Home » Verbatim » 2018 » Tuesday 27th March, 2018

Tuesday 27th March, 2018

NATIONAL ASSEMBLY OF SEYCHELLES

 

Tuesday 27th March, 2018

 The Assembly met at 9am

 National Anthem

 Moment of Reflection

 Mr Speaker in the Chair

MR SPEAKER

Bonzour tou Manm Onorab.  Bonzour tou dimoun ki a lekout e ki pe swiv travay Lasanble Nasyonal.  E mon annan loner pour mon resevwar e dir en bonzour spesyal bann zabitan Bel Ombre ki anler dan Galeri.  E ki’n vini pour swiv nou Sesyon Kestyon bomaten.  E apre pandan Break zot ava kapab enterakte en pti pe avek bann Manm ki enterese pour enterak avek zot.  E zot ganny akonpannyen par constituency clerk Madanm Nathalie Marie.

Ankor welcome e mwan osi tou dan Break taler mon ava fer en mannyer vin koze.  Zot ava ganny en pti entretyen.  Bon mon napa okenn Kominikasyon as such pour fer mon ava zis demann Madanm Clerk pour nou envit Minis pour nou konmans nou travay.  Mon ti a kontan welcome Minis pour Finans pour Trade avek Economic Planning Dr Peter Larose parmi nou bomaten.  Minister bonzour Minis.  I akonpannyen par CEO PUC Mr Philippe Morin.  E osi dan son delegasyon i annan Ms Sitna Cesar Special Advisor to the Minister.  E nou pour Minis i annan 2 kestyon bomaten i annan sa Private Notice Question by the Leader of Opposition lo sa sityasyon drivers.  E apre i pou swiv avek kestyon ki annan pour fer avek Kou Lavi anmennen par Leader Government Business.  E dan delegasyon osi tou i annan Ms Cillia Mangroo Principal Secretary for Trade Ms Christine Joubert CEO pour FTC.  E Mr Guy Morel ki Chairman Board STC.  Welcome parmi nou bomaten.  Bon mon ava pas laparol avek Leader Lopozisyon pour li poz son kestyon pour Minis.  Onorab Ramkalawan.

 

HON WAVEL RAMKALAWAN

Bonzour Mr Speaker.  Mersi bokou.  Bonzour Minis bonzour tou bann Manm bann koleg MNA e byensir bonzour tou bann zabitan Bel Ombre ki pe zwenn nou bomaten.  E tou dimoun ki a lekout.  Mr Speaker mon kestyon pour Minis i lir koumsa; etandonnen sa sityasyon ant Gouvernman lasosyasyon pour pick-up lekipman ek kanmiyon lwe ek sa Lakonpannyen Sinwan Sinohydro pa ankor ganny rezourd.  E sa pe kout pei en gro sonm adisyonnel par zour eski Minis pour Finans e Lenvestisman e Planifikasyon Ekonomik I kapab dir avek sa Lasanble premyerman.  Akoz ki Gouvernman pa’n gard son langazman ki ti ganny fer dan Diskour Bidze an 2017 an sa ki konsern sa Proze Danm La Gogue?  Dezyenmman ki solisyon ki pe ganny propoze?  Trwazyenmman kan eski nou pe espekte en solisyon akseptab pour tou kote?  E finalman konbyen eski sa proze i espekte koute an plis ki sa sonm ki ti’n ganny mete dan kontra?  Mersi bokou Mr Speaker.

 

MR SPEAKER

Mersi Onorab Ramkalawan mon ava pas laparol Minis Larose.

 

MINISTER PETER LAROSE

Mersi Mr Speaker.  Bonzour Mr Speaker bonzour Leader Lopozisyon Onorab Wavel Ramkalawan.  Leader Government Business Onorab Charles De Commarmond tou bann Manm Onorab dan nou Lasanble.  E tou dimoun a lekout enkli bann dimoun ki sorti dan Distrik Bel Ombre.  E Mr Speaker avan mon reponn Private Notice Question demande par Onorab Wavel Ramkalawan o size Danm La Gogue,  i fer premye fwa ki mon vin dan Lasanble pour 2018 mon ti a kontan pran de minit pour felisit ou lapwentman konman Speaker Lasanble Nasyonal.

Dezyenmman mon ti a osi profite pour felisit Onorab Ahmed Afif pour son lapwentman konm Depite Speaker nou Lasanble Nasyonal.  E trwazyenman mon felisit Onorab Philip Arrisol pour son viktwar Anse Boileau pou vin en nouvo Manm Lasanble Nasyonal.  Onorab Philip Arrisol welcome onboard.  Mr Speaker mon ti a kontan reponn kestyon Onorab Ramkalawan.  Akoz ki Gouvernman pa’n gard son langazman ki ti ganny fer dan Diskour dan Bidze 2017 e ki sa i konsern sa Proze Danm La Gogue?  Mr Speaker mon rapel byen dan Ladres Bidze ki mon ti fer an Oktob 2017 Lasosyasyon ti lev en konsern kot zot sekter i bezwen benefisye avek bann proze ki ganny tender par Gouvernman.  E sa ti ganny enskri dan Budget Speech Item 14.1.7 paz 21 to be presize.  Mansyon ti ganny fer lo Danm La Gogue ki PUC ti’n siny Kontra konstriksyon avek Sinohydro.  Gouvernman ti agree pour fasilit negosyasyon avek tou kontrakter e fer sir ki kontra I ganny ofer avek bann operater.

Sa sekter oubyen group I form par krwasans ekonomik Sesel.  Sa ki mon ti ekrir dan mon Budget Speech.  Apre konsiltasyon mon ti annan plezir pour anonse ki Gouvernman in donn lenstriksyon tou bann Minister Departman Lazans pour outsource servis avek bann operater.  Lasosyasyon in vin osi demann lentrodiksyon en rate Nasyonal parey rate tax pou redres inegalite dan sa marse.  An 2018, Gouvernman ti promet pour travay avek Lasosyasyon pour fer en assessment e pour fer en propozisyon lo lavenir pandan lanmwatye lannen, ler I fer son review.  Mr Speaker an vi ki kontra ti’n fini sinyen alor ti en pe difisil pour negosye avek sa Konpanny Sinwan Sinohydro.  Me Gouvernman pe fer tou son mye posib ki sa bann operater i ganny ofer en pe travay.  Kot i konsern 2enm kestyon ki solisyon pe ganny propoze Mr Speaker nou ankor pe diskite avek Lasosyasyon pour nou tonm dakor lo en solisyon o pli vit posib.

Kan eski nou espekte en solisyon akseptab pour tou kote?  I annan 3 Minis ki enkli mon menm.  Pe diskite bann propozisyon avek tou zot teknisyen sa proze pe kout telman tre ser par zour.  Mr Speaker mon ti a voudre ki nou vwar en solisyon konmela pandan letan mon pe koze.  E les kontrakter kontinyen son Kontra.  I pa dan lavantaz personn pour trennen avek negosyasyon.  Mr Speaker mon de koleg Minis Bastienne e Minis Dogley pe diskite pour vwar en solisyon pandan mon pe koze.

Lot kestyon konbyen eski sa proze i espekte koute an plis ki sa sonm ki ti ganny met dan Kontra?  Depi le 13 Fevriye ziska 13 Mars ki travay in ganny arête.  Sinohydro in soumet en claim pour R23milyon e nou espekte ki pour annan ankor claim.  Mr Speaker plis zour ki nou kontinyen negosye avek Lasosyasyon san en solisyon, i vedir ki nou pou depans plis par zour adisyonnel.  Nou pa konnen konbyen i pour koute an plis an vi ki negosyasyon i kontinyelman kontinyen.  Mon swete ki bomaten la nou ava vwar en solisyon Nasyonal ki satisfe tou parti.  Mersi bokou Onorab Ramkalawan pour tou ou kestyon.

 

MR SPEAKER

Mersi Minister.  Onorab Ramkalawan.

 

HON WAVEL RAMKALAWAN

Mersi bokou Mr Speaker e mersi Minis pour ou larepons.  Mr Speaker mon anvi premyerman baze lo – mon osi mon text Diskour Minis.  E letan mon regard son text i kler ki Cabinet parske letan in vini Cabinet in bezwen aprouve sa bann desizyon.  Cabinet ti’n tonm dakor ki bann kontrakter Seselwa zot pour annan en par dan sa Kontra.  Se sa ki text i dir pour asire ki Kontra i ganny ofer avek bann operater.  Mon anvi premyerman demann Minis kote eski Gouvernman in al mal?  Si zot in tonm dakor ki bann operater pour annan en par ladan.

E apre sa in vin sa problenm kot zot in vin avek zot prop transpor tou sa bann gro kanmiyon ki mon pa konnen kot zot ete la.  Savedir in annan en problenm kominikasyon; i annan en keksoz ki pa’n marse.  Eski Minis ti ava kapab dir nou ki bor?  Eski PUC ki pa’n swiv direktiv Gouvernman?  Eski Minister Lanvironnman ki reprezant PUC ki pa’n swiv direktiv Gouvernman?  Kote sa keksoz ki’n al mal?  E dezyenmman vi ki sa pe kout nou en kantite larzan eski Minis e I annan plis ki en mwan la depi ki zot pe negosye.  Konmsi mon anvi konnen –

I mean parske la in deza ariv nou R23milyon e R23milyon Mr Speaker ti a kapab permet nou konmans personal income tax depi en pe pli boner konmansman lannen.  Konmsi mon pe anvi demann Minis ki Gouvernman pe fer konman en fason irzan parske sa ki nou pa pe vwar.  Nou pa pe vwar en urgency lo lapar Gouvernman pour atak sa issue pour rezourd li.

E keksoz zis pe kontinyen zis pe kontinyen ale la in ariv plis ki R23milyon.  E by the end of the month i pour ariv R40milyon.  Dir nou Mr Speaker, ki Gouvernman pe fer pour montre ki i annan en urgency dan sa sityasyon.  Pour ki bann kontrakter i ava satisfe bann kontrakter i ava satisfe.  Operater pick-up ki ankor pe konplent zot osi zot ava satisfe e tou bann parti ava satisfe.  Mersi bokou.

 

MR SPEAKER

Mersi Onorab Ramkalawan.  Minister.

 

MINISTER PETER LAROSE

Mersi Mr Speaker mersi Onorab Ramkalawan pour ou kestyon siplemanter.  E ou konnen Gouvernman pe fer tou son mye posib.  Nou’n antre an negosyasyon avek bann technical staff avek bann managers kontrakter ki isi.  Me pour en rezon ou en lot, sa bann dimoun pa ti kapab pran desizyon.  Alor zot bezwen kontakte zot Head Office.  Nou’n menm fer vini en dimoun pli Sinyor dan zot konpani, zot in vin isi Sesel pour nou antre an negosyasyon pour vwar ki nou kapab onor nou komitman ki nou’n fer.  Avek bann operater pick-up avek bann lekipman e kot i konsern kestyon kot nou’n al mal.  I kapab se vre en problenm kominikasyon, me nou pe fer nou mye posib pour nou tonm lo en Lagreman kot nou kapab vwar en solisyon kot nou travay i kontinyen.

Parey mon dir Onorab Ramkalawan in mansyonn sa byen deplizanpli napa travay ki kontinyen.  De pli an pli sa proze pour koute en dimoun bezwen peye.  E natirelman i bezwen lepep Seselwa ki bezwen peye pour kontinyasyon ki nou pa kapab vwar en solisyon.  E dapre ki mon ganny enformen par PUC se I pour annan en sonm apepre R3,807milyon pour bann kontrakter Seselwa.  E an total sa ki sipoze rested an lekonomi Sesel I pour en total R89,790,965.71milyon.  I pa zis natirelman bann kontrakter pickup ki benefisye.  I pour tou dimoun, tou Seselwa ki kapab asosye li avek sa proze.  Mersi Mr Speaker.

 

MR SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker mon anvi demann Minis, si sa lakonpannyen li menm li in dir I pa kapab pran desizyon.  Akoz ki nou bezwen peye pour son inabilite pour li pran desizyon?  Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mr Speaker parey mon’n dir se ki sa bann dimoun ki ti isi nou’n rankontre zot detrwa fwa.  Me konman ou konnen I annan en striktir sa kontrakter.  E natirelman zot kiltir zot sivre lord zot Siperyer.  E nou’n bezwen fer vini zot Siperyer pour nou kapab vwar en solisyon avek sa negosyasyon.  Dapre Mr Morin se bann zofisye Sinwan sa lakonpannyen ki’n vini me nou napa non me nou a fer zot ganny son non plitar.  Parske nou bezwen vwar en solisyon Mr Speaker.  Nou pa kapab trennen avek en negosyasyon avek en dimoun ki pa kapab pran desizyon.  Mersi Mr Speaker.

 

MR SPEAKER

Mersi Minis.  Onorab Chantal Ghislain.

 

HON CHANTAL GHISLAIN

Mersi Mr Speaker.  Bonzour tou dimoun.  Eski Minis Mr Speaker eski Minis i kapab dir avek sa Lasanble si i annan okenn Seselwa ki annan par dan sa konpannyen Sinohydro?  Ouswa ki annan kek konpannyen ki Sinohydro i konekte avek, ki Seselwa?  Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  Mersi bokou Onorab Ghislain.  Pour etre tre direk avek ou mon pa konn personn ki annan okenn koneksyon avek Sinohydro.  Petet I annan be mon pa konnen.  Mersi.

 

MR SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Speaker.  Bonzour tou Manm a lekout bonzour Minis avek tou ou delegasyon.  Minis mon premye kestyon i akoz sa bann term ki pe ganny travay lo la pa ti ganny mete dan kontra inisyalman e i ti ganny negosye?  Akoz sa pa ti ganny fer?  Dezyenmman pour al en pti pe dan laliny ki Leader Lopozisyon in dir.  I annan R23milyon ki ou dir i an plis ki nou bezwen peye letan nou a pe negosye.  Akoz Gouvernman pa dir avek sa lakonpannyen, carry on avek ou travay nou a pran sa R23milyon nou a partaz avek sa bann drayver sa bann dimoun ki pe sey rod sa bann travay.  So nou ava partaz avek zot akoz nou pe al donn en lakonpannyen ki li I pe dir ou I pa pe kapab donn nou bann dimoun travay nou pe donn li ankor en adisyonnel – additional R23milyon ozordi gete.  E mon ti a kontan demann Minis, dan sa konteks konbyen I pe kout Gouvernman par zour, pour li kontinyen negosye avek sa lakonpannyen?  E ou’n dir Minis ki son bann sinyor son bann senior officers ki pran desizyon – zot ti bezwen ganny apele.  Kan ki zot ti antre dan pei pour zot kapab fer sa negosyasyon eski nou osi nou pa kapab claim avek zot?  Akoz si ou anvoy dimoun ki pa kapasite pour pran desizyon nou osi nou kapab claim.  E sa Kontra Minis kan ti ganny sinyen e si nou kapab ganny en kopi pour nou kapab vwar kwa kid an sa sa Kontra.  E pour nou kapab annan en pli broad idea what really is being done.  Mersi.

 

MR SPEAKER

Mersi Onorab Andre.  Minis.

 

MINISTER PETER LAROSE

Mersi bokou Mr Speaker.  Mersi bokou Onorab Andre.  Nou a fer ou ganny en kopi Kontra ki’n ganny sinyen dan en fason transparan.  At least a regard tou terms and conditions ki dan sa Kontra.  Me dapre Mr Morin Kontra ti ganny sinyen le 25 Out lannen pase.  E nou pa’n espekte ki nou pour relman antre an difikilte.  I vre sa ki nou pas ladan, in fini pase sa, mon swete pour nou kapab konmsi mazinen ki pour arive apre midi.  Mon pa konn lavenir nou pa’n espekte sa i fer premye fwa ki nou antre an Kontra avek sa konpannyen Sinohydro.  E nou’n espekte konman en Gouvernman nou kapab fer le mye posib pour nou Seselwa ganny en travay, menm si nou’n siny en Kontra.  Parske a lafen dizour, i depan lo de party pour kapab negosye en Kontra.  Epi i depan lo laranzman ki zot gannyen understanding konpromi ki dan en serten fason Gouvernman I mazinen.  Poudir pe bon malgre ki’n siny Kontra, alor i ava regard dan lentere Seselwa sirtou sa bann drayver operators.  Mersi.

 

MR SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Speaker.  Minis eski dan sa Kontra i annan en exclusion clause kot nou kapab sorti akoz i pe kout nou tro ser?  Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  Mersi bokou Onorab Andre.  Dapre Mr Morin napa exclusion clause dan sa Kontra.  E mon swete ki ler nou a fer sa Kontra available.  Mon ganny konfirmasyon avek Mr Morin se apre midi Mr Speaker nou a fer Lasanble ganny en kopi Kontra.  Mersi.

 

MR SPEAKER

Mersi Minis.  Onorab Herminie.

 

HON WILBERT HERMINIE

Mersi Mr Speaker.  Bonzour Mr Speaker, bonzour Minis avek ou delegasyon.  Mon annan de pti kestyon.  Mon premye kestyon mon ti anvi konnen lo ki grounds ki Gouvernman in donn en Stop Notice sa konpannyen?  Akoz mon pe prezimen ler negosyasyon ti pe ganny fer la ti annan serten louvraz ki kapab ganny fer ki ti anpes ou ganny sa gro claim vi ki ou’n donn li en Stop Notice.  E mon ti a osi konnen ki major component sa claim ki fer sa R23milyon?  Zis donn nou sa premye 3 konponan sa R23milyon.  Mersi Mr Speaker.

 

MR SPEAKER

Mersi Onorab Herminie.  Minis.

 

MINISTER PETER LAROSE

Mersi bokou Mr Speaker.  Onorab nou a fer ou ganny en kopi sa claim ki ava telman detaye ki ou ava vwar konponan bann depans ki make up R23milyon.  E dapre Mr Morin se napa bann gro travay ki pe ganny fer zis bann pti travay clearing ki pe ganny fer atraver sa Danm La Gogue.  Mersi.

 

MR SPEAKER

Mersi Minis.  Onorab Herminie.

 

HON WILBERT HERMINIE

Savedir pour nou kapab ganny klarifikasyon, eski sa travay lo site in ganny i annan en Stop Notice ouswa i annan louvraz ki pe ganny fer?  Akoz si ou donn en Stop Notice savedir sa dimoun in demolize lo site.  So mon anvi konnen si travay pe kontinyen or not.  Mersi Mr Speaker.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  Dapre Mr Morin napa Stop Notice.  Be zis senpleman pour fer sir ki annan bann pti travay ki kontinyelman ganny fer me non pa gro travay ki kontinyelman petet ti kapab elev sa danm.  Mersi.

 

MR SPEAKER

Mersi Minis.  Onorab Herminie.

 

HON WILBERT HERMINIE

Swivan larepons ki Minis in donnen.  Me si napa en Stop Notice, be akoz i annan en claim then?  Sa ki annan en pti konfizyon la si travay pe kontinyen why is there a claim?  Mersi Mr Speaker.

 

MR SPEAKER

Mersi Onorab.  Minis.

 

MINISTER PETER LAROSE

Mr Speaker, mon mazinen letan en kontra I ganny fer sirtou en gro konpannyen, i annan serten resours ki bezwen ganny deplwaye lo site  -ou konpran?   I annan serten depans ki ganny fer an avans avan-ler the main contract i ganny fer.  Parske ou pa kapab antreprann en Kontra ki napa okenn lekipman ki napa okenn machinery.  Mwan premye fwa Mr Speaker mon kapab konfirmen avek sa Lasanble.  I mon pour partisip dan en negosyasyon kot danm pe ganny eleve.  I fer premye fwa.  E natirelman mon krwar sa I en kestyon tre teknik e mon panse si zot le en pe plis lenformasyon nou a kapab ganny Minister konsernen avek zot teknisyen, pour vini reponn kestyon Lasanble.  Mersi.

 

MR SPEAKER

Mersi Minis.  Onorab Roucou.

 

HON CLIVE ROUCOU

Mersi Mr Speaker.  Bonzour Minis avek ou delegasyon bonzour tou bann koleg Onorab bonzour tou bann dimoun Bel Ombre dan Galeri.  Mr Speaker mon anvi demann Minis en de kestyon.  Premye kestyon si Minis I kapab dir sa Lasanble dan sa Kontra aktyel ki Gouvernman ti sinyen avek Sinohydro ki pa forseman ki zot pran okenn operater pick-up lokal.  E dan son negosyasyon ki in koz lo la si sa pa aboutir dan nanryen, ki plan Gouvernman?  Epi mon 2enm kestyon mon ti a kontan Minis I dir avek sa Lasanble ki son Minister pe fer ki bann proze devlopman dan lefitir, ki ganny byen planifye ki tou Seselwa i benefisye e ki sa sirkonstans pa ariv ankor?  Mersi.

 

MR SPEAKER

Mersi Onorab Roucou.  Minister.

 

MINISTER PETER LAROSE

Mr Speaker mersi bokou.  E mersi bokou Onorab Roucou pour ou kestyon.  Mwan, mon annan tou konfidans dan mon 2 koleg Minis.  Epi Cabinet of Ministers ki finally nou ava vwar en solisyon.  Sa pa enn fwa pa kapab kontinyelman trennen en lot negosyasyon, ki pour kout nou enormeman.  Sa mon kapab garanti ou.  E mon swete ki mon de koleg Minis I vwar en solisyon la bomaten avek sa negosyasyon, nou met en lafen avek tou sa bann ale vini.

Parske i pour kout nou pei enormeman e kot i konsern partisipasyon tou Seselwa.  I annan en National Development Committee ki tou bann proze nasyonal.  I bezwen ganny soumet avek NDC pou fer sir nou regarde ki eleman dan sa bann proze, i toutafe al pour Seselwa.  E parey mon ti dir dan mon lentrodiksyon Onorab, se ki Gouvernman in donn en lenstriksyon ki tou bann proze ki Gouvernman i fer avertisman anler lo la ki bann Minister bann Departman e bann Lazans, i pran an kont pour outsource services avek kontrakter Seselwa.  Mersi.

 

MR SPEAKER

Mersi Minis.  Onorab Roucou.

 

HON CLIVE ROUCOU

Mersi Mr Speaker.  Dan larepons ki Minis in fek donnen, mon ti ava kontan demann Minis.  Si i annan okenn poursantaz spesifik ki Gouvernman i tonm dakor lo la pour Seselwa i benefisye?  Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mersi Mr Speaker.  Pour lenstan mon pa dan en pozisyon mon pa pour kapab donn okenn poursantaz ki Onorab in demann mwan.  Mersi.

 

MR SPEAKER

Mersi Minis.  Mon pou donn laparol Onorab Ghislain lo swivan kestyon Onorab Herminie.  Onorab Ghislain.

 

HON CHANTAL GHISLAIN

Mr Speaker mon kestyon I ankor pour Minis.  Mon ti oule konnen par egzanp lannen pase ki Minis ti vin Lasanble, pour dir avek Lasanble pour bann drayver pick-up pour annan en par dan travay avek sa lakonpannyen Sinohydro.  Mwan mon kestyon se Minis ti fer sa lannen pase e bann negosyasyon avek sa konpannyen ti konmanse way before.  Mon pe zis demann Minis lekel ki ti al fer sa bann negosyasyon?  E eski Land Transport ti form parti sa bann negosyasyon?  Negosyasyon inisyal letan ti pe fer sa?  E apre letan bann pick-up i antre eski Land Transport I bezwen okouran poudir I annan bann transpor ki pe antre?  Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  Onorab Ghislain dapre Mr Morin negosyasyon Kontra, i ant PUC avek Sinohydro.  E i toutafe normal dan Kontra ler I ti ganny negosye sa bann eleman transpor ti pran an konsiderasyon.  Vwala se sa ki mon ganny enformen.  E pour dir ou tre fransman mon pa ti fer partisipasyon dan negosyasyon Kontra.  Mersi.

 

MR SPEAKER

Minis i annan sa bout eski Land Transport ti okouran ki Sinohydro ti pe fer antre sa bann transpor sa bann pick-up?

 

MINISTER PETER LAROSE

Mr Speaker sorry mon mank sa bout.  Dapre Mr Morin ki Sef Egzekitiv PUC i dir Land Transport ti okouran sa bann zafer transpor.

 

MR SPEAKER

Ok mersi Minis.  Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker bonzour Minis avek ou delegasyon.  Mr Speaker mon ti le zis demann Minis en pti pe lo laliny ki Onorab Ghislain in demande avan.  Si i satisfe ki avan ki I ti pronons son lekor dan Lasanble lo size pour donn bann drayver pick-up bann serten benefis atraver sa kontra si I satisfe ki sa Kontra in ganny diskite avek son Minister.  E avek Minister konsernen bann lezot partener, avan ki i ti fer sa prononsman dan Bidze?  Mersi.

 

MR SPEAKER

Mersi Onorab Hoareau.  Minister.

 

MINISTER PETER LAROSE

Mersi Mr Speaker.  Mr Speaker mon krwar mon memwar pa kourt.  Ler mon ti prezant Bidze mon ti dir sa Bidze i regard tou Seselwa.  E tou Seselwa i enkli sekter drayver se vre konman en Minis mon bezwen annan serten konfidans dan bann Sinyor Zofisye Gouvernman.  Si natirelman ler mon poz en kestyon in konfirmen ki mon satisfe avek son repons, me mon pa la pour mon a fouray dan tou son papye pour al regarde.  Natirelman mon bezwen pran son repons in good faith e vwala mon bezwen pronons mon anler lo la.  Se vre lannen pase avan ler ki mon pronons mon ti rankontre sa bann drayver pick-up zot ti vin kot mwan.

Mon koz avek zot; mon konpran zot difikilte e vwala ler mon poz sa kestyon avek PUC zot ti’n dir mon pour annan en sizable amount ki natirelman sa bann drayver pour benefisye.  Alor mon bezwen pronons mon anler lo la.  Parske sansan ki pour arive mon ti pour ganny kritike.  I dir be Minis ou ti pour regard dan nou welfare me la sa Bidze I kouver nou tou, but unfortunately nou pa vwar nou ladan.  Ou konpran?  E mon swete ki ankor enn fwa mon repet mon lekor, mon swete ki nou ava vwar en solisyon ki sa bann drayver pick-up sa sekter a benefisye dan sa proze.  Non pa zis sa proze leson nou bezwen tire anvi ki keksoz anler i en pe mal e la pour annan bann lezot mega project.  Ki mon swete fot si nou fer okenn fot nou pa repete nou tire n leson dan sa proze ki nou pe travers ladan pour lenstan.  Mersi.

 

MR SPEAKER

Mersi Minis.  Onorab Charles De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker bonzour Minis avek ou delegasyon.  Bonzour tou Manm Onorab e tou dimoun ki a lekout e bonzour tou dimoun Bel Ombre ki la dan nou Lasanble.  Mr Speaker sa kestyon i serye.  Eski ler Gouvernman ti’n fer sa prononsman dan Bidze an Novanm – an Oktob eski sa Kontra ti’n fini sinyen?  Mon krwar i dir wi.  E prezan eski dan sa kontra I ti mansyonnen kwa e kote ki bann operater pickup oubyen lezot lokal Seselwa, i pou benefisye ladan?

An menm tan lekel ki ti fer sa Kontra?  Eski Biro Attorney Zeneral ti ganny konsilte letan Kontra – avan Kontra I ganny sinyen?  E an menm tan eski dan lefitir bann kontra parey Minis in dir si Seselwa or bann local kontrakter i pour benefisye anba bann gro Kontra isi Sesel,  ki mannyer I garanti ki sa bann keksoz pour antre dan Kontra e ki mannyer zot kapab donn en komitman nou Lasanble Nasyonal?

E an menm tan eski Land Transport lefe ki zot konnen ki sa bann kontra dan sa Kontra sa kontrakter ti pour fer vini zot bann transpor –  byensir ki PUC i osi i ti bezwen konnen.  Akoz alor ki zot in dir ou ki lokal i kapab osi benefisye?  Konmsi ki rasyonnel deryer tou sa e ki mannyer finalman Cabinet dan tou sa zafer la li i aprouv pour ou vin dir sa bann keksoz dan Lasanble?  Mersi bokou Mr Speaker.

 

MR SPEAKER

Mersi Onorab De Commarmond.  Minis.

 

MINISTER PETER LAROSE

Mersi bokou Mr Speaker.  Onorab De Commarmond se nou legal advisor ofisyel sa Attorney Zeneral.  Tou Kontra nou’n Cabinet in aprouve tou Kontra i bezwen ganny sertifye aprouve par Attorney Zeneral.  Nou pa kapab vin Lasanble avek en Kontra ki pa’n ganny sertifye par Attorney Zeneral.  E kot i konsern Land Transport e dapre Mr Morin se ki kot sa clause ou’n demande si sa ti enkli dan Kontra.  Dapre Mr Morin se ki i annan en lalis transpor ki ti’n mete dan sa Kontra ki Sinohydro ti pour anmennen.  Me sa si i ti ganny clearance avek Land Transport ankor enn fwa i dir clearance ti ganny fer par Land Transport apre ki transpor in ariv dan pei.  E…

 

MR SPEAKER

En moman Minis.  En moman.  Onorab Ramkalawan.

 

HON WAVEL RAMKALAWAN

Mr Speaker en point of order.  Mon krwar nou pe diskit keksoz ki nou dan fernwar.  E mwan pa kontan diskit keksoz dan fernwar.  Mon krwar ki sa Kontra i bezwen vin devan Lasanble avan nou kontiny sa bann line of questioning.  Parske i annan keksoz ki pa kler la e mon avek tou respe pour Minis mon konnen ki poudir Minis pe dir nou sa ki i konnen.  Me selman nou konman Manm Lasanble, pou nou kapab fer zistis mon demande ki sa menm power ki en Komite Lasanble i annan pour li compel documents.  E I ganny sa power from the Assembly ki nou petet mon ti ava move ki nou pause lo sa kestyon, pour nou ganny bann dokiman imedyatman, pour nou kapab regard sa Kontra.

Akoz mon pa konnen si sa kontra in ganny prezante avek bann operater.  E si sa Kontra pa’n ganny prezante avek bann operater e nou Manm Lasanble, nou pa konnen ki annan dan sa Kontra nou pa pour kapab fer lazistis.  Pour nou kapab konnen oli sa lalimyer lo tou sa bann keksoz.  Si parey Minis in dir se PUC ki’n anvoy tou dimoun pronmnen in fer son zafer li menm, enkli Minis.  E pour nou konnen lekel ki’n anvoy kanmarad pronmnen pour nou end up dan sa sityasyon.  Akoz Gouvernman pa kapab dan en pozisyon pour donn en commitment.  E pour Minis Onorab pour vin devan Lasanble pour donn en commitment.  Kan bann lezot koleg pe deny e nou annan Minis Dogley par egzanp ki ansarz PUC ki’n deny poudir ti annan okenn commitment.  Nou bezwen vwar keksoz Mr Speaker.  Nou pa pour kapab kontinyen dan en fernwar parske nou pa pe fer lazistis ni bann operater ni nou Seselwa ni nou responsabilite.  Mersi bokou.

 

MR SPEAKER

Bon Minis, zis petet mon a demann ou how soon nou kapab ganny sa Kontra si nou kapab ganny li within minutesMinister.

 

MINISTER PETER LAROSE

Mersi Mr Speaker.  Swivan lentervansyon Onorab Ramkalawan Mr Morin i dir i kapab fer Lasanble ganny sa Kontra cette apre midi.  Mersi.

 

MR SPEAKER

Ok.  Yes Onorab Sebastien Pillay.

 

HON SEBASTIEN PILLAY

Mersi Mr Speaker.  Whilst ki mon konpran pwen ki’n ganny raise par Leader Lopozisyon me selman mon krwar nou pa kapab move ki Minis i retournen.  Minis i kapab retournen once ki nou ganny Kontra akoz Lasanble i annan pouvwar pour rekrit li once ki annan sa Kontra.  Me selman I reste lefe ki i annan Manm ki’n raise zot lanmen ki le fini demann zot kestyon.  E mon krwar osi sa bann kestyon i pertinan ki nou le demande.  E ler nou ava ganny Kontra sa Kontra i ava enform plis sa diskisyon ki nou pe fer.  Me selman mon krwar nou allow bann Manm ki’n raise zot lanmen pour fini demann kestyon Minis, i ava anmenn kontra apre midi.  E la aprezan vi ki kestyon i anba Onorab Ramkalawan Lasanble, i kapab re call Minis pour plis klarifikasyon lo sa size.  Se apre midi si i neseser.  Mersi Mr Speaker.

 

MR SPEAKER

Yes Onorab Ferrari.

 

HON JEAN-FRANCOIS FERRARI

Mr Speaker mersi.  Mon pe withdraw mon kestyon ziska ler mon vwar sa Kontra.  E mon ti a kontan sizer avek tou bann Manm withdraw zot kestyon e pour adjourn lo sa size.  E nou move lo en lot size Minis i la, i annan lezot size ki nou kapab koz lo la.  So mon ava demann bann Manm Lasanble pour aksepte pour adjourn.  E gard zot kestyon apre pour ler nou annan Kontra.  Mersi.

 

MR SPEAKER

Bon an vi ki i annan en pti pe kestyon ki vize direkteman lo kontra sirtou Onorab Leader Zafer Gouvernman Onorab De Commarmond osi in lev lo la.  Kestyon ki pe leve lot kote laba osi tou I annan pour fer avek Kontra.  Eski nou dakor nou ava postpone kestyon pour apre midi ler Minis i ava prodwir sa kontra avek Lasanble Nasyonal.  Eski i annan en konsansis?  Onorab Gill Simon Gill.

 

HON SIMON GILL

Bonzour Mr Speaker.  Bonzour Minis avek ou delegasyon bonzour tou koleg Onorab bonzour bann zabitan Bel Ombre.  Mr Speaker mon krwar I pozitiv pour nou ganny en kopi dokiman, me mon pa krwar apre midi i apropriye pour nou kontiny sa size akoz nou bezwen etidye Kontra.  Nou kapab pous sa size demen maten apre ki nou annan Kontra nou’n etidye li e nou ava prepar nou pou demen maten.  Mon krwar i annord e nou kapab bouz lo size ki lo Order Paper.  Mersi bokou.

 

MR SPEAKER

Ok mersi Onorab Simon Gill.  I annan en lot sizesyon eski nou annan en konsansis ki nou move dan sa direksyon?

 

HON CHARLES DE COMMARMOND

Nou annan en konsansis.

 

MR SPEAKER

Ok bon I paret nou annan en konsansis.  Alor nou ava Minister nou ava ganny en kopi sa Kontra pandan lazournen e demen maten, ou ava vini pour kontinyasyon pour reponn kestyon lo sa size.  Minister.

 

MINISTER PETER LAROSE

Mersi Mr Speaker.  Mon toutafe dakor parey Mr Morin in dir i a fer ganny kopi Lasanble sa kontra apre midi.  E mon swete ki I gard son parol konman en zonm loner.  E kot i konsern reponn kestyon mon krwar i annan bann lezot Minis osi ki’n involve avek sa Kontra, huh.  Alor nou ganny lezot Minis osi i vini pa zis Minis Finans – ou konpran?

 

(laughter)

 

 

MINISTER PETER LAROSE

E nou ava asize apre parey Onorab Gill in dir i ava annan letan pour etidye Kontra e demen bomaten nou a poz kestyon.  Mersi bokou Mr Speaker.

 

MR SPEAKER

Mersi Minis.  Mon krwar Lasanble i annan pouvwar pour summon parent Ministry for PUC.  E nou ava – Madanm Clerk avek sa 2 Leader i ava fer le neseser, ki demen maten Minis Dogley osi i akonpanny Minis Finans isi dan sa Lasanble.  Yes Onorab Ramkalawan.

 

HON WAVEL RAMKALAWAN

Mr Speaker mon krwar ki i annan de lezot Minis ankor.  I annan Minis Bastienne Land Transport apre Minis Dogley.  E mwan osi tou mon fully support sa ki Minis Larose in met devan parske mon krwar ki i annan corporate responsibility la.  I napa zis Minister i napa zis Minis Finans ki involve.  Parske nou bezwen nou osi tou a pe ede pour ki nou ganny pour nou ganny en solisyon.

Mersi bokou e si Mr Morin parske si en Kontra i la, mon pa vwar akoz i bezwen detrwa erdtan zis i al dan biro i retournen i anvoy sa kot nou e avan midi nou’n gannyen avan 11er nou’n gannyen.  Mersi bokou.

 

MR SPEAKER

Ok mersi Onorab.  Bon nou annan en konsansis nou ava pran en desizyon, alor pour nou anvoy deba lo sa kestyon pour demen maten.  E nou ava demande osi tou ki le de lezot Minis i ava akonpanny Minis Finans osi tou demen bomaten dan nou Lasanble pour nou kontinyen deba.  Yes Onorab Ghislain.

 

HON CHANTAL GHISLAIN

Mr Speaker.  Mon annan zis en pti kestyon.  Eski ou kapab advise bann Minis letan zot vin Lasanble si i annan en keksoz pour ki annan pour fer avek Kontra zot anmenn sa bann kopi Kontra dan Lasanble.  Mersi.

 

MR SPEAKER

Mersi Onorab.  Mon krwar I en bon pwen ki ler nou annan en kestyon ki vin devan nou fer sir nou anmenn dokiman relevan ki annan pour fer avek.  Yes Onorab Ramkalawan.

 

HON WAVEL RAMKALAWAN

Wi Mr Speaker.  Petet la mon kapab deswit fer en demann pour ki, Minis Lalanne letan i vin reponn kestyon lo.  Letan i vin avek Air Seychelles i anmenn Kontra Air Seychelles avek Etihad osi tou dan nou Lasanble.

 

(APPLAUSE)

 

HON WAVEL RAMKALAWAN

Pour nou pa bezwen arête demann li soz.  Parske i annan bann zafer ladan tou pour nou regarde.  Mersi.

 

MR SPEAKER

Ok pwen note Onorab Ramkalawan.  Minis Lalanne sipoze vini plitar nou ava fer le neseser nou ava request dokiman relevan.  Onorab Andre.

 

HON CLIFFORD ANDRE

Mersi Mr Speaker.  Mr Speaker mon pa konnen ki groser sa Kontra i ete.  Mon pe mazinen dan lespas en demi erdtan en call i kapab ganny fer e nou kapab ganny sa boner.  Mon ok avek nou get li demen me nou ava kapab ganny sa Kontra I pa bezwen fer kopi pour sak nou.  I ava anvoy en kopi kot Lasanble e Lasanble i kapab fer, akoz nou le fer sir ki sa Kontra pa ganny redacted refer parey dan lepase in fer.  Mersi.

 

MR SPEAKER

Ok.  Onorab Churchill Gill.

 

HON CHURCHILL GILL

Mr Speaker pour Air Seychelles mon ti a sizere sa bann rental avek SCAA li osi i ganny vini.  Akoz mannyer nou konpran i annan bann heavy rental.  Mersi.

 

MR SPEAKER

Ok mersi, mersi.  Bon eski ale Onorab De Commarmond.

 

(Interruption)

 

MR SPEAKER

Order!  Order!  Onorab De Commarmond.

 

HON CHARLES DE COMMARMOND

Mr Speaker.  Sa ki Onorab Flory Larue pe dir mon ti ava kontan i withdraw dan sa Lasanble – I tire. Non, non.

 

MR SPEAKER

Non.

 

HON CHARLES DE COMMARMOND

Ou konnen mon eksplik mon lekor – mon eksplik mon lekor.  Nou pe koz bann Kontra Gouvernman i vre ki Parti Lepep ki an kontrol Gouvernman.  Me, sa bann Kontra si i pa’n pas dan son form normal dan son landrwa normal e si I annan bann civil servants ki dan bann diferan lenstans in abiz lo zot pouvwar, pour fer sa bann keksoz koumsa e ki Parti Lepep as a party, napa nanryen responsabilite ladan!

 

 

(Interruption)

 

HON CHARLES DE COMMARMOND

E nou as a party mon pe met li kler.  E se sa rezon nou pe pouse pour vwar laklerte dan tou bann demagozi ki’n kapab ganny fer.

 

(APPLAUSE)

 

HON CHARLES DE COMMARMOND

Dan landrwa kot bann civil servants in abiz zot pouvwar.  Mersi.

 

MR SPEAKER

Mersi Onorab.  Non Onorab Larue mon pa pe donn ou laparol, akoz si ou’n fer komanter mon pa’n atann komanter i off-mick i off the record.  Ok?  Onorab De Commarmond in zis fer en klarifikasyon lo pozisyon son parti.  Nou pa’n tande sa komanter sa komanter pa’n al lo rikord.  Bon desizyon alor ki nou’n pran nou ava eskiz CEO PUC parmi nou e Mr Morin ou a fer nou ganny ou a fer Lasanble ganny sa Kontra as soon as possible.  Mersi Mr Morin.

 

(CEO PUC MR MORIN AND HIS DELEGATION WAS EXCUSED FROM THE HOUSE)

 

MR SPEAKER

Bon mon anvi zis fer bann Manm konnen ki nou deba Lasanble pa devret pe ganny mete lo social media as deba pe go on.  Si i annan okenn Manm ki pe fer sa i pe breach bann Kod Kondwit dan Lasanble Nasyonal.  Alor mon ti a kontan si okenn Manm ki pe fer sa pour silvouple arête before I take a decision.  Yes Onorab Valmont.

 

HON JUDE VALMONT

Mr Speaker bonzour.  Bonzour tou bann Manm.  Mr Speaker mon siport ou e mon demande ki aksyon i ganny pran avek sa Manm ki fer sa.  Mersi.

 

(Interruption)

 

MR SPEAKER

Mon fer wi mon pran en desizyon la.  Okenn Manm ki mon okouran ki pe breach Kod Kondwit Lasanble mon pour pran aksyon neseser.  Bon nou ava pran 2enm kestyon lo Order Paper.

 

(Interruption)

 

MR SPEAKER

Minister oule ki Manm ou delegasyon i vin obor ou I akonpanny ou pour sa kestyon lo pri lavi lo STC.  Si CEO avek Chairman BoardYes Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker pandan letan ou pe koze pandan sa size kestyon la mon pe regard mon Standing Orders.  E mon pe get Order 22 ki donn nou fason pour adjourn deba an se ki konsern adjourn Lasanble an sa ki konsern deba.  Me parkont nou napa okenn Order ki deal avek adjourn okenn form of deba ki relate avek kestyon.

 

MR SPEAKER

Napa.  So se sa rezon ki mon servi pouvwar the Chair.

 

HON SEBASTIEN PILLAY

Mon ti a kontan wi …

 

(Interruption)

 

HON SEBASTIEN PILLAY

…. ki – ekoute!  Ekoute! Ekoute!  Ekoute!

 

MR SPEAKER

Napa.  

 

HON SEBASTIEN PILLAY

Mon ti a kontan ki zis nou reste dan frame of ki nou reste annord ek prosedir, ki ler nou pe fer sa, nou ….

 

MR SPEAKER

Order!  Order!  Order!

 

HON SEBASTIEN PILLAY

…. ekoute Onorab ou a aprann en pti keksoz ozordi.

 

MR SPEAKER

En moman, en moman, en moman Onorab Pillay.  Annou annan en pti pe lord!  Mon’n donn li laparol.  Onorab Pillay.

 

HON SEBASTIEN PILLAY

Admirab Mr Speaker.  Admirab mon kontan ki mannyer ou pe fer keksoz.  Mon ti a kontan zis soulinyen ki ti ava bon ki nou dir ou pe invoke Order 95 ler i annan sa bann sityasyon zisteman,  kot bann sityasyon I ganny kouver anba Standing Orders.  Zis si nou annord ek prosedir.  Mersi Mr Speaker.

 

MR SPEAKER

Mersi.  Mersi mon okouran sa ki Standing Order i silans lo la.  Se sa rezon ki mon rod konsansis le de kote e mon pran desizyon.  Sa I bann – sa ankor i bann keksoz ki nou pour regarde dan nou bann review Standing Orders.  E Chair Onorab George I am sure i pe note.  Bon nou ava pran 2enm kestyon.  Nou ava pran nou 2enm item lo Order Paper e urgent question sorti kot Onorab De Commarmond Leader pour Zafer Gouvernman.  Onorab De Commarmond laparol i pour ou.

 

HON CHARLES DE COMMARMOND

Mersi Mr Speaker.  Ankor enn fwa bonzour tou dimoun bonzour Minis avek ou delegasyon.  Mr Speaker kestyon i lir koumsa eski Minis pour Finans Lenvestisman ek Planifikasyon Ekonomik, i kapab enform e eksplik nou Lasanble ki bann mezir konkret ki son Minister pep ran pour konkretman fer desann pri lavi dan Sesel?  Enn; ki rol STC dan sa konteks?  Dezyenmman ki rikord FDI pandan sa dernyen 5an in endik nou dan sa direksyon?  Trwazyenmman ki mannyer nou pour fer pour nou deviz antre dan nou Sistenm Banker e son pri stabilize?  E katriyenmman ki mekanizm kontrol ki annan an plas, pour garanti pour napa labi lo pri marsandiz e servis?  Mersi.

 

MR SPEAKER

Mersi Onorab De Commarmond.  Minis.

 

MINISTER PETER LAROSE

Mersi bokou Mr Speaker.  Avek ou permisyon permet mon pour fer opening stetment konsernan pri lavi dan Sesel.  Sa statement a permet mon met kestyon Onorab Charles De Commarmond dan son perspektiv.  Mr Speaker Onorab De Commarmond in poz en kestyon trez enportan ki pe preokip azanda Gouvernman Prezidan Danny Faure.  Prezidan i tre konsernen avek sa size e i enterese pour fer desann pri lavi kot tou Seselwa i a benefisye san eksepsyon.  Dan premye Bidze ki mon ti prezante le 9 Desanm 2016 paragraf 4.1 paz 6, mon ti mansyonnen ki Gouvernman i committed pour redwir pri lavi.  E Gouvernman in esey tou son mwayen posib pour fer desann pri lavi.

Mr Speaker pri lavi i pa zis pri marsandiz dan magazen, me i osi involve 7 konponan; akomodasyon, manze, tax, transpor, kou lenerzi, delo, telekominikasyon.  Kot i konsern pri marsandiz, i annan eleman ki kapab afekte pri marsandiz – non pa senpleman lokal.  External stock lo marse enternasyonal lo pri komodite ki trez enportan pou nou swiv.  Fre transpor, fre lasirans, deviz etranzer, tax lo enportasyon, profit margin par enportater e si I annan serten marsandiz ki bezwen met dan bonded warehouse ou si non bondage facility.  Mr Speaker ki Gouvernman in fer pour atak pri lavi? Par egzanp in entrodwir Trezyenm Mwan Saler in annan en Komite ki pe etidye saler dan civil service, in antre an diskisyon avek bann Konpani Telekominikasyon; in antre an diskisyon avek bann Konpani Lasirans, diskit avek bann labank pour redwir kou lentere e fre banker.

Redwir VAT lo 14 komodite debaz redwir lo lakaz ou apartman oubyen sa bann lakaz ki ganny lwe.  Redwir tax lo materyo konstriksyon; retir tax lo lenz enporte exempt stamp duty for First Time Home Buyers.

Ofer R50mil Seed Capital pour fer sir ki tou pti biznes ki kapab kalifye, i ganny sa fasilite finansyer pour ed zot pey zot fre depans.  In propoze pour ofer par dan lavant share a tou konpannyen ler privatizasyon progranm I konmanse.

Tou sa i bann demars ki Gouvernman in fer pour sey redwir kou lavi.  Mr Speaker a sa pwen mon le fer remarke ki pour Seselwa eksperyans en rediksyon signifikan dan kou lav,. tou bann akter dan sekter prive fodre zot osi zot zwe zot rol efektivman.  Zot pa kapab depan zis lo Gouvernman pour fer desann pri lavi nou tou nou annan en responsabilite ver kou lavi.

Mr Speaker prezan mon le reponn kestyon Onorab De Commarmond konm swivan.  Ki rol STC dan sa konteks?  E la nou vwar devan nou.  Nou annan Chairman STC avek son CEO ki mon anmenn avek mon ozordi pour ede klarifye serten kestyon siplemanter ki pour sorti dan House.  E pour reponn rol STC dan sa konteks se pour asire ki prodwir de baz i ganny vann a en pri afordab.  Pour le moman i annan 14 komodite de baz ki STC in mandate pour fer sir ki son pri i afordab pour tou konsonmater.

Lo bann zil pros parey La Digue avek Praslin ti enporte pour note ki sa bann komodite de baz ki mon fek mansyonnen i vann menm pri ki Mahe.  E sa i pou osi abzorb son pri transpor par STC, pou asire ki tou dimoun i reste lo sa bann zil I fer sir ki zot kapab aste komodite menm pri ki Mahe pe vann.  Sa abzanpsyon i kout STC R2.5milyon zis pour lannen 2017 par egzanp.

Dapre kont provizyonnel ki’n ganny fer pour 2017 STC in abzorb anviron R35milyon lo sa 14 komodite de baz.  Sa i vedir ki konsonmater Seselwa pa’n menm santi lefe ogmantasyon pri komodite e sanzman dan pri deviz etranzer.  Lannen 2017 Roupi Sesel in osi devalye par 2poursan kont Dolar e 14poursan kont Euro.  Pour sa STC in asire ki 2010 pri lo sa bann 14 komodite debaz pa’n sanze signifikan.  Mr Speaker malgre manda STC i enportan pour note ki i annan lezot fakter ki afekte komodite debaz ki tonm an deor kontrol STC.

Mr Speaker mon ekout deba Lasanble semen pase lo business model ki STC i bezwen swiv pour redwir kou lavi.  Wi kot i konsern pri lavi nou bezwen ekoute e pran aksyon neseser pour redwir kou komodite.  Depi ki nouvo Board STC in ganny apwente, nou’n fer trwa miting avek Management ek Board pour adres lefikasite sa lorganizasyon.  Pour donn en bon servis e redwir kou lavi konm rezilta.  Pour nou kapab pran mezir ki efektiv nou bezwen esper en rapor operational audit lo STC ki mon ti mansyonnen.  Sa lodit a defini enn fwa pour tou ki kote nou kapab redwir kou loperasyon e pas okenn savings lo konsonmater.

Par egzanp i annan pri marsandiz pri free k lozistik; pri lasirans lo komodite enporte kou loperasyon STC.  Minister Finans, Komers e Planifikasyon Ekonomik, in envit oditer lokal pour fer en operational audit parey mon ti’n anonse oparavan.  Zot travay pou focus lo management efficiency, financial and cash management, internal control procedures, stock management.  Management i idantifye bann areas kot i annan gaspiyaz; regard pri komodite enporte e lokal; regard son fakter asset utilization; regard depans ki Management i fer e kontrol ki zot annan lo la.  Regard zot Sistenm Enformatik ki the key driver pour en loperasyon parey STC.

Regard lefikasite zot bann travayer e ki kantite fwa travayer i kit STC e akoz zot kit STC.  Regard fre transportasyon e lozistik e regarde si STC i annan en contingency planning.  Sa legzersis i a demontre kote nou pe fer byen e ki kote nou bezwen amelyore.  Kot ki annan savings nou kapab servi pour redwir kou komodite e translate dan en rediksyon pri lavi.  Mr Speaker, sa legzersis i pa en legzersis spesifikman teori nou bezwen levidans reel ki a ede pour nou kapab konpran.  E kote desizyon konkret nou bezwen fer ki nou kapab fer pour redwir kou lavi.

Kot i konsern deviz etranzer Management e Board STC i bezwen negosye en rate fix avek tou zot Labank – in mansyonnen dan zot Rapor, pour long term pour fer sir ki zot kapab redwir varyasyon dan tour lesanz ki zot kapab afekte pri komodite.  Procurement Department kot zot fer zot bann … Fodre i vin pli inovativ dan en sistenm stock management e kontrole.  Management fodre i kapab gard en stok komodite de baz apepre 6mwan.  E evite fer antre stok par air freight ki kout en kantite larzan.  Re negosye rent ki ganny peye tou le mwan par STC; reevalye kantite sekirite ki STC i bezwen pour fer marse son aktivite; analiz lefikasite STC lo la kantite staff ki i bezwen pour fer marse sa lakonpannyen.

Sours plizyer fourniser pour obtenir pli meyer pri bulk buying avek Mauritius la mon le dir en mo anler lo la.  Management ek Direkter in vizit sa pei e zot in vwar ki pri i pou pli ser an konparezon ki zot pou al aste kot zot fourniser direk.  Redwir kou loperasyon elimin middle men si zot pa kapab ofer en pri tre konpetitiv STC; redwir kredi ki zot ofer serten kliyantel, parske la sa kou ki zot ofer I tre signifikan e i tre i kapab relman ganny servi.  Parske si sa bann kliyantel i pey avek gran lefikasite e sa i kapab ede pour redwir kou komodite.  Redwir kou elektrisite e servi en sistenm solar panels si i fodre.

Redwir kou gaspiyaz pey staff lo en performance-related pay Scheme.  Fer en kalkilasyon kot sak konsonmater a benefisye 400 ou 500 lo zot pri marsandiz tou le mwan.  Prodwir en lalis komodite de baz e pibliye toulezour lo medya.  E si i annan en sanzman dan pri STC i bezwen eksplike akoz.  Mr Speaker tou sa se demann en sanzman radikal dan lapros ki Management i servi dan lapros aktivite STC.  Pour nou kapab redwir kou lavi business as usual in fini, si nou le redwir kou lavi.  Bann staff i bezwen vin pli vizilan e pli konsansye dan zot travay parske STC ki pey zot saler.

Ki rikord FDI pandan sa dernyen 5an in endik nou dan sa direksyon.  Dapre estimasyon Labank Santral pandan sa dernyen 5an FDI ki vedir Foreign Direct Investment ki’n antre dan lekonomi Sesel, in vin en mwayen $188milyon par an.  Sa bann envestisman prensipalman i dan Sekter Tourizm fodre nou fer remarke ki faz lenplimantasyon sa bann proze ouswa konstriksyon, i kontribye FDI dan lekonomi Sesel pa telman signifikan.  An term la kantite deviz ki antre lo marse deviz domestik, sa i ganny determinen par poursantaz depan ki promoter proze I bezwen pey an Roupi.

E sa i ganny enflianse depan lo lenportasyon pou pei.  Ler proze i fini ganny konstrir oubyen i konmans operate kontribisyon FDI dan lekonomi i prensipalman an term lanplwa reveni Gouvernman lo tax servis, deviz etranzer si reveni sa biznes i an deviz.

Ki mannyer nou fer ki deviz i antre dan nou Sistenm Banker?  Mr Speaker sa kestyon i fer mwan mazin ler mon ti travay pour Labank Santral.  Pandan sa lepok ti annan regilasyon foreign exchange control.  Fodre nou pa bliye sa.

I ti egzize ki tou endividi e konpani ki ti fer biznes an deviz ki reveni an deviz I antre atraver nou Sistenm Banker.  Mon kapab konfirmen ki sa sistenm pa ti efektiv e pa ti marse.  Si nou pe deside pour re entrodwir en replika sa menm sistenm, nou bezwen prepar nou konman en Nasyon pour fer fas avek menm problenm ki nou ti eksperyanse avan 2008.  Si sa i nou lekspektasyon dan en marse lib nou tou nou pour bezwen sibir konsekans ekonomik.

E pour mwan nou pa e pour mon nou pa’n aprann leson avan 2008.  Nou’n sorti lwen nou Mr Speaker IMF dan son Press Release le 20 Mars 2018 lo lekonomi Sesel in konfirmen.  Nou performans macro makroekonomik e monneter i stab e pozitiv.  Fodre ki nou kontinyen etre pridan dan nou desizyon ki nou pran.  Mr Speaker sa mesaz i tre profon pour nou pei Sesel.  Ki mannyer pour nou stabiliz deviz etranzer? Sa i en size ki pour Labank Santral.  Se zot ki ansarz Polisi Monneter nou Minister Finans nou preokipe avek         Polisi fiskal pei.  Depi ki sa Sistenm Monneter i an plas in mars byen e fodre nou fer atansyon ki nou pa deranz sa sistenm ki petet nou bezwen fer analiz profon pour nou apresye son konsekans ekonomik.  Menm kestyon i ganny demande avek delegasyon IMF zot bezwen fer en legzersis davans pour regard son lenpak.  Ki mekanizm kontrol ki annan pour an plas pour garanti pour napa labi lo pri marsandiz e servis.

Napa kontrol Sesel depi 2013 nou dan en marse lib largiman ki ti ganny prezante avek Gouvernman se ki en tel mekanizm ti napa plas dan nou lekonomi modern.  Kot marse I devret ganny dikte par pri i enportan pour note ki i annan serten Lorganizasyon Nasyonal ki pran kont byennet konsonmater Seselwa.  Partikilyerman Komisyon Komers Zis ki regle kalite prodwir ki ganny vann lo marse lokal.  E tou i depan lo entegrite bann marsan pour fer bann aktivite ekonomik, ki zis e transparan dan lentere pep Seselwa.  Mersi bokou Mr Speaker.

 

MR SPEAKER

Mersi Minis.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker anba package Korperasyon avek L’Inde nou kapab ganny en kantite prodwir avek fourniser direk sorti dan L’Inde.  E an gran kantite kot STC i kapab stoke.  Eski sa posibilite pe ganny vreman eksplwate par lotorite konsernen?

E dezyenmman eski nou pa krwar Minis eski Minis pa krwar ki I bezwen annan en fason ler tou nou forex i antre dan nou pei.  E ki nou annan en sistenm ki anpes sa forex zis ale i pour ede pour stabiliz nou roupi e fer sir ki across the board pri osi i ganny stabilize?  E an menm tan, eski Minis i kapab regarde avek STC si avan STC ti pe vann materyo konstriksyon, eski pri ti pli bon marse ki la konmela ki STC i vann son materyo konstriksyon?

E an menm tan eski I annan lezot supplier lokal ki met zot bann prodwir kot Hypermarket e ki mannyer sa i marse avek STC?  E dernyerman si STC i aste bann prodwir an gro avek lezot enportater osi ki vann isi lokal.  E letan i met son markup parey normal, eski pri pour osi o ki ete dan STC pour serten lezot komodite?  Mersi.

 

MR SPEAKER

Mersi Onorab De Commarmond.  Minis.

 

MINISTER PETER LAROSE

Mersi bokou Mr Speaker.  Mon krwar Onorab De Commarmond in prezant mwan avan detrwa kestyon siplemanter ki tre enteresan.  E mon remersye ou pour sa.  Kot I konsern enportasyon avek L’Inde nou’n fini diskite avek Board avek Management.  Mon krwar tre byento zot pour al dan L’Inde zot ava fer zot travay pour zot sours zot bann komodite a en pri tre konpetitiv.  E sirtou osi regard kalite ki zot pe anmenn dan nou pei e sa tre byento zot a fer en voyaz L’Inde pou fer sir ki Seselwa i a ganny bann komodite afordab parey nou dir.  E kot i konsern stok forex mon le dir Onorab mazinen si vre lentansyon pour stabiliz nou pri forex, akoz sa osi i en fakter ki enflians ou komodite.  Akoz nou bezwen aste komodite avek forex ki swa Euro ou si non Dolar ou si non Liv Sterlen.  Me senpleman osi pour nou kapab stabiliz sa, pour fer sir ki napa kantite outflow ki out of foreign exchange nou bezwen regard sityasyon nou pei ozordi,  ki kantite foreigners I annan dan nou pei.  Natirelman mon konman Minis mwan napa nanryen kont foreigners.

Me la kantite foreigners ki annan dan nou pei kan zot ganny zot Roupi pei zot convert sa an deviz etranzer e sa i kit nou pei.  E kot I konsern receipts lo touris, e la mon krwar ti ava regarde si nou kapab fer en analiz avan ki nou touris I vin dan nou pei 50poursan zot depans i ganny re-mete dan nou Sistenm Banker.  E ler zot kit pei lezot 50poursan i antre.

Me sa i vedir kot nou pour bezwen annan en kontrol pli strik e sa nou pour bezwen sipor kot Labank Santral.  Minister Finans pour vwar kot nou kapab travay ansanm.  E sirtou ler nou bezwen korporasyon avek bann biznes ki fer komers avek deviz etranzer.  Kot i konsern supplier lokal mon krwar se i bezwen en zizman fer par Management si ler zot aste komodite lokal avek middlemen.  E ler zot fer zot met zot markup lo la zot bezwen regarde si sa i afordab pour nou konsonmater.  E si i pa afordab natirelman zot pour bezwen sanz zot fason ki zot operate.

E kot I konsern middlemen dapre miting ki mon fer avek CEO avek Board, I annan serten middlemen ki kapab ofer pri pli bon marse ki STC i aste avek zot fourniser.  Me tousala parey mon dir dan mon optimal statement pour reponn ou kestyon, i demann en sistenm kot nou pour bezwen regarde kot ki mannyer STC i fer son loperasyon tre radikal.  Nou bezwen regard li dan tou kote e kot nou kapab fer nou konsonmater benefisye e sirtou nou bezwen fer en kalkilasyon.  Nou bezwen al lo drawing board pour vwar kote nou bann konsonmater i kapab benefisye, pour par en sonm R400 a R500 lo tou zot komodite ki zot aste kot STC.  E la osi petet nou bezwen regard sa Sistenm Pwen kot STC i ofer konsonmater.  Mersi bokou.

 

MR SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker.  Bonzour Minis bonzour tou koleg Onorab.  Speaker mon kestyon in lev apre sa kestyon ki Onorab De Commarmond in demande.  En pti follow-up apre enn pertaining to en larepons ki Minis in donnen.  Minis mon konnen Board STC i ase nouvo CEO i ase nouvo.  Me selman mon osi mon fer shopping STC mon osi.  E mon vwar bokou nouvo prodwir resaman alor pertaining to sa kestyon mon demande.  Eski zot in annan okenn sikse an term trouv bann larzan alternativ sirtou rezyon rezyonal pour ganny bann prodwir a kourt redwi?  E 2enm kestyon mon ti zis anvi demann Minis si eski, i vreman mon vwar lo kontwar mon vwar travayer etranze mon osi mon napa nanryen kont travayer etranze.  Me mon demande eski I vreman kout STC pli bonmarse pour annan travayer etranze lo kontwar ki en Seselwa?  Mersi.

 

MR SPEAKER

Mersi Onorab Valmont.  Minis.

 

MINISTER PETER LAROSE

Mersi bokou Mr Speaker mersi bokou Onorab Valmont.  E mon ganny dir par CEO ki Trade Development Bank pe sey ed STC pour kapab outsource dan la rezyon bann fourniser kit re tre konpetitiv.  E kot i konsern Onorab De Commarmond L’Inde i annan en diskisyon ki pe go on between Board avek L’Inde.  E kot i konsern foreign workers anler lo cash register, i sanble ki zot ganny menm lapey ki ofer Seselwa, me senpleman i annan an adisyon housing allowance.  Ki vedir ki zot kout plis ki Seselwa, Seselwa pa gannyen housing allowance.  Mersi.

 

MR SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker.  Alor atraver ou, mon ti a voudre ki STC i konsidere fer enpe travay enpe pli dir pour rod enpe plis Seselwa.  Mon annan zenn dan Pointe Larue ki pe rod louvraz mon annan bann bon cashiers, alor konmsi i annan MNA ki’n dir lot kote zet sa travay lo zenn Pointe Larue.  Lo Seselwa.  Mersi.

 

MR SPEAKER

Mersi Onorab Valmont.  Minis.

 

MINISTER PETER LAROSE

Mr Speaker.  Mon krwar Onorab Valmont in tous en pwen sansib ki mon regard li tre pros e I konsern mon konman Minis.  Toulezour mon lir nasyon mon si nou regard nasyon sa kantite vacancy ki annan lo NASYON ki sorti kot SRC nenport partou lo kote prive.  Me si napa sa dimoun ki zenn ki kapab apply be nou pa kapab fors zot.  Ou konpran mon swete ki zot a pe kout sa deliberasyon Lasanble ki zot pran li serye.  Parske lavenir sa pei pa depan anler lo mon i depan lazenes ki pe vini ou konpran.  Alor nou swete petet osi STC i ava regard serten zot pay Schemes ki kapab, ede pour atrakte zot e la mon swete ki CEO olye ki i anploy etranze.  Nou ava fer ankor en round pour regarde si nou ganny Seselwa si nou ganny Seselwa i pour napa housing cost i ava redwir zot kou loperasyon.  Mersi bokou.

 

MR SPEAKER

Mersi Minis.  Onorab Regina Esparon.

 

HON REGINA ESPARON

Mersi Mr Speaker.  Mr Speaker mon ti a kontan demann Minis ki bann prodwir pe aste avek sa lakonpannyen Amira ki pour Mr Manish Tandon ki baze Dubai?  E apar diri kwa ankor ki STC pe aste avek Hassani Food Industries?  Epi lekel sa bann lakonpannyen lokal ki STC pe aste marsandiz avek isi?  Mersi.

 

MR SPEAKER

Mersi Onorab.  Minis.  Minister kekfwa ou pa bezwen donn lalis antye me mon santi kestyon i en pti pes a premye bout i en pti pe an deor.  Me ou pa neseserman bezwen donn the whole list of items ki STC i fer vini avek sa lakonpannyen.  Me lo sa bout lokal …

 

MINISTER PETER LAROSE

Mersi Mr Speaker mersi Onorab Esparon.  Dapre CEO zot aste zis diri avek Amira.  E kot i konsern Hassani zot ti fer lenportasyon lo emergency basis akoz zot ti pe run out of stock.  E la ankor enn fwa Mr Speaker mon le dir tre onnetman devan Chair of the Board – CEO nou bezwen evite zis pour nou al dan store pour vwar be dir ou konnen bann prodwir de baz i manke.

Nou bezwen annan en revolisyon lafason ki nou regard nou stock Management.   Sa bann dimoun ki prodwir travay dan procurement department i bezwen pli vizilan, pli alez a pli dynamic.  Pa les stock run out e dir be nou kapab fer vini par air freight non.  Se nou bezwen sanz sa business as usual mind set enn fwa pour tou.  Mersi.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Minis pa’n reponn mon kestyon lekel lakonpannyen lokal ki STC pe aste avek?  Mersi.

 

MR SPEAKER

Ok mersi Onorab.  Minis 2enm par kestyon.  Go ahead Minis.

 

MINISTER PETER LAROSE

Mersi bokou Onorab Esparon.  Sorry mon’n manke lekel lakonpannyen ki zot aste lokal.  Dapre CEO zot aste avek en kantite dimoun – pardon?

 

(Interruption)

 

MR SPEAKER

Order!  Order!  Go ahead Minis.

 

MINISTER PETER LAROSE

Onorab Ferrari in demann mwan siplemanter ki Onorab Esparon trwa pli gro, eski ou CEO ou kapab donn mon 3 pli gro?

 

MR SPEAKER

Minister reponn kestyon official from Onorab Esparon.

 

MINISTER PETER LAROSE

Mr Speaker CEO i dir i aste avek plizyer dimoun e i annan plizyer lalis avek li la.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Mr Speaker eski Minis i kapab klarifye ki zot pe fer vini zot pe aste marsandiz avek Capital Trading bann keksoz parey dantifris, prodwir pti baba, brosadan, comfort.  Zot pe aste Capital Trading e dir nou ki Chairman Capital Trading?  Mersi.

 

MR SPEAKER

Mersi Onorab.  Annou sey tenir nou bann kestyon siplemanter dan konteks kestyon orizinal akoz la nou pe al en pti pe.  Nou pe rod lenformasyon lekel ki own en lot konpannyen.  Minis.

 

(Interruption)

 

MINISTER PETER LAROSE

Mr Speaker mersi.  CEO i konfirmen ki i aste marsandiz avek Capital Trading.  E 2enm kestyon; lekel ki Chairman Capital Trading mon krwar I en Mr Mukesh Valabhji ki Chairman Capital Trading.

 

(Interruption)

 

MR SPEAKER

Mersi Minis.  Bon mon pour pran en kestyon ki arise lo la Onorab Loizeau.  Onorab Loizeau apre nou pour pran en Break – en.

 

HON NORBERT LOIZEAU

Mersi Mr Speaker.  Bonzour tou dimoun.  Mr Speaker Minis in dir avek nou ki CEO in dir ki par ase bann middlemen.  Vi ki mon vwar i annan middlemen ki in ganny mansyonnen la.  I pli bon marse ki aste avek prodikter?  I korek sa mon ganny dir.  Vi ki CEO in dir sa, akoz selman ki marsandiz i kontinyen pri i reste o menm kot STC vi ki in dir sa.  E konman mon lo middle men la vi ki STC i enn bann pli gran enportater diri.  E dernyen fwa dan deba ti annan mansyon ki annan de middlemen somewhere Dubai.  E la I fer ki markup lo diri in double i vin de fwa e nou konsonmater nou aste sa diri bokou pli ser.  Ki ou Minister pe fer Minis pour deal avek sa sityasyon middlemen ki STC in antre ladan?  Mersi.

 

MR SPEAKER

Minis.

 

MINISTER PETER LAROSE

Mr Speaker mersi bokou pour Onorab Loizeau pour ou kestyon.  Mr Speaker akoz mwan personnelman, mon pa konpran loperasyon STC as such mon pa micro manage loperasyon STC.  Me senpleman ki mon pe demande ki nou annan en complete operational audit fer pour donn en serten gidans ki swa i middlemen pour petet son costings osi, I kapab mal osi.  E nou pour bezwen annan sa levidans ki kote ki nou kapab adres sa landrwa kot STC pe fer mal e kot nou kapab donn benefis konsonmater.  Mersi.

 

MR SPEAKER

Mersi.  Mon krwar lo sa not nou ava pran en break en tea break Minis avek ou delegasyon a pran en dite e nou bann envite osi ki sorti Bel Ombre ava pran en tas dite anler dan Room 3 – mon krwar nou pe ale – yes.  Ok nou a pran en Break e nou a retournen 11er.

 

 

(BREAK)

 

MR SPEAKER

Bon mon zis prezant en leskiz pour sa pti retar ki nou’n gannyen.  An vi sa sityasyon bomaten ki’n leve lo sa kestyon. Lo sa Private Notice Question, nou’n ganny konfirmasyon ki le de Minis pour akonpanny Minis Finans apre midi 2er pour nou kapab kontinyen avek sa.

E mon swete ki dan lunch break la omwen nou ava ganny en kopi sa Kontra ki le de kote latab a kapab regard sa Kontra. E rezon osi pour sa se ki demen i annan Cabinet, so o tan posib nou a kapab deal avek sa sityasyon apre midi.  Bon nou ava kontinyen avek nou travay lo kestyon lo siplemanter par bann Manm.  Mon annan Onorab Ghislain.

 

HON CHANTAL GHISLAIN

Mersi Mr Speaker.  Mr Speaker mon kestyon i annan pour fer avek forex.  Dir mwan, i annan, konmela i annan bann marsan ki zot osi zot annan bann Foreign Exchange Bureau.  E zot fer vini marsandiz zot osi.  Eski i annan en fason ki Minis, Minister Finans i kapab verifye lakantite, akoz dan dezyenm parti kestyon i annan pour fer avek forex osi, lakantite forex ki sa bann marsan i aste avek Labank Santral pour zot fer vini bann marsandiz.

Eski i marye, ouswa i equal lakantite marsandiz ki zot fer vini isi?  Mon kestyon i vin koumsa akoz dizon par egzanp, mon pa pe dir i annan; lefet ki zot osi, zot annan bann Foreign Exchange Bureau e zot osi zot fer vini marsandiz, zot pe aste sa bann sa. Pour ki fer ki napa sa konfli ki ler mon pe aste dizon mon aste $1milyon avek Labank Santral pour fer vini marsandiz e ladan mon servi zis 500mil.  E mon lot 500 mil i al dan bann Forex Exchange Bureau ki zot, zot kapab met li an plas la.  Veye ler i monte, i desann i sa ki zot pe fer larzan lo lefet ki mwan mon’n demann pour mwan fer vin manze, Sesel.  Sa i mon premye kestyon.  si i kapab reponn sa are mon kapab pran leres silvouple.

 

MR SPEAKER

Mersi Onorab Ghislain. Minis.

 

MINISTER PETER LAROSE

Mersi bokou Mr Speaker. Mon krwar Onorab Ghislain in anmenn en pwen trez enportan. Se vre se ki serten sa bann marsan zot ouver bann Biro Desanz. Petet par deryer sa osi i annan serten lenplikasyon. Parey Onorab Ghislain in dir. Alor petet kekfwa i aste $1milyon.  Konmsi lo preteks ki i pe fer vin marsandiz me senpleman i servi zis 500 mil.

Sa set en keksoz kot Supervisory Department Labank Santral e Minister Finans i a kapab petet regard en pe sa bann Biro Desanz ki zot aktivite e ki zot pe fer.  Parski tou sort fason osi sa i annan en lenplikasyon anler lo kou lavi.  E si i annan serten parey koman Onorab Ghislain in dir nou pa konnen, manipilasyon somewhere.  Nou bezwen regarde parski a lafen dizour, nou MOTO, nou lobzektif se pour fer desann kou lavi.  E sa nou bezwen travay an kolaborasyon ek Labank Santral.  Parski li ki en regulate financial services.

 

MR SPEAKER

Mersi Minister. Onorab Ghislain.

 

HON CHANTAL GHISLAIN

Mon dezyenm kestyon i an se ki konsern bann prodwi ki bann marsan i fer vini. Akoz nou konnen pa zis STC ki fer vini bann prodwi manze.  Bann keksoz ki rantre dan pei nou pe remarke pour dir i annan bann kantite bann prodwi ki vreman pa neseser.  Par egzanp letan nou pe regard bann twisties, bann, ou konnen bann pti prodwir ki kout en kantite pour fer vini. Be akoz i kont forex sa ki fer vini. E nou vwar en kantite sa bann keksoz pe rantre dan pei.  And i rantre tanzantan ou vwar en kalite ki vini.

Mon regard par egzanp chips bannann.  Ou fer vini bann chips ki zot dir plante dan sa kan nou annan nou bann prodikter lokal ki fer chips. Bann prodwi koumsa. And tousala i enpakte non selman lo kantite forex, i enpakte lo lasante dimoun. Bann zanfan pe manz sa.  Ou war zot pe vin deplizanpli pli gro san ki mon pe al dan mon zafer Mosyon pour sa.  Me selman zit mon annan sa pti kestyon koumsa. Ki Minister pe fer pour ki i kapab kontrol en pe sa bann keksoz ki rantre dan pei?  E apre lakantite lalkol ki pe rantre dan pei.  Akoz letan nou repas dan tou sa bann magazen, lo tou sa bann letazer, sa kantite lalkol ki annan.

And mon zis demann mon lekor kote ki zot ganny forex pour zot kapab fer vini tou sa kantite lalkol.  Prezan ler ou pas dan en pti fridge, dan en pti freezer ou war kekfwa, 4 ponm, 5 ponm, 5 zoranz ki dimoun i pli bezwen fri ek legim pour zot manze si nou pa pe kapab aste lokal. Kekfwa napa lakantite ki ganny prodwi. Me nou kapab enporte, olye enport lalkol.  Me nou kapab pe enport plis fri ek legim pour dimoun konsonmen. Mersi.  Ki mannyer Minister i kapab kontrol sa?  Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  Kot i konsern bann prodwi kot nou kapab prodwi lokal.  Mon antyerman dakor avek Onorab Ghislain.  Se ki nou bezwen annan sa promosyon.  Sirtou bann pti biznes.  E nou vwar sa bann dimoun ki fer sa bann prodwi lokal i relye ek bann pti biznes kot i donn zot self-employment epi osi zot kree lanplwa pour lezot dimoun, pour zot manm fanmir.  Sa mon antyerman dakor e petet kekfwa nou Departman Off Trade i kapab regard ladan pour vwar ki mannyer nou kapab minimiz bann keksoz ki sorti deor, ki petet en kote pa bon pour lasante. E sa set en kestyon kot nou pour bezwen re-vizit sa tel sityasyon. Kot i konsern lalkol.

E i annan son lenplikasyon negativ.  E sa nou vwar pour dir be posibleman se ki nou pour bezwen regarde koman en Polisi Nasyonal.  Eski nou preferans i lalkol os non fri ek legim pour nou reste en pep an bonn sante?  Sa osi mon krwar i pour demann en national policy pour nou regard ladan pour vwar ki mannyer nou kapab minimiz konsonmasyon lalkol.  E si mwan mon pa tronpe i sanble konmsi Seselwa i one of the highest consumers of alcohol.  E sa i afekte nou prodiksyon.  E ler i afekte nou prodiksyon i a afekte krwasans ekonomik.  E ler i afekte krwasans ekonomik natirelman i afekte lapovrete. Mersi bokou.

 

MR SPEAKER

Mersi bokou Minis.  Dan menm laliny Onorab Sebastien Pillay.

 

HON SEBASTIEN PILLAY

Wi, wi Mr Speaker.  Mr Speaker mon ti deza met mon non lalis, mwan ava demann ou permisyon pour mwan fer sel demann mon kestyon la.

 

MR SPEAKER

Yes.  Go ahead Onorab.

 

HON SEBASTIEN PILLAY

Mr Speaker Minis in reponn sa kestyon kot i konsern bann Bureau De Change e zot rol dan lekonomi sirtou an se ki konsern fer deviz reste dan pei. Me eski Minis i kapab dir nou si ozordi Labank Santral i annan sa manpower neseser pour fer sa travay ki devret ganny fer vizavi bann Bureau De Change parski in annan konsern eksprimen par lapopilasyon ki kapab annan kek trik, dan zwe ki pe arive an se ki konsern bann Bureau De Change sirtou kot larzan pe kit pei pe al dan en lot pei san ki petet nou pe kapab monitor.

Eski Minis atraver Labank Santral pe osi regarde si bann Bureau De Change apre ki par egzanp en dimoun in komans en konpannyen, i komans dan retail, i komans dan konstriksyon, en pti moman ou vwar zot aparet dan Bureau De Change, si sa pa pee de pour ki i annan serten eleman transfer pricing kot i pe aste ek son lekor, pey son lekor?  E sa pa pe ganny rikorde koman reveni ki pei i kapab kolekte atraver Sistenm Tax? Mon annan de lezot kestyon, i posib pour mwan demande apre Mr Speaker.

 

MR SPEAKER

Yes. Go ahead Minis.

 

MINISTER PETER LAROSE

Mersi bokou Mr Speaker.  Mon krwar Onorab Pillay in demann de kestyon ki ankor enn fwa, de kestyon tre valab, tre enportan. E kestyon kot si i annan ase manpower par Labank Santral pour fer sir ki zot kapab monitor sa bann Bureau De Change?  E se vre mon pour bezwen an kontak avek Labank Santral pour vwar ki kalite travay sipervizyon i annan lo Bureau De Change.  E sirtou kot i konsern kot larzan i kit pei. E ler larzan i kit pei savedir.

Savedir larzan ki kit nou pei i pa larzan ki available pour nou servi dan nou pei pour Sekter Prodiktiv.  E sa i a osi i en fakter ki afekte nou devlopman ekonomik. Kot i konsern Bureau De Change avek transfer pricing.  E tou resaman mon ti annan kontak avek en spesyalis World Bank ki nou pe esey fer mannyer pour envit li pou re regard en pe transfer pricing. Non pa zis Bureau De Change me tou petet bann biznes ki nou sispe i kapab involve dan transfer pricing.

E la osi mon krwar i annan bann gro Kapital ki kit nou pei san ki nou kapab monitor zot telman byen.  Mersi.

 

MR SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi, mersi Mr Speaker.  Mr Speaker sa ki Minis pe dir la nou la i en keksoz tre enportan akoz nou pe koz pri lavi e sa de reveni ki pei i kolekte avek la fason ki nou kapab ede pour fer desann pri lavi. Ouswa nou kapab ogmant saler travayer ki redwi sa income gap ki egziste ozordi.

Me problenm ki mon pe vwar la se ki ozordi par egzanp nou’n vwar British Airways in retourn Sesel e lakantite touris pe kontinyen ogmante.  Alors ki Minister Finans pe fer atraver Komisyon Reveni atraver Labank Santral, atraver tou bann Lazans ki asosye avek sa. Ki zot pe fer reelman pour asire ki maksimonm deviz ki nou pe gannyen, par egzanp atraver lendistri tourizm i reste dan pei e nou pa vwar en sityasyon kot malgre ki lakantite touris i ogmante nou pa pe vwar sa yield ki nou gannyen, sa retour ki nou gannyen ek sa logmantasyon dan touris pe ganny manifeste dan reveni parey ti ava devret.

So kan eski nou pour vwar en aksyon ganny pran lo sa size Mr Speaker?

 

MR SPEAKER

Mersi Onorab.  Minis.

 

MINISTER PETER LAROSE

Mersi Mr Speaker.  Si nou mazinen tanzantan nou war lo pibliye lo NASYON, lo lezot papye pour dir logmantasyon i dan touris ki vin Sesel.  Me le kestyon ki nou bezwen poze eski zot anmennen sa kantite deviz? E la kot in tous lo en pwen tre enportan, sa transfer pricing.  Petet kekfwa la kantite nonm touris ki rantre.

Me posibleman sa bann akter ki dan devlopman touris i kapab annan special purpose vehicle company ki channel sa bann resi somewhere.  E la kot mon pe dir, se ki nou bezwen fer en lodit lo transfer pricing pour vwar ki mannyer nou kapab maximize yield lo kantite touris ki vin Sese.  E sa i ava ed nou stabiliz nou pri deviz.  Mersi.

 

MR SPEAKER

Mersi Minis.  One last question Onorab Pillay.

 

HON SEBASTIEN PILLAY

Mersi, mersi Mr Speaker. Mr Speaker to go back to premye bout kestyon ki rol STC dan sa konteks.  Mon ti a kontan demann Minis, nou’n koz bokou lo bann middleman.  Mon ti a kontan ganny li kler. Par egzanp, devan Lasanble nou vwar dan Papers Laid toultan i annan bann dokiman ki mon tre nou ki bann dimoun i vin bann azan pour bann diferan kalite prodwi, bann brand prodwi dan pei.

Si par egzanp STC i bypass sa ban azan, e zot oule al direk kot sa supplier. Par egzanp mon konnen pou dir ‘’Seybrew i azan pour Johnnie Walker.’’ I stand to be corrected, I stand to be corrected. Eski par egzanp, eski i pour annan en problenm pour STC bypass sa bann azan lokal.  Eski sa bann azan lokal pour annan en cause for action pour anmenn en keksoz kont STC si zot deside bypass sa bann azan lokal pour zot al direk kot sa bann supplier? Oubyen eski zot pe re-negosye bann rates ki zot gannyen?

Sey donn nou en nide pli kler. Akoz mon en pti pe konsernen ki si en sel kou, nou komans en keksoz dan en fason nou riske war en lot problenm souleve.  Mersi Mr Speaker.

 

MR SPEAKER

Mersi Onorab.  Minis.

 

MINISTER PETER LAROSE

Mr Speaker ler ou annan en agency i deza en middleman. E lozik i dikte poudir be si ou pe al kot en middleman natirelman pri pa pour vreman tre konpetitiv.       Se vre dapre CEO se ki zot annan serten agency agreement.  E alor zot bezwen regard sa bann agency agreement ki i dir ladan pour zot war si zot kapab annan en scope pour zot re-negosye.  E si i annan ki petet pa vo lapenn. Natirelman zot pour let sa bann agency agreement lapse e vwar si zot kapab al kot fourniser direk.  Parski i annan serten moman ki ler zot al kot fourniser direk i dir poudir be mon’n al tel agency Sesel alor al kot mon agency.

 

MR SPEAKER

Mersi Minis.  Onorab John Hoareau.

 

HON JOHN HOAREAU

Mersi Mr Speaker. Mr Speaker en parti mon kestyon in ganny souleve par Onorab Pillay.  Be selman mon ti oule al en pti pli devan ki sa pour demann Minis osi pour dir nou kwa ki pe ganny fer atraver son Minister pour ankouraz bann biznes, bann gro biznes sirtou bann biznes enternasyonal pour reenvestir dan Sesel; setadir pour met zot larzan, bann profi ki zot in fer, ki zot in gannyen isi Sesel pour remet li dan Sesel menm pour benefisye nou lekonomi. Olye repatri zot aletranze.

Apre Mr Speaker mon ti ava kontan konnen ankor en kestyon ki baze lo stabilite pri, stabilite deviz etranzer.  Malgre ki lekonomi in grosi en pti git lannen pase.  Me sa kalite groses parey nou apel li in enn ki’n ganny dekrir par IMF koman en growth ki pa quality.  Right?

        So mon ti a kontan konnen ki Minis i pour fer pour anmenn en pe plis quality growth baze lo lenvestisman olye baze lo kredi e konsonmasyon parey in ganny dir pa IMF.  Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mr Speaker mon krwar Onorab Hoareau in anmenn ankor bann bon kestyon.  Si petet kekfwa mwan a rapel en pe nou House, se ki lenvestisman, foreign direct investment in ganny dikte par 3 fakter.

  • Maximize profit. Secondly, stability in terms of the investment. E third se scope of repatriation of earnings.

Sa se 3 fakter ki dikte si envestiser ki deza envestir dan nou pei.  Osinon en nouvo envestiser ki oule envestir dan nou pei.  Me sa se si oule set en keksoz volonter.  Ou kapab regard nou taxi stand. Nou kapab regard nou ease of doing business. I kapab regard ki kantite skills nou pei i ofer. Petet pour zot fer zot business Sesel.  Me sa set en keksoz volonter.  Se zot ki deside.  Me a lafen dizour Gouvernman i kapab ofer serten incentive pour atrakte zot e pour fer sir ki larzan ki zot benefisye konm profi i ganny reenvestir.  Me sa se nou pa kapab coerce bann envestiser.  Me set en fason ki zot menm zot vwar loportinite pli zot biznes i grandi.  Alor zot sivre economic policy ki kapab ed zot pour determin  zot fakter si zot reenvestir osinon si zot rapatriye zot lenvestisman.

E kot i konsern economical growth mon pa konnen si ou’n ganny sans lir sa progress report ki IMF in fer le 20 Mars 2018.  E si non mwan a fer ou ganny en kopi.  E mon krwar si petet IMF i dir quality growth i doubtful.  Mon krwar in dir i very positive.  E mwan a fer ou ganny en kopi kekfwa i kapab anmenn ou en pti pe up-to-date ki findings ki zot in fer anler lo Sesel.  Mersi.

 

MR SPEAKER

Mersi Minis.  Onorab Hoareau.

 

HON JOHN HOAREAU

Zis pour fer remake ti dekrir li koman troublesome.

 

MR SPEAKER

Ok.  Se komanter.

 

HON JOHN HOAREAU

Pour dir zis pour fer remarke i ti dekrir sa growth koman troublesome.

 

MR SPEAKER

Sa groses.  Ok.  Bon.  Ok.  Onorab Henrie.

 

HON GERVAIS HENRIE

Mersi Mr Speaker.  Bonzour tou dimoun.  Mr Speaker avan mon demann mon kestyon, mon ti ava zis kontan eksprim lapresyasyon ki Minis in ekout deba lo STC semenn pase, e in pick-up plizyer pwen; bann solisyon ki Lasanble ti met devan ziska sa pti detay ki sa saving 4 a R500 par mwan ki nou ti mansyonnen.  E petet a lavenir ti ava byen ki bann Manm Lasanble kekfwa en zour ti a ganny sans en vizit kot STC.  Son bann diferan loperasyon pour nou kapab vwar ek nou de lizye pour nou kapab mye konpran ki si sa sa lorganizasyon e ki mannyer i operate.  Sa i zis en sizesyon.

Prezan mon kestyon premyerman, mon krwar bann keksoz ki devan nou la, devan nou lizye ki tanzib ki nou kapab tyonbo, ki mon ti ava kontan demann Minis kwa ki Minister Finans avek Board e Management STC pour fer pour sanz sa sityasyon.  Dabor lo kestyon rental.  Zis pour sitye lefe ankor.  De partikilye Parti Lepep i ganny peye avek STC R823, 333 par mwan pour kot building materials i ete.  Sa i fer R9,879,996 par an.  E depi Septanm 2014 ki sa loperasyon laba ti komanse, ziske Mars lannen, 42 mwan total pou’n fer R34. 579. 986milyon.  34 milyon, 42 mwan ziska prezan.

Lot, Hypermarket i pe pey Bois Des Rose Investment up to now, 29 mwan depi Oktob 2015 ziska Mars 2018, 42. 675. 327milyon roupi.  Dabor mon oule demann Minis ki bann opsyon ki i pe al met devan Board e Management pour tackle sa de.  Parski sa i 2 gro konponan dan kou loperasyon STC.  Sa rental pour Parti Lepep avek sa rental pour Bois De Rose Investment.  Sa i mon premye kestyon.

Dezyenm i annan sa unit dan STC ki internal audit, zot deza annan en unit zot internal audit.  Me mon konpran dapre en pe kestyon ki mon’n demande, se zot plito focus lo loperasyon e non pa the financial side of STC.  Si sa i korek kwa ki kapab ganny propoze pour sanz son term of reference e donn li en pli gran apersi lo loperasyon STC.  Akoz i touzour kapab annan keksoz ki zot annan en blind side to.

Apre 3enm e vitman. Onorab De Commarmond ti demann Minis en kestyon si i annan bann dimoun ki pe, bann lezot operater apard STC ki pe vann keksoz dan bann landrwa STC partikilyerman Hypermarket si mon korek. E Minis pa’n reponn sa kestyon. So mon ti a kontan redemande.  Eski i annan apard STC ki pe vann bann lekipman la partikilyerman dan Hypermarket?  Si wi lekel zot e ki kalite laranzman ki’n tonm dakor lo la?  Mersi bokou.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  Ankor enn fwa se ki mon kapab dir Onorab Henrie mon ti vreman ekout Mosyon semenn pase. E i malere se ki mon pa ti dan en pozisyon pour mwan vin rann repons kestyon Onorab Charles De Commarmond, akoz pour rezon ki Lasanble i konnen akoz.  Mon ti fit e mon pa pour kapab kasyet zot sa.

E la ozordi mon fit.  Mr Speaker kot i konsern en vizit kot STC, mon krwar si mon kapab fer sa komitman de lapar Chairman Board Lasanble an antye i ganny welcome pour zot fer en vizit kot STC, demann o tan kestyon, vizit tou landrwa.  Me sa set en zour ki a ganny determinen ki napa sitting Lasanble kot nou ava pas letan ansanm e tou kestyon ki petet pa’n ganny reponn apropriyeman ava ganny rann on the spot.  E kot i konsern rental se vre Chairman i dir ek mwan i annan scope pour re-negosye rental pou fer sir savings ki i fer i pas anler lo konsonmater.

E natirelman se lakle se pour rezourd redwir rather kou loperasyon STC.  E pour fer nou pour bezwen regard dan tou depans ki STC i fer e maximize area kot STC i fer son bann aktivite.  E rental set en gro depans ki STC i fer.  E mon krwar Board avek sipor Minister Finans nou a kapab vwar kot nou kapab re-negosye sa rent agreement avek parti ki nou lwe avek.  Kot i konsern internal audit,  i vre Chairman in fer dir mwan la, se ki pour zot etre pli efektiv zot pour bezwen raport direkteman avek Board pa avek Management.  E la pour lenstan i le kontrer.  E sa mon krwar i ava anmenn plis lefikasite e Board ava plis an kontrol aktivite STC.

Kot i konsern focus internal audit ki zot pa focus lo financial management, mon krwar la Onorab Henrie i annan en pwen tre valab ki mon agree avek li.  Si ou regard en pti pe the financial statement of STC nou ava vwar kot nou kapab redefinir la fason ki internal audit i fer zot travay e sirtou pour maximize the return, sirtou an servan good financial management system.

E kot i konsern middleman si ou permet mwan mon a zis demann CEO sa kestyon Onorab Henrie.  Onorab Henrie CEO i konfirmen ki zot annan en bon pe middleman ki vin vann zot prodwi avek STC.  E natirelman se ki zot a fer ganny en lalis Lasanble Nasyonal, zot ava vwar tou bann suppliers ki supply STC koman middleman.  E si annan okenn lezot kestyon a demande, i pare pou rann repons an ekrir.  Osinon ler zot vizit STC lanplasman e zot ava war zot menm.  Petet osi i kapab annan serten fourniser ki ava la.  Si i annan serten kestyon a klarifye.  Zot ava klarifye ler zot on the spot.

 

MR SPEAKER

Bon mersi Minis.  An vi konstrent letan.  Annou fer nou kestyon kourt e Minis osi tou repons presi, kourt.

Zis pour lenformasyon Lasanble ex-CEO Ms Laporte, Manmzel Laporte ti deza envit Manm Lasanble lannen pase. Me anvi bann konstrent letan, kantite travay ki zot ti pe fer nou pa ti kapab fer sa vizit.  Me Clerk i ava fer le neseser avek CEO avek Board STC pour organiz sa vizit pour bann Manm Lasanble. Onorab Henrie.

 

HON GERVAIS HENRIE

Mersi Mr Chair. Zis pour en klarifikasyon kestyon, mon 3enm kestyon sete pa lo middleman.  Middleman i se ki ou aste.

Mwan mon ti pe rode si i annan dimoun ki li sepaman i met en prodwi par egzanp televizyon dan Hypermarket ki pa pour STC selman STC ki pe vann pour li.  Si i annan, si wi ouswa non?  Mersi bokou.

 

MR SPEAKER

Mersi Onorab Henrie.  Minis.

 

MR SPEAKER

Mersi Mr Speaker.  Mon pou tre presi dan mon larepons.  Wi i annan dimoun e mark sa prodwi ki pe vann dan laboutik STC se Philips.  Mersi.

 

MR SPEAKER

Mersi Minis.  Onorab Noline Sophola.

 

HON NOLINE SOPHOLA

Mersi Mr Speaker.

 

MR SPEAKER

Go ahead Onorab Sophola.

 

HON NOLINE SOPHOLA

Mersi Mr Speaker.  Minis depi ki ou’n pran Portfolyo koman Minis pour Finans e a plizyer repriz ki ou’n vin dan Lasanble, mon’n toultan poz kestyon ki mannyer pour ede amelyor kou lavi pour zabitan La Digue ek Praslin.

Mr Speaker permet mwan pour prezant enn de pri dan komodite. Plis bann konstriksyon.  Mr Speaker crusher dust La Digue i vann R303 en tonn, sorry Mahe i vann R303 en tonn.  La Digue nou pe pey sa R793. 50 en tonn.  Plastering dust Mahe i pey 403 en tonn.  La Digue nou pe pey R980. 85 sou en tonn.  Minis ler mon regard blok – blok osi bann ki annan trou nou pe pey R9. 95 roupi.  E La Digue nou pe pey R24.  Minis lo sa laliny i annan dimoun ki’n deza fer laplikasyon pou antre dan sa domenn fer materyo konstriksyon.  Laplikasyon i date plis ki 2an.  Mon krwar ki si lotorizasyon i gannyen pour fer sa, sa pour ed vreman en gran led pour La Digue.  Minis ozordi i le 27 Mars 2018.  Eski ou kapab dir sa Lasanble ki mekanizm ki ou Minister in deside met an mars pour ede amelyor kou lavi lo sa 2 zil, kot transportasyon marsandiz i konsernen?

E mon dezyenm kestyon Minis ankor avek bi pour redwir kou lavi lo sa 2 zil, mon ti deza demande pour revwar housing loan ki ganny donnen pour ki i reflekte vre larealite lavi lo sa 2 zil? Minis mon’n fek eksplike kou ki nou peye pour bann materyo konstriksyon. Mr Speaker eski Minis i kapab dir sa Lasanble ki pozisyon son Minister i ete dan sa demars? Mersi.

 

MR SPEAKER

Mersi Onorab Sophola.  Minis.

 

MINISTER PETER LAROSE

Mersi bokou Mr Speaker.  Mr Speaker se ki mon lentansyon ler mon mazin kou lavi, i pa zis pour Mahe, Praslin, La Digue e lezot zil ki petet si i annan serten konstriksyon ki kapab ganny fer.  E kot i konsern crusher dust, blok ensidswit, se vre se ki mon krwar pa STC i involve dan sa bann domenn koumsa.

E kot i konsern laplikasyon bann materyo – e parey koman ou’n vwar Gouvernman in fer desann pri materyo konstriksyon, tol ensidswit.

E kot i konsern housing loan.  Se vre mwan dan mon kote mon pa reelman ansarz housing loan.  I annan son Minis ki ansarz sa e toutafe normal ki i annan serten dyalog ant mon Minister ek lezot Minister, pour vwar kote ki nou kapab redwir kou konstriksyon e sirtou bann materyo ki fer lakaz.  E sa i pour demann en konsiltasyon entansiv pour fer sir ki natirelman nou anmenn en benefis osi kot i konsern kou materyo konstriksyon pour Praslin ek La Digue.  Mersi.

 

MR SPEAKER

Mersi Minis.  Onorab Sophola.

 

HON NOLINE SOPHOLA

Mr Speaker mersi. Minis mon konnen pour dir blok i pa pe tonm dan STC.  Me selman ki’n ganny met devan nou la si mon’n konpran li byen dan dernyen de laliny in dir, ki bann mezir konkret ki son Minister pe pran pour konkretman ede fer desann pri lavi dan Sesel. Nou pa’n koz zis lo STC.  Mersi Mr Speaker.

 

MR SPEAKER

Ok.  Mersi Onorab.  Mwan osi mon pe, ler mon pe regard sa kestyon, sa kestyon i kit laport ouver.  Me annou sey parey mon dir an vi kestyon letan annou sey limit en pti pe nou kestyon e menm grander nou kestyon.  Onorab Ghislain ou ti annan keksoz pour swiv?  Non? Ok.  Apre Onorab Ramkalawan, Onorab Ghislain, vitman.

 

HON CHANTAL GHISLAIN

Mersi Mr Speaker.  Mr Speaker mon kestyon follow-up.  Eski Minis i kapab dir avek sa Lasanble ki Minister pe fer, kote in arive an diskisyon pour retir taks lo fuel, bann bato ki anmenn marsandiz lo Praslin ek La Digue – sirtou bann marsandiz manze.  Mersi Mr Speaker.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  E kot i konsern tax lo fuel, sa i pour en incentive kot nou kapab ede osi pour redwir kou transportasyon.  E si nou redwir kou transportasyon, e natirelman i pour redwir kou materyo ki swa ki nou anmenn komodite debaz osi non kou konstriksyon.  E sa nou bezwen negosye avek SEYPEC ki en lantrepriz Gouvernmantal. Mersi.

 

MR SPEAKER

Mersi Minis.  Onorab Terence Mondon.

 

HON TERENCE MONDON

Mersi Mr Speaker.  Bonzour Minis ek ou lekip.  Mon annan 2 pti kestyon.  Minis nou’n aprann atraver deba semenn pase, ki serten aktivite ki STC in antreprann in plito fer faver e ranpli pos en pti git dimoun enkli Parti Lepep.  Nou’n koz lo bann later ki’n ganny lwe a bann pri egzorbitan.

Mwan mon kestyon Minis, akoz ki ou Gouvernman i ankor pe kontinyen ankouraz faver e labi lo resours pep Seselwa?  E sa i pe anmenn en kou lo lavi ki nou pep pe fer fas avek.

Mon 2enm kestyon Minis in dir nou se aprezan ki zot pe regard sa size transfer pricing. An vi ki ou Gouvernman napa striktir an plas pour deal avek transfer pricing e lezot frod komersyal.  Par egzanp bann fo deklarasyon lo pri e valer komodite ki rantre dan pei.  Eski Minis pa krwar ki i pa pe adres vre problenm nou pei ler i napa striktir pour get lo bann frod komersyal?  Sa i mon 2 kestyon Mr Speaker.  Mersi.

 

MR SPEAKER

Mersi Onorab Mondon.  Minis.

 

MINISTER PETER LAROSE

Mersi bokou Mr Speaker. Mersi bokou Onorab Mondon pour ou kestyon.  E kot i konsern faver se ki mwan napa reelman levidans as such kot i konsern tou faver ki Gouvernman i fer. E mon krwar pour dir natirelman se ki i annan bokou dimoun pe ekout sa deba.  E si i annan okenn faver ki ganny fer, mon krwar nou a pran note, nou ava regle serten faver ki nou ganny fer, nou ava arete.

E kot i konsern transfer pricing.  E false declaration. Sa set en kestyon ki depi lontan in la.  E se vre nou dan en pozisyon la pour nou pran mezir pour nou aret sa zafer transfer pricing.  Premyerman i afekte nou reveni tourism.  E lezot resi.  E kot i annan false declaration e mon swete la ki i annan en komisyoner taks avek customs zot ava adres sa e mon krwar zot pe ekout byen Lasanble.

E si zot pa pe ekout la tanto zot kapab rewind deliberasyon ki zot ava vwar poudir komanter i anler lo la, nou bezwen etre pli vizilan pour redwir sa false declaration, pour fer sir ki nou kolekte maksimonm reveni.  Mersi.

 

MR SPEAKER

Mersi Minis.  Onorab Mondon.

 

HON TERENCE MONDON

Mersi Mr Speaker.  Eski Minis i kapab donn nou en komitman ki i a fer en evalyasyon konbyen i pe kout nou pei sa bann tranzaksyon komersyal – parey nou apel bann illicit financial flow, ki pe arive atraver bann komers enternasyonal.  Eski Minis i kapab donn nou en evalyasyon konbyen pe kout nou pei dan sa travay ki in dir nou i pe al fer.  Mersi.

 

MR SPEAKER

Mersi Onorab.  Minister.

 

MINISTER PETER LAROSE

Mersi bokou Minister.  Se vre sa ki mon fer evalyasyon, mon pa pour kapab dir ou konbyen pe kout pei.  E mon mazinen pour dir i toutafe natirel se ki nou pour bezwen fer en dimoun endepandan ki bias ki fer sir ki ler i fer son travay i fer son travay serye.  E ler in fin fer sa natirelman mwan ava vin devan Lasanble, mwan ava prezant rapor an ler lo la.  Me sa mon donn komitman, nou ava rod en dimoun endepandan pour fer sa legzersis o pli vit posib. Mersi.

 

MR SPEAKER

Mersi Minis.  Onorab Paul Ernesta.

 

HON PAUL ERNESTA

Mersi Mr Speaker.  Minis ek ou delegasyon bonzour tou mon bann koleg Onorab bonzour. Minis pli boner ou’n koz lo en seri bann mezir ki ou Minister in pran sirtou pour adres sa size pri lavi.  E ou menm fer resorti ki mon pour antyerman dakor avek ou, pa zis STC ki ede dan sa domenn dan sa process ki fer pri lavi ser si oule ki en fakter.  I annan plizyer lezot fakter.

Enn mon pe vwar osi parey dan bann lezot laboutik, bann ki vann presizeman materyo konstriksyon, annou get parey P&J, BODCO, e osi i annan bann lezot laboutik osi ki fer bann tel lavant.  Eski Minis in a en serten moman, ouswa son Minister a serten moman, in zwenn avek tou sa bann akter dan lekonomi pour diskit en pe sa size pour vwar zot input ladan pour ede kapab fer desann en pe pri lavi.  Petet osi vwar home to office osi kapab sey ede dan sa demars?

Swa si non, eski zot pe mazin pli tar pran en tel mezir pour kapab zwenn ek tou sa bann dimoun? Apre dezyenmman ou’n koz osi lo sa audit ki pour ganny fer.  Eski then la zot in etablir en timeframe, come up avek sa Rapor pour zot kapab adres sa bann sityasyon ki nou annan an konsern? E trwazyenmman mon krwar sa i enportan Chairman e CEO STC i dir nou. I annan bokou koze ki pe preokip STC.  Dan zot loperasyon, ouswa dan zot assessment zot menm ki mannyer zot vwar rol STC pe zwe lo marse? Eski zot satisfe avek performans or not?  E ki zot bann mezir, swa bann rekomandasyon ki zot ti a swete ganny fer pour fer li pli vin performan?  Vwala Mr Speaker. Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mersi Mr Speaker. Onorab Ernesta in amen ankor 3 tre bon kestyon kot i konsern kou lavi.  I toutafe normal ki mon’n dir dan mon opening statement kou lavi pa konsern zis Gouvernman, i konsern tou bann marsan ki enport marsandiz dan nou pei.  STC pa anmenn tou marsandiz ki popilasyon antye i konsonmen. Mon krwar i toutafe normal pour nou kapab adres sa sityasyon.  Nou zwenn dan en meeting e kot nou met tou kart lo latab, nou vwar lekel ki kapab partisipe e ki zot sizesyon.  E nou, nou pran en pozisyon tre ferm ler ki nou’n fer konsiltasyon avek zot.

E natirelman se ki nou ava profite pour nou fer li dan en fason tre transparan nou ava envit SBC ek lezot medya la kot tou dimoun i koz fransman anler lo latab e si zot fer komitman nou rol zot pour zot komitman.  E kot i konsern operational audit e mon swete osi tou ki sa oditer lokal ki i ganny korperasyon STC, i al dan tou Departman ki mon’n mansyonnen bomaten, i fer son evalyasyon osito posib ki i fini. Anmenn rapor isi kot sa Lasanble, nou ava dir be bon ki finding in sorti anler lo la.  Dan en serten fason i a ed nou pran bann desizyon tre konkret, tre serye dan en serten fason ki nou pa zis koz an teori.

Nou ava vwar the real evidence kote ki i sorti ki a quantify sa pour nou.  E kot i konsern rol STC e la ankor enn fwa mon pour bezwen demann CEO repons pour ou kestyon parski i la devan nou.  E si ou permet mwan en pti moman demann li.

Chairman STC i dir ek mwan the main objective se ki food security, affordability of prices epi route to market. Parski i annan serten bann fourniser, sirtou bann fermye. Alor i vwar en landrwa pour li vann zot prodwi avek STC.  STC i zwe sa rol pour ed zot vann zot prodwi.  E vwala son key objectives.  Mersi.

 

MR SPEAKER

Mersi Minis.  Onorab Ernesta vitman en.

 

HON PAUL ERNESTA

Minis zis vitman pa’n reponn si zot satisfe a sa pwen lo zot performans or not.  Apre ki rol osi Lasanm Komers dan sa demars?  Mersi.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  Mon krwar parey mon’n dir se ki ler nou pou convene en meeting piblik.  E nou pour envit SCCI pour zot osi zot zwe en rol enportan ladan kot nou ganny tou bann akter.  Nou pa pour envit zis en parti e kit en parti. Nou bezwen koz fran.  E konm Seselwa si nou patriyotik, nou bezwen etre fran ek kanmarad. Fer sir ki nou dan menm demars pour nou redwir kou lavi pour nou pep.  Mersi.

 

MR SPEAKER

Mersi Minis.  Onorab Phillip Arrisol.

 

HON PHILLIP ARISSOL

Mersi Mr Speaker.  Bonzour Minis ek ou delegasyon. Bonzour tou bann Onorab.  Minis swivan tou bann revelasyon semenn pase lo STC.  Eski Gouvernman in pran okenn desizyon pour adres serten sa bann revelasyon oubyen eski okenn meeting in ganny fer avek Board ou Management STC lo sa size?

E Minister Finans dan Lanons Bidze 2017 zot ti’n dir zot pour fer en odit lo STC eski Minister Finans in fini lans sa tender pour sa?  Lekel sa lakonpannyen ki’n gannyen.  E ki time frame sa odit?  Mersi.

 

MR SPEAKER

Mersi Onorab Phillip Arissol. Minis.

 

MINISTER PETER LAROSE

Mersi bokou Mr Speaker.  Mon krwar nou annan de Onorab Arrisol si mon bwen dan sa Lasanble. Onorab Phillip Arissol mersi pour ou kestyon e natirelman kot i konsern lodit nou’n fini lans tender avek 4 oditer lokal.  Nou pa fer okenn preferans. Me in annan zis enn ki’n reply.  Larestan 3 zot i annan enn ki dir be i napa ase resours. I annan en lot ki dir i annan tro bokou travay.  E i annan en lot pa’n reponn ditou. I annan zis enn ki’n reponn.    E natirelman mon’n pas kotasyon devan Board e mon kapab, mon pa pour mansyonn non sa oditer.  E mon kapab mansyonn kotasyon and quote, R390mil  avek 15poursan an azoutan 15 VAT anler lo la.  E osito ki i fini fer ki mon krwar avan Zen nou’n kapab ganny sa lodit e si menm i fini an May, i a pli meyer pour nou osito posib ki nou ganny sa Rapor nou ava vin devan Lasanble enn fwa pour tou, bann doutans ki petet nou annan lo STC.

O si non i annan serten hearsay.  Mon krwar sa oditer pour reelman enparsyal dan son zizman, dan keksoz ki pour idantifye, ki pour verifye.  Alor i a donn nou en Rapor e i ava ed nou pour nou move forward avek Board ek Management STC.

 

MR SPEAKER

Mersi Minis.  Onorab Arrisol.

 

HON PHILLIP ARISSOL

Mon premye kestyon Minis swivan bann revelasyon semenn pase lo STC – eski Gouvernman in pran okenn desizyon pour adres serten sa bann revelasyon oubyen eski meeting in ganny fer avek Board oubyen Management STC lo sa size?

 

MR SPEAKER

Ok.  Mersi Onorab.  Minis.

 

MINISTER PETER LAROSE

Mersi Mr Speaker.  Petet kekfwa mon ti a demann Onorab Phillip Arissol pour etre en pe pli presi dan son kestyon regilasyon – en.  Mon krwar si ou ti kapab ed mwan en pti pe.

 

MR SPEAKER

Petet Minis swivan deba non. Ou pe dir swivan deba semenn pase lo son Mosyon?  Si i annan okenn desizyon ki Gouvernman in pran, ki Minister in pran?  Ale.  Onorab.

 

HON PHILLIP ARISSOL

Mr Speaker bann revelasyon tel ki parey pri lokasyon, bann middleman.  Si okenn keksoz in ganny diskite, ouswa en meeting in ganny fer avek Management oubyen Board STC lo sa bann size?

 

MR SPEAKER

Ok.  Minis.

 

MINISTER PETER LAROSE

Mersi bokou Mr Speaker.  Mon krwar Onorab Phillip Arissol in etre en pe pli presi dan son second round kestyon.  E zis pou konfirm avek sa Lasanble menm Vandredi mon ti pe meet avek Board STC ek son Management. E natirelman se ki sa ki’n ganny diskite dan sa Lasanble e an vi osi ek sa operational audit ki nou pe fer. Nou a fer sir ki nou annan en roadmap pour nou pran bann mezir neseser e kot nou kapab vwar sa rannman kot nou kapab redwir sa kou lavi sanson nou pour kontinyelman demann en second round kestyon lo kou lavi, si nou pa pran mezir as efficient as possible.  Mersi.

 

MR SPEAKER

Mersi Minis.  Onorab Aglae.

 

HON EGBERT AGLAE

Mersi Mr Speaker bonzour Minis ek ou lekip. Minis mon’n ekout atantivman bann mezir ki ou pe propoze sirtou lokalman. Me mon kestyon i ki zistans ki nou kapab ale osi lo nivo enternasyonal, etandonnen ki Sesel in siny bokou Lagreman ekonomik, bann Lagreman Miltilateral, Bilateral – sirtou kot i konsern bann gran pei fourniser.  I annan, nou’n nonm L’Inde.  I annan bann pei osi ki pe fourni.

Akoz ki nou pa kapab servi serten atraver Gouvernman sa bann Lagreman ki’n ganny sinyen dan lepase pour lo nivo ekonomik ki ava ed STC.  Akoz STC li koman en Parastatal i pa kapab negosye ek en Gouvernman li.  So Minister Finans dan ou Seksyon Trade and Commerce akoz ki zot pa pe anmenn STC en pti pe pli devan li menm, pour kapab ganny bann bon deal.  E sa avek bi elimin sa ta middleman ki nou pe koz lo la?  Sa i mon premye kestyon.

Mon dezyenm kestyon Minis ou’n koz ou pe zwenn avek serten bann fourniser dan servis.  E nou konnen pour dir nou pe koz lo pri lavi, fer desann pri lavi e servis i enn bann fakter kle ki pe fer kou lavi kontinyen monte. Telekominikasyon i enn; lentere labank, savedir bann lenstitisyon finansyel. PUC servis litilite.  Petet ki zistans ki ou pour ale pour fer sir ki ou ferm ki sa bann entities ansanm, ansanm pa endividyelman. Akoz ler ou pe zwenn endividyelman sakenn i donn ou.  Ler ou pe zwenn zot ansanm i ava annan sa mayon, ou a konpran tou zot sor e la bann desizyon a ganny pran lo ki mezir ki kapab, Minister Finans i kapab pran pour ede fer desann kou lavi.  Mersi Minis.

 

MR SPEAKER

Mersi Onorab. Minis.

 

MINISTER PETER LAROSE

Mersi bokou Mr Speaker.  Mersi bokou Onorab Aglae.  E la mon krwar nou Departman Trade la ki mwan annan son Sekreter Prensipal avek mwan nou ava eksplor tou mwayen ek bann Lagreman ki nou’n sinyen.  Nou annan menm en labank enternasyonal, Trade and Development Bank pe sey ed nou, pour nou vwar bann area bann fourniser kot kapab supply nou avek komodite debaz ki pli konpetitiv.  Sa set en keksoz kot i deza an diskisyon e nou bezwen sivre sa a tre vit.

E kot i konsern anmenn tou bann akter tou ansanm.  E mon swete mon kapab call en meeting, envit tou bann akter ki swa ek telekominikasyon, lasirans, sepa lenerzi whatever sectors anmenn zot ansanm. Me en keksoz mon oule sey fer sorti Mr Speaker, par fwa ou call meeting ou kapab met anler lo televizyon, met anler lo papye.  Ou kapab fer serten call.  Be si zot pa vini. Ou konpran i annan serten difikilte.  Mon krwar si nou tou nou konsernen avek kou lavi. Nou bezwen fer en zefor pour nou anmenn parey koman ou dir anmenn nou sor par devan. Ki kalite challenge ki nou pe fer fas avek e kwa ki Gouvernman i kapab fer.  Parski a lafen dizour i demann Gouvernman avek private sector pour travay ansanm pour fer byennet lepep Seselwa.  Mersi.

 

MR SPEAKER

Mersi Minis.  Onorab Woodcock.

 

HON WAVEL WOODCOCK

Mersi Mr Speaker.  Bonzour Minis avek ou delegasyon.  Manm Onorab e tou dimoun a lekout.

Mr Speaker mon kestyon i annan pour fer avek kou loperasyon STC depans sirtou lo Praslin. Minis pe pey en sonm R33mil tou le mwan pour lease 2 morso later, PRC 077, ek PRC 078 lo Zil Eve pour konstri en warehouse avek supermarket.  An Out 2013 CEO STC ti anonse ki sa proze pour komanse, pour konplete dan 2 ou a 3 an, in ariv 5an depi ler STC pe lease sa 2 morso later ki’n kout zot anviron R2milyon. Me warehouse pa ankor ganny fer. Minis sa se en gaspiyaz larzan. Mon kestyon i kan ki STC pour komans e konplet sa warehouse ki pour ede redwir kou loperasyon STC, sirtou kot i konsern warehousing, storage lo Praslin?

E akoz ki STC pe rod pour lease ankor en morso later lo Ile Eve, parcel 5166 ki mezir 10, 645 sqm ki sipoze ganny sub-divided ant Seychelles Port Authority avek STC, kan zot pa ankor kapab devlop sa 2 parcel ki zot deza annan.  Mersi.

 

MR SPEAKER

Mersi Onorab Woodcock.

 

MINISTER PETER LAROSE

Mersi bokou Mr Speaker.  E mon oule remersye Onorab Woodcock pour ou kestyon. Petet ou’n byen obzerve se ki lo sa2e kare later kot lo Zil Eve i pey R33 mil par mwan.  E ki pandan 5an pa’n ganny devlope sa i fer bokou.  Mon agree avek ou – wi.  E kot i konsern a pe rod en pe plis later ankor pour devlope e la zot pe dir mwan zot pe revwar zot pozisyon stratezi anler lo Praslin.

E mon swete ki i ava annan serten konsiltasyon avek bann Praslinoise avek ou menm Onorab, pour fer sir ki devlopman ki fer lo Praslin i an dan lentere tou Praslinois, tre byento mon krwar ou ava ganny kontakte pour ou donn ou input pour fer sir ki STC i vin relevan anler lo Praslin.

 

MR SPEAKER

Mersi Minis.  Onorab Herminie.

 

HON WILBERT HERMINIE

Mersi Mr Speaker. Pour etre bref dan lespri fer desann pri lavi atraver fer desann pri komodite, Minis ti dir boner ki zot in get dan posibilite marse larezyon tel ki Maurice ki pa ti vyab.  Me Prezidan ti fer lanons lo kote marse Kenya.  Eski STC in fer serten travay dan sa direksyon, pour gete si nou kapab aste serten marsandiz laba pour fer desann pri lavi?

 

MR SPEAKER

Mersi Onorab Herminie.  Minis.

 

MINISTER PETER LAROSE

Mersi bokou Mr Speaker.  I annan work in progress avek Kenya.  E mon krwar nou ava enn fwa ki nou’n annan serten lagreman e ava vwar pour dir bann prodwi ki sorti Kenya ki vin Sesel i en pli meyer marse. E sa i a ede pour redwir kou lavi.  Mersi.

 

MR SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Speaker.  Bonzour tou dimoun. Mr Speaker mon ti a kontan demann Minis si atraver sa 3 meeting, mon krwar 3 in mansyonnen ki Management oubyen avek Board posibleman Minister Finans in fer dernyerman, swivan bann deba dan Parlman, ki bann desizyon konkret ki’n ganny pran lo bann pwen swivan;

Rent – eski bann owners sa bann landrwa par egzanp Parti Lepep, SSI, eski zot in deza ganny en Notis pour dir ki STC i swete re-negosye sa bann rent oubyen rann zot, zot landrwa? Eski sa demars in fini ganny fer.  Ok?

Lo kestyon lasirans ki kapab en konponan li osi enportan, eski bann Broker in ganny apele pour dir zot pou dir zot bezwen, zot anvi re-negosye.  E kekfwa la Chairman i kapab dir nou lekel bann Broker ki fer lasirans pour STC?

Eski mon 3enm pwen; Eski en desizyon in ganny pran pour retourn STC lo son manda orizinal?  Setadir pour provide availability e a bann pri afordab.  E pour okip bann marsandiz debaz.  Eski en diskisyon in ganny fer lo sa size? Eski en desizyon in gran pran pour STC sorti dan lapoud …

 

(laughter)

 

HON JEAN-FRANCOIS FERRARI

… pa dan lapoud – dan … powder, dan boulon, zekrou, zegwir eksetera pour retourn dan bann keksoz ki debaz?

Sa i mon 3 pwen be selman mon annan en 2enm kestyon Mr Speaker.  E sa i en sizesyon i pa, i kekfwa paret en pe joke, me i pa en joke.  Eski STC ti ava ase brav, pou met an gro lo en Board lo zot bann outlet kot zot pe vann keksoz vi ki STC i sipoze laboutik malere. Eski zot kapab mete lo en Board si en kliyan i war dan laboutik STC en prodwi ki pli ser ki en lot landrwa, sa kliyan i kapab pran sa prodwi al avek sa peye?

 

(laughter)

 

HON JEAN-FRANCOIS FERRARI

Mon pa konnen konbyen erdtan i pour pran pour tou marsandiz ale akoz tou keksoz kot STC i pli ser.  Se sa!  Eski sa i en diskisyon ki’n ganny fer pour nou … E eski bann target in ganny donnen a madanm ki CEO, msye ki Chairman pour redwir bann operational cost?  Eski i annan target kler ki’n ganny mete pour redwir sa bann cost e pour fer sir ki marsandiz finalman ki STC i retourn koman en laboutik malere silvouple.  Mersi Mr Speaker.

 

MR SPEAKER

Mersi Onorab.  Minis.

 

MINISTER PETER LAROSE

Mersi bokou Mr Speaker.  E mersi bokou Onorab Ferrari pour ou 4 kestyon.  E kot i konsern si en dimoun i kapab war en prodwi ki bokou ser dan magazen STC i pran i al avek?  Sa mon krwar i pour annan en enplikasyon en pe difisil pour STC deal avek sa.  Akoz tou dimoun i kapab antre dan magazen i dir be la mon a komans depouy STC sa ki mon vwar.  Fodre nou fer atansyon la en?

E kot i konsern desizyon orizinal, kot pour nou fer anmenn manda orizinal STC pour li fer li vin en landrwa kot i vin marsandiz debaz. Mon’n diskite.  Tou le 3 meeting mon’n diskit avek Chairman avek CEO. Mon swete ki zot in konpran mwan telman byen e ki zot ava pran aksyon anler lo la.

Kot i konsern lasirans Broker pour STC, mon pa konnen …

 

(Mic Off)

 

MINISTER PETER LAROSE

… wi dapre mannyer mon konpran par Chairman, i dir broker lasirans pour STC se RelianCe.  E kot i konsern Notis Parti Lepep pour retourn lenfrastriktir o si non pour re-negosye.  Mon krwar si zot in fer sa pandan letan ki mon pe koze la.  Mersi.

 

MR SPEAKER

Mersi Minis.  Onorab Simon Gill.

 

HON SIMON GILL

Mersi Mr Speaker.  Mr Speaker mon’n ekout byen bann kestyon, bann repons ki Minis in donnen, spesyalman son soumisyon.

Mwan mon annan en kestyon tre senp.  Premyerman eske Minis i a konsidere avek nouvo Board STC pran en desizyon pour pa fer sa legzersis internal audit?  Akoz ler zot pou demann mwan sa kestyon akoz mwan ava dir akoz tou.  Akoz mon krwar nou deza konn sifizaman bann size, bann konsern, bann mankman STC.  Annou pran sa 300 ekek mil roupi, nou pran nou fer en saving e donn sa nouvo Board latas pour zot pran aksyon baze lo tou bann size ki zot konnen i relevan avek fer desann pri marsandiz dan sa pei.  Sa i premye soumisyon.

2enm soumisyon ki mon oule fer, si nou pour napa internal audit dan zot prosen meeting, eski nou kapab vwar en plan ki ganny etale kot i definir an kourt term, mwayen term, long term bann desizyon konkret ki STC pour pran e i fer li vin piblik e ki nou ganny donnen en dele letan ki rezonnab pour nou trouv en lefe or en lenpak serye lo sa kestyon pri lavi or bann komodite spesifikman dan STC.

3enm soumisyon. Mon welcome nide pour zwenn avek tou bann stakeholder dan sa pei, ki deal avek lenportasyon e lavant komodite dan Sesel.  Swa bann wholesaler, oubyen bann retailer.  E mon ti ava voudre Minis i donn nou en dele letan rezonnab, ki sa legzersis i ganny fer antretan ki nou’n deza fini elabor nou Plan D-aksyon – parey mon dir, kourt term, mwayen term, long term e ki STC i fer li piblik e bann keksoz pe bouze tout an konsideran parey mon pe sizere nou elimin sa zafer internal audit dan STC ankor enn fwa akoz nou deza konn tro bokou bann issues ki annan.  Vwala mon 3 soumisyon Mr Speaker.  E mon ava ekout reaksyon Minis.  Mon a tenir sa 4 lezot kestyon ki mon annan pour le moman.

 

MR SPEAKER

Onorab ou ti pour annan ou en kestyon.  Dan ou kestyon ou’n annan ou 3 soumisyon.  Apre 3 soumisyon i relev ankor 4 kestyon.  Nou pou donn ou apre repons Minis, mon pour donn ou sans pour en siplemanter. Minis.

 

MINISTER PETER LAROSE

Mersi bokou Mr Speaker. Mon krwar Onorab Gill in ekout tre atantiv prezantasyon, opening statement ensidswit. E in anmenn 3 solisyon.

I dir be nou pa pour kontinyen avek sa operational audit, nou kapab servi sa larzan pour en lot keksoz pour redwir ki pou marsandiz e sa nou bezwen fer sir sa larzan i ganny allocate avek Chairman of the Board, avek Management STC.  Regarde mwan mon napa problenm mwan Mr Speaker.  Si zis Lezislatif i pas Lalwa ki i dir be nou pa kontinyen ek sa, mwan mon ok avek sa mwan.  Mwan napa problenm mwan. Mon a servi sa premye solisyon.

E kot i konsern pour annan en plan tre defini kot nou definir ki solisyon kourt term, mwayen term e long term, sa natirelman mon pour bezwen demann Chairman avek STC pour fer sa o pli vit posib. E nou ava annan en solisyon pour sa.  Mersi bokou pour sa dezyenm solisyon.

E 3enm kot i konsern Stakeholders Meeting, Wholesalers, Retailers Meeting.  Bon mwan mon kapab fer li semenn prosen.  Epi petet osi kekfwa osi Mr Chairman si annan bann Onorab ki oule asiste sa meeting e pandan zot konvenyans zot osi ganny envite at least zot ava ekoute kisisa ki sorti anler lo floor.  Me mwan mon apre pour sivre sa 3 solisyon ki Onorab Gill in anmennen.  E mersi pour sa.

 

MR SPEAKER

Mersi Minis.  Onorab Simon Gill.

 

HON SIMON GILL

Les mon a fer en dernyen soumisyon. Nou napa siplemanter.  Mersi.

Dernyen soumisyon mon ti ava voudre fer donnen konteks loperasyon STC, an relasyon avek pri komodite ki nou vann La Digue, Praslin. Eski STC i ariv lo en moman kot i pour bezwen kontinyen ek sa loperasyon, e i pou bezwen sibvansyonn bann kou pour asire ki bann komodite lo Praslin La Digue i vann menm pri avek lo Mahe isi?  Si sa i le ka.  Etandonnen ki i annan en push pour STC konsantre lo bann komodite debaz ki mannyer STC pour ganny larzan pour sibvansyonn kou loperasyon tir marsandiz lo Mahe anvoy Praslin La Digue pour kapab rasire ki komodite lo nou 2 zil prensipal, i vann menm pri avek lo Mahe.  Mon ti ava kontan ganny en pe zot pwen de vi lo la.  Tou an tenir kont ki nou deza konn en pe me petet pour konsonmasyon piblik i ava enportan.  Mersi bokou.

 

MR SPEAKER

Mersi Onorab Gill.  Minis.

 

MINISTER PETER LAROSE

Mersi bokou Mr Speaker, mon’n ganny dir par Chairman STC se nou bezwen subsidize bann kou loperasyon Praslin ek La Digue, pour fer sir ki napa sanzman signifikan dan pri.

E kot i kapab redwir kou komodite zot redwir li. Me senpleman zot bezwen asize avek Management Team pour zot kapab deside ki mannyer zot pour fer sa.  Me sa ki in dir ek mwan zot pour bezwen annan en pe portfolyo ki en pe pli larz ki maintenant.  Mon pa tro kapab definir kwa. Me senpleman les nou sorti dan Lasanble e nou ava fer en meeting e nou ava vwar ki mannyer nou kapab tackle sa problenm.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Bonzour Minis e ou delegasyon.  Bonzour tou dimoun a lekout. Mon ti a kontan demann Minis si i kapab donn en komitman avek Lasanble Nasyonal etandonnen ki ti annan en leokri semenn pase lo bann kou loperasyon STC.  E nou konnen bokou in ganny dir lo lekel sa bann kou ki o.  Si i kapab donn en komitman Lasanble Nasyonal ki dan 3 semenn Gouvernman ek STC san bezwen esper World Bank oubyen lezot eksper i kapab kri, oubyen servi lenformasyon ki zot deza annan; par egzanp bann bill of entry marsan ki’n fer vini diri, ponmdeter, zonnyon; kot zot konn zot bann pri pour en kalite prodwi.

E zot fer en konparezon.  E klerman zot etablir dan prosen de semenn si in annan over pricing oubyen middleman.  E zot pran en desizyon lo la.  E answit kot i konsern rent ankor mon pa vwar akoz i devret pran bokou letan, oubyen bezwen eksper kot zot dir ek STC nou pe donn ou en lenstriksyon, en direktiv ki sa rent i pou bezwen desann. E atraver bann diferan parti ki zot kontrole zot dir sa rent pou bezwen desann.  E answit donn nou en ledikasyon ki kantite gaspiyaz goods ki wasted oubyen destroyed par STC?  Konbyen i ete sa valer?  E redwir par 50poursan.  Donn nou en komitman pour sa prosen 3 semenn. Rezon mon pe dir sa se STC i annan li en lavant R3milyon par zour.

E i kler atraver prezantasyon semenn pase bann Mosyon ki zot in fer monte pri par 10pousan markup konpare avek 2009.  E zis ladan i vin R300mil par zour ekstra ki STC pe met lo dimoun.  Alor se sa rezon ki mon pe demann ou Minis annou pa tarde.  Annou fer li dan 3 semenn, dan 3 semenn nou a save R6milyon probableman lo konsonmater Seselwa.  E nou pa tard plis ki sa parske pli nou tarde pli i kout plis.  Eski dan 3 semenn ou kapab donn nou en komitman ki ou’n etablir bann middleman, ou pour redwir sa rent par omwen 30poursan.  E ki ou a donn nou en sif ki ou kapab redwir wastage par 50 poursan.

 

MR SPEAKER

Mersi Onorab Afif.  Minis.

 

MINISTER PETER LAROSE

Mr Speaker 3 semenn mon’n fek diskite avek Chairperson la i dir mwan i pa pour posib pour nou ariv lo obzektif Onorab Afif ki in demande.  Alors si i kapab donnen eske end of May.

E kot i konsern over pricing natirelman zot pour bezwen fer sa legzersis osi to posib.  E kot i konsern rent natirelman nou a eseye pour redwir par 30 poursan.

E kot i konsern gaspiyaz ki Onorab Afif in demande pour redwir par 50poursan, e mon swete avek plis zefor ek deba ki’n traverse depi semenn pase, lo kou lavi, lo STC spesifikman, si petet osi kekfwa nou kapab fer li en pe plis ki 50poursan, nou kapab redwir li petet en pe plis ki sa kot sa larzan i ava benefisye bann konsonmater Seselwa.  Mersi.

 

MR SPEAKER

Mersi Minis.  Onorab Basil Hoareau.

 

HON BASIL HOAREAU

Mersi Mr Speaker.  Bonn apre midi Minis e tou ou delegasyon.  Minis 2 sekter ki pe kit lavi o Sesel, se Sekter Banker e Sekter Telekominikasyon. Mon krwar ou’n adres sa dan ou larepons initial devan Lasanble bomaten.

Me keksoz ki toultan nou tande se ki Gouvernman pe negosye avek sa bann lakonpannyen dan sa bann sekter.  Toultan nou tande i annan negosyasyon.  Bomaten osi nou’n tande i annan negosyasyon. Me nou pa pe vwar okenn rezilta negosyasyon pozitiv kot dan sa bann sekter bann kou ouswa bann cost pe desann.

Ki Gouvernman i annan plan pour fer si bann negosyasyon pa pe marse?  Eski Gouvernman i annan plan pran aksyon ki i kapab pran anba Lalwa, ouswa menm amann Lalwa pour li nobou fors lanmen sa bann lakonpanni pour fer desann kou zot bann servis ki zot pe ofer sa pep?

E dezyenmman Minis en keksoz ki ti sorti e ankor la nou’n sorti se propriyete ki STC pe carry out son bann activities lo la.   Eski STC i annan en plan long term pour li own tou son bann propriyete kot i pe carry out son bann activities?  E si wi dan konbyen letan zot pe anticipate pour zot own tou zot bann landrwa?  Eski i annan bann landrwa ki’n deza ganny idantifye?

E trwazyenmman, e dernyen pwen ki mon anvi fer sorti, i pa en kestyon as such me i en komanter, en obzervasyon – mon krwar Minis vi ki ou’n ekout deba dan Lasanble lo STC semenn pase. Sa pwen ti ganny fer sorti. Nou’n ganny dir ki lobzektif fondamantal STC i ete.  Me kwa ki en pe drol pour mwan, se ki sa bann lobzektif pa ganny trouve dan zot memorandum of association of STC ki’n ganny kree.  Sa lobzektif pa la. So petet i enportan ki nou fer sir ki sa bann lobzektif. Vi ki zot lobzektif fondamantal, lobzektif prensipal STC ki sa i ganny mete.  Mersi.

 

MR SPEAKER

Mersi Onorab Basil Hoareau.  Minis.

 

MINISTER PETER LAROSE

Mersi bokou Mr Speaker.  Pour mwan reponn Onorab Hoareau son kestyon, mwan a komans avek sa dernyen kestyon ki ou’n fer se ki sis a manda orizinal pa ganny inscribe dan memorandum of association of STC?  E sa set en keksoz kot nou pour bezwen formaliz li o pli vit posib.  En tre bon pwen.

E kot i konsern long term ownership zot propriyete, e mon fek ganny dir par Chairman se ki zot pe deza travay lo en plan. Zot in idantifye serten propriyete.  E alor zot pour bezwen en pe capital investment pour fer sir ki zot own zot prop property.  E sa i ava redwir en pe kou loperasyon in the long term – en?  E kot i konsern telekominikasyon mon krwar se ki natirelman Gouvernman a bezwen pran en stance tre serye anler lo la pour zot kapab zwenn labank.

E sa mon kapab konfirmen se ki bann labank i reelman apre nou diskisyon zot in fer serten rediksyon me petet pa telman rediksyon ki lamazorite nou ti pe ekspekte.  E la mwan oule dir se ki dan le 6 Avril pour annan en meeting avek Prezidan Larepiblik e tou bann banker ava tande ki Prezidan i annan pou dir e ki rol bann labank i bezwen kontinyelman bezwen zwe pour ede redwir kou lavi.  E vwala le pozisyon.  E osito ki nou kapab sa plan long term kot sa bann propriyete, nou ava anmenn devan Lasanble pour konsidere. Mersi.

 

MR SPEAKER

Mersi Minis.  Onorab Georges.

 

HON BERNARD GEORGES

Mersi Mr Speaker.  Mr Speaker mon’n anvi pran en pti git letan pour ekout bann kestyon, akoz mon pa ti la detrwa zour. Kestyon ki mon annan pour Minis i enn ki nou’n aborde me i pa paret mwan ki nou’n al a profon lo la.

Eski Minis i kapab eksplik nou – e  mon konnen ki sa kestyon i devret vreman vin atraver CEO oubyen Chairman STC, me akoz ki apre pres ki 40 an ki SMB, STC pe fer biznes isi Sesel i pa’n kapab etablir bann sours direk pour li fer vin marsandiz e ki ankor bezwen reste avek bann middleman pour aste marsandiz.  Si sa bann middleman in kapab etablir sa bann kontak, akoz ki STC li menm pa’n kapab etablir sa bann kontak?  Sa se mon kestyon Mr Speaker.

 

MR SPEAKER

Mersi Onorab Georges.  Minis.

 

MINISTER PETER LAROSE

Mersi bokou Mr Speaker.  E kot i konsern 40an depi SMB, STC dan loperasyon – kot Onorab Georges i vwar li en pet re bizar kot zot pa kapab etablir relasyon avek zot fourniser sirtou kot i konsern komodite debaz.  E sa mon a bezwen demann kestyon Chairman avek CEO ki ti la.

Sorry, Mr Speaker mon’n pran en poz lo la, parski mon bezwen demann CEO avek Chairperson akoz sa rezon.  E i dir ek mwan pour dir kot diri i konsernen zot in mentenir same supplier depi 40an.  E sa se en kestyon ki petet ava evidans.

 

MR SPEAKER

Mersi.  Mersi Minis.  Onorab Ramkalawan.

 

HON WAVEL RAMKALAWAN

Mr Speaker mersi bokou.  Mr Speaker mwan mon a dir ou laverite, apre sa deba semenn pase e avek sa enteraksyon ki nou pe gannyen bomaten – mwan mon krwar ki STC, SMB i Gouvernman i fatige.  Zot zis fatige, epwize.  E ou a krwar konmsi i nepli annan linisyativ.

Parey Onorab Georges in dir, apre 34an, pre 40an dan Trading zot pa ankor konn, zot pa ankor kapab etablir bann marse?  I annan bann prodikter lokal, bann dimoun ki fek antre dan biznes fler, Kenya.  Zot in annan zot kontak ki zot in etablir.

Tou le semenn zot pe fer vini zot keksoz pli bon marse posib pour zot fer zot biznes. STC li i napa nanryen.  Apre tou sa bann lannen Mr Speaker.  E annou pa bliye 50milyon in disparet. 150milyon Coetivy, 40 milyon dan rent.  E ozordi apre tou sa bann lannen, nou ankor pe tonm nonm non en msye Mukesh Valabjhi! Me Mr Speaker i bezwen annan en problenm.  Mon anvi demande eski STC i dan en poban?  Eski i dan en poban ki i pa kapab sorti pour li kapab donn lepep Seselwa en meyer deal?

Mr Speaker i annan en problenm e mon krwar ki Minis avek tou son lentansyon menm CEO avek Chairman, be mon ganny lenpresyon ki poudir zot dan en poban!  E ki STC nou pour vin dan Lasanble, nou pour koze ziska ki nou’n ble dan nou figir.  E ki tou keksoz nek zis i kontiny parey.  Pa bliye ki pour dir son Broker ki zot pe koz lo la ankor enn fwa – nou pe koz lwe avek Parti Lepep ki pe kout sepa R800mil tou le mwan.  Zot Broker i lo Komite Santral Parti Lepep!  I anba lenvestigasyon devan Komite Anti-Koripsyon.  Tousala se bann menm keksoz, nek zis vir la, pran la, met la.  E nou’n ganny dir semenn pase tou zot bann transpor i Daihatsu. Daihatsu …. Eski i annan en sistenm tender pour zot transpor.  Mon ti ava kontan konnen.

Nou’n ganny dir pour dir televizyon Philips ki ganny vann dan zot, mon ti ava kontan konnen pour lekel sa lakonpannyen.  E ankor enn fwa nou vwar ki Seselwa i pe kontinyen pey keksoz pli ser posib.  Seselwa pe ganny the worse deal possible.

 

(APPLAUSE)

 

HON WAVEL RAMKALAWAN

E i annan serten dimoun ki pe byen pase dan milye tou sa bann deal.  Alor Mr Speaker mwan pour mwan, pour mwan konmdir Onorab Gill mon pe fer obzervasyon, en soumisyon ki pour dir si la apre 40an ki zot pe al revwar pozisyon stratezik; ki zot pe al fer resers.  Se pourtan sa bann menm dimoun ki nou’n nonm zot non, zot, zot in etablir zot dan en fason konkret.  Abhaye Valabjhi i enn bann pli vye marsan dan Sesel. in etablir li, li.  Ou vwar 4 Abhaye Valabjhi partou kote. Mwan mon dir sa akoz se larzan lepep ki pe mal ganny servi.

50milyon ki’n disparet ki ziska aprezan nou pour anmenn en Mosyon dan sa Lasanble.  E tousala i annan pour fer avek SMB e granpapa, well papa STC.  Alor Mr Speaker mon anvi osi demande par egzanp eski SMB sa liquidation process in fini ganny fer? Oubyen eski Seselwa ki ankor pe pey sa bann det ensidswit ki annan pour fer.  Coetivy 150 milyon.  Eski liquidation in fini ganny fer?  Oubyen eski sa bann fardo.  I ankor lo lepep Seselwa? E mwan toultan mon vwar ki pour dir lepep Seselwa li i pey lepo kase.  Me dimoun in, Prawn Farm Coetivy.  I annan serten dimoun in byen pase laba.  Be eski Seselwa li in byen pase.

Alor Mr Speaker mwan pour mwan a mwen ki mon vwar bann lanons parey Onorab Georges in dir ki, bann lanons enportan. Eski nou pour ganny keksoz byento la. Oubyen eski nou pour ganny dir ankor resers pe ganny fer. Internal audit pe ganny isi, lot pe ganny laba, lot, ki zis nou pour vir an ron.  E lepep Seselwa ankor enn fwa mwan mon anvi dir avek zot, nou dan sa Lasanble nou pe kontinyen sey fer sa ki nou kapab. Gouvernman avek son STC pe kontinyen trenn zot lipye, e napa okenn plan pour fer desann pri lavi dan nou pei!  Mersi bokou Mr Speaker.

 

MR SPEAKER

Mersi Onorab.  Minister. I annan en soumisyon si oule fer en komanter lo sa soumisyon.  Minister laparol i pour ou.

 

MINISTER PETER LAROSE

Mersi bokou Mr Speaker.  Mon krwar Onorab Ramkalawan in fer son soumisyon parey in dir. E fransman dir ou mon annan difikilte pour reponn sa bann kestyon.  Mon bezwen admet.  E mon pou termin koumsa.  Mersi bokou Mr Speaker.

 

MR SPEAKER

Mersi Minis.

 

HON WAVEL RAMKALAWAN

Selman – mersi bokou pou … Mwan mon’n fer soumisyon, ou, ou’n fer ladmisyon!

 

(laughter)

 

MINISTER PETER LAROSE

I bon.  Me zot bann veikil.  Eski i annan en tender process, oubyen zis zot al kot Abhaye Valabjhi.  Sa deal ek televizyon, avek Philips. Si nou ti a kapab ganny detay ki kalite deal ki SMB, STC pe fer avek STC. Mersi.

 

MR SPEAKER

Mersi Onorab.  Minis petet ou kapab reponn sa 2.

 

MINISTER PETER LAROSE

Mersi bokou Mr Speaker.  Kot i konsern transport reelman nou ava regard relasyon.  E si i annan en Kontra akoz.  E nou a fer Lasanble gannyen. Kot i konsern televizyon Philips osi nou a fer etre en pe presi dan nou lenformasyon nou a fer Lasanble gannyen.  E kot i konsern liquidation process, e sa nou a bezwen rode avek liquidator ki pozisyon in arive.  Parski sanson parey nou dir nou a pe trennen avek sa. Mersi.

 

MR SPEAKER

Mersi Minis.  Bon mon a retourn laparol kot loter Kestyon.

 

HON CHARLES DE COMMARMOND

Mersi Mr Speaker.  Vitman Mr Speaker.  Akoz ki STC pa fer bann lotel pey zot bann komisyon ki fer laba kot STC an forex parey ISPC, Global ek HSL i fer avek bann lotel, pour ki en fason zot kapab ganny pli bon rate, zot forex ava ek zot, zot ganny pli bon rate, e pli bon deal pour aste marsandiz.  E an menm tan eski – ki mekanizm ki annan an plas ki permet Gouvernman veye si bann lezot gran enportater pa pe enport marsandiz an pasan par enn ou de middleman zot, zot annan par dan sa biznes; si oule en pe parey STC i ete la, si lezot enportater partou pe swiv menm kalite keksoz si i annan en mekanizm pour vey sa.  Akoz sa osi i fer monte pri artifisyelman.

E dernyerman ki dele letan akoz serten bann keksoz ki’n ganny sorti dan lazournen ozordi, atraver sa kestyon enportan se ki nou’n vwar poudir i annan aksyon vitman ki kapab ganny pran pour annan en lefe pozitiv, pour fer pri marsandiz, pri lavi dan Sesel desann.  I kler sa atraver larepons ki nou’n gannyen.  Alor ki dele letan, eski Minis i kapab konfirm avek nou Lasanble pour nou pep war en keksoz pozitif dan pri desann pou serten marsandiz e pri lavi an zeneral pour nou pep.  Donn nou en dele letan spesifik dan sa direksyon.  Mersi bokou Mr Speaker.

 

MR SPEAKER

Mersi Onorab De Commarmond.  Minis.

 

MINISTER PETER LAROSE

Mersi bokou Mr Speaker.  E dele letan ki mon’n konfirm sa avek Chairman ki’n an relasyon osi konfirm sa avek son CEO.  Si ou kapab donn nou eskan mwan May koumsa nou a fer sa bann progranm.  Met an mars e nou a fer piblikasyon ki kantite pri in desann pour fer nou konsonmater konnen.  E sa nou ava servi medya byen pour fer lanons ki annan aksyon konkret ki ganny pran.

E kot i konsern enportater servi par middleman ki set aki i azout son bout, ek son bout ensidswit, ki finalman zot offload lo STC.  E sa set en rol kot Minister Finans a bezwen servi son resours ki i annan, pour fer sir ki sa bann keksoz koumsa i ganny minimize.  Osinon eliminen.

E kot i konsern peyman an forex par lotel.  Sa mon krwar i en tre bon sizesyon Onorab De Commarmond.  Sa i ava ede osi kot i kapab negosye en bon rate avek sa bann lotel. E mon krwar i annan bann lezot marsan osi ki fer sa bann keksoz koumsa. Sa mon krwar STC i kapab sivre legzanp e maximize reveni total.  E an servi sa savedir zot kou forex i ava pli meyer marse.

E vwala se kot mon reponn ou bann kestyon. Fotespere ankor enn fwa mon remersi ou pou ou kapab konpran pour dir mon pa ti kapab vini lot semenn pase pour reponn ou kestyon.  Me senpleman mon’n sivre Lasanble tre pre.  Mersi bokou Onorab.

 

MR SPEAKER

Mersi Minis.  Minis avek sa nou ava remersi ou pour ou letan dan Lasanble.  Mon konnen ou pour retourn ankor toute a l’heure.

E mon ti a kontan remersi Chair of the Board, Mr Guy Morel, CEO Ms Christine Joubert, Ms Mangroo ek Ms Cesar.  Nou remersi zot ki zot in spend sa kantite letan avek nou dan Lasanble.

 

 

MR SPEAKER

Pour apre midi nou’n ganny konfirmasyon ki Minis Dogley, Minis Bastienne pour akonpanny Larose, 2er isi dan Lasanble.  E mon pe mentenir an vi letan, mon pe mentenir lalis ki mon’n annan bomaten.  E mwan a zis fer zot konnen lekel bann dimoun ki lo lalis.  Kontra in fini arive kot Lasanble. Nou pour annan kontra, nou pour sirkil avek le de kote pandan ki zot a kapab analize.  Bann Manm ki lo lalis pour apre midi,  mon annan Onorab Adelaide lo kote LDS, Onorab Henrie, Onorab Afif, Onorab Mondon, Onorab Ramkalawan.

Lo kote Parti Lepep i reste mwan Onorab Basil Hoareau, Onorab Aglae, Onorab Simon Gill, avek Onorab Sebastien Pillay.  Mon pour mentenir sa.  Si zot annan lezot Manm i annan kestyon zot kapab pran donn sa bann Manm ki deza lo lalis.  Yes Onorab Andre.

 

HON CLIFFORD ANDRE

Mersi Mr Speaker.  Mr Speaker an vi ki mwan ki ti demann pour ganny Kontra.

 

 

(Interruption)

 

HON CLIFFORD ANDRE

Espere ou pa konn ekout Lasanble alor Onorab Pillay. Malelve ki ou ete.  Yes Mr Speaker, an vi ki mon ti demann Kontra e Leader Lopozisyon in dir pour nou arete eskan ler Kontra i vini koumsa ti marse.  Sa ki pa ti pe ekoute.  Oubyen ti’n al pran en pti sigaret i ok.

Mon pe demande ki…

 

(Interruption)

 

MR SPEAKER

Onorab.  Onorab, fer ou pwen.

 

HON CLIFFORD ANDRE

Mon pe demande ki mon ganny en loportinite, akoz mon ti annan size lo sa Kontra pour mwan demande.  Mon pa ankor ganny sans vwar Kontra.  Mersi.

 

MR SPEAKER

Bon ok. Dan sa ka i annan Onorab De Commarmond osi ki son kestyon in vin otour sa. Mwan pour les ou lo kote LDS avek Onorab De Commarmond lo kote Parti Lepep ki mon pour enkli lo lalis apre midi.  Alright?  Mon krwar it’s only fair.

Bon avek sa nou ava…

 

HON WAVEL RAMKALAWAN

Mr Speaker be sa Kontra ki groser i ete?  Konbyen paz i annan?

 

MR SPEAKER

Mon pa konnen.  Mon pa konnen – i pa la devan mwan.

 

HON WAVEL RAMKALAWAN

Parski an menm tan osi nou, nou anvi fer en travay serye.  Si en kontra ki annan 75 paz konmsi ou pa kapab ekspekte nou la 12. 52, pour nou al rod en manze.  E apre sa pour nou retourn la.  I mean, nou ti ava kontan konnen konbyen e si i en gro Kontra, i en gro Kontra 200 paz whatever ki nou tenir parey nou ti’n dir ki mon pe zis met sa koman en propozisyon.  Mersi.

 

MR SPEAKER

Bon, demen, demen nou pa pe kapab tir 3 Minis pour anmenn kot Lasanble.  Demen nou osi tou nou bezwen respekte en pti pe travay Egzekitiv.  Zot annan en schedule Cabinet Meeting ki zot in anmenn devan nou.  Nou bezwen i annan sa respe lo tou le de kote. Madanm Clerk in alert mwan pour dir i en kontra apepre 200 paz.  Si zot dakor Mardi prosen, le 3 Minis ava vini avek CEO PUC e zot a ganny letan. Bann Manm a ganny letan pour regard sa Kontra byen, e nou ava repran sa kestyon Mardi prosen.  Alright?  I annan en konsansis.  Ok?   So apre midi Minis Larose ou pa pou bezwen retournen apre midi.  E randevou i pour Mardi le 3, le 3 Avril.  Apre midi nou ava pran Air Seychelles.  E Madanm Clerk ou ava demann Minis Loustau-Lalanne pour vini.

Annou pa komans 2er, annou fer li 2.30 apre nou ava regarde.  Nou a donn en pti pe letan pour bann Manm osi. Alright?  So Minister mersi bokou ankor enn fwa avek ou delegasyon e nou ava eskiz zot parmi nou.  Yes Onorab Ghislain.

 

HON CHANTAL GHISLAIN

Yes Mr Speaker.  Mon vwar ou’n nonm en lalis bann dimoun ki pour demann kestyon, bann Onorab.  E mwan orizinalman ki ti pe query en kantite bann kestyon pour fer avek Kontra.  E mon ti a voudre mon non i ganny azoute lo la, akoz i annan bann kestyon ki pa’n ganny reponn.  Mersi.

 

MR SPEAKER

En moman, en moman.  Mon ti pe mentenir sa lalis. Si nou ti retournen la apre midi.  Si nou ti retournen la apre midi, akoz nou ti pour bezwen pran Minis Tourizm apre.

An vi ki nou pe anvoy sa deba pour Mardi prosen, Mardi prosen mon pour reouver lalis.  Alright?  Ki a donn sans tou bann Manm i a kapab antre.  Alright?  Mersi.

Annou zis en pti moman nou ava eskiz Minis ek son delegasyon parmi nou.

 

(MINISTER LAROSE AND THE STC DELEGATION WAS EXCUSED FROM THE HOUSE)

 

 

MR SPEAKER

Bon nou pa pour fer ABC ozordi, be demen nou ava annan nou en short ABC, akoz mon krwar nou deza annan en pe biznes ki pour overlap pour semenn prosen.  Avek sa nou ava pran en Break e nou ava retournen 2.30.

 

(BREAK)

 

MR SPEAKER

Bonn apre midi tou Manm Onorab.  Bonn apre midi tou bann Manm piblik ki pe kontinyen swiv travay Lasanble Nasyonal.  Avan nou kriy Minis mon annan 2 pti item ki mon oule deal avek.  Premyerman mon ti a kontan fer sorti en mesaz tre kler pou bann sekreter ki travay dan bann biro Gouvernman – sirtou ki atase avek bann lofis bann Minis ki Lasanble Nasyonal i bezwen an kontak avek zot de tanzantan.  Manm Sekretarya Lasanble Nasyonal ler i call zot pou organiz sesyon Lasanble Nasyonal ek bann Minis se pa zot sa bann sekreter ki desid lo ler oubyen ki zour sa Minis pou vini.  Se Manm Lasanble ki zot travay i egzize pou fer sa.  Sa se enn dan sa 3 responsabilite Manm Lasanble Nasyonal.  Sa rol oversight kot en Minis i ganny apele pou reponn kestyon ki konsern son Minister.

Otan ki posib nou restrikte nou lo nou Order Paper.  Me sirkonstans parfwa i diriz nou otreman.  Manm Sekretarya i fer zot mye ki zot a zour, kit sa bann sekreter sa bann Minis a zour pour ki i annan mwens lenkonvenyans posib.  Alor mon ti a swete ki sa kourtwazi ki bann sekreter dan Lasanble Nasyonal i partaz ek bann sekreter dan bann diferan Minister i osi ganny resiproke.

Dezyenmman mon annan – i en Droit de Reponse me an menm tan  i ava vin konman en leksplikasyon swivan nou Sitting Mardi le 20.  Mon’n ganny en let ki’n sorti kot CEO NSC e mon pou lir sa let apre mon krwar – bann Manm i sipoze.  Ok nou pe fer kopi apre bann Manm i ava ganny en kopi pou zot lenformasyon.  Sa let i adrese lo :- Speaker, National Assembly, Ile Du Port dat le 25 Mars 2018.

Dear Mr Speaker.  On Tuesday 20th March I accompanied my Minister, Mrs Mitcy Larue, to the National Assembly to answer an Urgent Question regarding the NSC dormitory.  There was one question that Honorable Noline Sophola asked that I had no notion what she was talking about and to make matters worse I felt stupid when Honorable Sebastien Pillay asked the Minister to ask me what I had done regarding this issue.  Of course I was completely blank about it.  Hon. Pillay also requested that a report be sent to the National Assembly at the earliest.  Mr Speaker on returning to my office I investigated the case and I discovered that NSC had been wrongly accused.

        I would therefore appreciate if my report could be read out publicly so that the Honorable Members and the public at large may learn the truth about the matter.  Thanking you.  Yours respectfully, Giovanna Rousseau CEO, NSC.  E mon pou lir, mon pou lir son Rapor.

Mr Speaker mon ti a kontan fer konnen sa Lasanble ek tou piblik ki sanpyonna atletik lekol ki ti organize le 18 Zen lannen pase e dayer tou-le-z-an i ganny organize par Ledikasyon Fizik dan Minister Ledikasyon e non pa par NSC.  NSC i asiste Minister Ledikasyon par donn zot nou fasilite.  Depi lannen 2014 ler ki nou ti’n’ upgrade’ nou fasilite dortwar seksyon PE ti demann nou pou zot zanfan Praslin ek La Digue reste dan nou fasilite ki nou ti’n fer.  Natirelman sa landrwa i pa ase gran pou pran tou zanfan konfortableman. Lannen 2017 selman lekol Grand Anse Praslin segonder ki ti  reste kot nou.  Lekol La Digue ek Baie Ste Anne ti reste kot School for Exceptional Child.  E lekol Grand Anse Primer ti reste  Petit Seminaire.  Alors Mr Speaker i pa drol ki mon pa ti konnen lo kwa ki Hon. Sophola ti pe koz lo la akoz La Digue pa ti reste kot NSC. Dapre mon investigation ki mon’n fer i paret ki en dimoun avek son zanmi La Digue ti sorti kot lekol Exceptional ver 8er diswar e i ti pe al kot Maison De Foot ler zot ti ganny atake e ganny vole en telefonn ek speaker.  Sa dimoun ki’n dir Gard ki li i ti pe reste kot Maison De Foot.  La ankor Mr Speaker mon ti a kontan fer konnen sa Lasanble ki Maison De Foot napa nanryen pou fer avek NSC.  Sa fasilite i pou Federasyon Foutbol e i ganny zere par sa Federasyon.  Mon’n atas rapor sa lensidan ki mon’n gannyen avek Kordgard Mont Fleuri pou plis lenformasyon.  Alor Mr Speaker san menm sa rezon ki Minis Alexander pa ti kapab pas nanryen avek Minis Larue akoz ti napa okenn rapor ki ti vin kot nou NSC.

Konsernan tim Praslin, reste dan dortwar NSC, mon ti a  kontan eksplike ki mannyer sa konpetisyon i ganny zere.  Zone 7 ki Sesel i form parti ladan, zot ki fer zot lord ki mannyer konpetisyon i deroule.  Konbyen en tim i bezwen peye eksetera.  Tou klib ki kalifye pou zwe dan sa konpetisyon i bezwen pey 45 Ero par zour, par personn pou zot lozman,  manze e transpor.  Tim lokal i pa bezwen pey sa, si i anvi fer son prop laranzman e se sa ki bann tim ti fer.  Praslin ek Anse Royale ti demande pou reste kot dortwar NSC e nou ti donn zot sa landrwa pou nanryen tandi ki Swim Blue Pal sanpyon zonm pou sa konpetisyon zot, zot ti deside pou reste se zot.  Mon ti a osi fer konnen ki lekip Mayotte ki ti ariv pli boner dan pei ti reste dan sa menm dortwar pou 6 zour.  Mersi pou zot latansyon.  Giovanna Rousseau.

 

MR SPEAKER

Bon mon pa pou lir sa Rapor Lapolis me mon’n atase avek sa let sorti kot CEO NSC pou latansyon tou bann Manm Lasanble.  Mon mazinen i zis, i en klarifikasyon plizoumwen, i en Droit de Reponse me i en klarifikasyon lo pou zis klersi dout lo kestyon e lo repons ki CEO avek Minis in donnen.  Yes Onorab Pillay.

 

HON SEBASTIEN PILLAY

Mersi Mr Speaker.  Mr Speaker se sa efektivman ki nou’n gannyen.  Nou’n ganny en rapor lo en lensidan ki’n ganny raise dan Lasanble e se nou rol konman Manm Lasanble pou demann bann kestyon lo bann size ki’n arive.  Mon krwar ki dan son let CEO i fer referans avek – well sa fraz mon pou lir…’’there was one question that Hon Noline Sophola asked that I had no notion what she was talking about and to make matters worse I felt stupid when Hon S. Pillay asked the Minister to ask me what have I done regarding this issue.’’  Mr Speaker ti napa okenn lentansyon okenn dimoun pou fer ni CEO ni Minis look stupid.  Me selman sa i montre klerman ankor lenportans ki tou bann lorganizasyon e bann Lazans ki ler zot vin dan Lasanble ek bann Minis zot prepar zot in regards to bann lenformasyon ki neseser pou donn lasanble.

E lo size bann dortwar e bann fasilite e bann aktivite sports skoler ki ganny organize Mr Speaker, Mr Speaker mwan mon annan mon lopinyon personnel lo la.  Mon pou dir mon lopinyon personnel i se ki mwan mon krwar ki NSC ki konman paran tou bann sport dan Sesel i annan en rol pou zwe akoz sa aktivite i ede pou dekouver bann nouvo talan.  Me anfen kont NSC in prezant zot lopinyon lo la, mon respekte zot lopinyon, me selman mon le fer kler ki i nou drwa dan Lasanble pou demann klarifikasyon.  CEO in klarifye e alors prezan nou ava gete prezan ki mannyer keksoz i deroule safwasi akoz mon krwar petet la tou dimoun ava port en plis latansyon vi ki i annan aktivite enter skoler ki vini le 17 Zen zisteman pou asire ki nou napa bann repetisyon bann lensidan pe enport lekel ki responsab, sa ki enportan se ki sa bann lensidan pa repet ankor.  Mersi Mr Speaker.

 

MR SPEAKER

Ok.  Mersi Onorab Sebastien Pillay.  Yes Onorab Churchill Gill.

 

HON CHURCHILL GILL

Mersi Mr Speaker.  Konman Loter Mosyon mon’n ekout byen mannyer bann konteni sa let e mon byen kontan pou vwar poudir napa nanryen ki’n tous lo kestyon.  Savedir kestyon ti kler e bann deba ki ti ganny fer lo kestyon ti ok.  Mersi.

 

MR SPEAKER

Mersi Onorab Churchill Gill. Mon a donn laparol Onorab Noline Sophola.

 

HON NOLINE SOPHOLA

Mersi Mr Speaker.  Mr Speaker avek lentansyon mon ti poz sa kestyon pa pou mwan imilye ni CEO, ni Minis, personn.  Me selman akoz sa lensidan ti arive e kestyon ti ganny poze ler Minis avan ti la, Edith Alexander.  E li Minis si i ti konnen sa pa tonm dan son kad oubyen CEO senpleman zot ti a’n dir i pa tonm dan zot kad.  Pou mwan ler in reponn koumsa in fer mwan krwar poudir – i donn mwan lentansyon poudir be nou konnen ki si sa ki ti pe pase.  Me i pa ti en move lentansyon ki mon ti poz sa kestyon.  Mersi.

 

MR SPEAKER

Mersi tou le 3 Onorab.  Petet zis pou zot lenformasyon, ler zot pou vwar sa Rapor Lapolis zot ava vwar egzakteman osi kote sa lensidan ti arive.  So i pa vreman anndan kot compound NSC.  Yes Onorab Ramkalawan.

 

HON WAVEL RAMKALAWAN

Mr Speaker mon krwar ki fodre nou konn – fodre pa ki nou zis mal enterpret keksoz.  I mean sa ki CEO in dir se ki i pa ti konnen e ki li pou li e letan sa dezyenm kestyon in ganny demande li in santi li stupid.  I pa pe akiz, i pa pe akiz personn.  Alors fodre nou osi konpran Angle.

 

MR SPEAKER

Annou pa, annou pa fer deba akoz mwan osi, mwan osi taler mon ti pe mazinen si mon pou lir sa bout be apre mon dir be si mon pou konmans lir son let mon plito lir li an antye me lenterpretasyon i pa pe dir ki en Manm in imilye li.  Me mon kontan, mon kontan lapros par egzanp Onorab Sophola kot in dir poudir son lentansyon pa ti en move lentansyon me petet parfwa i annan bann mal konprenezon.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon konpran komanter ki Leader Lopozisyon in fer me selman mon pa krwar poudir sa komanter ki in fer an relasyon avek nou bezwen konpran Angle, nou’n konpran tre byen ki CEO in dir e mon referans avek sa kestyon sete pou re asir li ki nou lentansyon sete pa pou fer li feel stupid malgre ki li in  dir dan sa moman ki in fer stupid.  So in bezwen nesesit en reaksyon from kestyon ki mon’n demande.  Sak aksyon i anmenn en reaksyon egal.  So si mon kestyon ki mon’n demande ki’n fer li santi koumsa i pa mon lentansyon pou fer li santi koumsa.  Mon krwar mon konpran tre byen Angle Onorab Ramkalawan!  Mersi.

 

 

MR SPEAKER

Ok.  Bon nou ferm deba lo la.  nou ava pran prosen item lo nou Order Paper e sa se Statement ki pou ganny fer par – Statement lo Air Seychelles ki pou ganny fer par Minis pou Tourizm, Lavyasyon Civil, Por e La Marin Mr Maurice Loustau-Lalanne.  Mon ava demann Parliamentary Reporter pou kriy Minis. Bon mon ava welcome Minis Loustau-Lalanne dan Lasanble.  Minis i ganny akonpannyen par son PS pou Lavyasyon Sivil Por e La Marin Mr Garry Albert e Human Resource pou Air Seychelles Mr Japha Ally.  Minis welcome e mon a donn ou laparol pou fer Statement lo Air Seychelles.

 

MINISTER MAURICE LOUSTAU-LALANNE

Mersi Mr Speaker.  Mr Speaker, Mr Deputy Speaker, Leader Lopozisyon Onorab Ramkalawan, Leader of Government Business Onorab De Commarmond, tou Manm Onorab, bonn apre midi.  Mr Speaker nou ava rapel ki an  Desanm 2017 mon ti vin fer en Statement  devan Lasanble Nasyonal ki ti  ganny swiv par bokou kestyon lo size restriktirasyon Air Seychelles.  Me a sa letan plan pa ti ankor ganny finalize dan son totalite.  Prezidan Danny Faure in osi tous size Air Seychelles dan son State Of the Nation Address pli boner sa mwan e i ti mansyonnen ki en prosesis restriktirasyon pe ganny finalize pour ki Air Seychelles i vin en lakonpannyen ki kapab soutenir son lekor fas a bann konpetisyon dan Lendistri Lavyasyon.  Prezidan ti osi dir ki bann travayer Air Seychelles ki pou ganny afekte dan sa restriktirasyon pou ganny konpansasyon e lasistans pou re ganny en lot plas travay.

Ozordi mon ti a kontan enform Lasanble lo devlopman final restriktirasyon Air Seychelles.  Mon kapab konfirmen ki Air Seychelles in finaliz son plan pou li vin en lakonpannyen ki pou konsantre lo son bann sekter kot i annan lavantaz e garanti profi.  Sa i Ground Handling, Cargo Handling, Loperasyon Domestik e bann vol dan larezyon tel ki; Abu Dhabi, Mumbai, Maurice e South Africa.  I pou fer son bann vol rezyonal avek selman 2 Airbus a 320.  Air Seychelles pe retir son de airbus 330 e pe lwe li avek Fiji Airline.  Enn sa avyon Airbus 330 in fini ale e pe ganny fer maintenance e re penn Abu Dhabi avan ki i ganny transfere avek Fiji Airline.  Sa dezyenm Airbus 330 i ankor pe fer larout Paris e i ekspekte ganny transfere avek Fiji Airline boner Avril 2018.  Lefe ki bann vol Paris pou arete ver lafen Avril Air Seychelles Wet Lease en avyon Airbus 330 avek Etihad Airways pou fer son bann vol Paris pandan mwan Avril.  Parey nou konnen Mr Speaker en wet lease i vedir ou lwe sa avyon avek son prop lekipaz.  Me i annan en Lagreman ki lo sak sa bann flight pou annan de Cabin Crew Air Seychelles ki pou prezan konman Anbasader.  Swivan en letid ki Air Seychelles  ti  fer pou swazir en avyon apropriye ki pli ekonomik pou son loperasyon rezyonal, nou’n kapab konfirm ek Lasanble, mon kapab konfirm ek Lasanble ki Air Seychelles in deside pou pran de Airbus a 330, 320neo.  Enn sa avyon i ekspekte ganny delivre an Zen 2019 e lot ver lafen 2019.   Sa Airbus 330neo i pou pran plis pasaze e son sistenm lwazir abor pou pli modern e konfortab.  Air Seychelles ozordi i annan li 6 avyon domestik e enn ladan pou ganny vann.  I ava fer ki i pou fer son loperasyon domestik avek 5 Twin Otter.

Mr Speaker an sa ki konsern resours imen mon kapab  konfirmen ki plan in fini finalize pour ki Air Seychelles i redwir la kantite travayer ki i annan ozordi.  Pandan sa semenn ki fek pase Air Seychelles in fer en seri rankont avek tou bann Departman pou enform travayer.

Rezon par deryer sa restriktirasyon, ki mannyer loperasyon Lakonpannyen pou ete.  Lekel bann Departman  ki pou ganny afekte.  Ki kriter ki pou ganny servi pou swazir travayer ki pou reste ouswa ale.

Ki konpansasyon ki pou ganny peye e bann ki pou ganny fer arete.

Kan ki travayer pou ganny enformen endividyelman e kan ki sa redundancy pou terminen e Lakonpannyen repran son nouvo striktir.

Mr Speaker feedback ki mon’n gannyen se ki sa bann rankont in deroul byen.  Bann travayer in satisfe avek leksplikasyon ki zot in gannyen malgre lenpak negativ ki i pou anmennen, pou bann ki pou bezwen perdi zot travay.  Ozordi i annan anviron 893 pozisyon dan Air Seychelles ki sorti  dan 13 diferan Departman.

Avek sa plan restriktirasyon i annan pozisyon ki pou ganny eliminen  e i annan pozisyon ki pou ganny merge avek en lot pozisyon.  An tou 202 pozisyon pou ganny retire, ki reprezant 174 travayer ek 28 vacancy ki pa pe ganny ranplase.

Ladan 113 pou sorti dan Departman Cabin Crew.  31 sorti dan Departman Komersyal e Marketing.

20 sorti dan Departman Flight Operation. 8 sorti dan Departman Finans.

7 sorti dan Departman Cargo.

7 pou sorti dan Departman Supply Chain and IT.

6 sorti dan Departman Resours Imen.

5 sorti dan Sekretarya CEO e 5 pou sorti dan Departman Teknikal.  4 Departman pa pou ganny afekte.  E sa i Ground Services, Sekirite, Crew Training e Quality Assurance.  An rezilta sa redundancy, travayer pou ganny sa bann benefis swivan.

Premye; sa ki Lalwa i demande setadir i pou ganny peye son konze anyel ki sa travayer in akimile; saler pou sa bann zour ki in travay dan sa mwan ki son servis i ganny terminen e i pou ganny peye en mwan notice pou terminasyon son travay dapre Lalwa Travay.

Dezyenmman zot pou ganny peye konpansasyon ki ganny kalkile lo saler debaz.  Enn zour pou sak mwan pou bann ki lo Kontra kontinyel e 2 zour pou sak mwan pou bann ki lo Kontra fix term parey Lalwa i demande.

Trwazyenmman pou bann ki annan 5an ou plis letan servis zot pou ganny peye pro rata zot Long Service Award anliny avek Polisi Air Seychelles lo Long Service Award.

Katriyenmman Air Seychelles in propoz ek Gouvernman, pou osi fer en kontribisyon an plis par donn sak travayer 3 mwan saler de baz.

E senkyenmman fasilite rebate pou sa travayer e son spouse selman apre ki in arete.

Pandan sa semenn Air Seychelles pe rankontre bann travayer ki lo lalis pou redundancy endividyelman pou enform zot formelman.  Group travayer Cabin Crew in eksprim zot dezir pou ganny enformen pandan sa semenn ki nou ladan si zot lo lalis olye espere ziska lot semenn.  E zot ti a kontan ganny zot let atraver e-mail olye ganny apele dan lofis.  Air Seychelles in dakor avek zot demann e zot pou ganny zot e-mail apartir ozordi.  Pandan mwan Avril ek Me sa prosesis redundancy pou ganny verifye e aprouve par Minister Lanplwa.

Apartir le 4 Zen sa prosesis pou ganny terminen e Air Seychelles a vwar li avek 691 travayer, 2 avyon Airbus 320 e 5 avyon domestik.

Nou osi konsyan ki apre ki en travayer in ganny enformen ki i pou ganny fer redundant son moral pou bese.  Air Seychelles pou pare pou release travayer ki anvi ale, swa akoz in fini ganny en lot plas travay ouswa nepli anvi kontinyen dan Lakonpannyen.

Air Seychelles pou osi ofer bann travayer ki pou ganny afekte avek loportinite pou ganny transfer dan Departman Ground Services, kot i annan en mankman travayer pou fer checking, porter, VIP ek CIP lounge.  Air Seychelles ansanm avek Minister Lanplwa pou ed bann travayer idantifye lanplwa dan bann lezot lorganizasyon tel ki lotel, Guesthouse, restoran, eksetera.

Minister Lanplwa pou organiz en recruitment fair le 12 Avril kot ICCS e le 25 Me lo Praslin.  Mr Speaker i regretab ki Air Seychelles i bezwen ariv lo sa plan, kot i bezwen redwir son aktivite komersyal e operasyonnel ki pe afekte bokou plas travay.  Me sa i pou ede sov nou National e remet li lo en semen pli solid.  Ansanm avek son partner Etihad Airways Air Seychelles pou konsantre lo redwir son kou loperasyon; fer sir ki i kouver son depans e fer profi, gard son tit konman leading Airline in the Indian Ocean e amelyor son servis Creole Spirit.

Mr Speaker sa i lenformasyon ki nou partaz avek Lasanble e bann ki pe ekoute lo sityasyon Air Seychelles.  Mersi Mr Speaker.

 

MR SPEAKER

Mersi, mersi Minister.  Yes Onorab Ramkalawan.

 

HON WAVEL RAMKALAWAN

Mersi Mr Speaker.  Mr Speaker Minis in fer en Deklarasyon e in donn en kantite promes.  E an menm tan osi in nonm partner Etihad.  I enportan avan menm ki nou konsider sa ki in dir, pou nou ganny serten lenformasyon konman en Lasanble Nasyonal.  Etihad i 40poursan, Air Seychelles i 60poursan ansanm ek Gouvernman Sesel.  Lannen pase nou ti demann sa Kontra e 8 mwan pase nou’n demann sa Kontra pou nou konnen ki i annan ladan, nou pa’n zanmen ganny li.  Nou anvi ganny en kopi sa Kontra Mr Speaker avan ki nou kapab demann okenn kestyon ki fer sans.

Dezyenmman in annan en ta ekstravagans si Air Seychelles in ariv koumsa ozordi in annan en ta ekstravagans ki enkli pey biro ki zot pa servi anviron sepa konbyen apartman Eden Island eksetera, eksetera.  Zot sistenm sa Kontra avek IBM  – nou anvi Mr Speaker e mon koz lo lapar mazorite dan Lasanble, nou krwar ki avan ki nou kapab menm koz lo sa ki Minis in prezante nou anvi ganny sa bann dokiman pou nou kapab fer en analiz serye pou nou regarde kote nou pe ale, akoz mon ava dir sa ki Minis in dir malerezman detrwa lannen pase letan Air Seychelles ti pe pas dan  bann menm sityasyon, nou ti ganny dir sa bann keksoz e ozordi sepa konbyen lannen pli tar nou pe ganny dir menm keksoz.

E nou ki reprezant travayer nou pa kapab aksepte ki en Airline ki pou nou ki nou pa konnen ki annan dan son Kontra e kwa ki lavenir pou donnen.

Alor Mr Speaker parey nou ti fer bomaten mon pe move ki nou ganny kopi sa bann dokiman, pou nou kapab fer en bon analiz parski sansan i pa pou fer sans.  E non selman ki i pa pou fer sans nou konman en Lasanble Nasyonal nou pa ava pe fer lazistis avek sa 202 travayer ki reprezant 202 fanmir Seselwa e kekfwa i annan enn de etranze tou, me selman mon koz plis pou bann fanmir Seselwa.  Alors mon demande ki nou pran en letan e Minis anmenn sa bann dokiman pou nou akoz dernyen fwa i ti dir avek nou ki sa  i annan serten eleman sekre, mon annan son le 14 Zen 2017 letan i ti dir nou sa.  E ozordi pe koz lo latransparans, nou annan en Prezidan ki koz lo latransparans e dan sa Lasanble se landrwa kot latransparans i konmanse.  Mon met sa devan ou Mr Speaker.  Mersi bokou.

 

MR SPEAKER

Mersi Onorab Ramkalawan.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker dan menm laliny mon segonn sa ki’n ganny dir dan sa Lasanble ki’n ganny move par Leader Lopozisyon e an menm tan mon osi note ki sa Kontra mannyer mwan mon tann li – mannyer mwan mon aprann mon pa ankor ganny li mon ti a kontan vwar pou nou konfirm sa ki mon pe dir la.  I en Kontra ant Gouvernman Sesel, Air Seychelles e Etihad e en Kontra of that magnitude mwan mon panse ti devret annan en ratifikasyon lo Lasanble Nasyonal an plis.  E lefe ki sa bann keksoz pa’n ganny fer in dan lepase wi me la a se moman kot nou pe vwar plizyer sa bann kalite keksoz ki pe arive devan nou Lasanble, mon osi siport ki nou vwar kopi Kontra pou nou kapab dissect li pli byen pou konpran e ler nou a demann kestyon, ler nou ava fer nou bann entervansyon lo behalf nou Lasanble lo behalf lepep, Seselwa i ava kapab annan plis sibstans e nou ava konpran kote nou pe ale vreman dan nou pti pei, zoli pti pei.  Mersi.

 

MR SPEAKER

Mersi Onorab De Commarmond.  Onorab Sebastien Pillay ou pe al dir mwan egzers Standing Orders 95 non?

 

HON SEBASTIEN PILLAY

Non Mr Speaker nou’n fini fer sa pwen bomaten me selman zis pou azout lo sa ki’n ganny demande.  Minis ou’n fer en Statement ki bann travayer i satisfe ek sa sityasyon.  Mon krwar petet Minis ou devret kalifye sa Statement akoz la kantite text, mesaz ki nou pe gannyen i pa paret sa ki ou pe dir nou i le ka.  Lot keksoz ki ou’n dir Minis, ou’n koz lo en kriter ki’n ganny servi.  Ankor en fwa mon pou koz lo bas sa ki bann travayer pe dir nou, e mwan mon pou ekout sa ki sa bann travayer pe dir mwan pou le moman, akoz mon napa lezot levidans pou mon counter sa ki zot pe dir mwan.  Mon ti a kontan vwar sa ban kriter ki’n ganny servi pou determinen lekel ki ale.  E akoz pou le moman ki nou ankor still annan bann zofisye ki ankor pe reste dan bann landrwa parey Eden Island ler nou pe koz cut cost nou pe koz restructuring.  So i annan en pti travay ki petet i devret ganny fer pou met annord ban lenformasyon ki nou devret gannyen pou nou bouz devan avek sa size.  Mersi Mr Speaker.

 

MR SPEAKER

Ok, mersi Onorab Sebastien Pillay.  Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker mwan osi mon subscribe tou sa ki’n ganny dir.  Mon ti a kontan demann Minis pou osi donn nou lenformasyon lo konbyen etranze i annan ki pe travay pou Air Seychelles e konbyen Seselwa, pou ki letan nou ava poz bann kestyon nou ava annan bann lenformasyon adekwa ki mon krwar i pa pou definitivman dan sa Kontra nou annan ban lenformasyon adekwa pou nou kapab poz bann kestyon ki enformen.  Mersi.

 

MR SPEAKER

Bon avan nou al pli lwen.  Eski i annan en  konsansis ki Minis pa reponn sa bann queries la.  en konsansis ki Minis i rod bann lenformasyon, i rod en kopi sa Kontra parey Minis Finans in fer bomaten.  E pou zot lenformasyon sa Kontra Sino- Hydro in rantre i plis ki 200 paz e nou pe fer kopi.  Nou napa en e-copy.  Eski zot le nou al dan menm direksyon kot Minis i retournen Mardi prosen?  Nou ava donn Minis Finans ek le de lot Minis sesyon bomaten e Minis pou Tourizm i ava retourn apre midi avek – petet Minister ou a kapab fer nou ganny bann dokiman  avan, avan Mardi pou bann Manm kapab konmans pas ladan pou kapab konmans dissect li … E apre ou ava retournen Mardi apre midi.  Eski sa i konsansis?  Onorab Ramkalawan. Eski sa i konsansis Onorab Ramkalawan?

 

 

HON WAVEL RAMKALAWAN

Mr Speaker mon  pe swiv sa ki ou pe dir me selman an menm tan osi mon ava dir ki mon soke avek en Statement ki Minis in dir kot redundancy konmsi i ganny pran pou – konman en fe akonpli.  Be prosesis Gouvernman?  Konmsi pou Minis kapab dir ki le 4 tou bann keksoz pou’n fini an plas.  Be i montre nou ki poudir Gouvernman i travay konman en rubber stamp  -parski letan i annan  en prosesis redundancy  parey nou ti vwar avek bann  travayer Cable & Wireless i annan en pli gran prosesis e ki mannyer, ki mannyer Gouvernman i kapab nek zis vini dir konmsi asir son kou ki poudir tel dat, tel dat, tel dat redundancy pou’n fini.  I mean sa pa en keksoz ki- sa pa la fason ki Lalwa Travay i deroule.

E i pa sipoze lafason ki Minister Lanplwa i fer son travay.  Parske la deswit mon pou dir ki Minister Lanplwa li osi tou i koupab dan sa zafer parske i ape zis swiv sa ki Air Seychelles i dir e olye defann travayer i ape zis, i ape zis permet travayer ganny koud pye pou al lo semen!   Alor, alor tousala i vreman, i vreman sokan e mon pa vwar ki mannyer sa kalite keksoz i kapab deroule e ki non Mr Speaker i pa akseptab sa.  Sa travayer Seselwa i bezwen ganny, i bezwen ganny defann.  I bezwen annan son drwa e sa ki nou pe tande la pa normal ditou.

 

MR SPEAKER

Ok. Mersi Onorab Ramkalawan.  Onorab De Commarmond.

 

HON CHARLES DE COMMARMOND

Zis pou azoute Mr Speaker se ki i enportan nou ganny lalis osi tou bann Seselwa ki pe understudy sa bann etranze e ki pou nou kapab vwar osi why ki bann Seselwa zot, zot pe ganny met deor e sa bann etranze zot, zot pe reste.  Mersi.

Confirm in post wi.

 

MR SPEAKER

Bon ale Onorab Andre.

 

HON CLIFFORD ANDRE

Mr Speaker eskiz mwan zis pou osi fer sorti ki parey Leader Lopozisyon nou annan en IBM Contract mon krwar ki i neseser nou vwar.  I annan  en SABER Contract ki i annan en sanzman lo sistenm.  Apre i annan  sa Management Contract ki zot annan.  Ti a bon ki nou ganny sa pou nou kapab poz bann kestyon parey mon’n dir enformen.  Mersi.

 

MR SPEAKER

Bon, avan mon ferm sa deba nou pran en desizyon – mon pran en desizyon final.  Mon krwar i tou zis ki mon donn Onorab Jude Valmont ki Onorab Pointe Larue kot Air Seychelles i fer tou son aktivite en parol.  Onorab Valmont.

 

HON JUDE VALMONT

Mersi Mr Speaker, mersi.  Pa pou  tarde zis pou sizere.  Mon ti a sizere ki Minis Lanplwa osi i akonpanny Minis Loustau- Lalanne next week pou klarifye keksoz.  Mersi.

 

MR SPEAKER

Bon.  Onorab Woodcock en pti pwen.

 

HON WAVEL WOODCOCK

Minis zis mon – si posib Mr Speaker mon ti a voudre ki Minis osi i fer en provizyon kou pri rental bann lofis ki zot pe lwe avek SCAA, akoz nou pe ganny lenformasyon ki i annan bann pri ki’n ganny inflate la dernyerman par SCAA.  So nou ti a kontan ganny kou rental pou tou sa ban lofis SCAA sirtou lo Airport Amitie Grand Anse Praslin.  Mersi.

 

MR SPEAKER

Bon, savedir Minis as much as possible ou anmenn bann dokiman, bann Kontra ki Air Seychelles in antre ladan avek diferan partner pou Manm Lasanble ganny sa lenformasyon.  So Minis mon ava zis donn ou en parol. En parol final e parey desizyon in ganny pran mon pou pran desizyon anba Standing Order 95 pou nou anvoy sa deba pou Mardi prosen.  Antretan ou ava provide Lasanble avek bann dokiman neseser e parey mon’n dir Mardi prosen mardi apre midi ou ava retournen pou reponn bann kestyon bann Manm.  Minister.

 

MINISTER MAURICE LOUSTAU-LALANNE

Mersi Mr Speaker.  Mr Speaker i pa mon lentansyon pou al kont en desizyon.  Me mon santi i annan bokou lemosyon.  I vre ki mon ti dir dernyen fwa ki sa Kontra avek Etihad i annan en non-disclosure clause ladan e nou bezwen demann zot, zot permisyon avan nou disclose.  Bomaten mon’n- e nou’n deza fer sa request.  Bomaten mon’n ganny enformen par Clerk konmkwa fodre mon anmenn sa Kontra.  Mon annan sa Kontra e toudswit nou’n re demann ofisyelman, formelman avek Etihad pou nou release sa Kontra.

Donk, pou le moman ou’n donn mwan en dele ziska Mardi prosen mon sipoze between now and then nou a’n ganny en konfirmasyon avek Etihad pou nobou release sa Kontra.  Sa i premye remark Mr Speaker.  Mon krwar sa prosesis, e kan nou ava debat Mardi prosen nou ava ganny li pli kler.  Sa ki mon’n dir se ki sa premye round diskisyon ki Air Seychelles in fer avek tou son bann Departmental Heads ek travayer, kot in eksplik rezon det sa restriktirasyon sa bann diskisyon in  pas byen.

So se sa ki mon ti dir, kekfwa in ganny mal enterprete.  In ganny demande pou klarifye, mon’n klarifye.  Lot kestyon se mon pare efektivman pou anmenn sa bann detay ki zot pe rode.

Mon annan en pe mon napa tou donk i a permet mwan pou anmennen e mon kapab osi dir avek Onorab Woodcock ki pri ki SCAA i sarz Air Seychelles pou le moman se R150 en met kare.  Be mon ava vini avek plis lenformasyon pli tar.  So Mr Speaker vwala si oule sa ki mon kapab dir pou le moman.  Nou pa ankor ariv lo en desizyon final, akoz Air Seychelles i bezwen apartir ozordi koz avek sak sa travayer ki pe ganny afekte.  Son CEO, son Human Resource Manager, son Line Manager e li menm, i pou ganny en diskisyon, en konsiltasyon ant Management ek sa dimoun.  E la i pou ganny dir akoz e sa kriter ki’n ganny servi i pou ganny eksplike.  I pou ganny eksplik son package.  Si i pa dakor i ava fer son pwen.  I a pran lot i ava kontinyen ziska i ariv 202.  Ver milye Avril sete sa plan, kot ozordi apre tou sa bann diskisyon ver milye a
Avril Air Seychelles i a sezi ofisyelman notifye Minister Lanplwa lala sa ki in fer e demann parey Onorab in eksplike demann lotorizasyon Minister Lanplwa pou fer sa redundancy.

E parey ou konnen Lalwa osi i dir en fwa ki Minis in donn son aprobasyon i annan en serten dele letan kot Air Seychelles i bezwen enplimant sa desizyon vis-a-vis  son travayer ki ganny afekte.  E son peyman osi i bezwen ganny fer en serten dele letan.  Se pou kwa Mr Speaker mon’n dir ki dan Avril, Me, akoz nou’n donn apepre 30 zour sa negosyasyon ant – soumisyon formel ofisyel notifikasyon kot Minister Lanplwa pou ganny larepons.  So i pa en keksoz ki’n rubber stamp ki nou’n pran en desizyon; se la sezisman Air Seychelles e son staff ki pe diskit sa.  Nou’n fer premye faz e la nou pe antre dezyenm faz.  Pou Air Seychelles pe antre dezyenm faz pou enterakte direkteman avek sakenn sa 202 dimoun ki’n ganny afekte.  Mersi Mr Speaker.

 

MR SPEAKER

Mersi Minis.  Mon pou pran ankor de pti komanter lo sak kote apre mon pou pran desizyon final.  Onorab Bernard Georges.

 

HON BERNARD GEORGES

Mersi Mr Speaker.  Mr Speaker mwan mon annan en pwen klarifikasyon pou demann Minis.  Minis i dir nou i pa kapab donn  nou en kopi sa Kontra fodre i al demann permisyon.  Mon en pti pe sirprann.  Mon mazinen nou pe demann permisyon ek Etihad.  Be si nou, nou annan 60poursan dan sa deal e Etihad i annan 40 depi kan ki gran frer i demann permisyon ek pri frer.  Premye fwa dan mon lavi mon vwar sa.  E si, e si sa Kontra i dir zis sa 2 parti ki pou lir sa Kontra e zot pa pou montre li en trwazyenm parti mon ti a kontan rapel Minis ki Lasanble i Gouvernman li i  en parti Gouvernman i annan 3 Brans nou, nou enn, e nou en parti dan sa Kontra.  Alor nou pa bezwen demann personn permisyon. Lir sa Kontra etandonnen ki nou, nou en brans Gouvernman ki en parti dan sa Kontra.  Mersi Onorab Georges. Onorab Andre.

 

HON CLIFFORD ANDRE

Mr Speaker mwan mon ti demann Minis an vi ki depi Zen lannen pase nou’n demann en kopi sa Kontra e la ozordi nou Mardi pou Mardi prosen eski i krwar si nou’n pas 9 mwan aprezan nou pou gannyen dan en semenn?  Nef mwan nou pa’n ganny en repons nou pou gannyen dan en semenn.  Akoz nou pa le vini Mardi pou nou ganny sa kopi Mardi bomaten kot en kopi en Kontra 100 paz parey sa enn kot nou pa ankor ni lir.  Nou le ganny li avan Mardi pou nou kapab pas lo la diskite nou osi, vwar en solisyon pou sa bann problenm oubyen annan kestyon enformen dan sa konteks.  Mersi.

 

MR SPEAKER

Right.  Onorab Afif.

 

HON AHMED AFIF

Mersi Mr Speaker.  Mr Speaker mon ti a kontan zis fer en konparezon avek sa sityasyon ek Irish.  I paret sa zafer Kontra i konmans vin en pe parey.  I ti pas en fwa nou demande Minis i vini, tournen.  Tourn dezyenm fwa e la dan ou ka i dezyenm fwa ou vini Kontra napa.  La ou pou tourn trwazyenm fwa pou ganny Kontra.  Eski i en Kontra parey Irish?  Nou louvraz konman Lasanble Nasyonal se oversight. Ki mannyer ou kapab fer oversight nou pe siperviz sa bann loperasyon Gouvernman.  Ki mannyer zot ekspekte nou siperviz dan en latmosfer kot zot anvi annan latransparans, kot zot pou pran dokiman zot pou kasyet.  Prezan nou, nou sipoze sey fer en pe guess work pou konnen ki annan ladan pou gete si i rezonnab si pa rezonnab.  Sa latitid pa akseptab dan sa Lasanble Nasyonal.

Nou devret ganny dokiman ki nou demande pou nou etabli si i zis ou i pa zis, parske nou annan 200 travayer Seselwa ki pe al perdi zot job probableman akoz en Kontra ki pa bon e nou, nou pa kapab dir nanryen ladan. E mon vwar sa pozisyon i pa akseptab; nou ensiste ki Gouvernman i vin avek sa Kontra, i met devan nou napa nanryen pou kasyet, i pa en zafer militer.  I pa en zafer militer sa napa sekirite pei at stake la.  Anmenn sa Kontra i annan zis bann deal finansyel ladan.  Nou annan en problenm finansyel nou pe perdi  larzan depi 2012.

Tou le lannen kantmenm zot in claim profi nou pe run loss.  Omwen 7, 8 milyon Dolar loss tou le lannen e la zot vini zot dir ek nou zot pa kapab eksplik nou akoz nou pe run en loss.  I pa akseptab Mr. Speaker.  I enportan nou ganny sa Kontra e pli vit, mon konnen zot kapab anmenn sa ozordi menm. Parski zot annan en kopi zot.  Anmennen selman nou’n dakor pou en semenn, anmenn sa Kontra nou ava etabli pozisyon nou a kapab dan en pli bon pozisyon pou nou fer nou louvraz oversight.  Mersi Mr Speaker.

 

MR SPEAKER

Mersi Onorab Afif.  Onorab Ramkalawan.

 

HON WAVEL RAMKALAWAN

Mr Speaker mon ti ava kontan remind Minis ki poudir anba Konstitisyon e la nou pe koz Sesel e lo Lalwa Siprenm se nou Konstitisyon.  Anba Lartik 104 kot i koz lo formasyon bann Komite dan Lasanble.  I donn bann Komite 104 (3), i donn en Komite Lasanble e pa bliye ki poudir en Komite Lasanble i ganny nesans atraver Lasanble. Lasanble ki donn li nesans savedir Lasanble i annan menm pouvwar.  E i donn li mon ava lir 104(3).  For the purposes of effectively performing its functions a standing or other committee – nou kapab osi met konman the National Assembly, may summon any person the committee believes may assist the committee in the performance of its functions and the committee shall have the power, rights and privileges of the Supreme Court for – la (b) compelling the production of documents.

Savedir Lasanble nou kapab fer li nou konman en Lasanble pou demann dokiman e anba Konstitisyon nou annan sa power pou nou fer li egzakteman parey Supreme Court i kapab fer li oubyen dan en fason tre senp nou kapab- Lasanble i kapab la konmela menm donn sa responsabilite FPAC, FPAC i call en meeting e i demann sa dokiman.  Napa nanryen pou al demann Etihad la!  Lasanble Nasyonal i fer sa e Mr Speaker zis pou ed Minis dan sa refleksyon nou’n fer li avek Barclays Bank.

Nou’n fer li avek ban labank pourtan bann labank ki anba financial regulations, zot annan drwa konfidansyalite pou bann – dan sa envestigasyon FIU, NDEA ki nou pe fer.  Nou’n bezwen dir avek labank anba 104(3) we are giving you an OrderWe are compelling you pou anmenn bann dokiman.  Alor mon pe dir sa Mr Speaker senpleman pou dir avek Minis ki Lasanble Nasyonal i annan sa pouvwar e se pa okenn lezot- okenn lezot body an deor Lasanble Nasyonal ki pou dir wi oubyen non si Lasanble Nasyonal i demande zot annan lobligasyon pou zot anmenn li.  Alor mon krwar ki napa nanryen pou al demann Etihad.  Sa ki Lasanble pe demande nou bezwen – Gouvernman i annan sa lobligasyon pou li donn nou sa bann dokiman.  Mon ti anvi zis met sa pou klarifye sa so that Etihad pa dir- okenn bann clauses, non-disclosure clauses ensidswit i pa marse anba 104 parski anba 104 sa ki nou demande nou devret gannyen menm parey I’m sure Mr Speaker, Minis i konnen menm Lagreman Assomption ti en full military Lagreman si Lasanble i demande i pou bezwen vin la devan nou.  Mersi bokou.

 

MR SPEAKER

Mersi Onorab Ramkalawan.  Onorab De Commarmond.

 

HON CHARLES DE COMMARMOND

Mr Speaker dan menm direksyon e fodre ki L’Egzekitiv for that matter i konpran nou pa pe fer, nou pa pe ni fer keksoz an plis nou.  Konmsi nou pa pe fer ni bay ni nanryen.  I dan tou nou responsabilite ki nou pe demann sa ban keksoz akoz nou osi nou bezwen dan nou responsabilite fer ki sa ki arive dan pei la, i annan sa latransparans, i annan  sa rann kont e osi i ganny fer byen dan fason korek.

E ou vwar zis pou reflesir de pti keksoz ler nou dan Sesel ozordi.  Pran Mahe, Praslin. Mahe Praslin la pe demann plis flight akoz ou al ganny en pasaz avyon fodre ou’n plas ou order mon krwar depi de zour avan.  E la nou vwar poudir pe dir olye 6 avyon enn pou ganny vann pou annan mwens savedir pou annan plis problenm ankor.  Ou vwar Minis in mansyonnen taler bann long haul flight ki ti annan Airbus 30 pou al an Chine li i pe pran avyon Sesel Sinwan in demann li avyon pou fer sa – rod kliyan answit charter pou ganny kliyan an Chine nou pran avyon nou vann ek Fiji.  

Fiji i menm zistans avek La Chine ek nou laba li prezan i pou al benefisye lo nou by the time ki nou, nou pou al ganny Kontra be nou’n fini perdi tou sa bann kliyantel ensidswit.  Akoz dapre dir nou, nou pa pou kapab host sa bann kliyan ki pou vini sa bann touris ki pou vini.  Be kote ki ti annan tou sa.  Mon krwar lefe ki touris pe ogmante dan nou pei nou devret kontan, rod fason diskite ek lotel ensidswit pou nou kapab ganny plis envestisman, plis touris en fason nou pei i a progres pli byen.

Nou pe koz lo foreign exchange.  Plis foreign exchange i ava antre.  En fason i a ede pou fer desann pri lavi.  Mwan mon pa konpran tou sa bann keksoz ki mannyer i pe kontradi kanmarad.  So i enportan ki nou vwar lesansyel the Contract pou ki nou kapab from there vwar kote nou kapab ansanm maneuver pou nou kapab ed nou Air Seychelles, akoz nou pep i ankor kontan son Air Seychelles e vwar ki mannyer mazorite son travayer lokal sirtou i reste avek lakonpannyen.  Mersi.

 

MR SPEAKER

Bon.  Mon pou al pran desizyon final.  Ou le entervenir Onorab Ramkalawan?

 

HON WAVEL RAMKALAWAN

Mr Speaker pou fer keksoz bokou pli fasil mon anvi move ki nou Lasanble i konverti son lekor dan en Komite e once ki nou konverti nou lekor dan en Komite nou compel the Minister to, parski in dir avek nou poudir i annan kopi sa bann Kontra.  Nou konverti nou lekor dan en Komite e nou – e nou demann Minis pou prodwi tou bann dokiman, la i 3.30 i bon ler pou nou kapab pran en Break epi 4er Minis i retournen avek  bann dokiman e nou konmans nou travay.

 

MR SPEAKER

Eski zot pou annan ase leta pou go through sa bann dokiman?  Eski zot pou annan ase letan pou go through bann dokiman?  Nou kapab konmanse.  Ok.  I annan en Mosyon ki’n ganny prezante, ok.  Onorab Andre i segonde.  Ok?  Bon nou ava pran, nou ava pran en vot pou Mosyon.  Se ki Lasanble i turn itself into en Komite.  E pou nou kapab kontinyen nou travay.

Tou Manm ki an faver?  Okenn Manm ki kont?

Ok?  Bon rezilta i inanim, tou Manm – Madam Clerk konbyen Manm nou annan la?

 

MADAM CLERK

Mr Speaker 29 Manm an faver.  Mersi.

 

MR SPEAKER

Bon Mosyon in ganny pase.  Eski zot le nou pran en Break?  Ok.  Wi.

 

HON WAVEL RAMKALAWAN

Deswit Mr Speaker mon demande ki Minis letan nou repran 4er  i anmenn tou bann dokiman ki nou’n demande Kontra avek Etihad, IBM Contract, SABER Contract, bann Kontra avek SCAA,  avek Eden Island, avek la osi kot zot, kot zot ti pe lwe e ki ti napa personn.  Ki mannyer i apele, Surya?

 

HON AHMED AFIF

Yes.

 

HON WAVEL RAMKALAWAN

E ki nou ganny tou sa bann dokiman dan nou lanmen letan nou repran dan 30 minit.  Mersi bokou.

 

MR SPEAKER

Bon les nou ava bouz mes pou Staz Komite.  Bon Minis ou annan dele letan mon krwar ou deza annan serten dokiman avek ou akoz Lofis Clerk ti’n averti ou.  Mon ava donn ou laparol Minis apre nou ava bouze.  Yes Minister.

 

MINISTER MAURICE LOUSTAU-LALANNE

Mersi Mr Speaker.  Mr Speaker la avek mwan mon annan Kontra Etihad ki 14 paz apre i annan 2 paz en Schedule so i pa en gro dokiman.  Mon annan en sample Kontra lakaz avek Eden Island akoz Kontra ek Eden Island i diferan Kontra avek diferan propriyeter.  So mon annan en lekivalan la.

So nou kapab ganny sa bann toudswit.  Me lezot Kontra mon napa la. I pou vreman difisil pou mwan by 4er pou mon fer sir tou sa bann Kontra i isi.  Mr Speaker so si nou le tou sa bann Kontra pou nou konmans nou Committee Stage i pou en pe difisil pou mon provide li by 4er.  I’ll do my best be solman mon pa konnen how I’m going to do it.  Mersi.

 

 

MR SPEAKER

Bon mersi Minis.  Minis mon konpran.  From the Chair mon konpran en pti pe ou pozisyon me annou regarde nou’n turn the Assembly into a Committee pou nou kapab compel pou ganny sa bann dokiman.  Annou osi tou fer en pti pe zistis lo kote Minis avek son lekip ki nou a kapab ganny sa bann lenformasyon e prezant the right information to Members of the National Assembly.  Annou pran en desizyon akoz ankor mon’n ganny averti taler poudir zot annan en important Cabinet meeting demen e zot pa oule Minis i absante.  Eski nou mentenir nou retourn Mardi avek tou bann dokiman neseser me selman Minis i konmans fer nou ganny bann dokiman pour ki Manm i kapab konmans pas ladan e nou fer parey mon dir nou fer en pti pe zistis, nou donn li en pti pe letan pour ki Minis osi i ava prepar li pou reponn bann kestyon bann Manm.  Demen i annan Cabinet meeting.

 

HON CHARLES DE COMMARMOND

Mr Speaker demen i kapab donn nou bann dokiman by demen apre Mardi prosen…

 

MR SPEAKER

Mardi prosen i ava retournen.

 

HON WAVEL RAMKALAWAN

Antretan tou staff Air Seychelles napa personn ki perdi zot lanplwa.  Mersi.

 

MR SPEAKER

Alright.  Minister.  So ou a konmans provide bann dokiman si ou annan la avek ou kite pou nou fer kopi e par demen tou bann dokiman i ariv kot Lasanble.  Ou ava retournen Mardi prosen pour…nou ava kominik ek ou ler akoz bomaten i posib nou pou pran the whole morning pou – avek Minis Finans, Minis Dogley ek Minis Bastienne me probableman ou pou retourn dan apre midi.  Yes Onorab Ghislain.

 

HON CHANTAL GHISLAIN

Yes Mr Speaker.  Lefe ki Minis in dir i annan bann travayer pou konmans ganny zot let, by e-mail tanto eski i still ale la ouswa sa…

 

MR SPEAKER

Yes Minister.  Go ahead Minis.

 

MINISTER MAURICE LOUSTAU-LALANNE

Wi, parey.  Mersi Mr Speaker parey mon’n eksplike zot pe ganny notifye konmkwa zot lo lalis redundancy.  Me zot pou annan sa diskisyon enn lo enn kot zot pou ganny eksplike zot kapab dakor zot kapab pa dakor.  Ou konpran?  So Air Seychelles i le fer li koumsa.  Air Seychelles pa le al kot Minister Lanplwa ganny en Certificate of Approval pou li pous 202 dimoun apre ale al pouse.

Se pa sa lentansyon.  Lentansyon se eksplik restriktirasyon, koz ek sakenn sa bann anplwayer ki ganny afekte.  Apre ki in fer en rezimen i pou pran i pou anvoy laba.  So sa bann dimoun ki pou ganny enformen zis zot pou konnen. Me zot ankor kapab dir avek Air Seychelles mon pa dakor, sa redundancy ki ou pe propoze mon pa dakor e donk Air Seychelles i ankor pe dyaloge avek sa bann staff.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Be eski – sorry Mr Speaker ler i ganny fer redundancy eski Minis Lanplwa pa i bezwen konnen avan kantite bann dimoun ki pe ale pou zot kapab …konmsi la ou pe dir nou Air Seychelles zot pe fer pou zot en lot fason avek lezot Departman ouswa Minister, ouswa landrwa travay ki’n fer dan lepase kot Minister Lanplwa i ganny involve depi day one ziska i fini.

 

MR SPEAKER

Bon i annan en – mon krwar Onorab Valmont osi ki’n fer sa lapel taler ki Minis Lanplwa osi tou i akonpanny Minis Tourizm.  Mardi petet sa i ava en bon nide ki …  Onorab Arissol.

 

HON SANDY ARISSOL

Mr Speaker mersi.  Bonn apre midi Minis avek ou delegasyon.  Mr Speaker mwan mon ti a kontan fer en lot propozisyon avek respe pou nou 2 Leaders dan Lasanble Nasyonal.  Sityasyon ki nou pe koz lo la i en sityasyon irzan.  Nou pe koz 202 fanmir pou ganny met ater to ou tar e i annan en pe pou konmans ganny e-mail apartir tanto.  I annan fanmir ki pa pou kapab enjoy en bon Pak Dimans.

Alor sa ki mon pe dir si demen bomaten bann Minis zot annan zot pe zwenn avek Prezidan parey labitid.  Nou kot Lasanble nou zwenn.  Be Zedi bomaten nou pa kapab annan en sesyon spesyal pou nou deal ek sa problenm pou nou fini enn fwa avek sa pou ki bann travayer, bann fanmir enkli nou konman Manm Lasanble Nasyonal nou lespri i ava an pe avek sa bann zafer nou a konnen  kote nou bann travayer Seselwa i stand.  Olye letan lezot pe fer Pak zot, zot pa tro konnen ki zot pe fer. Mwan mon krwar i en sityasyon irzan!  Akoz nou pe anvoy li semenn prosen?  Nou pe koz vant Seselwa.  Mersi bokou.

 

MR SPEAKER

Bon i annan – i annan sa sizesyon osi tou ki eski sa bann e-mail i devret sorti la? Ok?   Ki sa bann travayer i bezwen ganny averti la ok.  Onorab De Commarmond.

 

HON CHARLES DE COMMARMOND

Mon pe dir mesaz i kler Mr Speaker.  Nou pe dir personn pa ganny met deor la ziska Mardi prosen sa zafer i a ganny vin devan nou.  Nou, nou ava diskite, nou ava vwar the way forward and then nou a konnen ki kalite desizyon a ganny pran.  Nou, nou pe dir la personn pa ganny touse, personn sa bann e-mail whatever la, i ganny hold e les keksoz marse normal ava anmenn bann keksoz dan Lasanble nou ava diskite a gete apre…

 

MR SPEAKER

Onorab Ramkalawan.

 

HON WAVEL RAMKALAWAN

Mr Speaker tou sa ki pe ganny dir zafer e-mail pe negosye ensidswit i annan en lot kote.  Ozordi 5er tou Cabin Crew pou konnen lekel ki pe ganny met deor.  Zot pou konnen atraver letan zot ganny zot roster.  Savedir desizyon in fini pran.  Desizyon in fini pran e fodre zot vin fran avek nou e pa zwe avek nou!  E nou se sa ki nou pe dir. Nou, nou ape dir ki sa prosesis deza i pa bon e mon’n ganny pou ou lenformasyon mon’n ganny sa avek en Cabin Manager ki’n anvoy mwan en mesaz mon pa ti realiz sa ki poudir tanto 5er zot tou zot pou konnen.

Tou Cabin Crew pou konnen.  Be ki negosyasyon ou pe fer avek li kan ou’n fini met li deor.  E apre sa negosyasyon avek Lanplwa be Lanplwa i konplis ladan in fini stanpe e sa Minis fodre i aksepte avek nou.  Lanplwa in fini stanpe, tou keksoz in fini konnen parski ki mannyer ou konnen ki poudir i annan 202?  I bezwen ki ou’n fini pran en desizyon.

 

MR SPEAKER

Bon ok mersi Onorab Ramkalawan.  Onorab Pillay apre Onorab Andre, apre nou ava pran en desizyon.

 

HON SEBASTIEN PILLAY

Mersi Mr Speaker.  Mr Speaker mon krwar solisyon i kler pou nou kapab bouz devan ek sa size pou nou kapab pran li dan en fason kot nou ganny tou bann lenformasyon, akoz pa bliye poudir nou annan Zedi apre Zedi i annan Vandredi Sen personn pa bezwen ni konze piblik, apre Pak.  So letan nou pe repran sa size nou pou napa bokou letan pou nou enterakte avek dimoun akoz nou perdi letan.

So i kler ki sa ki pe ganny demande se ki okenn desizyon ki zot pe pran, okenn aksyon ki pe ganny pran pou le moman nou pe fer en pledwari avek zot hold-off, les nou konman reprezantan lepep, konman reprezantan bann dimoun ki pe text nou, ki pe e-mail nou, ki pe koz ek nou ganny en sans pou regard sa size pou vwar si sa bann konsern ki sa bann dimoun osi pe anmennen, akoz i pa en dimoun la.  I pa 2 dimoun ni 3 dimoun i 202 dimoun.  E 202 dimoun si ou diviz li par 4 konbyen i fer?  

So i annan en kantite dimoun ki pe ganny afekte par sa sityasyon ki nou bezwen zisteman pran letan pou nou kapab gete.  So mon ti a kontan si nou kapab ganny sa morso kler la then nou kapab move avek propozisyon orizinal pou nou konsider item Mardi kot nou ava ganny letan dan weekend pou konsider – ganny bann lenformasyon tou bann keksoz ki vin devan nou.  Mersi Mr Speaker.

 

MR SPEAKER

Bon Minister juste tre pasyan en pti moman.  Be patient.  Mon annan Onorab Andre avek dernyen Onorab Simon Gill apre mon pou pran desizyon.  Onorab Clifford Andre.

 

HON CLIFFORD ANDRE

Mersi Mr Speaker.  Mr Speaker avek tou respe mon krwar Minis in mal gid nou Lasanble akoz Lalwa Employment Act Seksyon 51 i dir i oblize i egzize ki poudir i bezwen annan en aprouvasyon Minister Lanplwa pou okenn redundancy.  So pou dir nou ki Air Seychelles i oule fer li en zafer amikal – savedir ou pe volonterman dir ek sa boug li resign oubyen ou ale.  So si mon’n mal konpran Minis i ava eksplik nou.  So mon ti a kontan ki nou ganny leklersisman lo sa size, akoz i en keksoz ki mon santi nou pe ganny mal gide.  Mersi.

 

MR SPEAKER

Mersi Onorab Andre.  Dernyen Onorab Simon Gill.

 

HON SIMON GILL

Mersi Mr Speaker.  Bonn apre midi Minis ek ou lekip.  Mon ti le zis rod enn de leklersisman ki Minis a kapab donn nou akoz sa nou  pa bezwen dokiman bann leklersisman ki mon ti a voudre gannyen.  No. 1, eski i korek ki i annan en desizyon ki Management Air Seychelles enkli ou Minis avek ou lekip in pran pou fer redundancy 201 travayer anler – 202 travayer?  Sa i premye keksoz.

Ti ava voudre nou ganny sa leklersisman byen annord.  Ler ou fini donn nou repons si ou pou dir nou ki non zot pa ankor pran desizyon, pa ankor finalize mon pe ranforsi en pwen ki’n ganny fer sorti pli boner ki nou met tou sa process on hold!  Mon ava donn ou sa posibilite atraver ou Mr Speaker, Minis i eklersi sa pou nou kapab bouz lo en lot level dan sa sityasyon la apre midi.  Mersi bokou.

 

MR SPEAKER

Mersi Onorab Simon Gill.  Minister.

 

MINISTER MAURICE LOUSTAU-LALANNE

Wi mersi Mr Speaker.   Mr Speaker parey mon’n eksplike sa demars ki Air Seychelles pe antreprann i pe swiv Lalwa.  I pa pe kas Lalwa.  Parey mon’n dir orizinalman plan ti pou konmans sa bann diskisyon one to one avek en lekip 4 dimoun dan Management Air Seychelles avek sa anplwayer Air Seychelles ki pe ganny afekte apartir le 3 Avri.  Letan sa ti ganny eksplike en group Cabin Crew ti prefere ki zot ganny enformen by e-mail plizoumwen imedyatman e se akoz sa ki ozordi apre midi serten anfen tou sa Cabin Crew sa 113 Cabin Crew lo zot e-mail zot a konnen si zot – ki zot pou nepli ganny konsidere e zot pou dan sa redundancy.

Me, parey mon’n eksplike zot pe ganny notifye personn pa pe ganny pouse.  Personn pa pe ganny met deor la!  Akoz en fwa ki in fini fer sa bann konsiltasyon, se la ki Air Seychelles pou ekrir son Let Ofisyel pou notifye Minis Lanplwa dapre sa Lartik ki ou’n quote pou dir li vwala sa ki nou, nou le fer.  Prezan i esper larepons Minis ki normalman i kapab 14 zour, me nou dan sa planning Air Seychelles in met 30 zour.

E si nou kontinyen, mon pa le kree plis konfizyon, si nou kontinyen lo sa laliny planning nou pe dir ki dan milye Me kot nou kapab ganny larepons sorti kot Minister Lanplwa ki konfirmen ‘’wi ale’’ oubyen ‘’non pa ale.’’  Pou annan en diskisyon la.

E donk travayer prezan pou konmans kit sa bann ki i le kite pli boner akoz zot in ganny en lot louvraz zot kapab al pli boner se sa ki mon’n dir pli boner dan mon Statement.  Me osi si zot le  reste ziska lafen zot pou konmans ale an Zen.  Lafen Me an Zen.  Ou vwar akoz letan Minis i donn son larepons nou annan nou 72erdtan pou nou dir avek sa anplwayer a sa moman la ki ou, ou lo lalis redundancy.   E redundancy package ou pou ganny ou nou a kalkil tan larzan ou pe ale.  E dan 7 zour nou bezwen pou nobou pey li.

Donk lala son sekans legal par Lalwa.  Nou pa pe kas Lalwa.  So sa zafer e-mail si zot santi fodre pa ki nou fer li koumsa nou ava esper ziska le 3 Avril.  Apre Pak e tou fason mon ava’n retourn isi pou mwan anmenn tou sa bann dokiman pou nou dan Komite Stage e debat plis an detay lo sa sityasyon regretab.  Mersi Mr Speaker.

 

MR SPEAKER

Mersi Minis.  Annou pa – ou pa pe al ouver deba ankor.  Ale met ou mic– met ou mic.

 

HON SIMON GILL

Direksyon kot nou pe ale i byen.  So Minis in dir nou dan son leksplikasyon ki in donnen i annan en posibilite reel ki sa 202 staff ki’n e-mark pou bouze ler ou’n fini fer sa prosedir, reelman i riske ki  zis 50 poursan ladan ki ale?  Dapre ou proze restriktirasyon.  Ki lenpak ki sa pou annan dan konteks ou restriktirasyon.  Eski nou’n ganny nou byen la.  Akoz sa ki ou pe dir la ou pe ouver en lespas pou nou dir ou ki si ou pe al negosye e ki si sa bann staff ozordi i pe dir ou non mon pa dakor avek sa desizyon ki ou pe pran – mon pou stay put e ki ou, ou fer?  ki ou, ou fer?

Ou vwar so annou get sa byen.  So probableman i meyer se sa nou pe dir i meyer ki annou tenir avek tou zafer.  Annou met tou keksoz annord.  Ou fer ou interview trankil, ou pa bezwen anvoy okenn let kot personn.  Ou koz avek sa bann staff epi baze lo bann repons ki ou gannyen la ou fer en soumisyon kot ou demann approval!   Wi be ou pa bouze pou ofisyaliz sa.  Se sa ki nou pe dir ou ou pa al ofisyalize.  Ou pa dir zot poudir ou, ou dan lalis redundancy.

 

MR SPEAKER

Bon.

 

HON SIMON GILL

Tyonbo tou keksoz la pou le moman. Pou pa kree plis konfizyon.

 

MR SPEAKER

Ok.  Mersi.

 

HON SIMON GILL

Mersi Onorab.

 

MR SPEAKER

Bon mon pa pou ouver deba ankor akoz en kestyon, en klarifikasyon i tant pou ouver laport ankor pou annan plis kestyon.  Nou’n pas en Mosyon pou al dan Staz Komite.  Prezan nou pa pe kapab kontinyen avek Staz Komite.  E i annan demann ki Minis i retournen.   I provide bann dokiman pandan la semenn la par demen e Minis i retournen Mardi prosen.  So eski mon demande ki nou retourn dan nou Lasanble en Mosyon pou – oubyen nou retourn otomatikman dan nou – Onorab Pillay.

 

HON SEBASTIEN PILLAY

Mr Speaker Standing Order i en pti pe …li lo la me selman en keksoz ki i dir ou ki vi ki mou panse ki Onorab Ramkalawan ki’n move Mosyon pou nou move dan Staz Komite, ki i ava fer move en Mosyon pou nou sorti dan Staz Komite e ask ou leave pou nou retourn dan Staz Komite Mardi kot nou ava kontiny deba.  And then prezan en dimoun i ava segonde e nou ava pran desizyon lo la.   Mersi.

 

MR SPEAKER

Yes. Yes.  Ok.  Mersi.  Onorab Ramkalawan.

 

HON WAVEL RAMKALAWAN

Yes Mr Speaker – in fact se dan sa menm sa direksyon ki lefe ki Lasanble pa kapab adjourn konman en Komite, mon move ki nou retourn konman Lasanble, pou nou kapab adjourn e kontinyen avek  bann lezot biznes pandan ki nou ganny sa bann lezot dokiman e Mardi prosen nou, nou repran sa travay e pou nou – e an menm tan osi Mardi prosen mon krwar nou ava kapab determinen si nou pou kontiny nou travay konman  en komite oubyen si nou pou fer li konman en Lasanble.  Mersi bokou.

 

MR SPEAKER

Okenn Manm ki segonde.  Onorab Sebastien Pillay.

 

HON SEBASTIEN PILLAY

Mr Speaker mon pou segonn sa Mosyon.

 

MR SPEAKER

Bon nou ava pran en vot.

Tou Manm ki an faver ki nou retourn – nou rekonstitye konman en Lasanble?

Okenn Manm ki kont?

Madanm Clerk.

 

MADAM CLERK

Mr Speaker i 26 Manm ki’n vot an faver.  Mersi.

 

MR SPEAKER

Ok.  Sergeant ou kapab move Mace.  Bon avan nou pran Break mon ti a zis kontan eskiz Minis ek son delegasyon parmi nou.  E Minis mon krwar ou’n ganny tou bann lenformasyon.  Ou ava fer Lasanble ganny bann dokiman e Mardi prosen ou ava retourn devan Lasanble pou nou kapab kontinyen nou travay.  Mersi Minis.  Mersi Mr Albert e Mr Ally.

 

(MINISTER LOUSTAU-LALANNE AND HIS DELEGATION WAS EXCUSED FROM THE HOUSE)

 

MR SPEAKER

Bon i pres 4er nou ava pran en Break ziska 4.15.  Non, nou annan Mosyon akoz – pardon – Onorab …

 

(Mic Off)

 

MR SPEAKER

Non, non i depan, i depan lo zot i depan lo si zot le adjourn nou pou repran demen bomaten.

 

HON WAVEL RAMKALAWAN

Mr Speaker mon krwar ki parski ler ki mannyer i ete si nou pou al konmans en Mosyon, nou pou zis pe ekout sa Mosyon, epi nou pou ale.  Plito nou, plito nou pran Mosyon demen fresh e nou ava kapab kontinyen.  vi ki demen osi tou bann Minis pa pou kapab vini e alors nou ava…

 

MR SPEAKER

I pou pirman Mosyon.

 

HON WAVEL RAMKALAWAN

Selman i annan en keksoz ki Mr Speaker mon annan en pti lafreyer ek sa ki Onorab Gill in dir.  Ou konnen parfwa dimoun i kapab dir keksoz dan en fason profetik san realize.  Onorab Gill in dir 203 travayer ki pou ganny fer redundant, eski sa i en profesi dan li menm?  Mon a poz sa lanmenm.  Mersi bokou.

 

MR SPEAKER

Mon krwar, mon krwar in ganny – in konmans 201, in al 202 in fini 203.  Wi, yes.  Onorab.

 

HON JEAN-FRANCOIS FERRARI

Eleksyon ti ganny vote par 202 vot en.  Tousala i annan en?

 

(laughter) 

 

MR SPEAKER

Bon, bon desizyon alor se nou adjourn e nou repran nou travay demen 9 er bomaten.

 

HON WAVEL RAMKALAWAN

Mr Speaker mwan si mon ti Minis mon ti pou enkyet mon.  Mon pa ti pou dormi byen tanto.  Mersi bokou.

 

MR SPEAKER

Mersi.  Alor nou adjourn.  Nou a repran demen 9er bomaten.

 

(ADJOURNMENT)