Home » Verbatim » 2017 » Verbatim Report NAS Sitting Wednesday 19th July, 2017

Verbatim Report NAS Sitting Wednesday 19th July, 2017

NATIONAL ASSEMBLY OF SEYCHELLES

 

Wednesday19th July, 2017

The Assembly met at 9am

National Anthem

Moment of Reflection

Mr Deputy Speaker in the Chair

 

MR DEPUTY SPEAKER

Bonzour tou Manm Onorab. Bonzour tou dimoun ki a lekout.  Bon avan nou komans nou travay, nou kontinyen ek nou travay ki nou annan 2 Mosyon ozordi lo Order Paper. Mwan a demann Onorab Ramkalawan i annan en pti kominikasyon pour fer.  Onorab Ramkalawan.

 

HON WAVEL RAMKALAWAN

Mr Speaker, bonzour. E mersi bokou pour donn mwan sa loportinite  pour adres nou Lasanble. Mr Speaker set avek gran tristes ki Nasyon Seselwa in aprann lanmor Louis D’offay, en zabitan Praslin, e en ansyen Lezislater, savedir in kontribye pour li pas Lalwa dan nou pei. E apard son bann lezot aktivite, in en sitwayen, e alor mon anvi propoze ki an sir respe pour en ansyen Lezislater parey nou’n fer dan lo plizyer lokazyon ki nou Lasanble i gard en moman silans.  Nou debout e nou gard en moman silans dan an siny respe pour son kontribisyon  ki in fer dan devlopman nou Nasyon. Mersi bokou.

 

MR DEPUTY SPEAKER

Mersi Onorab. Mon ava demann tou Manm pour nou debout, nou a gard en moman silans.

Bon nou a kontinyen nou travay, e lo Order Paper premye Mosyon pour lazournen. Mon a demann Onorab Jean-Francois Ferrari pour li move son Mosyon. Onorab Ferrari.

 

HON JEAN-FRANCOIS FERRARI

Mersi Mr Speaker. Mr Speaker, mon depoz devan Lasanble en Mosyon ki lir koumsa. ‘’Prenan kont bann kondisyon difisil e danzere ki nou bann stevedores ki travay avek bato ton i fer fas avek, sa Lasanble i demann Gouvernman avek bann lakonpannyen konsernen ansanm pour tonm dakor lo en nouvo tarif ki servi pour pey sa bann travayer. ‘’

Mr Speaker i vreman en gran loner, ki mon Parti LDS in swazir mwan pour koz lo lapar bann stevedores dan Lasanble Nasyonal. Sa dan li menm, i reflekte sa gran lenportans ki LDS i mete lo nou lendistri lapes, e lo travay tou Seselwa ki asosye avek sa resours sitan enportan pour nou pei. Dan lepase sa group travayer in ganny bokou anbete par politisyen. Sirtou avan sak eleksyon. Me nou dan LDS nou santi ki sa i bezwen arete. Nou swe se ki sa Lasanble i fer tou sa ki dan son pouvwar pour ki sa profesyon stevedores i ganny rekonnet pour son valer, e ki sa travay i ganny rekonpanse mannyer i merite.

Les mwan Mr Speaker komanse par dir, ki kantite resers, ki mon’n bezwen fer. Ki kantite konsiltasyon ki mon’n bezwen antreprann pour mwan fer ki mon annan tou bann lenformasyon neseser pour adres sa size dan en fason kler. Sertennman i pa en size fasil me ler ou dan politik e ou pe travay dan lentere tou sitwayen, napa okenn size ki merit ganny met de-kote akoz i tro konplike. Oubyen akoz politikman i tro sansib. Nou ti dir ki nou pour fer sa Lasanble vin ‘’Nou Lasanble,’’ e nou krwar ki doker, stevedores, e tou travayer por e lendistri lapes i osi annan zot plas dan sa Lasanble. Permet mwan osi byen boner pour demann zot leskiz e leskiz avek manm piblik ki pe ekoute si serten keksoz ki mon dir, serten sif ki mon met devan pa 100 poursan korek. Sa lendistri i sitan konplike, ki en dimoun an deor parey mwan pa pour kapab master tou detay en sel kou.

Alors mon envit bann dimoun ki pe ekout nou pour korize kot mwan mal e pa ezit-e pour pran kontak pour donn nou bann lenformasyon ki korek. Mon osi demann konprenezon bann maren Seselwa e travayer dan lasenn si mon pa pe mansyonn tro gran detay lo zot ka. Akoz mon’n demann lezot koleg dan Lasanble pour zot ler zot pran laparol, pour eksplik en pe kondisyon e sityasyon sa bann lezot travayer lo por.

Serten dimoun in sizere byen boner, ki mon merit tir sa Mosyon akoz dapre zot nou pa pour reisir anmenn okenn amelyorasyon pour bann stevedores. Apre en rankont ki 17 MNA tou le de parti in annan mwan pase avek Hunt Deltel ek Land Marine, enn nou bann Manm Mr Simon Gill ti dir ki kekfwa mon merit retir sa Mosyon akoz dapre li there is no case to answer. E ki dapre li i kler ki sa bann Lazans pa pour fer nanryen pour amelyor kondisyon travay stevedores. Si Onorab Gill depite Sekreter Zeneral Parti Lepep i abandonn lalit avan menm ki nou’n komanse, nou, nou pa pour abandonn sa lalit.

Nou dan LDS nou krwar ki nou kapab e nou devret amelyor kondisyon travay stevedores e nou pour fer tou sa ki dan nou pouvwar  pour ed sa group travayer. Si nou ekout sanson Philip Toussaint, nou pour tande ki en stevedores i en dimoun ki tou le granmaten i taye an desandan, son sak lo son ledo, in kabose, i pe al debourye pour li ganny son dipen.  Nou tande ki lavi pa fasil e ki depi plizyer lannen i pe sipliye pour ‘Msye Sel’ get li. Get en pe dan son kondisyon. Me i pa pe ganny ekoute. O kontrer ‘Msye Sel’ ti pe kontinyen fer li pran semen kannal. Wi Mr Speaker profesyon stevedores isi Sesel i dan en gran danze. Sak lannen ki pase, nou pe trouve ki mwens dimoun i anvi zwenn sa profesyon. Bann ansyen ki dan sa metye plizyer lannen  zot lo semen ale, e nou pa pe trouve ase bann ki pli zenn ki pe vin devan pour ranplas zot.

Ozordi la ler mon pe koz ek zot, zot pour soke pour tande ki annan omwen 40 stevedores Endonezyen ki pe travay dan Por Victoria.  Koumsa menm i komanse. Koumsa menm ki lendistri konstriksyon in arive depandan preski antyerman lo travay Endyen, Sinwan e lezot etranze. Seselwa ti konstri danm La Gogue li menm, ti konstri Airport Pointe Larue li menm, me apre pti-a-pti ler sa lendistri konstriksyon in sap nou. Sa in komans par 20 etranze e si nou pa fer sir, dan 20an tou travayer lo Por pour etranze. Profesyon stevedores i en profesyon.  E mon dir wi i en profesyon ki sipoze nob parey tou travay, en si ki, enn ki sipoze anmenn larises pour nou pep e pour nou pei. Nou annan sa gran resours pwason ki nou napa teknolozi pour lapes nou menm avek lasenn. Me omwen, ler sa resours i ariv dan por, nou merit fyer pour dir ki se Seselwa ki ganny larzan pour fer transbordman. Sa larzan i antre dan nou lekonomi, e bokou fanmir Seselwa i benefisye. Nou dir mersi bann stevedores. Me mannyer nou pe ale Franse ek Espanyol pour lapes, Endonezyen pour debarke, Filipino pou met ton dan bwat. Endonezyen pour remet container bwat ton lo bato ; Franse ek Angle pour vann nou ton dan zot laboutik, e nou, nou pour asize pe esper lasezon karang ek makro. Wi mon pa egzazere.

Sityasyon i grav e plito rod en solisyon, Gouvernman i donn fasilman GOP pour fer vini travayer etranze. Eski sanmenm sa ki nou apel en Gouvernman responsab ? Nou Mr Speaker, koman en parti responsab, nou pa pe aksepte sa sityasyon.  Nou pe demande atraver sa Mosyon ki Gouvernman i pran son responsabilite e rod tou fason pour sov sa bout ki ankor pour nou dan Lendistri Lapes. Konbyen fwa nou tann Minister lapes ek SFA pe dir nou ki se atraver aktivite ekonomik lo por ki nou ganny nou par dan sa larises. Ki nou ganny nou par dan sa Lekonomi Ble. Be ki par ki pour reste nou si nou perdi sa profesyon stevedores ? Eski LDS ki bezwen toultan kler tors lo problenm ? Gouvernman pa pe war sa sityasyon danzere ki devan nou ? Avan mon al pli lwen Mr Speaker, annou get en pti moman ki lopinyon serten dimoun i annan lo stevedore. Stevedore pa serye, bokou i lo lapoud. Bokou pa oule travay parey fodre. Bokou i vin en zour apre son lannmen zot pa vini eksetera, eksetera. Be si tousala i vre, akoz mon poz sa kestyon ki nou pe fer pour nou ed sa profesyon ?

Si i vre ki annan tou sa kalite problenm ki nou pe fer pour nou ed sa profesyon ? Nou pa pe fer nanryen. Nou’n deside kit sa profesyon la lo sa lapant destriktif ki i lo la. Nou’n  abandonn lalit. E pour bann ki serye dan sa louvraz nou pe les gagne pain, ganny disparet parey ler nou zet piti, pti baba ansanm avek delo bennyen. No case to answer parey Onorab Gill ti pe sizere.  E pour bann lazans bato, mon vreman etonnen i zot pa pe montre konsern pour sa sityasyon ki pe degrade.  E ki si i kontinyen pour afekte zot prop biznes e zot prop reveni.  Zot pa santi ki zot osi zot annan responsabilite pour amelyor sa sityasyon. Pour le moman malerezman mon vwar tro bokou larogans lo lapar bann anplwayer e tro bokou mank latansyon pour sa group travayer, ki pe fer serten anplwayer ganny bokou larzan. Nou dan LDS nou pa les tonbe fasil.

Nou realize ki problenm i grav apre ki nou’n ekout bann Lazans stevedores, mon’n fer li mon devwar pour al rankontre bann stevedores zot menm dan diferan landrwa travay. Dan mon biro, lo por lapes, dan mon distrik Mont Fleuri kot i annan bokou sa profesyon. Mon’n ekout zot avek bokou latansyon, e mon’n konpran ki sa size, i en size ki vreman konplike. Vreman konplike mon dir. I annan sitan keksoz ki ou bezwen konnen ki dan en semenn, oubyen dan en mwan mon pa ekspekte konn tou bann defi e bann problenm. Mon demann tou bann dimoun ki annan par dan sa lendistri pour eskiz mwan si mon mank serten detay.  Mon osi demann mwan bann koleg pour soutenir mwan dan sa deba.

Premyerman mon met devan Lasanble bann fe.  Bann sif ofisyel ki nou’n gannyen pour ki tou dimoun i konpran sityasyon. Ozordi i annan apepre 700 dimoun ki apel zot lekor stevedores. Ladan apepre 450 a 520 i ganny konsidere reelman koman stevedores. Lezot 200 a 250 i plito bann zonm zournen ki desann enn fwa letan pour ganny en zournen. Sa bann dimoun i travay dan bann tim ant 25 a 37 zonm e zot ganny kriye lo radio ler in ler pour zot tim travay. Zot travay shift 4an edmi ant 8er bomaten ziska 5er apre midi, toulezour enkli Dimans e konze piblik.

Pour montre nou Lasanble lenportans sa lendistri anviron 1200 tonn pwason in ganny transborde toulezour dan Por Victoria. Apre sa i annan lo kote Land Marine tou sa bann container ki ganny desarze e sarze tou le zour dan por. Stevedore menm ki fer sa louvraz. Alors si napa stevedores, napa Lendistri Ton, napa marsandiz ki antre, e sorti dan pei.  Dapre lenformasyon ki mon’n gannyen stevedores i kapab ganny an mwayenn en reveni R10, 800 par mwan.

Me annou fer atansyon. I annan bokou ki ganny mwens. Sertennman i annan ki ganny plis.  Alors ozordi nou pa la pour nou get sa ki ganny plis. Nou la pour nou gete ki omwen sa ki zot gannyen mwens, i soutenab e akseptab pour zot fer viv zot fanmir. Sif ki pli enportan alors ki nou bezwen met dan nou latet, se ki plis ki lanmwatye stevedores, i ganny zis pa anba R8mil 500 par mwan. Sa i en sif ki mon’n gannyen avek sa 2 lazans prensipal Hunt Deltel ek Land Marine. Mon repete plis ki lanmwatye, annefe, 55 poursan stevedores i ganny ki R8mil 500 par mwan. Dimoun ki dir ki stevedores i ganny en ta larzan, zot pe egzazere. I vre ki annan louvraz en e stevedores i pare pour travay an mor, i kapab ganny li plis R20mil par mwan. Setadir, i kapab double son lapey e menm plis.  Me sa i pa toultan le ka.  Ler nou pe koz lo lapey i enportan pour nou dir, pour nou dir avek bann Lazans ki anploy stevedores in deklare avek nou, zot in dir ki an mwayenn 53 poursan tou larzan ki propriyeter bato i pey zot, i al pour lapey stevedores. An dot mo, dan sak 100 ki propriyeter bato i pey Lazans, R53 i al dan lapey stevedores. Si sa i korek, nou, nou pa konnen si sa sif i korek.  Me sa ki nou’n ganny dir.  Si sa i korek i pa mal. Pour sa kalite lendistri, me mon dir byen si sa korek akoz nou pa’n ganny tou bann detay, e i nou lentansyon pour verifye si sa sif ofir an mezir nou kontinyen nou travay.  Byensir mon pa pour onnet si mon pa osi mansyonnen ki bann Lazans ki enplike dan sa travay zot in osi dir nou ki apard lapey parey lekip, zot annan bann lezot depans parey lekipman sekirite, lazans lasirans pour tou travayer. Transpor e manze apre ler.  Bonus e Land Marine i osi donn en bonus lafen lannen. Dan plas 13enm Mwan Saler akoz sa pa aplike pour travayer casual.  An pasan mon oule dir ki mon’n pa’n ganny tou detay lo sa bonus.  Me si mon pa konpran sa ki mon pa konpran se ki bonus i paret mwan feb e i pa aplik parey pour tou dimoun e i pa aplik parey pour tou dimoun ki pe fer menm louvraz.  Sa bann diferan standar i enn bann keksoz ki mon pour adrese pli tar, me ki mon dir deswit i pa akseptab. .

Aprezan si sa profesyon i sitan bon e larzan i sitan bel, akoz ki nou pa trouve ki dan nou pei parmi nou popilasyon sa profesyon pa pe fleri, me plito i pe disparet. Akoz ? Si i sitan fantastik bann Lazans i dir ki zot napa ase travayer Seselwa.  Akoz, eski nou pe komans vwar stevedores etranze sa lannen ki pe travay dan Por Victoria. I bezwen annan bann problenm par la. Mon asire zot ava dakor avek mwan.  Annou alor sey gete kote problenm i ete.  Mon asiz, mon’n asiz plizyer zour avek stevedores parey mon’n dir zot, e nou’n ariv lo serten konklizyon.  Nou bann dimoun fran nou.  Zot konnen e tou keksoz nou met lo latab, nou pa kasyet nanryen. Drog. Wi, lapoud pe fer ravaz dan sa profesyon, bokou zenn zonm for pe detri zot lavi avek sa lapoud e pe nepli kapab travay san sa drog.  Sa i vreman tris.  Me i pa en problenm ki zis konsern stevedores. Mwan mon’n rankontre e koz avek bann ki vreman serye dan sa profesyon. Bann ki travay for, e ki rekonnet ki sa problenm lapoud  in sot limit.  Me zot osi, zot ava osi dir ki i annan lezot problenm grav.  Avan mon al lo sa bann lezot problenm, les mwan pran sa lokazyon pour koz avek mon bann frer Seselwa ki lo lapoud.  Mon bann frer zot pe detri zot lavi. Zot dan en latrap.  Rod led, seye, menm si i difisil pour met ater sa drog.

Mazinen ki tou zot lafors, tou zot kouraz pe fini dan pos sa bann trafiker ki pe vin ris lo zot lasyer. Lo kote Gouvernman, mon sipliye ki Gouvernman i met plis resours e zefor pour ed sa bann viktim akoz si nou pa reisir sanz larout nou profesyon stevedores nou Lendistri Lapes e nou pei pour fini dan en presipis. 2enm problenm Mr Speaker, se sa enn ki pe dekouraz bann doker atraver bann sistenm taks ki pa byen ; ki menm mon dir ki enzis e ki deplorab, ki malonnet e ki pe kontribye direkteman pour detri sa profesyon e sa lendistri. Les mwan eksplike. Mwan repet ankor e zot ava rapel pli boner mon’n dir zot ki plis ki lanmwatye stevedores i anmenn kot zot mwens ki R8mil 500 par mwan.  Akoz ?  Akoz ler zonm i travay pour lavaler pa plis ki R8, 500 i ganny tou son larzan dan son pos akoz napa taks lo lapey ki tonm pa anba R8, 555.  Si en dimoun i sot sa limit par egzanp i travay pour R10mil sa mwan Zilyet, sistenm taks ki an plas i fer ki i bezwen pey 15 poursan lo sa sonm antye, ki fer ki ler in kalkil son total larzan in travay pour R10mil me i ganny li 8, 500 par mwan ; savedir i retonm par anba sa R8,500, parey, e i tonm parey sa enn ki’n travay mwens ki li.  Eski sa i zis ? Ou travay plis me ou ganny mwens?  Kote nou’n deza tande?

Se pour sa rezon ki nou pe vwar ki plis ki lanmwatye stevedores i travay zis pour li tonm pa anba sa R8, 555 e apre i asiz kot li.  Son konsekans alors se ki tre souvan komansman le mwan ou trouve ki laplipar stevedores i desann, i desann pour al anpli en zournen, me ler ou koste lafen di-mwan ou pa trouv zot. E se la ki bann Lazans i ganny zot rezon, zot leskiz, pour zistifye akoz zot bezwen anmenn stevedores etranze. Akoz zot dir ver lafen di-mwan zot napa ase dimoun pour travay.

Zot dir nou selman ki zot, e nou pare pour krwar zot, ki zot toultan donn priyorite Seselwa, me ler napa Seselwa, zot bezwen sa backup, akoz b bato i bezwen desarze. Me Gouvernman i bezwen realize e aksepte ki si sa problenm i egziste i lafot en sistenm taks ki pa zis. E ki bezwen ganny aranze. Akoz i en sistenm bankal e enzis.  Si napa ase stevedores dan sa lepok, se zot ki’n kree sa problenm. Se en problenm ki sorti atraver sistenm taks e la ou a krwar nou pour blanm stevedores.

Nou pa kapab blanm en dimoun. Si i pe penaliz, i ganny penalize pour li travay plis, i pa pour travay plis, o kontrer i merit ganny ankouraze. Mon byen mon mal ?  Alors la mon pe dir deswit, fodre sa sistenm taks i sanze. E fodre i sanz vitman. Akoz pli nou espere, plis nou pe detri sa profesyon e sa lendistri. Mon lapel avek Minister Finans se ki zot bezwen avan lezot departman e lazans o pli vit posib, e anmenn en solisyon byen boner.  Zwenn avek sa bann lezot Lazans. Akoz nou, nou bann MNA, nou pa pour asize zis les koz, les keksoz koumsa kontinyen. Fodre Gouvernman i konpran ki parmi sa kantite problenm ki stevedores i ladan, sanmenm sa enn konsern ki’n pli grav. E mannyer taks i ganny kalkile, ki sanmenm sa problenm ki zot plis konplent avek.  E fodre ki Gouvernman i konpran ki ler stevedores i dan problenm i refoul lo zot fanmir e ler i refoul dan zot fanmir, i refoul dan zot fanmir, i refoul lo zot distrik e ler i refoul lo zot distrik, i refoul lo nou bann MNA, e nou, nou pour bezwen, nou pa kapab aksepte en problenm ki zis refoule. Nou pour bezwen rod en fason pour ankouraz e pour pous Gouvernman pour li rod sa solisyon.

En lot sityasyon ki pa akseptab se lefe ki lo sak por i annan diferan Lalwa. Kekfwa zot a gete, zot a dir mwan be ki mon pe rabase.  Lo sak por, dan Por Victoria, i annan diferan Lalwa. Hunt Deltel i kontrol Por Lapes. Land Marine i kontrol Por Konmersyal. IPH i kontrol sa nouvo Por mon krwar i apel lo Zone 14, me kisisa tousala ? Tou sa bann Por pa i Sesel ? Tousala pa en konsern tir ton. Ki mannyer i kapab annan diferan Lalwa, diferan tarif, diferan management, diferan prensip lo sak por ?   Ki mannyer i kapab ki stevedores i santi ki sa kalite dezord i ganny fer e i pa devret kontinyen.  E bokou dimoun i mazinen ki pour dir ler i annan konfizyon, lanmenm ler ki stevedores i ganny afekte li.  Dan sa konfizyon Lazans pe lager ek kanmarad, lelefan pe lager anler fourmi i ganny kraze anba. E dan sa ka fourmi se stevedores. Dan sa dezord travayer pa benefisye. E fodre me en lord vitman. Fodre i annan en larmonizasyon, e mon pour revin lo la pli tar lo fason ki management bann travay stevedores i ganny fer.

I annan byensir plizyer lezot pwen ki stevedores in met devan mwan, e mon ava liste zot briyevman. Ler zot travay Dimans ziska tar dan lannwit, ler minwi i sonnen, zot lapey i desann akoz zot ganny dir ki la zot in fini ariv Lendi.  Selman zot pe travay dan lannwit zot. Koman minwi i fer dong, nou’n arive Lendi lapey i koupe. Travay lo cargo, travayer i konplent ki zot kapab travay de shift, me lapey ler i vini i vin zis pour 1, 1.5 shift. Kot Land Marine gangwayman ek  winchman, i ganny peye diferan tarif ki stevedores. Me kot Hunte Deltel aparaman tou i parey. Nou bezwen rod en fason kot i annan rekonpans pour bann meyer travay e bann plizyer, bann ki annan plis leksperyans. Bann stevedores ki lo cargo, par egzanp ler cargo i plake avek en bato lapes pour transport pwason, zot bann stevedores ki lo cargo, zot pa ganny peye tonaz  ler pwason i sorti lo bato lapes e i ganny transborde ater pour IOT. Savedir ki menm si zot dan menm tim, zis sa ki lo pti bato ki ganny konte dan tonaz. Sa enn ki pe asize lo winch, lo bato cargo li i zis asize li. Tenir en kou, tenir en kou taler, taler ki ou pour ou pe vini. Alors i annan ki kapab asiz en zournen e ki pa ganny nanryen akoz pwason pe vann avek IOT.

Lo payslip ki mon annan kopi avek mwan i annan en kare ki dir fish shifted. Me ler fish i ganny shifted pour IOT napa nanryen pour sa dimoun ki anler lo gangway, avek lezot travay lo bato cargo. Lasirans, Lasirans dan ka aksidan. Nou bezwen rod en fason, sa i en gro konplent, i arive aksidan lo por en kantite. Me nou bezwen annan en sistenm efikas ki ler en dimoun pe travay i ganny aksidan, i annan en sistenm ki click deswit ki sa dimoun i ganny pannyen, i ganny montre ki zot annan en pe lanmour pour li. I pa zis trennen konmsi en ler ou a krwar zot pe espere ki sa boug i perdi son papye Dokter, i pa pour ganny nanryen. Konmsi napa sa lakonpannyman. Nou pe zis bezwen li ler i pe travay, ler i ganny aksidan, nou pa, nou pa war li dernyen kou Mr Speaker, dernyen lensidan amonya, mwan mon annan en dimoun Mont Fleuri ki’n sote ki’n deranz son lipye. Konnen ki lager in bezwen lager. E mwan ki bezwen entervenir pour li ganny sa. Non. I pa merit koumsa. Dan Dimans stevedores i ganny R100 koman en lankourazman pour desann e vin travay. Me apre sa i ganny trouve lo son lapey final. Me non. Savedir ou ganny ankouraze bomaten, me dan apre midi ou ganny dekouraze.

Se sanmenm sa bann keksoz mon bann koleg e Manm Lasanble sa bann detay parey serten i dir ki osi fer stevedore dekouraze.  En dimoun i kapab vol ou R500.  Ou dir les pase. Me mwan mon konnen, nou konnen mannyer nou Seselwa in ete. Ler nou santi ki en dimoun pe vol nou R1, oubyen nou pe perdi R1, R2 toulezour, tou le, sa ki fatig nou.  Sa i fatig nou akoz nou, akoz nou konnen pour dir i pe ganny fer dan en fason ki enzis. Stevedores menm si bokou pa konn, pa konn tro, pa’n tro byen lekol, mwan asire zot konn konte. Zot konn azoute.  E ler zot azout sa bann pti bout, ansanm zot ganny sa dekourazman akoz zot war pour dir zot ti’n kapab ganny en pti pe plis pour zot kapab amelyor zot lavi.  Alors an fas sa bann problenm ki mon pe sizere. Mon Mosyon i demande ki en nouvo tarif i ganny servi pour pey bann stevedores.

Mon premye demann, anfen enn mon bann demann la a sa moman ki mon pour demande se mon propoz en pti lamannman lo sa Mosyon, zis pour mwan azoute apre en nouvo tarif pour mwan azout en nouvo tarif taks. Ok? Akoz mon pour demande ki kalkilasyon taks i ganny revwar imedyatman dan lentere bann stevedores. Sa i en lamannman senp. Zis pour ou met mo taks apre mon tarif, e tou lezot i reste parey.  Si Gouvernman i pran sa pti demann, sa enn, zis sa demann o serye zis avek sa sanzman dan tarif taks stevedores pour kapab war en bon lankourazman, pour travay plis.  Sa i en premye pa.

Mon lot demann se ki Gouvernman avek reprezantan Lazans ek Reprezantan stevedores i asiz ansanm pour met lord dan sa bann pti problenm ki mon’n mansyonnen pli o.  Sa bann pli pti keksoz i ganny repare, sa bann pti anomali i ganny repare, stevedores i kapab ekspekte si sa i ganny fer en pti benefis an plis lo zot saler lafen di-mwan.  Sa i en dezyenm pa pour redonn zot lankourazman.

Trwazyenmman, mon demande ki i annan en travay ki ganny fer ant Gouvernman e bann Lazans pour armoniz sistenm peyman ki bann stevedores i gannyen.  Se sa ki mon pe dir ler mon dir annou revwar tarif. Avan ki nou ti demande ki bann Lazans i donn plis ; avan ki nou demande ki bann Lazans i donn plis, nou bezwen komans par ensiste ki tou lazans i servi menm tarif pour menm louvraz. Nou bezwen ensiste ki tou Lazans i servi menm tarif pour menm louvraz.  Sa zafer travay pli fasil lo bato Espanyol, i pli difisil lo bato Franse sa nou pa pe aksepte.  Partou atraver lemonn i annan en prensip iniversel ki demande ki pour travay egal ou bezwen ganny en saler egal. Alors mon lans en lapel irzan avek Gouvernman, pour fer sir ki tou keksoz i ganny armonize dan lentere travayer. Dan lentere sa profesyon, e i dan lentere lapey sosyal.

Katriyenmman pli enportan se ki bann mezir long term ki nou pe propoze pour sof sofgard sa profesyon.  Sov li dan sa gran risk disparet ki i ladan. Redonn kouraz bann ki deza pe fer sa metye e sirtou ankouraz bann zenn pour pran sa travay. Okenn nou ki la dan sa Lasanble ozordi, mon asire nou pa anvi ki lot zenerasyon i montre ledwa lo nou, i blanm akoz zis etranze ki pe desarz marsandiz lo por e akiz nou ki nou pa’n fer nanryen pour soz sa profesyon. Annou alors get en plan long term. Profesyonnalizm travay stevedores silvouple. Donn bann stevedores en nouvo perspektiv lo zot metye. Respe zot.  Siport zot ler zot dan problenm e regard dan posibilite pour zot pran zot bann benefis boner pour sirtou bann ki’n travay en kantite lannen.  Se sa bann keksoz ki nou pe demande nou anvi met dinyite dan sa travay. Mon kontan pour raport avek Lasanble ki tou dimoun ki’n mon’n koz avek i dakor ki amelyor sa profesyon i en gran priyorite. Bann Lazans sirtou. Zot dakor. Me enn ler mon doute ki zot krwar ki se pa zot ki bezwen fer zefor. Se lezot ki bezwen fer zefor.

Me mwan mon dir ki tou dimoun i bezwen sa zefor. Bann Lazans i dir nou ki zot plifere travay avek stevedores Seselwa. Bann stevedore Seselwa i meyer dan Losean Endyen. E i ki an realite, i en pe en lenfirmite pour fer vini travayer etranze. Me zot azoute, zot pa kapab fer otreman.

Nou dan sa Lasanble e zot dan sa Gouvernman, nou bezwen montre zot ki mannyer nou kapab fer otreman. Nou bezwen rod en fason pour met larzan dan welfare stevedores pour profesyonnalizm sa travay. Nou dan en LDS, nou’n tann milyon fwa stevedores, nou’n tann milyon fwa ki stevedores. Donn zot R5mil, donn R10mil, donn zot R25mil pa pour zanmen ase, akoz zot pour depans tou. Apard bann ki pli serye, i vre ki en kantite stevedores i mank responsabilite ler zot fer zot depans.  Alors, ler i annan en sityasyon koumsa.  Pei i bezwen step in, pei ek bann akter sosyal e ekonomik i bezwen step-in pour met an plas en sistenm ki pran kont fanmir sa stevedores.

Lasistans ler i malad e i pa kapab travay, i en retret pli boner si i neseser pour bann ki’n karyate apre plizyer lannen dan sa louvraz. Mwan toultan mon enn sa kalite dimoun e mon dir zot avek bann stevedores, si ou pa kapab okip ou larzan, Gouvernman i merit antre pour li dan sa larzan ki ou pe kontribye, i ava manage i ava fer sir ki ler ou’n ariv ou laz, ou nepli kapab travay, ou pa pour depann lo Gouvernman, ou pour depann lo sa bout ki ou ou’n fer ou saving.

Nou demann alors Gouvernman pour met an plas en Fon Spesyal avek kontribisyon sorti kot Gouvernman, bann Lazans, e bann stevedore zot menm. Wi mon bann frer stevedores, zot in byen tande.  Si Gouvernman i aksepte sa lide zot osi zot pour bezwen kontribye en pe. Sa i tou zis. Napa nanryen ki pour nanryen. Zot lavenir, i zot responsabilite, e zot bezwen kontribye anver sa. Sa Fon i devret permet bann stevedore ki annan en serten kantite lannen travay dan sa metye, e ki nepli annan kouraz pour annan sa swa pour zot kapab poze pli boner, ok ?  Me sa i pour en lot deba, i pour ganny diskite, en konsiltasyon ava ganny fer pour met an plas bann detay sa bann keksoz. Mon pa  asire, me mon krwar ki sa pour ankouraz bannla pour fer travay dan en fason pli regilye. Si ou kontinyen, si ou konnen ki i annan en package, i annan en en sistenm ki kapab vin en safety net,  e ki sa i depan lo kantite zour ki ou’n travay. Kantite lannen ki ou’n donnen.

Alors, mon asire ki en stevedores i ava vwar sa benefis pour li menm.  E ler nou pour aranz sa zafer taks, zafer pour pli bon ankor. Finalman mon pe propoz en fason senp pour finans sa progranm. Parey souvan nou’n tande dan sa Lasanble fodre larzan CSR i ganny servi pour byennet bann travayer dan sa lendistri kot sa larzan i sorti. Se sanmenm sa ki apel Corperate Social Responsibility. An realite se sanmenm sa ki apel Corperrate Responsibility akoz dan sa lakonpannyen ki sa CSR pe ganny generate, e i merit retourn an priyorite pour sa bann travayer dan sa lendistri. Premye responsabilite sosyal pour Hunt Deltel, IPH ek Land Marine i welfare bann stevedores. Mon pe lans en lapel avek zot, pour remet sa bout larzan CSR ki zot depanse. Remet dan welfare sa bann dimoun ki fer zot ganny sa larzan an premye.

Montre ki zot apresye sa zefor, e ki zot rekonnet ki zot biznes, i depann lo kouraz sa travayer.  Se la ki nou pour war en vre partnership ant stevedores, Lazans, propriyeter bato, en partnership ki pour dan benefis tou dimoun. Mr Speaker mon lapel se ki Gouvernman annou vin pli efikas e pli vizilan lo problenm ki pe lev-e devan nou. Nou annan en kriz ki pe get nou. annou pa ler laroul in kraze, apre nou komans taye, nou komans gete ki mannyer nou pour anpes sa problenm.

I annan en kriz devan nou. Mon sipliy avek Gouvernman, avek Minister ki responsab pour Lapes, pour avek SFA, pour pran li koman en sityasyon irzan, pour gete ki nou kapab fer pour nou met en pe lord, en pe konfyans, en pe lankourazman dan sa lendistri. Pour travayer mon dir avek zot ankor enn fwa, annou vin pli responsab. Nou dan sa Lasanble, nou dan LDS nou annan sa lentere pour fer sir ki zot ganny byen rekonpanse, pour zot travay. Nou anvi trouve ki ler zot pran zot pansyon, zot annan dekwa pour soutenir zot. Me zot osi, zot bezwen sanz latitid. E kit ater bann move pratik. Zot bezwen fer sa zefor. Nou tousel nou pa pour kapab sov sa profesyon. Nou pare pour ede. Mer si zot pa zwe zot par, nou  pa pour reisir. Finalman pour anplwayer, mon demann zot ki zot vin pli rekonesan. E annou en lapros pli entelizan. E pli long term. Si nou dan sa Lasanble, nou pe demande. Akoz, se akoz nou anvi vwar en win-win situation pour tou le de kote. Lo kote biznes, lo kote anplwayer e lo kote travayer. Tou le de kote i bezwen benefisye. Pour le moman, nou war en sityasyon ki vreman de-balanse. E sa i danzere pour Lendistri Lapes. Nou anvi dir avek bann anplwayer, bann propriyeter bato, bann Lazans ki nou rekonnet zot pozisyon enportan dan sa lendistri. E nou oule ki zot kapab kontinyen fer sa biznes pour ankor plis ki 100an ki 200an e ki pour lavenir. Me sa i pour depan lo relasyon ki zot devlope avek sa resours imen isi Sesel. Fodre ki sa larises ki nou pe kree, i ganny partaze dan en fason zis en entelizan. Fodre ki dan sa zafer, tou dimoun i benefisye. E sirtou ki Sesel i benefisye e Seselwa i trouv sa benefis dan son lavi toulezour.

An konklizyon, mon envit tou Manm don nou Lasanble pour fer zot kontribisyon lo sa size enportan. I annan bokou keksoz pour fer resorti. Pa bezwen per. Pa bezwen per, koz fran. Kot i annan problenm annou dir. Nou’n nepli dan sa moman politik kot nou pa pour tous sa bann problenm akoz sa i kapab, sa i kapab fer nou ganny bann problenm politik, napa. Nou koz fran, nou met sa ki bon devan. Nou met sa ki mal devan, e nou rod solisyon.

Annou ansanm alors regard sa size dan son detay.  E silvouple, annou vin avek solisyon. Bann stevedores pe kont lo nou. Lendistri lapes i depann en kantite lo sa group travayer, e nou bezwen rod meyer kondisyon lanplwa pour zot. Mon remersye zot pour zot sipor.

 

MR DEPUTY SPEAKER

Okenn Manm ki segonn Mosyon.  Onorab John Hoareau.

 

HON JOHN HOAREAU

Bonzour Mr Speaker. Bonzour tou Manm Onorab, bonzour tou dimoun ki a lekout. Mon le segonn sa Mosyon e Mr Speaker mon oule demann permisyon pour mwan kapab koz lo sa misyon, lo sa Mosyon.

 

MR DEPUTY SPEAKER

Go ahead.

 

HON JOHN HOAREAU

Mr Speaker pour ki nou konpran vreman byen sa Mosyon i neseser ki mon fer en pti ilistrasyon mantal lo travay en stevedore. Jerry i en stevedore ki travay koman en cusual labour ler son tim i ganny kriye.  I desann byen granmaten pour al ranpli son zournen akoz i konsyan ki annan son lekor e son fanmir pour sonnyen. Son louvraz ozordi se pour desarz ton dan en kiv, kot tanperatir i mwen 40 Degre. Alor i bezwen met son lenz lafreser e desan dan kiv. La i pe al fer fas avek en lafreser terib. Menm si i annan lenz lafreser e lezot proteksyon annan de fwa i sitan fre ki ler pour monte, bezwen mont dan file akoz son lekor in fini komans pran lafreser.

Jerry i fer fas avek bokou danze ler i dan kiv. Lezel bann ton ki sitan fre, i vin parey en bout vit, i kapab ponnyard li si i pa pe veye ler i pe tir ton. En parti son louvraz, se pour lev bann gro ton e ranpli file. Annan de ler sa ton ki i pe lev-e i kapab preski i menm pwa son lekor. Pli move si enn sa bann tiyo ammonia ki en gason pwazonen, pete dan kiv Jerry i kapab perdi son lavi.

Mr Speaker mon pa pe dramatize, me se sa en pe bann risk ki Jerry i bezwen fer fas avek dan son louvraz pour selman R2, 65 par tonaz  si i pe travay avek Hunt Deltel, oubyen 3 an 3 a R5 si i pe travay avek Land Marine. Si zanmen Jerry i ganny en aksidan, e i pa kapab travay ankor, i pour selman zis, i pour selman ganny zis en larzan Lasirans, e nanryen an plis tou le mwan pour soutenir son fanmir.

Dan sa travay ki in donn tou son kouraz Hunt Deltel oubyen Land Marine i pour zis parey en lobze ki’n oubliye. La i pour vin en ka ki servis sosyal pour bezwen ede apre. Mr Speaker, dan en konversasyon, mon ti ganny avek Onorab Simon Gill, in fer mon konpran ki son papa osi in enn sa bann viktim sa lenzistis e move kondisyon travay, ki apre ki in donn son kouraz sa lakonpannyen i ti ganny en aksidan kot i ti koup son pous, e menm, e menm pa resevwar okenn konpansasyon dan sa lepok. Petet plizyer Manm sa Lasanble i kapab  konn lezot viktim  e lezot ka ki in arive dan sa lendistri.

Mr Speaker kestyon ki mon pe demann mon lekor, se ziska kan?   Ok? Ziska kan ki sa 2 lakonpannyen stevedoring pour kontinyen rezouir en zoli profi, tandis ki sa 520 travayer Hunt Deltel e 262 travayer Land Marine i kontinyen vwar zot pe fer fas avek en saler enferyer, e en lavi dir. Mr Speaker, les mwan premyerman fer resorti ant sa 2 lakonpannyen ki pe fer sa biznes stevedoring i annan en gran disparite ant larzan ki Land Marine i pey stevedores an konparezon avek sa ki Hunt Deltel i peye.

Bann sif ki nou’n ganny donnen, se ki Hunt Deltel i pet R2, 65 par tonn e Land Marine ant 3 a R5 depandan lo si sa travay id an tanperatir par lao omwen 30, oubyen par anba mwen 40 Degree. Setadir si en tim i desarz en bato avek mil tonn ton, sak travayer pour ganny li 200, R2mil 650 avek Hunt Deltel, oubyen ant 3mil a R5mil avek Land Marine.

Fodre fer resorti ki Land Marine in deza fer en pti zefor pour fer lazisteman lapey par tonaz, letan ti annan devalyasyon roupi ant, nou ti antre dan sa progranm reform makro ekonomik. Tandis ki Hunt Deltel pa’n zanmen fer okenn lazisteman dan lapey sa bann dimoun. Sa da li menm i montre klerman en lenzistis. E ki kalite lakonpannyen ki ou pe deal avek. Nou lo sa kote nou debout tre for lo prensip. Nou krwar ki tou sa ki pe fer menm louvraz i merit ganny menm saler. LDS pour toultan pouse ki i annan equal pay for equal work.  Ler nou ti diskit lo size Air Seychelles nou ti fer resorti sa. Ler nou ti diskit lo size bann travayer Lasante nou ti osi fer resorti sa pwen. Nou pour toultan apiye pour bann dimoun ki pe fer fas avek bann lenzistis parey dan travay.

Dezyenmman Mr Speaker, ler ou balans sityasyon lavi, e ou vwar ki en travay dan lanplwa a plen-tan, i resevwar plizyer kalite benefis tel ki koman en Pansyon Retret avek Fon Pansyon en konze 28 zour par lannen, Gratwite ensidswit. Be sa group travayer ki par natir zot travay bann debarder, oubyen nou apel zot bann casual labour. Menm si sak fwa zot desann pour al travay konm tel zot pa pe ganny bann benefis parey en anplwaye permanan. Alor i toutafe normal ki nou ord en fason pour donn sa group travayer ki apel stevedores, en pti pe plis pour etablir sa balans an konparezon avek bann travayer permanan. Dan sa fason personn pa pe ganny kit deryer e sa gro gato ki nou apel nou lendistri lapes e bann reveni ki aktivite por, i anmennen i kapab byen ganny partaze.

Mr Speaker, la mon oule osi propoze ki an plis ki en nouvo tarif lo tonaz, Gouvernman i gete ek sa 2 lakonpannyen ki pe anploy stevedores i gete ki posibilite ki serten poursantaz larzan ki stevedores i peye koman taks, i ganny al dan sa Fon Pansyon e ki osi kapab benefisye sa bann dimoun avek en pansyon dan zot vye zour. Mr Speaker ler ou get par egzanp Hunt Deltel ki li  i pe pey stevedores pli mwens, an menm tan ki pa’n mal fer lo kote lavantir dan biznes parski 1937 ler ki in ouver ziska ozordi in grosi pour li annan plis ki 11 lezot laliny biznes ki enkli son prop lote Marie Laure  pour ebez bann solda e bann lekipaz etranze, ler i annan sanzman lo bato ; lapartman lux dan quadrant, menm si zot, menm zot prop subsidiary company ki anrezistre bato lapes ki zot osi shareholders.

Zot devret kapab fer plis zefor pour partaz en pti pe sa profi avek bann travayer ki pe anmenn sa reveni pour zot. E la mon pe refer lo en liv osi – pa en liv, en pti Newsletter  ki zot in pibliye apre 80 lannen dan biznes. E ler ou get dan sa liv ou vwar portre bann bokou bann travayer ki dan bann diferan seksyon zot bann biznes, me napa en pri mansyon lo stevedoring. Ok ? So Mr Speaker an di-z-an sa mon oule fer osi resorti ki Mosyon pe demann Gouvernman pour ede dan sa travay. Mon pa pour kontan si demen en polisi i ganny forse lo sa bann lakonpannyen ki pe zer sa biznes, e sa i anmar zot lanmen. Nou konsyan ki por Victoria i enn ki annan en repitasyon dan larezyon, Western Indian Ocean ki baze lo son lefikasite. In deza ganny dir ki lefikasite Por Victoria i pli o dan larezyon avek bann servis ki pli konpetitiv. Me sa repitasyon i kapab fasilman ganny detri si nou pa fer atansyon. Size lavi drog ki mon koleg Onorab Ferrari in koz lo la e lalkol, e prodiktivite parmi serten stevedores, parmi serten stevedores i enn ki challenging e kapab menas sa aktivite. Alor i neseser en travay konzwent ant Gouvernman ek sa bann lakonpannyen, kot tou le de kote i kapab balans keksoz e rod en solisyon pli bon pour tou le de kote.

Avek mon pou aport mon sipor pour sa Mosyon e mon anvi oule renouvle mon langazman e langazman LDS ki nou pour toultan siport lazistis e pli bon kondisyon travay pour travayer dan Sesel. Mon konnen ki annan zabitan mon distrik Beau Vallon ki dan sa domenn stevedores. Alor mon pe dir zot kontinyen sa bon travay, e nou la dan zot kote kote pour nou donn zot sa sipor. Mersi bokou.

 

MR DEPUTY SPEAKER

Bon deba in ouver lo Mosyon. Prosennman mon annan Onorab Loizeau.

 

HON NORBERT LOIZEAU.

Mersi Mr Speaker. Bonzour tou dimoun. Bonzour tou dimoun ki a lekout. Mr Speaker ozordi i en privilez pour mwan ganny en sans pour koz lo en size ki enteres mwan en kantite. Sa size enteres mwan Mr Speaker akoz ozordi Norbert Loizeau ki pe asize dan en kravat ozordi, dan Lasanble, pe vin koz koman en dimoun ki’n fer sa travay.

E parey ou konnen Mr Speaker mon ti oblize desann pour al fer sa travay akoz malgre mon sinyatir Loizeau, mon pa sorti dan en fanmir eze, en fanmir ki ti annan.  Mon sorti dan en fanmir, mon sorti dan en class travayer, Onorab Gill pour dakor ek mwan. Sorti dan en fanmir lakaz travayer. E alors Mr Speaker, mon ti enn ki pa ti ganny bann privilez dan sa pei parey i annan ti gannyen legzanp bokou in benefisye ek bann lease. Bann later pour R1 apre zot in fer de milyon mon pa ti ganny sa bann privilez Mr Speaker. I annan ki’n ganny zil pour en R1 apre in sub-lease in fer de milyon. Mwan Norbert Loizeau mon ti ganny sa sans, sa bann privilez pour mwan kapab fer sa bann keksoz, e ki mon ti anvi gannyen osi sa bann kalite privilez Mr Speaker. Mr Speaker mon ti sorti dan en fanmir class travayer.

Sa bann letan mon bann frer pli aze, mon bann pli aze zot, zot ti’n kit lakaz, frer, ser zot ti’n al reste, an deor kot zot madanm ti reste zis 3 nou ; mwan mon manman ek enn mon ser Christianne ki nou ankor pe reste avek. Mon ti bezwen desann pour al travay Mr Speaker akoz mon ti bezwen soutenir lafanmir. E parey ou konnen ler dan ou fanmir, ou papa i kontan son sopin i pa fasil. E mwan mon ti vwar mwan pe desann, pour al fer sa travay. E Mr Speaker, e sa travay anba lasose Mr Speaker, tre zenn mon’n ale. Menm ler mon ti dan bann laz 15, mon ti ankor pe lekol Bel Eau segonder nou ti desann Mr Speaker. Ler i fer mon  mazin Mr Speaker mon bann zanmi Jean-Baptiste,  bann Patrick kot nou ti desann, nou ti al dan langar nou ti al rod en pti dipen; akoz sa letan i pa ti fasil.  E nou ti vwar nou oblize desann e nou sanse Mr Speaker la mon felisit Mr Elgar, ki li i ti ansarz anba ULC, ki en zabitan Bel Air e koman i ti vwar nou, i ti fer sir ki nou pran nou kart pour nou vin travay. Mr Speaker, mwan mon kontan mon’n fer sa Mr Speaker akoz mon en boug ki ti anbisye sa letan. Mon ti en boug ki anbisye e mon lentansyon se touzour en zour pour ariv sa nivo ki mon été. Parey ou konnen, ler ou ariv en nivo, i enportan Mr Speaker, parey, permet mwan ariv lo doker fer sa pti tour d’horizon konmdir Onorab George. En manager lotel i bezwen konn lakwizin, i bezwen konn fer waitress, i bezwen konn tou sa ki pase dan en lotel.

E alors se sa ki ou trouve, mon’n oblize desann pour mwan konnen ki devret dir laba ater i dir. Akoz Mr Speaker mon’n fer li akoz si en zour  i arive ki mon sorti lo sa sez, mon ater, pour mwan i pa pour en problenm akoz mon konnen kwa travay dir.  Me i pou fermal pour bann Mr Speaker, ler zot pour sorti anler dan Zil Air zot pour tonm ater pour en gro lenpak. Zot pou kraz kraze. E mwan i pa pour en problenm Mr Speaker, sa in demontre apre ki mon ti fer 4 edmi dan Lasanble, dan 4enm Lasanble. Mon ti ganny met deor, mon ti napa en lanplwa. Mon ti tourn ater, Mr Speaker, mon ti al ankor, mon pa’n desann lasose, me mon’n fer TOU pour mwan kapab sonny mon fanmir, Mr Speaker. Mon’n fer tou pour mwan kapab debrouye, e viv en lavi. Mon pa’n mandyan personn Mr Speaker akoz mon konnen kwa travay dir.

Mon’n fer tou sa nou konnen, bann louvraz dir, menm lo car park mon’n desann mon’n ale mon’n travay. E Mr Speaker apre ki mon ti fini 2an Polytechnic dan School of Engineering, an atandan en louvraz Mr Speaker mon ti desann lasose. Sa bann letan pour ganny en travay apre ki ou’n fini Polytechnic ki pa ti fasil, i pa ti fasil ditou Mr Speaker.  E mon ti annan mon bann zanmi tel parey ki George Souris, Dan, ki ti desann lasose ki ti ankouraz mwan ti dir mwan annou desann, nou al rod en dipen. Mon ti desann Mr Speaker, ek zot, nou ti al travay. Mon ti a kapab sove al L’Angleterre al viv lo Dole ki Angle ki ti donnen parey serten in fer, apre tournen vin montre bann dimoun dan Lopozisyon, fer krwar ki zot pli konn politik parey serten in fer. Non Mr Speaker, mon ti anvi fer sa mwan. Mon ti plifere stay pour travay pour mwan pei akoz mwan mon ti annan en bi. Mon ti annan en bi pour mwan ariv kot mon ete ozordi, Mr Speaker, e pour mwan kapab debout for. Pour mwan debat pour sa kours popilasyon ki laba anba Mr Speaker. Mwan ler mon vin koze Mr Speaker, mwan mon kontan koz pour sa bann dimoun ki pe struggle. Sa bann pti dimoun parey nou dir. Mon pa kontan koz pour bann profesyonnel akoz zot, zot eze, zot, zot anler laba zot. Mon kontan pour koz pour sa bann dimoun ki’n travay dir, e ki ankor pe travay dir Mr Speaker pour nanryen ditou. Zot pa pe ganny gran keksoz pour anmenn dan lakour.

Mon ti desann mon ti al lasose e premye antre Mr Speaker i pa ti fasil. Pa krwar koman ou vini ou pe al sot lo en pti bato lapes pour al tir pwason. Ou bezwen pas dan batenm dife. Bann ki avan ou, zot ki pour al dan pti bato. E ou ler ou vini ou bezwen al dan kargo. Dan lafreser Mr Speaker. Parfwa mon konpran soufrans nou bann dimoun ki fer sa travay ler zot vini zot koze, akoz mon’n pase mon’n konnen. Mr Speaker ou bezwen al travay dan sa lafreser e sa i en danze pour ou lekor osi. Lafreser, monte lasaler. Ler ou ariv en serten letan ou lekor in fini. E mwan mon pa’n fer sa pour bokou letan Mr Speaker akoz apre mon ti ganny en travay. Mon ti al travay SBC. Mon ti al fer li zis pandan 6 a 8 mwan e  kot mon’n fer en zoli leksperyans Mr Speaker, e ozordi mon santi mwan kapab koz lo sa size ki la devan mwan Mr Speaker.

Mr Speaker mon pour koz lo sa size, akoz dan sa travay i vreman annan bokou bann danze Mr Speaker. Danze i enorm Mr Speaker.  Zis mazinen ou dan en kargo, la mon pour servi bann term ki bannla i servi lasose, e petet zot, zot pa pour tro ganny en konpran ler ou pe barot pwason. Savedir ler ou pe class pwason dan cargo. Danze i la, ta danze.

Mon’n vwar Mr Speaker, zis mazin ler enn sa gro pwason pe desann, ler file pe large, si ou pa’n ganny letan class byen pwason, i annan en pti din ler zot desann Mr Speaker zot desann parey en jet. E avan file i large, ou bezwen fer sir i degaze monte, rod tou sa pti trou dan lakal bato, kot i annan en leskalye pour ou al kasyet ou, akoz pangar ou pour pran en defet Mr Speaker. Mr Speaker lafreser i enn. Mazinen ou nou pe koz mwen 40, i tough, sanmenm sa ki mon anvi ki nou siporte ki sa bann dimoun dan sa travay, i ganny byen gete, Mr Speaker. E la ek sa travay i annan bann lekipman ki nou travay avek ; hook, en lekipman danzere. Parfwa mwan mon’n war, nou pe travay kot de zenn, dan pe servi hook pour tape sa pwason i telman dir, hook i glise pers en zanmi la o-bor son lizye.

E sa kot nou pe travay lo bwe o-bor St Anne-sa zistans ! E tousala se bann danze ki arive, Mr Speaker, e sanmenm sa ki mwan mon pe dir, ki i enportan ki sa bann dimoun i ganny gete akoz sa travay i dir. I en travay ki pa tou dimoun ki anvi fer.  E mwan mon panse ki bann stevedores pa pe ganny byen gete. Pourtan stevedoring, si sa bann dimoun ki kontribye plis dan sa Lendistri Ton. Se zot ki ti tou, se zot ki fer tou sa bann louvraz dir. Bann gro konpannyen zot, zot anmas larzan zot. E mon pour dakor avek Onorab Hoareau. Mon osi mon’n pos dan sa liv, mon’n war bann long serving staff, mon pa war enn, e doker, pourtan i annan ki’n travay avek Hunt Deltel pour plis ki 30an, 35an. L Manager is ant lo la, Ti baya lo fil. Petet nou ti ava vwar son non. Johny Quatre koman oli? Malgre sa liv i telman zoli Mr Speaker. I zoli petet son lapo i tro klate son bann, i tro sofistike pour met portre sa bann dimoun dapre konpran. Kantmenm lo en pti bout kartron zot ti a fer apre zot ti ava staple o-bor.

Omwen nou ti a vwar. Be sa bann dimoun pa rekonnet nanryen ki sa bann travay ki sa bann, ki sa bann dimoun in fer ki zot kontribisyon dan sa lendistri, zot mazin zis gannyen, ranpli zot pos, e sa bann dimoun zot reste ater toultan. Mr Speaker ozordi dernyen fwa dan meeting, nou ti ganny sans koz avek bann zofisye dan se 2 lendistri. Sa 2 konpannyen; Land Marine avek Hunt Deltel. Me e nou ti ganny lenpresyon ki zot pa pe, sirtou Hunt Deltel. Me e nou ti ganny lenpresyon ki zot pa pe, sirtou Hunt Deltel, zot pe donn R2. 65 akoz zot dir i pli fasil. I pli fasil pour konmela, pour ou tir ton. Mon konnen, vreman i pli fasil akoz konmela i annan sistenm ladal. Lontan nou trenn bake. Trenn en vit dan file zet laba, anvoy dan kargo. Konmela i annan ladal Mr Speaker.

Be ladal. Be zot konnen ki degre danze i annan avek sa ladal? En ? En ta danze i annan avek sa ladal. Sa ladal i en nespes curveyor belt. Si en pwason in pri, si en pwason in pri, ou kapab pri ou lanmen. E alors e rezon ki zot, ki mwan mon pe gannyen avek sa konpannyen Hunt Deltel, se ki i paret mwan zot pa pe fer gran larzan lo sa biznes ton. Biznes stevedoring, i paret mwan zot pa pe fer gran larzan. Me selman, ou pa pe fer gran larzan, ou pe fer en biznes ki rantab, ou kontinyen fer sa biznes ?  Be ferm sa biznes, si i pa rantab ou pa kapab pey stevedores. E la e kestyon ki nou ti demande, ti annan en group dimoun ki ti al, ki ti al fer vizit kot Espanyol, Espanyol ti menm ganny dir ki si zot, zot ki ti pe peye stevedores, zot ti pour menm donn R10 la tonn.

E ler mon demann sa msye, i dir nou non, sa politik Espanyol i manti, i manti, zot pa fer sa ta larzan. Selman zot pa fermen zot biznes, biznes i rantab menm selman pour zot i pa rantab. Bann stevedores i kontinyen travay. I kontinyen ganny servi dan bann fason ki zot apre, zot pa ganny nanryen. E la Mr Speaker, mon anvi ki, mwan mon ti a kontan ki sa louvraz stevedoring tir ton, pa vin en louvraz ki atrakte zis doker. Ki atrakte zis droger, bann senp pti endividi. Aranz zon package sa en nide ki Onorab Larue ti donn mwan, i pa la ozordi. Annou fer li attractive ki i ava atrakte plizyer lezot dimoun.  Menm en driver i kapab enterese si lapey i bon pour li ganny larzan fay koman drayver.

I kapab desann lasose vin fer en travay. En dimoun petet ki en clerk, i pa pe ganny sitan laba, me stevedoring anba lasose pe peye i desann. Fer li attractive pour tou lezot, pour tou kous popilasyon kapab desann.  Pa fer li en travay ki ou bezwen zis bann droger, or bann endividi ki petet, ki mwen eze dan lasosyete. Annou fer li pour atrakte tou dimoun.

Akoz ozordi, ozordi nou annan en problenm. Mazorite nou bann doker ansyen, nou bann dimoun ki fer sa travay, zot in, laz in antre, mon konn bokou mwan laz in antre, e nou napa zenn. Oli zenn ? Dan miting, bannla in konplent, napa travayer, sanmenm sa ki ou trouve zot in rod travayer etranze pour vini. Zot napa zenn. Ozordi zenn koman i lev-e i lo ghetto pour al tir malad. Ozordi ou desann, napa zenn. Desann lari bazar, tro bokou zenn. E la i fer mwan mazin papa Onorab Ernesta ki lotrozour in sant en sanson ki mon ti kontan ; dan Lari Bazar ou pa kapab desann en, ‘’ponnyendmen’’ – R10,- ‘’koman sava ?’’- R25, e zoli sanson. Zenn i annan anvil, zenn i dan Lari Bazar.  Selman travay lo por i annan. E mwan mon pe dir sa Mr Speaker, akoz parfwa nou konplent napa travay, me selman nou menm nou, nou donn lenfirm.

La i annan en trend konmela, en bann dan lipye, ki sa boubou ki pran 2an, 3an pour geri. Pas o-bor tou laboutik, konmela en trend, en boubou. Sa boubou pa geri zanmen li akoz zot santi zot konfortab, vin o-bor laboutik, rod en larzan mandyan, ler i ariv 5er, 6er, i annan i ale ziska 8er, ziskan laboutik fermen, zot annan zot 500, 600 roupi. Kekfwa zot santi zot konfortab, e la mon pe dir ek dimoun annou aret soutir zot. Travay i annan, desann, mon ti desann. Mon ti desann, mon ti al debrouye.  Mon ti al travay.

E ozordi, ozordi vreman, avek sa, avek sa problenm drog, napa travayer. Napa stevedores. E sa i fer mwan rapel, mazin enn mwan zwer, enn mon zwer, en zwer rasta anler Sans Souci, Joe, i dir mwan, ‘’be dimoun in nepli al lasose. I dir mwan tou nou kok i dan kazo Montanny Posée.’’ Prezan mon pa’n tro, tro ganny en konpran ki i pe dir mwan. I dir mwan, ‘’wi. Nou bann zonm i dan kazo Montanny Posée, e nou bann pti poul i larg, etranze ki pe donn bal lo la.’’ Sa boug, e mon rekonnet Mr Speaker i vre. Oli nou zenn? Oli zenn pour desann lasose pour al travay. Lontan ti annan, ti annan. Dernyen fwa mon ti al fer en travay prizon en letan pase, koridor i plen. Zoli pti garson laba. Ki zot in fer? Vole, drog apre zot al prizon. Travay i annan, zot dir napa travay, pa i annan travay stevedores?   Si mwan mon ti  kapab, me zot pa zot pour kapab desann ? E la Mr Speaker, permet mwan ozordi, i annan en gro problenm drog lasose.

Dan sa miting zot ti dir nou, drog lalkol, i annan gro problenm. E la ler mon lo sa problenm drog ek lakol, nou menm ganny dir i annan i desann pour vin travay, zis mazinen, ou pe al dan mwen 40 ou, selman gro soley deor ou pe tranble, ou pa ankor tir malad be ou pe al dan mwen 40, ou pour al mor. Nou bezwen pli serye Mr Speaker, sa bann stevedores la ki lo eroin, ki lo sepa ki zafer.  Sa travay i pa en travay ki ou al fer dan lefe. Ou pour mor laba anba. Ou pour al dan mwen 40 ou pa ankor tir malad, soley pe tape deor, ou, ou pe tranble.

Selman oule al dan mwen 40 pour al travay ? Be ou pour mor.  Sa i en lapel ki mon pe dir zot. Annou sorti. E la Mr Speaker, davans, ozordi i annan dimoun mon pe koz koumsa akoz mon anvi ki bann stevedores zot pli serye. Malgre nou pe debat pour zot kapab ganny en keksoz. Me zot, zot bezwen vin pli serye. Ozordi lasose i annan davans ki donnen. I annan dimoun i fini travay lasose en sou napa. Akoz ler i vini, i pran davans 200. Ler ou pran 200, ou rann 300, 400. Si ou pran 500, ou rann mil. Napa lot swa, zot bezwen pran. E sa i ganny deroule lasose menm parmi zot. I annan dimoun ki stevedores ki travay doker ki pa servi drog. Zot fer li vin en biznes.  Zot fer li koman en biznes. Mwan mon vini mon pa fim drog mwan, mwan stevedores mwan.  Ou demann 200, aprezan ler bato i fini, be mwan premye pour ariv o-bor pour esper ou ler ou vin pran ou larzan ; pour mwan sa ki ou drwa mwan. Ler ou fer levanter, ou napa nanryen, ou napa nanryen. Land Marine i dir nou li.

Omwen selman Mr Speaker, Land Marine li mon’n koz ek enn de stevedores Land Marine, omwen zot pe seye. Si ou pe fer, 300 tonn par lao, ou menm kapab ganny R5 par tonn, si ou travay plis ou ganny plis. Me i annan en keksoz la. Me i annan bann lezot keksoz ki bannla i dir fodre amelyore. Parey dan disel, zot in dir nou, manrmay pa oule met disel.  Be lekel ki pour oule met 40 palet disel pour 175, 200 roupi, 40 palet disel Mr Speaker, lo sak palet i annan 50 bal.  An tou i fer 2mil bal. Mwan mon pour al met 2mil bal disel pour R100 ? Pour R200 ? Non aranze, fer sir ki sa bann dimoun i ganny en bon package. E la, bomaten mon’n koz ek en garson dan mon distrik ki fer sa louvraz, i dir mwan travay container. En travay pli danzere ankor.

Pour ou mont lo sa bann container anler laba. ou konnen mannyer zot monte, dan en bake koumsa, crane i lev ou, i met ou anler. Ou fer en fos manev i savire ou mor. I annan dimoun ki’n perdi lavi. I danzere, i danzere e lapey i fay. Lapey i fay.  E ler ou ganny difikilte laba ou ganny en aksidan, i difisil, i difisil pour ou ganny en larzan. I pran tro bokou letan. Tro bokou, Onorab Ferrari in koz lo la. E pli gran danze ankor. Mon’n koz avek en garson, i osi li i fer fon kiv. Mon’n war fon kiv kot i fer mwan. Ou bezwen desann laba ler in fermen pour al tir tou sa bann pwason ki’n kole dan sa bann tiyo ammonia partou. E sa garson i dir mwan,  i dir eski ou konnen si tiyo i kase zot ferm mwan anba ?   Eski mwan, mon pour desann lasose pour al fon kiv pour mwan ganny 300 roupi en zournen. Selman si tiyo  ammonia i pete ou pour fer mwan anba ?  . Be i mal.

Pour mwan vin fer en louvraz koumsa ou merit byen peye akoz mon lavi ki an risk. E Mr Speaker, mwan toultan mon dir. Nou bezwen rod en fason pour amelyor sityasyon sa bann dimoun laba lasose. E la mon demande ki Gouvernman in fer tou sa letan. Parey Onorab Ferrari in dir, Gouvernman i bezwen zwenn avek sa bann konpannyen pour vwar ki mannyer pour aranze, akoz sanson nou pour perdi, nou pour vwar sa bann, in dir 40, konbyen Endonezi in dir ki’n vini pour travay. Nou pour kontinyen war sa bann dimoun, pe kontinyen travay.  Nou pour kontinyen war zot. Ozordi Endyen pe netway semen, mon’n pase taler mon’n war ki pe arive ek nou zenn. Nou bezwen rod en fason, pour nou bouz nou zenn.  Nou bezwen fer fason pour adres sa problenm drog, pour fer sir ki nou zenn i pran en bon direksyon. Nou annan en ta travay pour fer Mr Speaker. E la i annan en lot keksoz mon anvi abord lo la.

Dapre konversasyon ki mon’n fer en dimoun zot bann doker zot travay lo tonaz, selman bann responsab, bann responsab konpannyen zot ganny lo poursantaz zot. Zot, zot asize zot ganny poursantaz, ou, ou travay lo tonaz. Ou tir tonaz, zot, zot a benefisye lo poursantaz. Tousala bann keksoz ki merit gete. Nou bezwen, nou bezwen fer sir ki tou bann keksoz i ganny fer byen, pour ki sa louvraz i pa ava en louvraz zis bann senp pti dimoun ordiner.

E i ava en louvraz ki tou dimoun ki anvi al fer, i a kapab al fer. E i ava annan bann package ki vin avek, bann lasirans i a ganny kouver. E menm, why not sa bann konpannyen kree en fon. Kree en fon pour ki kan sa bann dimoun zot letan in fini lasose in ariv en laz, i annan en keksoz ek zot, nou kapab al dan sa fon pour ed zot. E la i fer mwan mazin enn mon dimoun aze i dan son laz retret Mr Alcindor, dernyen fwa mon ti al visit li i pa ti tro, tro byen, i ti akont mwan ki mannyer in travay lasose li. In travay fortman, ozordi i pa byen, i lo en lili kot li. Petet dan son vye zour i ti kapab annan en larzan ki sa bann konpannyen in met de-kote kot ti kapab vini ganny en pti keksoz.  Petet i ti kapab al en pti kou deor, al fer en pti tretman. Kantmenm in ariv en laz avanse, be selman zis pour li in al fer en pti tretman, i konnen in ganny rekonnet. Mr Speaker parey mon’n dir.  Mwan mon pour toultan siport tou class travayer dan Sesel.

Akoz ozordi parer mon’n dir pli boner mon dan en kravat dan Lasanble ki mwan pour oubliye kot mon sorti. Mon pour siport zot a fon. Pa zis bann stevedores.  Tou lezot dimoun, e eskiz mwan, si i annan serten dimoun petet ki’n ofanse la fason ki mon’n koze, petet bann konpannyen ki deal avek sa problenm. Me nou bezwen adres problenm mannyer i ete Mr Speaker. Nou bezwen koz laverite.  Nou pa kapab pa koz laverite fer krwar tou keksoz i ok. Kan i annan problenm  akoz mwan mon byen ek entel, entel i annan sa gro biznes. Non, nou bezwen fer sir ki tou dimoun i ganny trete parey. E pour konklir, mon anvi demann tou sa bann konpannyen ki pe deal avek sa bann zafer ton, stevedoring la. Pa mazin zis zot lekor. Mazin sa bann dimoun zot kouraz. Zot annan fanmir. Mazinen ki zot osi ler zot in pran retret parey mon’n dir sa travay i serye. Apre sorti dan fre, vin dan so ale koumsa a longer di-tan pour bann ki travay dan medikal, zot konnen ki arive. Ou ganny en pake problenm. Mwan mon konn dimoun ozordi pe ganny problenm leren akoz lafreser, antre sorti.

I annan enn de ban dimoun aze ki mon konnen dan mon distrik in fer sa travay i annan problenm zenou. Zot pa’n tap zot zenou zot, zis selman sa antre sorti dan lafreser. Alors Mr Speaker pour konklir mon anvi siport sa Mosyon e  mon anvi dir tou dimoun annou donn sipor sa Mosyon pour fer sir ki nou sekter lapes i a deroul byen e tou dimoun ki partisip ladan, pa a ganny kit ater nou tou nou a benefisye avek en pti keksoz. Mr Speaker mon a remersye ou pour donn mwan sa permisyon pour koze. Mersi.

 

MR DEPUTY SPEAKER

Bon nou ava pran en Break, nou ava adjourn ziska 11er pour nou kontinyen deba lo sa Mosyon.

 

(BREAK)

 

MR DEPUTY SPEAKER

Bon nou a kontinyen nou travay. Prosennman lo mon lalis mon annan Onorab Roucou.

 

HON CLIVE ROUCOU

Mersi Mr Speaker. Bonzour tou Manm Onorab, e bonzour tou bann dimoun ki a lekout dan lakour. Mr Speaker pour komanse, mwan mon pour donn mwan mon sipor total sa Mosyon prezante par Onorab Ferrari. En tel Mosyon i vreman annan gran lenportans. Gran lenportans pour sa anviron 700 nou bann frer Seselwa ki pe travay koman bann stevedores. Tro bokou letan, tro bokou letan, nou bann frer stevedores, in ganny kit deryer. In ganny kit deryer par Gouvernman Parti Lepep/SPPF, ki pa’n zanmen war li neseser pour defann e rod sa ki pli bon pour sa group travayer. Nou bann frer Seselwa, kot sa bann dimoun pe travay dan bann kondisyon difisil e danzere. Mr Speaker mon parkour koman, mon karyer koman ners, dan casualty, dan ICU, mon’n vwar en kantite danze ki’n arive avek sa group travayer. Bann ki’n tape ek pwason, ki’n kas lipye, ki’n kas lebra. Bann ki’n ganny pike avek pikan pwason, bann ki’n paralize, ki’n ganny tape avek bal disel. E bann ki’n menm mor, an rezilta sa bann aksidan.  Mr Speaker mon donn ou sa garanti ki i annan en kantite aksidan ki pase lo par. E sa bann stevedores wi zot pe travay dan en kondisyon danzere e difisil.  Par kont Mr Speaker, ler mon get sa travay an relasyon avek bann stevedores e avek sa bann lakonpannyen, mon krwar i annan en pe dezord. I annan en pe dezord, e i annan en pe mefyan lo tou le de kote ; lakonpannyen li menm, e bann stevedores.

Lakonpannyen zot bezwen pran zot responsabilite. Mazinen ki sa laklas travayer se bann travayer ki ase, ki osi enportan parey nivo managers endepandan, ziska ler i ariv kot zot. Parey Onorab Ferrari bomaten in dir, ler nou get sa bann stevedores ek sa kantite travay ki zot pe fer, si ti napa zot, mon krwar nou pei osi tou ti pour dan bokou difikilte. Me par kont, par kont, sa bann stevedores osi i bezwen pran responsabilite.

Ler mon’n get dan dosye Hunt Deltel, spesifikman; bann benefis ki bann stevedores i gannyen. Premyerman, in dir ki sa bann dimoun i ganny tes medikal tou le de z-an. Mwan koman en dimoun medikal, mwan menm mazinen ki 2an i en pe tro bokou lo la kalite travay ki sa bann dimoun pe fer. E ti menm kapab avans sa pli devan, 6 mwan a 1an. Mon war ki i dir sa bann travayer, i ganny lasirans. Me ki nou’n konstate se ler sa bann travayer i ganny aksidan parey mon’n mansyonnen nou vwar ki sa bann travayer i pas dan en difikilte pour ganny en pti larzan pour zot aksidan. Sa kantite lager ki zot bezwen lager pour ganny en avoka pour defann zot, alors sa bann lakonpannyen avek kot sa bann stevedores i travay, zot devret pran zot responsabilite e fasilit, e fasilit sa mouvman akoz sa ban dimoun in travay. E zot in benefisye avek zot. Mon vwar zot, zot in fer en gran keksoz lo, as if, en gran lafanfar mon kapab dir lo meals when working after 5pm.

Zot donn manze apre 5er. Sa pa nanryen koman en benefis.  Si sa bann dimoun ti pe benefisye plis an form reminerasyon zot ti ava war sa benefis aktyel. Transportasyon. Absoliman, sa bann boug in travay ek, ou pour bezwen, transport zot dan en fason ou en lot. Mr Speaker sa Mosyon pe demann en keksoz. Sa Mosyon pe demande ki nou valoriz e donn valer sa travay danzere ki sa bann stevedores pe fer. Mr Speaker sa bann dimoun i travay dan lafreser mwen 40 Degre. Zis mazinen mwen 40 Degre. Pa en keksoz fasil. Sa bann dimoun i Zis mazinen mwen 40 Degre. Pa en keksoz fasil. Sa bann dimoun i travay lo crane pour mannev sa crane. Pa en travay fasil. Sa bann dimoun pe lev bann pwason ki pa ni pez ni 5 kilo, ni 10 kilo. Paray Onorab Loizeau ti dir bomaten sa bann dimoun pe desann dan kiv anba laba dan sa fonder pour zot al tir bann pwason ki’n kole.

E parey nou’n tann dir bomaten se zis mazinen enn sa bann tiyo ammonia i kase. Alors ki pour arive avek zot, nou pour ferm zot anba e les zot mor. Alors pour zot desann al travay pour R200, R300, non sa pa akseptab.  Sa pa akseptab, Mr Speaker, en tel, sa bann tel sityasyon danzere kot nou bann frer pe travay ladan nou koman en Lasanble, nou koman en Lasanble, nou koman en Lasanble responsab, nou bezwen met sa bann dimoun a ker.

Met sa bann dimoun a ker e war valer zot travay. E sa Mosyon pe demann en keksoz spesifik. Alor annou donn zot, zot valer. E mwan koman Manm elekte pour Plaisance, mon osi tou mon pour donn mon sipor. Mr Speaker dan mon distrik mon osi, mwan annan bann doker. La mon mazin mon bann frer, bann zonm debrouyer parey Yannick, Nabil, Davis e spesyalman Gilly. En zonm ki ankor pe desann toulezour apre plis ki 25an ki i travay. Mon pour tous en pti bout lo sa ki Onorab Loizeau ti dir bomaten. En boug ki pe travay plis ki 25an, ozordi ler mon get dan zournal Hunt Deltel mon ti a zis kontan. Mon ti ava zis kontan mon ti ava war son portre koman bann ki’n travay pour en kantite lannen. Ankor nou war sa bann dimoun i ganny me a lekar.

Mr Speaker i fer lapenn ler mon mazin mon bann frer ki par kont zot pe met apepre plis ki san ton disel, 100 tonn disel lo en bato pour R200, 100 tonn pour R200. Mon demande lekel la anndan ki ti pour al travay pour 100 tonn disel, pour met 100 tonn disel pour R200. Konmdir en lot frer Belvédère ti dir mwan ki mannyer en lakonpannyen in kapab aranz bann gro,  gro langar pour met disel ladan, nou, nou ankor lo R200. Alors mon retourn ankor ver bann lakonpannyen, retourn ankor ver bann lakonpannyen pour nou ed nou bann frer, ed nou bann travayer, nou bann stevedores, pour nou donn zot, zot merit.

Mr Speaker mon pa pour kapab kontinyen, san ki mon tous lo bann frer stevedores. Zot pour bezwen realize, wi sa travay i danzere, wi sa travay i difisil, me zot koman bann travayer, zot koman ban travayer oli zot responsabilite?

Ler nou isi dan Lasanble nou pe lager pour donn zot en bout pli meyer, mon pa pour kapab aksepte ki zot, zot asize e zot pa ed zot lekor.  Mon  pa pour kapab aksepte ki zot sa koman zot travay zot pa met lanfaz lo lenportans.  Wi, nou pe debat pour zot ganny en pli meyer.  Me eski zot, zot in pare pour sa saler ki nou pe lager oubyen sa ki zot pe gannyen la pour fer li vin enportan pour sa kantite travay ki zot pe fer. Nou’n vwar ban challenges ki sa bann lakonpannyen in koz lo la. Labi drog, labi lalkol, vole, e menm zot, zot menm deside ki kalite kargo ki zot pour desarze, si disel, oubyen si ton.

Mon bann frer stevedores. Ankor enn fwa, mon konpran difikilte, me zot koman travayer ankor mon met lenportans lo la. Konn zot responsabilite, konnen kwa ki zot anvi. Drog napa lenportans, napa an avan ladan. Ou pa pour kapab, ou pa pour kapab avan ou al travay, ou’n bezwen pas lo ghetto, rod ou laliny. Ki mannyer ou pour kapab travay.

Ou pa pour kapab travay bomaten anba lenfliyans lalkol. Mon’n dir ki kantite danzere, i danzere. Mon’n dir ki kantite aksidan ki mwan mon’n war alors koman travayer ou pa pour kapab al travay anba lenfliyans. Ou pa pour kapab al travay pe vol keksoz kanmarad, oubyen vol keksoz lakonpannyen. Ou pa pour kapab koman en stevedores ou deside ki ou pour desarze oubyen non. E travay se en travay. Si ou’n deside pour travay koman en stevedores ou pour bezwen konn tou, tou depi A ziska Z, ki ou devret fer, ki ou pa devret fer. Me par kont, mon revin ankor ver bann lakonpannyen. Nou bezwen donn sa lenportans, valoriz sa bann travayer. Ed zot, ed zot, donn zot sa lankourazman ki sa bann boug apre ki zot in travay 20an, 25an, 20an, 25an, ler zot ava pe pran zot retret, en early retirement kot zot ava vwar sa benefis, kot zot in travay, zot ava realize, zot ava realize ki wi apre 20an, 25an, mon’n vwar en rekour. Nou bann, bann lakonpannyen kot i benefisye en kantite, en kantite menm avek travay ki sa bann dimoun i fer, menm si kekfwa dan en poursantaz kot nou kapab mazinen, si zot pe benefisye at least a 25 a 30 poursan travay sa bann stevedores, rann sa bann dimoun en pe sa bann benefis, rann sa bann dimoun ki apre sa kantite travay apre sa difikilte, apre sa travay dir, zot ava war en rekour. Nou pa pour kapab aksepte ki sa bann dimoun apre tou sa kantite lannen, zot napa nanryen.

Mr Speaker, ler mon koz lo stevedores, mwan mazin en pti sanson David Philoe kot i ti dir ; ‘’Mon bourzwa donn mwan valer mon travay. Pa bezwen profit sa lafebles. Mwan osi mon en imen parey ou menm.’’ E i santi douler parey nou ou menm. Alors mon pour redemann ankor sa ban lakonpannyen ki anploy sa bann stevedores. Annou get sa bann dimoun. Annou donn zot lenportans, annou donn zot, zot merit. E dan lot kote. Bann stevedores, travay for, travay for ki ler nou, nou ava pe lager la, le nou, nou ava pe lager la, zot os, zot ava tou le de kote ava benefisye. Mon tande, mon tande ki i annan bann paran, bann fanmir, kot fanm, zanfan, i vin lo baro, pe vin lo baro pour vin pran larzan. Akoz zonm in pran davans parey Onorab Loizeau ti pe dir bomaten. In pran davans drog. Ler ou, ou fini travay, ou napa larzan pour anmenn dan lakour. Donk ou pour zis pey sa ki ou dwa, ou napa larzan.

Mon frer stevedores mazin zot fanmir, mazin zot madanm, mazin zot zanfan ki leker e kase akoz zot napa nanryen. Mr Speaker, pour konklir, pour konklir mon ti a kontan, mon ti a kontan, e parey Mosyon pe demande ki Gouvernman e sa  bann lakonpannyen nou tonm lo en lakor, zot tonm lo en lakor, ki nou ava ogmant tonaz, nou a ogmant fasilite, nou a ogmant fason fer ki tou travayer, ki tou stevedores, i ava benefisye e lakonpannyen i a benefisye egalman. Mersi Mr Speaker.

 

MR DEPUTY SPEAKER.

Mersi Onorab. Onorab Sebastien Pillay.

 

HON SEBASTIEN PILLAY

Mersi Mr, Mr Deputy Speaker. Mr Deputy Speaker sa Mosyon devan nou i pa enn ki anmenn en size nouvo devan nou Lasanble. Mon dir sa Mr Deputy Speaker akoz a plizyer repriz dan lepase, nou’n tann koz lo sa size isi dan nou Lasanble, e in en size ki malgre ki nou bann koleg lo lot kote latab pe fer nou krwar pour dir pandan 40an, se Gouvernman ki’n les bann stevedores dan zot kondisyon ki zot ladan. Mon krwar zot pe mislead bann dimoun pe ekout nou. Akoz zot bezwen konpran en pti listwar, listwar sa sityasyon ki egziste an se ki konsern bann stevedores, bann dockers, bann winchman, bann longshoreman, bann travayer por.

E pour nou fer Mr Speaker permet mwan mon pour fer en pti tour dan lepase pour nou konnen, pour nou kapab konpran egzakteman akoz nou’n ariv kot nou’n arive ozordi. Premyerman Mr Deputy Speaker, Gouvernman i annan diferan lenstans kot in bezwen fer bann sanzman dan lafason ki i konfigir nou lekonomi. E enn bann sanzman ki ti arive presizeman 1994, se ler en konpannyen ki ti apel Union Line Switch Company, oubyen ULC ti ganny ranplase par 4 lezot lakonpannyen lo por atraver privatizasyon pour fer bann travay. Mon dir sa Mr Deputy Speaker akoz sa i pour reponn serten komanter ki’n ganny fer par serten Onorab avan mwan kot ki rol ki Gouvernman i annan pour zwe. Si par egzanp ozordi, dizon sa Mosyon ti vin devan nou Lasanble, e ULC ti ankor pour Gouvernman, nou garanti, nou garanti zis  parey bann lezot eleman ki nou Lasanble in avans devan Gouvernman, nou garanti ki pour dir ti pour annan en reaksyon direk, lo sa ki pe ganny diskite dan nou Lasanble, akoz zisteman ti pour sete Gouvernman ki ti pour pe kontrol travay oubyen sa bann lakonpannyen ki lo por. Me malerezman, malerezman, i pa le ka.

Le ka i reste ki ozordi se bann konpannyen prive ki annan zot prop  azanda biznes ki pe manage sa bann aktivite, sa bann stevedores e anplwaye avek sa bann konpannyen prive. E se la kot mwan mon pour, mon pour difere avek Onorab Loizeau, kot nou napa okenn leskiz pour nou demande si nou pe koz lo rol ki sa bann konpannyen osi i bezwen an relasyon avek sa bann travayer, ki zot, zot anploye. Akoz i enportan pour nou met an perspektiv lefe ki ozordi nou bann stevedores nou bann dockers i travay pour en bann lorganizasyon, e sa lorganizasyon i annan en plan biznes e nou bezwen vwar prezan atraver sa Mosyon ki nou pe avanse ki mannyer nou kapab efektivman enfliyans konteks ki ekziste ozordi pour fer ki zisteman sa bann dimoun ki nou oule ed zot, i ganny en meyer sityasyon travay, e zot trouv apre ki zot in fini travay dan en meyer kondisyon.

E mon krwar pour nou kapab fer sa, e la kot mon pour difere avek Loter Mosyon, nou bezwen fer sir nou prezant bann fe parey zot ete ozordi, pour ki nou napa okenn brouyar dan direksyon kot nou oule ale. Mon dir byen direksyon Mr Deputy Speaker akoz i enportan pour mwan fer referans avek lefe ki dan 5enm Lasanble i annan en Manm presizeman Onorab Emmanuel Fideria ki’n al plizyer repriz, anmenn plizyer kestyon lo sa size stevedores, me malerezman pandan sa letan lefe ki Lasanble Nasyonal pa ti pas live, lo radyo e lo televizyon i pa ti posib pour laplipar dimoun tann Mr Fideria a sa letan ti pe dir.

E la mon pour amenn Lasanble, Lasanble lo le 5 Zilyet presizeman an 2016, kot Onorab Fideria ti dir, ‘’mon pa pour manke pour koz lo bann dimoun parey stevedore ek bann maren ki travay lo bato ton, sa louvraz kot preski 95 poursan nou lenportasyon  i  vin par bato. Nou pli gro lenportasyon ton, swa bann prodwir pwason, plizyer mil ton in ganny desarze sirtou lo por  nou demande lekel ki fer sa travay. ‘’

E Onorab Fideria i kontinyen pour dir kondisyon travay sa bann dimoun sa bann stevedores, sa bann doker si mon bann koleg lo lot kote latab ti’n pran sa letan pour zot fer en pti resers, zot ti ava remarke ki dan sa Mosyon i presizeman kontenir ki ozordi Onorab Ferrari in vin dir nou ki Gouvernman Parti Lepep, oubyen sa Lasanble ki la pe remedi en kantite keksoz ki dan le pase bann lezot Lasanble pa’n zanmen port latansyon lo la.  E mon krwar i enportan pour nou pa bouy sa akoz nou fodre konpran ki nou tou nou oule al dan menm direksyon san ki nou anmenm bann pwen ki kapab diviz nou ler nou pe ariv lo sa direksyon.  Akoz mwan Mr Deputy Speaker, personnelman mon siport sa Mosyon. Mon siport sa Mosyon pe lefe i reste ki nou bezwen al dan en fason ki bann Mosyon par le pase pa ganny afekte. E ankor enn fwa mon oule fer Lasanble note ki an 2006, sa letan Dokter Herminie ki apre ti vin Speaker nou Lasanble ti anmenn ankor enn fwa en Mosyon ki tret menm size. Ki vedir ki a plizyer repriz bann Manm ki’n dan Parti Lepep ki ozordi i en Gouvernman Parti Lepep, in a plizyer repriz anmenn Mosyon, anmenn diferan kestyon lo pour sey ede improve kondisyon ki bann stevedores i trouv zot ladan.

Se alors i enportan ki nou pa mislead the House pour fer krwar pour dir lo en kote nou, nou oule anmenn sa lager, lo lot kote nou pa enterese. I pa le ka ditou, annefe mon pa krwar pour dir sa i the extent, oubyen i sa zistans ki nou Lasanble i kapab ale. Mon krwar nou Lasanble i kapab al bokou pli lwen, e la mon pour eksplike ki mannyer nou Lasanble i kapab al bokou pli lwen Mr Speaker. Akoz mon dir sa set akoz nou lo sa kote, nou pa krwar dan zis fer en Mosyon e demann bann lakonpannyen pour fer isi, pour fer laba.

Mon ti a kontan fer Onorab Ferrari remarke an pasan ki enn bann keksoz ki’n koz lo la par egzanp an se ki konsern Lalwa Taks par egzanp. Ler mon dir ki nou bezwen retir sa bann mis-konsepsyon pour fer sir ki nou al dan en laliny dwat e nou vreman ariv lo en solisyon ki bokou lezot in seye dan lepase, me avek kondisyon, avek sirkonstans nou pa’n kapab arive, e ki nou ozordi, mwan lo sa kote latab mon pe dir nou annan en solisyon ki pour kapab ed nou. At least ariv a en pwen kot nou kapab donn sa bann dimoun ki fer sa louvraz, en lavi apre ki zot in fer sa travay, akoz nou konnen pour dir sa travay i en travay vreman difisil.

Mr Deputy Speaker, mon dir sa akoz mwan menm mwan personnelman mon konn plizyer dimoun ki’n travay ULC enn mon frer in travay ULC.  Son mon konnen ki mon pe koz lo la ler mon koz travay e natir sa travay e lefe ki sa travay i annan lo zot. Sa letan nou tou nou rapel ti annan bann longshoreman ki ti mars avek zot soz, zot ti bezwen al avek zot lenstriman i dan lakour. Konmsi i montre ou pour dir whilst ki keksoz in evolye. Whilst ki keksoz in evolye, sa bann konpannyen in evolye, bokou zot in branch out dan diferan aktivite. Lefe i reste ki sa louvraz, natir sa louvraz, konteks sa louvraz pour en dimoun ki pe fer li, e lenpak ki i annan lo sa dimoun ler i pe fer sa louvraz i enn ki sibstansyel lo son lasante, e lo long term. E mon krwar Onorab Ferrari dan son Mosyon e dan son lentervansyon e mon ti a kontan ki petet si i esey adres dan son konklizyon, ou pe mank en pwen enportan, en pwen fondamantal, se ki arive apre ki ou’n fer sa ki an Angle ou dir sa back-breaking job ki sa bann stevedores, sa bann winchman, ki sa bann doker i fer.

E la kot mwan, e la kot mwan mon oule propoz, mon oule propoz en serten solisyon ki ava permet nou ariv dan en direksyon. Mr Deputy Speaker zis pour fer konpran par egzanp ozordi, nou pe koz lo Lalwa taks. E nou’n koz lo revizyon dan taks. Mwan personnelman mon pa krwar se sa, se sa direksyon. Akoz par egzanp ou’n quote en fee, en figure par egzanp kot en dimoun i fer R9mil, i pey 15 poursan taks. I pa le ka, akoz non, non, i pa le ka, e si i le ka alors then sa lakonpannyen pe enplimant en rezim taks ki pa an konformite avek sa ki SRC ozordi in met an plas akoz, i kler ki si en dimoun pe ganny li par anba, par anba, 10mil ekek, par anba, ok, ler i ganny 8, 550 i napa taks. Ler ou monte taks i ganny kalkile par enformel.

Par egzanp en dimoun ki ganny R9mil  pour pey li zis 0.05 poursan taks, 0.05, savedir 5 poursan taks. Ok. So ou vwar poudir la ankor enn fwa kot lenformasyon, ou kapab al lo website SRC la konmela, e regarde ou a ava vwar poudir when it comes to income and monetary benefits tax, i kler. Alors i kler pour dir si i annan nouvo keksoz ki pa pe mars byen, then i pa pe mars byen lo nivo la fason ki …me par kont si i desot sa threshold 10mil roupi, then sa rezim taks 15 poursan i aplikab.

Alors mon krwar se sa ki nou bezwen fer sir ki nou ganny tou nou bann lenformasyon byen e mon apresye lefe ki ou’n dir i pa tou lenformasyon ki ou pour ganny byen  malgre ki mwan lo mon kote mon pour dir ou nou Standing Orders i fer kler ki si ou pe fer en statement savedir ou bezwen kapab substantiate me ou’n fer en Disclamer alors mon konpran sa.

Ou’n dir pour dir pa tou lenformasyon ou pour donn nou ki pour neseserman sa lenformasyon pour sa. Me lefe i reste ki ozordi i annan en formil ki ganny servi pour kalkil taks apre ki sa dimoun i ganny larzan par lao. Me prezan, me prezan annou regard solisyon. Nou kapab koz lo logmantasyon saler pour sa bann stevedores, nou kapab koz lo la. Me si nou pour koz lo, nou kapab koz lo la, me si nou pour koz lo la nou osi pour bezwen koz avek sa bann dimoun ki anploy sa bann stevedores si zot, zot pare. Si zot, zot dan en pozisyon finansyel zot pare. Nou’n tann bokou koze lo lot kote kot zot in koz lo rol ki Gouvernman i bezwen zwe.

Byensir Gouvernman i kapab zwen en rol fasilitater, i kapab zwen en rol regilater. Me malgre ki Gouvernman pour zwen en rol regilater, i pour still up to sa bann konpannyen osi pour zot enplimant regilasyon ki ganny met devan zot.  E i pour still annan en negosyasyon ki pour bezwen ganny fer ant Gouvernman avek sa bann lakonpannyen pour nou kree kondisyon, pour nou kree en si ou kapab dir en konteks kot i a permet nou annan solisyon pour sa problenm ki pe de zour an zour pe konmans afekte nou en pe plis. Prezan ler nou vin lo sa size anmenn travayer etranze pour fer sa louvraz. Konnen nou pa le sel pei ki pe fer fas avek sa bann crisis dan serten domenn. Alors ki nou kapab fer ? Alors ki nou kapab fer e la kot mon dir kot nou Lasanble i kapab al pli lwen. Ki nou kapab fer i senp. Nou kapab anmenn, premye solisyon, nou kapab anmenn akoz mon konnen pour dir lo lot kote zot anmenn Lalwa ki protez ki al ver offshore, e offshore nou konnen parey Onorab Loizeau in dir bann profesyonnel, bann dimoun ki en pe pli eze, nou kapab osi anmenn en Lalwa ki deal avek bann dimoun ki mwen eze, parey Onorab Loizeau in dir e se sa propozisyon ki mwan mon oule fer avek zot ozordi. propozisyon nimero 1 koumsa ; si nou dir ok, stevedoring, si nou oule komit nou lekor avek sa lo tou le de kote latab, nou oule al dan sa direksyon, stevedoring par egzanp i enn sa bann ka travay ki nou rezerve zis pour Seselwa.

Ki pour arive, eski sa bann konpannyen pour ganny ase Seselwa pour zot kapab fer fonksyonnen por ? Probableman non. Alor sa ti mon premye lespri ki mon’n mazin lo la, eski nou devret restrikte sa kad travay pour Seselwa e mon krwar non. I montre ou pour dir non akoz sa bann lakonpannyen pour ganny afekte. Hunt Deltel pour ganny afekte, Land Marine pour ganny afekte. Akoz mon krwar pour dir bann dimoun ki’n fer sa bann konpannyen zot bann businessman serye e zot envestir, zot fer zot larzan dan en fason e zot rod tou fason pour zot osi akoz zot napa zis stevedores zot anploye.

Zot anploy plizyer dimoun. E tou sa bann dimoun i depan lo performans sa konpannyen. Set alor kot nou bezwen prezan regard kote ki nou pour kapab provide en solisyon ki a permet sa bann dimoun ki fer sa louvraz pli tar zwir en lavi ki parey nou tou nou konnen i en lavi ki apre sa kalite ki zot in fer i pa’n afekte sa kantite. E sa pour sa kot mon propoz en Stevedores Benefits Act ki nou Lasanble e nou lo sa kote latab nou pour travay lo en Private Members Bill. Annefe nou’n deza an diskisyon avek sa, i ti en nide ki’n annan par bann Manm dan Lasanble oparavan in en nide ki Onorab Fideria in koz lo la, i en nide ki nou’n koz lo la isi lo sa kote latab kot nou’n dir ki nou bezwen Stevedores Benefits Act.

Akoz nou bezwen Stevedores Benefits Act.

Akoz dan Sesel i annan 4 travay ki natir sa travay i fer ki ler sa dimoun i fini fer sa travay, how is he left, ki mannyer i reste li? Ki mannyer i ete konmsi ler i fini fer sa travay. Zis parey nou pe koz pour teachers parey nou pe koz lo dimoun, e Stevedores Benefit Act i a permet nou, pour nou etablir en kalite benefis ki bann stevedores, bann dimoun ki pe fer sa louvraz ler zot konnen pour dir zot pour fini sa  travay, zot pour nepli kapab travay, zot pour ganny serten benefis.

Akoz fodre i kler, fodre zot note an pasan ki in annan plizyer, a plizyer repriz mezir ki Gouvernman in sey pran pour li minimiz lenpak lo bann stevedores par egzanp ler napa bato. Welfare Agency sey step- in. me sa bann mezir i pa’n zanmen konfigire dan en fason formel, pour ki nou kapab swiv li a longer di-tan, evalye li, regard la fason i pe fonksyonnen, e amann li, fer li vin pli azour avek ler konteks i sanze. Me par kont, si nou annan en provizyon Lalwa ki regard benefis sa bann dimoun e zisteman kot nou pe dir pour dir sa bann lakonpannyen i kapab fer en serten kontribisyon anver sa benefis ki pa vedir pour dir sa stevedores demen i pour ale i pour tir tou son benefis i pour annan en letan zis parey en pansyon, i pour annan en letan kot ler i konnen pour dir i nepli kapab travay, in donn tou, in fer tou, in performen pour ki son, son lakonpannyen in avans devan, i konnen pour dir i annan sa pour li. Se la kot mon krwar nou Lasanble akoz ou menm ou’n dir pour dir nou Lasanble pe al en serten zistans. Me mwan mon santi pour dir nou Lasanble i kapab al pli lwen.  E mon krwar la anndan la mon annan lagreman tou dimoun lo tou le de kote latab ki nou kapab move dan sa direksyon.

E akoz nou kapab move dan sa direksyon set akoz ozordi nou pe realize pour dir la kantite dimoun ki pe fer sa louvraz pe diminyen e nou bezwen osi asire ki demen i annan dimoun ki kapab vini, vin fer sa louvraz. Ok. Now, mon krwar pour dir, nide deryer sa Mosyon se pour nou kapab ganny en solisyon ansanm. Petet mon’n dir serten keksoz ki serten bann Manm lo lot kote latab in santi pour dir mon pe sey fer serten pwen politik, i pa mon lentansyon, me in toultan mon lentansyon in toultan mon lentansyon, pour mwan montre nou Lasanble pour dir si nou fer en keksoz, nou bezwen fer li san ki nou met bann keksoz, bann eleman ki kapab afekte solisyon ki nou kapab anmennen. E pour mwan solisyon se ki nou Lasanble i go the extra step pour ki nou kapab etablir formelman en kad Legal pour benefis sa bann stevedores. Pa zis vin koz lo la, me aktyelman fer li vin en formil dan Lalwa Mr Speaker. E se sa, se sa rezon det Mr Speaker deryer sa ki mon pe dir ozordi. Ou konnen Mr Speaker, nou’n dan en diskisyon nou de Onorab Ramkalawan lo form ladres ki nou pour servi, pour ou ler ou dan sez, nou of different schools of thoughts, ou vwar en moman donnen mon’n apel ou Mr Deputy Speaker, en moman donnen mon pe apel ou Mr Speaker, so mwan mon pour apel ou Mr Speaker, ler ou asiz dan sez baze lo nou Standing Orders pour fer ki nou an konformite mon ti a demann lezot Manm osi pour fer parey.

Zis an konklizyon mon konnen Onorab Henrie in apresye mon lentervansyon mon war li pe mazin en Lartik pour li al mete dan son Zournal, mon felisit ou lo la Onorab Henrie, mon konnen ou pour ekrir en bon Lartik lo mwan, mon’n fer en bon propozisyon. Mon krwar se sa nide, se sa nide, Mr Speaker. Nide se ki nou anmenn sa Lasanble sa zistans ki nou kapab anmenn li pour li anmenn solisyon pour en group dimoun ki bokou letan nou tou nou’n koz lo la.  E nou’n sey rod solisyon pour zot e nou’n vwar li difisil.

Atraver sa propozisyon nou pa pe atak okenn konpannyen, nou pa pe atak Gouvernman me nou pe dir tou dimoun vin ansanm, converge, vin a en pwen kot nou tou nou kapab regard sa group dimoun e dir, a demen stevedores i fini travay in ariv 50an, son problenm spine pa sitan ki i pa kapab travay, me at least selman i konnen pour dir be mon’n travay, mon’n donn tou, mon’n al lo sa bato, mon’n tir tou sa ton, mon’n fer tou sa travay. Me demen mon kapab garanti ki mon annan en pti larzan la ki mon kapab gannyen mon kapab servi.

Akoz nou pa oule ki en stevedores son sel rekour se invalidity benefits ler i ariv en serten laz.  Se sa ki mon pa anvi. Se ki mon krwar ler mon’n asize mon’n mazin lo sa Mosyon e nou’n diskite isi. Mon krwar pour dir se sa kot nou kapab ale. E si loter Mosyon i en, sa i war sa i en keksoz ki li i apre pour komit son lekor pour en solisyon tanzib pour li siporte, mon krwar nou kapab anmenn en Private Members Bill devan sa Lasanble, e nou kapab al dan sa direksyon.

Avek sa Mr Speaker mon oule dir pour dir in en plezir ankor enn fwa ozordi Mr Speaker pour nou koz lo en size kot nou tou le de kote latab nou tonm dakor. In en plezir pour nou koz lo en size zis parey yer ler nou ti pe koz lo la fason ki lapolis i reponn bann kestyon kot nou santi ansanm, par fwa i annan serten keksoz kot nou met tou politik de-kote, me nou get sa bann dimoun ki ‘n met nou la, ki nou reprezante. Nou rol reprezantasyon anver sa pep.

E se sa kot mon pe pran mwan lentervansyon ozordi. e mon krwar pour dir si nou tou nou pran nou lentervansyon dan sa loptik parey Onorab Henrie i kontan dir Mr Speaker, mon krwar nou kapab, nou kapab nou koman en Lasanble ariv ver bann solisyon tanzib ki a permet nou provide bann larepons pour bann kestyon ki’n difisil pour nou kapab rod solisyon. Mersi Mr Speaker.

 

MR DEPUTY SPEAKER

Mersi Onorab Pillay. Onorab Afif.

 

HON AHMED AFIF

Mersi Mr Speaker. Mr Speaker sa Mosyon ki devan nou, i pe demann Gouvernman avek bann lakonpannyen konsernan pour zot ansanm tonm dakor lo en nouvo tarif ki servi pour pey sa bann travayer. Alor mon tou dabor Mr Speaker, mon ti a kontan partaz en pti lenformasyon sirtou pour bann dimoun ki pe ekoute lo ki sa travay stevedore i ete, e ki mannyer ou sitye dan konteks aktivite dan sa lendistri endistriyel sirtou kot i konsern ton.

Alor pour komanse, Mr Speaker, dan nou Sekter Lapes Endistriyel ozordi i annan omwen 4o bato European Union ki pe lapes answit i annan apepre 11 a 13 lezot bato. Sa bann bato i en kalite lapes spesyal, servi lasenn, nou pa pe koz travayer stevedore parske  zot pa ankor antre dan sa zwe la. Sa se bann maren ki enn de Seselwa i lo la, avek bann maren etranze ki lo la ki al fer lapes.  Sa bann bato i rantre dan Por Victoria, e zot desarz 380mil tonn dan por Victoria. Anviron sa kantite. Sa aktivite ki zot pe fer pour anmenn tou sa ton dan nou por, rezilta se i annan leksportasyon, parske i annan en lizin ton isi ater, e anviron 12mil container 20 pye i ganny eksporte sorti Sesel avek bann prodwir abor. Dan sa sekter endistriyel i annan apepre 1600 Seselwa ki travay. Sa biznes leksportasyon, bwat ton lizin i kontribye an revini $300milyon tou le lannen.

An term license ki nou pe donn bann bato ki vin lapes dan ou delo anviron $10milyon, e byensir ler en bato i vin dan por i rod ravitayman i bezwen fuel par egzanp. SEYPEC li i pe vann anviron $160 milyon lavaler fuel, e byensir ler i vann i fer en profi. Mon pa konnen ki son profi me mon estimen omwen 10 a 15 milyon Dolar profi. E answit i annan tou kalite lezot servis ki ganny asosye avek bato endistriyel ki vin dan ou por ravitayman par lezot lakonpannyen, fournisman delo, netwayaz eksetera.

Ler ou get li an gro sa lendistri, i pe kontribye an term reveni pour nou lekonomi, anviron $1milyon par zour. I en kantite larzan, $1milyon par zour. Alor i en lendistri enportan. i siport stevedore, i siport tou larestan servis, maintenance, bato, reparasyon lasenn e menm par fwa i annan bann travayer ki travay lo bato ki bezwen deplase zot reste dan lotel. I annan bann management ki vin pour bann bato, zot reste isi, zot depans larzan. Alor i en bon lendistri. Me Mosyon ozordi lo stevedores. E stevedore vreman dan por ler nou gete, i annan 3 lakonpannyen ozordi, i pe ofer sa servis, i annan Land Marine, ki li i annan apepre 262 travayer ki travay ek li, me selman dan nenport ki moman 60 ki pe travay, me 262 dapre lenformasyon nou ti gannyen ki anrezistre. Answit ou annan Hunt Deltel ki ti annan plis ki 500 travayer anrezistre avek li me 450 apepre ki ti pe travay nenport ki ler.

Epi nou annan 3enm lakonpannyen se i travay lot kote ki relye avek …mon krwar i apel Ile Du Port Handling Services. Li mon napa bokou lenformasyon lo li. Me zeneralman ki nou Li mon napa bokou lenformasyon lo li. Me zeneralman ki nou pe vwar anviron 800 posibleman ziska 1000 travayer, i paret mwan laplipar Seselwa ki anploye ki pe ede dan en lendistri ki pe anmenn plis ki $1milyon par zour. Pa neseserman zis ek stevedore me an gro. Alor kestyon ki mon panse Onorab Ferrari ti’n mazinen, e ki bokou i koz lo la – eski, e nou pe get dan sa landrwa tre spesifik ozordi kot stevedore i konsernan, eski sa bann dimoun pe ganny en bon deal. Se sa vreman ki nou pe gete. Alor mwan mon’n profite pour mwan set fer, senplifye sa problenm pour pran en bato kip e antre dan por e gete konbyen sa baro pour pey sa lakonpannyen ki ater, pour de4bark ton ki abor, pey son travayer e get konbyen lakonpannyen ki li i anploy travayer i gannyen dan sa legzersis. Alors si nou pran par mwayen, en bato ki antre dan por avek 1200 tonn, 1200 tonn pwason ; e i pran li 3 zour pour li desarze.

Mwan mannyer mon’n ganny konpran, mon pa oule fer krwar mon eksper dan lapes, me lenformasyon ki nou’n gannyen se i annan anviron 37 dimoun stevedore ki’n ganny sa travay pour zot desarz sa bato. E sa bann lakonpannyen ki vin, ki vin pran servis avek sa bato ton ki pran servis avek lakonpannyen lokal i pey zot anviron 8 par fwa 10 Euro par tonn ki zot pe vin debarke. Alors si nou pran 1200 tonn, e ou miltiplir par dizon EU 8. 50, ou pe ganny ou en total, R162mil Sesel ki sa bato i pour bezwen peye pour li ganny servis stevedoring ater. Alor ler ou pour get sa larzan e ou gete prezan stevedore li, dan sa R162mil konbyen stevedore pour gannyen i annan 37 zot ki pour ganny sa travay pour al desarz bato. Depan lo lakonpannyen Land Marine ek Hunt Deltel sakenn i annan bann diferan tarif, be annou pran en tarif par egzanp ki pli ba ki R2.65 par ton, e ou annan 37 travayer, e ou annan 1200 tonn, i vedir ki sa bann travayer pour anmenn dan lakour R118mil. Bato li in pey lakonpannyen R162mil. E alor sak travayer dan 3 zour in anmenn zot R3,180, dan 3 zour. Ki vedir zot in travay e pour sak zour zot pa pe travay 8 erdtan, zot travay 4 erdtan edmi dan shift, parski i en louvraz difisil.  I en louvraz ki en pe riske, e bann lakonpannyen pa ankouraze ki zot travay 8 erdtan parski i tro bokou souvandfwa.

Alor vreman, si ou gete konbyen zot pe gannyen par erdtan baze lo lenformasyon ki nou’n gannyen i arive ziska 236 roupi par erdtan pour en travayer. Me en travay ki dir. Alor kestyon ki nou pe demande e nou konn minimum wage Sesel ki anviron 35 roupi, e nou vwar ki kantite travay sa bann dimoun i fer ki kalite travay ki zot pe fer, e ki kantite larzan zot pe anmenn dan lakour.

Alor kestyon ki nou bezwen demann nou lekor – eski, eski sa laranzman i zis ? En laranzman kot en bato ki’n in vin ek son pwason, in pey en lakonpannyen lokal, plis ki R160mil, sa lakonpannyen ki pe resevwar sa i pey son travayer R118mil, byensir i bezwen reste en pe pour li parski li i bezwen pey tou bann lozistik ki asosye sa. I donn lenz, i donn bogi, i donn legan, e i donn proteksyon eksetera. Se sa ki nou bezwen vreman demann nou lekor – eski sa i en keksoz ki zis, e eski i en keksoz ki soutenab pour kapab fer sir pour dir lendistri i kontinyen marse ? Ou pour ganny diferan kalite larepons. si ou pour demann travayer, travayer akoz son risk, akoz sa louvraz pa garanti parski zour napa bato, napa travay. Akoz i en louvraz difisil.  Travayer pour dir ou si ou kapab donn plis, byensir i pour kontan. Lo lot kote si ou demann lakonpannyen ki dan por, eski sa travay ki i pe fer i pe pey son dimoun byen i pour dir vwala ki mon gannyen, e mon pe pey laplipar mon larzan avek zot. Onorab Ferrari bomaten ler i ti fer son prezantasyon, mon krwar i ti nonm 52 poursan sa ki zot resevwar. Me depann lo lekel lakonpannyen ki pe peye. I klerman en gro poursantaz sa ki zot resevwar zot peye avek sa bann travayer. Me mon krwar kot nou’n arive ozordi, nou bezwen regard en pti pe ki sa sekter pe kontribye pour Sesel, e kote nou anvi i ale. E ki direksyon nou anvi ale. Direksyon mon krwar i kler, nou tou nou kler pour dir nou ti a kontan lapes Sesel i kontinyen dan en fason soutenab byensir. Nou ti a kontan ki bann bato i deside ki Sesel i por pli ideal pour zot vini. Parske la nou kapab vann zot fuel, nou kapab donn zot stevedore, nou kapab vann zot manze delo eksetera.

Sa se bann keksoz ki kler parski nou anvi dyob, nou anvi tax, nou anvi valer azoute pour tou dimoun kapab benefisye. Me byensir dan pe fer tousala, nou bezwen fer sir pour dir sa lendistri i kontinyen anploy Seselwa. Onorab Pillay dan son lentervansyon in fer kler e mon dakor avek li poudir lendistri ozordi i annan en kantite problenm, en kantite problenm parski pour rezon ki napa nanryen pour fer avek sa bann lakonpannyen dan por, neseserman, ozordi i annan problenm ek travayer. Problenm travayer i en problenm nasyonal, Nasyonal parski i komans depi problenm nou vwar depi dan lekol. Zot lantrennman depi ler zot ptipti, primer, segonder, eksetera nou vwar, nou koz dan sa Lasanble, lo bann konportman anti-sosyal ki nou pe vwar. Ki fer ki ler ou ariv, ou’n kit lekol, ou’n ariv staz en travayer pour antre dan lendistri, nou pe vwar serten problenm, sa fleo drog, lalkol, i serye sa, e bann lakonpannyen ki dan por ozordi, i dir ou klerman pour dir si zanmen zot ti pour bezwen aplik en standar par egzanp ki dir okenn dimoun ki annan okenn tras lalkol, oubyen drog dan son disan, ki ler zot fer tes, zot pa ti pour kapab anploy li. Be si zot ti aplik sa lo en baz vreman strik, i posib nou ti pour napa bann travayer, bokou travayer lokal, vwala kot ou ti pour bezwen petet konsider bann opsyon, anploy etranze. I en problenm serye sa.

Alors zot pe zwe en rol difisil pour balans ant donn dyob Seselwa, anploy etranze,  e fer sir finalman ki Sesel ki benefisye, parski si nou ki pe, nou’n ganny swazir koman por pli bon, nou bezwen war benefis, annan en por ki meyer dan larezyon, nou bezwen war benefis ki nou bann travayer ki pe ganny anploye.  E alor sa se bann konsiderasyon tre enportan, ki nenport ki dimoun ki pe mazinen ki mannyer nou pour amelyor sa sekter. Si fodre, si fodre regard tarif li menm. Sa se bann konsiderasyon ki nou bezwen mazinen. Ki Sesel i reste e por de swa pour zot vin isi, Sesel i reste konpetitiv, parski nou annan konpetisyon dan larezyon. Nou annan Mombasa, nou annan Moris li menm ki en por tre konpetitiv.

Me Sesel li par kont i annan en pli gran lavantaz, son lavantaz se nou lokazyon kot nou ete nou pli pre avek bann landrwa ki bato i al lapes, bann lakonpannyen i dir nou ki nou travayer, malgre tou sa problenm ki nou pe koz lo la drog, eksetera, nou bann travayer i parmi bann ki travay dir, pli dir e ki annan en lefikasite, ki pli dan larezyon.

E alor sa i ede bokou. Nou por li menm, son servis por i bokou pli bon dan larezyon. Alor mwan mon pour dir ki dan tou sa ki pe pase, Sesel i bezwen vin premye.  E dan Sesel premye byensir son travayer i bezwen bann dimoun ki benefisye, nou konnen pour dir bann lakonpannyen pe benefisye e napa nanryen mal, si bann lakonpannyen ki dan por i benefisye parski zot osi zot pey taks, i permet zot anploy plis dimoun, i permet zot kapab donn lezot servis agrandir e sirtou si se bann lakonpannyen Seselwa pli bon pour Sesel ankor. Alor mwan mon ti a kontan dir ki nou ankouraze bann lakonpannyen pou fer sa bann travay, me an menm tan, pour bann travayer e bann stevedores ki dan sa biznes i enportan pour zot realize ki nou tou nou valoriz zot travay. Nou tou krwar zot devret ganny en saler ki baze lo zot zefor ki zot fer, ki baze lo sa risk ki zot pe pran.  Nou tou nou aksepte pour dir zot travay, zot dan diferan kategori ek nou tou ki aswar nou dan en biro, swa nou baze ater ki nou ganny en pansyon regilye ki nou ganny kouver 21 zour dan en lannen ki nou pa travay, me nou ganny peye, nou konze, e nou annan lezot benefis ankor ki zot, zot napa. Zot napa en pansyon ki ganny tire lo zot, lo sa ki pe pey zot, zot napa zafer 21 zour parski, e zour napa bato, napa travay. E alors se la bann landrwa ki mwan mon krwar si zanmen i annan en tim, i annan en zefor kordinen ki ganny fer ant Gouvernman, ek sa bann lakonpannyen, e tou larestan stakeholders ladan, ki devret ganny fer kot nou devret ankouraz, travayer Seselwa pour al dan en metye parey stevedores. I pa devret parey petet koman Onorab Loizeau in dir bomaten dan sa lepok ki li i ti ladan, ti en travay sitan riske avek sitan aksidan parey Onorab Clive Roucou in eksplike. I devret en landrwa kot Seselwa i santi li i fyer pour ale. I santi ki i pe ganny byen peye, i santi ki zour in vye, e zour in fatige, pou fatig pli vit ki laplipar nou.

I annan en safety net ki pe vey li. Pa en safety net ki pour pran ou nenport ler, parski ou pa anvi travay, me zour ou pa kapab travay, zour ou’n tonm malad, i bezwen annan en keksoz ki protez zot. E alors si nou kapab trouv en solisyon, travay ansanm avek tou bann parti prenan pour fer sir ki sa kalite mechanism ki’n ganny met an plas, mon pa konnen si i pour vin atraver en Stevedores Benefits Act or nenport ki lezot Lalwa.  Si i vin atraver zis en laranzman ant bann parti konsernan, mon krwar mwan mon pour siporte parski mon krwar set en keksoz ki pour al anver sa direksyon, sa direksyon kot nou anvi war Sesel, bouz devan avek son sekter endistriyel ki enn bann sekter pli enportan dan Sesel.

E avek Mr Speaker mon ti a kontan anmenn mon sipor pour sa Mosyon ki nou tou nou travay ansanm pour fer sir ki depi stevedore, depi lakonpannyen, depi sa sekter i bouz devan dan en fason soutenab. Mersi bokou Mr Speaker.

 

MR DEPUTY SPEAKER

Mersi Onorab Afif. Bon mon pour pran en dernyen entervenan. Si i pa pour long, akoz in prezant mwan en pti not ki i pour absante apre midi. Ok.

Onorab Andre. Yes, yes, go ahead, proceed.

 

HON CLIFFORD ANDRE

Mersi Mr Deputy, mersi pour donn mwan sa loportinite, bonzour tou dimoun ki pe ekoute. Manm Onorab, Mr Deputy sa Mosyon prezante par Onorab Ferrari, i enn ki tre enportan. In vin a en letan kot nou, nou pe sey fer en fason, LDS pe sey fer en fason pour ki Sesel son bann travayer i benefisye plennman avek bann devlopman ki pe arive dan nou pei. Mr Deputy, i malere letan nou ekout Onorab Pillay, Sebastien Pillay in dir nou ki sa i en Mosyon ki ti anmennen dan 5enm Lasanble, in eksplik nou verbatim, in dir nou pour dir nou pa’n fer resers. Me en keksoz i enportan. Se li ki pa’n follow-up lo sa ki ti ganny dir par sa lepok Mr Fideria, akoz i ti dan sa Lasanble li, sa 5enm Lasanble, i ti’n kapab anmenn en Private Members Bill dan sa konteks pour li fer sir ki nou al ase lwen sa extra step ki in dir, nou ti’n ava al sa extra step.

In vin dan sa Lasanble zis pour li fer en mon ti ava met sa dan en langaz me kekfwa i pa Parlmanter en politik dan en loptik ki pa neseserman korek. Mr Deputy parey Onorab Loizeau in dir, mwan konpran soufrans bann stevedore, mon pour dir sa akoz mon osi mon’n fer sa leksperyans an ‘88. Letan mon ti Politeknik, wi, Onorab Pillay, mon’n fer sa louvraz. Mon ti dan vakans, al fer sa travay, lo bato ton. Tir ton dan lakiv, Onorab Hoareau kekfwa ou ki al lapes, pa mwan. Ok. Tir sa ton anba e fer monte, vwar tou sa bann deroulman antre dan lafreser, met sa gro jacket, sa sapo, sa legan, e eksperyans sa. Mon senpatiz avek zot, e mon konpran sa douler akoz mon’n pas ladan kontrerman avek tou mon bann koleg Onorab lot kote ki pa’n fer sa travay.

Mr Deputy, sa sityasyon stevedores i enn ki pa neseserman komans lo por, letan i arive. I enn ki komans depi letan bann Seselwa i ganny anploye, lo bann bato etranze, Espanyol Franse; kondisyon ki Gouvernman i negosye avek sa bann pei dan Linyon Eropeen, i enn ki defavoriz travayer ou byen maren Seselwa. So sa nou vwar i kontinyen, letan sa pwason, sa ton i sorti lo sa bato ton e i ariv isi pour fer bann, pour desarz li avek IOT, oubyen pour fer en transhipment ki al dan en lot landrwa.

Mr Speaker, mwan komans koumsa e mon dir sa set akoz bokou, bokou maren in vin vwar mwan. Zot in vin vwar mwan dan konteks ki zot santi zot pa pe ganny sa benefis ki zot, zot krwar zot sipoze gannyen e kontrerman avek lezot, zot bann counterpart ki fer menm travay avek zot.  Parey in ganny dir par Onorab Afif ki konze stevedore, Mr Deputy, mon krwar Onorab Pillay i bezwen ganny pour dir letan Mr Speaker, mon krwar Onorab Pillay letan i ti koze mon ti ekoute trankilman. Extend same courtesy, ase malelve. Wi Mr Deputy, mon pour kontinyen akoz mon pa pour les li pran sa letan ki bann Onorab i sipoze fer lezot keksoz. Mon krwar i enportan pour nou kapab vwar ki Sesel bezwen negosye bann Lagreman ki benefisye son pep, ki benefisye son bann travayer ki travay dan sa domenn. An se ki konsern bann stevedore.   Zot travay i enn ki dir. Mr Speaker zot peye tax. Onorab Ferrari in dir nou pour dir zot peye taks. Me selman Mr Deputy zot pa ganny en 13enm Mwan Saler. Akoz zot ganny dezavantaze dan sa bann domenn kot lezot pe ganny en benefis, sa i en keksoz ki nou bezwen gete ki mannyer, nou osi fer zot benefisye sa menm si nou pa ankor al sa extra mile ki ti’n sipoze arive dan 5enm Lasanble.

Me selman sa mile ki nou la lo la, nou bezwen sey gete ki mannyer zot osi zot kapab ganny zot 13enm Mwan Saler. Mr Deputy en lot, en lot sityasyon se i annan bann dimoun ki pe travay, I mean ki’n ganny dan prizon, bann prizonnyen ki pe travay dan sa bann sekter. Me selman letan zot gete zot ki al fer sa travay dir, zot lapey par ler i pa korek, sa ki zot sipoze gannyen, si en lot dimoun ki deor pe gannyen en R2.50 pour en tonn zot pe ganny R2 e lo sa R2 prizon i pran en tyer ankor ladan. So ler i fini, letan i ganny, i war li napa nanryen, me selman in travay dir.

Mon krwar nou bezwen donn dimoun valer, valer son travay, Mr Deputy. Mr Deputy en lot sityasyon se ki Lalwa lanplwa i dir ki savedir en casual worker. Mr Deputy Mr Speaker, Mr Speaker, Lalwa Lanplwa en casual worker, means a person engage by the day and from day to day, who is paid on a daily basis. Mr Speaker, akoz mon dir sa se akoz sa bann dimoun ki travay koman stevedore an prensip dapre Lalwa zis sipoze ganny peye toulezour, me sa pa le ka. Sa pa le ka. Zot esper letan sa bato in fini desarze pour zot pey sa dimoun. E yer mon’n zwenn en madanm ki’n dir mwan, son msye in ganny konze dokter i en stevedore e i pa pour ganny peye ziska le 19 mwan prosen.

Mr Speaker, sa i pa an konformite avek Lalwa. I bezwen annan keksoz ki nou kapab fer e sa ti sipoze sa extra miles ki zot ti’n sipoze ale dan 5enm Lasanble pour rektifye e sa id an Lalwa sa. Napa nanryen pour nou fer la. Napa Private Member  Bill pour nou anmennen, nou bezwen aplik e enplimant sa ki egziste. Wi nou bezwen fer plis. Mon 100 poursan dakor nou bezwen fer plis. Bann dimoun ki osi kot Casamar, Mr Speaker, zot rankontre serten difikilte, zot travay, zot pa ganny konze, zot travay zot pa ganny peye zot konze piblik, menm si zot vin travay dan konze piblik. Zot sityasyon i vreman, vreman grav. Akoz mon pe dir sa. Se ki dan sa konteks kot nou pe koz stevedores, kot nou pe koz pwason, kot nou pe koz desarz pwason. I annan en lasenn Mr Speaker ki mars avek. So dan tou sa lasenn i annan bann problenm ki nou bezwen idantifye, oubyen ki nou’n idantifye, ki nou bezwen put right parey nou dir. Wi nou bezwen fer en Lalwa, e Gouvernman ki dan Egzekitiv, Parti Lepep pour le moman ki dan Egzekitiv, Mr Speaker. E alors se li, se li, menm si sa i tanporer, se li ki bezwen fer sa travay la, pour li fer sir ki ozordi an Zilyet 2017, bann stevedores i santi ki i annan keksoz pe ganny fer. Nou, nou’n santi li nou devwar.

Onorab Ferrari in santi li son devwar letan nou’n diskite pour anmenn en Mosyon parey. Akoz nou’n vwar ki sa bann dimoun pa pe ganny gete. E sa in ganny dir par Onorab Ferrari. Se sa ki nou, nou bezwen LDS ozordi Mr Speaker pe bezwen get partou dan nou striktir pour nou kapab idantifye bann problenm pour nou anmenn devan pour nou kapab fer sir ki nou dimoun i ganny en remed lo sa bann keksoz ki an plas. I tro evidan Mr Speaker ki bann Lotorite ki sipoze pe tackle bann sityasyon zot pa pe get sa bann zafer  parey zot merit.

Pour bann etranze ki travay lo bato oubyen ki p  desarze, letan tonaz i ariv en serten, i depas en serten nivo zot, i annan en logmantasyon dan lakantite larzan ki zot ganny peye. Me sa Mr Speaker pa aplikab, pour Seselwa. Akoz? Aa i bezwen ganny revwar. Nou tou, tou dimoun i bezwen ganny trete parey. E zot bezwen kapab benefisye avek sa bann sityasyon ki’n ganny met devan.

Mr Speaker mon’n demande pour mwan koze lo sa Mosyon set akoz dan distrik Anse Aux Pins mon annan bokou dimoun ki pas atraver sa bann kalite sityasyon. Letan napa bato, zot vwar dan difikilte, zot pa met en bann parey Onorab Loizeau in dir me zot santi zot dan difikilte akoz zot pa pe ganny travay, zot pa pe ganny en resours. Zot osi zot annan en fanmir, zot annan zanfan pour anvoy lekol, zot annan madanm, zot pa dan drog. I annan ki pa dan drog, me ki letan napa travay i vwar dan difikilte. E menm si nou’n dir, menm si Onorab Pillay in dir i annan serten mechanism ki’n ganny mete.

I annan Welfare Agency, be sa pa korek. Akoz sa bann dimoun souvandfwa, zot ale, letan zot ariv laba, zot pa ganny sa remed ki zot in vin rode. I annan lezot kondisyon, i dir zot, zot madanm pe travay. I annan kantite, kantite, kondisyon ki i dir zot, zot pa meet, me selman zot war zot dan sa difikilte.

Mr Speaker, mwan pa pour long parey mon ti’n promet avek sa detrwa mo ki mon’n dir ek mon leksperyans ki mon’n fer koman en travay stevedores an ‘88 letan mon ti pe lekol, mon pour donn sipor total a Loter sa Mosyon, e sa Mosyon an zeneral, e mwan a demann lezot osi, pour fer parey e aksepte letan nou’n mal fer en keksoz oubyen direksyon nou’n mal pran aksepte pour dir nou’n mal pran. Annou repran ansanm, nou ava fer li en direksyon ki pli byen. Mersi Mr Speaker.

 

MR DEPUTY SPEAKER

Mersi Onorab Andre. Bon avan nou adjourn, mon annan enn de pti housekeeping announcement pour mwan fer. Mon ti a kontan zis aport latansyon tou Manm, ler zot absante pour fer Sekretarya konnen. Fer lofis Clerk konnen, zot kapab fer li direkteman, oubyen zot kapab fer li petet pi bon atraver zot party rep. Ok ? Akoz nou annan enn de mouvman Manm ki Sekretarya pa okouran. Nenport menm zot absante pour en lazournen, oubyen en demi zournen. I enportan, nou konnen nou annan enn de Manm ki annan lezot langazman. Fer konnen lofis Clerk.

Komite Truth and Reconciliation pe rankontre 12 :30 dan Committee Room 3, e Assembly Business Committee pe rankontre 1er dan Speaker’s Conference Room, e posibilite osi tou Bills Committee pour meet dan tea break. 1er i pour clash akoz i annan ABC meeting tou 1er. Nou annan Manm ki lo, ki dan ABC, an menm tan ki lo Bills Committee, ok? Mon’n ganny enformen ki zot pe sey organiz en pti meeting dan tea break. Ok? Yes Onorab Ferrari.

 

HON JEAN-FRANCOIS FERRARI

Mr Speaker mon pa ganny enformen me IAC osi pe rankontre mon ti a sizere ki nou al direk da Minister’s Meeting Room ler nou sorti la.

Minister’s Meeting Room at the ground floor.

 

MR DEPUTY SPEAKER

Minister’s Meeting Room, oubyen Room 2?

 

HON JEAN-FRANCOIS FERRARI

Waiting Room, or Room 2. That what I was told. Mon ava korize, me selman. Mersi Mr Speaker.

 

MR DEPUTY SPEAKER

Bon ok, nou annan, apre midi nou ava kontinyen deba lo Mosyon, e avek sa de mo nou ava adjourn e nou ava retournen 2er.

 

        (BREAK)

 

 

MR DEPUTY SPEAKER

Bon apre midi tou dimoun.  Nou ava kontinyen avek deba lo mosyon prezante par Onorab Ferrari.  E mon ava demann Onorab Herminie pou entervenir.  Yes Onorab.

 

HON WILBERT HERMINIE

Mersi Mr Speaker. Mr Speaker, tou Manm koleg Onorab e tou dimoun ale kout bonn apre midi.

Mr Speaker mon pou pran laparol apre midi o komansman par dir tou travay i annan son lenportans. Tou travayer i annan son valer. Ou en carer, en labourer, en sekreter, en manager ouswa stevedore.

        Ou sirman ede dan

lekonomi devlopman Sesel e osi annan plas dan sa sosyete. Mr Speaker size stevedore a mon lavi i en size ki tre delika.

Akoz mon dir sa Mr Speaker sete akoz natir zot travay. Stevedore i ganny anploye lo en baz zournalye ouswa casual par Hunt Deltel oubyen Land Marine. Stevedore i annan peryod travay. Sa i  en  peak season avek en low season. Dan peak season ki dir pou 8 mwan la i annan bokou travay.

Dan sa bann letan bann stevedores si zot travay zot lapey i akseptab. Pandan peryod low season i annan mwens bato, e se dan menm sanmenm sa peryod ki ou pou tann sa bann travayer dir ki napa bato, napa lavi e zot fay.

Mr Speaker zis mazinen en perd fanmir pa pe anmenn nanryen kot lakour pou 3 mwan.  Akoz zot pe depan selman lo sa bann bato, pou zot ganny en travay.

E la Mr Deputy Speaker sa bann travayer osi zot bezwen ganny en konpran ki natir zot travay byen kler. Zot travay ler i annan bato e ler napa bato zot pa kapab travay.

Mr Speaker mon pou tous lo mon distrik.   Wi Mr Speaker La Riviere Anglaise  i en distrik lavil kot popilasyon stevedore i ase o.  Zenn zonm byen porte byen miskle, bann  ki’n lev-e e pare pou al debourye. Bann ki i annan en vizyon bann ki annan en plan me plifere pou fer zournen pou ganny zot larzan a lafen lazournen ler zot fini fer zot travay.  Sa i zot swa personnel.

Mr Speaker mon’n zwenn anviron en dizenn sa bann travayer ki’n eksplik mon ki mannyer zot lavi konman stevedores i deroule. I sirman pa enn ki fasil.

Mon’n konpran zot, mon’n rakont mon soutyen e mon’n promet zot ki mon pou fer sa ki mon kapab pou zot konman en premye pa dan sa direksyon ozordi mon raport mon siport pou sa Mosyon.

En Mosyon ki valab e annan son merit.  En Mosyon ki pa devret annan okenn vizyon lo la.

Mr Speaker mon’n toultan krwar dan endividi ki fer zefor dan bomaten pou lev-e granmaten met son lespri ki ozordi mon bezwen al debourye avek lobzektif pou anmenn en dipen pou mon lekor e pou mon fanmir.

E sa pa en leksepsyon pou sa bann stevedores.  E pou sa bann tel endividi mon pou ‘toultan la pou siport zot dan en fason en lot.

Akoz i annan ki vreman serye. E alors mon pou demande parey loter Mosyon i demande, ki Gouvernman avek bann lakonpannyen konsernen pou get dan zot welfare.

Mr Speaker sa i devret byen kler.  Sa travay pa kapab ganny fer par Gouvernman tousel. I bezwen en travay ansanm. I devret annan en negosyasyon serye; en negosyasyon ki pran kont pa bann stevedores e ansanm tonm dakor lo en bon tarif.

Mr Speaker mon a pran sa loportinite pou lans en lapel avek sa bann lakonpannyen, pou mazin sor sa bann travayer. Laplipar zot ki bann perd fanmir zot annan en fanmir pou sonnyen. Nou bezwen ankouraz zot nou bann stevedore akoz zot deza pe fer en travay nob risk e difisil.

Mr Speaker mon vreman konpran natir travay en stevedore.  E se lo sa lot ki mon pou dir ki savings i enportan. Sa i en largiman ki mon’n gannyen avek detrwa sa bann travayer. Kot en zwer i eksplik mon ki sa pti gin ki parfwa li pa ni ase kote i pou gannyen pou fer savings.

Ankor la mon konpran zot parfetman. Me dan lavi nou bezwen persevere e mon la pou apiy zot ki zot tarif peyman i ganny travay lo la dan en dele letan rezonnab.

Amwen ki sa bann travayer, i ava ganny en pti gin plis pou menm anmenn kot lakour e ganny sans fer en pti savings kantmenm pa bokou.

Mr Speaker sa i fer mon mazin bann dimoun ki dan biznes banbara.  Akoz mon pe servi sa biznes banbara set akoz natir travay similer.  Ganny mon kler la mon pe fer referans ek natir zot travay e non pa zot reveni.  Me senpleman natir.

Banbara i annan sezon bann dimoun i al travay ler sezon i ouver e zot ganny zot larzan. E ler sezon i frenmen zot bezwen viv lo sa ki zot in gannyen pandan letan sezon ouver.

Parkont Mr Speaker i annan bann ki ler sezon i fermen zot pa asize nanryen fer esper sezon ouver.  Me zot al fer bann lezot pti louvraz ki zot apel bann ka saz e zot ganny en pti larzan. E ler sezon li re ouver zot retourn dan zot travay.

Alors Mr Speaker konman en linisyativ ki mon ti a byen siporte, ki pandan serten letan lannen ki nou apel low season ki napa bato Minister konsernen i a fer laranzman formil avek lasosyasyon stevedores kot dan sa bann peryod sa bann travayer i kapab otomatikman antre dan en domenn prodiksyon tel ki IOT, konstriksyon, eksetera.

Ozordi i annan detrwa ki pe fer li me i ti a bon ki lezot biznes osi i ganny ankouraze pou fer li.  Akoz sa i pou dan zot prop lavantaz. Pou terminen mon pou siport propozisyon anmennen par Onorab Pillay kot nou anmennen en Lalwa ki nou pou get, dan bann ka pou siport bann stevedores.

Akoz nou kapab fer li pou biznes offshores nou osi kapab fer li pou bann stevedores

        Mon oule dir avek sa bann stevedores dan La Riviere Anglaise ki mon la dan zot kote , e mon pou donn zot sipor ki zot lavi i amelyore.

Avek sa 2 mo Mr Deputy Speaker mon raport mon sipor pou sa Mosyon.  Mersi Mr Speaker.

 

MR DEPUTY SPEAKER

Mersi Onorab Herminie. Onorab Henrie.

 

HON GERVAIS HENRIE

Mersi Mr Speaker. Bonn apre midi tou bann Manm Lasanble. E bann dimoun ki pe ekoute dan lakour.

‘’Zonm o sant devlopman’’ i en lekspresyon ki nou’n tann koz bokou dan sa Lasanble, pou en rezon ki lot kote latab ki’n servi sa konman filozofi pou zot. E letan mon’n ekout deliberasyon bomaten, partikilyerman apre ki Onorab Ferrari in prezant son Mosyon pe ler Onorab Afif in koze, e prezan tou, sa bann sif ki otour ‘nou; tour lendistri lapes kot bann stevedores i sitye o milye sa lendistri, si nou; ti pou pran en legzanp pratik ‘’zonm o sant devlopman’’ i en legzanp parfe.

Mon krwar pa si i annan madanm ki fer sa louvraz non?   Zot bann  zonm.  I annan?   Ok mon’n ganny dir i annan -fantastik. Felisitasyon pou sa madanm ki fer sa. Si i vre i annan.

E letan mon pe kalkil lakantite larzan ki zot pe anmennen la konmela nou ‘pe koz Lekonomi Ble tou sa, alor i fer, sa portre parfe pou mon pou dir sa bann stevedores lo sant devlopman Sesel.

Prezan lontan stevedore i egziste. E Hunt Deltel li par egzanp i pe selebre 80an sa lannen. Gouvernman ki nou’n annan son parti in egziste pou 52an. Mon pe dir sa akoz an gran parti sa volonte politik pou fer annan en sanzman. Ouswa sa kondisyon neseser ki ozordi sa Mosyon pe demande ti’n kapab fer depi lontan si ti annan volonte politik.

E Lopozisyon in seye. Depi lepok ki Onorab Wavel Ramkalawan ti li tousel dan Lasanble konman en Manm proporsyonnel pou UO sa letan. Premye Lasanble Nasyonal ki mon’n konnen apre miltiparti. In koze a plizyer repriz, lo size stevedores.

        Anfet en lot dimoun osi avan ki nou’n tann bann legzanp ki’n donnen bomaten. Ansyen Manm Elekte pou distrik Bel Air, Mr Alain St Ange ti deza anmenn en Mosyon, e demande ki en keksoz i ganny, fer pou letan napa bato. E apre Gouvernman ti vin avek en Scheme ki ti donn sa bann dimoun mon krwar en zafer R1400.

Onorab Esparon in anmenn keksoz li osi dan son letan ki’n dan Lasanble- Onorab Esparon.

E apre i vre 2006 MNA English River sa letan Mr Herminie ti anmenn en Mosyon ki ti demande ki tonaz i sorti R2 pou vin R3. E sa letan Gouvernman ti annan par dan Land Marine. E ziska ozordi i ankor annan. Mon korek lo la? Non?   I napa?   I ti dir pou vann dan bann reform la. I ankor annan? I ankor annan? So savedir Gouvernman li i en pozisyon so to lead by example. Me solman nou bezwen admet. La letan mon pe koze Land Marine i pe pey plis li. R3.50 par tonaz konpare avek Hunt Deltel pe pey R2.65.

So i deza pe fer en pe. Me solman e si sa ki i pe fer i ase. Pou retourn lo mon pwen sa volonte politik. Konmsi Gouvernman li in annan plizyer lokazyon ki‘n kapab fer keksoz. Prezan sa Mosyon ki nou ti pe koz ki mon pe dir Mr Herminie ti anmennen la 2006.

Prezan annou pa bliye ki ti arive an 2008.  Devalyasyon nou roupi. Stevedores sa diskisyon ki zot ti pe diskit sa bann letan Lasanble pa’n abouti pou nanryen. In ganny worse and off ankor li. Akoz bann Kontra i fer an Ero mon mazinen avek bann lakonpannyen Seselwa.

Me apre ki arive? Prezan en lot zafer ki’n deza arive. Le 17 Zanvye 2003; Le 17 Zanvye 2003 bann stevedores i fer en Lagrev pou demande ki annan en logmantasyon. Sa lepok linyon travayer ti kontrole par Parti SPPF-zot  pa ti ankor apel Parti Lepep. I antre dan negosyasyon, be ki’n arive nanryen.

Ankor volonte politik, 40an ki zot in fer? Ansyen MNA Les Mamelles. Bomaten Onorab Sebastien Pillay in koz lo la. 2016 i anmenn en Mosyon en kestyon? En Mosyon, Mosyon ki’n arive apre sa? Zot ti annan mazorite absoli nou pa ti la nou.

Solman de fwa ki zot in anmenn en Mosyon avek ase re konsekan 2006 Mr Herminie 2016 Mr Fideria, ti 2 lannen Eleksyon. E mwan mon krwar zot ti pe zwe en zwe avek stevedores sa letan. Se rod en pe sipor probableman. Ler nou pe koz 800 a mil dimoun ki fer .sa travay. Prezan avek zot fanmir la nou, nou pe anmenn sa an 2007, 2017. Akoz .nou dan nou kanpanny LDS nou dir dan sa slogan la ‘‘Fer nou Lasanble’’ e sor e kondisyon travayer ki nou pe sey met devan; dousman, dousman. Nou’n koz lo diferan keksoz; kestyon in ganny anmennen apropo Air Seychelles, dan Bidze nou’n tous la ozordi nou lo stevedores.

        E nou kontan ki lo lot kote latab ozordi, in ankor enn fwa nou dir ok nou bezwen fer keksoz annou .al dan sa direksyon.

Solman sa i nou p]e fer sa deba dan Lasanble Nasyonal. Akoz desizyon final i pou bezwen ganny pran par Egzekitiv ki nou, nou pa laba. Volonte politik mon retourn lo la. Eski nou pou annan sa volonte politik pou fer?

Parski prezan, 40an zot in lo pouvwar, SPUP/ SPPF/ Parti Lepep, e dan preski tou Ladministrasyon in annan en portfolio Lanplwa. In annan en portfolio  Lanplwa. E in annan en long lalis dimoun ki’n ansarz sa portfolio. Premye non la ki mon’n note Mr Herminie.  Papa MNA English River non?

I annan Mr Ernesta, Mr Dugasse, Mr Meriton, Madanm Mondon, Manmzel Alexander, Mr Cosgrow.  E la ozordi Madanm Telemaque. Si i annan ki mon’n manke eskiz mwan. ki nou pou fer? Volonte politik. Ki nou pou fer? Ki nou kapab fer e e ki nou anvi fer?

Parski letan nou pou koz kondisyon, bann stevedores be Gouvernman li i pa konnen ki pe pase dan pei.

Par egzanp ozordi kestyon tax in lev-e e se sa ki loter Mosyon in dir annou fer en Lamannman dan Mosyon pou demande ki annan en nouvo tarif tax.

Preski mon letan mon’n koze avek bann dimoun, zot dir ek mon be sa bout, saler ki nou gannyen si nou pou ganny akoz zot casual, dizon zot ganny pou 2 fwa zot a ganny en lapey. Sak fwa zot pou gannyen zot pou tire tax lo la.

Me en sistenm ki egal dan pei kot nou tou nou sipoze parey, ki mannyer sa bann boug i pey plis tax ki mwan ek ou?  Dan son summing-up i ava eksplik ou mannyer sa i marse.

Si demen si ozordi nou ti pe dir be a bann kondisyon travay si zot napa bon legan, zot napa bon seaboot, si zot napa isi, si zot napa laba. Be lekel ki ansarz pou al fer bann lenspeksyon dan bann landrwa kot sa bann dimoun i travay? E pou dir avek bann konsernen bann lakonpannyen pou dir get sa dan sa pei Regilasyon Travay i dir sa. Ou bezwen donn sa ou bezwen donn sa ou bezwen fer sa. Mwan ki responsab sa? LDS ki responsab? Non i retour lo volonte politik, sa Gouvernman ki la konmsi ki nou’n fer? Ki nou kapab fer e i nou pare pou nou fer?

Donk si la nou pe koze ozordi, nou pe dir avek bann stevedores poudir get sa, mon’n tande mwan. Nanon in koz ek mon dan Mont Buxton. Pat in koz ek mon. Yanm in koz ek mon.

Menm avan mon ti vin en Manm Lasanble sa lepok ki nou pa ti la, konman en zournalis mon’n ekrir lo sor sa bann dimoun. E mon konnen, e mon’n promet zot pou dir wi nou pou fer sa ki nou kapab.

E se sa alor ki ozordi ki sa Mosyon in ganny anmennen. E nou pa’n zis vin avek, sa Mosyon konmsi nou’n zis pran li dan nyaz nou’n anmenn li la.

Vizit in ganny fer lo bann bato. Bann MNA non selman LDS lo lot kote latab osi, in zwenn avek reprezantan bann lakonpannyen, pou nou konpran.

Donk nou fer nou bout nou. Prezan en lot zafer. Bann stevedores  zot, zot kapab pe ekout mwan ouswa zot ava tande pli tar. I enportan ki zot osi e mon’n dir zot sa fran plizyer zot ki’n koz ek mwan, mon mazin partikilyerman sa group dan distrik Anse Aux Pins ki ti zwenn mwan en zour Vandredi, kot laboutik Vinoth vizavi Playground.

E menm en zour anler kot Thiroomee store ankor dan plato Au Cap en group ti zwenn mwan, e mon dir zot e mon pou repete la ki zot, zot pe fer? Ki zot, zot pe fer? Zot oblize organiz zot pou ki zot kapab annan bon prezantasyon pou zot asiz otour en latab ek lakonpannyen, ek Minister Lanplwa ki ava reprezant Gouvernman evidaman. Rod reprezantan Linyon pou zot kapab negosye sa bon deal ki Lasanble ozordi pe konmans koz lo la lo zot par.

E la letan mon pe koze ,mon pe mazin Simon ouswa Simon Michel sa boug Anse Aux Pins, mon’n tann li koze dan piblik lo sor bann stevedores; konmsi i eloquent, e i enn sa bann boug ki kapab reprezant parmi lezot kapab pike pou asize e negosye zot pozisyon dan en fason for dan en fason konvenkan ki pou zot demann en better deal pou zot.

Akoz zot o sant sa devlopman sa kantite larzan ki nou’n tann Onorab Afif bomaten koz lo la.

E byen alor Mr Speaker, nou, dan LDS nou siport tou lenstans kot nou pe rod meyer kondisyon travayer, pli bon saler.  E se sa ki ozordi ki fer nou pe koz lo sa Mosyon. E nou pe os i egzers nou rol pandan oversight Gouvernman. kot la nou pe dir avek bann Minister konsernen tel ki lanplwa,  tel ki lasante zot, bezwen fer sa ki zot dwatet pe fer, pou zot asire pou dir sa bann dimoun konman bann Seselwa pe byen ganny trete. Zot bann kondisyon travay i above board.

E ki personn pa pe ganny kit deryer.  Bomaten letan

Onorab Pillay in pran laparol en mo ki’n dir pe demande pou al extra step. What extra step ki nou pe demande?

Mwan mon ti ava dir sa volonte politik Gouvernman pou bezwen pronons son lekor, e mon swete ki sa voyaz sa Mosyon pou pase; lo tou lede kote latab mon konvenki pou dir nou pou vot an faver.

E alor i pou en mesaz for ki nou pe anvoy kot Brans Egzekitiv pou dir nou le zot langazman dan 100 poursan.

Ler sa in ava arive Lasanble in ava siporte. E Gouvernman i pou bezwen rod en fason avek bann lakonpannyen prive, parey Mosyon i dir, kot Gouvernman avek bann lakonpannyen konsernen e la bann zot bann stevedores zot bezwen organiz zot ki zot osi zot ava annan en reprezantasyon.

E petet osi anmenn bann dimoun ki dan Linyon pou reprezant zot. Ouswa reprezantan legal. E ki alor a lafen defen zot ava annan en meyer deal. En deal ki ava byen negosye. E atraver sa negosyasyon tou bann kondisyon i ava kler.  I ava bon. E i ava dan zot lavantaz. E i ava en kondisyon ki zot, zot ava’n agree avek.

Zisteman saler ki nou pe dir la, letan sa bann negosye en pli bon tarif tax. I ava sire ki zot ava kapab anmenn en saler kot zot pou nouri zot fanmir. E pou zot kapab fer fas avek sa pri lavi, ki pe kontinyelman ogmante.

Me pli enportan, parey Onorab ki’n koze avan mwan, in mansyonn sa zafer met en larzan 2 kote. I enportan, i enportan ki zot kapab met en larzan 2 kote; ki swa atraver sa ki zot a pe gannyen ozordi ouswa dan en propozisyon ki’n ganny fer par avan Onorab Ferrari dan son prezantasyon. E apre, Onorab Pillay in twist li dan en lot fason. Me ki zot a kapab ganny serten Pansyon en keksoz koumsa.

Akoz la mon pe mazin Mr Euphrasie dan  distrik Mont Buxton, ki’n fer sa travay pou en kantite letan.  Sa so-fre, so– fre i afekte lasante fizik, bann dimoun e ler zot ariv en serten laz zot nepli kapab fer sa louvraz.  E i enportan zot ki’n o sant sa devlopman pe anmenn sa kalite Kapital dan nou pei. Zot ganny trete pli byen konman Seselwa.  Mersi bokou Mr Speaker.

 

MR DEPUTY SPEAKER

Mersi Onorab.  Onorab Aglae.

 

HON EGBERT AGLAE

Mersi Mr Speaker. Bonn apre midi tou Manm e tou dimoun e tou dimoun ale kout. Mr Speaker nou pe koz lo en size vreman enportan kot i konsern bann stevedores ki travay dan en bann sekter nou pilye  Lekonomi, sa i nou Lendistri Lapes.

Mr Speaker, dapre mon memwar ler mon rapel stevedoring ki a laz apepre 14an ti annan en manm dan mon fanmir ki ti fer sa travay, sa ti mon boper. Ki son louvraz orizinal parey nou dir ti mekanik. Me i ti vwar letan akoz nou ti bezwen sa ti gagne pain pou nou kapab met nou bann demann kot lakour.

E sa travay ki li i ti fer ti en travay ki ti vreman dir. Dapre leksperyans ki li in rakont mon. in vreman dir dan bann kondisyon vreman parfwa ki i kapab perdi ou lavi. Ou’n koz dan lafreser ekstrenm anba 40 degre laba dan kiv.

E kot i annan sa bann lensidan ki i konsern ammonia ki si parey in dir i arive lensidan ou ganny frenmen e ou perdi ou lavi.

E i annan menm lenstans dan listwar sa travay, kot in Annan travayer dan sa lendistri ki’n menm perdi zot lavi. E sa letan si mon rapel si i ti pe ganny mwens ki R1 par tonaz.

Mr Deputy Speaker mon konmans mon lentervansyon koumsa se akoz ozordi sa travay i ankor en travay ki enportan. Se repitasyon Sesel in reste en Por kot tou bann purse seiners  tou bann ki dan sa lendistri i ankor pe vin Sesel, se akoz nou ankor en Por konpetitiv.

Nou ankor en Por ki pe desarz en responsabilite e ki pe fer lekonomi Sesel marse. Alors Mr Speaker si Por Sesel in reste konpetitiv i pa zis par zar, i akoz sa bann lakonpannyen ki pe deservi sa servis in touzour pare pou fer fas kont bann defi. E met Sesel e lekonomi Sesel o sant avan tou.

Gouvernman osi in ede Mr Speaker, pou kapab fasilit loperasyon sa travay. Annou pa fer sa fot pou dir apre 40an Gouvernman Sesel pa’n fer nanryen. Si i pa ti fer nanryen petet sa lendistri ti’n kapab mor ozordi.

Mr Speaker Gouvernman Sesel i pa’n zis asire ki bann lakonpannyen in touzour fleri, apre ki ti annan ULC ki ti pou Gouvernman. E ki’n ler in tant privatize anba liberalizasyon, sa biznes dan lendistri in vin en biznes ki’n profitab. En biznes kot bokou milyon pe ganny fer ladan.

E alor mon kestyon se si zot pe fer sa ta milyon pandan tou sa bann lannen, menm si apre ki nou’n pas atraver reform ekonomik dan sa pei an 2008, akoz ki ozordi ki sa biznes pe fleri ki nou pa kapab raport en soutyen an plis pou nou bann stevedores? 

        Byensir nou pa kapab zis koze, zis met presyon lo sa bann lakonpannyen pou donn en pe an plis san konnen osi bann defi sa bann lakonpannyen pe fer fas avek.

Nou ti annan en miting isi kot sa, Lasanble resaman avek sa 2 lakonpannyen mazer; sa i Hunt Deltel, avek lakonpannyen Land Marine. Kot zot in met bann sif devan nou. Zot in anmenn zot bann data devan nou pou fer .nou konpran kwa ki zot pe pas atraver. Me lafen dizour se ki zot pe fer larzan. I annan rantabilite. E zot pe kontinyen grosi.

Mr Deputy Speaker Mosyon pledwari ki pe met devan nou se pou nou kapab pa zis pe koze. Nou oule sa Mosyon i al pli devan pou fer sir ki a lafen ki ler nou vot lo Mosyon i annan keksoz sibstansyel ki ganny vini pou bann stevedores.

E se la Mr Deputy Speaker ki mwan mon siport sa propozisyon ki Onorab Pillay in met devan; ki Mosyon pe koze wi. Me selman nou bezwen keksoz en pti pe pli stratezik.

Se pa anmenn en Mosyon en Private Members Bill dan sa laliny kot, nou kapab annan en Stevedoring Act. En Stevedoring Act i pou pli garanti bann stevedores pou zot ganny zot bann benefis ki zot pou bezwen.

Premyerman anba sa i ava kapab defini, i pou dan Lalwa sa, i pou kapab definir en tarif lo baze lo performans ekonomik sa bann lakonpannyen ki dan sa lendistri. En to taks favorab.

Vi ki zot pa pe travay a plen tan. Ler mon pe dir aple tan zot pa pe travay 30 zour ouswa 28 zour dan en mwan.

Me akoz zot travay en travay ki baze lo lakantite bato ki annan en lakantite tonaz ki zot pe fer flas avek.      Zot a kapab ganny poursantaz  bonous. Baze lo reveni ki sa bann lakonpannyen pe fer ozordi. I a fer provizyon pou zot annan en sick leave benefits.

E letan kot napa bato ditou sa Lalwa ki a vin anmas i a fer provizyon ki zot ganny anpare. Parey nou dir dan en basket.

Sa provizyon osi i ava anmenn en sistenm pansyon, ki ler zot ava laz retret kot zot in perdi lafors, zot, nepli kapab fer, sa travay fizik. Zot kapab asize; annan en pti larzan, kot zot kapab kontinyen sonny zot fanmir, e zot lekor li menm.

Mr Speaker zot a osi benefisye menm si ozordi

I annan en lasirans ki zot pe gannyen zot ava as annan en kouvertir ki si ariv okenn keksoz ki swa en aksidan i kapab perdi en lebra. Ki zot pa pou kapab al lafen sa travay ankor.

Ouswa menm lanmor kot zot zanfan, zot fanmir osi kava ganny en benefis pou zot kontinyen viv.

Mr Deputy; Speaker nou konstate osi. Ki dan sa travay nou’n ariv dan en letan modern, in annan serten sanzman ki’n arive levolisyon modernizasyon sirtou dan bann domenn mechanisation ki sa travay ki ti pli dir 10an, 15an pase ozordi in vin en pti pe pli fasil, parey nou dir.  In vin en pe pli fasil gras a teknolozi ki sa sekter in anmennen. E sa osi in kout larzan pou sa bann lakonpannyen envestir.

Mr Speaker nou bezwen osi rekonnet ki malgre tou sa profi ki sa bann lakonpannyen i fer zot pe fer fas ek defi.

En pwen kle ladan Mr Speaker, se sa lafors travay ki zot bezwen. Ou kapab vini ozordi met bann gro, gro masin, bann gro, gro bato. Me si ou napa imen pou travay e nou bezwen Seselwa pou travay i pa pou dir aryen.

Nou pa pe kapab met robot pou fer sa kalite travay. Nou bezwen Seselwa.

E enn bann defi ki sa lakonpannyen in met devan nou, se ki travayer pa serye. Bomaten nou’n tann nou’n koz lo drog.  Bokou sa bann dimoun, e mon pou servi sa loportinite pou dir Onorab Ferrari osi ki pa neseserman tou dimoun ki pa’n; byen lekol ki al stevedoring.

I annan dimoun ozordi krwar mon ki annan kalifikasyon ki pe fer stevedoring pou diferan rezon. Petet i annan rezon sosyal. Petet i annan rezon parey nou dir i lo drog.

Me selman nou rekonnet zot kontribisyon ki zot pe fer dan sa sekter.

Mr Deputy Speaker vol, lalkol, drog i en defi pou sa bann lakonpannyen fer fas avek.

Ler nou ti pe regarde ou vwar ki poudir tou stevedores ki pe ganny ki pe travay dan sa sekter; ki swa Land Marine ki swa avek Hunt Deltel ou pe vwar zot pe aparet lo menm lalis travay sa 2 lakonpannyen.

Savedir ou vwar ki annan par ler i bouz dan Land Marine, par ler i bouz dan Hunt Deltel.

Me sa ki nou. Nou konnen se ki bokou ler ou’n koz avek i dir ou i al kot Land Marine akoz Land Marine i annan en pli bon to tarif.

Me ler zot pe fer konparezon avek Hunt Deltel osi ki li i travay avek plis ‘bann lakonpannyen Espanyol, zot dir ou ki zot osi zot benefisye me avek plis lakantite akoz sa bann bato espanyol pe anmenn plis von tonaz ki Hunt Deltel.

E nou konstate osi Mr Deputy Speaker ki sa bann stevedores parfwa zot pe swazir serten travay.

Bann lakonpannyen ler zot in koz avek nou dan sa miting zot in fer nou resorti ki ler i annan disel ou pa pe vwar stevedores. I annan rezon senp

, se ki ozordi parey i annan serten Onorab in mansyonnen boner, ki pou al lev sepa 100 tonn 200 tonn disel pou R200 si ti mwan  mon osi mon pa ti pou ale. Akoz sa nivo lafors sa lenerzi ki ou pe met ladan pou ozordi R200 i pa vo lapenn. Mon pran en senp legzanp. Ou zwenn en dimoun ou dir li vin fer en pti travay kot ou swa koupay deor. Si ou pe donn li R200 i get ou lizye blan i dir ou konmsi  sa pa ase. Zis pou detrwa erdtan.

Me ler ou pe kalkil sa bann stevedores pe fer akout 4, 6 erdtan pe desarz disel dan sa kondisyon soley ki zot ladan Mr Speaker sa fodre get ladan.

Mr Speaker pou terminen mon krwar i annan en nesesite ki pa zis Gouvernman ki pou kapab zwe en rol ladan.

Ler nou pe koz responsabilite ouswa en konsyans sosyal, moral ki vin avek sa sekter tou bann akter ki swa IPHL ki swa Land Marine, ki swa Hunt Deltel, zot osi zot bezwen annan en konsyans ase sosyal pou vwar poudir, zot bezwen sa bann stevedores pou zot kapab kontinyen grosi. Pou zot kapab kontinyen fer zot profi. San sa bann stevedores zot vo aryen. Sa zot bezwen rekonnet.

E se sa zot bezwen asize ansanm dyaloge. Annou tonm dakor lo en keksoz. Byensir i annan bann lorganizasyon travay. Parey Minister Lanplwa. Nou annan ozordi nou Linyon ozordi, petet si i pa efektiv. Me selman zot bezwen asiz ansanm. Zot bezwen tonm annakor akoz si demen tou stevedores i deside pa desann lekel ki perdi?  Byensir lekonomi pou afekte. Byensir sa bann lakonpannyen si zot annan loan zot annan det zot osi zot pa pe kapab meet zot bann demand.   E zot pou; bezwen frenmen.

Sa i larealite. Sa nou bezwen aksepte. Se sa alor ki mwan mon ti a kontan mon pou siport sa Mosyon. Me solman Onorab Ferrari an menm tan konman en Lasanble ki nou, nou serye isi, nou bezwen fer keksoz en pti pe pli konkretize

Annou tonm dakor e menm nivo partizan kot nou ava anmenn Bill kot i ava met sa bann keksoz ki pou konsern Gouvernay stevedores dan pei annord.

E sa pou garanti ki tou stevedores demen bomaten ler i lev-e i konnen sa laz ki li i ete ler i pou retired i annan keksoz. Si ariv en keksoz ek li i ganny keksoz. E son fanmir si demen i perdi son lavi, son fanmir pe benefisye ek keksoz pou li kapab kontinyen soutenir son fanmir.

Se sa mon pwen ki mon anvi fer resorti Mr Deputy Speaker. E nou anvi ki nou tou stevedores dan Sesel, i ganny trete parey.  Mersi.

 

MR DEPUTY SPEAKER

Mersi Onorab. Onorab De Letourdie.

 

HON JANY DE LETOURDIE

Mersi Mr Speaker. Bonzour tou dimoun. Mr Speaker mwan mon vreman anvi siport sa Mosyon alors mon pa ti pou dir nanryen. Mon’n deside mon bezwen dir en keksoz.

Sa ki pe ganny dir dan sa Lasanble apropo bann stevedores se ki nou tou nou pe agree ki sa group travayer zot en pe mwen fortinen ki nou bann dimoun ki dan en travay stab.

E alors zot pa rezoui tou bann benefis ki en travayer i kapab gannyen.

Nou tou nou realize ki zot, zot louvraz i vreman dir e riske. E alors zot pa kapab konpare avek bann lezot travayer ki ganny R300 ou plis par zour. Menm ki zot travay mwens ki 8 erdtan.

Mr Speaker mwan mon konn bann stevedores ki apel Darel, Nelson, Kenny, Aubrey, Pti Bernard alyas Pti Apa, zot, zot desann toulezour ler zot ganny kriye, nenport ki kondisyon. E zot al debourye pou sonny zot fanmir, malgre zot bann vilnerabilite ki zot annan.

Mon oubliy Curtis Mr Speaker. Curtis i en zenn zonm ki ti tonm dan kiv e preske perdi son lavi. Me erezman son Lanz Gardyen ti eparny li en pe. E menm si in fer bokou letan Lopital Curtis i ankor vivan, i pe kontinyelman travay dir pou sonny son fanmir e son lekor.

Mon swete ki Curtis in nobou kantmenm ganny en pti pe merit finansyel pou par rapor sa lensidan ki ti arive dan son travay.

Mr Speaker sa bann non ki mon’n nonmen se sa, sa se bann zenn zenerasyon stevedores. Me mwan mon rapel ler mon ti ankor zanfan, lo radyo ti toultan kriye pa ti ankor konpran ki si sa. Gang limero 1 winchman nimero 4 raporte. Pa ti ankor konpran kwa. Apre la ti nonm non bann stevedores zot non enn par enn.

E i annan en non ki mon rapel toultan ti dir Tobby Tomking. Sa  non in mark mon e mon mazinen ki si Mr Tomking i ankor vivan, in mor malerezman ti a enteresan pou konnen ki sa letan son lavi mannyer ti ete, son lasante. Ki mannyer son parkour ti fini.

E la Mr Deputy Speaker 50an apre mon pe get ek mon laz, nou vwar nou-nou’n tann dir ki stevedores pe ganny 2 a 5 roupi par tonaz. Mon pe zis mazinen Mr Tomking ek son bann koleg konbyen ti pe fer zot?  Ya?  Anfen, mon ti a voudre mon ki Gouvernman ek tou parti konsernen ki benefisye atraver servis nou bann stevedores Seselwa sirtou, i zwenn ansanm pou dyaloge. In ganny dir la.

Mr Speaker i annan en kantite propozisyon ki’n ganny fer resorti tou lede kote latab, ki mannyer nou kapab fer pou nou amelyor lavi bann stevedores.

Onorab Henrie in donn en lalis bann dimoun ki’n deza anmenn bann Mosyon, bann kestyon e menm Onorab Sebastien Pillay in dir ex- Onorab Fideria osi in anmennen. E la ozordi Onorab Ferrari pe re demande akoz sa sityasyon pe kontinyen agrave.

Finalman mwan Mr Speaker pli gro desizyon mon dir i re poz lo sa 3 lakonpannyen ki benefis plis atraver servis nou bann stevedores. Mon enplor zot; silvouple refer en pe .zot matematik. E si zot annan sa volonte zot pou kapab arive vwar en solisyon pou kapab amelyor lavi bann stevedores ek zot fanmir.

E zot bann stevedores pa zis asize les nou debat rod en meyer lavi pou zot, e zot bril zot larzan. Sa nou pa pou dakor. E la mon pa pe finalize Mr Deputy Speaker akoz mon konnen annan ki serye.

Me, malgre pou sa bann ki pli vilnerab i annan en dikton ki dir;’’ Aide toi et le ciel t’aidera.  Mersi Mr Speaker.

 

MR DEPUTY SPEAKER

Mersi Onorab De Letourdie. Onorab De Commarmond.

 

HON CHARLES DE COMMARMOND.

Mersi Mr Speaker. Mr Speaker sa Mosyon ki devan nou i en Mosyon enportan reel konmsi letan ou get li.

E parey in ganny dir, plizyer dimoun dan nou Lasanble oparavan osi in koze lo lakoz bann stevedores.

        E sa issues stevedores i en keksoz ki vre sa. Nou tou konnen pou dir stevedores son kondisyon travay li menm i pa the best.  Me sak konpannyen ki pe anploy bann stevedores la pe fer pe antreprann zot kondisyon avek bann stevedores zot prop laranzman. Sa en pwen. Savedir sakenn pe pey bann stevedores ki travay ek zot dan an ser van diferan baz. E diferan lapros. Diferan kondisyon; savedir i annan sa premye issue ki nou bezwen gete.

Me si bann kondisyon ki bann stevedores i travay anba i telman pa bon. I telman dan problenm konmsi mon krwar ki bann stevedores i devret kite. Si vreman pa bon.

Si zot pa kite savedir i bezwen annan en lavi ladan. I bezwen annan en keksoz ki atir zot. Bann fe bann keksoz ki mon met devan. Now prezan nou demann nou lekor en pe kestyon.

Eski zot ti kapab fer pli byen pou ogmant prodiktivite? Konmsi bann stevedores eski zot ti kapab fer pli byen pou ogmant prodiktivite?

Definitivman letan nou’n ekout bann entervenan bomaten, nou vwar pou dir wi zot ti kapab prodwir plis; e de plis definitivman zot ti prodwir plis e ganny plis.

E i annan bann keksoz ki bezwen ganny aranze. Alor eski zot kondisyon zot kestyon ki beg itself eski zot kondisyon ki zot travay anba la i bon, i ok? Non, nou vwar poudir i pa ok.  E i pa zis pa ok akoz bann dimoun bann konpannyen ki anploy stevedores i pa oule peye.

I pa ok akoz par natir. Stevedoring la i enn sa bann travay ki pa son natir difisil, i konplike. So kantmenm oule sey fer aranze i pou dan problenm. Lifespan en stevedores i pli kout ki en travayer normal.  So i montre ou ki alor son kondisyon ki travay anba la e ladan i difisil en kantite.

E nou bezwen pran konsiderasyon de sa. Alor eski bann konpannyen ki anploy stevedores i zis pou fer monte zot lapey? Konmsi stevedores i dir nou espere e la nou met en Mosyon. E nou espekte ki sa bann konpannyen zis pou fer monte lapey bann stevedores?

        Non. Pa pou al fer monte zis koumsa sa. Fodre alor ou obliz zot fer monte. Fodre annan en presyon parla ki fer ki zot fer monte.

Alor i annan zis 2 a 3 keksoz ki bezwen ganny fer a mon lavi ki bezwen arive pou amelyor lavi e lapey bann stevedores.

Enn; stevedores premyerman dapre mon organiz li, organiz zot. Bann stevedores dan zot Union. I bezwen annan en Linyon akoz konmela Sesel i lapant ki i pe pran i bezwen annan sa bann lorganizasyon ki fight pou ou.

I bezwen annan en linyon ki fight pou bann stevedores apre la a gete mon krwar ler mon pe mazin sa mon pe get dan L’Echo Des Iles menm mon’n vwar Per Mathiot pe koz lo linyon travayer. Me la en landrwa kot i devret annan en Union.

        Pa zis pou al boycott pou al blok soz. Me solman pou kapab negosye e deal avek zot kondisyon travay vizavi sa bann konpannyen ki anploy zot.

Nou’n vwar osi ki i annan lasose la i annan konpannyen ki pe anploy stevedores zis stevedores etranze.  Sa pa byen sa nou krwar nou bezwen lans en lapel avek Gouvernman pou dir tyonbo en kou. La osi i annan problenm. Nou bezwen asize re get sa zafer la.

2enm keksoz i en sizesyon en Lalwa ki i a kapab get bann Rights ek bann kondisyon bann stevedores. E ladan i annan plizyer keksoz ki kapab ganny gete. E mon krwar en Private Members Bill i pa en move nide ditou lo nou kote la mon krwar nou’n met sa propozisyon. E mon krwar nou devret pe pouse pou sa arive.

Sa i bann keksoz ki nou bezwen petet en pti pe forse pou arive.

Me i annan 3enm fason a mon avi ki mon krwar si i annan en lavolonte par la, en keksoz konkret i kapab arive. Lefe ki nou pe koz ankor enn fwa lo sa Mosyon, lo sa issue stevedores, nou pa pe vin la pou blanm personn en ou a lot. Ni stevedores ni sa ki anploy stevedores. E parey mon’n dir i annan sa bann kondisyon ki koumsa kantmenm nou kontan pa kontan.

Selman Gouvernman li i pa anploy stevedores dan en fason. Me solman Gouvernman konman Gouvernman responsab, mon krwar mwan ek letan, i fini ekout nou Lasanble ki nou pe debat lo sa Mosyon. E ki i pran konsiderasyon ki avan in annan diferan dimoun ki’n anmenn Mosyon. E ki’n koz lo lakoz bann stevedores i kapab dir ok nou a pran linisyativ ansanm. Avek bann konpannyen ki anploy bann stevedores ek bann reprezantan stevedores i kapab dir zot tyonbo en kou, fer en pti miting antre zot, ganny detrwa reprezantan. Annou asize annou get en kou ki mannyer nou kapab aranz en pe keksoz ki pa pou neseserman vin lanbarasman en lanbarasman pou personn.  Me ki i ava aranz kondisyon.

E dan sa bann kondisyon mon krwar i annan detrwa keksoz ki kapab ganny konsidere lo letan ou get lapey stevedores. I annan fason sa bout tax; sa bout income tax lo lapey stevedores, nou bezwen gete ki mannyer sa i kapab ganny tire. Ok sirtou a en saler ou a get li en saler en pe pli o, ki R8500.  Me ki i pa peye.

Dezyenmman ou bezwen reget la mon’n vwar i annan bann desizyon ki’n ganny pran, bann Lalwa ki’n vin anmas la pou Fon Pansyon. Pansyon pe ogmant son kontribisyon.

E mon krwar la i annan en keksoz ki kapab regarde an partenarya avek bann konpannyen ki anploy bann stevedores, pou vwar konman en kontribisyon pansyon.  An plis par bann konpannyen ki anploy stevedores.  E si i neseser at that level Gouvernman i met en kontribisyon akoz mazin byen. Ler sa stevedores pa kapab travay, ouswa ki son retirement in vin pli boner e i pa gannyen akoz napa en Scheme ki li i pou ganny son pansyon early; e nou krwar pou dir alor i bezwen si in malad i bezwen rod en fason pou li ganny son siport.

Savedir welfare i bezwen rantre an zwe. E souvandfwa letan pandan travay ler en stevedore napa bato welfare menm ki vini pou sey ed li pou kapab ed son fanmir.

So nou vwar poudir i annan kontribisyon ki Gouvernman i fer avek sa

Stevedore, pou li kapab survive.

Alor nou p[e demande ki sa kontribisyon i vin dan en fason pli koeran, pli organize ki vin toward son pansyon. E ki la pwen laranzman kapab ganny fer ki stevedores kapab ganny en early pension si i neseser pou soutenir la Akoz nou konnen sa kondisyon ki travay ladan i pa enn de one of the best – en tre bon kondisyon.

Alor Gouvernman la i annan sa zwe ansanm avek sa bann konpannyen. E pouvwar osi. Ki mannyer kapab ganny fer ki annan en fason en pe pli koeran en pe pli ki annan plis liniformite dan bann rates ki ganny aplike pou bann stevedores. Pou la tonaz si ou pe fer ou pe tir pwason, si ou pe tir disel, e pwason kot Land Marine e pwason kot Hunt Deltel i menm pwason. I pwason. Disel kot Land Marine, disel kot Hunt Deltel ouswa kot lot konpannyen i menm disel.

So alor si ou dan skiv ou dan skiv menm. Si ou dan lakal bato ou dan lakal bato. Tou sa

osi i bezwen annan sa bann zafer i parey li whether ou kot en konpannyen oubyen lot. Savedir la nou bezwen sey vwar sa groupman la; sa lorganizasyon lead anba direksyon Gouvernman i a kapab dir, annou gete alor koman nou kapab amelyor sa bann kondisyon si nou pa oule met en Lalwa ki ava vin en fason en pe pli byen ki kondisyon bann stevedores i kapab ganny gete.

Mwan mon krwar pou dir sa i pa devret vin en problem. I pa devret; vin en issue, i bezwen annan zis en lavolonte. Bann konpannyen ki antre stevedores i pa en kestyon ki nou pe vin fors zot. Mon krwar zot osi zot pou pare pou vin on board pou dir annou koze annou diskite. Akoz mon krwar dan nou pei ozordi i annan en latmosfer pou nou koze.

So si i annan en latmosfer pou nou koze, mon krwar mwan nou devret ouver sa laport e les koze pou nou kapab aranz bann keksoz ki annan devan nou e dan sa parkour kondisyon bann stevedores i a kapab ganny gete. E osi nou pou bezwen koz lo responsabilite stevedores. Ladan osi i bezwen annan sa bout.  Akoz pa kapab stevedores i osi i abiz lo son responsabilite ki i bezwen sorti avan ler i bezwen fer bann trik ki nou tou nou konnen sa bann zafer kot lasose, ensidswit.

E fer an menm tan mazin osi Lasanble i annan en vizit byento lo Por. E sa vizit lo Por mon demand e ki nou bann Manm letan nou ale nou pran konstans sa Mosyon ki nou pe diskite ozordi. Pou vwar osi ki mannyer bann keksoz ki kapab ganny amelyore lo Por. Akoz nou konnen poudir lo Por, lo tou Por sa i annan en bann kalite roulman ki pase. E stevedores parfwa i tonm dan pyez bann diferan kalite keksoz negativ ki pase ki arive lo Por.

Alor tousala i bann sa Komite kekfwa ki mon pe dir Gouvernman sey mete, i a kapab osi donn en koudmen pou get dan plis ki zis ka stevedores.  Me i ava, osi get dan bann lezot kondisyon lezot sityasyon ki annan lo Por e koumsa mon panse parey mon’n dir sa bann lakonpannyen i a tout pare pou donn koudmen pou fer. Akoz zot osi zot konnen pou dir ki napa stevedores zot osi bann konpannyen zot dan problenm, zot riske pa egziste. Zot pou bezwen demann etranze e la Gouvernman i dir tyonbo en kou Gouvernman osi ennler met lipye ater dir non mon pa pou donn ou permisyon pou anploye sa ta etranze whatever.

        Me solman i annan i annan osi ki nou bezwen pran konsyans si nou zis bloke osi nou dir non pa pou pran etranze! Be, nou manz e i vin par Por. I pou reste laba lo Por ouswa i pou reste lo bato.

So i annan tou sa bann.   Vat et viens ; tou sa bann issues  ki nou bezwen pran konsyans. E nou bezwen selman vwar en bon solisyon pou sa issue.

Alors osi dan sa nou bezwen get byen. Prezan i a permet konpran mekanizm ki stevedores i ganny son lapey. E prezan welfare oubyen bout sosyal kot   welfare menm. I ava kapab re vwar osi ki mannyer stage  ki i bezwen antre pou kapab asiste en stevedores pou fer sir ki i osi  son fanmir  i pa ganny trouve dan en sityasyon kot i pa kapab sonny son fanmir.

Avek sa mon krwar nou bezwen siport sa Mosyon. Mon pa, ti a voudre fer okenn lezot kalite politik avek sa. Me mon krwar i en Mosyon ki nou bezwen get li dan son merit e al dan sa direksyon pou nou kapab ed sa bann ed nou bann stevedores, pou kapab fer en pli bon travay e kapab konmsi santi zot pli happy. E ki osi bann konpannyen ki anploy zot i a osi pare pou kontribye towards sa bon koz ki nou pe koze la.  Mersi.

 

MR DEPUTY SPEAKER

Mersi Onorab De Commarmond. Onorab Georges.

 

HON BERNARD GEORGES

Mersi Mr Speaker. Mr Deputy Speaker mon kontan ki mon’n arive pou ganny en bout sa deba. Akoz mon krwar i mon devwar pou koz lo stevedores ki travay dan Lendistri Ton. Akoz parey Onorab Ferrari son distrik Mont Fleuri avek mon distrik Les Mamelles i tre sanblab i tre similer dan bokou sirkonstans.

E enn bann similarite se ki annan en popilasyon travayer dan sa lendistri ki reste Les Mamelles. E se lo zot par ki mon pran laparol apre midi. Ou ava eskiz mon Mr Deputy Speaker si akoz mon’n mank en bout sa deba mon repet mon lekor me mon pa koz tro lontan alor mon ava koup en pe lo posibilite repet sa ki’n deza ganny dir.

Mr Deputy Speaker sa deba dapre sa ki mon pe konpran apre midi, dapre sa ki mon pe tande i enn ki in deza vin dan nou Lasanble e sa i vre. Menm dan bann Lasanble ki mwan mon’n servi sa size ki’n deza monte. E mon kontan tann 2 keksoz la apre midi mon kontan tande ki mon pwen neseser dan sa Lasanble pou distrik Les Mamelles in abord sa size. E i byen ki’n fer sa akoz pe enport lekel ki pe reprezant distrik Les Mamelles problenm i reste, nou popilasyon ki travay .dan lendistri ton konman stevedores i merit ganny regarde, e zot kondisyon travay i merit ganny amelyore.

I annan lannen de lannen ki nou pe tann sa menm leokri parey nou tou ki annan stevedores dan nou distrik nou tande zot toultan pe dir nou koz ek sa 2 group anplwayer fer tonaz monte.

E sa pou tou letan ki mwan mon’n dan politik set en refren ki mon’n tande konstaman.

2enm keksoz ki mon kontan tande apre midi se ki sa Mosyon pou ganny siport Lasanble an antye. E sa i byen. Akoz nou bezwen koz lo en size koumsa avek en sel lavwa. E mon konpran ki

I annan en demars pou en Private Members Bill. Oubyen i annan en lide ki’n ganny flote pou en Private Members Bill ki pou anmenn en solisyon konpreansiv mon a les Onorab mover Mosyon reazir avek sa. Me i paret mwan ki lespri i al dan en bon direksyon.

Mr Deputy Speaker dan bokou ka nou tann bann stevedores ganny mal koze. Nou tann zot ganny mal koze pou plizyer rezon. Enn in ganny evoke par Onorab De Commarmond ki i annan serten keksoz ki pase lo Por ki pa toultan byen. E nou devret rekonnet ki sa i leka.

En lot se ki pou en zenn ki anvi al travay stevedoring dan lendistri ton i en opsyon ase fasil. E nou konnen ki bokou zenn pa oule anploye o mwan akoz pou detrwa 4/5 zour kekfwa en semenn travay dan en mwan dan sa lendistri zot ganny en lapey ki en dimoun ki anploye ti pou fer ti pou gannyen pou son full mwan. Alor i dan zot lavantaz pou zot travay mwens pou menm lapey. E annan plis letan lwazir.

Nou tann sa kritik. E en lot kritik ki nou tande e ki mon menm mwan mon devret admet ki dan bokou ka mon’n koz avek stevedores, ler zot ant 2 bato ler larzan in fini. E zot pe rod en fason pou ariv ziska ler zot ganny pou ganny kriye ankor zot pe rod en lasistans. Nou dir zot, ‘’me gete pa depans tou larzan ki zot in fer ler zot annan en bato met en pe savings de kote pou letan dir.’’ Me set en keksoz ki zeneralman pa ganny fer. E i normal, e sa i normal. Akoz ler ou annan larzan dan ou lanmen ou tant pou depanse i annan toultan en rezon pou ou depans sa larzan en keksoz ki ou bezwen aste en emergency ki arive.

Alor nou tant pou dir me annou trouv solisyon egzakteman parey sa Mosyon kot ozordi i dir. Annou trouv solisyon kot bann lakonpannyen en konsernen bann lakonpannyen ki anploy stevedores. e mon konpran ki mon krwar ki i byen ki nou konmans la. Akoz nou bezwen konmans kot larzan i ganny fer. e larzan i ganny fer la. Stevedores i ganny peye la. E se la ki nou se sa laport ki nou devret tap an premye.

E dan sa konteks, mon ti a kontan lo lapar bann stevedores dan mon distrik zwenn mon, mon bann koleg zwenn sa Lasanble, pou fer sa demann ki sa lapey sa tonaz ki ganny revwar a sa nivo. Akoz i en lendistri ki fer bokou larzan. E i en lendistri ki fer bokou larzan pou bann sener; bokou larzan pou bann maren, bann kaptenn lo sa bann bato.

E osi nou bezwen admet pou sa lakonpannyen ki fer stevedoring isi Sesel. Alor premye laport nou bezwen tape se kot zot.

Me se pa sel laport mon krwar ki nou devret tape. E mon ava zwenn ki koz avan mon bann ki mon’n tande bann ki mon konnen mon pa’n tande, pou dir ki enn fwa ki sa laport in ganny tape, e ki tonaz i ganny revwar. E ki sa fasilite in ariv sa income in ariv a en nivo ki apropriye e soutenab, nou devret prezan regard dan lezot fason pou siport; bann stevedores dan nou distrik. Pou siport sa bann ki pa kapab oubyen pa oule fer en savings ant 2 bato, ant 2 geng.

Pou bann ki pa kapab travay apre en serten letan pa akoz .nou konnen ki sa travay dan lafreser i en travay ki danzere. Mwan menm mon mon’n bezwen deal ek plizyer ka kot stevedores i ganny injury dan zot travay.

E i kler ki a en serten moman, zot repriz pli vit ki travay dan en biro oubyen ki annan en lot kalite lanplwa.

Me nou pa fodre bliye Mr Deputy Speaker ki kantmenm tousala in ganny dir, kantmenm nou bann stevedores annan de fwa nou kritik zot. Dapre sa ki mon konpran e dapre sa ki bann lakonpannyen i dir mwan, nou Por i reste enn bann Por pli performan lo sa nivo dan nou rezyon. Alor nou annan keksoz pou nou proud of nou annan keksoz pou nou kapab dir an faver nou stevedores.

        Alor avek sa detrwa parol ki mon sir in ganny dir avan, mon ti a kontan anmenn mon sipor pou ‘sa Mosyon.

Me mon pa kapab anpes mon pa kapab paret a mwens ki mon koz lo en lot keksoz. Mon konnen i tonm en pti pe an deor Mosyon. Me set en pwen ki bann travayer lo Por dan mon distrik in demann mon met devan. E mon krwar ki sa i en moman apropriye. Bann dimoun ki travay avek sa lendistri me pa neseserman konman stevedores bann dimoun ki travay dan lasenn par egzanp. Zot pe demande ki zot osi zot kondisyon i ganny revwar.

Akoz sa lendistri i en lendistri konpreansiv. I en lendistri bokou keksoz. Mon konnen ki Mosyon i koz lo stevedores ki travay avek bato ton. Me i annan osi ki rann en servis pou siport stevedoring, pou siport sa lendistri. E mwan mon konn en dimoun an partikilye ki ava rekonnet son lekor ler i pe ekout mon koze apre midi ki‘n demann mwan silvouple koz lo travayer dan lasenn koz lo tou dimoun koz lo maren ki al lo bato osi, akoz zot osi bann maren en Seselwa i bezwen ganny sipor nou kominote nou lendistri ek nou Gouvernman.

Alor Mr Deputy Speaker avek sa detrwa parol mon ti a kontan reasir nou Kominote Stevedores Les Mamelles ki i part ki sa Lasanble pou zwenn ansanm ozordi pou anmenn en sekour a zot bezwen.  Mersi Mr Speaker.

 

MR DEPUTY SPEAKER

Mersi Onorab. Onorab Simon Gill.

 

HON SIMON GILL

Mersi bokou Mr Deputy, Speaker. Bonn apre midi tou koleg Onorab e manm piblik.

Mr Deputy Speaker Mosyon prezante par Onorab Ferrari i en Mosyon ki ozordi ler nou analiz li met li dan konteks nou realite politik e ekonomik, nou konpran rezon akoz ki sa Mosyon in vini .

Bomaten ler loter Mosyon in koze, probableman en statement ki’n fer in donn en lenpresyon ki mwan partikilye mon dir annou pa kontinyen diskit case bann travayer ki nou ape l zot bann doker bann stevedore.

Mon mesaz ozordi apre midi se ki mwan depi lontan mon konpran ki savedir lalit. Mon pa’n zis asize, dan mon letan zenn. Mon’n deza   dir dan sa Lasanble mon profite pou  mwan re nonm ankor ki depi laz 13an, mon pe lalit.

E mon pou aret lalit selman ler mon nepli kapab koze e ler mon nepli kapab marse.

E Onorab Ferrari

mon konnen i len zonm ki annan en kapasite pou osi lalit. E mon a dir li annou zwenn ansanm pou nou kontinyen lalit.

Lalit pou en bonn koz. Lalit pa pou motif politik. Lalit akoz nou realize i annan en sityasyon reel devan nou ozordi e ki dan sa nouvo lanvironnman koabitasyon, mon kontan e mon apresye. Ki ozordi pou la premye fwa sa Mosyon ki dan Lasanble ozordi, pou ganny 100 poursan vot bann Manm ki isi prezan ozordi.

E avek sa vot i annan en mesaz byensir ki pou sorti pou tou bann dimoun ki annan keksoz pou fer avek bann travayer ki nou apel zot bann doker, bann stevedores.

E sa mesaz ki nou pou anvoye ozordi i si tou sa bann lannen ki nou’n koze tou sa bann lannen ki nou Parti in koze. Bann reprezantan nou Parti dan sa Lasanble in koze. E bann reprezantan dan nou pozisyon dan diferan moman letan koze.

Si i pa ankor koze si i pa ankor tande. Ozordi sa mesaz pe eko ‘’pli for ki zanmen.’’ E mon pa krwar r nou devret koz tro bokou. Se atraver en prozedlwa ki nou ava anmenn dan sa Lasanble ki pou anvoy sa mesaz pli for; atraver en deal wi nou koz lo en Private Members Bill ki mon krwar gler nou ava asize nou ava’n diskit lo tou bann pwen, e nou ava met tousala dan en Prozedlwa. Kot si nou serye nou tou nou pou vot lo os a prozedlwa e i ava annan byensir en striktir en lenstans ki ava asire ki sa ki sa Lalwa wi dir ki ganny met an aplikasyon.

Isi Mr Speaker, nou pa pe koz keksoz volonte politik. Volonte politik i egziste. E ozordi ‘’plis ki zanmen’’, nou reakte determinen pou nou ansanm avek nou bann koleg lo lot kote latab pou nou anvoy enn fwa mon dir en mesaz serye. Me i enportan mon mansyonnen apre ki mon’n fer sa lentrodiksyon Mr Speaker pou dir ki konman bann dimoun rezonnab nou rekonnet ki annan en kantite keksoz ki’n ganny fer lo nou lasose partou kot nou bann travayer ki nou pe koz lo la ozordi i travay.

Nou pa kapab fer krwar ki napa nanryen ki’n sanze. In annan en kantite transformasyon ki’n arive lo nou lasose. E in annan en kantite modifikasyon ki’n arive lo nou lasose.

E an zeneral san ki nou al dann bann spesifik e konpare avek ler mon papa ti travay koman en doker, avek sityasyon ozordi sirkonstans i diferan. E byensir i diferan e keksoz in sanze.

Parey Onorab Loizeau ki’n koze bomaten, mon annan sa leksperyans vivan, dan mon latet. E sa leksperyans i pa zis vivan lo mon latet akoz mon’n viv. Mon fanmir in viv avek en papa ki ti bezwen fer viv 7 nou.

E pou bann ki pa konnen, ti annan politik sa lepok. Mon pa pou al fer, gran elaborasyon lo la. Si ou pa ti siport serten Parti Politik dan lepase, dan lepok mon papa travay lo lasose koman en doker, ou pa ti pou gannyen en meday. Ou pa ti pou antre lo lasose. Ou gang pa ti pou ganny apele. Parey Onorab De Letourdie in dir. Sa bann non pa ti pou ganny, nonm ditou. E byensir ou ti pou ale 1 mwan ennler ou asize napa naryen napa reveni ki rantre kot lakaz.

E dan sa bann lepok Mr Speaker i enportan ki nou viv li en pe ozordi, e pou bann ki pe ekoute deor zot konpran.

Nou bezwen rod alternatif. Alternatif ki ti annan. Pa ti anploye, al plante, sonny zannimo, fer viv fanmir. Ki sa bann moman tris ki mwan mon’n eksperyanse dan mon lavi konman en zenn. Avek en papa, sel papa ki ti travay. E manman ti la kot Lakaz pe fer bann lezot tripo lezot debrouy.

I ti tough. Mon dir i ti tough parfwa ou plere aswar ler ou papa i antre avek R25 i dir, ‘’mon piti sanmenm tou ki mon’n gannyen. ‘’

Pou pey lekol ti napa larzan pou pey lekol. Mon’n deza koz alo la. Akoz ti napa lezot fasilite. Napa lezot mwayen. Ou ti struggle.

        Tou le Sanmdi ou ti bezwen desann pou al vann legim bazar, pou ou kapab fer bann bout aziste.

E ozordi nou bann doker ozordi ki ganny larzan toulezour. E nou dir still pa ase akoz sirkonstans lekonomi sirkonstans pei in sanze.  E mon ti sapo avek zot. Pou sa determinasyon ki zot annan pou kontinyen travay. I enportan ki nou kontinyen travay.

Mon osi mon’n koz avek ken kantite doker Mr Speaker. E tanzantan letan zot vwar mon zot dir, ‘’Chief koz en pe pou nou laba dan Lasanble. Koz en pe pou fer larzan bann tonaz monte.’’ E normalman mon pa kontan mansyonn non bann konpannyen ni endividi zot mansyonnen bann konpannyen zot mansyonn mon bann endividi. Me mon pou re strikteman pou kontinyen pa mansyonnen.

Me bann konpannyen mon krwar ki ozordi nou pe dir zot revwar ki mannyer zot donn reminerasyon sa bann travayer ki travay pou zot.

Ki’n fer zot ozordi sirviv atraver letan; kot, nou’n tann dir i annan pe selebre 80an legzistans.

E i pa’n fasil, mon konnen pou zot. Pou bann dimoun ki dan biznes. Me lefe i reste Mr Speaker pou mon pa al tro long dan mon lentervansyon e ki nou, nou bezwen konpran en keksoz. Se ki travayer bann labourer ki nou apel zot bann zournalye mannyer nou oule apele, atraver lemonn zanmen nanryen in fasil pou zot.

E i sa rezon. I sa rezon an rekonesans ki naryen pa fasil pou sa laklas travayer i rezon akoz ti bezwen annan en mouvman ki ganny formen pou lalit e defann drwa sanmenm sa group travayer.

E nou problenm Mr Speaker, ozordi dir tou sa ki nou oule dir. Nou, bezwen donn merit. Nou bezwen donn merit sa bann zonm fanm, ki’n zwenn ki’n groupe. E i’n debout; dan en moman istorik pou reklanm drwa lezitim travayer Seselwa.

Nou pa kapab toufe  sa. I listwar. I reel. E si i annan sanzman ki’n arive dan Sesel, se zisteman, se akoz i annan bann zonm fanm i’n debout akote bann zonm ki nou ti pe dir ti pe ganny oprimen. Pa ti pe ganny en fair deal zot lafors travay.  E wi ler nou dir 40an pli tar sir napa nanryen ki’n sanze ozordi en nouvo zenerasyon nou ki si dan sa Lasanble listwar in tap lo nou laport ozordi Mr Speaker.

E nou bezwen kree sa listwar. Ekrir sa nouvo sapit dan lalit travayer pou reklanm zot drwa lezitim. E mon kontan ki nou napa bokou diverzans lo la.

E ler mon dir mon kontan nou napa bokou diverzans lo la, i kree labaz pou nou anvoy en mesaz pou sa group travayer laba lo lasose. ke nenport ki Mannyer  nou oule ,apel zot. Ke nenport si i ganny larzan i fini i al brile.

Me nou mesaz lespwar pou zot se ki ozordi plis ki zanmen i annan en group Manm Lasanble Nasyonal Sesel ki pare pou debout e koz for pou zot.

Vwala lespwar. I pa en kestyon Parti Lepep ozordi. E mon kontan ki ozordi nou annan nou en mazorite Lopozisyon dan Lasanble Nasyonal. Wi mon kontan. Mon kontan i annan en mazorite Lopozisyon Lasanble Nasyonal dan sa Lasanble ozordi, akoz i a donn zot sa kapasite pou zot pli byen apresye sa moman ki nou, nou ti an mazorite e kot nou ti pe dir nou bezwen donn en fair deal bann travayer laba lo lasose.

E kot serten en bann Politisyen ki ti smart ti minimiz parol. Ti pe dir pou dir konmsi nou pa, bezwen fer tro bokou keksoz undercover.

        Me i annan ki ti brav mon bezwen fer li eksepsyon byensir i annan ki isi annan ki ti brav. Ki ti dir nou bezwen wi donn en fair deal bann doker. Donn en fair deal bann travayer bann stevedores. i annan ki ti brav. I Annan ki ti brav. E mon pe dir ozordi avek nou bann travayer stevedores lo lasose gard sa lespwar vivan. Akoz ozordi mazorite dan Lasanble Nasyonal, pe shoulder sa responsabilite. Pe shoulder sa responsabilite. Nou pa pou gete ki kantite sponsorship nou gannyen. Nou pa pou gete ki kantite sipor pou nou konpanny i gannyen. Nou pa pou gete ki kantite larzan nou Parti Politik i gannyen.

Me nou pou debout ferm pou nou anvoy en mesaz kler deor isi ozordi. E dir si dan sa prosen 3 mwan, si dan sa prosen 3 mwan napa nanryen ki vin piblik ki sanze lo kondisyon bann doker, sa Prozedlwa ki nou pe dir Private Members Bill pou ganny finalize.

Nou bezwen donn en sans. Onorab Ferrari i dir nou’n zwenn bann dimoun konsernen nou’n diskite. Annou donn en sans diskisyon ankor. Annou donn en sans negosyasyon ankor. Kot mon konnen pou dir zot pe ekoute.

E dan linegalite nou pe dir nou mesaz pou ale ozordi. E si 3 mwan mon repet, sa 3mwan pa sanze napa nanryen ki vin piblik lo amelyorasyon nou bann travayer lo Por, nou Bill i bezwen ganny table.

E ler nou Bill i ganny table, nou ava fer sir ankor enn fwa ki bann provizyon ki ganny definir ladan i ganny met an aplikasyon.

Mr Speaker, i annan pou dir isi dan sa Lasanble nou vin terorize. Oubyen nou vin dikte. E deza i annan serten dan sa Lasanble. Mon rapel tre byen ler nou ti pe fer serten diskisyon ti dir konmsi i annan i vin fer per. Napa mi vin fer per personn.

Me nou pe dir this time round nou serye koman en Lasanble. Sa ki krwar i pou take it for granted,  ki sa ki nou dir pa pou ganny met an aplikasyon mon krwar pe, fer en gran fot.

Nou lafors konman bann Parlmanter dan Sesel. Konman en nouvo zenerasyon Parlmanter dan 6enm Lasanble Nasyonal dan Sesel i mark leta nouvo.

I mark en nouvo sapit dan nou listwar politik. E ankor enn fwa pou mon konklir ler i mark sa nouvo leta nou bezwen fer sir ki nou akonplir dan son totalite. Sa misyon istorik ki listwar in konfye dan nou.

E i pa zis nenport ki listwar. I en listwar pou travay konman en Lasanble pou nou fer tou keksoz ki posib. Pou nou anmenn en sanzman, anmenn transformasyon profon. Dan lavi tou Seselwa.

E Mr Speaker parey mon’n dir mwan mon pou kontinyen lite, e lo sa kote latab nou pa pou zanmen give up. Personn, personn pa pou fer nou give up. Nou pou tenir, wi nou pa pou large. Tenir for pa pou large.

Sa tenir for i napa zis en kestyon ler ou lamazorite sa. Tenir for i en mannyer panse. I en filozofi, par lafason ki kantmenm ou en minorite lafason ki mannyer ou koze. Lafason ki mannyer ou Sizle bann loportinite. E mannyer ou transmet ou konviksyon devan. E dan en fason for wi. E Parti SPUP/SPPF/ Lepep Mr Speaker. I reste determinen pou kontinyen fer son lavwa tande, a traver tou bann size ki ganny anmennen isi dan sa Lasanble. E ozordi pou mwan fini nou dir avek bann doker nou bann travayer lo lasose Parti Lepep i la. E nou pa pou zanmen bliye ki zot egziste nou pou tenir zot for.  Mersi bokou.

 

MR DEPUTY SPEAKER

Mersi Onorab Simon Gill. Bon avan nou pran en break, mon ti a kontan zis enform bann Manm Bills Committee ki nou pou rankontre dan en pti moman Committee room 2. Ok, e nou ava avek sa nou ava adjourn ziska 4er.

 

(

(BREAK)

 

 

MR DEPUTY SPEAKER

Bon, mon prezant en leskiz pou sa retar akoz Bills Committee ti pe rankontre pou fer en travay lo Bill ki pou prosennman vin devan Lasanble. Nou a kontinyen avek nou travay. Mon annan Onorab William ti le fer en short entervansyon apre mon ava donn Onorab Ferrari, loter Mosyon pou… Non ou pa’n… Ok, Onorab William then Onorab Ramkalawan e loter Mosyon i ava wrap-up. Onorab William.

 

HON WAVEN WILLIAM

Mersi Mr Deputy Speaker. Mr Deputy Speaker mon pa pou tro long, zis mon ti a kontan met… well an siportan sa Mosyon, byensir sa Mosyon i annan son merit.  Mon anvi ki loter Mosyon ansanm avek nou Lasanble, nou mazinen ki fason a lavenir me avek sa Mosyon byensir, ki fason Lasanble pou kapab fer sir, mon konnen poudir nou annan en Assurance Committee e parfwa i annan serten bann bon, bon keksoz ki sorti ki merit follow-up avek aksyon par egzanp la lo tou le de kote latab i annan sa konsansis ; i annan bann bon propozisyon ki’n ganny fer sorti. Par egzanp sa Prozedlwa ki Onorab Gill in dir petet donn en dele letan 3 mwan, me mwan mon anvi demande ki petet nou annan en White Paper ki ganny fer sorti ki nou kapab vwar e konmans diskit lo la. Akoz ki arive se ki letan ou regard sa Mosyon li menm li, ouswa size sa Mosyon, i en size ki en bon pe letan pase, 2enm, 3enm, 4enm Lasanble, sa size in ganny trete isi.  E mon santi ki osi lontan ki Lasanble pa angaz li al pli lwen, pou angaz bann diferan stakeholders pou pran serten desizyon konkret, mon santi poudir sa bann bon sizesyon ki Manm Lasanble i met devan,  i pa ganny carry forward.  So mon ti ava demann loter Mosyon dan son wrapping-up si nou kapab annan something konkret, ki nou kapab anmenn devan. Akoz sa size i en size ase sansib osi tou. Akoz letan nou pe koz sa partenarya ant sekter prive avek Gouvernman, mon santi poudir la lanfaz i lo stevedores.  Me osi ki’n sorti dan sa meeting avek serten sa bann Lazans se ki nou pa kapab outprice servis dan Sesel akoz dan larezyon e osi o nivo mondyal i annan konpetisyon, diferan dinamik e lafors ki an zwe dan sa lemonn komers, alors mon demande ki nou pa ganny vwar ki Lasanble pe favoriz zis en serten kote me nou get li lo en fason global. Avek sa 2 pti mo Mr Deputy Speaker, mon pou aport mon sipor parey mon’n dir pou sa Mosyon. Mersi.

 

MR DEPUTY SPEAKER

Mersi Onorab William.  Onorab Ramkalawan.

 

HON WAVEL RAMKALAWAN

Mersi bokou Mr Deputy Speaker. Mr Deputy Speaker, mon krwar ki sa Mosyon ki devan nou Lasanble parey in ganny eksprimen par tou bann dimoun ki’n koze i annan son merit e i kler ki Lasanble pou aprouv sa Mosyon. Konman enn bann dimoun ki mon non in ganny mansyonnen boner pandan sa deba e konman enn bann Manm ki i pa fer premye fwa mon koz lo size stevedores, mon krwar ki ozordi i byen ki nou pe apros keksoz dan en diferan fason. E mwan mon swete ki enn fwa pour tou nou ava bouz devan ; parske nou pa pou kapab lannen ale, lannen vini, kontinyen koz lo en size ki nou tou nou tonm dakor lo la me ki apre napa nanryen ki arive. Mr Speaker mwan mon regard sa size dan en pe sa contexte nou lendistri, mon trouv i en pe drol ki Gouvernman, i pa’n kapab rantre pou li met bokou lanfaz lo sa bann diferan travayer. Nou’n koz bokou pandan sa dernyen 5an espesyalman, nou’n tann koz bokou lo Lekonomi Ble e alor petet i bon pou nou regard li en pe dan sa contexte.  Nou’n koz lo Lekonomi Ble me parey bokou nou i santi, i annan en kantite keksoz ki al kont sa zafer. E ou a krwar parfwa Lekonomi Ble i en keksoz plito ki’n sey ganny vann avek… lo nivo enternasyonal, olye ki nou konman Seselwa nou vreman santi sa lenpak. Akoz mon dir sa Mr Speaker ? Ozordi dan en staz kot nou pe enkyet lo Lendistri Ton, lo soutenabilité sa Lendistri ; kot nou pe koz lo rediksyon lakantite Yellowfin ki kapab ganny atrape, ozordi kot nou pe esey debat pou nou regarde si pou servi lannen 2014 oubyen lannen 2015 konman lannen referans, se la e kot keksoz i vreman grav ; se la kot nou pe sey regarde pou nou balans vreman nou bann rekonpans ki nou bann stevedores. Me Mr Speaker, an menm tan i enportan pou nou dir ki la letan nou pe koze i annan en gran konsern. Eski nou realize ki poudir an Septanm sa lannen dan ankor detrwa mwan bann bato lapes ton pe aret lapes, i kapab aret lapes? Eski nou realize ki pou son konsekans-ofet si pa ti’n met 2015 konman lannen referans, bann bato ton ti pou’n fini aret lapes akoz zot ti’n pou’n fini ariv sa quota ki permet zot lapes. Alors apartir Septanm i posib ki tou bann bato ton dan nou lanmer, i aret lapes akoz zot pou’n fini ariv sa rediksyon 15 poursan lo yellowfin ki I.O.T.C in enpoze. E alor, sa dan li menm li i montre nou en gran konsern. I vedir ki sa 700 ekek stevedores ki nou pe koz lo la, zot riske napa en travay.  E mon krwar ki se la ki fer ki sa Mosyon i annan li en lenportans ekstraordiner, ki nou pou fer avek sa 700 ekek stevedores letan bato i aret travay e letan napa aktivite lo nou por lapes? Mr Speaker, nou kapab deza konmans mazin en pe bann konsekans. Nou kapab mazin plis presyon lo sistenm welfare, enn.  Nou kapab mazin plis presyon lo bann aktivite dan bann distrik ; nou kapab trouv en logmantasyon dan kriminalite. Nou kapab aktyelman trouv nou avek bann gro problenm sosyal.  E zisteman sa lenkyetid ki mon pe met devan sa Lasanble e an relasyon Lekonomi Ble, se parski pandan tou sa bann lannen, pandan tou sa bann lannen depi ki nou Lendistri Ton nou’n met li konman en 2enm lendistri dan nou pei, mon santi nou pa’n manage li parey nou ti devret manage li. Ofet Mr Speaker nou’n fer en pti kalkil nou 2 Onorab Afif, e lo en baz tre konservater, nou pe dir ki pandan sa bann lannen depi 1984 letan nou Lendistri Ton, nou kapab dir in vreman take-off i posib ki in annan en minimum $1 bilyon reveni ki’n reste Sesel. $1 bilyon letan ou met li an term roupi i vedir R14 bilyon. E parfwa mon poz kestyon eski nou kapab vreman montre kote sa R14 bilyon in ale sorti dan sa lendistri?   Letan ou pe kalkil depans ki pei in pas ladan ; letan ou pe kalkil bann kriz ekonomik e byensir i annan serten dimoun ki’n byen pase, i annan serten lakonpannyen ki’n byen pase, me nou konman en pei i eski nou’n vreman benefisye ? Mazinen ki poudir depi nou Lendistri Ton in vreman vin lo en nivo endistriyel lo sa nivo, Sesel li i pa’n zanmen vreman rantre pou li al eksplwat sa resours. Ti annan en lesey avek Spirit of Koshe ki parey nou konnen pa’n marse, en bato fiberglass ki ti zis en failure.  Me apre Sesel li i pa’n zanmen enterese pou li eksplwat sa resours ki la devan son laport. Par kont nou’n fer tenk, nou annan nou 5 tenk me nou, nou menm nou, nou pa’n rantre dan sa lendistri pou nou kapab nou menm nou a pe lapes nou ton avek nou bato pou nou kapab ganny maximum. E byensir si nou menm nou ki ti a pe lapes nou pa ti ava zis pe resevwar larzan an term transbordement oubyen an term license. Me nou Sesel, nou ti ava pe vann ton e nou kapab mazinen ki pli gran benefis ki nou ti pou kapab gannyen. E donk Mr Deputy ozordi nou pe dir ki bann stevedores i bezwen ganny en pli bon deal.  Me selman ankor enn fwa letan mon met li dan contexte Lekonomi Ble, ankor enn fwa nou vwar ki poudir nou pa’n vreman byen servi sa resours ki nou nou’n gannyen. Letan mon regard maren Seselwa, ozordi Mr Deputy Speaker, nou bann maren Seselwa i ankor pe mal pase lo bann bato Espanyol e lo bann bato Franse ki zot al lapes. Par egzanp en maren Seselwa ki annan leksperyans e maren Seselwa ki letan ou koz avek zot, zot dir avek ou, ‘’se nou ki dekouver pwason; se nou letan nou lo zimel, bann Espanyol ek bann Franse, zot vreman kontan travay ki nou fer.’’ Me kwa ki zot pe gannyen? Pran par egzanp lo bato Espanyol, Mr Deputy Speaker en maren Seselwa i ganny R1800 konman en saler de baz, R1800 mwens ki saler minimum.  E apre sa, wi, depan lo tonaz i ganny li R3.50 par tonn ki ganny lapes. En Seselwa ki lo bato Franse li i ganny li R1400, ankor enn fwa pli ba ankor e avek tonaz, Franse li i pey en pe plis, i pey en pe plis i pey R10 par tonn. Me selman Mr Speaker, sa Seselwa, sa maren Seselwa ki mwan ozordi ki mon anvi letan nou pe regard stevedores akoz i dan sa menm lendistri, i enportan pou nou osi met son sor devan, sa maren Seselwa i napa lasirans. Sa maren Seselwa zour i pran konze, i ganny nanryen ; ni sa lapey i pa gannyen. Tandis ki en maren Franse, Mr Deputy Speaker, letan li i pran konze i retourn an France, li i kontinyen ganny son full lapey ; an plis ki sa, li i kontinyen ganny tonaz lo bann ton ki pe lapes ki son bato i a pe lapes dan Losean Endyen. Eski nou kapab dir sa i fair?  Byensir non.  I annan en keksoz ki mal e mon krwar ki an mezir ki nou pe regard nou bann stevedores, mon krwar la i annan en lot konba ki nou bezwen anmennen pou nou bann maren Seselwa ki pe travay lo bann bato Franse, e lo bann bato Espanyol. Akoz ki an menm tan li en Malagasy, ok, en Malgas, en maren Malgas li i a pe ganny plis ki en maren Seselwa se parski son pei ek son bann Linyon ensidswit zot in lager pou sa maren Malgas. Letan mon pe dir ki lo en bato Franse, en Seselwa pe ganny li R1400, en Malgas li i pe ganny li $540-plis tonaz. Alor Mr Deputy Speaker i kler ki i annan keksoz pou nou fer. E mwan mon krwar ki poudir konman en Lasanble Nasyonal nou bezwen met latet ansanm e nou bezwen defann nou bann Seselwa ki annan pou fer avek sa lendistri. Letan nou’n koze pli boner, Onorab De Commarmond in dir ki i enportan pou ki zot annan en Linyon. E Onorab De Commarmond in osi dir Per Mathiot Viker  Zeneral  Dyosez Victoria, in osi ekrir ki pou dir fodre ki i annan en Linyon pou bann stevedores. Me i annan en bout ki ou pa’n azoute, in dir me selman fodre pa ki sa Linyon i sorti dan parti ki O pouvwar akoz konmsi i pou vin en pe menm zafer. Me i annan en keksoz ki enterese Mr Deputy Speaker, i enterese e Onorab Gill osi tou in mansyonn Linyon, ki mannyer osi bann travayer i bezwen koste ansanm, plizyer nou nou’n mansyonn sa. Me eski nou realize ki poudir in deza annan en Stevedores Union dan Sesel ? In deza annan Stevedores Union e Onorab Gill en dimoun ki’n swiv byen lalit, i konn tre byen ki poudir ti annan tou kalite Union avan ’77 e konbyen fwa zot in debout lo semen avek Mr Rene devan pe dirize, Mr Philibert Loizeau, mon papa osi tou ti dan sa bann Lamars ; ti dan strike Lesplanad pe rod logmantasyon lapey. Me apre sa apartir ’77 tou sa bann Linyon ti ganny fermen.  Tou sa bann Linyon ti ganny fermen Mr Speaker, e ozordi letan… mon kontan letan Onorab Henrie pe koz sa empowerment, pe koze lo, ‘’Be ki mannyer nou pou bezwen empower sa bann dimoun?  ’’ E mwan mon krwar ki i kler ki poudir nou konman en Lasanble Nasyonal nou bezwen donn lankourazman tou travayer. Nou pa kapab vwar nou bann frer ek ser Seselwa ki pe trimouse, ki pe lager, me selman sa ki rantre eski pe travay, me sa ki rantre dan zot pos i pa vreman sifizan, i pa egal sa transpirasyon sa syer ki’n sorti lo zot fron. E donk wi i enportan; i enportan pou nou pran sa konman en size serye alors nou bezwen an mezir ki nou donn lankourazman nou bezwen regarde ki mannyer nou pou avans devan. Onorab Pillay in mansyonnen ki poudir ou konnen pa toutafe Gouvernman, ou pa kapab tro demann Gouvernman, parski sa i en sekter prive. Mon konpran son laliny, son laliny ki i pe vin lo la, me selman si en keksoz pa pe mars, nou bezwen… Gouvernman pa kapab dir sa i prive mon pa pou rantre ladan akoz ki Gouvernman i rantre pou li pas Lalwa pou ki bann sekter prive i donn 13enm mwan ?   Se parski nou vwar poudir i en keksoz ki travayer i merite akoz ki nou Gouvernman in etabli bann regilasyon ki dimoun dan sekter prive zot osi dan sa Pension Fund fodre ki i annan en kontribisyon ?   E donk annou pa zis dir Gouvernman konmsi li reste laba. Non, Gouvernman i bezwen rantre ladan.  Me i annan en keksoz ki mon osi pa tro ganny konpran e petet la mon a demann zot pou vreman fine tune ;   dezyenm fwa mon dir zot sa-fine tune pozisyon.  Zot in dir zot pou vin avek en Private Members Bill.  Private Members Bill sorti kot parti ki dan Gouvernman. Wi, Lalwa i permet Private Members Bill selman la i fer mon poz mon lekor en kestyon ; eski zot Gouvernman ki anmenn bann Bill ki ganny prezante par Leader of Government Business, li i pa anvi anmenn en Bill ?   Eski zot pe dir avek nou ki Gouvernman li i pa anvi pran sa anliny avek sa ki Onorab Pillay in dir, ki li Gouvernman i pa anvi pran sa konman son responsabilite, me ki sa Bill alors i pou ganny reprezante par Parti Lepep? Eski zot pe montre nou sa ki toultan nou konnen sa  en pe sa divizyon ki egziste?  Oubyen eski se Orange Party ki pou anmenn sa? Ok.

 

(laughter)

 

HON WAVEL RAMKALAWAN

Konmsi ki zot pe dir nou la ?  Ki zot pe dir nou la ?    Parski Orange Party pa trakase pou sorti kot zot menm li. I a pe sorti kot zot menm e letan mon pe dir sa Orange Party la, pa rod isi zot, pa get isi zot, get laba menm kot zot. Akoz letan zot bann… letan zot Manm Komite Santral i konmans al La Digue fer kanpanny pou form en nouvo parti politik pa oubliye sa ki ti arive ek zot an 2015.  E apre midi petet zot in montre nou ankor enn fwa, ki poudir i annan bann keksoz la ki pa tro soz, pa tro annord e ki aprezan zot konman en Lasanble, zot, zot  pe al konmans anmenn Private Members Bill.  Nou, nou anmenn Private Members Bill akoz nou dan Lopozisyon e konman bann dimoun ki dan Lopozisyon, letan Gouvernman regarde ziska aprezan la letan nou anmenn bann Bill, ok, nou anmenn Private Members Bill, Onorab De Commarmond 2 fwa in dir i pou fer Prezidan pa assent. 2 fwa in dir sa ; savedir parski nou letan nou anmennen apre i bezwen al sinyen pou State House. La zot in zwenn ziska depi 3.30 er ziske pres 4.30 er pou zot tonm dakor ankor enn fwa dan Bills Committee an relasyon avek en Private Members Bill. Me Mr Speaker i kler ki poudir si lo kote Parti Lepep zot pe deside pou anmenn en Private Members Bill ki pou deal avek kondisyon stevedores lo lasose savedir i annan en crack, en gro crack konmdi Onorab Gill, ‘’there must be a crack.’’ Ok ?

 

        (laughter)

 

HON WAVEL RAMKALAWAN

There is a crack in the system, in the Party, ok ? E sa pou lepep Seselwa i bezwen note. Mon poz sa la e nou ava regarde ki mannyer i deroule.  Mr Speaker, Mr Speaker, nou bezwen debout lo kote nou bann stevedores. E mwan mon enn sa bann dimoun ki ti dan sa delegasyon ki ti vizit en bato Espanyol. Mon annan bann portre, mon’n koz ek bann stevedores e letan mon regard sa kondisyon travay i en kondisyon travay ki mwan… I pa zis en kestyon mon pa anvi fer me i en kestyon mon pa pou kapab fer . Akoz ou bezwen en kantite lenerzi, petet letan mon ti annan 26an, 35an, mon ti ava konmsi en pe plis lafors petet mon ti ava annan plis kouraz me ozordi letan mon regard sa bann dimoun dan sa bann kondisyon, dan tanperatir, bann groser pwason, lakantite zefor ki zot mete. Mr Speaker mon konklizyon i senp sa larzan ki zot pe gannyen, i pa ase, i pa ase.  E bann lakonpannyen, wi zot in montre nou kwa ki zot gannyen pou zot fer, ki zot gannyen avek bann lakonpannyen Espanyol. Me mwan mon krwar ki poudir si sa i se tou ki zot gannyen, mwan mon krwar ki zot bezwen negosye en pe pli for pou zot ganny en pe plis e apre sa partaz sa larises avek plis nou bann frer ek ser Seselwa. E byensir letan nou pe partaz sa larises annou osi regarde ki mannyer nou pou soutenir sa bann dimoun parski sa travay ki zot fer, zot pa pe viv parey nou, nou pe viv, zot lenerzi in ganny, i ganny epwize byen vit e alors sosyete li menm li i pou bezwen ganny swen avek zot. Mr Speaker, larises dan sa lendistri i annan en kantite me ankor enn fwa mon pou bezwen dir sa larises pa pe ganny byen distribye parmi bann dimoun ki pe ede pou anmenn sa Dolar pou anmenn sa Ero dan nou pei. Stevedores i merit en pli bon deal ; maren Seselwa i merit en pli bon deal, tou dimoun ki dan sa Lendistri Lapes i merit en meyer deal e parey nou’n konmanse letan nou koz lo teachers, lo bann ners, nou’n koz lo bann travayer Air Seychelles, nou’n koz lo bann diferan landrwa travay byento nou pou bezwen koz osi lo bann drayver SPTC parski zot osi zot pa pe ganny en bon deal, bann travayer SPTC avek bann lezot travayer, mon krwar ki i nou responsabilite konman en Lasanble e Mosyon in demande ki Gouvernman i fer en keksoz mwan mon ti ava dir nou pa bezwen en Private Members Bill me nou bezwen Gouvernman sezi sa ki nou pe koz lo la. E la Mr Speaker, mon bezwen dir mon eksprim en pe dezapwentman akoz ti sipoze annan en nouvo fason pou nou apros bann Bills ; bann Mosyon ki ganny pase dan Lasanble, me ziska aprezan mon pa vwar Gouvernman pe vreman egzekit oubyen pran en pe bann keksoz ki nou dir.  Nou’n pas Mosyon lo La Digue ; nou’n pas Mosyon lo Later e lo Power Station Baie Ste Anne ; nou’n pas plizyer Mosyon e ziska aprezan nou pa ankor tann okenn Deklarasyon lo lapar Gouvernman.  Alors nou a pe dir avek Gouvernman pa bezwen zwe sourd Lasanble Nasyonal. Letan nou anmenn en Mosyon ki konsern sa ki pe arive dan nou pei, annou… Nou pe dir zot pa zwe sourd lo nou akoz si zot zwe sourd lo nou, nou osi nou kapab zwe sourd lo zot. Alor Mr Speaker avek sa 2 mo, mon commend Onorab Ferrari pou sa Mosyon e la fason ki’n prezant li e mon demande, mon espere ki tou bann lakonpannyen, tou lakonpannyen ki annan pou fer avek nou Lendistri Lapes zot regard nou pei en pe plis.  E an plis ki sa annou pa konmans zis anmenn etranze dan sa Lendistri annou fer sir ki nou Seselwa, nou pran sa an men e nou gard, nou fer sir ki sa Dolar ki rantre i reste Sesel. Avek sa 2 mo, Mr Deputy Speaker mon demann tou Manm, mon osi tou pou siport sa Mosyon. Mersi bokou.

 

MR DEPUTY SPEAKER

Bon nou’n osi pas Mosyon lo Sekirite Sosyal.

 

HON WAVEL RAMKALAWAN

Wi.

 

MR DEPUTY SPEAKER

Yer mon’n zwenn en madanm ki’n demann mwan kan ki Gouvernman pou act lo sa Mosyon. Onorab Pillay ou annan en leklersisman… Yes ale go ahead. Onorab Ramkalawan.

 

HON WAVEL RAMKALAWAN

Be i pa ganny drwa koze li Mr Deputy Speaker.

 

MR DEPUTY SPEAKER

Met ou mic off.

 

HON WAVEL RAMKALAWAN

Mon donn li en sans Mr Deputy Speaker.

 

MR DEPUTY SPEAKER

Onorab. Ale.

 

HON SEBASTIEN PILLAY

Mersi Mr Speaker. Mr Speaker, mon le zis refer nou Lasanble avek Lartik 94 nou Konstitisyon e Lartik 94 Konstitisyon i lir koumsa ; ‘’The right to introduce a Bill in the National Assembly may be exercised by the Vice President or a Minister or subject to clause 2 ; a Member.’’ I pa dir si mon devret en Member parti ki dan Lopozisyon; i pa dir si mon devret en Manm ki dan parti ki dan Gouvernman. Lefe i reste Mr Speaker se ki Lasanble Nasyonal i endepandan e avek sa lendepandans ki mon zwir mon kapab anmenn en Bill lo nenport ki size mon le trete e mon sirpriz e mon konnen Onorab Ramkalawan in fer sa, mon sirprann akoz i santi poudir avek sa mazorite petet Onorab Ferrari ti devret al dan sa direksyon me i pa’n ale e mon konpran e mwan ki mon pou fer…

 

MR DEPUTY SPEAKER

Onorab, ou’n fer ou pwen pa entrodwir nouvo keksoz ou’n fer ou legzersis…

 

HON SEBASTIEN PILLAY

E mon konnen i pou donn mwan sipor ler mon anmenn sa Bill akoz mon konnen i krwar dan sa cause li osi. Mersi.

 

HON SEBASTIEN PILLAY

Ok. In fer…

 

HON WAVEL RAMKALAWAN

Mr Speaker me selman sa pwen ki Onorab Pillay in fer resorti la i enportan pou nou remind lepep Seselwa ki poudir depi 1993 ziska 2017 pandan ki Parti Lepep ti an mazorite zanmen zot in anmenn en Private Members Bill !

 

HON SEBASTIEN PILLAY

Be zisteman avek en nouvo fason fer ki ozordi nou pou anmennen Private Members Bill ki Lopozisyon dan son gran mazorite pou siporte.

 

MR DEPUTY SPEAKER

Order! Order!

 

HON SEBASTIEN PILLAY

E mon remersi zot pou sa.

 

MR DEPUTY SPEAKER

Order! Order! Bon, mon demann Onorab Ferrari pou fer son konklizyon. Onorab.

 

HON JEAN-FRANCOIS FERRARI

Mersi Mr Deputy. Mr Deputy ou ava rapel ki ler Prezidan Faure ti dir ki zot vot pou LDS, nou pou fer Lasanble vin en dance hall. Onorab Sebastien Pillay, ou pe fer sa Lasanble vin en dance hall! Ou pa serye! Ou pa serye! Mon demann ou egzers en pe serye silvouple.  Mersi.

 

MR DEPUTY SPEAKER

Proceed.

 

HON JEAN-FRANCOIS FERRARI

Mr Deputy Speaker, mon ti a kontan konmans par dir en keksoz e mon pran la kot Leader Lopozisyon in termin son lentervansyon, lo Lanplwa. Detrwa mwan pase mon ti al vizit Minis Lanplwa, Mr Cosgrow e Mason Travel akoz mon ti enkyet, mon ti’n ganny en lenformasyon ki Gouvernman ti’n permet, ti’n donn G.O.P pou en serten kantite drayver etranze pou vin travay dan bann bis ki anmenn touris.  Mon ti dir avek Minis Cosgrow ki mon enkyet, mon ti dir avek management Mason’s Travels ki mon enkyet e ki mon pa dakor e Minis Cosgrow ti dir mwan, ti ekout mwan e apre 2 semenn apre mon’n vwar drayver etranze in ariv Sesel. I pa’n fer nanryen. Nou pe fer fas avek en menm sityasyon ozordi e i pa posib pou nou zis kontinyen koumsa. Mon anvi zis dir k i tro fasil e i en solisyon tro fasil pou zis anploy etranze Sesel. Non, Onorab Pillay, nou pa anvi met okenn restriksyon lo okenn dimoun ki bezwen travayer etranze, me selman sa ki nou anvi se en pe lord e avek lankourazman nou bann frer e nou bann ser Seselwa i ava travay. Nou pa kapab. Nou bezwen sorti dan sa sityasyon kot nou fer nou bann frer, nou permet ki nou bann frer stevedores i travay dan bann sityasyon difisil kot i annan lenzistis e apre nou dir napa ase stevedores, nou a permet en pe Endonezyen vini. Mon krwar si i annan en mesaz ki mon anvi pase ozordi avek Gouvernman, ki se sa enn la, annou pa les en sityasyon gate apre pran solisyon fasil e fer vini 3, 4 etranze. Annou konman sa Lasanble ozordi in fer deliberasyon lo travayer ki annan pou fer avek Lendistri Ton, Lendistri Lapes e notaman bann stevedores, annou pran sa konman en warning ki i annan fristrasyon, i annan problenm e nou bezwen adres sa problenm avan ki sa problenm i vin tro grav. Non, Onorab Pillay, nou pa la, nou pa la pou nou dir ki i annan konpannyen prive ki nou pa kapab entervenir ladan. Leader Lopozisyon mon krwar in fer sa pwen byen kler. En Gouvernman ki responsab e en Lasanble ki responsab pa kapab pass the buck e dir sa bann prive ki pe fer, nou Gouvernman, sa i bann prive. Gouvernman konman en regilater i annan sa drwa pou li entervenir. Zot ti fer menm largiman ler mon ti pe kestyon difikilte ki lakonpannyen Oceania ti pe pas ladan, zot ti dir mwan, Gouvernman pa kapab enterfer. Gouvernman i kapab enterfer dan bann lendistri ki stratezik, dan bann lendistri ki enportan pou nou pei, Gouvernman i devret kapab enterfer. E si ti en Gouvernman LDS, mon asire ki lontan nou ti pou’n pran nou responsabilite pou fer keksoz avanse. Mr Speaker, mon remersye tou bann Manm ki’n entervenir. Si dan en long deba, bokou Manm in entervenir e zot ava eskiz mwan si mon pa kapab remersye zot tou endividyelman.  Mon ti a kontan remersye Onorab Loizeau, Roucou avek Andre pou sa perspektiv direk ki zot in donn nou lo travay en stevedore ; bann realite lavi, ki mannyer sa i tradwir dan lafanmir, ki difikilte sa bann dimoun zot annan, ki leta lespri zot ladan.  Sa in kapab eklersi nou Lasanble pou konpran akoz i enportan ki nou adres sa size ase rapidman.  Mon ti a kontan remersye Mr Afif li osi pou son bann sipor, son bann largiman ekonomik, ki ti vreman enportan akoz mwan mon pa’n ganny letan pou mon devlop sa bann largiman e sirtou pou mwan remersye li pou sa pwen ki’n fer konmkwa tou sa ki nou fer demen i bezwen en win-win situation pou nou pei, pou nou stevedores e pou nou bann Lazans. Nou napa okenn lennmi, nou napa okenn dimoun ki nou anvi detri. Nou pa anvi… nou pa pe rod problenm avek propriyeter bato ni Espanyol, ni Franse, ni okenn lezot. Nou pa pe rod problenm avek bann Lazans. Tou sa bann dimoun ki bann partenaire dan en lendistri e tou sa bann bout i bezwen kanmarad pou zot kapab fonksyonnen e pou zot kapab fer zot profi.  Alors sa i en pwen ki mon santi ki Onorab Afif in fer sorti ki vreman enportan e alors mon pou remersi li pou sa. An sa ki konsern kontribisyon ki Onorab Sebastien Pillay, anfen mon remersye li pou lapenn in pran tou sa ki mon’n dir in re-package sa, in reanvoy kot mwan e in demann mwan pou siport sa.  Se egzakteman sa ki mon’n dir Onorab Pillay e Mr Speaker personn pa pe derob mwan selman mon anvi, mon pe rod en fason pou mon dir avek, i annan en Lalwa ki ou bezwen koze menm si ou napa nanryen pou dir? Non, konmsi klersi mwan, Mr Speaker, konmsi i forse koze dan sa Lasanble? Akoz si ou napa nanryen nouvo pou anmennen.  Mr Deputy reponn sa kestyon, eski i forse koze dan sa Lasanble?  Si i pa forse alors mwan mon krwar Talk Time is over., la in ler pou nou fer bann keksoz konkret, anmenn bann lide, anmenn bann solisyon ki enportan pou lavenir sa Lendistri. O konmansman ti annan 2 pwen, 3 pwen, mon ava dir, ki ti enportan ki mwan mon ti vwar li konman labaz sa Mosyon. Mon ti anvi tir bann lenzistis e bann konfizyon e bann diferan standar dan en lendistri kot diferan dimoun dan diferan konpannyen pe ganny trete diferaman e dan en menm pei pe ganny trete diferaman, sistenm taks i aplik lo li dan en fason diferan. Mon ti anvi pas en mesaz e mon krwar dan tou bann Manm ki’n entervenir zot in vreman fer resorti ki i annan en ta konfizyon, en ta disparite, en ta… Onorab De Commarmond pli boner in servi… in demande ki i annan en larmonizasyon, i annan en mo ki in servi, ki annan en pe lord, liniformite dan bann keksoz e sa enn bann keksoz ki mon pe demande akoz sa i pe anmenn en kantite. Nou bezwen annan en fason ki nou asize avek sa bann Lazans, avek sa bann group dimoun, avek sa bann sa… ki nou ganny en sistenm ki aplik pou tou dimoun parey e i ava sort out vreman en kantite keksoz. Dezyenm keksoz mon ti demande ki, mon ti pe swete nou kapab revwar peyman pou bann tonaz e mon krwar i annan en konsansis ki nou kapab avans de lavan lo sa size. Mon krwar dapre ki mon tande mon pa ti la ler bann Manm ti vizit bato Espanyol, ler zot ti annan bann konversasyon pou bann amater, me lenformasyon ki mon’n gannyen dan sa deba se ki bann amater zot pare pou zot fer en zefor. Zot pare pou zot fer en zefor.  E mon mazinen poudir bann Lazans notaman sa 3 ki nou pe koz… sa 2 pli gran, Land Marine avek Hunt Deltel apre sa enn nouvo, mon krwar i annan bann dimoun entelizan dan sa bann Lazans ki realize ki lavenir zot biznes i depan lo en lafors travayer ki santi zot en pe pli byen ganny trete. Alors mon mazinen ki vi ki avan devalyasyon, tonaz ti R2 apre devalyasyon i… e R2 sa lepok ti lavaler omwen R4 ozordi apre devalyasyon in reste R2 menm, i annan serten benefis ki’n antre sistenm ki pa’n ganny pase avek travayer, So mon santi ki lo sa nivo nou kapab diskite, nou pa pe demann personn, okenn Lazans, okenn dimoun pou kas zot leren, pou detri zot biznes, nou demann en dyalog pou fer an sort ki sa bann solisyon nou kapab trouv sa bann solisyon. E trwazyenm pwen asiste sa profesyon pou kapab annan en pe savings atraver en mekanizm ki permet ki ler en dimoun in travay dan sa Lendistri, en travay difisil, en travay ki i zot ki zot in fatige, zot annan en keksoz ler zot malad, zot pa bezwen al mandyan. Zot pa bezwen al plennyen. Ler zot ganny en aksidan, i annan keksoz ki respond vitman. Ler zot ariv zot laz kot zot nepli kapab travay, zot annan en sipor an plis ki zis sa R5500 ki tou dimoun Sesel i gannyen. Donk ki mannyer e sa mwan mon anvi dir e mon repete si i annan stevedores ki pa dakor avek sa, i zot drwa pou zot pa dakor. Stevedores i bezwen kontribye dan sa Fon. Nou, i annan bokou ki travay byen ki siport zot fanmir byen, me i annan lezot ki pa kapab, nou a krwar zot annan delwil dan zot lanmen, konman zot tyonbo larzan i ale.  Nou, nou ava ed zot nou. Gouvernman i ava ed zot pou zot kapab organiz en pe, en pti morso savings pou ki en zour zot ava kapab benefisye e annan en retret ki konfortab e ki dan dignité.  Sa i sa 3 pwen ki mon ti anvi met devan e mon satisfe, mon ere ler mon vwar poudir tou bann Manm ki’n pran laparol in anmenn nou dan menm direksyon. Prezan- prezan nou bezwen get ki nou pou fer avek tou sa lenformasyon, ki nou pou fer avek tou sa lenerzi ki nou annan ozordi dan Lasanble. Akoz i annan en kantite lenerzi e enn bann dimoun ki’n annan en kantite lenerzi se Onorab Simon Gill ki bomaten mon’n… byen boner mon’n gete ki mannyer mon kapab calm li down ,be i pa en dimoun fasil pou calm li down ; in vini avek son defans e mon apresye ki son defans in vini klersi mwan ki li osi e tou lezot Manm Lasanble i onboard lo sa proze ki nou’n anbark ladan. Alors kot nou anmenn li apartir sa moman? E sa se en pwen ki Onorab Waven William in lev-e boner. Kot nou anmenn li, mon bann koleg, pou depan lo volonter politik parey Onorab Gervais Henrie in dir-lo lavolonte politik. Nou dan sa Lasanble nou montre poudir nou annan sa volonte prezan nou pou kont lo Gouvernman pou li osi montre menm volonte politik pou anmenn sa sanzman. E ki mannyer nou pou fer sa, personnelman, personnelman avek respe, mon osi mon krwar ki nou bann… nou 2 avoka ki lot kote latab, napa 1, i annan 2. Nou 2 avoka ki lot kote latab in bit en pti pe lo zot enterpretasyon-lo zot enterpretasyon Private Members Bill, me sa i size diskisyon e lenterpretasyon. Mwan mon pwen se ki nou pa devret annan nanryen private ladan.  Si nou anvi fer en keksoz annou fer li konman en pei, konman en Lasanble an antye, annou pa konmans par private, nou konmans, nou fer li konman en pei.  E ki mannyer nou pou fer ?   En pei i ganny dirize par en Gouvernman mon krwar nou swe e nou devwar, se pou nou ensiste-zot ensiste avek Gouvernman e nou lo nou kote ensiste ki Gouvernman i lead the way.  Akoz mon anvi dir avek bann stevedores laba deor, mon anvi dir avek zot e tou bann ki dan sa Lendistri lo bato dan lasenn, eksetera si nanryen pa ganny fer e mon anvi kler lo la, si nanryen pa ganny fer pa bezwen blanm Parti Lepep dan Lasanble oubyen LDS dan Lasanble, blanm Gouvernman, akoz Gouvernman ki bezwen lead the way ladan.  Se li ki regilater se li ki annan sa overall regar lo Lendistri Lapes e se li over and above politik se li ki pe devret anmenn ansanm tou bann akter dan sa lendistri pou nou ganny en solisyon. Alors mwan mon krwar ki se koumsa ki nou devret pase e mon krwar ki nou devret demande ki Gouvernman i set-up en group travay ki reprezant Biro Attorney Zeneral, Minister Lapes, Lasanble Nasyonal, nou ava asize, nou ava travay otour en Prozedlwa, pou nou kapab anmenn en keksoz ki bon pou Sesel e ki bon pou sa lendistri. Se koumsa ki nou pou avanse. Si nou konmans avans dan en fason endividyel, private, nou pa pou avanse. Nou dakor ki i annan en kantite keksoz ki pou bezwen ganny diskite i pou bokou me selman annou konmans li la. E mwan mon krwar sa ki bann travayer dan Lendistri i devret vwar ki pandan tou sa bann lannen, sa bann size ti monte zis avan Eleksyon, la sa size i mont zis apre Eleksyon. Savedir nou annan sa… nou annan letan pou nou travay, pou nou fer sir ki nou pa zis vin akont en zistwar avan Eleksyon apre lannmen nou bliye, nou annan letan pou nou pran sa e annou fer li mars byen e annou fer li dan lentere Sesel. Parey Onorab… mon krwar mon’n koz tro bokou… Pardon? Non, non. Onorab… Pa Onorab Andre. Onorab Adelaide dan bor mwan i dir e sa i enportan ki mon dir zot, ler nou ti pe koze taler Onorab Adelaide i dir mwan ‘be konmsi ou krwar koabitasyon pe marse’, apre i dir mwan ‘be zis dan Lasanble ki merit marse sa. Anler dan bwa Baie Lazare osi fodre marse. Fodre mars partou.’’ E la nou ganny sans pou fer li marse, annou pran sa sans. Mon ava terminen an remersyan bann dimoun ki’n travay close avek mwan lo sa Mosyon, mon pa pou kapab nonm bokou, mon ava nonm Selwyn, Guilly, Titis, Bata, Didier e lezot, sa bann zonm ser, bann zwer ser ki’n travay avek mwan. E ler nou ti pe koze taler Guilly ki reste Plaisance, Guilly Marengo in ariv kot Lasanble pou li montre ki vreman i annan en problenm e in dir mwan pas sa mesaz avek Onorab Sebastien Pillay.’’ Wi, wi zot pe tir taks antye lo lapey depi 0 sou ziska par lao sa.  Wi zot pe tire. Be zisteman Onorab, zisteman i annan telman bann dezord dan sa bann se soz… telman bann diferan sistenm ki nou nepli konnen kwa ki akseptab, kwa ki legal, kwa ki pa sa… kwa ki pa legal. Alors mon kont lo zot sipor pou zot vot lo sa Mosyon pou ki nou enn fwa pour tou met sa bann keksoz flat lo en latab, nou diskit lo la e nou rod en solisyon. Mwan mon ava terminen an di-z-an mon annan 2 proze, mon annan en proze Corgat Estate, apre mon annan en proze pou bann stevedores, mwan mon pare pou al lo okenn Komite ki annan lo stevedores, mon annan letan, nou dan LDS nou annan letan nou annan kouraz, annou fer li, annou met latet ansanm e mon kont lo zot pou zot convince zot Gouvernman ek zot parti pou come onboard lo sa keksoz. Akoz i enportan ki tou dimoun i onboard. Alors mon remersye zot e mon demann zot pou siport sa Mosyon silvouple. Mersi.

 

MR DEPUTY SPEAKER

Mersi Onorab Ferrari.  Bon, ler in arive pou nou pran en vot lo Mosyon, mon a demann tou Manm ki an faver? Okenn Manm ki kont? Madam Clerk.

 

MADAM CLERK

Mersi Mr Deputy Speaker. Full house, 29 Manm an faver, personn kont. Mersi.

 

MR DEPUTY SPEAKER

Bon savedir Mosyon in ganny aprouve par Lasanble. Wi, nou pa… Pa lo Mosyon. Order! Order!

 

HON SEBASTIEN PILLAY

Mr Speaker, mon pe zis demande, enn bann lagreman ki nou ti ganny sete ki Lasanble Nasyonal i prepar en sentez pou bann Mosyon ler in fini pase dan Lasanble ; akoz parfwa bann Mosyon ler i mete lo Order Paper i annan bann lamannman ki ganny fer e eski nou pe fer sa sentez, si non, mon ti ava demann atraver ou lofis ki nou fer sir sa synthesis i ganny fer, i ganny met lo record e dezyenm en kopi i ganny anvoye kot Cabinet Office, pou fer sir ki zisteman parey Leader Lopozisyon in raise pwen, ki ler en Mosyon i pase, ki i annan sa swivi ki a kapab ganny fer, pa zis par Sekretarya me osi par bann Manm. Mersi Mr Deputy Speaker.

 

MR DEPUTY SPEAKER

Mersi Onorab Pillay. Pou lenformasyon Lasanble, Cabinet i okouran tou bann deba e i ganny tou bann deba e zot in request tou verbatim pou tou bann deba ki fer dan Lasanble e lo nou kote Lasanble, Sekretarya i fer le neseser vizavi bann Mosyon. Ok? Bon, avan nou adjourn, mon ti a kontan zis fer serten lanons vizavi Sitting pou semenn prosenn. Mon ti a kontan donn detay Sitting pou semenn prosenn e mon ti a kontan la a se moman enform tou bann Manm e tou piblik an zeneral ki nou pou annan en Sitting spesyal Mardi le 25 Zilyet 9er bomaten kot Prezidan Larepiblik pou vin adres Lasanble Nasyonal. Lafason ki nou’n deside dan Assembly Business Committee taler apre midi, se ki Prezidan pou adres Lasanble 9er bomaten apre nou pou adjourn ziska 2er apre midi kot le 2 Leader i retournen pou fer komanter lo Diskour Prezidan, lo Ladres Prezidan. Nou pe limit lafason nou pa pe fer parey State of The Nation Address ; se le 2 Leaders apre ki zot in rankontre e in fer rankont avek zot bann Manm, 2er apre midi zot vini, zot pas zot remark lo Ladres Prezidan. Swivan sa nou pou adjourn pou repran Merkredi, kot nou ava kontinyen avek nou normal Sitting avek Bills avek kontinyasyon Mosyon. Ok? So vwala en pti pe nou fason ki nou pou travay semenn prosenn. Ok?   I annan Komite Truth And Reconciliation ki mon krwar i annan en lantant pou rankontre pou fer en meeting Dimans 2er apre midi isi kot Lasanble, ok?  Si i annan okenn sanzman apre zot ava enform Manm, me pou le moman se Dimans 2er apre midi isi kot Lasanble Nasyonal. Ok?  Bon, avek sa alor nou ava adjourn ziska Mardi le 25, 9er bomaten.

 

(ADJOURNMENT)