Home » Verbatim » 2017 » Verbatim Report, The National Assembly Sitting, Tuesday 24th October, 2017

Verbatim Report, The National Assembly Sitting, Tuesday 24th October, 2017

NATIONAL ASSEMBLY OF SEYCHELLES

 

Tuesday 24th October, 2017

 

The Assembly met at 9am

 

National Anthem

 

Moment of Reflection

 

Mr Speaker in the Chair

 

MR SPEAKER

Bonzour tou dimoun ; tou dimoun dan Lasanble, tou dimoun an deor Lasanble ki pe ekout nou, byenveni pou nou deliberasyon e nou bann deba ozordi dan Lasanble Nasyonal, pou sa Mardi le 24 Oktob.  Mon espere tou dimoun pe pas en bon moman Festival Kreol.  Me avan sa, mon ti a kontan lo non Lasanble, tou nou bann koleg dan Lasanble ofer nou 2 koleg, Onorab Churchill Gill e Onorab Simon Gill, tou nou senpati pou zot moman douloureux ki zot pe pas ladan apre sa lensidan Praslin.  E mon remersi LGB, Onorab De Commarmond ki yer in reprezant nou, malerezman Onorab Gill mon ti annan lentansyon vini me mon ti annan bann lanpesman, mon pa’n kapab vini, me Onorab De Commarmond ti fer nou sa loner, in reprezant nou dan Lasanble kot lanterman.  Mon ti a kontan osi profit lokazyon lo lapar tou nou bann koleg isi dan Lasanble ki travay Lasanble, pou eksprim nou senpati avek lafanmir Esparon e sirtou ki nou konnen Depite Prokirer Zeneral, Depite AG.  Mr David Esparon in travay bokou avek Lasanble par lepase pou diskit nou bann proze, Prozedlwa, nou bann travay e nou ti a kontan eksprim nou senpati avek li, son manman Mrs Simon ek tou lafanmir.  E mon ti a kontan osi petet konman Speaker dir ki i enportan a sa staz dan nou lavi Sesel, ki nou tou nou donn en koudmen Lapolis pou fer sa travay ki zot pe fer.  E la mon fer en lapel pou okenn dimoun ki annan lenformasyon, nenport lenformasyon ki kapab ede pa zis dan sa ka mert ki’n arive me dan nenport sityasyon lawlessness, oubyen ki annan bann defi avek Lalwa ki nou anmenn nou sipor ek lenformasyon pou Lapolis.  Akoz Komisyoner ek tou the goodwill dan lemonn i pa pou kapab fer sa li tousel.  So i en lapel ki mon ti’n mazinen ti a bon ki nou tou nou reflesir lo la pou nou ed Lapolis. I annan serten lenformasyon ki vin kot mwan ki mon toudswit mon sey verifye ki i annan ase kredibilite e apre mon pas avek ComPol.  Mon krwar nou tou nou devret fer sa avek sa bi ki ansanm nou vin nabou atak sa fleo ki par itil pe pran grip dan nou pei.  Ek sa mon ti a kontan a sa bomaten ozordi la i fer nou bokou plezir pou envit, pou byen swet la byenveni en lot group sorti dan distrik Glacis sa voyaz e sa ki mon kontan ozordi konmsi i annan en konbinasyon bann sitwayen senior, epi en group adolesan osi ansanm ek zot, sa i byen, sa kalite relasyon oubyen enteraksyon enterzenerasyonnel ki byen.  E alor nou ti a kontan swet zot bann zabitan Glacis byenveni pou no Lasanble, zot akonpannyen par Constituency Clerk Glacis, Ms Livette Hermitte e osi i annan zot Chairperson Mrs Charles e Youth Worker ki avek zot Ms Kathrina Baron.  Alors byenveni e fodre espere zot pas en moman agreab dan Lasanble parey labitid zot pou kapab zwenn Onorab Esparon ki la, Onorab Esparon ki MNA Glacis, Onorab Sebastien Pillay e byensir LGB, mwan menm ek lezot Manm Lasanble ki enterese pou koz avek zot.  Malerezman Leader Lopozisyon pa dan pei alors zot a eskiz li si i pa la i pa akoz i pa’n vin me i pa dan pei, i lo en misyon ofisyel aletranze.  Me nou, nou la pou enterakte avek zot alor ankor mon swet zot la byenveni. Avek sa nou al toudswit lo nou… Wi, Onorab De Commarmond, yes, go ahead.

 

HON CHARLES DE COMMARMOND

Mersi Mr Speaker.  Bonzour Mr Speaker. Bonzour tou Manm Onorab isi prezan, Deputy Speaker.  Bonzour tou bann zanfan e tou bann zabitan sorti Glacis ki la ek nou e bonzour tou dimoun ki a lekout.  Mr Speaker, mon pran laparol la bomaten la zis pou zwenn ou dan sa ki ou’n dir komanter ki ou’n fer la bomaten e mon senpatiz osi avek lafanmir Esparon ki’n perdi enn bann icon bann zafer diskotek nou Simon ki tou dimoun i konn li.  E mon pe zwenn avek ou pou kondann sa bann kalite lensidan e nou kote Lasanble, kote Parti Lepep, nou vreman pa kontan sa bann lensidan ki pe arive e i pa fer premye, mon krwar pa si i pou fer dernyen e nou pe demande ki tou dimoun i sey dan sa sipor pou donn korperasyon Lapolis pou kapab ede fer sa travay ki zot pe fer byen pou kapab o pli vit posib vwar bann culprit e deal avek zot accordingly.  E an menm tan mon le osi lans en lapel ; dan nou pei nou ti annan en kiltir kot dan lepase nou toultan pe zet en koudey lo propriyete kanmarad si enn pa la, ou vwazen i zet en koudey lo lakour, i vwar si i annan en keksoz ki mal i alerte…i … ti annan sa korperasyon, mon pe demande ki sa korperasyon, sa sipor antre bann vwazen i redinamize, i repran valer e ki fer ki sa vizilans Kominote i ava vin an plis egzistans e sa i a kapab ede osi pou kapab nou tou, ler nou tou nou vin vizilan i kapab ede redwir sa bann kalite keksoz koumsa.  E alor mon le partaz sa avek zot e mon le ki nou donn korperasyon sipor sa nouvo ladministrasyon Lapolis e nou krwar ki mannyer zot pe konmanse la, zot kapab ede pou abat sa bann keksoz dan lefitir.  Mersi.

 

MR SPEAKER

Mersi Onorab De Commarmond.  Mon a donn laparol Onorab Ferrari.

 

HON JEAN-FRANCOIS FERRARI

Mersi Mr Speaker. Bonzour tou dimoun. Mr Speaker, mon ti a kontan fer le kou bann parol ki ou’n dir bomaten e ki Leader Of Government Business in dir, e renouvle nou senpati nou kondoleans Onorab Simon Gill e Onorab Churchill Gill pou sa maler ki’n arive.  E nou koleg akoz Mr Esparon, Depite Esparon i en koleg Lasanble Nasyonal, nou partaz son latristes avek son fanmir.  E nou ti a kontan vreman ki tou Seselwa i pull together e parey Onorab Gill i kontan dir ‘‘Together’’ dan sa bann moman difisil e donn sa korperasyon Lapolis. Lapolis i bezwen sa sipor.  Lapolis i nou zanmi se nou ki pou fer li reisi. Alors annou nou tou ansanm koste zepol e aret sa trend ki pe devlope, ki pe met en move limaz lo nou bann kominote.  So mon swet kouraz tou dimoun ki’n pas dan sa maler e mon demande ki nou tou nou fer nou bout pou aranz nou pei.  Mersi.

 

MR SPEAKER

Vwala, mon remersye sa 2 Manm Onorab. Evidaman i montre tou le de kote latab, nou lo menm nivo, nou lo menm wavelength pou nou travay pou nou pei.  Mon krwar sa nou’n fer kler tou letan.  Nou bezwen travay ansanm e la i en keksoz… 2 lensidan dan en semenn ki’n attristé nou tou e nou tou nou santi douler sa bann fanmir.  E mon krwar parey Onorab Ferrari ek Onorab De Commarmond in dir nou tou nou bezwen met lanmen ansanm pou nou ede me osi met lapriyer ansanm.  Mwan mon vreman krwar dan lapriyer pou nou vin nabou anmenn nou pei devan.  Alor mersi pou zot parol ankourazan. Prezan nou ava al drwat lo nou Order Paper e nou ava al lo Prezantasyon Papye limero 4. Anfet mon krwar zot tou zot in ganny sa Annual Financial Statement, zot in ganny en kopi.  So sa in deza ganny sirkile pou lannen 2016 ki fini le 31 Desanm 2016, so napa okenn diskisyon lo sa, sa i devan zot e nou ava toudswit lo pwen 5 lo Order Paper ki Public Bills e mon a demann Clerk pou fer First Reading.

 

MADAM CLERK

Mersi Mr Speaker.  Bonzour tou Manm. Bonzour tou bann envite. This Act may be cited as the Appropriation Act of 2018. Mersi.

 

MR SPEAKER

Mersi Clerk e zis pou fer rapel Lasanble e piblik an zeneral pa zis bann Manm Glacis ki la, ki sa i vedir ki evantyelman Minis Finans, Komers e Planifikasyon Ekonomik Dr Larose i pou bezwen vin devan Lasanble pou prezant Bidze.  Sanmenm sa ki nou’n apel… sa ki Clerk fek lir The Appropriation Bill 2018, Bill No. 1 of 2017 e sa i pou ganny fer Mardi le 31 Oktob.  Savedir prosennman avan lafen-di-mwan i a ganny fer epi i a donn nou en sans pandan mwan Novanm pou nou diskit lo Bidze.  En fason ki nou… parey nou ti fer lannen pase, depouy li me lavantaz se ki nou’n aprann ek nou legzersis lannen pase, sa lannen nou pe konmans fer li boner ki nou’n an fini fer li byen, enterakte avek tou bann Sef bann Departman, bann Minister, bann Antite, e ki ler nwel i vini, peryod nwel ek lannen i vini, nou ava’n fini avek sa pou nou kontiny ek lezot keksoz.  Alors sa i zis pou lenformasyon.  Avek sa lot kestyon… lo item lo nou Order Paper se kestyon, Questions For Oral Answers e Clerk eski Minis pou Lenerzi, Lanvironnman ek Sanzman Klima i la? Wi, nou kapab apel li silvouple ? E nou a demann Onorab Sophola ek Onorab Aglae pou met zot pare pou zot kestyon ler Minis i antre. Actually i annan plis ki sa 2, i annan osi Onorab Ernesta ek Onorab John Hoareau, ou osi ou annan en kestyon pou Minis Dogley.  Bon lo lapar Lasanble Nasyonal, mon ti a kontan swet premyerman a very good morning, bonzour e labyenveni Minis Dogley, Minis Didier Dogley dan Lasanble.  Minis Dogley parey zot konnen i Minis pou Lanvironnman, Lenerzi ek Sanzman Klima e i ganny akonpannyen par son PS pou Lenerzi ek Sanzman Klima, se Mr Wills Agricole ki zot konn li, Mr Philippe Morin i en figir byen koni dan Lasanble i CEO pou PUC – apre nou annan Msye Michel Vielle ki CEO LWMA, e osi nou annan en zenn profesyonnel Mr Mangroo, Msye Raoul Mangroo ki Procurement Manager at LWMA.  Alor byenveni, swaye alez e nou al toudswit lo nou premye kestyon pou Minis Dogley e nou a demann Onorab Noline Sophola pou poz son kestyon.

 

HON NOLINE SOPHOLA

Mersi Mr Speaker.  Bonzour tou Manm Onorab. Bonzour Minis avek ou delegasyon.  Mersi tou dimoun ki la prezan ozordi, bann zanfan e bann dimoun aze e osi tou dimoun ki a lekout.  Mr Speaker mon kestyon i comme swivan; eski Minis i kapab partaz avek nou Lasanble, staz ki lenplimantasyon Master Plan lo drenaz lo La Digue in arive ?  Ki difikilte ki son Minister pe rankontre e ki solisyon zot pe anvizaze pour rezoud sa problenm en fwa pour tou? Mersi.

 

MR SPEAKER

Minis Dogley.

 

MINISTER DIDIER DOGLEY

Mersi Mr Speaker.  Bonzour Mr Speaker, bann Onorab dan Lasanble e osi bann zanfan, zot teachers ek bann dimoun aze Glacis ki ek nou ozordi e osi tou bann dimoun ki a lekout dan lakour ouswa dan zot landrwa travay.  Mr Speaker, proze drenaz lo La Digue i ankor pe kontinyen anliny avek sa Master Plan ki ti ganny met an plas par National Drainage Taskforce. Sa Drainage Master Plan i konpri en seri proze… 32 an tou ki’n ganny idantifye lo La Digue apre bann resers e letid ti ganny fer apre movetan Felleng Sa Drainage Master Plan i an 3 faz. Faz 1 dan sa 32 proze, 8 proze in fini ganny enplimante.  Sa i konpri konstriksyon bann pon e drenaz mazer lo semen prensipal La Digue ki enkli enn; pon e drenaz La Passe, pon e drenaz L’Union Estate, kot Stasyon Lapolis, drenaz kot restoran Fish Trap, drenaz kot Ladministrasyon Distrik, pon kot semen Land Fill, elarzisman Lanmar Soupap Faz 1, e elarzisman Lanmar Soupap Faz 2.  Faz 2, sa Drainage Master Plan i konpri en seri proze drenaz e pon segonder ki pou ganny konstri depi La Passe ziska L’Union, kot sa bann landrwa swivan, 1; kot STC, 2; kot Chez Marston, 3; kot La Digue Lodge dan Kannal, 4; kot semen Veuve Reserve ek lekol, 5; kot pti lotel Rabadya, 6; kot Heli-pad, 7; kot semen Boul de Nez, 8; kot Pension Fund son vye biro ti ete e 9 ; kot ex-Shell ouswa Petrol Station.  Sa bann drenaz e pon segonder i bann striktir ki pou konekte avek bann pli pti drenaz ki pou tir delo lapli dan bann landrwa rezidansyel.  Dan sa 9 drenaz e pon segonder ki’n ganny reste, pou ganny konstri, 5 pou posibleman konmans ganny konstri boner lannen prosen, zot pe ganny finanse par proze Global Climate Change Alliance plus, en linisyativ L’Union Européen.  Nou estimate zot pou kout anviron R5.3 milyon.  Sa bann proze ki… sa 5 proze ki nou’n plan pou enplimante anba sa finansman, i sa drenaz kot Chez Marston, kot La Digue Lodge dan Kannal, kot semen Veuve Reserve ek lekol, kot Rabadya e kot Heli-pad.  An plis ki sa anba sa finansman Global Climate Change Alliance Plus i annan en konponan resers e letid pou zone kotyer lo La Digue.  Vi ki serten sa bann letid in fini ganny fer par lezot Lorganizasyon parey Japanese International Coorperation Agency, JICA, Gouvernman in demann L’Union Européen pou konsider transfer sa larzan apepre 5 milyon pou finans sa bann lezot proze drenaz anba Faz 2.  Dan Faz 3, sa Drainage Master Plan, bann proze pou konsantre lo konstriksyon bann dren lo bann semen segonder ki konekte avek bann landrwa rezidansyel, en pe partou lo plato La Digue.  An plis nou pou re fouy e elarzi Lanmar Soupap savedir enplimant Faz 3 e 4 e osi re fouy bann larivyer ki konekte avek Lanmar Soupap e Lanmar Saint Sauveur.  Faz 3 i konpri en seri drenaz dan sa bann landrwa swivan ; premye i kot St Ange Housing Estate, 2enm kot semen Boul de Nez, trwazyenm kot semen Waye-Hive, 4enm kot semen Tol sol, 5enm kot semen La Reserve e lekol Faz 2, 6enm kot semen Highway, 7enm kot semen Lavanniy, 8enm kot semen Koko Ibrid, 9enm kot semen Dan Kannal Bel, sa Faz 2, 10enm kot semen propriyete Mr Ernesta, 11enm kot semen Vilaz Kreol e 12enm kot semen Veuve Faz 3.  13enm re fouy e elarzi Lanmar Soupap depi pon Bill ziskan kot Pon Antoine e apre en 2enm Faz ki pou kontinyen sorti kot Pon Antoine ziska kot Mr Jimmy Melon. 15enm re fouy e elarzi Lanmar Anse Sévère ki bann dernyen proze ki nou pou fer.  An tou i espekte i pou kout anviron R19 milyon.  Difikilte ki nou’n gannyen Mr Speaker, i comme swivan ; premyerman kou sa bann proze i tre élevé, Minister pa pe kapab finans tou sa bann proze anba Bidze ki gannyen tou-le-z-an.  Sa i akoz sa bann striktir i ase gro e kou konstriksyon lo La Digue i osi tre élevé, sa i akoz tou bann materyo i bezwen ganny aste e transporte sorti Mahe e Praslin. Dezyenmman in osi annan serten retar pou ganny wayleave vi ki serten sa bann striktir i travers propriyete prive, e parfwa negosyasyon i pran en kantite akoz parfwa bann propriyeter pa dan pei. Trwazyenmman mouvman trafik lo semen in osi poz retar vi ki La Digue semen i etrwat e nou pa kapab ferm semen antye, akoz i pou afekte mouvman bann zabitan dan zot bann tranzaksyon toulezour e i difisil pou nou fer plis ki en proze lo sa bann semen a en fwa.  Katriyenmman ; parfwa osi i annan en mank materyo lo La Digue, sa i poz retar travay e travay i bezwen arete pou serten letan.  Mr Speaker, Minister pe rod plis finansman pou enplimant plis proze avek diferan Lorganizasyon parey GCCA+, Global Environmental Facility, Adaptation Fund an plis ki finansman ki Minister i gannyen anba son Bidze tou lez an.  Minister in rod soutyen lezot Lorganizasyon pou fer bann letid teknik ki bezwen ganny fer avan ban proze parey i kapab ganny enplimante.  Par egzanp WSP ki konmela i Winslow avek Dayer  Consultancy, en Lakonpannyen lokal ki ti fer en letid drenaz konman en donasyon.  Minister Responsab pour Habitat, Lenfrastriktir avek Transpor lo Later in ede avek bann Topo survey en pe partou lo La Digue. Global Environmental Facility, Intergrated Resource Management, eskiz mwan mon’n bezwen dir sa an Angle. Proze, en proze ki nou ti enplimante lo La Digue pou en don $500 mil in donn finansman pou fer letid lo Lanmar Soupap e lezot larivyer.  Dan lenplimantasyon bann proze Minister pe osi ganny lasistans e ekspertiz bann Lorganizasyon e Lazans parey Lazans responsab pou Transpor lo Later e Gouvernman Lokal.  Osi pou ede pou lenplimantasyon bann proze L’Union Estate pe ed Minister kot i konsern wayleave, zot ed nou idantifye bann propriyeter ki fer pou negosyasyon i al pli vit.  Minister pe osi lyez avek Ladministrasyon Distrik pou ki sa lyezon avek zabitan i mars bokou pli byen.  Se sa larepons pou sa bann kestyon, Mr Speaker.  Mersi bokou.

 

MR SPEAKER

Mersi Minis.  Onorab Sophola.

 

HON NOLINE SOPHOLA

Mersi Mr Speaker.  Minis en pwen tre valab ki ou’n touse se ki i montre ki ou pe travay an partenarya avek bann lezot Minister parey Land Transport e sa i tre byen akoz i ede pou akseler travay dan lakominote. Me mon pwen ki mon pou swiv se dan sa bann faz proze ki ou pe fer eski ou pe mazin osi pou met sirfas lo serten landrwa sa bann drenaz, akoz kot zot ete zot en pe an danze pou Lakominote. Mersi.

 

MR SPEAKER

Minis.

 

MINISTER DIDIER DOGLEY

Mr Speaker, wi definitivman.  Mon konnen poudir i annan plizyer sa bann drenaz pou le moman i pa kouver e en dimoun i kapab fer aksidan tonm dan sa bann drenaz. I en keksoz ki nou’n diskite entern-man pou gete ki mannyer ki nou pou kapab adres sa problenm kouver bann drenaz ouswa si nou met proteksyon tou dilon kot sa bann gran drenaz i ete. Pou le moman, nou priyorite se fer drenaz, tir delo lo plato La Digue e le moman ki nou a kapab raise ase larzan e si nou ganny ase larzan dan nou Bidze osi, nou a konmans met bann slab lo sa bann drenaz pou fer sir poudir dimoun pa tonm dan sa bann drenaz e ganny bann injury.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Bonzour Speaker. Bonzour Minis e bonzour tou bann dimoun ki la bann zanfan e bann dimoun Trwazyenm-Az e bonzour tou nou bann Manm. Mon kestyon Minis ou’n nonm detrwa non dan… detrwa non bann landrwa and mwan konman en dimoun La Digue, mon pa pe kapab konekte mwan avek sa bann non ki zot pe nonmen akoz i paret mwan sak fwa zot vin fer bann resers, mon pa konnen kote zot vin tir bann non, si zot vwar bann non avek bann dimoun ki la or zis mon pa konnen. Par egzanp ou’n nonm drenaz ki pou Kannal, La Digue Lodge. Be mwan mon konesans pou mwan lo Kannal se L’Union Estate kot nou pe dir Koko Ibrid.  And then lo sa lanmar i annan omwen 3 pon ki konekte sa bann lanmar e mon’n tann ou nonm zis 2, ou’n nonm Pon Bill avek Pon Antoine, mon pa konnen Pon Antoine kote i ete. Ou pa’n nonm Gran Pon ki L’Union ki konekte sa enn ki al anba dan lanbousir ki al devid Source D’Argent. Akoz parfwa zot fer bann fot ler zot fer bann resers zot pa kominik ek bann lokal ki la pou konn tou sa bann keksoz byen ki finalman apre tou sa bann keksoz i vin bann boulvers.  Mersi Minis.

 

MR SPEAKER

Minis.

 

MINISTER DIDIER DOGLEY

Mr Speaker, nou ava fer sir poudir nou zwenn ek bann dimoun La Digue pou fer sir nou ganny bann non egzakt, akoz ou konnen annan de ler dimoun i servi diferan non pou plizyer landrwa me nou, nou a fer sir poudir nou ganny sa bann non korek.  Sa ki enportan pou nou, se ki sa bann drenaz i ganny fer e problenm linondasyon La Digue i ganny adrese korekteman. Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Mon kestyon lo bann pon, ou’n nonm selman de pon, ou’n nonm Pon Bill ki Anse Reunion, i annan Pon Antoine mon pa konnen ki lekel ou pe mean apre and then i annan Gran Pon ki trouv L’Union Estate, me mon pa konnen sa Pon Antoine li menm li Pon ki desann kot Melon, La Passe.  Zis pou eklersi silvouple.  Akoz ou’n nonm selman 2, what about sa trwazyenm pon ki osi i konekte lo sa gran lanmar?  Mersi.

 

MR SPEAKER

Minis ou konn Pon Edouard, Pon François?

 

MINISTER DIDIER DOGLEY

Mr Speaker, mon krwar monn pou bezwen en pe led pou konn egzakteman sa bann diferan non egzakt.  Me solman parey mon’n dir ek Onorab, nou ava pran kontak e nou a fer sir poudir nou ganny li korek, pou fer sir nou adrese sa bann problenm drenaz lo La Digue korekteman.  Mersi Mr Speaker.

 

MR SPEAKER

Mersi Minis.  Onorab Valmont.

 

HON JUDE VALMONT

Bonzour Mr Speaker.  Mersi bokou.  Bonzour tou koleg Onorab.  Bonzour Minis e ou lekip e tou rezidan Glacis.  Mr Speaker, si ou permet mwan, mon pa pou demann en kestyon direkteman lo drenaz La Digue me selman lo drenaz an zeneral silvouple.  An zeneral, drenaz Master Plan, si ou permet mwan Mr Speaker…

 

MR SPEAKER

Order! Order! Order! Order! Order! Ou kestyon Onorab Valmont i drenaz an zeneral ki enkli La Digue tou?

 

HON JUDE VALMONT

Wi Mr Speaker.

 

MR SPEAKER

Ale poz ou kestyon.

 

HON JUDE VALMONT

Mersi bokou Mr Speaker.  Minis, mon ti a voudre demande an vi problenm Bidzeter ki zot annan, bann kontrent Bidzeter, mon ti a voudre demann Minis ki mannyer zot… si i kapab donn nou en leksplikasyon ki mannyer zot priyoritiz bann louvraz drenaz dan bann diferan distrik enkli La Digue. Mersi bokou.

 

MR SPEAKER

Minis.

 

MINISTER DIDIER DOGLEY

Mersi Mr Speaker. I annan sa ki apel en Drainage Taskforce ki ti ganny etabli depi ler ti annan sa problenm movetan Felleng e sa tim Drainage Taskforce i en tim dimoun ki sorti dan diferan Minister, Land Transport, Local Government, Minister Lanvironnman ek bann enzenyer ki travay ansanm.  I annan en travay ki’n ganny fer lo sa Drainage Master Plan depi sa lepok ler an 2013 i annan sa problenm e baze lo bann diferan letid epi zot revwar tou lez an lekel ki bann priyorite.  Savedir sa bann drenaz ki bezwen fer, in fini ganny etabli kote i ete an konsiltasyon avek distrik, depi sa detrwa lannen pase e an menm tan i annan bann revi ki kontinyen ganny fer.  E se la kot sa bann priyorite i ganny etabli. Mersi Mr Speaker.

 

MR SPEAKER

Ok.  Onorab Ferrari.

 

HON JEAN-FRANCOIS FERRARI

Mersi Mr Speaker. Mr Speaker, de kestyon silvouple. Premyerman, mon ti a kontan demann Minis sa bann pti drenaz ki in mansyonnen ki sipoze konekte avek bann pon pou degaz dan lanmer, dan delo sale.  Eski Minis i kapab eksplik nou akoz an Fevriye ler mon ti vizit La Digue ti annan bann rigol ti’n fouye partou otour lepok Eleksyon, zis avan Eleksyon sa bann rigol ti ganny fouye.  E la dernyen vizit La Digue avek Komite L’Union Estate, sa bann rigol oubyen sa bann drenaz pe ganny bouse, ok ? Sirtou la otour kot Mr Grégoire, son miray partou in ganny bouse.  Konmsi mon ti a kontan ki Minis ki Minis i kapab eksplik nou vi ki i pa ti Minis sa lepok me i ti PS, ki lozik i annan eski sa i form parti sa progranm Master Plan lo drenaz oubyen ti zis en gimmick politik? Konmsi pou nou konpran pou li pa ariv ankor sa bann keksoz koumsa.  E konbyen, eski Minis i kapab dir nou konbyen tou sa legzersis in kout nou?  Sa i mon premye kestyon.  Mon 2enm kestyon mon ti a kontan, mon’n vreman enterese tann Minis pe dir ki mannyer i annan en kantite proze zot pe sey, zot pe tap ladan pou zot anmenn nouvo sours finansman.  Mon ti a kontan demann Minis si i satisfe ki son Minister i annan sa kapasite teknik e an term human resource pou mobiliz… Pardon? Pou mobiliz fon pou sa bann proze drenaz La Digue? Mon anvi kapab konnen kekfwa Minis i ava eksplik nou, eski i annan sa bann resours?  Eski nou pe tap dan sa bann resours dan en fason efektiv, oubyen eski en bon pe nou pe mank sa loportinite ganny sa bann resours akoz nou annan serten limitasyon lo nou kapasite an term personnel teknik.  Mersi.

 

MR SPEAKER

Minis.

 

MINISTER DIDIER DOGLEY

Mersi Mr Speaker.  Premye kestyon pou bann drenaz ki’n ganny ouver ki pa’n ganny konstri avek konkret, personnelman mon napa vreman sa bann detay egzakteman kan i ti ganny fer e ki mannyer ti ganny fer.  Me solman mwan personnelman si pandan letan gro lapli nou vwar poudir i annan nesesite pou fer bann drenaz ki nou apel bann drenaz ouver avek later, pou tir delo e nou’n fer li pa zis La Digue, nou’n fer li dan plizyer lezot landrwa pou adres bann problenm imedya ki ler ou annan en problenm flooding ouswa inondasyon.  I napa nanryen mal avek fer bann drain later pou tir delo si i annan en problenm drenaz dan sa landrwa e ou napa sa full finansman pou ou fer en line drain avek konkret dan son fon.  Now kan sa bann ti ganny fer sa mon pa okouran parey ou’n dir, mon pa ti enplike sa lepok dan bann zafer drenaz later.  Me solman la pou le moman si i annan bann sirkonstans mon le refer resorti poudir wi, nou, nou fer li osi pou tir, konmsi kreol pou tir lasasen, pou degaz lasasen ler i annan bann problenm parey dan bann landrwa.  So ziske ler ki nou ganny finansman pou nou fer li dan en fason konkret.  Now 2enm keksoz, 2enm kestyon i annan pou fer avek resours imen, mon krwar tou Minister ti a voudre annan plis resours imen, sa i en keksoz ki kler e mobilizasyon fon i en gro problenm pa zis pou Sesel, i en gro problenm pou tou bann pti zil menm pou bann gran pei akoz i annan bann resours ki annan de ler i la ki avek bann pei ki, unless ki ou annan kontak ouswa bann Anbasader dan sa pei ki kapab zwe sa rol, rod sa lenformasyon anvoy kot ou, ou pa pou neseserman konnen ki pe arive.  E nou konman Minister Lanvironnman, nou pa travay nou tousel parey mon’n dir, nou travay avek tou bann lezot Lazans ki enplike avek bann zafer drenaz e osi avek UNDP ki enn bann Lazans enternasyonal ki nou travay avek – sirtou pou rod fon avek Global Environmental Facility avek GCF Green Climate Fund epi Adaptation Fund.  Alor i annan bann ki nou vize ki nou konnen i annan larzan kot zot e sa bann nou target zot.  E pou bann lezot i vre i annan de ler i annan bann fon me sa nou bezwen en pe plis sipor atraver nou bann reprezantan internationalement e osi atraver bann kontak ki nou annan avek bann lezot Lorganizasyon enternasyonal parey – e bann lezot Organizasyon Pti Zil.  Mersi Mr Speaker.

 

MR SPEAKER

Onorab Ferrari.

 

HON JEAN-FRANCOIS FERRARI

Wi, zis en pti klarifikasyon.  Mon ti a kontan Minis i kapab, akoz mon premye kestyon i pa ti… i en kestyon valab.  Mwan mon ti a kontan Minis i dir avek nou ler i annan okenn travay avek drenaz, ok, eski sa i spesifikman responsabilite son Minister e ki okenn dimoun, en Lotorite Sivil, en Lotorite politik i pa kapab zis vini avek en JCB, ok, e fouy drenaz avan Eleksyon apre rebous li apre Eleksyon? Konmsi ki Lotorite ki ou Minister Minis i annan pou fer ki sa bann keksoz i fer byen e ki pa kout pei larzan dan gaspiyaz ?  Sa ti mon kestyon. Mersi.

 

MR SPEAKER

Minis.

 

MINISTER DIDIER DOGLEY

Mr Speaker, drenaz i annan diferan Lazans ki enplike dan fer drenaz Sesel.  Bann main drainage, bann main koulwar, channel si ou le, sa i tonm anba Minister Lanvironnman.  Me solman parey mon’n dir parey Land Transport par egzanp, zot osi zot fer drenaz ki asosye avek zot semen si zot pe konstri semen i normal poudir ek sak semen ki ou fer ou met drenaz. Alors si Land Transport pe fer, ouswa Lotorite ki responsab pou Transpor lo Later pe fer semen zot osi zot enplike dan fer drenaz.  E kot Local Government i konsernen si zot pe fer bann pti proze dan distrik, zot osi zot enplike dan fer bann pti drenaz dan distrik.  E nou ganny bann sipor osi avek bann lezot enzenyer.  Mon sipoze sa in ed Mr Ferrari… Onorab Ferrari pou pli byen konpran sa sityasyon.  Mersi Mr Speaker.

 

MR SPEAKER

Mersi Minis.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker, mon kestyon pou Minis i lo Mater Plan drenaz ki bann similarite, bann defayans zot pe gannyen enkli lo lakot East of Mahe an relasyon ek La Digue osi parey menm.  Ki son relasyon drenaz avek sewage ki nou pe… sa urgency ki… i byen ki Mr Morin i la, an 2015 sa proze drenaz is a matter of urgency ki la a se moman zot pa ankor kapab fer li, ki son relasyon ki si i ariv ankor sa bann move flood, dan interview ki ti donnen SNA, ki zot osi zot pe fer pou fer sir ki ankor sa flooding ki ti arive dan East Coast of Mahe, Pointe Larue, Anse Aux Pins, Au Cap. Mersi.

 

MR SPEAKER

Minis.

 

MINISTER DIDIER DOGLEY

Mr Speaker, mon pa tro konpran sa lyen ant flooding e sewage.  Me solman si nou pe koz lo flooding ki ti arive ouswa inondasyon ki ti arive pandan letan movetan Felleng, sa depresyon ki ti arive an 2013, pou sa i annan en kantite lenvestisman ki pe fer.  E mon’n deza fer vizit avek ou menm ou Onorab, kot nou ale nou’n vwar kot bann travay pe ganny fer. Mon konnen ki tou dimoun i le, tou bann Onorab ti a voudre vwar plis proze pe ganny fer dan zot distrik respektif, me i annan en limitasyon finansman ki nou, nou bezwen parey mon’n fek reponn kestyon konsernan priyorite, nou bezwen sak finansman ki nou gannyen nou bezwen… sa tim si ou le, sa Drainage Taskforce a lafen i vin avek bann proze priyoriter, e finansman i ganny donnen pou sa bann proze ganny enplimante.  Mersi Mr Speaker.

 

MR SPEAKER

Onorab Pillay.

 

HON STEPHEN PILLAY

Mersi Mr Speaker.  Minis relasyon drainage ek sewage se Mr Morin menm ki ti fer mon…. Ou ti dir dan interview e li i ti, mon spesifye ki i ti dir, ‘‘Nou pa kapab esper sa Master Plan.’’ So mon pe demann ou ki proze sa priyorite ki ti pou donnen pou sa urgency sa sityasyon, ki progre zot in fer lo la parey Msye Morin ti dir an Avril 2015 avek SNA. I ti dir ‘‘Nou pa kapab esper sa Master Plan.’’ Be la nou pe koz lo sa Master Plan, ki proze, ki urgency zot pe mete si i ariv ankor sa flooding ki nou pa ganny sa menm sityasyon sewage monte dan lakaz dimoun partou. Mersi Mr Speaker.

 

MR SPEAKER

Minis.  Donn Minis en pe letan i en pti pe an deor kestyon ki Onorab Sophola in demande, me toudmenm i pertinan pou Les Mahe menm pa pou La Digue. Minis.

 

MINISTER DIDIER DOGLEY

Mersi Mr Speaker. Eski Onorab Pillay pe viz Pointe Larue ki msye… East Coast lo Mahe.

 

MR SPEAKER

Konmsi in mansyonn Pointe Larue, Anse Aux Pins ek Au Cap. Cascade, Onorab de Commarmond in azoute.

 

MINISTER DIDIER DOGLEY

Akoz menm Msye Morin pe ganny difikilte pou li lyez sa de kestyon akoz i annan 2 Master Plan ki nou’n koz lo la pandan sa bann dernyen mwan la.  I annan Master Plan pou sanitasyon ki sewage ; apre i annan Master Plan pou drenaz. Ki mannyer sa 2 i link nou pe ganny difikilte pou nou azout sa 2 ansanm.

 

MR SPEAKER

Parey i pe dir konmsi si mon’n konpran byen Minis, drenaz si i pa ganny fer, i annan flooding e i afekte sewage.  Enn i afekte lot. E mon vwar MNA Cascade, MNA Pointe Larue pe balans latet konmsi zot le en repons. Petet ou ti kapab diskit pli tar e anvoy en pe leklersisman lo la.

 

MINISTER DIDIER DOGLEY

Non, mon’n konpran Mr Speaker. Si ou a le permet. I kler aprezan.  I annan pou fer avek nivo delo anba later, water table.  Now si ou ganny en gro flooding definitivman sirtou dan bann landrwa plato par egzanp lo East Coast, Pointe Larue i enn bann landrwa ki kle e probableman osi Au Cap kot ou annan bann larivyer, ou annan bann lanmar, nivo delo dan plato i ase e ki arive se ki bann soakaway pa soak ler ou ganny bann inondasyon. Now definitivman se sa ki mon ti pe eksplike dernyen fwa osi ler mon ti vin dan Lasanble, ti pe koz lo Master Plan Sanitasyon, se k nou’n fini fer plan teknik pou adres sewer dan plato depi Pointe Au Sel ziska Brillant, plan in fini fer e PUC pe al fer en Donors Conference kot i pou envit bann Bailleur De Fonds,  bann dimoun ki finans sa bann kalite proze, tre byento pou nou kapab ganny finansman pou finans sa proze lo East Coast Mahe. Definitivman sa i pe ganny adrese e sa i ava ede pou redwir polisyon ler i annan gro lapli dan sa bann landrwa. Mersi Mr Speaker.

 

MR SPEAKER

Bann Onorab East Coast ou anvi konnen timeline kan sa Donors Conference pou ganny fer e kan zot ekspekte akoz gro lapli pe vini Minis.

 

MINISTER DIDIER DOGLEY

I le 14 Novanm, Mr Speaker.

 

MR SPEAKER

Savedir i pa lwen.  I lanmenm la o bor nou menm. Ok. Bon, mersi Minis pou sa leklersisman, nou a donn laparol Onorab Churchill Gill.

 

HON CHURCHILL GILL

Mersi Mr Speaker. Bonzour Minis avek ou delegasyon.  Bonzour tou Manm.  Mon annan 2 kestyon pou Minis. Minis in dir ki sa Master Plan pou sa drenaz i koup an 3 faz e pou benefis zabitan La Digue, mon ti a kontan konnen si Minis i annan en timeframe ki kan ki espekte sa konplete ki dimoun La Digue i a santi zot soulaze avek sa sityasyon drenaz.  Apre 2enm i sipoze annan en Sewage Santral pou La Digue, mon pe gete Minis si zot pe pran kont sa bann diferan drenaz ki pe ganny fer si zot pe pran kont bann serten koneksyon ki sa Sewage Santral pou bezwen konekte.  Mersi.

 

MR SPEAKER

Minis.

 

MINISTER DIDIER DOGLEY

Timeline se an 2019, nou le enplimant tou sa bann proze ki lo Drainage Master Plan.  Ankor parey mon’n dir pou depan anler lo finansman ki nou gannyen. Me solman mon krwar en keksoz ki nou bezwen konpran tre byen, se ki drenaz zanmen ou fini fer akoz plis i annan devlopman e lo plato La Digue, i annan en kantite devlopman ki pe arive ou pou bezwen pe kontinyelman pe fer semen e ler ou fer semen ou bezwen fer drenaz, e plis ou fer lakaz, ou bezwen fer drenaz. Epi i annan bann lanmar par egzanp Lanmar Soupap ki nou’n koze ek Anse Severe ki ou pou bezwen kontinyen desilt parey nou fer Mahe, kekfwa tou le 4 an, tou le 5an ou pou bezwen retournen ale al tir sa bann gravye, sa bann sediman ki’n ranpli sa bann lanmar.  Alor i pa en travay ki nou kapab dir an totalite 2019 i pou disparet, i pou’n fini ganny fer. Sa ki anler lo Master Plan lo plan se pou fini zot an 2019.  Me an vi ki i pou toultan annan devlopman ; an vi ki poudir bann lanmar pou toultan pe kontinyen pe ganny ranpli avek bann later e lapli pe kontinyen tonbe e avek bann sanzman klima, nou’n vwar ki’n arive dan Caraïbe partou, nou pa swete ki i ariv isi. Me nou’n vwar bann depresyon parey Felleng ki’n arive isi alor travay pou bezwen kontinyen, i pa en travay ki pou aret la.  E enn bann keksoz mon ti a voudre lev-e se ki ti fer en resers anba proze IWRM, kot nou ti vwar lo La Digue i annan en kantite lakaz ki napa flasher board avek dalo.  Mon krwar enn bann travay ki nou pou bezwen fer avek lo La Digue se fer sir poudir bann lakaz i annan flasher board avek zot dalo. E ki osi nou bezwen promot en progranm kot dimoun i met tank pou anmas delo lapli akoz si dimoun i kapab anmas sa premye gro lapli ki tonbe pou zot servi sa delo pou bann lezot aktivite, i pou ede pou redwir lakantite inondasyon ki i annan lo plato La Digue.  Well, pa zis La Digue dan tou Kominote akoz bann gro inondasyon ki’n arive se pandan bann peryod ler in annan lapli plis ki 100 milimet dan 24 erdtan.  Alors si sa premye gro kours lapli i kapab ganny anmase atraver bann sistenm Rain Water Harvesting ki la nou pe finanse anba bann donasyon ouswa bann finansman ki PUC pe donnen, sa osi pou ede redwir problenm inondasyon lo plato La Digue.  Mersi.

 

MR SPEAKER

Onorab Gill.  Wi.

 

HON CHURCHILL GILL

Minis ti annan 2 kestyon lot kestyon se sa proze drenaz… sorry, sa proze sewage ki sipoze fer.  Mon kestyon se si nou pe pran kont ler nou pe fer sa bann drenaz e sa bann diferan tiyo ki pou ganny pase, nou p bezwen fouy de fwa tousala i ganny kalkil ansanm en mannyer fer en sel ler i pe fer. Mersi.

 

MR SPEAKER

Minis.

 

MINISTER DIDIER DOGLEY

Mr Speaker, larepons i wi PUC I an kontak avek Drainage Taskforce pou fer sir zot adres sa bann issues e ki non pa enn pe fer en keksoz, lot pe vin deranze apre e proze i sipoze konmanse an Zanvye lannen prosen.

 

MR SPEAKER

Onorab Woodcock.

 

HON WAVEL WOODCOCK

Mersi Mr Speaker.  Bonzour Mr Speaker, Minis, koleg Onorab. Mr Speaker, pou konmanse mon a profit sa lokazyon pou pas mon senser kondoleans e senpati avek mon frer Onorab Churchill Gill e osi Simon Gill pou passing away of zot frer e fanmir Derrick Gill.  Mon kestyon – e osi de lapar bann zabitan Grand Anse Praslin, mon kestyon i comme swivan, mon pou al en pe lo laliny ki Onorab Valmont in koz lo la lo Master Plan lo drenaz Nasyonal, eski ou Minister i annan en Master Plan lo drenaz Nasyonal ki osi enkli Praslin sirtou Grand Anse Praslin ki osi inonde pandan sezon lapli, bann lakour, laferm, semen segonder i osi ganny inonde pandan sezon lapli sirtou pandan sezon lapli ki pe vini.  Mersi.

 

MR SPEAKER

Minis.

 

MINISTER DIDIER DOGLEY

Mr Speaker, Master Plan ki’n ganny devlope par sa taskforce i kouver tou le 3 zil Mahe, Praslin e La Digue.  Mersi Mr Speaker.

 

MR SPEAKER

Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour tou dimoun. Mr Speaker, mon ti a kontan demann Minis en kestyon an relasyon avek bann proze ki ganny fer lo La Digue kot in mansyonn bann kou ki en pe o.  Eski ou Minister ler i regard awarding oubyen i swiv awarding bann tender, zot pa regard kontrakter ki ganny sa proze pou asire ki sa kontrakter enn, i annan sa abilite pou fer sa proze.  E de, ki kalite monitoring zot annan an plas ki fer ki ler kontrakter i ganny sa proze, i konplet sa proze dan dele letan ki’n gannyen akoz baze lo serten komanter ki mon pe tande, i paret ki i annan sa problenm kot proze i reste undelivered pou tro bokou letan, e i pa within timeframe ki ti ganny set out.  Mersi Mr Speaker.

 

MR SPEAKER

Minis.

 

MINISTER DIDIER DOGLEY

Mr Speaker, Minister i swiv System Procurement Act ki’n ganny met an plas dan Gouvernman.  Tou bann proze ki annan pou fer lo Mahe, Praslin, La Digue i bezwen ganny tender, i bezwen pas atraver prosedir e apre ki en Komite in revwar bann bids ki’n antre, zot fer zot rekomandasyon e zot rekomandasyon i al kot Tender Board e Tender Board ki annan final desizyon lo lekel bann kontrakter ki ganny Kontra.  E menm dan lepase in annan bann sityasyon kot nou nou’n rekomande ki serten kontrakter akoz pou serten rezon ki’n annan problenm lo delivery, nou pa ti rekomande ki zot ganny kontra, Tender Board ti overrule nou bann rekomandasyon e ti donn kontra sa bann kontrakter.  E sa in fer ki par ler nou’n annan sa bann problenm, ki ou pe koz lo la.  Me solman desizyon final lekel ki ganny Kontra i pa avek Minister.  Mersi Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker. Prenant kont tou sa ki ou’n dir nou, ban limitasyon ki ou annan e lefe ki i annan Procurement Act ki nou swiv eksetera, eski ler zot pe prepar pou sa bann proze ki pe al ganny fer, zot pe regard en fason ki zot faz, zot fer diferan faz sa bann proze pou ki La Digue pa parey en perpetual construction site ki vin en lenkonvenyans pou bann Digwa me plito ki sa bann proze i ganny planifye e ganny rann avek Gouvernman, avek Lotorite konsernen dan en dele letan akseptab?  Mon pe dir sa Mr Speaker akoz mon’n vizit La Digue e mon’n vwar serten sirkonstans, serten proze pa neseserman pou ou Lazans i enkli lezot Lazans kot nou vwar poudir monitoring i pa a la oter e ki proze i pran tro bokou letan pou konplete e sa i poz en lenkonvenyan pou Lotorite lo distrik La Digue, akoz a plizyer repriz bann Lotorite i kontinyelman go back to bann Lazans konsernen pou sey rod en fason ki zot increase the monitoring ki zot fer.  E sa i enkli tou Agencies, LWMA e lezot ki tonm anba pa zis ou Minister me lezot Minister.  Mersi Mr Speaker.

 

MR SPEAKER

Minis.

 

MINISTER DIDIER DOGLEY

Mr Speaker, nou, nou sey fer nou mye pou monitor tou bann proze annefe mon zwenn avek sa tim ki enplimant tou bann proze lakot e bann proze drenaz tou le 14 zour pou mwan appraise mon lekor lo bann progre ki bann proze pe ganny fer.  E i vre dan lepase, la in amelyor en kantite pou le moman, i vre dan lepase nou’n gannyen sa bann difikilte me ler en kontrakter sirtou lo La Digue i pe dir i pe ganny problenm pou ganny materyo, i pe ganny problenm lo isi, problenm lo laba, i vin difisil pou nou apre kantmenm ou konnen e ou pe met presyon, i difisil pou ou kapab fer keksoz bouze. E parler si ou pou al vreman, ou pou al pran en desizyon drastik ki ou dir ou a tir sa kontrakter lo sa proze, ou a retourn kot Tender Board pou re-tender e ganny sa proze ganny enplimante par en lot Kontra, i pa neseserman toultan dan faver akoz ou annan en Bidze pou depanse sa lannen.  E si ou rekonmans a zero parler i byen posib ou pa pou fini net sa proze e toultan la pli par bann kontrakter zot dir ou, ‘‘wi, mon annan en pti problenm, mon pe degaze, mon pe al fer li deswit, pa trakase’’ whatever. Me solman i en problenm ki nou nou’n take it up avek Tender Board i en problenm ki kler, i en problenm ki egziste, ki kler e definitivman nou pou kontinyen sey fer mannyer ganny bann solisyon avek Tender Board.  Mersi Mr Speaker.

 

MR SPEAKER

Mersi Minis. Onorab Herminie ou annan en kestyon relye.

 

HON WILBERT HERMINIE

Mersi Mr Speaker. Bonzour Minis ek ou delegasyon. Minis ou ti kapab zis partaz ek Lasanble lekel bann kontrakter ki pe fer sa proze e konbyen sa 32 proze La Digue pe kout… an tou pou kout Gouvernman. Mersi.

 

MR SPEAKER

Minis.

 

MINISTER DIDIER DOGLEY

Mr Speaker, mon napa lalis kontrakter la me solman si Onorab Herminie i bezwen nou a pran nou ava anvoy kot li. An total dapre Bidze, mon vwar ki apepre 50 milyon nou pou bezwen pou fini enplimant tou sa bann proze ki lo sa Drainage Master Plan pou La Digue. Mersi Mr Speaker.

 

MR SPEAKER

Mersi Minis. Nou ava al toudswit lo kestyon limero 2 lo Order Paper pou ozordi e mon a demann toudswit Onorab Egbert Aglae pou prezant son kestyon.

 

HON EGBERT AGLAE

Mersi Mr Speaker. Bonzour Minis ek ou delegasyon. Bonzour tou Manm, tou dimoun ki dan Galeri e tou dimoun ki pe ekout nou. Minis mon kestyon i lir comme swivan ; eski Minis i kapab eksplik sa Lasanble, akoz ki sak fwa i annan gro lapli serten rezyon dan Port Glaud i bezwen sibir koupir delo pou plizyer erdtan, e ki mezir PUC pe pran pou rezourd sa sityasyon? Mersi.

 

MR SPEAKER

Minis.

 

MINISTER DIDIER DOGLEY

Mr Speaker, ler gro lapli i tonbe, bann matyer organik ek later rouz i desann partou dan bann larivyer e bann sistenm tretman enkli sa enn Port Glaud.  Bann filter i bezwen travay plis pou filtre sa delo e fer li vin pros.  Konsekaman zot kapasite pou fer filtrasyon i redwir, swa i fer ki PUC i bezwen netway zot pli souvan.  Savedir backwash pli souvan pou fer zot reganny zot abilite pou kontinyen netway delo. Dan serten sirkonstans kot lapli i tre for e delo i sal avek matyer organik avek later rouz, bann filters i bezwen ganny netwaye plis ki 5 fwa pandan lazournen.  Mr Speaker dan ka Port Glaud kot sa bann lakaz i sitye, zot pres ki lo menm lelevasyon avek rezervwar delo PUC e alors pandan ki bann netwayaz pe ganny fer lo filter presyon lo sistenm i kapab tonbe e supply delo kot sa bann dimoun i kapab ganny tanporerman afekte.  Mr Speaker, PUC pe met an plas serten mezir pou adres sa problenm dan sa landrwa tou dabor PUC in donn kontra en kontrakter pou met tiyo laponp e konstri en rezervwar dan en land bank par lao en Land Bank Belle Vue ki trouve par lao sa bann zabitan ki nou pe koz lo la.  E ler sa proze i ava konplete dan ver milye lannen prosenn, sa bann dimoun ki pe konplent lenteripsyon dan zot supply delo i ava vwar en gran amelyorasyon dan servis delo. Pou siport sa laranzman ki mon’n eksplike Mr Speaker, PUC in deza konstri en baraz bokou pli performan lo larivyer Lilet kot sa delo pe sorti.  I osi met en nouvo set filter an plas e PUC pe al donn Kontra pou konstri en nouvo rezervwar delo trete apepre 400 met kib kapasite pre avek Stasyon Tretman Port Glaud.  Ler tou sa bann proze i ava’n fini konplete lannen prosen, konsonmater dan Port Glaud e osi sa bann ki sitye dan sa landrwa ki nou’n koz lo la, pou vwar en amelyorasyon konsiderab dan zot servis delo.  Sa ki PUC pe al fer Mr Speaker, pou osi ed anvoy delo sirplis ki pou ganny anmase e trete dan lezot rezyon Was Mahe.  Mersi Mr Speaker. Ansanm tou sa bann proze i ekspekte kout PUC apepre R5 milyon.

 

MR SPEAKER

Onorab Egbert Aglae.

 

HON EGBERT AGLAE

Minis, mersi pou ou bann larepons. Mon annan 3 pti kestyon siplemanter.  Minis. Ou’n nonm amelyorasyon dan baraz Port Glaud kot Stasyon stokaz, mon prezimen ou pe koz Port Launay la e eski dan sa travay ki pou ganny fer pou amelyor bann distribisyon delo, si zot pe konsider lelevasyon sa stokaz delo, sa baraz sirtou ki mon konnen an se moman nou dan en lasesres me still i annan delo ki depase.  Dezyenmman i annan en proze ki PUC pe fer antreprann pou distribisyon delo ki pou al ver en stokaz anler lo oter Beolière.  Petet si ou ti kapab donn nou en pe detay e pou manm piblik osi ki sa proze pe fer e ki dele letan pou ganny konstri, pou fini e ki son kou ki pe kout PUC pou fer sa?  E dernyerman nou’n koz lo sityasyon la Foret Noire ki ou’n eklersi lo la, ki pou annan amelyorasyon mon kestyon lo la se ki sa laponp, i annan en laponp i ganny trouve Foret Noire, eski zot pe konsidere relocate sa laponp an vi ki i annan pa mal problenm sirtou ler i annan backwash, i afekte sa fanmir ki trouve anba sa semen, pou anpese ki i annan okenn problenm aksidan ki i arive zot lakaz sirtou.  Mersi.

 

MR SPEAKER

3 kestyon siplemanter.  Minis.

 

MINISTER DIDIER DOGLEY

Mersi Mr Speaker.  Baraz dan larivyer Port Launay, Larivyer L’Ilet, i fek refer annefe in ganny raise mon’n ganny dir ziska apepre 2 met oter avan i ti zis en pti baraz la ti’n fer zot vreman en baraz ki bokou pli performan.  Alors sa in fini ganny adrese. Konsernan Beoliere i pa pou direkteman pou fer avek Port Glaud, i annan ki pou plizoumwen pou fer pou pran delo pou sorti L’Ilet, ek Port Glaud pou anvoy lo was Mahe e sa bann sistenm pe ganny amelyore, i deza pe fonksyonnen me i pe ganny amelyore pou kapab anvoy plis delo ziska dan sid Mahe pou fer sir dimoun i ganny delo dan sa bann landrwa. Konsernan sa laponp Foret Noire, i en keksoz ki PUC i ava… i pa ti okouran me konman nou’n tande la nou ava fer sir poudir PUC i follow up e vwar ki mannyer i kapab adres sa problenm ki ou pe koz lo la spesifik. Konsernan rezervwar PUC parey mon’n sir pe fer en dezyenm rezervwar anler par lao sa Land Bank Belle Vue ki li apre i pou pran delo i pou supply antye dan bann Kominote par anba zot e sa i sipoze ganny komanse tre byento. Kontra in fini donn kontrakter.  Mersi Mr Speaker.

 

MR SPEAKER

Onorab Aglae, ou ok ?  Wi.

 

HON EGBERT AGLAE

Petet mon ti a sizere Minis atraver PUC, si nou ti kapab inisye kantmenm en vizit dan serten lokasyon sirtou sa enn Port Launay petet nou ava pli azour, nou pli konpran sa ki nou pe koz lo la.  Mersi Minis.

 

MR SPEAKER

Minis.

 

MINISTER DIDIER DOGLEY

Mr Speaker, wi, nenport moman nou kapab organize nou ava ale ansanm.  Mersi Mr Speaker.

 

MR SPEAKER

Ok. Mersi Minis.  Onorab William.

 

HON WAVEN WILLIAM

Mersi Mr Speaker.  Bonzour Minis avek ou lekip. Bonzour tou bann dimoun e zanfan ki dan Galeri. Mr Speaker, lefe ki i annan sa interconnectedness avek Grand Anse, Beolière, Port Glaud, mon ti a kontan si Minis ti kapab donn nou en garanti ki vreman sa proze 5milyon, an menm tan la mon pe refer avek deza baraz Grand Anse Mahe kot nou eksperyans menm problenm?  Eski sa proze pou rezourd sa problenm. E eski serten travay par egzanp met bann tanmi pou avan ki i ariv lo the main baraz pa kapab ganny mete an menm tan sa desilting i fer pli avan. Eski Minis i kapab donn nou en pti pe detay lo la.  E Minis an menm tan si ou kapab konfirmen si delo pe ganny ponpe sorti Beolière Grand Anse pou al Anse Royale. Mersi. Lefe ki nou pe eksperyans en pti pe problenm mank delo.  Mersi.

 

MR SPEAKER

Minis.

 

MINISTER DIDIER DOGLEY

Mr Speaker, sa bann proze ki pe ganny fer par PUC se senpleman pou amelyor sistenm akoz nou konnen poudir ler i annan bann enteripsyon parey i annan bann gro lapli mon’n eksplike difikilte ki PUC i gannyen.  I annan pou fer avek gravite, kantite delo ki ou annan dan bann tenk ki kapab, delo i kapab flow par gravite pou al kot sa bann dimoun.  Akoz ler gro lapli i tonbe PUC la vreman i napa sa full kontrol lo lakantite sediman, avek bann materyo brit ki sorti dan larivyer ki desann.  Alor i pou bezwen netway sa delo ziska i ariv en nivo ki li i kapab supply dimoun e i bezwen fer sa bann backwash.  I neseser pou li fer li e se pandan sa peryod ki zot ganny sa bann problenm. Alor sel fason se pou fer bann tenk ki bokou pli gro, pli performan, ki at least i ava annan bann pli gro stokaz delo trete ki deza dan tenk ki a redwir sa problenm koupir delo pandan letan zot pe fer backwash lo sistenm. Se sa ki PUC pe sey adrese an fezan sa bann diferan tenk Port Glaud e Beolière pou kapab anvoy delo kot bann lakour dimoun. E 2enm keksoz se wi, PUC pe pran delo sorti Grand Anse ki i anvoy Beolière apre i ganny supply ziska dan sid Mahe.  Akoz parey mon’n deza dir isi dan Lasanble dan sid Mahe napa bann gran larivyer parey i annan dan was Mahe e nou bezwen transfer delo sorti dan Was Mahe pou anvoy dan Sid pou fer sir dimoun osi laba dan Sid i ganny delo. Mersi.

 

MR SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Speaker. Bonzour tou dimoun. Kestyon ki mon ti ava kontan demann Minis se konbyen letan ki PUC i okouran sa problenm ki’n ganny soulinyen dan kestyon orizinal?  Ki PUC in fer pou eksplik son bann kliyan poudir vwala problenm e vwala ki nou pe fer, ki ti ava evite sa kestyon i ariv dan Lasanble Nasyonal.  E trwazyenmman, konbyen dimoun ki ganny afekte par sa problenm ki zistifye en lenvestisman apepre R5 milyon? Mersi bokou.

 

MR SPEAKER

Minis.

 

MINISTER DIDIER DOGLEY

Mr Speaker, mon krwar si nou lir zournal, napa en zour ki PUC pa dan zournal ek lo radyo e Mr Morin in eksplik mwan osi poudir zot ale dan distrik, zot koze avek dimoun ler i annan bann sityasyon parey e sirtou zot an kontak avek DA Office pou fer sir zot pas lenformasyon pli mye posib.  Kwa ki PUC in fer, i sanmenm sa bann proze ki PUC pe fer la konmela akoz i bann gro lenvestisman, ou bezwen plan li byen e i en bann louvraz teknik ki ou bezwen regard byen ki mannyer ou pe fer.  E parfwa par egzanp sa tenk ki pe mete par lao sa land bank pou bezwen annan bann semen. Par egzanp pou al fer baraz Larivyer L’Ilet, i napa en semen loto zot bezwen planifye li ki mannyer pou anmenn materyo laba, ki mannyer ou pou al build akoz ou bezwen al bokou pli o pou ou kapab ganny sa gravite pou supply sa delo bann gran zistans.  Alor i  bann travay ki pe ganny fer, i bann travay ki tre teknik ki tre konplike e parfwa i annan bann kondisyon ki pa sitan favorab e bann travay pe ganny fer.  E lakantite dimoun ki pou benefisye vreman ek sa tenk delo parey mon’n dir i pa zis bann dimoun Port Glaud, i dimoun Grand Anse ziska menm Pointe Larue delo pou arive, Anse Royale, dan Sid partou. Akoz delo ki sorti dan les Mahe i supply all the way Anse Boileau apre i reganny distribye atraver Santa Maria ek bann lezot landrwa ankor. Kot dan Sid napa bann gran larivyer parey Was Mahe. Mersi Mr Speaker.

 

MR SPEAKER

Onorab Henrie.

 

HON GERVAIS HENRIE

Mon premye kestyon sete konbyen PUC i okouran sa problenm, ki finalman nou’n vwar MNA Port Glaud in bezwen anmenn sa kestyon dan Lasanble Nasyonal.  Konbyen letan zot okouran ki sa i egziste. Mersi.

 

MR SPEAKER

Minis.

 

MINISTER DIDIER DOGLEY

Well dapre Msye Morin i annan apepre 1an ki zot okouran i annan sa problenm laba Port Glaud e zot in fer le neseser pou adres.

 

MR SPEAKER

Onorab Esparon.

 

HON REGINA ESPARON

Mersi Mr Speaker. Mon ti a kontan swet labyenveni bann sitwayen Glacis ki anler dan  Galeri.  E mon kestyon i koumsa Mr Speaker.  Eski Minis i kapab dir nou an vi ki Onorab Aglae in fer nou konpran ki malgre ki i annan rezervwar bann delo i ankor pe devid dan lanmer.  E proksimite distrik Port Glaud avek Grand Anse, eski Minis i kapab dir nou si son Minister pe pouse pou ki sa proze danm dan distrik Grand Anse i demare pou ki i a benefisye zabitan Port Glaud e lezot zabitan dan bann distrik dan zalantour.  Mersi Mr Speaker.

 

MR SPEAKER

Minis. Danm dan Grand Anse.

 

MINISTER DIDIER DOGLEY

Danm lo Grand Anse, Msye Morin fek enform mwan i ti pe fer demars pou ganny finansman e in arive ganny li $1 milyon avek African Water Facility pou fer bann letid neseser pou kapab design sa danm.  Alor i annan en pe travay ki pou ganny fer finansman in fini gannyen pou bann travay design in konmanse, e menm bann geo-technical information ki bezwen ganny fer pou design sa soz. Konsernan delo ki al dan larivyer PUC pa kapab bar tou delo dan larivyer akoz i pou detri ou bann biodiversite ki reste dan bann larivyer par anba.  Alor PUC li sa ki i fer i tir lakantite delo ki li i bezwen san ki li i detri lanvironnman asosye avek larivyer an zeneral.  Mersi Mr Speaker.

 

MR SPEAKER

Onorab Esparon.

 

HON REGINA ESPARON

Mersi Mr Speaker Eski Minis i kapab dir nou si zot annan en prozeksyon konbyen sa danm pou koute silvouple?  Mersi.

 

MR SPEAKER

Minis.

 

MINISTER DIDIER DOGLEY

Mr Speaker, i apepre R1 bilyon dapre bann estimasyon ki PUC in fer.

 

MR SPEAKER

Onorab William.

 

HON WAVEN WILLIAM

Mersi Mr Speaker pou permet mwan demann sa kestyon. Minis si mon ti anvi ganny en pti pe leklersisman. Mon rapel letan Mr Rousseau ti pe travay avek PUC ti annan en bon travay ti’n ganny fer lo sa proze, swadizan proze Danm Grand Anse Mahe mwan mon anvi konnen ki’n arive tou sa bann travay? La Minis ou pe dir nou poudir zot pe al fer en letid pou design. Konmsi ki’n arive avek tou sa bann travay ki’n ganny fer?  Eski sa plan i nepli valab? Mersi.

 

MR SPEAKER

Minis, plan teknik rafal lannen ’80, ’90.

 

MINISTER DIDIER DOGLEY

Bann travay ki’n ganny fer Mr Speaker, ti bann travay lo nivo konsep.  Apre ti annan bann letid osi ki apre ti ganny fer pou regard baz sa landrwa kot pou met sa danm.  Me la prezan parey mon ti deza eksplike ler ou bann proze sa groser, ler ou’n fer ou concept design apre ou annan en lot travay ou bezwen al fer.  Sa se bann plan teknik kot ou al an detay …. Ek ou bann final design ki ou bezwen fer.  E savedir sa milyon ki mon pe koz lo la, Dolar ki PUC i gannyen se egzakteman pou al adres sa technical, sa final technical plan avek son design ki mannyer sa danm pou ganny built.  Alor travay ki’n ganny fer dan lepase, pa’n ganny rezete i form par dan prosesis pou build sa danm a lafen Mr Speaker.

 

MR SPEAKER

Onorab William.

 

HON WAVEN WILLIAM

Mersi Mr Speaker.  Mr Speaker, mwan mon ti a kontan ki Minis avek son lekip i pran sa ki mon pe al dir avek en fason pozitiv. Lefe ki sa proze Danm pou ankour pou ganny fer, mon ti ava demann Minis ek son lekip pou konsidere ki zot sekiriz sa sit kot sa Danm, e ki okenn bann lezot devlopman ki zot lyez avek bann lezot Minister ki enn, letan sa proze pou pare ki pou napa lenterferans. Sa i tre enportan akoz i kapab swa kout pli ser kot ou bezwen deplas dimoun.  Konmsi i bon ki zot lyez avek bann Minister konsernan par egzanp MLUH pou fer sir ki enn bann later pa pe ganny vann ouswa lakaz pe al ganny fer ouswa laferm pa pe al ganny mete dan semen. Mersi bokou.

 

MR SPEAKER

En tre, tre bon pwen e menm mon ti ava azoute vi ki mon reste dan sa rezyon Was Mahe ki petet dimoun Grand Anse e zalantour i ganny en lide sa konsep ki ganny aksepte avan zot al dan detay teknik.  Minis.

 

MINISTER DIDIER DOGLEY

Mr Speaker, mon 100 poursan dakor avek sa ki’n ganny propoze e nou a demann PUC pou fer le neseser pou prezant sa konsep avek bann dimoun.  E osi nou ava pran kontak avek Minister responsab pou Lenfrastriktir avek Habitat, pou zot fer le neseser pou sa later dan sa landrwa pa ganny servi pou bann lezot aktivite.  Mersi Mr Speaker.

 

MR SPEAKER

Mersi Minis.  Nou annan en pti git letan nou kapab pran lot kestyon ki tre direk. Kestyon lo nou Order Paper limero 3 e nou a demann Onorab John Hoareau pou poz son kestyon.

 

HON JOHN HOAREAU

Mersi Mr Speaker.  Bonzour Mr Speaker. Bonzour Minis ek ou lekip. Bonzour tou Manm Onorab.  Bonzour tou dimoun ki a lekout.  Mon kestyon i koumsa Mr Speaker.  Eski Minis responsab pour Lanvironnman, Lenerzi ek Sanzman Klima, i kapab dir nou akoz ki PUC pa pe konsider dan limedya, pou konverti sa gran trou ki’n ganny fouye atraver loperasyon UCPS lo Ile du Suede, koman en rezervwar pou stokaz delo, ki a kapab deservi sirtou Les ek Sid Mahe. Mersi.

 

MR SPEAKER

Stokaz delo dou.  Wi.

 

HON JOHN HOAREAU

Delo dou.

 

MR SPEAKER

Wi Minis.

 

MINISTER DIDIER DOGLEY

Mersi Mr Speaker. Mr Speaker, PUC in deza konsider servi sa trou lo Ile du Suede pou stokaz delo pou fournir sa bann kliyan, san bann kliyan dan distrik Sid Mahe avek delo dou.  Sa trou i annan en potansyel konsiderab avek en kapasite stokaz ki 6 fwa Danm Rochons.  Sa i vedir apepre 300 mil met kib delo.  Me SCAA ouswa Lotorite pou Sivil Lavyasyon pa’n zanmen an faver sa zafer. Pou zot sa trou i reprezant en danze pou Lavyasyon Sivil e zot plan se pou konble li.  Lenformasyon ki nou’n ganny donnen se ki si en avyon i al tonm dan sa trou ouswa i kapab koz en problenm aksidan lavyasyon isi Sesel. Menm si Lotorite Lavyasyon Sivil ti pou dakor, PUC pa ti pou kapab itiliz sa trou pou stokaz delo dan limedya pou plizyer rezon.  Premyerman, bann tes ki’n ganny fer lo sa kalite delo dan sa trou i montre ki i pirman delo sale alors okenn zefor pou transfer delo dan sa trou pou annan sa risk ki i pou ganny kontaminen avek delo sale e ki i pou fer li initil konman stokaz. Okenn lesey pou anpes delo sale penetre dan sa trou, i probableman pa pou fasil akoz i resanble ki delo sale pe kontinyelman antre atraver plizyer lezot landrwa.  Okenn fason pou sel sa bann trou i pou pran en kantite letan e bokou resours.  PUC pou bezwen ponp sa delo konpletman e i pa dir si okenn metod pou sel sa bann trou pou en sikse.  Dezyenmman sa landrwa napa en larivyer ki pou kapab kontinyelman ranpli sa trou avek delo dou.  Sel opsyon pou ranpli se atraver Larivyer Cascade.  Pou le moman napa en tiyo pou transfer sa delo dan sa trou. Sa i en lenvestisman ki pou bezwen ganny fer dan lefitir.  Trwazyenmman sa delo pou bezwen ganny ponpe, trete apre ganny distribye avek bann kliyan, savedir PUC pou bezwen al envesti dan en sistenm tretman delo osi dan sa landrwa.  Se sa larepons Mr Speaker.

 

MR SPEAKER

Onorab Hoareau.

 

HON JOHN HOAREAU

Mersi Mr Speaker.  Mr Speaker, mon premye kestyon se ki ler ou pe get sa larepons ki’n ganny donnen par SCAA, si an ka en avyon i arive al tonm dan sa trou, i posib osi ki avyon i riske tonm dan delo sale, so pou mwan i pa fer gran diferans. Sa kalite largiman pa tro tenir delo.  Me anfendkont Mr Speaker, mon anvi ki Minis i dir nou, dir sa Lasanble si okenn lenvestiser prive in apros son Minister pou fer en proze parey avek bi pou vann delo avek PUC e si i annan lespas pou en proze parey dan domenn prive?  E dezyenmman mon ti ava osi kontan demann Minis pou si i pa fezab ki sa bann trou ki dan sa basen li menm, i kapab ganny bouse avek konkret ki fer ki sa landrwa i vin konpletman enpermeab pou anpes delo sale antre ladan e sa trou i ganny servi konman en landrwa stokaz.  Mersi.

 

MR SPEAKER

Minis.

 

MINISTER DIDIER DOGLEY

Mr Speaker, PUC i an faver pou servi sa trou, i anvi servi sa trou ; problenm PUC i napa lotorizasyon pou antre lo teritwar Sivil Lavyasyon pou li al met delo kot propriyete ki pa pou li.  I bezwen permisyon sa Lotorite ki responsab pou sa landrwa.  Me pou le moman sa Lotorite in dir li, non, i pa ganny drwa servi sa trou.  Now 2enm keksoz se konsernan pou bous sa bann fracture dan sa trou kot delo i antre, i pou en travay ase konsiderab akoz ou bezwen fer en travay ki byen pou fer sir poudir, I mean si ou ganny permisyon ou bezwen fer sir ou either idantifye kote sa bann leak i ete kekfwa bann delo sale antre. Epi rod bann metod pli apropriye pou kapab anpes delo sale rantre.  E ki mannyer mon konpran i annan, ki paret i annan en kantite bann pri fractures ki ant bann mini, bann pli gran e sa. Vedir i annan en travay ase complex pou fer. 2enm keksoz ki ou’n nonmen se ki mannyer ki bann Lakonpannyen prive i kapab zwenn en rol dan supply delo.  Parey mon krwar nou tou nou konnen delo Sesel i tre subsidized isi.  I kout PUC apepre R20 pou prodwi delo atraver delo larivyer me selman pou premye 10 met kib dimoun pe pey zot apepre R5.70 par met kib ; ki vedir poudir delo i endirekteman pe ganny subsidize.  Now si en dimoun, si Gouvernman i deside demen pou, pa konnen, pey sa dimoun ladiferans ki PUC pe vann sa delo avek piblik, then i ava annan lespas pou prive antre.  Me en keksoz mon ti a voudre fer resorti se ki depi Me sa lannen nou’n antre dan en lasesres e ziska prezan PUC in kapab manage delo sa lannen.  E in ekspekte annefe nou tou nou pe esper Van Nor antre akoz nou ankor dan Van Swet pou regarde si nou kapab ganny lapli dan bann semenn ki pe vini akoz laplipar larivyer ozordi si ou al regarde i sek. Mersi Mr Speaker.

 

MR SPEAKER

Mersi Minis.  Mon krwar Onorab Hoareau ou satisfe vi ki i deza 10.30 e nou annan katriyenm kestyon i ase gran e mon krwar i pou ouver pou en pe diskisyon, mon a donn laparol avan nou adjourn Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, avek tou respe mwan sa bann larepons ki Minis in donn nou dan nou Lasanble konsernan sa kestyon, mon pa satisfe ditou. Mon anvi demann Minis detrwa kestyon pou li al reflesir lo la, al fer travay epi vin donn nou, rann nou kont dan Lasanble, lo sa issue sa trou an kestyon kot Airport ki nou’n vizite lotrozour letan nou ti al fer en vizit kot UCPS ti ete.  Now avan ti napa en trou la, i bezwen annan en Lotorite dan Sesel, Gouvernman, Airport, SCAA oubyen menm MLUH ki’n donn permisyon pou fouy sa trou.  Si napa, ou les fouye prezan ou bezwen pey larzan pou konble.  Nou, nou pa dakor avek sa nou Lasanble e nou krwar sa i devret ganny servi konman en danm, en rezervwar pou stock delo ki nou napa ki nou bezwen. E Minis i devret al fer en kont la pou dir nou konbyen pou arive pou konble back to sa ki Airport i anvi, SCAA?  Konbyen pou kote pou anmenn delo sorti larivyer Cascade atraver tiyo parey bann dimoun lo Providence Industrial Estate i servi bann Larivyer Cascade pou anmenn delo laba keksoz.  I kapab anmennen osi atraver en tiyo pou ranpli sa trou e an menm tan i kapab servi lining ki zot ti pou fer at one time, PUC i konnen li anba Brilliant, dan Lagon Brillliant ti annan en sistenm kot zot ti pou met en lining pou fer stokaz delo epi zot pa’n fer li.  Zot kapab servi menm metod ki kapab ganny servi pou bous whatever trou ki zot krwar i annan ki delo sale i kapab antre.  E an menm tan osi ki i enportan i fer nou konn son cost pou balanse pou vwar.  E prezan Gouvernman i bezwen deside li.  Sa trou i kot li, pou Gouvernman kot i ete laba, SCAA, PUC, MLUH, lot whoever alor Gouvernman i bezwen deside si i bezwen stokaz delo, i bezwen pran en desizyon.  Pa kapab tou sa letan li enn pe dir ou sa, lot pe dir ou sa prezan en desizyon pa ankor kapab ganny pran.  I bezwen pran en desizyon.  E prezan si danze i pou avyon akoz kekfwa sa trou i ouver, i open, i en kestyon olye zis konble li ou zis kapab kouver li, delo i ava la ou ava kouver li.  So mon pa vwar kote problenm i ete, ki mannyer sa ki pe ganny propoze atraver sa kestyon, pa kapab ganny fer e a en kou normal pou deservi popilasyon lo sa zafer delo ki nou vreman, vreman bezwen e la nou pe antre dan lasesres.  Mon ti ava kontan en keksoz i ganny fer konkretman ki nou Lasanble i ganny met okouran byen normal e desizyon Gouvernman bold enough i bezwen pran dan sa bann direksyon.  Mersi bokou.

 

MR SPEAKER

Ok e mon krwar paret mon’n dir nou’n ariv 10.30, me Minis ou annan letan pou pran en pti tas kafe avek nou an menm tan ou annan 30 minit pou esey reflesir ki ou pou fer avek sa trou.  E prezan nou ava vin nabou annan letan pou koz en kou avek nou bann dimoun sorti Glacis.  So nou ava envit zot tou pou pran en pause kafe enterakte avek bann zabitan Glacis e sirtou bann zenn ki la e nou a retournen 11er – Minis si i ok avek ou, akoz nou annan en repons pou Onorab De Commarmond apre nou annan en 4enm kestyon pou ou. Alor nou a pran en pause kafe nou a retournen 11er.

 

(BREAK)

 

MR SPEAKER

Bonn apre midi tou dimoun e tou dimoun ki pe ekout nou.  Parey mon’n dir bomaten mon krwar nou’n fer en pti sanzman dan nou, lo nou Order Paper e mon ti a kontan  pran Public Bill enn ki nou pou fer Dezyenm Reading e san plis tarde mon a demann Clerk pou nou envit Vis-Prezidan ek son PS ki pou prezant sa Bill.  E sa Bill i devan zot.  Zot annan en kopi i National Information Services Agency (Amendment), Bill 2017.  Zot devret annan en kopi devan zot.  I osi annan bann amannman ki mon krwar Komite ki mon krwar ki Onorab Georges i Chair ki’n sirkile.  Sa osi i devret devan zot pou zot regarde an konzonksyon avek son Bill ki’n pibliye.  Petet Attorney General si ou ti kapab vin en pe devan pou nou vwar ou byen vi, ou premye vizit mon krwar dan nou Lasanble komann Attorney General.  Asize, make yourself comfortable.  Mon  ti a kontan Vis-Prezidan remersye ou e swet ou labyenveni avek ou PS.  I ankor annan en plas pou ou lot zofisye pou vin zwenn ou devan.  E petet lo non tou bann manm Lasanble nou zwenn ansanm pou felisit Mr Ally since premye fwa i vin dan Lasanble ek son apwentman konman nouvo Attorney General.  Mon pa ti la ler ou ti ganny sworn-in pou mon felisit ou me mon sir bann Pralinois parmi nou mon vwar Onorab Hoareau ek Onorab Woodcock pe kontan riye vwar en lot Pralinwa ankor ki’n monte.  Alor felisitasyon e tou de byen dan ou louvraz.  Avek sa nou a konmans nou travay e byenveni zot tou.  Nou pou pran sa Bill parey mon’n dir lo National Information Services Agency e mon a donn laparol LGB.

 

HON CHARLES DE COMMARMOND

Mersi Mr Speaker.  Bon apre midi Mr Speaker, bon apre midi Vis-Prezidan avek ou delegasyon e tou dimoun ki a lekout.  Mr Speaker anba Order 64(2) nou Standing Order, mon oule move ki the National Information Services Agency (Amendment) Bill 2017 i ganny lir en Dezyenm Fwa.  Mersi.

 

MR SPEAKER

Segonde par –

 

HON BASIL HOAREAU

I second the Motion Mr Speaker.

 

MR SPEAKER

Mersi Onorab Basil Hoareau in segond the Motion.  E alor nou al toudswit nou a donn la laparol Vis-Prezidan Meriton pou li prezant Bill, the merits of the Bill.  Vis-Prezidan

 

VICE-PRESIDENT MR VINCENT MERITON

Mersi Mr Speaker.  Bonzour tou Manm Onorab e tou dimoun ki a lekout.  Mr Speaker mon pe anmenn lamannman Prozedlwa lo Lalwa ki konsern Lazans servis lenformasyon nasyonal NISA.  Sa Lazans komersyal Gouvernman ki son bi prensipal se prodiksyon, piblikasyon e lavant zournal NASYON.

Premye amannman Mr Speaker i pe fer provizyon pou formaliz pos Depite Sef Egzekitif.  Rol en Depit Sef Egzekitif se asiste Sef Egzekitif, fer nenport travay ki Sef Egzekitif i kapab donn li e apre ranplas Sef Egzekitif dan labsans Sef Egzekitif.  I enportan pou note Mr Speaker ki sa pozisyon ti egziste administivman depi 2014 malgre i pa ti formelman dan Lalwa NISA.

Dezyenmman nou pe rekomande ki la kantite Manm ki ganny apwente lo Board NISSA i ogmante sorti 5 pou vin 7 e sa pou enkli en Chairperson avek en Vis Chairperson.  Lapwentman pou sa 2 pozisyon setadir pou pos Chairperson avek Vis Chairperson pou ganny fer par Prezidan Larepiblik lo rekomandasyon Lotorite lo lapwentman Konstitisyonnel.  Mr Speaker fodre mon fer resorti ki NISA  pa enn sa bann Lorganizasyon parey SBC kot lapwentman Chairperson avek Vis-Chairperson i devret absoliman ganny fer par Lotorite lapwentman Konstitisyonnel.  Nou pe propoz sa lapros anliny avek nouvo fason fer keksoz pou nou kontinyen annan plis latransparans dan lapwentman bann Manm Board sirtou kot i konsern bann Lazans ki tous lenformasyon.  Anliny avek sa Prezidan pou osi apwent sa 5 lezot Manm propoze par bann lenstans swivan.  Lasosyasyon bann pratikan medya Sesel, biro Prokirer Zeneral, CEPS platform ki angaz bann sitwayen Sesel, Departman Lenformasyon avek Liniversite Sesel.  En lot provizyon ki nou oule azoute se dan en fason kler e met bann kriter ki kapab kalifye en endividi pou pozisyon Chairperson avek Vis-Chairperson.  I  osi liste bann kriter ki fer en endividi pa kalifye pou vin en Manm Board zis parey nou’n fer avek Lalwa SBC.

Trwazyenmman ; nou pe propoze ki lakantite letan ki en Manm i asiz lo  Board NISA i ogmante sorti 2 an pou vin 5 an.  Lamannman final Mr Speaker i tous lapwentman CEO avek Deputy CEO.  Se Board NISA – nou pe propoze ki se Board NISA ki pe responsab pou fer rekomandasyon avek Prezidan pou apwentman Sef Egzekitif e en Depite Sef Egzekitif.  Mersi Mr Speaker.

 

MR SPEAKER

Mersi Vis-Prezidan.  Prezan Manm i kapab fer okenn komanter, klarifikasyon, kestyon, sizesyon ki zot oule.  Avan nou donn laparol Onorab Georges pou koz lo bann amannman ki Bills Committee in propoze, petet si napa lezot komanter, Onorab Georges ou a prezant sa bann lamannman ki Bills Committee.

 

HON BERNARD GEORGES

Non, Mr speaker mon oule fer li taler, mon ti anvi koz lo merit avek ou permisyon.

 

MR SPEAKER

Tre byen. Go ahead, go ahead.

 

HON BERNARD GEORGES

Mersi Mr Speaker.  Mr Speaker mon ti a kontan avek ou permisyon zwenn ou apre midi e lo lapar nou bann koleg avoka dan sa Lasanble etan donnen ki mon premye pou pran laparol pou zwen ou pou felisit nou koleg Mr Frank Ally.  Mon mazinen la prezan ki la prezan nou kapab konmans apel Onorab Frank Ally akoz i Attorney Zeneral in mont en grad – pou son lapwentman.  E nou lo kote Lasanble nou mazinen ki nou ava interact avek li parey nou ti interact avek son predeseser.  E nou ava annan touzour sa bon lantant e nou ava travay ansanm pou bann proze Lalwa ki pe vin devan Lasanble, dan en fason ki parey i nou rol lo Bills Committee me osi sirtou konman en Lasanble pou pas bann meyer Lalwa ki nou kapab pou nou pei.  Mr Speaker lo NISA mon ti a kontan dir 2 pti mo.  Premye keksoz mon ti a – ki mon ti a kontan dir apre midi se mon pa konnen si e eskiz mwan bann dimoun ki responsab pou NISA mon pa konnen si i annan  touzour en rol pou NISA dan Sesel 2017.  Mon’n  lontan en dimoun ki’n krwar ki avek proliferasyon medya – sirtou medya ekri nou nepli bezwen konman en nasyon annan en zournal Seychelles Nation ki vin port parol Gouvernman.  Mon krwar ki nou’n ariv ler kot nou devret revwar sa, sa Lazans, son rol e son fonksyon dan nou pei, e al dan direksyon kot nou ava kapab liberaliz medya ankor en pe plis e les bann medya, bann media houses prive pran sa rol NISA oubyen zwenn avek NISA pour ki sa Lorganizasyon i ava, i ava  vin en pe pli otononm.  E menm a en serten nivo ki i pa pou  bezwen azir anba lebra Gouvernman at all.  Me se pa sa kestyon ki devan nou ozordi.  Sa se en deba pou en lot zour me mon ti swete fer sa propozisyon la bomaten.  E mon konpran, mon konpran ki bokou dimoun i aste NASYON pou bann adverts ki i annan ladan i en outlet kot bann post i ganny advertise.  Me mon krwar ki NISA i zis sa tousel i pa esansyel pou nou annan en tel Lorganizasyon.  Sa se bann keksoz  ki bann lezot zournal i kapab fer oubyen ki NASYON li menm anba en direksyon endepandan ti a kapab fer li.  Mon bezwen dir akoz se en kritik ki mon fer an prive.  Mon krwar i enportan pou mwan fer li an piblik ozordi, ki napa mon krwar pa ki i annan bokou zournal eskiz mwan pou dir ki osi sek ki zournal, zournal NASYON.  Zis ou regard son bann headlines pou ou vwar ki i pa en zournal ki la pou egey bann dimoun ki lir li, me i zis senpleman en zournal ki pe disimin lenformasyon.  Mon  pa dir ki pa devret, Gouvernman i devret disimin son lenformasyon pou  ariv a la prote piblik e se sa ki nou fer dan sa Lasanble ler nou live on air.  Me mon krwar ki i annan en meyer fason pou nou fer li e nou devret regard sa pou lepanouisman nou pei.  Antretan, an atandan sa  levennman, an atandan sa zour mon, mon  bezwen anmenn mon sipor pou sa bann lamannman ki pe ganny fer akoz tousala i al dan en bon direksyon.  Sa direksyon ki Vis-Prezidan in koz lo la.  Malgre ki mon pa vwar ki sa Lotorite i annan – ou sa Lazans plito, i annan son plas ozordi mon kontan vwar ki i pe evolye, i pe evolye dan e bon sans.  I pe al dan en bon direksyon kot pou annan mwens menmiz Gouvernman lo li e pou annan plis lekleraz, en pe plis louvertir e en pe plis divan ki antre dan sa lorganizasyon avek sa bann, avek sa bann lamannman ki devan nou ozordi.  Alor i kler ki lo mon kote mon pou siport sa bann lamannman.  Mr Speaker ou’n koz lo serten lamannman a sa bann  lamannman nou ava vwar sa taler e mon krwar ki grosso modo sa bann sanzman ki ganny met devan nou ozordi espesyalman lo lafason ki Board sa Lazans pou ganny swazir, i pou ganny swazir par plizyer Sekter ki pou nominate enn ou plizyer dimoun ki pou ganny apwente par Prezidan olye ki se Prezidan li menm li ki inisye sa aksyon mon krwar sa se en bon direksyon.  Mr Speaker avek sa detrwa parol mon ti a swete ki bann – Vis-Prezidan avek PS sa Departman ki ansarz sa Lazans i konpran byen lafason ki dan direksyon ki mon pe koze e  mon as an interim measure, dan en fason enterimer  mon krwar ki sa bann lamannman i merit ganny siporte en pe  apre midi.

Mersi bokou Mr Speaker.

 

MR SPEAKER

Mersi Onorab.  Onorab Ferrari.

 

HON JEAN-FRANCOIS FERRARI

Mersi Mr Speaker.  Bon apre midi tou dimoun.  Mon pa pou tro long me selman mon annan de pwen ki mon ti a kontan fer.  Mr Speaker mwan dan sa pti entervansyon mon pou sey fer fason divors de fonksyon ki NISA i annan de fonksyon prensipal setadir pibliy en zournal, pibliy en zournal kotidyen, e dezyenmman annan en enprim sa zournal, annan en printing press.  Mon santi ki konman en mwan menm konman en zournalis par leksperyans mon’n toultan obzekte lide ki Gouvernman i annan en zournal e ki i met deor lenformasyon akoz sa lenformasyon ki Gouvernman i annan tandans mete se en lenformasyon ki natirelman bias e ki e i servi, i servi lentere sa Gouvernman.  O kour bann lannen pase nou’n vwar ki Nasyon in evolye lantman ver en keksoz- en zournal en pti pe pli komersyal, me in toultan gard sa lide e ban Minis, presedan avan ou Vis-Prezidan bann Minis ki’n presed ou dan sa fonksyon,  responsab lenformasyon zot in  argimante souvan ki the Nation is the mouthpiece of Government.  Alor osi lontan ki nou pe koz lo en lide, lo en bezwen edikatif ki Gouvernman i bezwen en mwayen pou li disimin lenformasyon ki edik bann dimoun lo bann keksoz ki enportan sa mon napa problenm.  Me ler Gouvernman i bezwen en zournal pou fer konnen son Polisi, son bann vizyon sa bann  keksoz mon santi ki i pa telman apropriye akoz sa i kapab ganny fer dan en lot, par en lot mwayen me selman Onorab Georges in dir nou pe evolye e mon pare pou mwan viv avek en Nasyon ki’n sanze, ki’n ganny renouvle e ki pe vin – e ki pe – ki annan sa, ki pe aim pou plis lendepandans dan son content. Alors dan sa lespri mon krwar mon ava dakor avek Onorab Georges ki nou pe vwar li dan en lide tranzitwar.  An sa ki konsern lenprimri, mon kapab dir ki mon totalman kont akoz lenprimri i en biznes.  I en biznes e Gouvernman pa fer – Gouvernman pa bon lo fer biznes.  E Gouvernman i devret e sa se sa direksyon ki nou’n anvi pous gouvernman pou les Sekter prive fer biznes akoz i pli efikas.  Me la nou pe ganny demande pou nou de facto aprouve ver en morso Lalwa   ki anterin sa laspe NISA savedir sa laspe biznes.  I domaz akoz nou tou nou konnen akoz ki NISSA in vin- ki mannyer lapres NISA in ganny kree.  Gouvernman ti annan en lapres ki i ti vann avek Dr. Ramados ti ek PRINTEC e ti ok, ti  en lapres komersyal, Gouvernman ti ok pou travay avek en lapres komersyal me de ki Dr. Ramados ti deside pou li sanz son enklinasyon politik i ti nepli akseptab pou travay avek sa lapres alors Gouvernman in  bezwen anba Prezidan Michel in bezwen kree en lapres.  Gouvernman re kree en lapres Gouvernman ki nou ti annan deza.  Donk deza o depar son rezon det, son zistifikasyon pou sa lapres ti en move zistifikasyon.  Se pour sa ki mwan mon pran sa lokazyon ler mon koz on the merits of this Bill pou mwan dir ki mon ti ava swete ki dan bann lannen ki pe vini, dan sa travay ki sa Lasanble i fer, nou met an pratik sa ki nou dir nou krwar ladan pou les biznes ganny fer par businessman pou la senp rezon ki businessman i pli efikas ki Gouvernman.  Alors

Gouvernman – re kree en lapres Gouvernman ki nou ti annan deza.  Donk deza o depar son rezon det, son zistifikasyon pou sa lapres ti en move zistifikasyon.  Se pour sa ki mwan mon pran sa lokazyon ler mon koz on the merits of this Bill pou mwan dir ki mon ti ava swete ki dan bann lannen ki pe vini, dan sa travay ki sa Lasanble i fer, nou met an pratik sa ki nou dir nou krwar ladan pou les biznes ganny fer par businessman, pou la senp rezon ki businessman i pli efikas ki Gouvernman.  Alors pandan  sa detrwa lannen  ki pe vini mwan personnelman mon ava fer li mon devwar pou mwan swiv performans finansyel NISA, sirtou son kote sa dezyenm laspe ; setadir lenprimri pour gete si i annan en zistifikasyon pou li kapab kontinyen.  Akoz a-lafen mwan mon krwar poudir sa departman i devret ganny lese a bann dimoun i konn fer sa en pe pli byen.  Alors Mr Speaker sa ti sa 2 pwen ki mon ti anvi fer.  Mon pou siport sa lamannman ki devan nou akoz i al dan en bon direksyon e mon krwar ki Vis-Prezidan kekfwa ou devret pran sa mesaz konmkwa nou devret e pe pli bold, en pe pli brav, en pe pli determinen dan donn tou sa transparans e sa lendepandans ki Prezidan in dir, i ti a kontan vwar pou Sesel.  E mon ti a kontan ler ou pran laparol taler ou fer, ou dir nou en pe ki mannyer ou santi lo sa size.  Mersi Mr Speaker.

 

MR SPEAKER

Mersi Onorab.  Onorab Basil Hoareau.

 

HON BASIL HOAREAU

Mersi Mr Speaker.  Mr Speaker mon krwar lamannman ki pe ganny anmennen par sa Bill ki devan nou ozordi i dan bon direksyon, tou Manm in dakor avek sa.  Me avan ou al pli lwen lo la mon ti a kontan koz en pe lo sa ki Onorab Georges in koz en pe lo la.  In koz lo relevans NISA ozordi  dan nou sosyete.  Mon krwar  poudir NISA i plis ki nasyon,   Seychelles Nation.  Enn son bann fonksyon wi se pou donn lenformasyon  nou bann dimoun atraver Seychelles Nation me i plis ki sa.  I la pou fer sir ki dimoun i ganny met okouran ki pe arive, i vre ki i annan osi son –  enn son bann fonksyon ki i annan anba Lalwa ki i kapab fer bann – i kapab fer bann printing services e i kapab donn  sa printing services non selman Gouvernman me lezot Lorganizasyon.  Sa i dan Lalwa e Lalwa ki ti pase an 2010 Mr Speaker.  E mon krwar i enportan ki pou mwan Seychelles nation i enportan li.  I vre ki Onorab Georges in dir ki poudir i en pe petet ou pa vwar li i en pe sek, in servi sa mo sek pou dekrir bann lartik me petet akoz i pa pe rod bann keksoz kontroversyal.  Wi dimoun  i kontan letan i ouver newspaper i  vwar – ouswa son front page i e keksoz ki kontroversyal e vre sa i fer vann en newspaper parski en dimoun letan i al –  Onorab Henrie pou konn sa tre byen i pou konn sa pli byen ki mwan parske li i en editor en  newspaper e letan pou met en front page ki catchy ki en mannyer letan en dimoun i antre dan en landrwa dan en laboutik par egzanp i get sa tit e i anvi aste sa newspaper.  Me nasyon i pa sa, pa sa son bi.  Son bi se pou donn lenformasyon e nou bezwen admet.  Resaman i annan en improvment dan lartik NASYON. Petet vre dan lepase NASYON ti tant vreman to be pa ti obzektiv dan son bann lartik i ti plito pro-government me  ozordi nou vwar letan nou pou get en Seychelles Nation nou pou vwar poudir i annan e improuvent dan zot lartik dan le sans ki zot pli obzektif.  E mon krwar sa i en step in the right direction e devret kontinyelman ankouraz bann zournalis ki travay avek Seychelles Nation pou kontinyelman al dan sa direksyon.  E petet, e petet wi zot kapab vin en pti pe pli- demann en pe plis kestyon e al en pe pli in depth dan bann issues ki zot deal avek.  E annefe Mr Speaker mwan mon pou dir poudir sa ki NASYON pe fer i en obligasyon Gouvernman ki Gouvernman pe desarze an term lartik 28 (4) nou Konstitisyon.  28 (4) nou Konstitisyon i dir ou, ‘’the State recognizes the right of access by a public to information held by a public authority performing a Governmental function.’’  So  ki nou pe fer, ki Gouvernman pe fer aktyelman i pa zis dir ek sa dimoun ou kapab rod lenformasyon kot nou me atraver Nasyon nou pe desarz sa responsabilite.  Nou pa pe dir ou esper ou vin kot nou me nou pe anmenn sa lenformasyon kot ou e aktyelman pou mwan mon krwar poudir i enportan NASYON i desarz sa responsabilite parske i Gouvernman atraver NASYON ou pe desarz en responsabilite Konstitisyonnel ki annan lo li atraver lartik 28 (4) nou Konstitisyon.  E letan mon pou koz plis spesifikman lo bann lamannman nou’n koz lo sa bann Prensip transparency ek good governance e se sa ki nou vwar dan tou sa bann lamannman.  Dan sa bann  lamannman i pou nepli en sityasyon kot zis Prezidan ki deside lekel ki i pou apwente, me rather se ki Prezidan pou bezwen apwent bann dimoun ki’n ganny rekonmande avek li par en lot body par egzanp lo kote chairperson and Vice-Chairperson of other Board i pou bezwen apwent kandida ki’n ganny rekomande par CAA.  So CAA i la pou li vwar lekel dimoun ki kapab potansyelman ganny apwente dan sa bann pos e li Prezidan i pou bezwen swazir from sa bann kandida ki’n ganny donnen avek li.  Likewise sa 5 lezot Manm, se bann bodies spesifik ki pou fer zot rekomandasyon, donn kandida Prezidan  e Prezidan a apwente savedir i pou fer ki i annan plis latransparans e bonn gouvernans dan le sans ki pa zis Prezidan ki deside.  E sa ki enportan osi se ki bann Manm, Chairperson, Vice-Chairperson  i annan kriter ki bezwen ganny satisfer.  Savedir pa kit li a diskresyon en dimoun apre zis dir apwent nenport ki dimoun me i annan bann kriter, bann kalifikasyon ki sa bann Vice-Chairperson e Chairperson i bezwen meet.  E la Mr Speaker mon ti a kontan petet lans en lapel avek sa bann bodies ki annan drwa pou zot rekomann bann Manm avek Prezidan pour ki zot osi zot pran zot responsabilite.  Pou ki i enportan osi poudir letan zot rekomann bann – zot fer rekomandasyon, zot fer rekomandasyon, rekomann  bann dimoun  ki konpetan, ki pou kapab desarz sa responsabilite me non pa zis rekomann en dimoun  zis akoz pou en lezot rezon, ouswa en rezon personnel me rather fer li dan latransparans zot osi ki mannyer zot kapab donn Prezidan bann bon kandida ki i pou swazir.  E egalman nou vwar poudir kot i konsern the CEO ek Deputy CEO Prezidan ankor pa pou zis apwente me rather i pou bezwen apwente upon the reccommendation of the Board so i annan tou en, en, en sirkonstans, transparans e bonn gouvernans.  E mon krwar i keksoz ki nou pe vwar dan tou nou bann Lalwa.  I montre poudir pti a pti nou pe amann bann nou bann  Lalwa kot i konsern bann agencies bann statutory corporations bann statutory bodies pou fer ki zot vin pli endepandan, pli transparan e accountable to the people e sa i montre poudir en  real commitment de lapar Gouvernman du jour pou fer sir ki keksoz nou pa zis koz lo sa bann bon Prensip me sa bann Prensip i ganny met an pratik pou benefis pei.  Mersi Mr Speaker.

 

MR SPEAKER

Mersi Onorab.  Onorab Henrie.

 

HON GERVAIS HENRIE

Mersi Mr Speaker.  Bonn apre midi tou dimoun.  Mon lentervansyon mon ava pran kot Onorab Hoareau in terminen kot in koz lo sa bann bodies ki pou nominate sa bann Board Members.  An fet leta mon pran laparol apre midi Mr Speaker mwan mon en Manm egzekitif lasosyasyon Sesel – AMS ki pou enn sa bann, enn sa ban groupman ki pou nominate en – ki pou rekomann avek Prezidan en Board Member.  E mon krwar sa Onorab Hoareau in dir, i tre enportan parski dezorme nou pou vwar en nouvo Board NISA.  E sa bann amannman ki pe ganny propoze ozordi i fer ki NISA i pou swiv en pe sa striktir nouvo striktir gouvernans ki Gouvernman pe sey met an mars.  E mwan personnelman mon an faver sa bann sanzman akoz wi i anmenn latransparans e i en bon striktir gouvernans savedir nou bezwen ankouraze.  Prezan ban dimoun ki pou al pran, ki pou vin Board e ganny apwente konman CEO e Deputy.  Mon krwar zot pou bezwen realiz rol ki zot pou annan pou zwe dan sa nouvo Sesel e parmi sa bann rol i annan bann kestyon osi ki lev-e akoz sa.  Onorab Georges in koz lo la letan nou pe koz lenportans ouswa akoz i bezwen ankor annan en NISA.  Mwan mon ava dir poudir mon krwar i ankor annan e rol.  Sa lorganizasyon dan Sesel ozordi zis parey SBC akoz malgre medya pe ganny privatize parfwa the private media pa kapab  donn ase louvraz bann dimoun ki le vin zournalis ; akoz enn, nou reveni i pa sitan gran,  nou bezwen admet poudir Seselwa i pa en nasyon ki kontan lir konmsi ou vwar li tou le bomaten lo bis avek en zournal i prefere asiz lo Facbook  e al dan bann group lopinyon, me solman i annan en pti group e mon a ankouraz bann dimoun ki ankor pe aste zournal, kontinyen parske zot provide en livelyhood pou bokou dimoun.  Be solman pou retourn lo pwen ki nou pe fer NISA i enn sa bann Lenstitisyon ki donn loportinite bann zenn e i train zot pou demen zis parey SBC zot kapab then move dan private sector.  E NISA mwan mon ava dir in a way in en success story.  En success story akoz ozordi nou vwar i pa bezwen rely lo Bidze Gouvernman, i fer tre byen, selman mon ava admet poudir wi i annan en pti lapreferans; kot par egzanp i ganny en kantite advert prensipalman avek Gouvernman ki fer li fer tre byen.  Nou’n vwar dan son financial report lo Public Enterprise Monitoring Commission, i pibliye son rapor.  E savedir mon ti ava dir avek sa bann dimoun ki pou vin nouvo Manm Board NISA pa zis mazin poudir konmsi nou kontinyen fer plis, nou fer plis lo detriman bann stakeholders osi dan sa lendistri.  Ki mannyer zot kapab demen ede ki i annan whatever ki zot pe fer i ganny partaze.  Konmsi i annan en level playing field, akoz nou’n vwar dan lepase akoz Today in konplent en pti pe,  poudir li i pa gannyen petet serten advert e la ozordi kekfwa mon ti ava profite ki ou vwar si Gouvernman i annan en lanons enportan , en tender en keksoz, be bann zournal prive ki sorti dan Vandredi osi i merit gannyen i pa zis the National Daily, akoz at the end of the day nou konnen ozordi ki poudir i annan dimoun ki pa lir NASYON, i pa lir Today i lir zis Weekly.  I pa lir Weekly i lir zis Le Seychellois.  I pa lir le Seychellois i lir Lavwa.  Konmsi i annan sa – wi i annan en lot zournal ki apel Independent.  Mon ti’n oubliye i annan.  So mon prezan mon krwar ki i dwatet responsabilite sa Board la pou dir ki mannyer nou kapab ede ki sa, konmsi sa playing field la i vin nivo.  E NISA  i bezwen ankouraze par egzanp enn bann keksoz ki mon krwar NISA i merit fer e la mon pe koz direk avek bann dimoun ki demen ki pou  vin lo sa Board ki zot merit konsidere zot pey CSR.  E ozordi sa lasosyasyon zournalis ki egziste i pe seye fer en kantite pou train nou bann zournalis be kote nou ganny fon?  Be zot merit pe, pe re mete konmsi  ou re envestir dan sa sekter.  Ou bezwen re envestir dan sa sekter.  E pa zis NISA lezot ki fer, mwan mon zournal i pey membership.  AMS tou-le-z-an i pey pou son bann travayer i pey pou li konman en lorganizasyon.  E nou Konstitisyon i fer sa provizyon.  NASYON i bezwen kouraze.  NASYON i bezwen ankouraze li osi.  Tou son bann dimoun i vin Manm sa lasosyasyon, zot konman en lasosyasyon zot pey membership.  Apre ki mannyer zot osi zot kapab ede akoz zot annan resours imen.  Zot annan mwayen finansyel pou ede anmenn devlopman dan Sekter Medya.  Par egzanp mon note ki NISA i napa en paz lo Facebook landrwa kot dimoun i ganny nouvel pli vitman.  Be Today pe fer li.  Tele Sesel pe fer li.  Le Seychellois i fer li.  SBC in komans fer li la nou tann bann advert tou le swar dan SBC pe dir al lo paz face book konmsi i annan bann nouvo prodwi ki zot osi zot bezwen konmans mazinen sa Board letan i vini.  E Mr Speaker zot telman pe fer byen finansyerman ki zot pa pe bezwen larzan Bidze avek Gouvernman e en keksoz ki mwan mon’n koz lo la dan lepase se News Agency.  Prezan li kote i sitye dan sa nouvo klima medya ?   I ti en pet project State House e mwan mon krwar poudir i annan en Bidze ki vin dan Bidze nasyonal ki al pou News Agency – SNA.  Mon napa okenn problenm avek mon ban koleg ki travay laba me selman mwan mon ankor pe ankouraz Gouvernman pou reflesir seryezman pou enkorpor SNA avek NISANASYON i telman annan leksperyans ki prezan zot kapab konbin sa leksperyans avek News Agency ki ava annan son newspapaer apre  i ava annan li en online platform.  E lefe  ki i sipoze en News Agency e NISA i sipoze National Information Services Agency ou zis combine le de dezormen apepre R4 milyon i ganny save dan Bidze.  E NASYON sa larzan ki li i pe generate i re envestir dan News Agency i donn travay bann part-time writers, bann photographers, so mwan mon pe ankouraz Gouvernman e sa nouvo Board ki pe vini seryezman reflesi dan sa direksyon.  Napa personn ki pou perdi zot lanplwa e mon krwar zot pou fer sesel an fet en gro faver akoz 4 milyon i kapab ganny envestir dan en lot keksoz ki pei i en pe pli bezwen.  E alor avek sa de mo Mr Speaker, mon pou siport sa Bill ki devan nou akoz mon krwar wi i pe al dan bon direksyon dan bann bon lentansyon ki Sesel i annan konman en pei e mon sete ki i ava anmenn ankor zournalizm konman en Lendistri en pa devan.  Mersi bokou.

 

MR SPEAKER

Mersi Onorab.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker tre bref sa Prozedlwa ki devan nou i e bon prozedlwa, i pe anmenn modernizasyon, sanzman ki pou anmenn plis transparans e plis kapasite pou fer marse NISA dan en fason pli byen.  Si nou kapab dir NISA in la, in zwe en rol enportan dan medya, dan pas lenformasyon dan nou pei e NISA pou bezwen kontinyen la pou ankor en bon pe letan.  E mwan mon dir ki  NISA i bezwen osi kontinyen dir laverite e dir laverite, dir sa ki pe pase vreman dan pei dan en fason transparan, dan en fason onnet, transmet e enform sa ki Gouvernman pe fer dan sa fason a la popilasyon.  I bezwen kontinyen fer sa.  I en rol enportan ki mon krwar mwan ki napa okenn medya prive ki pou kapab zwe sa.  Ler ou get dan pei ozordi tou sa bann medya prive i en kote.  I en kote e zot bias, telman bias zot akont fransman en kantite keksoz ki pa korek.  E mwan mon krwar ki dan sa  sans la o pwennvi lenformasyon NISA i annan en rol enportan.  Sa nouvo Board li ki i pou fer i pou enhance ankor sa ki NISA pe fer e i  pou fer li pli byen e mon krwar i annan serten  ki’n koze avan mwan e ki’n dir bann keksoz ki enportan ki sa nouvo Board i pou revwar serten mankman ki annan e ki pou aranze.   E an menm tan nou vwar ki poudir dan tou pei i annan ekivalan NISA.  Tou pei dimoun i annan son zournal ki fer pase lenformasyon sa pei a son pep.  E se sa ki NISA li osi i bezwen fer i annan i apel bilten, i annan NASYON, i annan diferan non zot servi me i annan plizoumwen sa kalite rol e  kontrerman a bann lezot zournal parey mon’n dir, sa i enportan, i annan sa tandans onnet.  E osi i enportan  mon krwar en kantite zournalis dan nou pei ki’n fer byen e pe kontinyen fer byen in pas atraver NISA dan zot formasyon.  E dan sa konteks la mon krwar ki NISA i pou kontinyen zwe sa rol pou form bann zournalis e bann travayer medya an zeneral pou kontinyen – si oule dir donn nou pei sa bann kalite dimoun sa Board, nouvo Board la ki mon vwar pe ganny agrandi e rol – zot bezwen zwe en rol en pe pli byen.  E ki a fer ki sa Lekol Medya si oule, sa bann travayer, bann  zournalis i ava vreman pas atraver NISA e nou swete letan zot sorti la zot osi zot vin bann pli bon zournalis ki nou pep i bezwen akoz challenge ki la deor i pa parey sa ki ozordi, sa ki demen nou anvi nou zenn i anvi vwar laverite ; i anvi vwar plis transparans e se sa kalite zournalis ki NISA i bezwen focus lo la pou formen pou permet nou sosyete al pli devan.  Avek sa mon krwar nou bezwen siport sa Bill mon krwar sa Bill i bon e dan bann sanzman ki pe anmennen dan bann amannman taler a ganny propoze e mon krwar nou ava siporte pou fer ki nou avans devan avek sa Bill.  Mersi bokou Mr Speaker.

 

MR SPEAKER

Mersi Onorab.  Onorab Arrisol.

 

HON SANDY ARRISOL

Mersi Mr Speaker.  Bon apre midi Vis-Prezidan, bon apre midi tou dimoun.  Mr Speaker mwan osi mon pou aport mon sipor sa amannman ki Bill pe demande apre midi.  I annan en kantite keksoz ki’n ganny dir an sa ki konsern NISA me selman nou pou bezwen parey in ganny dir aksepte, rekonnet ki poudir nou tou dan en fason ou en lot pandan lazournen ler nou ris e NASYON pou nou gete ki i annan lo la i annan dimoun ki kontan gete, parske se la kot ou vwar si i annan en lavant later.  I annan dimoun ki’n bliy son limero BINGO se la ki i pou gete.  I annan dimoun i rod en nasyon pou le get bann vacancy ki annan dan pei e NASYON nou kapab dir in zwe en rol enportan pou nou tou konman Seselwa.  Me parey Onorab De Commarmond in dir poudir bann papye prive zot tant pou al zot say en sel kote e sa nou pou bezwen rekonnet, parske letan bann dimoun in ouver bann papye prive se akoz senpleman sete NASYON li osi ti pe say en sel kote alors sa ki’n fer ki bann lezot dimoun i’n ouver papye pou fer sir sa ki NASYON pa pibliye me zot, zot nobou sey fer dimoun parey Onorab Hoareau in fer nou rapel poudir dan Konstitisyon enportan ki ganny bann lenformasyon i ganny pase apropriye pou nou tou ganny bann lenformasyon.  Me zisteman Mr Speaker letan mon’n tann koz lo Board, mon krwar i pou enportan ki sa nouvo Board ki ava vini ava ede ki NASYON i ava annan en balans dan son lapros, dan son travay ki i pe fer.  E mon ti a kontan osi dir poudir letan nou pe koz lo NASYON NISA i annan – nou bezwen rekonnet poudir i annan en group travayer laba ki fer en travay kot NISA sa se en group lekip travayer Seselwa.   Nou pou bezwen rekonnet sa e parske mon krwar ti ava enportan ki Vis-Prezidan dan son kapasite ki ansarz lenformasyon, ou rann zot en pti vizit kekfwa dan bann vizit ki ou fer, koz ek zot en bann group dimoun formidab.  Devan lo resepsyon i annan en group bann madanm tre gentilles zot approchable, zot koz avek ou me selman mon krwar sa Board ki ava vini i ava enportan pou li vwar osi letan nou pe koz annan nouvo keksoz annan nouvo fason fer, fer keksoz byen i pou enportan osi pou sa Board ansanm avek Gouvernman e nou konman en Lasanble get bann travayer ki travay laba.  Mon’n aprann poudir i annan travayer ki sorti NASYON avan zot dir mwan ti tonm anba radyo Sesel dan lepase la apre in bouze in vin kot i été.  I annan dimoun  ki travay kot NASYON ki annan anviron 40 ekek lannen ki pe rann en servi laba.  Me letan parfwa ou koz ek li ou get son pay slip, letan ou get en dimoun ki’n travay 40 ekek lannen son saler ki i ti pe gannyen i R9700 par egzanp.  Me letan ou get kantite lannen servis ki li in donnen e la tou resaman zot ti ganny en pti logmantasyon ki mon krwar pou nou kontinyelman gete ansanm avek DPA ansanm avek Minister Lanplwa pou nou kapab gete ki mannyer sa bann dimoun ki travay kot NASYON zot kontinyelman donn sa bon servis ki zot pe donnen.  Sa i a fer ki bann lezot kondisyon par egzanp liniform, i annan bann drayver ki zot kondisyon avek bann lezot travayer pa parey.  E mon krwar i ava enportan ki dan sa lamannman ki nou pe fer ansanm avek Vis-Prezidan i ava enportan pou nou anmas tou sa bann – met tou ansanm dan en sel package rode ki mannyer nou kapab fer NASYON, letan parey Onorab Georges in dir Gouvernman ava konsidere si zot pou kit li la oubyen phase li out avek bann nouvo devlopman ki annan, sa Gouvernman a va deside.  E mon krwar i ava enportan pou nou fer sir ki bann travayer ki travay laba zot santi zot dan en latmosfer byen.  Zot konfortab e zot happy avek louvraz ki zot pe fer.  E mon ti a kontan fini lo sa not Mr Speaker sak fwa mon al kot NASYON mon mazin defen Fabiola.  En madanm byen aktiv ki ti kit nou detrwa semenn pase i en zabitan Cascade e nou de Onorab De Commarmond nou ti laba avek lafanmir.  Mwan mon ti ganny sans pas en pti kou dan letan lunch pou nou al rann en vizit lafanmir ; kot nou’n perdi en travayer ekselan.  En madanm toultan ki ti annan de joie de vive kontinyen kontan koze e i ti la touzour letan en kliyan devan pou li fer pase son pwennvi oubyen dir bann pti joke.  Alor mon swete Mr Speaker Vis-Prezidan avek sa bann  lamannman i a fer ki nou ava ankadre tou sa bann pti detay ki nou pe donnen pour ki si NISA i reste i kontinyen fer sa travay i kontinyen fer li byen e dan latransparans parey nou tou nou kontan pou koz lo la. Avek sa de pti mo sipor Mr Speaker mon ti a kontan donn sipor sa bann lamannman ki’n ganny fer dan sa Bill.  Mersi bokou.

 

MR SPEAKER

Mersi Onorab Arrisol.   Prezan eski nou ti a kontan pas lo bann lamannman avan ki nou donn laparol Vis-Prezidan Meriton pou li konklir?  Petet si wi nou ava donn laparol Onorab Georges ki Chair Bills Committee pou sa scrutiny  ki zot in fer.

 

HON BERNARD GEORGES

Mersi Mr Speaker.  Mr Speaker nou annan devan nou ozordi dan Lasanble en rapor ki scrutiny of Bills Committee in fer lo sa Prozedlwa ki devan nou.  Sa rapor in ganny fer anba Order 83 e pli partikilyerman 83 (4) e 83 (5) .  Mr Speaker sa rapor i an 2 morso.  Premyerman i rekomann avek Lasanble lakseptasyon sa Prozedlwa ki devan nou akoz i an konformite legal e dezyenmman i pe propoz 1, 2, 3, 4, 5, 6 lamannman a sa Prozedlwa apre midi.  Tou sa bann lamannman mon bezwen dir in deza ganny diskite avek Biro Vis-Prezidan e i paret i annan plizoumwen lakseptasyon.  Mr Speaker i reste mwan zis de keksoz pou fer.  Premyerman pou rekomann ladopsyon sa rapor devan Lasanble e dezyenmman avek ou permisyon pou demann Onorab Basil Hoareau ki en Mank Komite ki loter lamazorite sa bann lamannman pou propoz sa bann amannman avek nou Lasanble apre midi.  Mersi.

 

MR SPEAKER

Onorab Hoareau.

 

HON BASIL HOAREAU

Mr Speaker, mon take it ki Mr Georges pe propoz sa avek mwan konman mon Chairperson of the Bills Committee. E anyway eski mon- mon krwar Onorab Georges ou’n fini table sa lamannman, there is no necessity pou nou al dan detay.  Basically i ban senp amannman Mr Speaker.  Premye amannman  i aktyelman en amannman ki nou ti annan en issue lo la last time letan nou ti pe pas pou lo dernyen Board ki son Lalwa ti vin devan nou se pou fer ki bann basically Prezidan pou apwent Chairperson e Vice-Chairperson from candidate recommended by the CA.  Apre lot substantial lamannman se an relasyon  pou fer sir poudir nou’n sanz, nou’n propoz lamannman dan seksyon 6 (5) akoz ki mannyer seksyon 6 (5) ti’n ganny drafte e menm si in dir poudir sak sa bann bodies i kapab propoz sa bann kandida be ki mannyer i ti ete la prezaman la, se ki i kapab ki Prezidan i kapab pran 3 fer konmsi lasosyasyon  medya i donn 3  kandida, lot i donn 3 i kapab pran tou le 3 from lasosyasyon medya e i pran zis 2 from en lot body.  Savedir i ti kapab posibilite ki Prezidan i kapab dir be mon pa  pe pran okenn kandida from en lot body ki’n propoze.  Me ou le  fer sir poudir i kler poudir Prezidan pou bezwen pran en kandida from sak sa bann body, pou fer sir pou donn lentansyon the Act i ganny mete kler ki napa okenn ambiguity okenn room pou demen pou donn en diferan lenterpretasyon.  Se pou met klarite.  E apre nou’n fer osi klarite annefe sa se Onorab Georges ki’ n fer li kler se ki Biro Attorney Zeneral pou bezwen apwent en legal practitioner akoz avan i pa ti dir kler, prezaman i pa dir kler i dir en Biro Attorney zeneral i kapab propoz bann kandida me la nou oule fer sir i kler poudir wi Attorney Zeneral i kapab propoze, me i kapab propoze selman en legal practitioner sorti  well- – legal practitioner zeneralman wi,  wi i kapab sorti dan son biro ouswa i kapab sorti dan prive. So se sa bann lamannman an gro Mr Speaker.

 

MR SPEAKER

Tre byen mersi.

 

HON BASIL HOAREAU

E mon pou segonn propozisyon pou nou basically aksepte sa ban lamannman ki’n ganny move by Onorab Georges.

 

MR SPEAKER

Ok.  Propozisyon i ganny segonde si napa okenn amannman to the Amendment then mon sizere nou pran en vot.  Tou bann ki aprouv amannman lev zot lanmen?

Clerk.

 

MADAM CLERK

Mersi Mr Speaker, mon’n rikord 26 Manm an faver.  Mersi.

 

MR SPEAKER

Savedir Lasanble i aprouv sa lamannman e avan nou pran en vot lo 2nd Reading General merit of the vote nou a demann VP pou konklir.  Vis-Prezidan si ou ti kapab –

 

VICE-PRESIDENT MR VINCENT MERITON

Mersi Mr Speaker.  Mr Speaker zot vot e zot partisipasyon aktiv dan deba lo sa amannman i montre ki nou, nou dakor poudir NISA NASYON i annan en rol for dan devlopman nou pei e nou demokrasi. Premye pwen.  Dezyenm pwen mon ti a kontan mwan osi apresye prezans Attorney Zeneral Mr Frank Ally e an menm tan mazin travay ki son predeseser si mon kapab dir Mr David Esparon in zwe pou tenir labar ziske ler en apwentman sibstansyel ti ganny fer.  E i fer mwan mazin sa mert ki’n arive kot son papa ti kit nou weekend.  E mon ti a kontan osi eksprim mon kondoleans avek la fanmir ensi ki la fanmir Gill ki osi in ganny afekte weekend pase.  Sa osi i a permet mwan swivan sa ki Onorab Arrisol in dir anvoy mon senpati e kondoleans avek fanmir madanm Fabiola ki ti kit nou en pe letan pase.  Mr Speaker rol NISA se port parol Gouvernman.  Onorab Ferrari mon repete ozordi sa largiman i ankor valab.  Ozordi dan en sityasyon kot tou keksoz i vin miltiparti, miltisosyete, milti konpannyen Gouvernman i bezwen annan en parol, en port parol kot i koz lo son bann Polisi.  I en Gouvernman ki’n ganny elekte – i bezwen annan en lenstans en fason ki son mesaz i ganny pase e ki nou pe dir son mesaz i bann keksoz reel e vre ki pa tay ni isi ni bor laba.  Byen koze i fer byen konpran Onorab.  Mal koze i fer diskisyon.  Se pou sa rezon ki nou dakor poudir NASYON i koz sa ki byen e ki dimoun i konpran.  Be selman sakenn i annan son pwennvi ki nou respekte.  Mr Speaker fodre osi nou note ki NISA son rol osi i ede fer desann pri printing.  I pa’n zis wi ki’n deside antre dan sa biznes, me in fer market study pou vwar poudir dan pei ki apart pibliy en NASYON, apard vann i annan osi lezot travay ki i kapab fer, bann lezot travay lenprimri.  I annan lezot travay ki ou fer an deor ki kapab permet ki larzan i gannyen me selman mon dakor ki ozordi i pe ganny son larzan atraver advert avek lavant NASYON.  Me o fir e an mezir ki keksoz i devlope, o fir e  an mezir ki konpetisyon i annan, konpetisyon ki normal i a permet ki i kapab zwe en rol pli enportan dan devlopman nou pei.  Mr Speaker i annan en kantite dimoun ki get NASYON, pou vacancies, pou advert, pou lartik reserse, lartik reserse e lartik ki annan  analiz ladan pou montre poudir, taler ou’n ganny dir ki i son fason gete i sek.  Me i sek me sa ki enportan se ki sak dimoun pe rode ladan. I annan ki le lir en lartik ki’n ganny reserse lo en size ki’n arive ki lezot zournal pa’n pibliye.  So ou bezwen annan enn ki fer li e mwan mon satisfe ki poudir Nasyon pe zwe sa rol.  Mr Speaker annou pa bliye ki rol NASYON se pou enformen, edike avek entertain korek sa.  Dan son Lalwa in dir.  Mr Speaker so napa kontrol ki Gouvernman pe mete kontrer nou pe donn plis lendepandans e lotonomi NASYON atraver sa lamannman ki zot tou zot pe siporte.  Se mon krwar se dan sa loptik ki’n nou’n vin avek devan ki nou pe get li me osi mon a fer sorti ki bann advert ki ganny pibliye gouvernman i pibliy son adverts dan tou bann deliz ki annan.  Pa zis dan NASYON me osi dan Today.  I osi en keksoz ki si nou pran nou vwar bann avertisman pou bann tenders, bann lezot adertisman pou vacancies i ganny fer piblikman dan tou le de papye ki aparet tou le zour e lezot osi ki aparet tou  le semenn.  Mr Speaker mon ti a kontan osi ler nou pe koz lo la ozordi montre nou lapresyasyon pou sa 43 staff ki travay kot nasyon zour e nwit.  Ler nou, nou pe koze isi i annan en dimoun ki per pran not analize pou kapab pa zis repet verbatim tou sa ki’n dir, me kapab summarise li, condense li dan en keksoz ki ou  kapab lir en dimoun ki kapab konpran e pas sa avek popilasyon e an menm tan anmenn travay ki Gouvernman pe fer kot dimoun, anmenn travay ki Lasanble pe fer kot dimoun, ki dimoun i kapab konpran sa.  So an mezir ki nou, nou pe asize nou pe enjoy ; an mezir ki nou pe asize nou pe lezot keksoz i annan dimoun ki pa pe dormi ziske 2er, 3er  bomaten pe donn zot letan pou kapab fer sir ki lannmen bomaten e ou pa kapab tenir sa file parey i annan i fer la.  Lannmen bomaten fodre NASYON i sorti, ler mon arive dan mon biro ki NASYON i annan e tou dimoun i apresye i annan son NASYON ki ler i vini i kapab lir e ganny nouvel ki pe pase dan pei.  Mr Speaker fodre fer sorti osi ki NISA i pa pe pran larzan avek Gouvernman.  In envestir son prop larzan, in rod loan pou li kapab peye pou li kapab fer sir ki sa biznes pe fonksyonnen.  I parey SCAA, i parey SEPEC, i parey Seychelles Commercial Bank e mon krwar zot a apresye ki i pa pe servi tax payers money, me kontrer i pe servi loportinite pou kapab anmenn en servis kot dimoun  ansanm avek lezot ki la lo marse lenprimri.  Fodre fer sorti osi Mr Speaker ki zot performans finansyel i ganny kondanse dan en rapor ki ganny fer tou lez an depi 2010 ziske 2016.  E sa rapor i ganny odite, e sa rapor i pa zis ganny odite me i ganny pibliye i lo sit Web Public Enterprise Monitoring Commission lo www.pemc.sc.  Al lo la nou a vwar sa rapor depi 2010 ziska 2016 pou vwar performans ki NISA pe fer. Wi nou bezwen bold and brave mon’n ganny demande.  Bold and brave pou donn lendepandans e kapasite finansyel.  Ranforsi kapasite sa Lazans pou li kapab fer pli byen.  Mon apresye bann lezot kontribisyon ki’n fer sorti ki montre ki  nasyon i pro- Gouvernman, me i la pou met bann fe ater.  Nou diferans avek lezot papye Onorab Georges se ki nou met bann fe e lezot papye i met bann pwennvi lo bann fe.  So ou bezwen retourn kot sours.  E NASYON i sa sours ki ler nou pran apre nou kapab rode nou, nou kapab sanz son rob me selman i bezwen reste e en sel sours.  E se sa rol mon satisfe ki i pe ganny zwe parey Konstitisyon i demann nou pou fer e mersi Onorab pou ou port a nou latansyon lartik 28 (4) nou Konstitisyon i demande ki Gouvernman i annan en fason pou anmenn sa kot dimoun.  Mr Speaker mon pros pou fini,  NISA wi i donn loportinite bann zenn pou zot kapab aprann, devlop zot talan e zwe en rol.  En kantite ki’n pas kot Nasyon e ozordi pe fer marse zot prop biznes, swa atraver en lot zournal oubyen atraver zot lantrepriz prive, self-employed.  Wi i en success story ki nou bezwen vann, vann byen.  E i pa en pese pou koz lo la.  I normal pou koze.  En bon keksoz ki pe arive dan pei annou koz lo la for labous plen e annou fyer nou tou.  Ou kapab sorti dan en lot papye be  selman nasyon i zwe en rol e i ankor annan son plas dan devlopman nou pei e dan nou demokrasi parey mon’n dir.  Mon’n ganny dir annou move to Facebook be okThe next level Onorab Henrie i dir.  Be selman mon pa konnen si Onorab Ferrari i tro dakor avek.  So konmsi devlopman pei nou demokrasi pe montre i kapab lo  en menm kote latab annan views diverzans, me selman nou dakor avek kanmarad, ki montre i vreman bon i sen pou sa ki nou pe fer dousman, dousman e mon krwar annou kontinyen travay dan sa direksyon me selman nou kapab koze e nou kapab koz byen.  Mr Speaker Onorab LGB in fer sorti ki nasyon i koz laverite.  I ranforsi pwen ki mon ti pe dir nou bezwen dir dimoun keksoz ki pe pase.  Nou bezwen zwe sa rol ki en Gouvernman i bezwen mouthpiece e en mouthpiece ki pe fer en keksoz ki byen, ki obzektif e ki tou dimoun i kapab on Board e sa nouvo Board pou ede kontribye pou dir i annan plis latransparans dan nou NASYON.  Onorab Arrisol ou’n fer sorti ki lefe ki tou dimoun i aste NASYON a en serten moman lazournen, sakenn i rod son keksoz dan nasyon e mon krwar sa nou satisfe avek sa.  Mr Speaker bann staff kot NASYON nou pe travay an mezir ki nou pe devlope pou fer sir ki bann staff ki travay zot pa ganny bliye.  Mon’n dir zot travay ziske 4er, 4er bomaten.  Zot kondisyon i ganny gete.  Zot annan en Scheme of Service ki permet zot saler, zot en bonus, en trezyenm mwan saler, avek en lot perks ankor pou bann dimoun ki ekrir an plis devlop kreativite parmi zot.  So o fir e a mezir ki finansyerman nou pli stab, nou a kapab get dan zot welfare pou fer sir ki zot osi zot kapab ganny rekonpanse pou anmenn plis larzan kot lakour pou kapab sonny zot lekor e sonny zot fanmir.  Mr Speaker mon vreman apresye ki mannyer lapros ki nou’n donnen avek sa travay ozordi e mon asire ki ozordi batenm dife Onorab pardon Onorab Ally e mon santi mwan fyer pou ganny an flanqué, flanqué lo en kote gos par li, 2enm kote kote drwat par mon PS lenformasyon bann mo an kreol ki servi, nou an Festival Kreol la e avek tou sa konsey ki Gouvernman i annan pou kapab fer sir ki son bann desizyon i bann bon desizyon.  Mersi Mr Speaker.

 

MR SPEAKER

Me fotespere zis zot flank ou zot pa fou ou.  Mr Vis- Prezidan mon byen kontan dan sa term flanke i pa fwet ou i flank ou.  Bon mersi e prezan, prezan nou a pran en vot lo sa 2nd Reading e merit zeneral sa Bill.  Tou bann ki pour lev zot lanmen ?

Clerk?

 

MADAM CLERK

Mersi Mr Speaker.  26 Manm ankor enn fwa an faver.  Mersi.

 

MR SPEAKER

Tre byen eski nou annan en Mosyon pou nou skip…  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker etandonnen ki sa bann amannman ki devan nou bann senp amannman mon oule move anba Order 91(1) nou Standing Order mon oule move ki nou sispann order 65 to 70 pou nou sot staz Komite sa Bill.  Mersi bokou.

 

MR SPEAKER

Segonde.

 

HON SEBASTIEN PILLAY

Thank you Mr Speaker.  Motion seconded.

 

MR SPEAKER

Onorab Sebastien Pillay segonde.  Eski zot kapab tou dimoun ki dakor lev zot lanmen?

Clerk.

 

MADAM CLERK

Mr Speaker ankor en fwa 26 Manm an faver.  Mersi.

 

MR SPEAKER

Tre byen nou skip Staz Komite e Onorab De Commarmond.

 

HON CHARLES DE COMMARMOND

Mr Speaker anba Order 71 (1) mon oule move ki National Information Services Agency (Amendment) Bill 2017 i ganny lir en Trwazyenm Fwa. Mersi.

 

MR SPEAKER

Mersi.  Amendment i ganny lir en Trwazyenm Fwa.  Onorab Georges ou segonde.

 

HON BERNARD GEORGES

Wi Mr Speaker mon segonn sa Mosyon ki sa Bill as amended i ganny lir en Dezyenm Fwa. Mersi.

 

MR SPEAKER

En Trwazyenm Fwa.

 

HON BERNARD GEORGES

Pardon en Trwazyenm Fwa.

 

MR SPEAKER

Tou bann ki pour lev zot lanmen?

Clerk.

 

MADAM CLERK

Mr Speaker 26 Manm an faver.  Mersi.

 

MR SPEAKER

Mon a demann Clerk prezan pou proceed pou lir, proceed with Third Reading.

 

MADAM CLERK

Mersi Mr Speaker.  This Act may be cited as a National Information services Agency (Amendment) Act of 2017.  Mersi.

 

MR SPEAKER

Savedir sa Bill in ganny pase e aprouve par Lasanble Nasyonal e Vis-Prezidan nou a remersye ou.  Savedir ou kapab prezan koz NISA ek labous plen parey ou’n dir.  Mersi pou ou letan ki ou’n vini avek ou PS, avek ou lekip.  E parey nou’n dir nou swet zot tou de bon ek Mr Ally.  Nou a eskiz ou.

 

(THE VICE-PRESIDENT MR VINCENT MERITON AND HIS DELEGATION WAS EXCUSED FROM THE HOUSE)

MR SPEAKER

Bon  mon krwar nou ankor annan 20 minit avan nou pran enpoz e mon ava demann Clerk pou nou envit Minis Myriam Thelemaque pou li vin zwenn nou pou prezant son Statement.  I ava ganny letan pou li prezant son Statement e mon ti a kontan notifye zot ki son Statement in ganny sirkile, i devan zot, zot kapab konmans regarde.  E ler in fini lir nou a pran en pti Break pou nou pause apre nou a retournen pou nou diskite.  Me selman i la i devret annan en kopi devan zot pou.  Fer sir ki zot ganny sans pou zot regarde an mezir ki madanm Minis i prezant son… so silvouple dir li i kapab antre avek son lekip.

Bon nou a swet lo lapar tou bann koleg dan Lasanble nou a swet Minis pou Lanplwa pou Imigrasyon ek Civil Status Minis Myriam Thelemaque ek son lekip byenveni dan Lasanble pou apre midi.  Mon ti a kontan petet demann en leskiz ki depi bomaten nou’n fer ou vini epi, ou’n bezwen retournen akoz nou ti pe kontinyen ek lezot travay, me mersi pou pasyans ki ou’n vini e ou akonpannyen par en lekip ki mon krwar laplipar dimoun zot konnen kote o-bor Minis i annan son PS Lanplwa Mr Jules Baker, i annan son Special Advisor Mr Veronique Bresson ki tou dimoun i konn li in travay isi apre nou annan PS osi Imigrasyon ek Civil Status madanm Vidot.  So avek sa Minis ou ti’n anvi fer en Statement.  Ou Statement in ganny sirkile avek tou Manm Lasanble.  Mon ti a kontan osi rekonnet ou lezot lekip ki dan kote laba ki si  okenn moman letan nou pe enterakte avek ou ou ti a kontan zot vin pli pre zis les mwan konnen nou a fer laranzman.  Avek sa toudswit Minis Thelemaque mon a donn ou la parol pou ou prezant ou statement avek Lasanble.

 

MINISTER MYRIAM THELEMAQUE

Mersi Mr Speaker.  Bon apre midi Mr Speaker.  Bon apre midi  tou Manm Onorab.  Bon apre midi tou travayer ek anplwayer e tou Manm piblik ki la a lekout.  Mr Speaker mon ozordi pe adres Lasanble Nasyonal e lepep Seselwa dann mon kapasite konman Minis sa Nouvo Minister ki’n ganny formen 3 mwan pase e ki aprezan konpri Departman Lanplwa e Departman Imigrasyon e Leta Civil.  Sa desizyon pran par Prezidan Faure pou anmenn sa de departman ansanm sete pou asire ki tou Seselwa ki dan son laz prodiktiv i ganny tou loportinite posib pou li kontribye dans son prop devlopman e devlopman son pei.  Mr Speaker konman sa Minis ki’n ganny sa responsabilite, mon fyer pou dir ki marse lanplwa Sesel in zwir en pozisyon stab pou bokou lannen.  Byensir sa pa’n vin par laverti, me in vin atraver bann Polisi ek progranm tre efikas ki Gouvernman in kontinyelman met an plas ; pou premyerman asir drwa Konstitisyonnel tou Seselwa pou en lanplwa desan e dezyenmman  o fir e an mezir ki nu annan nesesite pou adres okenn sityasyon e konstrent ki lev-e dan lemonn travay ki parey nou tou nou konnen i vin ek en latmosfer ki tre dinamik.  Mr Speaker mon oule fer resorti a sa pwen ki mon Minister i rekonnet ki bokou nou Seselwa pe travay tre dir dan sa pei.  I annan ki pe travay apre ler ki pe fer de louvraz, travay weekend, e konze piblik pou zwenn target ouswa donn en servis.  Set akoz  sakenn de zot ki nou pei pe toultan bouz de lavan e sa i kontribye pou ki plis loportinite lanplwa i kontinyen ogmante.  Kot nou pa ganny Seselwa pou ranpli sa bann pozisyon, demann pou travayer etranze i swiv.  Sa i en size ki tou dimoun i koz lo la, e ki merit ganny met byen dan konteks, nou realite devlopman lekonomi e devlopman nou resours imen aktyel.  Mr Speaker pou nou donn en pli bon apersi lo nou Marse Lanplwa dapre Biro Nasyonal Statistics an Zen 2017 ti annan 47,021 travayer anplwaye dan tou sekter lekonomi pei.  Statistics i montre ki lamazorite travayer i anplwaye dan sekter prive ki annan  29, 595 travayer ki reprezant 63 poursan ; swivi par sekter piblik avek 10,002 travayer ki reprezant 21 poursan e parastatal avek 7, 424 travayer ki reprezant 16 poursan.  Lamazorite sa bann travayer ti anploye dan Lendistri Tourizm e sa ti 8,888  travayer ki reprezant 19 poursan ; swivi par Lendistri Konstriksyon avek 4, 807  travayer ki reprezant 10 poursan e Lendistri Manufacturing ki ti annan 4,084, ki reprezant 9 poursan travayer.  Statistics ki mon annan apartir 23 Oktob i montre ki  i annan 17, 700 travayer etranze ki aktiv dan pei.  Sa i enkli travayer dan sekter prive,  dan sekter piblik e dan Offshore.  Mr Speaker mon ankouraze pou dir, ki Sesel in  reisi mentenir en to somaz Nasyonal tre ba pandan sa bann dernyen lannen.  Dapre piblikasyon Biro Statistics Nasyonal an Zen 2017 to somaz Nasyonal ti redwi pou ariv 3.9 poursan konpare avek Zen 2016 ki ti 4.2 poursan.  Malgre en to somaz tre ba, mank lanplwa parmi bann zenn, i reste en defi parey pou plizyer pei dan lemonn ozordi.  To somaz parmi ban zenn i aze ant 15 a 24an –  ti 11.8 poursan konpare avek Mars 2017 ki ti 12.7 poursan.  Nou’n konstate ki depi lansman Scheme My First Job an Zanvye 2016 to somaz pou bann zenn in redwi gradyelman sorti 13.3 poursan  an Mars 2016  pou vin 11.8 poursan an zen 2017.  Depi Zanvye 2016 ziska Zen 2017, mon Minister in anrezistre 1621mil graduates pou partisip dan sa progranm.  Dan sa 1, 621mil, 1,077 i deza dan en lanplwa e 366 in al kontinyen zot letid.  Sa larestan 178 in swa deside pou pa kontinyen dan sa progranm ankor dan prosen interview oubyen pa dan pei.  Mr Speaker sa i en lakonplisman ki nou pou fer ki otan ki posib, pou li ganny mentenir.  Me malgre rediksyon dan to somaz bann zenn sa sif i reste e konsern pou mon Minister.  An se ki konsern diferans ant Msye ek madanm i enportan note ki to somaz i pli o pou madanm ki pou msye.  E sa i menm remarkab parmi bann zenn.  To somaz Nasyonal pou madanm an Zen 2017 ti 4.2 poursan e msye ti 3.5 poursan konpare ek to somaz nasyonal parmi zenn madanm, ki ti 13.6 poursan e zenn msye ti 10.4 poursan.  Sa i montre ki bann zenn madanm, sirtou i dezavantaze ler pou rod en lanplwa.  Mr Speaker mon Minister in toudmenm konstate ki loportinite lanplwa i kontinyen annan dan pei.  Dapre vacancies rikorde par 2 Lazans Lanplwa Prive selman Zanvye ziska Zen 2017 ti annan 1073 loportinite lanplwa.  Le 3 Lendistri avek plis loportinite lanplwa ti Tourizm swivi par aktivite bann lezot servis parey hairdressing, reparasyon konpiter e konstriksyon.  Pou note ki loportinite lanplwa i kontinyen reste plis dan Sekter prive ki ti annan 1059 loportinite lanplwa.  Mr Speaker kot i konsern plasman ti annan 1,113 dimoun ki ti pe rod  en lanplwa k ti ganny plase depi  zanvye ziska desanm 2016.  Sa ti vin atraver bann Lazans lanplwa prive.  An plis ki sa ti annan 616 graduates sorti dan sant profesyonnel e 160 partisipan ti pran progranm Development Skills ki ti ganny plase dan en lanplwa.  Mr Speaker malgre tou nou bann lentansyon e sikse ki nou’n reisi fer diran plizyer lannen, kot i konsern dirabilite nou marse lanplwa,  nou’n vwar nou kontinyelman pe fer fas a bann defi ki mon Minister pe al adrese atraver serten aksyon.  Mr Speaker premye defi ki nou annan se la kantite graduates ki pa ase pou demann travay.  Pou annan 2016 sorti dan bann sant profesyonnel e ti annan 826 graduates an tou.  Zis pou donn serten legzanp lekol SIT ti annan 237 graduates, SMSA 67, STA 244, e Lenstiti Lagrikiltir zis 6.  An plis ki sa apepre 25 poursan dan labann pa kontinyen avek en karyer dan sa domenn ki zot in train ladan.  Dan serten ka osi, sa ki zot in ganny ansennyen i pa sa ki lendistri i bezwen.  Pou al pli lwen ankor menm latitid serten zot pa konvenab pou lemonn travayer.  Konman en Minister nou pou bezwen pouse ansanm avek nou bann partner kle pour ki i annan e vre sanzman.  Nou napa swa, akoz nou marse lanplwa pe depan lo la.  Kot i konsern graduates lo nivo liniversite nou ti annan 137 ki ti termin zot letid an 2016 ki ti enkli 27 lo nivo Masters.  Mr Speaker travay zournen i osi e konsern ki deplizanpli pe vin en pratik komen.  Pou sa kalite travay en travayer i napa okenn komitman avek en anplwayer.  I vin travay pou en tas spesifik e ganny lapey deswit.  Sa i anmenn en sityasyon enstab, ki pa neseserman  sa ki bann anplwayer pe rode sirtou  bann ki pe donn en servis kliyan parey en lotel. Sa sityasyon i diminyen lo la kantite dimoun ki disponib pou pran en lanplwa ki nou deza napa bokou.  E sa pe fer demann pou travayer etranze ogmante.  Sa i pli komen parmi bann zonm.  Mr Speaker nou pou bezwen annan en sansibilizasyon byen konpreansiv lo sa size, pou permet seselwa pli byen fer zot was kot i konsern zot devlopman e preparasyon pou zot fitir.  Plis ki nou annan dimoun  ki pa kapab e pare pou antre dan en lanplwa permanan e stab, i pou permet nou diminyen lo nou depan lo travayer etranze.  Mr Speaker sa staz kot nou’n arive lo nou devlopman personnel ek ekonomik, nou ankor pe fer fas avek en sityasyon ki Seselwa sirtou en serten group zenn ki pa pe profit bann loportinite ki met a zot dispozisyon pou zot prop devlopman.  Nou osi ankor annan serten nou, ki dan en lanplwa ki zis anvi profite me pa pare pou donn tou.  Latitid i kontinyelman persiste i par egzanp Labi konze dokter, mank travay san rezon.  In plis ki ler pou nou ranvers sa pratik.

Mr Speaker labi lalkol ek drog i soi en gran defi pou nou.  Avek sa pti norm popilasyon ki nou annan pou nou marse lanplwa sa problenm pa pe ditou ede.  Bokou pa kapab antre dan en lanplwa oubyen  si zot travay zot fer li anba lefe sibstans.  Sa i premyerman pa bon pou zot prop sekirite e lezot dimoun ki zot vin an kon tak avek.  E an plis, pli sa group i ogmante pli nou pou bezwen depann lo travayer etranze pou ranpli sa bann plas.  Mr Speaker nou ankor vwar travayer ki retisan pou ofer training, zot travayer pou kapab devlope zot kapasite pou zot avans pli devan zot ankor krwar ki se zis Gouvernman ki annan responsabilite pou train san realize ki plis zot donn kapasite zot travayer, plis sa pou anmenn benefis pou zot atraver en o nivo prodiktivite dan lorganizasyon.  Zot toultan dir ki napa ase Seselwa avek bagaz pou met dan pozisyon kle, me ler i ariv pou zot kontribye pou donn sa bagaz zot pa pare pou fer li.  Mr Speaker nou osi vwar ki anplwayer i ezite pou met an plas incentives swa dan form larzan oubyen lezot pou motiv e ankouraz zot travayer pou reste e travay pou bokou letan avek zot, e atrakte bon travayer.  En travayer ki travay pou bokou lannen dan en lorganizasyon, a lafen di zour i anmenn bokou rannman pou sa lorganizasyon, atraver son leksperyans.  Ou vwar ki zot pare pou fer bokou pou depans pou anmenn en travayer etranze, me pa pou donn en bon saler en travayer Seselwa par egzanp.  Mr Speaker sa sityasyon disparite dan saler ant travayer lokal e etranze i reste en defi. B Nou ganny pa mal rapor sorti kot bann travayer lokal ki dir ki en koleg etranze ki pe fer menm louvraz ek zot pe ganny plis lapey.  Sa i osi sorti tre for ler mon pe fer enteraksyon avek travayer, atraver mon bann vizit regilye ki mon’n fer dan landrwa travay.  I menm annan  sityasyon ki sa travayer Seselwa pe montre sa etranze travay.  Ankor nou vwar ki napa ase volonte pou depans lo sa travayer Seselwa, parey zot fer pou rekrit en travayer etranze.  Menm si son performans i alaoter.  Mr Speaker demann pou travayer etranze i  kontinyelman ogmante.  Depi Zanvye ziska Zen 2017 ti annan en total 5011 mil pozisyon ki ti ganny aprouve par Departman Lanplwa pou travayer etranze.  Sa 5 Lendistri pli komen ti Konstriksyon 2102 mil ki reprezant 41.9 poursan.  Lezot servis, 695 ki reprezant 13.8 poursan.  Lotel e restoran 500 ki reprezant 9.9 poursan.  Prodiksyon 407 ki reprezant 8.1 poursan e Komers 304 ki reprezant 6 poursan.  Malgre ki nou’n reisi annan serten pozisyon ki ti pe ganny okipe par etranze, ganny lokalize, i pa sa kantite e lavites ki nou ti a swete.  Anplwayer pa met gran zefor pou ankadre oubyen ankouraz travayer Seselwa pou reisi.  Sa travayer Seselwa osi parfwa pa oule pran responsabilite pli o oubyen i kite travay avan ler.  Mr Speaker sa ki sorti tre for dan mon bann vizit, se ki loportinite promosyon i vin premye pou en etranze.  I annan serten Polisi, ki nou pou bezwen revwar akoz nou santi ki serten anplwayer pa pe fer zot bout ; par egzanp sa Certificate Of Entitlement – COE ki permet zot pa averti ler zot annan en pozisyon vakan. Mr Speaker mon Minister i atas bokou lenportans lo sirveyans e ranforsman Lalwa, malgre i nou defi kot i konsern resours imen.  Sa i vin sirtou lo sirveyans e ranforsman konsernan lenspeksyon, pou asire ki tou travayer dan Sesel i pe ganny byen trete e annan bon kondisyon travay, travayer etranze ki pe travay san permisyon e plan lokalizasyon pe al byen.  Nou bezwen touzour met nou azour pou fer sir ki nou Seselwa i ganny tou loportinite posib e zot benefisye an premye lwen. Departman Imigrasyon e Letan Civil in kree en nouvo unit pou kapab pli byen zer sa fonksyon e pe met an plas serten lezot mezir ki mon pou vin lo la pli tar.  Mr Speaker en sistenm lenformasyon ki azour e kredib i tre enportan dan fonksyonnman mon Minister.  I la kot nou ganny nou lenformasyon pou asire ki nou bann Polisi e progranm i reste a zour.  Labour Market Information System – LMIS i sa sistenm enformatik ki rikord lenformasyon lo marse lanplwa.  Pou fasilit bann analiz e ede fer desizyon.  I annan en pe lannen ki nou pe fer li fonksyonn lo son kapasite konplet, me i ankor en defi pou nou.  Mr Speaker sa ti serten nou bann defi ki mon ti anvi fer resorti.

Mon pou aprezan prezant Lasanble avek serten aksyon ki mon Minister pe al pran.  Mr Speaker premyerman tou partner konsernen i bezwen tonm dakor lo en prosesis pou entegre prodiktivite dan curriculum lekol.  Sa i pou permet ki nou komans a en staz pli boner posib pou enkilke dan nou zanfan sa konsep etik dan landrwa travay.  Mon oule enformen ki sa travay i an progre e nou ekspekte prezant ek Minister Ledikasyon sa konsep ver lafen sa lannen.  E propozisyon pou apre ganny prezante devan Gouvernman boner 2018.  An atandan sa Mr Speaker, dan en fason pou kontinyelman adres konsern bann anplwayer lo sa size mon Minister pou kontinyen ek son progranm avek bann zenn dan sant profesyonnel pou sansibiliz lo etik dan travay osi byen lo ki mannyer pou zer zot lekspektasyon.  Sa i en demars ki nou’n konmanse depi Zanvye 2016 an kolaborasyon avek Minister Ledikasyon anba sa progranm My First Job Scheme.  Nou’n remark en amelyorasyon pandan sa lannen e pour lannen prosenn nou pou al menm pli lwen par anmenn anplwayer pou zot menm vin anver bann zenn atraver bann motivational talks dan sa bann sant, pou zot prezant zot ekspektasyon e ekout osi pou sa bann zenn.   An plis ki sa, an kolaborasyon avek travayer nou pou ogmant ledikasyon travayer afen ki plis sansibilizasyon i ganny fer lo bon konportman dan landrwa travay, lo zot drwa e responsabilite.  Nou pou konmans diskisyon avek bann Linyon boner lannen prosenn pou tonm dakor lo en plan.  Mr Speaker an se moman Minister Ledikasyon pe travay lo en Plan Devlopman Resours Imen Nasyonal.  Sa plan i enportan pou nou pei akoz se li ki pou donn lendikasyon lo bezwen pei pou ki ankadreman neseser i kapab byen ganny planifye.  An atandan ki sa i pare mon Minister pou entansifye zefor, pou kontinyelman sansibiliz bann etidyan par egzanp nivo lekol segonder e dan bann sant profesyonnel lo bann swa karyer ki an demann lo marse lanplwa.  Donk apartir Zanvye 2018 Zofisye Lanplwa pou ganny de plwaye pou kouver 6 lekol par term.  An pli ski sa Mr Speaker i enportan ki bann ansennyan sirtou Careers Guidance teachers i ganny tou lenformasyon posib lo travay ki egziste dan pei.  E tou sa ki vin avek.  Par egzanp kalifikasyon ki neseser pou zot kapab byen gid bann etidyan dan sa prose.  Nou pou konmans diskisyon avek Minister Ledikasyon tre byento pou nou konmans organiz sesyon avek sa bann ansennyan apartir premye trimes 2018.

Mr Speaker dezyenmman mon Minister pou konmans en legzersis apartir lannen 2018, pou travay avek sak sant profesyonnel pou  asire ki curriculum i an akor avek demann lo  marse lanplwa.  Mr Speaker sa bann demars i antandan ki nou demar en school to work transition survey ,ki pou ed nou annan en pli bon apersi lo diferan letap  e defi ki zenn i rankontre depi ki zot sorti dan sistenm Ledikasyon ziska ki zot antre dan lemonn travay.  Swivan sa desizyon neseser ava ganny konsidere pou pli byen asiste bann zenn.  An vi ki sa survey i en gro proze ki nou pou bezwen lasistans teknik – ILO nou pe anvizaze komans li an zen 2018 e nou pe prevwar ki i pou ale  apepre 18 mwan.  Mr Speaker mon Minister in osi komans diskisyon avek Minister Ledikasyon, pou pli byen atrap bann zenn ki kit lekol avan ki zot konplet lo nivo segonder.  E dan bann  sant profesyonnel pou zot kapab ganny sipor neseser pou devlop e skill oubyen trouv en lanplwa.  Nou swe se pou devlop en mekanizm atraver lesanz lenformasyon, pou permet ki osito ki en etidyan i sorti dan sistenm ledikasyon ki swa formelman ou i pa’n deside retourn lekol ankor i ganny lasistans.  Nou ekspekte annan sa mekanizm an plas apartir premye kar lannen 2018.  Mr Speaker nou rekonnet ki tou nou zefor pou atrap e ankadre nou bann zenn, pa pou aboutir dan nanryen a lafen di zour.  Si nou pa osi get dan kondisyon travay tou an respektan natir loperasyon en biznes.  Mon Minister i anvizaze konmans en diskisyon avek bann partner konsernen apartir 2018 pour ki dan 2 a 3 an nou kapab reisi met serten standar an plas.  Mr Speaker nou konstate ki aktivite lanplwa e formel pe ogmante dan Sesel.  E bokou dimoun espesyalman bann zenn ki’n pas atraver en sistenm ledikasyon pe entegre dan bann aktivite enformel olye antre dan sekter formel.  Dan en letid ki’n deza konmanse lo Praslin, e ki dan son staz final, i montre ki en gran mazorite Pralinois i plifere fer travay zournalye ouswa zot kalite travay me a kour term.  En resers parey pou osi ganny fer lo Mahe pou konmans an Zen 2019 e nou pe prevwar i pou finalize par lafen lannen 2020.  Avek bi pou ankouraz bann endividi ki annan defi sosyal pou zot osi kontribye dan lekonomi nou pei, Minister in lans progranm Unemployment Relief Scheme (URS).  Anba sa progranm bann partisipan pou kapab travay an plen tan ouswa lo en baz zournalye, casual.  Nou’ n entrodwir sa konponan zournalye pou asiste bann endividi ki pa kapab entegre dan en lanplwa a plen tan akoz zot problenm sosyal ; tel ki drog ek lalkol. Pandan dernyen semenn Oktob e boner Novanm sa lannen mon Minister pou al fer lanrezistreman bann partisipan dan 4 distrik prensipal ki nou pou al konmans sa Scheme.  Sa se distrik Plaisance, Roche Caiman. Les Mamelles e Mont fleuri.  Rezon Mr Speaker pou konmans dan sa 4 distrik i akoz ansanm avek Sekreter D’eta pou Lapovrete, zot in ganny idantifye konman parmi distrik ki annan plis dimoun vilnerab.  Mr Speaker nou pe target pou antre lo sa progranm, dimoun ki lo welfare pou rezon san lanplwa.  Bann prizonnyen ki termin zot santans prizon; bann dimoun ki pe swiv tretman detox dan en sant reabilitasyon osi byen ki lezot endividi ki annan serten difikilte e ki trouv li difisil pou ganny en lanplwa.  Pou note ki sa Scheme se en tranzisyon pou fasilit dimoun ganny en lanplwa permanan ki vedir ki zot pa pou kapab reste lo la pou plis 12 mwan.  Letan ki nou ekspekte, ki zot in kapab ganny sipor e leksperyans ki zot bezwen pou en lanplwa stab.  Mr Speaker malgre nou zefor pou plas Seselwa dan en lanplwa, nou pou kontinyelman bezwen travayer  etranze dan serten pozisyon anvi ki nou annan en pti popilasyon.  Sa i nou realite ki nou bezwen aksepte.  Toudmenm nou bezwen fer sir ki sa sityasyon i ganny zere efektivman pou asire ki nou Seselwa i ganny loportinite an priori.  I dan sa loptik Mr Speaker, ki mon anonse ki mon Minister in deza konmans en letid ki pou termin an 2018, pou analiz sityasyon lanplwa travayer etranze dan Sesel avek bi pou devlop en Polisi nasyonal lo Labour Migration, ki pou ekspekte pou pare an 2019.  Sa Polisi pou permet nou etabli byen tou standar ki neseser lo sa size.  Mr Speaker an a –tan- dan  ki sa Polisi i pare lefe ki Departman Lanplwa e Departman Imigrasyon, i aprezan en sel Minister nou pe eksplor posibilite pou anplwayer i soumet en sel aplikasyon kot Minister.   Kan in fer sa i pou’n bezwen fini idantifye sa travayer etranze pou sa pozisyon, son kalifikasyon  ek saler.  Sa i a pli fasil pou nou evalye, si sa travayer etranze i kalifye pou  desarz sa travay e si zanmen ki sa bann dokimantasyon i pa korek, aksyon neseser pou bezwen ganny pran kont sa anplwayer.  Dezyenmman konsernan stratezi pou adres lokalizasyon ; ozordi anplwayer i soumet son plan lokalizasyon e non sa understudy Seselwa apre ki pos aplikasyon in fini ganny aprouve.  Lefe ki laplipar anplwayer pa respekte sa lobligasyon, Minister pe etidye  posibilite pou ki ler en anplwayer i soumet son laplikasyon pou anploy travayer etranze, nou pou egzize pou serten pozisyon ki  i soumet non sa understudy Seselwa ek son plan lokalizasyon  ansanm ki enkli son plan devlopman konman en kondisyon pou son pos ganny aprouve si i merite.  Sa i a permet ki prosedir lokalizasyon i vin pli fasil pou zere.

Trwazyenmman Mr Speaker, nou pou annan en nouvo stratezi pou sa prosesis atestasyon Kontra travayer etranze.  Nou pe etidye posibilite ki apre ki Departman Imigrasyon i aprouv Permi Travay pou travayer etranze son Kontra travay i ganny soumet avek Departman Lanplwa pou atestasyon,  avan ki sa travayer etranze  i antre dan pei.  Sa i ava asire ki sa bann kondisyon, i anliny avek Lalwa lanplwa e ki i parey ki i ti’n ganny mete dan laplikasyon.  Osi i a permet sa travayer etranze, konn son kondisyon travay avan ki i antre dan pei pou anpese ki i annan labi e dezakor apre ki in ariv Sesel ; tel ki nivo saler ki bezwen ganny peye e kan sa saler i devret ganny peye.  Mr Speaker nou rekonnet ki sa 3 stratezi, ki mon’n mansyonnen pou  resisit serten sanzman dan loperasyon bann lorganizasyon, ki anploy travayer etranze ki diskisyon i bezwen ganny fer ek zot lo fason ki sa pou marse.  Nou ekspekte ki sa legzersis i konplete milye lannen 2018.  E a sa letan ki nou pou dan en pozisyon pou dir ki mannyer sa pou marse.  Mr Speaker kot i konsern sirveyans e ranforsman Departman Imigrasyon pou entrodwir en nouvo kart Permi Travay ki modern e ki pou annan tou lenformasyon neseser lo sa travayer ki i pou oblize mars avek a tou moman. Nou ekspekte entrodwir sa kart boner lannen prosen.  An plis ki sa mon Minister pe al entrodwir en Hotline ki pou osi komanse boner lannen prosen pou permet nenport dimoun ki anvi raport serten pratik ki pa konvenab ou ki kont Lalwa Imigrasyon oubyen lanplwa.  Sa i ava en metod adisyonnel pou nou fer nou sirveyans e ranforsman.  Manm piblik pou kapab fer raport dan tou konfidansyalite ki nou pou byensir verifye avan pran aksyon pou anpes rapor malis.  An se ki konsern sistenm quota pou anploy travayer, etranze nou’n konstate ki malgre ti annan bonn volonte Gouvernman pou amelyor ease of doing business, i annan serten anplwayer ki pe abiz sa sistenm quota.  Sirtou bann ki annan Certificate  of entitlement, alor Minister in konmans konsiltasyon avek diferan partner dan Lendistri e dan Gouvernman pou revwar sa sistenm quota e kondisyon ki atase avek.  Sa  i avek bi pou annan pli bon kontrol lo rekritman travayer etranze espesyalman pou asire ki priyorite travay i ganny ofer pou travayer Seselwa osi byen ki promosyon.  Nou ekspekte ki sa Revi i osi konplete milye lannen 2018 an adisyon avek bi pou ogmant sans pou Seselwa ganny en lanplwa e pou anplwayer i ganny en pli gran swa dimoun ki pe rod en louvraz an plis ki fer lavertisman pou zis pos ki disponib lo marse lanplwa Minister an partenarya avek Lazans lanplwa prive pe konsider pibliy lalis dimoun ki pe rod en lanplwa avek zot kalifikasyon e lezot detay enportan san ki zot non i ganny mansyonnen.  Nou pou komans diskisyon avek bann servis lanplwa prive mwan prosen.  Nou ekspekte ki tou in pare pou met an plas apartir  Desanm.  Pou note ki nou pou fer en seri sansibilizasyon avek anplwayer pour ki zot byen servi sa lenformasyon.  Mr Speaker an menm tan ki i annan zefor pou pli  byen zer rekritman travayer etranze, nou osi rekonnet  ki nou pei pou kontinyelman bezwen zot pou ede dan sa lespri ease of doing business nou’n antre an diskisyon avek DICT pou ki i devlop en sistenm ki a permet bann anplwayer  kapab soumet zot bann aplikasyon ek tou lezot detay online ; olye bezwen desann lofis pou en tel tranzaksyon.  Nou anvizaze ki sa proze pou konplete par lafen lannen 2018.  Mr Speaker parmi bann pwen ki nou anvizaze i ganny adrese atraver sa Polisi Nasyonal lo Labour Migration, se egalite dan lapey ant travayer Seselwa e travayer etranze.  Mr Speaker nou pou eksplor posibilite pou ki atraver sa Polisi travayer Seselwa ki annan menm kalifikasyon ou leksperyans ki sa travayer etranze, i ganny peye saler ekitab pou sa pozisyon.  Mr Speaker mon osi swete enform sa Lasanble ki i annan de Lalwa mazer ki pe vin devan Lasanble.  An gro bann propozisyon i annan bi pou ki nou annan Lalwa ki pli modern e vin lo en nivo pli ekitab.

Mr Speaker pou konklir, mon oule met lanfaz ki nou  bezwen ranforsi sa mesaz iniversel ki tou travay i annan menm valer e pou nou en travay desan i en baz fondamantal dinyite nou sitwayen.  Prosperite nou pei i garanti kan sakenn de nou i travay avek plis prodiktivite e responsabilite.  Mr Speaker mon oule donn mon komitman sa Lasanble e tou pep Seselwa, ki mon Minister pou fer tou ki posib pou nou delivre lo sa bann aksyon ki mon’n  prezante.  La ki Departman Lanplwa ek Imigrasyon e Letan Civil in zwenn ansanm nou annan tou volonte pou pli byen zer nou manda avek plis efikasite.  I pa pou fasil.  I annan serten  desizyon ki pa popiler me pou neseser pou soustenabilite nou lekonomi e stabilite nou krwayans sosyal a long term. Mr Speaker byensir dan serten lenstans nou pou bezwen resours adisyonnel e korperasyon lezot partner pou nou kapab efektivman delivre dan dele letan ki mon’n donnen.  Alors mon pe kont lo sipor zot menm, zot Lasanble Nasyonal, anplwayer, travayer e men m nou bann etidyan ki ankor dan lekol pou nou sakenn pran nou responsabilite akoz sikse nou pei i depan lo travay ki nou fer ozordi.  Mersi Mr Speaker.

 

(APPLAUSE)

 

MR SPEAKER

Mersi madanm Minis.  En bon teks konpreansiv an Kreol, an zoli kreol pandan Festival Kreol e mon krwar la i sa moman kot nou a kapab pran en pti Break.  Minis osi ou demann en pti keksoz pou aroz lagorz.  Nou a pran en Break nou a retournen 4.15 pou nou pran kestyon.  Mon remarke i annan dimoun  deza lev zot lanmen pou – mon’n note pou pran kestyon.  So nou a pran en pause e nou a retournen 4.15 pou nou repran nou travay.

 

(BREAK)

 

MR SPEAKER

Bon nou, ava repran nou travay, Minis fotespere ou’n repoz lavwa en pti pe, ou’n pran en pti Eau De Vie.  E premye dimoun ki ti demann laparol Onorab Arrisol.  Ok Onorab Arrisol ou annan laparol.

 

HON SANDY ARRISOL

Mersi Mr Speaker.  Bonn apre midi Minis avek ou delegasyon.  Bonn apre midi mon bann koleg.  Bonn apre midi tou bann ki ale kout.

Mr Speaker premye kestyon mon ti a kontan demann Minis, mon kontan ki Minis in rekonnet pou dir i annan travayer Seselwa parey dan son 3enm paragraf lo premye paz i dir, ki travay apre ler, ki travay dir pou nou pei. Zisteman lo sa laliny mon ti a kontan demann Minis ki ou Minister eski ou Minister in zwenn DPA zisteman pou nou vwar, pou zot vwar ansanm ki mannyer zot kapab ankouraz bann travayer ki devoue dan travay bann travayer ki travay dir.  Bann travayer ki onnet.  Pou ki zot ganny en pli bon saler, bann allowances, bann incentive ki ou ou’n koz lo la, ki ou krwar i ava ankouraz ou bann travayer ki deza dan lanplwa.  Mon premye kestyon.

Mon 2enm kestyon mon ti a kontan demann Minis letan ou’n koz lo bann etranze dan pei.  Eski Minis i kapab eksplik Lasanble ki kalite kontrol ki ou Minister i annan an plas?  La ki Minister Imigrasyon avek Lanplwa i ansanm pou fer sir ki egzakteman kot bann viziter oubyen bann etranze ki dir zot pe al reste Eden par egzanp.  Zot ale, zot ete, e ki zot pe fer?  E lo menm laliny sa i a fer ki tou Minister pe fer pou asire ki bann travayer etranze ki travay lo bann laferm, dan bann laboutik, dan bann lotel, pou asire ki zot pe fer sa travay ki zot pe dir zot pe fer e zot dan pei e zot bann dokiman i annord avek norm, av[ek Lalwa travay parey ou’n dir.

E mon dernyen kestyon Mr Speaker mon ti a kontan demann Minis.  Eski Minos ou okouran pou dir bann travayer etranze ki travay dan nou pei sirtou bann ki dan en pozisyon ase eleve, zot maltret nou bann Seselwa.  Zot entimid nou bann Seselwa.  Zot fer mizer nou bann Seselwa dan bann landrwa travay avek bi pou nou Seselwa degoute e kite.  Zot, zot a kapab fer desann zot frer, zot tantin, zot mari, zot msye, zot fanm pou vin travay dan nou pei apre zot ava dir pou dir bann Seselwa i bann donner poum e pa anvi travay.

Ki ou Minister pe fer pou rezourd tousala?  Mersi Mr Speaker.

 

MR SPEAKER

Minis.

 

MINISTER MYRIAM TÉLÉMAQUE

Mersi Speaker.  Mersi Onorab Arrisol.  Ou premye kestyon se konsernan incentives pou travayer si nou’n zwenn DPA.  Lannen … i fer egzakteman lannen prosenn 5an depi ki Lasanble Nasyonal ti aprouv en Lalwa konsernan striktir sekter piblik salary grid pou sekter piblik.  Eskiz mwan.

Prezidan Faure tri mansyonnen dan son ler i ti vin fer son Speech, dan Lasanble Nasyonal, le 25 Juillet.  Ki sa en legzersis pou bezwen ganny fer lo merit e defayans e anvi pou amelyor sa grid. 

An se moman i annan en group profesyonnel, ki’n ganny met an plas, ki pe evalye sa salary grid.  E ler zot ava’n fini fer sa legzersis, zot ava prezant sa dokiman avek Gouvernman.  E Gouvernman i a pronons son lekor lo saler travayer an zeneral, incentives, allowances, tou keksoz. Ok.

        Lo size kontrol an plas, parey mon’n mansyonnen dan mon Statement.  Limigrasyon in form en nouvo Unit sa Unit ranforsman.  Vre nou annan en defi ki napa ase dimoun dan sa Unit. me selman nou pe fer laranzman pou nou ganny en pe plis travayer e sa nou’n met dan Bidze zot a vwar ler prezante pli tar avan lannen i fini.

Sa ranforsman i fer bann checks bann swivi ler nou ganny bann tips, oubyen bann dimoun i call nou i dir nou pou dir i annan tel landrwa i annan dimoun ki pa anliny avek zot travay ki zot sipoze fer.  Me selman nou pa kapab toultan depan lo dimoun pou telefonn nou.  Nou menm nou, nou fer provizyon nou al fer bann checks.  Parfwa en fwa par semenn, 2 fwa par semenn e nou ganny lasistans bann zofisye ki travay L’Aéroport. 

        Lanplwa osi tou i annan son seksyon ranforsman. I osi i fer vizit lo laferm, lo trou lezot landrwa pou regarde si kondisyon travay sa bann anplwaye etranze i an konformite ek Lalwa oubyen si zot pe travay dapre ki zot merite travay.

Konsernan etranze ki maltret Seselwa, mon krwar i devwar sa dimoun ki li menm li in ganny afekte ek en case, ki annan parey en case ki’n ganny maltrete.  Petet i devret fer resorti li menm, ganny kontak ek nou lofis anmenn son case devan, e nou, nou a investigate, nou a evalye nou a kapab pran en desizyon pli tar.

I annan en mekanizm e en Lalwa ki an plas pou sa.  Mon’n reponn tou ou kestyon Onorab.

 

MR SPEAKER

Mersi Minis.  Onorab Roucou.

 

HON CLIVE ROUCOU

Mersi Mr Speaker.  Bonn apre midi Minis avek ou delegasyon.  Bonn apre midi tou Manm Onorab.  Mr Speaker mon premye kestyon pou Minis, se ki plan imedyat ou Minister i annan pou elimin sa zafer kot i Annan degrad lapey pou menm louvraz vizavi bann travayer etranze e Seselwa?  Mon ti a kontan annan en timeframe kot lo paz 14 ou’n koz lo loportinite egal pou bann travayer.

Epi mon 2enm kestyon, se si ou Minister i fer okenn evalyasyon spesifik, oubyen formalite pou bann Departman  Gouvernman oubyen biznes zot fer avan zot anploy okenn travayer etranze?  Mersi Mr Speaker.

 

MR SPEAKER

Minis.

 

MINISTER MYRIAM TÉLÉMAQUE

Mersi Mr Speaker.  Mersi Onorab Roucou.  Onorab parey mon’n mansyonnen sa letid ki nou pe fer pou Labour Immigration la i pou ankadre tou keksoz konsernan saler, ki pou fer li ekitab i pou koz lo la osi en letid pou ganny fer ki pou etablir en travayer en striktir travayer ki ekitab pou bann travayer ki ekitab pou bann travayer ki a konpetitiv avek travayer etranze ok.

        Kestyon en pti moman  silvouple.

 

MR SPEAKER

Onorab Roucou 2enm kestyon.

 

HON CLIVE ROUCOU

Mersi Mr Speaker.  Mr Speaker in fact mon ti anvi re konmans from mon premye kestyon.  Mon ti pe demann Minis dan imedyat ki son Minister i annan plan pou fer? Akoz pangar nou a kontinyen perdi plis travayer.  Mon  ti demann li en timeframe.  Epi 2enm ki Minis in demann mwan se si son Minister in fer okenn evakyasyon spesifik oubyen formalite avan ki  bann Minister oubyen bann biznes i fer okenn recruitment pour bann  etranze  oubyen zot fer li a la lezer zot fer recruitment etranze.  Mersi.

 

MR SPEAKER

Minis.

 

MINISTER MYRIAM TÉLÉMAQUE

Mersi Onorab. Akoz nou bezwen fer konsiltasyon.  I pa posib pou fer imedya. Nou bezwen fer konsiltasyon.  Se pou larezon ki ou vwar nou’n met li sa letan lafwenn 2018.  Avan sa nou pa pou kapab fer.

 

MR SPEAKER

Mersi Minis.  Wi

 

MINISTER MYRIAM TÉLÉMAQUE

Apre konsernan evalyasyon bann pos bann travayer ki vin travay isi, tou travayer, tou anplwayer avan i rod en anplwaye i bezwen fer sa aplikasyon kot lanplwa.  Eksepte bann ki annan sa Certificate of entitlement, parey mon’n mansyonnen dan mon Statement zot, zot direk kot imigrasyon.

 

MR SPEAKER

Ok Onorab Roucou.  Onorab Stephen Pillay.

 

HON STEPHEN PILLAY

Mersi Mr Speaker.  Mr Speaker mon bezwen demann Minis konsernan bann Kontra pou bann expat sirtou bann ki pe pran en counterpart oubyen understudy Seselwa;  pou ki Minis kekfwa i devret regarde tou expat ki vin travay Sesel anba en Kontra pou li fer fix non-renewable, apart dan serten eksepsyon ka eksepsyonnel, en fason ki si sa expat pa kapab fer sa knowledge transfer i pa kalib pou li pran en  understudy Seselwa e lanmenm ler nou vwar pou li manrmay i fristre i ale i kite.  So si ou pou ek mon, mon pe dir 2an kekfwa ou pa konnen si 4an en fix term contract ki napa sans, i bezwen transfer sa knowledge avek en Seselwa.  E si Minis pe konsidere pou dir dan bann antrepriz piblik i vin en priyorite sa, osi ki nou konmans kot nou avan.  Epi nou al kot sekter prive si i neseser, ki i annan parey PUC, SEPEC ; si i annan travayer etranze ki lo Kontra nou fer li fix term epi si ou pa kapab fer en lot dimoun vini pou transfer sa knowledge avek en Seselwa.

Mon 2enm kestyon Mr Speaker.  Se sa URS akoz in vin zis dan sa 4 distrik ki zot pe dir i pli vilnerab?

        Konplent ki mon gannyen nou ti devret fer li nationwide pou tou distrik gannyen tir en pe bann social welfare dan bann zafer ki nou fer li Nasyonal antye dan plas ki zis dan 4 distrik.

E dernyen kestyon se sa Hotline ki next year pe vini.  Eski la i annan en Hotline ki nou, nou kapab en dimoun ki annan konplent i kapab call pou fer krwar ou anvi fer konplent kot bann kondisyon servi en travayer etranze parey dan konstriksyon ki zot kondisyon kot zot pe viv kot zot pe reste i vreman deplorab kot nou kapab fer konplent pou vin gete.

E si sa Certificate of entitlement ou pa kapab regarde se zis tire zete.  Napa nanryen pou donn en fix quota i a pas kot ou, ou ava deside lekel dimoun ki bezwen quota pou travay Mahé.  Mersi Mr Speaker.

 

MR SPEAKER

Minis.  I annan 3 kestyon sorti kot Onorab.

 

MINISTER MYRIAM TÉLÉMAQUE

Mersi Mr Speaker mersi Onorab Pillay.  Konsernan sa Polisi ki parey renouvle Kontra plis ki 2an – sa i en sizesyon ki i valab.  Nou kapab get ladan e nou a konsidere ler nou pe fer sa Policy Labour Migration, ok.

        Lo size URS larezon ki nou’n swazir sa 4 distrik, se akoz an konsiltasyon avek Sekreter D’eta Lapovrete sa 4 pei sa 4 distrik ki’n come up koman pli vilnerab.  Se pou larezon ki’n konmanse ek sa.  Apre i pou move dan lezot distrik li, ok?

        Konsernan Hotline pou lemoman nenport dimoun i telefonn imigrasyon si zot annan en rapor pou zot fer.  E nou remersye zot.  Zot telefonn Imigrasyon zot telefonn employment e nou, nou reakte lo la.  Nou al rann vizit.  Nou al regarde si i zistifyab sa ki zot pe fer resorti, ok?

        Konsernan COI well mon krwar i annan zis mon ti’n regarde nou a pran ou sizesyon ki ou’n mete devan an konsiderasyon, nou pa pou kapab fer en komitman la selman.  Mersi.

 

MR SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Mon tri a kontan demann Minis anvi ki’n koz lo incentive, e Minis ou’n fer referans ek bann lorganizasyon ki i pa pe donn zot travayer incentive pou tenir zot dan lanplwa.  Kwa ki ou Minister pe fer pou adres sa menm sityasyon dan bann Departman Gouvernman?

E la mon mazin sa madanm e lezot travayer Lasante ki’n travay pou plis ki 30an.  E ankor pe anmenn dan lakour en saler R7300.  E sa i repet son lekor dan bann lezot Minister.

Mr Speaker Minis in dir nou ki i annan 1700 17 mil 7 san 32 travayer etranze.  Sa i bann ki’n pas atraver Imigrasyon i ganny GOP.  Minis mon garanti ou ki si bann field officer, i fer byen zot louvraz sa sif bokou pli o.

Mr Speaker, eski Minis i kapab dir sa Lasanble ki mekanizm ki son Minister i annan an plas pou detekte bann travayer ilegal san en GOP? Mon konnen in koz lo ka permi travay, legzanp Minis se parey kot H Hotel Direkter in vini i anmenn son madanm travay, son zanfan i vin travay.  Me sa bann pos pa’n zanmen ganny advertise.  Me zis sa bann dimoun in vini zot pe travay.  E sa case in ganny raporte kot Minister Lanplwa nanryen pa’n ganny fer Mr Speaker.

 

MR SPEAKER

Ou pe koz lo en case spesifik?

 

HON REGINA ESPARON

Mon pe donn li en legzanp mwan.  I annan en lorganizasyon ki son Polisi se pa si en msye pe travay la, sa madanm pa ganny drwa travay la.  An se moman Minis sa madanm ek sa msye tou lede pe travay dan sa lorganizasyon – san en GOP.

 

MR SPEAKER

Ok, les Minis reakte e reponn.   Minis.

 

MINISTER MYRIAM TÉLÉMAQUE

Mersi Mr Speaker.  Mersi Onorab pou ou kestyon.  Onorab mon pou pran sa kestyon fanmir i vin travay dan lotel parey ou’n dir sa General Manager, avek son madanm isi laba.

Sa lotel spesifik ki ou’n fer resorti la, i annan Certificate of entitlement.  Se pou larezon i pa advertise.  I al direk kot Imigrasyon.  Sanmenm sa bann defi ki nou’n fer resorti dan Statement.  Sanmenm sa ki nou’n vwar ki i pa advertise post, promosyon i pa i pa pas par lanplwa se pou larezon sanmenm sa bann ki nou pe al regard ladan.  Pou nou re vizit sa bann kondisyon, ki atase avek sa Certificate of entitlement.  Se pou sa bann rezon ki ou vwar nou pe fer sa, ok ? 

Konsernan mekanizm ki an plas, Pou en dimoun  ki annan ki i vin konman en viziter apre i travay lo GOP, se zis pou nou fer ranforsman, fer vizit kekfwa 2 fwa 3 fwa par semenn.  Akoz ou bezwen mazinen i annan pres 1500, 15,000  pou nou at least vizite vwar regarde si zot pe travay an konformite ek Lalwa.  Se pou larezon ki nou pe al entrodwir sa Hotline.  Pou nou fer dimoun telefonn nou.  Dir nou si zot vwar en keksoz ki pa pare ki pa sipoze pare normalité poum zot apre port nou latansyon, ok.?

        Apre konsernan incentive Onorab mon’n fer resorti pou dir i annan en tim profesyonnel ki pe regard e travay lo salary grid ki pou travayer.  E zot pe fer letid e ler zot pou’n fini fer sa letid zot pou soumet zot bann rekomandasyon ek Gouvernman e Gouvernman apre i a kapab pronons son lekor lo la.  I annan en letid ki pe fer at the moment, sa mon okouran.  Mersi.

 

MR SPEAKER

Onorab Esparon.

 

HON REGINA ESPARON

Mersi Mr Speaker.  Zis en pti klarifikasyon Minis.  Ler ou’n fer ou investigation ou’n vwar pou dir sa zafer lorganizasyon in anploy sa dimoun ilegalman, ki ou Minister pou fer?  Zis les li koumsa menm oubyen i annan serten sanksyon ki ou bezwen met lo sa lorganizasyon?

 

MR SPEAKER

Minis.

 

MINISTER MYRIAM TÉLÉMAQUE

Mersi Mr Speaker.  Ou pe dir mon ki anploy sa madanm oubyen in anploy en dimoun san permi?

 

HON REGINA ESPARON

…. nou’n vwar pou dir sa lorganizasyon in anploy sa dimoun san en permi.  Ki ou Minister i fer zis zot les li koumsa menm oubyen i annan serten sanksyon ki met lo li?

 

MR SPEAKER

Minis.

 

MINISTER MYRIAM TÉLÉMAQUE

Dan ka konsernan sa madanm si i ariv en ka koumsa i ganny kouver son COI.  Akoz li ler i apply permi ou pa konnen si son madanm ou.  Akoz i annan de ka bann manager madanm pa menm sinyatir.  Ou pa konnen laplikasyon i ganny soumet anba COI i vin kot nou.  Me bann leka ki ou vwar ki pe travay san en permi zot ganny fer ale, zot deporte.

 

MR SPEAKER

Onorab Ferrari ou annan en kestyon?

 

MINISTER MYRIAM TÉLÉMAQUE

En pti moman Onorab Vandredi pase nou fek atrap 2 dimoun ki ti ganny alerte pe travay kot Eden Island lo en yot. Zot in kit pei nou’n deport zot.  Nou ti deport zot.  Zot in ale yer oubyen mon krwar yer swar.  Zot in lale.

 

MR SPEAKER

Legzanp konkret Onorab Esparon ou ok?  Tre byen all right Onorab Woodcock.

 

HON WAVEL WOODCOCK

Mersi Mr Speaker.  Bonn apre midi Minis avek ou delegasyon.  Mon kestyon i kronm swivan, Minis ou’n koz lo sirveyans e ranforsman Lalwa pou asiste pou asire ki tou travayer dan Sesel i pe ganny byen trete i annan bon kondisyon dan landrwa travay.

A lefe ki mon en Manm Komite Anti Viktimizasyon, bokou bann case ki nou deal avek se bann case viktimizasyon politik dan landrwa travay sirtou dan Gouvernman.  Me malerezman i ankor egziste dan nou pei.

En legzanp tipik, en legzanp senp.  Semen pase Vandredi mon ti annan en pti vizit Grand Anse Praslin pandan opening hours bann ners ek staff sa klinik zot ti met bann konsern devan mon.

Lendi bomaten ners ansarz lopital ek klinik Inner Island in la kot sa klinik pou reprimann e donn 2 ners ek en lot staff sakenn en form pou ekrir en statement ki pou ganny anvoye kot Head Office pou pran aksyon disipliner avek zot.

Pou le senp rezon akoz zot in les mon antre dan sa klinik vizit landrwa e akoz zot in met zot bann konsern devan mwan.

Mon kestyon se ki ou Minister pou fer pou tir diskriminasyon, viktimizasyon ‘’ek nou pa ek nou’’ dan bann landrwa travay sirtou dan Gouvernman?

Mon 2enm kestyon.

 

MR SPEAKER

Onorab.  Order!  En pti moman.  Relax,

 

HON WAVEL WOODCOCK

Mon 2enm kestyon

 

MR SPEAKER

Onorab esper en pti moman.  En pti moman.  Order!  Ale poz ou 2enm kestyon Minis i ava regarde si sa i dan son purview Lanplwa.  Oubyen.. Order! Onorab Woodcock espere.  Silvouple.

 

HON WAVEL WOODCOCK

Ok, Mr Speaker mon pa pe koz ou bann pti baton pou ouver lanbousir mon pe koz lo bann keksoz serye la, ok.  Mr Speaker mon 2enm kestyon.  Yes?

 

MR SPEAKER

Onorab Woodcock silvouple, sa i en kestyon ki ou’n demande spesifikman avek Minister Lasante.  Minis i vwar si i tonm dan purview lanplwa oubyen si i tonm dan Protocol lasante Minister.

Silvouple espere les li son demann son 2enm kestyon apre nou a vwar Minis i pou reponn.  En pti moman.  Matter of privilege ale go ahead Onorab.  Silvouple, order!

 

HON CHANTAL GHISLAIN

Mon zis anvi demann Onorab Woodcock, akoz in dir en keksoz lo mikro.  Onorab Ghislain al sonny son bann reken.  Mon anvi konnen ki reken Mr Speaker?

 

MR SPEAKER

Sorry Sa kan in ganny dir sa?  Ozordi?  Onorab Woodcock mon pa’n tande, eski ou’n dir sa?  Silvouple, order!  Onorab Woodcock si ou’n dir sa?  Mon pa’n tande.  Si ou’n dir ou bezwen retract. 

 

HON WAVEL WOODCOCK

Ok Mr Speaker mon retract en keksoz ki mon’n dir.  Me selman Mr Speaker Onorab Ghislain pa kapab tou lazournen MNA koze i fatig ou zis i pe rabase lot kote.  Dir li reste trankil annan en pe respe pou son lekor…

 

MR SPEAKER

The point se si ou’n dir sa, ki mon’n tann Onorab Ghislain in dir, ou bezwen retract.  Ou’n retract ? 

 

HON WAVEL WOODCOCK

Mon retract Mr Speaker.

 

MR SPEAKER

Prezan demann ou 2enm kestyon.

 

HON WAVEL WOODCOCK

Mon 2enm kestyon Mr Speaker.  Enn bann konsern ki nou pe vwar ozordi Minis.  Se ozordi sirtou dan bann laboutik ou vwar bokou bann boutikye zot pe pran bann travayer etranze, e i pa zis dan laboutik, nou pe vwar sekirite, carer – menm bann dimoun ki pe netway lakaz en pti pe en pe partou nou pe vwar lo Sesel Praslin, La Digue.

Mon kestyon ki ou Minister pe fer pou anpese ki tro bokou etranze i antre dan nou pei ; akoz si nou pa fer atansyon nou vwar tro bokou etranze bann pti louvraz ki en Seselwa nenport ki Seselwa i kapab fer.  E ki ou Minister pe fer pou curb  sa en pe pou anpes sa kantite travayer etranze antre e pou fer sa bann louvraz koumsa.

En lot kestyon ki Minis ki mon annan, se ki ou’n dir ki labour, bann Labour Officer zot fer vizit dan bann workplace pou tyek lo bann expatriate workers e si nou pran legzanp laferm ou’n dir ki most bann vizit ki zot fer zot fer bann vizit pandan weekend.  E mon konnen sa bann vizit ou pe gete si pou fer sir ki bann travayer etranze pa e ganny eksplwate.

Me eski ou Minister i pe fer vreman bann check, bann vizit dan weekend dan Sanmdi avek Dimans? Akoz ki nou pe, vwar e mon osi dan bann weekend ki bokou sa bann travayer zot ganny eksplwate, zot ganny anvoy dan bann lezot landrwa pou fer bann travay ouswa zot pe ganny over work.  Eski ou Minister i pe vreman verifye tyeke ki bann travayer etranze pa pe ganny, eksplwate sirtou pandan pou weekend?  Mersi Minis, Mr Speaker.

 

MR SPEAKER

Minis i annan 3 kestyon, ou a deside premye si i tonm anba ou purview Minister pou reponn.  Apre i annan enn lo redwir kantite travayer etranzer, epi bann checks lo bann site kot i anplway travayer.  Minister.

 

MINISTER MYRIAM TÉLÉMAQUE

Mersi Mr Speaker.  Mersi Onorab.  Onorab sa konsernan Viktimizasyon ‘’ek nou pa ek nou.’’  Sa dimoun i devret zis al PSAB al fer son konplent devan.  Dir annan en sityasyon ki’n arive.

Pa sal kot lanplwa me al kot PSAB i al met son case laba devan i dir sa ki li i krwar ki li i santi, ok. Konsernan carer shop managers i pe ogmante.  Sa bann anplwayer ki vin demann sa bann post kot employment kot nou menm nou Minister.  Zot fer tou prosedir.  Zot advertise zot pa ganny dimoun.

Ki nou, nou pe fer dan sa loptik se pou larezon ki nou pe mazin review quota.  Pou nou kapab anmas tousala.  Ler nou a review kota nou a konnen pou dir ou devret ganny tan, e si ou ganny tan ou pa pou kapab al pli o.  Sa mon krwar i a kouver li ok. 

E konsernan vizit dan weekend; bann Labour Inspectors i ale, ek imigrasyon i al vizite dan weekend.  Zot al lo laferm, e parfwa aswar osi tou.  Akoz i annan dimoun ki nou aprann i fer keksoz aswar nou fer aswar tou.

E nou gannyen dimoun.  E sa bann dimoun e apre in breach zot kondisyon, nou fek zot kit pei nou deklar zot PI.  Mersi Mr Speaker.

 

MR SPEAKER

Mersi Minis.  Lonorab William.

 

HON WAVEN WILLIAM

Mersi Mr Speaker.  Bonn apre midi Minis avek ou lekip.  Premye kestyon Minis pa bezwen pran li an mal.  Lefe ki sa size URS mon krwar i en size ki konsern tou distrik.  ti annan en swe, mwan mon a demann ou si ou Minister malgre zot in pran en desizyon pou enplimant sa dan 4 distrik.  Me mon krwar pou dir i annan sa nesesite.  Akoz si non in en diskriminasyon.  letan nou pe dir loportinite egal.  E loportinite travay pou tou dimoun, so mon ti a dir pey konsider elarzir sa progranm URS ki tou distrik a kapab benefisye.

Akoz tou sa bann distrik i annan sa bann happiness.  2enm kestyon Minis mon’n tann ou dir ki zot  pou demann Minister Ledikasyon pou devlop en National Human Resources Devlopment Plan

Mwan mon anvi zis demande, eski zot pe pran kont swe sekter prive ki bor sekter prive son input pou antre ladan.

E si ou permet mon Mr Speaker.  In dir i annan 25 poursan bann etidyan ki pa al travay akoz sa training ki zot in gannyen.  Zot pa retenir sa pou zot al dan sa bann domenn travay.  Ki problenm i annan Minis.  Mersi.

 

MR SPEAKER

3 kestyon Minis silvouple.  I en pti pe parey sa ki Onorab Stephen Pillay ti’n demande avan.  Lo res ki ou fer lo nivo Nasyonal oubyen zis 4 distrik.  Me mon krwar Minis ti’n dir ki i sir to ti lo rekomandasyon Sekreter D’eta pou lapovrete.  Si mon rapel byen.

 

MINISTER MYRIAM TÉLÉMAQUE

Mersi Onorab pou ou kestyon.  Larezon ki URS pe al konmans dan sa 4 distrik.  Parey mon ti dir dan Statement, se akoz ler letid in ganny  fer zot sa 4 landrwa ki pli vilnerab.  Selman URS i lo en nivo Nasyonal.

Konmansman semenn prosenn lezot dimoun bann dimoun dan lezot distrik pou ganny kriye pou zot vin anrezistre, ok.  Konsernan Human Resources Development Programme sa i pe ganny fer i ongoing.  E Minister Lanplwa i lo sa Komite pou li kapab donn son rekomandasyon son bann pwen pou fer son bann komanter.

Sa 25 poursan sa bann dimoun ki annan diferan karakteristik ki zot personnel ki zot pa ganny anplwaye.  Petet nou devret fer plis analiz lo la pou vwar, ki sa bann rezon oubyen bann karakteristik ki i annan ki zot pa ganny anploye.  Mersi Onorab.

 

MR SPEAKER

Onorab Adelaide.

 

HON FRANCOIS ADELAIDE

Mersi Mr Speaker.  Bonn apre midi Minis avek ou lekip.  Minis lo kestyon swivi Onorab Woodcock mon pe demann ou, ki ou Minister pe fer, pou fer sir ki politik dan ou Minister i pa pe ganny pran konman en fason pou donn dimoun promosyon e petet i annan lezot dimoun ki santi zot defavorize kont petet sa bann desizyon ki ganny pran?

 

MR SPEAKER

Order! Order! Order!  Onorab ou pe demann… Order! 

 

HON FRANCOIS ADELAIDE

Les mon demann mon kestyon Mr Hoareau.  Ferm ou labous apre ou a ganny ou sans.

 

MR SPEAKER

Order! Order!

 

HON FRANCOIS ADELAIDE

Mr Speaker mon 2enm kestyon i akoz mwan mon en dimoun ki sibir sa bann keksoz 2016.  Se sa mon pe dir ou.  Avek sa nouvo Minis ki’n vini mon pe demann li ki dan son Minister i pe fer?  Ok ? 

        Mon 2enm kestyon Minis ki ou Minister pe fer pou petet aret donn sitwayennte etranze, pou ki Seselwa Orizinal i ava ganny valer dan son prop pei, e nou pa bezwen vwar nou pe ganny problenm avek bann zafer lanplwa.

Lot kestyon ki ou Minister pe fer sirtou avek bann lakonpannyen ki anploy travayer etranze ki zot annan sifizaman resours pou donn zot travayer e ki nou pa vwar zot dan nou bann brizan, nou bann larivyer.

E petet elimin tou nou bann biro diversite  sa pe ariv Baie Lazare e nou vwar, bokou bann travayer dan larivyer, dan delo sale ki zot pe detrir nou bann talafya menm Loulou.

E mon dernyen kestyon Mr Speaker.  Ki garanti ou pe donn sa Lasanble ki bann rikord petet la mon pe .dir akoz mon, ti met en pos kot Leta Sivil i ganny byen garde.  E petet dan bann lezot departman petet i kapab kot imigrasyon menm kot Biro Lanplwa pou ki sa bann rikord i ganny byen mete, e nou tou nou gannyen, petet pou bann referans dan lavenir.  Mersi.

 

MR SPEAKER

Minis nou a bezwen sey pran li enn par enn pou nou fer sir ki ou konpran byen sa bann kestyon, pa konnen si ou pou konnen kote ki al tyonbo Loulou.  Me sey pran sa premye kestyon zafer promosyon.

Mon prezimen Onorab ou ti pe koz lo promosyon, baze lo diferan Minister pa forseman dan Minister Lanplwa.  Dan Minister Lanplwa.  Minis.

 

MINISTER MYRIAM TÉLÉMAQUE

Mersi Onorab.  Mr Speaker, promosyon i donn lo merit, si ou merite ou ganny ou promosyon.  I ganny fer appraisal ou vwar pwen ki in donn ou.  Ou vwar si ou pe fer byen si ou pa pe fer byen.  Me si ou annan en problenm ou pa pe fer byen ou pa pou ganny promosyon.  Sa i normal tou dimoun i konnen, ok? 

        Mon asire si i annan politik ladan, mon pa pou al dan sa laliny laba ok ?  Mr Speaker konsernan sitwayennte.  Sitwayennte i annan en kriter. E kriter i la tou dimoun i vwar, i lo website.  Si ou apply ou met kriter, Komite i evalye ou aplikasyon, i kestyonn ou i fer rekomandasyon apropriye si ou pou gannyen, si ou pa pou gannyen.  Mwan mon pa pou kapab al dir konman Minis pa donn sa enn donn sa enn.  I kriter i la.  Nou pa kapab fer nanryen, ok? 

        Konsernan bann travayer ki pe ki dan lakonpannyen ki pe mon pa konnen dan delo kot anler Baie Lazare – whatever petet zot devret port latansyon lanvironnman.  Akoz imigrasyon ek Lanplwa i get kondisyon apre i get ou permi si i valab

Me si sa dimoun li i anvi li ozordi al en pti kou al lapes oubyen si i pe fer biznes kek keksoz kekfwa i annan kek pwason ki i pa sipoze pe lapes.  Me fodre ou refer ek Lanvironnman ou dir zot vin regarde vin vizite.  Prezan apre zot ava sort out – ok ?

        Lot kestyon Civil Status.  Mr Adelaide mwan mon krwar nou vreman Onorab Adelaide eskize mon demann ou leskiz.  Nou nou’n fer en sistenm digitalization ; savedir ou’n vwar pou dir ki nou annan bonn fwa nou oule met nou rikord annord.

E la dan Bidze ki pe vini ankor nou pe al demande larzan ankor pou nou kontinyen ek sa, pou nou tou pou nou rikord i annord.  Sa portre ki ou ti vwar whatever la ti annan son tablet pe ganny fer li.  Son shelf, i pe ganny fer pou met lo la.  Pa ti ankor pare, pe vini li.  I pou mete lo son shelve.  selman mon pa konnen ki mannyer in arive portre in ganny tire I don’t know for whatever reason. 

Selman nou, nou annan en sistenm ki nou pe travay lo la, pou digitalize tou nou rikord.  E lannen prosenn nou pe kontinyen menm.  I en prose ki pe kontinyelman ganny fer.  Mersi Mr Speaker.

 

MR SPEAKER

Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a konmanse par dir Minis mersi pou en tre bon prezantasyon.  Sirtou sa ki Minis i dir i pou fer, li reisi fer napa problenm tou keksoz pou ok. 

Mon kestyon Mr Speaker, i pou tous s domenn pleasure yachting ki mon krwar i enn bann domenn kot i annan plis labi konmela par bann etranze dan Sesel.

Mon’n met mon gardon Lekol Maritim mon krwar mon bezwen tir l i Lekol Maritim akoz ler i pou fini travay i pa pou ganny[en louvraz isi Sesel.  Akoz sa kantite etranze ki pe ganny permi pou travay dan yachting.

        Alors mon kestyon i koumsa Mr Speaker;  eski Minis i kapab eklersi nou. Lo lakantite GOP ki Departman Imigrasyon i donnen pou bann etranze travay dan sa sekter.  Notaman bann yacht master, bann kaptenn, bann marine mechanic, bann skipper, fishing guide, ek deckhand.  Tousala ou vwar tou sa bann etranze pe fer ziska bros bato zot bros bato konmela.

So mon 2enm kestyon eski Minis i kapab dir Lasanble si bann travayer etranze ki vin travay dan sa sekter, i bezwen pas bann menm legzanmen lekivalans.  Pou fer sir ki zot annan sa kalifikasyon neseser, zot pa zis vin ek en sertifika ki nou pa ni konnen, si zot in anmas sa obor semen  en landrwa.  E SMSA ne k i d onn approval lo la.  Ler ou konplent ek SMSA i dir ou GOP – ler ou konplent ek GOP zot dir ou dir imigrasyon, ler ou konplent ek imigrasyon zot dir ou Lanplwa sakenn i pass the buck

Solman mon ti a kontan ki Minis i kapab dir nou si i annan en kontrol kalite lo standar sa bann kalifikasyon ki sa bann dimoun i gannyen.

E finalman e ki Minis i kapab dir nou si i annan aktyelman en plan pou son Minister travay avek bann akter dan sa sekter.  Lo bann progranm ki pou ankouraz bann zenn Seselwa antre dan sa kalite travay.  Nou konnen poudir bann zenn Seselwa i kontan lanmer.  E nou bezwen sey ankouraz zot sa se bann travay ki ganny byen peye.  Me i paret-man nou pe aksepte solisyon pli fasil apply 2 GOP, apply 4 GOP sa semenn Silhouette Cruises in met 4 zenn Seselwa in fer 4 Sud Africain  mont lo bato pou fer cruise 2 mwan.

Toulezour i arive Minis.  Mwan mon ti a kontan konnen ki zot pe fer.  E en zour kekfwa ou ava envit mon ler ou pe fer bann check laba, Eden Island akoz laba osi Eden Island i annan sa bann,  keksoz.  Eden Island pa Sesel sa, Mr Speaker.  Parler zot annan zot Lalwa pou zot.  Mersi.

 

MR SPEAKER

All right kestyon Minis. Sirtou lo sa domenn bato.

 

MINISTER MYRIAM TÉLÉMAQUE

Mersi Mr Speaker.  Mersi Onorab Ferrari.  Avan mon pran larepons ou kestyon mon krwar i bon nou konpran pleasure yachting ek visiting yacht.  Pleasure yachting i plito komersyal.  Zot fer zot anrezistre pou charters, zot pou diving, game fishing lo en baz komersyal.  Visiting yacht i bann ki prive.  I vin isi en semenn, 2 semenn, 3 semenn, apre i ale ek son yot ok.

        Statistic ki mon annan la an se moman se ki an 2016 nou ti donn 44 GOP ki lye avek pleasure yachting.  Sa i enkli skipper, skipper company director, captain, yacht captain, skipper or director, marine officer skipper, marine technician, guide, engineer, marine mechanic, dive master, dive instructor, guiding instructor,  teknisyen, fly fishing guide, multy-lingual steward, hostess, ok?  Pou 2017 ziska le 20 Oktob nou’n donn 29 menm kategori ki mon’n mansyonnen anler, ok? 

An sa ki konsern rekritman, i annan en lakonpannyen ki ou’n mansyonnen la, ou konnen ou menm.  I annan en COI li osi.  I annan en Certificate of entitlement.  Se pou larezon ki i pa pas kot employment i vin direk imigrasyon.  Sanmenm sa mon’n dir dan mon Statement ki tousala nou  bezwen revize.   Ler nou pou revize i pou ferm sa bann trou ki tonm tonbe petet i ava bar tousala ok ?

        Konsernan ou 2enm kestyon Onorab, konsernan competency.  Sa mon krwar i plito SMSA ki sa regilatwar ki responsab pou verifye kalifikasyon bann travayer.

Akoz Imigrasyon pa pou kapab fer sa li.  I pa pou konnen si ou annan 60, 40.  Nou pa pou konnen.  Nou zis ou anmenn ou Sertifika ou sorti kot SMSA ou Sertifika competency tou keksoz i annord ou apply, prezan nou donn ou permi.  Nou napa sa konpetan pou nou al fer.  SMSA ki fer Onorab.  Li i sa body ki pou fer.  Pa  Imigrasyon.  Imigrasyon i pou donn ou zis permi li.  Ler tou ou dokiman i annord.  SMSA ki pou al regarde si ou konpetan pou ou anmenn en bato tan zistans, tan zistans.  Nou pa pou konnen nou.  Imigrasyon i pa competent ladan Imigrasyon Lalwa ou konnen i zis si ou annord, ou permi i annord tou keksoz i annord.  Sa ki Imigrasyon i antre ladan.

Apre si i pou annan demann pou bann zenn pou al travay dan sa sekter.  Mon krwar i pou annan demann akoz ler, lentrodiksyon lo ekonomi pou antre i pou annan en kantite demann pou bann travayer ki lye avek bato ek delo.  Akoz i pou kout plis dan sa domenn.  Savedir demann pou toultan annan.  Mon pa konnen si mon’n repons ou kestyon Onorab.

 

MR SPEAKER

Onorab Ferrari ou annan en siplemanter?

 

HON JEAN-FRANCOIS FERRARI

Minis mon ti a zis kontan demann Minis si a pare pou li ler i rankontre son koleg transpor Maritim poudir ki SMSA pa teste konesans bann dimoun.  Zot teste konesans bann Seselwa.  Ler ou, ou en Seselwa ou annan en Sertifika la i a fer ou asize i a fer ou transpire i a fer ou fer ou legzanmen.

Ler etranze i vini zis i donn en Sertifika e sa ou a krwar i sorti kot Larenn oubyen kot Mr Trump.  I ganny aksepte otomatikman.

E mwan mon ti a kontan si Minis i kapab re asir mon, pou dir i ava sey gete si zot pa kapab teste sa competency.  Akoz mon si mon al travay Canada demen zot pou fer mon test.  Mon kapab vin ek tou mon Sertifika.  So eski Minis i pare pou donn mon sa lankourazman.  Mersi silvouple.

 

MR SPEAKER

Minis.

 

MINISTER MYRIAM TÉLÉMAQUE

Mersi Mr Speaker.  Mersi Onorab Ferrari.  Onorab ki mon kapab sizere nou a bezwen form en Komite ansanm avek SMSA.  E nou formen en Komite.  Mon krwar nou PS i lo sa Komite.  E i ava take up sa pwen, e i a ganny diskite.  Apre nou a kapab donn ou en feedback ki arive.  Mersi.

 

MR SPEAKER

Very good.  Mersi PS Baker i a take up.  Onorab Ernesta.

 

HON PAUL ERNESTA

Mersi Mr Speaker.  Bonn apre midi Mr Speaker, Minis ek ou delegasyon ek ou koleg e tou dimoun a lekout.  Mr Speaker Minis dan son lentervansyon in mansyonnen ki lo somaz i en pe pli o parmi bann zenn e bann madanm.  E sirtou bann zenn madanm.

Nou vwar ki bokou fwa bann konsern ki annan ozordi bokou fwa mon’n pas; atraver.  I annan bann zenn ki anvi travay.  Zot fer aplikasyon pou al travay me i annan sa fenomenn mank leksperyans ki fer zot pa ganny lanplwa. Eski Minis i annan serten plan pou zot adres sa sityasyon ki pou permet nou bann zenn kapab antre dan lanplwa formel ?

Apre anliny dan menm direksyon.  Nou’n vwar osi paler bann i annan bann lavertisman ki ganny fer.  par egzanp si pe rod en shop manager kot bann kriter ki bann basic entry requirement ki pe demande ki very high.  Ki sa ou a krwar i bann fason ki pou bitter Seselwa pou apply pou zot kapab ganny sa post.

Eski Minis pe mazin ou Minister petet pe mazin etablir en guideline pou bann entry requirement de-baz.  Pou kapab permet Seselwa zot osi kapab apply pou sa bann post e evantyelman ganny lanplwa.  Mersi.

 

MR SPEAKER

Minis.

 

MINISTER MYRIAM TÉLÉMAQUE

Mersi Mr Speaker.  Mersi Onorab.  Konsernan leksperyans se pou larezon  ki nou’n entrodwir sa Scheme My First Job, ki pou donn leksperyans e bann zenn ler zot antre lo travay.  E sa Scheme Devlopment Programme osi tou i pou ganny ankadre ladan.  I pou ed zot pou build up zot skills.  E zot kapasite.

E lo size bann kriter ki ganny mete pou bann post dan Nasyon nou okouran, e dan revizyon Lalwa ki nou pe fer, i ganny pran an konsiderasyon.  Alor i pou ganny rektifye.   Mersi.

 

MR SPEAKER

Ok.  Onorab Andre.  .

 

HON CLIFFORD ANDRE

Mersi Mr Speaker.  Mr Speaker mon ti a kontan demann Minis, pou dir nou si letan in repas lo bann nouvo regilasyon, pou fer sir ki bann etranze i ganny anploye, i ganny anploye an konformite avek serten lareg parey in eksplike, si sa i pou aplikab pou bann etranze ki’n deza ganny anploye, me solman zot pa’n an konformite avek sa prosedir ki pe ganny mete. So si i pou mars si zot pou al revwar, bann ki’n pa’n pas dan sa sityasyon.

E 2enm ; eski Minis i kapab dir nou si bann lorganizasyon dan sa ka parey kot FIU letan mon al laba mon vwar en sekirite etranze, ki koz ek mon Angle, pou li demann mon ki mon pe vin fer, e bann lezot prosedir e i get anba loto avek en laglas si napa Seselwa ki kapab ganny train pou kapab get anba loto avek laglas?

E si, 3enm kestyon se eski Minis i kapab dir nou si pa’n letan bann anplwayer i anploy bann etranze, si son Minister i ale pou vwar bann kondisyon ki sa bann etranze pe reste ladan, akoz parfwa i annan ki bann kondisyon deplorab kot napa elektrisite, zot pa pe ganny manze adekwa parey zot sipoze gannyen.

E pi i retourn lo Gouvernman i vin parey en revolt ki zot fer epi Lotorite i bezwen al vwar zot pou fer serten sityasyon.  Sa i sa 3 kestyon ki mon annan.  Mersi Mr Speaker.

 

MR SPEAKER

Minis.  Mon ti a demann zot antretan ki Minis pe konsilte son teknisyen ki 5er in sonnen i reste nou 10 entervenan

 

MINISTER MYRIAM TÉLÉMAQUE

Mersi Mr Speaker.  Mersi Onorab Andre. Konsernan bann kondisyon travayer nou annan nou bann Labour Inspectors ki fer bann vizit.  Se pou larezon ki ou’n vwar mon’n mete dan Statement.  Ki bann nouvo prosedir ki nou pe al met an plas, se avan sa dimoun i vin isi.  Kontra pou bezwen montre, pou nou konnen ki annan dan sa Kontra ki apre ler i vin isi i a konnen pou dir in siny sa laba akoz la ki arive ler zot vin isi, zot soumet Kontra ek nou.  Zot dir ou non dan sa Kontra pa sa ki zot in sinyen dan zot pei lorizin.

Me nou. Nou bezwen rod fason pou nou re ranvers sa.  Nou pe fer fason ki ler nou donn ou GOP ou soumet Kontra osi pou nou vwar ki kondisyon ou pe don s dimoun ki son saler i pou gannyen.  Ok. 

        Lo size regilasyon konsernan etranzer etranze i annan en Polisi ki anmars, me selman ki nou pou kapab fer nou pa pou kapab sa Polisi i pou take up pou bann nouvo rekritman.  E nou, nou pa pou kapab bann ki’n, deza avan nou pa pou kapab revoke akoz in deza la anba en lot Lalwa.  Nou pa kapab al revoke li.  Nou bezwen nouvo i a tonm dan sa bann ki pe vini.  Ok ?

        Konsernan sekirite kot FIU nou annan 48 security firms Seselwa, tousala i Seselwa e zot vin rod travayer etranze menm Onorab Andre.

Me ler mon dir be non rod en pe Seselwa met onboard zot dir mon zot pa gannyen.  So se pou larezon ki petet tou sa ki nou vwar diskite dan nou Labour Imigration pou enkli bann demann ki pei i annan.  E nou, nou ava regarde ki mannyer nou pou kapab fer sa, materyalize.  Mersi.

 

MR SPEAKER

Mon ti a demann tou dimoun pou sey evite demann 3 kestyon, akoz i annan entervenan ki oule koze, demann en kestyon.  Onorab Aglae.

 

HON EGBERT AGLAE

Mersi Mr Speaker.  Mr Speaker mon annan zis 2 pti kestyon fasil pou Minis vitman.  Minis ler nou pe koz lo to somaz 2017 la ki 3.9 poursan, eski i baze lo sa plan konpreansiv e tou sa bann resers ki ou vwar baze lo sa bann target ki ou’n mete 2019, eski nou pou vwar en rediksyon ase signfikan dan to somaz?

E dezyenmman Minis ler nou pe koz lo sa travay lo sa plan lenplimantasyon byensir ou Departman i annan en ta travay pou fer.  Ki i anmenn mon lo en kestyon kot i konsern ou travayer ou lekip li menm, sirtou bann employment officer. 

Eski zot osi zot pe ganny gete anba sa ka lanplwa pou fer sir ki zot osi zot annan zot pe ganny byen zot incentive pou zot kapab delivre donn en pti pe an plis e anmenn sa plan kot i sipoze arive?  Mersi

 

MR SPEAKER

Minis.

 

MINISTER MYRIAM TÉLÉMAQUE

Mersi Mr Speaker.  Mersi Onorab.  Onorab sa Scheme URS i pou ed nou en bon pe, pou redwir sa to somaz.  Nou annan nou krwar i pou redwir en bon pe.  E lezot progranm ki nou annan anmars.

Konsernan travayer employment nou deza annan en Scheme of Service ki la an plas.  E sa i ganny revize ler nou vwar i annan en nesesite pou ganny revize.  Selman mon bezwen fer resorti.  Scheme normalman i annan bann kondisyon ki ale avek.

Petet i annan i dir ou fodre ou fer tel legzanmen.  Pou mont lo tel post.  Fodre ou annan tel leksperyans pou mont lo tel post.  Osi i ganny pran an konsiderasyon ler nou ganny nou reviz nou revwar saler nou employment offices.  Mersi Onorab.

 

MR SPEAKER

Sey demann ankor, demann en kestyon olye 3 Onorab Churchill Gill.

 

HON CHURCHILL GILL

Mersi Mr Speaker.  Bonn apre midi avek ou delegasyon.  Mon annan zis enn mwan.  I annan enn ki Minis pa’n mansyonnen dan son Statement. 

Me selman li i en size ki i pe fer en pe problenm dan milye, pa bokou letan avek Saint Anne Minister Lanplwa ti bezwen al entervenir konsernan redundancy.  Alors mon ti a sizere ki redundancy i ganny vwar kot sa bann dimoun ki anploy sa bann etranze zot kler ler i annan change of management, oubyen si zot pe fermen.  Ki mannyer fodre fer ki nou travay Seselwa i ganny byen zot benefis ki zot merite.  Mersi.

 

MR SPEAKER

Minis.  Benefis redundancy.

 

MINISTER MYRIAM TÉLÉMAQUE

Onorab ou, mersi Mr Speaker.  Onorab oule mon koz lo sa redundancy oubyen…  Akoz nou, nou a kontinyen sansibiliz bann travayer lo prosedir redundancy.  Akoz i deza la dan Lalwa.  Mersi.

 

MR SPEAKER

Ok Onorab.

 

HON CHURCHILL GILL

Non Minis pa bezwen koz lo la.  Zis selman mon ti dan Statement i pa’n ganny mansyonnen.  Alors mon ti a kontan li osi zot vwar li. Ok.  Mersi.

 

MR SPEAKER

Enkli li dan ou Statement evantyelman.  Ok Onorab Vidot en kestyon.

 

HON AUDREY VIDOT

Mersi Mr Speaker.  Minis nou bann lezot koleg in fer sorti kler ki nou bezwen defann nou bann travayer Seselwa.  Me osi enportan ki bann travayer etranze ki travay pou Sesel pou ranplas serten pozisyon.  I enportan osi ki nou limaz Sesel pa ganny sali.

Alors mon pou demande, akoz ki sa Hotline pou ganny konmanse lannen prosenn dan plas sa lafen sa lannen akoz   lorganizasyon i pa pe respekte bann Kontra e i pa pou sorti byen pou nou ki nou Seselwa pa pe tret sa bann travayer.  Mersi.

 

MR SPEAKER

Ok Minis.

 

MINISTER MYRIAM TÉLÉMAQUE

Mersi Onorab.  Mersi Mr Speaker.  Mr Speaker sa Hotline la nou pou entrodwir li very early next year.  Vreman… akoz nou fini konmans fer kontak avek bann operater telefonn.  Nou’n fini fer kontak.  I reste zis pou nou f[er le neseser pou nou met li la.  Selman ou konnen Bidze pe fermen, tou dimoun i busy i avek Bidze nou busy nou menm nou.  Me sa pa en leskiz.

Me selman pou le moman bann dimoun an deor i kapab kontinyen f[er parey zot pe fer la.  Zot telefonn nenport dimoun, zot telefonn bann travayer imigrasyon, zot telefonn bann travayer  lanplwa zot telefonn nou biro.  E nou, nou reakte lo sa bann calls.  Mersi Onorab.

 

MR SPEAKER

Onorab Sebastien Pillay.  En kestyon.

 

HON SEBASTIEN PILLAY

Mon ti annan detrwa kestyon Mr Speaker selman mon a met li dan enn, mon ava kase.  Mersi bokou Mr Speaker.  Bonn apre midi tou dimoun bonn apre midi tou Manm Onorab.

Mr Speaker mon ti a kontan demann Minis prenon kont bokou komanter in ganny fer lo travayer etranzer, akoz travayer etranzer ou’n sif bann sif bann anplwayer pe fer antre bann travayer etranze.  Eski ou kapab dir nou pou atraver bann enteraksyon ki ou Minister in gannyen avek bann anplwayer?

Mon konpran nou bezwen regard nou bann anplwaye.  Me nou bezwen regarde si bann anplwayer ki bann difikilte ki bann anplwayer zot menm zot in eksprimen?

Mon krwar zot tou zot pe ekout nou dayer e nou bezwen regard zot perspektiv osi konman zot bezwen fer larzan pou zot biznes i vyab ki bann difikilte mazer ki zot in met devan kot zot in prezant serten konsern pou ki zot bezwen sa bann dimoun vin dan pei pou kapab travay avek zot

E prenon kont prezan ki annan serten sirkonstans kot ou annan sa Certificate of entitlement par egzanp mon konnen i dir ou si ou annan enn ziska 50 ou annan 30 poursan travayer.

Eski zot annan plan  vi ki i tonm anba TIA met an plas en diskisyon avek Minister Tourizm pou revwar sa bann entitlement spesifik.  Pou fer sir ki i annan en pe plis ekitabilite dan lafason ki bann post i ganny donnen dan sa bann lorganizasyon?

E prenon kont pos si nou vin en pti kou lo Sekter Gouvernman sekter piblik.  Eski ou Minister i anvizaze travay lo okenn Polisi dan lefitir oubyen met serten demann devan Gouvernman pou konmans vwar bann cadre specific emolument par egzanp ka travayer imigrasyon, ka ners, kad ansenyan, konmsi pou regard sa bann ka dan zot eleman ki zot in tonbe e pou regarde si sa bann Scheme i tonm an dakor avek sa ki zot devret pe gannyen.  Mersi pou sa loportinite Mr Speaker.

 

MR SPEAKER

Ok Minis.

 

MINISTER MYRIAM TÉLÉMAQUE

Mersi Mr Speaker.  Mersi Onorab Pillay.  Onorab dan bann mon bann Klinik ki mon fer bann anplwayer i plenny bokou nou travayer.  Kantmenm nou nou’n fer, en Statement balanse.

Zot dir ou zot ganny bokou difikilte zot anploy en dimoun i vini 2 zour apre 3enm zour zot pa vwar li ; oubyen ler in ariv lafen di-mwan i pran son saler apre zot pa vwar.  Oubyen parey mon’n dir sick leave i come up.  Konmsi en bon pe problenm zot osi zot gannyen.  E se pou larezon ki zot bezwen vin kot nou lanplwa vin demann pou ganny sa travayer etranze.

E nou, nou pe anvizaze.  Ki sa bann Polisi ki nou pe al met anfors,  sa bann revizyon ki nou pe al fer.  E sa bann demars ki nou pou fer avek ledikasyon i pou ed i pou ede.  Pou nou kapab di mini sa demann.

Lo size quota, pou fer konsiltasyon avek tourizm.  Normalman quota i ganny deside par en Komite Sense. Committee of Employment of Non-Seychellois.  Se zot ki diskite pou evalye ki mannyer quota, i devret ki kantite zot devret gannyen dapre zot lendistri.  E sa Komite i ganny zire par PS Lanplwa e mon mazinen nou ava kapab take up dan sa Komite.  Si fodre reviz quota, an zeneral, konbyen nou devret gannyen konbyen ki pa devret gannyen.

Lo size kad mon krwar nou pa pou kapab tro fer komanter lo la akoz tou Scheme i ganny travay lo la, par DPA.  E nou, nou pa pou kapab al fer en komanter lo la.  Mersi bokou.

 

MR SPEAKER

Onorab Henrie.

 

HON GERVAIS HENRIE

Mersi Mr Speaker.  En kestyon alor.  Lo paz de Statement Minis 4enm paragraf i dir statistik ki nou annan apartir le 23 Oktob i montre ki i annan 17, 732 travayer etranze ki aktiv dan pei.

Kestyon mon oule demann Minis eski son Minister in fer en letid, nou’n tann koz bokou lo letid konbyen ozordi travayer etranze pe kout nou pei.  An term deviz etranzer ki sorti an deor Sesel.  An term servis ki zot servi dan pei depi delo, elektrik, bis, lakantite salte ki zot prodwir pou nou evantyelman konman en pei realize pou dir nou bezwen nou Seselwa lev-e al travay e redwir lakantite etranze ki i annan dan nou pei.  Mersi bokou.

 

MR SPEAKER

Minis

 

MINISTER MYRIAM TÉLÉMAQUE

Mersi Mr Speaker.  Mersi Onorab Henrie.  Onorab Henrie sa letid Labour Migration sa letid ki nou pe fer pou Labour Migration i pou ankadre sa bann pwen ki ou ou’n fer resorti.

E apre nou pou evalye sa bann pwen fason ki, nou ava adres li par en Polisi ki nou prezant avek Gouvernman.  Mon pa konnen si mon’n byen donn ou larepons.

 

MR SPEAKER

Onorab Henrie.

 

HON GERVAIS HENRIE

Mr Speaker i pa’n reponn mon kestyon, pou lenformasyon Lasanble.  Nou’n ganny enformen mon Komite COGA in ganny enformen avek Minister Finans pou dir i kout 5 million Dolar –  an term saler tou lemwan ki bann etranze i tire.  5 milyon Dolar zis mazinen konbyen roupi ki ti kapab servi pou nou pei.  Mersi bokou.

 

MR SPEAKER

Ou pwen se ou pe fer sorti Seselwa i devret realize nou travay pou gard sa forex dan nou pei.  Mersi.  Mon krwar Minis ok.  Alright.  Order! i reste annan en pti git pasyans zis 4 entervenan nou a kontinyen apre nou ava arete.  Onorab Loizeau.

 

HON NORBERT LOIZEAU

Mersi Mr Speaker.  Bonzour Minis.  Minis mon kestyon pe al antyerman lo bann graduates ki sorti dan bann sant profesyonnel ki ou’n mansyonnen la, spesyalman bann etidyan SIT ; Vv ki souvandfwa mazorite sa bann etidyan, ler zot sorti lekol SIT spesyalman bann ki pe fer electrical, refrigeration bann ki pe fer en pe plis dan konstriksyon. By the time ou rantre dan lanplwa pa bokou zot ki ganny aksepte dan lanplwa.  Senpleman akoz lo kote lenkonpetans.  Petet bann ki’n ganny aksepte se bann ki petet avan SIT ti annan en zanmi zot papa, zot frer ki ti pe fer sa louvraz alors zot in ganny sans fer en pe avan al lekol.

Mon kestyon i koumsa eski pandan bann vizit ki ou’n  fer dan bann distrik, dan bann landrwa travay ?  Eski ou satisfe avek nivo sa bann manrmay ki sorti SIT e ki ou Minister pou fer vi ki ou dir zot pou travay ansanm avek Minister Ledikasyon pou fer pou ki upgrade nivo sa bann etidyan SIT spesyalman?  Mersi Minis.

 

MR SPEAKER

Minis.

 

MINISTER MYRIAM TÉLÉMAQUE

Mersi Mr Speaker.  Mersi Onorab Loizeau.  Onorab dapre lenformasyon ki mon annan, mazorite bann etidyan ki sorti SIT i ganny abzorb dan landrwa travay.  E nou selman nou pou bezwen travay avek ledikasyon, pou train sa bann etidyan pou zot kapab meet demand ki annan lo marse lanplwa.

Lo size ki ler mon’n al fer bann vizit bann landrwa ki mon’n al fer vizit napa bokou bann etidyan SIT.  Selman i annan 2 landrwa ki mon’n rankontre 2 zot.  E sadly enough, zot pa’n swiv sa letid ki zot in ganny fer.  Zot in al dan en lot area.

Ler ou demann zot, zot dir ou koumsa saler i zwe en rol.  Apre zot dir ou koumsa sa demann pa sa kantite ki zot, zot ti a kapab gannyen, akoz petet mon pa konnen si kekfwa landrwa ki zot pe demande sa bann landrwa i pa oule pran zot akoz kekfwa zot napa leksperyans, petet sa osi i en deterrent pou landrwa travay pou zot menm.  Mersi.

 

MR SPEAKER

Onorab De Letourdie.

 

HON JANY DE LETOURDIE

Mersi Mr Speaker.  Bonn apre midi ankor tou dimoun.  Minis depi ki ou’n vini nou tande bokou dimoun nou pe dir i pa ganny dimoun pou travay Seselwa pa oule travay.  Me solman pa bon zeneralize akoz nou si konnen pou dir i annan sa group dimoun ki travay seryezman ki travay dir, pou fer sir ki son lakonpannyen i benefisye a lafen dizour i mazinen li osi i a kapab ganny en benefis.  Sirtou sa bann group zenn ki nou pe koz lo la Minis, i annan konplent ki dan ou bann vizit familyarizasyon ki ou’n fer.  Ou pa’n vreman enterakte direk avek zot.  Donk ou pa konnen zot pa satisfe akoz ou pa konnen ki bann difikilte bann problenm ki zot pe pas ladan.  Alors Minis zot i annan sa bann detrwa dimoun sirtou dan bann sekter prive ki’n ekrir ou let depi 1 mwan pase, konplent i annan ki ou pa ankor donn zot okenn larepons.

E sa petet zot, zot pe mazinen eski i pa bann mannev ki zot lakonpannyen pe fer pou fer zot degoute pou ale pou ki travayer etranze i a kontinyen  vini plis, anfen cheap labour dan en serten sans.

Minis ki ou ava annan pou dir sa bann dimoun.  Mr Speaker vre ou’n dir zis en kestyon, me solman nou’n dir bann dimoun fer li nou Lasanble. I annan e n garson in ganny 18an mwan pase.  In travay pou refrigeration i ti pe anplwaye kot Gran Kaz.  Donk in ganny son 6 mwan probasyon son 6 mwan probasyon i sipoze fini lafen di-mwan Oktob.

Bomaten letan in al travay in ganny en let ki’n dir li in fail i pa’n succeed.  Minis, sa garson i a pe ekoute la donn li en lespwar dir li ki i pou fer.  Mersi.

 

MR SPEAKER

Minis.  Petet Onorab ou kapab anmenn son bann spesifik non sa dimoun pou donn Minis pou li sey swiv.  Apre sesyon.  Minis.

 

MINISTER MYRIAM TÉLÉMAQUE

Mersi Mr Speaker.  Mersi Onorab. Onorab dan Statement mon’n dir pou dir i annan dimoun ki travay tre dir.  Bann ki reste apre ler, bann ki travay dan weekend, bann ki vin travay kantmenm i pa zot zour travay.  Mon’n rekonnet sa mon, akoz i annan Seselwa ki travay dir.

Nou bezwen aksepte sa.  I annan.  Non, non i ok, napa problenm mon pe vin lo la.  Konsernan lakonpannyen kot i annan en group zenn, ki ler nou’n pase dan vizit in dir nou pa’n zwenn zot.

Mon konnen ki i annan en group zenn ki’n ekrir in dir pou dir nou pa’n vizit zot.  Sa moman kot nou ti pase zot pa ti la.  I vre zot pa ti la akoz mon pa konnen, si kekfwa pa ti zot ler travay oubyen I don’t know for whatever reason.  Selman nou pe fer laranzman pou donn zot en apwentman pou nou koz ek zot – akoz zot in ekrir zot in dir zot ti a kontan koz ek nou.

Mon’n dir PS nou a fer laranzman nou ava vwar zot nou ava koz ek zot pou nou vwar ki zot problenm.  Akoz kekfwa vre ler nou’n pase zot pa ti la.  Napa problenm nou ava regarde.

Konsernan sa garson 18an Onorab in fini lekol refrigeration?  Petet ou a kapab donn nou son detay nou a regarde ki mannyer pou ou kapab fer pou nou ed li.  Akoz nou la pou nou ed bann dimoun.  Ok mersi.

 

MR SPEAKER

A lafen ou a donn PS son detay.  E zot a kapab swiv li.  Onorab John Hoareau.

 

HON JOHN HOAREAU

Mersi Mr Speaker.  Mr Speaker i annan 2 defi ki mon vwar Minis pa’n aborde dan son Statement i annan enn lo sirtou lo size GOP.  I annan enn premyerman lo size ki bann dimoun ki vin lo en serten GOP apre zot fer en lot louvraz.  Ki zot vin lo pou zot ganny GOP pou travay konman gard sekirite.  Me selman apre zot travay konman drayver.

2enm i annan

sa bann dimoun osi ki apre zot ler zot al fer lezot louvraz zot al fer mason dan distrik oubyen bann lezot keksoz – ki zot bar bann pti dimoun dan kominote pou zot ganny sa louvraz.

Ki fason ou pou adres sa bann problenm? E osi bann travayer ilegal taler mon krwar ou’n dir poudir bann ki vin ilegal ou fer zot ganny deporte.

Me bann ki fer vini sa bann dimoun ki aksyon ou pe pran kont zot pou dekouraz zot avek sa bann pratik?  Mersi.

 

MR SPEAKER

Minis.  Aktyelman sa i en bon kestyon.  As if sa ki ganny tyonbo, me sa ki’n anmenn li.  Avan Minis i reponn ale ok.

 

HON JEAN-FRANCOIS FERRARI

Minis i annan osi sa ka kot i annan bann dimoun ki fer travay bann etranze.  Zot GOP in expired apre sa bann dimoun i travay isi pou 6 mwan – 8 mwan – 1an san GOP.

        La prezan ler dimoun i oule fer sa travayer tournen pou travay pou li zot kot imigrasyon zot dir avek li non akoz sa dimoun pa’n pey GOP.  

Sa bann dimoun ki pa’n GOP ‘la se bann dimoun ki annan bann kontak en pe o.

E mwan mon santi ki nou ki Departman Imigrasyon i soutir zot.  Eski Departman Imigrasyon i soutir zot?  Akoz i annan dimoun ki bezwen vin pey dan zot plas apre pou sa dimoun pase.  Mersi

 

MR SPEAKER

Minis mon krwar i reste 2 kestyon ou a kapab reponn.

 

MINISTER MYRIAM TÉLÉMAQUE

Mersi Mr Speaker.  Mersi Onorab Hoareau, Onorab Ferrari tou.  Lo size bann etranze ki breach kondisyon zot Permi Travay.  Ler zot ganny ler in ariv sityasyon ki nou vwar i arive, nou pran aksyon tou keksoz i ler ou kas Lalwa ou bezwen ganny deporte.

Selman lo sa pou ganny rektifye ler nou pou entrodwir sa GOP Card.  Sa GOP Card la pou fer en bon pe iregilarite vin absoli.  Akoz en bon pe keksoz i pou pa pou kapab nou pa pou kapab fer ler ou annan sa kart, ok.

Konsernan bann dimoun ki ankouraz dimoun ki pou travay legalman, oubyen zot permi i fini.  Zot pa fer le neseser.  Sa nouvo Lalwa Immigration Act i pou vin devan Lasanble,  i pou ganny kouver ladan.  Zot a vwar zot menm ki nou’n rekomande i arive ek sa bann anplwayer.

Sa i pou ganny taken care of dan sa nouvo Lalwa.  Parey mon ti dir i annan 2 Lalwa ki pou vini.  I annan employment Bill avek Immigration Act.  Tou lede.  Ok. 

 

MR SPEAKER

Ok.  Dernyen.  Minis ou’n fini reponn ou kestyon.  Dernyen entervenan Onorab Basil Hoareau.

 

HON BASIL HOAREAU

Mersi Mr Speaker.  Mr Speaker vi ki mon dernyen eski mon kapab demann Minis 2 i menm kestyon

 

(laughter)

 

MR SPEAKER

Minis pa ankor fatige.

 

HON BASIL HOAREAU

Mersi Mr Speaker.  Minis ou’n fer referans lo paz 4 ou rapor dernyen paragraf.  Lo travayer zournen.  Ki nou apel casual workers.

        Ou’n dir pou dir i annan bokou travayer ki plito aksepte pou ganny anploye ouswa zot pli kontan ganny anploye konman en casual workers. 

        Eski Minis ou Minister in pran kont osi pou dir i petet i bann anplwayer ki kree sa sityasyon pou anploy sa bann travayer konman casual workers, akoz zot konnen pou dir zot kapab donn notis sa travayer en zour.  Fini pa pey konpansasyon.  Eski ou Minister pe fer sir ki zot enforce Lalwa ki dir pou dir si en travay en louvraz i such ki pa son natir i devret en dimoun ki la permanan, sa dimoun pa pe ganny anploye dan sa kalite louvraz konman casual worker but it should be continuous. 

Sa i enn parske sa ou’n dir pou dir i kree bann sityasyon kot evantyelman sa bann travayer Seselwa ki casual i ganny ranplase par en travayer etranze.  Sa i enn.

Dezyenmman lo paz 7 Minis.  Kot ou’n kategoriz bann lendistri dan ki bann nou vwar bann travayer etranze pe travay.

Eski i annan en lot further categorise categorization ki’n ganny fer.  Kot nou gete dan sak lendistri sak lendistri.  Parey lotel ek restoran.  Nou gete ki kalite louvraz ki annan plis etranze.  Eski i dan zarden? Dan komers eski i dan i bann salesperson ki nou vwar dan laboutik.

Akoz mon demann sa parske eski i pa plis ki ler.  Mon’n deza dir dan Lasanble.  E mon repete akoz mon fermeman krwar ladan, ki nou restrikte serten louvraz selman pou Seselwa.

 

MR SPEAKER

Ok. Alright. Alright. Minis i annan 2 kestyon la pou reponn.  Minis.

 

MINISTER MYRIAM TÉLÉMAQUE

Ok, konsern.  Mersi Mr Speaker.  Mersi Onorab Hoareau.  Konsernan casual worker ki i annan anplwayer plito anploy en travayer lo .. as casual.  Mon krwar nou pou bezwen ranforsi pli for Lalwa.  Akoz i annan bann ka ki nou okouran.  Me selman i annan bann ka ki nou okouran.

Me selman i annan bann ka osi ki mwan mon’n vwar i vin devan mon.  Zot pa oule anploye permanan.  Kantmenm mon’n dir zofisye be konsey li dir li fodre i anploy permanan akoz i annan sa benefis, son Pansyon tou keksoz pou li gannyen i dir non i plito pran casual, akoz ler i pale vini i pa vini son letan i pou li.  Selman nou, nou a fer nou neseser nou la ranforsi Lalwa si i annan en defayans konsernan employers, ok ?

        Konsernan restrikte serten kategori louvraz nou ti annan sa Onorab nou pe rode ki mannyer nou pou phrase li.  Nou ti annan sa, apre in ganny retire.  Selman nou annan en letid ki nou pe fer ki nou pe fer pou nou regarde si nou pou rekomande avek Komite sense si nou pou fer li re antre ankor.  Oubyen dan kondisyon COI, si nou pou met li ki serten travay i devret rezerve pou Seselwa.  Ler nou pou diskit sa relizyon COI la sa osi tou pou ganny diskite ansanm.

 

MR SPEAKER

Ok en dernyen pti kestyon apre Onorab Georges, dernyen, dernyen wi klarifikasyon

 

HON BASIL HOAREAU

Minis ou pa krwar si nou pou restrikte li nou devret met li dan Lalwa pa dan Certificate of entitlement.  Me dan nou Lalwa the Employment Act. 

 

MINISTER MYRIAM TÉLÉMAQUE

Onorab pou met dan Lalwa ou kapab fer met dan Lalwa.  Me selman marse lanplwa i anvoye i annan posibilite ozordi bar tenders ou tel profesyon i napa sa demann.  I posib dan 3an 4an, 5an sa demann ou bezwen re al amannman Lalwa.

Fodre absoliman nou met li dan regilasyon pa the Act itself.  Nou a konsidere.  Mersi.

 

MR SPEAKER

Dernyen kestyon Onorab Georges.

 

HON BERNARD GEORGES

Mersi Mr Speaker.  Mersi pou donn mon sa privilez.  Mr Speaker mon kestyon pou Minis i konsern en sekter pe ede pou redwir mankman lanplwa dan pei e sirtou mank lanplwa par etranze.  E sa se bann Recruitment Agency. 

        E mon ti a kontan demann men kestyon dan zot faver akoz mwan personnelman, mon konn Recruitment Agency i mon sir i annan  lezot ki pe rann en tre en bon servis.  Ki pe ed dimoun antre dan lanplwa me return lo zot investment annan de fwa i difisil e zot pa kapab arive fer debout zwenn.

Eski i annan en lespri en nide en progranm dan ou Minister Minis pou ed sa bann Recruitment Agency ki pe fer sa travay pou zot pas dan bann letan dir, e reste in business.  Reste dan sa business ki zot pe fer.  Mersi Mr Speaker

 

MR SPEAKER

Minis.  Recruitment Agencies.

 

MINISTER MYRIAM TÉLÉMAQUE

Mersi Mr Speaker.  Mersi Onorab Georges.  Onorab i annan 7 Recruitment Agengies ki anrezistre Sesel.  I annan 2 nou’n fini outsource e mon okouran ki nou pey zot pou bann placement ki zot fer pou dan travay.  E osi konsernan bann training ki zot donn bann Agent travayer bann zenn partisipan ok.

        Selman mon krwar nou pou bezwen mon totalman dakor avek ou ki nou pou bezwen regard sa konsep Private Employment Agencies, regarde ki mannyer zot pou soutenir zot lekor.

Akoz vre i annan zot ki i annan de mwan oubyen zot napa mwayen; akoz tou zot larzan i fini.  Me nou mon krwar kot Employment nou ou bezwen asize si i posib met en striktir An plas ki mon pa konnen petet ki nou a donn zot en sipor dan en fason.  Mon pa kapab komet me selman i ti dan mon lespri  akoz mon konn en ka spesifik ki sa madanm i vin vwar mon toultan.

E mon krwar nou bezwen travay lo petet en Polisi oubyen met e n striktir an plas ki nou kapab ed zot dan en serten sityasyon.  Mersi Mr Speaker.

 

MR SPEAKER

Ok, Onorab Georges ou ok?

 

HON BERNARD GEORGES

Mr Speaker wi mersi.

 

MR SPEAKER

Ok, mersi.  Minis mon ti a kontan remersye ou pou ou letan ki ou’n pas avek nou.  Mon krwar apre 3 mwan ki ou’n antre dan sa post ou’n fer en Statement ki byen nouri e mon krwar ki ou’n ganny bokou enteraksyon, bokou lide avek bann Manm.  I pa en Minister fasil, me nou kont lo ou pou sey favoriz Seselwa dan lanplwa e redwir sa kantite milyon ki nou a pe pey sa bann dimoun pou ale.  Me nou konpran ki i bezwen annan etranze i pa zis nou.  I  bann pei dan zot annan bokou etranze, nou ptipti nou bezwen devlope.

Me nou apresye zefor ki ou pe fer dan sa 3 mwan ki ou’n dan sa pos pou sa travay ki pa fasil.  Alor nou ti a kontan remersye ou.  Swet ou tou de bon.  Ou kapab kont lo nou sipor pou travay ki ou pe fer ou avek ou teknisyen e avek sa nou a eskiz ou e swet ou bonn kontinyasyon.

 

MINISTER MYRIAM TÉLÉMAQUE

Mersi Mr Speaker.  E mersi osi pou donn mon sa sans pou vin fer en Statement la devan Lasanble.  Mon pou osi remersye mon tim sorti Employment avek Imigrasyon ki’n ed mon bokou pou nou kapab travay lo sa Statement.  parey toultan mon dir Minis pa travay tousel i en travay tim.  Mersi bokou.

 

MR SPEAKER

Efektivman, mersi.

 

(APPLAUSE)

 

MR SPEAKER

E bonn fet Festival Kreol pou tou bann anplwayer.

 

(MINISTER TÉLÉMAQUE AND HER DELEGATION WAS EXCUSED FROM THE HOUSE)

 

MR SPEAKER

Bon alor nou’n ozordi nou’n al en pti pe pli lwen me mon krwar nou’n fer en bon travay omwen nou’n fini sa morso.  Demen nou annan Mosyon.

Me petet avan nou adjourn, mon konpran ki ozordi i laniverser Onorab Flory Larue i vin i ganny 21an si mon pa tronpe.  E Onorab Jany De Letourdie ti ganny pou li Sanmdi.  Mon tande in fer en bon manze kreol, e mon espere