::
Home » Uncategorized » Verbatim Report, The National Assembly Sitting, Tuesday 31st October, 2017

Verbatim Report, The National Assembly Sitting, Tuesday 31st October, 2017

NATIONAL ASSEMBLY OF SEYCHELLES

 Tuesday 31st October, 2017

The Assembly met at 11am

National Anthem

Moment of Reflection

Mr Speaker in the Chair

MR SPEAKER

Bon, bonzour tou dimoun dan Lasanble e an deor Lasanble.  Byenveni tou bann ki pa ti semenn pase Bon Retour.  Mon espere ki tou Seselwa pe pas en bon moman dan Festival Kreol, pe dekouver nou kiltir Kreol e mon swet zot en bomaten avek nou agreab.  Zot konnen ki nou pe zwenn bomaten e demen nou pe rezwenn ankor pour Bidze so nou a sey fer nou mye pour nou sey kouver bann pwen lo Order Paper ozordi konman nou kapab.  Parey zot vwar lo Order Paper i devan zot nou annan en (SI) Minor Offences e sa i parmi sa bann papye ki zot in gannyen dokimantasyon.  Nou annan osi en Rapor ki nou ti a kontan ganny prezante devan Lasanble Komite of Government Assurances  – COGA e pour la e san plis tarde mon ti a donn la parol Chairperson sa Komite Onorab Henrie pour prezant Rapor.

 

HON GERVAIS HENRIE

Mersi Mr Speaker e bonzour tou bann koleg Onorab e tou dimoun ki pe ekout nou.  Mr Speaker legzistans Komite Committee on Government Assurances oubyen COGA i anliny avek Lartik 104 Konstitisyon ki donn Lasanble Nasyonal sa pouvwar pour elekte diferan Komite pour permet bann Manm sa Konstitisyon pour desarz son fonksyon.  E ozordi alor nou pe prezant Lasanble avek nou premye Rapor anyel ki ava kouver nou travay depi Oktob 2016 ziska Oktob 2017.  COGA son rol prensipal se pour sirvey e swiv bann promes ki Gouvernman i fer dan Lasanble sa i anliny avek bann rol primordyal ki Lasanble i annan manda pour fer sa ki nou dir oversight role.  Lareg avek prosedir travay Lasanble Nasyonal ouswa Standing Order i osi fer provizyon pour annan en tel Komite e dan kad 6enm Lasanble Nasyonal nou Komite ti vin an egzistans apre en Mosyon table le 4 Oktob 2016.  Komite i konpri 7 Manm ki enkli Onorab Sylvianne Lemiel, Simon Gill e Wilbert Herminie lo kote Parti lepep Onorab Sandy Arrisol, Norbert Loizeau, Clive Roucou e mon menm Gervais Henrie, lo kote Linyon Demokratik Parti Seselwa oubyen LDS.  Onorab Roucou i Vis-Chairman Komite e mon tenir mon pozisyon Chairman metod travay COGA se ki letan en Minis en Sekreter Prensipal oubyen en Egzekitiv en Ministe, Departman e Lazans gouvernmantal pe enterakte avek Lasanble Nasyonal, sa ki zot dir i ganny rikorde.  Pli tar Komite i zwenn e nou deside kwa ki kalifye konman en promes.  Nou tonm dakor lo dele letan ki sa lorganizasyon pour gannyen, pour donn COGA en rapor lo demars pour fer sa promes vin en realite.  E laplipar di-tan, nou anvoy zot en let e demann zot pour fer sa.  A sa pwen, fodre fer remarke Mr Speaker, ki COGA ti soumet avek Lasanble Lamannman dan son term travay, pour kapab enkli lezot dimoun apard Minis, ki osi enterakte avek nou tel ki pandan staz Komite de ba lo Bidze.  Nou travay pa zis atraver let.  Nou osi fer site visit pour vwar pour nou menm progre en proze.  E nou annan bann miting avek diferan Minister konsernen, ki Komite i kestyonn zot profondeman, lo promes ki zot fer.  Pour ede promouvwar nou travay e legzistans COGA, nou ti zwenn avek Cabinet Minis antye o konmansman sa lannen, pour eksplik zot sa ki Komite i ekspekte de zot.  Sa lesanz ant Brans Egzekitiv e Lasanble atraver COGA, i desarz sa rol check and balances ki enn bann eleman fondamantal nou demokrasi.  Dan sa menm lespri, nou anvizaze rankontre Forum CEO boner lannen prosen e nou osi anvi annan en dyalog avek Brans Zidisyer e platform Sosyete Sivil lo travay COGA ; akoz zot Bidze i pas par devan Lasanble Nasyonal.  Avan mon kontinyen, mon oule remersye medya pour kouvertir ki zot in donn nou bann rankont avek Gouvernman, pandan sa dernyen 12 mwan.  Mon krwar zot lentere in promouvwar travay nou Komite, e osi Komite ki Lasanble Nasyonal i fer an zeneral.  Me mon azoute, ki ler zot kouver COGA konman en Nouvel, i pa en lot moman pour donn Brans Egzekitiv loportinite vann zot polisi avek piblik Seselwa, me aksan i devret lo fason ki Lasanble Nasyonal, pe fer Gouvernman rann kont.  So sa Nouvel i dwatet dan pwennvi Lasanble Nasyonal.  Pandan sa dernyen 12 mwan COGA in rankontre 25 fwa.  Nou’n konsider 247 lasirans nou’n anvoy 21 korespondans e in annan zis en korespondan avek Minister Tourizm Lavyasyon Por e La Marin ki nou pa’n ganny repons.  Nou’n rankontre CEO nou rankont plito avek CEO Komisyon Eleksyon ti kennsel akoz Mr Hendrick Gappy ti lo en vizit aletranze.  Nou’n fer 2 site visit enn lo Airport e enn Cascade nou’n rankontre Management SBC.  Nou’n annan 2 lodyans ek Minis Finans avek son senior management team.  Nou’n osi annan en lodyans avek Minis pour Labita Lenfrastriktir avek Transpor lo later e nou’n zwenn avek CEO SEnPA a de repriz.  Nou kapab raporte avek Lasanble Mr Speaker ki parmi sa 247 lasirans, nou’n i annan 71 ladan oubyen 29poursan sa ki ti ganny promes in ganny onore.  Pour larestan i bann proze ki ankor ankour e ki nou Komite pour kontinyen swiv zot lenplimantasyon.  Aprezan pour bann lobzervasyon ki nou fer baze lo bann enteraksyon e sa kantite lasirans ki nou konsidere, COGA in obzerve ki i annan en mankman travayer servis piblik kalifye ki pe afekte performans Gouvernman pour delivre, sa ki in promet an pli vit posib.  COGA in note ki la kantite staff ki kit travay dan servis e dele letan ki i pran pour rod travayer osi pe afekte lenplimantasyon bann proze.  Alokasyon Bidze i reste en defi, pour delivre servis ki efektif e pour met bann lenfrastriktir debout atan.  Plizyer Scheme of Service ki Gouvernman in promet in retarde sa lannen.  Medya Nasyonal, an deor Lasanble Nasyonal evidaman, i pa’n neseserman reste azour avek bann promes ki Gouvernman pe fer.  Dan en zefor pour met presyon neseser pour pli pour fer, ki bann servis dan servis piblik ava ganny fer avek plis efikasite.  Souvandfwa Brans Egzekitif pe pa pe gard zot promes orizinal.  Zot sanz Polisi dan milye semen, san kominik zot desizyon atan avek bann ki pour ganny afekte par sa menm desizyon.  Laplipar bann promes ki ganny fer, letan de ki fini sa proze letan ki konplete pa ganny anonse ouswa respekte.  E finalman nou dernyen obzervasyon, i se ki obzervasyon piblik e Dirizan dan kominote i tre ba dan bann linisyativ Brans Egzekitiv.  Alor baze lo sa bann obzervasyon, nou anvi fer sa seri rekomandasyon.  Pour fasilit kominikasyon Komite i rekomande ; ki tou Minister Departman e Lazans i idantifye en dimoun pour liaise direkteman avek Komite pour fasilit nou travay.  Nou demande ki tou Minister Departman e Lazans i respekte dele letan nou donn zot, pour reponn nou korespondan.  Sak Minister i dwatet ganny loportinite omwen enn fwa par an, pour donn en kontrandi lo zot travay an form en Statement devan nou Lasanble ; e ki zot sirtou kouver bann promes ki’n ganny fer pour zot Minister atraver zot Bidze e osi Diskour Leta Lanasyon.  Otan ki posib, COGA i ganny en posib en rapor ki Minister Finans i fer detanzantan ki montre depans Minister  anliny avek promes bidzeter.  Otan ki posib COGA i resanz lenformasyon avek FPAC lo progre bann proze mazer Gouvernman, tel ki bann proze Kapital ki’n ganny promet dan Bidze.  Otan ki posib, COGA i ganny kopi Rapor ki Minister Gouvernman Lokal i fer ki donn detay proze dan distrik parey in ganny promet dan Bidze ; ki sak MNA i pran lentere personnel dan bann promes ki ganny fer direkteman dan larepons bann kestyon ki zot demande, e enterakte avek bann komite ki swiv sa langazman.  Nou dir sa akoz i posib parfwa ki annan en langazman ouswa 2 ki sap nou e si i konsern bann MNA personnelman.  Zot kapab take up sa avek nou e in annan bann legzanp kot serten Manm in fer.  Pour kontinyen avek bann rekomandasyon ; Ki Gouvernman i seryezman delivre avek son parol ki mekanizm entern dan Gouvernman i ganny etablir pour asire ki tou proze i konplete, e ki mezir apropriye i pran pour minimiz bann defi ki retard bann lenplimantasyon okenn proze.

Ki Sekretarya Lasanble Nasyonal, i seryezman konsider loportinite training pour Manm COGA pour ed nou pli byen fer nou fonksyon konman en Komite.  E nou santi osi ki COGA i merit enterakte en pe plis avek bann lezot Komite sirtou atraver rankont bann Chairman Komite omwen enn fwa sak trimes pour partaz leksperyans lo fason amelyor nou travay.  An konklizyon Mr Speaker akoz natir travay 6enm Lasanble Nasyonal la kantite travay ki COGA in fer i bokou.  Kantmenm sa nou’n fer nou mye pour kapab annan en Rapor en pe avan Bidze pour ki ava ed bann Manm dan zot deliberasyon.  Sa Rapor ki nou pour sirkile byento ki tou nou bann Manm in sinyen nou’n met Annex, kot zot ava vwar lekel bann korespondan ki nou’n enterakte direkteman avek Minister.  Me selman Rapor COGA dan son natir dwatet la la lepeser li, akoz i telman annan tou sa bann lasirans tou sa bann korespondan.  Alor i pour annan en pli gro Rapor ki pour vin parey en Annex ki nou pour kit avek Library ki pour al ansanm avek sa Rapor.  Sa i pour donn zot parey direksyon.  Zot ava vwar lasirans Minister Lasante ki son code e li ava dan sa gro Rapor ki nou ava kite Library, akoz i pour apre nou kapab sirkil li online pour bann Manm ; akoz si non zis pour nou pa gaspiy papye, nou pa pour kapab fer en Rapor ki la la groser.  So mon swete ki zot konpran nou.  E Mr Speaker nou remersye sipor Sekretarya sirtou sipor Deputy Clerk, Madanm Tania Isaac, Madanm Thelermont, Madanm Thelma Julie, osi Clerk Lasanble, Madanm Juta Alexis, pour zot travay dir e devouman pour nou kapab akonplir bann obzektif COGA.  E avek sa de mo Mr Speaker mon annan plezir pour soumet nou premye Rapor Anyel COGA ki kouver Oktob 2016 a Oktob 2017 avek Lasanble Nasyonal.  Mersi.

 

MR SPEAKER

Mersi Onorab Henrie e felisitasyon pour sa travay ki zot in fer.  Evidaman zot in fer en travay tre konpreansiv.  E mon krwar zis pour remind bann Onorab ki ler zot in depoz Rapor ki ase epe parey in dir – dan Sant Dokimantasyon, i annan staff laba ki kapab ed zot, si i annan okenn dokiman an partikilye oubyen Minister partikilye ki zot le swiv avek.  Mon donn laparol Onorab Roucou ou ki Vice- Chairperson pour COGA.

 

HON CLIVE ROUCOU

Mersi Mr Speaker.  Bonzour tou Manm Onorab.  Mr Speaker parey ou’n dir koman Vis-Chairman Komite COGA mon sizere ki nou pa debat lo sa rapor ozordi.  Me nou ava anmenn en Mosyon dan le fitir pour nou debat sa Rapor.  Mersi.

 

MR SPEAKER

Tre byen.  Si napa …. sa en rekomandasyon sorti kot Vis- Chairperson COGA.  Si napa okenn obzeksyon, nou ava dakor nou ava met li koman en Mosyon a la venir akoz la nou pe al konsantre lo konmansman demen lo Bidze ok.  So nou ava al drwat lo … mersi …  nou ava al drwat lo nou lot pwen lo Order Paper ozordi.  E mon a demann Leader of Government Business pour prezant son Mosyon.

 

HON CHARLES DE COMMARMOND

Mersi Mr Speaker bonzour Mr Speaker bonzour tou Manm Onorab isi prezan e tou piblik ki a lekout.  Mr Speaker Mosyon ki devan nou i lir koumsa : that the National Assembly resolves to approve the Supplementary Estimates of R217, 5270 million laid before the National Assembly in accordance with Article 154(7) of the Constitution.  Mr Speaker sa propozisyon pour aprouv sa Bidze Siplemanter ki devan nou Bidze Siplemanter R217, 5270 i vin swivan plizyer keksoz enn nou vwar ki dan rapor fiskal dan Zen 2017 Gouvernman in kolekte plis Tax ki ti ganny prozekte alor Gouvernman i reviz in reviz son bann prozeksyon konm swivan.  Par egzanp dan income tax ki ti’n prozekte nou vwar nou fer en savings i annan en varyan 26milyon 881 mil e dan trade tax nou perdi en pe nou anmas mwens.  Savedir ki Bidze in progranmen avek revised ki mon pe dir depi Zen.  Excise Tax nou vwar en logmantasyon 4.13 milyon.  Dan ‘Goods and Services’ nou vwar poudir i annan en logmantasyon avek Bidze avek Revised Budget par 17 milyon 17.141 milyon.  E dan value added tax nou’n vwar la nou annan en bes par 26 milyon.  Me dan business tax, i annan en ogmantasyon en varyan sibstansyel R215milyon 817 mil.  E dan Corporate Social Responsibility Tax – CSR la osi i annan en varyans R580 mil.  E dan Tourism Marketing Tax la nou perdi en pti gin. In annan mwens larzan ki’n ganny anmase – 1.265 milyon.  Dan ‘’Other Taxes’’ nou’n vwar poudir la osi nou annan mwens larzan ki nou’n anmase.  Me selman dan anviron en 120 milyon.  Me selman tou Tax si oule ki’n ganny kolekte, i montre dan sa bann ki mon mansyonnen, i annan en varyan 83.789 milyon.  Tou Tax i enkli.  Alor ‘’other taxes’’ ki nou’n mansyonnen.  E other taxes la, i annan en keksoz ki nou bezwen eksplike, se ki dan ‘license fees’ avek ‘Stamp Duty ‘ kot Financial Service Authority, in annan … in ogmante par 204 milyon.  Selman la sepandan, i annan bann diferan keksoz ki’n arive, akoz i annan en re klasifikasyon si oule dir bann fees avek bann ‘’other taxes’’  lo kestyon dividends ensidswit ki nou bezwen redwir.  E alor la par 56 milyon.  Tou sa bann … i annan VAT ensidswit, tou sa bann keksoz Mr Speaker, i fer ki i fer Mr Speaker ki sa propozisyon ki devan nou i annan osi en lot konponan ki nou bezwen mazinen.  Se ki diran lannen ziska la, nou vwar poudir Gouvernman sa ki ti prozekte lo ‘recruitment’ bann ‘wages  and salary’ ;  savedir pour rekrit bann staff en legzanp mon pour donnen klerman i parey dan ledikasyon pour recruit more Teachers – lezot landrwa ankor parey ki swa Ners, i pa’n ganny fer – pa akoz sa Minister pa’n anvi, me akoz difikilte pour ganny sa bann dimoun.  Prezan in fer ki eskan la konmela nou’n vwar poudir i annan en bon pe larzan ki pa’n ganny depanse.  Alor la se sa ki fer ki Gouvernman e tou sa, i pe revwar in revwar bann son Bidze li menm.  Prezan ki fer son i fer lezot landrwa kot larzan pa’n ganny depanse, se bann proze ; bann proze sirtou proze Kapital.  Ankor mon pe tous lo Minister Lasante Minister Ledikasyon e ensi ki menm SLTA – Land Transport e ensi lezot serten lezot Minister prensipalman sa bann ki mon’n mansyonnen, i fer ki zot bann proze Kapital pa’n ganny depanse sa kantite ; par en defayans petet dan zot Minister zot menm kot Project Officers pa’n kapab fer lenplimantasyon sa bann proze.  Alor son bann larzan i reste.  Dan lot kote nou’n vwar poudir i annan mankman dan serten landrwa – par egzanp pran kot i annan kot i annan logmantasyon.  Pran par egzanp kot Social Services.  Social Services nou vwar,  nou vwar poudir dan Retirement Benefits, i annan logmantasyon.  An Oktob 2016 ti annan senpleman 510 early retirees.  Savedir bann dimoun ki ti’n  kit travay.  Be by August 2017, nou vwar poudir sa sif in mont 715 aplikan.  I fer ki depans i otomatikman ogmante.  ou pran dan Invalidity Benefit.  E la letan ou pe koz Retirement Benefits, in ogmante son depans par 27 …. 22.459.2 milyon ; Invalidity Benefits in ogmant par 15milyon.  Ankor i menm zafer – an Oktob 2016 si ou kalkile ti annan 1665 … non ti annan 1580 aplikan.  E sa in ogmante pour vin 1665 aplikan – si oule dir bann dimoun ki benefisye by June 2017.  Menm zafer pour Disability Benefits par 5 milyon in ogmante.  E la nou vwar poudir an Desanm 2016, ti annan senpleman 287 aplikan.   Par kont by June 2017 in annan 549 aplikan.  Sa en ogmantasyon par 262 aplikan – preski double Mr Speaker.  Home Carer menm zafer.  15milyon an plis bezwen depanse vwar larzan ki ti prevwar mwens ki sa.  Alor ou bezwen 15milyon an plis.  Akoz an Oktob 2016 ti annan senpleman 3031 Home Carers.  E la ozordi ki nou pe koze an Out – si oule – pa neseserman ozordi menm avan, an Out 2017 3301 Home Carers ki’n bezwen ganny anploye dan sa sekter.  URS menm zafer ou konnen poudir en nouvo Scheme ; la osi in annan depans ki pa ti prevwar.  I annan son social safety net li menm son ki mon kapab dir sa welfare.  Welfare nou’n vwar nou’n revise ‘Weights. ’ E sa pa ti prevwar an konmansman dan Bidze ki ti donnen nou vwar poudir i annan 6milyon an plis nou bezwen depanse.  E re employment risk ceiling  -sa osi i annan logmantasyon ladan ki bezwen ganny fer.  An plis ki sa Mr Speaker nou vwar poudir i annan tax exemption ki pa ti’n ganny  prevwar.  Pour fuel par egzanp, nou pe demande ki en sif adisyonnel 18.2milyon dan Sekter Tourizm par egzanp konman incentive.  Ti annan bann Incentive Certificate ki ti ganny fer depi avan e letan in sanz Lalwa Excise Tax, sa pa’n ganny pran an konsiderasyon.  E prezan i fer ki sa bann aplikan, i vin demann Gouvernman, ‘’…tyonbo en kou.  Ou ti’n promet mwan sa.  Ti dan mon kondisyon.  Ou pa’n onore.’’  E la Gouvernman antretan ki i bezwen anmenn Lalwa Excise Tax pour amande ou permet re kalifye sa ziskan ler zot kondisyon i ava expire.  Savedir zot bann rebate, ki zot gannyen, sa bann incentive, i ava fini ;  pandan ziska sa bann letan.  Alor Gouvernman i bezwen kapab pey … donn zot, zot  larzan pour zot fuel concession e sa i a en form monneter en zoli sif.  E la nou pe koz sirtou license, accomodation ki prodwir elektrisite ; air transport domestik ; nou annan commercial charters  for licensed hire craft operators.  E osi license dive centres  –  tour operators ;  license cruise ship operators.  Tou sa  bann entity ki mon pe nonmen, bann biznes i tonm osi ladan.  An plis Mr Speaker, nou vwar poudir Bidze Siplemanter ki nou pe demande la, i osi dan bann landrwa ki Gouvernman i annan bann shortfalls ; savedir i pa ti’n prevwar serten bann depans, pour arive e la nou vwar poudir sa bann depans i zistifye.  I bezwen ganny fer.  I enportan mon fer sorti a sa pwen la Mr Speaker, ki FPAC, in zwenn avek Minister Finans pour diskit konteni sa Bidze Siplemanter ki devan nou.  E FPAC dan son lasazes in vwar poudir i annan landrwa ki sa Bidze Siplemanter i tre zistifye – i zistifyab.  Me i annan landrwa kot nou santi ki i annan keksoz ki nou bezwen raise concern.  E parmi bann landrwa ki nou bezwen raise concern – i annan par egzanp Prizon.  E nou konnen Mr Speaker ou lo sa High Level Committee Prison e nou vwar difikilte ki nou pe gannyen Prizon.  E ki nou rapel tre byen lannen pase, pa lannen pase konmansman lannen, letan nou ti pe diskit Bidze 2017, nou ti freeze ; nou ti dir tyonbo en kou.  Nou ti dir pa depans en bout larzan avek prizon annou tenir – nou gete ; akoz  nou ti pe krwar – nou ti mazinen ki nou pe donn tro bokou larzan prizon, pour depanse e nou ti vwar poudir i annan tandans abuse laba.  E la FPAC i dir wi nou vwar difikilte.  Nou’n kontrol ki ti neseser pour ganny mete – in konmans mete. I annan progre pe ganny fer.  Alor larg sa bout pour kapab osi fer ki i ava annan en better management ; e ki kot Prizon laba keksoz i ava mars en pe pli byen.  I annan en lot landrwa ki i enportan osi fer mansyon.  Nou rapel tre byen poudir san Lafors Defans – o konmansman lannen letan nou ti pe diskit Bidze Lafors Defans la osi nou ti koupe ; la osi nou ti dir tyonbo en kou – pa depans sa freeze, nou a gete pli tar mannyer keksoz pou ete.  Sa bann koupe ki nou’n koupe – nou ti annan rezon.  Nou ti annan rezon dan serten landrwa pa an mal me an byen ; akoz nou ti dir ale regarde.  E prezan nou’n vwar poudir dan serten landrwa – e la nou felisit Lafors Defans, in fer savings li os li.   In fer savings – petet akoz i pa’n recruit lakantite dimoun ki i ti bezwen dan serten sirkonstans.  Me mesaz ki nou oule anvoye la, se ki sa bann mezir ki nou’n pran, in annan rezilta pozitiv.  E ki nou demann nou popilasyon e bann entities Gouvernman, pour pa pran neseserman sa bann keksoz ki nou fer an mal ; me pran li konman bann keksoz ki nou bezwen travay lo la, pour fer ki sak fwa bann Bidze oubyen Bidze Siplemanter i vin devan nou Lasanble, ki en travay pli konpreansiv – en pe pli korek i ganny fer pour ki i annan plis latransparans e ki sa ki nou pe aprouve i plito zistifye.  E an plis i enportan fer mansyon, nou rapel tre byen avek SCCI, li osi nou ti dir, nou pa pour donn ou son bout larzan R500 mil or R250 mil pour depanse, akoz nou krwar poudir dan Business Community zot kapab raise sa larzan zot menm.  Me pli tar zot in vin devan nou Komite, e zot in ekrir ou menm Mr Speaker poudir ki ; ‘’… tyonbo en kou, pour nou kapab debourye donn nou sa bout ki zot pe freeze apre lannen prosenn nou a regarde.’’  E nou ti pe konsidere fer sa, me an menm tan nou ti dir nou bezwen fer miting avek zot akoz nou osi vwar i annan keksoz ki nou bezwen diskite ansanm, avan ki vreman nou aprouve.  Alor nou ti  ava anvi ki sa miting i ganny fer o pli vit posib, pour ki nou larg osi sa bout la avek zot, pour zot kapab kontinyen fer en bon travay pour Business Committee; e ki i ava anmenn en rezilta pour lepep li menm – pour dimoun ki servi si oule dir, bann kliyan bann Seselwa ki servi biznes Community,  ki fer ki en pli bon kondisyon lavi i ganny arive lo zot kote.  Me i annan landrwa kot nou dir sa Bidze Siplemanter sa voyaz dan sa Bidze Siplemanter, ki FPAC i vwar poudir nou bezwen – avan nou aprouve, nou bezwen regarde.  E taler la petet dan diskisyon, i ava resorti korekteman, me selman an bref mon mansyonnen ki i annan trwa landrwa.  I annan par egzanp en Bidze 905 mil pour EIA, kot i konsern sa biznes sa building SEnPA ki’n ganny pran Anse Boileau.  Anse Boileau lot zour nou rapel Pension Fund plito Pension Fund ti pe fer building aprezan Gouvernman i dir nou a pran sa nou a lwe avek bann dimoun – sirtou bann pti dimoun ki bezwen en pti landrwa laba anler.  Me prezan nou vwar ziska ozordi sa building pa ankor ganny lwe.  E ki alor i pe ganny manage. Me prezan li Pension Fund i dir avek Gouvernman ou’n pran mon building ou bezwen pey mwan ou. E Gouvernman li i met sa larzan dan Bidze selman li i pa ankor lwe sa building.  Nou pe dir tyonbo en kou la nou bezwen gete.  Alor lo lapar Lasanble nou pe demande ki e lo Komite nou pour dir – mon a gete ki Lasanble i dir, me selman nou Komite deza mon pe anvoy sa devan pour ki nou sezi i vedir sa nou dir tyonbo en kou nou bezwen al get pli devan – freeze li en pti gin apre nou ava gete si i zistifye pour nou large.  En lot landrwa ki annan sa sityasyon osi kot ledikasyon nou pe dir tyonbo en kou nou pa pour aprouv sa deswit la nou pour freeze en kou – nou le plis diskisyon si avek CINEA, CINEA nou vwar fek fer Festival Kreol la, e nou’n vwar poudir la o ter partisipasyon  ensidswit in desann.  Mon … tou dimoun in vwar.  E  lakantite larzan ki pe ki’n bidzete pour sa i 5.5 milyon.  Nou konnen poudir avan avek Festival Kreol avek lot festival soz – enternasyonal la ki ti annan – Karnaval, nou’n vwar poudir sa de sif letan ou met ansanm ti bokou plis ki 5.5 milyon.  I kler sa.  Me selman la osi nou pe dir i annan Bidze ki pe vini petet CINEA dan son Bidze ki pe vini, i annan plis larzan e ki i a kapab pey sa depans ki in fer la.  Nou pa pe dir ki … E prezan nou pe rode sa depans ki la nou konnen in ganny laprouvasyon petet avek Cabinet, be selman nou pe nou annan kestyon ; nou bezwen demann bann dimoun ankor pour nou ganny bann leklersisman.  So pour le moman tanporerman nou pe dir freeze sa osi – pour nou fer en rediksyon dan sa depans.  I annan en lot landrwa kot nou dir osi nou pour tenir.  Akoz nou le en pti pe investigation i ganny fer e se kot LWMA.  LWMA 15.82 milyon pour pey STAR.  Nou tou nou konnen bann diferans bann problenm ki arive kot STAR – kot laba kot dumpsite ensidswit – e Cascade ou konn tre byen – i soz ladan Mr Speaker.  La aktyelman kan nou pe koze i annan bann salte – serten salte ou pa kapab al  met kot STAR.  Par egzanp bann delwil – bann lagres lotrozour semenn pase Minis in la, me i annan serten issues ankor, kot i konsern bann lagres pour deposit laba.  Me selman sa i pa konsern sa.  Sa ki nou pe koze la i konsern sa ki li STAR i pe dir Gouvernman i drwa li.  E nou, nou pe dir tyonbo en kou, nou bezwen regarde.  Eski i korek ki mannyer sa i été – ensidswit.  So nou le plis lesplikasyon pandan – e nou le en pti pe bann detay lo la – en investigation – dan en sans.  Parey Biro Oditer Zeneral  i kapab ed nou ladan, avan ki vreman nou dir dakor nou bezwen peye.  Akoz kekfwa nou bezwen pey plis ; kekfwa mwens osi.  So nou le en pli bon leklersisman ladan.  Sa osi nou pe dir nou ava freeze.  Si nou fer sa alor, nou a gete ki Lasanble i dir.  I a fer ki sa Bidze Siplemanter ki mon pe propoze, nou aprouve, i ava redwir.  E mon a dir taler konbyen i ava redwir.  Mr Speaker, mon krwar ki petet i enportan osi serten lezot landrwa kot nou vwar poudir i annan savings ki mon ti kapab mansyonnen.  I annan kot Foreign Affairs.  E kot Foreign Affairs nou vwar poudir la osi i annan en kantite … i annan plizyer staff ki’n ganny kite.  E i fer ki Bidze alor pour ‘’Wages and Salaries. ’’  Mazorite ou vwar dan sa bann diferan Minister ‘’Wages and Salaries’’ i annan savings.  E lo la nou vwar poudir swa staff in kite – swa zot pa’n kapab recruit.  E nou en pe konsernen me nou a gete ki mannyer sa i kontinyen avek.  Avek sa mon pour met devan nou Lasanble, sa propozisyon Bidze Siplemanter, ki devan nou.  Mr Speaker avan mon fini, zis mon dir petet i annan en amannman dan sa Mosyon orizinal.  Mosyon orizinal ti napa en sif si ou kalkile e mon mansyonn en sif ; savedir sa ki manke mon demande ki alor sa sif R217milyon, 5270 milyon i ganny konsidere konman en amannman dan sa Mosyon ki devan nou la.  Mon a remersye ou Mr Speaker.

 

MR SPEAKER

Mersi Onorab.  Eski i annan dimoun pour segonn Mosyon?

 

HON SIMON GILL

Mosyon segonde, mersi bokou Mr Speaker.  Bonzour tou koleg Onorab e manm piblik.

 

MR SPEAKER

Onorab Gill mersi.  Laparol Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon a pran laparol konman Manm FPAC, pour dir avek Lasanble ki … konfirm avek Lasanble ki bomaten nou’n rankontre dan en long miting avek Sekreter Prensipal Finans avek son staff, pour nou sey konpran enn de bann depans ki devan nou.  E mon ava eksplik enn de keksoz ki mon krwar i enportan ki piblik ki an deor konpran ki mannyer sa keksoz pe marse.  Premyerman mon ti a kontan dir ki piblik an zeneral ti tre, tre kontan pour vwar ki sa lannen pa ti annan okenn Bidze Siplemanter.  Normalman sirtou dan dernyen Lasanble e dan bann Lasanble avan deza Mars nou ti pe konmans tann Bidze Siplemanter.  Sa lannen nou’n  ensiste ki i annan en pe plis disiplin.  E mon krwar ki piblik i ava rekonnet ki nou ganny serten rezilta.  Ozordi nou pe vin isi pour nou apropriye serten sonm ki dan mazorite ka, pa ankor ganny depanse e sa se en prensip ki osi nou ti set nou ti lay down dan sa nouvo Lasanble – ki i pa akseptab ki okenn Minister, okenn Departman Gouvernman, i fer depans ;  apre ler zot fini fer depans zot vin kot nou kot Lasanble Nasyonal, e nou santi nou en pe oblize, aksepte sa bann depans e i vin parey en fe akonplir.  Byensir Mr Speaker i annan serten ka ki’n kontiny parey.  E taler mon ava pran lokazyon pour mon donn detrwa legzanp sa bann ka ki nou konman en Lasanble e nou koman Komite Finans dan sa Lasanble nou pour re dir ankor avek en gran fermte, en gran lafors, ki nou pa aksepte sa bann keksoz, nou pa kontan sa bann keksoz.  E ki nou demande pour lannen 2018,  ki i annan en pe plis disiplin dan depans e i annan plis responsabilite.  E ki tou bann Lazans, bann Departman, bann Minister, i fer zot bann keksoz zot planifikasyon byen boner, e ki si vreman zot santi ki zot pour bite zot vin kot nou e devan Lasanble zot al kot Minister Finans – zot fer en case ;Minister Finans i vwar si i annan merit e Minister Finans, i vin met devan Lasanble.  donk lo sa premye pwen Mr Speaker mon ti a kontan dir ki ou konman en Komite, nou annan serten satisfaksyon.  Nou pa 100 poursan satisfe, me selman i annan serten keksoz ki pe mars byen e nou pour kontinyen ensiste ki sa bann keksoz i …, sa bann depans Gouvernman i ganny fer dan en fason bokou pli disiplinen.  Mon 2enm pwen Mr Speaker, i en pwen enportan akoz bomaten nou ganny lokazyon, pour enterakte avek Sekreter Prensipal Finans – e enn bann premye kestyon ki nou ti met devan li ; se ki mannyer sa Bidze Siplemanter, pour afekte Bidze an zeneral ki nou ti’n planifye an konmansman lannen ; son bann budget outcomes parey nou dir e, ki mannyer nou pour kapab dir gard sa ki nou apel disiplin fiskal.  Mon ti a kontan raport avek Lasanble, ki sa bann depans siplemanter, ki nou pou rekomande i ganny aprouve, pa pour afekte depans overall Gouvernman.  Nou reste dan menm sityasyon disiplin e in permet nou sa ki permet nu konsider sa bann depans siplemanter dan en fason favorab, se ki nou vwar poudir nou vwar 2 keksoz.  Enn ; nou realize poudir Gouvernman in fer serten savings dan son Bidze fonksyonnman e sa i en keksoz ki nou welcome; akoz nou sorti dan en sityasyon kot bann Minister bann Departman, avek bann Lazans ti toultan dan en lespri Desanm pe vini fodre nou depans tou sa larzan ki nou’n gannyen, akoz si nou pa depans sa larzan vin Zanvye vin lot Bidze, nou pa pour ganny parey, nou riske ganny mwens.  Me sa ti en rekomandasyon ki nou ti fer.  E nou ti ganny sipor Minis Finans lo la.  Si i annan okenn domenn ki Gouvernman i kapab fer lekonomi, e atraver en bon zesyon nou espekte ki zot fer sa lekonomi e ki zot pa zis depanse just for the sake of depanse.  Donk in annan premyerman ; en lekonomi ki’n ganny fer.  E dezyenmman in annan en meyer koleksyon reveni.  Sa i permet nou pour konsider favorableman, ler nou annan en benefis, pour gete ki mannyer nou kapab pas en pe sa bann benefis – pa tou me – pas en pe sa bann benefis avek nou bann sitwayen avek – atraver bann servis ki nou ofer zot, e pran en pe met a kote pour nou kapab redwir nou det.  E sa prensip pa’n sanze e ozordi se sa ki nou pe fer.  Enn bann keksoz ki nou santi i en pti pe domaz, se ki bokou bann Departman Gouvernman pa’n kapab ganny tou bann travayer ki zot ti anvi gannyen.  E alors i annan en pti morso saving lo bann alokasyon ki ti ganny donnen pour bann Saler.  Sa i en pe domaz akoz nou santi poudir Gouvernman i bezwen ganny tou son bann travayer ki i bezwen, pour fonksyonn byen e sirtou pour donn en servis ki par ler i anmenn en reveni.  Mon ava donn en legzanp, ki ava montre i nou’n bouz en pe dan en fason proaktiv, pour nou fer sir ki lekonomi i marse menm si napa otan sa bann travayer spesyalize, kalifye ki nou pe rode.  Annou pran en legzanp Mr Speaker se legzanp Departman Registrar dan Biro Legal Affairs.  Nou tou nou konnen nou diskite dan Lasanble ki departman Legal Affairs – Departman Lanrezistreman i en Departman ki ti akimil en kantite backlog e ki ti pe anmenn en kantite fristrasyon pour piblik.  Me non selman fristrasyon i ti pe fer ki bann tranzaksyon lo later, ki ti pe ganny i ti pe ganny fer, pa ti pe avanse e son rezilta se ki Gouvernman ti pe perdi reveni dan peyman bann transfer tax, eksetera bann ki lye avek tou bann tranzaksyon lo later.  E la Minister Finans in adopte en sityasyon inovatif, ki’n permet – ki’n permet bann travayer dan sa Departman an atandan ki zot ganny plis travayer, zot kapab depans en pe plis lo overtime e improve zot Scheme of Service pour zot kapab prodwir plis dan en pti gin letan.  E Minister Finans in rapel nou ozordi ki zot ekspekte ki Mars/Avril lannen prosenn, tou sa backlog pour ganny clear.  E Minister Finans in dir nou osi ki zot espekte ki Gouvernman atraver sa legzersis, pour ganny en reveni.  E nou konnen ki staff in gannyen en reveni  zot osi.  Atraver en meyer kondisyon e atraver en posibilite fer en pe overtime -par egzanp dan en fason inovatif.  So si ou bouz en file – si ou konplet en file ou ganny peye.  Ou konplet en 2enm ou ganny peye.  Konmsi pli ou travay pli ou benefisye.  E sa se en latitid ki nou, nou welcome.  Nou anvi vwar en pe plis dan nou pei.  Nou anvi bouz dan en lespri – en leta lespri kot Seselwa i ganny plis ler i travay plis ; donn li posibilite pour li travay plis e i a ganny posibilite pour li ganny plis.  Donk sa i en legzanp.  Lo kote bann proze Kapital Mr Speaker, i en pe domaz ki plizyer sa bann proze an tou ka pour la valer plis ki R20milyon pa’n ganny enplimante e la osi pour menm rezon ki nou ki Gouvernman i annan en shortage – i annan en mank travayer spesyalize – bann Project Managers – bann Project Officers e sa nou ti konnen deza dan milye lannen, ki nou ti pour vwar enn de proze ki pa’n ganny enplimante.  E sa i pa bon pour lekonomi Mr Speaker.  Kekfwa nou fer en saving ozordi, me si Gouvernman si larzan pa roule, si bann proze konstriksyon, renovasyon pa ganny fer, lekonomi pa bouze e travayer pa ganny sa benefis atraver lapey.  Donk sa i en keksoz nou pe get bokou lo la.  Me an menm tan nou’n vwar atraver sa Bidze Siplemanter, enn de areas kot nou anvi en pe plis, en pe plis disiplin e en pe plis klarite e en pe plis lefikasite.  Mon donn de legzanp, akoz i annan bokou legzanp – mon ti a kontan donn de legzanp kot SFA par egzanp.  Kot SFA i annan 2 proze.  Enn ki konsern mariculture e lot ki konsern Fuel Incentive.  Sa i 2 proze kot nou santi ki nou, nou santi poudir nou kapab fer pli bon management lo sa 2 Scheme  la.  Ler nou dir pli bon management se akoz nou anvi ki bann peser ki vreman merite, i kontinyen ganny asiste e ki bann ki pa merite, pa a ganny asiste.  Akoz?  Si nou kontinyen les en move management lo la, demen sa dimoun sa peser ki li i vreman bezwen, i pa pour gannyen.  Akoz i annan bann move management – i annan bann gaspiyaz.  Donk nou anvi target sa bann depans vreman la kot zot devret ale.  E nou santi ki dan sa 2 Departman kot SFA i bezwen annan plis regilarite, i bezwen annan plis disiplin, i bezwen annan plis oversight e background checks, pour fer sir ki sa Scheme i kontinyen.  Akoz si nou les li ale ki mannyer i été, demen i pour arete.  E tou dimoun pour soufer.  I menm parey pour mariculture fer bann zafer plant pwason.  I paret ki i annan kantite kontrovers lo la, me selman nou still ankor pe kontinyen depanse toultan dan … la i annan 3milyon ankor ki …, non 1milyon ankor ki’n ganny mete ladan mon krwar … 1 milyon wi, ki’n ganny azoute ankor ki mon santi ki nou santi poudir i devret ganny pli byen monitored.  Finalman Mr Speaker, mon ti a kontan dir avek piblik ki pe ekout nou, i enportan pour zot konnen ki plizyer sa bann Headings, oubyen plizyer sa bann laliny Bidze Siplemanter ki devan nou, i pa aplik pour lannen 2017.  Plizyer sa bann laliny i aplik pour bann lannen avan, ki nou anvi rektifye, met lord ladan an realite.  Si ti mwan personnelman mon pa tro anvi al pey bann det ki lezot parey Onorab Pillay pe balans son latet ; ki lezot in fer.  Parey sanson i dir i annan en sanson ki dir i annan en moutya ki dir ‘’Ozordi nou pey det ki zot ti fer avan.’’  Me i annan i annan sa bann keksoz ki nou pour bezwen regalize en zour.  E mon annan 3 legzanp la Mr Speaker.  I annan en det pour R16 milyon pour STAR; i annan en det R10 milyon pour pey bann tretman overseas; e i annan en det pros R3 milyon pour Departman of DICT  -Information and Communication Technology ki ti dwa an term bann Tax ki zot pa ti peye lo anba withholding Tax.  Donk sa i bann keksoz ki nou pe ki finalman i tonm lo nou sa lannen, me selman nou i pa vreman responsabilite sa Lasanble ki la ozordi.  Me selman mon ava konfirmen ki Onorab De Commarmond in dir pli boner, i annan serten laliny ki nou pou … ki i  annan kestyon lo la.  E enn lo sa bann laliny ki nou annan en gro kestyon lo la se ki sa lorganizasyon CINEA ki ti fer Festival Kreol pe demann ankor R5.500milyon pour bann depans Festival Kreol.  Mon pa’n pa pour fer bokou komanter lo la, selman mon konnen poudir deor dan piblik, kantite dimoun pour kriy lasasen, akoz i pa’n … mon kapab dir san dekouraz personn ki pa’n the best  … i pa’n meyer Festival Kreol ki’n ganny fer.  E bokou dimoun pe demann kestyon lo kantite nou’n depanse pour sa.  E nou osi konman en Komite, nou pe demann sa kestyon.  Alors mon annan 2 laliny Bidze pour mon i de laliny – apard sa si lezot Manm i annan lezot laliny  i annan de laliny Bidze ki nou pour demann Gouvernman pour tenir lo la ; – sa se … an atandan ki nou ganny bann breakdown, bann depans detaye.  I annan sa.  Sa enn la konsernan Festival Kreol e CINEA.  E apre lo sa R15 – R16 milyon ki nou dwa avek STAR.  Akoz nou’n pran en pe lenformasyon lo la, e i annan diferan lopinyon.  Menm i annan lopinyon ki i posib ki se STAR ki dwa nou.  Ki dwa Gouvernman Sesel depandan ki mannyer ou fer kalkil.  Donk ant pey R16 milyon e ant ganny detrwa milyon roupi, i vo lapenn pour nou tenir sa peyman, pour nou fer sir poudir sa larzan i ganny byen, byen kalkile avan ki i ganny peye.  Alors Mr Speaker la i bann komanter an zeneral, pour eklersi sa bann pwen.  Mwan mon santi poudir i annan progre e i annan i ankor annan bann move zanfan.  E CINEA i en move zanfan.  Akoz zot fek depanse la, la, la, apre zot anvoy en bill kot nou.  Zot pa devret ganny fer koumsa Mr Speaker.  Mon krwar nou tou nou dakor, avan ou depanse ou gete si i annan larzan dan ou kont.  Nou pa pour kapab kontinyen koumsa.  E nou pour bezwen call to Order bann dimoun ki pe persiste avek bann pratik le pase ki pa bon pour nou lekonomi.  Alors Mr Speaker mon remersye ou e mon demann tou bann Manm pour konsider sa dokiman ki devan zot avek bokou scrutiny.  I kapab annan keksoz ki’n sap nou.  Alors i responsabilite sa Lasanble antye pour fer sa travay.  Mersi Mr Speaker.

 

MR SPEAKER

Mersi Onorab Ferrari.  Zis pour nou pran en desizyon si nou pour adjourn e repran.  Mon vwar i annan en Manm Onorab Afif ki’n lev lanmen pour koze.   Eski i annan lezot Manm pour koze?  Si i annan petet the best thing se pour pran … Onorab Pillay, nou oule kontinyen oubyen nou oule pran en Break?  Pardon ou osi ou ti anvi koze, nou adjourn apre nou a repran 2er?  Yes  tou dimoun i dakor?  Koumsa ki personn pa ganny pouse pour dir in ganny koup kourt.  Mon krwar Onorab Ferrari in fer sorti sirtou lo sa 2 pwen – 15 … R5.5 milyon allocated pour ganny Siplemanter pour Festival Kreol e Karnaval.  Apre sa R15.8 milyon pour STAR.  E petet i annan lezot budget lines ki lezot dimoun ti a kontan koz lo la.  So nou a repran – nou a pran en Break nou a repran 2er.  Me mon ti a kontan demann Deputy pour pran Sez akoz mon pour bezwen al en lanterman en dimoun dan distrik kot mon’n grandi ; kot Onorab Lemiel in osi grandi ki i annan en maler laba.  So mon ti ava apresye Deputy si ou ti ava asiz dan Sez apre midi.  Me demen bomaten mon a la.  Alor mersi.  Bonn Apeti e nou a repran 2er.

 

(BREAK)

 

MR DEPUTY SPEAKER

Bonn apre midi tou Manm Onorab, e bonn apre midi tou dimoun ki pe swiv travay Lasanble Nasyonal pou ozordi Lendi le 30 Oktob.  Nou pou kontinyen lo nou travay, deba ki’n ganny prezante par Onorab Charles De Commarmond. Pour Lasanble debat e aprouv en sonm R217, milyon 500mil konman en Bidze Siplemanter pour lannen 2017.  Mon napa lalis bann entervenan avek mwan.  Mon ti a zis kontan ki zot lev zot lanmen e mon a kapab repran.  Ok, mon annan Onorab Afif, mon krwar Onorab Ramkalawan osi ti …? Ok.  Wi Onorab Pillay li osi pa’n tro, tro byen, in fer mon Lofis konnen i pa pe vini apre midi ok?  So, mon annan zis 2 Onorab ki pou entervenir lo sa Mosyon?  Ok.  Bon nou a kontinyen nou ava pran Onorab Afif.

 

HON AHMED AFIF

Mersi bokou Mr Speaker, bonn apre midi tou bann Manm Onorab e tou dimoun a lekout. Mr Speaker Mosyon ki devan nou, pe demann nou pou aprouv R217 milyon preski R218 milyon. Pour mwan sa ki enportan Mr Speaker, se vreman pour nou konpran ki lenplikasyon sa i pou annan; premyerman lo Bidze Nasyonal ki’n deza ganny aprouve. E pour nou konnen ki lenplikasyon osi petet lo lekonomi Nasyonal, lefe ki nou pe konsider en Supplementary Estimate parey nou apel li.

Alor pour mwan, i enportan ki ler nou analiz sa bann sif ki devan nou, nou osi regard enn pti pe, ki son lenpak lo Bidze.  Par egzanp ki poursantaz primary surplus pour ete, apre ki tou sa bann larzan adisyonnel i ganny depanse.  Alors sa ki nou nou’n ganny prezante dan sa Lasanble, avek sa ki zot ti apel sa en Midyear Review pli boner sa lannen, sa se an Septanm, e la aprezan zot vin avek sa Supplementary.  Sa ki mwan mon konstate klerman se ki pozisyon an gro lo Bidze i pa pou ganny afekte; savedir ler ou pran reveni ou total Gouvernman tou son tax ler ou tir tou son depans enkli ek sa bann ki adisyonnel – sa ki zot apel overall position Bidze i pa ganny afekte.  I enportan ler ou get lo reveni Gouvernman son tax, ki i anmase.  Sa ki i remarkab se ki son konponan tax li menm pa sanz bokou pou sa lannen ki anba revi zot pou anmas zot R6.7bilyon konpare avek R6.57 bilyon. Me sa ki enportan pou vwar se ki zot konponan Grant ki R667 milyon sa lannen pou R377 milyon.  Savedir i preski R300 milyon par anba koleksyon Grant.  Savedir kado i deza ba.

Depans anba sa Bidze Siplemanter i mont en pe.  Me pli enportan lo kote Kapital nou remarke ki capital projects Gouvernman, li i osi i desann par preski 300 milyon.  Alor ki vedir ki an gro sa Siplemanter pe dir?  I pe dir nou, i pe anmas – i pe fer en pe savings atraver plizyer Minister dan zot saler, e dan sa ki apel ‘’goods and services.’’  Be i oblize vin devan Lasanble Nasyonal, pou demann Lasanble Nasyonal, pou aprouv okenn sa saving ki i fer pou li depans i dan en lot landrwa – i bezwen vin isi.  Me ler nou get son lefe total, i vedir i parey en fanmir ki pe anmas larzan ki tou le mwan i anmase i depanse, nou pe remarke ki depans ki ou pou fer anver lenvestisman savedir capital projects li i tonbe.  Me selman nou pe kontinyelman demann larzan, pour nou met dan bann kou ki nou apel sa recurrent; savedir bann kou saler avek keksoz ki nou pe aste – ki pa lenvestisman. Alors zeneralman, i pa en bon direksyon.  I pa en bon direksyon.  Parske pa bliye osi ler nou pe get pozisyon final Gouvernman son overall budget.  Ler ou tir tou reveni ou tir tou depans, ou tir lentere ki ou drwa lo loan Gouvernman Sesel i still drwa li.  I still drwa plis ki R223 milyon, e sa i dapre sif sa lannen.  Ler in fini pey tou keksoz fini pey lentere lo loan i pa ankor pey son loan li son principal.  I mank li 223milyon.  Savedir pour li kapab pey son det Gouvernman bezwen prêt larzan pour pey det.  E sa i en siny en pe trakasan, parske se sa siny ki ti egziste avan reform 2008.  Depi 2008 depi ti annan en progranm IMF mon rapel sa ti aret net.  Me i annan 2an konsekitiv ki sa i komans remonte konman en tandans.  Alor i en tandans ki en pti pe danzere.

Annou al pli spesifikman lo bann depans Mr Speaker.  Ler mon get depans i annan plizyer ki’n fer savings mon felisit zot, me an menm tan ki nou dir sa, fodre nou al an data.  Ler ou al dan data ou remarke pou dir saler dan sa bann diferan Minister, se saler ki zot pe save.  Prezan ou dir akoz zot pe save saler?  Be zot pe save saler akoz zot pa’n kapab rod dimoun pou met an plas.  E sa pour mwan ou pa’n kapab met dimoun an plas i trakasan.  Parske ou ti annan antye en lannen, pou ou rod dimoun pou ou met an plas me i posib osi zot in sey rod en zot pa’n ganny serten dimoun pou zot met dan sa pozisyon.  E la kot petet nou kapab fer rapel avek tou Seselwa, gete Gouvernman i pe fer en savings zis dan ‘’wages and salary’’ dapre sa Supplementary estimate – preski R15milyon. Plis ki en milyon roupi par mwan i pe save akoz i pa ganny dimoun pou met an plas dan diferan departman.  Alor en lapel avek tou Seselwa ou annan loportinite pou ou aprann pou ou lev-e debrouye travay ganny en kalifikasyon – ganny en metye e Gouvernman i annan plas pour anploy dimoun dan plizyer domenn.  E ankor enn fwa sa i montre nou annan en problenm dan nou pei kot nou pe fer savings menm dan wages, akoz nou pa kapab ranplas dimoun?  Ler ou get dan ‘’goods and services’’ mon vwar par egzanp Health Care Agency, Mr Speaker ki li i pe demann R10 milyon an plis e ou get bann detay lesplikasyon, mon konpran en pti pe akoz, parske nou tou nou konsernen avek Lasante.  Me ler ou get Lasante li menm mon pran zis en legzanp kot zot ti fer Dyaliz kot Lopital ti abitye pey anviron R20 milyon pou fer Dyaliz tou le lannen.  La ozordi i pey plis ki 43.  E sa ti vin devan sa Lasanble kot nou vwar klerman ti napa en tender lo lafason pou rod sa bann servis.  E sete Gouvernman ki ti envestir dan tou sa bann lekipman.

Gouvernman ki ti fer batiman, ozordi tretman i bokou pli o kalite.  Me selman i reste lefe ki nou pe pey bokou plis.  E mwan mon senserman krwar si ou get bann pri ki zot pe sarz pou Dyaliz, nou ti kapab ganny en pli bon deal e nou ti a sov nou probableman plis ki R20 milyon tou le lannen. Me la dan sa Bidze nou pe demande R10 milyon ek sa tou le lannen.  Se zis en obzervasyon Mr Speaker.  Nou annan plizyer lezot ankor depans ki mon vwar par egzanp anba Industrial Estate Authority, ki li i osi i pe fer en depans adisyonnel.

Me ler nou get detay i kler pou dir sa se rent i devret ganny peye, pour bann dimoun kapab fer pti biznes.  Me zot pe demann rent me selman napa personn dan sa landrwa ki zot pe pey rent.  Ankor enn fwa ou demann ou lekor be akfer, akfer nou pe annan en management dan pei an zeneral – mon pa zis dir Industrial Authority, me zeneralman.  Si Gouvernman li i met en Bidze an plas, oubyen i fer fasilite pou fer dimoun kapab ganny landrwa pou fer pti biznes, be de ki sa landrwa i ganny konstri sa landrwa i devret pe anmas son rent, e pey sa rent ek sa landrwa kot ki pe lwe zot bann landrwa pou fer biznes.

E la nou vwar nou pe peye 900 ekek mil Roupi me selman napa personn dan sa landrwa.  Alor i zis vin en kou lo Gouvernman.  E nou bezwen pas li koman en Supplementary Budget.  Nou’n koz en pe bomaten lo la ankor.  Mwan osi mon antyerman dakor avek Onorab De Commarmond lo STAR e Land Waste nou bezwen regard en pti pe a profon, akoz ki’n ariv preski en milyon Euro ki nou drwa en Lakonpannyen. Kwa ki’n arive ki en sel kou ki nou drwa en milyon Euro en Lakonpannyen ki nou bezwen pas li en sel kou dan sa Bidze.

Mon antyerman dakor ankor bann lezot depans ki mon vwar en pe o, overseas travel R8 milyon i preski R22 mil par zour tiket vwayaz, 22mil roupi.  Alor avek sa mon mazinen ou ti kapab anvoy 2 dimoun L’Europe toulezour. Toulezour 2 dimoun L’Europe toulezour.  Me i en kantite larzan ou demande akoz nou pe demann sa kantite larzan, e si napa posibilite pou fer sa desann konsiderableman. Parski ozordi avek Internet avek fasilite pour nou kapab koz avek dimoun aletranze, atraver lezot mwayen avek bokou mwens dimoun, fer li dan en fason efikas nou ti kapab eparnye en kantite sa bann larzan.

An menm tan, mon ti a kontan profite Mr Speaker pou dir i osi i annan serten Departman ki ou vwar zot in fer ase byen; par egzanp Land Transport – li ki annan en gro Bidze – sirtou pou al fer en kantite proze.  Mwan personnelman mon vwar zot bann proze ki zot in fer dan bann distrik, in mars tre byen. Sak fwa ou call zot, zot reponn tre vit.  E menm anba sa Bidze mon vwar en saving pour Land Transport R3milyon, malgre zot in vreman delivre.  E alor pour sa mon felisit zot.  An gro Mr Speaker set en Bidze ki, en estimasyon ki i pa en gro sonm par raport avek Bidze li menm; i mwens ki 1poursan GDP.  Me selman pa akoz i mwens ki 1 poursan, nou pa devret port latansyon avek plizyer defayans ki ganny montre atraver sa bann sif.  E avek sa mon ti a kontan dir ki nou devret remind Gouvernman, ki i son lobligasyon pou fer sir ki tou depans i ganny fer korekteman.  Tou kalkilasyon ki ganny fer i ganny kalkile byen, pour ki nou redwir bann lenstans kot bann demann adisyonnel i bezwen vini.  Nou felisit zot kot nou’n kapab koup larzan.  Sa i byen.  Me selman kot sa bann gro larzan i konsernen dan sa Supplementary Estimate mon krwar i trez enportan, ki nou al a profon pour nou konnen krwar ki par deryer sa en ki nou fer sir ki larzan Gouvernman ki nou tou nou pe peye pe ganny byen depanse.  Mersi Mr Speaker.

 

MR DEPUTY SPEAKER

Mersi Onorab Afif.  Onorab Andre.

 

HON CLIFFORD ANDRE

Mersi Mr Speaker. Mr Speaker letan mon pe get sa dokiman, Supplementary Budget ki’n ganny distribye avek nou konman bann Manm Lasanble, mon santi mwan konsernen. Konsernen Mr Speaker, akoz letan mon get dan Sekter Lasante, mon vwar ki i ganny ki lo la, i mete ki nou’n fer en savings R600mil.  Nou’n vwar ki bann Ners zot santi ki zot pe travay par lao sa ki zot pe ganny demande pou fer.  E vre bokou dimoun i dir ou ki zot santi letan zot al Lopital, servis i ganny donnen par ler i bon e ou vwar pou dir ki sa bann Ners pe met en zefor ekstra dan zot travay.  Mr Speaker mon demann mon lekor, si Minister Lasante pe fer en saving R600mil, e lo la i dir, ‘’…savings within the wages and salary budget.’’ Akoz nou pa aksed avek demand bann Ners, zot in pran lo semen lotrozour nou tou nou’n vwar – akoz nou pa aksed dan zot demann pou donn zot en logmantasyon menm si i ava aparet dan en increase in allowance ki zot pe travay, koumsa demen nou a kapab, letan Bidze i vini nou, nou kapab re-allocate larzan kot nou konnen nou bezwen pli bokou Ners nou a kapab re-allocate dan en budget pou kapab annan plis Ners an term recruitment.  So i en keksoz ki mwan mon pe get nou devret revwar.  Letan i annan savings rightfully so, Onorab Afif in dir ki i montre ki poudir dan mazorite sekter, nou annan larzan pour nou recruit staff.

Me en pwen ki nou bezwen fer sorti, wi i annan dimoun ki pa oule travay; be la bann zenn osi ki pa oule al rod travay e zot fer li tourn an ron. E i pa ganny en travay, me selman i annan kalifikasyon.  Par ler zot anvoy li demen, tanto oubyen letan in ganny dir nou’n fek vwar en sityasyon dan weekend kot en zenn fiy in ganny dir poudir in ganny anploye en zour apre i ganny dir poudir, non sa offer in ganny withdrawn, kan li in fer tou son laranzman pou li vin travay.

So, la i montre nou ankor Mr Speaker, la i montre nou Mr Speaker, la i montre nou Mr Speaker ki i annan serten sityasyon kot Gouvernman li menm, i pa efikas pou li anploy dimoun.  Me ozordi i vin kot nou avek en bidze kot i dir nou kot i fer savings lo wages and salary.  So, mon krwar nou devret annan en pti pe plis efikasite.  E dan sa domenn Mr Speaker mon pa vwar sa kantite avertisman lo televizyon oubyen dan bann Recruitment Agencies kot ou ti ava dir ki, nou osi bann Manm Lasanble nou realize kekfwa i ava annan some pos ki ners ki Ners ki vacant, i annan 200 konman dan en lot sekter, kot letan en zenn dimoun i vini avek son kalifikasyon i montre nou, nou ti a kapab gid dan sa bann sekter kot i kapab al pran lanplwa.  E kot i ava kapab ed nou pei a lafen dizour kot nou kapab mentenir, mentenir en larz pansyon ki akseptab pou nou tou.  Akoz nou tou nou konnen, vre si napa larzan ki pe kontribye; definitivman nou bezwen fer larz monte akoz nou pe dir tou dimoun pe viv pli lontan e napa larzan napa kontribisyon.  So si i annan plis dimoun pe travay ki pou fer sir ki nou laz pansyon i reste enn ki akseptab pou nou tou, kot nou santi nou kapab travay efikasman.

Mr Speaker, i montre nou dan sa Bidze ki wi in annan, i pou annan en savings, me eski sa bann eleman Minister pa’n kapab vwar 1an di-si?  Eski i neseser ki 1an apre ki nou pe vwar sa bann sanzman – bann direksyon kot pou ale?  Wi lannen pase nou’n travay for lo Bidze ki’n anmenn serten azisteman.  Nou a take it onboard.  Mon swete ki sa i pa en repetisyon ki ganny fer tou le lannen konstaman, pour nou kapab vwar bann sanzman dan bann sityasyon kot nou pep i santi zot, zot bezwen en direksyon ki pli kler, lo ki kantite keksoz ki kapab ganny fer dan nou pei.  Mr Speaker avek sa mon pou termin mon lentervansyon an referans avek sa Bidze Siplemanter mersi.

 

MR DEPUTY SPEAKER

Mersi Onorab Andre.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker swivan bann diferan entervansyon e apard Onorab Pillay ki i ti’n dir, i pou koze mon trouv li i en pe drol ki lo kote Parti Lepep napa plis dimoun ki’n deside pou zot regard sa Bidze e koze.  E sa i anmenn mwan lo sa pwen ki Onorab De Commarmond in sey fer bomaten.  Onorab De Commarmond in koz lo ki mannyer se sa travay scrutiny lo Bidze lannen pase, ki’n fer nou arive fer serten, konmsi koup depans.  Par egzanp ler in fer referans avek Defans li menm.  Kot in dir in koupe apre sa zot in vin fer plis savings.  Me zisteman mon anvi dir avek nou Lasanble e spesifikman atraver ou Mr Speaker, avek Onorab De Commarmond ki mwan personnelman, mon fyer sa travay ki LDS in fer dan sa Lasanble.  Parski apre midi nou pe war en refleksyon lo ki mannyer Bidze ti pase dan sa bann Lasanble avan.  Kot zot pa ti trouv li neseser pour zot al dan detay pour zot fouye e pou zot vwar kote pei i kapab fer lekonomi; kote bann depans pa ti neseser.  E donk, lo kote Parti Lepep mon krwar zot ankor annan en gran travay pou fer.  E la Mr Speaker mon ava dir si nou pa ti’n fer sa travay, tou sa larzan ki ti dan Bidze sa ki ozordi nou pe regarde ki nou pe apel savings, tousala ti pou’n depanse.  Zot ti pou’n depanse e kekfwa sa bann Supplementary Appropriations ti pou menm demande pou depans plis ankor.  Annou pran Defans par egzanp Mr Speaker.  Defans i san menm sa landrwa kot nou’n koup plis; nou’n koup R120milyon.  R120milyon dan Bidze pou sa lannen.  E la zot vini zot in fer en savings 1.3milyon lo salary and wages.

E Mr Speaker sa i montre vreman travay ki nou’n fer.  E parfwa letan dimoun i demande, ‘’Be ki zot pe fer laba dan Lasanble?’’ Mwan mon anvi dir avek pep Seselwa, sa ki nou pe vwar la sa i en travay mazer ki nou pe fer.  E nou pou kontinyen demann kestyon ankor.  Bidze pa pou ganny pase dan moman rikord.  E alor lefe ki sa travay ki nou pe fer pe port fri, nou pou kontinyen.  E an menm tan osi, i enportan pou mwan dir sa meeting ki nou’n annan avek PS finans bomaten, in donn nou sa posibilite pour nou regard tou sa bann depans an detay.  Tou sa bann laliny an detay.  E Mr Speaker zis pour ankor en fwa montre Seselwa ki poudir ki dan sa travay ki nou pe fer, menm si i annan en Bidze Siplemanter atraver Mosyon ki nou pou aprouve apre midi, menm ladan i annan en sonm 22 milyon ki nou’n dir met li wi, me selman tenir li.  Akoz nou anvi ganny plis detay; nou anvi fouy ankor ladan avan ki sa larzan i ganny depanse.  E ladan i annan sa R905mil pour Anse Boileau – sa batiman; i annan R15milyon 802 milyon pour STAR; apre sa i annan 5.5 milyon pour CINEA.

E ki sa i montre nou, i montre nou ki nou serye.  E nou pa anvi ki larzan Lepep Seselwa i zis ganny depanse dan bann fason ki pa vreman apropriye.  E la Mr Speaker regard en lot keksoz – Prizon, Prizon nou ti sispann en sonm 5milyon dan son Bidze lannen pase anba ‘’goods and services.’’ Pourtan ti’n dir i neseser napa ki zot pa ti’n dir.  La ozordi dan sa 5milyon nou a pe larg 3milyon.  Nou a pe larg 3milyon pour zot kapab aste serten veikil ki FPAC li menm li, letan nou’n fer nou miting, letan nou’n koz avek Prizon. nou’n vwar ki i enportan.  E zot in kapab vin avek detay – non pa zis pou dir la larzan ale depans ki mannyer ou anvi.   E lo sa 5milyon zot pe fer en lekonomi 2milyon.  E si mon pe koz koumsa Mr Speaker se parski nou pe dir deza dan sa legzersis Bidze ki nou pe vin fer la, nou bezwen ankor enn fwa tre atantiv pour nou balans tou bann keksoz.

E kot nou pou kapab fer lekonomi, e kot letan bann dimoun, e la mon’n deza anvoy en mesaz pou bann dimoun ki pou vin devan nou Lasanble; fer sir letan zot vin devan sa Lasanble zot konn egzakteman detay lo sa bann keksoz ki zot pe vin demande – parski si nou pa konnen, si zot pa konnen nou pou kestyonnen e si zot pa kapab demann ankor nou demande ki serten sa bann son mi ganny sispann.  E la zisteman mon kontan sa lespri avek ki PS in donn nou sa bann detay e nou’n war ki bann mouvman larzan i ete. Me pour mwan, mon a repran sa ki Onorab Afif in mansyonnen, pour mwan mon krwar ki nou lo nou kote dan LDS, nou pe met lanfaz lo en latitid serye, serye dan travay, serye dan travay ki pe ganny fer, serye dan nou devlopman personnel konman bann endividi.

Bokou dimoun i dir avek ou i annan bokou etranze dan nou pei.  Me nou’n vwar dan sa Bidze Siplemanter lakantite larzan savings ki’n ganny fer, zis lo lefe ki pa’n kapab anploy dimoun.  Oubyen pa’n kapab donn bann promosyon ki apropriye, alor mon osi mon mesaz i tre kler, Seselwa annou pran nou lavi serye.  Annou letan ler nou al lekol pran nou letid serye; annou letan nou’n kalifye ankor enn fwa pran keksoz serye.  Me an menm tan lo lot kote mon anvi dir avek bann Departman Gouvernman, pran travayer Seselwa serye.  Annou pa donn sa travayer Seselwa tou sa bann keksoz pli difisil – bann lenfirmite parey nou ava dir dan bon Kreol – zis pour nou pa anploy li; pour ki letan nou fer li son interview nou dir avek li wi ou’n kalifye.  Me apre sa en phone call i vini sorti kot en lot landrwa kot i ti travay avan, e la mon pe koz spesifikman pour sa dimoun ki ti travay lo Por e apre sa i ti ganny en lot plas travay dan en lot Lazans Gouvernman e ti annan en phone call ki ti sorti laba ti dir pa bezwen anploy li. E ziska ozordi la sa madanm i ankor pe sey fer en fason pour li ganny en plas travay.

Alor Seselwa annou konsantre.  E se zis atraver sa konsantrasyon ki petet laz pansyon pa pou ogmante parey pe arive dan bann lezot pei L’Europe.  Me si nou pran nou travay serye annou pa zis rod en travay kot letan i ariv 4er oubyen i ariv 3er sa dimoun pou donn nou R200 dan nou lanmen, pour nou apre al depans li dan bann fason ki pa pou vreman ed – ni nou menm, ni nou fanmir ni lasosyete.  Me Mr Speaker mon krwar osi ki dan sa Bidze in montre nou ki pou dir ki Gouvernman i bezwen aranz li en pe.  Gouvernman i bezwen vin pli serye ou pa kapab pey rent lo en landrwa kot Gouvernman zis in pran sarz sa batiman – en rent R900 ekek mil, me selman napa dimoun ladan. Parey Onorab Andre in dir e Onorab Afif e Onorab Ferrari tou bomaten, fodre i annan planifikasyon serye.  E sa ki nou pe vwar la i pa serye.  Ou pa kapab ouver en batiman avek tou lafanfar, pas lo televizyon, Maison Arnephy e apre, e apre sa, napa personn ki antre ladan, me selman Gouvernman li i bezwen kontinyen peye.  E la Mr Speaker mon a donn ou en lot legzanp.  Gouvernman in depans sepa konbyen larzan dan Bidze pou refer vye Lakour Siprenm.  Be Mr Speaker ou konn en keksoz?  Vye Lakour Siprenm i annan 3 mwan in fini – 3 mwan in konplete e li Gouvernman i pa ankor konnen ki mannyer i pou go about sa.  I pa konnen ki i pou fer.  Menm parey avek, ou rapel nou ti koz lo Kordgard Anse aux Pins; Kordgard Anse Aux Pins ti annan en kantite   lannen – en kantite mwan ti’n fini fer, me selman Gouvernman … Be mon pa ganny en konpran sa mwan.  Be si ou pe fer en Kordgard ou’n dan ou plan pou ou fer en kord gard be aprezan sa Kordgard sa kontrakter i fini sa travay.  Be mon krwar i senp ou sipoze annan en plan pou ou antre dan sa Kordgard. Pour mwan dan mon lespri, dan en fason tre senp mon krwar i devret mars koumsa.

Ou’n depans sepa konbyen milyon pou ou refer vye Lakour be in fini, kontrakter i dir avek ou in fini, be mon sipoze devret ase fasil pou ou dir, ‘’Be la aprezan dir annou antre ladan.’’ Anse Boileau Pension Fund nou’n ganny koze ek Pension Fund pour fer sa batiman pour ed pti biznes, pourtan zot koze lo pti biznes.  Dan sa Lasanble nou tann ‘Pti biznes;’ lo televizyon nou tann ‘Pti biznes;’ partou kote nou tann ‘Pti biznes’.  Be mon ti ava mazinen, e ‘Pti biznes’ li menm li i vini i dir avek ou i pe rod landrwa pour li fer son biznes.  Be la aprezan ou fini batiman pou ‘Pti biznes’ Gouvernman i pey rent, i pa ganny okenn income – ‘Pti biznes’ li i pe kontinyen li rod landrwa.  Mon krwar i annan en problenm avek lafason ki Gouvernman pe fonksyonnen.  E nou lo nou kote nou pe dir avek Gouvernman ganny ou plan kler.  E nou espere ki pou dir dan sa Bidze ki pou ganny prezante, e dan nou bann deba nou pou ganny bann plan ki kler.

Mr Speaker letan nou pe koz lo Capital Projects, Capital Projects i annan lekonomi, zis dan capital projects i annan en kantite lekonomi plis ki 24milyon.  E pourtan Mr Speaker letan nou pas lopital letan nou koz ek bann travayer, mwan i annan travayer kot Minister Lasante ki’n vin vwar mwan.  Nou’n koz lo problenm Fungus kot National Library, be kot Minister Lasante tou i annan problenm Fungus.  Dan son medical library i annan en gro problenm fungus.  Grand Anse Praslin la Onorab Woodcock pe dir.  Be Mr Speaker mon pa ganny en konpran ankor enn fwa.  E i annan dimoun ki malad laba.  I annan dimoun ki malad e prezan in tir zot dan medical library, in met zot dan en lot pti batiman me selman tou bann dokiman i dan medical library, be pa ou bezwen retourn laba.

E si nou pe fer lekonomi lo capital project, eski i en gran keksoz pour nou kapab repar sa bann landrwa pour nou pran swen avek lasante nou bann dimoun?  Pour nou kapab fer sir ki zot kapab respir byen letan zot desann pour zot al travay?  Alor tousala Mr Speaker i montre ou en dezord.  E mon krwar ki letan nou dan LDS nou koz lo sanzman, nou pa zis vin koz lo sanzman nou, nou dir ki fodre annan en planifikasyon a lonterm; fodre ki i annan en keksoz ki konkret.  Ozordi partou kot ou pase, wi i annan Homecarers, me selman i dimoun i dir avek ou i annan keksoz ki pa pe mars byen.  E mon sir dan sa Lasanble nou tou MNA nou konnen ki pou dir i annan keksoz ki pa pe mars byen.

Lot zour mon’n asiste en meeting piblik anler St Louis ki Onorab Arrisol ti’n organize e sa sete enn bann pwen, ki pwen zot ti fer resorti napa supervision.  Napa supervision.  E nou, nou pe dir sa bann dimoun ki pe fer sa travay zot tou zot neglizan zot isi laba.  Me selman nou konnen ki pou dir ki napa supervision ou napa garanti ki pou dir ki sa travay pe ganny fer parey i devret ganny fer.  Wi i annan en logmantasyon pour Homecarers.  Me selman eski nou sir ki sa travay pe byen ganny fer? Tousala se bann keksoz ki nou bezwen regarde.  E la Mr Speaker, zis pou montre ou ankor enn fwa, sa eleman konfizyon mon ava apel li. Dan Overseas Treatment Fund i annan en sonm R10milyon ki Minister Lasante i bezwen peye.  Be si mon dir Mr Speaker sa i lo paz 67 nou dokiman, si mon dir ou Mr Speaker ki bomaten letan PS in koz avek nou napa nanryen ki kler, nou’n met R10milyon la, me selman bann kont pa balanse.  Nou pa konnen si letan nou pou balans bann kont se, Sesel ki pou drwa oubyen si se Miot ki pou drwa.

Me selman ki’n arive akoz ki i annan sa bann keksoz ki pa pe mars byen, i annan dezord mon ava apel li – pasyan Seselwa in soufer.  I annan serten pasyan Seselwa ki ti pe fer tretman kot zis in vini in dir zot non nou pe aret fer ou tretman, akoz Sesel i drwa.  Be fodre nou met lord.  Menm parey pou STAR; sa 15 milyon ki nou’n dir pour met lo hold lo pause, ankor enn fwa pa konnen.  Pa konnen si letan pou fini balanse parske sa i en vye zafer depi 2010, nou pa ni konnen si letan pou’n balans tou keksoz se STAR ki pou drwa, oubyen si se Gouvernman ki pou drwa.

Tou sa bann keksoz Mr Speaker i montre nou ki nou pa pou kapab kontinyen dan sa menm fason, e non selman ki nou pa pou kapab kontinyen dan sa menm fason, me i montre ki pou dir fodre ki nou pran keksoz dan en fason serye.  Parske si i pa vin serye nou pa pou kapab avanse konman en pei e olye, olye ki nou benefisye avek larises nou pei, nou pou trouv nou pe tay isi, pe tay laba, nou pou trouv nou pe trouv lapovrete pe ogmante, nou pou trouv nou pa pe kapab delivre parey nou devret delivre.

Alor Mr Speaker ki nou lo sa kote nou pe dir?  Wi sa bidze siplemanter nou pou donn nou siport.  Nou pou donn nou sipor, akoz nou vwar son merit.  Me ankor enn fwa anmezir ki nou donn nou sipor akoz nou ganny byen bann leksplikasyon, i enportan ki pour nou deza, avan ki nou tann mesaz Minis demen, pour nou dir avek li, ki dan sa Bidze ki pe vini nou anvi vwar disiplin fiskal, ki ganny egzerse lo en nivo pli o posib.  Nou anvi vwar ki la transparans i dan tou keksoz i ki dan okenn sonm ki nou pa tro konnen kote i pe ale, nou pou poz kestyon.

Me Mr Speaker nou anvi vwar en plan; en plan lenvestisman piblik ki kler, ki pou donn nou en direksyon koman en pep. E ki letan i ava annan en keksoz kler, anmezir ki keksoz pe deroule nou ava kapab nou koman Lasanble Nasyonal, demann bann kestyon  ki apropriye; demann kestyon ki  letan nou vwar keksoz pa pe mars parey i devret marse, e sa i ava permet nou pour nou avans devan.  Nou pa ava parey sa ki’n fek arive semenn pase; kot nou’n ganny en Manm ki vin demande ki General Purpose Loan i reganny entrodwir.  Kan anfet se son prop Gouvernman ki ti deside pour aret sa.  E sa ki ti pli gou Mr Speaker, letan sa ti ganny arete, sete son Prezidan ozordi ki ti Minis Finans.  Zot pa konnen tousala?  E nou tou nou ava lo menm paz.  Enn pa ava fer en politik en pe pli bon marse. Manm lo FPAC Onorab De Commarmond, pa ava vin dir ki nou pa serye, akoz li i pe vin rod en pti gin larzan pour met dan pos Seselwa.  Pour nou kapab met plis larzan dan pos Seselwa, fodre nou annan en plan ki kler.  Nou pa kapab rod par pti bout dan en fason ki pa serye.  Fodre ki nou annan en plan konkret.  E se sa ki nou pe demande nou.  Nou bezwen Mr Speaker annan en Bidze ki ankouraz lanplwa.  Nou bezwen annan en Bidze ki pa ankouraz welfare, me ki plito dir avek lepep Seselwa la i la.  E atraver sa nou pou annan plis travay.  E Seselwa parey mon’n fek dir avan, Seselwa i ava vin devan i ava ganny plis travay olye pour li depan lo Welfare.

En Bidze ki i ava parey Onorab Andre in dir, pour kapab donn bann pli bon lapey nou bann travayer ki vreman serye bann ners, bann public servants, bann teachers e tou bann lezot dimoun.  E ki nou pa ava trouv nou dan en sityasyon Mr Speaker kot letan en dimoun i ava’n fer en travay serye, swa koman en midwife, koman en senior nurse, koman en staff nurse – oubyen koman en dimoun ki travay dan Minister Lasante oubyen parey mon frer Rabat kot Lakaz Mor – Ki letan in travay pou konbyen lannen i ankor pe anmenn dan lakour mwens ki R10mil me ki i ava annan en fason kot nou ava pe ankouraz dimoun pour ki nou pa ava trouv li ankor enn fwa kot zot pe ganny problenm pou anploy dimoun.

E souvandfwa Mr Speaker, problenm pou anploy dimoun i vin parey sa ki Anbasader Butler Payet ti dir. ‘’Letan ou donn pistas you get monkeys.’’ E ki nou bann travayer Seselwa pe dir, ‘’Avek nou kalifikasyon ou pa kapab donn nou Pistas!’’

 

(APPLAUSE)

 

HON WAVEL RAMKALAWAN

Ou pa kapab donn en nurse, donn en staff nurse, ou pa kapab donn en supervisor ki’n travay 30an dan en landrwa ou pa kapab donn li en lapey R8mil. Ou pa kapab donn li en lapey R9mil.  Fodre ki i ganny larzan ki ava kapab ed li ki ava kapab ed son fanmir.  E atraver sa zafer lanplwa Mr Speaker.  La ou ganny ou, ou ganny ou 2 sityasyon, ou ganny ou bann dimoun ki devoue me lo lot kote zot lapey i pa satisfezan. Be ki mannyer ou nou rekonpans sa bann dimoun ki annan sa devosyon?  E mon krwar ki parey mon pe dir se sa bann keksoz.  E letan nou koz lo bann size Bidze, letan nou regard sa bann keksoz parey mon krwar ki i enportan ki nou kapab bouz devan.  Pour ki nou ava kapab osi regarde vreman ki mannyer nou pou met larzan, pour nou kapab fer sir ki nou ganny nou plis bann dimoun kalifye.  E ki letan en dimoun in kalifye, i ganny rekonpans dapre son kalifikasyon – e non pa dapre zis sa ki ou, ou anvi.

E sa sete en size ki nou ti pe koz lo la; letan nou ti pe koz lo SFA lannen pase.  Letan nou ti vwar ki pour dir ki annan serten profesyonnel Seselwa ki i annan li 2 Masters Degree e son lapey ki i pe gannyen son basic salary i mwens ki R15mil.  Sorry, sa bann manrmay lezel zot met divan anba zot lezel.  Letan nou, nou pa pe rekonpans nou dimoun, i annan pei ki laba deor ki pou anvi rekonpans nou dimoun e zot pou ale.  E apre sa nou pou fer resers Seselwa ki kalifye laba deor i ezite pour li retourn dan nou pei?  Alors Mr Speaker tousala se bann pwen ki mon anvi met devan.  E si mon pe met tousala an relasyon avek sa Supplementary Budget e an plis ki sa, sa Mosyon e an plis ki sa, sa Bidze ki pe vini demen, se pour nou dir annou kapab balans byen nou bann keksoz; pour ki lannen prosenn si nou’n balans li byen si tou bann Departman zot in balans zot bann keksoz byen, nou pa ava bezwen vin rod Supplementary Appropriation.

Mon se sa mon rev dan sa Lasanble.  E mon espere ki avan ki mon fini – oubyen ki avan ki mon aret – well ki mon fini mon karyer politik isi dan Lasanble, mon espere ki pou dir sa rev i ava’n vin vre; kot dan sa Lasanble Nasyonal nou pa ava tann Supplementary Appropriation oubyen Mr Speaker, si i annan en Supplementary Appropriation, i ava pour bann keksoz vreman aksidantel ki’n arive.  I ava pour bann keksoz ki ti napa okenn fason pour nou prevwar, me pour bann keksoz vreman serye.  Donk Mr Speaker, fodre nou pran keksoz serye dan sa pei e fodre nou balanse tou nou bann proze.  Fodre nou annan en plan ki konkret.  E mon espere ki nou ava ganny enn e nou osi nou ava fer nou kontribisyon pour nou transform sa pei ki apel Sesel. Akoz si nou kontiny koumsa nou pa pou ariv pli devan. Alors Seselwa fer nou konfyans.  E parey mon’n dir nou’n freeze serten nou’n deside pour nou pran sa desizyon pour nou met en freeze lo serten sa bann sonm. E sa i enportan en kantite, me kot in ariv ler pou met divan anba lezel Seselwa, nou pou fer li.  Mersi bokou Mr Speaker.

 

 (APPLAUSE)

 

MR DEPUTY SPEAKER

Mersi Onorab Ramkalawan.  Bon mon napa ankor entervenan.  Mon ava demann loter Mosyon Onorab Charles De Commarmond pou fer son konklizyon.  Onorab.

 

HON CHARLES DE COMMARMOND

Mersi Mr Speaker.  Mr Speaker les mwan met detrwa keksoz byen kler devan nou.  Mon apresye deba ki’n ganny pase lo sa Mosyon pour Bidze Siplemanter.  Serten keksoz ki kler Mr Speaker; enn en Bidze Siplemanter i neseser.  I arive e i pour preski toultan arive.  Me ki enportan ki nou note – ki nou fer sir i ganny fer, se ki i annan en aprouvasyon par Lasanble Nasyonal avan i arive, avan sa depans i ganny fer.  E se sa dan bann progre ki nou Lasanble ki nou, bann progre ki nou pei in fer, ozordi nou pe anmenn bann Bidze Siplemanter ki an prensip depans pa ankor ganny fer. Letan ti’n ganny pibliye sa sa bann depans pa ti ankor ganny fer.  An prensip se sa lespri en Bidze Siplemanter ki ou averti e se sa ki vin dan form en Mosyon avan ki Bill i vini.

So, premye mon ti le fer sorti.  2enm keksoz se ki sa ki nou pe diskite la, sa ki nou war nou Lasanble pe fer Mr Speaker se rezilta zisteman vizyon Prezidan Faure.  Se rezilta vizyon nou Parti e se rezilta – si oule sa bann pwen kardinal lo lekel vizyon Prezidan Faure i lo la e vizyon nou Parti i lo la. Se bonn gouvernans, la transparans e rann kont.  E sa ki mon pe dir i obliz Lasanble Nasyonal pour zwe son rol; sirtou SPAC ek lezot Komite pour zwe zot rol oversight pli byen e pli performan.  Lasanble pa kapab reste deryer; i bezwen li osi sakouy li e fer sir ki i delivre lo sa oter.  Sa en pwen enportan e ki enportan ki nou pep i note sa.

Etan ki nou kontinyen la, Prezidan Faure i kontinyen pe gid nou, nou pou fer sir ki i annan ankor plis presyon, pour ki Lasanble son bann Komite, i zwe ankor pli byen son rol oversight.  Mr Speaker sa bann pwen ki devan nou, lo sa Bidze Siplemanter – serten logmantasyon, i tre zistifyab, mon a donn ou en legzanp parey ou pe koz apepre R1milyon pour recruit apepre 5 a 6 dimoun dan Seksyon Biodiversite dan Minister Lagrikiltir.  Sa i tonm an lakor byen avek sa ki Minis in vin eksplik nou lo son plan, pour kapab devlop Sekter Lagrikiltir.  E nou, nou Lasanble nou’n onboard avek Minis, pou dir wi ale dan direksyon pour kapab ede pou fer ki nou annan logmantasyon dan prodiksyon Agrikol.  E fer ki Lagrikiltir i repran son plas enportan dan nou pei.  So, mwan mon krwar sa i byen.  E an menm tan nou annan osi … par egzanp nou konnen pour dir nou ti aprouv bidze lotrozour dan Bidze ti napa alokasyon fer pour alleviation of poverty avek lalit kont drog.  Sa 2 sekter pa ti ganny ase sipor bidzeter.  E la nou pe vwar ki vi ki i annan serten progre.  Nou dir zot al fer zot progranm byen; les nou war ki pe arive.  E la nou pe vwar e la zot pe ganny zot bout.  So, mon vwar sa i zistifye osi, i zistifyab osi.  Anti-Corruption Commission – par egzanp nou’n vwar poudir li osi  i ti’n apros nou; in apros le 2 Leaders pou dir vwala sa Bidze ki ou pe donn mwan pe donn sa seksyon i pa ase, akoz the work is challenging; ti annan serten menas ki i ti pe gannyen osi; dan sekter – dan zot laspe sekirite, nou ti vwar poudir zot bezwen ogmante.  Alors pour zot kapab pli performan nou bezwen osi regard en pti pe pli byen dan zot Bidze.  E sa alor in annan sa ogmantasyon dan zot Bidze ki pe ganny propoze la.

Osi nou kapab dir poudir ki sa, sa Bidze Siplemanter ki nou pe demann Gouvernman pou fer, vre i annan serten keksoz ki ankor manke ladan.  Nou’n koz lo Fungus ki annan Lopital, be i pa zis sa ki zot in nonmen.  I annan menm Trwa Zonn kot ti’n ganny afekte par Fungus.  E sa nou pe demande osi dan legzanp ki’n arive avek kot Minister Kiltir kot Nasyonal Library nou demande ki Minister Lasante i osi take onboard the challenge pour zot evalye kot zot bann domaz ki’n arive.  Akoz nou’n konnen nou poudir in annan serten staff ki’n kite akoz sa kestyon Fungus zot pa’n kapab kontinyen travay.  E la Minister pa’n fer son bout pour get dan welfare sa bann staff dan zot kondisyon lasante. Alor nou demande ki la osi dan bidze ki vini devan nou demen pou ganny prononse dan son Diskour, nou demande ki Minister i regard ladan a moman apropriye, parey in promet i pet get osi dan logmantasyon saler bann Ners.

Saler bann Ners i pa pou aparet dan sa Bidze Siplemanter me selman dan Bidze ki demen i avan ganny prononse, i annan provizyon pour saler, ogmantasyon dan saler bann Ners ek bann lezot Travayer Lopital e nou a swete zot ava welcome sa.  Lot kestyon, mwan lo kestyon lo sa disiplin fiskal, lo kestyon serye ki bann zofisye Minister i serye, zot devret.  E mwan mon krwar nou’n lans en lapel lo tou sa ki nou pe dir, nou pe lans en lapel avek bann zofisye travayer Gouvernman pour zot perform pli byen.  Akoz tou sa bann keksoz ki pe ganny mansyonnen, kot i annan bann mankman la, be lekel ki travay ladan? Be mazorite se zot menm sa bann zofisye ki zot anmar bato, zot menm ki’n fer retarde serten progre dan nou sistenm dan nou pei. E nou pe demande ki sa bann mantalite i arete e nou demann nou Prezidan pou regard pli pros e dan en fason pli serye sa bann issues – e ki nou fer ki Gouvernman sirtou anba son leadership i perform pli byen e dan en fason pli koeran parey nou  pe vwar pe arive.

Avek sa Mr Speaker, i annan en pwen pour mwan dir – se ki sa  proposed sum of R217milyon 500mil 270 Roupi ki originally pe propoze, si nou pe dir akoz nou pa ankor, nou’n pronons li lo sa freeze, be selman nou pa ankor dir an zeneral si nou aksepte si Lasanble i dakor.  Mon pa konnen si nou pou fer li konman en vot; ouswa nou pe dir nou pran li an kont – nou demann Minister Finans pour pran kont sa ki nou pe dir, menm ki nou pe aprouv sa Bidze Siplemanter, me take note seriously lo sa zafer freezing; freeze sa bann bout -ki pa depanse ziska serten lenvestigasyon i ganny fer.  Mon krwar nou Lasanble an zeneral i tonm dakor lo sa pwen koumsa.

Si ou pou minus alor sa 3 konponan, ki an tou i a vin 22milyon 225 mil Roupi, i fer ki balans ki pou reste pour sa propozisyon Bidze Siplemanter i pou 195milyon 275mil, 270 Roupi.  Now, si ou minus osi savings ki dapre Bidze Siplemanter, son progranm i pe dir ki sa bann savings ki’n ganny fer, i pou fer ki vreman larzan ki ou pe rode i pou selman 145 milyon 8mil 750 Roupi.  Savedir ki montre pou dir overall performance i pa mal.  E pozisyon Bidze nou pe dir, i pa pe ganny afekte parey in ganny refer sorti par Onorab Afif.  Pa pe ganny afekte dan sa fason.  E alor ki sa Bidze Siplemanter, i dan mwayen ki nou pe kapab tolere.  E dan sa sans la, nou vwar poudir mon a demande an zeneral, i donn sipor lo sa Bidze Siplemanter lo sa Mosyon ki devan nou pour permet Gouvernman fer sa depans.  Akoz sa depans nou pe dir i enportan i zistifyab sirtou ler i konsern plis scholarship pour nou bann zanfan; letan i konsern overseas travel whether nou pou drwa ouswa Miot pour kontinyen drwa nou, or whatever. Malgre sa bann detay pour al get ladan i byen.  Me nou pe dir nou pa kapab negliz, kot i konsern lasante avek ledikasyon nou pep osi.

So, dan sa sans la, mon ava demande ki nou Lasanble i siport sa propozisyon Bidze.  Parey mon’n eksplike ek sa bann detay ki mon’n dir, e avek konsiderasyon freeze serten bout tanporerman ziska keksoz i ganny byen eklersi.  Mersi bokou Mr Speaker.

 

MR DEPUTY SPEAKER

Mersi Onorab De Commarmond.  Bon ler in arive pour nou pran en vot lo Mosyon.  Ou ti annan en pwen ou ti le fer sorti Onorab Ferrari?

 

HON JEAN-FRANCOIS FERRARI

Avek ou permisyon Mr Speaker mon oule presiz sa ki Onorab Ferrari pe dir so that ki i byen kler ki nou pe vol lo la.  E mwan mon ti a zis kontan dir ki, Mosyon Onorab De Commarmond i lir koumsa;

 

MR DEPUTY SPEAKER

I enkli sa lamannman.

 

HON JEAN-FRANCOIS FERRARI

Ki Lasanble Nasyonal i aprouv bann … Gouvernman … en … mon a lir an Angle; That the National Assembly resolves to approve the supplementary estimate laid before the National Assembly in accordance with Article 145 (7)  of the Constitution – ok – for the sum of  (nou bezwen azout sa avek)  for the sum of SCR217million, 500 thousand.   Is that correct?  Yeah ale.

 

MR DEPUTY SPEAKER

Ok? Yes Onorab De Commarmond?

 

HON CHARLES DE COMMARMOND

Wi Mr Speaker, bomaten mon ti ‘n fini dir poudir ok ti annan en omisyon lo sif.  Si oule mon relir sa Mosyon ki mannyer i devret ete.  I dir, the National Assembly resolves to approve the supplementary estimates  of 217  million, 500 thousand, 270 Seychelles Rupees laid before it, or before  the National Assembly in accordance with Article 154 (7) of the Constitution. Mon krwar i…

 

MR DEPUTY SPEAKER

Wi.  I okI ok.  I ok.

 

HON JEAN-FRANCOIS FERRARI

Sa i parfe.  Sa i perfect.

 

MR DEPUTY SPEAKER

Wi.

 

HON JEAN-FRANCOIS FERRARI

Prezan ki mannyer mwan mon ti… mon pe demann avek Lasanble si nou krwar nou devret formil en keksoz spesifik lo baz sa 3 budget lines ki nou pe demann Gouvernman – nou pe demann Minister Finans, pou donn nou en pe leksplikasyon pou nou kapab konpran  akoz i koumsa.  So… Ou konpran?  Mr Hoareau la pe sizer en keksoz.

 

MR DEPUTY SPEAKER

Onorab De Commarmond.  Ale Onorab.

 

HON CHARLES DE COMMARMOND

Nou ti kapab zis petet therefore petet azout ek sa Mosyon si i ok, si i ok ‘’… subject to the freezing of the sum of SCR22 million 225 thousand ki reflekte…. Me la nou pou al dan detay prezan … ki reflekte sa 3 seksyon.  Well nou pe freeze. 

 

MR DEPUTY SPEAKER

Ok, ok.  Ale Onorab Ramkalawan.

 

HON WAVEL RAMKALAWAN

Mr Speaker mon konpran. Me mwan krwar ki sa deba dan li menm li, i pe fer keksoz kler. Dan letan nou ti pe, nou bezwen retourn lo letan nou ti pe pas Bidze.  Letan nou ti pe pas Bidze. Zis nou ti kite sa bann sonm.  Me selman le fe ki i ti ganny fer sorti dan en fason kler, in ganny respekte.  Alors sa ki mwan mon espere, e pour satisfer sa ki Onorab Ferrari pe dir, ki sa menm lespri i ganny respekte.  E mon krwar ki PS Payet in deza donn nou son commitment; in deza donn FPAC son commitment, e alor mon vwar ki letan en PS i donn en Komite Lasanble son commitment, sa commitment i binding.  Alors petet nou pa ava bezwen azout nanryen.  I binding.  Mersi bokou.

 

MR DEPUTY SPEAKER

Ok.  Bon nou dakor.  Onorab De Commarmond.

 

HON CHARLES DE COMMARMOND

Nou’n ok ek sa.  Bomaten in fer sa commitment avek nou.  Mwan mon toutafe dakor lo la akoz sansan nou bezwen al resanz sa Mosyon, re aranz li sepa kwa pour fasilit keksoz.  Mon, I am onboard with the FPAC, with the Parliament, avek nou Lasanble Nasyonal, lo sa pwen.  E nou ensiste.  Nou ensiste.  Se sa rezon mon krwar Onorab Ferrari i pe rod en fason ki vin binding.  E mon krwar dan sa ki’n ganny dir la, it is binding.  PS in fer son commitment.  E i pa pour kapab sanze.  Nou a fer problenm osi.  Mersi.

 

MR DEPUTY SPEAKER

Mersi Onorab De Commarmond.  Bon ok, in ariv ler pour nou pran en vot lo Mosyon pour Bidze Siplemanter a en sonm 217milyon 500mil Roupi 17 sou, ki devan nou.  E mon a demann tou Manm ki an faver?

Okenn Manm ki kont? Madam Clerk?

 

MADAM CLERK

Mersi Mr Speaker.  Bonn apre midi tou Manm.  Mon’n rikord 24 Manm an faver, personn kont.  Mersi.

 

MR DEPUTY SPEAKER

Ok savedir sa Mosyon pour aprouv sa Bidze Siplemanter in ganny aprouve par Lasanble Nasyonal.

Bon sel pti lanons ki mon pour fer, se ki demen nou pran nou sesyon, nou lazournen normal.  Me sa pour ganny fer, nou pour komans 9er bomaten parey labitid – nou ekout Ladres Bidze 2018 ki pour fer par Minis Finans, Dr Peter Larose. Apre sa parey labitid, nou pour adjourn e nou pour repran Mardi le 7 pour nou komans avek bann Repons lo Bidze 2018, ok? Madam Clerk? Wi tou bann dokiman Bidze, le moman ki Minis pour fini demen, tou bann Manm pour ganny bann dokiman Bidze. Ok, pour zot kapab regarde, pour kapab ed zot pour fer zot repons.  Ok? Yes Onorab Ramkalawan.

 

HON WAVEL RAMKALAWAN

Mr Speaker zis en pti kestyon ki nou pe komans Mardi, oubyen Lendi?

 

MR DEPUTY SPEAKER

ABC in deside semenn pase nou pran li Mardi le 7.

 

HON WAVEL RAMKALAWAN

Mon ti pe zis lev sa parski le fe ki nou pour al toulezour pour kwa pa nou ti komans Lendi, e nou ti ava…

 

MR DEPUTY SPEAKER

Depi Mardi le 7 nou pour ale ek Repons.  Apre PS Payet i ava fer son Timetable bann Minister, bann Departman parey lannen pase, ki pour vin devan nou pour enteraksyon.  Ok?  Avek sa nou ava adjourn, e nou ava repran demen bomaten 9er.

 

(ADJOURNMENT)