::
Home » Verbatim » 2018 » Verbatim Wednesday 21st March, 2018

Verbatim Wednesday 21st March, 2018

NATIONAL ASSEMBLY OF SEYCHELLES

 Wednesday 21st March, 2018

 The Assembly met at 9.08am

 National Anthem

 Moment of Reflection

 Mr Speaker in the Chair

 

MR SPEAKER

Bonzour tou Manm Onorab.  Bonzour tou manm piblik ki a lekout.  Dabor mon  anvi zis prezant en leskiz pou sa pti retar ki’n gannyen, an vi en pti problenm teknik ki nou ti pe fer fas avek.

Bon nou pou kontinyen fer nou travay lo Mosyon ki’n prezante ki’n konmans deba lo la yer.  E Mosyon pou lenformasyon bann manm piblik os,i ki nou pe deba lo la.  Se Mosyon anmennen par Onorab Gervais Henrie Manm pou Mont Buxton.

Mosyon i lir koumsa ; avek bi pou fer desan pri lavi  dan pei Lasanble Nasyonal i demann Gouvernman pou sanz model biznes STC afen ki i kapab redwir son kou korperasyon.

Ankouraz konpetisyon lo marse.  Avek bi fer desann pri marsandiz e donn Seselwa en meyer de posib dan en pli gro dele posib.

Parey mon dir Mosyon i konmans ganny debat lo la depi yer.  E mon ava demann okenn Manm pou fer entervansyon.  Ok.  Onorab Wavel Woodcock.

 

HON WAVEL WOODCOCK

Mersi Mr Speaker.  Bonzour Mr Speaker.  Bonzour koleg Onorab, tou dimoun a lekout.

Mr Speaker sete avek bokou pasyon ki mon’n ekout prezantasyon Onorab Henrie lo son Mosyon ki pe demann Gouvernman pou sanz model STC.  Afen ki i kapab redwir son kou loperasyon.  Ankouraz bon konpetisyon lo marse avek bi fer desann pri marsandiz e donn Seselwa en meyer deal posib dan le pli kout dele posib.

De prensipal sa Mosyon se pou fer desann kou lavi.  Dan mon entervansyon mon met lanfaz lo fer redwir kou loperasyon, ki mon senserman krwar i pou fer desann pri bann komodite.  Sirtou bann komodite de baz STC e fer sa ban komodite pli abordab.

Akoz annefe manda prensipal STC se pou fer komodite debaz aksesib e abordab.

STC i espekte garanti ki pri komodite debaz i reste abordab se ta dir pli bonmarse posib.

Mr Speaker mon pa krwar ki STC pe ankol son manda orizinal.  Si ou konpar komodite ki STC pe vann avek bann lezot konpannyen wholesalers oubyen retailers, i kler ki STC pa pli bonmarse.

Par lefe ki STC pe vann bann komodite pli ser.  I pa pe provide sa konpetisyon dan marse lokal ki pou fer desann kou lavi.

Si  STC ti pe vann son bann komodite a en pri pli abordab pli bonmarse,  natirelman bann lezot konpetiter ti pou bezwen fer desann kou zot bann komodite pou compete avek STC e fer komodite Sesel vin pli meyer, vin pli bonmarse.

Mr Speaker Mosyon i tre senp.  Mosyon pe demande ki Gouvernman i rekonsider model biznes STC e ki sa konpannyen i redwir kou son loperasyon.

Mon pa pe konpran loptik Onorab Pillay.  Ki apre en prezantasyon detaye e lozik ki Onorab Henrie in fer Onorab Pillay in dir ki sa bann mezir ki Onorab Henrie in propoze par egzanp kou loperasyon ki pou fer desann kou komodite pri lavi pa fer sans.

In koz plito lo saler ki bann dimoun pe gannyen.  E mon dakor i zwe en rol dan purchase power bann konsonmater – lepep Seselwa.

I vre ki ogmant saler i zwe en rol lo lakantite komodite ki en dimoun i kapab aste.  Me Mosyon ozordi pa pe koz lo logmantasyon saler.

Ou kapab ogmant saler si oule.  Me si pri komodite pri lavi i kontinyelman monte eski i pou fer diferans?  Si en dimoun i ganny en ogmantasyon R200 lo son saler me kou komodite e kouver sa logmantasyon ki’n gannyen, ki diferans i pou fer ?

Tou Seselwa i konn byen ki mannyer sistenm Parti Lepep i marse.  I donn ek lanmen gos i pran ek lanmen dwat.

Mosyon pe koz lo fer diferan – Mosyon pe koz lo fer desann kou lavi, Mosyon se fer komodite sirtou komodite de baz i vin pli abordab.

E lafason pou fer sa se pa kou loperasyon STC i deza egzorbitan.

Tou depans ki STC i fer, i ganny pase lo konsonmater.  STC i bezwen re koup tou son depans e osi fer profi.  Par redwir kou loperasyon i vedir fer desann pri komodite.

Pou fer li pli senp pou bann ki konpran keksoz dan en lot loptik.  Si pa kou loperasyon i vedir ki en kilo zonnyon pou sorti R12 pou vin R8 ouswa zis en pti bwat dile sorti R35 pou vin R26 savedir ki komodite in vin pli abordab e pou fer desann pri lavi .

Sak sou ki nou kapab tire lo en komodite savedir fer desann pri lavi .

Annou get en pti annou get en pe bann statistik ki  Onorab Henrie in prezante.  STC pe pey rent lo 9 propriyete a en sonm R2.733.70milyon par mwan.  Sa i ariv en total R32.796. 840milyon par an.

Si STC ti ‘n envestir dan son prop propriyete sa kou ti pou desann bokou pli ba ki vedir STC ti pou fer bokou plis savings. 

Apre ki STC ti’n ogmant e agrandi son loperasyon par annan plis outlet; kreasyon Hypermarket, Fair Product defenestration venture dan bann lezot menm bann higher products an 2016, STC ti fer en turnover R1. 95bilyon.

Me eski en logmantasyon dan turnover vedir ki en konpannyen pe fer byen?  Dan biznes ou mezir performans en konpannyen ouswa en biznes par profi ki sa konpannyen i fer.

An 2016 STC ti rakont en profi R18.3milyon ki reprezant selman 1.68poursan son turnover ki ti sot R1milyon.

Me konpar sa bann, me konpar sa konpar 2016 avek lannen 2009 kot STC ti rakont en profi 35.2milyon ki ti valid 4.80 son poursan son turnover ki ti par lao R733milyon.

Get ladiferans ant loperasyon STC 2009 ki ti bokou pli pti ki loperasyon STC 2016 – STC ti fer plis profi an 2009 ki an 2016.  An 2009 parey mon’n dir STC ti fer R35milyon profi.  Me avek en kou loperasyon bokou pli o an 2016 STC ti selman kapab fer R18milyon profi.  Eski i fer sans?  Eski pri komodite in vin pli bonmarse ouswa in vin pli ser?

STC i bezwen redekouver son manda.  Vann komodite debaz a en pri abordab.  Pou fer sa i bezwen koup lo son bann ekstravagans.  Kou lo bann depans initil e konsantre lo lavant bann komodite pli debaz e pli esansyel.

Kou elektrisite avek delo ant 2009 a 2016 in ogmant par 108.71poursan.  Sa sif in sorti 13.4milyon an 2009 pou ariv 27.8milyon.  Zis son kou total pou 2016, i vedir ki par mwan STC ti pe pey an mwayen R2.3milyon pou son bill delo avek elektrisite par mwan.  R6.3milyon pou 12 Konpannyen Sekirite tousala se bann pri egzorbitan.

Mr Speaker kot i konsern kou alokasyon pou STC an 2009 a 2016 in ogmant par  752.91poursan.  Sa sif i sorti R5.7milyon an 2009 pou ariv R48.3milyon an 2016.

Mr Speaker sa i anmenn mwan lo Praslin.  Ki mon pou sey eksplike ki mannyer par fer desann kou loperasyon ki pou osi ede fer desann pri komodite e kou lavi.  STC pe pey en sonm R33, 360mil tou lemwan pou zis 2 morso later PR6077 e PR6078 lo Zil Eve Praslin ki sipoze servi pou konstriksyon prop warehouse.

Onorab Henrie in fer lapel lasanble ki an Out 2013 ansyen CEO STC ti anonse ki sa warehouse avek supermarket ti pou fini konstri dan 2 a 3an.

Me la nou’n ariv 5an pli tar.  Savedir dan 5an STC in depans plis ki R2milyon pou zis de morso later, me le kestyon se oli sa warehouse ?  Sa se en gaspiyaz R2milyon.

Mr Speaker si ou pe konsider economic of scale en warehouse  Ile Eve ti pou ede pou kou loperasyon STC lo Praslin ede fer desann kou komodite.

An se moman STC pe operate dan 2 warehouse; enn Grand Anse Praslin obor lekol primer e lot Amitie vizavi Airport.  Sa propriyete Grand Anse ki STC pe servi in fini ganny reallocate avek Minister Ledikasyon pou fer en nouvo Lakres pou Grand Anse Praslin menm si STC pe ankor servi sa propriyete.

Par lefe ki STC pandan 5an pa ankor fer sa warehouse lo Zil Eve, zot pe met retar avek konstriksyon lo nouvo lekol.

An se moman lekol Lakres Grand Anse Praslin i dan en kondisyon en leta deplorab.  E later i apar-tyen a lanmisyon Legliz Anglican.  E zot pe reklanm zot later pou sa lekol i baze, mwan mon kestyon se oli responsabilite STC. 

        Lot propriyete Amitie in fini ganny demarke pou fer en lot devlopman lo la.

Mr Speaker an term economies of scales si STC ti operate dan en warehouse olye tande depans STC pou bokou pli ba.  Marsandiz i debark Lasose Ile Eve si sa warehouse ti’n fini konplete ti’n fini ganny fer Ile Eve, kou transportasyon ti pou bokou pli ba.  Olye transport marsandiz pou al stor dan 2 warehouse Grand Anse, tou marsandiz ti pou’ ganny stoke dan en sel warehouse ki sa warehouse Ile Eve.  Sa ti pou kou pou transportasyon pou anmenn marsandiz kot 2 warehouse Grand Anse.

Pou manpower resours imen pou run 2 warehouse ti pou’n desann.  Kou elektrisite ti pou bokou pli ba, kou delo ti pou redwir depans lo sekirite pou vey 2 warehouse ti pou desann.  Kou maintenance lo 2 warehouse ti pou osi ganny koupe.

Depans ti pou ganny fer lo en sel warehouse ki ti pou annan lespas storage pou tou marsandiz.  Sa ti pou kou loperasyon par en significant amount.  Olye pas tou sa bann depans lo konsonmater par ogmant pri komodite, pri komodite ti pou desann akoz depans STC ti bokou pli ba.  5

Prezidan ti dir dan son Press Conference ki dan tou outlet pri STC i parey.  Mon senserman krwar ki Prezidan i bezwen fer en pti vizit dan tou bann outlet STC pou li vwar pou li menm, ki mannyer pri i diferan partou ;  sirtou Praslin avek La Digue ki pri i bokou pli eleve.

Mr Speaker mon senserman krwar

Ki si STC ti gard zot langazman e batir sa warehouse Ile Evre olye gaspi R2milyon lo lease ti pou’n desann.  Par lefe ki kou loperasyon ti bokou pli ba.

Mr Speaker kekfwa pli gro dezapwentman ki mon annan ozordi, se avek Parti Lepep.  Dan lepase mon’n koz lo land speculation Ile Evre kot plizyer endividi ti lease later pou detrwa mil Roupi, apre vann zot lease pou milyon, pou milyon Roupi.  Ozordi Parti Lepep pe fer parey.

Parti Lepep depi le 19 Zen 2013 in pran en Bay lo sa propriyete ki sitye lo morso later V10104 ki ti pou Gouvernman Sesel, e malerezman ozordi konsonmater STC  i bezwen pey Parti Lepep R823, 333mil par mwan.

Sa later i later Gouvernman.  Ki mannyer i kapab pas Bay  en later e en parti politik ki prezan pe fer profi lo ledo Gouvernman ?  Ki mannyer i apele sa?  Sa Mr Speaker se koripsyon.

Ozordi nou pe koz lo middleman.  Mr Speaker pli gro middleman Sesel se Parti Lepep ki pe ede fer pri lavi vin pli-z-anpli ser avek zot bann koripsyon.

Mr Speaker avek sa de pti mo mon pou .donn mon sipor total sa Mosyon.  Mersi bokou.

 

(APPLAUSE)

 

 

MR SPEAKER

Mersi Onorab Woodcock.  Yes Onorab Sebastien Pillay.

 

HON SEBASTIEN PILLAY

Order 56 Mr Speaker.  Mr Speaker mon oule klarifye en miscomprehension ki Onorab in koz avan mon avan in dir.  In dir ki mwan mon’n dir dan mon lentervansyon yer ki mon’n dir ki bann propozisyon ki Onorab Henrie atraver son Mosyon pa fer sans.

Mon pa’n zanmen servi sa langaz Onorab.  Sa ki mon’n dir tou senpleman mon’n dir ki Onorab in prezant en Mosyon e i annan bann pwen an komen lo redwir kou.  Sa ki mon pa’n kler mon’n dir ki Onorab i ava fer dan son soumisyon, i ava prezant lafason ki nou krwar nou devret revwar model STC.  Mon pa’n zanmen dir sa.

E lo en lot pwen Mr Speaker mon ti a kontan Onorab i substantiate sa largiman ki Parti Lepep ki pli gran middleman dan Sesel e alors se Parti Lepep pe promot koripsyon.  So si Onorab i annan okenn lenformasyon lo la – akoz nou’n dir dan sa Lasanble ki si nou dir en keksoz nou bezwen kapab substantiate.  So eski i kapab substantiate ki nou Parti Lepep nou pli gran middleman si non mon ti a kontan i retract sa statement.  Mersi.

 

MR SPEAKER

Ok ou premye konsern mon krwar sa i ok.  Lo sa, sa i ok.  Lo sa sityasyon later ki depi yer ki loter Mosyon with regards to Parti Lepep pe lwe later avek STC and all that –  wi mon ti a kontan petet osi loter Mosyon ki yer in mansyonn sa and all that, mon ti a kontan petet fer Lasanble fer serten dokiman confirm sa.  Zis pou …

 

(Mic Off)

 

MR SPEAKER

…atann en moman.  Lafason ki en Manm zis fer atansyon parey mon’n dir langaz ki nou servi. Lafason ki en Manm i pran sa lenformasyon e i vir li i koz lo la,  annou fer atansyon.  Me mon ti a kontan ki loter Mosyon lefe ki ou ti lev sa yer.

I a fer nou Lasanble ganny en kopi dokiman bann later ki Parti Lepep pe lwe avek STC.  Ok?

 

HON SEBASTIEN PILLAY

Mersi Mr Speaker.  Mr Speaker loter Mosyon dan son prezantasyon i pa’n zanmen servi sa term middleman pou dekrir sa sityasyon.  In prezant li as the fact as is. 

 

MR SPEAKER

Wi.  Se sa.  Ale Onorab.

 

HON SEBASTIEN PILLAY

Prezantasyon ki Onorab Woodcock in fer dan son dernyen statement in dir, in dir Parti Lepep pli gran middleman. 

        Apre ki mon menm ki’n koze lo kote Parti Lepep kot nou’n dir enn bann keksoz ki Onorab in propoze se retir middleman i ava redwir kou lenportasyon pou STC. 

        Sa ki Onorab in dir dekrir Parti Lepep middleman.  Sa ki mon pe demann Onorab pou fer se lo sa Statement ki’n fer pou dekrir nou konman en middleman pou li swa substantiate sa Statement ki Parti Lepep i en middleman si i pa kapab substantiate mon pe demann ou ki i retract sa statement ki in fer.  Se tou.

 

MR SPEAKER

Ok, bon Mosyon pe demande ki bann kou loperasyon STC i re pran bann kou loperasyon.  Me sa i form par, dan bann kou loperasyon.

Whether nou apel li en middleman, either ou apel li kou loperasyon kot STC pe peye –  mon konpran li i pa’n li in twist sa konmkwa sa kou loperasyon – wi sa kou loperasyon i ganny i ganny pran konman middleman. 

        Me mon pa santi, mon pa santi ki in fer okenn alegasyon okenn lakizasyon.

Zis lafason ki li in servi sa bout.  Me parey mon’n dir Onorab Henrie nou a fer nou ganny en pe lenformasyon with regards to this.  Ok? 

        Bon prosennman mon annan Onorab Lemiel lo mon lalis.  Onorab.

 

HON SYLVANNE LEMIEL

Mersi Mr Speaker, bonzour Mr Speaker, bonzour tou mon bann koleg Onorab e tou bann dimoun ki a lekout.

Mr Speaker mwan mon lentervansyon pou tre bref lo sa Mosyon, akoz i annan bokou keksoz ki’n ganny dir.  E menm prezantater Mosyon li menm in al antre an detay letan i ti pe eksplik son Mosyon.  So alors i zis en pti kontribisyon.  Mr Speaker Mosyon pe demann Gouvernman pou sanz model biznes STC afen ki kapab redwir son kou loperasyon ankourazman konpetisyon lo marse, avek bi fer desann pri marsandiz e donn Seselwa meyer deal posib dan en pli kout dele.

Mr Speaker mon krwar ki nou bezwen konsidere STC, i fondamantal pou asire ki i annan komodite esansyel ki abordab e asire ki i osi donn akse bann antrepriz ek biznes lokal e marse oubyen en sans pou vann zot prodwir.

Bokou dimoun isi Sesel menm isi dan sa Lasanble e bann etranze, nou fer shopping kot STC nou’n kapab konstate ki lanvironnman fer shopping laba i enn ki pozitiv e ou kapab shop dan konfor.

Par kont i annan ankor amelyorasyon ki STC i kapab fer lo tou nivo ki ou asire pou kontinyen amelyor son servis.  E osi kalite prodwir komodite ki i met lo son letazer.

Mr Speaker STC konman en biznes i bezwen fer profi ki pou fer li i bezwen fer profi ki pou kapab kontinyen soutenir li dan biznes.

Ozordi ler nou regard pri komodite kot STC Praslin e La Digue bann konsonmater pe pey menm pri ek konsonmater Mahé.  E sa mon byen apresye.

Me lekel ki pe abzorb sa kou?  Tou resaman STC in ganny li en nouvo Board ek en nouvo Management.  Mon ti a kontan vwar bann mezir proaktiv pe ganny pran pou redwir depans ki lorganizasyon ki sa lorganizasyon i fer e revwar cost base espere ki sa i a permet zot pas sa savings avek zot bann konsonmater.  So sa i ti mon kontribisyon Mr Speaker.  Mersi.

 

MR SPEAKER

Mersi Onorab Lemiel.  Onorab Basil Hoareau.

 

HON BASIL HOAREAU

Mersi Mr Speaker.  E bonzour tou bann Manm, e tou bann dimoun ki a lekout.  Mr Speaker Mosyon.bi Mosyon ler mon gete i kler.  Se ki i pe demann SPTC pou get son model, avek le bi pou fer desann bann pri marsandiz.  E bann marsandiz esansyel bann komodite de baz ki a fer li vin pli abordab pou tou dimoun Sesel.

Mr Speaker lentansyon Mosyon i bon, i bon mon siny profit lokazyon pou felisit loter Mosyon mon vwar i vreman fer resers.  Letan avan ki i prezant son Mosyon in donn nou bann lenformasyon e mon’n ekout li byen letan in nonm bann middleman ki egziste mon pa’n tonm Parti Lepep.  Mon espere ki Onorab Henrie i ava instruct ouswa i ava korize e montre Onorab Woodcock – pa middleman kekfwa mon a kit sa avek ou pou montre li.  Parske ler ou ti nonmen ou ti nonm 2 dimoun.  Si mon pa tronpe zot non bann lorizin Indien si mon pa tronpe.  Me pa Parti Lepep.  Me parey mon’n dir lentrodiksyon, ti vreman byen.  E i ti enn ki ti well researched.

Mr Speaker STC ki son lobzektif?  STC letan mon’n gete ki STC premyerman i en compagnie ki’n ganny operated anba Companies Act. 

E letan mon’n fer mon resers mon’n gete ki son bann lobzektif i basically annan bann lobzektif ki ase vag i kapab al dan biznes export, retail.  Me en keksoz ki pa nonmen dan sa lobzektif se ki pou mon, mon ti vwar li vreman enportan se ki enn son bann lobzektif se ki pou fer desann bann komodite esansyel komodite de baz sa pa ganny nonmen dan son lobzektif, annefe letan mon get son lobzektif i donn lenpresyon ki en compagnie ki pe vin fer komers ki pe vin fer biznes.

Me nou konnen,  me nou konnen sa pa ti le bi ki STC ti ganny kree.  E Gouvernman ozordi i annan en Polisi ki i pa lantre dan biznes. I pa pe antre dan biznes prive.  I kit biznes pou bann dimoun ki dan sekter prive.

Me kot i santi i annan en bezwen pou antre i pou antre par egzanp la kot STC in antre pou stabiliz bann pri.  Fer sir kot i konsern komodite de baz komodite esansyel i vin abordab a nou tou nou bann dimoun Mr Speaker.

E se la kot mwan, mon demande ki STC ti devret revwar son bann lobzektif, met sa in black and white ki sa i kler. Akoz otherwise donn lenpresyon ki pou dir en compagnie ki pe vin zis fer biznes parey nenport ki compagnie. 

        E i enportan ki STC i nobou attend sa bann lobzektif.  Nou’n koze mon’n tonm Onorab Woodcock mansyonnen pou dir STC son profi in redwir.  Mon pa krwar nou devret ziz STC son performans an relasyon ek son profi.

Mon plito krwar ki nou devret ziz li parey Mosyon pe sey demande ki mannyer in fer desann pri lavi Sesel?  Ki mannyer i pe ede, i pe asiste pou met pri bann sirtou bann komodite de baz parey nou dir pli ba.  E ki fer li pli accessible pou nou bann dimoun.

An menm tan,  An menm tan,  letan nou demann STC pou fer sa nou bezwen konpran ki STC ‘i bezwen fer en pe profi.  Sansan i pou run at a loss e i pa pou kapab kontinyen egziste.  So i enportan ki nou kapab kit li a la flot me an menm tan annan sa balans kot i achieve sa bann lobzektif.  E se pou sa rezon paler STC nou vwar li pe vann bann lezot keksoz an deor sa bann komodite esansyel se parski lo sa bann komodite ki pe sey fer profi pou li compensate, compensate, pou bann lezot komodite esansyel kot i bezwen vann a en pri ba.  E nou demann STC pou fer sa.  Nou bezwen i bezwen attend sa lobzektif.

E la petet mon ti a propoze.  Eski nou devret kit STC kontinyen parey i ete la, anba Companies Act?  Ouswa nou devret annan en Lalwa?  fer li vin en substitute  corporation ?  Parey Maurice i annan.  Maurice i annan en state trading company of Mauritius.  Ki li i egziste anba Act. 

        E li son Act i vin depi 1982.  E mwan mon krwar petet sa i devret dan laliny ki nou devret ale.  Nou devret annan en Lalwa.  E sa Lalwa i a set parey bann lezot Lalwa ki’n nou’n fer, i set bann objectives clear – clearly bann objectives ki i bezwen ganny met par sa bann par sa lorganizasyon.  E i ava met son striktir an plas.  Pou annan plis latransparans dan son fason management and operation e mon krwar sa i ava osi ede pou achieve pou anmenn nou dan sa direksyon pou fer pri vin pli ba.   E mwan mon krwar repet nou devret sorti from STC being a company incorporated under Companies Act to one ki ganny kree par en substitute corporation parey Maurice i annan.

Mr Speaker nou’n koz lo middleman mon toutafe dakor ki STC i devret tir bann middleman kot i egziste.  Nou bezwen tire, parske STC i bezwen rod en fason kot i rod sa bann goods at the source kot zot pe ganny prodwir.  Sa i enportan akoz nou tou nou konnen.  Si ou annan middleman, middleman i bezwen fer profi li.

E otomatikman middleman i vedir kou pri ki ou pe aste i vin pli o.  So nou bezwen tir zot.  E mwan mon pe dir si STC, si STC si STC pe kontinyen relied lo middleman zot pa pe act dan en fason responsab.  Zot pa responsab si middleman i kontinyelman egziste.

STC i bezwen tir middleman.  Si middleman i konnen kot pou al rode.  STC i bezwen konnen kot pou al rode Mr Speaker.  E mwan mon pe dir sa nou bezwen fer li.

Mr Speaker letan mon’n get cost STC, larealite sa cost i vreman o.   I larealite sa.  I o.  Otomatikman si ou cost operational cost i high, i vedir sa ki ou pe vann pou bezwen osi vin pli o .  Parske ou bezwen servi sa bann profi ki  ou fer, pou ou pey ou bann operational cost ou bann expenses.  So STC i bezwen revwar, revwar son operational cost.  E i bezwen vwar fason pou li redwir.  E la mon dakor poudir nou bezwen annan en short-term plan avek en long-term.  The long-term se ki STC i bezwen own tou son propriyete.  Parske si i own i pou vedir i pa pey rent. 

        E sa i bezwen long-term objective.  Pou li own tou son bann premises, kot i pe conduct son bann activities; be it management, be it son retail or wholesale activities. 

        Me short-term i bezwen osi revwar si pa kapab re negosye son bann rent.  Sa i short-term.  Vi ki petet i pa pou ganny son landrwa son landrwa la, me sa i bezwen parske sa apre i pou en benefis pou pep Seselwa.  Kot i a nobou fer son bann pri en pe pli ba.

E mwan mon siporte pou demann ki loter Mosyon in fer pou ki STC i redwir son operational cost.  Sa i osi anmenn mwan lo letan mon’n get bann expatriate kou bann expatriate ki pe ganny peye.

Letan mon get bann premises ouswa bann lakaz ki pe ganny lwe pou house sa bann expatriates.  Eski STC i annan en localization programme an term kot i konsern bann post?

Mon ti a kontan konnen ti pou enteresan pou nou konnen poudir sa bann pos kot bann etranze, pe ganny anploye konbyen letan zot pe ganny anploye.  Konbyen letan napa en Seselwa ki’n pran sa post.  E ki STC in met an plas pou fer ki sa bann pos ki pe ganny okipe par etranze, i ganny okipe evantyelman par en Seselwa.

Si nou koz lo localization of jobs Sesel, Gouvernman i devret lead by example.  Kot i konsern STC ki en state-owned company nou devret annan sa an plas.  E sa pou ede redwir kou.  Parske nou Seselwa nou pa bezwen donn li en landrwa reste.  E nou vwar ki kantite landrwa ki pe ganny lwe pou house sa  bann travayer etranze.  E mwan mon dir sa osi i ava go towards reducing the operational cost.  E alors mon demann STC, pou regard regarde ki mannyer i kapab localized sa bann pos.  E sa i bezwen ganny fer pli vit posib Mr Speaker.

Mr Speaker largiman ki’n ganny anmennen par neseserman dan sa deba ozordi, me plito letan Onorab Ramkalawan ek Onorab Ferrari zot ti pe sirtou Onorab Ramkalawan ti anmenn en largiman pou dir petet STC i devret al dan totalman wholesale.  Mon pa konnen si mon ti ganny sa byen.  Me sa lenpresyon ki mon ti gannyen.

Mwan mon pa tro krwar STC i devret al totalman dan wholesale.  Petet i kapab fer sa 2 keksoz retail and wholesale.  Akoz wholesale, wholesale Mr Speaker pou mon letan ou annan wholesale premyerman letan ou pe vin aste en keksoz kot li i annan en minimum ki pe dir ou aste.  Sa i the idea of wholesale; the difference between retail and wholesale.  Retail ou kapab rantre dan en laboutik pran en bwat dile whereas wholesale probableman i pou dir aste de karton avan ki ou nobou ki i pou vann ek ou.

So sa i kapab annan en lenpak lo serten nou bann dimoun, kous popilasyon.  Ki petet i pa ou santi pou dir i pou kapab al dan en laboutik ki vann wholesale e en sel pou aste 2 pake dile.

Petet i santi li pou dir i kapab – I mean 2 kartron dile rather.  Petet i a santi li pou dir i kapab aste 4 pake dile.  So me i pa anpese ki STC osi fer sa bout wholesale, ki i vann me selman sa retail i bezwen reste.

Mon krwar sa retail i bezwen este.  Me lanfaz i merit lo fer desann sa pri  lavi.

Lot keksoz ki vin an plas e ki mon krwar ki’n ganny koz lo la sa Onorab Ferrari ti adres sa.  Onorab Ferrari letan i ti pe son Reply to the State of the Nation Address, i ti nonmen pou fer desann pri lavi ki STC bezwen regard re get STC. 

        E i ti donn lenpresyon pou mwan ki sa i sel solisyon ouswa solisyon prensipal pou fer desann pri lavi.  Mon pa tro krwar pou dir i sel solisyon ouswa i sel solisyon prensipal.  Menm ou agree i part i part of a solution.  I enn ki ase signifikan.

Me i annan lezot keksoz osi nou bezwen pran kont.  E mwan mon’n koz lo la mon konnen i annan serten Onorab lot kote pa dakor avek sa.  Akoz lot fwa letan mon ti dir zot ti sakouy latet, letan mon ti dir re anmenn pri kontrol ; re anmenn pri kontrol.

Eski – Onorab Afif letan i a koze petet i a mon ti a kontan i adres akoz ki i krwar pri kontrol pa solisyon ?  Petet i ti a bon osi sa.  I mansyonnen.  Me selman, mwan mon krwar pri kontrol i solisyon at least avek pri kontrol lo komodite de baz.  At the very list si nou met pri kontrol nou pa pe dir met pri kont[rol lo tou keksoz.  Me par egzanp nou annan nou en group komodite e bann komodite de baz ki nou’n tir VAT lo la.  Eski lo sa group osi sa basket parey nou dir.  Eski nou pa devret met en pri kontrol lo la?  Ki ava ede ankor pou redwir pri?  Parske ki ou fer ek pri kontrol ou pe senpleman dir ek sa marsan ou bezwen. Ou pe kontrol ou profit margin ou pe kontrol ou profit margin sa ki nou pe dir ek sa marsan met en pri kontrol.  Ou pa kapab met nenport ki sa nou pe kontrole.

Si mon pa tronpe dan lepase letan i ti egziste ti 15poursan.  If I am not mistaken.  Sa ki nou pe dir.  Petet met sa lo komodite esansyel Mr Speaker.  Me i osi enportan ki STC i zwe son rol pou li fer sir ki ban marsan lezot marsan dan prive zot pa kapab pou zot kit zot bann prodwir konpetitiv zot osi zot bezwen fer desann pou zot.

Me an menm tan i osi enportan ki nou bann marsan an deor zot osi konpran pou dir wi zot dan biznes prive me zot osi zot pa kapab sarz ouswa vin zis pou fer profi maximum. 

E zot bezwen en pe pli annan en pe plis moral si mon kapab dir.  Me STC, STC sa responsabilite i lo STC li ki bezwen fors lanmen sa bann marsan pou fer sir ki pri i vin pli abordab pou nou bann dimoun.

Mr Speaker mon ‘n koz lo Maurice taler e wi sa bann state trading corporation i egziste dan en pe pei dan diferan pei Sri Lanka, L’Inde, me zot petet zot diferan.  Zot pa pe fer menm annan lobzektif ki nou STC Sesel.

Me pei ki mon’n vwar pli pre avek serten lobzektif parey ki pou nou se Maurice.  Maurice pa al dan retail li.  Me i annan serten komodite ki enporte.  Parey diri avek lafarin.

E apre li i distribye sa avek bann retailers.  E zot dir ek ou klerman poudir pri diri, pri lafarin  Maurice in redwir se akoz STC of Mauritius in antre.  E in achieve son bann lobzektif.  E fason ki zot operate Mr Speaker i enn ki vreman annan latransparans.  Par egzanp letan mon’n al lo zot website zis pou donn en legzanp. Zot ti pe rod kotasyon pou supply diri extra long basmati rice pou peryod 15 Avril 2018 ziska le 15 Zilyet 2018.  E zot ti Kotasyon ti ouver le 6 Mars e fermen le 16 Mars sa lannen.  Ki i fer?  Nenport ki dimoun i kapab al zot website.  Ale e i ouver!  Savedir i vedir poudir menm sa supplier overseas i kapab vini.  E bid.  I fer li open, transparan.  E mon krwar sa i fason ki devret ganny fer.  Ou pou al kot en dimoun en n sa bann suppliers direktema.   Wi ou kapab konn zot direkteman, me i open. 

Annan en website kot nenport ki dimoun deor nenport be it L’Inde, be  it La Chine, be it en lot pei, i kapab vini montre sa.  E sa pou ed nou, pou nou petet go to a source, e tir sa middleman.  Sa i devret ganny fer dan latransparans Mr Speaker.

E ;en keksoz ki mon ti vwar enteresan letan mon get zot bann striktir zot annan en Anti-Corruption Policy within zot lorganizasyon.  E zot annan sa Polisi in ganny set out in black and white deza.  Akoz?  Zot dir ek ou pou dir zot realize.  Sa kalite biznes ki zot pe fer i annan risk zot dir ou i annan risk koripsyon.  Risk of corruption is there.  E zot dir sa i la.

Alor zot in fer sa Polisi pou zot fer zot tou dimoun from members of a Board to the employees, pou zot konpran pou dir sa lorganizasyon pa pe tolere koripsyon.

E tou keksoz zot menm annan en Anti–Corruption Committee within the organization, pou fer sir ki keksoz i ganny fer above board 

        e ki sa i fer Mr Speaker, sa i ede pou redwir pri, akoz letan ou pe tir koripsyon, akoz koripsyon i kapab fer monte pri.  Mon pa pe dir dan STC i annan koripsyon.  Mon pe dir koripsyon li i kapab fer monte pri.  Parske sa dimoun pa pe get benefis lorganizasyon ouswa benefis pei, me i pe get benefis son pos.

e letan ou annan sa Polisi i anmenn latransparans, i pe fer sir ki bann dimoun i konpran poudir bann keksoz pe ganny gete de tre pre .

Petet mon ti a rekomande ki nou STC i annan sa.  Me si nou fer en Lalwa – si nou fer en Lalwa nou a incorporate sa dan sa Lalwa.

E mwan se sa ki mon pe dir.  Petet nou devret tir akoz letan ou n compagnie zeneralman it’s to make profit.  Me s i nou fer substitute corporation nou pou fet li kler.  I pou annan en Board e pou annan e la mon krwar pou dir sa direksyon ki nou bezwen bouze.  E i pou konklir Mr Speaker, mon pou donn mon sipor sa Mosyon.  Parske nenport ki keksoz ki pou fer desann pri lavi dan Sesel ki pou ede pou fer ki bann komodite esansyel i vin abordab, tou nou dimoun nou devret siporte.  E alors mon dir mon pou sipor sa Mosyon.  Mersi Mr Speaker.

 

(APPLAUSE)

 

MR SPEAKER

Mersi Onorab Basil Hoareau.  Mon krwar ou entervansyon in enteresan.  E in ganny apresye par tou Manm.  Onorab Clive Roucou.

 

HON CLIVE ROUCOU

Mersi Mr Speaker.  Bonzour Mr Speaker.  Bonzour tou Manm Onorab.  Mr Speaker pou konmanse mon dir Onorab Hoareau i kapab vin la obor mwan.

 

(laughter)

 

HON CLIVE ROUCOU

Mr Speaker sa Mosyon i devan nou i kler.  Sa Mosyon pe zis demann Gouvernman pou sanz model biznes STC afen ki a kapab redwir son kou loperasyon ankouraz bokou konpetisyon lo marse, avek bi fer desann pri marsandiz.

E tou sa ki prezantater Mosyon in met devan, i en bon reset pou fer pri lavi desann.

Dan menm laliny Msye Faure Lendi swar lo SBC in dir preski menm zafer.  Manda STC ti pou fer sir ki bann komodite de baz i aksesib e abordab.  Me par kont zis Onorab Pillay ki pa konpran sa.  Zis Onorab Sebastien Pillay ki pa konpran sa.  Sa pa fodre ni astronot vin eksplike.  Me Onorab Pillay i dan en konfizyon total!  Ladan menm in fer pledwari konmsi li menm avek Onorab Henrie pou pran son bann pwen summing-up.  Onorab Henrie pa fer sa fot.

Onorab Pillay i pli konfize ki zanmen.  Mr Speaker nou bezwen tonm lo en konklizyon for.  Si i lavi  i ser Sesel mon pa pou dir Parti Lepep i en middleman me wi Parti Lepep ki responsab, pou lamizer nwanr isi Sesel Onorab Pillay Parti Lepep e STC i form par ladan.  STC i form par pou met bann pri o.  E parey Onorab Ferrari ti dir lot fwa ki tou lezot marsan i kal anba.  Ler i kale nou Seselwa nou krwar sa son pri aktyel.  Me parkont non.

Mr Speaker mon fer en pti letour kot STC Sanmdi.  Mon soke wi Sesel pa kapab prodwir sa kantite zannannan pou nou konsonmasyon lokal.  Me mon soke pou mon vwar en zannannan Sud Afrique ki lavale R7, dan en STC i vann R150!  Mon pa konnen si i rekolte lo lalin, ki mannyer in pou arive me R150.  Alors sa pa byen.

Mr Speaker STC i pou bezwen redwir son kou loperasyon parey Onorab Henrie ti dir.  Mon pa anvi al dan sa bann gran, gran statistik e sif.  Me lefe i kler.  Lefe i kler ki son kou loperasyon parey Onorab Hoareau in dir, si ou kou loperasyon i o kote ou pou transfer sa?  Ou pou bezwen transfer sa lo konsonmater.  E pa lot ki lepep Seselwa ki pou soufer.

Alors STC i bezwen konsilte Onorab Hoareau, pou li vwar ki mannyer i pou desann lo son bann kou loperasyon ki nou Seselwa  nou bann frer ek ser i ava benefisye.

Nou vwar ki STC ankor kot i responsab, pou lavi ser zis mon pran zot Builders Depot kot bann materyo konstriksyon.  Apre en pti letour mon vwar ki STC tou son bann materyo konstriksyon i pli serye ki tou lezot lakonpannyen ki pe vann dibwa.  Par egzanp  2 par 2, 3 par 2, 4 par 2, plywood eksetera.  Tousala – tousala zot in anvoy R2, R1 a R2 an plis.

Ankor vizavi kou loperasyon.  Nou vwar ki middleman pe ankor pe zwe en rol.  Ler mon get lalis 5 pei ki prodwir diri ladan top 5 pei ladan i annan La Chine, L’Inde, Bangladesh, Vietnam epi Thailand.  Mon pa’n vwar Dubai.  Yet again nou vwar STC pe aste diri Dubai.  Ankor nou vwar en middleman nou pa konnen lekel ki benefisye.  Si i annan Seselwa oubyen non.

Ler mn koz lo STC mon mazin Madanm Uzice anler La Louise, ki ti toultan krwar ki STC ti pou ed li pou ganny len meyer lavi.  I ti toultan krwar ki STC anmenn manze pli bonmarse.  Me apre ki  in ekout Onorab Henrie yer swar ler i call mwan i dir, ‘’Zot vre Parti Lepep in bat mon latet!’’

Mr Speaker mon kontinyen mon anvi ankouraz mon anvi lo Mosyon in dir ankouraz pou konpetisyon.  La mon vwar kot STC i ede pou nou prop ser ek frer Seselwa fermye.

Par egzanp mon annan en fermye ki ‘n koz avek mwan yer.  Kot in dir mon tou le semenn i ti pe donn STC 500kilogranm tomat.  En sel kou STC i deside pa pran ankor son tomat.  Enporte pou menm pri lo letazer sorti aletranze.  STC i bezwen ed nou bann frer ek nou bann ser fermye par pran zot fri avek legim, koumsa i ava ankouraz nou fermye pou prodwir e parkont pri lavi osi i pava desann.

Mr Speaker STC i bezwen retourn lo son manda aktyel.  Lo son manda aktyel pou fer bann pri komodite debaz abordab.  Me ogmant menm lalis sa annan komodite de baz ki nou bann frer ek ser Seselwa  ki a benefisye.

Mr Speaker pou konklir mon pou donn sipor Mosyon prezante par Onorab Henrie, e mon pe ankouraz tou mon bann koleg fer parey.  Mersi.

 

MR SPEAKER

Mersi Onorab Roucou.  Onorab Sophola.

 

HON NOLINE SOPHOLA

Bonzour e mersi Mr Speaker.  Tou Manm Onorab, tou dimoun ki a lekout espesyalman zabitan La Digue ek Zil Pros bonzour.

Mr Speaker tou Seselwa san eksepsyon ti a swete vwar pri lavi desann dan Sesel.  Me nou tou nou konnen ki sa i pa depan zis lo en fakter en dimoun oubyen en lorganizasyon.

Mon ti dir dan mon lentervansyon lo Diskour Leta Lanasyon, ki i annan en levantay fakter entern osi byen ki enternasyonal ki atase avek pri e ki zot pa statik.

Mr Speaker, mon apresye ki sa Mosyon lo kou lavi i parmi bann premye pou ganny diskite dan sa Lasanble sa lannen.  Akoz kou lavi i vreman kritik pou tou kous popilasyon.

E mwan mon an faver sa tou demars ki pou ganny fer an bonn  fwa pou ede redwir kou lavi.

Mr Speaker mon lentervansyon pa pou tro long.  STC konmela i annan en model biznes, ki deza pe anmenn serten benefis pou tou sitwayen.  Me mon senserman krwar ki annan ankor bokou pou, fer pou nou kapab vreman ed nou bann frer ek ser.

Avan tou i neseser ki nou konpran byen rol STC.  STC i bezwen azir konman en lorganizasyon komersyal ki zwe rol enportan dan devlopman sosyo ekonomik pei.  E ki son manda se pou asire ki toultan i annan ase komodite debaz e ki osai vann a en pri rezonnab.  Vedir ki zot pe fer en pri profi ouswa ki parfwa zot pa fer ditou.

Sa ki enportan dan tou sa les ki i kapab kouver son depans pou anpes li faid e pli enportan pou li pa demann larzan Bidze.  E ki bann konsonmater i ganny zot komodite.

I vre ki STC i annan en evolisyon dan kalite marsandiz ki  pe ganny vann.  Pou mon sa i byen.  Akoz Seselwa oi a kapab fer zot shopping under one roof.   STC in deza eksplike devan sa Lasanble ki pa tou konmisyon ki i vann ki fer vini li menm.  I osi en debousman pou lezot enportater ki depoz zot marsandiz laba ek kot STC tou dimoun dan kours lasosyete i al laba, an kontan bann propriyeter biznes ziska sa dimoun retrete.

Mr Speaker loter Mosyon i dir ki fodre ankouraz konpetisyon lo marse.  STC i deza an konpetisyon.  Fodre tenir kont ki  pa zis STC ki vann zis marsandiz dan pei.  I annan lezot enportater.  I annan lezot laboutik ki bann dimoun i al aste zot prodwir apard ki STC. 

Eski sa bann marsan ki pe fer cartel zot pa devret zot osi revwar fason  fer zot biznes dan pei?  Olye ki zot groupe e fer pri parey partou pou zot prop benefis.  Se sa ki mon ti pe koz lo la apre Diskour Leta Lanasyon.

Ti a bon si  nou demann sa bann enportater osi pou annan en outlet kot piblik Seselwa i kapab aste an gro a en pri abordab.  Ou an touka ki mwen ser e ler zot aste an detay.

Mon krwar ki si  nou oule nou pri komodite i abordab, tou marsan, tou politisyen san leksepsyon i bezwen donn en koudmen dan sa lalit pou redwir kou lavi.

Mon byen kontan ki loter Mosyon li osi, pa’n demande ki Hyper Market STC i fermen.  Mon kontan ki konmela nou pe ekout reaksyon piblik.  Nou tou nou ‘sanse’.  Nou tou nou sanze sorry. 

        Zis mazinen si Hypermarket i fermen e dimoun li al aste zis serten komodite kot langar lekel ki pou al fer shopping laba ?

Deza nou pe al kree en class malere ki zot, zot al aste marsandiz kot Langar.  Kote fermye pou met zot prodwir pou vann?  Kot Langar?  Marsan osi pou al aste kot langar, zot deza ape fer li.  Lekel ki pou kontrol pri an detay apre?  Mwan mon plito dir ki STC i la pou ede kas en pe sa i cartel donn rekour Seselwa an sa ki konsern marsandiz ki abordab.  E Seselwa i kapab menm aste an gro kot STC.  Lekel sa marsan ankor ki pou pare pou vann son marsandiz an gro, pou rann sa servis ek en bon benefis piblik Seselwa?

Mr Speaker sa Mosyon i al bokou pli lwen dan bann distrik kot i annan en pti brans oubyen en outlet STC ki zabitan i kontan ale?

La Digue osi i annan en brans e mon remarke ki i byen ganny frekante par Seselwa osi byen par etranze.

Son pri i varye.  Malgre ki i annan en pti diferans dan serten pri konpare ek pou Mahé.  Me komodite de baz i parey ek pou Mahé.

Marsan i aste an gro apre zot al met dan zot magazen.  Byensir zot bezwen rod en profi. Me Digwa i benefisye bokou avek STC.

        Mon krwar ki STC i zwe en rol kle, pou lede amelyor kou lavi dan pei.  Malgre ki mon ti a swete ki zot ti a kapab azout ankor plis komodite lo sa lalis debaz pour ki i annan  plis lenpak pozitiv lo kou lavi.

Pou sa kapab arive mon zwenn ek loter Mosyon pou ansanm revwar ki mannyer pou redwir en pe depans kot STC e fer ankor plis rannman pou al ver konsonmater; sirtou ‘ki loter Mosyon napa lentansyon pou ferm, Hypermarket.

Alor se gradyelman ki

nou pou kapab santi son lenpak pozitiv lo nou popilasyon si non pou annan, plis konpetisyon pri.  Mersi Mr Speaker.

 

MR SPEAKER

Mersi Onorab Sophola.  Onorab Larue.

 

HON FLORY LARUE

Mersi Mr Speaker.  Bonzour tou dimoun.  Sa Lasanble in ekout lepep Seselwa letan i kontinyelman pe demande ki  nou rod bann solisyon pou anmenn sanzman dan fason fer pou ki zot kapab benefisye avek en base dan kou bann komodite manze a en pri pli abordab posib.

Dan sa Lasanble lannen pase, nou’n anmenn diferan Mosyon kot nou’n koz lo size STC, nou’n demann pou zot atraver zot Board pou rod bann fason ouswa solisyon pou fer sa vin en realite pou Seselwa.

Nou’n avek en nouvo perspektiv demann STC pou re get son manda orizinal pou fer son prodwir aksesib ou tou lakour e anmenn prodwi a en pri pli meyer marse.

Me parey Prezidan menm in dir i pa ekout nou bann lentervansyon i paret STC osi i pran menm lelan.  Sef i dir tou i fer parey.

Nou, nou pa dan Egzekitiv nou vin anmenn mesaz pou zot me zot pa oule tande.

Nou koz lo sa ki ansyen CEO in demisyonen.  E lenpresyon ki presyon ti tro for.  Mwan mon’n konpran ki sa madanm pa ti pare pou sanz striktir shopping experience STC e i ti pli vomye konsantre lo son magazen ki vann lenz ki osi baze dan Hypermarket pa lwen ek laboutik meb Green Island Construction Company.

        Onorab Henrie pe sey montre ankor atraver sa Mosyon, akoz ki fodre STC i sanz son striktir pou retourn dan son manda akoz son lentere nou lentere lo sa kote latab, i pirman pou  benefis pep Seselwa an traver disponibilite en landrwa kot en fanmir i kapab aste tou bann marsandiz debaz a en pri pli meyer marse dan pei antye.

Mr Speaker sa lentervansyon ki Onorab Henrie in fer in enn vreman detaye atraver evolisyon STC par montre bann sif biznes ki sa lakonpannyen in fer pandan son rezolisyon.

Enn bann detay ki’n vreman sok mon sa depans ki STC in fer apropo son bann lokasyon ki i peye.

Tou bann lezot Manm i repet sa.  Nou’n tande ki Apre STC in ouver Homewares Builders Depot e Hypermarket an 2014 e 2016, nou’n vwar en logmantasyon R38milyon.

Letan nou evalye sa nou bezwen demande si sa Board sa lakonpannyen i pran bann desizyon responsab.

Me Onorab Sebastien Pillay i dir se nou pe rod fason pou benefisye nou bann zanmi ouswa group siporter.  Alor mon bezwen get pli pros.

Mr Speaker eski zot in sezi byen letan Onorab in dir Onorab Henrie in dir ki STC i bezwen lwe en lokasyon La Digue avek Mr Gregoire Payet pou R60mil par mwan ki fer R720mil par an?  Ki La Digue Gouvernman apre ki zot in partaz later L’Union Estate, SMB pa in ganny en bout ki apre STC ti a kapab benefisye.  Olye fer aksesib en morso later pou sa antite ki son manda pou fer manze – manze Mr Speaker vin pli bonmarse dan sa pei, zot kontinyen fer sa lakonpannyen pey bann gro lokasyon, olye donn li en bout later Gouvernman.  Kot STC warehouse i ete lo La Digue i pa pou zot.  Me i en lease avek Gouvernman ki date le 9 Mars 2017 pou 5an a en kou R108mil,  R108, 720 par an.  Me tou sa later otour Mr Speaker en total plis ki 5mil met kare dan sant La Digue ki mon kontinyen repete, i pou Parti Lepep.

Onorab Sebastien Pillay lekel ki’n rod benefisye son lekor?  Mr Speaker nou’n tande ki STC pe pey Parti Lepep R850mil par mwan pou son Builders Depot.  Si sa Gouvernman ti annan lentere Seselwa aker zot ti a rann propriyete Leta e sa larzan ki fer en total R10. 200milyon par an ti a retourn dan pos Seselwa olye dan pos Parti Lepep.

 

(APPLAUSE)

 

HON FLORY LARUE

Eski sanmenm sa donn loportinite nou bann dalon Onorab Pillay ?   Ou ki sekreter pou Kominikasyon lo Komite Santral Parti Lepep.

Mr Speaker an Me 2014 Gouvernman Parti Lepep ti pran 2 bout later konble – 2 bout Mr Speaker, de.  Zis obor Builders Depot ki obor Highway ki ozordi i ankor vid, parey sa bann ki ou vwar Praslin ki zot in depans R2milyon lo la.

E zot in pass Bay ek Parti Lepep pou 60an a en pri zis R131mil par an.  Me sa menm Gouvernman i aksepte ki en Lakonpannyen Leta i pey en lokasyon plis ki R10milyon par an dan en antite prive en parti politik ki li menm li Mr Speaker.  Me zot Mr Speaker oli good gouvernance dan sa zistwar?

Zot in annan plis ki 1an pou sey rektifye sa bann problenm Mr Speaker.  Me non zot pa’n kapab Mr Speaker.  E la Onorab Pillay a dir nou vin pli kler pou vin dir nou, ki nou oule avek STC?

        Me i pa vwar ki fodre fer?  Menm kan nou’n dir zot, nou’n vwar klerman ki STC i pa la pou delivre en servis me pran isi kont Parti Lepep direkteman Mr Speaker.

Nou ti a ekspekte en Gouvernman responsab pou met sa 3 bout later konblaz ki Seselwa li in ser sang pou peye ansanm, e zot in fer li disponib pou STC fer son devlopman, zot pa ti vwar zot lekor pe sey pe pey sa groser rent si zot landrwa ti pou zot.  E Seselwa ti pou benefisye.  E non pa nou bann dalon Onorab Pillay!  Dan ou ka ou Parti ki benefisye lo tou le 3 bout later ki ti pou pep Seselwa me zot in pran akoz zot ki dan Gouvernman.

Mr Speaker letan nou vwar rent ki STC i bezwen pey Hypermarket la ou vreman bezwen dir ki Sa Gouvernman in kas ek Kwen!  Sa batiman kot Hypermarket i pou en lakonpannyen pou Gouvernman.  Pou Gouvernman Sesel ki apel Seychelles Seychelloise D’Investissement.

Eskiz mwan Onorab Pillay mon’n mal lir wi.  Société Seychelloise D’Investissement mon repete, mersi.  Mon kontan ou fer mon repete.

Li son manda i pou zer bann lakonpannyen, ouswa bann par ki Gouvernman i annan.  Lo son Sit mon vwar en lalis tel ki STC of course, sa ki envestir ladan Ile Du Port Handling Services Ltd.  Zot pe rod dimoun pou aste share.  Thai Union, L’Union Estate, IDC, Seychelles Postal Services, SEYPEC, Petro Seychelles, Paradis des Enfants e Land Marine PTY Ltd. 

        Yer Onorab Henrie ti mansyonn Land Marine pou kolabore pou get bann kou servis ki ofer STC lo Por.  Zot pa lwen dan sa zafer.  Zot lanmenm la avek Société Seychelloise D’Investissement.

Land Marine i osi en lakonpannyen ki group CORVINA enn bann pli gran group biznes ki egziste Sesel ki mon’n mansyonnen dan sa Lasanble lannen pase e byen profitab i osi annan 15poursan par ladan.  So tousala zot menm, menm.

Mr Speaker Gouvernman ti akimil en det atraver bann lenvestiser ki ti envestir dan sa proze Hypermarket i ete.  Espesyalman akoz sa bann envestiser ti servi sa menm later konble pou nou,   konman garanti pou fer biznes.

Alors letan i ti rankontre problenm, later konblaz ti pou Gouvernman in re ganny sezi par labank ki pou Gouvernman, Gouvernman i annan 70poursan par ladan alor pou li menm, menm.  Zot in pran sa det pou zot sa Société Seychelloise D’Investissement – zot in pran sa det pou zot menm avek Nouvobanq, alor prezan zot bezwen bous sa trou.  E zot met en antite Gouvernman dan sa landrwa, apre zot fer en antite ki STC pey zot, zot rent. 

E li son vizyon Société Seychelloise D’Investissement, se pou maksimiz retour pou bann ki annan par dan sa bann biznes, ki mazorite i kontrole par Gouvernman.

Alor maksimiz profi pou son lekor.  Dan sa ki mon fek eksplike mon vwar en zafer retourn an ron.

Mr Speaker sa bann lakonpannyen ti pran en desizyon pou met sa gro siny ki alimen lo sa batiman Hypermarket sa lakonpannyen Société Seychelloise D’Investissement a en kou ki nou konpran ti kout R240mil sa lansenny ti koute!  I pran sa larzan ki aste ponmdeter avek pou met en zoli siny lo son batiman.  Ou ki peye sa batiman !  Sa Gouvernman pa enterese fer desann pri lavi Mr Speaker.

Mr Speaker tousala i bann rezilta bann desizyon par dimoun ki dan Gouvernman; en Gouvernman ki 8 Minis, e 4 MNA lo Komite Santral Parti Lepep.  Oli profi lentere?

Zot tou zot responsab pou sa bann desizyon ki ‘n ganny pran sa Gouvernman ki li menm in dir zot pe rod solisyon pou fer desann pri lavi.

Mr Speaker nou, nou ganny akize ki nou le ferm STC.  Be dan ki bout sa Mosyon ki sa in ganny dir mon pa vwar.  Onorab Sebastien Pillay i dir ki nou bezwen vin dir klerman ki kalite striktir nou le.  Me si apre tou sa zefor ki Onorab Henrie in mete, pou montre klerman ki dan sa form ki STC pe fonksyonnen ozordi Mr Speaker i pa dan lentere sa group dimoun ki sipoze benefisye avek STC ki ankor ki nou kapab met devan.

Onorab Leader Lopozisyon in dir ki solisyon i dan lanmen Egzekitiv.  Nou vin met bann difikilte pei devan e nou pronons nou lekor lo bann solisyon.  Nou fer bann travay

pou montre ki bann opsyon ki devan nou

Piblik in dir zot oule en landrwa ki garanti en pri pli ba dan pei pou bann komodite de baz.  Zot pa pe vin rod en shopping experience me en fason pou abes zot depans le mwan e zot le li vitman.  Sif 2013, 2014 in montre 40poursan popilasyon lapovrete Sesel.  Nou’n ganny dir ki nou pep pa an bonn sante, e souvan sa i al ek kalite manze ki dimoun i annan ase avek.

Mr Speaker kot son Head Office lo Latanier Road STC i deza annan bann fasilite, bann gran warehouse enorm kot tou son marsandiz in fini ganny stoke dan en fason, ki pa pou tro difisil pou konverti li dan en stil nou no frills shopping parey LIDL.

Mon krwar Mr Speaker ki Onorab Basil Hoareau pa’n konpran ditou propozisyon sistenm STC.  La i le fer pli kontrol.  Akoz zot pa sey sa fason fer, ki direkteman a zot porte?  Nou pou adopte pri kontrol letan bann servis enplimant sa napa ase staff deza?

Onorab i oule nou adopte stil Maurice e adopte en dimoun ki get koripsyon dan son sistenm.  Me akoz i pa dir nou ki li i pe fer konman en Manm Parti Lepep, pou eksplik nou sa ta manboulouk ki nou pe koz lo la?  Ki i kapab fer pou eksplik son bann koleg parti ki bout ki koripsyon e osi idantifye lentere Onorab Pillay?

Mon apresye Mr Speaker anver ou ki Onorab Hoareau pou aksepte ki koripsyon Onorab Basil Hoareau ki ou aksepte ki koripsyon i ogmant pri lavi dan pei!

Wi Onorab nou pe sibir sa bann konsekans koripsyon dan tou kwen nou pei.  I normal zot, zot pa vwar e zot pa konpran Onorab Pillay, Akoz zot, zot in benefisye.  E zot ankor pe benefisye.

Mr Speaker sa bann fasilite i la.  Me STC i bezwen reget sa bann servis ki pe ofer.

 

(Interruption)

 

MR SPEAKER

Order!  Order!  Onorab non, non, non, non Onorab Pillay, Onorab Pillay, son parol  in dir zot – i pa’n nonm personn.  Non in fer referans avek ou.  Non, ler in dir zot i pa’n nonm personn. Ok?  Ou non in ganny nonmen avan me napa nanryen pou fer i pa vin direkteman lo ou.  Ok?  Onorab kontinyen.  Kontinyen Onorab.

 

HON FLORY LARUE

ok, Mr Speaker mersi.  Mon kapab rekonmanse si i pa’n konpran.

 

MR SPEAKER

Non kontinyen Onorab Larue.

 

HON FLORY LARUE

Ok Mr Speaker mersi.  Sa bann fasilite i deza la.  Me STC i bezwen reget sa bann lezot servis ki i pe ofer ki pa form parti son manda e delivre bann pri ba.

Mr Speaker annou parey evant larou.  Si zot deside servis sa model no frills parey lakonpannyen apele Ndle parey mon’n dir, zot kapab reprodwir li dan bann rezyon otour Mahé tel ki dan Nor, Was, Les e Sid e lo nou de Zil Pros.  E apre zot bezwen get dan en servis transportasyon pou kolekte sa servis avek  kominote.

Mr Speaker en biznes ki fer zis 1.68poursan profi Mr Speaker letan nou get son turnover i kler ki gaspiyaz,  move planifikasyon, bann lentere egois e la nou vwar lentere sa parti politik o pouvwar ki’n abiz konfyans sa pep.  Parti Lepep i annan ase lokipasyon pou clean up zot act   Zot bann akt egois ki zis yer Onorab Henrie in devwale pa fer sans pou bann manm lot kote, sanmenm sa STC ki zot fe krwar zot pa pou sanz son fason fer biznes pou ed malere.  Kan sa ler la zot pe zis protez zot bann byen mal aki.

Mr Speaker olye met presyon lo zot Gouvernman pou aret sa bann labi lepep Seselwa, Chairman Brans Parti Lepep ki fek ganny elekte sorti Praslin in vin tir mon portre kan mon ti la pe fer resers dan STC Hypermarket. 

 

(Interruption)

 

HON FLORY LARUE

Mwan mon vin fer mon louvraz.  Li i vin met demagozi dan son solisyon en parti serye.  Olye koze pou amelyore zot prefere  defann  sa ki mal.

 

(Interruption)

 

MR SPEAKER

Ou lentervansyon fer referans avek Mosyon.

 

HON FLORY LARUE

Mon ti STC pe fer mon resers Mr Speaker mon ti pe fer mon travay.

 

MR SPEAKER

Wi.  Wi. Wi.

 

HON FLORY LARUE

Mon pe ekout Speaker.

 

MR SPEAKER

Order!  Order!  Fodre ki ou lentervansyon i refer to the Motion ok?   Ale kontinyen.

 

HON FLORY LARUE

Eskize Mr Speaker mon ti pe fer referans ek mon bann resers ki mon ti pe fer.  STC i dir pa tir portre dan son magazen.  Sa msye Praslin i vin kas Lalwa.  Sa ta sekirite,

R30mil par zour pa ti pe fer son travay sa zour.  Me STC akoz i anpes tir portre?  Etan  annan bokou dimoun in servi  portre bann defayans servi sa letablisman lo medya sosyal.  Olye akey sa bann lobzervasyon sorti kot konsonmater direkteman ankouraze e amelyor servis, zot  adopte en sistenm Diktater.  Sa osi en keksoz ki zot bezwen sanze.  Ekout piblik Seselwa zot la pou sa zot.

MOTO sa lakonpannyen i STC is Values your trust.  ‘’STC i met valer lo ou konfyans.’’  Mon kit sa la Mr Speaker.

Eski sa ki Gouvernman pe sipoze pe fer?  Gouvernman sa bann fasilitater i la pou ed son pep viv dan pli bon  opsyon posib.  Me nou vwar nou pe fer biznes  sekter prive olye rod en fason pou li vin en n ki delivre lo son bann promes.  E la son manda i kler se pou anmenn bann prodwir a en pri pli meyer marse pou tou Seselwa.  Mersi Mr Speaker.

 

(APPLAUSE)

 

MR SPEAKER

Mersi Onorab.  Onorab Churchill Gill.

 

HON CHURCHILL GILL

Mersi Mr Speaker.  Bonzour.  I annan bokou ki’n ganny dir lo sa Mosyon ki tre enteresan.  E i en size mon krwar i byen ki nou Lasanble i adrese.  Akoz i pa pou kit nou sa size toultan nou pa vwar en solisyon.  Nou pou vwar nou tanzantan nou pe koz lo la.

Me selman mon krwar avek bann pwen ki’n ganny kontribye ozordi mon osi avek mon kontribisyon mon mazin kekfwa Board STC avek son management zot pe ekout nou e zot a kapab tir serten sizesyon ki nou mete i a kapab amelyor sityasyon.

Mon krwar ki loter Mosyon avek son wording kot sanz model biznes STC, mon  pa vwar problenm la.  Me solman mon dakor avek li ki kou loperasyon, i ekstrememan egzorbitan.  Akoz dan nenport biznes ler ou annan en turnover ki R1bilyon.  E ou net profit i 1 poursan. i montre poudir i annan en problenm serye.  Tre serye.

 

(APPLAUSE)

 

HON CHURCHILL GILL

E mwan ki annan serten konesans dan sa keksoz mon konpran sa tre byen.

E mon krwar poudir son lakle kot problenm i ete se kot sa marsandiz pe sorti.  Akoz tou determinasyon pri lo sa marsandiz,  i konmans la.

Alors pou mwan mon vwar pou dir STC i bezwen revwar son sistenm  Procurement –  vwar en fason ki nou kapab ganny keksoz, ki a lafen dizour  ler i ariv lo letazer, nou pa pou vwar sa bann pri ki nou pe vwar ozordi.

E dan son model biznes, i annan sa mo ki nou servi dan biznes ki nou dir market mix, mon krwar i normal pou annan akoz ler ou pe vann komodite debaz  lo serten pri e sa i fer ki pou base ou turnover vann sa bann keksoz debaz.  E prezan ou bezwen annan lot kalite komodite  ki pou siport ou lo bann lezot kou loperasyon ki ou pe fer.  E dan sa sans lanmenm la ki mon krwar pou dir sa kou loperasyon i annan en problenm.  E ler mon get sa kantite depans an term keksoz ki pa relye avek sa komodite, mon vwar pou dir i annan en problenm la.  e la mon pe koz lo sa bann kou bann landlord e kou sa bann lease later.

E parey in ganny fer sorti avan, ou pa kapab pran en later 3an pase pou ou fer konstriksyon, me selman ou bezwen peye tou lemwan.  I pa fer dibyen ou cashflow. 

        Alors sa i en landrwa kot STC i bezwen deside, si i devret kontinyen sa nide pou servi sa bann later, omye si i krwar  i annan en lot opsyon i  kapab servi,  kot i rann sa bann later e sa kou deza i sorti.

Akoz menm si sa bann cost dimoun pa konnen me zot la.  E savedir (1) sa bann hidden cost i bezwen ganny revwar, pou ki sa bann kou lo sa bann komodite i ava otomatikman desann.

Apre nou bezwen annan ler nou pe fer procurement nou pa kapab annan nou zis 1 ou 2 konpannyen ki nou fer biznes avek.  Akoz sa pa donn nou loportinite pou nou kapab vwar ki bor nou kapab pli benefisye.

Alors sa i en area ki STC i bezwen revwar.  E apre eski sa payroll, sa groser payroll ki STC ki i annan,  eski i pa pe fer en lefe?  Napa en fason kot nou kapab revwar sa ?  La mon pa pe dir ki dimoun i bezwen perdi zot plas travay.

Me solman annou vwar ki fason.  Si i annan okenn loportinite pou nou kapab, fer serten lazistaz la, an term – si kekfwa annan drwa annan nou 3 dimoun akoz ki nou bezwen 10 dimoun.

So annou revwar sa bann faon fer.  Petet sa i ava ed nou pou nou kapab fer desann ankor lo sa bann kou loperasyon.

Lo kou itilite, nou bezwen vwar tou sa bann keksoz ki  nou pe servi an term elektrisite ek delo.  Eski nou bezwen tou sa keksoz ki ozordi nou pe servi?  Oubyen napa lot fason ki nou kapab ganny sa bann lenerzi ki kapab ed nou pou koup lo sa kantite depans itilite ki ozordi STC pe vwar li pe fer fas avek.

Apre nou bezwen vwar ki oditer i annan pou dir dan sa loperasyon.  Akoz Minis Finans ti byen ler i ti dir nou i bezwen fer en operational audit.  Akoz dan sa i pou donn nou en sityasyon kler, kwa ki vreman pe pase laba e ki bann area ki vreman i annan bann depans egzorbitan ki nou kapab revwar.

Alors mon ti a swete ki la sa operational audit i fini ganny fer, ki nou dan Lasanble  nou ti a osi ganny en kopi e nou  osi mon ti a kapab kontribye ki fason nou kapab ede, pou nou adres sa bann problenm ki ganny sorti dan operational audit.

        e parey mon’n dir oparavan bokou keksoz in ‘ganny dir e mwan mon ti anvi anmenn en perspektiv biznes ki rantab an menm tan kot nou bann dimoun ki aste nou bann prodwi, zot pa vwar zot pe aste bann prodwir lo en pri ki tre o.  Akoz dan biznes i an nan fason fer kot sa i kapab desann, si son Management pe fer son travay byen.  Mersi Mr Speaker.

 

(APPLAUSE)

 

MR SPEAKER

Mersi Onorab Churchill Gill.  Just a quick mention; we are honored to have the Swedish Ambassador with us, and she’s here to pay a courtesy call on the two Leaders and myself.  And she came early and she decided to attend part of our Sitting this morning.  Welcome your Excellency. 

        With this we will take a Break and we reconvene at 11. 

        Nou pran en Break nou repran 11er bomaten.

 

(BREAK)

 

MR SPEAKER

Bon avan nou ti a repran nou travay mon ti a kontan prezant en pti leskiz, nou ti pe rankontre Anbasader La Suede se sa rezon ki nou’n ganny sa pti retar.  Nou ava kontinyen avek nou travay e mon annan Onorab Ernesta.  Onorab laparol i pou ou.

 

HON PAUL ERNESTA

Mersi Mr Speaker.  Bonzour Mr Speaker e tou Manm koleg Onorab e tou dimoun a lekout.  Mr Speaker mon pa pou long akoz tou pwen in fini ganny dir lo sa size.  Me avan ler mon konmanse Mr Speaker, mon pou anvi zis fer en pti remark ki boner Onorab Roucou in envit mon koleg pou asiz dan bor li lo son kote latab.  Zis mon a remarke ki SPPF – Parti Lepep ozordi i en parti ki evolye.  Me avek sa evolisyon i fer nou vwar keksoz dan en lot konteks.  Kot i annan pou nou kritike nou la pou kritike, pou byennet nou pep e nou la pou lager pou nou pep.  Se sa ki nou pe fer.  I pa vedir ki nou pe vin lo zot kot e latab.  Nou pe siport kot i byen kot i mal nou fer resorti.  Vwala Mr Speaker ki mon anvi fer resorti.

 

(Interruption)

 

HON PAUL ERNESTA

Tenir Onorab, tenir Onorab.  Mr Speaker mwan mon annan zis petet pou pwen konsiderasyon ki mon ti a kontan Onorab Henrie dan son konklizyon i pran kont ki pou nou kapab anmenn sa size pli devan, mon pou siporte sa Mosyon akoz en Mosyon ki pe koz byennet pou nou dimoun e kot pe anmenn en propozisyon pou ede pou fer rediksyon lo pri lavi.  Sa size STC, i non selman zis STC ki pou ede dan sa demars.  I en lapel pou tou, pou tou lorganizasyon e tou businessmen pou nou kapab ede fer desann pri lavi.

Mon ti a kontan ki Onorab i demann osi tou bann akter petet en lot Mosyon i kapab vini pli tar ki ava demann tou bann akter ki pe – dan lekonomi pou nou kapab sey zwenn ansanm.  Mon ti koz lo la dan mon lentervansyon, dan mon ladres, pou nou zwenn ansanm, revwar bann mechanism pou nou kapab ede pou fer vreman tou sa size ki pri lavi dan pei i desann.  E osi demann osi ki Minister Finans en proper audit, en proper audit i ganny fer kot STC pou vreman vwar tou sa ban fakter parey ki’n ganny fer resorti ki pe ede dan fer sa ban pri komodite lo marse e ti pe fer sa ser.

E mon krwar si en proper audit i ganny fer e i ganny adrese sa i pou osi ede.  Onorab Hoareau in propoz in pous sa nide i fer dezyenm fwa mon tann li koz lo la, pou annan sa lespri pri kontrol.

Mon krwar i ekstrememan enportan kot nou vwar sirtou lo bann komodite de baz i kapab annan serten eleman pri kontrol lo bann keksoz.  Akoz.  Zis en legzanp, annou get delo.  Kot ki fer delo la, anler Le Rocher i vann son delo lo wholesale R5 me i annan laboutik i pe vann R15 sanmenm sa boutey delo.

Savedir mon krwar si ti annan en proper  en pri kontrol lo la i ti pou ede pou kapab pa annan sa kantite profit margin ki ganny mete lo sa bann komodite.

Zis en delo R5 nou ti kapab petet vwar li pe ganny vann R7 ouswa R8 me pa R15.  Son pri i preski triple.  Mon krwar sa i osi ede dan sa demars Mr Speaker.

So vwala mon 2 pwen kot nou le  ki kapab anmenn plis sipor pou ranforsi kot pri kontrol i ganny etabli lo serten komodite de baz e bann biznes, Lorganizasyon i zwenn ansanm pou nou vwar ki mannyer nou kapab en bon mechanism pou kapab fer desann pri marsandiz dan pei.  E trwazyenm kot Minister Finans i fer en proper audit lo STC pou vwar tou sa bann fakter e thus ki i ava kapab ede pou fer desann bann pri bann komodite lo marse.  Mersi Mr Speaker.

 

MR SPEAKER

Mersi Onorab Ernesta.  Onorab Loizeau.

 

HON NORBERT LOIZEAU

Mersi Mr Speaker.  Mr Speaker mon osi mon panse mon pou kourt, akoz mon’n ekout bokou bann entervansyon avan ki’n pase.  E avek sa bann lentervansyon mwan mon’n vwar personnelman ki L’Egzekitiv i annan bokou pou fer lo kote sa size.  E mwan pou mon Mr Speaker mon anvi fer mon lentervansyon, pa dan en fason pou mon dir ferm STC.  Sa i pa mon lentansyon.  Mwan ki mon anvi vwar,  mon anvi vwar ki STC i vin en landrwa kot nou bann Seselwa ordiner i kapab ganny en bon deal, keksoz abordab parey Onorab Henrie in fer resorti dan son Mosyon.

Akoz STC ozordi Mr Speaker ou ale pa akoz laba i annan bokou, i annan bann keksoz ki pli meyer marse.  I annan lezot landrwa ki mwan mon’n pase ki annan keksoz ki ou kapab ganny en bon deal ki meyer marse.

E mwan mon al STC mon Mr Speaker. Mon fer mon konmisyon laba laplipar di tan letan me pa akoz keksoz i bon marse or pri i abordab senpleman Mr Speaker mon a laba akoz landrwa i gran i annan lespas, mon kapab pran mon trolley fer letour, fer mon konmisyon an pe.  Me selman sel problenm ki mon rankontre se ki ler mon ariv lo lakes avek mon trolley mon Bill i R6000.  Sel problenm ki mon gannyen laba.  Apard sa mon napa problenm.  E mwan mon’n pas dan lezot laboutik mwan. Ozordi, en legzanp.

Si kot SUMAS obor Barrel ti annan ase parking – dernyen fwa Onorab Prea ti fer mwan rekonnet sa ki kot SUMAS i annan marsandiz bon marse mon’n pase mon’n fer sa resers, si ti annan parking ti annan lespas, mon ti pou al laba mwan.

Le problenm se akoz sa kontrent parking ki fer mwan bouz STC, akoz i en pti pe pli konvenab pou nou.  Be Mr Speaker ler mon get Mosyon si vreman nou kapab sanz model SBC dan en bon fason, si nou kapab parey loter Mosyon in dir, fer desann pri lavi an sanzan sa model, par redwi kou loperasyon, ankouraz konpetisyon e fer desann pri marsandiz, pou Seselwa kapab ganny en bon deal, parey Loter Mosyon in dir.  Si nou reisi fer sa Mr Speaker mwan personnelman mon pou fyer, mon pou en boug ki kontan, e mon pou vwar ki mwan Onorab Loizeau Manm Elekte pou Bel Air pandan sa sizyenm Lasanble nou’n reisi fer keksoz ki byen pou nou pep.  Mr Speaker mwan personnelman se sa ki mon anvi vwar.  Mon anvi vwar ki ler enn – ki ler nou al STC nou kapab ganny en bon deal.  Pa zis pou mwan me pou bann dimoun ki nou, nou dir ki mwen fortinen ki nou, kapab al laba – shop.

Mr Speaker nou, nou anvi ganny en solisyon lo sa zafer pri lavi.  E se pou sa rezon ki nou isi lo sa kote latab, nou toultan vin ek en keksoz, vin ek en keksoz nou met devan.  Nou tal ater – parey Onorab Henrie in fer.  Onorab Henrie dan son Mosyon i pa’n dir ferm STC li.

Onorab Henrie pe sey rod solisyon ki mannyer pou nou kapab avanse.  Me parfwa Mr Speaker sa bann solisyon ki nou vin avek, posib i kapab pa enn ki pli meyer solisyon.  Me selman nou bezwen met keksoz ater.  Si nou santi i annan keksoz pe mal marse e se sa ki Onorab Henrie pe fer. E nou, nou konnen zot, zot pa pe tro fer sa.  Me nou, nou, nou pou toultan mete e atraver sa Mr Speaker nou’n ganny bokou bann propozisyon atraver sa Mosyon. Bann propozisyon konstriktiv.  Onorab Hoareau in fer bann – en lentervansyon siperb, kot nou vwar ki direksyon nou ale.

Nou tou nou anvi le meyer, e mwan mon osi si sa ki bon pou mwan i bon pou zot, e i bon pou lepep Seselwa mwan napa problenm.

Mr Speaker Onorab Henrie in fer bokou resers e mwan mon’n konmans ekout son lentervansyon ler mon ti pe vini dan transpor, akoz mon ti bezwen al depoz en keksoz irzan e ler mon’n get sa ta resers Mr Speaker ki Onorab Henrie in fer, dan lespas en semenn mon anvi dir ek lepep Seselwa ki Onorab Henrie napa nanryen malisye ki i pe panse lo STC. 

Onorab Henrie senpleman ler mon’n ekout li sa resers, Onorab Henrie in anvi vwar le meyer pou Sesel.  Onorab Henrie in anvi vwar ki pri lavi i desann dan Sesel.  E mwan se sa ki mon anvi Mr Speaker.  Mon anvi ki mon bann dimoun dan Bel Air kan i desann STC i kapab ganny sa ki i bezwen a meyer marse.  E kan i ariv ek son trolley, son trolley pa kout egzorbitan.  Mr Speaker sa mon pti kontribisyon ki mon ti anvi fer pou sa Mosyon.  Mersi.

 

MR SPEAKER

Mersi Onorab Loizeau.  Onorab Aglae.

 

HON EGBERT AGLAE

Mersi Mr Speaker.  Bonzour tou Manm Onorab. Bonzour tou pep a lekout.  Mr Speaker permet mwan pas mon kondoleans avek la fanmir Mahoune ki sa lensidan ki ti arive yer dan mon distrik Port Glaud.  Mon kondoleans avek la fanmir.  Mr Speaker Mosyon anmennen par Onorab Henrie i en Mosyon ki pe tous kou lavi e pou mwan i en Mosyon ki i pa merit fini la.

Sa Mosyon mon santi i bezwen ganny swiv par lezot Mosyon ki pou kapab konbat pri lavi.  Sa Mosyon tousel i pa ase.  Pou mwan mon pa ase konvenki ki i ase pou nou tackle sa problenm me i en pa ver en bon direksyon.  Mon dir sa Mr Speaker akoz STC ki enn bann pli gran enportater komodite dan pei.  E lobzektif STC depi son kreasyon SMB, STC bann letan ki mwan mon mazinen sete pou asire ki i annan komodite debaz e stokaz pou at least trwa mwan pou pep Seselwa kontinyen sirviv an ka i annan okenn sok mondyal ki arive.  Me pou STC kapab kontinyen fer sa byensir i bezwen annan li en lokasyon loperasyon.  Nou ‘n tann nonm bokou lo warehouse; nou’n tann nonm bokou lo propriyete e an mezir ki popilasyon i agrandi STC i bezwen kontinyen ogmant lakantite volim ki i bezwen pou supply sa pep.  E byensir i normal ki ler ou annan ou diferan lokasyon i annan son kou ki vi avek.

Pou ou kapab maintain en warehouse ou bezwen annan bann fasilite lenerzi, elektrisite.  Ou bezwen annan sekirite.  Ozordi nou koz lo voler, ou bezwen annan sekirite ki la pou asire ki tou sa bann komodite ki tou sa bann komodite ki ganny store i ganny reste la byen ki pa pe ganny vole.

En lot pwen enportan lo STC Mr Speaker se ki lobzektif STC onorab Afif i la ozordi sete pa pou fer profi.  Pa ti son bi pou fer profi pou asire ki bann komodite i la.  Ozordi nou’n koz STC pe fer li en profi, en turnover 1bilyon me en profi 16bilyon ki bokou nou ki lot kote pou li i pa normal.

En keksoz enportan se STC pa pe gannyen subsidy avek Gouvernman parey ti le ka dan lepase.  Sa i en fe.  E si ozordi STC li i deside pou li dan le menm tir serten subsidy fodre nou rekonnet sa.  I annan serten hidden subsidy ki egziste ozordi ki STC pa pe met devan me i pe abzorbe.          (1), I transportasyon.  Transportasyon nou koz Praslin, la Digue.  STC i delivre marsandiz i anmenn dan ban lokasyon kot ti annan bann franchise.  Tousala STC i pa Bill me selman i annan en kou ki atase avek e STC pa pe met devan.  I form par dan sa 1bilyon turnover ki li i fer.  Mr Speaker, STC i la pou asir stabilite serten pri komodite debaz.

En legzanp, annou koz lo dile.  Dile i en komodite ki very fluctuate li.  Nou’n vwar dan lepase dile in monte akoz in ariv serten fenomenn deor.  Annou pran en legzanp parey en pei parey La Chine ki annan li 500milyon Sinwan.  Si demen son Prezidan nou konnen La Chine i annan en disiplin ki ler son Prezidan i koze son pep i ekoute, i dir fodre tou mon zabitan mon sitwayen i bwar 2 ver dile par zour, ki sa ki pou arive.

Nou pou vwar en hike enorm dan kou dile lo nivo mondyal.  Me li STC li ler sa i arive i abzorbe sa bann kou li i pa pass on the bulk.  Nou pa pe ganny sa real price.  Si i pou met R2, R3 an plis ki serten in koz lo la in konpare poudir i annan outlet pe vann R2, R3 an plis STC pou li en pti pe pli o, me si STC li i deside atraver serten sa bann komodite de baz met the real price pri pou monte.

En lot keksoz ki nou’n koz lo la se ki nou vwar poudir i annan serten marsan lezot enportater apard ki STC ki li i kasyet anba sa pri reste zis par anba sa benchmark.  I normal sa.  Akoz STC se li ki pe balans sa pri.  I reste anba akoz i konnen si i mont pli o, i pa pou vann son prodwi so i kal anba.

Mr Speaker i enportan pou nou konpran sa ki pe pase la.  Sa Mosyon pe dir i en Mosyon ki bon me selman annou pa tret li an izolasyon.  STC tousel pa ase pou fer desann pri.  En fakter enportan se annou koze osi lo to lesanz.  STC i bezwen deviz pou fer vini son prodwi.  Lo Leta Lanasyon nou’n koz lo la.  Bokou Manm in diskit lo la.   Be si to lesanz i kontinyen annan stabilite pa zis STC ki pou ganny afekte lezot enportater pou ganny afekte.  En lot fakter ankor ki si nou bezwen touse apre ler nou koz lo bann Mosyon parey annou koz en kou lo fuel osi.  Annou vwar ki mannyer si Gouvernman i bezwen fer redwir tax ouswa annan en lot supplier ki kapab vin donn konpetisyon fuel dan pei sa osi  a ede ki si nou pe koz STC son kou elektrisite i above 1,2 million parey in ganny dir.  Be si nou kapab ganny en besman dan pri karbiran definitivman son loperasyon STC i desann.

En lot laspe enportan Mr Speaker se bann rental.  Nou’n koz lo rental ki STC i bezwen pe peye tou le mwan.  De la mon ti a kontan ki Minister Finans nou annan – STC i annan en Board zot zwenn ansanm si fodre al re negosye serten sa bann Lagreman lo kote rental zot a negosye.  I form parti dan sa prosesis sa pou fer pri desann. Apre i ava pass on sa ban pri si in desann avek son besman dan kou loperasyon nou a vwar en pti pe rediksyon dan kou loperasyon e pas atraver son bann komodite ki i vann.

Mr Speaker annou osi pa bliye ki STC i bezwen egziste li.  Menm si demen nou sanz son non, nou bezwen annan entity parey parastatal anba parasol Gouvernman ki pou asire ki i annan en kontrol lo komers sirtou atraver bann komodite debaz.  Akoz si nou’n koz lo liberalizasyon (eskiz mwan), lekonomi ouver ki fer mwan rapel ki an 2008 STC ti sorti dan biznes Hardware, dibwa, tol i ti sorti ladan li.  Me ki nou ti vwar pri serten sa bann komodite ti napa en kontrol. Seselwa ti pe kriye e ti napa tou.

Ti annan ti napa tou, pa ti pe kapab cope avek volim.  E apre STC in retournen e ler i n retournen Seselwa i n grennen in al laba.  Savedir nou merite annan bann keksoz parey e bann servis parey.  E byensir nou bezwen vwar osi ki mannyer ki li STC i egzers son loperasyon procurement.  I enportan sa.  Bokou in ganny dir lo middleman.

Eski pa in ler pou STC li menm ankor SRC i ava annan en rol pou zwe, Minister Finans i ava annan en rol pou li zwenn ladan, vwar tou sa bann sours kot STC pe ganny son supply.  Annou vwar si kot i annan middleman annou koupe.

I annan ki pa pou kontan petet pa pou benefisye me si nou care pou sa pep annou vwar annou koupe al direk kot sours i konsernen e la nou a konnen si vre STC pe ganny the fair deal ouswa STC pe azir malonnet dan en fason  ou en lot.  Mr Speaker nou bezwen annan en balans parey nou koze nou dir annan fairness.  I enportan pou annan fairness.  STC i osi aste serten prodwi avek enportater lokal.

I osi pran serten prodwi avek nou bann pti dimoun, nou bann pti fourniser lokal pou li met dan son outlet pou li vann.  I enportan sa.  Annou pa blok sa.  Me selman i annan serten pri ki STC ler i pe aster avek bann lezot enportater ki pe fer vini deor, i aste i met dan son laboutik li i napa gran kontrol lo la li.  I zis met en pti profit margin pou asire ki i soutenab, me pou mwan sa ki enportan ankor atraver sa Mosyon se annou get osi ler nou pe get STC ozordi son loperasyon demen nou bezwen al get sa bann lezot gran enportater ki pe fer vini.

Nou vwar super market i ouver mon ti dir dan mon Leta Lanasyon, gro super market i ouver isi laba.  I vedir ki biznes pe marse, biznes i bon.    Byensir pa tou dimoun ki vin fer son shopping dan STC.  I annan ki dir ou mwan mon al kot Deenu, mon al kot Krishnamart, mon al dan SPAR, mon al dan lot mon al kot Sekar.  Me lefe i reste ki si  mon anvi annan  en kontrol dan pri nou anvi vwar en rediksyon annou get tousala dan son lansanm.  Annou azir ferm, annou azir balanse pou nou demen pa montre ledwa lo zis en enportater pou dir ou ki pe fer lavi ser akoz sa i iresponsab.  Me lefe i reste ki STC i en brans Parastatal i pou bezwen kontiny son loperasyon dan en fason ki i bezwen vwar – mon dakor ler nou pe koz lo revwar son model.

Akoz en legzanp STC son transpor ki i servi ozordi, i kontan servi bann Daihatsu li.  Nou pa ekspekte akoz demen akoz li i servi Daihatsu koman son transpor, li i pou al dan lenportasyon pyes Daihatsu!  Sa i pa akseptab.  En legzanp dan cosmetics.  Eski STC i devret dan biznes cosmetic.  Duty Free eski i devret ladan Duty Free?  Nou pa devret donn en lot petet en lot dimoun ladan, en lot dimoun en lot entity deal avek e li i …?  Mon krwar ki i annan serten ground ladan pou nou vwar kwa ki STC i antre ladan, kwa ki i konsantre lo la e demen li i ava vin en biznes ki i ava sir sa ban keksoz i annan e i ava sir son  rantabilite san pou li kontinyen expand e ler ou expand kou i monte e pep Seselwa i sibir serten kou.  Mr Speaker sa i mon kontribisyon.  Mersi.

 

MR SPEAKER

Mersi Onorab Aglae.  Onorab Afif.

 

HON AHMED AFIF

Mersi Mr Speaker.  Mr Speaker sa Mosyon ki devan nou, ki’n ganny mete par Onorab Henrie i pe dir en keksoz. I pe dir annou sanz sa model ki STC pe servi ozordi.  E i pe dir annou sanz sa model, annou redwir bann kou loperasyon STC.  Ler i pou fer sa i ava kapab redwir son bann pri. E ler i pou fer akoz tou larestan marsan i kontan baz zot pri lo pri STC, pri zeneralman dan bann laboutik retail sirtou i ava desann, e ler sa i desann sa i pou fer en rediksyon dan pri lavi.

Mr Speaker Onorab Henrie in koz vreman lo model.  E i pe dir sanz sa model.  Alor mwan mon ti a kontan profit sa lokazyon ozordi pou regard en pti pe ki sa model in fer.  E pou fer sa mon ti a kontan 2009 kan STC ti’n fek konmanse e 2016 ki zis  2an pase kan nou annan en pe lenformasyon atraver son statement finansyel pou nou gete ki sa model in fer.  Alor 2009, lavant STC R733milyon.  So kou marsandiz R580milyon. Profi avan tax R56milyon.  Pa mal preski R1milyon par semenn profi – 2009.  2016 son lavant in monte nepli 733 in arive R1095milyon.  In mont par 40poursan. Kou marsandiz R798milyon.  Me son profi ou ti ava ekspekte in fer 40poursan plis lavant.  Son profi li i redwir sorti 56milyon 2009.

An 2016 i tonm R29milyon preski lanmwatye son nivo ki i ti ete kan in fer 49poursan lavant an plis ki 2009.  I kler, i kler i annan en keksoz ki’n al mal dan en biznes ek son model.  Sa i kler.  Parske pli ou fer lavant ou ekspekte annan pli bon rannman.

E alors mwan mon ti a kontan, bokou in ganny dir avan.  Profit en pti pe pou regard bann kou.  E ler nou regard bann kou STC byensir i annan son pli gro kou se son kou marsandiz li menm ki i fer vini.  I annan en pe i aste lokal.

E nou’n koz bokou lo la fason i pe enporte si i pe servi middleman eksetera, mon pa pou al tro an detay eksepte pou fer referans avek deba ki fek annan resaman konsernan diri e devan nou ti ganny prezante yer menm dokiman ki montre fourniser STC.

E sa ki kler pou mwan se ki diri ki prodwi dan L’Inde atraver son dokiman li i pe  fer vin atraver en fourniser ki apel Hassani Food Industries.   Anfen dan sa ki in prezante.  Me dan lot papye kot in montre kot tes laboratwar ti’n ganny fer non kliyan i pa Hassani i Gautam General Trading en lot fourniser ankor.  Petet i annan rezon akoz i fer sa.  Me sa ki kler se si mwan ek ou e nou bann konsonmater oubyen bann pti fourniser, ti bezwen aste diri petet i pa ti pou al dan L’Inde kot en gro faktori diri, pou li aste parske zot pa pou vann li akoz i ti pti.  Me ou STC kan ou pe fer vin 6mil tonn diri par lannen i bezwen apepre sa kantite, sirman ou pa bezwen al kot en boug Dubai pou ou fer sa.

Ou al direk kot fourniser.  E alor pou mwan zis lanmenm zis lo la san al plis detay mwan mon krwar sa zafer ki bor i fer vini ek middleman i devret en size enportan pou STC pou fer sir ki i pe ganny en meyer pri.

Me annou get bann lezot fakter son kou.  Nou pe koz model la, son model.  Delo ek elektrisite.  An 2009 kan i ti pey R13milyon ozordi pe R28milyon.  In double e annou pa bliye son lavant pa’n double li in mont par 50poursan, 49poursan.  La kot i enteresan rental. 

Rental kot dan en lannen i ti pey R5.7milyon ozordi i pe pey R48milyon.  Preski 8 fwa plis ki i abitye peye.  Lavant in mont zis par 49poursan lanmwatye selman i pey 8 fwa plis rental.  Travayer, lapey R37milyon ti abitye peye an 2009.  Ozordi 125 preski 3 fwa alor elektrik in double, rental in mont preski 8 fwa, travayer in mont par 3 fwa.  Demann mon lekor, eski travayer i annan  3 fwa plis travayer laba ozordi?

Sa lepok 2009 i ti apepre zis anba 400.  Ozordi zis par lao 700.  I pa ni’n double, me nou vwar total ki i pe pey saler plis ki 3 fwa.  Bezwen demann ou lekor kestyon.  Ler mon lir statement finansyel STC an 2016 zis pou CEO saler ti mont sorti 2015 a 2016 par 40poursan.  

CEO ki ti abitye ganny R57mil par mwan.  2016 R80mil par mwan.  Mr Speaker plis ki ou.  Plis ki ou.  Mon napa problenm ek saler dimoun mwan.  Mon napa problenm avek sa, me i enportan ki pep Seselwa i realize poudir ler pri i o, i annan son bann fakter ki ladan e souvandfwa e sirtou resaman mon’n tann kantite koze, ler tou keksoz i ser zot blanm politisyen.  MNA sirtou.

E zis pou fer rapel ki en saler MNA ki anmenn se li mwens ki R25mil la ou pe ganny ou en lakonpannyen ki pou Gouvernman ki pe pey en CEO trwa  fwa plis.  Me personn pa koz lo la.  Personn pa koz lo la.  Mon zis poz sa la konmdi manrmay e mon ti a kontan, mon ti a kontan met latansyon ankor lo sa latitid dan Management ki vize ver sa model.

Annou repran ankor sa size rental.  Mr Speaker ozordi zot pe pey R48milyon tou le lannen pou zot, pou zot zer zot biznes.  Prezan mwan mon demann mon lekor, Onorab Henrie in donn sif yer lo konbyen zot peye pou sa Hypermarket, sa warehouse.  Prezan mon etonnen ki si ou en biznes ou propriyeter se Gouvernman Sesel, ou aksepte olye annan ou prop fasilite ou al lwe en fasilite, a en pri avek respe en pri fou.  En pri fou.  Akoz mon dir sa.  Akoz si demen en boug prive i ganny dir nou ti a kontan annan nou en gro Hypermarket swa pou wholesale oubyen pou retail e nou ti a kontan ou kapab ofer meyer pri.

Premye keksoz sa boug ti pou mazinen i ti pou dir be ok be mon bezwen kalkil grander ki ou le mon fer en Hypermarket be aktyelman sa enn kot i ete i 3, 780mil met kare.  Premye keksoz mon ti pou mazinen swa mon lwe, swa mon aste enn oubyen mon fer mon menm.

Mon ti pou mazin fer mon menm parske la pli par bann gran  biznes ozordi ki pe fer sa kalite aktivite zot tant pou zot konstri zot menm.  Akoz a long term i pli fer sans.  Be alor mon pa ti pou al tro lwen.  Zis akote STC ou annan ou SIBA oubyen Financial Services Authority konmela ki annan gran warehouse li e resaman pandan sa dernyen 3an i fek konstri 3 gran warehouse sakenn apepre 3mil met kare.  STC kot li 3. 780mil.

Enn sa bann gran warehouse 3mil met kare kot FSA in kout R25milyon.  Alor si li avek 3. 780met met kare ki bezwen konstrir, en pri R10mil par met kare pou fer warehouse, parske i pa parey en lakaz li, en fondasyon, en pti morso beton apre ou mont son sipor avek bann beam apre ou kouver li.  I pa kout sa kantite li.  Avek R40milyon, R40milyon ou ti a’n etabli ou en warehouse grander sa ki kot STC Hypermarket i ete.  Konbyen rent i pe peye tou le lannen ki pa ni pou li?  R48milyon.  E pa zis pou sa landrwa laba i pe pey 24.  Zis akote li 1500 met kare mon konpran i pou parti lepep R800mil pa mwan.

Si mon ti napa sa larzan R40milyon pou mon fer mon prop warehouse mwan konman STC mon ti pou al prete akoz zis dan en lannen mon fer apre tax 20 ekek milyon profi.

Apre tou sa bann gro kou ki pa normal mon ti pou al  pret R40milyon, mon ti a pey R500mil tou le mwan konman repayment pandan 10an 10poursan mon ti a pey R6milyon repayment dan en lannen olye R24milyon.  Mon save lanmenm R18milyon.  Lanmenm la mon double profi preski.

Zis lanmenm, zis lo rent mon’n fini double profi.  Zis lo rent an plis ki sa mon’n ganny mon prop batiman.  Akoz sa bann kalite lide pa antre dan mazinasyon bann Direkter e bann dimoun ki pe zer STC.

Mon pa le blanm zot neseserman mwan.  Mwan mon pe dir sa Lakonpannyen i annan son aksyonner, son propriyeter.  Son propriyeter parey nou pe fer ozordi finalman mon krwar nou osi nou propriyeter akoz i en byen Gouvernman i en byen pep Seselwa.  Nou bezwen mazin sa ki byen pou sa Lakonpannyen e pou sa pep.

E si nou pe mazin koumsa nou pa kapab mazinen pou nou annan en loperasyon ki son bi  se fer desann pri lavi selman olye fer desann pri lavi ki nou  vwar li pe fer.  I pe fer bann kou enorm e i peye sa bann kou enorm li.  Be ki mannyer i peye?  I pas li atraver pri ki i pe vann marsandiz.  Mr Speaker zis pou donn en lendikasyon ki mannyer sa bann pri i pe ganny pase.  Si nou get sa sif 2009 e nou vwar konbyen ti pe aste marsandiz R580milyon e i ti  pe vann 733.  I ti pe fer li 26poursan profi ki i ti azoute i ti mete.  I pa en profi selman en margin ki i ti mete.

E i ti sorti ek en zoli profi savedir lo si i aste en keksoz R100 i markup par 26poursan e i vann e i ti nobou sorti ek en profi. Me ozordi ler i aste marsandiz R789milyon, i bezwen met li 39poursan margin ozordi.  39poursan margin ki fer li ariv R1095milyon e sa margin i enorm.  Si ou kalkil li i ti pou fer 26poursan parey ti abitye fer an 2009.  I ti a sov li dan lavant R100milyon.  Be lekel ki pe pey sa R100milyon ekstra se nou. Se Seselwa ki pe peye. Seselwa ki pe peye e si sak Seselwa e si ou dir poudir STC li i ti annan li, i annan 30mil travayer fer krwar i ti annan li 20mil kliyan, be sak Seselwa ti kapab sov li fasilman en R400 tou le mwan dan pri marsandiz.

Si ti napa tou sa bann over pricing, si ti napa tou sa bann overheads rental ki i pe pey bann rental fou.  Napa en businessman ki ti pou pey sa kalite rental, napa. Napa en businessman ki ti pou tenir sa bann kalite, sa bann kalite pri ki ou pe aste marsandiz parski ler ou dan en pozisyon for ou STC, en pozisyon for parske li son propriyeter se Gouvernman. E ler li konman en gro businessman i al aste pri deor, i al aste marsandiz deor i ganny li bann meyer pri ki ou kapab gannyen parske i pe aste volim.  Me still i pa pe gannyen.

I pa pe gannyen parske ler ou get pti ki bann marsan lokal pe vann keksoz souvandfwa i bat li.  Be i annan en keksoz ki mal ek sa model.  Alors mwan mon dir klerman, klerman sa model i bezwen sanze.  Si nou pe koz lo model mon ti a osi sizere ki parey lontan ler SMB ti ankor la ti annan en keksoz ki bokou dimoun in dir mwan zot ti kontan.  Mon pa pe sizere ou fer egzakteman parey, me par egzanp dan lagrikiltir.  Lontan ou ti annan ou en sistenm kot sa biznes ki ti apel SMB sa letan i ti pase enn fwa oubyen de fwa par semenn kot bann fermye i aste zot legim.  Mwan mon konnen bann landrwa parey La Misère ki ti prodwi bokou sousout ek kreson.  Grand Anse ti annan bokou limon, zoranz, gro manze.  Anse Boileau mon konnen zot ti annan zannannan, brenzel, kokonm, piman eksetera.

Tou le semenn ti annan en lorganizasyon, i pa neseserman demen ki STC ti bezwen fer sa selman i en loportinite kot ou ankouraz prodiksyon lokal e akoz nou konnen nou bann fermye ozordi zot pa neseserman konnen mannyer pou vann.

Zot konn prodwi ekstrememan byen me distribisyon ek lavant zot pa tro bon.  Si ou ti kapab fer sa e ou annan landrwa vann ou ti kapab fer sir poudir tou le semenn ou aste me ou pa aste a nenport pri fou e ou pa aste pou ou met en stock ki pou pouri ek ou.

Sa osi pa bon. Me ou fer li dan en fason byen kot ou kapab ed Sekter Lagrikiltir devlope an menm tan ou permet bann lotel ek lezot magazen kapab annan prodwi lokal ki meyer pou lasante dimoun.

Onorab Basil Hoareau ti koz lo posibleman entrodwir pri kontrol.  Mwan personnelman mon ti pou dir non.  Pa fer pri kontrol.  Rezon mon dir non lo pri kontrol se parske zanmen in deza marse.  Zanmen in deza marse akoz dan la pratik businessman i toultan trouv en fason pou bat pri kontrol.

Zis parey ozordi ler ou al bazar, e ou demann peser pri pwason i donn ou en pri baze lo ki kantite pwason i annan.  Zour pwason i annan karang in tonbe Bel Ombre oubyen in ariv anvil, i annan en kantite pri i ba.  Zour napa pri i o.  Zanmen ou pou al kontrole sa bann pri.  Prezan si ou dir be non, non nou pou al met en sistenm la.  Nou pou al dir ek sa enportater si ou enport en keksoz ki vin isi R100 ou pa annan drwa vann plis ki R130 parske nou pou anvoy lenspekter al tyek dan ou laboutik.

Ler i vini nou pou annan Bill of entry nou pe al fer tou la nou pe vey ou.  Be i fasil.   Sa boug ki i fer ler son marsandiz i ariv Sesel i pa ni pou kas Lalwa li. I pou fer li en lot middleman deor, i pou aste – landrwa kot i ti aste R100 li.  I met sa laba kot en lot middleman ki posibleman li menm, i form en Lakonpannyen deor i met sa R130 i anmenn isi pou R130 i met en markup i ariv R160 i kapab vann  ziska 160 me apre lo shelf i met 140, 150.  I fini bat ou li.

So (1) ou pa pou kapab al siperviz tou sa tranzaksyon aletranze.  (1).  Dezyenm.  Ou pou napa resours pou ou kapab tenir en sistenm, lenspekter ater parske zot tou zot pe al ganny aste ater.  Ler zot pou antre dan laboutik la pou al tyek pri si sa i par lao son limit ou non zot pe al ganny aste zot tou.  Sa in prouve dan lepase.  Zanmen in deza marse.

Dan lepok black market mwan mon rapel byen, ti annan pri kontrol sa letan.  Kan eski ou’n deza aste en larou sa lepok.  Oubyen en bal siman Praslin ou La Digue ki sipoze dapre pri e regilasyon.  Zanmen.

Akoz si ou le aste li dan magazen kot lenspekter pou vwar ou, ou pa pou gannyen.  Si ou pas deryer store 6er diswar ou a gannyen.  Fini bat pri li.  E koumsa ti ete.  Dek ki ou met en sistenm ki ou pa kapab sipervize zot pou bat sa sistenm e zot pou al underground.  Deswit zot pou al underground. Eski ou anvi annan en sistenm underground?  Non.  Akoz ler ou annan en sistenm underground ou pa pou anmas ni VAT ni business tax.   Gard li anler kot tou dimoun i vwar li.  Les li operate dapre son norm selman si ou anvi fe desann pri donn konpetisyon. Donn konpetisyon tou pri pou desann.

Onorab Aglae i dir koumsa ler zot ti SMB ti aret fer vin materyo konstriksyon sekter prive pa ti kapab fer vin pri materyo.  Mon pa konnen si sa i vre mwan, me selman sa ki mon konnen parske mon’n koz ek plizyer enportater.  Ou konnen ki zot problenm.  Zot per – zot ti per fer vini ban gro stock sa letan.  Akoz.  Zot dir ou SMB oubyen STC sa lepok pa konnen ki son plan zot.  Si demen en sel kou e i ti annan pwisans li i ti annan pouvwar ek li li, i fer vini en gro stock e ou, ou pe asize ek en gro stock ou.

E i vann lanmwatye ou pri, ou mor ek ou stock ou.  Zot pa ti le pran risk.  Zot ti fer vini par pti gin zot vann zot veye mannyer i marse e ale.  Me selman si Gouvernman ti sorti ek en Polisi kler, i ti dir koumsa mwan STC mon pe dir zot dan sekter prive nou, nou focus ki nou pe al mete, nou aksan ki nou pe al mete la i plito lo bann komodite de baz, nou pa pe ale dan bann materyo konstriksyon an gro.  Zot fer sa.  Donn en direksyon kler.  Fer kler ek popilasyon ou pou vwar kot depi P&J, depi kot Island Timber anler Grand Anse, depi tou sa bann dimoun ki enport dibwa ek feray zot tou zot ti pou lans dan sa biznes parske deviz i annan labank zot kapab al rode.

LC zot kapab gannyen labank.  Tou keksoz zot bezwen zot kapab gannyen.  Zot kapab fer menm plis ki STC.  Pa en problenm pou sekter prive sa.  Landrwa kekfwa i en problenm.  Zot a bezwen – ou a ed zot ganny en landrwa, me zot ti kapab fer li.

So alor Mr Speaker pou konklir mwan mon pou dir e mon konnen ki mannyer Gouvernman pou panse apre ki zot in  ekout sa bann deba, zot pou dir manman i annan problenm laba STC.  Annou al set up en High Level Committee annou konmans en letid.  Mwan mon pou dir pa bezwen okenn letid.  Letid in fini ganny fer par Seselwa deor.  Bokou bann MNA, Onorab Henrie in fer en tre tre bon analiz a mon avis.  Nou menm nou’n azout en pe lo la.  Mwan mon krwar sa devret ganny fer la ozordi, toudswit se Gouvernman antre ladan koup sa bann middleman.  Si zot serye kot STC koup sa bann middleman pa bezwen fer letid.  Antre direk al koup sa bann middleman zot konnen lekel zot.  Koup sa bann middleman.

Dezyenm.  Konsantre lo wholesale.  Konsantre lo la.  Zot kapab annan zot retail, zot pti bout Hypermarket napa problenm ek sa akoz li osi i annan serten eleman ladan ki enportan;  par egzanp mwan mon konn en fourniser bann snacks e keksoz koumsa Anse Etoile i dir mwan li pou li Hypermarket i itil pou li parske i en landrwa kot i ganny en debousman.  I kapab al met son bann prodwi e lezot landrwa pa pran.  So pareyman dan lagrikiltir kekfwa i kapab annan en landrwa kot i met bann prodwi lokal.  Les zot fer sa me aksan i lo wholesale.  Koup sa bann middleman.

Trwazyenmman deswit al revwar tou sa bann rent.  I en gro konponan sa.  I en gro konponan parey mon’n eksplike si i pran aksyon serye lo la i double son profi toudswit.  E i bezwen profi ou pa kapab annan en Lorganizasyon i annan en gro lavant i fer 2poursan.  Ou pa pou kapab soutenir li akoz ou ou bezwen kontinyelman pe re envestir dan training, re envestir dan kapital, re aranz ou landrwa.  Tousala bann capital cost ki ou bezwen annan en larzan de kote.  de poursan napa en biznes ki mars lo la.  Napa. Biznes prive pa marse koumsa.

E alors vwala ban fason ki mwan mon krwar si Gouvernman i serye, STC i serye nou pou redwir kou lavi.  Nou pou fer desann pri marsandiz parske taler mon ti dir zis STC tousel i kapab met R500 dan pos sak Seselwa tou le mwan.

Posibleman si i pe azir dan en fason ki korek.  I kapab fer sa li, me pa bliye ki ler STC son pri in desann pa zis dimoun ki al STC ki pou ganny rediksyon dan pri.  Tou sa magazen deor ki souvandfwa i servi STC konman son mark, li i get pri laba akoz sa i konnen en bann gro marsan i vid son pri laba e met pou li zis par anba.  Zot osi zot pou fer desann menm parey.

Alor sa benefis ki konsonmater Seselwa pou gannyen i pou bokou plis ankor.  Mon bezwen zis dir sa pou fini e mon agree avek mon krwar ti Onorab Aglae ki ti dir sa, ki i pa zis STC ki nou bezwen regarde.  I annan bokou lezot Lorganizasyon sirtou ki konsern pri lavi e la nou pe koz telekominikasyon, nou pe koz labank; parske mon pe mazin bann dimoun ki tou le mwan en dimoun i pey en larzan ek li.  Ou pey ou loan lakaz ek en labank, ou pey ou bill telefonn avek en Lakonpannyen Telefonn e ou aste ou manze dan magazen.  Sa bann gro, gro depans e byensir ou pey transpor.  Sa bann osi nou bezwen regarde e i annan fason pou fer li.  Si Gouvernman pa trouv li en fason pou kapab fer sa ase vit be napa problenm nou, nou la.  Nou, nou la nou.

Met nou dan Gouvernman, met nou dan Egzekitiv mon garanti ou sa bann keksoz i kapab ganny adrese deswit.  Mersi bokou Mr Speaker.

 

MR SPEAKER

Mersi, mersi Onorab Afif.  Bon mon annan en pti lanons pou fer.  Komite HIV/AIDS pe rankontre 12.30 dan Committee Room 2.  Avek sa nou ava pran en Break e nou ava retournen 2er pou kontinyasyon deba lo sa Mosyon.

 

(BREAK)

 

MR SPEAKER

Bonn apre midi tou Manm Onorab.  Bonn apre midi tou manm piblik ki a lekout e pe swiv travay Lasanble Nasyonal.  Nou, mon kapab dir nou’n komans on time pour la apre midi, bon nou a kontinyen nou travay.  E prosennman lo lalis mon annan Onorab Simon Gill, Onorab laparol i pour ou.

 

HON SIMON GILL

Bonn apre midi Mr Speaker, bonn apre midi tou Koleg Onorab e manm piblik ki pe ekout nou.  Mr Speaker size Mosyon devan nou Lasanble i en size ki tre enportan.  I enportan pa zis byensir pour nou Manm Lasanble me pli enportan ankor pour Sesel, pour tou Seselwa.  I enteresan ki sa size in mont ankor devan nou Lasanble i paret mwan tou-le-z-an nou pour koz lo sa size e sak loportinite ki nou pour gannyen, nou pour koz lo sa size, Politik vant Mr Speaker bann politisyen dan Lasanble Nasyonal in pran sa koman enn bann size enportan, me selman ler mon analiz, e mon fer refleksyon lo bann diferan entervansyon ki’n ganny fer zot ava eskiz mwan akoz zisteman mon dir politik vant nou met tro bokou politik dan en size sitan sansib ki pri lavi an relasyon avek pri bann komodite, bann ki pour entervenir pour dir “nou misyon nou, nou la nou’n ganny elekte pour nou fer politik” dakor pa problenm, me si sa i le ka permet mwan fer en pe politik.

 

(laughter)

 

HON SIMON GILL

Mr Speaker nou bezwen anmenn lezot eleman dan sa kestyon STC an relasyon avek pri komodite ek pri lavi, mon’n swiv avek gran latansyon dernyen lentervansyon ki Onorab Afif in fer.  E ler nou al dan listwar Onorab Afif dan bann moman ki SMB ti ganny reformen pour li vin STC, Onorab Afif ti enn bann arsitek sa sanzman, sa transformasyon si mon memwar i serve mwan byen e sa moman ki Onorab Afif ti enn bann arsitek pour redefinir SMB pour al STC zot ti definir en misyon ki zot ti oule STC akonplir.

E malerezman ou’n koz avan mwan Onorab Afif probableman ou pa pour ganny en sans koz ankor ziska ler nou fini debat lo sa Mosyon, ti ava byen dan ou lentervansyon ou ti’n dir nou si ou krwar poudir sa misyon ki ou ti’n anvoy STC lo la, i ankor lo sa misyon ki ou’n anvoy li lo la or si a serten moman dan son evolisyon, dan son devlopman in fer en lot trajectoire now si in fer en lot trajectoire Mr Speaker parey Onorab Afif pe sey endik mwan avek son lanmen, nou ava demande zisteman avan ler mon al pli lwen ki STC in retourn lo sa trajectoire ki Onorab Afif ozordi dan Lasanble Nasyonal ti met zot depi boner dan bann lannen ’82 or dan bann lannen ’80, ’90.  Ok, me ou, ou konn byen ler ou ti re definir sa misyon STC.  Now nou ava dir avek pep Seselwa an antye ozordi la ki nou pe ganny sans adres zot ki annou pa reste dan sa ilizyon e i enportan osi pour nou bann Manm Lasanble Nasyonal annou pa reste dan sa ilizyon ki STC tousel pour enpakte substantiellement lo kout lavi dan Sesel.

Nou pe krwar ki zis sanz lafason ki mannyer STC i fer biznes, i pour annan en lenpak Global zeneral dan tou kous Sosyete lo kou lavi.  Mon pe dir non!  Nou bezwen Mr Speaker tonm dakor ki nou bezwen get sa kestyon stabilite dan nou to lesanz, koman enn bann fakter enportan e Onorab Afif i dakor ek mwan lo la, nou to lesanz i enn bann fakter enportan, i enn bann endikater enportan ki afen kont pour determin pri komodite pa zis kot STC, pro komodite dan tou Laboutik dan Sesel, pa zis STC mon repete pri komodite dan tou Magazen e pa zis komodite ki STC i enporte, komodite ki tou Marsan i enporte dan sa pei.  Alor deswit mesaz ki nou bezwen anvoye koman en Lasanble Mr Speaker, nou pe dir bann ki i annan privilez pour earn foreign exchange atraver zot biznes pour rasire ki sa foreign exchange ki zot earn, i pa ganny kit dan kof, i pa ganny anvoye aletranze i pa ganny hoard ki nou fer sir ki nou met li an sirkilasyon e nou pa kre bann demann par laswit artifisyel lo nou foreign exchange e pour kree en crisis dan sa ki bokou nou, nou konnen dan demann epi otomatikman nek ou trouv nou foreign exchange, nou to lesanz i monte.  Sa i en eleman ekstrememan enportan.

Dezyenm eleman ki enportan Mr Speaker, se nou bezwen dir atansyon ki lekonomi Sesel i kontinyen trouv li pe vin en Lekonomi eksesivman depandan lo lenportasyon.  Malgre lefe ki nou konnen ki nou enport apepre 90 ou plis nou konsonmasyon, me nou bezwen rasire ki nou Lekonomi pa tourn li dan son lesansyel, en lekonomi zis kot nou konsonmen, konsonmen, konsonmen, konsonmen pran loan pour enporte, pran loan pour enporte, pran loan pour enporte akoz sa son lefe direk i met presyon lo demann foreign exchange, e si i annan presyon lo demann foreign exchange nou to lesanz i monte e sa i fer ki an retour trouv komodite ler i antre dan magazen i vin ser ankor.

Trwazyenm eleman Mr Speaker, trwazyenm eleman i enportan ki nou tonm dakor lo en keksoz e sizer dan fason for koman en Lasanble avek STC e Gouvernman, ki sa nouvo Board STC ki’n fek ganny apwente anba Leadership Mr Morel, ki pa tarde pour revwar loperasyon konplet STC.  E rasire dan sa prose ki i travay e i mars anliny son misyon istorik ki ti ganny demande pour akonplir, mon pa pour la dan detay akoz letan pa pour permet mwan pour al dan detay son misyon me the bottom line se pour fer sir ki gard pri komodite a en pri abordab e ki i rasire an plis ki tou keksoz apard ki en pri abordab Mr Speaker, se ki i rasire ki bann komodite esansyel dan sa pei zanmen manke.

Nou’n bliye sa nou, nou’n bliye pri abordab fer sir ki bann pri komodite esansyel toultan i annan lo marse e ki zanmen manke e ki par la swit byensir nou pe koz annan en stok rezonnab e dan en mo sa nou koz lo sekirite nou manze oubyen nou sekirite alimanter.  STC i annan en rol enportan pour zwe dan sa direksyon.

Lot eleman Mr Speaker ki ekstrememan enportan ki mon oule met lanfaz lo la nou annan nou bann koleg lo Praslin, La Digue ki la dan sa Lasanble ozordi STC ti annan osi misyon pour rasire ki bann komodite esansyel ki ganny vann lo Praslin, La Digue e ki son pri i parey isi lo Mahe, eski sa i le ka, amwen ki mon pa’n tro sezi byen, me si mon’n sezi byen kontenir lentervansyon bann Onorab Elekte lo Zil zot donn mwan en lenpresyon ki i pa le ka ki pri komodite i parey isi lo Mahe avek Praslin ou La Digue kestyon ki poze ki’n arive e akoz si i pa le ka, ki nou bezwen fer?  Nou bezwen fer sir ki sa nouvo Board i get dan sa size, ekstrememan enportan e nou pa kapab tard bokou letan lo la.

Lot keksoz ki enportan Mr Speaker se ki ozordi dan Sesel nou napa zis STC ki enport komodite an gran kantite.  Nou annan plizyer Enportater dan sa pei ki zot apel zot lekor bann Wholesaler lo sa pwen ki mon swe Mr Speaker, mon swe se ki nou napa zis en STC mon ti ava swete ki nou annan nou probableman 5, 6 akoz non 10 STC mon pe dir sa dan en konteks byensir, eske i annan en posibilite reel ozordi, ki bann dimoun, bann businessman ki enport marsandiz an kantite, zot zwenn ansanm, mon pe dir zwenn ansanm e kree en dezyenm, en trwazyenm, en katriyenm STC.  Eski i posib sa arive?  Touzour baze lo Prensip donn en fair deal Seselwa etan ki konsern pri komodite ki abordab.

Largiman ki mon’n tande taler e probableman largiman ki pour vini taler, i a dir sa bann dimoun zot deza pe enport komodite pli bon marse e pe vann pli bon marse ki STC.  Be i byen sa, i byen.  Si sa i le ka ki sipor adisyonnel i Gouvernman i kapab donn sa bann wholesaler pour ki zot kontinyen tenir zot biznes e ogmant lakantite keksoz ki zot enporte pour ki Seselwa i konsonmen.  Mr Speaker sa i en lot pwen enportan.

Lot pwen ekstrememan enportan Mr Speaker lo sa size kout lavi e pri komodite nou annan nou telefonn, nou annan nou internet.  Si nou pa anmenn sa eleman internet, telefonn dan sa equation kout lavi dan Sesel nou pe perdi posibilite reel pour nou vwar sa sityasyon dan son totalite.

So mon pe dir tou bann service provider telefonn i bezwen osi fer en zefor eksepsyonnel pour ki nou fer desann pri ki Seselwa i pey servis telefonn.  Ozordi nou annan en gran poursantaz nou popilasyon Mr Speaker ou ava dakor ek mwan ki konsonm data, servi mobile nou bann etidyan nou annan en popilasyon etidyan oubyen nou annan en zenn zenerasyon dan sa pei ki pe konsonm data tou le minit, tou le segonn e i kout sak fanmir, i kout Gouvernman en kantite larzan.  Kantite etidyan pe fer resers, pe download en kantite lenformasyon pour etidye pour aprofondir zot konesan.  Ankor enn fwa sa i enpakte lo kou dan sak fanmir lo depans dan sak fanmir.  I enportan sa, fodre pa zanmen nou bliy sa.

Nou annan elektrisite, nou annan delo, sa osi i bann konponan enportan ki enpakte dan depans en fanmir e finalman nou koz kout lavi dan sak fanmir.  Nou annan rate ki bann labank i sarze lo bann Loan sa osi i en fakter enportan Mr Speaker e nou bezwen demann bann labank par laswit kontinyen fer desann zot lentere lo loan, byensir pa lo bann loan ki nou pe servi zis pour nou enporte, enporte pour konsonmen, me lo bann loan Lakaz, loan pour fer ekstansyon lakaz, loan pour aste bann lezot konponan enportan ki bann fanmir i bezwen dan zot lakaz, nou bezwen gete ki mannyer labank i antre i zwe son rol ladan akoz zot enportan, fodre pa nou bliye sa.

E lot keksoz ki osi enportan Mr Speaker ler nou pe koz kout lavi nou pe koz STC nou bezwen osi fer ekstansyon avek bann lezot prodikter isi dan sa pei, lezot prodikter dan Sekter Agrikol; lezot Prodikter dan prodiksyon fri, legim, lavyann zot pe fer fas avek en konpetisyon feros.  Bann pli gro prodikter pe anval tou sa bann pti prodikter Seselwa e zot pe dir ou ziska STC ozordi pa pe kapab donn zot sa sipor e si i annan en keksoz ki mon pour tonm dakor lo la dan dernyen bout lentervansyon Onorab Afif se ki in dir ki ti ava byen ki STC ler li i pe revwar son loperasyon se ki i etann son lanmen e donn sipor nou bann prodikter lokal.  Onorab Adelaide Baie Lazare i konpran byen ki mon pe dir lo sa size.

Nou bezwen asire Mr Speaker ki dan sa zefor global pour nou fer desann kout lavi e pri komodite, ki zanmen nou bann frer, ser Seselwa ki zot mwayen sirviv i sa nivo prodiksyon ki zot kapab fer i ganny anvale akoz sa osi pour enpakte lo kout lavi.  I enportan sa.  Plitar letan nou a kapab aprofondir ladan me pour le moman mon pour kit sa la.

Lot size ki mon oule touse Mr Speaker mon a retourn lo loperasyon STC.  Bann entervenan ki’n koz lo sa size premyerman ti annan en move, ti annan en lesey pour nou dir nou elimin STC.  La, la nou pe konpran ki nou pa pour fermen STC nou pour revwar loperasyon STC bann ki’n fer Politik mon’n dir donn mwan en sans pour mwan fer mon politik mwan osi.  I paret mwan la zot pa pe tro dakor avek sa konmsi pour konmanse zot in dakor la aprezan zot pa pe dakor ok, so nou bezwen tonm dakor ki kot STC i annan en kantite fanmir ki nou bezwen tenir zot, e tenir zot for.   Mon pe dir for, tenir for ou, ou kapab dir “tenir pa les tonbe” mon napa problenm ek sa, be mon pe dir tenir zot for.  E dan tou nou zefor pour nou revwar loperasyon STC nou bezwen asire ki napa travayer ki perdi son plas travay kot STC, nou bezwen vwar son loperasyon, nou bezwen sizere avek sa Board parey mon’n dir, nou pe donn en sans Mr Morel ki fer sir ki dan en dele letan rezonnab ki ganny kot nou Lasanble en detay lo ki mannyer nouvo lapros STC pour ete e ki’n pran kont tou sa bann fakter ki’n ganny mansyonnen dan nou deba ozordi isi dan sa Lasanble, or kontinyasyon nou deba ozordi isi dan sa Lasanble.

Mr Speaker mon pa oule prolonz sa deba tro bokou me sa mwan santi se ki personn dan sa Lasanble pa kapab dezagree avek size fer desann kout lavi dan sa pei, e an relasyon avek pri bann komodite dan sa pei nou tou nou bezwen tonm dakor e mon pe sipliye ki nou tonm dakor lo la ki nou pa kapab demann zis STC pour fer desann pri son komodite, me nou bezwen osi fer en demann Nasyonal pour ki tou sa ki enporte pour konsonmater Seselwa konsonmen, se ki nou fer ki napa okenn egzazerasyon lo pri sa bann komodite.

Dezyenm eleman dan mon konklizyon ki mon’n ariv lo la Mr Speaker, se ki nou bezwen tonm dakor ki dan sa refleksyon dan sa deba ki nou pe fer ki STC i bezwen asire ki tou fanmir Seselwa Praslin, La Digue pri zot komodite avek sa ki pe vann isi dan sa pei lo nou Mahe ki zot osi laba lo Praslin, La Digue zot benefisye parey.

Lot eleman dan konklizyon Mr Speaker se nou demande ki dan sa zefor pour revwar loperasyon STC ki Gouvernman i konsidere pour elimin tou bann depans or tou bann kou ki STC i bezwen peye ler son marsandiz in ariv lo Por, nou pe demande pour konsidere pour li elimin tou bann kou lo tou bann komodite ki STC i enporte pour vann dan son magazen, tou bann kou eliminen e sa mon prezimen dan mon refleksyon dan mon analiz ki i ava annan en lefe pozitiv lo kou final komodite ler i ariv dan pannyen dabor e dan fwaye sak fanmir Seselwa, i enportan sa.

Si ler en rapor i vini dan sa nouvo lapros zot dir be i pa pey nanryen lo Lasose, zis son marsandiz i arive i tire epi i vann.  Fair enough napa problenm e nou a konsider bann lezot fakter alor e mon pour zwenn avek bann lezot koleg ki’n fer lentervansyon avan mwan kot nou’n dir rental, rental ki STC i peye i annan en consensus lo sa size.

Mr Speaker dan sa konteks mon sizesyon ki mon annan pour anvoy devan, se ki nouvo Board STC i fer le neseser pour rasire (1) ki dan en dele letan rezonnab STC i vin propriyeter tou son bann landrwa kot i pe fer son biznes, sa i ava enpakte pozitivman lo son depans zeneral ki i ava annan en lefe pozitiv lo son margin of profit ki i etablir ki definitivman relativman i pour desann e ki anfen kont i ava kapab son depans zeneral i pour desann.

E i ava enpakte pozitivman lo pri final or lo sa poursantaz ki i mete lo pri sak komodite avan ler i antre dan pannyen e ariv dan lakaz dan fwaye sak Seselwa, i enportan, e nou pe dir nou bezwen en dele letan rezonnab ki STC propriyeter son bann landrwa kot i pe operate son biznes ki deservi lapopilasyon Seselwa.

Lot eleman dan konklizyon Mr Speaker ki ekstrememan enportan ozordi nou konnen ki STC i annan bann Magazen ki i aste komodite avek li lo pri wholesale, ler i ariv Baie Lazare kot Onorab Adelaide e ler i ariv Bel Air kot Onorab Loizeau, ler i ariv St Louis kot Onorab Arissol sa bann Marsan in met en poursantaz profi lo la e ki an retour konsonmater i bezwen peye e ki fer ki pri ki sa bann komodite i vann kot STC i diferan prezan avek pri ki vann dan bann distrik, dan bann Retail outlet.

Kestyon ki nou poze ki solisyon?  Ki solisyon?  Probableman nou pour bezwen en legzersis dinamik pour gete ki mannyer loperasyon STC, ki mannyer nou an vizyonn sa nouvo loperasyon, i kapab enpakte lo pri komodite dan sak distrik, si nou pe dir ki pri komodite STC ki i vann isi lo Mahe devret enpakte parey lo Praslin, La Digue now ki mannyer nou pe vwar i enpakte dan distrik Port Glaud kot Onorab Egbert Barbe i ete, Aglae i ete, ki mannyer i enpakte Anse Royale kot Onorab Lemiel i ete, ki mannyer i enpakte Grand Anse Mahe kot Onorab William i ete.  Tousala nou bezwen vwar, ki bann solisyon, ki bann mekanizm?  Pardon?

Mon ti a kontan zot dir for, dir si zot oule parol, dir wi mon’n dir lo La Digue tou wi, Praslin, Baie Ste Anne, Grand Anse, Anse Etoile kot Onorab Afif good mersi.  I enportan dan konklizyon Mr Speaker ki mon azout ankor en eleman, sa eleman wi, bann eleman dan konklizyon sa ki mon lo la.

 

MR SPEAKER

Ankor 2 minit Onorab.

 

HON SIMON GILL

Wi Mr Speaker dan sa konklizyon mon lot pwen ki mon anmennen se dir avek tou Seselwa ozordi bann fanmir ki reste dan menm distrik ki zwenn ansanm, zwenn ansanm dan lafen di mwan desann kot STC kot swa outlet wholesale met zot demann ansanm e zot a ganny sa bon leksperyans aste komodite lo sa pri wholesale epi ler zot sorti kot STC sakenn i pran son morso i anmenn kot son lakaz, zot ganny zot komodite lot pri wholesale e zot konsonmen e imedyatman zot fer en saving ekstraordiner lo la.

Sa loportinite i egziste ozordi Mr Speaker koman mon pe koze la kot STC e lontan i egziste sa, me Seselwa probableman pa tou ki pran sa plezir pour li al fer sa kalite shopping.

Mr Speaker dan mon lot pwen konklizyon, ou ava dakor avek mwan ki Seselwa in ariv lo en nivo ekstrememan eleve, Seselwa son standar i o, Seselwa i pitch son standar tre o.  E ozordi napa byen, byen Seselwa ki pour al laba deor mon pa konnen i annan pour koz Maurice, i annan pour koz Singapore, konmela mon tande i ser laba pa bezwen ale, me lontan ti en plezir pour Seselwa bokou zot al deor al fer bann gro shopping me konmela mon pe krwar konmsi poudir bann gro shopping keksoz ki zot konsonmen toulezour probableman pe diminyen en pe.

E Seselwa i annan, ou konnen en kalite fason ki mannyer nou vwar nou, i ekstraordiner, i ekstraordiner e i donn ou en plezir pour vwar standar ki Seselwa in arive e standar ki nou pitch nou, e si mon pe demande ozordi Mr Speaker dan mon lentervansyon, dan mon lentrodiksyon si mon pe demande ki nou vwar plizyer STC, nou vwar plizyer Hypermarket, se zisteman pour ki Seselwa i ganny sa leksperyans ki mon a dakor sa leksperyans i bezwen en leksperyans shopping marsandiz bon marse, leksperyans shopping marsandiz bon marse dan Hypermarket parey nou pe koz bann gran Spa partou dan lemonn, bann gran Shopping Center partou atraver lemonn kot nou annan privilez pour nou al pas enn de semenn vakans.

 

MR SPEAKER

Onorab 1 minit pour ou wrap-up.

 

HON SIMON GILL

Wi Mr Speaker, mon pe met mon dernyen pwen konklizyon ater, mon dernyen pwen konklizyon Mr Speaker mon swete ki nou deba i kontinyen dan kontribisyon bann lide, bann sizesyon pour fer sir ki STC i revwar son loperasyon avek bi – pour kwa?  Pour fer sir ki nou fer desann pri komodite dan Sesel e ki STC dan mon dernyen pwen konklizyon i fer tou sa ki posib pour ki nou gete laba deor L’Inde lezot pei ankor dan larezyon ki mannyer direkteman nou kapab source komodite direk e anmenn dan nou magazen isi pour vann pour Seselwa konsonmen, mon pe dir direkteman, nou konnen sa i poz en challenge fodre pa nou anbet nou lekor Sesel son lespas konsonmasyon i pti gin Mr Speaker deor laba ou annan bann prodikter komodite ki zot annan zot minimum order quantity ki si ou pa pe match zot minimum order quantity i difisil pour ou rantre e ganny bann komodite ki konpetitiv pour anmenn isi.

Now i annan en largiman ki’n deza anmennen dan sa direksyon Sesel i kapab zwenn ansanm met latet, met zefor avek bann lezot pei dan larezyon ki enport an bulk e an retour par laswit Sesel i benefisye e konsonmater Seselwa i benefisye.

Mr Speaker mon finalman dir avek Onorab Gervais Henrie, koman enn ou bann voter dan distrik Mont Buxton mon pour siport sa Mosyon ki ou’n anmennen ozordi, ou’n anmennen dan Lasanble, akoz nou osi egalman dan Parti Lepep depi SPUP, SPPF nou’n toultan dir poudir Sesel, Seselwa deserve the best.  E si i annan en de glisman ki’n arive nou bezwen fer sir ki nou reorganiz nou realign nou pour ki nou kontinyen, nou kontinyen donn Sesel e donn Seselwa the best.  E ou kapab garanti mon sipor nou pe bouz avek letan Mr Speaker, nou pe bouz avek letan mon bann Koleg Onorab dan lot kote latab, e nou fer sir ki letan pa pour kit nou deryer.  Nou konnen i annan en nouvo dinamik dan sa pei, nou pe bouz avek sa nouvo dinamik e nou fer sir ki ansanm nou ava atrap lanmen and ‘TOGETHER’ koman bann Manm Lasanble ‘TOGETHER’ koman bann Manm Lasanble ki nou donn Sesel the best, ki nou donn Seselwa le meyer.  Mersi bokou Mr Speaker.

 

(laughter)

 

MR SPEAKER

Mersi Onorab, mersi Onorab Simon Gill.  Onorab Adelaide.

 

HON FRANÇOIS ADELAIDE

Mersi Mr Speaker.  Mr Speaker, bonn apre midi tou dimoun ki pe a lekout.  Deba in ase ris e sa deba lo fer desann lo- avek bi fer desann pri lavi e nou pe target STC ozordi apre midi e mon krwar i en bon komansman.

Mr Speaker avan mon komanse premye keksoz ki mon krwar i ede ler nou fer desann, ler pour nou fer desann pri lavi, se nou bezwen konn ekoute.  E mon ti a kontan Mr Speaker ki ou get en kou Sekretarya gete si Mr Faure pe ekoute ler nou pe fer sa deba la ozordi akoz si i pa ekoute i pa pour tande, byensir i pa pour konpran ki bann keksoz ki nou pe ganny dir e ki pe ganny fer.  Akoz mon pour dir ou sa Mr Speaker, akoz dan son Konferans de Pres i ti dir i pa ekoute e si i pa ekoute byensir i pa pou konpran ki pe pase.  So mon ti a kontan byen ekoute, byen konpran, ou tande e sa i ava ede pour fer desann pri lavi, premye konmansman.

Mr Speaker apre tou sa lentervansyon ki mon’n tande lo tou lede kote latab e mon’n tann sa sorti vreman for avek 3, 4 Manm Parti Lepep i annan en keksoz ki kler, se ki solisyon i deza la nou deza konnen ki nou bezwen fer pour fer desann pri lavi e nou pa bezwen met kontour ler semen i drwat, se ki nou adres sa problenm enn fwa pour tou e nou anmenn bann solisyon ki kapab ede.  I annan apepre 5 keksoz ki mwan mon’n met lenportans avek pour sa zafer desann pri lavi.  Nou’n tann lespas avek batiman ki STC pe servi i pe lwe e sa dan li menm i pe met bokou konstrent bidzeter lo finansman pour ki sa lakonpannyen i delivre efektivman.  

So par egzanp ler nou get sa lokasyon kot STC Hypermarket i ete aktyelman eski nou demann nou, eski nou demann nou lekor ki mannyer ki STC in ariv laba e i pe operate dan sa landrwa ki ti sipoze a mon avi en pe letan pase ti pour petet ki ti pour en landrwa kot ti pour annan bann proze grandyoz – me ozordi nou vwar ki sa fardo in ganny mete lo STC e STC pe forse pour li lwe sa landrwa pour li operate sa landrwa pour donn Seselwa sa servis?

Nou get son, petet nou get son grander, son oter, nou kapab konpran avek sa bann zafer refrwadisman nou kapab konpran ki kantite lafreser ki nou bezwen dan sa grander batiman pour kit keksoz konserve; pour kit keksoz fre.  E a mon’n avi si petet nou ti annan en landrwa en pe pli pti e pli ba mon krwar nou ti servi mwens lenerzi e petet sa ti ava tir en pe kou ki konsonmater ti bezwen peye pour li kapab ganny bann servis kot sa supermarket. 

Mon’n tann byen ki petet lot kote i annan enn de MNA ki’n sey fer politik avek sa size, zot dir ki nou devret frenm STC, mwan mon dan mon deliberasyon lo Leta Lanasyon zanmen mon’n nonm sa zafer frenm STC.  Nou’n dir ki STC i bezwen retourn lo son manda, Mr Speaker dimoun pour dakor avek mwan si nou pe fer biznes diri pli nou enport plis diri pli son pri i pour desann, pli konsonmater i servi plis pli mon krwar nou kapab fer pri desann.

E STC li i devret pe konsantre lo bann prodwir ki petet – parey Onorab Henrie in dir, vre i devret elarzi en pe son bann prodwir ki pe fer vini petet pour li ganny en pe plis benefis, be nou pa pour kapab tay deryer tou kalite biznes zis pour nou kapab dir STC i bezwen fer sa pour li kapab ganny larzan pour li kapab pey sa.

E si i annan bann prodwir ki i trouve ki i pa pe fer profi lo la, mwan mon panse ki STC pa devret antre dan sa bann, pa devret fer vini sa bann prodwir, me plito konsantre lo bann prodwir ki Seselwa i aste lo la baz toulezour, kot i annan plis volim e la mon krwar ki STC i ava vreman ede dan redwir pri lavi.

Nou’n tann sa zafer middlemen.  Mr Speaker petet taler apre midi ler deba pour sofe nou pour kapab konpran petet kantite sa middlemen ki i annan!

E i annan bann menm ki la obor nou ki nou pa ti pe menm mazinen e zot osi zot pe ede, zot pe ede pour fer monte pri lavi akoz sak pti keksoz ki nou pe aste, i annan bann dimoun ki pe benefisye direkteman swa endirekteman.

Me nou konnen lekel sa pli gro, sa bann dimoun ki pe benefisye pli gro, so mwan mon krwar Mr Speaker si nou senser dan sa deba ki nou pe fer ozordi, e nou koman en Lasanble nou anvoy en mesaz kler kot Egzekitiv poudir nou vreman mean business e ki nou tou nou siport kanmarad, mon krwar ki nou ava trouve en solisyon.

Mr Speaker en lot keksoz ankor ki mon krwar ki petet i pe ede pour fer STC fer son bann pri monte bomaten Onorab Afif in dir bann lapey egzorbitan ki nou pe pey bann o Zofisye laba kot STC.  Nou’n tann lapey R50, 000 pour mont R80, 000 Mr Speaker lekel ki peye sa?  Se nou menm bann Kreol ordiner ki peye sa.  Se sa bann dimoun ki pe al STC angi ki zot pe al rod komisyon pli bon marse me i annan bann kou ekstra ki zot pe bezwen peye e ki ler ou pe gete zot lavi pa pour amelyore me zot pour bezwen pey plis, akoz nou bezwen pey bann dimoun plis ankor.  Nou annan travayer etranze ki nou’n koze ankor.

Mr Speaker travayer etranze parey Onorab Basil Hoareau in dir nou bezwen pey son landrwa reste, nou bezwen pey tou pour li, so si nou ti fer sa nou ti donn Seselwa sa oportinite pour li pran sa sans e travay i ti pour ganny en larzan pour son fanmir e i ti pour koup en pe kou STC e sa osi ti pour ede dan fer desann pri lavi.

Mr Speaker en lot keksoz ankor ki mon vwar i ede dan fer monte pri lavi kot STC, se bann gaspiyaz, souvandfwa bann dimoun i call i dir ou be STC i annan keksoz pe zete.  Mon dakor zot a dir nou petet i al lo Lasirans, Lasirans i peye, me Mr Speaker sa bann keksoz bann lavyann, bann keksoz ki gate ki zot zete i al zet lo Dumpsite Cascade eski pa sanmenm sa ki donn plis loder Cascade e ki bann dimoun i konplent tou lazournen?

Mr Speaker si nou ti fer sir nou koup gaspiyaz Onorab De Commarmond pa ti pour ganny problenm ek sa bann problenm loder Cascade, so sa osi pour ede, i pour fer desann pri lavi akoz nou pa pe enport sa bann keksoz ki sitan pa bon, ki ler i ariv isi i gate e plis i met en burden nou Lekonomi menm sa dimoun osi in dir poudir par ler zot ganny bann petet aste bann fri e legim bann keksoz dan pake ki si i annan 5 ler ou gete 3 in fini gate akoz zot bezwen ariv kot zot pour ouver , ler ou gete anler tou i ok me anba i tant pour petet ganny petet bann mwazi apre i pa bon.  Tousala i ede pour fer monte pri kot STC e i ede pour fer dimoun depans plis.

Mr Speaker parey mon dir mon pa pour tarde lo sa topik akoz bokou keksoz in fini ganny dir.  E laprev i monte se ki si Gouvernman i anvi, si Gouvernman i annan sa volonte pour fer desann pri lavi dan Sesel, i kapab fer sa.

Mr Speaker avan ler mon bliye mon annan zis en lot pti kontribisyon si STC ti annan son petet i ti al kote pour al rod son prop outlet pour li vann son bann komodite; mon’n tann Onorab Simon Gill in dir 4 STC, 5 STC, 6 STC mwan mon krwar STC i devret annan zis 1.

Me selman nou kapab fer 6 STC parey ti pe dir dan Baie Lazare nou kapab met en outlet dan Baie Lazare i pour annan en STC ki pour, i pour the main STC me selman i kapab pa franchise son bann, i kapab anvoy son bann komodite dan bann landrwa parey Baie Lazare, bann landrwa en pe pli lwen swa petet Rezyonal, mon krwar sa ti pour ede pour nou kapab ede dan sa demars pri lavi.

E apre i annan sa rent ki mon tande R800, 000 par Mwan ki al pour Parti Lepep, Mr Speaker ler mon’n kalkile R800, 000 par Mwan dan en lannen i tonm nou apepre 9 milyon, 9.6 milyon ki ler ou gete i vreman en kours signifikan.

E sak fwa Eleksyon mon vwar zot donn 4 bal lapousyer ros, 6 fey tol, 2 tonn makadanm, 5 ver funny juice Mr Speaker be sa osi i ede pour fer monte pri lavi akoz se sa bann dimoun zot deza fini peye, zot deza fini pey sa kot STC, STC li i tir sa apre i anmase i met laba – son rent sa apre dan 5an i re donn ankor sa bann dimoun.

So si nou azir konsyansye, serye mon krwar poudir nou a kapab fer desann pri lavi e nou, nou pa’n dir frenmen STC nou en, nou’n dir restriktire.

Mr Speaker mwan mon pour kit mon deliberasyon la e nou time frame parey nou’n dir dernyen bout Mosyon pli kourt dele letan posib.  So savedir Egzekitiv bezwen konpran poudir nou pa vin zwe sa farsi nou, nou pe donn en dele letan e mon krwar petet ler Onorab Henrie i a sum-up at least demann li donn en dele letan dir mwan kantite dele letan nou pe demann li, 1 Mwan, 2 Mwan pour ki nou ava kapab evalye si vreman STC pe fer sa ki nou’n demann li, sa ki Lasanble in demann li pour fer.

Mr Speaker mon pour termin lo sa note e Onorab Henrie ou garanti mon sipor.  Mersi.

 

MR SPEAKER

Mersi Onorab Adelaide.  Onorab Arissol.

 

HON SANDY ARISSOL

Mersi Mr Speaker, bonn apre midi tou Manm, tou dimoun ki pe ekoute Mr Speaker mon ti a kontan premyerman felisit Onorab Gervais Henrie pou anmenn en tel Mosyon dan nou Lasanble Nasyonal, sa i montre poudir bann Manm LDS Lasanble Nasyonal nou pa zis koze, me nou serye.  Parske letan ou anmenn en tel Mosyon an relasyon avek pri lavi, mon krwar i konsern tou dimoun, i konsern tou distrik e i konsern lepep Seselwa.  Selman lo la mon ti a kontan zis dir en keksoz, premyerman mwan mon ti a kontan ki bann dimoun ki pe ekout nou la laba deor zot konpran en keksoz, lo Order Paper premyer Mosyon ki’n monte pour sa lannen, se Mosyon ki pe koz lo STC ki i annan pour fer avek pri lavi.

Mon dir sa Mr Speaker parske toultan i reste en pti group dimoun laba deor ki dir ek ou, nou pa tann zot koz lo pri lavi, zot pa dir nanryen lo pri lavi, zot pa koz lo pri lavi ditou!

La premye Mosyon dan Lasanble 2018 anmennen par Onorab Gervais Henrie pe zisteman adres pri lavi, selman ozordi nou pe tous STC Mr Speaker.  E lo sa menm pwen i enportan pour bann dimoun ki pe ekout nou laba deor konpran en lot pti keksoz poudir nou, nou Manm Lasanble Nasyonal nou, nou kriye nou demande, nou fer tapaz, nou tap lanmen lo latab selman pa nou ki dan Egzekitiv.

Egzekitiv zot parey Onorab Adelaide in dir zot pour bezwen ekout Manm Lasanble Nasyonal ki nou pe dir parske sa, sa 6enm Lasanble i en Lasanble serye konpare ek 5enm Lasanble ki ti la ki pa’n zanmen anmenn en tel Mosyon pour bann dimoun laba deor.

Alor i enportan pour bann dimoun laba deor ki pe ekoute konpran poudir nou, nou Manm Lasanble Nasyonal alor nou tape nou demande, nou rode me Egzekitiv laba deor li ki pran desizyon si i anvi fer oubyen i pa anvi fer.  Selman parey Onorab Adelaide in dir nou ti a demande ki sa Mosyon ki sitan enportan i annan en dele letan.

Mon dezyenm pwen, mon kontan letan Onorab Afif taler dan son lentervansyon e Onorab Adelaide in mansyonnen poudir STC son CEO ti pe ganny swa avan 50 e la R80, 000 par mwan.  Mon kontan letan in mansyonn sa mwan.  Mr Speaker ou konnen akoz mon’n mansyonn sa parske mon pa vwar personn kot lorloz avek en plakar.

Me parkont pour saler Manm Lasanble Nasyonal tou dimoun i gonfle lo la, tou topik konversasyon i lo saler Manm Lasanble Nasyonal.  Be mon kontan, pour dir Onorab Afif taler in dir poudir ler en Manm Lasanble Nasyonal in kas sa ki fodre kase in donn Gouvernman pour li parey nou dir “rendre César ce qui appartient à César” nou anmenn dan lakour anviron R24, 000.  Be i annan en keksoz ki Onorab Afif pa’n dir ankor lo sa 24, 000 la ki nou anmenn dan lakour parfwa mwan koman Onorab Arissol i annan bann madanm laba deor ki mon madanm pour mwan pa konnen ki mon ede, ki mon asiste pour li ganny en pti keksoz kot STC ki sitan ser.  I annan en bann zafer, i annan en bann zanfan laba deor, ki mon bann garson pa konnen zot annan bann frer ek bann ser ki mwan mon pe soutenir, parske zot paran i apros ou i demann ou en pti led.  Sa i nou responsabilite moral koman Manm Lasanble Nasyonal.

Alor nou enkli mwan mon happy sa ki mwan pe gannyen, parske mon pe osi asiste sa dimoun laba deor ki son bout pa zwenn ek sa lot bout, zisteman parske nou pe koz lo la.

Ou konnen akoz mon pe lev sa Mr Speaker?  Parske ou a krwar Manm Lasanble Nasyonal i vin en group dimoun ki ganny targete laba deor.  Yer swar dan zoli progranm topik konversasyon ler mo tourn dan lakour mon ti pe gete en zabitan dan mon distrik ti pe koz lo la trankilite dan distrik.  Souden konversasyon la trankilite dan distrik i tourn otour loto Duty Free ki bann Manm Lasanble i mars ladan zot vit monte.  Be mon krwar nou bezwen osi dir poudir zis Manm Lasanble ki ganny loto Duty Free bann Pret laba deor zot pa ganny loto Duty Free pour fer zot louvraz, bann Minis, bann Ziz, lezot dimoun dan sa pei pa gannyen loto Duty Free mwan mon krwar SBC bezwen pli serye dan son travay aret fer bann progranm ki mislead lepep Seselwa!

 

(APPLAUSE)

 

HON SANDY ARISSOL

I enportan pour nou koman en Lasanble serye ler nou, nou pe travay pour sa pei SBC i bezwen pran son rol, zwe son rol pour zot kapab donn dimoun bann lenformasyon ki korek me pa mislead nou pep atraver en tablet pour dir madanm en tel in anvoy sa, msye en tel in anvoy sa.

I enportan pour nou tou, si nou kontan nou pei fer sir nou konnen kwa ki nou pe dir e nou pe dir byen, me pa mislead nou pep an relasyon avek sa!  Akoz si nou fer sa nou pour vin parey SMB parey ozordi in vin STC.  Prezan mon a vin lo SMB parey Mosyon pe demande, Mr Speaker mon ti a kontan fer en pti letour lontan SMB si mon pa, an 1985 letan ti komanse, zot ti annan supermarket zot ti annan zot Lizin Dite anler, zot ti annan zot mon krwar en Lakonpannyen ki ti fer dile avek juice parske mon rapel dan bann lekol lontan ti annan bann dile triyang ki ti vini son pake ti gri sokola, ti annan son rouz, strawberry, ti annan son ble ti vanilla, sa ti distribye dan bann lekol.  Zot ti annan zot lakonpannyen Lasos Tomat “Soleil” zot ti annan zot Lakonpannyen Laferm Kanmaron, zot ti annan zot Foodpro.  

Zot ti annan plizyer Lendistri oubyen plizyer bann pti outlet kot Gouvernman sa letan ti santi poudir i bezwen kre sa parske zot ti annan en sel bi pour fer sir ki Seselwa i ganny bann komodite kantite avek en pri abordab oubyen affordable parey nou apele li pour bann dimoun aste.  Be letan sa in kree ki nou’n vwar?

An vi ki Gouvernman Parti Lepep SPUP avan apre zot ti Parti Lepep sa letan zot, zot ti profit dan tousala zot, zot in profit ladan zot in fer sir ki sa bann travayer ki ti ganny abzorbe dan SMB sa letan sete zot bann aktivis, sete zot bann siporter.  Akoz?  Li i ti ganny anmase parske i ti partaz byen papye oubyen ti vey byen zaksyon dan Zone kot nou ti reste pour dir si ou ti malparl Gouvernman, si ou ti pe byen koz Gouvernman alor li i ti ganny anmase dan en SMB i ti ganny en plas travay.

SMB li i ti fofile partou fer sir tou biznes, e sa letan pli gro Wholesaler dan Sesel sete SMB zot ti annan monopoli lo diri, lo plizyer legim e lezot marsan ti bezwen aste avek zot alor.

E sa ki mon rapel byen SMB sa letan lakonpannyen mon krwar ki ti annan plis travayer e letan nou pe koz nou SMB i fer Lafet Travayer le 1 Me Messieurs, Madames zot ti ranpli sa Port Launay e zot ti ranpli Vilaz Port Launay sa letan semen i blok depi kot Mrs Ayoon  laba ziska kot Legliz ti napa semen pour monte, ti napa semen pour desann, sa ti SMB sa lepok.

Ler nou get tousala letan in antre tousala sakenn in sey fason sa ki ti lo Board bann ki ti Manager bann ki ti la sakenn in anvoy son lanmen, sakenn in fer son bout, sakenn sa lepok nou ti aprann poudir lo bwat ti mark toilet paper ti pe al lo zil selman ladan ti annan labyer Heineken.  Ti vin en katastrof enorm, zot rapel sa zistwar ti la sa, so tousala SMB in sey fer avek bi dapre zot pour zot anmenn komodite pour Seselwa, pour li ganny en komodite selman zot an menm tan zot ti pe tir en keksoz avek sa.

Mr Speaker be sa SMB la ler i ti frenmen pour vin STC la se pour sa rezon ki ou vwar nou ti bezwen antre dan makroekonomik parske nou pei li menm li ti en dezord enorm.  Alor i pour enportan pour ozordi letan nou, nou pe koze koman en Lasanble serye Gouvernman i ekoute akoz si nou pa fer atansyon avek sa menm STC ki la, avek Hypermarket ki nou’n tann koz lo la nou pour retourn nou dan menm sityasyon ki nou ti vwar nou ladan.

Mr Speaker alor letan mon’n tann koz lo kou operasyon mon krwar i en keksoz enportan ki nou bezwen adrese, letan ozordi mon get kot Hypermarket ki nou pe koz lo Hypermarket ou get kantite sekirite ki i annan deor pe fer letour Hypermarket mon pa vwar menm kantite sekirite kot Labank Santral kot tou nou larzan i ete. Prezan mon demann mon lekor kestyon, be ki nou annan kot Hypermarket ki i annan 4 sekirite lo parking, 4 devan laport, 4 lo son kote, akoz?  Gouvernman i vwar li normal ozordi ler Seselwa pe fer fas ek pri lavi Gouvernman i vwar li normal pour donn enn zot dalon lakonpannyen Sekirite pour vey STC a en kou parey in ganny dir R33, 000 par zour.  Alor eski ou ekspekte pour dir sa bwat dile pour desann pour zabitan St Louis benefisye.

Of course i pa pour benefisye letan mon’n tann koz lo korperasyon sa etranze ki vin travay Sesel ozordi si nou fer letour dan sa menm STC ki ti SMB avan Mr Speaker nou pour vwar poudir i annan etranze ki’n la dan sa Lakonpannyen depi komansman ziska la.  Me parey mon ti dir dan mon State de la Nasyon eski etranze ki vin travay Sesel pa i vini pour 2an pour li train Sandy Arissol pour ki apre 2an Sandy Arissol i pran son plas, be ki nou’n vwar dan SMB eski sa ki’n arive?

Ozordi kot STC nou annan nou bann Supervisor ki’n li pour plis ki 17an zot ankor pe ganny zot menm Saler ki zot ti gannyen eski i normal sa ler CEO pe anmenn 80, 000 li sa Supervisor ki travay lo floor i pe ganny menm saler?  Si ozordi STC pe pey en rental sepa konbyen parey nou’n tann dir be selman son cashier avek son sales assistant avek son general helper zot saler i menm parey be pa eske nou annan enn problenm?  Nou annan en problenm me selman Gouvernman li i pa enterese ek tousala li.

Gouvernman SPPF li i konnen mannyer i mannev tou son keksoz li, Gouvernman SPPF li i vini lo non lepep Seselwa i kree STC pour lepep Seselwa selman li i pa enterese avek fason ki mannyer pri lavi desann, akoz?

Li menm li STC pe lwe en landrwa avek li e sa larzan li SPPF i met lo son kont, ki i pour fer avek sa larzan lo son kont li?  Apre 5an dan Kanpanny Eleksyon i pour repran sa larzan, i pour re aste sa menm dimoun ankor ki’n depans son larzan kot STC parey nou’n ganny dir atraver 2 bout dibwa, atraver 2 fey tol, atraver en deep ek en cooker ki mars zis pour 5an apre 5an ou Kanpanny i fini ou met dan bor semen Clean Up The World i pase i anmase STC li – SPPF i fer egzakteman sa.

SPPF, sa tim ki Onorab Pillay ti ladan Mr Speaker 5enm Lasanble zot pa’n an mazorite prezan ti napa Lopozisyon sa letan, an mazorite zot pa’n vwar li neseser pour anmenn en Mosyon pour met presyon Gouvernman pou demande, pou apiye, pou koste, pou fer red parey zot sanson i dir pour ki pri lavi i desann.  Non zot pa’n fer sa zot kontrer zot vire lo STC mon pe koze.

 

(Interruption)

 

HON SANDY ARISSOL

Donn mwan letan.  Taler zot in koze la zis bwar en pe delo les mon koze, taler Onorab Gill in fer son politik, la les mwan fer mon politik.  Sel landrwa kot Politisyen i ganny peye pour fer politik se dan Lasanble Nasyonal.

 

 

(APPLAUSE)

 

HON SANDY ARISSOL

La mon pe fer mon Politik so pa disturb mwan!  Parti Lepep ki Onorab Gill in ladan depi SPUP, Parti Lepep, SPPF zot, zot pa’n vwar lenportans demann Gouvernman pour fer desann pri lavi zot!  Zot, zot in rode ki mannyer Parti Lepep i kapab lwe landrwa avek tou pour zot anmas larzan met dan zot Kont apre pour zot kapab servi.  Be si Gouvernman SPPF ti serye Mr Speaker premye keksoz ki SPPF ti devret fer sa 40 morso later ki zot annan la rann 1! Dir STC la en landrwa pour ou, fer en landrwa pour ou pa bezwen pey lokasyon sa later i vin pour ou.  Sa i ava ede pour redwir pri lavi olye pey, (Mr Speaker, Mr Sebastien, Onorab Pillay pe disturb mwan silvouple sak fwa en dimoun i koze i raise en point of order) e la mon ti a kontan demann li pour li aret disturb mwan donn mwan mon letan pour mwan koze.

 

MR SPEAKER

Go ahead Onorab.

 

HON SANDY ARISSOL

Mr Speaker.  Mersi Mr Speaker very good alor letan mon pe koze mon pa kontan zot tro disturb mwan Mr Speaker mon pe dir poudir SPPF zot, zot pa’n serye pandan tou sa bann letan alor i enportan pour letan nou pe dir ki mannyer nou kapab ansanm TOGETHER, TOGETHER mon repete ansanm nou kapab fer ki sa STC i ede fer desann pri lavi Mr Speaker.

Premyerman nou bezwen get son kou loperasyon ki nou tou nou’n koz lo la ki enportan pour nou revwar parske letan son kou elektrisite i o son lokasyon i o i annan travayer etranze bezwen pey rental kot i reste, son kou loperasyon i reste o, sa i pour fer ki letan STC ti ankor la obor CODEVAR son pti bwat Melody ki 400 granm ti kout R30 ler in bouze in al Hypermarket in ariv 33, la ozordi R38.80 sou met li R39.  Letan son pake Basmati ki ti 1 kilo letan i ti la anvil kot CODEVAR i ti R26 ler in bouz kot Hypermarket son pake diri otomatikman in mont R28. 25 sou.  Son pake dite la sa pake dite SEYTÉ ki i annan ki lo bwat i met 100 la, ler ou ouver ou konte parfwa i annan 83 oubyen 91 la, tousala zot fer ek nou STC!  Li in sorti R38 parfwa i ariv ziska 44 oubyen 42 a R44.

Mr Speaker kou loperasyon i bezwen desann, ler kou loperasyon i desann sa i a fer ki kou pour rod marsandiz i ava desann, zabitan St Louis i ava benefisye, sa ki nou, nou pe rode pa neseserman en shopping experience parey in ganny dir bomaten.  Parey Onorab Loizeau ti pe eksplike ozordi Hypermarket i vre zot annan lespas zot gran, me sa ki Onorab Loizeau pe dir ler ou’n pous ou trolley ou’n anmenn devan kot cashier nou pa anvi ki zabitan Bel Air son trolley i ariv R6, 000, nou pa oule ki trolley zabitan St Louis i ariv R6, 000 nou ti a swete ki letan in fer son shopping son trolley devan kot cashier omwen i ava ariv R2, 000 pour son konmisyon le Mwan parske sa manman ek sa papa i al met zot larzan ansanm e zot a kapab fer en bon shopping a en kou redwir Mr Speaker.

Dezyenmman ki mannyer nou kapab ede pour fer ki STC i vin abordab?  Parey Onorab Adelaide in dir Gouvernman i bezwen aprann ekoute nou annan nou en Gouvernman ki pa ekoute ozordi.

Sa Mosyon ki pe pase la tou Manm lot kote menm Parti Lepep zot in donn bann pwen pozitiv lo la, savedir e nou lo nou kote nou’n fer egzakteman sa, savedir Egzekitiv zot pour bezwen ekoute, pran bann pwen le neseser e donn nou en dele letan pour dir avek Seselwa laba deor vre Lasanble i serye.  E zot koman Egzekitiv zot bezwen prouve ki zot serye annan en dele letan pour nou gete kwa ki nou kapab koupe deswit pour fer ki sa pri i desann.

Lot pwen ki nou kapab fer se nou’n tann koz lo middlemen par egzanp ki mon krwar ki i en pwen enportan parske si Dubai pa prodwir diri nou bezwen rode akoz STC ankor pe pran diri Dubai.

Eski napa en koneksyon en dimoun ki ti deza la avan prezan in dir ek ou be get sa kontinyen pran laba ou e li i ganny en pti keksoz lo la sa osi i pour enportan pour nou rode pour nou fouye, akoz ou pa al rod diri dan plantasyon diri me ou preferab rod diri la ater kot en landrwa ki pa plant diri.

Si mwan mon mwan anvi fer en lakaz Mr Speaker e mon lakaz ozordi i pour kout mwan en kantite materyo mon pa pour al kot Madeleine beau Vallon pour al rod 4 bal lapousyer ros mwan, mon a plifere pran en pick-up 3 tonn al kot CCCL aste 3 tonn lapousyer ros parske i pour pli meyer marse e mon pour fer en pli kantite travay avek, be se sa ki mon pe dir middlemen ki nou’n koz lo la i pour bezwen ganny eliminen, e STC pour bezwen fer ki tou bann lezot keksoz ki zot pe zwe avek.

I pour bezwen ganny amelyore Mr Speaker e tou bann pwen ki’n ganny fer resorti ozordi mon krwar i sitan enportan.  Me mwan mon kontan pwen ki Onorab Pillay ti dir yer akoz en dimoun i deplase dan son distrik pour li spesifikman al kot STC?

Dan lepase dimoun in dir bon STC ti annan serten monopoli par egzanp STC ki ti fer vin ponmdeter dan lepase, alor i annan sa Seselwa ki dir be get sa olye al Glacis kot MUTU mon preferab desann kot supermarket parske li i bezwen annan ponmdeter parske li ki fer vin ponmdeter alor sa dimoun ti met konfyans dan STC parske i annan serten komodite ki li i ti kapab fer vini be letan mon’n tann Onorab Gill dir poudir STC i annan tou komodite ozordi STC pe fer problenm avek, pe fer fas avek problenm diri pa neseserman i annan diri kot STC; ponmdeter la tou resaman se Mr Khan ki pe fer vini ponmdeter.

Alor sa i montre poudir nou bezwen vwar osi bann Polisi lekel komodite ki nou bezwen large les lezot dimoun en fason ki si ou annan ou en bato avek ki i annan lera abor ki STC pe fer vini ki’n kit deor pa kapab koste Por, me i ava annan en lot Marsan omwen ki touzour letan STC napa li i kapab pe ed la kominote avek serten komodite ki bann dimoun i bezwen Mr Speaker.

Mwan mon krwar pri lavi i enportan, pri lavi i konsern tou dimoun e pri lavi i konsern tou nou zabitan dan nou distrik me i enportan pour Gouvernman vwar ki mannyer i bezwen aprann ekoute, pour nou kapab ansanm rode kwa ki meyer me selman parkont parey Onorab Gill in dir i pa neseserman zis komodite de baz ki fer pri lavi ser i annan elektrisite, i annan delo i annan telekominikasyon tousala, me selman letan i konsern vant sa dimoun lafen di mwan premye keksoz ki dimoun i fer se rod son manze met la apre i pey lezot son bann pti det.

E mon krwar Mr Speaker Mosyon anmennen par Onorab Henrie ek tou bann komanter ki’n ganny fer mon krwar i valab i enportan, e se pour sa rezon ki mon ensiste ki Gouvernman zot ekoute e zot donn nou en dele letan e zot vin avek en progranm kler pour zot dir avek Lasanble Nasyonal oubyen lepep Seselwa get sa apartir Zen sa lannen nou pe pran tel mezir, apartir Zilyet sa lannen pour annan tel mezir oubyen tel ladres ki pour ganny fer an relasyon avek STC oubyen Hypermarket.

Me an zeneral Mr Speaker mon ti a kontan dir ki mon happy avek sa Mosyon e mon repete avek bann dimoun ki pe ekoute laba deor nou, nou bann Manm Lasanble Nasyonal nou, nou pa Egzekitiv nou, nou fer tapaz nou demande nou rode, nou tap lanmen lo latab e nou, nou rod sa ki meyer pour nou dimoun laba deor!

Sa ki nou pe demande ozordi nou pe rod li pour nou dimoun laba deor pour sa Seselwa ki travay letan i ganny son mwenza dan son lanmen i kapab aste son komisyon kot STC parske STC son manda sete sa, annan komodite me a en pri abordab pour Seselwa kapab aste.  Se pour sa rezon Mr Speaker mwan mon pour donn mon sipor sa Mosyon e mon pour fer parey mon pour demann tou lezot Manm osi pour fer egzakteman parey mwan mon pe fer.  Mersi bokou Mr Speaker.

 

MR SPEAKER

Mersi Onorab Arissol, Onorab Sandy Arissol. Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker bonn apre midi, bonn apre midi tou dimoun e tou dimoun ki a lekout.  Mr Speaker dan Ladres Leta la Nasyon dan mon Ladres letan mon ti pe reponn Ladres Leta Lanasyon mon ti fer resorti en kantite pwen konsernan pri lavi kot nou bezwen fer desann dan sa pei.

E mon ti fer en promes osi ki konman nou pou konmans Lasanble mon pou met devan kestyon pou anmenn Gouvernman dan Lasanble pou li adres son lekor lo la, e ou konn tre byen parey ou’n eksplike yer ki mon annan kestyon ki Minis i pa’n kapab vini yer ni ozordi me semenn prosenn i pou vini pou nou koz plis ankor lo pri lavi.

Se dan sa lespri ki mon kestyon ti la avan e apre i annan sa Mosyon ki’n vini e sa Mosyon no matter ki mannyer nou kapab get li dan en fason i pe tous pri lavi, i pe dir gete ki mannyer ou kapab fer avek STC.

Li i dir sanz business model pou fer pri lavi vin pli abordab sirtou pri komodite la akoz sa ki STC li i vann, pri lavi i pli gro, pli gran ki sa be la nou pe tous pri komodite spesifikman, e mwan dan sa lespri akoz i tous pou fer desann pri lavi lo nou kote latab isi Parti Lepep pou donn sipor sa Mosyon.  Me i enportan ki nou reflesir nou tou isi dan Lasanble e nou pep i reflesir bokou kot i konsern sa ki nou pe koze ozordi, STCSTC Mr Speaker mon kontan mwan ki tou Manm la ziska konmela, avan ti annan serten ki ti dir ti a bon ferm Hypermarket isi laba, tou Manm ki’n koze ziska konmela la pe dir pa pou ferm STC.  E sa mon donn zot en Aklamasyon, mon dir fantastik e nou pep deor i anvi ki nou pa fermen STC., si nou pe dir sa deswit la i click ki i bezwen en keksoz ki bon.  I annan en keksoz ki bon ladan !  E prezan letan nou gete STC i en derivative of SMB.

Mon met li koumsa mwan akoz avan ti annan SMB la, prezan la STC e sa rol SMB, STC i pa’n la toultan li, ler in ganny kree i ti ganny kree avek serten lobzektif spesifik, e lobzektif spesifik sete pou fer sir ki pri lavi i pa mont dan en fason egzorbitan dan Sesel pour ki dimoun i santi mal pou li viv korekteman.

E sa i primordyal sa.  E Mr René ler i ti conceptualise sa kalite sistenm, sa  kalite lorganizasyon i ti konnen li poudir in sorti dan en Sistenm Kapitalis kot bann dimoun sakenn ti oule fer mannyer nou anvi, parey dan en Sistenm Kapitalis i marse e ki la si konmsi napa en fason pou Leta organize e gete dan sa ka pri komodite i pou al nenport ki fason menm avek  konpetisyon.  I vre nou pou argimante ozordi ki kalite sistenm nou ladan ensidswit.  That’s an issue.  E mwan kontrer mon profite la pou mon lans en lapel avek Gouvernman.

Gouvernman di zour Parti Lepep e la O Pouvwar Gouvernman Parti Lepep in fer en kantite pou sa pei, in fer en kantite pou son pep no matter ki Lopozisyon i a oule dir me in fer en kantite!  E mwan mon challenge the status quo, mon challenge Parti Lepep Gouvernman pou ki vi ki nou’n train en kantite  dimoun dan Lekonomi, me oli zot sa bann dimoun ?  Nou pa apel zot pou fer en konsiltasyon?  Sa ki SBC i devret pe fer olye pe kestyonn Manm Lasanble, pe kestyonn en boug ki pa konn ditou ki rol Manm Lasanble ; pourtan in deza dan Lasanble sa boug li, selman i pa konnen ki deal Lasanble?  Sa pou mwan SBC ti kapab fer rod en caucus par la, rod en pe bann dimoun ki’n train dan Lekonomi,  dan Trade, en kantite zot i annan.

Nou bezwen apel zot, kestyonn zot pou lepep krwar pou zot evalye ki nou pe fer dan nou pei, pa ti anvoy zot deor pou al rod Degre apre pou nou pa servi zot.

Nou ti anvoy zot deor pou formen pou pei servi zot, me pei mwan mon santi pa pe servi nou bann dimoun ki nou fer, ki nou’n donn formasyon ase.  So premye keksoz la mon lans en lapel pou ki bann Lotorite Gouvernman i pouse pou ki i annan sa bann refleksyon par nou bann dimoun ki’n formen dan sa bann direksyon, dan par egzanp dan lekonomi la, ki ava dir nou ava gid nou dan Komers i a dir nou la, la i annan diferan model, la en model ki bon koumsa nou kapab fer ensidswit i a fer nou,  nou tou konpran en pti pe pli byen ki mannyer pei pou marse dan sa direksyon, sa en pwen – met li laba ater.

Prezan Mr Speaker alor lefe ki nou tou nou tonm dakor ki STC i devret reste e ki son lobzektif prensipal osi i devret ganny garde, akoz letan mon’n ekoute pe koz lo zafer legim, fri al aste kot marsan kot prodikter laba kot fermye be koumsa ti konmanse. Be SEYCOM be pa ti koumsa?

Be prezan mon pa konnen si nou le re envant larou me la nou’n arive dan en lot letap me mon konnen poudir Hypermarket i osi ouver serten landrwa ki permet bann dimoun ki pe prodwir isi laba pou vini pou kapab showcase zot bann prodwi, sa i byen.  E Mr Speaker mwan mon krwar poudir sa rol i devret reste e nou devret al vwar kwa ki’n arive mal, kwa ki’n arive mal e nou tou nou pa devret per, pei pour nou sa pa pou en dimoun tousel, pa pou detrwa dimoun, pei i pou lepep. Ee nou, nou reprezantan lepep e nou Lasanble i annan rol primordyal pou zwe dan sa direksyon e nou, nou bezwen al gete kote ki’n mal e aranze, nou en rol nou tou.

Alor letan zot in koze taler mon’n antann mwan.  SMB ti koumsa, letan Onorab Arissol pe dir be mon al an plis, mon al an plis ki zot in dir, en letan SMB ti annan menm avyon, bann ki pli zenn mon konnen zot etonnen zot pa konnen, i ti annan menm avyon – ou konpran?

Zil nou koz lo Coétivy Prawns Farm.  Mon dir zot la pa ni ankor fini liquidation lo sa e mwan mon demande ki FPAC i follow up sa zafer.  E alor ki fer, nou vwar poudir somewhere along the line, i annan en landrwa kot keksoz pa’n marse parey nou ti anvi i marse, parey lepep ti anvi i marse, me STC, SMB avan, STC la i pa ti telman endepandan li, i ti tonm anba purview Minister Finans, dan sa bann letan ki nou pe kestyonnen la, be bann dimoun ki’n dirize kot Minister Finans pa’n fer nanryen?  E ki zot in koze ?  Montre mwan en landrwa dan en zournal, dan en Rapor kot zot in dir poudir la, la problenm nou pe gannyen!  Al rode mon ti ava kontan kantmenm pa donn mwan direkteman met lo Facebook konmela tou keksoz lo Facebook mete lo sa bann zafer, montre mwan kote Minister Finans in dir la, la problenm lala problenm A,B,C,D,E!  Zot in mank zot responsabilite, zot pa’n zwe zot rol.  La nou problenm i la dan sa pei!  Nou problenm i la akoz pe enport, pe enport mon pe koz pou dimoun, mon pe koz pou tou dimoun akoz si nou kontinyen kot i annan en problenm nou pa adrese dan sa pei nou tou ki la, pei pou sap nou e nou pep, nou, nou bezwen annan en responsabilite se sa ki mon pe call mwan, mon pe call lo sa responsabilite ki nou tou nou annan.

Ler la Mr Speaker nou pou vwar poudir nou kapab aranz keksoz dan sa pei si nou anvi.  Ler la mon krwar ki pri marsandiz i kapab desann e i bezwen desann dan sa pei.  Si nou tou nou met nou zefor ansanm nou obliz Minister Finans ek Gouvernman, san ki nou paraliz okenn nanryen, me selman nou met nou lipye ater e nou pa zis koze e nou swiv, nou fer sa swivi, FPAC a zwe son rol; savedir bann diferan lenstans nou Lasanble Nasyonal i a zwe son rol.

Mon pour la mon pou donn koudmen pou nou kapab fer sir sa ki mal i ganny aranze dan nou pei e Parti Lepep mon le dir la nou Lasanble e tou dimoun ki tann mwan deor, Nouvo Parti Lepep – wi mon pe koz nouvo Parti Lepep dan le sans ki nouvo vizyon ki nou annan Parti Lepep i pa pe tolere e soutir sa bann keksoz anymore!

 

(APPLAUSE)

 

HON CHARLES DE COMMARMOND

Sa mon pe dir e mon pe demann, mon pe fer en lapel avek pep Seselwa pou kontinyen siport nou, kontinyen reste avek nou, akoz sa nouvo direksyon zot pou happy e pli happy ankor!

 

(APPLAUSE)

 

HON CHARLES DE COMMARMOND

Mr Speaker nou pa bezwen cross the floor pour nou akoz nou pe dir sa bann keksoz pou aranz keksoz dan sa pei.  Nou pa ni bezwen fer okenn quoi que ce soit e se sa ki zot pou gannyen avek bann sa kote latab la Parti Lepep, sa ki nou pou gannyen nou pou kontinyen pouse dan sa direksyon e nou pa bezwen ler nou’n koz koumsa dir i annan en plas vid laba nou pa pou vini laba dan sa plas vid.  Me selman nou pou kontinyen koze on this side of the table !

 

(APPLAUSE)

 

HON CHARLES DE COMMARMOND

Napa nanryen napa tasyon nou bezwen aranze.  Ou vwar zot per deza ! Zot menm zot, zot per, pa bezwen per swiv nou, ekout nou e annou al ansanm nou ava aranz sa pei dan lafason ki i bezwen ganny aranze.

Mr Speaker problenm se ki nou konnen la aktyelman ki nou pe koze i annan en Operational Audit deza ki Minister Finans pe fer kot STC, annou les sa audit ganny fer, sa audit i enportan, sa audit letan in fini ganny fer i a dir nou kote ki problenm vreman i ete, eski problenm i nou bezwen sanz business model STC ouswa dan son loperasyon ki annan sa bann problenm e zisteman problenm ki preski nou tou dimoun ki’n koze la in mansyonnen.  Sa bann problenm!  E sa bann problenm i bezwen ganny adrese.

Mr Speaker mwan mon’n pas en pe partou pou gete ki mannyer keksoz i ete kot i konsern pri marsandiz.  E mwan mon dezapwente, dezapwente avek STC konpletman! Mon pa pe demande pou sanz pou ferm okenn nanryen mwan, pou sanz okenn nanryen mon dan le sans par egzanp son lo Erport son Duty Free, i bann Duty Free i pli bon marse dan lemonn, tou dimoun i aklanmen, pli bon marse dan, me alors akoz nou pa kapab fer sa pri lokal komodite bon marse osi pou nou dimoun!

Mon a donn zot en legzanp, i fer vini dizon fromaz slice, pou li i sorti an France, pou en lot Marsan ki fer vini osi fromaz slice sorti Lerop menm dizon Austria ou sa enn ki sorti Austria sa prive ki’n fer vini, son wholesale price apepre R17 ler ou’n met son markup lo la ensidswit dizon i ariv R20 retail, pou STC li in sorti an France pou li pros R55.  I enposib! Something is wrong somewhere e sa pa bezwen met legan pou nou vwar, i annan en keksoz ki mal e letan i mal premye lenstans ki devret pe vwar sa se Minister Finans.  I bezwen pe vwar li, akoz STC i tonm anba li, Fair Trading bezwen osi pe vwar me lepep i osi bezwen pe vwar e la ankor mon demande SBC i lo bor STC, STC, SBC, SBS pase li osi al gete vin dir, mwan mon ti a kontan pe vwar sa, tou le swar lo televizyon nou pe vwar pou konsonmater la, la bann keksoz in pase in vwar in ensidswit donn bann lenformasyon, lala transparans i la.  Nou a ganny en pe latransparans nou a met ansanm ek sa bann zafer i ava fer keksoz nou a vwar kote problenm i ete.

Now prezan NATCOF, sa i devret enn son rol li osi, me la nou pa’n donn li larzan petet nou a regarde nou a apel, non, non be nou a apel li gete ki mannyer pou zwe en rol pozitiv dan sa direksyon – pe enport sirtou sa bann letan si in fermen i ok si pe enport si dan bann letan i pa’n zwe byen son rol plen dimoun.  Plen lenstans dan nou pei pa’n zwe byen zot rol sanmenm sa ou vwar nou koumsa, sanmenm sa ou konpran Lopozisyon i pa’n fek vin dan Lasanble li, Lopozisyon osi ti la depi lontan ok, nou osi nou ti la depi lontan! ou konpran mwan?

Mwan mon pe koz lo sa fason obzektif poudir kote ki i annan problenm e la nou’n vini nou ansanm nou dan koabitasyon kantmenm en bann kot zot laba i dir napa nou, nou de mon krwar nou kapab travay dan benefis pei dan en fason lezot ava konpran nou, nou a travay ansanm, annou travay ansanm pou nou kapab fer ki nou anmennen en keksoz ki meyer pou nou pep silvouple.

Mr Speaker  Alor ou vwar annou reflesir ankor en pti pe, en letan STC, SMB ti annan monopoli lo bann serten prodwir, in dir arete diri ti en legzanp, arete monopoli isi laba ensidswit donn, annou privatize, liberalize, ozordi nou’n liberalize tou dimoun i kapab fer vin diri, be oli pri in desann?  In vin pli bon marse?  La menm i mank diri, be letan i mank diri ou pa kapab zis blanm STC, akoz pa zis li tousel ki fer vini!  I annan en issue la konmsi nou bezwen, pwen pou nou reflesir lo la.

Now i annan bann Marsan in annan 200an zot dan biznes fer vini marsandiz, depi ler nou konnen i annan en bann lannen STC, SMB in vini letan Parti Lepep in in O Pouvwar, ver 40an pase, be i annan bann marsan isi dan nou pei i annan apepre 200an zot paran, gran paran, aryer gran paran in fer vini marsandiz.  Be zot pa ankor ganny letan tou sa letan ganny larzan pou fer Hypermarket zot pa’n fer.  Non mon pa konnen zot ti kapab petet, be si mon vwar SPAR be SPAR be pa en nespes Hypermarket be konmsi zot ti a met lespri ansanm met zot resours ansanm.

La ater la i annan dimoun ki annan en ta milyon la sa bann dimoun.  Now zot in byen pase sa bann dimoun dan marsandiz la.  Anyway les li, les li mon pa pe forse pou al fer sa mwan, mon zis pe poz kestyon mon, pran sa met la.

Now, ozordi Sesel dimoun in delibere dan Sesel; dimoun i al deor kantite al vizit lezot pei e zot vwar bann diferan shopping experiences.

Lontan dimoun letan i ale ler i vini bann keksoz ou pa ekspekte i anmennen i anmennen, ozordi nepli akoz, i annan sa bann zafer isi menm Hypermarket ensidswit, kontrer petet lezot ler letan mon pe lans sa lapel la lezot i met soz ansanm nou fer  ankor en Hypermarket i ava vin prive, STC i annan pou li. Me nou bezwen vwar konman nou kapab fer pli byen.  Nou a pe koz lo bann middlemen, i enportan nou reflesir osi, nou groser marse, mon pe get kot Breweries, Seychelles Breweries, Breweries ou ale ou dir ou ava al aste wholesale laba, i dir ou non i annan 4 distribiter, Krishnamart, lot, lot, lot, lot, GS Pillay ou al aste laba, ou wholesale laba, i annan bann distribiter deor osi mon panse bann prodikter, bann dimoun ki prodwi an mass ou pa pou kapab ale en pti Sesel pou al aste keksoz laba direk dan faktori probableman i dir ou al kot son distribiter laba.

Me selman i kler pou nou pa kapab pas atraver 3, 4 agent ki nou, nou tou isi Sesel nou konnen, mon krwar zis Minister Finans ki pa konnen me la nou pe dir li si i pa konnen lotorite si i pa konnen la nou pe dir i annan keksoz ki mal e ki fer ki pri ler i ariv li marse letan i arive dan laboutik la in vin tro ser, akoz nou konnen ki arive dan semen, akoz nou tou ki la nou pa’n lekol konmsi deryer tablo nou.  Ou konpran?  Nou tou nou konn en pe keksoz dan sa pei e se sa rezon ki nou pe dir, e se sa rezon nou pep in fer nou konfyans i dir vin dan Lasanble al sey koze met Lavwa ansanm pou fer keksoz. So dan sa direksyon nou pe egzize, keksoz i ganny gete ladan pou ki nou aranze.  Aprezan Mr Speaker pou mon fini mon anvi osi dir ek lepep Seselwa, dir ek nou Lasanble mwan mon’n fer li mon devwar, mon’n diskit avek Lotorite Endyen pa pou zafer Assomption

 

(laughter)

 

 

HON CHARLES DE COMMARMOND

Me, me depi avan mon pa ti’n mazinen zafer Assomption dan relasyon ki nou koze ou konnen dan nou  rol responsabilite konman Manm Lasanble, nou’n gete akoz mwan sa ban zafer pri marsandiz la cost of living i vreman fatig mwan en kantite.  Avek lespri pou rod en fason  pou nou pep dan sa package ki, ki High Commissionner  Endyen in dir mwan i annan mon’n dir li be napa en fason pou ou kapab gete ki mannyer nou kapab fer vini keksoz en pe pli direk sorti dan L’Inde?  Akoz mwan pou ou lenformasyon Mr Speaker tou le an pou en pe letan la mon al fer mon check-up dan L’Inde?   akoz mon problenm maladi ki mon annan me letan mon ale, mon al osi gete ki i annan laba ki zot vann konbyen i koute.

Mr Speaker en kilo zonnyon rouz sa zonnyon rouz ki dimoun i kontan la Sesel en kilo zonnyon rouz dan L’Inde ater letan ou pe pase la, konmsi letan mon dir ater konmsi dan ou konpran Onorab i konnen ou osi ou’n al dan L’Inde nou R1 Endyen, R1 Endyen i apepre 25 sou isi, sa son pri 1 kilo, nou isi sa zonnyon letan i vini R11 kilo, R11 Sesel kilo? Something is wrong somewhere!  E mwan mon pa aksepte e mon pou kontinyen lalit, mon pou kontinyen pouse e mon demann lasistans tou dimoun isi dan nou Lasanble enkli ou Mr Speaker, enkli Depite Speaker annou, enkli ou Leader Lopozisyon pou nou ansanm nou pou met presyon lo Minister Finans!  E mwan mon konnen where there is a will there will be a way, pri marsandiz, pri lavi, pri komodite i pou bezwen desann very, very soon dan nou pei.  Nou pou pouse pou sa arive.

Mr Speaker nou a pe koz lo energy kot SMB laba, kot STC, energy kot STC pa kapab sa kantite, i bezwen reflesir, si i pa reflesir, laba zot Board, nou isi nou pou rod en fason nou a konsilte pour nou dir ki mannyer nou annan lide ki mannyer pri energy pou bezwen pour zot fer fre anndan laba la, pou li desann e zot pou bezwen ekoute; a bezwen sey fer, pou ki kou i desann.  E prezan nou, nou pe dir Hypermarket – sa is one aspect of STC prezan i annan, i bezwen fer son lot Laboutik li ki pa Hypermarket, ki si nou kontan nou ava ale.

E prezan sa bann Laboutik i bezwen annan franchise.  Mwan mon believe ladan mon son franchise si oule servi sa mo ki mon pe sey servi e letan mon’n ekoute Onorab Adelaide lot, lot in dir sa.  Sa bann laboutik la i pa pou vann zis prodwi STC li.  Savedir i bezwen fer zanmi ek serten laboutik dan distrik kot i vann son bann prodwi.  Li i fer vini, sa lide fer vin an bulk la osi i bezwen aranz son langar li son storage capacity STC i bezwen ogmante pa kapab sa ki i annan la, si fodre later plis sa Gouvernman ava organize si Parti Lepep sepa kwa, sa ki zot in dir la sa no problem, nou pep i pli enportan, no problem it  will be done on earth as it is in heaven.  It will be done ok.  Pa trakase nou ava pouse pou nenport kwa arive si nou anvi en keksoz arive pou benefis nou pep, believe me mon pe dir sa avek seryete e avek konviksyon e avek konfyans.

E prezan dan laboutik laba ki mon pe dir dan distrik son bann prodwi i a bezwen laba, prezan li STC pa bezwen pri kontrol pou fer re envant pri kontrol ki i ti annan avan, pa bezwen sa, mwan mon avi pa bezwen sa, be selman li, selman li STC sa ki mon krwar ti pe sey dir, STC li i bezwen annan son dimoun ki al verifye son prodwi laba.

Li i annan son pri kontrol pou li pou ou pa abiz lo lepep, ou annan ou markup pou mete ensidswit be i ava’n dir ou in donn ou transpor ensidswit i bezwen annan en pri, i a donn ou leeway dan lekel ou kapab zwe be selman i konnen sa son prodwi e si ou fer fot i bezwen  annan aksyon, mwan mon krwar si i serye ladan i annan en keksoz konkret i kapab ganny fer.

E alors ler mon ti pe koz lo sa package avek Endyen, Endyen la i kapab garanti nou mon retour lo la en pti gin pou ki nou kapab ganny li an bulk osi e pou mwan mon krwar mwan nou zistans ki nou ete ek L’Inde?  bato i pas lanmenm lo bor akoz la zot pe koz lo zafer Assomption zot dir akoz bann bato, laliny bato i lo bor, be si i lo bor i lo bor Sesel, be alor sa i bann fason kot dan sa negosyasyon si i ganny negosye ankor sa soz la mon’n tann en bann zafer ki’n pase me whenever i ganny negosye, pa ganny negosye Lenn i annan en Relasyon ek nou, nou’n epwiz dan sa Relasyon, eksplwat ladan, regarde ganny en koze pou ki nou, nou bezwen benefisye.

Akoz nou annan en relasyon avek en pei?  Relasyon avek en pei i pa pou zis detrwa dimoun li.  I pou pep e mon krwar lepep i avan tou Mr Speaker e mwan dan sa laliny alor mon krwar poudir i annan en kantite keksoz i kapab ganny fer, sa kestyon transfer pricing i kapab ganny deal avek.  E nou konnen nou parey mon’n dir nou pa’n lekol deryer tablo nou, nou konnen poudir dan lemonn dan sa dernyen 3 an pri komodite in monte, nou konnen par 70 poursan pri petrol in monte petet par 100poursan les li ou, nou konnen i annan sa zwe ki egziste.

But still nou krwar nou poudir i annan lezot fason e si nou serye e mwan semenn prosenn Mr Speaker letan mon bann kestyon i vini e mon a ganny sipor tou Manm Lasanble lo sa bann kestyon zot a demann otan Minis Finans ler la, ler la nou pou konnen sa ki nou pe diskite ozordi menm si nou, nou aprouve si Lotorite Gouvernman pou serye lo la, nou pou kapab evalye, nou pou kapab vwar e konpran akoz la, la Minister Finans pou bezwen fer en commitment avek nou Lasanble pou dir wi sa i kapab ganny fer, sa pa kapab ganny fer koumsa i pou ete ensidswit.

Dernyerman Mr Speaker pou fini nou lans en lapel avek tou bann Board ek bann CEO, nou lans en lapel akoz zot, zot ganny mete la pou fer marse manda sa lenstitisyon, sa Lorganizasyon lekel ki anba zot e Parti Lepep ki pe Gouvernen la ki O Pouvwar dan kote Gouvernman, i donn serten manda.

E sa bann manda i bezwen ganny swiv, akoz letan manda sa bann diferan Lorganizasyon STC an premye, i pa ganny swiv i pa ganny respekte byensir tou dimoun pou konplent e premye pou konplent se Lopozisyon, e ler zot konplent i vedir ki Parti Lepep konmsi pa pe fer nanryen pourtan Parti Lepep li in set tou keksoz li, in met tou keksoz annord li zis dan legzekisyon serten dimoun pa pe fer zot responsabilite byen depi Board depi dan serten ka CEO, depi dan serten ka pli ba, ler sa pa pe ganny fer la sa boul, sa negativite i tonm lo Parti Lepep.

Mr Speaker parey mon dir Parti Lepep i pou bezwen  tir li dan sa ban kalite zafer koumsa e i pou bezwen azir pli for, azir pli dir, azir dan en  fason, azir dan en fason kot i pou bezwen montre lepep Seselwa poudir ou pa joke ek Parti Lepep, Parti lepep i mean business. Parti lepep i dan ou zentere, Parti Lepep pou anmenn ou lo sa lot nivo, e Parti Lepep pou anmenn bann sanzman neseser dan STC, VITMAN sooner rather than later pou fer ki lepep Seselwa i benefisye avek son STC e ki nou tou nou a kapab vwar nou pe viv en pe pli byen.  Mersi bokou Mr Speaker I will support the Motion e parey mon’n dir TOGETHER, Onorab Gill in dir ou osi ou’n dir, TOGETHER we will move this country to the next level.  Thank you Mr Speaker.

 

(APPLAUSE)

 

MR SPEAKER

Bon nou pou pran en Break apre ler nou retournen mon annan en Manm ki reste lo mon lalis e apre mon ava demann mover Mosyon pou fer son konklizyon.  I ava bon ki nou fini sa Mosyon ozordi an vi ki i annan kestyon ki Onorab De Commarmond parey mon ti pe dir i relye avek Kou Lavi e nan relasyon avek STC tou, ki Minis Finans pou reponn Mardi.  So nou ava pran en Break e nou ava retournen 4.15.

 

(BREAK)

 

MR SPEAKER

Nou a kontinyen nou travay lo Mosyon.  E mon ava pas laparol avek Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker premyerman les mon swivan diskour Onorab De Commarmond swet la byenveni dan nou Lasanble the new PL.  Parske ti annan new Labour Party be la Onorab De Commarmond in dir avek nou ki i annan nouvo Parti Lepep.

Alor Onorab welcome e i vre i annan plizyer keksoz ki ou’n dir konsernan akoz pa’n ganny dir avan lot pa’n ganny dir.  E petet mon bezwen remind ou ki poudir ou’n Leader Government Business pour en kantite letan.  E ki ou’n la e ou pa’n anmennen sa bann Mosyon.  E alors mon kontan ki ozordi dan sa nouvo lespri parey Onorab Hoareau ti lev Konstitisyon anler.  Kot mon mazinen en lide pour rann sa nouvote pour montre bann Manm Parti Lepep ki poudir sa laliberte lekspresyon I ladan.

E nou lager pour nou anmenn sa e nou kontan ki zot in kapab anmennen vin zwenn nou.

Mr Speaker mon bezwen felisit Onorab Henrie pour sa ki mon ava dekrir konman meyer prezantasyon ki mon eksperyanse dan sa 25an ki mon en Manm Lasanble Nasyonal.  Mon krwar ki resers ki Onorab in fer, lafason ki in met li devan nou e devan lepep Seselwa.  Dan en fason elokan in ede pour lev nivo nou Lasanble ankor en pe plis.

Alors Onorab felisitasyon e mon kapab zis dir be si nou pe al dan sa direksyon mon krwar ki Lasanble Nasyonal I annan li en bon lavenir.  E kot nou ava kapab adres tou bann size dan en fason entelizan, e dan en fason kot nou a rod solisyon.

Mr Speaker kwa ki’n arive mal?  Sa se enn bann kestyon ki’n ganny poze e la ankor enn fwa mon retourn lo Onorab De Commarmond letan in mansyonn konmansman.  Onorab Gill osi tou in mansyonnen ki ti bi the setting up of the SMB.  Me i resanble ki definitivman ki keksoz in al mal e si ozordi Seselwa pe konplent lo pri lavi.  Pe konplent lo lafason ki keksoz pe deroule e si Onorab Henrie in anmenn son Mosyon apre ki nou tou ansanm nou’n ekout sa pep,  pe dir fer desann pri lavi sanz model biznes mon krwar se parske keksoz in al teribleman mal.  E mon Mr Speaker mon pour tenir lo mon pwen ki mon ti dir dan diskour lo mon larepons lo mesaz Leta Lanasyon.  E mon tenir lo mon pwen ki poudir ozordi letan mon pe koze la mon senserman krwar ki poudir STC Hypermarket pa pe delivre sa ki pe delivre.  E alor I bezwen fermen!  Sa i mon pozisyon!

Mwan mon pe koz lo donn Seselwa en leksperyans marsandiz pli bon marse posib.  Tou bann Manm ki’n koze in rekonnet ki poudir STC ozordi son Hypermarket son depans ki I pe fer lo son rent lo elektrisite lo tou sa bann diferan keksoz Seselwa pa pe gannyen en good deal.  Alor eski nou zis kontinyen pour nou dir nou annan en Hypermarket?  Kan ofet nou ti kapab ganny keksoz pli bon marse.  E se la Mr Speaker kot parfwa nou problenm isi Sesel mon mazinen parske nou pti pti.  E i vre letan ou dir i annan sepa konbyen mil Seselwa ki’n vwayaze.  Me i enportan osi pour nou regarde kote sa bann Seselwa in vwayaze.  E ki leksperyans shopping ki zot in fer.

E souvandfwa ler ou al en landrwa pour en semen pour de semen ou pa ganny sans pour ou vreman konpran tou bann dinamik ki egziste.  E pour bokou nou ki’n ganny sa sans pour al etidye an deor Sesel spesyalman bann ki’n ganny sans pour al etidye Europe konman en etidyan ki ou bezwen balans byen ou larzan ki mannyer I ete nou’n ganny sa bann diferan lezot leksperyans.

E letan nou koz lo sa bann diferan leksperyans shopping malerezman pa tou dimoun ki konpran.  Pran par egzanp L’Angleterre mon ganny sa privilez pour mon etidye England.  Be L’Angleterre i annan diferan ou osi tou Mr Speaker ou’n fer sa leksperyans parey i am sure i annan bokou nou ki in fer.  Be i napa zis en kalite supermarket England.  Ou annan Harrods ki si ou anvi aste en ponm £25 ou ava al Harrods ou ava al aste en ponm £25.  Me si ou anvi en ponm 10p ki osi bon ki sa ponm £25 be ou al dan LIDL.  Ou al dan Sense breeze ou al dan Morrisons ou al dan Tesco’s I annan diferan model.  E alor nou isi e mwan mon krwar ki i enportan pour nou regarde ki model ki nou anvi ki nou bezwen.  Letan ou L’Europe e letan ou England osi souvandfwa obor LIDL I annan en lot brans.  I annan en lot chain ou kapab pronons li dan diferan fason mon pronons li ALDI.  E sa i en chain alman ki ozordi i partou dan Europe.  Be ankor enn fwa ou ganny ou bon kalite me selman son setup i totalman diferan.  Letan ou antre dan sa supermarket ou vwar tou bann marsandiz i annan son pri endividyel, me an menm tan osi i dan bwat, letan ou leve pour ou met dan trolley ou lev li antye.

Alor ki Seselwa pe rode?  Mon krwar e mon senserman mon reste lo sa pozisyon e mon tenir pozisyon Onorab Henrie.  Seselwa pe rod bon marsandiz me pli bon marse posib.  E sa I tonm enpe avek filozofi LIDL kot i dir avek ou high quality but LIDL konmsi ptipti pti git.  Me Mr Speaker sa ankor enn fwa I annan en prosesis ledikasyon ki nou bezwen antre ladan.  E dan sa prosesis ledikasyon letan nou pe koz lo pri lavi ki enkli marsandiz ki enkli bann lezot eleman dan lavi toulezour mon krwar ki nou bezwen osi regarde ki mannyer nou edik sa pep.

E se la kot mon dakor avek Onorab De Commarmond e mon dakor avek Onorab Arissol ki olye gaspir letan lo SBC pour Mr Jules Hoareau pour anmenn en konpanny personnel avek en azanda personnel kont Lasanble Nasyonal I bezwen edik sa pep.

Se sa ki nou pey li!

 

(APPLAUSE)

 

HON WAVEL RAMKALAWAN

E mwan personnelman Mr Speaker mon ava dir avek Mr Hoareau ozordi si ou anvi vin en Manm Lasanble dan prosen eleksyon met ou kandidatir e lepep Seselwa I ava deside!

 

(APPLAUSE)

 

HON WAVEL RAMKALAWAN

Letan nou met nou kandidatir e nou’n antre dan sa Lasanble Nasyonal lepep Seselwa in konnen zot ki’n elekte nou!.  Mon pa’n tan personn antre isi par Koudeta dan sa Lasanble!  Nou tou ki nou proporsyonnel ki nou ganny elekte direkteman lepep Seselwa ki’n elekte nou.  E Koudeta parey mon dir pour napa ankor!  Alor antre trankilman atraver bwat vote ti fek annan en bi election Anse Boileau I annan enn in ganny 88 lot in ganny 55 be petet mon pa konnen konbyen ou ti pour gannyen!

Alor Mr Speaker mon pe dir sa akoz ozordi an menm tan ki nou pe fer bann Mosyon kot nou pe diskit lo byennet lepep Seselwa.  Lasanble Nasyonal osi tou pe dir nou nou pa bann boul kot ki zis ou pour koudpye nou gos dwat.  Nou osi tou nou pour reponn akoz nou konnen ki poudir nou pe fer nou travay dan en fason serye e nou pe rode ki mannyer nou pour kontribye pour fer keksoz avanse!

Mr Speaker Sesel in ganny vole e enn mon tenm se ki fodre ki larzan I retourn Sesel.  E si ozordi nou pe soufer SMB se parske zisteman nou’n ganny vole letan ti setup ti annan bon lentansyon.  Menm parey le 5 Zen letan Msye Rene ti koze a nouvo Sesel ki Onorab Gill tanzantan I remind nou.  I pa ti dir nou I ti pour fer dimoun disparet, I pa dir nou, ki I ti pour annan dimoun ki pour met dan Prizon!  I pa ti dir nou, I pe al fer parti politik; I ti dir avek nou ki tou keksoz pour bon.  E nou osi tou nou ti krwar poudir STC son bi ti pour bon.  Me selman annou regarde ki mannyer zis mon pour pas en pti git lo listwar ki mannyer nou ti ganny vole e ki mannyer ozordi lepep Seselwa I ankor pe ganny vole.

Mr Speaker deswit apre ki apre sa bann zafer SMB Msye Rene avek en Mr Gerald Dickson ti form en lakonpannyen ki zot ti apel Grafix.  E Grafix konpran byen ki I vedir I vedir son ‘D ‘avek son ‘IX’ I Dickson son dan milye raf se France Albert Rene in the reverse order.  E li Msye Rene I kontan fer sa bann zafer.  I aste en laferm Australie I apel Algagresou Al Albert Gra Gregoire lot bout Sou – Soulican Algagresou.  Non I annan lot bout dan milye Gaitan Barallon.

Letan ou pas deor son lakaz son lakaz ki mannyer I apele Alsarelo bann diferan non Albert son zanfan Sarrah ensidswit.  Koumsa ki I kontan fer e sa Grafix Mr Speaker apre ki I ti’n ganny formen tou lenportasyon Gouvernman ti reste kot li pe anrezistre L’Angleterre.  E la mon annan tou son bann soz son company number 01867092.  Tou keksoz ti pas atraver sa e lekel ki ti bann dimoun Mr Mukesh Valabhji ti enn bann Direkter.  Mr Mukesh Valabhji apre letan Mr Valabhji ti arête Mr Patrick Vel ki ti vin son Direkter.  Me li Msye Rene li pa zanmen dan sa bann lakonpannyen.  Son Algagresou I pa lo la li!  Li I reste deryer.  Parey Koudeta, I pa ti fer Koudeta li!  Ou avek mon ki ti fer Koudeta.  Onorab Ferrari ki ti fer Koudeta.

Mr Speaker se sa lafason ki in marse.  E apartir la konmans pran larzan avek sa pep Seselwa.  E annou pa bliye ki an moman kot sa pei ti pe soufer avek kriz ekonomik, se la ki Msye Rene ti aste laferm Australie.  Me kote I ti ganny foreign exchange $50milyon disparet dan Labank Santral?

Tousala lepep Seselwa I bezwen ganny en konpran ki poudir akoz tou sa bann keksoz in arive se la ki ozordi nou pe anmas lepokase.

E pourtan pli boner tou bannla I annan serten Manm ki’n dir be i annan en ta larzan dan pei e bann dimoun ti annan zot bann supermarket.  Wi Onorab De Commarmond pour mazin byen e mon osi mon mazin byen zis dan Viktorya ti annan Victoria Super ti annan Chez Philip ti annan Mahe Trading ti annan Julien Parcou, ti annan Richard Supermarket pour la fanmir Mancham; ti annan Chaka ti annan Teemooljee’s.  Tousala ti annan parske ti en free market economy!

Me , dousman zot tou zot in ganny sere pa ganny dwa enport isi pa ganny dwa enport laba pri kontrol – import permit tousala se sa ki’n detri tou sa bann keksoz.  E ozordi nou ankor pe soufer.  E sa 50milyon mon pe mansyonn li sa $50milyon in dir ki ti ganny transfer dan kont SMB.  SMB li menm ki ozordi I STC savedir $50milyon miltiplir li par 14 nou ava konnen ki kantite larzan ki zot.

E sa bann dimoun Mr Speaker ki’n partisip dan sa bann direksyon ozordi zot ok zot.  Mr Mukesh Valabhji I annan gro tower dan Singapore lot zour ti annan en problenm an France avek se pa ki lot kalite zafer.  Ou tann Ile Pasyon – Ile se pa ki lot zafer; ou tann Intelvision, ou tann tou sa bann.  Ki mon pe sey dir Sesel in ganny vole e se pour sa rezon ki ozordi nou koumsa!

 

(APPLAUSE)

 

HON WAVEL RAMKALAWAN

E I enportan alor pour nou koste zepol ansanm konman Seselwa. pour nou repran sa vole ki nou.  Pour nou reklanm sa ki nou’n ganny vole!  E mwan letan mon regard otour nou, mon pa bezwen rocket scientist.  Ki mannyer ozordi letan ou regard ankor enn fwa mon parey zot konnen mon pa abiz mon dwa isi dan Lasanble me mon met keksoz ki reel.

Ki mannyer ozordi madanm ansyen Prezidan Rene Sarah Rene Madanm Sarah Rene I annan li propriyete partou?  Be kote in gannyen eski nou pa devret fer en resers lo la?  Pour nou regarde ki mannyer sa bann larzan Sesel lot zour nou ti koz lo la.  Ti annan en bout Providence ki’n fek ganny vann pour sepa konbyen milyon.  Kot Airtel I ete par devan Airtel laba Beau Vallon.  Partou kot ou pase se sa ki ou vwar.  Alor Mr Speaker e mon krwar senserman ki poudir tou sa bann zafer I annan pour fer avek SMB ki ozordi i STC.

Letan nou regard Coetivy bann nou ki’n ganny sans al Coetivy Mr Speaker Coetivy SMB ankor enn fwa ki pep Seselwa in bezwen kontinyen pe peye.  I annan plis ki $150milyon ki’n antre ladan.  E ozordi sa bann letan ou regard sa ki p arive lo Coetivy personn pa responsab tou kanmaron in ganny eksporte larzan nou pa kapab dir kote I sorti kote larzan in ale.  Be ozordi tousala se bann keksoz ki nou ki a pe soufer!

Orchid Farm tou sa bann zafer ki’n arive.  E pa bliye Mr Speaker ant 2001 a 2008 SMB tou le semen ti pe ganny li $700mil tou le semen I ti pe ganny li $700mil an giz ki pe pour lenportasyon, pour isi pour laba.

Alor si ozordi nou pe pas dan sa sityasyon e mon krwar ki poudir pe kontinyen.  Letan Onorab Aglae i dir STC tou son bann transpor i Daihatsu tousala nou rode akoz.  Ou konnen akoz Onorab Aglae se parske Daihatsu son lazans se Abhaye Valabhji!

 

(APPLAUSE)

 

HON WAVEL RAMKALAWAN

Se sa rezon e letan nou pe dir be sanz sa model konpletman annou regarde.  Nou konman en Lasanble nou bezwen take the bull by the horns.  E lo sa size pri lavi, mwan mon senserman krwar ki poudir sa prezantasyon ki Onorab Henrie in fer e nou bann entervansyon, nou, nou pe dir avek Gouvernman nou fatige avek sa zafer ki pe kontinyen la.  E nou pe dir fer en keksoz konkret donn Seselwa en meyer lavi.  Akoz Seselwa i kapab ganny en meyer lavi!

Mr Speaker letan STC, STC li menm li sa semen in donn nou laprev lo ki mannyer Seselwa pe ganny vole.  Mon pran mon letan mon analiz sa papye ki zot in donn nou.  Konnen mon dekouver Mr Speaker dan sa papye i annan de middlemen.  I annan de middlemen.  E se pour sa rezon ki yer mon ti fer resorti ki poudir sa zafer dat.  Dat lo sa de papye I diferan – enn i 2017 lot I 2018.

Mr Speaker lo dernyen paz i annan en lakonpannyen ki apel Gautam General TradingGautam General Trading li son dat lo sa papye I le 19 Zen 2017.  Akoz i 2017? Se parske letan ou al lo son website ou konnen ki I dir li? Son konman en Mission Statement.  Son lakonpannyen ‘’has visualized itself as being one of the primary suppliers of basmati rice throughout the middle eastern market. ‘’ Alor li i fer vini diri basmati sorti L’Inde i met li la.  En middlemen li – I pa prodwir diri li i met li la.  Sa 2enm lakonpannyen ki son zafer I date le 2018 Hassani Food Industries li ki’n eksport sa diri isi kot STC li i 2enm middlemen.  STC I kontakte Hassani Food Industries i dir li mon bezwen diri basmati.  Hassani Food Industries i fer en local call detrwa kilomet down the road i telefonn Gautam General Trading i dir avek li mon bezwen tan kantite diri basmati.  Mr Speaker la en legzanp lo ki mannyer Seselwa i ganny bage li.  Sa Seselwa aprezan i al dan supermarket STC ki i pe peye li?  Li i a pe pey markup STC i a pe pey markup Hassani i a pe pey markup Gautam e me selman nou pa’n al direk laba.

Pourtan ankor enn fwa letan ou regard zot kote zot aste zot letan mon regarde zot sa bann lakonpannyen la, zot apel sa bann manufacturing sites India China Taiwan.  Zot konnen ki mannyer pour al rode nou Seselwa ki pey lepokase.

Eski sa deswit pa en keksoz ki bezwen sanze?  Letan nou pe dir sanz model eski sa deswit parey plizyer parey plizyer bann Manm in dir.  Deswit nou bezwen kas sa e kas li dan en fason serye?

Seselwa Mr Speaker in ganny vole e Seselwa ozordi I ankor pe ganny vole.  Nou konman Manm Lasanble parey Onorab Arissol in dir nou pet al tou keksoz ater.  Nou a pe dir avek Seselwa ki mannyer keksoz I ete be si Gouvernman li i pa deside pour li pran aksyon.  Be nou pour kontinyen ganny vole pa bezwen blanm Manm Lasanble.  Pa bezwen zis vini dir avek Manm Lasanble zot pa pe koz lo pri lavi.  Nou’n tal tou keksoz ater nou’n met tou keksoz o kler nou vwar problenm nou osi.  Pa bezwen zis sante malere pe soufer ki Manm Lasanble pe fer dan Lakaz Kare.  Wi sa batiman ki nou ladan I kare me selman si aksyon pa ganny pran napa nanryen ki pour sanze.

Be Mr Speaker I annan en lot zafer ankor.  E i annan en Manm ki’n mansyonn sa, sa ki apel price racking.  Price racking i enteresan li.  Pour en lakonpannyen fer biznes lo li menm i kree en lakonpannyen laba deor.  E I annan en Manm ki ti koz lo la bomaten Onorab Afif mon krwar ki ti koz lo la.  Lo ki mannyer zot kas kontour.  Li i kree en lakonpannyen dizon Dubai oubyen India sa lakonpannyen i pour li.  Aprezan sa lakonpannyen i anvoy li en invoice prodwir i fer son lekor vin en middlemen.  La aprezan sa keksoz ki kout sa keksoz ki kout R10 li aprezan i met en markup i fer li vin R15 aprezan letan i vin isi, i deklar li R15.  Sa ler la li son prop zafer I pour li.  E son lakonpannyen ki laba deor in anrezistre sa lakonpannyen se pa dan ki fason son biznes ki I fer.  En pe parey Grafix letan ou regard son bann larzan sipoze fer pti git larzan.  Be wi lo papye I pti git me selman finalman sa ki I pe fer isi avek ou I terib.

Mr Speaker tousala se bann keksoz ki Gouvernman I bezwen regarde.  E mwan mon enn sa bann dimoun ki letan nou ti pe regard Bidze; letan ti annan sa larzan pour NATCOF mon ti dir koupe.  Ansanm avek nou bann dimoun akoz nou pa kapab annan en lorganizasyon ki zis fer sorti en Newsletter tou le 6mwan.  Me selman pa fer nanryen.  Sa I annan plas dan nou pei pour bann NGO omwen pour one NGO pour li kapab pran sa bann keksoz o serye pour li regarde.  Ki mannyer Mr Speaker dan lespas detrwa minit mon nobou vwar sa ki mannyer mon kapab vwar sa?

Se parske mon annan en lentere pour mon regarde be ki egzakteman pe arive be sa bann lakonpannyen zot osi tou zot bezwen pe regarde ki mannyer keksoz i bouze.  Ki mannyer trade pe bouze dan lemonn e ozordi ou pa ni bezwen pran en avyon oubyen pran en bato pour ou al regarde.  Ou al lo internet ou regard tou keksoz ki mannyer I deroule ki son pri ki mannyer marse i ete, ki mannyer ou kapab aste bann keksoz.  Ki mannyer nou annan nou bann Seselwa ki’n debourye at the height.

E la ankor enn fwa kot mon pa ganny en konpran ki mannyer Seselwa pandan moman kot ti annan kriz ekonomik kot ou ti ganny $400 $300 whatever it was; ki mannyer Seselwa pandan sa moman ti pe monte desann Singapore ti pe al debourye.  E ki mannyer ozordi tou Seselwa I ankor pe debourye akoz se parske Seselwa I enterese.  I enterese pour son byennet ki mannyer I pour fer son lavi amelyore.  Be ki mannyer sa bann dimoun ki ganny responsabilite ki pe ganny R80mil par mwan be ki mannyer zot pa pran lentere Sesel ek Seselwa?

Zot bezwen sanz I bezwen annan keksoz ki sanze.  Zot bezwen pran lentere Sesel a ker annou pa zis rod bann annou zis pa rod leksperyans kart leksperyans isi ti, ti, ti, ti, ti.  Be annou regarde ki mannyer nou pour donn sa Seselwa en meyer deal!  STC ozordi e la ankor enn fwa byensir letan nou travel letan ou antre par egzanp Sud Afrique ou antre dan en supermarket.  Premye keksoz letan ou pe peye i demann ou si ou annan en kart si ou annan en Fidelity Card.  E si ou napa deswit I fer aranze pour ou gannyen pour ou azout pwen.  Konmela partou kote i koumsa Sesel zis en lorganizasyon ki annan zis STC.

E eski nou demann nou konbyen zis sa zafer kart i koute eski pa en keksoz eski sa i tonm parti dan son misyon?  Oubyen eski sa bann zafer I devret pour nou ankouraz bann supermarket prive al dan sa direksyon e li donn nou en meyer deal.

Donn nou en meyer deal nou annou zis pa rod pa zis rod sa shopping experience se pa ki deal konmsi parey li letan ou Sud Afrique nek ou byen letan ou Europe ensidswit.  Fantastik I pour annan son I pour annan son kategori Seselwa e la mon pa pe rod klasifikasyon mon.  I pour annan Seselwa parey i annan ozordi I annan serten Seselwa ki dir avek ou I pa kapab bwar Seybrew.  I bwar Heiniken se pa ki Seybrew pa ale avek li or whatever.

Pareyman I pour annan serten dimoun parey mon koze o konmansman L’Angleterre oubyen okenn lezot pei pour annan serten dimoun ki pour dir avek ou li i pa al fer son shopping kot LIDL oubyen Tescos li.  Li i al Marks & Spenser li I al dan bann Harrods oubyen whatever.  Menm parey avek lenz.  Lenz i annan serten dimoun i satisfe pour li letan i pase Maurice, i antre dan lafwar i vwar 4 zoli semiz I aste son kat zoli semiz i vini.  I annan avoka ki aste zot keksoz dan lafwar mon letan mon ti dan bann premye Lasanble mon apel en fwa mon ti dir zot mon ti aste mon semiz Port Louis obor semen.

Sete bann semiz ki bann gran lakonpannyen sa menm semiz ki ti pe vann R100 Mauricien letan ou ti al France mon ti aste li se pa 50Ero.  Se pa konbyen i ti koute be Sesel osi tou i pour annan sa bann i pour annan diferan dimoun me dimoun osi i bezwen aprann pour li viv par son mwayen.  Mon krwar tousala i form parti sa ledikasyon e ki petet sa ledikasyon osi.  E petet i annan serten dimoun pa pour kontan ki mon pe dir par egzanp ozordi lo nivo lakaz.  Mon senserman krwar ki poudir parfwa progranm lakaz Gouvernman i aktyelman met en fardo lo serten fanmir.  Akoz ou donn en fanmir en lakaz ki son income i pti git, i napa ase larzan zis pour li penn sa lakaz aprezan son lakaz i deteryore tou keksoz i deteryore.  E ou trouv e nou tou dan nou tou dan nou distrik kot nou pase nou kontan ler en dimoun i ganny en lakaz.  Me parfwa nou bezwen demann nou eski sa model lakaz i bon pour ou dimoun, oubyen eski ou devret fer dimoun mont par peron pour li avanse!

E ozordi Mr Speaker letan nou pe koz lo sa size pri lavi pour sanz sa model mon krwar ki poudir i tre enportan pour nou balans sa STC byen.  E pour Gouvernman pran en aksyon deswit!  Parske sa Mosyon la nou pa pe dir dan 6mwan al fer soz al fer resers al isi al laba.  Be pa tou Manm Lasanble nou’n koze be nou bann Manm Lasanble nou lavwa pa I enportan?  Pa nou koz avek dimoun pa nou analize.  Pa nou’n al liniversite nou osi?  Pa nou’n etidye?  Alor akoz pa kapab ekout nou.  E pour ki sa Board STC I vini I koze e pran aksyon konkret.

E mon Mr Speaker mon pour dir ozordi i le 21 Mars mwan mon krwar ki si dan en mwan Gouvernman pa anons en keksoz konkret, mon krwar nou pour bezwen pas en Mosyon.  E mon sir ki nou pour ganny sipor nouvo PL nou bezwen pas en Mosyon of ‘No Confidence’ dan sa Gouvernman.

 

(APPLAUSE)

 

HON WAVEL RAMKALAWAN

Parske nou pa pour kapab kontinyen les zwe avek nou.  E mon pour konmans drafte sa Mosyon ki poudir sa Lasanble Nasyonal i eksprim son dezapwentman an sa ki konsern sa Mosyon ki zot in aprouve dan en fason inanim lo rol STC.  E i ki nou pas en vot ‘No Confidence’ dan sa Gouvernman e nou pe donn warning.

Mon pa le servi langaz Onorab Gill, Onorab Gill ti pour en pe pli agresiv, en pe pli for, en pe pli direk me selman letan Mosyon i a pase si Gouvernman pa fer nanryen mon osi mon pour koz parey Onorab Gill en kou!  E mwan osi mon pour fini avek ‘TOGETHER!’ Nou bezwen fer en keksoz.

Mr Speaker avek sa detrwa mo mon krwar mon dir sa ki mon fodre dir e mon siport antyerman sa Mosyon e mon demande ki aksyon I ganny pran dan tou bann diferan fason.  Ki nou fer desann pri lavi, sanz model STC, redwir son kou loperasyon, ankouraz bon konpetisyon lo marse, fer desann pri marsandiz e donn Seselwa en meyer deal posib.

Me mon pa kapab terminen letan mon pour dir letan nou pe koz lo STC.  Bann lezot marsan pa krwar ki nou pa pe get zot osi!  Parske zot osi tou zot pe zwe kouk avek nou pep.  Tou sa bann diferan chains ki egziste tou sa bann nouvo supermarket ki’n fer dan tou bann rezyon tou sa bann Biro to lesanz.  Mr Speaker sa bann Bureau de Change I annan ki annan nanm ki pe pase ladan!  I annan manboulouk ki pe pase ladan!

 

(APPLAUSE)

 

HON WAVEL RAMKALAWAN

I annan manboulouk ki pe pase ladan!  Nou pe dir avek tou bann dimoun fer biznes Sesel silvouple kit sa larzan Sesel dan nou lekonomi!

 

 

(APPLAUSE)

 

HON WAVEL RAMKALAWAN

Sa bann zafer pour abiz lo nou Seselwa pour anvoy larzan deor dan tou kwen lemonn pour zot avanse pli devan, nou dir avek zot pa bezwen pran nou pour bann enbesil!

Alor Mr Speaker mon krwar ki poudir Gouvernman I annan en gro latas devan li.  I annan en kantite travay pour li fer afen ki Seselwa I ganny li en meyer lavi.  Seselwa I kapab viv byen avek son fanmir dan en fason ere.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan.  Mon ava demann mover Mosyon pour fer son konklizyon.  Onorab Gervais Henrie.

 

HON GERVAIS HENRIE

Mersi Mr Speaker.  Bon apre midi tou dimoun.  Mr Speaker dabor mon ti a kontan dir ki poudir sa Mosyon ki nou’n prezante yer, mon pa vwar li konmsi ti en Mosyon pour Gervais Henrie tousel.  I en Mosyon LDS e pour Lasanble antye evantyelman letan nou –pour vot lo la.  I en lide ki nou’n tonm dakor lo la ansanm konman en lekip.  Lefe ki sa I nou premye Mosyon table par LDS pour sa lannen.  Mon a profite pour les bann manm piblik konnen ki konman en lekip nou desid lo diferan lide.  Kwa ki nou pour met de lavan dan zot lentere e evidaman nou tonm lo pri lavi an relasyon avek STC pour premye.

Nou diskite nou diskit son merit si I fer sans pour anmenn dan Lasanble.  E apre nou idantifye sa MNA ki pour vin konman flag bearer sa Mosyon.  E sa I en loportinite pour nou konman bann endividi dan LDS ganny sans devlop zot akoz nou bezwen al fer resers pour sa Mosyon enterakte avek bann ki pli konnen ki nou.  Akoz ler ou dan Lasanble i pa vedir ki ou konn tou keksoz e prezant sa Mosyon a en oter ki Lasanble I ekspekte de nou.

Alor dan bann mwan e lannen ki pe vini nou pour vwar ankor sa bann keksoz koumsa.  Dezyenmman mon le dir ki I annan en kantite sif ki’n ganny prezante par diferan entervenan depi yer sirtou lo sa kote latab.  Tou bann sif ki nou’n prezante Mr Speaker mon le dir ki nou pa’n zis pran dan ler koumsa i bann sif ki available to the public.  Laplipar sa i sorti dan bann rapor anyel STC depi 2009 ziska 2016 e sa bann rapor i dan Domenn Piblik partikilyerman lo sitweb PEMC – Public Enterprise Monitoring Commission.

Lot gran kontribiter dan sa deba in STC li menm zot in volonterman ofer mon larepons plizyer kestyon ki mon demann zot e mon ava profite pour remersye STC Mr Speaker.  Sa I montre nou en keksoz mon krwar zis parey I annan sa sanzman politik ki’n arive nou vwar dimoun pe koz en pe plis met zot lopinyon de lavan.  Mon krwar STC right now resaman nou’n vwar nouvo board ki’n ganny apwente nou’n vwar nouvo Management donk i annan en volonte mon santi I annan en volonte kot zot pare pour fer konversasyon lo sa menm topik, ki nou’n diskite.  E alor nou merit probableman profite konman Manm Lasanble pour enterakte en pe plis avek zot.

E trwazyenmman mon ava dire n gro mersi pour tou bann Manm lo tou lede kote latab ki entervenir lo sa Mosyon.  Fransman in menm sirprann mon bann kontribisyon ki’n annan dan sa deba.  E mon krwar nou’n fer en bon deliberasyon.  Mosyon ti direk e senp e mon ava zis repas lo la.  Son demann sete; avek bi pour fer desann pri lavi dan pei, ‘Lasanble Nasyonal i demann avek Gouvernman pour sanz model biznes STC anfen ki i kapab redwir son kou loperasyon ankouraz bon konpetisyon lo marse avek bi fer desann pri marsandiz e donn Seselwa en meyer deal posib dan en pli kourt dele posib.’

Alor latansyon spesifik ti lo STC.  Nou konsyan ki i annan en levantay fakter lokal enternasyonal ki enpakte lo kou lavi dan Sesel.  Me lentansyon sa Mosyon sete pour nou pa konsider sa bann lezot keksoz tel ki labank, lasirans, telekominikasyon.  Sa

I a vini li I a vini apre me nou bezwen konmans kekpar.  Nou, nou le konmans lo STC akoz I pour leta Sesel e nou santi poudir nou annan par ladan.  Onorab Afif in eksplik nou ki si ler kou loperasyon STC I desann son pri marsandiz pour otomatikman tonbe akoz I pour napa rezon pour li met en mar up osi o.

An konsekan letan pri STC i bese bann lezot marsan ki zot pe zis kal anba pri STC zot pour oblize fer desann pri zot osi.  Koumsa pri komodite an zeneral pour redwir kou lavi pour vin pli abordab e sak Seselwa I kapab ekonomiz.  Nou’n tann en sif site bomaten ant R400 a R500 par mwan.

Mr Speaker nou eksprim rekonesan avek staff e Board STC pour travay zot in fer pour kreasyon sa lakonpannyen an 2018.  Nou’n dir ki sa ki zot in fer si I byen i pa vedir le meyer nou konman en Lasanble ki reprezant bann dimoun ki’n vot pour nou.  Nou le ki zot al ankor pli lwen alor nou annan gran lekspektasyon avek sa nouvo Board e Management STC.

Zot annan en responsabilite moral etik e profesyonnel pour regarde evalye fer lodit dan biznes dan model biznes aktyel STC, son kou loperasyon avek bi pour amelyor performans zis parey nou Mosyon in demande.  Kekfwa la mon ava annan en mo pour manm Board STC sirtou.

Demann otan kestyon otour loperasyon STC mon krwar saBboard depi ler in ganny apwente I zwenn apepre 4 fwa.  Mon reste konvenki mon ava dir zot mon pa neseserman annan laprev la devan mwan.

Me selman mon annan at the back of my head konmsi I annan en keksoz pe dir mwan.  STC probableman enn bann dernyen frontyer kot larzan Piblik I kapab pe disparet.  Ler LDS ti ferm tiyo FIU/NDEA e letan Lasanble in la pour setup Ladefans pour konmans scrutinize Bidze kote zot krwar bann ki oule pran en keksoz dan pers piblik pour ale?  Alor Manm Board fodre demann bann kestyon lo bann middle men parey Hassani avek Manish Tandon ki Onorab Alcindor in mansyonnen dan son prezantasyon.  E osi bann komanter ki Leader Lopozisyon in fer dan son entervansyon avan mon.  Demande akoz STC I annan subsidiary office Dubai?  Zot in ganny en manda enportan pa dezapwent zot lekor pa dezapwent nou pa dezapwent Sesel.  Zis atraver lentervansyon Dirizan Lopozisyon avan mwan pa dir mon I pa’n provok ou panse pou al fouye e demann otan kestyon.  Mon a donn zot en legzanp kot zot kapab al demann kestyon?  Ozordi par egzanp nou’n vwar poudir depi ki li in ganny kree an 2008 STC pa’n vwar en rezon pour li envestir dan bann lekipman ki kapab transport son bann prodwir from lasose pour anmenn li nenport landrwa, apar son bann pick-up ki delivre tou son bann franchise.

Me selman apre nou ganny bann lakonpannyen ki’n vin apre li parey Vijay parey Laxmanbhai.  Zot annan sa bann gro kanmiyon ki kapab anmenn sa bann gro container e tou sa.  Anfet I annan set kanmiyon set lakonpannyen plito ki annan sa bann kanmiyon ki kapab anmenn container.  Be eski nou demann nou lekor akoz ki I toultan fer biznes avek Land Marine. 

E Land Marine dan mon prezantasyon mon eksplike ki mannyer li en lakonpannyen ki Gouvernman I annan par ladan pe kontribye pour compound lo problenm STC parey I pe fer pour tou bann lezot enportater.

E letan par egzanp en lakonpannyen sa semen I ofer STC I dir li be ok mon a vin pran ou komodite lo por pour anmenn lanmenm la dan warehouse ki dan proksimite Por.  Mon pour pran ou R700 ale retour pour en container 20pye apre R1400 pour en container 40pye li I dir ‘’non mon fini fer deal avek Land Marine. ‘’ Be ou ti fer deal avek Land Marine lo ki baz eski ou ti procure sa ou ti get ou ti marsande pour ou fer sa?  Eski ou ti tender so sa I bann kestyon ki Board I merit demande e en lot pwen kontansyon ki nou koz lo la ki mon krwar Board I bezwen demann zot lekor sa kestyon.

Diskite e fer konnen zot finding piblikman lo sa size se Hypermarket.  Mon dir dan mon prezantasyon ki depi louvertir Hypermarket kou finansyel STC in ogmant dan en fason radikal.  1an apre son louvertir Rapor STC an 2016 I dir nou ki kou elektrisite avek delo I ogmant pa plis ki R283mil par mwan akoz Hypermarket.  Kou rent I mont par R22milyon an 2016 konpare avek 2015.  Sekirite I mont par R2milyon nou bezwen demann nou lekor alor eski desizyon pour lans Hypermarket ti en desizyon biznes ki fer sans ki ti rantab e ki stratezik?

Mr Speaker an 2012 ansyen CEO STC Manmzel Laporte i zwenn sa lorganizasyon konman CEO.  An menm tan i Chairperson Societe Seychelloise D’Investissement.  Prezan i pe met de sapo li.  En pe parey sa sityasyon kot ti annan en dimoun ki ti PS Finans avek Gouverner Labank Santral an menm tan.  Donk Hypermarket zis en pe avan Eleksyon Prezidansyel 2015 Gouvernman I pe trakase ki I pour fer avek hypermarket ki zis pe debout la konman en white elephant.  Alor dan en interview ki Manmzel Laporte I donn Today Newspaper I dir, ‘’anliny avek vizyon Prezidan pour batir en nouvo Sesel.  SCCI ti fer en nouvo propozisyon avek Gouvernman pour devlop sa propriyete avek STC konman en partner.  E devlop li konman Hypermarket avek laprouvasyon Gouvernman. ‘’

Sanmenm sa ki mon dir kestyon ki Board i devret demann avek son lekor si zot bezwen admet ki sa ti en desizyon biznes ki ti en fot les konnen.  E apre ki mannyer pour solve sa problenm zot ava deside zot menm.  Me selman sa ki mon pe dir se ki i ti annan en konfli lentere.  CEO STC an menm tan Chairman SCCI avek en Prezidan ki ti anbisye pour met en gro proze pour ouver avan eleksyon ki ti fer apepre Desanm 2015.  Eski Sesel in ganny the best deal possible dan sa zafer Hypermarket ki tou sa kou in monte e ki nou Seselwa ozordi ti konman konsonmater ki pe peye?

Sa i bann kestyon ki nou bezwen demann nou lekor.  E parey mon koleg Onorab Arissol in fer dan son prezantasyon si nou pa demann nou lekor sa bann kestyon ozordi.  Mon vwar nou pe al dan direksyon ki SMB ti anmenn nou kot pei antye ti ganny met otaz avek preski dir fait.

Mr Speaker pour mwan kontinyen aprezan pe koz lo model biznes redwir kou loperasyon, dan tou bann prezantasyon san ki mon nonm non bann Manm endividyel.  Me selman i annan bokou solisyon ki’n ganny met de lavan e mon pour pas ladan.  E letan mon fer sa dan son Press Conference Lendi swar Prezidan Larepiblik ti dir, I kontan poudir landmen konmsi Mardi Lasanble ti sipoze diskit lo sa size STC.  E i ti dir ki nou bezwen fer en analiz detaye konman Lasanble pran bann desizyon lo lenformasyon konkret ki devan nou.

E sa ki mon pe al fer la si en dimoun ti kapab call State House si zot met radyo akoz I pour al donn solisyon Lasanble e alor ekout nou en kou.

Premye solisyon ganny mon byen kler tou dimoun sa Mosyon pa pe dir ferm STC eski nou konpran sa?  Pa’n dir ferm STC?  Vwala.  Solisyon kourt term entrodwir konsep ‘no frills, no thrills’ me sof gard kalite.

Kontinyen en entansifye promosyon e loportinite prodikter e artisan lokal.

Economies of scale sirtou pour Praslin avek La Digue menm pour Mahe anmenn tou loperasyon STC anba en sel twa.

Met aksan anba en wholesale; re-negosye rent.  E nou’n tann dir poudir I kapab anmenn en profi ziska R18mil pour STC si bann rent I ganny re-negosye.

Sanz Lalwa ki gouvern STC tir li anba konpannyen anba Companies Act e fer li vin en statutory corporation. 

Anba sa Lalwa fodre fer son lobzektif pli kler e non pa vag, mo ki ti ganny servi – parey i ete ozordi.  Met an nwar e blan ki son pri komodite debaz I reste abordab e aksesib konman enn son bann lobzektif.

Anba sa Lalwa I merit annan bann mekanizm e mezir ki lir kont koripsyon e promouvwar latransparans.  E oblize ki prosedir tender I ouver e pibliye.  En lot propozisyon se ki Minister Finans, fodre I pouse ki dan en dele letan rezonnab sa internal e operation audit dan STC I konplete e ki Lasanble Nasyonal I ganny en kopi.

Elimin middlemen al direkteman kot suppliers etablir kote marsandiz I sorti.

Met an mars en Sistenm Procurement elarzi la kantite suppliers redwir gaspiyaz sirtou an sa ki konsern stock ki ganny write-off ki nou dir apepre R8milyon par an.

Bann solisyon lonterm

Asire ki tou bann propriyete kot tou bann landrwa kot STC i annan propriyete ozordi, pour li fer son loperasyon I vin pour li.

Koup tou biznes an deor manda STC konsantre lo prodwir manze aret lager avek bann pti wholesalers ki fer vini zouzou, liv, labouzi, kosmetik, lalkol, stationaries, akseswar pour zarden eksetera.

I annan en sizesyon ki tax i ganny tire; I ganny egzanpsyon tax lo bann prodwir STC.  Me nou bezwen fer kler ki i bezwen zis lo prodwir manze e non pa lo sa bann prodwir ki mon fek nonmen avan.

Kot li STC i pour ganny favorize konpare avek bann lezot pti wholesalers.  Etablir en progranm lokalizasyon serye pran legzanp Labank Santral par egzanp napa okenn etranze ki travay laba.

Fer en analiz profon lo lafors travayer STC nou rapel nou’n ganny dir in sorti en pe mwens ki 400 an 2009 pour ariv ozordi 730.

E sa i annan en kou konsekan lo kou loperasyon sa lorganizasyon ogmant lalis bann prodwir de baz ki STC I fer vini propozisyon pous li ant 50 a 60.  Sa I a ed li koup lo bann aktivite an deor son Manda e koumsa i ava kapab fer en pti pe larzan pour kit li an operasyon me pa pour neseserman pour li fer profi.  Parey ozordi lefe ki I en lakonpannyen anba Companies Act I pe konsantre lo la.

Mr Speaker mon pour profite pour mon repet enn bann propozisyon ki personnelman mon ti fer ki personn pa’n elabor lo la me selman pour lentere piblik mon anvi repet sa ki mon ti dir.  Mon ti dir ki mon tann koz bokou lo kestyon shares lo bann lakonpannyen leta tou dernyerman.

Eski i pa’n ler pour konsider donn sak Seselwa ki pe travay ki pe travay ozordi en par dan lakonpannyen STC?

Sa a fer ki sak Seselwa a vreman santi ki i annan par dan STC i ava annan en sans lwayote e alor depans zot larzan kot STC e son bann franchise atraver pei.  Koumsa profi STC i a ogmante konman Seselwa nou a reganny kontrol nou Lendistri Komers ki enportan akoz krentif ki pe annan.

E legzistans STC enn fwa pour tou nou ava santi poudir nou tou konman Seselwa nou annan lentere ladan.

E Mr Speaker nou pe demande ki Seselwa i ganny en meyer deal posib dan en pli kourt dele letan posib.  Mon krwar ki di-si Leader Lopozisyon i dir ki 30zour i tre rezonnab ki li Gouvernman i kapab vin avek serten desizyon.

Me sa odit mon mazinen di-si le 30 Zen i merit en dat ki sa odit I fini ganny fer ki Lasanble i ganny en kopi.  E koumsa nou ava tann en plan kler ki sorti kot nouvo Board  e Management STC lo sizesyon pour koup gaspiyaz, redwir kou loperasyon ogmant konpetisyon e fer desann pri lavi.

Mr Speaker mon pa pou kapab terminen san koz lo en keksoz ki the elephant in the room.  E ou konnen bann Manm lot kote latab mersi pour zot kontribisyon ki zot in anmennen dan sa deba.  Me mon bezwen dir zot mon dezapwente avek zot,akoz i annan en keksoz enportan nou’n koz lo la lot kote latab plizyer rezon nou’n koz lo la.  Zot napa kouraz pour dir en sel mo sa plot later ki Homewares and Building Depot I lo la pour zot parti sa.  Si zot al kot Rezistra zot a regarde i en lenformasyon Piblik sa propriyete Gouvernman apre parey mon dir dan mon prezantasyon.  I ti ganny transfer avek Parti Lepep an Zen 2013 1an plitar STC I konmans son loperasyon laba.  E obor sa plot later ki 10104 i apepre 2400met kare I annan 2 lezot bout later ki vacant.  Ankor Parti Lepep ki’n ganny lease 60an lo sa de bout later son plot i V18998 apre V18999.  Prezan sa 2 plot letan ou met zot ansanm, son grander I apepre 4387met kare e zot pe pey en lease tou-le-z-an lo sa 2 bout ki vacant la.  R131,580mil par an.  Sa i fer alor I tonm apepre R10965mil par mwan.  Sa sa de bout vacant sa en?  Prezan sa bout ki li STC i lo la, i apepre lanmwatye grander sa 2 bout ki vacant.  Alor sa ki mon pe al dir Mr Speaker sa bout spesifik pour zot i pour zot, zot in pran en lease pour Parti Lepep.

Selman sa ki mon pe al dir zafer son pri mon napa son lenformasyon, me mon pe estimen akoz.  Si de bout letan ou met li ansanm I tonm apepre 300met kare, me si en lot bout ki lanmwatye, I bezwen son lot sif I apepre lanmwatye.  So mon pe estimen mwan poudir zot pe pey apepre R7mil par mwan pour sa bout later ki li STC I lo la.

Selman zot pe sarz STC plis ki R830mil par mwan! Ekout en kou.  Mon konnen ki Prezidan Faure in divorse ek Parti Lepep e i napa kontrol lo the management of the party.  Me Prezidan Parti i Vis Prezidan Larepiblik Minis Dezinyen i Sekreter Prensipal Parti Depite Sef Zeneral i Chief Whip Onorab Gill dan mon Distrik Mont Buxton dan fason ki mon pe travay mon swete i vot pour mwan next time.

 

(laughter)

 

HON GERVIAS HENRIE

Prezan I annan ankor bann Manm la ki Manm Komite Santral enkli Onorab Pillay mon enplor zot mon enplor zot silvouple pour lanmour Sesel pour tir fardo lo malere Seselwa!  Demann zot parti pour rann bout later.  Pour tir sa kour R830mil par mwan pour Seselwa letan nou tire lo STC silvouple, silvouple mon pa kapab dir ankor plis ki sa.  Me selman konpran mon I en burden I en kou lo STC I pa byen I pa byen I moralman mal!  Mon annan en zanmi ki en letan mon ti krwar I obsede avek the idea ki Parti Lepep I pe kontribye dan soufrans Seselwa an term kou lavi.

Me finalman letan mon asize mon fer tousala mon menm poudir ki I vre.  E Mr Speaker bomaten ti annan sa kestyon middlemen definisyon middle men.  Middlemen politik avek biznes se letan en dimoun I vin konman ant de keksoz en.

Donk pour al aste sa ballpen ki la R1.50 avek Onorab Arissol apre mon vann li R3 avek Onorab De Letourdie mon en middlemen mon double mon pri.  Ki mannyer en bout later ki mon pe estimen zot pe pey R7mil apepre son lease avek Gouvernman I a pe lease li avek STC pour R833mil par mwan,  ki mannyer ou apele sa?  Ki mannyer ou apele sa?

 

(Interruption)

 

HON GERVIAS HENRIE

Silvouple e pour bann dimoun kip e ekout mon laba deor nou’n tande poudir I pour annan en nouvo Parti Lepep.  Annan konfyans ankor dan zot, zot pour anmenn Sesel de lavan sa pour anmenn Sesel de lavan.  Bato in fini kraze lo koray ki mannyer nou kapab annan konfyans avek zot!

 

(APPLAUSE)

 

HON GERVIAS HENRIE

Ki mannyer nou kapab annan konfyans avek zot?  Mr Speaker STC i en.  Zis lot kote semen NISA i en lot e NISA i ti enn bann premye prodwir Nasyon.  I en lakonpannyen Leta I ti enn parmi bann premye lakonpannyen ki ti admet dan son rapor finansyel anyel poudir I pe lwe propriyete avek Parti Lepep.

Nou lo sa kote latab dan Lopozisyon nou’n toultan sispekte ki Parti Lepep pe fer biznes avek Gouvernman.  E enn bann kestyon ki mon anvi anmennen dan sa Lasanble.  Sa lannen se pour kriy Minis Finans isi pour li dir nou konbyen antite Gouvernman ki pe ganny en larzan direkteman dan Bidze me selman I pe pey Parti Lepep pour en servis, oubyen en keksoz.

Onorab Larue in anmenn en kanpanny apepre 40bout later enkli villa karoutsou dan mon distrik Mont Buxton.  Me lo sa 40bout later konbyen Sant Kominoter, konbyen lekol konbyen lakres, konbyen bazar nou bezwen demann avek nou lekor.  Alor kot servis Leta zot pe bezwen lease sa bann later pour zot kapab egziste e pe al dan kof Parti Lepep.

Alor ki mon kapab dir zot ankor konmsi pour zot konpran pour silvouple sa ki byen se pour rann.  E nou’n dir pour koup sa bann kou lo STC redwir son kou loperasyon rent I enn bann konponan pli gro.  E alor si zot fer sa zot pour annan bokou respe estimasyon dan lizye bann zonm fanm ki’n vot pour zot depi retour miltiparti ‘93.

Alor mon ava kit sa avek zot lo rikord mon demande mon bann koleg in demande.  E se tou mon kapab dir Mr Speaker.  Mersi pour latansyon tou dimoun.

 

(APPLAUSE)

 

MR SPEAKER

Mersi.  Deba in fini Onorab Simon Gill.  Ale lev ou point of order.

 

HON SIMON GILL

Mr Speaker mersi.  Senpleman relax – Onorab Henrie dan son konklizyon I dir in dezapwente avek nou kote isi.  E in mansyonn mon konman Depite Sekreter Zeneral e konman Chief Whip dan Lasanble Nasyonal isi.  Probableman li i ti annan son misyon ki i ti anvi akonplir e mon felisit li pour akonplir son misyon.  Me sa ki pa’n sezi probableman e si i ti’n sezi i ti ava’n tenir enpe dan mon bann pwen konklizyon.

Mon’n dir ki dan en dele letan ase rezonnab nou pe fer sir nou le fer sir or nou bezwen fer sir konman en Lasanble.  Ki STC partou kot I pe operate kot i pe fer son loperasyon ki i take ownership of tou sa bann landrwa kot i pe fer son loperasyon.

Sa dan li menm li i tir millions of words e i convey en mesaz senser e enportan ki nou’n anvi dir.  Mon ti ava voudre nou verifye sa dan Verbatim kot sa statement mon’n fer li e mon regrete ki mon pa ava dir sa mo ki mon pour dir.  Me mon fer le pwen.  Mersi bokou.

 

MR SPEAKER

Mersi, mersi.  Ou’n fer en klarifikasyon lo ou par.  Bon, in ariv ler pour nou pran en desizyon lo sa Mosyon pour nou pran en vot.  Lo Mosyon ki lir koumsa: ‘Avek bi pour fer desann pri lavi dan pei Lasanble Nasyonal, i demann Gouvernman pou sanz model biznes STC.  Afen ki i kapab redwir son kou loperasyon ankouraz bon konpetisyon lo marse avek bi fer desann pri marsandiz e donn Seselwa en meyer deal posib dan en pli kour dele posib.

Mon ava demann tou Manm ki an faver?  Wi nou pe pran en vot lo Mosyon.  Okenn Manm ki kont?  Okenn Manm ki kont.  Non. Madanm Clerk.

 

MADAM CLERK

Mersi bokou Mr Speaker.  Vot inanim 25 Manm an faver.  E personn kont.  Mersi.

 

MR SPEAKER

Bon Mosyon in ganny aprouvasyon Lasanble total.  Bon zis mon fer en pti komanter kourt mon pa’n anvi entervenir lo okenn akoz mon pa’n anvi enfliyans vot Lasanble.  I pa mon devwar pour entervenir lo Mosyon, me mon ti a kontan partaz en pti pe lo sa ki mon swiv anler.  Mon krwar in en bon Mosyon nivo deba i vreman o mon kontan bann entervansyon ki’n sorti lo tou lede.

Wi i annan serten entervansyon ki’n vin avek bokou pasyon e konpasyon mon kapab dir tou lede ansanm.  E sirtou mover Mosyon son konklizyon sirtou i montre en pe sa santiman.  Me an zeneral parey enn de zot in osi dir nivo deba i vreman o.  E mon krwar sa i en bon siny.  I en bon direksyon kot nou Lasanble pe ale.  Avek sa 2 pti mo nou ava adjourn e nou ava rezwenn Mardi prosen 9er bomaten.

 

 

(ADJOURNMENT)