Home » Verbatim » 2017 » Verbatim Report, The National Assembly Sitting, Thursday 9th November, 2017

Verbatim Report, The National Assembly Sitting, Thursday 9th November, 2017

NATIONAL ASSEMBLY OF SEYCHELLES

 

Thursday 09th November,

2017

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou dimoun ; tou dimoun  ki dan Lasanble tou dimoun ki an deor Lasanble.  Mon espere ki zot in pas en bon sware yer swar.  E mon ti a demann pour nou kontinyen avek nou travay.  Mon ti a demann Clerk pour envit Minis Finans avek son PS pour zwenn nou dan Lasanble.  Ozordi parey Deputy Speaker ti anonse yer nou pour kontinyen avek nou bann reaksyon bann Manm.  I reste 5 Manm ki pare pour koze e parey i ti tonm dakor dan ABC parey Deputy Speaker ti anonse nou pour adjourn ler zot fini.  E ki bomaten nou’n tonm dakor avek Minis Finans ki demen bomaten i a vini 9er i a donn son Reply.  E Lendi nou a konmans nou deliberasyon avek bann diferan Minister ki pour vini.  E ler Onorab Minis Dr Larose i antre, premye dimoun ki pour annan laparol i prezan Onorab Andre ou pran laparol.  Me donn en pti moman en pti letan les Minis avek son lekip settle down.  Minis byenveni, asize e mon fek anonse ki nou pour kontinyen parey nou ti’n tonm dakor yer ki nou a fini avek nou bann reaksyon nou bann Manm apre sa demen bomaten 9er parey nou dakor avek ou bomaten, ou a annan letan pour fer ou repons avan nou pran nou travay plen tan semenn prosenn.  E mon swet osi byenveni Mr Thesée Auditor General e Ms Sidna ki rwayal touzour la avek nou.  E san plis tarde nou a donn parol Onorab Andre.

 

HON CLIFFORD ANDRE

Mersi Mr Speaker.  Bonzour Mr Speaker bonzour bann Onorab bonzour bann dimoun ki a lekout lo televizyon e lo radyo.  Mr Speaker realignment; LDS i aliny son lekor avek Bidze 2018 pou dir ki pep Seselwa i bezwen benefisye avek progressive tax an Zilyet – an Zanvye 2018.  Minis ti vin dir nou ki sa pour konmans an Zilyet. Onorab Sebastien Pillay in demann nou yer pour realign nou lekor apre ki nou vwar ki zot letan nou, nou demande pour konmanse an Zanvye zot in realign zot avek nou parti LDS pour demann Minis pour konmans sa an Zanvye nou realignment i annord.  Mon sey pas lo sa Bidze Mr Speaker avek bokou latansyon e mon senserman pa vwar kote en sitwayen  i pour benefisye an plis ki i pe benefisye ozordi.  Dan sa konteks mon pour rezerv mon dwa pour vot kont ou an faver sa Bidze apre ki en analis konplet in ganny fer dan Staz Komite.  Mon oule fer resorti ki nou koman bann Manm Elekte par Seselwa pour fer sir ki 15 lo 10 i fer son lefe nou ki bann Ziz e pour fer sir ki lazistis depans finansyel, i ganny obzerve e respekte.  Mon pour fer sir ki mon desarz sa responsabilite plennman.  I difisil pour konpran akoz serten Departman pe demann logmantasyon dan zot Bidze, ler zot menm zot dir ki zot in fer tre byen ler dimoun pe kadas zot.   Si ou pe fer byen avek sa ki ou’n gannyen akoz ki ou bezwen plis ?  Mwan mon dir sa larzan ki larzan lepep i bezwen re ganny distribye avek pep Seselwa dan en lot fason.  Mon oule osi dir Mr Speaker, ki Zidisyer fodre i pey bann travayer ki’n resign dan Zidisyer e zot ankor pe esper zot konpansasyon pour plis ki 9 mwan.  Olye nou al trangle zot ankor – olye nou al trangle  bann travayer  ankor, nou bezwen fer sir olye nou al trangle bann travayer ankor nou bezwen fer sir ki sa bann Departman Gouvernman i konpletman elimin gaspiyaz ki parey sa Kanser e i pour touy nou pei si nou pa tret li.  Alors on konsey pour Minis se met bann prosedir ki pour asire ki sa bann departman i servi nou larzan ki nou’n rente pour gannyen, tre byen.  I vre ki ler nou get sa Bidze SPDF pe demann R294 milyon ; kot saler i reprezant R147 milyon e larestan R124 milyon pour ‘goods and services’.  An vi ki nou napa sa bann sityasyon postivite isi Sesel e vi ki nou annan nou en gran teritwar maritim ki reprezant plis ki 1.3 milyon mil met kare, e ki sirveyans sa grander teritwar nou bezwen plis resours imen e osi materyel, i neseser ki rol SPDF i ganny revwar avek bi pour fer bann Solda vin pli prodiktiv.  I enportan pour fer resorti, ki LDS pa oule personn perdi zot travay.  E nou pe senpleman demande ki zot vin pli efikas e pour fer sir ki progresyon dan travay i pour vin en lot – zot enn kot zot menm zot pour konnen ki lot letap ki zot pour fer pour zot profesyon.  Mr Speaker Trwazyenm-Az enn bann kous nou sosyete ki mon pour bezwen mansyonnen se bann Trwazyenm-Az, zot en group ki’n travay e fer sir ki ozordi nou dan sa kondisyon ki nou ladan bokou nou, nou paran i dan sa kategori bokou zot in dir mon sey demann Minis kote ki zot pour benefisye avek sa Bidze ?  Alors ankor enn fwa mon poudir olye donn sa bann gro, gro sonm larzan avek serten Minister ou lorganizasyon, akoz nou pa sey rod en fason pour ogmant osi larzan ki nou donn nou bann senior citizens or ou donn zot Mr Speaker en Trezyenm Mwan zot osi.  Allowance ; mon oule demann Minis pour rod en mwayen pour pa met allowance ki nou travayer i gannyen ansanm avek basic salary ler i kalkil tax – ler i kalkil tax pour peye nou pa pe dir ki allowance pa bezwen ganny takse.  Me sa i ava ganny takse lo en rate pli ba en legzanp de a trwa poursan.  Lanons dan Lasanble Mr Speaker en lot sekter ki mon pour tous lo la se bann Lanons ki’n ganny fer isi dan nou Lasanble.  Prezidan Faure in vin devan nou e dir ki i pour apwent de Tribinal enn ki get dan bann lensidan Labi, kot komet par Larme e Lapolis e lot ki pour get dan bann sityasyon Konpansasyon Later ziska la nou’n vwar ki sa tribinal ki pour get dan Konpansasyon Later in etablir, me son fonksyonnman i reste enserten.  Dimoun ki pa konnen kote pour kontakte sa reprezantan sa Tribinal.  I osi enportan pour note ki Konpansasyon ki sa Tribinal pour donn bann dimoun ki’n fer laplikasyon, pa’n zanmen ganny set up.  E kote sa bann dimoun pour ale pour asire ki zot award i ganny satisfer.  Sa Mr Speaker i montre ki Gouvernman pa pe fer sa ki li menm i dir.  E lot kote sa Tribinal ki pour osi get dan labi ki’n ganny komet par Larme avek Lapolis, pa ankor ganny kree.  Ler nou anonse annou fer sir ki nou fer li vin en realite a sa staz Mr Speaker mon oule fer resorti, ki ler sa Tribinal i ganny anonse fer sir ki en fon i osi set up kot bann konplenan, i konnen kote pour ale pour satisfer zot award.  Mon oule fer referans avek vizit ki Prezidan ti fer Anse Aux Pins le 8 Septanm sa lannen.  I ti vin vwar bann sityasyon enkyetan bann zabitan, me ziska la tou i ankor parey sa businessman ki Prezidan ti dir avek Mr Yves Choppy pour deblok li, pa ankor tann nanryen.  Sel keksoz ki’n bouze se akoz mon ti demande pour vwar sa plan pour Daycare e mon ti dan miting avek Local Government e mon demande ki sa lokasyon i ganny revwar, e sa lokasyon aktyel kot zot ti pour fer sa Daycare i ganny servi pour batir en batiman pour bann pti biznes dan distrik.  Par lefe ki nou’n bezwen pous sa proze ki larzan in ganny vote dan Bidze 2017 – mon oule dir Minis rod en fason pour remet sa larzan dan Bidze Gouvernman Lokal pour asir konplisyon sa proze, ki pour benefisye zabitan Anse Aux Pins.  Pti proze dan distrik ; Mon pa pour kapab pa fer referans avek bann pti proze dan mon distrik ler mon ti demann Minister gouvernman lokal ler mon ti dan en miting pour vwar sa bann proze, mon ti ganny garanti ki sa i posib.  Pour asire ki napa okenn zes ou manboulouk ki arive, mon ti demande pour vwar serten proze imedyatman avek DA e reprezantan Gouvernman Lokal ; espesyalman Project Department.  Mon ti sirprann Mr Speaker ler mon ti ariv lo site avek en lekip ki enkli Enzenyer ki nou annan Anse Aux Pins mon ti konstate pour mwan menm, ki sa travay ki pa ti dapre progranm ki ti’n sipoze terminen e rann le 24 Oktob, me ti’n fek konmanse sa zour avan mon vizit.  Kote nou pe ale Mr Speaker?  Sa proze ki larzan taks ti’n ganny aprouve pour fer ti mal fer e detrwa zour avan i ti’n sipoze konplete i pa ni ti menm i pa ni ti ankor menm komanse, pour ki ou ti ava dir i pe al konplete dan de trwa zour.  Ler nou ti gete, sa proze ti zis en vre gaspiyaz larzan.  Mon oule fer resorti ki dan mon diskisyon ,mon ti ganny dir ki sa Minister pe al fer en Seksyon Project Implementation, avek en Direkter Zeneral.  Sa i montre nou tre kler, ki sa bann Minister, espesyalman ki konsern pti proze, in annan labi.  La mon espere avek kreasyon sa Unit ou Departman, nou pour vwar en amelyorasyon dan bann proze ler i ganny fer.  Se dan sa sekter, ki nou ti demande ki MNA i ganny involve dan tou proze, pour ki nou ava asire ki tou sou ki ganny depanse dan distrik, i ganny fer avek tou accountabilityMinister Lasante ; Dan sa Bidze Mr Speaker nou vwar ki Minister Lasante in ankor enn fwa ganny en logmantasyon.  Mon oule dir avek zot fer sir ki nou ganny en kalite servis ki akseptab.  Kot nou bezwen donnen nou pour donnen avek bi ki servis i amelyore, pour ki nou bann zabitan ava ganny konfidans dan nou servis lasante e ki Seselwa pa ava al ganny trete aletranze.  Reabilitasyon drog ; An prenan kont sa Departman Reabilitasyon drog avek rediksyon mon pa pour kapab donn mon sipor pour sa R50 milyon ki i pe demande.  Mon oule fer resorti ki i annan bokou landrwa ki nou kapab senpleman renovate, e fer sa progranm avek bann zenn manrmay ki bezwen sa servis.  Nou pa kapab ki zis a sak fwa ki nou le satisfer en dimoun nek se nou bann taxpayers ki pour bezwen pey lepo kase Mr Speaker.

 

(APPLAUSE)

 

HON CLIFFORD ANDRE

Tax lo 2enm ou 3enm lakaz ; mon oule demann Minis pour konsider ki sa tax lo en 2enm lakaz i ganny retire konpletman.  Sa i ava ankouraz bann dimoun ki annan teren pour ed Gouvernman par konstrir lakaz, ki pour retir presyon lakaz lo Gouvernman.  Ogmantasyon laz Sekirite Sosyal;  Mr Speaker mon pa an faver fer laz Sekirite Sosyal monte sorti 63an pour al 65an.  Sa i paret en lensilt pour bann ki travay dir.  Get en kou bann travayer kot IOT ki travay 24 lo 24 parfwa.  I pa normal pour demann zot ler zot in ariv laz al repoze zot pour bezwen espere, ouswa aret travay san en benefis, a en laz parey.  Mr Speaker sa mon oule demann Minis pour donn nou en garanti, ki sa pa pour arive dan lannen 2018.  Dan sa konteks Mr Speaker mon ti a kontan demann nou zenn pour lev-e debourye e pour kontribye dan devlopman nou pei.  Sa i ava fer sir ki nou kontinyen mentenir laz Sekirite Sosyal 63an – ou menm fer li desann, akoz nou pour annan en kous nou sosyete ki pe kontribye.  Dan sa konteks Mr Speaker mon ti a kontan ki Minis i revwar Lalwa Sekirite Sosyal kot i dir si ou pa’n dan Sesel 5an avan ou ganny 63an, ou pa pour ganny ou Sekirite Sosyal.  Sa i mal akoz si ou’n fer ou kontribisyon pour bokou lannen e pour en rezon ou en lot ou’n ale apre ou retourn Sesel pour pran ou retret ou kontribisyon i bezwen ganny donnen avek ou.  Pareyman, ler en dimoun i al plis ki 3mwan apre ki in pran son retret son sekirite i bezwen ganny peye, akoz sa dimoun in fer son kontribisyon e si in deside al kot son bann zanfan pour plis ki 3mwan, akoz ki son larzan ki in kontribye pa ganny peye avek li ?  Kote sa larzan i ale ?  Donn li sa larzan akoz pour li sa.  Dimoun ki’n tonm malad ; Mr Speaker mon oule fer resorti ki ler en dimoun i tonm malad pandan letan ki i pe travay apre 3mwan sekirite sosyal i pey li R2500, akoz i pa pe ganny son saler pour sa peryod ki i malad Mr Speaker sa larzan ki sa dimoun pe gannyen avek Sekirite Sosyal i pa pour ase, akoz sa dimoun i annan deza loan ki i ti pe peye e ki mannyer i pour aste manze?  Mon pour demann Minis pour konsidere.  Olye ogmant serten Minister kot nou pour vwar pa zistifyab, pour met de kote sa larzan e pey bann det sa dimoun, avek bi pour fer sir ki sa dimoun pa perdi son lakaz ki souvandfwa i garanti son loan.  Si nou pa rod fason pour fer sa Mr Speaker se la kot Gouvernman pour vwar li pe sezi lakaz en sitwayen malad.  Progressive Tax; progressive tax i bezwen vin an aplikasyon an Zanvye 2018 Mr Speaker.  Akoz sa i a vreman fer sir ki sa Seselwa, pour annan en pe larzan dan son pos, menm si i pa bokou – sa i pour montre ki nou serye e nou pe gard nou promes avek lepep.  LDS pour fer sir ki sa i ganny fer pour benefisye nou pep.  Mr Speaker Minis in dir nou ki pour annan en lot Sistenm Tax an 2019 kot en biznes pe fer en reveni R500 mil par an, pour pey en pri fix R3000 mil.  E sa ki fer reveni R500 mil ziska R25 milyon pour pey 3poursan.  Mr Speaker mon pour demann Minis pour revwar sa akoz en pti biznes pa kapab pey parey en gro biznes.  Avek sa mon ti a kontan sizere ki Minis i revwar en Sistenm Tax swivan ; (1) 3poursan pour biznes ki fer reveni depi R500 mil ziska R5 milyon. (2) 5 poursan depi R5 milyon ziska R10 milyon ; e en Sistenm Progresiv pour ki en pti biznes pa pour pey parey sa gro lotel 5 Star ou IOT, ou lezot biznes.  Sa i pour permet Gouvernman pour anmas plis reveni.  Fer li ki tax pa pour plis ki 10 poursan.  Semen Capucin Mr Speaker, mon pa pour mon pour bezwen fer resorti ki mon reste dezapwente ki 1an apre ki mon ti fer resorti ki semen dan Capucin ki pour al kot bann Payet, i pour bezwen ganny konsidere e ki ler Prezidan ti vin Anse Aux Pins mon ti fer resorti sa ek li, e mon ti ganny garanti ki sa i lo progranm pour lannen 2018.  Me mon pa vwar li okenn par dan Bidze.  Mon pour demann Minis pour rod fason ki sa i ganny enkli dan Bidze dan plas donn serten Minister pour fer gaspiyaz .  Kot nou pour koupe nou ava anvoy pour sa semen e pour fer sir ki bann venue sportif,  dan distrik, i ganny byen mentenir e lalimyer i fonksyonnen lo kourt e laplenn.  Lakaz ; Apre ki lanons pa Prezidan ki pour annan 24 lakaz ki pour ganny konstrir dan distrik, mon ankor pe espere kan Anse Aux Pins pour vwar pour li.  Annou aret fer nou zabitan soufer.  Zot pe espere avek bi ganny zot lakaz.  Minis dir mwan dan ou repons, kote mon distrik Anse Aux Pins i stand pour ki mon osi mon kapab pas sa lenformasyon avek zot ler mon fer miting pour donn zot en kontrandi.  Sport; Mr Speaker mon oule fer resorti ki serten Departman Gouvernman pe servi fasilite Leta, pour donn bann zwer ki zot fer vini pour zwe pour zot.  Dan sa kad, mon oule demann Minis pour fer sir ki SPDF – Red Star pa servi bann fasilite ki tax payers pe donn zot pour zot aste zwer enternasyonal pour zot compete avek lezot Klib Lokal.  Mon pour demann Minis pour fer en lodit dan sa bann zafer e sa i ava asire ki St Michel, St Louis e lezot i lo menm footing avek SPDF – Red Star nou tou nou le vwar konpetisyon improve be annou fer li lo en level playing fieldLagrikiltir; Avek sa logmantasyon dan Bidze Lagrikiltir, mon oule demann Minis si sa bann pti fermye pour ganny akse avek sa bann larzan e ki pour napa okenn konplikasyon e retar pour zot akse sa Fon.  Sa se akoz se zot ki pour fer nou ganny sekirite manze e vin otosifizans dan sa sekter.  Pour konklir Mr Speaker, mon oule ki Minis i donn nou en kontrandi lo koleksyon nou bann larzan ki aparaman larzan FIU avek NDEA pa’n pey nou.  Eski i pour al rode ou non?  Sa bann gro sonm ki nou dekouver ki’n disparet dan nou lekonomi, eski i pour al serse pour nou, ou i pour toultan vini vin dir nou, nou pour bezwen pey plis tax lo tax apre tax?  Mon oule dir ki avek LDS Sesel pour touzour en ganyan e Seselwa pa pour perdi.  Nou pour toultan fer sir ki nou reste sa Ziz ki zot in vot nou pour fer.  Mwan mon le donn zot mon langazman ki mon pa pour ‘’Zanmen les tonbe.’’ Sesel i pli gran ki nou tou.  Lontan nou ti dir, ‘’plito lanmor ki nou viv dan lesklavaz.’’ Ozordi nou dir, ‘’Fer nou lavwa tande.’’Ee zet anba kot i neseser e se egzakteman sa ki mon pour fer.  Mersi Mr Speaker.

 

(APPLAUSE)

 

MR SPEAKER

Mersi Onorab Andre.  Mon a donn laparol Onorab Simon Gill.

 

HON SIMON GILL

Bonzour Mr Speaker.  Bonzour tou koleg Onorab bonzour Minis e ou delegasyon ; bonzour tou manm piblik ki pe ekout nou.  Mr Speaker depi ler Minis in vin dan Lasanble in prezant son Bidze, mon’n pran bokou letan pour analiz sa Bidze i met lanfaz lo konteni son Diskour byensir.  Tou le lannen, konman bann Manm Parlman, nou ganny sa privilez ki Lanasyon Seselwa in donn nou pour nou diskit e donn nou bann lopinyon lo Bidze nou pei Sesel.  E depi ler bann deba in konmanse dan Lasanble Mr Speaker, mon osi pran letan calm pour ekout sak bann koleg Onorab, lo tou le de kote latab sa ki zot annan pour kontribye dan Bidze pour lannen 2018.  Bann diferan reaksyon, in anmenn byensir bann diferan reaksyon osi – dan diferan kous nou sosyete, bann nouvo propozisyon ki’n sorti ki byensir ler nou Minis i fer son konklizyon i ava donn bann pozisyon lo la.  Bann demann byensir, mon krwar dan mon prop refleksyon i annan ki rezonnab e mon krwar osi i annan ki demann bokou plis refleksyon diran lannen 2018 e o dela 2018.  E Mr Speaker konman en dimoun ki en bon pe lannen in dan politik, parey ou e parey bokou nou, ler nou pran nou lespri byen calm nou asize, nou sey konpran ki pe pase otour nou i annan en keksoz ki nou tou – san eksepsyon, nou bezwen tonm dakor lo la, e sa se ki Sesel ozordi, nou pe fas avek en moman ki tre diferan avek bann moman ki nou’n viv.  Sesel ozordi Bidze 2018 in ganny prezante dan en konzantir kot mwan mon ava pe lir nou dan en leta ki vreman nou pe kestyonn e pe kestyonn, bokou plizyer keksoz ki al odela Bidze 2018.  E kwa sa ?  Sa se sa leta sekirite e ensekirite ki nou pei e nou pep pe fer fas avek.  Dan bann moman kot mon ganny lokazyon pour entervenir Mr Speaker lo kestyon drog, par egzanp mon’n demande si i pa i moman pour nou deklar en Leta Dirzans e deklar en lager san frontyer – san limit, pour nou kapab deal avek sa kestyon drog e met li anba kontrol enn fwa pour tou ; pour ki nou pep i viv dan lape plizyer fanmir i aret viv dan en laterer entern dan zot lakaz e kot zot kapab epanouir e zwir zot lavi dan trankilite e fer zot kontribisyon dan en fason normal dan nou pei.  E egalman Mr Speaker ozordi dan sa konzantir mon pour lans en lapel avek tou dimoun e Lotorite Lapolis e menm ziska nou Prezidan, pour etidye e gete si pa i moman pour nou deklar en Leta Dirzans ; kot sa fleo krim ki tou dernyerman nou pe fer fas avek ; kot sa bann akt terer vol entimidasyon ki nou pe fer fas avek.  E yer swar ler mon atann Komisyoner Lapolis Mr Speaker koz lo reorganizasyon dan Lafors Lapolis, e kolaborasyon ki i pe gannyen avek Lafors Ladefans mon dir probableman moman i propis pour nou aprofondir sa relasyon travay.  E pour nou asire ki dan sak kominote, dan sak vwazinaz ki sak sitwayen i ganny prepare e form bann lekip, pour ki enn fwa pour tou nou ede pour detekte okenn sityasyon dan ou vwazinaz, dan nou kominote.  Mr Speaker, probableman zot ava dir ki mon an deor Bidze, me sa Bidze pa pour kapab ganny enplimante ; lobzektif Bidze pa pour kapab ganny enplimante bann forecast pa pour kapab ganny atenn si nou napa en pep ki pe viv e pe travay dan trankilite son lespri.  Nou pa pour kapab think straight.  Nou pour santi nou entimide dan realizasyon dan nou bann latas toulezour ki nou annan pour fer.  Mon krwar i ekstrememan enportan ki nou bouze e pran sityasyon anba kontrol, met sityasyon anba kontrol.  Mr Speaker ler mon lo sa pwen mesaz ki mon ava voudre anvoye ozordi pour nou bann koleg ki’n koze e dir zot si i annan en keksoz ki nou devret met ansanm, se sakenn de nou met nou lanmen ansanm, annou atrap lanmen kanmarad, annou fer en lasenn, akoz ‘Ansanm’ nou kapab ganny sa batay kont entimidasyon kont tou kriminalite dan nou pei.  Nou kapab fer li.  Annou pa rod met lakle kot baro State House me annou met tou nou lakle ansanm annou fer sa lasenn kree sa mayon, pour nou kapab lit kont tou bann entimidasyon.  Si bann Teachers in desann pe konbat kont bann entimidasyon ki zot pe fer fas avek, nou osi nou kapab anmenn e form sa lafors adisyonnel, pour nou kapab met sityasyon anba kontrol.  Ou a realize Mr Speaker, mon pa pe blanm personn ; akoz bokou bann dimoun ki’n entervenir bokou ban Onorab ki’n entervenir nou ankor stuck dan en mindset.  Malgre ki nou ganny akize ki nou ankor dan en mindset lepase, me nou ankor stuck dan mindset lepase.  Nou bezwen bouze e sanze sa mindset Mr Speaker.

 

(APPLAUSE)

 

HON SIMON GILL

Nou bezwen sanze.  Mr Speaker sa Gouvernman – mon pe mazin byen ki mon dir wi Mr Speaker sa Gouvernman ki la depi 40an, i pa’n zis kree oubyen form divan, oubyen koudvan or tanpet.  Si nou pe dir Gouvernman in kree tanpet, nou pe admet ki nou tou anndan isi nou bann tanpet.  Me selman mon pa pour krwar sa mwan.  Mwan mon krwar sa i en lapsus.  Mwan mon krwar, tou nou bann koleg ki lo lot kote latab, laba i bann dimoun ki dan sa dernyen 40an dan sa pei zot in viv e grandi e menm ne dan sa pei – apre ’77.  I annan pa ti ankor ne ‘77 ki ozordi i en Manm dan sa Lasanble.  E ou en prodwir sa 40an lenvestisman dan Sesel.  E si ou en tanpet ou en tanpet sa lenvestisman ki nou’n fer.  Mr Speaker mwan mon krwar, poudir ozordi nou tou ki isi dan sa Lasanble nou bann dimoun ki kapab fer en bann kontribisyon pozitiv, pour nou ede pour sanz sa mindset deor.  E annou fer li annou sezi sa loportinite pour nou sanz sa mindset deor, e pour nou kapab ‘Ansanm, Ansanm’ vin sa bann leaders ki nou pei i bezwen ; pour nou vin sa bann roll model ki nou pei i bezwen.  Tou an admetan ki nou pa bann dimoun ki parfe isi anndan.  E mwan mon bokou lwen avek zonm de perfeksyon parey ou Mr Speake.  Nou tre lwen avek perfeksyon.  Bann politisyen nou’n pas nou letan devlop serten mindset la deor dan nou bann konpanny politik dan nou bann mesaz ki nou’n pase.  Mr Speaker ler mon’n swiv devlopman politik, i annan bann mesaz ki vreman a dir was beautiful – fantastik ; par egzanp – ‘’Pa pour zanmen les tonbe,’’ was beautiful.  ‘’The time is now’’ was beautiful ;  ‘’Pa file Kaptenn’’ was beautiful, ‘’TOGETHER’’ is beautiful and it will remain beautiful akoz i zis ‘’ANSANM’’ ki nou pour kapab transform sa pep Mr Speaker.  Me Mr Speaker, ‘’Pil Lo Li’’ is not beautiful ;

 

(APPLAUSE)

 

HON SIMON GILL

‘’Pil Lo Li,’’i anvoy en mesaz eg deor, e sa i ede ki’n kree en mindset kot nou tou nou krwar nou annan sa responsabilite pour Pil lo nou dimoun deor.

 

MR SPEAKER

Onorab mon a enteronp ou en pti moman ; en pti moman ou a kontinyen apre.

 

HON SIMON GILL

Wi Mr Speaker ok.

 

MR SPEAKER

Zis yer mon al vwar en MNA dan Lopital yer apre midi, mon pa le al vwar en 2enm.  Calm down avan ou leker i large.

 

(laughter)

 

MR SPEAKER

Me selman mon ti a zis dir ki mon apresye tou sa ki ou pe dir, me annou al lo Bidze.  Kontinyen Onorab Gill.

 

HON SIMON GILL

Mr Speaker mersi bokou Mr Speaker.  Mon demann mon bann koleg pour cool, cool.

 

(laughter)

 

MR SPEAKER

Ok tou dimoun cool.  Kontinyen Onorab Gill.

 

HON SIMON GILL

Take it cool, take it cool.  Now is my time !

 

(laughter)

 

HON SIMON GILL

E mon’n donn zot posibilite pour koze.  Mon’n ekout zot.  Mon’n ekout zot.

 

MR SPEAKER

Ok kontinyen Onorab.

 

HON SIMON GILL

Mr Speaker mon krwar i ekstrememan enportan – mon pour sorti lo sa pwen mon pour sorti e mon pour bouz lo mon 2enm pwen.  Mon 2enm pwen i anmenn mon pour koz lo kestyon pri lavi, Mr Speaker,  pri lavi.  En fenomenn ki tous sakenn de nou, ki tous sakenn nou pos, me ou konnen Mr Speaker, sosyete imen, parey in evolye e parey nou tou nou aksepte li ozordi i en sosyete enparfe.  Mon dir enparfe akoz, nou tou ozordi isi dan sa Lasanble konman bann Manm Parlman byensir, nou aksepte ganny en saler an plis ki sa dimoun ki en Cleaner.  Nou aksepte pour nou ganny en saler an plis ki sa Nurse ki sa Teacher, me nou tou nou lager nou tou nou anmenn nou bann largiman nou dir fodre ki sa Nurse i ganny plis larzan ; fodre ki sa Dokter i ganny plis larzan fodre ki sa Teacher i ganny plis larzan.  Akoz ?  Nou anmenn en lot largiman nou dir nou tou ase dan menm laboutik, nou aste tou sa ki nou bezwen dan menm laboutik me an menm tan nou pa pour zanmen aksepte akoz mannyer sosyete in evolye ki nou konman bann Parlman nou pour rezet nou larzan ki nou gannyen e aksepte en larzan en NurseNow, konmsi ki mannyer nou eksplik sa konpleksite sosyete imen?  E ki mannyer nou sorti dan sa lenpas kontradiksyon sosyal.  Ozordi nou trouv bann diferan Trade Union i formen.  Yer bann Teachers i fer lamars pour fer manifestasyon nou trouv ex-Minister St Ange pe swiv ; nou trouv ex-Minister Sinon pe swiv, e nou trouv Onorab Ferrari ki pa la ozordi pe swiv, e pe donn interview lo televizyon.  Ou konnen mon pa konpran sa.  Me sa ki kler, se ki nou bezwen tonm dakor pou dir avek Minis ozordi la dan nou Lasanble, ki Minis moman in arive e nou tenir kont tou zefor ki Gouvernman in fer ; nou’n ogmant lalis tou bann komodite ki nou santi ki enportan e tir tou tax – tou GST lo la.  Nou’n tire.  Lalis in long.  Mon menm mon pa kapab fini mazin tou komodite ozordi, ki zero.  Be kote nou problenm i été?  I annan plizyer eleman ki’n fer resorti pour nou kapab atak sa problenm.  No. (1); No. (1) se sa ki nou apel tou lesanz – exchange rate.    Ki mannyer nou met sa sityasyon exchange rate anba kontrol?  E ki mannyer nou stabiliz li.  Ozordi nou’n ouver marse foreign exchange tranzaksyon an foreign exchange, e sa dan li menm in anzandre en lot problenm. Ou annan serten sa bann dealer dan foreign exchange i anmas sa foreign exchange i met anba, e i kree problenm dan demann. E i kree problenm dan lof.  Minis ou konpran byen ki mon pe dir.  E Onorab Afif i konpran byen ki mon pe dir.  Ozordi nou annan en Rezerv nou annan en rezerv e nou proud ki nou annan en Rezerv ; en Rezerv ki an presedan dan nou listwar ekonomik.  Now ki mannyer nou Rezerv ki nou annan san kre problenm ekonomik pour nou pei, nou kapab mitigate avek bann lefe, bann lenpak sa to lesanz ki annan?  Akoz mon pe koz lo lesanz konman en fakter pri mondyal?  Akoz ler to lesanz i monte desann, sa menm larzan ki nou pe bezwen pour enport komodite, i pran lefe lo pri final sa komodite. Ler mwan mon al aste dan laboutik, oubyen ler sa madanm i al aste dan laboutik pour li konsonmen.  E an plis ki sa en 2enm fakter ki enportan Mr Speaker, nou’n koz lo loan labank – lentere lo loan labank.  Onorab Afif in koz lo la dan son entervansyon Onorab Ramkalawan in koz lo la e lezot entervenan in osi koz lo la.  I enportan Minis ki nou met ledwa lo sa fenomenn to lentere, lo bann loan labank, e sa i devret konmans lo nou 2 labank ki Gouvernman i shareholder ladan Nouvobanq, Seychelles Commercial Bank.  Akoz ki nou pa kapab met ledwa lo la?  Si i annan dimoun ki teti ki latet i dir dan sa bann labank, ki Gouvernman i en majority share, mwan mon pe dir avek respe pour tou dimoun let’s put them aside!  Annou bouze.  Nou lentere se pa en endividi ki pe diriz en labank.  Nou lentere se lentere Lanasyon ; lentere lepep Seselwa.  3enm eleman ki osi enportan ki enpakte, ki enpakte anfen kont lo kou lavi lo pri lavi.  E nou koz lo la dan plizyer repriz e sa se pri telekominikasyon dan sa pei.  Ki nou pour fer avek sa sityasyon ?  Eski nou santi Mr Speaker ki nou koz ase avek sa bann top Managers ?  Si nou santi nou’n koz ase it’s time to move forward avek lezot aksyon.  E ki nou annan konman lezot aksyon?  Ankouraz lezot envestiser dan sa sekter pour ki nou ogmant sa bann service provider e ki nou kre la baz pour donn plis konpetisyon.  Mon krwar sa i ava fer sir ki pri ki nou peye pour telekominikasyon an zeneral, e tou son bann servis kolateral i desann, e sa i ava enpakte dan en fason signifikan lo cost of living dan Sesel antye.  Mr Speaker lot keksoz ki osi enportan e ki nou bann marsan i konplent se la kantite letan ki marsandiz i dormi lo Lasose.  E bann fine – bann larzan ki sak komersan i bezwen peye pour letan zot bann komodite i pri la.  Be si ou ki annan problenm pour pase mon bann dokiman avan ler mon tir mon bann komodite akoz ki ou bezwen sarz mwan   E mon napa swa ; mon napa lezot swa, mon bezwen transfer sa charge lo konsonmater.  E sa i fer ki pri komodite ankor enn fwa son pri i monte.  Nou, nou pe dir si Custom or si Por ki responsab pour tard marsandiz lo Por pa devret fine okenn marsan ; pa devret met okenn sir-saz lo okenn enportater dan sa pei ; ziska ler ki nou kapab met sa sistenm fast tracking an plas ki Minis in aborde dan son Diskour Bidze.  Nou bezwen fer sir si tou keksoz i annord, ki konsonmater pa fer fas avek sa bann pri ki ‘pa neseser’ mon ava apele.  Mr Speaker ler mon koz lo pri lavi, i enportan mon donn mon sipor lo sa dernyen pwen avan mon antre lo mon 3enm pwen lo sa laspe…

 

MR SPEAKER

…Onorab Gill donn mon en pti minit ou’n koz 9.27 i reste ou 3 minit mon deza donn ou 26 minit.  Sey round-up akoz i annan ankor 3 dimoun pour koze silvouple.  Ale kontinyen.

 

HON SIMON GILL

Ok Mr Speaker si ou dir mon 3 minit mon napa swa mon bezwen aksepte.  Bon Mr Speaker, lot pwen ki mon le aborde lo sa kestyon pri lavi, se sa zefor ki Prezidan Faure pe fer.  In al Nairobi – Kenya e bann pei ki ou kontan – enn bann pei dan bann konversasyon ki ou’n fer nou konnen ou annan serten relasyon avek e dernyen son vizit la Maurice.  I annan bann zefor serye e pa zis li i annan son lekip byensir ki’n ale i annan bann zefor serye, pour nou kapab anmenn marse kot nou ganny nou bann prodwir pli pre avek nou teritwar.  E sa nou panse ki nou kapab annan en lenpak pozitiv lo pri ki nou pei pour bann komodite, finalman ler i ariv kot lakaz sa madanm pour li konsonmen.  Mon pe demande, e lapel ki nou konman en lasanble nou devret dir e mazinen, ki nou devret don tou nou sipor, se zisteman pour demann bann teknisyen e pour demann bann lenstitisyon konsernen pour zot bouze, e fer sir ki sa ki’n ganny diskite i pran en legzistans reel ; i ganny realize.  san pli tarde sa bulk buying – bulk import, mon krwar i enportan si tou bann kondisyon ler in ganny diskite i favorab.  Annou met li an aplikasyon.  Mr Speaker mon realize ki letan ki ou’n donn mon pe fini.  Mon pour dir ou mon a profite dan sa 6 lezot pwen pour zot lo la dan Committee Stage.  Me pour mon konklir.  Pour mon konklir mon pour demann mon pour fer en demann solannel, avek tou nou bann koleg Manm Lasanble ozordi.  E sa demann solannel se, annou nou tou, annou nou tou tonm dakor pour met politik partizan lo back burner ; .En demann ki mon pe fer.  Mon repete annou tou tonm dakor pour nou met politik partizan lo back burner.  Prezidan Faure Mr Speaker in fer en deklarasyon serye dan sa direksyon.  Malgre in ganny mal enterprete dan diferan kous nou sosyete, Prezidan Faure in dir, ‘’mon la e mon pran okipasyon se Sesel. Mon pran okipasyon, se byennet sak Seselwa.’’ E dan moman kot nou tou dan sa Lasanble koman bann politisyen, nou tonm dakor pour met politik partizan deryer nou, nou pour fer en kantite dibyen sa pep.  Mr Speaker ou a dakor si ti annan en dimoun ki ti koz lo partisan politics se menm  Mr Simon Gill.  E mon’n pran en rezolisyon depi en pe letan – mon krwar zot realize dan mon entervansyon, ki mon’n met sa de kote e ki mon bi – mon lobzektif, dan sa nouvo lanvironnman politik, se pour koz lo bann keksoz ki pour anmenn benefis pour nou pep me non pa pour nou ganny prosen Eleksyon.  E nou tou nou bezwen tonm dakor pour nou koz lo keksoz, pour nou kapab anmenn Sesel devan.  Nou sel keksoz ki devret preokip nou se Sesel e le byennet lepep Seselwa.  Annou fer sa e nou a vwar ki Sesel pour avans devan.  Annou aret atak – annou aret atak  annou aret atak.  Annou arete akoz sansan nou pa pour al pli lwen.  Nou pa pour al tro lwen.

 

MR SPEAKER

Order!  Order!

 

HON SIMON GILL

Nou pour tonm dakor lo tou sa bann keksoz pour nou refer en transformasyon ladan.  Nou pour bezwen demann avek nou servis piblik to deliver ;pour delivre fer sir ki sa ki’n ganny mete dan Bidze 2018 i pa carry forward pour 2019.  Me ki nou kapab fer li plennman – si i pa 99 poursan me 100 poursan, ki nou ganny realize.  Mr Speaker mon remersi ou pour donn mwan sa pti gin letan pour mon fer enn de remark lo nou Bidze.  E mon dir ek mon bann koleg nou bezwen travay ‘Together. ’ ‘Ansanm’ nou bezwen tonm dakor pour anmenn Sesel pli lwen lo sa lot staz son devlopman.  E nou tou ansanm nou kapab fer sa diferans.  Mr Speaker mersi bokou.

 

       (APPLAUSE)

 

MR SPEAKER

Mersi Onorab Gill.  Mon krwar pa si i annan okenn dimoun ki kont sa lide ki nou bezwen travay ‘Ansanm’.  Mon a donn laparol Onorab Esparon.

 

HON REGINA ESPARON

Mersi Mr Speaker.  Bonzour tou Onorab bonzour tou dimoun a lekout.  E pour konmanse mon a zis reasir Onorab Gill ki pour napa ‘Pile’ pour napa partisan politic mon pe vin deliver.  Mersi.  Permet mon konmans mon lentervansyon lo sa Bidze par fer en pti letour lo sityasyon aktyel dan pei.  Nou vwar nou pe adres Bidze 2018 dan en sityasyon ki dimoun i anmer dimoun i enkyet e fristre e pli enportan ankor dimoun pe viv dan en gran lafreyer akoz dimoun i per vyolans kriminel.  Nivo sekirite dan pei in tonbe e tou dimoun i en viktim potansyel.  Bann lensidan tou resaman i fors nou realize ki nou nepli kapab ferm lizye lo sa logmantasyon dan ka vol, avek vyolans ki pe tromatiz nou pep.  Alor i neseser pour annan lenvestisman finansyel e imen pour abord sa lakrent.  Piblik pe kriy ayoyo akoz pri lavi in kontinyelman ogmante e in kler ozordi ki Gouvernman pa pe kapab rezourd sa problenm. Merd fanmir i kontinyen kas latet pour lager avek sa lavi kantmenm Gouvernman i dir ki STC pour anmenn sa soulazman pour bann fanmir nou vwar ki sa pa toultan leka.  Mr Speaker sirtou ler en pake spaghetti pe vann R20 kot STC tandis ki dan lezot laboutik i vann R9.50.  Nou bezwen realize ki ozordi pa zis manze ki fer monte pri lavi.  Nou bezwen osi mazin bann servis parey internet telefonn bill delo avek elektrisite.  Pran en bill delo avan ki ou servi ou deza annan ou R25 pour ou peye sa i levy R15 e rental R10.  Apre pour sa bann linite konmans par R7.80 pour premye 10 linite R19.40 pour 2enm 10 linite e i monte ziska R29.58 en linite si ou pe fer plis ki 50 unit par mwan.  E mazorite lakour pe servi plis ki 20unit par mwan.  E mazorite lakour pe servi plis ki 20 linite par mwan.  E pa oubliye ki sarz pour Sewage i egalman la kantite delo ki ou servi, malgre pa tou delo ki antre dan lakaz ki al dan sewage.  Eski sa i zis?  Elektrisite pli move avan ou servi ou deza pe servi R23.45 e son linite i monte ziska R20.23 par linite si ou pe servi 300 linite.  La deza pour sa mert fanmir avan ki i pey son bill i annan li preski R50 pour li peye.  Ler PUC i reviz son tarif i mont an gran, e ler i desann i desann par 1sou Mr Speaker.  E la mon pe dir ki wi Minis nou bezwen envestir plis dan bann lenerzi renouvlab parey ou’n dir pour ede redwir kou lavi.  Mon mazin bann dimoun dan Flat North East Point ki Gouvernman ti retir zot pano soler, lo zot lakaz ler zot ti repare e zanmen  in remete.  Mon espere ki sa i ava ganny ranplase e petet zot ava parmi bann ki a ganny bann pano photovoltaïque.  Mr Speaker ler mon pe koz lo bann dimoun vilaz North East Point, permet mon demann Minis si i annan okenn alokasyon dan sa Bidze pour repar sa bann Block Flat North East Point ki MLUH in fini vann sa bann zabitan me son lenfrastriktir pa bon ; balkon pe tonbe e dan plafon, plafon osi i annan problenm avek sa bann tank delo dan plafon.  E bokou dimoun pa pe kapab afford pour fer depans ekstra pour zot repare dan zot pos.  Minis sa en promes ki Prezidan menm li menm, ti fer avek bann zabitan vilaz ler i ti vizit zot.  Mon pa konpran si Msye Faure ki pe bat latet sa bann dimoun, oubyen si se lord ki pa pe ganny egzekite me i paret ki bokou promes i ganny fer dan sa bann vizit e apre ou pa vwar okenn aksyon.  Mon pran par egzanp Vanessa ki malerezman ki apre tou sa bon parol i ankor dan menm sityasyon  Mr Speaker LDS i vwar i le vwar en Gouvernman ki efektiv ; pli responsab e annan bann plan serye.  Dan sa klima 15 lo 10 nou anvi vwar lefikasite e non pa promes e plis promes.  De lot kote sityasyon drog pe vin pli pir e mezir ki bann eskobar i fer monte pri Eroin, bann adikt i al vole e zot kas lakaz dimoun avek vyolans.  E nou menm vwar 2 ka kot de zonm ki’n travay dir pour zot biznes avek zot fanmir in ganny touye par dimoun ki ti pe vin vole.  An plis ki sa, serten zenn i krwar ki vyolans i repons avek solisyon pour tou pti bagar ki lev-e.  Premyerman nou vwar sa ka ki tris ki’n arive Discoteque Fire and Ice ; dezyenmman Mardi kot lekol Mont Fleuri e trwazyenmman Lendi kot sa koup touris otrisyen in ganny atake.  Dan Program ‘Bare Voler’ nou tou nou’n soke avek zistwar bann dimoun.  Se sa la realite zistwar ozordi dimoun pa santi li an sekirite ni se li ni dan landrwa piblik.  Mon koz sirtou lo sa mert fanmir ki vin dir mon ki ler i ariv aswar zot per pour ganny en sonmey profon, pangar dimoun i ava antre se zot e atak zot.  Mon ti a kontan ki Minis i eksplik nou, ki mannyer son Gouvernman atraver sa Bidze pour kapab garanti pli bon sekirite nou pep ?  Mr Speaker Minis i dir lekonomi pei pe fer byen, me la realite lo teren i totalman diferan.  Ler i pe dir ki pei in fer sikse konsiderab dan bann laspe lekonomi zabitan Glacis i demande be kan?  Kwa ki’n benefisye ladan ?  Ler mon koz avek Madanm Agnes Larue ki pe esper son peron i dir mon i pa vwar li dan sa sikse ; pour la fanmir Hoareau ki pe monte desann ankour pour zot ganny wayleave – semen avek bi ki lanbilans a kapab vin tir zot papa dan lakaz kan son asma i lev-e, zot ankor pe espere.  E zot pa vwar zot dan sa sikse.  Sa manman avek sa kat zanfan lo vilaz North East Point ki en Homecarer demi zournen, e ki ganny li selman R3535 par mwan e ki bezwen bwi lye dan boulwar i bezwen fer krwar vwazen ki i pe kwi bouyon pour son zanfan, kan saler la i pe donn zot min lasoup pour dinen ; akoz i pa kapab afford plis ki sa.  Li osi i dir mwan i pa vwar li dan sa sikse Minis.  Sa madanm ki monte desann kot welfare i tap laport san okenn sikse pour kapab soutenir son fanmir, sa madanm pa vwar li dan sa sikse ki Minis in anonse.  E pa zis sa, sa pri bis monte ki Minis in fek anonse la pour fer sa manman soufer plis ankor akoz i bezwen pey de bis pour al travay Bel Air kot i Carer.  Ankor R160 par lao son depans.  Sa madanm i enn parmi bann ki’n vin kot mon avek problenm i annan en kantite lezot ankor ki pe soufer an silans.  E Mr Speaker sa ki pli tris, se ki bokou sa bann mert fanmir pe plere akoz zot pe trimouse pour e zot ganny refize ed adisyonnel kot welfare me selman droger ki lo méthadone ki annan full kouraz e kapab travay li i pe ganny asistans avek Lazans Proteksyon Sosyal.  Ladan menm se li menm ki pe teroriz nou sosyete, zot menm ki pe atak touris zot menm ki pe kas lakaz.  Sesel Sa!  Mr Speaker mon pa kapab koz lo pri lavi san adres size Lagrikiltir avek Lapes.  Ozordi Peser avek Fermye pe pas atraver bokou difikilte.  Glacis nou annan nou en bonnonm Peser artizanal e mon pe koz lo zot non la.  La Peser Artizanal pe ganny menase par diferan fakter apar problenm stok pwason lo lakot, ki pe redwir e demann en bon zesyon, sa bann peser pe ganny difikilte ganny banbou pour mentenir zot bann kazye.  Akoz i annan en rediksyon dan banbou ki disponib pour zot akoz bann bato lapes ton pe aste banbou lo marse lokal an gran kantite pour fer bann rado flotan ki zot apel Fad.  Kan Bidze i fer provizyon pour SFA fodre ki Lotorite i vin devan avek en plan kler lo ki mannyer pour enplimante, e asire ki peser ki pe vann vreman lapes i benefisye avek konsesyon lo fuel e retir labi.  E dan sa prosesis pour elimin labi Minis, fodre pa ki Peser artizanal ki pe debourye li osi ganny pini er nou pe deal avek bann ki pe abize.  Malgre ki nou annan bokou Fermye nou napa Fermye Glacis sa detrwa ki annan i dir ki zot souvan pe fer konpetisyon fri avek legim enporte lo marse.  Fodre ki Minis i montre nou, ki mannyer bann pti Fermye dan bann distrik i kapab benefisye atraver larzan ki’n ganny allocate pour sa sekter.  Akoz bann fanmir ki fer lagrikiltir pe vreman soufer la Mr Speaker mon mazin Jimmy avek Ton Piyen anler dan leo L’ilot, ki pe trimouse.  Mr Paul Joubert dan leo Machabée ki li i pe preski aret plante akoz mankman lenfrastriktir parey delo ek semen ; ki’n ganny promet depi 20an pase.  Souvandfwa si i rekolte en bal kokonm zis lanmwatye ki ariv bazar, akoz kan i sey navige dan sa move semen, i tonbe son prodwir i perdi.  Mr Speaker mon zwenn larestan popilasyon, pour aplodir sa travay ki nouvo lekip NDEA pe fer, me selman mon ti a kontan konnen kan ki nou pour vwar zot aret sa bann trafiker prensipal dan Eroin ki pe kontinyelman pourrir lespri nou zenn, e fer soufer bokou manman, e pe met nou pe met en kantite retar dan devlopman sosyete ?  Akoz si nou fran avek nou lekor, nou ava admet ki se pa kanabis ki pe afekte nou zenn se pa fimer kanabis ki pe fer pei depanse avek méthadone, me i plito sa eroin ki pe demont nou bann zenn zan ek zenn fiy e ki pe anmenn zot menm ziska Simityer.  Mr Speaker nou’n tann Minis anons en allowance pour bann Ners me mon ti a pli byen apresye si Minis ti a vin dir nou zot pe donn bann Ners en logmantasyon R3 mil olye en allowance.  Si i ti’n atas sa lo zot saler, dan long term sa bann Ners ti pour benefisye ; parske sa ti pour ede ki demen ler sa Ners i pran son retret zot pansyon, ti a kalkile lo sa saler de baz akoz allowance i en keksoz tanporer.  Ler pansyon i ganny kalkile, i pa pran kont allowance.  Mr Speaker en logmantasyon signifikan dan saler bann Ners ti pour osi en siny lankourazman, pour sa travay nob ki zot pe fer.  Ler nou lo sa size travayer lasante mon bezwen mansyonn en lot group travayer ki lo frontline e ki’n ganny ekspoze avek tou kalite risk se sa se bann Sanniter e sa danze maladi Lapest in montre nou sa.  Zot pa devret ganny kit deryer.  Mon pe demann Minis pour regard saler tou lezot travayer lasante osi sa Clerk ki i ankor pe ganny R7300 apre 30an servis sa Physio Therapist sa Porter sa Asistan Ners Asistan Dantis Lab Technican e lezot.  Mr Speaker annou gete kote lezot zabitan Glacis i antre dan sa Bidze.  Ler mon koz avek dimoun dan mon distrik, la mazorite dimoun pa dakor avek sa desizyon pour fer monte pri bis zot pe demande ki mannyer ki zot sirtou bann manman tousel ki pe tous saler an mwayen R6500 par mwan, pour kapab aziste avek sa pri bis?  Nou annan nou en bon nonm dimoun dan Glacis ki pey de bis pour zot al travay e osi an mwayenn dan bann fanmir plis ki en adilt ki servi bis.  Sa pour anmenn en gro fardo lo zot ankor deza larzan ki antre dan lakaz pour ganny redwir par R500 si pa plis.  Mr Speaker piblik pa ankouraze ler zot antann zistwar larzan manke kot SPTC e osi kondisyon bann bis.  Ozordi dan en kantite bis lafnet si i ouver i pa fermen – si i fermen i pa ouver ler lapli i tonbe pasaze i bezwen ouver parasol dan bis ; feray dan bis i desir lenz ; dimoun i menm ganny pike avek feray.  Annou pa bliye ki souvandfwa sa bann bis i ranpli avek lapousyer e pasaze i bezwen fer atansyon kote i met son lebra, san kwa son lenz pour Sali.  Si SPTC i tir koripsyon dan son fonksyonnman mon asire ki zot ti pour kapab donn en pli bon servis e gard tiket bis abordab posib.  Pasaze i ankor pe mouye anba avek lapli, e pe soufer avek soley for lo Stenn Bis ; akoz sa swadizan kouvertir nef ki ti pour adres sa sityasyon, pa’n fer li.  In sanze me sityasyon in reste parey. Mr Speaker fodre ki servis i bon e dimoun i santi valer pour sa pri ki pe monte ki zot pe al peye.  Minis in koz lo land bank e spesifikman in mansyonn Land bank Carana avek La Gogue ki tonm dan distrik Glacis.  La Mr Speaker la Mr Speaker, mon pe ensiste ki zabitan Glacis ki lo lalis pour aste en kare later, ava ganny en priyorite parske i annan ki lo lalis pandan plis ki 10an.  Me mon apresye pour vwar ki larzan in idantifye pour amelyor semen North East Point, akoz sa ti enn mon promes elektoral dan kanpanny e mon swete ki sa proze i ava enkli agrandisman sa morso semen vizavi kot Mr Payet ki mon pe kontinyelman met devan Gouvernman.  Me mon dezapwente kantmenm ki napa larzan ki’n ganny mete pour agrandisman e amelyorasyon semen La Gogue depi kot Kegliz ziska kot Danm ;  m algre ki ler Minis Bastienne ti reponn mon kestyon devan Lasanble lo sa size i ti promet ki sa proze pour fer lannen prosenn.  Minis ou konn byen sa sityasyon sa semen e difikilte ki transpor ensi ki pyeton i fer fas avek sirtou letan ki lapli i tonbe.  Ankor en promes kase sa Gouvernman ki’n fail zabitan Glacis.  Mr Speaker mon santi ki mon pa pour kapab lev mon lanmen pour vot pour Bidze MLUH, kan ziska prezan mon pa ankor kapab vwar en solisyon satisfezan pour en dimoun ki DA avek mon menm nou’n idantifye konman priyorite No. (1) pour lakaz pour Glacis.  Prezidan in vizit li – Lotorite konsernen in vizit li ; nek in monte desann kot Minis konsernen.  I vin kot mon lofis avek larm dan son lizye omwen 2 fwa par semenn.  Me mon napa okenn solisyon pour li senpleman se pa Gouvernman LDS ki o pouvwar.  Nou pa dan Egzekitiv.  E sa ki dan Egzekitiv pa pe fer nanryen pour li.  Sa madanm avek son de zanfan parfwa pe dormi dan en loto tou le weekend, kan sityasyon kot lakour son manman kot i pe dormi dan salon ek zanfan pa bon.  Sa i pa tou.  Nou osi annan en lot fanmir ki son pake i dan kase pour plis ki 3 mwan. DA pe fer son mye me Lotorite konsernen i pa pe delivre.  Parti Lepep ase fer dimoun soufer silvouple.  Mr Speaker nou bann mon bann zabitan i osi demann mwan pour rod en leklersisman lo sa zafer loan pour etidyan, ki anvi kontiny zot letid.  Zabitan Glacis i anvi konnen si sa i vedir ki Gouvernman pe al redwir la kantite scholarship ki i pe donnen, oubyen si i pe al aret donn scholarship ou menm si sa ki pe propoze pour bann etidyan ki pa kalifye pour en Labours Gouvernman ?  Mon osi annan en serten lensertitid lo sa size.  Akoz nou tou nou konnen ki menm ziska ozordi i annan konsiderasyon politik oubyen familyal, ki lenfliyans lekel etidyan Labours e lekel ki pa gannyen.  Eski sa i pa pour fer li pli fasil ankor pour sa ki enplimant scholarship, pour refiz serten etidyan e dir zot al rod en loan pour peye pour zot letid?  Mr Speaker mon pa pe fer krwar mon expert dan zafer tax, akoz sa i pa pour vre.  Me selman sa ki mon kapab dir se ki sa nouvo sistenm i anmenn en kantite konfizyon dan lespri dimoun. E bann antreprener ki’n anploy dimoun i dir mwan ki zot pa kapab konpran akoz sa pe vin par pti kwiyer.  An Zanvye zot pour al konmans en nouvo tax e apre sa pour sanze an Zilyet.  Sa pour met plis fardo lo ledo bann anployer e sa konsern kalkil peyman tax sa bann anployer.  Alor mon demande ki Minis i ekout propozisyon LDS e fer sa progressive income tax konmans an Zanvye 2018 ; koumsa bann travayer i ava anmenn dan lakour en pe plis larzan depi Zanvye e non pa an Zilyet.  Lo sa size tax mon kestyon prensipal ; se lannen pase Minis in vin devan Lasanble in dir nou preski R1 milyon tax pa’n ganny peye dan sa pei par bann biznes, e en gran parti sa pei gro Lakonpannyen – Minis pa’n dir nou ki kantite sa larzan ki zot in ranmase e ki mannyer sa larzan in ede oubyen ganny distribye ?  Eski zot n’arive anmenn sa bann Lakonpannyen fer zot vin anliny avek zot peyman?  Eski zot in anmas larzan tax ki devret pe antre?  Akoz LDS i konvenki si tou bann biznes i pey tax ki zot merite, sa i ava fer ki fer li posib pour donn lepep Seselwa en meyer lavi.  An konklizyon Mr Speaker mon pour dir ki dan sa Bidze i annan keksoz ki pozitiv – sa nou aksepte.  Sa ki enportan e nou pe demande se ki parol i ganny swiv par bann aksyon konkret.  Nou espekte ki Gouvernman i pran son pep serye e sa i konmans avek State House li menm.  En kantite dimoun i pe dir ki ler zot vwar Msye Faure zot ganny bann zoli parol, me apre zot zis atann e ganny met lo bwe e malerezman napa gran keksoz ki arive.  Mon swete resours ki dan sa Bidze i ava fer bann diferan Departman e Lazans bouze, e fer travay neseser pour byennet sa pep.  Akoz i pa akseptab letan en Minis oubyen Departman i fer lekonomi lo saler, senpleman akoz zot pa’n reisir anploy en dimoun.  Kestyon ki mon demande se ki si sa bann landrwa napa en progranm pour lantrennman ?  Sirman ozordi nou bann zenn i annan en baz lo ki nou kapab konstri.  Alor pa zis refiz lanplwa en zenn me rod osi devlop li ; pa zis rod son leksperyans pour refiz li en lanplwa me plito ed li e donn li sa leksperyans.  Mr Speaker a i fer mon mazin ka en zenn garson dan mon distrik Ryan in vwar en vacancy pour drayver kot lapolis i fer en laplikasyon i gannyen tou prosedir i korek pour li konmans travay le 6 Novanm.  I resign kot i pe travay ler i raporte Lendi zot dir li zot pa ankor pare pour pran li.  I annan en loan pour peye, i vwar li san en lanplwa eski sa i ankourazan pour en zenn?  In ler pour Gouvernman annan bann plan serye etablir bann polisi kler e vin pli responsab e transparan dan sa ki i fer.  Mr Speaker enn mon zabitan i dir mon dir avek Minis e Parti Lepep, aret dir ki zot pe met ‘’Zonm O Sant Devlopman’’ akoz pandan 40an si zot ti’n vreman met ’Zonm O Sant Devlopman,’’ nou pa ti pour vwar nou avek 40 poursan lapovrete dan Sesel.  La Mr Speaker mon krwar ki dan Lasanble sak Minis i bezwen vin donn nou en Plan Detaye pour bann Minister o konmansman sak lannen, koumsa nou ava kapab pli byen swiv zot pour demann kestyon e met presyon kot fodre.  Kot i annan gaspiyaz nou a met sanksyon e fer zot vin pli pridan.  Nou pa pour kapab kontinyen parey i pe ale kot parfwa nou zis ganny en bann zistwar. Gouvernman Parti Lepep i bezwen realize apre 1an ki nou dan sa klima 15 lo 10, napa lespas pour fer krwar e bat latet.  Nou bezwen en Gouvernman ki deliver lo son parol e aret fer promes si non si zot santi ki zot pa kapab deliver annou retourn kot lepep Seselwa e zot a fer en lot swa.  Avek sa detrwa mo, mon pour dir ki ‘wi’ mon reste determinen pour travay pour zabitan Glacis e fer nou distrik bouze.  Pour ou ki mon pa ankor vwar en solisyon pour ou problenm, mon dir ou pa dekouraze.  Ansanm avek Lotorite Distrik nou a sey nou mye pour konvenk Lotorite ki ou en priyorite.  Me i pa neseserman ki toultan ki Lotorite i pans parey nou.  Me pe enport mon a reste a ou lekout akoz, ‘’Mon pa pour zanmen les tonbe.’’  Mersi Mr Speaker.

 

MR SPEAKER

Mersi Onorab Esparon.  Onorab Ferrari.  Onorab Ferrari ou pa ankor koze i reste, pardon ?

 

     (Mic Off)

 

MR SPEAKER

Pa sa, si Onorab Arrisol i le koz devan ou napa problenm.  Onorab Arrisol ou annan laparol.

 

HON SANDY ARRISOL

Mersi Mr Speaker.  Bonzour Mr Speaker bonzour Minis Finans sa 2 Leader dan Lasanble Nasyonal, Manm Lasanble Nasyonal Manm Sekretarya travayer Sekretarya SBC bann ki dan Galeri lepep Seselwa avek zabitan distrik St Louis.  Mr Speaker en lot lannen i koule e nou dan Lasanble Nasyonal nou donn nou reaksyon lo Bidze pei prezante par Minis Finans pour 2018.  Mon apresye ki Minis in fer byen kler dan son prop Diskour ki’n rod fason pour ekout tou dimoun.  Me i kler ki serten Manm lo kote Parti Lepep, in esey rod fason pour may Minis zanbet avek zot pe rod serten zot dalon, oubyen zot pe pous devan sa vye Azanda Parti Lepep, ki’n ganny met de kote menm par Msye Faure, letan in deklar son divors avek zot.  In ler pour sa bann MNA sanz sa mindset e realize ki pour sa pei bouz devan, nou pour bezwen annan en nouvo lapros konpletman, diferan konpare avek delo lo fey sonz ; ‘’Kile Lopozisyon’’; ‘’Pa anpandan’’ ; Kit pei ale si ou pa kontan ;’’ E mon ti a kontan remind Onorab Gill Mr Speaker avek Onorab Ghislain ki depi 1977 Parti Lepep pe pil lo Seselwa.  Zot in pil lo Seselwa atraver entimidasyon viktimizasyon ek disparisyon.  Alor pa bezwen per ‘’Pil lo li’’ sa 2 Onorab.  Nou dan LDS nou pour kontinyen ‘’Pil’’ lo bann Azanda ki pa anmenn okenn benefis pour nou pei.  Nou pour kontinyen ‘’Pil’’ lo bann vye azanda popilis ki fer detrwa dalon benefisye dan sa pei.  Mr Speaker an dot mo fodre ki serten zot konman bann MNA, zot tyek byen zot alignment politik.  Petet zot devret fer kler ki si zot pe swiv progranm Msye Faure avek zot Minis Finans, oubyen si zot bann ‘Orizinal; savedir dan lekip lepase ki pe viv ‘Lespace’ .  Mr Speaker lenpresyon ki mon gannyen se Minis i anvi ‘’travay pour en meyer Sesel,’’ me i annan bokou defi ozordi Seselwa in fini realize ki sa bann propagann popilis ki zot in anmennen ki’n fer nou pei faid e anmenn gaspiyaz pour resours presye, atraver koripsyon kot larzan in zis disparet.  Pandan sa bann lannen nou’n vwar bus shelter konstrir par garson Minis ki’n kout plis ki en lakaz ; Kontra donnen avek bann dalon ; gours ganny partaze parmi fanmir ; Gouvernman lwe biro avek Parti, tousala se bann landrwa kot larzan Seselwa, zabitan St Louis in ale.  E si pri bis ozordi i bezwen monte, se sa malere ki pour bezwen pey lepo kase.  Se akoz sa bann move plant dezord koze par sa Gouvernman, ki pas zot letan fer dominer avek lepep Seselwa.  Menm Mr Peter Sinon ansyen Depite Sekreter Zeneral Parti Lepep, ti fer Deklarasyon letan i ti sote ; ki sa zafer ‘’dimoun o sant devlopman’’ ti zis en bat latet sa.  Akoz o fet zot ti pe rod zot prop byennet e ranpli zot pos.  Lizye kreol in ouver gras a 15 lo 10 letan nou’n shower zot.  E mon konvenki ki Minis in fini konpran sa byen menm.  Tenm pour Bidze i travay pour prosperite tou dimoun.  Mon fyer pour form parti en lekip LDS ki pe travay pour prosperite tou dimoun.  E ki’n kas lafreyer dan nou pep ozordi letan dimoun pa dakor avek la fason ki zot ganny trete zot fer tande zot lavwa yer bann Teachers ti blok semen State House ; pli boner bann Ners ti marse lo semen bann Stevedores ; propriyeter bato eksetera, i montre nou ki nepli moman pour per me ki nou dwa fodre ganny respekte.  Alor dan sa Bidze osi si nou pa dakor avek serten keksoz, fodre ki nou fer tande nou lavwa.  Minis i konpran sa tre byen.  Me mon osi anvi anvoy en mesaz kler pour tou mon frer e ser Seselwa si nou anvi repran nou pei dan lanmen etranze, annou met tou zefor annou lev-e, annou debourye annou rod tou loportinite ki annan dan nou pei e annou fer nou pti pei fyer pour ki nou larises i reste dan nou pei me non pa sorti par milyon e pe al dan bann pei aletranze dan bann kont biznes etranze.  Nou pa pour kapab depan lo lenvestisman etranze.  In ler pour nou ankouraz lenvestisman Seselwa ek Seselwaz.  Rod fason pour pran tou bann travay pour ki nou lekonomi i ava devlope e non pa lekonomi i pa a vin lekonomi l’Inde, Philippines oubyen Bangladesh.  Nou bezwen rod e reklanm sa ki pour nou.  Annou aret vin sa Nasyon ki kontan kale lo zournen ; swa viv lo R25 oubyen donn ou R10 ; swa depan lo welfare ki lezot in kontribye.  Letan ou reste dan semen lo drog, lo lalkol, oubyen ou asiz kot ou lo Facebook, kan ou kapab lev-e al travay. – me ou espekte ki sa enn ki travay dir toulezour, san zwe malad i kontribye pour ou e ou a kalifye pour welfare e espekte en pansyon swa sekirite sosyal a lafen.  Ou pa pe montre gran lanmour pour ou pei, ou fanmir e ou prop lekor.  Met sa lepok deryer nou e annou pran nou desten dan nou lanmen.  Mr Speaker letan mon pe ankouraz travayer mon osi anvi dir avek Gouvernman pour pa dekouraz travayer.  Par egzanp letan i annan en group Sanniter ki’n konmans travay depi Fevriye zot probasyon in fini e zot Minister pa ankor dir zot nanryen. 2enm group se bann ki’n fini zot 2an, e sipoze sorti konman asistan me pa ankor ganny dir nanryen, e zot reste asistan menm letan zot letan in fini.  Me Gouvernman atraver zot Minister pa serye.  Zot pa pe fer zot pe fer zot louvraz Public Health Officer, me selman lapey i reste asistan.  Apre nou dir Seselwa pa oule travay me ler i montre lentere annou siport zot e ankouraz zot e pourtan sa menm group dimoun parey Onorab Esparon in dir, ki premye pour fer fas avek maladi.  Silvouple regard dan zot welfare ; ni menm en risk allowance zot pa gannyen konman bann group dimoun ki pran bann risk.  Alor mon mesaz i kler, nou pour bezwen nou tou lev-e e siport nou pei.  Sa i pour vedir asir lavenir nou zanfan me i annan tro bokou Seselwa ki dan profesyon, pour plizyer lannen zot ankor pe ganny lakok pistas.  Mon kontan ki sa Bidze i annan provizyon pour plizyer travayer ganny en logmantasyon atraver nouvo revizyon dan Scheme sa i en lankourazman e mon siporte.  Akoz i annan plizyer dimoun dan mon distrik ki pour benefisye.  Me mon demande ki Gouvernman i regard byen tou travayer dan servis sivil.  Akoz zot tou zot pe fer kontribisyon e pe montre devosyon.  Dan en fason spesyal regard osi bann dimoun ki’n travay  vitam aeternam dan landrwa, me ki lapey i ankor feb.  Sa i apel lesklavaz me lefe in fini in ganny aboli silvouple aranz sa bann travayer.  La osi mon anvi dir tou travayer, ki menm si parfwa nou pa mansyonn zot dan en fason spesifik, ki nou enterese avek zot tou e nou pe rod byennet zot tou.  Mr Speaker Leader Lopozisyon in fer kler, ki sekirite nou pep i bezwen priyorite No. 1.  A sa moman ki nou pe viv nou’n swiv bann program tre enteresan lo sa size.  I kler ki nepli letan pour les kriminel domin nou lavi tandis ki nou pep i per pour viv dan son prop lakaz.  Mon ti vreman touse avek zistwar Madanm Albert avek son fiy konbyen lezot manman avek zot zanfan ki pe viv dan menm sityasyon?  Konbyen Simon Esparon fodre i annan, avan ki nou repran kontrol sekirite e remet lape e trankilite dan nou kanton e dan nou kominote?  Mon antyerman dakor ki antretan ki nou revwar rol larme ; ki bann Solda i travay pre avek Lapolis pour ki i annan patrol 24 lo 24 e ki plizyer lekip fast response i ganny etabli dan bann distrik pour ki nou sitwayen i ava call en limero spesyal si zot vwar en latak, oubyen en keksoz drol dan zot distrik oubyen dan zot vwazinaz.  Sa i ava osi permet lapolis pour detri sa bann kan ki ankor pe vann Eroin.  Nou bezwen protez nou pep nou’n fini ekout tou sa ki nou ti devret ekoute e la prezan in ler pour aksyon.  Letan Leader Lopozisyon ti anmenn en Mosyon pour demann Gouvernman, pour revwar nou sekter Lagrikiltir avek Lapes e nou tou nou ti donn sipor swa atraver deba swa atraver en vot, sa in fer ki Gouvernman in ekoute.  Ozordi en logmantasyon 68.7 milyon pour Sekter Lapes ek Lagrikiltir.  Lannen 2018 Gouvernman pour depans en sonm R204 milyon dan sa de sekter mon swete ki prodiksyon i ava monte e ki bann benefis i ava pas lo zot konsonmater.  I ava ede avek redwir pri lavi.  Mon espere ki sa sonm i ava kouver konstriksyon bazar Sir Selwyn Clark ki baze dan mon distrik ; ki deservi plizyer bazardye pour ki bann bazardye i ava vann zot prodwir dan konfor parey Jerris, Zita Hertel Madanm Gerry pour mansyonn detrwa.  E mon swete i ava enkli bann bouse.  Akoz zot kondisyon ki Sooma ek son bann lezot koleg i travay ladan Mr Speaker, i vreman deplorab.  Mr Speaker ozordi kou lavi i en problenm avek en bon Scheme sa i vedir en bon saler i ava fer ki zabitan St Louis ki tonm dan sa bann tel dan sa kad lasante lansennyman, i ava kapab respir en pe pli byen.  Kou lavi i bezwen bese dan nou pei pri marsandiz savedir komodite de baz i bezwen bese dan nou pei.  Mr Speaker i tre enportan pour nou pei konbat kont lapovrete dan en fason serye.  Mon kontan tande ki propozisyon Lider Lopozisyon pour distribye bann pano photovoltaïque.  Ki ler i pe donnen avek bann fanmir ki tonm dan sa kategori in ganny byen ekoute.  Zis avek sa, bann tel fanmir i ava kapab fer lekonomi plis ki R300 par mwan.  Sa ankor enn fwa i montre ki nou dan LDS nou pe rod lentere nou pep.  E an mezir ki nou travay nou fer desann pri lavi.  Nou anvi ki nou pep i ganny en standar pli o kot zot ava kapab viv pli byen.  Ofet Mr Speaker LDS i enterese elimin lapovrete e donn dimoun dignité ou a konpran alor letan nou koz lo travay dir, fer desann pri lavi, ogmant prodiksyon lagrikiltir avek lapes, met plis larzan dan pos tou Seselwa.  Donn bon ledikasyon tou nou bann zanfan, tousala se pour amelyor lavi nou frer avek nou ser ki fer zot vin en Seselwa avek en Seselwaz fyer e beni.  Mr Speaker Gouvernman i vreman Gouvernman i fer en ta gaspiyaz avek resours Leta.  Oli bann lakaz ki Gouvernman ti konstrir pour bann etranze ki vin travay Sesel?  Fisherman’s Cove Estate avek Bel Eau – pour mansyonn 2.  Zot in vann avek zot bann dalon i annan ki ti deza annan lakaz oubyen en bout later ki’n gannyen me parkont i annan ki napa ni en lapel swa en bouret later, selman li i ganny kit ater parey dan mon distrik.  Mon pe propoze ki vreman in ler pour fer en bon levanter lo stok lakaz Gouvernman.  Akoz par egzanp anler Bel Eau mon ganny en konpran li i annan en pe manboulouk kot si nou pa fer atansyon, lapartaz pou kontinyen.  Ki mannyer lakaz kot lekol Montessori i été Bel Eau, ozordi i lo non Parti Lepep ?  Konbyen ansyen Minis in peye pour bann lakaz anler Bel Eau?  Lepep Seselwa i bezwen konn laverite.  Si nou met lord definitivman depans Gouvernman i ava desann.  akoz ki Seselwa li i bezwen pey lakaz plis ki R400 mil, kan Gouvernman pe fer faver pour zot dalon?  Sa letan in fini e fodre ki tou keksoz i ganny met o kler.  Mr Speaker mon ti a kontan si dan larepons Minis ou ti a kapab donn lepep Seselwa Minis en lalis lo ki lapey bann CEO, Special Advisor, Sekreter D’Eta bann PS, bann Direkter Zeneral ek lezot gro pozisyon i gannyen dan sa pei.  Dir nou ki bann lapey ki plis ki sa MNA i gannyen.  Rezon ki mon pe dir sa i tre senp.  Lenpresyon ki Seselwa i gannyen laba deor se ki MNA ki ganny plis larzan dan sa pei e fodre sa ki enn fwa pour tou sa lenpresyon i ganny korize.  Sa detrwa zour dan Progranm ‘Bonzour Sese’l mon kontan ler mon tann Jules Hoareau – Mr Jules Hoareau pe ganny plezir pour akiz bann MNA dan son progranm.  Me mon kontan la fason ki’n ganny fer, parske ozordi ‘laliberte lekspresyon’ i egziste dan nou pei.  Alor dan menm prensip mon ti a kontan petet an menm tan esey demann dimoun pour demann Mr Hoareau konbyen li i gannyen konman en CEO kot Fondasyon Zanfan?  Konbyen Board li i lo la Mr Speaker?  Apard ki CEO i pe fer part-time SBC, i ti travay kot CEPS.  Konbyen i anmenn dan lakour an tou – eski i pli mwens ki MNA oubyen i plis ki MNA?  Alor i pour enportan pour Minis Finans konfirm sa pour nou dan ou Repons.  akoz serten dimoun dan sa pei i kasyet ki zot gannyen me akoz lapey MNA li i piblik, zot donn en bal ladan.  E mon mon happy ler zot donn en bal dan mon lapey.  Me zisteman mon konman LDS, mon pour siport sa lide ki fodre Gouvernman i koup en pe sa bann gro pozisyon, kot zot pe zis donn zot dalon gro lapey, san ki i fer gran keksoz.  Dan sa deba lo detay Bidze, nou pour demann byen kler konbyen sa bann dimoun pe kout Gouvernman?   E ki travay zot pe fer?  E parey nou’n osi dir sa zafer pansyon pour ansyen Prezidan nou pour met li byen anba mikroskop, akoz dimoun deor pe koz bokou lo la.  Mr Speaker letan ou annan lorganizasyon pa pey zot det, savedir kontribye zot tax parey Lalwa i demande, sa osi i fer ki pei i perdi.  E sa i fer ki Gouvernman pa kapab partaz sa larises ek son pep.  Annou get en kou L’Union Estate letan ou ekoute i en landrwa kot zot in byen donn bal.  Rapor ki FPAC ti prezante devan sa Lasanble, ti sok tou dimoun.  I dwa plis ki R30 milyon zis tax.  I annan en endividi ki dwa ziska milyon Gouvernman, me li i ganny loportinite pour li ganny par pti kwiyer, selman i annan dimoun ki’n kondannen akoz i pa’n pey R600 alimoni pour son zanfan.  Ki mannyer sa i apele?  E menm la zot pe donn bal sa Board in anvoy Minis pronmnen, e pov manman Minis pov Minis ou manman pe ganny trennen dan Park Torti laba mon tande.  Zot pe swiv regilasyon finansyel e serten dimoun i pran sa konmsi i zot propriyete personnel.  Mon kontan ki Minis pe dir ki i serye e ki Gouvernman in fini pran desizyon pour privatiz mazorite aktivite laba.  Me Minis pa zis trenn lipye pran aksyon imedyat konmsi koze i dir ; aret sa lemorazi deswit.  Mr Speaker tousala in ganny soutire par 5enm Lasanble.  In fer ki nou pei in perdi en kantite larzan Minis Finans sa letan avek Leader Lopozisyon sa letan, soutire par bann Manm Lasanble sa letan ki ti pas Bidze dan 2 zour ; degaze pour al tir petar Maurice, selman zot pa oule nou tir petar Sesel.  Granmersi LDS e mon fyer pour form parti en lekip ki rod sa ki meyer pour son pep avek pour son pei.  Mr Speaker logmantasyon dan pri bis i en topik ki’n preokip tou Seselwa.  Mon krwar Gouvernman ti devret fer en bon lodit lo sa Lakonpannyen e prezant avek Lasanble eksplik lepep akoz ki i devret annan en logmantasyon, me pa zis donn sok nou sitwayen.  Si zot larzan pa pe ganny byen zere, rode akoz, me pa zis pas sa fardo lo lepep Seselwa.  Si napa en lot mwayen transportasyon ki pour pas sa fardo lo lepep Seselwa, ki napa en lot mwayen transportasyon.  Me de lot kote si SPTC pe al ogmant son pri, i pour enportan ki SPTC i amelyor son servis ki ofer avek lepep Seselwa.  Sa i pli bon servis, pli bon bis dan plis konfor e dan sekirite.  Me selman i osi enportan pour mansyonnen ki pri bis ti R7 avan li.  E apre zis akoz en Eleksyon Msye Michel ti taye e fer li vin R5 pour ganny vot.  Politik bonmarse ki pa soutenab pour nou pei.  Mon pour siport sa propozisyon ki touris pa kapab pey menm pri avek nou Seselwa. SPTC i devret annan en kart spesyal ki fer pour bann touris.  Mr Speaker pri bis pa kapab en sel pri sa i en sistenm pares; ki bezwen ganny modernize ; pri bis i bezwen baze lo zistans ki ou voyaze.  Sa dimoun ki sorti Quatre Borne par egzanp ki sorti Quatre Borne Takamaka pour desann anba Anse Forbans, pa kapab pey menm pri bis avek en dimoun ki pe sorti Quatre Borne pe al anvil !  Dan menm fason sa dimoun ki sorti Mont Fleuri parey Pti Nella pour li al anvil pa kapab pey menm pri bis avek en dimoun, sorti Mont Fleuri pour li al Takamaka ; vin pli inovativ e fer Seselwa pey valer son larzan.  Dan menm fason Mr Speaker nou’n fatige pey servis telekominikasyon sitan ser. Onorab Afif in koz lo pri Europe.  Me pa bezwen al sitan lwen mon bezwen al Maurice annou al lanmenm la Maurice Sid Lafrik oubyen Sri Lanka e deza nou vwar diferans.  Nou bezwen aksepte ki nou pe touy Seselwa e tousala i zwe en rol pour fer monte pri lavi.  I pa akseptab.  E sa ki gou par egzanp avek Intelvision se zis konman ou souskripsyon i fini zot koupe zot, me selman letan zot sistenm pa bon i scramble parey zot dir nou, napa okenn refund pour nou Seselwa.  Zis i dir ou ki i annan en problenm avek zot network.  Ki i konsern nou avek zot network?  Refund nou, nou zour ki zot in pran.  Menm zafer avek letan ou pe servi Whatsapp zis ou tann i koupe e apre i dir ou i a pe re konekte.  Me selman ou ganny tape menm.  Zot aranz en pe sa bann problenm ki annan ek zot.  Mr Speaker PUC pe vol Seselwa.  La mon pe koz pour bann dimoun ki konekte avek sistenm santral parey mon distrik St Louis.  Si ou servi 30unit delo zot sarz ou pour 30unit sewage.  Eski sa i apel voler?  Mon krwar zot osi zot devret pas dan sa Progranm ‘Bare Voler’ ki SBC pe fer.  Eski ou ou e dir mon sa 30unit delo in al dan tou kabinen in al dan kabinen sa 30unit ki ou’n servi?  Me sa 30unit ki mon’n aroz avek?  Kwi manze avek ; benny avek?  Mon krwar ki tousala i ede pour fer pri lavi monte.  In ler pour PUC aranz li en pe la Mr Speaker mon siny ki PUC i konn egzakteman ki poursantaz delo ki servi dan kabinen, be selman zot prefere vol sa pep avek zabitan St Louis e fer nou pey en pri egzorbitan.  Eski PUC li i napa en rol pour zwe pour fer pri lavi desann ?  E letan mon lo PUC Mr Speaker mon ti a kontan dir ki PUC in ler pour li revwar travay kondisyon ki son travayer i travay ladan, e bann benefis ki zot gannyen e revwar zot saler konman bann travayer Seselwa, ki devoue avek sa lakonpannyen e sa pei.  Mr Speaker i kler ki apre en lensidan ki Sir Kevin ti ganny abize par bann paran en etidyan, konman en Lasanble nou bezwen get tre pre Bidze sekirite Minis Morgan in dir nou ki zot pey R30 milyon an tou pour Sekirite.  Kestyon se, eski zot pe fer en bon travay oubyen eski sa bann laranzman ki pa efikas, e menm santi loder koripsyon kot dalon in ganny Kontra atraver kontak?  Lasanble Nasyonal i espere ki Minis Ledikasyon, i vin avek en bon plan.  Mr Speaker mon ti pour kontan fer detrwa rekomandasyon avek Gouvernman atraver Minis Finans, pour ki Gouvernman i vin pli serye e pli efikas.  Lannen pase Minis Finans ti dir ek Lasanble, ki SRC i annan plizyer milyon ki pa’n ganny ranmase.  Be ki Gouvernman in fer?  Zis sa i pase – koumsa menm i fini ; e zabitan St Louis ek lepep Seselwa, ki pli tar ki pour pey lepokase.  Gouvernman atraver SRC, i devret vin devan Lasanble e dir avek lepep Seselwa konbyen zot in rekipere dan sa larzan e fer bann ki koupab pey zot det ; non pa les li pase enpoz sa lo ledo Seselwa.  Dezyenmman ; bann biznes enformel dan pei ki pa pey tax ki Gouvernman pe fer pour rekiper sa bann larzan ?  I annan plizyer etranze ki vin Sesel konman touris, pe pase dan bis swa dan loto pe vann prodwir avek Seselwa oubyen magazen.  Eski zot annan license zot?  Zot pey tax zot?  Oubyen zis zot pe fer larzan lo ledo Seselwa me Gouvernman li i kontinyen pa ganny nanryen.  Ankor enn fwa Gouvernman pa serye.  Tro bokou koze, napa aksyon e pei i kontinyen perdi.  Trwazyenmman ; annou get en kou L’Union Estate sa msye ki dwa R1.5 milyon kan i pour re pey son det li Mr Speaker?  Eski i pa devret rann lepep Seselwa sa ki i dwa   Akoz li i kontinyen ganny loportinite pour li pey par pti kwiyer?  Mr Speaker letan Gouvernman pa serye, pa efikas pei i perdi tro bokou.  E Gouvernman Parti Lepep toultan zot in soutir sa bann kalite labi apre zot entrodwir tou kalite tax pour fer Seselwa pey sa bann larzan, ki zot pa’n zanmen anmase atraver zot dalon ki dwa.  Mon pe lans en lapel ek Gouvernman ki zot devret anmas tou larzan ki bann endividi swa lakonpannyen i dwa zot ek pei.  Pa zis les pase e met sa fardo lo zabitan St Louis ek lepep Seselwa.  Letan Gouvernman i serye e efikas sa i ava fer ki bann proze dan mon distrik avek lezot distrik, i ava ganny larzan pour materyalize.  Mr Speaker ozordi mon fyer letan Betty Julienne avek son Mr Harry Gill in ganny en lakaz apre ki zot in reste dan emergency house en emergency house pour plis ki 23an.  Akoz mon napa en lakaz ki mon pa pour rod enn ki pli dan bezwen.  Me avek plis larzan Gouvernman i ava anmase  i ava fer ki Vanessa ki pe esper en lakaz avek son de zanfan zot ava benefisye akoz kot son paran i pti…

 

MR SPEAKER

Round-up, round-up Onorab

 

HON SANDY ARRISOL

…Yes Mr Speaker mersi.  Akoz kot son paran i pti e i plen e i osi i ava benefisye.  Plis larzan dan kof Gouvernman i ava fer ki lafanmir Adela ki anler ki annan en proze pour rekonstrir zot lakaz i a kapab fer li e sa ki responsab i ava bouze lo sa proze.  Akoz pour le moman fanmir pa ankor tann nanryen apre ki Prezidan in vizit zot.  Plis larzan ava fer ki lekol La Rosière i ava finalman terminen, akoz la tou paran pa konnen ki’n arive – si in fini oubyen si i pa ankor fini.  Bann zanfan i fatige fer sa gran larout tou le bomaten pour al kot en lot lekol epi retournen.  Bann paran i konsernen.  Plis larzan dan Kof Gouvernman atraver bann ki dwa i ava fer bann semen dan proze Belonie, ki pour deservi plizyer fanmir la ki bann negosyasyon in al byen, miting in ganny fer e proze i ava ganny materyalize.  Si Gouvernman i vin pli responsab lo larzan lafanmir Adrienne /o Valentin ki reste l later ex-Morel deryer Ladministrasyon Distrik ki’n ganny en komitman ki zot fasilite lozman, pour ganny amelyore par konstrir en nouvo Blok Flat pour zot i ava fini.  Amelyor sistenm drenaz kot Aki Mr Speaker Belonie/ Roche Bois/ Hangard Street pour mansyonn detrwa.  Nou lobzektif se pour siport distrik avek lozman konfortab ; komodite esansyel e bon marse akse avek delo prop pa pey en bill egzorbitan avek PUC selman pey en lot bill avek Sodepak pour ganny delo prop pour bwar ; bon semen pa ogmant cc selman maler avek dezagreman lo nou kondisyon semen, ki drayver i servi.  En pli bon fasilite telekominikasyon ki pli abordab e rezonnab ; servis lasante ki profesyonnel ki nou Seselwa i ganny konfyans ladan i pa ava get nou Minister Lasante konman Panadol avek Parasitamol, sa i ava fer ki nou ava fer…

 

MR SPEAKER

Onorab Arrisol ou’n koz pour 25minit round-up silvouple.

 

HON SANDY ARRISOL

Mon pe sey round-up  Mr Speaker.

 

MR SPEAKER

Round up.

 

HON SANDY ARRISOL

Mr Speaker, avan mon terminen, mon ti a kontan dir avek Onorab Pillay ki mon ekout li byen lo sa size alignment.  Prezan mon konpran kote son problenm i été dan diskour in fer kler ki i siport annan sa sistenm ki Leader Lopozisyon ti dir konsernan en refund pour depans ledikasyon ki en paran i fer.  Byen non.  Me malerezman son papye ki son parti i siporte Mr Speaker i kont sa prensip dan en Lartik avek en gro tit ; ‘’Rann Larzan Nou Dalon Ki Zot Zanfan I Dan Lekol Prive.’’  Onorab landrwa pli pre Mr Speaker ki kapab fer son alignment se Roche Caiman.  Keksoz vreman senp ki zot devret fer si sa pa marse se retourn kot lepep, parey Onorab Regina in dir pour met Gouvernman LDS o pouvwar.  Mr Speaker pour konklir, mon ti ava kontan remersye tou dimoun ki’n ede dan sa travay ki nou’n fer pandan sa 1an.  Sa se bann Minister bann lorganizasyon, bann endividi zabitan mon distrik avek lepep Seselwa an zeneral.  Mersi pour Sekretarya Lasanble mon bann koleg Manm Lasanble pour tou zot sipor e mon konnen ki lannen 2018 nou pour fer bokou plis ki nou’n deza fer sa lannen, pour amelyor lavi nou zabitan ek lepep Seselwa.  Avek bokou travay ki reste pour nou fer ziska Desanm Mr Speaker, mon swet tou dimoun bonn kontinyasyon e bon kouraz dan sa ki nou pe fer ; ki Bondye i kontinyen beni nou zoli pei avek nou zoli distrik St Louis.  Mersi bokou Mr Speaker.

 

MR SPEAKER

Mersi Onorab Arrisol.  I 11er mwen en kar, nou a pran en Break nou a retournen 11.15.  Nou annan 2 dernyen entervenan pour koze.  Nou a pran en pti Break apre nou a tournen.  Avan midi nou a’n fini.  I annan osi . Anse Boileau  i reprezante dan Lasanble ?

 

 

(laughter)

 

MR SPEAKER

Do I need to remind ou my Clerk?  Nou a pran en Break nou a retournen 11.15.

 

 

       (BREAK)

 

 

MR SPEAKER

Mon ti’n edike ki petet apre sa de MNA dernyen i koze ki avan nou adjourn petet sa 2 Leaders i ganny en pti moman pour dir en mo.  Me i paret Leader i pe vini ok.  Bon nou a donn parol non ?  Nou a donn parol Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon tre dezapwente ki bann Leaders dan Parti Lepep in taye, akoz mon ti annan de pti parol, me selman kekfwa zot ava tournen mon a anmas pour a lafen.  Mon oule konmans mon lentervansyon par dir ki degre Mr Speaker mon fyer travay ki sa mazorite LDS in fer dan Lasanble – sa dernyen lannen.  Sirtou ki fason nou’n met en bon pe lord dan finans nou pei.  Ler mon get sa Bidze ki Minis Finans in prezante, mon’n vwar en progre menm si sa progre i vreman dousman.  Anba Sistenm James Michel, maladi ekonomik ti vin lo seval, me aprezan lasante ekonomik pe vin lo torti.  Nou pou bezwen bokou kouraz e ankor pasyans pour fini sa louvraz.  Ki bann sikse ki nou’n fer?  Plis lord dan Depans Piblik ; bann ki ti abitye donn bal in maron e nou pe trouv en bon pe saving ki dan le pase zanmen ti egziste.  Lontan konman Zanvye ti fer dong, en pti group ti konmans telefonnen pour gete si Bidze in fini ganny partaze pour zot pran en bout ladan.  En pti Kontra isi – en pti Kontra laba en deal par laba  sa lannen i paret ki sa bann dimoun in pran fore, akoz zot konnen ki nou ti pe vey zot e ki nou pa ti pour toler ankor sa bann pratik.  Dezyenmman laplipar ki zot kont pa ti annord, zot in fer en gro zefor pour met lord.  I reste ankor enn de Departman avek lazans ki ankor krwar ki zot kapab kontinyen dan menm pratik, me nou nou’n mark zot e nou pour fer sir ki zot adopte sa nouvo fason travay.  Trwazyenmman Oditer  Zeneral pour premye fwa dan listwar Trwazyenm  Repiblik in soumet son Rapor lannen pase avan lannen fini.  Sa i en gran led e nou remersye li.  Plizyer rekomandasyon ki Lasanble avek FPAC in fer sa lannen, in ganny pran an kont.  Nou remersye nou bann partner dan Minister Finans.  Wi in annan serten progre e nou fyer nou lakonplisman.  Wi nou’n travay menm si i annan en bann ki zis maltret nou, akoz nou  pe ganny en lapey.  Pourtan i kler ki zanmen dan lepase voter Seselwa in ganny sitan valer pour son lapey pour sa lapey ki i donn son MNA.  I vre i reste en kantite defi devan nou.  I annan en bon pe keksoz ki nou konman en pei nou pa ankor met dwat.  E sa malerezman se akoz pa tou bann lenstitisyon dan nou pei ki’n zwe rol e pran son responsabilite parey zot ti devret.  Nou konman en Lasanble nou’n kler tors lo sa ki pa ti pe mars byen ; ki swa dan bann Departman oubyen lazans Gouvernman.  Nou’n expose koripsyon dan NDEA, FIU, L’Union Estate ; dan lavant later ; dan Planning dan Lasante.  Wi nou’n fer nou bout me malerezman Egzekitif e Lezislatif pa’n swiv.  Welfare; zot ti promet pour annan en lapros targete kot zis bann ki vreman merite ki gannyen, me zot in fail pour met kontrol lo depans.  I ankor annan detrwa dimoun ki pe dir ki tan ki Parti Lepep i o pouvwar, zot pa pour zanmen travay e zot pour kontinyen viv lo welfare.  Bann Lazans Gouvernman ki pa’n delivre parey Natcof Paradis Des Enfants, sa bann keksoz i pe kontinyen ; kot tax pa pe ganny byen kolekte lo Erport, lo Por e lo bann landrwa kot SRC i annan biro.   Lo bann lalkol ki fer lokal ; lo bann Casino – sa i zis detrwa legzanp.  Koripsyon ki ankor la Mr Speaker.  Biznes Gouvernman i ankor pe ganny fer avek Parti Lepep.  E en lazans parey NISA i devret onte ki i ankor pe lwe pe servi larzan lepep Seselwa ki zot anmase par R5, par R15 pour zot donn Parti Lepep larzan.  Mwan, mon promet Lasanble ki lannen prosenn mon pour anmenn en Private Members Bill ki pour met en term avek okenn biznes ki Gouvernman i fer avek okenn parti politik.  I annan osi bann Lagreman ki nou pe tarde sanze tel ki Trezyenm Mwan Saler mwan saler ki nou pe peye pour IOT.  Sa se bann defi.  Me sa de lezot lebra Gouvernman in fail pour fer bann follow-up lo sa bann pratik ki nou’n met deo.  I malere pour vwar ki Egzekitif pa pe montre en lapros ini, me zis 2 kan e lager pouvwar.  Bann ki ankor krwar ki James Michel i o pouvwar pe redi en bor, e pe esey retourn pei dan bann vye pratik lepase.  Nou vwar en Prezidan ki pa kapab met son konfyans dan son Cabinet, akoz i bezwen kre en lot laliny pouvwar anmennen par bann CEO, e ni sa pa pe delivre.  Sa i fer ki nou annan en Egzekitif ki top heavy e ki pa efektiv.  Zot ti promet nou en Gouvernman for, nou’n ganny en Gouvernman fay.  Lo kote Zidisyer sa i en gran katastrof.  Repitasyon sa lebra enportan in degrade, akoz bann pratik malisye e bann azanda personnel sa ki ansarz, ankouraze par Msye James Michel e son group ki dezespere pour protez zot byen malaki e pour anpes prosekisyon.  La ankor Msye Faure pe donn lenpresyon ki i pa kapab, oubyen i pa oule fer nanryen.  Repitasyon Sef Ziz i dan labou, akoz bann pratik ilegal.  Nou’n trouve kot i pe kas anba Prezidan Larepiblik, me i paret ki bann Lotorite i per pour met lord dan sa Lenstitisyon.  Wi mon dir ankor Lasanble in fer son travay, me nou pa kapab fer tou keksoz.  Lepep Seselwa in donn nou pouvwar Lezislatif me zot in kit pouvwar Egzekitif dan lanmen Msye Faure e son Gouvernman.  Nou, nou ini dan nou misyon pour redres Sesel,   zot, zot divize e zot ankor pe lager pouvwar.  In ler alors, pour nou pas en mesaz kler avek Egzekitiv.  Si zot pa pare pour pran bann tough decisions; si zot pa kapab pran sa bann tough decisions; alors rann pouvwar.  Annou annan en Eleksyon e lepep i ava donn nou sa bout Lotorite ki mank nou, pour redres nou pei.  Pour sa lokazyon prezantasyon Bidze, nou’n montre ki nou prensip i kler, i realis e ki nou annan sa bann bon lide e kapasite, pour anmenn nou pei devan.  LDS in antre dan Lasanble konman en Lopozisyon for ; klerman dan en pozisyon ‘government in waiting’.  Alors si zot pa kapab, zet sa bout travay lo LDS.  Lo size tax dan LDS nou pran en sif zeneral kot i konsern tax lo saler, se ki zeneralman tou dimoun i bezwen kontribye.  Nou krwar sa ki ganny mwens i ava pey mwens me sa ki ganny plis i ava pey plis.  Nou krwar ki tou Seselwa i annan responsabilite, pour fer fonksyonnen son pei.  Sa bann Kominis, Sosyalis, SPUP, SPPF, Parti Lepep, ki fer nou krwar ki en bann pa ti bezwen peye, ti pe zis bat nou latet e se zot ki’n fer nou pei faid.  Malerezman avek sa bann Dirizan iresponsab, sa dernyen 40 lannen, nou’n erit en sistenm kot bokou Seselwa pe viv lo bordaz lapovrete, e nou bezwen rod bann teknik inovativ, pour tir zot dan sa Zone difisil.  Ki mannyer nou rekonsilye sa 2 pozisyon e nou fer bann bout zwenn ant sa 3 keksoz ; Travay,  Tax e Eliminasyon Lapovrete ?  Lide en tax progresiv ti sorti kot Lopozisyon, e ozordi sa bann ki ankor la akoz zot in vol eleksyon zot aprezan dakor avek tax progresiv.  Parey zot pa ti dakor avek Roupi konvertib, ozordi zot pli konn tou marse lib e zot pli konnen kisisa en Honda konvertib.  Enn bann prensip LDS dan tax ,se pran kouraz bann ki travay dir avek bann ki ganny mwens e donn zot lanmen pour monte dan lasosyete, e fer ki pei i annan en partaz zefor ki zis e ki rezonnab.  Dan propozisyon ki’n ganny met devan par Leader Lopozisyon, pour le moman ziska zour sa group travayer pour ganny en meyer reveni, pour napa tax lo saler pli ba.  Bann dan milye pour ganny en pe plis e bann par lao R35mil par mwan pour ganny en pti pe mwens.  Se sa lazistis sosyal dapre LDS.  Mon krwar ki tou Seselwa i ava apresye.  Lo welfare avek lasistans pour bann ki pli pov ; LDS i krwar ki nou pei i ganny ase pour fer tou Seselwa viv byen.  Malerezman sa larises i ganny mal zere e mal partaze.  Me i annan osi en problenm ler pe fer lapartaz.  En group Seselwa ki’n ganny soutire tou sa bann lannen, i plifere asiz kot zot oubyen dan bor semen pa travay e zis reklanm en par sa larises.  Pour nou bann Kretyen, i annan en parol labib ki dir ; ‘’sa ki pa travay pa devret manze.’’ Nou dan LDS nou dir, ‘’…sa ki kapab travay me ki pa oule travay zot pa merit ganny lasistans welfare.’’  Welfare i pour bann ki malad ; ki annan dezabilite oubyen ki travay me ki pa ganny ase pour fer 2 bout zwenn.  Sa i prensip ki nou dan LDS nou demande i ganny aplike lo size welfare.  Lepok kot serten ti dir zot pa pour zanmen travay tan ki SPPF i o pouvwar in fin.  In osi ler pour aret gele konmkwa i annan tro bokou etranze dan Sesel, me nou menm nou pa oule travay.  La nou dir klerman dan lannen 2018 Minis, nou le vwar en rediksyon lo welfare e en logmantasyon dimoun dan travay prodiktiv.  Sa se sa ki Gouvernman for, ou plito sa Gouvernman fay, pa kapab fer sa vin en realite, alors i merit sorti, resign debout akote e les LDS travay.  Lo lenvestisman dan Sesel Minis atraver ou Mr Speaker, ou plito lo mank lenvestisman.  Sa i konsern sirtou domenn lapes, ki tre enportan dan vizyon LDS pour Sesel prospere.  Sityasyon ozordi i parey yer.  Sa bann menm dimoun, ki’n anpes devlopman anba Sistenm SPPF, zot ankor la pe dray nou, e Msye Faure pa kapab kas anba sa bann Pti Lanpir dan Por Victoria.  I annan en pti group ki kontrol tou keksoz.  Tou nouvo devlopman lo Por dapre zot, fodre ganny kontrole par sa group, par menm dimoun.  E mwan mon pa per pour mwan dir – son Leader dan sa group se Mr Glenny Savy.  Zot ti krwar sa msye i kontrol zis zil zot tronpe.  Tou sa ki konsern lapes i anba son kontrol.  E si i dir wi ou pour viv si i dir non ou pour mor.  Mwan personnelman, mon’ al vwar Prezidan Faure, pour dir ki fodre i kas sa Lanpir.  E mon ankor pe espere ou a krwar li osi i per koze.  Ozordi Sekter Lapes i dan plis problenm ki yer nou ankor pe koz napa ice pour peser konbyen lannen nou pour lo menm topik e napa solisyon?  Nou lasose pe grennen akoz napa lenvestisman selman ler Konpannyen Renyonnen i envestir dan en nouvo lasose nou le detri sa envestiser.  Nou met milyon dan Processing Plant Providence me lo 8 Plant zis 2 ki nou kapab servi . Lekel ki’n pran gous?  Lekel ki’n benefisye?  Apre 1an ki nou pe demann en lanket nou pa ankor gannyen.  Dan sa Sekter Lapes Mr Speaker i annan klerman en mank stratezi, en mank planifikasyon en mank serye.  E la Gouvernman in vin devan nou Lasanble pour demann R50 milyon pour en Plan Emergency pour Lagrikiltir avek Lapes.  Kisisa sa Plan Emergency?  Zis pour bous isi avek en lot trou laba?  Oli en vre vizyon pour lapes pour lavenir ?  Lannen ale lannen vini nou pour reste lo plan emergency?  Konbyen lannen nou pe dir ki nou merit ganny plis valer pour nou pwason?  Eski Seselwa i realize ki plis ki lanmwatye ton ki pas atraver Por Victoria i apre ganny anvoye Maurice pour ganny transportasyon nou pa kapab fer sa isi nou pa kapab fer sa dan nou pei?  Nou pa kapab fer plis loins?  Nou pa kapab fer plis Omega 3 ?  Delwil Omega 3 nou pa kapab fer plis collagen ?  Nou pa kapab fer plis fish meal?  Nou pa kapab eksport en grad ton ki pli o ki zis sa bann ki nou pe met dan bwat?  W, tousala nou kapab fer Mr Speaker, me nou pa pour reisi fer sa si nou pa kas sa bann Pti Lanpir dan Por kot sakenn, pe pez son ta milyon son ta bilyon ki zot pe fer konmela.  En Lanpir Land Marine lo Por Komersyal – en Lanpir Hunt Deltel lo Por Lapes – en Lanpir lo IPHS lo lasose Sapmer ; en lanpir IOT, en Lanpir Port Authority; en Lanpir SFA ; en Lanpir Oceana avek en Lanperer ki ansarz tou sa bann Lanpir.

 

(laughter)

 

HON JEAN-FRANCOIS FERRARI

Zot, zot tou sa bann dimoun pe lager pour protez zot Lanpir e nanryen pa pe ganny kordinen – nanryen pa pe bouze.  Peser i espere, peser i faid ; doker i ganny promes stok ton pe redwir.  Pwason i al Maurice.  E nou pe lager nou isi ?  Nou merit onte ki sa Lor Ble ki dan nou delo i pas anba nou nennen, me se Morisyen ki vin ris.  Pa bliye osi ki i annan detrwa Seselwa, ki pe anpes lenvestisman isi Sesel, akoz zot, zot annan par dan cold store e dan faktori Maurice.

 

(APPLAUSE)

 

HON JEAN-FRANCOIS FERRARI

Msye Faure silvouple donn leadership dan sa lendistri ki dan dezespwar.  Nou bezwen lenvestisman me nou pa pour gannyen tan ki annan sa kalite dezord.  Si ou pa kapab fer Msye Faure zis kile les LDS met lord e donn sa direksyon. Akoz nou nou’n pare pour nou fer li.  Minis Finans nou konnen ki ou osi ou pe lager pour plis devlopman, e plis reveni pour balans ou Bidze e ou kapab kont lo nou pour donn ou lanmen dan sa sekter.  Mr Speaker mon’n swiv avek bokou latansyon bann sa 3 dernyen zour – bann Manm lot kote latab – e mon konpran aprezan akoz Parti Lepep i danzere pour nou lekonomi ; tandis ki LDS pe gete kote nou kapab ganny plis reveni ; kote nou kapab koup depans ; kote nou kapab fer saving; kote nou bezwen envestir parey Leader Lopozisyon in dir.  Lo kote Parti Lepep, zot pa enterese avek tousala.  Zot zis enterese depanse zwe politik, bat latet Seselwa avek ankor promes.  Sa lekip ki la devan mon pa pour zanmen kapab balans en Bidze, apard ler IMF i pran kontrol.  Mon rapel ler Prezidan Faure ti dir si zot vot pour LDS sa Lasanble pour vin en Dance Hall.  Sa semenn nou’n vwar Onorab De Commarmond avek Onorab Gill fer sa Lasanble vin en Concert Hall. I pa serye Mr Speaker.  Ozordi Minis atraver ou Speaker, nou pe ofer ou bann solisyon kot ou pour trouv sa larzan neseser pour ou kapab fer ki nou tax progresiv i konmans le 01 Zanvye 2018; akoz nou anvi ki sa i arive le 01 Zanvye 2018.  Premyerman anmas en bon pe sa bann larzan tax ki manke depi lepok Erod e son bann dalon ki’n benefisye.  Nou konnen i pa fasil, akoz sa bann dimoun ki dwa i annan kontak tre o dan pei me nou, nou pe ofer ou nou led Minis.  Apre debat Bidze mon demande en group travayer FPAC avek Minister Finans i ganny set up avek bi pour atak sa problenm.  Nou target Minis se o mwen R50 milyon an plis avan lafen Zen sa lannen.  Dezyenmman deswit ferm lazans ki pour soutir serten dimoun Natcof pa’n reisir fer nanryen pour konsonmater fermen e fer saving R1.5 milyon.  Paradis Des Enfants en kado anpwazonnen privatize e fer en saving R4.5 milyon.  Remet Vilaz Prezidan anba Minister Lafanmir e fer en saving R4 milyon sak lannen.  Pa kapab konman en Prezidan i vini fodre ekrir en lorganizasyon pour son bann madanm, apre nou ki pour peye.  En lot legzanp en lazans ki nou pa tro konnen ki mannyer pe marse e akoz i la se NISTI.  Sa i bezwen vin en nouvo Departman kot Liniversite Sesel e nou pour sov plizyer milyon.  Minister Finans avek FPAC, fer legzersis ki lontan nou pe demande pour reget bann rent ki Gouvernman i peye.  Mon sipliy ou nou sipliy ou Minis tro bokou labi laba – tro bokou faver politik.  La Zidisyer pe demann ankor detrwa milyon pour pey lakaz.  Pour bann Ziz etranze mon konpran, me nou pa kapab zis rod lakaz pour tou dimoun partou kote e nou pe pey bann pri fou.  Alors nou espekte nou Minis si ou fer sa legzersis avek FPAC, nou espekte omwen R5 milyon savings dan Bidze 2018.  Dan lezot landrwa kot tax i kapab anmase, la i la ankor enn de landrwa.  Minis Pti Ponm – Pti Zonn e tou sa bann lalkol lokal, ki pe detri lasante nou pep.  Me tax lo prodiksyon sa bann bwar lokal i desann.  Minis be i annan keksoz ki mal.  License Casino i zis R1.3 milyon pour en lannen antye pour tou sa bann Casino.  Nou serye nou?  License Lakonpannyen Telekominikasyon Minis, in desann lannen pase.  Non Minis get ladan, akoz sa bann ki annan … mon konpran i difisil me sa bann ki annan par dan bann gro Konpannyen la se bann dimoun ki tre powerful dan nou pei.  Alors mon konnen e nou servi FPAC e nou ava fer sir ki nou pe ganny plis pour valer nou larzan.  Zis avek sa detrwa pti legzanp Minis, nou ava pe ed ou pour trouv sa larzan pour enplimant tax progresiv an Zanvye 2018.  Zis avek sa bann mezir nou’n kalkile ki nou kapab anmas R80 milyon an plis – zis detrwa pti mezir.  Mr Speaker nou fyer ki nou dan LDS, nou en mazorite serye e vreman responsab dan sa Lasanble.  Me mon repet ankor tousel nou pa pour reisir.  Sa ki’n donn mazorite LDS zot vreman … sa ki’n donn sa mazorite LDS son vot zot vreman satisfe avek valer ki zot in gannyen atraver zot vot.  Par kont bann ki’n vot pour Parti Lepep an 2015 zot pe regrete ,akoz sa group pa pe kordinen pa pe travay serye, pa pe konsantre pour redres pei me pe zis lager antre zot.  Ler Minis i dir ki fodre met lord dan L’Union Estate La Digue Minis i annan MNA Lepep – pa zis enn i annan plizyer ki pe pas par deryer ki pe dir ‘’anvoy Minis pronmnen.’’  Minis ki mannyer sa keksoz i kapab marse?  Ki mannyer i apele sa bann keksoz ?  Eski sa pa i apel en boycott ?  Eski i en boycott ?  Eski serten i annan en azanda pour detri zot prop Gouvernman – esey met James Michel o pouvwar?  Sa mon krwar i en lide tre, tre fou, me selman mon pa kapab anpes serten dimoun reve.  Mr Speaker ler mon terminen mon pour dir detrwa parol pour bann ser pour mon bann frer Mont Fleuri.  Travay i entans e keksoz pe bouze, me mon pa ankor satisfe ki sa ki nou pe fer, i otan sa ki nou ti kapab fer pour nou amelyor lavi nou bann dimoun.  Mon remersye tou zofisye Gouvernman ki’n donn korperasyon.  Mon remersye mon DA avek son lekip.  Mon remersye bann zabitan ki’n aport zot kontribisyon.  Kot i reste pour fer travay nou pour redouble nou zefor ozordi nou zis get otour nou e nou’n vwar poudir Mont Fleuri in lev-e e Mont Fleuri pe bouze.  Mon remersye bann Ners ki’n donn nou lasante e bann Teachers ki’n pran swen avek nou zanfan.  Mon dir zot ki dan deba Bidze mon pe al lite sirtou pour bann Teachers avek Ners ki’n travay sitan lannen ki zot kapab annan en sistenm kot zot kapab ganny zot sekirite sosyal 60an.  Nou distrik pa’n ganny eparnye avek sa fleo vyolans.  E ozordi mon annan en lanons spesyal pour Sir Kevin ki sa dernyen viktim mon fer rapel Prezidan Larepiblik ki son premye responsabilite se pour asir sekirite pour tou son zabitan.  Pour le moman Msye Faure ou pa pe reisi dan sa responsabilite.  Ou bezwen reasir nou ki ou annan en plan e ou annan bann mwayen ki ou pour donnen, pour redonn sekirite lepep Seselwa.  Pli boner mon tann Mr Gill pe dir annou aret koz servi sa bann non ‘’Zet Anba’’ e ‘’Pil Lo Li. ’’ Mwan mon ti a kontan dir avek Mr Gill poudir  mwan  sa kantite pile ki zot in pil lo mwan e lo Leader Lopozisyon ki zot in anvoy nou Lopital, nou zanmen nou’n deza fer sa pour okenn Seselwa nou.  E zot in fer li pandan 40an.  Alors si vreman Onorab Gill ou serye ou devret tap ou pti lestoman e dir, ‘’c’est ma faute,  ’c’est ma faute –  c’est ma faute’’ e demann pardon pour 40an pour pil lo dignité e pil lo Seselwa.  Wi mon 100 poursan dakor avek Leader Lopozisyon ki resours Militer, i bezwen ganny remet dan sekirite nou pep.  Nou dan sityasyon Leta Dirzans e nou bezwen Gouvernman ki determinen pa en Gouvernman fay – travay i la e LDS i pare pour travay.  LDS i pare pour gouvernen.  Avek tou respe i demann bann ki santi ki sa louvraz i tro lour pour zot, debout en pti pe akote les nou travay les nou, nou ava aranz lavi pour sa pep Seselwa.  Mr Speaker mon dir ou mersi.  Prezan mon pran sa boul mon met lo laliny  gol e mon met sa travay final lo ou.  Konman en tim ki ini e determinen, annou anmenn sa laviktwar pour nou pei Sesel.  Mersi Mr Speaker.

 

       (APPLAUSE)

 

MR SPEAKER

Mersi, ok ok, alright.  Mersi Onorab Ferrari.  Mon krwar zis zot de Onorab Gill ki koz avek pasyon ki byen.  

 

HON PATRICK PILLAY

Anyway si zot a permet mon lo la par Anse Boileau pour dir enn de mo.  Mon pa pour long.  Minis mon konnen it’s been a long week pour ou.  Me mon ti a kontan premyerman felisit bann MNA mon bann koleg ki’n koze.  Mon sir ou a dakor avek mon Minis Finans Dr Larose ki i annan bokou keksoz ki’n ganny dir ki tre, tre valab, ki ava anrisir ou refleksyon lo Larepons ki pour ganny dir demen, lo travay ki ou pour fer 2018.  E parey in ganny dir, mon krwar nou tou nou’n pare pour travay pour siport ou parey mon deza dir ou priveman a plizyer repriz,  ou louvraz i pa fasil akoz ler ou bezwen balans balance sheet pour pei, tousala i tonm lo ou ledo.  Parey Onorab Ferrari i dir larg lo mon ledo mon krwar osi ou ledo i bezwen for, pour tenir tousala.  Mon ti a kontan zis fer detrwa komanter zeneral, ki pour siporT serten keksoz ki’n ganny dir.  Premyerman lo sa kestyon Minis, lo sa kestyon de labank Nouvobanq avek Seychelles Commercial Bank mon krwar dan Lasanble tou le 2 Leaders in koz lo la en kantite fwa.  E taler mon vwar Onorab Gill mon koleg in koz avek pasyon.  Konmsi ou a krwar in ler pour nou vwar en pe aksyon pour nou vwar en keksoz ki arive.  Akoz si Gouvernman li menm li, i pa kapab annan en kontrol lo labank ki i annan majority share pour fer lavi Seselwa pli eze, me nou annan en gro problenm.  Alor mon premye rapel avek ou Minis se sey regard ladan, akoz Lasanble in koz depi 1an depi Septanm lannen pase nou’n koz tou le de kote latab en kantite fwa lo la.  E mon krwar ler nou koz kou lavi fer lavi Seselwa pli fasil, si nou fer li pli fasil pour zot ganny en loan pour fer ki se swa ki zot oule ; swa biznes oubyen lakaz ; oubyen extend en lot lasanm lezot landrwa, i depan lo nou pour fer li pli fasil.  Sa kestyon sekirite mon krwar i kler ki nou tou nou’n demann en realignment Larme parey in ganny dir – en travay ki Larme i fer pre avek Lapolis.  Lapolis pe sey fer zot mye, me zot tousel san nou san lezot Lazans dan pei, zot pa pour arive fer li.  E mon krwar la nou tonm dakor nou tou konman en Lasanble – tou lede kote latab, ki nou bezwen annan sa reinforcement ki lapolis i gannyen.  Parske parey in ganny dir, nou dan en kriz, nou vreman dan en kriz mon’n koz lo la yer e nou tou nou konnen.  Mon pa bezwen repet ankor.  Sa ki nou pe pas ladan parey nou’n ganny dir fodre, nou tou nou travay ansanm pour nou sorti ladan akoz mon krwar nou en bizou ki nou kapab sorti.  Mon dakor avek sa ki’n dir nou kapab sorti dan sa problenm ki nou ladan.  Me selman mon ti annan enn de pwen ki vreman spesifik,  ki mon ti a oue koz lo la.  Mon ti a kontan siport Vice-Chairman Anti Viktimizasyon Komite Onorab Andre – mon prezimen ki’n koz lo nou behalf  -ki Prezidan in dir i annan sa 2 Tribinal.  Fodre ki sa 2enm Tribinal lo britalite Lapolis ek Larme i ganny etablir.  Mon konnen Mr Athanasius i Latet en Tribinal pour konsernan Later avek Lakaz, me sa 2enm i bezwen ganny etablir.  Akoz nou, nou vwar bann ka kot i annan fe laprev kot dimoun in ganny abize.  Ti a bon annan klotir.  E i pa zis setting-up sa Tribunal.  Me osi annan en fon la ki nou pe diskit Bidze.  Mon krwar tou dimoun in koz lo landrwa kot nou kapab fer saving e Defans i annan en dimoun ki’n koz extensively lo la – R294 milyon.  Me petet i devret annan serten finansman ki ganny met dan en Fon, pour plis sa bann dimoun ki klerman zot in ganny abize par Lafors Lapolis oubyen Lafors Larme, les zot move on avek zot lavi.  Pareyman pour Tribinal ki pe regard later ki’n ganny aquired avek bann lakaz ki’n ganny aquired ; les bann zenerasyon apre si i annan dimoun ki’n move on to the Angels ganny en settlement e move on avek zot lavi.  Sa mon krwar mon ti a kontan siport Vice-Chairman Anti-Viktimizasyon fortman.  I annan en keksoz ki mon osi mon santi tre for ki Onorab Ferrari in dir tax lo sa prodwir lokal parey Pti Ponm.  Konmela nou’n ariv en staz ler ou sorti Port Launay pour ou ariv L’ile Du Port tou laboutik ki ou pase – lo tou laboutik e mon demann zot fer sa remark, i ranpli avek lavertisman pour lalkol.  Si nou pe fer lager kont drog avek lalkol nou bezwen nou tou zwenn ansanm pour nou fer sir ki ler en dimoun i lev-e bomaten i pa vwar zis Heineken avek Amster avek Seybrew ou whatever.  Mon pa pe dir annou ‘Ban’ lalkol antye ; me nou bezwen revwar ki bann mezir nou pran, pour nou fer sir ki lasante nou pep pa ganny afekte ; parske year in year on nou pour bezwen nek ogmant Bidze ki Lasanble i gannyen.  I annan bann mezir prevantif anfet mon ti pe koz avek Ners Peggy Azemia ki travay lo Progranm sa semenn ki ti vin dan Lasanble, i pe dir mon ki zot le met plis lanfaz lo ‘Prevansyon’.  Me ‘Prevansyon’ li osi servi advert pozitiv lo medya lo mon televizyon  anpes advert negativ, ki zis ankouraz dimoun pour konsonm lalkol.  Alor mon krwar sa mon ti a kontan siport sirtou sa ki dernyen entervenan ki’n koz lo sa Pti Ponm akoz sa Pti Ponm, dan en Rally mon’n esey gout enn, me mon krwar si mon ti pour vwar sa zis mon lespri ti pour vire.  Akoz i en keksoz ki vreman ou pa bezwen ni al kot quality … kot Bureau of standards, ou santi ki i annan en melanz en cocktail ki vreman danzere pour lasante dimoun.  Mon ti a kontan finalman. koz en pti pe lo Anse Boileau.  Mon ganny dir ki tanzantan ki mon pa koz lo Anse Boileau.  Be la mon ganny sans ozordi, zot a donn mon en pti sans pour de minit koz lo Anse Boileau.  Mon’n tann Onorab Arrisol taler koz lo ‘laliberte lekspresyon’ ‘laliberte aksyon’ e mon pa oule pa koze, mwan osi mon a ganny ‘Zet Anba’ Anse Boileau laba.  Alor mon ti a kontan dir premye keksoz Minister Labita ki ler zot ti vin vizit Anse Boileau avek Prezidan Faure nou ti asize dan Biro DA nou ti koze avek DA, zot ti promet pour fer en keksoz avek sa vye lakaz kot Gilbert Benoit ti reste ki vizavi Sant.  Nou ankor pe espere.  Fotespere avan nwel sa bann twatir Asbestos i ganny tire lo sa lakaz, akoz i danzere akoz i annan dimoun ki pe servi sa pour vin dormi aswar.  En promes ki ou ti fer PS Choppy silvouple montre nou ki i annan en konmansman ; ki MNA i a ganny en biro pli santral olye al Anse La Mouche.  I a pli o-bor Sant kot bann aktivite i été, o-bor bann klinik avek o-bor lekol ensidswit o-bor Kordgard.  So sa i en lapel ki mon ti a kontan fer.  En promes ki zot ti fer Minis Bastienne avek ou PS, nou ti a kontan ki omwen ou konmanse ou montre nou ki i annan en volonte pour nou avans devan osi Anse Boileau.  Bann pti proze zabitan Anse Boileau DA in anvoy en lalis kot mwan,  nou a pe travay ansanm ki avan Novanm nou pou soumet avek Minister Gouvernman Lokal e nou a les zot konnen ; nou a met dan Sant pour zot vwar lekel bann pti proze dan distrik ki pe ganny enplimante 2018.  E mon ti a kontan asir zot ki ansanm avek Ladministrasyon Distrik, nou pe travay ansanm pour fer avanse – sirtou bann kestyon pti semen – semen segonder.  An se ki konsern Lagrikiltir avek Later, mon kapab donn zot en garanti ki nou’n tonm dakor avek Minis Charlette avek Minis Bastienne ki nou pour vin vizite ansanm avek MNA avek DA pour nou vwar bann proze ki priyorite dan Anse Boileau, sa nou pour fer li ou pa bezwen ganny letan pour pas lo tou bann landrwa lagrikiltir – tou bann proze kot nou pe regard later pour bann zabitan Anse Boileau, nou pour vini avek sa 2 Minis konsernen, kot nou ava enform zot ; kot nou annan en lalis kot zot in vin kot mon zot menm zot.  So sa i dan pipeline pour ganny fer.  Mon ti a kontan osi koz lo sa kestyon Lanpir.  Mon’n kontan sa lentervansyon ; akoz i annan keksoz – e la mon krwar sa ki mon kontan Minis ki dimoun tou le de kote latab dimoun in koz pran dimoun nepli tan pour nou fer krwar nou pa konnen.  Sa ki Onorab Ferrari in dir nou, e Onorab Clifford Andre i la, konman Komite koman Manm Komite Anti- Viktimizasyon an fet mon Vice Chairman, pou vwar ki nou santi i annan sa bann kalite Lanpir ki Onorab Ferrari in koz lo la.  E mon krwar Sesel pour li avans devan fodre nou pa per pour dir kot i annan keksoz pour li aranze.  Nou pa kapab retourn parey nou ti été avan 1977 kot en pti group dimoun i kontrol nou.  Nou’n ganny sans ozordi pour nou annan nou freedom e mon pa pe dir zis LDS ki’n lager ; diferan dimoun in lager pour nou ariv kot nou’n arive ozordi.  E mon krwar ozordi zour nou pa kapab oule zis serten dimoun krwar ki zot ki kontrol tou keksoz.  E la mon pe koz konman Vis Chairman High Level Komite Prizon.  Ozordi zour 10 mwan apre ki nou ti ganny dir poudir Marie Louise pour fermen prizonnyen i ankor pe langir Marie Louise.  Eski nou serye nou konman en Gouvernman?  Eski ki nou High Level Committee nou pe gaspiy nou letan tou le Zedi pour nou meet?  E en lot gran msye li i pran desizyon pour li dir ki pour fer avek Coetivy?  Ki nou pe fer nou?  Ki nou pe fer konman Gouvernman?  Nepli ler pour nou per kot i annan dimoun ki tro big for their boots – parey Angle in dir.  Fodre nou konman en Lasanble, nou met L’Egzekitiv under scrutiny, pour nou fer sir ki sa bann keksoz nou pa aksepte.  E finalman, finalman mon ti a kontan siport tou sa bann dimoun ki’n koz lo lasante.  E mon ti a kontan siport Onorab Arrisol dan son demars kot in dir ‘’…nou’n kontan bann Ners in vini.’’   Mon’n Minis Lasante 4an yer mon al vwar Onorab Audrey Vidot – pour bann zot ki pa ankor ale i dan en Hermitte Ward dan en private room deryer.  E mon debout mon koz avek enn de bann travayer.  E mon krwar ler nou pe regard 10 poursan Gratwite ensidswit ensidswit – avan Ners i annan lezot dimoun lo fron batay.  Cleaner osi i annan risk ki i pran.  Sa bann Asistan osi i annan risk ki i pran.  I annan dimoun konman Psysio Therapist i annan risk ki i pran.  Mon krwar ler nou pe regard lasante, nou pe regard kondisyon Travayer Lasante nou koz lo Ners nou koz lo Dokter me nou bezwen vwar osi bann ancillary workers bann ki zot osi zot lo fron batay zot osi zot ankor petet dan background ki zot osi zot ganny konsidere.

 

MR SPEAKER

E avek sa mon ti a kontan dir ou Minis ki nou apresye ou pasyans ou letan ki ou’n ekout nou.  Parey mon’n dir mwann personnelman konman Speaker. mon felisit tou dimoun ki’n koze.  E mon redir ankor ou poudir mon fyer mon en Speaker en Lasanble ki very proactive ; ki pa per pour dir pran nou responsabilite ; akoz nou tou nou’n dir nou tou nou dakor nou tou nou bezwen ini ansanm, pour Sesel.  Ki nou servi isi nou servi ‘’Together’’ ‘’Pa les tonbe,’’ whatever, pour vi nou tou nou tonm dakor ki pour Sesel nou kontinyen menm si nou ariv 63an – si nou ankor kapab kontribye annou kontribye pour nou fer Sesel avanse.  Avek sa mon a remersye tou dimoun ki’n ekout mwan, ki’n donn mon sa sans konman MNA Anse Boileau pou dir mon pti bout mwan osi.  Mon a dir Minis mersi pour ou pasyans ki ou’n ekout nou.  Nou’n tonm dakor ki demen bomaten 9er Minis pour donn son Reply pour tou sa ki’n ekoute. Epi ABC  pe al zwenn apre midi.  Nou mazinen nou a zwenn.  Anyway nou propoze ki nou a zwenn midi en kar, pour tou bann ki lo ABC.  E nou a deside si nou pour pran demen apre midi i annan serten dimoun ki dir annou pran demen apre midi.  Nou a vwar avek Minis taler, apre nou a vwar avek bann Lazans Gouvernman.  Me mon konnen ki semenn prosenn nou pour tre okipe toulezour.  Mon demann tou bann Minister – tou bann Departman, tou bann Parastatal, tou bann Antite prepar zot silvouple – pour nou al vit – avek efikasite, ki nou pa bezwen al apre Nwel ; koumsa ki sa ki anvi swet Nwel boner son kanmarad i a fer li.  E nou a deside pli tar ozordi si nou pu kontinyen demen apre midi.  Me demen bomaten Minis nou a welcome ou 9er bomaten pour nou ekout ou – ou Reply.  Avek sa  mon a swet tou dimoun bonn apeti – bonn apeti bonn kontinyasyon, nou a vwar zot demen bomaten 9er.  I annan miting – zis pour anonse i annan miting ABC parey mon dir midi en kar – dan Lasal Konferans Speaker ; FPAC osi pe zwenn 1er Committee Room 3.  Ok tou bann ki lo FPAC 1er Committee Room 3.  Mersi pour zot latansyon, zot partisipasyon. And  I am a very proud Speaker of a very proud Assembly.  Mersi.

 

(APPLAUSE)

 

(ADJOURNMENT)