Home » Verbatim » 2017 » Verbatim Report NAS Sitting Tuesday 18th July, 2017

Verbatim Report NAS Sitting Tuesday 18th July, 2017

NATIONAL ASSEMBLY OF SEYCHELLES

Tuesday 18th July, 2017

The Assembly met at 9am

National Anthem

Moment of reflection

Mr Deputy Speaker in the Chair

 

MR DEPUTY SPEAKER

Bonzour tou Manm Onorab.  E bonzour tou manm piblik ki a lekout e ki pe swiv travay Lasanble Nasyonal.  Bon premyerman mon ti a kontan welcome tou bann Manm ki apre en break 2 semenn kot Lasanble Nasyonal ti pe host 41enm Sesyon Plenyer SADC PF.  Konferans ti fer ant le 5 ziska le 15 Zilyet e mon kapab dir mwan ki’n swiv sa 2 semenn travay, konferans ti en sikse.  12 pei Manm SADC ti prezan e plizyer Mosyon e rezolisyon ti ganny debated on e ti ganny aprouve.  Mon kapab dir ki Sesel in partisip aktivman dan tou sesyon. E mon profite pou felisit tou bann Manm ki’n reprezant nou Lasanble e nou pti pei Sesel.  E la petet mon ti a kapab zis pour Manm piblik pou mwan mansyonn bann Manm ki ti prezan. Onorab Wavel Ramkalawan, Onorab Regina Esparon, Onorab Chantal Ghislain, Onorab Egbert Aglae e Onorab Terence Mondon.

Manm lo Komite Parlmanter osi tou rezyonal pou Komite lo HIV Aids zot osi  zot in partisip aktivman ant le 5 a le 6 Juillet Konferans ki ti fer Eden Bleu.

A lafen zot deliberasyon  ti annan en Deklarasyon ki ti ganny drafte e apre ti ganny table dan Sesyon Plenyer kot SAVOY sa ti Mahe Declaration e i ti ganny adopte.  Lo sa not osi tou mon ti a kontan profite pou remersi tou bann lezot dimoun an deor ki’n partisipe, nou apel zot bann resource persons ki’n vin partisipe aktivman sirtou dan sa 2 zour kot nou ti pe debat lo HIV Aids; sa 2 zour kot konferans in fer Eden Bleu.  Alor mon apresye ki zot lekspertiz in ganny apresye e par  tou bann ki ti dan sa Konferans.

Dernyerman mon ti a kontan osi remersi osi tou staff Sekretarya Lasanble Nasyonal ki’n travay san ses pour fer sir ki sa konferans in vin en sikse.  Alor mersi zot tou.

Bon avek  sa 2 mo nou pou al direkteman lo Order Paper.  Nou annan bann dokiman ki’n ganny prezante.  Nou annan bann rapor ki nou pa’n,  nou pa ankor ganny, nou pa ankor ganny wi, nou pa ankor ganny zot rapor soft copy akoz  nou’n gannyen  enn de  me son rapor i ase gro pou nou fer kopi pou nou sirkile, me nou pe esper  soft copies antre apre nou ava sirkil avek tou bann Manm pou zot lenformasyon.  Ok?  Nou ava al lo…nou a kontinyen lo nou Order Paper e  nou annan en First Reading e mon ava demann Madam Clerk pou fer First Reading.

 

MADAM CLERK

Mersi Mr Deputy Speaker.  Bonzour Tou Manm.  Bonzour tou dimoun a lekout. This Act may be cited as a Public Persons Declaration of assets, Liabilities and Business Interest (Amendment) Act of 2017.  Mersi Mr Deputy Speaker.

 

MR DEPUTY SPEAKER

Mersi Madam Clerk.  Bon avek sa nou ava pran nou lot pwen lo nou Order of the day e mon ava demann Parliamentary Reporter pou call in Minister Adam.  Yes Onorab Ferrari.

 

HON JEAN-FRANCOIS FERRARI

Mr Deputy Speaker mon ti a kontan en pti leklersisman konsernan bann papye, Papers Laid devan Lasanble.  Mwan personnelman mon pa’n ganny Air Seychelles Limited Financial Statement for the year 2016.  Mon pa’n ganny 2020 Development Limited Financial Statement, mon pa’n ganny PUC Members Report and  Audited Financial Statement, e mon pa’n ganny Seychelles Commercial bank Audited Annual Financial StatementSo eski ou kapab verifye silvouple?  Mersi. 

 

MR DEPUTY SPEAKER

Se sa ki mon’n dir Onorab Ferrari.  Nou’n ganny en kopi, Sekretarya in ganny en kopi.  Ki nou pou fer sa kopi la nou pou donn avek Komite FPAC.  Me antretan nou  pe demann tou sa bann Lazans pou soumet en soft kopi avek nou, avek Sekretarya ki nou a kapab sirkil lot tou bann Manm Lasanble.  Me  sa ki nou’n gannyen la nou pou donn avek FPAC  pou le moman.

 

HON JEAN-FRANCOIS FERRARI

Mersi.

 

MR DEPUTY SPEAKER

Apre lezot Manm ava kapab benefisye en soft copy ok.  Bon mon ti a kontan dir bonzour Minis Jean Paul Adam Minis pou Lasante avek son delegasyon.  I annan son PS Doctor Bernard Valentin, CEO Health Care Agency Dr Danny Louange, Public Health Commissioner Dr Jude Gedeon.  Mon annan Special Advisor to the Minister Doctor Reginald, madanm Hannah  Jeannevol i Personal Assistant to the Minister, Mr Marty Vidot Ministére attaché. Welcome Minister avek ou delegasyon bomaten e nou ava al direkteman lo kestyon.  Premye kestyon Onorab Regina Esparon. 

 

 

HON REGINA ESPARON

Bonzour Mr Deputy Speaker.  Bonzour tou Manm.  Bonzour tou dimoun ki a lekout.  Bonzour Minis ek ou delegasyon.  Mr Speaker mon ti a kontan demann Minis pou Lasante, si i kapab  eksplik sa Lasanble ki son Minister pe fer pour fer sir ki SOPD, Specialist Outpatient Department pe donn en bon servis ki efikas ; an sa ki konsern sistenm apwentman, kot pasyan pa bezwen perdi bokou letan, pou espere e en bon system follow-up?  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker e bonzour tou bann Leaders Onorab, tou bann Manm Onorab e tou bann dimoun ki a lekout.  I en plezir pour mwan vin devan zot ankor pou mwan reponn bann kestyon konsernan mon Minister.  Mr Deputy Speaker an se ki konsern sa kestyon,  nou konsyan ki parfwa i annan serten defayans an term sistenm lapwentman, me nou bezwen konstate osi ki in annan bokou amelyorasyon ki’n ganny fer dan sa sistenm e nou sey fer o maksimonm ki bann dimoun i ganny akse avek sa bann servis spesyalize ki ofer  dan Specialist Outpatient Department.  E pou note Mr Speaker ki par lannen nou annan 12mil 133 konsiltasyon avek spesyalis ki ganny fer dan bann diferan landrwa dan Lopital sirtou dan SOPD dan sa batiman ki  nou apel Twa Zonn.  Sa bann lapwentman spesyalis i – sa sif 12 mil 133 Mr Deputy Speaker annefe i bann ka kot i annan en swivi kontinyel.  Savedir sa i bann dimoun, nou apel sa bann repeat cases, bann  dimoun ki annan bann keksoz ki zot bezwen swiv regilyerman e sa i montre sa zefor ki pe ganny fer pou osi asir sa swivi, sa follow-up parey nou pe dir, lo zot bann diferan ka. I enportan pou note osi Mr Deputy Speaker ki nou’n osi  desantraliz bokou bann servis spesyalis tel ki Urology, Gynecology, Pediatrics, Internal Medicine ki nou ofer dan serten bann Sant Lasante rezyonal.  E sa in osi ede pou amelyor bokou sa servis ki disponib an term spesyalis pou bann pasyan e osi redwir sa latant ki zot bezwen annan parfwa kot sistenm santral SOPD.  Zis en pti klarifikasyon in ganny met a mon latansyon Mr Deputy Speaker, annefe sa sif 12 mil 133 i par mwan, eskiz mwan,  dan en lannen i annan plis ki 150mil konsiltasyon.  Alor sa sif i dernyen sif pou mwan Me sa ki nou annan akoz i pran en pti letan pou sa statistik antre,  i 12mil 133 repeat cases konsilte pou mwan Me.  E pou mwan Me osi dan bann nouvo ka, bann nouvo case ki’n ganny refer avek spesyalis i annan 2331.

Alor Mr Deputy Speaker lot pwen an se ki konsern lefikasite sa bann lapwentman; petet pli gran defi sa bann staff Lasante i annan e sa bann ners e dokter e bann Health Information Assistant se parfwa disponibilite sa kart, sa pasyan, sa patient notes akoz parfwa si sa pasyan in sorti lo ward parfwa sa kart i difisil pou ganny li a sa moman ki neseser e sa parfwa i anmenn serten dele.  Sa i en keksoz ki nou pe travay dir pou nou sey amelyore. Me sirtou son solisyon pou vin atraver sa Health Information System ki’n ganny tender resaman.  Mon asire ki dimoun in var letan in ganny pibliye e enn fwa ki sa i an plas savedir bann rikord pou antre dan en sistenm  elektronik e i pou redwir  enormeman sa problenm ki nou gannyen kot parfwa a  sa moman kot pasyan i prezant son lekor  ki son kart i pa disponib.  Nou regrete ki parfwa bann dele i arive akoz sa e i en keksoz ki nou pe fer bokou zefor. E nou apresye konpreansyon bann pasyan e nou apresye bann zefor bann spesyalis e bann ners pou asire ki zot ofer sa servis dan en fason sistematik.  Mersi Mr Speaker.

 

MR DEPUTY SPEAKER

Mersi Minis.  Onorab Esparon.

 

HON REGINA ESPARON

Mersi Mr Speaker.  Mr Speaker Minis in dir ki i annan defayans.  E an vi ki sa  bann defayans i koz bokou fristrasyon kot kart i perdi, rezilta pa ariv a ler.  Ou’n dir ki pou annan sa sistenm ki zot pe vin met, Health Information System ki pe vini byento.  Kan sa pou ganny, pou ganny finalize pou rezourd en pe sa bann problenm?  Mr Speaker i annan sa lot laspe kot nou annan kot sa seksyon surgical, sa Specialist Outpatient Department, i annan bokou pasyan ki vin lo stretcher, bokou pasyan ki vin dan wheelchair ; sa osi i koz bokou konsesyon e parfwa ou vwar kot pasyan in arive la 8er bomaten, 1er i pa ankor kapab vwar en dokter akoz sa zafer file perdi.  Ou konpran mwan ? Sa osi pe koz bokou fristrasyon.  Rezilta ki sorti la i al laboratwar parfwa i pa ariv a ler letan sa pasyan i vin anndan kot dokter, i bezwen esper en kantite letan.  Eski tousala pou tonm anba sa sistenm ki ou pe koz lo la ki pe  vini byento e kan sa i pou ganny finalize?  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker.  Mersi Onorab.  Annefe sa Health Information System parey mon’n eksplike nou pe fer tender la.  Apre pou annan evalyasyon bann bids e swivan bann evalyasyon pou annan en dezyenm faz kot nou pou al swazir sa konpannyen ki’n anvoy sa bid ki pli konpetitiv ki reponn a bann kriter ki nou’n etabli.  Enn fwa ki sa i ganny fer i annan en travay teknik ki bezwen ganny fe; par egzanp an term lekipman lenformasyon ki bezwen ganny enstale sa i enkli bann  nouvo server.  Sa i enkli bann nouvo server.  I enkli dan serten ka bann nouvo kab ki bezwen ganny konekte avek bann diferan servis lopital.  E sa nou ekspekte nou kapab konmans li lafen sa lannen e ki nou kapab konplet li nou espere a lafen sa lannen.  Apre son faz swivan, se son faz kot tou bann lenformasyon i ganny mete dan sa sistenm elektronik.  Mon pa kapab dir sa Lasanble la pou le moman konbyen letan egzakteman sa pou pran akoz sa i pou depan lo sa assessment ki pou ganny fer par sa konpannyen enn fwa ki sa konpannyen in ganny swazir.  Alor i annan diferan, i annan diferan staz dan, dan sa travay ki bezwen ganny fer akoz nou bezwen met diferan departman dan sistenm anliny e si mon sit sa legzanp ki ou’n site sistenm, nou servis laboratwar sa i en priyorite pou nou kapab met li dan Health Information System e sa pou  redwir en kantite sa bann dele avek sa bann pasyan ki bezwen atann avan ki  dokter i kapab vwar zot akoz zot pe esper sa rezilta.  Me osi mon konnen Mr Speaker ki in annan  bann ka parfwa regretab kot en dimoun in bezwen espere en pti pe tro lontan e nou regrete sa. Me mon santi ki sa i kanmenm, i pa sa  sityasyon normal.  I pa en keksoz ki ariv toulezour.  I en keksoz ki arive letan i annan en problenm avek sa kart oubyen avek sa rezilta.  E sa Health Information System pou redwir sa e menm petet elimin li konpletman, akoz dan sa sistenm nenport ki dokter letan i pou antre dan sa sistenm i pou kapab ganny sa dernyen lenformasyon ki annan lo sa pasyan.  Savedir koman sa rezilta i disponib i ganny  mete dan sa sistenm ki en sistenm online e alor sa dokter pou kapab konsilte li direkteman.  I pa pou depan lo sa dokiman fizik.

Onorab in osi mansyonn difikilte avek bann pasyan, difikilte ki nou gannyen avek parfwa bann pasyan ki annan serten dezabilite oubyen ki dan en wheelchair, e nou konsyan ki lafason ki sa batiman i ete nou pa kapab sanz li en sel kou.  Nou annan plan pou re devlop li dan nou plan redevlopman Lopital me nou sey o maksimonm pou nou donn sa sipor avek  bann pasyan ki dan bann kondisyon parey.  Mersi Mr Deputy Speaker e mersi Onorab.

 

MR DEPUTY SPEAKER

Mersi Minis. Onorab Roucou.

 

HON CLIVE ROUCOU

Mersi Mr Speaker.  Bonzour Mr Speaker.  Bonzour Minis.  Bonzour tou  bann Manm Onorab.  2 kestyon pou Minis silvouple.  Mon premye kestyon se mon anvi demann Minis ki son Minister pe fer pou amelyor servis lapwentman kot Twa  Ver kot i annan zis 2 dimoun ki pe travay e par kont nou’n tann sa kantite lapwentman ki pe ganny donnen, bann lapwentman ki sorti lo bann ward, dan bann distrik e dan klinik prive.  Epi Minis osi in koz lo bann servis spesyalize.  Alors mon anvi demann Minis ki son Minister pe fer pou bann servis spesyalize?  Par kont nou konnen parey spesyalis Cardiologist, Neurologist,  Echo pe mars byen.  Me par kont Dermatologist lapwentman i plis ki dan 3 mwan.  Orthopedic i annan zis 2 dokter.  Mon konnen i annan dokter ki pa pe vwar bann new cases.  Pe vwar zis bann surgery patient.   Mon tande dokter Louange tou nepli vwar pasyan e sa i sa 2 sekter kot i annan plis problenm.  So ki Minis pe fer pou ed sa bann Departman- please ?

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker e mersi Onorab.  Premyerman se ki konsern lapwentman dan Twa Ver tou bann batiman Lopital sa Health Information System pou adres sa akoz li i pou  Servis Lasante total.  I enkli osi dan klinik.  I enkli dan bann diferan Health Centers; i enkli dan sistenm danter.  Letan nou pou konmans li nou pou vwar depandan rekomandasyon sa bann ekspertiz si nou fer tou en sel kou oubyen si nou fer li par faz.  Nou pou ganny sa bann lenformasyon enn fwa ki nou’n ganny sa konpannyen an plas ki pou kapab konsey nou.  Me an bref solisyon Health Information System, i parey pou Twa Ver i parey pou Twa Zonn e osi bann lezot servis.  E mon remersi Onorab ki in note ki annan serten amelyorasyon dan serten bann servis, an term sa bann lapwentman e sa i atraver zefor ki’n ganny fer par bann staff Lasante.

Lo bann spesyalizasyon ki Onorab in site kot parfwa i annan serten retar sa i lye avek disponibilite spesyalis akoz pa dan tou sekter ki nou annan menm kantite spesyalis.  Me nou annan osi en sistenm ki nou asire, nou regard par egzanp irzans bann ka. E nou annan, nou rekonnet osi ki serten spesyalizasyon, serten loperasyon oubyen serten prosedir i pli irzan ki lezot.  Ou’n sit 2 par egzanp Dermatolozi ek Orthopedic.  Dan tou lede sa bann, dan  tou lede sa bann Sekter normalman i pa kestyon irzan, irzan.  Kot i en kestyon irzan byensir zot ganny sa referans avek sa spesyalis. E si nou  benchmark nou lekor par egzanp kot serten lezot pei, bann prosedir dan sa  bann sekter souvan i ganny planifye lwen davans akoz i bann keksoz ki kapab ganny planifye.  Par egzanp si e dimoun pe ranplas son zenou an term Orthopedic sa i en keksoz ki kapab ganny planifye ou pa bezwen fer li son lannmen oubyen dan en semenn.  Nou evalye douler ki sa dimoun i annan.  Nou evalye diferan keksoz pou nou plan sa surgery pou nou fer li dan en fason ki rekonnet  bann resours ki nou annan.  Si nou pran legzanp dan  lezot pei nou benchmark nou lekor, nou regard NHS L’Angletere resaman in fer sorti en rapor kot bann dimoun pe esper bann surgery Ortholpedic plis ki enn an.  Sesel nou napa sa bann ka.  Nou sey o maksimonm pou nou met li pli boner posib.  Me wi parfwa i nesesite ki i annan, i arive ki serten retar i arive.  An se ki konsern Dermatologist, nou annan aktyelman zis enn ki permanan isi me nou annan osi bann spesyalis ki vizite e sa i enkli enn ki pe vini prosennman sorti Sri Lanka.  An se ki konsern bann dokter, ou’n sit legzanp Dokter Louange.  Dokter Louange mon kapab asir ou malgre ki i annan sa pozisyon koman CEO, i pe kontinyen vwar pasyan me nou demann konpreansyon tou bann pasyan ki byensir i bezwen fer en schedule ki permet li fer son, gard son responsabilite konman CEO e apre vwar pasyan. E nou sey o maksimonm pou nou asire ki sa bann dimoun i ganny sa servis ki zot bezwen.  Mersi Mr Speaker e mersi Onorab.

 

MR DEPUTY SPEAKER

Mersi Minis.  Onorab Chantal Ghislain.

 

HON CHANTAL GHISLAIN

Mersi Mr Deputy Speaker.  Bonzour tou dimoun.  Minis nou konnen poudir bann pasyan Praslin, La Digue osi zot ganny bann servis kot zot bezwen al fer, dizon sorti  La Digue pou zot al Praslin pou zot al fer bann tes, dizon par egzanp US bann madanm ansent.  Eski i posib pou Minis aranze ki bann pasyan ki sorti La Digue o mwen zot kapab ganny zot, zot ganny zot bann apwentman byen bomaten, pa melanze avek bann pasyan ki sorti Praslin, akoz ler zot mank sa bato dizon 10er ouswa midi zot bezwen asize ziska 2er edmi pou zot retourn La Digue.  Mersi Mr Deputy Speaker.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker.  Mersi Onorab.  E mersi pou lev sa size ki nou konnen i enn ki konsern dimoun La Digue. E nou pe travay avek bann managers dan sant La Digue e osi Praslin pou nou sey adres sa konsern vizavi bato e disponibilite bann apwentman lo Praslin ki rekonnet sa spesifisite ki annan li sa zil. E nou  pe byensir osi regarde pou nou kapab o maksimonm pou fer sa bann servis spesyalize lo Praslin e ogmant sa bann servis e dan en fason pli regilye ki rekonnet bezwen bann dimoun lo Praslin ek La Digue.  Mersi Mr Deputy Speaker.

 

MR DEPUTY SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mr Deputy Speaker e bonzour tou dimoun.  Minis Seksyon Swen Spesyalis SOPD i souvan parey kestyon i dir i annan bokou konzesyon.  I annan en pe retar.  Bann Dokter Spesyalis zot menm, zot souvan zot eksprim zot fristrasyon ki zot pe ganny demande pou zot vwar tro bokou pasyan e alors zot pa kapab donn letan neseser sa pasyan.  Alors si sa i en konsern pou Minister Lasante mon ti a kontan demann Minis ki bann mezir ki  pe ganny pran, pou annan en meyer sistenm screening o nivo bann  klinik pou fer sir ki bann referrals ki ariv kot bann spesyalis i vreman bann i merit arive oubyen, e ki bann ki kapab ganny trete dan distrik i ganny reste pou tir en pe sa load lo bann Dokter Spesyalis?  Sa i mon premye kestyon.  E mon pran sa lokazyon ler nou pe koz lo Dokter Spesyalis mon dezyenm kestyon pou Minis kapab dir avek nou tou bann dokter e bann spesyalis ki dan Minister Lasante ozordi ki annan responsabilite administratif parey isi la nou annan 3, nou annan 3 dokter.  Eski Minis i kapab dir nou si i en Polisi Minister pou ankouraze oubyen pou demande ki tou sa bann dokter i fer omwen en serten letan pratik medikal, pour ki zot kontinyen avek zot profesyon pou ki demen ler zot, si zot retrouv zot an deor sistenm administratif zot ankor kapab pratike? Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  An se ki konsern sa screening ki nou fer pou pasyan avan ki zot vwar spesyalis sa i en eleman ki an term bann prosedir ki nou’n met an plas avek bann dokter dan kominote; sa i e keksoz ki nou’n demande koman enn bann mezir ki ganny swiv  dan en fason kontinyel.  E i enn bann keksoz ki nou pe verifye a la long term, pou vwar bann trance, pou vwar sa bann referrals ki lenpak i annan e osi letan nou  pou annan sa Health Information System i pou permet nou dan en fason pli imedya pou nou swiv par egzanp bann trends ki annan an term sa referral ki sorti dan kominote dan en sant rezyonal oubyen dan en sant, dan en distrik, pou ariv avek spesyalis e pou vwar son lenpak e osi pou nou kapab verifye sa lenpak sa tretman a long term.  Parey nou kapab vwar statistik ki mon’n donnen avek plis ki 12mil konsiltasyon par mwan e sa i bann repeat cases, i annan en swivi kontinyel avek bokou pasyan e nou bezwen kapab mezire lenpak ki i annan a long term.  Nou annan  serten sekter kot nou vwar i annan en vreman bon rezilta.  Kot nou vwar dimoun pe amelyore e nou vwar ki zot kapab vin prodiktiv dan nou sosyete. Dan serten ka,  nou bezwen dir la dan sa Lasanble sa i lye avek bann problenm pli larz ki nou annan dan nou sosyete.  Kot nou annan nou problenm alkolik, nou annan nou problenm labi sibstans, kot i annan bokou dimoun ki annan lezot problenm ki bezwen ganny revwar par spesyalis me zot kondisyon pa amelyore akoz bann lezot problenm sosyal ki egziste dan nou sosyete e bann, parfwa bann problenm konsonmasyon e konportman bann sitwayen e sa i enn bann eleman ki nou pli byen kapab verifye atraver sa Health Information System pou nou kapab vwar son rezilta a long term.  Lot keksoz se an metan sa Polisi ki nou’n pran pou nou met bann konsiltasyon par spesyalis zot menm dan  kominote i enn bann mezir ki’n osi permet sa pli bon lyen ant sa dokter kominoter, ek sa bann spesyalis akoz ou kapab vwar ankor pli byen sa lyen ki  i annan avek sa kominote.  E mon kapab dir ki sa i enn bann keksoz ki’n ede pou nou kapab monitor  sityasyon.  Lot keksoz se ki letan ou annan spesyalis ou idantifye bokou plis bann keksoz ki bezwen latansyon. E nou ava note ki dan Lopital Sesel nou fer plis ki 4mil 300 loperasyon par lannen, bann lentervansyon ki’n ganny fer lo bann pasyan e sa i vedir ki bokou bann ka i osi al lo en sityasyon kot ou bezwen fer en lentervansyon pli avanse.  E byensir i annan ka osi ki nou refer pou tretman pli avanse deor.

As se ki konsern bann dokter dan ladministrasyon, nou en pti pei e nou servi lekspertiz o maksimonm ki nou kapab e mon konnen ki laplipar sa bann dokter ki annan en pos administratif zot osi ofer serten, zot osi ofer zot servis dan nou Servis Lasante dan diferan fason.  E tou bann dokter dan pos administratif zot fer sir ki zot reste a zour avek zot landrwa lekspertiz e i annan osi bokou bann pos ki administratif me alafwa ki clinical e ki annan serten lekspertiz ki neseser e ki lye avek zot leksperyans konman dokter zot menm.  Alor nou napa en Polisi ki formel, ki dir ki zot bezwen fer sa me an pratik la grande mazorite bann dokter ki dan ladministrasyon zot osi fer en travay kontinyel koman dokter.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Henrie.

 

HON GERVAIS HENRIE

Mersi Mr Deputy Speaker.  Bonzour tou dimoun.  Mon kestyon pou Minis i  tourn otour sa sif ki in donn nou.  12mil 133 lapwentman zis mwan Me.  Si mon tir weekend savedir 22 zour travay pou mwan Me i tonm apepre 551apwentman par zour.  So mon anvi ki Minis i donn nou en leksplikasyon lo ki bann servis ki bann pasyan, bann kliyan pe vini, pe gannyen la kot SOPD?  Apre ki mannyer zot pe manage sa sif pou fer sir ki (1), ki pasyan pa fristre akoz zot bezwen esper en kantite letan?  Me pli enportan lo bann profesyonnel zot pa santi zot overwhelmed avek sa volim  travay par zour.  Dezyenm i tourn otour kestyon ki Onorab Ferrari fek demande parski mon pa’n neseserman satisfe avek larepons Minis, malgre in dir napa en Polisi formel me eski i kapab donn nou en legzanp par egzanp en dokter ki dan en pos administratif la ki osi pe at least en fwa par semenn dizon i pe vwar pasyan akoz nou piblik laba deor i anvi konnen ki par egzanp Dokter Louange pou son lekspertiz ki i annan dan field i pe fer en keksoz pratik pou popilasyon Seselwa.  Mersi bokou.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker e mersi Onorab.  Mon pou sit serten legzanp me i annan dokter Louange nou konnen ki en eksper dan son domenn.  I en  sirizyen pou spine e sa lekspertiz se menm i annan serten pei dan la rezyon ki napa sa lekspertiz, alor nou sanse ki nou annan ki isi e nou osi kontan ki i servi son leksperyans par egzanp letan i ti travay Singapore i pe  servi sa dan son rol aktyel konman en administrater.  E si nou pran  son legzanp i pe vwar pasyan en fwa par semenn konman en minimonm apre an plis i fer bann surgeries.  Nou annan osi par egzanp Dokter Gedeon ki osi fer en klinik.  Nou annan osi Dokter Reginald ki vwar pasyan regilyerman e tou bann dokter zot fer li zot responsabilite pou zot kontinyen vwar pasyan akoz i osi en form parti dan zot devlopman kontinyel e pou fer sir osi ki zot reste azour avek bann teknik ki egziste.

An se ki konsern volim pasyan ki spesyalis i vwar, i pa en size ki fasil Mr Speaker.  I pa en size ki ou kapab zis dir ki, ou pa kapab al dir en pasyan ou pa  malad ou pa pou vwar dokter.  E nou  bezwen osi konsyan parey mon’n dir ki lye avek bann problenm pli larz ki nou  annan dan nou sosyete nou annan serten defi ki devan nou par egzanp, nou annan en lepidemi lobesite dan nou pei.  Nou bezwen apel li en lepidemi akoz i nou annan nivo lobesite pli larz dan L’Afrique.  Letan ou annan lobesite sa i anmenn bann problenm kardyovaski8ler ki nesesit dimoun vwar spesyalis.  Letan ou annan sa problenm lobesite ou osi annan osi bokou plis problenm orthopedic, bann problenm par egzanp zenou, bann problenm slip disc e bann lezot problenm ki al avek.  Alor letan ou pe vwar sa bann sif i annan en serten eleman ki nou pe fer en travay pli aprofondi.  Me sa Health Information System pou ed nou pou nou pli byen evalye bann referrals ki ganny fer sorti  dan klinik pou  spesyalis.  Me i osi en refleksyon pli larz ki pe arive dan nou sosyete.  E si nou regard sa breakdown, sa bann diferan ka ki vwar spesyalis akoz sa i enkli, e  mon ti a kontan spesifye sa sif i pa zis Twa Zonn akoz i annan en serten spesyalite ki pa dan Twa Zonn.  I pa zis dan Twa Zonn.  I enkli par egzanp physio therapy ki i en  spesyalite e nou annan plis ki 5mil dimoun ki ganny refer avek physio therapy par egzanp par mwan.  Alor sa i enn pli gran landrwa. Apre ou  annan en kantite ki vwar orthopedic surgeon par egzanp nou annan 464 konsiltasyon par mwan pou orthopedic.  Dan Ante Natal osi nou annan en kantite.  E dan ophthalmology  osi en kantite.  Nou annan plis ki 800 dan ophthalmology par mwan.  Alor letan ou met tou sa bann diferan spesyalite ansanm e i annan en kantite spesyalite i fer en sonm ki enportan, me i lye avek bann kondisyon ki nou pe vwar dan nou sosyete ek bann problenm dan nou sosyete ki nou pe fer fas avek ozordi.  Mersi Mr Deputy Speaker.

 

MR DEPUTY SPEAKER

Mersi Minis.  Onorab Aglae.

 

HON EGBERT AGLAE

Mersi Mr Speaker.  Bonzour Minis ek ou delegasyon, tou Manm e tou dimoun a lekout.  Minis konman en ansyen travayer lasante mwan osi mon ti a voudre felisit tou travayer ki pe fer son louvraz nob tout an prenan kont tou sa bann defi.  Mon kestyon Minis alor i kot  SOPD i konsernen ou kapab annan sa pli bon servis efikas.  Enn bann kontrent ki souvandfwa pe fer fas avek se lenformasyon lo sa pasyan kot ler i pe vin SOPD kot i annan sa lalis di zour ki bann dokter i bezwen swiv baze lo bann pasyan ki pe vini, se kot i konsern zot file ki pa annord. Souvandfwa kot nou tande ki i annan rezilta disan ki pa ankor arive.  Rezilta scan, rezilta MRI, e menm history sa pasyan menm pa ankor petet ganny met a zour. Alors sa i kree en delay pou sa dokter, ki swa ki ti pe swiv sa pasyan ouswa en nouvo dokter, pou kapab pran en desizyon medikal pou sa pasyan e redwi sa retar ki egziste pou le moman pou kapab fer sa servis vin pli efikas.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker e mersi Onorab.  E mon remersi Onorab pou son lapresyasyon pou bann travayer lasante.  I enportan pou nou rekonnet travay ki zot fer.  Me osi pou lapros sa kestyon akoz i al dan direksyon kot nou vwar en pti pe bann defi ki nou annan dan nou sistenm lasante.  Sa problenm ki parfwa file pa annord kot i annan serten lenformasyon ki manke. Fodre nou konpran en pti pe, mon ti a kontan dir premyerman ki malgre ki nou annan petet sa nide ki sa i en keksoz ki dan tou ka i arive larealite i dan serten ka e souvandfwa, laplipar di-tan i bann ka  i ase izole me mon konpran ki pour sa pasyan i pa akseptab e definitivman i pa akseptab me pou nou konpran ki en pti pe ki mannyer i arive e ki bann eleman nou pou met an plas pou rezourd sa. Bokou dimoun Sesel ki ganny refer avek spesyalis i bann dimoun ki annan en kantite problenm an menm tan. Alors souvandfwa zot kapab par egzanp zot in ganny refer par egzanp avek Orthopedic me an menm tan zot osi annan en problenm avek zot ronnyon, zot bezwen, zot lo dyaliz par egzanp, an menm tan zot kapab osi annan dyabet e an menm tan zot kapab annan tansyon ek bann problenm kardyovaskiler.  E nou sistenm aktyel ki baze lo papye, ki baze lo en file fizik,  e par egzanp si sa pasyan in bezwen vwar plizyer dokter en pti pe enn deryer lot parfwa file pa ariv dan sa vites ki i devret arive oubyen sa rezilta pa ariv dan sa landrwa kot i sipoze arive a sa moman.  Avek sa sistenm Health Information System letan nou al dan en sistenm elektronik sa file pou nepli bezwen ganny transmet fizikman.  I en dokiman elektronik ki an menm tan sa menm moman sa spesyalis kardyovaskiler i kapab konsilte sa dokiman.  Sa Spesyalis pou Dyabet i kapab konsilte sa dokiman, e sa Spesyalis Orthopedic i  osi kapab konsilte sa dokiman Alor sa Health Information System mon konnen ki i annan dimoun ki fristre letan sa bann keksoz i arive.  Nou pe travay osi avek nou bann staff pou nou kapab pli byen eksplik pasyan si sa problenm in arive annou petet met en lot lapwentman pou sa pasyan ;  donn en pe plis letan pou nou kapab aranz sa.  Nou osi annan en standar ki nou met an plas kot sa file i bezwen ganny source son zour avan.  E si sa file pa’n ganny vwar  nou eseye re schedule sa pasyan si nou kapab.  Dan serten ka kontak i difisil oubyen dan serten ka i en ka irzan kot nou bezwen sey  vwar sa pasyan o pli vit posib.  Alor mon remersye Onorab pou lev sa kestyon.  Solisyon i atraver bann mezir ki nou pe met an plas deza an term management sa bann case, me solisyon a long term i lye direkteman avek sa Health Information System e nou bezwen tou dimoun pou siport son enplimantasyon akoz nou bezwen konpran ki dan son premye faz pou annan serten difikilte avek sa.  I pa pou en keksoz ki zis en sel kou ou annan son solisyon imedyatman.  Nou bezwen fer sa travay aprofondi, fer sa training pou bann staff ki pe al enplimant li e asire ki i ganny fer dan en fason sistematik.  Me mon annan konfyans ki sa i kapab vreman sanz nou sistenm lasante dan en fason pozitif.  Mersi Mr Speaker.

 

MR DEPUTY SPEAKER

Mersi Minis.  Onorab  Letourdie.

 

HON JANY DE LETOURDIE

Mersi Mr  Speaker. Bonzour tou dimoun.  Minis mon annan en sizesyon petet pou sey ede amelyor sistenm kot SOPD.  Nou konnen poudir lo son resepsyon, dan son waiting room souvandfwa i plen; i annan en kantite dimoun e napa plas asize e souvandfwa ou vwar dimoun deor lo bann oubyen pe debout lo balistrad e souvandfwa ou pa vwar sa ners ki pe kriye e ou pa ni menm tande.  Mon ti pe sizere si zot  ti a konsider met en PA  sistenm pou sa landrwa?  Petet sa ti a kapab deservi lezot landrwa osi ki pe ganny menm difikilte.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Deputy Speaker e mersi Onorab.  Nou pran tou sizesyon dan en fason pozitif e nou konnen ki  nou sistenm lasante ki mannyer in devlope i annan kontrent lenfrastriktir.  Nou pe adres serten sa bann kontrent atraver redevlopman bann diferan landrwa dan Lopital.  E nou ava pran sa kestyon en PA sistenm an konsiderasyon.  Nou pe osi atraver sa sistenm lapwentman dan la gran mazorite ka si sa pasyan i vin sa ler ki in ganny dezinyen.  Mon dir lamazorite ka mon konnen ki i annan letan ki i pa fezab i pou ganny vwar dan en letan ki apropriye e ki avek en minimum retar nou konnen parfwa i annan en pe.  Me nou pran not sa nesesite pou fer sir ki dimoun i tann byen letan zot ganny kriye.  E nou ava sey pran mezir pou adres sa.  Mersi.

 

MR DEPUTY SPEAKER

Mersi Minis.  Onorab Valmont.

 

HON JUDE VALMONT

Mersi Mr Speaker e bonzour.  Bonzour Minis e ou delegasyon.  Bonzour tou koleg Onorab.  Minis mon kestyon i baze lo en larepons ki ou’n donnen pli boner.  Ou’n mansyonnen ki bann spesyalis zot al, zot osi zot desantralize.  Mon ti a zis voudre demande si sa i mars lo rezyon e ki kantite efektiv i efektiv?  Apre zis en pti komanter ki enn manm piblik in pas ek mwan i dir aparaman English River bann pasyan Dyabet i pran omwen 6 mwan pou ganny apwentman pou vwar spesyalis.  Alor petet si Minis ti kapab get ladan as well.  Mersi bokou.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker.  Mersi Onorab.  Annefe an se ki konsern bann referrals avek bann spesyalis dan distrik.  Wi nou napa ase spesyalis pou nou ofer dan tou sant lasante ; savedir par dan sak sant lasante ki  annan me dan  bann sant rezyonal nou asire ki sa bann servis i disponib alor par egzanp dan sant rezyonal Anse Boileau pou rezyon was dan Sid Was, dan Lopital Anse Royale pou rezyon Sid es, dan English River par egzanp.  Alor sa i serten sa bann sant rezyonal me i pa dan sak klinik.  Kot serten klinik osi i annan problenm lespas, eksetera.  An se ki konsern son lavantaz ek son dezavantaz.

Bon lavantaz ki deza nou pe vwar ki i annan en pli bon lyen avek sa dokter dan kominote.  Akoz ou kapab vwar sa lyen kot en pasyan par egzanp ki en pe a laz, i abitye vwar en dokter dan kominote i annan plizyer problenm me lefe ki i kapab vwar sa Dokter Spesyalize mete i pe vwar en Dokter Kardyovaskiler dan kominote an menm tan i permet sa bann dokter pli byen enterakte e osi pli byen konsey sa pasyan lo son sityasyon.  Alor sa lo  kote son lavantaz.

Lo kote son dezavantaz i ase lour administrativman pou nou annan sa, pou ofer sa servis. Me nou vwar ki son lavantaz i plis ki son dezavantaz.  E tan ki nou kapab ofer sa servis dan en konteks desantralize nou pou kontinyen fer li.

An se ki konsern Dyabet nou kapab ofer en servis ase regilye e mon en pti pe sirprann pou tann sa legzanp ki ou’n dir mwan pou 6 mwan.  Mon pa krwar i reprezant en norm.  I annan serten ka petet par en mank la oubyen en lot kot en dimoun in ganny petet i pa’n ganny sa lapwentman kot i ti merite, e mon sizere petet Onorab ki ou kapab ekri mwan lo sa ka spesifik oubyen mon envit sa dimoun pou li ekri nou e mon ava fer sir ki i re antre dan sistenm dan en fason ki i kapab ganny swiv dan en fason ki rezonnab e asire  i ganny sa lapwentman apropriye avek spesyalis.  Me lo Dyabet mon ti a kontan dir ki wi i  enportan parfwa bann dimoun ki annan bann problenm ekstrenm,  pou li kapab ganny vwar par  spesyalis, me i osi en keksoz ki ganny swivi byen par bann ners.  I annan bokou ners dan bann sant, dan bann klinik ki vreman byen plase pou zot konsey, ki konsey bann pasyan lo meyer pratik an sa ki konsern dyabet.  I pa toultan neseser ki, ou konnen keksoz parey dyabet se vreman lakle se ou fason  viv toulezour e sa sipor ki ou gannyen avek ou fanmir par egzanp dan en fason regilye.  Alor lenportans ki nou donnen, se pou annan sa swivi dan sant lasante, ou vwar spesyalis si vreman i annan en sityasyon pli sever.  E mon ti ava note osi ki nou’n osi deza rekrit en nouvo  endocrinologist, endocrinologist e sa i en dimoun ki adres bann pasyan Dyabet. E sa pou permet nou dan en fason pli sistematik adres bann dimoun ki bezwen vwar bann spesyalis dan en fason pli azour.  Mersi bokou Msye…

 

MR DEPUTY SPEAKER

Mersi Minis.  Onorab Ramkalawan.

 

HON WAVEL RAMKALAWAN

Mersi Mr Speaker.  Bonzour Minis avek tou ou delegasyon.  Mr Speaker mon anvi zis demann Minis an relasyon konmsi pou fer sa servis vin pli efikas, an relasyon avek bann pasyan ki’n al fer tretman deor e ki apre sa zot ganny demande pou zot retourn dan en peryod letan par egzanp bann dimoun ki retinal detachment par egzanp, ki dir zot retourn dan 6 mwan, ki mannyer parski i annan serten dimoun ki pe ganny problenm pou zot retournen e byensir atraver bann spesyalis ki zot zwenn isi, ki egzakteman  son Minister pe fer pou adres sa size  pour ki sa follow-up i kapab ganny fer e rezilta konkret byensir i kapab ganny achieve? Mersi bokou.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab Leader Lopozisyon.  An se ki konsern  swivi akoz tou nou prosedir pou referans pou tretman an deor pei, i bezwen ganny fer par en referans atraver bann dokter ki baze isi.  Alor par egzanp si nou’n anvoy en dimoun deor pou en tretman dan lisye si nou servi sa legzanp ki ou’n servi, sa dimoun i al fer son tretman, letan in fini i annan e revi ki bezwen ganny fer. Serten revi i kapab ganny fer isi Sesel swa par bann dokter ki nou annan isi me osi si  mon pran legzanp ophthalmology nou’n agrandi en kantite nou kapasite  atraver bann spesyalis ki vizit Sesel regilyerman, alor nou demande ki sa pasyan i ganny swiv, i re vwar en dokter isi a sa moman son revi e  prezan depandan lo son kondisyon nou refer swa nou refer li ankor deor oubyen i ganny swivi isi pou kontinyasyon son tretman.  Akoz i depan lo sa prosedir ki’n ganny fer, lo ki swivi ki in ganny fer si i pou ganny refer overseas pou son swivi oubyen si i ganny swiv isi.  Me sa ki tre enportan se ki sa pasyan de ki in fini laba se ki i ganny revwar par en spesyalis isi.  Nou vwar serten kontrent ki nou annan avek enteraksyon avek piblik se ki souvandfwa letan zot in fini fer zot tretman deor  zot pa re vin direkteman kot nou servis kot Minister Lasante kot Health Care Agency.  Alor mon profit sa lokazyon pou mon dir tou dimoun i enportan ki zot ganny swiv par bann dokter isi pou ou kapab asire ki zot kondisyon i byen ganny evalye e apre si neseser pou zot swivi zot ganny refer lo Overseas Treatment Board.  Mersi Mr Speaker e   mersi Onorab.

 

MR DEPUTY SPEAKER

Mersi Minis.  Bon pou en kestyon time management, mon pe demann ek tou bann Manm fe zot kestyon bref.  Pa bezwen fer en statement, al direk lo zot kestyon spesyalman siplemanter e mon pou posibleman osi tou limit kantite siplemanter, ler mon lalis i fermen i fermen.  Nou a pran kestyon nimero 2. Onorab Noline Sophola.

 

HON NOLINE SOPHOLA

Mersi e bonzour Mr Deputy Speaker.  Bonzour Minis ek ou delegasyon e tou dimoun a lekout.  Mr  Deputy Speaker eski Minis i kapab eksplik sa Lasanble ki Polisi e protokol transportasyon e transbordman bann prodwi konzele ant Mahe e lezot zil- nou teritwar pou   asire ki sa i pe ganny fer lo standar neseser e ki pou napa risk pour bann konsonmater? Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Deputy Speaker e mersi Onorab pou sa kestyon.  An se ki konsern transportasyon bann prodwi konzele sa i ganny kouver anba Food Act. I annan en eleman spesifik anba Food Act  kot i konsern tanperatir kot bann prodwi konzele i bezwen ganny transporte ladan, i tonm anba  en regilasyon e pou le moman sa regilasyon i ankor dan staz pe ganny draft; e savedir i pa ankor vin an fors.  Malgre sa, bann Lotorite Lasante piblik i fer en monitoring regilye an se ki konsern transportasyon bann prodwi konzele, sirtou lavyann ek bann prodwi similer ant Mahe ek Praslin avek La Digue kot zot  fer bann verifikasyon lo sa bann prodwi.  Nou kapab note ki i annan bann bato ki i annan serten fasilite abor, ki permet transportasyon sa bann prodwi dan en fason ki konvenab. Nou annan serten bato ki annan serten defi e ki zot pa pe aktyelman transport sa bann prodwi dan en fason ki ideal me nou konstate ki dan la grande mazorite preski tou bann ka kot zofisye Lasante Piblik in fer bann verifikasyon bann met bato kanmenm i fer bokou zefor pou asire ki sa bann prodwi i ganny tenir dan en kondisyon ki ase akseptab; savedir ki malgre ki petet zot pa pe kapab met li dan en cold store abor sa bato zot pe met li dan en fasilite, dan en bwat par egzanp ki permet gard sa lavyann dan en kondisyon ase rezonnab.  Me mon ti a kontan fer sorti devan Lasanble Mr Speaker e bann Manm Onorab ki letan nou pou met an plas sa nouvo regilasyon sa pou enplimant en standar ki pli o e alor i pou nesesit ki tou bann operater i adres sa kestyon dan en fason pli sistematik.  Dan sa standar, nou pe demande ki tou bann prodwi konzele i ganny transporte a en tanperatir ki mwen 18 Degre Santigrad e sa i vedir pou zot kapab transport li i pou bezwen dan en cold store ki abor zot bato oubyen dan en parey nou dir en deep freeze ki osi kapab ganny enstale dan en bato.  E si sa verifikasyon sa neseser i ganny fe i kapab osi dan en resipyan ki annan sa insulation neseser, me ki permet  ki i gard son tanperatir a mwen 18 degre e sa nouvo regilasyon pou ganny prezante avek Konsey Minis prosennman e letan i vin an fors sa i pou permet Zofisye Lasante fer bann verifikasyon dan en fason bokou pli sistematik.  Me mon ti a kontan reasir Manm piblik ki Zofisye Lasante piblik i deza pe fer bann verifikasyon.  I deza pe fer monitoring, me zot pa ankor aplik sa standar akoz i enportan pou annan sa konsiltasyon avek bann operater dan sa sekter pou asire ki nou pare pou enplimant tou nou bann eleman ki lye avek sa standar ki pou enplimante anba sa Food Act.  Mersi Mr Speaker e mersi Onorab.

 

MR DEPUTY SPEAKER

Mersi Minis.  Onorab Sophola.

 

HON NOLINE SOPHOLA

Mersi Minis.  Minis petet mon ava elabor en pti gin.  Par egzanp isi lo Mahe ler bann prodwi konzele i vin kot bato i pa antre, zot pa met deswit lo bato.  I reste da soley parfwa dan 1erdtan, en demi erdtan.  Sa osi i annan en rol ki zwe lo sa tanperatir.  E ler sa  bato i pran sa bann kargezon konzele isi Mahe, i vin avek mon pe koz lo La Digue e mon’n eksperyanse lo Praslin tou, ler i tir dan bato i debarke i met lo lasose, propriyeter i pa vin ranmas deswit.  La i trennen 1erdtan, 1 erdtan edmi dan sa soley e  la osi tanperatir i desann.  E la ki i arive tousala nou vwar i defrost e ler i sorti lasose i al ganny met dan en konzelater, en lot tanperatir ankor.  E ou konn pli byen ki mwan  ki sa i annan en lefe, en lenpak negativ lo lasante popilasyon.  E mon pou dir ki popilasyon La Digue lo la nou vreman, vreman ganny afekte.  E ou konnen nou annan rikord, zot annan rikord ki pe arive.  E pou sa mon pou demann Minis pou get sa size tre irzan.  Tret li tre irzan avan ki nou ganny en lot keksoz ki apre  nou pou dir La Digue i toultan La Digue ki annan sa problenm laba.  Mersi Mr Speaker.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker e mersi Onorab.  E mersi Onorab pou sit sa bann legzanp presi.  E mon konnen ki dan serten ka sa bann eleman in arive e ki Zofisye Lasante piblik  in fer zefor letan zot in idantifye bann ka koumsa  kot in arive, pou koz avek sa bann operater akoz parey ou menm ou ou’n konstate sa i pa bann kondisyon ideal pou transport bann prodwi konzele. E definitivman sa prodwi i kapab ganny afekte akoz i pa pe ganny mentenir a en tanperatir ki konstan.  Se pou sa ki parey mon’n deza dir Gouvernman in drafte en regilasyon, ki nou pou al met an fors prosennman.  Ti neseser ki i annan en konsiltasyon e ki i annan en konversasyon ki ganny fer avek bann operater e ki i annan en serten preparasyon ki ganny fer avek bann operater pou sa regilasyon vin an fors.  Me nou toutafe partaz ou konsern. E i esansyel ki sa regilasyon i ganny met an plas ki pou permet pou nou pli byen protez lasante piblik bann dimoun lo Praslin ek La Digue.  I enportan note ki sa bann ka ki ou’n site parey ou’n dir i egziste me i annan bokou ka osi kot i annan bato ki annan son sistenm konzelasyon ki pe mars byen.  I annan osi kontener refizere ki pe transport  bann materyo.  E nou dir bann operater ki pe fer sa bann fason transport sa bann materyo kot i ganny kite lo Por ki sa pa akseptab akoz i annan en risk pou lasante nou popilasyon.  Dan sa nouvo regilasyon letan i pou vin an fors, annefe sa bann prodwi pou kapab ganny sezi e detri e i annan osi bann lanmann ki kapab ganny met an plas. E pou bann dimoun ki kontinyelman pa respekte Lalwa, bann mezir pli sever i kapab ganny pran, enkli prosekisyon devan Lalwa.  Mersi Mr Speaker e mersi Onorab.

 

MR DEPUTY SPEAKER

Mersi Minis.  Onorab Sophola.

 

HON NOLINE SOPHOLA

Minis mersi.  E pour sa mon pou felisit ou.  Me selman ki mon a demande, petet letan ki ou pe esper sa Act ganny prepare annou sey met en mekanizm provizwar kot lasose pou ed sa sityasyon.   E apre pou bann met bato mon’n koz avek serten.  Serten parey ou’n dir vre zot annan, mon felisit zot.  E sa mon pou dir i annan ki menm zot pe dir mwan zot ava amelyore.  E mon pou dir zot mersi pou sa bout ki zot pe fer akoz zot osi zot konsernen avek lasante piblik.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker.  Definitivman nou ava konsilte avek Lotorite Por e avek lezot  Lazans pou vwar kwa ki kapab ganny fer dan enterim.  Me lakle se pou anmenn sa regilasyon an plas e asire ki i kapab ganny ranforsi e nou pou fer li pli vit posib.  Mersi Mr Deputy Speaker.

 

MR DEPUTY SPEAKER

Mersi Minis. Onorab Loizeau.

 

HON NORBERT LOIZEAU

Mersi  Mr Speaker.  Bonzour Minis.  Mr Speaker avan mon demann mon kestyon, mon anvi fer en remark lo 2 keksoz ki Minis in dir.  Dan konzelasyon kot ki konsern bann prodwi konzele ase akseptab, ase rezonnab pa en bon mo pou servi akoz nou konn tre byen mwan mon konn sa tre byen akoz mon dan sa field refrizerasyon.  En prodwi konzele ler in ariv ater in defrost i pa byen pou ou al  re freeze li ankor.  Nou konn sa tre byen.  Kan ou tir en poul dan fridge pou al kwi, ou’n defrost li ou merit kwi li antye.  Napa pou anmas sa lot bout pou al met laba akoz i pa bon pou lasante.  E la Minis mon anvi demann ou vi ki i annan sa konsern La Digue kot prodwi i vini, prodwi in fini large parey nou dir an Kreol, eski zot annan bann zofisye lasante laba La Digue ek Praslin pou vwar sa sityasyon Minis?  Akoz sa i serye sa en.  I serye akoz mon pa kontan sa zafer ase akseptab ek ase rezonnab.  Eski zot annan bann dimoun ki vwar sa bann prodwi pou vwar si i ankor dan sa bonn eta?  Akoz Onorab Sophola in dir prodwi in fini defrost ler i ariv La Digue.  Eski i ankor lo sa standar pou sa bann dimoun La Digue, Praslin kapab konsonm li?  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Deputy Speaker e mersi Onorab.  Letan mon’n servi sa term akseptab mon pe dir dan konteks bann bato ki pe transport li aktyelman dan bann kondisyon ki rezonnab e ki zot fer en zefor pou asire ki tanperatir i reste a en nivo akseptab.  Savedir en dimoun, si zis ou pe kit en prodwi lo bor lasose.  Napa okenn zefor pe ganny fer sa pa akseptab.  Akoz mon’n servi sa term akseptab dan premye parti mon larepons pa an relasyon avek dezyenm parti larepons ki swivan legzanp ki Onorab Sophola ti donnen.  E sa definisyon lo tanperatir, i enn ki bezwen ganny fer dapre regilasyon.  Savedir dan regilasyon i pou annan en sif spesifik ki mwen 18 Degre dan sa regilasyon e sa i pou permet en fluctuation par 3 degre me sa i pou spesifik dan sa Lezislasyon.  Alor aktyelman, e pou pran dezyenm parti ou kestyon an se ki konsern bann zofisye lasante piblik.  Letan zot in vwar  serten ka kot sa keksoz pe ganny fer, zot in koze avek sa bann dimoun e zot in eksplike poudir  sa pa akseptab.  Akoz sa i kler.  Ou menm ou’n dir ou dan sa biznes e i enportan ki nou fer kler ki sa i en keksoz  ki nou bezwen fer sa regilasyon ki pou iniversel.  Akoz en lot keksoz  mon le fer sorti Mr Speaker e Manm Onorab nou apresye en kantite ki Onorab in fer sorti sa kestyon  dan konteks Praslin ek La Digue, me sa problenm i pa zis Praslin ek La Digue.  Mahe osi i annan parfwa boutikye ki pa pe respekte sa bann norm.  I annan parfwa bann enportater ki pa pe respekte sa bann norm.  Alor i enportan ki sa regilasyon nou konpran byen.  Sa regilasyon i iniversel.  I pou aplik pou tou dimoun e tou dimoun i bezwen swiv sa regilasyon.  An atandan zofisye lasante piblik pe fer tou le neseser pou zot an korperasyon avek sa bann operater pou dir zot kwa ki akseptab e kwa ki pa akseptab e si zot vwar en lensidan kot i annan en prodwi konzele ki’n ganny kite dan soley, zot pou dir klerman poudir i pa akseptab.  Alor mon le fer sa kler.  Bann Zofisye Lasante zot fer bann verifikasyon mon kapab dir ase regilye me wi zot petet zot napa sa manpower aktyelman pou zot lo Por pou sak larive bato me zot pou –  zot fer sa bann verifikasyon dan en fason ase sistematik.  Mersi Mr Deputy Speaker e mersi Onorab.

 

MR DEPUTY SPEAKER

Mersi Minis.  Onorab Churchill Gill.

 

HON CHURCHILL GILL

Mersi Mr Speaker.  Bonzour tou dimoun.  Bonzour Minis ek ou delegasyon.  Sa kestyon i tre ki ler ki solisyon se sa bann bato ki pe transport sa bann lavyann.  So pou letan Minis ou dir i annan dyalog ant ou Minister ek sa bann operater bato, mon ti a sizere pou nou alleviate sa.  An menm tan i annan en diskisyon avek lezot Minister ki kapab ed sa bann dimoun ganny en fasilite, pou zot, pran en fasilite met sa ki  devret ganny mete dan sa bato pou nou alleviate sa problenm.  E dan sa Lezislasyon mon a sizere osi ki okenn bato ki deside fer sa kalite biznes i devret annan sa fasilite pou tenir sa prodwi fre.  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi bokou Mr Speaker e mersi  Onorab.  Mon krwar en tre bon sizesyon ki nou ava met devan bann lezot partner Minister letan nou pe met an plas sa regilasyon.  Mersi Onorab.

 

MR DEPUTY SPEAKER

Mersi Minis.  Kestyon nimero 3 Onorab Aglae.

 

HON EGBERT AGLAE

Mersi Mr Deputy Speaker.  Mr Deputy Speaker avan mon le poz mon kestyon mon oule zis demann ou permisyon pou ou fer en pti minor correction kot i konsern mon kestyon kot i annan en mo, sa mo ‘’ouver’’, ki mon le fer li vin pli an langaz Parlmanter par met sa mo ‘’ler’’ operasyonnel.  Mr Speaker sa i pa ni pou afekte prezantasyon Minis dan son kestyon.

 

MR DEPUTY SPEAKER

Go ahead Onorab.

 

HON EGBERT AGLAE

Mr Deputy Speaker mon kestyon lir konm swivan.  ‘’Eski Minis i kapab donn detay sa Lasanble son plan pou amelyor servis lasante e osi pou konsider ler klinik Béoliere lo en baz 7 zour pou fasilit bann rezidan dan rezyon Port Glaud Grand, Anse Mahe? ‘’ Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Deputy Speaker e mersi Manm Onorab.  Dan tou nou bann sant lasante nou sey o maksimonm pou nou ofer en servis osi souvan ki posib me mon krwar i evidan ki pou bann kontrent ki evidan osi an se ki konsern nou bann staff eksetera i pa posib pou nou toultan ofer sa servis 7 lo 7 dan tou distrik.  Alor se zis dan serten sant rezyonal kot nou kapab ofer sa servis toulezour, me nou eseye ofer en servis pli bon ki posib menm dan bann sant par  egzanp ki Grand Anse Mahe kot Béolière e osi par egzanp dan Port Glaud.  E si nou pran sa klinik Béoliere aktyelman sa klinik i deservi en popilasyon apepre 5911 akoz i enkli e rezyon  pli larz, Grand Anse Mahe e osi bann parti Port Glaud.  E i donn bann servis lasante se ki konsern konsiltasyon dokter, danter, Family Planning, bann servis manman ek zanfan, i osi fer bann home visits.  Zot fer osi School Health, lasante piblik e osi lanvironnman.  E konsiltasyon dokter i ofer 3 fwa par semenn.  Dan Lendi, dan Zedi ek dan Vandredi kot sant Béoliere.  E an plis ki sa i annan 2 zour osi kot i annan konsiltasyon dokter dan sant lasante Port Glaud e sa i dan Mardi ek dan Merkredi.  Pour le moman nou pa’n kapab ofer dokter toulezour pou sa 2 sant lasante.  E malgre ki mon apresye en kantite sizesyon par Manm Onorab imedyatman sa i pa pou fezab me byensir si i annan, si nou annan sa kapasite pou fer li dapre lo lakantite staff ki nou annan i en keksoz ki nou kapab konsidere.  Nou osi bezwen osi regard sa popilasyon, e zot bezwen e asire ki nou resours ki nou met a dispozisyon i relatif osi avek popilasyon e asire ki zot kapab ganny sa servis ki zot bezwen me an rekonesan ki nou resours i pa limite.

Nou osi ofer bann servis spesyalize pou bann dimoun Port Glaud ek Grand Anse dan sant rezyonal Anse Boileau.  Sa bann servis spesyalize i enkli, Urologist, Physician, Pediatrician, Endocrinologist, Dermatologist e lezot ankor.  E nou’n fer sir ki nou ofer sa bann servis  dan bann sant rezyonal parey mon’n eksplike an referans avek premye kestyon pou nou anmenn sa  servis pli pre avek popilasyon malgre ki nou konpran  ki byensir dimoun ti ava swete ki i ankor pli desantralize dan bann sant distrik. Me lefe ki nou kapab ofer li deza dan bann sant rezyonal i en amelyorasyon konpare ek oparavan e i osi anmenn sa servis pli pre avek nou pep.  Mersi Mr Speaker e mersi Onorab.

 

MR DEPUTY SPEAKER

Mersi Minis.  Onorab Aglae.

 

HON EGBERT AGLAE

Minis mersi pou ou larepons.  Minis lespri mon kestyon par deryer sa kestyon se, mon konnen poudir Anse Boileau i annan serten servis ki i pe ofer pou sirtou dan domenn spesyalize avek bann lafason kronik, me annou osi al avenir malgre si la nou pa pe kapab fer li pou al avenir konsidere ki sa klinik i ouver  lo en baz 7 lo 7.  Mon pa pe dir vennkat er, pou 2  rezon prensipal.

Premye rezon se ki i annan en kou sirtou pou bann pasyan  kronik nou bann dimoun aze, pou deplase.  Sirtou zot pe pran en transpor, en lot zour zot pran en pirat parey nou dir, ki pou kout zot R400 a R500  ale retour pou al Anse Boileau e souvandfwa zot pe bezwen ganny akonpannyen osi par zot carer e sa osi i pe kout zot en pe Minis.

Dezyenmman se ki sa rezyon Port Glaud ki nou pe koz lo la, kot nou annan en gran lotel five star, kot a diferan repriz nou’n ganny bann lensidan fatal ki’n arive, ki swa aksidan, dife bann drowning osi, kot zot in bezwen petet sa ler, sa letan ki pe pran petet pou deplas sa bann dimoun petet malgre i annan en servis lanbilans sa osi ti a ede petet sov serten lavi sa bann dimoun an atandan ki servis ti a en pti pe pli pre.  E vi ki popilasyon i kontinyen ogmante.  Maladi i kontinyen ogmante sa a lavenir mon krwar pou ede pou sa rezyon kapab petet lo nivo zot lasante ganny enpoli bon servis.  Mon ti a demann ou Minis pou  konsider sa a lavenir.  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi bokou Mr Deputy Speaker e mersi Onorab.  Nou toutafe apresye rezon ki Onorab pe met sa bann pwen devan e nou konpran son bann rezon akoz.  Definitivman nou bi dan Gouvernman se pou toultan asire ki nou kapab ofer otan servis pli pre  avek popilasyon tan ki posib.  Nou bezwen osi realis parey mon’n deza dir an term nou resours.  E si nou resours i permet i en keksoz nou ava konsidere.  Me mon krwar i enportan osi nou note dan lasanble ki an se ki konsern akse avek bann klinik rezyonal e bann sant lasante Sesel i en Leader.  Pa zis dan nou rezyon me osi menm dan lemonn akoz letan ou regard lakantite sant lasante desantralize ki nou annan dan nou distrik kot dan lamazorite ka nou annan en sant ki disponib a mwens ki 20 minit vwayaz pou en dimoun.  Sa i en standar ki vreman bokou pei pe sey vize.  Nou konpran pwen ki Onorab in met devan ki par egzanp, dan Dimans i annan sa kontrent nou bezwen al en pti pe pli lwen e i annan sa eleman kou.  E sa i bann eleman ki nou gard antet e nou sey ofer sa servis otan ki posib.  Aktyelman nou resours imen pa pe permet fer li me nou pou gard li antet an mezir ki nou sistenm lasante i evolye e si nou kapab fer li nou ava fer li.  Me i enportan pou nou note ki deza sa ki nou pe ofer i en Leader konpare ek bokou pei dan lemonn e mon pa pe koz zis dan larezyon, mon pe koz lo bann pei ki bokou pli devlope ki nou.  Mersi Mr Speaker e mersi Onorab.

 

MR DEPUTY SPEAKER

Mersi Minis.  Onorab William.

 

HON WAVEN WILLIAM

Mersi Mr Speaker.  Mr Speaker mon ti annan 2 ou 3 pti kestyon.  Minis mon ti a kontan demann ou lefe ki nou pe koz lo amelyorasyon servis mon anvi konnen ki ou target vizavi lakantite ners, akoz mon konnen poudir i annan en presyon aktyelman la lo kote Lopital Victoria avek dan bann distrik.  Ki ou target?  Eski nou pe mazin fer vini etranze pou travay konman ners dan Lopital?  E dezyenmman i annan serten seksyon dan Lopital, par egzanp seksyon Sanniter, epi i annan en seksyon kot nou apel bann Health Care Assistant.  Zot pe vwar zot ki zot pa pe ganny mon kapab dir regarde dan en sans ki zot pa pe kapab mont  pli o ki sa nivo zot in arive.  Kwa ki pe ganny fer lo kote Human Resources Development pou kapab amelyor nivo ouswa fer zot keksoz ki zot saler i kapab ogmante?  Akoz lafason ki zot pe travay la…

 

MR DEPUTY SPEAKER

Annou…Order! Order!  Annou fer sir  nou siplemanter i relye avek sa kestyon orizinal Onorab.  Go ahead.

 

HON WILLIAM HERMINIE

Mr Deputy sa i relye akoz nou pe koz amelyorasyon servis e se resours imen ki enportan dan donn servis.  Alors mon kestyon i fokalize lo la.  Mersi Mr Deputy Speaker mon’n fini demann mon kestyon.  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Deputy Speaker e mersi Onorab.  Annefe zisteman enn nou bann pli gran defi dan Sesel aktyelman an se ki konsern lasante se devlopman resours imen e nou pe met an plas anliny avek nou stratezi lasante en plan long term ki pou permet nou adres sa ban bezwen.  An se ki konsern bann ners sa i premye eleman i pa eleman lo li menm, akoz tou travayer lasante – i pa sel eleman. Tou travayer lasante nou annan serten kontrent e nou bezwen fer zefor enorm pou nou kapab adres sa.  Me ners pi parmi sa parey nou dir sa front line ki dan  premye faz nou bezwen adrese e resaman nou’n demann pou nou ganny 50 ners adisyonnel avek Minister Finans e nou panse ki nou pou ganny  en rezilta pozitiv. Parmi sa bann ners alors nou pou fer en avertisman lokalman, e nou espere ki nou a kapab ganny en pe ners lokalman e pou annan en pe osi petet ki pou vin petet lo baz Kontra kot i pou a temps parsyel lokalman me definitivman lo sa 50 pou annan osi sorti aletranze.  Me lenportans dan sa faz ki nou ete dan sa faz aktyelman se amelyor servis atraver asire ki i annan sa bann staff disponib lo ward, dan bann distrik pou asire ki i annan sa servis a la baz pou nou bann pasyan e sa i nou target.

Sa kestyon Health Care Assistant i osi esansyel e nou’n osi demann pou nou ganny 30 Health Care Assistant adisyonnel.  Annefe me sa 30 Health Care Assistant pa pou telman adisyonnel akoz i annan serten kantite ki nou pa ankor finaliz sa sif ki pou al fer formasyon pou zot vin ners atraver sa access program.  Alor sa bann Health Care Assistant ki nou pe rekrite i pou permet nou adres serten kontrent me osi siport nou a sa moman kot serten bann Health Care Assistant pou al fer en formasyon.  Sa i lye avek nou plan a long term ki permet anmenn plis dimoun ki deza dansSekter Lasante dan sa metye ners.

E lot pwen ki ou’n fer sorti lo kote bann diferan travayer par egzanp Sanniter.  Ou’n mansyonn osi kontrent an se ki konsern osi resours pour bann Health Care Assistant e nou pe fer en travay aprofondi pou sey adres sa bann size e a sa moman apropriye nou pou kapab ofer  bann amelyorasyon dan zot kondisyon de servis e sa i definitivman enportan pou nou asir zot lentansyon e asir en meyer standar e kalite dan nou sistenm lasante.  Mersi Onorab e mersi Mr Deputy Speaker.

 

MR DEPUTY SPEAKER

Mersi Minis.  Kestyon nimero 4. Onorab Chantal Ghislain.

 

HON CHANTAL GHISLAIN

Mersi Mr Deputy Speaker. Deputy Speaker eski Minis i kapab enform sa Lasanble lo zot progranm maintenance kot Lopital Sesel anvi ki konsern:-

  1. bann lili ek ber paysan,
  2. bann sofa beds ki bann paran i servi ler zot reste avek zot zanfan Lopital, e tou lezot meb an feray ki nou vwar akimile en pe partou kot Lopital.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Deputy Speaker e mersi Onorab.  An se ki konsern sa kestyon lili ek bann diferan lezot meb ki parfwa nou vwar dan bann koridor; sa i en keksoz ki nou pe fer en travay aprofondi pou nou sey rezourd sa a long term.  Difikilte ki nou annan se ki nou annan en kantite lili dan nou Lopital e regilyerman par egzanp nou bezwen tir sa bann lili pou fer maintenance oubyen pou ranplas en lili e osi  aktyelman nou annan plis ki  200 lili, nouvo lili ki pe vini dan pei e ki pou, bann lili modern ki souvan i elektronik e ki pli apropriye pou en sistenm lasante modern e nou difikilte se dan compound Lopital nou napa en landrwa apropriye pou annan sa stor pou sa bann lili dan en fason regilye ki an menm tan ou kapab fer maintenance lo li. Nou annan en store kot nou met bann lili, me i annan sa  peryod kot letan ou’n tir zot lo ward avan ki ou transport zot dan sa  store  parfwa zot bezwen reste la pou en pti letan.  E sa i en keksoz ki nou pe sey adrese atraver re devlopman Lopital.  Nou annan aktyelman en total 371 lili dan Lopital alor zot a konpran ki sa i en sonm enorm e a nenport ki moman ou annan  en serten kantite ki pe al fer son maintenance.

An se ki konsern nou stratezi pou nou adres sa nou anvi ranforsi nou kapasite, pou maintenance e annan en unit, lakantite lili ki nou annan la i nesesite annan en unit ki pou adres zisteman sa kestyon  e dan nou plan re devlopman Lopital pou annan en landrwa  dan compound Lopital kot bann lili i kapab ganny transporte  letan zot pe al fer maintenance oubyen letan  zot pe ganny met an storage tanporer avan ki zot ganny re mete  lo Ward.  An se ki konsern  sa bann sofa bed oubyen nou osi annan serten ka bann recliners, sa i sirtou dan ka Pediatric Ward, kot  nou rekonnet sa bezwen pou bann paran kapab reste avek zot zanfan, bann  zanfan ki ti pti ki paran i bezwen kapab reste la e nou pe fer nou maksimonm pou nou fer sa servis neseser.  Aktyelman nou’n re met 10 lili dan Pediatric Ward me nou konsyan ki nou bezwen rod ankor e pardon, 10 recliners ek sofa beds dan pediatric wards.  E nou konsyan ki nou bezwen rod ankor pou reponn  a sa demann ki annan pou ban paran lo sa Ward e i en travay ki pe kontinyen.  Mon remersye tou manm piblik ki konpran ki lafason ki nou Lopital in ganny konstri, lafason ki i ete nou napa en landrwa pli apropriye pou nou met sa bann lili tanporerman me nou pe fer en zefor pou nou kapab adres sa dan sa plan redevlopman Lopital.  Mersi bokou Mr Deputy Speaker e mersi Onorab.

 

MR DEPUTY SPEAKER

Mersi Minis.  Onorab Ghislain.

 

HON CHANTAL GHISLAIN

Mersi Minis.  Mersi Minister.  Minis ou’n dir ki zot pe rod en landrwa dan Lopital menm pou kapab fer sa bann maintenance lefe ki sa bann lili i an feray e ler nou dir feray byensir pou annan zafer welding ki pou vini avek.  Eski Lopital dan compound Lopital i landrwa apropriye pou kapab fer sa bann maintenance lo sa bann lili feray?  E an se ki konsern lo kote stock taking lo sa bann  materyo Lopital, lekel ki responsab pou fer stocktaking e ki mannyer i ganny fer lo bann Ward?  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  An se ki konsern sa kestyon si ou pou annan sa landrwa maintenance dan Lopital oubyen an deor, nou pou  bezwen en Unit dan Lopital ki petet pa pou fer tou louvraz la me nou bezwen en unit dan Lopital pou bann rezon dirzans.  Apre osi konman  nou kapab apel sa en staging post pou par egzanp letan ou pe anmenn en nouvo lili dan lopital akoz ou bezwen assemble li, nou bezwen en landrwa, nou bezwen en workshop dan lansent Lopital ki permet nou fer sa travay dan en fason sistematik.  Nou deza annan en sistenm ki pe marse aktyelman lo an se ki konsern bann lekipman bio medical kot nou annan enUunit ki’n ganny etabli e ki travay dan en fason sistematik lo bann lekipman elektronik e lili konmela  i osi en lekipman ki elektronik alor i nesesit, nou bezwen annan en serten  fasilite dan nou lansent Lopital malgre ki wi serten travay i kapab ganny  fer dan en warehouse par egzanp an deor e sa i en keksoz ki nou pe adrese dan plan redevlopman Lopital.

An se ki konsern verifikasyon bann lili ek bann lezot meb sa i atraver nou sistenm asset management ki fer par Seksyon Administrasyon dan nou Minister me byensir sak ners manager lo sak Ward i annan sa responsabilite pou verifye lo en baz tou le zour ki bann meb ki la.  Ki kondisyon zot ladan, si zot bezwen ganny ranplase. Nou konsyan ki nou annan en travay entans ki bezwen ganny fer pou amelyor maintenance  dan Lopital e sa nou pou fer li atraver ranforsi s kapasite maintenance dan Lopital li menm li e ranforsi sa kapasite nou annan pou nou osi fer sipervizyon avek bann kontrakter ki detanzaot i bezwen fer bann travay dan lopital.  Mersi Mr Speaker e mersi Onorab.

 

MR DEPUTY SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Deputy.  Bonzour Minis.  Bonzour delegasyon e bonzour tou dimoun a lekout, Onorab ki dan Lasanble.    Minis pou fer fonksyonnen en lili dan Lopital i annan bann lezot additionals ki vin avek tel ki son matla, son tapi, pou fer sir ki sa lili li menm i ganny mentenir dan en bon kondisyon ;  eski sa konteks prenan kont tousala i form par lili Minis ti kapab dir nou si letan Lopital i anvoy bann tapi ki sal, ki definitivman bezwen  pas atraver laundry si letan i anvoy 30 tapi si i reganny sa 30 tapi pou li kapab servi sa 30 lili ki dan Lopital ? Enn.

E dezyenmman  sa kondisyon tapi si i prop letan i retournen akoz i annan rapor ki i pa prop i al parey epi i retourn parey.  Dezyenmman ou’n dir ki ou pe mazinen pou met en unit oubyen en seksyon ki pou take care of sa bann lili.  Eski la nou annan sa bann dimoun ki kapab fer maintenance lo sa ki letan nou annan sa lespas nou pa annan sa problenm ki prezan ki nou bezwen al rod bann dimoun pou maintain?  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Deputy Speaker e mersi Onorab.  An se ki konsern bann tapi ek bann lezot linen dan Lopital, wi nou annan serten kontrent parfwa atraver servis laundry ki nou annan aktyelman ki parfwa i annan pert ki arive dan laundry e i annan serten defi an se ki konsern kalite servis.  A sak fwa ki nou vwar en sa bann problenm nou met sa a latansyon sa operater.  E mon ti ava kontan sinyal avek Lasanble ki i annan en defi an term bann lekipman ki disponib pou sa, me se pou sa ki nou’n fer sa proze pou nou fer en nouvo renovasyon lo en nouvo landrwa pou fer laundry e sa in fini ganny konplete e i pou ganny tender tre prosennman.  E nou’n travay lo en standar servis ki pou ganny demande an se ki konsern tou bann linen Lopital pour sa laundry.  Mersi Mr Speaker e mersi Onorab.  Eskiz mwan Mr Deputy Speaker.  Eskiz mwan Onorab. Pou …nou deza annan bann dimoun dan Departman Bio medical ki kapab fer sa louvraz me lenportans pou nou kree sa nouvo unit se rekonnet sa volume, nou annan 371 lili dan Lopital, a nenport moman ou kapab adres sa bann size e nou bezwen annan e nou pou form bann dimoun neseser ki pou kapab fer sa travay me nou deza annan serten kapasite dan Lopital par egzanp sa 200 nouvo lili ki pe vini.  Nou  deza annan kapasite pou asanble sa bann lili e pou nou met zot an plas. Mersi Mr Deputy Speaker e mersi Onorab.

 

MR DEPUTY SPEAKER

Mersi Minis.  Onorab Aglae.

 

HON EGBERT AGLAE

Mersi Mr Deputy Speaker.  Minis mon annan 2 pti kestyon.  Premyerman si ou annan sa lenformasyon avek ou la an se  moman, konbyen pe koute enn sa bann lili ki  nou pe dir pou servi konmela modern, ki servi son elektrik avek tou?  E dezyenmman si a lavenir zot pa pe konsider petet ler en pasyan in vini petet i annan son problenm swa i kapab en dezabilite ouswa i pe reste bedridden kot i al dan lakour, si sa fanmir li i santi i kapab afford enn sa lili pou li met kot li si zot pou pare ou Minister pou asiste sa fanmir pou li kapab fer vini son lili pou li kapab servi?  Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi Mr Speaker e mersi Onorab.  Sa sif ki ou’n demande mon ava demann mon tim pou regarde en pti moman e petet pli tar Mr Deputy Speaker nou ava donnen si nou annan avek ou sinon nou ava donnen pli tar. An se ki konsern bann pasyan ki bedridden kot zot nou, Minister Lasante i kapab si sa dimoun in pare pou li aste, i kapab dir nou e nou kapab enport sa bann lili pou li ; me mon’n deza dir ki enn sa bann lili i kout en kantite larzan.  Enn sa bann lili i kout apepre $2000 alor i en sonm ase enportan.  Me Minister Lasante i kapab ede pour asiste serten, pou enport sa bann lekipman.  Mersi Mr Speaker e mersi Onorab.

 

MR DEPUTY SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Mr Deputy Speaker.  Mr Deputy Speaker mon ti a kontan demann Minis konbyen letan i pran son assess management department pou write-off bann assets akoz nou konnen bann lekipman medikal i vann ase ser me parfwa ler zot in vye zot bezwen ganny write-off.  Eski sa i koz en problenm sirtou par lefe ki parfwa nou vwar ki serten lekipman parad ki lili ki litter bann koridor e nou konnen  poudir psikolozi en pasyan ler i antre dan Lopital si i pe vwar bann vye keksoz sa osi i pa met li dan en  bon mood so mon ti a kontan konnen si Minis pe vwar avek Minister Finans dan sirkonstans kot zot pe ganny problenm pou fer write-off serten lekipman ki zot kapab fer pou retir sa bann lekipman dan lizye sa pasyan ki pe vini pou fer en pti pe pli fasil e pli appealing pou ler i vin lo Lopital pou vin pran son tretman.  E mon ti a kontan ki Minis osi i reasir nou ki an se ki konsern Casualty zot osi fer provizyon ki i annan serten oubyen enn ou de sa bann lili par lefe ki parfwa ler i annan bann pasyan aze ki pa kapab bouze zot pe ganny met lo sa bann lili e sa i koz en problenm, kot mon’n deza eksperyans en sityasyon avek serten pasyan. Mersi.

 

MR DEPUTY SPEAKER

Mersi Onorab.  Minis.

 

MINISTER JEAN-PAUL ADAM

Mersi bokou Mr Speaker e mersi Onorab.  Nou konsyan sa defi e parey ou pe dir enn bann defi ki nou annan avek nou Lopital aktyelman se ki pou nou kapab asire ki nou back of house i apropriye.  Ki nou back of house i annan sa landrwa pou nou met nou bann lekipman ki pa aktyelman pe ganny servi e refer.  Nou annan mon kapab dir en gran amelyorasyon an se ki konsern bann lekipman, pa bann lili pa bann meb, me bann lekipman pli avan se kot dan bann ka kot in ariv son moman kot nou’n bezwen tir li lo Ward.  Dan laplipar bann ka nou pe amenn li kot bio medical e dan serten sirkonstans sa lekipman i kapab ganny rekonfigire depandan lo son teknikalite e osi parfwa i kapab ganny tenir la avan i ganny write-off me sa i vre ki nou annan en pti pe en defi pou nou swiv byen bann prosedir akoz parfwa ou bezwen gard li la pou en serten letan avan ki sa verifikasyon i ganny fer.  E nou pe travay avek Minister Finans pou nou sey adres sa dan e fason pli sistematik e a long term.  An se ki konsern Casualty osi nou pe pran kont sa eleman, nesesite pou nou fer sir ki nou annan lekipman ki apropriye ki adapte avek diferan pasyan ki nou annan sirtou pasyan pli aze  ki deplizanpli ki se zot ki bezwen raport kot Casualty e asire ki nou annan en lili ki konvenab e ki reponn a zot bezwen dan limedya.  Mersi Mr Deputy Speaker e mersi Onorab.

 

MR DEPUTY SPEAKER

Mersi Minis.  Bon i reste  nou 3 kestyon pou Minis Lasante.  Mon sizere nou pran en Break nou ava retournen 11er.  E ankor mon ensiste ki nou fer nou bann kestyon pli kourt.  Nou al direkteman lo kestyon e Minis osi tou petet fer ou bann repons en pe pli bref. Ok  Nou ava pran en Break e nou ava retournen11er.

 

(BREAK)

 

MR DEPUTY SPEAKER

Bon nou a kontinyen avek nou travay, nou’n ariv lo kestyon nimero 5, Onorab Clive Roucou.

 

HON CLIVE ROUCOU

Mersi Mr Speaker, Mr Speaker mon kestyon i lir koumsa; ‘’Eski Minis i kapab dir sa Lasanble, ki plan son Minister pour amelyor bann lenfrastriktir nivo lapropte tel ki kot nivo Departman Antenatal Clinic kot Lopital Victoria, English River Health Centre e Seksyon Accounts pour ki i ava pli favorab pour bann travayer e pasyan.  Mersi.

 

MR DEPUTY SPEAKER

Mersi Onorab, Minis.

 

MINISTER JEAN-PAUL ADAM

Mersi Mr Speaker e mersi Onorab, annefe nivo lizyenn e nivo netwayaz dan Lopital e tou dan bann diferan Sant Lasante osi e tou bann diferan Biro kot Lopital ek bann landrwa Asosye i en priyorite anliny avek standar servis ki nou anvi fer sir ki nou etabli.

Nou annan tou bann eleman netwayaz, i annan en outsourcing ki’n ganny fer avek Cleaners Corporative, e nou annan en progranm standar ki an plas avek zot, nou annan bann diskisyon regilye avek zot pour asire ki sa bann standar i ganny mentenir. Me wi parfwa nou annan sa serten defayans an se ki konsern standar ki ganny met an plas par serten staff, me sa i ganny met devan zot dan en fason sistematik e regilye e nou fer le neseser pour nou adres li.

Dan bann serten bann landrwa ki’n ganny site dan sa kestyon, i osi en kestyon nesesite renovasyon, si mon pour sit legzanp, English River kot nou annan serten proze pour nou fer serten renovasyon, e avek nouvo Lopital Lafanmir ki pour ouver, nou pour kapab tir serten servis English River pour met laba ki pour kre ase lespas ki nou pour kapab fer serten sa bann renovasyon e dan adres serten sa bann konsern.

Me en sommaire Mr Speaker, sa i en priyorite pour nou e nou pe asir en standar lizyenn ek lapropte dan tou nou bann Sant Lasante e tou landrwa dan Lopital e nou pe sey fer li dan en fason ki sistematik.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Roucou.

 

HON CLIVE ROUCOU

Mersi Mr Speaker, en kestyon siplemanter, mersi Minis pour larepons, Mr Speaker mon anvi demann Minis si dan Lopital li menm i annan okenn striktir organize ki kontinyelman fer maintenance lo bann lenfrastriktir, ki koumsa sa bann lenfrastriktir i ganny mentenir, i reste prop, napa landrwa kase, ki nou pa pour bezwen depans en kantite larzan zis pour re aranz ankor si i annan en pli bon maintenance ? Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, annefe lye avek mon kestyon oparavan enn nou bann target, enn nou bann obzektif se kre, se ranforsi nou kapasite ansanm an se ki konsern maintenance, nou annan serten maintenance sirtou bann lekipman spesyalize ki’n ganny fer par Biomedical Unit, me nou annan sa kontrent, sa nesesite pour nou ranforsi nou kapasite pli spesyalize dan maintenance dan konteks en Lopital.

Aktyelman sa sipervizyon i ganny fer atraver Seksyon Ladministrasyon, me i enn bann landrwa ki nou anvi ranforsi atraver rekritman, me osi avek nou bann diferan Sant Lasante Rezyonal, nou anvi osi travay lo en baz maintenance contract avek bann partner dan Sekter Prive kot sa i kapab ganny outsource avek en Konpannyen, me sa i en keksoz ki nou ankor pe travay lo la, me nou pa pour kapab fer tou an menm tan akoz i en kestyon pour nou fer sir ki nou annan sa mwayen pour nou fer li dan en fason sistematik.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Roucou.

 

HON CLIVE ROUCOU

Mersi Minis pour ou repons ankor enn fwa, Mr Speaker mon anvi demann Minis, dan limedya si ou annan okenn timeframe ki ou kapab donn nou, ki nou ava kapab netway, eklersi sa bann landrwa ki nou vwar i en pe dan problenm aktyel la?  Mersi.

 

MR DEPUTY SPEAKER

Mersi, Minis.

 

MINISTER JEAN-PAUL ADAM

Mersi Mr Speaker e mersi Onorab, mon ti a kontan dir ki netwayaz i ganny fer regilyerman toulezour, nou annan serten defayans ki lye avek renovasyon, nou pa kapab met netwayaz koman menm zafer avek renovasyon, i 2 diferan keksoz.

An se ki konsern English River Health Centre, nou annan serten renovasyon ki pe al komanse avan lafen sa lannen, so serten travay pe, pour ganny fer prosennman. E pour serten sa bann lezot landrwa ki’n ganny site, mon krwar serten bann issues, i otour bann fungus ki lo miray, e sa nou annan serten prodwir ki nou pe servi ki pour gradyelman adres sa.  Mersi Mr Speaker, mersi Onorab.

 

MR DEPUTY SPEAKER

Mersi Minis. Onorab Andre.

 

HON CLIFFORD ANDRE

Mersi Mr Deputy Speaker, bonzour tou dimoun, Minis mon kestyon se ou’n dir letan ou’n reponn, ki poudir ou’n outsource, Minister Lasante i outsource cleaning avek Cleaners Corporative, eski sa i enkli netwayaz bann lekipman ki ganny servi pour fer okenn loperasyon oubyen de genre de pareille ki dan Lopital? E eski Minis i satisfe ki sa bann lekipman pe ganny mete a laoter ki i demande?  E dezyenm kestyon se, eski sa bann netwayaz i osi form par dan bann lifts kot bann pasyan i ganny transporte letan i fer loperasyon i bezwen ganny transport dan lift kot parfwa i annan serten lenfeksyon ki zot anmase ki kapab koz bann difikilte pli tar.  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi bokou Mr Speaker e mersi Onorab, an sa ki konsern netwayaz bann lekipman spesyalize par egzanp ki ganny servi dan loperasyon, sa i pa tonm dan manda Cleaners Corporative, sa i kouver par Departman Entern dan Minister, dan Health Care Agency ki apel CSSD Central Surgical Sterilization Division ok, e sa zot bi, zot rezon det se pour asire ki tou lenstriman i ganny sterilize e i ganny met, i ganny netwaye lo sa baz, sa standar enternasyonal.

Nou annan en lot proze pour nou, akoz nou pe ganny serten nouvo lekipman atraver donasyon sorti dan Lenn ki sa Indian Grant ki pour ankor met plis kapasite an se ki konsern sa kapasite sterilizasyon e asire pour nou al dan sa, parey nou bi pour nou annan en standar Enternasyonal pour nou Lopital an term akreditasyon pour sa prosen 5an, alor sa i en eleman ki kouver separeman avek Cleaners Corporative.

An se ki konsern, eskiz mwan Onorab mon krwar mon’n bliye note sa dezyenm parti.

 

HON CLIFFORD ANDRE

Si bann netwayaz, si zot ganny Contract pour zot netway sa bann lift, akoz bann pasyan letan zot sorti dan loperasyon zot kapab ganny serten lenfeksyon ki le ka.  Mersi.

 

MINISTER JEAN-PAUL ADAM

Annefe bann lift i kouver anba Cleaner’s Corporative, so sa i landrwa ki zot sipoze, i en common area ki sipoze ganny netwaye anba sa Kontra, efektivman mon’n vwar serten komanter resaman kot sa in ganny dir ki i en issue, nou’n lev sa avek Cleaners Corporative e mon krwar dan lamazorite sa in ganny adrese, me nou annan serten kontrent osi avek nou bann lift ki i annan en serten maintenance ki pour bezwen ganny fer ki i osi amelyor sa materyo ki ganny servi dan sa lekipman.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Esparon.

 

HON REGINA ESPARON

Mersi Mr Speaker, Mr Speaker mon ti a kontan demann Minis, dabor mon oule fer en Statement, akoz ki letan i annan bann High Dignitaries ki pe vin vizit Lopital, tou keksoz i prop, tel parey Minis ou ti vin Lopital North East Point zoli tapi, zoli zorye, tou keksoz ti prop, be bann letan koman ou vir ledo ou vwar sa bann landrwa kot son lizyenn, nivo lizyenn i tonbe, akoz sa bann sityasyon koumsa?

Epi dezyenmman mon ti ava dir avek Minis, si nou bezwen plis resours pour nou kapab mentenir sa nivo lapropte parey kot Lopital North East Point, akoz nou pa pe met dan Bidze pour demande ki nou ganny plis larzan pour nou kapab ganny dimoun pour netwaye, pour mentenir sa bann landrwa, bann lenstitisyon prop, akoz tel parey Lopital North East Point tou dimoun ki antre i dir ou i pi pisar, twalet pa pe marse, lavabo pa marse, tiyo i kontinyelman marse, me nanryen pa pe ganny fer, si nou bezwen plis resours Minis, annou met dan Bidze Lasanble i ava aprouve pour ki nou ava annan larzan pour anploy plis dimoun pour kapab mentenir sa nivo lapropte.  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker, mersi Onorab, mon konnen ki i konvenab pour parfwa fer bann Statement parey pou dir si en tel i vini tou keksoz i normal, si en tel i vini pa bon, me mon krwar annou, pour nou vreman ariv en solisyon nou bezwen analiz li en pti pe pli an detay.

E kestyon an se ki konsern lapropte i annan plizyer eleman, premyerman se pour asire ki dan en fason sistematik bann travayer ki pe fer zot louvraz pe fer li byen.

Alor par egzanp mon a servi mon prop legzanp parey ou’n dir enn fwa nou ti al vizit North East Point ti prop, i annan lot zour kot mon’n ale san dir zot, e i ti prop osi, me i annan fwa kot vre standar petet pa’n ganny aplike dapre i devret.

Alor ki nou pe fer lo nivo Health Care Agency, premyerman nou pe ranforsi Management dan North East Point akoz i enportan ki nou revwar sipervizyon lo sa bann dimoun endividyel ki nou pe netwaye.

Osi resaman nou’n demann ki i annan en proze spesifik pour netwayaz North East Point, alors sa i ankour deza.

Apre trwazyenmman nou annan en proze renovasyon dan North East Point apartir ki in deza komanse e ki pour kontinyen pour lannen prosenn osi pour komans li, me i pour kontinyen lo lannen prosenn, i enkli osi elarzi serten bann servis ki nou kapab ofer North East Point.

Me mon oule fer kler Mr Speaker e tou bann Manm Onorab ki an se ki konsern lapropte i pa en kestyon en standar pour enn, en standar pour lot, i en kestyon standar, i en kestyon met an plas en standar ki valab e ki ganny verifye dan en fason sistematik e sa i vedir ranforsi bann sistenm Management e osi asire ki i annan Accountability, si en dimoun son responsabilite pour netway son landrwa e i pa pe reisi lo sa standar, aksyon apropriye i bezwen ganny pran.

E lo kote Health Care Agency mon konnen ki zot deza pe fer sa, e mon asire osi ki nou pour komans vwar en serten rezilta.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Basil Hoareau.

 

HON BASIL HOAREAU

Mersi Mr Speaker, bonzour Minis avek ou Delegasyon e tou bann Manm e tou dimoun ki a lekout, Minis ou’n nonm nou standar, eski sa bann Cleaners ki vin travay dan Lopital ouswa dan bann Klinik ki zot ganny training spesyal pour zot fer sir ki zot meet sa standar, eski ou koman Minis ou satisfe ki sa standar pe ganny achieve?  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Wi Mr Speaker, mersi Mr Speaker e mersi Onorab, wi i annan en progranm an plas pour donn training pour bann dimoun dan Cleaners Corporative ki travay dan konteks Lopital e osi dan konteks bann Sant Lasante.

Problenm ki arive se parfwa i annan bann sityasyon sick leave par egzanp kot menm dan bann ka koumsa an teori Cleaners Corporative i sipoze anmenn bann dimoun ki’n ganny train, me wi i annan en defayans mon kapab dir lo pour fer sir ki standar i sistematik.

Nou annan en standar, standar i ganny verifye me nou pa a sa nivo ki nou anvi ete aktyelman, ok nou ankor annan en travay pour nou fer, me i annan amelyorasyon nou kapab vwar sa atraver bann diferan verifikasyon ki nou fer an nivo bann to lenfeksyon, nou kapab vwar bann rezilta ki pozitiv. Me nou bezwen viz en standar pli o me nou pe fer sa atraver WHO kot nou pe ganny serten sipor osi pour nou ranforsi nou bann verifikasyon an sa ki konsern standar netwayaz dan Lopital ek Sant Lasante.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Simon Gill.

 

HON SIMON GILL

Mersi Mr Speaker, bonzour Minis ek ou lekip, bonzour tou dimoun, Speaker en kestyon senp pour Minis, nou’n tann koz bokou lo standar, nou’n tann koz lo ISO Standards e lezot ankor kestyon se, eski i annan en team dan ou Minister ki zisteman zot latas prensipal se asir standar lo tou son laspe fizik a lenteryer, a leksteryer tou nou bann fasilite lasante dan Sesel.  Mersi bokou.

 

MR DEPUTY SPEAKER

Mersi Onorab, aparaman mon ti pe al poz sa kestyon koman dernyen kestyon pour Minis. Mersi Onorab Simon Gill, Minis.

 

MINISTER JEAN-PAUL ADAM

Mersi Mr Speaker e mersi Onorab annefe nou annan en team ki dedye pour asire ki nou annan sa meyer standar posib, e sa i en team ki travay lo infection control ok, zot bi se pour monitor bann standar ki an plas an term netwayaz lo tou bann Ward e osi dan bann Sant Lasante pour vwar ki nivo lizyenn i ganny mentenir lo sa standar ki nou ti ava swete.

E zot fer monitoring lo plizyer keksoz, par egzanp mon’n site lo nivo lenfeksyon zot verifye ki nivo lenfeksyon i kontinyen redwir, e sa nou’n vwar poudir nou annan en rezilta pozitiv an 2017 ziska prezan ankor parey konpare ek 2016, e zot servi sa standar an relasyon avek bann piblikasyon ki ganny fer par WHO.

I enportan pour nou note osi ki standar lizyenn ek lapropte ek osi pour redwir risk lenfeksyon dan bann Sant Lasante e osi dan Lopita,l i osi lye avek nesesite pour nou mentenir lapropte e bon nivo lizyenn dan nou lasosyete, akoz ki nou kapab vwar, se parfwa ou annan bann pasyan ki vin dan Lopital, si deza zot vin avek par egzanp serten mikrob oubyen serten mikrob ki annan rezistans menm avek latizann, sa i koz en problenm.

Alor i en batay mon kapab dir kontinyel pa zis dan Lopital, pa zis dan bann Sant Lasante, me osi dan lakominote pour asire ki nou nivo lizyenn i ganny mentenir a en bon nivo, e sa i ganny fer osi atraver Lotorite Lasante Piblik.  Mersi Mr Speaker e mersi Onorab.

 

MR DEPUTY SPEAKER

Mersi Minis, Minis petet zis en pti kestyon lo mon kote, eski ou lekip ki pe monitor, pe osi monitor kalite dezenfektan, detergents ki sa Cleaners Corporatives pe servi, e petet sa kantite osi tou ki zot pe servi akoz i annan rapor poudir i kapab annan shortcuts.  Mersi Minis.

 

MINISTER JEAN-PAUL ADAM

Mersi bokou Mr Speaker e en tre bon kestyon annefe nou, sa i bann verifikasyon ki ganny fer regilyerman atraver sa lekip, nou annan en standar ki’n etabli. Resaman osi nou’n fer serten verifikasyon e serten tes kot nou’n teste serten lezot kalite prodwir ki kapab annan bann meyer rezilta, nou pe fer bann proze pilot kot nou pe teste sa bann prodwir pli avanse ki nou espere i ava kapab donn nou en pli bon rezilta. Me i annan en standar ki pe ganny enpoze lo tou, pour netwayaz tou bann landrwa dan Sant Lasante ek dan Lopital.  Mersi.

 

MR DEPUTY SPEAKER

Mersi Minis. Kestyon limero 6, Onorab Lemiel.

 

HON SYLVANNE LEMIEL

Mersi Mr Speaker, bonzour Minis avek ou delegasyon, bonzour tou mon bann koleg e tou dimoun a lekout, eski Minis pour Lasante i kapab dir avek sa Lasanble e osi zabitan Anse Royale, akoz ki ziska ozordi servis danter pour adilt pa ankor komans vin an operasyon vi ki son deadline in fini pase?  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, annefe an se ki konsern sa servis danter Anse Royale ti neseser pour nou konstrir en nouvo batiman o-bor Lopital ki permet nou kapab ofer sa servis dan en fason ki konvenab, akoz sa vye batiman kot danter ti fer oparavan parey nou tou nou konnen i pa konvenab an se moman e se pour sa ki nou pa pe kapab ofer sa servis aktyelman.

Sa nouvo batiman in trwa kar konplete, i reste zis sa landrwa resepsyon pour bann pasyan e sa i dernyen faz proze ki Kontrakter pe mobilize aktyelman, me rezon pour sa retar ti sirtou lye avek en problenm teknik an se ki konsern enstalasyon sa 3 phase electricity supply ki ti met serten kontrent ki’n fer nou ganny en pe retar. E dan tou nou bann proze ki nou fer, i enportan ki nou sey fer li byen. Parfwa nou regrete ki nou annan serten dele dan sa bann proze, me i meyer pour asire ki i ganny fer dan en fason ki sistematik e byen ki kapab repran, nou a bezwen nou popilasyon plito ki fer en proze ki pa a la oter nou lekspektasyon.

Ankor enn fwa nou regrete pour sa dele, me nou pe ekspekte ki sa travay i kapab ganny fer vitman e nou a kapab ofer sa servis avek bann sitwayen Anse Royale, e en attendant nou remersye tou bann pasyan pour zot konprenezon, vi ki zot pe servi bann servis danter aktyelman dan Anse Boileau, Baie Lazare, ek Anse Aux Pins.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Lemiel.

 

HON SYLVANNE LEMIEL

Mersi Mr Speaker, Minis mon konpran nou pe ofer sa servis lo kote rezyon e mon krwar ou a kapab mazinen poudir i vin serten gro lenkonvenyans akoz nou annan nou pasyan menm par-ler i al Anse Aux Pins 7er, 7er edmi in fini sonnen la, pasyan i ganny fer retournen, i dir zot in fini frenm lalis akoz mon pa konnen ziska keler ki Dantis zot pran non lo lalis pour zot vwar bann pasyan. Petet sa osi ti a bon si ou ti regarde.

E mwan mon ti a kontan petet nou ganny en konfirmasyon kan sa dele letan, konmsi en pli kourt dele letan ki sa i kapab vin anmars ki nou kapab re ganny nou bann servis anmars, akoz mon krwar nou’n esper ase letan.  Mersi Minis.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, mon toutafe konpran konsern sitwayen Anse Royale e mon pran note osi sa sizesyon ki nou bezwen regarde zot akse avek bann servis, e mon pran note sa pwen ki ou’n met devan e nou ava pran sa, nou ava met sa pwen devan servis Dantis e sey adres sa konsern.

Lot eleman ki zis enportan pour mon note osi ki i annan serten lekipman ki’n ganny anmennen spesifikman pour sa proze, e sa lekipman in arive aktyelman e i dan, aktyelman i dan sa batiman en attendant ki nou kapab fini sa resepsyon.

An term sa letan ki pour pran, kontrakter i estimen ki i kapab pran apepre en 6 semenn a 2 Mwan pour nou kapab fer sa resepsyon, me i annan posibilite ki, mon pe donn ou sa koman en estimate, nou espere ki nou kapab fer li o pli vit posib.  Mersi Mr Speaker e mersi Onorab.

 

MR DEPUTY SPEAKER

Mersi Minis, Onorab Ramkalawan.

 

HON WAVEL RAMKALAWAN

Mersi bokou Mr Speaker, Mr Speaker zis pour demann Minis konbyen letan depi ki sa servis pa operasyonnel?  Mersi bokou.

 

MR DEPUTY SPEAKER

Mersi. Minis.

 

 

MINISTER JEAN-PAUL ADAM

Mersi Mr Speaker e mersi Onorab, i annan apepre 1an.  Mersi.

 

MR DEPUTY SPEAKER

Yes Onorab Ramkalawan.

 

HON WAVEL RAMKALAWAN

Konmsi Minis pe dir avek nou ki bann rezon ki in donnen 3 phase ensidswit i pran 1an pour rezourd?  Parske si i annan 1an depi ki sa servis i pa operasyonnel, savedir tou bann rezon ki in donnen in pran 1an ki zot pe al rezourd li prezan dan 6 semenn, e la mon anvi zwenn avek Onorab Lemiel pou dir i pa akseptab.  Mersi.

 

MR DEPUTY SPEAKER

Mersi Onorab Ramkalawan, Minis.

 

MINISTER JEAN-PAUL ADAM

Non Mr Speaker e Onorab, i annan en pti mal konprenezon akoz letan, zot ava rapel ki servis, nou kontinyen fer servis danter dan sa vye batiman ti annan risk avek, e nou’n pran sa desizyon pour nou frenm li. E letan nou’n aret sa servis la ki konstriksyon lo sa batiman ti komanse. E konstriksyon sa batiman ki pa ti enkli en landrwa resepsyon spesifik pour li lo depar, ti an batiman ki ti pour met sa bann dental chairs ladan, e resepsyon ti pour servi dan Lopital Prensipal.

Alors sa batiman in terminen apepre lafen 2016, mon pa mazin son dat egzakt, e apre sa ti en kestyon pour nou azout sa reception area pour nou fer sir ki bann pasyan ki vin pour sa servis danter i ganny akeyi dan en fason ki apropriye e sa ki’n pran nou en pti pe letan.

I annan 2 eleman, i annan sa eleman lekipman ki’n arive resaman e ki’n ganny mete dan sa batiman, apre i annan sa eleman 3 phase ki ti en eleman teknik ki ti en pti pe an deor nou kontrol.  Mersi Mr Speaker.

 

MR DEPUTY SPEAKER

Mersi Minis. Onorab Andre.

 

HON CLIFFORD ANDRE

Mersi Mr Deputy anvi ki Minis in dir ki letan Anse Royale pe esper reparasyon, bann kliyan i al, bann pasyan i al Anse Aux Pins, lezot landrwa eski Minis i kapab dir nou si zot pour osi ed sa bann landrwa pour beef-up zot kapasite pour kapab cater pour sa bann influx ki pe antre.  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, annefe bann Dantis ki ti abitye pe donn sa servis dan Anse Royale petet pe donn sa bann servis lo sa bann diferan Sant Lasante ki mon’n nonmen, alor nou’n ranforsi sa servis ki nou kapab ofer, wi nou annan serten kontrent pli larz lo kote danter nou annan plan fer plis rekritman pour nou kapab adres sa, me nou ava osi note ki servis dan bann Lekol par egzanp dan Lekol Anse Royale in kontinyen malgre ki i annan serten defayans mon konnen osi lo la.  Me nou’n fer plis ki 2, 276 konsiltasyon ki’n kontinyen dan bann lekol, servis dan bann lekol in kontinyen an 2016, alor sa 2, 276 sa i nonm konsiltasyon an 2016, e bann servis adilt ki’n bezwen al dan sa bann diferan Sant Lasante ki mon’n site.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Henrie.

 

HON GERVAIS HENRIE

Mersi Mr Speaker, mon anvi demann Minis ti annan en lepok ki Minister Lasante ti pe ofer bann servis danter dan en sistenm karavann e mon rapel Klinik Larivyer Anglez ti annan sa servis, zis akote, so mon anvi demande si sa i ankor egziste dan Minister Lasante, si sa pa ti en opsyon pour Anse Royale olye ki i deplas bann zabitan pour al dan sa 3 distrik ki ou’n mansyonnen.  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, nou ankor serten landrwa kot nou ofer sa servis dan karavann, dek ki mon site i annan lesey Perseverance ek Plaisance. Me i enportan pour note ki sa servis malgre ki dan en karavann i pa toutafe mobil akoz en fwa ki ou’n met li dan sa landrwa ou bezwen annan serten koneksyon ki fer li an plas, alor ou pa kapab zis deside pour ou bouz sa karavann en sel kou pour al en diferan landrwa.

Nou’n fer sa laranzman dan lepase pour nou ofer sa servis dan en landrwa kot ti napa, me i annan i pa en keksoz ki nou’n kapab fer dan limedya. Me nou kapab, mon krwar lenportans la se ofer sa servis pli vit posib dan Anse Royale. Mersi Mr Speaker, mersi Onorab.

 

MR DEPUTY SPEAKER

Mersi Minis, dernyen kestyon lo sa kestyon servis danter Anse Royale, Onorab Esparon.

 

HON REGINA ESPARON

Mersi Mr Speaker, Mr Speaker mon ti a kontan demann Minis an vi ki in mansyonnen poudir bann servis ki zot pe donnen an deor tel parey dan karavann lontan, si bann nouvo Lekol osi ki pe ganny konstri zot pe ofer sa servis tel parey Lekol Glacis ki’n ganny konstri tou resaman kot zanfan Lekol Glacis pe bezwen al servi servis danter Bel Ombre e sa i koz en kantite lenkonvenyans. Ki plan Minister pour fer sir ki sa lespas ki i annan dan Lekol pour Dantis i ganny maksimize?  Mersi.

 

MR DEPUTY SPEAKER

Onorab, kestyon i en pe deor scope anyway Minis i depan lo ou si ou oule reponn sa kestyon, me i an deor.

 

MINISTER JEAN-PAUL ADAM

Mersi Mr Speaker, mon ava remersi Onorab, mon ava quote annefe nou an kolaborasyon avek Minister Ledikasyon o maximum nou pe sey ofer sa servis dan bann diferan lekol.  E kot napa nou pe sey adres li, me dan serten lekol i annan kontrent depandan ki mannyer sa Lekol i ete, ki mannyer son ranplasman zeografik i ete, son lenfrastriktir alors se pa neseserman ki ou kapab fer li partou, me i toutafe en keksoz ki nou sey fer o maximum kot i posib.  Mersi Mr Speaker, mersi Onorab.

 

MR DEPUTY SPEAKER

Mersi Minis, kestyon nimero 7, Onorab Herminie.

 

HON WILBERT HERMINIE

Mersi Mr Speaker, bonzour Minis avek ou team, eski Minis i kapab dir sa Lasanble ki plan son Minister pour konstrir en post Klinik Perseverance pour tir presyon lo Klinik La Rivière Anglaise vi ki i pe deservi rezyon lavil enkli Perseverance.  Mersi Mr Speaker.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, nou apresye ki i enportan pour nou kapab ofer bann servis avek bann zabitan Perseverance. E parey mon krwar bann Onorab i konnen i dan nou plan pour nou konstri en Sant Lasante rezyonal ki pour baze Perseverance e nou pe al dan sa direksyon, nou dan staz kot nou pe planifye sa Sant Lasante pour nou met li an aplikasyon.

E en attendant wi bann rezidan Perseverance pe servi Sant Lasante La Rivière Anglaise me nou annan osi loportinite pour nou amelyor sa bann servis prosennman akoz nou dan staz pour nou komisyon loperasyon sa nouvo Lopital Lafanmir ki osi baze lo zil Perseverance.

sa proze in preski ariv lo moman kot in konplete, i reste semen pour fer pour ariv kot sa lopital. E letan nou pour ariv kot sa Lopital i annan serten servis ki aktyelman i baze La Rivière Anglaise ki pour kapab ganny bouze dan sa Lopital Perseverance, sa i enkli serten servis par egzanp Antenatal, Maternal Health, Child Health, bann servis Zinekolog e serten lezot servis ankor ki aktyelman nou kapab ofer li English River, me lefe ki nou pour kapab fer li Perseverance i pour en fasilite ki bann rezidan Perseverance pour kapab servi pour sa bann Sekter ki mon’n servi, me i pe osi amelyor kapasite La Rivière Anglaise pour ofer sa servis avek Rezidan Perseverance, me nou plan se fer en nouvo Sant Lasante dedye pour Perseverance.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Herminie.

 

HON WILBERT HERMINIE

Mersi Minis, Minis i kapab donn nou en at least en dele letan kan sa Lopital pour en fonksyonnel?  Mersi.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, sa Lopital Lafanmir ki lo zil Perseverance nou lo staz final pour nou fer handing over savedir kontrakter avek nou bann staff pe regard bann dernyen eleman, nou pe pas dan lopital nou pe regard sa bann opsyon, kestyon ki mon pa kapab donn ou en larepons egzakt se akoz pour nou kapab ouver sa lopital nou bezwen fer sir ki semen i an plas, mon konnen ki Departman Transpor i ankor pe travay lo sa semen akoz i pa tonm dan proze Minister Lasante e mon pa sir a sa moman son dele egzakt, selman mon’n ganny dir ki sa i enn parmi bann priyorite ki pe ganny adrese. Alor dek ki sa semen i konekte avek sa Lopital i pour permet nou ouver li.  Lo kestyon Lopital Perseverance li menm li nou lo staz planifikasyon la e nou pour komans enplimante prosennman, son konstriksyon pour kontinyen lo 2018 e nou ekspekte petet 2019 ki i a kapab ganny konplete.  Mersi Mr Speaker.

 

MR DEPUTY SPEAKER

Mersi Minis. Onorab Steve Pillay.

 

HON STEPHEN PILLAY

Mersi Mr Speaker, mon kestyon pour Minis i al lo sa recruitment pour son staff, 6 semenn pase i ti dir nou i bezwen i bezwen apepre 139 pour sa post, I’m talking about pour Perseverance, staffing for Perseverance post Clinic.

 

MR DEPUTY SPEAKER

Ok go ahead.

 

HON STEPHEN PILLAY

Wi, 6 semenn pase i ti dir nou i bezwen apepre 139 staff an plis pour cater pour loperasyon pour vin lo nivo normal, la taler in dir nou i pour bezwen 50 Ners an plis ki pe al anrezistre, be ki son plan prezan pour li kapab staff sa Lopital Perseverance ki pe fer, i en plan sa 139 pour ogmante, pour desann, e ki staffing pour sa bann landrwa deza i napa i en problenm, ki son plan Minister pour rezourd sa staffing dan sa bann landrwa? Ki nouvo ki pe vini, ki son plan?  Mersi Mr Speaker.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, annefe pour klarifye akoz mon krwar i annan en mal konprenezon, dan sa Lopital Lafanmir Perseverance serten sa bann servis parey Antenatal, parey Maternal Health, Child Health ki mon’n site sa i bann servis ki aktyelman i baze English River, English River i ankor en pti ankonbre i annan bokou servis dan en landrwa ki en pe ptipti, e osi i annan serten renovasyon ki nou bezwen fer English River.

Alor serten sa bann servis ki aktyelman i baze English River pour al dan sa Family Hospital, savedir ou pa pe koz neseserman nouvo staff imedyatman, i plito bann servis ki nou kapab ofer dan en fasilite ki pli konvenab.

Nou pour annan serten nouvo staff e sa i kouver anba sa rekritman 50 ki mon’n deza site e osi avek bann Health Care Assistants, sa sif ki ou’n servi, sa 139 mon krwar sif ti 135 e sa i nou plan mwayen term pour rekritman pour nou adres nou bann bezwen an se ki konsern sa bann diferan Lopital ki pe vini ankour enkli pour nou ranforsi nou staff egzistan.

E osi an menm tan nou pe fer en travay avek WHO pour nou fer en assesment baze lo egzakteman konbyen Ners nou bezwen baze lo diferan servis ki nou annan akoz lo nivo staffing ki ou bezwen lo lakominote i diferan avek par egzanp ICU, depandan lo sa dependency ratio ou pour bezwen diferan nivo an term lakantite staff.

Nou nou’n fer sa estimasyon 135 baze ki dernyen fwa mon ti’n koze dan Lasanble lo sa size, nou bezwen imedya ki nou’n demande sa 50 Ners avek 30 HCA ki an prensip nou sipoze kapab fer sa rekritman sa lannen menm, e nou pour annan ankor rekritman adisyonnel osi an 2018.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Henrie.

 

HON GERVAIS HENRIE

Mersi Mr Speaker, kestyon ki mon anvi demann Minis se pour li re klarifye pour mon benefis e benefis dimoun ki pe ekoute, fonksyon sa Lopital Lafanmir Perseverance; letan ti ganny commission reportaz dan medya sa letan mon ti anba lenpresyon ki pe ofer en servis Nasyonal, prezan letan ou pour tir sa bann servis Larivyer Anglez, eski savedir ou pe dir nou ozordi La Rivière Anglaise osi pe ofer sa servis lo en nivo Nasyonal prezan i pour ganny transfer laba, so mon anvi ou re klarifye fonksyon Lekol Perseverance lafanmir premye.

E Mr Speaker dezyenmman anfet, an vi ki sa bann sif in ganny mansyonnen mon ti a kontan demann Minis dan sa 135 Ners ki zot bezwen, ki bann mezir pratik e lozik ki ou Minister pe pran, pour ankouraz bann Ners ki’n kite dizon the last 5 years pour retourn menm lo en baz part time ki nou kapab make up pour sa limero la 135, eski i annan?  Mersi.

 

MR DEPUTY SPEAKER

Onorab, Onorab kestyon i lo en Klinik Perseverance ok? Order kestyon i lo en Klinik Perseverance ok? Annou fer ki nou kestyon siplemanter i annan relevans ok? Ok?  So Minis nou ava pas lo, Onorab William, napa ou pa’n montre relevans lo ou kestyon.

 

HON GERVAIS HENRIE

Be Mr Speaker mon premye kestyon in koz lo larepons Onorab Herminie, in koz lo sa Klinik Lafanmir, prezan mon ti oule ki i klarifye pour benefis nou Lasanble, piblik an zeneral, vreman ki pour fonksyon sa Klinik an relevans avek bann servis ki pour tire La Rivière Anglaise pour al laba whether sa Lopital i pour en rol Nasyonal dan sa bann servis ki pe ofer, sa mon premye kestyon.

 

MR DEPUTY SPEAKER

Mon krwar Minis in aborde sa, me Minis si ou oule klarifye sa pwen apre nou ava move on.   Go ahead Minis.

 

MINISTER JEAN-PAUL ADAM

Mersi bokou Mr Speaker e mersi Onorab sa lopital i en Lopital Nasyonal me i osi ofer bann servis partikilye ki pour benefisye bann dimoun dan en rezyon zeografik, i menm parey ki bann dimoun dan nor ki al vwar Spesyalis souvandfwa bann dimoun Santral zot pour al vwar Spesyalis dan Twa Zonn, se zot kapab vwar dan English River pour serten, me serten zot pour al vwar kot Twa Zonn osi.

So sa lopital i en lopital Nasyonal me ki posib benefisye bann dimoun ki reste dan sa rezyon imedya, nou bezwen par egzanp bann dimoun ki pe al, bann manman, bann manman ki pe al konsilte ou pour anvoy zot dan sa lopital ki pli pros, pour mon i evidan, e osi lavantaz ki petet ou’n manke letan mon’n site se ki letan ou bouz serten servis ou tir li dan English River ou met li dan Perseverance i permet ou osi ofer en meyer servis dan English River, permet nou fer serten renovasyon osi dan English River e ofer sa meyer servis.

Alor an bref sa 2 Lopital, sa Sant Lasante English River e sa Sant, sa Lopital Lafanmir pour ofer bann servis ki pour konplemant kanmarad e lo sa Lopital Lafanmir i pour permet nou ofer en servis pli spesyalize Nasyonalman.

E an se ki konsern bann resours imen Mr Speaker mon krwar mon’n fini reponn sa avan.  Mersi.

 

MR DEPUTY SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi bokou Mr Speaker mon en pe konfize, Mr Speaker eski Minis i kapab donn nou byen detay parske dan sa ki in dir, mon’n tann diferan keksoz, eski Minis pe konfirmen ki poudir pour annan en regional Health Centre baze Perseverance dapre son statement ki in fer, e apre sa English River i reste en Regional Health Centre, ok? Dan  sa ka eski Minis i kapab dir avek nou ki mannyer i pour re klasifye par egzanp sa Regional Health Centre Perseverance ki bann distrik ki i pour kouver, sa regional Health Centre La Rivière Anglaise ki bann distrik ki i pour kouver.  E dan sa 2 regional Health Centers ki bann servis ki pour annan dan tou le de ki pour osi ganny duplicate dan sa Family Hospital Perseverance.  Mersi bokou.

 

MR DEPUTY SPEAKER

Mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, mon pa krwar ou osi konfize ki petet ou pe krwar akoz Onorab parey ou’n dir nou pour annan, nou annan nou Sant Rezyonal English River i deza egziste, alor English River i pour kontinyen kouver sa bann zone ki aktyelman i kouver, letan nou kapab fer nou Sant Rezyonal Perseverance, savedir Perseverance i pour ofer servis lozikman avek bann dimoun ki dan Perseverance i pour osi ofer bann dimoun servis dan larezyon en pti pe pli larz; akoz nou annan en standar baze lo lakantite dimoun ki servi en Sant Lasante ki baze osi lo lakantite Dokter ki nou met dan sa Sant Lasante lo lakantite Ners eksetera, alor letan nou ouver Perseverance kouvertir La Rivière Anglaise i diminyen akoz ou annan en lot sant ki kapab kouver lakantite dimoun ki aktyelman la par La Rivière Anglaise.

Nou Lopital Lafanmir i en Lopital spesyalize, me i en Lopital Spesyalize ki ofer serten servis ki pour kouver larezyon me osi Nasyonalman ok? Par egzanp aktyelman nou annan osi en, nou annan Wellness Centre i en form Lopital spesyalize, Lopital Lafanmir i en Lopital spesyalize. Demen ou kapab osi annan en lot Lopital ki pa forseman dan lanset ou Lopital Santral ki ofer en servis ki spesyalize, me ki osi annan serten servis dan sa Lopital ki dimoun dan larezyon pour benefisye, akoz par egzanp en manman ki Anse Royale ou pa pour al anvoy sa manman Anse Royale dan sa Lopital amwen ki vreman i bezwen al vwar pour en rezon spesyalize, me tandis ki en manman ki dan, ki reste Perseverance lefe ki sa Lopital i la baze Perseverance i ki pour annan en kantite servis ki lye avek Maternal and Child Health lozikman i pour ganny akse avek sa servis ki laba.  Mersi Mr Speaker e mersi Onorab.

 

MR DEPUTY SPEAKER

Mersi Minis. Onorab Ramkalawan.

 

HON WAVEL RAMKALAWAN

Mr Speaker ou’n dir nou demann kestyon spesifik, mon’n demann en kestyon spesifik e mon pa’n ganny en larepons, Regional Health Centre Perseverance ki rezyon ki i pour servi, ki bann distrik ki pour al Perseverance, e ki bann distrik ki pour al English River se sa ki mon anvi konnen, eski Anse Etoile i pour tonm Perseverance oubyen pour annan en lot Centre ankor laba, mon pa konnen…

 

MR DEPUTY SPEAKER

Ok, mersi Onorab. Minis.

 

MINISTER JEAN-PAUL ADAM

Mersi Mr Speaker e mersi Onorab, Perseverance i pour kouver byensir Perseverance, Perseverance i en distrik li menm li ki son lakantite dimoun i ase larz, ki i ase gran i pour kouver osi en parti dan Anse Etoile, akoz Anse Etoile osi i en gran distrik; me English River pour kontinyen deservi sa bann distrik ki deza kouver minus Anse Etoile akoz Anse Etoile aktyelman i al dan English River. Sa kestyon i lo Anse Etoile si i pour ganny en Sant pour li menm swivan ki Prezidan Faure ti vizit distrik Anse Etoile, nou’n fer serten konsiltasyon pour nou kapab ofer en servis lasante dan distrik Anse Etoile, atraver en kolaborasyon avek sekter prive e sa aktyelman i touzour an diskisyon, e si nou al dan sa direksyon byensir nou pour bezwen fer en tender ouver demann ouver fer bann appel d’offres pour vwar ki mannyer nou kapab ofer sa servis si nou pour fer li laba akoz nou napa en batiman e nou napa en sit dan distrik Anse Etoile aktyelman.

Me priyorite atraver, nou pe fer sa Sant Perseverance, letan nou dir en Sant Rezyonal i baze osi pa zis lo lakantite distrik ki kouver, me baze lo lakantite pasyan ki kapab servi son servis. E letan ou pour regard Anse Etoile ek Perseverance ou pour vwar ki lakantite pasyan i larz.  Mersi Mr Speaker.

 

MR DEPUTY SPEAKER

Mersi Minis, bon a sa pwen nou’n ariv a lafen kestyon pour Minis Lasante pour Minis Jean-Paul Adam, Minis mon ti a kontan remersi ou pour letan ki ou’n pas avek nou bomaten avek ou lekip e nou ti ava eskiz ou parmi nou, ankor mersi.

 

(MINISTER JEAN-PAUL ADAM

AND HIS DELEGATION WAS EXCSED FROM THE HOUSE)

 

 

MR DEPUTY SPEAKER

Madam Clerk nou ava apel Minis Dezinyen pour PNQ.  Bon mon a dir bonzour Minis Dezinyen Mrs Macsuzy Mondon ki pe ganny akonpannyen par son Special Advisor Mrs Sheryl Vengadasamy e osi Komisyoner Lapolis Mr Reginald Elizabeth; bonzour e byenveni dan Lasanble.

Avan mon demann Onorab Ramkalawan pour poz son kestyon, mon ti a zis kontan ki bann Manm i port en pti pe latansyon direksyon zot kestyon an vi ki sa sityasyon i sansib, tre sansib espesyalman pour lafanmir e osi tou sa ongoing investigation ki Lapolis ek bann Lotorite pe fer. So alor mon ti ava demann bann Manm pour et responsab e fer en pti pe atansyon ki direksyon zot bann kestyon pe ale, avek sa 2 mo mon ava demann Onorab Ramkalawan pour li poz son kestyon.

 

HON WAVEL RAMKALAWAN

Mersi bokou Mr Speaker, Mr Speaker zis avan mon poz mon kestyon mon ti ava kontan e mon sir ki tou Manm Lasanble i ti a kontan eksprim zot solidarite avek lafanmir, lafanmir Mr Marvin Asba dan sa moman difisil, nou sey en pe akoz sa rezon ki nou pe anmenn sa kestyon pour eksprim nou solidarite e an menm tan pour fer en fason pour donn tou lankourazman sa lenvestigasyon ki pe ganny fer.

Mr Speaker vi konsern e mekontantman lafanmir, koleg, ek piblik Seselwa dan lafason ki lenvestigasyon pour retrouv Mr Marvin Asba in ganny fer ziska prezan, eski Minis responsab pour Zafer Entern i kapab dir sa Lasanble:

  1. Akoz ki in pran Lapolis sa kantite letan avan ki zot in entansifye zot travay e menm kominik avek piblik lo zefor pour rod sa msye, Mr Marvin Asba.
  2. Dezyenmman ki zistans zot in arive dan zot travay , e eski zot kapab dir nou si i annan okenn sispe oubyen bann lapis ki zot pe swiv, eski in annan okenn lenterferans pa okenn lezot Lotorite dan travay ki zot pe fer?

E finalman, eski in annan okenn kolaborasyon avek lezot pei vwazen pour rod led ek sipor lozistik vi ki Sesel i en Manm SADC, COI, ek Linyon Afriken e son bann fasilite tel ki DNA i limite.  Mersi bokou Mr Speaker.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mersi Mr Deputy, bonzour Mr Deputy, Leader Lopozisyon, Leader Gouvernman dan Lasanble, tou Manm Koleg Onorab e tou piblik a lekout, Mr Deputy koman Minis responsab pour Zafer Entern e osi koman en manman, mon konpran e partaz soufrans lafanmir Asba e son bann zanmi lo disparisyon Marvin Asba.

Mr Deputy en rapor ti ganny fer Lendi le 3 Zilyet 2017 apre midi kot Kordgard Anse Aux Pins konmkwa Marvin Asba en zabitan Anse Aux Pins aze 26an i manke, deswit Zofisye dan sa Kordgard ti anrezistre sa rapor ki konpri bann detay personnel lo Marvin e sa ti ganny sirkile kot Sant Kominikasyon Lapolis e kot tou Stasyon Lapolis atraver Mahe, Praslin e osi La Digue parey prosedir i demande; en Lanket inisyal ti komanse.

Mr Deputy prosedir an relasyon avek dimoun manke i konm sa, sa Stasyon kot sa rapor i antre i etabli bann lenformasyon lo sa dimoun tel ki son Non alyas e lezot deskripsyon personnel enkli enn son portre resan e sa lenformasyon i ganny sirkile avek tou Stasyon e patrol atraver Sant Kominikasyon Lapolis. Sa mesaz i ganny sirkile lo Radyo SBC ki demann sa dimoun pour pran kontak irzan avek son fanmir ouswa Stasyon Lapolis pli pros, Lanons ti pase menm zour Lendi le 3 Zilyet 2017 lo Radyo pour demann Marvin pour etabli kontak ek son fanmir ouswa Kordgard pli pros.

Normalman letan en dimoun i ganny raporte manke, i pa pran bokou letan pour zot re etabli kontak avek zot fanmir oubyen Kordgard, an menm tan ki sa pe ganny fer Lapolis i osi inisye en lanket atraver sa Stasyon kot sa rapor in anrezistre, e sa in osi le ka dan ka Marvin.

Mr Deputy apre sa premye Lapel lo Radyo Lapolis e lafanmir pa’n resevwar okenn kontak, alors Lapolis ti sirkil portre e bann detay Marvin lo medya Nasyonal son Mardi le 4 Zilyet 2017.

Apre ki Lapel lo medya Nasyonal pa ti’n anmenn okenn rezilta, e dapre prosedir Lapolis ki apre 3 zour ki en dimoun i manke, en tel Case, e sa Case en kestyon ti ganny transfer kot Priority Crimes Unit pour diriz Lanket an kolaborasyon avek lezot Seksyon anba Detectives Services tel ki; Tracking Team, Criminal Intelligence, Commercial Crimes e osi General Detectives.

Mr Deputy Zedi le 6 Zilyet 2017 Lapolis ti lans en trwazyenm lapel lo medya Nasyonal pour demann okenn dimoun ki annan lenformasyon konsernan Marvin pour vin devan. A sa pwen Lapolis ti’n deza travay lo serten lenformasyon e resers osi ki ti’n deza komanse.

Dapre lanket ek levidans ki Priority Crimes Unit pe fer Lapolis ti kapab etabli ki Marvin ti manke depi son Zedi le 29 Zen 2017. Sa rapor ti anrezistre avek Lapolis 4 zour apre ki ti’n deza manke.

Mr Deputy i enportan pour note ki dan tou ka dimoun manke sa premye 48 erdtan ki i manke i kritik pour Lanket, dan sa enn Case Lapolis ti resevwar rapor lo ka Marvin i manke selman 4 zour apre.

Mr Deputy Lapolis anba direksyon Head of Detectives services, pe fer en Lanket tre detaye e sa i konpri plizyer lafoul, door to door investigation revwar bann CCTV Footage, kolekte, filtre plizyer lenformasyon ki’n fini, oubyen pe kontinyen ganny travay lo la. Nou’n etabli en profil lo son lifestyle, etabli si i ti annan plan pour vwayaze, verifye avek bann Lazans ek bann bato si i pa’n kit Por ouswa Erport, son kondisyon lasante, e osi verifye avek Lopital Sesel.

Sanmdi le 8 Zilyet Zofisye pour Kominikasyon dan Lapolis ti fer en interview lo televizyon Nasyonal e osi avek Zournal Nasyon lo disparisyon Marvin.

Lapolis ti osi fer ofer en sonm lavaler R50, 000 pour okenn endividi ki ofer lenformasyon direk dan resers pour retrouve Marvin.

Mr Deputy en lot interview ti ganny fer par Zofisye Kominikasyon dan Lapolis Lendi le 10 Zilyet 2017 lo medya Nasyonal, an rezilta sa lensidan kot en kantite disan ti ganny vwar kot Legliz Takamaka, Lapolis ti konfirmen ki sa disan, sa i disan imen e pe fer lanket ladan.

Mr Deputy dan sa interview Zofisye Kominikasyon Lapolis ti lans en lot lapel pour okenn dimoun ki annan lenformasyon kredib pour vin devan.

I enportan pour note ki Lapolis pe fer en lanket avek en lespri tre ouver e pe eksplor tou bann posibilite pour determinen ki in kapab arive avek Marvin. Mr Deputy nou pa kapab a sa pwen revel plis detay lo Lanket, lapis, lezot lenformasyon enkli si i annan okenn sispe akoz Lanket i ankor ouver e pe kontinyen.

Lapolis an se moman pa dan en pozisyon pour devwal lenformasyon, akoz i kapab jeopardize oubyen konpromet Lanket dan sa staz kot in arive, nou oule reasir lafanmir e manm piblik ki nou pe tret tou lenformasyon ki nou resevwar koman enportan pour Lapolis, e se pour sa rezon ki manm piblik in vwar nou pe fer resers dan plizyer lokasyon.

Mr Deputy nou oule osi reasir lafanmir, Lasanble e osi manm piblik, ki napa okenn lenterferans par okenn Lotorite dan sa Case disparisyon Marvin, Lapolis pe tret sa Case koman enn bann ka pli serye ki zot pe fer lanket ladan an se moman.

Mr Deputy preski tou le 2 a 3 zour Lapolis pe gard piblik enformen atraver kominike lo medya Nasyonal. Sa Zofisye Lapolis ki pe diriz Lanket i an kontak direk avek paran Marvin preski toulezour.

Merkredi le 12 Zilyet 2017 Lapolis ti donn en lot kominike ek medya Nasyonal lo lafouy e resers ki pe fer an rezilta rapor ki en pickup ek zonm ek lapel ti ganny vwar granmaten dimans kot Danm La Gogue.

Zedi le 13 Zilyet 2017 Komisyoner Lapolis ti fer en statement e donn en interview lo medya Nasyonal, lo bann nouvo devlopman ki Lapolis pe antreprann pour ede dan resers retrouv Marvin.

Lapolis in osi ogmant rekonpans pour okenn lenformasyon direk pour en valer R100, 000.

Mr Deputy osi parmi bann nouvo devlopman i led adisyonnel atraver lafors defans pour ganny plis dimoun pour entansifye resers pour rod Marvin, espesyalman dan bann landrwa kot teren i difisil.

Mr Deputy parey nou’n vwar lo medya Nasyonal Sanmdi le 15 Zilyet sa loperasyon i pe kontinyen. Lapolis in rod led Interpol pour ganny bann Eksper pour asiste dan sa Lanket, en Yellow Notice in osi ganny anvoye kot Lofis Interpol pour missing person le 14 Zilyet 2017, Lapolis in osi anvoy sample sa disan anmase Takamaka pour fer tes DNA dan Laboratwar Maurice, Lapolis in osi rod led avek Sid Lafrik pour serten sipor teknik pour asiste zot dan resers avek lenvestigasyon. Mr Deputy Lapolis in fer plizyer resers dan plizyer lakaz prive, dan plizyer kwen Mahe, lo lakot e plizyer dimoun in ganny anmennen e kestyonnen an relasyon avek disparisyon Marvin.

I annan bokou deba e spekilasyon lo sa size disparisyon Marvin, atraver konversasyon toulezour, rezo sosyal e menm bann zournal. Me parkont i annan serten sa bann spekilasyon e deba ki kapab detrimental pour Lanket ki Lapolis pe fer.

I osi enportan pour note ki bann tel deba e spekilasyon ki kapab annan en lefe advers e tromatizan pour lafanmir Marvin.

Lapolis pe lans en Lapel ankor, avek okenn dimoun ki annan lenformasyon pour fer li direkteman avek zot Biro ouswa atraver sa limero telefonn spesyal ki zot in met  a dispozisyon piblik, sa limero Mr Deputy i 2 64 19 35.

Mr Deputy i swe nou tou pour trouv Marvin sen e sof. Tou zefor pe ganny fer pour retrouv Marvin, resers, lafouy e Lanket i ankor pe kontinyen.

Nou konsyan ki Lasanble Nasyonal e piblik an zeneral ti a voudre ki nou devwal plis lo sa size, me nou demann zot pour konpran akoz ki Lapolis pa dan en pozisyon pour devwal e pour donn plis lenformasyon etandonnen sa laspe sansibilite e delika an relasyon avek sa Case me nou demann zot   pour konpran akoz ki Lapolis pa dan en pozisyon pour devwal e donn plis lenformasyon etandonnen sa laspe sansibilite e delika an relasyon avek sa Case.

Parey mon’n dir pli boner Lanket i ouver e i kontinyen, nou pe enplor manm piblik e bann ki annan lenformasyon kredib e direk pour kontakte nou bann Zofisye Lapolis lo sa nimero 2 64 19 35. Nou tou nou anvi en konklizyon pozitiv dan sa sityasyon e mon swe, se ki nou retrouv Marvin sen e sof.

Mr Deputy Speaker mon remersye bann Manm Lasanble e manm piblik pour zot konpreansyon e zot sipor.  Mersi Mr Deputy.

 

MR DEPUTY SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi bokou Mr Speaker, Mr Speaker mon ti a kontan remersye Minis pour detay son larepons, me mon anvi demann li spesifikman – zis pe mazinen si mon pa pe al enterfer dan lenvestigasyon” mon ti ava kontan demann Minis si i pa santi ki poudir an se moman kot nek zis zot pe anvoy bann Polisye, bann Manm Lafors Defans dan lafore, si i pa en pe en gaspiyaz resours olye plito met lanfaz lo sa kote Forensic?

E dezyenmman, mon anvi demann Minis parske in annan plizyer dimoun ki’n disparet, par egzanp i annan Mr Peter Jules, Terry Jules sorry Anse Aux Pins; in annan Mr Nelson Sinon ki son lekor zis ti ganny ranmase e, konmsi i resanble ki i annan en keksoz ki manke dan lafason ki Lapolis i fer son lenvestigasyon pour zot annan en breakthrough, alors mon anvi demann Minis si i santi ki nou lafors Lapolis dan sa bann ka parey zot osi ekipe, e ki letan si i ariv sa bann sityasyon nou pa devret pe rod lasistans pli vit posib avan ki bann serten lapis i disparet.

E an menm tan osi Mr Speaker, i resanble ki pour le moman i annan serten dimoun ki konmsi en pe zis apre ki Marvin ti ganny deklare disparet ki serten dimoun ki ti vwar li, oubyen serten landrwa kot transpor ki i ti vin mete ensidswit, ki konmsi ou a krwar i annan en kantite keksoz ki ankor manke dan sa travay Lapolis si i kapab re asir nou ki vreman Lapolis pa pe parey nou dir an Angle nou pa pe leave no stones unturned  oubyen si konmsi pa santi poudir la pour le moman i en kestyon pe donn lenpresyon ki poudir keksoz pe ganny fer, me kan ofet i pa pe ganny ase lanpler.  Mersi bokou.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mr Deputy lenformasyon ki mon annan Lapolis i pe fer son mye avek parey ou’n dir bann resours ki i annan pour li kapab fer son travay e kontinyen avek sa Lanket ki pe fer, nou pe eksplor tou lenformasyon ki pe rantre. E se selman zis lo baz sa bann lenformasyon ki pe permet nou fer sa bann resers ki nou pe fer.

E kot byensir rezon ki nou’n demann led o nivo Rezyonal oubyen Enternasyonal se zisteman petet letan Lapolis i santi kot in ariv en staz kot i pour bezwen sa bann led se la, la kot nou’n bezwen fer lapel avek sa bann Lorganizasyon konsernen rod lasistans ek siport teknik pour kapab ed nou dan sa travay envestigasyon ki nou pe fer. Me Onorab mon kapab re asir ou ki Lapolis pe fer son mye pour li kapab rezourd sa Case pli vit posib ki i kapab.  Mersi.

 

MR DEPUTY SPEAKER

Yes Onorab Ramkalawan.

 

HON WAVEL RAMKALAWAN

Mr Speaker mon respekte sa ki Minis in dir, me selman koman en sitwayen letan mon aprann ki poudir par egzanp sample sa disan ki zot in ranmase Takamaka ki zot in anvoy Maurice, i pour pran sa DNA sample ki zot pe rode pour pran plis ki 3 mwan pour zot ganny en rezilta, e letan mon balans sa avek en lenvestigasyon, mon sorry me i pa donn okenn gran konfyans; parske si i pour pran 3 mwan pour ganny en sample pour konnen si sa i lye avek Marvin oubyen non, konmsi ki mannyer sa pour vreman ede dan lenvestigasyon?

Sanmenm sa ki mon pe dir, si i annan serten keksoz ki nou pe fer i pa zis konmsi en formalite, parske nou ankor annan Case sa skull ki ti pour pran plis ki 6 Mwan, 9 Mwan pour nou ganny, pour nou swadizan ganny en larepons, alors ki mannyer eski sa pour donn nou konfyans?  Mersi bokou.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mr Deputy mon konpran konsern Onorab, zisteman kot nou napa sa bann Unit spesyalize ki fer serten travay, se pour sa rezon ki nou bezwen annan rekour par egzanp pour fer sa tes DNA ki nou bezwen fer Maurice, me mon ti a kontan re asir Onorab poudir nou’n re koz ankor Direkter Laboratwar Maurice kot nou’n demande ki sa tes i ganny fer pli vit posib pour nou, e zisteman zot in donn nou en lasirans ki zot ava fer zot mye ki zot kapab fer li kantmenm dan en 2 semenn pour kapab fer nou ganny sa rezilta. Donk i pa pour pran 3 mwan.  Mersi Mr Deputy.

 

MR DEPUTY SPEAKER

Mersi Minis. Onorab Andre.

 

HON CLIFFORD ANDRE

Mersi Deputy Speaker, Minis bonzour ou team ki avek ou e tou bann dimoun ki a lekout, Minis premye kestyon ki mon ti a kontan demande, se an vi ki nou tou bann sitwayen nou depan lo Lapolis pour donn sa sekirite, ki sa sityasyon ki’n arive dan nou pei, i fer bokou dimoun e i annan serten ki pe travay dan bann Departman oubyen kondisyon zot pe enplike avek dimoun, zot santi zot dan bann sityasyon kwense kot zot per pour zot delivre zot travay, e mwan mon ti a demann Minis eski Sesel nou lafors Lapolis nou annan kapasite pour nou antreprann en loperasyon parey?

Dezyenm Minis i dir nou poudir 4 zour apre ki Marvin ti ganny, i pa ti la ki sa ti ganny fer en rapor, akoz Lapolis toudswit letan i dir poudir 48erdtan i vreman enportan toudswit, i pa ti pran bann reaksyon, i pa ti fer bann reaksyon neseser apre ki i dir 4 zour, deza i fer 2 fwa 48erdtan akoz i pa ti pran bann aksyon imedya letan sa rapor ti ganny fer e ki’n bezwen esper le 14 Zilyet pour li, apre kekfwa letan in annan serten entervansyon par diferan dimoun, set en konsern pa diferan dimoun ki in esper 12 zour apre pour li rod lasistans avek Interpol e osi parey i dir avek Sidafriken.

So eski Minis i kapab dir nou akoz sa bann zafer pa’n ganny fer letan ti merit ganny fer?  Mersi.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mersi Onorab, Mr Deputy i annan en prosedir an plas, e Lapolis byensir dabor i bezwen konnen kwa i pe deal avek, i bezwen fer son bann premye envestigasyon pour li konnen letan i pe demann led, ki i pe demande. Ou vwar?

Pour mwan i bezwen fer son bann prosedir ki li i annan pour fer locally e pour li konnen kwa egzakteman ki kalite led ki li i bezwen pour li kapab apre fer son demann avek lasistans o nivo Nasyonal oubyen enternasyonal e ou pa kapab zis koman i annan en keksoz, ou bezwen deside si sa i en ka kot ou bezwen al rod led an deor, oubyen si sa i en ka ki ou kapab zisteman handle ou menm ou locally, se pour sa rezon ki in pran sa detrwa zour avan ler ki Lapolis in fer sa bann demann o nivo Enternasyonal.

 

MR DEPUTY SPEAKER

Mersi Minis. Onorab Andre.

 

HON CLIFFORD ANDRE

Minis i pran nou 12 zour, avek sa 4 zour, i fer 16 zour pour nou kapab vwar kwa ki nou bezwen e ki lasistans ki nou bezwen?  Minis i en pti pe difisil pour mon kapab konpran, mon douler manman Marvin avek son fanmir, i fermal pour ou, pour en Lotorite pran li 16 zour pour deside ki i bezwen?  Mersi.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Be Mr Deputy se atraver Lanket nou krwar ki ou bezwen etabli kisisa ki ou pe, ki ou annan, kisisa ki ou pe travay avek akoz i annan diferan posibilite ki lye avek en dimoun ki manke. Donk ou bezwen etabli en pe ou Case pour ou konnen apre kisisa, ki si ki kalite lasistans ki ou bezwen, ou pa kapab zis fer sa ozordi pour demen, mon pans pa si sa i kapab le ka.  Mersi Mr Deputy.

 

MR DEPUTY SPEAKER

Mersi Minis. Onorab Basil Hoareau

 

HON BASIL HOAREAU

Mersi Mr Speaker, Mr Speaker avan mon demann mon kestyon mon ti a kontan dir la i annan 2 keksoz ki an konfli, i annan le bi pour pa compromise Lanket me an menm tan pour osi asir manm piblik poudir keksoz pe ganny fer an relasyon avek Marvin. Mon annan 3 kestyon, eski bann manm piblik in vin devan apre ki zot in lans lapel, eski i annan manm piblik ki’n vin devan e zot satisfe avek bann lenformasyon ki zot in gather from sa bann piblik?

E dezyenm, dezyenm eski san ki nou bezwen reveal lo swa disclose lo kwa ki zot pe baz zot Lanket, eski i annan keksoz konkret ki zot pe baz zot Lanket lo la, ouswa i zis bann keksoz zeneral?

E trwazyenmman mon dakor ki Onorab Ramkalawan lo la time of the essence dan sa investigation la, eski zot santi ki Lanket pe proceed dan en fason ase swiftly?  Sa i mon 3 kestyon.

 

MR DEPUTY SPEAKER

Mersi Onorab Hoareau. Minis.

 

DESIGNATED MINISTER MACSUZY MONDON

Mr Deputy napa bokou dimoun ki’n vin devan ok? Me bann dimoun ki’n vini nou’n pran lenformasyon avek zot e, me sa bann lenformasyon osi ki nou’n gannyen i pa neseserman Onorab, lenformasyon konkret ok?  Se sa petet en pe difikilte e nou, nou pe fer nou maximum posib avek lenformasyon ki nou annan pour nou kapab zisteman deal avek sa Case ki devan nou.  Mersi Onorab, mersi Mr Deputy.

 

MR DEPUTY SPEAKER

Mersi Minis, Onorab Hoareau ou ok? Ok Onorab Hoareau, go ahead Onorab Hoareau.

 

DESIGNATED MINISTER MACSUZY MONDON

Eskiz mon Onorab mon krwar ou ti pe demande si nou pe rod led?

 

HON BASIL HOAREAU

Mon’n demande si, vi ki letan i enportan dan sa Case, si zot santi ki Lanket pe devlop dan en fason ki ase vit, efficient?

 

MR DEPUTY SPEAKER

Go ahead Minis.

 

DESIGNATED MINISTER MACSUZY MONDON

Wi Onorab nou krwar poudir Lanket pe deroul dan en fason ki nou ase satisfe e se pour sa rezon kot nou, ki nou’n santi poudir kot nou bezwen zisteman rod lezot led teknik pour kapab ed nou pour deal avek sa Case en pe pli byen ok? Mersi.

 

MR DEPUTY SPEAKER

Mersi Minis. Onorab Henrie.

 

HON GERVAIS HENRIE

Mersi Mr Speaker mon annan 2 pti kestyon pour Minis, premyerman mon’n kontan son larepons ki mannyer in donn nou dan en fason tre metikile e dan son larepons in koz lo prosedir letan dimoun i manke, ki prosedir Lapolis i pas ladan, sa i byen, prezan mwan mon kestyon ki mon anvi demande se ki dan nou listwar Lapolis i pa fer premye fwa ki en dimoun i perdi, e i annan dimoun ki’n perdi e ki zanmen nou’n retrouve Sesel, savedir Lapolis i annan deza leksperyans lo esey retrouv dimoun.

Donk mon anvi demann Minis ki sa Protokol ki an plas ouswa ki sa prosedir ki an plas ki ler en dimoun i manke, li Lapolis ki son bann steps i fer pour ki nou reasir dimoun laba ki Lapolis i konnen, zot konnen ki zot pe fer, zot pa pe zis tate dan fernwar. Sa i premye.

Dezyenm nou’n koz lo led ki Sesel in demann bann Lorganizasyon Enternasyonal, donk mon anvi konn, ki’n zot reaksyon lo la whether zot pe donnen led e ki bann led ki zot pe aport nou si i ok pour reveal?  Mersi bokou.

 

MR DEPUTY SPEAKER

Mersi Onorab, Minis.

 

DESIGNATED MINISTER MACSUZY MONDON

Mersi Onorab, Mr Deputy mon krwar premye kestyon mon’n deza dan mon premye larepons ki mon’n donnen, koz en pe lo bann prosedir ki an plas. I vre ki i annan dimoun ki’n manke oparavan, me dan laplipar di-tan sa bann dimoun letan nou anvoy mesaz oubyen nou, zot repran kontak swa avek zot fanmir oubyen swa Lapolis.

Kot i konsern bann led ki nou’n demande, Sesel nou deza en Manm Interpol e normalman letan nou demann led larepons i pozitiv e nou pe ekspekte ki nou pour gannyen sa led ki nou’n demande avek sirtou Interpol e osi Sid lafrik.  Mersi Mr Deputy.

 

MR DEPUTY SPEAKER

Mersi Minis. Onorab Henrie.

 

HON GERVAIS HENRIE

Mersi Mr Speaker, mon premye larepons ki mon ti’n demande mon, sertennman mon pa’n satisfe avek…

 

MR DEPUTY SPEAKER

Ou kestyon.

 

HON GERVAIS HENRIE

Mon kestyon se ki mon anvi ki, mon anvi konnen serten keksoz ki Lapolis pour fer ki zot ti kapab dir nou, sa i form parti nou Protokol, par egzanp nou pour get rikord telefonn sa dimoun, konmela i annan sa ki zot apel ou apel ou telefonn kot ou pase i koz avek bann Tower, kit en footprint kot ou’n pase, konmsi mon ti pe anvi Lapolis i dir nou poudir sa i bann keksoz, nou pour servi lisyen, sa i form parti nou prosedir ki dimoun laba deor i ganny re asire poudir “ahnr ok sa bann dimoun zot on top of the game zot konnen ki zot pe fer akoz nou get televizyon bann progranm la Cable TV missing 48Hours nou vwar ki mannyer zot fer deor.  Mersi bokou.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mr Deputy sa lenformasyon ki mon’n donnen kot i konsern prosedir i sa lenformasyon ki mon kapab donnen mon, akoz mon pa krwar poudir Lapolis i merit devwal tou son teknik, tou son taktik ki i servi letan i annan bann Case koumsa ki i pe deal avek.  Mersi Mr Deputy.

 

MR DEPUTY SPEAKER

Mersi Minis mon konpran sa pozisyon, Onorab Ferrari.

 

HON JEAN-FRANCOIS FERRARI

Non Mr Speaker, mon pa krwar nou konpran sa bann pozisyon akoz i annan serten keksoz ki nou bezwen kapab dir pour re asir piblik, manm piblik i anvi annan konfyans dan son Lapolis, mon krwar ki Lapolis i devret komans engage en pe plis avek Lapolis, pour li kapab zisteman ganny bann lenformasyon ki i pe rode.

Mwan mon annan 2 pti kestyon silvouple, mon ti a kontan demann kestyon senp, eski lokalman zot in ganny korperasyon bann lezot Lafors dan Liniform pour fer sa travay?

Mon dezyenm kestyon se, ler par egzanp bomaten nou ganny lenformasyon poudir Lapolis ti pe fouye depi Port Glaud ziska Port Launay nou, nou oule sa ki nou ti a kontan konnen se ki eski zot in ganny en lenformasyon kredib ki pe anmenn zot dan sa direksyon, oubyen eski zot pe tat tate dan fernwar?  Se sa ki piblik i le tande.

E finalman si zot kapab dir nou, eski zot pe pran tou lenformasyon ki zot gannyen o serye?  Akoz i annan en kantite lenformasyon deor, sanmenm sa petet ki pe konfiz en pe, i annan en kantite lenformasyon, eski zot pe pran tou lenformasyon, eski si zot ganny lenformasyon konmkwa i en ka ki lye drog, en ka ki lye avek swisid, en ka ki lye avek en problenm personnel, eski tou lenformasyon ki zot pe gannyen zot pe tret li avek serye?  Mersi.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mersi Onorab, Mr Deputy lenformasyon ki nou gannyen nou bezwen filtre, nou bezwen filtre lenformasyon e apre reazir baze lo lenportans ki nou santi sa lenformasyon i annan. E lenformasyon ki nou gannyen so far i plito parey mon’n dir taler i pa neseserman lenformasyon ki tre konkret, me i plito bann lenformasyon zeneral ki nou pe kolekte, ki nou pe gannyen avek piblik, me an menm tan osi ou bezwen pe travay avek lenformasyon ki ou pe gannyen.  Mersi Mr Deputy.

 

MR DEPUTY SPEAKER

Mersi Minis. Onorab De Commarmond.

 

HON CHARLES DE COMMARMOND

Mersi Mr Speaker, bonzour Minis, bonzour tou dimoun, Manm Lasanble e tou dimoun ki pe ekoute, Mr Speaker premyerman nou le pas nou senpati senser avek lafanmir Asba e Pointe lo sa sityasyon trazik.

Eski Minis i kapab enform nou Lasanble, eski i annan landrwa pei ki, kot Sesel i kapab ganny rezilta DNA pli vit ki Maurice?  Konbyen i koute normalman pour en tes DNA? “Pangar i mank kestyon” ok konbyen i koute normalman pour en tes DNA, konbyen i ti pour kout Sesel konmela nou ti pour pran, nou ti pour annan nou prop sistenm DNA, konbyen ti pour arive?  Ou ganny mwan mon bann kestyon?

E an menm tan eski Minis i kapab enform nou Lasanble, si zot in pran konsiderasyon letan zot pe fer zot bann demars pour retrouvay pour sa garson, eski zot in pran konsiderasyon son telefonn, son computer, bann lenformasyon lo la e tracing, kantmenm ou telefonn in tennyen bann trace e avek Cable bann lenformasyon, eski sa bann keksoz, mon pa pe enterfer ek ou resers, eski briyevman zot in pran konsiderasyon sa 2 lenstriman pour sa garson?  Mersi.

 

MR DEPUTY SPEAKER

Mersi Onorab, Minis.

 

DESIGNATED MINISTER MACSUZY MONDON

Mersi Onorab, Mr Deputy avan sa nou annan, nou ti fer sa bann tes Sid Lafrik avek dan Len., Me letan ki ti ganny pran ti pli long ankor, donk apre nou’n annan MOU avek Maurice akoz Maurice ti kapab fer sa tes dan en letan en pe pli kourt, e Onorab nou pa ganny sarze pour bann fees Laboratwar kot i konsern fer sa bann tes, bann kou ki nou annan i plito bann kou Lozistik.

Kot i konsern ou trwazyenm kestyon, nou’n pran lenformasyon lo tou sa bann lekipman, bann gadgets ki ou’n nonmen, nou’n ranmase lenformasyon lo la.

E kot i konsern envestir dan mon panse en Laboratwar pour fer sa bann tes, i mon krwar sa i enn bann keksoz ki Lapolis pour bezwen reflesir lo la e konsidere a lavenir ki mon krwar i pour deplizanpli i pour annan en nesesite pour nou kapab envestir dan en Laboratwar parey, e sa i annan deza serten travay ki’n deza konmanse dan sa direksyon.  Mersi Onorab.

 

MR DEPUTY SPEAKER

Mersi Minis. Onorab De Commarmond.

 

HON CHARLES DE COMMARMOND

Wi mersi Mr Speaker, Mr Speaker petet zis pour klarifye mon pwen, mon’n dir, mon’n nonm senpati taler, senpati i plito ler i annan lanmor, plito soutyen ek sipor en, mon pe remet sa byen, be selman mon’n demann kestyon spesifik lo si zot annan en nide konbyen i kout, konbyen i pour kout Gouvernman si nou pour annan nou prop sistenm, eski zot in deza fer en, si zot konnen petet dir nou?  Mersi.

 

MR DEPUTY SPEAKER

Mersi Onorab. Minis.

 

MR DEPUTY SPEAKER

Mr Deputy mon napa sa lenformasyon la, me selman etandonnen ki serten travay in ganny fer lo la, nou kapab provide zot sa lenformasyon avek Onorab pour li konnen akoz i deza dan plan ok.

 

MR DEPUTY SPEAKER

Mersi Minis. Onorab Simon Gill.

 

HON SIMON GILL

Mersi bokou Mr Speaker, Mr Speaker mon osi lo la par nou Lasanble, lo la par nou team isi dan nou Lasanble nou oule dir avek tou manm piblik ki nou tre konsernen avek sa sityasyon otour Marvin.  I domaz.  Me mon oule met lanfaz lo pwen ki Onorab LGB in koz lo la, i pa ozordi ki nou Lapolis i egziste probableman si i annan en keksoz ki nou devret donn priyorite limero 1 dan Lapolis, probableman avek kolaborasyon Minister Lasante, si lo nivo kolaborasyon pa pour konpromet nanryen, probableman en Laboratwar pour tes DNA, nou napa en kantite Case ki nou pour bezwen fer DNA test, mon pe assume, now avek Minister Lasante, avek Lapolis si nou pa kapab tonm dakor met sa koman nou priyorite limero 1 pour nou fer sir, e re asire ki DNA test i ganny fer dan teritwar Sesel dan en lavenir tre pros.

Mon prezimen nou kapab ganny sifizaman sipor larzan, e lekipman teknik pour ki sa i vin en realite byento, mon pa ti a kontan trouv lannen 2017 fini, nou napa enn sa.

Mr Speaker lot keksoz ki mon krwar i enportan piblik deor, kestyon i vini, piblik deor i oule en reasirans ki kot lenvestigasyon in arive ki nou annan bann credible leads ki nou pe travay lo la. E rezon ki pe anmenn nou pour al rod soutyen deor i probableman si nou oule dir pour nou reasir piblik deor la ki Lapolis in ariv lo staz kot bann leads ki in gannyen nou’n santi nou en pti pe kwense e nou bezwen rod bann ekspertiz adisyonnel pour ki nou kapab crack sa puzzle kot nou’n arive la, akoz sa nouvel ekspertiz i manke.

Mon krwar sa i lenformasyon ki man piblik deor pe swete e i lenformasyon reasirans ki Lapolis pe travay 24 lo 24-7 lo 7 pour reasire ki nou dekouver, me omwen ki nou satisfer lafanmir, e nou satisfer Sesel ki pa mess-up avek Sesel ek nou bezwen trouv en solisyon avek sa Case.  Mersi bokou.

 

MR DEPUTY SPEAKER

Mersi Onorab Gill.  Minis.

 

DESIGNATED MINISTER MACSUZY MONDON

Mersi Onorab, Mr Deputy Lapolis in deza antre an kontak avek CELLMARK Forensic pour ed zot pour set up DNA Lab, donk mon ekspekte ki, mon krwar travay in deza komanse dan sa laliny; e ki sa i ava ganny fer dan prosen lavenir.

E mon ti a kontan re asir Onorab ki wi Lapolis pe entansifye tou son zefor ok, pour kapab, pour li kapab deal avek sa Case e byensir parey nou kontinyelman fer Lapel pour ou kapab fer ou travay byen, ou bezwen osi ganny lenformasyon pour ou kapab travay avek, me ankor enn fwa mon ava dir an menm tan ki Lapolis i pe fer sa travay i annan serten keksoz ki pa pe kapab devwale avek manm piblik. E lenformasyon ki nou donnen sak fwa ki nou mont lo medya i lenformasyon ki nou santi ki nou  kapab donnen zisteman pour sey donn en pe sa lasirans manm piblik lo ki nou pe fer, sa ki nou pa al an detay sa ki nou pa dir, i vedir nou pa pe kapab devwal li akoz i annan nou pa oule ki sa i afekte lenvestigasyon oubyen lanket ki nou pe fer.  Mersi Mr Deputy.

 

MR DEPUTY SPEAKER

Mersi Minis. Onorab Flory Larue.

 

HON FLORY LARUE

Mersi Mr Speaker e bonn apre midi tou dimoun parey in ganny dir i annan en listwar dan pei kot bokou dimoun in disparet, eski Minis i kapab dir nou ki poursantaz sikse pour retrouv dimoun ki’n disparet ki Lapolis i annan, ki zot poursantaz sikse ki zot annan pour retrouv bann dimoun ki’n disparet e lekel ki ti responsab pour sa bann ka, eski zot kapab donn nou en poursantaz rezilta?  I annan bokou ka ki menm letan i annan en mert ouswa en disparisyon, nou pa vwar sa bann ka ganny en konklizyon, eski nou annan en problenm avek nou sistenm Lapolis pour akey levidans dan en fason efikas, ki fer ki nou ganny rezilta pour trouv dimoun ki’n disparet, ouswa trouv bann ki enplike dan sa krim e sa i osi pour lezot krim tel ki labi ouswa rape.  Mersi.

 

MR DEPUTY SPEAKER

Onorab, Onorab, kestyon i spesifik.

 

HON FLORY LARUE

Wi i spesifik akoz i akeyi levidans ki fer nou ganny rezilta.

 

MR DEPUTY SPEAKER

Onorab, kestyon i spesifik lo en ka, e sa ka i ganny mansyonnen dan sa kestyon orizinal annou pa deborde, ou a ganny en sans petet pli Tar pour anmenn sa kestyon koman en kestyon orizinal. Me pour le moman tant pour nou tenir nou kestyon siplemanter lo sa kestyon ki devan nou. Ale go ahead Onorab lo sa kestyon, lo sa size. Go-ahead Onorab.

 

HON FLORY LARUE

Mon demann Minis si i kapab dir nou ki success rate, ki kantite sikse zot annan pour retrouvay dimoun ki’n disparet, mon krwar i an relevans avek sa kestyon, akoz en dimoun in disparet dan pei, e eski…

 

 

MR DEPUTY SPEAKER

Order !

 

HON FLORY LARUE

Zot kapab eksplik nou si zot annan en defayans pour akeyi levidans akoz levidans ki pour ed ou trouv sa ki enplike ouswa pour trouv sa dimoun ki’n disparet, eski zot annan en defayans anmas levidans akoz i annan sa ka ki’n ganny mansyonnen par Onorab Ramkalawan kot sa msye ti ganny trouve mor le 29 Mars Anse Royale, Mr Nelson Sinon e ziska prezan bann levidans ki’n akeyi napa konklizyon dan sa ka, e fanmir i ankor pe atann, sa mon kestyon, fotespere i pli kler.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mr Deputy sa lenformasyon ki Onorab pe demann mwan lo poursantaz sikse, mon napa la avek mwan, mon napa pour mon donn li.

Dezyenmman mon krwar nou pa kapab zeneralize akoz sak ka i annan son prop spesifisite, mon krwar parey nou ti’n mansyonnen taler i annan dimoun ki manke, apre dan en dele letan 14 zour zot retournen, e nou pa kapab zeneraliz tou ka pran met tou ansanm.

E Lapolis byensir i travay baze lo lenformasyon ki li i annan e lo Lanket ki li i pe fer, e kot i santi i pa kapab lanmenm ler ki i ale i al rod led an deor pei e o nivo rezyonal oubyen enternasyonal.  Mersi Mr Deputy.

 

MR DEPUTY SPEAKER

Mersi Minis. Onorab Larue.

 

HON FLORY LARUE

Minis ti osi mansyonn Interpol, mon anvi si i ti kapab regarde, si i ti kapab dir nou ki relevans Interpol dan sa Case?  Akoz eski zot krwar sa Msye in kit pei or eski Interpol pour vin Sesel pour asiste zot?

 

E ankor lo sa pwen levidans tou lezot Case ki al Ankour ou bezwen levidans e Lapolis ki akeyi levidans pour fer prosekisyon, eski Minis i kapab dir mwan si Lapolis i annan en defayans pour anmas levidans?  Mersi.

 

MR DEPUTY SPEAKER

Mersi Onorab.

 

HON FLORY LARUE

I pa’n reponn sa kestyon.

 

 

MR DEPUTY SPEAKER

Yes. Order! Order! Order! Order! Bon annou tret sa size serye ok? Order! Order! Order!  Sa size i en size ki serye ok? Onorab Larue son dezyenm par kestyon in demande si i annan en defayans dan Lapolis anmas levidans e tret levidans ki, Onorab Woodcock Order! Mon pe koze ok? Sa bout kot zafer levidans, Lapolis i annan defayans i annan relevans, Minis i konnen ki mannyer i pour reponn, Minis i ava abord sa bout e osi sa dezyenm bout lo, koman, wi avek Interpol and so on.  Minis go ahead.

 

DESIGNATED MINISTER MACSUZY MONDON

Mr Deputy led ki nou pe rode avek Interpol zisteman, se led spesyalize pour zot kapab ed nou avek kot nou’n arive avek nou lenvestigasyon ki nou pe fer, e ler ou pe koz si i annan defayans Lapolis dan anmas levidans. Onorab mon pa kapab dir ou si i annan defayans Lapolis dan anmas levidans me selman mon panse poudir en Zofisye Lapolis letan i pe anmas levidans si i konn son travay, i bezwen fer sir ki i kouver tou bann laspe pour li kapab ranmas sa lenformasyon ki li i bezwen, i bezwen ranmase.  Mon pa dir ki petet parfwa i annan keksoz ki kapab manke, me selman pour mwan si en Lapolis i pe fer byen son travay i bezwen fer li byen e fer sir ki i ganny tou bann levidans ki bezwen pour li kapab rezourd sa Case ki pe travay avek.  Mersi Mr Deputy.

 

MR DEPUTY SPEAKER

Mersi Minis, bon mon ankor 4 Manm ki’n lev lanmen, mon pour frenm mon lalis la, e mon pour donn sa 4 Manm sanz pour zot poz zot kestyon, Onorab Arrisol.

 

 

HON SANDY ARRISOL

Mersi Mr Speaker, bonzour Minis, bonzour tou dimoun ki a lekout, Mr Speaker mwan mon ti a kontan premyerman eksprim mon dezapwentman parske 40an pli tar dan nou pei nou ankor annan zenn ki pe perdi dan nou pei; e mwan mon konpran fristrasyon bann Parti Lepep letan nou koz disparisyon, sa i fatig zot en kantite me la nou annan en ka, alor zot pour bezwen pran li trankil, pran li à la légère letan nou koz disparisyon dan sa pei.

        Onorab Basil Hoareau tenir ou lekor les mwan demann mon kestyon. Mon ti a kontan Mr Speaker parey Onorab Larue in dir an relasyon avek defayans, Lapolis i annan defayans parske a plizyer repriz Lapolis i mont lo televizyon zot fer statement, nou annan Port Parol Lapolis ki monte ki dir ek nou poudir tel envestigasyon pe ganny fer, tel lanket pe ganny fer, apre nou pa tann absoliman nanryen. Sa i enn.

        Dezyenmman Lapolis li menm li a plizyer repriz son landrwa kot zot met zot Levidans in ganny kase dan zot prop Kordgard Santral, sa i en defayans pour Lapolis e nou bezwen aksepte e admet.  Plizyer ka in ganny mansyonnen e parey in ganny dir taler pli boner bann dimoun ki’n ganny perdi napa personn ziska prezan ki’n ganny arete ek sa.  Alor mon kestyon i vin lo sa laliny, eski Minis i kapab dir ek nou dan ka Marvin si i annan dimoun, si zot in enteroz tou dimoun an se ki konsern Case Marvin? Akoz Lapolis i annan en fason travay kot i annan dimoun ki kapab enteroze e i annan dimoun ki i per pour li al enteroze.

        Eski dan ka Marvin Lapolis in enteroz tou dimoun ki i annan pour fer avek ka Marvin Asba?  Mersi bokou.

 

MR DEPUTY SPEAKER

Mersi Onorab.  Minis.

 

DESIGNATED MINISTER MACSUZY MONDON

Mr Deputy mon krwar dan mon larepons mon ti dir poudir nou’n enteroze, nou’n pran levidans avek tou bann dimoun ki nou santi i annan keksoz, i annan en relasyon pour fer avek sa Case Marvin.

        E Onorab mon ti a kontan asir ou poudir Lapolis pa ganny dir lekel pour enteroze, lekel pa enteroze, ok Lapolis son travay se enteroz tou dimoun, ok?  E mwan mon pa enterfer dan travay Lapolis e dan son travay ki i pe fer, donk reasire ki poudir Lapolis pe enteroz tou dimoun ki i santi i bezwen enteroze, ranmas levidans ki annan pour fer avek sa ka Marvin. Ok ?    Mersi Mr Deputy.

 

MR DEPUTY SPEAKER

Mersi Minis. Onorab Adelaide.

 

HON FRANCOIS ADELAIDE

Mersi Mr Speaker, mon kestyon pour Minis i koumsa, Minis dan ou larepons mon’n tann ou fer referans avek sa tes, zot pe fer li pour nanryen, e zot pe pey zis Lozistik.

Eski ou pa krwar si petet dan plas donn sa R100,000 rekonpans si zot ti kontribye en pe larzan pour pey pour en tes petet nou ti ganny rezilta en pe pli vit?  Mersi.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mersi Onorab, Mr Deputy be dan sa laranzman i atraver en Lagreman ki nou annan avek Maurice, donk napa nanryen ki nou bezwen peye pour nou ganny li pi vit oubyen non, me selman nou, nou koz ek zot lo lenportans e severite sa Case e nou demann zot pour zot kapab fer li pli vit posib pour nou. Ok ?  Mersi Mr Deputy.

 

MR DEPUTY SPEAKER

Mersi Minis, Onorab Chantal Ghislain.

 

HON CHANTAL GHISLAIN

Mersi Mr Deputy Speaker, Mr Deputy Speaker nou’n atann en kantite bann keksoz partou ki pe ganny pase, non bann dimoun ki ganny lev-e, mon ti a voudre konnen si i posib pour dir nou Minister, ki kantite dimoun ki pe ganny komans enteroze dan sa bann Case, e eski tou sa bann dimoun ki pe donn lenformasyon in vin devan pour vin dir? E sa bann lenformasyon ki pe ganny pase partou lo Facebook, si sa ki lenformasyon ki’n vin ganny dir direkteman avek Lapolis?  Mersi Mr Speaker.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mersi Onorab, Onorab mon pa kapab dir ou lakantite dimoun akoz sa bann dimoun ki pe donn lenformasyon ki ou vwar partou, zot pa bann dimoun ki vin devan direkteman pour vin donn lenformasyon avek Lapolis oubyen, menm call sa nimero pour donn lenformasyon, donk sa bann dimoun ki donn lenformasyon lo social media zot lenformasyon i reste lo social media e mon pa pe kapab dir ou ki lakantite dimoun ki’n vin devan pour donn lenformasyon.  Mersi.

 

MR DEPUTY SPEAKER

Mersi Minis. Onorab Chantal Ghislain.

 

HON CHANTAL GHISLAIN

Mr Deputy Speaker lefe ki sa bann dimoun menm si i reste lo social media e lefe ki i annan keksoz pour fer direkteman e non Marvin pe ganny lev-e, eski sa bann dimoun zot osi zot pe ganny kestyonnen avek Lapolis?  Mersi.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mr Deputy non, sa bann dimoun pa pe ganny kestyonnen avek Lapolis akoz ou a vwar osi Onorab poudir tre souvan sa bann dimoun pe servi bann fake profile, nou pa konnen lekel zot.  Mersi Mr Deputy.

 

MR DEPUTY SPEAKER

Dernyen kestyon Onorab Ghislain.

 

HON CHANTAL GHISLAIN

Eski Lapolis napa en fason pour kapab penetre bann lenformasyon ki annan pour fer avek social media menm si i pa’n dapre nou or sa si i lalang or kwa, parey nou dir leave no stones unturned, eski sa bann dimoun i annan fason ki nou kapab Lapolis i kapab antre atraver Facebook al rode lekel sa bann dimoun menm si zot pe servi fake pour kapab vin reponn kestyon an se ki konsern bann lenformasyon ki zot pe donnen lo social media e i pe fer en kantite ditor, pa zis lafanmir, bann zanmi ek lezot menm lafanmir viktim e lafanmir bann non ki pe ganny lev-e.  Mersi Mr Speaker.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mersi Onorab, Mr Deputy i annan serten travay ki nou pe fer, me selman mon pa pe kapab devwale avek ou egzakteman ki Lapolis pe fer.  Mersi Mr Deputy.

 

MR DEPUTY SPEAKER

Mersi Minis, bon mon a pas la parol avek dernyen kestyon pour Loter kestyon. Onorab Ramkalawan.

 

HON WAVEL RAMKALAWAN

Mr Speaker premyerman mon anvi demann Minis, etandonnen  ki konmsi ki fer nou parfwa pa pran sa travay dan en fason serye. Lapolis ti ganny lenformasyon Takamaka lo disan, La Gogue zot in anmenn lisyen me ki nou ekspekte lisyen santi si nou pa rod en morso lenz oubyen keksoz ki pour sa dimoun e nou amenn lisyen?   Ki nou ekspekte gannyen?  Ou pa pour ganny nanryen. Alors sa i montre en defayans dan travay Lapolis.

E dezyenmman letan Minis pe dir lenvestigasyon ensidswit kan nou anmas levidans, mon sorry ki nou pe vwar kot Lapolis i annan en defayans serye dan lafason ki zot ranmas levidans, parske tou dernyerman tou sa bann Murder Cases zot pe perdi, alors i montre ki poudir i annan en gran defayans; i pa zis en kestyon Avoka Ladefans ki bon me si ou levidans i for ou devret kapab prouv en Case, savedir i annan defayans ankor.

E Mr Speaker mon pe annan en pe dezapwentman, dan lafason ki keksoz in ganny trete bomaten parske mon ti anvi ki sa kestyon i vin en fason pour rekonfort lafanmir, en fason pour donn piblik konfyans, me malerezman lafason ki sa Sesyon in deroule nou koman manm piblik e  I’ am sure pour manm lafanmir nou sorti avek nanryen ditou e am sorry Minis me konklizyon parey Onorab in dir, nou ganny lenpresyon ki poudir sa Case pour fini koumsanmenm, pour napa parske menm si pe dir levidans pe isi, levidans pe laba pa kapab devwale, mon ganny lenpresyon ki poudir sa pe ganny dir akoz Lapolis napa nanryen pour le moman pour zot al lo la.

E sa Mr Speaker e fer mon vin avek en lafreyer e ki mon krwar ki Lapolis i bezwen definitivman, e koman nouvo Minis ki responsab pour bezwen annan en keksoz serye akoz definitivman nou pe retourn dan en sityasyon kot dan lannen 2017 dimoun pe disparet e napa nanryen ki pe ganny fer. Eski nou pe retourn dan sa staz kot, ki pour mon ki parey mon pe dir i anmenn bokou lafreyer.

Alor mon santi ki malerezman nou, mon bezwen dir avek tou respe ki mon annan pour ou Minis se pour e pour Komisyoner Lapolis, me dan lafason ki keksoz pe ganny fer la, definitivman Lapolis i bezwen step-up son travay, ranforsi son kote lenvestigasyon akoz nou piblik pe perdi tou konfyans dan Lapolis,

 

(APPLAUSE)

 

HON WAVEL RAMKALAWAN

mon bezwen dir sa.  Mersi bokou.

 

MR DEPUTY SPEAKER

Mersi Onorab. Minis.

 

DESIGNATED MINISTER MACSUZY MONDON

Mr Deputy mersi. Mr Deputy letan en dimoun i manke, i annan diferan posibilite mon krwar mon’n mansyonn sa taler akoz en dimoun i manke. Sa i pa vedir ki i annan en krim ki’n ganny komet oubyen en lot keksoz ki’n arive, e se pour sa rezon ki Lapolis i pa kapab zis vini pronons li lo sa bann keksoz san ki in fer, in satisfe ki in konplet son lenvestigasyon ki li i pe antreprann e ki i santi poudir i kapab donn serten lenformasyon.

E mon krwar Onorab mon konpran poudir wi i annan petet serten defayans, dan Lapolis, me petet enn bann rezon petet kot nou santi kekfwa nou pa pe kapab, nou napa sa servis spesyalize pour nou donnen, se pour sa rezon ki nou pe al rod led avek lezot Lorganizasyon pour kapab ed nou ziskan ler ki nou, nou kapab pe annan sa bann servis lokal o nivo nou pei pour nou kapab ofer sa bann servis a lavenir. Donk mon pa ti a kontan ki nou sorti avek sa nide ki konmsi napa Onorab, napa nanryen ki pe ganny fer, akoz mon krwar ki poudir i annan bokou ki pe ganny fer. E mon panse avek bann led osi ki nou pe gannyen avek bann Lorganizasyon Enternasyonal, ki nou a kapab finalman rezourd sa Case kot i konsern disparisyon Marvin akoz mon kapab reasir ou poudir nou, nou pa pe pran sa Case a la lezer e nou osi nou anvi ki sa Case i ganny rezourd e ki ganny rezourd byen e ki nou tou nou konnen finalman kwa egzakteman ki’n arive dan sa disparisyon.  Mersi Mr Deputy.

 

MR DEPUTY SPEAKER

Mersi Minis, petet zis pour mon azoute Minis lefe ki sa portfolio i nouvo, sa Lasanble avek lezot Lasanble dan lepase in ganny promet parmi bann lezot Minis ki’n pase ki Lapolis pour step-up, Lapolis pour annan en Forensic Lab e la nou pe vwar ki sa problenm DNA i de zour an zour i vin pli enportan, i pa zis vizavi krim, mon krwar Lakour osi pe demann sa fasilite i annan bokou bann paternal test ki Lakour i demande e menm bann papa oubyen bann manman i demande pe ensiste, so lefe ki ou nouvo Minis e mon konnen ki ou kapab pouse pour sa kapab arive, i annan…. Order silvouple! I annan sa konprenezon lo tou lede kote latab ki si Departman Lapolis anba gidans ou Minister i prezant en projet zot pour ganny sipor sa Lasanble. So pa ezit-e reste an kontak avek nou, i annan sa demann pour demann avek Departman Lapolis pour fer en pti pe son travay regarde konbyen i pour koute, prezant avek nou Lasanble e mon asire i pour ganny sipor sa Lasanble pour nou kapab bouze e fer keksoz pli vitman, pli efikas dan bann investigation ki Lapolis pour antreprann.

Bon avek sa Minis nou ava remersi ou avek ou lekip, avek Mr Elizabeth Komisyoner Lapolis e Ms Vengadasamy parmi nou, nou konpran ou pozisyon e nou swete ki lenvestigasyon i ava kontinyen e tre byento nou ava kapab ganny en rezilta, mersi Minis e nou eskiz ou parmi nou.

 

(DESIGNATED MINISTER MACSUZY MONDON AND HER DELEGATION WAS EXCUSED FROM THE HOUSE)

 

MR DEPUTY SPEAKER

Bon i reste nou en Kestyon Irzan lo Order Paper. Nou ava pran li apre midi 2er, petet mon a sizere lefe ki’n ariv 1er mon sizere ki nou antre 2er edmi, 2er edmi akoz nou annan Komite Zil ki pe al meet la deswit e Komite Zil pe meet dan Speaker’s Conference Room ok? Yes Onorab Ramkalawan.

 

HON WAVEL RAMKALAWAN

Mr Speaker vi ki la 1er petet nou ti ava dir olye rankontre la deswit nou ti ava rankontre 1er edmi ok zis pour soz….

 

MR DEPUTY SPEAKER

Ok si zot oule Komite Zil i ava rankontre 1er edmi me Lasanble nou ava adjourn ziska 2er edmi, nou ava pran Minis, ale.

 

HON WAVEL RAMKALAWAN

Mr Speaker zis pour sa ki nou’n fek pas ladan dan sa Lasanble

mon krwar lo tou lede kote mon vwar bann reaksyon, lo tou lede kote nou bezwen eksprim nou dezapwentman e nou konsern pour ki Lapolis, sa Lafors Lapolis i zis step-up lo sa kote lenvestigasyon parske nou pa pour kapab kontinyen dan sa fason dan nou pei, I mean dimoun pour mor, dimoun pour disparet, dimoun tou sa bann krim pour kontinyen ogmante e nou pour end-up dan en Sosyete ki finalman tou dimoun pour pran Lalwa dan son lanmen.

Mon krwar ki nou koman en Lasanble nou bezwen anvoy en mesaz for pour Minis zafer Entern e pour Komisyoner Lapolis parske nou pa kapab kontinyen koumsa enough is enough.  In ler pour nou serye.

 

MR DEPUTY SPEAKER

Mersi Onorab, mon krwar parey mon dir i annan sa lantant tou lede kote e petet fer en swivi, le 2 Leaders si i en meeting en rankont avek bann Dirizan dan Departman Lapolis e regarde ki zot defayans, ki zot mank pour nou osi koman en Lasanble pour nou kapab donn sipor ok?  Bon nou ava adjourn e nou ava retournen 2er edmi.

 

(BREAK)

 

MR DEPUTY SPEAKER

Bonn apre midi tou Manm Onorab e tou dimoun ki a lekout ki pe kontinyen pe swiv travay Lasanble Nasyonal. E mon a dir en bonn apre midi spesyal pou Minis Dogley ki akonpannyen par Madanm Nanette Laure ki Direkter Zeneral for Waste Permit and Enforcement Division. Bonn apre midi Minis e bonn apre midi Madanm Laure.  Bon nou ava al toudswit lo nou bann kestyon e mon ava demann Onorab De Commarmond pou li poz son kestyon. Onorab.

 

HON CHARLES DE COMMARMOND

Mersi Mr Deputy Speaker. Bonzour Mr Deputy Speaker bonzour Minis avek tou Manm Onorab avek tou dimoun ki a lekout bonn apre midi. Mr Deputy Speaker mon kestyon I koumsa: anvi konsern eksprimen par plizyer biznes e prenan kont bann restriksyon lo prodwir a baz plastik eski Minis i kapab dir nou Lasanble ki bann mezir son Minister pep ran pou asir Lasanble ki sa bann restriksyon pa en lefe advers lo sa bann biznes, e lekonomi pei an zeneral?

Mon ti a kontan zis dir Mr Deputy Speaker la apre midi lo Facebook ou vwar i annan lasyet manze pe ganny servi dan lasyet papye wrap dan foil. Mersi.

 

MR DEPUTY SPEAKER

Mersi Onorab De Commarmond.   Minis Dogley.

 

MINISTER DIDIER DOGLEY

Mersi Mr Deputy Speaker e en bonn apre midi tou Manm Onorab e tou dimoun ki pe ekoute kot lakaz ouswa dan zot landrwa travay. Larepons Mr Deputy Speaker pou sa kestyon se ki, problenm salte atraver lemonn pe vin en problenm vreman grav ki pli ale pe deborde pou la pli par pei ki zot vwar zot dan bann difikilte pou kapab manage sa volume salte. E sa I annan pou fer avek konportman imen kot nou pe viv dan en lemonn kot nou dir i en lemonn consumerism kot dimoun i konsim bokou plis bann diferan kalite keksoz. E nou bezwen devlop nou en fason fer kot ler nou’n fini senpleman keksoz i ganny zete partou dan lanvironnman. E konsernan plastik li i ganny trouve parmi enn bann prodwir apre i vin salte kot pli gro problenm konsernan salte an zeneral. E parey nou’n vwar plastic an zeneral i annan bann par egzanp bann sak ki nou annan ki nou servi ki li ler nou’n fini servi apre en pti moman I ganny zete partou dan lanvironnman. E rezondet ki nou’n deside pou fer sa ban se pou tackle sanmenm problenm kot ou vwar nou pli ale kot i annan en gran kantite salte ki nou bezwen deal avek ouswa ki nou vwar ki Gouvernman i bezwen kontinyen depans en kantite larzan pou kapab zesyon pou kapab fer zesyon salte dan en fason pli byen e sa i fer ki nou bezwen adres sa problenm e aret sa sistenm business as usual, ki pe kree sa bann problenm ki pe fer li vin pli grav. An zeneral globalman si nou regarde la pli par pei osi tou kip e bouz dan sa direksyon kot zot pe adres sa problenm bann sak plastik ki ouswa bann lezot prodwir plastik ki pe ganny zete partou dan lanvironnman, e ki pe afekte biodiversite; e lanvironnman marin e menm lasante dimoun an zeneral.  E si nou regard nou Konstitisyon i dir nou osi ki tou Seselwa I annan en dwa pou li viv dan en lanvironnman ki prop e ki sen.  E mon konnen ler bann Onorab ti al sermante zot tou zot ti sermante pou mentenir Konstitisyon.  Epi nou en pei ki viv lo touris nou en pei ki viv lo lapes bann reveni, ki sorti dan sa de sekter kle e tou le de sa 2 sekter i bann sekter ki ganny afekte atraver bann salte si oule ki ganny zete dan lanvironnman.  Alor nou’n gete i annan bann prensip an zeneral ki ganny servi pou adres salte. I annan 3; annefe i reservi apre i resikle e konsernan plastik enn bann fason pou adres li se pou redwir la kantite plastik ki ganny enporte.  Savedir olye pou nou depans larzan pou nou rod gerizon pou rezourd sa problenm, nou fer mannyer ki nou adres sa problenm depi kot i sorti, e nou fer sir ki zis bann ki vreman dan lentere nou pei ki nou fer antre dan Sesel.  Alor ki sa ban pe sey fer akoz ki nou pe fer li koumsa? Enn, parey mon’n dir se ki nou pe adres sa problenm bann plastik ouswa bann prodwir plastik ki ou servi li senpleman en fwa, e apre ki ou’n servi li, i kapab dan detrwa minit ouswa enn erdtan I senpleman ganny zete dan lanvironnman. E sa bann prodwir i annan pou  fer avek en single-use plastic bags parey zot dir an Angle. I annan styrofoam boxes-bann bwat take away ki ganny fer avek styrofoam e dan bann cups avek bann lasyet ki ganny fer avek sa, epi bann kwiyer avek bann pti fourset ki nou’n vwar pli ale pe akimile dan lanvironnman. E menm pe ariv dan lanvironnman marin kot i al afekte bann pwason bann zwazo. E menm kontamin nou losean. E menm manze ki nou manze e menm touy bann torti avek bann mamifer marin. E i annan bann pei ki par egzanp ki zot in servi sitan kantite plastik sirtou dan bann pei Lazi kot sak fwa ou al dan delo sale ou bezwen demann pardon sa bann salte plastik e menm i annan plis sa bann zafer ki menm annan pwason ou menm ou pa vwar pwason; ou vwar plastik ki’n ranplas zot dan delo sale.  Nou pa ti a voudre pou dir Sesel en zour i ariv dan en leta parey.  Alor ki prosesis ki nou’n pran pou nou kapab adres sa problenm. Depi an Septanm 2015 apre ‘Clean up the world ouswa bann netwayaz lemonn nou ti fer en Konferans De Pres kot nou ti envit nou bann partners.  Sa ti Sustainability for Seychelles; ti annan CA en group bann zenn avek bann lezot lorganizasyon ankor pou zwenn nou, pou travay lo en prosesis pou nou kapab arive rod solisyon pou sa zafer plastik, ouswa bann prodwir plastik ki ganny zete dan lanvironnman isi Sesel. E apre sa nou’n zwenn avek CEPS; nou’n zwenn avek Lasante avek sekter prive avek bann Retailers Association Komers; bann Supermarket enn par enn e nou’n diskit avek zot pou vwar dan ki fason ki nou kapab adres sa issue, san ki nou kre en gro sok si ou le lo bann biznes isi Sesel.  E an zeneral larepons ki nou’n gannyen ti tre pozitiv-ti tre ankourazan, akoz laplipar bann lorganizasyon ti dir nou zot pare pou travay avek nou zot rekonnet dan plizyer pei, sa pe ganny fer. Alor zot pa vwar pou ki rezon sa pa kapab ganny fer isi Sesel. E pandan tou sa letan sel bann keksoz ki nou’n gannyen konplent ki nou’n gannyen se bann dernyen trwa mwan la serten biznes ki’n enform nou ki zot annan serten stok plastik sak plastik ki zot pa pou kapab fini tire dan zot stok avan sa deadline ki nou’n mete. E bann dernyen konplent ki nou’n gannyen se pandan sa semen ler bann Takeaway ti pe konmans ganny difikilte pou zot ganny bann take away bwat akoz ti napa available la, pou le moman. Apre ki’n annan en panic buying ler sa ban in vin an plas.  Nou’n servi osi medya en kantite pou enform dimoun nou’n lo televizyon nou’n servi bann Newspapers nou’n fer bann Lartik nou’n servi social media nou’n al kot bann dimoun direkteman dan magazen nou’n al anvil lari bazar pou enform bann dimoun kwa ki nou pe sey fer e kwa ki nou pe sey ki nou bi si ou le a lafen kwa ki nou le achieve ler nou pou fini met sa ban an plas. E an zeneral parey mon pe dir bann keksoz ki nou’n gannyen bann parol ki nou’n gannyen avek piblik, in tre pozitiv an zeneral.  E menm i annan par egzanp en Takeaway ki sorti Cascade li I ti konmans depi an Fevriye 2016 konmans servi bann take away ki biodegradab.  E la i pe fer bann prosesis pou li met an plas bann kwiyer avek fourset ki osi biodegradab.  I annan en fermye Anse Royale, ki par egzanp byen boner i ti aret fer vini sak plastik in fer vini son bann sak an sifon, ki ou kapab reservi pou vann bann keksoz ladan.  E i annan en kantite bann magazen ki osi pran menm prosedir menm semen ki zot osi zot in fer vini zot prop sak bann diferan print lo la ki tre atiran.  E ki ou kapab reserve a plizyer repriz.   Alor konsernan bann styrofoam take away, nou’n vwar mon krwar laplipar dimoun a enn fwa ou en lot zot in vwar ouswa dan aste take away zot in vwar poudir la pli par bann Takeaway outlet ti deza in vann take away dan sa ki apel bann bwat ki ganny fer avek bagasse ouswa sugarcane bagasse.  E sa ti’n konmans fini vin popiler lwen ki avan ki nou ti pe met sa ban. Annefe depi lannen pase i annan en bon pe ki’n konmans switch e pe  servi sa bann kalite bwat take away. Konsernan plastik sak plastik, i annan plizyer laboutik ki ti’n konmans byen boner aret donn sak plastik.  I annan menm bann ki mon’n koz avek zot dir zot tre kontan zot pa vwar litilite. Mwan personnelman mon ti a voudre ki zot ti a kontinyen vann bann sak ki biodegradab, akoz a lafen nou pa le ki dimoun, i ganny bann enkonvenyan, me at least zot servi bann ki pozitiv a lafen i pou degrade e non pa i pou reste dan lanvironnman pou li kontaminen e detri nou lanvironnman.  E nou nou’n kontinyen avek nou konsiltasyon e atraver nou konsiltasyon i annan plizyer dimoun ki’n vin vwar nou i annan ki’n dir nou zot annan serten difikilte; par egzanp i annan ki’n enport plastik ki’n dir nou zot annan en bon pe plastik avek zot bann plastik ordiner bann Takeaway la pou le moman napa plastik parey mon’n nonmen ki napa bwat take away parey mon’n nonmen e sa in ganny koze spesyalman dan bann dernyen semen kot en kantite zot in taye pou al aste bann bwat take away.  E avan bann dimoun ki enporte in dir nou ti napa vreman sa demann pou sa kalite bwat parey zot ti espekte. I annan en kantite zot in asiz lo sa bann bwat ziska bann dernyen moman apre en sel kou tou bann bwat in ganny vann zot nepli annan stok. Apre nou annan en ka kot en dimoun in vin devan kot nou’n dir li fer en biznes parti kot i annan ankor en pe bann plastik plates; bann lasyet ki fer avek bann plastik ki fer avek bann cups ki i fer an plastik ki li i ti a kontan kontinyen itilize. Prezan nou ki nou’n fer pou adres sa problenm nou’n toultan gard kontak avek bann boutikye. Me osi bann Takeaway owners bann dimoun ki annan laboutik ki vann take away; e ler zot in demann nou pou rod lenformasyon pou zot konsernan sa bann bwat, nou’n met zot toultan an kontak avek bann dimoun ki enport sa kalite keksoz; bann traders ki’n vin kot nou bann ki pe enport sa bann prodwir nou’n asize avek zot nou’n donn zot konsey nou’n dir zot kote nou’n donn zot bann spesifikasyon ki nou krwar i devret ganny servi e la pli par zot pa’n ganny difikilte pou enport zot bann prodwir. E nou annan lenformasyon pou dir Zedi sanmenm sa semenn e pandan sa Vandredi pandan weekend, i annan en gran kantite bann bwat take away ki pe ganny antre dan pei semen prosen e menm pandan mwan Out, i annan osi bann gran consignment ki pe antre.  I paret I annan en pe retar lo bann order ki’n ganny plase par sa bann lakonpannyen e sa i pa zis pou bwat take away e sa osi i pou bann sak bann diferan kalite sak par egzanp bann sak papye e lezot prodwir ankor. E nou’n kontinyen donn dimoun lenformasyon nou’n al Market Street parey mon’n dir dan Sanmdi e nou’n fer nou mye pou pas lenformasyon.  Alor ki nou’n sey fer konman Minister Lanvironnman nou konnen sa ki apel en moral obligation, pou fer nou louvraz pou fer sir nou gard Sesel konman en pei ki prop ki en pei ki nou kontan e mon krwar ki nou tou annan en lobligasyon pou nou fer nou mye pou fer sir nou gard sa pei dan la fason ki ete, e menm parey mon’n dir, i bann provizyon ki dan Konstitisyon, ki dir nou ki Seselwa i annan dwa pou reste dan en pei ki prop e ki an bonn sante.  E mon krwar poudir nou tou nou bezwen gard nou konsyans prop ki demen nou pou regard nou zanfan e pti zanfan pou dir zot ki nou’n fer nou mye pou gard sa pei dan pli bon kondisyon ki nou’n kapab. Mersi Mr Deputy Speaker.

 

MR DEPUTY SPEAKER

Mersi Minis. Onorab De Commarmond.

 

HON CHARLES DE COMMARMOND

Mersi Mr Deputy Speaker. Mr Deputy Speaker nou Lasanble i klerman siport sa ban kont plastik. I pa kestyon ki nou pa dakor avek sa ban nou tou nou ti a kontan ki nou pa vwar ditou plastik around parey Minis avek son Minister I anvi.     Me lefe i reste ki Lalwa (SI) (38) 2007 in pase le 30 Zen 2017 e in vin an lefe le 1 Zilyet. Par kont dokiman devan mon National Notification Authority Trade Division kot Minister Finans li in notifye World Trade Organization lo bann proze det pou adopte desizyon ki in ganny pran an Out 2017. E i annan de ka ki I donn 60 zour pou finis a Notifikasyon.  Konmsi ki mon pe sey dir eski Minister dan sa lespri, in santi ki in donn ase letan e santi ki in donn en mechanism pou phase out net sa bann plastik ki dimoun ki annan i reste?  E pou bann prodwir a baz plastik biodegradab pou ranplas sa bann plastik, akoz i annan en problenm dan Trade dan nou pei. Konmsi mon pe demande eski sa lenteraksyon in ganny fer korekteman; par egzanp i annan ase e sifizaman ledikasyon ki’n ganny fer lo nou medya sirtou nou medya Nasyonal-televizyon?  E an menm tan eski Minis i kapab profit ladan pou eksplik nou Lasanble ki plan Minister pou bann lezot prodwir a baz plastik. Tel ki bann yoghurt plastik ki met diri avek disik ladan tousala plastik menm eksetera ki olye zis sa bann pti sak ki ou met komisyon ladan?  Konmsi i annan 2 kalite keksoz e an menm tan ki’n arive avek proze resiklaz papye ki avek bi ranplas plastik osi ki Minister Lanvironnman in lanse plizyer lannen pase dan nou pei?

Mersi.

 

MR DEPUTY SPEAKER

Mersi Onorab. Minis.

 

MINISTER DIDER DOGLEY

Mersi Mr Deputy Speaker. Parey mon’n dir Deputy Speaker avek lansman sa kanpanny an Septanm 2015 savedir mwan prosen i ava ganny li 2 an depi ler nou’n fer sa premye Lanons, poudir nou pe travay lo en tel keksoz. Apre depi ler nou’n lanse nou’n fer miting dan bann sa ki nou apel targeted miting kot nou’n zwenn Chamber of Commerce nou’n zwenn bann Businessman nou’n zwenn bann Boutikye nou’n zwenn sa Retailers Association nou’n zwenn avek CEPS avek bann diferan group zenn ki direkteman i involve dan sa bann zafer.  Lide pou zwenn avek sa bann dimoun se pou nou kapab ganny zot feedback pou kapab ganny en lenformasyon sorti kot zot, pou nou kapab fer en pli bon louvraz.  Akoz i pa’n zanmen nou bi parey nou pe dir pou afekte okenn biznes isi Sesel. Nou ti a voudre pou dir keksoz i pase dan en fason tre soup tre byen kot tou keksoz i mars byen.  Me parey mon’n dir dan le pase se zis pandan sa dernyen 3 mwan ki vreman nou’n konmans ganny enn de dimoun ki vin devan ki dir nou, ‘’ki i reste mon detrwa plastik mon pa pou kapab fini vann ou itiliz sa bann plastik avan le 1 Zilyet.’’ Sa ti ariv pandan sa dernyen 3 mwan. Savedir dimoun ti okouran akoz nou ti’n koz avek zot nou ti’n zwenn zot, me selman mon pa konnen kwa ki ti pe pas dan zot lespri me selman zis lo dernyenrer ki nou ti pe ganny dimoun vin devan pou dir nou zot annan en pti problenm.  An zeneral nou’n sey fer nou mye, me selman problenm ki nou annan la ki nou annan ki dir nou zot annan en pe sa bann plastik ki nou pe sey ban. Apre nou annan e nou bann dimoun ki’n konform avek Lalwa ki annan bann container ki pe arive sa weekend semenn prosen e pandan sa mwan Out. E zot annan bann prodwir ki biodegradab ki en pti pe pli ser. Aprezan la si ou prolonz sa ban plastik problenm ki ou pou gannyen se ki nou fer avek sa bann lot dimoun ki ler nou fer sa bann keksoz, ki zot osi zot pe sey vann ki pou zot i pli ser. Ki pou bann ki deza egziste ?   Se la ki sa pti konfli i arive e nou bezwen asize pou vwar ki mannyer sa problenm.  E menm pandan letan avek regilasyon nou’n zwenn avek Trade vwar avek zot ki mannyer nou pou rezourd sa bann issues. Dezyenm keksoz ki nou pou fer avek bann lezot plastik ki mon’n nonmen ?  Pou le moman sa ki nou’n sey tackle se bann ki pli senp ; bann ki ganny servi zis en fwa ki i ganny zete e i vre ki pou dir bann ki parey yoghurt avek bann lezot prodwir ki ladan zot ganny servi zis en fwa apre zot ganny zete. Me selman i pa menm volume parey en dimoun ki al laboutik ki pou ganny li 5, 6 sak plastik zis pou met konmisyon ladan apre ler i ariv kot lakaz laplipar i al dan son bin epi i al ouswa dan bin ouswa dan lanvironnman.  E nou pa dir ki nou annan solisyon pou tou sa bann problenm plastik, akoz an zeneral i en bann kestyon ki ase konplike pou nou trouv sa bann solisyon direkteman e deswit pou kapab rezourd tou sa bann kalite plastik ki annan dan lanvironnman. Me at least nou le fer sa premye lenpak apre pli tar vwar ki mannyer nou kapab adres lezot. Konsernan recycling paper i annan en lakonpannyen ki ti ganny kree depi en bon pe letan depi an 2005/2006 mon rapel e sa lakonpannyen i ti pe fer recycling paper mon krwar, i ti pe ganny difikilte dapre diskisyon ki mon’n gannyen avek sa dimoun, sa biznes i pou li, i dir mon i ti pe ganny problenm. Akoz pri ki sa bann lezot prodwir i sorti deor i koute ler i ariv Sesel ki pri pou li ler li in prodwir sa bann papye isi pou sey vann, i ganny en kantite difikilte lo kestyon pou li compete lo pri. E sa in fer ki a lafen i pa vreman al an avan avek sa proze ki in sey pran detrwa lannen pase.

 

MR DEPUTY SPEAKER

Ok Minis. Onorab De Commarmond.

 

HON CHARLES DE COMMARMOND

Wi be konmsi prezan ki Minister pe fer dan tou sa de, konmsi sa premye ki mon’n dir i napa plan li ?  Sa bann plastik ki servi zis en fwa osi la parey bann container yoghurt bann plastik, ki servi diri avek disik ladan. Sa i zis en fwa bann plastik ki ou met konmisyon ladan i resikle li i reuse li i servi en fwa, me apre i servi ankor li i servi plizyer fwa.  Ou a met ou pwason ladan ou a met lezot keksoz ladan. Mon pa pe konmsi promot sa mon me mon pe met devan. Be ki plan Minister li pou sa lezot plastik ?

E pou sa zafer papye ki mon pe dir resiklaz i pa’n marse ki plan ki Minister i fer lo la ? Ou konpran mwan ? Ou dir bann plastik biodegradab li i pli ser me i annan en lefe zisteman lo lekonomi pei. Ki mannyer i mitigate sa ? Ou konpran ?  Parkont ou annan lezot plastik en dimoun ki ti’n fer vini avan i ankor la avek li konmsi eski kanmenm i annan sa ban nou pa kapab fleksib dan nou pti pei, pou les ankor en mwan konmsi. Ou mwen les sa bann dimoun, pa en mwan konmsi les li fini servi sa detrwa ki avek li.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mr Deputy Speaker pou sa premye kestyon konsernan sa bann zafer plastik ki Onorab pe ensiste ki nou donn en repons lo la. Nou annan plan pou met an plas en sistenm triyaz. Nou pe travay anler lo son bann detay, nou pa ankor pare avek son plan detaye me selman isi ver Septanm, nou pou annan bann detay lo ki mannyer nou pou met en sistenm triyaz bann defi.  Bann diferan salte ki ganny prodwir isi Sesel an menm tan i annan serten sa bann kalite salte ki nou pou kapab trie e probableman kolekte e fer re-eksporte. Alor, nou napa tou bann detay la konmela akoz nou pa en gran Minister ki annan en kantite dimoun ki pe travay lo diferan keksoz, me selman nou annan bann plan pou kapab redwir la kantite salte ki al lo landfill e divert sa bann salte ki kapab ganny resikle atraver re-eksportasyon.  Nou pa pou fer li isi Sesel akoz isi Sesel sa ki’n demontre tou bann proze resikle in montre poudir pri pou kapab fer sa bann travay i kout bokou pli ser.  Konsernan bann plastik parey Onorab i fek renonmen, problenm se ki i annan menm si nou prolonze la kantite sa bann plastik ki mon’n met okouran, i annan serten lorganizasyon ki annan en tonn plastik. Nou pa pe koz mil ni 5 mil ni 2 mil plastik, nou pe koz bann gran kantite savedir si ou prolonze ou ale i pou pran 2an pou kapab tir sa bann plastik dan sirkilasyon isi Sesel.  Mersi Mr Deputy Speaker.

 

MR DEPUTY SPEAKER

Mersi Minis. Onorab De Commarmond.

 

HON CHARLES DE COMMARMOND

Mr Deputy Speaker be i pa’n reponn mon kestyon lo zafer papye. Ki’n arive ki i pa’n marse be prezan depi 2005 pa’n marse prezan ki arive ? Aprezan sa tonn savedir i annan en ta sa bann plastik sa bann tonn ki pou fer avek prezan pou eksporte lekel ki pou organize pou eksport sa bann zafer ? Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Well pou retourn back lo son papye; mon’n repete, mon repet ankor pou dir papye nou annan plan pou met sa sistenm triyaz an plas kot bann diferan salte pou ganny triye. E enn bann keksoz enn parmi se papye e papye li i ganny kolekte e re-eksporte.  Akoz bann economies of scale konmsi fer resiklaz dan Sesel, i napa ase volume pou fer resiklaz e fer larzan avek. Akoz bann ki ganny enporte sorti dan lezot pei i bokou pli bonmarse ki ou sey prodwir li isi Sesel.

 

MR DEPUTY SPEAKER

Mersi Minis. Onorab Sebastien Pillay.

 

HON SEBASTIEN PILLAY

Mersi Mr Deputy Speaker. Bonn apre midi tou dimoun. Mr Deputy Speaker sa ban ki nou pe koz lo la i osi konsern bann utensils. E devan mwan i annan en (SI) (38) 2017 zisteman i koz lo la.  E biodregradable utensils zot in defini son ekivalan an plastik i enkli bann forks, spoons, knifes, plates, cups, trays made of plastic e polystyrene boxes zot in dekrir li konman take away box used for containing food. Now Mr Deputy Speaker prenan kont ki nou annan nou pa mal Takeaway ki dimoun i fer zot lavi atraver sa biznes e pa mal dimoun ki zot anploye.  Eski ou Minister in pran an konsiderasyon the cost ki sa bann dimoun pou gannyen ler zot bezwen upgrade from servi sa bann bwat polystyrene pou servi sa bann bwat biodegradab ?  Enn.  Dezyenmman ler mon regard Lalwa zot in osi dir ki Minister Finans i pou sa Agency ki pou issue permit pou sa enportater sa bann utensils avek sa. E tou dezyenmman ler mon’n fer letour enn de landrwa e koz avek enn de bann dimoun ki annan Takeaway paret ti napa en alternatif, sirtou an ki konsern bann utensils bann kwiyer e bann keksoz.  E bann Takeaways ti pe ganny dir ki zot pa sipoze pe servi sa. E annefe ler sa regilasyon i vin Lalwa zot pa pou ganny drwa servi li.  So mon kestyon i sa eski zot in osi mazinen ki sa bann dimoun pou bezwen en alternatif pandan letan ki zot pe met sa restriksyon pou ki zot a kapab phase into servi sa zafer biodegradab pou zot kapab servi, akoz zisteman ti napa lo marse pou zot kapab servi me zot ti pe ganny serten presyon e zot in santi zot anba presyon ki zot bezwen retir tou sa zafer plastik e konmans servi bann keksoz biodegradab, ki zisteman parey Lalwa i demande Mr Deputy Speaker. Mersi.

 

MR DEPUTY SPEAKER

Mersi Onorab Pillay. Minis.

 

MINISTER DIDIER DOGLEY

Ok, pri ki bann bwat take away ki fer avek bagasse i apepre R1 R1.50 R1.60 apepre i ganny vann. I vre ler ou konpar li avek styrofoam ki an plastik definitivman i pou bokou pli bon marse. Me ler ou regard son kou an zeneral ki apre ou pou bezwen al netwaye re-anmas sa bann styrofoam ki’n ganny zete partou, ler ou regard global lo pei son kou si oule I en kou ki pa enorm pou endividi peye an plis konpare avek en styrofoam plastik bwat take away konpare avek en bwat bagasse. Konsernan bann utensils, i vre nou ti’n ganny enformen pou dir I annan serten difikilte avek sa bann kwiyer eksetera.  E nou pa ti enforce kont sa bann dimoun akoz sa premye bann semen nou ti pe plizoumwen monitor pou nou vwar ki vreman pe arive akoz i en keksoz ki nouvo nou ti pe anmas lenformasyon; ou bezwen pran en peryod pou ou konpran ki mannyer keksoz i pe ale avan-ler ki ou kapab pran bann desizyon final. Akoz pli gro problenm ki nou ti pe gannyen avan sa, i nou pa ti pe gannyen sa bann feedback ki nou ti pe rode avek sa bann dimoun ti zis apre ban ki’n vin an plas, sa bann dimoun i konmans dir nou: ‘be i pa kapab ganny sa mwan’. E nou, nou pe swiv avek bann lezot lorganizasyon. Nou’n zwenn avek diferan businessman lo ki mannyer ki nou pou kapab ed sa bann dimoun pou kapab annan sa bann prodwir isi Sesel o pli vit posib.

 

MR DEPUTY SPEAKER

Mersi Minis. Onorab Pillay.

 

HON SEBASTIEN PILLAY

Mersi Mr Deputy Speaker. Prenan kont ki sa i en country-wide initiative ki nou pe fer e ki nou le al dan sa direksyon ki mon an faver en proteksyon an faver sa reduce cost dan lonterm term, me eski nou’n pran en lapros kordinen pou fasilit akse oubyen rod bann enportater bann sours alternatif aletranze atraver bann mechanism ki nou annan SIB e lezot, pou ki nou kapab annan bann enportater ki enport sa bann keksoz, pou anmenn dan pei, dan plas les sa bann enportater dan zot menm al source zot diferan landrwa. Akoz nou ti konnen ki nou annan en timeframe ase pros e prenan kont difikilte ki sa bann Takeaways pe gannyen e pa zis Takeaways me nou bezwen osi konsidere bann dimoun kip e fer en fonksyon se zot, laplipar sa bann dimoun i aste sa sak plastik sa kwiyer plastik apre ki i zete. So eski nou’n mazin fer sa e ki mezir zot in pran pou Minister avek Departman Trade avek lazans konsernen pou ki zisteman trouv sa landrwa ki sa bann dimoun i kapab source sa. Akoz mon dir ou Minis bann Takeaways zot konpran nesesite protez lanvironnman, me osi nou pe konsern lavi, livelihood dimoun sanzman dan pattern dimoun akoz en kantite dimoun i fye lo sa midi pou al rod zot manze. So i enportan nou konsider lenpak ki pou annan sosyalman lo nou bann dimoun. Mersi Mr Deputy Speaker.

 

MR DEPUTY SPEAKER

Mersi Onorab. Minis.

 

MINISTER DIDER DOGLEY

Mersi Mr Deputy Speaker. Onorab nou’n parey mon’n eksplike depi an konmansman 2016 nou’n zwenn avek diferan Government Lorganizasyon enkli Departman ki responsab pou Komers e nou’n diskite sa bann zafer. Akoz i annan en direct enplikasyon avek WTO e tou sa. Alor ti annan tou sa bann diskisyon pandan plis ki i an lo sa ban ki ti pe vini. E annefe depi boner lannen pase bann biznes zot ti deza an kontak avek bann diferan fourniser sa bann prodwir. E parey ou ti’n kapab konstate i annan bann Takeaway biznes ki ti deza pe servi sa bann bwat bagasse depi sa bann take away bagasse depi lannen pase depi an 2016 pa sa lannen zot ti deza an kontak pe fer vini sa bann zafer. E nou tan ki’n posib, nou’n fasilit e donn koudmen avek pou rode kote bann kontak i ete kote zot kapab fer vini sa bann keksoz. I vre parey ou’n dir i annan serten dekalaz ki’n arive lo kestyon bann kwiyer avek utensils. I vre pou dir sa i egziste. Me selman la nou’n ganny enformen ki sa bann keksoz ki semen prosen i annan containers ki pe antre plen avek sa bann kalite prodwir. Alor i paret pou dir I annan serten retar dan bann rekomann ouswa bann enportasyon ki ti pe ganny fer par sa bann dimoun ki dan sa biznes.

 

MR DEPUTY SPEAKER

Yes, Onorab Pillay.

 

HON SEBASTIEN PILLAY

Mr Deputy Speaker Lalwa i osi fer provizyon pou ki SBS i sa Lazans ki sertifye sa bann keksoz ki antre dan pei.  Alor vi ki sa bann container pe antre dan pei semen prosen, eski nou pe osi anvizaze ki nou pou annan en lot retar lo sa standardizasyon oubyen sa i pou ganny fer dan en dele letan ki pou permet sa bann biznes kontinyen fonksyonnen dan en fason smoothly.  E mon ti a kontan fer en plead lo lapar sa bann dimoun ki annan sa bann biznes si ou Minister pa kapab organiz li dan en fason pou zwenn avek sa bann biznes san ki zwenn avek entermedyer sa bann biznes, me plito zwenn direkteman avek zot. Mon ti a plito lans en lapel avek bann owners Takeaway ti ava bon zot form en Lasosyasyon kelkonk pou ki I ava annan en lavwa pou kapab koz lo zot behalf sirtou an relasyon avek sa size.  Mersi Mr Deputy Speaker.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mon krwar nou bezwen konpran ki mannyer sa sistenm I marse. Normalman laplipar bann take away bann pti Takeaway pa fer vini sa prodwir zot menm zot depan lo bann gran enportater ki fourni zot avek sa bann prodwir. E sa bann enportater nou pe travay avek zot depi lannen pase. Zot vin kot nou bann zofisye, nou bann zofisye i donn zot bann standar zot vin avek sample, zot pran kontak avek zot bann eksportater an deor Sesel. Zot ganny bann sample zot vin kot lanvironnman e lanvironnman i pran kontak avek SBS e SBS i dir i fer tes lo la, i dir si i an konformite oubyen non.  E apre ki SBS in clear sa prodwir, se la ki zot ale zot al enporte. E an zeneral ziska aprezan sa prosesis in mars byen; akoz parey mon pe dir ou i annan en kantite sa prodwir ki pou dan pei semen prosen. annefe sa weekend la Zedi/Vandredi an montan. Well konsernan bann take away nou’n zwenn zot e definitivman nou pare pou kontinyen zwenn avek zot akoz nou’n fer en miting an 2016 nou ti zwenn zot nou’n diskit avek zot, nou’n zwenn avek bann enportater. Nou’n fer miting avek bann diferan retailers. E nou toultan ouver pou zwenn avek dimoun pou dekouver egzakteman ki mannyer ki nou kapab rezourd okenn problenm ki egziste dan sistenm. Akoz i pa nou bi pou nou kree dan sistenm nou bi se rezourd problenm e fer sir ki i annan en tranzisyon ki ase soup ki arive ler nou pe fer en keksoz parey.

 

MR DEPUTY SPEAKER

Mersi Minis. Onorab Mondon.

 

HON TERENCE MONDON

Mersi Mr Deputy Speaker. Bonn apre midi Minis e tou bann koleg e you dimoun kip e ekout nou. Mon premye kestyon i al koumsa an vi ki nou pe vin en Manm WTO eski Sesel i annan drwa refiz lenportasyon bann prodwir ki deza pe servi plastik konman zot packaging?   Par egzanp bann twisties eksetera. Mon krwar si nou al dan sa laliny nou pou evantyelman reglemant osi bann prodwir ki pe antre dan pei ki pe servi plastik. E mon dezyenm kestyon; mon’n aprann ki ou Minister osi pe sezi bann stok bann bwat take away, ki pa sipoze servi avek sa nouvo regilasyon.  Ki rekour sa bann dimoun I annan ler zot ganny zot stok ki’n ganny sezi? Mersi Mr Speaker.

 

MR DEPUTY SPEAKER

Mersi Onorab Mondon.  Minis.

 

MINISTER DIDIER DOGLEY

Mr Deputy Speaker, konsernan WTO nou ti bezwen travay avek Departman ki annan pou fer avek Komers, pou kapab met sa Lalwa an plas. Annefe depi lannen pase zot in fini annan en draft. E depi an Zanvye sa ti ganny met lo web page WTO dan en fason si okenn pei i annan lobzeksyon zot ti ganny draw obzekte e nou ti pou bezwen fer en bann sanzman ki neseser si ti annan okenn lobzeksyon. E lafen Zen sa lannen Departman Komers ti dir nou ki in clear-up by WTO alor nou kapab a  lavan avek sa ban.  Alor nou’n bezwen swiv prosedir WTO avek sipor Departman ki responsab pou Komers.  Nou pa’n kapab fer li an izolasyon.  Konsernan sezi bwat take away lenformasyon ki mon annan ziska prezan nou pa ankor sezi bwat take away kot Minister Lanvironnman. Akoz nou main bi sete pou monitor, vwar ki pe arive mon konnen plastik ti annan serten komersan ki ti annan de tonn de tonn e borde nou ale vreman ti annan detrwa sezi ki’n ganny fer.  Me konsernan bwat take away sa napa okenn bwat ki’n ganny pran avek okenn dimoun. Mersi Mr Deputy Speaker.

 

MR DEPUTY SPEAKER

Mersi Minis. Onorab Valmont.

 

HON JUDE VALMONT

Mersi Mr Deputy Speaker. Bonn apre midi Minis e tou koleg Onorab.  Minis mon’n swiv ou bann repons i annan en remark ki mon’n fer. Ou’n dir ki i annan serten plastik ki’n deza ganny order ki dan semen e i annan ki deza la me selman ban in fini ganny enpoze mon zis anvi fer en remark. Be sa bann plastik la evantyelman zot pa bann salte zot.  Zis  prezan mon a demann mon kestyon.  Ozordi Mardi Minis e ou’n dir ki weekend i annan ase supply sa bann prodwir alternatif ki pe vini me ozordi Mardi, eski i annan ase supply pou sa bann biznes parey en take away e lezot?   E Minis kote en endividi zot ale ozordi la kot nou pe koze.  En zenn ki fer biznes ice ki  servi plastik kot i ale pou met son ice ladan li? Kote en endividi pou ale pou li aste bin bag?  Dan sa laliny Minis. Mersi bokou.

 

MR DEPUTY SPEAKER

Mersi Onorab. Minis.

 

MINISTER DIDER DOGLEY

Mr Deputy Speaker I annan en lalis exemption ouswa bann eksepsyon lalis plastik. Si ou ti get sa Lalwa byen, i annan tou bann pti biznes par egzanp biznes moulouk ki fer biznes samosa ki fer biznes chips ouswa okenn bann manufacturing sa ki apel bann Cottage Industry, i annan bann plastik ki nou’n tire i pa pe ganny afekte sa. Tou bann plastik ki kler ki ganny servi par egzanp ki ganny servi pou met legim ladan pou met latizann eksetera tousala i pa’n ganny enpakte atraver sa Lalwa. Akoz nou ti okouran pou dir i annan en nesesite pou fer sir poudir bann keksoz ki dimoun i vreman neseser serten group plastik ki pa ganny servi tou lazournen sa nou pou bezwen kit san eksepsyon la ouswa pou pa enkli li dan sa ban, pou fer sir dimoun i annan akse avek sa bann keksoz. Savedir en zenn si I le al aste son ice i pou annan plastik kler pou li met son ice ladan. E menm pou bann lezot par egzanp I annan ISPC ki’n fini fer vini sa bann sak ki biodegradab; mon krwar ou bezwen fer la diferans. I annan plastik ki pa biodegradab parey mon dir, ki ler in ganny prodwir i reste dan lanvironnman pou leternite. Kekfwa i ava kase me selman i pa disparet i reste dan lanvironnman i kontamin lanvironnman. Tandis ki i annan bann sak parey sa bann ki ganny fer avek delwil vezetab ki ganny fer avek starch zot apre 6 mwan zot degrade dan lanvironnman e ou kapab apre met zot lo konpos apre en serten letan, i degrade.  E se sa ki nou pe dir avek dimoun fer nou dir zot ranplas sa lot plastik plizoumwen avek sa enn ki biodegradab. Mersi Mr Deputy Speaker.

 

MR DEPUTY SPEAKER

Mersi Minis. Onorab Valmont.

 

HON JUDE VALMONT

Mersi Mr Deputy Speaker alor Minis ou kapab garanti nou ki ozordi I annan ase supply sa bann prodwir alternativ dan nou pei?  Apre mon ti a kontan demann Minis sa bann plastik ki deza dan pei ki pa pe kapab ganny vann ou donnen pou servi ki mannyer pou ganny dispoze sa?

Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Ok nou annan. Mon kapab donn ou en garanti poudir i annan ase akoz nou ankor pe pas bann lenformasyon avek atraver nou bann staff nou an kontak avek diferan dimoun. E nou pe anmas bann statistik pou gete ki kantite ki annan e an menm tan met dimoun an kontak. Lenformasyon ki nou annan se ki konmansman semenn prosen i pou annan plis ki ase dan nou pei.  Se sa ki nou’n ganny dir e nou pe regard bann diferan lakonpannyen ki’n deza pe ganny order e apre sa i annan plizyer container ki pe arive dan pei. Malerezman i ti devret ariv detrwa semenn davans me i malere pou dir in ariv dan en sityasyon parey ki sa semenn i napa. Me ver Vandredi  mon konpran i pou annan deza lo marse ver bann dimoun ki bezwen e problenm in arive akoz bann order  ti pe arive avek bann dimoun ki ti pe enport sa bann keksoz. E nou konman en Minister, si nou napa sa bann lenformasyon dimoun pa dir nou pou dir i ti annan serten issue. Definitivman nou pou napa lenformasyon pou nou kapab reakte anler lo la,  e pou nou fer le neseser e pou fer sir nou ganny ase dan sistenm. E okenn dimoun ki bezwen lenformasyon i kapab vin vwar nou kot Minister. E nou pe compile nou pe anmas lenformasyon akoz mon pa pe dir dan sa peryod tranzisyon nou pe fer sir nou ganny nou bann lenformasyon korek, akoz i kler pou dir avan pa tou lenformasyon ki ti pe antre. E ler nou’n sa nou kapab vwar kwa ki nou fer avan. E konsernan bann plastik ki lo market i annan serten lakonpannyen ki’n dir nou zot pare pou eksporte pa en problenm. Nou pou bezwen vwar ki kantite ankor ki annan avan ler nou kapab pran en final decision ki nou fer avek en sityasyon parey.  Parey mon pe dir akoz i annan konfli aprezan avek bann ki enport bann lezot kalite plastik avek sa ki vin vann dan sistenm isi Sesel. Mersi Mr Deputy Speaker.

 

MR DEPUTY SPEAKER

Mersi Minis. Ok, Onorab Valmont dernyen. Onorab Valmont.

 

HON JUDE VALMONT

Yes mon ti krwar Onorab Ferrari i siny Valmont. Yes Minis mon ti anvi zis demande parey ou’n nonmen ISPC zot bann gran suppliers akyelman kot bann gran endividi i kapab ale, pou ganny definitivman sa bann prodwir alternatif an se moman ?  Mersi.

 

MR DEPUTY SPEAKER

Minis.

 

MINISTER DIDIER DOGLEY

Mr Deputy Speaker si sa bann dimoun i le pran lenformasyon, zot kapab pran kontak avek Minister Lanvironnman e nou a donn zot lenformasyon lekel ki zot pou al telefonnen nou a donn zot limero telefonn tou sa lorganizasyon ki’n fer vini sa bann soz, e kan zot pou gannyen.  Si fo, nou pa le nonm non tou sort dimoun, me si zot le vini nou a donn zot lenformasyon.

 

MR DEPUTY SPEAKER

Mersi Minis. Onorab Arrisol.

 

HON SANDY ARRISOL

Mersi Mr Deputy Speaker. Bonn apre midi a tous.  Mon ti a kontan demann Minis letan mon pe get sa (SI) (37) 2017 ki’n sorti, mon ti a kontan demann Minis ki mannyer Lalwa i été ozordi, eski pa in fer ki en pti group biznes ki ganny targete an relasyon avek plastik ?

Parske letan mon pe get anba schedule (1) i koz lo bann exemption i donn en lalis egzanpsyon. Letan ou get bann egzanpsyon i annan bann dimoun ki dan biznes, li i profite atraver plastik, akoz li i ganny egzanpsyon atraver sa plastik, me malerezman i pou annan lezot biznes ki li in anrezistre in lev-e debourye parey nou’n dir prezan i vwar li anmare atraver sa menm Lalwa. Parske li pa tonm anba sa  egzanpsyon ki Lalwa pe fer, pour ki plastik pou li tonm avek anba la.  Par egzanp take away enn ki nou tann tou dimoun koz  lo la.  Eski Lalwa i fer-letan mon pe get li la avek bann egzanpsyon mon’n trouve, eski i pa i fer ki serten biznes i profite. Par egzanp sa ki fer delo li son bann plastik delo i kontinyen reste plastik ?  Si mon pe fer vin draze mon kontinyen fer vini draze parey Onorab Mondon in dir mon fer vini Chitato,  Twisties tousala i bann form plastik ki antre dan pei. Eski pa i fer ki en group biznes ki benefisye ?  E sa Takeaway li i pa benefisye me selman li en keksoz ki pe prodwir lokal.  Dezyenmman mon ti anvi demann Minis an vi ki nou pe koz lo take away. Eski bann bwat take away ki biodegradab ki nou’n tann koz lo la, eski i annan resers ki’n ganny prouve pou dir i bon pou nou lasante ?  An vi ki letan nou met manze so ladan oubyen bann manze lasos parey nou dir i perse sa bwat i kraze sa bwat i redwir lo son size e menm parfwa ler ou pas kwiyer sa bwat i vin avek ou kwiyer.  Eski in prouve poudir sa bwat biodegradab ki nou pe koz lo la, i bon pou lasante imen ?

Espesyalman nou ki pe enplimant sa. Mersi bokou.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mon a pran sa dezyenm kestyon premye Mr Deputy Speaker. Nou’n travay tre pre avek Minister Lasante e Minister Lasante ki annan manda pou Lasante imen. E zot osi zot in konsey nou pou fer dimoun arete avek sa styrofoam bwat take away. Akoz i kler poudir i annan bann resers ki’n ganny fer pou de montre pou dir bann reaksyon ki’n arive avek sa kalite bwat ouswa bann kemikal ki annan dan sa bwat i afekte lasante imen. E konsernan bann bwat papye ki fer avek bagasse bann lenformasyon ki nou annan se ki sa bann kalite bwat i bon pou imen. Napa okenn lenformasyon kontrovers ki montre ki i soz e si i annan lenformasyon ki antre pou montre i pa bon, mon krwar byen pou dir Minister Lasante i pou pran bann mezir neseser pou fer dimoun aret servi sa kalite bwat.  Dezyenm keksoz konsernan serten lorganizasyon, i ganny afekte serten pa ganny afekte. Bann dimoun ki ti pe plizoumwen benefisye plis avek bann sak plastik sete bann pti marsan sa ki nou apel Retailers e nou zwenn avek Retailers Association isi zot annan en lasosyasyon e nou’n diskit sa a plizyer repriz avek zot. Epi definitivman tou dimoun ki servi plastik, akoz tou dimoun ti annan laboutik ouswa dan nenport landrwa pou ganny sak pou servi. Sa ti fer li vin konvenyan pou fer zot bann shopping. E nou’n sey fer mannyer pou adres sa zafer e sanmenm sa mon’n dir pou dir annou ranplas-annou pa zis tir enn me annou ranplas li avek bann sak ki biodegradab, akoz li i pou ede pou at least petet i pa pou zoli ler i o-bor semen partou me omwen a lafen dizour li i pou degrade i pou nepli la pou al afekte lanvironnman avek lasante imen lo lonterm. Se sa mezir ki nou’n sey pran e bi ki nou’n sey met devan. Mersi Mr Deputy Speaker.

 

MR DEPUTY SPEAKER

Mersi Minis.  Onorab Aglae.

 

HON EGBERT AGLAE

Mersi Mr Deputy Speaker. Minis letan mon pe ekout bann larepons i kler ki menm si nou’n met sa bann ban lo serten sa bann plastik, nou pou still ankor annan bann plastik keksoz bann container sirtou bann bwat yoghurt parey nou’n dir i pou annan serten liquid container ki pou ankor la ki store nou bann komodite ki nou servi kot lakour. Alor Minis mwan  mon kestyon ki mon anvi poz ou, se en kestyon en pti pe inovativ dan li menm kot si Minister i pe konsider osi pou al en pti pe pli devan, kot i konsern sa bann prodwir ki nou pa pe kapab neseserman resikle, pou nou kapab servi li dan en fason inovativ. Ler mon pe koz ou la, nou annan en Creative Industry isi Sesel, kot serten parey nou annan bann levy ki ganny mete sa larzan osi ava ganny servi pou kapab petet servi sa Creative Industry ava ede pou kapab servi bann prodwir, parey nou vwar ler nou travel dan Lafrik, nou akoz Sesel nou kontan zet tou keksoz laba sa bann keksoz i pe ganny servi pou fer serten prodwir petet kiltirel artistik dan bann diferan keksoz. So why not nou pa met en plan an mars atraver ou Minister avek Trade and Commerce pou kapab devlop en pe sa Lendistri ki kapab i a fer i sa bann salte i pa al direkteman dan landfill pou fer bann konzesyon e kout nou bokou larzan. Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mr Deputy Speaker Minister Lanvironnman i reste ouver avek okenn sizesyon ki Onorab ouswa lezot dimoun i kapab annan, pou regarde ki mannyer nou kapab resikle bann diferan kalite salte ki ganny prodwir isi Sesel. Mersi Mr Deputy Speaker.

 

MR DEPUTY SPEAKER

Mersi Minis. Onorab Afif.

 

HON AHMED AFIF

Mersi Mr Deputy Speaker.  Mon ti a kontan demann Minis si i kapab donn nou en lendikasyon ki lenpak sa mezir pou annan an term ki kantite plastik prezan pou ariv lo landfill e donn nou par egzanp en poursantaz akoz nou pe koup lo bann plastik ki boutikye i donnen, me selman nou pe permet sak ki met lantir e disik eksetera i vini?

Eski nou pe sa kantite plastik dan pei par 50 poursan par 75 poursan oubyen 10 poursan. Mon ti a kontan annan en lendikasyon avek ou ?  E dezyenmman si ou kapab dir mon si dan sa Lalwa pou ban sak plastik i apply dan Erport. Parske mon konnen i annan dan Duty Free par egzanp zot ankor pe donn sak plastik. Me selman lokal dimoun pa annan drwa servi ?  Mersi.

 

MR DEPUTY SPEAKER

Mersi Onorab Afif. Minis.

 

MINISTER DIDIER DOGLEY

Mr Deputy Speaker nou napa en sif egzakt lo ki kantite sak plastik- kantite ki pou redwir. Nou konnen poudir konbyen ki’n antre dan pei pandan bann dernyen lannen, e nou pou bezwen vwar avek bann statistik ki antre e pou nou vwar egzakteman ki lenpak ki pou annan. Me selman nou konnen egzakteman par egzanp en dimoun on average i pe servi 300 sak plastik par lannen, par latet. E petet nou pa realize ler nou al dan laboutik nou pran plizyer sak plastik san ki sa… me si nou arive fer li nou pou vwar en bon rediksyon-sirtou bann ki pa dekonpoze. Pou nepli annan sa kantite, me definitivman nou pou anmas bann statistik avek lenformasyon pou ed nou pou nou pli byen konpran egzakteman si vreman nou pe achieve sa target. Par egzanp an 2007 ler nou ti ban bann flimsy plastic bags nou ti ekspekte pou ki i redwir akoz nou ti pe met 30 microns lo bann plastik ki antre dan pei, pa bann ki pli mens, ki ti pe anvole partou. E malerezman ler nou’n pran konsyan 5an pli tar nou’n vwar pou dir i pa’n neseserman redwir akoz dimoun in repran in reservi menm kantite. Akoz sa pattern ki en dimoun i pran sa plastik i met keksoz ladan le moman ki in fini itilize i zete, i kontinyen. I pa en keksoz ki sanz, akoz i bezwen sanz sa behavior sa fason fer.  Se la ki ou ganny sa vre sanzman lo la kantite plastik ki en dimoun i servi. Akoz plastik i preski free e i tre bon marse pou dimoun kontinyen pran li an gran kantite. Dezyenm keksoz se konsernan Erport sa i exempted anler lo lalis.  En touris nou pa pou al aras en pti Seselwa sorti aletranze ki’n sorti avek en sak pou aras li en sak plastik. I pa en keksoz nou annan plan ou fer avek sa.

 

MR DEPUTY SPEAKER

Mersi Minis. Onorab Ghislain.

 

HON AHMED AFIF

Zis en pti klarifikasyon si ou pa mind ?

 

MR DEPUTY SPEAKER

Ok Onorab Afif.

 

HON AHMED AFIF

Mon pa pe koz lo touris ki pe antre avek en in fini aste son keksoz depi deor. Mon pe koz sa enn ki’n fini pas imigrasyon prezan i antre dan Duty Free i ganny en sak plastik avek dizon STC dan Duty Free. I donn li en plastik ordiner, eski sa zot permet ?

 

MR DEPUTY SPEAKER

Minis.

 

MINISTER DIDIER DOGLEY

I exempted. Okenn dimoun ki sorti an deor ouswa ki pe antre Sesel ki vin avek en sak, nou pou napa dimoun Lanvironnman pou al asize lo erport pou tyeke si en dimoun i pe antre avek en sak. Si ou regard Lalwa i deal avek trading i deal avek trade of bags ki en dimoun i vin avek en sak ouswa soz.  I difisil pou deal avek trade of bags ki en dimoun i vin avek en sak ouswa soz.  I pou difisil pou ou aste en sak sa kalite sak si en ban i an plas isi Sesel osi in the first place.

 

MR DEPUTY SPEAKER

Onorab Ghislain.

 

HON CHANTAL GHISLAIN

Mersi Mr Deputy Speaker. Bonn apre midi tou dimoun. Mr Deputy Speaker eski Minis i kapab dir avek sa Lasanble avek lefe ki i annan 6an pase ti annan en lakonpannyen ki ti ganny en bout later lo Providence Industrial Estate, pou li kapab fer anmas en papye kartron and all pou kapab transform sa dan lezot prodwir. Par egzanp zot ti pe plak pou dizef fer bann bwat take aways and everything ; eski Minis fini… ok non be mon pe… be mon bezwen arete pou zot fini koze pou Minis tann byen mon kestyon ok ?

 

MR DEPUTY SPEAKER

Order ! Order ! Order ! Order ! Onorab Arrisol Order ! Kontinyen Onorab Ghislain.

 

HON CHANTAL GHISLAIN

Eski Minis i kapab dir avek sa Lasanble si sa lakonpannyen in aret fer sa prodwir ?  E ki arive dizon sa later ki i ti dir i ti pou fer sa prodwir lo la in fer son konstriksyon e si pa pe ede pou fer ladan ki pou arive aprezan ?

Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mersi Mr Deputy Speaker parey mon’n dir wi i annan sa dimoun ki mon okouran ki’n ganny sa propriyete pou fer sa aktivite e parey mon’n dir, sa dimoun kanmenm in envesti a lafen in trouv li dan en kantite difikilte pou compete avek bann lezot prodwir ki ganny enporte sorti deor ki antre dan Sesel.  E ki definitivman son biznes pa pe marse ki mannyer i ti devret fonksyonnen. Konsernan si Gouvernman pou kontinyen les li operate lo sa later, akoz i annan bann investment ki’n ganny fer ; in bati en batiman in anmenn lekipman eksetera, sa i pou bezwen ganny diskite avek MLUH Minister ki responsab pou Later avek Lenfrastriktir. Mersi.

 

MR DEPUTY SPEAKER

Mersi Minis. Onorab Larue.

 

HON FLORY LARUE

Bonn apre midi Minis letan mon atann Mr Onorab Afif i koz lo Duty Free mon krwar STC ki manage sa magazen dan Arrival e mon krwar kekfwa ou kapab klarifye si STC airside i pou kontinyen servi plastik ?  E lefe ki nou pe koz proteksyon nou lanvironnman i pe sey enplimant sa Lalwa e nou’n koz lo triyaz lo sorting e la nou’n koz lo papye ; ki plan Minister pou sort glass akoz nou annan sa dumpsite Anse Royale e mon ti fer en vizit laba le 17 Me 2017 e i ti fermen. Son baro ti annan en padlock lo la e rouye. Eski sa i en sant pou triyaz bann boutey an ver ? E akoz i pa pe fonksyonnen ? E si i pe fonksyonnen ki si sa ki pe ganny fer laba ?

Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Konsernan STC nou annan Mr Deputy Speaker nou annan en kantite diskisyon avek STC e nou’n annan en kantite korperasyon avek zot. In fact STC in annan en kantite sak mon kapab montre ou ki zot enporte ki dimoun i servi bann sak ki reusable, e zot pe travay pou zot fer vini bann sak ki biodegradab pou sak plastik ki biodegradab pou zot donn zot bann kliyan. E mon krwar mon panse zot pou servi sa osi dan Duty Free shop.  Konsernan ver bann boutey kase, nou pe travay lo en plan avek Minister Finans pou nou regarde ki mannyer pou nou apply menm sistenm ki nou’n fer avek PET avek Can pou ki nou annan en levy lo la. Apre ki nou anmas bann boutey apre ki nou kapab kraze, e servi sa bann ver par egzanp pou kouver bann salte akoz i disab, akoz i a lafen dizour ler ou’n kraze i retourn parey disab ou kapab servi li pou kouver dese ; ouswa pou fer lezot keksoz avek. Konsernan Anse Royale i sel landfill ki nou annan ki nou servi pou inert waste e pei i bezwen annan en landfill ki ou met inert waste ladan ; savedir bann salte ki pa dekonpoze. Alor nou ti a voudre gard li spesifikman pou sa fonksyon. Mersi Mr Deputy Speaker.

 

MR DEPUTY SPEAKER

Mersi Minis.  Onorab Larue.

 

HON FLORY LARUE

Sa proze ki ou pe koz lo la pou bann triyaz ver. Eski sa zot annan plan fer li en proze enternasyonal ouswa en proze prive e ki time line aplikasyon pou sa servis ?

Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Nou plan sete pou konmanse le 1 Zanvye lannen prosen ; me selman i pou depan lo bann diskisyon ki nou pou fer isi ki lavites bann keksoz i ale. E ler nou ganny lenformasyon nou a gete ki pou fer. Bokou bann travay recycling pa Gouvernman ki fer. Gouvernman nou i siport sa bann aktivite parey ; par egzanp ozordi si ou annan PET ouswa Can pa Gouvernman ki direkteman enplike me i annan bann partner prive ki antre dan sa biznes i ganny tender e sa bann partner se zot ki fer sa bann aktivite. E probableman sanmenm sa model ki nou pou servi. Mersi Mr Deputy Speaker.

 

MR DEPUTY SPEAKER

Mersi Minis. Onorab Larue.

 

HON FLORY LARUE

Eski sa prosesis tender i ouver ? E si i pa ankor ouver,  kan ki i pou ouver, akoz nou pe koz resiklaz i part en proze enternasyonal ki plan ou Minister pou fer recycling pou en par nou sistenm. Savedir nou annan en timing lo kan nou pou enplimant sa si nou pou recycling ver ?

 

MR DEPUTY SPEAKER

Minis.

 

MINISTER DIDIER DOGLEY

Mr Deputy Speaker parey nou’n vwar sa bann zafer recycling avek kontrol bann zafer salte, i en keksoz ase konplike. Alor i demann en pe letan pou fer bann resers anmas bann lenformasyon planifye li byen apre met li devan.  E nou pe travay lo bann nou’n fer bann resers nou’n anmas en bon pe lenformasyon aprezan nou pe travay lo ki mannyer nou pou al an avan avek nou plan. E disi mon mazinen ver lafen lannen nou pou dan en pli bon pozisyon pou donn Lasanble plis lenformasyon lo sa bann travay recycling ki nou pou fer. Mersi Mr Deputy Speaker.

 

MR DEPUTY SPEAKER

Mersi Minis. Onorab  Steve Pillay.

 

HON STEPHEN PILLAY

Mersi Mr Deputy Speaker. Mr Deputy Speaker mon kestyon i plito baze lo tou dimoun in koz lo plastik avek bann bwat take away. (SI) (37) i koz ekszanpsyon lo plastik .  (SI) (38)  napa egzanpsyon lo bann polystyrene bwat. Ki pou arive avek sa bann Businessman bann manufacturers lo bann trays lo bann frozen food ladan avek sa polystyrene ki pe sanze parey Mr Onorab De Commarmond en extension akoz vi ki napa egzanpsyon, zot deza annan masin ki zot in aste pou fer packaging avek sa polystyrene trays ki pou arive avek zot masin avek tou keksoz zot annan la an men si en egzanpsyon pa’n mete pou lo kote polystyrene. Akoz silvouple ?  Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mr Deputy Speaker mon pe regard sa definisyon. An prensip sa Lalwa i aplik zis pou bann take away boxes ki ganny servi pou servi dimoun manze ladan. Nou pa pe koz bann trays avek bann lezot keksoz kontinyen avek soz.  Me selman nou annan sa definisyon me definisyon i aplik spesifikman pou bann take away boxes.

 

MR DEPUTY SPEAKER

Mersi Minis. Onorab William.

 

HON WAVEN WILLIAM

Mersi Mr Deputy Speaker. Mr Deputy Speaker mon ekout Minis avek latansyon mon anvi demann Minis baze lo son larepons ki zot annan lo plizyer kestyon pou en plan konkret. Eski Minis i kapab dir avek sa Lasanble si i annan vreman en plan konpreansiv ki son Minister pe travay lo la ? E dezyenmman lefe ki nou konnen poudir kou lavi dan Sesel i vreman o e nou annan en pe problenm avek nou biznes ki pe servi sa bann materyo. Eski Minis i kapab dir nou si dan sa lapros konpreansiv i pe konsider petet serten sibvansyonn, akoz si non i annan en loportinite la e   nou kapab vwar koud lavi i monte ankor plis. Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mr Deputy Speaker konsernan bann zafer waste, definitivman nou annan en plan konpreansiv ki nou pe travay lo la. Nou annan bann finansman ki nou pou gannyen tre byento avek Linyon Eropeen ki nou pou fer en travay tre detaye lo ki mannyer nou pou manage waste dan le fitir.  Nou menm nou envestir finansman pou fer bann resers nou’n fer plizyer resers dan bann dernyen lannen la kot nou annan en kantite lenformasyon konpare avek avan.  Alor wi nou pe travay lo en plan konpreansiv e le moman ki nou ganny finansman nou ava anmenn osi bann eksper pou donn nou en koudmen pou nou kapab fer at least en plan pou nou kapab al devan avek. Mersi Mr Deputy Speaker.

 

MR DEPUTY SPEAKER

Mersi Minis. Onorab William.

 

HON WAVEN WILLIAM

Mersi Mr Deputy Speaker. Mr Deputy Speaker i pa’n reponn mon dezyenm parti kestyon kot i konsern sibvansyon. Akoz par egzanp in dir poudir i annan detrwa enportater ki pe fer vini. Eski i annan en evalyasyon en kalkilasyon pou vwar kantite demann ki nou annan, pou fer sir ki sa bann pri ki sa bann prodwir pou ganny vann i pa afekte further pou  lo logmantasyon dan pri.  Mersi.

 

MR DEPUTY SPEAKER

Minis.

 

MINISTER DIDIER DOGLEY

Mersi Mr Deputy Speaker mon’n konpran sa kestyon nou ava travay avek Minister Finans akoz zot ki deal avek tou sa ki annan pou fer avek sibvansyon pou vwar ki mannyer ki nou kapab adres en keksoz parey. Mersi Mr Deputy Speaker.  Annefe sorry annefe i deza annan vat exemption lo tou bann prodwir ki biodegradab.  Zot napa tax lo la.  Mersi Mr Deputy Speaker.

 

MR DEPUTY SPEAKER

Mersi Minis.  Onorab Ferrari.

 

HON JEAN-FRANCOIS FERRARI

Mersi Mr Deputy Speaker. Mr Deputy Speaker mon ti a kontan demann Minis an vi ki ler in reponn Mr, Onorab Afif i pa’n kapab dir nou ki bann targets ki son Minister i annan an term rediksyon la kantite plastik ki ganny rezete dan nou lekonomi.  I fer mwan en pe enkyet, akoz mon mazinen pou dir kekfwa sa Lalwa ki nou pe fer la i zis bann gimmick bann plezir Green Lobbies dan lemonn pou dir nou pe fer en ta keksoz. Me selman nou pa pe fer.  I fer mon en pe enkyet mwan.  Mon ti a kontan demann Minis i reasir mwan ki i pa zis en gimmick, me i annan bann pou annan bann lefe positif konkret ok ?   So sa i mon ti a kontan ki Minis i reasir mwan lo la. Mon dezyenm kestyon se eski vi ki Sesel pou reste for the foreseeable future en pei ki servi en kantite plastik ; akoz bann wrappings eksetera e bann egzanpsyon ki an plas ; l’areoport-dan permisyon pou antre avek dan Erport, sa i fer nou pei pou reste en pei ki konsonm en kantite plastik. Eski parler pou gete menm parey zot in fer pou pet si napa en posibilite, pou ankouraz bann dimoun ki anvi pou zot kapab anmas plastik par kilo.  Akoz nou bezwen rod bann solisyon a lonterm akoz nou’n vwar pou dir plastik pou la li. I pou la avek nou pou ankor en pe lannen nou pa konnen konbyen. Amwen ki  Minis i kapab dir nou  zot annan en plan dan lavenir-dan 10an, dan 15an, dan 20 an.  Me pou le moman Minis ou pa’n dir nou sa e mon ti a kontan si ou kapab si ou Minister in konsider sa posibilite, akoz in marse pou bann PET- in  marse-in-vreman marse. E mon felisit bann dimoun ki pe fer en vreman bon travay dan nou pei pou kit nou pei prop. Si i pa kapab ganny extended napa en Scheme ki kapab ganny met an plas pou anmas plastik par kilo e pou ganny en rekonpans finansyel avek en Lazans oubyen avek en prive. Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mersi Mr Deputy Speaker konsernan poursantaz plastik letid ki nou’n fer in montre nou ki i annan apepre 33poursan salte ki annan lo landfill i plastik ki enorm. I en kantite. I pe kontinyen ogmante. Kanmenm pa tou sa ki sak plastik i bann diferan tip plastik ouswa kategori plastik ki al anler lo landfill e sak plastik i enn parmi bann ki kontribye anver sa 33poursan. E nou, nou  plan se global se redwir la kantite salte ki al anler lo landfill .  Akoz mon ti la resaman nou ti diskite lo sa zafer landfill e ki mannyer landfill pe plen sitan vit. E enn bann plan ki Gouvernman i annan ki sa Minister i annan Minister Lanvironnman i annan, se pou redwir la kantite salte lo landfill. E parey mon’n dir prevansyon i pli bon ki apre ou al rod en medikaman pou tret sa problenm. Si nou kapab redwir sak plastik ki antre dan pei e nou kapab ranplas li avek bann ki biodegradab, i definitivman mye ki nou les plastik kontinyen antre apre pou nou al rod li dan sak bush dan sak rigol dan sak larivyer lo sak lans ki in ganny zete e partou pou nou anmennen pou al vann par kilo. Konsernan recycle plastik bann ki nou pa kapab minimize, ki pou kontinyen annan mon dakor avek ou pou kontinyen annan plastik dan Sesel, be sa si oule pou bann ki nou pa kapab avoid i pou bezwen antre.  Alor ler i antre, me nou pe travay lo en plan pou nou fer si oule en sant kot pou kolekte sa bann zafer si oule nou pe travay lo en plan kot nou pou tender apre pou nou rod lenvestiser pou met an plas en sant kot pou kolekte bann diferan kalite salte ; tri zot apre re-eksporte dan bann pei parey dan Lenn Lasinn ki annan bann sistenm resiklaz ki vreman avanse.  Akoz pou fer resiklaz isi Sesel definitivman ou pou trouv ou dan menm problenm avek sa msye zot ti pe koz lo la avek sa zafer papye.  Alor sa i konsernan ou premye kestyon. Well i dezyenm kestyon. Mersi Mr Deputy Speaker.

 

MR DEPUTY SPEAKER

Mersi Minis. Onorab Simon Gill.

 

HON SIMON GILL

Mersi Mr Speaker. Bonn apre midi tou dimoun.  Mr Speaker mon ti le demann Minis, si i realize pou dir sa desizyon ki in pran in kree plizyer problenm. Nou pa pou al dan bann detay sa bann problenm me, nou kontan Sesel nou kontan sa lanvironnman nou pa le nou lanvironnman i ganny afekte. Be dan sa konteks, baze lo en realite fer fas avek ki garanti Minis i le donn bann businessman la deor ki trouv zot avek zot kargezon plastik ki zot pa pe kapab fer tranzaksyon avek ?   Zot pe respekte sa Lalwa ki’n antre an fors ; ki garanti Minis ou annan pou sa bann dimoun avek zot kargezon plastik ki en desizyon pou ganny pran pou ki zot pa santi zot ganny afekte avek zot kargezon plastik ki zot pa ankor kapab fini dispose li ?   Sa premye kestyon. Dezyenm kestyon eski Minis pou satisfe pou tou bann dimoun dan ou Minister in angaz zot, pou fer sir ki sa crisis ki la ki Komite Biznes pe fer fas avek, bann boutikye pe fer fas avek, zot in fer zot travay byen. Malgre ou dir 2015 ou’n fer ou bann aksyon piblisiter pou fer sir bann dimoun i prepar zot atan. Eski ou satisfe ?  Par lefe ki nou pe fer fas avek en kriz dan nou lanmen, konman en pei e komite biznes pe kriy lasasen, dimoun pe saroy par trwa kat senk komodite dan son lanmen pe sorti dan laboutik avek. Eski ou Minister pou pare pou pran en mezir e rezourd sa problenm imedyatman Minis silvouple ?   Mersi bokou.

 

MR DEPUTY SPEAKER

Mersi Onorab Simon Gill. Minis.

 

MINISTER DIDIER DOGLEY

Mr Deputy Speaker mon tann Onorab Gill. Nou pou zwenn demen bomaten in fact Chamber of Commerce ; nou ava zwenn avek bann businessman pou nou mye konpran ki issues ki annan e apre ki nou’n zwenn zot nou ava pran en desizyon lo ki mannyer nou pou al forward. Mersi Mr Deputy Speaker.

 

MR DEPUTY SPEAKER

Mersi Minis. Onorab Ramkalawan.

 

HON WAVEL RAMKALAWAN

Mersi bokou Mr Deputy Speaker. Mr Deputy Speaker mon anvi demann Minis egzakteman ki zot Polisi ? Parske mon pa ganny en konpran ki Polisi zot Polisi i kont plastik akoz i appel plastik akoz i pa degradab. Eski zot Polisi i kont plastik akoz i al dan delo sale ? Eski zot Polisi i kont plastik akoz i fer bokou salte ?  Ki zot Polisi ?  Rezon  mon  pe  demann sa, se ki dan ou egzanpsyon napa problenm si nou fer en sak plastik apre eksporte. Si nou nobou fer en faktori plastik  prodwir de milyon tonn plastik, eksporte napa problenm. Me selman si en sak plastik i sa bann dimoun ki annan detrwa sak plastik ankor kot zot-ban ! Nou koz lo lanvironnman. Be mon ti kontan demann Minis eski ou realize ki Nasyon Ini en rapor Nasyon Ini date le 17 Novanm 2015 i fer kler dan en rapor ki son Tit se ;  Biodegradable Plastics and Marine Litter-Misconceptions, Concerns and Impact on Marine Environnment, i dir klerman ki poudir sa bann sak ki nou pe apel  biodegradab dan lanmer pa meet sa bann kondisyon pou li degrade. Alors i reste plastik.  Alor si nou pe koz an term nou lanvironnman-marin spesyalman i pa pou annan okenn lefe.  E i dir ki sa bann sak plastik parfwa sa bann biodegradab parfwa i bezwen tanperatir ziska 50 degre pou li dezentegre e alor pou napa nanryen. Mr Speaker mon retourn ankor lo sa ki zot Polisi ?  Mon kontan an menm tan osi aprann, ki poudir ozordi ki Minister Lasante  i dir avek nou ki sa bann bwat take away, styrofoam pa bon pou nou lasante.  Alor nou pe rod Kanser, nou pe rod isi akoz Minister Lasante pandan tou sa bann lannen pa dir nou ki degre afekte nou lasante in afekte nou ?  Nou pe koz nou pa dakor ek sak plastik ankor en fwa i vin sa konfizyon ki mwan mon vwar, lo Erport ou kapab aste ou komisyon dan en sak plastik akoz ou pe al dan en lot pei !  Savedir ou pa vreman annan en problenm e ou pou kapab rantre dan pei avek ou sak plastik !  Me sa bann sak plastik la i pa menm lefe ?  I pa pou annan menm lefe ?  Letan mon pe get (SI) (38) i dir avek ou dezormen nou pou annan en ban lo polystyrene boxes.  Eski nou pe dir sa bann bwat ki nou met pwason ladan la  ban konplet ?  Nou pa pou ganny drwa pran sa bann bwat met ice ladan pou anvoy bann lavyann La Digue, Praslin ensidswit ?  Konmsi nou pou al annan en lot ban ? E bomaten Minis pe dir avek nou bann fason pou fer li ensidswit-konmsi ki mannyer nou pu ranplas sa ?  E nou Kreol nou’n ariv en staz nou pti pwason dan bazar, letan nou aste pou nou-e an plis ki sa annou pa osi bliye ki poudir plastik la nou pe koz zis sak plastik konmsi sak plastik- e letan mon pas kot bann dustbin mon vwar kivet plastik ki’n kase, mon trouv seo plastik ki’n kase ; mon trouv tou sa bann-tou zouzou plastik ki dan soz ensidswit.  Mr Speaker, I’m sorry me-I mean mon pa vwar egzakteman e mon ti ava kontan Minis i eksplike egzakteman ki zot Polisi.  Eski senpleman i annan detrwa group ki’n konsernen ek lanvironnman ki’n lev sa size e ki ozordi aprezan nou bezwen zis swiv sa ?  Parski  Mr Deputy Speaker e mwan si mon pa ganny en larepons kler, mon bezwen dir avek Minis parski son 2 (SI) i ankor la devan nou-napa 90 zour.  Si mon pa ganny en larepons kler mon riske anmenn en Mosyon  pou squash sa SI (37) avek (38).  Parske la pou le moman Minister Lanvironnman pa ankor kapab dir nou, kwa egzakteman ki son Polisi akoz i pe ban sak plastik, akoz i annan tro bokou kontradiksyon.  Mersi bokou Mr Speaker.

 

MR DEPUTY SPEAKER

Mersi Onorab.  Minis.

 

MINISTER DIDIER DOGLEY

Mr Deputy Speaker mon krwar Polisi Gouvernman  i kler, konsernan plastik ouswa salte ki an zeneral. Nou Polisi se premyerman  redwir lakantite salte ki ganny prodwir dan Sesel-minimiz li dan bann ka kot i annan bann ki kapab ganny resikle e ganny reservi ki nou promot bann mezir ouswa bann teknolozi ki siport sa bann kalite aktivite, pou fer sir poudir sa kalite salte i ganny resikle ouswa si oule sa prodwi i ganny reservi.  E parey mon’n eksplike, plastik an zeneral sirtou sak plastik,  sirtou sa ki nou apel bann ki ganny servi zis en fwa apre i ganny zete ; tou sa  bann prodwi salte  ki ganny itilize zis en fwa parey sak plastik ou ava aste li la pli tar tanto ou 3 kar ditan i pe ganny zete ouswa demen bomaten.  Tandis ki e zouzou en  manrmay 3 kar ditan unless ki son kalite  i vreman pa bon  ki en zanfan pu zwen en bon pe letan ava ler ki i ganny zete.   En seo-en kivet si son kalite i bon, en dimoun pou kontinyen servi li pandan plizyer man en petet lannen avan-ler ki i  ganny zete.  Me sak plastik ; ver plastik bann lasyet plastik e bann keksoz ki nou’n  nonmen  i bann keksoz ki ganny servi en fwa.  Apre en fwa i pa ganny servi ankor e definitivman i al dan sistenm kot i al polye lanvironnman ; i al polye lanmer ouswa i al polye nou landfill.  E se  sa  ki nou, nou pe pran bann mezir pu fer sir poudir nou minimiz lenpak pou bann keksoz parey  i annan an ler lo nou lanvironnman.  Plastik ki ganny servi plizyer fwa lo lonterm parey tiyo ; parey nou’n dir parey Onorab Ferrari in mansyonnen pli boner-i annan plizyer kalite plastik ki ganny servi pou diferan purpose.  Alor vann ki pe ganny servi lo long term ki pe ganny servi a plizyer repriz, pou nou sa nou napa problenm avek.  Bann ki ganny servi en fwa apre i ganny zete ki reste dan lanatir, pou leternite akoz i pa dekonpoze ; ouswa si i dekonpoze i zis kas kase  i vin fen me solman nou pa vwar li me solman i la, se sa ki nou pe dir be si nou kontinyen koumsa, nou osi en bo zour nou pou parey Thailand-nou pou parey Bali kot lanmer i plen avek sa kalite salte.  E nou avan-ler ki Sesel i ganny kontaminen ; avan-ler ki i vin polye, nou dir annou paran bann pou nou en fwa pou tou adres plastik ki ganny zete tou toulezour dan nou lanvironnman. Mersi Mr Deputy Speaker.

 

MR DEPUTY SPEAKER

Mersi Minis. Onorab Ramkalawan.

 

HON WAVEL RAMKALAWAN

Mr Deputy Speaker mon anvi zis dir avek Minis sa ki son statement ki nou lanmer pou vin parey Bali avek Endonezi. Napa nanryen ki pou sanze avek plastik biodegradab ; parey mon dir rapor syantifik i montre ki bann sak biodegradab dan lanmer i napa i pa breakdown. Alors ou pou ranpli ou lanmer I mean ou pe tir plastik ou pe met li avek biodegradab lenpak i menm parey. E mon konpran problenm salte. Me selman an menm tan osi nou tou nou konnen en sak plastik, i pa ganny en sak plastik ki met konmisyon ladan, i pa ganny servi zis en fwa.  Nou tou ki annan lakour letan nou’n tir nou konmisyon dan sak plastik nou ploy li I’m sure tou Manm Onorab ki la dan Lasanble e mazorite dimoun ki ekout nou. Nou annan en tirwar oubyen en lot sak plastik ki annan sak plastik ladan. E dousman, dousman sa bann sak plastik i ganny servi pou li si ou annan en keksoz pou si ou annan en keksoz pou anmenn kot ou vwazen, ou met dan sa sak plastik ou donn ou vwazen ou vwazen i anmas sa sak plastik tou i ploye i met dan soz. Sak plastik i kit lakour letan i ganny servi pou li met lezot salte se la prezan ki al lo landfill. Sa bann zafer sak plastik i ganny servi ofet Mr Deputy Speaker mon anvi met devan Minis ki pou dir son bann egzanpsyon -mon krwar pou dir enn bann Manm ki’n dir. Son bann egzanpsyon sa se bann plastik ki ganny servi zis en fwa. Ou ava aste lavyann ou met li dan sa sak plastik blan sa sak plastik blan li i al direk dan dustbin. Ou aste en pake chips bannann ou whatever sa sak plastik i al direk dan dustbin.  Tandis ki sak plastik ki zot pe met ban lo la sa bann sak plastik spesyalman sa bann sak plastik ki pli epe e la Mr Deputy Speaker mon anvi menm dir ki menm letan nou vwayaze si nou al dan laboutik kot sak plastik i en pe pli epe, letan nou fini pakte nou valiz anmezir nou pe anpakte nou valiz nou anmas tou sa bann sak plastik. Se sa nou realite e se sa ki mon pe dir ankor enn fwa Mr Deputy Speaker mon pa pe ganny en konpran Polisi Minister Lasante parske sa zafer plastik i servi zis en fwa i pa stand. E mon krwar sa ki mon pe dir-I mean i reprezant la realite ki nou pas ladan. Konbyen fwa nou pase nou vrwar dimoun pe pas avek sak Duty Free Dubai oubyen pe pase avek sak Mark and Spenser oubyen en lot kalite sak. Me Mr Deputy Speaker mon still pa ganny en konpran e fodre mon demann Lasanble ki zot panse lo sa 2 (SI). Parske sa ki pe dir nou sa ki Minis pe dir nou avek son realite i de diferan keksoz. Pou bann Environment Lobbies mon konpran zot, i fantastik, me selman son realite i en lot zafer. Mersi bokou.

 

MR DEPUTY SPEAKER

Mersi Onorab.  Minis si oule fer komanter lo komanter Onorab Leader Lopozisyon.

 

MINISTER DIDIER DOGLEY

Mr Deputy Speaker zis en pwen mon pa’n vwar sa rapor ki Lider Lopozisyon ti pe fer referans avek bann sak plastik ki pa biodegradab dan lanmer. Annefe mon konnen ki i annan serten konfizyon ki’n ganny kre konsernan sak plastik ki biodegradab. I annan bann ki ganny fer avek fossil fuel ki sipoze biodegradab ki pa biodegradab. Apre i annan bann ki ganny fer avek delwil vezetal oubyen avek starch ki biodegradab selman mon pa konnen lekel ant sa 2 ki sa letid pe fer referans avek. E mon bezwen vwar pou mon konnen egzakteman ki i pe koz lo la.

 

MR DEPUTY SPEAKER

Mersi Minis.

 

HON WAVEL RAMKALAWAN

Minis Tit sa rapor en rapor ki’n ganny fer par UN i son tit se Biodegradable Plastics and Marine Litter-Misconceptions Concerns and Impacts on Marine Environments. I ti date le 17 Novanm 2015. Mersi bokou.

 

MR DEPUTY SPEAKER

Mersi Onorab. Onorab De Commarmond dernyen kestyon.

 

HON CHARLES DE COMMARMOND

Mersi Mr Deputy Speaker mon remersi Leader Lopozisyon lo sa pwen ki’n fer sorti. Zisteman mon’n note la pou mon remet sa devan Minis. E se egzakteman sa sityasyon e avek sa mon krwar ki Minis i bezwen konfirm avek nou Lasanble ki i pe al revwar sa ban avek bann Lotorite konsernen. E Minis i bezwen seryezman konsider sa ki nou Lasanble la i pronons li lo la.  E nou oule anvoy en mesaz for avek li osi pou revwar sa bann keksoz akoz i être sa ki nou pe dir. E an menm tan Mr Deputy Speaker eski Minis i kapab osi konfirm avek nou Lasanble dir nou Lasanble plito ki progranm Lanvironnman medyatize tre for pou kontinyen pou konsyantiz dimoun nou popilasyon lo servi bann alternativ, apar bann sak plastik sirtou a baz latwal, a baz papye ensidswit konmsi e triyaz salte konmsi ki sa ki pe anpes zot promot sa bann kalite litilizasyon alternativ lo sak plastik ? E parey mon’n dir e en lot keksoz se ki ou Polisi Minister lo ou bann prodwir ki serten marsan i fer vini serten enportater i fer vini i ganny fer deor a baz plastik Spesifically for Seychelles ki zot bann Polisi lo la ?   Mon konnen  manke i pa konnen ; pa konn sa bann prodwir.  Me osi  eski Minis i kapab dir nou, konbyen fwa sa ban ki’n anmenn devan nou la devan nou Lasanble, konbyen fwa avan sa Polisi in ganny delay ?   Sa ban in ganny delay li ?   E ki i pa kapab travay lo la ankor pou konfirm avek nou Lasanble ki zot kapab revwar sa konmsi ki nou popilasyon. Nou tou nou konsyan nou lanvironnman me selman annou fer keksoz ki byen. Mersi.

 

MR DEPUTY SPEAKER

Mersi Onorab. Minis.

 

MINISTER DIDIER DOGLEY

Mr Deputy Speaker si fodre fer konsiltasyon-parey mon’n dir avan nou a rekonmans konsiltasyon akoz lenformasyon ki nou ti gannyen avan atraver bann konsiltasyon ki nou’n fer, i pa ti pe donn nou sa kalite lenpresyon. Akoz nou’n zwenn avek SCCI nou’n zwenn avek Retailers Association, nou’n zwenn avek diferan group dimoun bann Takeaway nou’n fer miting Piblik me nou pa ti pe gannyen sa kalite lenpresyon pou dir i annan sa issues, ki parey la pe ganny fer resorti la anndan. Alor nou ava rezwenn ankor avek sa bann dimoun nou ava rekonmans nou konsiltasyon, e dan en fason ki nou a kapab travay lo en Lalwa ki akseptab pou tou dimoun e ki nou kapab al devan avek sa Lalwa. Konsernan bann Polisi konsernan bann diferan salte, parey mon pe dir nou deza annan detrwa travay ki nou pe fer ki nou fer sir nou met an plas bann sistenm triyaz e resikle isi Sesel kot salte i konsernen. Konsernan bann prodwir ki ‘Made in Seychelles mon konnen ki i annan en kantite prodwir ki ganny fer dan bann pei Lazi apre i ‘Made in Seychelles’ sirtou bann ki pe vann avek touris ; me bann ki enporte i ganny itilize Sesel mon napa tou bann lenformasyon. E si Onorab i annan lenformasyon mon ti a byen kontan si i ti a met sa a mon laporte. Mersi Mr Deputy Speaker.

 

MR DEPUTY SPEAKER

Mersi Minis.  Dernyen kestyon Onorab Simon Gill.

 

HON SIMON GILL

Yes Mr Speaker zis en keksoz pou presizyon. Nou pe oule  ki Minis ki dan son kominikasyon avan ler i sorti, ki i pe kominik avek Komite Biznes Seselwa ki malgre sa in antre pran viger la, ki i annan serten fleksibilite ki son Minister pou egzerse tou an tenir kont ki zot bezwen kontinyen etidye sityasyon epi fer plis konsiltasyon pou ki finalman pou ki tou dimoun i tonm dakor this is the way forward kot Sesel pe ale. Eski Minis i kapab donn nou sa lasirans la, espesyalman nou Lasanble me sa piblik deor la ? Mersi.

 

MR DEPUTY SPEAKER

Mersi Onorab Gill. Minis.

 

MINISTER DIDIER DOGLEY

Parey mon’n dir Mr Deputy Speaker nou ti’n deza pe fer en peryod tranzisyon kot Minister i konsernen. Nou ti pe zwenn avek bann dimoun nou ti pe vwar bann diferan group epi kolekte lenformasyon pou nou vwar ki pe arive on the ground. E nou ti pe deside pou nou kontinyen avek sa. Annefe parey mon’n dir demen nou pe zwenn SCCI zot le vwar nou. Nou le diskit avek zot epi nou a pran en desizyon ansanm ki mannyer nou bouz devan. Mersi Mr Deputy Speaker.

 

MR DEPUTY SPEAKER

Mersi Minis. Mon annan zis en kominikasyon mon pou fer Minis.  Mon osi tou mon annan en let sorti kot en pti biznes en pti businessman ki’n adres mwan depi le 10 Zilyet vizavi sa konsern, kot i pe menm koz lo son stok ki legalman enporte e la i pe ganny dir i pa kapab servi. VAT in kolekte lo la ; tou sa bann keksoz koumsa. Mon ti a kontan Minis mon’n fer kopi sa let ki ou a pran kontak- sa msye in met son limero telefonn lo la ou kapab osi anmenn li onboard pou konsiltasyon. Konsern ki sa Lasanble in lev-e i reel. I montre pou dir i annan en pe konfizyon lo stok ki deza dan pei ; ki mannyer pou dispose of si sa bann enportater si sa bann vander i kapab servi. I annan ki ou Minister i konmans pase e anmase. So tousala i pou en lot problenm osi lo ki mannyer ou Minister pou deal avek. Me konsern soulinyen dan sa Lasanble e mon swete ki avek ou parol avek sa garanti ki ou’n donnen Minis, nou ava kapab vwar en way forward. Avek sa mon ava pas avek Parliamentary Reporter pou donn ou sa kopi let Minis zis avan nou eskiz ou. Sa businessman i annan son contact number tou lo la Minis. Yes Minister final word.

 

MINISTER DIDIER DOGLEY

Mersi Mr Deputy Speaker e mersi tou bann Onorab pou bann diskisyon ki nou’n gannyen ozordi apre midi.  Mon krwar nou ava travay ansanm nou a regarde ki mannyer nou pou al devan avek sa Lalwa. E dan en fason ki nou tou nou kapab bouz devan avek en Sesel ki prop e ki nou annan bann lantant dan la fason ki nou fer li. Me avan-ler mon ale mon annan en pti sak sorti kot lanvironnman, ki nou pou donn tou bann Onorab ki dan en fason ki ler zot al zot magazen zot pa bezwen sorti avek lanmen avek zot konmisyon dan zot lanmen, zot ava sorti avek zot konmisyon dan zot sak. Mersi Mr Deputy Speaker.

 

MR DEPUTY SPEAKER

Yes Onorab.

 

HON WAVEL RAMKALAWAN

Mr Deputy Speaker letan mon pe remersye Minis an menm tan mon pe regard sa sak letan i tonm dan delo sale sa i pa pou degradab sa.

 

MR DEPUTY SPEAKER

Bon mersi Minis e nou vreman apresye sa enteraksyon apre midi  avek bann Manm. E konklizyon ki nou kapab sorti avek. Avek sa Minis avek Madanm Laure mon ava remersi zot parmi nou e mon ava eskiz zot.

 

(MINISTER DOGLEY AND HIS DELEGATION WAS EXCUSED FROM THE HOUSE)

 

MR DEPUTY SPEAKER

Bon mon ti a kontan ganny zot latansyon.  Nou annan en pti Mosyon dan sa Lasanble pou adopte term referans en nouvo Komite. Si zot le nou ava pran li nou a fini avek li ki demen bomaten nou ava tackle sa 2 Mosyon ki’n en pe letan lo Order Paper tou le semenn.  Ok si zot dakor mon ava demann mover Mosyon pou li move son Mosyon.  Onorab Ramkalawan.

 

HON WAVEL RAMKALAWAN

Mr Deputy Speaker nou ava rapel ki le 28 Zen apre ki ti’n ariv sa sityasyon kot Process Server sorti kot Lakour to issue summons lo serten Manm Lasanble Nasyonal, Lasanble Nasyonal ti deside pou li fer en Select Committee e la petet i a bon zis pou fer sa diferans ant en Select Committee ek en Komite Lasanble.

En Select Committee i regard en keksoz spesifik e i fer son rapor dan en fason imedya e non pa en Komite permanan dan Lasanble parey FPAC, parey Assurance, parey Standing OrdersSo nou ti deside pou nou set en Select Committee e pou regard, pou fer en lenvestigasyon lo sa, lensidan ki ti’n arive; e an menm tan osi ti annan 2 lezot size ki ti monte e sa sete sa case devan Lakour Konstitisyonnel an relasyon avek Komite Anti-Viktimizasyon, e en lot pwen ki ti monte osi sete sa latitid en pe hard ki Lakour ti pe fer an relasyon avek bann avoka, bann avoka lo nou 2 kote latab ki osi Manm Lasanble.

Onorab De Commarmond ti osi fer sorti 2 pwen ki ti koz lo sekirite dan Lasanble Nasyonal e son lot pwen sete ethics an sa ki konsern lafason ki dimoun ki travay avek Lasanble Nasyonal, oubyen ki annan koneksyon avek Lasanble Nasyonal i servi Facebook.  E pou nou byensir kapab fer nou travay nou bezwen fer bann regilasyon ki pou diriz travay  sa Komite Lasanble, e la Mr Deputy Speaker mon anvi enform Lasanble ki Sanmdi ki’n pase tou Manm sa Komite ti prezan isi, nou’n rankontre e nou’n regard sa terms of reference, regarde ki mannyer nou pou fer nou travay, me definitivman avan ki nou fer nou travay Lasanble Nasyonal i bezwen aprouv sa bann terms of reference.  Son terms of reference in ganny distribye avek tou Manm e an prensip i annan 4 pwen ladan.

Premye pwen e dan son lentrodiksyon  nou pe dir ki sa Komite i annan li konm responsabilite pou li fer lenvestigasyon dan sa ki paret i kapab, i kapab en mank respe pou privilez Lasanble Nasyonal me ki nou pa limit li zis avek sa e si nou santi i annan lezot size nou kapab pran li ladan.

E sa i an term premyerman; premyerman ki nou ava regard dan kwa e ki mannyer bann Somonn in ganny servi lo bann Manm dan Lasanble Nasyonal le 26 Zen 2017.

Dezyenmman pou nou regard lapros bann Manm Zidisyer, pou regard lapros Zidisyer an relasyon avek sa petisyon Konstitisyonnel ki pe challenge manda ek pouvwar Anti-Viktimizasyon ki ti ganny etabli par en Komite, en rezolisyon Lasanble Nasyonal.

Trwazyenmman; sa lapros ki’n ganny dekrir konman en pe hard line ki Zidisyer pe pran anver bann Manm Lasanble Nasyonal ki osi bann avoka e katriyenmman pou regard dan okenn lezot size kot pouvwar e privilez Lasanble Nasyonal in ganny afekte oubyen okenn mannev pou abes Lasanble Nasyonal. So sa i sa 4 Term Referans e nou dir ki nou ava organiz nou travay.  E dapre an lakordans avek Lalwa e ki nou ava prezant nou rapor osito ki nou termin li.

Mr Deputy Speaker la mon anvi azoute ki dan sa Komite ki Onorab De Commarmond ti ganny elekte koman Depite Chairman e mwan  mon’n ganny elekte konman Chairman e nou annan lentansyon Lendi prosen, Lendi prosen pou nou fer sa travay, pou nou ekout bann dimoun ki involve direkteman e la letan nou fini aprouv sa bann Terms of Reference, nou pou ekri Rezistrar Lakour pou nou dir avek li si i ti a kapab vin kot Lasanble Nasyonal Lendi prosen, Lendi le 24 – 9er bomaten li avek sa Process Server sa dimoun ki ti anmenn Somonn e nou pou osi interview Sekirite ki ti Sekirite Lasanble Nasyonal ki ti la  sa zour.  E letan nou ava’n interview zot nou ava regarde si nou bezwen  interview bann lezot dimoun.

Dezyenmman  Lendi menm,  Komite pou rankontre bann avoka, bann avoka ki osi

MNA pou nou regarde egzakteman kwa ki zot pe eksperyanse kot Lakour ki nou ava kapab balans sa e sa Mr Deputy Speaker i ava ganny swiv par en lenvitasyon, en let ki nou pou ekri Sef Ziz.  Nou pou ekri Sef Zis kot nou pou  envit li pou li dyalog avek nou e  li Sef Ziz, nou pou donn Sef Ziz sa prerogativ pou li determinen si i ti ava kontan, nou, nou vin kot son Biro oubyen si li i ava vin isi kot Lasanble.  E desito ki nou fer sa, desito ki nou fer sa, nou ava prepar nou rapor e nou lentansyon se si i posib ki avan Lasanble i terminen sa sesyon si i posib nou ava prezant rapor me sinon parmi bann premye keksoz ki nou ava fer dan trwazyenm term Lasanble nou ava  prezant sa  rapor.

Alor Mr Deputy Speaker avek sa 2 parol mon prezant sa  Mosyon ki nou aprouv bann terms of reference of the Select Committee on Judicial interference.  Mersi bokou Mr Deputy Speaker.

 

MR DEPUTY SPEAKER

Mersi Onorab Ramkalawan.  Okenn Manm ki segonn  sa Mosyon?  Onorab De Commarmond ou le entervenir?

 

HON CHARLES DE COMMARMOND

Mr Chair mon segonn sa Mosyon. Mon le zis dir en mo ki nou Komite an antye nou pe koze la i siport sa ki’n ganny prezante.  Nou napa much pou nou azoute eksepte ki, nou le fer keksoz byen.  Fodre pa ki  dimoun deor or  Lakour li menm zot santi ki nou pe fer keksoz ki mal.  Nou pe fer keksoz la baz dyalog.  Mon kontan ki sa mo dyalog i ganny servi.  Nou oule koze pou vwar kote ki annan en issue, kote ki annan problenm pou nou aranze pou fer keksoz marse.  Pirman se sa.  E mon kontan ki sa 2 lot pwen osi in ganny mansyonnen ki son eleman sekirite e ethics sa osi i dan menm lespri.  E mon kontan ki Komite letan ti zwenn nou tou nou’n pozitiv anver lafason ki nou apros  travay sa Komite.  E mon oule donn tou mon sipor e mon demann tou Lasanble an antye pou siport  sa ki, sa Mosyon ki devan pou ki nou fer sa  travay dan en fason diny, dan en fason byen e vit osi pli vit osi pou nou fini avek.  Mersi.

 

MR DEPUTY SPEAKER

Mersi Onorab de Commarmond.  Bon si i annan okenn Manm i oule dir en pti mo. Deba in ouver, oubyen sinon mon a demann mover Mosyon  pou fer en konklizyon apre nou a pran en vot.  Non.  Onorab Ramkalawan.

 

HON WAVEL RAMKALAWAN

Mr Deputy Speaker mon krwar tou in ganny dir.  Nou kapab pas lo en vot la.  Mersi.

 

MR DEPUTY SPEAKER

Mersi Onorab Ramkalawan.  Tou Manm i an faver?

Okenn Manm ki kont?

Madam Clerk?

 

MADAM CLERK

Mersi Mr Deputy Speaker.  30 Manm an faver e personn kont.  Mersi.

 

MR DEPUTY SPEAKER

Mersi Madam Clerk.  Savedir sa Mosyon in pase. Ok? Zot ava organiz zot ki mannyer zot pou meet and all that e Sekretarya i ava provide zot avek sa  secretarial support, ok?  Avek sa mon ava remersi tou ban Manm pour, mon konnen in en long lazournen me selman in en lazournen ki’n fruitful.  Nou’ n fer en bon travay.  E mon a remersi tou dimoun ki’n a lekout, ki’n swiv deba Lasanble Nasyonal.  Nou ava..ale Onorab Ramkalawan.

 

 

HON WAVEL RAMKALAWAN

Mr Deputy Speaker petet konman Chairman FPAC mon anvi zis atir latansyon Lasanble e la mon remersye Onorab Gill,  Churchill Gill ki’n remind mwan ki poudir sa  semenn FPAC pe depi  Lendi nou’n konmans bann Hearings kot nou pe anmenn bann diferan Departman an relasyon  avek rapor  Oditer Zeneral pou lannen 2015.  Sa travay pou kontinyen lazournen antye Zedi ek Vandredi. E nou espere ki poudir Vandredi nou ava’n kapab avans tre lwen e  apre sa nou ava regarde ki bann lezot travay ki pe ganny fer, e la se pou nou ekout bann dimoun pou demann zot kestyon lo bann pwen, lo bann pwen konsern ki Oditer Zeneral in mete dan son rapor. E an menm tan osi mon ava kontan enform nou Lasanble ki Oditer Zeneral in pare avek son rapor lo NDEA well lo NDEA avek FIU e i pa ti kapab prezant nou sa rapor akoz sa lamannman Lalwa ki nou ti’n fer pa ti  ankor ganny assented to par Prezidan, me ki sa in fini ganny fer e ki la prezan nou ava kapab, nou ava kapab prezant  sa rapor.  So lo kote FPAC sa 2 pwen in eklersi e  nou kontinyen avek nou travay.  Mersi bokou Mr Deputy Speaker.

 

MR DEPUTY SPEAKER

Mersi Onorab Ramkalawan.  Bon avek sa nou ava adjourn ziska demen 9 er bomaten pou nou kontinyen nou travay.

 

 

(ADJOURNMENT)