Home » Verbatim » 2017 » Verbatim Report, The National Assembly Sitting, Wednesday 8th November, 2017

Verbatim Report, The National Assembly Sitting, Wednesday 8th November, 2017

NATIONAL ASSEMBLY OF SEYCHELLES

 

Wednesday 08th November, 2017

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou dimoun.  Bonzour tou bann koleg Onorab, tou dimoun ki pe ekout nou an deor Lasanble.  Ozordi nou pe ekspekte en group sorti Praslin ki pou vin ekout nou dan Lasanble, me malerezman zot in ganny zot en pti retar.  Me mon swet zot labyenveni ler zot antre.

Me petet anfet zot pe antre osi, nou a donn zot en pti moman pour settle down, pour relax.  Me petet avan ki nou swet zot labyenveni e zot in asize, mon krwar i enportan mon’n reflesir lo la – Mon krwar i enportan pour mwan pa konman Speaker, me koman en teacher parske ler ou’n vin en teacher ou reste en teacher; en Administrater Ledikasyon, akoz mon’n Direkter Polytechnic pour en pe lannen konman en ansyen PS ek Minis Ledikasyon silvouple welcome Onorab Minister, asize.  Petet avan mon kontinyen, mon ti an kontan swet labyenveni Minis ankor enn fwa pour pran par dan nou bann deliberasyon at least pour ekoute reaksyon bann Manm Lasanble lo sa kestyon Bidze ki ou’n prezante semenn pase. Nou ava kontiny nou bann reaksyon avek diferan Manm la ki zot tou zot in arive zot in swete bann frer ek ser ki’n koup kannal sorti Praslin pou vin ariv kot nou ozordi.  Nou ti ava kontan swet zot labyenveni pa zis Mahe, me Lasanble Nasyonal.  E mon ti a kontan swet a tou partikilye en byenveni spesyal pour Doctor Shelton Jolicoeur – ki li i ti zot ti ava rapel en Deputy Speaker dan en Lasanble avan ki mon aprann zanmen in ganny sans pour vwar sa nouvo Lasanble.

Be la ozordi Dr Jolicoeur ou pa zis war nouvo Lasanble ou a vwar nouvo figir dan Lasanble bann zenn, zenn dimoun dan Lasanble. Alor nou ti ava kontan swet zot labyenveni, e espere zot a pas en bon letan kot zot ava ganny sans pandan pause dite bomaten enterakte avek bann Leaders bann MNA e avek Speaker li menm li.

Avan nou kontiny lo nou travay ki nou’n konmanse depi yer, mon ti a kontan kontinyen avek en Statement ki mwan mon ti a kontan fer.  Parey mon’n dir i difisil pouse parol koman Speaker, konman en sitwayen prive.  Me ozordi sa detrwa mo ki mon oule dir se, mon pe koz konman en ansenyan.  E parey mon dir enn fwa en ansenyan ou touzour reste en ansenyan.  E i annan diferan dimoun dan sa Lasanble ki konmela zot politisyen – zot MNA, ki zot osi zot ankor ansenyan.

E mon krwar sa ki’n arive – sa ki nou’n vwar e sa ki nou’n tande ki’n arrive yer, dan lekol Mont Fleuri avek lekol La Rivière Anglaise, i tre, tre serye.  Pour mwan konman en ansenyan – konman en paran, mon retourn lo parol per Lonnie Adrienne ler i ti pe fer son Omeli, pandan defen Simon Esparon, i kler ki nou pe ariv dan en leta.  Si nou pa aret li la pa demen, si nou pa aret li la nou pe ariv dan en leta lawlessness, kot nou nepli kapab kontrol nou zanfan. Mwan sa preski 3 deseni ki mon’n travay dan Ledikasyon, zanmen mon ti krwar dan mon lavi avan mon mor ki mon ti vwar en fanmir – pa en endividi, en fanmir vin atak en ansenyan ki’n donn son lavi 26an i a pe fer lekol.

Zanmen mon ti krwar mon pour vwar dan en laklas en zanfan fer Petar Ton dan laklas.  Nou koz lo Drwa Zanfan, me oli drwa lezot zanfan?  Drwa sak endividi i aret –o-bor nennen sa lot dimoun ki o-bor li ki annan son drwa.  Si ou, ou pa anvi fer aprann, ou pa anvi reste dan lekol i annan sa 30 lezot oubyen sa 29 lezot ki annan en drwa pour ledikasyon.  Mon senpatiz avek Dr De Commarmond, me mon sirpriz – mon dir sa byen kler e byen for konman en teacher en past Minis ek en past PS; ki zis Dr De Commarmond ki’n nobou kapab koze pour dir i kondann sa kalite aksyon.  Nou pa devret zis kondann sa kalite aksyon, nou devret pran aksyon kont aksyon.  Pour mwan konman en ansyen Minis ek en ansyen PS sa de manrmay i devret ganny expelled straight away.  E ler mon dir expelled anvoy zot deor lekol – pa pour retournen ziska ler zot in montre ki zot annan remorse.  Ki zot fer community work, zot i vin netway sa lekol, toulezour anba sipervizyon swa probasyon swa Lapolis.  E sa bann dimoun paran ki’n fer sa i devret annan en ka Lapolis, parske sa i greediest body harm.  Anba Education Act – anba tou kalite Act lalwa i la, pour protez bann sitwayen ki a pe protez bann zenn.  E nou konman en Lasanble, nou pa kapab reste trankil pa dir nanryen.  Nou bezwen koze pour dir nou bezwen siport nou teachers.  San nou teachers ki pe devoue, bann zanfan ki le aprann, bann paran ki le zot zanfan aprann pa pou vinabou arive ganny en ledikasyon ki nou, nou’n gannyen.  E mwan mon pa zis kondann parey Dr De Commarmond in dir , kondann sa aksyon, mon demann aksyon sorti from the highest level in the land pour kondannen e pran aksyon ki demen i pa ariv ankor.

Sa Lapolis ki egziste i devret annan sarz kont sa bann adilt e fast track zot sarz ki arive, nou fer legzanp sa bann dimoun pour montre zot pou dir nou pa pe aksepte sa kalite konportman dan nou lekol.   Konbyen lannen nou pou kontinyen nanryen fer zis ekoute, zis dir nou regret sa bann aksyon?  Konbyen lannen nou pou les nou bann zanfan kontinyen ziska ki nou ariv kot presipis? Mon demann Gouvernman – koman Speaker – konman en ansyen Minis Ledikasyon, konman en ansyen PS, konman en ansenyan, ou pour fer kler ki kalite aksyon nou pe pran.  Parske sankwa parey per Lonnie ti dir nou pe ariv pa zis dan en leta lawlessness me sa ki pli pir ankor nou pou ariv dan leta Anarchie.  L’Anarchie mon frer ek ser Seselwa se kan ou perdi kontrol; Gouvernman napa kontrol lo popilasyon, popilasyon i fer sa ki i le e parey Franse i dir; ‘‘en ce qui concern la socièté ca va dans toutes les directions.’’ Fodre nou aret li la.

Si nou pa aret li la nou pou perdi kontrol. E nou dan Lasanble, nou bezwen siport tou dimoun dan Ledikasyon, tou bann ansenyan, pou fer sir ki nou protez zot kont bann tel atrosite.  Ou pa kapab sorti se ou pou vin fer lekol apre 26an annan en fractured skull avek 8 pwen zegwir, kan ou’n vini pe ed zanfan lekol.  Vwala mon Statement ki mon oule fer. Mon konnen ki pou dir Speaker i la pour kontrol Lasanble, me la pa enplik zis Speaker, avek Lezislatif.  I konsern tou Seselwa, tou paran, tou zenn.  Onorab De Commarmond ou anvi pran laparol.

 

HON CHARLES DE COMMARMOND

Mersi Mr Speaker.  Bonzour Minis, bonzour Mr Speaker, bonzour Minis ek ou delegasyon bonzour tou Manm Lasanble e tou bann envite isi spesyalman nou Deputy Speaker avan – Dr Jolicoeur.

Mr Speaker, mon zwenn avek ou zisteman pour kondann severman lo nou kote mon krwar Lasanble antye sa aksyon ki’n arive dan nou bann lekol.  I annan Lekol Segonder Mont Fleuri, lekol La Rivière Anglaise, ou’n nonmen e osi i annan en serten aksyon ki’n arive Lekol Primer Mont Fleuri.  Tou sa i montre i sityasyon – e mwan konman en former teacher, parey ou mon’n train anba ou lanmen e mon pour dir ki parey ou’n dir nou la mwan mon osi mon kondann severman sa e mon senpatiz avek Minister Ledikasyon.  Sa bann keksoz koumsa pa devret arive dan lekol e pa devret zanmen arive.  E se sa rezon letan mwan mon ti en teacher letan sa Lalwa ti vini, zanmen mwan mon’n met li an pratik.  Toultan mon roten ti ek mwan, e mon pa’n zanmen met mon roten ater ler mon ti pe ansarz mon bann laklas.

E mwan mon demande ki tou sa bann Lalwa, i ganny revwar – sa bann sityasyon dan lekol i ganny revwar e si fodre nou konpran nou bann norm enternasyonal bann Konvansyon ki nou’n sinyen.  Me parey ou dir ou liberte pa kapab afekte sa ki pour mwan. Ou krwar ou, ou kapab fer mannyer ou anvi.  E se sa rezon yer dan mon koze, mon’n koz ek sa tel kalite ton pour ki nou met en lord dan nou pei enn fwa pour tou.  Pa pou kapab kontinyen ek sa kalite dekadans kot nou pe ale.  E mwan mon siport ou dan ki ou’n dir nou Lasanble antye i lans en mesaz serye – en mesaz for e nou, nou bezwen siport nou bann teachers nou pe fight en kantite pour zot.  E an menm tan bann paran i bezwen konpran sa sityasyon. E nou demande ki aksyon apropriye serye i ganny pran pour vin en deterrent pour leres; pa devret ariv ankor sa kalite keksoz koumsa sansan sak paran i avan pran son piti i ava fer son lekol li menm.  Nou vreman severman kondann sa e nou senpatiz avek Minister Ledikasyon e fanmir sa teacher ki’n ganny afekte son fanmir osi, e bann zanfan. I annan ankor lezot ensidan ki parey mon dir, i annan lezot zanfan ki’n atak lezot zanfan dan lekol, dan primer sa pe arive pa devret pe arive.  Nou demann lord ek disiplin serye, teachers osi nou devret donn li sa sipor, pour li pran kontrol son lekol en si son Headteacher pour ki sa bann keksoz pa arive. Nou osi parey dimoun in antoure lo teacher nou osi nou bezwen antoure pou fer sir ki sa bann keksoz pa ariv ankor.  Mersi.

 

MR SPEAKER

Mersi Onorab De Commarmond.  Onorab Afif apre Onorab William.

 

HON AHMED AFIF

Mersi Mr Speaker.  Bonzour tou dimoun.  Mr Speaker dan labsans Leader Lopozisyon permet mwan lo kote pour sa kote latab pour nou egalman eksprim fortman nou mekontantman.  Pour nou kondann sa kalite aksyon e pour nou parey ou demande ki aksyon i ganny pran kont sa bann dimoun ki’n fer ditor serten lezot dimoun, enkli ansenyan dan en lekol.  Sa pour nou pa akseptab nou dan Sekter Ledikasyon.  Sa i en siny poudir nou annan en problenm an se ki konsern sekirite dan pei.  Nou annan en problenm an sa ki konsern kiltir; an se ki konsern gouvernans dan pei.  Mon krwar si pa adres li dan en fason sistematik, dan en fason imedyat, i pou en move direksyon dan lakel sa pei pou plonze.   Alor lo lapar lo sa kote latab, mon ti a kontan senpatiz avek sa teacher sertennman; senpatiz avek Ladministrasyon Lekol.  Mon osi senpatiz avek Ladministrasyon Ledikasyon an zeneral.  Me selman nou pa kapab zis senpatize, nou bezwen zwenn ansanm zot bezwen kapab fer serten aksyon ansanm ek Lapolis ek tou Lotorite konsernen, pou fer siny i pa ariv ankor.  E sa i bezwen ganny fer toudswit, pour ki mesaz i kler pour popilasyon antye.  Mersi Mr Speaker.

 

MR SPEAKER

Onorab William.

 

HON WAVEN WILLIAM

Mersi Mr Speaker.  Mr Speaker mon osi mon zwenn avek ou.  Me selman mon ti ava demande ki apard ki ou fer sa demann ou anvoy let ofisyel to that effect.  E lot konsern Mr Speaker se ki yer swar nou antann bann touris ki’n ganny atake e ou’n antann osi bann progranm, bann kot bann fanmir pe konplent vizavi sityasyon ensekirite, vol ki pe arive.  Mwan mon demande ki aksyon osi, vizavi sa bann vol.  E nou bezwen osi zwenn avek bann lezot akter konsernen ki annan pou fer avek Lalwa.  Akoz ki bann dimoun ki fer act kriminel zot pe ganny large fasilman?  E r large san vreman ki piblik pa vreman konnen ki pe arive.  E dimoun ozordi pe viv avek lafreyer aswar pa dormi.  E i en sityasyon total ensekirite.  E mon demande ki Lotorite Konsernen i pran aksyon e aksyon vit vizavi sa bann act ki pe arive dan pei.  Mersi.

 

MR SPEAKER

Mersi Onorab.  Anfet konmdir Angle, it’s actually closer to home.  Ozordi enn nou Manm Lasanble kote Parti Lepep i pa la bomaten, akoz enn son pros yer, swar in ganny vole.  Ki vedir parey ou’n dir Onorab William, nou tou nou per; nou tou nou per.  I annan dimoun i dir ou, ou annan Sekirite.  mwan mon napa Sekirite kot mon dormi kot mon reste, me mon per.

Akoz mon lev-e.  Mon garson i lev-e i marse dan lakaz mon sote, mon rode lekel ki pe marse.  Me i en fe.  I en fe ki nou tou nou per.  Parey mon’n dir ou sa Onorab i ti la yer byen pe koze, in fer son entervansyon kot i ti pou al konnen, poudir son belmer pou ganny en ensidan parey yer swar?  I vreman fer lapenn, anyway mon kontan ki Onorab Ferrari ki o bomaten ou’n fer li ou devwar pour al lekol Mont Fleuri pour anmenn ou soutyen pour MNA sa distrik – pour sa lekol.  Mon konnen sa Headteacher i en Headteacher ki mon’n fer li lekol – i en teacher ki pe sey fer son mye pour fer keksoz marse.  So i pa fasil pour li konman en Headteacher.  I pa fasil pour bann teachers.  Sirman i annan serten lenkyetid alor mon ti a kontan donn ou laparol Onorab Ferrari.

 

HON JEAN-FRANCOIS FERRARI

Mersi Mr Speaker.  Bonzour tou dimoun.   Eskiz mwan mon’n en pti pe an retar Mr Speaker, mon’n pas en bon pe letan depi granmaten avek bann staff e bann etidyan lekol segonder Mont Fleuri.  Mon’n koz avek Sir Kevin ki vreman en personnaz ekstr ordiner.  I ti anvi vin lekol bomaten, i ti anvi vini akoz i kontan osi bann zanfan.   Me selman son kondisyon pa’n permet li.  Mr Speaker, sa ki’n arive i vreman tris.  E mon konpran lakoler bann teachers; bann teachers bomaten in refize partisip dan Lasanble, dan Assembly avek bann reprezantan Minister.  Zot in refize akoz zot pa anvi ki it’s just another day – it’s just another incident.  And then everything is forgotten. Zot pa anvi sa, zot anvi ki sa i en final wakeup call pour nou, pour pei, pour Gouvernman aksepte e rekonnet ki i annan problenm ensekirite, partou dan nou pei.  E ki aksyon i ganny pran.  Sa ki zot pe demande Mr Speaker.  I pa i pa enorm.  Zot pe demande premyerman ki lotorite Gouvernman i fer en Statement pou dir nou ki komitman zot annan pour zot lager kont ensekirite?  Ki mwayen zot annan, zot pe met an avan pour lager kont sa sityasyon lensekirite.   Zot anvi konnen ki zot Gouvernman i rekonnet sa problenm akoz bokou zot, zot santi ki pou dir Gouvernman pa rekonnet sa problenm.  Zot pa war i zis en pti lensidan koumsa.  E zot anvi ki Gouvernman i rekonnet sa problenm – Gouvernman i koz avek zot e Gouvernman i adres sa problenm, atraver bann mwayen e bann metod for e bann metod ki efikas.

La i la mesaz ki sorti dan sa lensidan Mont Fleuri.  E mon mazinen ki menm mesaz i sorti lo sa lensidan vol lo sa koup Praslin yer.  Alors la i pa le moman pour nou zis koze.  I le moman pour aksyon.  E Leadership i devret an premye sorti State House; Leadership i devret an 2enm sorti kot Lasanble Nasyonal; Leadership i devret an 3enm sorti kot lezislatif ki met an plas en sistenm ki deal ek sa bann sityasyon dan en fason for.

Akoz nou dan sa Lasanble Mr Speaker, nou’n koze.  Nou’n dir sa ki nou annan pou dir.  Nou’n repete e ennler mon krwar nou pa pe ganny tande.  So, nou pe fer tande nou lavwa ankor ozordi e atraver nou lavwa, nou fer tande lavwa bann teachers ki pe viv dan lensekirite ki pe donn zot kouraz ki pe donn zot lanmour pour sa bann zanfan e an retour la nou vwar ki zot pe gannyen.  Alor Mr Speaker nou solidarite dan sa sityasyon i total.  Mersi.

 

MR SPEAKER

Mersi Onorab Ferrari.  Honourable Minister, Dr Larose, mon demann ou en leskiz ki nou’n pas enn pti pe letan.  Me mon osi mon sir ki ou osi ou avek nou, avek Lasanble, e avek la popilasyon pour siport tou dimoun dan sa sityasyon ki nou ladan, ki konsern nou tou ki nou bezwen adrese.  Alor nou demann en leskiz si nou’n digress enn pti pe.  Prezan nou a tourn lo nou Order Paper – lo nou reaksyon pour Bidze. E nou a konmans avek Onorab Afif.

 

HON AHMED AFIF

Mersi Mr Speaker.  Bonzour tou dimoun ankor enn fwa.  Pour la 2enm fwa dan sa 6enm Lasanble, nou’n ganny prezante ek en Bidze Nasyonal.  Ankor enn fwa, nou rol se pa zis pour evalye konbyen nou pe depanse me ki lenpak sa depans pou annan pour nou pti pei.  Mon ti a kontan tou dabor fer en komanter zeneral.  Kan mon regard Bidze sa ki ti frap mwan se lefe ki pou la 2nm fwa depi 2009 kan, vre Reform Ekonomik ti konmanse Sesel. Ozordi an 2017 Gouvernman pe fer fas ek en bidze defisiter R171 milyon.  Savedir apre ki in fini pey tou son depans enkli lentere, Gouvernman i ankor drwa e i napa larzan pou peye.  Alors i bezwen al prêt ankor.   Sa i pa en bon pratik.  Se koumsanmenm ki Sesel ti konmans pran fond an lepase.  Nou ti depans larzan ki nou ti napa.  Nou ti pran prete pou bous trou e apre nou pa ti kapab rann.

Finalman Sesel ti bezwen al demann pardon, ek tou son bann kreansye, pour li kapab reganny son kredibilite. Minis mon rapel byen sa bomaten – en zedi 26 avril, 2009, 5er bomaten, dan Biro Paris Club nou ti pe negosye depi 11er bomaten ziska 5er bomaten son lannmen – san dormi dan en sel lasanm.  E sete la ki Minis Sesel sa letan Prezidan Faure ozordi, ti reisi siny ne lakor avek Club de Paris pour pardon Det Sesel par plis ki 45 poursan.  I ti dir byen kler dan son remark remersiman 5er bomaten, dan sa pti lafreser Paris; “Mon bann zanmi mersi bokou pour donn zot sa soutyen.  Mon fer zot en promes zanmen ankor mon pou vin devan zot pardon pour nou Det.” I ti dir sa an bonn fwa li, Minis mon konnen ou Minister pe lager lebra kase, pour anmenn en ‘Bidze sirplis’ akoz nou pa anvi zanmen anvi perdi nou dinyite koumsa ankor.  Me si napa volonte politik pour fer sa dan tou nivo Gouvernman, Sesel pou retourn an aryer.

Mr Speaker avek sa Bidze devan nou, Sesel pour bezwen al prêt plis ki 500 milyon Roupi an deviz etranzer an 2018.  An menm tan nou pou bezwen rann plis ki 400 milyon Roupi an deviz etranzer lo Det. An 2020 nou pou rann plis ki 500 milyon Roupi.  E an 2025 preski 550 milyon Roupi an deviz.  Sa pou vin en gro lour lo marse deviz etranzer, akoz ler Gouvernman pou aste plis forex avek labank pri deviz pour vin pli ser alors pri lavi pou vin pli ser.  Sa i deza evidan dan pri Dolar konpare avek 5an pase kan i ti pe kout R12.69 ozordi i R13.95 pour en Dolar oubyen 10poursan plis ser.  E nou konnen ki mannyer pri marsandiz pou swiv sa.  Mr Speaker mon bezwen dir ki mon rekonnet sa zefor senser par Dr Larose – nou Minis Finans, pour li met lord dan Bidze Gouvernman.  Me i pa pou kapab fer sa li tousel menm avek son zenn lekip profesyonnel anba direksyon Patrick Payet.

Fodre tou Manm Konsey Minis tou Lazans Gouvernman e son bann Lakonpannyen tel ki L’Union Estate i swiv. Personn pa kapab pran latitid anvoy Minister Finans pronmnen; pran byen detay partaz li konmsi regilasyon finansyel pa egziste.  Si nou pa fer atansyon e Pa fer ‘sirplis’ dan Bidze, nou pou retourn an aryer, akoz nou en pei ki ankor andete.  Minis in koz lo Sekter Offshore ki i krwar parey mwan, ki i annan en gran lavenir si nou anmenn li dan en fason modern – tou an respektan norm pli o nivo e pratik enternasyonal.  Nou fek tann skandal ki apel Paradise Papers dan Nouvel sa detrwa zour pase.  Wi i annan danze si nou pa swiv norm enternasyonal. Se pour sa rezon ki nou dan LDS nou’n fer le neseser pour anmenn 2 lamannman dan Sekter Finansyel ki pou ede anpes labi par FIU espesyalman.

Mon kontan ki sa ti ganny aprouve, me reste ankor pou fer.  Ki’n arive avek sa IBC Act ki nou ti aprouv lamannman pou fer nou vin pli konpetitiv?  Se pourtan Prezidan ti demande ki sa i ganny finalize ver Zen 2017.  Apre plis ki 1an, sa pa ankor ganny finalize.  I annan en letarzi dan sistenm Gouvernman pli nou tarde, pli Sesel i perdi.

Minis mon demann ou pour fer sir, ki tou bann lenstitisyon ki annan pou fer avek Sekter Offshore, i zwe en rol proaktif.  Sa bann Mafya Irlandais ki ti abitye bat latet serten dimoun in sove.  I enportan ki nouvo management FIU e Gouvernman i regard Sesel e sa sekter avek en nouvo vizyon, e adopte en stratezi pozitiv pour Sesel e kot nou fer grandi sa sekter dan en fason modern e dan en fason respektab.  Mr Speaker rediksyon dan pri lavi i enn bann lobzektif sa Bidze.  Nou’n tann sa dan plizyer Bidze dan le pase.  Me eski pe vreman arive?  Me pli enportan eski i pou arive an 2018?  Pour mwan sa i pou arive kan pri ki nou pey pour nou bann bezwen i desann par rapor avek nou saler.  Se la ki nou kapab dir pri lavi in desann akoz apre ki nou’n fini aste tou nou konmisyon, i reste nou en saving.

Avek sa progressive income tax, i kler ki bokou dimoun pou vwar en logmantasyon dan zot lapey akoz revizyon Lalwa Tax.  Me eski i pe ganny fer dan en fason zis e soutenab pour tou dimoun?  Larepons se non.  E pour bann rezon ki Leader Lopozisyon Onorab Ramkalawan in deza eksplike, nou pa kapab penaliz dimoun avek 30 poursan tax.

Par egzanp en dimoun ki ganny 100 mil Roupi par mwan i pey en tax 180 mil roupi tou le lannen ozordi.  Anba sa Reform i pou bezwen pey en lot R58, 600 roupi – an plis ki son kontribisyon 180 mil Roupi. Akoz sa diskriminasyon e pinisyon?

Sa pour mwan Mr Speaker, pa pou zanmen ankouraz nou bann profesyonnel pour zot monte, akoz dan zot lespri pli ou monte pli ou pou ganny pini.  Pour sa rezon mon siport Leader Lopozisyon kan i dir, ‘’annou reviz pli o tarif pou vin 20 poursan’’ annou koste tou tarif ver 15poursan – koumsa tou dimoun pou pey en poursan dapre son mwayen. Me finalman i pou konverze lo en sif ki pe apros 15poursan a lonterm.   Annou siport lenvestisman par Seselwa dan Ledikasyon ek Lasante.  En lot peyman ki pey ser tou le mwan e ankor pe fer avek pri lavi se ‘loan.’

Mr Speaker en rediksyon zis 1 poursan dan lentere i kapab fer ant 400 a 500 roupi dan pos en travayer tou le mwan, byensir i depan lo groser son ‘Loan Lakaz e son dire.  Ozordi nou annan bann labank enkli omwen en labank Gouvernman ki pret larzan ziska 14 poursan kan li in ganny sa larzan lo zis 2 poursan.  Se la kot i mal.  Se la kot pri lavi i kapab desann mon ti a konpran en ‘Loan Lakaz’ petet a 6 a 7 poursan lentere, me akoz 10 a 12 poursan avek bokou Labank Komersyal?  Akoz serten lezot ‘loan’ i al ziska 24 poursan?  Sa bann to lentere dan Labank Komersyal ki pe fer Seselwa mizer.  Me labank pe vin vreman ris.

Zis en labank Gouvernman Nouvobanq tousel, ti fer zis en profi 281 milyon Roupi an 2016, annou met sa an konteks.  Nouvobanq ti fer en profi 281 milyon Roupi, Gouvernman li pe bezwen perdi 150 milyon Roupi pou fer Reform Tax.  Savedir tou sa ki travayer in benefisye dan 2 lannen konsekitiv atraver (PIT) Nouvobanq i anval tousala dan en sel lannen.

Eski se travayer Nouvobanq ki pe ganny tousala?  Non akoz zot, zot pe travay dir zot.  Se Gouvernman e petet se CEO ki partaz sa gato.  Si zot zis pran tou larzan dan lekonomi pou zot zanmen pti biznes ni ou lakaz oubyen proze pou kapab menm konmanse.  Larises nou pei, in mal ganny distribye.  Mon’n fek donn en legzanp kler Mr Speaker; kot nou kannot i pou mars byen lo delo.  Dan sa Bidze Minis in dir i pou fer desann lentere, me nou pa pe vwar sa pe arive – sirtou la kan labank pe deklar gro profi ekstraordiner zis lannen pase.  Mon rekomann fortman avek Minis, pran son labank Gouvernman e lead by example.  Fer sa pour lepep Seselwa fer lentere desann a en to abordab kot labank i fer en profi rezonnab.  E ki nou tou nou benefisye atraver savings e lentere lo loan.  Mr Speaker mon demann Minis pou fer en target met omwen 1000 Roupi an plis dan pos sak fanmir tou le mwan, atraver rediksyon dan lentere labank.  Nou kapab fer li.

Annou regard telekominikasyon; li osi i tir en gro kopo lo nou out le mwan.  Mon konn fanmir ki pe pey plis ki 3 mil Roupi par mwan ek son mobile ek data ki byen limite. En pti fanmir dan L’Europe Mr Speaker kot tou bann kou i pli ser ki Sesel, me kot tou saler i bokou pli o ki Sesel.  Zot osi zot e zot servi kab, enkli kab soumaren. Me ler nou pey 3 mil Roupi par mwan sa fanmir lerop i pey mwens ki 700 Roupi par mwan, e ou ganny en mobile ek data san okenn limit a en vites siperb e pli vit ki Sesel.  Eski pa vedir ki nou pe ganny sarze plis ki 4 fwa son vre pri ki marse i devret ete?  Ki leskiz ki nou tande?  Sesel i ser.  Telekominikasyon i ser; zot envestiser dan kab soumaren, eksetera.  Alors zot bezwen rekiper zot larzan.  Me annou regard la realite, akoz nou pe koz lo pri lavi la.  Sa bann Lakonpannyen Telefonn, Telekominikasyon, i anmas preski 900 milyon Roupi tou le lannen.  Kou ki zot pey loan pour kab soumaren, i pa plis ki 50 milyon Roupi dan en lannen.  E ler ou met zot bann lezot kou an estimasyon i montre zot pe fer plis i pa fer plis ki 200 a 300 milyon Roupi profi dan en lannen.   Zis ek sa profi dan 2an zot kapab pey en kab soumaren nef ankor.  Me akoz nou bezwen sibir tou sa bann kalite pri?  E ki Gouvernman pe fer ladan? Lekel sa bann nouvo operater ki pour fer pri desann?  Eski zot pou annan bataz pou fer konpetisyon vreman lib ek sa enn de Zean ozordi ki ganny proteze?  Eski laplenn pou vreman nivo?  Sesel i bezwen lenfrastriktir modern Mr Speaker.  Lemonn pe al dan sa direksyon.  Mon donn en legzanp ozordi NHS L’Angleterre in konmans en servis screening kot dokter i koz ek pasyan atraver Facetime lo Internet, akoz zot krwar bokou pasyan pa bezwen vwar en Dokter si ganny konsey atraver Internet ek telefonn dan premye lenstans.  Sa i kapab redwir letan ki ou espere pour en apwentman sorti 2 semenn pour vin detrwa erdtan.

L’Europe i annan Sistenm hoober pour taxi, kot pri taxi in redwir konsiderableman.  Li osi i servi Internet ek ou telefonn. Lafrik dimoun i pey konmisyon atraver Internet ek en telefonn, Sesel napa swa.  Fodre nou bouz parey si nou anvi vin modern e efikas. Me zanmen nou pou arive ek sa bann pri egzorbitan. Sel keksoz fodre Gouvernman i ensiste, pour annan en bes konsiderab dan pri; si non pour fer marse dan en fason vreman lib e konpetisyon pou redwir pri.  Pa fer krwar i ouver, kan par deryer dimoun i ganny bloke parey zot in fer avek labank, ek menm Airline e mon asire plizyer lezot ka dan lepase.

Mon konsey pour Minis Finans – avek respe Minis, annou met en target pour redwir pri telefonn ek Internet an 2018 par 500 roupi dan pos sak fanmir tou le mwan.  Nou kapab fer li, atraver vre konpetisyon kot lenfrastriktir sa pei i a ganny partaze, dan en fason zis.  E kot nouvo operater i a kapab antre lo marse e ofer en meyer pri e servis.  Nou le war rezilta e sa i kapab ganny fer vit.  En lot domenn ki vreman afekte pri lavi, se pri konstriksyon.  Mr Speaker i pou difisil pour nou fer desann pri konstriksyon aktyel par bann gro poursantaz, akoz preski tou sa ki nou servi nou enporte, e nou pa kapab kontrol pri lenportasyon.  Mon ti a kontan sizere, ki nou evalye bann meyer fason konstri, ozordi nou kapab fer prefab avek materyo konstriksyon bokou meyer marse an servan feray ek cement board par egzanp.

Eski fodre nou fer tou keksoz batiman ek beton sirtou dan bann ka emergency?  Akoz nou pa regard kantmenm fer detrwa sa bann proze emergency low cost Housing an servan nouvo teknik.  Me ki pou osi dire pour omwen 25an byensir, avek maintenance pandan ki nou konstri pour pli lonterm?  Nou annan en problenm sosyal enorm lo nou lanmen.  Sa pei pou bezwen konstri plis ki 300 lakaz par lannen byento.  I kapab fer li si i balans kalite lakaz ki i pe fer, an servan nouvo teknolozi; materyo konstriksyon pli ekonomik e kot i osi regard sirtou pour Praslin ek La Digue fason pour asir transportasyon meyer marse.  Dan mon distrik Anse Etoile Minis, nou lekip volonter in travay avek detrwa sponsor e nou’n reisir met debout de lakaz an servan sa metod pou dimoun ki ti dan bezwen.

Pa ti kout sa lekip plis ki 3800 Roupi par met kare pour fer konstriksyon ler ou konsider pri sa bann donasyon.  Si Gouvernman li i aste ankor, i pou pli meyer marse ankor. Ankor enn fwa Minis mon propoz en target fer omwen 100 lakaz 50 met kare sakenn an 2018.  4 dan sak distrik par mwayen, an servan bann metod konstriksyon meyer marse.  Sak lakaz pa pou desot 175 mil Roupi e sak lakaz pa pou pran plis ki 2 a 3 mwan pou konstri. Kou pa pou desot 18 milyon Roupi.  Si tou i mars korekteman e sa bann lakaz a ganny delivre sirtou dan bann ka dirzans, avek bann kontrakter lokal.  Mr Speaker, sa rediksyon dan biznes tax lo lakaz an 2019, i en pa dan bon direksyon e mon dakor avek.

Lo kote biznes fodre, sa Gouvernman i kontinyen ankouraz lenvestisman.  Mwan mon napa problenm avek property tax zeneralman. Me eski son timing i apropriye kan nou war FDI pe tonbe? Akoz nou pa ankouraz lenvestiser lokal, pour al dan proze kot nou pe rod vre konpetisyon; par egzanp dan Labank, Telekominikasyon, Lasirans, Warehousing ou menm lavyasyon.  Nou bann Seselwa i byen kapab ki nenport etranze.  Zot annan lotel – menm detrwa ki gro.  Zot dan konstriksyon, zot konstri bato parey Mr Gerard Rose Praslin.  Zot fer biznes Ferry.  Zot kapab menm fer biznes lavyasyon si laplenn i nivo.  Problenm se nou blanm liberalizasyon, me vreman marse i ganny kontrole, akoz serten dimoun i ganny proteze.  Ouver sa marse libreman e pri pou redwir.  Mon pou osi dir Mr Speaker ki pour mwan lide Leader Lopozisyon, pou servi resours nou pei plito pour adres fleo sosyal, vyolans e vol dan pei i enn ki annan merit.  Nesesite en gro larme dan Sesel, i bezwen ganny revwar toudswit.  Dan sa Bidze annou remet sekirite, nou sitwayen nou bann touris e tou travayer e nou bann envestiser, koman pri mondyal.  Mr Speaker mon demann Minis pou konsider en restriktirasyon dan Lafors Sekirite nou pei, ki mye balanse pou protez sivilyen ek nou Teritwar Maritim.

Byensir nou pou bezwen osi annan en Unit Militer pour okenn menas teroris e dezord.  Me sa i bezwen dapre bann menas reel, e ki baze lo realite Sesel ozordi. I reste zis pour mwan pas enn de komanter lo ki mannyer sa Bidze pou afekte mon distrik Anse Etoile. Pandan sa dernyen Bidze konbyen lakaz in ganny fer Anse Etoile?  Konbyen semen in ganny fer pour fermye dan Kandahar, Hangard ek La Gogue? Konbyen panton in ganny mete pou peser La Retraite, oubyen o-bor bazaar Anse Etoile?  Mwan mon’n vwar 2.  me tou lede se bann dimoun prive ki’n fer a en pri byen afordab.  Enn ladan pe deza ganny problenm avek lotorite konsernan permisyon.  Be kan eski zot pou agrandi lapas La Retraite, ki irzan?  I pa pou kout bokou.  Kestyon se oli rezilta zefor Gouvernman?  Mon bezwen dir an pasan ki nouvo Minis pour Lagrikiltir ek Lapes pe montre en bon lespri travay e mwan mon ankouraze.

Me mon bann dimoun i anvi rezilta, akoz tro lontan zot pe espere.  Konbyen streetlights in mete; e konbyen proze drenaz in ganny fer?  Ou kapab kont lo ou ledwa.  E dan en ka mon menm demande konbyen dimoun ki pou benefisye avek sa proze drenaz ki an montan La Gogue an kitan Manresa si delo napa landrwa pou al debouse.  Se pourtan Mr Speaker ti annan en gro Bidze dan lakel i annan preski 200 milyon Roupi ki pa pou ganny depanse an 2017.  Se sa kalite fason travay, ki pe met sa pei retar.  Si Minis ek son Minister i travay lannwit lizour pou fer marse finans, akoz ki lakaz pep e ganny fer osi vit.

Akoz ki SLTA li i debrouye ek son Larzan Semen, me Lekol ek Lasante i deryer an term lenplimantasyon.  Si zot pa kapab travay, se pa ou problenm direkteman Minis.  Fodre Gouvernman i pran e adopte li, en nouvo latitid parey biznes i fer.  Ou ganny anploye pou fer marse – si ou pa kapab les en lot fer li e Gouvernman pou bezwen pran li en nouvo latitid byensir dan konteks son rol konman Gouvernman.  Sa latitid lesefer, ki nou’n parade tro lontan, i bezwen kit deryer byen vit.  Avek sa mon pou konklir e remersye Minis ek son lekip.  Pandan sa lannen nou le vwar en latitid serye dan Gouvernman.  Pa enn kot MNA ki bezwen al rod lakaz pou dimoun si son lakaz in brile.  I fer mwan mazin Mr Jose Thelermont La Retraite ki ziska ozordi i dan en lakaz brile pe esper Gouvernman vin rekonstri son lakaz ki ti ganny andomaze, ler dife ti bril lakaz son vwazen an Avril 2017.  Son lakaz ti asire, me ziska ozordi in dan fernwar pe esper Gouvernman vin reklanmen ek Lasirans e vin rekonstri.

Mon mazin lafanmir Juliette ki preski 4an depi ler zot lakaz in brile, zot in parpiye partou lo Mahe.  Fanmir in separe pe esper finalizasyon zot later e Plan Lakaz laba La Gogue.  Se sa kalite latitid e lanmertim ki nou pep pe fer fas avek.  Zot plere dan zot soufrans.  Zot ganny vole dan zot fernwar, me zot kontinyen trimouse pou kapab viv.  En Gouvernman serye, pa devret les sa arive.  E mon espere ki atraver sa Bidze tou keksoz i a sanze.  Minis se pa zis larzan ki pou sanz keksoz, me se latitid tou dimoun dan Gouvernman. En nouvo stil gouvernans kot i annan zis en Kaptenn lo en bato.  E ozordi sa Kaptenn se Prezidan sa pei ek son l’Egzekitif – se pa LDS.  Byensir nou, nou pou kontinyen zwe nou rol pou gard Lezislatif kot se ou Mr Speaker ki Kaptenn Lasanble Nasyonal, e atraver ou gidans ou gard nou lo en bon semen.

Nou dan lekip LDS dan Lasanble, nou pou kontinyen fer sir ki depans Gouvernman i ganny zere byen.  Nou pou kontinyen amenn sa batay pou met o-kler bann ka koripsyon ki pe ganny egzaminen par FPAC. Nou pou lager pou fer Gouvernman fer desann pri lavi, akoz si sa pa arive byento Pansyoner pou demande ki Sekirite Sosyal Pansyoner i ganny revize.  Parey ou dir souvan Mr Speaker, ‘’…in tro tar pou fer Seselwa dormi boner.’’ Byensir nou pou kontinyen travay avek en lapros pozitiv pou met Sesel Premye. Avek sa bann parol i reste pou mwan dir Minis ek son lekip mersi pou zot travay e zot konprenezon.  Nou pou kontinyen donn lide lo ki mannyer pou dres pei.  Me nou pou touzour fer ‘tande nou lavwa’, ler nou vwar sa mal pe afekte nou frer e ser.  Mon remersye tou dimoun a lekout e mon espere mon kontribisyon ki ganny pran dan en fason konstriktif, pour nou pei kontinyen bouz devan. Mon zwenn Leader Lopozisyon pou dir tou Seselwa ki mwan osi, ‘’Mon pa pou zanmen les tonbe.’’ Mersi Mr Speaker.

 

MR SPEAKER

Mersi Onorab Afif.  mon a donn laparol Onorab Valmont swivi par Onorab Woodcock.  Onorab Valmont.

 

HON JUDE VALMONT

Mersi Mr Speaker, Minis e ou delegasyon, koleg Onorab tou dimoun a lekout, nou bann envite dan Galeri e zabitan Pointe Larue, bonzour.  Mr Speaker ozordi i enportan ki nou rekont e apre zistans kot nou sorti konman en pep depi dernyen Bidze ki ti ganny prezante, dan sa menm Lasanble.  Set avek en lespri bonn gouvernans, rann kont e latransparans, ki Minis Finans i prezant pep Seselwa avek sa Bidze anyel pour lannen 2018.  Mon note ki set avek bokou antisipasyon, leksitasyon, ki en gran mazorite pep Seselwa dan ki Minis in fer son Ladres.  Sa Mr Speaker i senpleman laprev ki lepep Seselwa i de zour an zour in vin konsernen avek bann diferan laspe nou pei, ki enpakte lo zot e zot fitir zenerasyon.

Sa Bidze i vin avek bokou reform ki nou Gouvernman in antreprann pandan lannen 2017.  Sa Bidze li menm, mon santi ki in vreman met zonm o sant devlopman, par lefe ki bokou lis konsiltasyon in ganny fer e an rezilta Gouvernman in montre ki in touzour a lekout son pep, par vin avek bann mezir ki reflekte la realite sityasyon nou pei ozordi.  Mr Speaker, Minis in donn lepep garanti ki Sesel ekonomikman nou lo bon semen.  Nou pe pas dan en faz transformasyon rapid.  Sa i ede satisfer nou bann partner devlopman e an regardan ver lannen finansyer 2018 nou Gouvernman in permete adres priyorite pei dan en fason ki i finansyerman responsab.

Bidze 2018 i enn ki senp avek bi pour retenir krwasans ekonomik, asir stabilite finansyel mentenir en disiplin finansyel tre for, kree plis loportinite lanplwa kontinyen envestir dan lenfrastriktir ek lozman, asir en zesyon det piblik tre pridan; amelyor fason ki servis i ganny delivre, ofer loportinite pou ganny reveni siplemanter, e dan prosedir redwir kou lavi.

Alors Term Bidze sa lannen ki, ‘Travay pour prosperite tou dimoun,’’ i enn ki apropriye pou sa peryod ki nou trouv nou ladan ozordi.  Mr Speaker i enportan soulinyen ki Sesel in attend en stati avek o reveni.  IMF, in menm konfirmen ki nou pei in fer en progre remarkab an rezilta son bann reform o-kour sa dernyen 9an.  Laprev i la pour nou tou vwar.  An menm tan en sirplis 3 poursan nou prodwi domestik brit, GDP, nou Gouvernman in reisir asir stabilite ekonomik an promotan devlopman enklisiv.

Mr Speaker, se pour sa rezon koman en ansyen travayer servis piblik, mon rekonforte par plan Gouvernman pou kree en Komite Rekritman e resours imen, pour asire ki bann vacancies dan sa servis, i ganny planifye lo en baz anyel e mwayen term avek bann bi spesifik pour amelyor service delivery.  Set alors avek en vizyon anver nou priyorite nasyonal ki 40poursan Bidze 2018 i al ver Ledikasyon, Lasante, Zafer Lafanmir, e Sekter Sosyal.  En keksoz ki egalman ankourazan Mr Speaker se ki in fer sorti, se ki depi lannen 2017 Prozedlwa pou saler tou Minister pe ganny regarde de pre.  E sa san dout i donn viger demars lo Lasanble ver amelyorasyon saler tou Seselwa, san leksepsyon. Ankourazan pour lannen 2018, nou obzerve atraver Bidze ki an valer R2.4 bilyon Roupi in ganny rezerve pour reminerasyon e saler.  Sa i reprezant e logmantasyon 202.1 milyon Roupi konpare avek pou lannen finansyer 2017.

Bidze 2018, i fer provizyon pour omwen 5 nouvo ouswa revizyon Scheme Saler.  Mr Speaker mon rekonforte par lefe ki mon konnen ki tou bann Ners – espesyalman nou bann Ners kot Klinik Anse au Pins ki byen devoue a kapab ganny plis lankourazman pour delivre ankor plis pou benefis zabitan Pointe Larue, e osi Anse Aux Pins.  Apre tou se zot ki asir lasante nou pep e tou travayer Seselwa.

Mr Speaker nou tou konnen ki avek demann ki pe kontinyen ogmante pour lakaz, bann zofisye Departman Labita ek Lenfrastriktir zot travay bokou en anba imans presyon.  Alors an rekonesans zot zefor an 2018, nou pou vwar zot benefisye avek en nouvo Scheme Servis, ki a permet zot ogmant lefikasite.  E asire ki otan i ganny fer pou ed tou Seselwa dan zot demars pou ganny zot prop lakour demen.  Mr Speaker nou Gouvernman i rekonnet valer e potansyel zenn Seselwa.  Apre tou se zot ki gardyen fitir devlopman nou pei.  Alors i totalman normal ki zot bann ankadre i ganny empower pou diriz zot dan sa bon semen.  Se pour sa rezon ki mwan osi konman en zenn mon akeyi revi dan Scheme Saler pour bann travayer Konsey Nasyonal pour Lazenes avek grann ker.  Mr Speaker benefis travayer dan sa Bidze pa aret la.  Nou osi note ki revizyon dan Scheme Gratwite pour bann Ners e ansenyan in ganny enkli.  Mon asire ki Ms Lymia, Ms Jenny, Ms Shirley e tou lezot teachers Pointe Larue i a vwar valer ki nou Gouvernman i ganny mete dan zot, e konfyans ki nou annan dan zot pour edik nou bann zanfan.

Mr Speaker, sa Bidze in osi fer provizyon pour rekonpans bann anplwaye ki’n fer long servis apartir Zanvye 2019.  Parey mon’n toultan dir en travayer ki happy dan son louvraz, set travayer ki delivre, Mr Speaker, bokou ki’n swiv mwan pandan sa lannen ki mon dan Lasanble, zot a kapab konpran kantite lenportans mon’n mete dan lalit kont labi drog.  Pointe Larue nou kontinyen tap for par sa fleo.  Parey Minis in refer sorti nou lekonomi, i depan lo en lafors travayer ki prodiktiv, me sa pa pe ganny severman aksepte par sa demon ki apel drog.  Tro bokou fanmir pe soufer; swa direkteman swa endirekteman avek sa malediksyon.

Avek bi pour anmenn en solisyon pour en fanmir Seselwa, nou Gouvernman in kree en Lazans pour Prevansyon Labi Drog e Reabilitasyon.  Mr Speaker mon zwenn avek tou paran, fanmir sa victim sa fleo, pou dir en gran mersi nou Gouvernman pour envestir en 25.2 milyon Roupi dan tretman nou bann frère ek ser ki’n tonbe.  Nou enpasyan pou vwar plis servis ek rezilta – espesyalman lo nivo kominoter.  Mr Speaker devlopman nou pei i depan bokou lo lenvestisman nou Gouvernman, dan bann Proze Kapital.  An 2018 en sonm 1.15 bilyon Roupi pe ganny propoze.  Sa i reprezant en logmantasyon 15poursan konpare avek lannen 2017, avek en sonm 578.3 milyon Roupi ki pou sorti dan sa Bidze.

Mr Speaker zisteman atraver bann Proze Kapital pour lannen 2018, proze Redevlopman Nageon Estate pour kontinyen.  Tre prosennman konstriksyon pour 15 lakaz pour 15 fanmir pe al fer konplesyon.  Apre sa Faz 2 a komanse kot ankor plizyer lezot fanmir a egalman benefisye.  I enportan pour refer sorti ki sa proze in demare, nou’n ganny ankor bokou plis fanmir ki’n vin devan pou montre zot lentere pour zot osi ganny enkli.

Alors mon demann Gouvernman, pou konsidere ki provizyon in ganny fer pou envestir en pe plis larzan dan sa proze, pou garanti ki personn ki kalifye pa ganny kit deryer.  Gouvernman i espekte konplet 355 lakaz e fer alokasyon 200 morso later pandan lannen 2018.  Mr Speaker avek en tel lanons mon asire ki sa 340 aplikan lakaz e sa 204 aplikan later pou distrik Pointe Larue, a ganny en nouvo souf lespwar; espesyalman ler nou’n ganny garanti ki apartir fevriye 2019 nou proze 24 lakaz Ex-Albert Faz 2 pour konplete; e en lot 24 fanmir a ganny zot lakour.

Mr Speaker mon konnen la mazorite zabitan Pointe Larue, pour agree avek mwan, ki nou Pointe Larue, nou ris avek bokou later ki pa ankor ganny devlope, sirtou dan rezyon montanny.  Resaman pandan vizit ki Prezidan Faure akonpannyen par Minis responsab pour Labita Lenfrastriktir e Transpor lo Later, ti fer dan Pointe Larue, zot in ganny sans apresye potansyel enorm ki sa distrik i annan pour fourni later pour land bank, e fer lakaz pour bokou ki pe espere.

Alors Mr Speaker, mon akeyir lanons ki sa sonm 67 milyon Roupi pe ganny envestir lo lenfrastriktir semen kominoter, avek bi pou ede redwir kou lavi kot i konsern transportasyon.  Dan sa laliny Mr Speaker, mon ti a kontan Gouvernman pour konsider sa bann opsyon swivan.  Bidze i fer provizyon pour konstriksyon premye Faz en 3enm lane dan plato Pointe Larue di-si a lannen 2019.  Mwan koman reprezantan Pointe Larue, mon le demann Minis konsernen pour konsidere transfer sa larzan, dan devlopman sa semen dan montanny – ki sorti Karyol Anse au Pins ver Nageon Estate pour ki i a konekte avek semen Anse Dejeuner Airport.  Nou zabitan Pointe Larue nou plis ki konvenki ki sa, i a ede pou pli efektivman pour deal avek problenm trafik; amelyor sekirite pyeton dan plato, e permete ki nou trotwar i a ganny konstri depi kot Vielle.    Ziska kot Airport, pour konsidere ki lannen 2017 nou deza perdi 1.5 milyon Roupi; an esperan ki letid i ganny fer pour sa 3enm lane.

I a osi donn opsyon pour lezot semen kominoter; plis spesifikman Karyol Pointe Larue avek Nageon Estate Faz 2, Nageon Estate Faz 2 anler kot turning point kot Mr Melanie konekte semen dan montanny avek semen Anse Francois, sa i ede rezourd bann problenm bis ki nou pe rankontre.  E finalman konekte proze lakaz Ex-Albert Faz 1 ek 2 avek Pointe Larue, ki osi a ede donn soutyen bann zabitan, ler i vin kot problenm transpor SPTC.  Mr Speaker sa pa fini la.  Devlopman semen dan Pointe Larue, pour egalman amen nou en lot lavantaz.  E sa i pou permete ki nou ganny akse avek bann later land bank ki an retour a permet devlopman dan lenfrastriktir, ki a gard plis loportinite lozman pour zabitan Pointe Larue.

Mr Speaker Bidze 2018 anba bann Proze Kapital –  i fer provizyon pour en sonm 1.5 milyon Roupi pour bann proze drenaz priyoriter atraver plizyer distrik.  Mon santi ki sa pa ase.  mazorite Seselwa sirtou sorti dan rezyon les Praslin e La Digue sa memwar dezas Felleng i ankor fre dan zot lespri.  Menm si bokou in ganny fer depi 2012, i ankor reste en kantite pou fer mon toultan krwar ki prevention is better than cure.  Mon demande ki bokou plis i ganny envestir dan bann proze drenaz – sirtou dan plato Pointe Larue, pou garanti ki otan ki posib problenm delo monte dan lakaz ki dan semen, pa kontinyelman afekte nou bann zabitan.  Mr Speaker osi anba bann Proze Kapital Bidze 2018 i fer provizyon ki PUC i konekte 10 fanmir kot DA’s compound e dan zanmerant STP ki trouve Pointe Larue menm.

Sa proze in ganny prevwar pou konmanse ver lannen 2017.  Sa Mr Speaker i anmenn bon nouvel pour sa bann zabitan ki’n kontinyelman ganny afekte avek malpropte avek move loder pandan plizyer lannen.  Me sa pa fini la.  Bokou dimoun zot konnen ki Pointe Larue i en distrik ki vreman partikilye par le fe ki nou borde avek Airport e nou Water Table i o.  E lespas pou konstri nouvo septic tank dan leo, dan serten sou distrik e dan plato i vreman limite – si non pa enposib.  Alors nou zabitan mon distrik, zot depan bokou lo koneksyon avek laliny sewage – koman sa sel opsyon.  Alors Mr Speaker atraver ou e o non tou zabitan Pointe Larue ki pe ganny afekte, mon demann Gouvernman pou fer tou fason posib pour akseler demars finansman e egzekisyon sa PUC Sanitation Master Plan.

Mr Speaker Minister Lafanmir ek Zafer Sosyal, i en Minister ki fek ganny formen sa lannen, pour siport fanmir Seselwa e ede adres bann challenges zot fer fas avek dan lavi toulezour.  Se dan sa lespri, ki mon akeyir alokasyon 17.9 milyon Roupi dan Bidze.  Sa i ede pour promouvwar bann valer lafanmir e ankouraz en stil lavi ki sen e armonye dan nou sosyete, e garanti ki bann fanmir ki trouv zot dan kad reveni ba, a ganny sa latansyon ki zot merite.  Mr Speaker i bon refer sorti ki en sonm 8milyon Roupi in osi met de-kote pour konstriksyon en Juvenile Centre.

Sa i en lot laprev ki nou Gouvernman i reste a lekout, apre nou bann debat dan Lasanble, nou demann pour sa Sant vin en realite.  Mon konnen Mr Speaker ki ou osi parey mwan menm ou byen akeyir sa Sant.  Alors mon profite pour propoze ki sa Sant i ganny servi otan ki posib koman en Juvenile Educational Centre, pour efektivman e re oryant  nou bann zenn pour zot kapab pozitivman re-entegre dan  nou sosyete.  Mr Speaker Bidze ki’n ganny prezante devan nou Lasanble, i annan ankor bokou lezot bon eleman ki mon santi ki mon bezwen souleve avan mon terminen.

Par egzanp pour bann zenn nou trouv lentrodiksyon bann loan lentere ba; pour bann ki pe al etidye, nou trouve 5milyon in ganny verse pour Scheme lanplwa lazenes. Nou trouv 1 milyon Roupi i ganny met de-kote pour Scheme Lantreprenarya Lazenes – an dot mo YES Scheme.  Nou bann dimoun aze osi i trouv zot dan sa Bidze Mr Speaker. Malgre ki larz retret pe ganny propoze pou sorti 63 pour al 65an, nou Gouvernman in fer provizyon dan sa Bidze pour soulaz bann ki deside pour retrete a laz 60an depi Zanvye 2018, pour omwen benefisye avek zot pansyon anba Fon Pansyon.

En lot laprev ki Gouvernman i rekonnet kontribisyon pour bann dimoun aze, se ki atraver fasilitasyon lenvestisman prive dan konstriksyon lakaz pour zot.  En sonm 185 milyon Roupi pour zot Homecarers; 14.5 milyon pour Scheme Home Improvement pour bann pansyoner.  Lo kote Gouvernman Lokal Mr Speaker nou vwar alokasyon 30 milyon Roupi pour bann pti proze dan distrik.  Nou osi vwar nou’n vwar Konsey Rezyonal ki pou ranplas Konsey Distrik.  Sa saving ki ganny fer lo sa desizyon a ganny verse dan bann lezot proze dan bann distrik ki a benefisye nou kominote direkteman.

Lo kote pti biznes Mr Speaker, avek bi pour amelyor kapasite nasyonal pour prodwi sa lannen, Gouvernman in envestir en sonm 5.3 milyon Roupi dan Minister Lendistri Devlopman Lantreprenarya e Linovasyon Biznes, pour permete ki i viz ver bann servis ki annan valer pli o.  10 milyon Roupi in ganny mete pour bann sibvansyon lo lentere lo bann loan SMEs ziska 3 milyon.  Alors dan loptik promot pti biznes dan distrik Pointe Larue Mr Speaker, mon ti a voudre demann Gouvernman pour enform zabitan Pointe Larue ki’n arive avek zot plan pour konverti Lekol Segonder dan en Sant Lekol Antrepriz pour fasilit lanvironnman biznes? Mr Speaker mon pa kapab terminen san tous lalit kont lapovrete.

Mr Speaker depi konmans lannen 2016, Gouvernman Sesel in angaz li dan lalit kont lapovrete.  Sa lalit in konmans par lapwentman en Sekreter D’Eta pour eliminasyon lapovrete.  E en seri survey in konmanse.  Lefe ki Minis in refer sorti ki eliminasyon lapovrete, i annan en plas priyoriter lo azanda Gouvernman, i donn mwan e bann zabitan Pointe Larue, ki posibleman tonm dan sa kou sosyete, bokou lespwar ki zot a ganny sa sipor neseser kot i fodre.  Set alors avek en alokasyon konsiderab dan sa Bidze, ver bann Progranm Sosyal tel ki 40milyon pour Social Safety Net; 15 milyon pour bann reparasyon bann scheme vilnerab; 18 milyon pour bann scheme sibvansyon loan lakaz; 4.2 milyon ver Dedicated Fund; 6.7 milyon Roupi pour Scheme Daycare, reentrodiksyon ‘URS,’ lenplimantasyon bann faz tax progresiv lo bann saler, ki pou konplete ver Zilyet 2018, pour asire ki bann travayer Seselwa i a benefisye avek plis larzan dan zot pos. E egzanpsyon lo peyman Gratwite, Konpansasyon demisyon Trezyenm Mwan Saler, bonous service charge e peyman lo overtime dan bann ka eksepsyonnel.

Pour konklir, Mr Speaker, mon oule fer sorti ki apre konsiltasyon avek diferan dimoun dan mon distrik, mon pour aport mon siport, pour sa Bidze.  Me avek serten kestyon kot i fodre.  Sa Bidze i reprezant en disiplin fiskal neseser pour nou pei, e i osi montre ki Prezidan Faure e nou Gouvernman, i enn ki responsab e touzour a lekout laspirasyon son pep a tou nivo.  Mon swete, ki konsiltasyon i kontinyen e tou pep Seselwa i trouv li dan en fason ou en lot, parti prenan sa Bidze, e lezot ki swiv.  Mr Speaker, tou lendikasyon i la dan sa Bidze, ki Sesel i annan bokou keksoz ki pou vini tre pros dan le fitir; keksoz ki bon.  Mon terminen par salye zefor tou travayer Seselwa ki travay dir pou fer nou pei Sesel marse.  Mersi.

 

MR SPEAKER

Mersi Onorab Woodcock, Onorab Valmont pardon.  Mon a donn laparol Onorab Woodcock.

 

HON WAVEL WOODCOCK

Mersi Mr Speaker.  Bonzour Mr Speaker Minis, koleg Onorab. Mon pour komanse par swet labyenveni en delegasyon ki sorti Grand Anse Praslin ki enkli mon ansyen Headteacher Ms Monica Hoareau ki’n fer en gran kontribisyon dan mon lavi e osi en lot mwan ex- ansennyan Ms Nesta, ansyen Deputy Speaker Lasanble Nasyonal Mr Jolicoueur, Mrs Luc e plizyer zanmi, frer e ser Grand Anse Praslin ki’n vin vizit nou Lasanble ozordi.  Mon osi anvi dir en gran mersi mon clerk ki’n ede organiz sa vizit ozordi.

Mr Speaker koman Manm Elekte pour Grand Anse Praslin, mon toultan reste konekte avek zabitan mon distrik.  E sa entervansyon bomaten, mon’n prepare an konsiltasyon avek plizyer bann zabitan dan mon distrik.  Mr Speaker mon konnen ki dan Lasanble Nasyonal dan lepase Bidze ti fini dan de zour apre zot ti swet kanmarad Zwaye Noel e Bonn Ane e zot ti al dan Recess.  Lasanble Nasyonal mazorite LDS nou’n vin travay.  Pa ankor ler pour rod Nwel avek Lannen, parey enn de bann Onorab lot kote latab.  Mr Speaker sa Bidze 2018 i en Bidze ki lepep Seselwa ti a pe espere, avek bokou pasyans.  Menm si in annan konsiltasyon regardan sa Bidze, i vre ki Minis Finans konsilte pran kont plizyer propozisyon ki bann Manm LDS dan Lasanble Nasyonal in fer, malerezman i annan plizyer keksoz enportan ki mon santi pa’n ganny konsidere dan Bidze 2018.  Mon pour komanse par liste enn de keksoz ki mon krwar pour benefisye lepep Seselwa, e mon pour osi koz lo enn de mezir ki Gouvernman i bezwen konsidere, pour amelyor kou lavi pour Seselwa, pour tou Seselwa sirtou nou bann frer ek ser ki sorti Inner Island Praslin, La Digue.

I annan bokou konsern lo sa size progressive income tax, ki bokou Seselwa in eksprim zot mekontantman avek.  Mr Speaker mon senserman krwar ki sa progressive income tax pour benefisye bokou Seselwa.  Ti annan konsern ki bann travayer dan middle icome group, pour bezwen pey plis tax akoz zot pour bezwen pey 20 poursan taks olye 15poursan income tax.  Bokou bann travayer dan middle income class, sirtou bann zenn graduate e bann profesyonnel ki pe earn par lao 10mil a 25mil Roupi in kontakte mwan pour eksprim zot dezapwentman.  Mr Speaker le rezon ki bokou dimoun i pe fristre avek sa nouvo sistenm taks progresiv sete akoz en mal konprenezon.  Menm si i annan plizyer leksplikasyon ki’n ganny donnen lo sa size, i ankor annan bokou Seselwa ki krwar ki zot pour bezwen pey personnel income tax 20 poursan lo zot saler total, kan an realite avek sa nouvo sistenm tax progresiv zot pa pour bezwen pey en sou tax lo premye 8,550 Roupi lo zot saler.  Savedir si en dimoun pe ganny li en saler 12mil Roupi i pour pey 20 poursan tax lo zis R3, 449.50 sou olye lo 12mil Roupi.  Ki vedir i pour pey selman 517 Roupi tax. Oparavan sa endividi ti pour pey, ti pour bezwen pey 15 poursan income lo son saler total ki fer li en total 1800 Roupi income tax par mwan.

Sa travayer ki pe ganny en saler 12mil Roupi pour benefisye avek 1283 Roupi anba sa nouvo Sistenm Tax Progresiv.  Mr Speaker menm en travayer ki pe ganny en saler 25mil Roupi pour benefisye avek tax progresiv. Ozordi i bezwen pey 3750 Roupi income tax.  Avek sistenm koleksyon taks progresiv, i pour pey li 3,290 Roupi income tax ki en rediksyon 460 Roupi ki vedir 460 Roupi an plis pour reste dan pos sa travayer.  En dimoun ki pe ganny en saler 15 mil Roupi pour benefisye avek 960 Roupi. En travayer ki pe ganny peye 30mil Roupi pour benefisye avek 210 Roupi.  Savedir sa nouvo Sistenm Progressive Income Tax, i pour benefisye bokou Seselwa.  E le rezon ki mon pe fer sa leksplikasyon ozordi, se akoz menm yer swar on ganny bokou call par bokou bann zenn profesyonnel, e mon krwar sa i ava eklersi en pti pe sa.

Sa sistenm tax progresiv ki Gouvernman in propoze pour 2018, pou met larzan dan pos Seselwa e ede redistribye larises.  Mon dakor avek Leader Lopozisyon ki sa nouvo Sistenm Tax i merit vin an fors Zanvye olye Zilyet e ki income tax pa merit mont pli o ki 20 poursan.  Mr Speaker dan Sekter Konstriksyon, i annan en mankman materyo brit sirtou lo Inner Island, bann zil Inner Island i ankor pe pey bann materyo brit a en pri tre eleve konpare avek Mahe.  E pa zis dan Sekter Konstriksyon, kou marsandiz an zeneral i bokou pli o lo Inner Island.  Menm bann komodite esansyel i bokou pli ser Praslin ek La Digue konpare avek Mahe.  Gouvernman i merit get dan posibilite pour donn konsesyon lo fuel pour transportasyon bann marsandiz e materyo brit sorti Mahe par bato pour vin Praslin avek La Digue.  Par fer desann kou fuel pour transportasyon marsandiz par bato, i ava ede fer desann kou marsandiz e bann komodite dan magazen.  Gouvernman i bezwen osi get dan posibilite subsidize kou Animal Feed, manze zannimo.  Manze zannimo ler i ariv Praslin dan bann store i bokou pli ser ki Mahe ki fer lavyann e lezot prodwi a labaz zannimo vin bokou plis ser. Par subsidize kou transportasyon animal feed sorti Mahe pour Praslin, ki osi enkli transpor lo later i ava osi ede fer desann kou bann prodwi a labaz zannimo tel ki lavyann avek dizef.

Kot i konsern Sekter Lenformasyon avek Kominikasyon Gouvernman i bezwen get dan oligopoly sa de gran Lakonpannyen Telecom Airtel avek Cable & Wireless. Gouvernman i bezwen ankouraz plis Konpannyen Telekominikasyon antre Sesel. Pa akoz enn de gran zofisye Gouvernman i annan shares dan sa bann Konpannyen ki nou pe anpes lezot konpetiter antre dan market lokal.  Plis konpetiter – savedir kou Internet e telefonn pour desann pli ba.  Seselwa i ankor pe pey bann pri egzorbitan pour Internet ki en servis esansyel ozordi.

En Konpannyen Telecom pa kapab sarz dimoun rental pour Internet ler son Internet in ganny koupe pour plizyer mwan.  Sa i daylight robbery. Fair Trading Commission i bezwen get ladan.  Seselwa pe ganny vole par sa bann lakonpannyen.  Mr Speaker, atraver bann Mosyon ki’n ganny anmennen kestyon ki’n ganny demande, lentervansyon ki’n ganny fer e Komite ki’n ganny etabli par LDS dan sa Lasanble, kot i konsern bann Industrial Estate, ozordi nou pe vwar en pti lalimyer.

Lord pe ganny mete dan sa bann dezord lo bann Industrial Estate.  Avek lotonomi ki Industrial Estate Authority in gannyen avek Gouvernman, pour zer bann Plot parsel later Industrial Estate i atraver en Komite ki ti ganny etablir par Lasanble Nasyonal pour investigate Ile Eve e kreasyon en Komisyon Nasyonal, ki ti ganny propoze par Leader Lopozisyon.  Ozordi sa 3 gran bout later ki ti p ganny okipe par VJ Construction in ganny re-pran Ile Eve e pe al ganny subdivide e redistribye avek bann business Pralinwa.

 

(APPLAUSE)

 

HON WAVEL WOODCOCK

Sa i pour ede kree lanplwa, ogmant prodiktivite e kree plis larises lo Praslin.

By lafen Novanm later pour komans ganny redistribye.  I annan ankor later ki IEA in idantifye pour lease avek bann businessman Pralinwa.  Sa Mr Speaker, se en laviktwar pour bann Pralinwa safwasi par le fe ki Board Industrial Estate Authority ek son CEO, i an konsiltasyon avek bann MNA Praslin lo tou le de kote latab, regardan alokasyon later, i pour retir diskriminasyon politik dan la fason ki later Ile Eve i ganny zere.  Sa ki merite i bezwen ganny en morso kare later pour fer son biznes.  I osi annan propozisyon ki Gouvernman i devret ekoute.  Sa se alokasyon en bout later e finansman pour konstriksyon en microenterprise centre Ile Eve, pour bann pti biznes ki pa kapab envestir dan en batiman.  I pour ede relans bann aktivite endistriyel.  Sa i pour ede relans bann aktivite endistriyel lo Praslin. Mr Speaker, en total 1.15 bilyon Roupi pe ganny propoze pour depans dan bann proze kapital an 2018. Fodre pran kont ki Prezidan Faure in promet 24 lakaz dan 24 distrik dan 2an.  1an in pase e dan plizyer distrik proze lakaz pa ankor komanse.  Enkli proze lakaz kot vye Lakaz Gard Grand Anse Praslin.  Mont Plaisir osi proze lakaz ti’n merit ariv lanmwatye semen by now.  2 proze ki ti dan Bidze sa lannen, ki pa ankor komanse, se proze Daycare kot vye STC Grand Anse Praslin, proze nouvo lakres o-bor lekol primer Grand Anse Praslin.  Napa okenn renovasyon sibstansyel ki’n ganny fer lo lekol Praslin Segonder avek Grand Anse Praslin Primer menm si en sonm sibstansyel ti’n ganny aprouve dan Bidze sa lannen.  Bann Minister, fodre zot serye pour enplimant bann proze kapital.  Kot i konsern re sirfas semen, i byen ki SLTA pe re sirfas semen Grand Anse Praslin, me zabitan Grand Anse Praslin i dezapwente avek travay lo plizyer kours semen.

Mont Plaisir kot fek resurface deza koltar pe sorti.  Annou depans larzan Leta byen. Fodre fer bann travay ki byen e e dirab.  E semen primer antye Grand Anse Praslin, fodre ganny re sirfas.  Letan pyeste semen in fini.

Mr Speaker mon osi kontan pour vwar ki Gouvernman pe pran konsern bann Digwaz serye.  Atraver en Mosyon ki Leader Lopozisyon ti anmenn devan sa Lasanble regardan sa zil, e bann lentervansyon bann Manm LDS lo defi ki zabitan La Digue ti a pe fer fas avek, menm si en bann ti pe dir ki La Digue ‘’oli problenm,’’ ‘’napa problenm,’’ La Digue ozordi nou pe vwar dan Bidze konstriksyon en nouvo Lopital ki’n ganny alokasyon 5 milyon Roupi.  Sa Lopital pour benefisye tou zabitan La Digue.

LDS pour kontinyen sa tors 12 batri partou kot i merit ganny klere. Onorab Loizeau i dir mwan tors 19 batri, 12 batri pa ase.  Mr Speaker en lot laviktwar pour zabitan Praslin, se ki en Framework Management Plan pour Fond Ferdinand, in ganny propoze avek bi envestir plis kapital pour devlop sa Rezerv pour fer li vin pli ekitab e ogmant reveni pour benefis tou Pralinwa.  Fond Ferdinand a vin en valer azoute dan Lendistri Tourizm Praslin.  Avek en nouvo Board Management, nouvo Board Management Team ki pour priyoritiz prezervasyon Fond Ferdinand sirtou Coco-de-mer e osi ogmant reveni atraver lavant tiket e lezot diversifikasyon bann prodwir e servi ofer par sa Fon, Fond Ferdinand.  Tou le 2 MNA Praslin in koz bokou lo devlopman en Plan Biznes, en Plan Stratezik e osi en Marketing Plan pour devlop sa Rezerv dan en fason soutenab e ki pour anmenn plis reveni. Gouvernman in konsilte avek tou le de Manm Lasanble Nasyonal Praslin pour zot input regardan sa Plan Stratezik.

E mon senserman krwar ki Fond Ferdinand, pour kontribye en kantite dan lekonomi Praslin.  Mr Speaker, en porsyon reveni kolekte par Fond Ferdinand pour al dan Praslin Development Fund, ki pour ganny reviv lannen 2018.  Sa fon pour ganny servi pour bann proze ki pour benefisye zabitan Praslin, Baie Ste Anne avek Grand Anse.        Gouvernman i bezwen seryezman get dan monopoli ouswa oligopoly ki bann DMCs i annan lo Lendistri Tourizm.  En senp legzanp, ler bann cruise ship i vin Mahe, propriyeter Creole Holidays ki osi propriyeter Cat Cocos i pran 500 touris Mahe dan Cat Cocos, i anmenn zot Praslin ouswa La Digue, i anmenn zot dezennen dan son lotel, La Reserve ouswa L’Orangerie; en pe sa bann touris i met dan son bann bato o plezir. Me ki nou Vwar?  lezot lotel, restoran, bato lwazir, ki pa pour sa propriyeter zot pa benefisye en sou.  Sa se vorasite Mr Speaker, Annou partaz sa gato..

Fodre Gouvernman i anpes tou sa bann gro msye manz tou sa gato ki apel nou Lendistri Tourizm.  Pa bliye ki Prezidan Faure in koz lo redistribisyon larises. Mr Speaker, menm sis a bann DMC, sa bann DMC i siny Kontra avek enn de lotel, restoran, ouswa bato, plezir, lwazir byen rar sa bann dimoun i benefisye avek en kliyan. Plizyer zot, zot kapab konte lo zot ledwa kantite kliyan zot gannyen avek sa bann DMCs dan 1an. Sa bann DMCs pe zwen en zwe ‘’bef dan disab sakenn vey son lizye’’.

Mr Speaker menm si en sonm 30 milyon Roupi  in ganny mete dan Bidze 2018 pour bann pti proze dan distrik par Local Government pour Praslin, pour Mahe, Praslin ek La Digue,  mon napa konfyans ki sa larzan pour ganny servi byen.  Plizyer proze ki ti’n ganny bidzete e aprouve, pour ganny fer dan distrik sa lannen pa’n demare.  Grand Anse Praslin i pa en leksepsyon, Proze semen Le Relax pa ankor komanse. Proze resurface Basketball Court Grand Anse Praslin pa ankor komanse. Proze lalimyer lo court Grand Anse Praslin, e plizyer ankor dan lezot distrik pa ankor komanse. Nou pa kapab kontinyen avek sa latitid – ‘’gran prometer pti donner.’’ Rezon ki Minister i donnen pour sa bann retar se ki Tender Board i tarde.  Gouvernman i bezwen rod en fason pour speed up sa process.  Bokou Minis i mont lo televizyon, e promet plizyer gran proze, fer bann gran, gran lafanfar.  En proze enportan ki ti sipoze dan Bidze 2018 pa’n enkli pour Praslin. Sa se proze Multipurpose Indoor Gymnasium ki dan limbo.

Bann sportsmen e atlet Pralinwa ti’n ganny promet en gym pour ede devlop sa bann spor parey Volleyball e Basketball lo Praslin; en landrwa kot Match Nasyonal i kapab ganny zwe, olye ki atlet e tim Praslin i bezwen mont Mahe pour tou bann match.  Ankor enn fwa sa Gouvernman in let bann atlet Pralinwa down menm si nou pe prodwi bann atlet o nivo.  Mr Speaker i pour annan logmantasyon 600 Roupi lo allowance bann etidyan pos segonder ki sorti Praslin avek La Digue. Sa in byen ganny apresye, me par kont i malere ki bann etidyan Liniversite ki pe struggle pour ganny en lozman Mahe akoz napa plas Youth Hostel, zot allowance i reste parey. 6mil Roupi allowance pa ase pour kouver zot depans enkli lozman.

Ozordi i preski enposib pour ganny en bedsitter pour 5mil Roupi.  Bann etidyan liniversite i osi dezapwente ki zot allowance i ankor parey depi louvertir Liniversite an 2009. Menm si lavi in ogmante, pri lavi in ogmante, allowance ban etidyan Liniversite i reste 3 mil Roupi depi an 2009.  Mr Speaker, bann operater loto lwe pour kapab apartir 2018 renouvle zot license tou le 5an parey tou lezot biznes olye tou- le-z-an parey i ti ete oparavan. Me bann operater loto, pe osi demande ki tes lo bann loto lwe i merit vin parey tou lezot transpor ki ganny fer tou-le- z-an olye tou le 6 mwan ki kout zot bokou larzan e afekte zot reveni.

Mr Speaker, en keksoz ki mon’n koz lo la a plizyer repriz depi ki mon’n antre dan sa Lasanble, e lezot Manm LDS in osi koz lo la se rediksyon lo tax ki bann propriyeter ki lwe lakaz i bezwen peye.  Pour le moman zot pe pey 15 poursan tax. Gouvernman pour redwir sa tax apartir 2019 pour vin 3 poursan. Mr Speaker, sa rediksyon i byen, me i merit vin an fors apartir 2018.  Me non pa an 2019. Nou pe koz lo fer desann pri lavi ozordi. The time is now.  Par fer desann sa tax i ava ede fer desann pri rent lakaz.  E mon osi fer en lapel avek mon bann frer e ser ki pe lwe lakaz, silvouple ler sa taks i desann annou pran konsiderasyon pour nou bann frer ek ser Seselwa e redwir pri rental.

Mr Speaker, en konsern ki plizyer anplwayer sirtou dan lendistri i annan se konsernan larzan ki zot bezwen peye pour lasistans medikal, pour zot bann staff etranze ki pe travay Sesel.  Zot pey Lasirans pour zot staff etranze, zot osi pey 15 poursan income tax pour zot staff etranze.  Mon prezimen ki lasirans ek income tax i merit osi kouver Healthcare.  Par lefe ki sa bann anplwayer en kou ekstra pour lasirans medikal pour zot bann travayer etranze, sa i fer monte zot kou loperasyon. E osi pri bann servis ouswa prodwi ki sa bann biznes i ofer.  Gouvernman i devret get ladan.

Mr Speaker avek sa bann lensidan vol, avek vyolans sirtou kont bann touris ki pilye nou lekonomi.  Nou fek war en lensidan vreman grav yer swar dan nouvel. Komisyoner Lapolis i bezwen konsider relans tourism police, ki pou patrol bann landrwa ki pour ganny frekante par touris sirtou bann lans e ozordi bann latak i ase komen dan Cote D’Or.  Mon santi pour dir tourism police i pour vreman ede avek sa.

Apard ki Lapolis tou bann stakeholders i bezwen vin ansanm pour tackle sa problenm vol, ki pe afekte nou lendistri tourizm e Seselwa ordiner.  Sa i enkli bann MNAs, DAs e zabitan distrik.  Fodre en louvraz kolektiv e aktiv i ganny fer pour deal avek sa fleo vol ek vyolans, avek vyolans Sesel.  Gouvernman i bezwen donn lapolis plis resours imen e finansyel pour permet zot vin pli efikas.  Mr Speaker, pour fini mon pour kontinyen dir e repete ki Grand Anse Praslin nou bezwen en Jetty ouswa en slipway pour deserve bann bato cargo, bato peser, e bato lwazir. En Jetty ki pour fourni tou bann servis neseser.  En tel proze pour konplimant bann devlopman komersyal e Lendistri Tourizm dan Grand Anse Praslin, ki zabitan sa distrik i depan bokou lo la.  Avek sa Mr Speaker, mon donn mon langazman ki mon pour kontinyen fer bann propozisyon an konsiltasyon avek mon distrik, pour fer siny ki Praslin i ganny en better deal.  Nou dan LDS nou pour kontinyen fer sa travay pour depouy sa Bidze pour fer siny ki nou pep i viv dan en Sesel ki transparan, zis, enklisiv e ki pour benefisye tou Seselwa.  Mersi Mr Speaker.

 

        (APPLAUSE)

 

MR SPEAKER

Mersi Onorab Woodcock. Onorab Prea ou annan en pti komanter.

 

HON NICHOLAS PREA

Mersi Mr Speaker.  Mr Speaker i annan en pti keksoz ki le de Onorab Praslin pa’n touse ki mon ti pe kit ek zot mon ti krwar zot pour souleve.  Me mwan ti a kontan petet le fet ki zot pa’n lev-e pour demann Minis pour klarifye dan son repons. I annan en pti bout dan son Bidze kot in mansyonn en pti Labatwar lavyann rouz Praslin, zis pour klarifye kwa sa? En pti Labatwar Lavyann Rouz Praslin.

 

MR SPEAKER

Dan son repons evantyelman.

 

HON NICHOLAS PREA

Wi, mersi, mersi Mr Speaker.

 

MR SPEAKER

Alright, mersi. Order! Order! Order!  Vi ki mon’n donn laparol pour en klarifikasyon Onorab Prea, Deputy Speaker. Praslin ek La Digue i anvi dir en pti mo avan nou pran nou Break. Wi Onorab Churchill Gill from Baie Ste Anne.

 

HON CHURCHILL GILL

Mr Speaker mon ti mansyonnen sa yer.

 

MR SPEAKER

Ou ti mansyonnen.  Mersi pour klarifikasyon.  Onorab Sophola. Ou ok?  Onorab Woodcock. Ou ok?  Alright.

Mon krwar sa ki’n fer sorti bomaten i annan diferan entervenan – MNA ki’n koz lo sa Progressive Income Tax.  Yer lo SBC, yer swar, yer boner, ti annan interview ki Jules Hoareau ti fer avek PS Payet, PS Patrick Payet.  I vre ki mon konstate parey i annan lezot dimoun in dir ki i annan en pe konfizyon lo sa Sistenm Tax ki’n ganny anonse.  Mwan krwar ki PS Payet konm dabitid, parey nou’n konn li i ti kler dan son leksplikasyon.  E petet ti a bon ki nou sizere ki SBC i pandan Prime Time i repas sa progranm pour anmenn plis klarifikasyon e lalimyer lo kwa ki Bidze pe sey fer. I en sizesyon ki mon krwar vi ki bokou dimoun in koz lo la ki nou pe met devan.

In ariv ler pour nou pran en Break.  Me ler in mansyonn taler mon krwar Onorab Woodcock ki’n mansyonn enn son teacher la anler, i fer mwan mazin mon kominikasyon boner. Ler ou mazin lontan lekol segonder i dir ou Ms Monica sa zafer problenm disiplin pa pour zanmen gannyen.  Ler in ariv La Digue i dir ou Ms Yvonne, personn; zis i get ou, ou konnen pour dir ou bezwen reste ou trankil.  Si i ti la dan mon sez, Onorab Woodcock lontan ti’n reste trankil.  E parey Ms Monica.  E mwan mon pe mazinen petet nou pe rod solisyon. Taler Onorab De Commarmond in koz lo la, mon’n koz lo la.  Petet pour bann teachers, Headteachers ki ase zenn nou devret annan en mentoring programme.  Mwan mon krwar definitivman mwan krwar dan mon leksperyans ledikasyon mentorship i tre enportan. Souvandfwa zis pour gid en dimoun ki napa ase leksperyans, i anpese fer ki Ms ‘X,’ oubyen msye ‘Y’ i deside ki li it’s happy dan son retret, i pa anvi ganny enplike ankor.  Mwan mon deside mon anvi ganny enplike ankor.  Me i en lide ki petet i kapab ganny konsidere par Minister Ledikasyon.  Annan en group bann dimoun ki’n prove zot lekor koman bann dimoun kapab; e sirtou ki annan steel – s.t.e.e.l pour vinabou disiplin dimoun.

Parey mon’n vwar Komisyoner Lapolis in dir ki i pe refer, i pe regard Police Training Academy. Pour annan serten input bann dimoun ki’n kite dan gard.  Mon krwar ledikasyon i osi kapab fer sa.  Servi bann dimoun ki annan leksperyans, konesans, e i annan bann skills, e konpetans pour vinabou ed bann zenn. Pa forseman pour vin Headteacher, me pour la koman parey mon dir en mentor, en pilye ki kapab ede.  En lide.  Avek sa nou pour pran en Break, nou a envit bann, nou bann konpatriyot. Mon bann frer ek ser sorti Praslin pour vin zwenn nou pour en rafresisman e zwenn bann Leaders. E sirtou zot MNA sorti Praslin.

Ler nou tournen 11er, laparol pour Onorab Lemiel, swivi par Onorab John Hoareau.  Avek sa, nou a pran en break e nou a tournen…Wi Onorab Ramkalawan.

 

HON WAVEL RAMKALAWAN

Mr Speaker lo sa verbatim ki nou ti koz lo la yer.

 

MR SPEAKER

Wi sa verbatim zisteman mon’n vwar.  Clerk in donn mwan yer.  E mon ti a sizere ki Clerk pandan Break ou fer siny ki sak manm Lasanble i ganny sa verbatim.  An fet, sa verbatim i verifye sa ki Onorab De Commarmond in dir.  So i a fer kopi pour donn tou Manm pandan… Clerk?

 

(Mic- Off)

 

MR SPEAKER

Pandan Break.  Parey ou ti donn mwan yer. Wi, Ok?  Wi Onorab De Commarmond.

 

HON CHARLES DE COMMARMOND

Non Mr Speaker, ou, ou sipoze pe state the obvious about sa verbatim, e avek Mosyon ki Onorab Ramkalawan ti lev-e.  Pour vwar si in afekte son privilez e lezot privilez lezot dimoun lo sa ki mon’n dir.

 

MR SPEAKER

Non mon krwar parey mon’n dir.  Koman mon’n fini Lasanble yer, Clerk in donn mwan, i lo mon telefonn, in donn mwan kopi verbatim sa ki ou ti dir. E efektivman sa ki ou ti dir ek sa ki mon’n konpran ou ti dir, i parey.  Be selman pour en kestyon prosedir.  Since Onorab in demande mon krwar i bon pour tou dimoun i ganny en kopi.  It does not necessarily kapab en hard copy, oubyen soft copy, i deza lo telefonn.  I anvoy lo zot telefonn.  I annan, e zot a vwar egzakteman ki ti ganny dir.

E parey mon dir mwan mon ti’n pran notes; sirtou ler zot donn mwan en lide oubyen en sizesyon pour swiv; mon ti’n pran notes.  E i parey ou dir.  Be selman pour rezon prosedir Clerk i a fer siny ki tou dimoun i ganny en kopi verbatim egzakteman ki ou ti dir lo Prizon.  Avek sa nou a pran en Break nou a retournen 11er.

 

(BREAK)

 

MR SPEAKER

Avan nou kontiny nou travay, mon krwar ki Clerk in fer siny ki tou dimoun in ganny kopi verbatim yer lo sa kestyon – si ti Onorab De Commarmond ti dir i pour ‘tap’ tou dimoun ou non. E mwan personnelman koman Speaker – parey mon’n dir yer mon satisfe ki i ti pe koz lo Prizon e pa dan en fason zeneral.

Avek sa nou ava kontiny nou deliberasyon. E mwan a donn laparol Onorab Lemiel. Mon konnen ou annan lagorz pa tro, tro bon.  Me met bokou delo devan ou. Onorab Lemiel.

 

HON SYLVANNE LEMIEL

Mersi Mr Speaker, bonzour Mr Speaker. Bonzour tou koleg Onorab, tou dimoun ki a lekout.  En bon Bidze i bezwen montre ki mannyer larises en pei i ganny partaze avek tou son pep.  An dot mo ler nou get en bon Bidze tou Seselwa i bezwen vwar kote ki sa Bidze pour amelyor son lavi. Dan mon lopinyon, Bidze 2018 i kontinyen montre langazman Gouvernman pour amelyor lavi tou Seselwa espesyalman bann pli vilnerab.  Mr Speaker parey Tenm Bidze 2018 i dir; ‘’Travay pour prosperite tou dimoun.’’ Sa tenm i devret diriz kalite travay tou Minister e lorganizasyon Gouvernman. Nou bezwen travay dan en tel fason pour ki sak fanmir Seselwa i prospere.  Mr Speaker prezan permet mwan al en pe pli profon lo serten pwen ki’n sorti dan Diskour Bidze 2018.  Dan Bidze 2018 Gouvernman in fer provizyon pour lentrodiksyon diferan Scheme servis – sa i ava fer ki travayer dan sa 5 sekter ki’n ganny mansyonnen a kapab benefisye.

Mon akeyir Lanons ki bann ners pour ganny allowance retansyon R3mil. Staff Lakaz Mor pour ganny en allowance spesyal.  Ansennyan pour ganny allowance baze lo zot kalifikasyon.  Ler mon lo sa size permet mwan sizere ki Minister Ledikasyon i met an plas en bon plan training pour tou bann ansennyan enkli bann asistan ansenyan.  Mr Speaker, i annan lopinyon divers lo size allowance.  Dapre sondaz ki mon’n fer dan Anse Royale, plizyer dimoun in fer resorti ki tax pa merite ganny tire lo allowance.  Akoz sa i ava fer ki sak travayer a ganny posibilite reel, anmenn en pe plis larzan dan lakour.  Mr Speaker, pri lavi i reste en size priyoriter pour Gouvernman. Plizyer mwayen pe ganny servi pour kontinyen adres sa size. Mon note avek gran lentere linisyativ pour bann biznes Sesel aste an bulk atraver Maurice.       Si tou i mars byen, nou espere ki nou ava kapab vwar en bes dan pri komodite.  Mr Speaker ti pour byen ki Sesel i kontinyen antre dan bann Lagreman similer avek bann pei dan larezyon, pour ki nou pep i kapab benefisye plis.  Nou bezwen kontinyen ankouraz lespri konpetisyon dan bann diferan biznes.  Par egzanp annan plis Lakonpannyen Telekominikasyon; Lakonpannyen Lasirans e e lezot a ankor.

Mr Speaker, transformasyon kondisyon lavi dimoun dan kominote, i primordyal. Nou bezwen kontinyen met zefor pour nou elev bann ki pli vilnerab dan nou kominote.  Mon tre satisfe ki Bidze in fer provizyon ki Gouvernman i kontinyen finans diferan Progranm Sosyal, ki pour benefisye bann ki pli dan bezwen.  Mon apresye ki en sonm R15 milyon in ganny bidzete pour al anver Scheme pour reparasyon fwaye fanmir, ki vilnerab atraver Lazans Proteksyon Sosyal. Me par kont Mr Speaker, i neseser ki nou revwar serten bann kondisyon, ki vin avek sa bann lasistans.  Sekter Lagrikiltir in ganny en logmantasyon sibstansyel dan sa Bidze pour lannen 2018.  I mon swe ki avek en tel Bidze, Minister, sa Minister i kapab enplimant son Plan Mwayen Term ki ti ganny prezante isi dan nou Lasanble.  Minister Lagrikiltir e Lapes i bezwen met lanfaz pour rekrit bann profesyonnel. Pey zot byen pour ki an retour zot a kapab akonpli zot misyon.  Lanfaz i egalman ganny mete lo nesesite pour ogmant kapasite tou staff. I tre enportan san dout, ava kontribye dan transformasyon servis piblik e fer li vin sa lorganizasyon pli efikas.

Mr Speaker, i tre rekonfortan osi ki provizyon in ganny fer, pour enzekte finansman pour bann fermye pour ki zot kapab ganny bann lasistans atraver sa Fon Devlopman. Nou bezwen kontinyen ankouraz bann fermye ki fer elevaz zannimo, avek bi pour garanti pli bon lavyann lokal, konsekaman, nou ava vwar en bes enportan dan nou lenportasyon.  Mr Speaker, letan nou lo Sekter Lagrikiltir, i enportan ki sa Minister i vin pli vizilan lo kestyon zesyon tou Later Lagrikiltir ki’n ganny lease avek fermye.  Mr Speaker dapre resers, i annan anviron 130 dimoun ki ankor pe esper en morso Later Lagrikiltir pour komans zot biznes.  E Minister i bezwen fer son mye pour arive satisfer sa bann demann. Mr Speaker, ozordi bokou dimoun pe lwe en lakaz pour diferan rezon.  Dan bokou ka sa bann lakaz i ganny lwe a en pri tre egzorbitan.  Mon espere ki avek sa lanons ki tax lo propriyete imobilye pour ganny redwi.  Bann landlord ava pas sa benefis avek bann lokater. Mon oule sizere ki sekter prive i sezi sa loportinite pour envestir plis dan konstriksyon lakaz lwe – e byensir lwe li pli bonmarse ki ete konmela.

Lo kestyon standar bann lakaz ki pe ganny lwe Mr Speaker, e an relasyon avek zot pri, mon oule sizere ki Lotorite konsernen, i fer tou sa ki posib pour etablir serten standar.  Mr Speaker, ler nou pran sa size later ek lakaz. I touzour reste en dilenm pour nou.

Pour lannen 2018, ankor enn fwa sa Minister i ganny en alokasyon sibstansyel pour kapab konplet 335 lakaz e fer alokasyon 200 kare later.  Mon espere ki pandan lannen 2018, plizyer aplikan lakaz ek later dan distrik Anse Royale ava ganny asiste.  Mon swete vwar komansman konstriksyon sa 24 lakaz pandan 2018 dan nou distrik Anse Royale.  Mon oule osi rekomande ki dan Departman Labita, i re-konsider zot desizyon lo kestyon litilite kare later kot landfill e Sweet Escott.  Mr Speaker mon annan en vizyon kler pour distrik Anse Royale. E koman MNA elekte sa distrik, lo non tou zabitan Anse Royale, mon’n soumet bezwen Anse Royale dan en plan 5an ki kouver dirasyon mon manda.  Ozordi Mr Speaker, konteni Bidze 2018 i donn mwan pli gran lespwar dan lavenir nou distrik Anse Royale. Mon tre rekonforte pour vwar ki pour lannen 2018 serten proze dan mwan plan pe al ganny akonpli.

Nou distrik pour benefisye avek serten proze Kapital, tel ki konstriksyon nou Stasyon Dife.  E la Mr Speaker, permet mwan fer en pti leklersisman akoz yer bokou zabitan Anse Royale in call mwan apre entervansyon Onorab Larue pour zot rod serten leklersisman.  So mon garanti zabitan Anse Royale ki nou Stasyon Dife wi pour ganny konstri lannen prosen, e i pour ganny konstri par faz.  E i pour ganny konstri lo kare later se 8636, ki sa landrwa kot aktyelman nou pe fer nou bann aktivite lwazir.  Nou’n kontakte Fire Agency apre ki bann dimoun ti fer sizesyon ki zot sanz landrwa pour met Fire Station, akoz nou’n konsidere ki later kot Ladministrasyon Distrik pour ganny servi pour litilite koman en government building. So zofisye kot Fire Station in fer nou konpran ki zot, zot bezwen kare later separe pour ki zot, zot kapab met sa building lo la e zot in fer sorti ki sa building pour en building rezyonal e i pour enn ase gran. I pour annan son bann training facilities e zot bezwen e gran landrwa parking e zot bezwen akse pour sorti.

So kot Ladministrasyon Distrik i ete, ki a lavenir pour ganny konsidere pour fer sa government building i pa apropriye pour nou Stasyon ganny fer.  E de plis mon dir avek zabitan Anse Royale nou’n esper plis ki 15an pour nou Stasyon ganny fer. So a lafen de feb 2018 nou a vwar son komansman.  2enm proze ankor, se amelyorasyon lo serten semen tel ki semen Mont Plaisir e lezot ankor. Konstriksyon semen Gran Rivière pour zwenn avek semen Parson. Provizyon R1milyon pour komansman rekonstriksyon nou nouvo Outpatient Klinik ki pour ganny konstri par faz.  Sa proze i annan en gran lenportans pour nou distrik.

Lo kestyon lezot proze kominoter Mr Speaker, nou distrik pour osi benefisye avek R1.4 milyon atraver Minister Gouvernman Loka, kot nou pour enplimant bann pti proze kominoter ki pour ganny fer dan diferan kominote.  Nou defi, se kapasite enplimantasyon e dan sa konteks, nou tou nou pasyante pour vwar legzistans bokou plis kapasite dan sa Minister, ki ava ede pour anmenn en nouvo lelan, kree en nouvo dinamik dan lenplimantasyon tou proze lannen 2018.

An konklizyon Mr Speaker, mon pou dir ki Bidze 2018 i donn mwan lespwar.  I donn Sesel lespwar.  I devret donn sak sitwayen Seselwa lespwar.  Bidze 2018 in defini en nouvo direksyon, pour nou tou avans pli devan. Nou responsabilite se sezi bann loportinite lev-e, annou met tou sa ki diviz nou de-kote, annou kontinyen travay pour en sel Sesel.  Annou kontinyen zet en regar touzour lo nou bann frer ek ser ki pli feb.  Atrap zot lanmen e ansanm nou ava ede batir sa sel Sesel. Ki lannen 2018 i ava, i ankor enn fwa anmenn boner e prosperite pour tou Seselwa. Mersi Mr Speaker.

 

        (APPLAUSE)

 

MR SPEAKER

Mersi Onorab Lemiel.  Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker. Bonzour Minis ek ou lekip. Bonzour tou Manm koleg, Onorab.  Bonzour tou ki a lekout.

Mr Speaker prezantasyon Bidze pour lannen 2018 i prezant en lokazyon spesyal koman en Manm Lasanble Nasyonal ki permet nou adres bann size lekonomi e devlopman;  bann challenge ki nou pe fer fas avek e osi lakonplisman nou travay koman en Lopozisyon serye e vizyoner ki’n pare pour form prosen Gouvernman.  Mr Speaker, an zeneral sa Bidze i enn ki anmenn bokou.  Me i touzour annan bokou defi dan Egzekitiv ki mon ti a voudre adrese pour permet en pli bon zesyon larzan piblik.

Premyerman, i ankor annan bokou gaspiyaz resours leta dan bann Minister.  Mr Speaker, mon’n obzerv labi lo transpor leta, dan Divizyon Lapolis.  Lapolis i lwe loto pour servi dan zot travay, tandis ki serten zofisye i mont se li e park loto lapolis devan son laport o-bor en loto personnel, apre son travay.  Rapor Oditer Zeneral 2017 i ankor pe donn legzanp initil ki ganny fer san obzerv prosedir Prokirman.  Parey over payment pour en supplier kot Minister Ledikasyon, cash shortage kot MTC, e plizyer lezot ankor.

Mr Speaker, fodre enn fwa pour tou, Departman Tax i double son zefor e von pli proaktiv pour li ranmas reveni L eta, dan tou Seksyon Biznes. Avek resours tre limite e Gouvernman pa kapab ferm lizye lo serten biznes, konmsi i pa egziste, me tir lizye lo lezot e tir lizye lo lezot.  I bezwen annan en langazman serye, mon repete, pour fer biznes parey, pour fer biznes pey zot tax. Gouvernman i osi bezwen angaz li pour moderniz lekonomi an metan serten target spesifik atraver DPA pour fer servis piblik vin pli efektiv.  Nou lanvi se ki Gouvernman i depans mwens lo lakantite mendev.  Me i met plis lanfaz lo e-governance e digitalization sekter servis piblik.  Mr Speaker, ankor mon vwar Gouvernman i tourn an ron e trenn lipye an se ki konsern ‘ease of doing business.’ An 2016 nou rating ti 93enm dapre Labank Mondyal e 2017 nou reste 93enm; ki vedir napa progre.  Birokrasi i ankor en konsern mazer pour tou lenvestiser lokal e etranze. Larepons ankor se digitalization e en network Gouvernmantal.

Minis in osi dir ki in fer kozri avek bann lasosyasyon parey dealer veikil, taksi. Loto lwe, pick up komersyal.  Me kwa ki’n ganny fer konkretman pour amelyor klima biznes Sesel?   Ler nou demann sa bann dimoun konsernen, larepons se i difisil pour vwar.  Drayver taksi ankor pe lager avek bann gran lotel, pour tir baryer lo zot biznes tel ki transportasyon touris ki pe ganny fer par lotel li menm.

Lo car park Beau Vallon Bay i annan en bis ki desann ek touris anvil apartir 10er.  Lasosyasyon Loto Lwe i pe fer fas avek problenm lespas parking lo Airport e permi pour aste de loto egzekitiv duty free ki zot in ganny promet, me pa ankor zanmen gannyen.  Lalis i kontinyen. Nou’n tann Minis koz lo sekter servis offshore koman enn bann sekter ki a kapab annan en pli gran lenportans dan nou lekonomi. Me napa nanryen ki’n ganny fer lo kote rebranding sekter servis finansyel.  Rankont avek sa sekter in fer nou konpran ki nou bezwen en zefor konsolide lo nivo bann Sef Egzekitiv pour relans nou pei koman en ziridiksyon prop, serye, efikas, e enn ki annan bann bon Lalwa. Nou Gouvernman i bezwen vin inovativ e vizyoner, si nou oule devlop dan sa direksyon.

Dan sa Bidze nou’n vwar bokou keksoz ki nou koman LDS nou’n demande pour pep Seselwa ki’n ganny adrese.  La mwan oule donn detrwa legzanp. Premyerman Lopozisyon ti demann Gouvernman pour revwar sistenm taks e vin avek ki senp avek bi, pour redistribye larises e atak lapovrete.  Nou’n antisipe ki en nouvo Sistenm Tax ki fonde lo labaz prensip demokratik e fairness, i pour pli bon pour nou pei.  Setadir bann ki ganny pli gro saler i pey plis e lezot avek pli pti saler i pey mwens; tout an prenan kont en rezim taksasyon pa devret enn ki pini personn pour son sikse, e de lot kote i pa tap for, oubyen pa tap lo bann dimoun vilnerab.

I enn ki devret ganny byen balanse, pour permet devlopman e ankouraz en kiltir travay formel kot tou dimoun i a kontribye dan sa sosyete.  Osi i enn ki devret responsabiliz nou pep pour pran konsyans, ki annan en pri atase avek tou bann servis ki Gouvernman i donnen. Dezyenmman Mr Speaker, LDS in demande an plizyer repriz ki Minis i anmenn dan Bidze, provizyon pour permet bann Minister revwar Scheme of Service zot travayer.  Ankor la nou vwar ki pa mwens ki senk Minister e mwan a nonmen; Minister Labita, Lanvironnman, Lasante enkli staff lakaz mor, Minister Spor, e Minister Lazenes pour benefisye avek ban pli bon kondisyon travay e pli bon lapey.

La lo sa size, mon oule osi demann Minis pour osi get dan lentere bann full time Homecarers ki travay dir e souvandfwa dan konze piblik pour en minimum wage.  La mon oule mazin madanm Fred Mare Anglaise ki donn bokou swen son kliyan menm apre ler. Mon ankouraze pour tande, ki bann ansenyan pour ganny 10 poursan zot reveni total koman Gratwite sak 5an servis.  Sa i a ede pour motiv zot, fer zot tenir dan sa profesyon nob menm si i annan bokou defi.  Mon ti ava kontan vwar serten travay kontinyel i ganny fer pour adres osi lapey ansenyan, an konparezon avek ansenyan etranze pour ki nou a realize sa prensip nob kot napa diskriminasyon e ki LDS in toultan tenir.  Setadir ‘’equal pay for equal work. ’’ Tel koman bann Ners, bann Teachers pa devret ganny kit deryer.  Nou pe demann ki en revizyon zot Scheme i enkli bann librarian e lezot support staff i ganny fer.

Trwazyenmman apre Mosyon ki’n ganny anmennen tou le de kote latab, nou’n vwar ki Gouvernman in reazir pour donn logmantasyon etidyan Inner Islands ki pe vin lekol Mahe; egalman en Fon 500 mil Roupi in ganny donnen pour bann Fon Devlopman Inner Islands.

Katriyenmman LDS pa’n mank okenn loportinite pour koz lo size servis banker.  Akse avek finans pour pti biznes e lentere pli ba lo loan. Pri Lasirans e pri Telekominikasyon.  Malgre in annan, malgre Minis in anmenn serten pti lazisman isi laba, me sa size i, nou vwar ki progre i tro pti git, e tro dousman. L’Egzekitiv pa pe fer ase zefor sirtou lo kote Telekominikasyon pour anmenn negosyasyon for, pour fer sir ki sekter prive i bes zot pri anliny avek size ‘Fer desann pri lavi.’  Parey in ganny dir Minis in dir nou ki 21 poursan i annan, 21 poursan logmantasyon dan koneksyon Internet e 98poursan logmantasyon dan litilizasyon data.  In devret kapab anmenn plis profi pour bann lakonpannyen, alors in devret kapab fer zot pri desann.  Me sa pa’n le ka. Petet si Cable & Wireless pa ti pous 50 Seselwa pour fer vini sitan en gran nonm Sri Lankan pour vin fer pran zot plas travay, pri Telekominikasyon osi ti a kapab a en nivo abordab.  Mr Speaker, in annan plizyer legzanp kot LDS in fer son mark konte.  Me i pa posib pour mwan tous tou.

Mr Speaker mon oule prezant, koz lo serten mankman dan sa Bidze.  Mr Speaker, nou’n ganny dir tourism arrival in ogmant par 19 poursan.  In annan lentere pour lezot lakonpannyen avyon deservi larout Sesel.  Kestyon enportan ki nou bezwen ganny larepons, se ki eski lakantite nwit ki touris i fer Sesel in ogmante osi, oubyen in desann?  La kot Carrying Capacity in endik nou, ki lakantite touris ki pe ariv Sesel i a en nivo satirasyon e i kapab met presyon lo nou resours si i mont tro o, kwa ki pe ganny fer pour ki nou retir maximum benefis ek sa lakantite touris ki nou pe resevwar?  Kwa ki pe ganny fer pour konbat transfer pricing, en fenomenn ki pe redwir reset sorti kot sa lendistri?  Mon ti a kontan si Minis i donn nou serten detay dan son larepons.  Menm dan biznes Bare Boat Charter i resanble ki napa en kontrol lo strik, lo sertifikasyon e lekipaz ki vin travay sorti aletranze sirtou ler zot deklar kot imigrasyon ki zot pe vin koman touris.  E konbyen reveni tax i ganny ranmase dan sa aktivite?

Mr Speaker, Minis in prevwar en bes dan Sekter Konstriksyon, an vi ki i annan en Moratwar lo konstriksyon bann gran lotel.  Mon krwar ki sa i devret annan en retonbe pozitiv lo pri konstriksyon.  E si sa, e sa set akoz i pour annan plis konpetisyon aprezan konstriksyon pour pri. Eskiz mwan, mwan a relir sa.  Mon krwar ki sa i devret annan en retonbe pozitiv lo pri konstriksyon.  E sa set akoz i pour annan plis konpetisyon pour konstriksyon lakaz. Sa sityasyon in deza komans etablir son lekor e pri konstriksyon in komans desann.

La mon oule ankouraz bann dimoun pour konstri zot prop lakaz ankor fodre ki Minister Labita  pa trenn lipye e akseler zot zefor pour redistribye bann later land bank pli vit, pour ki Seselwa i a profit sa lokazyon pour konstri zot prop lakaz.  Ler pri konstriksyon i desann i osi fer pri lavi desann.  Mr Speaker, dan lantisipasyon mon ti a vwar, mon ti a voudre vwar ki Gouvernman i sezi sa loportinite, pour met pli gro alokasyon dan Bidze pour sekter Public Sector Investment pour komans en progranm anbisye pour re-devlop bann lenfrastriktir, mentenans bann building; sirtou bann lekol ki’n ganny konstri bokou letan pase.  San bon lenfrastriktir par egzanp semen modernizasyon nou grid elektrisite, delo eksetera, lenvestiser prive ou aletranze pa pou vwar li ideal pour zot met zot larzan dan biznes isi.

Mr Speaker avek sa Moratwar lo konstriksyon lotel, foreign direct investment earnings pour osi afekte. Alor Gouvernman napa swa me pour revwar son model lekonomi, e vin avek enn ki permet soustenabilite devlopman an fas avek sa defi.  Pour fer fas avek sa sityasyon mon ti a voudre vwar Gouvernman anmenn bann Lezislasyon ki a permet Seselwa pour pran ownership bann sekter kle, parey Lotelri, e ankouraz Seselwa pour vin bann antreprener. Pour kwa pa ankouraz Consortium, franchise, strategic partnership dan bann domenn biznes ki konmela, i preski antyerman dan lanmen etranze?  Pour kwa pa ankouraz building society prive pour ede avek loan lakaz ensidswit?

Mr Speaker, mon kontan pour vwar ki demars in ganny fer, pour ki etidyan i kapab pran en loan avek en lentere ba avek Labank Komersyal pour finans zot letid.  Mon ti a kontan vwar ki okenn repeyman i komans selman ler etidyan in pran en pos travay.  Mr Speaker, mon siport Onorab Ramkalawan dan son demann pour ki bann paran ki annan zot zanfan dan lekol prive i anpli en tax return.  An prensip en paran ki pey lekol prive pour son zanfan, i pe pey 2 fwa pour menm servis. Lo tax i pe pey osi, i pe osi pey Lekol Leta.  Alors si i pa pe servi Lekol Leta i normal ki i ganny serten son larzan refunded.  I osi pe retir en fardo lo Gouvernman ler i pe servi lekol prive. Mr Speaker, ler Gouvernman ti anonse ki en Lekol Elit pour ganny fer mon ti annan lespwar ki bann zanfan ki debrouye dan Lekol Leta e ki zot paran napa sa larzan pour met zot dan lekol prive ti ava omwen ganny en landrwa pour zot etidye e epanouir.  Sa ti pour lev nivo ledikasyon ki an se moman i sitan ba e pa fer nou fyer. I annan sitan problenm resours e disiplin dan Lekol Segonder Leta ki fer ki son lanvironnman pa favorab pour bann ki debrouye, ariv pli lwen posib.

Mr Speaker, sa desizyon Cabinet pour aret sa proze i sagrinan.  E mon ti a anvi ki Cabinet i rekonsidere. Si sa Gouvernman i serye, i devret realize ki i pa vo lapenn ou kontinyen ni pour ankor en zour ek en sistenm ki pa’n marse pandan 40an.  E apre ki zot in ferm Lekol Kolez ek Regina Mundi.  Koman prensip ou pa zanmen repet, fer keksoz dan menm fason e ekspekte en rezilta diferan.  Si zot pa oule fer li LDS pour fer li ler nou mont State House.

Mr Speaker, mon oule profit sa loportinite pour kondann sa move aksyon endisiplinen ki’n arive dan lekol Mont Fleuri yer. E nou pour donn nou tou nou sipor Mr Kevin Monthy ensi ki Minister Ledikasyon, pour lentervansyon disipliner ki zot anvizaze pran kont sa bann zanfan.  I regretab pour vwar sa lensidan koumsa, dan nou lekol.  E nou’n en pe dezapwente pour vwar ki Gard pa’n aret sa bann paran deswit apre ki sa lensidan in arive.  Pour terminan Mr Speaker, mon oule dir 2 mo, an se ki konsern mon distrik, e kwa ki annan pour Beau Vallon dan sa Bidze.

Mr Speaker, anba Bidze Gouvernman Lokal 2017, ti annan provizyon pour en changing room facility kot laplenn Beau Vallon.  Me zis 2 kabinen ki’n ganny konstri. Mon’n fer li mon devwar pour mwan anmenn sa sityasyon devan Zofisye Gouvernman Lokal e nou’n ganny en meeting avek menm CEO NSC lo konsep en laplenn ki pour deservi rezyon Nor  koman nou home turf.  Mon’n demande ki sa laplenn i ganny son lalimyer ek son graden pour asize, e en vre changing room i ganny fer.

Mon ekspekte ki sa plan i a ganny travay lo la sa lannen e i a ganny soumet dan Bidze 2019.  Mr Speaker, i malere pour dir ki Gouvernman i ankor pe trenn lipye lo bann proze distrik.  Bokou ka menm si larzan in ganny bidzete pour fer serten pti travay, me laplipar sa bann travay pa’n ganny fer.  Pour nonm detrwa; Proze Lalimyer lo semen – DA in fini anvoy lalis, Bus Shelters ki nou’n demande nou pa ankor gannyen, Koupaz pye dibwa, Slipway lo Mare Anglaise, ki SFA in sipoze fer, Semen leo Labati ki’n ganny tender, me nanryen pa ankor ganny fer.  Mon osi fer resorti ki zabitan Beau Vallon, pe swiv de pre ki pour pozisyon Gouvernman lo size sa propriyete kot Bazar Labrin i ganny fer.  Mon ti a osi kontan vwar ki Bidze distrik pour ed bann Lekip Sportif i ogmante, pour pran kont larealite ozordi.

Mr Speaker avek sa letarzi dan L’Egzekitiv, mon krwar ki Gouvernman i bezwen shape up e retir lensertitid an vinan pli proaktiv, pour ki pei i kontinyen devlope.  Avek sa Mr Speaker mon oule remersi tou dimoun ki’n ekout mwan.  Mersi.

 

MR SPEAKER

Mersi Onorab Hoareau.  Mon a donn laparol Onorab Aglae.

 

HON EGBERT AGLAE

Mersi Mr Speaker.  Bonzour Minis ek ou delegasyon, tou Manm Onorab, tou Seselwa a lekout.

Mr Speaker ozordi koman en Manm Lasanble pour la dezyenm fwa mon vwar mwan pe vin koz lo en Bidze Nasyonal prenan kont klima politik Sesel ozordi kot nou pe koabite politikman.  Lenportans atase ek en Bidze Nasyonal, se en gran valer.  Sa ki sa Bidze 2018 pe anmennen se en lot pli gran letap dan transformasyon devlopman nou pei Sesel; ki vize ver en devlopman enklisiv, nenport ki kouler, ki ou krwayans, Relizyon e politik. Sa Bidze i tous tou kous nou sosyete.

Mr Speaker apre sa 40an listwar in prouve ki tou Bidze lepase in vize ver pep o sant devlopman, loportinite dan egalite.  Se atraver sa menm lespri ki sa Gouvernman dan lepase in arive met Sesel lo kart mondyal malgre, tou defi ek sakrifis ki nou’n bezwen fer fas avek.  Sesel Mr Speaker, en pei an transformasyon, e Sesel i touzour pe transformen ekonomikman. Sa ki ptipti in vin gran. Sa ki mank loportinite pe reisir. Sa ki ti pli vilnerab in kontinyen ganny asiste e i annan ankor plis loportinite an mezir ki krwasans pei i ogmante.  Mr Speaker, tou pei ki anba devlopman i bezwen fer fas ek defi. I bezwen fer fas ek problenm.  E nou, nou pa en leksepsyon.  Kot Sesel i vwar li tanzantan pe reziste pour soutenir son pep, Ladres sa Bidze ek son bann pwen kle pe ekout lapel konsiltativ e priyorite sa pep.  Mr Speaker parey Tenm sa Bidze i dir; ‘’Travay pour prosperite tou dimoun’’ en pe parey dan en Sistenm Progresis kot pouvwar ek devlopman i santre otour son sitwayen, an mezir ki Sesel i sirmont son defi makroekonomik anba progranm IMF ozordi preski 10an apre, pei atraver Gouvernman i war li neseser redonn sa pep en pe dan sa lakonplisman avek bi rann lavi nou frer e ser Seselwa pli ere e plis dinyite.  E se sa ki en Gouvernman a lekout son pep i war koman enn son priyorite.

Mr Speaker sa Bidze i souliny bann bon performans edikater ekonomik tel ki; dan sekter prodiktiv, sekter touris, servis, lapes, e krwasans plis pti biznes.  Me malgre tou sa bann bon endikater, i annan pa mal defi pour nou sirmonte.  Mr Speaker se sa ki mon lans en lapel ek Gouvernman pour seryezman revwar diversifikasyon nou lekonomi ki ava kree plis larises.  Anmenn plis sekter prodiktiv, ki a redwir depans lo lenportasyon. En lot lefe pozitiv ki sa i ava anmennen se si demen, enn nou bann sekter kle i pas atraver difikilte, ou sok mondyal pei i ava ekonomikman annan en fall back position pou soutenir son pep ziska ki sityasyon i retourn i normal.  Mr Speaker Sesel ozordi pe sibir en bes dan lakantite foreign direct investment.  E le fe Moratorium dan Sekter Tourizm osi in anmenn en lenpak mwen pozitiv.

Mon toutafe dakor e normal ki nou bann aki ouswa leritaz pour fitir zenerasyon, i ganny proteze.  Me larealite i reste si nou anvi plis lenvestisman, plis deviz pour redwir sa to lenflasyon 3.2 poursan e depresyasyon Roupi, 2.45 poursan anver Dolar; tout an prenan kont bann bon parol lepase, fer Sesel vin en Pti Bizou dan Losean Endyen Mr Speaker nou bezwen koman en pep, seryezman koman en nasyon mazin lo serten devlopman dan en fason fran.  San okenn politik popilis, me pirman ekonomik.  Akoz si demen ler napa lenvestisman sorti aletranze pei pour ‘come at a halt’ parey Angle i dir e nou tou nou bann progranm devlopman pour bezwen ralanti.

Mr Speaker lenportasyon an deviz i plis ki 1bilyon Dolar par an e en Bidze pey anyel i kontinyen ogmante.  I annan pe dir fodre Gouvernman i koup depans, koup Bidze.  Mon napa problenm ek sa, si sa pour evit gaspiyaz.  Me lo lot kote nou war bokou demann, demann lozman, demann nouvo semen, demann nouvo Scheme, demann batiman pour abrit Minister, proze Danm, ogmantasyon saler e allowance ek lezot demann ankor.  Mr Speaker, eski sa pa vedir logmantasyon dan Bidze Nasyonal? Kote ki nou pour koupe ki son lenpak nou pour koupe?  Mr Speaker, Gouvernman dizour i konn son priyorite anba direktiv Prezidan Danny Faure; kot bokou devlopman e transformasyon pe ganny arive. E pep Seselwa i reste pozitiv anver en tel direksyon.

Mr Speaker, en bann mezir ki sa Bidze pe adrese, se redwir lapovrete e met plis larzan dan pos Seselwa.  E nou pe war sa atraver zero income tax pour sa plis ki 54 poursan travayer ki pe ganny mwens ki 8,050.  Anba sa propozisyon nouvo rezim income tax 98 travayer Seselwa pour benefisye.  Nou vwar ki nou pour napa Tax lo Gratwite e Konpansasyon pour bann travayer ordiner e public servant, eksepte bann ki dan lapwentman konstitisyonnel parey nou menm bann MNAs.  Mr Speaker mon welcome sa nouvo Scheme, sa 5 nouvo Scheme, tel ki pour ners, Health care profesyonnel. Malgre lanfaz i touzour lo sa de pti group. Annou osi pa blir bann kad travayer dan sa menm sekter tel ki bann teknisyen, bann clerk, bann porter, bann operator, bann cleaner. Akoz zot tou, zot en mayon enportan pour fonksyonnman, pour efikasite sa Minister.

Mr Speaker, bon nouvel osi pour bann travayer Minister Labita ek Lenfrastriktir pour en Scheme pli eleve, e sa i ede ranpli sa defayans mendev profesyonnel Seselwa, e rann sak Departman pli efikas, e sirmont lekspektasyon sa pep.  Mr Speaker, mon osi welcome sa nouvo Scheme Departman Lazenes e Spor, ki a ede os nivo moral sa bann travayer e ki a fer ki zot a vin pli performan, pli prodiktiv.  E se dan sa menm lespri ki mon welcome sa Scheme pour Minister Lanvironnman ek Sanzman Klima.  Mr Speaker an mezir ki krwasans ekonomik i ogmante, i neseser ki Gouvernman i konsider gradyelman revwar Scheme of Service across the board.  I rann zot pli azour pour reflekte larealite kou lavi.

Mr Speaker Bidze in mansyonn allowance spesyal, ki pour bann ki pour baze lo zot tann servis plis ki 5an, 10an, 15an.  E sa i al dan en bon direksyon pour ankouraz Seselwa reste dan lanplwa, an menm tan valoriz zot kouraz ek devosyon anver zot karyer.  E mon santi ki sekter prive i devret swiv dan menm legzanp a lavenir.

Mr Speaker pour bann etidyan Praslin, La Digue, Gouvernman in ekout zot.  En logmantasyon R600 a soulaz sa fanmir an term depans.  E mon demann zot sa bann etidyan pour sezi loportinite e pran zot letid o serye.  Mr Speaker bokou in ganny dir dan lepase lo travayer etranze.  Malgre tou sa kritik ki etranze pe pran travay Seselwa. Me ki nou vwar nou bann zenn i deside pa pran lanplwa formel e seryezman.  E sa i fer mwan poz serten kestyon.  Eski nou pour kapab ranplas sa plis ki 12mil travayer etranze si nou kontinyen koumsa? Eski nou pour kontinyen met retar sekter prodiktiv akoz mankman mendev Seselwa?  Mr Speaker larepons mon kit ek sa pep Seselwa pour seryezman reflesir lo la.  An menm tan mon lans en lapel ek Minister Lanplwa, pour fer en lodit zeneral pour tou pos ki etranze pe okipe e vwar reelman, si napa Seselwa kalifye ki pe rod louvraz ki kapab ranplas zot, sa bann etranze akoz pe kout Sesel anviron 50 milyon Roupi par an, an deviz pour anvoy dan bann lezot pei.  Sa larzan ti a’n kapab ganny servi pour pey nou manze, pey nou karbiran.

Mr Speaker, bokou in ganny dir lo konbat lapovrete. Eski lapovrete ki nou vwar dan Sesel i en lapovrete reel isi Sesel?  Eski nou koman en pep nou pe pran nou responsabilite o serye lo en baz kolaborasyon, konprenezon, lapartaz, en kontribisyon dan sak fanmir?  Ouswa nou pe viv endividyalizm an neglizans a bann bon valer sosyal, moral ki nou gran paran ti enkilke dan nou pour rann nou pli obeisan e pli disiplinen?  Eski nou konn balans nou lanmizman ek nou depans personnel?  Mr Speaker mon rekonnet ki i annan vilnerabilite e fanmir par fwa pa kapab fer debout zwenn. Alors plis zefor i merit ganny mete ansanm.

Gouvernman ek sekter prive pour konbat pri lavi.  I byen serten biznes i anrisir son lekor me lot kote nou bezwen osi aprann redonn sosyete sa ki sosyete in donn nou.  Mr Speaker, en fason ou en mezir ki mon fermeman krwar ladan, se plis rediksyon dan to lentere labank.  Ozordi lamazorite Seselwa i annan en det atraver en loan pour peye. E avek en rediksyon konsiderab i a tradwir en benefis plis ki 90 poursan Seselwa i a remet larzan dan son pos.  Mr Speaker, bann komersan i devret vin pli onnet e responsab dan zot komers.

E la mon plede avek SRC pour beef-up zot kapasite resours imen.  Detekte bann iregilarite; bann fo deklarasyon, e bann ki pa pe pey tax koman i fodre, i a ganny deal avek.  Sa i ava anpese ki pei i kontinyen perdi de milyon, de milyon par an.

Mr Speaker i vre ki sa lannen i en lannen ki’n difisil kot i konsern desiminasyon Bidze; kot nou’n vwar bokou retar dan lenplimantasyon serten progranm sosyal e proze ki’n rann lavi serten nou pep fristre, e nou dan Lotorite Distrik e koman Gouvernman. Mr Speaker menm si i annan ki’n dir ki sa Bidze pa Bidze LDS, i annan ki’n dir ki i ganny konsilte lo la me le fe i reste ki i pa en Bidze vize ver zis Parti Lepep. I en Bidze Nasyonal parey lo papye i mete, National Budget Address.  Vedir en Bidze pour tou Seselwa.  Mr Speaker mwan dan mon distrik Port Glaud ki en distrik anba devlopman e mwan mon manda se pour anmenn plis devlopman e loportinite.

Mon krwar ki sa Bidze pe tous tou dimoun dan mon distrik.  Tou sa ki pe travay, personnel income tax i dan zot benefis.  E i tonm parmi sa 98 poursan ki pe al benefisye.  Sa i vedir i ankor en pe plis larzan dan zot pos.  Mr Speaker, bann ki dan pti biznes anba en medium threshold pa pe bezwen fardo zot ek pey tax.  Me plito rod fason pour agrandi zot servis.  Nou bann etidyan pe kontinyen ganny zouir en ledikasyon gratwit e bann ki malad pe zouir en lasante pour nanryen, e sa pa zanmen merit sanze parey serten i oule fer nou krwar.

Mr Speaker, ou ki en teacher, en ners, en Dokter profesyonnel lasante ki reste dan Port Glaud ou dan sa Bidze.  Mr Speaker dan sa Bidze 2018 in pran kont nou bann fermye e mon lans lapel ek Minister Lagrikiltir, Lapes pour vin rann en vizit, e konsilte nou bann fermye, depi Des Arpents, Morne Blanc, ziska Port Launay. E osi nou bann peser ki pe diminyen zour an zour tou sa avek en lespri adres bann issue tel ki devlopman lenfrastriktir, servis de-baz akse ek kredi, marketing, stokaz pour zot kapab os nivo zot prodiksyon.  Nou pe osi fer en demann pour nou ganny en ice plant.  Mr Speaker en bann defi nasyonal se lozman. En mon kontan ki Prezidan Faure ti pronons son lekor lo proze lakaz lo kors Foret Noire parmi sa 3 priyorite devlopman lakaz dan Sesel, 24 Unit dan 25 distrik.

Me mwan demann Minister Labita ek Lenfrastriktir pour akseler sa devlopman apre tou sa letan espere akoz en promes set en det.  Mr Speaker dan sa Bidze a lavenir Port Glaud pour benefisye plis ki 50 milyon atraver lezot proze lakaz.  E sa ki ankor pe esper son lakaz, i en lespwar akoz zot feature ladan.  Mr Speaker, malgre tou zefor dan domenn lozman, i reste ankor lensertitid kot i konsern housing loan.  Wi HFC i la pour asiste, me son kapasite finansyel i parfwa limite e sa i rann bann aplikan fristre ki bezwen esper plis ki 1an pour zot loan lakaz.

La ki Minis Finans i prezan, mon demande ki sa i ganny revwar ogmant zot Bidze. Mr Speaker, an sa ki konsern labank – sirtou sa 2 labank Gouvernman, zot in ale dan sa direksyon, me i ankor annan serten ezitasyon dan prosedir, e menm par ler ou a krwar zot pa oule donn sa loan akoz i annan mon zabitan Port Glaud ki’n ale e ki ankor pe espere.  E pe vir an ron.  Mr Speaker mon mazin sa zenn fiy e sa zenn garson ki oule fer zot lakaz dan leo Foret Noire.  Sa lot fiy e en lot garson Morne Blanc, sa madanm Port Launay, sa msye La Grotte zot ankor pe esper zot loan.  File i sorti isi, i al laba.  Silvouple donn zot en larepons e deal ek zot kes.

Mr Speaker, ankor kot i konsern lenfrastriktir, Departman lo transport, later, i enn bann lazans ki’n delivre byen son travay.  En Bidze R7 milyon pour al dan lagrandisman semen Port Launay, ziska Cap Ternay, La Grotte ziska Cap Ternay dan detrwa faz.  Nou sipoze war maintenance sa 2 pon mazer pour asir pli bon sekirite trafik e sekirite routyer.  Mr Speaker dan sa menm Bidze 2018, R4milyon in ganny mete pour re-sirfas semen Foret Noire ziska Sans Soucis, e plis ki R2milyon pour proze Pavement e lagrandisman semen prive Belle Vue ziska Delplace enkli en bus shelter.

Mr Speaker plis ki 3 semenn pase dan sa menm Lasanble mon ti poz kestyon Minis lo kestyon network delo dan Port Glaud.  E la en sonm R3 milyon PUC in enzekte pour en nouvo network, laponp delo pour amelyor distribisyon stokaz delo. Zabitan Foret Noire a lavenir, ava aret sibir delo koupe.  Mr Speaker ankor pour Port Glaud, en Bidze 1.4milyon pour akseler devlopman Mission Lodge.

E la mon demann ek Gouvernman pour entervenir kot i kapab lo sa proze Waterfall.  Plis ki 3an pase proze in bloke; an fen ki sa Leritaz Nasyonal i reste a laporte tou Seselwa ek etranze dan en fason pli welcoming e pli an sekirite.  Mr Speaker, en sonm 1.5 milyon Roupi in ganny mete pour fer maintenance lo sa 2 Klinik Port Glaud e Beoliere swivan dyalog ek Minister Lasante pour asir konfor lanvironnman nou bann pasyan e staff.  E mon plede ankor enn fwa ki an mezir resours imen dan Minister Lasante i amelyore, donn nou distrik en Dokter permanan e ouver sa Klinik lo en baz 7 lo 7.

Mr Speaker en konsern ki mon zabitan i partaze se ki nou Stasyon Lapolis i demann en renovasyon mazer e tan donnen ki nou annan en nouvo Komisyoner, mon demann li pour donn en pe latansyon lo sa stasyon e donn li son vre stati neseser an term resours imen en transport permanan. Sa i a ede desarz zot travay dan en fason mwen fristran e lekspektasyon piblik dan sa lager kont kriminalite, drog, labi lezot sibstans e problenm domestik a ganny met anba kontrol enn fwa pour tou.  Mr Speaker swiv vizit Prezidan sa lannen dan mon distrik Port Glaud, mon ti met devan sa problenm delo sale lo lakot semen vizavi Vilaz Prezidan.

En solisyon se en breakwater.  An vi sanzman klima ki pe fer nivo lanmer monte, e sa pe koz bokou lenkonvenyans sirtou dan letan Vandswet pour motoris e menm pyeton.  Lefe ki mon pa’n vwar larzan pour sa proze dan sa Bidze mon enplor ek Minis Finans ki la ozordi ansanm ek Minister Lanvironnman pour zwenn ansanm, pour tonm dakor lo en Bidze pour demars proze o pli vit posib.  Mr Speaker parey tou le lannen Bidze i fer provizyon 1.2 milyon atraver Gouvernman Lokal pour bann pti proze. E mon santi ki sa lannen i pa’n fasil pour sa Minister e Port Glaud osi in ganny afekte avek bokou retar.  E sa in koz fristrasyon pour mon zabitan ki ti pe esper lenplimantasyon zot proze.  Alor mon demann Minis Finans pour zwenn ek Gouvernman Lokal pour revwar bann kad prosedir lenplimantasyon pti proze.  Elimin serten birokrasi, donn sa Minister son demann pour plis resours imen dan Seksyon Proze e son Scheme eleve.  Mr Speaker, sa pour ede senplifye lenplimantasyon pti proze dan en fason pli efikas, timely.  Akoz ozordi si ou pe al fer en proze 5mil i bezwen pas dan preski menm prosedir, ki en proze valer R100 mil Roupi.  Eski ou war sa i zistifyab dan en letan modern kot nou pe viv ladan?  Wi mon dakor nou bezwen latransparans e rann kont.  Me as long ki napa okenn loder koripsyon, sa bann retar i bezwen ganny redwir akoz sa pe rann serten mon bann zabitan fristre.  Mr Speaker, antretan sa Bidze 2018 i permet kontinyite dan progranm devlopman kominoter sosyal. I ankor annan zabitan ankor pe pasyante pe esper zot proze semen drenaz, peron, miray, landrwa larzi, zot bus shelter pour koup zot pye dibwa.  E mon dir zot ki sa lannen, ki lannen prosen gradyelman zot pour ganny gete.

Mr Speaker sa vyeyar, dezabilite, ouswa vilnerab ki son lakaz in avarye, sa Bidze in fer provizyon pour asiste zot e rann zot lavi pli konfor e ere.  Mr Speaker, pour bann zenn atraver sport ek kiltir, annou zwenn e sezi loportinite ki sa Bidze. Ou ki anvi vin en pti antreprener, ou ki anvi pourswiv ou letid avanse aprose vin devan sa Bidze in fer provizyon pour tousala.  Mr Speaker, ler nou pe koz lo lazenes ozordi ki sipoze pilye larelev fitir, mon annan serten lenkyetid.  Sa fleo drog pe ronz nou bann zenn garson, e solisyon i tro dousman.  E la mon profite pour poz kestyon lo size sa Sant reabilitasyon Cap Ternay ki ziska prezan koman en manm elekte napa en plan ki’n soumet a dispozisyon Lotorite Distrik Port Glaud, menm si bokou rekomandasyon e kontribisyon in sorti atraver nou zabitan.

Alors mon demann sa Lazans pour zwenn ek nou, vin eksplik nou zot Plan Devlopman, akoz i annan serten konsern atase ek en tel devlopman Cap Ternay.  Mr Speaker pour met lo rikord mon pa kont sa, en Sant Reabilitasyon dan son totalite akoz i annan en outcry sosyal lo size drog.  Me sa kou 40 milyon prenan kont son daily running cost, nou pa sir konbyen pour kout taxpayers money dan son totalite.  I annan serten lenfrastriktir parey nou bann zil elwanye presizeman Coetivy akoz nou pa servi menm larzan e enzekte laba.  Nou annan en progranm pli efektiv e a monn avi Coetivy pour pli an sekirite ek mwens lenterferans sorti an deor prenan kont son pozisyon zerografik. Mon konnen ki Komite Zil i kont lo la – i kont sa.

 

MR SPEAKER

Onorab, Onorab, soley i komans desann. Midi in sonnen, round-up.

 

HON EGBERT AGLAE

Mr Speaker, konpare ek Cap Ternay ki pli aksesib prenan kont son louvertir ek lanmer, son lafore ki pour mwan i enkontrolab. Eski sa pa pour poz serten risk?  E en lot pwen enportan se akse tou Seselwa e zabitan Port Glaud dan sa landrwa. Sa ki mon ti a kontan war se en devlopman eco-friendly, lwazir pour zenn, en Gateaway weekend pour en fanmir, e Sant Edikasyonnel Biolozi e Kiltirel.

Mr Speaker, pour round up ler mon pe koz lo lafanmir, landrwa kot tou i komanse, kot nou enkilke valer moral sosyal e disiplin.  Nou vwar tousala pe denigre e nou sekirite pe ganny menase. Eski pa in ler pour nou debout pli for, serye pour defann nou dwa tout an prenan kont laspe spirityalite?  Mr Speaker yer swar nou’n tande lo medya touris fek debarke pe ganny atake. Mr Speaker enough is enough ek sa kalite konportman. Met lafors lo semen, deal ek sa bann dezordonnen. In ler pour confront sa bann malez sosyal, retir vol, retir kriminalite dan nou sosyete.  Ler pour korize annou korize.  Ler in ler pour pini annou pini, akoz sa pratik nou gran paran ki’n fer nou vin sa ki nou ete ozordi.  Pour terminen mon remersi Bondye an premye Mr Speaker, mon fanmir, tou bann ki’n met konfyans dan mwan en siport mwan.  Mon remersye zefor Gouvernman pour kontinyen get son pep.  E ki Bondye i beni nou pei Sesel.  Mersi.

 

(APPLAUSE)

 

MR SPEAKER

Amen.  Mersi Onorab Aglae. Mon krwar ou’n fer en bann pwen enteresan.  Mon pa krwar ki Minis in manke ki kantite Onorab ki’n koz lo sa 2 labank pour fer desann. Onorab De Commarmond in komans lo la, Leader Lopozisyon in koz, mon krwar nou tou pe esper serten aksyon lo sa 2 labank. Avek sa nou pour kontiny nou deba apre midi. Laparol nou pour donn Onorab Steven Pillay pour komanse, swiv par Onorab Wilbert Herminie.  Pour le moman vi ki midi in sonnen. Nou a pran en Break pour nou al manze, nou a retournen 2er e mwan a swet zot bonn apeti.

 

(BREAK)

 

MR DEPUTY SPEAKER

Bonn apre midi tou Manm Onorab. Bonn apre mid Minis avek ou lekip, Mr Thésee, Ms Cesar, e en bonn apre midi osi pour tou manm piblik ki a lekout e ki pe kontinyen swiv sa deba lo Diskour Bidze 2018 prezante par Minis Dr Peter Larose.  Mwan, bon lo mon lalis mon annan prosennman mon annan Onorab Steve Pillay. Ok, Onorab Steve Pillay, e sa i pour swiv par Onorab Wilbert Herminie.  Onorab Steve Pillay laparol pour ou.

 

HON STEPHEN PILLAY

Mersi Mr Speaker bonzour a tous.  Mr Speaker, dan Bidze 2018, Minis Finans in devan Lasanble pour demann 7.951 bilyon Roupi pour depans Gouvernman – en logmantasyon 0.4 poursan.

Mwan en pe konsernen akoz avek bann disiplin fiskal ki nou pe tande mon ti a plizoumwen vwar en rediksyon dan Bidze.  Mon ti a kontan war en Gouvernman strik e efikas lo depans nou larzan.

Ler mon pe get sa kantite Komite ek Departman, mon konsern se ki Gouvernman i tro larz e top heavy parey nou dir. Mon pe get dan Bidze, mon pe vwar apepre 90 budget lines lo depans Gouvernman.  Nou bezwen rode kote fodre koupe, e retir gapiyaz e move zesyon.  Nou devret pe rode pour fer en Sesel ki efikas dan zesyon e depans Fon Piblik.  Permet mwan Mr Speaker, dir enn de mo lo bann pwen zeneral dan ladres Minis.  Mon konnen ki se ler nou pour al an detay lo Bidze, ki nou pour rod savings lo Bidze e zistifye sak Roupi ki tou Departman e Minister pe rode.  Mon pour demann Minis pour revwar en pe bann diplikasyon dan zesyon Leta. Enn bann legzanp se sa Staffing e Recruitment Committee ki’n ganny set up ankor.

Mon demande se eski dan Gouvernman, bann Departman aktyel ki pe fer sa a tou nivo parey DPA, Human Resources dan bann Minister ek Departman, akoz zot pa pe fail oubyen zot pa konpetan?  Minis nou bezwen en Lean and Efficient Government, pa en diplikasyon zefor e mendev.  Mr Speaker, Gouvernman in osi met 2.4 bilyon Roupi pour saler dan Bidze. Sa i reprezant 30.4 poursan Bidze total.  Sa i bezwen ganny zistifye e zer tre byen.  Mon ti a kontan konnen osi ladan, konbyen ki pour bann saler ki pa anba 8,555 Roupi; bann ki pa anba 7 mil Roupi, e bann ki anba 6 mil Roupi.

Mon osi konsern en pe pour bann nouvo Scheme of Service sirtou pour sa 5 ki pe al ganny peye.  Eski i annan lezot Scheme ankor apard sa 5 dan lefitir?  Oubyen dapre zot letid, bann lezot travayer zot osi satisfe.  Eski zot in pran kont parey bann cleaners dan Cleaners Korperativ, teachers, teaching assistant, e lezot travayer ki pe anmenn selman ant 5,050, e 8, 555 par mwan kot zot?  Mr Speaker dan sa Bidze fodre pa ganny kit deryer parey nou dir.  Nou tou nou’n kontribye, e nou tou nou bezwen kontinyen kontribye e partaz larises nou pei. En lapey dan an se moman ki nou ladan, anba 8,555 pa vreman akseptab.  Mon demande ki omwen 100 mil Roupi  i devret ganny mete koman en allowance peye par savings ki nou pour fer dan Bidze pour sa 20,222 travayer anba 8, 555, 54 poursan nou popilasyon Mr Speaker.

Ler serten MNA pe dir Bidze i bon pour tou dimoun, mon oule zis demann zot pour lafen di-mwan Novanm, pran zis 8, 555 lo zot saler e met zot dan lipye, soulye sa 54 poursan nou popilasyon.  Parey mon’n dir lapey anba 8, 555 fodre revwar.  E en sistenm i ganny met an plas pour ogmant zot saler avek savings ki nou pe al fer dan Bidze.

Mr Speaker ler nou koz larzan 5,050, fodre pa nou blir nou Trwazyenm-Az ki anba sa nouvo Scheme, (PIT) zot pour kontinyen reste lo sa Sekirite Sosyal 5,050.  Gouvernman i osi bezwen rod en fason dan sa Bidze ler nou koup depans, en pe i ganny remet ankor akote pour zot osi sa bann Trwazyenm-Az ganny en ogmantasyon.  Mr Speaker, en landrwa kot nou kapab fer en laranzman lo saler, e ankouraz plis Seselwa pour kontribye plis dan son pei, se bann expatriate ki anploye par egzanp dan Gouvernman, Parastatal, Lantrepriz Leta, e lezot ankor.  In ler pour met an viger en plan lokalizasyon ki tou expat i annan en understudy, oubyen counterpart, e i kler ki son kontra expat i limite pour en fix peryod, dizon pour 2an, e ki i pa pour ganny renouvle pour okenn rezo.  Si i pa pare pour partaz son konesans avek en Seselwa bye, bye ale. Dan bokou sa bann expat pe fer ekspre pour zot vin endispansab, e zot latitid ki zot pli siperyer ki nou, i pa akseptab.  Sa legzersis fodre komans deswit sirtou dan tou Parastatal si zot pe anploy bann expat. Parey PUC e lezot fodre, refer sa reform.  Sa Certificate of Exemption fodre aboli la sa lannen.  Napa okenn expat ki sitan spesyal ki i pa kapab ps kot lanplwa pour fer son aplikasyon.  Mr Speaker en lot laliny ki atir mon latansyon se ‘’goods and services’’ pour 2018. 2.7 bilyon Roupi, 34 poursan Bidze.

Sa mon konfidan ki nou Lasanble pour rod bokou plis leklersisman e zistifikasyon.  Nou’n konnen ki dan lepase en ta depans dan sa Heading in ganny kasyet anba la. Fodre tou keksoz i kler e pa pe ganny inflated.  En lot lazans ki apel Drug and Rehabilitation osi mon demande e mon pe rod en larepons kler lo si pa pe mont lo lipye lezot lorganizasyon ki deal ek drog enkli son bann konsekans.  Fodre kler son loperasyon pa pe duplicate ankor en lot.

Mr Speaker, Minis in tous osi lo plizyer lorganizasyon parey WMA, Health Care agency, Youth Culture and Sport, Home Affairs e lezot parey MHILT.  E mon oule dir avek lepep Seselwa, pa bezwen per.  Tou pour ganny detaye e depouye e met o kler.

Minis in osi koz lo sa 24, 24, 24 kot Prezidan ti donn son komitman atraver bann lakaz.  Sa Minis fodre ou kler lo la. Akoz serten pour bezwen ganny revwar.  Nou pa pour zis aksepte epi forse pour anvale.  Mon oule dir klerman parey Prezidan in dir; fodre annan konsiltasyon lo nivo distrik.  Sa mo n pe dir sirtou pour LWMA, SLTA e Minister Labita ek Lenfrastriktir.  Nou pou bezwen zwenn zabitan distrik, e Lotorite Distrik avan proze i aprouve.  Zot pour bezwen lyez ek Lotorite Distrik ler zot pe planning pour okenn proze dan distrik ki’n aprouve.  Mr Speaker dan sa laliny si Minis MHILT pa vin konsilte nou, mon pour demann ek mon bann koleg dan sa Lasanble, pour retenir son bann depans ziskan ler zot vin konsilte nou.

Mr Speaker Minis in fer osi referans lo URS; Employment Relief Scheme. Detrwa semenn pase ler Minis Lanplwa ti dan Lasanble, mon ti lev mon konsern ki URS pa devret zis dan sa 4 distrik, ki Lazans Lapovrete in ganny rekomande. Mon pe demann ankor ki URS i devret dan tou distrik san leksepsyon.  Menm si nou pour servi en lot format akoz nou tou form parti sa lalit.  An menm tan Mr Speaker mon en pe dezapwente ek sa Lazans Lapovrete apre tou sa letan zot ankor pe fer survey.  Mon demann mwan si vo lapenn, larzan pe depanse zis pour fer letid, e ou demande eski lezot lazans parey Sosyal, ESP, Minis Lafanmir, e lezot pa azour ek larealite lavi Sesel?

Apre tou sa lokasyon progranm sosyal, tou le lannen ki nou tande, eski zot napa en database apre tou sa lannen pour fer en aksyon final avek sa bann defi?  Mr Speaker konsernan SPTC mon’n tann sa R2 ki pe monte.  Me mon ti a zis briyevman demann Minis dan son larepons konbyen larzan i pe antisipe anmase avek sa R2 pour an plis pour anmenn pour SPTC?  E sis a pour ase pour loperasyon SPTC oubyen en nouvo bis?  Oubyen nou pour esper ankor Donasyon sorti dan L’Inde.  Mr Speaker, mon annan enn de pti pwen mon oule osi met devan.  Mon kontan ler Minis i dir pour annan reform dan Pension Fund, Parastatal, e lezot Lantrepriz Leta.  Enn de pti pwen konsern.  Mon krwar Gouvernman i devret pran reform drastik ek bann labank.  To lentere i tro o.  Fodre komans ek sa 2 labank Gouvernman premye zot menm.  Mon pa konpran akoz ki Gouvernman avek en senp direktiv, i donn sa 2 labank pour fer desann lentere.  Mr Speaker HFC fodre Reform i ganny fer.  Pour ankouraz plis lenvestisman dan lakaz, i devret annan en plan entansif envestisman pour bann envestiser ki anvi e kapab envestir dan sekter lakaz long-term. En vre partenarya ant Gouvernman ek prive kot Seselwa i benefisye.  Pa fer sans i pret larzan avek leta Labank Gouvernman, epi azout lentere lo la epi re-pret nou.  En Seselwa ki annan pour envestir e ganny en pli bon reveni lo son envestisman dan plas met labank parey konmela.  Mr Speaker, mon osi ti a kontan met devan lo menm laliny Pension Fund i devret ganny reformen e ouver posibilite pour ki dimoun ki anvi fer plis kontribisyon volonter e i kapab e apre i kapab pran en poursantaz sa kontribisyon, pa 55an me apre 5an, 10an i kapab ganny 50 poursan lo son kontribisyon.  Sa i ava redwir presyon lo labank pour bann pti loan avek lentere e i a osi ankouraz travayer pour envestir pour lavenir.  Sa mon krwar i a pran plas sa ‘General Purpose Loan’ ki zot ti pe koz lo la dernyen fwa.  Mr Speaker mon pe get osi si Minis i kapab konsidere ki Fon Pansyon i osi kapab resevwar tou profi, sirplis bann parastatal ek Lantrepriz Leta parey SEYPEC, SCAA, e lezot dan en kont spesyal i ganny redistribye, oubyen zere par Minis dan Bidze koman en Sovereign Wealth Fund.  Fon Pansyon i kapab met sa larzan osi dan Treasury Bills ek Bonds.  Sa i ava redwir larzan ki Labank Santral i bezwen avek labank prive.  Lide deryer sa Mr Speaker, se ki omwen nou a kapab ganny en konklizyon lo sa zafer pansyon 65an ki zot pe koz lo la.  E nou kapab komans koz lo pansyon 60an pour bann pansyoner.

Mr Speaker mon oule demann Minis osi ki tou larzan ki touris i peye pour vin Sesel, son pasaz, lasanm eksetera, fodre i antre dan Sistenm Banker an tou. Epi li si son met sa lotel i anvi retire, li i kapab refer transfer an deor par son labank.  Mr Speaker Central Bank osi i restrikte labank aste Bills oubyen Bond. Parey mon’n dir plito Fon Pansyon ek sekter prive ki ganny priyorite pour aste Bond oubyen Bills.  Labank li son larzan re aranz li e prêt son kliyan a en pri pli konpetitiv.

Mr Speaker lapovrete e pri lavi pa pour zanmen desann Sesel si nou pa re aranz nou exchange rate.  1 Dollar 14 Roupi pour zis kontinyen anmenn lamizer dan Sesel pour sa 54 poursan popilasyon.  Labank Santral fodre fer tou zefor pour fer desann Dolar.  Mr Speaker an konklizyon ankor, mon oule demann lo mon dernyen pwen i lo en demann ki en Letid redistribisyon ekitab lapey dan Gouvernman.  Fodre lapey dan tou Departman Gouvernman i anliny avek tou parastatal, oubyen Konpannyen Leta.  Menm bann ki Gouvernman i annan shares ladan. Fodre gete si pa kapab met en limit lo lapey par lao en serten nivo.  Nou larises i pour nou tou.  Alor fodre ganny partaze avek nou tou.  Mersi Mr Speaker.

 

MR DEPUTY SPEAKER

Mersi Onorab Pillay.  Onorab Herminie.

 

HON WILBERT HERMINIE

Mersi Mr Speaker.  Bonn apre midi Mr Speaker, e tou Manm koleg Onorab e tou dimoun a lekout espesyalman bann zabitan La Rivière Anglaise.  Mr Speaker ozordi mon pran laparol lo Bidze 2018, pour mwan koz lo lapar e reprezant mon distrik e mon bann zabitan La Rivière Anglaise. Mr Speaker ankor enn fwa Gouvernman in travay lo en Bidze ki pour dan lentere tou Seselwa.  Mr Speaker, avek en popilasyon preski 98 mil zabitan, byensir pour annan diferan lopinyon lo sa Bidze. I annan la ki pour kritike e war tou i mal. I annan ki pour war zot in benefisye dan en fason.  E dan lot kote zot pou’n vwar zot in ganny afekte.

I annan ki pour siporte e war vre merit sa Bidze.  Sa i totalman normal. Me swa direkteman ou endirekteman sa Bidze pour tous tou Seselwa ki pe viv Sesel dan en fason ou en lot.  Mr Speaker en Bidze avek en Tenm ‘’Travay pour prosperite tou dimoun,’’ i enn sirman ki’n vin avek en levantay loportinite. Me lakle se pour sezi sa loportinite ki Gouvernman pe ofer nou e travay pour nou kapab a tenir nou lobzektif personnel pour devlopman nou fanmir e nou pei.

Mr Speaker Bidze li menm in tous en ta fakter ki pertinan pour nou sosyete. Bann gran liny tel ki kou lavi, Schemes of Service pour bann travayer, reform dan taks, Sekter Banker, bann pti biznes e osi bann Proze Kapital zis pour tous en pe.  Sa i montre nou ki nou Gouvernman pe ekout son pep e pe travay dan sa direksyon pour amelyor lavi son sitwayen. Mr Speaker bann zabitan La Rivière Anglaise osi in ganny touse – en pe dan en fason direkteman serten dan fason endirekteman.  Swa avek bann pti proze kominoter ou par logmantasyon dan saler, ou par lasistans avek en Homecarer. Wi zot in ganny touse e Gouvernman i la pe siport zot.

Mr Speaker i annan plizyer lannen bann peser La Rivière Anglaise pe demande ki zot ganny en landrwa konvenab pour zot vann zot pwason; ki nou tou nou avoue ki zot enstale pour le moman i pa en bon landrwa ditou. Mon koleg in demande, mwan mon’n demande e swete ki sa lannen ki vini dan sa Bidze, sa bann peser ava ganny pran an konsiderasyon.  Zot ava osi ganny en landrwa pour enstal zot bann lekipman e masin bato.  E osi en landrwa kot zot a mouy zot bato e a ganny aranze pour enkli en slipway.  E Labe pour antre lo mouyaz a ganny fouye a en fonder rezonnab.  Sa devlopman osi i a ede pour sekiriz sa morso semen la lo Laveni 5 Zen kot zot ete pour le moman.

Mr Speaker dan Depans Kapital pour lasante i annan konstriksyon sant lasante Zil Perseverance.  Sa ti dan diskisyon e vizit ki mon ti fer ek Minis Lasante dan Klinik La Rivière Anglaise kot nou ti diskit lo bann servis ki pour ganny sorti kot La Rivière Anglaise pour al Perseverance. Sa i ava soulaz en pe bann presyon ki Klinik La Rivière Anglaise pe resevwar.  E fotespere la serten renovasyon osi a ganny fer lo nou Klinik e ki nou bann zabitan a ganny en pli meyer servis e swen lasante.  E bann travayer dan klinik a ganny bann fasilite de-baz pour amelyor zot lanvironnman travay.

Mr Speaker dan La Rivière Anglaise, nou annan nou en 30enn pti proze dan distrik ki lo pending depi lannen pase.  Avek en alokasyon 30milyon mon antisipe, ki sa bann proze sa lannen a ganny materyalize akoz sa bann proze i tous lavi bann zabitan e i annan detrwa ki la pour en pe lannen.  Sa i enkli proze miray anler dan zanmirant fanmir Sopha, Ma Joie.  Proze semen ki pour zwenn Union Vielle ek Ma Joie, proze renovasyon kot Lakaz Dimoun Aze zii pour nonm enn de.

Mr Speaker propozisyon in ganny fer pour konstriksyon en Daycare dan La Rivière Anglaise.  Sa i ava en soulazman pour bann manman sa distrik, e osi bann childminders ki pe vwar zot dan difikilte apre ki zot quota manrmay in ganny koupe pour en maximum 10. Zot a kapab zer sa Daycare dan en group kot zot osi zot ava benefisye avek en pti pe plis reveni.  Sa Daycare osi a donn plis opsyon bann paran ki war zot pe monte, desann pour rod en landrwa pour met zot zanfan ler zot al debrouye. Mr Speaker La Rivière Anglaise, i reste sa distrik ki annan pli vye Sant Kominoter lo Mahe.  Dan Bidze 2018 fotespere ki sa i ava ganny get ladan e en travay a ganny fer dan sa direksyon, pour deservi nou bann zabitan os.  Sirtou nou bann zenn en group kiltir ki pe fer en travay formidab avek bann fasilite ki pa ideal.  Mr Speaker, sa zistans ki Sesel in arive, i pou enportan pour nou travay ansanm pour nou devlopman personnel, travay pour nou avanse dan lavi, par pran bann loportinite ki Gouvernman pe met a nou dispozisyon.

Avek en tel Tenm ‘’Travay pour prosperite tou dimoun,’’ sa i koz lo li menm.  Si ou anvi prospere dan lavi, nou bezwen travay e travay dir.  Gouvernman in met a dispozisyon son pep bann benefis ki in anmase pandan lannen 2017, avek en bon performans fiskal.  Sa i montre ki sa model makroekonomik ki Gouvernman in adopte, pe aport son fri e se lepep Seselwa ki rezouir sa bann bon desizyon ki Gouvernman in pran.  En size pertinan ki pe preokip tou Seselwa, se kou lavi.

Mr Speaker Gouvernman dizour sa Gouvernman ki mon reprezante dan Lasanble, pa’n manke pour adres kou lavi Sesel.  I pa en travay ki fasil vi ki i enkli lezot sekter.  Me Minis in donn nou garanti ki sa Gouvernman, pe kontinyen negosye dan demars pour redwir kou lavi dan Sesel.  Alors i devret reste konfidan e annan lespwar ki kou lavi i kapab redwir gradyelman.

Serten mezir ki’n ganny anonse se pour tir tax lo Servis Fineray, rediksyon lo lentere ki FBFA i donnen lo loan. En Sistenm Tax Progresiv lo saler ki pour vwar laplipar travayer Seselwa anmenn en pti pe plis larzan dan lakour.  I annan 5 nouvo Scheme Saler ki pe antre an plas e osi en Komite ki pour ganny formen pour revi bann kad saler dan sekter piblik. Avek sa an tet Gouvernman pe fer komitman serye, pour redwir kou lavi e donn son pep en pti pe plis pour viv avek, pour fer zot lavi en pti pli konfortab. Se sa en Gouvernman ki kontan son pep e i pas benefis a son pep.  En meyer ledikasyon pou nou bann zanfan i primordyal. Mr Speaker, en pli meyer ledikasyon, en pli meyer kondisyon bann laklas i a ede pour bann etidyan aprann pli byen.

Souvan bann vizit ki mon’n fer, ki mon’n annan kot lekol La Rivière Anglaise. avek Headteacher sa lekol e osi bann meeting avek bann paran ek bann zanmi lekol, anba Bidze 2018, mon pour met presyon ki Minister i fer serten renovasyon mazer dan lekol.  Lafnet manke, sez napa eksetera.  Nou zanfan i bezwen en bon lanvironnman pour zot aprann byen e an retour zot bezwen zot osi apresye ki zot in gannyen e pa kase.  Mr Speaker, Gouvernman pe kontinyen finans Scheme Laptop e pli bon ankor sa pour aprezan enkli manrmay lo nivo S1 ek S2.  Sa Gouvernman pa’n blir zot osi. Mr Speaker pour ledikasyon avanse lo nivo liniversiter, Gouvernman pour osi ak koman garanter pour bann dimoun ki anvi pran en loan, pour kontiny zot letid avanse, swa isi ou aletranze e sa loan zot pour rekomans re-peye ler zot fini zot letid.

Mr Speaker dan ki pei ki sa i egziste?  Sa i montre en Gouvernman ki annan lentere son pe a ker e met devlopman son resours imen koman en priyorite.  Sa se en Gouvernman lepep ki kontan son pep.  Mr Speaker Prezidan Faure in fer vizit dan La Rivière Anglaise, komitman in ganny fer, teren in ganny demarke pour konstri 24 Unit dan 24 mwan.  Mr Speaker avek sa alokasyon pour Minister Labita mon pou met presyon la boner sa lannen, ki konstriksyon sa bann lakaz i komanse.  Nou bann fanmir pe esper plis ki 10, 20, 25an e i annan menm 30an pour en lakaz.  Larzan in ganny Bidzete alors annou bouze.

Prosedir alokasyon later Mr Speaker.  Sa bann demars i primordyal.  Nou bann dimoun i bezwen, Minis in mansyonnen ki pour annan en alokasyon 200 morso later an 2018.  Mon a pran sa lokazyon pour demande ki bann zabitan La Rivière Anglaise ki lo lalis pour plizyer lannen i ganny pran an konsiderasyon.  Ki travay demarkasyon later osi a ganny fer dan La Rivière Anglaise e priyorite a ganny donnen a nou bann zabitan sirtou vi larzan ti ganny donnen dan Bidze 2017 pour subdivide bann Plot anler Quincy ki pa ankor ganny fer. Mr Speaker dan sa Bidze Gouvernman in esey tous tou Seselwa.

Ou sa enn ki pa pe travay, me ki kapab travay, Departman Lanplwa pour anmas e ofer ou sa posibilite anba Scheme URS. Dan mon distrik i annan plizyer zabitan ki ti a kontan travay.  La i sa loportinite pour lev-e e debrouye e fer sa diferans kot lakour e dan fanmir.  Nou tou nou konnen, nou kontan ler in ariv Zanvye pour nou konnen ki nou pe al ganny en Trezyenm Mwan Saler.  Ankor en fwa en sonm 3 milyon koman lasistans finansyel pour bann pti biznes onor peyman Seselwa pour zot Trezyenm Mwan Saler in ganny mete.  Eski sa Gouvernman pa pe seye pour met en pti larzan dan pos Seselwa?  I bon note osi ki sa Trezyenm Mwan Saler pa pour ganny takse. Mr Speaker, mwan en zenn, en zenn ki’n benefisye anba sa Gouvernman.  Mon’n ganny en Labours en mon’n al etidye, mon’n retournen pour deservi mon pei.  Lazenes La Rivière Anglaise, sa ki mwan mon’n benefisye, loportinite ki mwan mon’n gannyen ozordi mwan la pour siporte e ankouraze ki zot osi zot gannyen.  Dan sa Bidze i annan plizyer loportinite pour zot.  Konn servi li la i zot sans.  Gouvernman pe donn zot sa debousman, i tou depan lo zot aprezan. Gouvernman in ofer zot en Scheme Pti Biznes e en sant kouraz pour train sa bann antreprener e ed zot pour zot kapab debout lo zot de lipye e donn bann servis azoute.  Sa Gouvernman in met dan Bidze en sonm 3, 5.3 milyon Roupi.  5 milyon pour Scheme lanplwa lazenes My First Job, sa pour ed bann zenn devlop bann skill pour zot al dan lanplwa ler zot in fini lekol.  1 milyon dan Scheme YES Scheme, 17.3 milyon pour allowance etidyan pour pos-segonder.

Mr Speaker eski sa Bidze pa pe tous tou sa bann zenn?  Eski Gouvernman dizour pa pe met, e donn nou bann zenn zot vre lenportans?  Loportinite i la lazenes, servi li.  Mr Speaker dan sa Bidze zenn pour benefisye.  Mr Speaker, Gouvernman in met an laporte sa bann zenn e ofer zot loportinite, e mon ti a kontan lans en lapel for avek zot. Servi li byen sa bann loportinite.  Mr Speaker, lo menm laliny mon ti a ava osi lans en lapel ek Gouvernman pour get dan welfare sa bann zenn osi ki’n al lekol, ki’n etidye e fer byen dan zot ledikasyon. Ozordi zot annan en pti biznes, zot en profesyonnel dan zot field respektiv, zot osi zot ti a kontan bann loportinite pareyman.

I annan plen zot ti a kontan pourswiv zot letid avanse malgre zot dan lanplwa. I annan zot ki ti a kontan annan en pti biznes par kote.  Alors mon demande ki Gouvernman i get dan zot welfare.  Mr Speaker, mon’n vizit plizyer lakour dan La Rivière Anglaise, e partou i annan menm konsern sewage.  E sa osi in ganny releve isi dan Lasanble par plizyer Manm Onorab.  Avek en tel alokasyon 653 milyon dan Proze Kapital pour PUC mon pour kontinyen met presyon ki proze Sewage i komanse kot pa ankor, e kot premye faz in fini ki proze i kontinyen e konplete dan dele letan rezonnab.  Dimoun La Rivière Anglaise sirtou bann dimoun ki dan Flat in ganny ase avek sa problenm.  Zot osi zot annan dwa pour viv dan en lanvironnman konvenab.

Mr Speaker, dan lot kote mon dezapwente, akoz ler mon get dan sa Bidze pour lannen 2018 distrik La Rivière Anglaise, pa pe benefisye avek okenn nouvo Proze Kapital. Proze i la e in ganny soumet. Omwen enn ti ava ganny mete dan plas ki mon war 4 ou 5 proze dan menm distrik, annou balanse.  Bann proze tel ki proze later anler pour fer lakaz pour bann dimoun dan La Rivière Anglaise /Union Vale, proze Daycare, proze semen Ma Joie, Mont Buxton ki pas kot Madanm Legaie pour bis kapab akse rezyon Ma Joie anler ki deserve apepre 50 fanmir. Nou bann multipurpose court dan nou bann sou distrik.  Proze pour refer miray ki tenir semen Castor Road, proze pour relocate Veteriner ek SBC, kot bann zabitan i kapab ganny sa bann prime land pour zot devlope e pour zot fer zot proze lakaz, ou bann proze ki dan lentere distrik.

Mr Speaker, tousala in ganny anmennen a latansyon bann dimoun responsab. Sa in fini ganny fer e nou pe espere pour nou ganny en repons lo la.  Mr Speaker, sa Gouvernman set en Gouvernman ki annan son pep a ker.  Wi in ler, wi ler in arive pour nou sakrifye nou bezwen fer li.  Wi ler in arive pour nou persevere nou bezwen fer li. E wi ler in arive pour nou benefisye se pep Seselwa ki pour benefisye.  Pa les etranze sorti deor pour vin dir nou sa.  Nou Sesel nou ankor sanse.  Ler ou pe kriye ou pe dir, ‘’Zet anba,’’ realize ki ou pe zet ou lasante anba. Ki ou pe zet ledikasyon ou zanfan anba.  Ki ou pe zet Trezyenm Mwan Saler anba.  Ou pe zet ou benefis sosyal an granmoun anba.  Ou pe zet sa benefis sosyal ki demen ou kapab vwar ou menm pe gannyen.

Mazinen ki ler ou senm divan ou rekolte tanpet.

 

(APPLAUSE)

 

HON WILBERT HERMINIE

Mr Speaker, serten ou zabitan pe vwar sa Sistenm Tax en pe konfize. Be mon asir bann zabitan La Rivière Anglaise ki tou dimoun ki pe ganny en saler anba 36mil Roupi pour benefisye avek en logmantasyon dan zot saler mansyel. Menm sa bann ki ganny par lao 40 mil Roupi pour benefisye par lannen apre ki zot in ganny zot Trezyenm Mwan Saler.  Eski sa Gouvernman pa annan zot lentere a ker?  I pe travay pour prosperite tou dimoun.

Pour terminen Mr Speaker, ou sa dimoun aze anba sa Bidze ou pansyon i garanti. Ou sa zenn anba sa Bidze ou ledikasyon pour nanryen i garanti.  Ou sa travayer, ou saler i garanti enkli ou Trezyenm Mwan Saler e osi pour nou napa income taks ki pour ganny tire lo overtime e Gratwite.  Ou sa enn ki napa sa mwayen pour aste en tenk delo, anba sa Bidze PUC pe ofer ou en pti loan pour aste enn.  Ou sa manman tousel ki bezwen rekonfor Gouvernman pa pour les ou tousel.  Avek lasistans ki ou kapab gannyen avek Welfare, e Minis pour Lafanmir ou pour viv en lavi sen e armonye.  Ou sa enn ki pe fer fas avek problenm drog, dan sa Bidze ou pour ganny kouver anba lazans prevansyon labi kont drog.  Sa servis i a ou laporte. Fer ou premye pa, sov ou lavi, ou toultan annan en 2enm sans.

Mr Speaker apre tou nou tou nou annan par dan sa levantay loportinite ki sa Gouvernman in ofer son pep.  Sa Gouvernman in fer siny in get nou tou.  Zabitan La Rivière Anglaise, mazinen ki nou toultan bezwen persevere dan lavi.  Nothing comes easy. Me a lafen dizour nou bezwen vwar sa diferans. Gouvernman in fer son bout prezan i nou tour koman bann zabitan pour pran nou responsabilite e sezi loportinite ki’n ganny anmennen dan sa Bidze.  Annou toultan mazinen pour ‘’Kit sa lespwar vivan.’’ Mon pour la dan zot kote parey nou’n komanse ‘ANSANM,’ nou a fini li ‘ANSANM’.  Sa ki tonbe mon pour la pour aport sa sipor. Annou travay pour prosperite tou dimoun.  Mersi Mr Speaker.

 

(APPLAUSE)

 

MR DEPUTY SPEAKER

Mersi Onorab Herminie. Onorab Terence Mondon.  Onorab Mondon.

 

HON TERENCE MONDON

Mersi Mr Speaker.  E bonn apre midi tou dimoun ki pe ekout nou Lasanble.  Mon repons lo Bidze 2018 i tous serten size kot mon santi Gouvernman pa pe fer ase.  Parey mon bann koleg ki’n koze avan mwan, Gouvernman napa en plan konkret pour adres sa bann problenm fondamantal, ki pe afekte nou pei e sa ki mon konstate kot Gouvernman i byen kapab fer keksoz, nou vwar zot pe tro trenn zot lipye. Depans Gouvernman;

Mr Speaker, koman en pei, nou devret konsernen ler depans Gouvernman i kontinyen ogmante lannen apre lannen.  Menm si prozeksyon fiskal i montre en sirplis, ler Bidze i ogmante. Premye keksoz ki nou bezwen rode – eski Gouvernman pe vreman redwir sa fardo loan ki ankor lo nou ledo e ki nou zanfan pour bezwen kontinyen peye? Analiz lo Det Eksteryer e Domestik nou pei, i montre ki Gouvernman i ankor pe tro depan lo loan pour balans zot Bidze.  Malerezman sa Bidze parey Bidze presedan pa vreman adres problenm fondamantal nou pei.  An dot mo sa Bidze ki’n ganny prezante pa pour anmenn nou pei lo en semen kot Seselwa ti a kapab rezouir bokou plis benefis. E met nou pei lo en semen progre ki pli soutenab.  Vre benefis se ler en Gouvernman i angaz li pour elimin gaspiyaz e redwir koripsyon dan nou sistenm.  I kler ki sa Gouvernman napa en plan konkret pour adres sa size gaspiyaz e koripsyon dan nou pei.  Sa 2 keksoz ki pe kout nou pep milyon par zour.  Nou vwar ki gaspiyaz resours i kontinyen lannen, apre lannen.

Rapor Oditer Zeneral, i ranpli avek legzanp alarman.  Mr Speaker kot i annan gaspiyaz, nou konnen i osi annan serten ki pe profite.  Rapor Oditer Zeneral pour lannen 2016, i donn en legzanp konkret dan en analiz detaye lo zesyon ‘manze zanfan lekol’. Dapre sa Rapor Gouvernman, i depans an mwayen en sonm 12 milyon par lannen avek en sel Lakonpannyen ki’n ganny Kontra san menm swiv prosedir Prokirman.

An plis ki sa se ki peyman pour ‘manze zanfan’ i ganny fer san okenn sipervizyon e verifikasyon neseser.  An dot mo Minister konsernen i zis pey invoice san verifye lakantite manze ki ganny delivre.  Sa latitid lese fer e neglizans pe kontinyen ganny soutire lannen apre lannen.  E sa i preski partou dan sistenm gouvernans.  Sa ki malere, Seselwa pe kontinyen pey pour tou sa bann gaspiyaz atraver Bidze Nasyonal.  Lo sa note mon oule fer sizesyon avek Minis.

Aret ogmant Bidze dan bann landrwa kot nou dekouver gaspiyaz.  Rapor Oditer Zeneral ansanm avek FPAC, pour kapab gid ou Minister dan sa prosesis. Fodre ki a lavenir nou kapab atas en sif an term poursantaz sa Bidze Nasyonal ki ganny fini par gaspiyaz.  I pour enteresan konnen ki poursantaz gaspiyaz i ankor annan kot Minister Lasante. Tax Progresiv; Mr Speaker, menm si Bidze i fer serten provizyon dan tax progresiv ki annan en pti soulazman pour sa kategori travayer ek saler pli feb dan nou pei, mon pa krwar ki sa pour fer en gran diferans dan lavi sa kous nou popilasyon.

Mon vwar sa provizyon dan personnel income tax plito siperfisyel an konparezon avek larealite lavi nou pei.  Avek kou lavi ki pe kontinyen ogmante, sa pti benefis pour vitman evapore.  Dan sa menm Bidze nou vwar sa menm kous nou popilasyon pour bezwen pey 40 poursan logmantasyon dan pri bis apartir Zanvye 2018.

Lekonomi; Mr Speaker, ler nou koz lo krwasans ekonomik nou bezwen realize ki se sekter prive ki moter kreasyon larises nou pei.  Alor Gouvernman i bezwen fer plis pour stimil aktivite ekonomik dan nou pei.  Mon pa krwar ki Gouvernman pe priyoritiz son depans, pour reponn a bezwen aktyel.  Si wi akoz i kontinyen met larzan bann striktir ki pa pe fer nanryen dan nou pei?

Gouvernman i devret met plis larzan pour siport linisyativ sa kous popilasyon avek en income mwayen.  Seselwa i anvi pran ownership nou lekonomi. E sa kous popilasyon pa pe ganny sa sipor neseser.  Labank pe pran tro vit avek en Seselwa ki pe fer son premye lenvestisman. Sekter offshore i ranpli avek bann Seselwa profesyonnel e byen kalifye. Alor akoz ki sa Lotorite konsernen, i bezwen pran tou sa letan pour redinamiz sa sekter e gard li koman 3enm pilye nou lekonomi.  Dan en lanvironnman biznes parey dan Sekter Offshore kot ou bezwen reste vizilan e konpetitiv, nou bezwen Gouvernman ki fonksyonn lo menm vites.

Nou bezwen en Gouvernman ki dinamik e alert. Si non sa sekter pour pran fon. Dan menm konteks, ler en Brans Gouvernman i pran 1an pour konsilte, konpran problenm.;  en lot lannen pour fer en plan stratezik e en 3enm lannen pour komans met sa plan an mars, nou kapab konpran kote nou pe ale avek vizyon Parti Lepep.

Koripsyon; Wi Mr Speaker, Seselwa i bezwen lazistis dan bann ka ki FPAC pe fer lenvestigasyon tel ki; FIU, L’Union Estate, e lezot ki’n demann komisyon kont koripsyon pour lenvestigasyon. Parey sa fame 50 milyon ki ti aparet en bomaten kot Labank Santral e disparet son apre midi.  Seselwa pour bezwen konnen ki’n arive avek son larzan.  Seselwa i bezwen vwar lafen sa bann lenvestigasyon.  Seselwa i bezwen konnen ki dezormen, nou annan en sistenm ki kapab protez zot resours kont bann dimoun koronpi.  Koman en Manm FPAC, mwan zwenn avek mon koleg Onorab Larue pour demande ki nou retir sa imilite ki protez en ansyen Prezidan kont okenn prosekisyon apre 3an ki sa Prezidan i kit Lofis.

 

(APPLAUSE)

 

HON TERENCE MONDON

Mon espere ki Parti Lepep i ava siport nou dan sa demann sitan enportan dan lager kont koripsyon.

Lafors defans: Mon zwenn avek Leader Lopozisyon lo sa propozisyon pour transform nou lafors defans.  E mwan mon krwar ki sa i devret ganny fer o pli vit posib.  I en gaspiyaz ler en pei pa maksimiz potansyel son resours imen.  Mon, kapab mazinen sa diferans pozitiv ki sa pour fer pour en solda.  E sirtou ler i vwar son travay pe ganny valorize e apresye dan son pei.

SPTC; Logmantasyon dan pri bis pour bezwen vin avek serten legzizans vizavi servis, e konfor pasaze.  Plizyer drayver i ankor pe esper zot Konpansasyon.  I enportan konnen lekel ki pour responsab pour sa sibvansyon ki SPTC ti pe resevwar avek Gouvernman.  Eski tou sa pour aprezan ganny kouver avek sa R2 ogmantasyon?  Travayer etranze e Seselwa.                 Travayer etranze pe filtre dan tou sekter nou lekonomi; depi gran ziska pti lantrepriz. Nou bezwen rekonnet ki zot pe zwe en rol enportan dan aktivite ekonomik nou pei.  Ziska ozordi Gouvernman pa ankor kapab met an plas en Polisi kler ki reponn a sa nivo realite.  I devret en polisi ki ranforsi kapasite travayer Seselwa.  E an menm tan restrikte bann travayer etranze pour vin sitwayennte Seselwa.

Malerezman pandan ki Gouvernman pe vir an ron, etranze pe eksplor kapitaliz lo bann lavantaz ki a zot dispozisyon.  En travayer Seselwa pa devret pe ganny ‘peanuts’ dan son prop pei. Sa madanm kot L’Union Estate i en legzanp tipik.  Mon’n aprann tou dernyerman ki travayer sewage kot PUC pe travay anba bann kondisyon ki pa akseptab.  Mr Speaker an mezir ki nou ekspoz lab pouvwar, faver, e gaspiyaz dan nou pei, keksoz pe vin deplizanpli kler.  Seselwa pe konpran akoz i pe kontinyen ganny ‘peanuts’ pour sirmont en kou lavi egzorbitan.  Deza bokou in fini realize akoz zot ankor lo lalis lakaz pour plis ki 15an. En nouvo Tax Sistenm, en nouvo Sistenm Tax.

Mr Speaker Minis in enform nou ki en travay konsiltasyon in ganny fer avek bi Reform Sistenm Tax e koleksyon reveni.  Mon pour aport mon sipor dan sa demars akoz nou bezwen devlop en sistenm ki kapab maksimiz koleksyon reveni nou pei.  En sistenm entegre pour kapab travay avek lezot taks sistenm aletranze.  Sa i primordyal akoz nou pei pe perdi bokou reveni atraver bann metod ki biznes i servi pour evit tax tel ki transfer pricing.  Sa prosesis i devret osi enkli en revi lo bann lagreman tel ki Double Tax Agreement ki Sesel in sinyen avek bann lezot pei.  Mr Speaker, ler mon ekout Onorab Ernesta prezant son lalis proze pour distrik Takamaka, mon bezwen sourir.  E mon annan 3 komanter pour fer lo sa ki in dir.  Sa proze Daycare in lo lalis proze distrik depi 2006, plis ki 10an pase.  E sa lespas ankor Lekol Primer…

 

MR DEPUTY SPEAKER

…Kontinyen, kontinyen Onorab.

 

HON TERENCE MONDON

E sa lespas ankor Lekol Primer ki ti’n ganny idantifye pour en tel devlopman, me ki nou’n vwar, ki nou’n vwar apre sa? Zot in fini komans partaze sa morso later avek zot Sef. Pourtan Onorab in dir nou i annan bokou later Takamaka pour fer land bank.

Oli lespas reserve pour fitir devlopman nou distrik?  Oli konsiltasyon pour sa desizyon?  Sa i en lot legzanp ki demontre ki sa Gouvernman napa en Plan Devlopman pour nou bann distrik.  Zis parey Onorab Larue ti fer resorti yer.  Lo sa note mon pour enplor Lotorite Konsernen e MNA distrik Anse Royale an partikilye pour angaz popilasyon Sid Mahe, avan ki zot sa stasyon Fire Brigade kot zot pe propoze.  Sa i en landrwa ki aktyelman ganny frekante par en gran popilasyon zenn nou rezyon.  Si non lazenes pou ‘Zet anba!’ Avek sa nouvo proze Daycare.

Mon 2enm komanter Mr Speaker, avek sa nouvo Proze Daycare ki dan Bidze pour lannen prosenn, mon pe demande ki Parti Lepep i rann Gouvernman sa landrwa ki zot pe okipe aktyelman.  Sa i ava kree plis lespas pour nou distrik, pour nou Klinik, pour zot kapab…

 

        (Mic Off)

 

MR DEPUTY SPEAKER

Order!  Order!  Order!

 

HON TERENCE MONDON

…sa i ava kree plis lespas pour nou Klinik pour zot kapab kontinyen amelyor servis ki zot pe ofer nou zabitan. Parti Lepep i devret kapab okip sa landrwa kot Daycare i ete ozordi, akoz sa Daycare i deza trouve lo en morso later Parti Lepep.  Dan bann zour ki pe vini, PS Payet pour bezwen dir nou Lasanble konbyen ki Parti Lepep in pey Gouvernman pour sa landrwa ki zot pe okipe depi 2012.

3enm komanter agrandisman krwaze semen Val D’Andorre in vin atraver propozisyon ki mon ti fer ler nou ti pe depouy Bidze Departman Transpor lannen pase.  Mon’n swiv sa proze tre pros e mon profite ozordi pour remersye CEO SLTA, PS transpor ek son lekip pour reazir vitman lo sa size.  Mon swete ki lenplimantasyon sa proze i kapab demare boner lannen prosenn.  Mon remersye ou Mr Speaker, e mersi pour ekout mwan.

 

        (APPLAUSE)

 

MR DEPUTY SPEAKER

Mersi, mersi Onorab Mondon. Mon a donn laparol Onorab Chantal Ghislain. Order! Order!  Onorab laparol i pour ou.

 

HON CHANTAL GHISLAIN

Mersi Mr Speaker.  Mr Speaker mon pour pran mon deba lo Leta Lanasyon pour mwan koz en pti pe lo sa bout seksyon kot… en kantite nou larzan.

 

MR DEPUTY SPEAKER

Deba lo Bidze.

 

HON CHANTAL GHISLAIN

Deba lo Bidze, sorry Mr Speaker.

 

MR DEPUTY SPEAKER

Order! Order! Kontinyen Onorab.

 

HON CHANTAL GHISLAIN

Mon pour pran mon bout deba lo Bidze sa lannen, pour koz en pti lo sa bout parti nou Bidze ki en kantite larzan i al ladan. E sa ki annan pour fer avek Benefis Sosyal e osi Welfare.

Mr Speaker Leta i rekonnet dwa tou sitwayen Seselwa pour viv en lavi desan, e dan dinyite e ki son sitwayen i ganny dekwa pour viv ler zot pa kapab travay ouswa envolonterman trouv zot san en lanplwa. Anba Konstitisyon sa sitwayen i ganny kouver an anba en Sistenm Sekirite Sosyal.

E anba Lalwa Sekirite Sosyal ki en Scheme iniversel etabli an Mars 1979 e ki form parti lobzektif sosyal sa Gouvernman, kot atraver en seri mezir i ofer sekirite e proteksyon ler sa sitwayen i trouv li san en saler lafen di-mwan, ouswa en rediksyon sibstansyel dan son reveni an rezilta maladi, maternite, blesir envalidite orfelen, ki swa ou’n perdi tou lede ou paran ouswa menm zis enn ou paran.  E nou Gouvernman in al pli lwen menm si ou paran i abandonn ou ozordi ou ganny tou swen e osi dan ka lavyeyes e lanmor.  E lefet ki sa i en Drwa Konstitisyonnel, sa bann benefis pour sa kategori dimoun i garanti tou le mwan.  E parey dan tou sosyete i touzour annan bann ki malgre zot annan tou zot lafors e kouraz pour travay, zot pli vilnerab ki lezot. La nou pe koz sirtou bann manman e papa tousel ki malgre tou zefors ki zot mete zot trouv li difisil pour fer sa 2 bout zwenn lafen di-mwan.  Gouvernman Parti Lepep i en Gouvernman ki atas gran lenportans avek proteksyon sa kous popilasyon ki pli vilnerab e i garanti e o degree byennet e konfor tou bann zanfan e dimoun aze – ensi ki bann ki vreman dan bezwen olye les zot sakenn pour debrouy li ki mannyer i kapab.

Donk, i son Sistenm Proteksyon Sosyal i kapab ganny regarde koman en lasirans kont lapovrete.  E en mwayen pour delivre en lazistis sosyal ki pli ekitab.  Malgre i larzan taks sakenn de nou sitwayen, me se Gouvernman dizour ki deside kote i mete e ki fason i depans sa larzan tax. Mr Speaker, avek Reform Ekonomik nou ti’n vin familye avek sa term welfare ki Gouvernman ti met an plas pour permet donn lasistans bann fanmir ki pa ti kapab fer fas kont sa sok ekonomik, ki ti’n dan en sok sosyal.  Me fodre admet ki o-kour sa 7, 8 lannen ki’n pase in annan labi sa servis.  Lasistans in vin depandans e bokou dimoun ki annan lafors ek ou kouraz pour lev-e e al debrouye ti’n trouv en fason vitman e fasil pour ganny larzan san rente.

Pli move bann ki deside zis asize e abiz drog e lalkol e komans kick o-bor semen, zot osi zot ganny anmase anba Welfare.  Me ki nou vwar?  Bann ki pli bezwen sa servis e lasistans ki ankor trouv li pe monte desann kot biro pour zot kapab ganny ede.

Pour sa paran ki li i ankor vivan, annan tou son lafors pour travay, me deside abiz lo drog, lalkol, vyolans dan lakour toulezour, negliz son zanfan e abandon li dan en Fwaye anba responsabilite Leta zot napa sa bann traka.  Ozordi i annan 1724 lakour ki lo Welfare.  Ladan 913 i dan lanplwa. Ki fer zot lasistans welfare i baze lo sa bout ki zot bezwen pour zot azout lo sa ki zot deza annan, pour ki zot fanmir i viv en lavi desan. Pour mwan fransman mon napa okenn problenm avek sa 913 fanmir ki pe ganny zot lasistans zis akoz nou Gouvernman pa kapab kit zot ater.  Se sa bann fanmir ki tonm dan kategori vilnerab dan nou pei ozordi.  Omwen zot pee d zot lekor e pa pe depan antyerman lo Gouvernman, pour donn zot tou. Mon tir mon sapo avek sa bann fanmir ki laplipar di-tan i bann manman tousel, ouswa bann fanmir mwen eze dan nou sosyete.  Me akote sa 913 lakour i osi annan 811 lakour ki pa ni menm pe fer en zefors pour en travay selman pe viv lo Welfare.

Mr Speaker, 811 lakour ki pa pe travay, me ki pe ganny welfare e sa pa akseptab.  Akoz pandan ki sa 913 pe fer gran sakrifis, lev-e al debrouye pour okip zot lakour ek zot zanfan i annan 811 ki li i pe viv en lavi diverti kontan e desann tou le mwan e al pran larzan ki 913 pe osi kontribye tou le mwan.  E se sa 811 ki bezwen al lo sa progranm URS.  La mon oule fer en lapel avek Gouvernman pour met bann Polisi e Lalwa kler pour sa 811 pa reste lo lasistans welfare.  2 mwan Mr Speaker, zis 2 mwan i sifi pour 811 dimoun reste lo lasistans welfare.  Lalwa i bezwen kler lo la. Me nou konnen par kont ki en kantite sa bann paran la ki pe travay, ki pa pe travay me ki lo welfare, se bann abizer drog ek lalkol. E lezot zis pour en rezon ki zot menm zot ki konnen e zis refiz-e mat zot deryer e al travay e nou osi konnen ki zot annan zanfan. Mr Speaker, Konvansyon lo Drwa Zanfan i dir ki tou keksoz ki annan pour fer avek zanfan i bezwen ganny fer dan meyer lentere sa zanfan.  ‘’Best interest of the child.’’  Tou nou travay, an relasyon avek zanfan i bezwen ganny gide par sa prensip.  Menm dan ka, dan en ka kot i annan child endangerment, kot zanfan i ganny met an danze par son paran se lentere zanfan ki devret dominen; non pa lentere ouswa bezwen sa paran.

Sa ki nou bezwen la se ki Lalwa i bezwen reflekte sa lespri e Lalwa i bezwen kler lo ki nou separ zanfan avek son paran dan meyer lentere sa zanfan.  I responsabilite paran pour sonny, elve e okip son zanfan. I pa responsabilite sosyete sa. I responsabilite paran mon dir. E paran ki refiz-e kategorikman pour travay e okip son zanfan, Lalwa i bezwen kler lo son stati. Akoz sa i en ka kot i pe met an danze son zanfan.  Mon repete paran ki refiz-e me pa bann ki pa kapab, akoz si ou pe refize okip ou zanfan savedir ou en danze pour sa zanfan.

Nou bezwen met Lalwa an plas ki dir klerman kan nou deklar en paran ‘unfit to be a parent?  E ler sa i arive, la se sosyete ki bezwen pran responsabilite sa zanfan.  Lalwa i bezwen kler lo la.  Mon konnen ki bokou pour sot anler e dir ki la nou pe al met ankor problenm lo Welfare.  Me les mwan a dir zot ki sa pa le ka akoz deza sa bann zanfan pe deza resevwar lasistans sosyal, me atraver zot paran ki malerezman olye servi sa lasistans lo zot zanfan, i pe servi lo zot prop lekor pour satisfer zot adiksyon drog ek lalkol. E an retour zanfan i kontinyen ganny neglize, fanmir i kontinyen trouv zot dan lapovrete.

Ler sosyete pe okip sa zanfan li menm la sa bann menm lasistans pa ava al dan lanmen sa paran ki pe refiz-e okip son zanfan, me plito direk lo sa zanfan.  E Lalwa i osi byen kler lo ki arive avek sa paran?  I bezwen ganny forse pour antre dan bann sant reabilitasyon. Refer son lekor, refer son lavi. Forse plas li dan en lanplwa apre son reabilitasyon e apre reevalye son ka – si la i nepli e danze pour son zanfan e selman apre sa ki a devret reganny son stati koman en paran.

Mon konnen ki sa pa fasil. Me napa nanryen ki enposib si nou tou bann lazans, Minister, Departman e kominote i travay ansanm.  Sa i sel fason pour ed nou sitwayen ki’n malerezman fini perdi direksyon. Mr Speaker, ozordi i annan 65 zanfan dan bann Fwaye. E konpare avek bann lezot Fwaye o monn, nou bann zanfan ki dan nou fwaye malerezman zot bann Orfelen Sosyal. Savedir zot paran i ankor vivan, e zot in zis ganny abandonnen.

Tou-le-z-an Gouvernman i donn sa Fondasyon, Fondasyon bann Zanfan at 7 a R8 milyon pour okip sa bann zanfan, ki fer an mwayenn par mwan 10 mil roupi pour sak sa bann zanfan ki paran in abandonnen.

An plis ki sa i annan ankor 224 zanfan ki pe ganny asiste anba Sistenm Foster Care enformel.  Savedir bann zanfan ki pe viv avek gran paran ouswa en lot fanmir.  E 8 lezot zanfan zot, zot reste dan formel foster care homes.  I osi annan ankor 686 zanfan ki’n perdi enn son paran atraver lanmor. Zot pe ganny asiste anba benefis semi-orphan.  En keksoz ki mon’n touzour lager pour arive. Ki finalman ti materyalize atraver Mosyon ki mon ti anmenn dan sa Lasanble – 5enm Lasanble.  Mr Speaker avan mon terminen mon annan en senp pti demann pour Minister Finans; konbyen nou ki port latansyon a sa bann pti sou ki reste.  Bokou nou a rapel lekol sa pti Scheme ki labank savings ti entrodwir pour bann zanfan, kot zot ti asiste, kot ou ti aste en kart 10 Roupi e apre aste bann tenm 25 sou e ler ou kart in plen ou paran ti anmenn labank e depoz li lo kont sa zanfan.   Ti en bon fason enkilke dan nou zanfan byen boner pour fer savings.  Mr Speaker permet mwan pour propoz avek Minis ki i sizer avek bann labank pou re-entrodwir en tel Scheme parey, ouswa dan sa zanr pour permet ki zanfan depi pti i konnen e konpran sa laspe savings.  Mr Speaker ozordi sa ki nou bezwen koman Seselwa se balans; ki swa sosyete, politik, sosyal e ekonomik, oubyen menm dan nou devlopman personnel. Nou bezwen sakenn de nou fer en legzanmen konsyans pour nou trouv sa balans lavi ki pli an bonn sante pour nou.  Nou bezwen manze wi. Me pa manz an tro.  Nou bezwen fer legzersis, wi, me pa fer legzersis an tro.  Nou bezwen depanse. Me nou pa kapab depans an tro.  Nou konnen nou koman Seselwa nou pa kapab viv nou lavi parey en pandil.  Nou tou nou konnen ki en pandil son louvraz se balans a gos ouswa balans a dwat.  Me zanmen i annan en balans.

Me nou koman imen, nou pa kapab viv nou lavi koumsa koman en pandil.  Pour en wi ou en non nou pa kapab zis ankoler ouswa deprese. Nou bezwen trouv sa balans dan nou spirityalite. Nou demars entelektyel, nou lekor fizik e nou bann bezwen materyel. Nou pa kapab melanz tousala ansanm.  Pour en senp parol nou ankoler, pour en senp problenm nou depress.  Mr Speaker mon pe koz koumsa akoz mon’n realize ki pour lasante sa sosyete, lasante nou prop lekor nou bezwen trouv sa balans.  Nou pa kapab overreact pour tou pti keksoz ki arive dan nou lavi toulezour.  Zis get nou isi dan sa Lasanble ler nou dan break, nou bwar dite, nou pa lager nou. Nou pa ni tir koudpwen.  Me ki ou vwar an deor, bann senp pti keksoz politik ou vwar i fer bann bel, bel keksoz.  En zanfan i mal azir lekol.  En ansennyan i mal azir avek en etidyan olye asize koze e rezourd problenm nou lakoler i pet plafon e nou reakte vyolaman.  Zis get en pti Lapest tou dernyerman.  Nou’n reakte an tro. Komans mars dan mask anvil e komans senm lafreyer dan tou direksyon. Annou aret overreact lo tou keksoz.  Akoz parey Angle i dir ‘’ There is always two sides of a story.’’  E se selman apre ki nou’n trouv sa balans dan nou lavi ki nou pour kapab bouze dan nou lavi.

Nou ki mont bisiklet toulezour nou konnen dek koman sa larou i aret roule nou perdi balans. Donk lavi i parey ler ou pe mont en bisiklet, zis ou kontinyen pedale.  I annan desant ou pez fren.  I annan bos ou saye.  I annan montanny ou sanz gear. Lesansyel se ki ou kontinyen pedale.  Granmoun i dir ou ki i annan zis 2 zour dan lannen ki en imen pa kapab fer nanryen.  E sa i yer ek demen. Donk sa ki annan pour nou fer la, nou fer li ozordi.  Ozordi ki ou bezwen lev-e e al travay. Ozordi ki ou bezwen fer de mwe pour ou lekor, pour ou zanfan, pour ou fanmir e pour ou pei.  Mr Speaker i en moman eksitan ler laklos minwi i sonnen pour revey le 01 Zanvye.

E kantite in kit sa monn pandan 2017. Mon senpati senser avek bann pros, pour bann, e pour bann ki antre nou ki pour reste deryer pour temwanny sa moman ler 2017 i anbras 2018.  Nou devret konsider sa moman koman en nouvo kado pour servi, eksplore e desid lo sak moman ki sak nouvo zour i anmennen pour realiz nou rev, redekouver nouvo kouraz pour afront nenport defi devan nou. Sa i mon swe senser. An fen granmoun i dir, ‘’Ler ou senm divan ou rekolte tanpet.’’

Pandan i ankor annan ki ankor pe krwar ‘’Seselwa i nepli dormi boner,’’ mon sel parol se ki zot bezwen ‘’pa dormi boner,’’ akoz zot bezwen ravaz tou nou kanton tou lannwit pour al teroriz zot prosen, rantre dan lakaz zot prosen, pil lo zot kanmarad, anmare, bate, e touy zot prosen.  Mon poz sa la Mr Speaker.  Mersi.

 

        (APPLAUSE)

 

MR DEPUTY SPEAKER

Mersi Onorab.  Onorab Jany De Letourdie.

 

HON JANY DE LETOURDIE

Mersi Mr Speaker.  Bonn apre midi tou dimoun.  Mr Speaker en Bidze Gouvernman sa Statement ki pli enportan.  Akoz li i prezant tou-le-z-an i lanons Leta finansyer bann reveni e osi bann depans.

En Bidze Gouvernman i annan en gran lenportans imans pou detrwa rezon, i fer nou konpran lapros par bann rapor bann loperasyon fiskal, bann aktivite ekonomik, bann lenstriman Polisi ekonomik, lalis bann fonksyon ki Gouvernman in fer, rann kont piblik e osi alokasyon bann resours parmi lezot.

Mr Speaker dan son Ladres Minis Dokter Larose in fer konpran ki sa i en Bidze ki enn Seselwa ti pe ekspekte bokou, e ki tous zot direk; akoz pou le senp rezon ki zot bann lopinyon in ganny ekoute avek lespwar ki aksyon osi i ava ganny swiv.

Minis wi ou annan toutafe rezon pou dir sa.  Akoz tou sa ki’n swiv en pe rezo medya, in swiv televizyon, radyo in atann kantite kestyon ek lezot pwen konsernan ki piblik in demann PS Payet e osi ki zot in fer komanter lo la.

Avek en gran lazwa dan mon leker Mr Speaker, mon fer refleksyon be ki zanmen Seselwa ti’n deza sitan angaz li antyerman dan son Bidze parey i a pe fer konmela.  Zot pa ti’n pran konstans ki zot ti a kapab osi partisipe e kontribye avek zot Bidze ek zot pei.

Zot pa ti’n pran konsyans ki ti annan bann profesyonnel Seselwa kot Minister Finans, ki osi konpetan.  Ozordi Mr Speaker, kantmenm zonm ‘’dan son lopilans in oubliy son nesans.’’  San okenn larogans, me an tout fyerte, mon dir se gras a LDS sa Parti Politik ki mwan mon siporte ki’n anmenn sa lekleraz kot in annan fernwanr e ki’n vin delivre son pep.

Mr Speaker me travay i touzour kontinyen.  Lobzektif sa Bidze se pou mentenir fas ekonomik asir sa abilite finansyel kree plis loportinite lanplwa, parmi lezot pwen for ki’n demontre e en azanda anbisye sorti kot en Gouvernman abitye.

Me eski sa logmantasyon dan sa Bidze Mr Speaker, pou vreman ede elarzi e diversifye nou bann sours reveni domestik.  Pou ki nou a kapab anfen kree sa lanbisyon pou reisi parmi nou bann travayer.  Oubyen i pou zis en logmantasyon ki pou kontinyen akeyir gaspiyaz, move planning, diplikasyon louvraz e move lezot pratik.  Par egzanp la tout swit kote mon bann koleg artis, ki pou vwar li pe benefisye par rapor a Lendistri Tourizm?   Akoz pou le moman la zot pa pe ganny travay ditou.  Me pourtan nou tande tanzantan pou dir touris pe ogmante dan nou pei.

Mr Speaker zis par devan Fresh Cut Roche Caiman ti’n met en pe koltar e sa mon krwar ti pe bos en trou ki tanzantan i vin konman en nwizans, e i debloke i vin trou apre zot re bouse.

Mon pe zis mazin nen apre 3 zour ki zot ti pe met sa koltar en legzanp on donnen, apre ki lapli ti’n tonbe sa trou i debours ankor.  Sa i en ptipti legzanp me ki montre konbyen fwa trou pe ganny fer depans lo la – lo menm trou!

En fanmir i ti a swete Mr Speaker ki ler i ganny son nouvo lakaz Gouvernman ti ava fini kouver omwen bann lezot depans sekirite esansyel tel ki burglars bar ek surrounding wall – koumsa i ti a tir sa presyon kot i pou bezwen rod ankor larzan pou li kapab viv an sekirite dan son nouvo lakaz.  Kot i deza pe pey en gro loan.  Sa Mr Speaker i a ed li mentenir son Bidze en pe e rezourd vandaliz osi lo propriyete prive.

Mon osi dakor ki fodre koup depans initil, e osi bann privilez ki pa neseser ki pa merite.  Konbyen meeting par egzanp si nou pou fer en pti legzanp konsyans, konbyen meeting, konmela pe fer AVANI oubyen pe fer SAVOY oubyen dan bann gro lotel.  E petet kekfwa kot nou pe depans en kou enorm avek bann manze ‘en pe odeganm parey nou dir sa.  E petet si mon ti pe fer en pti resers zot ti ava trouve eski napa otreman ki nou ti a kapab koup en pe Bidze.  Petet mon ava dir la i mank en pe lasal pou fer bann meeting bann Konferans ki kout en pe mwen meyer marse.

Yer Leader Lopozisyon ti demann sak Seselwa pou pran lavi o serye e osi demann zot pou fer zot prop envestisman.   Mr Speaker mon konman en paran e tousel ki’n fer grandi mon zanfan.  Mon santi mon responsab se sa ki mon’n esey rezonn ek mon bann zanfan toultan.  Se pou viv pou vin en sitwayen responsab e serye san ki nou kont labank pe deborde.  Ler nou fer parti, eski napa gaspiyaz an tro ki pe ganny arive? Eski nou annan ase pou depanse?  Priyorite ki mon met devan se ki fodre toultan nou pe pey nou bil avek nou bann det aler.  Rod fason pou fer en pti ekonomik e si ou kapab esey rod en lot pti keksoz par kote pou kapab ganny en pti an plis.  Parey ki mwan mon, ti fer ler mon ti anploye, lizour e aswar mon ti al fer lanmizik.  Nou moralite in tonm dan en dekadans Mr Speaker e nou krwar nou kapab fer sa ki nou lanvi.  E nou krwar nou kapab fer sa ki nou anvi.

Minis Larose atraver ou Mr Speaker, mon ava dir pou dir i annan en travay kontinyel pou nou fer la, pou ki nou travayer a lafen i a konpran konman sa sistenm tax progresiv i e marse, e konman i pou vreman benefisye li, savedir ledikasyon kontinyel i bezwen arive.

Mon osi siporte ki en travay i kapab ganny fer, pour ki i kapab sa pran lefe an Zanvye pou tir en pe sa soufrans lo dimoun.  En msye i dir mon i pa mind nonm son non Mr Mousmie i fer komanter avek mwan avan yer – i dir mon fodre ou pas sa Ms Jany i dir mon koumsa 23an pase i ti al Dubai avek son madanm.  E sa letan Dolar ti kout R15 lo black-market.  Me apre i dir mwan. ‘’be ou konnen Ms Jany be keksoz i ankor parey – i ankor menm parey.’’  Savedir ki montre ou, nou Gouvernman i pa’n tro fer en gran keksoz pou li kapab kontrol nou larzan pou fer sir ki i ganny sa stabilite.  Akoz i pa aste komodite kot i pli bon marse par egzanp Kenya, Maurice, Madagascar sa in dir i ava poz sa la ki nou’n deza koz lo la bokou nou osi.

Finalman Mr Speaker mon ti a kontan ozordi prezant 2 Bidze ki sorti kot 2 diferan lakour pou mon partaz avek zot.  En manman ki ganny 8,500 Roupi i en ansenyan e i annan 2 zanfan ki ankor anba laz.  In osi pran en loan 50 mil Roupi pou li aste enn de pti meb pou li met dan son lakaz.  Alors la lo sa 8,500 Roupi i pey li 3 mil Roupi loan; i pey 2,500 Roupi manze, i pey 1000 Roupi PUC.  Savedir elektrik ek delo e la deza i reste li 1500 Roupi e i pa ankor tir larzan transpor e larzan goute pou son zanfan.  Mon poz sa la annou gete ki mannyer nou, nou ti’n naze ladan.

2enm legzanp Mr Speaker ki mon’n gannyen se, en fanmir ki manman avek papa i la e 15,000 Roupi i antre kot zot lakaz.  Zot annan 2 zanfan ankor pe lekol.   Zot pey en loan lakaz 5,500 Roupi; zot pey manze 3mil Roupi;,  PUC  1000 Roupi;, telefonn ek Internet 1000 Roupi;  transpor 1,200 Roupi,  Daycare 1,500 Roupi,  gas 500 Roupi , goute pou manrmay 1,500 Roupi.

Mr Speaker in fini depas 15 mil Roupi in fini ariv 15,200 Roupi.  Ankor mon pou poz sa la.  Mr Speaker pou montre ki mannyer Seselwa i vreman struggle pou li kapab arive pran en bout pou met avek en lot.

An konklizyon mon ti a kontan fer en pti komanter lo Tenm Bidze ki, ‘’Travay pou prosperite tou dimoun.’’  Sa i kler e mwan mon ti a voudre swete ki bann mindset i kontinyen sanze – sirtou kot i konsern bann Lotorite distrik Mr Speaker.  Si i annan en lenvestisman pou fer annou asire ki, tou dimoun pa eksepsyon – san aksesyon i benefisye selon son merit.

Se selman par apre sa mindset i ganny sanze – se selman apre ki sa mindset defavoriz en dimoun akoz i pas siport kouler politik i sanze, ki nou a vreman kapab dir devlopman Kapital imen e prosperite pou tou.  Annou pa bliye Mr Speaker, ki akoz sa latitid viktimizasyon ki’n arive e bann malfer ki’n arive dan nou pei; byento sa pou kout nou ankor bokou e pou met presyon ankor lo nou Bidze, akoz nou konnen pou dir i pou annan 2 Tribinal byento ki pou ganny etablir nou pa konn kan.  E sa i pou ede pou sey anmenn en pe klotir lo tou sa bann malfer ki’n larive.  E sa i pou fer ankor en gro lefe.  Ki mon pe dir annou vey en pe osi nou aksyon sa aki nou fer ozordi akoz demen i kapab reflekte e i ava met presyon lo nou lekonomi.

Mr Speaker Seselwa in pran pasyans, in espere ler in ganny dir, ‘’gato ti ankor dan four.’’  In espere ler in dir, ‘’Gato pros pou pare.’’  In espere ler in ganny dir, ‘’Gato i ankor pe met lakrenm.’’  E menm in pas magarine lo zis en kote son dipen, letan i ti pe ser son sang.

Aprezan, mon dir Mr Speaker si nou anvi vreman rann lavi Seselwa pli ere nou kapab fer li.  Me parol i mars avek aksyon e osi avek en gran volonte.  Mersi bokou Mr Speaker.

 

MR DEPUTY SPEAKER

Mersi Onorab De Letourdie.  Onorab Basil Hoareau.

 

HON BASIL HOAREAU

Mersi Mr Speaker.  Mr Speaker Tenm Bidze se, ‘’Travay pou prosperite tou dimoun.’’  E mwan mon konpran li koumsa se nou bezwen travay pou prosperite tou Seselwa ki pe viv e reste Sesel.  Nou bezwen fer sir ki tou Seselwa i trouv zot, zot par dan sa devlopman ki nou pe anmennen, Mr Speaker.

E term i anliny avek bann Polisi ki administrasyon Prezidan Faure pe adopte e pe met an plas.  Tel ki devlopman enklisiv e redistribisyon ekitab larises.

Mr Speaker Tenm pe demann nou konman Nasyon pou zwenn ansanm.  Me nou diferans de kote annou zwenn ansanm kot nou a travay pou fer sir ki tou dimoun i prospere.  Savedir nou dan sa Lasanble nou bezwen travay ‘Ansanm, met nou diferans de kote e osi Lasanble Egzekitiv i bezwen travay ansanm pou fer sir ki Sesel i devlope e ki tou dimoun i benefisye Mr Speaker.

Mr Speaker mon’n deza dir dan sa Lasanble be mon repete.  Napa personn – napa personn ki annan monopoli lo bon nide.  Nou tou, nou tou nou annan bon nide e nou tou nou nide letan i bon, i ganny adopte, i ganny servi.  Sa ki enportan.  se ki nou annan en Gouvernman ki atantiv.  En Gouvernman ki pare pou met an plas bann mezir – as long sa bann mezir i dan lentere sa pep e sa Nasyon Mr Speaker.

Mr Speaker mon anvi ‘dir atraver ou avek Onorab Adelaide, pa les sa kravat anbet nou.  Pa krwar pou dir akoz nou met kravat  nou pli malen ki sa bann ki pa met kravat, Mr Speaker.

Mr Speaker parske en chimpanzee osi ou kapab met li en kravat.  I pa vedir i pli malen ki en imen Mr Speaker.  Sa nou bezwen konpran tre byen Mr Speaker.

Mr Speaker sa Tenm ki ‘n ganny servi i pa’n ganny servi dan vid.  I pa’n ganny servi zis pou fer li gou pou tande dan zorey.  I en Tenm ki nou trouv li Dan sa Bidze.  Nou trouv li dan bann mezir ki pe ganny met an plas dan sa Bidze Mr Speaker.

Nou konmanse premyerman avek Tenm petet ki pli dominan dan sa Bidze se; Progressive Income Tax Mr Speaker.

        E Minis in eksplike ki mannyer sa sistenm sa nouvo faz ki pe vini ki mannyer i pou marse.  Nou konnen ki deza dimoun bann travayer ki pe ganny R8,555.50sou zot in deza pa pe pey income tax. 

Lot faz ki Minis in propoze pou ganny enplimante an Zilyet 2018, se kot nou pou konmans sarz bann dimoun kim pe ganny par lao swa ki zot saler par lao 8555.50sou ziska  10mil Roupi – 15 poursan.  E par lao  R10 mil Roupi ziskan  83, 333 nou pou sarz zot 20 poursan e lezot par lao sa –  30 poursan.

Mwan mon pou zwenn Onorab Ramkalawan ek Onorab Woodcock, sa 2 Wavel, ki ti demande pou ki nou konmans enplimant sa an Zanvye 2018.

Mwan osi mon dir annou enplimant sa progressive tax son lot faz an Zanvye 2018 Mr Speaker.  I enportan, i enportan.  Annou konmans donn sa benefis nou bann travayer Seselwa byen boner lannen prosenn Mr Speaker.  Annou pa espere. Mon krwar zot in esper ase e i bon ki, nou donn zot sa benefis o pli vit posib Mr Speaker.

Mr Speaker income tax i annan de fason ou fer li en flat rate ki leka dan lepase, ouswa ou fer li progressive Mr Speaker.  E nou pa sel pei ki pe adopte en progressive income tax Mr Speaker.  L’Angleterre par egzanp zot annan en progressive income tax.  E i annan bann lavantaz ki dimoun nou gannyen avek en progressive income tax.  (1) se ki nou fer li pli ekitab.  Ou ki ganny plis, ou kontribye en pe plis an term tax.  Parske nou bezwen realize, nou pe viv konman en sosyete dan en kominote.   E ou ki pli byen plase, ki annan plis abilite ouswa reveni i byen ki ou kapab ed ou frer ki pli vilnerab ki ou, ki li osi anvi bouz en pe pli devan Mr Speaker.  Sa i enn.

Lot se ki ankouraz dimoun pou trouv lanplwa, pou rantre dan lanplwa.  Savedir sa dimoun ki li i konnen pou dir petet letan i ti pe ganny 8,550 mil Roupi avan i pa ti pe deside pou li travay, la i ava ankouraz li pou li antre dan market lanplwa, parske i pou vedir ki i pou annan plis larzan dan son pos.

E ki pe sa i vedir tir sa dimoun lo benefis sosyal, tir presyon alors ki li osi i a kontribye dan sosyete.   E sa ankor i pe kree en sirkonstans en sityasyon pou ankouraz dimoun pou travay.  Pou travay pou prosperite tou dimoun Mr Speaker.  Mr Speaker annefe nou konnen ki 98poursan lafors Seselwa – lafors travay Seselwa pou benefisye avek sa nouvo rezim.  E sa ki petet i enportan ki nou konmans li o pli vit posib – pli boner posib Mr Speaker.

Mr Speaker en keksoz i enportan Onorab Woodcock bomaten in eksplike ki mannyer sa sistenm i marse pou dir tou dimoun lo son premye R8 555.50sou i pa pey okenn income tax.  E lo ou 2enm bout se lo R8555.50sou ziska 10 mil Roupi ou pou pey 15 poursan e apre i monte 20 ziskan 30 Mr Speaker.

Me sa ki osi enportan, sa ki osi enportan Mr Speaker e ki nou bann dimoun nou travayer i bezwen konpran se ki sa progressive income tax sa income tax la, i ganny aplike a selman en anplwayer.

An dot mo, si en dimoun pe travay avek 2 anplwayer i pou benefisye.  Zis par egzanp si i annan en dimoun ki ganny anploye avek Onorab Pillay par egzanp i ganny li 8,555 mil Roupi i pa pou pey son income tax.  E si i ganny peye avek Onorab Roucou i ganny 8,555 mil Roupi avek Onorab Roucou i pa pou pey income tax lo la.  Savedir i pa pou zwenn li ansanm pou fer ou peye me sak anplwayer, sak diferan ou fer ou pe ganny ou benefis.  Ki i fer i pe ankouraz dimoun bann dimoun ki anvi e ki annan sa abilite pou pran en 2enm lanplwa.

E ankor nou vwar kot sa Tenm kot sa Tenm i ladan i dir ou travay pou prosperite tou dimoun e i ede pou devlop nou pei e ranforsi nou ekonomi sa i vreman enportan Mr Speaker.  Mr Speaker lot benefis sa income tax ki pe anmennen ki nou’n deza anmennen i pe agrandi sa group sa ki nou apel ‘exempted emoluments,’ savedir bann reveni ki income tax pa ganny peye lo la ditou.

Nou vwar ki sa group in ganny agrandi par egzanp pou nepli annan income tax lo Gratwite.  Konmela prezaman ou pey income tax ou pa pey income tax lo Gratwite lo sa premye 10 mil Roupi.  Me la i pou agrandi i pou fer li pli larz ki tou Gratwite ki ou gannyen pa pe ganny tir income tax lo la.

Lo Trezyenm Mwan Saler Mr Speaker ankor pou napa okenn income tax pou ganny tire.  I pou fer ou pou annan plis larzan dan pos, konmela prezaman income tax pe ganny tire selman lo sa premye 10 mil Roupi Mr Speaker.

Mr Speaker sa i vedir ki i annan bann travayer ki wi, zot pe pey zot income tax petet letan ou kalkil zot income tax par mwan i pou vwar pou dir par mwan petet zot pe pey en pti pe, an plis ki zot pe peye konmela.  Me letan ou pou get zot Trezyenm Mwan Saler letan ou pou get li annually ou pou vwar benefis ki zot gannyen.

E permet mon Mr Speaker pou retourn lo sa legzanp ki Minis ti donnen dan son letan i ti pe adres nou pou Bidze.  Pou mon ilistre sa.  Annou pran en dimoun ki ganny 40 mil Roupi par mwan. Sa dimoun ki ganny 40 mil Roupi par mwan avek sa nouvo income tax – progressive income tax li pou le mwan i pou pey  217 Roupi an plis ki i ti pe peye.  Tou lemwan sa.  Ki vedir letan ou ariv en lannen i pou’n pey 2,604 mil Roupi an plis ki ti pe peye.  Selman letan ou pe pran son saler san ki ou kont son Trezyenm Mwan Saler.

Me letan sa dimoun ou met son Trezyenm Mwan Saler ki parey mon pe dir, evantyelman i pou nepli pe pey okenn income tax lo la.  Letan ou pran li annually savedir pou’n fer li lo son Trezyenm Mwan Saler i pou’n ganny li en benefis 4,500 mil Roupi.  E ki vedir annually letan ou konpar sa ki’n pey an plis par mwan, e sa ki’n gannyen an sa Trezyenm Mwan Saler i ganny li en benefis 1,896mil Roupi.  Savedir dimoun pe benefisye e tou dimoun pe ganny pou kapab prospere.  Mr Speaker Konpansasyon.  Savedir letan en dimoun son travay i ganny terminen ouswa i arete.  Li osi i pou napa income tax lo la Mr Speaker.

Mr Speaker Onorab Ramkalawan in propoze in dir in dakor avek income tax e sa i byen.  E in propoze solman ki nou catch sa poursantaz 20 poursan, pa par lao 30 poursan.

E son largiman e largiman ki’n ganny anmennen se ki, sa petet pou dekouraz bann dimoun pou al pou travay pou ganny plis larzan ouswa menm dekouraz dimoun pou vin travay Sesel.  Ou menm pous bann Seselwa ki pe travay Sesel pou al travay aletranze.  Mon pa tro krwar sa Mr Speaker.  Akoz sa 30 poursan i konmans akse lo en dimoun ki ganny par lao 83, 333mil Roupi, Mr Speaker.  Dan en bracket o ki napa bokou Seselwa ki ladan.  Ki napa bokou Seselwa ki ladan.  Me i vreman o, i vreman o.

E mon pa vwar li unreasonable.  Akoz L’Angleterre par egzanp, son poursantaz tax i ariv ziskan 45 poursan.  Ziska 45 poursan lo dan son income tax i arive.  I sorti 0 i mont 10, 20, 30, 40,  ziska 45 poursan.  E mwan mon krwar pou dir i rezonnab.

E ankor mon demann bann dimoun bann Seselwa k dan sa bracket, pou mazin dan en fason pa mazin zis personnel me mazin nou pei.  Mazinen ki i annan nou frer; sa sosyete ki viv ladan la i pa zis nou ki pe fer nou ganny sa larzan wi.  Me i annan lezot dimoun ki, donn nou sipor dan diferan fason.  Me sosyete nou ansanm alors i enportan ki nou ki ganny en pe plis annou kontribye en pti git plis ed sa frer ek ser Seselwa ki bezwen li osi ki pli vilnerab ki li osi i anvi progrese i dan son lavi.

Mr Speaker mon kontan letan mon tann Onorab Afif in koz an sipor progressive income tax.  mon mazin an Oktob lannen pase letan Minis ti vin isi konman i ti ganny nominen ti ganny nominen pou pos Minis e i ti vin isi pou aprouve, mon rapel byen Onorab Afif ti koz kont progressive income tax.  Onorab Afif ti dir ti koz an faver en flat rate, en flate rate of 15%.  I ti dir pou dir – mon rapel byen ki i ti dir,  i ti dir pou dir IMF sa sistenm ki ou pe anmennen pou fer li pli konplike.  E IMF ti demann nou pou fer nou sistenm pou senplifye nou sistenm tax alors se flatrate is better.  Mon kontan ki Onorab Afif in les tonbe sa nide ki progressive income tax pa bon.

Mr Speaker lot mezir dan Bidze ki pozitiv se lo kote business tax Mr Speaker.  Nou vwar ki bann mezir ki pou annan bann businessmen bann opsyon; par egzanp bann biznes ki pe fer ziskan R500 mil Roupi reveni.  Zot pou kapab pey en pri fix 3 mil Roupi as business tax.  Egalman bann ki par lao 500 mil en maximum 5 milyon, zot, zot pou kapab pey 3 poursan lo zot reveni ki zot gannyen.  Lo zot turnover Mr Speaker.  Ki vedir, se ki biznes pou fer en pe plis larzan sa bann biznes i annan posibilite pou fer en pe plis larzan plis profi.  Me sa ki i enportan Mr Speaker se ki sa bann biznes letan zot ganny sa bann profi zot fer en pe plis larzan – pa kit tou pou zot.  Pa kit tou pou zot.  Partaz avek zot bann travayer partaz lo konsonmater.  Ki a fer ki pri lavi i a desann.

Parske Gouvernman atraver sa Bidze pe met bann mezir an plas.  Pe met bann kondisyon an plas ki pou permet sa larive.  Me i enportan ki sa benefis pa ariv zis a oter me i desann pli ba.  E nou sa bann businessmen zot servi sa bann lavantaz sa bann benefis pou osi ed nou bann lezot frer ek ser Mr Speaker.

Nou vwar peser; peser artizanal ek semi-endistriyel pou nepli pey tax.  sa i en move in the right direction Mr Speaker.

Bann peser artizanal pou pey zot license pou pey zis en license annual, ki sorti 50 Roupi pou vin 250 Roupi.  E ankor i demann bann peser.  Pou pas sa benefis osi nou bezwen kit en pe sa benefis ek zot.  Sa i normal, me pas en pe osi lo nou konsonmater lo bann dimoun ki vin aste zot pwason.  Ki a fer ki pri lavi a ede pou desann.

Onorab Woodcock bomaten in koz lo la.  Lakaz Lwe. Prezaman Mr Speaker en dimoun ki lwe len lakaz i pe pey en business tax 15 poursan lo son profi ki i fer.  La i pou desann i pou vin 3 poursan lo reveni.  Ki fer li i pli meyer marse.  Fer li pli meyer marse; ki vedir nou espekte wi sa dimoun ki pe lwe sa lakaz i pe rent en biznes.  Me an menm tan i a ede pou fer lakaz lwe pli afordab.  I a ede pou tir en pe presyon lo Gouvernman at least tanporer ki bann dimoun a ganny en shelter e sa i a ede pou nobou adres sa problenm lozman, ki nou konnen nou pe fer fas avek.  E sa mon pe dir Mr Speaker i annan bann mezir sa Bidze ki pozitiv e ki nou bezwen fer nou bann dimoun konnen i la, pran lavantaz me an menm tan pas sa benefis lo lezot dimoun kot i posib Mr Speaker.

Mr Speaker sa i anmenn mon lo travayer Seselwa.  Nou vwar mon vreman apresye Mr Speaker ki Bidze ankor i annan bann mezir ki pe ganny met an plas se pou ankouraz bann businessmen, bann anplwayer pou anploy travayer Seselwa Mr Speaker.

Mr Speaker sa i en keksoz ki tous mon en kantite sa.  Mon pou dir wi bokou fwa nou’n vwar ki travayer Seselwa in vin 2enm plas dan son prop pei.  Sa bann mezir pe ganny anmennen sa se pou ranvers sa sityasyon.  In plis ki ler Mr Speaker ki pou Seselwa travayer Seselwa i vin nimero enn dan son pei Mr Speaker.

Mr Speaker mon pa kapab konpran mon pa kapab aksepte letan ou rantre dan en laboutik mon vwar en shop assistant ki i en etranze.  Mon pa kapab konpran mon kapab aksepte letan mon pe al kot en lotel mon vwar sekirite etranze.  E ki sa bann lotel i dir ou napa travayer Seselwa, solman ou pas kot en lot lotel i annan travayer Seselwa.

Savedir sa lotel pa anvi, pran travayer etranze.  E Mr Speaker mon pou dir ki mannyer i ete.   Indien pa anvi anploy Seselwa, dan zot laboutik zot pou oule fer etranze zot Nasyonalite.  Sud Africain a anvi anploy Seselwa.  Zot, zot plifere anploy Sud Africain.  La Russie pa anvi anploy Seselwa, zot plifere anploy La Russie. 

Mr Speaker in plis ki ler pou nou fer sa fini.  E se sa bann mezir sa bann mezir ki pe ganny pran kot Gouvernman pe fer li pe kree kondisyon pou ankouraz, ankouraz bann businessmen pran nou Seselwa. Nou annan abilite Mr Speaker.  Ki mannyer Seselwa i al travay deor i okip bann pozisyon o, Minis Dr Larose i en legzanp.  Seselwa i annan abilite Mr Speaker.

E ki bann mezir ki annan dan sa Bidze nou vwar ki i pe dir pou dir okenn si ou annan en sertifika en Seselwa ki annan en Sertifika i annan en Diplonm ouswa en Degre ki ganny rekonnet par Lotorite Kalifikasyon Sesel.  Si ou anploy enn sa bann dimoun letan ou pe kle ou allow deduction dan tax ou ganny ou 2 san poursan ‘allowable deduction’.  Savedir ki i fer se ki sa biznes i kapab fer plis profi.

An dot mo si ou pe anploy en Seselwa dan sa ka, ou pey li R15 mil Roupi tou le mwan.  Letan ou claim en avek tax ou pou claim 30 mil Roupi, konman ou ‘allowable deduction.’  E ki i fer i fer sa biznes fer plis profi.

E sa i byen Mr Speaker.  Me mwan Mr Speaker, mon pou propoz en lot keksoz e mon pou demann Minister Minis Finans konsider sa.  Annou sa i en lavantaz ou pe ankouraz mon pe kree en benefis pou sa businessmen si i anploy en Seselwa.

Mon dir annou penaliz sa enn ki li i krwar i pa pou etranze.  Si en dan post i annan serten post ki ou’n krwar ou’n kit etranze e si petet ou’n kit en etranze la pou 3an ouswa 5an, mwan mon ,dir pa donn li okenn ‘allowable deduction’ lo sa lapey ki pe pey sa etranze.  Pa donn li si wi ou pou perdi e sa nou kapab fer dan Lalwa.  Nou kapab fer i pa pou vin en ‘allowable deduction’ dan lesans ki ou anvi pey en etranze tax pa pou pran kont avek sa.  Pa pe pran sa an kont e ou a pey ou tax lo la osi.  E mwan Mr Speaker lo la mon pou menm propoze mon ti propoz sa ek Minis Lanplwa, letan i ti la.  Ki i annan serten job mon dir annou kit sa zis pou Seselwa.  I kapab ganny fer Lalwa, i kapab ganny pase.  E annou fer li ki sa nou travayer Seselwa.  Annou proteze e apiy nou Seselwa Mr Speaker.

Mr Speaker pa zis sel mezir in ganny pran.  Mezir osi i en lot mezir enportan ki nou bezwen fer nou dimoun konpran ki’n ganny met devan e ki pou ganny aplike.  Si en dimoun en dimoun i ankor pe lekol – en manrmay i ankor pe lekol segonder ouswa pos- segonder ouswa i dan letid full-time.  E sa dimoun en travayer businessmen i anploy sa dimoun part-time letan i pou claim son tax la i pou kapab claim 150 poursan an relasyon ek sa lapey ki i pe donn sa bann dimoun.  Ki i fer Mr Speaker?  I pe ed nou kree en kiltir – en kiltir kot an mezir ki ou pe etidye ou konmans travay.

E pa zis sa i pe donn sa zenn sa leksperyans e osi sa disiplin pou li konmans travay.  E sa Mr Speaker mon krwar ri enportan e nou pe kree sa kondisyon, pou nou anploy nou Seselwa e osi e kree sa kondisyon pou nou prodwir en nouvo zenerasyon.  En nouvo zenerasyon bann zenn, ki konmans apresye travay byen zenn e ki konnen ki si sa valer travay Mr Speaker.  E mwan mon felisit Gouvernman pou sa bann mezir Mr Speaker.

Mr Speaker en lot mezir pozitiv dan sa Bidze se student Loan.  Loan pou bann etidyan Gouvernman in donn nou sa langazman ki i pou negosye avek bann Labank Komersyal pou fer ki sa bann loan pou al en to lentere tre ba.  Sa i byen.

Me sa ki enportan – sa ki enportan, se ki si bann etidyan i ganny demande pou fer bann kontribisyon e ki zot pa kapab Gouvernman, in pare pou garanti sa loan.  Sa i vedir ki Gouvernman pe fer sir pou dir dimoun nou bann dimoun ki annan abilite pou a la devan, pou fer letid pli avanse i nobou fer li.  i pe donn access to high education nou bann dimoun.  E nou pe envestir dan zot pou an retour dan zot vin travay ek le plis prosperite pou tou Seselwa Mr Speaker.

Me a word of caution Mr Speaker, nou bezwen fer sir ki napa labi.  Nou bezwen fer sir pou dir sa i ganny servi byen, kot napa okenn labi.  Ankor avek sa term anliny avek sa term en mo pozitiv Mr Speaker, se kot ITZ Industrial International Trade Zone. International Trade Zone Mr Speaker.  Kot pou lemoman bann travayer Seselwa ki pe travay dan sa bann Zone tel ki IOT, mon krwar IOT i annan en eksepsyon akoz Gouvernman ti pe peye.  Me bann lezot landrwa an tou i annan 842 – 842 Seselwa ki travay dan sa bann dan sa bann Zone … i zot pa pe ganny zot pansyon pa pe ganny peye.  E zot pa pe ganny osi Trezyenm Mwan Saler.

La sa pe al ganny fer.  E sa mon krwar i enportan Mr Speaker.  Me mon  pe demann Gouvernman osi letan i pe kalkil sa, pou kalkil en lot keksoz Konpansasyon.

Sa bann dimoun pa ganny Konpansasyon Mr Speaker.  Zot regilasyon ki donn zot employment regulations ki dir ou, i dir ou pou ganny Konpansasyon ti dan ou Kontra.  I annan provizyon pou Konpansasyon.  Me laplipar, sa bann Kontra Gouvernman tou sa bann Kontra napa provizyon pou konpansasyon napa en obligasyon parey nou annan dan Employment Act ki enpoze i dir ou bezwen pey konpansasyon.

Mon pe demann Minis pou mazin lo la osi.  Fer en fason ki nou donn nou pe koz ekitabilite nou pe fer li zis, pou tou nou travayer ki pe travay dan ziridiksyon Sesel Mr Speaker.

E mon krwar sa i enportan.  M Speaker letan nou pe koz lo travayer i anmenn osi mon Travayer Lasante nou lo sa kote latab, nou siport demars pou donn nou bann travayer lasante enkli bann ners en meyer saler.   En saler ki reflekte sa travay nob ki zot pe fer.

E Mr Speaker dan sa laliny osi, mon pou demande ki petet Gouvernman i re konsidere i re get lo, posibilite si bann ners ouswa bann Dokter zot anvi al travay part-time dan prive parey i ganny fer dan bokou pei ki sa osi zot a ganny drwa fer Mr Speaker.  Parske nou pe dir ek dimoun travay pou prosperite tou dimoun nou a donn zot sa sans pou zot travay en pe plis zot osi si zot anvi vin pli prosper, e zot santi zot annan sa letan e sa abilite pou al dan prive.  Zot ava ale Mr Speaker.  Annou pa anpes zot ale.  E mwan mon pe dir annou re get sa, ki mannyer sa bann travayer lasante a kapab met a zot dispozisyon bann dimoun ki osi dan prive.

Mr Speaker revizyon saler (mersi Onorab Henrie ou’n demann mwan) revizyon saler i enportan reviz revizyon saler i enportan e Minis in koz lo la pou dir public service nou pou reviz lo saler pou reviz saler bann public servants e ki en Komite pou ganny met an plas e ki by Me 2018 nou pou  bezwen ganny rapor.  Mwan mon dir sa i enportan annou servi saler sa bann dimoun e annou donn zot en saler ki rezonnab.  E ki parey mon’n deza dir zot kapab viv en lavi pli konfortab.  Parske letan ou konfortab dan ou lavi fanmir sa i osi fer ou plis prodiktiv Mr Speaker.

Mr Speaker i annan sa osi ki’n ganny koze (5 minit Mr Speaker).  I annan koze osi ki’n ganny…

 

MR DEPUTY SPEAKER

Onorab ankor 2 minit

 

HON BASIL HOAREAU

…mersi Mr Speaker 2 minit.  I annan mansyon lo a property tax.  Pou lemoman Gouvernman pe propoz 02.5 poursan Mr Speaker.  Mwan mon krwar i rezonnab la.  Asa moman parske premye fwa nou pe enpoz sa tax.  Nou bezwen vwar ki son bann mekanizm ki mannyer ki marse.  Ki bann problenm ki nou kapab, fer fas avek.   E apre, nou ava revize.  Mon krwar en 02.5 poursan i rezonnab pou konmans avek.  Parey Minis in donn son langazman le bi ki se pou reviz li tou le 5an.  Petet nou ava reviz li apre 5an nou a vwar pou dir si nou vwar li pe mars byen e i pozitiv sa ki i pe anmennen pou nou, nou kapab increase li.  Me pou lemoman annou pa tro tranglem, annou konmans dousman annou get e-gete ki mannyer nou ale.  E mon krwar sa i en step in the right direction. 

Mr Speaker mon ti a kontan demann bann dimoun dan servis piblik, Lasante ek Ledikasyon pou nou fer sir ki nou delivre.  Sa larzan ki pe ganny bidzete, se pou sir dan ledikasyon nou bann zanfan i ganny bon ledikasyon.  Nou bezwen fer sir pou dir i ganny well spent.

        E la Mr Speaker mon ava osi dir ki bann zanfan zot bezwen pan zot responsabilite.  I annan sa lensidan ki’n arive kot Lekol Mont Fleuri i vreman sagrinan Mr Speaker.  E mwan mon krwar en pe Mr Speaker par-ler se ki letan nou’n koz lo tro bokou Drwa Zanfan.  Mon pou dir ou fransman nou’n koz tro bokou lo Drwa Zanfan kot nou’n fer zanfan kwa pou dir zot annan zis drwa zis Drwa, Drwa. E mwan mon’n toultan kont sa mwan.  Mon’n toultan kont sa parske mwan mon believe firmly in the corporal punishment.  Mon pa vwar nanryen mal mwan mon’n dir sa ki nou vwar European fer la sa ki nou vwar European fer i pa vedir ki byen akoz European i fer.  Annou get nou kiltir annou get nou sityasyon Mr Speaker.

Mr Speaker i osi enportan ki nou politisyen nou pas en mesaz pozitiv bann mesaz ki byen pa bann mesaz ki nou ki kapab ganny enterprete dan en fason vyolan.  E sa i enportan e mwan mon pe dir annan restore disiplin dan nou lekol.  Letan Mr Speaker avan mon fini nu koz prosperite pou tou dimoun. Me sa dimoun letan i kree sa prosperite nou bezwen fer sir i kapab enjoy sa prosperite.  I kapab enjoy san ki en lot dimoun i oule vin pran son prosperite ki’n gannyen, dan en fason ilegal e malapropo.

An dot mo mon pe koz lo sekirite Mr Speaker.  Lapolis annou fer sir pou dir sa bann lensidan sagrinan ki’n arive Mr Speaker, pa zanmen ariv ankor.  Kot nou’n vwar Mr Esparon in perdi son lavi, akoz i annan serten dimoun ki krwar pou dir zot, zot annan drwa lo lavi dimoun.  I annan serten dimoun ki krwar lakour dimoun i osi pou zot.  Zot, zot kapab rantre ladan e vin fer zot shopping Mr Speaker. Nou bezwen deal avek sa bann kriminel dan en fason tre, tre serye.  Tre serye e nou bezwen fer sir ki nou Lapolis i efficient.  E mwan Mr Speaker mon krwar dan nouvo Komisyoner Lapolis; mon krwar ki i pou fer en louvraz e i pou delivre.

An konklizyon Mr Speaker mon dir annou fer bouze nou ekonomi.  Pou asir devlopman nou pei pou nou tou benefisye.  Mersi Mr Speaker.

 

MR DEPUTY SPEAKER

Mersi Onorab Hoareau.  Bon avan nou pran en Break mon ti a zis kontan enform bann Manm bann Manm ki annan soft copy zot Speech fer Lofis Clerk gannyen i a fasil pou bann Parliamentary Reporters fer verbatim.  E apre osi tou nou a kapab bouz pli vit pou nou kapab upload zot bann Speeches lo website Lasanble Nasyonal.  Ok?  Avek sa… yes Onorab Adelaide?

 

HON FRANCOIS ADELAIDE

Yes Mr Speaker.  Mr Speaker mon ti annan en pti pwen klarifikasyon akoz yer ler mon ti koze mon ti dir Minis in met son kravat;  konmsi mon ti pe dir ki Minis i respekte sa Lasanble.  Konpran son bann travayer i vini dan kravat i respekte sa Lasanble.

Me mon pa’n konpran ki Onorab Hoareau in dir Lasanble dan kravat avek chimpanzee.  Mon pe demann en pti leklersisman.  Mersi.

 

MR DEPUTY SPEAKER

Onorab.  Yes Onorab.

 

HON BASIL HOAREAU

Mon a donn li en pti leklersisman – mon zis repet sa ki mon’n dir.  Mon’n dir pou dir pa les sa kravat anbet nou.  Pa krwar nou met kravat ki nou pli malen ki lot ki en lot dimoun.  E vi ki servi chimpanzee ti pe tir fizi yer, mwan mon’n dir ou kapab met en chimpanzee en kravat i pa pou vedir i pou pli malen ki en imen.  Se sa. Ok si ou pa konpran kreol

 

MR DEPUTY SPEAKER

Mersi.  Order! Order!

 

HON JEAN-FRANCOIS FERRARI

Sa en komanter rasis sa.

 

HON BASIL HOAREAU

Yer letan ou ti fer li….

 

HON JEAN-FRANCOIS FERRARI

Onorab Hoareau be sa i rasis sa.  I pa devret.

 

MR DEPUTY SPEAKER

Order! Order!  Bon.  Mon krwar nou’n ariv lo en pwen kot i en pti pe azite nou ava pran en Break e nou ava retournen nou pou retournen 4er – zis pou nou kapab kontinyen kit nou letan pou nou kapab konklir nou bann repons ok?  Nou ava pran en Break ziska 4er

 

(BREAK)

 

MR DEPUTY SPEAKER

Bon nou ava kontiny repons lo Diskour ki Minis ti fer pou Bidze 2018.  Prosennman lo lalis mon annan Onorab Norbert Loizeau.

 

HON NORBERT LOIZEAU

Mersi Mr Speaker.  Bonzour Minis avek ou delegasyon.  Bonzour tou dimoun.  Mr Speaker.  Permet mwan konmans koumsa.  Letan mon get Sesel ozordi, i zis parey Prizon Montagne Posée.  Napa en sou lord.  Sa ki pa sipoze annan i annan.  I en dezord total.  E nou pti pei Sesel i egzakteman parey Montagne Posée.  Ozordi Mr Speaker nou’n vwar dan zournal ki Prizon pe rod resanz sereng pou bann prizonnyen akoz drog i en gro problenm.  Lakantite ka HIV ek hepatitis in ogmante dan Prizon.   E sa i montre ki ler en Gouvernman i lese fer rezilta se en katastrof.  Sa se, ‘’… ler ou senm divan ou ganny tanpet.’’  Se sa sesel i ete ozordi.

Larzan pe ganny depanse dan fou.  Si ozordi Leader Gouvernman Lasanble i ti en keksoz, apre i bliye ki in dir sa i montre ki sityasyon i grav.  I enn bon alignment i bezwen ganny fer laba lot kote.  Ler mon tann sa menm Onorab olye demande pou elimin bann move fason fer dan prizon tel ki telefonn, plito i dir kontinyen annan telefonn nou a bug zot.  Mr Speaker sa i montre ki zot in pri dan en vye mindset lepase.  Se pou sa ki nou, nou dir zot demann en pe alignment.  Ziska ozordi Mr Speaker ozordi nou pe deal ek en Bidze ki a mon avis i ase balanse.  Mon dir ase balanse akoz i annan serten keksoz ladan ki nou isi lo kote latab toultan nou’n koz lo la.

E la direkteman Mr Speaker mon pou resorti en keksoz dan sa Bidze ki pandan kanpanny Eleksyon 2015 nou’n koz lo la tou lazournen dan nou bann pti meeting dan bann pti rasanbleman partou kot nou ti ale.  E sa bann letan ti napa bokou dimoun ki ti attend sa bann pti meeting Mr Speaker.  E selman dimoun ti pe tande kot zot pe asize.  E pou sa rezon ki nou sa letan nou ti apel li nou ti pe donn en room service. 

E sa Mr Speaker sete tax lo lapey tou travayer ti pe ganny minimum wage, e sa letan minimum range ti 3 mil ekek Roupi.  E nou, nou, ti toultan koze dir  Ki minimum wage bezwen monte e ki tax ant lapey 5 mil a 8 mil Roupi, fodre pa annan.

Mr Speaker dan tousala i annan ki ti dir nou, nou en bann dimoun fou.  Nou pe anbet dimoun en Gouvernman responsab pa pou fer sa bann kalite keksoz ti en Gouvernman i responsab parey nou bann boug fou isi lo sa kote ki pou fer sa bann keksoz parey.  Ozordi Minis vi ki sa nide fou ozordi dan Bidze mon panse ki ou pa pe fou parey nou.  Minis mon pa pe dir ou fou, akoz sa ti en nide fou, ki nou, nou ti vin devan.

Ozordi Minis mon fyer ler ou’n vini ou’n anonse akoz pou mon sa i en gran lakonplisman.  E sa ki gou Mr Speaker Minis Larose in dir ki se en Gouvernman anbisye.ki pran bann desizyon parey.  Mon anvi dir ek Minis Larose ki sa Gouvernman pa anbisye – petet ‘OU’ ki anbisye; akoz dan lepase tou sa bann keksoz pa ti rantre dan zot zorey Mr Speaker. E mwan mon apresye sa lanbisyon ki ou annan Minis.  Pou ekout nou isi menm si nou ti ganny gete konman bann boug ‘‘fou.’’  E mon kontinyen repete.

E la Mr Speaker mon anvi dir Minis sa pa kapab pran lefe Zilyet 2018.  Parey Onorab Ramkalawan in dir sa i merit pran lefe boner Zanvye 2018.  sa i a soulaz en pe soufrans ki bann travayer kim bann kategori travayer pe pas ladan.  Avek pri bis ki pe monte sorti 5 pou vin R7 i ava en gran soulazman Mr Speaker.  Akoz se sa bann dimoun ki servi sa bann fasilite, sa bann servis parey.

E mon enplor Minis pou pran kont sa rekomandasyon.  E la vi ki pri lo tiket bis in ogmante avek lakoler par serten nou bann sitwayen lo sa size mon anvi dir Minis ki sa pe arive.  Akoz oparavan Parti Lepep ti fer krwar avek tou lepep Seselwa ki zot, zot kapab fer tou pou zot.  Zot pa merit fer nanryen zot.  Zot zis zot asize.  Zot a ganny tou.

Sanmenm sa ki apel ‘’…senm divan ou rekolte tanpet.’’  E la ozordi si nou konman bann Manm Lasanble nou pe ganny tou sord difikilte, se akoz zot dan Parti Lepep; zot ki ti fer dimoun krwar ki MNA i kapab fer tou.  MNA i en labank.  MNA i kapab donn zot tou.  E sa bann letan nou konn tre byen Mr Speaker.  Lafason ki zot laba ek zot Gouvernman ti pe donn bal dan Kof Leta.  Me ozordi avek sanzman politik Sesel in fer ki sa i en fardo.

Mon krwar Minis ou a dakor avek mwan, Ki Parti Lepep in rekolte sa ki in senmen li menm –  ‘’divan ou ganny tanpet.’’

E ou konman Minis tousala i pou tonm lo ou.  Pou ou pran bann desizyon ferm.  Pou ou kapab redres e rekiper tou nou bann larzan ki’n ganny gaspiye par sa Gouvernman pandan tou sa bann letan.

E nou lo sa kote latab Minis nou pou fer ki nou pou kontinyen vin avek bann pozisyon ki pou ede fer desann pri lavi e amelyor en pe lavi tou Seselwa.  E la mon anvi repran pwen ki Onorab Ramkalawan in fer; ti fer resorti yer dan son Diskour.  Ki en dimoun ki pe ede pou tir serten fardo lo Gouvernman i bezwen ganny rekonpanse.  Sa se bann dimoun malgre zot pe servi bann servis ki ganny ofer dan prive tel ki Ledikasyon, Lasante zot merit ganny en refund. 

Akoz zot pe tir en fardo lo Gouvernman.  Me an plis ki sa Mr Speaker se sa bann dimoun zot osi malgre zot pa pe servi sa servis ki Gouvernman pe donnen, zot pe al dan prive zot osi zot pe kontribye zot pe pey tax pou rantre dan lekonomi nou pei.

Mr Speaker ou a reste etonnen parfwa pou vwar lekel sa bann dimoun ki pe fer sa bann sakrifis pou al dan prive.  Pou met zot zanfan lekol dan prive pou servi servis Lasante dan prive.  Sa se bann senp pti dimoun ordiner Mr Speaker.  E la e sa i en bon initiative Mr Speaker.  Akoz nou bezwen envestir dan nou zanfan.  Menm si nou parfwa nou pa’n ganny sa sans pou nou ariv sa nouvo, ganny sa pli bon ledikasyon, me la i en moman pou nou envestir dan nou zanfan pou zot ganny sa sans al pli devan.

E sa i fer mon retourn lo pwen ki Onorab Ramkalawan ti fer resorti ankor yer dan son Repons.  Sa nide pou en Lekol Ekselans, i bezwen met an konsiderasyon Mr Speaker. La mon kapab la nou pa kapab mazin zis politik, akoz zis detrwa paran in deside vini fer en pe  tapaz, e alors nou nou’n per zis akoz pangar nou pa ganny detrwa vot e tou keksoz i cancel. 

Mr Speaker sa bann kalite mindset dan sa nouvo Sesel mon krwar i bezwen sanze pou nou kapab bouz de avan.  Malgre bokou zefor lo lapar ban Headteachers, lo lapar bann teachers zot menm Mr Speaker i pa fasil travay dan sa lekol Gouvernman.  E pou bann zanfan ki anvi aprann Mr Speaker i pa fasil. Nou’n vwar ki’n arive yer.  E nou’n vwar ki’n arive ozordi.  Kot bann teachers in desann.

Mr Speaker mon pa pou met plis ‘divan pangar i ariv en katastrof.’  E la konman lo sa size lekol mon ti a kontan ki Minis i get en kou dan welfare bann travayer ki nou dir bann warden kot bann lekol.  Zot napa en Scheme of Service dapre konpran.  Zot pe zis vir an ron parfwa zot Gard lo semen zot teachers an menm tan parfwa zot Messenger me sa kalite Messenger ki zot fer zot pa servi transpor zot mars apye.   E zot lapey i mwens ki 7 mil Roupi.  Mr Speaker mon ti a kontan ki Minis i get dan sa sityasyon sa bann kous travayer.

E mon pou al direkteman Mr Speaker vi ki mon lo sa size koumsa lo bann Homecares.  Gouvernman i bezwen get dan kondisyon bann Homecares zot napa en Scheme.   Zot fer tou zot osi, zot ners, zot Dokter, zot kwizinyen.  Parfwa bann vye dimoun i admit lopital menm ale pou aste Mr Speaker.  E zot, zot pa pe ganny gete byen. E en keksoz Mr Speaker nou pa pe ganny en konpran ozordi i annan dimoun pe fer louvraz Homecares ki pe vey 2 dimoun aze dan en lakour.  Zot pe ganny menm lapey avek en dimoun ki pe vey en dimoun aze.  E sa Mr Speaker mon krwar i en pwen ki nou bezwen adrese.  E vi ki, ki zot Mr Speaker, zot pa ganny en Gratwite zot kapab kite ler zot anvi.  Me pou en fason pou nou kapab ankouraz pou fer sa travay, e pou reste dan sa lanplwa mon krwar i annan serten keksoz ki bezwen ganny fer lo sa kote.

E la mon refer sorti sa pwen ki Onorab ti fer sorti osi dan son repons yer, Onorab Ramkalawan.  Konsernan bann dimoun ki’n travay en kantite lannen dan Gouvernman me selman zot in stuck lo en lapey ki pa vo nanryen.  Se pou sa rezon ki bann travayer ki pe ganny lapey ba zot plifere ler zot ariv 60an pou pran zot early retirement akoz ler zot kalkil zot lapey zot pansyon avek zot Sekirite Sosyal, i bokou plis ki sa lapey ki zot pe gannyen.

E la Mr Speaker i fer mon mazin en drayver kot Lekol Ledikasyon ki avek 38an servis i ankor pe ganny 7 mil Roupi.  E i pe apros son 60an; i pa santi li pare.  Pou li reste kontinyen travay.  Pou en lapey parey.  Alors i pou plifere pran son early retirement boner, e benefisye en pe plis.  E la mon krwar ki sa sanzman ki zot pe mazinen konsernan sa bann dimoun pe mazin pran zot retret boner, i merit ganny regete.  Akoz sa bann dimoun parfwa Mr Speaker, zot pa anvi zis pran sa retret akoz zot anvi al asize.  I annan ki annan rezon lasante, petet zot santi zot lasante pa permet zot al pli lontan.  Pou zot kapab re zwir ankor en pe plis letan zot lavi.  I annan ki annan zot bann vye paran ki pe reste ek zot.  Avek sa bann problenm Carers ki nou pe gannyen petet zot santi pou pli bon pou zot reste sa laz ki zot in arive reste okip zot vye para, donn en pe letan avek zot.

Mr Speaker – e la mon anvi koz lo en size ki pa’n tro, tro met gran lenportans dan Bidze. Lo kote Spor Mr Speaker mon pa vwar nanryen dan Bidze ki pou ankouraz spor dan Sesel.  Bann Lekip Spor pe struggle pou kapab egziste ozordi, i kout en ta larzan pou len klib kapab fonksyonnen isi dan Sesel.  Souvandfwa nou tann koz lo CSR tax, ki bann biznes i kapab servi pou ed sa bann lekip sportive.  Sa pa pe tro marse Mr Speaker.  Sa pa pe tro marse.  E i annan serten parmi ki pe manage serten Klib Sport avek zot konsernan CSR. Zot pe dir ki parfwa zot apros serten biznes sa biznes i dir zot konmkwa ki zot pe ed Gouvernman pou fer serten proze avek zot larzan CSR.  Mr Speaker, Minis mon pa konnen ki degre laverite i ladan.  Me pli tar ou a donn nou en pe leklersisman lo la.  Me la mon pe demann Minis vi ki pou annan serten departman ki pou annan bann   lo zot larzan dan Bidze.  Bokou bann dimoun ki dan spor pe manage sa bann lekip pe demande ki en larzan apre ki nou’n fer bann koupman dan Bidze i ava al anver bann Lekip Spor, bann Federasyon.  Byensir atraver Minister pour Spor.  Zot ava al partaz ek bann Federasyon pou donn bann lekip ki’n fer byen ki’n raport Sanpyonna respektiv Mr Speaker.  Akoz sa depans ki zot fer tou dilon lannen i bokou.  E mon konnen Onorab Pillay pou dakor ek mon Onorab Sebastien Pillay.  Akoz souvandfwa nou’n koz lo sa size deor dan Break e mon panse ki a donn en sipor li osi.

Mr Speaker parey zot konnen spor i enn bann meyer fason pou tir lazenes dan drog.  Pou tir bann zenn dan drog.  E spor i enn parey mon’n dir i en pli meyer fason.  E la mon’n fer resorti zot dir ki spot i amater.  Eski nou anvi nou spor i amater?

Lemonn pe evolye Mr Speaker e alor nou pa kapab ariv en lot nivo en pti pe pli o dan nou spor?  Napa bann fason ki nou kapab fer ki nou a kapab ariv omwen semi- profesyonnel?  E enn de nou pa kapab ankouraz bann biznes pou envestir dan spor – pran bann lekip sport rent li konman en biznes atraver zot Lazans CSR? Petet sa i, en nide ki mon pe avans devan Mr Speaker, kot i a ,ede e i posib i kapab ed pei.  I kapab ed pei Mr Speaker.

Me la Mr Speaker bann zenn ki dan Spor pe koze deor.  Zot in ganny gete selman zot pa pe ganny gete solman Gouvernman pe get pe donn larzan 2 milyon pou asiste bann ki lo drog.

Me la Mr Speaker mon vin lo sa Lazans pou Drog.  Eski nou’n kree Lazans pou nou dalon ki napa en lanplwa, alors in fer li en faver?   Mr Speaker la i la kot parfwa bann depans initil in antre Minis.  Akoz ki nou bezwen kree en lanplwa pou zot?.  Lapli par zot sa bann dimoun se bann politisyen parey Onorab Henrie in dir ki’n fail.  I annan ki ti kandida dan Parti Lepep ki’n ganny anmase pou travay dan sa Lazans.  Zot pa ti konnen ler ou antre dan politik ou kapab anler, apre en zour ou kapab tonm ater?   Zot pa prepar zot pou sa?  Mon krwar zot ti bezwen organiz zot Mr Speaker.  Nou lo sa kote latab, nou osi nou pas parey zot.  Lekel ki ti kree en lanplwa pou nou? Personn pa’n zanmen kree en lanplwa pou nou.  Nou’n an deor Lasanble pou 5an.  Nou’n struggle Mr Speaker. Nou’n fer tou sa ki devret fer pou nou ganny en survive.   Mwan par egzanp – mon ti zet mon bann lesel ek mon bann zouti mwan.  Akoz mon ti konnen i annan sa eleman ‘’sorti anler tonm ater.’’  Mon pa ti zete.  Mon ti al travay, mon ti fer tou Mr Speaker pou mon kapab viv, sonny mon fanmir ek sa Aprezan Mr Speaker mon pa ankor mor mwan; mon, mon ankor la.  E ki ti arive ti annan de moman Mr Speaker ler nou, nou ti pe rankontre sa bann difikilte, zot, zot ti dan Lasanble lamazorite zot.  Onorab Pillay i mazinen.  Onorab De Commarmond k ii pa la – i mazinen.  Zot ti koup tou.  Nou ti struggle.  Pa ti afekte nou Minis en.   Zot ti koup nou pansyon dan en fason malisye.  Pa ti en problenm pou nou.  Nou ti desann, nou ti travay. Onorab Arrisol i konn tre byen.   Lo Pirat nou ti desann.  Nou pa kanmi pou dir.  Nou ti al travay pou nou kapab sonny nou fanmir.

E ki ti arive ankor Mr Speaker apre sa?  Koup nou pansyon zot ti ogmant zot lapey zot.  Zot ti ogmant zot Gratwite 5an ki ozordi zot pe   koupe sorti 50poursan pou al 25poursan.  Se zot ki ti fer ogmante.  Se zot ki ti fer ogmante.  Zot ti fer sa Minis Mr Speaker zis pou zot anbelir zot lekor.  Zis pou zot byen pase.

Ozordi Mr Speaker sa bann ki’n byen pase eski nou bezwen donn zot en lanplwa?  Al fer en biznes, zot in byen pase zot.  Nou bezwen kree en Lazans pou donn zot 2 milyon pou kree bann Lanpir, parey zot ti fer lontan Mr Speaker?   Sa i pa akseptab tandis ki sport li i en fason pou nou kapab ede deal ek drog, i ganny kit de kote?  Minis mon krwar sa i en keksoz ki mon’n met devan ou petet ou ava pran konsiderasyon.

Mr Speaker mon konnen ki Minis in ekout nou byen isi lo sa kote latab.  Nou lo sa kote no u annan en plan pou sa pei… Ler nou pou rantre dan Egzekitiv si i annan bann desizyon strik e ferm, parey nou pe fer ozordi Minis nou pou fer li si i bon pou pei nou pou fer li.  Nou pa pou get okenn rezon politik, nou pou fer li.

Mr Speaker nou annan en Gouvernman ki per fer sa bann kalite desizyon ferm, bold parey nou dir.  E mon kontan ou pou fer li.  mon konnen, ou pe ganny en pe difikilte avek Gouvernman pou lapenn zot pe fer sa.  Akoz zot, zot pans politik zot.  Ou pans pli devan.  Ou en teknokrat Minis.  Ou anbisye parey pou isi lo sa kote latab nou anbisye – e ler ou anbisye ou annan bann nide fou ki ou anvoy devan.  Parey nou ti anvoye, dan lepase.  E la Mr Speaker apre ki zot, zot napa sa guts konmsi angle pou zot pran sa bann desizyon firm to keksoz i ganny blanmen ozordi lo Lopozisyon.  Nou pa kapab fer sa akoz Lopozisyon pou ‘Zet anba’’ – Lopozisyon pou isi…’’

E la i annan en koze deor, ‘’Prezidan Faure pa kapab fer nanryen, akoz Wavel.  Wavel li Wavel ki dir ki pou fer.  Wavel pa pou kontan.  Alors sa pa pou pase alors nou, nou pa pou kapab fer.’’  Be Wavel i Prezidan?  Msye Ramakalwan i Prezidan?  Me si Msye Ramkalawan i Prezidan, be li tir son lekor ek en san met anler State House

 

 

        (laughter)

 

HON NORBERT LOIZEAU

kit lakle, kit lakle lo gate, Wavel i a monte.  A dirize si Wavel ki dir tou keksoz.

Mr Speaker i annan sa koze deor.  Sa set en fason pou sey denigre Lopozisyon.  Me nou, nou konman en Lopozisyon nou pa per sa nou.  Nou pare pou pran bann desizyon ki bold.  Parey Minis Larose pe fer.  Minis mon felisit ou pou sa bann desizyon ki ou pe pran.  Malgre serten lenterferans pa ekout zot.

Mr Speaker ozordi SRC anba sa zot nouvo Minis i annan en ta travay pou zot fer.  Zot bezwen fer sir ki tou dimoun ki fer biznes i bezwen pey tax.  E la Mr Speaker nou bezwen ki kot Airport bann dimoun kot Ladwann i fer sir ki nou verifye ki bann dimoun ki pe anmenn bann keksoz dan pei zot annan license, akoz i annan bann biznes ki annan license pe ganny afekte, zis ou vwar en boug i sorti i sot deor i vini avek en kargezon i pey son tax lo la solman li.  Zis sa ki zot gete zot.  Zot pa get son license ler dimoun i vini pey son tax pou zot anmas en larzan, apre sa dimoun li i al lo Facebook lo Buy and Sell se pa ki zafer met sepa soz, i vann son prodwir.  Tandis ki sa dimoun li ki i pe fer son biznes byen prop anba en license, li manman li, li i ganny pake difikilte Mr Speaker.

E sa i en keksoz ki zot merit get ladan.  Me ladan menm nou pe koz biznes en formil dernyen fwa ti vin ek biznes en formil.  Ki biznes ki enformel.  Biznes i biznes.  Biznes en formil.  Ou pe aranz ou pe fer biznes enformel kot ou en pti garaz selman ou annan 5 loto enformel?  Sa garaz li laba Providence, i pa enformel li?

Tousala Minis Mr Speaker atraver ou, mon anvi dir Minis sa sete bann move pratik, ki fer ki ozordi nou lekonomi i fay.  Nou pa’n kapab ranmas larzan.  Akoz nou’n tro soutir bann dimoun zis pou rezon politik.  Enformel ou a fer ou biznes akoz sa ou a la.  Mr Speaker sa nou bezwen arete.

Mr Speaker permet mwan fer en pti komanter, lo mon distrik Bel Air aprezan.  Apard ki bann ki sa proze 24 Unit dan 24 mwan e proze Waterfront mon pa vwar nanryen ankor okenn lezot proze devlopman ki pou annan dan distrik Bel Air.

Konsernan sa 24 Unit mon pa krwar mon pa vwar li pou demare sa lannen Mr Speaker.  Akoz difikilte pou akse avek sa morso later Sans Souci ki zot annan plan fer sa bann Unit lo la.  E la mon anvi dir ek bann zabitan Bel Air bliye 24 Unit, dan sa 24 mwan.  Deza in fini pas 12 mwan nou pe al 12 mwan.  Nanryen pa ankor fer, alors nou pe dir bann dimoun Bel Air vey ‘’petet.’’  Annou vey ‘’petet.’’

Pou sa proze Waterfront Mr Speaker, ki tonm anvil me i form par dan distrik Bel Air.  Dapre lenformasyon pou konmanse lannen prosen.  Sa ki mon konpran dan en meeting semenn pase ki mon ti gannyen avek bann avek Lotorite Planning ki sa bann batiman pou osi enkli lozman pou dimoun ki anvi petet reste anvil.

E la mon anvi dir ek Lotorite konsernen fer sir ki dimoun Bel Air i priyorite pou ganny sa.  Akoz i dan lavil.  E dan nou distrik vi ki nou annan problenm later nou osi nou a reste anvil Mr Speaker.  Mwan mon krwar ki priyorite i ava vin pou dimoun Bel Air akoz sa proze Sans Souci nou pou vey petet.

An konklizyon Mr Speaker ozordi dan nou pei mon kontan ki Minis in dir nou bezwen pran en lapros ‘savings.’  Ler mon dir savings i pa vedir met larzan dan labank fer savings. 

Savings ou kapab fer li kot lakour.  Mon pe dir sa Mr Speaker konman en MNA mon vwar tou sa bann keksoz mon.  ozordi tou dimoun dan lakour i annan en toaster.  Nou lontan dipen nou ti manz li pir tranp dan ou dite pran en gro larou, saret anvoy anndan.  Konmela tou dimoun i oule toast dipen; microwave tou dimoun i oule ‘’ting ting’’ sofe – defrost, anvoy anndan.

Mwan mon sof pou mon lo four mwan.  Mon pa pe dir zot al rod en Four Petrol al rod en Stov Petrol met kot zot pou sofe nou annan gas konmela.  Nou kapab fer sa.  E la Mr Speaker ozordi malgre nou annan fridge akoz nou dalon i annan en Dispenser nou osi nou pou rod en Dispenser.  Kan nou kapab ranpli nou delo met dan fridge servi nou pou rod en Dispenser.

E apre ki i arrive san realize ki nou bill elektrisite i monte.  E apre nou tay partou e parey zot konnen sa pli gro labank ki zot tay ki zot vin rann lapel se kot bann MNA.  E la nou anvi dir zot fer antre dan savings.  Sa i en fason pou nou fer savings.  Mr Speaker.

En terminant mon anvi dir pep Seselwa Mr Speaker annan pasyans.  ‘’40an nou’n espere; arive nou pou arive.’’  Ek LDS tou i posib.  Tou i posib.  Ozordi sa pti lalimyer parey nou vwar Ramkalawan i dir ki lo fon sa tinel, ozordi nou vwar li en pe pli gro.  Nou vwar li i pe avans pli pre.  Annan pasyans, Akoz avek ansanm avek nou.  Nou pou rekonstri sa pei ki’n ganny detri par zot dan Parti Lepep laba ki pe riye, Mr Speaker.  Akoz zot pa serye zot zis zot riye zot.  Kantmenm pwen i serye zot riye menm.  Zot in fer sa 5an dan Lasanble dan Katriyenm Lasanble Mr Speaker.

 

MR DEPUTY SPEAKER

Wrap-up Onorab.

 

HON NORBERT LOIZEAU

Mon pe wrap-up.  Pou nou rekonstri nou pei ki’n ganny detri pou en Gouvernman ki’n napa okenn plan pour Sesel.  Par en Gouvernman ki’n zis asize mazin anrisi zot lekor, ek zot bann dalon e ki pou zot Nwel i pas boner.  Mr Speaker.  Mersi.

 

MR DEPUTY SPEAKER

Mersi Onorab Loizeau.  Onorab Sebastien Pillay.

 

HON SEBASTIEN PILLAY

Mersi Mr Speaker.  Bonn apre midi.  Bonn apre midi tou koleg Onorab e bonn apre midi tou dimoun ki a lekout.  Mon konnen bokou pe antre se zot, bann ki dan zot transpor pe ekout nou.  Mr Speaker mon pou konmans mon lentervansyon par dir ki i paret mwan ki Lopozisyon in ekout detrwa diferan Speech Bidze.  Mon dir sa akoz, i paret ki plizyer Manm Lopozisyon in ekout diferan kalite Bidze – enn ler mon demann mon lekor si Minis Larose in sorti in fer en Speech apre in re antre in fer en lot, apre in antre in fer en lot akoz la fason ki zot koze i paret poudir alignment lo lot kote kekfwa ki bezwen ganny en pti pe pli aranze, parey Onorab Loizeau in dir nou bezwen aranze lo nou kote.   Mon dir sa Mr Speaker zis pou ilistre mon pwen.  Pou ilistre mon pwen mon pou servi legzanp sa ki mon’n ekoute parsyelman, trankilman pandan sa dernyen zour.  Mon’n vwar par egzanp Onorab Henrie ek Onorab Larue in dekrir sa Bidze konman en Bidze parti lepep.  Sa en zafer parti lepep me Onorab Woodcock ek Onorab Hoareau in dir ki sa Bidze i anmenn bokou, malgre ki zot in point out tre byen, ki annan bann landrwa ki bezwen ganny aziste.  La Onorab Loizeau i vini i dir nou poudir, i konmsi dan zar i pe les tonbe sa lager pou dimoun Bel Air ganny sa lakaz ki mon ti a krwar i ti ava dir, i pa pou les tonbe sa lager apre i dir nou i annan batiman anvil e fe sir ki dimoun Bel Air i ganny en landrwa anvil.  So se sa- se en pti pe sa dekoneksyon ki fer mwan vwar en pti pe sa konfizyon ki fer mwan dir poudir zot in ekout diferan Speech Bidze.  Me mwan ki mon pou sey fer, mon pou sey ed zot re align zot lo en serten size, lo en serten pwen e prezan baze lo sa re alignment ki mon pou propoze avek zot, zot ava regarde kwa dan sa ki zot in dir ki pozitiv, kwa dan sa ki nou pe dir ki pozitiv.  E kote ‘Ansanm parey en dimoun bomaten in dir kot nou kapab met politik akote e avans pei pli devan.

Annou pran en premye pwen Mr Speaker ki dan lespri tou dimoun par egzanp Ledikasyon.  Onorab Henrie i dir mon koz lo Bidze, ok Onorab Henrie – Bidze.  Bidze in fer 824 milyon 833 mil Roupi pou Ledikasyon.  Ki fer ki sa i en depans apepre par zour 2.2 milyon par zour lo Ledikasyon.  Savedir Parti Lepep ki pe depans sa 2.2 milyon par zour.  I pa- i pa en lo Gouvernman, akoz i paret mon sa i en Bidze Parti Lepep. Me sa ki enteresan sa Bidze i reprezant en sonm 163 mil 847 Roupi pou sak zanfan dan segonder.  Mon target segonder baze lo sa ki nou’n tande resaman la.  Dan plas swazir sezi loportinite lot kote, pou zot koz lo responsabilite, ki sa bann zenn dan segonder i devret annan anver depans, ki nou konman en pei pe fer anver zot, zot in prefer swazir vin fer politik, serten zot pa tou, lo bann size ki vreman banal; ki vreman napa sans an relasyon avek sa Bidze.  Mr Speaker mwan senserman pou ed zot align zot lekor, ki nou devret pe dir tou zenn ki al lekol ozordi konpran sa depans ki pei pe fer anver ou, pour ki ou kapab akonpli ou rev pou ki ou kapab demen vin en sitwayen ki kontribye dan sosyete.  Akoz?  Akoz Mr Speaker.  Akoz i pou fer ki si en zanfan i dan S.1 ozordi by the time i fini S.5 nou pou’n pey plis en pti pe plis ki 819 mil Roupi pour son ledikasyon.  Me –annou get en paralel avek sa ki nou pe dir pou en zanfan ki lekol dan Gouvernman e konbyen paran ki met son zanfan dan lekol prive pe depanse tou le mwan.  E nou ava vwar poudir egalman parey en paran ki deside pran sa linisyativ pou met son zanfan dan en lekol prive, Gouvernman pe met larzan konsekans dan en Bidze pour ki nou kapab edik nou zanfan.  Me sa ki nou demande se ki sa zanfan i ganny ledikasyon de kalite, me osi ki i pran son responsabilite anver son ledikasyon; pour ki sa lenvestisman ki nou pe fer dan li i abouti dan en keksoz ki pozitiv.  Se sa lesansyel ki nou devret pe koz lo la ozordi ler nou pe koz lo sa Bidze ki devan nou.  Mr Speaker en lot pwen dan Bidze, ki mon krwar nou devret regard byen ki mannyer nou align nou lekor.  Nou’n tann koz bokou lo welfare.  E ozordi i paret ki se LDS ki an faver ki nou annan en ‘’benefit and approved program of SSF’’ e ankor i bezwen en lenvansyon Parti Lepep, akoz dan Bidze nou annan en pe plis ki 1 bilyon Roupi pour Welfare.  Ki fer ki nou pe depans apepre 2.9 milyon Roupi par zour, anba bann Progranm Welfare.  Me zot pa’n swazir pou koz lo la zot malgre ki zot pe koz lo carer fer isi, carer fer laba.  Lesansyel ki zot bezwen pe koz lo la se ki mannyer bann sonm ki nou’n met dan sa Bidze i abouti a bann fen pozitiv, pour ki bann progranm ki nou’n met an plas i annan en benefis pou bann dimoun ki sipoze benefisye anba sa bann progranm.  Se sa alignment ki nou pe koz lo la.  Se sa lesansyel ki nou pe koz lo la.  En lot pwen ankor Mr Speaker.  Pou Home Affairs i annan  en Bidze 468 milyon Roupi apepre R468 milyon ki fer ki 1.2 apepre 1.2 milyon Roupi par zour, pou ganny depanse an se ki konsern Sekirite pei, an se ki konsern Lapolis.  Se sa ki nou bezwen pe koz lo la.  Se eski nou kapab asire ki mannyer nou kapab travay ansanm, met tou konsiderasyon politik akote, pou ki sa 1.2 milyon Roupi par zour ki nou pe al depanse ki Gouvernman in met dan Bidze pou depanse, ki i kapab abouti a en fen pozitiv, ki nou pa tan ankor bann zistwar kot en dimoun se li pa an sekirite, i pa anpe; zisteman parey Onorab Hoareau ti fer sorti taler dan son entervansyon.  Se sa alignment ki nou pe koz lo la e non pa lo lezot size isi, laba.  E an pasan mon le remind bann Onorab lot kote ki Lalwa pou donn Pansyon bann MNA, Gratwite bann MNA pa ti pas dan Senkyenm Lasanble, me ti pas dan Katriyenm Lasanble.  Nou rapel byen sa en.  Alors Onorab Loizeau li menm li i ti vot lo sa Lalwa kan i pe dir ki senkyenm Lasanble ti vot lo sa Lalwa.  Par kont ti Katriyenm Lasanble ki ti vot lo sa Lalwa.  So – non, non- in koz lo Gratwite, li mon le fer byen kler ki alignment i bezwen bon throughout.  Me, me i annan pozitiv ki’n sorti dan sa deba ozordi. I annan en pozitiv enportan ki Onorab Hoareau in koz lo la e Onorab Loizeau e Onorab Woodcock in koz lo la se entrodwir sa Progressive Income Tax pli boner posib.  Akoz entrodwir li pli boner posib?  E annou koz lo la kantite dimoun ki pou benefisye avek sa personnel income tax.  Annou aret koz lo sa Gouvernman i le pran larzan dan pos dimoun, akoz zisteman avek mezir ki Gouvernman in pran 20, 239 dimoun pa pou pey tax – si sa i ganny entrodwir an Zanvye.  20, 239 dimoun e sa pou fer ki 36, 371 dimoun ziskan lannen prosenn, sa group dimoun 36, 371 dimoun pa pou vwar swa, en logmantasyon dan tax, ouswa i pa pou pey tax ditou.  I pou reste zis en pti poursantaz dimoun ki pou pey tax.  E parey zot in koze lo lot kote zot in dir poudir Parti Lepep i glorifye serten dimoun i donn zot bann gro plas, annou get byen bann dimoun, konbyen bann dimoun ki ganny bann gro saler dan sa pei.  Konbyen Seselwa i annan?  90 mil dimoun dapre statistics.  I annan 8 dimoun ki ganny sa saler.  100 mil Roupi i annan zis 14 Seselwa ki ganny sa saler.  So avan ki zot zis vin dir ki nou, nou pe donn tou dimoun bann gro, gro saler 100 mil Roupi annou get byen vreman konbyen dimoun ki pe ganny sa kalite saler.  E sa pou vin lo en pwen pou fer mwan vin lo en pwen ki Onorab Leader Lopozisyon in fer resorti dan son Ladres.  An tou par lao 83 mil dimoun i annan 197 dimoun total ki ganny sa saler.  Ladan 80 i Seselwa, 117 i expatriate.   Ki fer ki mezir ki Gouvernman in met an plas avek sa 30 poursan par lao i pa pou afekte sa 36,371 dimoun;  savedir sa graduate ki ziska 35 mil  Roupi pa pe vwar en logmantasyon dan tax ouswa pli ba pou pey mwens tax.  Sa lavantaz.  Me en nide ki tre bon, en nide ki tre bon  se sa size kot si sa dimoun i annan en ‘allowable deduction’ par egzanp i pe pey lekol, ou entrodwir sa me dezavantaz avek si ou fer ou sanz sa PIT ou tir sa 30 poursan ou met 20 poursan, i pou fer ki sa dimoun ki pe ganny 100 mil si i pe pey lekol dizon son ‘allowable deduction’ pou tonm 90mil, R30 Roupi lo 3 term si mon kalkil i bon, zot a koriz mwan si i annan lezot ki annan pli bon sif, 90 mil lo 3 term e son tax pou tonm dizon 108 mil, 108 tir 90 mil sa dimoun pou al pey li zis 18 mil Roupi  tax.  I pou fer ki an proporsyon ek son saler, i pou pey mwens tax ki en dimoun ki ganny R12 mil Roupi.  Se pour sa rezon ki sa propozisyon ki si nou annan en ‘allowable deduction’ pou fer li vin fair e ekitab, i pou mars pli byen ansanm avek si nou tenir an kont sa mezir ki Minister in met an plas e sa se annan sa bann threshold 0 poursan, 15 poursan, 20 poursan e 30 poursan.  Si nou entrodwir sa threshold 15 poursan e 20 poursan sa flatrate ki nou pe dir 20 poursan, dezavantaz ki nou pou kree se sa dimoun ki bann plis baze lo son ‘’allowable deductions’’ at the end of the day an proporsyon avek son tax ki i pou peye i pou’n pey mwens tax ki i ti devret peye in the first instance.  Me lavantaz en ‘’allowable deduction’’ i pa zis pou bann ki ganny gro saler, i pou bann ki pli ba tou.  Savedir ou kapab pe ganny ou R40 mil e avek en ‘’allowable deduction’’ ou pe pey pli ba e sa mon dakor avek.  Me pa pou sa bann dimoun ki pe ganny sa saler 83,333 Roupi.  La an proporsyon avek larzan ki zot pe anmenn dan lakour e deduction ki zot pe fer lo zot, i pa pou fair lo en dimoun ki pli ba ki li ki pe pey plis.  Se sa ki mon krwar en propozisyon ki nou bezwen fer, me nou bezwen regard ki mannyer sa propozisyon i marse dan son praktikalite.  En lot pwen enportan, en lot pwen enportan Mr Speaker se bann size ki sa Bidze in tant pou li adrese e lafason ki in tant pou li adres sa size. Par egzanp enn bann size enportan ki sa Bidze in sey adrese se sa size Lapes.  Resaman Mr Speaker mon’n fer en – mon’n zwenn avek bann peser lo Por Providence, mon’n menm zwenn avek lezot peser e mon oule prezant en senaryo devan zot zisteman pou ed zot ankor ek sa alignment; se si par egzanp demen nou donn peser ice, nou donn peser labwet, me en keksoz pou reste en problenm e sa se market ki peser i annan pou li kapab vann son pwason.  That is the main issue ki nou bezwen resolve pou peser.  Retir sa 2 eleman, peser i bezwen en meyer marse pou li kapab vann son pwason.  Zisteman pou nou kapab inject ankor plis growth dan sa sekter e fer plis dimoun benefisye dan sa sekter.  Akoz pou le moman par egzanp en peser pri ki i pe peye, ki i pe gannyen par kilo pou son pwason ki antre parfwa, i pa ase pou li kapab kouver son fre.  E se sa menm problenm ki bann peser pe rankontre.  E se pou sa rezon ki Minis atraver travay ki ou Minister pe fer se rod fason  pou link-up bann diferan Sekter Lekonomi pa zis regard Sekter Lapes dan – lo li tousel me link- up tou bann sekter pou vwar ki mannyer nou kapab kree vreman en marse kot peser oubyen ankouraz bann akter lokal ki oule envestir dan sa domenn pou envestir dan – rod bann marse kot zot a kapab vann zot prodwi e zisteman ed zot ek bann baryer trade ki kapab egziste ek ban rekomandasyon L’Union European e lezot rekomandasyon enternasyonal pour ki zot a kapab vann sa prodwi, eksport li e zisteman provide plis larises atraver sa lendistri.  Mr Speaker akoz mon’n koz lo peser se akoz i en size ki bokou Seselwa i koz lo la e i enportan ki nou rod en fason pou nou kapab rezourd sa problenm once and for all.  En lot pwen enportan Mr Speaker ki mon oule koz lo la se sa size Slim Government.  I en very appealing idea sa.  Me selman ki mon pe vwar se ki, e dekoneksyon avek parfwa nide ki zot avanse se ki parfwa zot demande ki i annan plis dimoun ki pe fer plis louvraz.  E parfwa zot demande ki nou annan Slim GovernmentSo nou bezwen deside kwa ki nou anvi. Si nou anvi en Slim Government then nou dir nou anvi en Slim Government.  Nou pa kapab dir ou bezwen plis travayer pou fer tel louvraz me selman annan en Slim GovernmentWe have to know what we want e dir sa ki nou anvi.  E se pou sa rezon ki en ler mon konsernen par lefe ki, ki mannyer nou kapab anmenn plis efikasite, dan lafason ki Gouvernman i fonksyonnen, prenon kont – prenon kont ki ozordi malgre tou sa ki zot in sey dir ki dan Gouvernman ozordi bann fonksyonner Gouvernman – sorry pou dezapwent zot me pa tou ki siport Parti Lepep.  I annan ki siport LDS.  Savedir sa i en Gouvernman Seselwa e zisteman rezon mon pe dir zot sa se akoz ki mannyer zot prezan avek nou, nou kapab anmenn plis efikasite.  Mon dir sa Mr Speaker, akoz yer swar menm mon ti pe ekout en interview lo sa lensidan ki’n arive Praslin, e ler sa madanm ki pe ganny interview i dir, par egzanp pou debwazman en landrwa, mon demann mon lekor si Prezidan Faure oubyen parey ou’n dir si Onorab Ramkalawan ki ti laba, i ti pou bezwen pran en gran kouto desann al debwaz sa landrwa li menm?  Ou konpran mwan.  Lefe i reste se ki sa dimoun ki’n ganny sa travay pou li fer, i bezwen delivre lo sa manda ki in gannyen pou fer son travay e i pa sa dimoun ki Prezidan ouswa sa Minis ki pou vin dir li a tou repriz ki i bezwen fer sa louvraz.  Se nou bezwen rod sa efikasite.  E le sel fason ki nou pou kapab ganny sa efikasite se ki  si nou met bann konsiderasyon politik apar antre nou e nou kapab dir avek one clear voice par egzanp travay ki Government Assurance Commitee pe fer, travay ki FPAC pe fer, kot nou kapab al dan en direksyon pozitiv kot nou kapab anmenn sa bann vre lapros travay ki anmenn en rezilta.  E mon kontan pou dir ki dan Bidze, dan Bidze in pran kont bann mezir ki nou bezwen pran, ki nou bezwen pran e zot in finans sa bann mezir pou ki nou kapab at least ariv e achieve sa ki nou pe rode.  E se pou sa rezon ki mon dir zot boner zot in lir diferan Bidze akoz ler mon’ n ekout zot koze mon pa’n tro ganny en konpran kote zot pe vini ouswa kote zot pe ale.

En lot, en lot pwen enportan ki mon oule adrese Mr Speaker e sa i konsern vertical integration.  Mon rapel tre byen ki Onorab Ferrari li menm li i ti en dimoun ki ti ekri bokou lo papye e ti dir poudir i an faver vertical integration.  A plizyer repriz nou rapel dan lepase ou ti blanm Gouvernman pou sa size vertical integration.  Me la ozordi nou vwar ki lenpak i annan.  E lenpak i kler e se pou sa rezon ki nou bezwen vwar ki mannyer bann akter dan bann diferan sekter, i kapab grosi to the point ki zot kapab compete avek bann lezot.  Me selman difikilte i reste ki si bann akter in vin sitan gro i pou difisil pou zot kapab – pou lezot antre.  E sa i fer mwan – i anmenn mwan lo sa pwen par egzanp ler mon pran, si nou capital investment par egzanp.  Admeton Mr Speaker nou met sa Bidze pou fer sa danm nou pou annan nou around SCR1.5 billion of capital investment dan sa pei ki fer ki nou pou annan nou en sonm larzan konsiderab ki pe roule dan lekonomi when it comes to capital investment.  Me selman ki pou arive at the end of the day?  Si Minis nou pa met an plas bann mezir pou asire ki sa larzan i ganny distribye dan en fason ekitab across diferan sekter ou pou vwar zis en bann wel established names, wel established companies ki pou antre ki pou benefisye akoz nou prosedir tender i fer ki zot kapab benefisye more than others.  Se pour sa rezon ki enn bann mezir ki nou bezwen pran konman Gouvernman, se nou pe met sa larzan pou inject economic growth, nou pe met sa larzan pou fer ki i annan growth dan lekonomi me sey rod en fason pou nou asire somehow ki sa i de-koul partou.  Ki sa i benefisye maximum dimoun.  Akoz ler nou regard sa sonm ki’n ganny propoze i apepre R2 bilyon par zour.  R2 milyon par zour when it comes to capital investment.  Ki vedir ki i bezwen annan ase larzan pou en maximum akter dan sa bann sekter pou kapab benefisye.  Mr Speaker mon krwar i kler ki nou bezwen resanz nou fason thinking pou nou re align nou lekor to where nou le nou pei ale.  Enn bann eleman fondamantal sa ki nou pe dir se met larzan dan pos Seselwa.  Me lesansyel ki nou bezwen fer se rod bann lezot fakter ki retir larzan dan pos Seselwa.  Ki bann fakter ki afekte Seselwa ki sa larzan dan plas reste dan son pos i sorti?   Enn bann pwen ki’n ganny- ki’n ganny soulinyen se akoz labank pa redwir son to lentere?  E nou tou nou konnen akoz i annan en rezon.  Par egzanp L’Amerique labank i kapab kontrol to lentere par lefe ki si bann labank prive pe borrow ek li, i donn zot bann discount rate, e sa bann discount rates i ganny pase lo customers.  Me Sesel bann labank prive pa pe borrow ek Central Bank.  Ki fer ki zot pa pe kapab, zot dan en pozisyon konfortab ki zot pa ou le fer desan bann interest rates. E se pou sa rezon, se pou sa rezon ki nou bezwen vwar ki mannyer Polisi ki nou pe servi, pe kit labank dan en pozisyon konfortab.  Si par egzanp labank pe kapab envestir plizyer milyon dan Treasury Bills i pou fer ki son lanbisyon pou li donn kredi pli bon marse dimoun, i ganny dampen – i ganny afekte par lefe ki i pe  ganny en return ki konsiderab ler i pe envesti.  E mon konpran ki Labank Santral in dir en influx of liquidity dan sistenm pou annan en lenpak lo par egzanp foreign exchange; akoz tou dimoun pou annan disposable income.  Me ou konnen nou pe servi bann model ekonomik ki parey Onorab Hoareau in dir i marse dan bann gran pei kot i koz lo economic of scales i annan eksetera.  Be Sesel nou napa sa.  Akoz nou pa sey en keksoz isi tre senp e parey tou dimoun in dir e mon pou siport sa santiman ki tou dimoun in avanse, annou konmans avek nou bann labank.  Annou link across sekter kwa ki nou bann labank pe fer.  Si i pe poste en profi 150 milyon konbyen 2 poursan pou afekte li?  E ki bann kalite loan bann kalite prodwi ki kapab ofer across different income brackets si posib.  Mon konnen ki nou pe dir be ok, i annan en gro Konpannyen pou vini pou vin borrow loan a en lentere pli ba be posibleman i a pas sa kou pli ba avek son kliyan.  Lesansyel se ki si nou pa seye, zanmen nou pou konnen ki lenpak i pou annan.  E si nou sey li dan en fason ki nou kontrol bann lezot endikater, then nou pou kapab asire ki – be ou konpran se pou sa ki mon pe koz lo alignment Mr Speaker.  Ler mon dir fer labank fer desann to lentere Onorab Ferrari i dir mon pou fer nou faid.  Be ou fek dir taler fer desann to lentere la i dir, ou konnen sa alignment vreman i bezwen ganny aranze sa Mr Speaker.  E san menm mon siport Leader Lopozisyon la fason ki in koze e kot in koz lo en lapros zeneral ki nou bezwen pran.  Me mon krwar zot bezwen swiv son legzanp.  Zot bezwen adopte zot dan en pozisyon ki zot kapab swiv.  Ok?  So Mr Speaker se sa ki – se sa ki fer ki ler nou regard nou Speech Bidze ki Minis in prezant nou e bidze ki devan nou ozordi i montre nou klerman ki nou annan en ta potansyel, pou nou kapab fer nou pei avans devan.  Me selman fodre nou commit nou lekor pou pran bann desizyon, vre bann desizyon ki bold.  Vre fodre nou commit nou lekor pou pran bann desizyon, ki parfwa i al o de la bann konsiderasyon politik.  Enn bann eleman Mr Speaker ki’n tous mwan sa 2 zour se ler mon’n regard sa progranm lo televizyon.  E mon’n regard enn nou ansyen koleg ki’n perdi son papa, pe koze, mon’n regard sa fiy ki’n koz lo i per dan son lakaz.  Sa msye ki dir ler i zwenn en dimoun dan son pey dibwa, i pa fye koz ek sa dimoun, akoz sa dimoun i annan kouto.  Avan yer menm mon pe koz avek en lot msye ki dir mwan en dimoun in park en loto an deor son lakaz i pe zwe lanmizik for i pa ni menm fye pou al dir sa dimoun tenny son lanmizik.  Ou konnen i fer mwan mazinen poudir, sa problenm ki nou annan nou tou nou kapab blanm ar 40an isi 40 laba, 15 lo 10, LDS, ‘Pil lo li’ eksetera nou, nou bezwen asire ki konman politisyen nou konmans sanz nou langaz.  Fodre nou sanz nou langaz.  Par egzanp, zis par egzanp taler Onorab Mondon in dir, ‘Zet Anba’ ou konnen ki mannyer i danzere ek zanfan lekol ozordi sa parol ‘Zet Anba.’  I fasil pou zanfan ganny enpresyonnen par bann keksoz ki nou dir konman politisyen.  E se pou sa rezon ki in ler pou nou konmans analiz lo kwa ki nou devret fer e la mwan malgre ki lo konmansman Mr Speaker wi mon’n fer serten referans politik, lo sa enn size mon prefere, pou mon pa vin fer referans politik.  Lo sa enn size ki mon le dir, mon le dir poudir bann langaz ki nou servi par egzanp eski ozordi nou still krwar poudir ‘Pil lo Li’ i en langaz ki nou kapab servi?  Eski ozordi dan sa klima ki nou ladan ki nou tou nou pe koz lo la i en keksoz ki nou kapab dir?  Eski ozordi – sertennman si ou santi i annan keksoz ki mwan mon’n dir ki mon pa devret dir ou dir mwan.  Me selman ki mon pe fer – ki mon pe fer, mwan mon pe extend sa olive branch ek zot, mon pe extend mon lanmen ek zot pou dir zot ki, nou bezwen travay ‘Ansanm pou nou rezourd sa problenm ki devan nou.  E zisteman, zisteman ler mon ti get zot konman en group laplipar antre zot siport sa Lazans ki ti vin devan nou ki deal avek Drug Reduction, konman en Lasanble nou ti siport li.  Ozordi mon dezapwente pou tande ki zot pe deside pou zot dir koup larzan sa Lazans; kan i oule zisteman, i le zisteman fer ki nou kapab tackle sa problenm drog.  So si nou santi poudir sonm ki i pe gannyen i tro bokou, nou ava la ouswa Lazans pou vin la.  I ava eksplik son, me pa met zot lekor pa pran en pozisyon ekstrenm, pa pran en pozisyon ekstrenm avan ki nou ganny sans ekoute ki pozisyon sa Lazans i pe pran.  Akoz ozordi i relman en problenm.  E an terminan Mr Speaker mon oule dir ek sa madanm ki ti zwenn mwan dan laboutik O Bon Valer mon’n ekout ou e mon pou fer pase ou pwen.  Son garson Mr Speaker in nobou sorti dan drog.  E in pran li en ta letan, me ozordi problenm ki  i pe rankontre se post addiction, post addiction napa en keksoz pou kontinyen soutenir li.  E zot pe rode sa.  Dimoun ki pe sorti from addiction pe rode sa.  E nou, nou bezwen careful ki bann dimoun ki mal entansyonnen pa servi bann manrmay ki lo drog konman scape goat pou zot bann aksyon kriminel.  I annan wi bann aksyon ki pe ganny komet par ban manrmay ki lo drog me annou careful pou bann ki mal entansyonnen ki le kas lakaz dimoun me apre nou tou nou ale nou zero in, nou focus zis lo bann manrmay ki lo lapoud me selman nou bliye poudir par lezot landrwa i annan ban lezot dimoun osi ki anvi fer ditor.  So mon krwar lapros ki nou bezwen pran konman en Lasanble se en lapros kolektif, en lapros travay ansanm.  Mwan mon apresye bann komanter ki mon ban koleg lo lot kote latab in avanse, mon krwar i annan bann bon pwen ki’n sorti lo lot kote latab, i annan bann bon pwen ki’n sorti lo lot kote latab isi; e ki Minis Finans in ganny ase home work pou li analize e pou li ler i pe Reply tou sa bann pwen ki i annan.  Mon pe look forward to sa Committee Stage ki nou pou al gannyen pou kapab zisteman regard sa Bidze dan son detay, dan son bann diferan eleman, me mon oule zis dir mon bann koleg lo lot kote latab e repete, pa pran en pozisyon ekstrenm avan ki ou’n ganny sans vin Committee Stage.  Akoz pou mwan i fer – i kree en sityasyon kot mon pa vwar apre kote ou pou kapab negosye oubyen kotye apre ou pou kapab fer en compromise.  Pa prejudge.  Zisteman plito allow sa bann Lazans i ava vin la e nou ava ganny sans ganny klarifikasyon lo bann pwen enportan ki zot pe fer.  Nou a ganny en konpran lo bann depans ki zot pe fer e nou avek zot nou.  Nou ansanm dan Lasanble malgre zot annan 19, malgre nou annan mwens nou ansanm dan Lasanble.  Demen i kapab zot ki annan mwens nou ki annan plis.  Mon krwar nou bezwen servi sa letap ki nou ladan konman en leson sa.  Dimoun deor pe get nou.  Avek sa Mr Speaker mon oule dir ou mersi.  E mon oule remersi tou bann Manm ki’n ekout mwan mon konnen zot in tanzantan anvoy bann pti komanter dan sa ki mon pe dir.  Mon toultan apresye bann komanter ki zot fer e mon le swet tou dimoun en bon lafen lazournen.  Mersi.

 

MR DEPUTY SPEAKER

Bon mersi.  Mersi Onorab Sebastien Pillay.  Mon krwar ou’n fini lo en bon not.  E avek sa i reste nou 5 Manm ki pa ankor entervenir.  Nou pou pran sa 5 Manm demen.  Ok.  Demen nou pou konmanse 9 er bomaten e nou ava konmans avek Onorab Clifford Andre.  Ok?  So nou pou adjourn ziska demen e apre demen mon mazinen kekfwa avan midi nou ava’n fini, nou pou adjourn pou repran vandredi kot Minis i ava retournen pou vin fer komanter lo nou ban entervansyon e i ava donn nou en repons.  Ok.  Onorab Ferrari.

 

HON JEAN-FRANCOIS FERRARI

Zis en pti pwen teknik.  Mon pa’n deza demande dan Lasanble me kekfwa Onorab Pillay i kapab fer e pti summary sa ki in dir akoz mon pa’n tro tro – konmsi si i kapab fer en pti summary e sirkil avek bann Manm nou ava kapab ganny en konpran.

 

MR DEPUTY SPEAKER

Ok. Ok, ok,  Onorab.  Ok Onorab.  Yes Onorab Ramkalawan.

 

HON WAVEL RAMKALAWAN

Mr Speaker mon ti pe zis regard nou progranm travay.  Lakantite Manm ki reste la demen midi nou pou’n fini?

 

MR DEPUTY SPEAKER

Wi.

 

HON WAVEL RAMKALAWAN

Minis, Minis…

 

MR DEPUTY SPEAKER

Nou’n pran sa desizyon dan ABC ki nou ti fer.

 

HON WAVEL RAMKALAWAN

Ki nou repran Vandredi?

 

MR DEPUTY SPEAKER

Nou repran vandredi bomaten, Vandredi bomaten i a donn en pti pe letan osi tou Minis pou prepar li ki vandredi bomaten nou dedye zis Vandredi bomaten i kapab kekfwa 1 erdtan kot Minis i vini i donn son Reply.

 

HON WAVEL RAMKALAWAN

Apre nou antre dan Committee…?

 

MR DEPUTY SPEAKER

Nou antre…non nou pa pe rantre Committee deswit.  Lendi le 13 nou konmans Komite.

 

HON WAVEL RAMKALAWAN

Mr Speaker tro bokou letan, annou pa trennen.  Si Minis i fini fer son Speech, i fini reponn.

 

MR DEPUTY SPEAKER

Nou annan ase … ok.

 

HON WAVEL RAMKALAWAN

Vandredi bomaten, son larepons i 1 erdtan, donn li 1 erdtan edmi.  Be nou fini … i ariv 10 er.

 

MR DEPUTY SPEAKER

Non, non Onorab meeting ki nou ti fer nou ti agree avek PS Payet nou annan ase letan devan nou e PS in fini sirkil en Timetable, en Schedule kot bann Departman bann Minister pou vini.

 

HON WAVEL RAMKALAWAN

Mr Speaker nou pe gat letan.  Nou konmanse nou rantre dan Committee Stage nou ale.

 

MR DEPUTY SPEAKER

Non napa letan gate.  Nou ti agree, tou dimoun ti agree dan meeting. Apre Repons Minis Vandredi nou pou Break nou repran Lendi 9er bomaten e nou antre dan Staz Komite en sel tre, ok.  Avek sa nou adjourn ziska demen bomaten 9er.

 

(ADJOURNMENT)