Home » Verbatim » 2018 » Verbatim Wednesday 28th March, 2018

Verbatim Wednesday 28th March, 2018

NATIONAL ASSEMBLY OFSEYCHELLES

Wednesday 28th March, 2018

 The Assembly met at 9.04am

 National Anthem

 Moment of Reflection

 Mr Speaker in the Chair

 

MR SPEAKER

Bonzour tou Manm Onorab.  E bonzour tou manm piblik ki a lekout e ki pe swiv travay Lasanble Nasyonal.  Mon napa okenn kominikasyon pou mon fer bomaten nou ava al direkteman lo Order Paper.  E  nou ava kontinyen nou travay kot nou kite yer.  Nou annan premye Mosyon.  Mover se Onorab Clive Roucou, Manm pou Plaisance.  Mon ava demann Onorab Roucou pou prezant son Mosyon.  Onorab

 

HON CLIVE ROUCOU

Mersi Mr Speaker.  Bonzour Mr Speaker.  Bonzour tou bann Manm Onorab.

Mr Speaker mosyon i lir koumsa.  Vi ki Seselwa ozordi, i bezwen al aletranze pou swiv tretman spesyalize e vi ki i annan en sit anal-an Providence ki pour Gouvernman e kot en Lopital Spesyalize ti’n ganny planifye, sa Lasanble i demande ki Gouvernman i pran desizyon neseser, afen ki en partenaire apropriye, i ganny idantifye pou konstri en Lopital Spesyalize e ki Seselwa i ava ganny en meyer servis medikal isi Sesel, e an menm tan, ganny servi koman en sant pou promot medical tourism ki ava benefisye lekonomi Sesel.

Mr Speaker permisyon pou mwan koz lo Mosyon silvouple.

 

MR SPEAKER

Go ahead Onorab Roucou.

 

HON CLIVE ROUCOU

Mr Speaker pour konmanse, mon anvi pas en pti mesaz pou bann pasyan ki’n admit dan Lopital Victoria, bann pasyan ki malad dan lakour, bann ki pe swiv tretman aletranze e ki santi zot tousel.  Mon anvi dir zot kouraz e bondye i a beni zot.

Mr Speaker lasante en pep i keksoz pli enportan e pli valer pou nenport ki Gouvernman.  En pep ki an bonn sante set en pep ki kapab kontribye dan lekonomi son pei, e lekonomi a bouz devan avek en pep ki travay for.

Alor i enportan ki nou konman bann Leader politik nou fer sir ki tou le neseser an relasyon avek lasante i a dispozisyon nou pep.   Ki zot ava ganny en pli o standar servis lasante dan tou bann spesyalite posib.

Mr Speaker sa konman bann Leaders politik nou kapab fer li atraver bann Mosyon e bann kestyon parey sa enn ki la devan nou.

Nou osi kapab kit en lizye lo Minister Lasante pou fer sir ki son servis i ganny amelyore e ki lepep Seselwa i benefisye.

Mr Speaker nou lo sa kote latab, nou senserman krwar ki lepep Seselwa i devret ganny sa ki meyer an sa ki konsern son lasante.

Alor servis lasante avek en standar enternasyonal i merite isi Sesel.  E en servis lasante avek en nivo enternasyonal i ava osi en gran led pou Minister Lasante e bann pasyan ki bezwen tel servis.

Mr Speaker nou tou la anndan nou konnen ki mannyer Seselwa i met gran lenportans lo son lasante.  Nou vwar sa par lo lakantite pasyan ki parey pou peye pou al vizit en dokter prive.  Ou menm depans son pti kas ki’n anmase pou plizyer lannen pou li al aletranze pou tretman oubyen menm en 2enm lopinyon.

Mr Speaker en Lopital Spesyalize dan tou son splander i ava asire ki tou bann spesyalizasyon e ki tou bann fasilite neseser i ganny kouver anba en sel twa.  E sa i ava permet bann pasyan pou konplet zot tretman e konplet zot bann follow-up, ki apre okenn entervansyon medikal zot in ganny demande pou fer.

Mon dir sa akoz ki en kantite Seselwa ler in al tretman aletranze kot dokter spesyalis laba deor in demande pou zot re vini pou zot re kontiny zot investigation oubyen zot bann follow-up  me zot pa gannyen.  En tel fasilite Sesel i ava fasilit sa follow-up avek bann pasyan.

Mr Speaker en tel fasilite avek bann spesyalizasyon parey loperasyon lezo, loperasyon leker, loperasyon ki nou apel ENT, zorey, nennen avek lagorz;  loperasyon spinal cord ek bann nerf.

Mr Speaker loperasyon kanser e tretman anba sa twa, anba sa fasilite tousala i ava al ganny kouver.  Mr Speaker Mosyon i koz lo sit an montan Providance.  Sa sit ki ti’n deza ganny idantite pou en proze dan menm zanr.  Me ki pa’n materyalize.  I regretan ki sa pa’n materyalize.  Me ennler ou dir granmersi akoz kekfwa i ti kapab vin parey en lot STC Hypermarket.

Mr Speaker mon pa pou koz lo sa bout later pangar i ava ouver en lot poban lever.  Mon pou konsantre lo mon Mosyon.

Mr Speaker Mosyon pe demande pe demann Gouvernman pou pran en desizyon a fen ki en tel proze i ava vin an mars.  E en tel proze i a fasilit e soulaz en kantite Seselwa.  E mon garanti ki en tel proze i kapab ganny materyalize isi Sesel.

Mr Speaker en partenaire i bezwen ganny idantifye.  Wi Gouvernman li menm probableman i pa pou kapab fer sa li tousel oubyen i pa pou kapab fer sa ditou.  Nou bezwen en partenaire.  En partenaire ki pou asire e fer sir ki striktir e progranm i ava lo en nonm enternasyonal.  E pou tel fonksyonnman sa fasilite i ava fezab.

Mr Speaker dan mon resers ki mon’n fer i annan bann Lopital aletranze ki’n deza montre lanvi.  Me en kantite zot in deklinen.  In deklinen akoz sa bann menm fasilite kot Gouvernman i anvoy zot bann pasyan.  E zot benefis i enorm.  Alors zot pa vwar li valab pou zot envestir Sesel pou gran benefis.  Zot pli vomye kontinyen dakor pou nou bann pasyan mont kot zot.  Me mon asire okenn partenaire ki kapab envestir dan tel servis i pou rantab.  E i annan en gran benefis.

Mr Speaker en kantite lazan i ganny depanse par Minister pou anvoy bann pasyan tret aletranze.

Mr Speaker aprezan mon pou met en pe statistik lo lakantite pasyan ki’n al trete aletranze pou sa dernyen 4an.  E lakantite ki’n kout Gouvernman e bann kondisyon spesifik pou get komen ki bann pasyan i al trete avek.

Mr Speaker pou lannen 2014 nou annan, 186 pasyan. 2015  – 184,  2016 – 254,  2017- 254.  Lakantite ki’n depanse 2014 plis apepre R20milyon; 2015 apepre R29milyon.  2016  plis ki R30milyon.  E 2017 plis ki R36milyon.

Mr Speaker konklizyon ki mon’n tire, pandan sa 4an gradyelman e konsiderableman lakantite pasyan i ogmante.  E lakantite larzan i ogmante.

So ler mon kalkil pandan sa 4an plis ki 115 apepre R116milyon in ganny depanse.  Plizyer fakter in kapab kontribye pou en tel logmantasyon.

Par egzanp Seselwa pe konmans vin pli vye alors sa probabilite ki plis pasyan i al trete e la.  Stil lavi in sanze nou vwar en kantite ogmantasyon bann maladi non- kominikab.  Par egzanp bann maladi kardyovaskiler.  E maladi kardyovaskiler i lakantite i annan plis pasyan antour i annan 25 pasyan ki al ganny trete pou tel maladi.  Nou vwar ki lenpak sanzman dan stil lavi i annan lo bann maladi.

Mr Speaker annou pa bliy kanser.  Lakantite kanser in ogmante.  Lakantite form tretman in bezwen ogmante.  Alors nou vwar pasyan ki al aletranze pou chemotherapy oubyen radiotherapy.  Tousala i bann fakter ki kapab ki pe ede kontribye pou en logmantasyon dan lakantite pasyan ki pe ale.

Alors mazinen  115milyon ; 115milyon pandan 4an.  Mon konnen i en kantite larzan.  E parey mon’n dir mon pa pe vwar sa sif pe desann lannen apre lannen.  Mon asire ki 2018 probableman nou pou annan plis pasyan ki pou ale e sa pou kout Minister menm  plis.

Alors sa i lenportans sa i en fakter. Akoz Sesel nou bezwen sa Lopital Spesyalize.  Sa Lopital Spesyalize i kapab ganny met an mars.  I kapab ganny met an marls kot Gouvernman i a benefisye from sa 115mil  -sa R115milyon.

Par egzanp  ki kapab demande.  Kot nou pou ganny travayer pou met ladan?  Sa lenvestiser apre ki’n envestir tou son bann resours neseser in met an fonksyonnman sa pals rekritman i kapab i a ganny fer.

Me avan ou konmans lo rekritman la mon mazin nou bann frer avek ser Seselwa, ki’n travay Sesel ki ozordi ki ban spesyalis dan bann diferan pei.  La mon mazin mon bann koleg dokter ki menm mon’n  ganny sans travay ek zot.  Dokter Wong, Dokter Claude, Dokter Soleil, Dokter De Commarmond, pou nonm detrwa.  Mon bann koleg ners la mon mazin Curtis, mon mazin Harry, mon mazin Jude, mon mazin Samira, mon mazin Norma ki tousala ki bann ners ek dokter spesyalize dan bann pei aletranze.  Espesyalman L’Angleterre.

        Mr Speaker si nou ta sa bann laport, si nou tap sa bann laport nou bann frer ek ser Seselwa i ankor annan en leker pou Sesel.  Nou bezwen fer sa bon envestir – sa bon marketing ki nou ava kapab ganny zot.

Me parkont nou annan bann dokter etranze bann gran spesyalis ki zot osi nou kapab tap zot laport pou zot vin donn nou en koudmen.  Par egzanp en fason ki lo Zil Silhouette pe mars byen.  Sa i en legzanp kot en dokter spesyalize pe ganny kriye, son konze i ganny peye par egzanp pou 3 semenn.  Whereby in pare pou travay 2 semenn e i ganny en semenn konze peye refrène de tous.  Nou pou vwar si nou tap laport nou bann prop frer ek ser Seselwa nou met en zoli package pou zot vin Sesel e donn nou en koudmen dan en tel fasilite nou pou vwar ki osa i pava marse.

Mr Speaker ozordi Sesel nou bann pasyan i bezwen al aletranze parey nou tou nou konnen.  Mwan mon enn ki’n deza en pasyan al aletranze.  Mwan mon enn ki deza akonpanny pasyan al aletranze.  Mon dernyen pasyan mon rapel mon ti anmenn 2 pasyan dan L’Inde.  Napa keksoz pli fermal ki ler ou pe pas anba tretman epi ou napa enn manm lafanmir obor ou.

I kapab pli bon latizann i kapab pli o pou fason tretman.  Me sa rol lafanmir i enportan.  Ou pou santi ou tousel ler ou’n leve apre anesthésie kot ou pa vwar en pti lanmen pe tous ou.  Oubyen en pti mo rekonforte.

Alors en tel fasilite ler nou ganny etablir nou bann pasyan a kapab follow zot tretman Sesel.  Zot a kapab fer zot bann entervansyon medikal.  E sa ki pli enportan, se ler zot a leve apre tou zot entervansyon zot en manm lafanmir oubyen en pros i ava obor zot.

E sa i debout kle ki mon stress lo la rol lafanmir dan tretman.  E mon krwar en tel fasilite ler sa dimoun i a leve i a war son manm lafanmir i ava kontan.

Mr Speaker Mosyon li menm al en pe pli devan, kot i koz lenportans medical tourism.  En tel fasilite, en tel fasilite avek tou son standar enternasyonal avek tou son bann lekipman ek bann spesyalis i ava met Sesel lo map medical tourism.  Kot Sesel i ava pe frot zepol avek bann gran pei ki medical tourism pe kontribye en kantite dan zot lekonomi.

La mon mazin Singapore mon mazin Thailand, e mon mazin L’Inde.  Me par kont Sesel i annan en lavantaz en lavantaz enorm.  Vi ki nou en pei ki byen etablir avek nou lendistri touris e nou tou nou pa pou bezwen evante pou nou pa krwar ki Sesel li menm pli zoli ki tou le 3 sa pei menm dan son bann difikilte.  Etranze, tourizm pou pare pou envestir dan zot tretman isi lokal e menm ganny en bon konze.  A an relasyon avek zot tretman osi si i permet.

Mr Speaker en fasilite kelkonk parey ki mon’n dir avek en standar enternasyonal avek  enfrastriktir modern pli bon kalite tretman e lenstriman dyagnostik pli bon spesyalis e pli bon staff ki’n ganny train e pe practise sa bann kliyan – sa bann touris ki pe servi sa fasilite pou medical tourism pa pou regrete.

I pa pou regret en kantite lakoz en kantite sa bann touris sa bann etranze I mean ki aletranze ki pe esper zot ganny sans pou fer en tel loperasyon oubyen tel tretman kelkonk zot laliny espere i vreman long.

E si sa fasilite i ganny mete a dispozisyon Seselwa e etranze, en kantite pou vin ver nou.

Mr  Speaker medical tourism pe vreman zwe en kantite lenportans  dan sa bann lekonomi sa bann pei.

Zis pou L’Inde 2014 ziska 2018 sa sekter in ogmant plis ki 20poursan.  i en kontribisyon 7 a 8  bilyon Dolar i ganny estimen ziska lafen 18.  Zis mazinen 7 a 8 bilyon Dolar i ganny estimen a 2018 !  Si Sesel pou nou konmanse nou kapab menm ganny lanmwatye mon asire pou fer nou en gran benefis.

Mr Speaker menm L’Amerique pou en pasyan fer en heart bypass i kout apepre 140mil Dolar.  E menm loperasyon en heart bypass ki ganny fer dan L’Inde san okenn tire lo lafason ki pe ganny fer i kout apepre 7mil Dolar.  Me si nou menm Sesel nou zwe obor sa 7mil Dolar nou pou vwar ankor en benefis dan nou lekonomi.

Mr Speaker avek en tel pri redwir menm si nou anpes li apepre 50poursan, san ki  nou konpromi sa kalite swen nou ava vwar logmantasyon dan dimoun ki anvi vin servi nou servis.  E nou ava vwar ki kantite benefis pou kontribye dan nou lekonomi.

Mr Speaker pou konklir Sesel nou pou bezwen vin nou merite en tel fasilite.  Mon konnen ki Lopital Sesel i deza pe ofer apepre tret diferan spesyalite.  Sa i enkli bann ki mon’n nonmen.

Me i sagrinan dan tou sa bann spesyalite ki nou pe ofer zis anviron 80poursan sa bann spesyalis zis apepre 80poursan spesyalis i bann etranze.  Me par kont nou annan en kantite Seselwa ki spesyalize dan menm domenn.

Alor Minister Lasante pa pe fonksyonn lo son fullest parey nou pe dir.

E mon pa krwar ki nou kapab ariv lo sa oter ki en lopital annan tou bann spesyalis modern spesyalis kalifye avek bann striktir an plas pou li arive.

Alors en tel fasilite i pou annan en gran benefis pou Lopital Sesel ki lakantite larzan ki nou pe anvoy pou sa bann dimoun trete deor nou ava kit li isi Sesel lakantite larzan ki lafanmir pe depanse pou zot al trete i ava reste isi Sesel e tousala i ava tonm dan nou lekonomi.

Alor s mon pe demann mon bann koleg Lasanble pou siport sa Mosyon afen ki Sesel i a bouz devan e nou pasyan i ava zwaye.  Mersi Mr Speaker

 

MR SPEAKER

Mersi Onorab Roucou.  Okenn Manm ki segonn Mosyon.  Onorab Esparon.

 

HON REGINA ESPARON

Mersi Mr Speaker mon segonn Mosyon.  Mon kapab ganny laparol?

 

MR SPEAKER

Bon Mosyon i ganny segonde.  Ok alors si oule entervenir.  Yes go ahead Onorab Esparon.

 

HON REGINA ESPARON

Mersi Mr Speaker.  Anvi ki ozordi bokou dimoun i bezwen deplase.  Swa lo depan Gouvernman ouswa lo zot prop depans pou al rod tretman spesyalize aletranze akoz lopital Gouvernman napa lekipman apropriye e avanse.  Ouswa i annan de ka kot napa spesyalis kalifye dan serten domenn ki kapab diagnose pasyan pou kapab inisye tretman apropriye.

Bi sa Mosyon ki mon’n segonde se pou demann Gouvernman pou pran desizyon neseser a fe ki sa sait ti’n deza ganny planifye pou en Lopital Spesyalize anal-an Providance a ganny devlope.

An dot mo sa Mosyon pe demann Gouvernman pou rod en partner oubyen detrwa partner apropriye pou finans e devlop sa plan ki ti’n deza la e ti’n ganny demarke pou en Lopital.

Anfen ki dimoun ki bezwen tretman spesyalize a kapab ganny sa servis isi menm.  E zot pa ava deplase pou al aletranze pou ganny en tel servis.

Mr Speaker dan sa bann dernyen lannen in annan pa mal mouvman pa nou sitwayen e menm etranze ki pe vin Sesel pou al rod meyer tretman spesyalize aletranze.

Statistik 2016 i ganny anmase par zofisye Imigrasyon lo pwen depar i montre nou en pe sa mouvman.  E mon oule dir pou rezon lasante bokou dimoun i fer sa zefor e sakrifis pou al rod pli lwen sa tretman ki lopital Gouvernman pa pe kapab ofer isi.   I annan ki sey kot  klinik prive parey kot Dokter Multhy i annan ki al kot Eureka me sa bann landrwa pe ofer sa gran varyete e menm si parfwa zot diagnose sa pasyan ki kantmenm difisil pou bann ki bezwen tretman spesyalize.

Annefe dan bokou ka zot napa lekipman o nivo pou fer bann lezot entervansyon pli avanse.

Larealite se ki annan pasyan ki parfwa i dezespere.  E lezot ki  nepli krwar dan Sistenm Lasante.  Swa esper tro lontan pou ganny en solisyon.  Oubyen zot santi ki zot bezwen rod en 2enm lopinyon.

I annan ki vwar son lasante pi vin lo torti parey nou kontan dir e i mazinen ki annan landrwa kot i kapab  ganny tretman pli avanse e pli vit, alor in sey al pli lwen.

Mr Speaker si ou koz ek sa bann pasyan sa bann dimoun ki deplase plizyer zot, zot pou dir ou zot fatige monte desann Lopital e zot pa pe ganny en solisyon.

Lavi i annan en sel.  Alor i normal ki dimoun i konsernen avek zot lasante e pou sakenn protez son sa menm lavi ki i annan.

Nou bezwen osi aksepte ki pa tou dimoun ki ganny menm priyorite ler in ariv pou ganny tretman vitman.  Nou bezwen admet ki annan dimoun ki monte desann Lopital pou rod gerizon pi annan ki ganny anvoye demen tanto ziska ki letopsi i dir ki i gannyen.

Tandis ki annan ki pou zot i fast track e lezot i ganny ki t deryer.  I annan ki mal sanse e kantmenm dokter pa vwar zot gerizon, menm ki zot sey demande pou anvoy zot aletranze i pa ganny sa sans.  E pli tar lavi i sap li.

Parfwa nou dir kantmenm i ti pou mor akoz nou konnen ki nou tou nou pa pou reste pyer.  Me dan serten sans avek meyer entervansyon kekfwa ti ava anpes konplikasyon e prolonz lavi sa dimoun pli  long.

E lot kote sa ki kapab afford pa espere konmdi koze ler i vwar ki zot pe fer li vir an ron e lenfinite tro bokou i fer son prop demars.  I al rod lasante pli wen.  Me si ti annan sa fasilite isi dimoun ti a santi zot en pe pli soulaze.

Loter Mosyon Onorab Roucou in donn nou bann sif ki Minister Lasante in anvoy pasyan tretman aletranze pou sa 3 dernyen lannen.  2014 -186 ; 2015 -184  e 2016 – 254.

Mr Speaker les mon get sa bann statistik lo en lot dimansyon.  Annou get an 2016 tousel kot Minister Lasante li in anvoy 254 pasyan aletranze.

Me a realite se ki annan mil 453 dimoun ki’n kit pei pou al swiv tretman medikal aletranze.

E dan 1,453 ti annan 1, 305 Seselwa e 147 etranze.  Lanmen la ou vwar i annan 1,1 99 dimoun ki pa’n pas atraver Minister Lasante.

Sa bann sif i baze lo lenformasyon ki ganny ranmase par Imigrasyon lo Departure.  E nou osi konnen oubyen i evidan ki pa tou dimoun ki pe kit pei pou rezon medikal ki ler i ranpli son form Imigrasyon i deklare.

I annan ki dir ki al konze oubyen i annan ki profit sa konze aletranze pou fer tretman spesyalize.  Savedir sa sif 1,453 pou 2016 i kapab pli o.

E ozordi Mr Speaker i al rod lasante dan kat kwen lemonn.  Me selman i annan detrwa pei favori ki annan sa lyen prop ek Minister Lasante parey Maurice, Sri Lanka, L’Inde ek La Réunion parmi lezot ki ganny pli byen frekante parey Thailand, Singapore e Sud Afrique

E ozordi menm dimoun ki al lo sa tretman par li menm, i vwar li pe al dan bann pei akoz sa kontak.

Mr Speaker les mon donn detay enn de statistik ankor.  pou nou konpran vre nesesite e en tel fasilite ki pou benefisye nou pep annan-tye.

Lo kote bann pei L’Europe ki enkli La France, Italy, L’Allemagne i annan 94  dimoun ki in al rod tretman spesyalize laba.  63 Seselwa e 31 etranze ki pe viv Sesel.

Lo kote L’Afrique enkli Sud Afrique, Ghana ek Kenya in annan 280 Seselwa e 36 etranze.  E zis L’Afrique tousel in annan 54 Seselwa e 14 etranze ki pe viv Sesel ki’n al laba pou rezon medikal.

Lo kote L’Ocean Indien in annan ki enkli Maurice, Madagascar ek La Réunion.  Zis Maurice tousel in annan 188 Seselwa e 11 etranze ki pe viv Sesel ki’n fer en total 199.  E Maurice i en pei favori akoz i pa tonm pa tro lwen avek nou e apre i fasil pou dimoun etablir kontak.

Tan ka La Réunion i annan 26 Seselwa e 2 etranze in al laba an 2016.  Annou get lo kote L’Asie pei parey L’Inde, Singapore, Thailand, Malaysia e Sri Lanka.  957 Seselwa e 79 etranze.  E ler mon dir etranze savedir en dimoun ki son pwendepar pou li al rod tretman in sorti Sesel e i pa en Seselwa.

E la nou vwar ki pli bokou dimoun in al dan L’Inde 353 in al dan L’Inde.  353 dan L’Inde.  E lo kote Sri Lanka 515 dimoun.  Mon konnen ki Minister in etablir kontak e i annan Lagreman ek serten Lopital dan sa bann pei.

Mr Speaker fodre nou osi nou mazinen ki parfwa in menm annan dimoun ki bezwen tretman spesyalize ki pa kapab pran avyon.  Akoz zot ka i kritik.  E sa presyon kabin i annan en lefe direkteman    maladi oubyen kondisyon lasante e met zot dan plis risk.

Tandis si ti annan sa fasilite isi, ti pou pli fasil pou donn sa dimoun son lasante.  E osi en fasilite ti pou enn  ki ti pou asiste Minister Lasante dan swen pli avanse ki donnen.

I bon fer resorti ki sa bann dimoun pa neseserman ganny anvoye par Gouvernman.  I annan en bon poursantaz parey mon’n eksplike, parmi zot ki pey zot tretman zot menm.  Oubyen sponsor i ed zot.

Me si ti annan sa fasilite isi bokou sa bann dimoun ti a kapab fer zot tretman isi menm.  E avek en tel fasilite bokou plis dimoun ti pou servi sa fasilite e sa ti a retir presyon lo Bidze Gouvernman.

E nou ti pou vwar bokou plis dimoun pe envestir dan son lasante.

Mr Speaker mon krwar ki Minister Lasante osi i devret pe pouse pou ki en tel fasilite i ganny met an plas.  Akoz pou ed li redwir son depans lo kantite lazan ki i peye pou tiket avyon e lozman.

E son depans ti avize pis lo swen lo tretman.  Alor ler nou get rapor akoz ler nou get rapor preliminer 2017,   12poursan Bidze Lasante in al anver tretman spesyalize pou aletranze.

Lo kote dyaliz R80milyon e overseas treatment R43.2milyon.  E vwar baze lo bann sif ki Onorab Roucou in donn nou 19milyon 2014  19.8milyon 2014.  28.2milyon 2015 ;30.6milyon 2016.  E la dan sa rapor preliminer nou vwar 43milyon an 2017.

Pli ale Minister pe depans plis.  Alor avek en tel fasilite sa larzan pe reste dan lekonomi pei e ti menm koup lo deviz.

E pou bann fanmir ki enn zot dimoun i malad zot pa ti pou bezwen kas latet pou al rode kote pou ganny sa larzan pou zot pou pey zot pasaz pou akonpanny zot prop aletranze.

Akoz nou  konnen ki sa plasman i kout en kantite e i annan ki bezwen al pran menm loan pou zot deplase.

Me keksoz ti ava pli fasil e sa fasilite i a la a zot laporte.  E olye ki tou responsabilite i tonm en sel fanmir ki deplas ek sa pasyan, zot ti a kapab partaz sa responsabilite isi menm a en pri pli redwir.

Mr Speaker annou get en lot laspe.  Bokou pasyan pe sorti aletranze, dokter rekomande e rekomann zot pou retournen pou fer en follow-up oubyen en check-up. Sa ki annan mwayen i retournen e bann pasyan ki Gouvernman i anvoye i anvoy zot trete  pa toultan ki zot ganny fer retournen.  Akoz i kout Gouvernman i kout Minister Lasante tro bokou.   

E Minister i priyoritiz  bann e sa ki i santi li kapab fer retournen i ganny sans ale.

Me si sa tretman i pe ganny fer isi menm ti pou pli fasil fer sa follow-up kekfwa li menm li sa dimoun ti a kapab ofer pou li pey pou son check-up si Minister pa kapab peye.  Akoz i pa ti pou bezwen en tiket avyon.  I pa ti sipoze annan larzan pou lozman e depans ti pou pli minim e abordab.

Mr Speaker i annan envestiser ki’n met propozisyon ek Gouvernman pou devlop sa sit.  Mon konn omwen de.  Enn fek met son fek plas son proze lannen pase Septanm.  Me nanryen pa’n ganny fer e ni menm en larepons zot pa’n gannyen ziska prezan.

Dan sa prosesis, i enportan pou annan konsiltasyon pou konnen ki ban servis spesyalize ki Minister pe bezwen. E ladan ki domenn i annan plis demann.  Akoz ozordi mon konnen ki bokou  plis dimoun pe ganny anvoye dan L’Inde pou radiotheraphy dan ka kot i annan kanser.  En tel fasilite ti pou sirman benefisye nou.  Lezot pou fer radiogram parey bann pasyan ki annan problenm leker.  Mon konnen ki bokou i ganny anvoye lopital MIOT pou fer bann orthopedic surgery bann entervansyon lezo pli avanse.  Bann entervansyon pli avanse pou lizye.  Lithotripsy tretman pou retir pyer dan ronnyon ek sistenm laser.

Mon konnen ki Minister Lasante i annan sa fasilite isi.  Me pa toultan  ki sa lekipman i bon e bon kondisyon.

En dimoun i vwar zot  bezwen deplase pou al aletranze pou sa bann entervansyon ler isi i pa kapab.  Pou bann transplant bann bypass parey loter Mosyon in dir.

Mr Speaker pou terminen mon zis anvi dir ki ozordi lemon pe evolye. E bokou tretman pe ganny fer ek laser.  Dimoun ti a kapab swazir en gran koupe oubyen en pti pike pou ganny menm tretman e sa ki ti a kapab peye ti a peye.

En pep ki an bonn sante i en pep ki prodiktiv e kontribye dan lekonomi pei.  Alor mon enplor Gouvernman atraver sa Mosyon pou fer  li posib ki sa demars a materyalize e nou a get tretman pli avanse avek sa Mr Speaker mon pou donn sipor sa Mosyon.  Mersi bokou.

 

MR SPEAKER

Mersi Onorab Regina Esparon.  Onorab Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Bonzour tou dimoun  a lekout.

Mr Speaker Mosyon ki devan nou pe demann Gouvernman pou idantifye en partenaire pou fer en Lopital Spesyalize ki ava donn meyer servis premyerman Seselwa menm.  E dezyenmman i ava ankouraz en nouvo aktivite ekonomik sa ki nou apel medical tourism. 

        Mr Speaker avek en pti dyalog ki mon’n fer avek serten dokter,  i paret mwan ki sa lide bokou dokter i partaze.  Bokou dimoun dan seksyon medikal i vwar ki i annan en nesesite pou en lopital spesyalize.  ;

Me annou ge en pti pe al aryer sa zistwar Lopital Spesyalize. Nou konnen pou dir i annan en landrwa i sit an alan Providence ki an serten pti group dimoun ki ti’n servi zot lenfliyans dan Gouvernman Parti SPPF e zot lavantaz lo lezot dimoun ki ti’n demann en morso ater pou fer biznes pou zot pran sa later e fer en lopital lo la.

Finalman nou vwar Madanm Sarah Rene, Mr Ramados sa  bann non ki pou mont souvan ler nou koz lo sa bann zafer later.  Nou’n vwar pou dir zot, zot ti ‘n pran sa landrwa e zot pa’n kapab fer debout met en Lopital Spesyalize akoz vorasite in trangle zot.

Nouvobanq in repran sa landrwa.  E ozordi i paret en sit abandonnen.  Loter Mosyon pe demann Gouvernman pou repran sa landrwa vi ki  Nouvobanq  i en labank Gouvernman pou re negosye sa landrwa e rod en partenaire e fer en Lopital Spesyalize en nide ki serye.

Akoz Gouvernman le antre an partnership?  Premyerman mon krwar 5i annan en keksoz byen enportan ki nou bezwen ganny, kler.  Gouvernman i deza annan en Lopital Victoria.  Me sa ki Gouvernman i ti a voudre vwar, se ki i annan en standar lasante i ganny mentenir dan sa pei.

Alor pou li kapab fer sa i pa kapab les sa zis dan lanmen prive. I bezwen osi annan serten lenfliyans.  E pli enportan ankor i bezwen kree sa lyezon ant Lopital Victoria e sa lopital  ki i ava ganny konstri.

Petet serten dimoun, ti ava demande eski nou bezwen en Lopital Spesyalize par volim pasyan ki nou annan.

E mwan mon pou dir wi nou bezwen.  Akoz napa en pri ki nou kapab mete lo lasante en dimoun.  Napa en pri ki nou kapab mete lo lavi e dimoun.

Me menm sa nou vwar statistik i montre ki an depi ant 2014  ziska 2017 si nou total tou sa  bann kantite dimoun ki’n al ki’n ganny anvoye aletranze pou partou La Reunion, dan L’Inde, Singapore, Sri Lanka ensidswit pou al bann tretman spesyalize.  Nou vwar i tonm apepre 878.

Me parkont loter Mosyon e sa ki’n koz avan mon in fer resorti pou dir sa demann i bokou, bokou pli gran sa.  Akoz i bokou pli gran sa ?  Akoz Lopital i annan en fason triyaz.  Mon respekte tou bann travayer medikal.  Bann dokter zot fer li dapre zot konesans medikal.  Ki zot swazir sa ki priyorite pou anvoy aletranze.

Me selman parkont i annan  bokou dimoun ki ale monte desann pou al Lopital pa vwar en solisyon.  Sa dimoun ti a plifere osi  kapab ganny en landrwa pou zot kapab ganny en solisyon pou zot problenm.

Nou vwar ki i kout Minister Lasante plis ki R115milyon dab sa 4an.   Alors se pa ase zistifikasyon pou kapab met sa larzan si ou pe kontinyelman ogmante par lannen dan en Lopital Spesyalize?

Serten dimoun osi pou et fran, i ganny bokou led avek Minister Lasante.  E nou’n tande osi pou dir i annan osi bann pti zwe politik ladan.  Menm ki nou dir pou dir nou respekte the pwennvi medikal me selman nou konnen pou dir osi annan osi bann pti tirayman politik parmi – bann pti faver  ki’n ganny fer.

E la Mr Speaker mon mazin en dimoun dan mon distrik.  Madanm Cynthia Gonthier ki reste dan flat deryer Bon Valeur ti fer mon ekrir en let pou Minister Lasante pou demande i ganny konsider pou al fer en tretman aletranze.  Akoz i pe soufer ek menm sentonm ki son ser in ganny dekrir konman en keksoz erediter e son ser apre ki ti fer son loperasyon Sesel 3 mwan apre i ti mor.  So li pou li i annan sa langwas sa lenkyetid ki i pou pas parey i pou en lot viktim.

Me parey mon’n dir akoz  i annan sa bann triyaz ki priyorite i ganny fer i pa’n kapab ganny sans ale.  Alors si nou ti annan nou en fasilite koumsa isi Sesel, sa madanm sa pti larzan ki ti annan petet ki i pa ti arive pou li aletranze i ti pou kapab servi li dan fasilite isi lokal.  E menm ti a kout Sesel sa tretman isi Sesel ti ava kout li en pe pli bonmarse ki aletranze.

Mr Speaker nou’n tonm nom siport psikolozik par fanmir, ki form parti sa tretman e sa mon osi mon krwar i en fakter tre enportan.   Ler ou fanmir pros i obor ou pandan moman ou pli bezwen zot, se la ki ou tretman ou konvalesans i mars pli byen.

Mon krwar Mr Speaker en lide osi ki tre enportan in ganny avanse.  Se bann visiting specialist ; bann dimoun ki osi ler i vin lo en baz  volonter anler zot bezwen selman en pti vakans zot kapab vini ede e donn serten tretman. Me selman nou, nou bezwen tap laport nou bezwen ouver en striktir ki kapab permet sa bann keksoz arive.

Nou vwar poudir serten klinik Sesel par egzanp Dokter Multhy tanzantan ou tande en dermatologist in vini en lot spesyalis sepa enn ki’n vini.  I vin pou serten letan i fer serten travay apre i ale.

Me si nou  osi nou ti kapab tap lo sa bann resours koumsa ofer zot en pti vakans an menm tan demann zot pou zot kapab ede dan sa domenn koumsa.  Mon krwar i en pe parey model Liniversite Sesel i operate ennler ou vwar bann visiting professors, lecturers i vini in donn serten.  Me mon krwar sa, bann keksoz koumsa nou bezwen fer en striktir pou fasilit sa.

Me an tandis lo kote foreign exchange, nou toultan nou tann nou pe koz lo foreign exchange ki fason nou kapab ankouraz plis foreign exchange  pou plis devlopman dan pei

        Me si nou pe get lakantite dimoun ki depans larzan aletranze pou bann keksoz medikal ou vwar i en gran nonm.  E i kout en gran i en gro presyon pou ou foreign exchange.  I ede fer foreign exchange pli ser i ede pou ki nou lekonomi i perdi bokou foreign exchange.

        Mr Speaker bann tretman spesyalize ki bann dimoun aletranze i varye.  Nou’n tann cardiologist, dermatologist, ENT, kanser, ophthalmologist e lezot ankor.

Mr Speaker sa bann tretman parey mon’n dir si nou ti kapab met sa bann masin sa bann teknolozi isi Sesel ti ava fer isi.

Petet dimoun ti a kapab dir be Lopital Victoria i deza en lopital spesyalize.  Wi i en lopital spesyalize me i kouver avek 13 spesyalizasyon.

I annan bokou plis ki nou kapab fer Mr Speaker.  Ok bann masin ki nou bezwen parey radiotherapy PET-CT Scan ensidswit bann teknik angioplasty, tousala ou bezwen bann landrwa ki en pe pli gran e Lopital Victoria i kwense, napa plas ankor pou devlopman pou fer met sa bann keksoz.  Alor Gouvernman i napa en gran swa, me i bezwen konsider met en lot landrwa pou kapab met sa ban lekipman spesyalize.

Mr Speaker i annan osi en laspe progresyon dan karyer ki nou bezwen mazinen.  Dizon bann spesyalis isi, ennler nou vwar zot fristre zot dir ou zot in al aprann bokou keksoz apre sa ki zot in aprann zot napa fasilite pou met li pou met zot nivo konnesans an pratik.

E la par egzanp mon mazin Dokter Lespoir ki pe travay dan en gran lopital Germany.  So sa bann dimoun si ti annan fasilite isi zot ti a kapab vin isi e fer zot travay.  Dokter Lespoir i en oncologist tre kalifye pe travay bann top spesyalis laba !  I kapab vini isi i dir ou me selman napa fasilite pou permet li deblok son karyer.  So progre son karyer i enportan e tousala ti a reste e deblok nou medikal isi Sesel.

Mr Speaker bokou in ganny mansyonnen lo nou popilasyon lasante lo popilasyon.  Nou annan en pe ki pe egeir parey in dir bokou swen ou bezwen donnen dan geriatric.  E nou napa bokou fasilite pou sa.  Pli ou viv  pli lontan me ou annan risk bezwen plis lasante medikal.

Mr Speaker nou get osi mon oule profite koz en pti pe lo nou stil lavi ; petet i pou tonm en pti pe lo Mosyon ki Onorab Ghislain pou anmennen apre.

Me nou stil lavi osi nou bezwen sanz epou nou kapab  viv en pe pli an b  onn sante pou nou kapab, aret met presyon lo Lopital.  I annan en kantite keksoz ki nou bezwen fer oubyen avoid fer pou nou kapab viv en pe pli bonn sante e pou nou pa met sa gran kantite presyon lo Sistenm Lasante.

Mr Speaker sa i fer mon osi mazin en lot lide.  Lasirans medikal.  Mon’n deza koze lo sa size lasirans medikal.  Ozordi nou dan en leta oubyen nou dan en sityasyon politik oubyen en sityasyon pei kot deplizanpli Gouvernman i ganny presyon pou kas son Bidze pou kapab fer tou keksoz marse dan en pei avek limitasyon nou resours.

Alor eski i pou ankor ler pou nou entrodwir en lasirans lasante kot tou sa dimoun ki pe travay ozordi ki kapab kontribye en pti larzan ver zot lasirans lasante e ler zot a bezwen en servis medikal zot a kapab ganny sa lasirans pou kouver zot servis medikal.  E sa i enn i lava re enzekte sa larzan dan sa lopital spesyalize pou fer marse sa Lopital Spesyalize pou kouver son depans.

Mr Speaker medical tourism i en lot sekter ki nou bezwen tap lo la.  Nou en pei soley en pei ver en pei kot touris i vreman kontan i apel li en paradi.  Me si nou marye sa nide paradi avek en landrwa kot i annan en lopital spesyalize i tonm byen pou en kantite dimoun, ki ti a kontan vin fer son konvalesans dan en landrwa tropik, ok ?

Mr Speaker ler nou pe get kontribisyon towards GDP oubyen ki serten pei i gannyen lo medical tourism nou vwar poudir L’Inde i tonm li apepre 5.92poursan, Singapore 4poursan, Costa Rica 0.4poursan,  Jordan 0.8poursan Malaisie 3.5poursan.

Alor nou vwar pou dir sa sekter i kapab vin en pilye nou lekonomi si nou kapab travay dan sa direksyon.

Mr Speaker mon pou donn mon sipor total sa Mosyon akoz mon vwar pou dir en Mosyon ki annan en kantite merit ; en Mosyon ki nou tou nou devret vwar pou dir i anmenn benefis pou sa pei, pou anmenn benefis pou nou pep e pou tir bokou fardo finansyel lo nou pep ki i bezwen vwar li dan bann sityasyon ki i bezwen kas son saving oubyen pran loan pou li al rod son lasante aletranze.

Parey mon’n konmanse mon’n dir napa en pri pou lasante en dimoun.  E mon pou fini an diran napa en pri pou lasante en dimoun.  Mersi.

 

MR SPEAKER

Mersi Onorab John Hoareau.  Okenn lezot Manm ki oule entervenir lo sa Mosyon ?  Onorab Sandy Arissol.

 

HON SANDY ARISSOL

Mr Speaker bonzour, bonzour tou bann Manm.  Bonzour tou dimoun ki a lekout.

Mr Speaker Mosyon ozordi Mosyon i lo lasante anmennen par Onorab Roucou.  En spesyalis dan lasante.  En Mosyon pe demann Gouvernman en landrwa spesyalize pou nou kapab fer bann serten tretman spesyalize.

Letan nou koz lo lasante mon krwar dan tou distrik ozordi letan nou pe koz lo lasante nou tou dan nou distrik nou konn en dimoun en fason ou en lot in al fer serten tretman aletranze oubyen en dimoun ki pe viv avek serten maladi.  Apre serten aletranze oubyen bann ki pa’n ganny sans pou zot al fer serten tretman aletranze.

Me an menm tan osi letan nou pe mazin nou pe koz lo lasante mon krwar i enportan pou nou mazin nou fasilite lasante ki nou annan ozordi.  Kot nou annan nou, nou annan nou bann profesyonnel ki travay Sesel nou bann frer ek ser Seselwa zot donn tou sa ki zot kapab avek en pti gin mwayen resours ki zot annan.  E sa servis zot donn nou parfwa nou menm nou, nou koz lo la.

Mr Speaker me selman i enportan pou nou pa bliye pou dir servis lasante Sesel i annan sa kotasyon kot dimoun i ganny dout kot dimoun napa konfyans parske souvandfwa letan ou koz ek en Seselwa i dir ek ou ti a byen si ou ti al rod en 2enm lopinyon mon frer.  Parske Sesel parey dimoun i dir ek nou, nou masin zanmen i konnen egzakteman ki ou gannyen.

Me ler ou al aletranze ki laba ki dir ek ou be mon frer ou ti ganny sa.  Me Sesel pa’n dir mon mon’n ganny sa parske Sesel nou masin pa marse nou.  I anvoy nou ankor 6 mwan i anvoy ou mwan prosen dokter pa la, oubyen sa randevou ki ou’n gannyen ou pa kapab vin lo la parske i annan en pti problenm be nou ava call ou letan nou’n pare.  Me by the time ou’n call sa dimoun letan ou’n pare swa son fanmir pe fer en pti demars pou sey anter li oubyen son fanmir in koste en pti larzan ansanm pou sey anmenn li aletranze.

Se pou sa rezon mon pe dir Mr Speaker avek tou bann fasilite ki nou annan.  Me nou sistenm lasante ki nou annan ozordi i fer ki nou Seselwa  i annan en dout.  Se pou sa rezon toultan nou Seselwa i sey al rod en 2enm lopinyon pli zou -mwen zot fer sa aletranze me i annan ki kontan zot fer li isi menm.

Alors se pou kwa mwan mon pou sipor sa Mosyon parske sa Mosyon pe demande ki nou annan en lot fasilite Mr Speaker. En pe pli teknik en pe pli modern pou ki sa a fer ki a dekouraz nou Seselwa pou li al aletranze me pou li isi menm.

I annan en bout teren ki mon’n tann koz lo la i annan en landrwa si mon pa tronpe kot mon’n tann Onorab John in koz lo la an relasyon avek kot ti pou fer en tel fasilite.

Me apre pa’n ariv nanryen.      Me akoz en tel fasilite me apre pa’n ariv naryen.  Me akoz en tel fasilite ki sitan enportan pou sa Seselwa ?  Par egzanp pou sa dimoun ki reste anler Saint Louis akoz sa en tel fasilite pou enportan Mr Speaker.

Premyerman ler ou annan en tel fasilite dan ou pei  koumsa ki spesyalize sa i pou fer ki k ou sa dimoun i redwir.  Akoz kou?  Par egzanp letan en manman in ganny dir pou dir son zanfan pou bezwen al Chennai par egzanp ou vwar sa manman ki sa i vin en kou an plis pou li.  Parske premyerman i annan bann pei aletranze kot ou bezwen pey en Visa alor sa manman li i  konmans tou sa bann pti laport pou li sey ganny lasistans pou li ganny en Visa pou li parske son zanfan pe ale napa en paran ki kontan son zanfan ki aletranze e pe swiv en tretman ki son pa la obor li, pou donn sa sipor.  Alor sa i fer ki si nou annan en tel fasilite nou pa bezwen premyerman bezwen annan en Visa me sa fasilite, alor i fasil pou sa manman pou sa paran nenport ki manm lafanmir swiv son fanmir ki dan sa fasilit.

Dezyenmman mon rapel letan mon frer Sylvain Arissol ti mor 2011, apre ki i ti’n swiv en tretman aletranze sa ti Chennai mon rapel ki pou dir en keksoz ki mon’n toultan ki dan mon lespri ki parfwa plizyer Seselwa pa konnen,  letan Gouvernman Minister Lasante i anvoy ou tretman aletranze, zot responsab ou laba me letan in ariv en keksoz ek ou laba Minister Lasante i larg son lanmen.  Letan ou’n mor Chennai par egzanp  Minister in fini son bout avek ou.

Prezan sa fanmir i vwar zot dan diferan sirkonstans parske zot bezwen fer tournen lekor enn zot menm fanmir isi Sesel pou fer lezot neseser avek.

Me sa i a fer pou ki ozordi Sesel nou annan nou en fasilite pare bokou pe demande.  Premyerman i tir en kou finansyerman lo en fanmir parske si zanmen dan tretman dan tretman i parey sport i annan gannyen avek perdi.  Kot parfwa nou lager ek serten maladi nou rekipere me parfwa nou lager ek serten maladi me nou pa sorti venker sa i a fer si nou annan tretman fasilite koumsa a sa nouvo dan nou pei i ariv en lanmor sa fanmir napa gran depans pou fer pou pey avyon oubyen en transpor pou rekiper son lekor byen in deza lanmenm la.  Bann fasilite ki la a  dispozisyon en pe pli pre sa i fer ki kou i redwir Mr Speaker pou sa dimoun isi Sesel.

Trwazyenmman letan mon’n koz lo sipor moral, sipor lafeksyon, letan ou dan en Lopital lamazorite letan se la granmoun i dir avek ou ki ou konnen lekel ki byen avek ou.  Parske la ou zanmi travay i vin rann ou en vizit ou annan bann lezot manm ki ou apel zot ou fanmir swa sa mon kouzin, sa mon tantin sa nou papye?

Be letan ou lopital in ariv dou en maler eski ou vwar sa tantin sa kouzin sa tonton ki lo papye oubyen sa frer sa ser ki apel ou frer ek ou ser. Se la kot ou konnen bann dimoun.        Alors sipor moral i enportan me letan ou annan en fasilite sitan pre ki dan lakominote isi menm la i ava annan i ava enportan pou ganny sipor moral.  E letan mon pe koz sipor Mr Speaker mon pe mazin en keksoz ki fer mon riye.

Parfwa nou konman Seselwa i annan sa Nasyon ki apel Indien la kot nou tret zot konman bann malbar nou apel zot malbar.  Nou, nou kapab pa kontan zot ki mannyer nou anvi.  Me parfwa letan nou pe koz sipor ler nou sorti Sesel nou al Chennai parfwa letan nou ouver nou lizye apre sa gran loperasyon la.  Nou vwar sanmenm sa malbar pe pas lanmen nou fron oubyen pe donn nou en ver delo pou soulaz nou lagorz ki’n sek pandan sa peryod letan.

Mon krwar i enportan pou nou osi letan nou pe koz sipor mazin tousala.  Parfwa letan nou malad nou, nou Seselwa Sesel pa kapab take care avek nou.  Premye landrwa ki i mazinen zis anvoy ou dan sa pei malbar laba kot nou pa tro, tro kontan zot nou mal.  Malkoz zot nou apel zot malbar i annan nou fason dir parkont nou bezwen zot.

Se parske sanmenm sa group malbar ki nou koz kont lo la Seselwa bann endividi nou kontan koz kont lo zot me parfwa se zot ki sov nou lavi.  Se zot ki pran byen ka avek nou.  E zis parey ozordi dan nou bann klinik nou annan nou bann endyen ki bann dokter.

Alor mon pe dir Mr Speaker letan pou konman bann Seselwa endividi nou pa kontan sa pti group dimoun ki nou tret zot konman malbar.  Me parfwa letan nou ouver  nou lizye aletranze dan zot pei se zot ki nou vwar.

Alor Mr Speaker me letan mon lo sa pwen mon pe dir pou dir alor sipor moral i enportan.  Me letan nou annan en tel fasilite dan nou pei menm, sa i a fer ki bann spesyalis ki ava la enkli nou fanmir i ava donn nou sa sipor ki nou pe rode.

Katriyenm pwen an relasyon avek sa fasilite akoz i pou enportan akoz i pou bon pou nou?  Ozordi Seselwa ki al aletranze par egzanp letan ler mon fek fini koz ek en madanm ki son papa sorti Sri Lanka, i annan sa bout ki apel check-up ou bezwen retournen apre 6 mwan oubyen apre 3 mwan pou ou vin swiv ou check-up.  Be eski konbyen Seselwa ki letan in fer en pti saving in al Sri Lanka swa in al Chennai swa in al Singapore lezot landrwa in fer en pti savings pou son fanmir.  Apre i annan sa lot bout check-up pou li fer?

Eski mazorite nou Seselwa zot annan sa finansman neseser pou zot retournen apre 6 mwan retournen apre 1an Mr Speaker.  Me avek en tel fasilite ki Onorab Roucou pe demande mon krwar i a fer ki sa Seselwa i ava en pti pe pli eze.  Parske fasilite pou lanmenm la obor li i pou pli fasil pou li swiv son tretman pou li ganny son randevou pou li fer en lot keksoz.

E letan mon fini avek sa premye pwen Mr Speaker mon ti a kontan antre lo en 2enm an relasyon avek en tel fasilite en tel fasilite dan nou pei i pou osi fer mon krwar ki nou bann profesyonnel ki mon’n tann Onorab Roucou koz lo la pe travay aletranze.  Letan i pou konnen pou dir Sesel i annan en tel fasilite modern ki egziste dan nou pei, sa i pou fer i pou ankouraz li pou li retournen.  Pou li dir be get sa mon’n travay tan letan Australie, L’Amerique, L’Angleterre be Sesel la deza mon osi mon laz pe monte i annan sa fasilite dan nou pei, alor mon ti a preferab retourn dan mon pei e al donn en koudmen parske fasilite laba in avanse e modern e alors sa i pou ankouraz nou bann profesyonnel pou zot retourn dan nou pei pou nou kapab pou zot kapab donn ou en pti koudmen ki nou pe fer.

Me avek en el fasilite kekfwa i ava osi ankouraz bann oncologist i annan plizyer bann Seselwa letan nou koz avek bann fanmir in mor rezon kanser.  Ozordi kanser pe fer en ravaz dan nou c pti pei.  E mon rapel byen Mr Speaker ti annan en pe lannen pase letan Lasosyasyon Cancer Concern ti organiz bann kozri mon rapel ti annan en spesyalis en dokter nou apel li ki ti sorti Chennai ti vin Sesel zot ti donn en kozri kot Exile Club. 

En keksoz ki ti fer resorti ki mon mazin byen Sesel zot ti koz lo nou pti popilasyon.  Zot ti dir ek nou Sesel ozordi nou enn bann pei ki konsonm bokou lagres zannimo.  Nou sa pti pei la 90mil nou ki nou annan.

Me letan mon asize mon reflesir lo la, se ki ou vwar letan nou koz lo lagres zannimo.  Ozordi nou annan sa fame bwat luncheon meat ki nou kontan manze konman fast food pou nou donn nou zanfan.  Me letan nou ouver li nou vwar premye keksoz ki flote lo la.

Nou annan sa bwat bef ki nou koz lo la, bann manze vitman ki nou kontan donn nou zanfan.  Letan mon fer rezon lo la i annan sa fame graton ki en kiltir dan nou pei.  Graton me graton e ki i fer Mr Speaker graton?

Se egzakteman letan ou asize ou fer tou sa bann rezonnman i retourn ankor lo sa dokter ti pe dir.  E tousala i anmenn mwan lo mon pwen final se ledikasyon anver nou pep letan nou pe koz lo en tel Mosyon.  Zis parey mon’n tann Onorab Hoareau koz lo la.  Ozordi nou konman en Lasanble letan nou pe koz lo Sistenm Lasante, amelyor Sistenm Lasante anmenn plis spesyalis anmenn plis fasilite modern mon krwar i enportan pou nou osi edik nou pep e pou nou pep vin en pe pli edike an sa ki konsern ledikasyon.

Kwa ki nou konsonmen konman en dimoun?  Kwa ki nou ki nou kontinyen met dan nou labous eski pa i enportan pou nou konman en Nasyon pou nou retourn lo la balanse.

Lontan letan nou koz lasante toultan letan nou ti ankor zanfan nou tou nou annan en zimaz dan nou lespri kot nou ti leve 4er bomaten granmoun ti donn ou ti piz nou par egzanp nou apel sa.  Pize, eski ozordi ti annan kendrik tou kalite delwil koko tou bann ki en pe pli aze nou rapel.  Me wi i annan dimoun ti bwi lagrenn papay – tousala.

E sa in fer ki ozordi nou annan nou bann zonm ek bann fanm Seselwa ki for ki travay.  Me eski nou konman paran nou pe enkilke sa dan lavi nou zanfan.  Kot i a pran en pe letan parey transpor.  Transpor nou bezwen fer servis.  Me eski nou konman zonm, fanm imen nou fer servi?  Eski nou reget en kou lekor an sa ki konsern sa ki nou konsonmen e sa ki nou pe pran parske sa i annan en lefe direk lo nou lasante.

E mon asire i ava annan lezot Manm ki ava koz lo  lezot keksoz me selman Mr Speaker mon konman en perd fanmir konman en Manm elekte dan mon distrik e letan ou koz lo lasante parey mon’n dir lo konmansman i annan plizyer dimoun me avek en tel fasilite mon krwar i pou fer ki i pou fer ki bann Seselwa bann Seselwa ki anmas son pti larzan parey granmoun i dir ranmas larzan parfwa pou fer vantar.  Be nou kit en pti larzan de kote pou lasante.

Sa i a fer ki avek en tel fasilite ;  avek en tel fasilite i ava fer ki nou bann Seselwa zot ava santi zot en pti pe pli annan konfyans.   I ava en pti pe pli pre pou zot e sa i ava fer ki i ava annan bann lezot ledikasyon ki a vin avek pou ki bann Seselwa zot ava annan konfyans dan en Sistenm Lasante dan en fasilite e sa i ava fer ki nou osi konman en pep nou ava viv nou ava viv an bonn sante e nou ava viv lontan parey nou ganny dir.

Alors Mr Speaker mwan mon pou donn Onorab Roucou full sipor pou en tel Mosyon.  Parske mon santi ozordi kot nou’n arive 2018 i pou enportan pou en pti pei parey nou annan en tel fasilite parske sa i pou bon pou mon osi ki pe koze.  Parske ozordi nou byen nou pa konn demen ki i arive avek ou e osi pou lezot nou bann dimoun ki pe ekoute.

Alors Mr Speaker pou lemoman mon ava aret la pou sa Mosyon mon a zis dir mon ti a kontan demann tou lezot Manm osi pou koz an faver sa Mosyon e donn bann pwennvi bann keksoz ki nou kapab amelyore.

E mon ti a kontan Mr Speaker pou dir ki mon a fini lo sa nou pou ki i enportan ki Minister Lasante nou revwar osi en pe bann fasilite ki egziste ki nou annan ozordi.

Nou annan bann senp keksoz ki nou kapab ki nou kapab fer pou amelyor fasilite oubyen Lasante sa dimoun ki dan nou distrik.  Par egzanp letan mon  donn en legzanp letan ou annan en msye ki pa vwar kler par egzanp i ganny deplase dan son distrik pou sorti Bel Ombre pou li al Mont Fleuri senpleman parfwa zis pou al get al teste disan oubyen pou al fer lezot keksoz.

Mon krwar i annan sa vizit ki nou bezwen dan bann distrik sirtou kot i annan bann dimoun aze, bann dimoun ki pa vwar kler, bann dimoun ki bedridden i enportan kot Minister Lasante zot kontinyen donn bann swen nou bann dimoun aze.

Me nou ki ankor en pe pli zenn nou, nou kapab bouze.  Alor  mon pe zis fini lo sa Mr Speaker pou Minister Lasante gete son bann fasilite ki zot annan annegzistans.

Alor Onorab Roucou mon pou donn ou mon full sipor e mon swete ki Gouvernman atraver en tel Mosyon enportan serye zot ava konsider s about teren ki nou’n tann koz lo la.  E avek bann pei zanmi ki nou annan zot ava donn nou en sipor pou nou kapab etablir en tel proze.  Mersi bokou Mr Speaker.

 

MR SPEAKER

Mersi Onorab Sandy Arissol.  Okenn lezot Manm ki oule entervenir lo Mosyon?  Mon napa personn lo mon lalis.  Onorab Clifford Andre.

 

HON CLIFFORD ANDRE

Mersi Mr Speaker.  Bonzour tou Manm Onorab.  Bonzour tou dimoun a lekout.  Mr Speaker Mosyon i enn ki reel e aktiv akoz dan Konstitisyon Lartik 29 (1) (e) i spesifikman fer provizyon pou nou kapab annan serten fasilite.  Permet mon Mr Speaker pou mon pas lo la.

29  (1) i dir, ‘the state recognizes sa i right to health care, the state recognizes the right of every citizen to protection of health, and to the enjoyment of attainable standards of physical and mental health and with a view to ensuring the effective exercise of this right the state undertakes…’ mon pa pou lir tou lezot me mon pou al lo  (e) ki mon’n dir ‘to allow subject to subs supervision and conditions as are necessary in a democratic society for the establishment of private medical service. ‘

        Mr Speaker sa i vedir ki Gouvernman, Gouvernman Sesel anba Konstitisyon i annan en lobligasyon pou li fasilit bann klinik prive.  So i en lobligasyon Konstitisyonnel ki’n ganny mete dan nou Konstitisyon pou fer sa anba sa provizyon.

Mr Speaker sa i vin neseser, akoz konmela letan en dimoun i al kot general practitioner e i ganny refer avek spesyalis parfwa i pran bokou letan.  Nou pa kapab dir sa i akoz i volonter me selman i akoz sityasyon ki mannyer i ete i annan zis en spesyalis ki bezwen vwar en kantite dimoun.  Alors vreman lalis i vin long.

Me avek letablisman en lopital spesyalize isi Sesel parey ti annan plan pou fer lannen pase i pou fer ki sa bann spesyalis pou vin pli regilye oubyen si en dimoun i ganny sa apwentman kot Lopital Victoria i santi ki li i krwar son maladi i merit vwar sa spesyalis pli vit e i annan en pti larzan parey Onorab Arissol in dir i a fer ki li i al kot sa klinik prive e vwar sa spesyalis e ganny en rezilta oubyen en diagnosis of son maladi ki i fer i kapab ganny tretman en pe pli vit.

Mr Speaker nou bezwen reel e realistik isi Sesel.  Parfwa letan nou dekouver en maladi i tro tar menm pou nou donn sa dimoun serten tretman.

Mon dir sa akoz parfwa i annan pasyan ki i ganny problenm leker.  E i vwar dokter tou le 3 mwan.  Son leker i ganny teste chest x-ray i ganny fer.

Me selman zot pa vwar lezot keksoz apard ki zis zot pe tyek leker.  Mon krwar i enportan ki nou osi elarzi letan nou ti pe fer en pti chest x-ray mon pa dokter.  Mon ti a swete enn lannen pase me mon krwar i enportan ki nou vwar en pti pe konmela sa konplent ki sa dimoun i donnen pou kapab idantifye serten lezot keksoz.

Mon dir sa akoz parey Onorab Arissol mon’n fer sa leksperyans personnelman avek papa.  Kot i ti pe tret pou kondisyon leker i ti ale i ti fer son bann pti chest x-ray  son bann tretman son bann tes ki neseser me apre 25 zour avan i ti kit nou malerezman i ti ganny diagnose avek kanser poumon.  Mon mazinen letan mwan mon’n sey pou mon get to terms parey Anglais i dir avek sa.  Mon’n sey fer sa analiz ki leker pa tro lwen avek poumon annefe i ant nou de poumon.

Me selman parey mon dir nou toultan annan bann sityasyon kot nou pe get pli devan pou bann ki vin apre pou zot kapab ganny sa servis ki pli efikas.

Me selman letan nou pe koz lo sa nou bezwen realistik osi pou dir ki pou nou dir ki annou get en kou servis lopital aktyel.  Nou vwar ki  dan Lopital ozordi i annan 2 lift.  Me selman enn pa pe marse.

Prezan pasyan k i pe al fer loperasyon i pe servi menm lift e si i ariv en keksoz avek sa ki mannyer sa bann ners oubyen porter oubyen lekel ki ti pou sipoze retourn avek zot lo ward i pou fer i pou anmenn zot dan lanmen zot pou bezwen al fer letour dan wheelchair konmsi i annan en bon pe sityasyon mon krwar ki nou kapab gete la e ki osi rezondet par deryer akoz ki nou bezwen annan serten lot Lopital Spesyalize.

I osi en fe ozordi kot i annan tro bokou dimoun ki ganny admet lo en Ward.  Nou’n vwar dan mwan personnelman mon annan leksperyans nou’n vwar dan Hermitte Ward dan tou son be i annan dimoun me dan koulwar osi i annan dimoun ki pe espere pou ganny admit.  Sa i fer ki si nou ti annan en lot fasilite kekfwa serten dimoun ti a kapab deplase e al kot sa bann fasilite pou li kapab ganny sa servis si i annan sa mwayen pou li peye pou sa servis.

E i osi enportan pou nou kapab annan bann follow-up lo bann pasyan ki’n fer bann loperasyon, bann tretman ki i ava ed zot ek bann soufrans ki zot kontinyelman gannyen.

Mr Speaker bomaten letan sa Mosyon in konmans prezante, en garson in anvoy mon en mesaz in dir mon i annan en dimoun ki li i ti konnen sorti L’Angleterre ki ti en ners ki ti’n retourn Sesel e i ti vini i ti apros Minister Lasante pou li gete si i napa en posibilite en travay avek Minister Lasante pou li anmenn sa konesans ki’n akimile L’Angleterre  e sa 2an pas.  E i ti ganny dir poudir napa travay.

I malere ki nou, nou pe gete ozordi nou vwar bann dimoun etranze ki pe travay dan nou lopital parfwa i annan baryer kominikasyon. Zot la pou deservi nou zot lanvi se pou deservi me selman sa baryer kominikasyon i fer ki parler ki kekfwa sa lesplikasyon ki pe ganny, donnen par sa pasyan pa vreman ganny konpran par sa dimoun ki sipoze pe asiste li medically.

        Prezan letan nou ava annan en lopital spesyalize i ava osi posibleman annan son bann dimoun ki pou fer sa bann enterpretasyon si i neseser pou fer sir ki sa dimoun li i ganny sa bon tretman ki neseser.

Mr Speaker nou’n koz  -Onorab Arissol – in koz osi kanser mon mazinen bann ki’n koz avan mon in kapab koz lo sa maladi ki pe ravaz nou sosyete ozordi.

I annan bokou bann lentere enternasyonalman ki mwan mon personnelman mon konnen e mon konnen zot in ganny en serten rankont avek Vis-Prezidan Larepiblik.  E dokter kot lopital pou eksplor posibilite epou vwar bann resers dan konteks kanser pou gete si i kapab ganny aplike isi Sesel.

E mwan mon ti ava dir avek Lotorite konsernen pou pran sa konman en priyorite pou vwar e get ladan pou ki i ava kapab annan en amelyorasyon akoz mwan mon ganny sans pou vwar en pti git rezilta ki sa resers in fer e dan kondisyon ki sa dimoun ti avan i ti’n ganny deklare pou ganny konmsi i reste vivan dan de semenn e sa sityasyon in sanze e 8 mwan apre sa dimoun i ankor vivan.

Alors mon mazinen ki Lotorite fodre get dan sa sityasyon en pe pli pros.  Kekfwa i ava ed nou dan bann konteks sa sant medikal servis medikal ki Onorab Roucou  pe demande ki kapab ganny servi pou administre dan sa bann latizann.

Mr Speaker i osi enportan pou nou kapab gete nou’n koz bokou lo pri lavi e kou bann prodwir ki dimoun i kapab dir pe fer en healthy living i osi en eleman mon krwar i kapab ganny anvlope dan sa Mosyon ki fer, nou konsonmen parey in ganny dir sa ki’n konsonmen e mon krwar Prezidan i annan de laspe ki li i konsider letan i ti al Praslin sey konsonmasyon avek legzersis alors pri sa konsonmasyon ‘healthy’ mon krwar i osi enportan pou nou kapab gete pou kapab donn nou dimoun en bon sistenm lasante oubyen zot health i ava vin pli bon.

Mr speaker avek sa de mo,  mon oule re asir Onorab Roucou ki son Mosyon i enn ki Seselwa i anvi vwar i enn ki pou benefisye Sesel; I enn ki pou permet Gouvernman parey ou’n dir desarz son responsabilite Konstitisyonnel.

Alors mon pou donn ou 100poursan sipor e zabitan Anse Aux Pins i  pou siport ou la size.  Mersi.

 

MR SPEAKER

Mersi Onorab Andre.  Bon nou ava pran en break nou ava retournen 11er e 11er si napa personn ki entervenir nou ava demann mover Mosyon, pou li close son Mosyon.

 

HON WAVEL RAMKALAWAN

Bon Mr Speaker, si pou ou demande lekel ki anvi koze nou ava lev nou lanmen ki ava kapab balanse e…

 

MR SPEAKER

Mon’n demande avan a 3 repriz mon demande ankor ler nou repran 11er.

 

HON WAVEL RAMKALAWAN

Annou fer li la akoz ou pa le fer li la.

 

MR SPEAKER

Ok nou ava fer li 11er.  Ok bon nou ava pran en Break nou ava retournen 11er.

 

(BREAK)

 

MR SPEAKER

Bon mon prezant en leskiz pour sa pti retar, mon ti annan Lanbasader Portugal ki ti’n, ki mon ti pe rankontre, nou ava kontinyen nou travay e petet mon ava demann bann Manm ki pare pour entervenir pour lev zot lanmen pour mwan kapab note oubyen si nou ava kontinyen parey nou ti pe al bomaten mon’n deza annan detrwa Manm pe lev lanmen, ok nou ava kontinyen parey, Onorab Simon Gill.

 

HON SIMON GILL

Mersi Mr Speaker, bonzour tou Koleg Onorab, manm piblik ki pe swiv nou deba dan Lasanble, Mr Speaker Mosyon anmennen par Onorab Roucou i en Mosyon ki mon konsider li annan serten relevans me mon santi kantmenm ki ti ava byen, i t ava swetab ki nou Lasanble i konsider fer la baz sa Mosyon en pe pli larz; tout an tenir kont ki dan son dernyen Diskour dan Lasanble Nasyonal, Diskour Leta Lanasyon Prezidan ti lans si mon a kapab servi sa term “en defi isi dan nou Lasanble’ e sa defi an bref sete demann nou Lasanble Nasyonal pour komans en deba oubyen konsider pour komans en deba lo soustenabilite nou sistenm e servis lasante parey i ete ozordi.

 

E mon rapel Mr Speaker dan mon lentervansyon an repons Leta Lanasyon mon ti dir annou fer tou deba posib lo size lasante me mon pa ti a voudre zanmen ki en zour dan nou servis lasante dan nou Lopital en pasyan masin i ganny tennyen lo li zis akoz son fanmir e li, li menm i napa larzan pour pey sa servis lasante.  I pour en zour regretab si zanmen nou ariv dan en sityasyon parey.

Bokou nou, nou koz lo servis o standar dan plizyer pei me tre pe konsiderasyon i ganny donnen avek de milye bann zonm fanm dan plizyer pei apel zot lekor bann pei devlope, bann pei model de milye zot sitwayen pe trimouse pour zot kapab ganny akse avek bann servis spesyalize zisteman akoz zot napa larzan, zot Fon i limite, bann kouvertir Lasirans ki dan plizyer pei i donnen pour kouver servis lasante i annan en kantite limitasyon.

Mon pa bezwen donn en lektir lo okenn sa bann size me nou kontan fer referans parfwa avek Lanmerik ki enn bann pwisans Ekonomik Militer e nou tou nou’n swiv bann demars ki Prezidan, Ex- Prezidan Lanmerik, Prezidan Obama ti fer avek sa fame Obama Care kot son lobzeksyon fondamantal sete pour kouver plis ki 30 milyon fanmir Ameriken ki pa ti annan en bon kouvertir lasante e ki ti pe struggle pour zot kapab arive pey zot bann bill e menm parfwa pa arive pey ditou.

Sa i enn bann pei model, i enn bann pei ki nou konsider tre Demokratik i ki parfwa nou pran lektir avek. E sa Mr Speaker i anmenn dan nou prop listwar, dan listwar nou servis lasante isi Sesel dan bann lannen ’60, ’70 kot si nou rantre dan sa parkour nou listwar e devlopman nou servis lasante i annan bann moman tre tris ki’n arive Mr Speaker.

E ozordi mon napa lentansyon pour mon al sit sa bann moman tris akoz de santenn bann fanmir Seselwa ki i annan laz parey mwan e ki i annan laz parey bokou nou isi dan sa Lasanble in viv sa bann moman tris dan zot parkour pour ganny akse avek servis lasante, me nou tou nou konnen ki dan bann lafen lannen ’70, ’80 ziska ozordi ki zefor Gouvernman in fer pour anmenn en servis lasante pli pre avek nou popilasyon, pli pre avek bann fanmir.

Me byensir sa parkour in antrenn en kantite defi e sa defi in anmenn nou ziska ozordi nou ankor pe fer fas avek bann defi serye dan nou Sistenm Servis lasante, defi tou dimansyon, resours imen, resours finansyel Prensipalman e ozordi si nou pe koz Gouvernman konsider pour remet an mars or si mon kapab servi sa term resisit sa proze en allant Providence nou annan rezon pour nou dir sa, i tre byen nou dir sa espesyalman letan nou konsider bann depans ki Gouvernman pe peye pour bann servis spesyalize.

Onorab Loter Mosyon in donn nou bann statistik in komans nou lannen 2014 kot in dir nou plis ki 20 milyon, 2015 in dir nou plis ki 26 milyon, 29milyon, 36milyon, ziska dernyen lannen 2017 e nou’n tann li dir en total plis ki R115milyon, sa i bann sif ki Onorab Esparon in vin avek bann nouvo sif e ler nou’n koze in dir mwan sa i bann sif preliminer.

Me pe enport ki nivo accuracy i annan dan sa bann sif lefe i reste ki i en realite ki Gouvernman i pey bokou larzan or i depans bokou larzan pour donn servis spesyalize nou bann Seselwa nou bann ser, frer ki isi lokalman pa kapab ganny akse avek sa kalite servis.

E Mr Speaker si ou demann mwan koman, pa koman en Manm Lasanble me koman en sitwayen ordiner i mon rev e i reste en rev e i devret reste en rev nou tou pour ki en zour nou kapab donn servis spesyalize or mazorite servis spesyalize nou bann sitwayen Seselwa e isi menm lo nou later i pour en zour laglwar, i pour en zour kot nou pour dir wi Sesel in travers en parkour e ozordi nou pe reisir dan enn bann misyon ki nou bann Dirizan in definir, in trase pour akonplir dan servis lasante isi dan Sesel.

Mr Speaker ler mon pe koz lo sa size i enportan ki nou pa perde de vie ki Minister Lasante bann teknisyen dan Minister Lasante bann Minis e bann lezot expert dan Minister Lasante Sesel ansanm avek bann expert ki’n vin donn koudmen zot in tras en plan pour devlop tou nou bann lenfrastriktir lo bann fasilite avek bi ogmant standar servis e standar fasilite e lekipman dan Sesel.

Mr Speaker dan mon resers apre ki mon ti’n vwar Mosyon Onorab Roucou lo Order Paper mon’n ganny akse avek sa dokiman, Mr Speaker ou vwar sa dokiman i met Master Plan Report Draft sa i en dimoun, en dimoun in dir mwan be ti ava byen dan sa Mosyon Onorab Roucou ki ou dir ki i annan en kantite travay ki diferan expert in fer e ki zot pe, zot in definir dan zot plan pour annan en lapros entegral an sa ki konsern amelyorasyon kondisyon tou nou bann Lopital e tou nou bann servis ki osi nou bann Klinik i donnen.

E sa i tre enportan e sa Lopital ki Onorab Roucou pe demande ki ganny konstrir i form parti sa Master Plan Lasante, i annan en prozeksyon 20 an ladan me son lenplimantasyon ki Onorab Larue pe demande kan pour komanse in deza konmanse me lentansite lenplimantasyon konteni sa Master Plan i ganny restrikte par Rapor avek resours finansyel, me ozordi Mr Speaker mon krwar i en loportinite ki nou pe gannyen pour lans en lapel e demann Minister Lasante an relasyon avek nou deba ozordi pour konsider revwar lenplimantasyon, re aziste bann priyorite si i posib tout an tenir kont nesesite pour nou annan servis spesyalize isi lo teritwar Sesel.  I tre enportan.

E byensir bann entervenan ki’n antre lo sa Mosyon in koz lo bann defi ki i annan, enn nou bann defi se mendev, bann dokter, bann spesyalis, bann nurse kalifye pour kapab al zer en fasilite parey ler i fini ganny konstri, nou annan lezot konsiderasyon ki nou kapab fer sorti pa zis depandan lo bann Seselwa ki deor me osi devlop bann Lagreman avek bann lezot pei, bann pei dan larezyon pour zot kapab dan bann diferan lenterval fer desann bann spesyalis pour kapab servi dan nou bann fasilite spesyalize isi dan nou zour nou ganny li.

E sa travay sa legzersis, sa legzersis sa diskisyon Mr Speaker mon krwar i devret komanse si i pa ankor komanse pour ki dan moman apropriye ler nou bann fasilite in pare nou kapab deza dir nou’n met tou bann eleman neseser pare e nou pa trouv nou annan okenn lenpas.

Mr Speaker mon retourn lo en pwen ki mon’n fer sorti pli boner kontenir challenge ki Prezidan Faure ti fer devan nou Lasanble dan Diskour Leta Lanasyon e lo, dan sa konteks mon oule demann avek loter Mosyon pour konsider open up sa scope Mosyon e nou tonm dakor ki ozordi le 28 Mars 2018 i komansman i lansman sa deba Nasyonal pour nou koz e konsider tou bann pwennvi an relasyon avek soustenabilite nou servis lasante isi dan Sesel.

Par la swit dezyenmman mon ava demann li pour konsidere ki soumet an diskisyon avek son bann koleg lo Komite Lasante or Komite HIV ki anba son Leadership pour konsider revwar zot terms of reference pour ki i elarzi lespas bann size ki zot kapab konsidere lo nivo zot Komite e par la swit pran Leadership nou Lasanble pour spear ahead sa deba Nasyonal lo soustenabilite nou servis Lasante isi dan Sesel.

Annou bouze, annou anmenn sa deba dan tou frontyer nou pei, dan tou kwen nou Teritwar nou angaz Seselwa pour debat lo sa size pour konsider tou bann eleman enportan ki i ava etablir direksyon e bann teknisyen e bann expert i ava analiz tou bann eleman ki ava’n sorti dan sa deba Nasyonal e an retour nou ava annan en soumisyon Nasyonal ki probableman i ava provok bann sanzman enportan dan sa dokiman ki apel Master Plan Report Draft final version development of conceptual Master Plan for Hospitals in Seychelles.

Mr Speaker si nou fer sa nou Lasanble i ava pe zwe son rol ki’n ganny konfye avek li par la Nasyon Seselwa, son rol ki in ganny konfye dan li par nou Konstitisyon e byensir nou Standing Order.

Nou pa pe rode ki person i ganny larzan adisyonnel lo sa Komite ler i ganny elarzi pour met an plis lezot Manm isi dan nou Lasanble pour ki an retour nou ganny en reprezantativite ase enportan.

Mr Speaker lo sa note mon krwar Loter Mosyon i ava konsider Merit mon soumisyon e nou a tonm dakor nou tou ansanm pour nou reformil lide otour sa Mosyon ki devan nou e tal nou semen pour ki, nou lans nou lo sa parkour deba Nasyonal pour angaz nou pep dan sa demars pour nou revwar ankor enn fwa mon repete soustenabilite nou servis lasante dan sa pei.

Mr Speaker napa nanryen kontroversyel lo en deba soustenabilite nou servis lasante ki nou devret pe anmennen.  Nou devret gete ki mannyer zenerasyon apre nou i kapab zwir servis lasante ki pa neseserman depan lo fonder son pos ki pa depan lo pouvwar son larzan oubyen lo son pozisyon class, me ki depan eksklizivman lo en rekonesans en drwa Lezitim ki nenport ki imen i devret zwir dan Sosyete modern, dan en sosyete demokratik tout an tenir kont Mr Speaker parey mon’n dir ki dan plizyer pei lasante zot ankor pe lager ki i vin en drwa konstitisyonnel me nou, nou sanse, nou sanse ki ozordi nou pti pei i en model dan sa domenn e ki Seselwa malgre tou bann defi, tou bann limitasyon ki nou servis i annan nou ankor kapab dir, ki nou kapab ganny akse avek servis lasante kot nou pa mor dan semen.

Ankor enn fwa mon rekonnet, mon rekonnet ki nou annan defi Onorab Ferrari mon rekonnet e lo sa size defi nou devret nou tou tyonbo lanmen sa Lasanble dan lafason mannyer i ete ozordi i kre sa prémiz Mr Speaker.  E i kree sa loportinite eksepsyonnel ki nou annan pour nou zisteman fer en diferans dan soumisyon bann lide e etal en direksyon ki bann Profesyonnel Lasante i kapab servi pour nou kapab fer sir ki nou donn nou pep sa ki meyer, etan ki konsern Lasante.

Mr Speaker mon ava ekout bann lezot entervenan spesyalman loter Mosyon ki mannyer ki i konsider mon soumisyon e nou ava diriz dan son direksyon pour nou donn sipor son Mosyon parey mon pe sizere nou amann li, nou amann li dan en fason avek en lespri tre pozitiv.  I reste Ownership son Mosyon mon napa okenn lentansyon pran Ownership sa Mosyon mwan me selman mon’n anmenn lide, mon pe kontribye pour nou anrisir e relans sa travay or lans sa travay ki nou’n ganny demande pour fer isi dan Lasanble.

Mr Speaker mon pa pour prolonz mon bann lide lo sa Mosyon mon ava esper moman zour sa deba i ganny lanse dan son bann diferan moman ki ava ganny progranmen mon ava kontribye mon bann lide lo lafason ki mwan personnelman mon santi nou devret etal sa direksyon dan nou servis lasante e lanfaz lo soustenabilite nou servis lasante.  Mr Speaker mon a dir ou mersi bokou pour sa letan ki ou’n donn mwan.  Mersi.

 

MR SPEAKER

Mersi Onorab Simon Gill.  Onorab Lemiel.

 

HON SYLVANNE LEMIEL

Mersi Mr Speaker, bonzour Mr Speaker, bonzour tou mon bann koleg Onorab e tou bann dimoun ki a lekout, Mr Speaker drwa a lasante i primordyal pour en pep, tou dimoun i annan drwa pour ganny akse avek tou servis medikal sanitasyon, ganny ase manze, annan en lakaz desan, travay dan en bon lanvironnman ki prop e senp, ozordi avek bokou devlopman ki’n arive dan nou pei depi an term lasante, sosyal, lenfrastriktir e lezot i tre enportan ki nou get pli lwen.

Mr Speaker ozordi stil lavi nou pep in sanze, nou vwar ki i annan bokou plis dimoun ki pe ganny detekte avek diferan maladi.  Dan bokou lenstans sa bann maladi i ganny detekte tar petet akoz sa dimoun li menm in raport tro tar oubyen sa maladi pa’n kapab ganny detekte menm si sa pasyan in monte desann kot dokter.

Mr Speaker nou pour osi apresye ki Minister Lasante in ozordi fer en bon pe progre kot i konsern deteksyon bann maladi, menm si i ankor annan lespas pour fer pli byen, bann dokter prive osi pe zwe en rol primordyal kot i konsern deteksyon maladi bann pasyan ki vin kot zot.

Mosyon ki devan nou ozordi i fer bokou sans e mwan mon pour siporte.  Mon annan bokou zabitan mon distrik ki’n al tretman aletranze e i annan ankor ki lo lalis espere.  Bokou manm fanmir sa bann pasyan in vwar, in vin vwar mwan pour sey rod diferan kalite lasistans pour zot kapab al akonpanny zot pros.  Manm fanmir sirtou bann ki pli vilnerab parfwa pa kapab akonpanny zot dimoun ki malad e sa i tous zot leker.  Bann tel sityasyon i menm afekte sa dimoun ki malad akoz ler en manm fanmir i al avek li, i al etranze pour al trete i santi li soulaze e sa i santi li soulaze e sa i kapab ed li pour reganny son lasante pli vit.  I santi li pe ganny sa sipor moral e son leta lespri i pli anpe e i redwir stres lo li.

Mr Speaker statistik in ganny prezante ek nou bomaten par Loter Mosyon li menm e osi Onorab Esparon i montre ki bokou dimoun i fer sa traze al aletranze pour trouv zot lasante.  Zis lannen pase nou’n vwar ki Minister Lasante in anvoy 254 dimoun pour fer tretman spesyalize, me Onorab Esparon atraver son resers in vwar ki 1,453 in vwayaze pour rezon medikal.

Mr Speaker annan en tel fasilite spesyalize dan nou pei pour anmenn bokou benefis pour nou pep.  I pou osi anmenn bokou benefis pour nou pei li menm, depans ki Gouvernman i fer pour anvoy sa bann pasyan aletranze, i a kapab ganny servi pour tret bokou plis pasyan isi menm Sesel.  Sa larzan i a kapab vin koman bann lasistans ki Gouvernman pour donn bann pasyan ki bezwen sa swen spesyalize me ki pa kapab afford pour peye.

Sesel pti ki i pti i ganny grade koman enn ki son sistenm lasante i tre avanse e tre bon.  Pour nou kapab anbelir plis lo la nou bezwen fer sir ki nou kontinyen amelyor tou bann servis dan bann Klinik, Lopital e fer sir ki i vin pli meyer.  Annan sa Lopital spesyalize i a kapab met nou sistenm lasante lo en pli o lesel e bokou plis Seselwa i a kapab ganny sa tretman isi menm dan son pei e kot zot a kapab ganny bann swivi neseser pour ki zot lavi normal i kontinyen.

An konklizyon Mr Speaker mwan mon pour donn tou mon sipor sa Mosyon akoz i pour benefisye Seselwa koman etranze, i pour anmenn larzan dan Lekonomi nou pei e mwan kot zabitan mon distrik pour benefisye mon pour touzour siporte.  Mersi Mr Speaker.

 

MR SPEAKER

Mersi Onorab Lemiel.  Onorab Gervais Henrie.

 

HON GERVAIS HENRIE

Mersi Mr Speaker bonzour tou koleg Onorab.  Mr Speaker mon krwar size lasante i en size ki i byen ki nou detanzantan koman en Lasanble nou koz lo la e sirtou anmenn en kontribisyon dan fason ki nou kapab amelyor servis lasante ki nou pep i ekspekte gannyen.

E lasante toultan in enteres mwan pour regard li dan fason ki i ganny manage dan Gouvernman.  E depi 1993 annou koz sa Repiblik ki nou ladan la 3enm nou’n vwar poudir wi Gouvernman in esey petet son mye ki’n kapab fer, me eski son mye i vedir le meyer ki in donn nou?

Premyerman annou komans en pe avek dimoun ki ansarz Lasante; bann Minis depi ’93 in enn bann Minister ki’n annan plis Minis ki’n toultan in annan sanzman dan son latet e sa pour mwan i en move lendikasyon dan fason keksoz pe marse.

Konmsi mon’n vwar li in annan en stabilite dan Minister Lasante toultan e pour zot lenformasyon depi ’93 nou’n annou nou defen Mr Adam ki’n Minis apre i vin Minis Jacquelin Dugasse pa neseserman dan bann lord la ki mon pe mansyonnen, ansyen Speaker Patrick Pillay osi in latet sa Minister, Vis Prezidan aktyel Vincent Meriton, Minis Dezinyen Macsuzy Mondon, Dr Athanasius, Anna Athanasius Marie-Pierre Lloyd, Mrs Marie-Pierre Lloyd in osi vin Minis, Mrs Mitcy Larue nou rapel li sa fraz ler i ti ganny apele pour vin Minis Lasante “Prezidan Lasante” menm li i ti sirprann poudir zot in met li dan sa pozisyon e a ler aktyel se Minis Adam.

Donk i fer nou konbyen? 9, 9 Minis dan en lespas 25an savedir an mwayenn apepre 2an en dimoun in la, zot konpran la ki mon pe dir konmsi sa enstabilite pour anmenn sa Minister lo en larout kot keksoz i ganny stabilize en plan i ganny met an mars.

Polisi i ganny revize be si toultan i annan sa sanzman a latet en Minister i anmenn enstabilite, alors si nou pe dir 9 Minis dan 25an be konbyen PS si nou ledwa pour ase pour konte mon pa sir, me selman i annan en long lalis.

Donk prezan pour mwan mon demann mon lekor Gouvernman aktyel eski in annan sa volonte politik pour pous frontyer ki ti kapab ale ouswa in pri avek Lartik nou Konstitisyon ki Onorab Andre in pronons son lekor eloquently lo la bomaten letan in koz lo Lartik 29 (1) e demann nou lekor prezan eski nou Gouvernman pa’n kontant nou avek donn lasante primer gratwitman – pa neseserman gratwit nou rapel bann dimoun laba deor sak sou ki ou peye dan tax se ou pe kontribye, napa nanryen ki pour nanryen dan sa pei annou bliye sa konsep, ledikasyon ou lasante i pour nanryen.

Prezan dan Lartik 29 ki i annan son Lartik (d) li i koz lo promouvwar responsabilite endividyel dan kestyon lasante, kekfwa sa i en keksoz ki nou pa’n koz ase lo la, e sa deba alor ki anfet Prezidan Larepiblik in pronons son lekor lo la pandan Leta Lanasyon mon pa’n vwar li dan lafason ki Onorab Gill ki’n koz avan mwan in vwar li.

Mwan mon’n vwar li koumsa, mon krwar Gouvernman i pe konsyan li poudir the cost of health care i pe komans vin en fardo pa lo li, me lo taxpayers Seselwa nou tou nou kontribye sa en dan sa pour pey lasante, i komans vin en fardo e alor i oule komans dir avek dimoun “be ekout en kou annou mazin ki mannyer ou koman en endividi ou kapab kontribye” e dan sa Lasanble mon krwar i annan en koleg lo sa kote latab ki’n deza pronons son lekor lo sa size, zis si nou get en pti kou vitman Bidze Minister Lasante savedir i vin pour Minister Lasante ki administre avek Public Health Authority zot Bidze ansanm an 2014 nou ti pe koz R594milyon; an 2015 i monte pour vin 633milyon; an 2016 i monte pour vin 732 milyon.

Apre an 2017 – 831 milyon, e sa lannen ki nou pe koze ki nou’n aprouve lannen pase 908milyon.  Zot vwar i kontinyen ogmante e i vin en fardo lo nou koman taxpayers be solman letan nou gete nou en popilasyon annou assume apepre 90, 000 dimoun si mon kalkilasyon i bon, ladan i annan en poursantaz ki etranze ki zot osi zot servi sa menm servis selman si mon krwar zot bezwen kontribye en larzan.

E nou ti ava dir sa kantite larzan ki nou koman taxpayers nou peye eski nou pe ganny sa valer, nou pe ganny sa quality nou ti ava apresye ganny sa premium quality e i annan diferans letan nou pe koz premium la mazin si ou ti pe asiz dan 2 Class avyon dan lekonomi avek lot devan i diferan sa.  Donk eski alor nou pe ganny sa?

Gouvernman li menm i pe bezwen pe anvoy en kantite dimoun aletranze bann sif deza ki mon bann koleg in mansyonnen avan i dwatet fer nou reflesir poudir be nou ti kapab al pli byen, pli lwen.

Donk sa Mosyon mwan mon vwar li i in vin a en bon moman e mon kontan ki nou lo sa kote latab nou’n pran sa linisyativ zisteman parey Onorab Gill in dir, Prezidan Larepiblik in envit Lasanble pour debat sa size e kekfwa nou nou’n anvi pran li dan sa angle ki nou’n pran avan donk nou’n ase inovativ, nou’n ase angaze, nou’n ekoute nou pe partisip nou osi dan devlopman pei e nou’n anmenn nou kontribisyon dan sa fason.

E sa Mosyon pour mwan i fer mon mazin serten bann mo kle ki nou souvan tande dan sa Sekter Medikal bann mo parey “efikasite, inovasyon, resers” donk sa Mosyon i pe anmenn sa bann mo de lavan.  Lavantaz en fasilite spesyalize pour anmenn en evolisyon dan servis lasante par fer li vin pli efikas, pli inovativ e sirtou i pour promouvwar resers.

Koman en pei i enportan ki nou pous sa bann eleman devan apre tou nou kapab demande be akfer nou annan Liniversite Sesel, akoz nou annan Lenstitisyon pour Inovasyon Teknolozi avek Lasyans.

Akoz nou annan NIHSS nou bezwen kree en lespas pour ki sa bann Lenstitisyon ki mon’n mansyonnen i ganny sans fer bann keksoz ki kapab kontribye i dan en fasilite lasante modern i ava ede, i ava ed zot kapab fer sa travay ki zot merit pe fer baze lo zot manda.

Mwan mon vwar li konmsi i nepli letan ozordi dan en lemonn modern pour ki en Lopital parey Lopital Sesel li i annan tou fasilite, i bezwen donn tou fasilite pour en servis.

Donk i ok pour ki en pei i annan en Sant Medikal Spesyalize prezan la dan Sesel konmela nou pe koz sa kestyon kolabor Prive avek Piblik e kekfwa sa i kapab en model.  Nou’n tann dir poudir parey Onorab Hoareau in dir nou Lopital Victoria li menm mon en pe zennen mon pour dir Lopital Sesel i nepli annan lespas pour grandi ki swa an term kote pour met ankor nou nouvo lenfrastriktir.

Donk en fasilite ki Mosyon pe demande i ava permet li ganny sa loportinite pour li kapab par egzanp etablir e Lab modern, zis mazinen dernyerman la i annan 2 lensidan kot nou’n bezwen al fer bann tes aletranze DNA pour konnen koksis ti pour lekel, senp pti keksoz ti bezwen al aletranze.

Letan ti annan Case Lapeste ki ti komans obor Madagascar bann tes ti bezwen al fer aletranze, donk nou pe vwar la ki mannyer Sesel wi i bezwen en tel fasilite, me pli enportan nou pep i bezwen ganny akse avek tretman modern.

Ozordi wi nou avoue poudir i annan en servis kot serten dimoun Leta Sesel i peye zot al fer tretman aletranze – bann Manm ki’n koze avan mon in koz longman lo la menm i annan dimoun ki al lo zot menm e ler zot retournen i annan bann laranzman kot Gouvernman i kapab ranbours zot sa serten larzan.

Be si sa akse ti lanmenm la parey zot al kot Eureka ouswa zot al kot Dr Murthy donk i ti pour pli ed nou e ozordi akse i ganny kontrole par en pti group profesyonnel malgre nou annan respe pour zot lentegrite profesyonnel me lekel ki i ale i ganny deside par en Board e i kapab annan bann eleman ki nou pa anvi i antre ladan tel ki faver, zanmi, fanmir ou menm konsiderasyon politik.

Alor sa Mosyon mon krwar si nou, Gouvernman i ekoute e fer sa ki i pe ganny demande par Lasanble Nasyonal i ava elimin tou sa bann keksoz.

E Mr Speaker mon pa kapab termin mon lentervansyon san mazin 2 zanfan; 2 zanfan tre zenn Christelle Payet ki aze 3 an e apre Luckious Rachelle ki aze 8an ki’n pri La Reunion.  Sa 2 zanfan zot in al laba, akoz maladi ki zot ti annan ronnyon, konplikasyon ronnyon zot in bezwen fer transplant e apre sa zot in pri La Reunion, menm si zot La Reunion sa bann loperasyon pa ti fer La Reunion ti fer La France e ankor akoz Sesel napa mwayen napa fasilite pour fer sa bann keksoz.

E ler zot in laba prezan zot in retourn La Reunion Lotorite Lasante Reunionnais i dir tyonbo i annan bann latizann spesifik ki sa bann manrmay i bezwen annan; dimoun kalifye pour deal avek zot case e si Sesel napa sa bann keksoz zot pa kapab vini.  Prezan i annan en kou pour ki zot fanmir i bezwen reste laba, be apre i annan moman ki in arive ki fanmir nepli kapab akoz difikilte finansyel.

E ler zot in desann dan ka pour Luckious Lotorite Reunionnais i anmenn case Ankour poudir be zot in abandonn en miner lo Teritwar La Reunion – ki pa neseserman le ka, me akoz sirkonstans ki sa paran in vwar zot ladan, e la prezan Case in ale vini Ankour ziska ozordi sa bann zanfan Christelle Payet avek Luckious Rachelle i ankor laba.

Eski nou koman en Nasyon nou kapab aksepte en keksoz koumsa?  Preski nou tou la anndan nou annan, laplipar nou, nou paran e nou santi douler sa 2 fanmir zot pa la avek zot zanfan e nou ti ava voudre pli vit posib, Christelle in ganny dir ki i kapab retournen apartir le 01 Zen e Luckious i kapab retournen aparti 01 Out sa lannen me eski nou servis lasante Sesel ozordi i annan dimoun kalifye pour swiv zot Case?  

Eski nou annan bann lekipman pour deal avek zot kondisyon e apre eski in annan bann latizann e dimoun kalifye pour administre sa bann latizann, sa i bann kestyon ki nou bezwen demann nou lekor e ki sa Mosyon li i pe adrese.

Alor an konklizyon Mr Speaker mon vwar poudir si en fasilite parey i ganny met an mars i ava pous abilite nou bann zenn profesyonnel par ofer zot en loportinite e progresyon dan zot karyer akoz prezan zot pour annan en fasilite ki alaoter ki zot kapab reve pour zot en zour al travay laba.

Mon vwar li osi en loportinite pour devlop en lyen e lesanz avek bann Sant Lasante dan larezyon, nou’n tann bann pei ki nou annan relasyon deza avek ki enkli Sid Lafrik, La Reunion, Maurice, Sri Lanka, L’Inde, e probableman osi United Arab Emirates.

I ava osi ofer plis loportinite biznes pour bann Sekter ki siport sa Lendistri medical tourism sirtou tel ki lotel, transportasyon la mon pe mazin sirtou laliny aeryen, kominikasyon, Lasirans eksetera.

Me pli enportan, pli enportan i pour anmenn en lenpak direk lo standar lavi tou nou bann sitwayen ki nou koman bann Manm Lasanble isi nou reprezante, dan Manifesto tou lede parti ti annan en sapit ki koz lo lasante pli bon servis, pli bon akse, devlopman pour profesyonnel e si tou lede parti ozordi i siport sa Mosyon dan nou Manifesto Eleksyon 2016 pour anmenn meyer servis e anfet meyer standar lavi pour nou popilasyon.  Avek sa 2 mo Mr Speaker mon ava dir ou mersi pour donn mwan loportinite pour fer lentervansyon lo sa Mosyon.  Mersi.

 

MR SPEAKER

Mersi Onorab Henrie.  Bon avan nou Break i annan en bezwen pour nou fer en ABC pour nou kapab konfirm Order Paper pour semenn prosenn anvi ki nou annan bann Minis ki pour retourn dan Lasanble Mardi.  Eski mon kapab ganny en konsansis lo ler ant le 2 kote akoz mon konnen nou annan en meeting ki nou pe sey organize la, en lot meeting ki nou pe sey organize dan break la ki pour enkli ankor le 2 Leaders avek Deputy Speaker so ABC.  

Mon ti pe met ABC 1er en kar en expectant ki nou ganny sa lot meeting avan, nou annan en lot meeting avan mon krwar Clerk pe kontakte zot la non, le 2 Leaders -non?  Oubyen nou ava pran sa lot meeting 1er en kar koman i a fini nou ava tous ABC apre akoz sa meeting i pour depan petet en pti pe, nou Order Paper pour depan en pti pe lo la.  OkSo nou ava Break e 1.15 nou ava zwenn dan Speaker’s Conference Room, right, nou ava retournen nou ava repran nou travay 2er.

 

(BREAK)

 

MR SPEAKER

Bonn apre midi tou Onorab, bonn apre midi tou bann manm piblik ki a lekout.   Premyerman  mon prezant en leskiz.  Petet zot pou tann bokou leskiz me en leskiz mon krwar i toutafe normal ki mon prezant sa pou rezon se ki mon menm mon en ti pe enplike dan meeting, enn deryer lot ki’n drag nou en pti pe apre ler.  E ankor i pa bann meeting ki pa enportan. Ii bann meeting pou fer avek nou travay isi dan Lasanble.

Bon leskiz in ganny prezante nou ava kontiny nou travay e prosennman lo mon lalis mon annan Onorab Jean-Francois Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon pa pou long, mon remersi ou pou ou donn mon laparol mon ti’n demann laparol apre ki en lentervansyon Onorab Gill ki mon’n swiv avek bokou lentere.  E mon krwar i enportan ki mon fer enn de pwen en pe kler lo sa size lasante, e sirtou lo sa size ki Gouvernman i anmenn bann nouvo fasilite pli modern pou fer monte nivo lasante dan Sesel.

Mr Speaker nou dan LDS nou vizyon pou lasante i kler e sa Mosyon ki la devan nou prezante par Onorab Roucou.  I met lo latab enn bann prensip dan devlopman lasante dan devlopman servis lasante se pou nou partner avek otan lorganizasyon en ta dimoun posib pou nou kapab anmenn bann fasilite ki neseser ki popilasyon pe demann nou.

Nou prensip e nou vizyon dan lasante se pou nou anmenn bann nouvo fasilite akoz servis lasante i bezwen grandi.  Servis lasante i en sekter dan nou pei ki bezwen lenvestisman.  Akoz nou pei pe grandi e nou Sistenm Lasante, nou Sekter Lasante pa kapab reste deryer parey i ete pou lemoman.

E nou tou isi ki’n pran laparol dan sa Lasanble in dakor ki i annan bokou domenn ki nou an retar ladan e ki nou bezwen met lavi pou nou kapab atrap en pe sa retar e anmenn sa bann servis ki nou sitwayen nou selman pe demande me ki nou sitwayen i  merite gannyen.

Alors a sak fwa ki nou ganny lokazyon nou prezant nou vizyon.  Prezidan Faure dan son Diskour dan Leta Lanasyon in sizere ki i annan serten lide ki i ti a kontan vwar Lasanble diskite pou lavenir devlopman dan sekter lasante.

Onorab Gill pli boner in osi mansyonnen ki i annan bann propozisyon ki i ti a kontan fer e menm anmenn lamannman elarzir scope sa Mosyon ki Onorab Roucou in met devan sa Lasanble ozordi.

Mr Speaker mon krwar i enportan pou fer sa plan kler.  Nou dan LDS nou’n met devan atraver sa Mosyon sa ki nou ti a kontan vwar Sesel.  I neseser alors ki sa parti ki dan Gouvernman e sa Gouvernman ki la i osi tal son kart lo latab kisisa ki anvi, kisisa ki anvi vwar pou lavenir.

Nou pa kapab annan en Gouvernman ki pe azir zis pran en pti pasaz lo ledo Onorab Roucou zis esey pran en pti bout, dan en Mosyon zis bous en pti trou la fer en pti maintenance laba.

Sistenm Lasante i sitan enportan ki merit en larsitektir konplet.  E mwan mon ti a kontan ki Gouvernman  i met sa larsitektir met sa desen devan pep Seselwa.  E nou konman bann partner dan sa pei, nou ava fer komanter lo la ki mannyer nou kapab fer komanter e ki mannyer nou kapab anmenn nou kontribisyon si Gouvernman pe zis tranpe ek LDS pou gete ki LDS  i annan pou dir sak fwa ler i annan en keksoz nou met devan Lasanble, Lasanble ki pou vin avek sa bann propozisyon.

Mr Speaker si Parti Lepep napa sa portre, napa sa vizyon.  Me mon regrete i devret kil akote, les sa enn ki annan en vizyon diriz sa pei.  E la nou ankor nou vreman dan en ka ki mwan mon krwar i pa akseptab i montre ki mannyer nou annan en Gouvernman  ki pa pe fonksyonnen.  Nou annan en Gouvernman ki pa brav, ki napa sa kouraz pou li anmenn modern nou sistenm.

Nou annan nou annan keksoz sa kantite keksoz ki nou anvi fer.  Me selman Mr Speaker avek respe nou pa kapab tou lazournen nou vini met lide lo latab met bann pwen lo latab e konmsi nou ki Gouvernman nou ki pou diriz sa pei.

I pa marse koumsa.  I annan en group dimoun me si zot pa kapab met sa vizyon kler sorry mon dir ankor.  Debout akote kile, les sa ki kapab travay akoz nou, nou anvi vwar la nou dir la nou anvi vwar en lopital nef spesyalize avek bann servis avek bann dokter Seselwa ki ganny posibilite fer zot travay ganny byen peye ki i retourn Sesel avek bann ners ki spesyalize ki aletranze ki anvi travay ki anvi anmenn sa sistenm lasante isi Sesel sa i nou vizyon.

Akoz nou santi i tro difisil pou lemoman nou bann sitwayen i bezwen al deor pou al sonnyen bann depans bann dimoun ki pe akonpanny en pasyan deor i bezwen depans en ta larzan ki dimoun napa e mon ti a kontan vwar servis Sesel.  Me ki zot pe espere ki Gouvernman pe espere pou dir ki zot pou ale zot pou fer sa bann keksoz.

I fer mwan mazinen Mr Speaker avek respe ki en fwa mon ti ouver en Manifesto sa lepok Parti SPPF ti annan zis portre ladan.  Zis portre.  Napa en plan.

Mr Speaker pandan sa premye 15 mwan depi dernyen Eleksyon nou’n pran en lapros.   Nou vwar ki sa Gouvernman ki ti la apre dernyen Eleksyon 2016 ti en pe aflize akoz i fek perdi Eleksyon ti en pe fay, fay ti en pe, lo kote lo kote.  Prezan nou konman bann sitwayen responsab nou dir be ok nou ava seye.  Montre zot en pti pe kler en pti pe konmsi montre zot nou pe ale kot nou ti a kontan zot ale, sey tenir zot lanmen dan sa fernwanr.

Nou konpran serten i en pe aflize akoz premye Eleksyon ki zot in perdi dan 40an.  Apart bann ki zot ti perdi me selman zot ti gannyen.  Zot ti pran parey i annan ti dir.  Si ou perdi nou pou pran.  Me vre zot in pran.

Me selman pandan sa bann lannen nou mazinen be sa Gouvernman i kapab mars lo li menm i kapab prezan ok vwar son responsabilite e fer bann propozisyon konkret pou lavenir e met anrout bann proze konkret pou lavenir.

Me malerezman apre 1an edmi ou a krwar nou ki ankor pe tyonbo zot lanmen pou anmenn zot dan sa fernwanr.  Me i pa pou marse koumsa.  Personnelman e mon krwar ki mon bann koleg isi dan sa kote latab i pe met devan Gouvernman ki zot pa kapab kontinyen zis vin kot nou pou rod lide e ki nou akoz pa nou.  Pa nou ki pe dirize.  Zot ki’n ganny Egzekitif dan zot lanmen.

So mon ti ava avek respe e mon kontan sa lapel mon tande pou dir tou lazournen pe fer lapel pou Lopozisyon travay pou Lopozisyon kontribye anmenn nide.  Wi be nou, nou pa’n ganny elekte pou sa nou.  Nou’n ganny elekte pou nou anmenn en kontrol en oversight lo Gouvernman e nou     oversight lo kwa si Gouvernman pa fer bann propozisyon lo kwa nou pou anmennen?

Alors mwan mon ti ava dir avek Onorab Gill avek respe i pa la apre midi kekfwa i bizi.  Ki sa bann zafer annou amann sa Mosyon annou elarzir sa scope annou fer sa, non, non, non, non, non, non, non, non.

Sa si zot ti annan zot plan si zot ti annan zot keksoz pou zot travay zot vini zot tale kler devan nou.  Ok Onorab Roucou mwan mon ti ava dir avek ou mon apresye ki mannyer nou,

Nou apresye ki mannyer ou’n prezant ou Mosyon, i kler avek bann keksoz kler ladan, tenir lo ou propozisyon nou ava kontinyen fer bann propozisyon, nou ava kontinyen montre dimoun lekel ki annan propozisyon pou anmenn sa pei devan.  E lekel ki napa propozisyon.

E malerezman mon pa bezwen fer en desen me selman pep Seselwa pou vwar poudir sa i egzakteman leka pe arive e i pa i nepli akseptab.

Alors Mr Speaker mon remersye ou pou sa letan ki ou’n donn mon akoz mon ti santi pou dir i enportan pou fer sa byen kler.  Pou fer sa byen kler pou rapel sak dimoun sak kote latab se kwa zot responsabilite.  Zot annan zot responsabilite nou, nou annan pou nou.  Nou pa pou kapab tou lazournen anmenn pake ki pa pou nou.

E apre ler nou fer ler nou met keksoz ater zot menm zot premye pou zot kritike, pou zot tap kalot ladan.

Alors Mr Speaker.  Mon ti ava terminen an dizan avek lepep Seselwa, pep Seselwa si zot anvi en meyer Sistenm Lasante en sistenm ki fonksyonnen.  Si bann dokter i le vwar bann servis e bann kalite lekipman ki modern ki zot bezwen pou zot travay, si bann ners i bezwen bann kondisyon travay amelyore e de bon kalite zot annan en sel keksoz pou fer.

Byento e mon tre byento ler pou annan eleksyon konnen lekel pou lekel zot pou vote, akoz zot annan konmela en Gouvernman ki napa  okenn propozisyon.

Alors rekonnet sa LDS pe fer e avek kouraz determinasyon nou pou arive.  Mersi Mr Speaker.

 

MR SPEAKER

Mersi Onorab Ferrari.  Onorab Flory Larue.

 

HON FLORY LARUE

Bonn apre midi tou dimoun.  Mersi Mr Speaker.  Mr Speaker loter Mosyon i eksplik nou bokou lo merit en servis spesyalize.  Sa i enkli en servis sa premye entervansyon medikal.  E parey Onorab Esparon in eksplike i osi annan servis after care letan en dimoun i konplet sa loperasyon.  Menm si in fer aletranze i kapab ganny swivre san e deplase isi Sesel.

La mon mazin Mr Padayachy Anse Royale ki ti ganny dir fodre i ganny retournen pou en follow-up sa lannen apre loperasyon ki ti’n fer lannen pase.

Me isi zot in dir li i pa bezwen retournen.  Me sa msye pe vreman soufer.  Alor Mr Padayachy pe fer son bann demars pou retournen pou sonny son lasante.

Nou’n vwar osi kot en zenn garson 21an apele Diego Cardan ki li in ganny touse bokou letan son manman ti malad e in dir ki son fanmir pa ti kapab pey tretman aletranze avek son manman i pa tro pti mistik ki tretman i ti pou gannyen isi.

Alor i pe fer son par pu sey ede pou anmenn plis lekipman pou ed bann dimoun ek kanser.  Diego i le fer en traverse ant Praslin ek Mahé en parkour ki pou termin Eden Island.

Dapre mon konpran Mr Speaker i pou fer sa, sa weekend Sanmdi le 31 Mars.  I annan sipor group Soroptimist e osi i met en Kont Go Fund  Me online pou rod bann sponsor.  Mon demann ki kapab pou ed sa zenn dan sa konpanny ki a retour a kapab asiste nou bann sitwayen ki vreman dan bezwen.

Alor i annan len demann pou en fasilite ki ofer bann servis spesyalize Mr Speaker.  Sa i kler.  I ti telman kler ki ti annan en lakonpannyen ki ti enterese pou met en fasilite an plas byen lontan.  Sa sit lo semen Providence dan distrik Roche Caiman lo plot number V12348 i mezir 25, 559mil met kare.  Sa proze ti ganny anonse an 2007 Mr Speaker.

Sa proze ti apele Seychelles International Specialist Medical Centre.  E i ti en kolaborasyon Dr Ramados en lakonpannyen apele Emerald Holdings Limited e letan zot ti lans sa proze lanons ti ganny fer ki sa devlopman ti pou ganny konplete dan 1an.  Sa Lopital a sa lepok an 2007 ti anvizaze donn bokou servis.  Zot ti telman konfidan dan sa proze ki a sa lepok dimoun ti ganny ofer bann shares ki ti kout 1000 Dolar en par.

Sa lakonpannyen ti ganny sa later lo en lease le 24 Oktob 2007 sinyen par PS Veronique Herminie sa letan.  Sa lease ti pou 99an a en kou 39mil Dolar par an.

Mon ti a kontan vwar bann detay pou vwar si sa rent ti ganny peye dan kont Gouvernman Mr Speaker.  Me sa i en lot kestyon pou Minis Finans pou en lot zour.

Sa proze ti pou ganny konstrir par Island Construction Company Limited.  Mon pa kapab solman pa mansyonnen an pasan Mr Speaker ki sa lakonpannyen Emerald Holdings ki mon’n esey al kot Registrar bomaten pou ganny son detay azour akoz la i relye direkteman ek Mosyon.

Me malerezman Mr Speaker zot pa vwar file pou Emerald Holdings.  Tousala i tard nou travay pou anmenn bon lenformasyon pou nou dimoun pou konnen lekel sa bann lenvestiser ki ti pe promouvwar sa servis sa letan.

Me Mr Speaker avek ou

permisyon lezot dokiman dan lezot file in montre ki enn son direkter an 2002 ti Mr Gregoire Payet akoz sa lakonpannyen Emerald Holdings ti osi annan de morso later ki li direkteman devan sa vye lopital obor lanmer pou zis R200mil par an.

Mr Joel Morgan ki ti sinyen pou donn zot sa later V8072 e V8073.

        Pou retourn lo sa proze Seychelles International Specialist Medical Centre Mr Speaker nou tou konnen ki i pa ti ganny konkretize.  Me zot ti relans zot proze sa voyaz anba management avek group apele Apollo nou tou nou konnen.

Mr Speaker Apollo Hospital Group i en bann leaders dan tou sekter ki a sa lepok ti pran plis ki 10mil lili dan zot rezyon L’Inde e an deor.  Sa nouvo proze avek Apollo ti pou annan en kapasite inisyal 100 lili, avek en plan ekspansyon 200 lili dan zot 2enm faz.  Zot ti pe ofer en dernyen lekipman dan zot fasilite e fer bann entervansyon tel ki loperasyon leker neurosurgeries e loperasyon an plas laans ek zenou.

A sa lepok zot ti pe fer planifikasyon pou en 2enm proze Maurice pou en Lopital avek 220 lili.

E vreman Mr Speaker sa lopital Apollo ti ganny konplete an 2013 a en kou 70milyon Dolar ki zot ti envestir.  La en sif ki’n anvoy Foreign Direct Investment pou Maurice an 2013 Mr Speaker.

Nou Mr Speaker nou reste la ater nou.  Akoz ki sa proze i fail?  Akoz ki nou dimoun pa’n ganny sa devlopman?  Eski akoz sak fwa ki desizyon i ganny fer Mr Speaker pa benefis nou sitwayen ki ganny met premye ?  Dan sa devlopman ti osi annan Madanm Sarah Rene.  Parey mon’n dir mon pa’n vwar dokiman Emerald Holdings bomaten akoz zot pa i disponib.

Me ankor Mr Speaker en lot lease ki mon annan pou tou sa later ki ankor lanmenm obor ki pran depi kot Airtel bor lanmer apre sa 3 bout later ki annan sa 3 gro Blok Flat ki mezir plis ki 7500 met kare ti ganny sinyen par Madanm Sarah Rene konman direkter Emerald Holdings pou tou le kat sa later an 2014.  Mr Speaker zis 1an apre sa menm lakonpannyen ki ti pe fer lopital in faid in dwa labank pres 13milyon Dolar, sa bout later in retourn pou labank Nouvobanq depi 2013.  A sa lepok ti annan en valer  R100milyon.  Ozordi sa later i montre ki Gouvernman Sesel ki propriyeter.

Bann lezot Manm  in tous lo size medical tourism, akoz  i annan ki santi ki petet lenvestiser pa oule vini akoz en Lopital sa grander ki spesyalize pa profitab.

Me nou vwar ki n 2011 Minis pou Tourizm sa lepok Mr St Ange ti pe promot medical tourism Sesel ansanm avek  bann zil Cayman Islands.  Cayman Islands in gannyen son bann Lopital 100 ekek lili an Fevriye 2014 Mr Speaker.  Avek en lenvestisman plis ki 70milyon Dolar.  Mr St Ange ek Minister Lasante pa ankor kapab rod enn pou nou.

Bann conference in ganny fer tou lo tour lemonn pou asir bann dimoun dan sekter medikal spesifikman ki pe rod elarzir zot biznes.  Akoz nou Gouvernman pa’n vwar li neseser pou fer en demars al rod en dimoun.  Espesyalman letan Msye Faure ti vin dir nou konbyen Seselwa ki vizit dokter par an nou ti soke.

Mr Speaker ki STB in fer pou li promot sa kalite tourizm pou anmenn s bann kalite lenvestisman Sesel?  Ki SIB in fer ansanm ek STB pou anmenn sa kalite devlopman.  Si depi Oktob 2007 Madanm Rene Dr Ramados ti ganny sipor pou fer en lopital par donn zot en bout later ki mezir plis ki 25mil met kar later.  En grander ki bokou plis ki donnen normalman, i bezwen ki Gouvernman ti konfidan pou demann en demann pou sa kalite lenvestisman !

E ki bann promoter lenvestisman pe fer pou devlop sa isi Sesel.  Depi 2013 in ganny repran e pou Gouvernman atraver labank Nouvobanq zot pa ankor organiz zot lekor pou rod en fason pou rod envestiser.

Mr Speaker eski i vre alor ki zot rod zis envestiser ki zot zanmi personnel.  Akoz pou sa de dimoun pou ganny sa bout later nou tou nou konnen ki zot konneksyon i vreman pros avek bann dan Gouvernman.

E an plis mon’n eksplike apre ki zot in kit en gro det avek labank – nou labank Mr Speaker, en det 13milyon Dolar.  Zot in kit nou ek en karkas dan semen Providence e apre nou Gouvernman i deside ki Madanm Sarah Rene in gannyen ankor 4 bout later lanmenm obor son moniman ki in fer.  Be oli problenm?  Konmsi Onorab Sophola.  Be pa nou pou bezwen demande si bann desizyon in ganny pran pou permet parey Mosyon i dir en meyer servis medikal isi Sesel?

Mr Speaker nou’n ganny dir pa fer politik ek maladi.  Be mannyer i apele sa?  Lekel ki soufer?  Olye nou bann Departman Gouvernman leve al rod envestiser serye pou vin en konpliman nou Sistenm Lasante avek bann defayans ki egziste zot monte zot al get pou nou kanmarad.

An 2014 Minis Larue ti al Sri Lanka avek en delegasyon dokter pou vizit bann fasilite pou mou anmenn nou bann pasyan laba e siny en MOU pou 5an.

E lannen pase Msye Danny Faure ti osi fer en vizit an Fevriye, pou konsolid nou bann Servis Medikal Spesyalize par vizit 2 lopital ki deservi Seselwa ki anvoye par Gouvernman.  I ti vizit Hemas Hospital ek Lanka Hospital. 

Mon pa konnen si i relevan Mr Speaker an 2015 Lanka Hospital ti deklar pli gro profi zot in deza fer, 16poursan konpare avek sa ki zot ti fer an 2014.  Si ti annan en Lopital isi sa profi ti ava dan nou lekonomi.

Nou’n tann Msye Faure  koz lo Foreign Direct Investment pou fer tou kalite proze dan son SONA pli boner sa mwan.  Me sa proze ki pe asize ek zot depi 2017 akoz i pa ankor kapab vin en realite pou li anmenn Foreign Direct Investment Sesel?

Mr Speaker la pou lemoman dan pei i annan dimoun ki enterese dan sa morso later kot ex-Lopital Madanm Sarah Rene i ete.  Zot oule fer en lenvestisman pou fer en Lopital lo sa sit.  Zot menm parey dapre mo konpran pou reservi sa premye opsyon pou permet Seselwa aste par dan sa konpannyen.

Alor Mr Speaker boul i dan kare Gouvernman Mr Speaker.  Lentere i annan ki’n ariv anba nou lipye zot la avek nou ozordi.  Sa zafer lopital kapab ganny transformen sorti en karkas pou vin en batiman ki fonksyonnen.  Akse avek Servis Medikal Spesyalize pa a reste zis en rev ek n fardo pou bann malad me i a vin en realite.  Mersi Mr Speaker.

 

MR SPEAKER

Mersi Onorab Larue.  Onorab Audrey Vidot.

 

HON AUDREY VIDOT

Mersi Mr Speaker.  Bonn apre Mr Speaker tou Manm Onorab.  e tou dimoun ki a lekout.  Mr Speaker Sesel  nou’n progrese akoz in toultan annan en Gouvernman ki met imen o sant son devlopman e son progranm sosyal i garanti akse.  E egalite dan tou son servis!

Ozordi Seselwa i lib.  I lib pou fer son prop swa pou servi nenport sant servis lasante.  Pe enport i prive swa Gouvernman me i reste son swa.

I vre ki i annan kot pasyan i bezwen vwar li dan bann pozisyon pou rod en 2enm lopinyon.  Swa kot en Sant Lasante prive baze lokal oubyen aletranze.  Akoz i pa satisfe avek servis petet ki’n resevwar dan Sant Lasante Piblik.

Me nou osi rekonnet ki i annan bokou, bokou sikse dan nou Sant Lasante Piblik.  Kot Gouvernman i envestir milyon, parey Onorab Roucou li menm in fer resorti dan bann statistik.

Sa bann finansman i pa zis tretman i pa zis pou tretman me pou bann progranm lekipman me fasilite pou amelyor bann servis pou nou bann Sant Lasante piblik.

Mr Speaker pou toultan annan divers pwennvi lo Servis Lasante Piblik.  Me i reste responsabilite sak profesyonnel lasante pou donn sa bon servis.  E travay lo febles pou ki lenstitisyon ki ankadre zot i byen ganny valorize.

Linisyativ Gouvernman Sesel pou ganny envestiser pou ede pou enplimant son servis lasante Sesel ti deza en desizyon ki Gouvernman Sesel in pran.

I zis malere ki dan lenvestisman parfwa i annan bann risk bann risk ki wi parey nou pe vwar ozordi en zoli morso bout teren dan mon distrik pa’n ganny fini devlope pou akonplir son merit.  Akoz  -(laparol i pou Onorab Larue mersi.)

Avek bon lentansyon pou kree loportinite sa devlopman lopital ti pou permet Gouvernman Sesel refer bann pasyan pou kontinyen zot tretman isi menm lokal e ofer sa sans pou bann profesyonnel lasante ki pe viv e travay aletranze ganny sa sans loportinite retourn Sesel e vin donn nou en koudmen dan devlopman nou pei.

Gouvernman Sesel ti pou osi pli byen kapab zer son Bidze, dan bann letan kot pou refer bann pasyan avek en tel fasilite kot savings parey nou dir Minister Lasante ti pou fer pou ede amelyor bann servis par envestir dan kondisyon bann travayer lo Servis Lasante piblik.

Mr Speaker yer dan nou Lasanble piblik in tann dir STC i laboutik malere.  Annou fer byen atansyon; byen atansyon Mr Speaker.  Mon dir sa akoz nou pa devret mon dir sa atansyon a koz nou pa kapab kree presedans ki demen nou kapab tann en Lopital klas i retournen kot enn kot bann napa larzan, e enn kot bann ki annan larzan.  Annou pa retourn sa lepok.

Mr Speaker i enportan ki okenn devlopman ki ganny fer Sesel menm en partenarya avek prive i bezwen garanti touzour garanti akse egalite dan tou son servis.

Sa proze i reste vizyon Gouvernman Sesel.  Onorab Gill bomaten in prezant i montre nou en Master Plan ki Minister Lasante i annan pou fer pou asire pou konfirmen ki wi, Sesel i pare e kontinyen rod fason pou fer sir ki nou kapab ganny en tel fasilite.

Gouvernman i bezwen pran desizyon si i pou kontinyen resers envestiser oubyen non.  Oubyen konsilte avek Nouvobanq lo en kondisyon repeyman lonterm ki pou Gouvernman i fini sa proze e enplimant son master plan ki li menm i a desantraliz serten servis e amelyor serten servis dan nou sistenm lasante.

Mr Speaker mon pou siport Onorab Simon Gill lo son propozisyon pou agrandi Scope Term Of Reference Komite HIV AIDS dan nou Lasanble.  Akoz sa i en propozisyon ki deza met devan nou Lasanble par plizyer Manm.  Mon rapel Onorab Henrie ti enn parmi ki ti siport ki ti koz lo la e la ankor i ganny ranforsi.

Mr Speaker mon pou termin par dir ki nou lo sa kote latab nou senserman krwar dan nou devlopman bann striktir e progranm dan lasosyete ki promouvwar     sak Seselwa, sak fanmir lo sosyete nou pep an zeneral.  Mersi Mr Speaker.

 

MR SPEAKER

Mersi Onorab Vidot.  Onorab Woodcock.

 

HON WAVEL WOODCOCK

Mersi Mr Speaker.  Bonn apre midi tou dimoun, tou Onorab.  Mr Speaker mon pou donn mon sipor total sa Mosyon ki’n anmennen par Onorab Roucou.  Akoz mon senserman krwar ki nou bezwen en Lopital Spesyalize Sesel.

Onorab Vidot in koz lo nou bezwen  fer atansyon 2 kalite klas Lopital.  Lopital pou malere avek Lopital ki i annan larzan.

Me ozordi lafason ki Gouvernman Parti Lepep in anmenn nou Sistenm Lasante isi Sesel ek nou Lopital Mr Speaker ozordi zot in ede kree 2 kalite klas.  Akoz sa bann gro zofisye Gouvernman ozordi zot, zot pa ale dan sa bann Lopital ki zot in ede anmenn li kot i été ozordi lo son zenou.  Tou zot tretman zot al fer dan lopital aletranze alor lekel ki’n kree klas Lopital malere avek lopital ki annan?  Me se Gouvernman Parti Lepep ki’n kree sa Mr Speaker.

E nou ozordi le rezondet ki ‘n nou’n anmenn sa Mosyon se pou nou kapab finalman Sesel annan en lopital spesyalize kot nou bann pasyan Seselwa ki annan bann maladi ki vreman ki sirtou bann maladi ki vreman grav zot kapab ale e met en tretman abordab parey sa bann gro sef pe ganny zot tretman aletranze Mr Speaker.

Mr Speaker ozordi nou annan bokou – si ou get en pe partou bann statistik ki pe sorti i annan plizyer in vwar kantite ka kanser ki ogmante kantite diferan maladi kardyovaskiler e lezot bann maladi nou vwar ki pe ogmante a en rate ase alarman.

E mon senserman krwar kot in ariv en letan kot i plis ki ler ki nou annan en lopital standar en Lopital Spesyalize ki ofer servis lasante avek en standar enternasyonal dan sa landrwa ki’n ganny propoze par Onorab Roucou anal-an Providence ki Onorab Flory Larue ozordi in eksplike pou dir i mezir apepre 25mil sqm. 

Mr Speaker Onorab Gill fek montre nou en master plan pou Minister Lasante.  Me les mon dir ou i annan apepre 5an Master Plan Minister Lasante me ozordi leta nou lasante i pa’n amelyor preski ditou i pe plito deteryore.  Nou pa kapab kontinyen viv dan lepase.  Ki Master Plan, Master Plan i enportan ti annan en master plan pa bokou letan pase oli lenplimantasyon?  Ozordi dan tou biro Gouvernman kot ou pase ou tann Master Plan isi Master Plan laba, si pa Master Plan Mr Speaker ou tann aspirasyon, aspirasyon 2013, aspirasyon 2020, aspirasyon 2030 me kot lenplimantasyon i konsernen Mr Speaker zero degre.

E nou pa kapab kontinyen annan en Gouvernman ki mars koumsa.  En Lopital Spesyalize sa se keksoz ki nou anvi vwar dan nou fitir Sesel pa en Master Plan ki pa abouti dan nanryen.

En Lopital Spesyalize Mr Speaker kot lepep Seselwa e Gouvernman i pa bezwen vwar li pe depans plizyer e de plizyer milyon Roupi tou le lannen pou zot kapab ganny zot lasante.

Mr Speaker ozordi bokou Seselwa i bezwen al trete aletranze.  Pou 2 rezon prensipal limero (1) akoz nou napa kapasite pou donn serten tretman spesyalize Onorab Roucou in koz lo la in mansyonn detrwa sa bann tretman ki Sesel nou pa pe kapab ofer li lo sa nivo.  Parey loperasyon lezo, loperasyon leker, ENT, loperasyon spinal cord i koz lo tretman kanser radiotherapy e plizyer bann lezot tretman ki ozordi Minister Lasante pa pe kapab donn lepep Seselwa.

E sa i en rezon akoz bokou dimoun i forse voyaz aletranze menm a fwa at them own cost pou zot kapab ganny sa bann tretman ki zot bezwen.

2enm rezon Mr Speaker akoz ki bokou Seselwa zot prefere al aletranze pou fer zot tretman se akoz Seselwa in perdi konfyans dan Sistenm Lasante Sesel.  Akoz sa Sistenm Lasante Sesel in fail plizyer dimoun Sesel.

Annefe Mr Speaker mon konn plizyer ka kot dimoun in al lopital e bann diagnose ki zot in gannyen i bann diagnose ki pa’n bon  bann diagnosis ki plito ki pa’n bon.

Bon en senp legzanp en legzanp ase resaman Mr Speaker ki’n annefe in tous mon in tous mon fanmir bokou.  Enn mon tantin ki fek kit nou lafen lannen 2017.  Ler i ti al lopital par lefe ki mank nou bann lekipman standar o nivo e parey mon pe dir en sant spesyalize pou deal avek sa bann ka serye e menm lo kot i konsern kanser.

Ler in al fer son tes laba ou konnen zot in dir li?  Zot dir li zot dir li pou dir i ganny lemoni.  I ganny ‘lemoni zot donn li latizann pou li tret lemoni.

Me nou manm lafanmir nou santi pou dir son leta ki i ti ladan i pa kapab lemoni i bezwen pli grav ki sa.  Alor nou ansanm nou met larzan ansanm nou deside anvoy li pou al fer en check-up L’ Inde. 

Ler in ariv laba L’Inde konman en diagnose i fer son  diagnosis dokter i dir li pou dir i ganny kanser poumon.

In ale vini lopital pou plizyer letan pou mwan e menm lannen.  Zot dir li i ganny lemoni li.

Me ler in al L’ Inde Mr Speaker ki zot in detekte pou dir i ganny kanser e son staz ti ase avanse.  E sa i montre ou Mr Speaker ki fason sa Gouvernman sistenm lasante in fail plizyer dimoun dan sa pei avek bann fo diagnose.  Akoz i mank nou sa bann lekipman neseser i mank nou sa bann lekipman neseser, i mank nou en Lopital Spesyalize pou deal avek sa bann ka koumsa.

Pa fini sa la Mr Speaker s sa ki ti pli worst ki sa L’Inde laba ti dir li koumsa fodre i fer en loperasyon deswit pou li met en tib.  Fodre i fer chemotheraphy e zot ti donn e zot dir li ki kalite latizann ki i bezwen servi pou fer son chemotheraphy ler i retourn Sesel akoz i pa ti kapab afford fer sa tretman L’Inde, akoz ti kout en kantite larzan.

Vre ler in tournen, zot ti di li pa bezwen ki al L’Inde i ava fer son chemotheraphy isi e zot ti osi dir li pa neseser fer sa loperasyon i ok, pa neseser.

Me ler pou fer chemotheraphy sa latizann ki L’Inde ti dir li  fodre i servi zot dir isi nou napa sa latizann nou pou servi en lot alternative en lot latizann i parey menm sa.

Mr Speaker mon krwar pa si sa bann dokter L’Inde zot bann dokter ki fou zot konnen ki zot pe dir.  E sa i montre ou Mr Speaker ennler bann latizann keksoz ki nou gannyen isi i substandard.  E nou bezwen elev sa nivo lasante.  Nou pa pe kapab kontinyelman lannen ale lannen vini  nou pey sepa konbyen deor e Gouvernman osi pe depans sepa konbyen pou anvoy bann pasyan aletranze kan plizyer sa bann pei pli pros avek nou Onorab Larue fek koz lo Apollo L’Inde. 

Eski nou, nou pa kapab fer keksoz koumsa?  Kantite larzan i pou kout Gouvernman Sesel?  Kantite Seselwa ki pou ki olye depans  sepa konbyen mil Roupi i annan ki’n pey milyon Roupi  mon konn en msye Anse Kerlan mon pa pou mansyonn son non in depans sepa konbyen milyon, milyon pou li kapab ganny son lasante.

Mr Speaker eski kan eski Gouvernman Parti Lepep pou pran sa konman en keksoz priyorite pou  fer sir ki nou annan en Lopital lo en standar en Lopital lo nivo enternasyonal Sesel.

Mr Speaker parske tou ka ki mon konnen mon a koz lo en lot ka ase pertinan pa tro bokou letan pas e zis lannen pase en pti fiy ki ti bezwen fer en liver transplant ou konnen ki Minister Lasante ti dir Mr Speaker, zot ti dir ki zot pa kapab fer nanryen pou li.  Zot ti die ek manm fanmir les li mor an pe.  Parey mon frer Onorab Hoareau in dir nou pa kapab met en pri pou lasante.  Nou pep i vin premye.

Ler mwan mon ti apros dokter e menm Minister Lasante an regardant sa ka sa pti fiy en pti fiy Praslin,  mon ti ganny dir son loperasyon i tro riske.  E i pou kout Gouvernman tro bokou larzan parol sorti dan labous Minis li menm Mr Speaker.

Ozordi Mr Speaker apre ki fanmir in tap laport avek presyon ki’n ganny mete lo Minister Lasante sa pti fiy finalman i nobou al L’Inde i ti napa bokou letan pou li viv e ozordi Mr Speaker avek tretman ki sa pti fiy in gannyen L’Inde sa pti fiy i vivan ozordi!  Son loperasyon i en sikse.

Mr Speaker si nou Sesel nou deside pou envestir menm si fodre rod foreign investment tap en pe laport nou bann zanmi aletranze i primordyal ki nou annan en tel lopital isi landrwa nou annan teren in fini prepare nou bezwen envestir dan en fasilite koumsa.

Me sel problenm parey lezot Onorab in koz lo la Mr Speaker se menm si bokou dimoun i al fer zot tretman aletranze loperasyon parey sa pti fiy ti fer son liver transplant Mr Speaker me i bezwen retourn L’Inde a plizyer repriz pou li fer bann check-up. 

        Me si nou ti annan sa Lopital isi Mr Speaker si nou ti annan en lopital spesyalize isi i ti kapab fer son check-up isi olye ki fanmir i depans sepa konbyen mil pou li al aletranze pou fer check-up akoz ennler sa bann case Mr Speaker sirtou kot i konsern bann tretman aletranze sirtou ler ou pe rankont kanser kekfwa en manm fanmir in al L’Inde e en dimoun in  L’Inde e en manm fanmir in al ek li.

Me selman ennler ler ou laba deor ennler  menm sa dimoun ki pe donn sipor i bezwen sipor.  I pa fasil i tough Mr Speaker.  Me si nou annan en tel lopital isi tou manm fanmir pou la pou donn sa sipor.  Ou konnen bann maladi ki terib i vreman, vreman terib pou vwar sa dimoun dan sa leta ki ladan sirtou apre ki’n fer chemotheraphy ouswa radiotheraphy ou get sa dimoun ou leker i fermal.  E menm sa dimoun ki pe konsole i sape.  I dan depresyon e i bezwen en fanmir otour li pou ed li donn li sa sipor.

E pou sa rezon Mr Speaker ki mwan  mon dir Gouvernman  i bezwen i bezwen i bezwen rod en fason pou fer sa vin en realite dan nou pei Sesel.  Si ti annan sa bann servis medikal spesyalize Sesel parey mon’n dir pli boner Mr Speaker ti pou gou ti pou kout Gouvernman bokou, bokou pli mwens.  E pa zis Gouvernman lepep Seselwa an zeneral.

Parey Onorab Roucou in koz lo la ozordi nou bezwen plizyer e menm plis tretman spesyalize. Parey mon’n mansyonnen pli boner bann tel treatment pou lezo, leker spinal cord sirtou kot i konsern kardyovaskiler e menm dyabet osi.  Nou annan bann servis spesyalize ki nou bezwen ozordi.  E Gouvernman i bezwen rod en fason pou fer sa vin en priyorite.  Minister Lasante i bezwen fer en fason.

Non selman nou bezwen lopital spesyalize Mr Speaker me nou osi nou bezwen plis spesyalis.  Mon krwar Onorab Hoareau lezot Manm in mansyonnen, in nonm detrwa bann spesyalis dan plizyer domenn dan plizyer dan lasante ki pe travay aletranze ki prefere aletranze kekfwa sa Scheme zot pe gannyen zot ganny valorize.  E nou Sesel nou bezwen rod en fason pou ankouraz sa bann dimoun pou vini why not donn en sipor dan sa Lopital?

Zisteman ozordi mon fek koz ek en dimoun i dir mon ozordi pou ou vwar en spesyalis ENT ennler i pran ou en mwan de mwan avan ler ou kapab vwar en spesyalis ENT.  I pa zis ENT i lezot spesyalis ozordi ou bezwen  met apwentman ou bezwen al met ou non lo en lalis ennler ou espere ou espere ziska amenn konmsi koze avan ler ou kapab al vwar en spesyalis akoz i annan en mankman spesyalis.

Ok?  Me avek en lopital spesyalize avek sa bann spesyalis ladan i kapab ede redwir en pe sa back log tou sa bann dimoun ki pe espere pou vwar en spesyalis.

Mr Speaker bann sif ki Onorab Roucou in koz lo la in donnen ozordi pou mon i vreman alarman.  I koz lo tretman maladi aletranze dan sa dernyen 4an  in mansyonnen detrwa sif 2015 in mansyonn i annan 186  pasyan ki’n kout Minister R20milyon.  2015 ti annan 184 pasyan ki’n kout Gouvernman R29milyon.  2016 254 pasyan ki’n kout Gouvernman R30milyon.  2017- 254 pasyan ankor ki’n kout Gouvernman R36milyon e an tou ki fer apepre 115milyon pasyan Sesel ki’n bezwen al pran tretman sorry R115milyon ki’n ganny  depanse pou bann pasyan al fer tretman dan bann pei etranze.

Mr Speaker e nou’n vwar pou dir bokou sa bann ka parey sa bann statistik i montre, i sirtou konsern bann case kanser e osi bann ka kardyovaskiler e lezot maladi ankor.

E parey mon’n dir Mr Speaker en Lopital ki donn sa bann servis ki pe fer sa bann tretman i pou ede koup kou Gouvernman.

Plis fanmir pou nobou kapab al vwar sa bann pasyan si zot dan sa Lopital isi pou donn sipor sa bann fanmir ki pe soufer avek nenport ki maladi.

Mr Speaker Onorab Roucou e osi lezot Manm in osi koz lo medical tourism ki mon krwar sa i en keksoz vreman ki nou bezwen venture ladan i vreman enportan.  Akoz mwan mon senserman krwar ki i pou anmenn bokou reveni pou Sesel.  I annan Onorab Roucou in partaz avek nou ki  L’Inde in fer li anviron 7.8bilyon Dolar avek medical tourism.   Me sa i en keksoz ki nou dan nou caucus se lo kote LDS nou’n koz bokou lo la.  Onorab Leader Lopozisyon Onorab Ramkalawan a plizyer repriz in koz lo medical tourism. 

        E en keksoz osi ki nou ti fer dan L’Inde e de nou bann Manm nou’n mansyonn sa.  E nou annan  bann MOU avek Gouvernman L’Inde ki mon asire avek partner aletranze nou kapab fer en pti pe resers rod en pti pe plis lenformasyon lo sa size.  Me mon krwar si nou invest ladan, nou annan en tel lopital isi mon senserman krwar ki i pou anmenn en kantite larzan.  Mazinen i dir ou en senp bypass Onorab Roucou in mansyonnen i kout 140mil Dolar.  Mon krwar en lopital L’Amerique ou’n mansyonnen 140mil Dolar.  Mazinen menm si ou pa pey sa 140mil Dolar nou pe sarz en fre en pti pe pli ba.  Mon asire i pou anmenn en reveni.  Sesel nou en pei egzotik,  nou en pei tropik, nou annan sa bon ler nou natir nou verdir i vreman en landrwa ideal pou bann dimoun ki fer medical tourism zot vini an menm tan ki zot pe repoze zot pe pran zot bann tretman an menm tan Gouvernman lepep si swa pe benefisye avek lenvestisman ki pe antre dan nou pei.

E mwan mon santi ki Gouvernman – I mean si ou konnen si zot pa pare pou fer li si zot pa kapab fer li LDS ki mannyer.  Nou pare pou fer li.  Zis sel plas les nou rantre akoz parey Onorab Ferrari in mansyonnen pli boner.  Lespri  nou annan nide nou annan  mon konnen ler zot pe vin zot pe get look up to nou pou nou donn en pe lide en pe konsey ki mannyer pou anmenn sa pei pli devan.

Me selman ou konnen si zot santi pou dir zot intellectually spent.  Mon krwar in ler pou zot sed plas e les LDS travay.  Ozordi mon bann frer ek ser menm lo lot kote latab zot bezwen admet mon pou dir nou, nou Sistenm Lasante in fail e nou bezwen jump-start li ankor.

Se pu sa rezon ki ozordi Onorab Roucou i met sa Mosyon devan Lasanble Nasyonal akoz nou santi ki lepep Seselwa  i merite en Lopital parey en Lopital Spesyalize ki pou deservi nou pep Seselwa.  Mersi Mr Speaker avek sa mon pou donn laparol mon pou donn mon sipor a sa Mosyon.  Mon pou demann bann Manm lo lot kote latab osi pou donn sipor lo sa Mosyon.  Mersi bokou.

 

MR SPEAKER

Mersi Onorab Woodcock.  Onorab Aglae.

 

HON EGBERT AGLAE

Mersi Mr Speaker.  Bonn apre midi tou Manm e tou dimoun a lekout.  Mr Speaker mon’n ekout atantivman bann deba lo sa Mosyon depi bomaten.  E mon santi ki Mosyon i annan en merit ler nou pe koz en servis lasante.

Mr Speaker avan ki nou pran en vot lo sa Mosyon sirtou lo kote latab nou bezwen konpran ler nou pe koz en servis spesyalize.  Kwa sa ki en servis spesyalize?

Mr Speaker ler nou pe koz lo sa konteks servis lasante byensir nou bezwen konmans kot i ti konmanse.  Sa i en lasante primer.  Si ozordi mon’n ne e mon ankor pe viv se gras a en swen lasante primer ki nou tou la anndan nou’n gannyen ki’n ne Sesel.

E ler nou pe get lepase kot Gouvernman ti la Gouvernman SPPF a sa letan nou vwar pou dir ti annan en plan.  En plan pou donn lasante pou sa pep Seselwa.  Akoz avan ki nou ti ganny nou liberasyon nou ti kapab dir.  Ti annan en servis lendepandans ti annan en servis lasante ki pa ti ekitab.  I ti defavorize pou sa pep Seselwa.  Ti annan sistenm klas.

E depi ler Parti SPPF in vin o pouvwar nou’n vwar pou dir ti annan en desantralizasyon servis lasante.  Ozordi si nou annan nou 17 klinik i annan bokou nou la bann MNAs ki al dan bann distrik dan nou Klinik se gras a en sistenm desantralizasyon pou lenfrastriktir ti bezwen ganny fer pou kapab annan en servis lasante a laporte sa bann zabitan.

Nou bezwen rekonnet sa.  Mr Speaker ti konmans koumsa.  Ozordi bokou nou i vin paran bokou nou ki annan zanfan se gras a en servis lasante ki permet ki ozordi nou ankor pe sirviv.

Mr Speaker i byen nou reve nou’n ariv en moman letan kot 10an, 15an pase nou ti pe lager pou nou ganny Klinik.

Ozordi nou’n ariv lo en pwen kot nou pe demann en Lopital Spesyalize. Napa nanryen mal ek sa i byen.

Me selman sa ki nou bezwen konpran pou dir nou napa en Sistenm Lasante ki’n fail.  Nou annan en sistenm lasante ki annan defi avek legzizans sa pep ozordi.

Mr Speaker mwan en dimoun ki’n ganny sans al dan L’Inde avek mon zanfan pou swiv servis spesyalize.  E laba sa bann letan pa akoz mon koneksyon politik sa ti an 2009 mon pa ti ankor ni pou reve pou vin dan politik.  Pa ti faver personn.

Me mon ti ale akoz Minister Lasante ti annan en progranm ki kapab permet ou ale pou swiv tretman.

E laba Mr Speaker pa zis Seselwa ki ti ale laba Chennai laba.  Laba ti annan European ki ti pe swiv tretman.  Ti annan Américain ki vin swiv tretman.  Pourtan dan zot pei i pli devlope Sesel me selman  zot vini dan sa landrwa pou swiv tretman.  I kapab pli bon marse wi.

Mr Speaker lasante sa pep an mezir ki popilasyon i kontinyen grandi me prediksyon ki ozordi di-si 2035 nou pou annan nou apepre 106mil zabitan.

E ler mon konpar sif ki ganny donnen lo bann kou kantite dimoun ki Minister ri anvoy aletranze.  Lannen pase ti 254 a en to plis ki en milyon Dolar.  Ki fer ekivalan 0.2poursan 2.5poursan dimoun lo 90mil dimoun ki pe swiv tretman aletranze.  I pa ankor arive  1poursan.

Me nou rekonnet Mr Speaker, ki i annan dimoun osi petet ki li ler in ariv kot Minister Lasante in al rod lezot lopinyon.  I. santi pou dir nou an retar.  Annou mazinen pou dir Minister Lasante li menm li i annan en Bidze, kot i konsern overseas treatment.  Tou dimoun ki santi li i annan en malad i ti a kontan petet ale al fer tretman aletranze.  Me eski i posib pou nou pran tou anmenn en sel kou?  Non i pa posib.

Mr Speaker en keksoz enportan mon krwar nou devret pe koz lo la, se en proper Diagnosis Centre.  Nou ti ganny dir dan lepase ti annan en sant ki ti ganny mete a dispozisyon Minister Lasante.  Me nou vwar pou dir ki i annan  bokou defayans.

Si nou arive nou dan sa pei detekte maladi ase pli boner i pou evite i annan bokou dimoun ki pou bezwen al aletranze e fer serten tretman.  Akoz mon dir sa?  Nou’n ganny bann legzanp parey kanser ki bokou ler i vini ki raporte i vin  lo en staz 3enm katriyenm staz bokou ki kapab ganny fer ler ou vwar ou ariv lo bann staz parey.

Alors anliny avek en  sant spesyalize nou bezwen annan nou en proper Diagnosis Centre ki pou konplemant sa de keksoz.

Mr Speaker i annan ki’n dir pou dir Lopital in fail, servis pa bon me pou mon Mr Speaker si en lopital pe fail si servis pa bon toulezour nou ti pou tande Seselwa pe mor isi Sesel.  Ti pou annan plis Seselwa  ki ti pou mor.

Mr Speaker sa parti ki o pouvwar depi o konmansman in fer sir ki s aki ne depi son neonatal ziska son geriatric i ganny swen debaz.  Napa ki’n refiz-e ganny tretman Sesel.  Kot dokter in kapab fer in fer.

Annou pa bliye osi pou dir se dokter ki pran desizyon medikal pa Minis. Minis pa en dokter li.  E sa nou bezwen konpran tre bye.  Depi ler nou pe fer sa politik nou bezwen konpran konteks ki mannyer servis medikal i marse, depi son latizann ziska son dernyen tretman depi sa bann ki ou gannyen ki mannyer i fonksyonnen.

Mr Speaker nou tou ki la nou reve si demen nou annan en maladi e mon mazin bann dimoun Seselwa ki pe viv ek en maladi ki nou kapab ganny en rekour.  Ki ler nou raporte i pa pe dir nou reste nou 3 mwan ouswa 2 semenn pou nou viv.

Wi nou pou bezwen en servis spesyalize.  Me selman  nou bezwen konpran pou dir sa servis spesyalize i vin avek son bann lezot keksoz.  I vin avek son kou.  Nou’n koz lo sa later ki laba Roche Caiman.

Mr Speaker parey i dir ou si Bondye i permet keksoz arive keksoz pou arive.

I fer m on reflesir demann mon lekor kestyon petet si sa lopital ti’n ganny fer a sa moman letan si nou Seselwa ordiner ti pou benefisye laba li.  Ouswa nou ti pou vwar zis en group petet ki li son  mwayen i permet ki pou ganny lasistans.

Me i byen nou’n retourn ozordi ek sa Mosyon pou konsider a en moman kot Prezidan Faure in set the Board in dir annou koz lo nou lasante.

Onorab Ferrari in dir napa en plan i annan zis portre me sa ki i enportan se ki Onorab Ferrari Mr Speaker portre i koz mil mo i dir ou.  Sa ki enportan.

E nou konman bann politisyen responsab ki krwar pou dir Seselwa i bezwen en pli bon meyer servis lasante nou bezwen vin pli responsab dan nou largiman.

Mr Speaker en Lopital nef li menm li i pa ase.  Ou kapab donn en travayer en pli bon zouti pli nef.  Me si pa konn servi i pa pou fer en bon travay.

E se sa prezan ki nou bezwen lans en lapel.  Nou annan bokou Seselwa ki kalifye ozordi.  Nou annan bokou Seselwa ki’n kit pei ki’n ale pou diferan rezon.  Nou bezwen anmenn zot back – ganny zot back.  Akoz si demen nou pe tonm dakor Gouvernman  i dir annou ale.  Annou konstri en batiman avek tou lekipman nou napa travayer.  Ki swen nou pou donnen?  Eski nou pou kontinyen vwar etranze ek etranze e nou menm nou, nou pou dir i tro bokou etranze.

Alors sa bann keksoz i bezwen marye ansanm.  Si  nou pou dakor pou nou annan en sant spesyalize i bezwen en Sant Spesyalize i annan tou son  laspe kreol Seselwa ki on Board.  Avek son kalifikasyon.  Nou bezwen Seselwa ki’n fini train e nou bezwen anmenn zot back. 

Mr Speaker en keksoz ki nou bezwen balanse osi avek en servis spesyalize Sesel.  Se son kou ler ou pou konpar li avek sa tretman ki deor.

Sesel nou dir pri lavi i  ser.  E ler ou pou konpar en pei parey L’Inde  kot li i annan en kou lavi en pe pli ba e son reminirasyon an term saler ler i pou pey en travayer ler ou pou anmenn li Sesel ou pou bezwen pey li plis.  Akoz pri lavi standard of living Sesel i bokou pli o.

Prezan ler ou pou konpar sa ou pou bezwen mazinen eski i pou vo lapenn pou nou  annan en servis isi Sesel spesyalize e ouswa nou pou kontinyen annan enn kot nou pou anvoy zis nou dimoun deor.

Mwan pou mon ler .nou pe koz servis spesyalize nou bezwen vwar lekel bann maladi ki komen isi ki pe atak nou Seselwa ki pe fer nou Seselwa perdi son lavi a pli vit.  E ler nou ava tonm dakor lo sa akoz servis spesyalize i annan diferan i annan tro bokou maladi pou nou kapab anmenn tou isi Sesel dan servis spesyalize.

Petet i annan kanser nou a dir ok annou spesyaliz dan kanser.  Nou annan bann problenm kardyovaskiler nou ava ganny spesyalis dan kardyovaskiler.  Nou annan bann problenm striktirel i konsern lezo, nou a dir ok annou al ladan.  Me selman i annan serten keksoz ki pa komen nou pa pou kapab petet pe dir be annou ale.

Parey nou dir en heart transplant konbyen Seselwa ki dan en lannen i bezwen al fer heart transplant, i minim i pa bokou.

Eski nou pou envestir dan serten lenfrastriktir dan lekipman pou fer sa transplant si nou volim kliyan i pa pe reflekte sa benefis ki ou pou’n depanse lo la.

Onorab Roucou in koz lo medical tourism.  I byen.  Eski ler sa touris li i pou deside pe vin Sesel i pou balanse li.  Eski ler i pou al fer en medikal spesyalize Sesel s i pe kout mon Sesel 100mil Dolar e dan  L’Inde pe kout mon 50mil Dolar.  Byensir i pou dir be mon pou al dan L’Inde akoz money spend.

        Me selman Mr Speaker i pou en lot benefis adisyonnel si petet avek serten marketing mon kapab dir kot ou balans sa ki Sesel i ofer an menm tan ki ou pe swiv ou tretman sa petet i ava pran en rekour pou nou kapab ganny en pe Foreign Direct Investment avek sa bann kliyan ki pou vini.

Mr Speaker nou pa kapab ferm en lizye lo en Seselwa ki pe soufer.  Mon pou dakor ek sa.  E mon nou pa pou vot kont sa Mosyon mon pou donn sipor Onorab Roucou in pas atraver Minister Lasante e osi konman en koleg.  E mon santi pou dir nou pou bezwen kontinyen pouse pou  ki Sesel i ava annan li en landrwa kot ler en dimoun i ale ek en maladi i va diagnose i ava ganny anvoye en landrwa apropriye pou li kapab swiv tretman kan i ankor boner me pa ler in tro tar.

Mr Speaker i touzour dan Manifesto Parti Lepep/ SPPF pou donn en swen lasante tou Seselwa.  Mersi.

 

MR SPEAKER

Mersi Onorab Aglae.  I reste 8 Manm lo mon lalis.  Plis mover Mosyon pou fer en konklizyon.  Nou pa pe pran Break.  Mon propoze ki nou ale ziska 4er 4:15  E si nou pa fini Mosyon nou ava adjourn nou ava kontinyen semenn prosen ek Mosyon continuation if debate semenn prosen ok. 

        Prosennman lo mon lalis mon annan Onorab Loizeau.

 

HON NORBERT LOIZEAU

Mersi Mr Speaker.  Bonzour tou dimoun.  Bonzour dimoun a lekout.  Mr Speaker mersi pou donn mon en pti sans pou  propoz an siport-an Mosyon Onorab Roucou.

Mr Speaker pou en pei annan en lavenir briyan, pou en pei fer progre, pou en pei annan en lafors travayer solid i bezwen ki sa pei i annan sa ki pli meyer an term lasante pou son pep.

Mr Speaker mon pe dir akoz pou mon  lasante i en keksoz primordyal e ki lepep Seselwa e nenport ki pei i bezwen met sa a laporte son pep.

Mr Speaker mon kontan ki Onorab Roucou in vin avek en tel Mosyon, akoz aktyelman dan nou pei i annan bokou malad ki pe rantre.   E bokou nou bann dimoun i al rod swen pli lwen.  E sa i tro bokou Mr Speaker akoz an term larzan parfwa sa dimoun i pa li tousel e al dan en lot pei.  I bezwen annan en dimoun ki akonpanny li.  E la kot nou vwar i pa pey zis pou tretman ki sa dimoun pa gannyen.  Me i pe osi pey pou akomodasyon ki sa lot dimoun ki pe akonpanny li i bezwen ariv laba.

E Mr Speaker sa i pa pou nanryen i koute.  Sirtou bann dimoun ki en pti pe mwen fortinen, ki anvi ganny zot lasante.

E Mr Speaker e mon rezon ki mon kontan mon pe siport sa Mosyon in vin devan nou akoz en problenm isi  Onorab Aglae in koz lo diagnosis, nou annan en problenm lo sa kote.   Mon pa pou al pli lwen Mr Speaker pou lemoman isi kot Lopital Sesel pou fer MRI i pran 3 mwan pou ganny rezilta.  Nou napa bann  profesyonnel ki kapab fer sa Mr Speaker.

E parfwa ki nou’n ganny nou rezilta ler ou al deor pa li problenm ki nou annan.  Nou konn sa tre byen Mr Speaker i annan kot i annan bann dimoun ki ganny anvoye deor pou en legzanp kanser tete isi zot in fer en pti loperasyon zot in tire.  Ler i ariv laba zot dir li ki i napa sa i annan en lot maladi.

Nou annan en gro problenm Mr Speaker lo kote diagnosis.  E Mr Speaker parfwa osi kan ou ganny pasyan ki al trete deor, apre ki i retournen Mr Speaker napa okenn bon swivi ki ganny fer lo sa pasyan.  Napa okenn gran swivi e zis in al trete ou retournen apre ou vin end up kot ou ti ete.

E parfwa pou li retournen pou li retournen pou al kontiny son tretman i pa fasil.  Menm si Lopital Victoria Lopital Sesel ki’n anvoy zot al fer sa tretman apre ki zot in retournen si konplikasyon i retournen still Lopital Sesel i pa kapab fer zot  tournen pou zot al refer zot  check-up al refer zot tretman.

E la Mr Speaker i fer mon rapel i fer mon mazin en zenn manman ki’n mor dernyen fwa ek kanser ki’n kit deryer 3 zenn zanfan ki ankor dan primer.  I ti al Sri Lanka i ti’n fer son tretman tournen byen, panse tou keksoz i ok.  Pas en pe letan i devlop ankor in ale vini kot Minister Lasante zot pa’n kapab fer naryen Mr Speaker eskan ler in past away.

Be si vreman ti annan sa fasilite en fasilite o nivo kot i konsern bann maladi serye Mr Speaker, petet ozordi sa manman ti ava kapab la.  Nou pa kapab re anvoy li dan L’Inde petet i ti kapab al dan sa landrwa, dan sa Lopital ganny serten swen spesyalize kot ti a kapab ed li petet viv ankor en pti pe pli letan Mr Speaker.

Me vi ki nou napa sa laplipar di-tan tou nou bann pasyan ki sorti al trete deor zot end up perdi zot lavi Mr Speaker dan nanryen ditou.

E la mon konnen ler nou’n koz lo sa fasilite spesyalize Onorab Gill, Onorab Simon Gill in dir pa tou dimoun petet ki pou kapab afford pou zot peye pou sa swen lasante.

Me Mr Speaker la i la kot Gouvernman li i bezwen fer son bout.  Sa ki kapab peye i ale i peye.  Me bann ki pa kapab parey Gouvernman pe fer la pe anvoy son pe anvoy zot dan L’Inde Gouvernman i kapab anvoy zot pa bezwen anvoy, dan L’Inde.

        E aktyelman Mr Speaker dapre konpran ler mon’n ekout bann statistik larzan ki nou pe peye pou en pasyan pou al trete dan L’Inde avek fasilite spesyalize isi lo nou later Sesel posibleman nou kapab tret 3 pasyan avek.  Sa ki mon pe tande avek bann profesyonnel lasante.

E se pou sa rezon mwan mon krwar en fasilite o nivo, i enn ki nou bezwen annan isi pou sey tir en pe kou lo Gouvernman.

Mr Speaker ozordi nou pe koz lo medical tourism.  I annan viziter ki i anvi vin Sesel.  Mwan mon konnen i annan en fwa mon ti al vakans L’Angleterre ti annan serten dimoun ki mon’n koz avek zot dir mon zot anvi vin Sesel mon ti annan en zanmi i ti annan en maladi e dapre son resers ki’n fer isi, i napa nou pa kapab trete sa bann keksoz.

Me li i anvi vin konze me selman i santi i pou vin konze si i ariv i ganny konplikasyon kot i pou ale.

E mon’n tann Onorab Aglae in koze in dir ler i ti al ek son zanfan i ti vwar Americain, Anglais tou lezot Nasyon i vin dan L’Inde e ler nou Onorab Roucou pe koz lo medical tourism se sa Onorab Aglae ki mwan mon pe gete mon.  Kot en dimoun i kapab al son vakans dan L’Inde, Sri Lanka ou kapab nenport ki Nasyon ,me selman an menm tan ou kapab ganny tretman.

E se sa ki nou anvi  isi nou.  En fasilite o nivo profesyonnel kot en dimoun pa zis pou Seselwa en dimoun i vin son vakans me pandan son letan vakans si i annan son tretman ki i ti abitye pran i kapab al laba e ganny son tretman.

E parey me selman Mr Speaker parey Onorab Roucou in eksplike sa bann loperasyon, spesyalize Mr Speaker ki mansyonnen i bezwen annan en lafors spesyalize dan diferan domenn travay, la nou pe koz ners, dokter, bann teknisyen.

E la mon pe vin lo sa pwen Mr Speaker personnelman akoz mon’n koz ek enn serten en de bann dimoun dan en de dimoun ki travay kot lasante spesyalman bann ners.  Zot dir mon be ki pou arive avek e tel fasilite  i vini.  Eski ou pa krwar nou bann profesyonnel pou le al laba Lopital Sesel trankil.

Sa i en kestyon ki mon’n koz ek Onorab Roucou mon mazinen an term sa Mr Speaker nou bezwen fer sir ki nou annan bann formasyon pou sa bann dimoun.  E nou bezwen fer sir ki an relasyon, ek sa ki sa profesyonnel pou gannyen laba kot sa Lopital  i pou napa en gran margin ki pou fer ki sa dimoun pou le kit lot kote pou li al laba.  Sa i en keksoz ki nou pou bezwen si i arive sa i vin an mars nou pou bezwen get seryezman ladan Mr Speaker.

Mr Speaker avek en tel fasilite i pou osi en loportinite devlopman a lavenir pou bann zenn ki anvi pran en karyer dan lasante.  Nou, nou pa pe koz  dan 3an – 4n nou.  Nou pe koz lavenir.  Nou pe koz ankor dan 5an dan 10an pete i enportan bann zenn ki i anvi en karyer lasante a lavenir i konmans reve Mr Speaker pou annan en landrwa avanse pou zot travay e fer zot karyer.  E pou osi met zot karyer ladan.

E  Mr Speaker nou isi nou pe mazin en fasilite o nivo nou.  O nivo enternasyonal dan en lenfrastriktir modern.  Ki pou ede osi donn en progresyon dan zot karyer ler zot in antre ladan.  Se sa ki nou, nou pe mazinen.  Zot pa pou bezwen kit Sesel pou zot al travay aletranze pou zot kapab progrese dan sa domenn lasante.

E la Mr Speaker mon anvi pas lo en keksoz ki Prezidan ti dir dan son Press Conference.  Prezidan ti dir i annan  en pti fiy 8an ti ekri en let i ti dir li i anvi vin en dokter.  I ankourazan Mr Speaker pou mon en papa  ki i annan en pti fiy 8an, pou mon i ankourazan en pti fiy sa laz Prezidan pe dir sa.

Alors mwan mon anvi siport sa Mosyon Mr Speaker.  Mon anvi siport, sa Mosyon pou mon pou ki sa fiy 8an ki pe reve pou li vin en dokter ler i arive i vin en dokter i ava annan en fasilite pou li kapab vin pourswiv son karyer ladan.

E mon anvi dir paran sa zanfan pou dir sa zanfan ki nou kot LDS ki nou pa’n vwar sa let nou annan en plan pou li kan i vin dokter.

Nou anvi ki ler i vin dokter i vin travay dan en kondisyonn ki pli meyer ki meyer Mr Speaker.

E Mr Speaker en terminant mon anvi dir en keksoz mon konnen ki petet sa proze ki nou, nou pe koz lo la pa pou fini deswit.  Me selman an atandan mon ti a kontan ki Gouvernman vi ki aktyelman dapre ki mon’n koze avek bann profesyonnel ki travay kot Lopital Sesel zot annan serten departman ki pe vin ek bann ka spesyalize parey nou pe koze.

Zis problenm ki zot pe gannyen se resours.  Napa resours napa rannman napa naryen ICU i tro pti sistenm pa pe extend zis nou an vi ki Gouvernman pou lemoman met en pe resours an-a-tandans ki sa proze i ganny fer pou nou kapab kontinyen ed nou bann dimoun ki annan bann problenm lasante ki grav.

E nou Mr Speaker nou lo sa kote nou kontan vin ek en bann propozisyon serye nou.  Nou parfwa nou vin ek   bon propozisyon.  Nou, nou vin met li lo latab nou.  Akoz nou lo Lopozisyon nou anvi vwar keksoz marse.

Selman Mr Speaker zot laba toultan zot vwar en problenm zot.  Selman zot laplipar di-tan zot pa met naryen zot.  Naryen pa mete.  Nou konman nou met en keksoz apre nou vwar i taye enn in met en zafer.  Legzanp lotrozour ler Leader Lopozisyon in met en zafer lo SBC apre nou vwar en lot i met rn zafer lo pri lavi.

Konmsi nou, nou toultan  take the lead Mr Speaker an terminen nou anvi dir lepep Seselwa  ki nou dan Lopozisyon LDS nou pou toultan pran sa lead nou pou toultan met bann propozisyon for bann propozisyon ki pou  bon pou Seselwa parey sa fasilite spesyalize kot Onorab Roucou in vin avek.  E ler nou vini nou vin for solid serye. E Mr Speaker avek sa mon anvi dir ek Onorab Roucou fye lo mwan pou donn  li sipor akoz Mosyon i bon Mosyon i annan merit e mon vwar kote Seselwa pou benefisye ladan.  Mersi Mr Speaker.

 

(APPLAUSE)

 

MR SPEAKER

Mersi Onorab Loizeau.  Onorab Sophola.

 

HON NOLINE SOPHOLA

Bonn apre midi Mr Speaker.  Tou Manm Onorab, e tou dimoun ki a lekout.  Mersi Mr Speaker.

Ler nou get dan Sesel nou kapab konstate ki Gouvernman in fer bokou dan domenn Lasante.  Par egzanp nou vwar ki lamazorite distrik i annan klinik oubyen lopital.  E i ankor pe fer.  I pe kontinyelman ogmant fasilite ledikasyon staff e osi envestir dan konstriksyon.  I pe kontinyen anmenn inovasyon dan tou sa ban n departman avek bi donn tou ;Seselwa en meyer sistenm lasante.

I vre ki nou annan bokou defi pou simante dan sa Minister.   Akoz la se lavi dimoun ki nou pe travay avek.  I pa fasil.  Me lavolonte Gouvernman pou fer pli byen i touzour la.  Dan lemonn  preski toulezour i annan bann  nouvo maladi ki ganny dekouver.  E Sesel i pa eparnye ladan.

Se pou sa rezon ki Bidze sa Minister i parmi pli gro Bidze dan nou pei pou  li kapab fer fas avek larealite lemonn.

Mon vwar li normal pou ganny sa gro Bidze akoz avan tou popilasyon an bonn sante mantal e fizik e edike i pli gran larises en pei.

I vre ki Minister Lasante in envestir bokou pou anvoy pasyan trete aletranze.  Toulezour i annan enn ou de pasyan ki pe kit pei pou al lo tretman avanse.

Me eski i annan en lot swa?  Non, akoz ziska prezan Sesel pa ankor kapab ariv lo sa nivo ki nou ti a swete arive pou ed tou nou, bann pasyan.

Mr Speaker me fodre byen note ki pa zis Minister Lasante ki envestir.  Nou bann frer ek ser Seselwa zot osi zot depans bokou pou al aletranze pou ganny en servis spesyalize.  Oubyen ganny en 2enm lopinyon lo zot lasante.  Sa sityasyon i aplik pou tou Seselwa san eksepsyon.

Sa traze i kout bokou lo bann fanmir ki  vwar zot pe depans tou zot lekonomi oubyen zot bezwen andet zot ek en loan.  Zot napa swa.  Akoz nou tou nou konnen.  Ki si nou pa an bonn sante nou pa kapab viv en lavi normal.

Mr Speaker loter Mosyon pe demande ki Gouvernman i revwar sa batiman anal-an Providence ki ti inisyalman pou fer en Lopital Spesyalize.

Mr Speaker lannen pase pandan ki mon pe dir mon ti pe diskit vizyon Digwa pou lopital La Digue avek Minis Adam i ti koz lo en Sant Spesyalize lo Mahé.

Alor en tel sant ti san dout enn parmi bann plan ki Minister Lasante ti annan pou met an mars.

Me kote ti pou fer sa?  Sa i en lot zafer.  Fodre no u demann sa ki ansarz later pou donn nou en teren.  Definitivman sa i pou en gran par annavans dan Sistenm Lasante.  Nou bezwen vin pli inovativ avek larealite lemonn.  Nou popilasyon pe kontinyelman agrandi pe vyei.  Lopital Sese l pe vin tro pti.   Nouvo ka maladi pe ganny dekouver.

Alor i toutafe normal ki nou annan, en nou vo lopital plis spesyalize ki sa enn aktyel pou ki pasyan a santi zot pli konfortab.

Mr Speaker mon senserman krwar ki tou popilasyon pou akeyir sa nide annan en Sant Spesyalize Sesel.  Nou tou nou realize ki i annan en tel sant pou ed bokou dimoun endividyelman e osi tir sa kou finansyel enorm lo Minister Lasante.  Pasyan pa pou bezwen al aletranze otan ki posib.  E sa pou fer li pou fer ki mwens larzan ki pou ganny sorti an pei.  E sa larzan i a ganny servi dan sa sant avek sa bann pasyan.

Sa i a fer Sistenm Lasante i va vin pli konpetitiv e anmenn amelyorasyon dan lafason ki servis i ganny delivre.

Mr Speaker konman en Manm Komite HIV and AIDS mon siport anmenn sa nide anmenn par Onorab Simon Gill pou elarzir sa Komite pou sa pwen soustenabilite dan Sistenm Lasante ki Prezidan Faure ti ko z lo la Leta Lanasyon an 2018 i a kapab pli byen ganny diskite pou ki aksyon a kapab ganny pran.  Apre tou nou tou nou pe travay pou Sesel pou Seselwa.

Mr Speaker fodre byen note ki Konstitisyon pei Lartik 29  i fer provizyon  pou don tou sitwayen swen lasante primer gratwit dan lenstitisyon Gouvernman.  E i osi fer mansyon ki i posib pou annan bann letablisman medikal prive dan pei.   Akoz mon krwar akoz avek la demokrasi ki nou a pe viv ladan, sitwayen i lib pou fer zot swa.

E se pou sa rezon ki dan mon  bann sizesyon mon pou anmenn partenaire prive.

Si Gouvernman i deside met an aplikasyon sa Mosyon mon pou propoze ki i eksplor tou posibilite posib.

E tout an fezan sa Mr Speaker permet mon pou fer kat sizesyon.  Premye ; en opsyon se les sa sant antyerman antreprann par prive Seselwa.

2enm ; oubyen ant lasosyasyon prive Seselwa e etranze.

E 3enm ; swa pou li asosye avek en Gouvernman en pei zanmi ek enn de prive lokal.

E katriyenm avan ki sa proze i materyalize mon ti la swete ki Minister Lasante i konmans  mazin dan train bann spesyalis Seselwa pou travay dan sa Sant Medikal.  Pou ki nou pa tro kontinyen depan lo spesyalis etranze.

Lo sa pwen mon pou demann bann spesyalis Seselwa ki aletranze pou konmans mazin retourn Sesel pou vin partaz zot lekspertiz avek zot bann frer e ser Seselwa.

Mr Speaker mon definitivman konvenki ki si Gouvernman i reisi met an plas sa sant  tout an tenan sa 4 propozisyon ki mon’n donnen.   E vi labote e la trankilite nou lanvironnman i pou en gran asset pou nou pei dan domenn medical tourism parey loter Mosyon in sizere.

Pou terminen Mr Speaker sa size ki loter Mosyon in anmennen i en Mosyon kitouz kous lasosyete.  Akoz lasante i presye e nou tou nou rod le meyer.  Preski nou tou nou annan en manm nou fanmir swa nou zanmi ki ‘n deza fer sa partou lasante spesyalize.

E dan mon distrik i annan dimoun diferan laz ki’n fer sa partou.  I annan ki pou ale byento.  E i annan ki’n fini kit nou.  I annan serten ki’n rakont zot leksperyans ki pa tro agreab.  E ki pou mark zot tou dilon zot lavi.

Mr Speaker mon ti a kontan vwar tou bann pasyan en zour kapab fer zot tretman spesyalize isi Sesel.  Alor mon pou siport sa Mosyon, pour ki nou tou nou a kapab benefisye.  Akoz nou tou nou pe travay pou Sesel e pou tou Seselwa.  Mersi Mr Speaker.

 

(APPLAUSE)

 

MR SPEAKER

Mersi Onorab Sophola.  Bon nou pou aret la ozordi.  E nou ava kontiny deba lo sa Mosyon Merkredi prosen.  Nou ava adjourn me nou travay i kontinyen Mardi, Mardi le 3, 9er bomaten.

 

(ADJOURNMENT)