Home » Verbatim » 2017 » Verbatim Report NAS Sitting Wednesday 26th July, 2017

Verbatim Report NAS Sitting Wednesday 26th July, 2017

NATIONAL ASSEMBLY OF SEYCHELLES

 

Tuesday 26th July, 2017

 

The Assembly met at 9am

 

National Anthem

 

Moment of Reflection

 

Mr Deputy Speaker in the Chair

 

MR DEPUTY SPEAKER

Bonzour tou Manm Onorab.  E bonzour tou manm piblik ki ale kout e ki pe swiv travay Lasanble Nasyonal.

Ozordi nou kontinyen nou travay nou bann sesyon labitid. E nou pou al direkteman lo nou Order Paper, kot nou annan 2 First Reading e apre nou ava annan en Second Reading. Nou ava envit Minis responsab ki pou prezant sa Bill.

Bon mon ava demann Madam Clerk pou fer sa 2 First Reading. Madam Clerk.

 

MADAM CLERK

Mersi Mr Speaker. Bonzour tou dimoun ki a lekout. Bonzour tou bann Manm.

This Act may be cited as Prevention of Drug Abuse and Rehabilitation Agency Bill of 2017.

        This Act may be cited as the Misuse of Drugs (Amendment) Bill of 2017.  Mersi.

 

MR DEPUTY SPEAKER

Mersi Madam Clerk. E mon ti ava demande ki nou apel Minis pou fer Second Reading. Antretan mon ti a kontan zis fer en pti lanons ki 1er Assembly Business Committee pou meet.

Mon zis anvi partaz sa lenformasyon avek tou Manm, e manm piblik. Anvi ki Lasanble ti pou fer son 2 dernyen Sitting semenn le 8 ek le 9 Out, e an vi lakantite Manm ki pa pou dan pei pou lo bann misyon aletranze. Nou pe pran Recess en semenn pli boner. Savedir semenn prosenn i pou nou 2 dernyen Sitting pou sa 2enm trimes. Mardi le premye e nou pou fini Merkredi le 2.  Ok? Zis sa pti lanons. Petet a lafen osi tou ozordi mon a kapab repet sa. Be Assembly Business Committee i meet 1er dan Speaker’s Conference room.

        Bon mon ti a kontan welcome Dr Peter Larose parmi nou ek Minis Pou Finans Trade and Economic Planning. E i akonpannyen par son PS Mr Patrick Payet. Madanm Mina Crea CEO Public Ethics Commission. Ms Amelie Nourrice Legal Draftperson dan AG’s office. E mon annan ki mon napa lo mon lalis la. Me anyway nou annan nou en zofisye ekstra nou welcome zot parmi nou dan Lasanble.

Avek sa mon ti a kontan demann en Mosyon pou Second Reading.

 

HON CHARLES DE COMMARMOND

Bonzour Mr Speaker. Bonzour tou Manm Onorab e tou piblik ki pe ekoute.

Mr Speaker anba Order 64(2) lo Standing Order mon move ki Public Persons Declaration of Assets Liabilities and Business Interest (Amendment) Bills 2017 i ganny lir en Dezyenm Fwa.

 

MR DEPUTY SPEAKER

Mersi Onorab De Commarmond. Manm ki segonde.

 

HON SIMON GILL

Motion seconded Mr Speaker.

 

MR DEPUTY SPEAKER

Mersi Onorab Simon Gill. Nou ava pran en vot lo Mosyon. Tou Manm ki an faver? Ok?   Nou go ahead mon demann Minis pou prezant son  Bill. Minis Larose.

 

MINISTER PETER LAROSE

Mersi Mr Speaker. Bonzour Mr Speaker. Bonzour osi Leader Lopozisyon Onorab Wavel Ramkalawan. Bonzour osi Leader Government Business Onorab Charles De Commarmond. Egalman bonzour tou Manm Onorab nou Lasanble prezan. E osi tou manm piblik ki pe ekout nou.

Mr Speaker  an Desanm 2016 mon ti ganny lokazyon prezant Lasanble avek Bill nimero (33) 2016, avek tit Declaration Assets Liabilities and Business Interest aplikab pou Zofisye Piblik.

Bomaten mon’n vin dan Lasanble pou prezant en amannman, an koneksyon avek sa menm Act ki ti ganny pibliye le 3 Zilyet 2017.

Lamannman i konm swivan; repeal seksyon 3 sou seksyon 4  e ranplas li avek en nouvo teks ki dwatet  lir koumsa; ‘’En dimoun i kapab ganny apwente konm en Konmisyoner si sa dimoun i deza okip oubyen kalifye pou en post Ziz dan Lakour Siprenm ou Ziz dan Lakour D’apel e in demontre en kapasite siperyer dan pratik Lalwa, oubyen i annan sa kapasite pou desarz fonksyon en Ziz ou Ziz Lakour D’apel. ‘’

Sa amannman i osi azout e fer osi azout lezot kondisyon. En dimoun avek lentegrite e  ki’n ganny leksperyans dan pozisyon similer. E osi byen Chairperson Public Officers Ethics Commission i kapab osi ganny apwente konm Komisyoner ex-officio. E lapwentman sa dimoun i kalifye pou resevwar peyman allowance ki kapab ganny determinen par Prezidan. Mr Speaker vwala lamannman ki nou pe prezant nou Lasanble Nasyonal bomaten. Mersi bokou.

 

MR DEPUTY SPEAKER

Mersi Minis Larose.  Bon deba i ouver lo sa lamannman. Okenn Manm ki oule entervenir?  Onorab John Hoareau.

 

HON JOHN HOAREAU

Bonzour Mr Speaker.  Bonzour tou Manm. Bonzour tou dimoun ki a lekout. Bonzour Minis ek ou delegasyon.

Mr Speaker dan en demokrasi modern pilye prensipal se bonn Gouvernans, e rann kont e latransparans.

Ler nou koz lo bonn Gouvernans, nou bezwen sof gard nou pei e nou Gouvernman kont koripsyon.

E sa Lalwa li menm i en Lalwa ki vize konman en deterrent kont koripsyon. Alors sa Lalwa, si nou rapel byen set e en nide ki ti sorti kot, Onorab Ramkalawan e Onorab Derjaques dan enn bann Lasanble presedan, kot zot ti demande ki bann Politisyen i deklar zot assets e zot bann lentere biznes.

Avek bokou deba lo sa size nou’n vwar ki depi le 1 Zanvye sa Lalwa in commencement date sa Lalwa in agrandi pou kouver 11 kategori dimoun ki enkli Vis Prezidan, Prezidan, Speaker Designated Minister, Ministers Leader of Government Business, Leader of the Opposition, Deputy Speaker, Members of the National Assembly, Mayor of Victoria, apre Counselors of District Councils.

        Me ler nou pe get sa lamannman ki’n vin devan nou ozordi, nou kapab vwar i annan en pti inconsistency osi dan sa lamannman. Vedir ler ou pe get li 4 (a) i set bann standar kot pou en Komisyoner ganny apwente.

E sa bann standar dan 4 (a)  i pa ganny reflekte dan 4 (b). akoz dan 4 (b), pou en person ki ki kapab ganny apwente konman Chairperson ki osi i kapab ganny apwente konman en Komisyoner, ou vwar pou dir i demann en pli ba nivo en term konparezon avek anler. Kot anler i demann ou sa dimoun i devret swa en Ziz ki’n deza annan en pozisyon Ziz. Supreme Court oubyen Justice of Appeal. Oubyen has shown outstanding distinction in practice of the Law.

        Me anba dan bout (b) i demann en person with integrity having acquired experience in similar post.

So la nou vwar i annan en inconsistency dan lapwentman kalite ki ou bezwen pou en Chairperson e kalite ki ou bezwen pou en Commissioner.

E mon krwar pou dir sa i devret ganny rektifye.

Nou osi vwar pou dir sa lamannman pa pran kont ok napa en lamannman ki pe pran kont lo parti 7. 7(1 sa Act ki don 3 mwan from assuming office pou kapab deklar ou bann assets. Antretan ki nou napa en Commissioner i vedir ki teknikman nou tou nou kont Lalwa.

        So mon ti a voudre vwar en lamannman ki vize fer sa osi.  Ki vize ver re aranz sa bout Lalwa ki fer li an konformite avek sityasyon aktyel.

Alor mon krwar i neseser parey mon’n dir pou armoniz sa bann keksoz. E sa sete enn de pti pwen ki mon ti a anvi fer bomaten.  Mersi.

 

MR DEPUTY SPEAKER

Mersi Onorab John Hoareau. Onorab Basil Hoareau.

 

HON BASIL HOAREAU

Mersi Mr Speaker. Bonzour Mr Speaker. Bonzour Minis ek ou delegasyon. Bonzour tou bann Manm ek tou dimoun ki a lekout.

Mr Speaker mon dakor antyerman avek sa ki Onorab John Hoareau in mansyonnen. Annefe i vre ki letan ou get sa Act, sa lamannman ki pe ganny anmennen to Act ki annegzistans. I annan serten lenkonsistans parey Onorab Hoareau in dir, kot i  met en standar vreman o an term en dimoun i kapab ganny apwente konman Komisyoner. En dimoun ki kalifye efektivman kalifye pou en pos Ziz ouswa en Ziz Lakour Siprenm ouswa en Ziz Lakour D’apel.

Me an menm tan i dir koumsa poudir. ‘’The Chairperson of a Public Officers Ethics Commission i kapab ganny ex- officio apwente dan sa pos.

Me letan ou al get dan Public Ethics Act, ou vwar pou dir napa en kalifikasyon pou sa Chairperson. Annefe anba Public Offices Ethics Act sa Commission i konpri Audit General, Ombudsman; ki Ombudsman mon krwar in refer avek pou lemoman. E Chairperson  of a CAA.  Apre i dir ek ou 2 lezot manm ki ganny apwente par Prezidan avek konsantman Leader of the Opposition, Speaker e Leader of Government Business. E i pa donn ou kalifikasyon sa Chairperson. So suddenly ou annan en standar ki o, me   i osi pou ou apwent en dimoun ki pa meet sa standar ki  pe hold  the office of Chairperson of the Public Officers Ethics Commission.

So ki sa i fer, se ki i bring on the standard. Ki nou dir, nou pe propoze letan nou al dan Bills Committee pou pa bezwen ki nou amann sa pa bezwen ki ou met fodre ou kalifye pou Ziz. As long ki nou servi menm kalifikasyon pou en manm ki ganny apwente lo CAA.  Savedir en dimoun ki annan approval integrity e ki ‘n servi dan en lofis ase o dan Gouvernman, ouswa anba Konstitisyon ouswa  dan en profesyon ouswa en vokasyon.

So i pou basically les ouver. Les ouver laport pour ki lezot dimoun-menm ki pa kalifye konman pou ganny apwente konman en Ziz i kapab osi ganny apwente me an menm-an menm tan  tenir sa stand ar ki ase o.

E dezyenmman par egzanp parey Onorab Hoareau in mansyonnen, nou vwar pou dir dan seksyon 22 Lalwa, i ti fer pou dir 3 mwan apre ki sa Lalwa ti vin anfors nou ti pou ‘n bezwen bann dimoun ki ganny trouve anba sa Lalwa, ki enkli nou bann MNA’s nou ti pou bezwen deklar nou assets.  Sa ti 3 mwan apre ki Lalwa ti vin anfors. E Lalwa in vin anfors depi Desanm mon krwar, Desanm 2016.

E nou bezwen amann sa provizyon.  Sa provizyon sansan nou pou vwar pou dir sa provizyon pou reste la. Me rezon akoz nou pa’n kapab deklar nou assets se parske napa okenn Commissioner ki ti’n ganny apwente.

Alors ki nou’n propoze dan Komite dan Committee Stage,  ki nou pou demande pou Amann sa provizyon 22 pou fer ki nou pou bezwen deklar nou assets  3 mwan apre ki Commissioner i ganny apwente.

So si Komisyoner  i ganny apwente dan Out 3 mwan apre par egzanp si 15 Out in ariv lo 16 Out 3 mwan apre nou pou kapab bezwen deklar nou assets.

        So mon krwar pou dir nou bezwen adres sa bann issues e parey Onorab Hoareau in dir sa Act nou’n deza koz lo la, e i en Lalwa ki pe al dan bon direksyon.  Mersi Mr Speaker.

 

MR DEPUTY SPEAKER

Mersi Onorab Hoareau. Zis  avan nou kontinyen mon anvi acknowledge en lot Legal Draftperson en Assistant dan AG‘s Office. Madanm Bootna. Mon sorry pou sa Mis. Ok Madanm Bootna welcome osi parmi nou. Mon a donn laparol Onorab Ramkalawan.

 

HON WAVEL RAMKALAWAN

Bonzour Mr Speaker. Bonzour Dr Larose Minis Dr Larose. E bonzour tou Manm Onorab. E byensir tou bann staff ki pe akonpanny Minis bomaten.

Mr Speaker sa lamannman ki pe ki la devan nou definitivman nou, nou siporte. E mon krwar nou pou ganny sipor lo tou lede kolte.

Me selman mon zis anvi mwan mon ti ava kontan fer en pti leklersisman spesyalman pou piblik. Rezon ki mon anvi fer sa pti leklersisman parski nou Lasanble i toultan pou ganny mete anba mikroskop.

E aprezan zot kontan letan nou fer bon travay. Me selman zis en pti mankman nou ganny pini. Parey nou dir an Kreol. letan mon ariv boner travay personn  pa vwar mon. zour mon ariv en minit an retar, e  se la ki mon bouzwar  i vwar ki pou dir mon’n ariv an retar.

Mr Speaker lefe ki nou dans a Lasanble tou lede kote. Nou ti tonm dakor ki pou dir bann assets  pou ganny deklare. E apre sa nou ti pas Sa Lalwa. E apre in napa gran keksoz ki’n arive.

Piblik aprezan serten manm piblik; parski nou pa kapab met tousala lo piblik. Serten manm piblik zot ti a pe dir.  Be la i la Lasanble in anbet  nou. Zot in pas Lalwa zis pou bous nou lizye. E Apre sa zot in reste trankil.

E nou’n menm ganny akize pou dir sa i tipik politisyen.  I enportan pou piblik konnen. Ki pou dir letan sa Lalwa in pase, in napa personn ki’n vin devan pou pran sa rol Komisyoner, pou nobou demann nou pou nou fer bann prosedir pou nou prezant nou assets.

E napa personn nou politisyen dan Sa Lasanble Nasyonal ki annan okenn lafreyer pou deklar nou assets.

Zour sa Lalwa ti pase, Speaker li menm li Speaker Onorab Patrick Pillay ti deklare pou dir li i pare pou fer sa la  konmela menm.

Ti annan serten Manm osi ti dir nou pare pou fer li. Alor piblik i bezwen konpran sa byen.

Si nou,  nou pas Lalwa e  Lalwa i ok me si apre napa personn an deor ki pare pou vin pran sa responsabilite.  I pa nou ki annan tor.

Se parski dimoun deor pa pare pou pran sa responsabilite.  E alor nou, nou pare. E plizyer nou ki’n deza dan sa Lasanble Onorab Gill, Onorab De Commarmond, Onorab William, Onorab Georges, Onorab Ferrari, mon menm, Onorab Prea, nou’n deza dan lepase fer deklarasyon nou assets.

E alor deklarasyon assets i pa en problenm pou nou. Nou ava mete.  E an plis ki sa i pa ni menm en problenm, pou piblik vwar nou assets.

        E la mwan personnelman mon envit let annou pou fini pas sa Lalwa e keksoz i marse mon pou anvi dimoun vwar mon assets, pou  ki sa bann ki apel mon Pret  Milyonner zot ava vwar ki mannyer sa Pret Milyonner  i ete. E ki enn fwa pou tou zot ava reste trankil kondir koze.

E alor Mr Speaker mwan mon krwar i byen, i byen ki sa Lalwa i vin devan nou pou nou avanse.

Me an menm tan, an menm tan mon krwar i enportan pou nou dir avek piblik ki poudir sa travay ki nou fer isi dan sa Lasanble i en partnership.  Zot osi zot bezwen vin devan pou zot zwe rol.

E parey menm zafer sa bann zafer Gappy Out! Gappy Out! Me apre sa letan Gappy  Out, fodre dimoun deor i pare pou vin devan, pou zot pran responsabilite. E egzakteman pou fer sir ki sa travay i byen.

Alors mon krwar i en lokazyon osi pou nou dir avek piblik i en partnership sa. Nou koze; Lasanble i fer sa travay. Me zot aprezan vin devan pou ede pou fer sa travay avans pli devan.

Pa zis dir  politisyen i voler, politisyen i laba ensidswit. Me konman nou pas Lalwa pou ou kapab regarde si politisyen i voler ou deside zis al lo Facebook e ou pa deside pou ou vin devan.

Alor Mr Speaker mon anvi mesaz i kler pou piblik.  La i la, nou’n amande nou pe al amande pou ki dimoun la nou’n donn tou kalifikasyon.

Alors sa bann dimoun avek kalifikasyon, zot ava ganny bann prosedir ki mannyer pou zot pou zot fer zot aplikasyon letan i annan en vacancy; letan i ava annan en vacancy ki mete pou dir pe rod en Komisyoner vini silvouple. Vin devan e apre sa nou konman Lasanble anba seksyon 3 (3) nou, nou pou-i dir ‘’The Commissioner shall be appointed by the President subjected to the approval of the National Assembly.’’ Letan ou a vin fer ou aplikasyon letan ou ava vin la devan Lasanble pou ki tou dimoun tou Seselwa i ava konnen lekel ou. Nou ava kestyonn ou, nou ava regarde lo sa kalifikasyon ki’n mete e apre sa nou ava get on with it.

E mwan Mr Speaker mon espere la nou, nou lafen Zilyet. Mon espere pou dir once ki sa Bill in pase Septanm avan ki nou prezant avan ki Bidze i pase, nou annou en Commissioner nou annou en Commissioner e tou Manm Lasanble e tou bann diferan kategori dimoun, parey Onorab Hoareau in mansyonnen, zot ava vin devan pou zot deklar zot assets.

Enn bann keksoz osi tou ki nou ti mansyonnen, letan nou ti pe koz lo sa Lalwa. Si nou rapel byen e ki mon pa vwar dan sa lamannman ki petet nou ava bezwen balans li byen. Nou ti a pe dir amwen ki’n pas dan en lot amwen ki’n pas dan en lot Lalwa, si mon memwar i servi mon byen. Konsernan bann lezot o zofisye. Bann lezot o zofisye ki nou krwar zot bezwen deklar zot assets. Pa met li zis lo zis lo nivo politisyen, me bann CEO.  Bann CEO ensidswit mon krwar zot tonm anba se ke la kot nou bezwen regarde parske sa Lalwa li i diferan. Akoz zot assets zot assets pou lemoman zot pe deklar li anba Public Officers Ethics Commission. Me i pa piblik. I pa piblik i zis ganny mete dan en lanvlop e apre sa i ganny met laba. E zis letan i annan en case si en dimoun i avek 0the Commissioner pou Public Ethics Commission se la prezan ki ganny…

Tandis ki sa Lalwa li son diferans se ki i fer vin i fer li vin Public. So nou ti a pe dir ki i annan plizyer bann dimoun ki zot osi tou zot annan bokou responsabilite; ofet zot ki deal direkteman avek larzan parske nou konman Manm Lasanble nou ganny en lapey, nou ganny en lapey ki deza piblik. Nou ganny en lapey ki deza piblik allowance i deza piblik. Tandis ki bann lezot tou zot keksoz i anmenn lapey en CEO i pa ganny devwale direkteman. Bann allowance ki gannyen, i pa ganny devwale direkteman.

E an plis ki sa i posib ki sa CEO zot, zot pe deal avek kontra. Zot, zot annan zot annan sa pouvwar pou zot donn en Kontra pou zot konmsi i annan en kantite larzan ki pas ki pas anba zot anba zot departman. Anba zot agency ki alor i enportan pou nou fer sa.

E donk si mon ti ava dir mon pa konnen si nou pou kapab fer li la mon krwar pa si nou pou kapab fer li la, me selman ti ava bon ki sa pwen i ganny konsidere pou nou kapab met tou keksoz annord.

E Mr Speaker mon pe osi dir sa-e la mon pe koz lo lapar tou bann Manm FPAC  lo lapar tou bann manm FPAC ki i nou responsabilite pou nou scrutinize sa Rapor Oditer Zeneral e sa rapor ki nou annan avek finans pou nou regarde ki mannyer nou kapab ede pou ki Finans Gouvernman i pa al dan tou direksyon alors i enportan, e dan bann rapor tanzantan nou vwar ki pou i annan problenm pe pase dan tel fason pe kestyonnen, akoz larzan in al dan tel proze, ti napa tender  ti napa isi, ti napa laba. Alors pou nou kapab met nou lakaz ki apel Sesel annord. E mwan mon krwar ki si nou kapab fer sa, sa i ava en premye pa. Nou a ganny sa Commissioner e apre sa nou ava os lakantite manm lakantite dimoun ki pou eligible pou li vin dan s a tonm anba sa Lalwa ki nou pe regarde la, pou ki transparans e accountability i ava vreman vin sa 2 lalimyer ki kler nou ki kler lafason ki bann tranzaksyon finansyel oubyen entegrite ek tou bann lezot keksoz i deroule dan nou pei.

Avek sa detrwa parol Mr Speaker mon pou donn mon full sipor sa Bill ki devan nou. E mon espere ki parey mon’n dir ki tre byento nou ava annan en dimoun devan Lasanble e nou ava kapab bouz devan.  Mersi bokou.

 

MR DEPUTY SPEAKER

Mersi Onorab Ramkalawan. Onorab Sebastien Pillay.

 

HON SEBASTIEN PILLAY

Mersi Mr Speaker.  Bonzour tou dimoun. Mr Speaker mon krwar ki devan nou lamannman ki pe ganny propoze i al dan en direksyon zisteman pou .nou kapab met azour en sityasyon ki zis parey entervenan avan mon in eksplike, ki parfwa mon menm mwan mon krwar i annan en mesaz en lapel ki nou bezwen lanse avek nou Pep nou popilasyon.  Si nou retourn kot Diskour ki Prezidan ti fer devan nou Lasanble yer i ti koz lo involvement nou tou Seselwa ki kapab fer en kontribisyon dan aktivite ki pe pase dan nou pei. Zisteman Konstitisyon i fer kler pou dir tou dimoun i kapab partisip dan en aktivite politik, ki annefe i enn bann lenstans kot en Konstitisyon i fer sir ki i tou sitwayen i kapab partisipe.

E zisteman mon krwar sa Lasanble Nasyonal pe fer son mye pou enkli sa baz kot tou dimoun i kapab partisipe.

Me parey entervenan avan mon in koze mon krwar souvandfwa nou vwar bokou dimoun ki pare pou reste lo en kote e fer bokou kritik oubyen dir bokou keksoz sa ki zot menm zot, zot pran sa step pou zot vin devan pou zot partisipe.

E enn bann lenstans kot sa in arive se zisteman relasyon avek lenplimantasyon sa Lalwa. E se pou sa rezon ozordi ki nou bezwen raise sa bann pwen an se ki konsern sa Lalwa sirtou bann provizyon sa; Lalwa ki ti pou fer ki i konmans fonksyonnen ki bann dimoun ki retrouve konman sa Lalwa i konmans deklar zot assets.

Mon dir sa Mr Speaker akoz i enportan pou nou realize pou dir ki Sesel i pou nou tou. Se nou ansanm ki bezwen travay pou fer li avanse. E par fwa bokou dan nou dan ka piblik nou kritik bokou bann politisyen; nou kritik bokou bann Minis nou kritik bokou bann dimoun ki pran responsabilite.

E me lo lot kote osi en kantite fwa bokou nou pa pare pou pran sa bann responsabilite ler nou ganny loportinite pou fer li.

E sa i fer mon mazinen poudir nou bezwen bouz devan akoz nou tou nou bezwen partisipe pou kapab fer keksoz avans pli devan.

E se mon krwar rezon akoz nou Lasanble ozordi pe proz sa bann amannman. Pe regard sa lamannman dan en lot fason, pou fer sir ki nou kree en baz pli ouver pou les maximum dimoun kapab vini antre e prezant zot kandidatir pou partisipe.

Mr Speaker en bann eleman dan sa Lalwa ki mon krwar ler entervenan avan  mwan ki’n koze ki mon pou fer referans avek. Se lefe ki Minis li menm anba sa Lalwa ki egziste konmela i kapab annan bann schedule ki egziste anba sa Lalwa.

Sa i vedir ki dan sa Lalwa kot i annan bann definisyon lo lekel ki sipoze deklar zot bann assets, minis li i kapab amann sa bann definisyon e fer ki i kapab azout ankor.

E sa i pou reponn en pti pe parey bann konsern eksprimen par entervenan ki’n koz avan mwan ki en bann bon konsern. Akoz nou vwar ki pou dir souvan fwa i annan bokou kestyon osi ki demande lo ler nou annan bann gran lantrepriz piblik ki zener en kantite larzan. Ki parfwa bann persepsyon ki ganny kree i kapab an byen i kapab an mal lo mon bann dimoun ki pe manage sa bann lenstitisyon.

E mon krwar la i enportan pou nou pep  konpran pou dir i byen ki zot demann kestyon mon krwar i enportan ki zot demann kestyon nenport fason ki zot fer li lo rezo sosyal dan nenport fason. Me zot osi bezwen realize pou dir zot bezwen osi antre dan partisipasyon si ou annan en kalifikasyon akoz ou pa tant ou sans pou li en Lenstitisyon akoz ou pa tant ou sans pou ou anmenn en lenstitisyon pli devan?

Se sa lenportans konman bann patriyot koman bann dimoun ki kontan nou pei pou fer avanse nou pei.

Avek sa 2 pti mo Mr Speaker mon konnen poudir apre ki nou fini nou karyer dan Lasanble i annan bokou nou mon vwar lo lot kote latab bokou nou ki pou al partisip dan lavi piblik; mon vwar Onorab Henrie i enn ki pou eager pou partisip dan sa nivo. E plizyer dimoun ki pou fer sa so mon krwar sa i ava en. Ozordi nou Lasanble pe kontinyelman avan se raise the bar even higher and higher.  Mersi bokou Mr Speaker. E remersi Lasanble pou zot latansyon.

 

MR DEPUTY SPEAKER

Mersi Onorab Sebastien Pillay. Onorab De Commarmond.

 

HON CHARLES DE COMMARMOND

Mersi Mr Speaker. Bonzour Minis ek ou delegasyon. Sorry taler mon’n mank ou.

E Mr Speaker sa Prozedlwa devan nou la ki pa en gran Prozedlwa. Me son sinifikasyon i gran. I en Prozedlwa ki son konteni parey in ganny mansyonnen pli boner, i anmenn nou ankor enn fwa lo bann pwen kardinal ki Prezidan nouvo Prezidan Faure i pe kontinyelman koz lo la.  E la nou pe koz lo latransparans, lo rann kont.

E nou dan FPAC tou dilon nou pe swiv sa kestyon sa issue latransparans, rann kont.  E in byen ganny fer sorti taler ki i pa zis nou ki merit pe ganny gete.

Me lot par dan nou sosyete bann ki pli direk avek larzan piblik. Si nou vwar menm dan Speech Prezidan la 2 zour pase yer plito nou’n vwar osi ki i pe dir ki tender  apartir konmela. Tender pou ganny fer piblik. Pou ganny lir lo radyo la osi dimoun pou konnen.

E se dan sa lespri la ki mon krwar i bezwen annan sa amannman oubyen parey in ganny resorti par Onorab Pillay ki en (SI) i bezwen sorti kot Minis i annan pouvwar pou azout dimoun lo la. E an konsiltasyon dan Cabinet mon asire ki Prezidan sa bout la sa bann lezot dimoun i kapab lalis i ganny azoute lo sa lalis.

E Prezidan in lans lapel ek nou pou travay onnet dan pei. Mon krwar sa i tonm osi dan sa direksyon.  Menm in al pli lwen kot i pe dir menm dan politik menm en Fon pou konpanny i merit ganny fer. E i nou ava diskit lo la .

Me i devret ganny kree zisteman pou anpes sa bann alegasyon koripsyon lo politisyen ki pa neseserman toultan i vre.  E sa i a tir i a met en an perspektiv i a tor tou sa bann fo rimer pou nou kapab dir.

An menm tan sa kestyon deklarasyon assets i pa devret fer personn per. Si nou onnet, sa nou pe travay byen napa nanryen ki devret fer nou per. Pou lenformasyon piblik nou tou isi dan sa Lasanble mwan mon konnen nou lalis in pare nou a pe espere.

Ok depi konmansman lannen nou pe espere. Pou mon in pare, Onorab Gill tou dimoun ki la Onorab Ramkalawan tou ou menm Mr Speaker nou lalis i la pe espere. Me kot nou pou deklare, nou le deklare nou, be kote pou deklare?

        So sa i en keksoz ki kler. Me osi i anmenn nou lo en lot pwen.  Lefe ki vin piblik nou deklar nou asset piblik, tou dimoun oi konnen. Menm nou osi dan Lasanble nou konnen.

Then anba nou privilez, anba nou privilez konman en Manm Lasanble konman Minis tou sa bann dimoun ki lo sa lalis la, tou sa bann dimoun. Nou pa kapab vin dan Lasanble zis evant keksoz lo sa bann dimoun, dir pou dir entel i koronpi entel in fer isi entel in fer laba, sa nou bezwen veye osi.  E mon demann ou Mr Speaker pou konman dirizan nou Lasanble pou veye sa.

En Manm pou li kapab vin dir en lot Manm in fer en keksoz ki mal dan sa bann direksyon i bezwen anmenn en Mosyon. Pa kapab zis i bal bise koumsanmenm nek i dir ozordi nek i dir demen. Konmsi sa i vin en nespes palto fann deryer. I pou mal e si nou les sa kontinyen i pou mal. So mon demande ki en lord osi i ganny mete dan sa direksyon avek nou Manm si i annan en keksoz konkret i fer son resers e i met en Mosyon and then sa issue i ava ganny diskite.

Lo lot kote pou fini se ki i sagrinen osi dan sa ki Onorab Leader Lopozisyon in koze. Lo kestyon Facebook i sagrinen osi sa zafer Facebook i pa zis dimoun an deor Lasanble i menm dimoun ki travay ek Lasanble pandan letan lasanble i fer sa bann fo alegasyon sa bann negativite, e ki sorti kot nou. I pa byen.

So mon demande ki sa osi dan en fason ou lot i ganny gete e rektifye dan o fir anmezir nou Lasanble i progrese.

Avek sa mon krwar ki bann lezot pwen dan Lamannman ki’n ganny sirkile i ava ganny eksplike si non in fini ganny eksplik en pe avek Manm ki’n propoz sa lamannman Onorab Basil Hoareau.

E nou pou donn sipor lo sa kote latab nou pou donn nou sipor antyerman lo sa Mosyon sa Bill ki devan nou pou nou kapab bouze. E ankor enn fwa mon dir e piblik nou lalis in pare nou pe esper Komisyoner la Chairman-Commissioner pou nou kapab al deklar nu assets i pou vitman.  Mersi bokou Mr Speaker.

 

MR DEPUTY SPEAKER

Mersi Onorab De Commarmond. Bon si napa okenn lentervansyon mon ava demann Minis pou fer sum-up . Yes Onorab Basil Hoareau.

 

HON BASIL HOAREAU

Mr Speaker si nou pa pou antre dan Komite mon pa krwar nou pou antre dan Komite la. Mon kapab propoz lamannman la?

 

MR DEPUTY SPEAKER

Ou annan en lamannman?

 

HON BASIL HOAREAU

Wi mon annan en lamannman.

 

MR DEPUTY SPEAKER

Ok go ahead.

 

HON BASIL HOAREAU

Well lamannman i ganny the blessings  of Bills Committee, so i en lamannman sorti kot Bills Committee.

E mon ti a sizere Mr Speaker si mon kapab demande ki nou in terms of Order 91   nou sispann Order 67 to the extent kot i dir nou bezwen donn sa notice  at least 72 hours before moving for it. So akoz nou pa’n donnen 72 erdtan. So si nou kapab at least sispann Order 67 (1) to the extent kot i provide sa time limit.

 

MR DEPUTY SPEAKER

Yes ok. Dakor- -prezant ou…

 

HON BASIL HOAREAU

Nou pran en vot  pou sispann zis pou rikord.

 

MR DEPUTY SPEAKER

Ok nou pran en vot lo sispansyon Standing Order 67. Ok tou Manm i an faver. Ok?   Go ahead Onorab Hoareau.

 

HON BASIL HOAREAU

Mr Speaker mon lamannman ki pe ganny propoze, se ki nou retir paragraf 2 of sa Bill ki mannyer  i ete la e nou replase li par en nouvo paragraf 2  ki pou lir swivan. Non 2 of a Bill-Bill.   So the Bill son paragraf 2 of a Bill nou delete e nou pou ranplas li par sa nouvo paragraf 2 ki lir swivan;

‘’The Public Persons Declaration of Assets Liabilities and Business Interest Act 2016 is hereby amended as follows. One, in section 3 by deleting and repealing subsection 4 and substituting therefore the following subsection.’’ And  the new subsection 4 pou lir swivan;

‘’The Commissioner shall be a person of proven integrity and impartiality who has served with distinction in a high office in the Government of Seychelles or under this Constitution or in a profession or vocation. ‘’

E 2enm pwen se in section 22, by deleting the words ‘’at the commencement of this Act’’ and substituting therefore the words ‘’after the appointment of the first Commissioner under this Act. ‘’

        Sa i lamannman ki nou pe propoze.

 

MR DEPUTY SPEAKER

Ok.

 

HON BASIL HOAREAU

Wi  le bi-le bi Mr Speaker se ki prey mon ti’n dir pli boner, sa premye lamannman se ki nou pou fer ki nou kit laport pli ouver pou bann dimoun ki kapab ganny apwente. E o paravan e manm sa lamannman ti pe ganny propoze nou ti pe fer referans avek en dimoun ki kalifye pou vin en Ziz. E mon krwar leksperyans i montre nou avek akoz sa i menm kalifikasyon ki ti egziste dan en existing Act,  i montre nou ki parey bann entervenan in koze oparavan ti napa personn ti pe vin devan.

Dimoun pa ti pe le vin devan e vi ki ti krwar i pe restrictive petet ti napa en kantite dimoun ki ti kalifye aba sa Lalwa.

Me la letan nou pe ouver sa laport pli gran, nou pe fer ki nou pe ouver loportinite pou lezot dimoun kapab vini e pou zot nobou kapab vin fer zot kontribisyon.

E nou’n retir sa bout kot i fer ki en ex-officio Chairperson of a Public Officers Ethics Commission ti pou’n kapab ganny apwente.

Akoz nou krwar pou dir pa met laport pli gran definitivman sans i la pou nou ganny en dimoun ki pou ganny apwente konman Komisyoner. E sa 2enm bout ki nou’n amande dan seksyon 22 se egzakteman sa ki nou ti pe dir pli boner se ki dan seksyon 22 i annan sa provizyon ki 3 mwan apre ki sa ti vin anfors, nou ti pou bezwen deklar nou assets. Tou bann dimoun ki tonm anba sa kategori of ‘’public persons’’ as per the Act, ki pou bezwen deklar zot assets.

Sa pa’n ganny fer akoz ti napa Komisyoner. E alors nou’n dir pou dir nou amann sa la pou dir letan Komisyoner i ganny apwente premye Komisyoner ki ganny apwente anba the Act la apre 3 mwan nou tou nou bezwen deklar nou assets.

        Sa i rezondet byen par deryer sa bann amannman.  Mersi Mr Speaker.

 

MR DEPUTY SPEAKER

Ok mersi Onorab Basil Hoareau. Okenn Manm ki segonn sa lamannman? Yes Onorab Ferrari.

 

HON JEAN-FRANCOIS FERRARI

Mersi Mr Deputy. Mr Deputy sa ki kon ti a kontan se si bann Manm lo Bills Committee ler zot in pran sa linisyativ pou propoz sa lamannman zot in bezwen diskit antre zot lo ki kalite lezot profesyon ki zot ti a kontan konmsi ki zot krwar i soutenab pou zot servi lo sa Komisyon.

Anliny avek sa ki Mr sa Ki Onorab Leader Lopozisyon in dir pli boner pou ankouraz bann dimoun pou vini, pou vin devan pou pran sa bann responsabilite. Mon ti a kontan bann dimoun ki ti li sa Komite, i al en pti pe plo lwen lo sa leksplikasyon pou dir nou lekel konmsi ki how-why zot pe rode; konmsi ki donn en pe lide dimoun pe ekout nou deor konmsi eski zot pe mazinen en Dokter ki’n retired, en kaptenn. Konmsi donn ou en pti pe plis sa louvertir pou nou kapab pou nou kapab konpran en pti pe.  Mersi.

 

MR DEPUTY SPEAKER

Mersi Onorab Ferrari.  Mon ava pas laparol avek mover lamannman Onorab Basil Hoareau.

 

HON BASIL HOAREAU

Mersi Onorab Ferrari. Mersi Mr Speaker. Mr Speaker i vreman wide-i vreman wide nou profesyon ouswa vokasyon pa’n ganny kalifye.

Me lefe i reste; i dir ek ou sa dimoun i bezwen en dimoun of proven integrity and impartiality. Sa i premye bi premye lim se ki i bezwen en dimoun ki annan  lentegrite.

E 2enm la i vin son profesyon swa son kalifikasyon swa en dimoun ki hold office of high distinction dan Gouvernman. E i kapab en dimoun ki ‘n okenn lofis ki ase eleve dan Gouvernman ouswa profesyon Dokter, menm i kapab en teacher.  En teacher ki’n prove himself or herself i kapab tonm dan sa kategori.

E sa ki enportan se ki, sa laport ki ouver bann dimoun i devret fer sa premye pa; vin devan. Letan zot vin devan la nou pou regard zot kalifikasyon i wide; i wide parski i dir ou okenn profesyon ouswa vokasyon.  Ki montre pou dir ou en dimoun ki kapab desarz sa responsabilite konman Commissioner anba Lalwa.  Mersi.

 

MR DEPUTY SPEAKER

Mersi Onorab Basil Hoareau. Okenn lezot? Ok, Onorab Ramkalawan.

 

HON WAVEL RAMKALAWAN

Mr Speaker mon krwar i sa kestyon ki Onorab Ferrari in demande e larepons ki Onorab Hoareau in prezante. Mon krwar ki nou bezwen osi mazinen ki pou dir responsabilite pou tonm lo nou konman en Lasanble.

E se pou sa rezon ki i annan sa prosedir kot sa dimoun i ava vin devan Lasanble kot nou, nou ava kapab egzamin li-interview li.

E se la kot mon espere ki nou konman en Lasanble nou ava zisteman pe rode si vreman sa dimoun i annan lentegrite. Letan son non i ava come forward si apre nou dekouver ki pou dir letan nou pe fer nou travay ki sa dimoun in involve dan in deza al dan prizon menm si i en dimoun ki annan en gro pozisyon in deza annan en gro pozisyon dan sosyete. Me selman in deza ganny deklare bankrupt; in deza ganny in deza al i annan en rikord kriminel i annan tou sa bann keksoz.

So mon krwar ki finalman i pou tonm lo nou konman en Lasanble, pou nou regarde be lentegrite sa dimoun i vreman bon e alors sa dimoun i kapab pran sarz, menm nou prop byen. Parske la dimoun i pou annan en rapor direkteman avek nou.

E mon krwar ki lo tou lede kote nou pou fer sir ki sa dimoun ki ganny apwente, tou lede kote i kapab annan konfyans dan li.

Parske si sa dimoun li menm li ki pou al konmans rakont parol lezot dan bal, mon krwar nou pou dir be tyonbo en kou i napa sa lentegrite. Alors mon krwar ki i pou osi nou responsabilite. Me mon krwar Mr Speaker dan sa lamannman ki Bills Committee pe anmennen mon pa konnen si zot in osi diskit avek Minis pou regarde, si i pou dakor avek sa lamannman. Mon krwar ki ankor enn fwa sa partnership i vini. Pou nou dir avek bann dimoun ‘’la i la.’’ ‘’La i la’’ nou pe ouver semen ordinerman letan i sonnen koumsa ou pa pou zanmen vwar li, akoz ou se sa problenm.

Sa i ariv dan legliz si ou telefonn i sonnen dan legliz oubliye kote bouton i ete. Wi. Alors Mr Speaker kot la ankor enn fwa nou mon krwar i enportan pou dir i pe sa scope pe ouver en kantite; dimoun avek lentegrite vin devan.  Mersi bokou.

 

MR DEPUTY SPEAKER

Mersi Onorab Ramkalawan. Onorab Georges.

 

HON BERNARD GEORGES

Mersi Mr Speaker. Mr Speaker mon ti anvi zis azout 2 parol sa formil ki devan nou ozordi set en formil ki an realite Bills Committee in pran en bon pe letan pou ariv lo la. Konman ou konnen Mr Speaker e nou’n anvi fer sir ki sa formil ki ganny servi e sa formil i deza lo nou Konstitisyon sa formil ki ganny servi i en ki en pa pou ferm laport pou fer li tro restrikte pou ganny en dimoun. Me an menm tan,  pou fer sir ki sa dimoun parey in ganny dir par tou bann entervenan bomaten set en dimoun ki apropriye pou fer sa travay.

E se  sa rezon ki sa formil i annan li 2 parti. Ou pa kapab en dimoun ki annan lentegrite oubyen enparsyalite me ki pa’n deservi pei a en nivo apropriye.

E ou pa kapab en dimoun ki’n servi pei a en nivo apropriye, me ki napa lentegrite ek enparsyalite, ou bezwen annan tou lede.

Donk sa i fer ki sa dimoun ki pou vin devan si pass sa test ,i pou en dimoun apropriye.

Sa ki an sa ki konsern son 2enm parti nou pa pe rod en dimoun zis ki’n servi Gouvernman dan en o plas. Me i kapab en dimoun ki’n servi en lofis anba Konstitisyon dan en o plas.

Oubyen menm en dimoun ki’n dan en profesyon kontab, avoka, Dokter, architect or whatever.  Oubyen en dimoun ki annan en vokasyon. En Pret, en Paster, en teacher, en nurse , en Zofisye Lapolis. Okenn sa bann dimoun ki’n servi avek distenksyon dan zot profesyon oubyen dan zot vokasyon, e ki annan an plis ki sa lentegrite ek enparsyalite ki’n ganny prouve. Donk fodre zot in fer en laprev sa, zot ava kapab ganny apwente.

Nou mazinen ki sa formil i ava an menm tan ouver laport pou en bon levantay dimoun kapab vin devan, me an menm tan lev bar pou fer sir ki sa dimoun i ganny apwente i en dimoun ki apropriye pou sa travay. Mon remersye ou Mr Speaker.

 

MR DEPUTY SPEAKER

Mersi Onorab Georges.  Si napa okenn Manm ki anvi entervenir? Onorab Sebastien Pillay.

 

HON SEBASTIEN PILLAY

Mon ti oule zis Mr Speaker mon ti oule zis segonn lamannman ki propoze.

 

MR DEPUTY SPEAKER

Ok, bon mon ava demann Minis pou sum-up. Non en moman. Nou pou vot lo lamannman ki’n ganny propoze ki’n ganny debate. So mon ava  demann tou Manm ki an faver sa lamannman pou lev lanmen. Ok? Okenn Manm ki kont? Ok Madam Clerk.

 

MADAM CLERK

Mersi Mr Speaker. Full house 30 Manm ki’n vot an faver e personn kont.  Mersi.

 

MR DEPUTY SPEAKER

Ok savedir sa Amannman sa Bill in ganny amande. E mon ava demann Minis pou fer son summing-up. Minis.

 

MINISTER PETER LAROSE

Mersi bokou Mr Speaker. I sanble sak fwa mon vin dan Lasanble i annan full House.

E sa ki mon’n note Mr Speaker i annan 7 entervenan annan en konsansis sa i montre ki dan bon direksyon. Mon antyerman dakor avek lamannman. Parske si i annan full House, ki mwan mon ete pou dir mon kont? Non. Mon antyerman dakor avek sa.

Me le pwen ki mon oule fer resorti Mr Speaker se ki Prezidan Faure in dir koumsa nou dwatet annan bonn gouvernans, transparans e rann kont.

Parey Leader Lopozisyon Onorab Ramkalawan in dir.  Si nou annan tout en lalis bann politisyen epi bann Minis, dimoun tre o plase pour kwa pa bann Sef Egzekitiv?

Nou pa kapab annan 2 pwa 2 mezir. Si nou’n deside pou annan bonn Gouvernans transparans e rann kont e anvi ki sa Lalwa i permet mwan pou an larzi sa bann kategori dimoun ki bann Zofisye Gouvernman mon pou fer li.

Nou bezwen met tou dimoun lo menm lalis. Nou pa kapab sorti dan en bilding nou al dan en lot building pou regarde.   Si entel ti la i pa ti la. Nou bezwen fer li lo en menm lalis. Se sa ki nou apel bon gouvernans transparans e rann kont.

E kot i konsern kriter. Kalite kalifikasyon ki bezwen; si mon rapel byen Mr Speaker Onorab Ferrari ler mon ti prezant sa Bill an Desanm ti dir me pour kwa pa en chartered accountant? Koriz mon si mon mal Onorab Ferrari.  Sa osi i en posibilite pou nou konsidere.

Me ankor enn fwa Mr Speaker se ki mon enpresyonnen avek sa konsansis ki nou annan, nou tou enkli mon menm bezwen deklar assets liabilities e si i annan okenn lentere dan biznes.

Avek sa mon ti a kontan remersye tou Manm Lasanble ozordi ki’n donn zot sipor. E byensir sa ki trez enportan enn fwa ki nou ganny Komisyoner 3 mwan apre tou dimoun i bezwen ganny deklar zot assets liabilities lezot lentere dan biznes.

Mon apresye ki bann Manm Onorab in dir zot in pare ek zot lalis.  Mersi bokou mon swet zot bonn zournen e bon kontinyasyon travay.  Mersi Mr Speaker.

 

MR DEPUTY SPEAKER

Mersi Minis Larose. Bon nou pou pran en vot lo Bill as amended. Tou Manm ki an faver. Ok,  okenn Manm ki kont? Madam Clerk.

 

MADAM CLERK

Mr Speaker 30 Manm an faver. Personn kont.  Mersi.

 

MR DEPUTY SPEAKER

Ok Bill in pase. Mon ava demann en Motion for Third Reading.

 

HON CHARLES DE COMMARMOND

Mersi Mr Speaker. Mr Speaker anba Order 71(1) Standing Order mon move ki Public Persons Declaration of Assets Liabilities and Business Interest (Amendment) Bill 2017 i ganny lir en Trwazyenm  Fwa.

 

MR DEPUTY SPEAKER

Mersi Onorab.

 

HON SIMON GILL

mon osi mon segonde Mr Speaker.

 

MR DEPUTY SPEAKER

Mersi Onorab Simon Gill. Bon Madam Clerk ou ava fer Third Reading.

 

MADAM CLERK

Mersi Mr Speaker. This Act maybe sited as the Public Persons Declaration of Assets Liabilities and Business Interest (Amendment) Act  of 2017.  Thank you.

 

MR DEPUTY SPEAKER

Bon savedir sa Bill in ganny aprouve par Lasanble. E avek sa mon ava remersye Minis ek son lekip parmi nou. E ankor Minis ou osi ek ou lekip pas en tre bon lazournen. E nou ava eskiz ou parmi nou.

 

(MINISTER LAROSE AND HIS DELEGATION WAS EXCUSED FROM THE HOUSE)

 

MR DEPUTY SPEAKER

Bon nou ava pran prosen item lo nou Order Paper e sa se rapor par Chair FPAC ok? En moman. Onorab Ferrari.

 

HON JEAN-FRANCOIS FERRARI

Mr Deputy Speaker pa mwan ki pe prezant rapor, alors mon demann en leskiz pou sa. Me selman mon pe sizere ki kekfwa nou devret pran en Break la. Akoz ler nou pou pran en rapor apre nou pou kas li par en Break en sa. I zis en sizesyon I mean i depan lo prezantasyon prezantater sa rapor. Ok mersi.

 

MR DEPUTY SPEAKER

Ok anyway mon a demann lopinyon Chair FPAC. Onorab Ramkalwan

 

HON WAVEL RAMKALAWAN

Mr Deputy Speaker mon konpran sa ki Onorab Ferrari pe dir. Me selman mazinen la i 10er mon krwar i kapab arive 30 minit 30 a 40 minit.  Alors mon ti ava dir petet parske i pou napa deba lo sa rapor petet nou a kapab rantre ladan la direkteman.  Me si nou annan en pti overlap then nou ava aziste li avek Break. Selman mon konpran lide ki Onorab pe mete se ki nou napa okenn Break. Mon krwar nou kapab fer li san okenn Break.

 

MR DEPUTY SPEAKER

Ok, si i annan konsansis mon ava demann Chair FPAC Onorab Ramkalawan pou prezant son rapor. Onorab.

 

HON WAVEL RAMKALAWAN

Mersi bokou Mr Deputy Speaker. Mr Deputy Speaker mon mazinen ki sa rapor i enn ki bokou dimoun in atann e nou osi nou konman FPAC nou’n atann en kantite letan pou nou resevwar li. Petet zis pou donn en pti background nou ava rapel ki pandan Bidze pandan deba lo Bidze ti annan bokou kestyon lo NDEA avek FIU. Ofet sa de lorganizasyon ti bezwen retourn dan nou Lasanble dan Komite pou zot donn nou serten lenformasyon. E enn bann kestyon ki nou ti vreman rode sete en Kontra. Oli sa Kontra anba ki bann depans ti pe ganny fer. E sa Kontra Mr Deputy Speaker zanmen ti ganny devwale.  E letan nou dan FPAC tou bann Manm e la ankor enn fwa mon bezwen dir ki lo FPAC i annan trwa Manm lo kote Parti Lepep e sa se Onorab De Commarmond, Onorab Sebastien Pillay avek Onorab Churchill Gill. E lo nou kote dan LDS i annan kat Manm sa se Onorab Terrence Mondon, Onorab Ferrari, Onorab Afif e mon menm ki osi Chairman sa Komite.  Alors tou le set Manm ti dakor pou nou pran sa responsabilite ki Lasanble Nasyonal ti’n donn nou pou nou kontiny nou travay. Nou ti panse ki pou dir i pou ase fasil nou ti ganny en dyalog premyerman avek Minis Finans pou nou regarde ki mannyer i kapab ed nou. Minis Finans ti fer serten demars me son bann demars pa ti abouti dan gran keksoz. I ti kapab ganny serten lenformasyon lo de lakonpannyen ki ganny etabli Moris e ki pou ganny mansyonnen dan rapor. Me lo lot kote ler i ti sey pran lenformasyon avek Barclays Bank i ti difisil pou li gannyen. Alors sa ki nou ti fer koman FPAC sete pou nou demann fer en reket en request avek Oditer Zeneral pou li ed nou dan sa travay parske li i ti annan sa Lotorite. Me ankor enn fwa Oditer Zeneral apre ki i ti’n fer son rapor i ti dekouver poudir li osi tou i annan serten lobstak. E lobstak sete dan Lalwa Anti-Money Laundering Act ki anba ki FIU i ganny etabli e osi anba Lalwa NDEA li menm anba ki NDEA i ganny etabli. Dan sa Lalwa i ganny en restriksyon lo son travay lo la fason ki i kapab raport keksoz avek nou. E se pou sa rezon Mr Deputy Speaker ki de semen pase Lasanble Nasyonal ti fer lamannman dan sa de Lalwa. E sa sete nou konman FPAC ki ti demande ki sa bann amannman i ganny fer. E zot ava rapel Mr Deputy Speaker ki pou dir letan sa lamannman ti ganny fer nou mwan lo lapar FPAC mon ti fer kler ki aprezan sa i ava permet nou pou nou resevwar rapor avek Oditer Zeneral e apre sa pou anmenn li devan Lasanble Nasyonal.  E Mr Deputy Speaker sa rapor ki mon pe prezante mon pe fer li avek Lasanble Nasyonal parske tou bann Komite Lasanble zot ofet ganny kree par Lasanble e nou bezwen apre raport avek Lasanble pou Lasanble resevwar okenn rapor. E sa i travay ki tou Komite i fer parske i dan nou Terms of Reference. Alor Mr Deputy Speaker les mon pas direkteman lo sa rapor ki la dan mon lanmen e nou ava partaz li avek tou Manm Lasanble e byensir sa avek Piblik. Pou nou fer travay pli fasil ki mon’n fer se mon’n pran sa letan ansanm avek Onorab Afif pou tradwir sa rapor an kreol e parske rapor i an angle pou tradwir rapor an kreol pou ki tou dimoun i kapab konpran.

E Mr Deputy Speaker le 21 Zilyet Oditer Zeneral Mr Gamani Herath ti ekrir Speaker Lasanble Nasyonal Onorab Patrick Pillay. E dan son let i dir avek li e sa bout la mon ava lir an angle i dir: ‘A special audit of the payments by FIU and NDEA has been completed by the request of the Chairman of Finance of Public Accounts Committee, FPAC. The request was made on 27th March 2017 under Article 158(7) of the Constitution which provides for the National Assembly of Seychelles to request the Auditor General to audit the accounts of any person’s or bodies refered to in Clause 3 at anytime. The request stated that the FPAC was involved in the investigation  a number of payments made by FIU and NDEA and ask the Auditor General to provide detailed information on payments specifically on consultancy and other fees made by the two entities from 2007 to 2016 with special emphasis on the remittances to two named companies. In accordance of section 82(2) in the General Act 2010 the resulting report is hereby submitted in seven copies to be transmitted to the FPAC in order to assist in their investigation. Yours sincerely Gamini Herath Auditor General’. Mr Deputy Speaker prezan mon pas direkteman lo sa rapor. Rapor lo lodit spesyal lo peyman anver NDEA avek FIU.

Lentrodiksyon:

National Drugs Enforcement Agency (NDEA) ti ganny kree anba Act 20 an 2008 ki ti vin an fors an Out 2008 pour diriz e kordin bann zefor nasyonal par Sesel pour konbat kont fleo drog. Responsabilite NDEA ti tonm anba Chief Officer apwente par prezidan. Apartir Oktob 2016, fonksyon sa lazans ti ganny transfer sorti biro Prezidan pour tonm anba Minis responsab pour Zafer Entern atraver (S.I)73 an 2016. Financial Intelligence Unit (FIU) ti ganny kree anba Anti-Money Laundering Act, 2006 konman en younit anba Labank Santral. Apartir 18 Out 2008, sa younit ti ganny kree koman en Body Corporate dan Lalwa the Anti-Money Laundering Amendment Act, 2008. Son bann lobzektif prensipal sete pour sirvey, donn training e asire ki i annan lobzervasyon par bann Lorganizasyon ki ganny definir anba 2enm parti sa Lalwa. Direkter sa younit i raport avek Prezidan anliny avek parti 3, seksyon 16(8) dan Lalwa Anti-Money Laundering (Amendment) Act, 2008. Chairman Komite Fon Piblik Lasanble Nasyonal FPAC ti demann Oditer Zeneral atraver son let date le 27 Mars 2017 pour fer en lanket dan peyman fer par FIU ek NDEA an servan fon piblik aprouve dan Bidze Nasyonal. FPAC ti enformen ki i ti pe deza fer en lanket e ti demann Oditer Zeneral pour donn lenformasyon detaye lo peyman, spesyalman anba “Consultancy (local and foreign)” e lezot peyman ki ti ganny fer par sa de lorganizasyon ant 2007 e 2016 e sirtou ek lanfaz lo de lakonpannyen, Solas Beo e Tech Ltd. Prenan kont sa demann, biro Oditer Zeneral ti fer en odit spesyal lo bann kont e rikord NDEA avek FIU selon son Manda anba Lartik 158 nou Konstitisyon e seksyon 22(1) dan Lalwa Oditer Zeneral, 2010 pou li soumet en rapor spesyal ek Lasanble Nasyonal. Lobzektif prensipal sa rapor se pour etablir atraver odit si enn sa bann tranzaksyon ti relevan pour sa bann lorganizasyon. De si bann rikord ti pe ganny garde dan en fason satisfezan par sa bann lorganizasyon an relasyon avek sa bann tranzaksyon. Trwa si zot ti anliny avek prosedir finansyel (setadir Financial Instructions, Accounting Manual, PFMA, 2012 e PFMA Regulations, 2014) e kot i konsern regilasyon pertinan lo taks e tender procurement. E finalman bann kontrol entern satisfezan ti egziste pour asir entegrite sa bann tranzaksyon finansyel.

Son metodolozi :

La fason ki odit in ganny fer. Odit ti ganny fer konm swivan: Enn Rod tou bann tranzaksyon peyman sorti lo sistenm Treasury Information System savedir kot Trezor pour sa de lorganizasyon pandan sa period 2009 e 2016. Dezyenmman pou selekte serten tranzaksyon ki ti annan pour fer avek “consultancy” e ki ti ganny peye regilyerman. Trwazyenmman analiz sa bann peyman an relasyon ek zot payment voucher, remittance advice, detay transfer labank, invoice, Kontra e lezot dokiman an relasyon avek e enkli lenstriksyon peyman ek Minister Finans. Odit ti osi analiz bann invoice pour etablir si zot ti otantik, relevan e osi detay bann lakonpannyen, zot kontak e kont ki larzan ti pey ladan. Katriyenmman analiz prosedir ki ti ganny swiv an relasyon avek prosedir etabli deza e lafason kontrol ki ti an plas. E finalman fer enterogasyon avek Direkter Ladministrasyon avek Finans FIU e son Direkter Resours Imen kot NDEA pour ganny plis lenformasyon.

Limitasyon:

Lodit pa ti kapab ganny dokimantasyon tel ki payment voucher, invoice e lezot dokiman pour peryod 2009 ek 2010 malgre ki Trezor ti montre serten tranzaksyon pandan sa 2 lannen. Alors sa odit ti kouver peyman pour peryod 2011 a 2016. Odit pa ti egzamin rikord Labank Santral pou etablir si peyman an deviz ti ariv dan bann kont spesifik sa bann lakonpannyen parey ti ganny montre lo bann dokimantasyon e relye ek sa bann invoice. Lanfaz ti ganny mete lo dokiman ki Trezor ti servi pour pey sa bann larzan. Odit pa ti kapab ganny tou rikord avek sa bann lorganizasyon anvi ki serten o zofisye ti’n fini kit sa bann lorganizasyon ler odit ti ganny fer.

En disclaimer:

Sa rapor ki swiv i kouver bann leksepsyon ki ti aparan pandan sa lodit depi Avril ziska Zen 2017. Pou note ki okenn lenstans kot non dimoun ek lakonpannyen i ganny fer dan sa rapor i ganny fer “san prezidis” oubyen move lentansyon kont personn me senpleman pou permet en meyer konprenezon bann size ki ganny kouver dan sa lodit. En rapor odit i pa baze lo laprev me senpleman lo levidans sifizan e rezonnab devan lizye bann Oditer ki familye ek prosedir e sistenm finansyel Gouvernman. Rezimen bann konklizyon avan nou al dan plis detay: en Kontra pou “consultancy” normalman ti pour annan bann term e kondisyon kwa ki pour ganny delivre, dele letan, bann kou, larbitrasyon, ensidswit. Dan labsans sa bann Kontra avek Solas Beo Inc, Tech Limited, Calendula e Barry Galvin & Sons pou peryod avan le 5 Zanvye 2015, odit pann kapab vwar zistifikasyon lo bann sonm ki ti ganny peye avek sa bann lakonpannyen. La mon repete Mr Deputy Speaker i dir: odit pann kapab vwar zistifikasyon lo bann sonm ki ti ganny peye avek sa bann lakonpannyen. I paret ki bann invoice pou peyman bann servis ti ganny fer lokalman. Par egzanp dan en ka, en invoice ki ti ganny donnen par sa lakonpannyen ki apel Calendula ti annefe lo en letter head Solas Beo avek detay kont labank Calendula. Rezondet sa bann servis pa ti kler akoz zot pa ti ganny spesifye e ti napa okenn rapor par sa de Lorganizasyon koman levidans servis ki ti ganny rann. Zeneralman ti mank dokimantasyon pour siport lanpler sa bann tranzaksyon finansyel. Si zot ti’n deza ganny fer, zot pa ti retenir li pour ganny servi par lodit. Ti annan lendikasyon lenfliyans for par management ki pa anliny avek separasyon pouvwar dan diferan fonksyon tou le de Lorganizasyon. Tou dokimantasyon enkli laplikasyon pou fer ek peyman an deviz avek Labank Santral, peyman par SWIFT ti ganny konplete e fer par sa de Chief Officers e ganny anvoye kot Minister Finans pour zot laprouvasyon e finalman kot Labank Santral pou peyman. I paret depi Minister Finans e Labank Santral ti aksepte fer sa bann transfer dan plizyer kont dan labsans laprev ki en servis ti’n ganny vreman  delivre selon en Kontra me pirman kont en invoice. Bann demann pou donn legzanpsyon peyman pour servis konsiltan kont prosedir procurement ti ganny fer lo baz rezon “sekirite Leta”. An plis, sa bann peyman ti ganny aprouve lo baz invoice apre ki servis ti’n swadizan ganny donnen me pa avan en demann i ganny fer parey i le ka normalman. Kot ti annan Kontra konsiltan pou bann travayer Ekspatriye ki ti ganny peye an roupi, i pa ti kler si peyman an deviz pou menm dimoun ti annan pour fer avek lezot travay ou responsabilite sa bann menm pozisyon. Lakonpannyen Calendula e Tech Ltd ti anrezistre koman bann International Business Companies savedir Offshore Companies IBC avek Financial Services Authority atraver en azan lokal ki ti pe fer biznes Sesel. Bann IBC’s savedir bann lakonpannyen offshore normalman pa pey taks Sesel e i pa kler si sa bann lakonpannyen ti pey taks Sesel. Rekomandasyon: dapre sirkiler limero 1 2015 ki ti fer an Desanm 2015 par Procurement Oversight Unit (POU) dan Minister Finans, Trade avek Lekonomi Ble e an liny avek Seksyon 10(1) e (2) anba POU kopi bann Kontra ki’n sinyen, ki enkli bann pou ofer servis konsiltan, aprouve par National Tender Board i devret ganny soumet avek POU Procurement Oversight Unit. An plis, POU, Sirkiler limero 1 ki ti pibliye an Novanm 2011, i dir ki POU pa pou aksepte okenn peyman lo baz “retro-aktiv” dan en prosedir kin ganny adopte. POU i bezwen asire ki sa bann provizyon i ganny aplike dan tou ka procurement kot larzan piblik i konsernen. Minister finans i bezwen asire ki ava i aprouv sa laplikasyon pour peyman an deviz, ki bann verifikasyon i ganny fer ki Kontra valid i egziste e ki bann sonm ki pe ganny peye i anliny avek laprouvasyon oubyen egzanpsyon  ki’n ganny donnen par POU kot i aplikab. FIU avek NDEA i bezwen gard bann rikord apropriye e swiv prosedir etabli anba Public Finance Management Regulations Financial Instructions e pou fer sir ki rikord odit i kler e ganny garde dan bon kondisyon pour referans si zanmen i bezwen dan le fitir. Sa bann rikord i devret kouver bann byen fiks e levanter bann byen sa de Lorganizasyon. Kan i annan kont dout lo taks ki bezwen ganny peye par Offshore Companies ki anrezistre Sesel e ki pe fer biznes Sesel, sa i devret ganny refer avek SRC pou son determinasyon. Pareyman okenn personal income tax ki devret ganny peye par travayer ki lo payroll sa de Lorganizasyon oubyen okenn lezot landrwa dan Sesel, i devret ganny etabli avek SRC. An menm tan withholding tax lo lapar sa lorganizasyon ki pa rezidan Sesel pour servis legal i bezwen ganny met devan SRC pour son direksyon. Sa se bann ka ki merit ganny swiv de pre par SRC akoz i posib ki i annan bann ka parey dan lezot lazans Gouvernman spesyalman kot i konsern servis konsiltan. Lankadreman sa sistenm: responsab Administrasyon avek Finans kot FIU ti responsab kont e verifikasyon tou invoice pou bann ‘Goods and Services’. Chief Officer ti aprouv tou bann invoice, payment voucher e ti anpli form aplikasyon for Payment in Foreign Currency Central Bank of Seychelles ki ti ganny soumet ek Minister Finans. Dan ka NDEA, Direkter Resours Imen avek Ladministrasyon ti responsab pou kont e pou sertifye tou invoice pour peyman. Chief Officer ti aprouv tou bann invoice, payment voucher e ti ranpli form Application for Payment in Foreign Currency Central Bank of Seychelles ki ti ganny soumet ek Minister Finans. Sa Minister ti aprouv sa bann form e anvoy kot Labank Santral pour fer peyman. Kan sa i ganny fer, Labank Santral i enform Trezor atraver en debit note ki ti ganny servi par Trezor pour fer en payment voucher e sa i ganny servi pour met General Ledger a zour. Se dan sa ledger ki odit i kapab servi pour ganny lenformasyon e egzamin tranzaksyon an relasyon avek sa bann peyman. Dan sistenm Trezor, ti napa tranzaksyon finansyel pou FIU avek NDEA pou bann lannen avan 2009 tandis ki ti napa rikord pou peyman avan 2011 pou NDEA dapre Direkter Resours Imen avek Ladministrasyon sa Lazans. Prezan annou al lo premye lakonpannyen Solas Beo Inc. Mr Deputy Speaker mon pe zis regarde annou ale nou ava fini avek sa. Nou a pran Break pli tar. Ok.

 

MR DEPUTY SPEAKER

Yes go ahead.

 

HON WAVEL RAMKALAWAN

Solas Beo Inc. NDEA avek FIU ti fer peyman regilyerman sak trimes avek Solas Beo Inc ki dapre resers ti en lakonpannyen anrezistre an Moris le 10 Desanm 2007 avek limero Idantite Lakonpannyen C076299.  Son ladres ti C/O Beresford Trust & Corporate Services Ltd, 1001, Alexander House, 35 Ebene, Cybercity, Mauritius. Kan lodit ti pe ganny fer, sa lakonpannyen ti ganny konsidere koman ‘Active.’’ Direkter ek propriyeter sa bann lakonpannyen pa ti kapab ganny determinen e la i annan en latasman (pou lenformasyon relevan.) Labank Santral ti ganny demande pou fer peyman dan kont Solas Euro Bank (account limero 7643621) avek Barclays Bank, Seychelles, swivan laprouvasyon Minister Finans lo baz demann ki ti ganny soumet par Chief Officer’s FIU ek NDEA. Tou peyman anver Solas Beo Inc pou peryod 2009 ziska 2015 par FIU ti ariv R41milyon 999 mil R846 . Mon repete tou peyman anver Solas Beo Inc. pou peryod 2009 ziska 2015 par FIU ti ariv R41, 999,846.  E sa i selon dokiman ki ti ganny egzaminen tandis ki peyman sorti kot NDEA pou sa menm lakonpannyen pou peryod 2009 ziska 2015 ti ariv R48,765 mil R843  ok. R48 milyon 765, 843 ki fer en total R90, 765, 689. I annan en latasman avek sa dokiman ki donn detay.

Kwa ki odit in dekouver: Dan sa sonm R48,765, 843 par NDEA, Odit pa ti kapab verifye en sonm R13,262,083 pandan peryod 2009. E sa i kase pou 2009 i tonm R6,111,920 ki zot pa ti kapab idantifye e 2010 (R7,150,162) akoz ti napa dokimantasyon. Bann invoice pour ‘expatriate services’ ki koresponn avek bann peyman ti’n ogmant konsiderableman pandan sa bann lannen sorti €47, 500 an 2009 pou vin €88,000 an 2015. Dan ka FIU san okenn dokimantasyon pou zistifye sa alors dan ka FIU sa ‘expatriate services’ ti sorti €47, 500 an 2009 pou li ariv €88,000 an 2015. An plis pou ‘expatriate services’, ki ti osi enkli lo bann invoice ti annan bann sonm varye sorti €28, 500 ziska €58, 750 pou (FIU) pou ‘special duties’. Menm zafer ti ganny fer pou NDEA avek bann sonm ki sorti €97,000  pour vin €165,000 par trimes. Detay sa bann travay ki’n ganny fer pa ti ganny spesifye lo sa bann invoice oubyen dan okenn rapor ou lezot dokimantasyon. Peyman ek Solas Beo Inc. ti ganny fer lo en baz sak trimes dan bann sonm varyab par tou le de Lorganizasyon. Odit pann kapab verifye la fason sa bann invoice ti ganny fer akoz zot ti senpleman met ‘expatriate services’ pou sak peryod e pa ti posib pou idantifye ki kalite servis ti pe ganny ofer. Odit pa ti vwar okenn Kontra ki montre bann term e kondisyon malgre bann demann ki ti ganny fer avek Direkter FIU e Direkter Resours Imen e Ladministrasyon NDEA. Dan 20 peyman par NDEA, 18 pa ti annan invoice ki ti orizinal. Dan tou sa bann ka, lenformasyon tipik lo sa bann invoice tel ki kontak pour lenformasyon limero telefonn, fax e ladres email, limero invoice e sinyatir reprezantan lakonpannyen pa ti ganny vwar lo bann invoice. Dan tou bann ka, lo kote FIU, odit pa ti vwar laprouvasyon Procurement Oversight Unit e National Tender Board e ti napa okenn demann pour laprouvasyon par FIU, kontrerman avek Public Procurement Act, 2009 e Public Procurement Regulations, 2014. Regilasyon 9 avek 11 schedule 1 ki konsern servis konsiltan. Dan ka NDEA, 14 parmi 20 peyman ti san laprobasyon POU. Kot laprobasyon POU ti ganny demande, sa ti fer dan en fason retro-aktiv a lafen sak trimes lo baz en invoice e pa avan sa servis ti ganny rode. Application for Payment in Foreign Currency Central Bank of Seychelles SWIFT par Minister Finans pa ti ganny vwar dan 1 ka e son bank transaction pa ti ganny vwar pou 18 ka par FIU. Dan ka NDEA, ti napa bank transaction pour 7 ka. Dan 2 ka FIU, invoice ki ti ganny peye an 2009 savedir le 23 Novanm 2009 pou €45, 650 e le 20 Septanm an 2009 pou €47, 500 ti ganny sinyen par en Mr Joseph Cully koman Direkter Solas Beo Inc. Odit ti osi vwar ki an 2010, Mr Cully ti lo payroll FIU koman en ‘’asset agent.’’ Payroll pou lannen 2009 pa ti disponib pour odit kapab enspekte e konfirmen si vre sa dimoun ti ganny anploye par FIU kan i ti pe siny invoice pou Solas Beo Inc. E si sa servis pa ti deza pe ganny fer dan FIU par sa bann dimoun dan pos. Nou al lo lot lakonpannyen;

Tech Company Ltd.

Tech Limited ti anrezistre par Financial Services Authority le 01 April 2011 koman en International Business Company son limero 088982, e malgre son demann, odit pa ti ganny detay bann Direkter ek Aksyonner par FSA an di-z-an ki sa lenformasyon pa ti prezan lo file sa lakonpannyen. Pou ganny note ki sertifika ki ti ganny donnen par FSA date le 28 Avril 2017 i dir ki lakonpannyen pa ti “in good standing”. E la nou donn en detay dan latasman limero 3. Dapre detay labank lo invoice, tou transfer par Central Bank lo lapar NDEA pou al dan en kont an Euro limero 2801001340302 avek ABC Banking Corporation Ltd Maurice. Tou peyman anver Tech Limited pour peryod 2013 ziska 2016 par NDEA ti ariv R18, 421,559 selon dokimantasyon ki ti ganny egzaminen; e sa i dan detay limero 4 avek sa rapor. Zot bann Findings: pour note ki lakonpannyen Tech Limited ti pe sarz pou ‘Project Development in relation to classifieds Project SRU’ apartir Zilyet 2013 ziska Oktob 2015 lo en baz sak trimes pou en sonm $142, 548. 76  Ameriken; sa ti an Dolar Ameriken. Lo komansman ki ti ganny revize e sa ti ganny revize sorti an Dolar Ameriken pou vin an Ero e sa sonm ti vin €137,000 an 2015. E ti ganny ogmante ankor pou vin €137, 740 an 2016. Bann servis ti ganny dekrir koman ‘personnel, investigative and legal services’. Lazans pa ti kapab prodwir okenn Kontra avek sa bann lakonpannyen pour donn plis detay lo sa bann servis e zot term ek kondisyon. An plis detay kontak tel ki ladres sa lakonpannyen ki normalman i ganny trouve lo bann invoice pa ti prezan lo sa bann invoice.  Ti napa ni sinyatir sa reprezantan sa lakonpannyen lo sa bann invoice. De plis, 3 parmi 10 invoice pa ti orizinal. Lot lakonpannyen Calendula Ltd. Calendula Ltd ti anrezistre avek Financial Services Authority FSA le 5 Mars 2013 koman en International Business Company avek son limero (120570). Malgre son demann, odit pa ti ganny detay bann Direkter ek Aksyonner par FSA an di-z-an ki sa lenformasyon pa ti prezan lo file sa lakonpannyen. Pou ganny note ki sertifika ki ti ganny donnen par FSA date 28 Avril 2017 i dir ki lakonpannyen pa ti “in good standing”. La ankor enn fwa i annan detay  latasman limero 5 sa rapor. Dapre detay labank lo invoice, tou transfer par Central Bank lo lapar FIU pou al dan en kont an Ero (2801001340302) avek ABC Banking Corporation Ltd an Maurice. Mr Deputy Speaker tou peyman Calendula Ltd pou peryod 2015 ziska 2016 par FIU ti ariv R13,060,944 dapre dokiman ki ti ganny egzaminen e sa i dan en latasman limero 6.

Kwa ki odit in dekouver: FIU pa ti kapab prodwir Kontra oubyen en kopi valid Kontra avek Calendula Ltd pou odit determinen ki kalite servis ki ti kapab pe ganny ofer e bann sonm ki ti pou bezwen ganny peye. FIU ti ganny 2 invoice tou le trimes dan diferan sonm, enn pour ‘expatriate services’ e lot pour ‘special duties and operations’.  Bann invoice ti mank detay enportan tel ki ladres lakonpannyen, kontak savedir (telefonn, email, website) limero invoice e sinyatir reprezantan lakonpannyen. Premye invoice date le 15 Zilyet 2015 pou Calendula Ltd ti ganny fer lo papye ofisyel Solas Beo Inc. ki tin ganny reye senpleman e non ‘’Calendula Ltd’’ mete dan son plas. Ok alors ti ganny fer lo papye ofisyel sa lot lakonpannyen ki apel Solas Beo Inc. ki ti’n ganny reye non Solas Beo Inc. ti’n ganny reye e ti ganny ranplase avek Calendula Ltd.

 

Aplikasyon ‘’Peyman in Foreign Currency – Central Bank of Seychelles (SWIFT) payment instructions forms aprouve par Minister Finans pa ti ganny trouve dan 7 parmi 13 peyman ki ti ganny fer. An plis, dokiman tranzaksyon labank pa ti ganny vwar dan 10 parmi 13 peyman ki ti ganny fer.

Lot sapit en msye ki apel Christopher Mooney. Mr Mooney ti ganny anploye koman en ‘’asset agent’’ avek FIU apartir le 01 Oktob 2011 ziska Avril 2016 e ti ganny peye en saler R27, 069, par mwan. Apartir Zen 2013, Mr Mooney ti resevwar en sonm siplemanter €15,000 par trimes, ki ti ganny reflekte koman ‘foreign consultancy’, ki selon payment vouchers ti an relasyon ek son servis koman ‘operation consultant’ to SeyPIC.  (Seychelles Piracy Intelligence Cell.) Peyman ti ganny peye dan kont Mr. Mooney’s, son kont an Ero limero (0101043169) avek Barclays Bank, Seychelles. Tou peyman pour Mr Mooney ti ganny trete koman “overseas consultancy services”, ki eksklir saler, pandan peryod Zen 2013 ziska Avril 2016 ki ti ekivalan R3,071,223 dapre bann dokiman ki’n ganny egzaminen; e sa i dan en detay atasman limero 8.

Kwa ki odit in dekouver: Dapre son Kontra lanplwa date le 28 Desanm 2013, efektiv pou 2014, son post title ti ‘Senior Asset Agent’ malgre ki son bann invoice ti montre ‘Operation Consultant’. Personal Income Tax (PIT) pa ti ganny dedwir e transfer kot SRC sorti lo larzan ki ti ganny peye an deviz e lo lakel sa anplwaye i oblize peye. I pou dwa en total pour peryod 2013 ziska 2016 en sonm R460, 683. Bann form aplikasyon for Payment in Foreign Currency Bank of Seychelles payment instructions pa ti ganny trouve dan 3 parmi 13 peyman ki ti ganny fer.

Lot lakonpannyen Barry Galvin and Son: Barry Galvin & Son ti en Avoka, baze an Irlann responsab pour fourni servis legal pour FIU.  Son fre €40,000  an 2013, ki ti monte pou vin €50,000, par trimes, ki ti ganny sarze ti ganny peye dan son kont Allied Irish Bank limero (22612010) an Cork, Ireland. An plis, Mr Galvin ti reklanm lezot depans tel ki vwayaz, subsistence allowances ek lezot, ki ti ganny ranbourse dan son kont an Irlann. Tou bann peyman pour Mr Barry Galvin & Sons pou peryod 2010 ziska 2016 par FIU ti ariv en sonm R18,319, 967 l selon dokiman relevan ki’n ganny egzaminen; e bann detay i dan en latasman limero 9.

Kwa ki zot in dekouver: Apart en let apwentman date le 5 Zanvye 2015, bann Kontra avek Barry Galvin & Son ki date depi 2013, kan servis ti pe ganny solisite pa ti kapab ganny prodwir avek lodit pour vwar si bann term e kondisyon enkli bann sonm ki ti ganny peye atraver let apwentman ki ti fer referans avek en kontra pour servis spesifye dan Appendix 1, Appendix 2, Appendix 3, Appendix 4 e Appendix 5, ki ti ganny marke koman “Classified”. Odit pa ti vwar ni sa bann Appendix ni bann Kontra. Dan tou sa bann ka, peyman ti ganny fer lo baz pro-forma invoice dan plas bann orizinal ki kontrer avek Financial Instructions 0520 ki dir ki okenn peyman pa devret ganny otorize amwen ki payment voucher i ganny akonpannyen par invoice ou lezot dokimantasyon tel ki resi, GRN ‘goods receive notes’ oubyen delivery note. Ti napa levidans pour montre ki withholding tax ki devret ganny peye par non-rezidan ki ariv

R2,747,995 e 13sou, detay lo limero 10, ti ganny peye avek Seychelles Revenue Commission anliny avek Seksyon 66 (1) Business tax Act, 2009, Seksyon (3) dan First Schedule, si i ti dwa. Dan 4 ka, sa form Minister Finans application for Payment in Foreign Currency Central Bank of Seychelles (SWIFT) payment instruction form pa ti ganny trouve. Dan 5 lezot ka, dokiman tranzaksyon labank pa ti ganny trouve.

Lot pwen; Konsiltan Lokal:

En madanm ki son inisyal i M.H. ti ganny apwente koman Consultant Analyst avek FIU apartir 01 Zanvye 2015 pou en a peryod 2 an e en sonm R30,000 par mwan dapre en let Kontra ki ti napa dat. Rol Consultant Analyst se pou fer due diligence savedir pou fer checks lo etranze an relasyon ek rikord vwayaz, lenformasyon imigrasyon, permi travay ek lezot lenformasyon dan Departman Immigration dapre en dokiman atase avek sa let mansyonnen pli o. Tou peyman pou sa madanm ekout sa byen. Tou peyman pou sa madanm pour sa peryod 2014 a 2016 par FIU ti ariv R960,000 selon dokimantasyon ki ti ganny egzaminen.

Me aprezan ki zot Findings:

Ti napa Kontra avan 2015 malgre ti annan peyman ki ti komans le 5 Zen 2014, ki ti total R240, 000 mil ziska lafen 2014. Sa Kontra ki ti napa dat ti ganny sinyen zis par madanm M.H, sinyatir Chief Officer pa ti prezan.  Dapre sa let, i sipoze ganny konze baze lo 1.75 zour pour sak mwan ki i ti konplet son servis, me ki pa ti kapab akimil par lao 42 zour. Par lenplikasyon sa ti en form lanplwa par FIU. Lenformasyon lo invoice ti endik ‘general consultancies’ tandis ki detay atase avek son ‘letter of contract’ ti spesifikman an relasyon avek ‘immigration consultancies’. Personal Income tax ki ariv en total R144,000 pa ti ganny dedwir lo bann peyman R960,000  ki ti ganny fer pandan sa peryod Zen 2014 ziska Desanm 2016.

Lot lakonpannyen ; Daniel Technologies: Daniel Technologies i en lakonpannyen an Irlande ki fournir lekipman sekirite e liniform avek NDEA selon son komann. Tou peyman pou Daniel Technologies pou peryod 2011 a 2016 par NDEA ti ariv R6, 947,386  ki ti ganny peye kot AIB Bank, Dublin limero kont (01610009) dapre dokimantasyon ki ti ganny egzaminen.

Kwa ki zot in dekouver: Dan laplipar bann ka, invoice orizinal pa ti ganny trouve par odit pour siport bann peyman ki ti ganny fer e sinyatir fourniser pa ti ganny trouve lo invoice. An plis, laprobasyon POU pa ti ganny vwar dan 15 ka. Plizyer bann item ki ti’n ganny peye pa ti ganny vwar dan stok levanter koman levidans ki zot ti ganny resevwar. Dapre sa Lazans, levanter pa ti ganny mentenir ki kontrer avek Financial Instructions 1203. Dan 10 ka, bann form aprouve par Minister Finans application for’’ Payment in Foreign Currency Central Bank of Seychelles (SWIFT) payment instructions form’’ pa ti ganny vwar tandis ki dokiman labank pa ti ganny vwar dan ankor 25 ka.

Lot Finbarr O’Leary and Thomas Quilter: Mr. Finbarr O’Leary ti ganny apwente par Direkter e sa ti ganny sinyen koman Deputy Director FIU pour en peryod 18 mwan apartir le 2 Avril 2015, e pour fini le 30 Novanm 2016.  Pareyman, Mr. Thomas Quilter ti ganny apwente par Direkter (sinyen) koman Direkter FIU pou en peryod 24 mwan apartir le 10 Mars 2015. Tou le 2 zofisye ti ganny peye zot saler lo payroll FIU.  Apard zot saler le mwan, tou le de zofisye ti resevwar en ‘relocation allowances’ tou le mwan koman “consultancy services” ki ti ganny peye sak trimes. Sa provizyon ti ganny site koman an akor avek Kontra pour servis ant State House ek Service Provider, Calendula Ltd. Sa bann “relocation allowances” ti ganny transfer dan bann kont an in Irlande; Bank of Ireland limero (40931088) avek IPBS (4208089).

Bann Findings: Bann sonm ki ti ganny peye pour “relocation allowance” ti varye sak trimes sorti €4, 700 ziska €6, 400. Dapre sa Kontra, bann term e tarif sa bann allowance ti an akor avek Kontra servis ant State House ek service provider Calendula Ltd. Odit pa ti kapab verifye bann sonm ki sipoze peye akoz zot pann ganny spesifye dan bann Kontra lapwentman respektiv. An plis, avek Kontra avek Calendula Ltd pann ganny trouve, odit pa ti kapab konfirm sa laranzman. Personal income tax ki ti pour ariv R76, 059 ek 30 sou ek R132, R205. 80sou pou sa 2 dimoun respektivman, pa’n ganny dedwir lo zot “relocation benefits ek consultancy services” ki ti total R507,061  ek  R881,372  respektivman. E sa i dan detay limero 12. Dernyen fwa ki Mr O’ Leary ti ganny enkli lo payroll ti an Novanm 2016. I ti ganny sepandan en gross salary R42,199. 95 sou le 21 Desanm 2016 ki paret en peyman an plis vi ki i ti nepli anploye par FIU. Ti napa okenn zistifikasyon lo dokiman payment voucher ou lezot dokiman an relasyon ek sa de peyman. Dan 2 ka, dokiman labank pa ti ganny trouve par odit an relasyon avek peyman pour sa 2 dimoun.

Mr Speaker sa i termin sa rapor ki nou’n gannyen e mon anvi anba Rule 23(8) Rules of Procedures for Committees pou Komite Lasanble pou mon lir sa i en lot dokiman Lasanble Rules of Committees. Mon anvi prezant Madanm Clerk en kopi sa rapor e demann li pou lay sa report lo latab an akor avek Standing Orders 28(1).

 

MR DEPUTY SPEAKER

Mersi Onorab Ramkalawan. Mersi Onorab bon apre prezantasyon sa rapor on the Special Audit of Payments by FIU and NDEA. Sa rapor i vin pou Lasanble Nasyonal aprezan. Mon ava organiz avek Sekretarya avek Clerk ki pandan Break nou ava fer en kopi ki sak Manm i ava ganny en kopi sa rapor. Me an menm tan osi tou nou konnen ki FPAC pe kontinyen son travay son bann investigation. Petet mon a demann bann Manm zis pou tenir sa bann rapor pou zot referans personnel antretan ki FPAC i kontinyen avek son travay. Ok. Wi Onorab Mondon.

 

HON TERENCE MONDON

Mersi Mr Deputy Speaker. Mr Deputy Speaker an akor avek Order 29 Standing Order 29(1) Standing Orders e Rules of Procedures Committees sa Lasanble mon move ki sa rapor prodwir spesyal lo bann peyman fer par FIU e NDEA e ki’n ganny prezante par Chairman FPAC i ganny konsidere dan prosen Sitting par en Komite of the whole Assembly. Mersi Mr Deputy Speaker

 

MR DEPUTY SPEAKER

Mersi Onorab Mondon. Ok mon pe regard Order 29.  En moman. En moman.  Order 29 ok,  i fer referans avek Order 28: ‘a member may give notice of a Motion that the Assembly resolves itself into a Committee of the whole Assembly to consider the paper and debate upon that Motion’. Otan ki deba i ganny confine to the general principle set forth in the paper, ok. Mosyon in ganny move okenn Manm ki segonde. Onorab Sebastien Pillay.

 

HON SEBASTIEN PILLAY

Yes Mr Deputy Speaker mon le segonn sa Mosyon.

 

MR DEPUTY SPEAKER

Ok Onorab Sebastien Pillay in segonn sa Mosyon. So nou pa ava debat lo la si zot agree ozordi avan nou pran en vot. E Mosyon nou ava move sa Mosyon next week, ok. Annou pran en vot lo sa Mosyon e tou Manm ki an faver ?

  1. ok. Okenn Manm ki kont?

Ok. Madam Clerk?

 

MADAM CLERK

Mr Deputy Speaker 30 Manm an faver person kont. Mersi

 

MR DEPUTY SPEAKER

Ok, mersi. Bon avek sa nou ava regarde apre Break si tou bann Manm nou kapab sirkil en kopi sa rapor e bann Manm a kapab konmans fer zot preparasyon pou semenn prosen. Me avek sa nou ava pran en Break nou ava adjourn e nou a retournen 11.30  pou kontinyasyon travay.

 

(BREAK)

 

 

MR DEPUTY SPEAKER

Ok. Avan ki nou kontiny dan nou travay, mon pe zis regarde si zot in ganny rapor tou bann Manm ? Ok? Ok? Good. Mersi Madam Clerk, Deputy Clerk pour sirkil sa rapor. Bon nou ava kontinyen avek nou travay. E prosennman lo Order Paper nou ava al lo Mosyon.  Mosyon table par Onorab Churchill Gill, e mon a demann Onorab Gill pour prezant son Mosyon.

 

HON CHURCHILL GILL

Mersi Mr Speaker.  Bonzour tou Manm.  Bonzour tou dimoun ki a lekout, espesyalman bann dimoun Praslin. Vi ki Vallee de Mai pe anmas reveni tre konsiderab avek bann touris ki vizit sa Rezerv, zabitan Praslin pa pe neseserman benefisye menm si sa aktivite pe ganny fer lo sa zil.

Sa Lasanble pe demann Gouvernman pou konsider donn serten poursantaz sa reveni ki a kapab ganny met dan en Fon ki pou ede fer bann pti proze pour benefis zabitan Baie Ste Anne e osi zabitan Grand Anse Praslin. Mr Speaker, Vallee de Mai i sitye dan leker Praslin, kot i annan pli gran lafore ki entakt avek pye palm e pye coco-de-mer e lezot plant andemik. In egziste pour en kantite lannen dan izolasyon e sa in fer ki bokou lezot lespes andemik in devlope dan sa fore. An plis, bokou parmi sa bann lespes andemik, i ganny trouve selman dan Vallée de Mai, pa dan okenn lezot landrwa dan lemonn. Ankor dan sa izolasyon, i fer ki en relasyon tre spesyal in ganny devlope ant serten zensek ek plant. Vallée de Mai ti ganny deklare par UNESCO koman en Patrimwann Mondyal an 1983. An rekonesan, an rekonesan sa tre gran valer ki sa fore ekstraordiner i annan. Fondasyon Zil Sesel (SIF) ti pran sarz Vallée de Mai an 1989 avek bi fer sir ki zot dedye zot travay pour asire ki sa sit i ganny byen zere, byen proteze an term konservasyon pou fer resers koman en sours ledikasyon pour tou bann viziter. An priyorite se pour asire son soustenabilite e son balans pour bann fitir zenerasyon.

Pour sa, zabitan Praslin i remersye Fondasyon Zil Sesel, pour tou travay ki’n ganny fer san oubliy travay enorm ki zot pe fer pou protez Aldabra ; en lot leritaz nasyonal e ki osi enn parmi nou Patrimwann Mondyal. Nou okouran ki tou larzan ki ganny anmase dan Vallée de Mai i ganny servi pou zer Vallée de Mai ek Aldabra. Nou pe koz lo en total viziter 87000 par lannen ki donn Sesel en reveni anviron R17 a R18 milyon par lannen. Mon osi note ki tou seselwa ki antre dan sa sit zot pa pey okenn tiket larantre.  Mr Speaker mon santi mon tre privilezye, pour anmenn en tel mosyon lo non tou zabitan Praslin.

Praslin i en zil tre spesyal, i byen ganny apresye par tou dimoun ki vizit sa sit spesyalman bann viziter etranze.  Moman in arive pour sa valer ganny rekonnet e respekte. Anfen, donn tou zabitan Praslin en par direk dan sa benefis ki zot byen merite.  Zil Praslin i fer en kontribisyon tre signifikan dan Sesel, me zabitan Praslin pan zanmen konn, ganny dir ki poursantaz kontribisyon ekonomik ki sa zil i kontribye dan sa pei. In ler pou sa kalite lenformasyon ganny formelman pibliye.

Mon anvi fer bann zabitan Praslin konnen ki lo bann size tre enportan ki konsern nou zil, mon pou reste angaze pour kontinyen met devan.  Mersi Mr Speaker.

 

MR DEPUTY SPEAKER

Mersi Onorab Churchill Gill. Okenn Manm ki segonn Mosyon? Ok, Onorab… Mon annan 2 Manm la. Ok. Onorab, Onorab Woodcock.

 

HON WAVEL WOODCOCK

Mr Speaker mon koman en zabitan Praslin, anvi ki sa Mosyon i baze lo Vallée de Mai ki ou kapab dir i dan tou le de distrik ant Grand Anse ek Baie Ste Anne, mon pou siport sa Mosyon ki Onorab Gill in met, sorry, mon pou segonn, sorry, sa Mosyon ki Onorab Gill in met devan sa Lasanble. E mon anvi fer mon lentervansyon lo sa Mosyon Mr Speaker. Mersi.

 

MR DEPUTY SPEAKER

Proceed, proceed Onorab.

 

HON WAVEL WOODCOCK

Mr Speaker, parey mon pe dir, mon siport sa Mosyon ki Onorab Gill in met devan sa Lasanble ozordi. Annefe mon rapel lentervansyon ki mon ti fer… Speech Prezidan Faure devan 6enm Lasanble Nasyonal le 18 Oktob 2016, zis apre son Inogirasyon. E Mr Speaker mon ti met lanfaz lo etabli en tel fon ki Onorab Gill pe propoze ozordi.  Mon’n koz lo la a plizyer repriz, mon’n menm propoze ki en poursantaz reveni larzan ki Praslin i generate i bezwen al dan en Fon ki ganny zere par bann Pralinwa. Olye ki nou bezwen depan lo bann Minister pour bann pti proze ouswa bann proze Kapital.  Sa Mosyon i en bon Mosyon e i en bon komansman pou anmenn Praslin dan en bon di direksyon ki mon asire bokou Pralinwa pe swete.

Menm Prezidan Faure ti donn son langazman pou etablir en tel Fon. Dan son SONA le 14 Fevriye sa lannen, 2017 Prezidan Faure ti anonse ki zot pou reviv Praslin Development Fund. Ti sipoze ganny etabli lafen, lafen d-imwan Zilyet, annefe lafen sa mwan la me ziska aprezan nou pa ankor vreman tann naryen regardan sa Fon si vreman i pou ganny etabli an Zilyet  sa mwan, or si i pou ganny etabli prosennman.  E nou pe swete ki sa fon i ganny etabli osito posib.

Dan deba lo Bidze mon rapel Mr Speaker, mon ti demann en kestyon lo sa size. PS pour Finans ti konfirmen ki larzan in ganny met dan bidze pou etabli sa Fon sa lannen. Savedir sa Fon pe vini ki mon pe prezimen ki larzan ki Onorab Gill pe propoze, en poursantaz larzan ki Vallée de Mai i anmase i kapab al al dan sa Fon. E Mr Speaker, fotespere osi ki ler sa Bord i ganny etabli pou zer sa Fon i enn ki ganny reprezante. I pa pou parey sa task force kin ganny etabli resaman pou zer bann tender pou bann proze lo Praslin. I en fon ki byen ganny reprezante. I pa en Fon ki parey nou pe vwar sa task force ozordi ki pe get bann tender pou bann pti proze MLUH/LWMA ki pa byen ganny reprezante, ki ou plizoumwen vwar bann aktivis bann siporter Parti Lepep.

Nou le en fon ki byen ganny, ki reprezant nou klima politik ozordi. Mr Speaker, ki mon anvi dir lo sa mosyon se ki Praslin ozordi, nou pa pe ganny en fair deal. Annual Report 2014 SIF Mr Speaker i montre ki Vallée de Mai ti ganny li 86,985 viziter e tiket ozordi pou antre Vallée de Mai i kout R350. Ki vedir ki SIF i fer li plis ki R30 milyon zis avek lavant tiket ki e sa Mr Speaker i en reveni ki tre konsiderab. Problenm Mr Speaker, se ki Pralinwa pa pe vwar ki fason ki larzan ki Vallée pe fer, pe zere pe anmase, pe benefisye Pralinwa. E sa i en konsern pertinan pou plizyer Pralinwa. Annefe dan mon kanpanny avan mon ti ganny elekte e mon asire Onorab Gill osi plizyer Pralinwa in apros li, e ozordi bokou Pralinwa pe vin devan.

Nou pe demande be ki fason ki nou pe benefisye avek larzan ki Vallée de Mai pe anmase ? Sa i en konsern pertinan tou zabitan Praslin. Baie Ste Anne avek Grand Anse. Wi Vallée de Mai i en i en UNESCO World Heritage e i en Leritaz Nasyonal. E i vre nou bezwen prezerv li e sa ki SIF in ganny manda pou fer. Me sa leritaz Nasyonal e enternasyonal i Praslin. E i pe generate bokou larzan, en sonm konsiderab.

R30 milyon zis avek ticket sales-san kont bann lezot larzan ki Vallée de Mai pe fer atraver lavant bann souvenir ; atraver vann bann prodwir a la baz coco-de-mer, kernel, coco-de-mer li menm son lavant, e bann lezot larzan ki pe ganny generate atraver biznes Vallée de Mai.  E Pralinwa I bezwen benefisye avek larzan ki Vallée de Mai pe anmase.  Mr Speaker en tel Fon i vreman enportan e SIF ki pe zer Vallée de Mai i bezwen kontribye dan sa Fon. I bezwen kontribye en poursantaz dan sa Fon ki pou benefisye Pralinwa. E se nou Pralinwa nou, nou ava deside avek sa larzan ki pou ganny anmase ki nou pou fer avek.

Mr Speaker, sa i en keksoz ki parey mon pe dir, ki neseser pou nou pti zil. Parey mon pe dir, Pralinwa pa pe senpleman demann ki zis en en poursantaz larzan Vallée de Mai i antre dan sa dan en tel Fon ki pou Praslin Development Fund  tre byento pou ganny reviv, Praslin zabitan Pralinwa pe demann en pti pe plis ki sa. Zot pe menm demande ki en poursantaz tou reveni ki ganny kolekte, ki ganny generate Praslin sirtou atraver lendistri tourizm, olye al dan Kof Leta i en serten poursantaz, i al dan sa Fon, dan sa Praslin Development Fund.

Mr Speaker, Praslin ki arive ozordi, nou bezwen depan lo Minister pou fer bann proze Kapital. Menm bann pti proze, tou sord proze. Bann  pti proze nou depan  lo Local Government atraver sa Bidze ki zot gannyen ki  R1.7milyon pou fer bann pti proze dan distrik e a plizyer repriz ki nou vwar se larzan ki ganny allocate pour bann proze Praslin i vreman pa ase. I annan proze kin ganny promet pour plizyer lannen ki ziska ozordi nou pa ankor war nanryen ganny fer.   Mr Speaker, i malere pou dir ki Praslin, nou pa pe ganny, parey mon’n dir, nou pa pe ganny en fair deal.

Praslin i kontribye, mon mazinen, mon estimasyon pou mon e i mon dakor avek Onorab Gill ti a bon lepep Pralinwa i ganny met okouran, kantite nou pe kontribye dan lekonomi Sesel.  Selman mon estimasyon ki mon’n fer atraver konsiltasyon avek enn de bann ekonomis, in dir mwan, Praslin i pe kontribye at least 20 poursan ou plis dan lekonomi Sesel. I annan ki pe dir menm 30 ekek poursan dan lekonomi Sesel sirtou atraver Lendistri Tourizm.

E Mr Speaker nou pa pe vreman vwar ki tou sa larzan ki Praslin pe fer pe benefisye Pralinwa, enkli larzan ki SIF pe kolekte pe anmase atraver Vallée de Mai. Mr Speaker, avek kontribisyon Vallée de Mai dan sa Fon, i kapab ede fund bann proze Praslin. Bann pti proze e menm bann why not bann proze Kapital. Sa nouvo Praslin Development Fund i ava deside, sa Bord ki pou zer sa Fon, i pou deside ki proze ki nou pou fer dan benefis Pralinwa. Nou ava koste avek nou zabitan e nou ava konnen ki bann proze ki pralinwa i anvi vwar lo kote Baie Ste Anne, ouswa lo kote Grand Anse. Ozordi ki nou vwar Praslin, Mr Speaker, ki  en konsern, en mekontantman de lapar nou bann zabitan se ki nou vwar tou bann, bann dezyenmmen. Nou vwar tou bann, ennler bann depouy, nou vwar tou bann restan, bann keksoz ki kekfwa bann reject lo Mahe, bann lekipman ki, kekfwa bann nouvo lekipman sorti aletranze in vini pou ganny servi Mahe, me bann ki dezyenmmen oubyen pe ariv lo zot faz final, zot ariv the end of their life cycle i ganny anvoy Praslin.

La bann bis TATA, ler bann nouvo bis TATA i vini, sa bann vye bis TATA i ganny repenn anvoy Praslin. Konmsi tou, ki nou vwar Praslin se ki nou pa pe ganny en fair deal. Bann lekipman, bann dezyenmmen, ouswa bann restan, sa i ganny anvoy Praslin. Pa bezwen al lwen, la resaman noun war pres almost 40an nou pe vwar ki semen Grand Anse Praslin, semen Praslin pe ganny refer me problem, nou pe servi en vye roller, nou pe servi en vye paver, nou pe ganny bann lekipman, bann lekipman dezyenmmen. Akoz ki nou, nou pa kapab ganny bann lekipman, bann lekipman nef?  E avek en tel fon ek larzan mon mazinen ki si nou annan en tel Fon ki nou pe zere nou menm lo Praslin nou kapab depans sa larzan pou aste bann keksoz ki pou benefisye nou. Si ou get SLTA la, en pake problenm ; vye paver, roller resaman fek brile lo la, starter, bezwen esper sepa konbyen letan pou aranze, sa paver tou lazournen i kase, JCB pa pe marse. Ou konnen sa Fon nou kapab gete, si Minister napa larzan, nou kapab gete ki fason ki nou kapab, sa Fon i kapab gete ki bann keksoz ki bann proze e menm bann lekipman ki manke Praslin e sa fon nou kapab nou kapab ede aste sa bann keksoz, purchase sa bann keksoz.

Mon kestyon se ki Pralinwa pe demande, eski tou kou nou pou ganny bann keksoz dezyenmmen ?  Eski  tou kou nou pou ganny sa bann vye lekipman? Eski nou pa deserve pou ganny bann keksoz ki bon, bann keksoz ki nef, bann keksoz ki nouvo? Nou deserve pou ganny bann bon keksoz nou osi lo kote Praslin. E sa Fon i a ede fer sa, i a ede pou nou kapab ganny bann keksoz ki pou benefisye nou bann zabitan. Minis fek anonse pa bokou letan ki en nouvo paver pe vin pe vin pe vin Mahe dan lasanble pa bokou letan pase, me nou, nou ankor pe deal ankor pe servi bann vye lekipman. Si ou pas partou dan plizyer bann Departman Ministeryel Praslin, napa lekipman. En kantite keksoz nou manke. Nou fek pa bokou letan, nou ti al fer vizit nou de Onorab Gill LWM kot Landfill, Nou annan en B6 ki pe pouri. Zot  pa pe kapab zer nou landfill, nou napa lekipman.

CEO LWMA ti bezwen vin gel devan televizyon pou demann en nouvo spikewheel. Ou konpran ?   Be kekfwa sa fon ti kapab ede, rod en spikewheel pou nou kapab zer sa landfill lo kote Praslin.  Sa Fon i en keksoz ki vreman enportan. E Vallée de Mai i enn en landrwa lo Praslin ki pe generate, ki pe kolekte en en reveni konsiderab i kapab ede. En poursantaz i al dan sa Fon e nou ava gete ki mannyer nou kapab ed sa bann diferan Departman. Zisteman, pa bokou letan pase apre ki nou’n lager, Watersport Grand Anse Praslin in reouver, e ki ou vwar, se ki sa dimoun ki pe manage sa Watersport Centre pe pas partou port an port, kaz an kaz pe rod sponsor enn de lekipman. Telman bann zenn in sorti pou, telman sa kantite zenn ki’n join Watersport Centre, i enkrwayab. Zot ti le fermen. I montre lentere ki bann zenn Praslin i annan i annan dan bann tel aktivite, me Selman ki ou vwar? Napa lekipman. Napa bato. Napa lavwal. Napa canoe. Napa laser. En kantite lekipman napa. E en tel Fon, en tel Fon i pou vreman ede. I pou vreman ede pou nou kapab rod sa bann lekipman ki sa bann zenn i kapab servi.

Ozordi nou pe dir nou bann zenn pe tonm dan drog, Praslin napa aktivite pou zenn e la nou’n reouver sa Centre lekipman napa. Nou bezwen ed bann zenn, nou bezwen annan bann aktivite ki pou benefisye bann zenn, anpes zot tonm dan sa bann fleo, dan sa bann anba sa bann move lenfliyans, e en tel Fon parey mon’n dir avek en kontribisyon signifikan Vallée de Mai, nou a gete, lo Bord nou a gete ki mannyer nou kapab ede ; menm sa Watersports Centre, mon pe koz lo kote Grand Anse, mon asire lo kote Baie Ste Anne osi i annan enn de bann lezot keksoz, bann pti proze ki zot kapab fer.

Mr speaker, parey monn dir, mon asire ki avek en kontribisyon Vallée de Mai dan sa Fon, nou ava nobou kapab ed sa Watersports Centre e osi ede finance bann lezot pti proze ki pou vreman benefisye e dan lentere nou bann zabitan Grand Anse, Baie Ste Anne, nou bann zabitan Praslin.

Mr Speaker, Praslin i bezwen benefisye plis avek larzan ki nou zil i generate. Nou bezwen vwar e dimoun i, ou konnen, i pa en keksoz ki nou pe envante sa. Si ou vwar Onorab Gill ozordi ek mwan nou pe koz lo sa size, e nou’n deza koz lo la dan lepase, savedir i en konsern ase pertinan pou nou zabitan. E sa pou plizyer lannen, nou pep pe demande.

Olye esper Minister, sa Fon i kapab aste bann lekipman ouswa i kapab konsider bann diferan proze ki pou benefisye nou zil.  Nou lo Praslin nou’n fatige avek sa bann zafer resevwar bann keksoz dezyenmmen. Nou osi nou ti a kontan vwar bann bon keksoz, bann keksoz nouvo. Mr Speaker.  Mr Speaker, parey monn dir, sa larzan i kapab ganny servi pou fer plizyer proze.  E  en lot proze ki mon pe mazinen la annefe mon rapel pa bokou letan pase dan deba bidze, ti annan en konsern ki ti ganny lev-e regardan bann kiosk pou bann artizan Praslin o-bor Airport Amitie, mon rapel Minister konsernen zot ti dir pour dir vreman sa bann kiosk i annan. Sa bann keksoz i la, me selman zot ti napa larzan pour transfer, pour anmenn sa bann kiosk Praslin. E vwala en lot fason ki sa Fon i kapab ede. E mon mazinen la avek sa reshuffle dan Cabinet avek, vi ki nou ganny en nouvo Minis pour Lazenes, Spor e Kiltir ki sorti Praslin, sa en keksoz kekfwa ki i kapab konsidere pour fer sir sa kiosk, ki nou bann artizan Praslin pe espere tou sa letan, zot kapab fer li desann Praslin.

Si non, si  i vwar i napa larzan i pa kapab fer sa, sa Fon, sa larzan ki sa fon pe anmase, nou ava pey en bato, nou ava fer sa bann kiosk desann. Nou bann artizan Grand Anse Praslin, ek Baie St Anne Praslin ki pour vin travay Amitie Airport zot kapab benefisye avek.

Mr Speaker, SIF atraver Vallée de Mai, pe generate apepre R30milyon zis avek lavant tiket. Parey mon’n dir san konsider bann lezot larzan ki zot pe anmennen, ki zot pe anmase ankor atraver lavant kernel e atraver bann lezot mwayen, Vallée de Mai. Mr Speaker parey mon’n dir Praslin nou bezwen benefisye. In fact, si nou pour zis get Vallée de Mai li menm, menm bann dimoun ki travay prosman avek Vallée de Mai pa pe war ki mannyer Vallée de Mai pe benefisye zot. La i fer mon mazin sa bann, sa 12enn, e plis bann gid lokal ki pe travay avek Vallée de Mai, bann gid endepandan.

Ni menm en landrwa asize, Vallée de Mai zot napa pour resevwar touris e sa bann dimoun i kontribye en kantite dan lekonomi Sesel. Zot al rod touris, zot vin anmenn Vallée de Mai, Mr Speaker, e zot, zot pe travay avek Vallée de Mai direkteman, zot pe kontribye dan lekonomi Sesel, zot pe anmenn bann touris la, en landrwa pour fer pour zot kapab asize, resevwar kliyan, zot napa !

Zot bezwen asiz dan larantre kot transpor i antre. E sa bann gid, zot, zot vreman konsernen ; i dir be get sa tou sa ki nou’n fer tou sa lannen, depi de lannen, de lannen, mon rapel sa ki ti vin lontan pour zwe zot gitar Vallée de Mai, pour ankouraz bann touris vin Vallée de Mai, ozordi zot pa pe benefisye. Oule dir mwan tou sa larzan ki Vallée de Mai pe anmase pa kapab fer en pti landrwa pour zot resevwar zot kliyan ? Konmsi i montre Mr Speaker ki mannyer zabitan Praslin pa pe vreman vwar e zot pa pe vreman benefisye avek tou sa larzan, sa 30milyon, e plis ki sa, ki pe ganny anmase dan sa, atraver sa Rezerv Patrimwann Nasyonal, e enternasyonal. I fer mon osi mazin bann field worker ki pe travay ek Vallée de Mai Mr Speaker.

I annan bann etranze ki vin isi pour fer bann resers, sa ki’n fer zot masters, ek zot bann, bann Degre. Me ler ou pe mazin bann field worker ki pe donnen, ki pe kontribye, ki  pe travay, ki pe ed sa bann, sa bann etranze kolekte sample, fer zot resers, isi laba. Me selman konbyen zenn, vreman, konbyen sa bann field worker, sa bann travayer Vallée de Mai ki’n vreman benefisye avek en labours, avek SIF pour al fer kek letid, e sa en konsern ki zot menm zot in met devan mwan. Ou konpran?   So Mr Speaker ou vwar poudir vreman i annan en kantite konsern regardan, regardan Vallee de Mai, larzan ki i pe anmase ki pa pe benefisye, menm bann dimoun ki pe travay direkteman  avek Vallee de Mai, e osi bann dimoun, Mr Speaker, e osi bann zabitan Praslin. Sanmenm sa rezon ki mwan ozordi Mr Speaker, mon pour dakor avek sa Mosyon, e mon pour siport sa Mosyon ki devan sa Lasanble ozordi Mr Speaker, akoz mon krwar avek en poursantaz sa larzan Vallée de Mai nou kapab fer en kantite keksoz avek sirtou sa larzan ki pour ganny met dan sa Fon. E mon prezimen pour dir dan sa Praslin Development Fund osi pour annan bann lezot fason ki nou pour kapab raise bann, bann larzan, lezot poursantaz larzan i kapab al dan sa Fon ki nou kapab determinen, nou koman Pralinwa, nou ava determinen ki bann proze ki nou pour fer.

Avek sa Mr Speaker, mon anvi zis propoz en pti amannman lo sa Mosyon ki Onorab Gill in anmennen, sirtou lo sa 2enm paragraph – ‘’…sa Lasanble pe demann Gouvernman pour konsider donn serten poursantaz sa reveni ki a kapab ganny met dan en Fon ki pour ede fer bann pti proze pou benefisye zabitan Baie St Anne ek zabitan Grand Anse Praslin. ‘’

Mr Speaker ki mon pe demande, sa bout kot i  dir. ‘’dan en Fon ki pour ede fer bann pti proze,’’ si zis Onorab Gill i kapab konsider pou tir sa pti bout ‘’pti proze’’ akoz mon mazinen poudir bann proze ki nou kapab sey antreprann, sa fon i kapab bann proze en pti pe, i kapab bann proze mwayen. I kapab menm bann proze Kapital, i kapab bann proze pli gran. Alor mon pe dir plito zis i tir sa, i tir sa pti mo ‘’pti,’’ i a vin zis ‘’bann proze.’’ Sa i sel pti amannman ki mon pe demande pour fer. Avek sa Mr Speaker, mon pou siport sa Mosyon ki mon frer lo kote distrik Baie St Anne in met devan sa Lasanble, e mon demann tou bann Manm osi pour siport sa Mosyon. Mersi Mr Speaker.

 

 

MR DEPUTY SPEAKER

Mersi Onorab Woodcock. Onorab Sophola.

 

 

HON NOLINE SOPHOLA

Mersi Mr Speaker. Bonzour tou Manm e tou dimoun a lekout. Mr Speaker sa Mosyon anmennen par Onorab Gill i annan son merit.

Mon senserman krwar ki tou aktivite ekonomik ki ganny fer dan en distrik i devret annan son retonbe direk, oubyen menm endirek pour sa distrik. Tou nou bann predeseser in toultan anvi e touzour swete ki nou bann zil i devret pli byen benefisye atraver bann aktivite ekonomik ki pran plas lo nou zil akoz nou’n remarke ki potansyel anmas reveni i la. Ler nou bann zil i anmas ase reveni, sa i ava fer ki mon’n sit 4 legzanp. Premyerman ; kominote dan sak nou bann zil prensipal atraver son bann reprezantan pa pour bezwen esper tro lontan pour antreprann bann pti proze neseser ouswa antreprann renovasyon lo serten lenfrastriktir de-baz ki egziste lo nou bann zil.

2enm, se ki kominote ava war benefis direk ki zot pe gannyen, e sa mon panse ava amelyor zot sans responsabilite vizavi Vallée de Mai. E 3enm zabitan ava pli pare pour pran swen avek sa sit ek zot proze. Akoz ler nou’n kontribye en nide pour konsevwar e realiz en proze i pa parey ki si nou’n zis war sa proze fer par en lot dimoun, ouswa par en lorganizasyon oubyen Gouvernman.

E 4enm sa nouvo leksperyans ava kapab ganny servi koman en model pour lezot distrik, spesyalman avek bokou koze ki nou konnen lo formasyon Konsey Distrik. Mr Speaker mon pour aport mon sipor pour sa Mosyon. An plis, mon ti a kontan partaz avek Lasanble, e Loter Mosyon leksperyans La Digue dan sa domenn, akoz nou annan en striktir en pe parey sa ki zot pe demande pour Vallée de Mai.

Nou annan La Digue Trust Fund. Sa Komite i administre par bann Digwa. I selman son Trezorye ki en reprezante Minister Finans e sa son prezans se pour asire ki i annan latransparans dan la fason ki larzan i ganny zere, e ki travay sa striktir i byen fonksyonnen. Sa Fon ti ganny etabli avek bi get en levantay proze ki nou kapab realize dan nou kominote, ed nou bann zabitan, osi byen ki donn sipor lezot lenstitisyon ki dan bezwen, dan kominote La Digue.

E kote nou ganny sa larzan, i senpleman atraver bann Donasyon, oubyen larzan sorti kot bann sponsor ki antre dan sa Fon. E L’Union Estate li i pran gran kontribiter  dan sa fon akoz tou le lafen di mwan Bord L’Union Estate i kontribye dan sa Fon e sa i depan lo profi ki zot in fer par bann aktivite. E i tre enportan note ki annan plizyer aktivite ki ganny deroule dan L’Union Estate. Alor i normal ki dan sa konteks son responsabilite sosyal i ede direkteman soutenir kominote La Digue.

Mr Speaker mon a donn enn de legzanp konkret pour montre finansman ki sa Fon in fer. E posibleman i ava ede dan legzanp bann proze pour fon Vallée de Mai. Par egzanp nou’n fer 8 konstriksyon pti kiosk pour bann dimoun pour lwe bisiklet. Nou’n ede amelyor Daycare Centre. Nou’n konstrir toilet e lezot travay kot simityer. Nou’n amelyor kot lekol. Nou’n ed bann zelev dan plizyer fason parey deplasman ler zot al aktivite skoler, lafet zanfan, e osi dan Prize Giving.  E Legliz osi nou ed zot dan serten amelyorasyon e kan le moman i arive i ganny ede par sa Fon.

E resaman nou’n ede dan konstriksyon sa zoli Mortuary, Mr Speaker mon krwar ki si Gouvernman i akord sa demann, zabitan Praslin pour benefisye bokou, tenan kont lakantite touris ki vizit Vallée de Mai par an. Sa dan li menm ava en gran kontribisyon ki ava donn tou Pralinwa ankor bokou plis rezon pour zot reste touzour fyer. San dout, zot ava annan ase resours neseser e posibilite reel dan zot lanmen pour realiz serten proze devlopman dan zot kominote. Sa i egalman en komansman.

Mon senserman krwar, ki amezir ki keksoz i bouze, Pralinwa ava eksplor lezot mwayen finansman ki ava ed zot plis ankor dan devlopman zot zil. Finalman, mon pour ankouraz Loter Mosyon pour pourswiv son lide odela nou bann deba.

E angaz tou son zabitan dan sa bonn koz pour zot prop benefis e progre zot zil e osi pour progre Sesel. Mersi Mr Speaker.

 

MR DEPUTY SPEAKER

Mersi Onorab Sophola. Onorab Ernesta.

 

HON PAUL ERNESTA

Mersi Mr Speaker. Koleg Onorab, tou dimoun a lekout, bonzour. Bonn apre midi plito akoz midi in sonnen. Mr Speaker mon lentervansyon lo sa Mosyon i pa pour enn ki long. So i pour ase kourt. Sa se senpleman pour anmenn sipor pour mon koleg Onorab Churchill Gill lo sa Mosyon.  E an menm tan mon enterese, mon kontan note ki lotorite dan L’Egzekitiv in osi montre lentere pour zot form en tel Fon pour ed kominote Praslin. Mon sipor pour sa Mosyon i al de pwen.

Premyerman Mr Speaker mwan krwar, Onorab Woodcock, dan son lentervansyon osi in fer le pwen kot in dir kot zabitan Praslin i bezwen ganny fer zistis.  Lo la mon pour dakor.  Onorab Gill in les nou konpran ki malgre i annan sa ta reveni ki pe ganny kolekte Praslin, so nou kapab dir bann reveni ase sibstansyel, lo zis lavant tiket ankor ki’n ganny mansyonnen pli boner, zabitan Praslin zot, zot pa pe benefisye en sou lo la.

Sel keksoz ki petet ki mwan mon krwar zot pe benefisye lo la sa ankor in ganny fer resorti, i senpleman lo zis sa bann pti aktivite parey pti cafeteria, souvenir shop, ensidswit. E osi bann portre ki ganny tire, tire lo sit. A mon avi reveni lo sa bann aktivite ekonomik ki mon’n mansyonnen pli boner, i pa osi sibstansyel konpare avek sa bann milyon roupi. Ouswa si nou get li lo term foreign exchange i plis ki milyon Euro ki CIF pe anmase lo lavant tiket par lannen lo zil.

Si nou pour al pli lwen Mr Speaker CIF in, pe manage Vallée de Mai depi an ‘89, SIF, sorry – depi an 1989, e sa i fer 28an, e 28an, tou sa letan zabitan Praslin ankor zot pa’n ganny nanryen lo la. E zot pa’n rekolte en sou. Zot in zis perdi, sa i les nou konpran ki kantite perdi, pert ki zabitan Praslin in fer pandan tou sa bann letan. E la mon pa konnen si i annan okenn aksyon konkret, swa bann keksoz konkret ki CIF in fer lo zil, petet ki nou pandan sa letan nou pa okouran. SIF ankor, petet ki nou, nou pa okouran ki pe ganny fer. E petet la SIF ti a bon les nou konpran kwa egzakteman bann keksoz ki zot in fer.  E ankor letan mon al pli lwen dan mon refleksyon. Petet pandan sa 28an, in annan en bon parti sa bann letan kot in ganny servi pour set up Vallée de Mai pour fer li vin sa ki i ete ozordi.

Me i malere pour dir dan okenn sa bann ilistrasyon ki mon’n mansyonnen napa okenn lenstan ou legzanp konkret ki’n annan okenn keksoz ki’n al ver Praslin. Sa sityasyon Mr Speaker i zistifye rezon akoz nou Prezidan ti dir nou yer dan son ladres kot nou krwasans ekonomik i bezwen vin pli enklisiv. Alors sa Mosyon pe anmenn en solisyon pour asire ki okenn Pralinwa pa ganny kit deryer dan devlopman ki pe arive lo zot zil. Me si zanmen in annan okenn moman ki Praslin in benefisye, ki petet nou pa okouran, la ankor mon demann CIF pour zot vini, SIF, eskize, mon pe, SIF, pour zot vin devan pour zot eklersi nou lo la. Keksoz ki pli enteresan ek sa Mr Speaker, lafors travayer parey in ganny fer resorti pli boner lo Vallée de Mai i ganny dominen par Pralinwa zot menm. Se zot ki bezwen asire ki Vallée de Mai, i reste ouver toulezour, depi 8er edmi bomaten, ziska 4er apre midi, 4er edmi apre midi, e osi fer sir ki ganny byen mentenir e proteze, sirtou sa 6mil pye coco-de-mer ki enn parmi sa 6 diferan pye plan andemik, trouve dan Vallée de Mai. Mr Speaker an parlan coco-de-mer, les mwan a fer remarke ki nou bann travayer pe ganny pa mal difikilte pour zot kapab protez sa bann plant kont bann voler. Sa i akoz landrwa i vas e sa fri li menm i annan en tre bon valer ekonomik.

La mon oule zwenn ansanm ek tou bann ki konsernen pour demann tou sa bann dimoun ki angaze dan sa aktivite ilegal, pour silvouple arete. Mazin ou zanfan, mazin Praslin, e mazin Sesel. Aret detri nou lavenir, e lavenir nou zanfan silvouple.

Dezyenmman mon pe siport sa Mosyon akoz mon konnen ki Praslin i annan ankor lezot sit lanvironnman ki kapab ganny devlope pour plis progranm lanvironnman. Konsekaman sa i kapab annan potansyel pour plis benefis atraver environmental tourism, ou ecotourism parey nou tou nou konnen. Par egzanp, annou get Fond Ferdinand, Glacis Nwar, Laplenn Olandez, Salazei, Curieuse, e plizyer lezot Sit ankor. E la letan mon pe koz lo sa bann sit Mr Speaker, i anmenn mwan lo mon distrik Takamaka ki mon osi santi i annan menm potansyel pour en tel aktivite e evantyelman benefisye atraver ecotourism. Par egzanp Ros Pizon, Basen Diri, Dan PenPen, Ros Zeglis, Grand Police, Pti Bwalo. Ki tousala i annan en valer istorik e kiltirel pour distrik. A sa pwen Mr Deputy permet mwan pour premyerman montre mon lapresyasyon par felisit e remersye Komite Leritaz Takamaka, e mouvman save Grand Police pour sa linisyativ e mobilizasyon ki ti ganny fer Sanmdi le 22 Zilyet bomaten, pour netway Grand Police e pti Bwalo.  Turnout ti vreman byen, kot nou ti ganny de group pour al sa 2 landrwa.

Salte ki nou ti ranmase sa zour i fer nou realize ki bokou lanfaz i bezwen ganny mete lo ledikasyon nou pep. Sa pour edik zot dan lenportans pour gard nou lanvironnman, ek nou bann lans prop. Mon demande ki Minister Lanvironnman i ganny pran en tre bon ka ek sa sityasyon. E osi pour met bann striktir neseser pour deal avek sa bann tel konportman dan nou pei.

Pour konklir, mon propoze ki sa Fon ki a ganny kree, i a osi al ver plis devlopman ek konservasyon lanvironnman lo Praslin. Sa i a ganny fer lo en baz en kour e long term. Atraver sa i a ede ki plis lanvironnman a ganny proteze e devlope. Konsekaman plis latraksyon touristik i a ganny ankouraz. An retour, atraver logmantasyon dan aktivite touristik sa i a permet ki ava annan plis reveni lo Praslin kot apartir de la i kapab annan bann benefis direk ki ava al ver bann Pralinwa direkteman. Mersi Mr Speaker.

 

MR DEPUTY SPEAKER

Bon mon ankor annan 5 Manm, i fer 6 Manm. Well i annan bokou plis. Ok ? Nou pour kontinyen deba apre midi 2er. Petet ler nou komanse 2er, mon annan bann Manm ki deza lo mon lalis. Lezot ki fek endike la, zot ava re montre zot lentansyon, mon ava note. Avan nou pran Break mon annan enn de pti lanons pour mwan fer.

Nou annan en konsern piblik vizavi Les, Sid Mahe, Was Mahe kot i annan kopi kouran ozordi i masiv. E menm mon lofis in ganny call anler pour dir zot pa pe tann deliberasyon Lasanble. Mon pe zis reasir Manm piblik ki Lofis Clerk pe negosye avek SBC pour regarde si nou kapab pran en bout tanto apre Nouvel 8er.

E petet larestan, petet rapor, mon krwar enn ki konsern bokou piblik, rapor ki chair FPAC in fer bomaten, i kapab pase tanto apre Nouvel 8er. E lezot deliberasyon nou ava regarde si SBC i a kapab pran kantmenm Vandredi swar.

Deswit apre nou adjourn la Komite HIV & AIDS pe rankontre dan Rm 2. E Assembly Business Committee pour rankontre dan Speaker’s Conference Room, 1 er.  So nou ava adjourn ziska 2er.

 

(BREAK)

 

MR DEPUTY SPEAKER

Bon, bonn apre midi, tou Manm Onorab e tou bann Manm piblik ki pe kontinyen swiv travay Lasanble Nasyonal.

Avan nou kontinyen, mon pran prosen entervenan. Mon ti a kontan demann bann lezot Manm ki ti oule eksprim zot lentansyon pour re endik mwan lekel ki oule entervenir lo sa Mosyon ? Ok. Mon vwar Onorab William. Onorab Ramkalawan, non? Onorab Gill. Ok. Hoareau. Onorab Simon Gill. Onorab Ferrari. Ok.

Nou pour, non ou pe dir Basil Hoareau pour koz en pe pour ou?  Ok. Bon. Ok. Nou pran Onorab Henrie.

 

HON GERVAIS HENRIE

Mersi Mr Speaker. Bonn pare midi tou koleg Onorab, e bann dimoun dan lakour. Mr Speaker sa Mosyon ki devan mon peg it li dan de lanpler.

Lo en kote i pe kestyonn rol ki bann lenstitisyon parey SIF ki sitye dan en kominote, nenport landrwa dan Sesel. Ki zot rol vizavi sa kominote kot zot baze. Apre dezyenmman i lev kestyon otour kreasyon en lorganizasyon en Bord, en Fon ki manage larzan ki zot gannyen. So i annan sa de largiman pour mwan. Be selman ave mon al lo la mon’n re lir sa Mosyon ankor en kou, mon’n regarde, mon premye difikilte avek li, kantmenm mon krwar i annan, i annan en merit ; i annan en largiman pour dir wi i ti neseser ki zot anmenn li. Parski en entervenan bomaten si mwan memwar i servi mon byen, in dir pour dir plizyer MNA Praslin avan in demande sa kestyon, konmsi in demande ki SIF i kontribye plis dan Praslin.

Selman apard zis demande kekfwa lo floor of the Assembly, kwa ki zot in fer ankor, konmsi bann reprezantasyon an term bann let ki ti kapab donn en ledikasyon pour dir dan prezantasyon Mosyon par egzanp mon ti ava swete tande pour dir la mon ti’n fer en let, la mon ti’n fer en let, la mon ti zwenn avek bann dimoun konsernen ki ti kapab konvenk mwan pour dir wi i annan plizyer demann, me SIF in reziste. Sa i enn.

Dezyenmman mon’n en pe dezapwente ki mon krwar i pa’n annan ase zefor pour nou non selman enform nou isi dan Lasanble, me piblik deor ki SIF deza pe fer pour Sesel, akoz SIF i fer en kantite keksoz. Mon pe dir sa mon pa, mon, akoz dan medya nou’n tande dan lepase ki SIF in enplike ki fer i donn mwan lenpresyon pour dir be zot bezwen pe fer plizyer keksoz.

Alor kestyon ki mon demann mon lekor – eski si mwan mon ti en MNA dan enn sa bann distrik lo Praslin, si mon ti pou’n anmenn sa Mosyon ozordi ? Petet non. Petet mon ti pou’n fer en pe travay ankor plis in the background e ler finalman mon ti an satisfer mon lekor pour dir sa zefor ki mon pe fer pa pe al ase lwen, then mon ti pour anmenn isi pour anmenn sa konsern o nivo nasyonal akoz i pe pas lo radyo, televizyon, dan Lasanble Nasyonal pour rod senpati. Non selman mon bann koleg MNA, me osi gran piblik pour vizavi sa demann.

Premyerman akoz nou’n demann Gouvernman pour donn sa larzan. SIF i ganny zere par en Board of Trustees ki wi i apwente par Prezidan, Prezidan i sorti dan zot parti, ankor bann konversasyon konmsi nou ti kapab fer dan koridor, ouswa en let ki pa bezwen vin la konmsi pour anbaras en lorganizasyon kip e fer bokou. Akoz la ozordi bann pwennvi ki pour pe sorti ki nou ganny lenpresyon SIF pa pe fer nanryen. So petet mon pa ti pour fer, anmenn sa Mosyon just yet.

Ou vwar ozordi SIF par egzanp, zot in donn apepre 30 mil liv, educational books bann library lo Praslin, e bann Library piblik, zot in donnen. Zot in fek repenn, Elderly Home Praslin. Zot sponsor tou le vakans bann progranm vakans, pour bann zanfan ant 5 a 11an. Zot in donn en bann lekipman odyo vizyel lekol Baie St Anne. Vallée de Mai in fek refer son Visitors Centre pa tro lontan, 2010, sa bann lenformasyon i piblik. Zot in depans apepre R5milyon-antyerman SIF ki’n sponsor.

Tou le z-an i annan en group zanfan atraver en progranm lanvironnman dan lekol ki enn bann ansyen Manm Lasanble Proporsyonnel Parti Lepep ti enplike ladan, Mrs Vicky.  Zot anmenn bann zanfan Aldabra. E tou le z-an zot asire pour dir i annan en sorti Praslin ki form parti sa group. Zis pour anmenn sa bann zanfan Aldabra, an term bato, avyon, avek manze i kout R700 a R800mil pour anmenn sa bann zanfan laba. SIF i osi sponsor bann aktivite kiltirel sirtou ki fer otour festival kreol, Christmas Carol, bann keksoz koumsa. Sa bann lenformasyon i piblik, e mon krwar i ti responsabilite sa Lasanble pour osi met latansyon lo sa bann bon keksoz ki zot pe fer.

Me pli enportan, zot manage Aldabra, e larzan ki Vallée de Mai i generate, se sa ki al an grann parti pour manage Aldabra.  I annan bann lenfrastriktir laba ki bezwen ganny antretenir.  Staff pour peye-bann keksoz koumsa.  Me pli enportan, nou’n antann pour dir e mazorite Seselwa dan nou lavi pa pour zanmen met lipye Aldabra. Sa i enkli mon tou probableman.  E zot pe esey anmenn Aldabra, Mahe, pli pre avek kot pli gran poursantaz popilasyon Seselwa i reste.

Sa proze Aldabra House pour kou SIF, lenformasyon piblik, nou’n tann koz lo la akoz, Minis Tourizm konmela li ki Chair, i ti Chairman letan i ti Chairman Bord.  Mon pa konnen si in sorti avek sa bann nouvo striktir gouvernans.  Me in dir pour dir, sa proze pour kout apepre 15milyon. Pa Roupi en Dolar. $15milyon. Kote SIF pour ganny larzan.  So tou sa bann larzan ki pe generate dan sa bann sif ki nou’n antann poudir 87mil viziter par an, R350 en tiket, i pe fer apepre, zot in fer kalkilasyon 30 milyon.  Be kote i sorti sa larzan ?   I sorti laba. Be selman, letan nou’n tir tousala, parey mon’n dir lo komansman i annan de keksoz ki nou war la.  Sa lenstitisyon ki sitye dan en kominote, ki mannyer li i reprezant li vizavi piblik ? Mon krwar i responsabilite SIF, pour li fer en pti pe plis tapaz.  Les dimoun konnen ki zot pe fer. Zot Board of Trustees i konpri 14 dimoun. Ler mon’n regarde mon vwar i annan zis 5 Seselwa lo la.   Laplipar i etranze, e i annan en Praslinwa atraver Mr Laboudallon. Kekfwa i mank ankor Praslinwa parmi sa bann Manm.  E petet Mr Laboudallon i annan en konsern lanvironnman. Be what about en dimoun ki zis reprezant kominote Praslin, swa enn sorti Baie St Anne, ouswa Grand Anse ki a lavenir, letan Prezidan i mansyonn son Board of Trustees i konsider met lo la.  Ki anfen i ava annan en pe plis lopinyon kominote Praslin direkteman dan management sa SIF.

Me pli enportan pour lobby, pour ki SIF i met plis dan Praslin akoz, i normal selman pour Manm elekte Baie St Anne anmenn sa Mosyon akoz SIF i sitye, Vallée de Mai i sitye Baie St Anne.

E alor i enportan, i normal ki i krwar pou dir be kekfwa vre fodre  zot merit donn en pti pe plis.  Be mon pe mazin osi bann lezot distrik dan Sesel, Botanik, par egzanp–kote i ete? Mont Fleuri. Onorab Manm elekte Mont Fleuri en zour pour anmenn en Mosyon pour demande ki Botanical Foundation, i donn en pti pe. L’Unon Estate La Digue.  In fact mon’n en pe sirprann bomaten letan mon antann pour dir l’Union Estate li i pli gran kontribiter dan sa La Digue Trust Fund.

Sa lorganizasyon, mon’n fek regarde enn dan bann zot Annual Rapor la, i run lo en loss.  Be alor kot i ganny sa larzan pour kapab kontribye sa kantite.  Sa i en lot deba.  Mwan mazin par egzanp CCCl ki trouve lo balizaz Cascade Les Mamelles, UCPS ki Pointe Larue, Airport la kantite larzan ki pe fer pour bann dimoun Pointe Larue Cascade. Nouvo Sant Biodiversite ki Grand Anse, bann lezot pli pti, pti latraksyon parey Waterfall, Port Glaud, Grand Anse i kapab generate, Cascade osi i annan en Waterfall.

Ki mannyer tou sa bann keksoz ki presye, ki trouve dan bann kominote, a lavenir i kapab kontribye plis dan kominote ki zot ete.  Sanmenm mon war pour dir sa Mosyon i annan en konponan ki met lanfaz lo la. Me aprezan lot largiman Mr Speaker, i kestyon sa Bord ki nou pe demande ki ava ganny sa larzan e re envestir dan kominote. Ozordi dan Sesel nou pe koz bokou, yer nou fek antann lo bann prensip, gran prensip ki Gouvernman i annan lentansyon met an plas, bon gouvernans, latransparans.

Leksperyans PDF avan in kit en gou anmer dan nou labous. Dezormen si sa i ariv ankor, nou bezwen aboveboard, nou pa kapab ankor kontinyen avek bann lorganizasyon ki mal zer bann larzan, non selman larzan piblik, me ki ava sorti dan bann lorganizasyon parey SIF i ganny mismanage. Nou pa anvi vin, i annan en joke ki zot fer lo en dirizan Afriken ki ti dir pour dir, bann Afriken i bezwen manage zot own affair, even mismanage. Pa akseptab sa. Nou bezwen manage li byen.

Nou bezwen annan bon Gouvernans, nou bezwen annan latransparans dan fason ki nou fer keksoz e alor, mon krwar sa ki mon ti anvi dir se ki mon konpran, an rezime mon konpran akoz sa Mosyon in vini, akoz par fwa nou napa  tro gran konesans dan kwa ki en lorganizasyon pe fer. I enportan zot sa bann lorganizasyon zot fer en pti pe plis tapaz lo sa ki zot pe kontribye dan kominote. Akoz tan ki dimoun pa konnen, dimoun pour demann plis. Akoz larzan sa. Dimoun pour demann plis, dimoun pour le ki zot fer plis. E alor mon swete ki nou trouv, nou trouv en fason ki sa bann lorganizasyon parey SIF e bann lezot ki mon’n mansyonnen ki sitye dan en kominote, i fer plis pour zot kominote. Me plis enportan ki si nou tonm dakor ki wi zot donnen, i annan en Bord ki manage, sa Bord i bezwen manage li byen, e i pa kit okenn gou anmer dan nou labous parey lo Praslin in deza annan sa leksperyans. Mersi bokou Mr Speaker.

 

MR SPEAKER

Mersi Onorab Henrie.  Onorab Valmont.

 

HON JUDE VALMONT

Mersi e bonn apre midi Mr Speaker. Bonn apre midi tou koleg Onorab e tou dimoun ki pe swiv nou.  Mr Speaker mon’n swiv, mon’n swiv bann MNA presedan ki’n fer lentervansyon ziska prezan, e sirtou dernyen lentervansyon.

Mwan mon pe koz an faver sa Mosyon. Akoz mon santi i annan son merit. E zisteman set akoz sa larzan i ganny zere lo sa zil. Alor petet MNA ki’n anmenn sa Mosyon, Onorab Gill, i santi li i enportan ki petet son bann zabitan, bann rezidan Praslin, mon krwar Onorab Woodcock a agree ek mwan ki zot vwar sa benefis direk.

E zisteman dan detrwa, yer Prezidan in fer sorti ki nou bezwen annan en lekonomi enklisiv, e alor merit sa Mosyon i vin ladan. Se ki sa larzan ki ganny zere lo sa zil, zabitan Praslin i war son benefis direk. Mon pour zis, mon pour bref lo sa, lo mwan lentervansyon Mr Speaker. Mon pour zis anmenn serten proposal lo en kreasyon en tel fon ki sa larzan, ki zere ki met dan sa Fon i kapab ganny fer avek.

Mon krwar zis avan mon fer sa i enportan konpran mwan mon pa, mon pa tro krwar ki okenn MNA sirtou sa 2 ki sorti Praslin, i zot lentansyon pour atak okenn lorganizasyon, e la zot in dir SIF, e petet zot zis anvi war en rannman avek sa larzan alor, mon pour fer serten pti proposal ki loter Mosyon i a konsidere si i war li akseptab. Mon vwar sa larzan premyerman, en tel larzan ki al dan sa Fon, i kapab al ver tourism, pour devlop tourism lo sa zil.

E ler ou devlop tourizm, ou kapab menm ankouraz bann pti biznes, bann Pralinwa ki le al vann souvenir, fer, fer juice e tousala. Sa larzan i kapab ganny servi pour sa. E osi, e menm i kapab ganny servi pour prezervasyon lanvironnman, nou konnen Praslin i annan sa problenm coastal erosion. Alor petet en porsyon sa larzan i kapab al ver sa osi. E osi nou konnen resaman ti annan problenm delo monte. Lapli i tonbe, delo i monte.

Alor petet osi fer bann proze irigasyon, ki a ed bann zabitan Praslin zisteman pour tir delo ki antre se zot. Osi Mr Speaker sa larzan i kapab ganny servi. I annan, mon’n tann en koze deor se ki teachers avek etidyan sorti Praslin, sirtou Praslin, ler pour zot sirtou letan vakans, i annan sa issue ki zot bezwen war zot pe pey, peye zot, zot trip lo avyon, bato e lakantite larzan ki zot gannyen osi pour reste, i pa sifizan lo Mahe. Alor petet sa larzan i kapab al zisteman ed bann teachers ek bann etidyan. I kapab ed zot osi.

Mr Speaker, mon annan, i annan ankor proposal ki sa larzan li menm. Nou’n tande lo zil i annan sa issue kou materyo konstriksyon ki ase eleve. Petet en porsyon sa larzan, mon pe dir sa akoz mon pe fer sa bann propozisyon zisteman pour Loter li menm, e lotorite konsernen zisteman diskite, e si sa i proceed, i al devan, zot a diskite kwa ki pli bon. Mon pe fer sa bann propozisyon zisteman pour ed dimoun Praslin e ed bann lotorite deside ki zot pour fer. E zisteman Onorab Henrie in fer sorti ki sa larzan i pa bokou me selman at least, dir zabitan Praslin petet zot a ganny en say pour konnen pour dir kote zisteman zot anvi sa larzan ale. Alor en lot propozisyon se ki i al dan, zisteman transportasyon, kou materyo, sa bann materyo konstriksyon, nou’n ganny dir materyo konstriksyon i ser. Alors si sa larzan petet i al ver sa, i a ed zabitan Praslin vwar sa rannman. Petet a war zot nobou deal en pti pe plis avek sa issue pri lavi as well.

E Mr Speaker mon ti a kontan propoze, en dernyen propozisyon se ki i al sa larzan i kapab al osi pour detox. Nou konnen Praslin osi, nou’n tann sa de MNA ki sorti Praslin pe lager pour en sant pour detox, pour zot bann dimoun nobou al detox. Petet sa larzan i kapab kontribye pour al ver swa en Sant Detox ; swa formasyon bann dimoun Praslin ki kapab a en nivo, lo en nivo distrik, pour ede zisteman avek detox.

Mr Speaker mon krwar i enportan pour mwan terminen ki note, ki sa larzan ki SIF i zenere la, i enportan ki nou pa fer sa ilizyon pour krwar ki napa larzan ki al Aldabra. E nou pa kapab pran Aldabra met an otaz as well.  Mon krwar nou bezwen konn byen konbyen ki ganny servi pour prezerv Aldabra. Akoz mon osi mon’n enn sa bann etidyan ki’n dan bann Wildlife Clubs, e mon konnen SIF i servi sa pour maintain Aldabra. Alor mon koman enn bann environmentalist mon dir, i enportan nou pa met Aldabra an otaz avek sa Mosyon.

Se zisteman dan lespri ki mon dir, mon demande  ki sa de MNA sorti Praslin, SIF, e zot asize, zot diskite, zot konnen vreman konbyen ki pe al ver prezervasyon Aldabra, e konbyen ki zot, zot kapab zere petet pour met dan sa Fon. E zisteman pour ede avek bann tel propoze ek bann propozisyon ki mon’n met devan. Alor mon demann tou koleg Onorab pour donn en sipor sa Mosyon, akoz i annan son merit. Mersi bokou.

 

MR SPEAKER

Mersi Onorab Valmont. Onorab Sebastien Pillay.

 

HON SEBASTIEN PILLAY

Mersi Mr Speaker, bonn apre midi, bonn apre midi tou dimoun.

Mr Speaker devan nou, nou annan en Mosyon ki dan li menm i tre enteresan, e i en Mosyon kot nou pe regard en kestyon, oubyen en size ki petet plizyer nou in pans lo la, plizyer dimoun par egzanp sirtou bann zabitan ki reste lo Praslin in pans lo la, in mazin lo la se egzakteman kwa ki ganny zenere atraver, atraver Vallée de Mai, e eski si, eski sa ki ganny zenere atraver Vallée de Mai, i devret kontribye dan devlopman Praslin direkteman, oubyen sa i devret al dan en, ganny vwar dan en konteks pli larz, e rol ki sa lorganizasyon ki’n ganny, ki’n ganny manda pour administre Vallée de Mai i zwe.

Premyerman Mr Speaker, fodre nou osi konpran pran ki ozordi konservasyon pe deplizanpli kout nou deplizanpli ser. Rezon pour sa se akoz avek bann sanzman lanvironnmantal. I annan osi bann lenpak imen ki pe fer ki malgre ki nou koman en pei nou’n fer bokou, nou’n fer bokou avanse dan domenn konservasyon. Lefe i reste ki se nou Seselwa ki pe peye pour ki nou gard nou bann Patrimwann dan en fason sen, e dan en fason dan son leta natirel parey i devret ete, e sa i fer ki i vin en, i en kou finansyel. Nou bezwen dir i en kou finansyel ki vin lo nou.

Me lo lot kote osi nou annan devlopman i men ki bezwen arive sirtou dan bann landrwa kot i annan sa bann sit kot sa bann landrwa in ganny deklare koman, koman bann patrimwann. Dan en lot fason vwar sa, annou pran en sipozisyon par egzanp ki Aladabra, I mean, Vallée de Mai pa ti en Patrimwann. I ti pour en later ki ti pour available la pour devlopman. Annou pran li dan sa konteks, mon pa pe dir ti devret koumsa, me selman, annou zis think outside the box pour en moman, e annou get li koumsa.

E i posib ki i annan bokou zabitan Praslin ki pe vwar koumsa, i ti pour en landrwa, en Sit kot ti pour annan devlopman. Akoz i en landrwa ki aksesib, e ki belong to Gouvernman. E sa i partou, i annan lezot landrwa, dan lezot distrik, menm lo Mahe osi kot nou annan bann menm, menm sityasyon. Me prezan si ti pour devlopman, i ti pour annan lezot aktivite ki ti pour pe pase dan sa landrwa. Si nou pa ti’n pran sa mezir pour nou protez li koman en Patrimwann. E se sa mon krwar ki pe fer nou demann sa bann kestyon ozordi. pa ki okenn dimoun pe koz lo Vallée de Mai sorti koman en Patrimwann. Non.

Annefe nou tou nou tre fyer ki nou annan en Vallée de Mai ki nou koman en pti pei nou’n fer sa zefor pour nou gard Vallée de Mai parey i ete malgre ki otour nou dan larezyon, bokou lezot pei in perdi en kantite bann, bann Sit ki ti kapab vin bann patrimwann nasyonal pour zot. Me ler nou pe demann sa kestyon nou bezwen osi regard lo son konteks finansyel prezan kot ki Vallée de Mai i fer ki i anmennen pour Praslin.

Lo en kote par le fe ki zis en touris i oule al Praslin pour al Vallée de Mai, mon prezimen si i pe reste dan en lotel lo Mahe i bezwen swa pran en tax pour li ariv lo Airport, swa i al pran, i al dan en bis ki’n ganny charter par son lotel. Deza la i pe peye pour sa transportasyon sorti kot son lotel pour ariv lo Airport pour li pran en avyon. Annou dizon i pe al par avyon. La i pour pey en tiket abor avyon Air Seychelles. Deza i annan en lot larzan ki al, ki i kontribye pour li ariv lo, lo Airport Praslin.

Ler in ariv Praslin, la i pour pran en lot taxi, swa en lot transpor, en lot larzan ki i bezwen peye, pour li ariv kot, kot Vallée de Mai. E i kapab ler i ariv dan Vallee de Mai, i fini vizit Vallée de Mai, in pey son kotizasyon pour li antre, i al dan en restoran lo Praslin.

So i annan en retonbe endirek, ki vin pli direk apre kot sa touris ki’n vin lo Praslin, pa zis atraver son kontribisyon ki i fer atraver Vallée de Mai, me atraver le fe ki in al dan Vallée de Mai, ki in fer tout a long sa value si ou kapab apel li kot i annan bann lezot aktivite ki’n pase. Lo en lot kote si en touris i pran bato i menm parey, i pour pey en tiket ki al Baie St Anne, ankor enn fwa i pour pran en transpor pour li ariv kot Vallée. So i deza annan bann valer azoute. Zis par le fe ki sa endividi pe mont dan Vallée de Mai pour li ariv kot sa sit pour li al vizite, e la kot i pour peye pour li antre.

Me Mosyon li prezan, i pe regard sa lenpak finansyel prezan ki ganny kree ler sa touris in ariv dan Vallée de Mai prezan in pey sa larzan.

E mosyon li pe dir ki serten sa bann retonbe i devret al pour Praslin. Mon krwar dan son lozik sa Mosyon i pe demann en keksoz ki fer sans. Me selman nou prezan bezwen regarde osi prezan dan ki konteks nou pour al aplik sa, si meton nou deside pour al aplike. Dan ki fason ki nou aplik li ?

Eski sa larzan ki nou pe koz lo la i pour al dan bann proze sosyal. Oubyen eski sa larzan pour al dan bann proze ki pour annan lenpak lanvironnman ? Oubyen sa larzan pour al dan lezot, lezot aktivite ki pour kapab montre ki sa larzan pe retourn dan lekonomi Praslin. E Mr Speaker sa ki nou pe vwar Sesel. E mon’n fer en pti resers lo la Mr Speaker. I en fenomenn ki pe arive dan bann bokou landrwa kot i annan bann diferan zil ki form en Leta.

E ki pe arive se i annan en serten mon pa konnen ki mon pour servi dekrir li, me selman sa bann zil par egzanp dan Karaib i annan menn sityasyon kot ou pe vwar sa bann pti satelit sa bann zil pe koman reklanm serten dwa lo bann aktivite ki pe pase lo sa bann zil. Akoz zot santi pour dir koman en kolektiv zot kontribye towards en central economy.  Me at the same time zot osi zot annan en lekonomi kot zot, kot zot annan dimoun ki viv lo sa zil ki enterakte, ki depan lo lavi, lo sa zil ki mannyer i ete. E mon krwar ozordi nou pe demann sa kestyon set akoz nou osi nou pe ariv ver sa step kot sa bann zil pe regard zot bann aktivite, e zot pe regard lenpak ki zot, zot annan towards devlopman nou lekonomi, e se dan sa laliny ki Mosyon pe ale.

Sa Mosyon pe anmenn nou pour mazin lo sa bann size, e pour vwar ki mannyer, nou pe regard kot nou été a sa moman kot ou sitye e ki lenpak ou annan avek sa ki pe arive. Pour mwan fer en parallel avek sa Mr Speaker, annou regard par egzanp si ou annan ou en gran lotel ki ganny trouve dan en distrik, annou pran en konparezon Glacis. Si ou annan en gran lotel dan Glacis.

I fer sans pour ou vwar ki sa lotel i fer kontribisyon direk dan devlopman sa kominote. Se sa bann kestyon ki nou pe demande ki pe ganny demande atraver sa Mosyon  endirekteman kot i pe anmenn nou ver en diskisyon pour vwar ler en aktivite ekonomik pe pase dan en landrwa, ki retonbe sa aktivite ekonomik i annan pour bann dimoun ki reste otour sa landrwa. Si nou pran par egzanp Baie Lazare kot i annan bokou bann lotel ankor, ki retonbe direk bann dimoun, bann zabitan dan sa landrwa, ki gard sa landrwa vivan. Akoz sa bann dimoun ti byen kapab toulezour al kot sa lotel fer tapaz, disturb, vin bann dimoun totalman ki iresponsab.

Me tou dimoun i sey viv en lavi responsab dan en fason ki zot mentenir landrwa kot sa bann aktivite pe pase, e sa gras sa, sa lanvironnman ki ganny mentenir atraver sa bann aktivite, se ki, se la kot sa bann aktivite i ganny sans epanouir, kot sa touris ki pe marse lo semen, i santi poudir i annan lalimyer lo semen pour li marse, i santi kot i ariv en laboutik. I zisteman i fer sans alors, pour ki i annan en serten, en reklanm lapar bann zabitan dan sa landrwa, pour ki sa bann aktivite i kontribye direkteman a la vi ki pe permet sa bann aktivite arive. E se sa laliny ki sa Mosyon pe pran. mon krwar le de entervenan ki sorti dan, lo Praslin, in met an konteks bann diferan eleman ki esansyel ki nou bezwen konpran. E i enportan, i tre enportan ki alors bann Lazans ki pe fer sa bann aktivite, i bezwen vin bokou pli pre avek sa bann kominote kot zot trouv zot, swa atraver bann lotorite, swa atraver bann lezot mechanism ki zot kapab met an plas.  Me lefe i reste ki atraver sa Mosyon nou ava kapab komans pe annan en diskisyon lo ki laliny nou pour pran an relasyon ek bann size koumsa.

E la mon oule al koz dan en fason pli direk. Si nou konsider par egzanp bann dimoun ki travay dan Vallée de Mai. Eski ozordi si nou pe demann en kestyon – eski nou santi pour dir sa bann dimoun in ganny en retonbe direk aktivite ki zot ede pour zenere ? Eski ozordi nou santi, nou bezwen demann nou lekor sa bann kestyon – eski nou santi pour dir ozordi par egzanp lavi sa bann dimoun atraver travay ki zot in fer, zot lavi personnel, in improve atraver bann aktivite ki zot pe fer. Oubyen eski nou kapab fer davantaz plis pour improve zot lavi ? Eski sa aktivite ki nou pe fer i kapab kontribye direkteman pour bann dimoun ki trouv zot angaze dan sa aktivite pour zot kapab ganny en retonbe direk avek sa bann aktivite ?

Se mon krwar lideal deryer sa Mosyon, se pour, se pour nou en pti pe pran konsyans bann size ozordi ki pa neseserman fasil pour nou koz lo la. I pa neseserman pour satisfer tou dimoun. Akoz mon konnen pour dir ozordi i annan bokou dimoun ki feel very strongly, about proteksyon lanvironnman e zot santi pour dir petet nou pe adres sa size dan en serten fason. So me non. O kontrer par lefe ki nou anmenn tou dimoun ansanm pour nou kapab donn diferan lopinyon, i ava pli fasil pour kapab konpran kote tou le de pe sorti.

Olye ki enn i reste lo en kote, nou pibliy bann magazin lo proteksyon, e lot pe sey travay pour kontinyen fer lavi kominoter avanse, i pe fer sir pour dir i annan bann, bann fasilite adekwat pour ki kominote i kontinyen avanse. So ler nou sey zwenn ansanm i ava pli fasil pour nou kapab konpran ki pe pase. Mon konnen Mr Speaker personnelman, mon konnen ki personnelman ki SIF, la mon pour nonm SIF ki zot servi serten, ki zot resours ki zot gannyen atraver zot bann lezot aktivite pour subsidize lezot aktivite ki zot annan. Lezot, lezot progranm ki zot annan pour lezot proteksyon.

Par egzanp nou’n koz lo Aldabra ki en masive undertaking, ki i enportan ki nou kontinyen protez li, me osi ganny en retonbe direk lo sa ki pase dan bann lezot sit lo sa ki arive avek Aldabra. Se pour sa rezon ki nou bezwen komans revwar ki mannyer nou set up bann Fon. Petet  ki ede pour protez sa bann sit sa bann patrimwann, akoz a longer di tan i pour vini deplizanpli, pli ser pour nou kapab asire ki par egzanp napa lerozyon kotyer napa bann lezot lenpak. Bann, bann lespes anvaisan ki nou bezwen al serten travay pour remedi. So, tousala i form parti bann diskisyon ki nou bezwen pour vwar a lafen dizour, si eski sa ganny zenere avek Vallée de Mai i devret al dan tel, tel, tel, oubyen tel direksyon.

Me lefe i reste Mr Speaker ki enn bann kestyon ki Onorab Churchill Gill in poze dan son lentrodiksyon pour son Mosyon se. Eski nou vreman konnen ozordi ki lenpak kontribisyon ekonomik ki Praslin pe fer dan devlopman nou pei?  E i en bon kestyon pour demande, i en bon kestyon pour demande set akoz sa i a permet nou osi pour realign la fason ki nou aporsyonn resours ki bezwen al ver nou bann zil.

E mon krwar in annan en entervenan ki’n dir par egzanp bann, bann machinery bann lekipman ki ganny anvoye lo zil sertenn fwa pa alaoter. So, sa osi i ava, i ava anmenn nou pour annan en lot fason panse otour bann polisi lo la fason ki nou aprovizyonn e ki nou resours bann diferan brans administrasyon bann Minister, bann Lazans kot ler nou anvoy, nou anvoy bann lekipman par egzanp lo Praslin ouswa lo La Digue. Nou anvoy bann lekipman ki lo la oter ki kapab fer sa louvraz. Akoz mon konpran sityasyon konmsi nou, nou parfwa mazin Sesel wi nou en group zil.  Be parfwa kantite lavi sirtou toultour Mahe e vi ki sant lekonomi i lo Mahe nou tant pour nou focus en kantite lo sa ki pe pase isi lo semen lo landfill lo bann size lo konblaz eksetera.

Me, me i enportan akoz atraver sa Mosyon nou pe osi mazinen sa bann keksoz osi ki pe arrive lo Praslin ki lenpak pe annan lo Pralinwa. Mon konnen mon pa en Pralinwa me mon’n sanse dan mon lavi ki mon’n ganny sans pas en morso mon karyer travay lo Praslin. E dernyen fwa mon’n al Praslin mon’n, mon’n etonnen pour vwar lakantite devlopman ki’n arive lo Praslin. E sa bann devlopman i pa’n ariv zis par lefe ki dimoun lo Mahe ki’n al envestir lo Praslin, me lefe ki Pralinwa zot menm zot pe fer zot mye pour zot envestir dan kontinyen devlop zot zil e servi maximum resours ki zot zil i kapab provide pour zot.

So, i enportan ki nou kapab les zot donn zot sa lespas pour demann sa bann kestyon e apre provide bann larepons. E mon konnen pour dir bann Pralinwa pour konpran si nou kapab donn zot lesplikasyon kler lo bann size ki zot pe demann nou. I tre relevan Mr Speaker akoz ozordi dezormen nou bezwen komans regard keksoz pour lefitir. E pour demen pour vwar ki mannyer i annan sa laspe sosyal e lanvironnman i ganny marye ansanm pour ki tou le de i kapab move dan en direksyon kot, nou kapab asire ki nou annan nou kapab soutenir nou travay proteksyon ki nou le fer me at the same time nou kapab kontinyen devlope konman, konman en pei. E sa pour mwan i enportan, alors Mr Speaker mon pour siport sa Mosyon lo sa baz, e mon konnen sa Mosyon enn son bann rekomandasyon petet ki, ki mover Mosyon i kapab konsidere, se ki nou annan plis dyalog. Se ki nou annan, annan plis travay pour vwar ki mannyer nou kre bann lenstans ki kapab provide plis dyalog ki nou kapab koz lo sa bann size.

Me en word of caution ki mon pour annan Mr Speaker se ki a okenn moman ki nou koz lo okenn fason pour finans okenn aktivite nou bezwen fer sir nou met li dan en kad framework transparan e dan en framework ki accountable.

Pour asire ki nou annan tou kontrol posib pour fer ki a la dizour nou konnen pou dir si nou pe met resours oubyen nou pe pran resours dan en kote, pour met dan en lot kote. Pour dir sa pe arive dan en fason ki net dan en fason ki kler e ki tou dimoun i satisfe avek la fason ki i pe ganny enplimante. Se sa lenportans mon krwar sa Mosyon pe koz lo la e sa, dan sa laliny rezon akoz mon siport sa Mosyon ozordi apre midi. E ki mon a envit lezot koleg Onorab zis pour, pour permet sa dyalog arive siport sa Mosyon. E allow bann dimoun Praslin pour koz lo bann size ki petet mon konnen dan le pase nou pa’n koz lo la, me ki ozordi nou bezwen konsidere akoz anfen kont Vallée de Mai i kot zot.

E se zot ki form parti sa aktivite se zot mon bezwen dir en sense of belonging i belongs pour zot e se zot ki pour kontribye pour kapab kontinyen protez li. Pour kapab fer sir ki i reste sa bizou ki nou tou nou kontan koz lo la e ki trouve lo menm nou Coat of arms ozordi. Mersi Mr Speaker.

 

        (APPLAUSE)

 

 

MR DEPUTY SPEAKER

Mersi, mersi Onorab Pillay ou’n ganny en laplodisman that’s good. Bon Onorab Aglae.

 

HON EGBERT AGLAE

Mersi Mr Speaker, bonn apre midi tou Manm e tou dimoun a lekout Mr Speaker Mosyon ki la devan nou ozordi i annan son merit. E ki ler nou pe koz lo en sit patrimwann mondyal ki ganny zere par UNESCO depi an ’83, i fer ki sa Patrimwann Mondyal i enn ki pli ptipti li menm li ki ganny zere par UNESCO. Mr Speaker i normal alor ki ler, dapre listwar dan listwar kot i annan en devlopman ki pe ganny anmennen ki kapab dan nenport ki pei.  Bokou nou petet politisyen ki kontan fer sa souvan, nou monte nou koz lo bann benefis ki sa devlopman pour anmennen dan sa lendistri. I kapab en faktori ki pe vin ganny built dan en landrwa kot nou koz bann benefis, benefis travay, benefis bann servis, lenfrastriktir, bann lezot keksoz pou upgrade pour fer pou anmenn pour son sitwayen ki dan sa landrwa.

Alors Mr Speaker mon’n konmans mon Mosyon koumsa se ki Vallée de Mai i en patrimwann pour Praslin. E si nou tir Vallée de Mai dan Praslin byensir lekonomi Praslin i riske vwar li tonbe an term touristik.  Sa ki Mosyon la pe demande la an se moman, se ki en porsyon sa larzan ki sa Sit Patrimwann i kree ki anmenn dan lekonomi pei an zeneral i ganny servi pour serten devlopman dan Praslin.

E pour mwan ler nou pe koz lo devlopman bokou Onorab i koze i annan Onorab Woodcock, fodre selman nou fer en distenksyon kler. Lo ki kalite devlopman ki sa larzan i bezwen anmennen. Akoz nou annan bann Lazans Mr Speaker ki bezwen kontinyen fer son travay lo en baz baze lo Bidze Nasyonal ki zot in ganny donnen. Ki par egzanp SLTA i bezwen kontinyen fer semen, MLUH i bezwen kontinyen fer lakaz kre bann lenfrastriktir ki, ki kapab devlop bann Housing Estate.

Local Gouvernment i bezwen asire ki bann pti proze i kontinyen bouze, SAA ek bann lezot Lazans ki annan keksoz pou fer avek devlopman sa landrwa Praslin li menm. Sa ki mwan mon anvi konnen petet loter Mosyon se ki nou tonm dakor ki i annan sa dyalog kot ki kalite proze ki sa larzan pour ganny servi ? E nou bezwen konstate ki SIF malgre i pe zer sa bann larzan i osi annan en fonksyon konservativ pa zis lo Praslin me bann lezot zil an aryer parey in nonmen Aldabra ki annan.

SIF osi i konstate wi Onorab Henrie nou osi nou fer en serten resers i vre ki SIF i fer bann Donasyon lekol i annan bann progranm edikasyonnel ki ganny fer, Quiz, bann Talk, bann Workshop, bann Training Programs ki ganny donnen, bann Outreach Programme e tousala i kout SIF larzan pour kapab fer sa.

Me selman ler nou koz larzan parfwa nou get sa gro sif, sa gro sif nou dir en ta larzan me ler ou’n kas, kas li dan son bann fonksyon ou vwar pou dir zanmen i ase tou kou i annan demann. Alors Mr Speaker sa Fon Spesyal li menm nou bezwen antreprann li dan en fason ki nou konnen ki i bezwen Praslin. Ki bezwen zabitan Praslin e alors en dyalog i bezwen ganny met an pratik de si to, pour vwar bann bezwen ki sa larzan i kapab ganny servi dan bann proze soutenab ki pour ede gard legzistans sa zil parey i sipoze ete.

Nou osi bezwen konstate menm si i annan Onorab ki’n koze pou dir napa benefis direk me si nou regarde i annan benefis direk. Toulezour i annan zabitan Praslin Mr Speaker ki pe ganny en living avek Vallée de Mai. Ki swa son operater taxi ki sa son boat charter, ki sa son guesthouse, ki sa son restoran li menm son Car hire. Akoz kliyan i bezwen deplase pour kapab ariv dan sa bann landrwa pour kliyan vin kapab vin vizit Vallée de Mai si i pa pe reste Mahe parey Onorab Pillay in fer sorti boner i annan ki petet i charter en, en bato, i pran tiket avyon e tousala i pe anmenn en lekonomi en larzan direk dan lekonomi pei.

E si en kliyan i anvi reste lo Praslin li menm pour kapab vizit sa site li menm, so i pe kontribye i bezwen reste 4, 5, 6 zour.  E sa bann zour ladan i pe ede dan lekonomi Praslin.  So i annan en benefis endirek ki zabitan Praslin pe benefisye e ki i annan bokou ki’n kree larises. Nou bezwen konstate, in kree larises avek sa Sit Patrimwann Mondyal.  Alor Mr Speaker merit Mosyon i annan. E nou koman bann Manm Lasanble ki Mr Onorab Henrie in koz lo la taler.  I annan bann lezot Sit osi, dan bann lezot distrik, ki annan valer enportan, menm si pa bann sit patrimwann mondyal, why not, nou osi nou pa vin ek en pe linovasyon dan sa bann, lo sa bann Sit.

Petet osi i kapab anmennen atraver Gouvernman, atraver Lazans ki zer leritaz dan distrik kot nou kapab servi sa bann Sit osi pour kree serten larzan ki kapab ed lakominote dan sa bann landrwa kot i ganny trouve.  Alor Mr Speaker mon demande ki annan plis konsiltasyon atraver sa Mosyon ki ganny fer avek bann zabitan Praslin ki zot osi zot ava annan en say lo sa ki pe pase lo zot zil.  Sa resours i pour zot, zot osi zot bezwen annan say poudir nou ti a kontan kit el keksoz i ganny fer atraver sa reveni ki nou pe gannyen, atraver sa Sit Patrimwann Mondyal.  Alor Mr Speaker, en lot keksoz ki mon ti a demann loter Mosyon i ti ava eksplike dan son Right of Reply se ki i pe mazinen, lekel ki pour, ki petet ki pour zer sa Fon. Lekel bann dimoun ki petet zot pour met lo sa.  Mon pa konnen si i pour vin en Bord, bann dimoun ki pour lo la, ki kapab petet donn gidans, annan en vizyon en pe pli long lo sa sit patrimwann pour fer sir ki nanryen pa ganny detri, ouswa ganny gate par move zer, move zesyon sa bann resours ki la. E pour terminen Mr Speaker mon konstate osi ki, menm si i annan Vallée De Mai, i annan Fon Ferdinand, menm si i prive, i osi i ede dan sa lekonomi, petet osi annou get dan laliny ki mannyer zot zwenn ek sa lot, sa lot bout laba dan Praslin ki osi i annan sa karakteristik Vallée De Mai  osi.  E menm si i annan bann diskisyon ki’n ganny fer ek Minister Lanvironnman lo son size, lo sa bann biznes petet ki ganny fer dan sa lot Sit laba pour kapab, pour kot i konsern coco-de-mer li menm.

E mon swete ki zabitan Praslin i pran sa sit koman enn zot leker dan Praslin, pour pa detri li, pour pa bezwen al antre bann koutim ki pe ganny arive de tanzantan, e sa pe fer zot perdi resours, i ganny arete. E ki zot gard sa Sit Leritaz koman en patrimwann ki pour zot Praslin, e pour benefis Sesel, akoz i osi i pe kontribye dan nou GDP an zeneral dan Sesel. Set avek sa Mr Speaker, ki mon anvi donn mon sipor sa Mosyon kot i annan son nesesite pour nou kapab petet tonm an akor pour zer sa sit. E petet an terminan, nou annan CSR konmela, petet en propozisyon ki ava vin en pe dan sa … CSR kot en porsyon, en pti porsyon sa a ganny tonm an akor baze lo bann konsiltasyon ki ava fer avek en ta SIF, ek Gouvernman. Se avek Mr Speaker mon oule terminen. Mersi.

 

MR DEPUTY SPEAKER

Mersi Onorab Aglae. Onorab Audrey Vidot.

 

HON AUDREY VIDOT

Bonn apre midi Mr Speaker, tou Manm Onorab, zabitan Praslin e tou dimoun ki a lekout.

Mr Speaker, nou atou natirel, e resours pli presye nou lanvironnman. Parey in stipile dan nou Konstitisyon, i devwar sak Seselwa pour ede prezerv en lanvironnman sen, an bonn sante, e ki fonksyonn byen pour nou byennet. Mr Speaker, nou pe fer sa avek en sikse konsiderab parey nou kapab temwannyen par lefe ki 50 poursan nou later i bann Rezerv lanatir. Enn parmi sa bann Rezerv i nou Vallée De Mai ki lokalize lo zil Praslin, e ki byen ganny rekonnet avek son bann plant andemik. Mr Speaker nou tou nou konnen ki se lo zil Praslin kot pli gran plantasyon coco-de-mer i egziste, e osi sa bann plant ki prodwir pli gro lagrenn dan lemonn.

I enportan note ki apart labote natirel sa Rezerv se sa plant coco-de-mer avek son lagrenn ki parmi bann pli gran latraksyon touristik lo sa zil, e ki anmenn en reveni konsiderab pour lekonomi Sesel. Mr Speaker, i osi enportan note ki bann teren e rezerv natirel parey Vallée De Mai i donn plis rezon pour nou kontinyen protez e prezerv nou lanvironnman e promouvwar devlopman soutenab lo nou bann zil. Parmi, revizyon ek promosyon bann polisi Gouvernman dan devlopman ki soutenab e ki pran kont lanatir.

Revizyon Kerikilenm pour fer ledikasyon lanvironnman vin en parti entegral laprantisaz. Entansifikasyon zefor pou ganny bann Fon pour bann proze ki target proteksyon nou rezerv natirel, lanmer e nou lakot parey Mosyon pe demann nou pour Praslin. Zefor kontinyel, pour donn legzanp par nou aksyon, nou bezwen kontinyen inisye e diriz diskisyon an ki konsern proteksyon lanvironnman. Promouvwar azanda, mitigrasyon sanzman klima dan Polisi Gouvernman zafer eksteryer, e vin sa azan pli vokal e proaktif pour lakoz bann Pti Leta Zil ki pe devlope.

Mr Speaker, pour ganny solisyon pour bann problenm lanvironnman ki nou pe fer fas avek ozordi, i demann aksyon ki annan potansyel long term pour devlopman soutenab. Se sa rezon ki Parti Lepep i konsider lenerzi renouvlab koman enn bann solisyon pli efikas e pli efektiv. Nou neseserman krwar dan demokratizasyon, ek akse avek lenerzi renouvlab, pour ki i ava abordab pour tou Seselwa.

Mr Speaker zabitan Praslin i bezwen ganny resours pour ede anmenn bann loportinite parey ki pour osi ankouraz touristik, touris pour depans plis lo sa zil. Bann resours ki pe ganny eksplwate, bann aktivite ki lye avek konservasyon e san dout, nou zil, i annan potansyel pour vin en sant resers. Mr Speaker Praslin i osi annan bann sanpyon prezervasyon lanvironnman. Zot osi kapab benefisye avek bann proze ki zot vin avek. Me i anmenn benefis pour sa zil. Mr Speaker, mon pa pour long, e mon pour konklir osi par dir, par demann sa Lasanble pour siport sa Mosyon, pour ki Gouvernman a konsider demann kreasyon sa fon e ki Loter Mosyon i a pran konsiderasyon bann pwen ki mon’n sorti, mon’n fer sorti baze dan bann diskisyon ki zot pour fer, pour ki Vallée De Mai, ek son bann aktivite ki pe fer sa reveni a ganny servi pour promouvwar bann devlopman soutenab ki pour benefisye pour bann zabitan Grand Anse Praslin e Baie St Anne Praslin.

E enn bann striktir lo Praslin a kapab byen zer sa Fon e mon a siport enn pwennvi mon koleg ki’n fer sorti, se en striktir ki pour kapab byensir zer byen sa Fon, pour byensir pour promot latransparans, bonn gouvernans, e rann kont. Mersi Mr Speaker.

 

MR DEPUTY SPEAKER

Mersi Onorab Vidot. Onorab Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker mon anvi dir ki mon konpran antyerman sa ki Onorab Gill avek Onorab Wavel Woodcock in argimante. Ofet, mon osi tou mon enn sa bann dimoun ki’n deza argimant dan sa direksyon parey zot konn tre byen. Pour nou regarde ki mannyer Praslin i kapab benefisye avek sa ki zot annan. E byensir Vallée De Mai i enn bann, i enn, en trezor mon kapab dir ki zot annan. Menm si ofet fon Ferdinand e la mon anvi koriz Onorab Aglae, Fond Ferdinand, i pa prive li, Fond Ferdinand, i pour Gouvernman li osi.

Ofet Fond Ferdinand i bokou pli ris, i annan bokou plis coco-de-mer ki Vallée De Mai, e an plis ki sa i bokou pli, i bokou pli agreab pour vizite ki Vallée De Mai, be selman listwar in anvi ki se Vallée De Mai ki en Sit Patrimwann Mondyal.

Mr Speaker sa ki bann Onorab sorti Praslin pe apiye, se pour regarde ki mannyer Praslin i kapab resevwar plis larzan ki ava antre dan bann proze.  Ofet sa se sa Mosyon ki pour dir i ava annan reveni ki ava kapab ganny met dan en fon ki pour ede fer bann pti proze, pour benefisye zabitan Baie St Anne ek Grand Anse. Alors sa de Onorab zot in met lanfaz lo Vallée De Mai, SIF, parey mon pe dir sa Mosyon, sa mo Gouvernman, sa mo Gouvernman ofet petet ti devret SIF an relasyon avek Vale De Mai. Mon krwar ki nou bezwen, nou bezwen  neseserman pran seryezman sa ki sa de Onorab pe rode pour Praslin.  E si nou pe koz lo, si nou pe koz lo zis Vallée De Mai, mon krwar nou riske tonm en pti git. Akoz nou riske tonm en pti git. Mon pa anvi repet bann largiman ki bann plizyer Onorab in met devan an  term SIF, son devlopman, son responsabilite.

E la mon’n aprann osi ki parmi bann depans ki SIF i fer, par egzanp SIF i annan en laranzman avek STB, ki bann zournalis etranze ki vin Sesel, ki vini par STB, se zot ki peye. Ok, se zot ki peye pour bann zournalis etranze vini. E sa par an tonm anviron 700 tiket, anviron  700 tiket, e sa bann zournalis, i parmi bann ki ede pour donn Sesel piblisite. E la nou deza pe koz an term milyon Roupi.

E SIF parey mon pe dir mon pa anvi repet sa ki Onorab Henrie pli spesifikman in mansyonnen. Me nou bezwen regarde an gro aprezan ki mannyer nou pour balans sa. Aldabra ofet i pran pli gro bout dan sa depans ki, dan sa reveni ki SIF i ranmase kot Vallée De Mai. E pour serten parmi nou isi dan sa Lasanble ki’n ganny sa privilez pour vizit Aldabra, mon bezwen dir, e la mon koz lo mon sir lo lapar nou group ki ti ganny sans vizit Aldabra, nou bezwen dir ki SIF pe fer en gran travay konservasyon laba, en gran travay konservasyon e a tou pri nou koman en Lasanble atraver sa Komite Zil letan nou ti zwenn avek zot, letan zot ti fer zot prezantasyon e la ozordi mon profite, mon profite koman Chairman Komite Zil, pour dir avek SIF atraver son CEO Ms Dogley, mersi bokou pour donn nou sa, pour zot pey sa bout nou vizit lo Aldabra. Mersi bokou pour donn nou sa sans pour zot eksplik nou egzakteman ki travay ki zot pe fer, ki bann menas ki zot annan an term konservasyon e ki mannyer, e sa lo kot nou vreman kontan ki vreman zot pe fer en travay formidab.

E sa bann zenn, sa lekip zenn ki laba lo Aldabra, nou vreman ‘tir sapo’ avek zot. E letan nou ti pe, letan nou ti pe al Aldabra, ti annan en zenn fiy, en zenn fiy ki ti’n fek parmi bann meyer etidyan, kot Lekol Maritime ; li i ti lo menm bato avek nou, e i ti pe al komans son travay ranger lo Aldabra. E tanzantan letan mon, i mon zanmi lo Facebook e tanzantan i pe met enn de portre, konmsi sa bann lavantir ki zot annan. E letan nou’n ganny sa privilez pour nou partaz sa leksperyans ki zot pe fer Aldabra ; kot par egzanp ozordi zis lo konservasyon torti, kot ti annan en moman popilasyon torti ti a pe desann, ti a pe desann senpleman akoz torti ti a pe ganny touye e Heinz-sa gran lakonpannyen… ti annan li en prodwi ki ti apel Kalipi, ti annan en lasoup Kalipi soup  kot zot ti pe, zot ti pe enport Langleter, zis Kalipi torti, savedir sa bout cartilage ki tenir sa de lakok torti ansanm, alor zot ti pe zis en torti, tir sa morso Kalipi, met dan barik, eksport Langleter, zet larestan torti. E sa travay konservasyon ki zot in fer e lakantite torti ki ti pe monte pour ponn a en serten moman ti’n ariv mwens ki 1000.

Ozordi atraver travay konservasyon, monitoring, fer sir ki tou keksoz i ete. Byensir sa ban lo torti, ozordi i annan pli ki 15mil torti ki monte pour ponn lo Aldabra e sa set en travay, en travay ekstraordiner. E letan nou pe balanse. Mon pe zis partaz sa pour Pralinwa konpran pour dir zot pe ede pour konserv en lot Sit Mondyal. Ofet mon pe dir sa pour fer bann Pralinwa annan en lafyerte ki pour dir ofet sa de Sit Mondyal ki Sesel in fer kado limanite se zot Pralinwa. Mon kapab dir ki se nou Pralinwa, parey ou konnen mon osi tou mon disan i Praslin. Se nou Pralinwa ki pe prezerv sa an relasyon avek sa kado ki nou’n donn  lemonn. E alors nou devret annan en lafyerte. E sa dan li menm li i en, i en lafyerte ekstraordiner ki nou devret annan koman Pralinwa.

Donk zot pe fer en kantite travay e sa larzan ki sorti Praslin i pe byen ganny servi, par egzanp ozordi Aldabra anba SIF, zot elektrisite prodiksyon elektrisite ki oparavan, zot ti annan zenerater ki zot ti anmenn diesel, e nou tou nou konn sa polisyon, ensidswit ki kapab annan, ozordi zot in transform, zot sours elektrisite, e zot pa pe servi diesel pour prodwi elektrisite, me zot pe servi bann pano photovoltaic. E sa i kouver tou zot prodiksyon elektrisite ki zot servi.  Sa dan li menm i montre ki pour dir i annan sa konesans, e an menm tan osi, sa apresyasyon pour lanatir.

Popilasyon torti osi tou, Tortidter ti pe pas dan bokou problenm akoz kabri, kabri ti pe manz tou bann plant, bann pye dibwa konmsi zot bann feyaz ensidswit, e torti pa ti pe ganny ase pour zot manze, e in annan en gran proze pour elimin e la ozordi sa popilasyon i a pe repran. I a pe repran malgre ki lo sa nivo konservasyon ozordi ou pour war ki pour dir en torti ter Aldabra lo, lo Atoll Aldabra, i bokou pli pti, pti ki en torti par egzanp lo Mahe, oubyen lo Astove. Akoz en tortidter lo Astove, ofet torti lo Astove, i bokou pli gro akoz li i ganny bokou manze. Mon pe zis donn sa pti background pour dir ki pa krwar ki pour dir kontribisyon Praslin pa pe ganny byen servi, e i pe byen ganny servi, e alors zot pe deza fer serten keksoz. Me selman Onorab Gill, e Onorab Woodcock zot annan en konsern. Ki mannyer nou pour kapab ranmas plis larzan pour benefisye Praslin ?

Mwan mon krwar ki i annan diferan fason e petet la mon ava dir ki lo en kote nou kapab koz lo larzan ki Vallée De Mai i prodwi. E nou kapab nonm sif.  Me mwan mon krwar Praslin in perdi de milyon, in perdi de milyon, e milyon. Pa roupi, Dolar.  Senpleman akoz in annan en mank kontrol en landrwa.  Mon ava dir zot, e se sa lot kot, mwan mon krwar ki Praslin ki nou bezwen nou Lasanble diriz, diriz nou latansyon pour nou fer sir ki Praslin pa kontinyen perdi.  Ou konnen Mr Speaker, Praslin i annan sa plant ki nou’n mansyonnen, coco-de-mer. Be li coco-de-mer i annan en keksoz anndan li letan in sek ki apel kernel, be sa kernel coco-de-mer ki bokou dimoun pa realize i kout, letan zot eksporte, i kout 400 dolar en kilo, $400 en kilo. E i annan dimoun ki’n dan sa biznes plis ki 15an. E la mon ava dir Mr Patrick Bonne par egzanp ki mansyonnen dan en Lartik ki pour dir in dan sa biznes pandan pli ki 15an.

In annan Mr Wilson Nancy, ki li osi tou in dan sa biznes pandan plis ki 15an. Ou konnen Mr Speaker sa larzan ki zot gannyen avek sa kernel coco-de-mer. Li Praslin, i pa’n ganny nanryen. Praslin pa’n benefisye en sou Dolar dan sa biznes. E mon a zis donn ou serten sif. Par egzanp, letan ou balans lakantite coco-de-mer nou fer en kalkil, en kalkil, en kalkil aproksimatif, en, kalkil aproksimatif ki fer ki tou le z-an serten dimoun in ranmas, non, non tou le mwan serten dimoun dan zot kont labank in rantre $100mil. $100mil in rantre dan serten pos bann endividi, bann prive ki vedir dan en lannen, in annan parey mon pe dir sa i en kalkil, an gro, gro. I annan zot in anmas $1.2 milyon zot in anmas $1.2 milyon. 1.2 milyon i pe tonm ou plis ki R15miyon.  E sa mwan mon war li direkteman koman en keksoz ki pa nou ti, nou pa ni ti pour bezwen demann en poursantaz pour al dan en fon ti kapab pran tou sa larzan, met dan en Fon.

E la ou ti ava pe koz $15milyon, la ou ti pe ava koz en larzan sibstansyel pour ou kapab ganny larzan ase pour ou fer serten proze. Parski la sa ki nou pe koz lo la letan mon pe regard bann kont SIF, nou pe koz dan en lannen zot fer en profi anviron R4milyon. E alor  dan sa R4milyon ou pe al en poursantaz, e poursantaz i vedir si ou pe koz 10 poursan, ou a pe koz 400mil ki nanryen ditou.

400mil pa ni ase konmela pour ou fer en Daycare Centre, i pa ni pour menm ase pour ou fer en nenport pti proze, en ice plant pa pour arive lo sa pour nou bann peser ; ou pa ni pour kapab al dan plato konsolasyon, sorry, dan plato Anse Kerlan letan i annan flooding, pour ou kapab fer keksoz. Ou pa ni pour kapab fer en ki mannyer i apel sa ki lotrozour nou ti pe koz lo la, la ki al dan delo. En gronny, i pa ni pour ase pour nou fer en gronny pour nou kapab protez lanvironnman. I pti git. Mon konnen ki pour dir, Mr Faure, an tan ki Prezidan i ti anons en ban lo leksportasyon, lo leksportasyon kernel coco-de-mer apartir 1 Mars 2017. Me mwan mon krwar ki pour dir, i bezwen annan en lot fason pour nou kapab kontinyen benefisye e pour Praslin benefisye direkteman.  E alor mwan mon ti ava dir ki se la kot nou bezwen met, met lanfaz e kot nou bezwen met lenportans pour ki, e la kot zot koman bann Onorab lo Praslin ansanm avek Gouvernman ganny en bon dyalog, e ozordi avek sa lespri.  Bomaten nou’n war sa ta milyon ki’n perdi partou kote. Mwan krwar ki se la kot zot kapab, zot de Onorab Praslin, rod en rankont, swa direkteman avek Prezidan, ansanm avek Minis Lanvironnman,  fer en keksoz solid pour ki zot kapab eksplwat sa kernel coco-de-mer.

Petet i ava annan dimoun ki a kapab ed zot pour zot regarde mannyer sa 15milyon, 15milyon ou menm plis, i ava kapab antre dan serten fon pour zot kapab fer en travay pli konkret pour zot Komite e definitivman dan la fason ki zot tou le de zot in koze, la fason ki zot tou le de zot in koze, i kler Mr Speaker ki pour dir zot anvi fer en keksoz pour zot kominote. Zot anvi war serten proze pour zot kominote. E la mon pe mazinen, nou’n osi tann koz lo Prezidan Faure in mansyonnen konsernan, konsernan bann lekol, lotonomi bann lekol.

E definitivman si zot ti pe ganny zot en bon larzan 15milyon, pour kwa pa, zot ti ava kapab mazin an term lotonomi lekol pour lev standar, lekol primer Baie St Anne, lekol primer Grand Anse, lekol segonder Grand Anse pour ki zot ava kapab ganny keksoz ki ava bokou pli bon, bokou pli solid. Zot semen Praslin ki parey nou konnen i en pe, i en pe gran problenm. E la mon vwar ki pour dir zot pe, zot pe re sirfas, zot pe re sirfas serten landrwa.  Me selman mon pe dir tousala koman, koman en fason pour zot ganny larzan. Apre sa Mr Speaker, mon pe osi mazinen, petet si Onorab i dakor, parski mon krwar ki Mosyon ki mannyer i été i tro restrictif.

En lot landrwa kot zot, en lot landrwa kot Praslin i devret kapab retenir en pe larzan direkteman se dan tourism marketing tax. Praslin son vokasyon i plito touristik, zot annan en kantite gran letablisman e zot osi annan bokou bann pti letablisman e tou sa bann pti letablisman, tou bann letablisman touristik i bezwen fer en kontribisyon pwen 0.5 lo zot turnover.  E sa larzan i al direk dan tourism marketing tax. Be akoz, olye ki tou sa larzan i al dan Fon Gouvernman, i al dan sa Fon, apre Gouvernman ki deside pour ki mannyer pour servi li. Akoz ki en poursantaz larzan ki Praslin i prodwi, i pa kapab al, i pa kapab reste Praslin.

Reste Praslin, pour zot kapab annan bann proze serye. E la ankor enn fwa Mr Speaker mon konpran ki pour dir dan lepase in annan problenm avek sa PDF, nou tou nou konnen in annan problenm avek PDF, larzan, larzan pa’n tro kapab, pa’n tro accountable. Nou’n tande pour dir coco-de-mer in ganny vann anba latab dan tou kalite fason. Alors mon krwar ki, e si mon lir byen lespri Onorab Gill, mon krwar ki Onorab Gill, i pa osi dir ki pour dir sa PDF la, oubyen son bann lezot Fon fodre re ganny regarde pour ki ou annan dimoun serye lo la , e ki sak sou i accountable.

E mon krwar ki pour dir ozordi la fason ki nou pe fer nou travay dan sa Lasanble, e regarde, nou’n kapab al rod NDEA ek FIU, 2 lorganizasyon ki ou ti a krwar pa pour kapab touse, be si nou’n kapab ariv lo FIU avek NDEA, nou pa arive lo PDF ? Be PDF i en pti draze dan nou labous.

En pti ka. I zis en pti ka, alors, alors, Onorab, Speaker, mon krwar ki, an fen nou pe donn en pe lide la parski nou’n anvi war tou keksoz kler, e Praslin i devret kapab koman nou dezwenn pli gran zil, tou son bann fasilite, i devret kapab benefisye plis, e alor mwan dan en serten sans, petet mwan ava met sa devan ou pour ou konsiderasyon, Onorab Gill, atraver Mr Speaker.

Mwan mon ti ava dir konmsi letan pour regard ou Mosyon, mon pe zis met sa pour ou reflesir lo la. Mwan mon pour siport ou mwan, mon siport sa Mosyon, menm si i pe mansyonn spesifikman  SIF, me mon krwar ki lide se ki nou’n ouver li, ouver li pour ki Praslin i benefisye.

Mwan mon ti ava petet met devan ou pour elarzi sa Mosyon pour dir par egzanp ; ‘’vi ki Vallée De Mai pe ranmas reveni tre konsiderab avek bann touris ki vizit sa Rezerv, vi ki tou letablisman i kontribye .05 poursan lo zot turnover dan sa tourism marketing tax ; vi ki i osi annan bann lezot sours reveni ki ganny ranmase lo Praslin  sa Lasanble pe demann, pe demande ki en sonm poursantaz sa bann reveni, ou kapab met li en poursantaz  sa bann reveni i ganny met dan en Fon Spesyal ki ava ede fer bann pti proze pour benefisye zabitan Praslin. Mon pa pour propoz en lamannman ofisyelman parski mon krwar ki pour dir mon pour kit sa avek ou.

Mwan mon’n zis vini pour mwan fer en refleksyon, en refleksyon lo sa Mosyon anliny avek, anliny avek sa ki dezir ki pe ganny eksprimen dan Lasanble ; parski mwan koman en dimoun ki fyer mon en Pralinwa, mon fyer mon annan sa disan Pralinwa. E petet pour Onorab Churchill Gill mon anvi dir avek ou ki mon papa, mon papa ti premye pti baba pour ne dan 1927 dan Cottage Hospital letan ti fer Baie St Anne, letan ti fer sa lopital, mon papa ti premye pti baba pour ne laba.

E apre sa in vin Mahe, e alors konmsi mon fyer parski i ti ne laba, be selman i ti annan en misyon Mahe pour li, pour li fer mwan. Vwar ? E alor Mr, e petet zis pour azoute Mr Speaker ki mannyer i ti enportan, mon ava osi zis koman en anecdote dir avek zot ki mon papa ti sipoze lo Mary Jane, me selman i ti mank pasaz. Vwar tousala desten sa. Ok. Wavel Ramkalawan ti bezwen ne. Parski, vwar? Alors Mr Speaker, Mr Speaker, mon pe dir, mon krwar ki Onorab i konpran dan ki lespri ki mon pe fer mon kontribisyon.

Parske mwan  mon krwar ki poudir Praslin in ganny kit en pe deryer, e i annan bokou larzan ki Praslin prodwi ki pa pe ganny reservi pour Praslin, me k ii zis fonn dan bann diferan kont. Avek sa Mr Speaker e avek sa lespri ki mon’n koze, mon krwar mon pour donn mon sipor sa Mosyon. Mersi bokou.

 

MR DEPUTY SPEAKER

Mersi Onorab Ramkalawan. Onorab William.

 

HON WAVEN WILLIAM

Mersi Mr Speaker. Mr Speaker mon pa konnen si prosedir i permet me mwan anvi tonm dakor ki sa refleksyon ki Onorab ki fek koze dapre mwan, mon krwar i fer bokou sans.  E mon konnen ki pour dir petet i pour en long lamannman, me selman ler ou regarde, i annan bokou fason ki Pralinwa i kapab ganny resours pour zot kapab fer zot bann pri proze bouze lo Praslin. Mr Speaker, an di-z-an sa, byensir mon pour donn sipor sa Mosyon.  Me an premye lye mon ti a kontan felisite, e remersye SIF pou sa bon travay ki zot pe fer.

Sa demann fer Onorab Gill sorti Praslin, e mon’n osi ekout Wavel Woodcock dan la fason ki zot in koze. Mr Speaker mon krwar ki zot pli byen plase pour koz e konn bezwen, e osi vwar bann problenm, e bann rannman ki zot pe manke, e bann nesesite ki bann pti lantrepriz i kapab benefisye lo Praslin.

Me mon ti a kontan ki atraver sa Mosyon, demann ek loter Mosyon ki enn se ki apre ki sa Mosyon in ganny pase ki sa de Onorab i konsider al pli devan ek sa Mosyon parey in ganny dir par serten Onorab in koze avan mwan akoz zot bezwen pous sa azanda, e byensir nou dan Lasanble nou pour siport sa azanda, zot bezwen pous sa azanda pli lwen pour fer sir ki ; enn; sa swe i ganny realize. Mon santi ki Vallée De Mai li menm li, byensir i konsern coco-de-mer. Mon pa santi ki vreman i pe ganny sa valer azoute parey Pralinwa, ouswa Seselwa ti a voudre gannyen.  E mon konnen ki aletranze i annan serten bann pei, si nou pa vey byen, zot pour fer plis larzan ki nou, sirtou lo coco-de-mer. E mwan ma demande ki si sa i ganny materyalize ki i devret ganny materyalize, ki nou devlop bann pti lantrepriz ki pour kapab donn plis valer azoute, Vallée De Mai avek coco-de-mer. Akoz mon santi ki nou mank vreman bann loportinite. Si ou al deor dan plizyer sit, ou al Moris, Thailand, Lenn, lo en Sit, sa ki zot pe fer an term pti aktivite, bann lantrepriz ki vir toultour sa Sit li menm li, i enkrwayab.

Be akoz nou Sesel, Seselwa sirtou Pralinwa, otour Vallée De Mai, swa Fond Ferdinand, nou pa kapab fer otan plis ? Alors mon demande ki, mon konnen ki Gouvernman, bann dimoun konsernen pe ekoute ki nou kapab tonm dakor pour zwenn ansanm avek sa 2 Onorab, e avek bann Pralinwa, tou bann stakeholders enportan pour nou regarde ki an plis benefis Praslin, Pralinwa, e Sesel nou kapab fer o maximum pour benefis nou pei.

Mr Speaker kestyon fondamantal se eski nou kapab fer plis?   Mwan mon pour dir wi, mon pour dir wi, me i mank volonte, e byensir i mank bann sipor neseser e mon konnen pour dir Gouvernman pe lans bann diferan Scheme e mon krwar pour dir i annan lespas. Kondisyon pe ganny kree, e loportinite i  la. E mon ankor mon pour demann sa 2 Onorab pour pa aret la. Sa Lasanble i pare pour donn sipor sa Mosyon e pous sa azanda pli lwen, zot kapab fer li.  Napa nanryen ki enposib. Mersi bokou Mr Speaker.

 

MR DEPUTY SPEAKER

Mersi bokou Onorab William. Yes Onorab Ramkalawan.

 

HON WAVEL RAMKALAWAN

Mr Speaker, si nou, si Onorab i dakor e si ou menm ou dakor, mon ti ava, e pour ede dan sa lespri ki nou pe koz lo la. Mwan mon’n drafte en keksoz. Mon’n drafte en keksoz, e si Onorab i anvi an ka Mwan mon’n drafte en keksoz. Mon’n drafte en keksoz, e si Onorab i anvi aksepte li, anyway tou fason i 3.25 osi tou la, pre pour nou pran en break, mon ti ava kontan partaz sa avek li oubyen avek Lasanble. So petet pandan Break nou ava. Ok.

 

MR DEPUTY SPEAKER

Bon i annan en propozisyon pour en amannman  me i ase sibvansyel.  I annan en sipor par Onorab William pour siport sa propozisyon.  Mon panse nou diskit sa. Me si Loter Mosyon Onorab Churchill Gill i pare nou pran en Break, ou ava diskit sa ek Onorab Ramkalawan e ler nou a antre si ou aksepte sa propozisyon pour amann ou Mosyon, then, mon ava donn ou laparol, e apre nou reste nou 3 Manm pour debat lo la. Si nou pour debat lo, si ou aksepte sa amannman, nou a debat, nou a kontinyen debat lo Motion as amended e nou ava pran li dan sa direksyon. Si loter Mosyon, Onorab Churchill Gill, ou dakor.

 

HON CHURCHILL GILL

Vi ki i 3er 25. Nou kapab pran Break, me selman apre ler nou tournen, avan nou repran, mon ava kominik avek ou.

 

MR DEPUTY SPEAKER

Yes. Ok. Ok. I annan en konsansis ki nou ava pran break e nou ava pran sa deba apre pour regarde si Loter Mosyon pour aksepte sa Mosyon. Ok ? Avek sa nou ava adjourn, e nou ava repran 4er.

 

(BREAK)

 

MR DEPUTY SPEAKER

Bon nou kontinyen nou travay. Mon ti a kontan demann loter Mosyon ki desizyon ki zot in pran.  Onorab Churchill Gill.

 

HON CHURCHILL GILL

Mersi Mr Speaker. Mr Speaker mon tre pozitiv lo propozisyon ki Onorab Dirizan Lopozisyon in met devan. Me selman ler mon fer mon wrap-up, mon ava komant plis lo la akoz i annan serten mansyon dan amannman ki nou’n deza annan serten travay pe ganny fer lo la. Mersi.

 

MR DEPUTY SPEAKER

Ok. Ou pe take onboard sa propozisyon. Ou pe amande ou Mosyon, oubyen.

 

HON CHURCHILL GILL

Non akoz i annan mansyon, i annan keksoz ki ladan ki annan serten travay ki’n ganny fer ki mon pour eksplike dan mon wrap-up.

 

MR DEPUTY SPEAKER

Ok. Savedir nou kontinyen lo Mosyon as it is. Ok, thank you. Onorab Basil Hoareau.

 

HON BASIL HOAREAU

Mersi Mr Speaker. Bonn apre midi tou dimoun e tou bann Manm. Mr Speaker letan nou koz Praslin i annan 2 landrwa ki vin antet; Vallée De Mai, ek Anse Lazio, ozordi Mosyon pe adres issue lo Vallée De Mai e Mr Speaker, Vallée De Mai i annan diferan valer ki anmennen. Premye valer ki anmennen en valer lanvironnmantal.

An dot mo, i en Nature Reserve, in ganny proteze anba Lalwa e i annan bokou bann plant e zannimo andemik. Plant ki nou’n koz lo la se coco-de-mer, e Vallée de Mai i byen koni pour son coco-de-mer. Nou osi annan Black Parrot. Kato Nwanr, me ki ozordi, nou vwar i enn bann legzanp konkret ki mannyer konservasyon ki’n fer ek Vallée De Mai  in vin en sikse parski ozordi letan ou al Praslin Kato Nwanr i partou. Lontan mon rapel letan mon ti pe grandi, ou pa ti war Kato Nwanr byen, byen, ou ti bezwen al dan Vallée De Mai pou vwar li.

Me ozordi letan ou al Praslin Kato Nwanr i partou lo Praslin.  E sa i mon tre pour dir in en sikse sa konservasyon ki’n annan dan Vallée de Mai. E Mr Speaker avek sa issue lanvironnman, i vin a osi son laspe educational ; educational ; aspect parske i en landrwa kot bann zanfan lekol i kapab vizite e aprann, aprann lo diferan issue ki mannyer lanvironnman i devret ganny proteze e ki mannyer lanvironnman i interact.

E mwan mon rapel koman en zanfan lekol, letan mon ti pe lekol Praslin, mon’n fer vizit Vallée de Mai koman avek mon group laklas pour mwan an de repriz. Mon rapel byen boner, petet dan premye dezyenm, apre mon rapel byen dan P7 ki konmela i S1 mon, nou ti fer vizit lekol Vallée de Mai. So i annan en lenportans e i osi ede pour kiltiv en sans responsabilite e proteksyon lanvironnman byen boner avek kot i konsern bann zanfan. I annan osi en laspe kiltirel, laspe kiltirel an lesans pour dir ou kapab vwar bokou bann palm trees, bann ki dan lepase ti ganny servi pour diferan keksoz. E nou osi nou konnen pour dir i annan bokou ki ganny sante lo Vallée de Mai. Mon  mazin en sanson byen popiler, mon pa pour kapab sante, mon napa sa, mon pa doue parey Onorab Letourdie, me mon mazin, i annan sanson defen, Micky Mancham, ki’n sante, in koz lo Vallée de Mai in dir ou ‘’Praslin, napa pti zil pli zoli ki ou, e sanmenm zil ki mon kontan.’’ E i dir ek ou pour dir ‘’i ava retourn Praslin dan Vallée De Mai dan paradi.’’ So i annan en ta laspe kiltirel kot ki, kot Vallée de Mai in ganny servi dan bann sanson. Mon mazin en sanson osi par Mr Patrick Victor ki dir. ‘’pa ale, pa ale aswar parski pye mal pour koste pye femel, e si ou war sa malediksyon lo ou, ou pour menm mor.’’

So i annan en ta, menm en laspe mistik avek li, Mr Speaker. I annan sanson ki’n dir; ‘’Retourn Praslin,’’ egzakteman ankor par Mr Patrick Victor. So i annan en kantite laspe kiltirel osi ki Vallée De Mai i anmennen. Me ozordi nou pe konsider en lot laspe, son laspe ekonomik.

Son laspe ekonomik, e largiman ki pe ganny anmennen se eski sa laspe ekonomik i devret ganny partaze dan en fason pli direk avek Praslin ek son bann zabitan ? E  Mr Speaker letan mon’n fer mon resers, se lenformasyon ki mwan mon’n gannyen se ki lanmwatye viziter ki vizit Sesel i vizit Vallée de Mai. Lanmwatye, e i aktyelman landrwa ki pli ganny vizite par touris, i landrwa ki pli ganny vizite par touris ki vin Sesel.

So nou kapab konpran kantite viziter ki vizit Sesel e konbyen ki vizit Vallée de Mai ladan se lanmwatye. So i montre nou pour dir i en latraksyon touristik enorm, e enportan. E annefe Valle de Mai i menm ganny servi koman en marketing tool. Parski letan Sesel, pa zis lo kote letan touris i vin Sesel, me letan nou promote Sesel an deor, enternasyonalman, se Vallée De Mai i ganny servi koman enn sa bann landrwa ki pour atrakte touris pour vin Sesel. So its a marketing tool, e annefe nou konn byen Vallée De Mai i ganny mansyonnen bokou fwa koman The Garden of Eden. E pour mwan koman en Pralinwa mon tre fyer de sa. E parey Onorab Ramkalawan in dir pli boner, Vallée De Mai i pe soutenir, i pe soutenir Aldabra. So Praslin, pe soutenir Aldabra, e sa mon krwar i enn bann keksoz ki par fwa, petet nou pa realiz valer, valer, ekonomik e ki mannyer Vallée De Mai i asiste pour proteksyon enn nou bann, en lot nou leritaz Nasyonal ki osi en World Heritage Site.

E mwan mon Mr Speaker, mon dir ki mon pour donn mwan sipor sa Mosyon, mon pour donn mon sipor sa Mosyon e mwan, an menm tan ki mon pour dir mon pour donn mon sipor sa Mosyon, mon osi salye, mon osi pran sa loportinite pour salye louvraz ki SIF in fer. SIF ti ganny etablir an ’79. E son premye, son premye responsabilite ti Aldabra me apre osi in vin Vallée de Mai. E in fer en louvraz siperb.

Sa nou bezwen aksepte, e nou bezwen rekomann zot pour sa. Mosyon pa pe target, Mosyon nou realize, nou realize pour dir le fe ki i annan reveni konsiderab parey Mosyon i dir, i pe anmas, Vallée de Mai pe anmas reveni tre konsiderab avek bann touris. Se parski louvraz e management ki SIF in fer avek Vallée De Mai. Si ozordi nou’n nobou pe servi Vallée de Mai koman en fason pour nou ganny larzan, se parski SIF in fer en louvraz manifik. E annefe Mr Speaker sa lannen, SIF fek ganny Certificates of Exellence for 2017 by TripAdvisor. So sa i montre pour dir zot louvraz dan konservasyon e management Vallée de Mai pa pe zis ganny rekonnet o nivo Nasyonal me lo kote enternasyonal. E mon krwar sa nou bezwen apresye e dir ek zot felisitasyon pour sa.

E nou devret ankouraz zot pour kontinyen.  Me kantmenm sa nou konnen pour dir zot in fer serten depans. Onorab Henrie in donn legzanp kot zot in fer serten proze Praslin kot zot in asiste, kot zot in met larzan dan serten aktivite Praslin. Nou rekonnet sa, nou pa pe dir ki sa pa pe arive. Ki Mosyon pe demande. Letan ou get Mosyon en pe pli, en pli pre, vre i dir avek bann touris ki vizit sa rezerv, zabitan Praslin pa pe neseserman benefisye.

Letan mon lir sa fraz, zabitan Praslin pa pe neseserman benefisye. Pour mwan ki Loter Mosyon pe dir se ki napa en benefis petet direk, direk ki zabitan Praslin pe vwar avek larzan ki pe ganny anmase dan Vallée de Mai. E pour mwan, mon pe dir pour dir i enportan ki, petet zabitan Praslin i vwar, i vwar li kot i pe gannyen direkteman – direkteman ladan. E sa mon krwar i enportan, parske, Onorab Woodcock in mansyonn bann proze ki kapab ganny fer Praslin.

E mon krwar sa i enportan parske ki nou pour vwar, nou pour vwar en sityasyon kot lanvironnman pour nobou soutenir swa dan en….nou’n deza montre par lefe ki Vallée de Mai pe fer larzan ki mannyer i pe, lanvironnman pe soutenir nou lekonomi, me osi a ede pour soutenir nou kominote dan en fason sosyal osi. E mon krwar sa i enportan. E i annan en lavantaz, i pour annan en lavantaz enorm ki nou pour gannyen, petet nou pa pe realize si nou fer sa. Si sa zabitan Praslin i santi ki Vallée de Mai pe kontribye direk dan bann proze lo kote zil Praslin, ouswa lo kote sa kominote. Parske mon krwar i pour fer nou bann zabitan Praslin vin pli responsab. Nou pour realize ki Vallée de Mai i vedir pour nou. E i pour donn nou en sans, en pe plis responsabilite.

Mon pour pran en legzanp senp ; Onorab Woodcock in dir pour dir i annan sa water centre Praslin. Zis par egzanp si en zanfan, sa bann zanfan ki pe servi sa watersport, i realize pour dir bann lekipman ki ganny donnen demen i sorti dan reveni kot Vallée De Mai. Be sa zanfan letan i pe grandi pour dir be Vallée de Mai i annan en sans lenportans dan mon lavi. In ed nou e sa i fer vin pli responsab.

E ki fer i vedir ki petet nou pour nepli annan sa kantite poachers ki nou konmela, e menm pa zis sa me i a ede pour dir demen, ozordi petet i annan dimoun ki konnen lekel sa bann poachers, me selman i dir ou pour dir i pa pour al dir, i pa pour al dir, i pa pour get involve. Me letan en dimoun i santi be gete ou pe detri sa landrwa ki pe ed mwan. Sa dimoun pour santi be mwan osi mon bezwen pran mon responsabilite e al raporte.

So i pour kree en sans responsabilite dan nou bann zenn. E dan kominote Praslin an zeneral, si nou vwar sa benefis direk. E wi SIF in ede, wi, me at least ki sa Mosyon pe demande les Praslin letan i ganny son larzan letan i al dan sa Fon zabitan Praslin a deside atraver zot bann reprezantan lo sa Fon. I a deside ki proze sa larzan pour ganny invest ladan. Akoz la se SIF ki deside dan ki proze i pour met sa larzan me petet bann zabitan Praslin zot pout konnen lekel proze ki annan priyorite. E mon se pour sa rezon ki mon pour siport sa Mosyon. E i enportan petet pour nou note.

Anba, anba Lalwa ki gouvern, annefe Decree ki gouvern SIF, zot pa pey okenn biznes tax. Zot Lalwa i dir zot pa pey okenn biznes tax. So sa larzan i ganny anmase fully, fully, e alors mon krwar i only fair, parey nou’n dir pour dir sa sit i lo Praslin, e i annan zabitan Praslin ki travay avek management e Konservasyon Vallee de Mai. Alors i enportan ki at least sa kominote i santi pour dir i annan en benefis direk. E mon dakor pour dir letan nou form sa Fon, mon pa konnen si i pour ganny kree anba en nouvo regilasyon, en nouvo Lalwa ki nou bezwen fer li dan en fason, en framework ki annan latransparans. E annefe yer letan Prezidan Faure ti pe fer son Speech, son Diskour, in koz lo fason mannyer i annan latransparans dan lapwentman.

E Onorab Ramkalawan dan son repons i osi in mansyonn lo la pour dir i annan, nou bezwen annan latransparans dan lapwentman lo bann Bord. E mon asire ki sa latransparans pour ganny trouve dan lapwentman sa okenn Bord, ouswa okenn Fon ki ganny kree e pour mwan avan mon terminen, mon pour adres sa pwen ki Onorab Ramkalawan in lev-e lo coco-de-mer, mon krwar i en pwen ki fair.

Mon santi mwan tre sagrinan ki en prodwi ki zeneralman sorti Praslin pa’n benefis, pa’n benefisye at least bann zabitan Praslin.  E sa ki fer mwan pli sagrinan letan mon gete sa bann dimoun ki pe benefisye pa ni menm zabitan Praslin.  Mon ti a kapab pran en serten recourse si, si mon ti a dir be ok en zabitan Praslin in benefisye avek sa les li. Be pa ni menm zabitan Praslin. E pour mwan mon krwar pour dir sa pa devret arive. E mon krwar pour dir sa ki Prezidan Faure in fer an Mars kot in ban sa leksportasyon, i en step in the right direction.

La petet, prezan nou a ganny sa letan, sa lespas pour nou rekonsidere ki mannyer nou pour tackle sa. E mwan mon krwar ki mannyer nou, nou pour tackle sa.  Nou’n deza annan en Coco-de-mer Management Decree of 1978. Swa nou amann li, e nou deal ek sa issue kernel ki pa ganny dealt with pour le moman dan sa Act, ouswa nou bezwen re get en nouvo Lalwa. En nouvo Lalwa total lo sa ki konsern coco-de-mer.

E mwan mon pour siport le fe pour dir wi, si nou’n deside re eksport sa kernel, sa nwa, nou bezwen fer sir ki Sesel, Sesel, e osi obviously Praslin i benefisye direkteman from sa exportation. Mon krwar sa i tre enportan.  Nou pa kapab les nou resours, ouswa les nou bann ki mon pour dekrir koman en trezor benefisye selman serten dimoun. In plis ki ler ki sa ki pour nou, sa ki Leritaz Nasyonal pour Sesel, i benefisye Seselwa. Mersi Mr Speaker.

 

        (APPLAUSE)

 

MR DEPUTY SPEAKER

Mersi Onorab Hoareau. Onorab Simon Gill.

 

HON SIMON GILL

Mersi bokou Mr Speaker. Bonn apre midi tou dimoun. Mr Speaker Mosyon prezante par Onorab Churchill Gill bomaten i annan en merit e sa merit i pa zis ki nou pe koz lo enn bann Sit Mondyal, me osi son lenportans Nasyonal.

E an partikilye son lenportans e son lenpak ki  i annan lo zil Praslin Baie St Anne. Avan mon al pli lwen mon krwar sa Mosyon i osi  donn nou en lot loportinite, pour nou remersi bann dimoun ki pe manage Vallée de Mai avek sa pasyon, sa determinasyon ki fer ki nou gard sa landrwa entak, e kot viziter ki vizit Sesel i kontinyen vwar sa bote, e sa lanvironnman inik ki Vallée de Mai i prezante.

E mon krwar Loter Mosyon dan son lentervansyon i napa okenn moman ki nou oule mepriz travay ki sa bann dimoun pe fer e tou le kontrer mon krwar in dir pour dir zot pe fer en bon louvraz e ki nou acknowledge zot travay.

Me loter Mosyon dan en 2enm moman i pe rod en pe larzan ki ganny anmase ler bann viziter i vizit sa Sit.  E sa i anmenn mwan pour koz e fer referans avek enn bann lentervansyon ki mon ti fer letan zot ti pe koz lo Mosyon anmennen par Onorab Sophola. E bann lezot lentervansyon ki’n pourswiv apre ki Onorab lo lot kote in anmenn en lot Mosyon.

Kot nou’n dir i annan nesesite pour tret bann zil dan son spesifisite, e vwar dan ki fason nou kapab met an plas bann striktir pour permet administre nou bann distrik. Administre bann diferan  teritwar dan Sesel. E vwala demann sa Mosyon i egzize ozordi ki nou tonm dakor ki annan en nesesite met an mars en striktir, en striktir probableman ki nou pour, nou pa pour vwar li dan okenn lezot distrik me ki reponn a bezwen a nesesite spesifik Baie St Anne Praslin e akoz non Grand Anse Praslin osi. E vwala.

Lot koman en 3enm pwen, lot keksoz ki ekstrememan enportan ki nou tonm dakor lo la apre ki Onorab Ramkalawan in fer en soumisyon dan la fason ki ti a va kapab vwar sa Mosyon i ganny elarzi. Mon krwar son propozisyon i annan en merit osi. E zisteman i anmenn mwan osi pour vwar keksoz dan en fason bokou pli larz pour tou lezot distrik. Ler nou pour koz lo District Council, ler nou pour koz probableman bann alternatif Distrcit Council.

Probableman i ava annan nesesite annan en levanter Mr Speaker lo tou bann letablisman biznes dan sak teritwar Sesel, e gete ki mannyer dan nou divizyon teritoryal, dan divizyon administratif ki nou koz District Administration ki egziste dan en ladministrasyon dan en distrik. Gete ki mannyer nou kapab direkteman anmas reveni. Anmas reveni ki direkteman i al dan sak sa bann distrik, direkteman.  So la i  dan sa lespri ki mwan mon vwar merit ki serten amannman ki Onorab Ramkalawan in anmennen me mon osi vwar merit dan sa laspe tre restrikte ki Onorab Churchill Gill in anmenn son Mosyon, e mon krwar i byen sa direksyon ki i pe pran.

E probableman nou servi sa koman en model koman en proze pilot ki ler nou’n target larzan ki pe ganny anmase, ki pe ganny zenere dan, dan nou Rezerv, dan nou Patrimwann Vallée De Mai, nou kree en striktir spesyal kot nou met bann dimoun ki nou tonm dakor lo la dan en fason transparan, kot nou donn zot bann manda kler pour ki zot kapab fer en travay konsekan avek larzan ki zot gannyen.

Now nou pe gete osi ki lenpak  ki pour annan ler zot tir en pe larzan ki zot annan, zot anvoy pour Praslin, par lefe ki nou konnen pour dir zot pe deza pe travay, pe annan en legzersis tre konsekan osi pour Konserv Aldabra. Nou bezwen gete ki lenpak finansyel sa pour annan. Par rapor ankor enn fwa mon pe dir avek kontribisyon ki zot pour fer dan fon pour devlopman Praslin nou de zil ; Baie St Anne, avek Grand Anse.

Ler mon’n dir sa Mr Speaker, mon pa oule al fer gran repetisyon lo tou bann keksoz ki’n ganny dir. Mon krwar tou sa ki’n ganny dir i enportan. Me mwan a dir avek nou bann koleg lo lot kote latab ki sa Mosyon i en Mosyon ki mon vwar li i enplik 2 Onorab lo tou le de kote latab e mon pa vwar okenn rezon pour nou pa donn en sipor inanim sa Mosyon akoz anfen kont nou pe oule ki nou zil i devlope an relasyon osi avek devlopman ki pe pase dan tou teritwar Sesel pour ki an retour, an konklizyon zabitan Praslin, Baie St Anne, Grand Anse, i ava vwar zot pe ganny en kontribisyon direk ki sorti dan enn zot bann rezerv lor si mon kapab apel li, sa Rezerv Lor ki zot pe sonnyen laba lo Praslin.

E avek sa Mr Speaker, mon pour konklir par dir avek Onorab Churchill Gill mwan ekspekte ki tou Manm Lasanble pour vot an faver son Mosyon malgre i pe eksprim serten rezervasyon lo amannman son Mosyon. Me dan lespri ki bann deba in deroule. Mon krwar ki napa rezon pour annan okenn krentif Onorab Churchill. Annou bouze, sum-up, e nou a kontinyen travay. Mersi bokou.

 

MR DEPUTY SPEAKER

Mersi Onorab Simon Gill. Bon mon a demann Mover Mosyon, Onorab Churchill Gill pour fer son summing-up. Onorab.

 

HON CHURCHILL GILL

Mersi Mr Speaker. Mon a komanse an remersye tou bann Manm ki’n kontribye atraver zot lentervansyon. E mon asire bann dimoun Praslin ki pe ekoute, zot in tre apresye ki sa Mosyon Manm Lasanble i konpran kwa ki nou pe sey fer.

Mwan a komanse atraver, an komansan par SIF, parey mon ti dir dan mon prezantasyon nou, tre konforte avek travay ki SIF pe fer. E i annan menm en paragraf kot mon’n menm mansyonnen ki zabitan Praslin i remersye zot pour sa travay, e nou tre apresye akoz si Vallée de Mai i parey i été ozordi se gras a zot.  E ler mon’n gete ki, zot ti komans an 1983, e la as we speak, i fer zot 34an,  e mon krwar zot in fer en ekselan travay pour Vallée de Mai, menm si nou konnen Vallée de Mai pe siport Aldabra e nou napa okenn problenm ek sa. Nou pa ti a oule sa i arete sa Mosyon i pa ditou annan lespri pour dis-kontiny sa, o kontrer nou kontan sa pe ganny fer, e nou ti a kontan i kontinyen.

E dan lentervansyon ki Onorab Grand Anse Praslin in fer, in fer referans avek bann lekipman ki pa alaoter ki Praslin souvandfwa i vwar li pe bezwen travay avek pour devlopman lo sa zil. Mon krwar sa konsern i genuine, e mon krwar a en serten moman, nou pour bezwen antre an dyalog avek Gouvernman konsernan Bidze ki ganny pour pei. E Praslin pour annan en lot formil ki mannyer nou fer Bidze. Pour le moman Bidze pe ganny fer lo nivo distrik pour bann proze, e mon krwar grander zil Praslin in ler pour elarzi Bidze ki donn sa zil pour fer kont ki bann lezot lekipman ki bezwen pour compensate bann devlopman ki Bidze distrik i donnen, omwen zis Bidze bann diferan Lazans, i devret enkli bann lekipman ki devret ganny servi lo sa zil dan plas zis pour larzan proze. Mon krwar a serten pwen, nou pour bezwen ganny sa dyalog, pour Praslin lo la.

An ki konsern Fond Ferdinand, avek sa bann kernel, i annan en diskisyon ki ti ganny fer par en vizit ki ti ganny fer par Prezidan Larepiblik Praslin ki tou le de Onorab Praslin ti prezan kot i annan serten demars ki pe ganny fer, e yer nou’n ganny konforte. Prezidan in fer nou konpran ki en travay tre avanse ki pe ganny fer lo la, e tre byento pour annan serten lanons lo la.

Lo kote bann letablisman Praslin, i annan bann letablisman ki nou konnen pe ed bann diferan Klib Sportif, e se sa rezon pour konmela mon pa’n vwar li i ideal pour nou elarzi sa Mosyon pour kouver bann lezot resours ki Praslin i fer, akoz mon santi ki i devret annan en dyalog pour nou al kouver tou leres, swa an fezan en Komite kot nou a komans zwenn sa bann dimoun, sa bann diferan sours kot reveni i antre pour nou vwar en formil, agree ek zot ki fason ki nou kapab fer ki Praslin a  kapab benefisye en pe plis. Se pour sa rezon ki tou sa bann propozisyon ki’n ganny fer zot tre bon, me selman nou bezwen pran zot pa par pa pour fer sir kot keksoz i ganny fer dan en fason sistematik.

E nou osi okouran Praslin konm kwa SIF i kontribye parey in ganny mansyonnen, liv, penn lekol, e lezot ankor ki kouver pa zis Praslin me Mahe. Me selman dan 34an ki SIF i la, e si nou pe met en value avek sa bann liv, ek sa bann lasistans, mon krwar nou tou nou pour war pour dir i tre minim. Me selman nou, nou pa, sa Mosyon pa la pour kestyon sa li. Me selman zis pour letan sa in ganny lev-e, i enportan mon fer sorti konm kwa nou okouran ki sa bann keksoz pe pase, me selman nou santi menm si sa pe ganny fer, i pa devret en problenm pour en serten kontribisyon antre dan en Fon pour zil Praslin benefisye.

Alors Mr Speaker san okenn dout zabitan Praslin i bezwen santi zot benefisye avek sa resours. Ler sa Bord ki pour zer sa fon i ganny konstitye mon pour sizere ki tou le de Manm Lasanble ki reprezant Praslin i devret ganny asiz lo sa Bord parmi bann lezot ki a ganny apwente. Avek sa Mr Speaker i reste pour mwan demann tou Manm Lasanble prezan pour siport sa Mosyon pour zabitan Praslin. Mersi.

 

MR DEPUTY SPEAKER

Mersi Onorab Churchill Gill. Bon in ariv ler pour nou pran en vot. Yes Onorab Woodcock?

 

HON WAVEL WOODCOCK

Mr Speaker.  Mersi Mr Speaker, zis en pti, mon ti’n osi propoze en pti lamannman si Onorab Gill i mazinen, dan plas ‘’pti proze,’’ pour ede fer bann pti proze, dan plas pti zis met ‘’proze.’’ Akoz i kapab diferan kalite proze lo plizyer lanpler, pti, mwayen, ouswa gran…proze Kapital. Mersi.

 

MR DEPUTY SPEAKER

Ok. Sa i en pti amannman. Onorab Churchill Gill.

 

 

HON CHURCHILL GILL

Annefe mon ti’n met en leksplikasyon konsernan sa amannman. Akoz tou proze ki pour ganny fer, i pour ganny determinen par sa Bord ki pour ganny mete pour zer sa Fon.

E prezan kalite proze osi, i pour ganny determinen par sa Bord, zot groser e zot lanpler, akoz sa i pour depan lo ki kantite larzan i annan dan sa fon. Alors mannyer i été la i pa pour sanz nanryen. Akoz tou bann desizyon pour ganny pran par sa Bord. Ok. Mersi.

 

MR DEPUTY SPEAKER

Bon. In ariv ler pour nou pran en vot lo Mosyon. Mosyon koman i ete lo Order Paper napa okenn sanzman, tou Manm ki an faver?

Okenn Manm ki kont? Madam Clerk?

 

MADAM CLERK

Mersi Mr Speaker, mon rikord 19 Manm an faver e personn kont. Mersi.

 

MR DEPUTY SPEAKER

Ok, savedir Mosyon in pase.

Bon nou annan ankor de Mosyon lo Order Paper mon ti a kontan… Ale Onorab Ramkalawan.

 

HON WAVEL RAMKALAWAN.

Sa Mosyon pa bon ki mannyer i ete. Gouvernman, pa Gouvernman ki ansarz Vallée de Mai, SIF.  Mosyon pe demann Gouvernman, i pa bon sa Mosyon sanmenm sa nou ti pe esey propoz en amannman ki’n ganny rezete. Sa Mosyon pa bon. Mosyon pe ganny poste kot the wrong person.  Ladres lo sa Mosyon pa bon.  Mersi bokou.

 

MR DEPUTY SPEAKER

Ok Lasanble in pronons son lekor lo Mosyon, vot in gran pran, e in ganny rikorde e nou kontinyen. Bon i annan ankor 2 Mosyon lo Order Paper. Mon ti a kontan ganny zot lopinyon si nou pour pran en lot Mosyon la, e nou ava kontinyen deba semenn prosenn.

Onorab Simon Gill.

 

HON SIMON GILL

Mr Speaker, mersi pour laparol. Mon krwar kot nou letan in arive, i meyer ki nou adjourn e nou pran de nouvo Mardi prosen. Avek ou permisyon, mwan mon move. Mersi bokou.

 

MR DEPUTY SPEAKER

Mersi Onorab Gill, Onorab Ramkalawan.

 

HON WAVEL RAMKALAWAN

Wi mon osi mon krwar. Parski definitivman nou pa pour kapab pran 10 minit sak Mosyon. I pour.. Non nou pa pou kapab.

 

MR DEPUTY SPEAKER

Mon ti pe propoz ki nou regarde si nou pour komans enn la apre nou anvoy deba pour semenn prosenn. Me si zot agree, nou ava anvoy pour semenn prosenn. Yes Onorab Ramkalawan.

 

HON WAVEL RAMKALAWAN

Mr Speaker zis avan nou, pli boner ou ti dir avek nou avek kopi elektrisite ki pour dir ou pour koz avek SBC. Ti ava bon pour nou konnen ki SBC pe dir. Mersi bokou.

 

MR DEPUTY SPEAKER

Wi, sa i form par dan mon 3 pti lanons ki mon annan pour mwan fer. Ok. Premyerman mon anvi enform Bills Committee ki nou pour zwenn Vandredi le 28 midi isi kot Lasanble. Ok. Mon konnen i pour en zournen ase sarze akoz pour annan en vizit bomaten par bann Manm Lasanble. Me nou bezwen zwenn akoz nou annan 2 Bills ki nou’n fer First Reading pour nou kapab konsider sa 2 Bills. Ok? So tou Manm Bills Committee Vandredi midi, isi kot Lasanble.

Nou annan osi de Manm Lasanble kip e fer en vwayaz lo lenvitasyon o komiser Endyen sa i tonm dan kad en progranm pour bann zenn parlmanter Lafrik, e sa de Manm pour ki pei Vandredi le 28.  E zot vizit i al ziska le 7 Out. Sa de Manm se Onorab Sandy Arrisol, avek Onorab Wilbert Herminie. Lo size SBC, nou’n ganny en lantant avek SBC ki tanto apre nouvel 8er, SBC in agree pour pas Rapor FPAC, rapor fer par Chair FPAC lo sa Rapor FIU avek NDEA. Lezot travay Lasanble lo Mosyon, SBC pour regarde koman i kapab pas otan posib Vandredi swar. Ok. So Lagreman ki nou’n gannyen, savedir pour bann zabitan dan Sid avek Was Mahe, zot a kapab swiv en pe deliberasyon, en pe lo sa rapor ki ti ganny prezante avek Lasanble bomaten.  E ansanm avek 2 Mosyon semenn prosenn,  Lasanble osi tou, la ki tou Manm in ganny en kopi sa rapor pour fer deba lo sa rapor. Ok?

So nou pour adjourn ziska Mardi prosenn 9er bomaten.

 

(ADJOURNMENT)