Home » Verbatim » 2017 » Verbatim Report NAS Sitting Wednesday 13th September, 2017

Verbatim Report NAS Sitting Wednesday 13th September, 2017

NATIONAL ASSEMBLY OF SEYCHELLES

Wednesday 13th September, 2017

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou dimoun, tou bann Manm Lasanble Nasyonal, tou bann travayer Lasanble Nasyonal, tou bann dimoun ki pe ekout nou dan lakour e an deor lakour pour sa 2enm Sesyon sa semenn, sa Mardi le 13 Septanm 2017.

Mon ti a kontan an premye lye swet labyenveni, i annan problenm lot kote laba? Onorab Larue, non?  Ok mon ti krwar mon’n mal ganny dat, ozordi i le 13 non?  Konmsi mon konpran le 18, le 13, mersi.

Ok, mon ti a kontan ek bokou plezir lo la par tou bann Manm Lasanble swet la byenveni ozordi team ki’n vin zwenn nou sorti dan nor, sorti St Louis pli spesifikman e si mon pa tronpe mon vwar pe byen riye anler e si zot ganny  konpannyen  par Mrs Doyace Poris.  Alor mon ti a kontan swet zot la byenveni, yer nou ti annan en team sorti dan was, sorti Beau Vallon, I mean Anse Boileau pardon bomaten nou annan bann dimoun sorti St Louis, alor mon ti a kontan parey mon dir swet zot la byenveni espere zot a pas en moman kot zot a kapab vinabou apresye e aprann sa ki Lasanble pe fer koman travay pour pei.

2enm keksoz se ki yer ler mon’n fer bann Lanons mon’n ganny dir mon pa ti mansyonnen ki nou ti’n fer en vizit travay Lenn, anfet i vre petet mon ti’n devret mansyonnen, i ti en vizit Ofisyel, en Delegasyon ki mwan mon ti lead pour al vizit Lok Sabha Lower House Parlman Lenn.  E nou ti ganny sans zwenn Prezidan Lenn en nouvo Prezidan, Prezidan Kovind e osi Premye Minis Narendra Modi kot nou’n fer bokou bann diskisyon, e mon krwar i annan letan mon dir diskisyon, savedir bann lesanz lide.  E mon krwar i annan bokou laport e bokou loportinite ki’n ouver pour nou, pa zis ant Gouvernman a Gouvernman, savedir Lenn ek Sesel me osi pour Lasanble Nasyonal.  Sa ki ti enpresyonn nou se vreman zot Mize, parey ler mon ti sorti Westminster an Zanvye mon ti dir zot Mize sirtou son kote Ledikasyon ti enpresyonn mwan bokou.  E premye fwa ki mon’n al dan Parlman Lenn mon ti krwar normalman Franse ki for lo bann Mize, zot fer sa telman byen; me Lenn osi in fer en zoli travay e zot in pare pour ed nou dan 2 fason.  1 pour set up nou Mize ki nou’n dir nou pour bezwen finalman tir tou sa bann item ki dan corridor met dan en Mize e osi tou bann kado ki Speaker oubyen Deputy Speaker i gannyen.  Par egzanp depi letan mon’n vin Speaker diferan Dignitary ki vini i donn nou en kado, sa bann kado parey sa ki nou’n gannyen dan Lenn, bann item potri oubyen bann memorabilia tousala i pour al pour Lasanble, i pour al dan sa Mize – avek en leksplikasyon lekel ki ti donnen, pour kwa e kan.  So tousala nou’n ganny bon parol avek zot e nou osi in ganny dir ki ler nou set-up nou prop Channel parey SBC ti raporte mon ti ganny sans ganny interviewé lo en Channel ki dedye pour Lok Sabha pour Lower House Parlman kot diferan dimoun i koze.  E  mon ti ganny sans pour ganny interviewé lo sa Channel e zot in pare pour vin donn nou training.  E menm ed nou finansyerman pour nou set up en keksoz parey e annan lesanz kot nou bann prop staff i ava kapab al laba pour ganny sa exposure ek sa formasyon.

Alor i annan tousala dan semen, ki parey mon’n dir yer bomaten, i fer ki lavenir pour nou Lasanble, i paret mwan dan en lalimyer optimistic; ki pour lavenir e mon krwar ki nou a ganny bokou lasistans ki kominikasyon ant nou koman en Lasanble avek piblik Seselwa, pour bokou pli efikas.

Avan nou al lo nou Mosyon – parske ozordi nou annan 2 Mosyon lo Order Paper, ti annan en pwen ki mon ti a kontan, en pwen tre zeneral i tonm dan kad ledikasyon piblik ki mon ti’n koz ek enn de bann Koleg MNA, ki mon krwar i bon pour averti piblik an zeneral, koman petet nou kapab klas li anba zis public education.

Ou konnen pandan Recess parey tou bann Manm nou vwar kantite nou bann constituents, bann dimoun dan nou distrik kot nou’n ganny elekte, manm piblik, mon vwar manm piblik Anse Boileau, mon vwar manm piblik preske toulezour isi menm dan Lasanble, e i annan en keksoz mon ki remarke ki dimoun pa realize, ler ou en manm piblik ou al dan en Biro Gouvernman pour nenport ki rezon – swa en Laplikasyon Lakaz, oubyen ou al fer Laplikasyon Later, oubyen ou al vwar en dimoun ki pour ed ou avek ou problenm sosyal ou bezwen touzour fer 2 keksoz, (1) ou bezwen fer sir ki si ou al ek okenn dokimantasyon savedir Sertifika, Papye, Laplikasyon ou pa kit tou laba, ou bezwen fer sir ki ou retourn ek ou kopi, ou donn zot en kopi me ou bezwen annan ou paper trail, sa ki nou apel an Angle en paper trail.

Ou bezwen konnen kan ki ou ti ekri, ki ou ti ekri e ki ou ti ekrir.  Dan Lendi mon vwar dimoun Anse Boileau, e sa Lendi avantyer i annan 2 ka kot en dimoun, enn mon ti bezwen riye, li menm li in riye, apre mon’n demann li, ‘’Madanm lekel ki ou ti vwar?’’  ‘’Mr Pillay en pti madanm nwar, nwar.’’ Mon dir, ‘’Be madanm dan bann Minister Gouvernman i annan en kantite pti madanm nwar, nwar! Sipoze si ou ti’n vwar mwan, ou ti a dir riske ou’n vwar en vye zonm nwar, nwar!’’

Ou bezwen demande premyerman; ‘’Madanm eskiz mwan, koman ou apele?  Ki ou post? Ki ou telefonn? Donn mwan silvouple.’’  E ou ale avek sa dimoun ou’n konnen, sa ou’n vwar, Mr Simon Gill, son nimero i 2554483 e i reste, i pe travay Maison du Peuple, omwen ou konnen lekel ki ou’n vwar.  Oubyen ou’n vwar Mrs Ghislain Marie tel, tel Biro.  Alor premye keksoz ou bezwen konnen lekel ki ou’n vwar e gard sa lenformasyon.

2enm keksoz parey mon dir, fodre ou fer sir ki tou ou papye i reste ek ou.  Tro bokou dimoun i vin vwar ou pour ed li, me selman ler ou demann li, ‘’Be oli ou papye?’’ ‘’Mon ti fer Laplikasyon.’’ ‘’Ki lannen?’’ ‘’Zot Mr Pillay mon pa tro, tro rapel.’’ Fodre ou fer sir, si ou napa en file oubyen en folder en sak plastik i bon, en sak plastik prop pour anpes lapli mouy ou papye, gard tou ou papye pour ou fer sir ki ou annan en paper trail.

Mon krwar sa i enportan, mon pe fer sa koman Speaker, koman MNA, i enportan pour tou dimoun mazinen, souvandfwa dan linosans dimoun i ale i pa fer sa bann keksoz, me i enportan pour nou ganny sa bann rikord.

E mon krwar Onorab Ramkalawan in fer en komanter sak plastik konmela mon krwar pe arete non?  So whatever sak ou gannyen, sak papye oubyen sa bann nouvo sak recyclable ki ou gannyen, me gard li dan en fason, le pwen ki mon anvi fer se gard li dan en fason ki ou annan ou levidans ki ou’n ale kot tel dimoun.  Bon avek sa si nou napa okenn komanter sorti kot okenn Manm, nou a komans nou Mosyon parske yer zot a rapel ti annan en kestyon pour Minis Larose e in eksplik nou akoz ki i pa ti kapab reste e nou’n tonm dakor ki i pour vin semenn prosenn.  Yes Onorab Ramkalawan.

 

HON WAVEL RAMKALAWAN

Mr Speaker bonzour, mersi bokou e mon osi mon ava profite pour dir labyenveni tou bann figir familye anler St Louis, mon vwar mon ansyen Profeser, mon vwar bann zanmi, mon vwar mon ansyen adverser dan en premye Eleksyon anler St Louis, mon vwar tou kalite dimoun labyenveni, gou pour vwar bann figir familye e bann dimoun enportan osi.

Mr Speaker mon ti zis anvi enformen ki poudir demen FPAC pe kontinyen avek son bann lenvestigasyon.  E demen, mon pe dir sa an term pour ki piblik i kapab, i santi zot welcome pour vini parske parey nou’n dir se bann Sesyon Ouver kot piblik i kapab asiste, e demen nou pour komans 8er en kar, nou pour komans 8.15.  E pour premye fwa nou pour osi sey fer en Skype interview avek ansyen Gouverner Labank Santral e ansyen Minis Finans Mr Pierre Laporte, alor konmsi it’s another milestones si nou kapab fer li pour montre ki poudir nou pe bouze.  E si sa enn la i marse, petet nou pa ava bezwen pour nou anmenn bann o ansyen Zofisye Irlande isi Sesel me nou ava kapab osi fer en Skype interview.

        So nou pe bouze dan sa direksyon.  E tou manm piblik, Lasal i ptipti malerezman, me tou manm piblik ki ganny envite e byensir lenvitasyon i osi pour tou medya.

Me selman Mr Speaker mon bezwen zis dir lo la par FPAC, ki poudir sa lenvestigasyon ki nou pe fer i vin pli konplike de zour an zour.  E bann dokiman ki nou pe resevwar i zis bokou, e letan Lasanble ti frenmen ou ti fer en remark ki poudir FPAC pour bezwen lasistans e a sa pwen kot nou ete la, Mr Speaker mon pour dir wi nou bezwen lasistans; e si par egzanp nou ti annan lasistans en Forensic Accountant or konmsi en dimoun kalifye koumsa, ki ti kapab pas dan tou sa bann papye konmsi pour donn nou en keksoz kler, i ti pour ed nou en kantite.  Alors mon osi met sa devan ou koman Speaker lo ou latab pour regarde ki mannyer ou pour kapab ed nou, akoz i bokou e nou konnen osi ki poudir lekspektasyon piblik i bokou, i for.  E alor nou pe rod led anmezir ki nou kontiny nou travay pour nou fer en keksoz byen, en keksoz drwat.  Me komedi koze travay i la, travay i la.  Mersi bokou.

 

MR SPEAKER

Mersi bokou Onorab Ramkalawan ki Chair FPAC.  2 keksoz anfet pandan Recess Mr Oditer Zeneral ti vin vwar mwan, mon ti’n zwenn son Asistan dan en fonksyon e nou’n koz en pe, li i ti vin vwar mwan pour li diskit Rapor ki i ti’n anvoye lo Lasanble depi Zanvye ziska lafen Septanm 2016 ki nou ti’n demann li en Rapor Odit pour vwar ki, kwa ki mon’n erite e ki mon pa oule ganny blanmen pour keksoz ki mon pa ti responsab, alor in anvoy en Rapor ki mon’n vwar prezan nou bezwen zwenn li pour koz ek li, annan en konversasyon kot avan i fer son Rapor final.

Me en keksoz ki i ti dir mwan se presizeman sa, koman Oditer Zeneral son Biro i kapab ed FPAC avek dimoun ki annan en pe plis leksperyans pour fouy dan bann papye ki zot annan.  Sa i enn.  E dezyenmman ler nou ti zwenn Foreign Secretary dan Lenn e osi Madanm, Onorab Speaker Lok Sabha i en keksoz ki nou ti dir, ki mwan mon ti dir, zot ti demann mwan ki priyorite ki nou annan koman en Lasanble, e mon ti dir zot poudir mwan koman en politisyen i ankor reste mon priyorite, koripsyon e koripsyon e en domenn kot nou mank resours se bann Eksper, bann Eksper savedir bann Forensics Auditors, e mon ti lev sa osi, mon ti dir Mr Oditer Zeneral, Mr Herath ki nou bezwen sa bann dimoun.  E i ti pe dir mwan i annan en pti pe difikilte pour gannyen me petet koz avek O Komiser Endyen  – mon krwar nou a fer osi pour sey fer sir ki zot ganny tou lasistans ki zot neseser, akoz i pa zis ki zot bezwen ganny sa, me lekspektasyon piblik i tre o, me mon krwar osi lezot dimoun ki’n pran la Retraite, mon pa pour nonm non personn, me konmsi dan group taler mon’n vwar, dan sa pase mon’n vwar enn mon fanmir ki dan Retraite ki ti travay lontan dan Labank, petet sa bann dimoun ki’n pran la Retraite ki kapab ed FPAC, zot kapab volonter.  Mon pa pour nonm non personn, me selman definitivman mon ava repran avek Dr Sayeed O Komiser Endyen parske definitivman mon krwar zot bezwen lasistans, me mon ti ankouraz dimoun zisteman pour ekoute pour konnen ki pe pase, pour vwar ki kalite difikilte FPAC pe pas ladan.  Parske i pa en louvraz fasil, parske nou tou nou konnen triker i malen.  Alor nou a les pause sa lanmenm, mon a sey fer sa ki mon kapab pour ed FPAC dan zot travay ki zot pe kontinyen fer.

Eski nou kapab al nou premye Mosyon pour ozordi, i lo nou Order Paper.  Nou annan 2 Mosyon e san plis tarde mon demann Mr, Onorab Gill pour prezant son Mosyon.

 

HON SIMON GILL

Bonzour Mr Speaker, bonzour tou koleg Onorab, bonzour tou manm piblik ki pe ekout nou, e bonzour tou bann zabitan, ki zabitan St Louis mon vwar ki dan Galeri.

Mr Speaker Mosyon ki mon’n table i lir koumsa; Sa Lasanble i demande ki imedyatman en letid serye i ganny egzekite par Lenstitisyon konsernen avek bi etabli nesesite reel, mendev dan tou bann Departman lo tou nivo striktir Gouvernman avek bi, donn kapasite neseser ki ava permet annan en performans bokou pli efikas e pli efektiv.

 

Mr Speaker apre ki mon’n lir sa Mosyon, pou demare mon krwar ki sa Mosyon i partaz en pe ou lespri e partaz en pe sa lanvi ki mon’n tann ou, ou’n eksprimen pour vwar bann Lenstitisyon, bann Departman Gouvernman delivre.  E i osi partaz lespri tou nou bann koleg dan Lopozisyon, swa lo kote Parti Lepep e lo kote LDS pour nou vwar en Gouvernman bokou pli performan, en Gouvernman efikas, en Gouvernman ki efektiv.

Mr Speaker ler mon Mosyon ti’n ganny ariv a laporte piblik, ziska yer 10er diswar mon’n ganny plizyer phone call e bokou dimoun in dir mwan sa Mosyon ti’n plis ki ler ki nou anmennen.  I annan en kantite mon bann koleg in partaz zot lopinyon e in donn mwan en pe bann lide ki zot santi mon devret kapab koz lo la ozordi an plis ki mon prop preparasyon ki mon’n fer.  E mon oule remersi bann dimoun dan bann diferan Departman Gouvernman ki’n osi kontribye dan bann resers ki mon’n fer an preparasyon pour sa Mosyon ozordi e osi byen nou bann Koleg dan LDS ki mon’n koz avek, kot mon’n eksprim konteni sa Mosyon avek zot, e mon remersi zot pour bann nide tre valab e tre enportan ki zot in fer vizavi mon Mosyon e osi byen bann koleg dan Parti Lepep ki isi dan Lasanble pour bann nide ki zot in kontribye an relasyon avek sa Mosyon ki mon pour prezante ozordi.

Ler mon’n dir sa koman lentrodiksyon Mr Speaker, mon ava dir ki Sesel in antre, i pe travers dan en moman eksepsyonnel nou listwar.

I annan bokou lekspektasyon piblik ki’n ganny kree la deor dan nou pti pei Sesel.  Mon’n tann bokou.  Mon’n ekout bokou e mon’n analiz bokou bann divers lopinyon, bann kritik ki bann sitwayen ordiner in fer an fas avek zot kontak avek bann diferan Departman e servis Gouvernman.

Konklizyon se ki i annan reaksyon mix, reaksyon varye baze lo interprétation ki sak sitwayen in reisi donn mwan vizavi zot kontak avek bann Departman.  I annan en keksoz ki dan tou sa bann pwennvi ki mark en sityasyon ki mon kapab zeneralize e dir Gouvernman dan bann Departman, nou krwar ki zot devret vin bokou pli efektiv e bokou pli efikas.

Ki mannyer Gouvernman i vin bokou pli efektiv e efikas?  Parmi bann lezot eleman ki nou’n kapab dekouver limero 1, se ki sak Departman dan Gouvernman i bezwen annan li en minimum lafors travay ki permet li akonplir bann latas ki’n ganny donnen pour sa Departman or pour sak sa bann Minister.

Si ou annan en mankman mendev, ou pa pour kapab akonplir bann latas ki’n ganny donnen avek lefikasite e efektivite.

Lot kote nou’n vwar i pa zis lakantite mendev, me i kalite mendev, ler nou pe koz kalite mendev i mendev ki kalifye, i mendev ki annan konpetans rezonnab pour ki sakenn de zot  dan zot deskripsyon travay ki’n ganny donnen pour zot desarze ki permet zot kapab desarz li byen, me i pa zis sa i annan en lot eleman resours, apard resours kapasite entelektyel fizik i osi annan bann lezot lekipman, bann lezot kontak adisyonnel ki ou bezwen fer e lyez, lyezon ki ou bezwen etabli avek bann lezot Minister oubyen menm lezot Departman a lenteryer ou prop Minister, ki permet en dosye sorti lo en latab kot en zofisye e bouz lo lot latab kot lot zofisye.  Si ou napa bann mendev kalifye, bann mendev konpetan, e si ou napa bann resours ki konpletman sa bann konpetans, nou vwar en mankman dan service delivery; nou vwar en mankman dan efikasite e kapasite pour delivre e satisfer lekspektasyon piblik la deor, ki pa ekspekte plis ki ler zot pran kontak avek ou ki dan en lespas letan rezonnab or ki zot konsider i rezonnab pour kapab vin avek en larepons pozitiv ou negativ me ki satisfer sa lanvi, e ki satisfer sa bezwen imedyat ki sa sitwayen ordiner ler in pran en desizyon pour ariv kot ou Minister.

Dan sa konteks Mr Speaker, mon Mosyon ler pe demande pour fer en resers or en legzersis imedyat, se zisteman pour etablir bezwen mendev dan sak Minister, dan sak Departman pour ki sak Minister, sak Departman i kapab viv e egziste alaoter lekspektasyon piblik Seselwa.

Nou pa kapab annan en Departman Mr Speaker ki i dir ou, ou bezwen esper 2 Mwan pour anrezistre 2 fey papye.  Dan sa Sesel ozordi, dan sa lemonn ozordi, dan sa lanvironnman biznes ozordi i pa rezonnab, i pa akseptab pour mwan ganny dir or pour okenn sitwayen ganny dir fodre esper 2 Mwan pour ou ganny 2 fey papye anrezistre.  Si sa i le ka i montre nesesite pour nou kapab ranpli sa bann Departman avek mankman mendev ki zot manke pour kapab arive delivre avek ekspektasyon piblik.  Lot eleman enportan, ler nou pe demann sa Resers Mr Speaker, i anmenn nou lo en pwen enportan, nou pa pe dir al azout okenn lezot layer adisyonnel or pa neseser ki ou etabli bann lezot layer adisyonnel dan Gouvernman.  Ozordi nou koz SMART Government, nou koz LEAN Government, me nou koz en Gouvernman ki kapab delivre, e delivre ou bezwen annan konpetans ankor enn fwa mon repete e ou bezwen annan resours neseser.

Kan eski nou pour ariv lo sa nivo, kot nou kapab dir ki nou Gouvernman pe perform a laoter bezwen e nesesite nou sitwayen?  Se byensir ler sak bann Minister ou bann Departman i ava’n sorti avek rezilta zot letid, rezilta zot resers ki montre vwala mendev ki mon bezwen e vwala kapasite ki mwan mon santi mon bezwen, pour mon kapab donn en servis ki efektiv e efikas.  I sa moman ki nou ava’n kapab ariv lo sa konklizyon – vwala nou satisfe ki keksoz i ava marse.

Me mon oule anmenn en lot eleman Mr Speaker, lot eleman se saler.  Dan resers ki mon’n fer dan bann diferan dyalog ki mon’n fer, bokou bann travayer dan servis piblik i dir ou zot saler pa ase.  Zot santi zot pe donn en kantite, me zot pa santi zot pe ganny byen rekonpanse.  E la ankor dan sa resers i pa zis en kestyon gete ki kantite ou bezwen e ki bann kapasite an term kalifikasyon ou bezwen, me ou bezwen osi koman en Minister, koman en Departman, get reminerasyon sak bann nivo ki ou annan a lenteryer ou Departman or ou Minister pour ki an retour ou kapab satisfer sa endividi or sa group travayer ki a lenteryer ou Departman e Minister.

Lot eleman ki osi enportan Mr Speaker, ki dan sa resers ki mon’n fer an preparasyon sa Mosyon nesesite i dikte, ki pour Gouvernman kapab vin efektiv e efikas ki a lenteryer sak Minister, sak Departman dezormen nou bezwen rekonnet nesesite ki i annan koezyon; ki i annan en linite e kapasite enteraksyon avek tou sa bann diferan endividi, diferan profesyon ki a lenteryer, ankor enn fwa sak Departman e sak Minister.

En Minister, sak Departman, e sak Minister, en Minister, en Departman pa pour kapab ariv lo en nivo, efektivite e lefikasite si a lenteryer sa Departman e sa Minister sakenn pe sant en kalite sanson, sakenn pe sout dan diferan direksyon.  E nou challenge Mr Speaker kwa ki nou challenge?  A lenteryer sak Departman, e sak Minister, nou challenge se bann diverzans ki i annan dan lopinyon ozordi.  Fodre nou debord, fodre nou depas sa bann diverzans ki annan dan nou bann lopinyon a lenteryer bann Minister, e a lenteryer bann Departman.

Nou bezwen tonm dakor koman en Minister, koman en Departman, ki koman en team nou annan nou en misyon pour akonplir.  E sa sel misyon ki nou annan pour akonplir, se satisfaksyon lepep Seselwa, satisfaksyon bezwen sa pep, sa pep i bezwen en servis ki efikas e en servis ki efektiv.

Mr Speaker sa i demann ledikasyon, ledikasyon, ledikasyon.  Nou pep dan servis piblik or nou popilasyon dan servis piblik i bezwen depouy son lekor avek bann diferans, e bann diverzans lopinyon ki nou annan.  E nou bezwen travay ansanm koman en lekip, travay ansanm koman en team pour nou akonplir ankor enn fwa misyon e lobzektif ki sa Minister or sa Departman in etabli.

Mr Speaker permet mwan pour rantre lo en lot staz mon lentervansyon ozordi.  Nou annan nou bann District Administration Offices; bann District Administration Offices i en lekstansyon lebra Gouvernman dan sak distrik.  E dan sa Lasanble nou’n ekoute, mon’n ekoute, nou’n tande e  mwan mon’n tande, e mon’n ésanz en kantite pwennvi avek bann Onorab dan Lopozisyon lo ki mannyer zot vwar Ladministrasyon Distrik ki en ekstansyon Gouvernman dan sakenn nou bann distrik kot zot in ganny elekte e kot nou, nou bann Manm isi in ganny elekte.

Ankor enn fwa, bann lopinyon i varye e nou kapab dir avek lasirans e dan en fason tre serten, ki i annan bann Ladministrasyon Distrik ki pe perform dan en fason rezonnab ki annan bann Ladministrasyon Distrik ki son nivo enteraksyon avek piblik i rezonnab; ki i annan bann Ladministrasyon Distrik lafason ki zot enterakte avek bann Manm Elekte lo kote Lopozisyon i rezonnab, e lafason ki zot enterakte avek bann Manm dan Parti Lepep i osi rezonnab.  Now me i annan en gro challenge, ki challenge ki annan devan nou?

Challenge se ki lo tou nivo nou bezwen devlop sa eleman ki nou apel trust.  Bokou piblik ozordi i dir ou mon pa trust mon Ladministrasyon Distrik; mon pa trust mon DA; mon pa trust sa bann lezot zofisye ki travay dan Ladministrasyon Distrik.  E i dir ou koumsa i annan en mank konfidansyalite.  I annan en mank lentere vizavi mon konsern, e alor mon prefere pour pa desann kot Ladministrasyon Distrik akoz mon pa krwar ki zot pour kapab rezourd mon problenm.  Sa i en challenge, e isi dan sa Lasanble ankor enn fwa mon’n tann plizyer Onorab koz lo sa size.

Me Mr Speaker ou ava dakor avek mwan ki nou annan en lot defi, defi se ki nou’n antann ki byento lannen 2017 pe fini e lannen 2018 pe vini, nou ti ekspekte vwar or nou ekspekte vwar e fer fas avek Eleksyon Ladministrasyon or Konsey Distrik pour et pli presi.

Dan mon bann konsiderasyon Mr Speaker, mon vwar sa ekstansyon District Council koman en lot layer, koman en lot platform ki nou pour tante pour al azoute dan sa ekstansyon lebra Gouvernman lo nivo lokal.

Ki bann lopinyon i dir, e ki bann sizesyon ki i annan la deor an fas avek sa sityasyon?  Bann lopinyon i dir ki menm lo nivo Ladministrasyon Distrik lafason ki mannyer i egziste, ki i mank kapasite, e ler ou koz avek plizyer DA dan mon resers, i dir ou zot in fer lavertisman dan NASYON zot pe espere.  Zot in fer interview bann kandida or plizyer kandida.  Rezilta bann interview se ki zot pa vwar bann dimoun avek bann konpetans.  Zot bezwen esper ankor e re al advertise bann post.  E sa i fer ki ziska serten degre nou vwar en mankman kapasite a lenteryer bann Ladministrasyon Distrik e ki sa par konsekans i pa permet annan en servis ki efikas e en servis ki efektiv.

Sa manm piblik la deor, sa popilasyon ki nou pe deservi dan nou 26 Distrik enkli Perseverance, i soufer akoz en mankman kapasite a lenteryer sak distrik.  An fas avek sa sityasyon ki nou fer?

Mr Speaker, ou ava dakor avek mwan ki olye al azout en lot layer District Council nou bezwen dayer ogmant kapasite a lenteryer sak Ladministrasyon Distrik mannyer i ete ozordi la; ogmant kapasite, kree lespas pour ki nou anmenn e nou resers dimoun ki i annan konpetans, dimoun ki pour kapab ede pour donn sa servis avek lefikasite e efektivite.  Al dan Eleksyon District Council pa pour permet nou attend sa lobzektif dan en lavenir pros.  I pour al met en ler adisyonnel e deza ki ou dan en kriz avek mankman mendev a lenteryer District Administration, ou pour bezwen trouv ou avek en lot challenge pour ou al dan Eleksyon District Council.  So labaz the bottom line ki nou bezwen etabli, se ogmant kapasite a lenteryer sak Ladministrasyon Distrik, byensir apre ki nou’n etidye bann mankman ki i annan baze lo bann servis ki zot bezwen delivre e pour zot kapab meet lekspektasyon sa popilasyon dan sak zot distrik ki zot annan pour zot deservi.

Now ki alternativ?  Ki alternativ?  Mr Speaker alternativ mon krwar nou’n koz bokou ‘power to the People’ yes lo nivo Parti Lepep nou believe ‘power to the People’, nou believe dan empowerment nou popilasyon; nou believe dan empowerment nou dimoun dan partisipasyon dan decision making process lo nivo zot Kominote.  E lo deside kwa ki zot bezwen?  Kwa ki zot ti a voudre trouve ki rantre dan zot distrik e dan zot Kominote, pour ki zot lavi i deroul dan en fason pezib; dan en fason byen e kot sakenn de zot i santi ki zot form parti zot Kominote e parti zot distrik.

Byensir power to the People i vedir osi annan lodasite pour demare; lodasite pour demare se mon pe dir nou kapab bouz avek en model dan plizyer rezyon ki ava permet nou etidye e swivi pour ki an retour, a moman apropriye oubyen dan moman apropriye nou kapab retourn lo sa size District Council lo nivo sak distrik parey ozordi nou annan sa Prozedlwa ki pa ankor rantre an fors i defini.

Now, nou pe dir pour nou komanse mon krwar nou kapab met bann group distrik, group zot probableman nou ava dir rezyon Nor, nou ava dir rezyon Sid, nou ava dir rezyon Les, nou ava dir rezyon Sid, nou ava dir bann group lo zil i fer bann groupman.  Sa i bann lide ki nou kapab avanse e nou kapab konkretiz li e fer sir e rasire ki Gouvernman i kapab vwar en direksyon pour bouze e met li an aplikasyon atraver byensir bann swivi, bann assessment ki nou fer e finalman dan moman apropriye byensir parey mon pe dir nou kapab met an aplikasyon Eleksyon District Council.

Pour mwan pourswiv sa largiman Mr Speaker lo sa bann Konsey Rezyonal ki mon pe sizere, nou kapab annan nou 7 dimoun parey Council ozordi pe propoze.  Me olye distrik i vin lo en baz rezyon, ava annan 7 dimoun bann dimoun nou ava rode kote nou ganny zot.  Nou annan en popilasyon la deor – pa neseserman bann dimoun ki dan lanplwa ozordi probableman i annan bann dimoun ki’n retire, ler ou’n pran dizon 4 distrik or 5 distrik, or 3 distrik ou’n met ansanm, ou a fer sa resers ou a gete bann bon dimoun, bann meyer sitwayen Seselwa ki ou kapab gannyen e form sa Council.  E parmi zot i ava annan 1 ki ava sorti koman or ganny elekte koman Chairman sa Council e bann lezot councilor kot ou pa bezwen neseserman al dan en Eleksyon.  I ava vin en mezir Administrativ, en desizyon Administrativ ki Gouvernman i pran, koman par lekstansyon son servis lo nivo rezyonal odela bann distrik.

Byensir bann detay, bann modalité, fonksyonnman sa Regional Council, i ava reste pour nou travay lo la pour nou detay li e Minister konpetan i ava kapab travay lo la e diskit e enterakte avek nou, pour ki an retour nou kapab fer bann propozisyon, bann sizesyon konkret pour ki Sesel i bouze e move vreman pour empower nou popilasyon.  E empower li dan fason reel; dan en fason ki pa pour met si ou le presyon adisyonnel lo nou resours linite, nou resours imen linite ki nou annan.  Non selman resours imen linite, me mon oule osi dan sa konteks tous laspe bidzeter Mr Speaker.  Dan bann prozeksyon ki District Council in fer, bann enteraksyon ki mon’n fer avek Minister, zot ti annan en prozeksyon R50 milyon ki zot ti’n mete pour District Council.  Avek sa sizesyon, pou bouz avek bann rezyon pour nou al definir zot bann latas, mon pe vwar poudir nou kapab servi zis en tyer sa Bidze or probableman en 50 poursan sa Bidze.  Dan sa 50 milyon probableman nou kapab servi 25 milyon or petet en pti pe plis.

Bann Expert i ava asize i ava met tou keksoz an perspektiv e Sesel i ava bouze pour nou kapab empower nou dimoun.  E mon retourn lo en pwen ki mon ti dir pli boner sa savings ki nou kapab fer avek en Ladministrasyon or en lekstansyon lo nivo rezyon ki nou pe mete, son savings ler nou koup lo District Council lo nivo 25 distrik nou pa etal li, nou restrikte li sa savings, nou kapab servi sa savings pour nou ogmant saler public service.

Apre nou letid nou ava’n etidye e definir travay ki zot pe fer, nou ava donn zot en pe plis larzan pour ki zot ganny sa Incentive adisyonnel pour zot kapab delivre, me la osi mon ava dir Mr Speaker mon a fer sa mansyon District Administrator zot travay en kantite, e ler mon pe koz ogmantasyon reminerasyon public service ,mon osi rekonnet nesesite pour nou revwar lapey ki nou bann District Administrator i gannyen.  Sa i ava osi en Incentive adisyonnel, pour ki zot kapab deservi nou popilasyon pli byen ki zot pe fer ozordi.  E i byen ki nou mansyonnen, e mon’n deza mansyonnen ki zot travay en kantite nou bann DA e “Chapeau” pour bann ki vreman pe perform a laoter e legzizans du jour, e ki nou popilasyon i satisfe.   E  i vwar satisfaksyon dan zot travay.  E egalman ankor dan servis piblik i annan en kantite dimoun ki pe perform dan en fason ekselan e i annan i bezwen pull up.

Mr Speaker mon remarke ou pe fer mon siny ler pe aprose.  Mr Speaker pour mon konklir ou’n vwar dan mon lentervansyon sa 2 nivo ki mon’n anmenn mon largiman e nesesite ki Gouvernman i fer en evalyasyon serye pour ki i determinen nivo konpetans e i determin bann mankman ki i annan lo nivo Nasyonal dan tou nou bann lenstitisyon e lekstansyon nou bann Ladministrasyon Distrik e lekstansyon bann Konsey Rezyonal ki mon pe dir i ava byen ki nou konsider sa koman en alternativ bann District Council Election pour ki nou bouz nou dan Sesel e nou kapab zwenn lekspektasyon nou pep.  Mr Speaker avek sa detrwa bann mo ki mon’n dir mon ekspekte ki nou bann koleg dan Lopozisyon i donn sipor sa Mosyon e nou kapab entervenir e met bann size, anmenn bann eleman, bann lezot largiman pour konplemant sa size ozordi ki devan nou.  Tout an rekonesan ki Sesel in ariv en moman kot si i annan en domenn ki nou bezwen atake, se zisteman service delivery, service delivery and quality service delivery to the people of Seychelles.  Sesel i bezwen en servis ki a la oter e ki reponn e ki reponn a legzizans nou lepok.  Mr Speaker mon move e mon demann bann koleg pour siport sa Mosyon.  Mersi bokou Mr Speaker.

 

MR SPEAKER

Mersi Onorab Gill, mon’n ganny dir plizyer fwa par mon bann Koleg dan SADC ki Speaker does not speak, alor mon pa pour speak, but i annan pwen enteresan ki ou’n fer sorti ki tous mwan koman MNA Anse Boileau me ki pa koman Speaker ki pour taler mon pour koz koman MNA Anse Boileau, me la Onorab William, mersi Onorab Gill.

 

HON WAVEN WILLIAM

Mersi Mr Speaker, mon ti a kontan segonn sa Mosyon e koz lo la.

 

MR SPEAKER

Wi, go ahead.

 

HON WAVEN WILLIAM

Premyerman mon a dir ou bonzour tou manm piblik ki a lekout e swet la byenveni tou bann Senior Citizens sorti St Louis dan Gallery.

Mr Speaker Mosyon i lir konm swivan; Sa Lasanble i demande ki imedyatman en letid serye i ganny egzekite par Lenstitisyon konsernen avek bi etabli nesesite reel, mendev dan tou bann Departman lo tou nivo distrik Gouvernman, lo tou nivo striktir Gouvernman avek bi donn kapasite neseser ki ava permet annan en performans bokou pli efikas e efektiv.

Mr Speaker, sa Mosyon i en Mosyon ase enportan, enportan dan moman devlopman ki Sesel in arive.  Mr Speaker dan interview ki Prezidan resaman ti donnen, i ti pe koz lo ler in arive pour vwar ankor kad saler dan servis piblik.

Mr Speaker, mon pe dir ki sa Mosyon i enportan e i bezwen al an relasyon avek sa travay ki pour ganny fer vizavi bann revizyon kad saler dan servis piblik akoz ou pa pour kapab fer enn, me selman pa regard lot.

Mr Speaker baze lo leksperyans ki mon annan lo nivo distrik koman en Manm Elekte konsern lo servis piblik in toultan la, in toultan en konplent par plizyer nou bann zabitan.  E mon konnen osi ki in en konsern pour tou bann Manm Elekte letan zot pe fer travay ouswa pe ede ki zot distrik i devlope e avans pli devan.

Mr Speaker, mon rekonnet ki’n annan serten defayans.  Letan mon pe koz lo defayans mon pe koz lo par egzanp ki dan sak bann Minister Departman i annan bann performance appraisal ki ganny fer e nou ti ekspekte ki atraver bann performance appraisal ki serten bann problenm ki ganny dekouver, sistematikman ti devret pe ganny deal avek pour os nivo performans nou bann servis piblik.

E la Mr Speaker mon rekonnet ki nou annan bokou bann travayer dan servis piblik ki travay tre dir, ki annan konpetans, me parkont i annan serten bann lakin ki mon panse ki atraver sa Mosyon e mon espere ki atraver sa Mosyon i pa vin zis en Mosyon koumsanmenm ki Lasanble i met devan e koz lo la, me ki sa Mosyon i ava sorti avek bann rekomandasyon e mwan mon demande ki Egzekitif i osi pran sa bann rekomandasyon akoz parey mon dir pa neseser nou pe koz lo ogmantasyon saler ankor, me san regard lo kote performans; akoz performans i bezwen relye osi avek nivo Konpansasyon.

Mr Speaker wi nou bezwen plis Gouvernans e mwens Gouvernman; parey nou dir an Angle ‘’More Governance less Government.’’ E Prezidan li menm li in, letan i ti pran Lofis i ti met sa 3 gran prensip ki nou bezwen travay plis lo la se, sa se bonn gouvernans, rann kont.  E mon santi ki si servis piblik pa vin performan e la nou pe ganny nou en Lasanble ki pe rod lekselans, ki pe rod bon performans avek Egzekitiv atraver bann kestyon, atraver bann Mosyon, e osi atraver bann Komite letan zot pe summon bann dimoun pour vin reponn bann kestyon ouswa pour rod leklersisman.

Mr Speaker mon santi osi ki – enn – dan bann Minister e Departman travay i bezwen annan respe pour lendividi.  I bezwen annan respe pour pozisyon ki nou donn sa bann endividi.  I bezwen annan bon tretman nou bann travayer, akoz si non sa bann menm travayer i pa santi zot ere; i pa santi zot happy dan zot landrwa travay pour zot kapab donn touzour sa bon performans.

Mr Speaker letan mon’n ekout loter Mosyon tou sa bann pwen ki’n souleve, i bann pwen tre enportan.  E mwan mon enn sa dimoun ki’n vreman vokal dan mon distrik avek pep mon distrik kot i konsern Eleksyon District Council.  Mwan mon enn sa dimoun ki’n toultan krwar ki pour le moman nou pa bezwen sa Eleksyon District Council.  Letan ou pe regard sityasyon e problenm ki i annan dan pei e nou priyorite.  E mon kontan lafason ki loter Mosyon in met son bann pwen ater pour siport revizyon sa prosesis ver sa Eleksyon.

Mr Speaker dan tou landrwa travay nou bezwen bann bon Dirizan, akoz se bann Dirizan ki pour lead bann ki anba.  Nou bezwen bann bon Administrater, nou bezwen bann bon kad.

Mr Speaker i enportan osi kot nou vwar bann febles kot i konsern training ki training i bezwen kontinyelman ganny donnen, ki bann ki annan bann mankman zot santi ki enn i annan sa sans pour zot aprann plis pour zot kapab ganny promosyon.

Mr Speaker i bezwen annan standar ki ganny mete, akoz si napa standar nou pa vreman kapab eksperyans sa bon servis ki nou ekspekte.  En lot keksoz ki mon’n santi i manke, se ki sa mankman dan target setting.

Mr Speaker par egzanp ou pour al dan en Departman Gouvernman pour al sey deal lo en problenm, mon krwar pour tou man piblik ki pe ekoute i enportan ki nou demande; en tel mon’n vin la kot ou, dir mwan kan mon ekspekte ganny en larepons; donn mwan en time frame. Mr Speaker sa i manke sa, bokou dimoun i oubliye osi demande sa bann kestyon, e mwan mon fer li mon devwar letan mon ale mon dir en tel la mon pe vin kot ou la, ou bezwen dir mwan kan mon pour ganny en larepons – akoz sa pour mwan i enportan akoz si ou oubliye mwan ki bezwen mon pa pour oubliye, mon pour bezwen vin rod ou’ akoz sa i enportan Mr Speaker.

Mr Speaker si nou pa fer sa bokou fwa letan ou al Meeting dan bann Departman Gouvernman prezan ou dir dan ou menm, ou dir be sa boug la mon’n vin meeting ouswa sa manmzel mon’n vin Meeting kot li ni en phone call ni en nanryen mon pa tande, be letan ou’n fer li komit son lekor nou bezwen fer nou servis piblik komit son lekor lo bann keksoz ki i annan pour fer avek devlopman ouswa reponn bezwen a nou manm piblik dan distrik.  E mwan mon demande ki enn bann dimoun zot komans demann kestyon en pe plis.

Mon kontan taler Mr Speaker letan ou’n koze ou’n dir ki nou bezwen demande en tel ki mannyer ou apele, donn mon ou nimero telefonn akoz bokou nou bann dimoun parfwa anba presyon lavi zot oubliye demann sa bann kestyon.  Me mon ti a kontan dir nou manm piblik ki sa bann kestyon i enportan, i enportan menm bann kopi ou dokiman.

Mr Speaker i fer mwan prezan anmenn nou dan nou prop sityasyon koman en Manm Lasanble.  Mr Speaker dan sa pei sel 2 reprezantan Lepep ki ganny Elekte se en Prezidan avek Manm Lasanble.  Mr Speaker letan koman en Manm Lasanble nou al dan en Departman Gouvernman ouswa en Minister, si mon servi mon legzanp, mon pa pe vin lo mon prop behalf koman Waven William letan mon vin devan, ouswa mon lev en telefonn pour mwan telefonnen pour mwan sey rezourd en problenm mon bann dimoun dan distrik.  Mon vin la avek Lavwa Lepep mon distrik.  E i enportan ki bann Manm Lasanble i ganny serten respe ki sa call back i ganny fer; ki en repons i ganny donnen.  Nou ti a kontan ki nou pa ganny trouve konmsi bann dimoun ki napa nanryen.’’ Nou pa deal avek ou, nou deal avek sa manm piblik.’’ Me nou annan Lavwa Lepep, mon’n vin kot ou akoz mon anvi rezourd problenm pep dan mon distrik e i enportan ki zot rekonnet e donn nou serten respe, e letan zot donn nou serten respe nou a kapab osi donn zot osi sa respe.

Mr Speaker mon krwar sa bann pwen i tre enportan.  Mr Speaker nou bezwen vin pli profesyonnel e mon santi poudir sa Mosyon i en Mosyon parey mon dir ki Gouvernman, Egzekitif, i bezwen pran li o serye, dan sa konsanti kot nou’n arive si vreman nou anvi en servis piblik ki efikas, si vreman nou anvi en servis piblik ki performan.  E Mr Speaker letan nou kapab fer sa, letan nou kapab fer sa tou dimoun pour santi zot satisfe e travayer dan civil service osi Mr Speaker mon santi poudir sa bann kad i bezwen ganny byen obzerve e bann dimoun ki pe supervise bann Administrater i bezwen swivre sa bann travayer.  Nou bezwen set target; nou bezwen set standar.

Mr Speaker avek sa de pti mo mon pour donn mon sipor sa Mosyon e mon krwar ki sa Mosyon in vin a en moman tre byen e enportan; akoz mon santi ki travay ki Lasanble Nasyonal pe fer i enportan ki lo kote Servis Piblik avek Egzekitiv zot osi zot os zot nivo, pour kapab fer sir ki nou delivre sa ki meyer pour nou pep.  Mersi bokou.

 

MR SPEAKER

Mersi Onorab William.  Onorab Ramkalawan.

 

HON WAVEL RAMKALAWAN

Mersi bokou Mr Speaker.  Mr Speaker mon krwar ki bomaten i enportan an menm tan osi pour nou obzerve ki poudir la nou pe koz an term en transformasyon; parske i annan en kantite parol ki’n ganny dir ziska aprezan espesyalman par loter – par dernyen entervenan ki mwan personnelman mon kontan, mon kontan akoz i mark en sanzman lespri.  E sa sanzman lespri fodre ki nou pep Seselwa an antye i note pour nou pa retourn ankor an aryer e pour nou kontinyen mars devan,.  Letan Onorab William i koz lo Lavwa Lepep ki poudir letan nou’n ganny elekte nou vin avek Lavwa Lepep.  Wi me Onorab William parey avek mwan, nou’n bann Manm Elekte dan bann distrik, me lafason ki Onorab William li in ganny trete e lafason ki mwan mon’n ganny trete in totalman diferan.  I resanble ki bann Manm Parti Lepep zot, zot ti Lavwa Lepep me Lopozisyon pa ti Lavwa Lepep!

St Louis Mr Speaker mon kontan bann dimoun ki la anler, zot konnen St Louis koman Manm Elekte pour St Louis, mon fer kado dan mon zenerozite, dan an bezwen Lekol Belonie Headteacher i ganny transfer.  Letan mon al Anse Etoile koman Manm Elekte koz ek Headteacher, Headteacher i dir ki zot bezwen en pe dustbins akoz bann bin sete bann barik lanmwatye ki poz en danze pour zanfan.  Mon fer kado Lekol Anse Etoile en pe dustbin, bann proper bins, Headteacher i ganny dir met tou sa bann bin dan store.  Alor pa ti Lavwa Lepep! Mwan mon pa konnen lekel ki ti’n elekte mon me tandis ki Lepep ki ti’n elekte Onorab William.  E sa in kontinyen.  In menm annan bann sityasyon kot ansyen Prezidan Michel in vin vizit distrik i anmenn kandida Parti Lepep ki ti ganny bate dan Eleksyon pour akonpanny li MNA i ganny kit ater.

Me selman pour senm konfizyon letan i vizit distrik Mamelles i kontakte Onorab  Bernard Georges!  Tousala Mr Speaker se bann keksoz ki’n arive e ki nou bezwen met lo rikord.  Ozordi nou bezwen bouz devan.  E se sa ozordi letan nou pe mark sa, la nou dan sa semenn premye laniverser dernyen Eleksyon tousala i marke tou sa ki pe pase ozordi i en lendikasyon lo sa sanzman ki pe arive dan nou pei.  E fodre ki, e mon dakor la fodre ki dezormen nou azir dan en fason profesyonnel; nou azir dan en fason drwat ki bann striktir dan Gouvernman parey Mosyon Onorab Gill i dir, striktir dan Gouvernman e osi striktir lo nivo distrik i deroul dan en fason drwat, dan en fason profesyonnel.  Fodre nou arete ek sa bann zafer nou annan kontak, nou annan zorey Prezidan, nou annan isi, nou annan laba.

La kot nou ete fodre nou tou nou annan zorey Prezidan! fodre nou tou nou vin Lavwa Lepep Seselwa akoz nou Eleksyon i pa’n ganny fer dan en lot fason avek kanmarad.  E mwan mon krwar ki deswit, deswit i bezwen annan en mesaz, yer letan Minis Bastienne ti la nou’n dir li serten keksoz konsernan rann larepons, fer dimoun konnen kot zot demars in arive.  E mon ava dir zot zis atraver en konversasyon e atraver enn de bann keksoz ki nou’n fer yer, i annan 3 problenm La Digue ki’n ganny rezourd; 3 problenm La Digue ki’n ganny rezourd.  E i pa ti neseser pour mwan lev sa dan Lasanble.  Sa ti’n devret ganny fer par bann Lotorite konsernen.  Ti’n devret ganny fer par bann Lotorite konsernen.

E Mr Speaker la mon ava dir ki letan FPAC ti vizit La Digue, be pa nou’n vwar en kantite keksoz ki Lotorite konsernen i devret fer?  Me mon pa konnen ki zot problenm me nou espere ki poudir avek sa ki nou pe koz lo la, la nou ava kapab al dan en direksyon.  Fodre ki bann lenstitisyon i ganny empowered parey nou dir Angle.  E letan ou empower en dimoun, ou pa donn li post responsab me selman avan ki i pran en desizyon fodre ou ki dir li.  Ou’n annan ou, ou sistenm pwen be otomatikman ou devret kapab dir avek sa dimoun, be dapre sistenm pwen dan ou distrik ou nimero 20; ou nimero 10, me ki pe arive ankor enn fwa nou kontinyen retourn ankor pour regarde lekel li?  Ki mannyer i ganny, ki mannyer i pour ganny asiste?  E se sa Mr Speaker ki fer ki i annan bokou lenzistis.  Serten dimoun zot keksoz i pas vit, lezot i ganny problenm.

E la mon dakor antyerman avek Onorab Gill, ou pa kapab pran plis ki 2 mwan pour anrezistre en dokiman!  Keksoz i bezwen bouze.  E si i annan problenm staff, be rod plis staff mete pour ki keksoz i ava bouze.  Nou pa kapab annan en sityasyon kot dimoun i santi i per pour li pran desizyon selman li ki la.  Li ki la ki annan sa responsabilite li ki annan sa post title.

Alors fodre ki dan Gouvernman i annan en keksoz ki arive me lo nivo distrik e la Onorab Arrisol kekfwa pli tar li menm li i ava dir dan li menm, letan i ti koz son Mosyon, letan i ti prezant son Mosyon, e la mon bezwen fer re sorti atraver ou Mr Speaker pour Onorab Gill, letan Onorab Arrisol ti dir fodre i annan konsiltasyon avek tou bann Dirizan dan distrik, pa tou dimoun lo kote Parti Lepep ki ti vote!  I annan serten dimoun lo kote Parti Lepep ki ti abstain; i annan ki ti vot kont osi tou.  Alor mon kontan ki ozordi Onorab Gill, Onorab Gill pe re anmenn sa Mosyon e ki avek sa lespwar ki la aprezan nou pe bouze ki sa bann dimoun ki ti vot kont, ki ti abstain, zot ava realize ki sa pei la, fodre personn i met li otaz.  Sa pei fodre nou bouze ek li e fodre nou tou nou met nou lanmen ladan letan nou bezwen fer li bouze.

Nou’n koz lo saler.  Ankor enn fwa mon dakor avek ou antyerman.  Me letan nou pe regard saler fodre ki saler Mr Speaker parey mon ti dir letan Mr Faure ti vin la, Saler i bezwen annan en rezondet.  Akoz ou donn en dimoun R5, 000?  Akoz ou donn en lot R20, 000?  Akoz en Nurse ki kalifye apre 20an servis, plis ki 20 an i pe ganny li R9,000?  Akoz Mr Rabat ki’n travay sepa ki kantite letan kot Lakaz Mor ki fer en travay vreman delika i ankor pe ganny li mwens ki R9, 000?  Akoz en travayer Lasante ki’n travay 28an i ape ganny li R8, 000?  Akoz en travay L’Union ki’n travay pandan 35an i ankor pe ganny li R5, 000?  Pa fer sans.  Pa fer sans e apre nou koz lo pri lavi, nou koz lo tousala.  I bezwen annan en rezon det en saler, e sela kot nou bezwen nou koman en Lasanble dan sa Bidze ki pe vini, nou pour bezwen balans tousala pour nou regarde kwa ki pour donn lankourazman.  E yer ankor enn fwa nou’n deza komans fer mouvman; bann Teachers, letan zot ti anonse ti 75poursan e mon konnen, Onorab De Commarmond i konn sa byen en serten dyalog ki’n tenir e sa in desann la, in ariv 60poursan.  Alor nou bezwen regarde.  E la i vreman sokan letan nou pe regard saler, kisisa ki fer ki en Teacher ki pe travay – en Nurse ki pe travay, en Polisye ki pe travay, en nenport dimoun ki pe travay konsyansyezman, pour li ganny en pti lapey, me pour en Avoka, mon pa pour nonm okenn non pour en Avoka, ki travay avek FIU pour li ganny en retainer of €25, 000 par mwan, ki tonm R400, 000 – R400, 000 e ni Onorab Hoareau, ni Onorab Hoareau, ni Onorab Bernard Georges, ni Onorab sa 3 Avoka, ni Onorab Andre personn dan zot travay zot napa en retainer of €25, 000.  I annan en keksoz ki mal la.

E tousala Mr Speaker se bann keksoz ki nou koman en Lasanble, e sa Mosyon i permet nou pour nou etal en pe tou sa bann diferan keksoz.  Letan Onorab Gill i dir fodre regard bann lapey.  Wi, fodre pa ki nou regard bann lapey zis bann dimoun ki annan responsabilite pli o me la kot nou’n arive fodre nou regard lapey tou dimoun.  R5, 000 ozordi en Seselwa pa pe kapab viv avek.  Nou bezwen aksepte, nou bezwen aksepte, R5,000 pa kapab.  Nou ava bezwen travay pour nou regarde ki mannyer nou fer sa pei prodwir plis larises – larises sa pei i ava reste isi e non pa parey nou pe vwar dan nou lenvestigasyon kot larises sa pei i kit sa pei i ale san okenn gran rann kont.

Nou bezwen osi regarde e met lanfaz lo kreasyon larises.  Ok, lo kreasyon sa larises kot letan nou ava kree sa larises nou ava balans li. E la i bezwen osi annan en sans responsabilite.  E sa mon krwar Mr Speaker fodre ki nou kontinyelman nou koman en Lasanble, nou koman bann Dirizan dan sa pei pour nou dir avek nou pep Seselwa travay.  Fodre ki nou dir avek nou pep Seselwa rod en travay regilye.  Akoz fodre i rod en travay regilye e non pa zis en travay zournalye regilye pour li kapab li osi tou kontribye dan Fon Pansyon; pour ki letan i ava ariv 63an oubyen 60an i ava kapab pe ganny li en Pansyon; ki nou ava kapab annan mwens etranze ki pe travay dan nou pei, ki nou ava kapab atraver sa build up tou sa bann diferan Fon e letan nou fer li nou ava kapab pa rod pour met laz Pansyon 65an me laz Pansyon i ava kapab reste pli ba.

Alors Mr Speaker tousala se bann keksoz ki nou bezwen balanse.  E wi sa ki Onorab Gill pe dir sa i en pwen ki nou’n koz bokou lo la nou osi tou lo nou kote e sa i konsern Ladministrasyon Distrik.  E Ladministrasyon Distrik avek bann Konsey Distrik fodre ki nou regard li seryezman.  E sa ki in koz lo la an relasyon avek bann Konsey Rezyonal sa i enn bann keksoz ki nou lo nou kote nou dakor avek; ki fodre i annan en nouvo fason regard sa parske nou pa pour kapab zis annan nou en lot striktir ki lour; kot dan sak distrik i ou ava annan ou en Konsey Administrativ kot letan ou miltiplir 7 x 25, konbyen i arive 7 x 25, Onorab Afif pour donn dir mwan sa vit, vit 175, ou vwar ki mannyer Onorab Afif i so, i sharp deswit i parey calculator li – e bann Manm la ki pe regarde zot vwar ki mannyer parfwa letan zot vwar mwan pe lager avek sif la, apre mon ganny sa sif vit, i pa neseserman mwan, Onorab Afif ki mon calculator.  Wi ki olye annan nou en nouvo striktir kot ou pour al ganny ou plis, ou pour al ganny ou anviron 175 dimoun, annou annan en striktir ki pli ptipti lo nivo Rezyonal.  E la avek sa ki nou pe koz lo la i ava annan 49 dimoun – 49 dimoun sa dan li menm li i ava depans an mwens e hopefully i ava bokou pli efektiv.  Akoz si par egzanp ou pe regard problenm Mont Buxton, problenm Mont Buxton i plis ou mwen parey avek problenm La Rivière Anglaise, i plis ou mwen parey avek problenm St Louis, alors zot ava kapab asiz ansanm diskite, koze e atraver sa bouz devan pour nobou avanse.

Alor Mr Speaker mwan lo mon kote mon pa pour pli long ki sa, mon krwar ki wi nou bezwen bouz Gouvernman dan tou son bann striktir.  E la ankor enn fwa mon pour dir ki sa travay ki Lasanble Nasyonal pe fer, sa travay scrutiny kot nou pe klere partou kote, se an menm tan osi pour nou dir avek Gouvernman nou bezwen plis efikasite.  Si napa efikasite, nou bezwen repoz ankor kestyon lo zot Bidze.  E la I’m sure pandan ki nou pour diskit lo Bidze nou pour bezwen regard ankor parske parfwa ou annan ou en Seksyon isi, I mean e la mon pe koz spesifikman dan Minister Kiltir, dan Minister Kiltir ou a krwar i annan en kantite keksoz ki zot pe mont lo lipye kanmarad.  Ou koz lo CINEA, ou koz lo Departman Kiltir, ou koz lo Arts Council, ou koz lo en lot zafer, be napa en fason konmsi pour zot pour nou depans mwens e pour nou annan nou plis efikasite?

E tousala Mr Speaker se bann keksoz ki nou pour bezwen regarde letan nou pe tous Bidze ankor.  E sa travay ki nou pe fer nou pe osi dir annou fer sir ki tou bann prosedir i ganny swiv.

Alor Mr Speaker avek sa 2 parol mwan mon pour donn mon sipor sa Mosyon, parske mon krwar ki i pe tous lo bann size ki enportan, nou pe koz lo empowerment of lo en kote of the Civil Service me lo lot kote osi, nou pe koz lo the empowerment of bann distrik; of bann Leaders dan Kominote e atraver sa nou ava kapab fer nou pei bouz devan.  Alor Mr Speaker mon pwen i kler.  Mersi bokou.

 

MR SPEAKER

Mersi Onorab.  Mon konnen i annan diferan dimoun ki’n demann pour koze vi ki nou pa lwen pour pran nou pause Café, mon ti a donn la parol Onorab St Louis, Onorab Arrisol vi ki son bann dimoun St Louis i la pe ekout li.  Si zot pa mind apre lezot ler nou repran apre pause Café nou a pran lezot dimoun ki’n edike ki zot in anvi koze, Onorab Arrisol la parol pour ou.

 

HON SANDY ARRISOL

Mr Speaker mersi mwan osi mon pour prezant mon sipor avek Mosyon anmennen par Onorab Gill; e mon ti a kontan swet la byenveni nou bann dimoun sage ki asize la anler, se pa lot ki bann dimoun St Louis.

Mon kontan Mosyon ki Onorab Gill in anmennen parske parey Onorab Ramkalawan in dir set egzakteman Mosyon ki mwan mon ti anmennen dan Lasanble Nasyonal pour nou demande ki tou bann dimoun ki annan Lotorite dan distrik, nou kapab asiz ansanm pour nou koze, pour nou rode kwa ki meyer pour nou distrik.  E yer parey in ganny dir i annan en kantite nou ki montre fristrasyon sirtou letan bann Minis ki nou pe lyez avek zot pa korpere oubyen zot pa reponn ou let; oubyen zot pa return ou email; oubyen zot pa reponn ou telefonn.  E mon kontan selman sa in ganny fer resorti par en Onorab Parti Lepep e sa se pa lot ki Onorab Gill.  E mon kontan lafason Onorab Gill in anmenn sa parske in al en pti pe dan tou direksyon – Saler, DA, Striktir, Servis e sa i fer ki laport in ouver en pe byen gran pour nou tou kapab fer rantre.  Alor mon ti a kontan komans koumsa mwan Mr Speaker; ou konnen letan mon pa ti, nou pa ti dan Lasanble Nasyonal pour 5enm Lasanble mwan mon enn bann Manm Lasanble ki dimoun St Louis i konn byen ek letan mon ti sorti dan Lasanble 2011 mon pa ti pran par dan Eleksyon mon pa’n zanmen sanz mon nimero telefonn, e mon nimero telefonn i ankor egzakteman parey. Ee mwan mon enn sa dimoun ki’n reste konnekte avek dimoun St Louis.  Mon’n kontinyen al, si i annan maler dan distrik asiste dan servis Lanterman e bann dimoun ki la ki asiste Lanterman zot vwar mon ase souvan.

Mon’n reste konnekte avek dimoun St Louis, kontinyen rann zot en vizit, menm al Lopital parfwa letan ou konnen i annan enn ou zabitan i malad.  Savedir mon pa’n zanmen dekonekte.

Parfwa letan nou, nou vin dan Gouvernman nou nimero telefonn otomatikman i sanze.  Letan nou dir bonzour sa madanm nou donn li en nimero telefonn, me ler nou, nou vin nou pran sa syez nou nimero telefonn i sanze.  Pour mwan mon nimero telefonn i annan egzakteman 20an depi ler mon pe servi sa nimero telefonn e mon happy mon nimero telefonn.

Mr Speaker, mon komans koumsa parske lafason ki Onorab Gill in dir poudir ozordi dan Departman Gouvernman i annan plizyer nou ki fer mizer malere nou bann frer, ser Seselwa.  E si ozordi Parti Lepep in perdi sa pouvwar ki zot ti annan dan Lasanble Nasyonal e nou dan LDS ki’n ganny en mazorite set egzakteman sa se lakoz.  Parske mon rapel dan tou Speech ki Msye Rene ti fer ti dir avek bann SPPF reste konnekte avek dimoun.  Msye Michel ti servi en lot fason; al lo peron kot bann dimoun.  Me malerezman SPPF zot, zot pa’n alo lo peron personn.  Be nou mwan mon rapel mwan ansanm avek Leader Lopozisyon, Mr Ramkalawan avek Onorab Loizeau ,nou letan nou pa ti dan Lasanble nou ti reste lo en pickup nou; kontinyelman konekte avek dimoun; eksplik zot ki pour arive.  Letan mon’n tann Onorab Gill koz lo larzan pa ase – ozordi bann 3enm Az ki asize la anler se nou ki ti demande pour zot ganny en logmantasyon sorti R3,100 pour vin R5, 050 menm ozordi i pa ase.  Me letan nou, nou ti pe dir sa Msye Michel ti vire ti dir nou iresponsab.  ‘’Kot pou ganny larzan pour donn sa bann Trwazyenm-Az ki asize la anler ozordi  sa pti logmantasyon?   Pei pour faid!’’ Me selman parkont letan mon ekout Chairman FPAC avek bann Manm FPAC mon get kantite milyon Roupi ki zot in pey etranze lo lasyer nou bann Trwazyenm-Az ki asiz la anler Mr Speaker i fer lapenn.

Toultan Gouvernman li i vwar en rezon pour li pa donn sa travayer en R200, en R300, en R500, me selman toultan i vwar larzan pour li gonfle sa etranze ki vin travay dan nou pei.

Dan Bidze lannen pase, nou ti aprann poudir en etranze ki train lisyen ti pe ganny li R100, 000 par mwan menm plis ki nou Komisyoner Lapolis.  E osi Menm ki Prezidan.  E ozordi letan en tel Mosyon i vini i enportan pour nou ki la ki serye, donn sipor sa Mosyon.  Letan mon’n tann Onorab Gill koz lo bann DA par egzanp lafason ki zot deservi zot louvraz, i enportan pour nou remind bann dimoun laba deor poudir bann DA ti ganny mete dan bann distrik pour fer kwa?  Senpleman pour zot pini bann dimoun ki pa ti siport sa sistenm.  Par egzanp St Louis, St Louis mon a donn en legzanp kler, mon rapel i annan en madanm i reste Dan Koko i al rod en plas travay lo Erport, en zour i telefonn mwan, ‘’Mr Arrisol ou konnen DA in call mwan akoz mon papye Aplikasyon i kot Ladministrasyon Distrik.’’ Prezan mon demann li, ‘’Be madanm ou’n apply en plas travay pour al balye dan Ladministrasyon Distrik, pour ou vin Sekirite Ladministrasyon Distrik?’’  I dir mwan non, mwan mon louvraz, mon pe rode Erport.  Prezan i pe rode akoz son papye in retourn dan Ladministrasyon Distrik.  En keksoz ki nou bezwen aksepte ozordi, Security Clearance dan sa pei in ede, pour fer nou Seselwa vin mizer, e sa ti ganny entrodwir par bann SPPF.

Si ozordi nou Seselwa napa sa labitid travay; oubyen pa kontinyelman rod en plas travay parske SPPF ki’n anmenn sa dan lepase, zot in entrodwir Security Clearance lo tou nou bann Seselwa e sa ki in fer?  Nou bann profesyonnel i kit pei li, i al travay aletranze.  Akoz?  Son manman pa ek nou.  Li i pa vin lo bann aktivite dan distrik li!  Son papa full aktivis li!  Bann zanfan i ganny pini lo la par zot paran senpleman akoz zot pa siport sa sistenm.  Sa osi in ede pour fer nou bann Seselwa kalifye ozordi al imigre dan lot pei, e ozordi ou vwar nou ranpli avek bann etranze.  Sa osi in ede, letan mon’n tann Onorab Gill koz lo par egzanp lakaz, annou get en kou sityasyon lakaz.  La St Louis nou byen rar nou ganny lakaz nou, parske mon rapel en fwa mon ti al en Konferans ti annan en landrwa mon’n bliye egzakteman si Congo, zot dir mwan ti annan en pti distrik, en pti sou distrik ki ti siport Lopozisyon an mor, en zour son Prezidan ti dir, donn en lord i dir get sa, rod en caterpillar kraz sa bann pti soz  – sa bann pti payot laba fer en laplenn foutbol donn bann manrmay.  Akoz?  Senpleman parske laba zis zot ki ti siport Lopozisyon en pti pe pli for; parske zot pa ti pe ganny ede.  St Louis i enn bann distrik ki’n ganny marke, nou dimoun lo kote lakaz par egzanp, letan nou koz lakaz i enportan pour nou dir ozordi – Perseverance i en lapreferans li, son non i devret lapreferans olye Perseverance; parske i annan dimoun ki’n sorti dan lakaz dan son distrik in ganny en lot lakaz lo ledo enn ki ankor lo lalis pour plizyer lannen.

Ozordi annou get en kou bann Santer ki’n sante pour Parti Lepep.  I annan en kantite zot Mr Speaker – mon kontan zot in ganny en lakaz mwan, be selman letan ou get zot laz, letan ou rod zot Laplikasyon konbyen lannen zot in espere, ke laz zot zanfan i annan? La mon annan dimoun dan mon distrik St Louis ki ozordi in vin granmanman, in vin granpapa akoz sa sistenm ki laba lot kote latab in ser zot, e zot pa’n ganny en lakaz.

I annan Santer ki annan son lakaz li i dan en distrik i pe lwe son lakaz in ganny en lakaz avek Gouvernman Parti Lepep Perseverance!  Mon bann zanmi sa i bann keksoz ki nou pour bezwen anba sa nouvo parasol nou pour bezwen arete.  Lakaz i annan dimoun la par egzanp Mont Buxton in ganny lakaz , mon aprann poudir i annan dimoun Mont Buxton ki’n sorti dan en Flat, i ti dan en Flat li, in sorti dan en Flat in vin dan en lot Flat.  Be konmsi nou bezwen konnen kwa vreman ki nou pe fer avek nou bann dimoun.

Later, later annou pa koz lo later, ler ou annan en Gouvernman ki pa responsab parey Msye Michel i kontan dir, zot fer politik bon marse, parey Onorab Larue i kontan dir letan Parti Lepep li i annan sepa konbyen kare later, be selman mwan St Louis mon annan dimoun pe esper en morso later – pa pour ganny kado, pour nou aste en morso later.  Sa osi nou pour bezwen revwar, nou pour bezwen parey yer letan Onorab Ferrari pe dir bann dimoun ki i annan quarry, nou pour bezwen rode ki fason zot lo zot later zot kapab ganny en pe ros pour met dan zot Lendistri pour fer marse zot quarry.  Nou bezwen get avek Parti Lepep osi ki mannyer li i komans kot li avan pour li kapab ed bann dimoun dan distrik kapab ganny en morso.  Saler, mwan mon toutafe, mwan ler i koz saler mon kontan lager lo la parey Leader Lopozisyon in dir.

Ozordi Sesel nou pour bezwen revwar saler.  E letan nou koz saler Mr Speaker i pour enportan pour nou get bann dimoun ki’n travay plizyer lannen dan bann landrwa; par egzanp St Louis mon annan en madanm in Supervisor Air Seychelles pour 23an letan i anmenn dan lakour pandan son 23an i anmenn dan lakour R8, 000.  Parey mon toultan dir mon annan en Teknisyen Laboratwar dan Lekol Belonie Segonder ki tonm St Louis in fer 37an servis.  I anmenn dan lakour R6,800! Mr Speaker,  letan ou annan en Librarian ankor dan distrik St Louis dan Lekol Belonie Segonder i osi anmenn dan lakour R8, 000!  Me in ler pour nou revwar lafason ki mannyer nou ankouraz nou Seselwa pour li prodwir dan son pei; pour nou kapab tir sa tas lo son ledo poudir bann Seselwa bann donner poum.  Parkont nou konnen i annan me selman bann Seselwa ki pe travay.  Ki mannyer nou en Gouvernman Lasanble nou sey koz avek Gouvernman ek bann Minister ek DPA, Minister Finans pour nou rode ki mannyer nou kapab soutenir nou travayer.  Saler i en rol enportan pour ankouraz li pour li travay par egzanp, zot dir napa larzan, larzan Sesel i annan en kantite larzan; parfwa lafason ki nou larzan i ganny zere.  Sesel nou annan en kantite larzan larises dan nou pei.

Letan dan Recess la mon’n aprann dan bann Resers ki nou’n fer dan bann Meeting ki nou’n ale, Mr Speaker nou’n aprann poudir Sesel tou le Mwan i perdi li $5milyon Ameriken i kit pei i ale.  Nou pou bezwen get avek SRC, ler SRC pe rod plis larzan pour son bann travayer i pour enportan pour nou dir avek SRC bann dimoun ki anmas larzan Tax ki mannyer zot, zot vin pli efikas pour nou rode ki mannyer bann gro Lotel zot pe fonksyonnen. Kote zot larzan i ale bann gro Lotel par egzanp?  Me selman par kont Gouvernman li i trangle sa pti 2 lasanm, sa 3 pti lasanm, letan nou pe koz Tax, dan FPAC mon ti tande lo televizyon poudir i annan en Msye La Digue laba zot ti mansyonn son non, Mr Payet i dwa 1.5 milyon.  Letan Mr Payet i dwa 1.5 milyon li Gouvernman i negosye ek li pour li pey par pti kwiyer – be Gouvernman i bezwen negosye ek sa enn osi ki dwa 400 pour li dir be get sa, be ou pey par 25 Sou.  Si sa enn ki  pey 400, sa enn ki pey 400 li ou trangle li ou donn li en dele letan pour li peye oubyen, ou rod en somonn ou anvoy kot li, ou anvoy Gard fer li per, be selman sa enn laba La Digue li ki dwa 1.5 milyon li akoz i pey pa pti kwiyer li?  Akoz li i vot La Digue?  Tousala, tousala par pti kwiyer fodre arete.  Si La Digue i pey par pti kwiyer nou tou nou ava pey par pti kwiyer.

Mon zwenn en msye Bazar Mr Speaker zisteman lo sa pwen i dir ek mwan, ‘’Mr Arrisol mwan mon lwe en pti landrwa kot mwan, mwan, mon’n ariv mon laz Retret mon lwe en pti Bedsitter mwan, mon lwe li R1, 200 par mwan, akoz mon lwe li R1, 200 mwan?  Zis pour mwan ganny en pti larzan pour soutenir mon lekor avek mon Sekirite Sosyal ki i gannyen.’’  Tax i dir ek li lo sa R1, 200 i bezwen i bezwen pey R189 tou le mwan e fer sir ou peye e 15 poursan.  Me selman Payet laba kot Onorab Sophola, li i dwa 1.5 milyon e li i pey par pti kwiyer.  Non be tousala in komans pey par 1 kwiyer diri prezan?  Very good, granmersi FPAC.  So, sa ki mon pe dir Mr Speaker nou pa kapab annan 2 pwa de mezir dan nou pei.  Parey Onorab Gill pe dir dan sa striktir ki nou pe rod konstrir, letan Onorab Gill in ouver laport dan tou direksyon Saler, Lakaz, Later, DA i enportan prezan pour nou vwar sa striktir ki nou pe dir la.

 

MR SPEAKER

Onorab sa ki ou pe dir i bon, be mon krwar ou bann constituents i swaf zot anvi zot anvi…

 

HON SANDY ARRISSOL

Napa problenm zot happy, mwan mon pe dir sa ki mon pe dir zot pe enjoy laba anler, selman Mr Speaker i enportan, e mwan mon pour donn sipor Onorab Gill e mon bann constituency i bezwen konnen poudir Onorab Gill i nou CC Member dan distrik St Louis.  E sa mon bezwen dir Onorab Gill i nou CC Member St Louis e mon anvi remind Onorab Gill poudir dan lot Eleksyon nou pour bat li ankor, nou pour bat li e dan sa nouvo striktir ki nou pe fer St Louis Mr Speaker ki Onorab Gill in propoze e mon kontan sa laspe finans in monte kot nou kapab koup en pe finans parske mon rapel letan bann Meeting Konsiltasyon Mr Ernesta ki la anler i enn bann dimoun ki ti demann kestyon an relasyon avek finans.  Konbyen pou koute?  Konbyen sa bann dimoun pour gannyen?   Be mon krwar sa pwen ki Onorab Gill in refer sorti e i ganny siporte par tou lede entervenan avan mwan, kot nou a kapab balans en pe, letan nou pe dir napa larzan, i pour enportan pour nou pa entrodwir en gro striktir ankor dan distrik, ki pour anmenn en burden lo Gouvernman.  Me an konsiltasyon parey nou pe dir, i ava enportan pour nou revwar.  Me selman letan mon pe dir koup tou bann striktir i pour enportan pour State House osi get en pe son striktir; rode osi ki mannyer i kapab koupe olye zis pran bann MNA ki’n ganny bate dan bann Eleksyon pour met zot dan, avek Secrétaire D’État pour Drog; met avek lot, met avek lot pour fer zot striktir gonfle.  I enportan pour nou balanse, vwar ki mannyer ansanm letan nou pe dir ek Seselwa koupe, pour nou kapab koup en pti pe partou, partou.  Me selman Onorab Gill kantmenm nou pour bat ou dan prosen Eleksyon mon pour siport ou Mosyon la.  Mon pour siport ou Mosyon e mon ti a kontan ankor enn fwa remersye tou bann dimoun St Louis ki la Mr Speaker e lo ou par remersi ou pour zot lakey e Mr Gill, Onorab Gill ou Mosyon mon pour siporte 100 poursan.  Mersi bokou Mr Speaker.

 

(APPLAUSE)

 

MR SPEAKER

Mersi Onorab Arrisol omwen ou bann constituents in tann ou koze first hand.  E mon a remersye ou pour ou lefe ki ou pe siport ou oponan – ki ou’n dir li ou pour bat li dan prosen Eleksyon e mon vwar li byen kontan riye konmsi li ki pour gannyen.

Anyway bann Senior Citizens St Louis, mon ti a kontan envit zot prezan nou pe pran en pause café pour zwenn nou anler dan Lobby bann MNA ki asosye ek zot, ek lezot ki anvi zwenn zot a ganny sans enterakte avek zot.  Zot annan en rafresisman anler e mwan osi mon pase mon ava vin vwar zot en pti kou, nou pour adjourn nou a repran nou travay 11er.

 

(BREAK)

 

MR SPEAKER

Nou a kontinyen nou deba lo Mosyon ki’n ganny prezante par Onorab Gill.  E lot dimoun ki’n demann pour koze se Onorab Adelaide.

 

HON FRANCOIS ADELAIDE

Mersi Mr Speaker.  Bonzour tou dimoun a lekout.  Mr Speaker Mosyon ki Onorab Gill in anmennen i en bon Mosyon.  Me atraver sa Mosyon nou’n trouve ki Onorab Gill pe tous diferan laspe keksoz avek en sel Mosyon.  An dot mo nou pe touy 4 zwazo avek en sel ros. E i pa en move zafer akoz petet sa lanpler, sa Mosyon mannyer i pe vini e nou pa pour kapab tarde vi ki nou vwar bokou dimoun pe koze. E mwan mon pour tous enn de bann pwen spesifik.

Mon byen kontan ki Onorab Gill dabor ler in prezant son Mosyon, i pa’n koz lo okenn lepok kolonyal, lepok parti inik ziska ozordi. Mon kontan ki in realize ki tou lepok i annan son lepok.  E ozordi sa lepok kot politisyen pe vreman ganny apresye pour son fransizm, son lentegrite, son aksyon, menm par son lenfliyans. Mon santi ki sa Mosyon i vreman enportan. Mon pe koz dan sa lepok kot mon ti konn pouvwar en MNA. En MNA ti pli ganny apresye ki menm en pret.  I ti enfliyansyel en kantite.  Me ozordi tou keksoz pe tonm dan son perspektiv.  Nou bezwen realize ki ler nou pe koz lo donn parey son Mosyon pe dir; en letid serye i ganny egzekite.  Mon pe panse koman en dimoun ki pa’n viv bokou letan me depi 74 kot ler ti annan en lepok kot nou ti pe koz lo moralite, kot nou ti devret koz lo moralite, kot nou ti tann menm pret pe ganny anpese pour koze lo radyo ler i ti pe donn son lopinyon.

Menm nou’n trouve ki dan letan pase nou ti kapab ganny nou en lafors travayer ki ti pour efikas, ki ti pour kapab perform byen.  Me nou’n annan bann move prensip parey aste dimoun ek larzan, enfliyans zidisyer pour donn desizyon ki dan en sel kote, e tousala in ede pour abes en pe nou popilarite koman, koman en Nasyon.  Mon mazinen Mr Speaker ki ti annan en letan ki si ou ti malen ou pa ti pour kapab travay dan sa Gouvernman akoz zot ti tant pour met ou en kote.  An mezir ki pou lespri ti ouver zot tant get ou koman en lennmi larevolisyon.  E nou ti’n tann menm parol pour dir bato i pase, avyon i pase, sa ki pa kontan ale.  Mwan mon krwar sa in dan en fason, in ede pour fer nou Seselwa per, nou Seselwa in perdi en pe son lendepandans, nou’n vwar  Seselwa pe sivre politisyen, dan plas pour li travay dan son konesans pour li devlop son lekor li menm e si ozordi egzekitiv pour ekout sa Mosyon e  pour met sa an aksyon, mon krwar pour dir Seselwa pour kapab perform a la oter ki mon krwar i devret kapab.  E lesyel pa pour the limit, mon krwar i pour al en pe pli o ki sa.  So Onorab Gill mon byen kontan ki sa Mosyon in sorti lo kote ou menm laba kot Parti Lepep, e ou menm petet ou remarke pour dir i annan problenm, i deza egziste sa problenm, e nou bezwen fer en fason pour nou kapab rektifye; rektifye sa problenm si zot in realiz sa dan zot kote, mon dir zot mon pour siport zot, e tou Seselwa an zeneral pour siporte en tel Mosyon koumsa.

Mr Speaker mwan parey mwan dan mon distrik, mwan annan bann dimoun ki annan papye, ki menm pas atraver Young Leaders, ki ozordi pe rod en plas pa akoz afilyasyon sa dimoun, i pa pe gannyen en plas, i pa pe gannyen en plas travay.  In fer bokou laplikasyon dan Gouvernman, dan prive, me i pa ariv okenn par.  Me selman ler  i ekout rezilta lekel ki’n ganny sa plas travay i trouve pour dir en dimoun ki pa ni ti menm merite, son leksperyans i napa, me akoz sa dimoun i annan kontak, akoz sa dimoun i pre avek bann o zofisye dan Gouvernman, i kapab zis lev en telefonn e i ganny sa travay e sa dimoun ki devret fer sa travay i pa ganny son sans egzekit son travay dan en fason ki si i ti ganny mete dan sa pozisyon i ti pour fer bokou pli byen.  I ti pour anmenn nou pei en pe pli devan.

Mr Speaker, mon pa pour tro tarde parey mon’n dir, be selman mon pour koz en pti git lo sa kote, sa lot, sa dezyenm parti sa Mosyon ki Onorab Gill in anmennen, lo kote Ladministrasyon Distrik. Mon krwar ki i en bon desizyon, be it lo nivo finansyel, o nivo konpetans dimoun osi, mon krwar ki i pour ede.  Nou parey nou, lo kote LDS, nou lespri i deza ouver nou.  Nou pare pour aksepte kritik avek dimoun, nou pare pour ekout keksoz pour fer keksoz bouz devan.  Me nou tou konnen pour dir bann dimoun Parti Lepep, enn de zot, sirtou bann ki dan bann kot administratif, zot pa oule tro, tro ekoute par ler. Zot pa oule tro ekoute, zot abitye ek sa bann vye nide, e menm kantmenm ou pe anmenn bann nouvo, zot, zot pa oule pran, zot in abitye ek en fason travay, e mon krwar si Onorab Gill i kapab sanz sa dan son Gouvernman, mon krwar nou pour bouz bokou pli devan.  Mr Speaker ozordi mon oule met lo rikord Lasanble atraver sa Mosyon, nou bann MNA LDS nou pa zanmen kapab ganny en lofis. Se pourtan nou, nou’n ganny elekte dan en distrik.  Me selman MNA Parti Lepep, zot, zot ganny en lofis. Be ki mannyer nou, nou oule bouze, nou, nou oule reprezant nou distrik.

 

MR SPEAKER

Order! Order!

 

HON FRANCOIS ADELAIDE

Nou, nou oule reprezant nou distrik ki nou pa pe gannyen sa bann sans.  So nou dimoun pa pe ganny sans vin koz ek nou pour nou pran bann desizyon.

So i enportan ki ler Onorab Gill in anmenn sa Mosyon ki Prezidan Faure, Msye Faure koman Prezidan i tande. I tande ki kote son parti pe koze e i osi i ede pour fer ki nou bouz devan.

 

MR SPEAKER

Onorab, eskize. Onorab Ghislain, ou fek antre.  Ou fek antre apre tou dimoun. Silvouple ekoute, donn li en sans koze, taler si ou anvi koze lev ou lanmen, ou a koze. Kontinyen Onorab Adelaide.

 

HON FRANCOIS ADELAIDE

Wi Mr Speaker, par ler laverite i ofans zot en pe, me selman nou dan Lasanble nou bezwen koze. I enportan pour nou koze, e annou ganny en konpran akoz ki nou krwar nou, nou mindset dan sa pei i bezwen sanze.

Mr Speaker mon pe en lot propozisyon ankor si nou aksepte ki Seselwa nou annan bann dimoun ki annan sa kapabilite, pour pran plas dan Gouvernman. Me mon propoze ki Gouvernman i ava fer en lalis tou son bann travay ki zot annan dan Gouvernman pour ki nou tou Seselwa nou a war, e nou ava kapab apply.  Nou pa kapab en Gouvernman parey en masin sipoze mars lo 4 silenn, nou mars lo 2 silenn me selman nou bezwen rezilta, nou bezwen trouv rezilta.  Pa pour zanmen marse. So mon ti a sizere ki Gouvernman i etablir en lalis ki tou son bann travay ki annan, e dimoun i ava apply, nou a fer li dan fairness, e ki dimoun i a ganny son merit, me ki i pa ava ganny faver.

Mr Speaker, Onorab Gill parey mon dir ou, mon pour siport sa Mosyon avek lespwar ki nou pe anvoy en sinyal, en bon sinyal pour sa Gouvernman. I nepli tan pour nou swazir lekel ki nou pour donn faver, me i pa pour baze lo faver, me i pour baze lo merit.. Si sa Mosyon pour vin dan sa kalite perspektiv mon pour siport ou Mosyon.  Mersi bokou Mr Speaker.

 

MR SPEAKER

Mersi Onorab. Onorab Aglae.

 

HON EGBERT AGLAE

Mersi Mr Speaker. Bonzour tou koleg Onorab, e tou dimoun a lekout.

Mr Speaker sa Mosyon in vin a en moman kot pei li menm nou dan en transformasyon. I pa zis en transformasyon politik, me osi en transformasyon kot nou bezwen re balans nou mindset. Mon’n ekout bann koleg bomaten, loter Mosyon li menm ek bann ki’n entervenir. Nou’n koz lo bokou lo sa ki nou apel service delivery.  E baze lo la nou vwar pour dir i annan bokou lensertitid, bokou fristrasyon anver service delivery, e sa i en keksoz ki nou bann Manm Onorab, tou sa ki’n ganny elekte, tou sa ki’n ganny nominen, zot pe fer fas avek lo en baz toulezour akoz nou, nou deal avek problenm dimoun.  E ler nou pe koz problenm dimoun, i annan diferan dimansyon problenm.  Mr Speaker tou-le-z-an parey lannen pase nou’n vin, i annan en Bidze ki’n vin devan nou, kot nou’n depouy sa Bidze parey in ganny dir.  E bokou latansyon in antas lo sa bann sonm larzan ki sak Departman ouswa Minister i gannyen.

Nou’n fer sir, nou’n fouye, nou’n gete, be en keksoz enportan parey nou ti vwar se ki laplipar bann Minister, departman zot in anbark zot lo en PPBB, sa i performance- based budgeting. Alor kestyon pour mwan, e parey Onorab Ramkalawan in fer resorti ki ler prosen Bidze pour vini, nou pour bezwen get sa larzan an term performans, e mwan mon dakor ek sa. Mon dakor avek sa akoz ler ou pe ganny en saler pour fer en travay, ki swa parey in ganny dir saler i relevans avek ou travay ou non. Me selman nou ekspekte annan sa servis ki’n ganny delivre lo lekspektasyon ou Departman, ou  Minister e sa kliyan ki ou travay avek.

Mon dir sa Mr Speaker akoz souvandfwa, nou pe vwar e nou pe kontinyen vwar kot dimoun i kontinyen tourn an ron; i kontinyen retourn kot MNA parti MNA, e se MNA ouswa sa DA ki li i bezwen kit son lofis, desann al kot sa Minister pour li al kapab fer keksoz bouze, kan sa i pa sipoze en norm ki sipoze, i pa sipoze le ka.

Mr Speaker bokou ki’n swiv bann kour management, i annan bann, i annan en teori senp. En departman i bezwen annan li en lobzektif, i bezwen annan li son target, i bezwen annan li en metod pour li arive  ver sa target. I bezwen annan en resours a son dispozisyon ki swa imen, ki swa an term moniter, e a lafen, nou bezwen war en outcome ki nou kapab evalye. E se sa ki mwan mon ti a swete ki Mosyon i ankadre, e ki ler Bidze i vini, nou bezwen get tou sa bann metod ki’n ganny site pour fer sir ki demen lobzektif ki Nasyonal, baze lo demann ki en Minister ouswa en lazans in ganny met devan, i pa pe divert li, e i reste lo son laliny ki li i bezwen donnen.

Mr Speaker, pour sa osi kapab arive, resours imen i en lakle. Nou’n ariv en moman letan dan sa pei, kot nou pe vwar kot i annan bokou Seselwa ki pe travay dir, e mwan mon felisit zot. Me osi i annan Seselwa ki i deside pa anvi kontribye anver son pei. E pour mwan sa  pa sipoze en norm akoz lanplwa  annan.  E ler mon pe koz lo lanplwa, mon krwar in ler pour Gouvernman li menm atraver bann lenstitisyon edikasyonnel, si fodre fer en survey pour vwar lekel bann lanplwa ki an gran demann.  E la bann zenn, bann ki pe fini pos segonder, i ganny channel dan sa bann Departman, ouswa dan sa bann pos ki an demann, e Gouvernman i bezwen pare pour li envestir kontinyelman pour fer ki sa bann lanplwa ki an demann, ouswa sa bann etranze ki dan sa bann lanplwa i kapab ganny ranplase. Nou pe koz mendev akoz ler, ou’n pas dan bokou bann lazans, bann Minister, bokou ki’n vin la dan Bidze i dir ou, i ti a kontan ganny li tan kantite travayer, me i pa pe gannyen pour diferan rezon, e i bezwen outsource petet lo enternasyonal.

Mr Speaker mon krwar in ariv en ler la kot en striktir parey Mosyon pe demande,  i ava adres sa demann. Lekel ki pour fer, petet Loter Mosyon i kapab dan son Reply lo ki fason pour antreprann sa striktir ki pour kapab revwar the whole process, pour kapab vwar bann louvraz ki nou neseser, fill in sa bann pos pour bann Departman ki napa e la nou ava kapab komans vwar en sanzman.  Mr Speaker ler mon pe koz en sanzman, i annan en konponan enportan kot i konsern saler, e sa i annan en Departman ki mon krwar bokou nou par ler nou tant pour fristre avek se DPA.

I byen nou’n train dimoun, dimoun in train, zot in ganny zot kalifikasyon, zot in ganny zot sertifika, ouswa i annan ki annan leksperyans menm si napa en gran sertifika, i annan leksperyans apre bokou letan ki in dan sa domenn.  Me ler i ale, i annan en pos ki’n advertise, i ale, i vwar pour dir malgre tou sa zefor, tou sa sakrifis ki li in fer, in etidye parey nou dir in burn the candle.  Ler i al get sa pos e ler i get son reminerasyon, petet sa Departman i pare pour pey sa sonm, me DPA i vin en lobstak pour li. E la akoz nou vwar pour dir nou ganny sa bann turnover, e nou menm ganny bann brain drain kot sekter prive i pran sa bann ki Gouvernman li menm li in train. In plis ki ler pour DPA ganny revwar en pe dan son totalite.  Parey in ganny dir ki mannyer ou met en valer avek en travay. Ki formula ou vin avek pour kapab dir X i bezwen tan larzan, Y i pour bezwen tan larzan pour ou konpare?   Sa i en legzersis osi ki bezwen antre dan sa Mosyon la pour nou kapab adres sa sityasyon akoz i en konponan kle.

Mr Speaker ler nou koz lo servis delivery par ler, sirtou dan bann top management, senior management nou vwar i annan bokou complacency. I annan dimoun i tro konfortab dan son pos.  I annan dimoun i pa vin ovatif akoz in secure li. Ouswa napa enn par lao li ki pe deryer li avek en pti baton petet pour dir vwala, ou pe perdi direksyon, vwala ou bezwen pe fer sa akoz nou apel sa parey en scrutiny parey nou dir. Nou bezwen annan sa bann kad menm si annan bann metod parey appraisal ki ganny fer, me selman who appraises the boss li menm, lekel ki appraise the boss. Se nou lepep ki bezwen appraise the boss prezan. Se sa ki nou lepep pe demann nou la deor ki servis delivery, bann lazans i sorti dan sa bann complacency.

Mon pa dir ki tou i parey, i annan lazans ki pe delivre, i annan bann Minister ki pe travay byen, me i annan, mon pa pour nonm non, me i annan i bezwen parey nou dir Angle pull up their socks. Pull up their socks akoz nou pep la deor i touzour lannen e lannen pe dir nou pe vir an ron, nou problenm pa ganny rezourd, e ler problenm pa ganny rezourd i pe vir an ron se sa MNA e sa DA ki ganny blanmen. Krwar ou, mwan ki pe fer ki son problenm pa ganny rezourd. Kan ou, ou pa dormi aswar, ou asize, ou travay, ki mannyer pour build up son case pour fer li vin pli lour, pour anmenn devan, e ler i ariv laba sa keksoz i ganny dormi.  Ouswa li i pa dan soulye sa dimoun akoz i pa dan ou distrik, i pa pran sa o serye, i pran sa a la lezer, sa nou dir enough is enough, nou’n ganny elekte pour fer en louvraz, nou merit kapab ganny ekoute e nou pour serye lo sa zafer ler nou dir ekout nou.

Mr Speaker, i annan en lot keksoz enportan dan servis delivery sa i birokrasi.  Nou pe vwar pour dir i annan tro bokou birokrasi dan serten Departman. En file i sorti la, i al lo step 2, lo step 3 apre i kapab retourn ankor lo step one.  Eski dan sa konteks modern kot teknolozi i an plas, nou dan Lafrik nou sipoze premye lo kot i konsern teknolozi, eski nou dan en moman letan kot en desizyon i bezwen pran donkey years pour kapab ganny pran pour deal avek?  Mon larepons se non. Nou bezwen elimin diplikasyon dan bann Departman, nou bezwen elimin birokrasi.  Pour ou kapab elimin sa bann problenm e  diplikasyon, birokrasi sak Departman parey ou’n dir i bezwen swiv en metod travay i bezwen annan en prosesis ki ler en file i vin devan ou, i pa pe tourn ankor par deryer li, i sipoze al de lavan pour en desizyon ganny pran, e sa dimoun sa kliyan a lafen dizour li ki pour vin viktorye. E ou departman, ou a ganny pour dir ou pe travay, napa person ki kapab vin montre ledwa lo ou.  Ni sa Minis, ni sa PS, ni sa direkter, ni sa supervisor akoz in pou’n fer son bout akoz metod travay in deza ganny met devan, e zot kapab avans azanda zot Gouvernman li menm zot Departman.

 

MR SPEAKER

Sey round up Onorab.

 

HON EGBERT AGLAE

Mr Speaker avan mon round up, mon oule koz en pti git lo ladministrasyon distrik kot i en lakle. I en brans Gouvernman. Mwan mon’n deza en DA, e louvraz en DA i vast.  Ler ou pe get louvraz en DA, si ou pe dir ek en MNA, nou vwar pour dir MNA osi pe fer louvraz DA konmela.  E DA son volim travay i 3 fwa plis ler ou’n kalkile.  Ou vwar DA pe deal ek bann korespondans, bann problenm lakaz, later, sosyal li menm, DA pe deal ek progranm pour fer aktivite.  DA i annan son bann lebra Lazans ki vin dan distrik i osi ki enpakte lo li.  E ler ou pe get son saler li menm koman en DA, Mr Speaker, mon krwar nou bezwen reflesir lo la.

Nou bezwen reflesir lo la akoz DA tou-le-z-an nou pe perdi DA.  E ozordi ler ou pour dir en dimoun, ou apros li vin en DA, i dir ou non sa louvraz pa pour li. E menm MNA osi pe komans dir ou mwan mon pa anvi fer sa louvraz mwan.

Mr Speaker, i en bann sakrifis ki bann dimoun ki travay koman DA, MNA i fer dan son lavi akoz, i bezwen pe travay pour en group dimoun, pour en pep ki’n elekte li.  Mr Speaker pour konklir loter Mosyon mon pour donn ou sipor, me parey mon’n demande, ou ti  a eklersi nou en pti git lo, petet lo ki kalite striktir ki pour kapab adrese, lekel ki pour responsab pour kapab pa fer sa legzersis, akoz i annan en gran nesesite. E ki ler Bidze i vini sa lannen nou bezwen dir fortman avek bann lazans ki non-performing pour zot vin kler e si zot napa en metod prosedir travay pour fer keksoz bouze, mon pa krwar nou devret donn zot en Bidze pour zot travay. Mersi Mr Speaker.

 

MR SPEAKER

Mersi Onorab.  Mon ti a zis kontan aport zot latansyon ki annan 12 entervenan ki anvi koze, i 11:35. Nou annan en Mosyon, en 2enm Mosyon ozordi lo IDC ki nou ti a kontan ler nou komanse 2er, nou komans lo la.  So mon ti a kontan propoze ki zot sey presiz zot entervansyon, gard within the scope of sa Mosyon ki Loter in mete.  I tre spesifik si zot relir li; en letid i ganny fer pour par lenstitisyon konsernen avek bi etabli nesesite reel mendev dan tou bann departman lo tou nivo striktir Gouvernman.

Sey gard within that scope pour nou fini koumsa ki midi mon pa anmenn ziska midi edmi, oubyen 1er mwen en kar, zot ganny zot Break, personn pa kapab dir in ganny gastrik akoz Speaker.  E 2er nou komanse, nou pran lot, lot Mosyon lo IDC ki mon krwar tou dimoun i anvi tande. Alor silvouple Onorab Loizeau, 3 minit. The alternative se ki ler nou’n ariv midi nou Break, nou repran 2er par laswit nou pran IDC.  Zot deside, parey labitid mon esey pratik demokrasi pour les zot deside, mwan mon a met dan  bannal mon  a gide.  Onorab De Commarmond.

 

HON CHARLES DE COMMARMOND

Non mon pe dir ou met mon non lo lalis pour koze.

 

MR SPEAKER

Pardon.

 

HON CHARLES DE COMMARMOND

Met mon non lo lalis pour koze, apre mon pe sizere, nou koz lo sa Mosyon ki la devan nou ziskan ler nou exhaust li, apre nou ava al lo lot Mosyon. IDC sa Mosyon mon pa sipoze i pour pran tro long li.  Akoz zis i pe demande pour son CEO vin dan Lasanble pour…. Ki mannyer mon konpran.

 

MR SPEAKER

IDC in demande pour son CEO vin devan Lasanble, i dir vin devan Lasanble pour donn serten detay e leksplikasyon kler, lo rol IDC dan biznes konstriksyon. E mon pti leksperyans dan sa sez bann Mosyon koumsa i pa pour zis kase roule sa Onorab De Commarmond. Be selman parey mon dir I stand to be guided as always, mwan  en Empire who tries to be fair and consider zot lentere.  Si nou anvi kontinyen ziska 12.30, annou kontinyen me selman sa ki mon pe dir zot bezwen sey presiz. Precise, to the point, within the scope of the motion. Parski parey mon dir i annan 12 dimoun ki oule koze. Wi Onorab Gill vi ki ou ki loter Mosyon.

 

HON SIMON GILL

Mr Speaker mersi bokou, with all due respect, mon sizere enbleman ki nou diskite, nou les deba ale, midi nou Break, e 2er nou pran.  Nou gete ki kote nou ale.  Nou pa pe dir file ziska 7er, 8er.  Epi ler nou fini, nou pran lot Mosyon. Mon krwar i meyer koumsa.   I pour permet tir en pti pe tansyon anndan la. Mersi.

 

MR SPEAKER

Eski sa i pwennvi lamazorite dimoun? Eski nou kapab par montre show of hands ki nou dakor pour nou kontinyen ziska nou a fini apre la nou ava la lo IDC?  Bon we are guided by the majority, nou’n al dan en demokrasi, at least nou pe sey al lo sa parkour, lo sa journey.  Mon a donn laparol Onorab Loizeau.

 

HON NORBERT LOIZEAU

Mersi Mr Speaker, bonzour tou dimoun.  Bonzour tou dimoun a lekout. Mr Speaker mersi, i en plezir pour mwan ganny en sans pour mwan koz lo Mosyon anmennen par Onorab Gill.

E ozordi mon kontan ki en tel Mosyon in ariv devan Lasanble par en Manm lot kote laba, lot kote latab laba akoz vreman dimoun, Seselwa, spesyalman bann dimoun ki nou dir bann pti dimoun ordiner ki nou kontan servi sa mo, menm si mon pa tro, tro kontan sa mo, i pas dan tro bokou difikilte Mr Speaker parfwa, pour zot kapab fer bann demars.  Zot antre dan en laport, zot al dan en lot, zot ganny dir, vwar isi, fini vwar sa enn, vwar lot, nanryen pa marse.  E la Mr Speaker taler dan pti meeting ki nou ti annan, ou pa ti la, petet ou ti a tande, Mr Ernesta in fer sorti en keksoz ki mwan a dir ek zot sa i ti la anler pe asize.  I dir ler sa bann demars koumsa i fer, i fatigan, i ti servi en term ‘’tel e le mak tel le zako.’’ Kot ou ale menm zafer menm.  E mwan Mr Speaker, mon krwar sa sityasyon i serye.

Ozordi  mwan mon pour al lo pwen, akoz kontrent letan. Pour komanse. Mon anvi, mon’n tann Onorab Gill in koz lo mendev.  Wi i annan en mankman mendev. Me selman nou bezwen konpran ki sa mankman mendev i lafot lekel? Ki Gouvernman ki’n la. E ler, ler mon’n ekout Onorab Gill i paret mwan zot sorti dan en lot parti politik.  Mwan mannyer mon pe ekoute.  Ok?   Mon konpran si Onorab Pillay ti pour dir nou dan koabitasyon nou pa koz koumsa.  Wi nou dan koabitasyon me selman, malgre nou dan koabitasyon, nou bezwen fer sorti serten keksoz kot nou vwar.

E sa Mr Speaker, sa bann mankman mendev se pirman lafot en Gouvernman ki pa responsab.  Ki’n la pandan tou sa letan.   E la i fer mwan mazin ler nou pe koz mankman mendev, Mr Speaker, zot rapel bann letan ‘‘ek nou pa ek nou.’’ Sa in fer fristre bokou dimoun sa.  Bokou dimoun in bezwen kite ale zis akoz viktimizasyon dan travay.  Akoz rezon politik menm si zot ti en bann profesyonnel ki ti travay byen Mr Speaker, zot ti bezwen ganny met deor akoz zot lopinyon avek sa Sistenm ‘’Ek nou pa ek nou.’’ E la nou pe koz lo service delivery. I bezwen napa bon service delivery dan bann lorganizasyon piblik Mr Speaker.  Be ler ou met deor bann ki konpetan, ki direksyon ou pe pran?   Ou pour toultan annan bann ki pa konpetan ki la deryer.  E la i fer ki sa ladministrasyon pa pour zanmen marse.  E sa en fot, en keksoz ki’n arive dan sa Gouvernman pour plizyer e plizyer lannen.  E la Mr Speaker i fer mwan mazin bann profesyonnel.  Nou annan en ta profesyonnel ozordi, vi ki nou pe koz lo service delivery, mankman mendev, ozordi nou annan bokou profesyonnel ki’n kite in al travay aletranze. ..

Nou annan ners, nou annan dokter. Mwan annan zanmi ki anvi vin travay Sesel, zot pa oule vini senpleman akoz zot pa happy avek la fason ki keksoz i ete.  E la Mr Speaker, nou dan LDS nou annan en gro latas nou.  Nou vwar nou dan en pozisyon kot nou pe repar en pei.  Se ki pe arive ki LDS pe fer. Nou pe repar en pei ki’n ganny desire gos a dwat atraver sa bann kalite lenzistis, bann kalite keksoz ki’n arive pandan sa bann letan.  E ozordi mon kontan ki Onorab Gill in koz lo lapey. Wi lapey i en konsern, ozordi mwan mon pa krwar en lapey R5050 minimonm wage i ase pour en dimoun, pour en fanmir, pour sa zonm, pour sa labourer, pour sa manman. Mon vwar sa larzan i fay. Ki mannyer dimoun pour donnen, pour prodwir si lapey i slow dance?  Non pa kapab sa, nou bezwen fer sir ki lapey pour ganny bon prodiktivite, fodre lapey i en nivo ki sa dimoun i satisfe avek. Ok?  Ozordi Mr Speaker, mon kontan ki zot in vin ek sa Mosyon dan Lasanble. Akoz nou Lopozisyon, mon rapel nou Lopozisyon, ler nou ti ankor SNP toultan nou’n koz lo la.  Sa Ramkalawan ki laba la. Sa Mr Ramkalawan, Leader Lopozisyon, in mal koze lo la li?   In koze, ziskan i annan menm serten lot kote ki toultan zot i war keksoz mal.

Zot ti dir i mal ki i pe dir, zot ti portre li koman en bebet ki pe fer tou dimoun per.  Ozordi non, Onorab Ramkalawan, Onorab De Commarmond i konn byen li, bann nouvo, zot pa tro, tro konnen, Onorab Waven William, zot ti portre li koman sa bebet ki pe vin manz zot. Ozordi non.  I pe montre laklerte atraver FPAC sa ki taler mon pour vin lo la.  E tou sa ki Onorab Gill in dir dan son Mosyon Mr Speaker.  Sa se bann keksoz ki lontan ti merit la an plas ganny fer.  E annou zis mazinen – lekel ki’n la 40an?   En Gouvernman 40an o pouvwar ozordi en Manm i vini, i vin dir nou sa fodre sanze?   Be sa fodre depi 40an zot ti pe merit fer.  Ozordi mon asir ou Mr Speaker.  Si sa bann keksoz mon pour bref en, si sa bann keksoz ti’n arive pandan tou sa bann letan ozordi nou ti pour lwen.  Ti pour annan en lord total dan sa pei.  Ozordi, Onorab Ramkalwan koman chairman FPAC ek son lekip pa ti pour vwar li pe anmenn FIU, NDEA, pe vin kestyon sa bann dimoun pe vin rod nou larzan. Be la la savedir keksoz pa ti pe mars byen, aprezan in ankouraz sa bann labi.   E sa Mr Speaker in arive anba Gouvernman SPUP/SPPF/Parti Lepep.   Eskiz mwan mon pe koz koumsa Mr Speaker.   Me kot nou bezwen dir, nou bezwen dir.  Ok?   Sa in arive anba sa sistenm.

E la ozordi mon kontan i annan bann Manm laba.  Ler mon get, ozordi mon kontan Onorab De Commarmond, Onorab Sebastien Pillay ki’n Manm FPAC pandan tou sa lannen, depi dan 5enm Lasanble, Onorab De Commarmond depi avan mon krwar in lo la.  Nanryen pa’n ganny fer, e sa i montre ki zot in soutire pour sa bann keksoz arive Mr Speaker.  Zot in soutire pour tou sa bann keksoz arive, akoz zot, zot pa’n dir nanryen. Ozordi mon kontan LDS i la, LDS pe fer zot koz en pti git.  Sa i byen.  Nou atraver LDS nou pour fer sir ki keksoz pour sanze.  E la ler mon get sa.  Sa zafer FIU, NDEA la.  Tou sa bann letan sa bann keksoz pe arive. Zot pa’n vwar?  E ozordi pour konfirm ki keksoz ti pe mal marse, ozordi menm dimoun dan dernyen Lasanble ki’n Chair FPAC; ki’n soutir sa bann move practice, li i ganny rekonpans.

Mannyer i apele, bougla ki ti pe asiz laba la.  Menm son non mon oubliye. Pierre? Mr David Pierre, in partisip, ou trouve mannyer Gouvernman, sanmenm sa Mr Speaker mwan sa bann keksoz koumsa mon apel poor Leadership dan, mon kontan servi sa mo mwan. Poor leadership lo lapar Gouvernman Parti Lepep. Ou pa kapab soutir en boug ki’n soutir koripsyon. Koripsyon donn li pos Anbasader. Ki mannyer nou kapab fer sa?

Sa se bann move practice ki ozordi mon kontan ki Onorab Gill in vin ek sa.  E nou, nou pour fer sa, nou pour sanz sa. E LDS li i annan sa travay.  LDS i annan sa travay parey mon’n dir taler pour nou repar sa pei.  Onorab Ramkalawan, toultan i dir mwan sa.  ‘’Norbert nou bezwen repar sa pei.’’ E mwan mon enn ki pare pour repar sa pei ansanm avek zot.  Nou pa anvi fer li nou tousel nou, pangar zot a dir nou dominer, nou… Non, nou pour fer li ansanm ek zot.

E la Mr Speaker, i fer mwan mazin bann Lalwa ki aplik zis pour serten.  Ler nou koz 2 pwa 2 mezir.  Sa i arive sirtou dan bann Minister parey Land Use and Habitat.  Ozordi mon pour al lo en pwen spesifik. I annan dimoun i kapab fer tel keksoz, i annan pa kapab.  En legzanp ki mon a donnen, Mr Chang Ty Sing … Bel Air, kot simityer Bel Air i anvi fer en baraz li.  I anvi fer en baraz li akoz i reste o-bor semen zis vizavi Vines, in fer son lakaz, aswar ler bann dimoun i sorti, sorti disko partou, zot oule sot kot li, zot oule fer kot li en loka, sa ki le vin zet zot zafer lanmenm i fer.  Li i pa annan dwa met en baraz 2 met. I pa annan dwa,  zot dir li non.   Selman i annan en msye anler an montan Curio ki’n fer en lakaz eco-friendly, swa swadizan eco-friendly.  Li in fer en baraz anviron 3 met. Vwar, kot in ganny laprouvasyon li?  Li Mr Chang Ty Sing PS laba kot soz in met lipye ater, non, ‘’Ou a fer 1an met edmi!’’  Li sa msye in fer enn 3 met oter. I mal, se sa bann keksoz ki fodre aranze Mr Speaker.  E la i fer mwan al lo sa sityasyon lakaz parey Onorab, Onorab Arrisol in koz lo la taler. Mwan mon konn dimoun ki mon’n pran dan lebra, ozordi i annan later, lakaz.  Mwan akoz mwan mon dan Lopozisyon, ni en lapel later mon napa, ni en tol mon napa.  Ok?  E la i fer mwan mazin en madanm, e zenn manman, 50an ki’n granmanman ozordi Maria-lise Anacoura ozordi i pe seye menm pour li kapab ganny en lakaz, en later.  E la Mr Speaker, vi ki Onorab in fer mwan mazin en keksoz, sa 40 bout?  Bann move practice.  Sa i pour vin dan bann move practice ki’n arive lo lapar Gouvernman Parti Lepep, kot 40 bout later pour en Parti Politik!  Se bann lenzistis ki’n arive. Onorab De Commarmond, mon krwar ou pour dakor ek mwan.

Rann, donnen, Maria-Lise Anacoura a ganny en bout, a fer en lakaz.  Annie anler lo Glacis i a ganny en bout i osi i a fer en lakaz. Annou aranz, ki nou merit fer, annou koriz sa bann move practice, rann, annou fer sa.  E Mr Speaker, ou anvi mon bref, mon pour bref, mon annan plizyer pwen mon anvi koz lo la, me selman restriksyon letan mon ava termin la, e mon anvi dir Onorab Gill malgre ki mon lentervansyon in al en pe dan sa direksyon, mon siporte sa Mosyon mwan.   Mon pou donn mon sipor sa Mosyon senpleman akoz nou bezwen repar nou pei parey Onorab Ramkalawan i kontan dir.

Sa pei ki’n ganny desire pandan 40an, i bezwen ganny repare, met lo en direksyon dwat, e fer nou pei bouz devan kot tou lepep Seselwa a viv byen dan lape, e dan larmoni.   Mr Speaker mon a dir ou mersi pour sa pti letan ki ou’n donn mwan pour fer mwan deliberasyon.  Mersi.

 

MR SPEAKER

Mersi Onorab.  Onorab Lemiel.

 

HON SYLVANNE LEMIEL

Mersi Mr Speaker.  Mr Speaker ozordi ler nou get sityasyon mendev dan Sesel, nou kapab konstate ki pei an zeneral napa ase mendev, e pli presi mendev kalifye.  Dan preski tou Minister oubyen Departman nou tann pe konplent napa dimoun pour desarz serten responsabilite kle.   Ou tann bann Minister pe al rod etranze pour travay koman bann teknisyen dan diferan divizyon oubyen unit.

Mr Speaker sa zafer mank mendev dan bann landrwa travay in vin tre enkyetan dan Sesel.  Ler nou pran en Minister parey Gouvernman Lokal, i enn parmi bann Minister tre enportan dan pei.  Bann Ladministrasyon Distrik i tonm anba son portfolio, e sa Minister i enn ki enplimant bann pti proze kominoter e osi deservi en kominote dan bann distrik.  Ki nou pe vwar ozordi?  Sa Minister i mank mendev dan tou son Departman, travayer pe kontinyen resign par group. Eski i annan en problenm laba? Oubyen travayer pe ganny bann pli bon lof dan sekter prive?

Mr Speaker, dan sak distrik, sak distrik in ganny li R1.4milyon pour fer bann pti proze kominoter sa lannen.  E sa lannen nou konstate ki en lannen ki Departman Devlopman Kominoter sa larzan in ogmante pour nou kapab fer bann proze.  Konbyen distrik la ki kapab dir ki in reisi komanse oubyen konplete sa bann proze, la ki nou’n ariv dan mwan Septanm?   Akoz sa pe arive?  Mon konnen petet zot pour servi leskiz Bidze in ganny release tar.  Me sa pa sel rezon.  Rezon prensipal set akoz en mankman mendev ki pe fer ki sa Minister pa pe perform byen kot i konsern delivre bann proze distrik.  Si ou regard Ladministrasyon Distrik ozordi serten DA e son support staff pe resign.  Biro i vid.  Napa personn pour dirize. Serten travayer zot fer sa ki zot oule dan bann biro. Ladministrasyon Distrik i enn parmi bann landrwa kot sa letid kot loter Mosyon in propoze i bezwen ganny fer imedyatman.

Si en distrik napa en administrater, i vin difisil pour travay marse e pour distrik bouze.  Parfwa ou ganny bann bon DA ki travay tre dir.  Sorry, me zot saler i pa koresponn avek sa travay ki zot pe fer.  En lot landrwa ki nou antann konplent mankman mendev, se kot Minister Lakaz e Later, e osi Lazans SLTA.  Sa Minister i enn ki enplimant bokou proze dan Sesel me ki nou vwar ozordi. Se sa menm Minister e Lazans ki mank plis dimoun pour travay. Zot ganny Bidze pour fer serten proze, me par kont CEO i dir ou i napa teknisyen pour li vin kapab fer en tel proze.  E la kot nou vwar larzan i ganny reste dan Bidze e i tourn dan kof Gouvernman. Sa sityasyon pe vin fristran de zour an zour, e dimoun dan kominote i vin fristre de zour an zour akoz zot pa pe vwar nanryen pe bouze.. En lot fenomenn osi ki pe fer mank mendev dan Gouvernman Mr Speaker, se saler.  Fodre nou revwar seryezman sa issue saler travayer Gouvernman.  La ki an 2018 ki Gouvernman in donn son langazman, ki zot pe al revwar sa, nou espere ki i ava en lankourazman pour bann travayer.

Me an menm tan nou demann travayer osi ki ler zot saler in ganny revize ki nou delivre pour sa pep. Mr Speaker, i osi annan sa konponan training pour bann in-service workers.  Sa bann training i ganny donnen par Guy Morel Institute, i annan ki ganny donnen par Liniversite Sesel, e bann Minister e Lazans zot bezwen konsider training pour zot bann travayer koman en priyorite. Fodre donn travayer sa lankourazman pour bouz pli devan atraver promosyon e lezot kalite incentive parey bann pti training aletranze, bann attachment eksetera. Bann Minister fodre zot fer sir ki zot annan en Bidze pour training e fodre zot pa konsider, e fodre ki pa zot konsider li koman mwen enportan ki lezot vot dan zot Bidze.

Parfwa serten Minister i ganny demande pour zot revwar zot Bidze, e premye landrwa kot zot koupe se dan vot training. Sa set akoz serten landrwa pa vwar training koman en priyorite.  Par kont Mr Speaker, i osi annan travayer ki pa oule pran training pour zot ganny pli bagaz e ganny sa kalite kalifikasyon ki sa landrwa travay pe rode, san realize ki avek training ou pe ouver bann laport e loportinite dan ou karyer.  Si tou travayer ti pran zot sans e attend training sa ti pour ede ki dan Gouvernman ti ava annan plis bann mendev kalifye.  Mr Speaker ozordi tou pei pe modernize, nou pe koz lo desantralizasyon eksetera. Be eski Sesel nou’n pare pour desantralize?   Mwan mon pour dir ki nou pa ankor pare.  Avek sa kalite en kantite mendev ki nou annan dan nou pei ozordi, nou napa ase dimoun, ni menm pour balye semen, nou bezwen pe rod etranze pour fer sa.

An konklizyon, mon krwar ki sa Mosyon i annan son merit. Mon pour rekomande ki nou siport sa Mosyon.  Mersi.

 

MR SPEAKER

Mersi Onorab. Onorab Roucou.

 

HON CLIVE ROUCOU

Mersi Mr Speaker. Bonzour tou Manm koleg Onorab. Mr Speaker mon’n ekout Mosyon prezante par Onorab Gill avek bokou lantouzyazm.  Mon’n realize ki Onorab Gill in bezwen annan en kantite kouraz pour li aksepte ki vre apre 40an i mank lefikasite dan bann Departman Gouvernman.  Mon repete i regrete ki in pran li 40an.

Mr Speaker si ozordi en tel Mosyon in ariv devan nou dan sa Lasanble, i somewhere, somehow keksoz in al mal, keksoz in al mal.  E parey labitid, pli gro culprit se Gouvernman Parti Lepep.  Kot in mank, kot in responsab, pour mank linefikasite dan tou sa bann departman Gouvernman.  Partou kote kot nou pase, nou vwar i mank linefikasite dan tou sa Departman Gouvernman. Mr Speaker, dan mon pti resers, mon’n rode akoz.  Mon’n rode akoz.  Premyerman nou vwar ki saler, saler i keksoz primordyal, e en kantite travayer i fristre e zot pa perform lo sa oter, se akoz zot saler. Ankor premyerman ler nou get saler an konparezon avek bann etranze. Mon pran spesifikman lo bann travayer lasante kot mon bann koleg ners, dokter, asistan ners, travayer laboratwar pe travay an konparezon avek bann etranze ki dan Minister Lasante, kot nou annan etranze dan Minister Lasante ki ganny R80mil. I annan ki ganny R75mil an konparezon avek en ners ki travay dan emergency department. Kot dan en 3 shift 24 erdtan kot i annan 2 ners lo sak shift, 2 a 3 ners lo sak shift. Kot zot vwar apepre 125 pasyan a 130 pasyan lo 24 erdtan, e zot pe ganny zot parey Onorab Ramkalawan in dir taler mwens ki R10mil. E zot war depi en latak leker ziskan en lafyev pour mwen ki R10mil an konparezon avek en dimoun pe ganny R80mil e R75mil. So ki mannyer nou ekspekte, ki mannyer nou ekspekte annan performans. Non, nou pour napa performans. Ki mannyer nou ekspekte mon bann koleg ners spesyalman zot performen avek sa kalite lapey kot nou war menm sef ners, plis menm son lapey pa aparet lo payroll. E nou pa konnen konbyen i gannyen.

E li i sa bann ki siport pour anpes nou ners ganny en meyer lapey e par kont ankor nou war performans i desann. Nou war ankor kot lapreferans dan progresyon, dan travay i zwe en rol, egzakteman i pour arive menm zafer menm, nou pour vwar performans pa pour ariv alaoter.  Ankor nou’n war kriter kler pa’n ganny etablir, par egzanp, pour bann positive reinforcement kan travay i ganny fer byen, e koman en Manm Komite Viktimizasyon mon’n war kot dan bann travay, kot dimoun, kot dimoun pa’n ganny sa progresyon ankor akoz zot pwennvi, pwennvi politik.

Mr Speaker ozordi apre 40an, apre 40an mon vwar ki Onorab Gill in come to his senses pour dir wi i mank prodiktivite, i mank lefikasite dan bann Departman Gouvernman.  Me mwan senserman mon pour donn Onorab Gill sa sipor; mon pour donn Onorab Gill sa sipor akoz in ganny sa kouraz pour li vin koriz en mal.

Mr Speaker, Onorab Gill in koz lo 2enm parti son lentervansyon in koz lo Ladministrasyon Distrik. E mwan osi, e mwan osi mon pour siport li lo demars pour annan sa Regional Council.  Mon krwar ki laplipar distrik dan nou pei zot bann problenm i preski balanse, i preski balanse.  Alors avek en Regional Council kot i ava annan pli mwens or zot a pli focus dan zot travay, e travay i ava vin en pe pli efektiv konpare avek si i ti pli gran.  Me par kont, mon pa konn nide par deryer Onorab Gill menm si in met sa devan.  Kekfwa i ti pe mazinen si nou ti pour fer nou 26 distrik LDS ti pour ganny 26-0, menm si kekfwa i pa ti ava politik, me selman nou konnen, i ti pour ganny bate net, me par kont avek sa nide Regional Council, mwan pour siport li, mon pour siport li e travay i ava pli focus.

Parey ou dir Mr Speaker, mon pour al en pe pli kourt, pour mwan konklir mon pour swete ki Gouvernman dizour i met zot lobzektif kler, e son target fikse.  Alor ki resours imen i reste en parti vital dan nou pei e dan bann Departman Gouvernman kot sa resours ki pli enportan i a ganny tou sa led posib ki performans i ava ogmante e service delivery i ava vin pli prometan.  Mersi Mr Speaker.

 

MR SPEAKER

Mersi Onorab Roucou. Midi in sonnen, mon krwar avek sa nou a pran en Break pour dezennen, nou a retournen 2er pour nou kontiny nou deba lo sa Mosyon prezante par Onorab Gill. Savedir nou adjourn, bonn apeti nou repran 2er.

 

(BREAK)

 

MR DEPUTY SPEAKER

Bon, bonn apre midi tou Manm Onorab e bonn apre midi tou bann dimoun ki a lekout, ki pe kontinyen swiv bann deliberasyon Lasanble Nasyonal.

Premyerman mon ti a kontan prezant en pti leskiz pour sa retar ki nou’n gannyen, e osi mon prezant en leskiz pour Speaker ki pa pour prezan apre midi dan Lasanble. I annan en matter ase irzan ki’n lev-e ki i pe deal avek e alor se mwan ki pour kontinyen chair lo deba, lo Mosyon ki’n ganny prezante bomaten. Lafason osi tou ki nou’n diskite dan Assembly Business Committee taler ki mannyer nou pour pran Business of the Day ozordi se ki sa 2enm Mosyon nou pe anvoy li pour semenn prosenn.  So nou pour kontinyen deba, bann deliberasyon lo Mosyon ki’n prezante par Onorab Simon Gill bomaten. E nou pour ale ziska 4er, 4er en kar koumsa, apre nou pour adjourn pour donn osi sans FPAC members pour zot meet en pti moman avan zot pran zot travay demen. Ok?

So petet avan mwan komans pas lo lalis, mon ti a zis kontan pour en show of hands bann Manm ki’n montre zot latansyon ki zot anvi entervenir lo Mosyon Onorab Simon Gill zis pour mwan crosscheck, Onorab Woodcock, Onorab Hoareau, Ernesta, Onorab Hoareau, Valmont, Onorab Afif, Sebastien, Onorab Stephen Pillay oule koz…ok?   Onorab De Commarmond, Onorab Vidot, Onorab Sophola, Onorab Esparon, Onorab Simon Gill, Churchill Gill, ok, Onorab Ferrari, Onorab Ghislain, ok, Onorab Andre.  Bon, yes mon’n ganny zot tou mon krwar byen, wi Onorab Basil Hoareau, Onorab Sebastien Pillay.

Ok mon annan 17 Manm, ok. Zis pour avek en bi pour nou kapab manage letan, annou pa fer repetisyon. Ok?   E mon pour allocate 5 minit par Manm. Ok. Zis be precise, annou entervenir lo Mosyon, ok. E nou a kapab fini at least par 4er, 4er en kar. Ok nou pour komanse deswit avek Onorab Woodcock.

 

HON WAVEL WOODCOCK

Mersi Mr Speaker mon ti annan bokou keksoz pour dir me selman mon ava sey summarise sa ki mon ti annan pour dir.

Mr Speaker mon dakor avek Onorab Gill ki nou bezwen etidye e get nesesite mendev dan tou Departman e lo tou nouvo striktir Gouvernman avek bi parey in dir pour donn kapasite sirtou resours neseser tou bann Departman Gouvernman e osi pour empower e donn plis resours bann civil servant pour ogmant zot performans e efikasite.

Mr Speaker mon dakor ki manpower dan plizyer Departman Gouvernman e agency pa ase, e sa i pa permet bann departman, bann agency delivre to the maximum pour delivre alaoter ki kekfwa zot ti pour anvi delivre annefe mon koz avek bann plizyer bann zofisye dan Gouvernman, plizyer bann Head of Department e zot in dir zot menm ki sa i enn bann difikilte ki zot pe fer fas avek. Par egzanp mon’n pran en senp legzanp Praslin konsernan Lapolis, i annan en lack of manpower, e napa ase zofisye Lapolis, se pour sa rezon ki ou vwar ler gard pe tay deryer voler, droger pe vann drog dan simityer.  E sa i zis en legzanp, dan plizyer Departman, ou vwar poudir i annan en mank mendev, i annan en mank travayer e sa i en kontrent ase serye.

Mr Speaker si i pa en mankman manpower ou vwar ki swa napa manpower, swa napa ase travayer, ouswa napa resours. Parey gard ou vwar napa transpor, napa minot, napa isi napa laba.  E sa i en konsern ase serye.  E ki nou vwar Mr Speaker, se a plizyer repriz ler sa bann departman i a apros DPA, ouswa Department of Public Administration zot pe rod plis travayer pour zot boost up zot manpower pour zot annan plis travayer pour zot kapab desarz zot responsabilite, zot reach en, a stumbling block kot DPA pa pe aksepte bann request, ouswa bann rekomandasyon ki zot pe fer pour increase zot workforce.  E i pa zis sa osi Mr Speaker, e lot kontrent ki bann departman Gouvernmantal pe fer fas avek se osi kot i konsern saler.  En ler zot oule ogmant saler zot travayer, kekfwa en dimoun ki’n devou ki’n travay byen dan tel Departman, e DPA i pa pe aksepte pour ogmant saler sa bann dimoun. In fact Mr Speaker ti annan en zofisye Gouvernman e resaman i fek koz ek mwan konsernan son drayver. Son drayver pour 28an i pe ganny en saler, en saler R6mil, e ler nou al kot DPA pe demande pour ogmant son saler DPA pa pe aksepte pour fer sa.  E sa i dan plizyer Departman e sa i fer bann travayer fristre, zot pe ekspekte en servis o pli o nivo me selman nou pa pe fer ase pour ankouraz bann travayer e bann saler ki bokou bann travayer pe gannyen i tro ba, e DPA pa pe aksepte pour ogmant saler plizyer bann travayer sirtou bann civil servant dan Gouvernman.  E sa i en keksoz ki nou bezwen get byen, nou bezwen reviz en pe DPA, bann kriter ki zot servi pour alokasyon kantite travayer avek en Departman Gouvernmantal, ouswa menm saler ki bann civil servant pe gannyen, dan plizyer Departman Gouvernmantal.

Mr Speaker pour nou ganny bann travayer pli efektiv, pli efikas, nou bezwen gete kalite saler ki nou pe donn nou bann travayer.  En keksoz ki sagrinan Mr Speaker sa i en konsern ki bokou bann zenn i von devan mwan, in met devan sirtou bann zenn profesyonnel, bann zenn ki’n al fer zot, ki’n al etidye, zot in struggle, zot in ganny zot Degre, zot Masters, finalman, ler zot vin dan Gouvernman, zot pe ganny ofer en saler R10mil a R15mil e menm pli ba pour en degre ek en Masters ki aletranze zot pour ganny zot en saler bokou pli o ki pour ankouraz e se pour se la rezon ki nou war, nou war bokou bann, nou bann zenn profesyonnel, zot end up dan private sector olye dan Gouvernman e sa i en gran dekalaz e sa i ede lower the standard of service ki nou ti kapab gannyen avek sa bann zenn profesyonnel.

Mr Speaker ki mannyer nou kapab ekspekte gard nou bann profesyonnel  dan Gouvernman, gard zot dan Gouvernman, travay dan Gouvernman kan saler, bann kondisyon travay ki nou pe donn zot i pa akseptab, i tro ba?   E sa i en keksoz ki nou bezwen get seryezman ladan si nou anvi vwar servis o nivo Gouvernman i amelyore.  En lot keksoz ki manke Mr Speaker ki mon pour koz lo la se en mank sinerzi dan bann landrwa travay.

Napa kolaborasyon dan plizyer dan bann Departman e sa i enkli a lenteryer bann departman e osi, i annan osi en mank networking, en mank sinerzi antre bann diferan Minister.  I annan bann mank kominikasyon, i annan mank lenformasyon, e mwan a donn ou en senp legzanp Mr Speaker, resaman Cabinet of Ministers fek pran en desizyon pour donn lotonomi Industrial Estate Authority pour zot kapab zer bann industrial estate, me selman zot ankor war zot pe ganny bokou difikilte avek MLUH, ler bann dimoun pe apros Industrial Estate Authority pe rod zot bann file, napa file. Oli file? Aplikasyon zot in submit depi, i annan depi 2009, 2010 ler la Industrial Estate Authority in ganny otononm pe rod sa bann aplikasyon napa, napa sinerzi.

Desizyon pe ganny pran dan en Minister san an kolabor avek en lot Minister, ouswa san konsilte avek en lot Minister. E ou vwar pour dir en ler I annan bann internal scuffle, zot pa pe tonm dakor avek kanmarad.  En lot legzanp ankor tipik se regardan, mon servi Praslin menm an regardan Later Lagrikiltir Praslin.  Minis pour Later ti anvi pran Later Lagrikiltir pour fer Housing Estate, Minister Lagrikiltir in met lipye ater, in pa’n aksepte.

So ou vwar bann scuffle dan Gouvernman, i mank sa networking, i mank sa kolaborasyon, i mank lenformasyon, i mank kominikasyon.   En dimoun en ler i le kekfwa i pe apply later ouswa lakaz or anything to that matter i ganny anvoye isi laba, departman isi, departman laba, i war li pe zis tourn an ron, i mank networking.  I mank sa sinerzi antre bann diferan departman Gouvernmantal.  Mr Speaker pour tou sa bann keksoz aranze, pour nou war plis efikasite dan bann servis Gouvernman en keksoz ki enportan pour nou gete, se nou bezwen get leadership.  Parey Onorab Loizeau in dir sa ki pli enportan pour nou gete se leadership.

At the end of the day it all come down to sa dimoun ki pe lead sa Departman e ultimately sa dimoun ki pli o ki tou. Prezidan ek son cabinet of Ministers, si nou napa bon leadership definitivman bann Departman pa pour deliver effectively lo standar ki zot merit delivre akoz en issue leadership.  Ki nou’n vwar, annou pran legzanp FI?  FIU sa kalite leadership ki nou’n vwar en leadership kot bann dimoun ti mank bann Polisi kler, zot sel azanda, zot sel goal sete pour anrisir zot lekor atraver etablir e kree bann shell companies, bann offshore companies kot zot ti pe  pey zot prop lekor, nou’n vwar. Sa i pa bann kalite leadership ki nou oule.  Nou oule bann leadership egzanpler, bann leaders ki annan bann Polisi kler, ki annan bann vizyon kler pour nou nasyon, kot zot anvi bouz nou pei pli devan.  Sa ki nou bezwen. At the end of the day ou pa kapab blanm sa pti dimoun anba.  Ou pa kapab blanm sa supervisor, sa manager, ou bezwen blanm sa enn ki pli o.  Akoz kot nou ete ozordi is the result of kalite leadership ki nou’n annan, e kalite leadership ki nou’n annan for 40 years Mr Speaker. E sa i fer mwan mazinen pour dir en ler i demann en change of leadership, a change of mindset, ok?   Foolishness is the same thing over and over again an expecting a different result.  Ki nou war for many years is the same kind of result.  Sa bann, nou war lenkonpetans pe kontinyen.  Nou pa pe vwar bann servis pe ganny delivre alaoter akoz i annan en lack of leadershipWe are not getting the right form of leadership.  E sa en keksoz ki nou bezwen get ladan. Nou bezwen empower nou bann dimoun en pe pli byen e menm nou bann leaders. Parey Onorab Loizeau in dir, i annan bokou dimoun ki ti annan sa abilite, ki ti kapab anmenn nou pei pli devan me zot pa’n ganny gete dan lepase.

Nou kontan ki la nou pe travay ansanm, finalman nou annan bann dimoun ki pe ganny sa loportinite pour ganny bann pozisyon leadership ki ozordi nou vwar keksoz finalman pe bouz pli devan. Mr Speaker mon konnen napa bokou letan me selman les mwan met, mwan a koup enn de bann keksoz ki mon ti pou koz lo la.  Mon ava bouz lo kote Ladministrasyon Distrik.

Onorab Gill in mansyonnen e in dir pour dir i annan en mistrust.  Dimoun pa trust bann Ladministrasyon Distrik, nou bezwen demann en kestyon akoz sa?   Mr Speaker sa i le senp rezon pour sa se ki dan lepase, nou tou nou bezwen agree pour dir Ladministrasyon Distrik i ganny servi koman en zouti politik.  Se la kot osi determinen lekel pour ganny later, lekel pour ganny lakaz, se a plizyer repriz lepase, zot in swazir lo en baz politik.  E sa keksoz ki nou pe sey sanze ozordi, sa ki keksoz ki tou lede latab nou’n agree pour dir bezwen arete, nou bezwen baz keksoz lo en fason ki en dimoun i merite, ouswa dapre bann kriter spesifik.

Mr Speaker bokou fwa bann Sef Departman, ouswa bann zofisye Gouvernman pa konn zot louvraz, ouswa zot pa konn zot rol.  Par egzanp plizyer DA dan distrik pa pe fer zot louvraz.  E zot pa pe engage zot bann District Team bann dimoun ki tonm anba zot responsabilite pour fer sir ki zot responsabilite ki zot in gannyen zot pe desarze.

Mr Speaker ler par fwa ki nou war ler bann Ladministrasyon Distrik zot pa fer zot louvraz byen, enn ler i reflekte lo nou.  Nou bann Manm Lasanble Nasyonal.  Akoz nou a plizyer repriz nou bezwen step in pour nou fer bann louvraz, sa bann keksoz ki DA i sipoze fer.  Se nou ki bezwen pouse pour sa bann DA fer zot louvraz, ouswa nou, nou bezwen al tap laport bann Minister akoz sa bann DA, sa bann reprezantan, sa bann DA pa pe fer zot louvraz e Local Government ki annan oversight lo DA pa pe fer sa louvraz oversight, zot pa pe monitor zot bann DA ase pour fer sir ki zot pe fer zot bann aktivite, zot bann travay ki zot sipoze fer dan distrik.  A plizyer repriz parey mon’n dir bann MNA nou bezwen vwar nou pe fer louvraz DA.  Nou vwar nou bezwen pe gete, pe sey tap en laport pour nou kapab ganny en pti larzan pour nou kapab sey fer en pti aktivite dan distrik kan DA dan lezot distrik pe ganny li 1.6, R1.7milyon tou le mwan pour fer bann aktivite, pour fer bann proze dan distrik, Mr Speaker. Ok?

 

MR DEPUTY SPEAKER

Wrap-up, wrap-up Onorab, wrap-up.

 

HON WAVEL WOODCOCK

Wi, wi Mr Speaker.  I enportan Mr Speaker ki nou annan en body ki pe monitor bann Administrater Distrik.  Akoz Mr Speaker parey mon’n dir se nou prezan ki finalman nou pe fer louvraz, nou pe fer en duplication louvraz ki en lot dimoun ki sipoze fer ki pa pe desarz son responsabilite,  ki pa pe pran son louvraz o serye, nou vwar nou, nou bezwen involved dan, enn ler dan alokasyon lakaz, proze drenaz dan distrik, met lalimyer dan distrik, kan sa bann keksoz i responsabilite Ladministrasyon Distrik, e zot pa pe pran zot responsabilite, e nou, nou bezwen toultan deryer zot pour fer sir ki zot pe fer zot louvraz ki ti kapab ganny fer fasilman olye ki nou bezwen deryer zot tou lazournen.  Mr Speaker sa i en keksoz ki nou bezwen get ladan e mwan mon dakor ki nou bezwen annan en body, en body reprezante par piblik ki i annan en oversight lo DA pour fer sir ki sa bann aktivite, bann louvraz ki zot merit fer dan distrik, zot pe fer.  En body parey Onorab Gill in koz lo la, in koz, da lepase nou’n koz lo District Council, la Onorab Gill in koz en pti pe, in anmenn en lot propozisyon, en Regional Council ki mwan mon santi pour dir i pour en bon nide, i en bon fason pour nou annan en oversight, lo Ladministrasyon Distrik, en Regional Council ki mon mazinen i pou kout nou pli bon marse an term lenfrastriktir, an term resours, an term eleksyon, e en Regional Council ou kapab annan bann Councilors ki en pti pe pli konpetan, dan en pool mwens dimoun olye ki nou pour annan parey en District Council pour 25 distrik, ki pour kout nou bokou larzan an term Bidze, ki nou annan nou en 6 to 7 Regional Council ki kapab fer sa louvraz dan en fason en pti pe pli efikas, e ki pour kout Gouvernman pli mwens larzan, e nou ava annan bann dimoun pli konpetan pour desarz sa bann responsabilite.  So Mr Speaker, avek sa mon pour donn sipor Mosyon ki Onorab Gill in met devan sa Lasanble e mersi Mr Speaker.

 

MR DEPUTY SPEAKER

Mersi Onorab. Onorab John Hoareau.

 

HON JOHN HOAREAU

Bonn apre midi Mr Speaker. Mersi Speaker.  Mr Speaker ler mon get Mosyon ki Onorab Gill in anmennen bomaten, i a pe demande ki en letid i ganny fer pour etablir nesesite reel mendev.  Me malerezman sa letid in fini ganny fer parski African Development Bank avek ANHRD, avek Minister ledikasyon, avek Roman Consultancy, in fer en letid koumsa e sa bann rezilta pour ganny devwale an Desanm.

Alor Mr Speaker, ler in entrodwir son Mosyon, in koz osi lo laspe performans dan servis piblik.  E se sa en pti pe ki mon anvi baz mon lentervansyon lo la akoz senpleman en letid lo mendev i pour zis donn nou lenformasyon lo mendev ki bezwen dan pei, dan diferan sekter, e ki kalite mendev ki ou bezwen, ensidswit.

Me size performans dan servis piblik i enn ki al bokou pli lwen ki sa si oule.  Ler nou get li lo en baz istorik, bokou bann pei Lafrik ek letid ki mon’n come across mon’n vwar ki bokou bann pei Lafrik ki’n pas atraver en period kolonyal, i osi pe vwar serten problenm prodiktivite serten problenm servis piblik.  E ler ou get o pli o profon, ou Vwar pour dir dan sa bann lepok apre ki in annan bann lendepandans dan sa bann pei, i annan osi sa ki nou apel en superiority inferiority complex kot bann dimoun ti krwar pour dir si nou pe donn en bon servis nou pe abes nou lekor, nou pe donn en bon servis, nou pe flat dimoun.  Alor nou pa bezwen flat dimoun, nou pa bezwen donn en bon servis.

So, malerezman, nou pa kapab les sa bann lefe kiltirel afekte nou devlopman pei.  Alor ki nou bezwen fer, nou bezwen rod bann fason ki nou kapab nurture si oule nou bann dimoun pour fer ki zot perform pli o nivo posib.  E ler nou pe get sa size parey mon pe dir, nou Gouvernman osi in realize pour dir i en problenm servis piblik. Nou osi, nou dan Lasanble la nou pe fer bokou tapaz lo sa size, e Gouvernman osi in komans realize parski an 2014 DPA avek Minis Finans in komans zisteman entrodwir sa ki nou apel result-based management dan servis piblik, e parey mon krwar Onorab Aglae ti koz lo la bomaten PPBB in ganny entrodwir ki enn sa bann pillars dan result-based management. Me ler ou get sekter piblik, i enportan nou konnen ki mekanizm ki egziste an se moman dan sa bann servis piblik ki pe ede pour amelyor performans.  From there on nou a kapab aprezan adres sa size ki mannyer nou pour kapab fer pour improve performans dan servis piblik.

Nou vwar par egzanp ler nou get bokou sirkonstans ki mannyer bann managers, bann diferan lorganizasyon, zot pe anmenn sa ki nou apel performance management dan zot lorganizasyon. Nou vwar ki laplipar di-tan zot mank sa labaz sa konesans management, e mon krwar bokou in ganny dir en pe lo la bomaten par Onorab William ki’n dir ki nou bezwen get sa size ledikasyon osi.  Ki mannyer nou empower sa bann managers, sa bann supervisors pour zot kapab anmenn amelyorasyon dan servis piblik.

E la par egzanp nou pe get vizyon, konbyen fwa ki en manager, i konsilte avek son bann subordinates pour gete si zot pe align zot ban target avek vizyon son lakonpannyen. I annan sa size rewardReward nou get li parey carrot and stick kot, kot si oule en dimoun i travay pli byen ou bezwen kapab osi konnen ki fason pour motiv li pour li travay pli byen. E i vin lo sa gro size motivasyon dan servis piblik.  Nou vwar pour dir bokou dimoun demotive.  E akoz bann rezon ki zot demotive?  En rezon prensipal se saler. 2enm rezon se zot pa santi zot parti sa lorganizasyon.  Zot pa ganny sa recognition parey nou dir.  Tou dimoun ki travay i travay akoz i annan serten needs e sa needs i drive son motivasyon.  E si ou pa pe nurture sa motivasyon, ou pe fail pour ou kapab met ou bann travayer anliny avek vizyon ki ou lorganizasyon i annan.

So sa i en pti pe anglob kisisa performans dan sa.  I tro fasil ennler pour nou zis ale blanm nou travayer pa oule fer sa, dan servis piblik ki i annan isi ki annan laba, travayer i sa. Me nou pa pe gete o profon ki pe arive dan servis piblik.  Ki mannyer nou kapab fer sa servis piblik vin pli performan, vin pli efikas.  Alor Mr Speaker mon pa pour tro long lo sa size. Me mon ti a osi kontan pour vwar ki sa Mosyon i ganny rewarded, konmsi refer son mo kot i ava pran kont pour dir nou pe adres en size performans rather ki en size mendev. Ok? Akoz mendev sa bann keksoz in fini ganny fer.  So i napa nesesite pour nou al refer en lot letid ankor akoz i annan enn ki pe al ganny prodwir la.  Mr Speaker, an terminan, mon ti a kontan koz en pti pe osi lo sa size eleksyon dan pour District Council ki propozisyon ki la aprezan se ki nou fer li Regional Council. E sa mon pour siport li 100 poursan.  Akoz mon pour siport li akoz la i annan en gran merit, sirtou en merit lo kote Bidzeter, kot olye nou partaz sa pti morso resours ki nou annan lo en gran lesel pour annan en kantite dimoun, me nou konsantre nou resours pour fer li viz plis lo sa servis li menm, rather ki lo kantite dimoun ki pe ganny anploye pour fer sa bann keksoz.

So sa mon pour totalman siport li, me mon pour annan en pti problenm pour mwan vot pour sa Mosyon zisteman akoz son wording.  Mersi.

 

MR DEPUTY SPEAKER

Mersi Onorab.  Onorab Ernesta.

 

HON PAUL ERNESTA

Mersi Mr Depite.  E bonn apre midi tou dimoun a lekout. Mr Depite, mon pa pour long, mon pe, mon lentervansyon i senpleman pour anmenn sipor pour sa Mosyon parey ki mon’n tande depi bomaten.  Tou bann entervenan ki’n entervenir avan mwan se byensir zot in demontre zot sipor anver sa Mosyon.

Me avan mon demare Mr Speaker, mon al pli lwen, i enportan, i annan serten konsern ki mon’n tande si oule, swa mon kapab dir i annan serten kaset ki’n ganny zwe, menm sanson, 40an ki nou la, I mean depi ler sa sistenm parti o pouvwar, nanryen pa’n ganny arrive, 40an isi, 40an laba, me les mwan a fer realize pandan sa 40an i pa zis siporter lepep e SPPF ki ti dan egzekitiv pe travay ti annan osi Lopozisyon lDS ki ti pe travay.  E si nou dan sa sityasyon ozordi se nou tou nou form parti ladan.

E bon Mr Speaker, mon pwen lo sa Mosyon kot mon pe get en laspe, en laspe kot nou’n koze, nou’n vwar ki nou’n koz en pe lo saler, me mwan, mon enterese avek sa laspe kiltir, i annan en serten kiltir ki’n ganny devlope dan tou lorganizasyon, e dan tou lorganizasyon travay i annan en kiltir.  Pour nou kapab bouze de la, sa Mosyon pe demann nou pour fer sa letid pour nou kapab evantyelman se sanz sa kalite kiltir pour fer sir ki nou annan en egzekitiv ki performan e en egzekitif ki efikas.  So nou bezwen get li. Apre i annan lot laspe kot nou bezwen gete.  Nou’n koz i annan dimoun ki la depi, ki dan en lorganizasyon travay, i en travayer plis ki 30an, a 25an ki lo en menm saler, ki pe ganny menm saler.  Son saler i pa, i pa ogmante, kote sa i vini.  Mon rapel letan mon ti dan, mon osi en serten tan mon ti dan egzekitiv, i annan sa bout kot nou apel, ki tou-le-z-an nou fer en appraisal; kot sa appraisal i annan serten rekomandasyon ki ganny sorti avek. I annan either kot nou vwar sa human resource officer, i vwar sa immediate supervisor, i vwar training, en rekomandasyon training pour sa staff or i annan serten increment.

Me malerezman letan nou vwar arivan son lannen answit sa logmantasyon si ti annan en increment R200 pour sa staff, i pa zanmen arive.  I montre nou konsern i la, kot nou bezwen annou dan seksyon HR annan en bon planifikasyon pour nou staff e pour nou lorganizasyon. Savedir nou bezwen annan nou en bon progression plan pour vwar.

Sa staff ozordi i lo plan A, i lo pwen A, demen bomaten, swa ankor dan 2an i bezwen kapab pe ariv li lo pwen B. E nou bezwen kapab vwar sa. Nou’n koz osi lo logmantasyon saler de-baz.  Sa i en pwen me osi si zanmen nou pe anmenn sa parallel logmantasyon ki nou pe dir, olye ki sa dimoun i pe ganny sa promosyon. Li i pe ganny son increment, i pour annan sa sanzman dan son, dan son, dan son devlopman.  E atraver sa, letan sa staff i ganny sa bann benefis, e sa i fer li motive.  I fer li motive pour li travay e pour li kontribye e osi nou bezwen adopte en kiltir kot sa staff, swa sa endividi i kapab anmenn, i kapab inisye keksoz dan son lorganizasyon travay.  E letan sa staff i pe santi li i pe kontribye, epi i pour santi li pli belong pour li kapab pe donn, pe donn plis lo son nivo performans dan son lorganizasyon travay e sa i kapab ed li pli byen ankor.

Mr Speaker e dan sa konteks mon krwar se nou fer li byen avek sa legzersis ki Onorab Gill in ganny demande pour ganny fer, mon pa vwar okenn baryer ki pour anpes annan efficiency and effectiveness dan tou lenstitisyon Gouvernman. E pour al lo mon dernyen pwen Mr Speaker parey mon’n dir mon pa pour tarde.  Nou’n koz osi lo Konsey Distrik ki mover Mosyon in koz lo la kot mon krwar ki i ekstrememan enportan kot nou revwar li.  E in dir i annan en total R50milyon dan son soz ki’n ganny mete dan Bidze pour sa. E letan mon get sa R50milyon – si nou met sa 50milyon diviz li par 26 i fer nou 1.9milyon ki nou kapab donn sa distrik pour li kapab performen.

Savedir sa Ladministrasyon Distrik i kapab parey in dir kot nou’n kapab idantifye sa bann problenm mendev ki annan, nou annan osi bann proze, lenplimantasyon bann proze dan distrik avek sa 1.4milyon ki Onorab in mansyonnen pli bonner, it is not enough!  Nou a dakor tou bann dimoun ki dan en distrik, nou a dakor ki i pa ase baze lo tou sa bann travay bann program ki nou annan, ki annan pour fer lo nivo distrik ki sa i kapab rann lavi nou bann zabitan pli meyer.  E so Mr Speaker an gro parey mon’n dir mon pe anmenn mwan sipor pour sa Mosyon, e ankor mon napa dout ki tou nou bann koleg pour siport sa Mosyon. Mersi.

 

MR DEPUTY SPEAKER

Mersi Onorab Ernesta.  Onorab Basil Hoareau.

 

HON BASIL HOAREAU

Mersi Mr Speaker bonn apre midi tou dimoun. Mr Speaker letan nou get Mosyon ki’n anmennen par Onorab Gill i kler. I pe demann en letid i ganny fer dan lenstitisyon Gouvernman pour vwar nesesite reel mendev dan servis piblik avek le bi pou fer ki performans dan servis piblik i vin pli efikas.  Mosyon i realize e i aksepte lefe ki nou annan problenm dan servis piblik.  Nou annan problenm service delivery, ki pa lo standar e an rezilta bann manm piblik i fristre e dezapwente.  Se sa ki Mosyon i rekonnet e Mosyon pe dir annou adres sa problenm. Annou rod en solisyon pour sa problenm, e fason ki nou pou, avan ki nou konnen ki solisyon nou pou anmennen pour rezourd sa problenm Mosyon pe dir annou fer en letid.  E mwan mon pe demande Mr Speaker ki letan sa letid i ganny fer.  Sa letid i ganny fer dan en fason onnet e avek en vre volonte.

An dot mo annou depouy sa servis piblik.  Annou get to the bottom of the problenm annou vwar kote problenm i ete. Si i annan problenm politik nou pou bezwen admet, si i annan lezot problenm nou pou bezwen aksepte. E parske selman letan nou aksepte larealite ki nou pou kapab adrese e rezourd sa problenm. Ki a en fason ki manm piblik i a ganny good quality services ki i a ganny delivre avek zot Mr Speaker.

Mr Speaker Mosyon i al dan direksyon bonn gouvernans e latransparans.  Parske letan nou annan en servis piblik ki delivre ki satisfer lekspektasyon nou manm piblik, i vedir ki annan bonn gouvernans.  E osi latransparans pou fer sir ki i annan bonn gouvernans.  Se sa ki Mosyon pe adrese e se dan sa lespri ki Mosyon mon mazinen ki loter Mosyon in anmenn in anmenn sa Mosyon devan nou Lasanble.

I kler ki nou annan en problenm service delivery dan servis piblik.  Nou bezwen train nou bann dimoun e osi edik zot.  Letan mon dir edike mon pa dir edik dan en fason formel met zot dan bann course ouswa bann konferans me osi edik zot dan en fason pou sanz mindset. Nou bezwen annan sa volonte pour sanze.  Nou bezwen annan sa volonte pour sanze, nou bann dimoun dan servis piblik i bezwen konpran nou bezwen donn servis dan en fason diligent.  Ki manm piblik i satisfe avek servis ki zot pe gannyen, parske apre tou manm piblik i annan tou drwa pour egzize ki dan servis piblik servis i bon.  Parske nou bann travayer dan servis piblik i ganny peye par avek tax payers money.

Se sa bann dimoun ki kontribye pour nou saler, pour saler bann dimoun dan servis piblik.  E alors zot annan en drwa, en rezon pour zot egzize ki sa servis ki bann travayer dan servis piblik pe donnen i  alaoter.  E i enportan ki bann servis i ganny delivre dan en fason ki fair, enparsyal e dan en fason responsab.  Letan mon dir fair ek enparsyal i vedir ki desizyon pa kapab ganny pran lo okenn ground politik ouswa lezot baz ki pa valab.  I bezwen ki tou desizyon ki ganny pran, si en dimoun i fer aplikasyon lakaz, en aplikasyon later ouswa lo okenn lezot servis ki sa pe ganny fer dan en fason transparan kler e san okenn diskriminasyon ou viktimizasyon.

E mon krwar sa i en keksoz ki nou pou bezwen ki’n deza konmans ganny fer.  Nou bezwen aksepte wi ti kapab annan sa bann problenm me  an menm tan nou bezwen aksepte pou dir i annan nou pe bouz dan right direction e i annan en vre volonte.  En vre volonte pour retir sa bann diskriminasyon, viktimizasyon ki kapab arive dan sistenm servis piblik.

Ladministrasyon Prezidan Faure pe bouze dan sa direksyon e bokou pe ganny fer.  E Onorab John Hoareau in koz lo PPBB, mon dakor avek sa. E la i donn nou osi koman en Lasanble sa sans, sa PPBB i donn nou konman en Lasanble sa sans pour nou fer sir dan nou oversight rol pour nou fer sir ki servis piblik pe delivre. Parske letan zot pou vin kot nou zot pou vin kot nou atraver lafen lannen avek pour bidze. Se la ki nou koman sa Lasanble nou bezwen fer sir pou dir gete larzan ki pe ganny allocate dan servis piblik avek bann diferan Departman ou Minister pe ganny servi dan en fason byen ki manm piblik pe trouv en rezilta.  An dot mo sa larzan ki ganny allocate avek sa Minister pe ganny convert dan en rezilta pozitiv dan servis ki pe ganny, donn manm piblik.

E se sa ki nou, nou bezwen fer nou dan sa Lasanble nou pou bezwen fer sir ki nou osi nou zwe nou rol pou fer sir ki servis delivery dan public service i improve.  E loter mosyon in koz lo fer letid.  Mwan ki mon krwar se wi nou fer sa letid, parey mon’n dir mon pe siport sa Mosyon.  Me apre sa letid nou bezwen toultan annan en independent assessment nou servis piblik.  Nou pa zis fer en letid letan sa letid in fini nou dir la la bann solisyon ki nou pe anmennen bann aksyon ki nou pe devret pe pran me apre ki aksyon in fini ganny pran nou kit la.  Mon krwar nou bezwen kontinyelman dan en fason i annan en body ki pou endepandaman asses.  E sa pou fer ki bann travayer dan servis piblik pou dir kontinyelman i annan en assessment ki pou annan lo servis delivery e sa pou keep them on their toes parey nou dir pour fer sir ki zot delivre.

E mon kontan ki byento pour annan sa Public Service Commission ki pou ganny etabli. Petet sa i a en rol ki sa Public Service Commission pour bezwen discharge, i pou bezwen desarze pou fer sir ki i pe evalye. E mon krwar sa Public Service Commission sa Bill ki pou vin devan nou ki mon asire ki nou donn, konman en Lasanble nou pou donn sipor sa Bill.  I pou en senp osi pour asire ki service delivery manm piblik i gannyen.  Mr Speaker letan nou koz lo public service nou’n koz lo bann travayer, bann civil servants, lo zot obligasyon pour zot donn en bon service me i osi enportan ki zot ganny sa lankourazman.

Lankourazman i vin an term saler par egzanp. I vre ki nou bezwen reget saler nou annan nou public, nou Lalwa lo la ki koz lo Public Salary Act ki koz lo lefe ki bezwen annan en striktir saler ki rezonnab.  E ki sa striktir saler i bezwen ganny revize tou le 5an.  Sa nou bezwen fer. E letan nou revize nou bezwen fer li sir ki sa saler ki nou pou donn nou bann travayer dan servis piblik i enn ki ankouraz zot, i enn ki permet zot osi dan zot lavi personnel viv zot en lavi konfortab.  E sa i a ed zot pour zot delivre dan zot servis. Parske ou pa kapab annan travayer ki fristre si ou travayer i fristre i pa pou delivre. Nou bezwen nou osi konpran ki nou bezwen siport an retour pour zot donn sa bon servis bann manm piblik.

Mr Speaker nou’n koz lo manm piblik, me osi i annan en group ki an partikilye bann envestiser. I pa zis nou bann Seselwa ki pou fristre letan napa en bon servis piblik. I bann envestiser, nou annan en bann envestiser etranze ki vin Sesel e ki ler servis pa bon zot pou dir be Sesel akfer mon pou vini pou fer biznes akfer mon pou vini pour envestir larzan. Nou koz lo ease of doing business.  Nou bezwen osi ede pour ki letan sa bann etranze i vin Sesel zot santi pou dir zot kapab fer business Sesel ki bann Lotorite Piblik, Lotorite Servis Piblik i delivre.

Parey nou’n dir nou pa kapab annan en dokiman ki pran ou pe ganny ou de mwan ki asize dan en biro ouswa petet letan ou annan en dokiman transfer.  Ouswa lezot dokiman ki ou anmenn kot Registrar General ki pran bokou letan pou li ganny adrese.  Sa i fer ki bann envestiser i pull out.  Parske envestiser i kre dyob, i kre lanplwa e i osi anmenn reveni dan nou pei.  Mr Speaker la mon pou koz lo en size ki mon pe eksperyanse e ki bokou avoka mon konnen pe eksperyanse an relasyon ek sanksyon.  I dir ou you don’t kick a man when he is down, me selman mon pou koz en kou lo FIU la.

Lo FIU parske ou annan en sityasyon ozordi en legzanp kler, kot sanksyon pe ganny fer pour bann etranze pou aste later Sesel.  E i annan bann etranze ki pe vini pour envestir e en sanksyon swa ou pou donn li swa ou pa pou donn li, pour mwan en dele letan 6 mwan in devret en desizyon ganny pran swa ou pou dir li wi, swa ou pou dir li non.  Me i annan bann sityasyon ki devlope kot nou vwar sa bann aplikasyon in ganny anvoye kot FIU pou li fer son diligence lo sa due diligence lo sa potential purchaser.  Me ki arive i annan aplikasyon 9 mwan – 1 an i ankor kot FIU pe rode ki pou arive avek!

En desizyon pa ankor ganny donnen.  Me sa i montre ou  sa i pe afekte, sa i service delivery en lorganizasyon parey FIU ki sipoze efficient pa pe delivre.  E i pe rann bann envestiser fristre e bokou envestiser in pull out akoz sa.  Parske zot dir ou be mon pou vin Sesel mon premye leksperyans mon pe vwar i sa, be akfer mon pou reste?   Nou bezwen improve.  Nou bezwen fer ki, i annan de keksoz i pa fer sans pou donn en dimoun en rezilta ki pozitiv me sa rezilta in pran bokou letan.

I pa fer sans pou ou donn en dimoun osi en rezilta ki negatif ki pa bon.  Menm si ou’n donn li vit, ou bezwen annan en balans.  Enn ki efficient in terms of timing and in terms of quality. Nou bezwen fer sir nou ganny sa balans tre byen. E Mr Speaker an terminen mon pou koz en pe lo district, briyevman lo District Council.

Wi mwan mon pa krwar pou dir nou devret al dan en eleksyon kot nou pou annan nou.  Eleksyon dan 26 distrik pour elekte 26 District Councils, mon pa krwar nou devret fer sa.   E mon pa krwar sa pour ede anmenn pli bon servis dan distrik.  Sa ki nou pe devret pe fer se desantraliz bann servis met zot pli pre dan distrik.  Beef up nou ladministrasyon distrik fer ki nou bann dimoun ki nou met dan Ladministrasyon Distrik nou donn zot sa nou empower zot pour zot delivre en pli bon servis pour nou bann manm piblik.  Sa nou devret pe fer sa.

Mon dakor avek nide pour annan en Regional Council, ki li sa Regional Council li i a la zis pou oversee bann distrik ki tonm anba li pou fer sir ki zot pe delivre.  E avek sa Mr Speaker mon pou dir mon pou napa lezitasyon pour donn mon siport sa Mosyon, parske mon krwar sa Mosyon pe adres en vre problenm, en vre problenm ki pe afekte nou bann sitwayen e en problenm ki nou bezwen trouv en solisyon vitman, en solisyon permanan.  Mersi Mr Speaker.

 

MR DEPUTY SPEAKER

Mersi Onorab Hoareau.  Onorab Afif.

 

HON AHMED AFIF

Mersi Mr Speaker.   Mr Speaker mon’n ekout atantivman bann diferan komanter ki’n ganny, ki’n ganny dir bomaten vreman siport sa Mosyon par Onorab Gill ki li i pe demann pou fer en letid,  pour nou regarde vreman akoz Gouvernman pa efikas mon pou konmans an di-z-an dir ki mon totalman dakor avek li ki i annan bokou landrwa pour nou aranze si nou pou dir Gouvernman pa efikas.  Mon pa pou koz lo tousala akoz bokou in ganny dir lakaz par egzanp nou annan en point system me personn pa konnen ki mannyer sa point system i marse.  Mwan ziska ozordi mon annan plis ki 70 ka Anse Etoile dimoun ki pe rod en lakaz ki malerezman olye al kot en DA oubyen kot Gouvernman pour zot konnen kote zot ete lo sa lalis, personn pa konnen.

E finalman zot trouv zot pe retourn kot MNA, MNA i pran zot ka li osi kantmenm i pa vreman i pa egzekitiv me selman mon sey ede parske ou santi sa konpasyon pou bann dimoun ki dan en problenm, en dimoun ki son lakaz in brile, la mon pe mazin bann fanmir Juliette par egzanp ki annan 3an ki zot lakaz in brile e ziska ozordi zot pe trimouse pour zot kapab ganny en landrwa pour reste.  E sa problenm pa ankor ganny rezourd. Mon pe mazin biro DA li menm ki i inonde toulezour avek tou kalite problenm e par-ler byensir se zot menm ki pa efikas ki pa pe fer ase pour sa bann ka.

Be de lot kote ou war ki Gouvernman osi i annan en gran birokrasi ki bokou keksoz i bloke, e finalman tou dimoun i vir an ron e pa konnen kot pou ale.  Mon get ozordi i annan bann ka ki ou ti a mazinen ki ti kapab rezourd ase vitman par egzanp sa bann dimoun ki’n travay avek SVPD kot zot pe reklanmen ki i annan konpansasyon ki zot merit pe ganny peye, parske in fer servis dan larme apre zot in al dan lapolis saler in sanze eksetera. Me bann pti keksoz koumsa kot ou vwar serten dimoun pe zis ganny en tyek avek en let i dir li la i la ou larzan ki nou drwa ou me napa detay kalkilasyon. Ankor sa Mosyon pe koz lo efikasite be oli efikasite si prezan apre ki ou’n pey sa dimoun, sa dimoun pa konnen akoz ou’n pey li sa sonm; i pa konnen ki detay i annan ladan prezan ki i fer i tourn ankor kot menm biro.  Detrwa zot pa tro lontan pase mon ti vwar zot devan baro State House zot pe dir zot bezwen vwar Prezidan parske zot pa konnen ki mannyer sa kalkilasyon in ganny fer.

Alor, si nou annan pour nou aranze onnetman Onorab Gill, ou pa bezwen bokou letid mon krwar mwan pour mwan set en keksoz annan bann dimoun responsab dan diferan Departman Gouvernman, ki konnen ki mannyer pour deal avek piblik, ki mannyer pour eksplik piblik, akoz zot desizyon in ganny fer dan tel fason e mon krwar piblik i en piblik ki toleran, i en piblik ki konpran si nou eksplik zot byen,  mwan mon krwar dimoun pou vwar pou dir set en Gouvernman ki responsab, set en Gouvernman konpasyon, set en Gouvernman ki anmenn solisyon. Parske souvandfwa nou pa pe vwar ase solisyon. Mon get par egzanp ozordi ou get Revenue Commission. Ankor nou pe koz lefikasite dan sa Mosyon.

E li ozordi se li menm li ki anmas plis reveni ki antre dan Kof Gouvernman se Revenue Commission.  E ziska ozordi nou pa ankor vwar en Komisyoner nou annan enn Acting e pour en bon pe letan ziska ler dan Lasanble sirtou nou’n fer en kantite tapaz nou dir be i annan gro larzan ki outstanding ki mannyer nou napa en dimoun ki responsab ki ansarz?   E mwan konman en manm FPAC mwan osi okouran zot annan, zot reklanmen Minis ti dir i annan 1.3 bilyon savedir 1300milyon Roupi ki deor.  Apre zot in eksplike ki pa tou ki neseserman zot drwa i annan en pe ki dimoun zot dir zot pa drwa me SRC i ankor reklanmen zot drwa eksetera.

Me ki pe arive ek tousala?   Nou annan forse 2, ou 3 dimoun dan sa gro lorganizasyon, ki pe telefonn bann dimoun ki drwa.  E menm ler i pe telefonnen li osi son rikord pa annord.  Prezan i pa tro konnen ki mannyer i pou al deal avek sa bann dimoun ki swadizan drwa.  E alor pour mwan pa bezwen letid ou bezwen senpleman regard dan  sa bann lorganizasyon e met dimoun ki konpetan sa i enn premye.  2enm mwan mon krwar, met bann dimoun ki ou donn zot sa pouvwar anba Lalwa. Ou pa kapab annan dimoun ki i kontinyen pour li fer son travay dapre en kout telefonn.  En dimoun anler i telefonn i dir li be non sa ou fer koumsa sa.  I pa get Lalwa li.  I pa enterese ek Lalwa li i abitye ganny en phone call pou dir li ki mannyer pour fer keksoz.  Sanz sa.  Annou pa fer letid sanz sa mantalite dir li, ‘’Ou dan en lorganizasyon laplipar lorganizasyon Gouvernman i ganny gide par en Lalwa swiv ou Lalwa.’’ Tre senp personn pa pou enterfer ek ou.

Mon krwar en lot keksoz nou devret ganny sanze – aboli sa lafreyer dan civil servant en kantite civil servant i per en kantite fwa zot pou dir ek ou. ‘’Ou konnen kwa ki nou per nou?  Nou per nou pou al devan FPAC Lasanble oubyen nou per taler nou a ganny kriye dan Lasanble.’’ Be Lasanble i pa en lorganizasyon ki fer dimoun per li.  Lasanble i la pour donn oversight si ou fer keksoz byen, si ou fer keksoz byen mon pa krwar pou annan okenn gran kestyon pou ou bezwen per pou vin devan en Lasanble.  Si ler ou pe al donn Kontra pa parey FIU in donn Kontra son direkter pour li pey son lekor.  Ou fer Kontra byen ou fer li dan en fason kot ou annan detrwa lof ou fer en tender dan en fason kler.  Akfer FPAC pou kriy ou?  Akfer ou bezwen vin devan Lasanble pour vin reponn bann kestyon anbarasan?   Se bann keksoz koumsa ki nou devret travay fortman pour nou sanze, ki pou anmenn en sanzman dan la fason ki mannyer keksoz i ganny fer Sesel.

Answit akoz ankouraz etranze vin Sesel nou’n koze lo plizyer rezon akoz nou napa bokou Seselwa ozordi mon pou al ladan. Be annou envit nou bann Seselwa profesyonnel ki aletranze petet, oubyen menm Sesel ki petet i dan sekter prive si nou, nou fer zot vwar pou dir dan Gouvernman ou kapab vin travay ozordi san bezwen per. San bezwen per ki ou pou ganny, ou pou ganny regarde en fason ou fanmir ti tel kalite, ti annan tel pwennvi.  Alor ou pa pou monte si nou tir sa lafreyer dan lespri en kantite Seselwa zot pou vini zot.  E ou pou ganny ou en civil service ki ou pou fyer. Parske mwan mon konnen en mon krwar fortman ladan pou dir Seselwa i kapab travay vreman, vreman byen. Annefe i annan bokou Seselwa mon konnen ki travay aletranze ki en model menm dan sa bann pei kot zot pe travay.

Kantite Seselwa i konn travay e zot mon krwar avek en mantalite kot ou met zot dan en landrwa kot zot kapab vin prodiktiv kot zot ganny respe kot zot santi zot kapab fer keksoz dan en fason kot zot servi linisyativ.  Si ou kree sa lanvironnman ou pou ganny bokou Seselwa ki anvi travay.   E finalman Mr Speaker mon ti anvi zis dir en pti parol lo sa propozisyon olye annan plizyer Council annou fer li detrwa Council mon krwar sa i, i en keksoz ki fer sans finansyelman.

Sesel i en pti pei.  I annan pei dan lerop par egzanp kot en council i kapab reprezant 90mil dimoun.  Be nou avek 90mil, si nou pou al fer 25 Konsey mon krwar nou pa pe tro efikas.  Alor lide, lide pour annan Regional Council fer li vin en pe pli, pli efikas, pli pti, pli streamline si ou le. I en lide ki mwan mon siporte me a kondisyon ki lafason ki i ganny zere, i reflekte bokou dezir popilasyon. Par egzanp si zot vwar sa bann DA dan sa bann landrwa pe zwe politik eksetera, pa deserve zot byen.  Fodre nou annan bann DA ki reprezantatif.  Alor fodre nou annan lo sa bann Konsey, bann dimoun ki pans en pe parey ki nou pe koze la. I bezwen reprezantatif en pe lo balans ki nou vwar en pe dan Lasanble.  E mon krwar nou devret al lo sa bann laliny koumsa premyerman i pou redwir kou lo Gouvernman. Dezyenmman i pou donn dimoun en sans pou vwar nouvo figir oubyen en fason administre ki reflekte lafason zot panse ozordi.  E finalman mon krwar i pou anmenn pli gran lefikasite parske tou dimoun pou travay anba en striktir ki bokou pli kler.

E avek sa Mr Speaker mon ti a kontan aport mon siport pour sa Mosyon.  E mon krwar annou pa al fer tro gran letid.  I annan keksoz ki senp ki nou tou nou konnen i kapab marse ozordi.  Annou met dimoun an plas ki konn travay ki anvi travay dan lentere Sesel avan tou. E mon krwar nou pou war en sanzman dan lafason keksoz i mase dan pei.  Mersi Mr Speaker.

 

MR DEPUTY SPEAKER

Mersi Onorab Afif.  Onorab Valmont.

 

HON JUDE VALMONT

Mersi, bonn apre midi Mr Speaker, bonn apre midi tou koleg Onorab, e bonn apre midi tou Seselwa ki a lekout.

Mr Speaker mon pou, mon pou konmanse par dir mon osi mon pou siport sa Mosyon.  Mon santi sa Mosyon i en bon Mosyon in ariv en bon letan akoz mon krwar Onorab Gill ler in prezant sa Mosyon in lans en lapel for avek Egzekitif zisteman pou amelyor servis delivery. Mon krwar bokou Onorab in koz lo la oparavan, nou’n menm, dan lepase nou’n koze lo repons ki nou donn manm piblik dan en kour dire letan; file ki nou sipoze fer bouze dan biro e tousala.  I osi i pe lans lapel pour nou amelyor kondisyon travayer.

Nou konnen i annan diferan travayer dan servis piblik. I annan ki travay dir, travay long letan e se sa nou pe lans en lapel zisteman pou amelyor zot kondisyon par donn zot bann incentives; revwar zot saler mon’n koz lo la depi lo konmansman. E mon’n war lezot koleg Onorab in zwenn mwan pour fer sa lapel pou revwar kad saler nou bann travayer e nou’n dir 5050 ozordi i pa nanryen. Alor sa osi, sa Mosyon pe demande ki nou fer sa.  E osi i pe menm demande ler mwan mon analiz li i pe al pli profon. I pe dir nou annou ansanm ler nou dir revize, regete nou anvi met standar dan servis piblik. nou anvi war travay o pli o kalite e nou anvi vwar zisteman bann output.  E ler ou fer letid ou bezwen vwar kantite travay ki en dimoun pe fer e ki son output.

La Mr Speaker mon koz dan, koman en ansyen direkter pour protocol dan Foreign Affairs.  E mon ti pran sa labitid ki koman sa dimoun ki pe lead en seksyon ou pran sa letan ou asiz ek ou travayer de tanzantan ou demann ek li ki son problenm.  Ou rod fason pou adrese e zisteman nou pe demann bann ki dan leadership ozordi dan landrwa travay bann Direkter, Direkter Zeneral e menm o pli o nivo, pou asiz ek zot staff ekout zot, e get dan zot welfare.  Mr Speaker mon pou koz en pti pe, mon pou koz an faver sa nide, dan plas annan en Konsey 25 Konsey, 25 Konsey o nivo distrik nou al en pti pe ver rezyonal.  Akoz  mon dir sa Mr Speaker, se ki petet sa i ava ede elimin birokrasi.  I a ede elimin birokrasi e osi petet anmenn en pe plis kordinasyon.   Mon pran mon legzanp Pointe Larue ler nou get most pli probableman pou annan rezyon les pou tonm Anse aux Pins, Cascade e petet menm Au Cap. Ler nou gete pou annan sa kominikasyon sa kordinasyon petet ler nou get onivo proze Kapital i a en keksoz ki mon’n fer sorti oparavan en semen. E mon konnen i annan lezot distrik pe lager pou fer sa, ler nou dir nou pou fer semen proze dan milyon.  Mon krwar i ganny lavwa plis ki en distrik e zisteman Anse Aux Pins, Pointe Larue ler nou dir konekte semen Karyol ek Anse Dejeuner nou pe get ver lavan.  I en keksoz ki pou benefisye zisteman tou Seselwa ki pe pas atraver sa landrwa.  Akoz i pou ede zisteman elimin trafik.

E Mr Speaker ler mon koz lo sa sistenm rezyonal la, sa konsey rezyonal petet ou konnen ler nou a ganny, ler in fer li rezyonal nou a nobou save petet larzan sa larzan i ava al dan zisteman amelyor e ranforsi kapasite nou Ladministrasyon Distrik.  Nou tou nou konnen bokou MNA oparavan ki’n koze avan in refer sorti ki nou DA i travay dir zot bann staff i travay bokou, e mwan osi mon’n ganny sans konman MNA dan mon distrik mon’n vwar.  DA i sa dimoun ki ler i dir minwi, 1er bomaten en dife i arive i parmi premye pou ganny kontakte, e dezas i arive, e i la.  E zisteman i la Sanmdi i la Dimans e MNA I parey, alor ki mon demande petet ler nou ranforsi Ladministrasyon Distrik nou gete lekel bann pozisyon ki nou kapab mete an plis.  Nou bezwen sa ki nou dir bann foot soldiers sa ki nou dir bann field workers bann dimoun ki ler DA petet i dan meeting, i pa kapab i annan dimoun pou al fer lenspeksyon, i annan dimoun pou swiv bann pti proze pou fer sir ki zisteman larzan leta, larzan tax pa pe ganny gaspiye.  I annan sa bon monitoring.

Mr Speaker mon pa pou long mon pou zis koz en pti pe osi lo rol Ladministrasyon Distrik li menm zisteman Ladministrasyon Distrik i sa pwen fokal ant lepep, lepep Seselwa mon pe dir avek zisteman Gouvernman Santral. E alor ler mon dir ogmant kapasite ladministrasyon distrik li menm i a ede annan sa follow-up akoz bokou souvandfwa piblik Seselwa lepep zot souvandfwa annan fristrasyon zisteman, akoz napa sa follow-up e ki zot fer zot onivo distrik ou ekspekte ou lokalman ou pe vini kot en Ladministrasyon Distrik, ou pe antre dan en biro ou pe dir i annan tel keksoz pou fer e zisteman ou ekspekte en repons dan en kour dele letan.  Me souvandfwa i pa lafot Ladministrasyon Distrik li menm ou byen sa administrater li.  I zis ki li osi petet ler i anvoy lenformasyon anba, i bezwen esper ankor detrwa semenn e zot bezwen follow-up i ale vini. Alor se pour sa rezon  petet ler nou ogmant kapasite nou ganny en pe plis dimoun.  I annan dimoun ki kapab sistematikman swiv serten keksoz e fer sir i bouze.  Mr Speaker mon rapel 2 semenn pase mon ti attend en workshop ki Mer Lavil ti fer lo desantralizasyon.  Zisteman zot ti koz, ti annan 2 msye sorti UCLGA zot ti pe fer prezantasyon zot ti dir desantralizasyon i pa neseserman ki ou annan en Konsey ki dan sa distrik ki egziste.  Mon krwar nou bezwen en pe letan, akoz zisteman pour nou annan bann councilors dan bann distrik nou bezwen annan fasilite neseser.  Alor nou bezwen konmans get fason desantraliz serten servis.  Ler mon pe dir sa Mr Speaker, mon pe dir  parey onivo devlopman kominoter, petet sak distrik dan plas annan zot project officer ki reprezant 5, 6 distrik Santral Victoria, petet nou kapab ogmant lakantite anvoy enn dan sak distrik.  E osi nou get lo kote zenn.  Petet ler nou dir desantralize i annan youth workers me selman sipor i merit ankor sipor lo kote zenn.  E Mr Speaker pou konklir mon ti a swete ki nou dir, mon’n tann mansyonnen i annan sa 50milyon petet nou kapab ler i fer rezyonal, Konsey Rezyonal petet i a reste omwen 25milyon petet en ti pe plis.  So, ki mwan mon sizere, mon sizere ki nou envestir. Parey Onorab Ernesta in refer sorti e zisteman nou envestir dan bann proze kominoter kot lepep Seselwa a vwar kot zot larzan tax i vin direkteman devan zot laport. En semen, en pti peron pou fasilit en Trwazyenm-az tousala i bann keksoz ki nou kapab fer.   E osi amelyor serten kondisyon lakaz dan bann distrik, nou ozordi bokou nou, nou aksepte ozordi ki problenm mazer se problenm lakaz, be pa zis en matter of konstri en nouvo lakaz Mr Speaker i annan dimoun i santi li i dan problenm lakaz zisteman, akoz i pe reste dan en lakaz ki kondisyon pa bon.

Alor petet ek sa larzan distrik petet i a ganny en pti larzan an plis ki i kapab fer sa bann pti keksoz pou ed nou bann dimoun.  E lo sa not Mr. Speaker mon ti a demann tou lezot koleg Onorab pou donn sipor sa Mosyon e pour ede ki nou lans en lapel ansanm konman en Lasanble pou lans en lapel ek Egzekitiv pour egzakteman fer sa resers e nobou improve kondisyon nou bann travayer ki travay dir pour nou Nasyon.  Mersi.

 

MR DEPUTY SPEAKER

Mersi Onorab Valmont.  Onorab Henrie.

 

HON GERVAIS HENRIE

Mersi Mr. Speaker, bonn apre midi tou dimoun Mr. Speaker Mosyon ki devan Lasanble i vre i senp selman ler nou’n lir li son wording, i kapab pas konman konplike be selman i zis demann en letid pou konn kapasite mendev dan bann Legzikitiv Gouvernman ouswa servis piblik mwan koumsa mon vwar li.  Pour konn son lafors avek son mankman rezilta sa letid a petet ede fer servis piblik vin pli efikas e efektiv.

Me dan son prezantasyon loter Mosyon in entrodwi en nouvo size, ki a mon avi i ti merit vin dan nou Lasanble konman en nouvo size lo li tousel.  Sa i konsern Eleksyon Konsey Distrik ki merit fer an 2018.

Pou size letid mendev dan sekter piblik mon pou retourn lo la ankor en pti moman.  Me pou zafer Konsey Distrik mon krwar Onorab Gill pour sa politisyen ki i ete i swa pe maske ouswa abes lenportans sa deba lo en size sitan enportan.  Parey mon’n dir mon repete mon krwar i ti merit en size a stand alone issue devan nou Lasanble.  Mon reaksyon bref lo sa propozisyon i se ki wi demokrasi i annan en kou. Ou’n dir 50milyon Roupi me eski kou tousel i sifi pou konvenk Seselwa otreman?   Sa Eleksyon Konsey Distrik mwan mon krwar si ti fer ti pou en Referendum lo prezidans Mr Danny Faure.

Son rezilta ti kapab presipit disparisyon Parti Lepep lo lasenn politik Sesel, mark mon parol.  Mon konnen e zot pa anvi sibir entel imilyasyon ler zot ankor pe sennyen apre sa defet 15 lo 10.  Alor mwan mon krwar i ankor en pe boner pour nou diskit lo la nou kontinyen koze.  Mr Speaker mon pou retourn lo premye pwen pour sa kestyon lodit lo mendev e efikasite servis piblik.  Lefe ki sa Mosyon in anmennen par en manm Parti Lepep mon vwar sa i en afron.  Mon repete en afron pour zot Prezidan aktyel, e menm zot ansyen Prezidan. Akoz mon dir sa, demann ou lekor akoz en parti politik i merit fonksyonnen.   Zot al dan en eleksyon avek en manifesto ki elabor klerman vizyon en parti pour sa pei si i ganny eleksyon.

Eleksyon Prezidansyel 2015 ti ranporte mannyer sa in posib mon pa konnen, ziska ozordi par Parti Lepep son kandida.  Anba en Manifesto avek tenm ansanm ki SNP ti’n deza servi oparavan.  2 sapit dan zot Manifesto ozordi in merit pe delivre lo sa ki Onorab Gill pe rode.  I annan en sapit ki koz lo ‘’Travay dir ansanm.’’ E en lot i koz lo ‘’En Gouvernman ki travay e delivre pou ou.’’  Alor ki mannyer zot parti i fonksyonnen? Mon pe demann mon lekor. Eski zot Komite Santral i nepli donn direktiv lo polisi Cabinet Minis ki an retour i enplimant dan Gouvernman?  Ki mannyer Depite Sekreter Zeneral Parti Lepep pe dir nou Ladministrasyon Msye Faure ki annan 8 Minis, 8, ki manm Komite Santral e ki Prezidan sa menm parti i osi form parti Cabinet pe enplimant zot Manifesto.  Ki mannyer i marse sa eski zot nepli ansanm.  Sa mon kestyon, Ki plan ki progranm ki zot pe servi alors pou diriz Sesel ozordi letan mon pe koze?  Eski zot annan en vizyon kler ouswa zot pe zis fer sa ki LDS dan Lasanble i dir zot fer?  Ler mon’n ekout bann entervenan lo lot kote latab Mr Speaker ou a krwar zot, zot en parti minoriter ki apel parti lepep dan Lasanble.  Nou, nou en parti mazorite ki apel LDS apre i annan en Cabinet laba ki dirize pa Msye Faure.

Konmsi oli sa koerans ant zot ki sorti dan menm parti avek Cabinet.  I enportan ki popilasyon Sesel i rekonforte pou dir ki kaptenn avek segon aktyel i konnen ki zot pe fer e pa pe anmenn nou dan en presipis.  I fer 1an  depi ki Prezidan Michel ti kit labar an tayan e en Mosyon li i ganny anmennen 1an pli tar parey mon’n dir ki dir i annan gran defayans dan servis piblik.  Eski sa i zot fason pou ziz son aksyon ki i pa’n delivre pour elev standar servis piblik dan nou pei?   Anba Msye Michel e menm avan li, in annan plizyer form reform pour esey redres servis piblik nou bezwen admet. Si nou retourn detrwa lannen an aryer ti annan sa ki ti apel MERP an 2002.  Dan son prop fason dan ladministrasyon Mr Rene sa letan MERP ti pe sey redres lekonomi e par konsekans servis piblik.

Apre ti vin reform IMF an 2008. Zot rapel depar volonte an 2009 e apre sa in annan bann lentrodiksyon bann progranm ki plizyer mon bann koleg in koz lo la, par egzanp programme performance-based bugeting. Akote tousala in osi annan National Human Resource Development Plan.  Son premye ti an 1989 ki ti ganny drafte e li i ti kouver peryod 90 ziska 95, ansanm avek en National Development Plan.  Apre ant 2012 a 2016 i annan en lot plan ki ANHRD ti ganny led Labank Devlopman Afriken ki mon koleg Onorab Hoareau i koz lo la. Alor tousala, tou sa bann lannen ki’n pase in annan en lesey pour anmenn some sort of reform, me se Cabinet e bann Minis ki’n fail lepep Seselwa.  Nou bezwen dir.  Akoz at the end of the day kote responsabilite i arete?   I bezwen aret a latet tou sa bann Minister e Departman.  Apre i annan en lot zafer fodre nou pa bliye pli bon lodit lo performans piblik se rapor Oditer Zeneral ki sorti tou–le-z-an.

Ki mannyer Prezidan Rene, Prezidan Michel e Prezidan Faure i kapab soutir en direkter en Direkter Zeneral en CEO, en PS en Minis kan rapor oditer apre rapor nou vwar poudir zot pa pe delivre, akoz i annan bann mankman prosedir pa pe ganny swiv, larzan pa kapab accounted for. Nou pe koz delivery dan servis piblik sa nou.   Minis i perdi 4.5 milyon Dolar.  Selman nou zwe musical chairs avek.  CEO i sorti dan en Lazans i al dan en lot, i al dan en lot en legzanp ki mon pe mazinen san ki in fer keksoz mal.  Enn i sorti dan SPTC i al dan SLA – fini SLA i an end-up dan DBS, kontinyen vir an ron. Kan ki en Direkter – Direkter Zeneral, CEO, PS, Minis pou ganny appraise parey yer nou’n tann bann teachers zot, zot bezwen score 75 poursan zot. Apre pa delivre.  Selman nou pe pil lo travayer dan servis piblik. Mwan mon krwar sa i pa byen. Responsabilite delivre bon servis, i retonm lo zepol pa zis travayer. Travayer wi i merit ganny byen manage, ankouraze, ankadre, antrennen, byen peye, rekonpanse e reprimande ler in ler, ler i neseser.

Si nou servis piblik pa a la oter sepa zis zot ki tor. Mr Speaker mwan mon rapel ler mon ti fek komans travay SBC. Sa lepok mon dan nouvel radyo e mon ti annan en editor ki ti apel George, Robert George ti ansyen MNA pou distrik Baie Lazare. Enn bann pli bon sef ki mon ti annan, akoz avan nou ti al en interview i ti pou brief nou ki kalite kestyon nou kapab demande. Letan nou’n retournen premye keksoz i dir ou donn en pti kontrandi sa nouvel set a dir pou konnen si byen ou’n konpran dan 1 minit. Apre ler ou pe edit ou pe ekrir ou script tanzantan i pe pase avan ou al rikorde, i lir, i aranze.  Konmsi se sa ki mon’n fek  dir en travayer ou manage li ou ankadre li tanzantan, i kriy nou in, i demann nou konmsi  ki mannyer nou pe santi bann keksoz koumsa.  Eski nou pe fer sa ase dan servis piblik ozordi?

A lafen lazournen, nou bezwen mazin byen i annan en servis piblik ki la an plas. Konbyen politisyen ki dan servis piblik ozordi; ki swa in deza en ansyen MNA, in deza en ansyen kandida eleksyon, i nou fanmir i nou zanmi zot ki dan pozisyon leadership.  Alor nou bezwen ozordi demann nou lekor ki mannyer sa bann keksoz in marse.  Mr Speaker pour mwan kontinyen permet mwan nonm 12 non; 12 non. mon a komans Tit Morin, Khishna Labonte, Robert Bibi, Michelle Vital, Roger Legras, Clive Elizabeth, Jack Valentin, Maxim Tirant, Daniel Dogley, James Savy, Raymond Wong, Andre Vital.

Sa en douzenn Seselwa konpetan eksperyanse e kalifye ki ti ganny pouse mal apropo dan Lapolis an 2003. Menm Lakour ti rule apre ki zot pouse pa ti an a-kor avek Lalwa pei apre ki zot ti ganny pouse nou’n bezwen rod Irlande, Sid Afriken pou ranplas zot e pey zot plis ki Prezidan.  Prezidan!  Set a dir zot pe ganny zot 100mil Roupi par mwan. Parti Lepep ki’n o-pouvwar dan sa bann letan e ziska la ozordi zot in pil lo nou profesyonnel zis akoz zot lopinyon politik.  Zot in okazyonn brain drain dan Sesel.  Zot in gonfle servis piblik avek zis sa ki siport zot sel kalifikasyon siport Parti Lepep. Get konbyen kandida parti lepep Lasanble Nasyonal an 2016 e ansyen MNA 5enm Lasanble ki’n ganny rakle dan Gouvernman resaman.

Prezan dan milye tousala pa oubliye lekel Minis ki ansarz Ladministrasyon Servis Piblik e ki ankor pe ansarz.  Pa lot ki Mr Danny Faure.  E si nou pe koz, si nou pe demann en letid lo akoz inefikasite servis piblik zot pe blanm lekel?    Lannen pase a lokazyon lazournen servis piblik Mr Faure ti lans en dokiman apele; ‘’A Responsive Public Service, Serving Peoples’ Need.’’ I reponn ki sa ki sa Mosyon pe dir sa dokiman.  Oli li sa dokiman la?  I lo en shelf parla State House?  Annou al rode tir lapousyer lo la.  Dan son Diskour i ti promet i pou met an plas en senp survey atraver servis piblik, pou ganny lopinyon konsern avek konplent piblik.  In fer sa?  Si ti’n fer ti a pe reponn bann kestyon ki sa Mosyon pe dir nou.  Li menm li sa Msye Faure in vin isi la, in debout la in dir ek nou, ‘’Piblik pa en sif lo file!’’ Dan Lasanble in dir sa. Bann public servant laba deor in tande.  Lo televizyon nou’n tann li dir pou dir ki kliyan ki piblik Seselwa fodre i ganny en larepons dan 48 erdtan.  Nou’n tann li dir.   Be oli?   Mwan konman MNA mon’n bezwen call diferan Lazans tou lazournen, pou demande pou dir be ekout en kou, enn mon constituent la depi Zen in demann en keksoz zis dir li wi ouswa non.  Tou lazournen nou bezwen fer sa.   Oli sa 48er ki nou pe koz lo la ?  Oli  i pa en sif lo file ki nou pe koz lo la?

Sa Mosyon vreman letan zot pe rod lodit la, lekel ki zot anvi fer odit lo la?  Demann zot lekor en kou byen.  Sirtou bann ki’n deza MNA avan kwa ki zot, zot in fer pou kontribye ki ozordi in afeblir efikasite lendepandans, e menm abes stati Ladministrasyon Piblik dan lizye piblik Seselwa. Ler nou koman MNA nou pran DA nou anmenn ek nou dan distrik pou fer aktivis, be i mank erdtan lo sa sez pou li reponn lapel dimoun dan distrik non? Alor lekel ki’n kontribye?  Mwan mon pa’n zanmen pran MNA Mont Buxton, Dan Lenn sot Kap, fer konpanny ek mwan. Mon pa’n zanmen fer e mon pa krwar sa i son rol.  Alor Mon pe enplor zot sirtou bann MNA e annou pran osi sa leson mon bann koleg dan LDS, pour nou pa fer parey.

Alor an konklizyon mwan Mr Speaker mon anvi dir en mo avek piblik Seselwa, sirtou mon bann rezidan dan Mont Buxton ki pe ekout mwan. Nenport Gouvernman ki swa i LDS demen bomaten ki i reste tro lontan o pouvwar i pa bon pou okenn pei dan lemonn antye! Akoz ler en Gouvernman i fer tro lontan o pouvwar la, i vin letarzi.  I konfortab zot pa krwar ki zot ete e zot krwar zot ki la.  I enportan ki nou sanz Gouvernman tou le 10 a 15an pou kontinyen annan sa lavi dan Gouvernman, akoz ou konnen ler sa lot boug i vini sa lot parti i get tou bann keksoz public servant i reste li endepandan, e servi tou parti politik. E pou ou sa public servant ki pe ekout mwan e ki pa’n krwar dan sanzman alor demann ou lekor ki mannyer ou ou’n kontribye pou rann sa servis piblik ki ou ladan non- performan apre ki SPUP/SPFF avek Parti Lepep ki’n o pouvwar.  Nou dan LDS toultan nou’n dir prensip, prensip, prensip, nou advocate pou en servis piblik endepandan. Komisyon Servis Piblik dan plizyer bann Manifesto diferan parti lopozisyon, in koz lo la e parey Onorab Basil Hoareau in koz lo la pe vini, nou kontan nou pou siporte.

Nou’n demann, nou’n fer lapel pou bann Seselwa ki aletranze retournen. Plizyer nou la anndan lo tou lede kote latab nou’n al lekol laba deor nou’n vwar pour dir kondisyon i pli bon selman Sesel premye, nou’n tournen. Ki swa nou lapey i ba, ki swa nou bezwen travay dir nou’n tournen pou donn sa pei rann sa pei plito sa ki li in donn nou.  E ozordi mon ankor pe fer sa avek fyerte mon demann ou laba deor mon konnen ou pe ekout mwan lo Internet, Radyo, SBC i pas Live, mon pe dir ou retournen.  Me en lot zafer ki dan sa Lasanble in dir Speaker in koz lo la dan son chair isi devan. Seselwa ki kalifye ki’n pran zot retret konsider retournen donn en pti koudmen. Pou bokou bann dimoun par egzanp nou bann Manm Lasanble mon’n koz sa avek plizyer bann dimoun ki kalifye dan en domenn en zour par semenn, redonn dan en servis kot nou ti ete ki swa teacher ki swa dan Lasante ki swa dan sanmenm sa ki mwan mon ankor fer mon Zournal. Konmsi akoz mon pe ed medya kontinyen devlope menm si mon en Manm Lasanble Nasyonal, akoz sa pei apre tou i pou nou. Alor dan sa konklizyon ki mon’n dir dernyen fraz Mr Speaker  mon oule dir avek bann dimoun laba deor.  La la nou’n vwar en Mosyon anmennen par Parti Lepep ki’n admet ki i annan defayans serye dan nou servis piblik ki donn nou servis toulezour. 40an zot in fer o pouvwar i annan defayans mwan mon’n dir in ler pou zet sa travay lo LDS nou ava aranz sa servis piblik enn fwa pour tou.  Mersi bokou.

 

MR DEPUTY SPEAKER

Mersi Onorab Henrie.   Onorab Vidot.

 

HON AUDREY VIDOT

Mersi Mr Speaker. Bonn apre midi Mr Speaker, Onorab, zabitan Roche Caiman. E tou dimoun ki a lekout.  Mr. Speaker les mon a fer sorti atraver ou pour Onorab Henrie ki nou dan Parti Lepep nou pa pil lo personn nou.  Akoz bondye ti donn nou en lipye pou marse zot dan LDS ki pil lo dimoun – eskize.  Nou koman en Lasanble i nou priyorite pour fer sir ki Gouvernman i travay e travay…

 

MR DEPUTY SPEAKER

En moman, en moman, en moman, Onorab Vidot. Onorab Vidot en moman, en moman, bon sa lekspresyon in ganny servi par Onorab Henrie zis in reponn sa lekspresyon.  Mon pa krwar ki Onorab ki i mean ki okenn dimoun i pil lo kanmarad fizikman. Ok? Yes Onorab Ramkalawan

 

HON WAVEL RAMKALAWAN

Mr. Speaker la fason ki Onorab in dir sa i pe akiz nou pou en keksoz ki pa normal.  E se pour sa rezon mon krwar ki son lafason ki i a pe melanze.   Letan Onorab Henrie in servi sa lekspresyon, in servi li dan en totalman diferan konteks ki li i a pe servi.  Nou dan sa Lasanble nou pa bann manrmay.  Nou pa bann enbesil dan sa Lasanble e se pour sa rezon ki Onorab i bezwen konpran, ki letan i koze la, i pa pe koz avek bann enbesil. E ki se sa rezon Mr Speaker ki son statement la fason ki in fer li i pa annord e fodre ki i retract sa statement.

 

MR DEPUTY SPEAKER

Ok, bon parey monn dir sa lekspresyon in ganny servi e mwan mon final ruling se Onorab Vidot ti pe fer referans avek sa lekspresyon ok?  Annou carry on, i pa pe mean ki personn pe pil lo kanmarad, ni LDS pe pil lo public servants whateverCarry on Onorab Vidot.

 

HON AUDREY VIDOT

Mersi Mr Chair nou koman en Lasanble i nou priyorite pou fer sir ki Gouvernman i travay.  E i travay dan lentere pep Seselwa. Mosyon Onorab Simon Gill pe dir avek Gouvernman ki si nou le konsolid progre Sesel nou bezwen osi amelyor bann servis benefis sosyal ekonomik pou Seselwa.  Pour Gouvernman fer sa, i bezwen revwar sak son bann departman pou pli byen partaz son bann resours ki pou ede, asir Sesel pour annan en lekonomi stab e ki lavi nou bann dimoun i kapab reste stab.  Mr Speaker nou bann Departman Gouvernman in fer bokou, me i kapab osi fer bokou plis pou pli byen servi pep Seselwa. Akoz apre tou, se travayer servis piblik ki reprezant rezilta travay Gouvernman e non pa zis Egzekitiv.  Alors i nou zofisye servis piblik ki responsab pou promot bon gouvernans e latransparans dan Gouvernman. E se atraver zot ki pou asir sekirite e byennet nou dimoun.

Mr Speaker, nou tou dan Lasanble nou le vwar e asir linite ki asir e garanti progre pour nou distrik e nou pei.  Nou tou nou le vwar e fer sir ki nou distrik i bouze avek plis devlopman, progranm pour bann target group avek bi asir lepanouisman avek devlopman tou dimoun.  Mr Speaker i annan bann pwen ki’n ganny fer sorti depi bomaten ki vreman, vreman byen.  Me par kont mon pour eksprim mon dezapwentman en pti pe lo osi lo serten pwen ki’n ganny resorti par serten nou bann Manm.  Komanter ki osi ganny fer pour abes nou bann ladministrasyon distrik par dir ki zot ganny anvoye pour pini dimoun dan distrik.  Mwan mon pa pour agree pe enport si lot kote dezakor, akoz la mon pour briyevman dir mwan koman en ansyen DA ansanm avek bann DA aktyel ki pe travay ozordi, nou’n ed bokou dimoun menm ki dan Parti Lopozisyon ozordi.  Koman en ansyen DA mon’n ed dimoun akoz mon ti ganny anploye pour ede nenport ki, ki vin vwar mon koman en zofisye Gouvernman e monn gard mon rikord travay ki mwan mon’n fer.  Zis parey bann lezot DA’s in fer pour ed zot bann siporter dan nenport ki, swa Lopozisyon, swa Lepep koman en sitwayen Seselwa ki bezwen en lakaz.  E legzanp i la devan zot.  Fer en pti vire Perseverans zot ava vwar kantite dimoun ki’n ganny ede.  Ti napa okenn zil lapreferans, ti annan zil Perseverans.

Mr Speaker les mwan enform sa Lasanble ki pa zis santer ki’n ganny lakaz Perseverance, mwan koman en ansyen DA ler mon ti English River fer en pti vire Castor Road, nou pour vwar en bann vye lakaz ki en bon pe zot bann aktivis ki ozordi ankor for dan LDS, ti reste ladan gras a mon sipor ki’n travay ki’n siporte koman sitwayen, koman en zofisye Gouvernman pour zot kapab ganny en lakaz, akoz zot ti merite, me pa akoz zot afilyasyon politik.  Alors annou pa dir pour dir sa parti i viktimiz dimoun.

Mr Speaker realite nou bann DA i travay. I travay pour nou, pour zot bann distrik, menm si zot ganny plis kritik ki en pti mersi.  Alors annou pa koz, annou pa koz keksoz ki nou pa konnen zis pour nou rod politik pour ganny popilarite.  Mr Speaker mon pour retourn lo lenportans sa Mosyon ki devan nou ozordi.  Pou Gouvernman kapab delivre i bezwen ranforsi resours e striktir nou Gouvernman e la pour nou met lanfaz lo nou bann Ladministrasyon Distrik.

En DA pour li kapab pli byen delivre i bezwen annan son bann travayer.  I pa kapab travay li DA, li menm li i pour dan lofis, i pour vwar dimoun, li menm li i pour al lo teren.  Me Selman i napa office manager, i annan zis en i office assistant, oubyen i annan en office manager, i napa en office assistant.  I bezwen tou son staff konplet.  Sa pour li byen permet li kapab pli byen konekte, etablir e devlop konfyans parmi son bann zabitan.  Mr Speaker mon oule fer resorti ki nou koman en Lasanble, nou pe dir avek Gouvernman revwar lafason ki zot pe partaz resours, e nou bann zofisye i bezwen servi sa bann resours byen akoz se sa ki pep Seselwa pe ekspekte de zot.

Mon’n tann koz lo konsey rezyonal. Mr Speaker sa i kapab ede revwar e koup lakantite depans ki nou Gouvernman i kapab fer…si nou fer pour tou le 25 distrik.  E nou koman en Lasanble nou oule vwar en pli bon servis kot i konsern proteksyon e sekirite nou zabitan.  E  mon konklir ki nou bann dimoun, nou kapab reviv nou bann klib sosyal ki vreman tous nou bann zenn ki pe ganny afekte dan bann kominote avek bann fleo sosyal.  Relev bann progranm ki tous nou bann lafanmir, ki nou bann fanmir i vin pli solid e pli for, e byensir kontinyen ankouraz nou bann Trwazyenm-az pour partisipe lo nivo kominoter e partaz zot bann konesans avan zot kit nou.  Mersi Mr Speaker.

 

MR DEPUTY SPEAKER

Mersi Onorab Vidot.  Onorab Esparon.

 

HON REGINA ESPARON

Mersi Mr Speaker.  La ki Onorab Gill in prezant son Mosyon, mon konpran dan ki direksyon ki sa Mosyon pe ale.  Fransman dir ler mon tir sa Mosyon lo papye mon pa ti konpran son loptik, la ki in eklersi son scope, i fer li vin pli kler.

Mr Speaker swivan sa workshop ki Onorab Valmont in koz lo la ki Gouvernman Lokal ti fer an kolaborasyon avek UCLG e Mer Lavil semenn pase lo desantralizasyon ki detrwa nou Manm Lasanble ti ganny sans partisipe. Sa size desantralizasyon e resours mendev ti ganny diskite pandan 3 zour. E sa size District Council osi ti en pwen for dan diskisyon. Parey loter Mosyon in fer resorti, desantralizasyon i en size ki fodre ganny diskite ankor en pe pli lwen. E ti annan rekomandasyon sorti dan sa workshop lo size Eleksyon District Council ki partisipan ti pe dir ki pour bezwen re ganny diskite.  Annou gete kote nou sorti e kote nou pe ale.  5an pase ler ou ti antre dan en Ladministrasyon Distrik, konmsi ou ti’n vin enteronp en Lerwa dan son mazeste.  E ou prezans ti ganny vwar koman en espyon.  Sa i pa ti zis pour politisyen Lopozisyon, me osi pour manm piblik ki ti vin dan sa biro ki pa ti siport SPPF/ Parti Lepep.

Menm la Mr Speaker i annan serten mindset ki pa ankor sanze.  Pa tro lontan mon rantre dan Ladministrasyon Distrik Glacis pour vwar DA, serten aktivis SPPF/Lepep ki ti la prezan, pa neseserman travay me akoz zot pran sa brio koman zot biro politik i ganny lodas pour demande ki ou pe vin fer la konmsi ou pe invade son privacy, oubyen ou’n trespas lo son teritwar. Me malgre sa pti tap pti, i annan ki pe konpran. Malgre ki annan serten DA ki ankor pe vir an ron dan sa latmosfer koabitasyon, i annan ki’n konpran sa konsep konsiltasyon e travay ansanm.

Mr Speaker ozordi sa konsep kot Ladministrasyon Distrik i sa landrwa kot Parti Lepep i fer avanse son program politik, i bezwen ganny retire. Dan sa koabitasyon, napa plas  pour sa kalite latitid.  E dan sa klima politik 15 lo 10 kot li sa DA i bezwen konpran ki i en civil servant e non pa en politisyen.  Mr Speaker mon krwar ki dan sa letid rol DA osi i bezwen ganny byen definir pour zabitan a konpran pour ki Ladministrasyon Distrik in nepli en biro politik, me i en lofis ki la a dispozisyon tou dimoun dan distrik pe enport ou kouler politik, ou larelizyon.

E bann DA osi i bezwen aret soutir sa bann aktivis Parti Lepep ki pa pe anploye ek lofis DA, zis pour asize menm kabar anba sa Ladministrasyon Distrik e vey zaksyon tou dimoun ki vini pour al rod sa servis.  Se sa ki fer ki dimoun i dir ki napa privacy dan biro Ladministrasyon Distrik.  E sa, e sa ki zot vin diskite apre tou dimoun i konnen.  Zis pour anforsi en pwen ki Onorab Woodcock in fer sorti pli boner. Mr Speaker nou bezwen osi donn DA son lotonomi pour li deservi dimoun dan son distrik pour ki demen ler dimoun i vin kot li i pa a dir ki i pa konn nanryen akoz tou desizyon i bezwen pran direktiv avek Santral.  E si i pa ankor ganny lord sorti Santral i pa kapab ed kliyan.

Mr Speaker, ler mon tann DA pe konplent ki Minister Labita i dir li ki i napa okenn say lo okenn propriyete PMC dan son distrik me se MLUH ki fer desizyon.  E lo lekel ki ganny lozman oubyen later dan sa distrik? Legzanp tipik Mr Speaker i vo lapenn mansyonnen, en bedsitter i vid dan distrik Glacis, dan North East Pointe presizeman. E i annan en koup ki son pake i dan kaso kort gard Glacis pour plis ki 2 mwan. DA i rekomande ki sa koup i ganny sa flat.  E i ganny dir ki i napa okenn say ladan se PMC ki deside. PMC avek laprouvasyon Minis, donn en fanmir en zanfan sa bedsitter, 2 semenn in pase, in met rido apre in retire, e i pa ankor reste ladan.  Tandis ki li sa koup i pe dormi anpandan. Se sa ki mon dir ki fodre ki rol DA i vin kler pour ki zabitan osi i a konnen ki rol DA, kote rol DA i komanse, e kote i fini pour zot pa fristre ler keksoz pa marse dan zot faver, me adres problenm dan son landrwa apropriye.

Akoz i pa akseptab pour fer dimoun vir an ron.  8an pour ganny en bout later ki’n fini ganny idantifye, reste zis pour fer dokiman. I pa akseptab 5an pour en dimoun ki son, ki tou son keksoz i annord pour ganny en loan pour li fer en lakaz lo en propriyete prive, i pa ankor ganny okenn larepons.  Distrik i blanm housing officer, housing officer i blanm DA, lot i blanm madanm Bistoquet, PS i dir i pa konnen.  Tout en dezord dan sa bann biro lakaz.  E la Mr Deputy letan nou pe koze la, mwan annan en dimoun ki’n anvoy en text pour mwan, pour dir mwan dir dan sa Lasanble. oli li;’’ Hi madanm letan ou fer ou lentervansyon dir zot met en pe lord dan biro Housing akoz napa kominikasyon antre zot menm laba.’’ Ou vwar i annan dezord en pe partou.  E mwan mon swete ki sa letid ki pour ganny i a met lord en pe partou. Mr Speaker mon welcome sa letid ki ava ede met en pe laklerte e en pe lord dan sa bann dezord ki egziste dan biro Ladministrasyon Distrik e dan lezot biro Gouvernman. Alor mon pour donn mwan sipor pour sa letid, pour ki sa letid i ganny fer pour etablir nesesite reel mendev dan tou bann Departman, lo tou striktir Gouvernman parey Mosyon pe demande.  Mersi Mr Deputy.

 

MR DEPUTY SPEAKER

Mersi Onorab Esparon.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon byen kontan ki Onorab Gill in anmenn sa Mosyon ozordi ki nou devan sa Lasanble pe diskit sa Mosyon.  E sa Mosyon osi in permet nou pour nou konpran en pti pe leta de lieu  ozordi, mannyer sityasyon i ete.  E mon byen kontan ki bann, bann MNA lo lot kote latab osi pe eksperyans serten keksoz, bann diferan size ki bann MNA lo sa kote latab dan lepase in osi eksperyanse.  Case in point, legzanp donnen par Onorab Esparon i kler, i en legzanp ki MNA  Parti Lepep malgre dan son distrik dan lepase in eksperyanse.

So pour krwar ki se Parti Lepep ki fer sa MNA dan lepase ki ti fer desizyon, oubyen pe anpes en dimoun ganny tel servis.  Ou vwar ozordi ou menm ou atraver leksperyans ki ou pe gannyen e referans ki DA pe fer lo bann size, i pa neseserman le ka.  E se delivery ki at the heart of the problem.  E si sa i le ka, bokou bann keksoz ki zot ti pe dir, ki ti pe ganny dir lo bann MNA Parti Lepep sa letan, ti an referans avek difikilte ki sa bann dimoun ti pe gannyen pour anmenn sa servis anver zot bann dimoun, akoz zisteman zot ti pe ganny retar atraver bann dimoun ki ti dan sa bann pozisyon.  E sa i  en pwen  ki’n ganny fer resorti par Onorab Sandy Arrisol bomaten letan in fer son lentervansyon, kot in dir, mon pour repet sa ki in dir, mon krwar, koriz mwan si mon ganny li mal kot in dir poudir si i annan en rezon akoz Parti Lepep in perdi eleksyon, se akoz in napa delivery lo nivo lokal.  Now mon koz koumsa pour ki tou dimoun i konpran pour dir ozordi koman en Lasanble Nasyonal i pa en kestyon Parti Lepep ek LDS, sa.  I en kestyon Lasanble Nasyonal. E se la kot mon krwar mon bezwen koriz Onorab Henrie akoz Onorab i prezant en pti pe en konfizyon pour mwan la.  I dir koumsa pour dir ler nou ti dan Lasanble nou ti bann yes men akoz nou swiv tou sa ki Gouvernman i fer.  Ok, ou pa’n servi sa mo.

Ok dan lepase, pa Onorab Henrie eskiz mwan Mr Speaker mon pour retract, dan lepase in ganny dir pour dir nou bann Manm kote latab isi, kote Parti Lepep nou ti bann yes men akoz nou swiv tou sa ki Gouvernman i fer.  Ozordi nou eksprim nou lendepandans kot nou challenge Gouvernman, wi i en Gouvernman ki annan bann Minis ki sorti dan Parti Lepep, me dan public service ozordi, i napa zis travayer Parti Lepep.  Dan public service ozordi i annan plizyer dimoun sorti dan plizyer de-nominasyon. E mwan mon pa care ki sa dimoun i siporte as long ki sa dimoun i kapab fer en louvraz ki alaoter ki byen.  Se sa ki enportan.

Me ler nou montre lendepandans Onorab Henrie i dir ek nou koumsa pour dir si i annan en problenm antre nou?   Be i napa problenm antre nou. Akoz nou, nou Lasanble Nasyonal e nou rol se pour annan oversight lo sa ki Egzekitif i fer.  Nou devret demann kestyon Egzekitif pe enport si nou Minis.  Pe enport si en dimoun sorti dan Parti Lepep i bezwen reponn kestyon akoz nou’n entrust li avek en servis ki bezwen ganny delivre.   Akoz ki pour arive dan long term?   Dan long term demen admeton nou annan en Prezidan LDS.   En dimoun i al kot dokter, sa Dokter i pran 20 minit pour vwar sa dimoun, 30 minit pour vwar sa dimoun, oubyen i pran 2erdtan pour vwar sa dimoun – eski nou pour blanm sa Prezidan?  Mon pa krwar pour dir ou pour fer sa.   Ou pour get sa Dokter.

Me souvandfwa mannyer nou’n regard politik e nou’n fer li vin lo en nivo partizan, nou, nou a pran en lapros partizan lo tou desizyon ki ganny fer, nou blanm kanmarad.  Me ki nou pe vwar, nou pe vwar poudir ler nou move away tou lede kote from sa lapros partizan, nou’n nobou achieve en kantite keksoz pour pei.  Me ki arive prezan nou ganny blanmen akoz nou tonm dakor lo bann size.  Be Mr Speaker, par egzanp, ou annan dimoun ki dir ou nou tro tonm dakor, me si par egzanp LDS i vini i dir nou pe koz lo annou elimin drog.   Mon pour dezagree akoz nou devret elimin drog?

Si Parti Lepep i vin lo improve public service zot pour dezagree akoz Parti Lepep in dir improve public service?   Se sa rezon ki ler nou mars ansanm koman en Lasanble pour nou rod solisyon pour ed nou pep, se la kot nou pep i benefisye.   Akoz sa ki nou, nou pe rode koman en Lasanble kolektiv se en meyer lavi pour Seselwa. Now pe enport ki mannyer sa i arive, me selman nou la a sa moman pour nou fer en kontribisyon pour nou fer keksoz bouz pli devan.   Nou tou nou kapab al lo 40an. Zot kapab dir pandan 40an nou pa’n fer nanryen, nou, nou kapab dir pour dir be annou komans kot dimoun ti ete, konbyen ki ti annan lakaz, konbyen ki ti annan isi, konbyen ti annan laba.  E ou pour dir mwan be sa ti louvraz en Gouvernman.

Me lefe i reste, lefe i reste se ki mon kapab retourn dan lepase, oubyen mon kapab regard sa ki la ozordi devan mwan en kestyon ki mon bezwen reponn.  Mon pour donn ou en legzanp.  Bomaten avan mon vin dan Lasanble en madanm i call mwan i dir ek mwan koumsa pour dir be i ti’n fer en laplikasyon kot en landrwa, e si i pa ti’n call i santi pour dir si i pa ti’n call i pa ti pour ganny en larepons.  Be ou konpran?  Konmsi sa i napa nanryen pour fer avek Parti Lepep, LDS sa.  1 annan pour fer avek en servis ki en sitwayen in demande i pa’n gannyen.  E mon pa krwar pour dir, mon pa ni menm konn sa zofisye ki pa’n reponn sa madanm.  Be selman sa ki mon krwar pour dir sa madanm ti’n devret ganny en larepons san ki li i bezwen call. Akoz ou ti’n promet li pour donn li en larepons lo son size akoz i pe esper sa larepons pour li fer en lot keksoz.  Se sa ki sa size ki Onorab Gill in anmennen, i oule adrese, se ki nou regard sa ki pe pase  pour nou kapab improve keksoz.  I pa en kestyon, i pa en kestyon, i pa en kestyon fer politik avek. Ou konnen mwan, mwan i annan en keksoz ki mon oule zot konpran e petet nou kapab tonm dakor lo la.

Nou kapab tonm dakor lo la akoz mon krwar pour dir i en size ki enportan.  Ou konnen ziskan ozordi nou pe kontinyelman demann nou bann Lazans ki deal avek retail sector pour prezant en solisyon an regar logmantasyon dan bann pri.  E tou dimoun out there pe kontinyelman dir nou pour dir be arbitrerman ou pa konpran ki mannyer par egzanp ki 3 mwan pase ti kout en pri en sel kou in monte.  Napa okenn logmantasyon dan pri fuel, napa logmantasyon dan freight, napa logmantasyon dan nanryen. Me selman se, selman, selman sa komodite in monte.  So ki nou, nou pe demande.  Nou, nou pe demande poudir be annou regard en pe eski ozordi kot nou ete, nou annan 4 dimoun ki pe fer sa louvraz, 4 i ase nou bezwen plis; eski nou pa bezwen pli proaktif pour vreman regard sa solisyon.

Onorab Henri ek mwan menm nou’n deza koz lo en size enportan kot nou track en keksoz kot ler i antre lo por e nou’n koz lo sa difikilte ziskan ler i ariv dan laboutik konbyen i koute, akoz se sa ki pe fer dimoun ditor.  Nou kapab lager e dir, ok nou donn dimoun en logmantasyon saler.

Nou kapab fer sa, me selman at the end of the day si koman sa boug i ganny logmantasyon saler, tou keksoz pour monte, nou blanm Gouvernman pour sa arive.  So i annan en keksoz ki mon krwar somewhere nou bezwen regarde kwa ki pe arive ki mank sa – petet mon pa pe dir i mank proaktivite mon pa kapab, mon napa mon ledwa lo sa size pour le moman.  Be eventually nou pour konpran li an detay kot akoz ki nou pa kapab get down to ler sa komodite in ariv dan sa laboutik, kwa ki kontrole ki soz pri in mont tel fason; ki kantite markup tel dimoun i mete lo la.  Se sa lesansyel nou deba ozordi.  Nou deba se improve sa servis ki dimoun i gannyen, e sa an retour i ava ede – enn, pour amelyor son lavi e de i ava fer ki bann lazans ki annan en rol pour zwe dan fer desann par egzanp pri lavi. I ava zwe sa rol e fer desann pri lavi.

Nou kapab fer en ta deba politik la anndan.  Nou kapab koz lo en ta size, me lesansyel i reste se donn en meyer lavi Seselwa.  Ozordi nou tou nou’n agree pour dir nou bezwen travay pour pei.  E napa personn la anndan mon krwar ki pa anvi vwar enn son frer, oubyen son ser Seselwa avans devan.  E mwan mon krwar pour dir en keksoz ki nou bezwen retire dan lespri dimoun, se sa krwayans ki nou pe, public service alor i belong to Parti Lepep, alors Parti Lepep in mal fer.  Akoz par ekstansyon ou pe blanm travay ki kapab bon travay ki en siporter LDS pe fer dan en fonksyon piblik.

E i annan plizyer siporter LDS ki dan fonksyon piblik. I annan plizyer siporter Parti Lepep dan fonksyon piblik.  So nou pa kapab zis dir pour dir sa enn i lo sa kote, sa enn i lo sa kote.  Akoz si nou fer sa eski ou pe dir mwan pour dir en zour si ou, ou ganny en pozisyon responsabilite ou pour practice en pratik, si ou Parti Lepep ou pa vini alor si ou LDS ou vini? Be sa pa i go back to ek nou pa ek nou? Ou konpran be sanmenm sa i enportan, i enportan Onorab bann keksoz ki ou dir par ler ki relev en pti pe bann santiman kot nou bezwen move from sa. 15 lo 10 in arive.  So nou bezwen move from sa. Ki nou pour fer, nou pour kontinyen debat politik kan nou’n tann Speaker bomaten dir nou kot in anvoy en dimoun aste, yer mon krwar aste en bwat dile, ti kout en pri i kout en lot pri.  Akoz mwan mon enterese ek sa mwan. Mwan enterese par egzanp konnen akoz bann komodite ki bann pti baba i servi i sa pri ki zot ete.

Mon enterese pour mwan konnen akoz sa i arive.  Ou kapab dir mwan mon parti ki o pouvwar, me dan mon parti eski ou pou vwar bann travayer ki pe travay i annan egalman travayer ki sorti lot kote latab e mon kote latab.  I pa en kestyon ki mon parti ki o pouvwar, i en kestyon ki mwan ek ou – ki mwan ek ou ki Manm Lasanble elekte. Proporsyonnelman, Proporsyonnelman oubyen  direkteman elekte pour kapab deal e tackle avek bann sityasyon ki nou pe fer fas avek. Ok?   Non, nou relax, ou konnen akoz, akoz mon pasyonnen akoz lefe ki nou pa pe kapab konpran Mr Speaker.   Mon pa pe kapab konpran Mr Speaker akoz ziska ozordi en dimoun koriz mwan lot kote si zot konn sa, akoz ozordi nou pa ankor kapab met nou lanmen lo si ou dir mwan pou dir en marsan i ouver en retail, en dezyenm, en trwazyenm, en katriyenm son tax burden i reste parey!

Akoz ou dir mwan pou dir sa komodite dan laboutik son pri i sanze de-zour o lannmen. I senp Mr Speaker.  Ou konnen nou  tou nou sey adres diferan size;  par egzanp Onorab Ferrari pe  sey adres size stevedores. Mon pa konnen ki’n arive petet i ava koz lo la ek nou i ava dir nou ki mannyer keksoz in pase. Me selman koman MNA nou tou nou sey adres diferan size akoz nou care pour Seselwa. Nou anvi keksoz avanse pou nou pep.

E la mon ti a kontan, mon ti a kontan, Mr Speaker, mon koz koumsa akoz mon konnen tou mon bann koleg i konpran mwan tre byen. Mon koz koumsa akoz par egzanp, en keksoz ki’n arive par egzanp Prezidan Faure mon vwar li en keksoz ki in fer se ki in ouver the public service. Me ler in ouver the public service nou ganny dimoun ki atak li pou dir la i kree en lot Board, sa ler sa Board ti la li.  E ou konnen lekel ki in met lo sa Board li, i pa’n get political affiliation sa dimoun li.  In met sa dimoun lo sa board akoz i santi sa dimoun i kapab fer pli byen.  In met sa lot akoz i kapab fer pli byen, me selman petet mon pa konnen si Onorab Henrie in fer dan son papye, me i paret mwan i pe ganny atake akoz in fer sa.  So, annou konnen kwa ki nou anvi, ki direksyon nou le ale avek sa. Ok?

Akoz en keksoz ki enportan dan tousala, ok annou pran bottom line, bottom line, ki nou anvi non mon lo sa pwen stevedores la Onorab Ferrari, en pti kou –  bottom line ki nou anvi, ki nou anvi nou anvi rod en solisyon pour nou bann dimoun. Nou anvi anmenn en solisyon. E mon krwar sa ki nou pe fer si par egzanp nou al dan sa eleksyon. Admeton Onorab Henri i al dan sa eleksyon nou decentralize. Non mon pe adres li akoz in lev en pwen, sorry mon a fer li through the Chair si fodre.

 

MR DEPUTY SPEAKER

Ou annan ou ankor 2 minit Onorab.

 

HON SEBASTIEN PILLAY

De minit mersi Mr Deputy Speaker, admeton ki nou decentralize Government nou anmenn li lo nivo lokal be ou konnen ki pou arive sa bann menm problenm delivery pour afekte sa Local Government.  Me ou konnen i annan keksoz ki pou improve.  Wi i kapab improve sa consultation, me delivery on that consultation pour en problenm. Dayer atraver ou nou’n tann en lot Onorab sorti Au Cap kot in koz lo sa mank konsiltasyon e mon siport li ladan. Fodre ou konsilte dimoun lokal avan nou fer en desizyon and I agree with him.  Mon siport li, ou konpran, me sa ki enportan se ki nou devret si i annan desantralizasyon problenm pa pe ganny desantralize.  Nou bezwen pe desantraliz solisyon, e sa that’s why ki mon krwar. This is not a political ploy lo lapar Onorab Gil, far from it. I en pwen pour ki nou anmenn improve service delivery en ki at the end of the day – at the end of the day, ler ou’n desantralize sa Local Council i anvi fer tel proze dan son distrik i konnen i kapab rely lo en efficient public service pour deliver en keksoz ki i anvi.  E non pa right back to where we are.  E mon kontan Mr Speaker en keksoz ki nou devret apresye la anndan se ki  we are moving on the right step.   Nou pe ariv lo en pwen ozordi Sesel ki nou pe al kot local governance e si nou fer regional avan, as a first step. I pou en bon step, i pour en building block to when nou actually ale anmenn li lo en nivo lokal.  I ava empower nou bann dimoun ki zot ava pare lo en nivo lokal.

Mon krwar se sa lespri ki nou le travay ladan.  E pour fini avek en fraz ki Onorab Gill ti servi dernyen fwa ou konnen.  I ti dir the time is now togetherSo mon krwar annou pran li dan sa lapros kot nou pe travay ansanm pour anmenn keksoz pli devan pour pei.  Mon remersi ou Mr Speaker pou ou latansyon e mon remersi mon bann koleg e mon demann tou dimoun pou siport sa mosyon. Mersi Mr Deputy Speaker.

 

MR DEPUTY SPEAKER

Mersi Onorab Sebastien Pillay, Onorab Letourdie.

 

HON JANY DE LETOURDIE

Mersi, Mr Speaker mon koup tou mon ekstrememan bref e mon koup tou repetisyon, an atandan ki sa letid serye pou ganny fer.  Mwan mon pe fer sa bann propozisyon ki mwan mon krwar pour mwan, selon mwan e bann keksoz de-baz ki nou kapab fer pour nou anmenn solisyon konmans anmennen. Alors ki nou pe koz lo mindset Mr Speaker mwan mon’n deza sanz mon mindset akoz. Mon’n fer mon salon dan mon lakaz vin en lespas kot mon kapab resevwar dimoun ki bezwen mon servis tou dimoun. An atandan ki avek lespwar tou MNA san leksepsyon i a kapab ganny en lofis.

Mr Speaker la konmela mon konnen i annan en kantite civil servant – en kantite dimoun en kantite DA en bon pe dimoun la ki pe swiv Lasanble.  Depi la konmela mon demann zot, zot osi pou zot sanz zot mindset. Alors ki mannyer zot kapab fer sa deswit fer sa desizyon travay lo sa file ki’n ganny lapousyer ki ou’n ganny dir met akote. Telefonn sa msye ki ou sipoze call li depi semenn pase e pa bliye dir sa madanm i pa’n kalifye koumsa i a kapab rod en lot alternativ.  E ou DA arete dir ou bezwen travay zis avek MNA ki’n ganny elekte.  La Mr Speaker i deza en premye legzersis pour en servis pli efikas.  Le moman nou retir kouler Polisi  dan servis piblik, nou a deza akonpli lanmwatye sa travay ki Mosyon pe demande.  E nou ava les lespas pou fer pli gro travay fondamantal, ki in ganny kree par en moto ‘’pa ek nou. ‘’

Mr Onorab Simon Gill, mon siport ou Mosyon.  Mersi.

 

        (APPLAUSE)

 

MR DEPUTY SPEAKER

Mersi, mersi Onorab Letourdie, Onorab Sophola.

 

HON NOLINE SOPHOLA

Mersi Mr Speaker.  Mr Speaker Loter Mosyon pe koz lo empowerment bann travayer dan diferan striktir Gouvernman avek bi pou amelyor service delivery. Mon toutafe  dakor, mon toutafe dakor avek sa servis delivery.  I vre e nou bezwen admet ki servis delivery i en pwent feb dan nou sosyete.  Lannen ale, lannen vini nou koze me aksyon i tre minim.  Olye ki nou pous travayer pou fer plis progre parfwa se nou menm ki retard progre travayer.  Mon pou donn en sityasyon.  Bann zanfan ler zot fini lekol, zot tre zenn. Parfwa zot ganny difikilte pour zot kapab fer en bon swa.  Zot fer move swa dan lesans.

I annan en zenn zanfan in pran IT koman son karyer oubyen en  IT technician.  E in travay li.  Apre 2an, 3an, i santi ki pa sa, sa domenn ki i ti anvi, i oule bouze, i dir mon pour al fer accounting.  I al kot son HR i met son problenm devan, i dir mon anvi bouze.  Son HR zis i dir ek li, ‘’Non ou pa pour kapab.’’  Eski sa lorganizasyon in donn sa zenn dimoun en sans pour prouv son lekor?   Mon reponn mon menm mon dir non.  Lo kwa sa larepons ti baze? Eski son larepons sa dimoun, sa HR ti baze lo son past appraisal sa dimoun, oubyen lo son lopinyon personnel.  Mon krwar si nou anvi vwar service delivery improve, sa tel latitid fodre nou arete.

Pa bezwen retard progre travayer.  Eski sa travayer pour delivre?  Larepons i non.  Reste 4an, 5an, sa zenn pour met retar sa lorganizasyon akoz i napa en gou pour li travay.  Si petet sa lorganizasyon ti’n donn li en sans pour prouv son lekor, mon asire ki i ti pour delivre, e sa lorganizasyon ti pour benefisye.  Mr Speaker, ogmant e amelyor service delivery i al avek donn ledikasyon ek training.  E an retour i al avek ogmantasyon saler.  Se sa ki byen enportan ki bann HR i bezwen annan en performance management based system ki tre efikas.  Ladan i ava annan kontra ki defini responsabilite sa bann travayer.  I ava annan sa bann atribi ki i ale avek sa Kontra.  Sa dimoun pour konn egzakteman ler i gete mon ti annan sa pour mwan delivre mon pa’n fer.  E la nou regarde  regarde en appraisal i pa devret pini travayer me plito ankouraz zot pou vin pli prodiktif.  Par ankouraz zot pou travay lo zot pwen feb.  Yer nou’n fek vwar legzanp appraisal la dan Lasanble ler Minister Ledikasyon sa bann zofisye in vin la ki’n arive.  E mon asire ki prodiktivite, delivery la a sa  bann pov zanfan ki pe soufer dan laklas mon sagrinan pou zot.  Ki ou a fer?  Bon me nou bezwen osi revwar kondisyon sa bann travayer akoz saler e training pa ase pou ogmant prodiktivite.  E osi i annan en lot pwen fondamantal ki nou bezwen tenir kont, sa se monitoring.  Sa sirveyans la i pouse e i remet sa Lorganizasyon oubyen sa travayer on track parey nou dir parfwa an Kreol ler zot pe dereye nou refer zot re kalibre zot pou zot antre kot zot devret ete.  Sa sirveyans i fer nou konnen ki pe  arive dan bann diferan lorganizasyon pou ki aksyon imedya i  kapab ganny pran.  Nou pa bezwen esper letan appraisal pou dir kote ti pe al mal, oubyen ler letan Bidze ki nou dir sa Lorganizasyon ou ti pe al mal.  In fini tro tar.  Konbyen lorganizasyon travay ki get welfare zot travayer ?  Parfwa ni en bonzour, konman sava pa ganny dir.  Ki arive avek sa travayer?  Eski i pou vin prodiktif kan byen  bomaten son lazournen in fini gate ?  La nou bezwen revwar leadership bann lorganizasyon akoz prodiktivite i enkli tou dimoun dan lorganizasyon.

Mr Speaker mon bouz lo kominikasyon.  Ki mannyer eski travayer i ganny adrese?  Eski nou pran letan pou ekout zot?  Kote desizyon i toultan ganny pran?  Eski i annan en balans dan pran desizyon?  Mon dir tre rar ki  desizyon i sorti kot grass root to top vedir sorti anba pou mont anler.  Toultan i sorti anler i desann anba.  E sa kalite management la prodiktivite pou desann.  Nou pou napa prodiktivite akoz kominikasyon i tre, tre pov.  Mon’n fer resorti sa detrwa pti pwen Mr Speaker selman pou fer reflesir ler nou pe koz lo prodiktivite.  Loter Mosyon pe propoz konsey rezyonal.  Petet avek sa tit konsil ki pe mete sa i pou avans striktir.  I pou en benefis mon pa konnen nou bezwen espere.  E mon demande osi ki La Digue i ava osi benefisye akoz petet pou annan mwens striktir nou pa pou bezwen al fer striktir ankor.  E la avek sa bann servis desantralizasyon bann servis, posibleman keksoz i a pli vit.  Meyer kordinasyon dan travay; deplasman pou bann Digwa i a trés peu, me dan lansanm ki nou pe rode, nou pe rod lefikasite o nivo striktir Gouvernman.  Posibleman ler nou a vwar sa model ki definitivman nou pou bezwen ganny prezante avek nou a konpran pli byen kisisa sa konsey rezyonal e ki mannyer i pou ete.  Mr Speaker konsiltasyon dan distrik i enportan sirtou ler nou pe al fer travay.  Sa pwen in ganny resorti bomaten par 2 Manm Onorab.  Mon byen kontan akoz sa i en siny lapolites.  Montre respe pour lenstitisyon.  Respe pou Lotorite ek striktir ki an plas dan distrik.  Tre, tre valab sa, tre enportan.  Mon pe lev sa pwen Mr Speaker, akoz sa fek arive sa sityasyon mank respe dan distrik sa ti ariv La Digue le 5 Septanm.  Mr Speaker mon senserman krwar ki fodre ki nou viv sa ki nou prese.  Mersi Mr Speaker.

 

MR DEPUTY SPEAKER

Mersi Onorab Sophola.  Onorab Stephen Pillay.  En moman Onorab Pillay.  Onorab Ferrari.

 

HON JEAN FRANCOIS-FERRARI

Mr Deputy kekfwa Onorab Sophola i kapab dir nou ki ti arive La Digue le 5 Septanm pou lenformasyon Lasanble akoz zis pou eklersi nou en pti pe kekfwa.  Mersi.

 

MR DEPUTY SPEAKER

Eski sa ti kwensid avek vizit ki FPAC ti fer La Digue?  Eski FPAC ti La Digue le 5, non?  Ok.  Onorab, wi Onorab Sophola eski sa i fer referans avek Manm FPAC ki ti La Digue?

 

HON NOLINE SOPHOLA

Mr Speaker mon pa’n dir Manm Nasyonal me mon’n dir mank respe.  Wi FPAC si nou anvi konnen wi i ti La Digue.  Mersi.

 

MR DEPUTY SEAKER

Eski Onorab, Onorab.  Eski sete Manm Lasanble ki form par Komite FPAC ki’n enplike dan sa lensidan?

 

HON NOLINE SOPHOLA

Wi Mr Speaker mon ava eksplike.  Mwan konman Onorab ki’n ganny elekte pou La Digue mon pa ti ganny averti poudir FPAC pou vin La Digue.  Me set apre dan en sesyon travay ki mon’n fer en pti pe tapaz napa ni menm 24erdtan ki mon ti ganny en text ki ti dir mon poudir, Onorab sa text ti le 4, ti dir mwan Onorab mon a lir si zot oule.  Akoz parfwa ler nou pa konn keksoz nou krwar nou kanmarad i zis rabase.  Ti dir nou, i dir mwan ‘‘Dear Honorable Sophola, good day.  On instruction of Honorable Ramkalawan, please be informed that there would be a public meeting by FPAC, tomorrow at 9.30am in the Community Centre La Digue.  Re-Audit Report L’Union Estate.  Your presence would be very much appreciated as the elected Member of the National Assembly for district and Inner Island.’’  Sa mon ti ganny avize 1.30pm Lendi.  Mardi 9er FPAC pe antre La Digue.

 

MR DEPUTY SPEAKER

Order!

 

HON NOLINE SOPHOLA

Mr Speaker sa ki mon pe fer resorti se lapolites i enportan.  E sa letan mon pa reste La Digue mon’n fini vin isi mon ti dan en sesyon travay.  Mersi.

 

MR DEPUTY SPEAKER

Mersi Onorab.  Bon annou pa fer en deba lo sa pwen.  Wi nou’n ganny en, nou’n ganny en leklersisman.  Yes.  Non Onorab Ferrari mon ava donn laparol Chair FPAC.

 

HON WAVEL RAMKALAWAN

Mr Speaker FPAC pe ganny akize.  Sekretarya Lasanble pe ganny akize.  En Manm Elekte in ganny dir in ganny enformen pou annan en meeting, lakourtwazi in ganny …be si i pa pe kapab vini i dir i pa pe kapab vini.  Me selman pou son lenformasyon, pou son lenformasyon e Onorab De Commarmond i la son prop Leader ti enform tou le 2 MNA e  sa se parol Onorab De Commarmond – son prop Leader ti enform tou le de MNA ki poudir FPAC pou La Digue e zot pe ganny demande pou zot la.  Si alor si i annan problenm laba pa met sa lo FPAC.  Alors Mr Speaker napa, napa okenn mank polites o kontrer mon vwar bonn polites ki Mr Hermitte konman Sekreter FPAC in enform li e nou ti ava kontan konnen si li i ti reponn?

 

MR DEPUTY SPEAKER

  1. OK. Bon annou pa fer plis deba lo la. Petet apard ki en Manm Komite i enform sa MNA ki pou annan en vizit nou ti ava demande ki enn fwa ki sa Komite i deside pou fer en vizit, enn fwa ki keksoz in finalize, sa MNA kot sa vizit pe ganny fer i ganny enformen i ganny ase letan.  Mon konpran son pwen petet son pwen i pe dir in ganny sa mwens ki 24er.  In ganny averti mwens ki 24er.  Ok?  Annou, wi annou toultan mazin kominikasyon dan en channel  Ok.  Onorab Stephen Pillay.

 

HON STEPHEN PILLAY

Mersi Mr Speaker.  Bonn apre midi a tous.  Mr Speaker mon apresye Mosyon ki Onorab Gill in anvoy devan, in met devan, e mwan mon pare pou siport sa Mosyon me i pou depan ler Onorab i fer son summing-up pou mwan regarde e si i dir poudir ti ava, sa Mosyon i pou ganny demande pou Prezidan akt imedyat lo la akoz Mosyon ordinerman i pran 1an pou akt, alor nou fer sir nou dir, demande pou li fer aksyon deswit nou a siport sa Mosyon.  Mr Speaker sa Mosyon in lev enn zafer mendev vizavi saler dimoun dan lanplwa.  Sa i en konsern ki vreman enportan, akoz ozordi zour avek lapey ki nou annan konmela nou’n vwar dimoun kalifye parey sarpantye, mason, draftsman ki pa pe reste dan zot lanplwa akoz saler i ba.  I annan ki menm i plito al  dan pirat ki fer son vokasyon ki in train pou li.  Leader Lopozisyon in koz lo lapey R5,050 ki pa ase pou en dimoun viv avek.  Sa i vre.  Me Mr Speaker i annan osi lezot kou.  Lezot kou ki arive parey pou bann dimoun ki lo welfare sirtou bann ki pe ganny R2500 ki mon fek fer en vizit Sanmdi kot en madanm ki dan sa performans efikas ki pe demande Health osi i devret regarde sa 2,500 ki  i donn en madanm ek en zanfan dan en lakaz sa i fer lapenn pou mon vwar.  So kot i donn Sertifika Medikal pou Envalidite mon ava demann Onorab Gill osi pou tous lo la  pou dir i pa zis dan lanplwa bann ki lo welfare osi.

Mr Speaker Onorab Aglae in nonm Administrater Distrik ki travay dir e zot louvraz i entans.  In demann lapey pou DA.  Wi sa mon siporte.  Me  pa  zis DA i annan office manager i annan  lezot travayer parey in dir field technicians.  Au Cap i enn bann legzanp ki mon pa konnen lekel ki determin saler travayer, nou pe rod en Office Assistant pou en pe letan me tou dimoun ki vin interview zot refiz-e akoz sa lapey.  Me mwan mon aprann ki se ki DPA ki desid lapey post dan Gouvernman e parey Onorab Lemiel in dir, Local Government wi i annan en pake problenm be se sa mon krwar ki problenm se lapey ki DPA pe donnen, pe advertise pou dimoun pou ladministrasyon distrik i tro ba e dimoun pa pe vini pou vin fer sa louvraz.  Lot se bann proze distrik e mon pou dakor avek Onorab Lemiel ki i annan en delay.  Au Cap osi i annan zis 2 ki’n konplete e la Bidze pe vini sa lannen ankor detrwa semenn larestan i ankor lo in progress.  Fotespere avan Bidze i vini bann lezot proze i terminen pou nou kapab determin bann proze.  Sa osi i form par dan efikas; akoz i resanble pa Gouvernman lokal ki pe fer sa bann delay.  I resanble Tender Board ki ler zot pe donn tender zot pe donn tender dimoun ki dan lepase osi zot kontinyen delay lo bann proze ki ti devret tire akoz mwan mon’n vwar en lenstans kot SLTA in donn en Bill of quantities apepre R80 mil, en tender i tender pou R103 mil, en lot tender R125 mil,  Tender Board i rekomann sa enn R125 mil.  Pour ki rezon mon pa konnen, me sa mon krwar dan Bidze nou pou detay byen lo la sa bann  proze ki ganny tender out pou donn en bon kont randi lekel ki devre ganny bann tender.

Lot pwen ki mon ti a kontan fer releve sorti kot Onorab Valmont ek Onorab Sebastien.  Bon performans wi fodre konsiltasyon e parey nou’n vwar yer ti en lenstans ki ti vreman apropriye, pou en legzanp tipik.  Yer ler pou sa zafer UCPS pou move Au Cap Montagne Posée ki mon kont pou lo rikord zot ti nonm en bout later S7022, me la mon’n al rode sa bout later in fini  ganny sub divide e  bout in konmans ganny allocate pou land bank.  1.5 milyon met kare in konmans ganny allocate pou en dimoun pou land bank.  File mon pa ankor vwar akoz i ankor pe rode.  Me ankor i sa ki Onorab Sebastien avek Onorab Valmont i devret konpran.  Se sa konsiltasyon ki pou fer performans, efikasite ek kapasite neseser ki Onorab Gill i anvi fer antre dan sa Mosyon.  Me i annan en pti bout ki fodre nou konpran.  Lekel ki accountable.  Sa PS? Sa Direkter Zeneral?  Sa dimoun dan DA?  Me sa Minis i pa accountable li?  Ki nou pou fer? Nou pou zis rod lanfaz lo sa bann – se sa Minis ki Head of the Departman.  Alor pou mon terminen Mr Speaker si i le efikas e performans pou mwan siport sa Mosyon, mon pou demann Onorab Gill ki fodre osi i dir si sef enkli Minis i pa delivre nou demann Prezidan pou tir li e met, sed la plas avek en lot ki anvi e ki kapab deliver dan son louvraz.  E sa si i kapab delivre.  La si ou dir sa dan summing-up ki Minis osi i devret ganny met ater la mon a siport ou.  Mersi Mr Speaker.

 

MR DEPUTY SPEAKER

Mersi Onorab Pillay.  Onorab Churchill Gill.

 

HON CHURCHILL GILL

Mersi Mr Speaker.  Bonn apre midi tou Manm.  Mr Speaker sa Mosyon i annan en gran merit sirtou pou nou ki reste lo zil Praslin avek La Digue akoz nou nou fer fas avek bokou defi akoz bann dimoun Praslin i vwar zot, zot bezwen incur bann kou adisyonnel pou zot kapab pous serten servis ki zot bezwen desann Mahe e sa i enpakte direk lo zot saler en keksoz ki dimoun ki baze Mahe pa neseserman annan sa bann depans.  Alors nide pou desantraliz en pe servis i tonm byen pou Praslin, akoz Praslin ozordi i annan serten servis menm si i annan en biro sa bann dimoun zot tre junior e prezan bann dokiman i ganny met dan en brief case i met lo bato, i desann.  Mon krwar la kot devlopman in arive dan Sesel.  Praslin i devret annan bann biro ki annan, ki staff i lo nivo Direkter ki serten desizyon i a kapab ganny pran Praslin menm akoz ozordi bokou desizyon pe reste avek Mahe.  Petet sa ti bon pou en serten letan me ozordi nou bezwen revwar sa e fer dimoun Praslin koup sa bann depans ekstra ki zot, zot bezwen fer.  Sa i aplik pou Praslin ek La Digue.  Donn nou sa bann servis desantralize pour ki nou dimoun i a kapab benefisye e nou pa ava vwar nou kot nou bezwen desann Mahe pou bann serten servis ki napa Praslin.  E ozordi lo kote resours ki Praslin i gannyen, nou vwar ki i ankor lo en sistenm lo baz distrik.  Menm si sa i lo baz distrik, nou santi poudir grander Praslin ek popilasyon ozordi avek bann devlopman ekonomik ki pe arive in ler pou Gouvernman kapab revwar fason ki resours i ganny distribye lo zil Praslin, pour ki zabitan Praslin i a santi poudir zot pe ganny gete dapre zot bezwen, e resours ki pe donnen i reflekte serten poursantaz ki Praslin pe kontribye dan lekonomi Sesel baze lo bann aktivite ki pe ganny fer.  Alors mon krwar sa legzersis i tre byen e mwan mon a demann loter Mosyon ki ler sak legzersis pe ganny fer ki Praslin osi dimoun Praslin i enkli dan sa group ki pou fer sa legzersis pour ki nou  a kapab met ater nou bezwen dapre letan ozordi.  Alors mon pou donn mon sipor pou sa Mosyon.  Mersi.

 

MR DEPUTY SPEAKER

Mersi Onorab Churchill Gill.  Onorab Andre.

 

HON CLIFFORD ANDRE

Mersi Mr Speaker.  Mr Speaker sa Mosyon ki’n anmennen par Onorab Simon Gill i annan serten merit, me selman mon ti a kontan fer resorti serten pwen.  Pandan bokou lannen in annan letid parti letid in ganny fer avek sistenm ki delivre servis avek piblik.  Ti annan letid ki ti ganny fer pandan letan ansyen Prezidan Rene.  In annan bann mezir, bann letid ki’n ganny fer pandan lepok ki ki’n ganny apele ‘I did it my way’.  E tou sa bann letid Mr Speaker pa’n zanmen abouti dan vre fason efikas pou delivre servis avek pep Seselwa.  So ozordi nou pe demande ki en lot letid ankor i ganny fer me selman parey Onorab Pillay in dir mwan osi mon pou get en pti pe ki summing-up Onorab Gill i fer an referans avek bann rezilta ki ganny tire sorti dan sa letid.

Mr Speaker mon pou koz lo bann proze dan distrik.  Ozordi Onorab  Hoareau in dir ki nou bezwen aksepte ki i annan serten problenm e mwan mon pou koz lo serten problenm pou gete si sa letid pou aksepte poudir sa i bann problenm ki reel e se sa  fason ki nou kapab vwar solisyon  se atraver sa.  Proze dan distrik ki mannyer i ganny fer, lepok Eleksyon, pandan kanpanny tou bann aktivis, beton i ganny mete deor kot zot – mon pe koz Anse Aux Pins la – beton i ganny mete deor.  Ou vwar kanmiyon pe monte desann avek lapousyer ros, makadanm, blok, siman, feray, pou fer bann keksoz.  Cooker i monte tou.  Ou konnen, flat screen tousala i monte.  Me sa i en lendikasyon ki letan nou pep i gete, i vwar li i bezwen en lakaz, me en dimoun ki annan en lakaz e li i pe pey sa lakaz li.  Zot dir li fer en kontribisyon i pe peye li.  I annan ki pe pey lannen 2000, depi lannen 2000 e i vwar en lot li i pe ganny en semen pe ganny fer par en kontrakter, kot larzan pe ganny peye par Ladministrasyon Distrik.  Mr Speaker sa i enn bann landrwa ki nou bezwen revwar, pou nou kapab met en lord ladan.  E bann ki’n pran larzan ki pou distrik ki’n ganny fer sa bann zafer i bezwen rann; fer li pey son loan, fer li peye akoz se sa fason ki nou pou vwar ki mannyer i annan lazistis.  So i a kapab kontribye pou fer, fer pou sa lot ki reste anler parey kot bann Payet anler tou sa letan zot pe esper semen pa gannyen.  Ok?  Alors kekfwa ava annan en pti kontribisyon larzan pou kapab fer sa bann zafer.  Mr Speaker nou’n koz lo qualified manpower.  I enportan pou note ki i annan Seselwa ki annan menm kalifikasyon avek en etranze me akoz li i pe ganny en saler ki pli ba sa etranze i ganny anmennen e sa etranze i ganny en saler 3 fwa pli o ki sa Seselwa.  Selman par-ler letan nou ti pe fer negosyasyon pou St Anne, sa bann dimoun ki vini pe ganny en saler plis ki Seselwa, se sa Seselwa ki montre li ki mannyer pou fer serten keksoz.  Lotrozour mon’n ganny apele Airport, mon ti Airport mon’n ganny aprose i annan bann Airline ki pe anmenn district manager zot country manager etranze, me selman zot pa konnen ki mannyer i fer sa bann booking bann keksoz e Seselwa ki pe ganny mwens larzan ki zot ki pe montre zot ki mannyer pou fer.  So sa i bann sekter, bann fakter Mr Speaker, ki enportan letan nou pe gete, ki pa zis dan sekter Gouvernman ki nou bezwen gete.  Nou bezwen gete ki mannyer employment i aprouv Kontra pou permet en dimoun ganny en saler ki pli o ki sa Seselwa me selman sa Seselwa ki pe montre li.  So i bann keksoz ki nou bezwen gete letan nou pe fer sa letid, kekfwa nou bezwen fer en letid vreman aprofondi ki pou determin serten eleman ki pou satisfer nou Seselwa.  Sa osi i aplikab dan Sekter Tourizm, dan Lotel kot en dimoun i vini, si en Seselwa ki pe fer li i  ganny en pli bon package, i ganny en transpor, i ganny en lakaz i ganny tou keksoz e sa se pou ki mannyer nou pou delivre sa servis.  E sa i pas par kot Minister Onorab Hoareau. Atraver ou Mr Speaker i pas kot Minister Lanplwa, kot enn bann servis, bann letid servis pou delivre Seselwa i bezwen ganny fer.

Lot Mr Speaker mon get dan mon distrik.  I annan en Bus Stop ki pou dir pou fer, pou organiz terminal, pou fer tou sa bann zafer.  I met en notice  e sa notice ti pou pran lefe depi avan eleksyon 2016.  Notice i dir ou Desanm 2015 pou konmanse.  Pa’n konmanse.  In konmans an 2016 aprezan in arete la.  In arete.  I enportan pou nou konnen kote ki sa bann zafer i ganny fer.  Eski akoz Anse Aux Pins en dimoun LDS, en Manm LDS ki’n gannyen prezan nou’n arete?  Me selman mwan mon pou lager akoz sa ti en keksoz ki mon diskit avek Prezidan Faure dan son vizit Vandredi letan i ti pas Anse Aux Pins.  Nou pa kapab, nou bezwen enform nou pep ki pe arive.

Devlopman lo Chetty flat pou zot ouver sa pon pou kapab annan en flow ki sorti.  Ti annan en dele letan Mr Speaker.  Dele letan pa’n ganny respekte.  Sa se akoz nou donn menm dimoun tou Kontra.  Akoz nou bezwen gete.  Eski i annan gous oubyen non?  Eski i annan tro bokou travay ki en dimoun pe gannyen  oubyen non?  Eski i annan ase lekipman pou li fer sa travay oubyen manpower oubyen non?  Lot Sekter Mr Speaker se i annan dimoun ki annan Class One kontrakter selman li letan i demande pou fer vin en etranze i ganny en bal kantite difikilte.  Sa ankor service delivery.  I ganny en bal difikilte pou li ganny son bann soz me selman i annan ki annan plis ki mil GOP pou li fer vin etranze me selman zot menm zot, zot Class One.  Kontrakter akoz i annan 2 pwa, 2 mezir eski, nou’n dir annou tir politik.   Annou tir politik dan sa bann zafer.  Si en dimoun i siport Parti Lepep and he deserves donn li.  Si i siport LDS e i deserve donn li.

En lot legzanp ki mon pou pran Mr Speaker se dan Lapolis.  Nou tou nou’n vwar i annan polisye ki’n vin kot Lasanble akoz sa zafer promosyon.  Service delivery, Komisyoner, eski in delivre byen?  Eski DPA in advise li byen?  Service delivery tousala ok.  Eski en dimoun ki’n fer 5an , 6an, 7an, lo en ran Lenspekter in vwar en dimoun ki’n sorti Serzan in vin Sou Lenspekter, in vin Lenspekter i mont ASP la.  Definitivman i bezwen demann kestyon.  Eski sa i bann servis ki pe ganny delivre?  Akoz servis i pa zis avek pep i avek ou bann travayer.  I annan ki’n dir koz avek ou travayer gete ki mannyer i ete.  Gete ki mannyer ou kapab improve.  Ou menm ou Onorab Hoareau atraver ou Mr Deputy in dir sa.  Nou bezwen annan sa kominikasyon me sa i en keksoz ki enportan e ki bezwen ganny fer.  Nou annan dimoun ki parey mon’n dir in apply lakaz i pe peye Mr Speaker.  I pe peye e letan i sey al rod son statement oubyen i sey al rode  ki zistans mon ete, akoz mon pa pe gannyen ki en lot dimoun ki vin an dernyen mon i gannyen?  E i pa ganny en repons i ganny anvoye sorti kot en lofis pou al en lot lofis, en lot lofis.  Mon annan en madanm in dir mwan pa ezite mansyonn son non me selman mon pa pou fer li pou rezon ki mannyer sistenm Parlmanter i marse, i ti annan, i pe reste dan en lakaz.  I pe peye lakaz li.  Kontribisyon i pe fer.  I pe lwe.  Sa dimoun dan prive i dir li sorti.  I ale i al kot Minister i dir be mon’n ganny dir sorti mon pou bezwen en lakaz mon napa landrwa pou mon reste.  Kot mon belmer i plen alors i difisil pou mwan kapab reste menm si mon ti ava anvi ale.  Zot pa ni donn li en lenformasyon.  Mwan Mr Speaker, mon telefonnen mon anvoy text.  Mon anvoy text mon dir silvouple pran kontak avek mwan an referans avek sa madanm.  Mon pa ni ganny en repons mon text.  Eski sa nou bezwen fer en letid pou nou kapab amelyore Mr Speaker?  Non. Non.  Nou bezwen kapab konpran letan nou ganny en responsabilite pou nou desarze, nou bezwen desarz li e text in anvoye nou bezwen reponn.  Kanmenm 10er diswar, 11er diswar anvoy en pti not eksplike.  Mwan mon a transmet sa avek sa madanm i ava soulaz li en pti pe, pou li kapab konpran ki pozisyon i ete.  Mr Speaker i annan dimoun dan mon distrik ki son partner, son msye in mor.  I desann pou sey vin rod en pti larzan – i annan zanfan.  Son msye in mor ki ti kontribye pou amenazman son zanfan, ok?  I desann kot Welfare i ganny tourn an ron pou li kapab vwar en pti soulazman ki li i kapab gannyen akoz kontribisyon son msye i nepli la.  Sa i bann keksoz ki nou bezwen get a fon e mwan mon pou dir Mr Speaker sa i bann keksoz ki politize.  Onorab Sanders, Vital non – Vidot, Onorab Vidot Mr Speaker i dir napa politik, napa politik dan son fason ki li i ti pe travay.  Me mwan mon pou bezwen dir, mon pou beg to differ.  Mr Speaker mwan mon’n viktim enn sa bann sityasyon.  Mon spesyalize dan Delimitasyon Maritim.  Mon ti lo komite Delimitasyon Maritim depi lannen 2001 ler mon’n retournen.  Letan Lalyans ti formen mon zwenn Lalyans mon ganny en let sorti kot Minis Adam ki ti ansarz Lekonomi Ble i dir ek mwan, ‘Your services are no longer required.’’  Sa apre ki mon’n al dan Lalyans sa.  So mon pe montre ou ki mannyer lekspertiz, nou’n koz lo brain drain bann Manm Onorab dan parti lepep in koz lo brain drain. Bann Manm Onorab dan parti lepep in koz lo brain drain mon pe dir ou ki mannyer brain drain i arive lo en baz politik.  So pou ozordi vini dir poudir i pa lo baz politik, i fo.  Ozordi Prezidan Faure pe sey diminyen sa.  E si pa ti LDS ozordi dan Lasanble Mr Speaker; si pa ti 15 lo 10 nou ti pou ankor annan sa menm problenm.  Nou ti pou ankor annan sa menm problenm.  Ase malelve les mwan koze.  Ti pou annan menm problenm Mr Speaker.  Ek nou pa ek nou sa konotasyon i et e i reel.  Mr Speaker i ki lontan oubyen mwan mon’n fer sa leksperyans, sa enn pou ganny lakaz.  En pti Komite i asize, gete, ‘’I ek nou li, be i pa ek nou?  E se sa kestyon ki ganny demande Mr Speaker.  ‘’Ek nou pa ek nou?’’  So i egziste e i ankor egziste ozordi akoz sa striktir ki ti ganny met an plas pou kapab asiste dimoun.  Mr Speaker avek sa detrwa mo mon pou esper larepons ki Onorab Gill i donnen, pou mwan kapab gete ki direksyon oubyen si mon pou lev mon lanmen pou mon siport sa Mosyon.  Mersi Mr Speaker.

 

MR DEPUTY SPEAKER

Mersi Onorab Andre.  Onorab Chantal Ghislain.

 

HON CHANTAL GHISLAIN

Mersi Mr Deputy Speaker.  Mr Deputy Speaker taler mon’n  tann en zafer ki dir ziska ozordi zot pa ankor konnen ki mannyer zot in ganny Eleksyon.  Konmsi parfwa enn ler nou bezwen mazinen pti pe, ou konnen dan lager toultan ler ou al lo ring i annan kwen rouz ek kwen ble napa kwen ver.  Kekfwa la larepons zot kestyon.  Mr Deputy Speaker si ozordi nou pe koz lo nou lafors travayer apre ki tou sanson pou’n fini sante, tou diskour pou’n fini lir, mwan ou, li, nou tou nou pou nepli la.  En sel keksoz ki pou reste se berso nou nesans ki later nou zanset in kit ek nou.  Sesel.  Sa Sesel kot nou konman kreol ki dir e ki deside ki pou fer.  Byen lo konmansman depi lendepandans Sesel nou’n touzour met nou pep o sant devlopman.  Laprev i la devan nou pe enport ou ras, ou kouler lapo, ou sinyatir, i annan dimoun byen edike ziska menm avek degre Doktora, Masters, byen eksperyanse i annan talan dan nenport ki domenn.  Tout o long nou devlopman nou Gouvernman in touzour krwar dan nou dimoun.  Ozordi tou nou zanfan i dan lekol.  9an ledikasyon obligatwar e pou fer sir ki personn pa ganny kit deryer ozordi en zenn fiy ki’n trouv li ansent lo ban lekol zot touzour kapab retournen pou kontiny zot letid apre nesans zot zanfan.  Tou dimoun i lib pou sanz lanplwa.  Tou dimoun i annan menm sans pou kontiny son letid pli avanse dan nenport ki domenn pou li kapab ganny promosyon.  Mr Deputy Speaker si i annan en keksoz ki lemonn ozordi i bezwen fer pou nou pei se respekte dinyite nou Seselwa konman en nasyon.  Respe nou langaz, respe nou abilite pou melanze, pe enport nou kouler lapo, nou krwayans politik e relizye.  Mr Deputy Speaker se sa labote nou idantite konman en Kreol.  Ki swa an poezi, an santan ou menm an vers, nou tou nou annan drwa konman en Seselwa pou dir sa ki nou anvi dir konman en nasyon.  Kan i arive nou Sesel, nou vant, nou zanfan Seselwa pou lager avek tou son lafors.  Ankor e an arm pou defann nou patri.  Pa ti en fars kan le 29 Zen 1976 nou ti lager pou lamars pou Lendepandans Sesel ek son pep.  Lamars travayer, Lamars Diri, lamars pou tou Seselwa vote e tou lezot lamars dan nou listwar pou donn nou dinyite konman en pep.  Pa ti en fars ler ti fer lamars pou liber nou pei ek son pep dan lamizer nwanr.  E pa ti en fars osi sirman ler nou ti deside ki sa pep pa pou viv parey bef dan disab sakenn vey son lizye.  E finalman pa ti en fars ler nou ti swazir en sistenm ki garanti en o degre byennet e konfor zanfan e dimoun aze, ensi ki bann vreman dan bezwen konpare avek en sistenm ki les sakenn de nou debrouy ki mannyer i kapab.  Wi 40an nou’n la.  40 an akoz sa pep dan tou son mazorite ki’n desid li koumsa.  Me annou aret manti avek nou lekor ki 40an sa pei ek son pep pa’ n bouze.  Konbyen nou ki esey asize e sey fer en refleksyon lo kote ki nou ti pou’n ete konman en endividi si nou pa ti’n deside pran nou desten dan nou lanmen.  La mwan mon krwar avek mon sinyatir ek mon kouler lapo lefet ki mon fanmir ti napa larzan mon krwar mon ti pou ankor pe kourbe pou anmas ko-ko lo plato Linyon.  Parey i annan ki oule fer nou krwar ozordi ki zenn La Digue nou pa devret bouz Mahe pou al rod en meyer lavi.  Nou osi nou bann zenn Digwa i anvi vin avoka.  I anvi vin pilot, i anvi vin tou sa ki bann zenn Mahe i vini ozordi zis akoz La Digue pa permet sa arive dan sa bann kalite travay olye zis travay Linyon Estate.  Mr Deputy Speaker malgre tou sa ki nou dir nou bezwen ozordi dir mersi sa Kreol Seselwa ki’n batiz sa pei.  Wi travay in long, lannwit in long, lapey in ti gin me se nou frer e ser Seselwa ki’n travay, ki’n skente nwit e zour pour ki ozordi nou ki la pe asize dan sa Lasanble nou la ozordi.  Kan ki nou pou azir fran e dir mersi Sesel pou son lakonplisman?  Konbyen nou ki’n esey fer sa refleksyon lo lefet ki nou viv dan en pei kot kouler ou lapo ouswa ou sinyatir pa deside si ou pou vin Minis, Anbasader, en Onorab dan Lasanble Nasyonal, si ou pou al Liniversite ou non.  Kot ou lib pou koze, lib pou swazir ki larelizyon e parti politik ou ladan.  En pei kot nepli annan class, kot si ou pli vilnerab ki lezot ou pa ganny akse avek ledikasyon, Lasante ouswa menm pou ou ganny akse avek bis piblik.  Kan ki nou pou azir fran avek nou lekor e dir mersi Sesel ki pandan 40an ou zanfan in al dan menm lekol avek sa ki pou mwan.  Menm sant Lasante ki avek mon zanfan pou mwan. Mr Deputy Speaker kan ki nou pou azir fran ek nou lekor e dir mersi Sesel ki tou sa in posib akoz sa Gouvernman in fer sir ki in met son pep o sant son devlopman.  Mr Deputy Speaker se gras a tousala ki ozordi nou pe koz service delivery.

Dan en pti resers personnel ki mon’n aprann en senp pti keksoz ki mon oule partaz avek zot ozordi.  Sa i sa let ‘d’ en senp pti let dan delivery.  Sa pti let i vedir dedikasyon.  Dedikasyon sa reprezantan ki pou donn sa servis.  Le moman ki sa msye ouswa sa madanm i rantre dan sa lofis, i devret santi li priyorite limero enn e non pa selman sa enn ki trouv li dernyen lo lalis lapwentman.  Donk i bezwen zis esper son tour.  Okip li byen.  Donn li lenformasyon.  Diriz li kot i devret ale.  Nek zis zot tir la met la.  In ler pou arete tousala.  Fer dimoun vin pyon ouswa zwe kouk kasyet ek dimoun.  Silvouple aret fer dimoun monte desann dan sa bann biro.  Aret fer li hold-on lo son telefonn, pas li avek en dimoun, re pas li avek lot san okenn repons konkret e fer Gouvernman perdi kredibilite.  E pou sa pti ponnyen ki deside zwe politik avek lavi dimoun, avek ledikasyon nou zanfan e avek file dimoun, mon enplor zot ozordi pou sanze pou lanmour Sesel.  Pou lanmour nou Patri.  I pou responsabilite ki ler i annan en randevou ou pa met li asize, espere, espere, e gaspiy lazournen travay zis asiz lo ban espere.  Ozordi dan tou pti keksoz nou koz politik.  Tou keksoz nou fer politik avek.  Si ozordi nou’n mal fer, nou ganny deal avek, nou ganny retire dan nou pos, nou sot lot kote nou kriy viktimizasyon.  Be kote nou pe ale?  40an in koze ozordi e zot koze zot dir ou poudir 40an bann dimoun in ganny peze isi dan Sesel.  Be eski nou pe dir ozordi ki pandan sa 40an tou sa bann dimoun ki pe travay dan Gouvernman i siport Parti Lepep.  Eski zot pe dir nou poudir ouswa zot pe azir fran ek nou poudir 40an pandan sa dernyen 40an in annan bann dimoun lopozisyon ki’n pez nou pep Seselwa.  O kour mon lavi mon’n aprann en senp pti valer ki ankor pe ed mwan dan mon lavi e sa i entegrite. Sikse e popilarite i pou vini e i pou ale li me ou lentegrite i pou reste pour touzour.  Lentegrite i vedir fer keksoz ki byen.  Toultan e dan nenport ki sirkonstans pe enport si piblik i vwar ou oubyen pa vwar ou.  I demann bokou kouraz e devosyon pou fer sa ki byen pe en enport sirkonstans ou trouv ou ladan.  I pran bokou lannen pou kree en bon repitasyon, en bon zimaz e popilarite.  Me i pran selman detrwa segonn pou perdi li.  Mon’n aprann sa apre ki mon’n pas 20an dan servis medya Sesel.  Donk nou tou nou devret pe fer sa ki byen.  Pa zis pou nou lekor me pou nou pep Seselwa.  Mersi Mr Deputy Speaker.

 

MR DEPUTY SPEAKER

Mersi Onorab Ghislain.  Onorab Ferrari.

 

HON JEAN-FRANCOIS FERRARI

Mersi Mr Deputy.  Mr Deputy mon pa pou long parey nou’n promet.  E annefe mon mazinen poudir sa Mosyon nou ti’n kapab debat li dan en fason bokou pli vit, me mon bezwen dir ki annefe prezantater Mosyon in fer en bon pe kontour avan ki in ariv lo son 2 pwen prensipal ki nou pa devret enn se ki nou pa devret met ankor lezot striktir e son 2enm pwen se ki nou napa ase resours pou nou fer marse en lot striktir lour dan pei.  Mon krwar sete sa ki, mwan an tou ka se sa ki mon’n konpran ki prezantater Mosyon  in anvi dir nou e avek respe mon ti a kontan dir Mr Deputy ki sertennman mon an total akor avek mon bann koleg ki’n dir ki nou pa bezwen en letid ankor en letid.  Bann letid i annan en kantite ki pe anmas lapousyer lo tablet, dan bann file lo bann letazer e ki zanmen in ganny servi.  Nou konnen ki nou bezwen fer.  Nou konnen ki sa ki nou bezwen se bonn volonte. E kekfwa enn bann lamannman lo sa Mosyon ki mon ava propoz avek Onorab Gill, kekfwa i ava senpleman dir ki sa Lasanble i demande ki imedyatman Gouvernman i montre son bonn volonte, son determinasyon par etabli nesesite mendev reel dan Sesel.  Se atraver sa.  Montre determinasyon, bonn volonte akoz sa bann sif i la.  I la.  Bann letid in ganny fer e enn an plis oubyen enn an mwens i pa pou, i pa pou sanz bokou keksoz an sa ki konsern lenformasyon.  Akoz si nou fer ankor en lot letid parey Onorab Sophola in dir dan son prop parol lannen ale lannen vini me aksyon i minim.  La nou fer en lot e aksyon i pa neseserman ki nou pou ganny meyer aksyon.  Donk mwan mon ti ava dir mon premye pwen se ki nou bezwen bonn volonte pou nou kapab rekonnet nesesite e lirzans sityasyon ki nou pei i ladan e met bann priyorite devan.  Sa ki pa telman en priyorite tir en pe lanfaz lo li e annou avanse.  Ler mon dir nou bezwen bonn volonte, i senp e mon ava donn enn de legzanp.  Mr Deputy nou tou dan sa Lasanble anfen laplipar antre nou, an tou ka lo sa kote latab nou toultan dir ki enn bann Minister kot i annan mwens lefikasite se kot MLUH.  Minister ki responsab Lakaz, Lenfrastriktir.  Nou tou nou konplent nou pa ganny en repons, nou ekrir kot lakaz nou pa gannyen.  Nou ekrir kot later nou pa gannyen pou anrezistre e papye later nou pa gannyen. E enn bann rezon, enn bann rezon pou sa se ki bann travayer laba i vreman fristre.  I annan telman, i annan bann dan Survey ki pe esper Scheme of Service depi 3an ki pa pe gannyen, ki zot pe kaye dan en post.  I annan lezot dimoun dan Registrar ki pe kaye dan bann post.  Kot lakaz, kot PMC i annan dimoun ki pe zis trenn trennen.  I annan dimoun mwan mon’n rankontre par egzanp sa ki konsern lakaz avek bann talan e ban kapasite ekstraordiner pou travay.  Bann dimoun ki annan leksperyans me ki pa pe ganny donnen sa sans pou zot anvole.  E pou mwan i pa enportan si en dimoun i siport en parti ou pou en lot me selman nou bezwen – mon ti a mazinen ki Minis ki responsab i ti ava dir be ok i annan telman kritik, alors tou dimoun pa kapab mal e mwan mon byen.  Non nou annan problenm annou gete ki mannyer nou kapab adres sa bann problenm e nou ava fer sa bann keksoz marse.  Ler mon dir ki nou bezwen bonn volonte se ki nou bezwen osi rekonnet ki nou bezwen sanze.  Enn bann keksoz ki mon ti a kontan dir a sa moman la se ki mwan mon enn bann dimoun ki ti toultan apiye pou nou annan eleksyon dan distrik.  Eleksyon pou Konsey Distrik, Eleksyon pou DA, oubyen nominasyon, oubyen lapwentman pou DA me omwen en eleksyon dan distrik akoz mon toultan an faver bann sistenm minisipalite oubyen bann sistenm en Lotorite desantralize; akoz mon believe ki se la ki ou aprann la demokrasi.  Ou pa kapab – i difisil pou prouv ou premye Eleksyon al dan Eleksyon pou vin Manm Lasanble Nasyonal.  I devret annan lezot mars peron avan sa.  Me mon osi pare pou mwan ekout sa ki prezantater Mosyon in dir ki bann sirkonstans kekfwa i pa ideal, oubyen i pa parfe oubyen i annan lezot priyorite e nou bezwen konsider tou bann sirkonstans.  Me selman mon ti a kontan dir avek prezantater Mosyon ki mwan ultimately mon vizyon se pou annan bann eleksyon o nivo lokal, pou ankouraz nou bann zenn, nou bann dimoun ki’n pran pansyon pou zot antre dan lavi lakominote dan en fason pli striktire.  So nou kapab, nou kapab annan en – annan bann bon rezon pou annan en retar me selman a lafen dizour avan nou, nou kit sa pei oubyen nou kit sa later oubyen nou kit sa plas dan Lasanble mon ti a kontan vwar ki sa i ganny realize en zour.  Akoz se atraver la ki nou pou devlop sa nouvo volonte, a nouvo fason fer.  Se atraver en demokrasi bokou pli direk, kot dimoun i ava rekonnet son responsabilite e pran son responsabilite.  E parey bokou dimoun in dir, bokou mon bann koleg in dir dan Lasanble, mon pa bezwen retourn lo la.  I annan telman bann pti keksoz ki nou kapab fer.  Bann pti pit keksoz ki nou kapab fer pou nou sanz lavi nou popilasyon.  En repons, en let, return en call.  I telman, i telman enportan pour – kekfwa pou nou i pa enportan me pou sa dimoun ki pe esper sa call.  E mwan mon ti a kontan   ozordi salye, i annan bann civil servants ekstraordiner.  I annan bann civil servants, mwan mon santi i annan serten landrwa par egzanp mon ava dir  dan SPDF dernyerman mon’n call pou SPVD, mon’n ganny en text, en repons back dan 15 minit.  E mon’n promet mon lekor ki ler mon pou zwenn Brigadye mon pou nonm li lekel sa Kaptenn ki’n act lo sa ki mon’n dir e felisit li.  I annan dimoun ki pe bouze.  I annan dimoun ki anvi vwar keksoz arive.  I annan dimoun of course zot pou zot, zot pa santi, zot pa donn lenpresyon ki zot santi difikilte ki serten dimoun pe pas ladan.  Alors eski en lot, en lot layer parey Onorab Gill in dir i pou sanz keksoz?  Mon pa konnen me selman si ou’n deside pou al lo en sistenm rezyonal plito ki en sistenm distrik nou kapab seye.  Personn antre nou pa konnen akoz nou pa’n deza fer.  So nou bezwen seye e nou bezwen, nou bezwen sey avek bann keksoz ki en pe pli pti plito sey avek bann keksoz ki en pe pli gran.  Alors mwan mon zis swete ki desizyon ki nou pran a lavenir baze lo larzan ki nou annan, finans ki nou annan, kapasite bann dimoun pou travay nou fer li dan lentere bann dimoun akoz mon fatige, i fermal.  Bomaten, bomaten mon’n rankontre ankor en madanm Dodin Lopital. I konnen i pou tann mwan la, i pou tann mwan.  Tanzantan in nonm mwan depi ler madanm Benstrong ti la zot in promet mwan en miray e son lakaz pe konmans grennen e i pou grenn lo lakaz en lot dimoun anba.  Depi ler madanm Benstrong ti la.  Me sa en pake lannen sa.  Nou’n zis kit li ater e nou pa’n kapab, nou’n anvoy li demen tanto – demen tanto.  So nou pou bezwen rod bann striktir ki permet ki sa bann keksoz i arive e ki bann desizyon i ganny pran. Ok? Nou pa kapab annan en kontrakter anler kan Tobrouk ki fer 2 an i pe aranz en lateras.  2 an.  E ou a krwar personn pa kapab dir li nanryen.  I pa posib, nou pa kapab kontinyen koumsa.  Alors si keksoz i sanze e i konmans avek nou premye.  Mon ti pe fer en fars taler avek Onorab William.  Zot konnen ki mannyer bann zabitan Grand Anse i apel Onorab William?  Chairman.  Tou dimoun Grand Anse zot apel li Chairman akoz i ti Chairman Brans be sa osi i en keksoz ki bezwen sanze akoz dimoun pe mazin li konman Chairman Brans SPPF. Vwar.  E ler i mazin li koumsa kekfwa sa dimoun ki pa dan parti lepep i dir be mon pa kapab al kot Chairman akoz li i Chairman laba, alor sa osi i bezwen sanze.  Nou osi nou bezwen dir ek nou bann dimoun mon nepli Chairman mwan mon MNA akoz mon MNA pou tou bann dimoun.  Akoz lontan – enn bann keksoz ki, ki nou’n vwar pandan tou sa bann lannen se ki par-ler nou menm nou ki responsab akoz Lalwa, Lalwa ti ganny fer e mon prop papa ki ti deza dan Gouvernman SPPF ti dir mwan Lalwa ti ganny fer swa pou donn lavantaz en dalon ouswa pou pini en dimoun ki nou pa ti sa – ki nou pa ti kontan.  Se koumsa bann keksoz ti ganny fer.  Mon pa kontan li alors mon fer en Lalwa kont li.  Mon kontan sa enn mon fer en Lalwa pou li.  Koumsa ti marse lontan.  Ok?  Egzakteman.  Be sanmenm sa bann keksoz ki bezwen sanze.  Sanmenm sa bann keksoz ki bezwen sanze.  Mwan Onorab mon’n vwar.  Si mon’n vwar mon’n – mon pa pe dir ou sorti mon pa pe sa akoz deza Parti Lepep i en pe fay si ou konmans sote i pou ankor pli fay so tenir ou flex ou.  Tenir ou flex – akoz enn bann keksoz ki nou bezwen fer.  Enn bann keksoz ki nou bezwen fer se fer sir ki nou responsab.  Nou edik bann dimoun pou fer en keksoz avanse e nou pa – se pou sa ki Lasanble i riske vot tou an faver pou sa Mosyon, akoz nou pe al dan en sel direksyon.  E menm parey pli boner Onorab Pillay ti demann mwan zafer stevedores.  Be egzakteman be sanmenm sa bann kalite keksoz ki met retar.  Nou dakor lo en keksoz apre i annan de dimoun sorti dan en Union par kote i dir stevedores anmare, apre lannmen demare, delarge pou zot ganny menm keksoz ki nou ti’n gannyen son lavey.  Sanmenm sa bann keksoz koumsa ki nou bezwen, nou bezwen pa fer.  Alors Mr Speaker, Mr Speaker mwan mon ava terminen an di-z-an keksoz koumsa.  Nou bezwen avanse, nou bezwen avanse.  Mon vwar poudir kekfwa Onorab Gill in anvoy en mesaz konmkwa i pa tro, tro annan eleksyon konmsi en pe boner konmsi nou pa tro, tro fer la akoz  – mon konpran akoz ler ou’n sorti dan en defet en pe lour ou pa le al dan en lot deswit la.  Ou le rekipere konmsi aranz, aranz lekor en pe ou konpran, konmsi.  Sa i byen be selman mwan mon konsey se pa tro tarde en akoz pli zot tarde keksoz i kapab vin en pti pe pli konsekan en.  So alor mon kontan sa zefor ki pe ganny mete pou vwar ki mannyer nou kapab avanse akoz avanse nou bezwen avanse ok?  E Annou, annou fer sir ki premye keksoz ki vini se ki nou montre sa bonn volonte e nou edik nou bann dimoun ki keksoz in sanze.  Ki nou bezwen travay.  Nou bezwen travay pou nou anmenn sa pei devan e ki napa personn ki pou ganny zis anmennen akoz li in la, e i pou ganny anmase parey bann dimoun in dir tan ki i annan welfare, tan ki parti lepep i o pouvwar mon pa pou travay akoz i annan Welfare.  Sanmenm sa bann keksoz.  Bann keksoz ki bezwen sanze nou bezwen montre sa bann volonte e mwan mon mazinen poudir nou pou avanse.  Mersi Mr Deputy Speaker.

 

MR DEPUTY SPEAKER

Mersi Onorab Ferrari.  Onorab De Commarmond.

 

HON CHARLES DE COMMARMOND

Mersi Mr Deputy Speaker.  Mr Speaker nou’n deza preski exhaust sa debate lo sa mon pa pou long alor.  Me selman si ou vwar deba i al sa zistans sa kantite i montre poudir vreman i annan issues.  I annan problenm, problenm i reel alors sa Mosyon i annan son merit.  Si ou kalkile mwan mon get li koumsa en.   Legzizans nou pep ozordi avek devlopman avek modernizasyon ki parti lepep in anmennen dan sa pei i fer ki nou annan bann nouvo defi, bann nouvo challenge e sa i fer nou – i fer li vin difisil e pli difisil pou nou kapab delivre pou nou pep.  E lezot lenstans dan menm fason ki nou ti fer avan.  Nou annan lezot problenm ankor ki pas dan milye.  Nou’n vwar ki lefe drog in tap nou popilasyon ki travay en kantite e nou lafors travay i ganny afekte.  Ler la ki nou’n bezwen ogmant lo etranze pou donn nou koudmen.  I annan bann komanter pozitiv ki’n sorti dan deba.  I annan dimoun ki’n dir ki avan, i annan menm ki’n mansyonn serten non, Robert Georges ti en bon sef ti travay kot SBC me sa ti pandan sa 40an an, savedir pandan sa 40an, well sa ki mon krwar in dir i ti fer son travay byen, whatever, whatever.  Be in annan plizyer e lotrozour en dimoun i dir mwan dir letan Msye Rene ti pran pei koumsa i dir, i dir be pa tou dimoun ki ti annan degre be selman travay ti ganny fer.  Sa ti en lepok.  E la nou vwar nou avek sa bann nouvo challenge e ki fer ki ou annan ou levolisyon nou demokrasi i anmenn nouvo defi, nouvo challenge.  Nou demokrasi pli i evolye, pli i devlope, i avanse, i anmenn bann nouvo legzizans li osi. E nou vwar Prezidan Faure in vini la avek serten nouvo konsep.  Serten konsep ki osi nesesit pous nou pli devan ki i pe koz lo enklisivite ki konmsi ki tou dimoun i devret donn koudmen e sa i tonm drwat avek mon pwen ki mon deza dir toultan dan Lasanble ki Seselwa i bezwen annan par ladan, dan son desizyon ensidswit.  Nou koz lo bonn gouvernans, latransparans e rann kont e nou dan FPAC nou pe remarke.  E pa zis FPAC tou bann travay Komite Lasanble mon asire zot pe vwar kote i annan issues.  E kote keksoz i retarde pou bann rezon bet.  Yer, yer dan Question Time avek Minis nou’n vwar kote en Minister i pe esper en dokiman pou plizyer mwan from en lot Minister ki i ti’n devret travay lo la e anvoye.  So i montre nou poudir vreman problenm ki nou pe koze i vre.  Nou get dan Gouvernman li menm ler nou’n shift e menm Lorganizasyon enternasyonal i dir ou IMF i pouse pou annan sa ki nou apel performance-based-budgeting, programme performance-based budgeting.  Sa in ganny pouse dan direksyon zisteman akoz i annan problenm autre part.  I vedir annou sey sa nouvo fason pou nou kapab delivre pli byen pou nou pep.  Alor i annan tou sa e i pa zis nou, i pa zis nou pei ki pe rankontre sa difikilte ki pe pas atraver sa faz.  Alor i en challenge ki nou bezwen fer fas avek, me nou pe dir ki petet vre pa demann, pa devret annan en lot letid.  Letid pou al pran plis letan ensidswit mon krwar nou tou i annan bann largiman ki’n ganny mete tou dimoun i vwar kot problenm i ete mon krwar letan Prezidan Faure li menm in met – in koz lo bonn gouvernans, latransparans e rann kont zisteman in vwar.  Pa bezwen al fer letid.  In vwar poudir i annan issues la.  E ki bezwen ganny adrese sa bann keksoz be selman nou, mon ti pe koz FPAC.  FPAC dan son bon travay ki i pe fer nou’n vwar nou bezwen serten lezot lenstans, lezot travayer.  Pe koz lo forensic expert ensidswit or lezot dimoun be ou vwar si ler nou bezwen sa bann kalite sipor nou pa gannyen, i pou rann nou travay retar.  I pou fer nou regrese instead of avans devan.  Be kote nou pou ganny sa.  I vre Lasanble li in pran, in fer en lepa devan li, i pe ganny son lotonomi.  I kapab pran serten desizyon si i vwar i annan en legzizans pou li fer.  Be pa tou landrwa ki annan sa kalite lotonomi pou li kapab bouz dan direksyon osi vit ki i ti ava anvi.  Savedir i montre ou ki osi i annan serten lenstans dan pei, serten striktir ki oule al devan.  Kantite travayer dan public service i oule fre pli byen, me i ganny retarde par serten lezot keksoz.  E la nou konnen nou poudir DPA i enn sa bann landrwa ki retard zot.  So se sa rezon ki mon demande ki osi an menm tan nou annan en pti pe pasyans akoz mon konnen poudir i annan Public Service Commission ki pe vini e sa Lalwa pe – pou vin devan nou Lasanble e kekfwa avek sa, i ava ed nou pou osi avans devan be nou lans en lapel ki atraver sa  Mosyon Gouvernman, Egzekitiv i vitman e deswit servi sa ki nou pe diskite la sa bann pwen, pou fer ki i annan bann sanzman neseser pou anmenn en pli bon service delivery pou nou pep.  E si nou koz lo District Council mwan mon enn sa dimoun ki ti pouse pou District Council.  Mon’n pous en kantite e mon’n si oule anmenn en Mosyon lo la.  Me mon vwar la ek sa ki zot pe ganny dir i kler, nou bezwen revwar sa konsep dan son totalite.  E tenir li pou le moman akoz sansan nou pou al met layers after layers e sa i pou olye avans devan i pou fer nou annan plis problenm.  E nou vwar alor ki nou devret revwar lafason ki nou pe panse.  E se sa ki nou pe koz sa sanzman mindset.  E si nou revwar keksoz dan sa fason e mon krwar mwan avek sa Mosyon letan nou’n met tou keksoz ansanm, i devret anmenn nou en pli bon keksoz pou nou pep, akoz a lafen dizour se sa ki nou pe rode.  Nou pe rod en fason pou delivre pli byen pour nou pep akoz nou pep i bezwen li a lafen dizour, li ganny en pli bon rannman avek whatever sistenm ki an plas.  Se avek sa ki mon pou, mon pou donn mon sipor sa Mosyon e ki mon konnen mwan ki ler konteni sa Mosyon i ganny met an pratik nou pei, nou Ladministrasyon Piblik i ava pli efektiv e pli efikas e i a delivre pli byen e tou dimoun i a pli santi li annan par ladan e pli byen avanse.  Mersi.

 

MR DEPUTY SPEAKER

Mersi Onorab De Commarmond.  Bon nou’n fini deba lo Mosyon mon ava demann mover Mosyon pou fer son konklizyon.  Onorab Simon Gill.  Sey dan 10 maybe 15 minit.  Go aheadGo ahead Onorab.

 

HON SIMON GILL

Mersi bokou Mr Speaker e bonn apre midi malgre 5er in sonnen mon krwar nou annan ankor en kantite lenerzi pou nou ale akoz nou’n dir nou pare pou travay pou sa pep.  E mon pare pou fer mon konklizyon Mr Speaker.  Ou konnen dan Konklizyon premyerman mon oule remersi tou bann koleg Onorab ki’n pran laparol pou koz lo konteni Mosyon.  I annan nou a note dan nou rikord ozordi le 13 Septanm 2017 – en pe parey i tradisyon dan bann Lasanble serten in profite pou fer en pe politik.  Nou kontan dir sa fer en pe politik akoz nou’n sorti en pe lo konteni esansyel Mosyon.  I annan ki mon regre i en pe pli for akoz mon ti pe ekspekte ki zot kapasite ki zot annan ti pou adres vreman lesansyel Mosyon e kontribye avek bann nouvo lide.  Kontribye avek bann sizesyon pou fer nou servis piblik bouz pli devan.  E an partikilye mon annan mwan mon zanmi la, mon koleg Onorab Gervais Henrie ki mon Manm Elekte dan distrik Mont Buxton.  E mon vreman regrete lafason ki in abord konteni sa Mosyon.  Mon tir sapo avek Onorab Afif, Onorab Ramkalawan e Onorab Jany de  Letourdie.  Vreman zot in fer bann keksoz ekstrememan fantastik.  E lezot Onorab danze ki mon pa fini mansyonn tou zot non i riske dir zot pa pou vot pou sa Mosyon.  Me an fenn kont sakenn de zot in fer son kontribisyon malgre parfwa zot in fer en pti pe politik.   Ankor enn fwa mon bezwen dir e mon krwar onnetman zot aksepte sa.  Me back lo lesansyel Mosyon Mr Speaker.  Lesansyel Mosyon napa en konfli dan son formilasyon.  En konfli aparan parey Onorab Hoareau in le sey anmenn son largiman.  En largiman akademik ki mon pa trouv vreman a sa moman pou nou kontinyen en deba lo sa largiman akademik.  Ler ou koz lo Performans – definitivman avek performans ou bezwen vwar son laspe lefikasite e ou bezwen vwar ki mannyer i efektiv sa performans.  E ou pa kapab koz lo performans an izolasyon avek kapasite entelektyel e abilite fizik sa endividi, sa zonm, sa fanm, ki pe perform dan sa travay or dan sa responsabilite ki i annan pou li desarze.  Byensir enn bann defayans nou sistenm ladministrasyon piblik Mr Speaker se pandan tou bann Departman e pandan tou bann Minister ki ou annan e etabli sa ki nou apel en performance appraisal.  Sa i en defayans ki avek sa nouvo zefor sa nouvo regar ki nou pe vwar public service an relasyon avek nesesite pou zot delivre e servis ki efektiv e efikas nou bezwen pe konstaman evalye zot performans pou ki nou pous zot kot i annan bann defayans, nou pous zot kot bezwen plis training e nou fer zot kapab perform e zwenn lekspektasyon nou pep.  Zwenn lekspektasyon sa piblik ki zot pe deservi.  Mr Speaker a sa staz i enportan ki nou note e mon aknowledge nesesite pou ki tou nou bann fitir post ki nou mete dan Gouvernman i bann post, i bann pozisyon kot nou met bann dimoun ladan baze lo merit.  I enportan ki nou rekonnet kapasite, abilite en endividi pou li desarz sa responsabilite baze ankor enn fwa lo konteni e latas ki sa Departman oubyen sa Minister i annan pou akonplir.  De lot kote mon oule fer referans avek demann ki Onorab Pillay in fer.  Onorab Pillay, Onorab Elekte pou distrik Au Cap.  Wi en bon piti sa zot dir mwan.  Mr Speaker mwan mon a dir Onorab Pillay Manm Elekte pou Au Cap ki dan sa nouvo lanvironnman politik performans i top to bottom and bottom top.  Dan en lot mo ki mon pe dir, nou pa kapab annan nou en servis piblik kot nou fer abstraksyon e izol serten dimoun an relasyon avek nesesite pou perform e donn en servis ki efektiv e efikas nou pep.  Gouvernman i an servis nou pep e rien d’autre e alor nou ekspekte sa ki anba konman en labourer e sa k i anler dan top leadership nou pei i perform e reponn a legzizans nou pep dan sa moman istorik konkret ki nou ladan e ki Sesel pe traverse avek tou son splander, tou bann diverzans politik, tou bann sanzman bann dinamik ki annan dan korelasyon lafors politik ozordi dan nou pei.  Nou pep pa oule okenn lezot keksoz apard ki en servis ki efektiv e efikas.  E ladan i annan en kantite eleman.  Ladan i annan en lot eleman ki’n antre.  Sa lot eleman ki nou’n fer antre Onorab Henrie malgre ou’n dir i ti devret vin konman en Mosyon separe or en size separe nou pa kapab fer abstraksyon ki Ladministrasyon Distrik i per lekstansyon Lebra Gouvernman dan nou pei.  Ladministrasyon Distrik i en ekstansyon Lebra Gouvernman dan kominote, dan distrik.  E i enportan ki i donn en nouvo dinamik ki nou pe fer fas avek ki nou osi prepar nou pep pou li kapab fer en leksperyans, en leksperyans ki evantyelman pou anmenn nou lo eleksyon District Council.  Onorab Ferrari in fer mansyon sa.  Onorab Ferrari Sesel, sa Sesel ki nou tou nou kontan e sa Sesel ki nou tou nou bezwen pe travay pou li i pou arive en moman kot nou pou annan Eleksyon District Council.  Me pou le moman donnen nou sityasyon aktyel nou pe dir annou konmans par etablir bann Regional District Council or bann Regional Council.  I vin konman bann prototip lo nivo rezyon, ki permet Sesel ki permet Gouvernman sesel, Leta Sesel fer bann letid e vwar lafason ki i pou operate, ki mannyer apre nou kapab etal li lo nivo bann distrik kot evantyelman i ava zwenn dezir e laspirasyon nou tou non pa zis dezir e laspirasyon Onorab Ferrari.

Mr Speaker Sesel nou pe avanse.  Sesel nou pe progrese e mon konnen ki nou tou isi dan sa Lasanble ozordi mon pou servi en terminolozi ki mon kontan servi dan sa nouvo konsanti politik, now is the time and it is not only the time alone it is the time together e together nou pou anmenn sa Sesel.  Nou pou ede pou transform sa Sesel Mr Speaker.  Sa Lasanble i annan li en nouvo lenerzi.  Non pa zis lenerzi en kote me lenerzi miltipliye Parti Lepep avek LDS isi dan sa Lasanble Nasyonal. Mon krwar konman en lekip nou pou kapab anmenn sesel lo sa lot nivo.  Sa lot nivo ki nou pep pe swete nou anmenn Sesel.  Non pa pou benefis personnel me pou en benefis pou la Nasyon Seselwa.  Alor annou pa vwar okenn konfli avek pozisyon ki nou pran.  Mwan wi mon pou kontinyen pres bann prensip ki mon krwar ladan.  Me mon’n krwar dan en prensip pa akoz mon’n anvi krwar dan en prensip, me i en prensip iniversel e ki mon tann bokou mon bann koleg koz lo la lo lot kote latab.  Lazistis sosyal, mon krwar ladan mon senserman krwar ladan.  Legalite dan loportinite mon senserman krwar ladan.  Mon parti i krwar ladan e nou pou kontinyen krwar ladan isi lo sa kote.  E mon kontan zot osi zot krwar ladan.  Si nou tou nou krwar ladan nou bezwen fer sir ki nou edik nou pep.  Ki nou sanz sa mindset nou pep ki bokou zot in koz lo la.  Nou pep i bezwen or nou bezwen edik nou pep.  Nou bezwen edik nou pep pou ki nou anmenn zot pou transform sa mannyer zot panse.  Sa mannyer zot vwar en Manm piblik ler i abord zot laport or ler i abord zot biro dan servis piblik.  Pa vwar sa manm ki vin kot ou laport konman en LDS or konman en Lepep.  Vwar sa dimoun konman en sitwayen ki vin kot ou par rapor avek ou pozisyon ki ou annan ozordi kot i bezwen vin kot ou i napa en lot laport pou li vini e ou bezwen met ou a servis sa zonm, sa fanm ki vin kot ou.  Se sa nou misyon.  E mon demande ki sak sa bann Lorganizasyon i bouze e fer sa letid.  Mon pou ensiste fer sa letid akoz mon konnen ki i annan pa’n fer li swa zot in fer li a la lezer e nou bezwen al dan profonder.  Ankor enn fwa Mr Speaker i pa rezonnab e i pa akseptab pou okenn servis piblik, okenn dimoun dan public service pran en mwan, de mwan, 3 mwan pou acknowledge en let ki en Manm piblik i anvoy kot zot.  Zot bezwen lev-e bouze e nou pe dir nou pa pe koz zis ankor enn fwa sa Clerk, sa Direkter, sa Direkter Zeneral, sa PS, nou pe koz son Minis ki responsab sa Lorganizasyon, sa Minister.  Nou pe koz lo la.  E nou bezwen viv alaoter legzizans nou pep ozordi; legzizans nou pei ozordi.  E mon konnen mon annan konfyans dan leadership Prezidan Faure.  Mon konnen ki avek sipor sa Lasanble nou pou ed Prezidan Faure pou al sa extra mile pou ede ki nou transform public service.  I pa kapab fer li li tousel.  Nou bezwen donn li sipor.  Nou bezwen donn li siport e mon kontan son lapros ki in pran.  En lapros konsiltasyon.  En lapros kot i zwenn bann Leaders pour ki nou kapab ansanm konsilte e sa konsiltasyon ankor enn fwa nou pe dir i bezwen … ziska dernyen lakaz dan nou kominote.  E bann Regional Council ki nou pe dir i pa bann neseserman bann nenport ki dimoun ki vin lo la.  I bann dimoun ki kapab donn son de zorey pou ekout sa dimoun ordiner laba dan kominote.  Alor Mr Speaker mon pa pou pran pli bokou letan dan sa Lasanble ozordi mon krwar ki nou mesaz, nou mesaz in ale e osi lontan ki nou annan sa msye anler State House Prezidan Danny Faure annou garanti ki i pe ekoute e ki i pou pran aksyon e mon’n ganny demande par en Onorab  isi dan sa  Lasanble dir pran aksyon imedyatman e mon a dir nou oule konman en Lasanble non pa konman Simon Gill, konman en Lasanble nou oule ki dan en dele letan tre kourt aksyon i ganny pran pour ki an retour nou konnen  ki pe pase e sak bann Departman, sak bann Minister i raport avek nou pep lo bann desizyon ki zot in pran pour ki an retour nou pep i konnen  ki sa ki zot pe fer.  Nou pep i konnen kote ki annan mankman e nou pep i konpran ki bann plan kour term, mwayenn term, e long term ki sak bann Departman, sak bann Minister in pran pou rezourd e adres sa kestyon Manpower needs dan sak bann Departman, dan sak bann Minister e ki nou adres osi training, training, training pou sak bann zonm, fanm dan sak bann Minister, dan sak bann Departman e ki zot in vwar sa kestyon saler.  Vwar sa kestyon saler, vwar sa kestyon saler, akoz ansanm zot form sa laspe entegral ki pou permet annan en Gouvernman ki pou permet annan en public service ki efektiv e efikas.

Mr Speaker Sesel i nou sel patri.  Nou tou nou bann Seselwa e nou bezwen nou tou travay pou sa sel Sesel. Annou met bann diverzans politik de kote e annou tonm dakor ki Sesel i pli gran ki nou tou e ki nou la e nou bezwen deservi Sesel.  Mr Speaker mon demann mon bann koleg lo lot kote latab e demann tou mon bann koleg isi lo sa kote latab pou vot an faver sa Mosyon pou ki ansanm  konman en Lasanble Nasyonal konman 6enm Lasanble Nasyonal nou anvoy en mesaz en sel mesaz pou Egzekitiv pou ki an retour keksoz i kontinyen bouze e Sesel i kontinyen progrese.  Mersi bokou Mr Speaker.

 

(APPLAUSE)

 

MR DEPUTY SPEAKER

Mersi Onorab Simon Gill.  Mon kontan sa pasyon ki ou mete dan ou bann deliberasyon.  Bon nou ti dir nou pou fini 4er en kar me deba in ris mon krwar ki i vo lapenn e mon asire ki bann Manm piblik ki pe ekout nou deor pe apresye nivo deba dan nou Lasanble.  In ariv moman pou nou pran en vot lo Mosyon.

Mon ava demann tou Manm ki an faver pou lev lanmen?

Okenn Manm ki kont?

Ok.  Bon Madam Clerk. 

 

MADAM CLERK

Mersi Mr Speaker.  Mon’n rikord 28 Manm an faver e avek en Manm kont.  Mersi.

 

MR DEPUTY SPEAKER

Mersi savedir Mosyon in pase. Bon avan nou adjourn mon annan zis en pti lanons pou mon pase.  Mon a zis fer zot rapel ki FPAC pe rankontre demen bomaten isi kot Lasanble dan Committee, 8.15 dan Committee Room 3 e mon osi tou fek ganny lenformasyon ki SBC pou transmet travay Komite FPAC demen Live lo televizyon e lo radyo.  OkSo avek sa nou pou adjourn ziska Mardi prosen e bonn rantre tou Manm e tou travayer Sekretarya.

 

(ADJOURNMENT)