::
Home » Verbatim » 2018 » Verbatim Wednesday 18th April, 2018

Verbatim Wednesday 18th April, 2018

NATIONAL ASSEMBLY OF SEYCHELLES

Wednesday 18th April, 2018

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab, bonzour Minis Adam avek ou delegasyon ki konpri Mr Yves Choppy Sekreter Prensipal Lenfrastriktir Departman Lenfrastriktir, Dr Lauren Reginald Special Advisor to the Minister, Dr Danny Louange CEO Health Care Agency e Mr Marty Vidot Personal Assistant to the Minister, welcome dan Lasanble Minis avek ou delegasyon e osi en bonzour spesyal pour bann dimoun ki pe swiv travay Lasanble Nasyonal.

Parey mon ti’n anonse yer, bomaten nou pour komans avek Statement fer par Minis pour Lasante.  Minis ti’n osi demann mwan semenn pase an vi ki i annan serten keksoz technical ki son panel i anvi interact osi avek bann Manm, si nou kapab al dan Staz Komite e mon’n dir li wi mon’n grant li sa request petet menm avan nou komanse si nou ti a kapab ganny en Manm ki move ki nou al dan Staz Komite Minis i ava fer son Statement e nou ava flow direkteman dan enteraksyon dan kestyon, okenn Manm ki pour move Mosyon?

 

HON CHARLES DE COMMARMOND

Mr Speaker, bonzour Minis ek ou delegasyon, bonzour tou manm e tou dimoun ki a lekout, Mr Speaker nou oule fer sa Mosyon la ouswa nou les Minis fer son Statement apre nou move ladan?

 

MR SPEAKER

Up to you.

 

HON CHARLES DE COMMARMOND

Si non, si ou oule fer li la mon move ki nou apre ki Minis in fer son Statement ki Lasanble i a move dan Staz Komite.

 

MR SPEAKER

Minis in fer mon konpran ki swivan son Statement Dr Louange pour fer en prezantasyon, so petet ti ava bon annou fer li la.  Ok.

 

HON CHARLES DE COMMARMOND

Petet annou fer li la, be mon oule move ki apre Statement Minis ki nou antre dan Staz Komite pour vwar, pour deal avek sa matter ki devan nou, sa Statement ki Minis a met devan en dimoun ti ava segonn sa.

 

MR SPEAKER

Ok, mersi Onorab.  Okenn manm ki segonde?

 

HON AUDREY VIDOT

Mon segonn sa Mosyon Mr Speaker.

 

MR SPEAKER

Mersi Onorab Audrey Vidot.  Nou kapab pran en vot lo Mosyon ki nou al direkteman dan Staz Komite, tou Manm ki an faver, ok okenn Manm ki kont?  Madanm Clerk.

 

MADAM CLERK

Mersi Mr Speaker, bonzour tou Manm mon’n rikord 14 Manm an faver, personn kont.  Mersi.

 

MR SPEAKER

Ok, mersi, so nou ava, Sergeant fer le neseser pour nou bouz dan Staz Komite avan mon donn la parol Minis Adam.  Ok?  Minister laparol i pour ou.

 

MINISTER JEAN-PAUL ADAM

Mersi bokou Mr Speaker, Mr Speaker Onorab Leader Lopozisyon, Onorab Leader Zafer Gouvernman e tou bann Manm Onorab dan Lasanble e tou dimoun ki pe swiv nou deba ozordi, bonzour e mersi bokou pour donn mwan sa lokazyon pour fer sa deklarasyon devan Lasanble pour kapab prezant serten detay lo Plan Devlopman Lopital ki Gouvernman in met an plas depi 2016.

I enportan pour note ki lasante i en sekter ki depan lo son profesyonnel.  E nou bann profesyonnel i premye pilye pour fer avanse lasante nou Nasyon.  Nou plan re devlopman pour Lopital i avan tou batir lo sa zefor ki nou bann profesyonnel i fer toulezour pour fer nou Sistenm Lasante avanse.

E i enportan osi pour note ki sa plan redevlopman Lopital i en plan ki sitye dan konteks nou prensip lasante dan Tou, lasante Pour Tou e lasante Par Nou Tou.  Nou tou nou bezwen anmenn en kontribisyon e osi sa bout lenfrastriktir i zis en eleman dan devlopman nou Sekter Lasante.

I en eleman enportan me i zis en eleman.  E alor sa plan redevlopman Lopital i mars ansanm osi avek bann lezot plan stratezik ki nou annan dan nou sekter par egzanp sa i enkli plan stratezik pour lasante, plan stratezik pour bann maladi non-kominikab akoz sa i enn bann eleman pli enportan ki nou pe fer fas avek aktyelman stratezi pour VIH /SIDA e lezot ankor.  E sa bann plan i enportan akoz i bann dokiman ki reflekte priyorite nou pei baze lo analiz ki’n ganny fer par bann profesyonnel dan Sekter Medikal .

Mr Speaker avan ki mon envit Dr Danny Louange pour al en pti pe pli an detay lo sa plan dan son prezantasyon, e mon remersye Lasanble ki’n permet nou annan sa konversasyon dan Staz Komite akoz mon krwar i enportan pour donn profesyonnel sa loportinite pour zot eksplike kwa ki’n ganny planifye.

Me avan ki nou fer sa mon pour pran en pti moman pour partaz avek zot serten refleksyon lo nou Sistenm Lasante aktyel, avan ki mon tous osi lo sa bann envestisman ki’n planifye dan sa Plan Devlopman.

I enportan pour nou byen analize konpran nou Sistenm Lasante akoz se selman letan nou konpran kot nou ete ki nou kapab osi pli byen prevwar lavenir.  Lozikman Sekter Lasante i tous nou tou e i tous nou dan en fason tre personnel.  Pour sa rezon nou tou nou bezwen pran en moman pour nou konpran byen sa sekter e premye mesaz ki mon anvi fer pase kler dan Lasanble, se ki nou Sistenm Lasante pe kontinyelman delivre en meyer servis pour pep Seselwa.

Mon konnen ki petet ki pa tou dimoun pour dakor avek sa, e mon konnen osi ki i annan ki santi ki nou sistenm i pa alaoter.  Me statistik e rezilta ki’n sorti dan nou Sekter Lasante i montre sa progre kontinyel ki pe ganny fer.

I enportan ki nou regard nou servis lasante baze lo rezilta, baze lo levidans e pa zis lo santiman.  Sa pa vedir ki santiman pa enportan, i enportan pour nou tande letan en dimoun pa satisfe me pour nou fer en desizyon ki byen e desizyon ki rasyonnel, nou bezwen regard avan tou levidans.  E levidans i montre ki nou bann profesyonnel pe fer en diferans.

Premyerman si nou regard bann endikater prensipal pour lasante nou kapab vwar ki Sesel i annan en Sistenm Lasante, i annan sa Sistenm Lasante ki pli performan dan Lafrik, sa in konfirmen par Fondasyon Mo Ibrahim ki’n osi demontre atraver bann rezilta pibliye par bann diferan lorganizasyon ki nou sistenm i an progresyon.  Pour pran en egzanp kot i konsern mortalite zanfan ki fek ne e la si nou regard en pti pe bann statistik istorik, nou kapab vwar ki an 1966 dan lepok Kolonyal – dan sa lepok lo sak 1, 000 nesans 67 pti baba ti mor.

An 2017 sa sif in ariv 10.9 dan sak 1, 000 nou bi, nou lobzektif se pour nou desann anba 10 e bann pei pli devlope an mwayenn pe ariv dan 5.

Pour bann zanfan anba 5an en lot statistik pour bann zanfan anba 5an an 1967 – 83.9 zanfan ti mor lo sak 1, 000 nesans.  An 2017 nou’n ariv lo nou target mwayen term pour ariv anba 14.  E sif egzakt i 13.33.

Nou kapab vwar osi ki plis ki 97poursan nou zanfan pe ganny kouver par vaksen e 99.2 poursan bann manman ansent i annan akse ek servis neseser pour prepar nesans.

An 2017 nou’n fer 451, 260 konsiltasyon dan nou Sekter Lasante e sa i enkli 50, 123 zis dan Casualty.

Resaman osi Labank Mondyal in fer en letid dan nou Sistenm Lasante baze lo son lefikasite e in demontre ki nou Sistenm Lasante i delivre rezilta remarkab relatif avek lenvestisman ki ganny fer.

Nou pe osi konpar nou lekor avek bann pei pli devlope, bann pei dan groupman OECD e dan serten sekter nou rezilta i konparab.

Mr Speaker avan mon al pli lwen mon anvi adres konsern dimoun ki pa satisfe avek Sistenm Lasante letan zot in bezwen servi li e mon anvi dir klerman ki mon pa pe sit sa bann statistik pour esey dir ki tou keksoz i bon dan nou Sistenm Lasante.

Letan en pasyan pa resevwar en bon standar servis byensir sa pasyan oubyen sa fanmir pour dir ki Sistenm Lasante pa’n delivre pour zot, e zot annan tou drwa pour zot  demann kestyon.

O maksimonm ki posib bann profesyonnel konsernen, i donn zot larepons, me nou bezwen servi osi sa bann moman kot i annan defayans ki ganny idantifye pour nou adres nivo servis, pour nou adres standar oubyen nenport lezot mankman ki ganny idantifye.

Me nou bezwen osi konsyan ki en moman oubyen en lensidan pa devret defini en sistenm.  E letan nou pe regard plan lenvestisman pour nou lavenir i esansyel ki nou analiz kot nou pe al byen osi byen ki kot amelyorasyon i neseser, akoz sa lenvestisman i konsern nou tou e nou bezwen fer li dan en fason stratezik.  E pour nou delivre sa meyer lasante posib nou bezwen batir lo nou bann aki lo sa ki nou deza annan, akoz si nou sey refer serten keksoz i pour kout nou plis larzan.

Mr Speaker nou Lopital Sesel aktyel in ganny konstrir an plizyer faz e i en Lopital ki ofer plizyer servis spesyalize.  Nou osi annan nou Lopital Lafanmir ki baze Perseverance ki pour permet nou ofer bann servis pli direkteman lye avek manman ek zanfan.

nou annan osi nou bann Lopital dan kominote e sa i enkli Lopital Anse Royale ki prosennman pour osi komans akey pasyan inpatient, nou  Baie Ste Anne Praslin e osi nou Lopital Logan La Digue.

Nou annan nou 16 fasilite dan Kominote ki ofer swen primer.  Nou lenfrastriktir dan Kominote i tre enportan akoz se atraver sa bann fasilite primer ki nou tous la mazorite nou popilasyon.

Fodre osi nou note ki parmi sa bann diferan lenfrastriktir ki egziste, serten pa ti ganny konstrir a la baz pour akey en fasilite lasante; par egzanp serten nou bann klinik dan distrik ,ki bann lakaz ki’n ganny kouvertir oubyen bann lezot batiman ki’n ganny kouvertir an klinik.

Gradyelman dan nou Plan Redevlopman nou pour amelyor sa bann fasilite.  Nou konsyan osi ki si ti posib tou dimoun ti pour anvi annan en Sant Lasante dan son distrik, me sa ki enportan dan konteks sa plan, se pour ogard eleman akse avek servis e swen lasante.  E se sa prensip ki diriz nou dan sa Plan Devlopman.

Bann eleman ki ganny adrese dan sa plan, se pour regard nou Sistenm Lasante dan en fason entegre, e sa i alor adres kestyon Lorganizasyon lafason ki servis lasante i ganny delivre.

Dezyenmman; bann lenfrastriktir ki nou annan dan lasante;

Lafason ki nou regard bann swen irzans;

Lafason ki nou regard lenformasyon dan lasante atraver Health Information System ki enpoze ki an kour sa lannen;

Sa kalite servis dan nou Sistenm Lasante e osi bann prodwir ek teknolozi kot i neseser pli avanse ki nou kapab entrodwir pour amelyor servis lasante.

E sa Hospital Master Plan, sa plan redevlopman i form par dan sa bann eleman stratezik pour nou regard nou Sekter Lasante.

E sa plan i pran kont diferan laspe devlopman ki nou pe antisipe dan Sekter Lasante. Premyerman i regard bann servis e fasilite ki aktyelman manke dan nou pei baze lo en analiz kot nou konpar nou lekor avek bann standar Europeen, sa plan i pran kont fezabilite pour nou ofer en tel servis dan nou pei e kot i apropriye sa lenvestisman in ganny progranmen.

Dezyenmman sa plan i osi prevwar evolisyon lasante pour prosen 20an e pli lwen e bann bezwen ki nou pour annan atraver par egzanp logmantasyon dan nou popilasyon e lezot sanzman.

Trwazyenmman dan nou plan redevlopman nou osi pran kont nou bann bezwen aktyel osi byen ki bann nouvo spesyalizasyon ki nou pour bezwen a lavenir.

Nou rekonnet osi ki pa tou spesyalizasyon ki nou pour kapab baze a plentan dan nou pei, akoz nou konn kontrent resours imen oubyen osi parfwa akoz kontrent grander nou popilasyon.

Sa plan i osi regard bann standar, bann protokol e bann sistenm verifikasyon ek kalite ki bezwen ganny enplimante prevwar dan bann fasilite ki nou pour kapab fer sir ki sa bann standar i ganny zwenn.

Sa plan i osi revwar bann lekipman ki deza pe ganny servi e nouvo lekipman neseser pour devlopman Sistenm Lasante.

Sa plan i osi adres akse avek Lopital e bann Sant Lasante sa i enkli kot i konsern sirkilasyon pasyan e osi staff e osi byen sirkilasyon bann veikil dan en fason pli efikas.

Sa plan i osi entegre dan Plan Devlopman pli larz pour lavil Victoria; sa plan i fer provizyon osi pour ranforsi bann standar proteksyon pasyan lo baz medikal e osi pour prevansyon risk e osi pour sekirite pasyan.

Sa plan i osi adres lefikasite bann diferan servis; setadir ki bann servis ki siport kanmarad i kapab ganny plase pli pre posib; en legzanp se pour bouz Servis Sterilizasyon obor Lasal Opératoire.

Mr Speaker parmi bann priyorite sa plan se pour pran kont la realite nou pei kot pli gran defi i lye avek bann maladi non-kominikab.  Nou kapab vwar ki laplipar nou bann ladmisyon i lye avek maladi kardyovaskiler, respiratwar e osi bann kanser.  Sa evolisyon i nesesit plis lenvestisman dan bann fasilite ki pran kont sa bann risk an menm tan osi ki nou pran kont lefe ki plis zefor pe ganny mete dan prevansyon.

I esansyel Mr Speaker pour nou note, ki letan nou regard rezilta 2017 bann diferan maladi ki’n koz ladmisyon e bann defi ki nou fer fas avek dan nou popilasyon prevansyon i bezwen nou premye refleks.

E nou bezwen toultan pe regard prevansyon an menm tan ki nou regard lezot lenvestisman e bann stratezi.  Me fodre nou konpran byen osi ki prevansyon pa vedir ki ou pa kapab envestir dan plis e meyer servis e meyer spesyalizasyon, akoz an mezir ki prevansyon pour marse, nou ekspekte kantmenm ki nou popilasyon i vyeyi e alor nou popilasyon pour ganny afekte avek sa bann maladi non-kominikab bann maladi kardyovaskiler e lezot e sa pour pandan dan plis letan.

Savedir nou pour bezwen kapab tret bann dimoun pour en peryod pli long letan zot ganny afekte avek en maladi – si nou pran en legzanp dyabet, letan dimoun pe viv pli lontan zot pour bezwen viv avek sa maladi pour pli lontan, e an konsekans bann swen spesyalize i bezwen osi disponib.

Sa plan i osi met lanfaz lo nesesite pour nou relev kapasite nou bann fasilite.  Sa i vedir adres bann materyo ki ganny servi dan konstriksyon e regard bann standar.  E par egzanp adres serten kontrent ki nou’n deza pe fer fas avek – par egzanp sa risk Fungus ki nou konnen in afekte bann sant lasante.

E osi lezot batiman dan nou pei.  Sa i anliny osi avek nou prensip pour ofer servis otour bezwen sa dimoun, sa pasyan, oubyen parey nou’n met li dan nou plan, nou prensip person-centered care.

Nou bann fasilite pe pran kont osi bann defi otour labi drog ki aktyelman karakteriz nou pei.  E nou ekspekte ki malgre ki nou pe fer bokou zefor pour adres sa size nou ekspekte ki pour annan en lenpak kontinyel nou servis lasante pour plizyer lannen ki pe vini.  Sa i nesesit ranforsman eleman sekirite e osi bann servis pour bann pasyan ki deza lo sibstans.

Mr Speaker sa plan i osi pran kont sa lefe ki nou popilasyon pe vyeyi.  Nou pe antisip plis bezwen lye avek sipor e swen pour bann dimoun aze.

Sa i pa zis bann swen medikal dan bann sekter; dan bann servis lasante oubyen dan bann sant lasante.  Sa i mars ansanm avek bann lezot servis ki kapab disponib dan nou Kominote.  E i mars ansanm ek linisyativ anonse par Prezidan Faure dan son Diskour Leta  Lanasyon pour osi ofer servis pour plis dimoun aze atraver sekter prive kot later pour kapab ganny met a dispozisyon pour envestiser ki enterese pour devlop bann tel fasilite.

Mr Speaker parey mon’n dir sa plan i prevwar pour envestir dan serten spesyalizasyon ki aktyelman nou anvoy dimoun aletranze.

Aktyelman nou deza ofer en kantite spesyalizasyon isi Sesel, ki oparavan nou ti anvoy aletranze.  Dan Servis Ortopedik par egzanp 97poursan lentervansyon aktyelman i ganny fer isi Sesel.  Sa i enkli ranplasman zenou e osi bann loperasyon lo kolonn vertebral.

Nou annan 16 sekter ki dirize par en konsiltan ansarz e sa i donn plis ki 30 spesyalizasyon ki nou ofer aktyelman.  Parmi sa bann spesyalizasyon i enkli general surgery, internal medicine, emergency medicine, hemodialysis, obstetrics, gynecology, ophthalmology, pediatrics, urology, general intensive care, anesthesia, endocrinology, orthopedics surgery, spine surgery, oncology, cardiology, radiology, neurology, neonatal intensive care, palliative care, rehabilitative care, dermatology, occupational therapy, rehabilitation, hyperbaric medicine, geriatric medicine, maxillofacial, orthodontics, communicable diseases – mon’n mansyonnen deza (pardon) occupational health, vascular surgery, hematology, ek gastroenterology.  

Nou annan osi 88 spesyalis ki aktyelman travay dan Lopital, me ki osi ofer servis dan serten sant lasante rezyonal.

Nou osi aktyelman annan plizyer spesyalis sorti dan bann Lopital ek lorganizasyon avek ki nou annan korperasyon ki vin fer bann lentervansyon lo en baz regilye.  E sa i enkli par egzanp pour respiratory medicine, pour ophthalmology, pour bann allergist, bann spesyalis pour breast surgery, bann rheumatologist, bann vascular surgeon e lezot ankor.

Sa plan redevlopman Lopital ki nou pe prezante i vize ranforsi fasilite spesyalize dan plizyer sekter, enkli pour latet ek likou, pour ENT, parey nou dir pour zorey, nennen ek lagorz i prevwar en sant cardiothoracic; en sant vasculaire avek en unit spesyalize pour bann stroke.  Nou prevwar en sant spesyalize pour bann maladi non-kominikab enkli posibilite pour ofer bariatric surgery.  I ofer servis maxillofacial, i ofer ranforsman bann fasilite dyagnostik, en sant ortopedik, bann servis pour neurology ek servis osi ki prevwar posibilite fer transplant ronnyon, servis gynecology ek obstetrics, servis spesyalize pou lizye parmi lezot ankor. Sa plan i alor osi prevwar ogmant lakantite lasal loperasyon pour ariv 9 aktyelman nou annan 3.

Mr Speaker i annan serten proze dan sa redevlopman e ki deza an kour.  Bidze pour lenvestisman dan proze kapital i deza baze lo sa Plan Devlopman ki’n ganny prezante avek Development Committee e i osi avek Minister Finans.

Savedir previzyon lenvestisman dan fasilite i pran kont sa Plan Devlopman.  Dan bidze 2018 in prevwar par egzanp premye faz pour Lopital La Digue; premye faz pour sant rezyonal pour dimoun aze North East Point, premye faz dan batiman outpatient pour Lopital Anse Royale, nouvo sant lasante pour Baie Lazare pour nou bouz e amelyor servis clinical lab ki pour bouz dan diagnostic center .

E nou kapab vwar osi ki dan Lopital Sesel travay in deza komanse pour bouz servis sterilizasyon pour fer plas pour nouvo ICU ki osi son premye faz pe komanse an 2018.

Nou pe osi fer travay lo batiman Red Roof ki anliny avek sa plan redevlopman.

Nou annan osi nouvo laboratwar pour lasante piblik ki pe ganny planifye pour sa lannen e pour ganny fer ansanm avek nouvo Sant Izolasyon ki nou ava rapel nou ti diskite dan deba lo Bidze.

Nou rekonnet defi ki nou annan pour asire ki nou bann proze i bouz dan en fason pli rapid e nou’n ranforsi lekip ki travay lo sa bann proze e nou pe osi adopte model kot nou rekrit bann manager spesifik pour bann proze kot i neseser sorti dan sekter prive.

Mr Speaker atraver sa Plan redevlopman nou pe vize relev standar zeneral nou Lopital.  E sa pour permet nou osi soumet nou Lopital pour akreditasyon enternasyonal e osi regard posibilite ki nou Lopital i vin en Sant Formasyon, sa pour ed nou en kantite osi avek devlopman nou bann spesyalis sirtou nou bann spesyalis Seselwa.

Mr Speaker nenport ki Sekter Lasante i depan osi lo kalite resours imen.  Nou kapab fyer ki nou annan en kantite Seselwa, kantite dokter, kantite spesyalis, en kantite profesyonnel dan Sekter Lasante ners e lezot ki annan en standar ki mon kapab dir i vreman eleve.  Nou tou nou konsyan defi ki bann travayer lasante i fer fas avek, mon salye zot kouraz, zot determinasyon e zot lanvi pour zot kontinyen amelyore.

Sa Plan Devlopman i osi prevwar en ranforsman nou bann kapasite resours imen; byensir i pa en eleman spesifik dan sa plan e i plito ganny regarde separeman, me i en eleman ki nou bezwen adrese e atraver zefor ki NIHSS in fer nou vwar ki plis etidyan pe antre dan sa sekter sirtou atraver sa Kour ACCESS ki’n ganny etablir lannen pase e an 2018 in annan 30 nouvo etidyan ki’n antre pour sa course pour ners kot NIHSS.  An total nou annan 44 etidyan pe swiv bann kour nursing kot NIHSS aktyelman.

Nou osi aktyelman annan 54 dokter Seselwa an formasyon aletranze.

E nou annan osi 12 ki aktyelman aletranze pe fer zot spesyalizasyon. Nou pe kontinyen priyoritiz spesyalizasyon nou bann dokter Seselwa e pe rod loportinite pour plas zot.  An menm tan nou pour bezwen a pir lo dokter ek ners ek lezot profesyonnel ekspatriye e nou remersye sa bann travayer ki pe kontribye pour lasante nou pep.  Lazans Servis Lasante pe osi fer en legzersis pour definir sistematikman nou bezwen resours imen a mwayen e a lonterm.

Mr Speaker avan ki mon konklir sa plan i osi kre lespas pour partenarya avek sekter prive.   I rekonnet ki serten servis i kapab ganny ofer par sekter prive pour konplemant servis ki i ofer atraver Gouvernman.

Aktyelman mon pe fer bann vizit kot bann diferan klinik e operater prive dan Sekter Lasante e nou pe vwar bann fason ki nou kapab korpore e sirtou travay lo bann standar minimonm e osi adres bann fason ki nou kapab agree pour adres serten konsern Nasyonal – sirtou kot i konsern par egzanp bann maladi non-kominikab.

Mon remersye tou sa bann partner pour zot travay an kolaborasyon avek servis Gouvernman.  Atraver sa Plan Devlopman nou kapab osi vwar ki i annan lentere par ki, si i annan lentere par sekter prive pour envestir dan sa sekter, nou kapab fasilit sa e nou kapab vwar li akote lenvestisman ki Gouvernman pour fer.

I enportan ki sa lenvestisman i ganny fer dan en fason ki rekonnet larealite nou pei.  I enportan pour note ki rol Gouvernman se pour kontinyen asir ou garanti akse avek meyer swen posib pour nou popilasyon, san pran kont kapasite ekonomik okenn sitwayen e sa i vedir ankor an konfirmasyon dapre nou Konstitisyon pour nou ofer servis lasante gratwitman pour nou bann sitwayen.

Mr Speaker sa i reprezant bann pwen mazer lo loryantasyon sa plan.  Dr Danny Louange pour kapab donn plis detay lo bann lenvestisman spesifik e byensir nou pour apresye loportinite pour nou adres okenn kestyon oubyen klarifikasyon ki neseser.  Sa plan Mr Speaker i reprezant en analiz realis ki’n ganny fer lo bann opsyon lenvestisman par Gouvernman pour elev standar lasante dan nou pei.

Laport pa zanmen fermen pour partaz nide oubyen pour koz lo opsyon.  Me dan tou semen ki nou trase, i enportan pour ekout pwennvi bann profesyonnel ki’n deza marse lo sa santye.  Nou bann profesyonnel lasante i konn defi ki nou annan e zot osi konn bann loportinite.  Personnelman mon fer zot bokou konfyans, mon remersye Lasanble ankor enn fwa pour donn nou sa loportinite.  Mersi Mr Speaker, mersi tou bann Manm Onorab.  Mersi.

 

MR SPEAKER

Mersi Minis Adam.  Mon ava donn laparol Dr Louange.

 

CEO HEALTH AGENCY DR DANNY LOUANGE

Mersi Mr Speaker, bonzour Mr Speaker, bonzour bann Onorab e bann, bonzour bann dimoun ki a lekout.  E mon oule remersi Lasanble pour donn nou sa loportinite pour nou prezant nou Master Plan pour bann Lopital dan Sesel.

Mr Speaker mon ti a voudre mon annan sa tantasyon pour mon koz avan mon prezant sa Master Plan koman en profesyonnel lasante, koman en spesyalis, mon krwar i enportan pour mwan dir ki kantmenm nou pe koz lo specialized hospital, kantmenm nou pe koz lo Lopital mon krwar pour en lasante, pour en sosyete ki an bonn sante i enportan ki prevansyon en kantite i ganny mete dan prevansyon.

E mon espere ki bann piblik ki pe ekoute i tann sa, Lopital i la pour ed bann dimoun ki malad si nou kapab prevent bann kondisyon bann maladi e sa pour redwir nou burden ki i annan lo bann servis spesyalize.

Mr Speaker pour mwan kapab entrodwir sa Master Plan i enportan nou get akoz sa Master Plan ti ganny devlope.  E sa i ti anliny avek obzektif pour kapab anmenn en servis lasante o nivo, e pour sa Gouvernman i deside ki i enportan pour nou devlop sa konsep of a Master Plan pour tou sa bann Lopital ki nou annan dan Sesel e osi bann Health Care Centers as well, bann sant lasante osi e pour anmenn li dan en fason holistic approach parey nou dir an Angle ki bor tou bann spesyalis tou bann dimoun ki spesyalize ki annan konesans leksperyans dan Lopital i met zot nide ansanm.

E bann Lopital ki nou’n, ki sa master plan in focus lo la i Seychelles hospital ki zot konnen i annan en campus Mont Fleuri osi i Wellness Centre i part of it.

E osi part of North East Point i osi anba Lopital Sesel.  Nou’n osi get Anse Royale in get North East Point lot seksyon ki par anba Seychelles hospital.

In get osi Baie Ste Anne Lopital, osi in get La Digue, Lopital ki La Digue e osi in pran kont osi sa Lopital Family Hospital ki Perseverance.

Mon oule met emphasis rezon akoz sa Master Plan in bezwen ganny devlope, i akoz dan Lasante, dan Health Care Agency nou pe, nou annan en Bidze pour lenverstisi, pour bann Proze Kapital.

E si nou napa en master plan nou napa en direksyon en fason organize, en fason byen striktire ki mannyer nou pour, ki mannyer nou pour build e akoz nou pour build sa.  Bann obzektif, sa obzektif pour sa Master Plan, i pour gete ki sa gap ki bann defi ki nou annan letan, nou konpar nou sityasyon current avek en sityasyon ideal ki bor ou vwar en Lopital ki byen akredite enternasyonalman.

Nou osi get bann servis ki nou pour bezwen devlope avek pour the next 20an, pran an konsiderasyon bann statistics lasante ki pour, ki nou pe ekspekte sanze e bann osi bann démographique evolisyon ki osi pour sanze dan sa prosen 20an, e parey Minis in dir i bann, nou pe idantifye ki bann nouvo servis ki nou kapab anmennen pour nou kapab amelyor lasante dan en short ek en medium term as well.

E osi letan in devlop sa Master Plan i ti enportan pour nou gete ki bann lekipman biomedical engineering equipment, bann lekipman e aircon and so on ki nou kapab, ki egziste ki kapab, nou kapab kontinyen reservi oubyen renouvle, pour nou kapab redwir kou.  E sa i aplik osi pour bann lezot fasilite ki egziste.

So apre osi i enportan dan, ek modernizations of Lasante, Sistenm Lasante i enportan ki nou pe provide en servis ki flow ki a en o oter.

Pour mwan kontinyen ou’n koz lo sa group ki’n nou’n konsilte e ki’n fer sa Master Plan, i en group ki form parti bann, en spesyalis dan medikal, en spesyalis dan design engineering ki annan leksperyans dan bann striktir medikal, architect, ki annan leksperyans skills dan bann striktir medikal, structural and civil engineering apre bann konsiltan ki in deza fer en Lopital dan lepase.

I annan apepre ti annan apepre 6 konsiltan ki ti dan sa team, e mannyer zot in apros sa in fer en fason ki bor zot in fer en analysis zot in debrief nou team dan Health Care Agency ek Minister Lasante e zot in vin avek en konsep apre avek en final proposal.

E sa ti an diskisyon avek nou team dan Minister Lasante, Health Care Agency.  Mon krwar bann kle, bann konsiderasyon kle ki nou bezwen gete e ki mannyer letan nou pour annan sa Master Plan ki mannyer nou pour enplimant sa plan.  E sa plan pour minimiz bann disruption dan servis nou’n bezwen fer li an faz.  I osi enportan ki mannyer nou apros aksesibilite avek public traffic flow letan sa bann devlopman pe arive.  E osi pour get Master Plan bann plan ki pe arive o letour bann Lopital. e bann devlopman Nasyonal osi.  Mon krwar ki pli enportan i ki sa Master Plan in gete, i bann kou bann proze, e ki mannyer pour ganny finanse.

E parey mon’n dir oparavan in, nou’n gete ki bann lenfrastriktir bann servis, bann lekipman e bann sistenm ki kapab ganny reservi pour sa prosen 5 a 20an.  E osi letan zot in devlop sa Master Plan zot in gete ki mannyer pour minimiz demolisyon avek dimini, pour redwir konstriksyon nouvo building e konmkwa ki sa plan letan nou pe enplimante i ava cost effective.

        Sa plan osi letan ti pe ganny devlope i ti en, i ti get detrwa fakter; bann fakter démographique; bann fakter sosyal e nou konnen ki servis i bezwen sanze akoz nou démographique pe sanze.

Nou popilasyon pe ogmante, life expectancy pe increase bann maladi non-konmikab pe ogmante; apre i annan bann social ills.

E i annan en ta bann challenges dan term prevansyon tretman pour bann pasyan e menm bann modernizations of bann teknolozi ki pe, evolisyon ki pe arive dan health care osi enportan pour met dan sa plan.

So si mon komans, pour komans koz lo sa plan mon pour koz lo Seychelles Hospital ki Lopital Sesel e ki bor sa group ki baze dan campus Mont Fleuri.

Letan i get sa ki bor sa Lopital Spesyalize i ete, sa servis in ganny divize an 2 group.  Bann non-clinical apre ek bann clinical.  Pour non clinical standar osi sa plan in vwar ki i bezwen amelyore.  Parey Ladministrasyon Lopital bann enformatik, Sistenm Enformatik, Sistenm Rikord ou bezwen sanze, bann sistenm sipor i bezwen sanze, sa plan osi i bezwen adres bann fakter bann servis clinical ki bor i pe anmenn li o par avek standar enternasyonal ki bor nou pe move lo bann sant, bann konsep ki bor i annan bann multi-disciplinary, interdisciplinary centers.

Par egzanp Head and Neck Center, Dental and Maxillofacial Center ki vin ansanm avek Plastic Musculoskeletal Center, Cardiothoracic Center, Vascular Center, Stroke Center and so on.

I osi enportan osi pour anmenn bann sant ki bor i adres bann kondisyon non- konminikab ki osi pe afekte nou dan Sesel.  Letan i get sa Lopital Spesyalize in get number of beds.  Currently kouran la nou’n, number of beds i annan apepre 3 a 4 par 1, 000 popilasyon.  E i ideal letan ou get standar Eropeen, standar Ameriken alokasyon i devret apepre 5 a 7 par 1, 000 dimoun.

So si nou pe mazin 2, 035 ki zot in fer en estimate i pour annan apepre 1,600 – 106mil popilasyon alor in vwar ki, sa plan in vwar i enportan pour nou annan letan nou pe travay lo la pour annan 650 active beds.

Currently nou annan 371 active beds.  E sa bann lili, sa bann bed kapasite ki bor pour increase, i ICU, cardiovascular oubyen stroke center, kidney center, orthopedic, gynea, e sa i zis en pe ki mwan mon mansyonnen.

Me menm Isolation Center osi i enportan.  Letan nou get bann servis ki nou pour, ki ganny entrodwir dan sa plan i pediatric ICU, e gynea i pour separe avek surgical, female surgical, i pour annan orthopedic ki pour separe avek males surgical i pour stroke and cardiovascular ladmisyon ki pasyan ki pour separe avek Medical Ward en Kidney Center ki pour separe avek Medical Ward, oncology i deza dan sa plan, fertility, geriatric apre en logmantasyon dan bann lili pour Hospice.  E osi en logmantasyon pour bann lezot Ward ki mon pa’n mansyonnen ki deza egziste.

Letan nou get building ki pour demolir dan sa plan e pour fer plas build bann nouvo building, i sa building ki letan ou pase menm anba ki nou apel Green Roof sa i pour ganny demolir PPU ki apel Pharmaceutical Production Unit ki zis opposite nou nouvo Central Store sa osi pour ganny demolir.

Emergency Preparedness Unit en building ki pour bezwen ganny demolir pour fer plas pour bann lezot building.  I annan en old Central Medical Store ki nou pe currently nou pe servi li koman en store pour bann medicine i pour ganny demolir.

Sa building ki nou apel nou tou nou konnen li koman Mont Fleuri Dental Clinics i pour ganny demolir.  Mortuary osi.  Biomedical ki bor old Dental ti ete en pti building par deryer Mortuary pour osi pour ganny demolir.  Apre sa old NIHSS pour ganny demolir.  Mon pe koz an zeneral kwa bann building ki pour demolir.

Me selman sa i pour ganny fer an faz.

Ki bann nouvo building ki’n ganny mete dan sa plan i en 24 Hour Emergency General Outpatient Pharmacy Block ki mon ava apel li sa non ki pour ranplas Green Roof.  E sa i pour en multi-storey building ki pour accommodate lezot servis ki mon pour mansyonnen plitar.  I osi en nouvo building pour ladmisyon ek tou bann lezot servis ki vin avek, en nouvo building pour Outpatient, en nouvo building pour parking both piblik avek staff pour amelyor nou sityasyon parking kot Lopital Sesel e en nouvo building pour Operating Theater, en nouvo building pour Mortuary ki pour osi annan bann lezot fasilite pour Clinical Lab e bann offices, e Training Center.  

Osi i pour annan en nouvo building pour bann servis ki pour apel en servis block.  Nou pour osi dan sa plan i annan osi nouvo building pour Akomodasyon e nouvo building pour Nursing School.

Apre dan sa plan osi in mete osi ki bann lespas ki nou annan ki potansyel pour nou kapab build si nou oule extend.  E dan sa plan i kontinyen koz spesifikman lo semen, ki mannyer nou kapab annan akse avek Lopital Sesel.  Ki bor i ava fer ki menm si i annan trafik, i annan bann emergencies i kapab antre.

E mon ava sirkil sa prezantasyon pour zot kapab konpran egzakteman, ki mon pe koz lo la.  E menm pour sirkilasyon dan Lopital li menm nou deza konnen nou annan en defi e i pour fer e i annan sa plan i annan en sistenm ki zot in propoze ki fer en one way letan nou monte pas kot Diagnostic Center kot Casualty apre i sorti ant Lab oubyen kot Pathology, kot Public Health Lab ant Public Health Lab ek Hemodialysis.  I annan en pti koulwar par deryer Physiotherapy ki bor sa semen i kapab pase al tonm kot Mortuary apre eventually i pour al desarz lo semen Hermitage zis obor kot old NIHSS i vini.

Me pour piblik, sa semen ki’n ganny propoze i antre kot Central Medical Store i ete konmela; ki bor Transpor i annan en lofis la.

E osi i monte i pas kot Old Nursing Home, old NIHSS Nursing School e i al pet lo semen Hermitage.  Sa plan i annan in ganny fer an faz, e premye faz e ki bor nou konsantre lo Diagnostic Center . Nou pour tir bann servis lo 1st floor pour nou kapab fer plas pour Clinical Lab.

Letan sa plas in available nou pour move Clinical Lab laba, e Clinical Lab i annan diferan Unit i pour sorti ki bor i ete currently i pour move laba.  Letan in fini move laba sa landrwa ki bor Clinical Lab i ete i pour ganny devlope an ICU (1).

E  an menm tan nou pour rekomans fer bann lezot aktivite ki dan sa plan; ki enkli devlopman anba D’Offay Ward parey nou tou nou konnen anba D’Offay Ward ki bor Laundry ti ete dan lepase, la e pour fer, nou pour devlop sa pour fer bann en Medical Store.

E an menm tan nou pour osi travay lo Red Roof pour Hospital Management, pour IT System pour bann lezot fasilite parey Kantin, en Museum e bann training facilities ki pour vin laba Red Roof.

Pour Old Hemodialysis ki dan sa plan old hemodialysis zis obor red roof la i pour oncology e sa deza in fini ganny fer e ki bor oncology ti ete detrwa mwan pase la osi i annan travay pe fer pour li vin en cancer center, ki bor pour vin en Kidney Center ki bor pour annan bann masin dyaliz osi pour ogmant nou kapasite dyaliz.

Apre i annan bann lezot parey mortuary ki bor sa osi dan phase (1) ki bor nou bezwen build en nouvo Mortuary avan nou demolish sa current mortuary, sa building mortuary i en standalone, e i pour annan loading bay, pour annan mortuary, pour annan part of clinical lab parey microbiology e nou osi annan plan pour gete ki nou kapab build si nou pe build en standalone ki i ava vin en training center pour laboratwar, Conference Room and so on, letan sa in ganny build mortuary i pour ganny demolish old Dental pour ganny demolish apre parking block ki pour annan 3 level ground avek 2 pour kapab amelyor parking, sitasyon parking dan, kot Lopital Sesel i pour annan piblik avek, i pour annan parking pour piblik avek staff.

E dan phase (1) ankor i pour annan bann redevlopman alteration semen.  I pour annan, parey mon’n describe pli boner main entrance apre ki mannyer bann semen pour ganny sa bann alternations ki nou pour fer lo semen within sa Seychelles Hospital.  E osi dan phase (1) i pour annan en building, new building pour servis bann support services.

        Dan phase 2, phase 1 i, dapre sa plan i year 1 to year 5 and phase 2 year 5 to year ‘20.  dan phase 2 ki pour komans sa pre 5an i enkli demolisyon sa building ki nou apel Green Roof apre pour next phase i pour next step i pour konstrir, rekonstrir en building la ki pou en standalone building, ki pour enkli en 24 Hour Emergency; pour annan farmasi, general outpatient, fizyo, occupational health, occupational therapy i annan son lot floor i pour annan 2 surgery endoscopy, cardiology services.  Lo son 2nd floor i pour annan pediatrics antennal outpatient ki bann pasyan ki pour servi Mont Fleuri e osi nou annan osi potansyel pour nou kapab build, i annan bann lezot floor pour nou accommodate nou bann requirements.

Lot step dan sa phase 2 i pour annan en nouvo, nou apel li OT building Operating Theater Building.  Dan sa Operating Theater Building i pour ganny baze par deryer fizyo an fas obor current hemodialysis unit ki bor dyaliz i ete e sa lespas la i vid e dan son basement sa plan i propoze ki nou build en Kitchen avek possibly en Kantin, i pour osi annan lo ground floor i pour annan CSSD Departman Sterilize apre Laundry lo son 1st floor i pour annan en operating theater apre lo son 2nd floor i pour annan Plant Room.

Me sa building la akoz i en standalone building, i annan potansyel pour nou kapab met lezot servis osi lo la e build en pe plis letaz lo la, depandan nou resours.  Osi akoz pour annan bann devlopman dan sa seksyon laba ki Mortuary par deryer fizyo ki bor OT block pour ete, incinerator ki bor i ete currently i osi pour bezwen bouze e nou pour fer en nouvo building pour li.

Oxygen Plants i osi pour ganny restriktir ki pour annan en store workshop pour nou bann biomedical engineering, fizyo ki bor i ete i pour ganny renovate, farmasi osi i pour ganny renovate.

E la kot farmasi i ete ki bor Kitchen i ete i pour vin en sant orthopedic avek trauma.  Letan dan bann lezot step ki enkli 2nd ICU sa i pour lo 2nd floor obor ki bor sa 1st ICU pour ete, Casualty pour ganny renovate, the operating theater ki bor i ete currently, i pour ganny converted into training rooms ki pour enkli simulation eksetera.  I osi pour annan kapasite osi pour nou kapab servi li koman Isolation Room si nou kapasite dan sa Isolation Room pa adequate.

Lo Blue Roof osi pour annan bann devlopman osi ki enkli ground floor, i pour vin bann lofis pour bann dokter oubyen bann servis non-kominikab, maladi non-konminikab.  Apre osi lo en sans 2nd floor, son 1st floor i pour annan bariatric surgery, pour annan dyabet, pour annan bann lezot maladi kronik apre pour annan bann training facilities lo son lot floor ki pour, 2nd floor i pour annan bann lofis avek pour bann dokter, bann travayer lasante.

Pediatric ki bor i ete currently i pour vin sa plan i propoze ki nou fer li en acute psychiatric, pour Yellow Roof i pour vin koman en sant ki bor nou pour annan en head and neck enkli maxillofacial dental, so sa i pour ganny, i pour en block spesyalize pour zis sa bann kondisyon.

E ki bor NIHSS i annan en plan pour fer en nursing, old NIHSS i annan en plan pour fer Nursing School.

Sa an bref i bann kle proze ki sa plan i describe pour Lopital Sesel baze lo campus Mont Fleuri.

Pour North East Point hospital Mr Speaker si ou permet, i bann devlopman ki pour annan i pour geriatric pour bann kondisyon pour bann vye, bann dimoun aze i pour osi annan bann devlopman pour bann pasyan ki i annan problenm psyschiatric e sa bann problenm kronik.

Sa i osi enkli bann servis rehabilitative servis Hospice e i annan bann lezot, i annan lespas ankor pour kapab improve lo Home for The Elderly

 

E sa i North East Point according to sa Master Plan i pli bon nou servi li pour sa bann servis ki mon’n mansyonnen, e nouvo building ki, nouvo lenfrastriktir ki zot propoze i en incinerator, laundry, kitchen e bann stores.

        Pour Anse Royale Mr Speaker i plis bann servis segonder e bann servis primer.  Bann servis segonder i bann ladmisyon bann minor surgery ki si nou improve renovate sa sant laba, sa Lopital laba nou pour kapab fer pti minor surgery nou kapab fer x-ray, nou kapab improve bann ladmisyon ki nou pe propoze fer dan en short term.

E lot nouvo building, bann nouvo building ki pe ganny propoze pour Anse Royale i en nouvo block outpatient en incinerator avek en mortuary me sa again parey mon pe dir i dan faz 2 sa plan.

Pour Wellness Centre ki baze Les Canelles osi sa plan in gete in fer en analiz i vwar ki i enportan pour kit li koman en chronic psychiatric care ki pour annan psychotherapy i pour isolation, pour annan bann fasilite pour bann, bann fasilite pour sa bann pasyan dimoun ki pe soufer avek sa bann kondisyon.

E bann nouvo building ki’n ganny propoze pour fer laba akoz deza sa building i nouvo, i plis bann renovasyon me bann, en nouvo building ki zot propoze i pour staff pour accommodate staff.  Konmkwa ki nou ava annan on call doctors e bann lezot staff ki pour travay pli pre avek sa sant.

Pour Lopital Baie Ste Anne Praslin in vwar ki bed occupancy rate i lo, savedir number of beds i pour zot propoze ki i reste parey.  Me ki zot propoze i ganny fer, i reorganiz ki nou pe fer ki bann servis ki nou pe provide kot Baie Ste Anne Hospital.

Enn bann servis ki zot pe proze i x-ray ki nou annan deza en proze pe go on lo la, i pour amelyor servis fizyo, amelyor servis dental, fizyo, farmasi travay lo sa operating theater konm kwa ki nou a kapab fer en pe minor operations Praslin, improve maternity, improve lo sant dyaliz e re travay lo sa sant sterilize osi e osi provide Baie Ste Anne avek en sant isolation.

En nouvo building ki zot pe propoze, ki sa plan pe propoze pour Baie Ste Anne i pour staff akomodasyon apre bann pour viziter sirtou bann spesyalis e bann lezot staff ki sorti Mahe pour al Praslin.

Pour La Digue Mr Speaker ankor bann nouvo, nouvo building ki zot in propoze i sa new hospital ki nou’n fini pe, nou annan bidze pour komans travay lo bann konsep sa lannen, e zot osi, e sa plan osi i fer provizyon pour kapab amelyor sa striktir ki deza egziste pour convert li into en outpatient service.

        E Mr Speaker finally mon oule osi mansyonnen ki Family Hospital kan letan i part of sa Master Plan ki bor nou deza annan en Family Hospital Perseverance i annan apepre 36 lili currently ki phase 1 me i annan plan pour nou al lo phase 2 ki pour annan 70 bed ou menm pou al lo phase 3 ki nou vwar ki i annan en nesesite pour annan 150 lili.

E sa Lopital i pour deservi zanfan avek bann madanm e tou bann servis inpatient i mazorite bann servis outpatient pour ganny plase laba.

Mr Speaker mon ti a kontan al lo sa kou ki sa plan in osi propoze, in osi fer letan zot pe kalkil sa gran plan depi e sa 2 faz ki mon’n describe e an total i apepre R2.8 bilyon e letan nou get dan phase 1 ki dan premye 5an sa plan i apepre, zot met en sif ki apepre R470milyon.

Sa i enkli bann lekipman medikal osi dan sa bann fasilite ki pour ganny devlope.  E avek sa Mr Speaker mon dir ou mersi.

 

MR SPEAKER

Mersi Dr Louange, bon nou a prezan pran kestyon from the floor, okenn Manm ki oule demann kestyon?  Ok mon a komans avek Onorab Vidot.

 

HON AUDREY VIDOT

Mersi Mr Speaker.  Bonzour Mr Speaker, Minis avek delegasyon tou manm Onorab e tou dimoun ki a lekout.  Mr Speaker mon kestyon pour Minis mon konnen pour rezon resours i touzour reste en konstrent, me petet ti ava byen fer nou konnen kan ki Minister Lasante i ekspekte, mon konnen i annan en dele letan time frame ki zot pe sey mete pour at least achieve pour annan sa bann fasilite, me lo sa Sant Diagnostic petet kan ki zot pe mazinen, mon konnen priyorite lo zot lalis, kan ki zot ekspekte baze lo resours pour zot kapab at least annan sa fasilite?  Mersi.

 

MR SPEAKER

Mersi Onorab.  Minister.

 

MINISTER JEAN-PAUL ADAM

Mersi Mr Speaker e mersi Onorab, annefe premye parti dan sa pour nou kapab ranforsi sa sant diagnose se pour bouz bann fasilite clinical laboratory dan sant dyagnostik akoz sa bann eleman laboratwar i osi mars ansanm avek bann scan akoz nide se letan ou annan en pasyan kapab adres tou son bann diferan konsern.  Alors sa i premye faz.

Dan dezyenm faz ki apepre apre detrwa lannen, apre 3an plitar i annan serten lezot servis ki nou pour regarde pour envestir ladan pour ofer sa bann meyer fasilite. Me en keksoz ki fodre nou note se ki nou Sant Dyagnostik deza mon kapab dir i parmi le meyer dan larezyon akoz nou annan bann lekipman vreman avanse dan term MRI, CT Scan i annan serten pti amelyorasyon ki nou bezwen fer pour serten lekipman, me apre osi nou bezwen ranforsi kapasite bann eksper, bann spesyalis pour fer sa bann diagnose, me nou sant i, nou Sant Spesyalize i deza mon ti a dir lo en vreman o nivo.  Me letan ou pour ranforsi laboratwar ansanm avek sa Sant Dyagnostik, sa i sa premye faz pour ranforsi nou kapasite.  Mersi Mr Speaker.

 

MR SPEAKER

Mersi Minis. Onorab Clive Roucou.

 

HON CLIVE ROUCOU

Mersi Mr Speaker.  Bonzour Mr Speaker, bonzour Minis avek delegasyon, bonzour tou mon bann koleg Onorab, Mr Speaker mon’n ekout Minis avek Dr Louange avek bokou pasyon.  E écoutant Dr Louange avek tou respe mwan mon krwar sa i another white elephant sorti kot Minister.

Mr Speaker me mon kestyon mon anvi en pti klarifikasyon eski bidze in deza egziste pour sa proze oubyen zot pour rod, oubyen kot zot pour ganny sa larzan pour en tel fasilite?

Epi mon dezyenm kestyon se si Dr Louange i senserman krwar ki par demolir the actual facilities e rebuild i pour pli fezab ki rod en lot landrwa spesifik?

Epi dernyen bout Minis in koz en pti git lo bann nouvo teknolozi dan diagnostic center mon anvi met lanfaz lo sa ki Minis in dir akoz mon senserman krwar parey Minis in dir i annan tou kalite fasilite me dan manpower e sa bann dimoun spesyalize pour fer sa bann diagnostic.  Mon pran legzanp lo mon menm kot ankor mon anvi remersye mon bann koleg ners ek dokter ki’n okip mwan ler mon’n dan Lopital semenn pase, me parkont mon’n antre ek en problenm swadizan mon’n fer 3 fwa loperasyon mon’n sorti ek menm problenm menm ki pa’n geri.  So mwan mon krwar teknisyen spesyalize i devret vin en bout enportan.  Mersi Mr Speaker.

 

MR SPEAKER

Mersi Onorab Roucou.  Minister.

 

MINISTER JEAN-PAUL ADAM

Mersi Mr Speaker e mersi Onorab.  Mon regrete ki Onorab vwar sa koman en white elephant.  E mon bezwen dir ki Mr Speaker letan ou pour fer nenport ki lenvestisman ou bezwen planifye li, e ou bezwen analiz e apre ou annan opsyon.

E si mon pour pran sa pwen spesifik ki Onorab in dir eski i pour pli efikas pour en nouvo Lopital konpletman par egzanp, an bref non!  Akoz si ou pe al fer en nouvo Lopital an bref ou bezwen kre en duplicate tou bann servis ki deza egziste dan Lopital e i annan serten, me pour pran ou pwen petet en pti pe pli an detay pa vedir ki serten servis pa kapab ganny met en lot landrwa.

I annan serten servis ki ou kapab met li an deor dan plan redevlopman ki’n ganny regarde in ganny vwar ki i pli efikas o maximum pour servi sa lespas ki nou deza annan akoz si ou bezwen kree en dezyenm servis dan tou sa bann diferan servis, o kou pour ankor plis ki avan ok?

I pa vedir ki serten sa bann servis pa kapab ganny bouze en pti pe akote dan sa plan i donn ou sa opsyon, i annan serten servis ki ou bezwen met li la.  Alor par egzanp block opératoire si ou deza annan tou bann fasilite dyagnostik la i pli fer sans pour annan ou block opératoire la sirplas e kapab fer li fonksyonnen.

E Mr Speaker Onorab in koz lo osi resours imen ki nou dakor, sa nou dakor dan lesanz ki nou’n touzour bezwen ranforsi nou resours imen e nou bezwen konsyan poudir i annan bann staff ki vreman konpetan.  E i annan en kantite kondisyon ki nou adrese toulezour.  I annan en kantite dimoun mwan mon konn menm ka kot dimoun par egzanp in al deor pa’n ganny diagnose me isi nou’n kapab diagnose li, wi i annan ka kot nou pa’n kapab diagnose isi e ki dimoun in vwar an deor me i mars lot fason osi.  Akoz nou annan bann profesyonnel lasante ki bon, me wi i osi annan lespas pour nou amelyore.  Mon dakor 100poursan e sa i vin atraver parfwa bann serten formasyon ki nou pe fer pour nou bann staff e osi lezot ekspertiz ki kapab vini.

E si nou pran akoz Onorab in sit son prop kondisyon, sa ki mon kapab dir li oubyen nenport ki dimoun.  Dan medicine e mon krwar Onorab i konn sa byen akoz in deza travay dan sekter, pa toultan ki ou pour annan en lentervansyon ki donn ou en rezilta ki ideal.

I an realite dan medicine sa.  Mon krwar nou tou nou konn sa e menm i annan dimoun ki pour al deor e i pour ganny bezwen fer keksoz plis ki 1 fwa.

Si e parey mon’n deza dir dan mon lentervansyon o depar si i annan dimoun ki pa satisfe avek servis zot annan toutafe zot drwa pour zot eksprim sa, e kot i annan posibilite zot kapab adres sa, e i enportan osi pour note ki letan nou regard sa annou regard li dan en fason obzektif, annou regarde vreman eski in ganny diagnose byen mannyer mon konpran, mannyer Onorab in dir li menm li, wi in ganny byen diagnose.

Kestyon se otour sa tretman ki’n ganny fer e si sa tretman i apropriye savedir tretman in ganny fer byen, kestyon si i pa’n marse se i annan plizyer eleman medikal ki mon pa pour al ladan, akoz son lenformasyon i konfidansyel i depan lo li si i anvi al plis detay lo la, me dan tou sa bann eleman ou pour annan serten sirkonstans kot ou fer en tretman ki pa mars toultan a 100 poursan.  Sa i zis en realite dan medicine.  Mon ava aret la Mr Speaker.  Mersi e mon krwar Dr Louange ti anvi azout detrwa keksoz.

 

MR SPEAKER

Mersi Minis.  Dr Louange.

 

CEO HEALTH AGENCY DR DANNY LOUANGE

Mersi Mr Speaker, mersi Onorab pour sa kestyon, sa entervansyon.  Mr Speaker mon krwar i enportan pour nou get sa plan e fer en refleksyon lo sa plan dan en fason obzektif, akoz dan Sesel nou napa kapasite pour nou kapab fer en plan bann devlopman servis medikal.

E dan en devlopman servis devlopman medikal nou bezwen dimoun ki annan skills dan engineering, architect and so on and so forth, ki zot annan sa konesans ki mannyer en Lopital, ki mannyer en servis kapab ganny devlope.

E menm lo standar akoz sa group ki zot in fer, zot in aim pour bann infrastructure bann standar Europeen, standar British.  Pour standar clinical avek operational zot in, zot pe get JCI, JCI i Joint Commission International.  Joint Commission International i en sistenm Ameriken ki pe ganny servi dan plizyer pei menm dan bann pei Lazi.

E letan sa group in vin ansanm zot, zot pe gete ki mannyer, ki nou bezwen pour nou kapab meet sa standar si nou oule meet sa standar, prezan.  Si whether sa bann, sa i en white elephant mon krwar i enportan pour mwan Mr Speaker site ki nou’n deza komanse travay lo sa plan, parey oncology in fini, nou’n fini fer.  Parey la an se moman sa lannen nou annan apepre 5 proze ki nou pe travay lo la ki baze lo sa plan ki enkli clinical lab, ICU ki bor  pour ranplas lab La Digue, Anse Royale e CSSD.  E menm Medical Ward osi ki sa plan i propoze ki nou renovate dapre en serten standar osi deza byento bann travayer pour komans travay lo la

 

 

Mwan mon vwar sa plan i en plan ki nou pour kapab servi nou tou e menm nou demann zot sipor pour kapab ed nou pour nou kapab fer sa plan.  Pa reste or pa vin en white elephant me i vin en elephant ki vivan ki nou kapab, ki kapab deservi nou menm, nou prop fanmir, nou prop zanmi e tou dimoun dan Sesel.  Mersi Mr Speaker.

 

MR SPEAKER

Mersi Dr Louange. Onorab Roucou mon pour donn ou zis en kestyon ok?  Akoz mon annan bokou lezot Manm ki anvi entervenir, en kestyon dernyen.

 

HON CLIVE ROUCOU

Mersi Mr Speaker, Mr Speaker Minis pa’n koz lo sa bout finans ki mon ti demann li, si i aktyel oubyen si i pour fer further

 

MR SPEAKER

Ok. Yes Minister.

 

MINISTER JEAN-PAUL ADAM

Mersi Mr Speaker, annefe sa i, sa rezon finans i enn bann rezon akoz i pli fer sans pour fer li an faz akoz nou’n deza met sa Plan Devlopman dan konteks Bidze akoz Minister Finans aktyelman zot fer multi annual budget re planning.  Savedir zot regard lo plizyer lannen e si ou pour regard sa ki nou’n gannyen sa lannen i sa bann premye faz, e pour sa premye faz 5an i en 480milyon apepre, apepre 480milyon e sa in ganny prevwar dan Bidze pour ou gradyelman, nou bezwen al amelyor mon bezwen dir fran la dan Lasanble Mr Speaker, nou bezwen amelyor nou kapasite pour abzorb pli vit.

Me dan bann provizyon Bidze zot pe prevwar pour zot sa premye faz in ganny regarde pour asiste Sekter Lasante.  Fodre ou mazinen poudir sa plan i ganny fer, i ganny faze lo 15 a 20an.  Savedir ou kapab fer li an diferan, ou fer diferan morso a diferan moman ki vedir ki dan tou le lannen petet ou pe bezwen envestir en 100 milyon kekfwa i annan serten lannen ou bezwen met en pe plis, me i permet ou fer li atraver ou Bidze.

Si ou ti pour pran en opsyon ou bezwen konstrir en Lopital konpletman separe ou pour bezwen annan sa bidze an total imedyatman, akoz ou bezwen, ou pa kapab fer en bout Lopital apre komanse, ou bezwen kapab fer li pour en sel proze.

E si mon swiv en pti pe deba ki’n arive dan Lasanble oparavan kot in annan Mosyon par egzanp pour en Lopital Spesyalize i fezab pour annan en Lopital Spesyalize petet ki ganny fer par sekter prive, sa i en keksoz petet ki fezab, me fodre nou diferansye ant sa ki en Lopital Prive i kapab fer e avek sa ki Lopital Gouvernman i bezwen fer ki nou bezwen ofer servis pour tou dimoun.

E nou bezwen fer sir ki sa servis i aksesib pour tou dimoun.  Si i annan en Lopital spesyalize separe i toutafe en opsyon, i toutafe en keksoz ki petet i kapab fonksyonnen dan nou lekonomi e petet menm kapab annan partenarya avek Gouvernman.

Me fodre nou pa krwar ki nou kapab met a kote nou responsabilite pour nou envestir pour byennet nou popilasyon a lonterm zis si i annan en keksoz pour ganny fer par sekter prive.  Gouvernman i bezwen fer sir ki sa bann fasilite i disponib en fason ou en lot pour nou popilasyon.  Mersi Mr Speaker.

 

MR SPEAKER

Mersi Minis. Onorab Paul Ernesta.

 

HON PAUL ERNESTA

Bonzour Mr Speaker, bonzour Minis ek ou delegasyon ek tou bann koleg Onorab e tou dimoun a lekout.  Mr Speaker Minis in koz, plis selman Dr Louange in koz lo i annan serten nivo akonplisman ki zot in ganny fer lo sa Master Plan, eski i kapab dir nou ozordi ki zistans i ete letan i get son, lo term progre son Master Plan?

E dezyenmman Minis dan son lentervansyon pli boner, in koz lo bann fasilite ki i annan 16 fasilite primer lo nivo distrik, dan Master Plan si oule mon pa’n neseserman tann gran keksoz, gran mansyon lo la eski ou kapab eksplik nou en pti gin lo la.  Thank you Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Wi mersi Mr Speaker, premyerman pour bann proze ki deza an kour i annan parey Dr Louange in eksplike i annan oncology ki nou’n deza fer en premye renovasyon ki ti an parti atraver Bidze, an parti atraver sipor ki nou’n fer atraver plizyer Lorganizasyon dan Lasosyete Sivil.

Nou annan osi serten renovasyon ki’n fer lo serten Ward.  E nou bann prosen letap ki priyorite ou kapab dir son akselerasyon i komans sa lannen kot nou annan serten proze ki pli konsekan ki komans bouze.  Sa i enkli pour nou bouz servis sterilizasyon ok akoz sa i en, i annan serten nouvo lekipman ki nou’n gannyen atraver Donasyon L’Inde ki sa bann lekipman in fini ariv dan pei e nou pe re etablir sa nouvo servis sterilizasyon.

Nou annan letan nou pe bouz sa servis sterilizasyon i donn nou lespas pour nou komans fer travay lo nouvo ICU e nou pe osi bouz servis clinical lab pour nou bouz li dan sant dyagnostik.  Nou annan osi, sorry nou annan sa faz north east point, premye faz North East Point ki pe komanse sa lannen, epi nou annan outpatient Anse Royale ki pe komans sa lannen, epi nou annan La Digue premye faz ki pe komans sa lannen apre nou annan Baie Lazare.

An term bann diferan sant lasante ki pour ganny refer dan bann distrik, dan sa plan i prevwar ki tou sant i ganny refer, tou sant i ganny amelyore e bann ki mon’n site i bann pour 2018.

Pour 2019 nou’n fer serten propozisyon avek finans me nou pa ankor ganny klarifikasyon lo lekel ki pour priyorite an 2019, me an 2019 pour annan osi serten sa bann proze ki pe komanse sa lannen ki pe kontinyen par egzanp Anse Royale, par egzanp La Digue ki pe al kontinyen e osi dan sa plan nou annan en serten diferansyasyon ant bann sant rezyonal ki bann sant rezyonal byensir i en pti pe pli gran kot ou ofer plis servis.

Bann sant dan bann distrik ki bann pti sant lasante aktyelman, nou pour ranforsi zot servis nou pour amelyor zot fasilite me i pa pour forseman vin bokou pli gran si mon kapab met li koumsa.

Sa bann sant rezyonal ki pour ofer bokou plis servis, bann sant ki deza egziste nou pour amelyor son standar, nou pour fer li pli byen e kot, e nou pran legzanp serten landrwa kot i vreman sere nou pour bezwen agrandi li me i pa pour forseman bann, nou pa kapab ekspekte ki sa bann sant pour vin bann gran Lopital, met li koumsa, i pour ranforsi sa bann servis ki disponib dan sa bann sant dan distrik.  Mersi Mr Speaker.

 

MR SPEAKER

Mersi Minis. Onorab Regina Esparon.

 

HON REGINA ESPARON

Mersi Mr Speaker. Mr Speaker mon ti a kontan demann Minis ki training plan zot annan an vi ki zot pe expand zot pour bezwen plis resours imen, eski zot annan en training plan pour bann staff ki pour occupy sa bann nouvo servis ki zot pe mete?

Epi Minis ou’n dir pour annan extension Lopital North East Point mon konsern se ki ler nou pe agrandi landrwa nou pe bezwen grandi landrwa pour nou servi, non pa parey klinik La Riviere Anglaise ki en gran klinik i annan landrwa ki pa pe servi parske North East Point Hospital li menm li i annan sa bout devan kot car park lo kote gos, kote drwat la ti sipoze en landrwa kot ou met bann dimoun i kapab vin met zot paran la peye pour sa, me depi ler in fer zanmen in servi.  Si nou pe al agrandi ankor konmsi i pa pour en waste konmsi, nou pe grandi me selman nou pa maximize son use li menm.  Mon ti a kontan en pe leklersisman.  Mersi Minis.

 

MR SPEAKER

Mersi Onorab Esparon.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Parey mon’n mansyonnen dan mon deklarasyon resours imen e nou plan lenvestisman dan resours imen mars ansanm ek sa plan lenvestisman pour Lopital e mon’n deza mansyonnen an term bann nouvo profesyonnel ki pe antre dan sekter nou annan 44 ners aktyelman ki an formasyon, parmi bann ners ki deza dan servis nou aktyelman annan 21 ki pe fer BSC e nou annan 12 ki pe fer MSC apre nou annan serten lezot training pli a kour term ki pe fer pour diferan groupman, pa zis pour ners posib bann lezot profesyonnel.

Par egzanp pour bann paramedic e serten lezot e sa i ganny fer tou le lannen.  Nou pe osi travay avek NIHSS pour ofer serten kour pour serten lezot sekter fizyo par egzanp e serten lezot e nou pe osi moderniz nou training plan an relasyon avek sa bann bezwen ki nou antisipe.

E osi parey mon’n eksplike nou annan aktyelman 54 dokter ki pe etidye aletranze, 54 Seselwa ki pe etidye pour vin dokter e osi 2 ki pe fer spesyalizasyon e nou annan osi en group dokter ki deza Sesel, ki zot an kour pour fer zot spesyalizasyon.  Savedir zot deza pe travay dan en sekter spesyalize dan Lopital Sesel e ki apre zot bezwen al fer zot spesyalizasyon aletranze e mon ava rod sa sif lo konbyen i annan selman mon annan sa, selman i pa la devan mwan.

Apre sa dezyenm parti kestyon kot i konsern North East Point, annefe sa North East Point osi i annan 2 faz e sa premye faz ki pour komanse sa lannen.  I renovasyon.  Savedir aranz en pti pe nou rapel ler nou ti vizite Onorab i annan bann konsern ki nou partaze otour bann fasilite pour bann pasyan ki pour amelyor zot kondisyon, e sa i komans, e sa bout ki ou’n mansyonnen ki pa pe ganny itilize o maksimonm.

I pour diferan rezon annefe sa premye faz i renovasyon sa bout, letan nou fer renovasyon sa bout i pour permet nou pran bann pasyan ki bann pasyan psychiatric, bann pasyan dan mental home pour permet nou bouz zot laba apre fer renovasyon dan zot seksyon.

E apre sa seksyon ki aktyelman kot occupational therapy i ete nou pour ranforsi bann fasilite occupational therapy me nou pe osi ranforsi sipor pour bann dimoun aze par egzanp bann dimoun ki ganny bann problenm Alzheimer’s ek Dementia e sa i pour enkli bann serten, premyerman nou bezwen konsyan poudir i annan en waiting list pour dimoun antre dan Regional Home.

Alor i annan serten avek sa renovasyon nou pour adres serten dimoun ki pe espere pour antre dan Regional Home me nou pour osi amelyor fasilite pour bann dimoun enkli bann dimoun an deor ki kapab bann dimoun par egzanp ki ganny afekte par Dementia par Alzheimer’s pour kapab vin fer en serten aktivite dan sa landrwa avek sa renovasyon.  Sa i dan premye faz.

Dezyenm faz ki tonm apre 2020 se la kot nou al dan nouvo batiman e sa i vin par deryer, sa pour ranforsi geriatric care, bann fasilite reabilitasyon, fizyo eksetera e sa i vin dan dezyenm faz.

Premye faz se pour nou amelyor sa ki nou annan e adres bann konsern, bann konsern par egzanp lasanmben ki enn bann konsern ki nou’n leve ansanm e pour nou met sa an konformite avek bann standar pour bann dimoun aze, e zis pour note ki yer zisteman mon’n zwenn osi avek fondasyon pour bann dimoun ki annan Alzheimer’s ek Dementia kot nou’n koz zisteman lo bann proze e nou’n diskit sa renovasyon avek zot lafason ki nou kapab donn sipor bann dimoun ki ganny afekte ek sa bann keksoz.  Mersi Mr Speaker e mersi Onorab.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Mr Speaker petet mon a demann Minis, eski dan sa plan i annan en provizyon pour fer hydrotherapy or etablir en sistenm pour hydrotherapy?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Wi Mr Speaker i pour, dan premye faz i pour plito regard pour nou fer sa dan Rehabilitation Center me evantyelman wi en keksoz ki kapab ganny konsidere dan North East Point li menm li letan ou fer ekspansyon ok.  Mersi.

 

MR SPEAKER

Mersi Minis.  Bon nou ava pran en Break e nou ava repran 11er.

 

        (BREAK)

 

 

MR SPEAKER

Bon.  Nou ava kontinyen avek lot kestyon pour Minis avek son panel.  Onorab Noline Sophola.

 

HON NOLINE SOPHOLA

Mersi Mr Speaker.  Mersi Minis pour sa prezantasyon byen kler e tre anbisye.  Mon vreman apresye akoz i montre ki Minister Lasante i annan en tre bon vizyon pour anmenn le meyer pour pep Seselwa.  Eskiz mwan si zot in deza koz lo la me petet mon pa’n retenir dan prezantasyon.

Minis sa kestyon i viz pour Lopital Sesel.  Parfwa nou annan zabitan Praslin ek La Digue ki bezwen akonpanny en manm zot fanmir dan en ka irzan Mahe.  Eski zot in pran konsiderasyon annan en landrwa oubyen en Waiting Room kot sa manm fanmir i kapab santi li ase konfortab pandan ki i pe esper sa pasyan oubyen dokter?

E dezyenm kestyon, osi si zot in konsider annan en landrwa kot bann pasyan ek manm fanmir i kapab ganny in-depth counselling apre ki medsen in dekouver maladi sa pasyan?  E osi parfwa kan i annan en ka lanmor dan fanmir?  Mersi.

 

MR SPEAKER

Mersi Onorab Sophola.  Minis.

 

MINISTER JEAN-PAUL ADAM

Mersi Mr Speaker e mersi Onorab.  An se ki konsern bann pasyan Praslin ek La Digue, nou, nou konsyan i souvandfwa letan zot ganny, sirtou en admission irzans kot zot bezwen vin Mahe. Ki annan, aktyelman serten defayans an term sipor e landrwa kot zot vini.  I vre ki nou, nou Lopital i aktyelman napa vreman en landrwa spesifik par egzanp kot fanmir i kapab i kapab espere, oubyen kot i annan lezot fasilite, bann cafeteria, eksetera.

Alors, dan sa konsep devlopman, dan batiman, kot batiman Green Roof i ete aktyelman, sa pour vin en nouvo Sant Admission.  Savedir ki aktyelman nou napa.  Se nou pou ganny en landrwa kot tou bann admission i pa laba.  E kot pou annan serten servis ki disponib osi pour bann fanmir.

I pa’n prevwar pou annan akomodasyon me sa i en keksoz ki Gouvernman i kapab osi diskit avek en prive dan zanmirant ki kapab annan serten akomodasyon ki kapab ganny fer par sekter prive.

Me sa devlopman lo Sant Admission ki pou dan Green Roof pour mon krwar, pour ofer bokou plis servis pour bann fanmir ki par egzanp i an antant e avek bann lasal e bann landrwa pour zot espere.

E osi avek bann fasilite pour zot refresh zot lekor kot i neseser.  Apre sa kestyon lo, kot i konsern in-depth counselling, sa i lye plis avek bann standar ki nou pe sey met an plas.  E mon ti a dir ki aktyelman dan serten sekter in annan en bon progranm kot par egzanp sa, sa pasyan mon kapab dir, i ganny sa counselling ki i neseser.  En legzanp se CDCU.  Mon konnen kot i annan en kantite bon travay ki’n ganny fer laba.  I annan serten lezot, mon konnen dan annan osi Oncology, mon krwar i annan amelyorasyon an term counselling i kapab ganny donnen avek pasyan.

Me definitivman nou lentansyon se, osi avek fasilite se ki, letan ou annan sa lekspertiz ki isi a lonterm ki ou kapab fer sa formasyon pour permet ki ou annan sa counselling  ki disponib pour tou, pour tou pasyan ki bezwen li.  E pour tou fanmir osi ki bezwen li osi.  E aktyelman osi nou ofer serten sipor adisyonnel osi atraver psikolog.  Kot i annan nesesite, zot kapab ganny referans avek psikolog.  Mersi Mr Speaker e mersi Onorab.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker.  Bonzour Minis avek ou lekip.  Bonzour tou dimoun a lekout.  Mon annan 2 pti kestyon.

Premyerman mon ti a kontan konnen si Minis i annan plan pour desantraliz en pe Servis Medikal e anmenn en pe dan, kot Klinik Beau Vallon.  An vi ki lenfrastriktir i deza la e i gran.  I annan plas pour accommodate en pe plis servis.  Mon ti oule konn ou progranm lo la.

E dezyenmman, mon ti oule konnen, an vi ki nou’n fer demann pour lanbilans, i annan plis ki 2an.  Ti lo progranm, nou ti sipoze gannyen en bon pe letan pase.  Me ziska aprezan, en lanbilans avek en loto pour Klinik Beau Vallon i ankor en nesesite primordyal ki nou bezwen.  Mon pa konnen si ou kapab donn nou en pe leksplikasyon lo sa 2.  Mersi.

 

MR SPEAKER

Mersi Onorab Hoareau.  Minister.

 

MINISTER JEAN-PAUL ADAM

Mersi Mr Speaker e mersi Onorab.  I deza annan en kantite servis spesyalizasyon ki disponib dan Klinik Beau Vallon, dan Health Centre Beau Vallon.  Sa i lo en baz konsiltasyon byensir, pa neseserman pour fer prosedir.  Me si ou regard laplipar ban spesyalizasyon ki konsern bann maladi prensipal ki nou annan, savedir bann dimoun ki annan dyabet, pour bann dimoun ki annan problenm sirkilasyon, bann dimoun ki annan problenm kardyovaskiler, problenm tansyon, sa bann Spesyalis i disponib dan Sant Lasante Beau Vallon.  Byensir anmezir ki nou ranforsi nou bann spesyalizasyon, nou pou kapab ofer, nou kapab desantraliz plis bann spesyalizasyon dan, dan bann distrik.  Akoz pour bann pasyan bokou i pli fasil pour zot vizit zot spesyalis dan distrik.  Me i vre ki dan serten sekter akoz nou napa sitan sa kantite spesyalis, alor zot fer zot bann randevou sirtou kot SOPD parey nou dir Yellow Roof.  Me i deza annan sa bann servis lo en baz ase larz kot Sant Lasante Beau Vallon

An se ki konsern lanbilans, nou, nou rekonnet poudir i annan serten retar an term pour nou kapab ganny sa bann lanbilans.  Me i annan 11 ki’n fini ganny procure e i ekspekte ariv dan pei dan apepre 2 mwan.  Ok, sa i pou enkli enn ki pour Sant Lasante Beau Vallon.  Mersi. Mersi Speaker.  Mersi Onorab.

 

MR SPEAKER

Mersi Minis.  Onorab Waven William.

 

HON WAVEN WILLIAM

Mersi Mr Speaker.  Bonzour Minis avek ou lekip.  Minis lefe ki La Misère nou limite avek later e lefe ki sa, zot in pran nou Sant Sosyal letan ti annan sa problenm polisyon La Misère e nou’n fer Klinik.  Mon anvi demann ou, eski ou Minister dan sa gran plan zot annan en phase out plan pour, pour sa?

E prenan kont osi ki pandan en aktivite avek en group Lion’s Club, ti annan sa propozisyon pou fer en Dental Clinic avek en Eye Clinic.  Ki plan ou Minister vizavi transfer sa Klinik kot sa lakaz Komandan e avek sa proze Lion’s Club?

 

MR SPEAKER

Mersi Onorab William.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Parey Onorab in remarke, sa Klinik ti ganny etablir dan sirkonstans spesifik.  Nou’n mentenir li akoz pour fasilit akse pour bann dimoun ki reste La Misère, pour zot ganny akse avek sa servis.

Me si ou pou regard konpare avek nou tou nou bann diferan Sant Lasante, sa enn ki baze Souvenir son lakantite dimoun ki partisip, ki vizite i mwens.  E alor dan plan redevlopman, mon oule fer kler ki plan redevlopman nou regard tou Klinik an term ki i kapab anmennen dan nou servis lasante.  Alor pour sa rezon nou pa pe mazin ferm serten Klinik.  Me i annan serten Klinik kot nou bezwen regarde ki mannyer nou kapab pli byen fer loriyantasyon bann servis baze lo bezwen.

E an term Souvenir aktyelman, baze lo lakantite konsiltasyon, i pa neseserman en landrwa ki nou ekspekte ki lakantite konsiltasyon i ogmante.

Alor bann opsyon se pour nou regarde eski i annan posibilite met serten servis spesyalite.  E ou’n site par egzanp dantis ek lizye.  Eski serten sa bann servis i kapab ganny mete la?  Letan nou’n fer premye diskisyon, ti dan konteks en partenarya Klinik Prive, ki ankor an diskisyon me pa ankor annan en, en desizyon ki’n ganny pran lo sa.  Akoz nou pe esper osi Minister Finans pour finaliz sa, sa Public Private Partnership Policy ki pour gid ki mannyer nou kapab regard sa.

Me nou bezwen osi regard, nou bezwen fer en pti letid pour vwar son fezabilite an term lekel pasyon ki pou servi? Ki lakantite dimoun, eksetera.  Apre sa propozisyon pour li al dan sa lot lokasyon, lo plan Lasante i ok.  Sa landrwa petet li menm i meyer.  Me mon krwar sa ti’n ganny diskite avek Minister pour Later avek Lenfrastriktir.  Me en desizyon final pa ankor ganny pran, akoz i depan en pti pe lo sa propozisyon en partenarya piblik prive e osi lo fezabilite ki bann servis ki nou kapab mete dan sa landrwa.  Mersi Mr Speaker.  Mersi Onorab.

 

MR SPEAKER

Mersi Minis. Onorab William, en kestyon.

 

HON WAVEN WILLIAM

Minis, lefe ki ou’n nonmen ki i annan, ou annan 30 Seksyon Spesyalize.  Mon anvi demann ou, eski dan s gran plan i annan lentere bann foreign partners pour konplimant sa?  E dan ki sekter ki Gouvernman pour allow?

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Pour fer kler ki i annan sekter ki nou krwar i kapab annan spesyalizasyon envestisman par prive.  Me i annan serten konsiltasyon ki pe sey ganny fer osi avek Board Health Care Agency  avan ki nou desid 100 poursan ki bann sekter ki nou ti pou plis ankouraz dimoun oubyen non.

Me dan en fason zeneral, definitivman, par egzanp lizye i en landrwa kot ti kapab annan lenvestisman.  Akoz nou kapab war i deza annan bokou servis pour lizye ki dan, ki dan prive.  Dantis i deza annan bokou.  E i annan posibilite pour fer ekstansyon sa bann servis an term osi serten tretman ki petet nou kapab dir li plastic surgery me plito kosmetik.

I annan osi opsyon ki sa i kapab ganny fer par sekter prive.  Me pour fer kler ki Gouvernman li menm li pa ankor publie okenn gidans pour sekter prive pour dir ki sekter spesifik ki nou ti ava ankouraz sa oubyen non.

I enportan pou annan en konversasyon avek Board Heath Care Agency, la pour nou vwar ki bann sekter.  E osi pour nou ganny gidans avek Minister Finans e osi Minister Lenvestisman, pour nou fer sir ki i annan en prensip ki kler pour tou dimoun.  Mersi Mr Speaker e mersi Onorab.

 

MR SPEAKER

Mersi Minis.  Onorab Gervais Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker, mon premye kestyon i relye avek en larepons ki Minis in deza donnen konsernan Mosyon ki ti devan Lasanble.  E sa Mosyon ti pe demande ki en Sant Spesyalize i ganny kree isi Sesel.

So, baze lo larepons ki’n donnen, mon anvi dir, mon anvi demann Minis si, si son Minister in swiv bann propozisyon fer par Lasanble?  E alor ki pozisyon Minister Lasante ozordi le nou pe koze vizavi propozisyon pour ki Gouvernman i apros, i fer demars pour acquire sa propriyete laba e pour fer li koman en public private partnership project?  Sa i premye.

Dezyenmman, mon oule demann Minis an vi ki sa Master Plan son kantite konstriksyon ki pou annan, si i fer ki zot pou bezwen agrandi son siperfisi, Lopital Sesel partikilyerman ki i ete ozordi?

E ki mannyer sa i kapab afekte bann propriyete prive ki dan zalantour, si pou annan en lenpak?  Mersi bokou.

 

MR SPEAKER

Mersi Onorab Henrie.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Nou’n swiv sa deba lo Mosyon.  Mon pa pou kapab dir ou ki mon’n swiv sak lentervansyon.  Me nou’n apresye an zeneral lide par deryer sa Mosyon.  Konsern ki mon’n deza eksprimen e osi dan mon lentrodiksyon, se ki mon krwar ki bokou deba otour sa pa ti baze lo bann fe.  I ti baze lo parfwa bann fo persepsyon nou Sistenm Lasante.

E i enportan ki nou adres okenn lenvestisman dan Lasante.  Si i gouvernmantal oubyen prive, nenport.  I bezwen baze lo bann letid fezabilite.  I bezwen baze lo realite ki nou popilasyon i ladan ozordi.  I pa rezonnab pou zis dir annou fer en lenvestisman me apre nou a gete ki mannyer nou pou peye.  Akoz finalman sa, sa lenvestisman i bezwen marse dan nou lekonomi.

Dapre revi ki Minister in fer, nou vwar ki i annan serten servis ki aktyelman nou anvoy dimoun aletranze pour sa bann spesyalizasyon.

E si par egzanp i annan en prive ki anvi envesti Sesel pour ofer sa bann servis spesyalize, e enkli par egzanp lo sa batiman ki ti ganny site, Gouvernman i santi ki sa i en posibilite.  Akoz si sa servis premyerman i koresponn avek standar ki nou espekte.  Apre dezyenmman son kou i rezonnab.  E nou espekte ki pour annan en amelyorasyon dan kou akoz pa pou bezwen anvoy sa pasyan, bezwen pey tiket avyon.  Alors i devret annan en meyer kou ki si en prive ki kapab fer sa, sa biznes isi ki nou’n pare koman Gouvernman si i annan en servis ki nou pa pe ofer dan Lopital ki nou kapab regard pou menm refer pasyan dan sa, dan sa Lopital.

Me i enportan pour note ki Gouvernman, nou deza an konversasyon avek plizyer lenvestiser ki’n apros nou.  Me mon bezwen onnet osi avek Lasanble pour dir ki fezabilite en tel proze i pa neseserman fasil.  E sa proze si nou pran sa legzanp sa proze ki ti ganny fer, sa lenvestisman ki ti ganny fer avan kriz finansyel ekonomik 2008.  Mon krwar ki sirkonstans mondyal i diferan ozordi.

E sertennman en dimoun ki pou envesti ladan pou bezwen regard li dan en lot fason.  I pa vedir ki i pa fezab.  Me i vedir ki en lenvestiser i pour bezwen fer en bon fezabilite, pour regard bann kou dan en fason koeran pour etidye marse.

E osi i annan probabilite nesesite ki ou pou fer li ansanm avek en pe tourizm medikal.

Akoz si ou regard legzanp bann lezot pei ki’n fer bann Lopital Spesyalize, legzanp pli pre obor nou se Maurice.  Zot in fer li alafwa pour ofer en servis pour zot popilasyon.  Me pou kouver zot kou, zot in osi annan en eleman Tourizm Medikal ki’n disponib ladan.

Alor lapros ki Gouvernman ti, bann gidans ki Gouvernman deza nou’n donnen, par egzanp bann lenvestiser, se ki i enportan ki si en group i vin fer en Lopital, i en group ki deza annan, parey nou dir an Anglais, en track record.  Savedir pa zis en lenvestisman, me en group ki deza annan en rikord an term loperasyon en Lopital.

E osi ki byensir Gouvernman pa pou aste okenn servis ki li deza i pe donnen.  Akoz i pa pou fer sans, akoz i pou kout pli ser.  Me si i annan servis ki zot kapab fer ki i fer sans, Gouvernman i kapab konsider sa.

Alor Gouvernman i deza annan sa konversasyon avek sekter prive.  I annan osi Lopital Miot ki si mon pa tronpe in gannyen en bout later dan lepase pour fer devlopman en Lopital me i pa’n fer li.  Alor mon krwar Gouvernman pe dir li i pou bezwen, swa i bezwen devlope oubyen non.

E alor sa bann opsyon pou fer en Lopital Spesyalize dan prive i egziste.  E Gouvernman i pe pourswiv sa bann demars.  E dan, an term sa Mosyon, nou napa problenm avek nide sa Mosyon.  Me i enportan ki i baze lo bann, bann levidans e bann statistik ki baze lo larealite ki nou fer fas avek dan nou pei aktyelman ozordi.  Mersi Mr Speaker e mersi Onorab.

 

MR SPEAKER

Minis mon krwar i annan en dezyenm kestyon lo lagrandisman kot Lopital.

 

MINISTER JEAN-PAUL ADAM

Mersi Mr Speaker e mersi Onorab.  Eskiz mwan, mon ti’n mank sa dezyenm bout kestyon.

Annefe pou annan en lagrandisman konsekan dan sit Lopital aktyel.  E sa, pli gran diferans pour sirtou kot sa ki nou apel Green Roof ek Blue Roof.  Akoz Green Roof aktyelman i zis en, i Ground plus One aktyelman.  E dan redevlopman i pou mont plizyer letaz an plis.  Ok. Alor depandan lo gidans sorti kot Planning.  Me i kapab al ziska 4, 5 letaz.  E mon pa krwar i annan en gran lenpak avek bann batiman vwazinaz akoz deza dan sa zanmirant ou annan batiman ki 4, 5 letaz.  E alor ou pour en pti dan menm laliny.  E alor dan sa redevlopman nou al pli o.

Menm zafer avek Blue Roof.  I annan loportinite pour al pli o.  e par deryer Lopital egzistan, pou annan nouvo block opératoire ki pour 6 oubyen 7 letaz.  Mon ava dir ou egzakteman.  Selman i plizyer; i plizyer letaz.

Alor i annan bann batiman kot nou pe mont pli o ki nou ete aktyelman.  Nouvo batiman osi ki pou pli o. Me nou’n pran an kont osi lenpak ki pou annan lo vwazinaz.  E i an liny avek gidans zeneral ki Planning i donnen.  Byensir Planning pou donn en desizyon final.

Alor i pou, pardon eskiz mwan, pou Operating Theater i pou Ground Plus Four.  Savedir 5; 5 letaz.  E nou pou swiv gidans ki Planning i donn nou.  Me nou ekspekte ki sa i kapab ganny fer dan en fason ki rezonnab e ki pa pou annan en lenpak telman negatif lo bann vwazinaz.  Mersi Mr Speaker e mersi Onorab.

 

MR SPEAKER

Mersi Minis.  Onorab Henrie.

 

HON GERVAIS HENRIE

Zis en pwen kalifikasyon; lo premye kestyon vizavi sa batiman laba en allant Providence.  Akoz Minis in dir nou poudir wi i annan sa, lide i egziste e Gouvernman pe pourswiv bann diskisyon avek bann envestiser.  Me sa ki pa’n kler dan son larepons se ki, si sa batiman spesifik i en size dan sa diskisyon avek bann envestiser?   Mersi.

 

MR SPEAKER

Mersi Onorab.  Minis

 

MINISTER JEAN-PAUL ADAM

Wi Mr Speaker. Wi, mersi Mr Speaker e Onorab.

Sa batiman wi spesifikman akoz Gouvernman in dir i ti ava swete ki sa batiman i vin en Lopital.  Akoz sa ti son lentansyon lorizin.  In annan serten nide pour fer lezot proze me Gouvernman in dir i ti a plifere ki sa i vin en Lopital.  Mersi.

 

MR SPEAKER

Mersi Minis.  Onorab Francois Adelaide.

 

HON FRANCOIS ADELAIDE

Mersi Mr Speaker.  Bonzour tout le monde.  Minis mwan mon pe koz lo spesifikman Klinik Baie Lazare ki mon’n tann ou mansyonnen.  Mr Faure li i ti dir nou poudir premye faz i pou konmanse sa lannen.  E la mon’n tann ou pe dir sa lannen osi.  Me dapre nurse officer, dan miting piblik Baie Lazare, i ti dir ki konstriksyon pou konmans 2019.

So, mwan mon kestyon se mon pe demann ou, la aktyelman le 18 Avril, ki pozisyon nou ete avek konstriksyon?  E ki dat petet nou pou vwar premye pyer ganny mete pour sa Klinik?  E ki bann mannev, bann plan re-alokasyon ki Minister pe fer pour ki nou a konnen kote nou pou bouze? E kan ki nou pou konmans bouze?  Mersi.

 

MR SPEAKER

Mersi Onorab Adelaide.  Minis

 

MINISTER JEAN-PAUL ADAM

Mersi Mr Speaker e mersi Onorab.

Efektivman sa proze in konmans bouze.  Me mon pa pour kasyet avek Lasanble pour dir letan nou pou fer lenfrastriktir dan Lasante, parfwa i meyer pou fer li byen ki ou pou zis taye fer en keksoz.  E letan nou’n konmans sa travay lo, lo Klinik Baie Lazare, nou’n realize ki osi atraver bann renovasyon dan lepase, parfwa letan nou’n taye pou fer serten keksoz, i pa forseman in reponn sa bezwen.

E alor sa faz ki nou ladan la se pour nou fer en lay out ki adres tou bann konsern ki nou annan dan distrik.  Premyerman se landrwa i ptipti par rapor a bezwen pour bann pasyan.

Dapre sa –e  sa i enn bann proze ki nou pe outsource son management.   E dapre bann gidans ki nou pe gannyen avek bann enzenyer e bann diferan dimoun ki pe travay lo la, sa bann faz preparasyon.  I riske pran en bon bout sa lannen.  E i vedir wi, nou annan en posibilite ki petet nou kapab konmanse serten keksoz lafen sa lannen.

Akoz premye faz se sirtou se pour bouz Klinik egzistan dan sa, dan milye lakres, non?  Pour bouz sa Klinik egzistan dan vye lakres.  E ki i permet nou ofer sa servis pandan ki sa peryod renovasyon pe ganny fer.

Alor nou pe tap tou pour tou pour nou sey fer sa pour lafen sa lannen e ki pour permet sa proze kontinyen an 2019.  E fotespere i fini an 2019.  Mersi Mr Speaker.

 

MR SPEAKER

Mersi Minis.  Onorab Adelaide.

 

HON FRANCOIS ADELAIDE

Minis, savedir nou pe konfirm avek dimoun Baie Lazare poudir sa lannen nou pa pe war okenn konstriksyon.  E sa R5milyon ki nou ti vote an Desanm, nou ti krwar poudir nou ti pou annan en konmansman kot nou pou trouve.  Savedir sa lannen pa pou bon?  Mersi.

 

MR SPEAKER

Mersi Onorab.  Minis

 

MINISTER JEAN-PAUL ADAM

Mersi Mr Speaker.  Mersi Onorab.  I pa toutafe korek sa ki in dir.  Akoz sa 5milyon i kouver osi pour transfer dan sa batiman tanporer, ok?  Alor nou, nou annan serten preparasyon ki bezwen ganny fer.   E i annan osi bann kou transfer dan sa nouvo batiman, dan sa batiman tanporer.  E alor pou annan serten konstriksyon ki pou ganny fer.  Me nou pa pe ekspekte sa proze fini an 2018, me plito an 2019.  Mersi Mr Speaker.

 

MR SPEAKER

Mersi Minis.  Onorab Sylvanne Lemiel

 

HON SYLVANNE LEMIEL

Mersi Mr Speaker.  Bonzour Minis avek ou delegasyon.  Minis, mon…. Mr Speaker atraver ou, Minis mon konsern i konsern Wellness Hospital.  Akoz aktyelman la ou pe vwar tou pasyan kot wellness ansanm avek kanmarad.  E i annan lensidan ki pe arive aktyelman kot bann dimoun ki vin vyolan e ki pe harass bann nurse.

Lavi bann dimoun ki pe vey zot la i en pti pe riske.  Ki ou plan, mon’n vwar ou annan plan pour Wellness.  Me ki ou plan la pour nou kapab separ en pe sa, sa bann, sa bann dimoun ki pe plizoumwen fer vyolans dan sa Wellness Centre la, ki kapab koz swa en lanmor swa en aksidan arive avek en lot pasyan?  Mersi.

 

MR SPEAKER

Mersi Onorab Lemiel.  Minis

 

MINISTER JEAN-PAUL ADAM

Mersi bokou Mr Speaker e mersi Onorab.

Annefe nou annan serten defi avek Wellness Centre.  Me mon, mon apresye en kantite travay ki bann staff i fer laba.  E mon krwar ki zot fer en travay remarkab, prenon kont difikilte ki zot fer fas avek.  Parey nou konnen aktyelman Wellness, nou pe bezwen diviz li an 2 fonksyon.

I annan sa fonksyon reabilitasyon pour bann dimoun ki’n ganny afekte par drog.  E sa fonksyon aktyelman pe ganny dirize par Lazans pour Reabilitasyon e Prevansyon Drog.  E nou annan osi nou kote psychiatric, kot nou annan nou bann pasyan Wellness.

Sa i vedir ki wi, lespas ki disponib pour nou bann aktivite Wellness i pa ase.  E Gouvernman pe sey akselere pour kapab, parey nou konnen i annan plan pour bouz sa bann progranm reabilitasyon dan son prop landrwa.

I annan provizyon pour li, pour li kapab bouze.  Sa pou donn nou en pti pe plis lespas.  E priyorite se pour nou kapab fer sa o pli vit posib ki pour permet nou kapab fer nou travay dan Wellness avek lespas ki i merite e dan bann kondisyon ki i merite.  Me an, lezot eleman ki zis bon gard antet se dan nou plan redevlopman, nou annan osi provizyon pour en Acute Psychiatric Ward ki pour vin dan Lopital, dan Lopital Sesel baze Mont Fleuri.

E lot eleman se nou, nou pe travay avek lazans pour nou ranforsi sekirite kot Wellness akoz nou konnen poudir sa i en, sa i en konsern aktyelman.  Mersi Mr Speaker e mersi Onorab.

 

MR SPEAKER

Mersi Minis.  Onorab Clifford André

 

HON CLIFFORD ANDRE

Mersi Mr Speaker.  Mr Speaker, mon annan 2 pti kestyon ki mon ti a kontan demann Minis. An vi ki lapwentman pour vwar bann spesyalis i pran bokou letan.  Eski dan sa progranm redevlopman, letan pe konsider redevlopman avek bi anmenn meyer servis, eski Minis i kapab vwar si nou kapab improve lo sa?

Akoz mon mazinen sa i kree en pe sityasyon kot bann dimoun i santi zot en pe fristre par ler pour zot ganny lapwentman.  Pour zot konnen the diagnosis of zot maladi i ete.

Dezyenm kestyon ki mon ti a kontan demann Minis se, an vi ki Anse Aux Pins i annan serten devlopman ki pe pase lo l’Ile Soleil e i annan konsern lo pour mentenir Klinik kot i ete oubyen sa devlopman bouze.  Eski antretan, nou konnen Ile Soleil pa pou ariv deswit, eski antretan ki si desizyon i ganny pran pour mentenir al fer li laba, eski nou kapab annan en improvement?

Akoz kondisyon, kontrent, i sere e bann servis ki ganny ofer i en pe difisil.  Dimoun pe panse, ou i annan lezot keksoz.  So, eski kondisyon i kapab pour amelyor sa servis ki pe ganny donnen dan sa Klinik?  Mersi

 

MR SPEAKER

Mers Onorab André.  Minis

 

MINISTER JEAN-PAUL ADAM

Mersi bokou Mr Speaker e mersi Onorab.

An se ki konsern bann spesyalis, nou, definitivman avek sa plan redevlopman, nou pou annan plis lespas pour bann outpatient consultations par spesyalis.  E sa i pou vedir ki i pou ed nou pour nou kapab ofer en meyer, en meyer servis avek piblik.

Me i enportan pour note osi ki, akoz mon konnen, mwan osi mon ganny sa konplent ki dimoun i dir i pran en pe letan pour vwar spesyalis.  Me si ou pou konpar nou, nou letan espere pour vwar spesyalis Sesel e nou konpar li menm avek lezot pei, i pa sitan lon, i pa sitan lontan.

Mon konnen i annan dimoun ki letan ou annan en maladi, ou santi poudir ou anba presyon.  Me an zeneral sa, sa apwentman avek spesyalis i ganny determinen selon severite sa ka.  Savedir si ou annan en sityasyon ki vreman kritik, zot pou fer en fason ki spesyalis i war ou pli avan.

Si ou annan en sityasyon ki kronik, e mon oule fer kler, i pa vedir ki nou dismiss kondisyon sa pasyan.  Me parfwa sa kondisyon i kapab ganny manage par egzanp akoz souvandfwa i pou’n deza ganny en serten pilil oubyen i pou’n, in ganny serten aksyon ki pou ganny pran.  Apre i pou ganny revwar par spesyalis.

E alor an bref sa redevlopman pou donn nou fasilite ki pou fer, ki pou permet nou fer li en pti pe pli meyer e i pou mars ansanm osi avek Health Information System ki osi pou ed bokou avek bann, bann reference avek spesyalis.

Akoz lenformasyon pou pas plis fasilman.  Akoz nou perdi en kantite letan aktyelman letan parfwa ou pe fer sir ki kart sa dimoun i azour oubyen ki kart i disponib pour sa spesyalis kapab vwar sa pasyan.  Avek Health Information System, sa pou ed nou en, en kantite.

En se ki konsern Ile Soleil, provizyon pour nou re-devlop Servis Lasante dan sa rezyon, i pou ganny fer lo île Soleil.  E plan i en cours e nou pe ganny sa atraver en don sorti kot Gouvernman Chinois. 

E sa, sa Sant Lasante pou enn ki pou kouver sa rezyon pli larz.  Nou’n regarde opsyon byensir pour nou refer li lo menm sit.  Me i annan en kantite, mon krwar ou konnen Onorab ki dan sa distrik.  I annan en kantite kontrent otour sa sit aktyel.

I annan problenm ki i lwen.  En landrwa kot delo i vini sorti, sorti anba.  E nou’n deza fer serten renovasyon miner, depi an 2016 an parti.  Apre nou’n fer ankor en pe an 2017.  Ti enkli, nou’n re-penn, nou’n met serten nouvo tiles.  I’n anmenn serten defi avek osi akoz serten ki nou’n fer pa’n toultan adres sa problem.

Akoz par egzanp, sa problenm Fungus, nou ti’n deal avek me mon konsyan poudir i’n retournen.  Nou annan serten lezot pti amelyorasyon ki nou pe sey fer la lo nivo sekirite an term fencing.

E apre lo kote pansman, pour nou donn meyer fasilite pou pansman koman en baz tanporer.  E osi poudir ki enn fwa ki Ile Soleil i, in ganny met an operasyon, nou annan sa opsyon pour nou regard, pour regard sa vye Klinik koman en landrwa ki dimoun i kapab ganny akse avek serten servis Lasante.

Me fodre nou konpran ki an term son, an term fezabilite a lonterm, pour nou met bokou plis servis, pour nou donn plis sans, par egzanp pou annan plis spesyalizasyon dan sa landrwa.

Pour ofer plis servis, nou bezwen en landrwa pli gran e nou bezwen en landrwa apropriye.  E se l’Ile Soleil ki’n ganny idantifye koman meyer landrwa pour nou fer sa.  Mersi Mr Speaker e mersi Onorab.

 

MR SPEAKER

Mersi Minis.  Onorab André

 

HON CLIFFORD ANDRE

Minis, ou’n eksplik nou la i annan Master Plan ki zot pe devlope.  Mon’n gete depi 2015 zot in komanse.  I ale ziska 2016, Novanm.  Eski sa devlopman ki pe fer Ile Soleil, zot in pran konsiderasyon pour ki pa ankor dan 5an nou vini nou dir nou bezwen re-azout ank.., oubyen refer, konmsi si nou pa pran li, ou’n dir 20an nou plan, si nou pran konsiderasyon sa pour nou fer sir ki letan nou pe fer enn la, nou pe fer enn ki at least i a medium to long term.  Mersi.

 

MR SPEAKER

Mersi Onorab.  Minis

 

MINISTER JEAN-PAUL ADAM

Wi. Mersi Mr Speaker.  Mersi Onorab.  Wi, sa plan i pran sa an kont.  E si ou regard menm, nou kapab dir bann Sant Lasante ki nou’n fer pli resaman parey Sant Beau Vallon, nou ti’n prevwar ki serten agrandisman, serten serten servis adisyonnel ki kapab vini pli tar.  E menm parey pour Ile Soleil, nou pou gard regard devlopman a lonterm.  Mersi.

 

MR SPEAKER

Mersi Minis.  Onorab Phillip Arissol

 

HON PHILLIP ARISSOL

Mersi Mr Speaker.  Bonzour tou dimoun.

Mr Speaker, eski Minis i kapab dir nou si dan sa Master Plan, Minister Lasante in enkli servis pou  fasilite primer pour Prizon Montagne Posée vi ki la aktyelman zot pe servi Klinik Anse Boileau?

 

MR SPEAKER

Mersi Onorab.  Minis

 

MINISTER JEAN-PAUL ADAM

Mersi bokou Mr Speaker e mersi Onorab.

An se ki konsern Prizon, i pa kouver direkteman dan sa plan.  Me Lotorite Prizon in met, mon pa sir si zot in finalize, me zot ti pe travay lo en plan redevlopman prizon ki enkli pou revwar konpletman servis medikal ki disponib dan Prizon.  Akoz sa i en defi aktyelman ozordi.  sa i enkli akse avek dokter, avek fizyo, avek dantis, avek tou bann diferan swen medikal ki ou bezwen dan Prizon.  E sa pou ganny fer dan en fason konpreansiv dan plan ki servis Prizon pe devlope.

Mersi Mr Speaker.  Mersi Onorab.

 

MR SPEAKER

Mersi Minis.  Onorab Valmont

 

HON JUDE VALMONT

Mersi Mr Speaker.  Bonzour.  Bonzour koleg Onorab.  Bonzour Minis e delegasyon.

Minis mon kestyon i konsernan resours ki konplimant sa Master Plan.  Mon… boner mon’n tann reponn sa kestyon lo lanbilans.  Be mwan mon pe demande Minis, ou’n dir i annan sa bann lanbilans, 11 lanbilans pe vini.  Mwan mon konsern i avek sa bann dimoun ki ou met ladan; Master Plan.  Eski zot pe adrese sa issue, mon konnen zot annan issue drayver, e sa konsern porter?  Akoz i annan sityasyon ki zot donn ou en lanbilans la, lanbilans pe esper porter vini.  Porter pa arive, what not.  Sa i enn.

Minis osi lo kote Ile Soleil, mwan mon ti a voudre konnen si, kan ki sa lopital Ile Soleil pou konmanse?  E dernyen se sa issue latizann e lezot lekipman ki dan lepase nou’n koz lo la.  Lasanble in for lo la.  Nou’n dir gaspiyaz e what not, nou pa ti a kontan war.  E nou konnen i annan latizann ki gate.  Alor mon demande si zot annan en sistenm, en sistenm atraver sa Master Plan?  Si zot osi zot pou met en sistenm ki pou garanti ki pa pou arive sa bann keksoz ankor, at least pou minimiz.  E osi pou adres sa bann sityasyon ki kot Lopital ler ou tande dimoun pe, i call ou koman MNA pe dir ek ou napa tapi.  Me selman ler ou call, ou koze zot dir ou tapi en kantite dan stok me selman pa pe ganny sa.

Pou adres sa bann pti keksoz ki pou ede redwir fristrasyon e redwir konplent ki Minister Lasante Lopital parfwa pe delivre.  Mersi.

 

MR SPEAKER

Mersi Onorab Valmont.  Minis

 

MINISTER JEAN-PAUL ADAM

Mersi bokou Mr Speaker e mersi Onorab.

An term resours imen mon deza koz lo bann ka parey ners ek dokter.  Me efektivman i enportan osi pour nou pran kont bann parey drayver lanbilans e porter, eksetera.

Alor nou, nou annan serten pozisyon ki nou pe sey ranpli aktyelman.  E nou pe, nou pe osi demande pour nou ganny bann pos adisyonnel a mwayen e a lonterm.

E nou pe travay osi lo nou nouvo Scheme of Service pour sa sekter ki nou ekspekte i kapab ed nou osi pour nou kapab rekrit dimoun a lavenir.  Me nou annan serten post ki nou pe sey al ranpli sa lannen menm.  E i annan lezot ki nou pe demande pou kree pour lannen prosen.  Zis mon koleg in koriz mwan en pti kou. Mon bezwen zis dir avek Lasanble poudir nou, lakantite lanbilans ki’n vini i 10 me pa 11.  Eskiz mwan akoz mon ti’n dir 11, me se 10.

Apre lot sif ki mon a profite mon a mansyonnen la akoz i lye osi avek sa kestyon. sete nou annan, mon krwar ti Onorab Esparon ki ti lev sa.  Nou annan 11, nou annan 18 (eskiz mwan) nou annan 18 osi dokter aktyelman ki travay isi.  Ki deza pe travay dan diferan sekter spesyalize, e ki’n ganny idantifye koman bann kandida pou al fer ankor spesyalizasyon aletranze.

Apre an term Ile Soleil, sa i  en proze ki nou’n soumet avek Gouvernman Chinois.  E in ganny aprouve e aksepte.  E  Minister Finans pa’n met li pour le moman dan Bidze 2018 akoz nou ekspekte ki faz preparasyon i a vin an 2018.  E ki sa petet i ava konmanse an 2019 si mon’n byen konpran lenformasyon ki nou’n gannyen.

Epi an se ki konsern lefikasite an term bann medikaman ek… ki nou aste sorti aletranze, nou pe fer serten legzersis aktyelman dan Minister Lasante pour idantifye nou pwen for, nou pwen feb.

E definitivman mon krwar i annan serten keksoz ki nou kapab amelyore.  Akoz nou annan parfwa bann moman kot lefikasite petet i pa a la oter ki nou ti ava swete.  Me an menm tan si nou pran par egzanp sa Rapor Labank Mondyal ki mon ti site dan mon deklarasyon au depar, i montre ki an term servis ki nou delivre atraver nou lenvestisman dan Lasante, i konparab avek bokou bann pei, menm pli devlope.

Sa i enkli an term lafason ki nou aste nou bann diferan lekipman ek bann medikaman.

Me atraver sa revi ki nou pe fer, nou ekspekte osi kapab idantifye serten amelyorasyon.  Me mon krwar i enportan letan nou regard evolisyon dan nou pei e bann maladi ki pe vini, sirtou bann maladi non-kominikab demann pour bann medikaman spesyalize pou ogmante.

Alor malgre ki nou kapab annan plis lefikasite, nou kapab redwir nou kou, nou pa kapab ekspekte ki sa pou redwir an term bann Bidze ki pour neseser.

Lot eleman ki pour ed nou ladan se Health Information System.  Akoz sa pou permet nou swiv dan en fason bokou pli fasil.  Par egzanp medikaman ki ganny donnen avek sak pasyan pou asire ki napa labi, i annan mwens gaspiyaz.  E ki nou kapab lye sa direkteman avek rezilta osi an term sa pasyan dan en fason pli sistematik e pli fasil pour verifye.

Mersi Mr Speaker.  Mersi Onorab.

 

MR SPEAKER

Mersi Minis.  Onorab Valmont

 

HON JUDE VALMONT

Mersi Mr Speaker.

Mr Speaker Minis i annan en pti bout kestyon in manke lo kote sa bann lekipman parey tapi lili and what not, sa dan Lopital.  Apre mon ti a demann Minis antretan ki nou espere pour Lopital Ile Soleil i ganny konstrir, mon osi mon ti a met lanfaz lo amelyor pour, pour ede amelyor Klinik Anse Aux Pins.

E i annan sityasyon la ki pasyan i asize, ler gro lapli i tonbe zot pa konnen kot pou ale.  Mon krwar sa i en keksoz ki bezwen ganny met lanmen lo la.  E osi dan lespri desantraliz en pe bann servis.  Zot konnen Pointe Larue i en distrik ki nou servi Klinik Anse Aux Pins, alor mon ti a demann Minister ou  Minis e Minister pou konsidere osi pour anmenn bann servis de baz parey Family Planning dan nou Ladministrasyon Distrik, bann keksoz koumsa.

E menm pansman, nou annan nou bann vyeyar ki petet i, zot trouv li difisil pour deplase pour al Anse Aux Pins.  Alor anmenn sa fer Ladministrasyon Distrik.  Nou pe esper zot.  Mersi.

 

MR SPEAKER

Mersi Onorab.  Minis

 

MINISTER JEAN-PAUL ADAM

Mersi bokou Mr Speaker.  Mersi Onorab.

An se ki konsern Anse Aux Pins e sa bann servis, i en kestyon, i en kestyon osi parfwa staff.  Kot nou annan sa provizyon par egzanp pou fer serten home visits e i annan serten pasyan enkli dan Pointe Larue ki ganny kouver.  Me nou konsyan ki nou ti ava kontan fer bokou plis.

Me en kestyon osi annan sa resours imen ki disponib.  I en keksoz ki nou pou travay lo la.  E apre dan nou bann model nou pe regard bann opsyon ki mannyer nou kapab tous dimoun dan kominote osi.  Pa neseserman zis atraver, bann Sant Lasante.  Mon krwar sa i en tre bon nide.

Apre an se ki konsern tapi lili ek bann lezot, mon krwar in annan serten amelyorasyon avek amelyorasyon ki nou’n fer dan laundry kot nou’n anmenn li dan Lopital.  Nou’n anmenn li dan Complex Lopital.  Me nou annan serten defayans touzour, wi sa i en pti pe lye avek swivi ki, ki nou fer avek sa bann diferan materyo.

Me lot eleman ki mon demann tou dimoun pour konsyan se ki Lopital i pa parey en lotel.  Dan en lotel ou souvan ou ganny omwen 24erdtan preparasyon pou konnen poudir par egzanp en dimoun i pe al vin pour en admission.

Dan Lopital souvan admission i ganny fer e ou pa kapab espere.  Admission letan i bezwen ganny fer, i bezwen ganny fer.  E osi si ou regard lakantite pasyan ki’n ganny admit dan nou Lopital.  Nou annan lo bokou Ward nou depas 100poursan.

I annan souvandfwa ki bann Ward i, nou annan tro bokou pasyan par rapor ek nou kapasite.  I annan serten Ward ki pli anba presyon ki lezot.  E sa i vedir ki parfwa i difisil pour nou fer sa, sa tapi oubyen sa tetdorye ariv a bon moman oubyen bon landrwa.  Me nou pe fer zefor pour nou kontinyen amelyor sa.

E i pou osi lye Health Information System si mon pa tronpe, wi. I osi pou ed nou dan Health Information System pour nou kapab diriz bann keksoz kot, kot i neseser.  (Pardon) mon’n manke sa dernyen bout.  Mersi Mr Speaker.  Mersi Onorab.

 

MR SPEAKER

Mersi Minis.  Onorab Wavel Woodcock

 

HON WAVEL WOODCOCK

Mersi Mr Speaker.  Bonzour tou dimoun.

Minis, mon kestyon i baze lo bann servis kot Lopital Baie Sainte Anne, Praslin.  Mon ti a kontan konnen kan ki sa Decompression Chamber Lopital Baie Ste Anne pou vin operasyonnel?

Dezyenmman, eski ou Minister pe konsider fer en l’Hospice, en Hospice Lopital Baie Ste Anne, Praslin par lefe ki annan bokou ka terminal Praslin?  E parfwa bann pasyan terminal i vwar zot lo menm Ward avek bann, bann lezot pasyan.  Epi kot i konsern Servis Danter, kot dantis zanfan, i annan en konsern Fungus ki bokou bann, bann paran pe konplent.  E zot bezwen anmenn zot zanfan kot Klinik Grand Anse instead.

E finalman, akoz ki bann etidyan Nursing NIHSS ki sorti Praslin ler zot fini zot letid Mahe, zot ganny forse oblize pour travay Mahe menm si zot oule retourn lo zot zil pour travay?  Sa i en konsern ki plizyer bann zenn in met devan mwan.  Mersi.

 

MR SPEAKER

Mersi Onorab Woodcock.  Minis

 

MINISTER JEAN-PAUL ADAM

Mersi bokou Mr Speaker e mersi Onorab.

An se ki konsern Decompression Chamber, nou dernyen faz la pour nou kapab fer li vin operasyonnel.  Nou’n annan bann eksper ki’n vizite a plizyer repriz.  Sa ki reste pou regle, mon krwar, se sa kestyon elektrisite ki nou pe esper sa Rapor final pour nou kapab fer sa, sa laranzman neseser avek sa lekipman elektrik pour fer sir ki i an konformite, ki i avek bann norm ki sa, sa lakonpannyen ki fer maintenance i endik nou lo la.  E se menm lakonpannyen ki osi fer li lo Mahe.  Alor nou fer sir ki nou ganny li byen pour nou kapab ofer sa servis lo, lo Praslin.

An se ki konsern bann pasyan terminal, parey nou’n deza tande dan prezantasyon ki’n ganny fer, nou, annefe litilizasyon lili Praslin i deza ba, nou, nou napa sitan sa kantite lili.

Petet ki nou kapab fer, se dan, regard konsiderasyon dan plan devlopman pou vwar si i annan serten landrwa ki nou kapab met li pour en pti pe plis konfor pour bann pasyan ki terminal.  Byensir nou osi ofer pour bann pasyan Praslin ki terminal, si i neseser zot kapab ganny en plas Mahe dan en Lopital Mahe oubyen dan Hospice si i neseser.

Me nou konpran e nou konsyan poudir parfwa zot plifere reste pres ek zot fanmir Praslin.  Alor nou regard sa koman sa opsyon dan Lopital Praslin.  Me mon krwar nou tou nou konpran ki i pa pou fasil espesyalman fer en batiman spesifik pour sa.

En se ki konsern dantis e sa problenm Fungus, nou pe fer en travay dan tou nou bann Health Centers gradyelman pour nou sey adres sa problenm.

Apre, an se ki konsern bann etidyan NIHSS, mon krwar nou tou nou bezwen konsyan poudir nou, nou annan defi en pti pe partou.  E nou sey met, nou sey met bann ners la kot nou pli bezwen zot.

E dan sirkonstans bann dimoun ki sorti Praslin, parfwa i arive ki petet dan sa moman kot zot graduate napa en post imedya ki disponib, e nou demann zot korperasyon ki nou, nou met zot dan en post kot i dan zot benefis pour zot devlope.  Me si swete al Praslin, nou seye o maksimonm.  Me parfwa si sa post pa disponib, i pa fezab pour nou fer li.

E osi pour note ki tou ners, nenport ki landrwa ki zot sorti, premye faz letan zot fek fini graduate, se ki zot pas dan en oriyantasyon, kot zot pas dan tou bann diferan servis ki nou ofer.  E sa byensir i nesesite ki zot baze is Mahe pour sa, pour sa peryod.  Mon krwar mon’n kouver tou.

Mersi Mr Speaker e Onorab.

 

MR SPEAKER

Mersi Minis.  Onorab Chantal Ghislain

 

HON CHANTAL GHISLAIN

Mersi Mr Speaker.  Bonzour Minis avek ou delegasyon.  Bonzour tout le monde.

Minis, ou’n koz lo l’Hospice Praslin.  Nou konnen osi poudir i annan bann pasyan ki ler i sorti Lopital, zot bezwen reabilitasyon.  Par egzanp, zot pa kapab al direk dan lakour, e trwa kar sa bann pasyan zot bezwen al Sant Reabilitasyon isi Mahe.  Ki Minister dan devlopman i annan pou fer an sa ki konsern Praslin ek La Digue an se ki konsern en sant reabilitasyon pour sa 2 zil?

An se ki konsern bann porters Minster, eski dan Proze Devlopman Lopital Victoria, i annan en plas ki zot pe designate pour ki tou bann porters, i la available.  Par egzanp tou bann wheelchairs Lopital, tou bann stretchers Lopital i la obor, préférablement obor sa sant ICU ki menm si dan en wWard anler i pou bezwen en wheelchair i bezwen call anba i a mont avek.  Ki tou sa bann, sa bann, sa servis i a ganny, i a la e bann porters i a la.  I ava aranze, en bon landrwa pour zot asize e pran zot bann, tou zot bann keksoz i a la.  Parey en nespes lofis pour zot.

E an se ki konsern osi pour, pour relieve en pti pe bann nurses dan Lopital, pour zot kapab annan plis zot letan pour zot konsantre zot travay, travay en nurse spesifikman avek pasyan, ki zot pe fer, ki Minister pe fer si i dan plan pour kapab annan bann, nou kapab dir sa bann, bann Relation Officers pour sa bann pasyan direkteman, ki zot, zot ava pe take care avek bezwen, bann lezot bezwen ki sa pasyan i bezwen?  E pa nurse ki pe deal ek sa bann zafer.  Par egzanp, si son zorye, si i annan zorye, si i annan dra, si annan, tou bann pti keksoz.

E an se ki konsern bann lezot Sant Lasante, ki Minister pe fer, si i dan zot plan, pou annan bann Administrators, ki zot, zot pa neseserman bann nurses me selman se zot ki administre sa bann, tou sa bann pti detay, lezot detay ki pasyan i bezwen.  Tousala an prenon kont pour kapab relieve sa bann nurses pour zot pa, pa… konmsi konsantre zot louvraz as en nurse olye al dan sa bann lezot.

Parske nou realize poudir i annan en kantite bann lezot dimoun ki, ki al, swa zot al fer zot bann letid dan administrasyon e pa neseserman zot ganny plas travay dan bann lezot landrwa.  E enn bann landrwa kot nou bezwen en kantite sa bann dimoun se dan Lopital, dan Lopital ek bann Sant Lasante.  Mersi Mr Speaker.

 

MR SPEAKER

Mersi Onorab Ghislain.  Minis

 

MINISTER JEAN-PAUL ADAM

Mersi bokou Mr Speaker.  Premyerman an se ki konsern bann pasyan ki bezwen reabilitasyon, sa i bann pasyan ki sorti Hospice, parey nou’n eksplike e ki lo Praslin ek La Digue, nou konsyan poudir sa i en, i en defi aktyelman.  Alors dan redevlopman Lopital La Digue e osi Lopital Baie Ste Anne, Praslin nou pa pe prevwar pour nou fer en Sant Reabilitasyon lo li menm akoz sa i en lenvestisman ase larz.  Me nou pou annan sa opsyon dan sa bann redevlopman, pou annan bann lespas ki pou disponib pour reabilitasyon.  Nou defi aktyelman i plis lo kote staff akoz idealman ou kapab annan bann staff spesyalize pour reabilitasyon ki baze lo sa bann zil ki aktyelman nou en pe limite dan sa kote.  Me dan devlopman a lavenir nide se ki dan sa 2 Lopital, malgre ki petet ou pou napa en Sant Reabilitasyon parey, oubyen en ward reabilitasyon parey nou, nou annan isi Mahe.  Me ki nou annan serten servis reabilitasyon ki disponib dan sa bann Lopital.

E an term lafason ki Lopital pou ganny fer li menm li, sa lespas pour la.  Defi ki pou vin avek, se ki pour nou ganny staff.  Me nou pe travay lo la atraver formasyon.

Apre an sa ki konsern porter, definitivman sa i en defi ki nou annan aktyelman.  Sa landrwa ki zot annan i tro pti.  E sa i kree bokou kontrent an term pour lekipman ki ou’n site me osi an term zot konfor.  E dan redevlopman sa i en keksoz ki nou, nou pe adrese.  Nou pou annan landrwa pour tou staff annefe.  Tou bann staff kle enkli lezot ki aktyelman pa tro dan en bon pozisyon, parey bann emergency medical technician, bann paramedic, pour zot ganny en landrwa apropriye pour zot kapab, letan zot pe esper louvraz oubyen zot pe, oubyen zot dan zot break, pour zot ganny sa bann landrwa apropriye.  E osi landrwa pour zot met zot lekipman.  Sa i en defayans aktyelman me dan plan redevlopman sak, sak servis pou annan son, son landrwa apropriye pour sa.

Apre an term ners ek pasyan, nou pe regard, nou’n kree sa prensip person- centered care e atraver sa i annan plizyer eleman ki nou mezire an term rezilta ki nou ekspekte gannyen.  I vre ki parfwa pour en ners par egzanp lo ward, letan Ward i plen oubyen ki annan plis pasyan ki, ki labitid lo Ward, i annan en serten lenpak lo sa kapasite pour zot ofer person-centered care.

E atraver health care assistance, nou pey sey ofer plis sa bann sipor.  E annefe, petet sa bann rol ki ou’n site i pou tonm en pe plis lo Health Care System.   E sa i vin en pti pe atraver training ki nou pe ofer zot.  Nou annan serten health system ki’n ganny idantifye, ki menm pe al fer formasyon la pour fer ners.  E i annan serten ki nou ofer zot training pour zot kapab adres serten sa bann responsabilite e siport travay ki ners i fer.

Apre an term administrasyon, avek redevlopman Lopital, ki nou pe vwar, nou pou etablir, nou pou baz tou nou bann Sant Lasante lo bann standar enternasyonal.

E evantyelman alor, tou bann dimoun ki pou antre dan management sa bann fasilite, zot pou annan en serten kalifikasyon ki bezwen link avek sa, avek management sa bann fasilite.  Petet sa bann dimoun pour bann profesyonnel Lasante me i pa vedir ki nou ferm li osi pour bann dimoun ki pa bann ners.

Akoz aktyelman i vre ki tou nou bann Sant Lasante i ganny dirize par en Nurse Manager.  Sa i osi pour serten rezon pratik akoz i osi annan sa kestyon par egzanp pour met staff lo shift ki souvandfwa i bon ou annan en dimoun ki konpran sa servis byen.  E ki kapab byen servi son bann resours imen osi byen ki son bann lekipman.  E ki konn byen par egzanp an term son, son bann medikaman, an term son emergency trolley, an term son bann diferan provizyon ki i bezwen annan dan son Sant Lasante a nenport ki moman.  Ou bezwen annan en dimoun ki annan en serten konesans dan Lasante.

Alor sa bann pot administratif nou pou lye li, link li avek en kalifikasyon spesifik baze lo sa standar ki nou pe, ki nou pe etablir pour tou nou Sant Lasante.  Mersi Mr Speaker.  Mersi Onorab.

 

MR SPEAKER

Mersi Minis.  Onorab Ghislain

 

HON CHANTAL GHISLAIN

Yes.  Mr Speaker, par egzanp i annan en bon, bokou bann gro Lopital, dizon par egzanp aletranze kot pa neseserman sa bann post i bann pos ki bann dimoun ki nurse ouswa ki vreman konn, anyway pou aprann, definitivman i pou aprann en pe keksoz lo daily travay en nurse ki annan pour fer avek medikal.  Me selman i bann dimoun ki konpran ladministrasyon e zot annan sa, zot pli pros avek pasyan.  Sa nurse li i ava pe fer plis ki annan pou fer avek medikal.  Ou’n dir poudir pou fer rota nurses and all; sa dimoun li i napa nanryen pou li al enterfer avek travay nurse li.  I pou direkteman avek sa pasyan.

Akoz bokou, bokou dimoun ler i sorti Lopital, swa bann konplent ki sorti, toultan zot pe konplent ou lo serten servis.  Me i pa neseserman servis ki sa nurse in donn li, li.  I servis ki, i bann ptipti keksoz ki parfwa, dizon par egzanp i pe plenny lo dra, i pe plenny lo kalite manze, i pe….. Be nurse i napa letan pour li al get sa li.  Nurse i annan li pou administre son latizann, pou li fer pansman, pou li fer tou bann lezot.

La nou fek, nou pe tann koz lo 200 staff Air Seychelles ki pe sorti.  Napa plas pour train sa bann dimoun pour zot al fer sa bann louvraz, sa bann louvraz parey?  I pou vin parey en Relations Officer me selman i pe direkteman avek, avek sa pasyan me ki napa nanryen pou fe avek medikal.  Mersi.

 

MR SPEAKER

Mersi Onorab.  Minis

 

MINISTER JEAN-PAUL ADAM

Mersi Mr Speaker e mersi Onorab.

Mon konpran sa, sa kestyon dan laliny ki ou pe dir ki sa bann administrater pa bezwen bann ners.  E pour konfirmen, wi.  Akoz nou, ki nou pou fer, nou pou etablir en standar.  E sa standar i pou aplik pour nenport ki.  Savedir en dimoun ki anvi antre dan sa post, i bezwen koresponn avek sa standar.

Aktyelman mon’n eksplik sa rezon rota eksetera, pour eksplike akoz pour le moman, sey tant pour annan bann ners dan sa bann post administratif.  Me parey ou menm ou, ou’n eksplike, ou kapab divize sa bann rol administratif ant diferan fason.

Alor, dan konteks plan devlopman, nou, nou pou etablir sa standar ki ou bezwen annan tel kalifikasyon pour fer sa rol.  Prezan i kapab en dimoun ki en profesyonnel Lasante, en ners ki fer sa.  Oubyen i kapab en lot dimoun ki, ki’n fer sa formasyon, i kapab fer sa rol.  Ok?

Mersi Mr Speaker.  Mersi Onorab.

 

MR SPEAKER

Mersi Minis.  Onorab Jean-Francois Ferrari

 

HON JEAN-FRANCOIS FERRARI

Yes Mr Speaker.  Mon ti a kontan zis demann Minis, sa proposal, sa Conceptual Master Plan ki zot in prezante ozordi, dapre lenformasyon ki mon’n, ki mon’n gannyen, in, i ti ganny commissioned an Me 2015.  I ti annan 30 semenn pour zot fini sa travay; setadir 8 mwan.  la nou 2018; savedir nou preski 2an an retar.  Kwa ki fer nou krwar poudir sa bann timelines ki ladan pou ganny respekte e ki avan 2035 nou pou annan en Lopital en pe pli byen, en pe pli modern oubyen eski pou annan bann slippages e bann retar ki pou akimile?  Akoz deza la nou annan 2an an retar.

Mon dezyenm kestyon se, sa dokiman ki, kekfwa ou a koriz mwan Minis, i en concept, it’s a Conceptual Master Plan.  I en concept.  I pa, son bann detay pa ankor ganny finalize.  In kout R5.6milyon pou fer sa dokiman.  E i annan mon krwar 6, (1,2,3,4,5,6), 6 konsiltan ki’n travay lo la e zot in ganny zot tou le mwan, pour zot fer sa bout, i annan 6 zot, zot in ganny zot R547mil sakenn pour zot travay lo sa dokiman ki la devan nou.

Mon ti a kontan ki Minis avan i terminen i reasir piblik Seselwa poudir nou’n gannyen valer pou nou larzan ler nou’n depans sa R5.6milyon.  E mwan mon annan en dernyen kestyon.

Mon vwar poudir sa Kontra ki ti donnen pou fer sa travay ti ganny sinyen par Mrs Peggy Vidot ki ti en manm Minister Lasante.  In ganny sinyen par Dr Danny Louange li osi ki en manm Minister Lasante. Eski zot ti kapab eksplik mwan akoz Mr Glenny Savy li osi in siny sa dokiman?

Ki son rol ki li i annan pou fer dan sa Kontra silvouple?  Mersi.

 

MR SPEAKER

Mersi Onorab Ferrari.  Minis.

 

MINISTER JEAN PAUL ADAM

Mersi bokou Mr Speaker e mersi Onorab.  Premyerman sa plan i en Conceptual Master Plan dan le sans ki i donn ou opsyon ok?  Me i pa vedir ki napa detay akoz dan bokou ka Dokter Louange i a kapab konfirmen.  Dan bokou ka i al vreman dan detay lo par egzanp bann fittings alor i don ou en plan ki ou kapab servi pou ou enplimant ou bann proze.

Me i osi rekonnet, sa plan i rekonnet ki dan serten ka pa neseserman a sa moman la ki ou pou deside ou pou fer ‘a’ oubyen ‘b’.  I annan serten opsyon ki kouver ladan e ki donn ou sa opsyon pou al dan sa direksyon oubyen lot.

Sa i lye avek sa – apre kestyon son timeline sa proze – sa dokiman in ganny soumet avek Minister Lasante an 2016.  E nou’n konmans bann konversasyon avek Minister Finans, in ganny prezante avek Development Committee, in ganny re vwar avek Minister Finans an 2017, me ti annan serten proze ki ti deza Ankour ki lye ek sa Master Plan.  E an 2018 mon kapab dir se la kot akselerasyon an term enplimantasyon i vini.

Wi annan serten, serten retar me i pa forseman, i pa forseman annan en lenpak enorm lo oriyantasyon sa proze dan son totalite.  Akoz lenportans se rezilta ki ou gannyen.  Si – mon  pa krwar i pou vin – mon pa krwar annefe  i ariv deza an retar mon krwar i plito 1an.   E an term bann proze ki’n ganny devlope, konsern mazer ki mon annan mon’n deza dir avan se nou kapasite lo enplimantasyon wi.

Alor mon pa ekspekte ki nou kapab petet swiv sa timeline a 100poursan akoz nou pou annan serten defi ankor ki pou vini, me nou sey adres sa atraver lekspertiz e atraver annan bann dimoun ki konpetan e ki konn zot louvraz pou kapab fer sa bann loperasyon.  E parey Dr Louange in eksplike letan ou pe al fer en lopital i pa parey nenport ki batiman.  Sa i enn.

E dezyenmman dan Minister Lasante atraver menm atraver bann dokter oubyen bann dimoun ki la ou pa forseman annan sa lekspertiz otomatikman prezan dan Minister.  Alor nou pe apir par egzanp lo bann lezot eksper dan sekter prive.

Apre sa kestyon an term valer pou larzan.  Bon premyerman mon krwar Dr Louange ti sit 6 eksper selman i annan – ti annan annefe 11 dimoun an tou dan sa tim.  E dan sa tim ti annan 6 spesyalis apre ti annan 5 teknisyen sipor.

Ti annan Dr Torovich ki ti Lead Consultant.  Apre ti annan en Standards And Quality Auditor, Bio Medical Engineer, Lead building Services Engineer, Lead Master Planner, Architect, Lead Cost Consultant, Mechanical Engineer, Electrical Engineer, Public Health Engineer and Civil and Structural Engineer.

 E sa kou i konsekan me si mon pou baz li lo, si ou regard par egzanp Lopital Perseverance ki’n ganny fer resaman, mon napa sif egzakt akoz i ti en proze ki ti en donasyon me nou konnen  ki sa Konsiltan ki ti travay lo bann  engineering lo sa proze in ganny peye plis ki 100mil Dolar.

E sa i zis pou en lopital.  Mon pa kapab dir ou sa pou sa akoz mon pa en expert dan sa sekter me tou sa prosedir tender ti ganny swiv ti ganny anvoye kot Tender Board, ti fer le neseser e sa bann dimoun ki’n enplike dan sa proze i bann dimoun ki’n fer bann proze parey dan lezot pei enkli Maurice.

An term wi – an term sa kestyon lo Mr Savy mon pa sir egzakteman selman mon mazinen i ti  form parti sa Evaluation Committee. I ti form parti sa Evaluation Committee ki ti ganny etabli a sa moman  ki ti enkli Madanm Vidot, Dokter Louange e li osi i ti enplike lo la si mon pa tronpe dan son kapasite konman en manm lo Development Committee. Mersi bokou Mr Speaker e mersi Onorab.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Zis en pti klarifikasyon si ou pa- se avek ou permisyon.   Minis in dir nou plizyer fwa ki bann dimoun ki’n involve lo sa proze se bann spesyalis ki annan pou fer avek medikal.  Mon pa konnen – mon pa anvi dir ou, ou pa pe dir laverite, me ou’n dir nou poudir se bann spesyalis …ki mannyer ou kapab pran en dimoun an deor ki pa konn nanryen dan medikal ki vin lo en Evaluation Committee?

Mr Glenny Savy. Konmsi ki son rol?  Se sa ki mon oule konnen akoz mon vwar partou konmsi dan tou bann file, dan tou bann dosye dan tou bann sa, sa msye i aparet.  Sey dir nou ki mannyer in aparet?

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Eski mon kapab pran atraver deklarasyon ki Onorab in dir savedir ki Dr Louange ek Madanm Vidot osi pa konn nanryen dan Lasante?  Akoz mon krwar zot bann profesyonnel lasante ki’n donn bokou, ki’n travay bokou dan sa sekter.  Alor petet ou annan en problenm personnel ek Mr Savy, mon pa konnen sa i ou problenm.  Me si Mr Savy in travay lo sa Komite, in travay li dan en serten rol me ti annan profesyonnel lasante ki’n travay konstaman an lyezon avek osi sa bann spesyalis ki’n vini.

E sa bann spesyalis ki’n vini sorti deor i bann dimoun ki spesyalize dan devlopman bann lopital aletranze e zot in partaz zot leksperyans avek nou e nou’n fer – nou’n rod bann dimoun ki konn sa louvraz.

E si problenm Onorab Ferrari se zis avek Mr Savy bon mon toutafe konpran son problenm.

 

(Interruption)

 

MR SPEAKER

Order!  Order!  Onorab Ferrari.

 

HON JEAN-FRANCOIS FERRARI

I enportan ki mon eklersi akoz mon’n montre respe pou profesyonnalizm e konesans Dr Louange e lezot profesyonnel Madanm Peggy Vidot.  Mon’n respe mon pa’n dir nanryen mal lo sa ban dimoun.  Mon pa’n ensinye nanryen mal o kontrer mon dir zot, zot bann profesyonnel parey Minis in dir.

Me nou annan en msye ki trouv kouzen Minis Adam ki li i aparet partou lo tou sa bann keksoz nou le sey konpran ki son spesyalite!

Dr Savy li konmsi dan ki lopital in travay?  Se sa ki nou le konnen nou Minis.  Akoz i aparet partou?

 

(Interruption)

 

MR SPEAKER

Ok. Order! 

 

HON JEAN-FRANCOIS FERRARI

Mon napa en problenm personnel mwan mon pe vey – i annan R6milyon ki’n ganny depanse, mon pe sey vey en pe larzan piblik e mon le konnen lekel, akoz sa bann dimoun i ganny involve lo sa bann proze.  Se tou! Mon pe fer mon travay mwan.  Mersi.

 

MR SPEAKER

Mersi.  Minis avan mon donn ou laparol annou evite fer sa bann lyen kot nou al direkteman, nou fer bann lakizasyon …

 

(Interruption)

 

MR SPEAKER

Order silvouple the Chair has the right to speak and to be heard!  Annou evite.  Annou evite e petet osi Minis dan ou repons annou evit serten keksoz kot nou vwar kot Manm i al direkteman petet i fer serten lyen avek Minis avek serten dimoun.  Ok, Minis mon a donn ou laparol.

 

MINISTER JEAN-PAUL ADAM

Mersi Mr Speaker e mersi Onorab.  Mon krwar sa ki mon pe sey dir se ki dan sa plan e mon pou kontinyen  dir sa akoz i laverite, sa plan  in ganny adrese atraver bann dimoun ki konn sekter medikal.

Alor wi si i annan Mr Savy ki ou santi napa sa lekspertiz medikal me i e  dimoun ki ti enplike dan sa Evaluation Committee e si i ti enplike ladan in enplike pou son konesans a sa moman.

Alor mon konnen i annan lezot Evaluation Committee dan lezot sekter ki osi enkli serten dimoun ki pa neseserman dan sa field spesifik me zot annan serten lekspertiz ki zot vini.  Me mon krwar lafason ki Onorab Ferrari in demann sa kestyon nou kapab kler lo ki son lentansyon.  Me mon pa pou al plis ladan.

 

MR SPEAKER

Non, non, Minis, Minis.

 

MINISTER JEAN-PAUL ADAM

Mersi Mr Speaker.

 

MR SPEAKER

Minis annou pa – annou evite.  Mon’n dir annou be cautious ki nou pa al dan sa direksyon. Bon dernyen kestyon Onorab Aglae.

 

HON EGBERT AGLAE

Mersi Minis.  Mersi Mr Speaker.  Bonzour Minis ek ou delegasyon.  Minis mon annan de kestyon.  Dan sa Master Plan ki ou’n prezante mon’n vwar poudir vreman ase entans.  Lo kote digitalising patient information ki zistans ou Minister i ete pou fer sir ki nenport ki pasyan ki al dan nenport ki sant lasante sa dokter ouswa pasyan i one figures away pou ganny tou lenformasyon lo sa pasyan ?

Dezyenmman mon ti a kontan demann ou Minis, ou’n koz lo 52 dokter ki ankor lo letid.  Ki plan ou Minister vizavi expansion bann lenfrastriktir avek nou bann  etidyan lokal ki pou swiv bann kour parey ners, farmasi,  dan laboratwar pou fer sir ki ou annan ase resours imen ki ler ou’n fini konplet ou lenplimantasyon sa Master Plan ?

E mon dernyen kestyon Minis i konsern bann lagrandisman sirtou bann klinik ki ou’n koz en pe lo la.  Eski zot pe konsider klinik Port Glaud spesyalman anvi ki son waiting area i vreman ti pti e sirtou dan Lendi i annan en ankonbreman an deor sa Klinik.  Mersi.

 

MR SPEAKER

Mersi Onorab Aglae.  Minis.

 

MINISTER JEAN-PAUL ADAM

Mersi bokou Mr Speaker. Mersi Onorab.  An term lenformasyon a la baz elektronik e sa i en proze ki deza ankour atraver Health Information System e premye faz se pou etabli sa sistenm avek son diferan konponan e son eleman digitalization; savedir kot ou scan bann vye file sa i annefe segonder.

Akoz ou anvi premyerman etabli en sistenm kot letan ou pe la pli devan tou bann rikord i al direkteman dan sistenm elektronik.  Savedir letan ou annan en konsiltasyon avek dokter sa bann nouvo lenformasyon ki met dan sistenm i al dan en rikord elektronik.  Me i pou mars ansanm kot nou pou fer sa proze pou nou scan bann vye  file pou li antre dan sa sistenm.

Me priyorite se fer sir ki letan ou pe al devan tou lenformasyon i antre dan sa sistenm.  E sa sistenm ki mon’n etabli i pou lye avek tou bann diferan sekter dan lasante savedir i pou lye avek ou latizann, avek ou tretman avek bann ladmisyon ki ou’n annan e si ou pe vwar plizyer spesyalis osi avek sa bann diferan spesyalis.

An term formasyon bann dokter ek ners nou annan bann training plan ki kouver plizyer sa bann diferan formasyon nou annan sa – nou annan bann dokter ki pe esper –nou annan dokter ki deza lo formasyon e nou annan 54 ki pe fer formasyon konman dokter.

Nou annan 12 ki lo spesyalizasyon e nou annan 18 ki aktyelman pe travay isi Sesel ki’n ganny idantifye konman bann kandida pou al fer spesyalizasyon prosennman.

Bann defi ki nou annan parfwa pou pozisyonn zot dan spesyalizasyon se ou bezwen ganny aksepte dan en lopital iniversiter dan diferan pei e parfwa sa i limite akoz parfwa i annan serten restriksyon lo bann – dan bann dokter etranze par egzanp me en keksoz ki gradyelman nou pe adrese atraver bann diferan Lagreman.

Apre pou ners osi nou annan bann formasyon aprofondi.  Nou annan bann formasyon a kourt term apre nou annan sa bann formasyon pli a long term parey BSC ek Masters ki disponib.

E nou fer sir ki bann lezot profesyonnel dan lasante, bann lezot kad nou kapab fer zot tou sa sipor kot i neseser.  An se ki konsern Port Glaud nou konsyan osi poudir landrwa i ti pti konpare avek bezwen pou sa distrik e dan plan re devlopman nou pou byensir revwar sa klinik pou adres konfor bann pasyan.

I annan serten pti travay amelyorasyon ki nou’n sey fer dan en baz tanporer me pou son pli gro renovasyon i vin en pti pe pli tar mon krwar i pou vin an 2020 si mon pa tronpe e me byensir nou a sey vwar toultan bann amelyorasyon ki nou kapab fer ki adres bann bezwen tou le zour ki bann pasyan i annan.  Mersi Mr Speaker e mersi Onorab.

 

MR SPEAKER

Mersi Minis.

 

HON NICHOLAS PREA

Minis mon annan en pti kestyon lo mon kote.  Ler nou’n koz aksesibilite spesyalman to the main hospital ou pe koz en re organizasyon road system me i pou internal e nou konnen poudir i pa zis Victoria konzesyon i vin partou e sirtou dan bann moman kritik bomaten.

Eski dan sa devlopman kot ou pe koz en new Emergency Centre kot ou pe koz additional theatres i annan en plan pou met en helipad?  En posibilite pou ki helicopter i kapab transport en pasyan dan en fason emergency direkteman kot Lopital?

 

MR SPEAKER

Minis.

 

MINISTER JEAN-PAUL ADAM

Ok.  Mersi bokou Mr Speaker e mersi Onorab.  Eskiz mwan mon ti pe zis konsilte mon bann koleg.  Annefe tou sa bann eleman ki ou’n mansyonnen i form parti pou nou fer sir ki i annan lefikasite dan flow bann servis e osi staff e osi veikil dan landrwa.

E i annan provizyon pou en helipad e ki sa i prevwar bor kot ansyen lekol NIHSS me i pou depan, me i pou depan lo provizyon Lotorite Lavyasyon Civil lo si sa i fezab e ki bann, ki bann lezot kondisyon ki zot pou mete pou nou kapab annan sa helipad an operasyon.  Mersi Mr Speaker.

 

MR SPEAKER

Mersi Minis.  Bon mon ava demann Sergeant pou retourn lo Komite of the whole Assembly.  Ou a retourn Mace.  Minis lo sa pwen mon ti a kontan remersi ou pou spend bomaten avek nou pou eksplik nou en pti pe lo Master Plan Minister Lasante.  E mon ti a kontan remersi Dr Louange, Dr Reginald, PS Choppy e Mr Vidot.  Minis avek ou delegasyon mersi e nou ava eskiz zot parmi nou.

 

(MINISTER JEAN-PAUL ADAM AND HIS DELEGATION WAS EXCUSED FROM THE HOUSE)

 

 

MR SPEAKER

Bon avan nou Break nou annan plizyer Komite ki pe meet pandan lunch time ant 12.30 la ziska 2er.  Bills Committee pe meet deswit la dan Room 2.  HIV/AIDS Committee pe meet li osi deswit la dan Speaker’s Conference Room.

Defence and Security Committee pe meet 12.30 Room 3 e bann Manm mon a zis remind bann Manm ki lo Defence and Security Committee lefe ki premye meeting.  Onorab Ramkalawan, Onorab Afif, Onorab Ferrari, Onorab Andre, Onorab De Commarmond, Onorab Simon Gill, Onorab Basil Hoareau.  E dernyen mon annan Komite lo Lasirans ki pe meet 1er Room 3.  Bon avek sa nou ava pran en Break e nou ava retournen 2er.

 

(BREAK)

 

MR SPEAKER

Bonn apre midi tou Manm Onorab e bonn apre midi tou manm piblik ki pe kontinyen swiv deba Lasanble Nasyonal.  Nou ava kontinyen avek nou travay lo Order Paper e mon ava demann Madam Clerk pou apel Minis Dezinyen e Minis responsab pou Zafer Entern, Madanm Mondon.  Yes Onorab Ferrari.

 

HON JEAN-FRANCOIS FERRARI

Yes mon ti anvi zis demann Chair avek- with respect konbyen letan ou pe mazinen nou pou bezwen pou sa item la?  Ou mazinen?  Ou pe plan en pe.  Non konmsi zis pou mwan organiz en pe mon-

 

MR SPEAKER

I tou depan lo kantite Manm ki le demann kestyon.

 

HON JEAN-FRANCOIS FERRARI

Ou mazinen dan 3.30 nou ava’n kapab?

 

MR SPEAKER

Se sa mon ti pe pans koumsa.

 

HON JEAN-FRANCOIS FERRARI

Ou ti pe plan koumsa?  Ale nou ava al dan sa direksyon.

 

MR SPEAKER

Yes. 

 

HON JEAN-FRANCOIS FERRARI

Mersi.

 

MR SPEAKER

Bon mon ti a kontan welcome Minis Dezinyen e osi Minis responsab pou Zafer Entern dan nou Lasanble – Madam MacSuzy Mondon.  Minis welcome.  E mon ti a kontan osi welcome ou delegasyon Ms Cheryl Vangadasamy ou Special Advisor, Mr Sam Dodin Inspector, Ms Elsa Nourrice e Mr Samir Ghislain.  Minister avek ou delegasyon ankor enn fwa welcome dan Lasanble.  Nou al direkteman lo PNQ e  apre nou ava pran sa Kestyon Irzan.  Mon a demann Onorab Ramkalawan pou poz son kestyon.

 

HON WAVEL RAMKALAWAN

Mersi bokou Mr Speaker.  Bonn apre midi Minis avek ou delegasyon.  Mr Speaker premyerman mon ti ava kontan lefe ki kestyon i lo en endividi ki’n arive avek li, in perdi son lavi. Mon ti ava kontan avan menm ki mon poz kestyon prezant kondoleans avek lafanmir Bristol, lafanmir Mr Keven Bristol lo la par nou tou ki la prezan.  Mr Speaker swivan lanmor Mr Keven Bristol dan Prizon Montagne Posée granmaten Dimans 15 Avril eski Minis pou Zafer Entern i kapab dir Lasanble premyerman pou ki rezon e konbyen letan Mr Bristol ti’n ganny kondannen?  Konbyen letan eski in pase dan prizon avan son lanmor ?  Ki bann sirkonstans ki’n okazyonn lanmor Mr Bristol?  Ki protocol etabli par Lotorite Prizon letan en lanmor i arive dan prizon  vizavi enform lafanmir  ek lenvestigasyon?  E eski sa protocol ti ganny swiv Dimans?  Konbyen prizonnyen ki’n mor dan prizon Montagne Posée dan sa dernyen 3an?  Mersi bokou.

 

MR SPEAKER

Mersi Onorab Ramkalawan.  Mon ava pas laparol avek Minis Mondon.

 

DESIGNATED MINISTER MACSUZY MONDON

Mersi Mr Speaker.  Bonn apre midi Mr Speaker.  Bonn apre midi tou bann Manm Onorab ek tou bann dimoun a lekout.  Mr Speaker avan mon konmans reponn kestyon mon ti a kontan eksprim mon kondoleans avek lafanmir Bristol e zanmi Kevin.  Mr Speaker pou reponn kestyon Manm Onorab Leader Lopozisyon Mr Bristol ti ganny kondannen pou 3 mwan prizon.  Sa sete pou pa pey child maintenance par Tribinal Lafanmir.  Mr Speaker mon ti a kontan fer resorti ki sa i fer trwazyenm fwa ki Mr Bristol i kondann prizon pou menm lofans.

An Out 2012 i ti osi antre dan prizon pou 9 mwan, an Out osi 2017 pou 3 mwan e la an Avril 2018 i ti ganny kondannen pou 3 mwan prizon.  Mr Speaker Mr Bristol in  fer 4 zour dan Prizon depi zour son ladmisyon le11 Avril 2018 ziska zour ki i ti ganny prononse décédé le 15 Avril 2018.

Mr Speaker parey in ganny kominike par lapolis sa ka in ganny raporte par lapolis par Lotorite Prizon pou fer lanket etabli sirkonstans lanmor Mr Bristol.  Lapolis ankor pe fer son lanket ziska prezan.  Lekor Mr Bristol ti dan Care e Transition Unit kot i ti pe ganny detenir depi son ladmisyon.  E i ti ganny vwar ater anviron 3.40 bomaten.

Kominike lapolis in fer resorti ki dapre rezilta letopsi ki zot in resevwar Mr Bristol in resevwar plizyer blesir an rezilta en bate ki in gannyen.

Mr Speaker nou pa dan en pozisyon pou donn plis detay ziska prezan pou rezon ki lanket ki lapolis pe fer dan sa lensidan.  Kot i konsern protocol etabli par Lotorite Prizon, regilasyon Prizon 2001 i stipile bann prosedir protocol ki Lotorite Prizon i merit swiv dan en  tel lensidan.  E mon’n ganny enformen Mr Speaker ki prosedir pou Mr Bristol ti ganny fer dapre regilasyon ki annan an plas.  Mr Speaker i annan 5 prizonnyen ki’n mor pou diferan rezon ant Avril 2015 ziska Avril 2018.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker eski Minis i kapab dir avek nou ki aksyon ki Lotorite Prizon ti pran lo granmaten letan sa lensidan ti ape arive?  Mon mansyonn byen pandan ki ti ‘ape arive’ akoz lo granmaten si i annan en bagar i bezwen ki zot tande ki pe arive spesyalman si en dimoun pe ganny bate parey Lapolis in dir.

Ki aksyon ki gard prizonnyen oubyen Lotorite prizon spesyalman si i ti kapab dir nou lekel ki ti pe ansarz prizon dan sa moman ti pran, si zot ti pran okenn aksyon?

Eski Minis ti kapab osi dir nou ki leta, lekel ki pe ansarz prizon a ler aktyel?  E eski vreman Minis i santi ki prizon a sa moman i annan en bon sistenm Lotorite oubyen eski Prizon pe ganny run konman en landrwa kot sakenn pe fer sa ki sa ki zot anvi?

E letan Minis Mr Speaker i dir avek nou poudir tou bann protocol in ganny swiv eski Minis i kapab dir avek nou dan sa ka akoz ki lafanmir Mr Bristol in konplent ouvertman lo medya, ki poudir zot pan ganny enformen parey zot ti ava eksepte ganny enformen e ki zot ti vreman dezapwente.  Alor dan sa ka balans sa an relasyon avek sa protocol ki Minis ou dir nou in ganny etabli.  Mersi.

 

MR SPEAKER

Mersi Onorab Ramkalawan.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker ti annan en shift supervisor ki ti pe ansarz Prizon e en Sef Lenspekter ki siny duty officer e nou ti ganny enformen sa lensidan byensir par duty officer sa zour bomaten.  Mon note Onorab ou kestyon pe demande ki Lotorite Prizon, ki aksyon Lotorite Prizon ti pran letan sa ti pe arive.

Me sa lensidan ti ganny raporte letan ki lensidan ti pe arive napa okenn, napa okenn Rapor  ki ti pe ganny fer me i  plito apre, apre ki, apre ki lensidan in arive, bann zofisye ki ti lo shift ti tann en kriye pou demann lasistans sorti kot sa unit, kot sa, kot sa lensidan ti pe arive.  E letan bann zofisye ti ale lanmenm ler ki zot ti vwar lekor Mr Bristol dan unit ater, kot i ti ganny vwar apre.

E letan zot ti tyeke zot ti vwar poudir i ti napa okenn – i pa ti pe reazir e i ti napa okenn pulse letan zot ti tyeke.  Nou medical officer ti ganny kontakte, Lapolis ti ganny kontakte, Lopital osi ti ganny enformen e tou sa bann dimoun ti vini pou vin asiste e pou kapab donn Lotorite Prizon en koudmen  dan sa ki’n arive.

Mr Speaker an sa ki konsern lekel ki pe ansarz prizon nou annan  en Depite.  Nou annan en Depite Sirentandan Prizon e sa i Mr Samir Ghislain ki la obor mwan apre midi.  E mon ti a kontan re asir Onorab ki nou annan en Sistenm Lotorite dan prizon parey Manm Lasanble i kapab okouran an Novanm 2017 i annan en  Sirentandan par Enterim ki ti ganny apwente pou ansarz Prizon, e i pe  ganny asiste par son Depite e par bann lezot zofisye dan prizon donk i annan en management zisteman ki an kontrol ki pe fer marse Prizon.

E an menm tan mon ti a kontan dir ki nou pe ganny lasistans avek en expert ki sorti – ki nou’n demande ki sorti UNODC e ki’n la depi mwan pase e ki pe ed nou avek serten travay ki nou pe fer kot Prizon.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mr Speaker swivan larepons Minis, eski Minis i kapab dir nou laverite e konfirmen ki poudir o fet letan sa lensidan ti pe arive ti annan  bokou kriye e ki Lotorite Prizon bann Gard Prizonnyen ki ti on duty personn pan enterese pou zot entervenir e si zot ti’n entervenir petet zot ti ava’n kapab sov lavi Mr Bristol.

E dezyenmman Mr Speaker sa expert la eski Minis i kapab dir avek nou si i pe ganny peye par Gouvernman Sesel, oubyen si par UNODC? E si i pe ganny peye par UNODC pou ki kantite letan ki i pou ganny peye par UNODC avan ki Gouvernman Sesel i peye, parski in deza en expert avan ki konmans ganny peye pou 3 mwan par UNODC e apre sa se Gouvernman Sesel ki’n bezwen pey li 11mil Dolar par mwan e pandan ki li sa msye i ti reste Eden Island.  Konfirm sa pou nou silvouple Minis.  Mersi.

 

MR SPEAKER

Mersi Onorab. Minis.

 

DESIGNATED MINISTER MACSUZY MONDON

Mersi Onorab.  Onorab mon pa okouran poudir – mon napa sa lenformasyon ki ti annan  en kantite kriye ki petet si bann lapolis ti’n entervenir.  Mon konnen ti annan 3 zofisye sa zour swar ki ti pe travay e normalman zot sipoze pe fer patrol, pe fer letour tou le erdtan.

Whether sa ti’n ganny fer e sa i ava sorti dan lenvestigasyon entern ki Lotorite Prizon li menm li pe fer pou vwar egzakteman lo son kote ki bann keksoz ki’n arive.

Me parey mon’n dir ou mon napa sa lenformasyon si ti annan ki kantite kriye ki bann gard, bann Gard Prizonnyen sa letan ki ti pe travay pa’n entervenir, pa’n respond.

Kot i konsern sa expert ki la avek nou i pe ganny peye par UNODC e Gouvernman Sesel pe asiste avek son akomodasyon e avek transpor o nivo pei.

Petet bann ekspertiz ki’n vini avan Onorab pou vin travay avek Prizon mon mazinen in ganny anvoye pou serten task spesifik.  Me sa enn se nou ki’n demande e i en dimoun ki annan apepre en 30tenn lannen ki’n manage en prizon pou apepre en 30enn lannen e nou ki’n demande nou kapab ganny en dimoun avek leksperyans ki kapab vin ed nou avek zisteman bann travay reform ki nou anvi fer dan Prizon; serten nou bann keksoz ki nou krwar nou santi nou anvi met an plas akoz i annan pa mal travay ki nou bezwen fer.

E mon ti a kontan reasir ou Onorab poudir nou pou vwar rezilta sa travay ki nou pe fer ek sa led ki nou’n demande avek sa expert.  Akoz se nou ki’n demande pou li kapab vini zisteman pou li vin donn nou en koudmen kot i konsern management Prizon.  Mersi Mr Speaker.

 

MR SPEAKER

Mersi Minis.  Onorab Ernesta.

 

HON PAUL ERNESTA

Mersi Mr Speaker.  Mr Speaker bonn apre midi, Minis, ou bann delegasyon e tou Manm koleg, bonn apre midi tou dimoun a lekout.  Mr Speaker eski Minis i kapab dir avek sa Lasanble si sa prizonnyen ki’n perdi son lavi dan sa ka Mr Bristol ti fer konplent avek Lotorite pou dir ki son lavi ti dan risk.  Si wi ki Lotorite in fer?

Dezyenmman eski Prizon i annan en sistenm ki permet bann zofisye ki lo duty detekte okenn komisyon e pou entervenir vitman pou evite ki bagar ant prizonnyen i fini dan bann lensidan trazik parey sa enn kot Keven in perdi son lavi?  E trwazyenmman eski bagar ant prizonnyen i ariv souvan?  E eski i annan bokou prizonnyen ki sibir bann blesir an rezilta sa bann bagar?  Mersi Mr Speaker.

 

 

MR SPEAKER

Mesi Onorab Ernesta.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker non Lotorite pa’n ganny okenn Rapor sorti kot Mr Bristol pou dir ki i santi ki son lavi i an risk.  Sel rapor ki mwan mon annan lenformasyon se ki i ti fer en konplent son Vandredi avan pou dir i pa ti le bwar son medikaman ki dokter ti’n donn li ok.  E sa sel rapor ki li i ti fer akoz i ti pe refize i ti pe demann lezot keksoz i pa  ti oule bwar son medikaman.  Nou napa okenn sa rapor Onorab ki ou pe dir nou.

Kot i konsern sistenm pou permet detekte.  Zisteman si nou prosedir oubyen nou protocol i dir ki bann zofisye ki pe travay dan Prizon dan sa bann letan zot sipoze pe fer patrol tou le erdtan.  Mon krwar posibilite i la si zot pe fer sa byen zot pou kapab detekte si i annan bann keksoz, bann bagar ki pe arive e petet entervenir.

Me sa parmi bann lenvestigasyon ki nou pe fer o nivo Prizon nou ava find out apre si sa ti ganny fer.  E Onorab wi dan en Prizon ou souvan annan bann bagar ki arive akoz ou pe deal avek diferan kalite mes, diferan kalite kriminel e sou van i annan bann bagar ki arive e petet parfwa kot prizonnyen i lager e parey nou konnen  i annan lezot bagar ki’n arive kot petet prizonnyen in arive in bles kanmarad.

E depi – nou annan apepre 5 lensidan bann bagar ki’n arive depi konmansman Zanvye ziska la konmela.  Mersi Mr Speaker.

 

MR SPEAKER

Mersi Minis.  Onorab Terence Mondon.

 

 

HON TERENCE MONDON

Mersi Mr Speaker.  Bonn apre midi Minis  avek ou lekip.  Mon premye kestyon mon oule demann Minis dan sa ka spesifik kot Keven in perdi son lavi dan prizon akoz ki zot bezwen kit Manm fanmir Keven an deor baro sirtou dan sa moman soufrans.  Eski sa i form parti zot protocol kot prizon ler en lafanmir i perdi enn zot pros?

Dezyenmman mon oule demann Minis eski nou pou ganny kopi Rapor Lenvestigasyon?  Akoz i paret osi ki rapor lenvestigasyon pou Mr Robert Banane pa ankor- personn pa ankor vwar son  rapor lenvestigasyon e mon ti a kontan Minis i fer nou ganny en kopi sa Rapor Lenvestigasyon.  E mon trwazyenm kestyon akoz ki en dimoun ki mont prizon pou pa pey alimoni i bezwen ganny mete parmi bann lezot dimoun bann lezot kriminel?  Eski sa-  dan Prizon napa en lot fason pou zot gard – pou fer en diferans bann diferan ka ki mont Prizon?  Mersi Mr Speaker.

 

MR SPEAKER

Mersi onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker mon panse rezon ki bann fanmir ti’n ganny kite an deor baro pou en pe letan sete petet akoz lapolis ti la deza e i annan serten travay ki zot ti pe ganny fer.  Lapolis, bann dimoun medikal, Lotorite petet pou rezon sekirite ti pe atann avan ler zot fer bann fanmir antre.

Me selman mon panse zot pa ti merit ganny kit an deor baro.  Zot ti’n kapab antre e ganny mete en landrwa anndan, anndan dan Prizon si nou ti bezwen ki zot atann pou en pe letan.

Onorab kot i konsern Rapor Lenvestigasyon Robert Banane mon pa ankor ganny en kopi, mon pa ankor ganny en kopi sa Rapor, pa ankor ariv kot mwan.  E kot i konsern Keven ki ti ganny met dan Prizon, ki ti kondannen pou pa pey alimoni zisteman kot i ti ete dan sa Care and Transition Unit sa i en landrwa kot nou met bann prizonnyen ki fek antre dan Prizon.  Dan sa Unit zot reste pou en minimum par egzanp de semenn, depan lo zot sityasyon kot i parey en nespes induction si ou le, kot zot pas atraver bann egzaminasyon medikal e en risk assessment i ganny fer lo zot.

Zot ganny vwar par bann zofisye reabilitasyon e bann zofisye welfare ki travay avek prizon.  E apre petet sa premye semenn ki nou deside dan ki seksyon prizon ki zot pou ale.  Me i domaz ki sa lensidan in arive pandan sa premye de semenn kot sa unit kot sa ki nou apel en Care and Transition Unit.  Mersi Mr Speaker.

 

MR SPEAKER

Mersi Minis.  Onorab Mondon.

 

HON TERENCE MONON

Mersi Mr Speaker.  Mon ti oule refer rapel Minis ki i annan 2an ki ou pa ankor ni menm vwar Rapor Envestigasyon e mon ti a kontan ou kapab fer en komitman avek nou Lasanble, donn nou en komitman ki nou kapab vwar rapor lenvestigasyon dan sa ka ki mon’n mansyonnen.

E zisteman lo ka protocol Minis ler en fanmir in perdi en pros dan prizon depi apre 7er ziska pros midi i ganny kite an deor baro i pa akseptab!  E mon ti a kontan, mon ti a kontan ki ou etabli en protocol imedyatman pou kapab resevwar bann fanmir ki bezwen pas dan sa bann sityasyon parey.  Mersi Mr Speaker.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker kot i konsern sa Rapor mon krwar sa Rapor i pe ganny antreprann par en Mazistra si mon pa tronpe kot Lakour me solman nou a kapab rod sa lenformasyon kan  eski sa Rapor i pou pare pou nou kapab ganny en kopi.

E kot i konsern protocol mon pa konnen si sa bann dimoun ti esper ziska midi Onorab me mon krwar poudir lenformasyon ki mon pe gannyen la se ki dan apepre en 20enn minit a en demi erdtan zot ti ganny fer antre.

Donk, sa lenformasyon ki mon bann zofisye ti pe donn mwan.  Me selman parey nou pe dir nou annan bann protocol ki an plas e kan nou enplimant bann protocol byen nou pa merit annan, nou pa merit annan sa bann kalite problenm koumsa a lavenir.  Mersi Mr Speaker.

 

MR SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Speaker.  Mr Speaker mon osi mon ti a kontan pas mon kondoleans avek lafanmir Bristol lo sa pert.  Mon ti a kontan demann Minis in konfirm avek nou e osi in eksprim kondoleans pou lafanmir isi dan nou Lasanble.  Eski Minis, bann Lotorite Prizon in vwar lafanmir pou li kapab ganny zot versyon akoz Onorab Mondon fek dir en keksoz ki ou dir ou zofisye ki’n donn ou.  Eski kekfwa pou vwar zot versyon si zot in esper 4erdtan, konbyen letan?  Sa i enn.

Dezyenm, eski sa Transition Unit fek ganny etabli ?  E eski i pe servi son purpose?  Akoz si en dimoun i ganny kondannen pou murder parey ou pe dir i pou al laba.  Konbyen dimoun i housed, i kapab housed at any one time e ki son peryod sirveyans ki kapab ganny fer lo la.  Akoz kot prizon i annan en Camera Unit mon prezimen zot kapab vwar ki pe pase.  I sipoze vwar ki pe pase.  Lot kestyon se eski prezan vi ki Mr Bristol in mor responsabilite pou pey alimoni pou tonm lo Lotorite Prizon kot son lanmor in arive?  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker wi nou annan en zofisye en liaison officer ki an kontak e ki pe – ki an kontak avek fanmir ok e ki pe var fanmir kot i pou koz avek zot kot i konsern sa ka.  CTCU ti ganny entrodwir lo konmansman Zanvye – ok, zisteman pou nou kapab ganny en sans pou assess parey mon’n dir bann prizonnyen avan ler ki nou met zot dan bann diferan lezot unit dan Prizon.

E son kapasite se pou 15 dimoun.  Me a sa moman parey zot okouran ti annan zis enkli Kevin ti annan zis 7 dimoun dan sa CTU.  E Mr Speaker kot i konsern responsabilite pou pey alimoni mon krwar lanket ava determinen rol e responsabilite Lotorite Prizon dan sa lensidan.

Mon pans pa si ler sa bann keksoz koumsa i arive se sa Lotorite ki pey alimoni.  Mon krwar i annan bann lezot, lezot keksoz ki ganny peye oubyen ki ganny konsidere dan en fason en pe diferan.  Mersi Mr Speaker.

 

MR SPEAKER

Mersi Minis.  Onorab Andre.

 

HON CLIFFORD ANDRE

Eski Minis i kapab dir nou dan sa kapasite 15 unit, eski i annan separasyon ladan ki met si en dimoun in ganny kondannen pou murder i pa parey avek en civil imprisonment kot en dimoun pa pe pey alimoni.  Si zot tou zot ganny mete ansanm e mwan osi mon annan lenformasyon ki dir ki poudir pandan letan ki sa lensidan ti pe arive ti annan en kantite kriye kot lasistans ti pe ganny demande.  E akoz kekfwa Minis i a dir mwan i pa ankor ganny Rapor Lenvestigasyon be selman sa i en fe akoz ki si i annan  en demann pou sekour Lotorite Prizon kot i sipoze annan sekirite pa kapab afford en inmate sekirite ki nou Konstitisyon i donn li par verti son Drwa Imen.  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mr Speaker mersi.  Parey mon’n dir nou – letan nou met bann dimoun la nou met zot konman bann dimoun ki fek ariv dan Prizon.  E byensir i annan serten konsiderasyon ki ganny donnen e nou met zot la baze pou nou kapab fer serten lobzervasyon e pou zot kapab annan sa enteraksyon avek bann zofisye Probasyon, bann zofisye Welfare, bann counsellors ki nou annan  dan Prizon.  E mon krwar si sa 3 zofisye ti pe fer zot patrol parey zot ti’n merit fer parey nou’n dir tou le erdtan, zot ti pe patrole zot ti pou bezwen tande si ti annan bann kriye ki pe arive dan prizon.  Mon pa konnen akoz zot pa’n tande, zot pa’n entervenir me lenvestigasyon entern ki nou, nou pe fer i ava bezwen dir nou egzakteman kwa egzakteman ki’n arive.

An menm tan osi sa i ava ganny konplimante par lenvestigasyon ki lapolis li i pe fer e Lotorite Prizon apre  i pou bezwen vwar ki mannyer si i annan serten febles ki’n arive, ki mannyer i pou bezwen met bann mekanizm an plas pou li kapab adres sa bann febles.  Mersi Mr Speaker.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Mr Speaker.  Mr Speaker mon kestyon pou Minis i sa enn ki swivan.  Anfen i annan de kestyon.  Premyerman eski Minis i kapab konfirmen nou’n tann lanket Lapolis; nou’n tann lanket eski Minis i kapab konfirmen premyerman ki etandonnen ki sa se en dimoun ki’n mor pandan ki i ti anba custody Lafors Lord en inquest pou ganny imedyatman e otomatikman konmanse pou determin sirkonstans lanmor sa msye.

E dezyenmman e mon rekonnet ki sa i al en pti pe an deor kestyon me avek ou permisyon an deor topik me avek ou permisyon Mr Speaker mon ava demande.  Eski Minis pa krwar ki in ler oubyen in overdue pour ki nou annan en sistenm dan sa pei, kot olye anvoy en papa oubyen en manman ki pa pey alimoni dan prizon kot zot pa pou kapab pey sa alimoni ki zot dwa, en sistenm i ganny met an mars parey nou’n demande plizyer fwa dan sa Lasanble pou sa bann dimoun ganny anvoy en landrwa kot zot pa pou al ganny mor me kot zot pou al travay pou pey sa alimoni ki zot dwa sa zanfan?   Mersi Mr Speaker.

 

MR SPEAKER

Mersi Onorab Georges.  Mon pou les sa dezyenm osi pase, mon swete ki Minis i kapab donn en repons, akoz mon krwar mon’n deza soulev sa osi isi dan Lasanble.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker parey mon krwar mon’n dir oparavan nou annan en internal enquiry ki’n deza konmanse e si i annan en nesesite apre ki Lapolis in fer son travay – si i annan en nesesite pou fer en inquest mon krwar poudir sa i ava ganny, sa i ava ganny i ava ganny fer.  E kot i konsern en sistenm pou met an plas pou bann dimoun pou zisteman al travay pou zot kapab pey alimoni Onorab mon pran li konman en propozisyon ki ou pe fer e ki kapab ganny konsidere – mon panse par Gouvernman.  Mersi Mr Speaker.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Mr Speaker.  Wi Minis silvouple pran sa konman en sizesyon akoz se en sizesyon ki Manm lo tou le de kote sa latab in fer plizyer fwa e ki ti ava byen enplimante.

Minis mon krwar pa’n tro sezi mon premye kestyon.  Mon pe demann li konfirmen ki anba Lalwa pa si i merite – pa si i apre lanket me otomatikman, me obligatwarman en inquest i bezwen ganny fer akoz in ariv en sudden death a en dimoun dan anba proteksyon Lafors Lord.  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mr Speaker mon pa konnen si mon kapab konfirm sa.  Si mon dan en pozisyon pou konfirm sa avek Onorab la pou le moman.  I en sudden death wi me mon krwar i annan pou fer osi avek lakoz.  Avek kwa ki Lapolis i determinen in lakoz sa lanmor.  Donk mon pa santi mwan dan en pozisyon pou mwan donn en konfirmasyon Onorab a sa moman.  Mersi.

 

MR SPEAKER

Ok.  Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Bonn apre midi Mr Speaker.  Bonn apre midi Minis Dezinyen ek ou lekip.  Bonn apre midi tou dimoun ki a lekout.  Mr Speaker dan sa lensidan la eski an relasyon ek sa eski Minis i kapab enform nou Lasanble, dir nou ki kantite prizonnyen par rapor avek gard prizonnyen i annan dan Prizon.  Konmsi kantite prizonnyen e ki kantite gard pou nou kapab ganny sa ratio.  

E an menm tan eski Gouvernman li konman Minis Dezinyen, eski Gouvernman pe mazin bann lofans parey ki Mr Bristol, prizonnyen Bristol ti’n fer konman  pa pey alimoni  e bann lezot petty theft kapab dir, eski Gouvernman pe get en fason kot sa bann dimoun pa al dan Prizon per se me en landrwa kot i kapab ale al travay, pey sa alimoni, al travay rann sa pti zafer ki’n ganny vole e apre pli tar i ava – letan in fini son letan i ava sorti dan sa landrwa me konmsi ki i pa al dan sa  bann Prizon parey la ki nou pe vwar Prizon, Prizon  normal menm la.  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker nou annan apepre 432 prizonnyen an se moman e nou annan 174 Gard Prizonnyen.  Donk mon krwar sa i donn Onorab en nide apepre me lo nou kote nou, nou santi poudir nou bezwen ankor plis, nou bezwen ankor plis Gard Prizonnyen pou travay dan prizon e se pou sa rezon ki nou pe fer demars pou nou kapab fer en rekritman overseas pou nou kapab ganny en pe plis Gard Prizonnyen ki pou rantre si tou keksoz i mars byen, si Bidze i permet pou nou kapab ganny bann Gard Prizonnyen ki ava rantre a lafen Zen pou kapab donn nou en koudmen.

Kot i konsern bann petty offences parey Onorab in dir mon krwar sa i zwenn en pti pe osi avek sa ki Onorab Georges in dir petet i annan en nesesite pou nou revwar Lalwa pou entrodwir en pe plis community service kot bann tel ka sirtou bann ka ki pas devan Tribinal Lafanmir pou lavenir e petet i ava annan plis lefe kot olye al dan Prizon ki finalman osi ler ou dan prizon ou pa kapab peye me ou a kapab travay pou ou kapab finalman pey ou alimoni.

Donk mon krwar sa ankor mon konsider li konman bann keksoz ki nou kapab konsidere dan le fitir.  Mersi Mr Speaker.

 

MR SPEAKER

Mersi Minis.

 

HON CHARLES DE COMMARMOND

Minis zis ou pa’n dir la kantite prizonnyen mon pa’n tande sa bout la letan ou’n dir?  432?  E lefe ki nou vwar sa i en – i annan en lirzans ladan.  Sa kestyon lezot kalite pinisyon apard zis met dan Prizon nou vwar poudir fer dimoun travay e rann sa keksoz ouswa pey sa alimoni nou vwar i annan en lirzans ladan.

Pa zis mwan ki vwar sa tou dimoun, nou Lasanble e pep Seselwa i vwar sa.  Akoz ki garanti ki sa i kapab vin devan nou Lasanble o pli vit posib?

Si nou ti kapab ou Minister fer ki sa i vin o pli vit pou nou kapab ede ki Gouvernman i kapab bouz byen dan sa direksyon e dimoun i ava santi li pli happy.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Onorab mon krwar nou kapab travay avek bann sekter konsernen, pou nou kapab fer en propozisyon dan sa laliny, ki ava ede parey ou pe dir ki nou ava ganny en pli bon reabilitasyon, oubyen en meyer rezilta kot i konsern pou nou kapab deal avek bann sityasyon parey.

Si Minister Entern ki bezwen lead sa travay nou ava fer li avek bann lezot Minister ek bann lezot sekter pou nou kapab, pou nou kapab met en propozisyon devan Gouvernman.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Zis sa ratio ler mon pe gete 432 prizonnyen avek 174 Gard Prizonnyen en ratio ki pa mal me akoz i annan pratik nou vwar en kantite prizonnyen me napa gard ki pe vey zot e  zot i mank sipervizyon.  Akoz?

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Onorab, mersi Mr Speaker.  Sa bann dimoun i travay shift osi.  Nou bann gard prizonnyen i travay shift e mon krwar zot ganny divize par 3 shift.

Donk parey mon’n dir pli boner i annan en nesesite pou nou annan plis, pou annan plis gard prizonnyen petet menm pou travay lo en shift.  Ler sa lensidan ti arive ti annan 3 Gard Prizonnyen ki ti pe travay me eski letan nou, nou pe fer nou bann travay entern nou pou bezwen vwar eski sa i sifi lo en shift pou annan zis 3 Gard Prizonnyen ki pe travay.  Ok.  Mersi Mr Speaker.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker.  Mr Speaker, bonn apre midi tou dimoun.  Letan mon pe ekout bann larepons ki Minis  pe donn nou mon pe swete ki Minis i realize li ki ansarz Prizon i tonm anba Zafer Entern, e dan son bann larepons konmsi napa sa lirzans pou ki i annan en keksoz serye ki’n arive e ki zot on top of things pou rezourd bann sityasyon.

Par egzanp sa Rapor dan lanmor Robert Banane in fini sorti depi Fevriye 2018.  E letan Justice Natasha Burian in fer son bann rekomandasyon, in dir pou anvoy rapor kot Komisyoner Lapolis kot Sirentandan Prizon, kot Minis Zafer Entern e Minister Lasante.

E Minis in vin Minis Zafer Entern depi an Juillet 2017, la ozordi 2mwan i vin devan Lasanble i pa ankor ganny rapor.  E Rapor i annan 10 rekomandasyon  ki ganny fer enkli rekomandasyon pou prizon avek son Minister.

Mon kestyon la i seki be i paret napa, napa sa lirzans pou sa Minister met kontrol dan Prizon kot nou konnen 432 dimoun bandi, voler tou sa bann eleman move nou sosyete i laba e alor sa Minister i bezwen annan keksoz an kontrol.

Alor kestyon mon anvi demande se ki vreman Minis in fer depi ler in vini pou adres sa bann konsern ki annan dan Prizon?  E dezyenmman Minis in nonm nou 5 lanmor. question arising Mr Speaker 5 lanmor depi Avril 2015 ziska 2018 eski i kapab dir nou natir sa bann lanmor?  Mersi bokou.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Onorab.  Mersi Mr Speaker.  Mon ava konmans avek natir sa bann 5 lanmor.  Enn ti en dimoun ki ti ganny aksidan ti tonbe dan en pick-up lo zil Coetivy pandan ki i ti lo Rehabilitation Program.  En dezyenm ok, se enn ki ti ganny blese pandan an 2016 pandan en lensidan kot Prizon.

Trwazyenm sete en etranze ki ti komit swisid dan Prizon ki ti pann.

Katriyenm i ankor nou annan en on going public enquiry ki pe ale lo la.

E dernyen osi i annan en police investigation ki pe ganny fer dan sa dernyen ka.

Mr Speaker mon ti a kontan petet kot i konsern bann rapor mon konnen poudir nou’n demande Prizon e mon pa konnen pou ki rezon me nou pa ankor gannyen sa Rapor Onorab, me nou ava rode nou ava demann ankor en kou e fotespere sa voyaz nou ava gannyen.

Me solman mon ti a kontan re asire ou ki i annan en kantite travay ki pe ganny fer dan Prizon.  E sinon parey  mon’n dir nou pran linisyativ pou nou menm nou apros nou UNODC, pou nou kapab ganny serten led ek serten sipor se akoz nou annan sa lavolonte pou nou kapab zisteman amelyor bann servis ki nou pe donnen, ki nou pe donnen dan Prizon.

Par egzanp, enn bann keksoz ki nou pe fer nou pe re vwar Prison Act ki nou konnen in la en pe letan ok e nou konnen ki sa travay i ava, nou ava kapab konplet li ver lafen, ver lafen sa lannen.  Avek led UNODC nou pe osi travay lo en Master Plan, kot nou pe revwar e amelyor, moderniz kot nou kapab agrandi kot fodre tou bann lenfrastriktir Prizon e fotespere ki sa travay osi i ava ganny konplete dan en bref dele e ki nou  kapab fer en proposal avek Cabinet pou nou kapab bouz devan.

Kot i konsern mendev e kot i konsern bann resours imen, parey mon’n nonmen taler nou’n entam en diskisyon avek Gouvernman La Tanzanie e si tou keksoz i mars byen e osi si nou ganny, nou ganny nou larzan ki dan Bidze ki nou pe atann nou pou kapab recruit 17 sa bann zofisye a lafen Zen ki ava kapab vin donn nou en koudmen dan Prizon.

Anliny osi avek revizyon Lalwa Prizon nou pe revwar nou bann  SOPs ok nou bann Standards Operation Procedures.  Ankor avek bi pou nou kapab amelyor nou sistenm.

An menm tan osi nou pe regard popilasyon prizon an relasyon avek la kantite prizonnyen e staff ki i annan e sa travay osi nou pe fer li an regardan la fason ki nou  deplway bann staff dan prizon e ki mannyer nou servi byen nou resours imen dan Prizon.

Lotorite Prizon pe osi travay lo en plan training pou tou bann staff Prizon ankor avek led UNODC, e nou annan bann dimoun ki pou vin ed nou avek sa training e nou panse letan sa in konplete.

Sa i ava permet zisteman nou bann staff Prizon vin en pe pli efektiv dan desarz zot bann  responsabilite.  Nou annan osi en memorandum of understanding ki pei i sinyen avek Maurice e ki pou permet nou ganny serten sipor pou prizon avek Gouvernman Morisyen.

E konmansman sa lannen nou ti osi pran en desizyon pou nou transfer Seksyon Probasyon direkteman anba Lotorite Prizon.  Sa pou ede asir en pli bon kordinasyon e amelyor servis ki nou donnen avek nou bann – ki nou donnen dan nou sistenm pou nou bann prizonnyen.

I annan osi bann proze, bann proze nouvo proze ki nou pe entrodwi dan Prizon.  Parey nou’n dir i annan bann travay mentenans bann enfrastriktir ki pe antre dan nou, dan nou plan.  Nou annan bann proze kominoter ok ki nou pe  mazinen entrodwir.  Bann proze edikasyonnel, e rekreasyonnel pou nou bann prizonnyen e an menm tan osi en progranm spirityel ki nou pe met an plas.  Byensir nou bann Day Release progranm i kontinyen.

Nou Progranm Reabilitasyon lo Coëtivy ki’n konmanse e pou le moman nou annan 42 prizonnyen ki lo sa progranm.  E nou plan se ki nou annan omwen en santenn prizonnyen ki join sa progranm lo Coëtivy a lavenir.  Ok?

E vwala Mr Speaker enn de bann travay ki nou pe entamé ansanm dan Prizon.  Ansanm avek bann Lotorite konsernen.  Mon ti anvi zis partaz sa avek Lasanble.  Mersi Mr Speaker.

 

MR SPEAKER

Mersi Minis.  Mon ava pas dernyen kestyon avek Loter Kestyon.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker eski Minis i kapab dir avek nou, ki dernyen fwa bann dimoun ki ansarz prizon enkli Mr Ghislain ki asiz obor ou in antre dan Prizon li menm kot bann prizonnyen i ete?  Sa i mon premye kestyon.

Mon dezyenm kestyon Mr Bristol ti ganny bate apartir 11er diswar, eski sa in ganny raporte avek zot?  Oubyen eski Lotorite Prizon pe kasyet sa ki’n arive vreman ant Sanmdi avek Dimans, parey ki zot ti kasyet letan Mr Banane ti ganny touye avek en koud bal e zot ti dir in glise lo tol e in tonbe e se lanket ki ti montre ki poudir son lanmor ti ganny okazyonnen par koud bal.

E finalman eski Minis pa krwar ki poudir i vreman iresponsab pou en lenstitisyon ki annan plis ki 400 prizonnyen pou ki dan en shift?  E sa zour swar ti annan zis 3 zofisye ki ti ape travay.  Eski sa pa montre ki poudir Lotorite Prizon in fail pandan ki, pandan ki son Sirentandan i L’Amerique lo konze e i annan zis 3 zofisye e ki i bezwen annan aksyon serye ki ganny pran anler kot sa lenstitisyon?  E final, final menm sa msye ki zot in anmennen la sa etranze, eski nou ti a kapab ganny en kopi son CV?  Akoz ki mannyer nou konpran zanmen in deza ansarz okenn Prizon dan son lavi.  Mersi bokou.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker be Lotorite Prizon bann dimoun ki dan lotorite i bezwen, i bezwen pe travay oubyen pe rantre, pe la kot Prizon, sa ki mwan mon konnen – mon pa tro konn avan, me selman sa ki mwan mon konnen depi nouvo Sirentandan par enterim in take over Prizon in pas tou son letan dan Prizon.

I la e mon konnen i annan en kantite travay ki in fer.  I vwar bann inmates, e i annan serten nouvo linisyativ e ki i pe met an plas.

E Onorab mon krwar tou dimoun petet i merit son konze e li osi in bezwen pran son konze ki i ti’n fini planifye.

Me sa i pa vedir ki i pa pe pran son travay o serye.  Mon ti a kontan re asir ou poudir i annan en kantite keksoz ki pe ganny fer par sa nouvo Acting Superintendent Prizon.

Si bann dimoun dan Prizon whether dan Lotorite oubyen whether bann gard prizonnyen zot pe kasyet be i bet parske parey ou’n dir finalman dan enquiry ki pou fer laverite pou sorti.  Bann fe pou sorti.  Donk napa rezon pou nou kasyet.  Nou merit dir keksoz parey i ete.

E si ou’n dir Mervin, sa lensidan ti ganny arive 8er diswar, I mean 11er diswar mon espere ki sa i ava sorti, bann fe i ava ganny etabli.

Apre nou ava deside konman en Lotorite kwa ki nou, nou annan pou nou fer avek bann dimoun ki kasyet nou lenformasyon.  Me mon espere ki sa i pa le ka.  Ler ou pe dir i annan zis 3 prizonnyen mon dakor avek ou poudir sa i pa ase.

E se pou sa rezon ki nou dir nou bezwen anploy plis gard prizonnyen e petet mon ti a profite pou fer en demann avek Lasanble pou regard en pti pe nou Bidze pou nou kapab, nou Bidze ki’n freeze pou nou kapab ganny larzan pou nou kapab fer sa bann dimoun vini.  Akoz si nou pa ganny larzan nou pa pou kapab recruit sa bann nouvo Gard Prizonnyen ki nou an vi, ki nou anvi recruit.  Wi Onorab mon a fer ou ganny en kopi, en kopi CV sa expert UNODC ki pe avek nou- ed nou avek bann travay ki nou pe fer dan Prizon.

 

HON WAVEL RAMKALAWAN

Mr Speaker.

 

MR SPEAKER

En moman.  Eski Minis in fini?  Minis ou’n fini?  Ok.  Mersi Onorab Ramkalawan.

 

HON WAVEL RAMKALAWAN

Mr Speaker mon’n demann Minis en senp pti kestyon.  Son Depite i asize la obor li.  Si son Depite i kapab dir avek nou ki dernyen fwa i ti rantre dan Prizon kot bann prizonnyen i ete?  Mersi bokou.

 

MR SPEAKER

Mersi Onorab.  Non. Mr Ghislain se Minis ki reponn.  Minister.

 

DESIGNATED MINISTER MACSUZY MONDON

Onorab Mr Ghislain i dir mwan poudir 3 semenn pase i ti pe travay kot Prizon e i fer en zefor pou li pase kantmenm en fwa, enn fwa par semenn, me nou rekonnet ki in ganny donnen konman Depite en responsabilite spesifik.  Se li ki pe ansarz Remand Centre.  Donk en  bon pe son letan osi i pas kot Remand Centre.

 

MR SPEAKER

Mersi Minis.  Bon mon a donn en dernyen laparol Onorab Georges.  I annan en lenformasyon. Onorab.

 

HON BERNARD GEORGES

Mersi Mr Speaker.  Mr Speaker mon ti’n demann Minis en kestyon en pe pli boner, me mon ti napa sa lenformasyon to hand.  E sa se sa kestyon lanket.  Nou ganny tann bokou sa lanket ava determinen, lanket ava determinen.

E mon ti anvi zis port a latansyon non selman Minis me osi nou Lasanble e popilasyon an zeneral –  provizyon seksyon 351 Criminal Procedure Code ki dir kler

‘’In the following cases the Attorney General shall be bound to order an inquest to be held…’’ e  ‘…’where the person has died in prison or while in the custody of the police. ‘’

Donk enperatif, en lanket i bezwen ganny fer, napa way out e sa lanket ava reponn – nou espere lamazorite bann kestyon ki nou’n demande apre midi.  Mersi.

 

MR SPEAKER

Mersi Onorab.  Minis ou le fer en komanter.

 

DESIGNATED MINISTER MACSUZY MONDON

Wi mersi Mr Speaker. Si sa i le ka dan sa ka la en lanket ava ganny fer.

 

MR SPEAKER

Mersi Minis.  Nou ava bouz lo kestyon Onorab Aglae.  Onorab.

 

HON EGBERT AGLAE

Mersi Mr Speaker.  Bonn apre midi Minis.  Minis mon kestyon dirzans i lir konm swivan date le 21 Mars.

An vi lensidan kot en prizonnyen in sibir blesir grav dan Prizon e lezot lensidan ase resan, eski Minis ki responsab pou Zafer Entern i kapab dir ek sa Lasanble (1).

Ki mezir ki Lotorite Prizon pe pran pou asire ki sa bann tel lensidan pa repete?  (2). Ki proteksyon ki i annan an plis pou asir tou sekirite tou travayer prizon e ban prizonnyen?  (c). Eski i annan en Polisi lasirans an plas pou travayer prizon?  (d).

Ki mekanizm efektiv ki zot pe met an plas pou anpese ki okenn zouti ou lobze danzere ki kapab met an danze lavi imen pa antre dan Prizon?  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker parey mon’n mansyonnen pli boner, avek lasistans teknik ki nou pe gannyen, sa i ava permet nou re organiz en pe bann travay oubyen bann servis ki nou pe, ki nou pe kle ki nou pe donnen o nivo Prizon; tel ki parey nou bann Lalwa, nou plan, nou bann plan formasyon ki nou annan pou nou bann travayer. nou Master Plan lo  – ki pou dir nou kote nou anvi anmenn prizon al lavenir.  E an menm tan osi revwar en pe lafason ki nou de plway nou bann staff dan Prizon.

E sa i ava permet nou annan en plan en pe pli konpreansiv e sistematik, lo ki mannyer nou pou adrese e amelyor servis Prizon.

Mr Speaker Lotorite Prizon i annan en mezir sekirite an plas e sa i kontinyelman pe ganny amelyore ki enkli ranforsi lafason ki nou fer lafouy; par egzanp lo prizonnyen, lo bann viziter e menm lo bann staffOk?  E ki travay kot Prizon.

An menm tan osi nou pe kontinyen vwar ki mannyer nou kapab ranforsi sa – amelyor sa sistenm pou nou kapab fer sir ki parey ou pe dir sa Sistenm Sekirite, sa bann mekanizm sekirite Onorab ki nou pe met an plas i efektiv pou tou dimoun.

Mr Speaker nou napa en Polisi lasirans pou travayer prizon.  Tou bann case mon panse parey dan bann lezot sekter i ganny anvoye kan i neseser kot Biro Attorney Zeneral ki ganny assess e si i annan okenn merit pou konpansasyon oubyen lezot keksoz sa i ganny fer baze lo merit sak ka.

Me dan Scheme of Service i fer provizyon pou en inducement allowance e pou bann travayer prizonnyen ki tenir an kont ki zot pe travay dan en lanvironnman ki ase riske.

Mr Speaker i annan mezir an plas pou sey anpes zouti e lobze danzere antre dan Prizon.  E sa i – tel ki fouy lo bann prizonnyen e parey mon’n dir oparavan bann viziter osi e bann staff ki antre dan Prizon.

I annan en legzersis netway Prizon ki ‘n konmanse e sa i annan pou bi idantifye tou bann lobze ki kapab ganny servi konman en zouti danzere e retir li lo compound Prizon.

Sa i pe ganny fer par faz, e premye faz pe ganny – premye faz ti fer lannen pase.

Dezyenm faz pe ganny konplete lafen sa semenn. Lezot faz byensir pou kontinyen apre ofir e an mezir ki nou entame bann travay ki nou annan pou fer.

Mr Speaker mon krwar avek sa detrwa mo akoz mon pa anvi repet osi bann keksoz ki mon’n dir oparavan letan mon pe reponn premye kestyon Leader Lopozisyon.  Donk mon ti ava dir ou mersi Mr Speaker.

 

MR SPEAKER

Mersi Minis.  Onorab Aglae.

 

HON EGBERT AGLAE

Minis mon annan de pti siplemanter.  Eski tou servis camera i an fonksyonnman dan Prizon an se moman aktyelman ?

Dezyenm kestyon eski Lotorite Prizon pe swiv norm cell ratio ki ganny etabli par Nation Unis?  E dernyen se eski Lotorite Prizon pe revwar striktir akse entern Prizon pou ede ki i annan en kontrol ler bann tel lensidan i arive?  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker wi nou annan bann camera dan Prizon me mon bezwen  aksepte osi ki i annan ki pa pe marse akoz si i annan  en keksoz ki bann prizonnyen i fer byen  se tanzantan zot kas en camera.

E nou vwar nou pe bezwen re install oubyen re ranplas bann camera lo en baz kontinyel.  Me nou annan bann camera ki ganny plase dan bann diferan landrwa enportan dan Prizon.

Kot i konsern ou lot pwen Onorab nou pe sey nou mye atraver klasifye, plas bann prizonnyen dan bann diferan unit pou sire ki sa i anliny avek bann norm enternasyonal me i pa vedir ki nou reisi pou nou kapab fer sa a 100poursan.

E letan nou koz en pti pe lo bann mekaniz ki an plas, pou nou kapab fer sir ki bann keksoz pa antre mon konnen bann search ki nou fer o nivo Prizon i deplizanpli mon kapab dir i vin pli difisil, akoz menm bann fanmir souvan pa korpere avek nou.

I annan keksoz ki otan ki posib zot esey kasyet keksoz dan tou diferan fason ki zot kasyet, tou diferan fason ki zot kapab.

Par egzanp ozordi ou annan keksoz ki pe ganny kasyet dan pampers; dan pampers en pti baba dan Prizon.

E ler nou fer search ki nou bezwen fer nou ganny dir ki nou pe denigre sa pti baba.  Konmsi toultan bann dimoun, ban viziter ki vin dan Prizon zot sey rod en fason konmsi pou zot sort of konnen en pa pli devan.

I annan ki met dan labous, ou konnen apre letan zot anbrase zot pas sa zot donnen avek sa prizonnyen.

Donk nou fer fas avek pa mal difikilte, pou nou kapab kontrole bann keksoz ki rantre dan Prizon; dan seve dan labou.  E mon krwar poudir nou- an mezir ki nou entansifye nou bann, nou bann search ki nou fer pou Prizon mon krwar nou pou tann bokou konplent avek bann viziter ki vin dan Prizon me nou napa en swa, nou napa en swa.  Nou pou bezwen entansifye sa bann search si nou anvi zisteman kontrole e anpes sa bann keksoz antre dan prizon.  Mersi Mr Speaker.

 

MR SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker.  Bonn apre midi tou koleg Onorab, Mr Speaker, e bonn apre midi tou delegasyon.  Minis en pti kestyon; eski dan bann mezir zot in deza konsidere pou met bann at least bann solda pou ede avek sekirite prizon as and when necessary?  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi.  Wi Mr Speaker i annan bann sityasyon kot nou’n annan serten lenformasyon, ki annan keksoz ki kapab arive kot nou’n demann led.  Kot nou’n demann led avek SPDF.  E sa in arive pou kapab ed nou, ed nou kontrol serten keksoz.  Mersi Mr Speaker.

 

MR SPEAKER

Mersi Minis.  Onorab Valmont.

 

HON JUDE VALMONT

Alor Minis. eski i posib pou fer li en pti pe pli permanan kekfwa pou solda segonn laba anler, pou ede ziska ler petet zot nobou solve sa de issue lack of sekirite prizon   Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker mon panse nou pa anvi ki sa i  vin en keksoz permanan.  Me parey mon’n dir i annan bann letan ki si nou santi nou bezwen led pou en semenn, de semenn e nou fer li.

Akoz nou bezwen mon panse balans sa osi avek lezot keksoz ki pe arive ki nou pe fer dan prizon.  Me selman ziska prezan Onorab i la fason ki nou’n fer li in mars in mars byen.  Mersi Mr Speaker.

 

MR SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Speaker.  Mr Speaker anvi ki sa lensidan ti arive avek Curtis Sinon, mon le demann Minis si li menm li konman Minis responsab pou Zafer Entern, in vwar la fanmir pou koz avek la fanmir?

Akoz zot dir zot pa ankor ganny sa enteraksyon avek ou.  E rezilta sa lensidan, sa inmate in sibir blesir grav dan son lestoman, ki fer ki son kondisyon ki i ti pe repoz ladan i bezwen ganny sanze.

E sa pa ankor ganny fer, eski Minis i kapab dir nou si zot annan lentansyon prezan omwen amelyor son kondisyon repo?  Ki vedir dormi aswar i pa kapab dormi dan sa kondisyon ki i ti pe dormi.  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Onorab non.  Mwan mon pa ankor enterakte avek sa fanmir.  Me mon konnen poudir Lotorite Prizon in vwar la fanmir e an menm tan Zofisye Prizon osi, welfare dan Prizon in enterakte avek la fanmir.

Bon si i annan okenn keksoz ki nou bezwen  fer pou nou kapab amelyor kondisyon, parey ou dir nou, nou ava fer li.

Akoz mon krwar Lotorite Prizon in ede dan plizyer fason.  In ede bann la fanmir kot in annan bann lensidan ki’n arive dan Prizon dan lepase.  Mersi Mr Speaker.

 

MR SPEAKER

Mersi Minis.  Onorab Vidot.

 

HON AUDREY VIDOT

Mersi Mr Speaker.  Bonn apre midi a tous, Minis ek ou delegasyon.  Mr Speaker mwan mon kestyon pou Minis eski i dan plan Lotorite Prizon pou moderniz zot fasilite   Si wi petet kan ki zot pe konsider konmanse?  Si non petet si zot pa krwar it’s about time ki zot konmans mazin pou konmans lo la, akoz prenon kont ki bann issues ki kontinyelman releve an term annan sa bann akse avek sa bann zouti – oubyen fasilite ki zot fasil ganny akse avek pou andomaze dan Prizon.  Mersi Mr Speaker.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Wi nou annan plan pou nou i annan serten travay ki nou bezwen fer la, pou permet nou kapab fonksyonnen kot nou ete.  Me bann travay pli long term pou agrandi, moderniz Prizon sa i bann keksoz ki pou rantre dan sa Master Plan ki nou pe travay lo la.

E mon panse apre ki nou’n – mon krwar travay audit in fini ganny fer lo Prizon e mon panse ki sa in deza ganny soumet Mr Speaker avek Lasanble Nasyonal.

E zis apre ki Lotorite Prizon in ganny sans vini pou li vin diskite, mon panse ki nou a kapab proceed avek bann travay ki nou annan  pou nou fer, kot i konsern fasilite moderniz oubyen amelyor fasilite dan Prizon.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker eski Minis i kapab zisteman lo sa kestyon sa fasilite, le fe ki la dan Lasanble nou annan en Komite Sekirite Defans, eski sa Komite ti kapab ganny sans pou vwar sa plan ki zot annan pou devlop Prizon pou nouvo plan la.  E lefe ki i annan en irzans, eski sa plan pou ganny fer lanmenm la?

Eski sa i petet dir nou en pe deswit?  E aktyelman ek prizon ki mannyer i ete la?  Eski i annan sans pou zot re organiz li enternman e avek la kantite sekirite ki zot annan ki nou krwar, mwan mon krwar ase osi si ou get li par Rapor prizonnyen i enn pou 3 e si zot organiz zot byen mon panse i devret kapab annan en pli bon sirveyans.

E an menm tan nou aprann osi ki prizonnyen zot menm zot pe vey kanmarad dan prizon, eski ou kapab konfirm sa?  E akoz ki sa pe ganny fer?

E finalman nou osi aprann ki i annan plizyer zouti dan Prizon fabrike par bann prizonnyen zot menm?  Akoz  zot pe les sa annan dan prizon e nou konnen i annan  ki’n ganny fer dimal avek serten sa bann zouti, alors akoz sa sirveyans i pa alaoter, i pa ase menm ki zot annan sekirite personnel konmsi dimoun menm, ou annan ou camera ensidswit still sa bann lensidan  i kontinyen arive?  Mersi.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker wi letan nou plan i pare nou pou napa okenn problenm pou partaz sa avek Komite Lasanble lo Sekirite.

E nou – Onorab kot i konsern bann prizonnyen ki pe vey kanmarad mon pa tro okouran.

Selman mon konnen poudir annan de ler zot ganny, zot ganny groupe petet ou konnen pou fer serten progranm oubyen pou fer serten travay, e petet letan zot ganny groupe ou annan enn petet ki ansarz group.

Me kot i konsern pe vey kanmarad mon pa, mon pa tro asire si sa i le ka.  Kot i konsern bann zouti ki pe ganny fabrike dan Prizon wi nou konnen prizonnyen parfwa zot servi nenport kwa ki zot ganny akse avek, zot kapab servi en fourset fer li vin en zouti e mon krwar si nou al lo site prizon, nou al lo twitter nou pou vwar kot in ganny pibliye bann diferan zouti parfwa ki nou ganny ranmase avek bann prizonnyen dan Prizon.

E parfwa i pa fasil me nou sey fer nou mye.  Me mon krwar kantmenm sa travay in entansifye en pe.  E nou’n diminyen en pe lakantite zouti ki ti annan dan prizon oparavan.  E byensir nou pa aret la.  Nou travay sirveyans i pou kontinyen e nou sa ki nou anvi, se ki a lavenir nou a kapab parey mon’n dir netway tou sa bann keksoz e fer sir ki prizonnyen napa akse avek sa bann zouti dan Prizon.  Mersi Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Eski lefe ki sa msye ki asistan ki la i obor ou, petet ti ava demann li si  sa bann lensidan ki nou pe dir i arive  dan Prizon; sa sirtou sa kestyon vey kanmarad donn lanmen konmsi pou sirvey lezot.

E an menm tan ki aksyon imedyat la, petet konman ou sorti kot nou Lasanble imedyat ki zot pe al pran dan Prizon la, pou kapab amelyor sityasyon ki egziste?  Eski i annan okenn aksyon ouswa zis i pou les kontinyen parey labitid en lensidan in arive zis bato i marse?

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker wi mon krwar poudir i annan serten aksyon; parey mon’n  dir letan nou, nou fer nou internal investigation e si nou vwar poudir i annan en serten febles ki nou dekouver o nivo Prizon nou bezwen re medye sa bann febles toudswit.

E nou travay netwayaz i kontinyen pou nou kapab amelyor nou servis sekirite.

Me selman mon krwar letan ki nou ganny sa bann travayer an plis nou bezwen mon krwar sityasyon Onorab i ava amelyore.

I ava permet nou annan en pli bon kontrol e annan en pe  plis lefikasite dan bann travay ki nou’n konmans fer.  Mersi Mr Speaker.

 

MR SPEAKER

Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker Minis in mansyonn son Bidze ki’n frozen.  Eski Minis i konnen ki poudir depi ki Lasanble in freeze Bidze Prizon serten en parti ki permet prizon travay me sa parti spesifik, Lotorite Prizon pa ankor vin avek okenn plan.  I pa ankor fer okenn demann avek Lasanble lo sa size spesifik.  E alor tan ki Lotorite Prizon zot, zot pa fer zot travay Lasanble pa kapab fer travay pou zot.

 

(APPLAUSE)

 

HON WAVEL RAMKALAWAN

Dezyenmman Mr Speaker, eski Minis in koz lo bann cameras ki kase.  Tou sa ban ta milyon, zot annan en ta milyon ki zot depanse pou camera.  Ki oter sa bann camera i ete ki prizonnyen i kapab detri sa bann camera?  Sa mon ti ava demann li.

Apre si Minis ti ava zis kapab eklersi mwan Mr Speaker, Minis in koz avek en serten konsern, en serten petet mon a dir rezon ki poudir en dimoun i lo konze akoz in travay.  Be sa msye pa ankor ni menm ganny 1an depi ki in pran sa pozisyon.  Ki mannyer i annan konze?  Mersi bokou.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker be i annan son konze akoz i ti pe travay konman Advisor Minis pou Prizon depi detrwa lannen.  Donk son konze ti’n due e in bezwen, in bezwen pran son konze.  E zisteman i pa’n, in espere pou li pran son konze.  In espere letan sa expert UNODC in rantre pou li kapab pran son konze, sansan i ti’n kapab depi en pe pli avan.

Onorab apre nou’n fer en demann atraver Minister Finans pou nou kapab, Lotorite Prizon pou kapab retournen pou zwenn avek FPAC – Lasanble pou nou kapab prezant bann travay ki nou’n fer ki ti ganny demande ki nou fer pou  Lasanble.

Mon pa konnen si nou annan en, si nou annan en kopi dan kominikasyon.  Me selman petet nou tou lede nou pe esper kanmarad me selman mon konnen poudir i annan serten demann  ki Prizon in fer atraver Minister Finans.

Petet zot pa’n servi prosedir ki zot i merit servi me mon ava follow-up akoz nou, nou pe atann ki nou ganny apele pou nou kapab eksplike bann travay ki nou’n fer.  Mersi.

 

MR SPEAKER

Mersi.

 

HON WAVEL RAMKALAWAN

Mr Speaker mon zis anvi dir avek Minis ki napa absoliman nanryen e petet sakenn i dan en diferan gir.  Mersi bokou.

 

MR SPEAKER

Mersi.  Dernyen kestyon Onorab Herminie.

 

HON WILBERT HERMINIE

Mersi Mr Speaker.  Bonn apre midi Mr Speaker, bonn apre midi Minis.  Mon annan 2 pti kestyon.  Eski Minis i kapab dir Lasanble ki Lotorite Prizon pe fer an vizavi bann prizonnyen ganny akse avek telefonn mobil dan Prizon?  Epi dezyenm kestyon on average konbyen  prizonnyen i annan par kaso?  Mersi Mr Speaker.

 

MR SPEAKER

Mersi Onorab.  Minis.

 

DESIGNATED MINISTER MACSUZY MONDON

Mersi Mr Speaker.  Mr Speaker nou’n anmas en bon pe, en bon pe telefonn mobil avek bann prizonnyen dan Prizon e nou pe osi i annan serten travay ki nou pe fer ki petet mon pa pou tro devwale ki mannyer nou pe fer sa bann travay.

Akoz mon krwar i annan bann inmates pe ekout mwan tou la letan mon pe koze.  Me selman telefonn dan Prizon i enn bann konsern nou met bokou lanfaz lo la – ok?  E nou fer – i annan serten travay ki nou fer dan sa domenn.

Kot i konsern inmates ki ou’n demann mwan dan bann diferan unit, mon  krwar sa i osi depan lo sa unit li menm.  Par egzanp Male Block dan Male Block i ase gran nou annan nou 244 prizonnyen.

Dan Female Block ki en pti Block nou annan nou 21.  Dan Special Incarceration Unit nou annan nou 35 prizonnyen.

Dan Vulnerable Prisoner’s Unit nou annan 15.  Dan sa unit ki nou apel Temporary Holding Facility nou annan nou 17 prizonnyen – ok?  E lo bann Day Release Camp nou annan nou en trantenn e kot Remand Centre nou annan nou en 20 tenn apepre en 28 prizonnyen.

E parey mon’n dir taler Coëtivy nou annan nou 42 me nou plan se nou increase pou nou annan apepre en santenn ou plis lo Coëtivy.  Mersi Mr Speaker.

 

MR SPEAKER

Mersi Minis.  Ti mon dernyen kestyon.

 

HON WAVEL RAMKALAWAN

Mr Speaker Minis in dir ki kot Remand Centre i annan 28 remandies.  Konmsi mon pe balans sa avek son kestyon ki in donnen pli avan ki poudir – son larepons ki i n donnen pli avan; ki Depite Sirentandan Prizon i baze kot Remand Centre kot i annan 28 dimoun.  Konmsi mon pe zis balans sa ankor avek…

Sorry mon pa pe pik lo personn mwan mon pe zis balans lo management sa landrwa.

I mean ou Sirentandan i lo son konze merite.  Ou Depite Sirentandan kot i annan, kot i annan anler Prizon kot i annan 400 ekek prizonnyen ou Depite Sirentandan se 3 semenn pase ki i ti pas kot Prizon Minis in dir nou!  Konmsi i annan en gro problenm, i annan en masiv problenm management.

E mon zis pa ganny en konpran e si Minis ti ava osi dir nou, be konbyen gard i annan anba kot Remand Centre?  Mersi bokou.

 

MR SPEAKER

Ok.  Minis dernyen komanter.

 

DESIGNATED MINISTER MACSUZY MONDON

Mersi Mr Speaker.  Mr Speaker Depite i osi ansarz en pe Progranm Coëtivy.  E an menm tan osi parey mon’n mansyonnen pli boner sa travay ki nou pe fer Onorab i pou permet nou osi revwar la fason ki nou de plway bann travayer – a lenteryer Prizon li menm ki swa Montagne Posée ki swa en pe osi kot Remand Centre.  

E mon krwar sa i ava permet nou pou nou kapab petet re organiz nou en pti pe pli byen.

An menm tan osi letan  nou’n nonm 3 semenn ler ou’n dir letan ou antre  dan en Block petet.  Me i annan de landrwa osi ki Depite Sirentandan i pas en fwa tou le semenn.  Me petet i annan nesesite pou plas pli souvan.  Pou li pas pli souvan e i ava fer en zefor pou li pas pli souvan kot Prizon – me nou annan – ler ou al kot Prizon i pa vedir ki ou al dan – ou bezwen pas dan tou bann unit.

Petet sa semenn ou a vini ou al dan serten unit e lot semenn ou vini ou pas dan lezot unit.  Ok?  Me mon krwar sa travay ki nou pe fer Onorab mon ti a kontan asire ou parey mon’n dir sa i pou permet nou refer sa redeployment nou staff en pe pli byen a lavenir.  Mersi Mr Speaker.

 

MR SPEAKER

Mersi Minis Mondon.  Minis mon ava remersye ou avek ou bann teknisyen, Ms Vangadasamy, Mr Ghislain, Mr Dodin e Ms Nourrice e nou ava eskiz zot parmi nou.  Mersi Minis.

 

(THE DESIGNATED MINISTER MRS MONDON AND HER DELEGATION WAS EXCUSED FROM THE HOUSE)

 

 

MR SPEAKER

Bon nou pou pran en Break e nou ava retournen – yes?  Nou a pran en Break nou ava retournen 4er pou kontinyasyon deba lo Mosyon ki ti ganny move yer par Onorab Flory Larue.  Ok?  Nou ava retournen 4er.

 

(BREAK)

MR SPEAKER

Bon nou ava kontinyen avek nou travay.  Lo Mosyon ki’n move par Onorab Flory Larue, ki pa prezan dan Lasanble.

Bon zis pou averti Lasanble avan nou kontinyen avek deba nou lo sa Mosyon.  Yer mon’n dir e mon repete ankor.  Pou nou être cautious lo ki mannyer pou deal avek sa Mosyon.  Sa Mosyon i fer referans avek en endividi avek son lakonpannyen.  Mon konnen petet ki pou annan serten link.  Me annou fer en pti atansyon kot dan nou entervansyon nou pa osi go down pou nou impute serten keksoz lo serten dimoun.  Lo serten manm lafanmir.  E pou nou osi tou pa al sa nivo kot nou pe denigre serten dimoun.  So mon ti a kontan zis pas sa avek zot.

Lo mon kote mon’n ganny en speech list from kote LDS me fir anmezir nou ava ale, lo kote Parti Lepep mon pa ankor ganny personn pou eksprim dezir pou entervenir.  Anmezir mon ale si Manm i dezire pou entervenir lo sa Mosyon, zot kapab zis lev zot lanmen.

Bon Mosyon ki ganny move yer – Mosyon ki’n ganny move yer par Onorab Flory Larue i lir kronm swivan.  Sa Lasanble i demande ki Gouvernman i repran tou later ki Madanm Sarah Rene oubyen son lakonpannyen in gannyen ki pa ankor devlope.  E an menm tan ki en lenvestigasyon i ganny fer pou regarde akoz ki sa madanm oubyen son lakonpannyen in ganny sa kantite morso later Leta.

Mosyon ti ganny segonde par Onorab Henrie ki’n entervenir.  E lo mon lalis ok – prosennman mon annan Onorab Woodcock ki pou entervenir.  Onorab.

 

HON WAVEL WOODCOCK

Mersi Mr Speaker.  Bonn apre midi tou dimoun.  Mr Speaker apre bann revelasyon ki Onorab Larue in anmennen lo son Mosyon yer.  Mr Speaker lepep Seselwa i dan sok.  I annan plizyer lemosyon deor i relevan ki kouler politik sa bann dimoun.  E mon Mr Speaker mon vreman dezapwente.  Mon sagren Mr Speaker e mon menm ankoler ler mon tann lafason ki sa fanmir – rasin SPUP/SPPF/ Parti Lepep sirtou en Ex-First Lady in abiz lo later Leta.

Mr Speaker i fer onte ki mannyer sa madanm, Madanm Sarah Rene in abize e pran later Leta e partaz osi avek son fanmir.

Malerezman Mr Speaker sa bann manni abiz lo later Leta in fini enkilke dan sistenm Parti Lepep SPPF Mr Speaker en vorasite malonnet.

I malerezman pou dir Mr Speaker ki sel ki sa bann sef se pou anrisir zot lekor e akimil maksimonm later posib.

Annou pa bliy sa 40 bout later ki Parti Lepep ki’n acquire pou zot  byen personnel, ki nou dan LDS nou pe demann zot pou rann lepep Seselwa.

E Onorab Larue in deza et en ka devan Anti-Corruption Commission pou ki sa bann later i retourn dan lanmen lepep Seselwa.

Semenn pase mon fek vwar kot Gouvernman in lease en kare later kot Builders Depot avek Parti Lepep pou preski nanryen e apre zot in sub-lease sa later avek STC pou R830mil par mwan.  Sa Gouvernman Parti Lepep ek zot bann Sef zot in donn bal dan later Leta.

E mon krwar nou tou dan sa Lasanble nou pe aksepte sa ozordi.  Semenn pase ti ganny releve dan Mosyon Onorab Roucou.  Ki sa later annal-an Providence ki Onorab Roucou ti pe propoze pou fer en Lopital Spesyalize ki mezir 25, 559 met kare i en later ki’n ganny aste par Emerald Holding ki lakonpannyen Madanm Sarah Rene avek Gregoire Payet.

Mr Speaker 25,559 met kare later.  E sa i enn parmi plizyer morso later ki sa madanm in aste avek Gouvernman.  Ozordi sa later in ganny sezi par Nouvobanq sa i en lot zistwar ankor.  Me sa i pou en lot zour.

Mr Speaker zis mazinen lo sa grander later, plizyer proze ti kapab ganny fer pou benefisye lepep Seselwa tel ki sa proze lopital spesyalize ki Onorab Roucou ti koz lo la lo son Mosyon semenn pase ki ti deservi bann pasyan Seselwa e ofer bann tretman medikal avanse.

Mr Speaker mon bezwen fer sorti ki Gouvernman i annan en Polisi ki sa Polisi i kler – en later par personn.  En later par personn – one person one land.  Ki vedir en dimoun i kapab aste zis en morso later Leta.  E sa i osi depandan si sa dimoun i napa en lot kare later.  Si sa dimoun i deza an posesyon en lot kare later – en pe parey Onorab Henrie ti koz lo la.  Deswit i forfait son drwa pou li ganny okenn lezot later Leta.

E ki ou pe vwar la?  En madanm in ganny li plizyer morso kare later pou de milye e de milye met kare ki mon pou ankor koz lo la en pti pe.

Ler ou get lakantite later ki bann Ex-Prezidan – zot madanm bann Ex-Minis in gannyen ouswa ki zot in aste pou R1 Mr Speaker i malere.

2 Ex-Minis ki deza devan Anti-Corruption Commission pou land speculation.  En Minis ladan pou vin investigate pou 72 morso later Msye Prezidan.  Kan i eski ase pou sa bann dimoun?

Ozordi Mosyon Mr Speaker i lo Madanm Sarah Rene.   E sa Lasanble i demande dapre Mosyon Onorab Larue, i demande ki Gouvernman i repran tou sa later,  ki Madanm Sarah Rene oubyen son lakonpannyen in gannyen ki pa ankor devlope e an menm tan ki en lenvestigasyon ganny fer pou regarde akoz ki sa bann madanm oubyen son lakonpannyen in ganny sa kantite later Leta.

Annefe Mr Speaker mon pou osi fer en rapel avek lo Komite FPAC pou osi get ladan, akoz involve bann zafer stamp duty ki pa’n ganny peye e ki mannyer Gouvernman planning ouswa MLUH in kapab allow sa bann transfer pou sa kantite transfer later lo sa madanm san ki stamp duty in ganny peye.

Alor mon pou fer request avek FPAC pou osi get dan sa demagozi.

Mr Speaker annou prezan get en pe dan later sa madanm ki’n aste avek Leta.  Dapre resers ki Onorab Larue in fer an 1988 Madanm Rene ti aste en morso later avek Gouvernman ki mezir 1811 met kare pou R120mil Bel Air.

Sa madanm ki osi aste 3 lezot propriyete avek Gouvernman La Digue.  3 propriyete.  Ou kapab mazinen ki annan Digwaz ki pe espere lo lalis lakaz ek later pou plizyer lannen pou ganny zot en morso later.

Sa Mr Speaker ti an lannen 2000.  Enn sa later ki Madanm Sarah Rene in aste La Digue e konstri lo la i kont Lalwa density ki toultan Planning pe enpoz lo plizyer Seselwa.  Ki dir ki ou pa kapab konstri anba 400 sqm. 

        Mr Speaker sa i monte klerman ki Lalwa i aplik zis pou en serten dimoun.  I annan dimoun ki Lalwa pa aplike pou zot swa akoz zot tit ouswa zot afilyasyon politik.

An 2002 ankor sa madanm ti aste ankor en bout later avek Gouvernman, e revann an 2005 pou en gran profi.  Ankor enn fwa i kas en lot Polisi Gouvernman ki dir ki en dimoun pa kapab revann later Gouvernman avan 5an.  In vyol ankor enn fwa Mr Speaker en lot Polisi Gouvernman.  Sa i fer 3 Polisi Gouvernman ki sa madanm in vyole.

Madanm Sarah Rene in osi aste en morso later i 252 plis ki 72mil met kare e revann pou selman R1milyon.  72mil met kare pou R1milyon Mr Speaker.  Ozordi zis mil met kare dan sekter prive i kout anviron R1milyon.

Mr Speaker i annan trik ladan.  Sa later i alan Grand Police kot Zanado.  Mr Speaker pa fini la.  Sa madanm avek son msye ex-Prezidan France Albert Rene zot in aste 106, 749 met kare later ankor – Grand Anse Mahé ankor pou zis konbyen?  R65mil !  Mon repete ankor Mr Speaker R65mil pou 106mil met plis ki pre 107mil met kare.

E sa i 3 parsel Gouvernman ki’n ganny merge ansanm B542 E B765 e osi B767pou vin B1854.  Konbyen dimoun ti pou kapab benefisye avek pres 107mil met kare later Mr Speaker.

Annou fer en pti kalkilasyon si ou subdivide sa 107mil kare later par 600 met kare apepre 177 dimoun ti pou kapab benefisye avek en bout later.

Sa ki osi enteresan Mr Speaker se pa zis zot ki’n benefisye.  Me zot 3 zanfan osi in ganny later Leta.  E sa zot in gannyen menm avan ler zot ti’n ariv laz mazer.  Enn i annan li 3, 398 met kare, lot i annan 8, 642 met kare.  3enm fiy ler i ti laz 9an i ti ganny li son bout 6mil 710 met kar epou selman R135mil an 2011.

E sa bann later Mr Speaker tou sa bann later i Grand Anse Mahé.  Konbyen zenn Mr Speaker, konbyen zenn ki pe espere pou ganny en bout later?  Mon pe mazin sa bann return graduate ki’n fer zot aplikasyon pou plizyer lannen ki pe espere pou des années,  et des années eske prezan zot pa ankor kapab ganny en bout later.

Mr ler ou piti entel i ok ou napa problenm.  Si ou piti Minis ou piti PS, SS ouswa ou annan kek lafliksyon politik ouswa ou post i bye for fasilman ou ganny later Mr Speaker.  Sa i apel nepotism e sa bann keksoz Mr Speaker fodre arete Sesel.  Fodre keksoz i ganny fer dan en fason drwat dan en fason dapre priyorite e osi dapre merit.

Mr Speaker Sesel kot ou pou vwar en later ki mezir 886 met kare pe vann pou selman R2, 587.  Ankor Madanm Sarah Rene in donn bal en morso later 886 met kare pou R7, 587 Mr Speaker kot i egziste sa?

Sa later ankor enn fwa i Grand Anse Mahé me non pa La Digue parey son fiy in klanmen lo Facebook.  Mr Speaker sa se en krim kont lepep Seselwa!  Plis ki 5mil Seselwa pe rod en morso later Gouvernman.  E sa Gouvernman Parti Lepep in soutir sa bann labi e zot in menm form par sa bann labi Mr Speaker.

Mr Speaker mon bezwen dir pou dir labi later i partou.  I pa zis Mahé i pa zis Praslin i pa zis La Digue i partou Mr Speaker dan Sesel.

E menm Praslin pa’n ganny eparnye annefe Lendi Onorab pardon Mr Speaker Onorab Gill avek mon nou ti zwenn avek IEA Industrial Estate Authority pou nou diskit re-alokasyon later Ile Eve e nou idantifye plis ki 40 morso later ki IEA by Zilyet pou konmans lease bann businessman Pralinwa sa i enkli 5mil met kare ki IEA in repran avek Vijay Construction ki ti pe okip 3 gro morso later Ile Eve.

E bokou Praslin ti demande Mr Speaker ki mannyer Vijay in ganny tou sa later Ile Eve?  E mon bezwen dir Mr Speaker si LDS pa ti kler sa tors Ile Eve Vijay ti pou ankor okip sa bann later ozordi.

Mr Speaker fodre pa bliye ki sa se menm konpannyen ki pe fer sato 5 letaz Sheik Al Meriton Sorento Glacis.

Ozordi Mr Speaker.

 

 

MR SPEAKER

Onorab, Onorab relevans Mosyon.  Mon’n dir mon’n donn en warning pa al an deor sa Mosyon.

 

HON WAVEL WOODCOCK

Ok.  Mersi Mr Speaker.  Ozordi Mr Speaker avek sa lekleraz ki LDS pe anmennen Sesel ozordi plis    bout later pe al ganny redistribye avek bann businessman Pralinwa zis parey Madanm Sarah Rene ki i annan later Gouvernman partou.  I annan dimoun osi Mr Speaker ki annan later parey mon’n mention Ile Eve e zot osi annan plizyer lezot morso later partou Praslin.  E i ankor annan lezot dimoun Mr Speaker sirtou bann ki byen plase e dan bon koleksyon ki zot in ganny plizyer e de plizyer parcel morso later anba sa Gouvernman Parti Lepep.

Mr Speaker mon bezwen dir ki sa bann kalite labi fodre i arete Sesel.  E mon bezwen dir osi Mr Speaker ki sa Gouvernman Parti Lepep zot pa’n fer ase pou anpes sa bann keksoz arive.  Zot pa’n fer ase pou aret sa bann labi.  Tro bokou dimoun in abize lo lasyer lo later e lo bann asset lepep Seselwa.

Mr Speaker zis mazinen kantite dimoun ti kapab ti pou kapab benefisye avek sa bann later ki’n vole.

Mr Speaker zis Madanm Sarah Rene ek son fanmir zot in benefisye avek plis ki 225mil met kare later.  Sa, sa ki nou konnen ki anviron 55 arpan.  Kantite lakaz Gouvernman ti kapab fer lo sa bann later pou lepep Seselwa Mr Speaker.

Kantite later ki ti kapab ganny subdivide en morso ti kapab ganny donnen avek plizyer, plizyer zabitan Sesel.

Mr Speaker ler mon pe koz lo la i pa zis later Mr Speaker.  Lo sa later mon ti kapab subdivide donn dimoun later me sa later, me sa later ou ti kapab fer bann housing estate ankor.  Plizyer housing estate ti kapab ganny fer lo 225mil met kare later.

Pa zis Housing Estate Mr Speaker en kantite condominium osi ti kapab ganny fer pou benefisye lepep Seselwa sirtou bann zenn profesyonnel bann return graduate ki retourn Sesel ki annan plizyer zot pe espere Mr Speaker pou zot kapab ganny en bout later.

An parlan condominium Mr Speaker dan condominium osi zot pe donn bal ladan.   Green Island Construction pe fer condominium lo bout Perseverance pou vann avek bann zenn profesyonnel ki kapab afford ouswa bann ki kapab pran en pti loan pou aste enn sa bann condominium.

        Me selman Mr Speaker avan ler ki condominium i fini plizyer paran byen kolekte in fini aste condominium davans pou zot zanfan.  Menm bann zenn ki ankor pe etidye aletranze!  What about sa kantite return graduate ki pou plizyer lannen zot ankor pe espere pou ganny en lakaz ouswa condominium? Mr Speaker Onorab lot kote i  konn sa tre byen.  Me li piti msye e madanm entel akoz zot koleksyon ouswa afilyasyon politik zot in fini pare pou zot antre dan zot condominium ler i fini fer.

Mr Speaker tousala i mal e i degoutan.  Sa bann preferans e labi asset Leta fodre arete.

Mon bann frer ek ser Grand Anse Praslin e partou dan Sesel, menm si sa bann zans pe pas partou dan distrik pe ofer lesyel ek later zot sel lentansyon se pou protez malaki sa bann voler.

Nou pa kapab kontinyen soutir e toler voler Sesel.  Pa bliye lafen lannen pase Gouvernman Parti Lepep ti pe rod en pansyon R70mil pou bann Ex-First Lady ki nou dan LDS nou dir ‘Zet Anba!’  Konmsi 55 arpan larter pa ase pou zot.  Zot oule plis ?  Sa i vorasite Mr Speaker.

I annan 3  keksoz ki Parti Lepep ki Gouvernman Parti Lepep in fer byen pandan 40an.  (1)  donn bal dan kof Leta.

(2)  donn bal dan later Leta  3enm diriz fanmir avek en sel bi reste o pouvwar.

Onorab Ferrari, Onorab Afif Ton Lik ki ti debout pou Parti Seselwa dan premye eleksyon Lasanble Nasyonal Leader Lopozisyon zot tou zot konnen ki mannyer Parti Lepep i servi manm fanmir pou diriz fanmir pou rezon politik akoz zot tou in pas ladan.

I annan plizyer Onorab Mr Speaker lo lot kote latab ki konn sa tre byen ki mannyer Parti Lepep i fonksyonnen.

Mr Speaker e la ozordi, ozordi Parti Lepep pe sey fer parey Grand Anse Praslin dan mon prop fanmir divide and rule dan en konmsi zot menm.

Zot en parti san moralite e zot sel bi se reste o pouvwar a tou pri.  Me nou dan LDS i annan de keksoz ki nou le anmennen dan Sesel, nou oule anmenn linite dan Sesel.  Nou oule anmenn lekleraz dan Sesel.  Nou le tir koripsyon e labi lo asset Gouvernman larzan Gouvernman e later Gouvernman Sesel.

Nou dan LDS nou pa pou kouver ni protez okenn voler Sesel !  Mr Speaker mon bezwen dir sa tan ki Gouvernman Parti Lepep i o pouvwar zot pou kontinyen soutir e kasyet sa bann voler.  Sesel fodre i ganny en Gouvernman ki drwat en Gouvernman ki pran lentere son pep a ker e non pa vol son pep!

Mr Speaker ler mon get lakantite later ki Madanm Sarah Rene ek son fanmir i annan ozordi, i fer mon mazin sanson en zenn garson Brad Esparon undercover Mafya undercover Ninja.

        Wi Mr Speaker bann mafya e nou dan LDS nou pa pou toler okenn Mafya.  Annefe Mr Speaker nou pou tir sa bann mask dan figir sa bann Ninja ki pe kasyet.

Mr Speaker mon pou fini mon entervansyon avek en parol mon granpapa Irene Grandcourt dan lavi fodre touzour travay dir.  Byen malaki pa zanmen prospere.  Mersi Mr Speaker.

 

(APPLAUSE)

 

MR SPEAKER

Mersi Onorab Woodcock.  Onorab Jany De Letourdie.

 

HON JANY DE LETOURDIE

Mersi Mr Speaker.  Bonn apre midi tou dimoun Mr Speaker pou mon i pou ase bref.  Akoz mon pou al direk lo mon pwen ki mon anvi fer sorti.

Mr Speaker permet mon felisit Onorab Flory Larue pou sa eksploz-e leksplozif ki’n fer yer lo son Mosyon pou demann Gouvernman pou repran bann later ki Madanm Sarah Rene oubyen son lakonpannyen in gannyen e ki pa ankor devlope.

Onorab Larue i annan dimoun ki per pou ou e pe fer lapriyer pou demann bondye pou sofgard ou pangar ou disparet!

 

(laughter)

 

 

HON JANY DE LETOURDIE

Me mwan mon pe dir avek sa madanm ki pe enkyet dan ou plas pa per madanm pa per nanryen akoz se selman laverite pou anmenn ladelivrans.

Mr Speaker dan son lentrodiksyon letan ki Onorab Larue ti pe eksplike ki mannyer son leker ti fermal e lour letan in dekouver lafason ki lepep Seselwa in ganny vyole.  Mon ti tre atantif e mon ti tann en lavwa sorti dan lot kote latab ti dir ‘’gele.’’  Non.  Gele pa sifi pou en krim parey ou larm pa pou koule Mr Speaker mon pou sennyen.  Zis, Sanmdi ki fek pase mon’n zwenn en madanm avek 3 zanfan zot tou par anba 10an.  E sa madanm ti pe demann mon si mon pa konn en landrwa en pti landrwa kot i a kapab lwe akoz kondisyon ki zot pe viv e deplorab Mr Speaker.

Zot tou dan en sel lasanm e pe servi tou fasilite avek sa dimoun ki ti pe sey ed zot.  Ki zot, fer prezan zot reste ziska tar dan semen pou donn sans son met lakaz fini fer son bann tripo apre zot monte pou zot pa tro dan lipye e anbaras li.

Sa manman i osi fer mon konpran ki i annan 4a n depi i pe peye pou ganny en lakaz e ki zis Desanm lannen pase i ti’n al gete ki zistans si ete e i dir mon in ariv 64  apre i demann mon ki savedir mon dir li mon pa tro konnen ki tyenm 64 selman mon pa konnen ki ou pozisyon.

Me Mr Speaker sa osi ti en sityasyon ki kondisyon stil lavi fanmir.  Parske gete i a pe      anpandan dan semen partou e petet zanfan pa pe ganny sans fer son devwar lakour.  Akoz zot napa en lakour.

Mon asire ki nou tou ki la anndan nou konn plizyer nou konn plizyer ka parey kot bokou fanmir, i ankor pe espere lo en bwe pou en pti kare later oubyen en lakaz.  Me dan lot kote ki nou trouve.  Zanfan i ganny later me zot menm zot, zot pa ankor ni menm konn eple sa mo later.  I terib sa Mr Speaker.  Eski sanmenm sa ki nou apel sharing and caring?  E en lapartaz ekitab?

Me la sey dir mon papa Lanasyon lekel ki’n tay ek pli gro bout gato la?  Tandis ki lamazorite Seselwa i ankor pe pas margarin lo zis en kote son dipen.

Mr Speaker mon pou al direk lo sa Landrwa kot mwan mon reste mon en zabitan ki apel Roche Caiman.  Ler nou ti vin reste Roche Caiman ti annan en pti rankont ki ti ganny organize pou nou sa  letan par nou CC member avek MNA ki t i la sa letan.  Mon ti ganny dir nou ti ganny dir plito dan sa pti speech ki la an  premye pyer en lot pyer pe ganny mete akoz sa sit ki nou ti pe fer aktivite lo la ti’n ganny idantifye pou konstrir 3enm faz lakaz.  Eski zot rapel bann zabitan Roche Caiman?  Mon ti la mon osi.

Mr Speaker, sa pa’n zanmen arive.  Me o kontrer sa plot later in ganny son met.  En lot moro ankor in arive zis devan mon lizye akoz tou le bomaten ler mon ouver mon laport lasanmben, mon regard sa bout later ki’n ganny konble pa tro lontan e sa se 5plot V19108 Mr Speaker.  I baz baliz highway avek Fire and Ice e li osi i annan son met.

Mr Speaker proze 24 lakaz dan 24 distrik dan, 24 mwan.  Mwan mon krwar pou dir Roche Caiman i pas en pti pe akote lo la, plat.

Petet ankor dan 4an ki sa i ava kapab abouti.  Me selman Mr Speaker nou antann bann non mon pa pou, nonmen la.  Bann gro non ki nou kapab klasifye ki nou dir i annan priyorite e annan, privilez pou ganny sa bann gran morso later.

Me sepandan si ou en pti mizerab ki’n sanse pou ganny en pti morso obor lanmer laba ou lavi pou malere akoz zot ganny zot rann ou lavi preske enposib pou ou kapab viv akoz sa i pou fer ou degoute.

Mr Speaker akoz ki Gouvernman pa vwar li ki nou dimoun Roche Caiman nou osi ti a byen pou nou rezouir dan en zoli pti lakaz ki vir avek lanmer byen konfortab e byen detase.  Akoz ki nou bezwen ganny antoure ek bann gro, gro batiman toultour nou anserkle e bar nou vi avek gro, gro batiman.  Konmsi ou a krwar zot pa anvi vwar nou.  Apre solman zot pas sa pti soz lo nou lalev zot dir nou, nou reste Eden Village. 

Mr Speaker permet mon ozordi konman en zabitan Roche Caiman pou koz lo la par bann zabitan osi mon pe fer en demann avek Madanm Sarah Rene Zarqani e osi si i annan lezot ki krwar ki zot in ganny bann later ki tonm dan distrik Roche Caiman dan en fason malapropo pou rann sa bann later pou ki bann lakaz magazen e lezot lenfrastriktir itil pou letablisman nou zabitan a ganny konstrir lo la.

Enkrwayab me vre Mr Speaker.  En sel dimoun tou sa kantite later ki 40 fanmir Roche Caiman ti a kapab sakenn en zoli pti lakaz detase ek kanmarad, en pti zarden ki zot kapab fer zot pti zardinaz osi.

En sel dimoun Mr Speaker i annan preski plis ki 50 arpan ou plis later!  Me tandis ki i annan ni en goni later i napa.  Oubyen en lapel oubyen kantmenm en kwiyer.

 

(laughter)

 

 

HON JANY DE LETOURDIE

Mon bann ser frer zabitan Roche Caiman eski zot ankor mazin lanblenm nou distrik?   Les mon fer zot mazinen, sa se Larmoni, Lape e Lasante.  Ki mannyer eski nou pou kapab viv sa lanblenm a son maksimonm avek sa kalite labi e tretman ki sa Gouvernman ki la o pouvwar depi plis ki 40an in fer ?

Me Mr Speaker mon annan en pti mesaz soulazman pou zot.  Dezormen mon bann zabitan plis ki zanmen me zot konfyans dan LDS – sa sel parti ki pou liber zot konfyans e anmenn rekonfor pou zot.  Mersi Mr Speaker.

 

(APPLAUSE)

 

MR SPEAKER

Mersi Onorab De Letourdie.  Onorab Clive Roucou.

 

HON CLIVE ROUCOU

Mersi Mr Speaker.  Ankor bonn apre midi Mr Speaker.  Bonn apre midi tou bann Manm Onorab.

Mr Speaker pou konmanse mon anvi dir Onorab Larue en gro mersi pou en tel linisyativ pou anmenn en tel Mosyon devan.  Mersi Onorab Larue !

Mr Speaker sa Mosyon parey nou tou nou konnen ti vin apre ki mon menm ti anmenn sa Mosyon pou en Lopital spesyalize lo sa bout later kot in deza annan en plan pou fer en tel fasilite.

Mr Speaker dan mon liberasyon sa zour mon ti fer kler ki mon pa pou koz lo sa bout later kot sa Lopital i sitye.  Pangar mon ti ava ouver sa bwat lever.  Se zisteman akoz mon ti konnen pou annan sok.  Me yer Onorab Larue in al ouver sa bwat lever.  Nou vwar tou sord grander tou sord groser e tou sord kouler.

Mr Speaker nou tou la anndan lo tou lede kote latab spesyalman mon get lot kote latab Parti Lepep yer lo zot figir ti annan lakoler e maloker.  I fer mon mazin en lezot koleg lot kote le i ti toultan dir,’’ si ti napa Msye Rene kot nou ti pou été !’’  I fe mon mazin en sanson ler zot gran santer David konmsi zot menm ‘’papa akoz ou rezet nou ?’’ Osi nou ti donn lanmen pou koupaye.  Me ler ou’n ganny 55 arpan prop dyab lo sa kote.  Li kekfwa i annan zot     arpan pa ankor gannyen.

Mr Speaker mon onte, mon ankoler, ler mon tann sa kantite later ki en sel lafanmir pa lot ki lafanmir Rene in gannyen 55 arpan.  Mon kanmi ankor enn fwa mon dir e mon onte.

Mr Speaker zis permet mon dir de mo ; mon bann frer ek ser Seselwa ki’n siport Parti Lepep, Parti SPUP, Parti SPPF mon bann frer ek ser mon konnen zot pa ti konnen.  Mon konnen ozordi zot pe tap zot lestoman avek se ma fot.  Pou dir ki fot nou’n fer pou nou vot pou en parti ki depi an 1964 le 2 Zen kontinyasyon le 5 Zen 1977 i vol konfyans sa pep.

In maltret sa pep!  In abiz sa pep !  In fer sa pep soufer.  Mon bann frer ek ser ki’n siport Parti Lepep pli gran koupab ladan se pa lot ki zot per fondater Msye France Albert Rene avek son Madanm Sarah Rene avek tou son bann fanmir ki’n abiz sa pep e vol sa pep e vyol sa pep!

Mon bann frer ek ser ler pou sonnen konmsi David pa fer ankor menm fot.

Mr Speaker mon pa vwar i drol zis 22 bout ki nou konnen – zis 22 bout.  Zis 22 bout 55 arpan.  Zis 22 bout.  Me le 5 Zen 1977 115 zil ti ganny vole !

Alors 22 i paret mwan ki nanryen.  Mr Speaker mon bann frer ek ser ki’n siport Parti Lepep pa trakase.  Nou dan LDS nou pou welcome zot.  Si Eleksyon i vini fer nou konfyans pa donn ankor sa bann triker !

Me Mr Speaker letan i koz pou li menm.  Tout a tour sakenn a son tour.  Zanmen Mr Rene dan son wildest dreams i ti mazinen ki en zour sa pei ti pou sanze – en zour nou ti pou dekouver zot.  En zour nou ti pou vwar laklerte.  Mon bann frer ek ser Seselwa pa fer sa fot ankor.

Mon bann frer ek ser Seselwa tou bann siporter Parti Lepep zis mazinen dan 3 zanfan – konmdir Onorab De Letourdie menm ler zot pa ti konn eple mo later zot ti’n fini gannyen.  Mon tonm zis lo en konklizyon lontan point system ti an progre alor.  Pli gran kriter se pou vin zanfan Prezidan.  Alors ou pa ti apropriye pou ou ganny en bout later.

Mr Speaker mon lakoler i kontinyen ; mon lakoler i kontinyen ler mon mazin mon bann frer ek ser dan mon distrik Plaisance ; ler mon mazin sa 5mil dimoun ki pe esper en bout later ; ler mon mazin sa 40poursan lepep Seselwa ki pe esper en bout later.  Me pa lot ki lafanmir Rene in vol nou later.

Mr Speaker dan distrik Plaisance i annan 94 dimoun.  La mon mazin mon bon dalon Orphe anler Copolia ki i annan 10an i pe rod en bout.  La mon mazin Madanm Letourdie ki i annan 15an i pe rod en bout.  La mon mazin menm mon prop frer ki kontrakter ki i annan 20an i pe rod en bout later anler Providence me i pa ankor konnen.  Konmdir Onorab Letourdie ankor ni en kwiyer later i pa konnen.

Me parkont bann Parti Lepep pe enjoy, pe diverti kontan.  Mr Speaker Mosyon par Onorab Larue pe demann en Keksoz.  I pe demande ki sa Lasanble ki Gouvernman i repran tou later ki Madanm Sarah Rene oubyen son lakonpannyen in gannyen e ki pa ankor devlope.

Me mwan mon anvi al en pti pe plis ki sa.  Mon anvi demann Onorab Larue pou fer en pti lamannman menm si in devlope me in ganny vole, in ganny mal pran, in pey pou ptigin larzan.  Alors tousala i pou sa pep i devret rann menm si in devlope nou pa enterese avek si ou’n vole fodre ou rann.  Pa ti pou ou, pa ti pou ou.  Ti pou lepep Seselwa.  Pa pou ou Madanm Sarah Rene!  Msye Rene ou’n mal fer ek sa pep, ou devret onte ; ou devret kanmi ler ou pou vwar ou nanm devan dieu ozordi mon demande ki ou pe fer.  Ou pa onte ler ou ti dir, ler ou ti dir ou annan en leker pou tou Seselwa ?  Mon bann frer ek ser sa msye ek son fanmir zanmen in deza annan en leker pou personn ler i ti dir donn nou ankor 5 li i ti pe pran 5mil met kare.  55 arpan( sorry)

        Mr Speaker sa bann dimoun in trik nou in trik nou lo maksimonm.  Me Mr Speaker mon krwar sa maladi later i dan zot per fondater ziska Parti Lepep.  Lannen apre lannen nou’n tande la ki sa 22 bout zot Minis in pran lot 22 bout lot 110 bout, lot 40 bout.  Me zot ki mannyer nou frer ek nou ser pou ganny en bout?

Mr Speaker mon pa konnen ki mannyer mon pou sey fer konpran a pep la ozordi pou nou dir ki Parti Lepep pa’n fer naryen pou nou me parkont plis soufrans la soufrans e la soufrans ankor.

Mr Speaker Parti Lepep anba gidans Prezidan Rene swadizan ki ti nou liberater, in abiz sa pep.

Alors mon pe demann sa pep.  Alors mon pe demande mon pe demande mon pe plede ki sa bann dimoun si zot annan en konsyans mon dir ankor si zot annan en konsyans silvouple, silvouple rann sa pep son byen !

Silvouple i annan nou bann frer ek nou bann ser ki pe lager pe monte desann pou li ganny en pti bout later.  Me non zot, zot annan tou zot in benefisye zot in ganny tou zot in pran tou zot in tete avek bef zot in tete avek park zot in fini pran tou napa naryen pou zot pran ankor.

Me silvouple rann! Mr Speaker Parti Lepep Madanm Sarah Rene kot sa Mosyon in demann ou nou pe dir ou silvouple rann donn sa pep en sans donn sa bann frer ek ser ki napa en bout later en sans pou li ganny en bout.  Donn ou bann frer ek ser ki pe rod en bout pou fer improve zot biznes zot a kapab fer me ou ou’n pran tou.

Mr Speaker ozordi ler nou get nou bann frer ek ser ki pe monte desann i menm pa konnen ki nivo i ete lo lalis zis pou en sel rezon akoz tou later in pran tou later in ganny partaze avek zot dalon avek zot fanmir avek zot pros.  Silvouple pou lanmour rann sa pep sa ki apar-tyen a son pep.  Mersi Mr Speaker.

 

MR SPEAKER

Mersi Onorab Roucou.  Onorab Loizeau.

 

HON NORBERT LOIZEAU

Mersi Mr Speaker.  Bonzour tou Manm e tou dimoun ki pe ekout nou ozordi.

Mr Speaker ou konnen ozordi ler mon’n ekout bann Manm pou koze mon pa pe vwar sa bann Manm laba koze Mr Speaker.  Ou konnen mon pa ganny lanvi koze.

Mr Speaker akoz mon onte mon la.  Mon onte dan zot plas Mr Speaker akoz sa parti ki zot pe siporte se sa parti ki mon fanmir ti siporte ti lager for  pou met la.

E ozordi la mon pe tann sa bann kalite keksoz koumsa Mr Speaker mon latet i bel !  Zot annan rezon pa koze. Zot annan rezon mwan si mon ti zot mon ti pou leve mon ti pou ale Mr Speaker.  Akoz zot in ganny anbete.

Me selman Mr Speaker mon pou bezwen koze akoz mwan mon’n sanse mon’n sote dan sa pirog nanm ki zot ladan la.  Mon’n sote ladan e ozordi mon lo lot kote.

Mr Speaker semenn pase en Minis ti dir dan en sesyon avek FPAC ki responsabilite bann ki ganny konfye serten responsabilite dan servis piblik pou asire ki zot egzers due diligence.

Sa i vedir Mr Speaker ki bann dimoun parey bann Registrar, Direkter Zeneral, Sekreter Zeneral e Minis ti merit sonm alarm ler zot ti vwar ki en endividi an partikilye ti pe kontinyen aste otan later Gouvernman.

Kestyon Mr Speaker Polisi Gouvernman in dir en kare later par personn.  Onorab Henrie ti fer sorti sa byen yer.  Kot li i ti aste en kare later ek son papa ti pas lo li.  Zot ti ekrir li zot ti dir li i ok in ganny en bout later alors son non i sorti lo la.

Setadir Mr Speaker Gouvernman pa vann later avek sa ki’n deza annan later.  Parey Madanm Rene ek son fanmir zot ti’n deza annan later.

Alors Mr Speaker ki mannyer Madanm Sarah Rene ki ti aste son premye morso later avek Gouvernman 1988 anba Konpai anler Bel Ombre kot nou ti zwe foutbol zot ti pous nou zot ti dir nou sorti pa zwe ankor la, akoz sa madanm ti aste zot ti bare Mr Speaker.  Li in nobou aste later apre sa.

E osi Mr Speaker mannyer sak son fiy ki ti’n deza annan later ti nobou kapab aste ankor later avek Gouvernman?  Eski alors bann dimoun dan servis piblik zot in egzers due diligence?  Non Mr Speaker.

Minis Adam dan sesyon FPAC semenn pase ti dir, bann ki pa kapab fer sa fodre zot avanse i ti dir Mr Speaker.  Fodre ki zot avanse.  Savedir zot demisyonn-en bann ki pa kapab fer sa.

Akoz ler ou dan en tel pozisyon Mr Speaker ou pa kapab travay dan lafreyer rann faver e fer lapliferans pou serten.  Be akoz zot in les sa madanm?  Zot les Madanm Rene ek son fanmir fer sa avek lepep Seselwa ?

Ozordi ler Gouvernman pe dir ki later i limit-e dan Sesel i annan ki pe rezouir gran, gran morso.

Mr Speaker sa i apel egois plis ki egois sa i apel voras.  E la mon mazin Mr Speaker ler zot ti pe akiz nou konman nou ti pe boycott konblaz nou pe boycott konblaz sa ti pou donn sa pou malere pou donn later zot to akize Mr Speaker.  Me nou ti annan rezon sa bann letan Mr Speaker.  Akoz sa bann dimoun pa ti pe konble pou ed malere pou fer lakaz pou ed pti biznes zot.  Zot i ti pe konble pou zot partaz antre zot ek zot bann dalon.  Ozordi nou pe vwar Onorab Larue in fer montre klerman Mr Speaker.  Ozordi Mr Speaker sa later ki  mon vwar pe montre la ki sa madanm in gannyen.  Ozordi konbyen pti biznes in benefisye?  Ou kapab konte Mr Speaker.  Ou kapab konte lo ou ledwa.  Mon konn biznes ki i annan lannen pe rod en morso later pou zot operate lo la ziska ozordi Mr Speaker zot ankor pe espere zot pa ankor ganny nanryen.  Pourtan sa biznes zot epe fer byen zot pe fer tre byen Mr Speaker me sel lobstak ki zot pe gannyen se zot bezwen rent en landrwa.  E sa i de-balans zot en pe.

Be si zot ti kapab ganny allocate en morso dan sa ta later Mr Speaker, me ti ava fer dibyen pou zot.  Ozordi zot ti ava al pli devan.  Ozordi zot  ti ava vin pli gro?  Reference bann pli gro biznes ?

Mr Speaker zot pa’n gannyen sa bann pti biznes tel parey mon bann zwer Steve, David Francoise ozordi ki pe struggle son biznes refrizerasyon ozordi i napa landrwa lezot dimoun ankor set akoz i annan.  In vwar zot pli voras ki nou tou e zot santi ki later Sesel i pou zot.

Deplis ki sa Mr Speaker, lo sa bann bout later laplipar di-tan i ganny fer lo la.  Napa nanryen ki ganny fer lo sa bann bout later.  Zis zot pran zot ki la apre pli tar zot vann zot lease 2milyon Mr Speaker.

Zot asize apre zot fer larzan fasil Mr Speaker.  Sa i mal ki’n arive Ile Eve, zot in konble konbyen dimoun Praslin in gannyen Onorab Woodcock in koz lo la.  Zis serten in gannyen apre ou tande i vann lease avek en lot dimoun i fer 2milyon apre zot, zot rezouir sa ta larzan.

Mr Speaker be la mon pe get i annan sa morso zot pe koz lo la Providence ki’n vann avek en konpannyen konstriksyon sa konpannyen Konstriksyon i deza annan later Providence ki pe servi.  In deza annan.  En ta Mr Speaker gran, gran bout.  Eski pa ti a byen ki en lot dimoun ti a kapab ganny en morso.

Mwan Mr Speaker la depi 25an depi lepok SIDEC lepok    YES Scheme mon’n rode en bout mon pou mon kapab fer en pti workshop.  Zanmen mon’n gannyen.  Senpleman akoz mon frekant Ramkalawan.  Si ou frekant Msye Ramkalawan la ou pa sipoze ganny nanryen dan sa pei ou.  Alors ou bezwen ganny kit de kote.

Mr Speaker be ler mon get sa ta later la ki mon pe gete lala ki Madanm Rene in gannyen me sa fanm i kontan later Mr Speaker.  Me sa madanm eskiz mon ennler ou a dir in ganny malediksyon later!  Be Mr Speaker ou kapab kontan later koumsa?  Ek sa, sa ki gou dernyen fwa lo Facebook mon ti vwar 2 trou simityer.  En zenn fiy ti mete.  ‘’Enn pou Malere enn pou Risar.’’  Tou lede sa trou i parey.  Me sa madanm i pa realize i pou al anba later li osi li?  Degre i kontan later Mr Speaker kontan tou zot kontan later zot pou al anba sa later.  Zot, zot pou kite Mr Speaker.

E Mr Speaker sa ki pli enteresan ankor zis zot pran zot akimile later i akimile, akimile la zot kit la.  Zis pou zot ganny en letan pou zot vann en gro kopo, vann en lease  Mr Speaker ki i annan Seselwa ki pe esper later pou fer lakaz.

Mr Speaker lo sa bann later ki nou pe mazinen apard vilaz Roche Caiman ki kantite lakaz zot ti a fer.  Onorab Larue i fer kalkilasyon lo zis en morso zis bann 40 plot.  600 met kare savedir 40 pti biznes ti pou ganny sans Mr Speaker fer en pti konstriksyon e fer zot biznes grandi.  Li sa madanm i pran tou.

Mr Speaker eski ou krwar dan sa zafer later la zis Madanm Rene ki’n pran?  Pli gran morso petet li ki’n gannyen Mr Speaker.  Me i annan en msye Mr Speaker i pa onte Mr Speaker.  Mr Dolor Ernesta.  Ozordi Mr Dolor Ernesta…

 

 

MR SPEAKER

Onorab annou regard kontenir Mosyon e sa msye ki ou’n mansyonnen in deza annan en case devan ACCS.

 

HON NORBERT LOIZEAU

Ok.  Mr Speaker mon’n nonm sa akoz i pe campaign Bel Air i pa onte?  Ou deza ler ou ti dan Gouvernman ou’n abiz 50 morso ka i devan ACC laba.  Ozordi ou a pe vin campaign pou dir kit sa Gouvernman la  pou ou pa rann kont.  Pou ou pa  rann kont sa 50 morso ki ou’n pran ?

E mwan Mr Speaker mon kanmi dan son plas.  Mon kanmi ozordi dan Sans Souci konbyen dimoun pe esper later?  Ki kantite?  50 morso in ganny hold akoz li sa msye.   E le mon pe dir ek dimoun Sans Souci dir ler i pase bann ki pe rod later, dir li tou le Sanmdi i pe pase Sanmdi mon pou la ler i pe pase pou mon dir li!

Mr Speaker ozordi i annan bokou zabitan dan nou distrik ki napa later.  E ler mon pe vwar sa ta morso ki zot pe pran Mr Speaker mon leker i fermal.  Ozordi nou annan bann dimoun, mon konn en madanm Mr Speaker Marie-Alise Anacoura in vin granmanman eskan ozordi i pa ankor ganny en morso later!

Plis ki 20an pase i pe rod en morso Mr Speaker in ganny li 53an la i pe ganny difikilte pou ganny en lakaz ou konnen ler ou ariv sa laz ou pa ganny loan zot dir ou ou’n depas ou laz.  Tou sa bann letan si i ti’n ganny son landrwa Mr Speaker i ti’n fini etabli li.

Nou annan Sheila Antat ki’n vin granmanman Mr Speaker ki ankor pe espere, eski i byen? Konmsi sa madanm, Madanm Rene pou en manman ki annan zanfan eski i byen i annan sa ta later kan sa bann dimoun ki mon pe nonmen la zot, zot napa nanryen?  Zot pe tay kot en fiy pou reste ennler zot kot en zanmi.  Li sa madanm kot son msye ti brile lotrozour la i pe zis tay, tay partou.  I napa nanryen menm.

Mr Speaker legois.  I annan dimoun ki i annan gro leker zot egois Mr Speaker.  E dan tousala Mr Speaker  i annan en dimoun nou pa pe koz lo la.  Mon konnen ou pe reste trankil akoz ot pa pe koz lo la zot.  Zot konnen lekel sa dimoun Mr Speaker.  Me Msye Faure – Msye Faure nou pa koz lo li?  I konnen sa li Mr Speaker konman Prezidan i konn sa li. I merit pran aksyon.  Li ki vini i vin koz lo  latransparans, rann  kont, bonn gouvernans Sesel i pli gran ki nou tou.  Ozordi se pa Sesel ki ‘’pli gran ki nou tou.’’  Se Sarah ki’’ pli gran ki nou tou’’ akoz i pe pran tou later Sesel.

 

(APPLAUSE)

 

HON NORBERT LOIZEAU

Alors se li ki pli gran ki nou tou Mr  Speaker.

Mr Speaker mon e koz koumsa akoz mon ankoler.  Mon ankoler akoz mon osi mon dan menm sak ki Marie-Alise Anacoura ki Sheila Antat ki Annie Victor Sans Souci ki piti pti fanm ‘Dan Koko’ ki ankor pe espere.  Mon dan menm sak Mr Speaker sanmenm sa ki ou trouve ki ozordi mon pe koz koumsa akoz mon ankoler.

E nou dan Bel Air Mr Speaker nou pa happy avek sa sityasyon vi ki nou dan Bel Air zot dir ki nou annan rezerv.  Selman i annan ki pe konstri dan rezerv nou konnen sa nou.  Nou ankoler pou sa Mr Speaker akoz i annan demann bann lakaz dan nou distrik nou pa pe gannyen pe anvoy demen tanto, me selman i annan bann gran, gran morso partou ki serten zot bann dalon pe pran ; tel ki Madanm Sarah Rene.

E deplis ki sa Mr Speaker, son premye bout later ler ou bezwen premye bout later ou bezwen ganny en bout later pou ou konstrir pou ou reste, li i pe lwe sa landrwa !  Me pa ti a byen en zabitan Bel Air ti a ganny sa landrwa ozordi ti a pe reste ladan.  Marie-Alise Anacoura sa granmanman ti ava rantre ek son fanmir ?

Mr Speaker e deplis ki sa kot later avan mon terminen i paret-man i annan 2 pwa 2 mezir ozordi dapre bann meeting ki nou’n gannyen posibleman bann later pou redwir en kare pou swa 600 met 600 sqm or 1200.

E 600 met kare later dapre konpran i pou kout R50mil sa dapre ki nou pe tande.  E sa ki 1200 met kare li i pou anviron 150, -140.  Be Mr Speaker me ler mon’n tann Onorab Larue koze sa madanm in aste en morso Grand Anse pou R2, 587.

Mr Speaker i mal ozordi Onorab William ou merit ankoler pou sa Onorab William.  In pran later ki enn ou zabitan Grand Anse ti ava gannyen.  Sa madanm ki ou dir i kontan ler mon koze i annan en fiy li mon ti pas kot li lot fwa son fiy pe rod en lakaz.  Be son fiy ti ava gannyen.  Ou merit ankoler i ti ava ganny sa pou 2mil 500 parey Madanm Rene in gannyen.

Mr Speaker mon pou termin la parey mon dir mon ankoler mon ozordi ler mon tann sa bann zafer later akoz mon osi mon dan menm sak mon dan menm sak parey mon bann dimoun ki mon’n koz lo la.  Mon pou termin la.  Mersi Mr Speaker.

 

MR SPEAKER

Mersi Onorab Loizeau.  E nou osi nou pou termin la pou ozordi nou pou adjourn nou ava repran nou travay Mardi prosen 9er bomaten.

 

(ADJOURNMENT)