Home » Verbatim » 2017 » Verbatim Report NAS Sitting Wednesday 11th October, 2017

Verbatim Report NAS Sitting Wednesday 11th October, 2017

NATIONAL ASSEMBLY OF

SEYCHELLES

 

Wednesday 11th October, 2017

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou dimoun.  Bonzour tou bann Manm Onorab, tou lezot dimoun ki dan Lasanble e ki an deor Lasanble.  Ozordi mon ti a kontan lo lapar tou dimoun, swet labyenveni bann zabitan Au Cap ki’n vin dan Lasanble ozordi.  I form parti parey nou’n komans fer en pe letan, envit diferan group dimoun pour vin vwar ki mannyer Lasanble Nasyonal koman en Lebra Gouvernman i travay.

Alor nou ti a kontan swet zot, zot ganny akonpannyen par constituency clerk pour Au Cap, Madam Payet, Alana Payet.  Alor nou ti a kontan swet zot labyenveni.  Fotespere zot pas en bomaten ki zot ava vwar enteresan e aprann ki mannyer nou fonksyonnen.  Ler nou pran nou break 10.30 zot a ganny sans enterakte avek bann Manm Onorab an partikilye zot prop MNA, e sa de Leaders dan Lasanble Nasyonal.  Evidaman, mon osi mon a vin la pour vin bwar en tas dite avek Ms Antoinette avek tou lezot dimoun ki mon vwar anler dan Gallery.

Mon krwar ozordi sel kominikasyon ki mon annan pour fer, se ki nou annan en kestyon enportan ki Leader Lopozisyon pour poze.  Me avan nou envit Minis ek son delegasyon pour zwenn nou dan Lasanble, mon krwar i enportan pour nou tou.  Mon pa pe koz zis pour Lasanble.  Mon pe koz pour tou dimoun Seselwa zeneralman pour nou montre de keksoz; responsabilite ek solidarite pour sa moman ki nou ladan.

Mon krwar nou dan en peryod kot i annan bokou lenkyetid. Me nou bezwen nou tou sey reste kalm, solider ek kanmarad e responsab.  E la mon pa pe koz nou, forseman nou dan Lasanble.  Mon pe koz pour tou dimoun lo rezo sosyal an partikilye ki nou fer serten keksoz dan en fason ki nou touzour mazin Sesel avan.  Nou pa ede pour senm panik dan pei.

Mon krwar i enportan pour fer kler sa ki nou tyonbo lanmen kanmarad. Alor solidarite ek responsabilite i enportan pour sa peryod ki nou pe pas ladan e mon sir parey tou kriz, nou a sorti ladan akoz mon touzour en optimis. Mon krwar si nou travay ansanm pour nou pei, nou a vin nobou overcome sa.  E avek sa mon a demann ki nou envit Minis, i ok.  Nou envit Minis Lasante ek son delegasyon pour vini avan mon a demann Leader Lopozisyon pour poz kestyon ek Minis.

Bon nou ti a kontan lo lapar tou dimoun.  Lo lapar Lasanble swet byenveni Minis Adam avek ou delegasyon partikilyerman Komisyoner Dr Gedeon, e CEO Dr Louange ki la o-bor ou.  E san plis tarde, nou pour demann Leader Lopozisyon pour toudswit poz son kestyon avan ki nou demann Minis pour reponn.  LOTO, Leader Onorab Ramkalawan.

 

HON WAVEL RAMKALAWAN

Mersi bokou Mr Speaker. Bonzour.  Bonzour tou bann Manm Lasanble, Minis ek ou delegasyon e tou bann zabitan Au Cap ki pe partisip avek nou bomaten e tou Seselwa.  Mr Speaker mon kestyon i lir koumsa; eski Minis pour Lasante i kapab donn Lasanble detay lo sityasyon Lapest dan Sesel e dir nou ofisyelman si i annan okenn ka Lapest ki’n ganny konfirmen Sesel?  Mersi bokou.

 

MR SPEAKER

Mersi Onorab.  Minis ou annan laparol.

 

MINISTER JEAN-PAUL ADAM

Mersi Mr Speaker, e bonzour Mr Speaker, Manm Onorab, Leader Lopozisyon ek Leader Zafer Gouvernman, tou bann Manm Onorab, tou bann zabitan Au Cap ki pe swiv nou, e tou Seselwa ki pe swiv nou deba bonzour.

E premyerman Mr Speaker mon ti a kontan dir ki nou apresye sa loportinite pour nou vin koz avek Lasanble lo sa size, ki parey ou’n  dir i enn ki bezwen ganny adrese avek solidarite, e ki nou tou nou bezwen responsabilite pour nou travay ansanm, pour nou kapab adres sa size dan en fason sistematik.

Mon krwar tou dimoun dan nou pei in swiv bann diferan reprezantasyon dan medya, ki’n ganny fer par Lotorite Lasante Piblik dirize par Dr Gedeon e bann mesaz ki in donnen lo televizyon yer swar e osi dan bann lezot medya.  E mon ti ava swiv en pti sa lapel ki ou’n fer Mr Speaker pour dir ki i enportan ki nou reste vreman fokalize lo bon lenformasyon; ki i enportan ki nou travay avek disiplin. Akoz nou en pti pei e bann fo lenformasyon i kapab fer en kantite ditor.  Nou kapab vwar deza lo bann reseaux sociaux ki en kantite dimoun pe partaz lenformasyon ki pa korek. E nou mon komans isi parmi nou bann leaders, parmi bann Manm dan Egzekitif, parmi bann Manm parlmanter ki nou fer li nou devwar pour asire ki tou dimoun in met sa lenformasyon ki kredib, avek popilasyon.  E nou asire osi ki nou reste fokalize lo bann mezir ki ganny propoze par bann eksper dan sa sekter.  E alor Mr Speaker i tre enportan ki nou vreman ekout bann Profesyonnel Lasante e ki nou swiv bann mesaz ki zot pe donnen e bann rekomandasyon an term la fason ki dimoun i azir.  I enportan ki nou swiv sa bann konsiny, akoz sa bann konsiny i donnen pour en rezon.

E osi ki nou pa zis kree la panique, e ki nou vreman reste baze lo bann fe.  Mon ti a kontan dir Mr Speaker malerezman in annan bann sirkonstans yer kot serten fo lenformasyon in ganny propaze, e sa in fer louvraz nou Minister e Lazans, servis Lasante, osi lo Lotorite Lasante piblik parfwa pli difisil.  Par egzanp nou’n annan en zournal ki a en serten moman in dir i annan 3 ka kan ti annan zis enn.  Bon mon apresye ki sa zournal in fer zefor pour korize.  Me i enportan ki mesaz i ganny pase dan en fason ki sistematik.

Nou’n osi annan sityasyon kot i annan dimoun ki zot ti napa tou lenformasyon e zot in met deor lenformasyon pour donn lenpresyon, ki sa ka pest ki nou’n dekouver ti lye avek sa bann delegasyon sorti Madagascar ki ti’n ale pour basketball.  E sa ankor in kree konfizyon akoz nou’n ganny dimoun ki’n vin devan ki pa ti bezwen vin devan.  Alor i enportan Mr Speaker ki nou tou nou pran sa responsabilite, rod sa lenformasyon e asire ki nou tou nou met sa lenformasyon deor dan en fason ki sistematik.

Mr Speaker avek ki mon al en pti lo sa ka spesifik Lapest i enportan pour nou rapel en pti pe bann mezir ki nou’n deza pran. Nou’n ganny en kantite leksperyans atraver la fason ki nou’n bezwen azir letan nou’n ganny sa risk avek sa bann delegasyon ki ti ale pour basketball Madagascar e ti tournen swivan ki, swivan dese nou lantrener ki ti al avek sa maladi.  E nou’n swiv protokol dan en fason sistematik, e sa in anmenn rezilta.  Akoz tou dimoun ki’n ganny mete anba obzervasyon dan nou Sant Tanporer ki’n ganny kree kot lakademi militer Perseverance. Tou dimoun in swiv sa peryod anba lobzervasyon san okenn problenm.  E sa 3 dimoun ki ti ganny admet Lopital akoz zot ti santi zot malad. Tou le 3 ti ganny teste e zot negativ pour Lapest.  E alor tou sa bann dimoun ki ti enplike dan sa lensidan zot tou zot napa okenn problenm e zot an deor sa peryod kot lenfeksyon i kapab annan.  Alor nenport dimoun ki ti annan kontak avek zot oubyen, nenport dimoun ki ti dan sa bann delegasyon zot konpletman an deor sa risk aktyelman.  E i enportan Mr Speaker ki nou fer sa pwen.

Bann lot mezir ki nou’n pran Mr Speaker, nou’n deside ase rapidman pour nou cancel sa flight ki ti pe ale ant Sesel ek Madagascar.  E ti enportan pour nou fer sa. E nou’n regarde lakantite dimoun ki ti pe antre dan pei e nou’n santi ki sa ti en mezir ki ti enportan pour pran a sa moman.  I enportan pour note ki pour le moman nou sel pei dan larezyon ki’n cancel son flight. Me ankor nou’n fer li akoz nou pe priyorite lo proteksyon nou bann zabitan ek nou bann sitwayen.  E parey nou konnen bann dimoun ti a risk a sa moman, nou’n met zot lo bann prophylaxis e sa in anmenn rezilta, parey mon’n dir okenn sa bann dimoun pa’n ganny sa lenfeksyon.

E alor nou kapab dir ki nou teste nou protokol atraver sa leksperyans. E ki nou protokol in marse.  E se atraver zisteman travay tre pros avek bann Travayer Lasante avek bann diferan lezot dimoun dan kominote ki nou’n kapab asire ki nou ganny sa rezilta pozitif. Mr Speaker, an se ki konsern sa ka Lapest ki nou’n dekouver yer Mardi, mon ava donn zot en pti pe plis detay lo sa ka.  Me avan sa zis pour donn zot en pti apersi lo sityasyon Madagascar ki touzour tre delika. Dapre bann sif ki fek sorti kot Lorganizasyon Mondyal Lasante, e kot Lotorite Madagascar, i annan aktyelman 449 ka Lapest ki’n detekte Madagascar.  E parmi sa 449 ka i annan 48 lanmor.

Lorganizasyon Mondyal Lasante in fer en gran zefor pour mobiliz resours ansanm ek bann lezot partner, tel ki Lakrwa Rouz, Medecin Sans Frontiere e lezot partner pour kapab met sa lepidemi anba kontrol.  E nou menm nou osi isi Sesel, nou’n bezwen pran bann mezir avanse.  Mon pour al en pti pe plis an detay lo serten sa bann mezir.  Parey nou konnen nou pe fer sirveyans lo Airport kot nou pe verifye tanperatir bann pasaze ki pe arive e tou bann, e nou annan osi en formiler ki pe ganny anpli Airport e tou bann dimoun ki’n al Madagascar dan sa dernyen 7 zour pe ganny swiv osi par bann Zofisye Lasante Piblik dan en fason sistematik.  Lendi le 9 Oktob ti annan en pasaze Seselwa ki ti’n al Madagascar depi le premye Oktob in retournen le 6 Oktob lo sa dernyen vol Air Seychelles in devlop lafyev e lezot sentonm ki konsistan avek Lapest.

I enportan pour note pour dir sa msye ti retourn dan pei depi Vandredi. In ganny swiv par Zofisye Lasante Piblik depi Vandredi parey protokol i prevwar. E Vandredi, Sanmdi, e Dimans letan in ganny vizite i ti napa okenn lafyev.  Me Lendi le 9 Oktob letan in prezant sentonm, li menm li in vin kot sant Lasante Anse Boileau.  Sa i pa anliny avek protokol akoz, i ti’n ganny lenstriksyon ki si i ti ganny okenn sentonm i bezwen fer en call kot Zofisye Lasante Piblik.  E nou ti pour fer laranzman pour donn li son tretman.  Me lefet ki in vini kot Sant Lasante, nou’n pran tou mezir neseser. E deswit in ganny admit kot Lopital Victoria. E in ganny anba izolasyon parey nou’n fer pour bann lezot ka oparavan kot ti annan dout si sa dimoun ti annan sentonm ki konsistan avek Lapest.

Sa tes rapid ki’n ganny fer lo son flenm, in montre ki i pozitif pour Lapest.  Sa tes ti ganny fer dan apre midi Lendi. Me nou ti bezwen fer en konfirmasyon, e nou’n anvoy en sa esantiyon. Eskiz mwan, e nou’n anvoy sa rezilta kot Laboratwar Pasteur pour nou ganny konfirmasyon e Mardi, savedir yer, zot in donn nou konfirmasyon pour dir sa i en ka Lapest.  Nou’n osi … i enportan pour note ki sa tes rapid, i en tes ki ganny fer lo son flenm.  E sa tes rapid i pa ganny konsidere koman sa tes definitiv.  E alor i annan ankor tes pe ganny fer.  Nou’n pran en santiyon, ki’n ganny anvoye dan bann laboratwar referan pour fer bann tes konfirmasyon. .

Me baze lo bann konsiltasyon ki nou’n fer avek Institut Pasteur.  Nou konvenki ki sa i en kes Lapest.  E se pour sa nou’n pran tou bann mezir neseser.  Premyerman bann mezir ki bezwen ganny pran.  Se tou neseser in ganny fer pour swiv tou bann kontak ki sa msye in annan depi ki in komans malad.  E osi swiv tou bann kontak depi ler in retourn Sesel.  I enportan pour diferansye a sa moman ki in retourn Sesel ki ti Vandredi swar kot i ti napa okenn sentonm kot i pa ti malad, e i ti napa lafyev.  E a sa moman kot i ti komans malad ki Lendi bomaten.

Lot mezir ki nou’n pran atraver bann kontak.  Se son, nou’n idantifye son partner, son zanmi pros, e enn son zanfan, e zanfan son partner, e osi en zanfan son zanmi ki ti an kontak pros avek li pandan sa weekend.  E zot in ganny admet Lopital Victoria pour izolasyon, e pour fer tes akoz zot ti pe komans ganny lafyev en serten lezot sentonm.  Pour le moman bann tes zeneral e zot x-ray i toutafe normal.  Par kont zot pa pe tous okenn flenm.  E pour sa rezon sa tes rapid pa pe kapab ganny fer avek zot pour le moman.

Me lefet ki zot napa flenm, sa i en keksoz ki pozitif e anliny avek bann sentonm normalman avek Lapest si zot napa flenm i endike ki probableman zot napa sa maladi.  Tout menm nou’n swiv en prosesis kot nou fer atansyon e zot pe resevwar bann antibyotik ki neseser, e zot pe ganny garde an izolasyon.

Nou osi an kontak direk avek Lorganizasyon Mondyal Lasante, e avek bann laboratwar aletranze pour ganny bann tes konfirmativ isi menm, e nou’n anvoy bann lesantiyon pour nou kapab ganny sa bann rezilta o pli vit posib.

Malerezman osi sa dimoun ki’n ganny konfirmen avek sa maladi, i pa’n swiv bann konsiny ki’n ganny donnen par bann zofisye lasante piblik e in al dan serten landrwa ki’n fer li pli difisil pour nou swiv kontak e nou ava donn serten detay.  Me nou’n idantifye tou bann kontak ki posib atraver sa interview ki nou’n fer avek li.  E nou’n swiv sa bann kontak dan en fason sistematik.  Alor bann kontak ki nou’n resevwar ziska konmela i enkli 258 dimoun an tou.  Sa i enkli bann pasaze ki ti lo vol Air Seychelles Vandredi sorti Madagascar.  E sa i 41 dimoun. Ti annan osi 7 Manm lekipaz lo sa avyon.  Sa osi i form parti bann kontak.  I annan osi bann fanmir pros ki reste dan menm lakaz ek dan lantouraz avek sa msye.  E sa i 12 dimoun.  Sa 12 dimoun pe ganny transporte pour sirveyans aktiv dan nou sant tanporer kot Lakademi Militer.

I annan osi bann kontak ki’n fer kot en parti ki sa dimoun ti ale Vandredi swar kot Chilli Bar.  E sa i apepre en 170 dimoun.  I annan osi bann staff ki ti travay dan sa landrwa e sa i 13 dimoun.  Nou annan osi 18 staff ek pasyan kot klinik Anse Boileau.  E nou pe swiv tou sa bann dimoun de tre pre, e si i annan okenn dimoun ki devlop okenn sa sentonm, zot pour ganny admet lo izolasyon e pour tretman adisyonnel avek antibyotik si i neseser.

Mon oule fer note Mr Speaker osi ki an plis ki sa 5 dimoun ki dan fanmir imedya ek zanmi sa msye, in annan osi de lezot ka ki’n prezant sentonm ki nou’n admit zot kot lopital.  Me sa de lezot dimoun baze lo zot istorik e lenformasyon ki nou, ki zot in donn nou, nou pa santi a sa moman ki zot en risk tre for.  Me lefet ki zot annan sentonm nou pe gard zot dan izolasyon an ka.

Nou pe osi kontinyen swiv sa bann diferan kontak pour vwar si annan okenn sa bann dimoun ki annan sa bann sentonm e pran bann mezir apropriye kot i neseser avek sa bann dimoun ki annan sa bann sentonm. Me tou bann dimoun ki lo sa lalis kontak pe resevwar bann antibyotik, bann prophylaxis.  E ankor sa i anliny avek protokol tou sa bann dimoun ki dan sa premye laliny kontak, se zot ki resevwar antibyotik, e bann prophylaxis. I enportan osi pour nou konstate akoz en kantite dimoun, mon konnen in eksprim konsern. Si zot in annan kontak avek bann dimoun ki’n annan kontak avek li.  E sa risk i vreman minim. Nou annan sa premye laliny kontak e sa bann dimoun nou bezwen swiv zot de pre.  Me menm zot dan sirkonstans ki’n arive baze lo lenformasyon ki nou annan si zot swiv zot tretman prophylaxis nou pa devret annan konsern pour zot.  Me nou bezwen swiv zot de pre. E nou fer lapel avek tou dimoun pour swiv tou konsiny e tou gidans ki pe ganny donnen par bann Zofisye Lasante.

Mr Speaker bann mezir ki nou ti’n pran oparavan sete osi bann dimoun ki malad, bann dimoun ki annan sentonm e ki malad ki bezwen ganny met an izolasyon, ti pe ganny mete lo D’Offay Ward e nou’n swiv sa, alor nou annan aktyelman en group pasyan ki lo D’Offay Ward.  Me vi ki lakantite dimoun ki an kontak in ogmant en kantite. Nou’n pran previzyon pour nou annan en rezerv plas lo ward an ka i annan lezot dimoun ki devlop sentonm.  Mon oule fer kler Mr Speaker, ki lefet ki en dimoun i devlop sentonm i pa vedir sa dimoun i malad. Nou bezwen fer sir ki nou swiv byen sa bann prosedir.  Me si en dimoun i annan sentonm, e sa sentonm i konsistan avek Lapest nou pour admet li, nou pour met li anba izolasyon.

Provizyon in ganny fer pour met Hermitte Ward dan dispozisyon pour sa.  E tou bann pasyan ki ti aktyelman lo Hermitte Ward in ganny bouze tanporerman kot Maternite e serten lo lezot Ward parey D’Offay Ward.  E Hermitte Ward pour ganny garde koman en ward izolasyon, pandan sa peryod ki nou pe adres sa lepidemi Lapest.  Mr Speaker zot ava rapel osi ki Dr Gedeon yer swar lo medya in eksplik metodolozi ki pe ganny met an plas pour bann pasaze ki pe kontinyen vini sorti Madagascar ki pa en gran nonm me ki bezwen ganny swiv dan en fason aprofondi.

E dan bann mezir ki in eksplike yer swar in dir i zot pe ganny mete anba sirveyans aktiv kot zot rezidans oubyen dan en lotel si dan ka en touris.  Me Mr Speaker bomaten nou’n osi fer meeting ant bann profesyonnel konsernen.  E baze lo konsern e osi baze lo posibilite ki i annan kontinyasyon serten ka izole bann dimoun ki pour vini sorti Madagascar, nou pe fer provizyon ki tou pasaze ki vini sorti Madagascar pour bezwen al an izolasyon pour 6 zour kot sant formasyon militer kot Lakademi Perseverance.  Nou pe swiv menm prosedir pour tou bann bato ki antre dan nou pei. E ki tou bann pasaze ki’n pas letan Madagascar pandan sa dernyen 7 zour pour bezwen al anba izolasyon pour en peryod 6 zour kot Lakademi Militer Perseverance.

Nou’n osi travay avek tou bann Lazans Vwayaz pour kontinyen dekonsey dimoun pour vwayaz Madagascar. E nou santi ki sa pe ganny swiv.  E fodre nou note ki i annan serten pasaze Seselwa ki touzour aletranze e ki pour retournen dan bann zour ki pe vini. Nou pe osi travay avek Lotorite Lapes pour asire ki bann peser ki al Madagascar dan en fason enformel, i aret sa pratik.

E nou demann nenport ki peser ki’n fer sa oubyen nenport ki maren ki’n annan okenn kontak Madagascar pour vin devan kot bann Sant Lasante pour nou kapab fer en assessment lo zot kondisyon e osi vwar si nou bezwen swiv zot de-pre e met zot anliny avek sa sirveyans ki nou pe deza fer.  Mr Speaker tou bann diferan travayer dan Minister Lasante, e dan lazans pour servis Lasante, e osi dan Lotorite Lasante Piblik, pe travay tre dir an se moman pour fer sir ki tou sa bann kontak i ganny swiv. E tou konsey e tretman i ganny donnen e tou lozistik i an plas. I pa en keksoz ki fasil me nou pe azir avek lavites.  E nou pe azir dan en fason ki sistematik.

Nou pe donn o tan lenformasyon ki posib avek medya.  E nou demann tou medya, e nou demann tou bann leaders isi pour fer tou sa zefor pour asire ki sa bann lenformasyon i ganny partaze dan en fason sistematik.  Mon oule ankor rapel tou bann Manm Onorab, e tou bann dimoun ki pe swiv, bann metod transmisyon, sa maladi akoz sa i en kestyon ki pe monte souvan.

E mon oule fer rapel ki sa ka ki nou annan isi Sesel i Lapest Pneumonic, i pa Lapest Bubonic.  Lapest Pneumonic, i sa enn ki ganny transmet par bann gout delo dan ler letan en dimoun i touse, oubyen letan i eternen.  Savedir risk ki en dimoun i annan pour ganny sa maladi isi i an proksimite avek en dimoun ki enfekte.  E an proksimite nou pe dir dan en zistans de met.  Me sa i vedir osi dan bann ka kot sa dimoun in kapab respir sa bann gout delo ki kapab dan ler.  I annan preski, preski napa risk pour okenn lenfeksyon lo bann sirfas akoz sa bakteri pa tenir plis ki detrwa minit lo bann sirfas.  Sa i pa vedir ki sa risk pa egziste, me sa risk i vreman minim akoz mon krwar zot tou zot kapab konpran ki apre detrwa minit sa sirfas nepli annan okenn konsern.

Sa i vedir osi ki napa okenn konsern vizavi bann landrwa piblik, ki’n kapab ganny vizite par okenn endividi ki a risk pour Lapest.  I vedir ki napa risk dan sa bann landrwa spesifik.

Pour nou kapab annan byen zesyon sa risk i enportan pour konpran metodolozi transmisyon e alor i enportan alor pour fokaliz lo rediksyon kontak avek bann dimoun ki’n enfekte.  Se pa en kestyon rediksyon kontak avek nenport ki dimoun.  En dimoun ki annan en kontak segonder.  I bann dimoun parey nou dir dan sa premye laliny kontak. Savedir en kontak konfirmen avek en dimoun ki’n annan sa maladi.  I enportan osi pour mwan repete Mr Speaker, ki sa maladi transmisib zis a sa moman kot en dimoun i dan sa sirkonstans kot in annan lafyev ek latou.  Savedir sa dimoun i kapab annan, i pe anmenn sa bakteri.  Me i pa kapab transmit sa bakteri si i pa dan faz kot i malad.  E i enportan pour nou rapel sa Mr Speaker pour nou evit panik e pour non evit osi move konpreansyon par nou popilasyon.  E mwan ava rapel ankor ki dan sa ka spesifik okenn sentonm lafyev pa ti ganny dekouver avan Lendi, e tes ti’n ganny fer Vandredi, Sanmdi, e Dimans.  Osi anliny sa kestyon i enportan Mr Speaker zis pour mwan nonm sityasyon serten lekol dan nou pei.  E mon oule fer kler ki Minister Lasante, e ni Lotorite Lasante Piblik pa’n fer okenn demann ki lekol i ganny fermen akoz i pa neseser.

Me mwan krwar ki nou tou nou konsyan dan sa aktivite kot ti annan 100 apepre en 170 dimoun ki ti partisipe, ti en levennman pour lazournen bann ansenyan e bokou bann dimoun ki ti partisipe ti bann ansenyan.  E alor i annan serten lekol ki sa bann ansenyan zot pa disponib pour vin lekol akoz protokol i prevwar ki an plis ki met zot lo prophylaxis.  Nou pe met tou sa bann dimoun ki lo sa lalis kontak lo 6 zour konze.  Sa i vedir ki sa bann ansenyan pa pe kapab vin travay dan sa peryod.  Me mon repet ankor ki risk lenfeksyon dan bann lekol i preski zero; akoz i pa’n annan okenn lendikasyon ki en dimoun ki enfekte, oubyen en dimoun ki dan sa staz kot i kapab enfekte, in annan akse dan okenn lekol.  Bann mezir ki’n ganny pran avek bann ansenyan i koman bann prekosyon e i anliny avek protokol pour nou asire ki nou swiv zot dan fason pli sistematik posib. Nou’n ganny enformen ki Lekol Enternasyonal in pran desizyon pour ferm zot lekol akoz mank ansenyan.  Sa i konpreansib akoz zot napa sa mwayen pour fer zot lekol marse.  Bann lekol Gouvernman pe fer, pe regard sityasyon mannyer i ete.  E zot pour pran desizyon pli tar ozordi baze lo lakantite ansenyan zot annan.  E sipor si zot pour kapab kontinyen ofer servis pour bann zanfan oubyen non.  Mon lans ankor lapel Mr Speaker, avek tou bann Manm Onorab avek tou piblik pour nou travay avek disiplin e swiv sa kestyon avek latansyon. Me evite osi fer bann, pas bann lenformasyon ki fo.

I annan en kantite lenformasyon pe sirkile, me nou demande ki dimoun i verifye lenformasyon avan ki zot fer okenn demars pour dir sa i en keksoz ki korek, akoz parfwa i kree plis problenm pour bann Travayer Lasante kapab travay dan en fason ki sistematik.  Mon remersye Lasanble pour donn nou sa loportinite pour nou kapab donn sa bann detay siplemanter.  Mon ti a kontan osi salye bann travayer lasante akoz zot pe travay zour e nwit. Zot pe met bokou, bokou zefor e zot pe travay avek bokou determinasyon.  E zot pe donn o tan sipor ki posib avek nou popilasyon.  Nou demann nou popilasyon osi pour konpran e pour swiv bann konsiny ki ganny donnen dan en fason sistematik.  Mersi Mr Speaker, e nou pour kontan reponn okenn kestyon oubyen klarifikasyon ki okenn Manm i annan, oubyen okenn manm piblik i annan.  Mersi Mr Speaker, mersi tou Onorab.

 

MR SPEAKER

Mersi Minis pour ou repons avek sa bann klarifikasyon. Mwan a don laparol loter kestyon.  Onorab Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker dabor les mwan zis dir Minis ki se pour sa rezon ki nou’n santi sa nesesite pour anmenn Minister Lasante dan Lasanble, zisteman pour ki nou diffuse sa bann sityasyon kot i kapab annan konfizyon e pour nou ganny egzakteman kwa ki pe arive pour ki dimoun zot menm zot si annan bann keksoz lo rezo sosyal atraver bon lenformasyon zot kapab korize e pour ki nou pa antre dan en sityasyon panik.

Mr Speaker, mon ti a kontan premyerman demann Minis pour dir nou klerman, konbyen ka egzakteman ki’n ganny konfirmen.  Eski i zis enn, eski i 3, eski i 4? Dir nou egzakteman konbyen ki’n ganny konfirmen.  Eski pour annan okenn sanksyon anba Public Health Act lo part 8 anba Public Heatlh Act kont sa endividi ki’n met en, ki’n met bokou dimoun a risk par pa swiv bann konsiny ki Minister Lasante in donn li e olye al se li pour reste in al dan en Discoteque.

Alors ki bann mezir ki zot pour pran? Parski mwan mon pe demann sa pa pour sot lo sa endividi.  Me pour plito pran konsiderasyon ki nou en pri popilasyon.  E ki en detay, la deza menm pe dir ki lakantite dimoun ki zot pe kouver.  Ki zot pe swiv, ki zot bezwen swiv avek bann resours limite, i bokou. Eski, eski Minister Lasante pe reviz zot bann fasilite ki zot annan lo Airport?  Akoz mon pe demann sa kestyon. I annan en dimoun la in anvoy mwan en mesaz i dir avek mwan in antre sorti Maurice Vandredi.  E zot ti pe fer bann check pour bann pasaze ki’n kapab pas atraver Maurice, sorti Madagascar.  Me se pourtan ti napa okenn Zofisye Lasante ki ti annan en mask, ki ti annan bann lekipman baryer ki pour anpes annan okenn transmisyon si dimoun ti annan kontak avek. Alors eski zot pe mazin ogmant sa?  E finalman si ou ti kapab dir avek nou zot bann, ki bann mezir ki zot pe pran osi atraver, ok, mon konnen mon’n mansyonn Maurice me atraver Kenya avek Ethiopie ki bann pasaze pe servi pour zot ariv Sesel e apre sa pour zot pran bann vol ki konekte avek bann lezot destinasyon?  Mersi bokou.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker.  Premye kestyon i annan zis en ka ki’n konfirmen.  Parey nou’n dir an tou i annan 7 pasyan ki anba izolasyon. I annan zis en ka ki nou’n konfirm li … me mon oule presize konfirmen dan konteks rapid test.  E avek sa rapib test ki’n refer avek Institut Pasteur. E zot dir sa i konsistan avek en ka Lapest.  Me sa dan, i en keksoz teknik.  Me dan konteks Lorganizasyon Mondyal Lasante – WHO, zot dan zot definisyon sa i touzour en ka probab.  Me son ka probab kit tre, tre probableman i en ka Lapest.  Nou, nou pe tret li koman en ka Lapest, menm si konfirmasyon ofisyel pour vini atraver tes disan ki nou pa ankor ganny rezilta.  E Mr Speaker ankor mon dir i enportan pour nou swiv bann lenformasyon ofisyel.  Akoz Minister Lasante zanmen in deza dir ki annan plis ki 1. I annan zis en ka, touzour dir ki i annan zis en ka.  Dan bann entervyou ki dokter Gedeon in fer, in touzour kler, ti annan zis en ka.

Alor i enportan ki tou dimoun ki pe rod lenformasyon i retourn lo bann sours ofisyel pour ganny sa lenformasyon kler.  E si i annan okenn dout pour demann sa kestyon. E mon apresye parey Onorab Ramkalawan in dir.  Lenportans ozordi se tir sa bann dout e eksplik dimoun tre klerman.  E mon espere ki tou dimoun i ganny sa vreman kler. An se ki konsern sanksyon kont sa endividi.  Parey Onorab in fer mansyonnen. I annan serten provizyon anba Lalwa ki kapab ganny servi.  E mon krwar i enportan pour nou note Mr Speaker ki sa endividi in azir dan en fason tre iresponsab.  Me nou rol koman Lasante, se premyerman se pour fer tretman.  Premyerman pour asire ki tretman i ganny fer dan en fason sistematik e osi asire ki sistenm i anfors ki permet nou adres bann risk otour sa. Alor sa kestyon si i annan okenn sanksyon.  Mon krwar i enn ki petet i meyer pour adres li pli tar.  Nou priyorite a sa moman se vreman asire ki sa dimoun, son fanmir, zot byen.  E mon kontan pour dir ozordi Mr Speaker ki sa dimoun son kondisyon i vreman stab, i napa okenn lafyev.

E son bann manm fanmir osi zot osi stab, e zot lafyev i minim.  Alor nou dan en sityasyon kot nou kapab asir sa servis lasante pour bann dimoun ki a risk.  E nou priyorite osi prezan se pour swiv sa bann dimoun ki annan kontak avek sa endividi, e donn sa servis.  Epi pli tar nou ava war si i annan nesesite regard sa eleman sanksyon.  Me priyorite a sa staz se pour vreman asir zesyon sa problenm.

An se ki konsern bann fasilite Airport.  Nou’n swiv bann rekomandasyon bann diferan lorganizasyon enternasyonal, sirtou Lorganizasyon Mondyal Lasante.  E mon retourn lo sa pwen ki sa maladi i kapab ganny transmet a en moman kot sa dimoun i dan sa staz lafyev ek latou.  Alor mezir primordyal ki pe ganny fer, aktyelman lo Airport se verifikasyon tanperatir.  Akoz se koumsa ki ou kapab idantifye sa pasaze ki pli a risk.

E osi dan sa ki mon’n deza eksplike dan mon lentervansyon, tou bann pasaze ki pe sorti Madagascar aprezan pe al ganny refer dan Sant izolasyon dan Lakademi Militer. Alor menm si zot napa okenn sentonm zot pour ganny refer dan sa sant obzervasyon. Alors sa kestyon si ou bezwen en mask i aplike si en dimoun i dan sa faz kot i kapab transmit sa maladi. Si ou pe met en mas me napa okenn dimoun ki annan lafyev sa mask pa forseman. I pa donn ou okenn benefis. E se pour sa ki priyorite an term fasilite ki nou pe met lanfaz lo la lo Airport se sa bann temperature checks, sa bann verifikasyon. E, me sa i en keksoz ki mon krwar serten bann travayer ki travay lo Airport in demande avek Lotorite Lasante Piblik.  E nou kapab met a zot dispozisyon bann mask si i neseser.  Me mon ti a kontan dir ki priyorite.  Se pour swiv protokol an term tanperatir. Akoz an term verifikasyon tanperatir se la ki ou pour depiste sa risk primordyal.  E se otour sa bann protokol ki ou kapab pli byen annan zesyon sa risk.

An term sa bann pasaze ki an transit zot osi zot pour swiv sa menm protokol kot zot pour bezwen al anba obzervasyon. Me nou pe travay osi avek bann Konpannyen Lavyasyon.  Mon’n koz avek Minis Tourizm bomaten pour nou demann zot pour redwir okenn, oubyen menm aret okenn lof ki zot annan pour bann pasaze ki pe transit anver lezot destinasyon. Nou konpran ki serten bann pasaze an transit se bann dimoun ki’n bezwen refer zot larout swivan ki vol Air Seychelles in arete.  Sa i dan serten ka.  Me mon krwar pour nou al pli devan lafason ki nou bezwen al adres sa se asire ki tou pasaze, si zot sorti Madagascar, si zot annan en kontak Madagascar ki zot ganny met anba obzervasyon. Si zot an transit, si zot pe al pli lwen.  Si zot pe reste dan pei zot ganny swiv dan sa fason.  E sa i sa mezir primordyal ki nou pe swiv.  Mersi Mr Speaker.

 

MR SPEAKER

Onorab Ramkalawan.

 

HON WAVEL RAMKALAWAN

Yes, mersi Mr Speaker, zis de pti kestyon ki swiv swivan ou larepons.

Mr Speaker Minis i dir i satisfe ki lafyev sa bann lezot dimoun i minim.  Eski konmsi ou pe dir avek nou ki zot ti annan lafyev avan e ki la prezan zot lafyev pe diminyen? Eski sa pa en lendikasyon maladi. Mwan mon en layman pare you menm. Dokter i ava…

Apre dezyenmman letan ou pe dir ki en dimoun i pour ganny. I kapab transmet sa maladi letan i dan … Letan i dan staz lafyev ensidswit.  Be se sa dimoun lo Airport ki pe travay. Ou pa pour konnen. I mean sa pasaze i arive, i prezant.  E se la aprezan i met ou an fas avek sa dimoun. Be si i deza dan en staz kot sa incubation in fini soz e ki i kapab transmet. Se sa ki nou pe dir konmsi sa proteksyon ki nou fer li, nou fer li imedyatman.

Apre si ou ti kapab donn detay lo sa Hermitte Ward ki mannyer zot pe fer li.  Akoz depi yer, konmsi in annan bokou boulvers.  E ki lefe ki Hermitte Ward i en Ward kot dimoun i fer loperasyon. E kot i annan bann fasilite ase spesyalize. Ki aprezan pour al lo kote maternite. Konmsi si ou ti kapab donn nou en pe ki bann lenkonvenyans ki pe arive.  E si zot pour kapab sustain sa ki zot pe fer?

 

MR SPEAKER

Minis.

 

MINISTER JEAN-PAUL ADAM

Mersi Mr Speaker.  E parey mon’n dir. Sa kestyon lafyev minim, mon ti’n eksplike dan mon lentervansyon d’orizin o depar pour dir ki sa bann dimoun in ganny admisyon osi akoz zot annan lafyev. Zot ti annan lafyev.  E se pour sa osi zot in ganny met an admisyon. Sa bann dimoun ki fanmir avek sa premye ki’n ganny konfirmen konmkwa i annan Lapest.  Alor sa, son bann fanmir imedya, son partner e enn sa zanfan, zot annan en lafyev ki pa tre for.  E zot pe ganny swiv. E sa lafyev parey mon’n dir in diminyen.  E nou pe fer sa tes.  Enn fwa ki nou, nou pa kapab fer sa rapid test akoz sa napa sa sputum.  Napa sa flenm pour zot kapab fer sa rapid test.  Me nou pe fer sa tes atraver disan e nou pour ganny rezilta prosennman. E mon krwar nou a kapab reasir tou dimoun si zot annan, si par egzanp nou dekouver pour dir zot annan Lapest, zot dan en sityasyon kot zot pe ganny swiv avek le meyer kondisyon posib akoz zot deza lo tretman.

E sa i vedir ki nou protokol ki an fors i pe swiv zot dan en fason ki sistematik.  Sa kestyon mask parey mon’n dir, vi ki demann i la Lotorite Lasante Piblik ava fer li disponib pour bann travayer lo Airport.  Me zis pour dir ankor enn fwa lenportans protokol se pour idantifye bann dimoun ki posibleman malad e se pour sa nou pe fer sa bann temperature checks e se sa priyorite an term travay ki nou pe fer.  An term Hermitte Ward definitivman i reprezant en defi pour en servis lasante parey nou dan en pti pei.  Me sa i neseser akoz nou bezwen regard priyorite aktyelman se pour nou vreman asire ki sa en ka Lapest i ganny izole.  E mon krwar an swivan nou protokol sa i toutafe fezab.

E bann mezir ki nou bezwen pran se par egzanp bann elective surgeries.  Savedir bann loperasyon ki pa neseser, ki pa irzan, ki pa bezwen, ki kapab planifye pe ganny anvoye pour le moman. A n term bouz bann pasyan bokou bann pasyan in ganny mete osi lo D’Offay Ward ki son sityasyon i en pti pe parey Hermitte Ward, e sa i redwir en pti pe boulversman. Me byensir nou ti a plifere pa bezwen bouz zot ditou. E nou pe anvoy serten lezot lo Maternite parey mon’n dir.

E byensir nou ti ava swete ki nou pa bezwen bouz personn.  Me dan en ka parey priyorite se asire ki ou annan en ward ki disponib pour izolasyon e atraver sa mezir ki nou’n pran, nou kapab ofer sa servis. E nou kapab redwir lenpak pandan sa peryod aktyel.  Mersi bokou Mr Speaker.  E mersi Onorab.

 

MR SPEAKER

Onorab Afif.

 

HON AHMED AFIF

Mersi Mr Speaker.  Bonzour Minis avek ou delegasyon. Bonzour tou dimoun a lekout. Mr Speaker mon ti a kontan demann Minis si i kapab donn nou en pti pe detay par egzanp lozistik ki zot in met an plas pour zot kapab asire ki tou sa bann dimoun ki zot konsider anba passive, oubyen active surveillance i vreman pe konform avek regilasyon ki zot in met anba.  Rezon mon pe demann ou sa Minis se parske legzanp i montre ki sa dimoun in antre Vandredi.  I sipoze anba passive surveillance. Me in reisir al Chilli Bar, in reisir al detrwa landrwa.  E la ozordi nou annan nou 258 dimoun ki en pe dan sa sityasyon.  Alor ki resours an term dimoun, an term ou relasyon ek Lapolis, avek lezot Lotorite ki pour donn nou sa lasirans ki sa 258 dimoun, e i annan plis ankor ki pe vreman kapab ganny sipervize, pour asir nou popilasyon e pour nou pa kree panik e pour fer sir ki tou dimoun i an bonn sante?

Mr Speaker mon ti a kontan osi demann Minis si i kapab donn nou en lasirans ki dan lekol Anse Etoile li menm kot bokou bann teachers ti dan sa renyon Chilli Bar.  E zot lekol pa’n fermen.  Alor ki mannyer zot pe fer sa swivi lo sa bann dimoun ki’n al laba.  En swivi de pre.  Parski si sa ti en lekol ki ti annan bokou teachers laba. Eski zot kapab pran en desizyon parey egzanp.  Oubyen eski i neseser pran en desizyon ferm sa lekol pour sa peryod akoz teachers pa pour kapab ale eksetera?

E donn nou sa lasirans ki zot pe pran.  Zot annan resours, oubyen zot napa resours me zot bezwen demann resours pour fer sir ki sa travay i kapab ganny fer.  Nou popilasyon i reste dan en leta sen.  Mersi Mr Speaker.

 

MR SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker.  Mersi Onorab.  Byensir en sityasyon parey sa pour met presyon lo nenport ki sistenm.  E nou, nou en pti pei.  Alor definitivman i annan sa presyon.  Me nou ava note ki nou sistenm ziska prezan pe marse.  Nou pe kapab vizit sa bann dimoun.  Mon kontan ki Onorab in sit sa legzanp ki’n arive.  E i enportan pour nou konpran serten keksoz se ki pour nou kapab adres nenport ki lepidemi, si se Lapest, si se Dengue, si se nenport ki lepidemi, ou bezwen annan korperasyon piblik.

Ou pa kapab malerezman vin en manman pour tou dimoun. Nou bezwen fer sir ki dimoun i konpran e ki dimoun i azir selon konsiny ki Lasante i donn zot. Alors si nou swiv, si nou pran sa legzanp Lotorite Lasante Piblik ti swiv konsiny. E ti donn tou lenformasyon avek sa dimoun.  E i ti osi ganny verifye par bann zofisye lasante piblik a larive son Sanmdi e son Dimans, e sa swivi ti ganny fer dan en fason vreman sistematik.

E si ou pe vwar depi avan ti annan deza en 100enm dimoun anba obzervasyon, passive surveillance avek bann diferan dimoun ki’n arive lo diferan avyon.  Sa pe dimoun toultan akoz byensir i pour annan en peryod letan.  E definitivman nou resours imen i limite. Me nou’n met priyorite lo sa size alor tou bann Zofisye Lasante Piblik pe regard sa koman zot priyorite nimero 1. Nou’n osi kominik avek tou bann Sant Lasante e sa pe ganny osi servi koman en priyorite. Enn bann premye priyorite pour adrese. Nou’n idantifye bann ners ek bann lezot Profesyonnel ki pour travay spesifikman lo sa size. Nou annan bann ners adisyonnel par egzanp ki pour travay lo Hermitte Ward. Nou annan bann ners adisyonnel ki pour travay dan sant lobzervasyon.  E nou pe travay osi avek bann lezot dimoun dan kominote pour donn sa sipor neseser e labaz i komans dan Health Centre pour asire ki sa bann dimoun i kapab ganny akeyir si zot vini.  Me si ou vwar deza, si nou fer en pti mars aryer si ou regard o moman ki nou’n konfirm sa ka Lapest ki ti midi Mardi.  Savedir yer, nou’n deza komans sa travay pour fer kontak avek tou bann dimoun ki ti ganny konfirmen, e mon felisit bann Travayer Lasante ki la gran mazorite sa bann dimoun in kapab ganny kontakte dan en peryod mwens ki 24an.

E si ou regard dan en lot pei pli gran sa kot lavantaz en pti pei ou kapab parfwa fer sa bann kontak.  Me mon pour lans en lapel ankor Mr Speaker se ki nou bezwen korperasyon tou dimoun.  Nou bezwen fer sir ki, e lot keksoz ki nou’n fer vitman se nou’n komans donn bann doz antibyotik. E a lafen ozordi tou dimoun pour lo sa bann tretman.  Ou’n dir Onorab ki kapab annan lezot dimoun ki pour vin devan.  Efektivman nou pe pran sa an konsiderasyon ki i annan dimoun petet ki pa ti’n ganny idantifye.  Me nou konfyan ki baze lo nou bann interview ki nou’n fer ki sa premye kontak in ganny idantifye.

Sa premye laliny ki pli a risk in ganny idantifye, e menm sa tretman ki nou pe donn tou sa bann dimoun, i redwir en kantite zot risk.  Deza o depar, zot risk i pa forseman tre o. e avek sa tretman ki zot pe swiv, zot risk i vin preski zero.  Osi atraver lot mezir ki nou’n pran, se tou sa bann dimoun in ganny met lo konze.  Savedir zot pa al dan zot landrwa travay.  Me mon ti a kontan repete ki zot sa bann dimoun zot pa vreman en risk pour kree lenfeksyon, akoz zot menm zot, zot napa, zot pa dan sa sirkonstans kot zot pe transmet sa maladi.  Alor risk ki dan bann lekol i vreman minim. Me se en prekosyon ki nou’n demann tou sa bann dimoun ki dan sa premye laliny kontak, pour pa al travay pandan sa letan.  Alor pour lekel Anse Etoile sa kestyon spesifik, risk i vreman minim.  Nou pa santi i annan en risk lasante piblik e pour sa ki nou pa’n demande ki lekol i fermen me byensir i annan en defi pour sa lekol. Akoz i annan plis ki 60 ansenyan ki pa pe kapab vin travay. Alor mon konnen ki management lekol pe diskit sa avek Minister Ledikasyon. E zot pour pran en desizyon lo gard sa lekol ouver oubyen non.  Me mannyer konpran pour le moman zot santi ki zot anvi gard sa fasilite pour bann zanfan. Me risk pour bann zanfan i preski zero.  Mersi Mr Speaker.

 

MR SPEAKER

Onorab Pillay ou lo en menm kestyon?  Sorry Onorab Afif.

 

HON AHMED AFIF

Mersi Mr Speaker. Minis mon ti a kontan si ou kapab dir nou spesifikman par egzanp konbyen staff ou annan ki ou’n met de-kote?  Ou annan 258 ka ki ou pe fer passive surveillance.  Konbyen staff ou annan ki ou’n met de-kote.  Eski 50, eski 100 dimoun a plen-tan zis pour fer sa.  Rezon mon demann sa se parski dan lekol Anse Etoile par egzanp i annan dimoun ki mon konnen ki anba passive surveillance, i dir zis sanniter in vin kot zot in pran tanperatir, zot pa’n gannyen prophylaxis.  Zot pa’n gannyen tou sa bann keksoz. Alor lekel ki pe vreman veye pour dir sa bann keksoz parey ou pe dir pe arive, e i pa zis an teori.  Mon en pe konsernen, i annan en bato  par egzanp ki’n vini sorti Madagascar in fer 2 mwan Lone Shark – kot Eden, son bann staff in ganny demande pour al dan lakour.  Zot in ganny large zot tou.  Me oli sa monitoring?  Lekel sa bann dimoun ki pe fer sa aktivman.  Eski ou kapab donn nou pli detay.  Mersi?

 

MR SPEAKER

Minis.

 

MINISTER JEAN-PAUL ADAM

Mersi Mr Speaker. Mersi Onorab.  Mon ava donn ou detay sa banns if an term staff prosennman. Me sa bann Zofisye Sanniter pare you pe dir pe vizit bann lekol par egzanp. E sa pwen ki ou’n fer sorti lo prophylaxis mon oule fer kler sel dimoun ki pour ganny mete lo prophylaxis se bann dimoun ki partisip dan sa levennman Chilli Bar. Nou pa pour donn tou dimoun dan lekol Anse Etoile. Nou pour donn zis sa bann dimoun ki ti dan sa levennman e alor ki dan sa premye laliny kontak.  Si en dimoun i dan dezyenm laliny kontak i pa neseser pour zot pran prophylaxis.  E se pour sa mon’n dir risk i preski zero pour sa bann dimoun. E bann dimoun ki dan premye laliny kontak en gran poursantaz in gannyen depi yer.  Me a lafen ozordi tou dimoun pour lo sa bann prophylaxis parmi sa premye laliny kontak ki mon’n dir.

E an term bann bato ki pe arive. Bann bato pe ganny verifye par Zofisye Lasante e mon oule fer kler nou protokol, nou’n fer en nouvo Travel Advisory prezan. Kot parey mon’n eksplik Lasanble dan mwan statement lo depar ki a lavenir savedir apartir ozordi ek demen tou bann pasaze ki vini sorti Madagascar pou’n ganny mete anba lobzervasyon dan Sant Formasyon Lakademi Militer Perseverance.  Savedir sa i pour redwir lakantite Zofisye Lasante Piblik ki nou pour bezwen anvoy lo bann ka spesifik akoz tou dimoun ki pour ganny swiv pour ganny fer dan en landrwa santralize, ok? Me ziska prezan avan sa bann Zofisye Lasante ti pe swiv bann dimoun ki arive sorti tou destinasyon.  Sorti atraver, e par tou mwayen.  Bann ki arive par avyon, ban ki ariv par bato. E zot pe swiv zot toulezour atraver bann verifikasyon tanperatir, akoz sa i anliny avek protokol enternasyonal.  Sa i pli bon fason pour detekte sa maladi. E ankor menm avek sa endividi ki’n ganny afekte avek Lapest, ou kapab vwar ki nou protokol ti marse.  Protokol ti ganny swiv, e bann tanperatir ti ganny pran a bann moman apropriye.  Lefet ki nou annan en ka aktyelman.  Lefet ki nou annan en ka savedir nou pas lo en lot nivo an term nou bann entervansyon – parey mon’n deza eksplike. La kot nou met par egzanp dispozisyon Hermitte Ward, osi kot nou met sa Sant Militer Perseverance disponib pour kapab asire ki nou annan obzervasyon tou bann dimoun ki antre a lavenir. Mersi Mr Speaker.

 

MR SPEAKER

Onorab Ferrari enn relye avek sa enn siplemanter.

 

HON JEAN-FRANCOIS FERRARI

Wi Mr Speaker. I annan en sityasyon en pti irzan la ki pe devlope.   E mon krwar Minis i a kapab deal avek sa. I annan en sityasyon en pe panik la aktyelman la kot klinik Corgat Estate Minis.  Konmsi mon ti a kontan ki ou pran lokazyon pour ou, akoz sa se bann teachers International School ki’n al laba e zot pe panik.  En sityasyon en pe messy.  Mon ti a kontan si zot kapab pran sa lokazyon pour zot koz avek sa bann teachers e dir zot kwa ki zot devret ekspekte ki mannyer bann prosedir pour ganny deroule so that they are reassured that the situation is diffused.  Sorry Mr Speaker me ti annan en pti lirzans.

 

MR SPEAKER

I ok Onorab.  Avan mon donn laparol Onorab Pillay, Onorab Arrisol i dan menm laliny.  Ale avan Minis, apre Minis a fer sel reponn.

 

HON SANDY ARRISOL

Bonzour Minis. Bonzour tou Manm. Bonzour tou manm piblik.  Mr Speaker mwan osi relye avek sa ki Onorab Ferrari in dir parski letan Minis in dir ek nou pour dir Lekol International School in fermen an relasyon avek en mankman teachers.  I annan en paran in anvoy mwan en notis sa ki zot ti gannyen zot tou. ‘’Important Notice International School shall be closed for tomorrow for 6 days as a precautionary measure against the plague. Thank you. ‘’Zot pa’n mete an relasyon avek sa pour dir nou zot napa en mankman ansenyan. E al lo sa menm pwen.  Mon aprann pour dir tou bann staff International School zot kot klinik Corgat Estate dan zot mask zot pe esper Dokter.

Prezan Mr Speaker mon a fer sel demann mon kestyon an relasyon avek sanmenm.  Mon pa bezwen demann ankor taler koman ou’n donn mwan sa pti sans.  Mon ti a kontan demann Minis alor an vi ki nou pe koz mas.  Eski bann travayer Airport pa egzanp bann Immigration Officers, Customs, bann dimoun ki resevwar bann pasaze ki vini.  Eski zot osi zot pour gannyen sa bann safety gears parey nou dir. Legan, letan ou pe pran sa Passport avek sa dimoun, kekfwa en mas dan figir. Sa i mon premye.

Dezyenmman mon ti a kontan demann Minis an relasyon avek sa ki in koz lo la, mon ti a kontan met Minis dan en senaryo kot letan in dir pour dir sa msye ki in admet Lopital letan i ti vini sorti Madagascar, parey Minis in dir nou in al, i ti al Chilli Bar, e letan in sorti Chilli Bar in la Savoy kot parti teachers ti pe ganny organize. Savedir in sorti Chilli Bar dan son parti ki son lekol ti organize, in al Savoy dan National parti ki Minister Ledikasyon ti organize.  Ler in sorti Savoy son Sanmdi in al show Reggae Slaves ki ti fer anvil.  E mwan sa senaryo se la i la mon senaryo Mr Speaker.

 

MR SPEAKER

Demann ou kestyon Onorab.

 

HON SANDY ARRISOL

Non pe eksplik Minis mon ka pour li konpran mon kestyon. Mon kestyon se letan sa ansenyan in zwenn lezot ansenyan kot Savoy, Chilli Bar. Prezan Minis in dir ek nou ki pour dir zot in apel son zanfan, son madanm ek son bann zanfan pre pour zot kit anba lobzervasyon. Akoz in annan kontan direk. Be letan mon mazin sa msye in al danse Savoy avek lezot teachers.  E sa teachers ozordi in al lekol, lezot zour in al lekol.  Eski pa in annan kontak direk avek bann zanfan ki dan lekol?  Sa i mon kestyon.  E mon dernyen kestyon mon ti a kontan demann Minis – eski bann ners ki pe travay, ki’n ganny swazir dan sa, eski in ganny swazir dan sa, eski in annan bann ners spesifik ki’n ganny swazir pour travay dan sa Ward Izolasyon, ki’n ganny fer. Oubyen zot pe pran nenport ki ners pour travay avek sa?  Se tou Mr Speaker.  Mersi bokou Minis.

 

MR SPEAKER

Minis.

 

MINISTER JEAN-PAUL ADAM

Mersi Mr Speaker. E mon oule dir ki mon konpran ki dimoun i konsernen.  E mon konpran ki pour dir dimoun parfwa i annan sa lenstan pour panik.

Me i enportan Mr Speaker annou reste fokalize lo vreman bann mezir ki bezwen ganny pran.  Mon konpran Onorab Arrisol, me bann lenformasyon ki in mete, mon pa krwar ki i korek.  Mon pour demann li akoz i enportan Mr Speaker ki nou annan lenformasyon ki vreman kredib.  E mon konnen akoz mon osi mon’n resevwar serten dimoun in anvoy mwan text avek serten. Pour dir mwan tel dimoun ti la, tel dimoun ti la. Nou, nou al lo prensip eski nou kapab verifye.

E sa dimoun in donn son leksplikasyon ki in fer, e sa dimoun i dan en sityasyon kot mon krwar i pe koz laverite akoz i dan en sityasyon kot li menm li i per, konsyan enormite sa difikilte ki i ladan.  E apre osi nou verifye sa ki i dir nou avek bann lezot temwen.  E mon krwar deza dan lenformasyon ki ou’n dir mon pa krwar i korek ki in al Savoy.  Mon konpran ki sa levennman Savoy annefe ti lannmen si mon pa tronpe.  Sa petet i en keksoz ki nou kapab verifye.  Mon pa pe dir si i annan lenformasyon ki ganny anvoye dan en fason koumsa. Mon pour demann nenport ki silvouple pour met li dan en fason ki i kapab ganny verifye par bann temwen ki kapab ganny fer, dan en fason sistematik.  I enportan akoz i pa bon pour nou zis met lenformasyon san vreman kapab konnen si sa i reel oubyen non.  Zofisye Lasante piblik in pran en kantite letan yer pour kestyon sa endividi, pour kestyonn son fanmir.  Pour kestyonn bann zanmi, pour kestyonn lezot dimoun ki ti dan sa parti Vandredi swar, e pour zot etablir sa lalis kontak baze lo risk.

Alor i enportan, nou’n tann plizyer versyon sorti kot lezot dimoun lo kot i ti ete.  Me nou santi baze lo bann lenformasyon ki nou’n kapab verifye aktyelman, i kler ki sa risk an term premye laliny kontak in ganny idantifye.  Me dan ka spesifik ki ou’n nonmen Onorab mon ti a dir si sa dimoun i, si en dimoun in anvoy en lenformasyon ki ou met sa lenformasyon klerman.  Sa dimoun i donn son non, son nimero telefonn, son kontak. Nou verifye tou lenformasyon.

Nou ganny en konversasyon avek sa dimoun.  E baze lo la nou kapab azir sis a risk i plis ki sa.  Me mon’n deza tande sa mesaz ki ou’n dir mwan par en lot dimoun, e mon ti verifye, mon krwar i pa korek en.  Mon krwar i enportan pour nou met li la kler.  Pour nou pa kree en panik ki pa neseser. Me mon konpran lapros ki ou’n pran akoz i enportan ki nou tou nou konpran bann keksoz ki devan nou.

An term bann ansenyan kot Mont Fleuri nou ti konsyan bomaten ki ti annan en bon pe dimoun ki’n vini. Nou annan en dokter ki spesifik, ki pe war zot, enn par enn.  Vre akoz i annan bokou zot, petet in pran en pri letan.  Nou’n ganny sa lenformasyon.  Me mon fek ganny en text la sorti kot konsernen.  E i pa vwar sa bann pasyan dan en fason sistematik.  Si i annan sa bann ansenyan ki pe ekout nou ki ankor pe espere.  Si zot napa sentonm, zot napa okenn keksoz pour zot enkyet si zot napa okenn sentonm.

Si zot pa anvi espere zot kapab al kot en lot Sant Lasante Rezyonal tel ki English River, oubyen menm kot casualty si i vreman neseser. Me i annan en dokter spesifik ki pe espere pour war zot la. I annan plis ki 60 pasyan alor byensir i pran en pti letan pour li kapab vwar zot tou. Nou konpran ki serten dimoun i konsernen akoz zot krwar pour dir sa bann ansenyan i kapab afekte zot, larepons i non.  Sa bann ansenyan i pe ganny swiv atraver en tretman koman en prekosyon.

Sa bann dimoun i pa a risk pour transmet sa maladi. E lot lenformasyon sa dokter in dir ki tou dimoun ki in was ziska prezan pa pe prezant bann sentonm. Ok. Alor mon oule reasir tou dimoun ki i annan sa prosedir ki an plas. I annan bann Dokter spesifik ki pe swiv sa bann diferan pasyan. Be byensir si i annan en dimoun ki santi.  I annan en dimoun ki’n ganny manke.  Vin devan, selman vin devan avek lenformasyon kredib.  Vin devan pour dir tel dimoun, tel ler avek bann lenformasyon ki vreman presi.  Mersi Mr Speaker.

 

MR SPEAKER

Mon ti a kontan zis dir ki i annan bon pe MNA, e bon pe Manm Onorab ki anvi poz kestyon, fer komanter.  Me mon fer en lapel ankor ek tou dimoun ki si nou pe demann en kestyon oubyen nou’n fer en komanter ki nou annan fe, ki’n verifye. Ou pa kapab fer serten komanter, oubyen statement ki pour kree plis konsern pour dimoun.

Silvouple verifye ou fe.  Pa tou text ki ou pour gannyen ki vre.  Ou bezwen verifye ki sa ki ou pe dir i korek akoz lo en sityasyon parey mon’n dir pli boner ki delika.  E nou pa oule ki tou dimoun i komans panike e ki out dimoun sorti tel lekol i al kot en klinik.  Annou fer keksoz byen. Onorab Steven Pillay.

 

HON STEPHEN PILLAY

Mersi Mr Speaker.  Bonzour tou dimoun, bonzour nou bann dimoun Au Cap.

Mr Speaker mon en pti kalme lenkyetid e asir la popilasyon ki bann risk ki involve pour human to human transmisyon.  Ki Minis i kapab dir nou, konmsi i donn sa garanti, sa lasirans ki posibilite pour en dimoun enfekte transmet ek son pet sa maladi. I zis human to human, e cannot be transmitted kategorikman kot son pet.  E lo kote, vi ki bann zannimo enfekte i bann long term resevwar sa?  ki mezir zot pe pran, bann bato ki zot dir pe met lasose sorti Madagascar, pasaze pe ganny met anba karantinn.

Ki mezir zot pe pran pour asire ki napa okenn lera enfekte or okenn zannimo ki pe kapab sorti, vi ki lera nou annan stray dogs i annan.  Ki mezir zot pe pran pour donn lasirans, nou pe kontrol tou keksoz lo tou pwen antre.  Mersi Mr Speaker.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker.  E mon oule ankor rapel ki … mon krwar en kestyon tre pertinan.  Me i annan en diferans ant diferan kalite Lapest.

I annan sa ki apel Lapest Bubonic, ki transmet prensipalman atraver zannimo. Me sa ka ki nou annan aktyelman i Lapest Pneumonic ki transmet prensipalman atraver bann gout delo dan ler e ant imen. Alor risk pour transmisyon avek zannimo i minim. Vreman redwir.  I pa konpletman enposib akoz bann zannimo osi respir sa.  Me i vreman dan bann ka ki’n ganny dokimante i vreman rar. I vreman rar ki ou annan sa bann kalite sityasyon.

E baze, me lo lot parti ou kestyon. Se an term bann bato ki pe vini. Nou pe fer bann travay sirveyans sirtou atraver bann dimoun.  Alor tou bann dimoun ki pe vini lo bato pe ganny teste tanperatir eksetera. E si zot vin ater, zot pour ganny swiv. E dan nouvo protokol ki mon’n eksplik Lasanble, zot pour bezwen al an izolasyon kot Lakademi Militer Perseverance. Me an term sa bann bato, zot menm nou osi fer provizyon si i neseser pour fer spray avek ensektisid.  E osi ki redwir posibilite ki ou annan sa lenpak.  Alor pour le moman mon kapab reasir piblik, ki model transmisyon atraver zannimo i minim.  I vreman preski zero.  Nou bezwen adres konsern otour nou sitwayen ki malad aktyelman e atraver izolasyon nou pour kapab asir zesyon sa maladi dan en fason efikas.  Mersi Mr Speaker.

 

MR SPEAKER

Onorab Loizeau ou ti annan en kestyon relye avek sa enn? Oubyen i en lot kestyon separe?  Ok.  Onorab Prea.

 

HON NICHOLAS PREA

Mersi Mr Speaker.  Mon anvi zis sa kestyon Corgat Estate ki Minis in fer referans avek i annan en Dokter ki spesyalize laba.  Mon ti a kontan, mon kestyon i straight forward.  Eski tou Sant Lasante, klinik zot annan bann dimoun konpetan e zot okouran bann protokol pour zot swiv pour zot detekte? E eski tou sa bann sant, sa bann klinik i annan prophylaxis ki si zot detekte keksoz zot kapab komans sa tretman?  Mersi.

 

MR SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker.  E mersi Onorab.  E i en kestyon tre pertinan e tre enportan. Zisteman tou Sant Lasante, tou bann dokter in ganny en briefing lo ki mannyer pour adres sa size.  E bann travayer lasante. E osi prophylaxis i disponib dan tou Sant Lasante.

Nou pour, e nou’n osi fer bann pre-packs.  Savedir sa bann antibyotik ki si i annan en dimoun ki ganny idantifye vitman koman en dimoun ki ti dan laliny kontak, ki i kapab ganny met lo sa tretman.  Nou rekonnet ki defi pour en pti Sant Lasante i plis.  Alors si i annan dimoun ki annan konsern osi, nou osi annan en, nou pe fokaliz osi nou zefor lo sa ki nou apel bann sant rezyonal. E sa i Anse Boileau, Anse Royale, English River, ek Beau Vallon.  Alor sa i bann Sant Rezyonal ki zot ler louvertir i en pti pe pli long.  Osi pour bann dimoun ki apre 4er i bezwen pase. E tou Sant Lasante i kapab donn en servis. Alor nenport ki santi, par egzanp ki pa ankor vin devan akoz i pa ti konnen, in ekspoze. Oubyen ki santi i annan en konsern i kapab vin devan kot bann Sant Lasante.

Me mon pour demann osi lapopilasyon pour osi pa reazir an tro. Pa over react parey nou dir.  Nou’n ganny detrwa ka yer swar kot Casualty kot in annan dimoun ki’n vini e letan ou pour demann zot kestyon, ou vwar ki zot risk, zot napa en risk avek Lapest. Parfwa zot malad. Zot annan petet en lot lafyev, zot annan en lot maladi, e nou tret zot.  Napa problenm, nou pa pe dir okenn personn al se li, nou pe tret tou dimoun.  E si zot sentonm i konsistan, nou pour admit zot. Me si zot napa sa risk.  Si zot napa sa exposure avek sa risk nou pour tret zot pour sa lot maladi akoz napa, fodre nou konpran byen ki sa risk i sorti dan en dimoun ki’n ganny enfekte dan sa premye faz.  Alor i pa zis nenport ki ki’n al Madagascar ki forseman ou pour malad.  Mersi Mr Speaker, e mersi Onorab.

 

MR SPEAKER

Onorab Sophola.

 

HON NOLINE SOPHOLA

Bonzour Minis ek ou delegasyon e tou dimoun prezan.  Minis nou’n koz bokou lo Airport.  Me mon konsern i pandan mwan Oktob nou vwar bokou bann cruise ship ki antre isi Sesel.  E ladan nou annan parey Costa ki son larout i Sesel/Madagascar e isi.  Mon pe regarde ki prevansyon ki ou Minister in mete pour vizavi sa bann cruise ship. Mersi.

 

MR SPEAKER

Minis.

 

MINISTER JEAN-PAUL ADAM

Mersi Mr Speaker e mersi Onorab.  En tre bon kestyon ki petet mon ti’n devret mansyonnen depi avan.  Annefe nou’n fer, nou’n fer kontak atraver Departman Tourizm avek bann laliny cruise ships pour nou dir zot ki nou rekomande ki zot dan zot parkour ki pour zot vin Sesel fodre zot annan plis ki 7 in pase, plis ki 6 zour pardon in pase depi ler ki zot in pas dan en por Madagascar.

E si en bato i vini ki zot…sa 6 zour pa ankor pase, bann dimoun ki anvi debarke pour bezwen al anba obzervasyon parey nenport ki dimoun ki pe antre dan nou pei ki sorti dan en landrwa afekte parey Madagascar.  Osi, si sa bato i vin Sesel nou pour swiv nou protokol, nou pou fer en temperature check avek tou dimoun ki arive.  Me si sa bato in fer plis ki 6 zour lo lanmer sa risk i dapre bann protokol enternasyonal, sa risk i preski zero. Alor nou pe swiv sa menm lapros avek sa menm Konpannyen bato krwazyer. Mersi Mr Speaker.

 

MR SPEAKER

Mersi Minis.  Onorab Roucou.

 

HON CLIVE ROUCOU

Mersi Mr Speaker. Bonzour Minis, bonzour tou Manm Onorab.  Mon kestyon pour Minis se – Minis ki plan a long term e pli pridan ki ou Minister i annan pour okenn evantyalite dan ka en lepidemi pour anpes okenn sa bann boulversman parey in annan lo Lopital Sesel yer?

E 2enm kestyon, eski ou Minister i annan ankor enn fwa, i annan plan pour fer en sant izolasyon permanan e me ki pa sitye dan Lopital Sesel li menm?  Mersi.

 

MR SPEAKER

Minis.

 

MINISTER JEAN-PAUL ADAM

Mersi Mr Speaker.  An term nou plan long term.  Mon ti’n deza eksplike avek Lasanble nou annan sa Sant Izolasyon ki nou pe fer dan en kad medikal k nou’n prevwar, mon krwar in ganny, pour le moman i dan Bidze provizwar pour 2018, ansanm avek nouvo Laboratwar pour Lasante Piblik.  E me sa i ava ganny prezante avek Lasanble prosennman letan Bidze i vini.  E sa i donn nou lenportans pour nou annan sa sant dan sa landrwa o-bor Lopital.  I enportan pour annan en sant lo tou, izolasyon dan en konteks Lopital.  Akoz nou pran legzanp Lapest Mr Speaker, si en dimoun i anba obzervasyon, ou kapab met li dan en Sant ki lwen avek ou santral lasante. Akoz sa dimoun pe zis ganny obzerve.

Me si en dimoun i dan sa faz kot posibleman vreman i annan Lapest, e ki dan en sityasyon medikal ase grav, ou bezwen annan li dan en sirkonstans medikal kot ou konsantre ou zefor.  E si nou napa sa mwayen pour nou kree bann Lopital Izolasyon ki lwen avek nou Lopital. Parey mon’n dir sa konteks izolasyon medikal dan lansent Lopital, nou pe prevwar lannen prosenn. Nou pe diskite dan en fason pli laz avek bann lezot Departman lo posibilite annan bann Sant Izolasyon obzervasyon dan en fason pli zeneral ki kapab dan en lezot landrwa dan pei. Me sa i pa pour forseman en fasilite medikal.  Akoz nou pour bezwen annan, si ou pour annan en fasilite medikal, ou bezwen annan tou son sipor ki al avek. Ou bezwen kapab donn sa dimoun sa sipor medikal aprofondi, ki neseser. Mersi Mr Speaker.

 

MR SPEAKER

Onorab Basil Hoareau.

 

HON BASIL HOAREAU

Mersi Mr Speaker.  Mr Speaker mon annan de pti kestyon. Premyerman nou’n ganny dir pour dir bann tes ki kapab ganny fer Sesel pour le moman i selman tes, rapid test an relasyon avek servi flenm. Ki protokol ki nou annan pour fer tes by disan?  Mon pe mazinen nou pour anvoy laboratwar aletranze.  Ki laboratwar ki nou anvoye?  E ki son protokol ki ganny servi?  E ki kantite letan pour nou ganny rezilta?

E lot bout kestyon, eski i annan en plan pour nou entrodwir fer sa tes disan lokalman?  Mersi.

 

MR SPEAKER

Minis.

 

MINISTER JEAN-PAUL ADAM

Mersi Mr Speaker. E mersi Onorab. An term sa tes rapid sa nou’n gannyen atraver sipor avek Lorganizasyon Mondyal Lasante.  E i permet donn ou, i permet ou bouz vitman dan serten ka.  Me selman parey ou’n dir.  Si napa flenm i pa marse.  Me dan tou bann ka alor nou pran bann esantiyon disan e nou anvoy kot Institut Pasteur Paris.  Letan nou ti’n fek komans ganny sa bann problenm e ki ti annan sityasyon avek nou lantrener Madagascar, nou ti fer teste dan Institut Pasteur Madagascar.  Me la nou’n ganny kontak direk avek Lenstiti Pasteur a Paris.  E anba protokol ki nou pe etablir nou ekspekte ganny rezilta dan enn de zour.

E nou annan osi isi Sesel nou pe, nou’n ganny en PCR machine, selman nou bezwen adres serten bann lezot konponan ki al avek avan ki nou kapab met li an fors dan en fason sistematik.  Mersi Mr Speaker.

 

MR SPEAKER

Onorab Hoareau.

 

HON BASIL HOAREAU

Mersi Mr Speaker. Letan Minis in dir nou pe ekspekte annan bann lezot konponan sa masin PCR is it ki ou’n dir.  Sa pour teste disan sa?  Konbyen letan ki ou krwar i pour kapab ganny tou keksoz pour met li an mars?

 

MR SPEAKER

Minis.

 

MINISTER JEAN-PAUL ADAM

Mersi Mr Speaker. Mersi Onorab. I en kestyon akoz sa. I en kestyon ki ase teknik.  I lye avek sa probe ek sa primer ki al avek sa masin ki nou bezwen permisyon kot sa Institut Pasteur.  E enn fwa ki zot donn nou sa then nou pour kapab fer sa isi.  E nou ekspekte, i pa sipoze telman long. 2 semenn, petet en pe mwens osi.  Mersi.

 

MR SPEAKER

Onorab Loizeau.

 

HON NORBERT LOIZEAU

Mersi Mr Speaker.  Bonzour Minis ek ou delegasyon.  Mr Speaker mon anvi demann Minis 3 pti kestyon.  Minis an vi tou sa bann konfizyon ki nou pe tande la konsernan lekol ki ou’n dir ki risk …sa maladi.  E de plis ki sa i annan bann teachers ki’n dan sa fonksyon ki’n ganny demande pour reste se zot.  Vi ki dan tou bann lekol i pa neseserman ki sa bann teachers zot reste dan sa distrik kot sa lekol i ete.  Zot eparpiye partou dan tou kominote. E avek sa konfizyon ki annan la deor.  Eski ou pa panse pour rezon prevantiv Minis ti ava byen petet nou ferm bann lekol at least la eskan Lendi or pour 6 zour pour rezon prevantif Minis?  Sa en pwen.

E dezyenmman Minis mon anvi konnen konbyen letan zot pran ler en dimoun ki’n ganny kontak avek en dimoun enfekte? Legzanp en msye dan mon distrik, en zanmi in dan sa fonksyon, posib in ganny kontak ek sa dimoun, in call lasante, se ozordi bomaten ki veteriner in vini, in tyek son lafyev se tou.

In dir mwan sa, mon pa konnen. Sanniter, Sanniter, ki dele letan zot pran pour zot ariv kot sa dimoun?  Apre Minis, apre Minis mon’n fer zot riye, zot kontan.  Zot napa kestyon zot riye.

 

MR SPEAKER

Ok kontinyen Onorab.

 

HON NORBERT LOIZEAU

Apre vi ki semenn Kreol pe arive la pour annan bann manifestasyon kot pour rasanble bokou dimoun.  Ok. E mwan bomaten letan mon desann anvil mon’n war detrwa madanm ki pe mars ek mouswar lo nennen, mon’n war 3, 4 dimoun avek mask.  Eski vi ki pour annan sa manifestasyon la an se moman ki annan sa bann zafer Lapest ki pe arive.  Eski avek lafreyer, konfizyon ki pe annan lo dimoun, eski ou Minister pe an kontak avek sa bann dimoun ki pe organiz sa bann levennman pour petet mon pa konnen cancel or zis donn mwan en pe..?

 

MR SPEAKER

Cancel oubyen postpone.

 

HON NORBERT LOIZEAU

Wi. Mersi.

 

MR SPEAKER

Ok, mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab.  E mon pour dir ankor enn fwa ki mon konpran ki sa i en maladi ki fer nou tou per. Mon konpran ki i en maladi ki met nou lo nou defans akoz i en keksoz ki dan ler.  Nou konnen pour dir sa i kree sa santiman ensekirite parmi nou popilasyon. Me mon pour retourn ankor Mr Speaker pour dir ki i enportan ki nou regard laspe syantifik sa maladi. La fason ki i ganny propaze. E bann teknik ki’n ganny servi pa zis isi dan lezot pei pour anpes li ganny propaze.

E an term par egzanp kestyon pour ferm bann lekol. I pa, i pour en pti en reaksyon an tro. Akoz ou annan sa premyerman i zis serten lekol kot sa bann ansenyan i baze. Parey in dir zot baze dan zot lakour. E nou’n dir zot reste kot zot lakour zisteman pour nou kapab pli byen swiv sa bann kontak. Pour nou kapab konnen kote sa bann dimoun i ete. Sa bann dimoun, e sa bann dimoun si zot pe pran sa bann prophylaxis, zot risk lenfeksyon i preski zero. Ok?  Akoz si ou pe pran sa maladi, sa maladi i vreman en maladi virilan, konmsi i vreman anmas vit.

Selman osi i fasil atak li. Ou atak li ek antibyotik.  E si ou pe pran sa bann prophylaxis ou pa pour gannyen sa maladi.  I vreman en keksoz senp.  Se pour sa ki nou pe swiv sa bann kontak dan en fason kontinyel. Si nou pe ferm tou bann lekol nou pe al en pti an tro.  E nou pe met nou pei en pti pe, mon kapab dir dan en sityasyon panik ki pa neseser.  Nou annan byensir bann mezir ki nou pe fer pour verifye sa bann dimoun.  E si i annan okenn siny, nou donn zot sa sipor, e nou asire ki zot ganny akse avek servis lasante kot i neseser.

E i menm parey manifestasyon bann manifestasyon piblik.  Sesel nou annan en ka.  E i kler ki sa 1 ka in ganny sa maladi Madagascar.  I pa’n ganny li isi. I kler ki in ganny sa maladi laba. Letan in vin isi, in an kontak avek serten dimoun.  Me se pa tou kontak ki anmenn en lenfeksyon.  Akoz sa moman ki lafyev i for, ki lenfeksyon i ganny transmet.

Alor dan sa 3 zour in ganny swiv par bann Zofisye Lasante. Son lafyev in for nek Lendi. Savedir sa moman lenfeksyon nou kapab definir li dan en peryod apepre en 24 erdtan.  E in ariv vitman dan lopital. Alor risk pour li ganny propaze pli larzman dan piblik. I vreman minim.  Alor i enportan pour nou pa reakte an tro.  Mon ti a dir kantmenm ki si i annan dimoun e atraver bann interview ki nou’n fer avek sa msye e osi avek bann dimoun ki otour li.  Nou’n ganny lalis kontak premye.  Sa ki nou apel premye laliny kontak.  Bann dimoun ki’n konfirmen ki’n annan kontak direk avek li.  Me nou lans en lapel si i annan dimoun ki konnen pour dir zot ti an kontak avek li e pa ankor ganny kontakte pour vin devan, pour vin kot en Sant Lasante, prezant zot lekor e zot a kapab ganny sa konsey neseser. E si i neseser osi met zot lo sa antibyotik, sa prophylaxis. Mersi Mr Speaker.

 

HON NORBERT LOIZEAU

Mr Speaker konsernan semenn Kreol la.

 

MR SPEAKER

Pardon, ou annan en siplemanter Onorab Loizeau. Ale.

 

HON NORBERT LOIZEAU

Minis pa’n reponn sa bout lo semenn kreol vi ki pour annan sa manifestasyon kot pour annan bokou dimoun pour semenn Kreol. Vi ki i annan sa.

 

MR SPEAKER

Minis.

 

MINISTER JEAN-PAUL ADAM

Mersi Mr Speaker. Wi annefe parey bann lekol i en pti pe al an tro pour nou, akoz bann manifestasyon piblik fason ki ou pour ganny enfekte se sorti en dimoun en dimoun ki enfekte. Pour le moman sa dimoun ki nou konnen in ganny enfekte i dan lopital, ann izolasyon.  Bann dimoun ki dan premye laliny kontak, ki a risk, zot osi zot pe ganny swiv, e zot lo tretman.  Savedir risk pli larz dan bann manifestasyon piblik i vreman ba.

E se pour sa rezon ki nou pa pe fer provizyon pour anpes sa bann manifestasyon ganny fer.  Nou konnen, nou konpran ki en kantite dimoun i konsernen.  E mon’n ganny dir ozordi i annan serten marsan ki’n redwir zot servis oubyen ki pe, i annan serten Daycare ki’n fermen mon’n, mon konpran reaksyon dimoun.  Me i enportan pour nou regard lo son baz syantifik.  Ki son risk pour li propaze atraver sirkilasyon lo semen an piblik. E sa risk i minim si nou swiv byen bann protokol ki an plas. Me mon redir ankor, ki i enportan ki tou dimoun i swiv a let bann konsey ki ganny donnen par zofisye lasante piblik. Mersi Mr Speaker.

 

MR SPEAKER

Mon krwar ki Onorab Loizeau ou’n poz ou 3 kestyon. In ariv moman pour nou pran en pti break akoz nou annan bann envite ki sorti Au Cap ki la e 10.30 in sonnen. Minis premyerman avan nou pran en pause.  Mon a demann si ou pou kapab kontinyen 11er akoz nou annan pa mal Onorab ki anvi demann kestyon.

E mon krwar i en topik tre, tre enportan ki dimoun i demann leklersisman. I annan omwen 8 dimoun ki oule koze. Eski i ok avek ou pour retournen 11er apre ou an pran en pause ou osi ou a bwar en pe kafe, ou a relax en pti git. I ok avek ou? A bon nou pour envit bann, nou bann envite sorti distrik Au Cap pour zot, zot ganny gide kote pour ale.  Pour pran en pti snack, en dite oubyen en kafe, oubyen juice avek nou. Zot a ganny sans enterakte avek le de Leaders dan Lasanble ek zot MNA e mwan menm.

Be avan nou pran en pti Break mon ti a kontan repet sa ki Minis Adam in dir.  I nou pei, i konsern nou, nou bezwen pran responsabilite.  Si in dir nou fer sa, nou bezwen ekout sa ki sa bann profesyonnel medikal i dir nou.  E mon krwar Onorab Loizeau in fer en bon pwen taler. Petet bann groupman ki nou pe mazinen. Petet annou rekonsidere pour fer lavi bann Travayer Lasante pli fasil.  Mon krwar nou tou nou bezwen pran nou responsabilite e mazin nou zanfan, nou pei avan nou menm nou e respekte konsiny ki lasante in donnen.  Avek sa nou a pran en pause, nou a retournen 11er.  E nou envit tou nou bann envite sorti Au Cap pour zwenn nou dan anler dan corridor mersi.  Wi Onorab Ramkalawan.

 

HON WAVEL RAMKALAWAN

Mr Speaker zisteman lo sa pwen ki ou’n fer resorti pour nou ekoute. Me selman mon anvi dir avek Minister Lasante ziska aprezan napa nanryen lo televizyon.  Zot pa pe fer, napa okenn ‘Spots’ lo televizyon ki pour donn popilasyon ledikasyon, lenformasyon.  Mon ti ava kontan si zot ti komans fer sa.  Then dimoun i ava dan en pozisyon pli bon.

 

MR SPEAKER

Onorab, pardon.  Minis Adam.

 

MINISTER JEAN-PAUL ADAM

Mersi Mr Speaker. Mon apresye sa sizesyon pour nou fer ’Spots’ selman Mr Speaker Dokter Gedeon in lo televizyon preski toulezour dan bann dernyen semenn ki’n pase.  I pa konmsi ki nou pa’n met lenformasyon dan domenn piblik.  Lotorite Lasante piblik in fer en gran zefor pour met sa lenformasyon devan.

Dr Gedeon in vreman donn update lo en baz e si mon pran yer lo en baz preski tou le 2 erdtan.  Kot in donn lenformasyon dan en fason ki regilye.  E nou konpran sa sizesyon lo kote ‘Spots’ e nou ava pran li koman en keksoz ki nou kapab fer, napa en problenm.  Me Mr Speaker e tou bann Manm Onorab, nou bezwen rekonnet pour dir lenformasyon i la.  Mersi.

 

MR SPEAKER

Non mon krwar Minis i pa en kestyon ki enn i kontradir lot. Mon krwar lenformasyon i devret lo diferan nivo. La bomaten mwan personnelman nou’n vwar li in eklersi bokou keksoz e nou vwar li in eklersi bokou keksoz dan lespri dimoun.  Petet ki nou ti kapab fer si i annan bann pti konsiny, bann pti ‘Spot’ parey ou dir ek dimoun pa bezwen al en parti si ou pa bezwen ale.

Personn pa defann ou pour al parti, be selman ou pour al dan en landrwa kot i konzeste.  Risk i la. Mon krwar sa lide ki Onorab pe dir. Petet tou le de nivo i bon.  E mon salye. Mon ti a kontan koman Speaker alye Dokter Gedeon, en dimoun ki mon annan bokou respe pour li ki li in vin nobou in the forefront of tousala pour li anmenn lenformasyon.  I pa fasil.  Pa fasil, me mon krwar sa ki Onorab pe dir se marye sa ansanm ek sa ki zot pe deza pe fer.  Mon pa krwar okenn nou dan Lasanble nou pa rekonnet zefor ki zot pe fer.  Nou rekonnet sa e nou salye zot.

Nou la pour siport zot.  Be annou met nou lide ansanm pour tou e fotespere tou sa ki pe ekout nou i ekout bann konsiny bann direksyon ki zot ganny dir. Avek sa nou tou nou bezwen en pti tas kafe.  Nou adjourn, nou a repran

11er.

 

(BREAK)

 

MR DEPUTY SPEAKER

Mon ti a zis fer rapel bann Manm pour nou rantre a ler pour nou kapab kontiny nou travay. Nou ankor short en Manm pour nou kapab ganny en quorum, ok. Mon wi egzakteman mon krwar i malere ki mon fer sa lanons from the Chair. Depi nou’n komanse a sak fwa ki nou pou annan en seating Clerk in fer son devwar in anvoy tou Manm en pti Notice pour zot antre a ler pour zot met telefonn lo silans and all that.  Me apre mon krwar serten Manm in dir pou dir annou dis-kontinyen sa, Clerk in dis-kontinyen.  Me la mon pe dir ek Clerk as from now on nou bezwen remind Members ki nou annan en ler komanse, nou annan en ler ki nou Break e i annan en ler ki nou, ki Speaker oubyen the Chair i dir nou pou repran e nou fer sir nou repran.

Nou bezwen pran konsiderasyon osi tou ki Minis avek son delegasyon osi tou, zot busy zot annan bokou travay, bokou responsabilite pou desarze. Ok, nou annan en quorum la nou kapab kontinyen, mon anvi zis prezant leskiz pour Mr Speaker. I pe deal ek enn de bann pti keksoz avan son depar tanto.  Kot i pe al asiste meeting IPO St Petersburg, so as from now ziska lafen lazournen mwan ki pou Chair.  Nou ava kontinyen avek kestyon pour Minis Lasante, e prosennman lo mon lalis mon annan Onorab Adelaide.  Onorab.

 

HON FRANCOIS ADELAIDE

Mersi Mr Speaker.  Bonzour Minis avek ou delegasyon.  Minis mon annan detrwa pti kestyon. Mon premye kestyon i for lo sa kestyon Onorab Ramkalawan lo kote sa msye ki ou dir son fanmir ti ganny, i ganny, mannyer nou dir sa in ganny met anba lobzervasyon. Ou’n konfirmen ki zot ti annan en pti lafyev e eski i pa en kwensidans ki apre son papa in ganny lafyev ki son zanfan in ganny lafyev? E eski ou Minister in fer le neseser pou li gete akoz ki sa garson pe ganny sa pti lafyev ki ou pe dir?  Mon 2enm kestyon se Minis eski ou kapab dir mwan petet akoz i annan konsern la, nou tou nou en pe enkyet. Eski bann dimoun an zeneral i annan landrwa ki zot kapab al rod sa prophylaxis petet pour zot kit avek zot petet si zot santi zot konmans ganny petet en lafyev petet zot a kapab pran pour ed zot.  Petet si zot in ganny kontak avek sa bann dimoun pour sa maladi ki zot pa devlop sa maladi?  E mon 3enm pti pwen Minis, eski kot bann sant lasante taler i annan Onorab in demande be mon pa’n ase kler lo la eski kot bann Sant Lasante ler bann pasyan in vin avek bann sentonm parey lafyev avek latou, i annan en sistenm fast track ki zot kapab ale ki plis dimoun pa ganny ekspoze avek petet si zot in ganny kontak avek sa bann dimoun, pou lezot dimoun dan piblik pa ganny ekspoze avek sa maladi.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Bon premyerman an sa ki konsern sa zanfan i annan de zanfan dan fanmir ki admet aktyelman.  Mon krwar petet … eskiz mwan i annan 5 dimoun dan fanmir ki’n ganny admet aktyelman ladan i annan en zanfan, i annan en dimoun mon ti krwar i anba larz me i pa le ka.  Alors sa lot zanfan ki ou’n dir si i reste dan menm lakour avek sa dimoun, premyerman nou verifye si in vreman in annan kontak avek sa dimoun oubyen non.  E eski in ganny kontak avek en Profesyonnel Lasante pour le moman.  E si sa i pa le ka fodre i vin kot en Sant Lasante pour li ganny kontak avek en profesyonnel lasante pour nou kapab evalye son kondisyon apre vwar si i pa’n ganny kontak avek sa dimoun ki’n ganny Lapest.  Napa risk si i pa’n ganny kontak, en kestyon si son kontak i zis segonder savedir avek lezot dimoun me pa avek sa dimoun de-baz napa risk.  Sa i en keksoz petet zot a ganny sa bann lenformasyon avek Dokter Gedeon nou ava kapab verifye.  Apre a sa ki konsern prophylaxis, nou pe donn sa dan bann sant lasante, me i enportan pour nou konpran napa en sans donn prophylaxis tou dimoun. Nou donn prophylaxis avek bann dimoun sa ki nou apel bann premye laliny kontak, savedir bann dimoun ki’n ekspoze avek sa premye dimoun ki’n ganny sa maladi. Bann dimoun ki an deor sa premye laliny kontak e sa nou etablir atraver zot history, savedir baze lo leksplikasyon kot zot in ete, ki zot in fer zot napa nesesite pou zot pran en prophylaxis ok? Byensir nou regard, nou regard sentonm sak dimoun mon mazinen sa dimoun ki ou’n dir in bezwen vin devan kot lasante i bezwen pe ganny swiv par en dimoun Lasante aktyelman e mon asire zot in fer en assessment baze lo son kondisyon.

Apre lot kestyon se an term bann Sant Lasante, dan sak Sant Lasante nou’n dir, nou’n brief en serten kantite profesyonnel en serten kantite profesyonnel.  Nou’n brief bann profesyonnel pour zot kapab pour fer sa servis apropriye ek sa bann konsey ek bann dimoun neseser.  Me dimoun ki dan sa premye laliny kontak, bann dimoun ki deza ganny kontakte par Zofisye Lasante Piblik, bann sanniter parey nou dir, zot, zot kapab pli bon keksoz se si zot ganny en sentonm se pou telefonn sa Zofisye Lasante Piblik ki i an kontak avek zot. Akoz sa zofisye lasante piblik pe vizit zot toulezour.  Alor pli bon keksoz se kontakte sa Zofisye Lasante Piblik ki pou organiz transpor lanbilans pour vin sers zot kot zot.  E pou anmenn zot dan en landrwa apropriye pour kapab egzamin zot epi pou kapab adrese.  I pli bon pou zot, mon pe koz la pour bann dimoun ki dan premye laliny kontak savedir sa 258 dimoun ki nou’n fini idantifye zot e ki nou pe kontakte zot.  Si i annan dimoun ki pa ankor vin devan e ki zot santi zot dan sa premye laliny kontak savedir zot in annan kontak avek sa dimoun ki’n malad ant Vandredi ek Lendi zot bezwen, nou’n demann zot pou vin devan e prezant zot lekor e nou ava kapab gid zot.  Me nou santi atraver bann interview ki nou’n kapab tous la gran mazorite si pa tou, mon krwar nou’n kapab tous preski tou dimoun ki dan sa premye laliny kontak.  Mersi Mr Speaker.

 

MR DEPUTY SPEAKER

Mersi Minis. Onorab Flory Larue.

 

HON FLORY LARUE

Bonzour Deputy, bonzour Minis, bonzour tou dimoun. An relevans avek Statement ki Minis in fer lo kote medya, prensipalman medya sosyal, yer leta sa ti sorti lo kote nivo Nasyonal sa lenformasyon ti sorti, i ti sorti via en post ki en post ki Newspaper TODAY ti fer lo medya sosyal, via son Facebook page.  Akoz ki Minister Lasante pa ti vwar li en irzans pour li kontakte tou medya pour les medya ki ti annan sa siny ki i en keksoz ki propaz vitman, e i en keksoz ki dimoun pe dir i en danze pour lasante piblik.  E an plis ki sa eski Lasante, Minister Lasante i annan en plan kominikasyon ki nou’n dir letan Minis in fer nou Statement in eksplike ki letan en dimoun pour annan entry Mahe zot annan sa medical officer ki zot zwenn e zot in ganny dir protocol.  Dan sa premye ka nou’n vwar ki sa dimoun pa’n follow protocol. Dapre mon konpran mon’n koz avek enn de bann dimoun ki ti lo flight Vandredi e zot in eksplike ki apart sa form ki zot in ranpli e sa tes tanperatir ki zot in pran zot pa’n ganny advise ki pou fer.  Eski kekfwa alors Minister Lasante la ki, nou pa kapab dir si korek, si i pa korek me si napa sa ledikasyon eski Minister Lasante i kapab urgently met en pe protocol lo televizyon.  SBC i 24 erdtan servi sa pour kapab donn en pe lenformasyon bann dimoun kekfwa ki annan lafreyer ki’n antre lo flight Vandredi ouswa ki pe antre pa other point of entry pour konnen ki pou fer.

Lo kote medya nou annan en site ki apel eTurboNews e si Minister Lasante eski zot pe monitor lefe lenformasyon ki pe sorti lo kote enternasyonal letan nou pe get nou Lendistri Tourizm eski zot pe follow bann medya, pour zot kapab donn lenformasyon ki korek. Akoz eTurboNews i dir ki i annan trwa dimoun ki’n teste pozitiv Sesel alor i pe dir plague is spreading in Seychelles.  Zis pour zot kapab pour monitor ouswa si zot annan en plan pou monitor akoz i annan lezot Departman, lezot lendistri ki pou ganny afekte si Minister Lasante pa donn lenformasyon korek akoz medya sosyal pou donn bal. Akoz Seselwa pa konnen ki pe pase zis zot ki konnen ki pe pase mersi.

 

MR DEPUTY SPEAKER

Mersi Onorab Larue. Minister.

 

MINISTER JEAN-PAUL ADAM

Mersi Mr Speaker.  Mon le fer kler ki Minister Lasante in donn lenformasyon avek tou medya nou ti envit tou medya pour vin sa briefing avek dokter Gedeon yer e tou medya in ganny lenformasyon o menm moman e ansanm.  Me diferan medya in fer sorti sa lenformasyon dan diferan fason e dan diferan moman sa i rol bann medya pour zot swazir kan zot pou fer sorti sa lenformasyon. Me Minister Lasante in fer sorti tou lenformasyon menm moman avek tou bann operater dan sekter medya.  I regretab ki parey mon ti deza dir dan mon lentervansyon lo komansman ki serten medya dan pet aye pour fer lenformasyon sorti in fer lenformasyon ki pa korek.  E Minister Lasante in osi fer li en pwen pou met sa devan sa bann medya e pou zot koriz zot lerer e zot in fer li.  Me malerezman sa kot responsabilite i vini anver nou tou Mr Speaker, Mr Deputy Speaker, responsabilite i la pour nou pa met en lenformasyon dan domenn piblik san ki nou kapab verifye sa lenformasyon dan en fason ki sistematik.  Alor Minister Lasante pou kontinyen met sa bann lenformasyon ki korek deor.

E mon regrete ki medya sosyal i donn bal avek sa bann problenm, me Mr Speaker nou bezwen rekonnet pou dir nou lenformasyon ki nou’n donnen dan premye kad i korek li.  Me a en serten moman i annan dimoun ki pa servi sa lenformasyon dan en fason ki responsab.  E nou demann ankor tou dimoun si i annan en dout dan lenformasyon demann klarifikasyon e si, e sa ki mon konsernen en mon krwar i rol pour tou Manm Lasanble e tou dirizan kot letan i annan en lenformasyon ki fo e ki nou konnen pou dir i fo nou osi dir pou dir i fo, nou menm nou, nou pran sa linisyativ.  Minister Lasante pou fer li me selman tou bann endividi osi bezwen pran sa responsabilite pou fer sir ki si i annan en nouvel ki fo ki sa i ganny dir klerman ki sa i pa kredib.  E annou demann dimoun osi donn zot sours i enportan ki bann dimoun i donn zot sours.  Letan zot pe fer okenn travay dan medya.

Apre mon krwar pwen ki ou’n fer ki nou aksepte nou krwar ki en keksoz ki byen met en pti pe plis lenformasyon dan bann model parey ‘Spots’. Mon krwar en kantite lenformasyon in ganny donnen atraver medya me i annan lespas pour fer an term bann ‘Spots’ an term bann pti lanons ki tous dimoun dan en fason pli direk e nou ava fer li. An se ki konsern sa bann dimoun spesifik ki dan premye laliny kontak e ki’n ganny gide lo kwa ki zot kapab ganny fer ki zot devret fer. Ou’n sit 2 ki’n dir ki petet pou zot pa ti kler me tou dimoun ki arive lo Airport i ganny en leaflet i eksplik zot ki zot sipoze fer e bann zofisye lasante letan i pe swiv avek zot, i pe donn zot sa lenformasyon e i osi en lokazyon pour zot demann kestyon e fer le swivi.

Alor sa kontak direk endividyel i enportan e an zeneral i pe marse. I annan serten defi si dimoun pa pe ekout sa bann konsey ki zot pe ganny donnen me nou pou kontinyen ranforsi bann mesaz atraver medya e osi lo en baz endividyel e atraver bann Sant Lasante. Mersi Mr Speaker.

 

MR DEPUTY SPEAKER

Mersi Minis.  Onorab Larue.

 

HON FLORY LARUE

Lefe ki Minis pe servi medya sosyal koman en legzanp, e mon kapab dir ki medya sosyal is the most instant way ki dimoun pe ganny lenformasyon, mon vwar ki Minister Lasante i annan en group lo Facebook me i pa pe servi, i annan de post enn 15 hours ago, enn 18 hours ago e se tou.  Ni lo la napa advise lo ki mannyer dimoun i bezwen proceed savedir zot pa pe servi sa form medya ki dimoun pe servi, e ki ou pe dir ki dimoun i bezwen responsab.  Zot menm zot, zot pa pe servi, zot pe lezot be responsab be mon krwar i bezwen Minister be proactive pou pas lenformasyon avek dimoun rather.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Ok.  Mersi bokou, Mr Deputy Speaker e mersi Onorab.  An term medya sosyal bann pos bann ‘Spots’ eksetera ki kapab ganny fer.  Nou rekonnet en kantite plis i kapab ganny fer, me mon pa konn sa sit spesifik ki ou pe site, me mon konnen en kantite Profesyonnel Lasante in met lenformasyon lo bann rezo sosyal.  Alor i pa ki lenformasyon pa ti la i annan sa kestyon lo, defi avek rezo sosyal se ki lenformasyon i sorti dan tou kote.  E mon krwar en pe an defi se ki dimoun pa verifye bann lenformasyon.  E me nou pran sa pwen ki nou bezwen rod fason pou fer sa bann lenformasyon pas pli vit dan sa bann rezo ki dimoun i servi, me nou demann dimoun osi pou kontribye dan sa partisipasyon atraver poste bann lenformasyon ki korek e kredib. Nou demann bann dimoun alor par egzanp nenport ki letan ki i annan en lenformasyon ki kredib i partaz sa lenformasyon dan en fason ki responsab.  Mersi Mr Speaker.

 

MR DEPUTY SPEAKER

Mersi Minis, Onorab Ramkalawan lo menm size.

 

HON WAVEL RAMKALAWAN

Yes, Mr Speaker mon anvi zis demann, an swivan sa ki Minis fek dir.  Eski Minister Lasante i annan en Public Relations Officer?  E si non eski zot pa krwar ki in ler pour annan en Public Relations Officer ki li i ava son rol zis pour li donn piblik lenformasyon.  Mon apresye ki dokter Gedeon pe fer sa me selman Dokter Gedeon i ansarz Public Health. Konmsi si ti annan en PR i pa ti ava Dokter Gedeon ki toultan ti a bezwen vin donn sa bann lenformasyon me ki i ti ava ongoing e son bann dimoun ti ava pas la.  E that is the way it is done.

 

MR DEPUTY SPEAKER

Mersi Onorab.  Minister.

 

MINSTER JEAN-PAUL ADAM

Mersi Mr Speaker e mersi Onorab, nou annan en Communications Officer ki fer sir ki tou lenformasyon i ganny anvoye dan en fason sistematik avek tou medya.  Mon konsyan pou dir ki rezo sosyal i en keksoz en pti pe pli konplike parfwa pou ou kapab fer sa lenformasyon pase dan en fason ki sistematik.

Me nou annan sa Zofisye Kominikasyon e mon krwar i fer en louvraz remarkab vi ki nou annan zis enn pour en vreman gran Minister.  Me an term Dokter Gedeon li i bezwen prezant serten lenformasyon an term son rol koman Konmisyoner pou Lasante Piblik.  I annan serten lenformasyon ki li i bezwen fer pase regilyerman i mars ansanm avek sa rol lasante piblik. Mon konpran sa ki dimoun pe dir nou bezwen rod tou mwayen pou fer mesaz pase e mon toutafe pe al dan menm direksyon avek zot. Mon demann zot osi pou ed nou e pou met sa bann mesaz devan. Mersi Mr Speaker.

 

MR DEPUTY SPEAKER

Mersi Minis.  Onorab Egbert Aglae.

 

HON EGBERT AGLAE

Mersi Mr Chair.  Bonzour Minis avek ou delegasyon. Minis mon premye kestyon i konsern en pe dan laliny sa medya ki i byen nou pe donn en serten kominikasyon me selman sa ki enportan osi se bann swivi ki zot pe fer sa 200 ekek i ti a byen osi enform piblik ler zot in pas zot letan incubation ki pe arive si ka pe dimini.  Dezyenmman Minis eski ou Minister i ase e ki pe, i annan ase stokaz tretman pou kapab deal avek okenn evantyalite ki kapab lev-e si i monte? Mon trwazyenm kestyon i eski ou Minister pe mazin extend serten servis sirtou avek bann klinik, pou ki bann dimoun ki santi zot pe ganny serten sentonm ki zot pa sir lo la, kapab raporte a nenport keler?  E dernyerman eski polisi ou Minister i permet – vi ki la i annan serten mansyon ki mon’n ganny serten lenformasyon ki kredib, ki i annan serten zofisye dan servis piblik pe met mask pou vin travay ladan, eski i en pratik ki zot pou ankouraze ouswa zot pou kontenir?  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Deputy Speaker, mersi Onorab. Sa peryod kot sa maladi i konmans vin aktiv parey nou’n dir i 1 a 6 zour savedir sa incubation i 1 a 6 zour.  E ankor si nou regard sa ka kot en dimoun ki’n ganny Lapest in ariv Sesel Vandredi e savedir si ou pou pran 6 zour sorti Vandredi i fini Zedi demen. E si ou pou regard bann dimoun alor ki petet i a risk sa peryod ki kot i ti annan lafyev se plito ver Lendi e plito sa risk i otour sa zour ki plito ki ver Vandredi.  Me ase vitman sa peryod incubation risk pou pase e sa ki enportan dan sa peryod se ki nou fer sa swivi avek tou sa bann sa kontak, sa premye laliny kontak e sirtou pou siport sa bann dimoun ki dan premye laliny kontak.  Ankor enn fwa dimoun pa kapab ganny sa maladi, si zot pa’n an kontak avek en dimoun ki’n ganny enfekte e osi en dimoun ki, pa zis enfekte me en dimoun ki pe montre sentonm sa lenfeksyon atraver lafyev ek latou.

Alor sa, e sa incubation period i ase kourt; konpare avek bokou lezot maladi i pas vreman vitman. Si ou pe gard tou bann dimoun lo contact list lo sa premye laliny kontak ki nou pe etabli, zot pe al lo prophylaxis e alor osi zot risk i ankor diminyen ok?  Sa i vin lo sa lot kestyon lo par egzanp dimoun, si nou pe ankouraz dimoun pou met mask larepons i non.  Akoz nou bezwen re-evalye risk, risk ki sorti lo en pasyan, i sorti lo en pasyan.  E si ou napa kontak direk avek sa pasyan de-baz ou risk i diminyen plis ou mwens kontak avek li.  Alor an deor sa premye laliny kontak ki 258 dimoun e sa bann dimoun pe ganny mete lo prophylaxis, alor nou ekspekte ki sa bann dimoun pou byen ganny, pou byen ganny swiv.  Osi lefe ki lo prophylaxis nou pa ekspekte ki zot pou devlop sa maladi.  Alor nou kapab dir ki nesesite par egzanp pou marse dan semen pou met en mask i vreman preski zero.  Akoz nou napa sa kantite ka kot sa pe ganny propoze dan lezer, nou idantifye, lavantaz se nou en pti pei ou kapab idantifye sa bann kontak ki in gannyen dan en fason ki en pe pli sistematik.

An menm tan si en zofisye i anvi met en mask nou pa pou kapab anpes li si i anvi mete napa problenm me pour, parey nou deza dir pour bann lo airport pour bann ki anvi sa servis nou ava kapab ede pour nou gannyen. Me lakle, lakle pour, pour kapab adres sa lepidemi, se son kontrol a la baz savedir letan ou pe debiste li boner.  E sa i atraver bann verifikasyon lo tanperatir sa i lakle pour adres sa maladi e nou zefor i bezwen reste fokalize lo la.  Mask i kapab donn en dimoun en santiman proteksyon ki pa en move keksoz, me priyorite an term pour debiste sa maladi se atraver sa bann verifikasyon tanperatir e sa i kapab ganny fer dan en fason kot sa travayer i minimiz son kontak avek sa pasaze par egzanp.  Akoz nou bann zofisye lasante lo Airport zot ganny formen dan sa laliny.  Alor si sa dimoun napa en tanperatir deza sa risk in vreman diminyen menm si in sorti Madagascar.  E parey nou’n dir osi letan nou pe al pli devan tou bann dimoun ki pe vini sorti Madagascar pou al an izolasyon.

Lot pwen Mr Deputy Speaker ki mon pou profite pou mansyonnen akoz mon pe ganny serten lenformasyon ki i annan lezot lekol pe mazin fermen eksetera, me i enportan ki nou pa reazir an tro.  I annan risk avek sa maladi nou bezwen konsyan sa bann risk, me pour nou konsyan sa bann risk i retourn lo sa dimoun ki ti malad lo komansman e apre pou byen idantifye sa bann dimoun ki ti lo lalis kontak koman premye laliny kontak. sa bann dimoun lo premye laliny kontak zot pa kapab afekte en dimoun zot tan ki zot pa pe montre sentonm.  E tou lendikasyon ziska prezan napa en dimoun ki vreman antre dan sa case definition parey nou pe dir ok?

Alors nou fer sa sirveyans dan en fason sistematik e i enportan pour nou pa zis kree la panique oubyen spekilasyon i enportan pour reste lo bann lenformasyon en bann fe e azir dan en fason sistematik. Mersi, Mr Deputy Speaker, mersi Onorab.

 

MR DEPUTY SPEAKER

Mersi Minis.  Yes Onorab Aglae.

 

HON EGBERT AGLAE

Yes, Minis i annan en parti mon kestyon kot i konsern tretman zot stokaz dan Minister eski zot annan ase tretman, ouswa zot pe mazin procure enn pti plis latizann pour kapab deal avek okenn evantyalite.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Deputy Speaker.  Mersi Onorab.  Annefe wi nou annan larzman stok sa medikaman, i en medikaman ki tou fason nou ti annan stok. Akoz i en antibyotik ki ganny servi dan bokou lezot ka pa zis dan ka Lapest.  Me zisteman letan nou’n konsyan ki nou annan sa defi nou’n fer provizyon osi pou rod bann stok siplemanter kot i neseser. Alor i napa okenn konsern lo sa kote. Mersi Mr Deputy Speaker.

 

MR DEPUTY SPEAKER

Mersi Minis.  Onorab Wavel Woodcock.

 

HON WAVEL WOODCOCK

Mersi Mr Speaker.  Minis par lefe ki i annan bokou touris ki sorti aletranze e zot transfer direk Praslin e osi ki bokou yacht, bato bann peser Praslin i fer larout Sesel/Madagascar parfwa san ki zot en form bann lotorite konsernen. Eski ou Minister pe konsider pran okenn mezir pour al etablir en Sant Izolasyon lo Praslin e fer available prophylaxis lo Praslin an ka ki sa Plague i ariv Praslin/La Digue/Inner Island, sirtou koman en mezir pre-konsyonnel mersi.

 

MR DEPUTY SPEAKER

Mersi Onorab.  Minister.

 

MINISTER JEAN-PAUL ADAM

Mersi Mr Speaker Mersi Onorab.  Bon an term bann pasaze ki sorti aletranze swa par avyon ouswa par bato prosedir i parey pou tou pasaze ki sorti aletranze savedir ki nou fer en screening nou verifye kote zot in vwayaze e dan nouvo prosedir ki nou’n anonse dan sa Travel Advisory; si zot in al Madagascar.  Zot pou ganny mete anba izolasyon. Sa izolasyon i baze lo Sant Formasyon Militer Perseverans, me i annan provizyon osi en lasanm Izolasyon kot Lopital Baie Ste Anne si i neseser si ou bezwen dan enterim.  Me an priyorite tou sa bann dimoun ki dan legzanp ki ou servi sa bann dimoun ti pou ganny idantifye depi Mahe e pou ganny mete direkteman anba Izolasyon. Mersi.

 

MR DEPUTY SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Speaker. Mr Speaker mon ti a kontan demann Minis prenon kont ki bann vol pe kontinyen al Madagascar i annan bann pasaze ki pe transit. E mon konnen ki WHO pa’n rekomann en travel Ban Madagascar zis parey WHO pa ti rekomann en travel ler Ebola ti deklare apre nou ti war ki son response ti limite.

E prenon kont nou vilnerabilite eski i en size ki Minister Lasante pe konsidere an relasyon avek en Travel Ban – an sa ki konsern travel from Madagascar sirtou bann pasaze ki pe transit.  E dezyenmman eski zot satisfe ki dan bann Airport kot bann pasaze pe pas an transit pe sorti Madagascar,  i annan bann tyek ki’n ganny mete asire ki sa bann pasaze  i ganny screen avan ki zot ariv Sesel e non pa les en pasaze ki posibleman kapab kontazye pou en vol pour li vin Sesel?  E mon ti a kontan osi Minis si ou ti kapab klarifye prenan kont nou, nou pou bezwen aksepte ki parfwa nou menm nou Seselwa nou rann nou lavi difisil ki nou pa swiv serten regilasyon ki ganny met an plas, eski son Minister atraver bann lotorite konsernen pe anvizaze met en serten sanksyon oubyen serten fine oubyen serten kontrovansyon kont bann dimoun, propriyeter bato ouswa endividi ouswa nenport ki; ki la ki nou konnen ki i annan sa danze sa risk atrap sa maladi e transport li isi.  Si en dimoun i willing ale, al Madagascar e apre retournen e ganny vwar ki in kontazye ek sa maladi eski zot pe anvizaze prezan vi ki sa dimoun prezan i konnen – pa parey en dimoun ki i pa konnen in ganny sa maladi in retournen, me sa dimoun i konnen ki i pe met son lekor, son fanmir e lezot dimoun a risk.  Eski i annan mezir ki zot pe anvizaze pran lo sa kote.  E prenan kont ki bann bato ki antre en pti pe partou lo bann por enn pti pe partou, eski ou Minister avek ou lotorite konsernen Port Authority e lezot pe anvizaze met serten sanksyon en fine, kont okenn bato ki pa antre e fer en screening mandatwar dan en landrwa determinen pandan letan ki sa, ki si nou pe fer fas avek sa lepidemi.  Mersi Mr Speaker.

 

MR DEPUTY SPEAKER

Mersi Onorab Pillay.  Minis.

 

MINISTER JEAN-PAUL ADAM

Mersi Mr Speaker.  An se ki konsern sa bann konsey ki nou donnen pou bann vwayazer nou pe dir la ki Seselwa pa devret vwayaz Madagascar ditou pour okenn rezon.  Akoz risk ki tre elve e ki si i annan en dimoun ki bezwen ale pour en rezon ofisyel i bezwen pran kontak avek Minister Lasante avan pou vwar si sa vwayaz i vreman merite.  E nou sel petet mon kapab dir nou sel fason ki nou vwar ki en vwayaz Madagascar pou merite se dan konteks lalit kont Lapest.  Si i annan en dimoun ki bezwen ale dan en konteks ofisyel dan sa laliny sa i petet sel sirkonstans ki nou kapab dir i akseptab pour en dimoun al Madagascar.  Si non nou pou dir ki bann dimoun tou Seselwa i bezwen evite al laba.  E an term bann mezir, nou’n met sa mezir kot tou dimoun ki posibleman in pas Madagascar dan dernyen 6 zour pou bezwen al anba obzervasyon letan zot isi, letan zot retourn isi. Oubyen menm si i en touris i sorti dan en lot pei si i pe pas Madagascar letan i pou ariv is ii pou bezwen al anba obzervasyon sa i enkli pour bann pasaze an transit. Nou’n osi enform bann Konpannyen Lavyasyon ki bann opsyon ki zot pe ofer atraver transit ki sa i ganny arete, me nou konpran ki sa bann konpannyen zot letan nou’n enform zot sa zot pe regard sa bann opsyon ki, ki pe ganny ofer ki mannyer sa i ganny redwi.  Lakantite i pa enorm e nou ekspekte ki sa i kontinyen redwir anmezir ki, akoz vol in arete, vol direk. Nou ekspekte ki sa i redwir, an term bann lezot Lakonpannyen Lavyasyon pour lemoman nou pa pe met, nou pa pe anpes zot vwayaz Sesel akoz zot pa pe anmenn pasaze direkteman.

Byensir i annan sa posibilite ki ou ganny enn oubyen de pasaze swa touris oubyen Seselwa ki pe retourn dan pei.  Me avek sa mezir kot tou pasaze pou bezwen pas anba sirveyans pandan 6 zour, nou santi ki sa i kapab adres sa konsern dan en fason sistematik.  An sa ki konsern bann verifikasyon Madagascar li menm li, zot in, apre bann serten difikilte lo komansman an term zesyon sa maladi. Aktyelman zot pe aplik bann protokol par, ki in ganny rekomande par Lorganizasyon Mondyal Lasante.  E la tou pasaze ki kit Madagascar pe ganny en verifikasyon tanperatir ki ganny fer lo tou pasaze ki pe sorti.  Me parey mon’n eksplike Sesel nou annan nou prop verifikasyon pour tou pasaze ki antre dan nou pei, nou pe teste tanperatir.  E bann ki sorti Madagascar pour ganny met an izolasyon parey mon’n eksplike Lakademi Militer Perseverance. An sa ki konsern bann mezir sanksyon bann Lalwa Lasante Piblik i prevwar ki serten sanksyon i kapab ganny pran.  Pandan en premye faz ki en dimoun par egzanp ki pe reziste bann mezir lasante alors nou’n idantifye en pasaze ki’n al Madagascar, ki pa pe anvi al anba lobzervasyon nou travay avek Lapolis pou nou obliz zot pour zot al anba lobzervasyon.  Ziska prezan mon ti kontan dir ki tou dimoun ki dan lalis premye kontak e tou bann lezot dimoun, tou dimoun pe konpran sa problenm e zot pe korpore e zot pe donn sa sipor.  Me Lotorite Lasante Piblik i annan sa pouvwar pou zot fors dimoun pour swiv bann konsiny ki an plas avek korperasyon Lapolis.  E sa ki konsern bann sanksyon definitivman si en dimoun i direkteman kontradir sa ki nou pe donnen koman meyer lapros pou adres sa size, nou pou pran aksyon kont sa bann dimoun. Mersi Mr Speaker

 

MR DEPUTY SPEAKER

Mersi Minis.  Onorab Pillay.

 

HON SEBASTIEN PILLAY

Mersi Mr Speaker.  Mr Speaker Minis pa’n kler, pa’n eklersi lo sa size response ki WHO pe anvizaze ki bann pei i fer e si Sesel i konfortab avek bann mezir screening ki i annan dan bann lezot pei larezyon. Tel ki si en pasaze i swa transit par Maurice ouswa bann pei avan i vin isi.  Eski zot satisfe?  E eski Sesel in antre atraver Minister Zafer Etranzer an kominikasyon avek bann pei larezyon. Atraver par egzanp Komisyon Losean Endyen pour vwar ki mannyer dan larezyon zot in etablir en sistenm kot nou konsider vilnerabilite sak pei an relasyon ek sa maladi akoz pa tou ki kapab response parey oubyen pa tou ki pou vilnerab parey.  E si posib dir nou si parmi sa bann sanksyon ki zot pe anvizaze met an plas. Enn ladan i kapab menm impound bato par egzanp si i annan bann dimoun ki refize swiv lord ki in ganny donnen e zot ale e al Madagascar.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker, mersi Onorab.  An se ki konsern WHO Lorganizasyon Mondyal pour Lasante i annan en kordinasyon rezyonal sak pei i annan en reprezantan WHO dan son pei e bann gidans pe ganny donnen dan sak pei pour swiv sa bann diferan prosedir.

Bon en pwen ki ou’n fer resorti ki tre valab Sesel an etan ptipti nou dan en fason tre vilnerab apre nou annan kontrent resours imen.  E se pour sa rezon ki nou’n aret avyon e se pour sa nou sel pei ki’n fer li e nou’n eksplik sa avek Lorganizasyon Mondyal Lasante zot in fer serten reprezantasyon an ver nou pou dir ki selon zot meyer pratik, i pa neseser pour aret vol.  Me nou’n eksplike ki dan konteks Sesel, swivi ki bezwen ganny fer avek tou bann dimoun ki an kontak i pou tre difisil pou nou kapab fer sa si i annan en vol direk kot i annan en kantite pasaze ki vini tou le semenn letan nou’n war evolisyon sa maladi in kontinyen ogmante.  Alor nou’n pran sa desizyon dan premye semenn apre ki WHO ti fer lanons.  E alor mon kapab dir i annan en konpreansyon ki Sesel i bezwen azir dan en fason en pti pe pli diferan avek serten lezot pei. Nou annan osi sa rezo ki apel SegaNet ki met bann pei dan Losean Endyen dan bann Komisyon Losean Endyen an kontak lo bann baz sirveyans bann maladi tel ki Lapest e tou bann pei pe donn lenformasyon kanmarad.

E atraver sa bann lenformasyon ou kapab pran en serten desizyon.  Mon krwar i ase kler ki Madagascar o depar pa ti bouz ase vit ki ti merite.  Me enn fwa ki sa in ganny idantifye koman en problenm, en mobilizasyon in ganny fer e i annan bann travayer WHO ki’n antre Madagascar e ki zot pe ede avek sa repons e nou konpran ki prosedir i bokou pli efikas ki avan.  E osi ki sa bann lezot pei pe fer, i enportan pour note ki sak pei i annan sa lespas pour li fer sa ki i santi i neseser.  An se ki konsern bann sanksyon anba Lasante Piblik i annan diferan mezir ki i kapab ganny pran enkli lanmann.  An term sezi, sezi bato oubyen lezot byen sa osi i kapab ganny fer me byensir i bezwen ganny fer atraver en case ki dan lakour. Me sa i form parti bann mezir ki nou kapab pran ki si i annan dimoun ki reziste bann mezir ki Lotorite Lasante Piblik pe met an plas.  Ziska prezan nou santi ki dimoun i konsyan sa gravite sa problenm e lenportans pou travay ansanm avek Lotorite Lasante Piblik. Mersi Mr Deputy Speaker.

 

MR DEPUTY SPEAKER

Mersi Minis.  Onorab De Commarmond.

 

HON CHARLES DE COMMARMOND

Mr Speaker ou’n tir mon non pour kestyon orizinal, akoz mon kestyon i relye avek sa.  Zis pour Minis eklersi ek nou Lasanble si par egzanp Madagascar lefe ki sa in deklare laba si i annan okenn lekol ki’n fermen ki mannyer zot pe pran sa sityasyon laba e an menm tan ler en dimoun i konnen li, i an kontak fizik direk avek en dimoun ki’n swa ganny afekte swa ki a risk; ki konsey ki Minister i dir avek nou piblik la si ou konnen ou’n an kontak fizik direk ki prezan ou osi ou a risk ki i fer sa dimoun konmsi akoz i annan ki i per i pa konnen ki pou fer i le kasyet ensidswit ki ou fer.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker e mersi Onorab.  An sa ki konsern bann meeting piblik Madagascar tou in ganny Ban.  Sa i enkli osi bann lekol kot tou in fermen me i enportan pou met li dan konteks ki Madagascar zot dan en lepidemi kot kantite case pe ogmante toulezour.  E i pa ankor ariv sa faz ki lakantite case pe diminyen.  E vi ki son mode transmisyon i atraver dimoun savedir nou pe koz Lapest Pneumonic, Madagascar i annan osi sa lot Lapest, me sa lepidemi aktyel se Lapest Pneumonic e pa Lapest Bubonic.  E alor lefet ki sa i ganny transmit atraver dimoun zot in redwir tou bann manifestasyon.

Sesel aktyelman nou annan en ka.  E sa i an izolasyon e in ganny izole tre vitman apre ki in idantifye okenn sentonm.  Nou bezwen adres sa groupman dimoun ki premye laliny kontak sa 258 dimoun ki dan diferan fason in an kontak avek li.  Me sa bann dimoun pe ganny swiv premyerman atraver antibyotik sa en keksoz ki nou kapab fer pa tou pei ki kapab fer.  Nou kapab swiv tou sa bann dimoun met zot lo sa bann prophylaxis E asire zot ganny sa tretman.  E si zot lo sa tretman probabilite zot ganny sa maladi i bokou redwi menm si petet zot ti annan en serten exposure oubyen risk alor lakle se swiv sa bann dimoun de pre.  Koman en prekosyon nou demann sa bann dimoun pou reste se zot e pa sirkile.  Me sa bann rekomandasyon i aplik pou sa bann dimoun.  Alor dan en fason zeneral mon krwar diferan dimoun in dir ozordi petet i ler pour nou redwir en pti pe bann manifestasyon piblik, sa sertennman vi ki nou annan en bon nonm dimoun ki, nou 258 dimoun ki lo lalis kontak ki bezwen evit bann manifestasyon piblik.  Dan en fason pli zeneral nou kapab osi redwir bann manifestasyon piblik.  Selman i pa neseser pour nou Ban sa bann manifestasyon a sa staz.  I enportan pour nou pa reazir an tro pour nou konpran sa risk.

Apre sa i lie avek ou 2enm kestyon kot si en dimoun i santi li ki i a risk; savedir ki’n annan kontak alor premyerman mon krwar la gran mazorite e probableman tou dimoun ki dan premye laliny kontak nou ase konfyan pou dir nou kapab kontakte zot la e bokou in deza ganny mete lo prophylaxis depi yer larestan pe gannyen ozordi. A lafen ozordi tou dimoun ki dan sa premye laliny kontak pour lo prophylaxis.   Savedir sa bann dimoun zot risk i vreman redwi.  Prezan sa kestyon ki ou’n demande en pti pe si en lot dimoun pa’n ganny idantifye li ki i fer?  Premye mesaz pa kasyet akoz sa dernyen keksoz pou fer akoz sa maladi i toutafe fasil pou kapab tret li selman fodre ou kapab idantifye sa risk.  Alor premye keksoz ki sa dimoun i fer si i deza an kontak avek en Zofisye Lasante Piblik zot pou gid li savedir si i ti dan laliny kontak. Si i pa dan laliny kontak i vin devan kot en sant lasante oubyen kot Casualty e nou pou refer li avek sa bann dokter ki pouf e en assessment lo son ka baze lo sa ki i dir.  Akoz i annan dimoun ki i krwar zot a risk me letan vreman ou kestyonn zot, zot pa risk.

Nou’n ganny plizyer ka dimoun ki’n vin casualty yer swar bann dimoun ki annefe ti annan kontak avek delegasyon Basketball e zot in fini sorti dan sa peryod ki zot a risk.  Alor i en risk zero, i en risk zero pou donn sa koman en legzanp.  I annan, sel fason ki ou kapab idantifye en risk se si ou’n annan en kontak direk avek sa dimoun ki’n ganny afekte. Si ou’n annan kontak avek en dimoun ki dan laliny kontak, savedir en dimoun ki’n kontakte li me ki pa annan okenn sentonm ou risk i vreman, vreman minim.  Me si ou annan okenn konsern oubyen si ou annan okenn sentonm ou kapab, meyer keksoz se vin devan kot en Sant Lasante pou kapab ganny konsey neseser.  Mersi Mr Deputy Speaker.

 

MR DEPUTY SPEAKER

Mersi Minis, mon pou pran kestyon de Manm ki aparaman zot kestyon i rely eek sa ki Minis pe reponn la. Onorab Jude Valmont apre Onorab Wilbert Herminie.  Onorab Valmont.

 

HON JUDE VALMONT

Bonzour e mersi Mr Speaker, bonzour Minis e ou delegasyon, Mr Speaker premye mon ti a voudre tir mon non pour lezot kestyon ki vini akoz mon pou demann sa enn la selman i en komanter.  Minis mwan mon ti a voudre konnen si zot okouran i annan 3 Malagasy ki i an transit airport depi yer swar. Akoz mon’n ganny en mesaz la avek bann staff airport e zot pe dir ek mwan ki zot osi zot egalman konsernen. Zot aktyelman dan Departure Lounge depi yer swar, eski ou kapab garanti sa bann staff ki involve laba ki pe travay laba aktyelman ki sa bann dimoun in ganny teste pe ganny monitor e ki napa okenn siny sa plague.  Mersi.

 

MR DEPUTY SPEAKER

Ok.  Onorab Herminie.

 

HON WILBERT HERMINIE

Mersi Mr Speaker.  Minis in dir koumsa ki zot pe servi prophylaxis pour tret sa maladi. Mon zis pe gete pour en dimoun ki alerzik avek sa latizann eski i annan tretman alternativ ki zot pe servi pou tret sa maladi?

 

MR DEPUTY SPEAKER

Mersi Onorab, Minis.

 

MINISTER JEAN-PAUL ADAM

Mersi Mr Deputy Speaker.  Mersi Onorab.  Pour sa bann dimoun nasyonalite Malagasy ki lo Airport zot lo an transit parey tou pasaze zot in ganny verifye a larive baze lo verifikasyon tanperatir avek zot listwar kot zot sorti kot zot pe ale.  E zot tanperatir aktyelman i stab i pa en risk imedya baze lo la.  Nou konpran ki dimoun i konsernen; nou konpran tousala.  Me i enportan ankor mon pour dir nou al lo baz ki mannyer sa maladi transmet enn. Si sa dimoun napa sentonm risk transmisyon i preski zero e dan sa nou swiv sa bann protokol nou fer sir ki tou dimoun ki antre dan nou pei i fer verifikasyon tanperatir e ganny swivi par bann zofisye lasante piblik.

An sa ki konsern sa kestyon lo antibyotik annefe si en dimoun i alerzik avek enn nou annan 5 diferan varyete sa menm antibyotik ki kapab ganny donnen an ka ki zot alerzik avek enn, alor nou annan tou konfyans ki nou kapab annan en tretman ki konvenab pour tou dimoun ki kapab ganny afekte.  Mersi Mr Deputy Speaker.

 

MR DEPUTY SPEAKER

Mersi le de Onorab i satisfe ok.  Onorab Henrie.

 

HON GERVAIS HENRIE

Mersi Mr Speaker.  Mr Speaker mon ti ava kontan ki Minis avek son delegasyon zot pran note ki i annan en semenn depi ki zot ti isi dernyen fwa kot nou ti adres the very subject e i ti pe annan en pe konsern ver Lasanble.  Ki konmsi Lotorite Lasante i mont en pe lentelizans vizavi sa cancel vol Air Seychelles deswit e ti annan en pe retisan nou bezwen dir e ki apre en zour ouswa de zour in vini.

Prezan par egzanp zot in ensiste avek sa zafer obzervasyon a passive ki ozordi nou bezwen admet in fail, kot en endividi in pas dan sistenm e en ka in ganny konfirmen.  Ler sa i arive Mr Speaker, mon kestyon i fer nou bezwen admet i fer ki piblik laba deor i kestyonnen be eski Minister Lasante vreman i on top of sa sityasyon?  Mon pe demann akoz par egzanp letan nou pe koz avek bann dimoun bokou nou bann MNA nou pou vwar pou dir lo Airport in annan en laps dan bann pou koz ek bann travayer pou dir ki zot pou fer. Lo Por menm zafer; bann travayer dan Por i santi ki i annan tro bokou aksan lo Airport me pa telman lo Por. Nou vwar pou dir i annan en labsans kanpanny ledikasyon piblik, par egzanp pour edik dimoun lo ki mannyer sa maladi i transmet pour zot pa panik.  Nou pa vwar dan medya, Minister Lasante i bezwen pran kont pou dir son mesaz li ki bezwen kontrole.  Li ki bezwen kontrol son mesaz e servi tou mwayen posib teknolozi ozordi in evolye e sirtou social media tou Seselwa most of the time pe servi so zot bezwen servi tou sa bann mwayen posib. E ozordi nou annan Sesel sa ki nou apel en Disease Surveillance Response Unit.

Nou, nou pa ankor war li dan sa equation zot ki sipoze, mon pe prezimen mwan nou pa war, nou vwar Dokter Gedeon me lezot nou pa tande.  So, ki mon anvi Minis i reasir nou, kekfwa mwan mon bann dernyen kestyon se pou reasir piblik ki zot on top of the situation ki i ava kekfwa en focal point – en limero spesifik ki si zot santi zot konsernen zot kapab call. Ki sa dimoun prezan i kapab santi li relax akoz Minister i on top of the situation. Sa i mon premye kestyon pour ki Minis i donn nou sa lasirans.

E apre dezyenmman la letan pe koze Mr Speaker, nou aprann pou dir lekol Anse Etoile zot in call, zot bann teachers in call paran zot in dir vin sers zot zanfan.  Konmsi ou’n ganny en legzanp en lekol leta in fer sa, La Rosiere kot en sa zanfan in al lekol Lendi Mardi, be selman laba napa aksyon ki’n ganny pran; konmsi i annan en mix message ki pe ganny anvoye dan bann Lekol Leta.  E lefet ki Minister i form parti Minister Ledikasyon i kapab pe koz ek lasante. Konmsi pour nou pran en desizyon kot i annan en keksoz konsistan e non pa mix messages nou tann pou dir serten paran par egzanp dan politeknik yer swar bann bokou zanfan ti pe dir pou fer petisyon pou zot pa al lekol.  So, mon anvi ki mon dezyenm kestyon ou reasir nou ankor ki mannyer Minister Ledikasyon akoz mon kontinyen dir ledikasyon, Lasante i ava koz avek bann Departman Gouvernman dan servis piblik an korpore asir zot pou dir servis i ava kontinyen napa nesesite pou zot panik. Pour zot pran sarz sa sityasyon a men, e reasir nou popilasyon pou dir ki napa nesesite pour nou panik.  Mersi bokou Mr Speaker.

 

MR DEPUTY SPEAKER

Mersi Onorab.  Minister.

 

MINISTER JEAN-PAUL ADAM

Mersi bokou Mr Deputy Speaker, mersi Onorab.  Mon konpran bann konsern ki pe ganny met devan par Onorab, me mon ti a kontan dir, akoz ou’n dir ki obzervasyon pasiv in fail.  Mwan mon ti pou dir ou le kontrer mon pou dir ou obzervasyon passive in marse. Akoz nou annan kontak avek sa dimoun konstan, savedir nou’n konnen nou’n kapab swiv sa dimoun.  Problenm ki vre se ki sa dimoun pa’n pran son responsabilite li menm. E la nou pe koz en kestyon lo ki nivo irzans ou pe ale an term lasante piblik akoz a sa moman. A sa moman avan sa ka ki nou annan la. Avan sa nou ti napa okenn ka Sesel.  Sel ka ki nou ti annan ti konsern en Seselwa ki pa ti dan nou pei, ki ti mor Madagascar menm. E apre nou tip e deal avek bann ka bann dimoun ki’n vizit Madagascar. E alor e ki serten ant zot ki ti annan kontak avek sa dimoun ki ti’n mor e nou’n swiv bann protokol izolasyon pour sa bann dimoun.  E pour tou bann lezot dimoun, bann dimoun ki’n posibleman al Madagascar lakle sete pour sa bann dimoun swiv bann konsiny ki nou’n met devan zot.

Malerezman sa dimoun e mon konnen pour dir i regret sa ki in fer.  Lenportans la se donn sa sipor pour kapab adres sa problenm pour anmenn aksyon neseser.  E i pa’n swiv sa bann konsiny. Rezilta nou annan en ka isi. Alor letan ou annan en ka isi nou pas lo en lot nivo.

Akoz parey mon’n deza eksplike tou bann dimoun ki pour arive pli tar pour ganny mete anba izolasyon dan Sant Lantrennman Militer Perseverance.  Savedir tou bann nouvo dimoun ki’n annan en lyen avek Madagascar oubyen ki’n vizit Madagascar resaman pour ganny met anba sa obzervasyon santralize e alor ou pour napa sa bann problenm, sa bann risk ki ou’n eksprimen.  An term vol e si nou ti’n devret cancel vol pli boner.  Ankor enn fwa mon pour dir ki rekomandasyon pa tou dimoun, se pa bezwen cancel bann vol.  E letan nou, nou ti vin dan Lasanble, nou ti dir ki nou pe verifye sityasyon akoz ti tre boner dan sa lepidemi.  E nou ti dir nou pour regarde ki mannyer nou war sityasyon pe evolye.  E nou pour pran en desizyon prosennman e se sa ki nou’n fer.  Nou’n regarde en zour nou’n vwar pour dir lakantite ka in ogmante. Nou’n regard dezyenm zour lakantite in ogmant ankor.  E nou’n cancel vol. nou’n pran sa desizyon pour nou cancel sa vol.

E si nou regard sa ka spesifik. Menm si nou ti’n cancel sa vol pli boner, sa msye i en Seselwa li.  Savedir i ti pour bezwen tourn isi.  E keksoz mon kontan se i pa’n tourn dan en serkey.  In tournen, e nou’n kapab donn li sa tretman ki apropriye.  Nou’n kapab fer sir ki i ganny akse avek sa tretman.  I vin en risk pour nou tou ki nou bezwen annan en zesyon lo sa risk.  Me lefet se ki tou fason sa msye ti pour bezwen tournen a en serten moman. E alor nou ti pour bezwen adres sa risk, menm si ou ti napa sa flight, ou ti pour bezwen tourn par en lot fason, i ti pour tournen. E an se ki konsern bann, alors zis pour revin en pti pe lo sa kestyon obzervasyon passive, protokol in ganny swiv, e in ganny swiv dan en fason sistematik, kontak in ganny fer, e a tou moman bann dimoun ki ti napa sentonm, si bann dimoun ti annan sentonm nou’n kapab adrese si dimoun napa sentonm zot in kontinyen ganny swiv.  E a sa moman kot li in annan sentonm, nou’n kapab admit li dan en fason vreman vitman e alor redwir lenpak ki kapab annan.

Mon oule redir ki mon konpran konsern ki dimoun i annan. Ok. Nou tou nou konpran, nou tou konpran sa konsern ki dimoun i santi zot a risk.  Me lenportans se evalye sa risk lye avek metod ki sa maladi i propaze.  E nou kapab war ki la gran mazorite nou popilasyon i pa a en gran risk akoz zot kontak in ganny diminyen.  E i vreman e sa msye i osi an izolasyon la pe ganny sa meyer tretman ki posib.

E la mon profite pour mwan dir osi akoz mon’n fek aprann pour dir Lekol Independent mon krwar pe mazin fermen osi, in fini fermen.  E sa mon, byensir i swa sa lenstitisyon pour li ferm son laport si i santi sa i neseser.  Me a sa staz vi ki napa en kontak avek en dimoun enfekte, i pa neseser pour nou al lo sa bann nivo.  I enportan pour nou konpran sa mesaz dan en fason sistematik ki i pa neseser pour nou al lo sa lelan, san ki nou annan en risk ki spesifik ki lye avek en dimoun endividyel.  I enportan pour nou konpran sa pour nou evite fer bann desizyon ki baze lo lenformasyon ki kredib e korek.

An se ki konsern kanpanny ledikasyon piblik. Mon krwar ki definitivman Minister Lasante nou annan lespas pour nou fer plis.  E nou konsyan pour dir nou bezwen rod diferan fason rezo sosyal nou toutafe dakor.  Me an term, e i annan, fodre nou pa dir osi nanryen pa’n ganny fer.  I annan keksoz ki’n ganny fer, selman nou konsyan pour dir la fason ki dimoun i konsonm medya ozordi in sanz en kantite.  E se vre ki resours imen ki nou annan i pa totalman alaoter pour nou kapab adres tou bann defi dan sa konsern. Me nou pe kontinyen ranforsi nou kapasite.  Fodre osi nou note ki dan sa sityasyon kot nou annan en ka i nivo, e depi yer.  E annefe konfirmasyon ti depi yer midi.  Nou pa ankor ganny 24 erdtan.  E mon krwar si ou regard dan sa sirkonstans, lavites ki nou’n kapab bouze, nou’n kapab met lenformasyon deor i kantmenm en keksoz ki pozitif.  E prezan nou tou nou bezwen vin ansanm pour fer sir ki sa lenformasyon korek i pase e nou pran sa pwen ki nou pour ranforsi lenformasyon atraver bann diferan, bann diferan forum tel ki rezo sosyal.

An se ki konsern DSRU, annefe se DSRU ki fer bann kontak, bann kontak tracing.  Se zot masin ki pe fer marse tou nou progranm.  Zot pa isi avek nou akoz zot pe travay.  Alor mon krwar sa i evidan ki letan nou – annefe mon ti’n demann dokter ki ansarz pour vini ozordi.  Me mon’n toutafe konpran li letan in bezwen al fer bann kordinasyon lo teren.  E al vizit bann diferan landrwa. E mon krwar sa i toutafe normal. E nou konpran osi nesesite pour dimoun kapab ganny kontakte en dimoun pour ganny lenformasyon. En kantite dimoun in deza kontakte DSRU. Se zot ki pwen kontak fokal pour sa bann kestyon.  E zot pe donn o tan lenformasyon ki posib. E sak Sant Lasante osi pe donn lenformasyon.  Mersi Mr Deputy Speaker.

 

MR DEPUTY SPEAKER

Mersi Minis.  Petet zis pour reitre en pti pe pwen ki Minis in fer sorti. Dokter Jastin Bibi mon krwar ki Minis pe fer referans avek.  I ti sipoze, wi i ti sipoze akonpanny delegasyon. Me pour sa rezon ki Minis in spesifye i pa’n vini.  Onorab Henrie.

 

HON GERVAIS HENRIE

Mr Speaker mon apresye larepons Minis.  Selman a mon avi letan nou annan en sistenm obzervasyon pasiv, an plas ki en dimoun i pas atraver sa lasenn e i end up annan kontak avek 258 endividi, pour mwan mon war pour dir nou annan en mankman.  E so kekfwa mon ti ava osi sizere avek Minis ki letan fason zot kapab kontakte popilasyon – konmela bokou Lakonpannyen i servi SMS, zot pey avek Cable, Airtel pour anvoy en 1 SMS, tou dimoun i gannyen.  Ou annan Intelvision ou kapab anvoy lanons lo la pour, e menm lo Facebook ou pey en sponsored add sa tou dimoun pour kapab gannyen, alor konsider sa dan zot bann metod ledikasyon piblik.  E petet letan sa zafer in poze.  Petet ti ava bon ki Minister i fer en internal inquiry pour regarde ki mannyer sa sityasyon nou’n deal avek.  Kwa ki’n marse, kwa ki pa’n marse parski nou’n vwar, nou’n annan leptospiroz i kontinyen Sesel, Dengue in vini, la nou annan sa plague ki mon swete i pa ariv plis ki en ka. Konmsi ki pour nou kapab ankor enn fwa nou on top of the situation ki sa sirtou sa unit DSRU i annan lanmen lo sa bann sityasyon? Akoz sirtou nou en pti pei avek bon repitasyon touristik.  Mersi bokou.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker e mersi Onorab.  I, byensir letan ou regard an aryer ou pour dir par egzanp passive surveillance pa ti ase akoz sa dimoun pa’n swiv bann konsiny.  Me labaz passive surveillance, se pour dir ki ou annan korperasyon piblik.  E se bann prensip dan lasante piblik kot ou pe, ou travay dan en fason kot ou pe travay avek piblik. Ou annan serten pouvwar anba Public Health Act me ou servi sa pouvwar letan ou bezwen servi sa pouvwar. Savedir dan premye faz letan ou’n donn en konsey spesifik avek en dimoun.  Ou ekspekte ki sa bann konsiny i ganny swiv. Parey nou’n vwar i pa’n ganny swiv dan sa ka spesifik.  I pa vedir passive surveillance pa’n marse.  Akoz passive surveillance in marse pour tou bann lezot dimoun ki’n sorti Madagascar.  E passive surveillance in ganny servi dan preski tou pei ki annan sa bann kalite lepidemi – dan en fason sistematik akoz i osi enkli kestyon resours imen; i en kestyon la fason ki ou regard evolisyon sa maladi.  Letan ou annan en ka prezan ki’n arive ou sirkonstans i sanze.  Ou bezwen al lo en lot metodolozi ki pli avanse.

Se sa ki mon’n deza eksplik Lasanble.  Me pour ou deswit al dan sa senaryo ki nou’n koz lo la.  Sa senaryo kot tou dimoun i al anba izolasyon deswit. I pa baze lo analiz e rekomandasyon.  Me i en pratik letan ou pour adres sa bann kalite maladi.  Sanson en pti pei parey Sesel, ozordi i Lapest.  Me ou pour vwar ou lekor toultan ou pe sey adres sa avek bann, avek bann mezir ki vreman mon kapab dir en pti tro lour.  E an se ki konsern bann pwen kontak e lafason ki mesaz i kapab ganny pase.  Nou dakor nou ava adres bann diferan metodolozi ki nou kapab met an avans ki kapab adres sa.  Mersi Mr Deputy Speaker.

 

MR DEPUTY SPEAKER

Mersi Minis.  Onorab Chantal Ghislain.

 

HON CHANTAL GHISLAIN

Mersi Mr Deputy Speaker.  Mr Deputy Speaker mwan mon kestyon i an se ki konsern sa msye, sa msye ki malad.  Mon ti a voudre konnen ki mannyer i ete, si i pe rekipere. Si i ok.  Apre ek son zanfan osi.

Apre osi Mr Speaker, si ou kapab Minis i kapab eksplike si i fasil osi pour trete Lapest and nou osi annan sa Yellow Card an se ki konsern kot Minister Lasante, e lo la dan sa Yellow Card i annan pour yellow fever avek detrwa maladi e Kolera i enn parmi osi.  E nou konnen osi pour dir Madagascar i en landrwa kot i annan en kantite bann ka Kolera. E ziskan konmela nou pa pe ganny bann tretman avan nou al ganny bann latizann avan nou al Madagascar an se ki konsern prevansyon kont Kolera. How effective is sa Yellow Card, Yellow Fever Card ki tou sa bann keksoz lo la, ki lo sa bann latizann ki lo la ki bann dimoun i gannyen avan i al dan sa bann pei. Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Ok. Mersi Mr Speaker e mersi Onorab.  An se ki konsern sa pasyan li menm li son kondisyon i tre pozitif, in amelyore, i stab.  Lafyev in desann annefe i ti napa lafyev dernyen verifikasyon ki nou’n fer. E i pe swiv sa tretman dan en fason sistematik. Alor lakle se pour idantifye dimoun ki posibleman ki malad boner. Izol zot, e donn zot sa tretman neseser.  Alor nou annan konfyans ki i pour amelyore baze lo deza sa amelyorasyon ki nou’n vwar.  E menm zafer pour son fanmir, son fanmir pa ankor konfirmen si zot annan Lapest, oubyen non.  Me zot pe ganny swivi de pre e zot sityasyon in osi amelyore par rapor letan ki zot ti’n antre dan Lopital.  Alor nou kapab dir avek konfyans pour dir zot rekiperasyon pe al byen.  E nou zefor i vreman, nou anvoy nou mesaz solidarite avek zot. E nou kontiny nou zefor pour asire ki nou kapab tret sa dan en fason, dan en fason ki zot kapab fer en full recovery parey nou dir.

An se ki konsern bann risk, bann lezot maladi tel ki Kolera. Kolera i en maladi ki egziste dan plizyer pei pa zis Madagascar.  E sa risk i enn ki ganny sinyale par Lasante.  Par egzanp an term serten pei. E osi si ou regard par egzanp sit web WHO ou pour osi vwar serten konsiny pour serten pei kot kolera i kapab annan en lepidemi ki lev-e detanzaot. Me an term tretman bann prophylaxis pa marse an relasyon avek Kolera.  Alors sa pa en tretman apropriye.  Me an term, vi ki nou deza annan sa Travel Advisory an se ki konsern Madagascar, nou ekspekte ki dimoun pa pe voyaz laba e alor sa risk vizavi Madagascar nou krwar i diminyen me nou pran note sa pwen konsernan form, sa form zonn ki ou’n eksplike pour ki mannyer nou pli byen sansibiliz dimoun; me mon krwar i mars ansanm avek nou demars pour nou met plis lenformasyon avek piblik.

Mon pour fer tou dimoun mazinen ankor ki sa ka in ganny konfirmen mwens ki 24 erdtan pase.  Alor i annan en kantite travay ki ankour. I annan en kantite keksoz ki pe ganny fer pour nou bouz devan dan en fason ki permet nou adres sa bann problenm.  Zis lot kestyon mon krwar ki nou’n lev-e se bann dimoun avek Lapest si zot ganny sa tretman?  Dan laplipar ka si zot ganny sa tretman a tan zot rekiperasyon i kapab 100 poursan.   Alor tan ki sa i ganny adrese boner, bann posibilite pour fer en rekiperasyon konplet i vreman, vreman o.  E se sa labaz ki nou pe fer, ki nou protokol pe ganny aplike.

Zis en lot pwen ki mon realize mon’n bliye reponn an term kestyon ki Onorab Henrie ti’n demande, an term bann revi ki lasante i kapab fer lo bann pratik sa i en keksoz ki ganny fer sistematikman.  Me i annan diferans ant sa enn ki la, ant Lapest par egzanp avek Dengue ek leptospirosis akoz Leptospiroz i en keksoz ki andemik dan Sesel.  In touzour la.  Dengue i la depi bann lannen 70.  Savedir i annan en long, i en keksoz ki lev-e detanzantan.  E ki nou bezwen adres son bann lenplikasyon.

Nou pe koz en maladi ki pa egziste Sesel e ki nou’n annan en ka ki’n antre dan nou pei e ki mannyer nou redwir sa risk?  Alor i bann diferan protokol. I pa egzakteman menm fason. Selman pwen ki ou’n fer mon krwar ki nou bezwen kontinyelman revwar ki bann keksoz ki’n marse.  Ki bann keksoz ki nou bezwen amelyore. E i en keksoz ki nou fer dan en baz regilye.  Mersi Mr Deputy Speaker.

 

MR DEPUTY SPEAKER

Mersi Minis.  Bon mon ti a kontan sinyal zot ki nou pour termin sesyon avek le 2 Leaders.  I ava demann dernyen kestyon.  E mwan a komans avek Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker letan ki mon felisit Minister Lasante pour tou sa zefor ki zot pe fer pour contain sa sityasyon.  Eski Minis petet i kapab dir nou Lasanble, ki kantite letan i krwar Minister Lasante pour pran pour elimin sa risk altogether – konmsi, konpletman?  Mersi.

 

MR DEPUTY SPEAKER

Mersi Onorab, Minis.

 

MINISTER JEAN-PAUL ADAM

Mersi Mr Speaker e mersi Onorab.  An term risk Lapest zeneralman akoz Madagascar i ase pros avek nou.  E vi ki bann lakantite ka pe kontinyen ogmante, nou ekspekte ki sa i dire pour en pe letan.  Nou pour bezwen lo alert pour en pe letan.  Nou espere pa sitan lontan me tan ki bann ka pa ankor komans diminyen nou kapab konsidere ki risk i reste ase elve vizavi avek Madagascar.

Vizavi nou ka spesifik akoz nou annan en ka spesifik. E avek Lapest ou lye ou risk a sak fwa avek sa kes endividyel ki ou premye ka.  E ou regarde ki bann risk ki ganny propaze sorti dan sa premye ka.  E si ou regard bann mezir ki nou’n pran avek dan sa ka, nou risk pour li propaze i vreman ba akoz bann mezir in ganny pran boner.  Nou’n azir vitman. Sa dimoun in ganny met anba izolasyon.  E annefe demen, Zedi i pou’n fini ariv lo sa moman kot sa moman lenfeksyon.  Sa peryod lenfeksyon i fini.  Savedir risk pour li kapab enfekte lezot dimoun.  E deza napa lafyev, alor risk i vin preski zero pour li kapab enfekte pli tar.

E nou fer swivi dan en fason sistematik avek tou sa bann dimoun ki in annan kontak avek li.  E si tou sa bann dimoun i pran sa bann prophylaxis ankor, risk pour zot ganny sa i vin preski zero akoz zot pour annan sa proteksyon ki lye avek sa prophylaxis. Alor pour nou tir sa risk lye avek sa ka spesifik, nou pe koz lafen sa semenn.  En si nou swiv nou protokol, nou tou nou disiplinen, nou tou nou swiv bann konsey ki Lasante i mete. Nou met sa anba kontrol vitman.  Me sa risk pli larz ki lye avek Madagascar i byensir i depan lo sityasyon ki arive dan Madagascar.  Mersi Mr Speaker.  E mersi Onorab.

 

MR DEPUTY SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker premyerman mon ti a kontan demann Minis direkteman si in antre an kontak avek eTurboNews pour fer zot koriz sa Lartik e sa se Mr Alain St Ange mon krwar ki son korespondan prensipal.  Parski i ti pran R200mil avek lotel St Anne e i ti dir, i ti von dan Lasanble i ti dir sete sa ki ti gannyen. Alors si i ti kapab koriz sa parski i komans son lartik an di-z-an. ‘’Health officials in Seychelles have confirmed that 3 people have tested positive for the bubonic plague.’’ E apre sa pli tar dan pli anba dan son Lartik i mete klerman ki pour dir tou bann lekol in fermen pour 6 zour.  Ki alors se sa bann kalite propagann, bann fo lenformasyon ki mon krwar nou veye, nou bezwen pran ka avek. Parski la i dir egzakteman; ‘’…additionally as a precaution all schools in Seychelles are closed for the next 6 days as it is not yet confirmed that the contact was made with any of the teachers…,’’ bann zafer.  So sa i premye.

Dezyenmman Minis eski ou kapab konfirmen avek nou ki enn bann rezon akoz ki Minister Lasante pa kapab donn lenformasyon lo Facebook lo en baz regilye pour zot update dimoun se parski DICT, e sa i en polisi Gouvernman kot DICT in blok tou bann kominikasyon ki bann, ki kapab sorti from government servers to social media.  E ki a sa moman la kekfwa nou bezwen en keksoz diferan. E wi sa konsern avek bann lezot lekol. I mean par egzanp kot school for the Exceptional Child pe kontinyen call pe dir ki i annan en pe zot bann teachers ki’n al laba.  E alors si i kapab annan en keksoz ki kapab ganny fer.

E finalman Mr Speaker, petet zis avan finalman la ki nou annan sa sityasyon. Eski konmsi Minister Lasante pa santi ki i en bon lokazyon vi ki dimoun i dan en pe en letan alert, en leta lafreyer, konmsi i annan en pe sa sityasyon, pour nou kapab lans en bon kanpanny par egzanp deratizasyon?  Konmsi pour nou profit ladan pour nou lans en kanpanny nasyonal deratizasyon.  Parski la tou dimoun pour enterese pour li vin pran pwazon lera, konmsi nou ava kapab, nou ava kapab met en keksoz serye. E finalman menm Mr Speaker, mon konpran en pe sityasyon Minister Lasante kot Seselwa i panik akoz i en keksoz nouvo.  E letan, menm parey letan HIV ti komanse tou dimoun ti krwar ou pou, ou bezwen veye moustik pour donn nou HIV, napa kalite ki, tou dimoun ti per.

Me avek ledikasyon dimoun in konpran sa.  Pour nou komans sa progranm ledikasyon, e pour fer tou dimoun konnen ki pour dir Lapest, Lapest i enn sa bann maladi ki ou kapab tret li fasilman.  I pa en maladi ki konmsi ou bezwen al anvoy dimoun deor pour trete e en pe parey leptospiroz osi tou si ou ganny li atan i en maladi ki ou kapab tret li fasilman.  Konmsi, e se sa kalite ledikasyon ki mon personnelman mon ti ava kontan war pour ki dimoun, parey ou’n dir o komansman ki sa lespri panik i sorti dan nou pep.  Me an menm tan osi nou pran nou prekosyon.  E keksoz i kapab bouz devan e mwan mon osi tou mon ti ava kontan dir zot kouraz dan sa travay ki zot pe fer. I pa en travay fasil.  Me selman zot annan sipor Lasanble, zot annan sipor lepep Seselwa.  Zis donn nou sa ledikasyon, mon tre nou ki pour dir zot proactive e dan sa fason, nou ava kapab pas dan sa faz la pour le moman, e nou ava kapab retourn nou lavi normal san ki Lapest i kontinyen reste en mo dan nou vokabiler.  Mersi bokou.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Deputy Speaker. E mersi Onorab.  An se ki konsern sa lartik mon krwar nou tou nou a konpran ki nou mwens ki 24 erdtan depi ler nou’n pous dan sa direksyon avek sa pour nou adres sa size.  E nou pa ankor ganny sans repran nou tou bann fo lenformasyon ki’n ganny met deor malerezman.  Se pour sa nou bezwen tou dimoun pour nou adres sa bann size.  E i enportan ki tou fo lenformasyon ki dimoun i apersevwar.  Akoz apre ki nou’n koze la bomaten.  Nou tou nou pli konsyan bann konsern ki i annan.  E alor letan en dimoun i war en lenformasyon ki par egzanp sa lartik ki absoliman i fo. Fodre nou dir i fo, e nou raport li.

Mon krwar ki i en keksoz ki bezwen ganny fer dan en fason ki sistematik. E nou pa ezit-e osi pour servi e mon krwar la osi i bann kestyon osi tou endividyel dan nou sosyete. Annou promouvwar bann lenformasyon ki korek ki nou kapab, nou aksepte ki Minister Lasante i kapab met plis lenformasyon.  E nou pour kontinyen travay dan sa laliny. Mon krwar osi selman i annan en kantite ki’n ganny fer. I annan kantite lenformasyon ki’n ganny mete lo tou bann medya Nasyonal.

E sa in ganny osi donnen dan en fason sistematik e nou adres sa bann kestyon endividyel kot i annan bann fo lenformasyon. E nou dir sa bann dimoun zot menm zot i enportan ki zot koriz sa bann pwen ki fo.  E mon krwar apre ki ou’n lir sa lartik nou tou nou note ozordi pour dir sa bann pwen i fo.  Nou tou nou konnen i fo.  E nou fer li nou devwar pour nou met sa lenformasyon ki korek baze lo larealite.

An se ki konsern sa kestyon lo DICT.  Bon nou pour bezwen demann zot en pti plis spesifik sa Polisi akoz mon pa sir a 100 poursan me mannyer mwan mon konpran li i annan en polisi dan Gouvernman ki redwir akse avek bann rezo sosyal akoz zisteman pran en kantite bandwidth dan Gouvernman e alor sa i en polisi dan en fason zeneral. Bann zofisye kominikasyon pa zis dan tou bann diferan Departman i sipoze annan akse avek rezo sosyal enkli dan lasante. Me mon ti a kontan dir ki nou bezwen fer en revi zeneral dan la fason ki Gouvernman i travay.  E la fason ki Gouvernman i travay an zeneral sa i enkli Lasante, be i enkli lezot Minister, i pa forseman adapte fasilman avek bann prensip ki rezo sosyal i servi.  E alors sa i en keksoz ki Gouvernman i bezwen adrese dan en fason sistematik. E si nou regard osi bann rezo sosyal an zeneral la fason ki lenformasyon i pase se dimoun i partaz lenformasyon.  They share. Dimoun i partaz sa lenformasyon, dimoun i share sa lenformasyon, e zot click e zot i anvoy sa bann lenformasyon.  Alor sa ki nou, nou pour demande osi se nou, nou pour fer en gran zefor lo nou kote pour met plis lenformasyon dan reseaux sociaux, dan bann rezo sosyal.  Me nou bezwen la popilasyon an zeneral pour osi fer bann fo lenformasyon propaze dan en fason pli larz.

An se ki konsern Lekol Eksepsyonnel, me sa i enkli osi pour tou bann lezot lekol.  Nou konpran.  Ozordi akoz i annan en kantite dimoun petet ki pe al kot bann Health Centres.  Nou konpran pour dir i annan dimoun ki pe bezwen esper en pe letan. E nou regret sa.  Me i enportan ki si i annan en gran laliny kot en Sant Lasante, zot kapab sey al kot en lot. I enportan ki zot idantifye zot lekor koman bann dimoun dan laliny kontak. Par egzanp bann dimoun kot Lekol Eksepsyonnel e asire ki zis zot ganny sa tretman.  E nou, nou pour fer sir parey mon’n dir lafen ozordi tou dimoun ki dan lalis kontak pour lo tretman.  E i normal byensir ki dimoun i santi sa lensekirite, sa lenkyetid.  Me mon pour repet ankor si en dimoun napa sentonm, zot risk i vreman minim. Ok?  Savedir napa en rezon pour panik.

Lot keksoz mon pour repete ki Leader Lopozisyon in dir e ki bokou lezot Onorab in dir se ki sa maladi ou kapab tret li fasilman.  Savedir si ou annan okenn konsern.  E ou vin devan, ou al lo tretman ou pour napa konsern.  Ou kapab adres sa e nou fer sir retablisman konplet. E apre ti annan sa sizesyon an term an kanpanny pour adres bann problenm lera. Gouvernman pe regard plizyer eleman konsernan bann keksoz parey.  E nou ava travay, nou ava enform Lasanble lo enn de sa bann stratezi a lavenir.  E gete ki mannyer nou kapab adres sa. Zis pour terminen Mr Deputy Speaker, e Onorab mon oule eksprim mon lapresyasyon avek tou dimoun ki nou’n fer sa deba mon krwar dan en fason ki permet dimoun pli byen konpran sa size.  Mon demande ki apre nou deba la bomaten, nou tou nou pran li responsabilite pour pas bann lenformasyon ki kredib. Mon repet ankor ki sa maladi pa kapab ganny transmet si sa dimoun pa dan en staz kot i annan lafyev, kot i annan latou. Mon repet ankor pour dir sa maladi i kapab ganny trete fasilman atraver bann antibiotic.  Mon pour repet ankor se ki si en dimoun napa en kontak direk avek en dimoun ki enfekte son risk i preski zero.  E alor nou demann dimoun pour pa taye pour pran desizyon baze lo bann lenformasyon ki pa azour, oubyen ki pa kredib.  Osi en kestyon ki’n ganny demande se eski bann landrwa ki sa dimoun in enfekte in ale, eski sa bann landrwa i ok? Eski sa bann landrwa i reprezant en risk si nou pran legzanp Chilli Bar, e lezot landrwa, dan sa bann landrwa i absoliman pa a risk. Napa en risk ki lye avek landrwa. Transmisyon i ganny fer atraver sa bann endividi avek en lot endividi.

E avek sa Mr Deputy Speaker e tou bann Manm Onorab mon ti a remersye sirtou tou bann Travayer Lasante zot lo teren la, zot pe travay dir, zot pe fer bokou zefor e zot pe fer maximum pour donn o tan lenformasyon e nou demann osi tou popilasyon Seselwa pour konpran sityasyon. I en sityasyon en pti pe eksepsyonnel. I vedir ki wi i annan serten presyon lo nou servis. Me nou annan sa mwayen. Nou annan sa kapasite ansanm pour nou kapab adres li, e asire ki Lapest pa propaze dan Sesel e ki i reste izole dan en ka.  Bann mezir neseser ziska prezan i vedir ki nou pe al dan sa direksyon kot nou anpes sa ka al pli lwen ki kot i ete e mon remersye sipor Lasanble pour nou osi fer sa posib. Mersi bokou Mr Deputy Speaker ek tou Onorab.

 

MR DEPUTY SPEAKER

Mersi Minis avek ou delegasyon; Dr Gedeon, Dr Louange, Ms Henderson e Mr Vidot. Mersi pour pas sa demi zournen avek nou pour kapab eklersi en pti bann konsern bann Manm lo sa sityasyon. Mon osi from the Chair Minis, mon oule swet ou avek tou ou bann zofisye kouraz e sikse dan sa travay ki zot pe fer. E lo sa note mon ti a kontan eskiz ou ek ou delegasyon parmi nou.

 

(MINISTER ADAM AND HIS DELEGATION WAS EXCUSED FROM THE HOUSE)

 

MR DEPUTY SPEAKER

Bon, mon ti a kontan zis enform bann Manm ABC ki nou annan meeting 1.15 dan Speaker’s Conference Room.  E mon ti a kontan osi tou envit mon Clerk ek mon Deputy Clerk pour nou rankontre. I annan en SADC ki aparaman depi midi zot in vini, pour nou kapab al rankontre zot, ganny en meeting avek zot. Onorab De Commarmond.

 

HON CHARLES DE COMMARMOND

Zis pour dir Lasanble Mr Speaker ki mon’n retir sa Kestyon Dirzans akoz bann prizonnyen in ganny anmase yer swar.  Mersi.

 

MR DEPUTY SPEAKER

Mersi Onorab De Commarmond.  So avek sa nou ava adjourn e nou ava repran nou travay 2er.

 

(BREAK)

 

MR DEPUTY SPEAKER

Bon apre midi tou Manm Onorab e bon apre midi tou dimoun ki a lekout ki pe kontinyen swiv travay Lasanble Nasyonal.  Premyerman mon ti a kontan prezant en pti leskiz pour sa retar ki nou gannyen sa i bann komitman ki mon Lofis, Lofis Clerk, Deputy Clerk e le 2 Leaders in annan pandan break.  Alor mon prezant mon leskiz pour nou konmans en pti pe tar.  Nou pour al toudswit lo nou L’ordre du Jour lo Order Paper e prosennman lo Order Paper mon annan en Mosyon ki pe ganny move par Onorab Clive Roucou e mon ava call upon Onorab Roucou pour li donn son Mosyon.  Onorab.  Go ahead Onorab.  Ok.

 

HON CLIVE ROUCOU

Mersi Mr Speaker.  Bon apre midi Mr Speaker bon apre midi tou Manm Onorab.  Mr Speaker mon Mosyon i lir koumsa:  Lasanble Nasyonal i rekonnet logmantasyon alarman dan la kantite ka kanser ki pe rikorde dan nou popilasyon e an mezir ki i siport tou zefor ki Minister Lasante i pe fer, nou demande ki plis resours i ganny mete dan deteksyon ek tretman pour sa kondisyon.  Mr Speaker mon a prezant mon Mosyon aprezan pour konmanse Mr Speaker ler mon met sa Mosyon lo latab mon mazin mon rol konman en Manm Lasanble pour tou bann dimoun ki pe soufer avek sa kondisyon.  Spesyalman ler mon mazin mon vwazen kot en manman avek en fiy in mor e in kit deryer 2 pti zanfan zis akoz Kanser.  E mon mazin en lot fiy dan mon vwazinaz tre zenn ki pe viv avek sa kondisyon ozordi la e mon konnen i pa fasil pour li.  Mr Speaker mon osi salye tou bann dimoun dan en fason ou en lot e bann fanmir ki annan en dimoun ki zot pe ede ki pe soufer avek sa kondisyon.  Mr Speaker mon anvi zis donn en pti definisyon bref ki savedir Kanser.  Kanser i sa term ki ganny servi ler bann selil dan nou lekor ki abnormal e zot konmans diviz zot lekor san kontrol e la zot konmans anvair bann selil normal kot zot kas sa fonksyon spesifik ki sa bann selil pe fer e tousala ler sa proses pe ganny fer pe ganny transmet par disan e en sistenm dan nou lekor ki apel nou Lymph System.  Mr Speaker Kanser i kapab afekte tou dimoun an zeneral. Ii pa ni gete si ou mizer si ou ris si ou blan oubyen nwanr si ou zenn oubyen vye; si ou en zonm oubyen en fanm.  Alors Kanser i napa en figir pour personn.  Mr Speaker Kanser i vin avek en kantite konsekans sosyal e ekonomik; par egzanp sa dimoun ki ganny diagnose avek kanser i bezwen fer loperasyon i bezwen al fer tretman aletranze e nou vwar konman en fason income i ganny afekte dan lakour.  Nou vwar ki sa dimoun i bezwen al lo social security.  Nou vwar lavi dan lakour i sanze.  Alors Kanser li menm i vin avek en kantite problenm dan en fason ou en lot.  Mr Speaker Kanser ozordi i en problenm global e Sesel i pa’n ganny eparnye ditou.  Dapre Lorganizasyon Lasante Mondyal lanmor par Kanser i apepre 12.5 poursan lanmor total mondyal.  E sa i anviron 7 milyon dimoun par lannen.  Mr Speaker sa total lanmor par Kanser i plis ki lanmor koze par SIDA, Malarya, TB azout ansanm.  So nou vwar la kantite ki Kanser i touye.  E pour kontinyen Mr Speaker WHO i menm dir ki menm par lannen 2020 ka lanmor par Kanser pour ogmante, ogmante par apepre 8 milyon; savedir i pour tonm apepre 15 milyon by 2020.  E ki pli alarman se logmantasyon lo la kantite ka Kanser pour bann pei ki pe devlope e bann pei ki antour rezyon Lafrik.  Ankor i montre kot Sesel kot Sesel pa pe ganny eparnye dan okenn fason.  Mr Speaker statistik efreyan i kontinyen.  Zis Sesel plis ki san nouvo ka Kanser i ganny diagnose tou-le-z-an e sa i afekte dimoun a tou laz.  Me ler nou get son frekans son frekans in prouve ki dimoun a mwayen laz 30an pe plis ganny afekte e ler nou get sa, sa i nou lafors travayer.  Mr Speaker i alarman akoz ler nou get en popilasyon 94 mil dimoun e 100 nouvo ka kanser tou le an i vreman enkyetan.  Mr Speaker zis 2011 ziska 2015 en total 440 ka Kanser in ganny diagnose parmi zis bann madanm selman.  So dan 4an 440 ka kanser parmi bann madanm.  Avek Kanser matris ki premye swivi par Kanser tete e kanser gro lentesten.  Sa i zis parmi bann madanm.  E pandan menm peryod savedir 2011 ziska 2015 en total 508 ka Kanser in ganny diagnose parmi bann zonm.  Alor i fer en total 948 ka Kanser dan sa peryod 4an.  Alor zis mazinen – zis mazinen pandan 4 an 948 ka Kanser.  Mr Speaker sa bann lanmor par kanser i 2enm apre bann maladi kardyak isi Sesel.  Alors ler nou get sa lanpler ki ozordi Kanser in arive Sesel, i pa en keksoz ki nou devret pe vwar li alalezer.  Mr Speaker parey Mosyon pe demande, nou konman en Lasanble nou bezwen pran sa problenm Kanser o serye e nou bezwen kontinyen ankouraz Minister Lasante pour fer plis ankor, pour nou asire ki tou resours neseser i a dispozisyon bann travayer e Minister as a whole.  Kantite fwa tro bokou kantite fwa tro bokou pasyan i ganny diagnose tro tar.  E mon anvi anvoy en lapel pour Minister Lasante ki nou bezwen asire ki ler nou bann pasyan i al vizit klinik sa Dokter sa Ners ki pe vwar li i fer le neseser pli vit posib.  Dan mon koze avek bann pasyan ki’n soufer avek Kanser sa i enn pli gran problenm; kot zot in al klinik ankor sa Dokter san klinik in ale zis pour transfer zot kot en Spesyalis.  Mr Deputy Speaker pour le moman Minister Lasante pe servi bann diferan tes pour diagnose Kanser.  prensipalman nou annan City Scan, MRI, Mammogram nou fer bann tes ki nou dir bann phsycology test nou fer bann zot fer bann screening test sa nou fer bann screening test dan vant dan matris e avek bann siny avek sentonm sa Dokter sa Spesyalis i konfirm sa diagnosis.  Alors pour le moman i annan bann lekipman e bann prosedir ki an plas.  Me ki mwan ki nou dan Lasanble nou pe demande nou pe demann plis ankor plis pour fer sir ki en pasyan i ganny diagnose pli vit posib e son tes i ganny konfirmen.  Par egzanp nou annan sa Biopsy kot i en prosedir medikal kot en morso sa landrwa spesifik i ganny tire e anvoy analize e la i ganny konfirmen.  So nou anvi ki Lasanble nou met sa lanfaz ki Minister i annan tou sa neseser e tou sa konpetans pour fer sa diagnosis as early as possible.  Mr Speaker an rekonesan tou sa bann mezir an rekonesan tou sa bann mezir mon senserman krwar ki Minister i bezwen pran li en keksoz primordyal, parey nou pran avek HIV/Aids nou met sa kanser osi lo sa nivo.  HIV/Aids sa bann dimoun i pran byen zot tretman nou vwar zot viv en lavi normal pour en kantite letan an konparezon avek kanser moman ki ganny mal diagnose oubyen tretman pa available oubyen loperasyon pa marse oubyen si in fini marse parey nou dir dan term elements term kot in meet exercise nou vwar ki sa dimoun son lavi –  nou vwar ki sa dimoun son lavi i kourt alors mon pe enplor Minister Lasante pour li envestir dan bann nouvo tes par egzanp ler mon lir nou annan en tes ki apel en Anti-Maligning Screening Test sa i en tes ki ganny design pour detekte kanser byen davans.  Mon annan en lot ki apel en Cancer Marker Test i osi ki moman ki ou fer sa bann tes sa dimoun ou kapab diagnose li menm avan, i ganny devlope.  Alors resours osi i bezwen ganny mete lo nivo lokal par egzanp pour fer bann resers – bann resers aprofondi apar ki form transmisyon ki zenetik oubyen dan keksoz ki nou konsonmen i annan bann keksoz aktyel ki mon krwar Minister Lasante fodre met bann resours spesifik.  Par egzanp napa okenn resers ki prouve ki lefe ki delo desalinasyon i annan lo lekor.  Lot mon mazinen menm nou bann tiyo ki ariv kot nou laplipar lakaz nou bann tiyo i kwiv alors mon demande napa en resers ki’n prove ki kantite lefe kwiv i annan dan delo ki ariv dan nou lekor.  Tousala i bann keksoz ki kapab en fakter risk ki kontribye pour Kanser.  Mr Speaker pour kontinyen nou konman endividi, endividi nou osi nou annan nou rol vreman enportan pour zwe – vreman enportan pour zwe pour asire pour asire ki nou zwe en rol pour diminyen oubyen tir nou lekor at risk.  Alors tou dimoun isi Sesel ou bezwen zwe en rol; par egzanp nou bezwen manz en ladyet balanse nou bezwen aret konsonm lalkol avek sigaret an ekse nou bezwen fer legzersis pour bann madanm zot bezwen fer zot egzaminasyon tete zot bezwen kit zot lapwentman zot pap smear oubyen kontinyen avek zot Pap Smear alors pour nou en fwa pour tou tonm lo en konklizyon pour nou diminyen sa kantite ka Kanser isi Sesel.  Mersi Mr Speaker.

 

MR DEPUTY SPEAKER

Mersi Onorab Roucou.  Bon avan nou kontinyen ok mon le zis fer lapel bann Manm poudir nou napa en quorum ok mon annan de Manm ki’n sorti anvi ki zot vwayaz tanto zot pe al fer en pti pe zot preparasyon mon napa quorum la mon annan zis 16 Manm unless ki nou ganny en lot Manm ki antre e nou kapab.  Onorab.  I am in the Chair ok Onorab Basil Hoareau pe antre ok, ok, ok.  Bon okenn Manm ki segonn Mosyon?  Ok Onorab Sebastien Pillay e oule entervenir?  Go ahead Onorab.

 

HON SEBASTIEN PILLAY

Mersi Mr Speaker mon le segonn sa Mosyon e mon ti a kontan dir de pti mo lo sa Mosyon.  Mr Speaker sa Mosyon i en Mosyon ki tre enportan pour mon akoz par lefe ki personnelman mon pas atraver sirkonstans kot mon perdi de paran avek sa maladi.  A premye repriz mon ti perdi mon manman an 2009 I mean an ‘91 pardon e an 2009 mon ti perdi mon papa avek sa maladi.  E i enportan pour mwan fer en tour lorizon lo leksperyans ki mon vwar an ‘91 ziska leksperyans ki mon fer fas avek an 2009 i pa en size fasil pour bann fanmir koz lo la.  A en moman i ti en size sou le tabou kot i pa ti fasil pour dimoun ki ti pe ganny sa maladi menm pour koz lo sa maladi avek lezot dimoun; oubyen manm fanmir ki ti pe eksperyans sa maladi pour koz lo la.  Akoz petet a sa moman koman nou sosyete nou bann kominote ti vwar sa maladi.  Me bokou in sanze bokou in evolye e malgre sa bann sanzman i reste serten defi ki nou bezwen fer fas avek e mon konnen ozordi i annan bokou benevol bokou bann dimoun i volonterman i sey travay pour sey ede.  I annan lasosyasyon Cancer Concern ki fer bokou travay pour sey ede.  Me size Mosyon li menm i koz lo premyerman rekonnet logmantasyon alarman kantite ka Kanser.  E dezyenmman ki nou met tou zefor posib pour siport bann mezir deteksyon ki nou met an plas.  Rezon pour sa i senp Mr Speaker.  Mon krwar si nou regard bann lannen ‘91 depi ‘89 par egzanp onwards lafason ki sa maladi ti pe ganny trete bokou bann profesyonnel ki ankor dan sa domenn lasante e bokou bann dimoun ki’n pas atraver sa leksperyans i rapel ki mannyer ti difisil.  A sa letan osi pour anvoy bann pasyan trete apre ki zot ti ganny dekouver avek sa maladi La Reunion.  Bann tretman sa letan se bann tretman vreman agresiv.  E sa ti annan en lenpak sirtou si par egzanp dan sirkonstans en zanfan ki pe perdi en paran oubyen en fanmir nenport kel ki pe perdi enn zot pros.  E ler nou regard ozordi la fason ki tretman i ganny fer e la fason ki tretman i nobou osi ogmant lifespan sa dimoun, e fer ki sa dimoun i pas plis letan avek son fanmir dan sa bann letan ki i pe pas dan sa maladi; oubyen menm i annan dimoun ki parfwa i sanse ii fer li sirmont sa maladi i fer li tre enportan ki deteksyon i sa moman kle ki kapab permet sa dimoun pour sirmont sa defi.  E personnelman mon koz avek plizyer dimoun ki’n pas dan sa sityasyon e mon konnen i toultan en size difisil pour koz lo la.  Akoz ti annan en moman ler en dimoun i ganny diagnose avek en kanser ti parey en death warrant.  Ti basically i pe dir ou ti pe kont bann zour ki sa dimoun pour viv.  Ozordi keksoz i en pti pe diferan kot i annan bann tretman ki anmennen ki permet bann dimoun pour prolonz son lavi.  Me sa ki esansyel dan tousala se, kwa ki nou kapab fer plis pour nou davantaz met bann mezir prekosyon – premyerman e osi bann mezir deteksyon ki a permet nou dekouver sa maladi a en moman pli apropriye pour nou kapab tret li.  Mr Speaker i pa fasil pour nenport ki dimoun pour koz lo sa size sirtou par lefe ki i annan serten dimoun ki dir ou i annan serten zenetik avek; oubyen i annan dimoun ki koz avek ou lo serten pre depozisyon ki en dimoun i kapab annan si ou’n sorti dan en fanmir kot i annan dimoun parante ki’n soufer avek sa maladi.  E ou menm ou kapab dir, anvi ki napa bann tes ki ganny fer par le pase byen avan sa mon pe koz dan ‘70 bann lannen ‘60 nou pa konnen dan nou history bokou nou kwa ki annan e ki bann kalite kondisyon medikal ki egziste, ki kapab fer nou pre-dispozisyonen pour atrap serten kalite ganny serten kalite kondisyon oubyen serten maladi.  Se pour sa rezon ki i enportan ki ler nou koz lo sa size ozordi, kan ki nou fer li dan en fason pli ouver, kan ki nou kapab fer li dan en fason pli konkret, toultan koz lo ki kalite kondisyon nou kapab anmennen pour ede pour sirmont bann problenm, pour bann defi ki sa i kapab koze.  Akoz fodre nou pa bliye ki son lenpak i pa zis en lenpak lo endividi me i en lenpak psikolozi pour sa fanmir ki bezwen eksperyans sa.  E la mon le fokaliz lo serten eleman par egzanp dan bann lannen presedan mon pe koz ou 20an di si ti napa vreman sa kalite swivi ki ti annan avek bann pasyan.  Ti napa sa kalite swivi kot bann pasyan ki ti ganny konseye, lafanmir bann pasyan ti ganny konseye.  Ti plito en lanfaz ki ti ganny mete lo ki kalite tretman ki pour ganny donnen.  E parey mon dir sa tretman a sa moman ti ase agresiv.  E souvandfwa par egzanp kot nou vwar ti annan serten stigmatizasyon ki ti vin avek kot i annan par egzanp kot serten dimoun ler i pe eksperyans sa maladi i perdi son seve i bezwen met en wig kot menm dan lasosyete ti annan serten fason ki dimoun ti vwar sa.  Ki menm ozordi i egziste ki i apropriye.  E ki mon krwar nou konman lapopilasyon nou bezwen vin pli sansib avek bann keksoz ki afekte nou popilasyon.  E Onorab in tous lo bann statistik.  Sa bann statistik i enportan pour nou, akoz i fer referans avek konpleksite oubyen avek konteks nou pei, e pour ki rezon serten sa bann kanser i annan plis prevalans dan nou pei.  E across tou lezot pei ou pour vwar ki poudir, i annan serten prevalans serten frekans ki vwar serten kanser aparet ki dan serten lezot pei ou pa pour vwar.  E Sesel parfwa nou koz bokou lo lifestyle.  Mon pa ipokrit Mr Speaker mwan osi mon lifestyle i pa neseserman the best lifestyle, me selman mon konnen poudir toultan mon viv avek sa avek sa avek sa nosyon petet dan mon latet, ki posib en zour i pour arive me ou konnen ou bezwen viv ou lavi.  Bokou dimoun in pran sa lapros ou bezwen viv ou lavi.  E ou bezwen fer pli meyer anver ou zanfan fer le meyer anver ou travay ki ou pe fer.  Me se pour sa rezon mon le salye bokou Seselwa ki’n pas atraver sa difikilte me ki kontinyen avek zot lavi ki kontinyen al devan san ki zot les sa maladi kit zot ater pez zot ater ou kit zot deryer.  E mon krwar sa i en keksoz i en evolisyon ki’n arive kot avan nou pa ti kapab vwar sa avan nou ti vwar pli to ki as soon ki sa i arive i annan en antre dan lakok ki sa dimoun ti fer dan plas sey sorti e koz lo la e allow lezot dimoun pour soulaz en pti pe sa burden.  Ozordi par egzanp nou kapab nou kapab fer refleksyon lo sa ki pe arive e avek par egzanp size drog kot i annan fanmir ozordi ki kanmi me i annan enn dan mon fanmir ki dan drog e menm parey ler en dimoun ti ler nou vwar HIV i arive i annan dimoun ti kanmi pour koz lo la.  Me nou vwar poudir sosyete i konmans koz lo sa bann size i konmans ouver sa size en pe plis, konmans ouver deba lo la i permet nou pour rekonmans mazin lo pli meyer lo pli bon fason pour nou tackle sa bann problenm.  E se sa mon krwar lide deryer sa Mosyon.  E se sa ki mon pe siport sa Mosyon.  Be mon bezwen dir Mr Speaker ki i tre, tre enportan i fondalman enportan ki ler nou pe regard along sa continuum ki en dimoun i malad avek sa maladi, nou bezwen regard sistenm sipor ki egziste; pa zis pour sa dimoun e la mon pa pe koz neseserman sipor finansyel, me mon pe koz lo plito lo en sipor, lo en pwennvi konsey, en pwennvi counselling ki tre enportan ki en dimoun i gannyen.  Akoz sa i osi ed li i vin parey en si ou kapab dir sa en mind over matter sort of panse  kot parfwa lespri dimoun i kapab ed li osi overcome serten keksoz.  E mon konn bokou dimoun ki atraver lafors zot panse, lafors zot krwayans in nobou sirmont bokou defi.  E sa i enportan pour nou osi mazin lo la.  E mon krwar se dan sa lespri ki Onorab pe sey anmenn son Mosyon pou pa zis konsider bann lapros medikal ki asosye avek sa bann size, me tou son bann keksoz ki kapab ankadre li ki fer ki konman en pei, nou pran en lapros pli konpreansif pour nou kapab tackle sa size Kanser dan en fason spesifik.  E pour asire ki dan en pwennvi prevansyon nou fer tou sa ki nou kapab fer me osi lo en pwennvi deteksyon, nou annan an plas bann mezir ki a permet nou detekte sa Kanser boner.  E lo en pwennvi post detection nou kapab osi fer bann travay neseser pour asire sa bann dimoun ki once i detekte i annan sa maladi, i a ganny sans swiv sa tretman i a ganny sans follow through sa protokol ki neseser pour li kapab donn li en sans – en sans pour li batay avek sa.  Mon konnen i annan plizyer mezir ki plizyer pei in pran dan sa size.  E mon krwar enn bann keksoz ozordi ki bokou dimoun ki dan domenn Farmastetik par egzanp si ou fer resers lo Internet ou pour vwar, i koz avek ou lo, si en zour en Konpannyen i dekouver ki cure for cancer, se sa en zour sa konpannyen i rich overnight.  E mon krwar se sa osi ki Sesel i bezwen anmennen dan bann Forum enternasyonal pour asire ki sirkonstans spesifik bann pei parey pour nou i pran konsiderasyon ler nou pe regard Kanser dan en fason zeneral.  E sa i enportan nou bezwen demande kwa ki pe fer dan lezot pei osi, pour nou kapab anmenn. anmenn solisyon pour nou pei.  Mon konnen nou pe koz lo sa size ozordi.  I fer 2enm fwa ki nou koz lo en size ki pour fer avek lasante.  Bomaten nou’n koz lo size sa lepidemi e la nou pe koz lo sa size Kanser.  Mon krwar i montre sa i montre sa konsern i montre sa nesesite ki nou kontinyen annan sa deba pour nou lasante, pour nou fer tou posib pour kapab anmenn nou sistenm lasante lo meyer nivo.  E la mon salye mon salye dayer avek en lespri tre for bann travayer par egzanp Unit Oncology, ki pandan letan ki mon papa ti malad ti fer en travay formidab.  Mon’n ganny sans zwenn li atraver maladi ki mon papa ti gannyen.  Mon konnen ki bann staff Minister Lasante zot fer en travay formidab.  Zot okip sa bann dimoun pour zot fer tou posib pour zot kapab ki sa bann dimoun i dan en moman konfor letan ki zot pe swiv zot tretman.  E mon felisit sa devouman ki zot annan.  E mon krwar konman en pei nou bezwen realize ki parey la ozordi nou pe anmas kantite dan nou Travayer Lasante, nou bezwen fer tou zefor pour nou kapab osi valoriz kontribisyon ki zot in fer.  An konklizyon Mr Speaker mon ti a kontan demann nou Lasanble an antye, pour pran sa deba dan en fason ase serye e pour nou rod en fason dan en fason pozitiv bann solisyon ki kapab ed nou, zisteman pour nou achieve sa ki sa Mosyon ti a kontan vwar.  E ki ler nou pe koz lo sa Mosyon, nou osi mazin tou sa bann dimoun ki nou’n pas atraver sa bann sityasyon.  Onorab in nonm enn de legzanp; mwan mon’n koz lo mon sirkonstans personnel.  In annan Mosyon dan Lasanble, dan 5enm Lasanble, kot i annan Onorab osi i annan Manm Lasanble ki’n pas atraver menm sityasyon.  E pour fer konpran poudir pour ou overcome sa size, se fodre ou annan sa lafors pour ou kapab koz lo la, pour kapab sey travay towards en solisyon.  E mwan mon pa’n arete travay pour sey anmenn sa solisyon dan mon fason pour mwan.  I parfwa difisil.  I ankor difisil pour mwan pour relye avek serten size otour Kanser, me mon nobou fer li avek letan e avek sipor lezot dimoun, avek koze avek lezot dimoun.  E mon krwar se sa ki pe sey ed nou avans pli devan, sirtou ler nou pe tackle en size ki serye koumsa.  Avek sa mon remersye ou Mr Deputy Speaker.

 

MR DEPUTY SPEAKER

Mersi Onorab Pillay.  Bon mon pe sinyal zot ankor mon ti eksplike ki Onorab Basil Hoareau pour antre akoz nou zis so… wi nou napa quorum.  Nou Standing Orders pe review me antretan nou bezwen swiv sa ki nou annan e quorum se 17 Manm.  So nou a zis adjourn pour detrwa minit la nou ava atann Onorab Hoareau si i pour antre.  Petet mon ava zis fer sa lanons osi la, i sa rezon ki dan ABC taler nou’n pran desizyon e mon pour anons ankor a lafen lazournen ozordi; ki anvi la kantite Manm ki’n deza deplase e lakantite Manm ki pe deplase tanto e demen pour al lo bann overseas missions, semenn prosenn osi tou nou pour napa Sittings Mardi avek Merkredi okSo nou’n bezwen pran sa desizyon akoz anvi nou pour napa en quorum ok?  Bon i annan en Manm i zis sinyal mon i pe wi i pe al en pti moman dan Ladies Room.  Nou ava kontinyen avek deba lo mon lalis prosennman mon annan Onorab Arrisol.  Onorab.

 

HON SANDY ARRISOL

Mersi Mr Speaker.  Bonn apre midi tou Manm bonn apre midi tou bann ki a lekout Mr Deputy Speaker mon krwar i en Mosyon enteresan ki Onorab Roucou in anmennen dan son kapasite konman Manm elekte pour distrik Plaisance e osi konman en profesyonnel lasante.  Letan in konmanse in fer resorti ki i mazin bann dimoun Plaisance ki li in mansyonnen bann dimoun ki li i konnen ki’n swa in kit nou oubyen zot pe viv avek sa maladi.  E mon rapel letan nou ti pe vizit de fanmir Plaisance nou de Onorab Roucou se pli zou mwen sa topik ki bann dimoun i koz avek ou ozordi – se lasante.  E Kanser i enn bann.  E mon krwar Onorab Roucou alor in profite i anmenn en tel Mosyon pour ki i a kapab pas serten lenformasyon avek zabitan dan son distrik e nou osi nou tou ki la nou a kapab fer parey e an menm tan ganny serten leson oubyen ganny serten keksoz ki letan nou tou nou ava koze nou ava partaze.  Mr Speaker mon ti a kontan konmanse par dir poudir dan tou distrik ozordi, enkli dan pei, nou annan dimoun ki nou konnen swa fanmir swa zanmi swa vwazen ki pe viv avek Kanser swa zot in kit nou atraver Kanser.  E dan mon distrik St Louis la pour le moman mon annan en kantite dimoun, me selman mon annan bann mazorite bann madanm i enportan pour mon dir ki mazorite bann madanm konpare avek en msye ki ti reste St Louis Basen e ozordi letan nou pe koze mon annan en madanm ki ti Lopital ki ti ganny discharge e ti pe reste avek son fiy parske i osi in ganny dir poudir i ganny Kanser.  E letan nou fanmir nou manm nou fanmir i ganny Kanser nou tou nou trakase; konman bann manm fanmir nou enkyet parske zisteman dan laliny ki’n ganny dir poudir parfwa i relye avek fanmir si enn dan fanmir i gannyen si premye zenerasyon pa’n gannyen be i retourn lo 2enm oubyen 3enm zenerasyon.  Me mon pa konnen si Lasyans in prouve sa oubyen zis kekfwa en keksoz ki dimoun i dir.  Me letan mon tann koz lo Kanser mon tann Onorab Roucou koz an relasyon avek manze, me parfwa mon demann mon lekor kestyon, si vreman i annan pour fer avek manze swa si ou konsonm lalkol an ekse swa si ou konsonm sigaret an ekse.  Parske ozordi i annan dimoun ki perdi son lavi atraver Kanser ki pa konsonm lalkol ki pa ni menm met en sigaret dan son labous e alor kwa ki fer li ganny Kanser?  An lot mo mon demann mon lekor kestyon parske parfwa i annan bann dimoun ki nou vwar zot anvil – bann nwizans nou apel zot pli zou mwen zot manz dan bin; zot pa fer okenn legzersis zot pa ni pran okenn ben; zot bwar nenport ki bout bwar me zot pli gro zot pli gra zot pli fit ki sa enn ki pe vey manze, vey lagres, ki pe fer de pti legzersis lo fitness trail.  Tousala nou bezwen balanse.  Alor kestyon ki ou bezwen demande parfwa letan ou get en zannimo parey torti ki zis asize, manze, bwar delo, manze, bwar delo, pa fer en fout legzersis me li i viv 200an plis ki lezot zannimo.  Alor ou demann tou sort kalite kestyon.  Be Mr Speaker mon konman MNA elekte pour distrik St Louis an 2011 mon ti perdi mon pti frer ki apel Selvain Arrisol i ti annan selman 21an.  E letan nou ti ganny dir i ti ganny Kanser nou tou dan fanmir nou ti fer nou mye pour li.  E li i ti ganny Lukemia e en keksoz ki nou ti aprann avek Lukemia letan i ti ganny sans al Chennai se ki letan i ti ariv Chennai Dokter i ti dir avek lafanmir poudir letan ou ganny Lukemia si ou pa trete apre 48erdtan initil ou perdi letan ou vin Chennai parske i pa fer sans.  Me parey nou konnen protokol Minister Lasante, zot fer tou le neseser zot fer tou sa ki zot kapab zot fer sir ki pasyan i swiv tou protokol e zot fer sir ki pasyan i ganny tou sa ki fodre gannyen.  Mon rapel sa bann letan ler li i ti Lopital i ti admit avek sa maladi son semenn ki ti sipoze voyaze son nivo disan ti ba, son platelets ti ba alor i ti bezwen voyaz son semenn answit.  E mon rapel byen ti an 2011 an Fevriye 2011 e mon pa ti kapab bouze mon pa ti kapab deplase akoz mon ti fek vini sorti avek li Maurice.  E mon manman ki son manman ki zanmen in deza voyaze dan son lavi, sete mon defen frer ki ti fer mon manman voyaze dan son lavi, parske mon manman ti bezwen akonpanny li pour al avek Chennai.  E letan mon frer ti sorti isi mon rapel dernyen servis mon ti kapab rann li sete letan i ti pe asize Airport pe esper avyon, i ti lafen ou ti aste en keksoz pour donn li pour manze avek en keksoz pour li bwar.  Se sa dernyen zour ki mon ti vwar mon pti frer parske letan i ti ariv Chennai e zot ti voyaz Lendi avyon ti ariv Mardi e Mardi letan i ti ariv Chennai i ti ganny pran dan en lanbilans anmennen dan Miot Hospital admit ICU, kot i ti fer en semenn e son semenn Lendi answit i ti ganny deklare mor.  So mon pe dir tousala parske sa i en pe bann prosedir ki bann fanmir i pas atraver.  E mazorite letan ou fanmir i mor dan en lot pei avek maladi Kanser letan serkey i vin isi ou napa dwa ouver.  E senpleman ou anter mon frer san konnen ki li ki dan sa serkey.  Akoz mon manman ki ti avek li alor nou ti annan konfyans nou frer ki ti ladan.  Alor sa i en pti pe bann parkour ki bann fanmir nenport ki vwazen parey dan mon Distrik mon konn plizyer zenn mon konn en zenn manman ki ti reste anler kot Aki ki ti en pti fiy aktiv.  I ti annan son pti fiy osi me li senpleman toultan i akonte ki i ti annan en douler dan son zenou.  Depi lontan lekol i ti pe lekol i ti segonder Lekol Belonie i ti en etidyan letan mon ti pe travay Lekol Belonie ki ti la.  i ti ganny en douler dan son zenou e nou konnen sa bann laz letan ou vin dir ou annan en douler dan ou zenou, ou dir kekfwa ou’n tonbe frote pas en pti keksoz lo la, met bann.  Paran i fer tou.  Me apre finalman anmezir i ale letan i ariv laz mazer parey nou dir dan son 20an sote i dekouver ki sa i en lot keksoz ki ti pe dousman, dousman sey ronz sa dimoun.  I annan en madanm mon ti konn li i ti travay STC i reste anler semen Serret li i ti ganny konmans ganny bann douler dan vant, i ti ganny bann desarz parey nou dir e i ti al kot Dokter finalman i ti fer serten tretman kot in al aletranze e ler in tournen tou keksoz in ok pour apepre 5an – 6an.  Me apre tou sa malad i tournen e apre tap li i zet li ater en sel kou e lafanmir i bezwen fer le neseser pour anter li.  Alor Mr Speaker mon ti a kontan ki nou tou nou e se pour sa rezon ozordi mon prefere abiy an roz, parske se sa kouler ki asosye avek Kanser ozordi e parey Onorab Pillay in dir Lasosyasyon Kanser Sesel zot pe fer tou sa ki zot kapab.  Zot pe sey ankouraz dimoun dan tou fason e ozordi par egzanp letan en dimoun in mor avek kanser zot ankouraz ou pour pa anmenn fler, me met en pti kontribisyon dan bwat ki al ver sa lasosyasyon pour zot al fer en fason ou en lot ed bann dimoun ki’n ganny afekte avek sa maladi.  Mr Speaker mon ti a kontan fer detrwa pti rekomandasyon lo sa Mosyon.  Mon premye rekomandasyon ki mon ti a kontan fer se sansibilizasyon parey bomaten letan nou koz avek Minis pour Lasante nou tou dan en fason ou en lot nou’n dir poudir parfwa i mank bann pti ‘Spot bann pti advert ki annan pour fer avek lasante.  E mon santi pour kanser osi ki Lasosyasyon Kanser ki medya nou bezwen annan en pe plis sansibilizasyon par egzanp lo sa maladi; kekfwa pour ankouraz nou sirtou nou bann msye ki pa al Lopital byen, byen otan ki nou pa ograba nou pa dan lanmak parey nou dir nou bann msye nou tant pour pa ale Lopital.  Be bann madanm letan zot ganny en pti ayo en pti mouse zot raporte.  Alor kekfwa bann progranm sansibilizasyon kot i kapab ed nou lo kalite manze ki nou pour manze par egzanp.  Yer swar letan mon ti pe get progranm ‘Zil Pros An Mouvman’ ti annan Old People’s Home ki ti La Digue kot ti montre bann dimoun bann travayer Fregate ki ti al laba.  E letan ou ti interview bann dimoun zot ti ankor fit e pourtan zot ti naze in retire me zot ti pe koz kalite manze ki zot ti manze par egzanp.  Letan mon ti tann en msye pe dir ki li i bwar tanzantan i efiz son roz anmer i bwar en pti gin fey korsol i efize.  So.  Me selman ler ou koz avek Onorab Roucou ki la o-bor mwan ki dan ki annan en baz profesyonnel lo nivo lasante i dir avek ou, ‘’Non, non, non, Onorab Arrisol, mwan sa bann zafer letan ou met pti fey parmi pti fey i pa ganny kalkile,  napa ganny mezir, so mon pa tro an faver sa.’’  Me lontan nou tou nou granmoun 4er bomaten ti lev nou ti donn nou en kwiyer delwil par-d fors e sa ki ede pour piz nou.  Dan granmaten de fwa ti annan tas rozanmer ki ti’n ganny mete la, ti napa mezir.  Mon kontan ozordi mon annan Onorab Roucou byen fit i byen gran.  In bwar son gran tas li osi me selman ozordi i dir avek ou sa napa mezir alor li i pa pour donn son zanfan, oubyen li i pa pour bwar.  So mon krwar sa osi i enportan avek Minister Lasante ansanm avek bann lezot Syantis ki nou annan enternasyonalman ek lokalman, sey vwar.  Advise nou.  Ozordi letan nou pe get medya, nou pe get medya sosyal ozordi sa pti bred pti fey ki nou koz lo la ki nou apel li bred mouroum ki dan tou lakour i annan, ki lontan nou ti apel sa balizaz – bred balizaz, ozordi li i pe ganny dir ki li i en medikaman i en manze i en medikaman enternasyonalman.  Ki annan bann lefe advers lo sa bann selil ki koz Kanser.  Korsol par egzanp i en lot sa rozanmer ki mon koz lo la.  So i annan tousala ki mon krwar ansanm avek Minister Lasante ek bann eksper dan Lasante zot kapab advise nou bann dimoun an relasyon avek keksoz ki nou manze.  Letan nou koz sa ki nou bwar.  Mon’n tann Onorab Roucou i koz desalinasyon; eski desalinasyon ozordi i zwe en rol pour ki dimoun i ganny maladi kardyovaskiler par egzanp?  Eski delo desalinasyon i osi ede dan fer dimoun devlop Kanser pli vit posib?  Nou pa konnen.  Par egzanp Onorab Roucou in dir i pa ankor annan en letid ki’n fer ki’n prouve lo la lo kalite keksoz.  Lot keksoz ki nou bezwen koz lo la se kalite manze ki pe antre dan pei par egzanp.  Mon rapel ti annan 3an – 4an pase ti annan en Spesyalis ki ti vini isi atraver Lasosyasyon Cancer Concern ki ti pe fer i ti fer en kozri Exile Club Mr Speaker, e i ti pe dir mon sel mo ki mon vwar mon sa fraz ki mon rapel i ti koz lo la, ‘’…se Sesel i enn bann pti pei ki konsonm kantite lagres zannimo.’’  E letan mon ti asize mon ti fer mon refleksyon konman en imen lagres zannimo se kwa?  Eski letan nou konsonm bwat bef par egzanp bann manze vitman ki nou kwi nou donn nou zanfan oubyen nou konsonmen?  Eski sa i en lagres zannimo?  Bwat luncheon meat par egzanp; bann manze vitman ki nou kwi pour donn nou zanfan oubyen nou menm nou konsonmen?  Oubyen letan nou pran en pti lalkol tanzantan nou aste nou en pake graton eski graton avek ki i fer graton?  Eski i en fason konsonm lagres letan nou asize nou manz pistas, ok?  Ozordi pistas in ganny prouve poudir dan en bwat pistas i annan anviron de ver delwil eski si mon vid 2 ver delwil mon donn en imen eski i pour bwar?  Non i pa pour bwar.  Me letan i konsonm en bwat pistas eski sa i fer ki deza in fini bwar de ver delwil?  Konmsi i pour enportan pour Minister Lasante ansanm sey travay pour nou aranze sey get bann progranm ki kapab ed nou popilasyon sansibiliz li lo ki fason lifestyle, manze, tousala mon krwar i ava ede dan sa lalit kont kanser.  Dezyenmman mon 2enm rekomandasyon mon ti a kontan fer Mr Speaker se an relasyon avek sa building ki nou annan laba an montan Perseverance an kit-an Airtel si mon pa tronpe kot ti pour fer en Lopital.  E ozordi letan mon al vizit L’Inde ansanm avek Onorab Wilbert Herminie e letan ou get Gouvernman L’Inde zot lebra in ouver pour donn nou led.  Kantite led zot anvi ofer e mon krwar ozordi atraver sa Mosyon nou ti ava demann Gouvernman ansanm avek Foreign Affairs, pour zot vwar ki bann led L’Inde i kapab donn nou.  Nou annan en propriyete laba, nou annan later nou annan en building ki’n konmans monte, mon pe rekomande ki Gouvernman ansanm avek Gouvernman L’Inde fer Lopital Spesyalize.  Parske mazorite nou pasyan ki sorti Sesel zot al end up dan L’Inde.  Zot al end up hospital Chennai.  So sa fasilite ti ava vin pli pre avek nou kot nou pasyan ti ava la kot fanmir ti a kapab en fason ou en lot vin vizit li e sa ti a fer ki nou bann dimoun ti ava dan en pli bon swen.  E omwen nou ti a kapab fer serten kontribisyon pour nou fer nou tes verifye e laba ti ava annan bann dimoun spesyalize ki ti ava la pour gid nou, pour eksplik nou, pour montre nou, pour sonny nou; oubyen pour ekip nou dan sa term kreol pour nou kapab tir en pe sa bann konsep ki nou annan Sesel.  Sesel nou annan en konsep – mon pa konnen si i vre si manti kot letan ou al lopital zanmen Lopital Dokter i konnen masin ki ou gannyen.  Ou bezwen ler ou al Chennai – ler ou al Sri Lanka i dir avek ou be ou ti ganny sa ou ti ganny sa be selman dimoun i dir avek ou sak fwa mon al lopital laba zot tyeke zot anvoy mwan isi fer be zanmen zot vwar.  So mon krwar i ava enportan atraver sa rekomandasyon atraver led ki nou ava gannyen avek bann pei etranze e mon pe mansyonn L’Inde an spesifik me selman i kapab annan lezot ki ava kapab ed nou sitwayen konnen vreman ki i gannyen, e kwa ki’n mor avek.  Me pa senpleman nou pa vreman konnen ki nou gannyen letan nou annan en douler dan nou vant.  Parske parfwa bann Dokter letan ou dir li ou ledo ki fermal i dir avek ou non, non pa ou ledo ki fermal be la dan ou vant ki fermal, be selman nou bezwen krwar li akoz li ki Dokter li ki annan sertifika ou napa nanryen se pour sa rezon ou’n al kot li, alor ou bezwen pran sa ki i donn ou menm si dan ou ledo ki fermal Mr Speaker.  Mon 3enm e mon dernyen rekomandasyon mon ti a kontan dir mon ti a kontan Minister Lasante i entrodwir en sistenm swa en travelling insurance swa en mon pa konnen ki mannyer nou apel li.  Mon pe dir sa Mr Deputy Speaker parske mon get letan mon frer ti mor e mon asire dan tou lezot fanmir i koumsa, Minister Lasante son protokol se tir ou Sesel i anvoy ou Chennai.  E letan ou ariv Chennai ou fer ou tretman i pa neseserman ki nou tou nou sanse, me i annan de ka ki sa pasyan i mor laba.  Letan pasyan i mor laba, Minister Lasante i fini avek ou.  Savedir se fanmir aprezan ki fer demars ki mannyer zot pour sey tap tou laport pour zot kapab refer lekor desann.  E mon pe dir parske sa pe dir avek nou me malerezman fanmir sakenn i annan son depans, me letan ou annan en fanmir ki solid bann frer ser sakenn i vin devan e zot koste e zot fer lekor enn zot fanmir.  Mon krwar Minister Lasante letan en i annan en pasyan ki pe voyaze, advise son fanmir met bann keksoz kler devan li sa i form parti nou protokol.  Me pa neseserman letan i al laba keksoz pour deroul dan sa fason.  Alor i enportan pour eksplik fanmir, ‘’Be get sa ti a bon ou pey en pti keksoz – en lasirans letan ou pe voyaze, si zanmen i ariv en keksoz laba sa i kapab kouver ou.’’  Mon krwar tousala i form parti sa konsiltasyon – tou sa travay ansanm ki nou pe fer pour nou donn nou dimoun bann bon lenformasyon pour ki finalman nou tou nou happy e nou pa pe blanm personn oubyen montre ledwa lo personn.  Mr Speaker mon krwar i en Mosyon ki fer sans, e mon krwar i en Mosyon nou tou dan en fason ou en lot nou pe demann Gouvernman pour sey fer son mye.  Mwan mon konnen Minister Lasante e nou tou nou konnen poudir Minister Lasante, avek mwens resours ki zot annan – nou bann staff ki Ners ki Dokter ki bann Spesyalis ki nou annan zot fer zot mye pour nou.  E taler i annan en madanm ki’n call mon i dir avek mon pa bliye letan zot mansyonn lasante toultan zot koz zis Ners avek Dokter i enportan poudir i annan sa bann pti group dimoun ki zot dir Public Health Authority laba deor, zot osi zot zwe en rol dan lavi lasante tou dimoun.  Letan i annan en outbreak dan pei premye dimoun ki ganny kontak avek sa se bann Public Health Officers.  Alor i dir mwan mazin zot letan zot koz lo lasante; pa asosye lasante avek zot Ners avek Dokter.’’ Me selman i enportan poudir nou rekonnet e nou apresye travay ki Minister Lasante avek tou son staff zot fer pour benefis tou nou zabitan.  Alor Mr Deputy Speaker mon ti a kontan felisit Onorab Roucou pour sa Mosyon.  E mwan dan mon distrik, mon ti a kontan prezant mon sipor pour tou bann fanmir ozordi ki pe viv avek Kanser.  I pa en keksoz ki ou rode.  Mwan mon konn en dimoun – mon konn en koup msye avek madanm ki tou lede i terminally ill zot pe reste ansanm e zot la.  Mon konn dimoun ki Dokter in kondann li 7an pase poudir i ti donn li letan i ti diagnose li ti vwar ki an Me, i ti ganny Kanser Dokter ti apel fanmir i dir li pran byen swen avek li parske i ti donn li ziska Desanm kekfwa apre Desanm i riske pa la.  Ozordi sa dimoun i annan 7an depi i pe viv avek Kanser parey nou dir an term kreol i pli aktiv pli for pli gro pli gra ki mon e i la me pourtan in ganny kondannen.  E parey granmoun i dir se Bondye ki donn lavi li ki tir lavi, me senpleman nou bezwen sipor lafanmir avek sipor la kominote.  Alor Mr Speaker sa Mosyon pour ganny mon sipor e mon ti a kontan demann lezot Manm osi pour fer parey.  Mersi bokou.

 

MR DEPUTY SPEAKER

Mersi Onorab Arrisol.  Onorab Ferrari.

 

HON JEAN-FRANCOIS FERRARI

Mersi Mr Deputy Speaker.  Mr Deputy Speaker mon osi mon ti a kontan aport mon sipor pour sa Mosyon.  E nou konnen poudir Kanser i en maladi terib fer mon mazin nou koleg Onorab Andre mon ti al avek li Lopital mwan pase, koz en pti kou avek son papa dir li mon vwar li mon a vwar li dan son store apre 21 zour apre i ti’n fini.  Konmsi sa kalite lavites ki vreman enkrwayab.  E alors nou bezwen konsider tretman kanser konman enn nouvo priyorite Minister Lasante dan sa lepok ki nou viv akoz mon pa en Spesyalis me bokou dimoun i ava dakor i ava argimante ki i en maladi lemonn modern i depan lo nou konsonmasyon lo lifestyle bokou.  E bann keksoz ki pa ti egziste lontan nou ozordi i egziste sa bann nouvo maladi.  E nou bezwen met bokou plis zefor ladan.  E parey Onorab Roucou in dir parey letan in prezant son Mosyon i anler lo lalis; vreman enn bann maladi ki pe pran plis nou bann frer nou bann ser nou bann tonton tantin ki pe ale avek sa maladi.  E nou konman bann dimoun ki la isi ki bann Lezislater ki koz avek Gouvernman ki annan lotorite nou bezwen rod en fason pour nou akonpanny sa demann e pour nou anmenn nou pyer nou ros dan sa konstriksyon en sistenm lasante ki pour take care nou bann frer avek ser ki ganny frape par sa maladi.  Mon pran sa lokazyon pour mon lev en pwen ki mon krwar tre for ladan e ki i annan en pe letan ki mon pe diskit lo la avek bann responsab dan Minister Lasante.  E sa se ki mannyer nou finans sa bann nouvo servis?  I kler Mr Speaker ki pep Seselwa konman en pep i aport bokou latansyon.  E i vin ansanm konman en fanmir ler enn zot manm i ganny frape par maladi.  E nou’n vwar sa plizyer fwa kot bann dimoun bann manm fanmir i met ansanm bann resours e zot fer tou sa ki zot kapab pour zot kapab prolonz lavi zot bann fanmir.  Kot Minister Lasante pa kapab pran sarz bann depans par-ler aletranze oubyen tou bann depans aletranze ou vwar ki finalman pep Seselwa i met lanmen ansanm zot met lanmen dan zot pos e zot vini pour zot osi anmenn zot fer zot kontribisyon da bann ka koumsa.  Alor mwan ozordi mon ti a kontan ki nou konsider sa demann ki Onorab Roucou pe fer, e nou gete ki mannyer nou lepep Seselwa an konmansman par nou bann Onorab dan Lasanble, e tou bann dimoun isi Sesel ki servi sistenm lasante ki mannyer nou kapab anmenn nou kontribisyon anver sa nouvo servis ki nou pe demande?  I annan 2 fason.  Premyerman se dan nou lifestyle la fason ki nou anmenn nou lekor e dan fason ki nou protez nou lekor kont sa maladi.  Akoz mon krwar ki vreman par-ler nou vwar bann dimoun ki pa responsab e ki abiz zot lavi zot lasante e apre zot ekspekte ki Servis Lasante Piblik Sesel i pran sarz zot kondisyon e i fer tou bann depans e tou bann zefor neseser pour zot kapab reganny zot lasante sa pour mon i en keksoz absoliman iresponsab.  I osi iresponsab.  Ki sa ki nou tande bomaten konmkwa i annan en dimoun ki ganny dir pa bezwen reste kot ou akoz i annan en maladi ki kontazye, me selman i prefere al direkteman dan en parti.  Sa se bann kalite konportman ki iresponsab, e nou bezwen sever avek.  Nou bezwen kondann zot dan en fason tre sever, akoz sa syek ki nou viv ladan si nou pa pare pour pran responsabilite pour nou lasante me nou pa en sitwayen ki responsab.  2enm fason ki nou kapab fer sa, se pour gete ki kalite kontribisyon finansyel nou fer pour sa nouvo servis.  Onorab Roucou dan son Mosyon i pe demann plis resours ki ganny mete dan deteksyon e tretman Kanser; plis resours.  Nou tou ki isi dan sa Lasanble ki’n travay lo bann finans Gouvernman lo larzan Leta nou konnen ki resours pa en keksoz ki napa en limit avek.  I en keksoz ki limite dan tou keksoz nou travay e byento nou pe al antre dan en legzersis byen difisil pour nou sey deside kote resours nou pei i bezwen ale lannen prosenn napa okenn Departman ki pou ganny resours ilimite, me pour ganny tou bann resours ki i bezwen in ler pour nou mazinen ki mannyer nou osi nou anmenn nou kontribisyon.  Nou pe dir ki nou bezwen annan plis servis dan deteksyon nou konman en pep souvan nou tande pour dir nou pe al en kou Maurice oubyen nou pe al Chennai oubyen nou pe al Colombo nou pe al fer tes, nou pe al fer en medikal, bann konsiltasyon medikal akoz nou annan en konsern pour nou lasante.  Mon ava dir zot ki i vre dan tou fanmir i annan – sa bann menas kanser e i vre osi konm parey Onorab Roucou in dir ki souvan sa i bann menas ki zenetik ki congenital parey nou pe dir.  Mwan dan mon fanmir i Kanser gro lentesten.  E sa i fer ki nou bezwen pran nou responsabilite e fer sir ki mon fer bann tes apropriye regilyerman.  Mon al Lopital Victoria, e mon fyer pour mon dir mon enn bann dimoun ki toultan mon al dan Lopital Victoria, akoz mon annan konfyans dan mon bann Dokter avek dan bann ners e tou bann problenm medikal ki mon gannyen mon al dan Lopital Victoria.  Mon pa’n al lot landrwa.  E mon santi poudir i annan posibilite i annan potansyel e i annan sa determinasyon e i annan sa devosyon pour tret tou dimoun dan sa Lopital.  Alors mon dernyen fwa ki mon ti pas Lopital mon ti ganny en aksidan mon ti ganny trete tre byen mon pa’n al okenn landrwa apre e mon ti demande, ‘’Be ki mon drwa ki mon bezwen peye?’’ E Dokter Louange ki ti la ti dir mon napa nanryen pour ou peye.  Sa lentervansyon ki zot ti fer lo mon si mon ti al Sri Lanka ki kout apepre R200mil.  Alor mon demann li be napa nanryen naryen pour peye?  Nanryen pour peye non non nou pe gete dan posibilite en zour gete ki mannyer nou pour fer selman nou pa ankor pas lo la ou napa nanryen pour peye.  E mon dir be le tou lezot tou dimoun i parey personn pa peye lasante i free.  Ok.  Alor wi mon tann en Onorab labe i dir desizyon Gouvernman SPPF.  Mr Speaker mwan mon’n toultan krwar ki mon annan en lespri Sosyalis.  E ki dan en lespri Sosyalis sa bann ki kapab peye i peye pour ed bann ki pa kapab peye.  E nou fer en sistenm nou ankor annan en sistenm isi Sesel en sistenm lasante wi met an plas par Gouvernman SPPF ki fer ki personn pa peye.  Sa ki annan larzan dan son pos, i pa peye.  Sa ki napa i pa peye.  Savedir mon reste avek mon larzan, ou reste ou napa.  Sa i pa apel Sosyalis sa.  Sa i apel enbesilite.  Sa i apel enbesilite e se pour sa rezon ki nou annan sitan problenm ki nou pei ti faid an 2008, e ki nou ankor annan problenm dan sistenm lasante.  Mwan mon krwar ki nou kapab e nou devret met an plas en sistenm ki pour anmenn nou  sa  bann nouvo servis ki sa Mosyon pe demande, me ki se bann Seselwa ki kapab kontribye ki kapab kontribye i ava pare pour kontribye pour sa nouvo servis.  Sa menm larzan ki zot pe al depanse Maurice, Chennai oubyen Colombo ava depanse Sesel.  E mwan mon ava peye pour sa servis, akoz mon konnen ki si nou fer en sistenm kot bann ki kapab peye i kontribye en pe, nou ava kapab okip bann dimoun ki pa kapab peye.  Notaman nou bann vyeyar; nou bann dimoun aze; nou bann zanfan lekol nou bann zanfan ki annan dezabilite; nou bann dimoun ki’n ganny en andikap permanan; tousala i bann dimoun ki nou bezwen okip zot e nou pa devret refiz okenn Seselwa servis medikal.  Nou pa devret refiz okenn dimoun okenn servis medikal.  Me selman sa ki kapab peye i bezwen peye.  I bezwen met lanmen dan son pos, pour nou fer sir ki sa pour sa pti kastrol larzan i vin en pe pli gro, e nou kapab fer monte nou sistenm lasante.  E se sa ler mon get Mosyon Onorab Roucou mon se sa ki mon lir ladan, pour demann ki plis resours i gannyen mete; pa zis Gouvernman ki bezwen met resours nou bezwen Gouvernman ki brav sa pa en keksoz ki Lopozisyon ki devret pe dir.  Se en Gouvernman ki devret brav ki devret dir ok parey Onorab Arrisol in dir nou annan en Lopital ki’n konmans fer lanmwatye in kit dan semen nou konnen ki nou annan en Gouvernman.  E vre Onorab si sa en lot prensip SPPF ki si ou’n ganny en bout later pour en devlopman ou kit dan semen, i sipoze repran.  Selman i pa repran pour tou sa i repran pour serten pour serten dimoun pour repran.  Pour sa enn laba kot i annan bann gro dimoun ki’n met zot par ladan sa lopital ki pa’n fini sa nou pa repran sa.  Me wi nou bezwen repran.  E nou a fer li vin en Sant Lekselans pour Lasante.  E L’Inde i ava ed nou e lezot pei i ava ed nou e sa dimoun ki pour bezwen sa servis si i apel Onorab Pillay, oubyen i apel Onorab Basil Hoareau i ava kontribye.  Akoz i kapab kontribye en pti larzan pour ed son frer ki pa kapab kontribye.  Mon krwar nou tou nou devret dakor lo la.  E sa i en nouvo depar.  I devret en nouvo depar dan nou fason vwar ki mannyer nou pour anmenn sa pei.  Nou konnen ki poudir i annan serten dimoun ki pour dir la la Ferrari laba i dir fodre fer peye lasante.  Dir sa ki zot anvi dir.  Mwan mon konnen ki mon’n dir mwan mon konnen ki mon dir ki en sistenm ki pa akseptab.  Akoz i annan Mr Speaker mon ava dir ou mon pa pour nonm non.  Mwan mon konn en dimoun ki en CEO ki ganny preski oubyen otour R200 mil par mwan ok mon zwenn sa CEO dan sant fizyo terapi lopital ler mon ti pe fer mon fizyo terapi i osi i ti lo en masin dan bor mwan be i osi pa pe pey nanryen akoz i free.  Ki ou ganny R200mil ki ou ganny R5 mil i free.  Be ou krwar sa dimoun R5 mil ki ganny R5mil sa dimoun i ganny R5 mil Onorab i fini vwar ozordi ki zot pe bat son latet, akoz li i pour reste la ater avek son R5mil avek sa enn laba i pour reste avek son R200mil.  E alors se sa bann kalite keksoz ki mon pe dir nou konnen poudir nou sistenm lasante nou Konstitisyon i garanti lasante pour tou i garanti tretman medikal pour tou dimoun lasante primer sirtou.  Me selman nou Konstitisyon pa dir nou ki tou keksoz nou pour ganny pour nanryen.  I annan serten keksoz ki nou osi nou bezwen nou bezwen fer nou kontribisyon.  E la dan sa domenn la mon asire mon asire ki an mazorite apard bann ki ankor krwar ki Parti Lepep ki’n ekrir Labib alor zot sipoze bann zot sipoze swiv sa Labib ki’n ekrir par SPPF par Parti Lepep.  Apard sa bann dimoun mazorite Seselwa i pour pare pour li fer son kontribisyon.  Akoz i ale i fer son kontribisyon kot Dokter Jivan kot Dokter Murthy kot Dokter Chetty kot Euromedical kot Dokter Albert zot ale zot plen partou laba.  Zot fer zot sa zot kontribisyon laba alors menm dan en servis Gouvernman en servis spesyalize, mon asire poudir lepep Seselwa i pare pour zot fer sa kontribisyon.  E mon enplor Gouvernman fodre zot brav dan sa Gouvernman – sanmenm sa ki fer zot in perdi sa dernyen eleksyon akoz zot pa brav selman fodre zot brav pran bann desizyon ki brav ki modern bann desizyon ki modern.  Pran bann desizyon fer bann keksoz ki modern pour nou pei.  Anmenn sa servis e zot ava vwar poudir nou kapab apros li dan en nouvo fason ok?  Alors Mr Speaker o moman ki mon pe siport sa Mosyon, mon e lans sa lapel pour ki nou fer keksoz dan en fason diferan.  Akoz mon’n dir sa semenn pase mon pas 3erdtan ant 8er diswar 11er diswar dan sistenm Emergency dan Lopital.  Mon’n pas 3erdtan.  Mon’n debout la.  Mon’n koz avek Ners mon koz avek Dokter mon koz avek sa msye ki pour sa masin ex-tray portable ki li osi par-ler Onorab Arrisol vre nou osi nou bliy li sa bann Teknisyen.  Ki pous sa masin ale kot en lili, ale al kot en lot ale al laba al fer x-tray dan minwi aswar.  Nou osi nou bliy zot sa bann dimoun mon koz avek bann Porter.  Dimoun i i dekouraze dan nou sistenm lasante.  Zot dekouraze mon vwar bann zenn Dokter zenn, zenn Dokter ki zot pe mazinen konman zot fini konman zot ganny en sans zot pour mapay  Zot pe ale, akoz i annan bann Dokter ki ganny peye apre 8an letid R15,700 par mwan.  I pa politik bon marse Onorab.  Mwan mon pe dir ou, ou konnen ki mon pe dir ou Onorab Pillay.  Mon pe dir atraver ou Mr Speaker mon pe dir ki si nou ti anmas R50 laba dan en servis si nou anmas R100 dan en servis nou a pran nou a pey sa Dokter en pe pli byen.  Nou a pey sa Ners.  Si fodre amand Konstitisyon nou ava amande nou ava amande si fodre nou ava amande.  Onorab, Onorab sa ki nou bezwen fer se gete ki mannyer nou kapab annan en sistenm ki entelizan, ki smart, ki anmas en pti pe larzan pour nou pey nou Dokter en pe pli byen pour nou pey nou Ners pli byen pour nou pey tou nou Teknisyen pli byen.  Akoz sa bann dimoun pour kite pour ale.  Zot pour ale. So mwan mon pe dir avek zot annou bliy sanmenm sa nou pei ti faid akoz nou mazin zis ki mannyer nou pour depanse ki mannyer nou pour donnen mazinen ki mannyer nou kapab anmase.  E la mon pe dir anmas avek bann ki annan anmas avek mon tou akoz mon en Onorab mon pa ganny R5,050 mil mwan.  Mon kapab peye nou kapab peye pour en servis nou kapab peye pour en keksoz.  Ou konpran?  So annou brav; annou pran sa bann desizyon e annou sov nou profesyon medikal annou sov nou servis medikal nou pa kapab ou laba ou vwar bann dimoun ki dan depresyon; ki bann dimoun ki tou lannwit zot pa asize zot zis deal avek bann ka pour en lapey ki zot pa ni kapab lwe en flat, zot nepli kapab lwe en lakaz.  En Dokter i travay 8an i pa kapab pey en lakaz zot!  Be i pa posib.  Alors ou vwar?  La i la sa zot problenm.  Anyway nou tou fason mon konnen Mr Deputy Speaker nou pour kit zot deryer akoz zot ankor dan en frame of mind.  Onorab in anmenn bann propozisyon bann servis adisyonnel, at least mon ti ava ekspekte zot sipoze pe manage en Gouvernman zot sipoze pe manage finansman piblik konmsi zot ava demande kote nou pour gannyen ki nou pour fer?  Kot nou pour ale?  Kot nou pour rode?  Kot nou pour peye?  Lekel ki pour invest? Sa bann keksoz.  Nou pa pe rod sa nou, nou pe rod kritik sa ki Ferrari i dir.  Ferrari i dir en keksoz ki fer sans e nou lo sa kote latab nou anvi Onorab Ferrari nou anvi ki sa Mosyon i ganny tande par Gouvernman.  E mon konnen ki i annan plizyer dimoun dan Gouvernman i annan plizyer dimoun dan Gouvernman ki dakor avek mwan lo la.  Selman zot pe esper konmsi i mank en pti pe kouraz.  Be mwan mon pe dir zot ki mon pour la deryer zot.  Annou ale let’s do it annou ale let’s do it.  Anmenn sa bann servis Sesel be nou anmenn sa servis Sesel akfer nou pour bezwen al dan L’Inde ou dakor egzakteman Onorab Hoareau i dakor avek mon ok – akoz li i pa en Orizinal bann ki Orizinal zot pour pran en pti pe plis letan pour zot dakor.  E alor Mr Speaker mon donn mon full sipor mon donn mon sipor Onorab ki’n prezant Mosyon mon donn mon sipor Minister Lasante mon donn mon sipor Gouvernman kanmenm mon pa dan Gouvernman pour nou fer sa ki bon pour Sesel.  E sa i en bon Mosyon e i lokazyon pour nou fer en bon keksoz pour Sesel.  Mersi Mr Deputy Speaker.

 

MR DEPUTY SPEAKER

Mersi Onorab Ferrari.  Onorab Aglae.

 

HON EGBERT AGLAE

Mersi Mr Speaker bon apre midi.  Mr Speaker nou pe tret en size vreman enpotan me i annan serten Onorab ki’n deside anmenn politik ladan.  E pour mon i enportan ki ler nou pe koz lo Kanser premyerman annou mazin bann ki’n mor avek Kanser; annou mazin bann ki pe soufer ozordi avek Kanser akoz demen i kapab enn antre nou ouswa enn nou manm fanmir ki pas atraver en leprev Kanser.  Mr Speaker mon konmans mon lapros koumsa akoz mon en dimoun ki’n travay avek seksyon kanser Oncology Unit mon fer 4an.  Mon annan en Sertifika dan re konstitisyon phsytophotic drugs; sa i preparasyon bann tretman avan bann pasyan i vin pran zot bann tretman.  E dan sa parkour ki mon travay laba Mr Speaker ou’n vwar dan lizye bann pasyan ki pe lager pour zot kapab reganny zot lavi.  Mon pa krwar ki la anndan i annan enn antre nou ki ti pour kontan, pour pas atraver bann leprev parey.  Sa difikilte pour sirmont sa batay pour zot ganny zot lavi.  Menm avek sa tretman ki zot pe gannyen, menm si Minister in envestir bokou dan bann nouvo zenerasyon tretman pour Kanser, sa i pa ase pour sov lavi en dimoun.  E ler mon ekout Mr Deputy Speaker mon ekout Onorab Ferrari mon ti a dir li petet en ennler sorti lo nyaz kot i été frekant nou pti dimoun ater i a konpran ler nou pe koz Kanser e kou ki vin avek tretman Kanser.  I byen sa ki pe dir petet sa ki annan larzan bann milyonner zot kapab kontribye dan tretman Kanser me dan mon parkour ki mon travay avek bann pasyan napa en milyonner ki mon’n travay avek.  I tou bann pti dimoun ki pe survive zot lavi.  Mr Speaker pour tret Kanser son ki atas avek apar ki transplant bann organ i enn bann pli ser tretman ki egziste, Kanser i enn dezyenm osi ki koute apre dyaliz.  E si demen Gouvernman li menm li i pran desizyon i dir tou pasyan ki’n ganny diagnose avek Kanser kontribye, bokou pour mor deswit – sa mon garanti, akoz kou pour tret Kanser par en pasyan i ant R100mil – i depan lo kalite Kanser.  E menm ziska R1 milyon an montan sa i bann kanser pli grav parey brain cancer.  E pour nou fer serten largiman lo kou en lavi en dimoun ki lo Kanser pour met en sonm, pour mwan nenport ki Gouvernman ki lo pouvwar si LDS si Parti Lepep si lot ki pour vini i bezwen pran sa serye akoz nou pe koz lavi en endividi la.  Nou tou ki pe travay nou pe pey kanser nou pe pey tax eskiz mwan pour ki demen – si i ariv okenn maler avek nou i ava annan sa Gouvernman ki la dizour – pe enport ki pour la ki pour pare pour anmas ou.  Me ozordi pri lavi nou tou nou pe koz pri lavi ki nou annan en nivo lapovrete ki nou pe sey lager avek, pour kapab sirmonte e ler ou pour annan ou e manm dan ou fanmir ozordi dan en senp fanmir mon pe koze, ki pour ganny kanser i pour napa mwayen pour li al fer okenn tretman i pa fasil.  I annan ki’n pran loan mon konnen akoz i annan dimoun dan mon distrik i annan trwa partikilye ki ankor pe batay sa maladi i annan ki’n pran loan pour ale pour al tyeke.  I annan ki demann prete.  Sa ki enportan pour mon se sa bann dimoun i anvi viv.  E nou bezwen donn zot en lespwar pour zot viv san fer politik avek sa Mosyon.  Mwan mon pour siport sa Mosyon Mr Speaker akoz i annan en nesesite pour nou anmenn en lager kont Kanser.  Premyerman ki mon anvi koz lo la, i enportan se lifestyle.  Mon’n dir boner, Minister Lasante i kapab fer vini bann dernyen zenerasyon tretman si i le.  Me i annan en keksoz ki’n fer avek nou lifestyle.  Ler nou pe koz lifestyle i annan kwa ki nou manze, kwa ki nou bwar, kwa ki nou enpoz lo lekor.  Akoz Kanser i prouve poudir menm dan serten landrwa travay kot ou kontinyelman ekspoz ou lekor avek serten – petet kemikal serten pratik ou posibilite ganny Kanser i vreman o.  E sa i vin mwan mon 2enm pwen kot i konsern prevansyon.  Mwan mon believe ki Minister Lasante i bezwen angaz li pour fer plis prevansyon.  Prevansyon i pour koute wi me selman i pour sov bokou nou Seselwa.  Depi sa ki antre dan nou Por, lo Airport, sa ki nou pe konsonmen sa ki nou pe prodwir, tousala i en keksoz ki ou bezwen pran kont dan sa levennman prevansyon.  Nou pou bezwen annan osi bann Eksper medikal pour travay dan sa domenn – mon pa konnen si zot pour kre en Departman i deza annan en Departman Prevansyon dan Minister Lasante, me ler ou koz sa departman larzan ki ganny mete dan Bidze pour prevansyon i minim; ki swa dan lezot maladi SIDA lot, lot me ou vwar poudir ki larzan dan Sesel kot i konsern Prevansyon pa ganny mete.  Plis larzan plito al dan tretman, ki ler sa ler in ariv ou i ganny mete ladan.  Me mon krwar i devret lanver kot annou fer prevansyon vin en top priority pour nou Gouvernman, atraver Minister Lasante pour ki i ava sov nou sa kantite dolar ki nou bezwen anvoy dimoun aletranze.  Mr Speaker nou koz lo lalkol, nou koz lo sigaret tousala i bann keksoz ki pe anvair nou sosyete e ki pe koz serten maladi.  Mr Speaker ler mon pe koz lo lekspertiz osi nou bezwen Seselwa nou napa Seselwa ki pour kapab etidye pour vin bann Oncologiste.  Mon rapel sa bann letan ki ler ti annan nou ti annan Doctor Georges ki ti la ki ti en dimoun ki ti vreman fantastik, i ti konn son pasyan byen in ede pour soulaz remor bann pasyan e menm fanmir.  Me nou pa pe vwar Seselwa ozordi pour angaz zot pour al fer bann degre pour vin en Oncologiste.  Nou napa Seselwa ase kalifye.  Mr Speaker ler en fanmir in pas atraver en leprev Kanser ki swa en paran tousel ki annan li detrwa zanfan enn – de zanfan, ou vwar ki soufrans i bezwen pas ladan.  Ki mannyer i annan serten son bann zanfan ki pas atraver bann leprev – sirtou si bann ki ankor pe lekol, ki pa ankor antre dan travay kot sa paran i bezwen aret travay antre lo en benefis sosyal, e la lapovrete i atak sa fanmir.  En keksoz ki nou bezwen pran kont loter Mosyon, se ki mannyer Gouvernman i bezwen kapab antre pour soulaz en fanmir – en manm ki pe travers en leprev pour li konbat son lavi atraver Kanser.  Sa larzan ki zot pe gannyen ki pe kontribye atraver sistenm sosyal, i pa ase.  Mr Speaker i annan bann teknolozi ozordi modern ki egziste i annan serten masin parey bann masin deteksyon ki Onorab Roucou in nonmen, me mon ti a lans en lapel deor ok petet Onorab Ferrari osi a kapab donn en lanmen apros sa bann milyonner, fer bann Donasyon avek Minister Lasante, ki a kapab osi ede dan deteksyon.  Annou pa zis esper Gouvernman si ou annan ou vwar poudir ou pa ti devret ganny sa tretman pour nanryen, pran sa larzan donn Minister Lasante.  Dir li invest dan en detection masin pour Kanser.  I a kapab mon pour kontribye ler mon pour vin milyonner mon pa trakase mon pa ankor vini.  Mr Speaker Onorab Ferrari pe disturb mwan.  Mon pour kontinyen an di-z-an ki deor la i annan bann resers ki pe ganny fer e enn bann resers ki ase kontrovers ozordi ki bann gran Lakonpannyen Farmastetik zot menm zot en pe zot pe tap kalot ladan dan en sans pa pe aksepte; bann Board Lotorite serten pei lasante osi.  Se i annan sa fame ki nou apel Vitamin B17, ki bokou in ganny koz lo la, ki dir i kapab tret Kanser e i annan serten Reserser in fer resers lo la.  E in prouve ki sa vitamin i kapab geri Kanser e sa vitamin i ganny trouve dan bann lagrenn parey ponm, apricot.  E rezondet sa bann firm deor i pa pe neseserman anvi al envestir pour kapab fer sa tretman available pour petet lemonn antye, se akoz petet premyerman; son availability i la toulezour avek ou zot pa pour fer milyon lo la bann gran Lakonpannyen Farmastetik e pour zot sa i en pert si sa demen sa tretman i vre i vin en realite pour tret nou bann pasyan Kanser.  Fodre realize pour ki i annan bokou lobbying aletranze e bann pei Africa petet nou ki pase dan SADC nou vwar bann difikilte ki bann pei SADC bann rezyon Africa i gannyen pour zot ganny akse avek bann tretman.  Menm si zot annan bann zengredyen labaz pour fer sa bann medikaman.  E pour mon sa i en keksoz ki i en leker i en konsyan sosyal, petet ki nou lanse avek bann partners konsernen, pour zot kapab anmenn en lager ki senp pour Kanser en lager ki pour kout nou pli meyer marse ki nou kapab fer li e ki nou bann dimoun ki pe viv avek Kanser li menm li i ava vwar en lespwar ki ler ou pe mazin Kanser ou pa pe mazin zis lanmor.  Akoz i koumsa ozordi.  Si Dokter in dir ou ganny kanser bokou nou i mazinen nou annan detrwa mwan pour nou viv.  I pa sipoze le ka me i en realite i ankor annan en batay i ankor annan en lager pour nou lager.  E le pli gran lespwar, se sak endividi i pran en responsabilite.  Nou tou nou pa anvi ganny Kanser.  Me selman konman en zonm sirtou mon koz lo papa bann zonm Mr Speaker se nou menm nou ki pa le al kot Dokter nou menm nou ki pa le al fer check up.  E souvandfwa ler ou vwar nou ariv lo sa lili Lopital nou kanser in vreman avanse nou dan 3enm – 4enm staz e sa i vreman difisil pour ganny en lespwar pour ou sirviv.  Me kant a bann madanm parey in dir i frekant plis lopital kan zot ganny en pti douler zot taye zot ale zot sans survival parey nou dir i plis ki pour bann msye.  Me sa ki enportan se bann madanm zot menm, zot ganny plis gran varyete Kanser ki bann msye bann msye napa bokou bann varyete Kanser ki nou kapab gannyen.  Me selman e la mon lans en lapel avek Seksyon Prevansyon kot Minister Lasante pour entansifye kanpanny en pe avek bann msye.  Annou pa reste zis dan klinik.  Annou al ver kominote pik sa bann msye annou dir zot vini.  Annou fer bann kanpanny medikal anba bodanmyen, anba laboutik anba isi kot zot frekante pour sa bann zonm sanmenm bann landrwa kot zot ale, pour nou ganny zot, pour nou sov zot.  Mr Speaker an terminen mon pour donn mon sipor sa Mosyon.  E mon swete ki la an Oktob vi ki Bidze pe vini kot nou kapab depouy sa Bidze Minister Lasante e fer sir ki larzan dan Prevansyon i annan ase.  E larzan pour envestir dan bann lekipman pour bann deteksyon i ava annan en fason fer – petet par zot ladyet 3 mwan nou a tonm dakor lo la.  Ki Minister i ava envestir dan sa bann lekipman osi avek sekter prive byensir, ki i ava pran son responsabilite li osi pour ed Minister Lasante pour li kapab ed nou bann pasyan ki dan bezwen.  E avek sa Mr Speaker mon lans en lapel avek bann ki pe soufer avek Kanser pa bezwen dezespere, nou priy pour zot e ki zot kapab reganny zot lavi.  Mersi.

 

MR DEPUTY SPEAKER

Mersi Onorab Aglae.  Bon mon annan ankor 6 Manm ki le eksprim zot lentansyon pour entervenir; mon annan en 7enm.  Nou ava pran en Break e mon sizere nou retournen 4.15 sharp – wi – pour nou kapab fini sa Mosyon.  Ok so nou ava adjourn ziska 4.15.

 

(BREAK)

 

MR DEPUTY SPEAKER

Bon nou ava kontinyen dan nou travay.  Nou a kontinyen deba lo Mosyon ki’n ganny prezante par Onorab Clive Roucou.  Onorab Loizeau.

 

HON NORBERT LOIZEAU

Mersi Mr Speaker bon apre midi tou dimoun.  Mr Speaker ozordi i en plezir pour mon pour ganny sans koz lo en size ki vreman serye.  E ler mon’n ekout plizyer entervenan delibere mon’n ekout Onorab Pillay ki in akont parkour son papa i fer mon mazin bokou keksoz Mr Speaker akoz mon osi akoz mon osi dan mon rankontre manm fanmir ki’n pas dan bann sityasyon parey, e mon konnen ki mannyer Onorab Arrisol e Onorab Pillay pe santi ozordi.  Mr Speaker ou konnen ler nou pe koz lo Kanser i fer mon mazin en parol lontan ki mon bann dimoun aze ti dir mon sirtou mon manman.  Lontan Kanser ti asosye avek bann dimoun ki annan larzan; bann dimoun byen eze spesyalman sa bann lepok kot bokou bann dimoun ki ti vin isi pe reste bann etranze.  Ti asosye avek zot Mr Speaker senpleman akoz zot sa bann dimoun zot ti ganny akse avek serten komodite sa letan ki pa ti enteres nou bann pti Seselwa sa lepok.  Nou bann Seselwa pa ti enterese avek sa bann prodwir, akoz i pa ti ankor popiler.  Me zot vi zot ti deza ganny akse avek sa e zot ti servi e sa i fer mon mazin lontan, ler nou pe bwar en dite par egzanp souvandfwa nou pe servi en larousaret sa biskwi ki nou dir larousaret en dipen sek parfwa de kwiyer diri ladan ki’n reste me zot sa bann dimoun zot dapre mon bann paran zot ti pe servi diber.  Zot ti pe servi bann lot keksoz, pour fer bann sandwich e sa bacon.  E sa pa ti ankor entrodwi parmi nou popilasyon, akoz sa letan ki nou ti pe viv, nou bann dimoun pa ti enterese avek sa bann keksoz nou ti prefere kontan zot letoufe, zot ladob, bann keksoz koumsa.  Be se sa ki rezon zot ti asosye sa maladi avek bann dimoun ki pli eze sa letan.  Me ozordi Mr Speaker tou dimoun i kapab ganny Kanser.  Keksoz i sanze, in sanze konpletman.  Senpleman enn se ki nou lifestyle in sanze.  Dimoun pe nepli kapab viv parey avan.  Konmela tou dimoun tou Seselwa nenport ki tit Seselwa ordiner eskiz mon si mon pe dir Seselwa ordiner akoz nou Kreol vi ki nou dan semenn Kreol.  Tou nou bann pti Seselwa grassroot i ganny akse avek tou sort kalite komodite Mr Speaker.  E si ou al dan bann supermarket ozordi ou pour vwar lo letazer – tou sord kalite bann processed food.  Sa i montre ki nou lifestyle in sanze advert lo televizyon kot zot pe advert sa bann kalite prodwir kot, ‘’la la pli bon bef pour manze, pli bon corn beef.’’ I annan bann advert ki fer par sa bann dimoun ki pe fer vini sa.  Me parkont lontan – parkont ozordi ou pa vwar bann lezot keksoz ki nou dimoun lontan ti kontan manze en legzanp zanberik, boulgor; konmela pour ou ganny en pti pake zanberik ou a travay avek marse pour ou ganny en pake ou bezwen esper Chaka ler son stok i vini pour ou kapab gannyen ouswa kot Deenou apar sa tou sord kalite processed food, sa i ranpli letazer.  E ozordi Mr Speaker konmela ou ava konte konbyen dimoun ki vin travay avek en pti morso manze ki zot in kwi kot zot menm kot lakour.  Ou ava konte.  Konmela tou dimoun i manz take away e ou a reste etonnen Mr Speaker sa ta kalite lasos.  Mon lontan mon ti konn lasos siyav.  Konmela ou a nonmen kalite lasos sweet soy sauce, delicious sauce lot i annan langaz Sinwan lo la; lasos delwil Sesame oil i annan diferan i annan bann i sorti dan L’Inde lot, i sorti – name it Mr Speaker.  E se pour sa rezon ki ozordi Kanser in vin alarman e dapre bann Eksper sa i enn bann rezon ki sa i arive.  E ozordi ou pour pas dan bann fanmir mon asir ou, kot i annan zenn manrmay si zot pour monte aswar sa paran in kwi en letoufe karang, mon asir ou sa zenn pa pour manze ou pour manze ou letoufe ou menm.  Li i pour al laboutik i pour al rod son bwat bef, son bwat luncheon meat i pour rousi i pour manze i pour kit ou letoufe telekel dan kastrol.  Sa i montre ki lifestyle in sanze.  E Onorab Roucou i annan rezon pour vin avek sa Mosyon.  E mwan mon fyer pour koz lo sa Mosyon Mr Speaker.  Akoz mon’n vwar dimoun ki’n mor avek sa maladi.  Onorab Roucou in osi mansyonnen kan en maladi koumsa i ariv dan fanmir, i pa afekte zis sa dimoun.  I afekte lafanmir antye e mwan mon’n eksperyans sa.  E la i fer mon mazin ler granpapa mon madanm ti pass away avek sa maladi.  Zis en mwan apre i ti vin pas en pe letan kot mon pour li vin rezouir son vye zour apre 8 mwan i ti tonm malad avek kanser.  E ou ti a vwar Mr Speaker lo son figir i ti en boug for solid, ler i ti dir ou i anvi manze – mon pa kapab.  Ti tris Mr Speaker.  E sa i fer mon rappel ler nou ti pe check out dan sa lasanm lotel, pa lasanm lotel sa lasanm Lopital sa lasanm prive kot nou ti été apre ki ti mor le 31 enn son garson ti dir mwan,’’ ..men konmsi nou pe check out dan en lotel.’’  Konmsi ou ti vwar sa latristes lo sa fanmir Mr Deputy Speaker e i ti tris.  E sa i fer mon mazin en madanm en zenn madanm ki mon konnen – dernyen fwa ler nou koze i pe rakont mon mannyer son papa in ganny diagnose avek Kanser Prostat e ler i pe akont mon sa mon santi sa latristes, me selman mon pa ti montre li kontrer mon ti donn mon ti donn li bann mo lankourazman.  E senpleman ou ti vwar Mr Speaker akoz sa manm fanmir ti en dimoun, ki ti ed li dan son lavi toulezour avek son travay.  Li ki fini tar i ti annan son zanfan lekol, se li ki ti al anmase anmenn kot lakour kot granmanman okipe li ler i fini tar anmase.  Ozordi in perdi lanmen drwat e sa ki ti sagrinan Mr Speaker ler i akont mon premye zour ki son papa ti fer premye chemo, ti enkrwayab; pa ti kapab fer nanryen.  E tousala bann leksperyans ki serten dimoun in pas e ki mon felisit Onorab Roucou pour vin avek sa Mosyon.  E kot mwan Mr Speaker mon mazin enn mon fanmir pros ki ler mon pe asize lo lili i pe dir mon dir ou madanm si napa en Dokter ki byen avek i a donn li en pti latizann en pe pli for pour kalme sa douler zis mazinen en dimoun pe dir ou sa.  Savedir i montre ou ki sa maladi Mr Speaker, i en maladi ki terib e nou konman en Lasanble mon krwar nou bezwen rod tou fason pour nou rod en mannyer pour adrese ki dimoun pli konsyan ki pe arive.  Mr Speaker me selman parfwa i annan bann defayans kot Lasante kot parfwa i annan dimoun ki per pour fer bann tes senpleman akoz parfwa zot fer en tes zot ganny dir ki Kanser me pli tar ler zot al aletranze zot vwar ki se pa Kanser me en lot maladi.  I annan dimoun ki’n perdi en kote tete konmkwa zot in dir Kanser apre ler zot arive i dir pa Kanser.  Mon rapel enn en zanmi Onorab Ramkalawan Onorab Ferrari i konn li byen ki ti ganny diagnose avek Prostat, me kan zot ti al Reunion zot ti fer bann tes ti trouve ki non e sa i met dout dan lespri dimoun si zot pour al fer e zot konnen tes prostat ki fason i fer e i dekouraz bann zonm pour al fer nou konn tre byen sa nou.  Sanmenm sa nou trouve bokou bann zonm ozordi pa le fer tes pour Prostat Mr Speaker.  E mwan mon krwar Lasante i merit met plis zefor pour fer sir ki zot bann tes zot bann tes i kredib.  La parey sa biopsy ki fer kot Lopital Mr Speaker, nou bezwen demande ki degre kredib i kredib.  E souvandfwa bann Dokter bann referral ki ganny fer ler dimoun i ganny soz, i ganny fer an retar – i ganny fer an retar.  E by the time by the time sa dimoun i ariv Lopital zot fer bann lezot tes sa Kanser in fini spread.  E sa en febles ki lo Minister Lasante ki mon krwar nou merit adrese e vwal ki lenportans Mosyon Onorab Roucou i vini.  Onorab Roucou in koz lo statistik mon pa pour koz lo statistik Mr Speaker ler mon get sa statistik ki Onorab Roucou in donnen, i fer mwan per.  I fer mwan per e mon pa pour koz lo la mon a les bann ki kapab soz fer sa.  Akoz i montre ou ki sa sityasyon Kanser dan pei i enn ki’n ariv tre alarman e nou pour bezwen fer keksoz pour deal avek sa.  Mr Speaker ozordi Minister Lasante, mon krwar i merit pran lo li menm pour fer dimoun okouran en ta keksoz.  Ozordi i annan dimoun i dir ou ki Kanser i annan dimoun ki sorti dan en fanmir ki annan Kanser.  Alors i bezwen ganny Kanser swa son pti zanfan pour gannyen me parkont ozordi i annan bann maladi ki si ou gannyen i kapab fer ou ganny Kanser.  Bokou dimoun pa konnen.  Legzanp Dyabet i enn.  Dernyen fwa mon ti pe koz avek en profesyonnel ki deal avek sa bann zafer i ti dir mon ki Dyabet i osi en fason ki kapab trigger Kanser.  E bokou dimoun – bokou pa konnen.  E la Mr Speaker mon anvi an konklizyon ki Minister Lasante i bezwen entansifye zefor lo bann progranm, lo bann  pti ‘Spot’ lo televizyon pour endik dimoun pour sansibiliz dimoun lo sa maladi; pour gid zot lo bann prevansyon kot sa bann maladi.  Sa mon krwar en keksoz ki mon krwar Minister Lasante i devret bouz lo la, akoz vi ki nou pe vwar bann advert ki pe ganny fer pour advertise bann prodwi ki swadizan i kapab trigger Kanser.  Alors Minister Lasante osi i bezwen pran son responsabilite fer bann ‘Spot dir lo sa bann keksoz, pour ki dimoun sirtou nou bann pti Seselwa ordiner ater ki petet pa pe konpran sa bann keksoz, ki pe krwar zis Kanser ou gannyen akoz i en maladi.  Me zot ava konnen ki kanser ou kapab ganny li dan diferan form.  Mr Deputy Speaker mon pour termin la mon anvi dir avek Onorab Roucou kont lo mon sipor lo sa Mosyon, akoz mon konnen kwa ki sa maladi mon vwar dimoun ki’n soufer avek e i en maladi ki fermal.  Mr Speaker mersi bokou.

 

MR DEPUTY SPEAKER

Mersi Onorab Loizeau.  Onorab Ernesta.

 

HON PAUL ERNESTA

Mersi Mr Speaker e bon apre midi tou bann koleg.  Mr Speaker letan mon konmanse i enportan pour mwan rekonnet tou bann viktim.  Ozordi nou annan bann malad bann dimoun ki malad pe viv avek sa maladi.  E dezyenmman i annan dimoun ki’ osi fini pass away avek sa maladi.  E i annan bann fanmir ki pe soufer akoz sa maladi e sirtou bann fanmir kot bann defen in fini kit zot.  Actually dan mon distrik parey nou, dan en fason ou en lot direk ou endirekteman nou annan en pros ouswa en dimoun ki nou konnen pe soufer avek sa maladi mon dir tou sa bann dimoun ki pe soufer avek sa maladi kontinyen lalit i annan lespwar.  I annan dimoun parey Onorab in mansyonnen pli boner, i annan ki annan depi 7an pase in dekouver sa maladi ziska ozordi zot ankor pe viv.  E zot osi bann ki dan sa malad ozordi zot osi zot a kapab viv pareyman e menm pli lontan.  Mr Speaker Mosyon anmennen par Onorab Roucou, i enn ki letan mon get li i annan de laspe; i annan sa laspe kot in koz logmantasyon dan ka dan sa bann ka Kanser ki pe devlope ogmante dan pei.  E dezyenmman in koz osi pour nou vwar anmenn plis resours pour kapab ede dan deteksyon boner mon mazinen i pe koz dan deteksyon boner pour evite ki nou ganny plis bann kalamite bann ka defen ki arive dan pei.  Letan mon analiz sa Mosyon, mon gete ki pe arive otour nou.  Mon gete ki Minister Lasante pe fer pour li kapab ede dan sa sityasyon.  Ozordi nou’n tande ki i dir met plis sansibilizasyon Minister pe fer i bezwen ganny fer.  E mon rekonnet ozordi i annan bokou sansibilizasyon ki ganny fer si nou pour al dan en klinik dan tou klinik kot nou pour ale dan nou distrik, nou pour vwar i annan bann leaflet ki’n ganny mete ki koz lo la; nou pour vwar i annan bann posters partou dan klinik ki ganny mete ki koze lo sa size diferan Kanser i ganny koz lo la.  Me selman son rezilta i pa pe transmet dan sityasyon realite ozordi.  Mon’n ganny sans relate en pe avek bann statistik parey Onorab Roucou in ganny fer mon rekonnet Mr Speaker ki sa sityasyon i vreman alarman.  Zis pour sa dernyen 5an, nou’n vwar in annan en logmantasyon dan ka Kanser ki’n annan.  Pour 2015 nou’n vwar pres 300 menm si pa plis dimoun ki pe ganny afekte avek sa maladi e pli trakasan taler enn in dir dan son distrik i annan plis madanm ki pe soufer avek sa maladi, me nasyonalman sityasyon i plis nou bann zonm ki pe ganny afekte avek sa maladi.  E plis bann ka i baze lo bann ka Prostat ki nou ki pe afekte nou bann zonm.  Nou al pli lwen get nou bann madanm 2011 nou vwar ki Kanser – ka Kanser parmi bann madanm ti bann madanm 50an above.  Me ozordi sityasyon realite i diferan.  2015 nou vwar ki sa age group in tonbe.  Olye nou pe vwar bann madanm 50an pe ganny Kanser nou vwar ki bann zenn 35an an montan pe ganny Kanser.  Sa i en pwen pour nou konsernen Mr Speaker.  Akoz mon dir nou konsernen i annan de group laz nou dir tou keksoz nou annan nou bann zenn ki preski bracket nou bann zenn e osi nou workforce nou pei, ki pe ganny afekte.  E plis zot bann ka i ganny afekte avek ka Kanser Tete e vwala bann konsern en pe ki pe ganny afekte nou bann kominote e nou pti pei ki pe ravaz nou pti pei Mr Speaker.  E letan mon al pli lwen annou gete kwa ki pe kree sa sityasyon e i annan diferan lesplikasyon ki’n ganny donnen ozordi dan sa Lasanble pour zistifye kwa ki pe kree trigger sa logmantasyon dan ka Kanser dan nou pei.  Me resers in prouve actually nou pa kapab dir relman what is the real cause ki pe koz sa maladi menm dan pei e osi dan lemonn antye.  I annan diferan teori par egzanp ki mon eksplike, me selman ase konkret napa lo la.  Mon al get ankor letan nou get sa bann group laz ki pe ganny afekte mon vwar Mr Speaker ki parmi bokou nou lifestyle pe ganny sanze en lenformasyon ki mon gannyen kot klinik letan mon gete tou rikord lo Family Planning in desann dimoun pa pe ale bann zenn madanm pa pe ale pour fer zot Family Planning.  Me dan lot kote nou vwar en logmantasyon dan teenage pregnancy e sa ankor i dir nou en keksoz.  Ozordi nou popilasyon pa pe neseserman pran son responsabilite as they should.  Parey Onorab in mansyonnen pli boner nou pe les responsabilite nou prop lasante dan lanmen Gouvernman, dan lanmen Leta.  I en moman kot nou tou nou bezwen pran nou responsabilite.  Ozordi dan tou klinik sa bann servis pe donnen gratwitman, kot nou, nou annan zis pour ale pour nou al fer nou bann tes kot enn i ava ede pour nou kapab detekte sa bann ka boner e ganny tretman apropriye.  Letan mon get sityasyon Sesel ozordi konpare avek L’Angleterre en Onorab in dir pli boner nou merit antre dan si ou le ankouraz bann dimoun pour pey lasante.  Me sa i pa neseserman en Polisi nou Gouvernman dizour.  Me keksoz ki nou kapab fer parey L’Angleterre, L’Angleterre i annan anba son NIHS i annan son swen lasante gratwit pour tou piblik; en pei ki devlope e pli devlope ki nou e nou on the other hand nou pe demande pour ki nou anmenn en gratwit peye pour nou lasante pour nou bann dimoun.  Me keksoz ki nou kapab fer Mr Speaker nou kapab antre an partenarya antre an partenarya avek en Lopital prive swa dan L’Inde ki zot tretman spesyalize, kot nou vwar bokou nou bann dimoun nou bann Seselwa i bezwen pey en avyon al laba dan sa pei dan L’Inde whatever pour li fer son bann tes e egalman ganny son tretman e nou kapab Mr Speaker e anmenn sa menm servis lokal.  Kot sa i ava fer ki sa dimoun olye al aletranze i kapab al lokalman ganny son tretman a en pri pli meyer marse Onorab Aglae in dir pli boner, sa tretman sa swen pour sa servis pri pour sa servis i vreman ser.  Si mon rapel byen in dir ant R200 mil a R1milyon.  Me olye sa dimoun a pey son R200 mil i ava kapab pey sa servis isi ki i a ganny li en bon tretman byen avanse.  So Mr Speaker mon krwar nou kapab fer en pa dan sa direksyon.  Apre en lot keksoz ki nou kapab fer mon pa pe vwar lasante pe al ver nou bann dimoun i annan enn in dir pli boner anba koko lo semen i annan nou bann Ners ki kapab al laba al kot sa bann dimoun i kapab sanmenm sa bann dimoun ki pa pe vini kot lasante ki pa pe vini kot sa bann servis al laba fer bann tes avek zot e ganny bann … ki kapab achieve bann detection e egalman ganny bann tretman apropriye.  Mon krwar Mr Speaker si nou fer sa i ava kapab ankor en lot mezir kot nou pe ede detekte lo bann swen lo bann problenm Kanser ase vitman, e osi ede anmenn tretman pli vit pour nou bann dimoun.  Avek sa Mr Speaker mon poudir atraver ou mon poudir Onorab Roucou ki sa size i en size ki ekstrememan enportan pour nou tou i tous nou tou, i tous lavi tou Seselwa e mwan mon pour donn tou sipor sa Mosyon e avek bi ki nou kapab ede anmenn en deteksyon pli boner pour nou bann dimoun.  E petet ede calm down sa sityasyon Kanser ki pe arive dan nou pei.  Mersi Mr Speaker.

 

MR DEPUTY SPEAKER

Mersi Onorab Ernesta.  Onorab Adelaide.

 

HON FRANCOIS ADELAIDE

Mersi Mr Deputy Speaker bon apre midi ankor enn fwa zot tou.  Mr Speaker sa Mosyon ki Onorab Roucou in anmennen, mon poudir i en tre bon Mosyon.  E o konmansman mon lentervansyon ki pa pour tro long mon pour asir li ki mon pour donn li mon sipor.  Mr Speaker ler mon get sa Mosyon Kanser i fer mon mazin way back letan mon ti dan lekol primer mon ti annan en Miss ki ti apel Miss Sylvia Alexis i ti dir nou ki vwar mannyer lemonn pe ale pour annan bann maladi ki pour ganny anvoye pli tar pour nou kapab sanz nou fason viv.  I ti fer nou konpran ki Kanser i parmi enn sa maladi e la ozordi nou trouve poudir nou pe ganny Plague e i en maladi ki ti date bokou letan pase dan lepok Moses letan i ti pe liber son pep laba avek Pharaon e tousala i pe montre ou ki letan pe aprose.  E mon mesaz ozordi ki mon annan pour mon dir avek bann Manm Onorab Parti Lepep silvouple zot koz pre avek Gouvernman, dir zot Gouvernman in ler pour repantir dir zot Gouvernman in ler pour aret koripsyon.  Akoz tousala i ede pour ogmant kantite ka Kanser ki arive Mr Speaker kisisa Kanser, Kanser se parey Onorab Roucou in dir se en maladi ki nou mars avek me ki arive se nou bann selil i devlop an plis e se sa ki fer nou malad.  E mon osi mon aprann ki annan de kalite i annan bann ki B9 avek bann ki …. bann ki bouze apre bann ki pa bouze.  Si ou ganny bann ki bouze i pli danzere me bann ki pa bouze i pli kapab sonnyen me tousala i kanser e la ki nou pe demann Gouvernman pour petet revwar sa bann Polisi revwar metod petet teknolozi pour kapab petet kontrol en pe sa maladi kanser.  Mon krwar ki Seselwa i ava santi li en pe pli an sekirite pour li kapab viv en lavi en pe pli long mon krwar nou tou nou anvi viv lavi en pe pli long me si Gouvernman i aktyelman angaz li dan sa lager kont kanser mon krwar nou pour en pe pli byen.  Mr Speaker ler mon pe dir sa zot pe demann mon akoz mon pe dir koripsyon i ede pour kanser Mr Speaker nou ganny lapli mazinen nou ganny lapli 365 zour dan en lannen nou kapab ganny li toulezour menm nou kapab ganny li lanmwatye lannen.  Ki arive, nou delo i al zis dan larivyer ki nou fer nou, nou donn nou zabitan delo desalinasyon pour bwar.  Mr Speaker delo desalinasyon in prouve poudir petet i kapab en sours i kapab ede pour Kanser Mr Deputy Speaker nou annan par egzanp Baie Lazare nou annan nou bann gran later lagrikiltir e mon annan mon en zabitan Baie Lazare ki li in anvi plante pour li fer son organic farming.  Ozordi son file i ankor lo latab Prezidan Faure.  I pa ankor kapab ganny en larepons si i pour kapab ganny en bout later si i pa pour gannyen akoz i annan serten lenterferans avek petet avek koneksyon e ki nou vwar li petet pe ankor pe debourye i pa ni konnen si i pour ganny en bout later si i pa pour ganny en bout later e si i pour ganny fer lazistis.  Sa se byensir Mr Hansel Moustache.  Mon krwar zot in trouv li lo Facebook lo bann petet bann magazin ki pe promot son organic farming me partou kot i ale i ankor pe ganny en pe problenm.  Mr Speaker i annan en lot fason ankor nou pe trouve ki nou pe entrodwir nou pe enport bokou bann petet bann komodite ki menm petet Lasante Piblik pa pe fer li son devwar pour al gete pour al verifye.  E nou pe trouve menm dan laboutik ki nou annan bann marsandiz ki p expire lo bann shelf e ki napa personn ki pe pran aksyon Mr Deputy Speaker tousala i prouve ki dir zot kapab petet ede pour fer dimoun devlop Kanser e si nou pa pran aksyon byento i pour petet maladi limero enn dan Sesel i pour petet sirmont maladi kardyovaskiler.  Mr Speaker en lot keksoz ankor ki mon trouve eskiz mon petet mon osi mon annan en zanmi ki fer bann zafer delo, nou’n vwar bann transportasyon delo dan bann pick up ki i pe ganny ekspoze avek soley e nou tou nou’n trouve ki petet nou tou nou konnen ki bann plastik i ganny sofe e ler i pe ganny ekspoze avek manze i annan bann ka … agent material ladan ki petet i kapab ede pour ogmant lakantite ka Kanser.  Me nou pa pe trouv sa konman petet en mwayen ki nou kapab petet kapab kontrole e anpes sa bann keksoz antre dan sa bann delo antre dan sa bann manze.  Me nou vwar li ok.  E isi ou nou tou nou konnen ki i annan soley, soley osi i enn ede pour donn kanser pour fer dimoun ganny Kanser e tousala nou pre dispose avek sa bann keksoz.  Me selman petet si ti annan en pli bon petet sistenm lenformasyon ouswa si dimoun i en pti pe pli veye, en pti pe pli konsernen petet en pti pe pli met nou dimoun petet pour fer zot konpran poudir tou sa bann keksoz, i kapab ede pour fer kanser petet i ti ava osi ede e petet pez en pe lafason ki dimoun i ganny Kanser.  Mr Speaker nou trouve 2an pase 3an an pase Perseverance kot nou Gouvernman ti en blok flat avek leternik ti pour al met Seselwa ladan kan nou konnen poudir leternik i en keksoz ki donn Kanser.  E si Kreol pa ti zanmen kapab koze sa bann lakaz bon marse nou ti pour donn sa bann senp Kreol e ki ti pour arive Mr Speaker nou ti pe met zot direkteman avek lanmor.  Se sa ki mon pe dir zot koripsyon akoz sa larzan nou ti kapab ganny nou en lakaz an blok akfer nou prefere al fer lakaz leternik pour donn nou bann dimoun pour ki nou dir zot viv ladan?  Mr Deputy Speaker tousala se en fason ki mannyer mon pou dir avek zot laba bann Onorab Lepep koz avek zot Gouvernman; mon pa pe blanm zot mon koz avek zot Gouvernman dir li sa i mal.  E nou konman Seselwa, nou pa sipoze pe fer sa avek nou kanmarad se sa akoz mon dir zot koripsyon i ede pour fer kanser ogmante.  Mr Speaker mon konnen letan pa tro dan nou faver mon ti a kontan koz en pe plis lo la, me selman mon pour termin mon lentervansyon petet lo sa not avek en pti rekomandasyon.  Mr Speaker ou konnen poudir ki Seselwa ler i ariv lo son lasante Seselwa i en nasyon ki pour fer tou pour son lasante pour peye mannyer ou anvi si li i pour ganny son lasante i pour ganny son lasante Mr Speaker Seselwa pour peye.  I nepli sa letan parey Onorab Aglae ti dir taler ki Seselwa pa kapab peye Seselwa i kapab peye akoz zot deza pe peye zot deza pe er li so petet i ava annan bann lezot Scheme bann lezot fason ki Seselwa i kapab kontribye pour zot kapab ganny en lasirans avek zot lasante; akoz mon konnen ki sa Seselwa i pare pour fer.  2 pti rekomandasyon Mr Speaker, petet lo sa zafer kanser petet donn plis pouvwar lasante piblik, pour deal avek bann ka i annan bann ka ki lasante piblik pa kapab deal avek tel parey bann lakaz ki ankor annan leternik, lo la ki petet i annan zot bann dimoun i annan bann dimoun bann vwazen o-bor ki pe konplent.  Me Lotorite Lasante Piblik i pe vwar li napa sa pouvwar pour petet deal avek sa bann dimoun, akoz lalwa pa permet me si petet nou ti kapab anforsi sa bann Lalwa e donn Lotorite Lasante Piblik sa pouvwar petet i ti kapab ed en bon pe dan sa cause pour apes Kanser.  Mr Speaker apre en lot keksoz ki ti kapab ankor petet ankouraze pour fer ka Kanser desann se ankouraz plis later lagrikiltir les nou bann fermye plante donn zot plis petet bann fasilite akse avek larzan.  Nou pa bezwen vwar nou pe enport bokou bann legim enporte bokou bann lavyann enporte me nou ava plito pe prodwir li isi dan nou pei, e i pour bokou pli safe pour nou dimoun.  Of course apre pri i ava bezwen desann e parey mon pe dir i pour organik.  Mr Speaker mon pour fini lo sa not petet en lot dernyen pti rekomandasyon petet mon ti a ankouraz Gouvernman petet pour nou ankouraz bann envestiser, pour zot aste plis bann transpor refrizerasyon pour ki zot ava kapab re transport nou bann komodite dan en fason ki ava pli soutenab ki ava pli byen e nou ava ganny sa bann prodwir ki ava byen fre ki dan bon leta e sa osi i ava ede redwir Kanser.  Mr Speaker parey mon dir o konmansman mon bezwen koup en pe mon bann notes, me Onorab Roucou ou konnen ou pour ganny mon sipor pour sa Mosyon.  Mersi bokou.

 

MR DEPUTY SPEAKER

Mersi Onorab Adelaide.  Parey ou refer sorti letan pa dan nou faver mon ankor annan 6 Manm lo lalis ki pare pour entervenir avek mover Mosyon pour fer son konklizyon.  Mon ava demann bann Manm dan zot entervansyon annou en pti pe presiz annou konsantre lo merit sa Mosyon ok?  Onorab Sophola.

 

HON NOLINE SOPHOLA

Mersi Mr Deputy Speaker.  Mr Speaker sa Mosyon i tous en size sansib pour bokou.  Bokou nou, nou per pour koz lo la akoz pour serten nou de ki nou tann sa mo Kanser nou mazin lanmor me larealite i la nou bezwen koz lo la pour edik nou popilasyon.  Ka Kanser i vreman pe ogmante de zour an zour malgre tou zefor ki Minister Lasante pe fer.  Parey loter Mosyon ti dir kanser i tous tou kous nou popilasyon.  I pa swazir si ou zenn oubyen vye si ou ris oubyen mizer e menm si in deza pran enn ou plizyer manm dan ou fanmir ou non.  Toulezour i annan enn nou prop ser ou frer ki nou bezwen rann nou dernyen omaz akoz sa maladi.  I vreman difisil pour aksepte me lavi i kontinyen e nou bezwen fer fas avek la sityasyon.  Alor se sa rezon ki mon krwar ki nou bezwen fer en analiz profon, pour vwar ansanm akoz ki malgre ki tou zefor ki Minister Lasante pe fer ka Kanser i kontinyen ogmante.  Mr Speaker eski se pa nou stil lavi ki pe fer ki sa maladi pe ogmante de pli an pli dan nou sosyete?  Eski nou popilasyon i annan ase ledikasyon lo sa maladi?  Eski Minister Lasante i envestir ase e i annan ase lekipman pour servi dan deteksyon e prevansyon sa maladi pli boner?  Eski Minister Lasante i annan ase resours e tretman apropriye pour ede konbat avek sa maladi?  Loter Mosyon pe demann plis resours sirman annan plis resours imen finansyel avek enfrastriktir i ava ede, me mon krwar osi annan en protokol byen etablir e byen swivi i kapab egalman ede.  Annan resours imen pour kapab ede pour fer bann sesyon prevansyon vin pli pre par al dan bann kominote – parey enn in dir avan e zwenn avek piblik pour pas lenformasyon.  E se la ki bann pasyan ki dan dout a kapab devlop sa bon relasyon avek sa Zofisye Lasante.  E zot pour ganny ankouraze pour al fer bann diferan tes ki ganny ofer byen boner fodre nou dir e nou aksepte ki pa tou dimoun ki kontan al fer vizit lopital sirtou ler nou dir nou pe al fer en tes, akoz nou pa konnen ki nou pour ekspekte ki nou pour tande laba.  Me Minister Lasante i bezwen fer plis travay sansibilizasyon atraver medya non pa esper zis enn fwa dan lannen sa pa ase.  Training ek kondisyon travay, i zwe en rol enportan.  Plis ki bann travayer medikal i ganny formasyon zot pour pli byen ekipe pour ede dan sa lalit.  Kan bann travayer i byen ganny formasyon dan sa domenn zot a pli byen kapab delivre.  Me osi nou bezwen get zot kondisyon travay.  E sa i devret en kondisyon ki favorab, akoz i pa fasil pour anons move nouvel i demann bokou lo zot napa personn nou ki la ki ti a voudre dan plas sa bann dimoun pour anons move nouvel.  Kot counselling i konsernen sa osi i en pwen tre enportan akoz i tre sansib e delika lafason ki rezilta i ganny donnen avek pasyan e osi avek manm lafanmir.  Counselling i bezwen ganny fer dan en fason sistematik dan en landrwa apropriye parfwa sa kominikasyon ant pasyan ek responsab medikal pa pas byen.  Se pour sa rezon ki mon dir ki bann travayer medikal i bezwen ganny formasyon, e osi anliny annan bon kondisyon travay pour zot kapab delivre byen.  Alor mon krwar ki Minister Lasante, i bezwen ogmant son resours finansyel, pour ede amelyor tou resours dan Seksyon Prevansyon e deteksyon kanser.  Mr Speaker La Digue pa’n ganny eparnye avek sa maladi son to deteksyon i vreman o.  Mon ganny dir ki to prevalans kanser i pli o La Digue konpare avek lezot landrwa dan nou pei.  Alor mon pe demande ki Minister Lasante i fer en letid profon pour vwar akoz ka kanser lo sa zil i bokou an konparezon avek lezot landrwa dan Sesel.  En pwen ki Minister Lasante i bezwen tenir kont, mon ti fer resorti la dan sa Lasanble ki la fason ki bann manze konzele i ganny transporte i bezwen revwar.  Silvouple Minister Lasante azir lo sa pwen.  Mon pour sezi sa lokazyon sa Mosyon pour felisit lorganizasyon Non-Gouvernmantal Cancer Concern ki pe entervenir dan sa domenn e pe aport en sipor valab dan travay ki Minister Lasante pe fer.  Sa lorganizasyon malgre i napa ase resours in kapab fer son prezans konte lo tou nou 3zil prensipal.  Mr Speaker mon dernyen mo, se pour nou popilasyon.  Akoz nenport kwa ki Minister Lasante oubyen lezot lorganizasyon, i fer si nou popilasyon pa servi byen popilasyon ki nou gannyen, nou napa volonte pour pran responsabilite sa zefor ki pe ganny mete pour konbat sa maladi pa pour aboutir dan nanryen.  Alor mon ankouraz mon bann frer e ser Seselwa.  Pour servi byen bann servis deteksyon kan Kanser – ka Kanser ki Minister Lasante e lezot lorganizasyon pe ofer.  Annou pa esper tro tar.  Tou bann dimoun ki pe viv avek sa maladi oubyen en manm zot fanmir ou zanmi, mon dir zot pran kouraz e met zot konfyans dan nou Kreater.  Pour zot fanmir kouraz e touzour viv avek lespwar ki en zour en gerizon i a  ganny dekouver.  Avek sa detrwa mo Mr Deputy Speaker mon pour aport mon sipor pour sa Mosyon.  Mersi Mr Speaker.

 

MR DEPUTY SPEAKER

Mersi Onorab Sophola.  Onorab Afif.

 

HON AHMED AFIF

Mersi Mr Speaker.  Bon apre midi tou dimoun.  Mr Deputy Speaker mon konnen letan i pa dan nou faver, mwan osi mon pa pour tro long.  Mon pour zis konmanse an diran ki Lasante en Nasyon i vreman baze lo lasante son bann dimoun.  E Kanser dapre statistik ki nou annan, i enn bann pli gro koz lanmor.  E dan nou popilasyon mon krwar sa rapor ti 2012 ti dir i annan 453 dimoun ki annan lensidan Kanser parmi 254 ti annan bann zonm e 199 ti bann madanm.  Savedir pour sak 4 madanm i annan Kanser i annan 5 zonm ki annan Kanser.  Ler nou konpar li avek lensidan kanser dan larestan lemonn, petet i pa ankor élevé me ki élevé ou non si nou annan 453 dimoun dan nou pti popilasyon i tro bokou.  Pour mwan bokou lezot Manm Onorab in koz lo la i anmenn douler, i anmenn soufrans, i anmenn en kou pour nou tou ki bezwen soutenir en sistenm lasante, e alor merit sa Mosyon ki pe demande ki nou devret annan plis resours ki ganny met de-kote pour deteksyon avek tretman pour mon klerman i annan merit.  E mon asir Onorab Roucou mon sipor lo la.  Me ti a kontan osi dir ki apar-d deteksyon e tretman petet nou devret osi letan nou pe konsider tretman annou konsider ki i annan en kantite dimoun pour plizyer rezon zot trouve ki, zot ti a prefere al aletranze pour ganny serten tretman.  Parfwa byen zistifye pa akoz ki bann staff kot Oncology Department oubyen kot lopital zot napa konfyans ladan, me petet teknolozi ki egziste dan lezot pei e la mon pe koz parey Chennai mon pe koz La Reunion mon pe koz Sri Lanka kot bokou dimoun i ale.  Zot santi ki petet zot annan en meyer sans ganny dyagnoz avek en tretman ki pour anmenn en soulazman pour zot.  E mon krwar ki nou devret osi konsidere ler nou pe koz tretman – annou konsider pour nou kapab ed sa bann dimoun ki’n al laba ki’n pey dan zot pos pour zot ganny tretman oubyen parfwa zot ganny atraver Gouvernman, annou rod tou fason pour ed zot kontinyen ganny menm kalite tretman.  Dimans mon ti zwenn en dimoun ki li menm in al fer tretman Sri Lanka e laba sa Dokter in dir avek li petet ou solisyon se, i kapab ale e ou kapab ganny en pikir, e si ou ganny sa pikir i kapab ed ou sa se lendikasyon ki i ti gannyen laba.  Ler i ti vin Sesel zot ti dir avek li be i annan en lot tretman ki nou bezwen donn ou radiology avek tretman e pour li rezon in swazir pour reste isi i tre senp.  I napa sifizaman fon pour li al fer tretman aletranze e petet Gouvernman pour tarde oubyen pa pour donn li larzan.  Alor mon pour mon, mon krwar nou devret – pa zis lo en baz konpasyon me lo en baz kot si nou konnen en dimoun in konmans en tretman e en tretman ki valab en tretman ki ou anvi i kontinyen kapab swiv menm semen pour li ganny son solisyon, akoz nou pa fasilit li ?  Si par egzanp Gouvernman i dir nou pa pour kapab pey pour ou al Sri Lanka pour ou al ganny sa pikir, me Gouvernman i dir nou a ede nou a koz avek sa dimoun aletranze ou Konsiltan ou Dokter, nou a rode si nou pa kapab fer vin sa pikir isi.  Annan sa dyalog pa akoz in al lo li menm prezan inyor li la ou pe vin kot nou nou ki pe al ansarz ou annou pa pran sa lapros annou annan sa lapros proaktiv dan sa bout Mosyon kot i dir pour nou donn zot tretman pour sa kondisyon.  Annou annan en lapros proaktiv kot, nou pe osi al anver sa bann Dokter aletranze fer en swivi lo sa pasyan konpran en pti pe ki’n pase ki prezan ler i vin Sesel kekfwa i a kout nou mwens larzan; i a kout sa fanmir e pei mwens larzan akoz nou annan sa swivi avek bann Dokter aletranze.  Mon krwar sa ti en pti keksoz mon ti ava demande.  Osi dan tretman e dan nou pe koz deteksyon mon ti a osi demann Gouvernman pour konsider donn otan training, vi ki nou konnen sa i en maladi ki pe touy dimoun tou nou bann Dokter nou bann Ners nou bann dimoun spesyalize, pour zot kapab vreman alaoter kot dimoun i santi poudir tretman pour Kanser Sesel i vreman bon.  Akoz nou isi Sesel bokou dimoun ki annan larzan i dir be si ou annan larzan al La Reunion akoz? La Reunion in devlop en repitasyon ki bon.  Pareyman Chennai in devlop en repitasyon me petet pour Sesel i pour pli difisil pour nou ariv sa nivo, akoz nou popilasyon i pti pti volim Kanser ki pe pase i pti pti, Dokter pa pour ganny sifizaman bann leksperyans.  Me annou rod fason pour nou kapab ganny lekspertiz aletranze ki kapab ozordi annan sistenm online; i kapab fer analiz online ansanm avek zot kot zot kapab vreman pe koz avek bann Dokter bann Eksper aletranze ansanm avek ou pasyan isi.  E koumsa sa bann dimoun a ganny le meyer olye koz avek zis en Dokter ki li i pe vwar zis bann pasyan isi ki’n ganny kanser so sa mon krwar i en keksoz ankor mon ti ava demann Gouvernman pour konsidere dan lespri sa Mosyon.  Finalman nou’n koz lo la mon ti le zis dir ki pa zis deteksyon avek tretman ki nou bezwen mazin lo la me anpes ariv Kanser e bokou Manm in koz lo la – mon pa pour dir bokou me mon pa en Spesyalis medikal Mr Speaker me selman dan pe lir en pti pe lo la mon vwar ki si ou ankouraz dimoun lo manz plis fri avek legim sa i pour ede.  Alor fri avek legim osi fri avek legim lokal si nou kapab, parske nou konnen ki mannyer in ganny prodwir pran bann mezir pour anpes dimoun vin tro gro obésité i en problenm koup en pti pe lo lalkol e tousala se bann progranm ki petet i an deor Minister Lasante.  Me larestan Gouvernman osi i bezwen zwe en rol pour li kapab vreman ede pour koup lensidan Kanser.  e finalman i annan lo kote manze ankor bann lavyann sa ki nou apel zot apel sa processed meat i ede pour ganny Kanser ankor si nou kapab atraver Minister Lagrikiltir avek Lapes ankouraz plis prodiksyon lokal.  Tousala se bann keksoz ki pour ede pour redwir sa problenm e an menm tan nou pe redwir sa problenm pour bann ki deza la annou rod fason pour vreman donn resours.  Alors mon ti a kontan donn Onorab Roucou mon sipor.  E mon konnen si Gouvernman i swiv sa laniy nou pour anmenn en meyer kalite lavi pour nou pei.  Mersi bokou Mr Speaker.

 

MR DEPUTY SPEAKER

Mersi Onorab Afif.  Onorab Ghislain.

 

HON CHANTAL GHISLAIN

Mersi Mr Speaker.  Mr Speaker mon pa pour tro long lo sa size me selman mon pour aporte mon soutyen pour Mosyon.  Parske i en Mosyon ki konsern nou tou i zis fer mon mazinen ki 5enm Lasanble zis le 23 Oktob 2012 Onorab Jennifer Vel ti anmenn en Mosyon parey me li i ti pe demande ki Minister Lasante i fer en letid lo Kanser avek bi pour redwir son prevalans.  E pour fer bann deteksyon pli boner.  I byen note osi ki depi 2008 Minister Lasante in fer provizyon pour etablir en National Cancer Registry e laba i annan de travayer a plen tan mon aprann sa e se dan sa Unit ki anrezistre tou bann detay ka kanser ki annan dan popilasyon, se laba ki sa bann detay i ganny garde.  E fodre osi note ki Mr Deputy Speaker ki fodre osi note Mr Deputy Speaker ki lanrezistreman bann ka Kanser mon aprann ki i pa mandatwar isi Sesel pour ki okenn resers osi ki kapab ganny fer i enportan.  Alors ki sa bann lenformasyon i kredib dan Sesel.  Pour osi annan tou sa bann lenformasyon kapab ganny anmase fodre tousala i kontinyel i enportan okenn statistik ki ganny kolekte sa osi i byen presi.  E sa i aport lo bann paramet e kriter ki byen defini.  Tou sa mon asire ki Onorab Roucou i bezwen konnen parske in travay dan sa bann in Ners i konnen sa bann zafer.  Sa lenformasyon ki nou pe koz lo la i bann i konpri bann karakteristik tou bann dimoun ki ganny diagnose avek Kanser rezilta tretman e osi lentervansyon ki pour swiv apre.  Sa i neseser pour etablir sa trend lo ki kalite Kanser ki pe devlope dan nou pei dan nou popilasyon e osi dan ki laz lenformasyon ki Minister Lasante i annan mon aprann i date depi 2008 e touzour dapre statistik in montre ki nonm ka kanser anrezistre ziska la i 1,922 ka, ladan plis ki 500 pasyan in fini mor avek sa maladi.  Mr Speaker i bon osi note ki Minister osi i antreprann en letid lo Kanser an 2014 lo bann fakter de risk ki kapab okazyonn sak bann kanser e nou ganny dir ki Minister in konmans osi teste lavyann enporte e lokal pour ormonn e antibiotics pour prevansyon Kanser.  Akoz i annan ormonn osi ki annan ki kapab osi koz kanser e mon aprann osi ki sa letid i on going Mr Speaker e la mon pe fer en lapel avek Minister Lasante omwen vin devan Lasanble e vin prezant nou avek rezilta preliminer sa letid ki zot in fer.  I byen osi note ki pli nou detekte diagnose Kanser pli boner i pli bon e alors tretman i vin osi pli efikas.  Sesel i annan li en popilasyon avek en kantite dimoun aze e in prouve ki prevalans Kanser dan dimoun aze i osi tre o akoz zot prone pour kapab ganny Kanser tel ki Kanser Prostat e osi Kanser Kol Matris.  Alors i enportan nou bann zonm 40an an montan zot al fer zot bann tes kanser prostat pour redwir sa risk pour zot kapab devlop sa maladi.  E osi bann madanm zot ganny demande pour zot kapab vin fer zot tes Pap Smear byen regilyerman.  I annan menm tes pour Kanser Tete ki Minister i organize regilyerman, e i annan plis dimoun ozordi ki pe viv avek kanser ki fer ki toultan nou krwar ki bokou plis ka kanser dan pei.  Sa i akoz bokou bann deteksyon i ganny fer ase boner dan bokou ka mon pa pe dir toultan i le ka.  Me selman dan bann ka ki dekouver e ou vwar bann dimoun ki pe viv avek kanser mon konn dimoun ki’n viv over 25 years avek Kanser Tete.  I annan ki pe viv zot in koup en kote tete e zot pe viv byen normal en lavi normal.  Mr Speaker si zis pour re sot en pti pe lo resers lo Kanser i kapab pran diferan lapros savedir kwa ki fer dimoun ganny kanser par egzanp sa i osi en size ki tre gran akoz diferan Kanser i osi annan diferan lakoz.  Lafason viv konsonmasyon sigaret konsonmasyon lalkol nou ladyet fakter dan lanvironnman i parmi bann lakoz bokou Kanser selman mon pa’n tann sa enn lo koripsyon mwan en.  Me lakoz plizyer Kanser pa ankor ganny dekouver petet koripsyon i a dekouver ladan, nou pa konnen nou byen note osi ki nou kapasite resers pour aprofondir dan lakoz Kanser isi Sesel i ase limite.  Fodre nou admet sa me resers fer dan lezot pei avek plis resours ki nou i osi relevan pour Sesel alor nou swiv lo la.  Mr Speaker mon mwan Oktob parey nou tou nou konnen i mwan Kanser en mwan kot nou tou nou koz lo kanser donk i apropriye ki nou osi bann Leaders ki lavwa osi nou kominote e nou koz lo kanser.  Nou mazin nou bann zenn frer e ser manman papa e zanmi ki’n perdi batay kont sa maladi; bann ki ankor pe bataye avek sa maladi e bann ki’n fini osi perdi lespwar, nou mazin zot dan sa moman.  Me dan tousala nou touzour mazinen ki Kanser i selman en letap dan nou lavi, me non pa zistwar nou lavi antye.  Apre bann maladi kardyovaskiler parey Loter Mosyon in dir kanser i 2enm maladi pli komen isi Sesel sityasyon kanser isi Sesel i en konsern pour tou popilasyon e tou profesyonnel ki travay dan Onchology dan Lopital Sesel.  Akoz ler en dimoun i ganny Kanser lafanmir antye ou a krwar i ganny sa maladi.  Akoz?  Akoz i afekte zot tou.

So Mr Speaker nou koz lo bokou sa bann dimoun ki ganny kanser, la zis La Digue nou’n perdi 2 manman, 2 zenn manman avek Kanser, i domaz me selman tousala i bann keksoz ki ase douloure e i bann letap ki bann fanmir i pas ladan.  E se pour sa rezon ki mon pe dir ki i byen ki nou koz lo sa pasyan li menm parske bann Ners zot annan zot letan, zot devoue, zot devour en kantite avek bann pasyan.  Me selman nou tant pour nou bliy sa pros, sa zanmi, sa zanfan, sa paran ki la ki li i bezwen fer fas avek tou sa letap maladi sa dimoun.  Sa dimoun ki malad li wi i pe swiv son tretman i osi annan bann letap ki i bezwen ganny counselling.  Me selman li i annan lespwar li akoz Ners i la, son dimoun i la, what about sa dimoun ki la obor li, li ki ganny afekte, li ki pe vwar tousala so nou, mon pe demande ki ou mete dan ou konklizyon ki nou annan plis bann dimoun bann counsellors ki kapab counsel bann pros, bann dimoun ki demen zot osi zot santi zot prepare.  E i annan wi ki prepare me selman pa neseserman apre zot give up e i fatig zot en kantite, nou vwar en kantite mon asire nou tou nou’n pas atraver sa bann sityasyon nou’n vwar zanmi, nou’n vwar bann zanfan kot i perdi e zot napa sa soutyen, zot napa sa counselling ki zot pas atraver.  So mon pour aret la mon pa pour, mon kapab koz en kantite lo la, me selman mon pour zis aret la pour Loter Mosyon mon pour siport ou Mosyon.  Mersi.

 

MR DEPUTY SPEAKER

Mersi Onorab Ghislain.  Onorab Woodcock.

 

HON WAVEL WOODCOCK

Mersi Mr Speaker mon a sey fer li pli kourt ki posib.  Mr Speaker mon a komans mon lentervansyon par premyerman senpatiz avek tou bann fanmir Seselwa ki’n perdi en manm fanmir ou en lot atraver sa maladi, e osi mon anvi donn mon soutyen, mon sipor okenn dimoun ki ozordi in ganny diagnose avek sa maladi.  Mon konpran soufrans ki vin avek sa maladi Kanser, annefe i annan 3 manm mon fanmir ki’n ganny diagnose dan lepase avek Kanser, 1 in mor mon kouzen avek Kanser disan i ti annan 1an pli zenn ki mwan e an se moman la i annan enn ki terminal; enn in nobou sirmont sa maladi atraver tretman ki in fer aletranze.  E mon annan 2 zanmi vreman pros 1 mon aktivis osi tou, tou le 2 in ganny diagnose avek Kanser; 3 zanmi ki’n mor resaman Praslin en zanmi lafanmir en madanm ki ti anmenn mon lekol dan mon letan lanfans, parmi sa 3 zanmi en garson menm laz avek mwan fek kit nou.

Mr Speaker i annan en kantite ka Kanser Sesel e en kantite an lanmor akoz Kanser e i pa zis ler mon pe koz Sesel mon koz osi Praslin, Praslin pa’n ganny eparnye, annefe Praslin, i en kantite dimoun ki’n ganny diagnose avek Kanser ki’n perdi lavi resaman i ase o e i vreman, vreman alarman.

Mr Speaker enn bann problenm ki an se moman ki plizyer bann dimoun ki’n ganny diagnose avek sa maladi, e menm bann ki perdi zot lavi dan lepase i konplent, e bann manm fanmir se ki i annan en problenm, se ki Gouvernman pe tarde detekte bann ka Kanser.  I annan dimoun ki’n ale vini Lopital e zot in menm ganny diagnose avek tou sort lezot kalite maladi.  I annan dimoun ler zot in ariv staz 3 ou 4 Kanser ouswa zot in vin terminal ki Lopital prezan ki zot in detekte ki sa bann dimoun zot ganny Kanser.  Mon a donn ou en legzanp en manm mon fanmir mon pa pour dir lekel in ale vini Lopital zot in diagnose li avek pneumonia e manm fanmir ti bezwen met larzan ansanm pour anmenn li an L’Inde, e ler i ariv laba zot in vwar son staz Kanser ti ase, ti vreman grav.  E zot ti’n propoze pour fer loperasyon me ti kout larzan pour fer sa, in retourn Sesel, ler in troun Sesel in dir koumsa pa bezwen fer sa loperasyon i pour bezwen fer Chemo.  Me selman sa latizann ki zot ti’n propoze pour li servi L’Inde ler in ariv isi zot ti napa sa kalite latizann.  E alor zot in dir li i bezwen servi en lot latizann; en lot kalite tretman ki pa neseserman ed li e sa en defayans.  E mon krwar Onorab Gervais Henrie mon krwar ki’n mansyonn sa or Onorab Afif, ki enn-ler nou bezwen gete si en dimoun in al deor in ganny en serten, Dokter in donn en preskripsyon in dir servi en kalite tretman me ler nou vin isi nou oule sanz sa tretman, nou oule donn li en lot tretman, en lot kalite latizann ki pa neseserman ed li.  Nou bezwen follow up akoz ki arive enn-ler mon santi Mr Speaker ki ennler nou standar lasante lo Sesel i pa lo sa nivo.  Akoz ki ou krwar poudir bokou Seselwa i sorti isi plifere al deor?  Akoz standar nivo lasante ki, sistenm lasante ki nou pe servi, ki nou pe ofer Sesel i pa vreman a la nivo, a la oter a sa standar ki pe ganny servi aletranze.  Standar latizann pour chemotherapy ki pe ganny donnen isi i pa lo nivo i pa standar ki i pe ganny servi dan bann lezot pei swa L’Inde, swa Sri Lanka kot bokou bann Seselwa i kontan ale.

E Menm Mr Speaker i annan bann lekipman ki nou pe servi isi kekfwa i pa lo sa alaoter, i pa sa bann kalite lekipman spesyalize.  I mank nou sa bann kalite lekipman ki pe fors Seselwa pour zot plis ou mwen al aletranze pour zot rod sa, zot lasante.

Mr Speaker mwan mon pe dir keksoz ki mon’n remarke se Gouvernman parfwa kot nou envestir larzan nou pa’n neseserman envestir larzan dan landrwa, kot nou ti merite, 300 ekek milyon in ganny envestir dan bann Irish ki ozordi nou pa vwar nanryen ki’n abouti nou ki’n anmenn Sesel, sa R300 milyon kantite lekipman nou ti’n kapab aste avek ki ti pour benefisye bann pasyan; pa zis ek Kanser, me bann lezot maladi ki ozordi nivo bann ka, bann case pe ogmante dan nou pei Sesel.

Mr Speaker en keksoz ki nou pa oule aksepte, be nou bezwen face larealite e mon bann frer lot kote nou bezwen agree, nou bezwen face larealite pa zis Kanser plizyer lezot maladi, nou Gouvernman Sesel, sa Gouvernman Parti Lepep in fail nou sistenm lasante Sesel, nou bezwen aksepte.  E la prezan nou bezwen get devan pour nou amelyor sa sistenm lasante e anmenn li lo en lot nivo.  E en fason pour fer sa, se pour nou envestir dan nou sistenm lasante, envestir dan bann lenfrastriktir; envestir dan bann lekipman ki nou bezwen ozordi ni menm dan nou bann Profesyonnel, dan nou bann Ners, i annan bann Dokter, bann Pharmacist, bann Profesyonnel Medikal nou pa pe envestir ase ladan san kont bann lekipman ki nou bezwen, bann lekipman neseser ki nou bezwen ki nou napa ozordi dan nou pei Sesel.

Mr Speaker Seselwa in perdi konfyans dan sistenm lasante Sesel.  Nou tou nou bezwen admet sa, Seselwa in perdi konfyans dan sistenm lasante Sesel zot prefere al at aletranze pour fer tretman, mon dakor Mr Speaker dan nou Konstitisyon vre i dir ki, “lasante i gratwi, lasante i pour nanryen,” me selman kantmenm i dir dan nou Konstitisyon i dir pour nanryen nou bezwen ofer quality health care, nou pa kapab dir akoz i dan nou Konstitisyon pour nou donn lasante ki prezan nou pour donn bann lasante ki pa lo sa nivo.  Nou bezwen élever nivo nou lasante Sesel e i komans par envestir dan bann lekipman e bann Profesyonnel, bann Expert ki nou bezwen dan nou pei ozordi.

Mr Speaker i annan plizyer case Sesel ki Dokter in dir pa kapab fer nanryen, menm bann case, i annan case kot en dimoun i annan problenm pous, ler i al kot Dokter i perdi son lipye, ou konnen i annan bann case ki Dokter pa kapab fer nanryen me ler sa dimoun i al deor i fer 1 semenn detrwa semenn deor ou detrwa mwan deor ler i tournen in ganny gerizon pour son maladi; ki pe montre ou poudir nou’n nivo lasante Sesel i pa alaoter.  E nou bezwen rod en fason pour nou fer sa monte, e sa fason se envestir dan ban Expert e envestir dan bann lekipman ek bann lenfrastriktir neseser ki nou bezwen; annou envestir osi dan bann Profesyonnel, train bann Profesyonnel dan bann diferan domenn, expertise dan bann diferan field, mon pa konnen mwan eleman lo sa kote me selman nou bezwen envestir dan nou bann Profesyonnel.  E osi keksoz ki nou pe fer Mr Speaker nou depan tro bokou lo etranze, nou annan en kantite Seselwa Profesyonnel, annou envestir dan nou bann Dokter Seselwa, annou envestir dan nou bann Ners, annou envestir dan bann dimoun donn zot sa bann training, donn zot sa bann bagaz ki zot bezwen pour zot kapab retourn Sesel e tret nou bann Seselwa.

Mr Speaker ozordi si nou pe vwar bann Lorganizasyon parey ‘Make A Child Smile,’ Cancer Concern, se akoz Minister lasante pa pe fer ase pour éleve standar nou sistenm lasante.  Paran i bezwen pas partou tap laport isi, tap laport laba pour rod led pour li ganny en pti fon en pti larzan pour li anmenn son zanfan aletranze pour li kapab ganny en tretman.

Mr Speaker mon fek deal avek en case resaman pa bokou letan pase kot Dokter ti’n give up lo en zanfan, me akoz en Lorganizasyon ki tap laport in nobou kapab raise ase income, ase larzan sa zanfan in ganny anvoye aletranze in trete e ozordi sa zanfan in retournen e sa zanfan i an bonn sante.

Mr Speaker Gouvernman pa pe unfortunately zot pa pe envestir ase dan nou sistenm lasante.  Zot pa pe fer ase pour élever sa standar nou sistenm lasante Sesel.  Mr Speaker ozordi in fact Onorab De Commarmond ti avek mwan, Wavel William, Onorab Loizeau, ler nou ti L’Inde nou ti zwenn avek sa Foreign Secretary Lenn nou ti realize poudir i annan en kantite MOU, Onorab Valmont osi ti la ki Sesel in sinyen avek L’Inde.

E enn bann keksoz ki L’Inde i pare pour fer, L’Inde i pare pour ed nou avek en Lopital modern e spesyalize e menm avek bann Expert Medikal ki nou bezwen pour ed nou sistenm lasante Sesel.  Me ki nou vwar Foreign Affairs pe asiz lo la i pa pe fer nanryen nou Gouvernman, Gouvernman Parti Lepep pa pe fer nanryen pour angaz sa bann pei aletranze nou bann zanmi ki pare pour ed nou.

Nou bezwen, we need to be proactive si nou anvi, si nou vwar nou pe ganny difikilte kekfwa resours ou finansman pour fer sa annou tap laport nou bann zanmi, bann pei aletranze ki pare pour ed nou.

Mr Speaker avek sa mon pour fini me en sel keksoz mon anvi dir, resaman avek sa lamars, protestasyon ki bann Ners ek Dokter pe fer i fer ou mazin en gran savan ler i ti dir koumsa; “…if you give peanuts you get monkeys.”  Mr Speaker problenm Sesel se sa Gouvernman pa pe envestir ase dan nou pep Seselwa, zot pa pe envestir ase dan nou bann Profesyonnel, sa i enkli nou bann Profesyonnel Medikal, nou bann Dokter, nou bann Pharmacist, nou bann Ners, nou bann Teachers e tou nou bann Profesyonnel.

Si nou envestir dan nou Profesyonnel nou pour vwar nivo dan tou bann Departman Gouvernman enkli nou lasante, sistenm lasante mont lo en nivo pli o ki pour deservi nou pep Seselwa.  Avek sa Mr Speaker mon pour siport sa Mosyon e mon konnen poudir tou Onorab ki la anndan zot pour siport sa Mosyon.  Mersi bokou Mr Speaker.

 

MR DEPUTY SPEAKER

Mersi Onorab Woodcock, Onorab Ramkalawan.

 

HON WAVEL RAMKALAWAN

Mr Speaker mersi bokou.  E mon’n ekout atantivman bann letan ki mon’n la dan Lasanble e mon osi tou mon ti ava kontan komans par dir ki in annan enn de bann zistwar personnel ki’n ganny partaze dan sa Lasanble pli boner e pandan Break mon ti ape dir avek Onorab Pillay ki letan mon ti pe drive pour mon al en meeting, mon ti vreman touse avek bann parol ki i ti ape dir letan i ti pe rakont son parkour personnel avek son manman, avek son papa.  E mon konnen ki poudir sa bann, se sa bann parkour personnel parfwa ki ed nou pour nou pli byen sezi en problenm.  Mon’n tann en Manm koz lo Onorab Arrisol e li osi tou son parkour personnel mon ti L’Inde ofet letan son frer ti mor.  E mon ti la avek son manman e mon konnen ki mannyer sityasyon i ete.  E petet Mr Speaker, mwan mon dan en sityasyon en pe diferan avek bokou nou bann Manm dan Lasanble.  Koman en Pret dan Legliz Anglikan, byensir mon ganny sans dan mon travay Pastoral rankontre tout sort kalite sirkonstans maladi e dimoun dan Kanser mon’n administre avek paran ki zot zanfan i ganny Kanser e i vreman fermal bann dimoun, bann zenn dimoun, bann dimoun pli aze.  E tou sa bann zistwar se bann zistwar soufrans e mon osi tou vreman mon anvi komanse par dir ki pour tou bann dimoun ki ozordi swa zot, zot pe soufer avek sa maladi dan diferan staz kekfwa i annan serten dimoun ki’n fek dekouver ki poudir zot ganny sa maladi, e zot ankor dan sa leta depresyon.  Petet osi bann ki’n komans fer serten tretman e ki zot pe vwar en lalimyer e byensir sa i donn en lankourazman, oubyen bann ki ozordi trouv zot lo zot lili lanmor parey nou dir.  Alor pour tou sa bann dimoun mon anvi mon osi tou eksprim mon solidarite e mon krwar ki set atraver nou solidarite ki nou nobou ed dimoun swa pour zot pas atraver zot soufrans oubyen ankouraz zot dan zot tretman e ed zot pour zot vwar sa lalimyer e an menm tan osi lo kote zot fanmir; parske souvandfwa lafanmir nou bezwen donn zot en kantite sipor e mon konnen ki poudir nou tou ki la dan Lasanble nou’n trouv nou dan sa bann sityasyon kot nou’n bezwen donn sipor.

Mr Speaker mwan apre midi mon anvi al direkteman lo sa ki Onorab Roucou in mete dan son Mosyon, kot i pe dir fodre i annan plis zefor, ok ki plis resours i ganny mete dan deteksyon ek tretman pour sa kondisyon, e mon krwar se sa ki fer Mosyon ki Onorab Roucou in prezante vreman relevan.

Ou konnen Mr Speaker nou dan en pei kot kanser i limero 2 lakoz pour lanmor, maladi kardyovaskiler i limero 1, me selman letan nou regard fasilite ki nou annan pour sa 2 maladi i vreman, konmsi i pa ase; par egzanp ozordi letan nou pe koz lo Kanser nou konnen ki poudir petet tou resaman ki nou’n ganny nou en Oncologist en Dokter ki spesyalize dan tretman Kanser, Heart Specialist pour lo kote kardyovaskiler, en Cardiovascular Surgeon Doctor whatever sa ki ou anvi apel li ankor enn fwa nou pa ankor ganny li.  E petet mon pe dir sa se parske mon anvi, mwan mon ti ava kontan vwar en keksoz pli konkret e la petet mon a vin lo en akoz mon pe dir sa, mon a vin lo mon leksperyans personnel.

Ou konnen Mr Speaker letan mon manman ti mor mon ti swete ki poudir ti annan en, ti ava annan en Sant Kardyovaskiler, ti ava annan en Casualty Kardyovaskiler, ti’n fer li en triple heart bypass e letan i pa ti pe santi li byen nou ti bezwen anmenn li kot Casualty normal e laba kot Casualty normal i pa bann, ou pa zwenn Dokter spesyalize, ou pa zwenn Ners spesyalize e by the time ki zot ti’n fer li al fer x-ray al fer isi, al fer laba atann ensidswit sete pa bann Spesyalis.  E by the time ki zot ti pe rush avek li i ti’n tro tar, tandis ki si ti annan en Sant Kardyovaskiler ou konnen ki poudir en dimoun in fer li en triple heart bypass, i pa pe santi li byen, ou ti ava al direkteman kot sa Casualty e laba ki i ti pour zwenn, i ti pour zwenn bann Ners ki’n spesyalize dan sa kote Kardyovaskiler; i ti pour annan en Dokter ki konn byen sa bann soz Kardyovaskiler e zot ti ava kapab fer li, e se sa ofet Mr Speaker mon pe dir sa, se parske si mon frer Sylvestre Radegonde ki ozordi i Anbasader Sesel an France si i ankor vivan se zisteman, akoz ti annan en Sant Spesyalize e i ti kapab al direk laba e deswit zot ti debourye enn pti kou i ti lo latab loperasyon.  Byensir nou pa pe dir ki Sesel nou pour vin lo menm standar avek Langleter, avek Lerop whatever me selman akoz nou pa kapab reve, akoz nou pa kapab mazin nou lo sa nivo e menm parey pour Kanser; menm parey pour sa maladi Kanser.

E mon toultan letan mon tann bann zistwar bann dimoun ki’n ganny diagnose ek Kanser, zot dir avek ou gran mersi mon ti annan en zanmi ki ti en Dokter.  E letan mon ti koz avek li sa zanmi ti dir avek mon pran sa kondisyon serye e sa zanmi ti fasilit serten keksoz pour mwan e mon’n ganny diagnose vitman.  E alors mon’n kapab al komans tretman pli boner posib, e rezon ki mon pe dir sa Mr Speaker i senp, kanser pli ou dekouver li boner, pli ou annan en diagnosis pli boner posib plis posibilite pour ou tret li.  E Dokter pour dir avek ou i annan en kantite Kanser nou’n koze nou’n dir, Kanser Prostat parmi bann zonm Sesel i o, e pourtan Kanser Prostat i enn bann Kanser ki kapab ganny trete pli fasilman.  Me akoz i premye se parske posibilite pour diagnose li.  E Onorab Norbert Loizeau i annan rezon petet la osi nou bezwen en ledikasyon parske konpare ek bann madanm mon ti pe partaz sa pandan tea break avek bann travayer dan nou Kantin kot nou pe dir tandis konpare ek bann madanm ki depi en tre zenn az zot ganny ankouraze pour fer zot tes Pap Smear konmsi zot annan sa labitid pour zot al kot Dokter zot ganny pti baba, zot donn tete an piblik, zot ganny ankouraze pour donn tete ki konmsi zot pli pare pour zot al kot Dokter, me en zonm li si i annan okenn keksoz avek laba anba i tant pour li kasyet i pa oule personn tous laba i pour kasyet, i pour kasyet, ziska ki in ariv tro tar, e letan in ariv tro tar e kot aprezan tou dimoun pe get laba anba kot i ti ape kasyet in tro tar, in ariv lo staz ki ou pa kapab retourn an aryer.  So Mr Speaker i annan sa eleman ledikasyon.  Me mwan mon osi krwar kot letan Onorab Roucou pe koz lo resours mwan mon senserman krwar ki Sesel lefe ki Kanser i 2enm maladi ki touy plis dimoun nou devret kapab annan nou en Oncology Department ki vreman, vreman spesyalize, vreman spesyalize kot en lenvestisman ki vreman pour vin pour benefis nou pep; kot letan en dimoun i komans santi en pti keksoz in al kot son Klinik i pa bezwen esper 3 mwan, i pa bezwen esper 6 mwan pour li vwar en spesyalis. Me ki keksoz i al pli vit posib parske ozordi Mr Speaker letan en dimoun in al Klinik dan son distrik in vwar en Dokter in monte desann, sa Dokter premyerman in komans donn li en serten latizann in ale, in retournen in monte desann in fini pas kekfwa 3 mwan oubyen 6 mwan apre sa, sa maladi son problenm i kontinyen.  Letan Dokter i donn li en randevou kekfwa i annan serten dimoun ki pli sanse ki lot, me i annan serten dimoun ki sa letan ki i pran pour li vwar en Spesyalis in fini ariv 1an e Kanser li, kanser i pa espere li, Kanser pa dir, ‘’Be la mon ava esper en pti kou konbyen letan pou pour vwar Spesyalis dan 6 mwan? Mon ava espere mon osi tou, dan 6 mwan la aprezan nou ava al kot Spesyalis ansanm.’’ Kanser pa esper ou li.  E mwan mon ti vreman letan mon ti la avek frer Onorab Arrisol letan nou ti la zis koman son frer ti’n mor, letan nou ti pe koz avek sa Spesyalis i dir avek nou be sa kanser la ki apel Leukemia i dir sa i danzere lakantite cells, son bann cells i double tou le 24er erdtan, tou le 24erdtan lakantite cancer cells i double e alors fodre ou atak li o pli vit posib.

E en lot keksoz ki i ti osi, ki sa Onologist ti osi dir, i dir ou konnen problenm avek Sesel se ki parfwa zot fer loperasyon kot zot pa devret fer loperasyon oubyen zot pa fer loperasyon kot zot devret fer loperasyon, oubyen bann rezilta kot Lab pa bon.  E mon konpran sa egzakteman parske Mr Speaker mwan mon annan en zanmi, zanmi madanm enn mon zanmi ki ti ganny diagnose avek breast cancer Sesel, zot ti koup en kote son tete i ti al fer tretman L’Inde letan i ti ariv laba zot refer tou bann tes prezan i demann li ki egzakteman zot ti dir ou Mahe, i dir. ‘’Be Dokter mon annan zis en kote tete mon’n, zot ti son, zot ti dir avek mwan, mon ganny Kanser Tete.’’  Sa Spesyalis i get li e nou tou nou konnen ki mannyer Chennai i ete kot ou pa vwar zis en Spesyalis ou vwar plizyer Konsiltan ki vin regard ou ozordi, landmen i annan en lot oubyen detrwa erdtan plitar lot i vini i demann ou menm kestyon, lot apre midi i vini i demann ou menm kestyon finalman ennler ou dir,’’ Be sa bann boug konmsi zot pa konnen, zot pa koz ek kanmarad?’’ Salerla pour ki zot kapab apre letan zot fer zot konsiltasyon zot konn egzakteman ki direksyon pe ale.  E letan i ti retourn isi Minister Lasante pa ti tro kontan e zot ti anvoy li La Reunion pour fer en dezyenm tes laba ti dir li menm keksoz.  Sa ki Onorab, sa ki me selman mwan dan sa ka ou konnen kot mon regrete, kot mon regre i ete, kot mon latristes i ete in annan en dimoun probableman en madanm ki probableman li letan in retourn Lopital zot in dir avek li i napa Kanser, i napa en problenm in al se li salerla li ki ti annan sa Kanser.  I posib ki sa rezilta ki ti pour sa lot 2enm madanm in ganny swap absoliman; parey sa case ki Onorab Loizeau ti pe mansyonnen konsernan en dimoun ki son tes Prostat ti ganny melanze e li ti pe al met pare pour al fer loperasyon, kan ofet se en lot dimoun ki’n ganny, ki ti ganny sa problenm li ki ti devret lo pe met pare pour al lo Lasal loperasyon lo latab loperasyon, lo latab loperasyon.  Donk Mr Speaker mwan mon krwar ki nou devret annan en landrwa spesyalize kot nou met lanfaz lo tretman Kanser, e kot atraver sa nou Seselwa i ava kapab ganny sa bon tretman, me lo lot kote annou osi fer en lot rezon, si ozordi Seselwa i al MIOT i al Chennai pour fer tretman Kanser, si yer Seselwa ti al Maurice pour fer radyolozi, mwan letan mon ti pe etidye pour vin Pret anler Lopital Candos mon ti al vizit tou bann Seselwa ki ti vin fer tretman pour Kanser parske zot ti premyerman vin Maurice apre sa ti al La Reunion, apre ti al Singapore la tou dernyerman zot Chennai.

Me annou osi mazinen si nou ti annan nou en bon Sant, eski nou pa ti a kapab mazin an term bann lezot osi tou pour vin kot nou?  Nou pa ti a kapab mazin an term Medical Tourism, Medical Tourism kot en dimoun ti ava dir be mon malad, mon pe swiv en tretman me Sesel i annan li en Sant ki fantastik anmenmtan mon ava combine li ek en pti konze obor lanmer kot mon ava kot mon pa ava bezwen dan, si mon Langleter konmsi dan pei lafreser Liver pe vini ensidswit me mon ava plito pli relax e, so annan en bon Sant, en bon Oncology Centre kot nou kapab annan bann lekipman i pour en gro investment, me si nou kapab avek led bann zanmi avek Lenn ki pe, ki pare pour ed nou pour nou kapab donn nou bann Ners Seselwa osi tou sa tretman e bann Lab Technicians tou sa tretman annan en lekip konplet non selman ki nou bann Seselwa ti ava, nou ti ava annan sa konfyans ki poudir be nou annan en bon Sant.  Parske Mr Speaker i annan en keksoz osi ki nou bezwen mazinen, letan atraver sa progranm ki Minister Lasante i annan letan ou’n ganny diagnose avek kanser e apre sa i dir ou pe al fer tretman Chennai, ok i en i kapab donn en lankourazman me selman letan ou Chennai ou napa ou fanmir avek ou, letan ou Chennai laba ou pe anvi manz en pti bouyon bred ou pa gannyen sa pti bouyon bred, letan i en lot Kiltir e nou tou nou konnen poudir parfwa letan ou malad ou annan bann, ou konnen ou annan bann pti kapris, bann pti soz ozordi, ozordi ou pa anvi manz okenn keksoz e laba Chennai i annan bokou bann dimoun ki vini ki dir “ah yo mon fatige manz sa bann kari Endyen, bann soz ensidswit dal pouri; konmsi ennler i demann mwan en lot pti manze spesyal ki ava donn mon lafors.’’ E apre sa letan ou laba tou sa zistans ou anvi vwar ou pti zanfan, ou anvi vwar ou frer, ou anvi vwar ou ser, ou anvi tou sa bann keksoz tandis ki si nou ti annan sa isi, sa osi tou ti pour ede.  E sa nou kapab zis konpar li par egzanp avek bann dimoun ki sorti Praslin ek La Digue ki vin fer tretman Mahe, mazin ou Mahe zistans i sitan pre, me selman letan en dimoun i la Lopital i dir avek ou mwan mon anvi retourn La Digue mon, mon anvi retourn Praslin.  Akoz senpleman pour li dan son lanvironnman kot son fanmir i siport ou, e nou tou nou konnen ki dir avek ou ki ou fanmir dan ou prosesis tretman fanmir i zwe en gran rol, se pour sa rezon ki letan nou pe priy pour en dimoun ki malad, nou pa priy zis pour sa dimoun ki malad, nou osi priy pour son fanmir anmenmtan pour son Dokter, pour son bann Ners tousala akoz tousala i form en sel Unit ki pour ede.

Alor Mr Speaker mon krwar ki wi i enportan pour nou annan en Sant, mwan in fact mon krwar dan 2 Sant mon, mon krwar dan en Sant pour kanser en Oncology Department ki spesyalize e nou annan nou bann nou pey, nou envestir pour nou pey byen e apre sa en Cardiology Department kot nou konnen ki poudir pour bann maladi kardyovaskiler sa dimoun i pour ale e i pour ganny sa swivi neseser.  Me lo lot kote osi Mr Speaker mon anvi dir ki mon krwar ki i enportan pour nou met lanfaz lo ledikasyon pour edik bann madanm, pour edik bann msye, e an plis ki sa pour nou edik nou bann zenn ozordi i letan nou regard nou bann zenn.  E mwan osi tou mon annan en pti groser me selman mon’n ariv en laz ki petet ou konnen hormone i komans diminyen e alors i pli difisil pour ou perdi pwa me selman i annan en keksoz ki pa akseptab se ki nou bann zenn manrmay, nou zenn manrmay in gro pe marse pe roule, parfwa ou get bann garson, bann garson 6an in ganny ou konnen parey pti bonhomme Michelin, ou konnen larou Michelin kot i annan detrwa spare tires lo li.  Be mon krwar ki tousala se bann keksoz ki nou bezwen fer atansyon e tousala i pour fer ki nou lifestyle i pour vin pa bon e byensir se la kot nou ava pe ouver semen pour tou bann maladi rantre.  E mwan osi krwar senserman ki sa bann fast foods nou bezwen met lanfaz lo la, nou konnen ki poudir i pa bon, be si nou konnen ki poudir i pa bon annou pa zis koz lo swa, annou koz lo en swa pozitiv pour en bon lavi annou pa kontinyen avek sa bann fast foods ki pour ed nou pour fer nou pep deteryore; annou ankor enn fwa ankouraz nou bann zanfan pour manz margoz, pour manz brenzel parey nou letan nou ti pe grandi.  Serten parmi nou la letan nou ti pe grandi sa ki ou manman ek ou papa ti met lo, dan ou lasyet ou ti bezwen manze, ou ti kapab pa manz brenzel, be si ou pa ti manz brenzel ou pa ti pe ganny okenn lezot keksoz ou ti pour al dormi avek larm dan ou lizye.

Si dan bomaten letan in enfiz sa saponer ou pa bwar avan ou al Lekol ou ti pour annan, me ozordi ki nou tande, ozordi nou tande laba deor pe fer resers i dir avek ou roz anmer i bon pour Kanser, i dir avek ou margoz i bon pour dyabet e nou, pli bonner i annan bann dimoun ki’n menm koz lo nou bann zanset lo lafason ki zot ti, zot pa ti ganny Kanser, be akoz zot pa ti ganny Kanser?  Akoz zot ti leve granmaten i mean ankor enn fwa nou tou nou annan zistwar pour akonte, mon papa ti lev 4.30 bomaten pour li al okip son zannimo, apre sa i ti annan en bisiklet i ti pedale pour li al travay e apre i ti monte i ti aktiv i pa ti, toultan i ape fer legzersis i ti ape brile.  E lavyann nou pa ti manz lavyann toulezour dan lasemenn.  Nou ti manz lavyann dan Dimans.  E koman zanfan letan nou’n ganny sa pti bout lavyann pa nou tou nou rapel ki mannyer nou ti manz nou diri, nou ti manz partou, nou ti kit tou nou bann pti bout lavyann dernyen e apre pou nou enjoy nou lavyann.  Be ozordi i vre ki parfwa dimoun i annan en fo konesans i dir avek ou nou lavi in amelyore nou manz lavyann letan nou anvi.  Wi i vre nou manz lavyann letan nou anvi, me selman son konsekans, son konsekans osi tou nou bezwen regarde e pour tou keksoz ki nou fer, pour tou aksyon i annan en reaksyon.

Alor Mr Speaker avek sa 2 parol mon pour osi dir avek bann zonm annou pa per; espesyalman letan ou’n ariv laz 40an, letan ou’n ariv laz 40an al fer ou tes prostat gete ki leta ou prostat pa bezwen, annou pa bezwen mazin pour al fer tou sort kalite nide enbesil, nou Prostat i en bout nou lekor ki nou bezwen pran swen avek li e alors annou fer nou PSA.  Annou fer nou tes; annou al kot Dokter pour nou regarde ki nou leta parske nou konnen ki poudir se sa bann bout la ki kapab detri nou.  Alor Mr Speaker mon dir annou osi pran en lifestyle ki pli healthy.  Annou travay e mon pour termin ankor, mon pour termin parey mon ti komanse Mr Speaker, letan mon pour dir mon swet tou bann dimoun ozordi ki pe soufer avek sa maladi, mon dir zot, “kouraz, tou benediksyon. E nou dan sa Lasanble nou pour sey kontinyen fer travay ki neseser pour nou kapab amelyor zot sityasyon, oubyen petet menm si nou pa amelyor zot sityasyon, me amelyor sityasyon pour demen.’’  Mersi bokou Mr Speaker.

 

MR DEPUTY SPEAKER

Mersi Onorab Ramkalawan. Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker lo sa Mosyon ki devan nou.  Ou vwar mon ti kapab.  Letan mon’n ekout serten dimoun koze an en diferan lapant.  Pran en lapant kot i eksplike ki mannyer Parti Lepep in amelyor sityasyon lasante dan nou pei.

Pou eksplike osi ki mannyer dan serten Minister sa kestyon koripsyon i napa nanryen pou fer direkteman ek Parti Lepep.  E ki Kanser napa koripsyon konmsi Kanser.  I annan osi mon ti kapab dir argimante ki mannyer soley osi i donn Kanser.  E ki si fodre nou ti ava dir Bondye tir son soley pou fer plezir serten dimoun dan nou pei.

Me mon pa pou pran sa lapant ki mon pe dir akoz mon krwar ki sa topik ki devan nou, i en size tre, tre enportan.  E mon kontan lapant ki Onorab Leader Lopozisyon in pran.  E se sa mon krwar i en legzanp pou lezot dimoun dan Lopozisyon, se swiv sa ki zot Dirizan in fer dan sa kot i konsern sa topik e sa Mosyon ki devan nou.  E se egzakteman dan sa direksyon ki mon pou fer mon lentervansyon.  Mr Speaker mon letan donnen ki mon enn sa dimoun ki’n atraver sa ki nou pe koze ozordi ki’n pas atraver Kanser; e mon’n sape mon’n ganny sove mon’n ganny en 2enm sans i fer mon realize reflesir e pran konsyan bokou lo sa topik sa size, sa problenm ki nou pei pe pas ladan e mon zwenn avek Leader Lopozisyon pou senpatiz ek tou bann dimoun ki ankor pe soufer; e ki annan sa problenm e ki dan sa bann difikilte e ki pe lalit ki pe lite kont Kanser.  Sa i kler me solman lo lot kote osi mwan mon dir zot pa leksperyans ki lapriyer i en soutyen osi ki zot bezwen rely lo la osi, pou donn zot sa lafors ekstra pou konbat kont sa.

Mr Speaker ou konpran dan nou pei la ozordi, nou’n sorti lwen.  E i enportan pou konpran ki avek devlopman i annan sa bann kalite maladi osi ki vini.  E osi neglizans.  E si oule nou’n neglizans dan en sans nou dir be la, la i annan sa kalite keksoz sa pilil la alor nou’n les sa history ki nou’n

grandi avek sa kiltir ki zisteman Onorab Wavel in fer sorti.  Nou’n les li laba deryer.

Mon annan en zanmi ki li tou le bomaten la konmela in servi devlopman in servi son margoz in blend i ganny son juice, mon dir sa i en pe for.  I dir mon non.  E vre in fer mervey avek li.  Me pourtan margoz la ozordi ou donn sa zenn marmay telman i anmer i dir ou non, i pa pou manz sa.

Me alor mon pe dir sa ki nou tou nou pran konsyansye, mon krwar i annan ki’n koz lo nou medsin tradisyonnel, an relasyon avek sa bann problenm lasante ki nou pe gannyen.  E nou demande ki Gouvernman i vwar lavantaz ankor, i reflesir ankor en pe pli devan pou gete ki mannyer i kapab travay, se sa bann dimoun ki annan konpetans ladan pou vwar ki mannyer nou pa zis pran 5, 6 fey e kekfwa i ava annan bann mezir en pli apropriye ki ava dan staz kot nou’n arive ozordi ki pou kapab gid nou dan sa bann direksyon.  Sa i en pwen.

Me kot i konsern kanser li menm li.  E sirtou lo konteni Mosyon Mr Speaker i enportan ki ou fer sorti ki ozordi dan Sesel nou annan nou diferan kalite Kanser i annan 5 ki vreman, vreman pli for.  Pli i annan pli evidan pli bokou.  E sa se Breast Cancer, Prostat, Kanser Kolonn, Kanser Cervix apre i annan Head and Neck Cancer.  Lo ki fer kot lagorz an montan ensidswit.  E ler nou gete pourtan i pa sipoze konplike letan ou gete.  E nou annan si oule dir en bon pe keksoz ki’n ganny fer dan sa direksyon.  Me akoz i kontinyen ogmante?

E ou pou vwar Mr Speaker pou dir problenm pa ni bezwen en ta larzan, pou rezourd li.  Mon krwar mon wi ou bezwen Bidze, me selman i pa telman e lonm ki i en posib si i monte.

Mon krwar mwan i bezwen annan en volonte par Minister Lasante pou dir vwala vreman kanser ou’n nonm osi maladi leker.  I ok me selman la nou pe koz Kanser, annou konsantre lo la.  E vreman si nou problenm i la annou met en latansyon.  Bezwen annan en volonte si nou anvi anmenn sa rod en solisyon, e sa solisyon nou, nou vwar i pa en posib.

I annan bout ki kekfwa i enposib kekfwa taler mon a dir kwa.  Me selman la nou vwar pou dir i annan bann keksoz debwaz ki nou bezwen fer.  Par egzanp i annan 3 keksoz ki mwan mon krwar nou bezwen ariv lo la.  Enn se nou bezwen annan en progranm prevansyon serye.  E sa pou mon, mon vwar li kote kout telman larzan ki nou pa kapab fer li.

2enm keksoz ou bezwen en sistenm early detection.  Si ou pa vwar li vitman, boner, i pou difisil pli tar i pou pli konplike.

E Kanser i kler.  Pli ou vwar li pli boner pli sa pasyan i kapab ganny sove.  Pli sa problenm i kapab ganny rezourd.  E trwazyenmman se son tretman.  I bezwen annan fast treatment e tretman ki lo la ki apik.  Savedir nou bezwen vwar sa.  Me i bezwen annan en striktir ki permet sa arive.

Me nou, nou napa.  Sa ki nou annan nou i vin parey e parey dan mon ka.  Mwan mon toultan dir si pa Dokter Gedeon mon’n fini mor.  Mwan mon pa ni kanmi pou dir toultan mon remind li mon dir li mersi sak fwa mon zwenn li.  Si pa li pa en relasyon zanmi ti ariv dan Lasanble, mon pa oule al dan sa detay.  Me i pa kapab mars koumsa.  I bezwen annan en keksoz metodolozik, en keksoz vreman ki tou dimoun i pas atraver i konnen.

Par egzanp alor la, nou vwar pou dir dan klinik letan en dimoun in ale.  E konman sa dokter i konmans vwar bann siny e li i pa pou konnen li be i general surgeon me wi i dir ou i annan en lump kot tete.  Be si i annan en lump kot tete ou konnen pou dir i pa ou domenn spesyalize ladan ou refer li e la Minister Lasante i bezwen annan en sistenm ki permet sa pasyan, sa dimoun konman i vwar bann sentonm ki diriz en pti pe dan sa direksyon ou pa tarde avek ou bezwen al fer li vwar Spesyalis se sa devret al vitman.  Pou ou kapab detekte si i annan en problenm vitman.

E si i annan lekipman sa bann lekipman mammogram e ensidswit pa devret annan problenm sa i pa devret konmsi keksoz ki out of reach sa.  Alor bann lekipman ki senp ki pa konplike, met a dispozisyon e annou spesyalis.

E sa ki mon krwar nou a kapab detekte boner.  Me solman nou pe lans en lapel osi avek nou pep.  Nou pep pa kapab akoz i dan bon dan en serten kote i negliz son lekor.

Pa kapab i dir ou aret fimen dan mon ka i ti koumsa. Nou, nou kontinyen fimen.  Dan mon Kanser i direkteman sigaret.  La mon’n arete, pli gou pli bon ou pli fit duty, me se sa mon’n antete.  E fodre pa ki nou pep i vin parey mwan mon ti ete mon’n antete lo sa bout pou fer mon malad ziska sa sityasyon.  Me nou, nou pe lans en lapel pou dir look boner be boner ale al fer ou bann tretman ou bann tes ki ou bezwen fer.  Ou Pap Smear, si ou bezwen gete ou breast teste ou soz, ou prostate nonmen, taler e tou.

Bezwen ale al fer zonm i annan pou li fanm i Annan pou li byensir.  Me mon pou kapab vwar kote problenm si i annan en problenm a detekte boner.

E en lot keksoz Mr Speaker ki mwan mon panse nou devret pe fer; sa kestyon annan en Komite nou apel sa en Tumor Committee ki li Kanser la ou pou kapab met li ansanm ek tou lezot.

E sa lide ki ou’n avanse Onorab i byen.  I bezwen separe.  Ler en dimoun i vin Lopital, i vin kot Casualty ensidswit – konman ou vwar ozordi La si ou ale i en problenm.  I en problenm dan lesans ki si sa dimoun sa medical officer ki la,  sa Spesyalis ki la li, i pa Spesyalis Kanser li.  Me avan dizon zot pou admit ou, pou li admit ou i pou admit ou dan Ward zeneral.  I pa konnen.

Me si ou ti annan sa Unit Oncologist separe … e konman ou vwar pou dir sa dimoun la nou konnen ki son deal alor ou kapab fasilman re oriyant li ver Unit Oncology e la mon al menm pli lwen ki sa ou pe dir i devret admisyon konmsi i devret li i deal ek son zafer li menm.  Son admisyon li menm i fer laba.  E i konnen li ki son tretman pou al donn ou pou al administre ensidswit ki en fason i kapab sov sa dimoun e pa bezwen espere i pa bezwen al pran en ta letan al sepa kote.  I laba e separe – en pe parey si oule dan Urology konmsi pou ki deal ek bann ka bann msye ensidswit.  Konmsi mwan mon krwar i devret al dan sa direksyon.

E nou vwar alor la kot dan Unit Oncology i bezwen ganny beef up.  I bezwen ganny beef up son Unit li menm fizikman ek son bann keksoz ki i bezwen al ladan.  E an menm tan son Spesyalis.  Son bann dimoun spesyalize.  Gouvernman li i bezwen deside dir nou annan sa problenm Kanser, alor nou bezwen rod detrwa nou bann ners ankouraz zot e Dokter, pou al spesyaliz dan sa bann unit.  Ouswa si i demann korperan ki nou annan rod.  I annan 3 area kot nou bezwen.  Nou bezwen Surgical Oncologist, nou bezwen Gynaecologist e en Pediatric Oncologist.  Sa 3 pli omwen ou pou bezwen.   E la koumsa e ou bezwen li permanan.  Ozordi la nou napa okenn oncologist permanan isi Sesel.

E nou bezwen 3 urgent sa pou mwan mon krwar i urgent.  E Gouvernman i devret deside lo la.  Be mon pa vwar sa konplike mon.  Bidze pe vini si i annan en pti Bidze ki antase avek anvoye, nou nou’n konpran nou Lasanble lo sa bann zafer koumsa nou konnen pou dir sa i en merit, sa i en priyorite.  Lasante nou pep nou pa pou zwe avek.  E alor nou krwar ki nou pou donn sa sipor.  Be Gouvernman Minister Lasante i bezwen prepar li e anvoye.  Met dan Bidze e bouze avek.

Bann nurse spesyalize ki nou pe die.  Bann nurse aktyelman ki travay kot Oncology.  Zot napa ni en risk allowance.  Pourtan zot pe fer chemo.  E sa i mal.  I bezwen annan en letan repo.  Ou bezwen annan en shift.  Pa kapab zot menm zot ki pe fer tou sa toulezour.  Bezwen ganny gete dan en fason.

E mwan mon krwar i annan bann MOU ki nou kapab fer avek lopital deor.  I vre pa tou keksoz dan Kanser ki nou kapab fer.  Par egzanp radiotherapy sa nou pa pou kapab fer isi.  Son unit i pou tro radyasyon nou zil i ptipti pou nou pei i ptipti dan sa sans i pou konplike pou sa bout la nou ava anvoy deor.

E sa mon dir ou ava annan ou, ou Tumor Committee la, i ava oversee sa diagnosis la i a gete.  I a get ou bann staz i a dir ok sa enn i bezwen tretman pou al fer radio lot soz, anvoy deor sa enn la.

Lot pou chemo sa ou a fer isi.  E i pa devret difisil.  I vre nou kapab melanz li avek medical tourism e dimoun i kapab vini i vin fer son 2 keksoz isi.  Ou ou’n annan ou Lopital Spesyalize.  Dan sa sans i annan sa bann service ki a kapab gannyen.

E sa ki Onorab Ferrari ti pe sey dir bomaten pa bezwen ki nou al enplimant sa dan Lopital Sesel.  Me selman an relasyon sa lopital prive la wi.  Akoz i annan i pa pou vin i annan dimoun li i pou al fer son bann test li menm li.  Me i a pas laba i ava al ver.  I annan lot alor atraver Lopital, bann ki pa kapab kontribye me Gouvernman i a pey direk pou li.  Me i pa bezwen depans sa kantite.  E sa i pou save Gouvernman en ta larzan.  Pou envestir further invest dan sa seksyon dan Unit Oncology. 

E mon krwar parey mon pe dir sa Unit Oncology i devret endepandan konpletman.  E mwan mon krwar i devret annan zot prop landrwa pou zot fer zot follow up ki i devret annan zot prop konsiltan, consultant in charge parey mon pe dir.  Zot ki pou konnen akoz zot ki pou pli konpetan ki sa bann consultant ki lo ki laba kot casualty.  I seye li be i pa son domenn.  Ler ou vini ou konnen sa ou a ganny sa spesyaliz sa latansyon spesyalize.

Konmela parey nou pe dir.  Sa bann keksoz koumsa i kapab ganny amelyore.  Mr Speaker nou pa sipoze la ozordi pou pran en ta letan.  Nou krwar pou dir sa size ki devan nou in i en size serye nou’n vwar pou dir i annan bann keksoz enportan ki’n ganny dir.  E nou parey letan i annan Mosyon ki koumsa Mosyon ki nou vwar i an valer i annan merit nou, nou demann ek Gouvernman pou ekout nou byen.  Ekout nou Lasanble byen.  E bann pwen ki’n ganny dir ki enportan, servi li e annou akt lo la vitman.  Nou, nou kontan en pe aksyon, e nou dir akt lo la vitman pou ki nou kapab bouz dan en lot soz.

Nou koz lo lifestyle.  Lifestyle i enportan.  I enportan e nou, nou parey nou dir ennler nou tro neglizans, nou bezwen annan bann progranm bann progranm Outreach.  Sa bann progranm i pa kout telman larzan alor nou, nou krwar pou dir i annan keksoz ki a ganny fer men pe vitman la progranm edikasyonnel lev awareness pou kestyon pas lenformasyon, lenformasyon i ede pou dimoun vin pli aware.

      Alor kestyon screening parey nou pe dir tousala bann senp keksoz ki nou krwar nou i devret i devret ganny fer, e pa difisil.  E nou demann avek Minister Lasante donn sa latansyon neseser Unit Oncology e fer ki sa Unit i a vin pli performan bann spesyalis enportan i ava la.  E i ava permanan.  Dan en fason ki sa Unit i ava fer ki i a tir nou pei si oule dan serten difikilte serten problenm kot i konsern sa kestyon maladi Kanser si nou oule lapel li koumsa, akoz nou vwar wi nou’n vwar pi annan en ogmantasyon sirtou apartir 2009 ki’n arive avek lakantite ka Kanser.

E avek sa nou pou donn tou nou sipor.  E mwan mon demande ki nou dimoun osi i vin pli aware akoz lavi i kout.  Lavi i gou, me fodre pa nou zwe avek pou nou perdi li avan son ler ki neseser.  Mersi.

 

MR DEPUTY SPEAKER

Mersi Onorab De Commarmond.  Avan mon donn laparol loter Mosyon pou fer son konklizyon, zis mon anvi dir 2 pti mo, me pa pou entervenir dan ki direksyon zot pou pran zot desizyon, zot pou vote.

 

HON NICHOLAS PREA

Bon, zis mon anvi dir poudir mwan Oktob pou mwan i en mwan ki an menm tan i fer mon mazin sa maladi Kanser bokou akoz ti annan 2 dat ki mark mwan en kantite. Le 1e Oktob e 8an pase mon ti perdi enn pti zanmi ki ti ne le 1e Oktob e i ti mor laz 16 an avek kanser le 1e Oktob. Nou fek mark 8an son laniverser lanmor.  Le 8 Oktob i lanniverser lanmor mon pti ser 37 an pase e li osi ti mor avek kanser, Leukemia.  So sa mwan Oktob ozordi ki’n dedye pou konman en mwan ki nou bezwen mazin bann dimoun ki pe soufer avek Kanser and so on, i osi mark mwan parey in mark plizyer Manm isi dan nou Lasanble.  Petet mon kapab dir 37an pase ti napa sa lavansman dan swen medikal ozordi i annan me selman parey bokou Manm in fer sorti i enportan pou detection ganny fer boner. I enportan parey loter Mosyon pe demande, parey bokou Manm osi i demande ki nou annan bann fasilite e bann dimoun osi spesyalize ki kapab fer detection e kapab fer bann swivi tretman and so on.  Zis mon anvi en pti pwen avan mon fini, parey mon’n dir mon pa pou koz bokou.  I annan bokou pasyan, i annan bokou Seselwa ki ler i al Lopital e finalman i ganny detekte zot al fer, zot al rod en 2enm lopinyon e bokou fwa zot al dan klinik prive.  Me i annan en latitid ki ler zot retourn kot Dokter Minister Lasante, i annan en latitid negativ e petet la mon a vwar en plo Minister Lasante, bann Zofisye Ladministrasyon pou koz ek zot Dokter.  Si sa pasyan in deside al rod en 2enm lopinyon, an menm tan i la pou ed sa Dokter pou fer sir ki i annan en 2enm rapor ki li i kapab konpar pou li avek avan i pran en desizyon.  Me i paret si sa Dokter Minister Lasante in dir ek sa pasyan, “…mwan prosen ou bezwen vini vin opere,” e sa pasyan i dir, “Be non mon al rod en 2enm lopinyon,” e sa klinik prive i dir ek li, “…be non mon pa vwar annan pou opere, mon a donn ou rapor, retourn avek kot Dokter Minister Lasante.” Relasyon ant sa dokter Minister Lasante ek sa pasyan i kase akoz sa.  So mwan mon ti a kontan mon fer sa lapel annou sanz en pti pe sa latitid.  Pasyan ki al rod en 2enm lopinyon kontrer i ed sa Dokter Minister Lasante pou amelyor son diagnosis e petet pou tonm lo en konklizyon ki pli konkret e sa i en swa ki sa pasyan i annan e nou bezwen respekte sa.  Vwala sa ki mon ti annan pou dir.

 

MR DEPUTY SPEAKER

Mon ava demann loter Mosyon pou fer son konklizyon. Onorab Roucou.

 

HON CLIVE ROUCOU

Mersi Mr Speaker.  Mr Speaker.  premyerman mon anvi remersye tou bann Manm ki’n fer zot kontribisyon lo sa Mosyon e mon asir zot ki tou zot kontribisyon ti vreman valab e mon kontan sa lafors espesyalman sorti kot Onorab Pillay, Onorab Sandy Arrisol ki ou a krwar zot nabou pou tir sa ki lo zot leker e mon’n ekout Onorab Ramkalawan avek Onorab De Commarmond osi avek bokou pasyon espesyalman Onorab De Commarmond konman en pasyan ki’n deza pas atraver sa. Me dan bann gran laliny ki tou bann Manm in koz lo la, par egzanp lefe zenetik ki Onorab Arrisol e lezot Manm in koz lo la se ankor, mon anvi ankouraz Minister Lasante e ankouraz bann manm fanmir ki si dan lafanmir Kanser in deza prezan, fer sir ki zot fer zot tes.  E mon pe dir Minister Lasante ki i ava annan en database sa fanmir e manm lafanmir ki ava ganny en swivi tou le 2an, tou le 5an ki akoz i en fakter risk sa bann dimoun fodre ganny swivi. Annou pa les Kanser devlope, kanser arive epi nou pou sey trete.  Ankor nou’n tann koz lo prevansyon mon osi mon senserman krwar ki prevansyon i lakle.   Si nou’n fer prevansyon otomatikman nou pou ganny dedwir lo tretman. Ankor nou’n tann lo responsabilite parmi bann dimoun, parmi sitwayen, silvouple i annan risk deor e risk nou’n tann sigaret, lalkol, ladyet balanse, groser, tousala i bann fakter risk.  Alosr mon ankouraz bann dimoun, silvouple fakter risk i la. Fakter risk i la, lenformasyon i la.  Menm si kekfwa mon’n tann koz lo bann leaflet, ankor mon ti ava ankouraz Minister Lasante pou fer sa bann lenformasyon lo televizyon, kot dimoun i pli aware e zot pli konnen ki zot ava fer pran sa bann mesaz aker.  Ankor nou’n tann lo bann zonm avek fanm; e ankor nou tann zonm i en pti pe dan problenm espesyalman lo Kanser Prostat.  Konman en ners mon konnen i en pti pe difisil. Apre 40an comme dir Onorab Ramkalawan bann madanm in konmanse byen boner fer zot bann tes, nou 40an an montan pe al lo 50an i dir nou pou al fer en tes Prostat ki en pti pe difisil pou nou aksepte.  Me selman kanser prostat i komen parmi bann zonm e i en Kanser ki pe ronz nou zonm en kantite.  Annou met sa lafreyer, sa lakanmizri de kote e annou al devan.  Me mon anvi anvoy en lapel spesyal pou mon bann dimoun Plaisance, in fact pou mwan come up avek sa Mosyon se parey Onorab Arrisol ti dir ler nou ti vizit Plaisance kot nou ti pe koz avek 2 dimoun ki ti annan Kanser e la kot sa lespri formil sa Mosyon ti vini alors mon anvi ankouraz mon bann dimoun dan distrik Plaisance, premyerman bann ki pe soufer avek kanser, pran kouraz, pran zot tretman byen e parey Onorab De Commarmond ti dir vir ver Bondye, priye.  I ava en lenspirasyon pou nou.  E alors mon ti ava ankouraz tou mon bann dimoun dan Plaisance fer sir zot fer zot tes.  E pou konklir, fotespere ki Minister Lasante i annan sa volonte, sa volonte pou nou sanz tou keksoz e si i annan nesesite dan zot Bidze, nou ava gete ki mannyer nou ava bouz devan. Mersi Mr Speaker.

 

MR DEPUTY SPEAKER

Mersi Onorab Roucou.  Bon nou’n ariv moman pou nou pran en lo Mosyon, mon ti a demann tou Manm ki an faver. Okenn Manm ki kont?  Madam Clerk.

 

MADAM CLERK

Mersi Mr Speaker. 19 Manm an faver personn kont.  Mersi.

 

MR DEPUTY SPEAKER

Ok, Mosyon in ganny aprouve par Lasanble e mon swete osi tou ki bann Zofisye Minister Lasante i ava pran kont sa deba ki Lasanble in fer ozordi.  Bon avan nou adjourn mon annan 2 pti lanons pou mwan fer.  Mon ankor zis… e bokou de fwa i bon pou manm piblik pe ekout nou pou deplasman nou delegasyon.  Nou annan en delegasyon ki pe kit pei tanto ki pe al asiste 137enm Sesyon Lasanble Zeneral International Parliamentary Union, IPU ki nou Lasanble i en Manm. Sa delegasyon… sa meeting pou fer St. Petersburg, Russia e i pou ant le 13 a le 18 Oktob e delegasyon i ganny headed par nou Speaker.  E lezot Manm ki forma par sa delegasyon i Onorab Charles De Commarmond Leader of Government Business, Onorab Letourdie, Onorab Waven William, nou Deputy Clerk Mrs Isaac e personal assistant to the Speaker Mr Terry Romain.  Mon anvi osi tou anonse ki Commonwealth Parliamentary Association Small Branches – pou bann Small Branches i annan en meeting ki pe ganny schedule an le 19 a le 10 Oktob, Malta. I annan 2 Manm ki pe al reprezant nou Lasanble e zot pe kite Mardi prosen, sa se Onorab Ahmed Afif avek Onorab Churchill Gill.  E parey mon’n anonse yer nou annan lezot Manm ki Maurice e menm ki Sud Afrique pe reprezant nou Lasanble anba diferan misyon. Bon an vi deplasman sa kantite Manm e sirtou pou Mardi ek Merkredi prosen kot nou pou vwar bokou bann Manm absante lo bann misyon aletranze, dan Assembly Business Committee nou’n pran en desizyon ki pou napa Sitting Mardi le 17 ek Merkredi le 18. Alor prosen Sitting Lasanble i pou repran Mardi le 24 Oktob. Ok?  So nou fer manm piblik osi ki kontan swiv nou konnen poudir sa 2 zour semenn prosenn pou napa Lasanble. Bon avek sa mon ava swet tou bann ki pe vwayaze en bon voyaz e bon travay aletranze.  E bann Manm ki pou isi nou konnen i annan bann ki annan bann Committee meetings and so, i annan bann ki annan lezot travay ankor pou fer.  E reste touzour an kontak avek Sekretarya pou bann lenformasyon ki nou pou pase.  Avek sa nou ava adjourn ziska Mardi le 24.

 

 

(ADJOURNMENT)