Home » Verbatim » 2017 » Verbatim Report NAS Sitting Tuesday 26th September, 2017

Verbatim Report NAS Sitting Tuesday 26th September, 2017

NATIONAL ASSEMBLY OF SEYCHELLES

Tuesday 26th September, 2017

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Mon dir bonzour tou bann dimoun ki dan Lasanble, an deor Lasanble, e bann ki pe ekout nou dan lakour e an deor lakour e swet zot labyenveni pour nou Asiz ozordi dan Lasanble.  Parey labitid nou annan en lazournen sarze.  E mon espere, zot tou zot santi parey mwan, avek this bright and beautiful morning, ki annan en song in my heart and a spring in my step.

Les mon fer serten Lanons koman, anba Communication item 3 lo nou Order Paper.  Premyerman mon ti a kontan swet labyenveni bann trainee Zofisye Lapolis ki sorti…ki pe vizit nou Lasanble, ki sorti Lakademi Lapolis i ki pe vizit nou dan kad par zot progranm travay; progranm letid curriculum, kot zot pe aprann lo sa 3 Brans Gouvernman, zot rol e zot fonksyon.

E nou a rapel sa 3 Brans e nou menm nou Lasanble Nasyonal, Egzekitiv ki ganny gide par Prezidan, e Zidisyer ki ganny gide par Sef Ziz.  Sa bann trainees i ganny akonpannyen par 5 Enstrikter Lapolis dan Lakademi.  Sa se ASP Ned Wirtz, Lenspekter Maria Itard, SI Natasha Derjaques, Serzan Cedric Esther, PC Cedric Raoul.  Byenveni dan Lasanble.  Zot tou sorti Lakademi.  E parey labitid ler nou pran en Break 10er edmi, mon espere zot a ganny sans enterakte avek bann Leaders dan Museum area – anler lot kote kot zot pe asize e osi dan Commitee Room 3.  Mwan osi mon a sey vini pour ekoute ki zot annan pour akont nou, e an menm tan zot a ganny en pe refreshment.

Mon ti a kontan osi enform Lasanble e piblik an zeneral, ki Vandredi ki pe vini, Vandredi le 29 Septanm, nou pour annan en Sitting Ekstraordiner; en Asiz Ekstraordiner, akoz nou pour annan vizit Depite Sekreter Zeneral United Nations Mr Michel Sidibé ki li i osi UN Aids Executive Director.  E an menm tan i Depite Sekreter Zeneral UN.  E zot a rapel dan Nouvel ki Prezidan Faure in zwenn li resaman New York e i pour isi, e i pour adres Lasanble dan en Asiz ekstraordiner Vandredi le 29.  So mon ti a kontan since i en personnalite o, ki nou tou Manm Lasanble nou prezan Vandredi le 29 9er bomaten.

Ozordi dan Kominikasyon, mon ti a kontan koz lo de mo, lo respe, ou konnen bomaten mon’n koz ek serten dimoun ki’n vin anvi vwar mwan, mon’n eksplik zot ki mon pa kapab vwar zot akoz mon annan priyorite se Asiz Lasanble.  Me ler monn ekout zot mon krwar ki i enportan pour mon koz lo respe.

I enportan pour nou dan Sesel reflesir lo sa mo respe; sirtou respe pour bann ki vilnerab.  Ler en dimoun i en drug addict, i adikt avek drog oubyen i en prostitye, oubyen i en prizonnyen, i ankor en Seselwa e i ankor en imen, nou dwa li respe.  Konstitisyon i fer sir ki sak sitwayen sa pei irespektiv kot i ete dan sa ladder Lasosyete, nou dwa li dinyite e respe.  E mon krwar nou tou dan sa pei nou devret reflesir lo la.  Ler mon koz lo respe osi Konstitisyon i donn nou dwa lekspresyon lib.  Nou kapab asosye libreman ek sa ki nou oule; nou kapab pratik libreman nou krwayans politik Relizye eksetera.  Me selman sa ki enportan se fodre nou respe kanmarad ler nou pe koz lo kominikasyon.  E la mon pa pe koz lo kominikasyon zis one-to- one oubyen endividyel, me kominikasyon lo medya, print media, social media, nou bezwen respe kanmarad.

Avan nou pran nou kreyon nou komans ekri, oubyen avan nou pran nou ledwa nou komans tipe lo nou laptop, annou mazin sa mo respe.  Nou dwa nou kanmarad respe si nou oule nou, nou ganny respe.  E Sesel pour ou progrese dan sa evolisyon kot nou pe ale ver modernite e en demokrasi modern e vibran, nou bezwen respekte kanmarad.  E mwan i enn mon pwen for ki mon pour koz lo la ziska ler mon pour aret koze ki nou bezwen dan sa pei annan Law and Order e disiplin.

E sa ki underpin tousala parey Angle i dir son “bedrock” se respe.  Fodre nou aprann respe kanmarad.  Mon ti a kontan nou tou nou reflesir lo la e si zot oule plis leklersisman, mon pa dan sa gro sez tou lazournen mwan, mon anler dan mon Biro zot kapab vin vwar mwan, nou a diskit lo la.

 

Dernyen Lanons avan nou pran nou biznes of the Day ki mon ti a kontan dir se Mr Savy, Mr Glenny Savy in aparet devan Lasanble semenn pase, e i pour aparet ankor, me mon ti a kontan dir ki son PR Mr Payet i anmennen bomaten i lo Biro tou bann dokimantasyon ki i ti promet pour donnen, alor mon a demann Chair Komite Lasirans Onorab Henrie pour fer sir ki sa i ganny kolekte e ou a vwar ki ou devret fer avek, si pour sirkil kote; mon pour napa letan pour fer sa me mon ti a kontan ou vin dan mon Biro pandan Break ou pran e ou a konnen ki ou pour fer avek, parske ou’n koz lo la yer byen, dan en fason byen enpresyonan.  So mon a met dan ou lanmen pour ou travay lo la.

Vwala avek sa, nou a komans nou travay Order of the Day e lo nou item ozordi i annan prezantasyon Papye nimero 4, apre i annan Public Bills.  Clerk?

 

MADAM CLERK

Mersi Mr Speaker bonzour, bonzour tou Manm, bonzour tou dimoun ki a lekout.  So mon pour al dan lord kronolozi parey Bill i aparet lo nou Order Paper.

Premye Bill.  This Act may be cited as the Prevention of Drugs Abuse and Rehabilitation Agency (Amendment) Act of 2017.

2enm; This Act may be cited as the National Information Service Agency (Amendment) Act of 2017.

E 3enm, this Act may be cited as the Seychelles Media Commission (Amendment) No. 2 Act of 2017.  Mersi Mr Speaker.

 

MR SPEAKER

Mersi Clerk, sa i First Reading.  Alor nou ava al toudswit lo item nimero 6 lo nou Order Paper, e nou a envit Minis Pamela Charlette, Minis pour Fisheries ek Lagrikiltir ek son delegasyon pour zwenn Lasanble, silvouple.

Bon lo lapar Lasanble, mon ti a kontan envit Minis Charlette dan Lasanble, welcome li ek son delegasyon.  Minis fer ou konfortab, santi ou alez, breathe, e parey Labib i dir, “All will be well”.  Minis Charlette i akonpannyen par PS for Fisheries Mr Michel Nalletamby pour lenformasyon tou dimoun, son PS pour Lagrikiltir – Mr Antoine-Marie Moustache, son Konseye Spesyal pour Lapes, Mr Roy Clarisse ki o-bor Mr Moustache, Mr Ronny Renaud ki CEO SFA, Seychelles Fishing Authority i laba a kote, i annan osi Mrs Linetta Estico ki Deputy CEO of SAA Seychelles Agricultural Agency e mon ti a kontan anonse ki Statement Minis Charlette, pour ganny sirkile avek tou Manm apre ki in fini delivre son Statement e natirelman parey labitid ler in fini fer son Statement nou ava donn letan pour kestyon leklersisman, sizesyon pour Minis.  Alor Minis.. yes Onorab Pillay.

 

HON SEBASTIEN PILLAY

Mersi Mr Speaker, Mr Speaker mon ti pe move, mon ti oule move anba Order 79 (1) ki nou pran sa Statement Minis anba Committee Stage, rezon pour sa i akoz nou’n annan plizyer Mosyon lo size Lagrikiltir apre nou’n annan plizyer deba lo size Lapes.  E prezan vi ki sa i en, i annan konponan Emergency Plan ladan e Bidze pe vini, mon krwar ti ava en propis vi ki nou annan Minis avan Bidze, ki si nou konsider sa Statement lo Committee Stage, i ava permet nou pour ganny maximum detay lo sa Statement e bann kestyon ki bann Manm i annan, i a kapab ganny klarifye; koumsa nou ava pli enformen ler nou annan deba lo Bidze, akoz nou ava deza annan sa bann teknisyen ki la pour zot kapab osi reponn e konsolid bann lenformasyon ki nou pour gannyen.  Mersi Mr Speaker.

 

MR SPEAKER

Sel zafer Minister Charlette, se si sa i le ka, then ou bann zofisye i kapab osi reponn, anmenn leklersisman si nou al lo Staz Komite.  Eski i annan okenn lezot komanter?  Yes Onorab Ramkalawan.

 

HON WAVEL RAMKALAWAN

Mr Speaker bonzour, mersi bokou e bonzour tou bann Zofisye Lapolis e Minis ek son delegasyon.  Mr Speaker lo nou kote nou kont.  This is the Minister ki’n fer en request pour li vin fer en Statement dan Lasanble.

I demande pour li vin fer en Statement as the new Minister.  I antoure avek son bann teknisyen.  E nou lo nou kote nou krwar ki poudir, i byen ankadre avek son bann Minis – avek son bann teknisyen, pour li kapab reponn bann kestyon ki pour ganny demande.  E mon personnelman nou pa vwar akoz i annan okenn kestyon ki Minis pa pour kapab reponn.

Nou tou nou vini e i deza annan bann enteraksyon ki Minis in fer avek bann plizyer Manm, e atraver sa bann enteraksyon, nou konnen ki poudir dan sa learning curve, i dan sa learning process, me i napa nanryen pour ou Minis per, i son premye fwa ki i vin devan Lasanble.  So annou pa, mwan pour mon letan sa Onorab Pillay in met sa, mwan mon krwar i ape denigre kapasite Minis.  I ape denigre kapasite Minis.

 

MR SPEAKER

Ok Order!  Order!  Order!  Order!

 

HON WAVEL RAMKALAWAN

Nou Lasanble Nasyonal ki ti aprouv nominasyon Minis Charlette e mwan mon napa okenn dout ki poudir pandan sa Sesyon, pandan sa Sesyon pour annan bon korperasyon.  Ofet mwan mon krwar ki nou la, nou osi koman bann dimoun ki pe siport Lendistri Lapes avek Lagrikiltir, pour nou pa vin rod may zanbek me pour nou regarde ki mannyer nou pour fer sa 2 laspe enportan dan nou lekonomi monte.

Alors Mr Speaker nou lo nou kote nou pour dir nou pa bezwen al dan Komite.  Les Minis montre nou son, sa ki in aprann.  Kot i annan febles, nou osi tou nou ava la pour nou donn li lankourazman.  E mon krwar avek sa lespri nou kapab fer sa Sesyon normal san okenn…Mon ti a zis demande ki petet kot son bann teknisyen pe asize, petet sa enn la lo kote Lapes petet enn ti ava lo son kote drwat, lot ti ava lo son kote gos pour ki i ava fasil pour li enterakte avek zot.  Mersi bokou Mr Speaker.

 

MR SPEAKER

Mersi Onorab, avan nou revwar configuration asiz devan, mon a donn laparol Onorab Pillay apre Onorab Hoareau pour zot enterakte.

 

HON SEBASTIEN PILLAY

Mersi Mr Speaker.  Mr Speaker mon krwar annou pa mislead The House.  Lentansyon se pa pour denigre Minis dan okenn fason; lentansyon se ki mwan koman en Manm Lasanble i annan Bidze ki pe vini e mon annan Minis Lagrikiltir dan Lasanble, mon ti oule servi loportinite pour mon kapab ganny maximum lenformasyon.  Mon pa’n diskit nanryen avek Minis si i oule al dan Committee Stage oubyen non.  I mon drwa koman en Manm, anba nou Standing Orders parey i dwa nenport ki Manm dan Lasanble, pour li raise en point of order e demande ki nou al dan Committee Stage zis parey nou Standing Orders i prevwar.  Mon oule zis remind Lasanble, ki nou’n menm rod nouvo fason pour nou entrodwir nouvo eleman, ler nou’n diskit zisteman Mosyon Onorab Ramkalawan, pour nou antre dan en Committee Stage.  So mon krwar poudir vi ki nou’n annan sa diskresyon ki nou’n extend lo son Mosyon, mon ti pe zis demande e sa dan sa fwa si nou pa ni pour bezwen al anba okenn Lord, ki nou sispann okenn Lord nou Standing Orders.  Nou ti pour bezwen zis swiv Lord ki deza dan nou Standing Orders.  E zis pou fer bann Manm lot kote konpran.  I mean mwan sa ki mon pe fer i dan benefis tou Manm.  I pa dan benefis Minis, i dan benefis nou Lasanble se tou.  Mersi Mr Speaker.

 

MR SPEAKER

Ok, you made the point, ok Onorab mersi.  Onorab Hoareau.

 

HON BASIL HOAREAU

Mr Speaker mersi.  Mr Speaker mon ti pour segonn sa Mosyon ki Onorab Pillay in met devan.  Zis pour dir poudir mon konpran kote Onorab Ramkalawan i sorti letan in dir poudir se Minis ki’n vin devan nou Lasanble, li ki’n demande pour li vin fer en Statement.  Sa i korek, me letan ou get Order 34  (c) i dir ou koumsa poudir letan Minis i fini  fer en Statement, zeneralman napa okenn deba e kestyon pa vin as of rights sa, kestyon i ganny demande avek diskresyon Speaker.  I pa en Question Time parey letan Minis SA…So se a diskresyon Speaker ki kestyon i kapab ganny mete.

E mwan ki mwan, mon krwar, se a sa staz petet, la si Minis i santi poudir petet i annan bann serten larepons ki bezwen son teknisyen, parske Minis pa en teknisyen li dan Lagrikiltir nou tou nou konnen, me petet si i annan bann technical questions ki arise, si i santi petet wi i kapab reponn an term of Policy and so forth, me lo kote teknik si i krwar son teknisyen i pli byen plase pour reponn sa kestyon, then se sa ki nou pe demande nou, nou pa pe dir konmsi pour sey bypass Minis.  Non i pa le ka.

 

MR SPEAKER

Alright mersi, mon’n ekout tou le de kote mwan mon Speaker me tou dimoun i konnen mon osi en Fermye.  Mrs Linetta Estico i konnen mon en Registered Farmer, mon’n in vwar li 2 semenn pase, Mr Naiken i konnen.  Mon krwar Minis parey in ganny dir, i pe fer en bon travay.  E mon pe koz koman en Fermye.  I ankor zenn.  Mon vwar in vin Port Glaud dan plato kot i flood, kot mon reste, mon distrik – mon pa reste dan plato mon, mon reste Port Glaud.  In vin dan diferan landrwa, in al Praslin.  Sa ki mon kontan Minis pa’n anmenn en retenir cameramen e tou zafer deryer li; en Minis ki pe debourye hands-on, e mon krwar parey in ganny dir parey Onorab Hoareau tou bann teknisyen i la, i a donn nou letan pour konsilte zot, kot ou santi ou bezwen en pti pe letan pour konsilte.  Be mwan mon annan konfyans ki Minis Charlette pour fer en bon travay.  E avek sa mon a demann Minis pour prezant ou Statement.

 

MINISTER PAMELA CHARLETTE

Bonzour Mr Speaker.  Bonzour tou Manm Onorab e tou oditer ki pe ekout nou ozordi.  Parey nou tou nou apresye Sekter Lapes ek Lagrikiltir, i annan en rol tre enportan pour nou pei.  Non selman ki Lapes i reprezant dezyenm pilye nou Lekonomi, me sa sekter osi byen ki sekter Lagrikiltir i enportan akoz zot kontribye dan sekirite alimanter nou pei.

Nou bezwen aksepte ki nou petet pa pour zanmen kapab prodwir la totalite, nou bann bezwen alimanter.  Me menm sa nou bezwen fer tou pour asir maximum prodiksyon posib tout an respectant bann norm soustenabilite lizyenn e lasante.

Nou pa kapab koman en pti pei depan lo lenportasyon pour la totalite nou manze.  I absoliman neseser, ki a tou moman nou annan en serten nivo prodiksyon manze dan nou pei.  Sa i pa zis pour asir en nivo prodiksyon lokal, me osi pour gard sa kiltir prodiksyon manze e osi transfer sa konesans atraver nou bann zenerasyon ki swa dan Lapes oubyen dan Lagrikiltir.

Byensir nou bezwen fer sir, ki nou osi reste azour avek nouvo metod prodiksyon e nouvo teknolozi ki souvandfwa nou adopte e adapte sorti aletranze.

Mr Speaker nou osi rekonnet ki sa 2 Sekter pa’n touzour ganny tou resours finansyel, teknolozi, mendev e later neseser pour soustenabilite e sikse.  Alor Mr Speaker, se an rekonesans sa bann kontrent e lezot ankor, ki nou vin dan Lasanble Nasyonal ozordi.  Nou lentansyon i pour prezant devan Lasanble priyorite nou Minister e son bann Lazans pour Sekter Lapes e Lagrikiltir pour larestan sa lannen e pour lannen 2018.  Minister i deza annan son plan lonterm ki nou apel li SNAIP, ki i ti prezant avek medya detrwa semenn de la.  Me sa ki nou pe koz lo la ozordi, i en plan pour imedya.

Prezidan Faure dan son Diskour isi dan Lasanble Nasyonal an Zilyet, ti osi koz lo lenportans sa 2 sekter.  Alor i neseser ki nou osi vin eksplike, ki Minister Lapes ek Lagrikiltir, i vin donn en pe plis detay lo nou bann mwayen term pour nou relev sa 2 sekter nou lekonomi.  Nou akonpannyen ozordi par le 2 Sekreter Prensipal pour sa 2 Sekter, Konseye Spesyal pour Lapes e osi bann Sef Egzekitif sa 3 Lazans, ki tonm anba mon Minister.

Mr Speaker, mon a komans avek Sekter Lapes.  Sa sekter i konpri 3 kategori aktivite Lapes, sou sekter Artizanal, Semi-Endistriyel e Endistriyel.  Ozordi nou pe fer fas avek en sityasyon kot dan Sekter Artizanal i annan konsern avek plizyer bann stok pwason.  E sa i enkli bann lapes tel ki bourzwa.  Alor an vi sa menas lo stok pwasondfon, nou bezwen pran bokou prekosyon lo ki mannyer nou envestir dan sa sou sekter.  Nou pa kapab ankouraz bokou plis Lapes o fon, si nou oule asir son soustenabilite.  Petet nou bezwen menm komans mazin redwir zefor dan sa lapes pour permet ki bann stok i kapab re batir zot.  Annefe dan sa laliny tre byento, nou pe anmenn en Plan Zesyon pour Lapes o fon lo plato Mahe devan Konsey Minis, pour konsiderasyon.

Sa plan ki’n ganny fer atraver konsiltasyon avek bann parti prenan, i adres tou form lapes ki pe arive dan sa sou sekter ozordi.  E fer provizyon pour anmenn en form soustenabilite dan son pratik.  Ozordi bann aktivite tel ki lapes fer par bann bato Charter e Lapes Rekreasyonnel, pa ganny reglemante.  Alor pa vo lapenn si nou met kontrol lo Lapes Artizanal Komersyal, me lo lot kote les lezot aktivite lapes fer en nenport kwa.  Nou senpleman pa pour attend nou lobzektif anmenn soustenabilite dan sa aktivite.  Savedir en tenant compte konsern lo stok pwasondfon, nou Plan Zesyon pour osi ede zer lenvestisman dan lapes bann stok menase.  Minister i oule osi amelyor kondisyon bann peser e nou pe kontinyen avek lenvestisman dan bann lenfrastriktir, tel bann fasilite akostaz e debarkasyon, Store pour lekipman lapes e osi lezot ki ganny determinen koman neseser pour fasilite sa lapes.   Vi ki ice i en konsern grav, nou pe kontinyen amelyor sa servis e nou pe get bann mekaniz pour ankouraz partisipasyon sekter prive, prenon kont kou prodiksyon aktyel. Me an menm tan Mr Speaker, nou pour osi bezwen revwar serten pratik ki menas soustenabilite lapes o fon, e serten labi e gaspiyaz; par egzanp Konsesyon lo karbiran, Gouvernman i depans plis ki R25 milyon par an lo sa Konsesyon, e malerezman i annan bokou konplent labi dan sa sistenm.

Konsekaman tre byento, mon pour soumet en papye devan Konsey Minis lo sa size.  Anmezir ki nou pe revwar Konsesyon lo karbiran, nou pe osi revwar lezot sipor ki nou donn sou sekter Lapes Artizanal; par egzanp nou okouran ki malgre ki Peser i sipoze pe zwir serten Konsesyon lo Tax enportasyon lo zot lekipman, sa pa neseserman le ka, akoz mazorite peser i plito aste zot lekipman lokalman, kot sa Tax in fini ganny aplike.  Alor zot pey son pri antye.  Annefe lamazorite bann fermye, i osi fer fas avek menm sityasyon.

Dan sa loptik, nou bezwen an konsiltasyon avek Departman Finans.  Nou deza an konsiltasyon avek Departman Finans e Komisyon Reveni, pour eksplor bann diferan opsyon, pour asire ki peser e fermye i vreman benefisye avek sa Konsesyon.

Minister atraver son proze CLISSA pe osi diskit e ankouraz bann Lasosyasyon pour permet ki zot a kapab fourni peser avek bann pti lekipman a en pri pli rezonnab.  Dan sa ka ler bann lasosyasyon a enport sa lekipman sa Konsesyon Tax a ganny aplike dek i antre dan pei, e peser a senpleman pey sa pri ki i sipoze peye.

Me la i neseser fer resorti, ki sa bann lasosyasyon ki antre dan sa demars, pour bezwen demontre zot abilite pour zer en tel proze, e osi rann kont regilyerman lo zot aktivite pour fer sir ki se peser ki pe benefisye.

De lot kote Mr Speaker, nou annan sou sekter Lapes Endistriyel, ki konpri bato sener e longline Endistriyel.  Dan sa ka parey nou konnen aktivite bato sener, pe osi fer fas avek serten restriksyon, akoz menas i annan lo stok pwason migratwar; an partikilye ton zonn.

Lapes Endistriyel i nesesit en nivo lenvestisman tre o, ki pa dan laporte bokou Seselwa.  I annan konsern lo stok ton e atraver Komisyon Ton Losean Endyen – IOTC nou annan restriksyon lo lakantite Ton Zonn ki nou kapab lapes.  An vi ki bann lespes ton i an plizoumwen bouz ansanm, sa restriksyon i finalman aplik lo totalite lapes bato sener.

An se moman Lapes Semi- Endistriyel, i annan mwens ki 1,000, i anmenn mwens ki 1, 000 tonn ton par an; e Endistriyel longline mwens ki 12, 000 tonn.  Sa i enkli tou lespes ton.  Sa volim lo li menm, pa pour fer okenn lefe lo nivo stok sa lespes.  O kontrer nou annan ankor lespas pour lapes en pe plis ton, atraver sa 2 metod san menas soustenabilite sa stok.

Alors Sekter Lapes Semi-Endistriyel e Endistriyel long line se sa 2 sou sekter, ki prezant pli gro loportinite pour lenvestisman dan devlopman lapes.  Savedir se dan sa 2 sou sekter, ki nou bezwen ankouraz nou bann envestiser Seselwa.  An di-z-an sa, mon oule fer resorti ki nou Minister i okouran difikilte, ki ou sekter Semi-Endistriyel pe fer fas avek e nou bezwen donn li latansyon en pe pli partikilye.

Dan nou bann diskisyon avek bann parti prenan e dan nou lanaliz, nou’n remark plizyer keksoz.  Nou annan en sekter dan ki nou annan bokou lespwar, me malerezman bann partisipan aktyel pe vwar li difisil pour re pey zot det.  An bref sityasyon bann operater i konm tel; zot annan gro det ki pe menas menm zot bann byen personnel. I paret ki posibleman i annan en problenm avek teknik lapes ki fer ki zot pa pe atrap sa volim pwason ki zot ti a ekspekte.  Difikilte pour ganny mendev pour al lapes; en for depandans lo fasilite lo later tel ki ice pour kapab al lapes; mank materyo lapes ki pa neseserman annan lo marse lokal; difikilte pour vann zot pwason kan zot rantre.  Dan en tel sityasyon nou pour bezwen relev sa sekter pour benefisye peser.

Nou Minister pe alor propoz en progranm spesifik pour siport sa Sekter Semi- Endistriyel konm swivan; revwar loan enkli repeyman e grace period avek Labank Devlopman; asiste bann Operater avek lekspertiz dan lapes longline, pour ki zot amelyor zot konpetans.  Siport zot avek finansman e lekspertiz, pour enstal sistenm refrwadisman lo zot bato; en sipor finansyel pour ed zot re demar zot aktivite.  An dot mo sipor anver zot cashflow.  Akseler travay ki pe ganny fer pour lavant zot pwason, enkli spesifikman atraver sa Komite ki’n ganny etabli par Board Lenvestisman Sesel, pour promouvwar leksportasyon; akse avek marse i osi depan lo asir devlopman bann lezot fasilite valer azoute ki pe ganny devlope lo Por Providence.

Sa bann mezir i an plis ki lezot devlopman ki pe arive lo sa Por atraver sipor ki nou pe gannyen avek Gouvernman Zaponnen, kot pour annan lagrandisman fasilite akostaz e debarquement pwason.  Enn fwa ki sa proze in konplete ver lafen lannen prosen, zot Lizin valer azoute a kapab komanse lo sa morso later ki pa deryer Por, e la osi i ava annan lezot loportinite lavant pwason.

Mon espere ki tou ansanm, nou pour kapab re met Sou Sekter Lapes Semi- Endistriyel lo son lipye e ki nou kapab pli byen benefisye atraver sa lapes.  Nou Minister pe osi travay pour etablir en Polisi lo sa ki nou apel bycatch pour ki nou annan plis lord dan sa domenn pour kapab garanti plis akse avek sa bann pwason pour labwet, leksportasyon oubyen valer azoute.

An se ki konsern Sekter Agrikol, nou plan i vize ver anmenn plis sipor pour fasilit aktivite fermye.  Dan sa demars nou fek ouver en Store Lagrikiltir Anse Boileau e nou’n deza komans travay lo nou Store Santral Grand Anse Mahe pour asir stokaz entrant.  Sa pou permet ki nou annan sifizaman materyo ki fermye i bezwen a tou moman.  Be la nou pour aprovizyonn lezot Store pour ki zot pou osi stok a en nivo ki fermye pa manke.

Mon ti a kontan fer resorti a sa pwen ki dan nou stok, nou pe anmenn bokou plis prodwir biolozik, pour ki nou progresivman retourn ver en prodiksyon pli natirel, e nou bann prodwir i vin pli sen e kontribye pour en pli bon leta lasante nou popilasyon.  Se pour se la, ki nou bezwen edik bann fermye lo bann nouvo prodwir e nouvo fason aplik zot.  Nou deza komans en travay pour computerize nou bann Store, pour amelyor lefikasite dan zesyon stok.  Sa sistenm pour osi met nou gard pli byen statistik, lo nou bann être etrant pour bon desizyon.

Touzour Grand Anse Mahe, nou pe osi devlop en Mechanization Store, ki pour stok serten lekipman agrikol, pour vann, ouswa pour lwe avek fermye, pour fasilit zot travay lo laferm.  Nou espere ki sa fasilite a fer lagrikiltir en pe pli atiran pour zenn, e anmenn plis rannman dan sa sekter.   Nou osi resaman konplet plizyer travay pour amelyor stokaz e distribisyon delo dan plizyer landrwa; tel ki La Gogue, Port Glaud, Anse Boileau ek Cap Samy lo Praslin.  Nou pou kontinyen sa travay dan lezot landrwa tel ki Val D’Andorre, Amitié, e Cote D’Or.

Minister atraver Lazans Lagrikiltir, pe osi entansifye travay lo konstriksyon semen, e nou ekspekte kontinyen sa lannen e an 2018.  Pour le moman nou’n siny Kontra pour 2 semen Montagne Posée, 2 semen lo Praslin, 1 Grand Anse Mahe, e 1 La Gogue.

Lezot proze ki nou anvizaze komanse sa lannen, i pour survey bann Later Agrikol ki pour ganny pas bay avek fermye.  Nou pe arete met fermye lo Later Lagrikiltir, ki pa ankor ganny demarke e anrezistre.  Annefe Mr Speaker, nou pe osi revwar lafason ki nou donn Later Lagrikiltir.  Nou oule ki lagrikiltir lo later, ki nou pas avek fermye, i ganny pratike koman en biznes e non pa koman en aktivite sosyal.

I neseser ki tou laferm i transform a en biznes ki finalman depan lo li menm.  Nou oule ki bann Later Agrikol ki nou annan i vin pli prodiktiv.  Se pour sa rezon, ki nou pe travay pour met tou bann lenfrastriktir e servis an plas.  Finalman fermye ava annan tou keksoz ki zot bezwen e mon espere ki zot ava kapab fer zot aktivite avek mwens difikilte.  Parey mon’n mansyonnen, pour re get lafason ki nou donn Later Lagrikiltir, pour ki i pli transparan.

Nou pou osi ensiste lo evalyasyon bann propozisyon ki nou gannyen, pour asire ki zot vyab, koman en biznes avan nou donn sa later.  Sa i a ganny fer avek led Lazans Lagrikiltir.  Sa pour osi ed nou attend nou lobzektif pour fer lagrikiltir vin pli komersyal.

Mr Speaker, sa i bann demars ki nou pe fer an zeneral dan lagrikiltir.  Nou pour osi konsantre en pe plis lo Sou Sekter Elevaz.  Sa sou sekter pe fer fas avek bokou difikilte e nou oule relev li, pour ki i vin pli soutenab e vyab.

Nou Minister i senserman krwar, ki nou kapab fer sa sekter pli performan, e pli konpetitiv, kot nou a kapab redwir nou depandans lo lavyann enporte, ki nou pa asire kwa ki ladan an term of hormone, antibyotik ou delo.  Nou pe komans travay lo en Livestock Improvement Laboratory, ki pour baze Grand Anse Mahe.  Sa Laboratwar pour permet fer bann analiz pli profon, lo diferan laspe elevaz, kot nou pou kapab a lafen donn plis konsey aprofondi, nou bann fermye e pour anmenn amelyorasyon dan prodiktivite.  Travay in osi komanse lo lenfrastriktir Sant Zenetik pour koson, nou’n osi resaman enport nouvo bloodline koson pour rekonmans nou resours zenetik an ameliorant sa Sant Resours Zenetik nou pour kapab donn fermye bann pti koson pli bon kalite kot zot a vwar plis rannman.

Nou annan plan pour anmenn ankor nouvo bloodline pour kontinyen amelyor nou bann resours zenetik kabri.  Dan sa laliny e avek sa nouvo laboratwar elevaz, nou pe osi planifye pour komans fer en similasyon artifisyel.  Sa pratik pour permet nou renouvle nou resours zenetik pli souvan, e bann Fermye elevaz i devret tir benefis ladan.  Sa laboratwar pou osi permet nou pour etablir bann standar elevaz, kot nou kapab teste lavyann e manze zannimo.

Sa pour finalman permet nou, met serten standar lo lavyann ki ganny enporte e la nou devret kapab vwar benefis pour fermye e lasante piblik.

Mr Speaker an vi sityasyon sa Sou Sekter Elevaz e son lenportans pour Sou Sekter Fri e Legim, nou pe osi prepar en progranm soutyen pour relev sa sou sekter, bann fermye elevaz in fer fas avek bokou difikilte dan lepase, kot zot in fer bann gro lenvestisman e en pti pe letan apre vwar lanvironnman biznes sanz en sel kou.  An rezilta, zot in bezwen fer fas avek pli gro kou loperasyon e lanvaisman par lavyann enporte ki zot pa’n kapab fer fas avek.

Pour soulaz zot difikilte, Gouvernman ti a sa letan met en subsidy lo labatwar, kot zot ti devret benefisye avek en rediksyon ase enportan dan kou servis.  Malerezman laplipar di -tan se pa sa fermye ki anmenn koson labatwar, me bann bouse.  Alor fermye pa pe neseserman benefisye avek sa subsidy.  Nou pe alor revwar sa mechanism, pour nou permet ki se vreman fermye ki zwir sa benefis.

Sa progranm i pour elevaz koson e poul, ki nou pe propoze pour sa sou sekter i enkli sa bann mezir swivan; revwar zot loan enkli peryod repeyman e grace period avek Labank Devlopman.  Nou annan dan lekip Lazans Lagrikiltir, en Spesyalis elevaz zannimo e nou pou servi son konesans, pour ede revwar Plan Prodiksyon e Plan Biznes sa bann fermye lo sa progranm.  An vi zot sityasyon finansyel, nou pe osi konsider asiste zot avek en pti fon, pour ed zot rekomans zot aktivite.  Nou pour fer sir ki fermye i benefisye avek sa subsidy, ki zot sipoze gannyen atraver labatwar.  Nou pe revwar en sistenm kot zot ganny sa soutyen pli direkteman.  Selman nou pour bezwen fer anliny avek nou bann lobligasyon enternasyonal tel ki WTO.  Nou ava fer Lanons pli detaye lo sa progranm tre byento.

Lavyann lavant lokal, i an difikilte e fermye i fer fas avek.  Alor nou Marketing e promosyon lavyann prodwir lokalman, pou bezwen ganny revwar.  Nou ekspekte ki STC a kapab ed nou en pe dan sa demars.  Nou’n komans en diskisyon tre preliminer pour vwar koman nou kapab ed sa Sekter.

An plis, nou’n osi komans en travay avek operater Labatwar Le Rocher, pour ariv lo en Lagreman pour amelyor relasyon avek fermye e servis ki zot benefisye avek.  Sa legzersis i osi enkli serten amelyorasyon lo labatwar, pour ki kalite lavyann i pli bon e i a ganny en pli bon lavant.  Nou pe ekspekte ki avek tel plan, nou pour kapab vwar amelyorasyon ase enportan dan sa sou sekter e i annan reperkisyon tre pozitiv lo Sekter Fri e Legim.  Previzyon pour laplipar bann dezas natirel, i fer ki Sekter Lagrikiltir ek prodiksyon alimanter i ganny menase seryezman, espesyalman dan sa lepok ki nou depans depandans lo lenportasyon manze pe vin pli an plis pli enstab.  Gouvernman Sesel i kontribye 50 poursan lo Premium ki bann fermye ki anrezistre anba Lasirans Lagrikiltir pe peye.  Nou Minister pe alors reget sa progranm Lasirans, pour ki i vin pli efektiv e atiran pour ankouraz partisipasyon plis fermye.

E lot domenn tre enportan ki nou Minister pe gete, se domenn Biosekirite.  Anmezir ki nou amelyor prodiksyon lokal lavyann fri e legim, nou bezwen fer atansyon ki nou redwir menas ki sa bann sekter i fer fas avek.  Se la kot travay Biosekirite i vin tre enportan.

Biosekirite i osi konsern lasante dimoun kot nou menase avek bann maladi e pest tel ki avian flu Mad cow, disease, senir plim e lezot.  Alor nou Minister atraver Lazans Biosekirite Nasyonal, i annan en plan pour amelyor vizilans e proteksyon pei kont sa bann menas.  Pour sa nou pour ogmant nou kapasite kontrol pre border, border e post border.  La nou pour bezwen plis resours imen e lekipman apropriye.  Travay Lazans Biosekirite i enkli kontrol e evit propagasyon pest ek maladi, laplant, e zannimo atraver pei.  Alor i nesesit annan sa kapasite pour deplase a nenport moman e dan diferan landrwa an menm tan.  Pour sa nou oule ogmant lakantite veikil a dispozisyon sa Lazans, pour ki nou fasilit zot deplasman.

En lot servis sa Lazans, i servis Veteriner.  En servis ki bezwen bokou latansyon, vi ki nou bann fasilite enfrastriktir osi byen ki nou kapasite resours imen i limite.  Nou annan plan pour en re devlopman Union Vale kot nou pour annan osi en batiman pour Veteriner enkli en Klinik modern.  Malerezman i pa paret nou pour annan sa finansman pour fer sa dan limedya.  Alor nou pe fer plan pour fer en amelyorasyon lo sa batiman ki egziste pour agrandi li e met bann fasilite pli konvenab pour tenir nou, ziska ki nou kapab ganny sa nouvo batiman.  Kontra in fini ganny donnen e proze i a demare boner an Oktob.

La i enportan pour fer sorti, ki nou annan zis 4 veteriner, me i nesesit en minimum 7 pour kapab donn en servis pli efikas.  Mr Speaker, parey tou dimoun i kapab swiv dan Nouvel, e atraver bann diferan meeting dan bann rezyon, nou pe re entrodwir Lanrezistreman lisyen boner lannen prosenn, e avan lannen fini nou ekspekte ki sa Prozedlwa i a pas devan Lasanble.

Pour re entrodwir Lanrezistreman lisyen nou pour bezwen kapab fer bann servis neseser, alor nou pe osi re entrodwir en Dog Control Unit, ki pour plase dan Lazans Biosekirite.  E la nou pe prepare pour met an plas sa bann resours neseser enkli staff, lekipman, veikil spesyalize, pour ki nou kapab komans travay preparatwar, pour enplimant sa nouvo Lalwa.

Mr Speaker, avan mon fini, mon annan en mansyon spesyal pour bann zabitan Praslin ek La Digue.  Tou bann mezir i osi aplike pour sa 2 zil kot i apropriye.  Me nou lapros pour diferan, akoz nou pe form en Komite ki pour enplik lotorite sa 2 zil e bann Lazans konsernen.  Sa Komite i ava asire ki devlopman sa 2 zil dan Lagrikiltir ek Lapes, ava ganny konsidere dan son totalite an konsiltasyon bann akter prensipal.  Koumsa nou ava kapab rod finansman pour zot bann proze.

Mr Speaker, tou sa bann plan e Mezir ki mon’n koz lo la ozordi, pour depan bokou lo efikasite bann lorganizasyon ki pour enplimant zot.  Savedir Minister ek son bann Lazans, ki osi depan lo motivasyon zot resours imen, alor nou pe osi fer serten reazisteman dan striktir sa bann Lorganizasyon pour anmenn en pe plis efikasite.

Nou pe osi travay avek bann Lotorite konsernen, pour revwar reminerasyon bann staff pour ki nou kapab gard nou bann bon eleman, me osi atir nouvo ekspertiz pour ede anmenn sa devlopman ki nou pe rode dan sa 2 sekter.  An plis ki sa, nou annan lezot mezir sipor ki nou pe adrese, ki enkli lenfrastriktir pour Biro, Lekipman travay e transpor pour fasilit deplasman nou staff, pour fer zot louvraz dan en fason pli efikas.

Mr Speaker, sa i an gro nou plan pour Sekter Lapes ek Lagrikiltir, ki mon espere pour anmenn en pe plis dinamiz dan zot devlopman.  An plis ki Bidze anyel, sa plan pour kout R31 milyon pour Sekter Lapes, R14 milyon pour Sekter Lagrikiltir, R13 milyon pour Lazans Biosekirite e R3.2 milyon pour Minister.  Minister i ouver pour resevwar lezot propozisyon ki nou kapab konsidere pour amelyor nou plan, tout an prenon kont letan e resours ki a nou dispozisyon e osi byen ki bann limitasyon ki nou annan.

Pour terminen Mr Speaker, mon ti a kontan remersi ou pour sa loportinite pour fer sa lentervansyon ozordi.  E mon remersi bann Onorab pour zot latansyon e kontribisyon ki zot pour anmennen.  Mon remersi osi bann oditer ki’n pran letan pour ekout mwan ozordi.  Mersi Mr Speaker.

 

MR SPEAKER

Mersi Minis Charlette, evidaman mon’n ekout avek atansyon ou Statement e koman en fermye mon krwar ou pe anmenn nou bokou lespwar.  Me mon pa a koz konmela mon a les lezot entervenan koze.  Onorab Ferrari.

 

HON JEAN-FRANCOIS FERRARI

Mersi.  Mr Speaker, mon annan en kantite kestyon, me selman mon ti a kontan komans avek enn zeneral e apre mon mazinen ou ava donn mwan lokazyon pour poz enn de bann kestyon pli spesifik.

 

MR SPEAKER

Ok.

 

HON JEAN-FRANCOIS FERRARI

Mon ti a kontan zis demann Minis an zeneral, Minis eski ou realize poudir Minis Lagrikiltir e Lapes li menm li Minis ki fer pli kourt letan dan okenn sa bann Gouvernman ki nou’n konnen sa bann dernyen lannen?  E ki mwan mon vwar sa koman en mank lentere Gouvernman e en mank sipor Gouvernman pour Minister Lagrikiltir avek Lapes dan lepase.

Mwan mon ti a kontan Minis si ou kapab dir avek nou Lasanble, ki konsiltasyon ou’n gannyen avek Prezidan?  Ki travay ou’n fer?  Ki diskisyon ou’n gannyen pour fer sir ki ou pour gannyen sa sipor ki ou pe demande?

Akoz Minis dan ou konklizyon, ou’n donn nou detrwa sif, ler mon’n met sa ansanm an gro i probableman mwens ki 40 milyon ki en Lazans pour lalit kont drog pe demande pour li fer en proze Cap Ternay.  Ou, ou pe demann menm kantite larzan ki mwan mon krwar i pa sifizan, akoz tou manman ki lev-e bomaten premye keksoz zot demande ki nou pe al kwi tanto.  Me selman nou koz lo finans, nou koz lo lasante, nou koz lo Foreign Affairs, nou pa pe gannyen.  Minis, mwan mon ti a kontan ki ou reasir sa Lasanble ki Minister Lagrikiltir ou pe al lager pour lev sa Minister Lagrikiltir e pour fors Gouvernman donn ou tou sipor pour met an plas sa bann mezir ki ou’n anonse.  Mersi.

 

MR SPEAKER

Mersi Onorab.  Minis Charlette.

 

MINISTER PAMELA CHARLETTE

Mersi Mr Speaker, mersi Onorab. Mr Onorab Prezidan ler mon ti ganny apwente, premye keksoz ki i ti fer se envit tou dimoun, tou bann Lazans pour en Meeting kot State House.  La ki bann dimoun ti donn zot pwennvi lo kote bann sipor ki zot bezwen e zot ti fer konnen zot fristrasyon ki dan lepase zot pa’n gannyen sa bann sipor.  Tou keksoz nou ti met lo kart, nou ti met lo latab e sanmenm sa ki Prezidan ti fer nou ale pour fer en Emergency Plan.

Sa Emergency Plan ki nou annan i pa zis sa.  Nou annan en plan a lonterm, me sa Emergency Plan se pour fer nou sorti dan sa sityasyon kot nou ete ozordi.  E byensir i bezwen annan finansman ki al avek.  Nou’n koze, nou’n fer plizyer diskisyon – ziska semenn pase nou ti ankor pe diskite avek Minister Finans, pour donn nou sa finansman ki nou pour bezwen pour nou Emergency Plan.  E mon krwar i annan tout en nouvo dinamiz ki tou dimoun menm Cabinet in fini aprouve nou Emergency Plan.  E zot konnen ki sa 2 Sekter i bezwen sa, ganny sa lenportans e sa finansman.  Alor mwan mon pour dir ou, mwan menm personnelman mon pe travay for e mon pa pe aksepte ki zot pe dir mon non.   Mon toultan pe demande ki sa finansman i gannyen.  Mersi.

 

MR SPEAKER

Mersi Onorab taler nou a retourn kot ou parey ou’n dir.  Onorab Georges.

 

HON BERNARD GEORGES

Mersi Mr Speaker.  Mr Speaker, Minis konpran mwan silvouple, mon ti vin la eskiz mwan Mr Speaker nou ti pe ekspekte en keksoz en pe pli révélatoire, me mon en pti pe dezapwente Minis.  Mon konnen i pa ou fot ou fek pran, ou fek pran en Minister ki’n ganny neglize pandan bokou lannen e ou pe sey relev li, me i paret mwan ki Statement bomaten i fer mwan mazin enn sa bann kanmiyon ki al tir en loto ki’n tonm dan en ranpar pour remet li lo semen.  Alor ki nou, nou ti pe ekspekte, anfen mwan mon ti pe ekspekte en veikil nef bomaten.  Minis i annan 2 keksoz ki mank konpletman dan ou prezantasyon bomaten e anmezir ki ou pe remet en sekter an plas, refer sistenm Veteriner, refer revwar Labatwar eksetera, what about bann nouvo sekter?  Par egzanp Zil Elwanye, ki son rol pour ete dan prodiksyon agrikol e prodiksyon lapes?

E dezyenmman ki vizyon ou Minister i annan pour Sekter Lapes ton Endistriyel, kot Sesel i ava kapab li menm li annan son Lendistri Ton e non pa depann lo bann sener ki sorti dan bann lezot pei.  Eski ou ti a kapab ed nou silvouple lo sa 2 sekter.  Mersi.

 

MR SPEAKER

Minis.

 

MINISTER PAMELA CHARLETTE

Yes.  Mersi Mr Speaker parey mon’n dir dan mon lentervansyon bomaten, ler Onorab pe koz Zil Elwanye, sa sipor endistriyel par egzanp lo annan zot prop purse seiner, sa i bann keksoz lonterm kekfwa ki nou ava travay lo la.  Me selman la pour sa Statement sa, i tou bann keksoz imedya ki nou anvi fer; akoz nou annan, parey nou pe dir nou annan en Plan SNAIP, me sa i en plan a lonterm.  Pour mwan sa ki vreman i en priyorite right now, se pour nou kapab met sa 2 sekter debout lo son 2 lipye.  E minimum ki nou kapab avek resours ek letan ki nou annan, se sa bann prepozisyon ki nou pe met devan.

Me selman Zil Elwanye byensir i annan loportinite.  Sa nou konnen i annan loportinite, me selman i devret tout en lot letid oubyen lot resers, pour kapab gete.  Akoz mon’n al dan bann pei parey Maldives kot i annan zil e bann prodiksyon ki zot pe fer i vreman enpresyonan.  E zot servi plis hydroponics par egzanp.  Me sa i en keksoz ki nou pe anmennen evantyelman.  Me selman pour li ariv lo sa nivo i pour pran en bon pe letan.  Se sa ki mon pe dir, ozordi mon pe konsantre en pti pe plis lo mon bann plan imedya ki mon annan.

 

MR SPEAKER

Mersi Minis. Onorab Georges ou ok?

 

HON BERNARD GEORGES

Mon ok Mr Speaker.  Mersi.

 

MR SPEAKER

Ok.

 

HON BERNARD GEORGES

Minis mon mazinen poudir pour Sekter Ton menm repons, i en plan a lonterm ki nou ava regarde.  Mon satisfe pour atann li lo sa.  Mersi.

 

MR SPEAKER

Onorab Henrie.

 

HON GERVAIS HENRIE

Mersi Mr Speaker, bonzour tou dimoun.  Mon kestyon pour Minis i konsern dan son Statement.  Mon konstate ki i napa en mansyon spesifik lo zenn dimoun, malgre dan ou Statement ou ‘n dir ki mendev i en defi.

Permet mwan Mr Speaker, pour tro lontan dan Sesel i annan en tandans Lagrikiltir, kot nou’n krwar ki bann manrmay ki pa tro aprann ki pran Lagrikiltir; ouswa bann fir ki pa tro zoli ki al dan Lekol Lagrikiltir.  Nou bezwen admet sa.  Me selman ler mon get la, ler mon get la, mon vwar bann teknisyen tre konpetan e mon konn zot kapabilite.  Mon vwar mon krwar Minis i premye madanm dan Sesel ki tenir sa portfolyo.  Alor avek en zoli Minis, avek ou laparisyon lo lasenn Lagrikiltir ek Lapes, mon krwar i en moman la pour nou re ankouraz nou bann zenn dimoun, poudir i annan en kantite loportinite travay dan domenn resers, lasyans dan Lagrikiltir.  E menm pli enportan larzan.  Agriculture and Fisheries is a big business.  Mon ti ava kontan ou dir nou dan ou plan Emergency Plan la kot zenn dimoun i vin ladan, akoz nou annan en Lekol Lagrikiltir ek Lapes.  Sa i enn.

Dezyenmman Minis in dir nou i annan en problenm labi, gaspiyaz dan kestyon Konsesyon fuel – ki Leta taxpayers, pe depans apepre R25 milyon ladan, e in dir nou i pe prezant en papye devan Cabinet byento lo sa size, so mon ti ava kontan i donn nou en pe plis detay lo la, ki kantite ki pei pe perdi par egzanp; dan sa Scheme, ki’n konvenk ou Minister, pour soumet en papye avek Cabinet as an emergency measure pour nou tackle sa problenm.  How serious is it?  Mersi.

 

MR SPEAKER

Minis avan ou reponn, mon ti a kontan dir Onorab Henrie ki nou napa zis en zoli Minis, me nou annan en zoli madanm ki Pilot Michel Estico in marye avek Linetta i la.  So pa zis vilenn dimoun ki al dan Lagrikiltir.

 

(APPLAUSE)

 

MR SPEAKER

E mon pa krwar poudir mon’n ne lo laferm, mon papa ek mon manman ti fermye tou lede ti 2 zoli dimoun. Minis silvouple reponn ou kestyon.

 

(Mic Off)

 

MR SPEAKER

Silvouple, silvouple.  Minis.

 

 

MINISTER PAMELA CHARLETTE

Mersi Mr Speaker,  mersi Onorab.  Depi ler mon’n antre Minis, mon’n rankontre bokou fermye zenn.  E mon tir mon sapo avek zot, akoz se sa bann zenn ki pe fer ladiferans vreman.  Nou annan bann parey Jude Brown Pointe Aux Sel; nou annan bann parey lo Praslin nou ti al vizite Roddy Rose ek bann lezot ki vreman, vreman, vreman pe serye menm si nou dir zenn konmela pa kontan travay.  Me sa i en keksoz ki’n motiv mon espesyalman pour get zot pli pros, met zot a dispozisyon.  Akoz ler annandler dan mon bann plan big meeting dan Zedi ki mon annan avek piblik, en kantite bann zenn i apros nou e ler nou refer zot avek Lazans Lagrikiltir toultan nou met en pti presyon poudir sa i en zenn ki anvi e ki kontinyen fer byen dan lasosyete.  Alors nou siport zot.

Me lo kote mendev pour le moman parey ou pe dir i vre sa statement ki ou’n dir ki nou toultan pran bann zanfan ki kekfwa i annan problenm lekol, oubyen ki pa’n meet sa grad akademikman.  Nou annan lo Board SIAD lekol, dimoun sorti dan nou Minister ki pe involve zot en pe dan lafason ki sa lekol li menm li i fonksyonnen e bann progranm, lo son bann curriculum.

Nou pe osi ankouraz bann Lazans par egzanp SFA pour al dan bann Lekol Biznes par egzanp, pour rod bann dimoun oubyen bann manrmay pe fer A ‘level pour dan Lasyans parey ou’n dir akoz Lagrikiltir.  Ler ou gete Lagrikiltir ek Lapes i tout an lasyans.  I pa zis ale pour al pyose dan later, i tout en lasyans.  E i annan en divers kalite karyer ki ou kapab pran dan sa tou lede sekter.  Nou ti komanse detrwa mwan pase avek en port ouver ki nou ti fer, me malerezman nou pa ti ganny bokou zenn ki ti vini.  Nou pa ti ganny bokou dimoun menm si nou ti’n fer en bon pe piblisite.  Me selman nou pour kontinyen.  Nou pour al ver zot, nou pour al dan lekol, pour nou kapab atrakte en pe sa bann zen.  Me osi lo kote reminerasyon, i en keksoz ki nou pe, ki nou pour travay, ki nou pe travay lo la in fini komanse, i annan bann Scheme ki’n fini ganny deza enplimante.  Me nou pe revwar ankor pour nou kapab fer sir ki bann dimoun dan Lagrikiltir bann ki annan son Masters, bann ki annan son Degre zot osi ganny rekonpanse parey dan bann lezot Departman Gouvernman.

Lo kote fuel Onorab, wi mon’n dir i annan bokou gaspiyaz e i 25 milyon par lannen.  Me selman la pour le moman nou napa vreman detay.  Nou pa’n anmenn plis detay figures pour nou kapab dir ou, kekfwa si ou ti kapab fer en request pour diferan statistik sa nou ti ava rode nou ti ava donn ou.

 

MR SPEAKER

Onorab Henrie.

 

HON GERVAIS HENRIE

Zis en pti follow up Minis, Mr Speaker.  Dan mon kestyon orizinal, zisteman mon ti’n fini fer sa request, pour nou konnen ki poursantaz zot krwar ki pe ganny perdi; konmsi ki deza in donn zot sa lenpresyon poudir wi i annan en konsern la ki’n fors ou pour al prezant en papye devan Cabinet.  So mon ti’n fini fer sa soumisyon.  Alor mon ava swete ki Minis i kapab fer nou ganny sa lenformasyon avan lafen lazournen, travay Vandredi.

Mr Speaker en follow up lo mon kestyon, mon’n note ki lot kote latab in bat lanmen ler in dir i annan bokou zenn dan Lagrikiltir, so mon ti a kontan Minis si letan in vin dan son Minister, i annan en legzersis ki’n deza ganny fer ki depi letan ki Lekol Lagrikiltir e Lapes, Maritime la, in ganny, in komanse isi Sesel, ki kantite zenn ki’n pas dan sa 2 lekol e ki’n ganny retain dan 2 Lendistri e kantite ki’n ale vizavi lenvestisman total ki pei in fer dan zenn, pour pran travay dan sa 2 sekter – koumsa nou ava kapab konnen e bat lanmen pli for.  Mersi.

 

MR SPEAKER

Onorab, I mean Minis Charlette sorry.

 

MINISTER PAMELA CHARLETTE

Mr Speaker mersi…

 

MR SPEAKER

Yes Minis.

 

MINISTER PAMELA CHARLETTE

Onorab nou pa’n fer en letid lo lakantite zenn.  Me sa ki nou kapab dir se ki, ler nou get nou bann teknisyen ki nou annan ozordi, menm bann zenn teknisyen ki nou annan, tousala in sorti dan Lekol Lagrikiltir.  Me dan sa bann 3 dernyen lannen, ki nou pe konstate se ki apepre tou le lannen apepre 5 etidyan ki nou gannyen pour pran sa karyer.  E i annan selman ler nou rankontre zot, zot anvi retourn dan Lagrikiltir.  Me zot anvi retournen pour zot vin en fermye, pour zot plante oubyen fer elevaz zannimo lo en plan komersyal.  E se sa ki nou pe ankouraze menm si zot deza annan en karyer la pour le moman.

 

MR SPEAKER

Minis ou’n fini?

 

MINISTER PAMELA CHARLETTE

Sorry?

 

MR SPEAKER

Non kontinyen ou, kontinyen, Onorab pe demande apre pour li fer en follow up.

 

HON WAVEL RAMKALAWAN

Non Mr Speaker, mon ti zis anvi, Minis in nonm en sif la, in dir tou-le-z-an zot ganny 5….

 

MINISTER PAMELA CHARLETTE

Sa 3 2 dernyen lannen …..

 

(Mic Off)

 

HON WAVEL RAMKALAWAN

Sa 3 dernyen lannen zot in ganny zis 5 zenn ki al dan Lagrikiltir?

 

MR SPEAKER

Hold on.  Order!  Les Minis eksplike.

 

HON WAVEL RAMKALAWAN

Mr Speaker, Mr Speaker in fini eksplike in dir ki pandan sa dernyen 3an zot in ganny zis 5 zenn ki al dan Lekol, par lannen, 5 zenn par lannen ki al dan Lekol Lagrikiltir.  Alors mon ti ava kontan dir avek Parti Lepep retir sa bat lanmen ki zot in fek bate.

 

(laughter)

 

MR SPEAKER

Ok. Order!  Order!  Minis esper en pti moman.  Silvouple, Minis esper en pti kou nou a esper zot reste trankil, ozordi konmsi zot en pti pe eksite.  Ok Onorab Loizeau ou annan en kestyon.

 

HON NORBERT LOIZEAU

Mersi Mr Speaker.  Bonzour Minis ek ou delegasyon, bonzour tou dimoun.  Mr Speaker mon anvi demann Minis en pti kestyon.  Parey Minis ou konnen mwan mon kontan tous bann pti fermye mwan.  Vi ki bann, i annan en konsern la ek bann pti fermye dapre konpran Lease Agreement pour plante lo later Gouvernman bann pti fermye zot ganny li pour 10an, si korek zot a dir mwan, konsern ek sa bann pti Fermye se ki sa Lease 10an i pa ase pour zot, eski zot pe mazin extend li pour 15an, 20an?  Rezon ki mon pe dir sa Minis se ki sa bann fermye zot dir pandan sa 10an, zot ganny difikilte pour zot kapab ganny entertain avek Labank pour bann loans akoz sa Lease i tro kourt.  Alor zot bezwen servi zot Kapital pour zot pour zot sey mannevre pour zot kapab al devan.  E petet sanmenm sa rezon ki serten bann pti fermye zot pe ganny sa bann kalite difikilte.

E dezyenmman Minis, dan pei i annan en ta kategori fermye e ki zot pe mazin fer pour bann traditional family farmers Minis ek bann ki pe fer backyard farming?  Rezon ki mon pe demann sa kestyon se ki ozordi i annan bann gro Fermye ki pa pe zis plante, zot pe osi enporte.  E dapre sa ban pti fermye zot, zot santi zot pe ganny afekte e zot pe dir ki sa bann gro fermye pe kas market.  Rezon sa, se ki sa bann gro fermye si zot pe plant zironmon, zot zironmon pour pare Novanm, alors depi Zen zot enport en pe zironmon ziskan ler zot zironmon i pare.  Alors sa bann pti fermye ki’n plante zot zironmon, in pare en legzanp zot santi zot an konpetisyon avek sa bann enporte.  Ki zot pe fer pour rezourd sa problenm Minis?  Mersi.

 

MR SPEAKER

Mersi Onorab.  I de kestyon tre pertinan.  Minis.

 

MINISTER PAMELA CHARLETTE

Mersi Mr Speaker.  Mersi Onorab, ou premye kestyon i lo Lease wi nou’n konstate ki sa Lease i tro pti, nou’n revwar nou Lease e nou osi annan en papye ki nou pe anmenn dan Cabinet ki pran konsiderasyon Lease.  E nou pe extend li pour en peryod up to 30 years, i annan ka.  Me sa i toultan lye avek lenvestisman osi ki sa dimoun pe al fer lo sa later.

Lo kote bann traditional oubyen backyard farming ,pour le moman zot osi pe ganny akse par egzanp avek nou bann Store kot i vann; akoz ordinerman i sipoze pour bann dimoun ki anrezistre as farmers.  Me selman nou les bann lezot dimoun ki annan bann pti laferm, oubyen ki bann pti ki annan, ki pe fer backyard farming pour ganny akse avek bann prodwir ki nou, nou vann lo Store.  Apre osi i annan en proze anba CLISSA ki train bann backyard farming e sa i en fund ki ganny fund par IFAD.  E sa i en training ki nou donnen pour bann backyard farming farmers.

 

MR SPEAKER

Onorab Loizeau ou annan en siplemanter?

 

HON NORBERT LOIZEAU

Mr Speaker mon bout kestyon lo bann ki pe enporte ki pe kas market ki pe detri sa bann dimoun ki pe plante la.  Bann gro fermye ki pa pe zis plante me ki pe enporte, ki pe tant pour detri sa pti dimoun ki pe… I pa’n tous sa.  Mersi.

 

MINISTER PAMELA CHARLETTE

Onorab fransman pour dir ou, mon pa pour kapab donn en solisyon right now, akoz sa fermye kekfwa i pe enporte ler napa prodiksyon – mon pe mazinen.  Sa i pour bezwen, i pour bezwen fer li anliny avek bann lezot Lalwa Lenportasyon mon mazinen, me pour le moman nou napa vreman solisyon pour sa, akoz nou pa vreman kapab anpes en dimoun enporte, unless ki nou met en restriksyon lo la.  Me sa i en keksoz ki pa pour le moman nou pe konsantre lo la petet.  So nou napa en solisyon pour sa problenm pour le moman.

 

MR SPEAKER

Minis mon krwar sa kestyon Onorab Loizeau i en keksoz ki petet parey ou dir devret etidye ansanm ek bann fermye, met lide ansanm pour vwar serten Regilasyon parey ou’n dir ki kapab ankouraz fermye lokal, e dekouraz sa prodwir ki pe vin compete ek prodwir lokal.  M -on krwar i annan en domenn kot ou kapab fer en pti pe konsiltasyon avek pa zis bann fermye me bann businessmen osi.  Onorab Woodcock.

 

HON WAVEL WOODCOCK

Mersi Mr Speaker.  Bonzour Minis.  Mon oule konmanse par remersye Minis ek son delegasyon pour zot vizit ki zot ti fer Praslin, kot i konsern Lagrikiltir avek Lapes, mon annan zis enn de pti follow up, kestyon follow up baze lo sa vizit.

Dan ou vizit nou ti aprann ki i annan apepre 125 fermye, 125 laferm Praslin avek La Digue, me ki nou ti aprann se ki zis 25 a 30 poursan fermye ki pe servi 80 poursan later ki zot in ganny allocate avek, so ki ou Minister pe fer pour build kapasite bann fermye e ed bann fermye servi sa bann later ki zot in ganny allocate to the maximum.

Mon 2enm kestyon i parey nou ti diskite, i annan sa konsern mankman materyo lo Store Amitié.  I annan  dan lepase i annan bann ka kot pour pres 3 mwan in annan mankman legren, ou sa lagrenn lo Store, ki ou Minister pe fer pour ede rezourd sa bann problenm mankman materyo lo Praslin? E osi konsernan Lagrikiltir, mon anvi demann Minis an vi ki Gouvernman Sesel i annan en MOU an Lagreman avek Gouvernman L’Inde kot i konsern Lagrikiltir, eski ou Minister pe konsider venture dan Hydroponics, par lefet ki i annan en leskar site later Sesel, eski zot pe konsider bouz dan sa direksyon hydroponics dan lefitir?

Mon dernyen kestyon i konsern peser i ankor pe konplent ki i mank labwet ek ice, ki plan ou Minister pour rezourd sa problenm?  Mon konnen ki Praslin osi i en konsern, mon konnen ki FBOA i an negosyasyon avek SFA pour set up en ice plant container ek en cold store Grand Anse Praslin, mon kestyon i, eski alokasyon later pour komans sa proze in fini ganny fer?  E kan ki FBOA pour kapab enstal sa ice plant e cold store?  Zis pour fini Mr Speaker, peser semi-endistriyel i ankor pe ganny problenm pour vann zot pwason, lo Praslin pli gro konsern, pli gro problenm se sirtou avek bann gran lotel ki bann peser pe ganny difikilte vann zot pwason ek bann gro lotel, parey Raffles avek Lemuria, ki plan ou Minister pour abord sa size, e osi amelyor fasilite eksportasyon pour nou bann peser semi- endistriyel etandonnen ki marse lokal pa kapab pran tou sa bann pwason?  Mersi.

 

MR SPEAKER

Minis.

 

MINISTER PAMELA CHARLETTE

Mersi Mr Speaker. Mersi Onorab, pour bann materyo ki fermye i bezwen, nou konnen ti annan en problenm dan lepase me parey mon’n dir dan mon lentervansyon ozordi, i annan sa computerization lo nou Store ki nou pe fer.  Koumsa i en inventory system ki kapab dir nou konbyen bann, ki bann materyo ki i annan, kwa ki pe manke, e kwa ki nou bezwen kekfwa, kwa ki pa pe vann, pour nou kapab vann li en pti pe pli bon marse pour les ale.  Akoz nou pa kapab kit bokou, nou pa kapab stok bokou e kit bokou dan Store pangar i gate.  E pour Praslin osi nou’n fer sir ki i annan sa kominikasyon avek Mahe, avek ekstansyon Praslin, pour kapab annan toultan sa kominikasyon pour dir zot, kan ki zot bezwen materyo.  Me selman i annandler ler ki i annan problenm bato par egzanp.  Me selman sa nou bezwen kominik, nou’n fer sorti ki nou bezwen kominik avek bann dimoun pli boner, pour zot konnen poudir napa en materyo, me par ler i annan bann substitute par egzanp.  Akoz ki i fer, nou annan bann substitute ki kekfwa dimoun pa tro konnen oubyen bann alternativ ki zot pa tro konnen kwa, alor nou bezwen fer en pti pe plis ledikasyon osi pour nou kapab edik bann fermye, bann lezot alternativ si napa en materyo ki zot kapab servi.

Pour Hydroponics wi i en keksoz ki nou pe konsidere evantyelman.  Sa i pour, nou pour fer en model Praslin sa par, se Lazans Lagrikiltir pour fer en model Praslin, pour nou demonstre en pe avek bann Fermye.  I pe ganny konstrir an se moman.  Ler nou ti ale Vandredi pase, ler nou ti ale ansanm, ti pe komans ganny konstrir.  So sa proze pe ganny sponsor par CLISSA.  So fotespere boner lannen prosenn nou a’n kapab at least annan keksoz ladan pour nou kapab montre Fermye.  E sa osi pour ganny replike en pti Mahe kot nou Research Centre Anse Boileau sorry, Anse Boileau lo kot nou Research Centre, kot nou pour fer en pti réplicable osi pour nou kapab komans entrodwir sa fason prodiksyon avek bann fermye osi Mahe.  Ou’n demann mwan en kestyon lo training mon krwar – premye?

 

MR SPEAKER

Onorab Woodcock.

 

HON WAVEL WOODCOCK

Yes konsernan sa 125 laferm lo Praslin, La Digue e par lefet ki nou ti aprann ki i annan zis apepre 25 a 30poursan bann planter ki pe servi 80% kapasite zot later ki’n zot in ganny allocate, ki ou Minister i anvizaze fer pour increase kapasite bann planter e ed zot pour zot kapab servi sa bann later to the maximum?

 

MINISTER PAMELA CHARLETTE

Mersi Mr Speaker e mersi Onorab.  Toultan i annan sa, nou annan nou bann Zofisye Ekstansyon ki pas kot bann Laferm ki gete ki zot pe fer e la kot sa advice oubyen sa direksyon i donnen avek zot, ki mannyer zot kapab increase zot prodiksyon.  Me malerezman pa tou ki parey nou’n vwar la ler nou’n al Praslin menm osi Mahe pa tou ki fer li.  I annan ka kot nou’n fer rekomandasyon, nou’n fer rekomandasyon apre rekomandasyon, me nanryen pa arive ok?  Me selman sa bann dimoun i nou bann Zofisye Ekstansyon i la pour donn sa advice pour bann fermye, kwa ki zot devret fer pour zot kapab annan en pli bon prodiksyon.

Pour lo eksport, pour lo pwason parey mon’n dir dan mon lentervansyon nou bezwen osi travay konzwentman avek sa Export Committee, ki’n ganny formen anba SIB pour kapab resers en pe lo bann marse ki i annan pour leksportasyon, pour ki bann peser semi- endistriyel, i kapab ganny en marse pour zot eksport zot bann prodwir lapes e valer azoute.

 

MR SPEAKER

Onorab Woodcock ou annan en pti kestyon ankor?  Height wi, donn Minis en pti moman pour li konsilte son teknisyen.  Yes Minister.

 

MINISTER PAMELA CHARLETTE

Lo kote sa ice plant, later in fini ganny allocate, me selman mon krwar FBOA prezan pe anmenn son ice plant pour met lo la.  Apre regardan lezot, lo kote labwet mon krwar sa i en keksoz ansanm avek sa Komite ki nou ava met an plas, nou kapab petet diskit en pe bann keksoz ki nou kapab fer menm an konsernan bann lekipman, lo sa Store lekipman ki anvizaze ganny donnen pour zabitan Praslin.  Me sa i tout en, i a mars ansanm dan sa ler nou a met sa Komite an plas, nou a koz lo tousala e fer sir bann fasilite i ava available e ki mannyer i pour ganny manage par bann Lasosyasyon Praslin.

 

MR SPEAKER

Ok Onorab Woodcock?  Ou annan en pti supplementary?

 

HON WAVEL WOODCOCK

Non, non en kestyon ki mon’n demande kekfwa Minis, zis pour mon rephrase li, i annan sa konsern bann peser, ki zot pe ganny difikilte vann zot pwason avek bann gran lotel Praslin, bann lotel parey Raffles avek Lemuria.  Ki Minister pour fer pour sey angaz sa bann lotel pour zot kapab pran pwason avek bann… akoz Praslin nou ganny bokou difikilte bokou fwa sa bann lotel pe pran pwason sorti aletranze.  Me ki ou Minister pe fer pour get dan sa sityasyon.  Bokou peser wi i konplent ki zot ganny difikilte pour vann zot pwason avek sa bann gro, gro lotel Lemuria ek Raffles.  Ki ou Minister pe fer pour sey ed bann peser Praslin?  Mersi.

 

MR SPEAKER

Minister. 

 

MINISTER PAMELA CHARLETTE

Mersi Onorab.  Kekfwa dan sa Komite osi sa i a ganny diskite, me deza mon konnen poudir Praslin Business Association, ti sipoze annan en meeting sometime le 28 ki i ti’n envit nou, me selman la en pti pe tight schedule pour nou diskit ansanm avek sa bann lotel.  Me sa osi pour bezwen fer an konzwentman avek Minister Tourism mon krwar.  Akoz nou tou nou bezwen onboard si nou pour al dan sa direksyon koumsa.

 

MR SPEAKER

Ok Minis? Minis ou’n fini reponn sa kestyon, i ok?  Minis i ok.  Alright, bon.  Nou’n ariv 10.30, i annan 2 keksoz mon anvi fer resorti, Onorab Henrie i annan en madanm fermye, i dir mon ou sexist ler ou’n dir Minis i zoli, eski ou ti pour dir sa avek Minis Dogley ek Minis Morgan?

 

(laughter)

 

MR SPEAKER

Alor mon pa ankor reponn li, me petet ou ti devret retract ou statement ki ou pa krwar zis vilenn dimoun ki la anndan, Onorab Henrie.

 

HON GERVAIS HENRIE

Mr Speaker mon ava retract, me selman mon ti pe konplimant, mon ti pe fer en konpliman Minis.  E mon asire kantmenm zot pe bat lanmen zot agree avek mwan lot kote latab.  Mersi bokou.

 

(laughter)

 

MR SPEAKER

Ok, alright that’s it, ok, ok Order! Order!, mersi Onorab Henrie mon krwar sa madanm i a satisfe e i a kontinyen plant son mayok ek son patat.  Avan nou pran nou Break pour bann dimoun ki’n envite, enterakte avek nou menm nou bann Manm Lasanble ek Minis ek son delegasyon, Minis nou pour bezwen retournen 11er akoz nou annan en kantite entervenan ki anvi koze enkli, si i enkli MNA Anse Boileau, e avan nou arete selman mon ti a kontan fer en Lapel, mon krwar sa size ki nou pe koz lo la i konsern tou dimoun par lefet ki sa kantite MNA, preski tou MNA i le entervenir.  Mon ti a kontan fer en Lapel vi ki i annan bann Zofisye ek bann Trainees sorti Lakademi Lapolis pour lans en Lapel ek Lapolis pour osi zet en regar lo fermye ek zot prodwir parske i annan bokou vol lo bann laferm; pa zis Mahe me Praslin osi.  Alor en Lapel lo la par bann fermye – mon pa pe koz zis pour Anse Boileau me pour Baie Lazare, pour Praslin, pour partou, zet en regar ler fermye i konplent ki zot bann prodwir i ganny vole.  Sa i en Lapel ki mon pe fer lo la par bann fermye.  Avek sa mon bann koleg nou a pran en Break, Minis ou osi ou a ganny sans pran en tas kafe.  En pti kestyon Onorab Ramkalawan.

 

HON WAVEL RAMKALAWAN

Mr Speaker sa dernyen komanter ki ou’n fer la an menm tan mon krwar ki nou koman en Lasanble i enportan pour nou edik dimoun ki poudir letan ou dir en dimoun i zoli, i pa sexist; konmsi parfwa nou bezwen balans sa bann mo parske i annan bann lekspresyon ki dimoun parfwa, par egzanp rasis, sexist ensidswit, ki konmsi poudir sa dimoun i pa en sexist remark letan ou’n dir, i en konpliman, konpliman egzakteman.

 

MR SPEAKER

I en compliment.  Vwala madanm ou pe ekout nou, i pe dir i en konpliman e mon krwar i annan bann madanm isi ler i annan bann Minis zonm ki vini ki a dir zot osi zot zoli.  Ok, mon krwar mon klersi sa.

 

HON WAVEL RAMKALAWAN

Zis Onorab Ghislain ki pa konpran tousala.

 

(Mic Off)

 

MR SPEAKER

Avek sa, Order! Order! Order! Mersi.  Avek sa nou ava adjourn nou a retournen 11er.

 

                (BREAK)

 

MR SPEAKER

Bon, nou a kontinyen nou konversasyon, nou enteraksyon avek Minis Pamela Charlette e mon a donn laparol toudswit a Onorab Esparon.

 

HON REGINA ESPARON

Mersi Mr Speaker. Mr Speaker, Minis lo sa statement in mansyonn Fish Processing Unit, mon mazinen i pe fer referans avek sa 9 unit, Providence, ki ti ganny konstri an 2013 pou met valer azoute avek pwason, lezot prodwi lanmer. Koriz mwan si mon mal.  Sa proze ti ganny aprouve par Linyon Eropeen e ganny donn ek en Lakonpannyen Sinwan e ti sipoze kout R32 milyon.  Eski SFA i satisfe ek quality sa proze?  Si non, ki son Minister pe fer dan limedya, pou fer sir ki ganny met lo standar? Konbyen sa proze in koute an tou?  E eski kontrakter in ganny peye tou son larzan ki’n devret gannyen? Mr Speaker, Minis in osi koz amelyorasyon sityasyon peser.  Mon konnen ki proze peser Glacis in demare e Minis ou menm ou ou’n fer en vizit laba dan mon labsans. Be mon pe demann ou Minister Minis, pou annan plis sipervizyon lo sa proze, pou verifye si kontrakter pe delivre dapre son Kontra.  Akoz si Vann Nor i vini proze pa ankor avanse peser pou dan problenm avek zot bato. E trwazyenmman, eski ou Minister i annan plan revwar sa Salary Scheme pou bann graduates dan Lapes ek Lagrikiltir, akoz zot ganny 40 poursan mwens ki ban lezot graduates dan Gouvernman. Akoz sa i osi ede retenir bann profesyonnel dan sa domenn, e ed ou Minister egzekit son plan.  Mersi Mr Speaker.

 

MR SPEAKER

Mersi Onorab. Minis. Donn Minis ankor enn pti moman akoz ou’n demann 3 kestyon, Onorab so pasyant en pti git.

 

MINISTER PAMELA CHARLETTE

Mersi Mr Speaker. Mersi Onorab. Nou a pran premye kestyon. Sa 9 Processing Unit Providence, in kout anviron R32 milyon e wi kontrakter in fini ganny peye e kontrakter i ganny peye ler sa konsiltan i donn go ahead pou pey kontrakter.  Si ou pe demann mwan si SFA i satisfe avek prodwi ki zot in gannyen?  Non pa vreman.  Ki nou Minister pe fer? Nou annan nou 9 processing plant, 2 ki deza dan loperasyon, 1 ki son alokater in fini ganny aprouvasyon avek Planning e pe fer le neseser pou antre e met lekipman.  Nou annan 6 unit ki deza osi annan zot bann alokater e ki zot osi prezan pe revwar ; akoz kondisyon sa bann processing plant, zot pe revwar en pe zot aktivite ki zot pou fer sorti from wet processing pou zot al plito lo dry processing. Sa proze Glacis, mon konstate, wi mon’n fer enn de vizit pa zis enn, enn de vizit pou mwan get progre e mwan osi mon pa tro satisfe avek progre. So wi nou bezwen fer sir ki SFA i annan en progranm ki al vizit, monitor sa bann proze.  E sanmenm sa ki dan sa Lasanble, dan sa Emergency Plan i annan osi demann pou plis resours pou zot Project Implementation Departman, koumsa i ava annan plis mendev pou kapab al fer sir ki zot monitor sa bann proze ki pe ganny fer.  Lo kote Salary Scheme, wi, i plan Minister e nou’n deza konmanse e i osi dan sa Emergency Plan pou revwar Salary Scheme, pa zis graduates be bann lezot travayer dan tou le de Sekter Lagrikiltir avek Lapes. E wi nou’n konstate ki vreman en graduate pe ganny parey zot konnen R8 mil i pa sifizan. So wi, nou pe gete Salary Scheme e osi Scheme Of Service pou tou le de Sekter.

 

MR SPEAKER

Onorab Esparon.

 

HON REGINA ESPARON

Mersi Minis.  Mersi Mr Speaker.  Minis konbyen i pou koute pou remet sa bann unit laba Providence lo sa standar ki i merite pou kapab met li an mars? Konbyen pou al kout Minister ankor an plis lo sa batiman laba pou zot kapab met li lo sa standar ki EU ti pe demande? Premyerman. E dezyenmman Minis mon ti a petet advise ou Minister, ler zot fer bann vizit dan distrik, enkli osi bann Lotorite Distrik ladan. Akoz la ou’n dir mwan ou’n fer 2 vizit, nou pa konnen nou. Mon ti krwar ou’n fer zis enn. Mersi.

 

MR SPEAKER

Ok, en sizesyon.  Minis.

 

MINISTER PAMELA CHARLETTE

Mersi Mr Speaker.  Mersi Onorab.  Premye kestyon i pou kout nou apepre R2.6 milyon par unit si nou anvi met li lo sa standar ki standar Européen an plis.

 

MR SPEAKER

Ok.

 

MINISTER PAMELA CHARLETTE

Apre ou dezyenm kestyon, premye vizit mon ti fer ki ou ti konnen selman ou pa ti la, 2enm vizit sa zis mwan menm mon personnel ler mon pe pas…Ti napa delegasyon ek mwan, mon ti pas mon tousel. Ler mon pe pas bor dan Nor, mon’n sote mon’n get en pe ki pe arive.  Me selman toultan ler mon pe fer vizit mon’n fer okouran tou lede Manm Elekte dan Lasanble, mon’n anmenn ek mwan lo bann vizit.  Mersi.

 

MR SPEAKER

Onorab Prea.

 

HON NICHOLAS PREA

Mersi Mr Speaker.  Bonjour tou dimoun.  Mr Speaker, mon ti a kontan zis konmans avek sa komitman ki Minis in fer pou sa Statement pou annan en serten nivo prodiksyon manze a tou moman dan pei.  E nou konnen avek sa i vin en Bidze e mon swete ki dan Bidze nou ava vwar sa demann ki nou Lasanble nou ava kapab debat e aprouve pou zot.  Mon annan mwan osi plizyer kestyon me mon anvi demann 2 kestyon pou konmanse, si mon ganny sans apre Mr Speaker mon a kapab demann lezot.  Enn pou sak sekter.  Minis ler ou’n koz lo annan sa nivo prodiksyon manze a tou moman dan pei. Si dan sa plan ou Minister in set en target par egzanp pou prodiksyon lavyann poul e pork dan sa near future. Ok?  E lo kote Lapes, Minis pa’n mansyonn lapes banbara, sea cucumber, eski sa kalite travay i ganny kategorize konman semi-endistriyel, endistriyel? Lefe ki mon pe dir sa akoz mon annan en pe sif devan mwan, kot en dimoun ki la dan sa biznes i pe anmenn apepre R12.7milyon e ladan mon vwar en management fee ki i pey SFA… mon pe koz sa dan en lespas Oktob kot sezon i ouver, Oktob 2016 pou Zen 2018. SFA i ganny en management fee pres R600 mil.  I annan bokou bann sa… zis son airway bill pou li process, pou li sa… ankor par lao R600 mil. Son karbiran 36 trips par 5 bato, ok, ki tonm apepre 7 voyaz par sak bato, i R1.44 milyon. Eski ki kategori son Minister pe met sa Lendistri?  Ki program ki SFA pe antreprann, pou monitor oubyen pou regilariz en pti pe sa lendistri.  E petet osi tou, akoz ki bann dimoun parey mon pe dir zot pe anmenn bokou larzan, reveni atraver sa lendistri akoz ki zot pa pe ganny konsesyon lo karbiran? Mersi Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker. Mersi Onorab.  Premyerman lo bann target ki nou annan pou lavyann poul ek pork.  Lo kote pork konmela nou pe prodwi 10 poursan e nou anvizaze mont li a 20poursan.  Ok?  E poultry, se aprezan aktyelman i a 20 poursan, me selman nou pou monte 35 e i annan de ka ki nou kapab monte 50poursan.  Lo kote sea cucumber, i annan en stock assessment ki pe ongoing pou nou kapab etabli, me pou le moman nou pe konsider konman, nou met li dan kategori Artizanal.  Me parey ou’n dir, tou sa reveni ki i pe anmennen se sa ki kekfwa sa subsidy lo fuel pa pe apply pou zot.  Akoz zot gannyen sa reveni.  Nou pe konsantre plis lo bann pti peser ki kekfwa pa kapab, ki son kou prodiksyon i en pti pe pli o.  Mersi.  Mon pa konnen si mon reponn…?

 

MR SPEAKER

Onorab Mondon.

 

HON TERENCE MONDON

Mersi Mr Speaker. Bonzour Minis avek ou lekip e tou dimoun ki pe ekout nou. Mon 2 kestyon i al swivan, Minis in koz lo servis veteriner e an vi ki sa servis i osi en konponan entegral dan devlopman Sekter Agrikol, akoz ki Minis i pa kapab vwar sa finansman neseser pou kapab, dan son plan imedya, pou re-devlop sa servis, ki parey nou konnen i dan en move leta aktyelman.  E mon 2enm kestyon in koz lo… Minis in koz lo maksimiz prodiksyon, mon anvi konnen ki travay pe ganny fer o nivo L’Union Estate La Digue pou kapab…an vi ki  nou konnen, ki zot pa pe maksimiz zot prodiksyon, ki kalite travay ki’n ganny fer par ou Minister pou ede maksimiz prodiksyon lo sa zil?  Mersi Mr Speaker.

 

MR SPEAKER

Minis.

 

MINISTER PAMELA CHARLETTE

Mersi Onorab.  Pou reponn ou premye kestyon nou ti met dan Bidze pou sa lannen.  Well en pe letan sa i dan Bidze, nou’n fer demann pou nou fer sa nouvo batiman Union Vale ki i konpri lofis pou tou nou bann Lazans enkli Minister e osi Veteriner.  E osi en lot veteriner me ziska prezan nou pa’n ganny finansman pou fer li.  Nou’n still met ankor pou sa lannen.  Me selman i annan parey mon’n dir dan mon plan imedya, i annan sa renovasyon ki nou pou fer ki pe al an Oktob pou kapab sekour zot en pti pe, donn zot en pti pe plis bataz e plis lekipman pou zot travay avek.  Pou L’Union Estate sa i en keksoz endepandan, ki pa tonm vreman anba Lazans Lagrikiltir, me selman dan nou papye ki nou pe anmenn kot Cabinet pou aprouve, lo kote alokasyon later, i annan osi en propozisyon ki tou bann later Lagrikiltir i reganny met anba Minister Lagrikiltir oubyen through Lazans Lagrikiltir.

 

MR SPEAKER

I ok?  I annan Onorab Herminie avek Onorab Ferrari k i annan en kestyon relye avek sa ki Onorab Mondon in demande.  Onorab Herminie.

 

HON WILBERT HERMINIE

Mersi Mr Speaker. Bonzour Minis avek ou delegasyon.  Lo menm laliny avek kestyon regarding veteriner.  Minis i pe dir koumsa sa en proze pou zot kapab refer nouvo building, osi fer en pe maintenance, be vi avek sityasyon kot zot été, nou lokasyon kot zot ete i dan en landrwa rezidansyel, eski i pa ti pli bon annan en pli bon plan ki zot kapab relocate zot dan en landrwa ki pa rezidansyel, vi ki i annan bokou konplent avek bann zabitan dan sa area la Union Vale konsernan sa fasilite veteriner kot i ete.  Mersi Mr Speaker.

 

MR SPEAKER

Onorab Ferrari lo veteriner

 

HON JEAN-FRANCOIS FERRARI

Non Mr Speaker, mon ti pe zis atir ou latansyon ki pou met non lo lalis pou mon demann enn de kestyon apre.

 

MR SPEAKER

Si ou non i lo lalis?

 

HON JEAN-FRANCOIS FERRARI

Wi, wi.

 

MR SPEAKER

I lo lalis wi. Onorab Mondon ou ti annan en kestyon, sorry mon pan vwar ou lanmen anler.  Ou ti annan en siplemanter, wi.

 

HON TERENCE MONDON

Wi Mr Speaker. 2 pti kestyon siplemanter.  Akoz mon konnen dan en pe letan pase 2014 ti annan… BBC ti pe backup pou fer serten travay lo sa L’Union Vale, servis veteriner.  Ki’n arive avek sa proze?  E dezyenmman mon pa tro konpran akoz Minis i dir nou ki L’Union Estate ki i en asset Leta, konmsi zot napa en rol pou zwe, pou fer sir ki zot pe prodwi, donn en servis prodiksyon Agrikol parey i sipoze.  Mon pa vwar akoz ki Minis i dir nou konmsi i napa okenn Lotorite lo L’Union Estate.  Si ou ti kapab eklersi nou lo sa please.

 

MR SPEAKER

Minis. Petet L’Union Estate ti en Paraetatik, i pa tonm anba Minister Lagrikiltir. I tonm anba Minis Finans.  I en body corporate. Minis. Onorab Mondon ou le koz ankor en kou?

 

HON TERENCE MONDON

Mon pa ganny en konpran Mr Speaker ki en Minister i ansarz Lagrikiltir, selman i napa en say lo en… sirtou nou pa pe koz prive la nou pe koz Leta.  En….. Leta.

 

MR SPEAKER

Petet Minis parey nou tou nou’n dir bomaten i nouvo, i en keksoz ki devret regarde. Ou pwen i valab parske nou pe koz 4 arpan later prodiktiv ki kapab prodwi en kantite keksoz lo La Digue. So petet Minis i ava etidye sa.  Minis.

 

MINISTER PAMELA CHARLETTE

Mersi Mr Speaker. Mersi Onorab.  Konsernan La Digue menm si kekfwa i pa tonm anba nou akoz zot annan en Board e zot operate parey en Lakonpannyen.  Nou bann Lazans, bann dimoun Lazans i ale pou advise zot lo kote prodiksyon koumsa, me selman nou napa en kontrol lo sa later li menm.

 

MR SPEAKER

Ok. Onorab Ghislain.  Sorry Onorab Herminie ou annan en related question ?

 

HON WILBERT HERMINIE

Minis pa’n comment lo re-lokasyon.

 

MR SPEAKER

Ok. Renovasyon kot veteriner ou pe dir? Minis.

 

MINISTER PAMELA CHARLETTE

Mersi Mr Speaker. Onorab sa ki mon konpran, nou, nou pa’n gannyen konplent ki’n vin kot nou pou dir nou la pa en landrwa, oubyen en dimoun pe resevwar konplent ki i annan tapaz whatnot.  E i pa’n dan nou plan pou annan en lot landrwa pou relocate si nou bezwen fer li nou bezwen al through al rod en bout later ankor pou nou kapab met en batiman lo la.

 

MR SPEAKER

Eski ou annan konplent rezidan ki o bor ou Onorab Herminie?

 

HON WILBERT HERMINIE

Wi petet akoz Minis i nouvo me selman mon ava zwenn li…

 

MR SPEAKER

Ou a lyez ek li?

 

HON WILBERT HERMINIE

Mon a lyez ek li akoz sa ti en outstanding issues.

 

MR SPEAKER

Ok.  Alright.  Ok, sa mon krwar ou kapab fer en lyezon avek li. Onorab Larue ou annan en pwen relye avek sa kestyon.

 

HON FLORY LARUE

Mersi Mr Speaker. Mr Speaker, direkteman wi, sa site Grand Anse kot BBC ti ete ti ganny allocate pou veterinary services, en sant veteriner an 2014 letan zot ti give back sa propriyete, lanons ti ganny fer. Ki pe arive ek sa akoz la in dir la napa plan apard sa enn Union Vale pou veterinary services, so i pa kler.

 

MR SPEAKER

Minis.  Grand Anse.

 

MINISTER PAMELA CHARLETTE

Grand Anse. Mersi Mr Speaker. Grand Anse ti ganny earmarked pou en laboratwar veteriner.  Laboratwar parske… wi, i pa… ek livestock tou le de ansanm.

 

MR SPEAKER

Ok.  Onorab Larue.

 

HON FLORY LARUE

Mersi Mr Speaker.  Sa bann letan ti Mr Peter Sinon pou Minister of Natural Resources ki ti la prezan letan sa handing over was done e MLUH ti dir ki enn sa morso pou ganny servi pou Veterinary and Livestock Services ki prezan i sitye Union Vale, i pou bouze pou al Grand Anse. So eski i annan en sanzman ouswa sa…

 

MR SPEAKER

Minis.  Eski nou pe koz menm zafer menm keksoz?  Onorab William i tonm dan ou distrik petet ou kapab donn en pti pe leklersisman.  Ou okouran?  Be selman nou a les Minis reponn.

 

MINISTER PAMELA CHARLETTE

Mersi Mr Speaker.  Parey sa ki nou, nou konnen, sa ki mon’n ganny advise se ki Grand Anse i pou en landrwa kot i annan sa laboratwar avek genetic center ki ti pou la. Me selman veterinary services li menm pa ti gannyen…

 

MR SPEAKER

I pa ti pou laba.

 

MINISTER PAMELA CHARLETTE

Mon pa konnen kekfwa lenterpretasyon oubyen ki mannyer dimoun in dir me selman ki mon kapab dir, se ki sa landrwa la ki i pe al gannyen fer son laboratwar. Kontra in fini ganny donnen ek kontrakter e i sipoze kout nou R5.3 milyon ki pe al ganny konmanse.

 

MR SPEAKER

I relye avek sa Onorab Pillay? Ale vitman.  En kantite dimoun pou koze.

 

HON SEBASTIEN PILLAY

Mersi Mr Speaker.  Mr Speaker, mon ki mon ti pe zis…mon pe konpran lide deryer sa kestyon akoz ou pou annan bann fermye ki baze dan sa rezyon e si zot pou bezwen transport par egzanp zot zannimo all the way to Victoria, i pou annan en kou, i pou annan distress pou sa zannimo so sanmenm sa mon krwar petet rezon akoz ti ava bon konsidere dan sa rezyon, pou ki ou annan at least en servis lo en nivo animal husbandry selman.  Me lo kote veterinary services ki annan pou fer avek sa veteriner zeneral, lisyen, sa i a ganny fer dan Victoria.

 

MR SPEAKER

Ok.  Minis ou le respond to sa?  Normalman mon espekte veteriner ki zot mobilize me selman ou pwen i ase valab.  Minis.

 

MINISTER PAMELA CHARLETTE

Mr Speaker sa ki mon ganny en konpran se ki vet services pou livestock i pou Grand Anse.  Union Vale i sipoze for pets.

 

MR SPEAKER

Wi, small animals.  Sa mon osi mon’n ganny dir alor ou a pwen.

 

MINISTER PAMELA CHARLETTE

E vet i sipoze bouze pou al lo laferm.

 

MR SPEAKER

Mersi Minis, mon krwar ou repons i kler.  Onorab Ghislain.

 

HON CHANTAL GHISLAIN

Mersi Mr Speaker.  Mr Speaker, mon kestyon i al koumsa, Minis in koz en pti pe lo sa zafer plato Mahe pou bann peser, eski i dan Minister Lapes pou osi konsider re fer, reserve sa whole plato pou nou bann peser artizanal selman?  E apre an se ki konsern osi bann Lagreman lapes, eski i dan plan zot Minister pou kapab… pou revwar bann Lagreman lapes ki nou annan ant Sesel avek bann lezot pei pou ki Sesel an zeneral i retir maximum dan tou son bann resours ki annan pou fer avek lapes.  Minis osi ou’n koz lo vizit ki ou’n fer lo Praslin ek La Digue, eski Minis i kapab dir avek sa Lasanble – sirtou bann dimoun, bann peser, bann agrikilter lo Grand Anse Praslin. Eski bann agrikilter dan sa distrik in fer resorti zot bann problenm, an se ki konsern problenm pou zot kapab maintain sa bann sistenm irigasyon lo zot laferm e problenm delo ki zot rankontre an se ki konsern lasesres?  Apre zot okouran osi ki poudir i annan sa basen anler Mont Plaisir ki dir i annan en trou ladan, e ki ziska la zot pa ankor kapab aranze pou zot kapab ganny zot delo. Apre osi i annan sa konsern osi lo lontan ti annan sa sistenm konter, ki nepli pe marse konmela e tou bann fermye i pey R100 ki vedir ki bann agrikilter ki pli pti zot dezavantaze, akoz zot pe pey menm kantite parey en gro fermye.  Mersi.

 

MR SPEAKER

Minis.  Minis mon kapab sizere ki si ou, ou nouvo ou dan sa post, mon vwar Mr Moustache pe sey eksplik ou menm.  Si ou santi i annan serten repons ki ou kapab anvoye pli tar pou Lasanble pou sa bann dimoun, sa i akseptab sa, avek Lasanble, avek Speaker.  Ou pa pou kapab konn tou keksoz, ou fek vini ou osi alor pa ezit-e pou dir ou kapab anvoy sa lenformasyon pou Onorab atraver mon Biro.  Be selman i annan mon krwar 4 kestyon ki Onorab Ghislain in demande enkli en trou dan en basen par la Grand Anse.

 

MINISTER PAMELA CHARLETTE

Ok.  Mersi Onorab.  Mr Speaker, mersi.  Lo kote plato Mahe, sa i pe ganny travay… in fini ganny travay lo la, e i annan bann demarkasyon ki’n ganny fer.  Me selman sa kekfwa nou a donn nou lenformasyon pli tar akoz nou pa kapab al spesifikman. Lagreman Lapes, wi Lagreman Lapes nou re negosye ler zot expire. Si in ekspire nou ale nou re negosye sa Lagreman e nou toultan fer fason ki Sesel i ganny keksoz ladan, i ganny en benefis.  E i pa zis en Lagreman ki kekfwa mwan Minis mon ale mon al fer.  I tout en tim ki ale, i konpri son legal, son bann teknisyen tousala, zot la pou negosye.  Lo kote sa enn Mont Plaisir sa kekfwa nou a rod lenformasyon pou nou donnen, me selman mon konnen poudir en bon pe bann proze irigasyon, drainage i ganny fer anba bann funding ki nou gannyen. Par egzanp CLISSA so nou ava gete si vreman i annan bann plan pou La Digue, nou ava anvoy kot zot… Praslin.  Ok.  

 

MR SPEAKER

Ok.  Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis ek ou delegasyon.  Bonzour tou dimoun ki a lekout.  Mr Speaker, eski Minis i kapab eksplik nou Lasanble, si dan son plan imedya la e i kapab eksplik nou osi konmsi vann labatwar; letan ti pran ti vann ek prive eski ti annan kondisyon pou gete si nou kapab repran pou fer antre dan son plan imedya? E dezyenmman osi ki plan Minister imedya, pou demark bann landrwa lo lakot ki pou ganny réservé si oule pou lapes artizanal sirtou kot i konsern kazye, avek bi pou anpes bann landrwa lo lakot ganny konble pou plis later endistriyel ki nou fek tande lo medya tou resaman.  E an menm tan eski dan son plan imedya, eski i kapab dir nou si son Minister i okouran okenn benefis anba Komisyon mix Sesel – L’Inde?  E eski zot in met en lalis devan Gouvernman pou rekomandasyon ki i ava ede pou zot beef up zot Sekter Agrikol sirtou e lapes, dan en serten lenstans. Par egzanp bann zafer veikil e tou, langre, lagrenn e en kantite keksoz ki kapab ede pou anmenn en rediksyon dan pri bann komodite, pri lavyann, pri fri, pri legim, pwason, ki kapab ede pou… akoz la nou vwar pri karbiran pe monte, Roupi pe devalye – sa pou impact lo pri lavi so si i kapab ganny gete dan son plan imedya lo Lagrikiltir ek Lapes.  Mersi.

 

MR SPEAKER

Minis.

 

MINISTER PAMELA CHARLETTE

Pou labatwar Mr Speaker, ti napa en Lagreman, me selman i annan enn ki nou’n fini drafte e ki AG pe revwar.  Lo kote SFA demarkasyon; SFA i deza annan bann lenformasyon lo bann… kot bann pwen. Par egzanp kot dimoun i al fer kazye, kot diferan bann pwen lo lakot.  E mon krwar sa bann proze reklanmasyon i ankor dan konsep.  So evantyelman SFA avek Minister konsernan avan ki sa i vin en realite, i a bezwen koze pou vreman demarke sa bann landrwa spesifik.  Avek India ki nou’n fer, nou’n anvoy deza en lalis bann lekipman lagrikiltir sirtou ki nou pou bezwen.  Ler nou pe koz en pe lo mechanisation, so nou’n profite pou nou fer en lalis lekipman avek Gouvernman L’Inde pou ed nou dan sa fason.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, letan nou’n ekout Minis taler in annan lezot bezwen ki mon konnen i imedya parey veikil ou’n mansyonnen.  Si i ti kapab vi ki sa Komisyon pa ankor finaliz son bann bezwen, eski Minister i kapab revwar sa lalis pou azout serten keksoz ki nou vwar i imedya ladan, pou kapab ede pou rezourd ou bann problenm imedya ki ou annan e ki mon asire Gouvernman an zeneral i pou aksepte sa vi ki i konsern nou vant.  Mersi.

 

MR SPEAKER

Minis.

 

MINISTER PAMELA CHARLETTE

Wi Onorab nou ava konsidere e menm mon’n demann en lodyans avek High Commissioner India pou nou kapab met nou plan devan apre demann en pe lasistans. Mersi.

 

MR SPEAKER

Tre byen. Minis… Pardon… Onorab Vidot.  Ou pa ankor vin Minis Onorab. Ou ankor Onorab.

 

HON AUDREY VIDOT

Mersi Mr Speaker.  Bonzour tou Manm Onorab, Minis ek ou delegasyon e tou dimoun ki a lekout.  Mr Speaker menm si Roche Caiman dan mon distrik napa bokou dimoun ki dan Sekter Lagrikiltir, Agrikol, mon fyer pou dir mon annan en zenn tre debourye Marsha Radegonde ki’n antre dan sa domenn e mon ankouraz li pou li kontinyen.  Mon kestyon pou Minis, Minis ki ou Minister pe fer pou adres bann problenm kot bann dimoun ki’n ganny allocate en bout later lagrikiltir kot napa akse semen.  Mon konnen i annan ki pe rankontre sa difikilte ki ou Minister pe fer?  Sa i lo kote Lagrikiltir e mon 2 kestyon ki konsern pou SFA.  I pa fer premye fwa ki mon poz kestyon lo konsernan labi lo bann konsesyon fuel, eski SFA in vwar en amelyorasyon dan koleksyon lenformasyon, ki zot bann zofisye i anmase pou kapab ede, pou adres en pti pe sa bann problenm labi. Parey kot dimoun, i annan propriyeter bato ankor pe servi konsesyon fuel pou zot saroy karbiran lo zil ; pou zot kontinyen met dan zot transpor. I annan pe menm… bato ki pe ganny servi pou saroy drog e osi  ki i annan ki pe anmenn dimoun lapes pou plezir ki i pa byen.  E 2enm eski SFA in fer letid pou vwar lekel bann bato ki pe pli byen benefisye pou ganny konsesyon lo bann lekipman lapes, ki zot pe purchase.  E lekel ki pa neseserman parey ou’n dir dan ou statement bomaten.  Ki SFA ler si zot fer sa letid petet osi i ava vwar ki bor sa de balansman i ete pou adrese.   Mersi.

 

MR SPEAKER

Minister a pran en pti letan pou konsilte ek ou PS ek Mr Clarisse.

 

MINISTER PAMELA CHARLETTE

Mersi Mr Speaker.  Mersi Onorab.  Lo kote plan semen nou annan en pe bann funding external – parey mon pe dir, mon’n mansyonnen oparavan ki sa i enn ki i annan bann proze semen ki tonm anba la. E osi i annan sa fon LTF osi ki nou servi pou bann lenfrastriktir lo bann laferm ki enpakte bokou fermye.  E semen osi i ganny mete ladan.  Nou annan bann nouvo semen pou ganny fer me i annan osi dan vye semen ki nou osi     pe sey amelyore ansanm avek drainage, irigasyon bann keksoz koumsa.  Lo kote SFA se akoz sa rezon nou’n anmenn sa Emergency Plan ozordi pou nou kapab boost up en pe SFA lo kote monitoring parey mon’n dir lo kote proze enn e osi lo kote bann keksoz, bann aktivite ki pe arive lo Por.  E sa i enkli osi bann labi parey ou pe dir pou monitor, pou le moman se kapasite menm ki pe anpes nou fer li.  E osi parey ou’n dir pou bann lekipman, parey mon’n mansyonnen dan mon lentervansyon ozordi, sa i osi menm keksoz parey mon ti’n dir oparavan ki bann konsesyon pa ganny vreman ganny pase avek bann pti fermye, oubyen bann peser akoz pa zot ki vreman ki al pou al enport sa bann materyo pou anmennen, me zot, zot ganny li a en pri ki deza in fini met sa bann tax lo la oubyen VAT whatnot.  So  e nou i dan nou plan pou reget ansanm avek Minister Finans avek Revenue Commission.  Nou’n deza konmans sa konversasyon, me selman nou’n arive en staz kot nou pe gete ki mannyer sa pou arive; whether nou fer li konman en refund, me selman refund osi i annan son bann kontrent ki vin avek.  So nou bezwen rod en mekanizm ki vreman ki pa en long prosedir osi e osi ki pou efektiv la dan son lenplimantasyon.  Mersi.

 

MR SPEAKER

Onorab Vidot, en siplemanter.

 

HON AUDREY VIDOT

Yes. Mersi Mr Speaker. Minis parey bann lenformasyon mon konpran ki zot pe anmase konsernan pou labi.  Mon konnen SFA zot annan bann sistenm an plas ki pou zot fer sa prosesis konsesyon marse. Eski zot pe vwar poudir baze lo bann data ki zot pe anmase avek zot bann zofisye, sa bann bato si vreman pe sorti e kantite depans ki SFA i fer an term bann paperwork pou annan sa bann dokimantasyon pou parey si sa dimoun i al lapes konbyen trip i pe fer, pou sa lakantite fuel ki pe gannyen anba sa scheme si vreman zot vwar i annan en balansman, si vreman i pe marse, i rantab pou sa kantite larzan, apard ki konsesyon ki Gouvernman pe depanse ek nou bann peser wi, me an term osi bann ta depans ki nou pe rode pou paperwork pou fer sir ki sa trail  i byen ganny monitor. Mersi.

 

MR SPEAKER

Minis apre ki ou’n konsilte Fisheries Officials.

 

MINISTER PAMELA CHARLETTE

Mersi Mr Speaker.  Ler nou get pou depans ki Gouvernman i depanse, sa nou kapab dir ou ki depans me lo gaspiyaz li menm sa i en keksoz ki parey nou konnen i difisil pou nou monitor li – parey mon’n dir avek sa mendev ki nou pe demande kekfwa i ava redwir. Me selman sa papye ki nou pe anmenn devan Cabinet i pou kekfwa en keksoz drastik ki nou pe al fer, me nou krwar nou bezwen fer li la, pou nou anpese redwir sa bann labi ki annan dan Sekter Lapes.  Me lenformasyon i dir nou ki nou bezwen pran en strong stance against abuse dan kote konsesyon karbiran.  Mersi.

 

MR SPEAKER

Onorab Aglae.

 

HON EGBERT AGLAE

Mersi Mr Speaker.  Bonzour Minis ek ou delegasyon. Bonzour tou Manm e tou dimoun a lekout.  Minis mon kestyon mon pou swiv en pe dan laliny ki Onorab De Commarmond in demande, kot i konsern bann led enternasyonal – an vi ki Sesel in ganny kategorize konman en high income country, kot petet serten led iv in difisil pou vin a nou laporte.  Me dan sa zefor pou kapab revamp nou Sekter Lagrikiltir, eski ou Minister pe konsider zwenn nou bann partner aletranze – parey lontan ti annan bann partner parey, nou ti ganny bann led teknik, bann led training, bann led teknolozi.  Parey nou konnen nou bann fermye, pa tou ki azour avek bann best practices, itilizasyon kemikal ek langre i en konsern.  E osi kot i konsern bann sirplis, sirplis tou dernyerman nou annan tomat, eski parey en valer azoute bann keksoz parey i kapab ede, petet soulaz en pe?  Eski dan sa laliny Minis ou pe konsider pou zot petet zwenn dan en fason formel, avek sa bann lezot Lazans pou kapab Sesel li menm li ganny en serten, led pou kapab met nou lo sa lipye kot nou devret été?  E dezyenmman i konsern bann lenportasyon bato lapes, tou resaman ki i on hold, eski sa bann lenportasyon bato pou kontinyen reste on hold? Ki peryod letan ki sa bann dimoun pou espere pou zot kapab enport en bato ?  Mersi.

 

MR SPEAKER

Ok Minis, ler ou pare pou reponn kestyon Onorab Aglae.

 

MINISTER PAMELA CHARLETTE

Mersi Mr Speaker.  Onorab nou deza annan nou… form parti en membership en bon pe lorganizasyon.  I annan IFAD ki nou pou zwenn tre byento. Nou annan FAO ki deza i annan 12 proze ki pe konsidere apre i annan bann Lorganizasyon parey COMESA ki nou kontinyen pe ganny kontak avek zot.  E osi adisyonnelman dan sa Emergency Plan i annan en Departman ki nou anvi mete pou nou kapab tap into en Departman International Cooperation ki nou, nou anvi nou menm nou ale, al rod sa bann fundings, rod sa bann Lagreman pou nou kapab boost en pe tou le de Sekter Lapes ek Lagrikiltir.  Ok.  Lo lenportasyon bato i plito lo second hand.  Mon pa konnen si ou’n ganny en konpran – lo second hand boat.

 

MR SPEAKER

Onorab Aglae.

 

HON EGBERT AGLAE

Wi Minis, vi ki ou’n nonm lo kote second hand, me i annan dimoun an se moman ki pe enport en bato nef ki i pa pe permi.  Mon pa konnen solman sa nou ava met a ou latansyon pli tar lo sa endividi.  Mersi.

 

MR SPEAKER

Ok, so ou a les Minis ganny sa lenformasyon.  Onorab John Hoareau.

 

HON JOHN HOAREAU

Bonzour Mr Speaker.  Bonzour tou a lekout.  Bonzour Minis ek ou delegasyon.  Minis an vi ki ou’n koz lo Seychelles National Agricultural Investment Plan Program, mon pa’n tann mansyon lo size zesyon delo avek lenerzi renouvlab.  Eski sa pa form parti ou vizyon pou fer ki dan Sekter Lagrikiltir, bann fermye i pey en pe mwens, i depans en pe mwens lo lenerzi? Apre dezyenmman Minis, i byen nou ankouraz dimoun pou antre dan Lagrikiltir, me an vi ki nou pe enport apepre 72 poursan o plis sa ki nou manze a en valer apepre $87 milyon par lannen; kwa ki ou pe fer oubyen ou pou fer, pou fer ki bann fermye – sa ki zot pe al prodwi zot annan lasirans poudir i pe al ganny konsonmen lokalman – i pe ganny vann e kwa ki ou pe fer pou permet zot met valer azoute avek zot bann prodwi? Trwazyenmman mon ti ava kontan konnen, si ou kapab donn nou en lide lo ki laranzman ou pe fer avek bann labank komersyal ou Labank Devlopman, pou fasilit loan pou bann fermye ou bann peser ki le reenvesti dan sa domenn? Mersi.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Mersi Onorab.  Onorab ou’n nonm SNAIP; SNAIP i pou long term me selman nou Emergency Plan i very short term until next year.  Lo kote bann labank, deza wi i annan bann konversasyon e sanmenm sa ki nou’n anmenn sa 2 Relief Scheme dan sa Emergency Plan ki nou pou fer avek DBS e osi i annan bann training ki bann labank osi in gannyen recently lo kote sa 2 sekter pou zot ganny en pe konpran plis lo sa 2 sekter e ki bann kekfwa bann challenges ki zot pe gannyen.  Apre osi par egzanp DBS i annan tout en close kolaborasyon avek Lazans Lagrikiltir par egzanp, ki ler bann dimoun i al kot zot pou apply en loan i ganny… DBS i refer zot avek Lazans Lagrikiltir kot i ed zot dan zot prosedir e osi fer zot business plan pou submit avek labank.  Lo kote value added e market lo kote lapes mon’n koz lo la regarding sa export avek SIB, Export Committee.  Lo value added pou Lagrikiltir sa nou’n vreman konmans avek bann training ki nou’n donnen. Nou’n al kot SIAD in fer training lo la, lo valer azoute e sa mesaz ki nou pe donn bann fermye osi dan bann training ki CLISSA i organize. Me pou dir ou ki value added osi i en keksoz en pti pe medium a long term.  La pou le moman, nou pe koz bann priyorite ki nou vreman bezwen pou nou relans prodiksyon dan Lapes ek Lagrikiltir.  Mersi.  Mon pa konnen si mon’n reponn tou ou kestyon?  Mersi.

 

MR SPEAKER

Kestyon in ganny reponn Onorab Hoareau?  Happy?  Minis, mon pe zis tyeke si apre midi ou pou lib pou nou kontiny nou sesyon kestyon akoz you appear parey Angle i dir to be the darling of the National Assembly. Mon annan en kantite dimoun lo mon lalis ki le koze.  Midi in sonnen… Pardon? Onorab Ramkalawan i dir mwan I’m being sexist, sorry Minis, si mon pe be sexist. Bon, midi in sonnen Minis, eski i ok pou nou repran apre midi, ou kapab vini? Pardon, I mean 2er, eski ou pou kapab? Oubyen ou a prefere…

 

MINISTER PAMELA CHARLETTE

Up to 2 I’m ok, 2er…

 

MR SPEAKER

Non, non, nou pou pran en Break akoz normalman nou Break midi apre nou repran 2er.  La 2er nou kontinyen.  Me si ou pa kapab nou a repran ou pou demen oubyen en lot zour, me si ou lib 2er akoz i annan omwen ankor 14 dimoun ki le koze demann ou kestyon.

 

MINISTER PAMELA CHARLETTE

Ok. Mon pa lib vreman me selman mon kapab kennsel meeting

 

MR SPEAKER

Non, 2er eski ou lib?

 

MINISTER PAMELA CHARLETTE

Yeah, yeah mon a bezwen kennsel sa ki mon annan Mr Speaker, sa ki mon pe dir.

 

MR SPEAKER

Ok, tre byen alor avek lakor Minis, nou a adjourn ziska 2er, nou a repran bann lezot entervenan ki annan lo mon lalis.  Avek sa mon a swet zot bonn apeti e Minis si ou pe manz ladob anmas en pe pou mwan osi.  Sorry, meeting FPAC, Onorab? 12.30, Committee Room? Committee Room 3.  Clerk, eski i annan lezot Komite meeting ankor? Non zis… Yes, wi. IAC pe zwenn avek mwan. Sorry Onorab Ferrari, yes?

 

HON JEAN-FRANCOIS FERRARI

Non, pa ozordi Mr Speaker. Me…

 

MR SPEAKER

So it’s just FPAC dan Rm 3.

 

HON JEAN-FRANCOIS FERRARI

Me en mesaz pou tou Manm IAC, nou Rapor in fini pou zot sinyen pou nou prezante.  So it’s with the Clerk, please. Thank you.

 

MR SPEAKER

Alright. Tou bann Manm IAC in tann sa. Yes Onorab Roucou.

 

HON CLIVE ROUCOU

Mr Speaker, Komite HIV/AIDS osi tou nou pe zwenn pou en pti brief, please.

 

MR SPEAKER

Ok.

 

HON CLIVE ROUCOU

Konman nou fini la.

 

MR SPEAKER

Tou Manm in tande. Avek sa mon a swet zot bonn apeti nou a repran 2er.

 

(BREAK)

 

MR SPEAKER

Bon nou ava swet bonn apre midi tou dimoun e ankor swet labyenveni Minis Palma Charlette ek son delegasyon.  Fotespere zot in  vin nabou en pti pe sustenance pou anmenn nou atraver sa apre midi.  Akoz nou annan bokou dimoun ki oule koze, e san plis tarde mon pou donn laparol Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minis in prezant nou avek en Plan Emergency.  En konponan sa plan i bezwen korpor bann lezot Lazans oubyen lezot eleman ki ed sa bann lendistri.  Mon pou koz spesifikman lo lapes.  Par egzanp bann boatyard; bann servis ki par egzanp bann dimoun ki annan bato pou bezwen annan.

Mon pe pran par egzanp spesifikman lo bann lo zil par egzanp La Digue.  Pou en peser ki La Digue repar son bato pou anmenn Praslin son kou pou li anmenn Mahé eksetera.

Eski dan sa Plan Emergency zot in osi konsider bann diskisyon ki zot bezwen gannyen avek bann lezot Lazans ki siport bann aktivite ki relye avek par egzanp Lapes lo nivo semi-endistriyel, oubyen artizanal pou fer ki bann fasilite ki sa bann peser pou bezwen i pou la available ler zot pou bezwen par egzanp ouswa fer bato, ouswa pou repar bato.  Dan sa konteks konsern lapes.

An se ki konsern lagrikiltir mon ti a kontan klarifye par egzanp nou konnen i annan en kantite lenvestisman dan lagrikiltir ozordi in ganny fer, par bann dimoun prive ki envestir zot prop mwayen, pou fer marse sa sekter, eski anba sa plan konponan lenvestisman ki Gouvernman pe mete, zot annan plan pou revwar li dan mwayen term oubyen longer term, pou zisteman siport en pti pe aktivite ki lo nivo prive dimoun pe fer?  Mersi.

 

MR SPEAKER

Minis.

 

MINISTER PAMELA CHARLETTE

Mersi Mr Speaker.  Pou premye kestyon Onorab, lo kote fasilite sirtou lapes si nou pou koz lo Praslin/La Digue, mon krwar sa i bann fasilite parey mon’n dir ler nou fer sa Komite, nou pou ganny en pli bon apersi, ki bann fasilite ki zot bezwen e ki mannyer nou kapab raport soutyen pou zot – an konsiderasyon bann finans ki nou, nou ava met laporte.  Byensir nou bezwen annan konsiltasyon avek tou ban lezot parti dan Sekter Lapes, oubyen Lagrikiltir.  Nou bann premye rankont plito in vize ver lakominote – bann lasosyasyon ki annan, bann peser bann fermye lo kote distrik.

Me osi i annan bann lezot an alan nou ava osi konsider bann lezot partners parey ou pe dir li kote kot Por; par egzanp si ou pe koz lo kot Por Lapes nou deza an konsiltasyon avek Port Authority.

Me selman i annan ankor travay pou nou fer pou nou pran konsiderasyon tou dimoun.  Byensir i annan sa eleman konsiltasyon ki nou krwar ladan.  Akoz plizyer fwa dan lepase ki nou’n vwar, bann keksoz bann fasilite oubyen lenfrastriktir i ganny mete, apre personn pa servi.  I reste – par egzanp mon pe get dan bann distrik konmela i annan landrwa ki annan 2 bazar, pourtan se lakominote ki demande apre ler ou mete keksoz i sanze, i dinamik.

So nou oule toultan annan sa konsiltasyon avek tou bann…sirtou avek lakominote akoz zot ki konnen ki bezwen peser, bann lasosyasyon si i annan.  E osi bann lezot partner dan sekter.

Pou lagrikiltir wi, nou pou be zwen review sa bann plan anmezir i nou ale ki nou ganny bann staff.  Par egzanp mon pe dir dan project monitoring enplimantasyon i annan en Komite ki nou pou mete kot Minister par egzanp, zis pou revwar e monitor sa bann proze ansanm avek sa bann Lazans.

So sa bann plan ki nou pe mete, sa bann mezir ki nou anvizaze fer nou bezwen annan en plan pou nou osi revwar li tou le petet tou le 6 mwan, pou nou kapab gete ki zistans nou’n arive.  Mersi.

 

MR SPEAKER

Wi Onorab Pillay.

 

HON SEBASTIEN PILLAY

Mersi Mr Speaker.  Prenon kont lagrikiltir souvandfwa ou vwar par egzanp bann ki deza sucessful i nobou apre reini ase fon, pou zot kapab kontinyen.  I annan bann zenn ki oule konmanse.  E zot oule idantifye par egzanp teren pou zot oule konmanse.  Mon konn dayer dan distrik ki mwan mon’n grandi Glacis lezot distrik probableman i annan.

Eski ou Minister pe regard sa dan en fason anba sa plan ki zot pe fer, dan en fason en pe pli targete, pou zisteman donn en desizyon lo bann demann ki sa bann zenn endividi ou byen bann dimoun in fer, pou zot kapab konmans en aktivite agrikol pou zot kapab siporte akoz si non si nou rely lo bann ki’n deza etablir, then sa bann pou toultan sirpas lezot akoz zot mwayen petet pou zot kapab envestir en pe plis.  Par dir ki nou pa devret get zot, me zot mwayen pou envestir en pe plis. Tandis ki sa bann ki pe komanse pa pou kapab sa persi akoz zisteman zot napa sa teren.  So as part sa Emergency Plan eski nou pe osi vwar ki mannyer nou fer plis dimoun ki pa neseserman in pas atraver lagrikiltir, me ki kapab fer lagrikiltir, pou kapab partisip dan sa sekter.

Apre mon pwen i en pti pe plis spesifik par egzanp annou pran par egzanp La Digue.

 

MR SPEAKER

Kestyon.  Onorab kestyon.

 

HON SEBASTIEN PILLAY

Mersi Mr Speaker.  Mon’n rankontre en owner – en peser ki oule repar son bato, me i bezwen anmenn li Praslin pou repar son bato.  And the cost pou li anmenn son bato Praslin i pou difisil e menm parey son cost pou li vin Mahé menm parey ek Praslin.

Ler mon pe koz lo bann servis adisyonnel eski par egzanp dan en fason dan en target approach ou pran ou Minister i pran, eski bann zofisye i al regard bann lenfrastriktir ki siport sa lendistri ki an plas?

Par egzanp si ou annan en boat yard si fasilite ki sa boat yard pe rode zot pe sey  rod atraver  diferan Lotorite koumsa sa ki nou annan en kordinasyon, across sa value chain – pa zis pou regard lapes lo li tousel, me regard tou bann lezot aktivite ki asosye avek.  Mersi Mr Speaker.

 

MR SPEAKER

Mon al les Minis konsilte Mr. Clarisse ek Mr .  Antretan Onorab Adelaide ou kapab formile ou kestyon direkteman Apre ou tour.

Ok Mr Nalletamby ou pa donn Minis en lektir it’s a salient points.  Wi Minis.

 

MINISTER PAMELA CHARLETTE

Mersi Mr Speaker ler ou pe dir target vreman bann youth parey ou pe dir sa plan ki nou’n anmennen ozordi i tous tou dimoun, tou bann fermye.

Me selman youth ki mannyer nou ankouraz zot se par egzanp ler nou konnen i annan en zenn ki anvi.  Toultan nou fer sir ki nou get li premye.  Akoz nou konnen pou dir kekfwa zot annan sa lafors ek sa nide, akoz konmela bann zenn manrmay zot vin avek lide biznes osi, ki nou gete ler nou fer ansanm zot business plan ler zot vin kot Lazans Lagrikiltir.

So menm si sa Plan Emergency, parey mon’n dir sa i Emergency ki nou bezwen pou tir nou kot nou ete la pou nou anmenn nou dan en lot direksyon.  So basically nou anvi target youth wi, me selman sa i en keksoz ki nou a bezwen travay en pti pe a lonterm lo la.  Me solman sa ki mwan mon konnen par egzanp ler ou pe koz inovasyon.  Inovasyon se bann zenn ki anvi anmenn sa inovasyon.  Zot demann.  So nou pe target zot through sa.

Regarding boat yard, La Digue mon krwar ki zot annan en boat yard si mon pa tronpe.  Sel requirement ki mon krwar nou’n gannyen, se pou vin debous channel. 

 

        (Mic Off)

 

MINISTER PAMELA CHARLETTE

Me sorry, dapre konpran slipway i egziste deza.  Nou ava verifye nou ava dir ou en lot moman.

 

MR SPEAKER

Mersi Minis.  Onorab Adelaide.

 

HON FRANCOIS ADELAIDE

Mersi Mr Speaker.  Bonn apre midi avek ou delegasyon.  Minis nou lo sa kote latab nou bann nou serye.   E nou anvi ed Minister Lagrikiltir pou avans pli devan.  Mon kestyon se ki mon demann ou Minis ki ou garanti ou pe donn sa Lasanble, ki tou sa bann pwen ki nou voice out dan Lasanble, e nou bann konsern e rekomandasyon i ganny rikorde e i ganny aksyonn-en pou benefis Sesel?

Zis pou donn  ou en pti legzanp parey mon dernyen lentervansyon mon ti koz lo 3 dimoun Baie Lazare 4 dimoun Baie Lazare.  Nou ti annan Robin Magnan pe rod en kare later.  Nou pe dir Steven Boniface ki ti anvi anrezistre konman en fermye.  Colin Payet ki anvi valoriz son bann sertifika.  Avek Hansel Moustache ki annan en let depi 1an i lo latab Msye Danny Faure, i pa ankor ganny en larepons.

So nou ti a kontan ki petet, sa bann keksoz i ganny aksyonn-en, pou ki sa bann dimoun dan limedya zot prepare.   E ler ou lans ou progranm lonterm pou lannen prosenn, zot osi zot ava pare pou zot kapab konmans kontribye.  Sa i mon premye kestyon.

Mon 2enm kestyon Minis vi ki ou fek antre dan sa Minister, ou annan pa mal bann zofisye ki’n la oparavan; ki mannyer ou pe get zot sa nouvo challenge ki ou lekip pou gannyen?  Eski ou’n vwar zot, zot pli enerzetik ouswa zot ankor an dout?  Vi ki souvandfwa nou ganny promes ki lagrikiltir pou bouz devan, me sa pa’n zanmen arive.

E mon 3enm kestyon i pa, tro long.  Eski i annan okenn later lagrikiltir ki’n ganny distribye dan Baie Lazare tou dernyerman?  Si wi ki kriter in ganny servi pou sa alokasyon?

E mon dernyen pti pwen Minis mon osi annan bann dimoun Grand Anse kot store laba, e zot kondisyon travay sirtou bann ki pe travay lo pestisid, bann ki travay ek kemikal.  I annan bann ki napa ni menm lekipman pou zot travay avek e zot pe ganny ekspoze.  Dan ou limedya ki ou Minister pe fer pou adres sa sityasyon?  Pou ki parey mon’n dir lannen ler ou konmanse sa bann dimoun pa vwar zot, zot malad.  Me zot osi for pou zot kapab kontinyen lo sa semen pou devlop lagrikiltir.  Mersi.

 

MR SPEAKER

Mersi Onorab.  Minis petet i annan 3 kestyon alafwa petet oule pran en pti letan pou konsilte ou bann teknisyen.  E mon ti pe al demann ou si oule okenn sa de lezot dimoun ki laba Mr Naiken, Mr Renaud, Madanm Estico pou vin o-bor ou, parske nou kapab azout Ankor en sez kot Mr Clarisse isi.

Eski ou santi ou konfortab oubyen oule zot vin pli pre?  Silvouple pas kote isi Mr Clarisse, avans  met en sez isi Mr Belle.  Met enn sez la, Mr Clarisse i a bouze e Madanm Estico i a vin pli pre ek Minis.  Ok sorry about sa pti delay me mon krwar i zis fasilit louvraz Minis Charlette.

Minis ler ou pare pou reponn 3 kestyon Onorab Adelaide Baie Lazare.

 

MINISTER PAMELA CHARLETTE

Mersi Mr Speaker.  Mersi Onorab.  Lo kote garanti mon krwar mon’n fer kler avek tou bann dimoun ki mon travay avek tou CEOs, tou PS ki mon la pou mon delivre en travay e ki nou bezwen fer sa travay pou nou kapab fer benefis ganny benefis pei, me sirtou bann fermye avek bann peser.

Lo mon bann vizit osi ki mon’n fer, nou pe donn sa langazman e komikman pou tou dimoun ki nou pou pran aksyon pli vit.  Ki menm si nou pa kapab fer en keksoz, nou bezwen dir ki nou pa kapab fer.  Oubyen nou dir sa pa pou fer toudswit me i a pran en pe letan. Mon krwar nou bezwen dir laverite e fer sir ki ler nou dir en keksoz nou delivre.

Lo kote Grand Anse Mahé ler mon ti fer vizit laba mon ti vwar pou dir e mon ti demann sa bann dimoun mon ti demann zot akoz zot pa pe servi zot pa met zot bann lenz proteksyon.  Mon ti demann zot sa kestyon.

Me selman nou lo nou Minister nou donnen bann gears proteksyon pou travayer.  E osi nou fer zot fer tes regilyerman.  Pou nou fer sir ki napa okenn keksoz ki pe afekte zot.

Ou’n demann osi lo mon lekip ki mon annan, mon santi mon en pti pe fortunate ki mon annan en lekip ki expert dan zot field.  Me selman i annan bann defayans dan nou Minister nou menm lo kote striktir ki sa nou pe ganny ki nou oule adrese dan sa Emergency Plan. 

        Defayans osi lo prodiktivite, e sa i en keksoz ki nou pou tackle anmezir ki nou ale.  Mon krwar mon’n firm depi ler mon’n vini pou mwan dir ki nou bezwen prodiktiv ler nou konmanse nou konmans 8er nou fini 4er.  Dimoun i bezwen la pou pran telefonn pou pran mesaz kliyan.  E si sa dimoun pa la nou bezwen donn li en dele letan kan nou pou bezwen come back avek li.

Mon krwar sa i konmans par mon menm.  Par annan sa donn sa legzanp.  E mon krwar dan mon enteraksyon avek bokou dimoun mon krwar zot ava satisfe ki mon’n toultan pare, pou donn zot en feedback oubyen mon’n toultan seye pou mon kapab ed zot dan en fason ou en lot.

Lo kote later lagrikiltir i annan ki’n ganny idantifye Baie Lazare, me selman i pa ankor ganny allocate.  Mersi bokou.

 

MR SPEAKER

Onorab Adelaide

 

HON FRANCOIS ADELAIDE

Minis solman mon pou ensiste lo sa kote Grand Anse, akoz ou konnen pou dir kantmenm nou fer  bann Tes Medikal nou bann lekipman pa ase sofistike.  E souvandfwa ler nou pou dekouver pou dir sa bann dimoun zot annan problenm zot pre ek lanmor.  So mon ti  ava ensiste ki ou anvoy ankor en lekip laba, akoz sa landrwa pa conducive ditou pou sa bann travayer.  So sa mon ti a kontan ki ou take care en pe urgent.  Mersi.

 

MR SPEAKER

Minis ou ava anvoy ankor en lekip?

 

MINISTER PAMELA CHARLETTE

Yes, mersi bokou Onorab.  Mon a fer le neseser pou nou anvoy en lekip pou al gete.

 

MR SPEAKER

Mersi Minis.  Onorab Ernesta.

 

HON PAUL ERNESTA

Mersi Mr Speaker.  Bonn apre midi Mr Speaker, Minis ek ou delegasyon.  Mr Speaker dan son Plan Emergency in koz en pe lo bann prodiksyon pou ogmant prodiksyon.  An menm tan, nou konnen ozordi i annan en konsern kot lavant bann prodwir.

E kot nou vwar bokou bann fermye zot lavant pa neseserman vann parey zot espekte pe vann.  I annan diferan fakter ki kapab anmennen akoz sa.

Parey nou’n konnen i annan petet lenportasyon, konpetisyon bann prodwir enporte.  Ozordi par egzanp en poul dou avek en poul lokal i bokou pli meyer marse.

E dezyenmman, nou get the cost of production isi lokal.  Ki sa i en fakter, mon pa konnen si Minis dan son Plan Emergency i annan en fason swa zot annan en stratezi pou kapab adres sa.

Apre dezyenmman i annan en persepsyon out there ki pti fermye, pa pe neseserman ganny gete egalman parey bann gro fermye.  Sa setadir napa en level playing field pou zot.  Eski Minis osi dan zot plan zot annan lapros pou zot kapab adres sa sityasyon ki si zanmen sa i leka.

Trwazyenmman Minis nou koz lo later lagrikiltir, nou konnen ou’n mansyonnen ki i annan serten aplikan ki’n fer demann pou later lagrikiltir ; mon kestyon, ki kantite aplikan i annan vizavi bann demann lo later lagrikiltir?  Mersi.

 

MR SPEAKER

Minis petet ou a konsilte Madanm Estico oubyen Mr Moustache.  Me i pe demann sif ek statistik si ou santi ki ou bezwen al fer en pti pe resers ou kapab donn li apre.  Onorab Stephen Pillay prepar ou apre pou ou kestyon.

 

MINISTER PAMELA CHARLETTE

Mersi Mr Speaker.  Mersi Onorab lo kote cost of production dan nou Emergency Plan i annan sa plan pou revwar alokasyon later.

E an menm tan ler nou pe donn later, nou met lenfrastriktir lo la.  Gouvernman i met lenfrastriktir.  Sa i a redwir zot kou prodiksyon oubyen zot kou lenvestisman, ki zot pou met lo sa later.

E sa kekfwa i a fer zot pli konsantre lo zot aktivite, rather than zis donn zot en later.  Apre nou vwar napa prodiksyon lo la.

So sa i enn.  Apre osi nou annan bann training osi ki nou fer.  Bann training; parey mon’n dir osi bann extension officers i pase pou get zot pou advise zot en pe lo zot prodiksyon ki mannyer pe ale.  E advise zot ki mannyer pou kekfwa fer li pli i en pti pe pli byen.

Nou annan osi en survey ki nou pe fer deza lo kou prodiksyon akoz toultan nou dir kou prodiksyon i o me selman kekfwa nou pa pe al an detay.  Kwa ki pe fer li o?

I annan bann persepsyon kwa ki fer li o.  Me solman nou bezwen rod byen e avek levidans pou nou kapab siport bann Polisi oubyen bann progranm ki nou pou mete a lavenir.  So sa i en keksoz ki nou pe fer dan Minister.

Apre i annan bann assistance through bann funding.   Parey mon’n dir CLISSA ki ed bann pti fermye pou devlope.  Training i enkli ladan.

Konsernan lavant, konsernan market parey ou pe dir, mwan pou mon krwar ki nou telman annan lotel nou telman annan guest house.  Nou telman en pei touristik.  Akoz ki nou pa kapab ganny en market?  Atraver osi bann lasosyasyon ki nou pe ankouraze se sa bann lasosyasyon ler zot vin ansanm kekfwa i ava en fason pou bann fermye zwenn ansanm annan en lasosyasyon ki pou kapab kolekte zot bann prodiksyon e al vann.

Par egzanp mon konnen poudir SEYFA ki fek ganny formen i pe fer son laplikasyon pou li ganny en plas dan market.  Sa pou ed li pou ganny pou pran bann prodwir bann fermye ki sa dan sa lasosyasyon e vann lo market.

So pou lo kote market mon krwar i annan ase market.  Kekfwa nou bezwen get lo seasonality osi bann fri ek legim, e gete ki mannyer nou kapab restrikte en pe lo bann lenportasyon.  Mon’n reponn tou ou kestyon Onorab?

 

MR SPEAKER

Ok Onorab Ernesta.

 

HON PAUL ERNESTA

Mr Speaker i annan sa bout lo kote pou pti fermye la pou kas sa persepsyon pti fermye gro fermye.

 

MINISTER PAMELA CHARLETTE

Mon krwar nou Polisi i kler nou get tou fermye.  Nou get tou fermye.  Me selman nou pou spesifikman par egzanp i annan en rekomandasyon ; bann fermye i vin kot nou. Nou diskite avek Lazans Lagrikiltir.  E la i ganny zot ganny kekfwa lasistans koumsa.

Mon ti a voudre lans en lapel pou bann fermye pou vin anrezistre osi.  Sa i ava pli ed fasilite en pe sa servis ki zot pou gannyen avek Lazans Lagrikiltir.

 

MR SPEAKER

Onorab Stephen Pillay.  Ou ti annan en keksoz pou demande? Ou’n demann 3 kestyon Onorab Ernesta.

 

HON PAUL ERNESTA

Mr Speaker en follow up.  Zis en follow up.

 

MR SPEAKER

Quickly. 

 

HON PAUL ERNESTA

Thank you.  Zis petet dan sa follow up Mr Speaker i en sizesyon lo sa kote demann later.  Mon pe pran kont par egzanp nou distrik Takamaka i annan bokou pti fermye ki anvi fer bann prodiksyon, me solman nou kon taste ki osi i annan distrik ki bann later i osi i annan bann later prive, kot Minister i kapab si i antre an negosyasyon ek bann prive pou kapab sey ankouraz zot pou osi sey devlop en pe bann later, ouswa an term partenarya avek zot ki mannyer devlop bann fasilit pou lagrikiltir.  Mersi.

 

MINISTER PAMELA CHARLETTE

Nou kapab konsidere.  Kekfwa nou a diskite apre ki mannyer nou pou kapab fer li  Mersi.

 

MR SPEAKER

Mon ti a kapab fer en lapel ki zot sey demann en kestyon e direk.  Akoz i annan plis ki 10 dimoun ki anvi koze, ki reste pou koze.  E i deza pas 2.30.  Onorab Stephen Pillay.

 

HON STEPHEN PILLAY

Mersi Mr Speaker.  Bonn apre midi Minis.  Mon a sey fer detrwa kestyon ansanm Mr Speaker.  Vi ki Minis i dir i ti vizit Au Cap kot Mr Jude Brown Vandredi.  Mon eskize mon pa ti la mon pa ti dan pei mon ti a kapab zwenn ek ou.

Me ki mon krwar pli tar nou a kapab zwenn avek Mis Madanm Linetta Estico nou kapab fer en pti vizit lo site. 

Mon kestyon se detrwa ansanm an gro fermye ki lo probasyon akoz ki serten pe ganny re al lo probasyon ankor kan zot kapab pran sa later pou donn en lot fermye ki serye ?

E lo later ki zot pe donn Lagrikiltir, akoz ki annan landrwa lagrikiltir pe ganny transfer dapre Minis Housing.  Egzanp SADECO pe vin pou Housing Estate  ek SADECO Au Cap.

E Hydroponics kot Golf Court Reef Hotel in fermen.  Ler pe koz lo Hydroponics akoz ki zot pa pe re ouver li or ki zot plan pou li?

E lo lagrikiltir dernyen se akoz ki fermye laferm ek touris dan serten landrwa, zot mont lo lipye kanmarad?

Mon krwar Madanm Estico i okouran enn Pointe Au Ciel kot blef pe sonny o-bor guest house.  5 guest house within a hundred metres each. 

        Ok, i resanble zot napa pouvwar pou enforce sa.  Mr Speaker avek zis en pti keksoz pou lapes prezan…

 

MR SPEAKER

Dernyen  kestyon.

 

HON STEPHEN PILLAY

…en pti dernyen kestyon pou lapes.  Mon ti demann son ex Minister avan dan zafer lapes semi-endistriyel dan bann long liners.  Ki zot Polisi lo pou lapes lo bann plato, pa plato Mahé lo bann lezot plato dan lezot outlying islands akoz ti annan en konsern ki long lining i pe fer encroachment lo artizanal lo bann lezot landrwa ki monitoring i en pe lax.  Mersi Mr Speaker.

 

MR SPEAKER

Mersi Onorab.  Minis apre ou konsilte ou teknisyen petet ou kapab reponn 3 kestyon.  Apre sa nou vin kot Onorab Lemiel.  So ou prepar ou kestyon – pa 4.

 

MINISTER PAMELA CHARLETTE

Mersi Mr Speaker.  Mersi Onorab.  Pou lemoman i annan later SADECO apre kot Hydroponics ou dir kot Reef Hotel.  Sa bann later i still i pa anba nou ziridiksyon.  Me selman dan sa Emergency Plan osi, i annan en papye osi ki nou pe anmenn kot Cabinet pou aprouve regarding alokasyon later.  So li osi i pou enkli ladan.  Akoz deza zot in fini ganny ti’n ganny demarcated pou lagrikiltir, ki prezan pa pe ganny servi.  So nou swete ki kekfwa i ava aprouve pou nou pran sa bann later.

Regarding bef si ou ti kapab donn mon plis lenformasyon nou ti ava rode apre.  Ki bann…

 

MR SPEAKER

…kote sa bef i été o-bor guesthouse.  Be  Onorab Pillay mon krwar ou ava envit Minis vin vwar sa bef kot guesthouse laba.  Onorab Lemiel.  Wi Onorab Pillay i annan long liner ki ou ti’n demande.

 

HON STEPHEN PILLAY

 Wi ti annan longliner epi sa bann zafer probasyon ki ganny…

 

MR SPEAKER

Minis.

 

MINISTER PAMELA CHARLETTE

Regarding probasyon wi nou donn probasyon bann fermye ki nou pa pe vwar pe vreman sifizaman servi son bann later.  Me selman an menm tan, nou donn zot en sans pou zot eksplike ki difikilte zot annan e nou, nou advise zot ki pou fer.

Me i annan ki nou’n deza donn enn de.  I vre ki nou’n deza donn enn de fwa  ekstansyon.  Me sa par egzanp i vin a rekomandasyon Lazans li menm, ki donn zot sa sans mon oule dir pou zot kapab ogmant zot prodiksyon.

Me evantyelman dan sa alokasyon – sanzman dan lokasyon later ki nou pou fer sa osi i ganny konsidere konbyen par egzanp konbyen fwa nou pou les en dimoun al lo probasyon.  Akoz vreman, nou annan apepre 130 dimoun lo Waiting List ki pe esper later.  E sanmenm osi dan sa Emergency Plan i annan sa provizyon pou nou kapab survey later ki deza la ki’n  earmarked konman lagrikiltir me ki pa ankor pa kapab nou pa ankor kapab survey pou donn zot pou donn later.

Konsernan long liner, Mahe plato sa ki mon konpran se ki i tro pti, nou pa kapab anpes li ganny eksplwate bokou.  Alor nou donn zot sans pou zot al fer bann pelagic par egzanp kalkal ek atelis.  Etelis.

Me selman Mr Speaker parey nou’n dir dan sa plan osi i annan sa Mahe plato Management Plan ki nou pe fer. Ki kapab endike vreman kote bann lapes diferan lapes aktivite lapes, i a ganny fer.

 

MR SPEAKER

Ok mon ti a fer ankor en lapel avek tou dimoun pou si ou annan 4 kestyon sey fer parey Onorab Gill i fer.  Swazir enn ki pli enportan.  Ou pa kapab demann 4 kestyon, zanmen nou pou fini.  Onorab Lemiel.

 

(laughter)

 

HON SYLVANNE LEMIEL

Mersi Mr Speaker bonn apre midi tou dimoun.  Mr Speaker Minis in tous en pe petet lo kestyon ki mon ti pou demande; sa i konsern sa zafer later lagrikiltir ki en bout MLUH i responsab en bout lo kote lagrikiltir kot mon kestyon se ki ti pou demande ki tou later i ganny dir pou lagrikiltir i ganny transfer kot lagrikiltir.

Minis ou’n osi tous lo sa zafer survey, me parkont mon kestyon i se ki eski dan ou plan short term la, ou annan sa resours finansyel.  Petet ki ou’n mete pou ou kapab gannyen pou okip ou avek dimoun ki pou ed ou ler ou’n ganny sa bann later tou in transfer kot ou pou ed ou avek surveyor pou survey sa bann later e ki ava fer keksoz pli vitman.  Mon krwar sa pou fasilit bann fermye pou fer zot ganny sa later pli vitman sirtou sa 130 dimoun ki pe espere.  Akoz la pou lemoman keksoz i vreman slow.  Mersi.

 

MR SPEAKER

Minis.

 

MINISTER PAMELA CHARLETTE

Mersi Mr Speaker.  Mersi Onorab.  Dan nou Emergency Plan nou’n met pou demarkasyon 3 pwen 6 milyon Roupi pou nou kapab fer survey.  E nou pe anvizaze osi servi bann si nou kapab servi surveyor an deor.  Akoz si nou pou rely lo en lot; par egzanp rely lo Minister Land Use kekfwa i pou pran en pti pe pli lontan, akoz zot osi zot en pti pe under capacitated.  So sa 3. 5milyon pou ed nou 3.6 milyon pou ed nou survey 72 Hectar later deza.

 

MR SPEAKER

Ok  ?  Onorab ok Onorab Lemiel? Onorab De Letourdie.

 

HON JANY DE LETOURDIE

Mersi Mr Speaker.  Bonn apre midi tou dimoun.  Mr Speaker mon ti annan 4 kestyon mon a swazir 2 ptipti ki pli enportan.  Apre si i annan letan mon ti ava tous lo sa 2 dernyen lo ice plant si ou permet mwan.

 

MR SPEAKER

Dakor.

 

HON JANY DE LETOURDIE

Minis mon pe ganny en konpran ki pou dir i annan en progranm finansman pou labwet ki ti pe ganny fer par Zaponnen.  E si wi i annan ki pozisyon sa progranm? E ki mannyer eski bann peser pe pou benefisye?  Apre mon ti a kontan osi wi lekel ki pe ansarz sa progranm

Mon 2enm kestyon Minis.  Ok? Mon 2enm kestyon eski dan sa plan dirzans i annan en rol spesifik, ki ou pe raporte pou Lekol Maritim ek Lagrikiltir ek Ortikiltir?  Mersi.

 

MR SPEAKER

Minis.

 

MINISTER PAMELA CHARLETTE

Mersi Mr Speaker.  Mersi Onorab.  Dapre mon konpran ti annan en proze pilot pou lo kote makro kannal – makro kannal pou labwet.  Me selman i pa’n en sikse, dapre mon konpran napa bokou peser ki’n enterese pou fer li.

Osi lo kote Lekol Lagrikiltir i tonm direkteman anba Minister Ledikasyon.  Me soutyen ki nou donnen se atraver sa Board ki annan bann manm sorti Minister.  Mon krwar zot pe travay ansanm, ansanm avek Minister Ledikasyon, pou revwar en pti pe parey mon’n dir oparavan lo kote nouvo building ki pou ganny fer, ki bann servis ki zot  bezwen –  bann lekipman osi e osi donn en pe direksyon lo curriculum dan sa lekol.  Mersi.

 

MR SPEAKER

Ok Onorab De Letourdie?

 

HON JANY DE LETOURDIE

Mersi vi ki’n an bref mon kapab demann mon 2 ptipti lo…

 

MR SPEAKER

Nou a retourn lo ou.  Les nou ava al lo Onorab Sophola apre mon a met ou non.   Mon a get letan en kou.

 

HON JANY DE LETOURDIE

Ale mersi.

 

MR SPEAKER

Onorab Sophola ou ti’n demann laparol.

 

HON NOLINE SOPHOLA

Mersi Mr Speaker.  Minis dan ou Prezantasyon ou pa’n koz tro bokou lo La Digue.  Me ou’n dir ki ou pou met en Komite sipervizyon.

Minis eski dan sa Emergency Plan ou pe garanti met en ice plant lo La Digue?  Akoz mon pe dir sa se ki bann peser Digwa pe soufer bokou avek sa pri ice.  E si wi si ou’n idantifye en landrwa.

E 2enm tre bref, mon pou koz lo L’Union Estate.  Bomaten ou’n koz lo later lagrikiltir.  Me dan plan redevlopman L’Union Estate, ki ti ganny prezante 2 a 3an pase ti annan en provizyon ki ti pou fer Sant Resers kot Old People’s Home i ete.  Eski sa i ankor an mars?  Mersi.

 

MR SPEAKER

 

Minis ou annan En Sant Resers La Digue? Mr Moustache, Madanm Estico mon tande ti pou annan Sant Resers La Digue.  Order! Order! Les Minis reponn.

 

MINISTER PAMELA CHARLETTE

Mersi Mr Speaker. Mersi Onorab.  Lo kote ice plant sa nou’n diskite wi mon konfirmen ki pou annan en ice plant.  E sa nou pou fer li o-bor zis lot kote kot bazar pou ete.  Osi Sant Resers nou pa okouran pou dir pou annan en Sant Resers me ki mannyer mon konpran se ki nou ti pou servi L’Union menm konman en zone ki nou kapab fer resers.

 

MR SPEAKER

Ok.  Yes Onorab Sophola.

 

HON NOLINE SOPHOLA

Minis mon pa konnen si petet ou bann dimoun avek ou i konnen.  Ti annan en plan re devlopman pou L’Union Estate ki ti prezante.  E kot Old People’s Home i te la, zot bann dimoun ti pou sorti e la kot zot ti pou fer sa Sant Resers.  E se sa ki mon pe poz kestyon lo la.  Mersi.

 

MR SPEAKER

Petet Minis i en keksoz ou a diskite avek dan ou Minister pou vwar si sa i fezab oubyen dan ou plan. Ok.  Onorab Arrisol.

 

HON SANDY ARRISOL

Mersi Mr Speaker.  Bonn apre midi Minis avek ou lekip.  Bonn apepre midi tou Manm e ou bann ki a lekout.  Mr Speaker premyerman mon ti a kontan dir letan nou pe koz lo laferm, nou pe koz lo zannimo, mon ti a kontan dir avek Onorab Esparon avek zabitan Glacis, pou dir Sanmdi nou ti manze nou koson ki nou ti pe griye.  Nou pa’n zete – parey Dynamo in dir nou nou’n zete, nou’n manze.

Mon premye kestyon.  Mersi Mr Speaker mon’n tann Minis in koz lo later lagrikiltir i ganny itilize pou biznes, me pa pou rezyon sosyal, alor mon ti a kontan demann Minis si dan sa progranm ki zot pe fer sa Emergency Plan si son Minister in idantifye bann later, bann endividi ki’n ganny later lagrikiltir, me ki pa pe devlope?  Par egzanp bann dimoun ki annan later lo zot non, me solman nou vwar lezot dimoun pe travay lo la.  Oubyen nou annan ou menm ou’n dir i annan 130 dimoun lo lalis espere.   Eski zot in idantifye bann later, bann endividi ki pa pe servi later lagrikiltir? sa i a fer ki bann dimoun anviron 70 mil met kare ki pe dormi,  bann zenn sa 5 zenn ki sorti tou-le-z-an, omwen i a konmans ganny en pti bout pou li kapab devlope.

E mon dernyen kestyon Mr Speaker, mon’n tann Minis, koz lo labatwar, bouse, lavant lavyann lokal kalite lavyann i pli bon lavyann.  Mon ti a kontan zisteman demann Minis si anba Emergency Plan  zot annan  en plan konkret pou Labousri ki nou annan anvil dan bazar Sir Selwyn Selwyn Clark.

        Akoz Prezidan in fer vizit laba.  E mon ti a kontan Minis ek son bann teknisyen ki la, Labousri kot i ete ozordi i deplorab.  Kondisyon pa bon.  Sanitasyon pa bon, delo sal i monte, lera i rantre, laport in kase e zot dan en kondisyon deplorab. Silvouple Minis si ou kapab dir mon zot annan en plan dan ou Emergency Plan pou sa pti group dimoun ki ede lo kote fermye zot osi.  Mersi bokou.

 

MR SPEAKER

Minis.  Mersi Onorab.

 

MINISTER PAMELA CHARLETTE

Mersi Mr Speaker.  Mersi Onorab.  Pou nou idantifye bann later ki pa ganny itilize, sa i en keksoz ki nou pe fer kontinyelman toultan.

E sanmenm sa dan sa plan ki nou’n met sa propozisyon – ki nou pe al devan Cabinet avek en propozisyon ki mannyer nou pou allocate bann later.  E ki bann prosedir ki pou fer li pli transparan osi.

Nou konnen pou dir nou annan apepre 40 poursan later ki pa pe ki under utilized.

E parey nou dir i nou plan kekfwa en pti pe pli a lonterm pou nou al kot bann fermye zot menm pou get zot bann difikilte e seye;  avan ler ki nou tir zot, nou toultan eseye pou nou kapab ede kot nou kapab.

Me parey mon’n dir wi i annan bann ki vreman ki kekfwa si ou tir zot, apre i annan en lot problenm ki arive ; ki par egzanp bann ki’n fini [fer lakaz lo later lagrikiltir. Ki mannyer ou handle sa?

Dan bann letan avan nou survey en bout later ki zot in fer konstriksyon lo la, nou vann zot.  Oubyen – me selman still annan ler kote zot fer zot lakaz i pa difisil pou ou fer sa.  Akoz ennler zot pran zot lakaz zot met dan milye apre later lagrikiltir i otour ou.  So en keksoz ki’n ou pe kontinyelman travay lo la, in nou a seye pou nou kapab rezourd sa problenm kot a lafen dizour, ler nou pran later nou pa osi kree en lot problenm sosyal par deryer.

Lo kote Labousri, i annan bann travay ki’n deza konmanse lo Victoria Market. Sa i premye faz.  2enm faz an tou leka.  Me selman i annan provizyon – nou ‘n fini fer Bidze pou nou met en osi 3 e katriyenm faz ki pou get kot Butchers i ete, pou nou kapab fer en lot konstriksyon.

E lo lot katriyenm faz osi kot pou nou kapab aranz en pe kot Fish Market.  So sa nou pe fer li an faz, an menm tan ki resours i osi i vini.  Mersi.

 

MR SPEAKER

Onorab Hoareau en related question.

 

HON BASIL HOAREAU

Mersi Mr Speaker en kestyon an relasyon avek later.  Mon ti a kontan demann Minis si son Minister ek Minister Lanvironnman petet pe fer en legzersis pou get bann later ki pou le moman dan Rezerv Nasyonal.  Ki petet i kapab ganny servi pou lagrikiltir.  Si i annan en legzersis ki pe  ganny fer, pou regete si i annan bann serten later ki kapab ganny tire san obviously compromise nou lanvironnman – me si sa pe ganny fer.

 

MR SPEAKER

Minis.

 

MINISTER PAMELA CHARLETTE

Mersi Onorab.  Zis pou konfirmen nou’n deza anmenn en papye dan Cabinet lo kote Agroforestry ki’n ganny aprouve.  E ladan en sizesyon se pou revwar sa bann later kot dimoun i kapab – menm si pa telman sansib ki dimoun i kapab rantre e fer Agroforestry ladan.  E sa papye in ganny aprouve i zis pou nou prezant nou travay, nou’n annan enn de dimoun ki’n konmans vin kot nou avek bann proze.  E nou bezwen zis evalye pou gete si i viable, e swivan sa gid zot.  E travay ek Minister Lanvironnman pou e osi MLUH pou kapab ganny en konsansis  ki bann later ki nou kapab pran.  Mersi.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Mon ti a kontan demann Minis si i kapab dir nou dan en fason konkret en pe spesifik, ki plan imedyat oubyen irzan son Minister i annan pou adres  sa problenm finansman sirtou pou bann pti fermye?

Mon konn 2 par egzanp enn pe sey rod en pikep e i al kot Labank Devlopman, in al kot en lot labank.  E zot tou pe demann en gro poursantaz lo sa montan ki i bezwen.  Konman en sekirite.

Me byensir konman en dimoun ki ti pe konmanse i pa fasil pou li gannyen.  ki DBS pe fer par egzanp si ou kapab dir nou dan plan imedyat ki zot pe fer pou asiste en dimoun ki ; par egzanp i pe rod en pe larzan envestir dan tiyo avek en laponp.  Pou stokaz delo par egzanp ki souvandfwa pou bann pti fermye pli gro problenm ki zot gannyen.

Napa en sours finansman. I annan en lot ankor la ki mon konnen Angare i pe zisteman i pe rod sa.  E partou kot zot ale i difisil gannyen.  Mon krwar si ou ti kapab trouv en solisyon  4ase vit pou sa bann ou ti a vwar detrwa pti proze pe demare.

E alors si ou kapab dir nou ki zot pe fer dan plan imedyat pou adres problenm finansman?  Mersi.

 

MR SPEAKER

Minis.

 

MINISTER PAMELA CHARLETTE

Mersi Mr Speaker.  Mersi Onorab.  Nou’n deza konmans kozri avek DBS spesyalman.  E apre akoz nou annan osi en fon Agriculture Development Fund avek ki DBS i manage.  E sa nou fer li osi konzwentman avek Lazans Lagrikiltir.

So nou’n remarke, nou konnen ki kekfwa i annan bann difikilte ler bann fermye i al kot en labank pou fer son… pou apply.  Me ki nou pe fer nou pe fer sir ki annan sa kominikasyon toultan ant DBS avek Lazans Lagrikiltir, ki toultan zot ler en fermye i al kot DBS i rankontre en problenm, sa fermye pa retourn se li i pran son problenm i anmenn kot Lazans Lagrikiltir.  E nou Lazans Lagrikiltir li i ede pou ed sa fermye.

Nou pe osi revwar sa EDF Fund ki nou annan avek DBS, pou fasilit en pe bann prosedir aplikasyon.  Apre nou’n fini konmans fer diskisyon osi avek SBFA, pou osi eksplor sa posibilite, pou zot ganny loan.  Akoz mon konpran son prosedir en pti pe pli fasil ki bann lezot Labank Komersyal.  Me tousala i dan nou plan.  Mon krwar pou lemoman priyorite la se, sa ki mon’n koz lo la lo mon dan mon Emergency Plan se sa Relief Scheme ki nou pe donn livestock osi.  Mersi.

 

MR SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonn apre midi Minis ek ou delegasyon.  Bonn apre midi tou Manm.  Minis vi ki bann later kot Dawn Dew Farm bann fermye zot napa elektrisite,  alors mon ti a sizere ki zot ganny lasistans pou zot kapab ganny sa koneksyon elektrik.

Apre Praslin parey ou pe konnen i napa en labatwar li. Mon ti a sizere ki nou fast track sa proze laboratwar.  Akoz pou lemoman la wi ti annan enn avan, me solman domaz i pa dan lanmen Minister Lagrikiltir apre i pa an fonksyon.

Apre pou sa Komite ki ou’n koz lo la dan ou progranm ki pou ganny set up Praslin,  mon ti a sizere ki sa osi nou fer li dan la ase kourt dele,  pou nou kapab konmans asize pou nou adres bann lezot problenm ki nou annan.  Mersi.

 

MR SPEAKER

Minis.

 

MINISTER PAMELA CHARLETTE

Mersi Mr Speaker.  Lo kote Dawn Dew Farm elektrisite wi ti en kontrent ki nou ti diskite, me selman mon krwar kekfwa ler nou’n zwenn ansanm lo sa Komite, nou a pli annan en zistifikasyon pou nou al kot PUC pou kekfwa negosye en pe.  Akoz sa i pou tonm dan lekspertiz PUC, pou advise nou kwa ki nou kapab fer.

Me parey mon’n dir oparavan dan Emergency Plan osi parey ler nou pe fer nou pe donn later osi, i annan sa konsiderasyon pou nou met lenfrastriktir.  Savedir tou keksoz ki Utilities semen irigasyon si i bezwen en drainage tou ban fasilite koumsa bann fermye i a konsantre  lo zot aktivite.

Lo kote laboratwar wi i annan en labatwar dan plan.  E si ou pe ensiste wi nou ava sey gete kapab fast track li en?  Sa Komite wi nou ti sipoze ankor dan 2, 3 semenn ler nou ti zwenn pou nou akoz nou bezwen en terms of reference pou nou kapab distribye ek tou dimoun pou konnen ki son rol e ki son ki purpose nou pe met li an plas.  So byensir i ava ganny konsidere pou fer li dan letan imedyat.  Mersi.

 

MR SPEAKER

Onorab Larue.

 

HON FLORY LARUE

Mersi Mr Speaker.  Bonn apre midi Minis.  Letan mon’n fer mon resers mon vwar ki nou’n annan en Plan 2013 National Food and Nutrition Security Policy pour Sesel, ki ti ganny endorse par Gouvernman.

Apre nou annan sa SNAIP ki ou’n koz lo la ki li i apel Seychelles National Agriculture Investment Plan ki sipoze en Plan 2015-2020.  La nou 2017 avek tou respe Minis ou nouvo ou pe pran en Minister, me parey in ganny mansyonnen par lezot koleg ou tim otour ou in la en bon pe letan.

E la nou vwar ki sa Minister i come up avek en Emergency Plan.  Dan ou plan Minis eski ou kapab donn ou en time span spesifik ki dire sa Emergency Plan?

        E kan 5ki sa Emergency Plan li i pou fit in avek sa plan ki zot annan 2015-2020 ki fer ki sa bato lagrikiltir i come back lo track silvouple?

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mersi Onorab.  Ler ou koz sa ki ou’n koz lo la avan i en Polisi i pa en plan.  SNAIP i nou plan lonterm 2015  a 2020 parey ou’n dir.  Sa i ongoing. Me solman ki nou pe dir nou, nou pe vin avek sa plan pou nou met en pe priyorite e focus lo enn de keksoz ki nou krwar i bezwen ganny fer, pou nou kapab tir sa 2 sekter kot i été ozordi pou avans li.

So i pou mars an konzwentman.  E sa Emergency Plan i pou la ziska 2018 dan sa lannen.  Me selman bann keksoz ki i annan dan SNAIP, i still ongoing.  Me selman sa ki nou pe met emphasis  lo la, se sa bann priyorite e focus ki nou pe focus lo la, zis pou nou kapab met nou latet en pti pe par lao delo.

 

MR SPEAKER

Ok Onorab Larue?

 

HON FLORY LARUE

Mon pa krwar ki Minis in vreman reponn, akoz si ou annan en plan ou bezwen konnen kan ki sa plan i ganny achieve.  E pou ou achieve li ou bezwen annan target.  E dan ou plan ki ou’n donnen Emergency Plan ou pa dir nou kan ki sa bann target spesifik ki oui pe vin deal avek letan i annan bann emergency.  Kwa ki problenm, e kwa ki sa plan pou solve?

        Sa ki pou mwan mon, vwar li i pa konpreansiv.  Me solman pou go back lo time span pou bazar Victoria Market zot fek siny en dokimantasyon ki zot ti donnen en timeline pou dir ki by Desanm 2017 renovasyon pou’n fini lo bazar.  Sa i lo zot site Facebook. 

        Eski sa bann renovasyon zot in koz lo la pou finalize avan Desanm 2017?

 

MR SPEAKER

Spesifikman lo bazar Victoria ou pe koze.  Minis.

 

MINISTER PAMELA CHARLETTE

Mersi Mr Speaker.  Zis pou mon klarifye ankor en pti pe.  Sa Emergency Plan se bann funding ki nou bezwen dan imedya.  E ler nou pe dir imedya, i annan keksoz osi ki pou pran letan.  Par egzanp mon pe recruitment ;  i en kantite lo mendev pou ogmant kapasite Minister ek Lazans.  Recruitment nou kapab fer en pe deswit, me i annan ki nou pou bezwen fer li an 2018 osi a longer di-tan.

So parey mon’n dir mon pe fer sir ki Sekter Lagrikiltir avek Lapes i annan en focus pou lemoman pou nou travay lo la.  Larestan sa bann keksoz ki dan SNAIP par egzanp Victoria Market.  i deza dan SNAIP li osi.  Li ki pe ganny fer i pe ganny fer anmezir di-tan.

Son premye faz wi i pou fini Desanm 2017 la.  Rezon kekfwa ki ou pa pe vwar keksoz pe arive, set akoz konstriksyon pe fer on the site rather ki off site rather ki lo son site li menm.

So en kantite – par egzanp sa roofing, sa roofing i fer offsite apre ki pou fini ganny enstale.  E bann materyo osi – bann materyo ki nou pe konstrir avek, ti bezwen ganny enporte. Tousala.  Selman nou’n targete pou nou fini Desanm 2017.

 

MR SPEAKER

Onorab William.

 

HON WAVEN WILLIAM

Mersi Mr Speaker.  Bonn apre midi Minis avek ou lekip.  Mr Speaker etandan ki Minis in dir ki Prezidan in zwenn li avek son lekip.  E etandan ki nou pe koz lo food security, e nou pe rekonnet ki Sekter Lapes i nou 2enm pilye lekonomi, ki form parti en Sekter Lagrikiltir.

Mon anvi demann Minis avek sa Relief Plan ki i pe prezant devan nou, si i satisfe lefe ki Sesel i en Manm EU avek UN, e ki annan en serten poursantaz GDP kontribisyon ver sa sekter, eski son Minister avek sa Relief Plan e pou lavenir mon ti a kontan si Minis i dir nou, mon konnen ki otour li la i annan bann teknisyen ki annan apepre en 40an servis, si zot satisfe avek lenvestisman ki pe ganny fer par Gouvernman dan sa sekter?

E dezyenmman Minis lefe ki dan ou lapros – lefe ki sa Lasanble ti a kontan ou fer byen ;  eski ou pe osi letan ou pe rantre dan diskisyon avek   negosyasyon, ou pe osi anmenn bann reprezantan bann sekter enportan e kle, ki pou fer ki enn ; ou plan i vin en plan konpreansiv ki vreman pran kont konsern, e bezwen sa 2 sekter?  Mersi bokou Mr Speaker.

 

MR SPEAKER

Mersi Onorab.  Minis.

 

MINISTER PAMELA CHARLETTE

Mersi Mr Speaker.  Mersi Onorab.  Lo konsernan lenvestisman dan sa 2 sekter mon krwar si nou la ozordi set akoz nou, nou menm nou, nou pa’n satisfe avek Bidze ki kekfwa oparavan nou’n gannyen pou sa 2 Minister.  E mon krwar Prezidan osi i konsernen oubyen in pronons son lekor ki sa 2 sekter pou ganny sa latansyon ki devret.

So sa i en konmansman pou nou demann plis.  Me selman nou bezwen annan sa kapasite pou nou zer sa finans  li menm.  E sanmenm sa ki sa Emergency Plan osi i konsantre en pe lo la, lo kapasite bann Lazans ek nou Minister, pou kapab kekfwa zer en pti pe pli byen sa finans,  sa lenvestisman ki nou pou gannyen.

Lo kote konsiltasyon, nou toultan annan konsiltasyon avek bann akter si oule dan sa 2 lendistri.  Nou’n konmanse avek bann lasosyasyon sirtou.  E osi nou pou kontinyen osi dan bann meeting piblik, ki nou fer pou kapab ganny en bann plan ki parey ou dir ki annan konsiltasyon tou dimoun lo la.

E bann meeting ki nou fer apre avek par egzanp ler ou’n fer avek MLUH, nou’n toultan anmenn bann konsern bann fermye e bann peser dan a bann meeting, pou nou kapab resolve.

E i annan bann meeting ki nou bezwen par egzanp along side tou ansanm pou nou get en issue pou nou get en problenm e diskite ki mannyer nou kapab resolve li.  Mersi.

 

MR SPEAKER

Onorab?  Wi Onorab William ou annan en lot kestyon.

 

HON WAVEN WILLIAM

Mersi Mr Speaker.  Minis lefe ki  i annan serten bann problenm parey mon’n dir ou nouvo.  Mon pe zis devan serten bann konser ki mon santi pou dir Minister Lagrikiltir fodre i adres par egzanp enn, se bann kriter ki Environmental Health i demande.  Mon’n al kot Licensing.  Epi ou annan sa ki konsern credit facility. 

Sa sekter pe dir ki i annan bann demann zot met devan.  Me ki nou pa ti a kontan ki ou Minis, ou pe vin dir nou bann keksoz ki lezot Minis lin dir nou, me selman nou pa’n vreman vwar sa lenpak dan sa sekter.

So parey nou pe dir, nou pe dir larg lanmen Seselwa.  Me selman sekter pe dir be ou a krwar lipye ki pe ganny anmare.

Me eski zot pou revwar en pti pe sa bann eleman vreman enportan, ki pou vreman relans sa bann sekter?  La mon pe koz pa zis dan sa Relief Scheme la.  Me dan petet pou en pti pe dan Bidze ki pe vini.  Mersi bokou.

 

MR SPEAKER

Minis.

 

MINISTER PAMELA CHARLETTE

Mersi Onorab.  Mon krwar nou bezwen toultan travay ansanm avek bann sa bann lezot Minister.  Nou pa pou kapab met zot a lekar akoz nou telman depandan lo bann lezot Minister ; parey Public Health par egzanp Lanvironnman, MLUH osi.

Mwan mon krwar ki mon en dimoun ki krwar vreman ki ler ou annan en problenm, ou bezwen rod en fason pou debourse.  E menm lapros ki mon pran avek mon tim ek mwan.

Si zot .annan en difikilte ki zot pa kapab perse, zot vin kot mwan.  E nou ansanm nou rod en solisyon.  Oubyen nou fer fason ki nou konsilte avek bann lezot Minister.  E sanmenm dan mon lapros ler mon ti fek vini mon ti met ansanm tou bann issues imedya, e nou ti apel bann Minister – bann lezot Minister nou’n fer li avek MLUH , nou’n fer li avek Port Authority, Planning ti la.

E se bann keksoz ki nou pe adrese an menm tan an, akoz nou bezwen annan zot baryenn osi lo sa ki nou, nou pe fer.  Akoz nou pa pou kapab fer li an dezolasyon.  Mersi.

 

MR SPEAKER

Onorab Roucou.

 

HON CLIVE ROUCOU

Mersi Mr Speaker.  Bonn apre midi tou Manm Onorab.  Bonn apre midi Minis avek ou delegasyon.  Mr Speaker anvi ki mon konsernen avek lasante nou  pep, mon kestyon pou Minis se ki plan son Minister pou asire ki lanfaz i ganny mete lo la kalite ki nou bann fermye i prodwir?

Premyerman  an konparezon avek sa ki nou enporte.  E dezyenmman avek bann kemikal oubyen pestisid ki bann fermye i servi?  Mersi.

 

MR SPEAKER

Minis.

 

MINISTER PAMELA CHARLETTE

Mersi Onorab.  Dan sa Plan Emergency nou annan en kantite keksoz ki nou’n mete pou Lazans Biosekirite; akoz nou vwar li i vreman enportan.  E dan lepase i pa’n ganny en Bidze pou li kapab operate parey i ti devret.

Sa i en fason ki nou kapab amelyor bann kontrol ki parey mon’n dir oparavan, pre border, border e post borderSo i konmela nou pe ganny par egzanp en kantite flights ki pe rantre dan pei ; kantite marsandiz par Por.  So sa bann pwen stratezik ki nou bezwen atake avek mendev.  E osi bann lekipman e fasilite pou nou kapab pou zot kapab fer zot louvraz.

Adisyonnel-man, nou annan kot BBC parey mon’n dir oparavan i annan sa Livestock Laboratory, sa i pou donn bann standar, bann prodwir.  Met bann standar lo bann prodwi e  fer sir ki sa ki nou pe osi i bon pou lasante nou popilasyon.

En lot keksoz ki nou’n fer sir nou konsantre lo la se bann inputs ki nou, anmennen lo stor bann pestisid par egzanp.  I annan bann pestisid ki kekfwa fermye pe demande ki deza in Ban dan pei.

Me nou, nou bezwen edik zot pou zot kapab servi en lot alternativ.  E i annan bann ki bio ki non-kemikal.  E sa nou pe ankouraze e nou stor i annan bann pestisid oubyen bann fertiliser menm, ki preski natirel nou kapab dir.  Se sa bann zefor ki nou pe anmennen lo kote lasante piblik.  Mersi

 

MR SPEAKER

Mersi Minis.  Onorab Simon Gill.

 

HON SIMON GILL

Mersi Mr Speaker.  Bonn apre midi Mr Speaker.  Bonn apre midi Minis ek lekip.  Bonn apre midi tou koleg Manm Lasanble.

Mr Speaker mon pou tre bref wi, parey tou larestan bann Manm in ‘tre bref.  So mon realize ki nou pe tous en size serye Mr Speaker.  E mon panse ki avek ou permisyon nou kapab extend sa deba ziska odela ki 5er.   Espesyalman ler ki nou pa pou fer statement.

 

MR SPEAKER

Kestyon Onorab, kestyon.

 

HON SIMON GILL

Mr Speaker kestyon pou Minis.  Premyerman eske ki nou kapab konn konponan lentervansyon Gouvernman dan aksyon konkret reel lo later, dan sa Emergency Plan?  Sa i enn.

E 2enm eleman sa i lo kote prodiksyon agrikol e lezot.  E lo kote Sekter Lapes, la osi mon ti ava kontan konn lentervansyon Gouvernman ladan dan en fason tre konkret.

E si nou tonm dakor ki nou vreman oule sa Emergency Plan i vreman annan lefe.  Epi nou ava annan en peryod en letap kot Gouvernman i resorti.  E byensir dan sa process idantifye bann dimoun kapab, kale, to take on. 

E nou fer sir ki nou kapab sustain sa lentervansyon, e sa nivo kot Gouvernman apre i a kite.   E parey mon pe tann ou peryod ou’n dir 2018 probableman beyond.  Sa i premye konponan kestyon, i en kestyon ase serye sa Minis ek ou lekip, akoz mon krwar i enportan.

E lot keksoz mon santi ki’n manke ki nou bezwen annan en presizyon lo la Mr Speaker ;  dan la mezir ki nou prodwir lokal, ki garanti Gouvernman pe donn tou sa bann prodikter, ki zot prodwir pou annan lespas lo market?  Nou pa kapab annan en sityasyon kot lenportasyon i vini i vin compete e detri tou sa bann zefor lokal ki Gouvernman e bann endividi dan sekter prive pe mete dan prodiksyon agrikol avek tou son bann lezot konponan ki entervenir ladan e menm lo kote lapes.  Nou pa kapab annan sa sityasyon si nou vreman oule rezilta.  Si nou vreman oule rescue parey ou Emegency Plan son lobzektif mon pe konpran, i pe aim tou,  nou pa pou kapab annan sa dezekilib avek lenportasyon masiv dan Sesel e an menm tan en lesey pou nou prodwir lokalman e compete. 

        Pe enport ki target nou oule mete, nou napa fasilite pou nou prodwir keksoz masiv dan Sesel san en proteksyon lenportasyon bann prodwir dan sa pei.

`       Mon respekte tou bann teori marse lib, me nou bezwen donn en lenportans partikilye sa sekter ki nou pe koz lo la si nou oule really fer en lefe e kree en lenpak dan sa  sekter Mr Speaker.  Pou lemoman mon pou aret la mon annan 3 kestyon si ou permet mon, mon ava demande Mr Speaker.  Mersi bokou.

 

MR SPEAKER

Taler nou a gete ler nou’n fini zet en deal ki nou pou fer si ou a get ou 2 kestyon.  Me sa kestyon i en pti pe dan laliny ki Onorab Mondon ti demande bomaten.  Minis petet ou a reponn sa kestyon lo balans lenportasyon ek prodiksyon lokal.

 

MINISTER PAMELA CHARLETTE

Mersi Mr Speaker.  Ou premye kestyon ti lo konponan Gouvernman.  Si mon konpran ou byen ou pe dir lo kote finansman konbyen Gouvernman i pe mete? Right?

 

MR SPEAKER

Wi Onorab bref-man sey presize.

 

HON SIMON GILL

Presize, Gouvernman wi chip in lazan.  Me pou lemoman, nou annan en kantite bann dimoun ki pa oule re antre dan sa sekter. Eske Gouvernman i pare pou take the lead, take the lead?  E an menm tan bann dimoun ki zot in idantifye i la, i pe swiv pou ki evantyelman ler nou’n ariv sa optimum capacity la sa sekter prive i antre.  Byensir avek nou tonm dakor annan bann proteksyon neseser e dispansab pou sustain sa prodiksyon, e fer sir ki market i available.  Vwala ki mon a pe rode Mr Speaker.  Mersi.

 

MR SPEAKER

Minis.  Ou a pe rod en pti pe proteksyon pou bann fermye ki pe prodwir lokal? Ki enportan

 

MINISTER PAMELA CHARLETTE

Mersi bokou Mr Speaker.  Mersi Onorab.  Onorab lo kote Gouvernman, mon krwar se sa langazman ki nou pe donnen ozordi pou Gouvernman antre e pran kontrol en pe lo lagrikiltir e lapes.  Par sa Emergency Plan ki nou’n mete devan Lasanble ozordi.

I vre ki sa Emergency Plan i get tou fermye. Tou fermye.  E nou, nou bezwen fer sir ki sa Emergency Plan i marse.  So i annan en investment ki nou’n sizere me selman i annan osi sa Fund osi ki Prezidan in met dan la dispozisyon, zis pou nou kapab relans sa 2 sekter.

So Gouvernman pe met bokou lenvestisman dan sa 2 sekter prensipal Mr Speaker.

Lo kote lenportasyon mon krwar mon ti eksplike en pti pe avan ki wi kekfwa nou bezwen re get lafason.  Par egzanp konmela nou annan Tax lo poul.

So kekfwa nou bezwen elarzir en pe sa kategori dan livestock me osi get en pe lo pou lagrikiltir.  Par egzanp mon ti dir taler ki nou kapab fer li seasonal akoz pa tou, nou bezwen fer sir.  Nou bezwen realis osi pou fer sir ki i annan supply toultan.

E pou nou kapab met en Tax, kekfwa nou fer li seasonal kot nou konnen supply i bokou lo market, supply lokal i bokou.

E osi tire ler napa supply.  Me pou lo kote sa i pou mars ansanm osi avek bann nouvo -bann nouvo inovasyon ki pe anmennen pou fer fermye kapab prodwir en pti pe plis.

 

MR SPEAKER

Onorab Gill.

 

HON SIMON GILL

Mr Speaker mon pou attempt pou rephrase akoz mon, santi mank keksoz.  Annou reverse the thinking.  Ozordi dan Sesel eske lo kote Minister Lagrikiltir in idantifye dizon 10 zonm, fanm ki enterese pou prodwir poul lavyann poul or dizef?  Zot la probableman zot prodiksyon i lo en nivo.  E dan sa Emergency Plan Minister pe attempt pou anmenn nivo prodiksyon lavyann poul, lo dizon 500 mil.  Now eski zot in arive lo sa moman kot ou dir, ‘’ Bon,  vwala nou annan  nou 10  dimoun, nou krwar sa 10 dimoun i annan n potansyel pou nou pous zot to the limit.  Nou anmenn zot lo sa limit e nou sustain zot.  ‘’

Lo kote lapes.  Eski zot idantifye dizon en ven tenn dimoun – mon pa konnen si i annan polis mwan.   Or ladan en seleksyon dan sa 20 ki annan, ou’n selekte 10 dimoun – ‘’vwala.  I annan potansyel annou pran zot konman sa target group nou bouze nou sustain. ‘’

        So it will be a gradual and phase implementation of the Emergency Plan, pou ki evantyelman ler ou get li lo en broader spectrum dan Sesel, nou ava ariv lo sa optimum or sa minimum pou nou kapab dir  Bon.  Nou annan sa level of National Food Security ki nou pe rode.’’  E byensir in reponn lapel lobzektif ki Minister Lagrikiltir in anvi attempt.

        Mon’n sey probableman mon a kapab ganny en lot repons.  Mersi bokou.

 

MR SPEAKER

Sirtou ki Minis ou menm ou ou’n mansyonnen Prezidan prezant lasal dan Lasanble in mansyonnen, ki ti pou donn zot 50 milyon si mon pa tronpe.

Mon krwar sa kestyon i pertinan.  Idantifye bann ki pare pou prodwir fasilit prodiksyon ki pei i benefisye.  Eski zot konmsi konman bann teknisyen sirtou – Minis ou nouvo Madanm Estico Mr Moustache Mr Naiken lezot eski zot idantifye bann dimoun pou sey ede fasilit prodiksyon, pou ogmant prodiksyon lo nivo Nasyonal?

 

MINISTER PAMELA CHARLETTE

Nou preokipasyon pou lemoman se pou nou ed dimoun ki deza ladan.  Parey mon’n dir oparavan Lazans Lagrikiltir i annan en survey ki pe fer, ki pou idantifye bann dimoun e bann problenm ; bann target group ki nou pou kapab asiste.

E dan osi dan sa Emergency Plan i annan sa Relief Scheme ki nou’n vwar poudir Sekter Endistriyel i sa sekter ki annan plis loportinite.

Alor se sa sekter ki nou pe konsantre en pti pe plis lo la donn zot en pti pe plis latansyon atraver sa Relief Scheme ki nou annan.

E par egzanp dan sa group semi-endistriyel, i annan 37 boat owners.  E sa i pou enkli pou enkli – par egzanp mon’n nonmen oparavan ekspertiz ; pou enkli zot loan ki zot deza annan.  Tousala i bann keksoz ki nou pou bezwen  fer pou .nou kapab ed sa group dimoun.  Mersi.

 

MR SPEAKER

Mersi Minis.  I annan ankor dimoun pou demann kestyon nou’n ariv lo 3.30, nou bezwen pran en desizyon.  Parey mon dir touzour konmsi defen Msye Mancham consensus.  E annou tonm dakor personnelman mwan osi mon annan detrwa kestyon ki fermye Anse Boileau in anvoy kot mon pou demande.

Minis mon konnen it’s been a long day pou ou depi 9er bomaten.  Eski ou dakor nou ava pran en pti Break apre nou ava retournen nou fer sir ki tou dimoun i ganny en sans en Minister ki ou’n pran ki tre kle pour devlopman Sesel – Lapes avek Lagrikiltir.

Alors si tou dimoun i dakor, nou ava obzeksyon nou a pran en pti Break pa dir en pti Break nou a pran en demi-erdtan parey nou abitye fe.  E nou a retournen 4er pou nou kontiny ek nou bann enteraksyon.

Minis ski sa i akseptab, oubyen ou’n fatige?  Ok. 

 

MINISTER PAMELA CHARLETTE

I ok Mr Speaker.

 

MR SPEAKER

Ok tre byen nou a pran en Break nou a retournen 4er.

 

(BREAK)

 

MR SPEAKER

Bon nou a pran nou dernyen lap pou ozordi e mon a donn la parol Onorab Prea.

 

HON NICHOLAS PREA

Ok. Mersi.  Mersi Mr Speaker pou sa 2enm loportinite.  Mr Speaker mon pou direk.  Mon ti a kontan port a latansyon Minis, ki petet osi demann li i annan en basen   ki fermye i sipoze ganny konekte avek.  Pa ankor ganny commissioned for so many years, si Minis i annan lentansyon dan sa Emergency Plan pou regard ladan?  Minis petet bomaten ou’n koz lo renovasyon lo fasilite Veteriner mon anvi petet demann Minis si i pe anvizaze fer en vizit laba akoz fasilite pa adekwat.  Menm landrwa ki loperasyon oubyen tretman, pe ganny fer ek zannimo i menm landrwa kot staff pe fer dite, pe fer kafe.  So mon ti a swete ki dan ou progranm ou ti a fer en vizit laba.  Minis mon vin spesifikman lo sityasyon Belombre.  Eski Minis i kapab dir avek nou kan sa bann Fish Processing Unit pou ganny commission e pou pare pou ganny allocate?  Si i kapab donn nou lenformasyon konbyen aplikan in gannyen deza e si zot pou annan drwa process for export.  Mon dernyen pti kestyon SFA. Eski Minis i okouran ki bann – sirtou bann zenn ki pe fer travay obzervasyon lo ban bato ton, zot pti zafer, zot pti larzan i an retar par apepre 3 semenn, si Minis i kapab klarifye akoz aparaman sak fwa zot vin ater sa peyman i tarde.  Mersi.

 

MR SPEAKER

Minis.

 

MINISTER PAMELA CHARLETTE

Mersi Mr Speaker.  Mersi Onorab.  Premyerman lo kote Val D’Andorre sa basen in fini konmans ganny en pe latansyon anba proze CLISSA.  Nou’n al Val D’Andorre pou nou get en pe bann problenm delo laba e sa ki nou’n konpran se ki sa proze in fini konmans an mars e by Desanm pou’n fini.  Konsernan veteriner sa i t enn ban premye vizit ki mon ti fer.  Mon ti al vizite e sanmenm sa ki nou’n met en pti pe presyon lo kote Procurement, akoz ti pe pran en pe letan pou nou kapab ganny aprouve e konmans sa renovasyon lo la.  Lo kote Belombre sa bann processing plant in fini, me selman zis ki nou pe espere se son STP sewage pou waste.  Apre bann dimoun ki pou ganny allocate, i pou bezwen fer bann laranzman anndan li menm pou kapab dapre ki zot pe – pou servi wi.  Dapre zot bezwen.  Pour bann peyman SFA kekfwa nou ava rod plis lenformasyon, me dapre ki mon konpran se apre ki bann observer zot fini compile zot bann data e zot fer entry zot fer zot bann report e apre la ki zot ganny zot larzan.

 

MR SPEAKER

Onorab Prea.  Ou annan en klarifikasyon.

 

HON NICHOLAS PREA

Zis.  I annan de pti bout ki Minis in oubliye.  Si zot in deza ganny aplikan pou Fish Processing Belombre, konbyen?  E eski process osi pou vize ver eksportasyon?  Mersi.

 

MR SPEAKER

Minis.

 

MINISTER PAMELA CHARLETTE

I annan deza 6 aplikan e i plizoumwen vize lo marse lokal.

 

MR SPEAKER

Apar export?  Wi Onorab Prea.

 

HON NICHOLAS PREA

Mersi Mr Speaker, vitman.  An vi kou lenvestisman eski petet Minister i kapab petet konsidere ki pou sa bann aplikan, pou sa bann dimoun kapab operate e retir en profi pou konsider osi petet regard marse pou export osi.  Mersi.

 

MINISTER PAMELA CHARLETTE

Mon krwar si i annan en market nou kapab bezwen les zot pou export osi.  Mersi.

 

MR SPEAKER

Onorab Ferrari.

 

HON JEAN-FRANCOIS FERRARI.

Mersi Mr Speaker.  Mr Speaker de kestyon enn pou Lapes enn pou Lagrikiltir.  Mr Speaker mannyer mon’n ganny en konpran, Minis i kapab pe dir nou ki i pe demann avek Gouvernman en serten sonm larzan pou li enplimant sa bann proze ki en pe irzan.  Mwan mon ti a kontan demann avek Minis, an vi ki nou okouran de lensidan, enn kot Processing Plant ki’n ganny fer konpletman substandard e ki pe kout nou an plis ki son Bidze ankor apepre R15 milyon.  Si Minis pou aksepte pou fer lodit sa ki’n arive laba.  Mon konnen i pa’n ariv dan son letan me mwan konman en Manm FPAC sa Lasanble mon pa pe les pase sa keksoz.  Nou bezwen en lodit lo kwa ki’n arive? Lekel ki responsab?  ki sa Kontrakter fer ?  Lekel sa Project Manager? E lekel ki pou pey lepokase dan sa enn proze?  E dezyenmman in annan de lensidan fraud an 2016.  Vol fuel e vol ice.  Enn kot SFA anvil.  Enn kot SFA Providence.  Mon ti a kontan si Minis i kapab dir nou si lanket in ganny fer, akoz aparaman sa bann dimoun ki’n fer sa bann fraud, pa’n ganny pouse o kontrer zot in ganny – i annan bann lentervansyon tre o ki’n dir fodre re met zot dan zot louvraz.  So mon pe demann avek Minis ki i kapab dir nou lo sa bann lensidan, akoz si nou les pase sa bann keksoz i pa pou posib pou nou donn zot ankor larzan pou fer sa plan.

Mon dezyenm pwen pou de pti – pou en pti keksoz pou Lagrikiltir.  Mon ti a kontan ki Minis i dir avek nou bann zabitan Praslin ki son – ki progranm Minister Lagrikiltir pou debous bann lanmar, akoz i ankor annan bokou problenm lanmar bouse ki pe anpes bann fermye fer zot travay.  E i annan en proze – mon krwar anba CLISSA pou bann – pour fer bann mous dimyel.  Aparaman i annan 100 lakaz mous dimyel ki ankor i’n ganny take dan en stor kek landrwa, e ki bann fermye pe rode; akoz mous dimyel i enportan pou prodiksyon fri ek legim e zot in ganny take enn landrwa e ki Minis i kapab dir nou lo ki pe arive avek sa bann beehives e kan eski zot pou ganny distribye avek bann fermye?  Mersi.

 

MR SPEAKER

Minis.

 

MINISTER PAMELA CHARLETTE

Mersi Mr Speaker.  Mersi Onorab.   Mon konmans avek ou premye kestyon pou Processing Plant ti annan en technical audit ki nou ti fer, me sa apre in ganny anvoye kot Minister Finans pou gete si zot menm zot kapab fer odit lo kote frod, oubyen bann keksoz ki’n al mal.  Lo kote fuel sa osi sa case in ganny anvoye kot Departman Finans li osi.  Ok?

Wi sa case ice ti annan en internal investigation parey mon konpran, me parey ou’n dir nanryen pa’n ganny fer me kekfwa nou kapab re lev ankor.

Lo kote bann beehives.  Nou annan beehives, ordinerman ki nou fer nou donn training apre nou distribye.  Me i annan ki’n deza ganny distribye be selman i annan ki nou bezwen fer li apre ki training in fini ganny fer.  Sorry.  I pou ganny fer wi, bann training apre i ava ganny distribye.  Anba CLISSA sa parey ou’n dir.

 

MR SPEAKER

Ok.  Onorab Ramkalawan.  Sorry ankor en kestyon.

 

MINISTER PAMELA CHARLETTE

Sorry, i annan en progranm maintenance drainage ki Lazans Lagrikiltir i fer ki nou fer li tou le lannen.  Pou sa lannen nou’n fer 2 travay lo Praslin e nou annan plan pou fer distilling lo ankor 3 segondary drains lo Praslin avan lafen sa lannen.

 

MR SPEAKER

Yes Onorab Ferrari.

 

HON JEAN-FRANCOIS FERRARI

Mr Speaker mon krwar avek repons Minis nanryen pa’n ganny fer.  Nou’n fer Audit me nanryen pa’n ganny fer pou hold accountable parey Prezidan i dir pa mwan ki dir sa, rann kont, be accountable pou sa bann keksoz ki’n arive, ki bann fraudulent keksoz, mon ti a kontan si Minis i kapab dir avek Lasanble si i ava pran sa linisyativ pou fer anvoy kot FPAC tou le 3 rapor lo 3 investigation, sa 3 Internal Audit ki’n ganny fer e ki’n ganny anvoye kot Minister Finans nou ti a kontan kapab ganny en kopi silvouple Minis.  Mersi.

 

MR SPEAKER

Minis eski ou kapab fer available sa 3 kopi Rapor?

 

MINISTER PAMELA CHARLETTE

Napa problenm.

 

MR SPEAKER

Very good.  Mersi.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon pe anvi premyerman zis dir avek Minis ki sa lenformasyon ki in donnen pli boner, konsernan sa proze labwet pa egzakteman sa ki ou’n dir nou son larepons.  Sa proze labwet ti en proze Zaponnen ki letan Zaponnen ti’n ale, ti annan en operater ki ti ganny – pou li kontiny sa proze.  I ti fail.  Ti re konmans ankor, li menm li ki ti gannyen.  In fail ankor.  I annan en bout later Providence ki sipoze anliny avek sa proze, e sa in ganny servi pa pou sa proze, me pou sa dimoun ki en kontrakter pou li met son bann materyo konstriksyon.  Mon pe zis dir sa Mr Speaker pou mwan dir ki petet se sanmenm sa bann kalite keksoz ki’n anpese ki keksoz i marse.  E la mon retourn lo kestyon ki Onorab Ferrari in demande, an relasyon avek Providence.  Sa bann Units ki sipoze dan processing.  Eski Mini i kapab dir nou konbyen sa bann Units ki pe marse la pou le moman, ki pe fonksyonnen?  Sa bann Units ti ganny fer 2014, 3an pase e ozordi, ozordi nou tou nou konnen ki poudir i annan tou sort kalite problenm avek.  Kwa ki zot pe fer pou zot balans sa e antretan mon osi aprann ki poudir i annan 2 Rapor ki’n ganny fer lo sa proze, eski Minis ti ava kapab fer Lasanble Nasyonal ganny kopi sa 2 Rapor lo, sa 2 Rapor Lodit lo sa proze li menm.  Parski aparaman i annan sa de rapor ki pe koz lo sa, lo sa bann problenm.  Mr Speaker, mon ti ava osi kontan demann Minis lo sa Fisheries Development Fund, eski i kapab dir avek nou konbyen larzan dan sa Fisheries Development Fund ki’n ganny disbursed?  Konbyen ki’n al pou bann diferan proze, konstriksyon bato, lezot servis e ki mannyer sa bann loans pe ganny re-peye?  E petet Mr Speaker sa bann premye kestyon ki mon pe demande la i  anliny avek lapes, parski mon krwar ki sa semi- industrial, industry i devret ganny bokou plis lankourazman e la pou le moman  i pe ganny neglize e zot tou zot pe, zot pe konplent; alors pou nou kapab bouze dan sa, dan sa direksyon.  Mon dezyenm, mon dezyenm kestyon Mr Speaker i anliny avek Lagrikiltir.  Dan tou sa bann, dan tou sa bann plan ki Minis in dir nou eski ankor enn fwa i kapab donn nou en, en timeline, mon pou re ensiste lo la en timeline.  Lagrikiltir nou’n vini si dan Lasanble nou’n dir ek Minis nou ava donn li larzan ensidswit, me toultan konmsi in reluctant e dernyen Bidze bann zofisye ti la, me ou a krwar konmsi ti napa gran plan.  Me sa ki zot pe dir la spesyalman zot in servi sa mo emergency kan eski, eski nou kapab trouv en, en lankourazman, konmans vwar keksoz konmans bouze?  Eski i pou pran nou 6 mwan avan nou vwar sa?  Eski i pou pran nou en 1an avan nou vwar sa?  Kan eski nou pou kapab vwar keksoz pe bouze?  Mon ava aret la pou le moman Mr Speaker e mon ava regarde ki larepons ki Minis i donn nou.  E petet zis an pasan si Minis ti ava kapab dir avek nou La Digue la, toultan zot pe koz lo bazar, pe koz lo ice plant ki pou fer lanmenm la o-bor.  Sa case i ankor Ankour, zafer later.  Eski Gouvernman pa pou trouv li dan en sityasyon kot i pe fer konstriksyon lo later ki pa pou li?  Si Lakour D’Apel i rann zizman an faver sa bann dimoun ki’n met zot claim?  Mersi.

 

MR SPEAKER

Petet pou premye kestyon since Minis i ase nouvo dan sa Minister, lo sa kestyon proze labwet ki Onorab in demande e Mr Clarisse, Mr Nalletamby, Mr Renaud, petet zot kapab zot ki’n la avan e lontan zot kapab donn Minis en pe leklersisman, pou li vinabou reponn kestyon Onorab lo eski i vre ki i annan enn ki ti gannyen in fail in re gannyen in fail ankor?  Me si sa i le ka nou pe al an avan.  Nou pe pez akselerater me nou lipye i lo clutch.  Mr Nalletamby ou kapab brief Minis?  Plito tou le de frein ã mains ek frein ã pied.  E sa i pa akseptab.  Wi Mr Nalletamby.  Minis wi ou non eski i egziste sa, ti pas koumsa oubyen non?

 

MINISTER PAMELA CHARLETTE

Ok.  Mr Speaker kekfwa mon a pran enn a la fwa.

 

MR SPEAKER

Ok.

 

MINISTER PAMELA CHARLETTE

Sa zafer labwet i en pti pe konplike ki mannyer mon PS in eksplike, me dan sa ki mwan mon pe konpran, se ki ti annan vre en proze pilot ki ti’n konmanse, apre ti tonm dan delo, akoz sa dimoun ki ti pe vin fer training, ki ti ganny train pou fer ti perdi an mer.  So alors zot in bezwen rekonmanse e wi, i pa ti en 2enm proze, me selman ti menm keksoz ki zot ti pe kontinyen.  Koumsa ki mannyer mon konpran.

 

(Mic Off)

 

MINISTER PAMELA CHARLETTE

Pardon?

 

MR SPEAKER

Menm later kot i annan proze labwet eski i annan, i vin ganny store materyo konstriksyon?

 

MINISTER PAMELA CHARLETTE

Well nou pa tro okouran si i pe servi konman materyo, si i annan materyo konstriksyon laba.  Selman nou a tyeke nou a gete.

 

MR SPEAKER

Petet Minis ou kapab sizere ki ou fer en vizit laba vwar, si i annan en landrwa ki sipoze annan en proze labwet ki pe ganny konman en landrwa ki pe store materyo konstriksyon.  Si sa i le ka, then i pa normal.  Petet si ou pa konnen ou teknisyen i kapab anmenn ou e ou a donn nou en repons dan Lasanble an ekri.  Yes Minis.

 

MINISTER PAMELA CHARLETTE

Wi, mersi Mr Speaker mon krwar wi, kekfwa i a pli bon ki mon a fer en pe resers avan ki mon pronons mwan lo la.

 

MR SPEAKER

En vizit e si sa i le ka ou ava regarde ou a korize parski parey nou dir nou konnen ou zen ou fek konmanse en ou bezwen letan ou osi pou dekouver salte en pti pe partou, partou e netwaye.  Eski mon kapab, Onorab ou ok avek sa?  Bazar La Digue Minis.

 

MINISTER PAMELA CHARLETTE

Non i annan ankor de kestyon la.  Fisheries Development Fund ou ti pe dir mwan.  Fisheries Development Fund i avek DBS e sanmenm sa ki nou’n met dan sa Emergency Plan, pou nou re gete pou nou siport semi endistriyel.  Sa i pou donn en relief sa bann akter ki dan sa sekter vreman, akoz nou remarke ki zot osi zot annan bokou det e nou bezwen kekfwa re gete ki mannyer nou kapab siport zot en pti pe.

 

MR SPEAKER

Ok.

 

MINISTER PAMELA CHARLETTE

Regarding timeline Onorab nou time line emergency i from now e dan 2018, me selman rezilta, rezilta nou bezwen vwar li en pti pe pli apre.  Me selman i annan keksoz par egzanp ki pou deswit par egzanp recruitment; sa i pou 2017 e en pe 2018, i annan ki nou’n etal li en pti pe.  Apre bann lezot proze sipor par egzanp bann drainage sa i on going ki pou fer.  So i annan ki rezilta i en pti pe li imedya me selman i annan keksoz ki nou pou fer la ki pou ganny rezilta en pti pe pli lontan 2019 an montan.

 

MR SPEAKER

Ok.

 

MINISTER PAMELA CHARLETTE

Dapre nou sa ki nou’n ganny enformen akoz mwan osi ler mon’n ganny sa, sa demann mon’n bezwen rod en pe lenformasyon.  Dapre nou sa ki nou konpran se ki sa later Legal ownership se Gouvernman.

 

MR SPEAKER

Yes.

 

MINISTER PAMELA CHARLETTE

Sa lenformasyon ki nou’n gannyen.

 

MR SPEAKER

Selman ou’n dakor pou fer en pe resers pou regarde si pou gouvernman oubyen pou prive?

 

MINISTER PAMELA CHARLETTE

Wi nou’n fini met sa dan latansyon Minister konsernen.

 

MR SPEAKER

MLUH.

 

MINISTER PAMELA CHARLETTE

Wi.

 

HON WAVEL RAMKALAWAN

Mr Speaker definitivman Minis i ankor nouvo e petet i pa pe ganny tou bann facts me i annan en kantite keksoz la.  Me selman lo kote sa timeline, ok, Mr Speaker mwan letan nou pe koz Lagrikiltir nou anvi vwar keksoz konmans arive e par egzanp nou’n fek pas dan en sityasyon la kot tomat in sorti R100 en kilo e zis atraver sa lanfaz lo prodiksyon Praslin, La Digue in fer en zoli rekolt e tomat in tonm R10.  Prezan mon pe rode mwan dan sa Emergency Plan konmsi ki egzakteman zot annan, pou nou kapab deswit vwar en lankourazman, en lantouzyazm parmi bann fermye, pou zot konnen ki poudir zot pou annan larzan pou zot ale debourye la e ki zot pou met zot bann plant, e ki sepa nou pou annan, nou pou annan kokonm nou pou annan brenzel, nou pou annan sa bann legim.  E menm parey osi lo kote, lo kote lapes pour ki bann dimoun deswit la dan en kourt dele, peser pou konnen ki poudir sa dimoun ki dan sa semi industrial i konnen ki poudir be regarde mon pou kapab si mon bezwen al aste 50mil lanmson, 50mil lanmson mon pou kapab desann en landrwa la anvil, pou mon ganny mwan 50mil lanmson; mon labwet vov, e la zisteman ki zot pe fer – parski ki mannyer mon aprann i annan bann dimoun i annan proze ki pe asize pandan plis ki 1an kot bann dimoun i anvi, i anvi fer ice plant, i anvi enport labwet me ki Minister li menm li konmsi pa pe montre sa lantouzyazm pou fer keksoz bouze.  So Mr Speaker mwan mon pe koz an term aksyon.  Ki bann aksyon konkret ki nou ki nou pou vwar pou nou kapab konnen ki poudir la bann peser, bann dimoun ki dan semi-industrial, divan anba zot lezel zot pe ale, bann peser, bann fermye prodiksyon annou ale.  E non pa pou nou al fer en stasyon resers L’Union Estate lo bann koson ki meg e ki pe apiy park par egzanp.

 

MR SPEAKER

Lo sa menm kestyon?  Ale Onorab de Commarmond, Minis hold on en pti moman Onorab De Commarmond i oule en related question.

 

HON CHARLES DE COMMARMOND

Mersi Mr Speaker.  Mr Speaker dan menm laliny se sa mon kestyon bomaten ti dan menm direksyon.  Ti dan menm laliny konmsi konkretman par egzanp parey lo Tax mon krwar in mansyonnen me selman pa kler.  Dir nou sa ki pe fer vini sa kantite lanmson, sa kantite lekipman lapes oubyen pou lagrikiltir ki son deal li?  Eski i pe ganny en tax concession?  sa pti fermye li ler i vin aste i pou pey son 15 poursan?  I pa peye?  Kot sa benefis i pou gannyen pou li kapab apre transmet avek, donn piblik ki pou aste prodwi.  Konmsi ki i ava annan – par egzanp lagrenn, legren, bann legren bann keksoz eski ou pou annan en lo, en lo ki pe vini ouswa ki zot pe fer en debrouy la pou zot ganny en bon kantite, ki ou kapab partaz avek fermye; konmsi ki vin en incentive pou fermye pou li kapab boost up – ou konnen things like that ki nou ti ava kontan konnen pou kapab ogmant prodiksyon, pou dan sa laliny ki nou pe koze.  Mersi.

 

MR SPEAKER

Minis sa 2 Leaders i oule aksyon, aksyon, aksyon.  Bann teknisyen ki la, bann executive zot tann sa parol.  Action.  Minis petet ou kapab reponn sa 2 Leaders.  Antretan Onorab William prepar ou en kestyon pou ou poze.

 

MINISTER PAMELA CHARLETTE

Mersi Mr Speaker.  Kekfwa ki nou kapab fer, me selman i pou pran en pe letan mon pa konnen nou kapab al dan sak par egzanp Lazans SAA kwa ki annan vreman.  Mon a donn ou en legzanp kekfwa ou ava en pti pe pli konfortab.  Par egzanp nou’n koz lo mendev pou SAA.  Sa Lazans i bezwen 18 nouvo anploye siplemanter. Osi demarkasyon later parey nou’n dir pou bann – pou nou kapab allocate later avek nou bann fermye.  Sa bann gran laliny.  Lentrodiksyon nouvo bloodline parey nou’n koz lo la pou kabri. Kontribisyon lo labatwar lavyann par egzanp, lo Praslin.  Lentrodiksyon lensiminasyon artifisyel osi pou la kalite lavyann.  Apre nou Scheme, nou scheme lasirans osi ki nou bezwen soutenir sa bann fermye avek.  E apre i annan bann lezot bann proze par egzanp ki SAA i aktyelman pe travay lo la.  Par egzanp nou ti’n koz lo Victoria market, nouvo semen Montagne Posée par egzanp, nouvo semen ankor Zalouzi Praslin.  Extension of existing road at La Pointe Praslin; renovasyon Letsi Road Grand Anse Mahe; upgrading of irrigation system par egzanp Grand Anse Mahe osi.  Lo kote store osi, store nou’n fini koz lo la dan Emergency Plan nou’n ouver enn dan Anse Boileau.  I annan enn Grand Anse ki li osi pe ganny travay lo la.   Ankor konstriksyon sekirite par egzanp Grand Anse Mahe, irigasyon kot Pig Genetic Centre, irigasyon ankor Beolière Grand Anse Mahe.  Apre i annan bann proze osi ki pe ganny propoze, ki’n ganny fini aprouve par egzanp nouvo labatwar, Hatchery nouvo hatchery, bann lekipman ki nou pe procure, bann nouvo teknolozi parey shade house ki pou ganny entrodwir.  Sa nou pe mazinen kekfwa lafen lannen nou konmans ganny sa bann lekipman pou nou fer bann resers plito, apre pou nou envit bann fermye pou vwar pou zot vwar pou zot menm e osi edik zot en pti pe ki mannyer pou, train zot ki mannyer pou plant anba shade house.  Ankor…ok.

 

MR SPEAKER

Eski Onorab Leader Lopozisyon, Onorab Leader of Government Business zot satisfe ki i annan bann proze konkret ki pe pase.  Wi Onorab.

 

HON WAVEL RAMKALAWAN

Mr Speaker parey pou’n dir toultan nou dan sa Lasanble nou anvi vwar Lagrikiltir re lanse.  Nou anvi vwar nou bann fermye pe prodwi.  E sa pou ede pour ki nou koup lenportasyon e sa bann proze ki Minis pe dir Mr Speaker,  zot ok, me selman konmsi nou pe rod en keksoz konkret par egzanp letan mon ti vwar ou pe vizit, letan nou ti vwar Minis pe vizit Anse Royale, konmsi letan mon antann Mr Hoareau ki pe debout devan en gran laferm, devan en gran plato e  i pe dir konmsi i pa tro sir si la i pou al lanse; konmsi mwan mon anvi tann en keksoz kot ki pou –  en mesaz ki pou al kot Mr Hoareau ki pou dir avek li Mr Hoareau ou konman en  fermye nou anvi ki dan 3 mwan e nou pou ed nou pour ki dan 3 mwan ou sistenm irigasyon pou marse; ou ava ganny legren ki neseser, e ki sa landrwa la letan nou pou vizit li dan en dele letan nou pou’n donn ou tou lankourazman nou pou vwar li ver.  E nou pe koup lo enportasyon.  Sa lot fermye ki i ti pe dir i ganny problenm akoz i partaz delo avek lot ensidswit, poudir la i la problenm i rezourd, fermye la aprezan ale.  Sa fermye ki pou avek pti koson ensidswit, oubyen avek bef pe dir, ‘’La i la mon frer, la i la mon ser, la i la ki mannyer keksoz pou ete, ou pou vini?’’  E nou Lasanble Nasyonal nou pare pou donn tou sipor poudir la i la sa Bidze ki ou bezwen Minis pou ou re lans sa Lagrikiltir.  Bann kazo poul ki vid konmsi; kot sa fermye i a kapab re ganny sa lankourazman, laba anler dan Anse Boileau kot Mr Speaker, kot nou ale anler Hermitage kot i ti en pig rearing area; kot tou sa bann park i vid pou nou dir, ‘’La i la i annan sa posibilite.’’ E ki sa bann dimoun i konmanse e nou koup lo sa konmsi nou pa bezwen – i byen semen ensidswit tousala en bann keksoz me ki annan pou fer direkteman avek sa fermye, direkteman avek sa peser, ki ganny sa louvertir e i pe ale li.  Parski la pou le moman tou keksoz konmsi i en pe tola tola.

 

MR SPEAKER

Minis petet pou al lo sa kestyon nou bezwen bouze.  I annan de dimoun ankor ki le koze, 3 dimoun ki le koze.  Petet en sizesyon e la mon pe koz konman en fermye an menm tan MNA Anse Boileau.  I annan diferan extension officers.  Petet sakenn zot, zot area of responsabilite swa en rezyon oubyen en distrik zot vin avek en plan ki imedya, ki ou met ansanm pou fer en plan nasyonal kot i annan aksyon pou fer sir ki prodiksyon i monte.  Petet nou pe konsider sa pou fasilit ou louvraz, servi ou bann extension officers. Yes Onorab De Commarmond.

 

HON CHARLES DE COMMARMOND

Wi, be pa, zis pou azoute parey ek sa i fer ou kapab mezire.  Sa fermye pe demann ou konsesyon.  Be mon’n donn ou lagrenn, mon’n donn ou sa isi laba ou pa’n prodwi, mon pa vwar nanryen letan mon’n monte, mon’n vin – ou extension officer letan in vin gete, napa nanryen ou pa pou kapab gannyen whatever ki ou pe demande.  Ou konpran i bann mezir konkret konmsi ki ed ou pou ou kapab al de lavan.

 

MR SPEAKER

Mon krwar Minis in ganny mesaz, in kler.  Onorab William mon ava les ou poz ou kestyon.

 

HON WAVEN WILLIAM

Mersi Mr Speaker.  Mon ti a kontan demann Minis dan sa Relief Plan ki’n met devan Lasanble, eski sa timeline ki’n donn nou i annan serten bann Lalwa ki pou ganny amande; par egzanp redwir kou a lenportasyon.

Dezyenmman Minis, bann Lotel Five Star letan sa touris in asize pe pran son lasyet manze i pa pou kapab dir si sa ki i pe manze i first grade ouswa second grade.  Eski nou bann fermye pou kontinyelman ganny penalize pou zot kapab vann zot bann fri avek legim dan bann Lotel Five Star? akoz Minis si sa pa arive parey Leader Lopozisyon avek Leader of Government Business in dir, an relasyon osi avek sa kestyon ki Onorab Gill in demande – ki garanti akoz nou pe fer le loz pou demann prodikter pou ogmant prodiktivite, me selman lenkyetid out there, avek leksperyans ki bann fermye, e prodikter in pas atraver, zot santi poudir zot pa pe ganny sa garanti.  Eski Minis i kapab fer en commitment la, ouswa i ava mazin lo la, ki nou bann fermye ki pe ekoute ki dan lensertitid ki anvi re lans zot, zot ava annan bann target konkret ki Minister pe met devan zot pou dir – wi nou pou kree lespas pou nou protez zot pou zot ogmant prodiktivite.  E Minis pa oubliye poudir dan sa eleman vilnerabilite ki enkli en ta keksoz, Sesel i vilnerab vizavi sa ki pe pase a leksteryer Sesel.  Mersi.

 

MR SPEAKER

Minis.

 

MINISTER PAMELA CHARLETTE

Mersi Onorab.   Pou mwan donn ou en garanti ozordi, mon pa pou fer li ozordi akoz sa i bezwen en diskisyon avek Minister Finans spesyalman Trade Department.  Akoz senpleman sa bann Lagreman ki nou annan avek WTO e lezot pei parey dan la rezyon COMESA, SADC.  So i bezwen annan en diskisyon pli a profon ki mannyer sa pou arive avan ler nou ki nou fer en komitman.  How – ki nou, ki mannyer nou pou restrikte lenportasyon.

 

MR SPEAKER

Ok.  Onorab De Letourdie mon ti dir mon a retourn kot ou si ou annan ankor en kestyon ki oule poze.

 

HON JANY DE LETOURDIE

Mersi bokou.  Mersi bokou Mr Speaker.  Minis vitman.  Eski ou ti dan en pozisyon pou donn nou en pti pe leta nou bann ice plant Mahe pli presizeman.  Apre Minis ti annan en pe letan bann travayer ki travay dan ice zot menm, zot ti annan en konplent ki napa ase dimoun pou lev zot alors i fer li ekstrememan difisil pou zot kapab pran zot konze e mon pe regarde ki pozisyon, ki in arive about sa sityasyon.  Mersi.

 

MR SPEAKER

Minis.

 

MINISTER PAMELA CHARLETTE

Avek ou permisyon Mr Speaker mon kapab konsilte mon CEO SFA?

 

MR SPEAKER

Wi.  Nou annan en pti letan pou esper ou Minis.

 

MINISTER PAMELA CHARLETTE

Briyevman mon ava pas en pti pe lo sa bann ice plant.  Belombre i annan 2 ice plant tou le de i pe marse.  Por Victoria nou annan enn e li osi i pe marse.  Me selman ler nou pe gete prodiksyon i en pti pe pli ba ki son kapasite.  Par egzanp sa enn Victoria i 10 me selman son kapasite par zour i 7.5.  Anse Royale i annan enn li osi i pe marse, li osi i below capacity. Providence i annan 2.  I annan enn ki pa pe marse, akoz nou pe esper pyes, spare part ki pe vini.  E i sipoze kekfwa an Oktob akoz i annan en expert zaponnen ki sipoze desann pou vin get en pe tou bann ice plant ki annan problenm.  Sa i enn ant sa de ki lo Providence.  Apre nou annan enn Anse La Mouche.  I pe – osi i pe marse, selman i, son prodiksyon i low akoz i en pe letan li.  Praslin osi i annan 2.  E tou le 2 ti annan problenm avek ki mon’n konpran i’n ganny repare.  Apre ti nou annan en schedule maintenance osi ki nou’n fer pou maintain sa bann ice plant e apre nou annan en expert lokal menm, ki pe advice nou lo kote maintenance sa bann ice plant.  Mersi.

 

MR SPEAKER

Mersi Minis ou’n mansyonn enn Anse La Mouche.  Mon krwar evantyelman nou a envit ou nou oule enn osi Anse Boileau be sa nou a koz apre pli tar.  Onorab Gill ou annan en kestyon.  Onorab Simon Gill.  Ou annan en kestyon non?  Sorry en pti moman Onorab Gill.  Onorab de Letourdie ou ti annan en pti siplemanter.

 

HON JANY DE LETOURDIE

Mon ti annan en lot pti bout kot bann travayer ice plant.

 

MR SPEAKER

Ok.  Minis travayer bann ice plant.

 

MINISTER PAMELA CHARLETTE

Wi nou realize ki i annan en issue lo kote travayer e i form parti dan nou recruitment, dan nou Emergency Plan.  Mersi.

 

MR SPEAKER

Ok.  Mersi Minis. Onorab Simon Gill.

 

HON SIMON GILL

Mersi Mr Speaker.  Mon a demann enn dan sa 3 parey ou’n dir mwan.  Premye kestyon se ti ava voudre si Minis i dir nou, ki mannyer bann provizyon ki i annan dan nou aksesyon avek World Trade Organizasyon.  Ki mannyer nou progranm Lagrikiltir lokalman e attempt pou nou protez nou bann fermye, peser eksetera, ki mannyer sa i enpakte avek sa sinyatir ki nou’n siny sa World Trade Organization.  Akoz mwan mon vreman konsernen avek kantite konplent ki mon tann nou bann prodikter lokal i konplent avek sa, konmsi sa flooding, bann prodwi enporte ki compete avek zot.  E i vreman serye sa, mon ti ava voudre ki nou Minis i donn konsiderasyon serye sa, e lot eleman se ki mannyer sa nouvo progranm ki pe met devan pou ganny difize lo televizyon, radyo, dan zournal pour ki sa prose ledikasyon i vreman osi mars konzwentman dan sa zefor pou nou kapab boost up nou prodiksyon Nasyonal.  Mersi bokou Mr Speaker.

 

MR SPEAKER

Mersi Onorab. Minis.

 

MINISTER PAMELA CHARLETTE

Mersi Mr Speaker.  Mersi Onorab.  Konsernan WTO nou osi en pe konsernen akoz i ouver laport pou bokou lenportasyon antre.  E menm si liberalizasyon ti ariv avan ki nou ti annan sa aksed avek WTO e sa in kree bann baryer pou trade plizoumwen.  Me menm nou’n eseye dan lepase pou met en pe Tax lo bann legim enporte, sa i pou bezwen si nou pou deside pou nou met ankor plis Tax lo sa bann legim oubyen parey mon ti pe dir avan, parey lavyann poul, sa i bezwen annan en diskisyon avek Departman Trade pou nou kapab fer li.

Lo kote en pe sa ki nou pe fer ozordi nou’n konmanse avek en Press Release ki nou ti eksplik en pe nou plan pou Lagrikiltir avek Lapes, me nou osi annan nou web site avek nou Facebook page ki nou met bann, ki nou advertise en pe nou bann keksoz ki nou pou fer e osi bann Lazans osi zot annan zot prop website ki zot met zot lenformasyon.  Ankor i annan training ki nou pe, ki nou pe depan bokou lo la, pou nou kapab edik bann fermye avek peser e osi dan bann meeting ki nou ale nou pe promot bann keksoz ki nou pe met dan plan ozordi ki nou pe dir toultan.  E mwan mon’n vwar en sanzman dan latitid plito, latitid bann peser ek bann fermye akoz mon vwar zot en pti pe pli motive, e akoz zot osi zot anvi vwar keksoz arive so pour mwan mon vwar li en motivasyon pou mwan osi avek mon bann staff pou kontinyen sa ki nou’n konmanse.  E nou bezwen sipor tou dimoun.  Nou bezwen sipor Lasanble e sipor osi bann fermye e peser zot menm pou zot kapab diriz nou dan sa bann direksyon.  Mersi.

 

MR SPEAKER

En pti kestyon.  Wi Onorab Gill.

 

HON SIMON GILL

Zis en follow up ki ladan; petet Minis osi ti ava voudre abord si i annan a lenteryer son Minister ki’n etabli en Unit pou kapab bouz nou bann prodikter lokal ver bann standar, ki sa i ava kapab sey equate nou en pti pe pour ki bann fermye ler zot al vann zot bann prodwi – parey Onorab William in dir zot pa ganny difikilte pou zot kapab penetre menm nou marse lokal isi dan Sesel.  So ki zefor, ki bann progranm ki zot annan sirplas pou nou kapab bouz dan sa direksyon e si i annan en timeframe ki’n ganny etabli lo sa laspe spesifik silvouple.  Mersi bokou.

 

MR SPEAKER

Sirtou sa ki konsern supply bann lotel ki pou rod qualityYes Minis.

 

MINISTER PAMELA CHARLETTE

Mersi Mr Speaker.  Se sa ki nou pe anmenn dan sa plan ozordi.  Sa Emergency Plan akoz nou bezwen etabli bann standar.  Par egzanp bann laboratwar resers i en fason pou nou teste e fer sir ki bann prodwi ki nou pe prodwi i a sa nivo.  Koumsa bann, bann mon kapab dir bann lotelri, zot osi zot a konfidan oubyen fye, i a santi li konmsi reliable pou zot ganny sa bann prodwi pou zot kliyan.  Mersi.

 

MR SPEAKER

Sorry Minis i annan en unit oubyen pou kree en unit?  Sorry mon pa’n tro konpran.

 

MINISTER PAMELA CHARLETTE

Non nou napa en unit me selman SAA i annan staff ekstansyon, staff resers ki spesifikman fer sa bann…

 

MR SPEAKER

Onorab Ramkalawan en dernyen pti kestyon.

 

HON WAVEL RAMKALAWAN

Mr Speaker ankor enn fwa mon pou dir ki nou anvi vwar Lagrikiltir marse me …

 

MR SPEAKER

Wi ou’n dir sa taler Onorab kestyon prezan.

 

HON WAVEK RAMKALAWAN

Wi mon’n dir sa mon zis anvi avan mon met sa dernyen pwen la re asir Minis me en komanter ki pe sorti Minis, se ki ou annan sa lantouzyazm, ou annan tou sa bann keksoz, me selman i annan, i annan serten dimoun ki pa anvi vwar ou succeed.  E sa ou bezwen pran li seryezman.  Lo kote Lapes tou sa bann keksoz ki ou’n dir avek nou i bon me letan par egzanp mon anvi mwan gannyen sa rapor lo sa bann ice plant.  I annan proze ki Seselwa in met devan pou prodwi ice, pou fer bann keksoz me ankor enn fwa i annan keksoz ki ganny bloke.  E alor mon ti ava kontan ki Minis, mon ti ava demann Minis pou regard seryezman an sa ki konsern ou Lendistri Lapes, koz avek bann dimoun ki konsernen.  Me avek tou respe ki mon annan pou tou bann teknisyen ki la.  Mr Speaker avek ou permisyon mon ava zis lir en keksoz from – ki mon’n fek gannyen, from en dimoun ki involve dan Lagrikiltir e ki konnen.

 

 

MR SPEAKER

Go ahead.

 

HON WAVEK RAMKALAWAN

I dir: – ‘’It is sad to say that with the current status of SAA, we will not see progress in crop production or livestock.  No one is asking about the current capacity of SAA.  Is the current capacity ready to meet demands on the field?  Is the current capacity getting the support from the Administration of SAA?  Is the current capacity in tune with what is happening in the field?  The answer to the above is no because SAA is upside down.  The management does not know the capacity of its staff and worse the farmer who we consider as our partner.  No leadership means no guidance.’’  Mr Speaker mon pe met sa la. Apre i azoute i dir, ‘Extension officers are not qualified to address current issues in the field and these issues will not be solved in the next year.’’  Mr Speaker mon pe dir sa la parske se en eksper li osi tou dan sa field ki pe regarde li.  E si nou, nou anvi donn lankourazman Minis, e parey ou’n vwar Lasanble i pare pou donn tou sa sipor, me pou nou kapab donn sa sipor fodre li osi i annan sa lantouzyazm, fodre ki dimoun dan ou Minister i care parey ou, ou pe care.  Nou kontan ki poudir letan ou ti vin interview ou ti dir avek nou, letan mon ti demann ou si i met ou Minis Lagrikiltir ou dir ou ti pou met ou pti soulye e ti pou mont Val D’Andorre.  E mon kontan letan mon ti vwar ou anler Val D’Andorre dan ou pti soulye, me eski sa menm lantouzyazm ki ou, ou annan i pe atir sa menm lantouzyazm vizavi lezot?  Oubyen eski i annan en latitid lese fer ki malerezman pou mor olye resisite?

 

MR SPEAKER

Ok.  Les Minis met son santiman.  Minis fran, dimoun pe ekout ou, fermye pe ekout ou, dir konmdi Americain say it as it is.

 

MINISTER PAMELA CHARLETTE

Mersi Mr Speaker.  Mersi Onorab.  Dan nou plan Emergency Plan pou SAA, mon krwar nou’n tous en bon pe lo mendev osi.  Lo mendev, well pa zis SAA partou  dan Minister e bann lezot Lazans bann restriktirasyon parey  nou dir oubyen bann nouvo staff oubyen bann training ki nou pou bezwen donnen pou sa bann staff.  Mon okouran ki i annan defi mendev, me selman parey nou konnen partou i annan defi mendev, me selman ki mannyer nou balanse e ki mannyer nou fer nou- nou plan pou osi a long term lo kote ledikasyon, lo kote Lekol Lagrikiltir osi –  parey Mr Henrie ti pe dir ankouraz (Onorab Henrie sorry) pou ankouraz bann zenn pou pran sa defi pou antre dan Lagrikiltir e Lapes.  Mon konpran ou pwen.  Mersi pou partaz avek mwan sa pwen.  Me mon krwar par-ler motivasyon i en pti pe infectious konmdi koze.  Si zot vwar en Leader ki parey ou dir for i strong i kapab bouz en pe.  Mon donn mon komitman pou mwan travay pli pros avek SAA – si i annan okenn kontrent ki zot pe fer fas avek mon la pou zot soutyen.  Mon’n fer zot konnen sa toultan e nou a get closely bann problenm mendev ki zot annan.  Mersi.

 

MR SPEAKER

Minis prezan dernyen kestyon i pou al kot MNA Anse Boileau.  I annan 10 kestyon since mon pa oule Onorab Gill demann plis ki 2 alor mon ava demann zis 2 mwan osi.

 

HON PATRICK PILLAY

Premyerman i en kestyon ki en fermye in anvoy kot mwan parey Onorab Ramkalawan in ganny dir.  Mon krwar i pe koz lo Montagne Posée avek Barbarons.  Demann Minis si i annan okenn privilez pou bann sitwayen Sinwan avek Endyen ki annan later lagrikiltir?  Mon mazinen sa i en dimoun sorti Montagne Posée i pe koz lo Montagne Posée avek Barbarons.  So eski i annan sa oubyen i annan dimoun ki’n deza natiralize ki Seselwa?

 

MINISTER PAMELA CHARLETTE

Si ou demann mwan si i annan en privilez pou mwan i normal pou mon dir ou non.  Napa privilez pou en dimoun etranze pou li vin fer lagrikiltir oubyen ki’n natiralize.  Mon krwar i pou pas, si in natiralize en Seselwa i pou pas parey tou dimoun.

 

HON PATRICK PILLAY

Ok.  Mon krwar sa dimoun i pe ekout ou in ganny son repons. Minis mwan mon annan 2 kestyon premyerman enn senp.  Wi ou non petet en pti detay.  Eski FAO i donn nou lasistans Sesel pour lagrikiltir?

 

MINISTER PAMELA CHARLETTE

Nou gannyen lasistans Mr Speaker me selman bann lasistans teknik ekspertiz plito.

 

HON PATRICK PILLAY

Zot pa ganny lasistans an term proze.  Zot parey bokou bann international organization i rod consultancy i anvoy dalon oubyen dimoun ki zot konnen dan zot pei.  Me proze, mon pe koz proze pou finans serten proze dan en pti fermye, medium size farms eski zot ganny lasistans ek FAO?

 

MINISTER PAMELA CHARLETTE

Dapre mon konpran Mr Speaker non nou pa gannyen.  I zis bann teknik …

 

HON PATRICK PILLAY

Ok.  Mon 2enm kestyon apre mon annan en sizesyon.  Minis ou’n koz bokou lo livestock.  De fwa ou’n mansyonn livestock e new bloodlines ou’n mansyonn kabri mon konnen poudir anba Minis Peter Sinon ti vin bann Anglo Nubians avek Boars sorti Australie.  Mon kestyon mon konnen i annan dimoun osi ki pe enterese fer vin livestock, kabri, pork e bef, eski zot annan en landrwa pou quarantine?  E sinon eski zot annan lentansyon annan en landrwa pou karantenn pou zannimo ki sorti deor?

 

MINISTER PAMELA CHARLETTE

Mr Speaker pou le moman nou napa en karantenn pou cattle, me selman nou annan en karantenn Anse Boileau pou koson avek petet kabri – bann small animals plito.

 

HON PATRICK PILLAY

Be si en dimoun i fer vin de bef sorti wherever, Sud Afrique eski zot annan landrwa pou zot?  Mon demann sa akoz Mr Corgat I am talking of facts.  Mr Gilmer Corgat mon’n al kot li i dir mwan i ti fer vin 2 bef sorti Sud Afrique zot dir li karantenn kot li.  Is that the normal procedure?  Eski napa  en fasilite – en larzan ki kapab fer karantenn pou de bef Mr Corgat in fer vini?  Apre i annan en lot fermye – yours truly li osi mon krwar i pe fer vini…Minis?

 

MINISTER PAMELA CHARLETTE

Mr Speaker sa ki nou’n idantifye pou le moman Anse Boileau i pou small animals, me selman si i annan dimoun ki par egzanp i fer vini 2 bef par egzanp ou’n donn sa legzanp laplipar letan nou fer en negosyasyon oubyen bio sekirite i plito al kot sa fermye i annan son laranzman ki i fer pou swiv sa bann zannimo.  So i fer li lo son laferm, me selman nou donn li bann gidans ki mannyer i kapab fer li.

 

HON PATRICK PILLAY

Mersi Minis.  Mon annan en sizesyon mon dernyen bout mon tann ou dir ou pou al IDC pou vizit en pe bann landrwa kot i fer prodiksyon agrikol.  Mon sizesyon e mon pe koz leksperyans se ou al pas en weekend, laba ou pou ganny en band kanmtole osi ki zwe lotel so ou pou kapab dans en pe kanmtole, al pas en weekend sa zil ki apel Denis Island ki prive pou Mr Mickey Mason e laba ou pou vwar what self-sufficiency is all about.  Mr Mason mon’n al pas en weekend laba, i prodwi son manze zannimo i annan en sawmill oubyen en chopper i servi fey papay, fey ko-ko, zenn ko-ko i ganny palmist i servi son fey i met tousala ansanm, kann, fatak e i prodwi tou son zafer li menm pou son lotel.  E mon krwar sa i en legzanp ki lezot zil IDC, nou’n perdi en kantite letan – mon konnen mon pa lo Komite Zil mon pa pe akiz personn me sa ki mon’n vwar Ile Denis what the private sector does and the public sector does not been able to do, petet nou devret konsidere ler ou al laba pou donn prive en pe sans pou anmenn prodiksyon pou sa pei.  Alor mon ti a sizere ki ou pas en letan laba akoz mwan mon’n tre enpresyonnen e ki sa fanmir pe fer.  Zot menm prodwi niche products pou anvoy Mahe ki nou isi nou aste konman pate, konman fromaz, ensidswit.  Mon krwar sa i en legzanp pou bokou fermye e menm si ou ti kapab organiz pou bann fermye ki anvi ogmant oubyen moderniz zot prodiksyon sa i en keksoz zot devret organize pou al vwar ki Mr Mason i fer.

E mon dernyen komanter ler nou pe koz lo legren, nou pe koz lo legren isi laba, be i annan bokou fermye ki bezwen bann small machinery.  Si ou annan ou 60 kabri ou pa konn surf the net pou ou rode Bangalore oubyen Sud Afrique oubyen Kenya – Lagrikiltir i devret zot menm konmans vinabou annan bann pti sawmill ki elektrik oubyen batri, ki kapab ed bann fermye.

 

MR SPEAKER

E finalman Minis, mwan personnelman mon krwar ki konman en fermye ou pou fer byen dan Lagrikiltir.  Mon anvoy tou mon bann email mon bann sizesyon Mr Moustache i o-bor ou la mon kopi kot ou, parski mon krwar ki nou bezwen ed ou antan que fermye nou, nou bezwen ed ou donn ou bann lide akoz ou ankor zenn, ou napa sa kantite leksperyans Lagrikiltir e mon krwar si ou kontinyen annan sa determinasyon ek Leadership menm avek serten difikilte ki ou annan avek serten staff mon pa pe dir ek tou staff ek serten staff you will get there e Lasanble pou donn ou tou sa sipor.  Alor avek sa mon ti a kontan remersye ou ki depi bomaten 9er ou’n la, 5er in sonnen ou ankor la, ou ankor pe look bright and spritely.  Mersi ek tou ou teknisyen pou vini.  Nou’n apresye bokou ou lantouzyazm.  Ou’n ekout ou bann teknisyen e nou swet ou tou de bon e nou a eskiz ou.

 

MINISTER PAMELA CHARLETTE

Mersi Mr Speaker.  Kekfwa permet mwan pou fer en pti klarifikasyon lo en keksoz mon ti fer taler.  I posib?

 

MR SPEAKER

Wi go ahead.

 

MINISTER PAMELA CHARLETTE

Ler en Onorab ti demann mwan lo kote bann zenn dan Lagrikiltir ki’n pas dan Lekol Lagrikiltir, zis pou donn en pti pe klarifikasyon kekfwa mon’n mal donn sa sif en.  Sa ki nou’n – dan lunch time nou’n ganny en pe lenformasyon.  An 2016 ant 2017 par egzanp antran dan landscape akoz i annan diferan kour dan Lekol Lagrikiltir.  Par egzanp pou Landscape ti annan 15 antran me selman zis 5 ki ti fini.  Apre dan Advance Course pou Lagrikiltir ti annan 9 ki ti antre me selman 6 ki ti fini.  Apre i annan en Course ki apel General Agriculture ti annan 8 ki ti antre me selman 5 ki ti graduate.

 

MR SPEAKER

Me i 5, 5 menm.  Ok.  Minis mersi bokou pou sa lenformasyon e parey mon dir nou swet ou the best wishes pou lavenir e nou a eskiz ou ek ou bann teknisyen.

 

(MINISTER CHARLETTE AND HER DELEGATION WAS EXCUSED FROM THE HOUSE)

 

ME SPEAKER

Bon mon bann ser koleg, mon krwar avek sa nou ava call it a day parey Angle i dir.  Mersi pou zot partisipasyon.  I en size tre enteresan, lefe ki nou’n konmans depi 9er bomaten e la 5er in sonnen.  Mon krwar si mon text i byen, bann fermye in apresye bann kestyon e Minis parey nou dir, i ankor zenn i pa ankor eksperyans byen sa soulye Lagrikiltir, me mon krwar parey Onorab in dir i met son pti soulye in monte dan Val D’Andorre – Dan Pen Pen.  E mon krwar i pou fer byen.  Alor mersi nou a kontinyen demen nou annan nou Mosyon alor nou a re-pran demen 9er bomaten.  Pas en bon sware.

 

(ADJOURNMENT)