Home » Verbatim » 2017 » Verbatim Report, The National Assembly Sitting, Tuesday 7th November, 2017

Verbatim Report, The National Assembly Sitting, Tuesday 7th November, 2017

NATIONAL ASSEMBLY OF SEYCHELLES

Tuesday 07th November, 2017

The Assembly met at 9 am

National Anthem

Moment of Reflection

Mr Speaker in the Chair

MR SPEAKER

Bonzour tou dimoun ki dan Lasanble, tou bann koleg Onorab, bann dimoun ki’n vin zwenn nou ozordi tou bann konpatriyot Seselwa ki pe ekout nou dan lakour e an deor lakour.  Nou swet zot labyenveni pou nou konmansman semenn travay.  Mon ti a kontan ozordi an partikilye swet la byenveni anler dan Gallery nou bann pti trezor sorti lekol Perseverance.  Anfet i annan 30 zenn manrmay sorti Perseverance, lekol Perseverance e ki akonpannyen par Ms Ernesta Ms Zita Ernesta ki sorti lekol laba ki akonpanny zot.  Alor nou ti a kontan swet zot la byenveni.  Fotespere zot ekout nou bann Leaders, nou bann MNA koze e a donn zot lankourazman, pou zot aprann byen e dir dan lekol.  Nou ti a kontan osi swet la byenveni bann Ners.  Nou annan bann Manm Lasosyasyon Ners ki ganny gide par zot Chairperson Sister Rosie Bistoquet e nou kontan vwar zot anler dan Gallery ki’n vin zwenn nou ozordi.  Lo lapar tou bann Manm mon sir nou kontan zot in vini e nou profit sa lokazyon pou remersye zot pou travay ki zot pe fer, travay ki zot kontinyen fer, travay ki zot in fer ansanm ek bann Dokter; tou bann Travayer Lasante sirtou dan sa moman ki nou pe pas dan en moman difisil – kot i annan bokou kriminalite e mon a dir menm atrosite, ki finalman ler sa bann keksoz i arive pou ganny sonnyen zot ganny end up lopital e ners ek dokter ki bezwen okip zot.  Alor nou ti a kontan, nou kontan ki zot in vini. Nou remersye zot.  Nou felisit zot e nou espere ki ler nou pran en break, en pause kafe 9.30 – I mean 10.30 pardon, nou a ganny sans koz ek zot, zot a enterakte ek nou 2  Leaders ek nou bann MNA mwan osi mon la pou koz ek zot.  Alors byenveni.  Pour manm piblik, ozordi nou pou konmans bann reaksyon lo Bidze ki Minis Finans ti prononse semenn pase.  Nou pou konmans avek nou 2 Leaders dan Lasanble, epi sak Manm dan Lasanble evidaman parey tradisyon i ete zot pou ganny sans anmenn zot reaksyon lo Bidze.  Epi nou espere ki by Zedi nou a’n fini ki Vandredi Minis Finans i vinabou retournen pou li donn son prop reaksyon lo sa ki’n ganny dir, e delibere dan Lasanble.  E par la swit semenn prosenn parey, nou’n fer lannen pase toulezour nou pou zwenn ziska 5er, pou nou koz lo Bidze e anmenn bann dimoun ki responsab dan Egzekitif sirtou pou vin zistifye zot Bidze e enterakte avek bann Manm.  Alor mon swete ki zot tou zot ava ekoute e annan zot komanter pozitiv touzour, pou nou bouz devan konman en Nasyon.  E mon konnen poudir parey lannen prosenn zot pou ekoute e nou espere, nou osi nou’n aprann nou leson lannen prosenn e ki mannyer nou kapab al pli vit.  Mon annan tou konfyans ki bann Minister, bann CEO, bann Parastatal pou’n pli mye prepare ki lannen pase ki koumsa ki nou ava kapab al pli vit e nou ava fini avan Nwel.  Avek sa Clerk petet mon ti a envit Minis Finans pou li vin dan Lasanble avek son delegasyon.  First ReadingOk Clerk.  Nou a demann ou pou fer First Reading.  Mersi Onorab.  Mon krwar osi petet i annan en pti koreksyon lo sa, nou Order Paper i annan en (SI) devan zot lo Land Reclamation Retrospective Order i annan en fot lo sa, lo Official Gazette si zot le korize i devret lir (SI)  55 of 2017 e i pa devret (SI) 54 of 2017.  Eskize pou sa lerer.  Zot kapab koriz sa lo zot (SI)  silvouple.  Minis welcome.  Bon mon ti a kontan oule lir First Reading Public Bill.  Clerk.  Public Service Special Pension Bill, 2017.

 

MADAM CLERK

Mersi bokou Mr Speaker.  Bonzour tou Manm.  Bonzour Dr Larose.  Bonzour osi tou nou bann envite anler dan Gallery. First Reading of sa Public Service Special Pension BillThis Act may be cited as a Public Service Special Pension Act of 2017.  Mersi.

 

MR SPEAKER

Mersi Clerk.  Pou lenformasyon tou dimoun, evantyelman apre nou’n fini avek Bidze Vis-Prezidan li menm li evantyelman i ava vin prezant sa Bill devan Lasanble.  Me avek sa mon ti a kontan swet la byenveni Dr. Larose, Minis Finans, Komers, Ekonomik ek Planifikasyon ek son delegasyon.  I annan PS Payet ki son Prinicipal Secretary Patrick Payet.  Special Advisor madam Sidna Cesar ki nou konnen, nou konn li byen e Mr Thésee i Comptroller General byenveni pou zot ekout nou, zot pou la avek nou pou detrwa zour pou ekout nou, e pou ekout bann reaksyon bann Manm.  E mon sir Mr Minis Dr. Larose ou ava pas en letan agreab dan sa sez dan Lasanble.  E avek sa san plis tarde nou pou donn laparol straight away Onorab Ramkalawan ki Leader Lopozisyon pou son Reply dan Lasanble.  Onorab ou annan laparol.

 

HON WAVEL RAMKALAWAN

Bonzour Mr Speaker.  Bonzour Minis.  Bonzour tou koleg Onorab e bonzour osi tou bann zanfan lekol Perseverance e tou bann nurse e lezot dimoun ki dan Gallery.  Mr Speaker pandan sa dernyen semenn nou tou nou’n ganny sa loportinite pou ekout nou pep eksprim li lo Bidze 2018 prononse par Minis Larose.  In annan en kantite sizesyon, komanter e kritik.  Apartir ozordi i rol nou Lasanble Nasyonal, pou fer son komanter e pran desizyon pou nou pep.  Sa latas i enorm.  Se pou sa rezon ki nou tou nou bezwen ekout kanmarad, balans bann largiman, rod sa ki posib e pli bon pou nou pei e avans devan.  Nou annan sa gran responsabilite pou nou serye dan nou lapros, byen kalkile dan nou stratezi e adres direkteman konsern sa pep ki’n elekte nou pou reprezant zot isi dan Lasanble Nasyonal.  Avek travay ki sa Lasanble in fer, avek Minister Finans atraver FPAC, nou’n ganny sa loportinite pou devlop en tre bon rapor.  Mon remersye Minis ek son lekip pou zot kolaborasyon ek zot sipor pou donn lenformasyon apropriye kan i neseser.  Mon bezwen dir ki sa Minister i enn avek ki mwan mon personnelman ansanm avek lezot mon koleg, nou ganny tou korperasyon.  Mon bezwen osi eksprim mon lapresyasyon ki nou lavwa in ganny ekoute e sa i evidan dan plizyer rekomandasyon ek desizyon ki’n ganny anonse dan Diskour Bidze.  Me en Bidze i pa depann zis lo Minister Finans.  En Bidze i enkli Polisi Gouvernman ki pou ganny egzekite atraver bann diferan Minister ek Lazans.  I annan Polisi ki Minister Finans i bezwen senpleman rod larzan pou finanse malgre ki zot pa krwar ladan.  Nou dan LDS spesyalman avek nou reprezantasyon ki lepep seselwa in donn nou, nou annan sa responsabilite pou regard tou keksoz.  Parey lannen pase nou pa pou ezite pou kestyonnen, koupe kot nou santi i neseser, e donn plis larzan kot sa i enportan pou amelyor performans e donn rezilta pozitiv, ki pou fer nou pep viv dan pli gran konfor an mezir ki zot debrouye.  Me dan tousala, i enportan ki nou viv dan en pei kot prensip finansyel i ganny obzerve a tou moman e napa en sel  Lorganizasyon ki konsider son lekor par lao Lalwa ki lo Mahe, Praslin, La Digue oubyen lo en lot zil.  Mr Speaker kot nou ete ozordi, mon krwar ki nou bezwen pran lavi serye.  Gouvernman i bezwen annan bann plan konkret.  Nou pep i bezwen konnen dan ki direksyon i pe ale, e nou bezwen annan konfyans dan nou menm e dan lavenir.  Alor mon pou apros mo lentervansyon anba sa laliny swivan:- Envestir dan nou pep pou prosperite nou Nasyon.

Mr Speaker sak Seselwa i devret konsider son lekor koman en lenvestiser. Mazinen ki pou ou vin en lenvestiser pa neseser pou ou annan en ta milyon roupi.  Letan ou montre lanmour pou ou zanfan e montre li semen lafwa e fer li konn son kreater ou pe envestir dan en adilt ki pou montre respe pou lezot, e pou son lekor.  Letan ou pran swen avek ou lasante ou pe envestir dan en travayer solid ki pou fer en gran kontribisyon dan devlopman son pei. Letan ou montre lentere dan ledikasyon ou zanfan ou pe envestir dan en sitwayen edike, en profesyonnel Seselwa.  Letan ou viv en lavi  an bonn sante ou pe envestir dan en long lavi.  Alor annou mazinen ki premyerman tou keksoz i konmans avek nou konmans en endividi e lafason ki nou envestir dan nou lekor.  Gouvernman i bezwen partisip dansa lenvestisman pou ed sak sitwayen realiz son rev e fer nou Nasyon ganny sa vre prosperite e kree sa sosyete kot nou santi nou a lez akoz lazistis i renye.  Se la kot mon repete depans bidzeter i bezwen fer sans e nou pa kapab koman en pep zis kontinyen viv lo bann ideal lepase.  Mr Speaker ozordi nou dan lannen 2017.  Bidze ki nou pe prepare i pou 2018.  Nou pa an 1977, alor fodre nou bouze.  Mr Speaker lepep Seselwa ozordi pe demann sekirite.  Per Lonnie Adrienne ti eksprim sa tre byen dan lanterman n ou frer Mr Simon Esparon ki ti’n perdi son lavi dan en fason vyolan, vyolan e pli enzis posib.  En travayer ti dan son lakaz avek son madanm pe repoze apre en lazournen travay, zis pou ganny atake dan landrwa kot i sipoze trouv lape.  Mr Speaker Seselwa pe demann sekirite atraver lafors lapolis efikas e serye.  Alor mon konsider sa koman priyorite nimero enn ozordi.  Annou fer nou pei en landrwa kot nou viv an sekirite.  Mr Speaker an 1977 Mr Rene ti kree en larme pou defann Larevolisyon.  Ozordi nou an 2017 e napa okenn revolisyon pou nou defann.  Me ki nou vwar?  Mr Rene i viv dan en kan Larme e Mr Michel li osi i antoure avek en kan larme.  Bokou nou resours i ganny servi pou mentenir en Larme malgre ki nou pei pa anba okenn menas.  Alor mon pe propoze ki nou pran en desizyon brav pou regard nou bezwen aktyel dan konteks ozordi.  Ki mon vwar?  Premyerman Mr Speaker Sesel pa bezwen en Larme parey nou annan ozordi.  Dezyenmman Sesel i bezwen en bon lafors spesyalize dan ka hijacking oubyen bann loperasyon spesyalize.  Trwazyenmman; Sesel i bezwen ranforsi Coast Guards e Airwing pou sirveyans nou teritwar ek nou resours.  Katriyenmman; Lapolis, sa lafors i bezwen ganny ranforsi avek pli zofisye resours, ek bon lantrennman pou defann lepep Seselwa e gard lape ek sekirite.  Mr Speaker en tel desizyon i ava ed nou pei servi son resours imen, dan bann fason vreman prodiktiv e nou ava fer en gran lekonomi.  An plis ki sa nou ava vwar mwens fizi ek aminisyon ki kout tre ser.  E nou ava pe partisip dan progranm, Silencing the guns in Africa; en proze linyon Africain pou nou kontinan.  Nou lazenes osi ava grandi avek en lot lespri ki dan li menm i ava en bon lenvestisman pou nou pei.  Nou pei pa kapab kontinyen depans milyon lo sekirite ansyen Prezidan kan nou pep pe ganny masakre e viv dan lafreyer dan zot prop lakour.  Kriminel pa kapab kontinyen gard en pei otaz.   Nou demande ki en legzersis i ganny fer imedyatman.  Nou pou sispann Mr Speaker tou larzan ou sekirite bann ansyen Prezidan ziska ki sa Lalwa lo Ansyen Prezidan i vin devan Lasanble Nasyonal.  Dan sa menm konteks Mr Speaker i kler ki ozordi, akoz defayans dan nou Lafors Lapolis ki nouvo Komisyoner pe adrese, nou vwar en kantite Lakonpannyen Sekirite prive ki pe vin lo lasenn serten nou pa ni konnen ki kredibilite zot annan me ki zot in ganny nesans zis atraver kontak.  Sa in kout nou pei en kantite larzan dan sa Bidze.  Avek bon lenvestisman dan Lafors Lapolis nou ava kapab koup sa bann depans e nou a ganny nou normalite.  La mon bezwen eksprim byen swe nou pep.    Nou pare pou envesti pou ganny en lafors lapolis respektab profesyonnel e disiplinen.  Alor avek sa sanzman ki’n arive avek NDEA, nou sete ki sa nouvo Lafors Lapolis i ava anmenn en bon konba kont drog e fer nou bann kominote konn lape ek sekirite.  Me pa zis sa Mr Speaker; sekirite pour nou pep ek pei pou osi ed nou protez pli gran lendistri dan nou lekonomi.  Sa lendistri pe fer byen e sa lannen i pou kontribye anviron 1 bilyon Roupi dan nou lekonomi.  Alor nou bezwen met lanfaz lo gard en bon repitasyon.  Malerezman ozordi Sesel pe konmans ganny regarde koman en pei kot touris pa an sekirite.  Serten pei pe komans donn warning zot sitwayen letan zot vizit Sesel.  Touris i ganny vole partou ; enkli dan zot lasanm lotel, lo lans e menm lo trail.  Sa ki pe arive lo lans Cote D’Or par egzanp a kapab kontinyen.  Alor avek plis resours dan Lapolis, nou ava kapab protez nou lendistri No. 1 me osi nou pep.  Sa i ava osi ede elimin sa kiltir vyolans, ki pe devlope tro vit dan nou sosyete.

Mr Speaker lot size ki tou Seselwa pe koz lo la ozordi, se tax personnel oubyen progressive income tax.  Sa size i lo latab depi en bon pe letan.  E sak fwa i ganny mansyonnen i ganny anvoye.  Mon pou ensiste avek Minis ek Gouvernman, ki progressive income tax i pran lefe le 01 Zanvye 2018 e non pa Zilyet 2018.  Rezon i tre senp.  Rezon i tre senp Mr Speaker.  Lamazorite travayer pou benefisye atraver sa Sistenm Tax.  Alor akfer ki nou bezwen atann ziska Zilyet.  Bis pe monte le 01 Zanvye, alor met plis larzan dan pos travayer imedyatman.  Definitivman Mr Speaker lo nou kote nou pe siport en tel proze akoz apre tou se nou dan Lopozisyon ki ti premye pou propoz en tel fason pey tax.  Letan nou ti fer li nou ti ganny gognarde egzakteman parey letan nou ti propoz logmantasyon Sekirite Sosyal, pou nou bann pansyoner, Trezyenm Mwan Lapey e zero tax lo saler minimum.  Me parey labitid nou ti ensiste akoz nou ti ape rod tou fason pou amelyor lavi travayer Seselwa.  E alor ozordi nou pe reklanm sa ki nou ti met devan, e nou pe ankor enn fwa regard dan welfare travayer.  Mr Speaker i enportan pou tou Seselwa konpran ki progressive tax pou permet tou travayer ki ganny en lapey mwens ki R36 mil, rantre dan lakour avek en pe plis larzan.  Apre bokou refleksyon lo sa premye R8500 ki pa pey okenn tax swivan bann komanter piblik, LDS i dakor ki dan en sosyete i enportan ki tou dimoun i fer en kontribisyon; akoz apre tou nou tou nou servi sistenm lasante, anvoy nou zanfan lekol, et salte dan bin ensidswit.  Me avek sityasyon pri lavi ozordi, nou krwar ki sa kategori travayer i devret kontinyen parey i ete ozordi, savedir mentenir 0 poursan tax etandonnen ki pri bis ek lezot keksoz pe ogmante.  Pou demann zot pou pey tax a sa moman i ava vedir, ki se sa kategori travayer avek mwens lapey ki pou rantre dan lakour avek mwens larzan dan zot pos.  Zis avek bis Mr Speaker zot pou bezwen pey R4 an plis par zour ki vedir R20 par semenn e R160 an plis par mwan.   Alors nou pe dir mentenir sa 0 poursan tax.  Mr Speaker nou krwar ki Gouvernman pa pe ranmas tou larzan ki i devret.  Minis Finans li menm lannen pase ti donn nou sa sif plis ki 1 bilyon Roupi  dan tax ki pa ti’n ganny ranmase,   E alor nou pe ensiste ki Gouvernman i met lanfaz pour ki tou dimoun ki drwa Gouvernman i pey sa ki i devret.  E sa dan li menm i a kouver pou sa kategori travayer me osi pou sa ki i pou perdi atraver Progressive Income Tax.  SRC anba nouvo direksyon pe ganny demande pou rod tou bann travayer ki zot bezwen, rekonpans zot byen e fer zot travay dan en fason vreman efikas.  Mr Speaker nou dan LDS, nou krwar ki e sistenm tax personnel ki arive 3 poursan i tro o e ki i kapab vin en dekourazman pou nou prop Seselwa ki’n byen fer dan lavi ; e i kapab osi vin en dekourazman pou bann Seselwa ki ozordi pe viv aletranze ki ava mazin vin travay Sesel.  Annou pa oubliye ki ava annan menm ankouraz serten nou bann profesyonnel, pou kit Sesel, e al travay aletranze kot zot ava ganny en pli bon lapey e pey mwens tax.  Se pou sa rezon ki nou propoze ki sa Sistenm Tax progressive i annan 3 nivo ki ava mars koumsa pou travayer.  Premye:- R8550 – o poursan, R8550 a R10mil – 15 poursan e par lao 10 mil – 20 poursan.  Mon repete Mr Speaker ki LDS pe ensiste ki sa nouvo fason kalkil tax i pran lefe imedyatman apartir

Zanvye 2018 pour ki travayer i ganny en benefis imedyat.  E la – mon konnen poudir serten leksplikasyon in ganny donnen, me mon bezwen repet li pour ki dimoun i konpran akoz ki nou pe ensiste lo la.  Travayer ki ganny ant en lapey R8500 a R10 mil pou anmenn dan lakour ant 378 a R1200 an plis.  Lapey ant R11mil a R20 mil ant R784 ziska R1234.  Ant 21 mil ziska 33 R134 ziska R734 an plis.  Me par kont travayer ki ganny par lao R36mil, zot pou trouv zot pe pey en sonm an plis ant R17 ziska R3200.  Mr Speaker dan LDS nou osi anvi fer en propozisyon ki ava rekonnet lenvestisman ki nou sitwayen i fer dan zot lasante ek ledikasyon zot zanfan.  Sa i egziste dan bokou pei enkli nou vwazen Maurice.  Annou pa oubliye ki i ti osi egziste Sesel avan ki Sistenm Tax ti ganny sanze an 1979.  Nou pe propoze ki tou dimoun ki pey pou ledikasyon zot zanfan oubyen pou servis lasante prive i ganny sa posibilite pou fer en tax returns, ki ava permet zot re ganny en poursantaz sa larzan ki zot in depanse.  Sa i kapab mars dan sa fason swivan.  Pou ledikasyon sa paran – e ozordi Mr Speaker mon bezwen dir ki bokou paran i fer sakrifis pou met zot zanfan lekol, lekol prive.  Sa paran i ava ranpli en form e atas li, atas son bann resi avek.  Si tou keksoz i annord i ava ganny rann en poursantaz tou son depans pour sa lannen.  An sa ki konsern lasante, bann Lakonpannyen Lasirans i devret ankouraze pou vann Lasirans Lasante.  Gouvernman i ava refund en poursantaz ki sa dimoun i peye pou son lasirans tandis ki se Lasirans ki ava pey son depans medikal.  Mr Speaker i enportan pou note, ki en paran ki fer sakrifis e anvoy son zanfan dan lekol prive oubyen ki al kot Dokter Prive i osi  pey tax normal lo son lapey ki an prensip i ganny servi dan Bidze Ledikasyon ek lasante me li sa dimoun i pe redwi fardo lo Gouvernman kan i fer sa depans lo li menm.  Lo en lot kote i pe ed lasosyete prodwi en sitwayen byen edike ou an bonn sante ki kapab fer en gran kontribisyon dan devlopman nou pei.  Sosyete i bezwen aprann rekonpans son bann sitwayen, ki pran en tel latitid e ankouraz lezot pou fer parey.  Dan sa fason nou sosyete li menm i ava benefisye e nou ava vin pli prospere.  En tel plan i a menm trouv lankourazman pou letablisman plis Lekol Prive dan nou pei ki a son tour i ava kontribye dan fer monte standar ledikasyon e soulaz Lekol Leta.  Mr Speaker letan nou lo size lapey ek benefis, i neseser ki Gouvernman i fer en revi total lo lafason ki zot fer serten kalkil.  Ozordi en travayer i pey tax lo tou allowance ki i gannyen, akoz tou sa i ganny klasifye konman income.  Me akoz letan i ariv ler pou pey li son Trwazyenm mwan oubyen son Gratwite tou son allowance pa ganny konte.  Nou krwar ki sa i en lenzistis ki devret ganny aranze imedyatman.

Mr Speaker ozordi i kontinyen annan lenkyetid, parmi bann travayer Air Seychelles.  Toulezour zot vwar kondisyon i deteryore e zot fason travay osi i vin pli difisil.  Pourtan letan nou rantre lo avyon, lanons ki ganny fer dan avyon Air Seychelles avan avyon i dekole se nou swet zot en bon voyaz avek Air Seychelles ki’n ganny vot the World Travel Awards 2017 koman meyer Lakonpannyen Aeryen dan losean endyen ensi ki meyer laklas biznes e manm lekipaz pou katriyenm lannen konsekitiv.  Ensi byen in ganny rekonnet resaman koman laliny aeryen avek meyer Brand.  Mon sipoze Mr Speaker ki se travayer Air Seychelles ki’n permet sa arive.  Eski sa pou kontinyen letan ou get moral travayer ozordi?  Konbyen zot ki pe asize e pa pe anvole e pe anmenn dan lakour preski nanryen ditou.  Servis lo avyon avek mwens Cabin Crew ek mwens fasilite eski sa pou ede? Lafatig, mont Paris e desann avek menm lekipaz.  Konman en konponan enportan dan nou lekonomi e osi dan nou Lendistri Tourizm nou pe rod serten larepons ki mon espere nou ava gannyen byento.  Mon anvi dir ki malerezman Mr Speaker bokou bann promes ki ti ganny fer isi dan sa Lasanble pou bann travayer Air Seychelles bann ki travay ater e bann dan avyon pan ganny realize.  Annou pa oubliye ki malgre tou sa bann avyon pe vini se Air Seychelles ki nou garanti pou nou Lendistri Tourizm e fodre nou protez li.  Seselwa i kontinyen perdi konfyans dan Gouvernman akoz parfwa tro bokou promes pa ganny garde.  Mr Speaker pandan mwan Oktob nou’n vwar nou bann Ners fer en lamars pou eksprim zot mekontantman avek zot lapey.  LDS i rekonnet e apresye travay ki nou Ners i akonpli.  Mon anvi eksprim solidarite LDS avek zot e dir ki nou debout lo zot kote.  E la mon rekonnet ki plizyer nou bann MNA ti akonpanny zot dan sa demars.  Nou’n antann ki zot allowance pou ganny ogmante.  Sa ki nou ti a kontan gannyen pandan sa deba lo Bidze, se en langazman kler sorti kot Minis ki sa ki pe ganny apele allowance pou ganny enkli dan saler sa bann profesyonnel e pou ganny konte letan, letan pe travay lo zot Trezyenm Mwan Lapey e zot Gratwite e ki Gouvernman pou regard ankor tou  bann Scheme of Service pou sa group travayer byen devoue.  An menm tan mon bezwen osi azoute ki Gouvernman pou bezwen regard dan lapey bann lezot Travayer Lasante – e mon’n tande i annan serten kategori ki zot in mansyonnen tel ki bann asistan ners e drayver, bann ki travay dan farmasi ek lezot enkli bann staff ki travay dan biro.  Travay i bokou me i kler ki lapey pa ase.  Mr Speaker lo lot kote mon anvi koz lo sa group travayer i apel Carer.  Mazorite sa bann dimoun pe fer en bon travay e la mon mazin spesyalman bann paran ki pe travay avek zot zanfan a plen tan e la mon mazin madanm Payet avek Pti Mary Grand Anse Praslin.  Mr Speaker sa bann dimoun pa kapab rod en lot lanplwa menm si zot annan kalifikasyon oubyen zot ti ape travay avan.  Zot la 24 lo 24 7 lo 7 – 365 lo 365.  I vre ki la aprezan zot in ganny Trezyenm Mwan Saler.  Kestyon ki mon pe poze dan laform en propozisyon se pou pey sa bann travayer en konze.  Sa i ava ede pou zot ganny en pti larzan an plis dan zot pos pou zot devouman.  Mr Speaker mon osi krwar in ler pou Gouvernman konman en shareholder dan IOT pou regard nou bann travayer Seselwa.  Bokou travayer ki’n koz ek mwan in eksprim zot soufrans lo lakantite travay ki zot bezwen fer dan sa faktori kot laplipar di-tan zot lo zot 2 lipye.  Me an plis ki sa zot in koz lo zot lapey ki souvandfwa i ekivalan lapey minimum.  La ki nou pe osi antann bokou zistwar koripsyon laba nou demande ki Gouvernman i pran son responsabilite dan en fason pli serye akoz sa i pou definitivman, annan en lefe direk lo rannman ki Sesel i gannyen avek son 40poursan par dan sa lakonpannyen.  Mon espere ki nou bann reprezantan lo Board i fer zot travay tre byen.  Mr Speaker apre travay ki FPAC in fer an relasyon avek bann travayer linyon Estate kot travayer ki ti’n travay pou 35an ti ankor lo lapey minimum, mon kontan vwar e mon felisit Minister Finans pou zot entervansyon e sa bann travayer in ganny en logmantasyon lapey.  Me selman mon bezwen azoute ki sa logmantasyon ki zot in gannyen, pou bezwen ganny vizite akoz i ankor byen feb.  Letan ou pe konsider sa an relasyon avek pri Lavi spesyalman lo La Digue e letan ou pe regard sa bann zes, ki kontinyen arive dan sa Lorganizasyon kot serten dimoun ki lo Board i ganny apwente Depite CEO e an plis ki sa zot ganny promet back pay.  Eski zis bann sef ek zot dalon ki pou benefisye dan sa lorganizasyon Mr Speaker?  Mon oule asir Minis ki i pou ganny tou sipor neseser dan bann demars pou re organiz L’Union Estate e met li lo en semen kot i fer profi.  Sa aspe privatizasyon atraver en korperasyon piblik prive i byen ganny resevwar e o pli vit posib ki sa Board ek management i ganny sanze i pou pli bon ankor pou sa Lorganizasyon.  Mon zis anvi ki Minis i note ki koman Chairman FPAC mon pe obzerve ki CEO pa pe swiv regilasyon finansyel kot sistenm tender i konsernen.  Mon fer en lapel avek tou MNA Parti Lepep pou pa kas anba desizyon ek aksyon zot prop Gouvernman.

Mr Speaker size lapey e pansyon ek Sekirite Sosyal i kontinyen reste en size enportan dan nou pei.  Mon pe bezwen toudswit dir ki nou kont sa propozisyon ki en dimoun ki pran retret a laz 60 an pou nepli ganny son Sekirite Sosyal.  Sa Sekirite Sosyal R5050 ki Lopozisyon ti fer nou bann pansyoner gannyen i senpleman ed zot pou mentenir zot standar lavi.  Annou pa koup sa.  Mon fer en lapel avek Minis pou konsider sa seryezman.  Mazinen ki sa bann dimoun napa okenn lezot sours reveni, alor si ou koup sa ou ava pe penaliz zot.  Mr Speaker i annan en group travayer ki’n pran retret, ki’n ganny oubliye konpletman dan nou sosyete.  Sa Mr Speaker se bann travayer ki ti pran retret avan ki Pension Fund ti vin an egzistans.  Se en group fanm e zonm Seselwa ki’n travay byen dir pou zot pei avek kalifikasyon profesyonnel ki zot annan.  Serten in donn 40 an lannen servis pou zot pei e ozordi se sa Sekirite Sosyal ki reste la baz ki zot gannyen.  E la Mr Speaker mon mazin enn mon teacher Mr John Adam, ou koleg ki tonm dan sa kategori alor mon senserman ankouraz Minis ansanm avek Departman Ladministrasyon Piblik, pou fer en resers e regarde ki mannyer sa bann dimoun i ava kapab ganny en pansyon konvenab, silvouple.  An menm tan mon byen akeyir sa desizyon ki ava permet serten kategori dimoun spesyalman pou rezon medikal tous zot kontribisyon dan Fon Pansyon a laz 55 an.  An menm tan mon profite pou fer en lapel avek tou Seselwa, pou dir ki si nou pa rantre dan lanplwa permanan kot nou kontribye dan Fon Pansyon regilyerman i kler ki laz pansyon pou ariv 65an.  Sel fason, se pou Seselwa pran plis lanplwa dan Sesel e an menm tan sorti lo travay zournalye.  I depan lo nou pou sanz sa direksyon kot nou pe ale ozordi.  Petet Fon Pansyon li osi i devret regard pli pre lapey son bann Direkter e son bann depans an zeneral.  FPAC a en serten moman pou bezwen osi regard dan kont Fon Pansyon.  Mr Speaker tou travayer dan nou pei i enportan.  Mon’n mansyonn serten group, me mon anvi ensiste ki letan mon fer sa ki mon lentansyon se pa pou negliz lezot.  Sa Revi konpreansiv lo lapey ki’n ganny anonse fodre ki i arive.  I kler ki lapey dan nou pei pa fer sans.  Parey mon ti dir pli boner sa lannen o pli vit ki nou fer sa legzersis i pou pli bon pou nou pei ek nou pep.  Mr Speaker Gouvernman i fer bokou gaspiyaz resours nou pei, akoz i pa fer plan lonterm.  Ozordi en plan i ganny anonse zot pey bann konsiltan en ta larzan, me apre napa nanryen ki arive.  Oubyen zis plan i sanze.  Gouvernman pa donn nou pep lenpresyon ki i konnen ki i pe fer me ki pe plito tat tate dan fernwanr.  Sa i pa zis responsabilite Minis Finans me Gouvernman an antye.  Ozordi nou annan en kantite legzanp otour nou.  Gouvernman in deside refer ansyen Lakour Siprenm, me se la ozordi ki i pe deside ki i pou fer avek.  Gouvernman ti fer plan ek gran lanons pou en Lekol Lekselans lo Perseverance ki ti pou ede lev nivo ledikasyon, me la nou tande ki sa plan in ganny abandonnen.  Nou sistenm semen dan lavil Victoria i en sel dezord.  En zour i al dan en direksyon, en lot zour i al dan en lot direksyon.  En semen spesyal i al L’Espace, paralel avek li, i annan en lot semen ki fini lo en ron pwen ki ou kapab met en batiman 4 letaz dan milye.  Plan pou en devlopman Water Front i ganny koupe avek e semen.  Zarden zanfan i en katastrof e bato Libra in vin en vre bato De Quincy ki mon krwar nou bezwen anvoy li Japon pou al repare.  Mr Speaker sa i senpleman pa akseptab.  Me sa ki malere i se ki tou sa bann keksoz i annan en kou finansyel ki lepep Seselwa ki bezwen pey lepokase.  In ler pou Gouvernman koup sa kalite gaspiyaz e konkretiz sa ki i dir.  Si i pa kapab fer sa mon bezwen dir i pou bezwen demisyon nen e call pou nouvo Eleksyon.

 

(APPLAUSE)

 

HON WAVEL RAMKALAWAN

Mr Speaker souvan mon konsernen.  Souvan mon konsernen avek lanons ki ganny fer dan Diskour Bidze konman plan Gouvernman me osi avek lavites ki Gouvernman i fonksyonnen.  Dan diskour sa lannen mon’n tande ki pou napa tax lo burial services.  Sa i byen akoz letan nou mor nou tou nou bezwen ganny antere.  Me eski Minis i okouran ki sa menm lanons ti ganny fer an 2014.  Letan service fineray Padayachy ti tann, sa an krwayan ki Gouvernman ti pe al bouze lo la, i pa ti sarz dimoun VAT lo serkey e sa ti fer pri desann.  2 an pli tar dan ki sityasyon sa Lakonpannyen i vwar li ladan.  Gouvernman malgre zot lanons pa’n pran okenn aksyon e la zot pe ganny demande pou zot vin pey VAT lo sa ki zot pa’n sarze.  2017 nou tann menm zafer ankor.  Sa i apel Mr Speaker en lenzistis.  E mon espere ki Minister Finans i a regard dan sa ka e pran aksyon apropriye, e an menm tan avan ki nou fini deba lo Bidze mon espere ki Minis Finans pou pran en nouvo still travay ki tou bann lanons ki in fer dan son Bidze regilasyon i ava ganny anmenn devan sa Lasanble pour ki nou konnen aksyon pe al ganny pran.  Mr speaker dan menm laliny mon anvi dir ki sa Gouvernman i tro dousman.  Sa i en gro konplent.  Dimoun i monte desann e pa trouv solisyon.  Tousala i apel gaspiy resours imen.  Byento i a fer 1an Mr Speaker depi ki en garson lo La Digue i anvi fer vini en masin telescopic ki fasilit met beton lo en letaz.  Zot in dir ki zot pe esper en nouvo Polisi Transpor.  Ziska aprezan napa nanryen ki’n arive.  Esey dir mwan sa Polisi lo planet i pe sorti ki i pe pran sa kantite letan?  Oubyen sa i senpleman montre linefikasite sa Departman konsernen.  Dan menm fason pou fer en Survey lo La Digue pou regarde konbyen transpor ki pa pe roule pou kapab donn nouvo aplikan permisyon pou anmenn en transport pe pran leternite.  Zot in ler pou pran nou pep serye e vin en Gouvernman ki proaktiv olye zis koze e desin portre lesyel.  Mr Speaker mon’n mansyonn plan pou sa lekol ekselans ki ti pou fer Perseverance e ki la nou’n antann in cancel sa i en gran lendikasyon ki Gouvernman pa tro konnen dan ki direksyon i pe ale.  Ki mannyer ou kapab vin koz lo e plan ki pou lev standar ledikasyon dan pei, par met tou bann meyer etidyan ansanm pou donn plis konpetisyon e alor pli o kalite e apre en sel kou tel plan i ganny cancel?  Mon konpran konsern bann paran Perseverance konsernan met – bann konsern paran Perseverance konsernan en lekol pou zot zanfan.  Me eski Gouvernman pa ti a kapab senpleman met dan son plan konstriksyon en lekol Perseverance e gard sa Lekol Ekselans?  Mon ti a vwar paran Perseverance pe ganny ankouraze Mr Speaker pou dir avek son zanfan, pe dir avek son pti garson mon boy la i la sa lekol ki mon anvi ou arive.  Alors fodre ou aprann pli byen pou ou kapab ariv dan sa Lekol Ekselans e non pa cancel sa nide.  Eski en tel plan pa vedir gaspiyaz larzan?  Konbyen bann konsiltan in ganny peye e konbyen erdtan travay in ganny gaspiye lo en tel proze?  Mr Speaker bokou mon bann komanter in annan pou fer avek lefikasite Gouvernman; ki kapab osi ganny tradwir koman ki vre lenvestisman ki Gouvernman pe fer dan son pep pour son pei ?  En gro travay ki Lasanble i annan se pou delivre sa ki nou apel en Gouvernman efektiv e sa i konmans avek Bidze.  I annan serten demann ki nou pe fer dan sa direksyon.  Premyerman redwir depans Gouvernman.  Bidze Gouvernman i monte lannen apre lannen.  I vre ki pri tou keksoz i monte, me i osi leka ki anmezir i ale Gouvernman parey nenport lorganizasyon i akimil bann depans ki pa neseser.  Mon pe met devan ki Bidze Gouvernman i annan plizyer depans ki pa neseser, oubyen ki pa anmenn okenn benefis pou byennet nou popilasyon.  Sa zafer taye pou depanse avan lannen i fini, zis akoz i ankor annan larzan i en pratik ki fodre arete.  Avan ki Bidze i kontinyen ogmante nou bezwen fer tou sa ki posib pou koup depans.  Dezyenmman koup privilez ki pa zistifye.  Privilez dan Gouvernman i akimile e i konpri sekirite, loto, lakaz, servis ensidswit.  Kot i kapab redwir nou devret redwir.  E la mon pa pe demande pou elimin sa bann keksoz ki neseser.  Me senpleman bann ekstravagans ki kout ser; par egzanp i annan zofisye ki annan zot lakaz me zot ganny allowance lakaz dan zot pozisyon, zot lwe zot lakaz e Gouvernman i pey en lot pour zot.  Eski sa i zis e i fer sans?  Nou bezwen revwar lokasyon ki Minister oubyen Lazans Gouvernman i peye.  Gouvernman i en gro kliyan lespas lwe sa ki nou apel lokasyon.  Serten sa bann pri lokasyon i egzorbitan.  Mon pa ezite pou dir ki serten sa bann laranzman i vin atraver politik.  Nou annan par egzanp landrwa ki Gouvernman oubyen Lakonpannyen piblik i lwe avek parti politik pou en gro pri.  Nou pe demande ki sa bann Kontra i ganny revwar.  Gouvernman i devret seryezman regarde si i pa devret fer son prop batiman olye lwe biro ki kout ser.  Mr Speaker koup bann pozisyon Onorer.  I annan plizyer landrwa kot i annan bann zofisye ki’n zis ganny en tit e napa fonksyon spesifik.  Par egzanp mon toultan kestyonnen ler en dimoun i ganny nonmen Special Advisor.  Si i annan en louvraz donn sa dimoun en pozisyon ki reflekte son rol dan sa lorganizasyon.  Mon dir sa akoz i annan plizyer landrwa kot dimoun in ganny en pozisyon parey Special Advisor san ki i annan okenn keksoz spesifik ki i fer.  Eski nou bezwen sa kantite Board dan sa pei?  Eski Gouvernman pa devret annan mwens dimoun; – Slim Gouvernment parey nou dir.

Mr Speaker letan mon pe al ver lafen, ler mon koz ek bann akter ekonomik an deor Gouvernman, mon tann en kantite konsern e mon tann koz lo en kantite problenm.  Bokou i krwar ki i annan en serten blokaz e ki nou pa pe rezourd nou bann problenm ase vitman.  I annan en lenkyetid ki lekonomi in deza konmans ralanti.  Zot montre lo ralantisman dan Sekter Konstriksyon ki wi Minis in rekonnet.  Me zot osi vwar menm fenomenn dan serten lezot Sekter.  Zot ekspekte en ralanti dan Sekter banker.  Zot santi ki biznes offshore in deza tonbe e pe fer fas avek difikilte pou repran.  I annan lenkyetid pou Sekter Komers.  Mon sertennman pa anvi senm panic me nou pou fer en gran fot si nou pa pran sa bann konsern o serye pli vit posib.  Annefe, mon partaz sa lopinyon ki Gouvernman pa pe bouz ase vit pou adres sa bann konsern, serten ki’n trennen depi lontan.  Nou bezwen bouze si nou anvi vwar rezilta konkret.  Nou ase soulaze ki tourizm in perform byen sa lannen e ki i pe osi promet pou fer byen lannen prosenn me i annan serten laspe ki nou bezwen travay lo la.  Reveni lo Tourizm i ankor ba an konparezon avek lakantite touris ki vini.  Fodre plis Seselwa i kapab antre dan biznes tourizm ek biznes ki lye avek tourizm.  I annan plizyer kalite biznes ki nou bezwen proteze.  Biznes taxi par egzanp pe ganny touzour kwense, akoz zot mwayen konpetisyon i rantre parey bann gro Lakonpannyen i pran tou zot touris anba zot lezel.  I annan osi en fenomenn ki pe devlope Mr Speaker kot serten etranze i rantre dan pei konman touris e apre fer biznes konman fotografer oubyen Organizater Maryaz.  Fodre protez sa bann loportinite pou Seselwa.  Mr Speaker Sekter Lapes in vwar lenvestisman mazer pandan sa bann dernyen lannen.  Bokou Seselwa in pran sa risk e antre dan sa Sekter me zot semen pa fasil ditou.  I annan bann problenm ki’n trennen lannen apre lannen.  Ice ek labwet i de ki toultan egziste. Depi tou sa bann letan ki nou antann sa bann problenm nou pa ankor kapab fini vwar en solisyon pou zot.  Mr Speaker mon okouran ki ozordi bann bato lapes semi-endistriyel i annan osi en problenm mendev.  Sa i e met nou osi fas a en sityasyon ki pe blok nou devlopman.  Kapasite mendev Seselwa i kontinyen desann a mon avi prensipalman akoz drog ek lalkol.  Mwan mon enn ki toultan defann loportinite pou Seselwa, me nou pe ariv lo en sityasyon kot i enposib pour agrandi nou lekonomi san mendev etranze.  Mon vreman tris Mr Speaker ler mon vwar ki nou bezwen depann lo etranze dan sekter, dan Sekter Lagrikiltir ek Lapes.  An menm tan ki nou bezwen rekonnet sa sityasyon, mon pa anvi ki nou abandonn lespwar lo nou travayer Seselwa.  Mr Speaker Biznes Finansyel Offshore i Lendistri ki Sesel i bezwen e i enn ki bon pou Sesel.  I form par sa lekonomi modern ki nou anvi devlope.  I ofer bann lanplwa tre atiran sirtou pou nou bann zenn.  Pli gran lobstak ki sa Lendistri i fer fas avek se en move limaz pou Sesel ki’n ganny kree akoz nou pa’n alert lo nesesite pou reste alaoter.  LDS Mr Speaker dan sa Lasanble in pran sa travay o serye e in anmenn lamannman Lalwa esansyel pou soutenir nou biznes offshore.  Travay ki nou’n fer pou netway FIU ek NDEA in eklersi en problenm mazer ki ti pou touy nou Sekter Offshore net si nou pa ti’n adres li.  Mr Speaker mon pa kapab fini adres sa kote lekonomi, san pas lo nou problenm resours imen.  I kler ki resours imen i en gran fakter limitasyon dan nou devlopman.  Mon oule eksprim en lenkyetid lo sa proze Unemployment Relief Scheme (URS) ki’n ganny anonse e demande si i pou fer en diferans olye refer ankor en metod ki pa’n marse annou sey ankor en lot keksoz.  Olye met larzan dan sa proze URS mon pe propoze ki nou sey enn ki met dimoun dan en progranm ki prepar zot pou travay ki annan dan sa pei.  Sa i bezwen en progranm byen targete setadir get egzakteman ki travay i annan lo marse.  Letan sa dimoun i konplet sa progranm nou donn li en Sertifika ki rekomann li avek anplwayer.  I antre dan louvraz direkteman.  Annou aret re envant larou me annou pran en semen direk ki ava rezourd nou problenm.  Mr Speaker travay i bokou me malerezman nou annan en Gouvernman ki pe mars tro dousman.  E sa i ganny rekonnet par State House li menm li paz 3 dan Bidze letan State House i dir ki enn son pli gran challenge se mon quote: ‘’…problenm latitid, rezistans avek sanzman e persistans sa vye mindset ki annan en lefe lo performans ki annan lenpak lo Bidze.’’

 

(APPLAUSE)

 

HON WAVEL RAMKALAWAN

Sa Mr Speaker, sa Mr Speaker se en laverite enkrwayab ki malerezman i osi ankor egziste isi dan sa Lasanble.  Mr Speaker Sesel i bezwen anmas reveni servi li byen avek tou kous nou sosyete.  Devlop en pei kot sitwayen i viv dan lape ek sekirite.  Annou regard tou travayer Seselwa e envesti dan zot pou sa lavenir prospere ki nou pe rode.  Mon demann benediksyon kontinyel lo nou pei an mezir ki nou travay san ses dan lespri ki nou pa pou zanmen les tonbe.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Ramkalawan, Onorab Leader Lopozisyon.  Mon a donn laparol prezan Onorab De Commarmond Onorab Leader of Government Business.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon.  Bonzour tou Manm Onorab isi prezan e  nou bann envite isi dan Lasanble ozordi – ensi ki tou dimoun ki pe ekout nou deor sirtou bann dimoun Cascade. Mr Speaker sa Bidze ki in ganny met devan nou mwan mon kontan pou mon deliber lo la pou mon fer mon bann kritik mon bann pwen ki mon krwar i devret ganny fer.  Mon larepons alor pou Diskour Bidze 2018 i le swivan Mr Speaker.

Plan e vizyon depans e reveni Gouvernman pou 2018 i en bon plan.  I en plan tre anbisye ki donn bokou lespwar pou lavenir Sesel.  Sa Bidze parey son tenm i dir set en plan travay pour prosperite tou dimoun.  Alor tou dimoun, tou travayer Seselwa sirtou bann ki travay dir, osi byen ki tou bann ki a risk e ki vilnerab i devret trouv en keksoz pou li dan sa Bidze.  Zot devret santi zot annan en par ladan.  Sa Bidze i montre klerman vizyon Prezidan Faure ek son Gouvernman kote i oule ale e dan lentere lekel i oule travay.  Sa Bidze se en Bidze pou le pep Seselwa Mr Speaker.  Mr Speaker dan sa laliny serten kous nou popilasyon pa kapab pe mazinen ki Bidze i devret zis dan son lentere.  I bezwen annan en partaz.  I bezwen annan sa ki nou apel en ‘give and take’ e tou nou pep i bezwen pe donn koudmen kree sa larises ki apre pou ganny partaze.  Pa kapab zis en bann ki trimouse e kree larises, tandis ki en lot group i prefere pa kontribye, pa travay me oule ki Bidze i plis dan son faver.  Deswit la mon oule lans en lapel pou partisipasyon tou dimoun dan kreasyon larises dan Sesel; dan travay pou Sesel pou kapab annan rezon valab pou claim benefis e pou demann plis dan Bidze a lavenir.  Mr Speaker mesaz sa Bidze 2018 i senp e kler.  Entrodwir en Sistenm Tax senplifye, mentenir stabilite ekonomik, redwir kou lavi e rann nou pep pli ere.  En kantite konsiltasyon in ganny fer parmi bann group konsernan e konsiderasyon plizyer komanter e pwennvi sorti – sirtou par Sekter Prive e nou Lasanble Nasyonal in ganny fer Mr Speaker.  Mr Speaker dan sa konteks preparasyon Bidze 2018, in konmans depi avek bann kritik, remark, komanter e analiz Bidze 2017 dan nou Lasanble Nasyonal li menm  e par bann Manm zot menm isi dan nou Lasanble, e bann komite e sirtou FPAC.  Alor nou vwar poudir konsiltasyon Mr Speaker i pa vedir osi ki tou lazournen e dan sak meeting Minis ek PS i bezwen la.  I kapab annan lezot teknisyen ki reprezant Minister, Departman oubyen lezot antite Gouvernman enkli Oditer Zeneral e mazorite bann remark, kritik, e komanter i arive kot Minis Finans dan en fason ou dot.  Si son teknisyen, alor ouswa dan en serten Departman si teknisyen pa vin dir Minis oubyen son direksyon ki’n arive me nou dan Lasanble nou pou dir nou, nou dan bann Komite kot nou ete dan FPAC ensidswit nou pou dir Minis lala sityasyon ki mannyer i ete e nou enkli dan nou rapor.  Tou sa i form par kalite konsiltasyon.  Nou, nou zis swete ki bann striktir etabli par Gouvernman byensir, i marse pou permet bann konsiltasyon aboutir a bann keksoz konkret, pou anmenn sanzman pozitiv dan pei.  Par egzanp sanzman bann Polisi pou fer lavi nou pep pli fasil e meyer.  Mr Speaker i annan plizyer legzanp ki nou kapab servi la.  Lotrozour nou’n koz lo sa kestyon Car Hire lo Praslin.  4an Gouvernman dan Cabinet in deside pou enplimante zero.  Nou kapab koz lo lezot keksoz.  Nou’n koz lo density Policy pou revwar, i bezwen annan keksoz konkret ki Gouvernman i vini i dir li la la in fer, in vwar pou dimoun kapab annan konfyans e vwar sa bann keksoz e konpran kote nou pe ale.  Dan sa konteks Mr Speaker, dan sa lapros 2018 in enn konpletman diferan avek bann lezot Bidze oparavan.  E mon sete alor ki i ava annan mwens deba e mwens depouye, akoz nou sipoze konpran li pli byen sa voyaz.  Mr Speaker les mwan osi koz en pe la lo kree larises e les Seselwa benefisye.  Mr Speaker ler i annan bann gro proze par egzanp, gro proze Gouvernman i devret kre kondisyon pou les maximum biznes Seselwa benefisye.  Parey ler Arab ti pe konstri anler La Misère, bokou biznes Seselwa sirtou bann biznes pick up in benefisye en kantite.  Menm bann ki pa kontan Arab e ki oule Arab ale zot osi zot in benefisye e profit ladan.  La i annan proze Danm La Gogue.  I annan proze met tiyo dan Sesel an antye, dan Mahe an antye.  En lot gro proze se sa proze Arab Gran Bois laba Anse Boileau Mr Speaker ki ou, ou pe apiye Mr Speaker.  En lot manman proze ankor ki pou vini se proze Assumption e petet serten lezot zil i L’Inde pou antre ladan pou ede.  Tou sa bann proze Mr Speaker Gouvernman i devret kree en serten kondisyon pou ki maximum biznes i benefisye e non pa zis en nou de, oubyen bann konpannyen etranze i vini e apre zot oule reste net Sesel.  Si ti annan plis fairness e si Gouvernman ti anvi travay pou prosperite tou seselwa e tou dimoun – parey Tenm Bidze pe dir, alor  menm Gouvernman i devret fer sir ki i annan bann kondisyon, bann pli bon kondisyon vizavi sa ki ganny sa bann Kontra pou fer sir ki Seselwa i benefisye.  Mr Speaker menm zafer letan bann tender i ganny fer.  Mon dakor i annan procurement e ki bann prosedir i bezwen ganny swiv.  Me nou pa kapab donn menm kontrakter, 3, 4, 5 gro proze.  Get dan pti proze distrik Mr Speaker, nou vwar ki LWMA la zot pe fer sir ki tou pti Kontrakter i ganny en keksoz.  Sa i byen.  Me nou pa kapab fer menm parey par egzanp pou bann gro proze.  Alors ler menm Kontrakter i ganny 3, 4, 5 proze sa bann gro proze son kapasite pou fer tou sa bann proze byen e atan i vin en problenm.  E zot rod tou rezon o monn pou eksplik retar ki zot gannyen.  Antretan Minister li i ganny presyon e son program i retarde, e lanmenm la pou pa perdi larzan dan Bidze parfwa davans i ganny peye e sa pa en bon pratik.  Alor Mr Speaker mon krwar la osi i annan keksoz ki nou bezwen diskite e Gouvernman avek Gouvernman pou vwar en pli bon fason fer ki pli byen e ki plis Kontrakter a benefisye e a ede tir sa presyon travayer etranze lo nou.  Akoz ki arive Mr Speaker, si dizon en Kontrakter Mahe i ganny en Kontra dizon lo La Digue, e avan i fini si i annan lezot tender ki ganny fer e partisipe e lefe ki li i deza laba i fasilman kapab donn en quote ki pli bon marse e bann lezot ki tender zot pa’n fer li lo menm baz savedir i annan unfairness la.  Alor napa fairness parey nou’n dir e sa Kontrakter ler li menm li ki’n ganny tou sa bann Kontra, i demann ou pou enport plis travayer etranze pou fini son proze e  an retour i met plis presyon lo nou forex Mr Speaker.  E osi zis li ki pou annan plis kapasite overdraft e kontinyen grosi e grandi; tandis ki lezot Kontrakter a ferme oubyen pou soufer avek Trezyenm Mwan saler e pa ganny loan ek labank ek lentere – e si i gannyen lentere byensir i  tre o.  Mr Speaker, nou pep i bezwen viv byen e ere parey Slogan Pension Fund i dir.  ‘Viv Ere’.  Be pou ou viv ere i pa posib annan en Bidze e mazorite dimoun pa travay e zis Bidze i soutir zot.  Pou viv ere i bezwen annan en larises kelkonk ki ganny kree. E menm si nou ti annan kek lezot resours apard ki larises lanmer e nou verdir e soley still nou ti pou bezwen travay pou kree larises.  I annan serten ki byen for me pa oule travay e zot lo Welfare.  Sa pa pou kapab kontinyen Mr Speaker.  I devret arete toudswit.  Me tou sa bann dimoun i bezwen ganny plase dan en travay oubyen anba an progranm re training e la ou a ganny en saler korek.  Me ou pa pou kapab ou pe ganny welfare akoz ou pa kapab travay, me selman nou zwenn ou lo Highway anba en gro manman bal Pet, e si ou deside pa travay ou a bezwen pran ou responsabilite e sibir ou konsekans.  Nou pa kapab kontinyen tolere sa bann keksoz Mr Speaker.  Dan sa Bidze, Mr Speaker, mon kontan pou vwar ki i annan en ogmantasyon ou rezourd problenm Lapovrete.  E la mon oule fer rapel ki problenm Lapovrete pa pou rezourd zis par met plis larzan dan lanmen toudswit. Nou pou bezwen amelyor e akseler serten progranm pou rezourd problenm sa bann ki nou pe dir i vilnerab oubyen pov.  La mon swete ki diran lannen nou vwar nesesite pour diskit davantaz lo sa bann pwen.

Par egzanp. Pran par egzanp en fanmir en zenn fanmir i annan 2 zanfan.  Zot pti lakaz in avarye e koule.  Zot nepli kapab reste ladan ankor.  Zis enn ki travay e lot li i ganny – e sa enn ki travay i ganny en saler minimum e lot li i lo lasistans Welfare.  Alors zot al kot Lotorite e zot dir ki zot problenm lakaz i tel tel e zot ankouraze pou pran en loan.   Zot dakor kantmenm Lotorite i konnen poudir zot pa kapab peye sa loan zot dakor pou zot pran sa loan.  Labank li bliye sa bann dimoun koumsa i pa pou kapab ganny loan labank.   E ler zot case i ariv pli devan definitivman i pa ganny aprouve akoz napa garantor e zot resours ki vin kot lakour pa ase.  Alors sa zenn fanmir i al rod en lakaz.  Zot ankouraz li i dir al apli form pou ou kapab ganny en lasistans lakaz.  Gouvernman a fer lakaz e a donn ou enn.  Zot ganny en lakaz lwe antretan – vi ki zot in ranpli form alor zot sey rod en lakaz par la e zot ganny en lakaz lwe pou R6 mil e Gouvernman i ed zot ek part payment pou R4000mil Mr Speaker.  I  vre zot pa’n tro aprann lekol petet e zot dir mwan zot zanmi ki ti lekol ek zot in aprann pli byen ki zot, e Gouvernman in  pey en course  preski R1 milyon pou zot  e zot in ale zot in pass zot course Liniversite, zot in retournen zot pe travay.  E zot pa pe rann sa larzan.  Sa ki Gouvernman in envestir dan zot pros R1 milyon Mr Speaker.  Prezan zot dir mwan be si, zot dakor i byen sa enn in aprann in ganny sipor ek Gouvernman, i dir be zot ki vilnerab ki mannyer zot pa kapab ganny asiste avek en pti sipor pou kapab met zot lakaz annord e ki zot a reste ladan.  Pourtan sa lakaz i lo later zot manman ki’n mor petet.  Mon panse la Mr Speaker nou devret revwar ki mannyer sa bann problenm – i pe fer – ki pe vin an fas de nou i ete.  Definitivman mon panse mwan i annan en problenm par la akoz Gouvernman  i annan en  progranm pou rezourd sa problenm lapovrete, me an menm tan nou vwar poudir sa bann problenm parey i pa pe rezourd.  Savedir definitivman i annan keksoz ki pa pe akorde quelque part e la mon dir ki lefe ki annan en kantite larzan dan Bidze pou rezourd sa bann problenm parey nou demande ki i annan en akselerasyon e ki nou revwar lafason e ki sa ban keksoz i ganny fer pou li al pli vit e ki i tous bann dimoun targete ki vreman dan problenm.  Dan menm lespri Mr Speaker akoz ki Gouvernman pa fer en bon pe lakaz.  Bon pe lakaz Prefab par egzanp ek materyo ki nou’n vwar Minister Lasante in ganny kado e ki en proze parey in ganny fer kot SMB Hall la Roche Caiman, e ki nou vwar ki sa bann lakaz i kapab osi letaz.  Akoz non.  E ki sa i ava ede pou ganny lakaz pli bon marse e pli vit e i a tir presyon alor lo materyo konstriksyon e apre Mr Speaker gouvernman i a kapab vann sa bann lakaz bon marse avek bann dimoun ki vreman bezwen lakaz.  E la sel responsabilite ki ou a met devan sa bann dimoun se zot bezwen rod en fason pou zot repar zot lakaz e sa reparasyon maintenance i pou bokou mwens ki letan ou’ n fer li ek blok parey ozordi i ete.   E la i permet Gouvernman pou revwar rol PMC kot i konsern son Bidze e revwar konpletman, akoz tro bokou larzan PMC i annan pa pou kapab rezourd bann problenm reparasyon, reparasyon.  Pli ou fer lakaz pli reparasyon i ogmante.  E la alor nou bezwen revwar sa fason ki sa i ganny fer.  Mr Speaker dan lot kote nou vwar ki i annan bokou dimoun ki travay dir dan nou pei. Be letan ou travay dir ou bezwen osi ganny byen rekonpanse.  La i annan plizyer entrepreneur bann pti antreprener, mwayen e gro sirtou bann ptipti mwayen e ki zot nou konnen se katalis devlopman.  Mon oule dir ki zot, zot bezwen ganny gete e zot osi zot bezwen grandi.  E ki i annan sa bann pti antreprener e mwayen antreprener zot souvandfwa annan en bann kantite lide inovativ.  Souvandfwa serten sa bann lide i ganny vole e lezot dimoun i fer larzan lo la.  Akoz zisteman akoz zot pa pe ganny sa sipor ase.  Nou konnen nou Gouvernman i annan en progranm, ki ed zot dan en serten fason me mon krwar la nou vwar ki bann problenm ki zot vwar li difisil pou ganny bann loan avek bann labank, i devret ganny revwar.  Par egzanp inisyalman nou kapab vwar ki letan bann pti antreprener i pe lans li dan biznes nou devret vwar ki DBS i devret pe ed li inisyalman.  Ler in fini ariv lo son lipye, la bann lezot Labank Komersyal i kapab antre ladan pou vwar koman i kapab fer li grandi.  E kot DBS Mr Speaker i devret annan en dimoun ki ganny anploye a plen tan, zisteman pou asiste sa bann dimoun ki pe vin – bann startups nou apel sa ki pe konmans en biznes, en pti biznes pou ed li avek son plan biznes, son business plan avek son cash flow ensidswit akoz souvandfwa i bezwen annan en ledikasyon kot i konsern bann biznes pou bann dimoun ki pe antre dan biznes.  Pa tou dimoun ki oule fer en biznes ki konnen egzakteman ki mannyer ki sa ki i pe al fer.  Par egzanp lotrozour i annan en zenn ki vini e i dir mwan labank pa le ed li akoz i annan en bon lide li pou konmans en biznes e nou demann li, mon’n koz ek labank ti en pe …pou vwar li e apre letan mon follow-up ek labank sa zenn ki i annan Mr Speaker se ki i oule fer enport 2 container sorti Sud Afrique e i dir i oule rod en sonm anviron R1 milyon pou li fer son ban roulman.  Labank i dir napa problenm nou ava donn ou.  Esey dir nou 2 kestyon.  Reponn nou 2 kestyon.  Kisisa ki ou pe fer vini dan sa 2 container?  E ki mannyer ou pou vann?  E i dir ar prezan i pou get son dalon Sud Afrique pou gete ki sa ki i kapab met dan container, prezan ki i pe mazin sa.  E ler pou ariv isi i annan bann zanmi pou ed li alor i pou fer son bann kontak pou ed li pou gete ki mannyer i pou vann sa ki dan container.  E ou vwar poudir i annan en mank planifikasyon, en mank lenformasyon, en mank ledikasyon konplet.  E labank byensir pa kapab ed li la.  Me  par kont sanmenm sa mon dir ki DBS inisyalman li i devret pe gete sa bann dimoun ki pe start en biznes e dan sa sans la labank i ava annan lezot Labank Komersyal i ava ganny sans pou zot kapab zwe en rol lo en lot nivo.  Mr Speaker si zot pa kapab, alor ganny en loan sa bann dimoun i pou dan problenm e la nou vwar poudir sa problenm loan osi i en keksoz ki bezwen osi get seryezman ladan.  E la nou pe dir ki pou sa arive alor nou krwar poudir Gouvernman, i bezwen annan en fason ki zot reflesir ansanm ek labank.  Akoz nou pa kapab get zis Gouvernman li i pe desid en kote e bann labank li i pe fer en lot fason.  Labank i bezwen annan en lot thinking osi.  Akoz li i bezwen petet al pli pre ek dimoun, Barclays i annan sa legzanp.  Nou vwar avek Cable and Wireless, nou vwar avek SPTC e sa i kapab agrandi avek lezot gran antite travayer kot, i ede pou bann dimoun reste dan zot travay pou ogmant prodiktivite e labank li i la in vini li osi, pou fer dimoun annan labitid ouver kont ek labank e an menm tan ed zot pou zot kapab ganny en loan there on the spot.  I annan tou sa bann keksoz Mr Speaker kot mon krwar kot i konsern labank i devret bezwen ganny gete.  Me an menm tan nou vwar en lot keksoz.  Mon konnen mwan mon vwar ki Gouvernman i devret pous plis avek son 2 labank.  Lentere nou pe dir i o.  I vre.  Be mon konnen i annan serten labank par egzanp Credit Union ki’n konmans donn lentere tre ba.  Me pou lentere tre ba son kapasite ek Credit Union i pa bokou li.  I pa kapab donn en ta loan, e fodre ou en manm ek li.  E byensir alor la nou pe demande ki Gouvernman i revwar lafason ki i fer son bann labank operate.  Par egzanp Gouvernman i kapab obliz son 2 labank, Nouvobanq avek Seychelles Commercial Bank pou fer desann lentere.  Nou konnen ki pou arive Mr Speaker.  Board pou vin dir avek Gouvernman dir ou konnen nou’n dir CEO e CEO i teti i pa oule fer.   Gouvernman i devret pe revwar serten keksoz.  Gouvernman i bezwen kapab annan Board ki krwar dan son Polisi.   Si i pe dir fer desann lentere dan loan labank, sa Board i bezwen li osi pe krwar ladan sa CEO i bezwen pe krwar ladan.  Dan sa ka nou lans en lapel avek Minis Finans pou kapab al revwar sa 2 Board pou kapab enplimant sa ki Gouvernman i anvi fer akoz dan Bidze ou’n dir Minis Finans, ou’n dir ki i annan promes ki labank pe dir wi nou pou fer desann lentere, wi nou pou fer isi, wi nou pou laba.  Me si sa pa ganny transcend into action ek aksyon konkret dan sa ka nou pou annan problenm.  Initil nou pou fye lo labank Santral akoz Labank Santral li i pou dir ou non mwan mon endepandan, e i pa pou kapab fors lezot labank pou kapab fer desann zot lentere.  I annan en dinamik la ki bezwen marse. Letan alors Mr Speaker sa bann labank pa pou kapab fer desann lentere, i pou en problenm pou lenvestisman dan nou epi.  Me nou kapab vwar en lot keksoz ki pe arive.  Nou annan en gro loan 50milyon avek L’Inde i annan detrwa lannen pa ankor ganny servi.  Sa loan Mr Speaker lo en  lentere tre ba 1.75% nou vwar ki Gouvernman ti kapab pran sa loan ale koz ek L’Inde ankor ganny sa loan pou inject dan nou sistenm finansyel e la i ava ede pou stabiliz nou valer roupi e an menm tan re  redwir lentere lo foreign exchange  borrowings.  E sa li menm i ava ede pou Gouvernman kapab ede pou konbat pri lavi.  Pri komodite i ava desann i ava stabilize, akoz zisteman parey nou vwar la valer Roupi i pe devalye e ler sa i arive byensir nou vwar poudir pri komodite i ogmante.   E dan Bidze i annan en kantite keksoz ki’n ganny promet la pou fer desann pri lavi.  E nou demande ki davantaz, sa bann keksoz i vin an aksyon.  Mr Speaker les mwan koz de mo lo pri bis.  Premye fwa Mr Speaker ki mwan mon vwar en keksoz koumsa kot en pei i subsidize pri bis pou touris. Sesel.   Olye fer en fason aranz sityasyon e kondisyon bis, biznes taxi pou fer sir ki pri taxi i desann e fer sa touris  a anbark dan taxi,  nou isi Sesel nou subsidize pri bis e nou dir  touris i ok ou anbark lo bis e ou pey menm parey avek Seselwa.  Akoz mon dir sa, akoz sa R2 Mr Speaker ki nou pe met lo pri bis la, lo pri tiket bis i annan konsiltasyon ki’n ganny fer avek Board SPTC oparavan e Board i devret vin devan e dir ek lepep dan zot evalyasyon pou zot pri bis ti devret SR9.  E Gouvernman li in subsidize in dir non R9 tro bokou nou a fer li R7.  I bezwen annan latransparans dimoun i bezwen konnen ki’n pase.  E Board avan i devret dir ek Board ozordi sa nouvo Board SPTC kwa ki’n pase dan konsiltasyon.  Sansan nouvo Chairman petet nouvo Board vre petet pa ankor koz ek Minister Finans, me i annan konsiltasyon ki’n ganny fer.  Be lot keksoz fodre pa nou bliye Mr Speaker.  Se ki bis i kapab ganny privatize.  E si i ganny privatize pri tiket bis pou vin petet R15.  I pa pou vin mwens ki R7.  I pa pou vin mwens ki R9 i pou vin plis e pa bliye poudir isi dan nou Lasanble gran mersi nou Parti i ankor la e nou Prezidan Faure i ankor la pou fer sir ki pri bis i reste R7.  Sinon pa bliye ki Lopozisyon dan nou Lasanble in dir e i kontinyen dir ki koman zot vin o pouvwar zot pou privatiz transpor piblik.  E la mon met lanmen, mon met sa issue Mr Speaker lanmenm la ater.  Poz li la dimoun a reflesir lo la.  Fodre an menm tan ki nou oule pri bis i stabilize e reste ba fodre ki nou zenn e nou dimoun ki servi bis, i aprann pou li respekte sa bann bis pou zot pa koup seat akoz tan ki zot koup seat e zot fer bann aksyon vandalizm dan bis pri bis pou bezwen kontinyen monte.   Kote ou pou ganny larzan pou aste nouvo bis?  Konmsi sa bann keksoz la nou bezwen pe kontinyelman kontinyelman fer nou dimoun konpran sansan nou take it for granted.  E dan nou pei nou’n pran tro bokou keksoz for granted.  E la i anmenn mwan lo medya.  Rol medya e avek Minister Finans sa Bidze Mr Speaker, se en bon Bidze parey mon’n dir.  En Bidze ki annan en kantite keksoz pou met devan nou pep dan form ledikasyon, me i bezwen ganny fer korekteman parey ler nou’n Bidze – ou’n lir ou speech Bidze Minis tou dimoun in preski pa konpran poudir i pou benefisye avek sa Sistenm Tax, progressive income tax.  Tou dimoun in krwar poudir personn pa pou benefisye e zot in konmans met en bann zafer lo Facebook me par kont letan ou al in depth, letan ou al depouy li byen ou vwar poudir wi dimoun pou benefisye.  Alor i annan tou en ledikasyon ki nou lans en lapel avek ou Minister pou konmans fer apartir konman nou fini dan Lasanble la, ou konmans fer tou le swar ou pran en bout sa Bidze eksplik lepep Seselwa pou li kapab vwar li ladan, pou li kapab vwar son rol e son responsabilite, akoz i annan en responsabilite osi dan sa.  Si nou pa kree larises kote nou pou gannyen pou kapab kontinyen donnen.  Mr Speaker i anmenn mwan dan Lari Bazar.  La mon pe koz vre Lari Bazar.  Sa kalite sityasyon Mr Speaker ki pe arive dan nou Lari Bazar i konsern nou tou e nou pa pou kapab kontinyen tolere akoz sa osi  i annan lefe lo nou Bidze.  E nou vwar poudir nou pe donn lapolis en bon konpo larzan dan sa Bidze pou fer ki nou Lapolis i mars pli byen.  E la nou’n lans en lapel e en nou vwar poudir Lapolis NDEA,  e menm si ou le dir Lazans  Prevansyon Labi Drog e Reabilitasyon ek son  Lapovrete laba kot Mr Dick Esparon i ete e son Minister Tourizm tousala i annan keksoz pou konsernen akoz nou touris pa kapab kontinyen al lari bazar e i ganny challenge e i ganny – dimoun pe mandyan gran lizour, gran midi zenn dimoun  pe mandyan sa ki  pe demande pe demande, prostitisyon lanmenm la, ensidswit.  Dimoun pe dormi ater.  Nou pa kapab kontinyen.  What is wrong with nou Lari Bazar?   Par kont en ponnyen gard i lanmenm pe patrole li selman napa aksyon.  Mr Speaker mwan mon krwar, mon lans en lapel pou ki Lapolis ek sa Bidze ki nou’n donn li i kapab train ankor plis dimoun e fer ki i annan en lord Lari Bazar e dan bann lezot hotspot dan Sesel pou ki dimoun i kapab viv dan en fason pli kordyal e pli byen.  E dimoun i bezwen aprann sivilize e pour nou kapab nou tou enjoy labote nou pei e nou Lari Bazar.  Mr Speaker mwan mon anvi felisit, profit lokazyon la ti annan en progranm yer swar lo televizyon e mon le felisit Mr felisit Mr Rouillon i sorti Grand Anse Praslin li Mr Speaker pour son bon koze ki in koze lo televizyon.  Son entervansyon ti ekselan e la mon ti krwar mwan, mwan konman i pe koze mon dir la la vre MNA Grand Anse Praslin.   Mr Speaker be osi mon le felisit li akoz mon krwar se atraver sa bann keksoz parey ki mon krwar dimoun i pou bezwen, i pou bezwen partisipe pour ki tou dimoun i zwe son rol  akoz sa pei i nou pei.  I pei pou nou tou.  Tou dimoun i bezwen pe kontribye pe donn son koudmen pou nou met en lord pou nou fer sir ki nou tou nou viv dan lape e dan sekirite.  E parey mon’n dir Mr Speaker, mwan mon kontan ki i annan en bon pe larzan pou lapolis e mon welcome nouvo Komisyoner Lapolis, son bann move ki i pe fer.  I pe enkli sa bann dimoun ki ti la depi avan par egzanp mon vwar li in konmans rod Mr Bibi, Mr Tite Morin, Mr Valmont ensi ki lezot pou kapab re dinamiz sa lafors lapolis e re train bann dimoun pour ki zot kapab si oule annan en Lapolis pli byen, pli konpetan, pli soz pour ki nou konnen Mr Speaker zot pou met en lord ek en disiplin pou kapab briz tou baryer dan nou pei Mr Speaker.  Sa i anmenn mwan osi lo bann problenm vol e kas lakaz e bann lezot krim, lezot atrosite k i pe arive e ki’n arive dan nou pei.  ka vol.  Mr Speaker ozordi ou kapab vwar lekel ki vin vole kot ou e ou e dir lapolis. La ki mon pe koze i annan ka ki dimoun in dir lapolis entel, la la mon’n vwar li, lala nou annan footage camera ensidswit me Lapolis dan serten sirkonstans pa pe fer ase e nou, nou pe ensiste ki zot devret bouz ankor plis; e mon konnen ki Mr Labonte pe tann nou la e mon pe demande Mr Komisyoner sakouy sa bann seksyon kot ou laba ki pa pe fer ase pou ki zot kapab ede.  Dimoun li i pe ede i pe donn koudmen, alors Lapolis i bezwen fer sa lot bout.  Apresye ki dimoun – ziska la konmela pa pe pran Lalwa dan zot lanmen.  Si i ti pran Lalwa dan zot lanmen zot pou konn sa bann voler zot menm zot pou deal avek zot menm.  Me malerezman dapre Lalwa letan ou’n fer sa olye voler ki pou al prizon ou menm ou ki pou al prizon si ou’n deal ek voler dan en lot fason.  E konman mon nonm prizon Mr Speaker, ler nou pe koz lo prizon sa ta larzan ki prizon osi pe gannyen dan sa Bidze pou donn Departman Prizon i fer ki bann prizonnyen pou bezwen azir en lot fason.  E nou’n tande dan progranm dernyerman la kot en tyer popilasyon prizon i annan HIV avek Hepatitis e zot fimen pike mannyer zot anvi dan Prizon, telefonn mannyer zot anvi.  Mwan menm mwan tanzantan enn bann i telefonn mwan.  Tousala taxpayers money Mr Speaker.  Sa ki nou pe koz la nou, nou konnen poudir ou, ou lo High Level Committee pour Prizon, alor nou oule propoz ek ou – mwan mon oule propoz ek ou 2 pti keksoz – 2 pti mesaz petet pour ou kapab  anmenn lo sa Komite laba.  2 keksoz ki senp.  Etabli en sistenm pou ekout tou telefonn kot Prizon laba – depi sa dimoun ki annan … zot konnen zot ki mannyer pou fer sa e osi met Sistenm Camera pou vwar tou sa ki pase dan Prizon depi zot cell kot zot dormi, kot zot reste la, partou pou ou vwar, pou ou tande e i byen ki Mr Vic Tirant ki ansarz Prizon.  Mon kontan mon akoz Mr Vic Tirant i en boug ki en profesyonnel dan kestyon – en spesyalis dan kominikasyon.  E i konnen sa ki mon pe dir ki mannyer pou marse sa.  Ki mannyer pou fer.  I posib fer tou.  Alor nou demande ki ou anmenn sa laba dan sa Komite e sey met en presyon pou kapab konmsi annan en fason pli byen, en fason pli korek pou kapab deal avek sa zafer sekirite dan Prizon e partou.

Mr Speaker mon welcome Water Font ProjectWater Front Project Minis in anonse e Gouvernman in anonse 100poursan envestisman Seselwa.  Sa ki mon le tande.  Sa ki mon le tande mon kontan Gouvernman  i annan sa kler vwayan  i annan en plan, en vizyon e sa lontan ti’n devret arive malgre tar.  E nou pe dir ki koumsa i devret ete.  E an menm tan lezot entity Gouvernman ki nou pe plan pou privatize fodre nou annan en bon plan privatizasyon par egzanp  30poursan serten entity dizon kantmenm ou le privatiz en labank oubyen en lot – en lot biznes Gouvernman par 30poursan ou donn sa Seselwa envestiser Seselwa.  E non pa ou les ou dan problenm, apre letan ou vwar ou pe al noye la ou  dir nou bezwen privatiz sa biznes antye e la ou pe rod en strategic partner e la sa biznes i al tonm dan lanmen etranze e Seselwa li i pa ganny sans envestir korekteman dan son prop pei.  Ler nou pe koz lo la Mr Speaker avan mon fer mon konklizyon i enportan ki nou lans en lapel avek tou landrwa travay pou get dan welfare zot travayer.  Travayer pa kapab kontinyen zis ekspekte Gouvernman ki get dan son welfare tou letan.  I annan- sirtou bann ki dan Sekter piblik.  I annan en responsabilite zot osi.  Zot bezwen apartyen a en Union.  Dan lemonn ozordi zot pa kapab zis reste kot zot e fye lo politisyen pou fer tou zot keksoz akoz i annan zour politisyen, pou ganny fer taye li dan landrwa travay.  Landrwa travay pou dir tyonbo en kou, avek ki manda ou annan ou pou vin enterfer dan sa biznes isi kot mon été, pou ou vin tyek dan welfare travayer?  Travayer i bezwen konsyan sa e i bezwen al dan en union.  Atas li ek en Union, swa avek Robinson, Robinson mon le dir la ouswa avek Holy Angels– tou sa la i bann Union ki nou annan la dan pei.  Atas zot avek pou zot kapab zot kondisyon a ganny gete.  Mr Speaker, mwan mon krwar poudir responsabilite i bezwen, i bezwen ganny desarze par nou pep.  Pa kapab zis i asize krwaz lebra i ekspekte tou keksoz i koul dan dalo pou li.  Konman konklizyon Mr Speaker, nou bezwen dan nou pei pas a laksyon.  Nou bezwen pas a laksyon akoz nou pa kapab zis koze.  Nou pa kapab zis les sa Bidze dan liv.  Sa Bidze i bezwen vin vre, pou ki nou vwar nou ladan e nou vwar son rezilta.  E pou li vin vre nou bezwen konpran li e met son konteni an pratik Mr Speaker.  E nou bezwen azir.  Nou pa kapab lannen ale, lannen vini zis nou koz lo Bidze e sa Bidze li i bezwen vin sours lenspirasyon pou nou.  Pou nou pep.  Si nou pou dir ki nou annan par ladan – sa Bidze i bezwen fer nou rev vin vre. Nou pa kapab dir nou annan par dan sa Bidze, nou annan par dan devlopman nou pei me selman nou pa vwar li konkretman.  I bezwen vin real sa.  Nou annan en vizyon nou pei Mr Speaker.  Nou annan en vizyon akoz ler mon get la kantite touris ki vini i vre i byen ki nou ti donn bann konsesyon tourizm e la dan Bidze mon vwar dan reveni i annan serten gro biznes touriz, serten gro lotel ki pe konmans pey zot tax.    E nou demande ki lezot biznes touris, i osi konmans pey zot tax.   Akoz sa konsesyon ki nou ti donnen i ti pou enserten letan e prezan in ler pou zot kontribye akoz sa kantite touris ki vini nou pa vwar son ekivalan an form monneter ki antre dan pei.  I devret antre plis e nou pe ensiste ki bann biznes touris i pey plis.  E alor Mr Speaker osi nou vwar nou bann tankers pe kontribye ozordi.  Ler nou ti deside pou annan sa bann tankers pou pran loan bokou dimoun ti kritik nou be nou ti annan en vizyon.  E sa vizyon ozordi in vin vre e lepep Seselwa i bezwen apresye sa.  I bezwen apresye ki nou parti, nou Prezidan, nou ki’n la pou plizyer lannen pe diriz sa pei nou’n annan en vizyon.  Nou pa’n diriz sa pei zis dan nanryen ditou nou.  Nou’n diriz sa pei akoz nou ti annan en vizyon e sa vizyon i en vizyon reel; i en vizyon konkret e parey ki mon’n dir la nou vwar ki ozordi sa bann keksoz pe materyalize e nou devret pe reap the benefit of sa bann zafer la, sa bann devlopman, sa bann lenvestisman pou antre dan nou, dan nou tax, dan nou basket pou kapab ed nou pei avanse.  Dan sa Bidze i annan en kantite Proze Mr Speaker.   En kantite proze pou nou pep.  Proze si ou le dan  Minister – Lanvironnman, dan Minister Lasante, dan Ledikasyon, Semen, dan Minister Transpor, Lakaz, en kantite proze lakaz e bann proze distrik.  Bann pti proze.  Proze kot Minister Sosyal zisteman pou tous bann problenm Lapovrete ki mon ti pe dir taler.  Me Mr Speaker tou sa bann Proze i devret ganny fer.  Si i pa ganny fer nou dan problenm.  Me mwan mon realize ki nou annan en gro problenm avek kapasite pou delivre sa bann proze e atan.  Lotrozour mon’n kos lo la e mon redir ankor e mon pe lans en lapel.  Mon konnen poudir i annan problenm dan sa bann Minister pou zot kapab deliver.  Mr Speaker alors mon pe sizere avek Prezidan pou etabli en Komite, en Komite Enplimantasyon.  Ou met detrwa dimoun lo la pou ou   kapab fer la swivi dan tou sa bann keksoz ki nou pe fer, ki nou pe dir.  I kapab swiv fer la swivi lo bann proze Gouvernman e bann desizyon ki Cabinet i pran.  Mr Speaker pou fini nou vwar poudir Prezidan i pe fer son bout li.  In al Kenya, in al Maurice, in al Abu Dhabi, partou in ale menm e pe fer en bann demars.  E sa bann demars li i fer son bout e i bezwen annan follow up.  I bezwen annan proper follow-up Mr Speaker.  E sa bann negosyasyon ki in fer i bezwen ganny realize.  I bezwen vin vre pou ki nou reap the benefit of sa bann demars ki in fer.   Sansan sa bann vizit enportan ki in fer pa pou aboutir dan naryen.  Alors la sa Komite ki mon pe dir i bezwen kapab ed Prezidan dan realizasyon sa bann vizit.  Ler i annan i al Kenya i dir nou kapab anmenn plis lavyann anmenn plis bef ensidswit i bezwen annan follow up.  Si in al Maurice pou rod en fason ki mannyer nou kapab korpere pou fer desann pri lavi i bezwen annan follow- up e sa follow-up i bezwen vin vre pour ki i annan en vre rediksyon dan pri lavi dan nou pei pour ki nou dimoun i kapab benefisye Mr Speaker.  Pou fini mon remersye ou pou les mwan koze pou sa bann letan.  Mon remersye tou dimoun ki’n ekout mwan e mon swet tou dimoun bon kouraz.  Bon kouraz e bon partisipasyon dan realizasyon nou Bidze.  Si nou pa kree sa larises, mon re dir ankor nou pou dan problenm.  Se letan nou kree larises ki nou kapab enjoy sa benefis apre.  E mon swete tou dimoun i pas li en bon fen lannen avek prosperite, e dan lasazes.  Tou dimoun i kapab fer ki nou vwar nou lannen 2018 en lannen pli bon en lannen kot nou tou nou a pli prospere nou a pli ere parey si oule parol Fon Pansyon i dir ‘Viv Ere’ pou nou kapab al de lavan se letan nou menm nou ansanm konman en pep nou pe reflesir ansanm, nou pe diskit ansanm, pou nou vwar sa semen pou nou al de lavan e avek gidans bondye mon swet tou dimoun en bon finisyon lannen.  Zwaye Noel Bon Ane tous kantmenm ankor lwen me selman nou dir zot organiz zot boner, parey nou, nou pe organiz nou boner ek nou Bidze, nou Lasanble alors nou dir tou dimoun osi get zot lannen boner.  Mersi bokou pou lekout Mr Speaker.

 

(APPLAUSE)

 

MR SPEAKER

Mersi Onorab Leader of Government Business, Onorab De Commarmond.  Mon ti pros krwar ou pe al sant en Christmas Carol.  Mon ti a kontan remersye tou le de Leaders.  Mon krwar i annan bann kominalite, i annan bann pwen ki zot in koz lo la – lo sirtou lo kestyon sekirite avek lapolis ki nou tou dan Lasanble, nou tou bann MNA mon bann koleg avek mwan menm nou partaz lopinyon tou le 2 Leaders ki nou bezwen travay ansanm pou nou met en fren avek sa bann atrosite e kriminalite e nou bezwen ed lapolis.  E mon kontan ki tou le 2 Leaders in dir ki nou pe donn sipor Lapolis.  Donan en bon Bidze e ankouraz zot travay ki zot pe fer mon ti a zis kontan anonse an ka zot bann constituents pe rod zot ki Onorab Georges i pa la ozordi akoz i aletranze lo en misyon travay so si zot pa vwar li i pa pe dormi se li i pe travay parey zot konnen i annan serten fonksyon. Malerezman Onorab Vidot i pa tro byen i lopital e nou swet li tou de bon ki i vinabou sorti e geri.  La ankor nou remersye bann ners ki okip tou nou bann dimoun ki i a byen zwenn nou dan Lasanble prosennman, pou osi pran par dan deba.  Mon’n pran not Onorab De Commarmond ou bann pwen lo Prizon, i enportan.  Parey mon’n dir avan i ariv en pwen kot nou tou sak MNA pou bezwen konnen lekel prizonnyen ki sorti dan zot constituency pou zot vinabou ede Lotorite Prizon avek nou tou ki pe ansarz High Level Committee.  Mon krwar sa pwen ki ou’n note mon sir ki Prezidan Faure in ekoute, me mon ti a zis kontan remind ou ki Onorab Henrie ti prezant en rapor COGA ki li son rol se osi pou fer Committee of Assurances pou swiv en pti pe, pik en pti pe bann Minister kot nou pa vwar bann desizyon ki zot in promet nou dan Lasanble. So avek sa, mon in ler pou nou adjourn pou donnen sans nou bann trezor anler pou enterakte avek nou ek nou bann ners, profesyon ki nou tou nou respe pou koz ek nou epi nou a repran kontinyasyon nou travay 11.15.  Avek sa nou ava adjourn.  Nou a repran 11.15 pou nou kontinyen nou bann deba lo Bidze 2018.

 

(BREAK)

 

MR SPEAKER

Nou a kontiny nou travay mon bann koleg.  E mon a donn laparol Onorab Prea.

 

HON NICHOLAS PREA

Mersi Mr. Speaker.  Mr. Speaker, prezantasyon Bidze 2018 in amenn bokou reaksyon mixed e mon pou santre mon repons en pe lo sa bann santiman ki’n ganny partaze ek mwan e osi partaz en pe mon pwennvi.

Mr Speaker, i swe nou tou lo sa kote latab ki nou pran bann desizyon ki dan lentere nou pep e lentere nou pei.  Sa travay ki nou pe fer, se pou ede redres nou pei pou ki a lafen tou dimoun a benefisye ek larises ki nou pei pe anmennen.

Se dan sa menm lespri ki nou ti pran desizyon pou depouy Bidze 2017 avek bi ranforsi disiplin fiskal, idantifye bann labi e anmenn latransparans e accountability dan depans Bidze.  Nou’n set en nouvo fason fer keksoz dan nou pei e en nouvo fason kot Bidze i ganny zere e depanse akoz nou bezwen pli responsab ler nou depans larzan taxpayers.  Komite FPAC in fer bokou pou montre Gouvernman kote gaspiyaz i été ; fer bann rekomandasyon pour Gouvernman kapab pran aksyon avek bi ranmas sa bann larzan ki pei in perdi.

Ozordi si Gouvernman ti serye dan sa demars nou ti pou komans vwar lefe e nou pei ti pou trouv li dan en meyer sityasyon enn ki ti a prezant en lavenir pli pozitiv.

Travay 6enm Lasanble  pandan sa 1an, in anmenn en diferans pour Sesel e pour Seselwa.  E mon fyer mon kontribisyon.  Minis dan son prezantasyon in konfirm sa e rekonnet ki nou pe travay ansanm pou transform nou pei.

Ozordi bann lendikasyon dan preski tou domenn pe montre siny  pozitiv … e nou kapab komans koz lo stabilite finansyer e en lekonomi pli for.

Me nou annan ankor bokou pou fer pou kree plis loportinite pou nou dimoun kapab ganny plis reveni e partaz plis larises ki pei i kree.

Mr Speaker, sa size PIT in lev en deba e mon osi partaz santiman serten dimoun.  Me Leader Lopozisyon in fer en propozisyon bomaten e mon aport mon sipor.

Napa en Sistenm Tax ki parfe dan lemonn.  Alors mon siport plis konsiltasyon dan sa bann semenn ki devan nou, pou amelyor sa sistenm e mon osi siport son lenplimantasyon an Zanvye 2018.

Mr Speaker, mon welcome desizyon ki pe ganny pran pou redwi kou lavi:  Atraver tax ki’n ganny retire lo bann benefis ki travayer i gannyen tel ki lo Konpansasyon, Gratwite, Trezyenm Mwan, service charge, overtime e peyman lafen Kontra.

Osi atraver zefor pou adres pri ki nou pe pey marsandiz.  Tro lontan nou’n ganny bann move deal kot bann middlemen in anrisi zot lo nou. Semenn pase mon’n temwanny plizyer Lakor ki’n sinyen ant Sesel ek Maurice.  E si nou serye sa pou ede fer desann pri lavi.  Le 2 pei pou nepli get kanmarad koman konpetiter, me plito partner, kot nou pou kapab zwenn ansanm pou aste marsandiz an gro, avek bi redwi pri ki nou peye e kou transportasyon.  Nou pou osi kapab enport legim e lezot prodwi ki an abondan e a en pri ba.  I annan potansyel i zis ki nou pa’n fer sa depi lontan.  Ozordi Mr Speaker mindset in sanze e nou pe apel bann dirizan Mauricien nou frer ek nou ser.  Sa letan maltret Morisyen in fini.

Mr. Speaker, Mon ankouraze  par sa demars ki pe ganny fer pou sekter prive envestir aletranze.  Mon swete apre sa vizit ki sa delegasyon biznes pou fer Maurice  sa mwan nou a kapab ouver laport pou bokou plis komers e lenvestisman ki a benefisye Sesel.

Bokou biznes i akey sa demars Gouvernman pou  privatiz bann Lantrepriz Leta e vann bann par ki i annan dan bann Lakonpannyen tel dan bann labank, Land Marine e IOT sa i a bon pou ankouraz plis loportinite lenvestisman pou Seselwa.  Sa i a fer ki Gouvernman o plito konsantre lo lenplimantasyon bann Polisi.

Mon ti a demande la, ki SIB i  vin pli pro-aktiv pou atir envestiser lokal an premye, e apre al ver envestiser etranze.  Fodre ki larises ki nou pei i prodwi en maximum i kapab reste isi e ganny reenvestir isi menm.

Ankor mon pran legzanp lo Maurice Mr Speaker kot mazorite lotel e bann gro Lakonpannyen i own par bann Mauricien zot menm.  I osi annan posibilite  envestir dan lezot pei lo Kontinan  e la dan sa lespri sa nouvo partenarya  Maurice pe extend sa lanmen avek nou, i pe envit Seselwa pou fer sa parkour ansanm e parey mon’n dir -loportinite i la.

Mr Speaker, enn bann Konpannyen ki Gouvernman pa’n koz lo la se Air Seychelles. Minis Tourizm detrwa semenn pase, i ti asir mwan ki Sesel ti pou soumet en plan ek son partner Etihad e ki Gouvernman ti pou fer en lanons, me sa pa’n arive.  Alor si posib, mon ti ava demann Minis si i annan okenn lenformasyon pou li partaz avek sa Lasanble e donn en mon lespwar pou tou sa travayer Seselwa, ki ozordi zot vwar zot dan lensertitid.  Si Air Seychelles pe fer byen, se gras a sa group travayer Seselwa ki pe donn tou e ki ozordi zot fer nou fyer.

Enn bann konsern ki mon deza lev-e se sa nivo ki rent in arive e son lenpak lo kou biznes e pri lavi.  Gouvernman pa pe ede dan sa sekter.  Apre ki’n vann preski tou son bann lakaz ek apartman, e dan bokou ka a en pri tre ba, ozordi Gouvernman pe zwe dan sa pti pool lakaz lwe ki i  annan lo marse.  Sa i fer ki bokou propriyeter i profite pou fer monte pri pou ganny en pli bon deal.  Ozordi dan sa Bidze nou vwar menm Zidisyer pe rod plis larzan pou lakaz lwe.  I paret ki ler ou vin en Ziz ou bezwen al reste dan en lot lakaz e met en   fardo lo Bidze …

Menm parey, demann office space par bann Departman Gouvernman, sa osi pe ede pou fer monte pri lokasyon dan lavil.  In ler pou Gouvernman envestir dan bann batiman kot bann Minister a kapab enstal zot a en kou pli meyer marse, e liber bann lezot landrwa pou fer rent desann, e vin pli abordab pou biznes.

Mr Speaker, i annan en bezwen pou Gouvernman met en pe lord dan pei.  Tro bokou biznes ilegal ki pa pey tax pe fer konpetisyon ek sa enn ki bezwen pey license e tou kalite tax.  Sa osi pe ede pou afebli nou lekonomi.  SRC napa mwayen pou al rod sa bann tax ki i pa pe kolekte.  E la osi mon ti a kontan si Minis ti a kapab dan son repons donn nou en lide konbyen sa bann aryeraz  tax ki SRC in kapab kolekte.

Mon pa kapab aksepte ki nou pe servi plis ki R25milyon larzan taxpayers pou sa progranm Prevansyon Drog e Detox.  Mon ti a prefere vwar nou beef-up Lafors Lapolis e plis kontrol lo bann port of entries.  Annou met zefor pou anpes drog antre dan pei me pa les li antre e apre al rod tretman.  Prevention is better and cheaper than cure.  Sa en Head ki mwan, mon pa pou donn sipor.

Menm keksoz ki mon fek tande lo televizyon, kot Lotorite pe mazin entrodwi methadone dan prizon.  Sa i fou.  Dan premye ka drog pa sipoze antre prizon.  Alor ou pa bezwen tretman methadone.

 

(APPLAUSE)

 

HON NICHOLAS PREA

Si en kondannen i annan problenm drog, anmenn li dan Wellness Center kot i a fer son detox swa atraver methadone oubyen cold turkey.

Pandan lannen, mon’n soulev plizyer topik me i malere ki nanryen pa’n ganny fer:  Dan mon repons lo Bidze 2017 e repons Leta Lanasyon mon ti demande ki nou revwar fason ki Children’s Fund i ganny zere e kree en Board ki a administre sa Fon me 1an i koule e nanryen pa’n arive.

Mon ti anmenn en Mosyon pou ki bann Seselwa ki reste e travay aletranze e ki’n rantre dan pei pou zot retret ganny zot Sekirite Sosyal parey tou dimoun. Menm ki Mosyon ti ganny aprouve nanryen pa’n arive.

Mon ti anmenn bann zofisye Ex-SVPD, bann ki ti fer gro sakrifis e al koman sekirite lo lanmer kont piratri.  Me ziska la i ankor annan problenm pou pey zot, zot bann benefis.

Lannen pase nou ti lev sa size allowance pou nou bann etidyan aletranze.  Mon’n rankontre plizyer dan sa 23 etidyan Seselwa ki Maurice e zot in sipliy ek mwan pou fer sa demann pou zot ankor.  Pou ki Lotorite i get dan posibilite ogmant zot allowance, an vi ki pri lavi dan pei kot zot pe etidye in osi monte.

Problenm parey ti sorti dan vizit Bel Ombre, se ki Gouvernman ti fer sorti Prezidan ti fer sorti tre kler ki dan son Gouvernman i annan en problenm napa swivi.  Pou sa marse Mr Speaker, mon sizere parey Leader Lopozisyon in dir bomaten, nou bezwen en Gouvernman ki pli Slim e ki pli efikas.  Tro bokou advisers ek konsiltan ki pa efikas e pa pe delivre.

Mon ti a kontan si Minis dan ou repons eklersi mwan lo kwa sa Lazans Nasyonal pour Lentelizans ki pe ganny kree anba sa Bidze.

E mon ti a kontan osi Minis fer en propozisyon ki petet, zot kapab pran li an konsiderasyon.  Vizavi SPTC  fer en pe parey Cat Cocos e entrodwi en lot pri pou bann viziter ki servi sa servis bis ; en diferan travel  card ki en pe pli ser ki a kapab ed sa Lakonpannyen kouver en pe son bann depans.  Bann touris, bann viziter i dir ek nou i ridikil ki zot pe pey R5 pou en servis bis.  E si zot, zot in vwar li tro ba alor nou annan pou nou kapab improve lo la.

Mr Speaker, nou pe ariv lafen 2017, mon pe get kote mon vwar distrik Bel Ombre dan Bidze 2018.  Ankor mon pa vwar gran keksoz.  Mon vwar gran proze e mon en pe dezapwente:

Leta semen primer distrik Bel Ombre, SLTA ti pou met en nouvo sirfas koltar avan lafen lannen, me sa in ganny anvoye pour 2018.  Me i malere ki sa proze pa menm dan Bidze 2018.  Minis mon envit ou ankor pou vin vwar kondisyon nou semen.  Annou fer sa pti voyaz zis nou 2 dan distrik Bel Ombre e ou a konstate kwa ki mon pe dir.

Stasyon Fire Brigade, nou distrik in sibir 2 dife e ankor nou’n vwar nesesite pou annan en Stasyon dan rezyon Beau Vallon.  I pa kout bokou pou annan en langar, ki sa konminyon i kapab park ek en pti biro kot sa bann travayer a kapab fer en pe dite avek en sistenm toilet.  Silvouple annou pa esper en lensidan mazer.

Lanbilans Mr Speaker; sa mon’n fer a plizyer repriz avan.  Mon ti menm fer sorti dan vizit ek Prezidan kot Klinik le 01 Desanm ansanm avek Onorab John Hoareau.  Sa ti Desanm 2016.  E osi tou dernyerman ler nou ti fer vizit distrik.  Mr Speaker nou ankor pe espere.

Konstriksyon pavement ant H Hotel ziska Lekol Primer Bel Ombre, annou pa esper en aksidan.  H Hotel in fer sa bout dan plato.  Alor annou ede pou fer sa lot bout.  Proze 24 lakaz dan 24 distrik dan 24 mwan 24, 24, 24 pou mon distrik Bel Ombre sa in ariv 24, 24, 12, nanryen pa ankor komanse.  24 mwan in redwir paret 12 mwan.

Bann ti proze dan sou distrik tel ki sa pti bout semen 50met kot lafanmir Napoleon ek Duval.  Silvouple annou aret fer dimoun soufer.  Mon pou konklir par  fer en lapel ek tou Seselwa.  Annou konsyan tou sa ki nou fer e annou pran nou responsabilite o serye. Annou konn nou priyorite. Annou pa depans plis ki nou gannyen, me  esey met en pti pe de kote pou demen.

Alor mon lapel ankor enn fwa, servi byen bann servis e pa fer labi ek gaspiyaz.  Napa nanryen ki pou nanryen.  Ou ki’n debrouye lekol e dan ou landrwa travay e atraver ou sikse ou nivo lavi in monte,  me dan sa Bidze ou santi petet ou pe ganny penalize pa dekouraze  Ou ki pe benefisye serten rediksyon dan tax oubyen atraver serten incentives, pas en sa bann benefis ek ou prosen.  Alor ankor enn fwa mon fer en lapel ek Minis Finans, pou kontinyen bann konsiltasyon avek bi pou rod en Sistenm Tax  ki pli meyer pour Sesel.

Mr Speaker, mon apresye ozordi ki Seselwa pe viv dan en  letan pli agreab, en pei pli lib e pli meyer, gras a lapros ki nou’n pran depi eleksyon Septanm 2016.  Nou pou kontinyen travay dan sa fason, avek bi anmenn plis stabilite e prosperite pou nou pei.  Nou pou kontinyen travay pour Sesel.  E nou dan LDS nou asir Lepep Seselwa ki nou pa pou Zanmen Les Tonbe.  Mersi Mr. Speaker.

 

MR SPEAKER

Mersi Onorab Prea.  Onorab Churchill Gill.

 

HON CHURCHILL GILL

Mersi Mr Speaker.  Bonzour avek ou delegasyon.  Bonzour tou Manm.  Bonzour tou dimoun ki pe ekout nou.  En bonzour tre spesyal pou tou zabitan Baie Ste Anne.

Mr Speaker Bidze 2018 i fonde lo enn parmi bann gran prensip fondamantal nou Parti.  Legalite dan loportinite pou partaz larises pei avek tou Seselwa.  E sa pou vin en realite an traver sa seri posibilite ki Bidze 2018 pe propoze akonpli.  Lentervansyon mon kontribisyon lo reponn Bidze, se pou kontinyen fer en konversasyon neseser avek tou Seselwa.  La mon ava koz lo bann levantay loportinite ki Bidze 2018 pe anmennen pou zot.

Mr Speaker realistik fason konkret lobzektif stratezi, zesyon oubyen aktivite ekonomik ki Gouvernman in konmanse ase byen lontan, malgre nesesite plizyer modifikasyon ; e ladaptasyon donnen legzizans o kou bann lannen ki’n pase, ozordi san okenn dout nou pe vwar son fri.

En legzanp klasik san presedans dan nou listwar devlopman ekonomik, se desizyon Gouvernman pou lans dan proze lenvestisman 6 tanker, atraver SEPEC.  Ozordi tou det in fini ganny peye.  Sa i montre ki desizyon pou lans dan biznes tanker ti enn ki bon.  Malgre pou bann risk lekel ki pou e pe benefisye.

Tou Seselwa in benefisye.  E pou kontinyen zwir fri sa lenvestisman.  Sa sityasyon i donn Sesel en posibilite reel, pou asire ki lekonomi Sesel i ganny konsolide.  Par konsekans i ava permet Gouvernman transmet tou sa bann benefis dan bann sekter pli enportan.  Tel ki asir lo bann fakter ki pe anmenn lefe negativ lo pri lavi dan nou pei.  Pri lavi i bezwen desann ankor plis.

Sa i reste enn priyorite prensipal non selman zis Gouvernman.  Met tou bann akter ki angaze dan diferan aktivite ekonomi dan nou pei Sesel.  Alafwa ki mon apresye e aplodir tre for zefor remarkab ki STB pe fer pou ogmant vizibilite e promot Sesel lo marse touristik enternasyonal, Gouvernman i bezwen asire ki tou mezir i an plas pou asire devi etranzer ki pou Sesel i vin Sesel e reste Sesel.

Sesel i bezwen deviz etranzer Dolar, Ero pou ede dan nou balans peyman.  Deza nou’n ki valer total nou reset in ogmante.  Me mon konvenki, ki Sesel i kapab fer bokou pli byen. An zeneral tou bann endikater ekonomi i donn nou sa santiman pou en pozisyon tre optimis akoz lekonomi Sesel i kontinyen grosi.

Mr Speaker ler lekonomi en pei i grosi sa pei i ganny larises an plis.  Sa larises an plis i sistematikman fer Sesel kontinyen egalite dan loportinite pou partaz larises pei avek tou Seselwa.  Ki mannyer alor Bidze 2018 pe propoze akonpli en redistribisyon larises?

Premyerman Mr Speaker Scheme of Service, nouvo rekritman pou sekter piblik.  Lo Scheme of Service ek nouvo rekritman, i tous travayer direkteman e sa Bidze in fer provizyon konsiderab pou amelyor pos sa bann travayer swivan.  Atraver en sonm konsiderab valer R62.1 milyon pou rekritman nouvo travayer e en sonm R91. 6 milyon pou nouvo Scheme of Service. Travayer dan sa bann Minister swivan pou benefisye avek provizyon bidzeter, pou nouvo Scheme of Service.  Teknisyen dan Departman Lenfrastriktir e Departman Labita, Minister Lanvironnman Lenerzi e Sanzman Klima, ners ek Health Care Assistant dan Health Care Agency adisyonnel-man, pou osi annan nouvo retention allowance, ki pou ganny pey.  R3mil pou bann Ners ek travayer Lakaz Mor.  Zot pou osi benefisye avek en allowance konman incentive adisyonnel.

National Sport Council, dezyenmman Mr Speaker Gratwite, Konpansasyon pou servis kontinyen, promosyon returning graduates pou returning graduates – en sonm R15.9 milyon in ganny mete dan Bidze, pou asire ki tou nou return graduate i ganny travay.  Osi byen i ganny en saler rezonnab.

Tou bann ners pou benefisye avek 10poursan ogmantasyon, lo zot Gratwite e personn pa pou pey income tax lo zot Gratwite.  Mr Speaker, dan nou Lasanble.  Nou’n koz bokou lo nesesite pou revwar saler dan servis piblik.

Nou’n koz bokou lo nesesite amelyor servis delivery.  Dan servis piblik.  Egalman atraver Bidze 2018 i kler ki Gouvernman in reponn sa bezwen.  Alor tou travayer dan servis piblik etranze konman Seselwa i bezwen sezi sa loportinite sezi sa moman desizif dan nou listwar pou non selman retenir plis larzan lafen di-mwan, me pou konsyansyezman delivre en servis ki zwenn lekspektasyon piblik Seselwa.

Mr Speaker mon konversasyon bidzeter i desann e focaliz lo bann self-employed dan dimoun ki pe fer zot prop pti e mwayen biznes.  Bidze i fer provizyon pou annan plizyer Kontra ki pou ganny tender pou netwayaz ek landscaping, lo nouvo plizyer distrik Mahé, Praslin ek La Digue.

Provizyon Kontra netwayaz e amenazman larivyer.  Nou bann SMEs ki’n pare pou agrandi.  E bann ki pe mazin konman zot biznes, zot tou zot la dan provizyon Bidze 2018. Zot pa’n ganny kit ater.  Rediksyon lo lentere kot SBFA pou kontinyelman kre loportinite pou pti biznes pou kree plis lanplwa.

Mr Speaker tou Progranm Sosyal Gouvernman in ganny en sonm tre konsiderab R276.7 milyon.  Sa i fer nou realize ki si nou travay dir, pou adres nou bann problenm sosyal, nou pei pou kapab redwir lakantite larzan ki nou bezwen depanse ozordi, pou adres sa bann diferan defi ki pe ronz nou sosyete.

Gouvernman pe fer lenvestisman lonterm, pou fer siport bidzeter pou diferan kategori biznes, avek bi soulaz sa bann ki pe fer fas avek serten difikilte.  An provizyon R27.2 milyon i la pou sa lasistans pe permet zot bouze.

Mr Speaker lo kestyon car hire operator, nouvo minimum 7 loto dan fleet in ganny etablir.  Kestyon se, eski Minis Finans in fini ganny lagreman avek sistenm banker, pou pozitivman konsider ogmant loan pou sa bann dimoun ki bezwen rod transpor adisyonnel?

Mr Speaker plizyer fwa nou’n koz lo Seselwa pran kontrol pou lekonomi.  Alors size privatizasyon i touzour monte e Seselwa pe kontinyelman demande ki bann mezir konkret ki pou ganny anonse, ki pou gradyelman Seselwa i a vreman pran kontrol lekonomi pei an traver prosesis privatizasyon.   Dan sa konteks Minis Finans a kapab konsider, donn serten detay dan moman son repons lo Bidze.

Mr Speaker mon konversasyon lo Bidze i anmenn mon ver egzekisyon mon rol konman Manm Elekte pou distrik Baie Ste Anne Praslin.  Avek bokou konfidans mon oule dir avek tou zabitan Baie Ste Anne, ki serten parmi plizyer bann plizyer konsern ki mon’n anmennen isi dan sa Lasanble, ozordi mon annan plezir pou dir zot provizyon bidzeter in ganny fer pou 2018.

(1) PUC travay in konmanse pou amelyor sityasyon polisyon tapaz kot Stasyon.  Ok?

(2) Lagrikiltir i annan en sonm 50milyon ki’n ganny mete dan Bidze pou sa sekter.  Baie Ste Anne i annan en pa ladan.  Sa ki mon pe demande se ki Lotorite konsernen, i fer tou sa ki posib pou senplifye prosedir pou ki tou fermye in ganny akse avek sa larzan dan en dele letan rezonnab.

(3) Ogmantasyon allowance etidyan Praslin ek La Digue.  Sa size in ganny konsider pozitivman dan Bidze 2018.  Tou etidyan Baie Ste Anne, Grand Anse Praslin, La Digue, pou ganny en ogmantasyon.

Me mon krwar ki sa sonm i devret ganny kontinyen revwar ler en lot ogmantasyon i posib.  La ankor parey touzour nou pe dir, lekel ki lapel ki mon lanse pou tou etidyan, se etidye, etidye, etidye, pou ki zot a fer Sesel zot paran fyer e zot prop lekor fyer zot lakonplisman.

Proze lakaz Marie-Jeanne Estate faz 2, 12 Blok Flat in deza konmanse.  Ankor provizyon dan Bidzeter in ganny fer.  Fanmir Baie Ste Anne pe espere, mon enplor zot pou gard zot lespwar vivan toultan rekonesan ki otan ki resours i annan Gouvernman donn zot son langazman pou konstrir plis lakaz.  E dan sa fason satisfer dezir ek laspirasyon sa bann fanmir ki dan vre bezwen.

(5) Labatwar pou Praslin i dan Bidze.  (6) Lenfrastriktir lo zil Eve i dan Bidze. (7) lagrandisman semen Salazie i dan Bidze.  (8) Lagrandisman semen Anse La Blague provizyon i dan Bidze.  (9) Fond Azore premye faz provizyon i dan Bidze.  (10) renovasyon Youth Hostel provizyon i dan Bidze.  (11) renovasyon lo Lopital Baie Ste Anne i osi dan Bidze.  (12) Amelyor distribisyon tiyo delo lo Praslin par PUC provizyon i dan Bidze.

Gouvernman Lokal provizyon Bidzeter i kontinyen garanti posibilite pou annan en sonm enportan ki ganny egzekite ver realizasyon plizyer proze dan distrik avek bi amelyor standar pou bann diferan lenfrastriktir nou distrik.

Mr Speaker apre plizyer demann, finalman Fon pou Devlopman Praslin in ariv Baie Ste Anne.  Mon santi, mon soulaze.  Me mon senserman krwar ki provizyon sa lokasyon dan Fon Devlopman pou Praslin i demann revwar, e asire ki sak distrik i ganny R500 mil ki ava fer en total en milyon dan Fon Devlopman Praslin.

Mr Speaker zabitan Baie Ste Anne i fer plis demann.  Mr Speaker zabitan Baie Ste Anne i rezonnab zot konpran limitasyon ki nenport ki Bidze i annan egalman zabitan Baie Ste Anne i konpran ki sak distrik lo Mahé.  Praslin e La Digue i osi bezwen ganny en pe dan sa redistribisyon larises Nasyonal.  Me lo zot non li non tou zabitan Baie Ste Anne mon oule met lo rikord ki Gouvernman i kontinyen rod mwayen, pou enplimant sa bann proze swivan dan mwen dele posib.

Proze Peser Baie Ste Anne ki an fas avek Kordgard Baie Ste Anne nouvo Stasyon Lapolis pou Baie Ste Anne, Sport Complex pou zil Praslin.  Propriyeter pickup lo Praslin pe demande ki Minister oubyen Lazans konsernen i swiv model negosyasyon avek konpannyen ki pe al konstrir danm La Gogue.  E ki pe asire ki bann propriyeter pickup lo Mahé i ganny angaze direkteman dan tou sarwa materyo pou danm La Gauge.

Alors Praslin pa devret ganny kit deryer.  Mon pe demann Gouvernman oubyen Lazans konsernen pou asire akonpli dezir tou bann propriyeter pickup lo Praslin.

Mr Speaker pou mon konklizyon, mon krwar ki sa Bidze i pou tou Seselwa e i devret e nou devret sezi loportinite pou nou progre personnel e kontribisyon pou nou pei ki pou Sesel i ava pardon ki Sesel i ava prosper ankor plis benefis nou tou.

Mon swete ki Gouvernman i kontinyen lo sa semen prosperite pou tou Seselwa en meyer lavenir.  Mon ti ava profite pou demann tou Seselwa pou solider deryer Prezidan Faure pou sa bon travay ki pe fer pou nou pei.

Prenon kont sa nouvo Leta e nouvo lepok ki nou pei pe traverse.  E mon swete ki sa koabitasyon i kontinyen demontre sa o nivo matirite ki egziste, pou fasilit sa transformasyon nou pei dan en meyer sosyete pou tou Seselwa.

Mon donn zot mon garanti ki mon pou kontinyen anmenn devan zot konsern e bezwen, bezwen nou distrik pou ki ansanm nou kontinyen travay pou en meyer Baie Ste Anne.  Mersi Mr Speaker.

 

        (APPLAUSE)

 

MR SPEAKER

Mersi Onorab Churchill Gill.  Mon krwar i reste en minit pou midi avan nou pran en pause kafe nou retournen pou nou donn laparol Onorab Adelaide, mon ti a zis kontan anonse ki dan nou zefor konman Lasanble pou vin pli ouver e pli an kontak avek piblik Seselwa, ki nou annan National Assembly Lasanble Nasyonal i annan en Facebook page apre en paz pou YouTube osi.

Mon ti a kontan fer lapel parey touzour mon’n fer lo rezo sosyal, ki bann dimoun ki poste keksoz lo sa bann paz i poste bann keksoz pozitiv parske positivité i pou anmenn nou devan.  E ki nou annan bann profil ki reel e ki donn nou bann nide ki mannyer zot ti a kontan vwar keksoz i marse.  Alors sa i en kestyon lenformasyon e nouvo PR Ms Alexandria Faure i pe travay for lo la pou anmenn sa kominikasyon piblik avek Lasanble Nasyonal.

Avek sa ankor enn fwa mon ti a swet tou dimoun en bonn apeti – sirtou nou bann ners ki’n reste pou ekout en 2enm sesyon, nou’n apresye.  Bonn Kontinyasyon tou dimoun.  Nou a repran 2er.

 

                (BREAK)

 

MR SPEAKER

Bon, bonn apre midi tou dimoun ki a lekout, tou bann koleg Manm Onorab.  Parey mon ti dir bomaten i tour Onorab Adelaide pou donn son reaksyon apre sa i swivi par Onorab Sophola.  Onorab Adelaide ou annan laparol.

 

HON FRANCOIS ADELAIDE

Mersi Mr Speaker.  Bonn apre midi tou dimoun.  Minis avan mon konmanse, mon ti a kontan ki ou pa pran nanryen personnel.  Nou la pou nou aranz pei kot nou mal nou dir, kot nou byen nou bouz ansanm.  E mon respe ou en zenn onm ki vini byen abiye, ou respekte nou lenstitisyon, byen kravate parey nou, pa vin parey bann dimoun lager, bann dekolte.  Mr Speaker, apre sa dernyen Bidze lafen 2016 pou nou antre dan lannen 2017, bokou ti ganny dir, me an 2017 nou ankor pe realize ki napa bokou ki’n ganny fer.  Apre sa Bidze ki ti sipoze enklizif kot tou Seselwa ti pou vwar ladan e form parti pou en meyer lavenir, nou’n trouve ki pri lavi in monte.  Fason fer biznes sirtou pou Seselwa i ankor otan difisil. Ki Seselwa pe kontinyen .., trimouse avek lespwar ki en zour kekfwa i ava benefisye.  Mr Speaker, 2017 pe al terminen ankor dan anviron ankor 55 zour kestyon se lannen ale, lannen vini nou pou kontinyen tann bann bon parol, bann zoli promes me larealite se ki nou pe i kontinyen soufer, ganny abize, kontinyen ganny vole sirtou par bann pti tim mafya.  Apre ler in arive pou bann travayer ganny rekonpanse, nou tann L’Egzekitiv dir “Nou bezwen fer plis sakrifis.”  Mr Speaker, letan ser sang in fini.  Seselwa in fatige fer sakrifis; akoz sak fwa zot fer sakrifis en pti group privilezye i benefisye e zot pa ni menm onte, menm zot ganny debiste, zot ankor pe pran menm.  Mr Speaker, tenm sa lannen se travay pou en prosperite pou tou Seselwa.  Si ou en etranze en dimoun i translate sa pou ou definitivman si sa Gouvernman ankor en manda 5an definitivman sa etranze pou apiy li.  Me Mr Speaker, Seselwa ozordi in fini per fo promes sa Gouvernman.  Eski sa Gouvernman i serye ler i pe fer bann langazman koumsa?  Mr Speaker, permet mwan prezan pou tous enn de bann gran liny dan sa diskour Bidze 2018.  Mr Speaker, mon’n tann Minis dir avek pli bokou Airline ki pe montre lentere pou met Sesel konman en lot destinasyon, pou sirman en plus pou lekonomi.  Sa i defet largiman ki ansyen Speaker Mr Patrick Herminie ti predir an 2016, pandan letan Kanpanny.  I ti dir lo medya ki si LDS i remportre sa eleksyon bokou Airline pou aret vin Sesel, savedir i ti pe zis rabase e teroriz Seselwa.  Sa Mr Speaker i fer mon vin lo en size, drog dan Sesel e mannyer nou pou konbat sa move fleo, ki pe detri nou lafors travayer e ki kapab fer nou anfonse.  Eski sa Gouvernman i serye ler i pe propoz en sonm R40 milyon pou en Sant Reabilitasyon pou bann dimoun ki lo labi drog Mr Speaker?  Nou pa bezwen sant ki pou kout sa pri.  Vre laspe i devret fize dan prevansyon, anpes drog dan pei, deal avek sa bann eskobar, ogmant plis patrol dan bann hotspot; rekonpans bann dimoun ki donn detay lo bann tranzaksyon drog.  Tou dimoun i konnen kote ki annan biznes drog.  So i fasil pou deal avek sa problenm. Pli bon fason pou tret sa problenm se pa par methadone.  Akoz bokou ki dimoun ki mwan mon’n enteroze pou fer mon konpran ki cold turkey se sa pli bon fason.  Me solman fodre i annan bon lasistans ki pou siport zot pandan sa 2 semenn.  Mr Speaker, pou nou pran 40 milyon e met dan lanmen Sekreter D’état pou labi sibstans a mon’n avi i fer mwan mazin en post lo Facebook, kot en group zonm arme dan L’Afrique ti met en ak47 dan lanmen en chimpanzee, rezilta katastrof.  E konman en Lasanble Nasyonal ki serye, nou devret santi nou konsernen e rod pli bon fason pou deal avek sa problenm.  I annan bokou Seselwa ki eksperyanse ladan.  Nou annan en Dokter Malulu avek son bann staff ki nou devret fer, dan nou bann travayer en bon reminirasyon, donn nou Social Worker en bon reminirasyon, nou Youth Worker dan distrik donn zot en bon lankourazman, zis pey zot pli byen e get dan zot welfare.  Donn zot sa privilez.  Apre tou se zot ki bann profesyonnel. Pa tou politisyen ki konnen ki ‘Monte au ciel’. i bon pou lerni Mr Speaker.  Mr Speaker, pou annan plis prosperite, fodre nou annan en Gouvernman pli aktiv, inovativ e pare pou travay dan en fason efikas.  Sa Gouvernman Lepep i tro dousman.  Mr Speaker, ‘Time is money.’  Me si ou gaspiy letan i egal ki ou pe perdi larzan.  Mr Speaker, sa bann dimoun ki’n met Sesel otaz, fodre ganny pouse e ranplase par lezot dimoun ki kapab fer sa Gouvernman marse. Gouvernman Parti Lepep fodre zot mat zot deryer.  Mr Speaker, ler mon pe get lo bann proze distrik pou Baie Lazare dan liv Bidze, mon trouve i annan en proze klinik, mon konnen ki sa i en konsern ki bokou zabitan Baie Lazare in eksprimen.  Me avek tou respe ki mon annan pou sa L’Egzekitiv, nou pa bezwen renovasyon parey mon’n vwar lo sa Bidze.  Sa set en lensilt.  Si zot pe renouvle sa Klinik nou pa pe aksepte.  Sa Klinik ti en lakaz, nou le en Klinik ki nef.  Nou pa le en lakaz ki renouvle.  Nou demann en nouvo klinik avek bann diferan fasilite modern avek lespas. Mon ti’n tonm dakor avek Msye Faure ki premye faz i ava ganny fer an 2018 e faz konpilsyon an 2019.  Mr Speaker, atraver ou, mon pe demann Minis, silvouple reget FSA e son bann Lalwa.  Nou annan en kazino ki apel Liberte Casino Baie Lazare, i anvi sponsor nou bann manrmay lekol avek bann donasyon.  Me FSA avek son bann Lalwa pa permet li.  E la ki sport i ganny entansifye dan Baie Lazare, silvouple les nou ganny nou bann sponsor.  Sa bann larzan i prop les zot envesti dan nou kominote e dan nou zenes.  Mr Speaker; letid lo lapovrete avek progranm URS ; mon panse ki i pa zis pou Gouvernman swazir zis en pe distrik e kit lezot distrik deryer. Si i annan en progranm, annou enkli Sesel antye, pa akoz statistik i montre nou ki nou bezwen zeneralize.  Onorab Ramkalawan in donn nou en bon propozisyon.  Baie Lazare i annan lapovrete egalman Baie Lazare i annan dimoun ki bezwen mont lo sa progranm URS pou ed li dan son lavi dir. Ouswa swiv sa progranm ki Onorab Ramkalawan i fek propoze.  Si mwan konman MNA, mon ti ganny konsilte, mon ti montre zot kote sa bann zabitan i ete.  I pa zis pou en Gouvernman ki sipoze responsab e kapab pran en tel desizyon dan en tel fason.  Mr Speaker, Mr Larose dan son speech in fer en statement, en statement ki si son Egzekitif i annan zorey pou ekoute, latet zis pou reflesir, i met sa statement dan bann aksyon byensir Sesel pou rezouir e son pep pou dezormen vin bann Pti Prens avek bann Pti Prenses dan son pei.  Mr Speaker, an dot mon parey Mr Rene ti deza dir en pti Singapore. Sesel i en goldmine.  I pe espere pou ganny eksplwate, wi Minis, trwa fwa sa lannen, dan mon lentervansyon, mon’n koz lo Sesel i en goldmine me ki nou’n trouve Mr Speaker, nanryen.  Pran nou Lendistri pwason, pran nou pwason, nou Lendistri Lapes, gete lekel ki pe ansarz, etranze.  Dapre resers pa mwan, IOT i pey Sesel lavaler 1 zour e li i benefisye 29 zour. Eski nou pe benefisye avek nou Lor Ble?  Mr Speaker, nou lanvironnman, nou lans, nou ler fre, nou lanmer, tre pe reveni i antre Sesel lo size touris; akoz la pli par sa bann tranzaksyon i ganny fer an deor.  Seselwa i plito benefisye avek zis tir sewage, garbage e nou travayer i perdi bokou mileage akoz laplipar letan zot ganny gete konman enferyer konpare avek etranze.  Ki Gouvernman pe espere pou deal avek sa bout gold mine? Nou soley Mr Speaker, Goldmine.  Nou’n aprann ki nou’n ganny asiste avek bokou Don lo kote photovoltaic e ki benefis sa ti pou anmennen pou sak lakour Seselwa.  Nou ganny soley preski 11 mwan par lannen, i fer lapenn pou trouve Gouvernman pa pe tap dan sa bann don pou benefis son prop pep.  Mr Speaker annan de ler mon panse ki sa Gouvernman i kontan get sa pep konman zis bann sif ki aziste ler pou ganny vot.  Zis pou kit sa minorite o pouvwar e bann ki anler zot kontinyen fer sa pep vin en ki bezwen mandyan e soufer.  Zis pran legzanp drog dan Sesel, en nouvo Komisyoner in kapab met en pe kontrol e ki sa Irlandais ti pe… ki sa bann Irlandais ti pe fer?  Ki zanmen zot in met sa sibstans anba kontrol. Mr Speaker, ki mannyer nou’n kapab les Msye Rene anbet nou e dir nou ki i enferyer pou al bat kannel e anmas koko?  Se pourtan i ti en Lendistri ki bokou nou Sesel ti depan lo la.  Apre tou pa tou nou ki ne pou nou asiz devan en computer ouswa pou nou fer lekol.  Mr Speaker, goldmine se nou bann later, konbyen bout later ki’n kapab ganny devlope pou byennet nou pep ki nou pli vomye vann avek etranze, e nou trouve ki etranze i les sa bann propriyete abandonnen e Sesel i perdi de milyon profi.  Mr Speaker, ankor goldmine, nou lafors travayer Seselwa, eski i pa in ler pou don Seselwa son valer dan son pei kot i ti ava ganny tou sa ki i bezwen pou li devlope e kontribye dan byennet son pei.  Konbyen bann pti group privilezye in deside vol bann bout later e fer milyon profi zis pou zot e anpes bokou Seselwa benefisye, pou zot kapab fer zot lakaz e amelyor lavi zot fanmir e sa Gouvernman i soutir zot.  Mr Speaker, ozordi zot pe fors Seselwa pou pey bokou tax e ki pe ede pou pey bann proze konblaz.  Bokou Kreol pe soufer akoz zot anmenn dan lakour pa bokou larzan.  Later konblaz apard ki lakaz, etranze pe benefisye.  Zot pe fer gro profi, eski pa ti a bon konmsi sa bann biznes i kontribye plis pou pey sa bann site ki’n ganny pou preski nanryen dan plas trangle Seselwa ordiner.  Mr Speaker, ler mon lo sa size, mon pa oule mank sa loportinite pou koz lo bann Real Estate Agent, bokou Seselwa ki pe fer sa biznes, zot in eksprim avek mwan ki sa biznes i ti ganny byen fer dan latransparans, bann abizer dan sa domenn ti a bezwen mazin de fwa.  E nou ti pou anmenn bokou plis larzan dan nou lekonomi.  Zot in eksprim bann difikilte ki zot Seselwa zot gannyen, pou zot kapab eksplwat sa domenn.  Me ki etranze i kontinyen avek bann deal e benefisye ki pei pa ganny preski nanryen.  Mr Speaker, mon panse ki Gouvernman i devret fer neseser pou annan en proper Policy framework lo Real Estate en si byen ki bann Real Estate investment enkli bann FDI akoz ler ou get dan lepase sirtou lo kote bann proze FDI i annan tro bann trik mardaz e nou’n trouve ki Gouvernman pa’n anmas reveni egzakt ki ti pou benefisye pei.  In plis ki ler pou met en lord dan sa ki konsern nou bann goldmine. Mr Speaker, en lot nou bann goldmine, se ki si nou pa fer atansyon pou definitivman fer en lenpak lo Lendistri Lapes, sa se bann azyatik ki laplipar letan atase avek bann Lakonpannyen Konstriksyon, zot in ariv dan tou nou brizan avek tou sort lekipman pe ravaz nou bann brizan.  Tou sa ki zot trouve, zot touye.  Dan nou larivyer, tou sa ki bouze, zot detri.  Eski pa in ler pou nou annan en lord dan sa pei e eski sa Gouvernman pa ankor ler pou sorti dan zot konfor e deal avek sa bann sityasyon ki pe detri nou bann goldmine Sesel?  Mr Speaker, mon pou bezwen sorti en kou lo gold mine me nou pou bezwen konman en Nasyon konmans extract nou bann goldmine pou benefis nou pei.  Mr Speaker, nou’n toultan koz lo partaz larises.  Enn de dimoun i krwar si sa Gouvernman i koup lapey MNA tou keksoz pou aranze, me zot in bliye ki i annan 33 MNA lontan ki pa ti pe travay me sa pa ti en problenm, ozordi i annan 19 MNA LDS ki pe fer sir sa lot 14 i delivre e nou tou nou pe travay dir, me L’Egzekitiv osi tre pe ki pe travay e larestan akoz zot konn bokou keksoz Msye Faure i bezwen fer sir ki i anpese ki zot a vin bann loose cannon e bezwen garanti zot en lapey kot zot a santi zot konfortab.  Mr Speaker, la mon pe koz lo serten PS ki pa pe perform, bann Special Advisors, CEO, Deputy CEO, Sekreter D’Eta eksetera, eski Minis petet dan son summing-up i a kapab donn nou en detay lo si i krwar tou sa bann dimoun pe vreman travay e ki zot pa pe sot lo lipye kanmarad ?  Me mon konvenki ki Gouvernman i merit pran sa lapros ‘Leaner Government’ si i anvi anmenn prosperite pou tou Seselwa. Mr Speaker, MNA ozordi pe fer bokou travay ki devret antre dan Guiness’ Book of Records.  Lasanble pe ranplas L’Egzekitiv, Minis, CEO, PS, Sosyal, name it Mr Speaker, menm Ziz avek Avoka, vwala ki kantite travay ki pe ganny fer me nou rekonpans kantmenm pa tou kou ki pleasant, nou determinen pou baskil sa sistenm oppresser e ranplas avek en sistenm ki zis, modern kot i ava annan mwens mefyans e kot lemonn i a reganny konfyans ankor dan Sesel e Seselwa.  Mr Speaker, pou nou Seselwa zwir nou paradi, i enportan ki nou tou ki’n drwa Sesel avek Seselwa i rann nou, nou bann byen e osi rann nou nou bann larzan.  Si Gouvernman ti’n fer son legzanmen, i anmas tou sa larzan ki endividi, group e lezot ki drwa nou pei, eski ozordi nou pa ti pou kapab ogmant lapey travayer e anpese ki zot bezwen desann anvil pou fer Protestasyon?  Mr Speaker, in ler pou nou donn en dele letan 1 mwan e apre konmans sezi bann byen Malaki e retourn li dan nou lekonomi akoz tou malere zot, zot ganny trangle avek tax ler zot pa peye, tou pti biznes parey.  Alors i devret egalman aplike pou tou sa ki drwa tax.  Mr Speaker, en lot landrwa ki nou bezwen kontinyelman fer labi ki pe kontinyelman fer pri lavi monte e kot Gouvernman pe vwar li pe depanse se lo gaspiyaz e si bann bon planifikasyon dan tou Minister Gouvernman, Parastatal ti aktiv bokou larzan ti pou ganny retournen damn Consolidated Fund.  Senp legzanp se Land Transport, bann Lakonpannyen tel ki PUC, Lakonpannyen Telekominikasyon, eksetera. Koltar fek mete Mr Speaker, PUC i vin kase pou fer pase son tiyo.  Ki kalite sa, Mr Speaker? Motoris pou kontinyen pey cc pli o pou bann semen trou.  Peye i ser, nou pa mind Mr Speaker, me donn nou valer pou nou larzan.  Ler mon lo semen Mr Speaker, mon le ganny leklersisman akoz nou vwar en gran roundabout ki pran tou lespas avek en pti semen pou transpor sirkile. Lekel sa Sef Land Transport ki pou otorize met en zebra crossing lo en Highway 2 lane apre en roundabout? Mr Speaker, pli bon planifikasyon sa Lasanble pe demande.  Aret met nou Seselwa lo death row, nou travay nou pey tax, nou kontribye osi bokou ki lezot i kontribye, donn sa pep son valer.  Dan plas pey en boug pou train lisyen R125 mil; dan pey lisyen pou pran lapis anba delo; dan plas pey etranze pou fer konsiltasyon envestigasyon ki Seselwa ti a kapab fer akoz ki nou pa donn nou pep sa sans. Larzan osi i ale avek Kreol.  Envesti dan nou Nasyon.  Apre tou si ou envesti dan ou pep garanti prosperite sa Nasyon. Mr Speaker, pa kapab terminen san koz lo pri bis ki’n monte. Nou napa problenm me nou ti ava ekspekte ki Gouvernman i ekout SPTC avan pran desizyon. Eski Gouvernman vreman i kontan konsilte?  Mwan mon krwar ki management ti a kontan dir Gouvernman dan plas fer monte pri bis, rod en kou sa ta milyon ki tou-le-z-an nou tande i disparet kot SPTC. Mwan mon krwar ki tou demars i devret ganny vize lo rod sa ta milyon avan deside trangle Seselwa parey zot labitid.  Mr Speaker, semen ki sorti dan Sid Mahe ki pas atraver les Mahe i reste en problenm. Nou demande ki dan sa bann depouyman, sa ki ansarz Land Transport ti a donn nou en plan kler lo ki zot progranm, pou deal avek sa sityasyon e amelyor trafik dan sa rezyon enkli nou proze West Coast Development Baie Lazare ki dapre konpran Petit Anse Development in sponsor, in donn larzan Gouvernman…

 

MR SPEAKER

Onorab, sey round-up.

 

HON FRANCOIS ADELAIDE

Ya.  Pou nou fer nou bann pavement ek bus shelter parmi bann fasilite ki pou fasilit devlopman Baie Lazare. Mr Speaker, Lagrikiltir, Lapes, mon krwar sa Lasanble in koz bokou lo sa size, nou labous in fermal ek koze, tou solisyon nou’n donnen, nou espere ki bann teknisyen dan sa domenn i a donn Minis Pamela tou sipor pou fer sa pilye lekonomi progrese.  Mr Speaker, dan bann zour ki pe vini, nou pou depouy sa Bidze pli byen e la mon a ganny sans bann leklersisman lo nou bann proze dan Baie Lazare me mon pa kapab mank sa lokazyon poudir avek Minister Devlopman Kominoter aret dormi lo plan distrik.  Larzan nou’n donnen, aret fer zabitan tour nor, si zot pa oule vwar zot lo Facebook, dan zournal silvouple, donn nou sa ki nou bezwen, sinon nou pou kontinyen name and shame. Mr Speaker, pou terminen akoz mon ti annan bokou pou dir e mon a plito koupe, Sesel i bezwen bouze. Msye Faure, tou sa travel ek sa gro delegasyon osi nou vwar rezilta. Seselwa i bezwen vin Prens avek Prenses dan son pei. Nou le vwar en Gouvernman ki serye. Si zot pa kapab kile, les LDS travay.  Mon konnen ki gran met i ekout nou, i pa pou zanmen les Sesel tonbe, sa paradi lo later.  Mon enplor tou dimoun dan sa Lasanble, menm ou Minis avek bann MNA Parti Lepep, lev zot lanmen e dir L.D.S Sesel.  Lord Deliver Seychelles! The time has come and the time is now!  Ini pou Sesel, i nepli tan pou fer Seselwa dormi boner.  Dan sa koabitasyon i enportan pou nou ekout LDS e pran tou bann pwen ki LDS i donnen an konsiderasyon.  Mersi Mr Speaker.

 

        (APPLAUSE)

 

MR SPEAKER

Mersi Onorab Adelaide.  Mon ti a kontan demann bann entervenan sey gard within 15 minit pou nou vinabou nou progranm i flow.  Mon a donn laparol Onorab Sophola, swivi par Onorab Larue.  Onorab Sophola ou annan laparol.

 

HON NOLINE SOPHOLA

Mersi e bonn apre midi Mr Speaker, Minis ek ou delegasyon, tou Manm Onorab, zabitan La Digue e Zil Pros e tou dimoun ki pe ekout deba lo Bidze 2018, bonn apre midi.  Mr Speaker, mon napa okenn dout ki sa Bidze 2018 ki nou pe debat lo la, i en Bidze byen kalkile.  I en Bidze ki’n ganny prepare ek konsiltasyon avek diferan Minister, serten Lorganizasyon e popilasyon Sesel an zeneral.  Bidze 2018 delivre anba tenm; ‘’Travay pou prosperite tou dimoun,’’ i ranpli avek potansyel pou benefisye e donn lespwar tou Seselwa. Sepandan, pou reasir atenn sa lobzektif, nou tou nou pou bezwen travay avek bokou plis efikasite, ogmant prodiktivite, annou donn plis rannman dan sak travay ki nou fer.  Mr Speaker, dan en konteks zeneral dan sa Bidze, i annan plizyer mezir enportan ki pou anmenn en lenpak pozitiv pou tou lasosyete. Byensir Mr Speaker, nou tou nou pou bezwen travay ansanm nenport ki bor politik ki nou ete avek tou nou senserite e avek tou sipor nou popilasyon, pou ki nou kree labaz pou donn tou Seselwa en Bidze ankor meyer pou lannen 2019.  Dan nou dyalog avek lepep, annou demann sak sitwayen Seselwa pou pran letan pou analiz sa Bidze byen; pou vwar ki mannyer nou tou nou’n ganny enkli ladan e ki fason i pou benefisye sakenn de nou.  Mon pou fer mon kontribisyon dan sa dyalog ler mon ava tous size rediksyon kou lavi, ledikasyon, provizyon lakaz pou bann ki pe espere, osi byen ki fasilite pou nou bann dimoun aze ki vreman dan bezwen.  Mr Speaker, lo kestyon Pri Lavi sa Bidze in pran plizyer mezir ki pou ede amelyor pri lavi pou fer li vin mwen ser.  Parmi bann mezir mon pou koz lo zis enn ou de legzanp kot en gran mazorite Seselwa pou direkteman benefisye.  Par egzanp, Lagreman Sesel e Maurice in sinyen pandan vizit Prezidan Faure, pou aste e transport bann marsandiz an bulk, sa i annan gran potansyel anmenn benefis pou Sesel e tou Seselwa ki konsonm komodite enporte – a kondisyon ki i ganny byen enplimante.  Mon panse ki nou ava kapab eksperyans en rediksyon konsiderab dan pri plizyer komodite, konsekaman en rediksyon dan pri lavi.  Kot serten labank ki’n redwir lentere lo loan an plis zot in ogmant lentere lo savings.  Sistenm fast track lo Por, sa a fer ki marsandiz pa pou reste lontan dan Por efektivman ava en rediksyon fre ki marsan i peye avan ki marsandiz i ariv dan laboutik.  Lozikman, tou Seselwa i devret pe aste marsandiz pli bon marse.  Dan domenn ledikasyon Mr Speaker, mon pou nonm sa 4.5 milyon ki’n ganny mete dan Bidze anba Dedicated Fund pou lekol.  Sa i an faver nou bann zelev ki pli dan bezwen pou ki zot osi zot santi zot konfortab dan lanvironnman lekol.  Laptop Scheme an faver bann zelev segonder, osi byen ki etidyan pos-segonder.  Sa dan li menm i en fason pou anmenn en nouvo demokratizasyon dan akse avek nouvo teknolozi. Fodre tenir kont servis Wi-Fi piblik kot i annan diferan hotspot ki pou benefisye piblik an zeneral lo sa 3 zil prensipal.  Mr Speaker, lakaz i en priyorite mazer pou leta Seselwa ki sak fanmir i ganny en lozman konvenab.  Alor Bidze 2018 in re konfirm langazman Gouvernman ki par lannen 2018, bokou plis fanmir i ava annan zot prop lakaz.  Mr Speaker, enn parmi nou bann group dimoun ki pli bezwen konfor dan lasosyete, se sirman nou bann dimoun aze.  A mon avi, i ti pou ideal vwar ki tou nou vye paran i reste dan lakour avek zot zanfan, tan ki zot pa bezwen bann swen spesyalize.  Me anfen sa i pa posib.  Dan plizyer ka akoz sirkonstans lavi e mon a presye ki i annan provizyon an faver sa kous sosyete dan sa Bidze. Gouvernman i krwar bokou dan nou bann dimoun aze.  I krwar ki zot bezwen ganny en lozman konvenab kot zot santi zot alez e dan konfor, se pou sa rezon ki sa Bidze in fer provizyon pou bann diferan Lakonpannyen ki enterese pou vin envesti plis dan konstriksyon lozman spesyalman pou nou bann dimoun aze.  Mr Speaker, konteni mon lentervansyon lo kestyon bann merit Bidze 2018, i anmenn mwan ki a sa pwen sezi loportinite pou dir, ki mon kontan vwar ki Gouvernman pe kontinyen antre an partenarya avek prive, dan serten domenn pou agrandi performans ekonomi e sosyal nou pei.  Mon pou donn mon lankourazman pou sa akoz dan konteks nou pti pei, si nou pou gard kontrol lo nou lekonomi fodre ki sekter prive e Gouvernman i travay ansanm.  Sa partenarya i devret al pli lwen ankor sirtou dan domenn konstriksyon lozman sosyal avek bi ogmant lakantite lakaz lwe e freehold ownership. Konsekaman sa avan annan en lefe direk lo pri lakaz lwe.  Mr Speaker, pou kontinyen avek mon lentervansyon, permet mwan tous sa ki Bidze 2018 in annan pou nou distrik La Digue e Zil Pros.  Paran Digwa e Pralinwa, nou konnen i pa’n zanmen fasil pou nou fer debout zwenn kan nou zanfan pe al lekol dan pos-segonder, Mahe, me pare bokou demann ki’n ganny fer e tou resaman nou ti met ankor lanfaz lo nesesite logmantasyon dan allowance nou bann zanfan ki antre dan pos segonder, Gouvernman in finalman ekout nou lapel e ogmant allowance pou sa group zanfan e permet zot tou ganny en minimum R2mil tou le mwan.  An plis fodre pa ki nou bliye ki sa group etidyan zot benefisye avek tiket bato gratwit Ale/Retour tou le mwan pou vizit zot fanmir. Alor paran Digwa ek Zil Pros, nou devret santi nou soulaze pou sa lenvestisman dan nou zanfan. Annou konman bann paran responsab ed tou nou zanfan fer sa depans anver zot letid. Lo menm size, mon krwar i enportan mansyonnen lo non tou paran bann zanfan, se pou demande ki Gouvernman atraver Minister konsernen i fer revizyon sistematik lo kestyon allowance donnen dinamik dan pri lavi e donnen posibilite ekonomik reel nou pei.  Nou tou bann paran, osi byen ki tou etidyan La Digue ek Praslin pe demande ki Bidze 2018, i fer provizyon pou rekonstriksyon Youth Hostel avek bi anmenn li lo en lot standar; kot i ava ganny bann fasilite modern e ava kree en lanvironnman letid pli konvenab.  An plis Mr Speaker, anliny avek progranm lenvestisman Gouvernman anver bann zenn Praslin ek La Digue.  Malgre tou bann kritik mon konnen i annan en nesesite pou travay lo en plan oubyen antre dan en lagreman avek sekter prive pou konstri plis fasilite lozman avek bi asiste nou bann zenn Digwa ek Pralinwa pou bann ki’n fini lekol e pe kontribye lo devlopman Sesel lo Mahe.  An plis nou annan tou sa bann zenn ki pe aprofondir zot letid apre pos-segonder, zot kot Liniversite Anse Royale oubyen Guy Morel Institute.  I ti a byen pou ki Liniversite Sesel i annan son prop campus rezidansyel ki kapab benefisye bann etidyan ki sorti Praslin ek La Digue.  Petet osi etidyan ki annan rezidans permanan lo Mahe, ti ava osi kontan servi en tel fasilite si i annan lespas.  Mr Speaker, Bidze 2018 pa ti pou konplet si nouvo lekol La Digue pa ti’n ganny met ladan.  Wi sa i en tre bon nouvel pou Digwa.  Sa lekol pou kout anviron 42 milyon, sa i en gran reisit pou tou zabitan La Digue.  Nou selebre sa gran lakonplisman e nou swete ki tou i mars byen e nou pasyante pou selebre plis ankor zour ki pu annan son louvertir Ofisyel.  Digwa ek Zil Pros, zot osi zot pou benefisye avek zot prop lakaz. Dan L’Union Estate, en sonm 15 milyon 300 mil in ganny mete pou konstri 18 lakaz e lo ex-Sophola, 3 milyon 400 mil pou bati 4 lakaz, sa i fer en total 22 lakaz pou 22 fanmir. Bann fanmir lo Silhouette zot pou ganny zot lakaz.  Mr Speaker, mon tre satisfe ki Gouvernman pe rod plis lozman pou bann dimoun aze.  Me mon osi apresye ki en sonm 15 milyon in ganny enkli pou renovasyon bann Home ki an egzistans, espesyalman sa home La Digue. Nouvo lopital La Digue, finalman – en bon nouvel pou tou Digwa ki lontan nou ti pe espere, en provizyon 25 milyon in ganny mete dan Bidze 2018 a 2020 pou lenvestisman dan konstriksyon nou nouvo lopital ; konplet avek nouvo fasilite out patient dapre son Master Plan.  Nou tou san eksepsyon nou apresye sa devlopman, me nou annan en konsern lefe ki apre tou sa espere, dan prozeksyon i selman an 2020 ki nou pou vreman vwar sa batiman dan tou son lanpler.  Fodre ki Digwa i konpran byen, akoz nou pou bezwen espere sa i akoz lenplimantasyon sa proze i dan 3 faz lenvestisman.  5milyon an 2018, 13milyon an 2019 e 7 milyon an 2020.  Mr Speaker, nou konpran prozeksyon lenvestisman pou nouvo lopital La Digue me lo non tou zabitan La Digue mon pe demann Gouvernman pou revwar lenplimantasyon sa proze e fer tou sa ki posib pou fer sa lenvestisman dan en peryod selman 2 an.  Proze semen i annan bokou ki’n ganny mete dan Bidze 2018.  La Digue nou pou benefisye avek de ladan. Premye travay lo semen Vanilla pou termin lannen 2018. Semen Gro Ros pou ganny amelyore travay pou al pou ldapre Plan.  Mr Speaker, nou apresye lenvestisman lo semen gro ros, nou Digwa nou konnen ki sa landrwa i danzere.  Kestyon in ganny demande dan Lasanble, e lo non tou zabitan La Digue, mon pe ensiste ki provizyon crash barriers i ganny mete lo serten bout sa semen. Nou reste pozitiv, akoz personn pa ti ava kontan fer fas avek okenn aksidan petet menm fatal avan ki nou bouz ver aksyon konkret.  Mr Speaker, privatizasyon parey Minis in fer resorti, i devret anmenn lefe pozitiv lo sa Kominote e pei an zeneral.  Mr Speaker, dan son prezantasyon Minis in dir, ki i deza annan en dimoun prive ki pe montre lentere pou partisip dan privatizasyon L’Union Estate.  An plis Minis in koz lo privatizasyon en lavan ‘Shares’. Tou Digwa i oule vreman konnen e konpran ki Minis pe vreman deside fer. Mr Speaker, size privatizasyon L’Union Estate i reste en size sansib e delika, e i tre enportan ki sa bann fakter swivan i ganny byen konsidere.  Premyerman fodre ki nou konpran e apresye listwar vre natir L’Union Estate.  Nou bezwen aprofondir dan akoz ki i ti bezwen pas atraver lakizisyon.  Fodre byen note Mr Speaker, ki sete Digwa avek lezot Seselwa ki ti debout kont en proze lotel ki ti pou fer Source D’Argent ki ganny trouve dan L’Union Estate.  Anfen tou Digwa pe vreman espere pou ganny eksplike lo vre lentansyon Gouvernman. Mr Speaker, pou terminen lo kestyon 2018 an fas avek bann bezwen pou La Digue, mon oule egalman fer sorti ki nou ekspekte ki bezwen nou lazenes i seryezman ganny get ladan.  Dan sa konteks lo non lazenes La Digue osi byen ki lazenes Seselwa, sportman Seselwa mon pe demande ki imedyatman Minister konsernen i bouze e egzekit travay renovasyon lo serten fasilite ; tel ki dormitoire ki bokou lekip sport i servi ler zot vin La Digue.  Library i osi en gran konsern e ankor lo non tou zabitan La Digue mon pe demande ki Minister konsernen i bouze e fer sa ki neseser pou met sa fasilite dan en kondisyon bokou pli favorab.  Mr Speaker, permet mwan eklersi serten dout e konsern ki nou annan vizavi sa Bidze zeneral, ou menm met devan serten sizesyon.  Apar ki bann mezir zeneral ki sa Bidze pe pran pou adres pri lavi dan pei, nou pa’n vwar nanryen an relasyon avek La Digue avek Zil Pros spesifikman kot kou transportasyon marsandiz e materyo konstriksyon i konsernen; ki nou tou nou konnen i en fakter ki pe afekte pri lavi nou bann zil.  Nou ti a sizere ki sa i ganny adrese dan sa Bidze par en mekanizm ki pou soulaz kou transportasyon pou Digwa ek Pralinwa akoz sa i en problenm ki nou ti fer resorti a lokazyon deba lo Bidze 2017.  Homecarer nou ti a kontan ki Minis konsernen i reevalye servis Homecarers e ki nou ganny meyer swen pou nou bann dimoun aze. Pou fast tracking lo Por, nou ti a kontan vwar en seksyon separe pou La Digue ek Praslin e sa i ava ede pou redwir kantite letan ki marsandiz i reste lo Por e osi redwir kou i koute pou marsandiz ler i ariv lo nou zil. Mr Speaker, mon senserman krwar ki sa Bidze i annan bokou plis merit ki febles, e o non zabitan La Digue ek Zil Pros mon pare pou donn mon sipor.  Mersi Mr Speaker.

 

        (APPLAUSE)

 

MR SPEAKER

Onorab Henrie ou oule koze konmela?  Oubyen ou pe fer en lo sa ki’n ganny dir? Ok, go ahead.

 

HON GERVAIS HENRIE

A point of clarification, Mr Speaker.

 

MR SPEAKER

Pardon?

 

HON GERVAIS HENRIE

Mon dir en pwen klarifikasyon.

 

MR SPEAKER

Ok.

 

HON GERVAIS HENRIE

Onorab ki’n fek koze in fer en mansyon ki bann zabitan La Digue pou ganny zot prop… Silhouette pou ganny zot prop later – donk … konmsi mon ti a kontan ganny en… akoz si mwan mon konpran byen se ki Silhouette dimoun napa drwa annan… Si i ti kapab klarifye sa pou nou? Silhouette zot napa drwa annan later.  Mersi.

 

MR SPEAKER

Onorab Sophola, bann zabitan Silhouette avek later, ek lakaz. Ale redir.

 

HON NOLINE SOPHOLA

I sanble ki Onorab pa’n ekout byen.  Mon’n dir zot pou ganny zot lakaz akoz ler, avan Bidze mon’n koz avek sa bann dimoun dan sa distrik, mon’n koz ek DA, zot non i lo lalis dan serten distrik, sorry lo Mahe pou zot ganny zot lakaz.  Mersi. Dimoun ki reste Silhouette ki pe travay Silhouette zot sorti dan diferan distrik lo Mahe e zot pou ganny zot lakaz.  Mersi.

 

MR SPEAKER

Ok i kler. Alright.  Order! Order! Mon krwar sa i klarifye keksoz.  So Onorab Henrie in klarifye.  E nou a donn laparol Onorab Larue swivi par Onorab William.  Onorab Larue.

 

HON FLORY LARUE

Bonn apre midi tou dimoun.  Mersi Mr Speaker.  Mr Speaker, mon komans mon larepons lo Bidze 2018, parey mon ti komans lo sa enn 2017.  Dan sa dernyen 5 an nou’n vwar nou Bidze double. Sa bann gro sif in ganny donnen pour fer fonksyonnen tou sa bann servis ki Gouvernman i ofer.  Me 1 an apre ki nou ti vwar sa Bidze 2017 kwa ki’n sanze pour Seselwa? Eski sa bann larzan pe ganny servi pou donn servis dapre I devret?  Eski Seselwa pe ganny mete o sant devlopman?  Ler nou vwar sityasyon logmantasyon lo tiket bis in sorti R5 pour vin R7.  Me pri bis ti deza oparavan R7 me an Zilyet 2010 pri bis ti desann pou vin R5; eski Gouvernman in sey ofer alternativ pou tir presyon lo sa sistenm?  Sa sityasyon i montre en mank planifikasyon lonterm pour etablir en sistenm transpor kominal ki swa prive ouswa piblik, me ki kapab delivre sa servis ki nou pep i vreman bezwen.  Sa bann keksoz i pran letan pour etablir e san planifikasyon, se mazorite dimoun ki soufer a lafen.  Ozordi realite finansyel lemonn i montre ki tou keksoz i monte e en Gouvernman ki responsab i rod fason pour ed son popilasyon pour prepar pour sa bann sanzman.  Mr Speaker, sa bann labi ek mank responsabilite lepase, i en fardo enorm lo sa popilasyon e Gouvernman ozordi pe transmet sa, lo popilasyon.  Eski Gouvernman pa pou rann kont?

Lannen pase bokou bann persepsyon koripsyon in ganny aksepte koman en realite.  Bokou sa bann labi tel ki sa gro $50 milyon Dolar nou pa tann nonmen.  Nou’n ganny en nouvo Attorney zeneral resaman, eski i pou asiste lenvestigasyon pour rod larzan Seselwa?  Dan sa ladministrasyon ki kontinyen koz lo “latransparans, rann kont e bonn gouvernans” personn pa ankor bat avek okenn dokiman pou dir nou oli sa larzan ki Msye Danny Faure li menn ti dir ki wi ti ganny donnen ek pep Seselwa?  Msye Danny Faure, Seselwa i ankor pe esper en larepons apre plis ki 1 an ki ou’n pran sa pos Prezidan.

Tenm Bidze 2018, i “Travay pour prosperite tou dimoun.”  Eski savedir nou pou travay depi ozordi pour sa prosperite?   Oli rezilta tou travay sa ki nou pep pe kontribye pandan tou sa lannen?  Ankor mon anmenn a zot latansyon ki dan sa dernyen 5an Bidze in double e i pres pour ariv R8 bilyon.  Nou pou bliy lepase ek tou bann labi ki’n anmenn nou kot nou ete?  Akoz pa bliye ki koripsyon i fer en pei vin pli pov.  Enn bann komodite rar dan sa pei i later.  Eski Msye Danny Faure pe travay lo en keksoz pour fer Parti Lepep rann sa 40 bout later ki SPPF in pran ek Seselwa ki kapab anmenn plis prosperite?   Eski i pou rann nou kont tou bann biznes Gouvernman ki pe lwe batiman avek Parti Lepep; savedir zot pe anrisi zot lekor atraver larzan Leta?  Eski zot pou rann piblik Seselwa “Maison du Peuple” ki dan li menm i dir ou i en batiman ki pour Seselwa?  Eski zot pou fer sa bann zes pour nou vwar prosperite ekivalan pour tou dimoun parey zot pe prononse dan Bidze?

Bokou koripsyon pour ganny devwale dan lannen ki pe vini. Deza FPAC in devwal en ka kin anmenn li direk State House.  Eski nou dan sa Lasanble nou pa bezwen konsider retir iminite 3 an lo bann ansyen Prezidan, ki nou a kapab fer tou bann lenvestigasyon e montre ki dan nou pei personn pa pli o ki Lalwa?  Pou fer sa nou bezwen ki lot kote latab, i zwenn nou pour anmenn lazistis e “rann kont” pou amann Konstitisyon.  La nou ava vwar si vre Msye Danny Faure i serye pour “rann kont e anmenn latransparans.”

Minis i dir ki sa lannen Bidze i konpletman diferan ki okenn lezot Bidze akoz in annan bokou konsiltasyon.  Sa se akoz nou dan LDS nou’n dir ki dan sa Lasanble fodre dimoun i fer li ‘Zot Lasanble.’  Fodre ki i annan konsiltasyon.  Ozordi pep Seselwa i enterese avek devlopman zot pei e responsabilite bann ki zer larzan pour devlop zot pei.  E sa i osi fer ki pour 2enm fwa Seselwa i enpasyan pour depouy sa Bidze.

Minis Larose in fer kler ki i pe prezant sa Bidze pour lannen Finansyer 2018 anba ladministrasyon Prezidan Danny Faure.

Sa Bidze pa en Bidze LDS, se bann diferan Minister dan Gouvernman Parti Lepep ki’n prezant zot demann finansyer avek Minister Finans e la nou isi dan sa Lasanble nou pou demann kestyon.  Mr Speaker, Dokter Larose i dir ki sa Bidze 2018 i en dokiman ki pe ganny byen antisipe par lepep Seselwa.  Wi akoz dimoun i bezwen planifye zot biznes pour zot prozekte zot bann devlopman e envesti dan lefitir.

Eski Gouvernman li i annan en plan ki dimoun i kapab idantifye avek e sirtou depann lo la?

Nou pli gro defi i nou groser, e sa ki pase dan lemonn eksteryer, i kapab afekte nou pei tre vitman akoz nou enport bokou komodite.  Alor i enportan ki Seselwa i pense lo nou abilite koman en pei pour kapab sirmont en kriz finansyer.  Me eski Gouvernman i diskit antre zot pour ki en defi finansyer i kapab ganny abzorbe par en lot sekter pour deflekte lenpak pour pep Seselwa si an ka i arive?  Nou devret met bokou lanfaz lo devlop nou abilite pour prodwir lokal e pour aste e konsonm lokal.  Me yer swar lo televizyon in montre vizit Minis pour Lagrikiltir Madanm Charlette lo Praslin e an 2017 sa Gouvernman pa ankor kapab fer en labatwar pour sa zil?  Sa prodikter i ganny limite akoz i pa kapab vann son prodwi ek lotel.  Be sa pei i annan en plan pour fer son pep vin en pep ki kapab soutenir son lekor?  Konbyen lannen zot bezwen pour konnen ki sa i en nesesite de baz pour ankouraz prodiksyon lokal e konsonmasyon lokal ki osi pli bon pour lasante.  En pep pli an bonn sante I osi en polisi Minister Lasante.  Eski zot kominike pour met an plas bann bezwen pour ki tou Minister i zwenn son bi?  Mon kontinyen demann mon lekor tou sa lannen kot nou larzan in ale?

Mr Speaker, nou’n vwar en nouvo Minister Lafanmir, Lazans Pour Prevansyon Labi drog ek Reabilitasyon e Lazans kont Lapovrete.  Nou anvizaze ki apre sa premye lannen travay zot a kapab donn nou en meyer nide lo zot bann lakonplisman e ki sanzman e benefis zot in anmennen.

Fotespere ki bann lazans pe kominik avek bann Minister respektiv pour asiste sakenn zot dan zot manda.  Sa 3 nouvo striktir ki monn mansyonnen in vwar zot kreasyon akoz sa defi Nasyonal ki pei pe traverse avek sa gran poursantaz dimoun ki’n tonm dan lalkol, drog e souvan dan en lavi krim.  Nou pei resaman in vwar en seri krim e bokou in ganny devwale lo medya sosyal.  Nouvo Komisyoner Lapolis i fek vin dan son post, me Seselwa pe met bokou konfyans dan li pour anmenn en rekour.  Seselwa pe rod plis aksyon sever kont bann kriminel, me nou tou nou konnen ki sa i en serk visye.  Alor tou sa bann Lazans i bezwen rod sa balans korek pou nou bouz devan. Sitwayen i bezwen ganny edike lo zot drwa e nou bezwen reget nou lalwa pour ed dimoun protez zot byen.  Eski nou devret permet dimoun met bann sistenm sekirite ki annan sistenm servi bann fil elektrik ki donn sok, pour deter bann kriminel parey nou vwar Sid Lafrik toultour nou propriyete? Eski nou’n vreman ariv sa staz?  Tousala i bann kestyon reel ki nou bezwen fer fas avek akoz a la fen Seselwa pe rod solisyon dan zot lavi toulezour.

Mr Speaker sa i anmenn mwan lo en lot size ki afekte nou tou se sa logmantasyon polisyon ki nou propaze atraver salte.  Nou zet par lafnet, nou zet anba miray nou vwazen letan nou pe desann olye met kot bin e sirtou nou les tou nou salte lo lans e apre mare o tousala i al dan lanmer.  Nou polye nou labote inik nou pei, rezon e baz prensipal nou Lendistri Tourizm ki enn bann lendistri ki kontribye anver sa Bidze.  Minister Lanvironnman i bezwen rod en fason pli efikas pour anmenn solisyon atraver swa ledikasyon ouswa penalizasyon, me i pa kapab kontinyen koumsa.  Sa Minister i osi bezwen regard byen dan bann distrik bann sit ki ganny frekante par bann voler ouswa droger pour kasyet zot bann aksyon akoz in bwaze ouswa abandonnen e pran bann aksyon neseser.  Dan Bidze Minis i koz lo lenplimantasyon en Konsey Rezyonal kot tou MNA pour kapab partisip dan bann miting.  Sa a fer ki letan Bidze in ganny pase nou bann MNA nou kapab kontinyen regard sa depans lo nivo distrik e devlopman ki pe ganny fer. Pour le moman kominikasyon avek Ladministrasyon Distrik Anse Royale.  Dan mon ka i difisil e parfwa zot pa reponn okenn mon kominikasyon. Fotespere avek sa nouvo DA ki fek komanse i a donn en sans pour kree en lyen kominikasyon.  Mon annan R40 mil pou donn bann zanfan ki viv avek dezabilite dan distrik Anse Royale me mon’n ganny dir ki DA napa en lalis ki a zour.  Sa lalis ki zot annan plizyer zanfan in fini vin adilt.  Be ki mannyer zot planifye bann bezwen sa group zanfan dan distrik?  Ankor ou vwar en group dimoun vilnerab i ganny neglize?  Mr Speaker, Bidze i osi koz lo en stasyon tenny dife ki pour ganny konstrir Anse Royale.  Mr Joseph Francois ti eksplike ki sa Stasyon pour ganny mete lo sa Sit ki pour le moman I annan en “stage.’’   Sa later ti’n ganny demarke koman en landrwa lwazir dan plan devlopman Beach Park Anse Royale ki yer swar ti ankor lo sit web MLUH e i ankor demontre en fasilite lwazir.  Alor oli plan pour sa nouvo Stasyon Tenny Dife? Kote sa i sorti?  Ankor napa planifikasyon?  Depi an 2007 Anse Royale ti sipoze ganny en Stasyon Tenny Dife tanporer ki ti pou swiv par enn permanan dapre Mr Morel letan zot ti aste 6 nouvo fire tender. La an se moman sa devlopman pa ni kler avek sa nouvo lenformasyon.  Kote nou pe ale?  Mr Speaker,

Dimoun i fatige viv koumsa!  Bann ki’n ganny problenm semen Mont Plaisir ek Val D’Andorre ki bezwen “reverse” plizyer fwa dan zot traze pou al travay e antre kot zot akoz sa bann semen i ganny frekante bokou.  Zot in fatige Mr Speaker.  Zabitan tou bann distrik i fatige ek bann promes dan vid ki apre pa zanmen marteryalize.  Alor fotespere sa bann Konsey distrik I vin efektiv boner lannen prosenn pour donn dimoun plis larepons konsernan bann devlopman pour zot distrik e fasilit bann servis ki bann administrasyon distrik i sipoze delivre pour zot planifye zot lekor.  Piblik i le vwar en plan pour soulaz zot bann difikilte e larepons atraver en plan pour rezourd zot bann konsern.

Mon pwen final Mr Speaker i en tenm ki sorti atraver bidze antye.  Minis i koz lo lenerzi soutenab e isi Sesel nou annan nou Seychelles Energy Commission ki’n ganny etabli depi 2009 e dan son lalwa son lobzektif i “ … ensure the provision of adequate, reliable, cost effective and affordable energy while protecting and conserving the environment.”  Ankor depi 2009 napa plan pour ki pep Seselwa ivwar lenplimantasyon e aktivite sa Komisyon an pratik.  Telman napa kordinasyon nou vwar nek an 2020 ki SPTC pou azout bis ki “energy efficient”. 11an apre ki sa komisyon in ganny etabli e apre tou sa bann lannen ki STB pe promot Sesel “as pure as it gets” nou vwar nou bloke deryer en Tata ki pe mont La Misère ki pa “pure” ditou.  Nou bezwen esper 3an ankor pour ganny sa bann bis.  Tou sa batiman nef ki Gouvernman i konstrir avek GICC atraver PPP, zot pa fer kordinasyon avek komisyon pour met ni “photovoltaic” lo twa pour servi lenerzi soley e ni ranmas delo lapli.  Eski vreman i annan en plan “to go greener?’’  Me solman Central Bank li depi 2013 in fer prosedir pour met sa sistenm lo zot twa.  Eski sa Komisyon pe travay avek PUC, Planning e lezot departman ouswa sakenn i fer pou li? Eski zot Komite i annan en plan?  Akoz eski nou bezwen al fer solar farms letan bann twa lakaz e bann batiman biznes pa ankor ganny servi? Mr Speaker Later Sesel i presye, eski Gouvernman in get tou son opsyon a lonterm avan fer solar farm lo zil Romainville? Eski sa i nou meyer opsyon?  Mon dir sa akoz nou pa ti a kontan ki sa i fini parey servis desalinasyon ki li osi in kout pei e ankor pe kout pei bokou?  I byen nou ganny donasyon, me nou bezwen fer letid pour nou bezwen e non pa pran tou sa ki vini akoz pe donnen e apre i kout ser e I pa anliny avek plan devlopman e Polisi pei.  Sa sekter i ankor dezord.  Si in ti’n fer lenerzi vin pli disponib e pli bon marse i ti pou soz bokou bann kou dan fer biznes.  I pa tro tar.  Me en bon plan nasyonal kordinen i enperatif pour fer pri desann e dimoun a vwar benefis e an menm tan fer en lenpresyon lo lasenn enternasyonal.   Zeneralman sa Bidze i reflekte sa enn lannen pase akoz napa en gran logmantasyon.  Me pour mwan mon vwar i mank en plan Nasyonal kordinen akoz sa sityasyon bann Minister travay zot tousel sakenn dan en kwen, pa pou marse.  Fodre i enklisiv e i enkli nou bann decision-makers isi dan Lasanble Nasyonal.  Rezilta bann Pti Rwayonm dan sak Minister pour 40 an in donn nou en rezilta ki nou tou nou pe sibir konsekan.  Proverb I dir si ou le en lot rezilta fodre sanz fason fer.  Ankor parey Onorab Ramkalawan in dir State House i kler letan i dir lo paz 3 ki fodre nou sanz nou fason panse akoz I kler ki sa I annan en lenpak direk lo nou Bidze.  Alor annou bouz devan avek en lespri ouver e en nouvo fason fer, e nou pour fer li pour Sesel.   Mersi Mr Speaker.

 

(APPLAUSE)

 

MR SPEAKER

Mersi Onorab.  Nou donn laparol Onorab William swivi par Onorab Roucou.

 

HON WAVEN WILLIAM

Mersi Mr Speaker.  Mr Speaker Minis in prezan sa Bidze Mardi pase pep in ekout, pe analiz pe reflesir.  Mr Speaker mon pou komanse par dir ki mon felisitasyon ek remersiman senser, i al anver tou seselwa ki’n kontribye direk ou endirekteman ver provizyon pou Bidze 2018, ki pli o Bidze dan listwar Sesel ziska prezan.  En mo partikilye pou sa Seselwa ki a nenport ler in pare pou travay, bann ki lev-e depi 5er bomaten pou li al pran premye bis ki sorti lo Depot, pou li al donn son kouraz dan sekter prive e piblik; spesyalman bann ki dan sekter prive, ki nou rekonnet, i moter nou lekonomi.  Nou vreman apresye zot devosyon e determinasyon pou touzour patriyotik e pe fer sa diferans.  Mon met lanfaz lo sa kategori dimoun e sekter, akoz zot pli vilnerab pou fer fas ek sekous sosyo ekonomik lefe ki zot saler pa garanti parey dan sekter piblik.

Mr Speaker,  si sa travayer i lo semen 5er pou ganny sa bis, i montre sa komitman e sa responsabilite anver son travay, ou osi demande, keler in lev-e e kwa ki’n bezwen fer avan sot lo semen, prenon kont kalite lavi sa group fanmir dan sosyete.

Mr Speaker ek sa group endividi ki, swa dan sekter prive e piblik, ki mon demann Gouvernman pou gard sa pri bis R5 e konsider fer monte pri bis pou etranze e revwar ki kote larzan adisyonnel kapab ganny trouve pou ed SPTC donn sa bon servis.  Sa Seselwa i vwar sa benefis direk lo sa pri bis, tandis ki bann ki lo papye, i tann pe ganny dir, i pou benefisye, me lafen di-mwan i pa vreman trouve letan i bezwen pey an plis pou servis e komodite ki monte otomatikman san avertisman

Sa ava en siny rekonesans e koman en benefis direk pou fanmir Seselwa, ki servi bis pou tou lokazyon, sa i a en soulazman pou zot ki bezwen servi plis ki en bis pou fer zot bezwen; swa dan lasemenn ou dan wikenn

Mr Speaker mon osi demann Gouvernman pou osi donn valer e en saler merite pou sa bann travayer ki annan lannen leksperyans e konesans ki pe travay akote bann ki annan Diplonm ouswa Doktora, tou lede zot konplemant zefor kanmarad, pa fer sa enn ki napa Diplonm santi li pe ganny defavorize.  Prenon kont ki tou i permetab me pa tou ki posib e benefisyab dan lavi, i enportan koman en nasyon, koman en Gouvernman e koman en Lasanble e pep an zeneral, ki nou konpran e aksepte nou realite koman en pti pei, Leta Zil, lwen ek bann gro marse, limite ek resours dan tou son dimansyon, ki depan lo enportasyon ki koute, ki napa kontrol lo bann fenomenn tandans devlopman enternasyonal, ki endirekteman ouswa direkteman afekte nou lavi, nou fason viv e nou bann plan. Petet letan prezidan France Albert Rene, ki mon rapel tre byen in toultan met devan nou ki nou lekonomi i frazil e ki nou dan en sityasyon vilnerab, baze lo sa bann spesifisite ki mon’n nonmen.

Dan konteks nou partisipasyon lo lasenn enternasyonal, se sa menm refren ki mazorite nou Manm Lasanble nou inifye pou fer larestan lemonn konpran nou sityasyon vilnerabilite.

Dan sa konteks, politisyen i annan en latas pou ede fer pep konpran sa realite e edik li pou adopte, e formil son fason viv ek sa vre realite son lanvironnman, me non pa dan enn ki fo e ranpli ek desepsyon, mank lenformasyon e konesans sa fo realite

Mr Speaker nou Lasanble pou bezwen tonm dakor lo plizyer pwen konmen e koman politisyen pou donn bon direksyon pep Seselwa

Annou pa koz lo linite, enklizivite, pa kit personn deryer e met pep o sant devlopman, ler nou parol e nou aksyon pa kordinen, me zot opoz kanmarad.  Pa konfiz nou pep

Annou pa zis koze e fini par koze.  Koman politisyen annou konsernen e annan sa sans konpasyon pou konpran ki pa tou ki ti ne, annan e ki pa tou ki’n sanse pou ganny serten privilez e lavantaz dan lavi.  Annou vreman asir touzour sa enklisivite pou sitwayen pran ownership desten Sese.

Mr Speaker pep Grand Anse zot in anvoy mwan isi pou vin zot lavwa e pou koz pou zot.  Mon pou koz an zeneral dan mon ladres e fer resorti serten konsern e tous serten sekter e fason konportman ki enportan ki Gouvernman e tou akter kle dan devlopman Sesel zot tenir kont, pou amenn en amelyorasyon

Mr Speaker, servis piblik bezwen amelyor zot performans – parey zot job description i demande, zot ganny peye pou fer sa.  Sepandan i vre ki Gouvernman bezwen rekonnet e valoriz plizyer kad travayer ki merit ganny en pli meyer saler e rekonpans.  I byen pou serten manifeste, ki’n fer li pou deklans aksyon, e ki nou pe vwar dan Bidze.  Mon panse ek formasyon bann diferan linyon sa bann prosesis negosyasyon a pran en lot dimansyon,   Sa zafer demen tanto, larzan lepep pann ganny vote pou gaspir letan kanmarad  Larzan inn ganny vote e pou ganny vote pou donn touzour sa meyer servis e larzan inn ganny vote pou fer keksoz bouze.  De fwa nou servi nou pozisyon koman klou e marto.  Sa bann ki larg nou lanmen, nou les li pase; sa bann ki pa soutir nou kapris, nou fer sir nou klout li e fer son lavi malere e ki i degoute.

Serten zofisye, ou a krwar zot annan en lakord, zot get sa endividi, zot anmar son lipye e larg son lanmen, koumsa ya tatonn-en e skente ek fristrasyon pou vwar son rezon , de lot kote i annan osi, ki vwar ou pe bouze, zot anmar ou lipye ek en bwe.  Tandis ki etranze i fer sa ki i oule e byento, i vin pli Seselwa ki Seselwa, silvouple annou pa fer lavi nou sitwayen malere e mizerab; ki olye vwar larzan pe antre dan son pos, ek sa bann lenfirmite ki i gannyen i vwar son rezerv mete de kote pe deklinen menm.  Akoz serk visye sistenm e fason servis piblik, ki mon demande i sanze pou lanmour Sesel.  Mr Speaker, Sesel i pour Seselwa, mon repete, Sesel i pou Seselwa, pou kontinyen sa devlopman soutenab, nou bezwen etranze pou vin donn nou koudmen, wi, me mon demande ki Gouvernman i regard son Polisi, son bann striktir e bann lalwa an plas, ki a retir sa diskriminasyon ouswa defavorizasyon sa Seselwa kont etranze, kot i pa merite.  E ki sa etranze, i pa abiz nou zenerozite akoz inn ganny en privilez.

En zenn garson 21an, in antre dan lanplwa depi 18an in antre dan lanplwa resaman, mon a rakont zot ki i ti dir mwan. I dir ek mwan kot in ganny anploye dan Lizin, tou Seselwa i ganny trete parey.  I dir mwan son anplwayer inn fer vini en etranze; sa etranze i ganny menm saler ek li, si i oule al lo lans, i pran bis e pey menm parey .son anplwayer, in bezwen pey G.O.P, tiket, manze, landrwa reste e delo ek elektrik.

An grosso modo, Mr Speaker, i demann mwan, ant sa etranze ek li – lekel ki pe pli byen pase?  E deplis sa etranze pa pe kit larzan dan lekonomi sesel, mwan mon pe depans dan lekonomi Sesel, tandis ki li, i pe anvoy preski tou son larzan deor.  Laba kot i pou vo plis, ki fason i pa pou santi li an sekirite, e pou esey fer desann serten son bann dalon e manm fanmir, Sesel. I ti dir mwan osi ki serten Seselwa bezwen sanz zot fason mazinen e travay olye fye lo lezot.  Mr Speaker, lalwa devre les sekter prive negosye zot kondisyon saler de-baz ek sa bann travayer etranze, ki Seselwa pa santi defavorize.

Si sa Lakonpannyen i kapab ganny en zouvriye pou en saler ki anba minimum wage e ki sa travayer etranze in dakor, les li, pa fors li donn travayer etranze an plis ki travayer Seselwa, ki pe fer menm travay, me ler ou azout son bann lezot benefis, son deal i pli meyer ki pou sa Seselwa.  Mon enplor Gouvernman pou antre an konsiltasyon ek sekter prive avan fer Lalwa, akoz zot pe viv sa leksperyans e konn sa realite pou ede fer lalwa pli meyer.

Mr Speaker, koze lo semen, koze la deor, i lo kout lavi.  Saler, ensekirite e vol, se sa bann size ki pe preokip lespri bokou dimoun, sirtou kot i konsern larzan, larzan ki pa zanmen ase pou fer de bout zwen.

Mr Speaker, prenon kont sa plizyer fanmir ki dan bezwen, sa zenn ki’n kit lekol e ankor pe rod en travay, sa enn ki pe esper en lakaz, sa bann ki anvi kre en pti biznes e ganny en living pou soutenir zot fanmir, fodre ki pei i annan pli meyer kondisyon e lanvironnman pou sekter prive kre sa larises pou satisfer sa bann bezwen e laspirasyon pep.  Gouvernman bezwen zis asir bon Polisi e Lalwa apropriye pou liber sa moter lekonomi pou transform dinamik ekonomik Sesel.  Mon demande ki Gouvernman atraver son bann minister e lazans i double zefor pou koup gaspiyaz e minimiz diplikasyon travay, pour ki resours i ganny byen servi.

En lenstans kot mon santi devre kapab revwar ankor, se dan Bidze, Minster Lafanmir, Lazans pou elimin Lapovrete e Lazans pou Drog. Nou souvandfwa koz lo sa sinerzi ant bann Department e Minister.  Mon pe vwar ki sa sinerzi parmi sa 3 antite devre kapab pli byen marse e konpletmant zefor kanmarad.

I annan serten depans entertainment ki merit ganny koupe dan bann minister parmi lezot, tel parey koup lo servi transpor pou deplasman kot souvandfwa pou en vizit, plizyer transpor i ganny servi ki ti kapab ganny ekonomize, akoz nou pe vizit menm Sit. Mon ti pas dan en leksperyans dan vizit Prezidan kot souvandfwa mon ti vwar mwan deryer, akoz sa ta transpor ki ti dan motorcade, la mon pa pe dir ki Prezidan ki’n dir zot fer li koumsa, me ki pa ti merite.  Letan ti perdi zis pou park dan sa konsesyon transpor,

Mr Speaker, Sesel koman en pti Leta Zil, ki anvi reste lo en semen soutenab devlopman e reste azour avek tandans devlopman global, e ki pep Seselwa e Sesel, pa ganny kit deryer, pou bezwen byen balans sa partisipasyon, dyalog e rekonesans e respe rol sak partner dan sa partenarya sekter piblik e prive,

Mr Speaker, mon pa konn ou, ouswa lekspektasyon lezot Manm lo sa size, be mon konn laspirasyon bann zenn, bann Mwayenn- Az e bann Trwazyenm-Az dan mon distrik, tel parey trouv zot ti loan aprouve, vwar zot lakaz ganny fer lo zot kare later, amelyor zot kondisyon lavi e progrese an dot mo.  Mon ti a kontan vwar ankor plis loportinite e ranforsisman kondisyon favorab, pou kreasyon ankor plis larises e lanplwa atraver desantralizasyon aktivite ekonomik dan distrik, kot i posib. pou vreman kree loportinite pou met plis larzan dan pos Seselwa, loportinite pou plis biznes lokal ganny kree, kondisyon e lanvironnman pli favorab pou ankouraz plis envestiser etranze an term foreign direct investment pou vin Sesel,

Sepandan bokou nou seselwa ki’n rantre dan en pti biznes ouswa pe mazin fer li, zot pe vwar li difisil pou soutenir zot, e bann ki pe swete envestir, pe mazin 5 fwa avan lanse, senpleman, Mr Speaker, akoz lensertitid sa lanvironnman fer biznes.

Sa nouvel lo ease of doing business, lo rating Sesel mondyalman i pa ankourazan; sa rating pa fer nou reste konpetitiv dan larezyon. Gouvernman bezwen redouble zefor ek tou akter kle pou amenn progre pou asir sa eleman soustenabilite.

Mon ti a kontan vwar ouswa tande ki serten Polisi e Lalwa an plis, ki pou protez nou bann lantrepriz lokal dan sekter Tourizm, Lagrikiltir,  Lapes e serten lezot ankor, ki annan pou fer ek serten servis e prodwi lokal ganny ranforsi e entrodwir.  De lot kote lefe ki tou dimoun bezwen manze, ki Lalwa adekwat i ganny mete pou protez sa ki pti kont sa ki pli gro, anon kre en lanvironnman pou tou benefisye.  Pa ti a bon demann lasistans ek Fon Monneter Enternasyonal ouswa Labank Mondyal pou ed nou avek lasistans teknik pou etidye ouswa evalye, nou lanvironnman fer biznes Sesel, anliny ek Lalwa Konpetisyon, pou vwar si vreman sa pratik, fer biznes zis e fair; ki napa labi detriman sa ki pli feb.

Mr Speaker, la mon sizere ki sa 2 lazans ki Gouvernman in met an plas, Fair Trading Commission e NATCOF, ki zot ganny resours adekwat, pou sofgard en pratik pli fair dan biznes Sesel.  E ki konsonmater i ganny edike, enformen lo tranzaksyon e pratik biznes pou ganny touzour sa fair deal e lazistis. Mr Speaker, Gouvernman pe dir ki i pe larg lanmen, me mwan mon dir ki annou pa larg zis lanmen me annou larg lipye osi, akoz si ou larg zis lanmen me anmar lipye pa espekte progre.

En legzanp se dan Lagrikiltir, Gouvernman pe donn konsesyon, pe fasilit loan e pe met serten enfrastriktir e pe demann sa sekter pou reponn lapel e ogmant prodiktivite,

Fermye pe ekoute.  Parmi i annan ki pridan, epe kestyonnen e pe dir, napa lavant akoz lenportasyon pli bonmarse, akoz paralel market.  Akoz ozordi, enportater ki ti Wholesaler, i ozordi Retailer, lotel pa oblize aste zis ek prodikter lokal, lefe ki li osi, i en biznes e an vi en profi pou kouver son depans.  Alor dan sa kalite lanvironnman sa fermye, sa prodikter osi lontan ki i pa vwar debousman garanti e sipor Lalwa apropriye pou protez son lenvestisman, pa ekspekte li ogmant prodiksyon e fer en pert.  Menm latansyon fodre donn sekter ki pe eksport pwason ouswa pwason valer azoute ki amenn larzan Sesel.  Food for thought, Mr Speaker.  Pa’n ler pou Lafrik pou diskit lo son prop standar pou protez son bann antrepriz kont pozisyon dominan pei devlope ki bezwen nou resours, tel parey nou pwason Sesel.

Mr Speaker, mon sizere ki Minister Lagrikiltir i vwar tou fermye koman en biznes, e pa enpoz bann kondisyon ki pou tir larzan dan son pos osi kapab fer li fait.  Donn lasirans ki lenportasyon quota pou ganny redwir; ki sa fermye a ankouraze pou pran loan pou envestir; ankouraz e menm fors lotel Sesel pou ede sipor nou bann fermye kot olye enport, zot get lokal, pou ede redwir depans nou deviz ki ti kapab al ver bann sekter priyorite; e annan sa konsyans sosyal e responsabilite e reste konsistan avek stratezi devlopman pei e pou benefis sa Seselwa. Mon demande ki latansyon i osi ganny donnen lo bann ki’n pran zot prop larzan e reenvestir par pran bann gro loan ek Labank Komersyal, a to lentere vreman o, ki Gouvernman pa negliz zot ouswa konmsi pini zot, pou akoz zot in grandir e nepli tonm dan ran vilnerab, mwayen ouswa pti.  Me ki Gouvernman i konsider negosye ek bann Labank Komersyal, pou redwir zot lentere e osi letan repeyman. Sa ava en lankourazman kot zot pa vwar zot pe ganny kit deryer, me apresye ki Leta i apresye zot zefor dan lekonomi.

Mr Speaker, lefe ki plizyer fermye i soufer ek tiyo delo kase detanzaot, mon enplor Minister Lagrikiltir pou akseler sa proze met tiyo nef Grand Anse Mahe, e ki zot travay pros ek PUC pou anmas delo lo sa plizyer sours delo Grand Anse ki a ede dan letan lasesres. Dan sa menm konteks, ki Minister responsab pou PUC i osi proaktiv dan realiz sa proze Danm Grand Anse Mahe. Lontan nou pe koze, annou bouze lo la.  Aksyon ki pep pe demande.

Mr Speaker, lot pwen, se ki lefe ki kout lavi i en konsern toulezour, mon pe demande ki Gouvernman, menm si i pe koz ek plizyer sekter ki annan serten lenfliyans lo kout lavi, ki i konsider inisye en deba Nasyonal lo televizyon ek bi edik sitwayen ek lenformasyon apropriye atraver deba dan Prime Airtime, ki piblik an zeneral a kapab kontribye lide e osi konpran sa dinamik e tandans lo sa size kout lavi; ki i pa depan ditou lo zis Polisi, stratezi Nasyonal, en nenport Gouvernman, sirtou dan nou ka, koman en pti Leta Zil.  Ki sak sa bann lide avar ganny evalye lo son fezabilite reel.

Mr Speaker, nou welcome sa ogmantasyon dan Bidze Lapolis e Seselwa, pe ekspekte en pli meyer servis e profesyonnel, mon salye tou bann ki pe devoue pou mentenir lord e lape.

Mr Speaker, swivan apwentman nouvo Komisyoner e son plan pou sa sekter, mon zis demande ki sa plan i ganny pouse pou vin realite, ki anfen kont, pep seselwa avar annan plis konfyans dan sa Lafors e ki seselwa, pa pou bezwen kontinyen reste prizonnyen zot prop lakour malgre ki i egzers pridans.

Mon sizere ki Lapolis, Attorney Zeneral e Zidisyer, ki zot travay kot a kot, pou asir sekirite pep e ki zot osi revwar Lalwa pou protez viktim e permet li ganny rekour apropriye.  Dan sa konteks, ki distrik i ganny sa servis community policing akseptab.  Lapolis pou bezwen mazin pli devan kot i konsern aktivite vol, akoz ozordi vol inn fini vin sofistike e voler konmela i vey gard par lefe bann mankman ki nou Lafors Lapolis i annan.

Mr Speaker, mon demande ki Gouvernman i balans sa legzersis Sistenm Pwen ek realite demann lo merit.

Pou sit en legzanp, en fanmir ki pa pe peye e pe reste dan kondisyon sere, e enn ki pe peye depi en pe letan pase, baze lo son komitman pou ganny en lakaz, lekel ki priyorite?  Sa ki pe peye kontinyel pou son lakaz ouswa sa enn ki pa pe peye me annan 4 zanfan? Minister bezwen konsilte plis ek Lotorite Distrik pou balans desizyon.

Mr Speaker, nou espektasyon ek MLUH se ki sa proze STP i ganny enplimante pour ki zabitan plato Grand Anse Mahe zot pa santi ki zot in aste kabri dan sak. E avek sa kalite Sistenm Desarz ki pe kout Gouvernman bokou.  E met a risk lasante rezidan Flat e lezot ki pe eksperyans menm realite dan lezalantour distrik.  Mon osi demande ki ek sa plan anbisye fer 24 Unit Lakaz dan sak distrik ki Minister i asir son kliyan bann bon lakaz, Me pa kabri dan sak, ek bokou problenm striktirel a en longer di-tan ki aparet

Lefe ki mon plan, se asire, ki plis lakaz e kare later i ganny fer e demarke, ki pep distrik i benefisye kontinyelman, mon lans en lapel ek Gouvernman pou idantifye finansman pou sa 2enm faz proze lakaz Ex-ION, akoz la ou a krwar ki in ganny met lo hold. Minister MLUH i annan en devwar pou reasir sa bann sitwayen distrik ki ti ekspekte zot sans monte pou ganny en lakaz.  Me ki’n dezapwente akoz zot pann ganny en let, ki Minister i donn zot sa garanti ki zot sans i touzour la a laprosenn fwa.

Mr Speaker, Gouvernman pou osi bezwen kapab annan en pli meyer fason pou administre e okip son bann batiman, propriyete e lekipman onivo Nasyonal e distrik.  La mon refer ek bann fasilite sportif ki pa pe ganny byen mentenir par kontrakter ki koup zerb, lekipman kase i ganny lese abandonnen lo Kort e laplenn; reparasyon pa pe ganny fer a-ler; ki stati e Leta enfrastriktir i deteryore.

Mon demande ki Gouvernman i konsider tir sa sonm larzan ek NSC e donn Gouvernman Lokal, pou donn en pli meyer servis dan distrik.  Dan sa menm konteks, pa dir distrik motiv zabitan e zenn pou inisye lekip sportif e group kiltirel, ler sipor finansyel pa ganny donnen e  ankadrer pa ganny  sa sipor e soutyen neseser.  Mr Speaker mon enplor Lazans Transpor lo Later pou o pli vit posib …

 

MR SPEAKER

…sey round-up Onorab.

 

HON WAVEN WILLIAM

… pou fer sa proze trotwar Barbarons pou evit aksidan fatal, ki kapab ganny evite, Akoz natir sa bout semen vilaz Ex-Troain.  Mr Speaker mon pou termin la, akoz mon pou ganny sans entervenir lo plizyer size, e alokasyon pandan Sesyon Komite.  Mon demande ki Minis Finans diran deba, ki son Seksyon PR, zot donn plis lesplikasyon piblik lo televizyon lo detay Bidze pou sa pep konpran kwa ki pe arive.  Mon sezi sa lokazyon pou felisit SBC ki’n amelyor standar progranm televizyon, spesyalman dan ‘Bonzour’ Sesel, pou enform pep e permet partisipasyon.

Avan konklir mon met lanfaz lo nesesite pou plis dyalog e konsiltasyon ant Lotorite Pei e pep Seselwa, pou asire ki vreman personn pa ganny kit deryer; ki sak Seselwa i ganny sa sans pou kontribye lide, e ganny valorize pou son zefor.  Ki a ankouraz li pou pran kontrol son desten, vin pli prodiktiv e en sitwayen responsab.

Finalman Mr Speaker, mon oule asir zabitan La Misère, lo sa lensidan Polisyon, ki Komite in fer son travay e pe esper Gouvernman pou donn son pozisyon, avan ki nou fer en lot miting piblik avan lafen sa lannen.  Mon aprann ki ti annan en Petisyon ki ti pe ganny sinyen pou demann Prezidan pou vin fer miting avek zot, lefe ki zot pa pe tann nanryen.  Alor mon demande ki Gouvernman i fer son bout travay e donn pozisyon pou nou bouze ek sa konpansasyon

Mon profit lokazyon pou remersi tou zabitan depi La Solitude, Beauvoir, Souvenir, Pti Barbarons, Barbarons, plato Grand Anse e Savi Estate pou zot sipor kontinyel.  Mon anvi osi remersi zot, pou konpran ki rol e travay en Manm Lasanble in pran en lot nivo; me ki mon disponib de zour pou vwar separeman zabitan La Misère, e Grand Anse.  Mon laport i ouver pou tou zabitan sans eksepsyon.  Mon dir zot pa per pou fer zot prezans konte.  Kot i mal, dir mwan i mal e annou ini, pou met zefor pou fer pli byen ankor.  Mon napa monopoli lide, e mon rekonnet ki sa travay, se ansanm ki nou pou reisir.  Wi se ansanm.

Pou terminen mon swet pep Seselwa, ou msye Speaker, Deputy Speaker ek zot fanmir, Minis e ou lekip e zot fanmir, tou Manm Lasanble e fanmir, staff Lasanble e SBC en Bonn Fet Nwel e en lannen prospere.  ‘Sesel i pli gran ki nou tou!’  Annou reste angaze pour Sesel akoz personn pa pou fer li pou nou dan sa vilaz global.  Si pa nou menm. Mr Speaker.  Seselwa i en pep beni e Sesel i privileze, kot sa ki nou demann, i pa ozordi, ouswa demen me sa swe i ganny akonpli dan son letan apropriye.  ‘Plis ki Zanmen’ sa relasyon ek li i reste priyorite dan sa parkour devlopman Sesel.   Mersi Mr Speaker.

 

(APPLAUSE)

 

MR SPEAKER

Mersi Onorab.  Mannyer pe ale konmsi ler Nwel nou pou’n ganny en kantite kado.  Onorab Roucou ler nou a retournen ou a pran laparol.  Mon krwar in ler pou nou pran en Break.  Nou a retournen 4er.

 

(BREAK)

 

MR SPEAKER

Bon nou a kontinyen avek nou bann entervansyon e parey mon ti dir donn la parol Onorab Roucou apre sa nou a retourn kot Onorab Ernesta, Onorab Roucou ou annan laparol.

 

HON CLIVE ROUCOU

Mersi Mr Speaker, bonn apre midi Mr Speaker, bonn apre midi Minis, bonn apre midi tou Koleg Onorab e en gran bonn apre midi zabitan Plaisance.

Mr Speaker semenn pase mon’n ekout Ladres par Minis Larose avek bokou lentere lantouzyazm e lekspektasyon, tousala ti ganny konfirmen ler Minis dan son Ladres ti nonm sa Tenm “ Travay pour prosperite tou dimoun,” e i ti tous 3 pwen Kardinal kot i ti dir “ki sa Bidze i pour senplifye nou sistenm Tax; pour mentenir nou stabilite ekonomik e redwir kou lavi pour tou Seselwa e fer zot zwaye.’’

Mr Speaker sa 3 Statement avek sa Tenm i 3 pwen ki’n fer en bon reset, en bon reset pour en meyer lavi Sesel.  Mr Speaker me parkont mwan demann mon lekor en kestyon; senserite e langazman Gouvernman pour fer sir ki vre ki 2018 Seselwa i vin zwaye.  En allant ler mon’n ekout Bidze prezante par Minis, mon’n mazin 2 dimoun dan mon distrik – en zenn onm 43an ki ti en travayer pour en rezon ou en lot in ganny aksidan; ozordi i nepli kapab travay e i pe resevwar li R2, 500.

En lot fir dan leo Belvedere ki pe soufer avek kanser i osi pe ganny R2, 500.  Alors mon pe demande si vre 2018 zot pour zwaye?  Me parkont mon a demann Minis pour reevalye lasistans ki bann tel ka parey i resevwar.

En allant mon mazinen ki pa lot me ki Gouvernman aktyel, Gouvernman Parti Lepep, Gouvernman SPUP/ SPPF ki’n met nou dan sa zistans.  E tousala in ganny konfirmen par Onorab ki’n koze avan mwan, ler Onorab William in dir ki marto in ganny servi pour klout Seselwa ki’n anvi debourye e ki lakord in anmar zot, pa zis dan zot lanmen e dan zot lipye, mon anvi demann Onorab William lekel ki’n O Pouvwar sa 40an?  Lekel ki’n anmenn sistenm marto ki’n klout nou Seselwa e lekel ki’n anmenn sistenm lakord ki’n anmar nou Seselwa?  Se pa lot ki Parti Lepep SPPF/SPUP.  Ki zot in koz, ki zot lot kote latab zot pe siporte e ki zot ankor krwar ladan.  Granmersi 15 lo 10 pe sey fer zot tir sa mindset.  E sa ki lo paz 3 nou Liv Bidze pe dir sanz sa mindset.  Zot sipor pour Parti Lepep, in fer sa parti met sa sistenm marto ki’n klout Seselwa e anmar nou Seselwa e in anpes nou progrese.  E nou vwar nou lavi in an retar, an konparezon avek nou isi dan LDS ki nou Leader Onorab Ramkalawan toultan i dir “met divan dan lezel Seselwa e nou ava vwar ki mannyer nou ava anvole. ” Alors mon bann koleg lo kote Parti Lepep silvouple sanz zot mindset.

2enm pwen, Mr Speaker mon pour debout o-bor Onorab Ramkalawan lo size Tax Progresiv ki mon pe enplor Minis ki dan son desizyon pour enplimant sa tax an Zilyet i en pe tro tar.  Silvouple annou fer li desito, desito savedir Zanvye.  Apre ki nou bann frer ek ser Seselwa pandan 40an, pandan 40an zot in trimouse, zot in fer sakrifis parey zot Prezidan avan ti dir, “zot in pas dan en pti kou van,” alors in ler pour nou donn Seselwa son merit; kot nou’n vwar sa tax progresiv kot dimoun pour ganny en pti benefis, sa pti benefis ler zot kapab komans zwir li boner Zanvye.  Annou pa esper Zilyet pour tro bokou.  Apre 40an nou pe anvoy li ankor Zilyet, tro bokou.  Mr Speaker mwan mon anvi fer en lapel for avek tou mon bann frer ek ser Seselwa ki ankor for ki kapab travay silvouple, silvouple annou desann annou al travay, annou pran en travay ki permanan ki nou osi nou ava kontribye dan lekonomi nou pei Parti Lepep/SPUP/SPPF in donn nou en pikir amorti dan nou lespri ki’n fer nou pares, ki’n fer nou pa kapab deside, ki’n fer nou pa kapab travay.  alors annou sorti dan sa lesklavaz mantal ki sa bann dimoun in met nou; annou vin lo kote LDS kot nou koze, kot nou dir “Seselwa fodre nou travay,” annou aret krwar dan zis asize e ganny welfer, nou annan nou par pour zwe dan sa pei, nou annan nou par pour zwe pour kontribye e mon krwar dan travay for, e travay for i fer nou vin en zonm, i fer nou vin en fanm ki nou devret vini.

Mr Speaker alors i kler pour mon kontinyen dir avek Gouvernman, wi mon krwar dan travayer fodre pey tax, me parey nou Leader in dir “nou’n met sa baz pour nou komanse from 8, 500 me parkont menm si travayer, menm si travayer pour kontribye dan son Tax Gouvernman osi i bezwen zwe son rol primordyal kot i re anmas tou nou larzan tax, tou nou larzan tax ki zot in gate, ki zot in diverti kontan; ki zot in abize.  La nou pe koz L’Union Estate tou sa kantite milyon, 33 milyon.  Nou pe koz sa Msye ki dwa 1.5 milyon ki li i pe rann par pti posyon parey latizann anmer.  Fodre zot rann sa larzan tax.

Mr Speaker dan liv Rapor Oditer Zeneral lo paz 64 pour lannen 2016, in fer en pwen kler, in fer referans avek VAT ki pa’n ganny anmase ki sum-up pour 280 milyon.  So zis mazin sa kantite larzan ki nou annan deor; zis mazin sa kantite larzan ki sa pei, ki sa Gouvernman ki pa responsab e in zis gate.  Alor Mr Speaker mon anvoy en lapel for avek Prezidan Faure menm si in divorse avek zot, me selman fer sir, fer sir ki nou larzan tax in tournen.

Mr Speaker Minis in dir ki Bidze pour Saler 2018 in monte pour ariv 11.1poursan an konparezon ki sa lannen 2017 ti 10.9.  In dir sa pti logmantasyon i ava ede pour kit Saler Seselwa dan en fason soutenab.  Alors mon ti ava apresye si Minis ti a definir sa mo soutenab?  Mon ti ava konnen lo ki nivo ki paramet ki i pe donn nou sa ledikasyon pour en saler soutenab.  Sa en pti rekomandasyon ki mon ti ava demande.  E Minis in kontinyen pour dir ki pli gro defi se ogmant saler bann Profesyonnel an mentenir li dan laktyalite lekonomi nou pei ozordi. An relasyon ek saler Mr Speaker, lo sa kote mon krwar ki Gouvernman i devret vin pli senser.  Si zot anvi retenir nou lafors travayer par egzanp Minis in koz lo Scheme of Service pour bann Ners avek bann Asistan Ners en logmantasyon dan zot allowance.  Mwan mon krwar sa i en desizyon kaprisyez ki Gouvernman in pran.

Mr Speaker an relasyon avek sa Scheme of Service pour bann Ners mon pe fer en demann avek Minis pour li rekonsider sa R3, 000 Retention Allowance  pour fer sa group travayer pli satisfe at least fer li vin lo zot saler de baz.  Sa i a benefisye zot ler zot ava pe al rod en loan menm kot Labank ou menm pour zot Pansyon.  Lo sa pwen mentenir nou lafors travayer, Gouvernman pe tro trenn son lipye.  Menm ler ou get lapey bann Ners Seselwa an konparezon avek bann Ners etranze la kot nou koz lo equal work and equal pay, me i pa le ka.  I pa le ka pour mon bann Koleg Ners.  ar egzanp nou vwar en Staff Nurse ki fek kalifye pe ganny li 7, 200 a R8, 200; en Senior Nurse ki pe ganny li R8, 821, en Nursing Officer avek 20an leksperyans pe ganny li R11, 000; en Ners pli eksperyanse ankor avek 35an leksperyans pe ganny li 12, 900, Minis ankor kot Minister Lasante nou annan diferan kad travayer.  parey Asistan Ners ki annan en progranm deza pour zot ki pe ganny 5, 600 a 8, 000 zot saler de baz, en Drayver ki pe ganny li 6,325, en Telephone Operator ki pe ganny li R5, 400 ek R50 Night Duty Allowance, R50.  E Telephone Operators zot night duty i komans 4er apre midi ziska landmen bomaten 8er, zis mazinen pour R50.  Mon pe demande lo ki planet nou kapab pe viv alor?

An kontinyen mon mazin mon 2 frer Mortuary Assistant Williamson Rabat avek Gabriel Mathiot kot Minis in koz lo en special allowance pour sa 2 dimoun.  Alors mon ti a swete ki Minis i a donn en sif e an konsiderasyon en sonm rezonnab, ki ava reflekte travay delika ki sa bann dimoun pe fer; travay delika.

Me parkont, me parkont Mr Speaker en etranze ki travay dan Minister Lasante, en Biomedical Engineer ki ganny li R60, 000 son saler de baz; ladan i annan R32, 000 allowance, mon pa pe konpran sa.  Mon ti a demann Minis pour donn nou oubyen investigate, oubyen donn en leklersisman ki mannyer sa disparite dan R60, 000 e R32, 000 allowance.  Non mon pa konnen.  En lot pwen, en lot dimoun dan Minister Lasante sorry mon pran Minister Lasante spesifik mon pran li koman mon pti baba en pti pe, en dimoun ki fer recruitment, recruitment Dokter, recruitment Nurses i ganny li 10 fwa lapey en Senior Nurse; savedir otomatikman i pe sot li dan 80, 000.  Ki mannyer en boug i fer recruitment i ganny R80, 000, mon pa konpran?  Ankor Minis mon ti a swete, mon ti a swete ou ti a donn nou en leklersisman.

Pour kontinyen Minis in koz lo en Recruitment Plan pour lannen 2018; ankor mon pran Minister Lasante ki son Recruitment Plan i en pe an dezord, mon ti a swete an konsiderasyon, la mon pe mazin mon bann koleg, in fact mon mazin 3 mon Koleg ki’n marye avek en Dokter Cubain ki’n deza travay Minister Lasante koman Dokter e bann Teknisyen Spesyalize, ozordi zot pa pe travay akoz Minister pa oule recruit zot.  An konsiltasyon i dir zot annan sa Lagreman avek Cuban Embassy.  Be si nou en pei Souveren ki mannyer Gouvernman Cubain i ankor pe diriz nou ki mannyer nou pour fer.  Mon krwar nou’n bouze lo sa nivo Castroism.  Alor Minis please, please pran sa en konsiderasyon.  Mr Speaker Minis in koz lo Sekter Lasante, Minis in koz en total 11.7 depans total PSIP pour 2018; kot i annan 4 milyon pour renovasyon Diagnostic Centre.  Mr Speaker Diagnostic Centre i en young building; young building e sa i dan langaz teknik konstriksyon, i en building ki ankor nef.

Alors mon ti anvi demann Minis en leklersisman lo ki kalite renovasyon ki zot pe anvizaze fer ki pour ariv 4 milyon, 4 milyon lo Diagnostic Centre.

Minis in koz 3.5 milyon pour en landrwa izolasyon, mon krwar sa enn i annan son Merit e sa i en kestyon ki mwan menm, mon ti demann Minis Adam ler i ti vini, me parkont son repons pa an konformite avek lenportans ki Minis Larose ozordi in donn nou.  E mwan mon senserman krwar wi nou bezwen en Sant Izolasyon pour ankor si evantyalite i arive, nou pa pour parey bann poul ki’n koup likou pour ankor enn fwa, alors Minis sapo pour sa pwennvi.

Mr Speaker mwan mon krwar in manke ankor pour Minister Lasante nou’n vwar 4 milyon ki pe al kot Diagnostic Centre, me parkont Lakaz Mor in ganny met akote, Lakaz Mor in ganny met akote akoz laba lanvironnman travay pa conducive, Chiller napa; nou vwar Mortuary Assistant kot pe sorti aswar ler Lakaz Mor i plen pour kontinyen vin sanz lekor from Chiller pour Container.  Mon krwar sa letan nou’n devret fini pase; letan in fini pase kot dimoun i ankor pe sanz lekor mor from Chiller pour lo Container.  Ankor mon ti a demann Minis pour fer le neseser ki Bidze i akomod en sityasyon koumsa.  Tou sa letan Gouvernman Parti Lepep pa’n vwar li neseser, pa’n vwar li neseser menm pour envestir dan en tel keksoz pour benefis sa pep.

Mr Speaker en keksoz ki mon kontan Minis in touse, ler in koz lo 335 lakaz e 200 plot later pour lannen 2018.  Mon kontan akoz ozordi mon mazin mon bann frer dan kote Kan Gard Plaisance, ler mon mazin Winsley, mon mazin Denise ki pe esper lakaz en kantite letan kot zot in manke premye batch me kekfwa zot a vini dan dezyenm batch.

Me parkont Mr Speaker mon mazinen tou sa bann progranm, tou sa bann proze ki ti’n mete depi lannen 2017 pour distrik Plaisance, ler mon pe mazin semen sorti Copolia pour desann Belvedere; mon mazin semen sorti Copolia pour desann Rochon, mon mazin semen sorti Rochon pour vin Belvedère tou le 3 ziska ozordi nou pa ankor vwar ni premye pyer mete.

Dezyenmman lakaz Kan Gard ki Minis in koz lo la ki mon vreman apresye ziska ozordi in fer zis 6 Unit me zanmen ankor en lakaz in touse.  Mon swete ki sa voyaz Gouvernman Parti Lepep i senser.  Mon’n apresye osi ler mon tann Minis in koz lo re devlopman Ex-Murray Copolia, kot lannen apre lannen zot pe trennen, trennen e zanmen Ex-Murray in deza ganny touse.  Ankor mon swete ki avek langazman Minis sa voyaz Ex-Murray i a devlope e bann dimoun Copolia i ava ganny zot lakaz e zot later.

Me i sagrinan – ki dan tou sa bann proze mon pa’n tann koz lo lakaz, ki nou dir Lakaz Per anler Belvedere, akoz sa bann dimoun pe viv dan en fason enpitwayab, pa akoz zot anvi, me akoz sa bann lakaz i annan lannen e en kantite lannen.  Minis mon ti a swete ou ti ava rod en pti fason kekfwa ou ti ava pous sa osi devan.

 

Mr Speaker pour konklir mon swete ki Gouvernman i aret trenn son lipye; ki Gouvernman i met keksoz an pratik koumsa ki sa pei i bouz devan, e tou Seselwa i ava vwar son plas dan sa pei.  E nou ozordi dan sa kote latab nou dir tou sa ki bon pour nou i bon pour pep Seselwa e nou, nou pour siport Seselwa e nou pa pour ‘Zanmen les tonbe.’’  Mersi Mr Speaker.

 

MR SPEAKER

Mersi Onorab Roucou.  Nou a donn laparol Onorab Ernesta apre i pou tour Onorab Henrie, Onorab Ernesta.

 

HON PAUL ERNESTA

Mersi Mr Speaker.  Bonn apre midi Mr Speaker e Minis e tou bann Koleg Onorab e tou dimoun a lekout – spesyalman bann dimoun Takamaka. Mr Speaker parey in le ka dan lepase Minis responsab pour Finans, lafen lannen i vin devan nou Lasanble pour prezant nou avek Bidze pour lannen prosenn.  Sa lannen i fer dezyenm fwa pour nou koman Manm sa 6enm Lasanble nou pe partisip dan en tel prosesis.  Me les mon a fer remarke ki prezantasyon sa enn Bidze i diferan avek lezot.  Sonm ki’n ganny prezante i enn pli o ki bann Bidze oparavan, i tonm zis par anba R8 bilyon.

Mr Speaker mon santi ki in annan bokou zefor ki’n ganny mete, ek konsiderasyon ki’n ganny pran dan preparasyon Bidze 2018; par egzanp mon vwar en direksyon kler ki Gouvernman i annan dan son Plan Fiskal, pour efektivman adres nou bann defi sosyal e anmenn en disiplin dan depans pei; ankouraz e angaz tou kous nou popilasyon dan devlopman nou lekonomi, e konsekaman konbat lapovrete e lev standar lavi tou nou sitwayen.

Reaffirm komitman nou Gouvernman pour met an valer Prensip nou Parti.  Sa se pran swen ek nou dimoun e met zot o sant devlopman.  Pour al pli lwen i reflekte plan travay nou Prezidan Danny Faure, pour annan latransparans, rann kont e bon Gouvernans.  Sa i klerman ganny demontre dan sa 9 lobzektif ki’n ganny etablir e osi atraver Tenm Bidze ‘’Travay pour Prosperite tou dimoun.’’

Mr Speaker an écoutant Ladres Bidze lopinyon serten Group dan mon distrik e lezot manm piblik mon realize ki i annan diferan lopinyon lo Bidze 2018.  Me realite i reste ki dan sa Bidze i pou benefisye mazorite Seselwa.  Par egzanp bann benefis reel plis larzan dan pos mazorite Seselwa atraver Progressive Income Tax; 25 poursan rediksyon lo Gratwite bann pos Konstitisyonnel.  Sa i ava pas ek bann group pli vilnerab. Loan avek bann Lentere ba pour bann etidyan, to lo reveni lwe lakaz pour desann pour ariv 3 poursan.

An menm tan nou rekonnet ki sa Bidze i annan serten limitasyon pour kapab realiz son lobzektif prensipal espesyalman pour asire ki tou Seselwa i benefisye e konsekaman i lev nou nivo lavi.

Plis zefor i bezwen ganny mete avek bann labank pour zot donn piblik en servis lo en pri pli abordab.  E osi pour zot kapab retir bann baryer, par egzanp bann kondisyon difisil dan Laplikasyon Loan tel ki bann Guarantors, bann personal contribution ki ganny aplike e la si sa endividi pa kapab satisfer sa bann kondisyon zot laplikasyon i ganny rezete.

Mr Speaker ou kapab konpran fristrasyon enn mon zabitan ki’n avek son Labank pour plis ki 25an, letan i al fer en Laplikasyon pour li ganny en Car Loan pour li komans son pti biznes 3 fwa son demann i ganny rezete, zis akoz?  Sa bann kondisyon difisil ki son Labank i enpoze, a lafen in bezwen al ver en Car Dealer ki ti fasilit lo hire/purchase avek en to lentere tre ba e pandan 2an vwar li ki’n fini pey son transpor.

Letan nou get dan Sekter Kominikasyon Mr Speaker bann kou servis i ankor vreman o dan sa Sekter e i annan de lot kote kalite servis i vreman ba, plis ankor i annan bann service provider ki vreman malonnet kot zot kontinyen abiz lo nou sitwayen.  Zabitan mon distrik zot bokou fwa tonm viktim sa bann tel aksyon malonnet.  Sak fwa kouran i koupe dan distrik nou vwar koneksyon Intel osi i koupe dan serten parti distrik e i pran zot detrwa zour pour re etablir koneksyon, me menm sa letan i ariv le mwan napa okenn lazisteman dan zot peyman ki ganny fer.  I menm annan serten landrwa dan distrik kot napa okenn sinyal telefonn.

Mr Speaker mon rekonnet bann mezir ki Gouvernman pe pran pour redwir kou lavi dan pei, an dot mo, asir distribisyon larises dan tou kous nou sosyete.  Me nou bezwen fer sir ki dile pa ganny tire ek toro.  Akoz si Gouvernman pa fer byen atansyon, nou kapab vwar sa ki annan pour annan plis e sa ki napa pour napa ditou.  Premyerman letan mon get bann Mezir lo bann Konsesyon rediksyon lo Tax e Lentere, mon vwar i annan en de balansman akoz plis bann biznes ki pe benefisye.  Mon rekonnet ki Gouvernman pe fer sa avek bon lentansyon pour ki afen bann biznes a pas sa benefis lo konsonmater.  Kestyon i reste eski vreman sa i ganny pase lo konsonmater?  Mon pa tro sir si sa i le ka.

Annou pran legzanp lo Peser, Peser i ganny Konsesyon lo fuel me ou pa vwar diferans lo zot pri pwason.  I annan bokou zot sa bann dimoun ki’n anrezistre dan sa biznes zis pour zot ganny Konsesyon lo fuel apre zot pran sa fuel pour al fer lezot biznes ou aktivite avek.  Alors mon demann Gouvernman pour etablir en sistenm pli strict pour evit sa bann labi.

A mon avi, tou bann Peser ki ganny Konsesyon zot bezwen kapab provide proof of evidence zot travay pandan le Mwan atraver en rikord.  Si nou al pli lwen ankor annou get en kou lo revizyon pri bis.  Ozordi i annan en bon group nou popilasyon ki servi bis piblik.  Sa i enkli sa dimoun ki lo en saler pli ba, sa enn ki lo en saler ase eleve ou menm sa touris ki vin vakans.  E zot tou zot pey bis menm pri.  Me malerezman sa enn ki lo saler pli ba ki pli ganny afekte.  Mon krwar Gouvernman i bezwen vwar en mekanizm, pour protez sa dimoun ou sa travayer pli vilnerab; par egzanp etablir en Sistenm Concession Card pour sa group dimoun.

Dezyenmman an vi ki lekonomi Sesel ozordi in ganny liberalize nou vwar ki kantite ditor sa pe fer nou bann konsonmater; konpetisyon pour annan bann pri konpetitiv e abordab pour bann servis e prodwir, i preski pa egziste.  Pri bann komodite ozordi, pe ganny fikse par bann marsan e businessman zot menm.  Zot pe fer bann gran profi egzorbitan lo depan nou bann dimoun.

Mon sizere ki Minister Finans i antre an diskisyon avek Lasanm Komers, pour diskit posibilite pour revwar profit margin lo bann komodite.  An menm tan nou vwar serten bann marsan e businessman etranze ki vin fer biznes isi Sesel apre zot rapatriy sa larzan dan zot pei.

Gouvernman i bezwen etablir en Polisi kler, pour asire ki mazorite nou forex i reste dan nou pei; revwar rekritman dan serten sekter parey dan Retails pour asire ki plis nou Seselwa i ganny anploye dan sa Sekter.

Mr Speaker pep Seselwa ozordi i egzize ki nou annan nou en servis piblik ki pli efektiv e efikas dan son performans.  Mon santi in ariv ler pour Gouvernman revwar son striktir travay; elimin bann diplikasyon dan bann pos; elimin bann birokrasi; file sorti kot en teknisyen i bezwen al direk kot sa decision-maker; konsider annan plis teknisyen ki bann managers.

Mon apresye ki Minis in rekonnet lenportans nou Resours Imen.  Mezir pour donn bann Teachers en marketable skill allowance i en bon incentives pour bann Teachers, me parkont sa i kapab ganny elarzi pour bann lezot kad travay osi.

Bann entry requirement pour bann pos, i merit ganny revwar kot i reflekte spesifisite sa louvraz avek son reminerasyon.  Annou pa demann bann gran kalifikasyon pour en senp louvraz.

Gouvernman i bezwen asire ki nou annan bann travayer de kalite.  E atraver logmantasyon dan Bidze Ledikasyon i en pwen depar kot nou merit asir en bon nivo kalite Ledikasyon pour nou bann etidyan.  E la nou tou paran, Minister Ledikasyon e etidyan nou merit pran nou responsabilite pour kree sa loportinite pour demen.  Mr Speaker i annan en sonm konsiderab ki’n ganny mete dan PSIP ki tous direkteman bann dimoun dan la Kominote.  Mon apresye bokou bann demann ki mon’n fer devan Gouvernman pe ganny konsidere pour enplimantasyon lannen 2018.  Par egzanp konstriksyon nouvo Day Care, devlopman semen kot Legliz ziska Jean Larue, devlopman semen Sophola, Hoareau/Dodo anler Quatre Bornes.

Mon osi profite pour remersi Gouvernman pour progre e sipor dan lenplimantasyon sa bann proze ki’n ganny fer sa lannen; tel parey, elarzisman semen Bougainville.  Dapre dernyen kominikasyon avek CEO SLTA in fini ganny Tender i sipoze komanse nenport ki moman.

Konstriksyon Housing Estate Ex-Desaubin in preski fini.  Survey pour devlopman semen kot Onezime/ Rose Bristol Quatre Bornes in fini ganny fer e i dan staz finalisation pour lenplimantasyon e osi bann lenplimantasyon bann proze kominoter.  Me parkont Mr Speaker mon dezapwente avek serten proze ki mon santi i annan en lenportans priyoriter pour nou Kominote ki’n ganny mete pour 2019, an 2020 ou menm ki pa’n menm ganny konsidere ditou.  Par egzanp elarzisman semen Maravie ki sa mon ti ganny komitman avek Minister responsab pour Land Transport dan Bidze lannen pase ki ti pour ganny mete pour dan Bidze 2018.  Semen ‘Dan Pen-Pen’ ki’n ganny pouse pour 2020.  Pour mwan sa i en gro konsern akoz zabitan sa Kominote pe soufer bokou avek mankman lenfrastriktir semen dan sa rezyon.

En tel devlopman ti pour ed non selman sa kominote, me Gouvernman osi par lefe ki ti pour retir bokou presyon lo demann lakaz ouswa later, retaining wall Anse Parnel ki li osi in ganny anvoye pour 2020.  Sa landrwa Mr Speaker i vreman riske pour bann pyeton ek motoris ki servi sa semen.  Redevlopman nou Kord gard ek nou Klinik i 2 lezot proze ki vreman enportan pour nou kominote.  Me malerezman tou le 2 pa’n aparet okenn par dan Bidze.  La mon demann le 2 Minister konsernen pour konsider sa 2 proze pour lannen prosenn.  In osi annan demann pour konstriksyon en building pour Mikro Antrepriz dan distrik e teren ti’n fini ganny idantifye konsep ek en plan striktirel ti’n fini ganny fer.  Ankor malerezman li osi in ganny ekskli dan Bidze.

Takamaka i en distrik ti annan pa mal potansyel pour devlopman teren ek later Land bank.  I annan landrwa parey L’Intendance ek Anse Forbans ki’n fini ganny subdivide pour later, i reste zis devlopman lenfrastriktir pour ganny fer avan alokasyon. Me malerezman mon’n vwar ki sa osi pa’n ganny enkli dan Bidze.

Dan Bidze 2018 in annan en sonm 1.5 milyon ki’n ganny allocate pour drenaz atraver distrik.  Mon rekomande ki Minister Lanvironnman i konsider plato Anse Forbans pour amelyor sa sistenm drenaz, sa Kominote i ganny afekte sirtou en fanmir partikilye ek problenm inondasyon sak fwa i annan gro lapli.  An gro Mr Speaker letan mon get bann proze pour distrik anba PSIP ,mon rekonnet ki plis zefor ti kapab ganny mete pour benefis mon distrik.  Lo sa laliny Gouvernman i bezwen build up son kapasite pour li kapab delivre lo nou bann proze.

Konklizyon Mr Speaker; mon realize ki sa Bidze in kre la baz pour en lavenir avek loptimizm, i pe anmenn nou ver en Lekonomi pli soutenab.  Me nou bezwen reste pridan dan tou sa ki nou fer akoz bann fakter eksteryer i reste en bann gro risk pour nou lekonomi.  Nou annan bokou travay ankor pour fer, nou pa merit zanmen ankor retourn kot nou ti ete an 2008, pour kapab reisir i bezwen nou tou.  Parey Tenm i dir “Travay pour prosperite tou dimoun.”

Mr Speaker letan mon dir nou tou, i vedir tou dimoun, annou pran nou responsabilite tou di-moun.  Annou lev-e, annou fer nou kontribisyon pa depan lo Gouvernman pour fer tou keksoz pour nou.

Bann ki pe kas lakaz arete, lev-e al travay annan respe pour Propriyete nou prosen akoz tou zot bann viktim zot in trimouse e fer sakrifis. Gouvernman i merit met plis finansman dan devlopman progranm lazenes lo nivo distrik, sa i a asir zot devlopman entegral dan kominote.  E zot osi zenn servi byen bann loportinite ki zot gannyen pa les zot tonm viktim drog ek lalkol e bann aktivite anti-sosyal.

Pour bann ki pe reisir dan lavi felisitasyon, mon dir zot kontinyen, bann fanmir ki pe struggle sa Bidze i annan ou ladan pa perdi lespwar.  Politisyen i nou responsabilite pour edik byen nou pep, annou aret mislead nou bann dimoun zis pour ganny mileage politik.  Son konsekans i grav.

Dan sa konteks wi Onorab Larue Prezidan Faure in demann Anti-Corruption Commission e Ombudsperson pour fer lenvestigasyon dan sa 50 milyon Dolar.  Alors nou devret demann ek Anti-Corruption ek Mrs Nichole Ghérardi-Tirant ki pe arive avek sa lenvestigasyon.  E lo sa note Mr Speaker mon dir mersi e bonswar.  Thank you.

 

MR SPEAKER

Mersi Onorab ou’n rekonnet nou ankor komansman Novanm nou lwen avek Nwel.  Nou a donn laparol Onorab.  Henrie.

 

HON GERVAIS HENRIE

Mersi Mr Speaker, bonn apre midi tou dimoun sirtou bann zabitan Mont Buxton, Mr Speaker Bidze 2018 i asir en kontinyite.  I asir keksoz la pour la me mon santi i mank en plan kler e anbisye pour anmenn transformasyon Sesel dan sa Pti Singapore ouswa Monaco Losean Endyen, ki pa ozordi zour nou’n ganny promet.  Sa i premye Bidze ki Ladministrasyon Mr Faure pe prezant nou, sa vizyon ki in prezante se, Seychelles Vision 2032.

Me souvenir ‘Laspirasyon 2013,’ ‘Stratezi 2017’ e ‘Vizyon 2020’ in kit en gou anmer dan nou labous pour okenn loptimizm.  Letan Minis Finans i dir nou ki Gouvernman in konsevwar en plan ki vize ver bezwen nou sitwayen, Parti Lepep i oule ki Seselwa i oubliy tou sa gaspiyaz linefikasite e koripsyon ki’n annan pandan sa 40an zot in O Pouvwar.

Ler i dir i prezant en ‘azanda anbisye’, sorti kot en Gouvernman anbisye nou pa oubliye ki parmi sa Cabinet 12 Minis, ladan i annan 5, selman 5 ki Mr Faure in apwente.  Mazorite Minis in la depi lepok son predeseser, menm depi lepok Mr Rene.  Alor kwa nouvo lenerzi e dinamizm Ladministrasyon Mr Faure i kapab donn Sesel pandan lannen 2018?  Mr Speaker an 1993 Bidze pei ti zis pa lao R1.3 bilyon.  24 an pli tar apre retourn miltiparti sa sonm in monte pour ariv par lao R7.9 bilyon.  Eski i fer sans pour en pti Leta Zil parey Sesel, avek en popilasyon mwens ki 100, 000 zabitan pour annan en Bidze pros R8 bilyon?

Sa Bidze i kontinyen grosi lannen apre lannen.  Ziska ki tan ki i pour reste soutenab, ler nou pe ganny dir par egzanp ki nou Sistenm Pansyon pa pour soutenab e i pour bezwen ogmant o laz 65an?  Laplipar sa depans malerezman pa pe benefisye Seselwa ki ganny Saler pli ba.  Dan bokou lenstans i al dan konfor en pti group an term gro Saler, Gratwite Anyel, Sekirite, Tiket Avyon per diem, allowance pour lenz, Allowance pour divertisman, Allowance pour Lakaz,  eksetera.

An gro en gran poursantaz Bidze Nasyonal tou le lannen i al pour bann benefis avek privilez.  Lannen apre lannen Gouvernman i kontinyen grosi.  E in ariv le moman pour vwar si groser e depans Gouvernman pa pe afekte prosperite lonterm nou pei.  Letan politisyen i depans larzan irespektiv si in ganny li atraver tax oubyen in prete zot pe retir sa larzan dan Sekter Prodiktiv pei.  Sa ki mon ti a kontan demann Dr Larose o non bann zabitan Mont Buxton – i ki mon reprezant zot isi, se ki dan sa premye Bidze ki li in konsevwar, i annan strict sirveyans ki ava determinen si larzan taxpayers pe ganny byen servi, partikilyerman ler ou konpar performans Gouvernman avek efikasite sekter prive.

Sa ki mon pe demande, se ki tou alokasyon i bezwen lo en baz ekonomik 100 poursan e non pa akoz konsiderasyon politik.  Pa akoz nou annan ase sirplis ki nou bezwen ogmant nou depans.  Ler Gouvernman i depans mwens, i ofer sekter prive sa lespas pour li kree lanplwa e krwasans dan lekonomi.  Se pour sa rezon mon ti a kontan ki Dr Larose avek son lekip i fer en evalyasyon lo plizyer progranm ki dan sa Bidze.  (1) pour redwir presyon Bidzeter a lonterm; e (2) akoz nou merit donn Sekter Prive loportinite pour antre dan bann Sekter a kote – mon repete akote Leta tel ki dan Ledikasyon, Lasante, prodiksyon elektrisite, servis bis, eksetera.

 

Mr Speaker sa bann propozisyon swivan i dwatet ede ogmant performans Bidzeter Gouvernman.  Komisyon Reveni Sesel SRC i merit ganny tou sipor neseser, pour agrandi son lafors travay afen ki zot kapab kolekte sak sou ki merit al dan Kof Leta.

Gouvernman i ranmas tou larzan, i ranmas larzan avek tou biznes ki pe fonksyonnen dan Sesel.  I pa kapab en pei i kontinyen peye ler nou konnen ki pei pa pe anmas nanryen direkteman avek en kantite Seselwa, ki an retour pe benefisye direkteman atraver larzan ki zot kanmarad pe peye.  In ler pour zot osi kontribye en pti morso ozordi, e anpese nou fer fas avek en kriz finansyel demen.  Gouvernman fodre i redwir son depans.  Gouvernman i bezwen akseler depans pour konstrir son bann prop batiman pour servi koman Biro.  Antretan i bezwen egzize ki pri ki ler ki li i peye par met kare koman alokasyon ler i bezwen lespas pour Biro, savedir met en ‘Cap’ lo pri son rental, sa ava ede osi redwir kou alokasyon dan pei.

Touzour lo kestyon depans, Gouvernman i bezwen en poz plis disiplin e elimin labi kot bann Transpor Leta i konsernen.  Transpor Leta i dwatet servi strikteman pour bann kours Ofisyel.  I dwatet reste kot travay apre 4er e pa ganny servi pour anmenn madanm travay oubyen fer shopping e zanfan al lekol.

Zis mazinen par egzanp State House i demann en Bidze Siplemanter pros R200mil pour Car hire ki laplipar in depanse lo loto lwe pour bann ‘Tonton Makout’ e lezot Sekirite, ler Prezidan i al vizit distrik – ki’n fer bokou sa lannen.  Letan ou aprann ki Lofis en Minis i deza depans pey en bill telefonn R53 mil zis pour 1 mwan, Mr Speaker Minis Finans pour bezwen konpran akoz mon pe ensiste ki Gouvernman i koup son depans.  R53 mil zis pour 1 mwan lo telefonn.

Sa sif i trouve dan nouvo Rapor Oditer Zeneral 2016, i pe koz lo Departman zafer Entern ki sa lepok ti en Minister.  Mr Speaker nou rapel langazman Dr Larose ki ti fer dan Bidze lannen pase, pour redwir depans Gouvernman lo kestyon telefonn e osi elektrisite.

Bann Minister ki ganny en Bidze i merit kapab zistifye tou zot depans.  Gaspiyaz, labi e frod ankor pe arive dan Gouvernman Parti Lepep an 2016 – parey dernyen Rapor Oditer Zeneral i montre dan bokou lenstans.  Ozordi nou vwar bokou diplikasyon dan Gouvernman, an se ki konsern rol plizyer Lazans e Departman.  bokou zot pa prodiktiv e zistifikasyon zot legzistans nou ankor pe kestyonnen.  Zot zis kree Lazans e pos pour met siporter Parti Lepep, oubyen bann failed politicians.  Nou bezwen arete avek sa pratik, akoz set travayer Seselwa ki bezwen ganny takse plis ler Parti Lepep i anmas son bann politisyen ki’n fail.

Letan nou konsider lefe ki travayer pe kontribye plis ki R817 milyon atraver tax lo Saler dan Bidze 2018, i neseser ki nou demann valer nou larzan avek bann ki pour zer sa Bidze.  Sa i enkli bann CEO, Sekreter Prensipal, Minis e menm Prezidan.  Eski i pa ler ki Sesel i entrodwir en Sistenm Evalyasyon oubyen appraisal system pour sa bann O Zofisye dan Gouvernman?

Akoz ozordi bann dimoun ki lo Kontra dan servis piblik i ganny evalye e peye baze lo performans zot evalyasyon, me bann CEO, PS, Special Advisor avek Minis, zot travay konmsi rien été; ganny apwente la, demen zot transfer laba, konmsi sa pozisyon i en dwa ki zot in ne avek.  In plis ki ler pour Sesel etablir en mekanizm evalyasyon pour son bann o fonksyonner piblik.  Nou bann MNA nou debout dan en Eleksyon.  Si nou pa pe performen nou konnen ki arive avek nou – akoz voter Seselwa ki deside.  Le moman osi in arive ki si en dimoun pa pe delivre i pa zis ganny transfer, me i ganny dir, mersi pour son servis e orevwar.

An gro, bann pwen ki mon’n fer resorti ziska la, se ki aksyon Gouvernman pe kout pei tro bokou.  Si i koup bann depans initil, i ava kapab annan plis larzan dan pos Seselwa.

Toudmenm pour kontinyen Mr Speaker, mon oule rekonnet serten nide pozitiv ki Dr Larose avek son lekip dan Minister Finans pe met devan dan sa Bidze.  I annan sa 5 nouvo Scheme Saler ki pe ganny finanse.  Menm si mon ti a plifere vwar tou travayer i ganny konsidere, mon’n vwar ki i annan en Komite ki pour ganny etablir pour propoz revizyon Saler ki a ganny enplimante dan Bidze 2019 a tan, pour Eleksyon Prezidansyel 2020.  Parti Lepep ankor enn fwa pe mazin zis zot CV e non pa travayer Seselwa.

La mon demande ki Gouvernman i zistifye nivo Saler ki pour etablir e ki sa bann sif ki zot a kapab vin avek, pa pou’n zis sorti anler e tonm ater.  Mon osi swete vwar sa Komisyon endepandan pour servis piblik ki’n anonse depi 2016 i vin en realite byento.  Mon rekonnet ki en sonm R1.5 milyon pe ganny propoze pour bann Proze Kapital.  Bann tel proze ava kree loportinite Lanplwa e menm nouvo lenvestisman dan bann pti biznes lokal.  Minis in sit bann operater pick-up koman en group ki pour benefisye direkteman avek sa bann gro proze; parey Danm La Gogue.  Komite COGA i note sa koman en lasirans.  Me i enportan ki Gouvernman i gard son plan e delivre sa ki in promet dan en dele letan rezonnab.  Rekonstriksyon Lekol La Rosière i en legzanp tipik, ki mannyer letan Gouvernman i kas son plan sa i afekte piblik direkteman.  Paran Mont Buxton ankor pe monte desann avek zot zanfan, pour al Lekol Mont Fleuri pandan sa dernyen 2an.

Ler mon lot pwen Proze Kapital Mr Speaker, fodre note ki di-si Desanm 2017, Gouvernman pou’n depans R200 milyon an mwens ki i ti’n bidzete lo Proze Kapital.  Rezon prensipal i se ki zot napa kapasite pour delivre, sirtou an term resours imen.  Mont Buxton osi in ganny afekte par sa sityasyon, kot omwen 2 proze semen ki ti sipoze konplete sa lannen pa pou’n fini a tan – sa i enkli proze semen dan Lenn.  Prezan nou pa pour, prezan nou pa konnen, si tou sa bann retar i osi en malis kont lepep Seselwa e pour demen dir bann MNA LDS ki’n ganny elekte pa’n fer nanryen; menm ler nou konnen poudir Gouvernman Parti Lepep ki O Pouvwar.

I byen note ki Onorab Churchill Gill li in dir byen for, ki tou proze dan son distrik in ganny konsidere pour 2018.  Ankor sa i souliny mon pwen ki plizyer o fonksyonner pa pe delivre alaoter, dan sa responsabilite ki zot in ganny konfye.  E fodre pa ki nou kontinyen soutir medyokrite dan sa pei.

Mr Speaker, prezan mon oule osi koz briyevman lo 3 sekter ki mon santi i bezwen nouvo langazman politik pour relev zot.  Premyerman Sekter Offshore i bezwen al de lavan, pour sa arive nou bezwen volonte politik en vizyon e stratezi kler.  Mesaz ki nou pe oblize anvoy avek Lemonn eksteryer i se ki Sesel i ouver pour biznes.  Nou bezwen komans travay ozordi menm pour refer repitasyon Sesel ki’n sali koman en Ziridiksyon Offshore.  Nou pe bezwen amann Lalwa, okenn bann Lalwa ki devret ganny amande asire ki bann Lalwa i kler, napa okenn anbigite e ki i an konformite avek bann meyer pratik Enternasyonal.  Sesel pe merit al lo en Kanpanny medyatik organiz Latelye avek Konferans avek bann partner etranze ki a kapab atir Lapres Enternasyonal, pour vann zimaz sa sekter dan en fason pozitiv.  Tou zofisye ki al reprezant Sesel aletranze; depi Prezidan, Minis, Manm Lasanble, bann Diplomat, Gouverner Labank Santral e lezot o fonksyonner servis piblik e sekter prive i merit pe sant menm sanson; ki nou Ziridiksyon i prop e ki nou ouver pour biznes.

Enn fwa ki nou fer sa lendistri pour swiv akoz i annan larzan pour fer.  E en target Nasyonal an term reveni dan sa Sekter Offshore i merit plis ki apepre R2 milyon di-si 2025 sorti apepre R600 milyon ozordi.

Mr Speaker LDS i krwar dan nesesite Seselwa, annan en pli gran par dan nou Lendistri Tourizm.  Sa i ava en fason pour fer sir ki plis reveni i reste dan nou pei, menm si ziska la in annan en logmantasyon 19 poursan dan lakantite viziter ki’n debark Sesel, kestyon i kwa ankor nou kapab fer pour ganny plis touris? Letan nou konstate ki pour sak touris Europeen ki nou gannyen, Maurice i ganny 3 an plis, e pour sak touris Afriken ki vin isi, 4 i debark Maurice i definitivman annan lespas pour amelyorasyon.  Mon admir zefor Kenya pour reisi ogmant zot lakantite touris Afriken atraver bann Kanpanny senp e tre spesifik.  Ozordi mon krwar ki Sesel atraver STB, i merit pe profit bann vol direk sorti Kenya, Ethiopie L’Autrische, Allemagne, Abu Dhabi, Dubai, Sri Lanka, L’Angleterre e La France byento – ki nou pa pe pey okenn depans lo sa bann vol pour omwen esey atir ankor plis touris sorti dan sa bann pei pour vin isi.  Nou’n vwar ki 15 lo 10 pour anmenn retour British Airways avek Air France an 2018.

Mr Speaker ozordi nou annan plizyer mil Seselwa ki viv aletranze.  Sa ki nou merit pe reflesir lo la ozordi, se ki mannyer nou kapab ankouraz nou diaspora Seselwa dan 4 kwen lemonn pour kontribye direkteman dan Lekonomi Sesel.  Nou koz bokou lo lenvestisman direk etranze oubyen FDI, eski a kote sa Seselwa aletranze osi pa kapab zwe en rol?  Zis pour donn en legzanp dapre sif pibliye par Labank Mondyal an 2016, L’Inde i en pti pei ki son sitwayen otour lemonn ti anvoy plis larzan kot zot;  72.2 bilyon Dolar.  Sa ti swiv par La Chine 63.9 bilyon Dolar e Philippines 29.7 bilyon Dolar Ameriken, L’Ethiopie avek Kenya i legzanp 2 pei vwazen ki’n kree en kad Ofisyel pour ankouraz lenvestisman direk dan plizyer sekter zot lekonomi; tel ki konstriksyon, teknolozi, Real Estate, lavant Par, Tourizm eksetera, avek zot bann zabitan, zot bann sitwayen ki viv an deor zot pei.  Pour Sesel osi sa potansyel i reel.

Sekter Telekominikasyon i enn kot i annan kritik lo tou le 2 kote.  Piblik i dir pri i tro o, e zot anvi vwar en rediksyon dan pri pour ede fer kou lavi desann.  Bann operater i konplent ki laplenn pa nivo.  Dan milye tousala nou annan en Departman Teknolozi Lenformasyon avek Kominikasyon – DICT ki pa osi proactive dan sa deba.  Koman regilater, i dwatet fourni nou popilasyon avek en larepons oubyen kek leksplikasyon lo sa size.  I pa osi fasil i annan son konpleksite e nou bezwen en leksplikasyon.

I merit osi pe konsantre lo devlopman Polisi e son rol koman Regilater, olye ki i fer konpetisyon avek Sekter Prive dan devlopman proze.  Antretan dan lespri fer desann kou lavi, DICT i dwatet pe promouvwar litilizasyon e adopsyon teknolozi dan servis piblik.  I dwatet pe pouse pour ki nou konstrir en Rezo Nasyonal pour fasilit lesanz lenformasyon avek bann diferan Departman Gouvernman; sirtou pour anmenn benefis dan Sekter Lasante avek Ledikasyon.  San ki nou bezwen re evant larou Mr Speaker Sesel koman en pti Leta Zil, i kapab ganny bokou, atir bokou Lakonpannyen ki i kapab servi Sesel, akoz son grander pour fer bann proze pilot pour teste bann nouvo prodwir teknolozi, e nou kapab benefisye bokou atraver sa.

En lot pwen lo sa size, i se ki DICT i bezwen met an plas regilasyon ki obliz tou bann ISP bann Internet Service Provider pour zwenn sa ki nou apel en “Internet Exchange Point.” Sa sistenm i fer ki tou konteni Internet ki en dimoun i download lokalman i ganny store isi, dan nou lokalite.  Alor laprosenn fwa ki en konsonmater i rod sa menm lenformasyon pour napa kou adisyonnel konpare avek konmela, ki fer nou bezwen al download sa lenformasyon an deor Sesel atraver kab fibe optique soumaren.  Le moman ki ou tonm Tanzanie, ou pe bezwen pey an plis ki si ou ti pe fer li dan lokalite Sesel.  Sa ki mon pe demande se ki Gouvernman i envestir dan lenfrastriktir; tel ki en Rezo Nasyonal i asir ki kad Legal sa sekter i azour avek meyer pratik Enternasyonal e i annan loportinite training pour bann zenn Seselwa.

Avan terminen Mr Speaker, mon anvi dir 2 mo lo la par distrik Mont Buxton.  Nou napa en shopping list parey Baie St Anne.  Me mon plito anvi fer en pledwari lo la par zabitan Mont Buxton ki zot oule bon servis an retour pour kontribisyon ki zot pe fer dan sa Bidze.  Koman taxpayers zot oule ganny valer pour larzan.

Annou pran progranm netwayaz distrik par egzanp.  Dan laplipar ka zabitan dan distrik napa lenformasyon lo lekel Kontrakter ki responsab pour netway larivyer, bin sites, semen, lanmar, eksetera.   Si zot annan en konplent pour fer lo performans sa kontrakter kote zot ale?

Ozordi laplipar dimoun i call MNA ki an retour i lyez avek DA pour rezourd okenn problenm.  Avek en sonm R 216, milyon, 366 mil, i kler ki nou pei pe depans tro bokou larzan pour kit pei prop.  Sesel fodre i vin konsyansye lo size lapropte; ki non selman i benefis pour nou Lendistri Tourizm, me i enportan pour nou lasante.  Gouvernman fodre envestir dan ledikasyon e Kanpanny sansibilizasyon e bann kontrakter pa zis krwar sa i en larzan fasil.  Zabitan i oule vwar valer pour larzan.  Mon ti ava kontan par egzanp vwar ki en Zofisye Lanvironnman i ganny apwente dan sak distrik ki pase e sansibiliz dimoun lo sa size lapropte dan sa kalite Bidze ki nou pe depanse.

Pareyman dan servis piblik i bezwen alaoter.  Telefonn i bezwen ganny reponn.  I pa normal ki ou call en switchboard e ou bezwen call 3 a 4 fwa avan ki Operator i reponn.  Let i bezwen ganny reponn a tan; email osi parey.  Dimoun i bezwen ganny dir laverite e lenformasyon ki kler.  Lepok fer dimoun vir an ron in fini.  Zabitan i oule valer pour larzan.

Servis bis SPTC i bezwen a ler e i bezwen monte sak fwa ki i ganny schedule pour monte.  Ozordi napa School Bus ki deservi Mont Buxton, paran i bezwen pey bis piblik ogmantasyon R2 pour afekte bokou fanmir si sa servis pa ganny fourni avek bann paran Mont Buxton.  Semen Mont Buxton i demann nouvo sirfas pour asir sekirite.  E la apre midi ler mon pe koze, in annan en aksidan ase grav lo semen dan Lenn.  Erezman in napa okenn dimoun ki’n ganny blese me selman in afekte Sistenm Delo PUC – ki mon swete zot rektifye sa o pli vit posib.

Sityasyon drog i anmenn problenm sekirite ki zabitan i konsernen e oule vwar en solisyon.  E nou problenm delo i bezwen rezourd enn fwa pour tou.  Sa zafer tou le weekend en tiyo i kase Mont Buxton Santral ouswa Belonie pa en sityasyon normal.  Zabitan i oule vwar valer pour larzan.

Tou sa ki pe al ganny en Bidze, mazinen i zot responsabilite pour rann lavi tou sitwayen Seselwa enkli zabitan Mont Buxton ere e fasil.  La mon rezwenn Dirizan Lopozisyon Onorab Ramkalawan ler in dir nou bomaten pour mazin Sesel koman en lenvestisman, dan ki nou ganny en retour; sa retour i anmenn benefis ki apel progre avek devlopman.  Sa 2 keksoz ansanm i fourni nou zabitan avek sekirite – an dot mo en lavi normal.  Alor sa ki nou pe demande se senpleman valer pour nou larzan e pour nou kapab viv en lavi normal.  An konklizyon Mr Speaker, mon oule fer piblik ki pe ekout mon deor konnen, e pa fer sa fot pour krwar poudir sa Bidze R7.9 bilyon i Bidze LDS.  Sa Bidze i Bidze Parti Lepep.  Si ou santi i annan landrwa zot in esey imit nou Polisi pibliye dan nou Manifesto pour Eleksyon Lasanble Nasyonal 2016, zot in fail.

I annan en gran diferans ant nou lekip LDS ini, avek sa Gouvernman ki divize.  Nou Polisi i kler, akoz i sorti dan bann valer ki nou senserman krwar ladan; parey nesesite amelyor bann kad Legal envestisman, amelyor lenfrastriktir piblik, met pli bon Kondisyon pour fasilit biznes, reviz Polisi avek Regilasyon Tax, Lanplwa avek saler, asir distribisyon larises ki zis, e ki benefisye Lasosyete antye, e met Mezir kler pour redwir kou lavi e ki enkli fer to Lentere Labank e kou telekominikasyon desann.

Mr Speaker ozordi Sesel i dan en sityasyon – ki parey mon’n dir pli boner, i pa normal.  Nou’n annan en Eleksyon Prezidansyel 2an pase selman 10 Mwan pli tar sa enn ki ‘however’ ti ganny Eleksyon ti taye e pas baton apre victoire15 lo 10, apre ki in ‘pas baton’ e i vin, apre ki in pran baton e in en Manm aktiv Komite Santral Parti Lepep pour plis ki 25an, Msye Faure in sot laba e in dir nou ki in ‘’divorse’’ avek Leadership Parti Lepep.  Mon pa tro sir si sa i en ‘Divors’ menm; si i en Separasyon’ oubyen ‘Kitans akoz sa 2 dimoun ki pli pre avek li dan Cabinet, i son Vis Prezidan ki Sef Parti Lepep e Minis Dezinyen ki Sekreter Parti Lepep.  Apre tou sa Minis ki Mr Faure pa’n apwente -7 an tou, i Manm Komite Santral Parti Lepep.

Mr Speaker nou dan en sityasyon ki pa normal.  Divors Parti Lepep pe sabotaz Sesel.  Sa leta, letarzi ki nou ladan parey Leader zafer Gouvernman, in aksepte e admet bomaten i egziste, kot R200 milyon dan Proze Kapital pa ganny depanse; kot servis piblik i fer lekonomi plis ki R11 milyon lo saler ki ti’n ganny bidzete, i akoz i annan en divizyon aktyel dan Parti Lepep.

Eski sa bann Minis an retour pe nepli tenir Msye Faure e in larg li?  Le moman in finalman arive pour rekonstrir Sesel avek zenerozite e kouraz.  E si nou oule en Gouvernman, e si nou oule en pei i annan en meyer demen, Sesel i bezwen nouvo Gouvernman; en Gouvernman ki pour drwat, ki pour zis, ki pour travay dir e performan; en Gouvernman LDS pour tou Seselwa.  Mersi Mr Speaker.

 

(APPLAUSE)

 

MR SPEAKER

Mersi Onorab Henrie.  Sa ti dernyen entervansyon pour ozordi vi ki 5er in sonnen.  Mon krwar i apropriye ki ou’n tous lo envit Seselwa pour vin envestir dan zot pei.  Mon konnen ki i annan bokou Seselwa aletranze ki ekout nou deliberasyon depi L’Australie, Canada, Italy, L’Angleterre.  E sa i en keksoz ki nou tou mon krwar nou krwar ladan poudir nou bann co– sitwayen retournen vin donn nou koudmen, vin envestir dan nou pei.  Avek sa mon i annan okenn komanter?  Wi Onorab Leader Lopozisyon?

 

HON WAVEL RAMKALAWAN

Mr Speaker mon ti’n anvoy en pti mesaz mon anvi raise a matter of privilege.

 

MR SPEAKER

Ok.  Go ahead.

 

HON WAVEL RAMKALAWAN

Mr Speaker, bomaten dan son entervansyon Onorab De Commarmond, in fer en Deklarasyon ki mon santi i afekte – non selman nou privilez dan Lasanble, me osi i kapab afekte privilez tou Seselwa.  In fer en Deklarasyon konmkwa dan Prizon, zot devret les bann telefonn rantre; bann telefonn mobile, e apre sa ekout sa bann telefonn; ekout sa bann telefonn.  Sa Mr Speaker i anmenn en size telephone bugging, ki en size tre serye.  E mon krwar ki i neseser pour Onorab De Commarmond eksplik sa Lasanble – premyerman, ki lenformasyon ki i annan ki telephone bugging’s spesyalman mobile phone bugging -parske si ou pe les bann prizonnyen rantre ek telefonn, zot pa pe rantre avek en fixed-line me avek en mobile phone.  Ki sa i ete?

E dezyenmman; lefe ki Lalwa i dir ki si prezan bugging i bezwen ganny pas atraver en desizyon Lakour – ki i pe mazinen egzakteman?  E Mr Speaker mwan mon spesifikman mon anvi konnen, si Onorab De Commarmond i kapab dir avek nou, e konfirm sa ki in dir, ki mobile telephone bugging pe ganny fer Sesel. Parske lafason ki’n in dir i senp pour ou al laba lo High Level Committee e dir zot fer sa.  Parske ziska aprezan Gouvernman in deny ki poudir i annan okenn digital telephone bugging; savedir atraver mobile phone.   Mr Speaker mon ti ava kontan ganny en pe leklersisman, pour nou kapab klersi sa, akoz tousala i form parti sa bann travay anba, anba ki kapab pe arive dan nou pei.  E lefe ki bomaten Leader of Government Business in dir avek nou ki sa i en keksoz fasil.  Fer nou konnen silvouple.  Mersi bokou.

 

MR SPEAKER

Ok.  Mon rapel ki mon ti dir ti annan 2 sizesyon ki mon ti’n note koman en Manm, anfet Vice Chairman High Level Committee, be selman mon a donn la parol Onorab Leader of Government Business, Onorab De Commarmond pour reponn sa konsern Onorab Leader Lopozisyon.

 

HON CHARLES DE COMMARMOND

Mersi Mr Speaker.  Mr Speaker mon kontan ki ou’n pran sa 2 pwen pour ou anmenn devan dan High Level Committee.  Me mon sagren pour dir ki Onorab Leader Lopozisyon pa’n ekout mwan ditou – i pa’n konpran petet ki mon’n dir.  Sa ki ou, ou dir mon’n dir la, mon pa’n dir sa mwan. Ok?  Sa ki ou dir mon’n dir mon pa’n dir sa.  Mwan ki mon’n dir lefe ki i annan sa bann issues dan Prizon, mon demande ki sa i ganny pran konsiderasyon dan Prizon, pour kapab regarde posibilite; pour konnen ki pe pase.  Akoz tro bokou issues ki pe pase dan Prizon – ou konpran?  Sa ki mon’n dir.  Mon pa’n dir entrodwir telefonn mobil dan Prizon apre i al ekoute mwan.  Mon dir zot bezwen get dan sa posibilite.  E sa ki mon pe dir dan Konstitisyon i permet sa.

So mon dir al regarde pour ki nou kapab konpran konnen ki pe pase.  Akoz tro bokou atrosite dan Prizon pour nou kapab met keksoz anba kontrol silvouple.  Se tou.  Mersi.

 

HON WAVEL RAMKALAWAN

Mr Speaker I’m sure….

MR SPEAKER

En pti moman, en pti moman les Onorab rod klarifikasyon.  Mon krwar i bon ki nou pe klersi sa.  Apre mwan mon a dir mannyer mwan mon’n konpran; ki mon’n note mwan annan mon notes la devan mwan.  Onorab Leader Lopozisyon.

 

HON WAVEL RAMKALAWAN

Mr Speaker Onorab De Commarmond i pe sey avoid en pwen krisyal.  Onorab De Commarmond in dir ‘‘ekout bann telefonn…’’

 

MR SPEAKER

Dan Prizon?

 

HON WAVEL RAMKALAWAN

…se sa ki pwen enportan ki mon pe fer sorti; ‘’ekout bann telefonn’’ e mwan mon pe demann li baze lo sa ki in dir si telefonn mobile i kapab ganny ekoute Sesel?  Swivan ou Deklarasyon.  Parske si ou fer en Deklarasyon i bezwen ki ou konnen.

 

MR SPEAKER

Ok.  Les mon a dir koman, mon krwar sa 2 sizesyon ti adres ver mwan koman Vice-Chairman High Prison Committee.  Mon pa pe dispute the fact ki oule get son prensip.  Me mwan mon’n met sa 2 pwen.  E i la pour zot vwar.  Premyerman mon dir;’ ‘’tap Prison telephones’’ e dezyenmman ou’n dir, ‘’CCTV camera everywhere. ’’ La 2 pwen ki mwan mon’n note.  Mon dir mon ava anmenn laba.  Me selman not withstanding ou pwen, se eski ou okouran ki i annan telephone tapping?  Mwan mon’n pran ou pwen parey ou’n dir mon mon’n mete la.  So petet ou a klersi sa pwen ki….

 

HON CHARLES DE COMMARMOND

Wi.  Be ou’n konpran byen Mr Speaker, set egzakteman sa.  Ki mon pe dir, i annan tou sa bann issues ki pase dan Prizon ok? Ii annan menm dimoun ki pe servi telefonn dan Prizon.  Tou dimoun i konnen sa nou’n dir lotrozour lo televizyon, lo radyo, partou.  Now mon pe dir get dan tou sa bann posibilite si pa posib fer.  Dan Konstitisyon i dir dan pour rezon sekirite pour rezon lenformasyon, si i bezwen ganny fer, well mon pa konn son prosedir Legal – sa mon krwar Lapolis whoever zot ava fer zot bann formalite.  E mwan mon dir ki Mr Vic Tirant i en boug ki spesyalize dan bann zafer telekominikasyon, kekfwa i konnen li ki mannyer sa bann keksoz i kapab ganny fer, dan lesanz ki ansanm ek Lapolis pour vwar ek Cable & Wireless … what.  Mon pa konn son mekanizm mwan.  Selman mon pe dir get dan sa posibilite si sa i pour ed nou, i pour ed nou pei.  That’s what I said.  E protez sitwayen – sa ki nou pe rode sekirite pour sitwayen.  Se dan sa lespri mon pe dir.  Mon pa’n dir lot fason konmsi pour al fer osi tapping telefonn dimoun ensidswit.  Sa mwan mon kont.  Mon pa pe dir sa mwan.  Mersi.

 

MR SPEAKER

Onorab Ramkalawan.

 

HON WAVEL RAMKALAWAN

Mr Speaker.  Vre ki Onorab pa konnen ki in dir bomaten.  Ti ava bon pour nou ganny sa verbatim.  E dezyenmman Mr Speaker i kler ki mon pe Pourswiv en largiman which is basically parey Angle i dir “a waste of time.”  Thank you very much.

 

MR SPEAKER

OkAlright Onorab Ramkalawan.  Ou pwen in note.  Mon krwar demen ki nou a fer sir Clerk si nou ganny verbatim lo sa ki ti ganny dir bomaten by LGB.  I ti komans son entervansyon a 1 minit apre 10er.   So ou kapab al pli vit ek verbatim ou a konnen.  E nou ti a kontan ganny sa pour sirkile koumsa ki nou kler.  Me parey mon dir mwan koman vi ti viz ver mwan koman 2 sizesyon – mon ti pran li koumsa.  Me ou pwen parey mon dir ou ti a kontan konnen si i annan tapping.  Mwan osi mon ti a kontan konnen, akoz enn ler mon tann mon telefonn fer en bann tapaz ki mon pa tro, tro konpran.  Yes Onorab De Commarmond?

 

HON CHARLES DE COMMARMOND

Mr Speaker mon krwar nou pe diskit en keksoz ki en a waste of time.  Si ou al dan mon verbatim, al rod mon verbatim tanto menm, ou a vwar egzakteman ki mon’n dir dan sa direksyon.

 

MR SPEAKER

Se sa ki mon’n dir

 

HON CHARLES DE COMMARMOND

Ok. 

 

MR SPEAKER

Clerk i al rod verbatim pour demen,

 

HON CHARLES DE COMMARMOND

….ou a vwar ou a konpran.

 

MR SPEAKER

…e nou konnen. Ok?

 

HON CHARLES DE COMMARMOND

Mersi.

 

MR SPEAKER

Mersi.  Mon krwar in en lazournen kot i annan bokou size…

 

HON JEAN-FRANCOIS FERRARI

Apre pour demann pardon…

 

MR SPEAKER

…silvouple.  I annan bokou size ki’n ganny lev-e ek bokou sizesyon.  Mon sir Minis Dr Larose in note tou sa bann sizesyon ki’n sorti.  Mon ti a kontan sirtou remersye ki otan ki posib dimoun in reste dan zot 15 minit ki’n ganny allocated pour zot.  E ki’n annan bokou sizesyon pozitiv, lo ki mannyer pour al de lavan e ki mannyer nou kapab ed Minister Finans.  Mon krwar tou le 2 Leaders bomaten ti fer sorti le pwen ki nou bezwen travay ansanm avek Minister Finans, pour nou fer sa ki bon pour Sesel.  E mon krwar nou’n ganny en deba ase enteresan ozordi.  Nou annan bokou pour nou diskite ankor parey mon ti dir bomaten – nou pour kontinyen lazournen antye demen Zedi.  E all being well, Vandredi nou a donn sans Minis pour li retournen e reakte ek nou reaksyon.  Alor avek sa nou a dir zot mersi bonn kontinyasyon – bonswar.  Mon pa pour swet zot bonn Nwel akoz mon annan en kantite letan ankor.  Mon a vwar zot demen 9er.

 

(ADJOURNMENT)