Home » Verbatim » 2017 » Verbatim Report NAS Sitting Wednesday 14th June, 2017

Verbatim Report NAS Sitting Wednesday 14th June, 2017

NATIONAL ASSEMBLY OF

SEYCHELLES

 

Wednesday 14th June, 2017

 

The Assembly met at 9am

 

National Anthem

 

Moment of Reflection

 

Mr Speaker in the Chair

 

  1. SPEAKER

Bonzour tou Manm Onorab, tou dimoun ki pe ekout nou. Byenveni ankor pou en lot lazournen travay dan Lasanble Nasyonal. Avan nou kontiny nou travay ki nou ti’n arête yer apre midi e nou envit Minis pou vini zis mon anonse ki pou bann sirtou bann constituents ki pa vwar zot MNA. Onorab Gervais Henrie avek Onorab Audrey Vidot dan Lasanble, se zis pou fer kler ki zot dan en workshop Sid Lafrik e i pa ki zot absan par azar me zot dan en workshop lo Africa Capital Sustainability. Alor pou ozordi zot pa pou la, parey zot pa ti la yer e avek sa ozordi nou pou kontiny nou kestyon pou Minis Loustau Lalanne avek son lekip. E nou a demann Clerk pou fer le neseser, nou a demann Madam Soopramanian pou envit Minis pou vin pran son plas devan. Mersi.  Nou a swet byenveni bomaten dan nou Lasanble Minis Maurice Loustau Lalanne ki parey zot konnen ki Minis pour Tourizm, Lavyasyon Sivil avek Por ek La Marine. E avek li i annan Mr Gary Albert e osi Mr Roy Kinnear ki CEO Air Seychelles. E parey mon ti dir yer nou espere ki Minis Lalanne a vin nobou reponn pou benefis piblik ki normalman zot espekte nou kominike an Kreol. Me Mr Kinnear avek Mr Albert i la pou ede kot i annan klarifikasyon pou Minis anmenn bann lesplikasyon pou piblik an zeneral. Alor avek sa san plis tarde mon a  demann Onorab Leader Lopozisyon pou prezant son PNQ pour Minis Lalanne. Onorab Ramkalawan.

 

HON WAVEL RAMKALAWAN

Mersi bokou Mr Speaker. Bonzour Mr Speaker, bonzour Minis avek ou delegasyon, bonzour tou Manm Onorab e tou dimoun ki a lekout. Mr Speaker la ki Kontra Air Seychelles avek Etihad in ekspire eski Minis responsab pou Tourizm i kapab dir sa Lasanble bann keksoz swivan:

Premyerman ki pozisyon Sesel an sa ki konsern sa Kontra?

 

Dezyenmman eski kondisyon bann pilot Seselwa pou ganny revize afen ki zot ganny menm benefis avek bann pilot etranze?

Trwazyenmman konbyen eski Air Seychelles i peye pou lwe lakaz Eden Island pou bann pilot etranze e lekel propriyeter sa bann lakaz?

Katriyenmman eski bann cabin crew avek travayer Air Seychelles i kapab ekspekte en amelyorasyon dan zot kondisyon travay spesyalman kot i konsern lapey?

Senkyenmman akoz ki malgre Etihad i annan 40poursan dan sa Kontra se zot ki domin tou loperasyon?

Mersi bokou Mr Speaker.

 

MR SPEAKER

Minis Loustau Lalanne.

 

MINISTER MAURICE LOUSTAU-LALANNE

Mersi Mr Speaker.  Bonzour Mr Speaker e bonzour tou bann Manm Onorab. Mr Speaker pou reponn premye parti kestyon Onorab Leader Lopozisyon. Premye Kontra sa Management Service Agreement ki ti ganny sinyen e vin an fors 1 Fevriye 2012 ant Etihad Airways, Gouvernman Sesel ek Air Seychelles sa pou en peryod 5an apartir le 1 Fevriye 2012 e i kapab ganny renouvle pou en peryod 5an avek konsantman le 3 parti an ekri. Renouvelman Kontra ti fer atraver en let ki ti ganny sinyen par le 3 parti Etihad, Gouvernman avek Air Seychelles le 14 Oktob 2016. Sa ekstansyon Kontra i pou en peryod depi le 1 Fevriye ziska le 31 Zanvye 2022. Rezon pou renouvle sa Kontra i baze pirman lo performans ekonomik Air Seychelles pandan sa peryod. Air Seychelles in retourn profitab depi 2012 e i reste profitab anba sa Management Service Agreement. Sa in arive avek korperasyon e kordinasyon plizyer stakeholders e an tenir kont target devlopman Gouvernman, an sa ki konsern Lendistri Tourizm e osi travay tou anploye Air Seychelles tou le 886 anploye. Swa dan ground operations, bann loader, enzenyer, pilot, cabin crew, cargo, fleet planning, komersyal ek revenue management. Mr Speaker mon a pas lo dezyenm parti. E larepons i konm swivan: pilot etranze i ganny R26mil par mwan an plis ki pilot Seselwa lo jet e R700 an plis lo twin otter. Kan Air Seychelles ti pe anploy pilot Etihad diferans saler ti bokou plis, me sa pa leka ozordi. Air Seychelles i santi ki avek son program training progranm pou tou pilot Seselwa twin otter vin pilot jet i en meyer stratezi a lon term pou ranplas pilot etranze. Ozordi Air Seychelles i annan 68 pilot jet, 38 Seselwa e 30 ekspatriye. Pilot domestik pou twin otter Air Seychelles i annan 42 – 35 pilot Seselwa e 7 pilot etranze. Sa kan training i osi reprezant en sonm larzan konsiderab an Zanvye 2016 Scheme of service bann pilot ti ganny revize e Air Seychelles napa plan pou le moman pou reviz bann benefis bann pilot dan limedya. Trwazyenm parti; Air Seychelles i lwe 5 apartman en lasanm pou $2500 sak apartman; 12 apartman 2 lasanm pou $3000 sak apartman e 11 apartman 3 lasanm pou $3900 sak apartman par mwan. Sa i pou 28 pilot etranze. Sa bann apartman i ganny lwe atraver VMA Eden Island e sa lorganizasyon i pey tax Gouvernman. Repons pou katriyenm parti, ozordi Air Seychelles i annan 180 cabin crew, 129 flight attendant, 25 cabin supervisor, 26 cabin manager. An mwayenn zot pas 60er-d-tan dan lezer e zot duty hours an mwayenn i 120 par mwan. Zot lapey lafen di-mwan i varye apartir R14mil ziska R20,500. An plis ki sa zot lay over parey nou dir, Paris 54 er-d-tan. Air Seychelles i donn transpor avek lotel dan sa ka. An milye 2016 tou cabin crew ti ganny en logmantasyon 8poursan lo zot saler. Tou travayer Air Seychelles i ganny benefis ki pa an cash  – parey zot kapab ganny lakantite tiket pou zot, zot paran, zot spouse e zot zanfan anba 30an. Zot osi kapab ganny 10 tiket par an pou zot zanmi. E dan ka cabin crew sak fwa ki zot fer en voyaz zot annan en duty free allowance en lit lalkol oubyen 200 sigaret. Mon ti a kontan fer osi remarke Mr Speaker, ki depi Zanvye 2016 ziska Me 2017 zis 2 cabin crew ki’n volonterman demisyonen. Air Seychelles i santi ki son cabin crew i ganny peye korekteman. Parkont lezot travayer ki travay an mwayenn 68erdtan par mwan e la mon pe fer referans avek ground staff, mon’n demann Air Seychelles pou revwar saler avek allowance checking staff, loader, e lezot staff  ground handling  ka a mon’n avi zot devret ganny regarde osito posib. CEO Mr Kinnear pou fer en assesment e retourn ver mwan lo sa size ver 1 mwan. Senkyenm parti repons Etihad i annan 40poursan dan Air Seychelles, 40poursan share dan Air Seychelles e pou sa i annan li 3 Direkter lo Board enn parmi i son Vis-Chairman. Air Seychelles i annan 60poursan par e pou sa i annan li enn parmi i son Chairman an plis ki sa i annan sa management service agreement ki donn responsabilite pou day- to-day management pou serten servis. O konmansman Etihad ti apwent 13 Manager sa an 2012 – 2013. Ozordi e ankor avek sa Management Service Agreement, 8 Seselwa in ranplas sa bann managers alor ozordi in reste zis CEO, General Manager operasyon, General Manager komersyal, General Manager Resource e Corporate Operations ki bann anployer Etihad. Avan lafen 2017 Air Seychelles i anvizaze ranplas ankor 2 Manager etranze. Mr Speaker serten fonksyon ki pa operasyonnel in ganny santralize Abu Dhabi e sa i enkli Revenue Management. Li o konmansman i ti santralize a 100poursan me ozordi i apepre 50-50. Network Planning, Fleet Planning, kestyon legal e la li osi sa zafer kestyon legal i annan en serten poursantaz sa louvraz ki ganny fer lokalman isi par Air Seychelles avek Lasirans. Mersi Mr Speaker.

 

 

MR SPEAKER

Mersi Minis, Onorab Ramkalawan

 

HON WAVEL RAMKALAWAN

Mersi bokou Mr Speaker. Mr Speaker mon premye kestyon i direkteman avek sa Kontra ki zanmen in vin en dokiman piblik. E i enteresan ki i ti ganny renouvle le 14 Oktob 2016 2 zour avan ki ansyen Prezidan Michel ti sorti konman Prezidan. Eski Minis i kapab donn nou en garanti i ava fer sa Kontra ant Etihad avek Air Seychelles i ava donn sa avek Lasanble Nasyonal pou nou kapab annan view of li. E pou nou kapab konnen egzakteman ki i annan ladan. Eski Minis letan i pe koz lo cabin crew e i pe dir zot ganny byen peye, eski Minis i kapab dir avek nou si en lapey en basic salary pou en cabin crew of R5,022 plis en crew monthly allowance of R1,116 ki fer en total R6,198 i akseptab? E ansanm avek sa pou en cabin manager ki letan i ariv apre tou son responsabilite pou li ganny en lapey R11,941 avan tax me letan finalman i tir tax i zis par anba R10,000 si sa i akseptab? E ki i bezwen mazinen si sa dimoun pa pe travay i pa pe gannyen tou sa bann allowance. Eski Minis i kapab osi dir avek nou lo kote bann pilot, ki zot rezondet pou ki en pilot etranze i ganny li bann ki lo gro avyon i ganny li R26,000 an plis ki en R26,000 menm mon krwar ki ou’n dir, an plis ki en pilot Seselwa. Vi ki zot tou lede zot pe fer menm travay e an plis ki sa pou en pilot Seselwa ek en pilot etranze isi lo twin otter kisisa ki fer ki en etranze i ganny li R7,000 an plis ki en pilot Seselwa. E finalman Mr Speaker mon ti ava kontan demann Minis si dan zot progranm i annan okenn plan understudy pou ki Seselwa i ava pran plas bann etranze spesyalman lo kote ground staff. Parske i annan konplent ki letan serten Kontra etranze pe terminen zot kre nouvo pos pou ki sa bann etranze i kapab antre dan sa bann nouvo pos. Me eski Air Seychelles i annan li en vre progranm understudy kot Seselwa finalman Seselwa i pran kontrol son airline dan la fason ki nou espekte. Mersi bokou.

 

MR SPEAKER

Minis

 

HON WAVEL RAMKALAWAN

E zis. Sorry Mr Speaker. Zis pou azout avek lapey, sa study ki ou’n dir pou bann staff pou bann ground staff ki ou’n dir pou annan en revizyon lapey. Parske sa definitivman i merite parske i totally an deor proporsyon. Kan eski bann staff Air Seychelles tou bann diferan kategori bann ki vann tiket, bann ki check in dimoun, porter, ensidswit. Kan eski zot ava espekte en ogmantasyon dan zot lapey?

Mersi bokou.

.

MR SPEAKER

Minis

 

MINISTER MAURICE LOUSTAU-LALANNE

Mersi Mr Speaker, mersi Onorab Ramkalawan pou bann kestyon siplemanter. Tou dabor pou reponn ou premye kestyon, wi sa Kontra i en kontra ant 3 parti parey mon’n eksplike. E i annan en provizyon dan sa Kontra nou pa kapab fer sa Kontra vin piblik san laprouvasyon bann parti konsernen. So mon pa pou kapab pou le moman donn ou en garanti ki mon kapab fer sa kontra, pou handover sa kontra pou le moman. Mon pou bezwen demann Air Seychelles pou li rod laprouvasyon an ekrir en lot parti apre sa mon kapab fer li. Si napa lobzeksyon fer li, donn Manm Lasanble atraver Speaker. Me mwan mon lir sa Kontra pou le moman mon fek ganny li mon osi letan mon ti pe prepar ou larepons. E mon pa vwar difikilte ki sa konteni sa Kontra i ganny partaze. An sa ki konsern cabin crew Mr Speaker sa bann sif ki mon donn zot, sa R14mil pou saler bann flight attendant ziska R20,500 par mwan pou bann cabin manager i son saler global. E i vre pare you eksplike i annan saler basic i annan bann allowance; letan bann cabin crew par egzanp i lo avyon i pe anvole i ganny li en pti Dolar par erdtan E  kan i lo baz setadir letan i  ankor lo avyon Johannesburg avan avyon i pas 1 erdtan sepa 1 erdtan edmi avyon i kite pou retourn Mahe, i ankor lo avyon pe travay i ganny en pti allowance an dolar par erdtan. Letan i Paris lo sa layover  i ganny li 4 Dolar par erdtan an plis pour sa peryod 54 erdtan ki i Paris, sa i fer li apepre $200 sak fwa zot layover Paris. Pou li kapab aste en manze eksetera akoz Air Seychelles i donn li son lotel son transpor. So tousala letan ou met ansanm i fer zot ant R14mil parey mon’n dir ziska R20,500. Pou pilot zis pou korize ki bann twin otter pilot etranze zot ganny zot R700 an plis lo saler zot ganny zot $50 apepre an plis. Sa mon pa konnen akoz e i en pti sonm i pa R7,000 i R700. E sa i en zafer tranzitwar parey mon pe dir ou akoz nou le ranplas zot e nou’n fer en gro recruitment resaman pou pilot domestik Air Seychelles. An sa ki konsern pilot lo jet etranze wi zot ganny R24,000 an plis. Annefe saler mwayenn en pilot Seselwa lo jet i $8,500 Ameriken par mwan e en pilot etranze li i $10,000, $10,000 par mwan. Sa $10,000 i apepre sa industry norm, kot ou kapab ganny en pilot lo marse enternasyonal si oule. Parey mon’n osi dir dan mon larepons oparavan Air Seychelles ti pou bezwen pran bann pilot Etihad, ti annan en rezon akoz nou ti bezwen fer sa. Parey ou konnen Air Seychelles ti pe fly bann Boeing nou ti retourn 4 Boeing 2 – 300 e 200 sa bann ki ti pli vye, e nou’n ranplas zot tou dousman par Airbus.  E letan nou’n fer sa tranzisyon nou’n bezwen pran pilot Etihad be nou ti peye pilot Etihad, e pilot Etihad li i ti pe kout nou apepre ant $20 a $24mil par mwan. Donk i ti pe kout nou bokou pli ser, me sa i nepli leka ozordi sa bann pilot Air Seychelles etranze parey ou vwar nou annan plis pilot Seselwa lo jet ki pilot etranze. Nou annan 30 Seselwa e nou annan zis 28 etranze. E mon kapab osi dir avek ou ki byento la dan apepre en mwan ki nou pe termin Kontra ankor 3 pilot etranze. So la osi nou pou cancel sa bann apartman ki nou pe lwe Eden Island eksetera. So i en work in progress o fir an mezir nou pe ale pou nou annan en sistenm omozenn. Me mon ti a kontan osi dir Mr Speaker ki ozordi se pilot Seselwa ki ganny plis larzan konman saler. I annan pilot Seselwa ozordi ki ganny plis ki pilot etranze ki pe anvole lo Air Seychelles; akoz zot in la depi en pe letan zot in fer en bon travay e mannyer Scheme in etabli zot pe zot desote R140mil par mwan. I annan pilot Seselwa ki pe ganny sa larzan ozordi Mr Speaker. Pou localization definitivman sa i en keksoz ki mon aport bokou lentere mon met bokou lanfaz lo la. Dan sa Management Service Contract kan zot a kapab lir li zot menm zot a kapab vwar ki apre sa premye peryod 3an dan sa Management Service Contract Etihad, i bezwen rode parmi anployer Air Seychelles bann understudy pou vin ranplase sa bann pos. E sa in ganny fer korekteman a mon avi akoz ozordi nou’n ranplas 8 pou le moman e i annan ankor 2 avan lafen lannen pou ganny ranplase. Etihad in met a dispozisyon Air Seychelles son Training Academy e dan sa Training Academy nou’n deza train 9 Managers Air Seychelles ki’n al laba dan en peryod letan ki’n retournen zot pe anploye. I annan 7 ki laba konmela e i annan 6 ki fek termin en Engineering Course ki pe ganny anploye. So i annan sa constant training ki nou pe servi par fasilite Etihad Airways ki baze Abu Dhabi. Ozordi dan Air Seychelles i annan sa 886 anploye. I  annan zis 13 ekspatriye  i annan sa 6 ekspatriye Etihad si oule i annan 4 dan general management apre i annan 2 en pe pli ba e se zot ki pe ale byento.  E apre i annan enn de lezot nasyonalite; mon krwar i annan en Morisyen eksetera dan lezot pos.  So i annan zis 13 ekspatriye dan Management Air Seychelles dan sa 886 dimoun ki pe anploye. Ok, i annan sa bann pilot osi me pilot mon’n donn ou sifizaman leksplikasyon mon ava swete.  Mr Speaker dernyen kestyon, so kan bann lezot staff Air Seychelles pou kapab vwar en logmantasyon dan zot saler?   Mr Kinnear i pou bezwen soumet avek mwan en propozisyon dan 1 mwan e mannyer i marse se ki i pou bezwen apre ki mon’n donn mon rekomandasyon anmenn li kot son Board, akoz se Board Air Seychelles ki pou pran sa desizyon finalman. E donk Board ava etidye propozisyon e avek son Chairman zot ava pran en desizyon ki mon a nobou kominike apre. Mon pa konnen mon pa kapab dir ou si i ariv deswit apre ki mon’n pran mon rekomandasyon. Me mwan osi parey ou mon santi ki sa pa servi sa mo kategori me sa group travayer zot definitivman bezwen ganny gete le pli vit posib. Mersi Mr Speaker.

 

MR SPEAKER

Mersi Minis. Onorab Ramkalawan

 

HON WAVEL RAMKALAWAN

Yes, Mr Speaker 2 pti follow- up. Mersi Minis pou ou leklersisman de pti follow-up ki konsern konmsi sa Kontra mon trouv i en pe drol ki dan sa moman kot nou koz bokou lo latransparans bann gouvernans ki konmsi nou ankor… Selman mon kapab konpran akoz parey nou pe dir ki sa Kontra ti ganny renouvle le 14 Oktob e alor sa sete ansyen rezim e nouvo rezim ki pe koz lo latransparans, alor sa petet i ava sa i ava ganny rezourd.  Eski zot annan okenn plan pou zot anploy bann pilot Seselwa ki an se moman zot in fini zot training  – bann zenn pilot Seselwa ki’n fini zot training ki pe asize se zot pandan ki etranze pe travay?

Kan eski zot pou bring onboard sa bann sa bann zenn pilot, lo sa kote domestik pou donn zot sa lansman dan zot karyer? E apre si zis an pasan Mr Speaker pa neseserman an pasan mon pa’n devret servi sa mo. Si Minis i annan sa larepons an term bann enzenyer Seselwa ki pe ganny zot lapey i bokou bokou pli feb pou bann etranze e ki ou a krwar Air Seychelles i annan – sa Lagreman la i annan en tandans pou kit bann enzenyer Seselwa ater me pou met lanfaz lo bann enzenyer etranze.  E kot par egzanp lapey ki zot donn en etranze ti a kapab donn 2 Seselwa training pou zot dan zot type parey zot apel sa pou zot al lo sa lot type training. E ki sa lot group enzenyer pa pe ganny regarde dan la fason.. Ki Minis i annan pou dir lo sa size?

Mersi.

 

MR SPEAKER

Minis

 

MINISTER MAURICE LOUSTAU-LALANNE

Mersi Mr Speaker, mersi Onorab. Mon pa okouran ki i annan pilot Seselwa ki pe asize dan lakour me selman si i annan mon ti a kontan ki zot pran kontak avek Air Seychelles akoz nou bi se definitivman anploy plis Seselwa met zot atraver sa training.  Ki mon pe dir par sa training se a dir zot vin fly sa twin otter pandan en serten letan.  Letan zot ariv bann grad kantite erdtan ki zot neseser e otomatikman transfer zot si zot annan sa abilite lo jet. E la resaman mon konnen ki nou’n fer promosyon 18 pilot Seselwa ki zot in sorti dan domestik ki’n al lo jet.  E ozordi letan nou regard la kantite pilot ki nou annan pou domestik i deza en pe tro bokou, me nou fer li akoz nou le asire ki i annan en constant flow bann pilot Seselwa ki pou transfer lo jet. Alor si i annan efektivman nou kapab ranplas sa 7. Akoz dan sa 7 nou annan 2 Kaptenn avek 5 First Officer etranze ki pe fly lo twin otter. Alor si i annan pran kontak avek nou e nou a fer le neseser pou regarde ki mannyer nou a anploy zot akoz nou ava ranplas sa bann etranze. So mon pa vwar okenn problenm la Mr Speaker. An sa ki konsern enzenyer, parey mon’n eksplike osi i annan en group enzenyer ki’n retournen sa training Etihad.   So zot in kalifye zot in konmans travay kot Air Seychelles.   Me enzenyer i osi dan sa group dimoun ki parey mon pe dir,  nou’n label sa konman ground staff e zot pou ganny osi regarde  dan sa legzersis ki Mr Kinnear  pou fer ki i pou soumet avek mwan dan 1 mwan. Mersi Mr Speaker

 

MR SPEAKER

Onorab Prea.

 

HON NICHOLAS PREA

Mersi Mr Speaker.  Bonzour tou dimoun. Mr Speaker mon annan bokou kestyon mon swete ki apre mon ava ganny sans pli tar si ou permet.  Otan ki Minis i nouvo wi, me in deza lo Board konman en Board member e mon krwar an serten moman ou’n menm CEO Board Air Seychelles.  Mon annan 2 pti sizesyon avan mon demann ou kestyon. Bann travayer Air Seychelles pe demande ki, zot konpran ki ou nouvo dan ou portfolio ki ou vizit bann fasilite bann landrwa travay e ou ganny en meeting avek zot pou zot kapab eksprim en pti pe zot bann konsern – zot bann kondisyon.  E mon dezyenm pri sizesyon Minis, si ou annan en latest rapor finansyel Air Seychelles pou soumet avek Lasanble Nasyonal?    Bon mon kestyon pou Minis Mr Speaker, apar Eden Island eski Air Seychelles pe lwe okenn lezot lakaz pou expats elsewhere atraver Mahe?

Minis sa zafer saler i kontinyen retournen i annan bokou disparite ant saler expat e Seselwa. E Seselwa ki li i pa bezwen serten allowances i bezwen zis son lakaz,  i santi ki son basic salary par egzanp sa R5mil ekek sepa R6mil ekek i fer li difisil pou zot kapab ganny en loan avek labank.  E labank pa pran ka zot bann allowances.  Se zot bann allowances ki fer zot saler monte vin R14mil a R20mil, me labank i get zot basic salary.  So zot  pe santi ki poudir i annan bokou disparite la e la i mars en dezavantaz pou zot. Minis eski osi ou kapab dir mon ki rezon ki cabin crew i bezwen al fer bann senp medical test par egzanp pou tansyon e pou donn en santiyon disan, e zot bezwen mont Abu Dhabi?   Kwa ki mal avek nou sistenm lasante isi ki bann senp tes nou annan Lagreman e Sesel i enn dan sa trwazyenm parti dan sa Lagreman ki nou pa kapab servi nou sistenm isi pou fer bann senp medical test. Mon pou demann dernyen Mr Speaker apre nou a gete pli tar si mon ganny sans ankor. I annan aparaman i annan en koze lo en kontra avek en Lakonpannyen Computer Ameriken pou la valer $10milyon si Minis i okouran sa, si i kapab petet partaz avek nou kwa sa sa Kontra ki Air Seychelles in vwar li antre ladan avek en lakonpannyen mon krwar IDM. Mersi Mr Speaker.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab pou ou kestyon. Sertennman depi ki mon’n vin Minis mon’n pase lo Airport mon’n vizit enn de landrwa mon pa’n vizit spesifikman bann diferan Departman Air Seychelles e i lo mon kalandriye pou mon fer li sertennman. Me mon’n osi resaman rankontre enn de group travayer Air Seychelles.  I annan detrwa ki’n koz avek mwan letan mon vwayaze mon osi. Me selman i annan en group ki’n vin vwar mon resaman e pou eksprim zot  serten konsern. E mon krwar nou’n ganny en diskisyon fran e ouver konstriktiv. So mon krwar mon laport i touzour ouver. Be mersi pou rapel mwan ki fodre mon akseler mon bann vizit. An se ki konsern Eden Island, parey mon’n eksplike ozordi i annan 28 dimoun ki reste dan sa bann apartman diferan grander. Air Seychelles in fek konfirm avek mwan ki i annan enn de etranze ki zot zot prefere pran en accommodation allowance.  E zot, zot kapab pe reste an deor Eden Island me se pa Air Seychelles ki pe peye pou zot reste an deor. Zot annan en allowance ki permet zot, so i kapab annan enn de ka.  Mon sezi ou pwen ki annan avek difikilte avek basic salary apre pou bann staff nobou ganny en bank loan.  Sa mon ava demann Mr Kinnear osi dan sa revi ki i pe fer pou mwan, regarde  ki mannyer  nou kapab aziste sa.  Medical test mon pa okouran. Mersi pou port mon latansyon. Mwan mon rapel menm mon osi letan mon ti ki kontroler aeryen pilot mon ti bezwen fer mon bann tes medikal tou le 6 mwan, me nou ti fer li isi. Ti annan bann dokter nou ti’n omologe pou nou fer bann Tes Medikal pou lavyasyon. So mon a bezwen regarde si kekfwa zot nepli la mon pa konnen me i en keksoz ki nou kapab fer isi.  Ou annan parfetman rezon e nou a regarde ki mannyer nou kapab sanz sa sityasyon. Sa Kontra IDM mon napa lenformasyon pou le moman mon ava demann Mr Kinnear  en pti moman, me kekfwa en pe pli tar mon a retourn lo ou kestyon avek permisyon Mr Speaker si nou annan lenformasyon.  Mersi.

 

MR SPEAKER

Mon ti a kontan fer en lapel avek tou Manm pou sey gard zot kestyon pou 2 pa bokou. Akoz i annan plis ki en douzenn Manm ki le entervenir. Onorab Afif.

 

HON AHMED AFIF

Mersi Mr Speaker. Bonzour Minis avek tou ou delegasyon. Minis mon ti a kontan demann ou si dan ou Statement ki ou ti fer o-komansman ki ou’n deklare ki Air Seychelles i profitab.  Ler mon pe regard kont eski ou pou dakor avek mwan – ler mon pe regard kont 2014 avek 2015 kan i dir i pou fer profi pou 2014 $3.2milyon me selman sa i enkli dan son reveni. $15.5milyon ki Gouvernman in met ladan. Savedir si ou tir sa ki Gouvernman in met ladan an 2014 Air Seychelles in perdi $12.3milyon. An 2015 kan in deklar $2.1milyon Gouvernman in donn li $4.6milyon.  Savedir si ou tir sa i $2.5milyon perd. Tou le lannen menm avan sa Air Seychelles pe perdi larzan menm parey menm e menm plis.  Alor kwa ki sa partnership in vreman anmennen si son bi sete pou tir sa perd?  Mon dezyenm kestyon se eski e nou napa en kopi sa Lagreman, eski ou krwar Minis pou ki nou’n ganny en fair deal, sa ki nou apel en fair deal. Akoz ler mon get kont ki in ganny pibliye in ganny sinyen avek tou zot Direkter 2014 avek 2015. Etihad i en partner ki Air Seychelles i anpli avyon  ou non, mont Paris vid – mont Madagascar eksetera Etihad i pe anmas li dan zot kont an 2014 $27milyon dan larzan ki al direkteman zis pou pey avyon ki Etihad i lwe zot. An 2015 $25milyon. An plis ki sa pou fer maintenance i annan $2.2milyon. 2014 i 6.3.  Savedir i pe fer plis ki $30milyon tou le lannen. Zis Etihad i gannyen anpli avyon ou non.  Minis mon kestyon se eski ou krwar sa i en fair deal?   E eski sa bann lwe avyon ki zot pe lwe, in ganny fer dan en fason transparan?   E si ou ti kapab donn nou detay konbyen i pe lwe sa de Airbus 330 avek sa 2 Airbus 320?  E finalman mon ti a kontan ou dir nou si i annan okenn loan ki Etihad in pret avek Air Seychelles e  si i annan ki zot bann kondisyon? Mersi Mr Speaker

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab Afif. Wi ou annan rezon, sa bann sif profi ki Air Seychelles in pibliye, in ganny odite e pibliye, i tenir kont sa lazan ki Gouvernman in peye akoz in ganny trete konman en reveni. So ou annan parfetman rezon. Me dan sa Lagreman o-komansman tou lede parti setadir   Etihad e dan ka Air Seychelles – Gouvernman, ti bezwen met $20milyon sakenn. Mon konmans pe donn ou lenformasyon sa Kontra la. Mon pa konnen si mon korek, me tou le fason alor sa bann larzan ki ou vwar Gouvernman pe donnen la, i dan sa Management Service Agreement ki nou’n sinyen. Ou vwar?   Donk sa ki mon kapab dir ou, se ki ozordi Gouvernman in fini donnen. I pa pe demann ankor li. Wi, be apre sa i pa pe demann ankor li. Tou le fason Lagreman ti sakenn pou met sonm larzan, pou konmans sa nouvo letap. Me mon dakor avek ou, me mon pe re- konfirmen  ki sa $3.2 oubyen sa  $2.1milyon, i enkli sa larzan. An sa ki konsern Etihad mon toutafe dakor pou dir ki Etihad letan ou al rod servis kot li, i pa en konpannyen ki bon marse. So nou pey en pe plis normalman.  Wi me akoz nou pe pey li at cost, Lagreman i dir nou bezwen pey li at cost. Alor kan nou lwe en avyon avek li, nou pe lwe li at cost, me son rental i pa telman bonmarse. E nou’n realize sa e sa ki nou pe fer ozordi nou pe sanze sa bann keksoz; nou pe sanze o fir an mezir ki nou pe ale. Par egzanp ozordi bokou engineering  i ganny fer kot zot, me Air Seychelles ozordi pe regarde mannyer nou kapab antre, ou konn byen ou osi ou ti en Manm lo Board avek mwan lontan. Lo en rental pool nou kapab ganny spare parts pli bon marse atraver lezot konpannyen dan lezot landrwa e sa osi nou pe regarde pou le moman.  Air Seychelles i aktiv.  Nou  pe regarde kote nou kapab sov en pe larzan. Akoz ozordi Air Seychelles parey mon’n eksplike i li tousel  annefe – ou vwar?  Byento nou pou annan zis pilot Air Seychelles ki pou fly sa bann avyon  lease a Etihad.  Si nou nobou pas nou engineering avek en lot lakonpannyen, nou pou ganny nou spare engine nou lezot spare parts, pli bon marse ki nou gannyen ozordi avek Etihad.  E sa bann demars ki nou bezwen fer. So i annan en refleksyon entern ki pe permet nou regard koumsa. Etihad napa problenm avek sa li akoz nou bezwen debout lo nou 2 lipye. Lot kestyon ki ou’n poz mwan se konbyen nou pe rent sa Airbus. Sa mon ava konsilte pou mwan regarde si mon kapab donn ou lenformasyon toudswit. Si nou pa kapab nou ava sertennman anvoye Vandredi avan Vandredi pou ou gannyen. Loan mon pa okouran ki i annan okenn loan ki Air Seychelles in pran avek Etihad. Mon krwar dan Lagreman i kler si nou fer profi nou partaze si nou fer losses ou partaze lo menm ratio 60:40 parey nou Kontra i ete. Mersi Mr Speaker.

 

MR SPEAKER

Onorab Ernesta.

 

HON PAUL ERNESTA

Bonzour Mr Speaker bonzour Minis avek ou delegasyon e tou bann koleg Onorab e tou dimoun a lekout. Mr Speaker mon anvi demann Minis premyerman; ki benefis ki Air Seychelles in gannyen atraver sa kontra ki in gannyen atraver Etihad – enn.   E apre in koz osi lo kote bann ground service pou sa inegalite ki pe arive avek sa bann staff. Akoz in pran sitan letan pou zot ozordi pou ki pe al revwar zot saler?   E dan revizyon sa saler kwa ki zot pe fer kwa ki zot pe konsidere ladan?   E si pe annan en Scheme of Service an prenon kont ki annan staff ki bokou lannen pe travay kot Air Seychelles. Sirtou parey bann porter ki pe ganny menm saler depi ler zot in konmanse.

Mersi Mr Speaker.

 

MR SPEAKER

Minis

 

MINISTER MAURICE LOUSTAU-LALANNE

Mersi Mr Speaker, mersi Onorab pou  sa 2 kestyon. Premye kestyon ki benefis ki nou’n gannyen?   Mon krwar nou’n ganny plizyer benefis. Premye se ki si nou ti napa sa laranzman – parey mon’n deza fer resorti dan sa Lasanble, mon krwar Air Seychelles ti pou’n mor. Ti pou napa Air Seychelles. An 2012 letan nou’n siny sa lakor avek Etihad nou ti annan nou apepre 450 anploye. Air Seychelles ti’n vin li en pti konpannyen preske faid.  Ozordi 5an pli tar Air Seychelles, in pas atraver en transformasyon konplet e ozordi Air Seychelles i annan li 886 anploye –parey mon’n dir taler e tou son bann anploye gran mazorite son bann anploye in ganny en training profesyonnel  bokou pli avanse an servan sa Training Academy ki Etihad in met a nou dispozisyon. Etihad in osi permet nou fer sa tranzisyon kot nou’n rann sa bann avyon e nou’n transfer lo Airbus. Nou’n osi gannyen o debi en pe lasistans avek Etihad ki ozordi i mwens an sa ki konsern economies of scale letan pou aste en pe fuel, letan ou aste manze, serten lezot keksoz kot Etihad pe aste in bulk e nou, nou pe ganny en sipor dan sa fason.  Zot in nobou convert nou bann pilot kot nou’n arive i ase enportan. Mou annan  bann Managers ki’n swiv Management Training dan Lavyasyon pou zot antre dan pozisyon kle, parey mon’n eksplike. E donk tousala i bann keksoz ki’n zwe a mon’n avi dan nou faver.  E ozordi nou bezwen regard son lot letap – kot nou bezwen pran plis kontrol.  E parey nou’n eksplike  sa i  pe arive dousman. Sel keksoz ozordi ki Etihad i annan keksoz ferm se sa Fleet Planning e sa Network Planning, sa i ankor anba kontrol Etihad.  Alor si demen nou, nou  deside ti a bon  akoz i Departman Tourizm i le al mon pa konnen – L’Amerique  ou vwar nou pou demann Etihad pou fer sa bann kalkil pou regarde si i en bon zafer,  si pa en bon zafer  – keler fodre ale, keler fodre tournen eksetera.  Sa i ankor fer avek zot. So nou’n ganny nou en evolisyon mon krwar bokou pli rapid. Si nou ti pou fer li nou tousel mon krwar pa si nou ti pou arive ditou. Donk sa partenarya i enportan. Me parey Onorab Afif in dir mon krwar i ase enportan ki nou kontinyen regarde, kote nou kapab fer plis lekonomi finansyel pou li vin   dan nou lavantaz.  Akoz in pran telman lontan?   Mon pa kapab vreman eksplik ou donn ou en rezon definitif. Mon krwar par-ler nou pa regarde ki mannyer sityasyon i evolye. Ki mon pe dir par sa?   Lo Erport ozordi napa zis Air Seychelles avek sa kantite vol. I annan Turkish Airlines. I annan Emirates in sorti enn in vin 2, i annan Qatar.   Ozordi nou Erport i busy en kantite.  Zot menm dir mwan par egzanp, ki  pa kapab fer maintenance fodre fer maintenance Lendi swar. So aswar tou lannwit Lendi apartir 10er diswar ziska 7er bomaten, se la ki zot fer maintenance lo Runway eksetera, eksetera,  akoz lazournen pa kapab fer. Be si nou annan menm kantite dimoun pou fer menm louvraz e nou bi se pou ki nou fer tou nou avyon al on time e i respekte schedule, nou bezwen donn en sipor sa bann dimoun. Swa nou anploy plis dimoun oubyen si nou pa kapab anploye nou bezwen donn zot en pe plis larzan pou donn zot en incentive pou vin travay.   E sa en pe dan sa laliny ki mon’n demann an irzans ki Mr Kinnear i regard sa sityasyon. Mersi Mr Speaker.

 

MR SPEAKER

Onorab Ernesta en dernyen siplemanter.

 

HON PAUL ERNESTA

Wi Mr Speaker. Mr Speaker mon pou demann Minis letan in koz lo increase ki’n arive atraver Air Seychelles e petet ladan ki kantite Seselwa petet nou kapab dir lo poursantaz ki kantite in anmennen dan sa lorganizasyon. Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, Onorab eskiz mon silvouple, mon ti pe ganny en pti enterferans isi ou kapab repet ou kestyon?  Mersi.

 

HON PAUL ERNESTA

Wi Minis, mon kestyon i lakantite increase ou’n koz lo la an term bann anploye. Ki kantite Seselwa ki’n annan ladan?   Mersi.

 

MINISTER MAURICE LOUSTAU-LALANNE

Mersi Mr Speaker.  Mon krwar antan poursantaz i tou Seselwa. Akoz nou ti annan nou bokou plis anploye Etihad oparavan ti annan 13, la i reste zis 4 dan top management. Apre nou’n pran enn de ant, ant. So e nou’n grosi sorti 500 pou nou ariv 886, so i vreman lanplwa a 100poursan pou Seselwa mon krwar i fair ki mon donn ou larepons. Mersi Mr Speaker.

 

MR SPEAKER

Onorab Valmont – en kestyon.

 

HON JUDE VALMONT

Mersi bonzour Mr Speaker, bonzour Minis e ou delegasyon e tou koleg Onorab e tou ki pe swiv.  Minis mon annan en kestyon apre en sizesyon.  Mon’n  aprann ki aparaman ki i annan high turnover dan bann ground staff services. Mon ti a voudre demann Minis eski ou okouran?   E si wi, eski zot in fer en letid ou en meeting pou etabli ki lakoz sa turnover?

E mon sizesyon se, i annan en Onorab ki’n fer resorti ki Minis petet merit akseler meeting avek bann staff Air Seychelles. Me mwan konman MNA ki sorti dan sa distrik ki Erport i lo la, mon demande petet pa zis meeting avek staff Air Seychelles me selman lezot staff par egzanp staff SCAA e ki annan sekirite, cleaners ,eksetera. Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab. Mon a reponn ou de kestyon apre ou ava eskiz mwan. Mon ava donn larepons Onorab Afif lo son rental.  Wi high turnover mannyer mon konpran i annan 2 problenm an fet. Premye problenm se ki saler kondisyon travay bann check-in staff pa ti koresponn avek louvraz ki zot ti pe fer.  So ti annan en mankman staff parey mon’n eksplike taler avek sa ogmantasyon avyon. E Air Seychelles in respond akoz zot in anploy ankor 16 non 20 nouvo check-in staff resaman pou permet ki sa shift work i mars korekteman. Me parmi sa 20 ki’n ganny anploye, i annan serten ki’n konmans travay apre zot in aret travay. Problenm se sa problenm shift work,  ou vwar? Akoz zot bezwen vin travay aswar eksetera. So apre en serten letan 1 mwan 2 mwan zot aret vin travay. So se sa ki nou bezwen idantifye akoz.  I kapab ki sa shift allowance ki Air Seychelles pe donn zot konman incentive, i pa neseserman korek e se sa ki nou pe al adrese. So mon krwar pa i annan en high turnover, me definitivman se en landrwa ki dimoun i ganny anploye apre i kite zot ale; ou zot pa vin ditou ankor. So sa i en konsern ki nou pe sey adrese la.  Wi mon krwar i enportan parey mon dir mon osi vizite Lavyasyon Sivil avek lezot Departman. Me mon pa’n fer bann meeting endividyel dan sak Departman pou le moman. So mersi ankor pou lenvitasyon mon ava fer li e parey mon konpran se bann lazans sekirite lo Erport osi ki byen anvi vwar mwan e mon ava vizit zot.  Mr Speaker si ou permet mwan mon ava reponn Onorab Afif lo rental; sa 2 Airbus 330 i pe kout Air Seychelles $775mil par mwan sak.  E sa Airbus 320 i pe kout $180mil par mwan. Mersi Mr Speaker.

 

MR SPEAKER

Onorab Afif.

 

HON AHMED AFIF

Zis en follow-up mon ti a kontan demann Minis si sa lease rate ki pe dir nou i en lease rate ki i krwar i lo pri marse ozordi? Akoz mon konpran 330 normalman i apepre $500mil pa 700 e pou sa 320 i apepre $150mil. Zis mon ti anvi konnen si ou, si zot in tender si zot krwar i en pri marse ozordi?

 

MR SPEAKER

Minis.

 

MINISTER MAURICE LOUSTAU-LALANNE

Wi, mersi Mr Speaker. Mon krwar sa $575mil par mwan pou sa, non $575 pardon eskiz mwan kekfwa mon’n fer. Non i $575mil par mwan e sa lot Airbus 320 i $180mil par mwan. So mon krwar pou reponn ou kestyon mon krwar premye lease rate sa 330 pou son laz eksetera i akseptab sa $775mil –  $575mil par mwan pardon. Mersi Mr Speaker.

 

MR SPEAKER

Mersi Minis, mon repete ki 10er in sonnen nou annan plis ki en 12enn dimoun ki le entervenir nou annan en dezyenm kestyon pou Minis avan i ale. So silvouple sey gard en kestyon. Onorab Ghislain.

 

HON CHANTAL GHISLAIN

Mersi Mr Speaker. Bonzour tou dimoun. Mr Speaker mon kestyon i al en pti pe lo bann crew ki on call.  Akoz ozordi zot pa ankor kapab ganny en allowance pou zot on-call akoz ki lefe ki sa bann travayer menm si zot on-call i vedir zot pe travay akoz zot pa kapab fer tou keksoz. E en lot pti kestyon Minis La Digue an se moman nou napa en landrwa ki nou kapab al pey tiket pou menm fer en rezervasyon. Si nou fer nou fer par telefonn e nou ganny demande pou vin pey sa tiket avan. Eski zot kapab fer posibilite pou fer en fasilite pou nou kapab al pey sa tiket Air Seychelles?   Mersi.

 

MR SPEAKER

Minis.

 

MINISTER MAURICE LOUSTAU-LALANNE

Minis, wi mersi Mr Speaker mon’n note e mon osi mon okouran ki zot pa gannyen sa telephone on-call allowance mon note mon ava fer sir nou ava fer en follow-up, mersi bokou.

 

MR SPEAKER

Onorab Herminie – en kestyon.

 

HON WILBERT HERMINIE

Mersi Mr Speaker. Bonzour Minis avek ou delegasyon. Minis eski zot annan plan pou amelyor sa flight allowance ki bann crew i gannyen sa $32.5 par erdtan. Annou pran par egzanp en quick turnaround flight Johannesburg – en monte desann i fer en 10 erdtan e an tou zot pe ganny zot en $32.5. E pou en flight Maurice avek Madagascar i $16.25 e sa ler ou gete li menm i tonm apepre, pou Johannesburg i tonm apepre R500 ekek ki i en pe ba. Epi osi kantite letan zot krwar zot succession plan pou pran pou ranplas tou bann etranze ki deza la?   Mersi Mr Speaker.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Allowance ki pilot I gannyen i en pti pe plis ki sa allowance ki cabin crew i gannyen. Nou kapab regarde si nou kapab fer ogmante, sa mwan mon napa en obzeksyon. Me sa ki enportan se ki nou bezwen regarde kote nou bezwen koriz lenzistis si i annan avek lezot staff Air Seychelles.  Mon krwar priyorite se regard bann ground staff pou le moman. Akoz sa ki arive nou kapab annan nou en cascading effect ou konpran?   E nou kapab konmans donn enn apre ou bezwen regard son lenpak akoz ou bezwen donn partou apre e ou riske vin en sityasyon enorm.  So mon prefere ki nou konsantre lo ground staff pou konmanse nou a regarde e apre regard lezot e si i annan posibilite fer li nou ava aziste. Mon krwar sa i fason fer li pli pridan Onorab pou nou prosede pou le moman. Me mon konpran sa ki ou pe dir e nou ava sertennman tenir li an kont. An sa ki konsern kan tou ekspatriye pou ale sa i en pe difisil pou mwan dir ou demen apre demen. Par egzanp nou nou’n koz lo enzenyer etranze ozordi e la nou fek annan nou bann enzenyer ki’n tournen i annan en bon pe zot 5 ou 6 ki’n retournen. Nou kapab donn ou en ki mannyer en progranm pou dir ou dan engineering pou tan. Me fotespere osi ki nou bann dimoun pa sanz landrwa, akoz bokou nou bann travayer profesyonnel in osi kit Air Seychelles in al travay pou lezot konpannyen deor, e nou pa kapab anpese sa.  So i annan  touzour sa 2 keksoz ki nou bezwen zwe avek.  Lo pilot nou pe akseler-e; akoz sa i en stratezi ki nou pe adopte – nou pe akselere.  E parey ou konnen en pilot letan i antre Air Seychelles, i vin konman en First Officer lo en twin otter, i pou pran li 10an pou li vin en kaptenn lo en jet. So sa peryod i ase long e se pour kwa ki nou bezwen annan nou en pe an ekse bann pilot ou pou vwar fer sir ki nou pa interrupt sa succession plan. So lide i la so pa trakase – so touzour donn nou Seselwa priyorite. E nou Seselwa par-ler ler nou donn zot priyorite zot pran, me i annan osi serten ler ou ofer zot kekfwa i sorti en Cabin Manager ou dir li pran vin ansarz cabin crew ater eksetera i dir ou i pa anvi. I pa oule pran sa responsabilite an plis. Sa osi i annan tousala. Be la nou pe pran en pe dan bann detay. Me tou sa bann defi i egziste toulezour. Me priyorite se donn Seselwa louvraz dan Air Seychelles. Mersi Mr Speaker.

 

MR SPEAKER

Onorab Sophola – en kestyon.

 

HON NOLINE SOPHOLA

Mersi Mr Speaker. Bonzour Minis avek ou lekip, tou Manm Onorab e tou dimoun a lekout spesyalman bann dimoun inner islands bonzour. Mr Speaker mon annan zis en kestyon. Mr Speaker vi ki Minis in koz lozman pou bann pilot etranze, nou osi annan bann cabin crew ki sorti Praslin avek La Digue e zot osi zot napa en lozman lo Mahe. Alor Minis mon pe demande si ou kapab dir sa Lasanble ki ou Minister pe fer pou siport sa group cabin crew kot lozman i konsernen?  Mersi Mr Speaker.

 

MR SPEAKER

Minis.

 

MINISTER MAURICE LOUSTAU-LALANNE

Mersi bokou Mr Speaker, mersi Onorab. Bon i en kestyon ki p pran mwan en pe ‘hopping’ konm dir Angle. Bon mon larepons mon ava demann Air Seychelles pou sertennman regard en posibilite e les mwan konnen pou mon nobou apre sa donn ou en larepons pli definitif.   Mersi Mr Speaker.

 

MR SPEAKER

Onorab Esparon – en kestyon

 

HON REGINA ESPARON

Mersi Mr Speaker. Minis Air Seychelles ti annan 60poursan share dan lakonpannyen e Etihad i annan 40poursan. Akoz ki mazorite desizyon se Etihad ki pran?  E staff i santi ki Air Seychelles pa pe pran zot lentere. Epi eski tou pos Senior i ganny advertised isi lokalman avan ki zot anploy etranze?  Crew in fer bokou demann pou ki bann turnaround flight zot ganny en allowance, ki zot allowance i ganny ogmante e Air Seychelles in refiz-e e in kategorikman i pa pou entertain. Avek sa basic salary ki Minis ou’n dir sa bann staff i gannyen, zot entitle zis par anba R50,000 an term loan avek labank – zis pou enform ou. Mersi Minis.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab pou ou kestyon. Mon ava dakor avek ou ki kekfwa o konmansman sa Management Service Agreement avek Etihad se Etihad ki ti pran bann desizyon si nou le servi sa term. Me toutafe o depi nou’n toultan annan nou 4 Direkter lo Board, e nou ti Chairman e nou ankor touzour Chairman sa Board Air Seychelles. Etihad i annan li zis 3 e tou desizyon ki’n ganny pran vizavi Air Seychelles, in ganny pran par sa Board. Kekfwa ou ganny lenpresyon ki se Etihad ki pe pran bann desizyon akoz se Etihad ki annan sa day-to-day management Air Seychelles. E o konmansman parey mon’n dir nou’n pran 4 Boeing nou’n  fer ale nou’n fer en antre bann Airbus e se Etihad ki’n negosye tousala. Parey letan nou’n fer retournen sa bann Boeing i pa zis fason dir ok pran en avyon donn kaptenn Jackson dir li anmenn Arizona met dan dezer. I pa sa i pli konplike ki sa, nou bezwen peye nou bezwen Kontra nou bezwen respekte. So in annan enn de negosyasyon pou retourn sa bann avyon ki’n kout nou larzan parey sa kontra in demande e tousala Etihad ki’n servi son negosyasyon avek sa bann Leasing Company pou ki sa tranzisyon i pase korekteman avek son lenpak finansyel pou nou.  So in annan sa bann keksoz ki dimoun in dir,  ‘’Be  ou vwar be Etihad ki pe negosye pa nou ki pe negosye.’’ Me nou bezwen realize se zot ki ti annan sa management contract pou donn serten servis pandan sa peryod tranzisyon. Ozordi letan nou pe koze nepli leka. Parey mon’n eksplike nou pe sey sorti e kot Etihad i tro ser kot nou vwar nou kapab ganny li pli bon marse, me avek kalite, Air Seychelles pou pran desizyon pou kit Etihad e vin dan sa bann nouvo Kontra avek lezot konpannyen ki kapab donn nou satisfaksyon. So vwala mon krwar sa ki mon anvi konfirm avek ou. Ozordi Mr Kinnear  i pa tou le semen pran avyon mont kot Abu Dhabi i  al dir avek sa boug laba, ‘’Get sa, i koumsa i koumsa.’’ I pa fer sa.   I reste isi li, ou konpran?   Akoz i pe travay pou Air Seychelles.  Alor tou sa bann 4 5 pos General Manager ki reste Air Seychelles i annan en succession plan.  Mon a donn ou en legzanp, letan nou ti konmanse 2012 Etihad ti met en CEO e i ti met en Chief Finance Officer ki ti en madanm. Apre 5an sa Chief Finance Officer i en Seselwa; in swiv son training in al travay kot Etihad; in al travay kot en lot equity partner Etihad akoz Etihad i annan plizyer equity partner. I travay avek sa equity partner, in ganny son leksperyans, in retourn travay Air Seychelles e ozordi se li ki Chief Finance Officer. E tou lezot dimoun pou pas parey – ou vwar?   E menm CEO nou pou ranplas li ler letan in pare –  ou vwar?  E nou annan en succession plan pou sakenn sa bann dimoun. E 2 ladan avan lafen lannen nou pou ranplase osi. Avek dimoun avek Seselwa ki konpetan. So pa trakase lo la ou mon demann ou silvouple pa tro tro trakase lo la. An sa ki konsern bann allowance mersi pou donn mon sa link konsernan sa basic salary avek sa loan ki i kapab gannyen.  E parey mon’n eksplike nou ava regarde ki mannyer nou kapab rod en formil ki nou kapab ogmant sa basic salary pou fer sir ki staff i kapab debrouye pou rod zot loan eksetera. Mersi Mr Speaker.

 

MR SPEAKER

Onorab Arrisol – en kestyon.

 

HON SANDY ARRISOL

Bonzour Mr Speaker bonzour Minis bonzour tou Manm. Mr Speaker mon ti a kontan demann Minis bann pilot ki’n ganny fer redundant eski zot pou ganny re anploye dan sa kozri ki nou pe fer ozordi la?  Apre mon ti a kontan demann Minis training Air Seychelles kot Lakademi Etihad eski Air Seychelles ki peye oubyen i pou nanryen? E anvi ki ou’n koz lo CEO mon kontan vwar CEO o-bor ou. Mon ti a kontan demann Minis anvi ki CEO mon aprann i travel business class selman i fer blok sa 2 seat o-bor li ki kout nou en larzan  e apre ler i ariv ater i servi bann servis parey limousine e sa mon mazinen i kout pei en kantite. E sa ti ava ede ki nou bann dimoun ti a ganny en pe plis saler, sirtou sa madanm dan mon distrik ki’n fer 23an servis konman en Supervisor e i ankor pe ganny li zis R8mil par mwan.  Mersi Mr Speaker.

 

MR SPEAKER

Minis mon krwar en bout sa kestyon ou fek reponn, me tou fason laparol i pou ou.

 

MINISTER MAURICE LOUSTAU-LALANNE

Mersi Mr Speaker, mersi Onorab. Bon tou dabor si CEO i pran 2 seat, i pey enn i ganny li rebate i kapab lot vid. Mon pou dir li aret fer sa, akoz i pa korek. Mwan mon pa fer li mon pa vwar akoz li i pou fer li. So lala mon larepons lo sa kestyon ki ou’n poze. Wi letan nou servi sa fasilite Etihad nou peye of course nou peye. Me parey mon dir ou sa Lakademi pa bokou Airline ki annan zot Lakademi zot prop simulator eksetera. I lo en standar tre eleve e nou santi nou pe ganny valer pou nou larzan. Me wi nou peye of course e nou pey li at cost parey Lagreman i demande. Mersi Mr Speaker.

 

MR SPEAKER

Onorab De Commarmond – en kestyon

 

HON CHARLES DE COMMARMOND

Mersi Mr Speaker. Mr Speaker bonzour, bonzour Minis avek ou delegasyon bonzour tou Manm Onorab e tou dimoun  a lekout. Mr Speaker avan mon demann mon kestyon en klarifikasyon Minis lo bann kestyon ki’n ganny demande e ou larepons. Par egzanp lo bann proposed allowance ki nou’n koze la. I pa telephone allowance. Nou pe dir donn bann cabin crew en standby allowance. E lo kestyon saler nou pe dir revwar the payroll structure of the cabin crew, ki en fason tou son keksoz i gannyen i a vwar lo son payslip.  I pa kapab vwar li zis en bout epi labank pa pe donn li loan, ensidswit. I a vwar tou en fason li osi i a kapab vwar son bann diferan kalite allowance ki i a  gannyen. Mr Speaker mon kestyon i koumsa. Tou sa bann keksoz ki pe ganny koze la i involve larzan – finans si napa finansman ni increase dan okenn kwa ke se swa, pa pou kapab ganny fer. Ki vizyon Air Seychelles alor pou zener plis reveni; par egzanp ou vwar bann cargo fees ant Air Seychelles avek bann lezot Airline sa enn ki donnen sa servis ki i donnen. Revwar rent ki fer ki SCAA i sarz li si pa tro bokou  –  rediskit sa kondisyon revwar sa kestyon lakaz lwe kot Eden Island la si pa kapab lwe an deor avek bann lezot Seselwa ki ava kout pli bonmarse.  E an menm tan ler ou pe reponn sa Minis si ou ti kapab donn nou en lide lo training ki nou bann pilot Seselwa i gannyen. Lekel ki fer training Seselwa menm pe donn training Seselwa, i ganny allowance training ouswa bann etranze ki train bann  Seselwa?   Ki mannyer i kapab ganny fer sa e donn nou en pti pe lide lo la. I annan en Let mon tande ki…

 

MR SPEAKER

I annan 2 kestyon ou’n demand ease pa bezwen ankor sizesyon Minis reponn sa 2 kestyon

 

MINISTER MAURICE LOUSTAU-LALANNE

Mersi Mr Speaker mersi Onorab De Commarmond. Mersi pou klarifye sa zafer allowance, donk i en stand by allowance mon’n ganny li kler e lo payslip si i pa leka sertennman nou a bezwen donn tou son bann structure mersi bokou. E wi mon krwar tou dabor tou pilot bann ki’n retire bann ki’n pran redundancy eksetera zot toultan zot kapab vini apply letan i annan vacancy eksetera. Parey mon’n dir si i annan dan lakour ki pe espere kontakte Air Seychelles nou ava regarde ki nou kapab fer. Bon mon krwar Air Seychelles i konsyan ki Gouvernman pa’n met okenn larzan dan son Bidze 2017 pou sibvansyonn li. I bezwen deboury li lo son plan ki in soumet ki’n ganny aprouve, i pa pe demann okenn sibvansyon. Alor si i vwar ki en larout demen pe marse ozordi demen pa pe marse pou divers rezon mon a kapab donn zot en legzanp. Par egzanp Air Seychelles ti anmenn bokou cargo par Sid Lafrik  avek legim e i ti donn li en reveni ase sibvansyel. Ozordi akoz rezon pes eksetera regilasyon sanniter Sid Lafrik i pa permet ki fri avek legim i sorti Sid Lafrik pou vin ganny eksporte menm vin Sesel avek lezot landrwa. So Air Seychelles in perdi sa, alor i pa kapab esper lafen lannen pou Gouvernman pey konpansasyon akoz cargo in sanz landrwa. I bezwen reakte deswit. Mannyer mon konpran bokou fri avek legim ozordi i sorti Lezip me i vin par Emirates. So nou’n perdi, Emirates in gannyen. So tousala Air Seychelles, mon pe donn ou en legzanp pou montre ou ki Air Seychelles i bezwen toultan pe etidye kote i kapab redwir kou; kote i kapab ogmant reveni. Akoz at the end of the day i pou napa sibvansyon an 2017.  So tou sa bann keksoz ki ou’n mansyonnen si ou kapab mont cargo fees, si ou kapab tir rent Eden Island nou pe al kennsel 2 letan sa 2 pilot i ale, 3 pilot pardon i ava ale, nou pe redwir menm. Mon krwar lide Air Seychelles in swazir Eden Island akoz i ti en pe plis secure. Par egzanp sa bann pilot ki reste la, zot rod zot prop transpor pou zot vin travay e letan zot fini travay zot pran zot prop transpor a zot cost zot vin Eden Island akoz i Eden Island. Lontan letan nou ti lwe en lakaz dan nor en lakaz dan sid wherever it is nou ti bezwen provide transpor e par-ler ti annan problenm sekirite. Akoz  zot konnen kaptenn in ale pou 3 zour zot kas son lakaz deryer. I ti annan tou sa kalite difikilte pou sa konmsi zot in vin la. Me mon partaz avek ou mon krwar ki sa bann rent i en pe bokou, alor tousala nou kapab revwar negosye pou ganny en better deal. So mon krwar ou pwen i valab. Training definitivman letan dan hierarchy sa Scheme letan ou vin en training captain ou ganny en keksoz an plis. Ou vwar?   So i normal sa e sa i dan tou. Pardon?   Mon pa pou kapab dir ou egzakteman ozordi lekel selman i annan bann Seselwa osi ki  bann training Captain ki nobou  donn training. E zot in ganny sertifye  akoz ou bezwen pas en legzanmen pou ou nobou fer sa.  So definitivman zot ganny reminere accordingly. Mersi Mr Speaker.

 

MR SPEAKER

Onorab Mondon – en kestyon silvouple.

 

HON TERENCE MONDON

Mersi Mr Speaker. En pti kestyon si Minis i kapab dir nou ki laz sa 4 aircraft dan fleet Air Seychelles? E si i pe konfirmen ki sa bann aircraft i pa bann avyon ki Etihad i retire e si nou pou espekte bann avyon en pe pli nef dan lavenir? Mersi.

 

MINISTER MAURICE LOUSTAU LALANNE

Mersi Mr Speaker, mersi Onorab eskiz mon pou sa pti retar. Wi sa de 330 ki Air Seychelles i lwe avek Etihad se bann avyon ki orizinalman ti pou Jet Airways. Parey ou konnen Etihad osi ki jet airways i en equity partner avek Etihad so sa 2 avyon ki parey ti ganny konstri orizinalman pou Jet Airways. E mannyer mon konpran sa 2 avyon i annan apepre 15an sa Airbus A320 zot osi  zot pou Etihad anfen zot ti pou Etihad. Parey ou konnen zot lo nou lwe zis prezan, ou vwar? E zot osi zot annan apepre menm laz, mon krwar enn i annan 12an enn i annan 15an. Pa quote mwan mon lannen pou lannen me zot apepre dan sa vintage. I pa tro vye pou en avyon; me mwan mon krwar sa ki pli enportan se ki, en fwa ki ou dan sa avyon son konfor son seat eksetera i ok, be son IFE tou sa ki al avek i demordernize letan ou konpar li. Sa mon dakor avek ou, e i en keksoz ki nou bezwen regarde toultan pou nou gard li lo standar servis Creole Spirit. Mersi Mr Speaker.

 

MR SPEAKER

Onorab Sebastien Pillay – en kestyon.

 

HON SEBASTIEN PILLAY

Mersi Mr Speaker. Mr Speaker Minis in koz lo sa management service contract eski i annan lezot Konpannyen Aeryen ki pa’n swiv sa menm metod ki’n ganny ofer menm opsyon avek Etihad? E si wi, ki’n arive avek sa bann konpannyen dan sa konteks?  Mersi.

 

MR SPEAKER

Minis

 

MINISTER MAURICE LOUSTAU-LALANNE

Mersi Mr Speaker. Wi mon krwar ki mon a reponn li an de parti. Mon krwar ki premye parti i annan plizyer konpannyen menm serten dan la rezyon ki’n pas dan menm kalite tirbilans ki en pe zalou ki nou nou’n nobou fer li e ki zot pa’n kapab fer li; ziska ozordi zot pa’n kapab fer li. So i annan sa e Etihad li letan in lans dan sa equity partnership parey Onorab in eksplike pou zot osi i en biznes. So zot ti le fer en pe plis larzan annan bann koneksyon pou met plis pasaze lo zot prop avyon. I annan zot in reisir i annan zot pa’n reisir par egzanp avek a Alitalia zot pa’n reisir e zot in kennsel. La resaman avek Air Berlin zot pa’n reisir e zot pe kennsel. Me avek Air Seychelles zot vwar ki o mwen sa laranzman, i en laranzman model si oule e zot pare pou kontinyen avek nou.  E se en pe akoz sa parey mon’n eksplike dan mon larepons ki in ganny renouvle lo sa baz performans ekonomik. Akoz Air Seychelles i en partner ki’n nobou si oule zener en keksoz pozitiv olye negativ. Mersi Mr Speaker.

 

MR SPEAKER

Onorab Roucou  – en kestyon.

 

HON CLIVE ROUCOU

Mersi Mr Speaker. Bonzour Mr Speaker bonzour Minis. Mr Speaker eski Minis i kapab dir sa Lasanble in koz lo bann allowance pou bann cabin crew si sa i kouver zot medikal si zot malad aletranze?  Mersi

 

MR SPEAKER

Minis.

 

MINISTER MAURICE LOUSTAU LALANNE

Wi definitivman mon krwar ki Air Seychelles i annan en lasirans pou tou son pasaze si zot tonm malad pou zot ganny take care of par lakonpannyen. Mersi Mr Speaker.

 

MR SPEAKER

Onorab Basil Hoareau – en kestyon

 

HON BASIL HOAREAU

Mersi Mr Speaker. Mr Speaker si ou permet mwan. Mon annan en kestyon mon kapab kas li an 2?  I pou en kestyon, I pou en kestyon li zis kas li an 2.

 

MR SPEAKER

Fer li vitman kas li an 2 pti bout.

 

HON BASIL HOAREAU

Mersi Mr Speaker. Bonzour Minis bonzour tou dimoun ki pe ekout nou. Minis ou’n dir nou pou dir an 2016 ti annan revizyon saler pou bann cabin crew. Mon kestyon se eski bann cabin crew ti ganny konsilte, zot ti pran an kont zot bann wishes zot bann proposals? E si sa pa’n ganny fer eski zot pare pou fer sa legzersis?

E mon dezyenm bout mon kestyon se managerial pos ou’n dir pou ganny localize ou’n dir nou sa i dan zat plan. Kan ki ou ekspekte sa localization i ganny konplete? Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab Hoareau pou ou kestyon. An sa ki konsern premye kestyon wi CEO i konfirm avek mon ki ti annan konsiltasyon pou donn zot sa logmantasyon e zot ti dakor. Pou dezyenm kestyon, definitivman by lafen lannen ki vedir pou reste ankor 2 pou reste 2 enn pou CEO sa mon pa pou kapab dir ou kan egzakteman me nou bezwen vin dir ou lekel son designated person ki nou pou travay avek. I deza annan enn me mon krwar zot pe regard en lot dimoun eksetera so lenformasyon ki mon pou gannyen mon pou kapab anmennen pou mon donn ou byento. Me 100poursan nou pou localize. Mersi Mr Speaker.

 

MR SPEAKER

Nou’n ariv nou past 10er edmi nou annan en desizyon pou pran. Eski nou, nou annan ankor 8 entervenan ki le demann kestyon Minis. Eski nou kontinyen ziska 11er apre sa mon bezwen dir i annan en urgent question par LGB oubyen nou a pran en break la apre retournen 11er e demann Minis si i pare pou retournen?   Ki konsansis?  Minis eski ou available, mon konnen ou’n mank en pe avek cabinet bomaten, me mon vwar i annan en kantite lentere avek sa kestyon Air Seychelles. Parey mon dir i annan ankor 8 dimoun ki le demann ou kestyon, eski ou ti a kontan pran en tas café pou pran en souf apre retournen 11er?

 

MINISTER MAURICE LOUSTAU-LALANNE

Mersi Mr Speaker. Mr Speaker mon antyerman dan zot lanmen. Mon’n la pou fer en travay mon pa Ankor fini. So i antyerman a zot diskresyon.

 

MR SPEAKER

Tre byen. Mersi pou ou konprenezon. Nou a pran en poz café e retournen 11er.

 

 

(BREAK)

 

 

MR SPEAKER

Nou a kontinyen avek bann kestyon pour Minis pour Tourizm, Lavyasyon Sivil, Por ek Marine. .E donn laparol Onorab Simon Gill.

 

HON SIMON GILL

Bonzour Mr Speaker. Mersi bokou Mr Speaker. Bonzour tou koleg Onorab. Bonzour Minis avek ou delegasyon. E bonzour tou manm piblik.

Mr Speaker with due respect mon konpran ou pe dir zis en kestyon, en kestyon, en kestyon, or la pour le moman akoz nou’n ganny break nou’n refresh.  Nou annan, nou kapab demann, annan en pe plis letan pour nou kapab koze. Mon prezimen nou kapab ale. Mon pe dir sa akoz Mr Speaker ou a dakor ek mwan sa topik ki nou pe trete ozordi, i en topik ki esansyel. I enn bann konponan endispansab dan nou lekonomi, dan Sesel, e mon krwar avek respe ankor enn fwa, permet nou pour nou kapab epwiz sa.

Mon pe dir sa akoz i annan en kantite lenformasyon ki pe rantre. Bann staff pe call, pe text, pe dir nou pour dir, lenformasyon ki nou pe ganny donnen ozordi, pa korek, pa otantik. Ok ?  Now

 

MR SPEAKER

Mon dakor Onorab. Mon osi mon’n ganny text. Poz ou kestyon.

 

HON SIMON GILL

Wi mon kestyon prezan i koumsa. Minis eske Air Seychelles avek son partenaire stratezik zot annan en plan stratezik, e ki ladan letan ou ava eksplik nou, si i pour kapab demontre klerman kan ki Sesel, Air Seychelles i kapab bouz li menm li koman en Airline – retourn parey nou ti ete avan ler nou ti form sa lalyans avek sa strategic partner?   E probableman ou ava dir nou osi, baze lo lenformasyon ki ou annan, konbyen lezot laliny aeryen ki annan en laranzman parey?

Dezyenm eleman ki tre enportan pour Seselwa konnen, se dan sa laranzman ki nou’n fer avek sa partner la, nou’n annan 60 poursan, zot annan 40 poursan,  eske sa bann profi ki nou’n fer atraver lannen – mon’n konpran nou pe koz apepre 2012,  eske sa partenaire stratezik in pran en pe sa bann profi, in rapatriye, in anvoy kot li laba ?   Mon krwar sa i ava donn nou en lendikasyon, tre, tre enportan dan nou deba ozordi. E probableman lot keksoz enportan – se eske ou annan en kantite demann ozordi pour nou bann zenn garson, nou bann zenn fiy, kontinyen zwenn nou laliny aeryen pour travay dan diferan sekter ki kontenir dan sa aktivite ?   Bon. Pour le moman Mr Speaker mwan a dir ou tre mersi pour allow sa 3 kestyon. E probableman mon a ganny ankor en pti sans pli tar.

 

MR SPEAKER

Ok. Minis i annan 3 kestyon pour ou reponn.

 

MINISTER MAURICE LOUSTAU-LALANNE

Mersi Mr Speaker, mersi Onorab. Wi i annan en plan stratezik ki Air Seychelles i devlope tou le lannen kan i prepar son Bidze. So nou annan sa plan stratezik ki available.   Konbyen letan ?   Nou’n siny ankor 5an parey mon dir.  E dan sa Lagreman, nou kapab si nou pa kontan sorti anytime parey dan tou Lagreman.

Me pour le moman i pa lentansyon ditou pour nou sorti dan sa Lagreman. Sa profit sharing, oubyen loss, 60/ 40 mon kapab konfirmen ki okenn dividend pa’n ganny peye, menm ki Air Seychelles in  fer sa declared profit ki’n ganny audited. An sa ki konsern bann dimoun ki le ganny lanplwa avek Air Seychelles, sertennman, o fir an mezir ki Air Seychelles i devlope, e parey mon’n dir an 2012 ti annan apepre 500 anplwaye. An 2017 i annan 886. Kan nou’n vwar nesesite anploy plis dimoun, sa Air Seychelles in fer li, senpleman akoz nou ouver bann nouvo larout, nou bezwen plis pilot, nou bezwen plis cabin crew, e sa in en pe si oule priyorite pour komanse. Mon rekonnet ki dan lezot departman parey nou’n diskite bomaten, Air Seychelles pa’n tro, tro oule met plis staff. Parey nou’n koze lo ground handling, checking staff and so on. Menm ki nou’n ganny nou plis avyon, pa neseserman Air Seychelles ki pe servi airport. E sa in ganny korize akoz resaman Air Seychelles, in anploy 20 checking staff, e ankor 6 loaders. So Air Seychelles i bezwen veye ki nou … letan nou, nou i pe donn servis lo Airport akoz i pa donn servis li menm, me i pe donn servis lezot konpani aeryen.

So touzour Air Seychelles parey mon repete, i reste ouver pour li kontinyen donn lanplwa. Ozordi pilot, nou annan bokou plis pilot Seselwa, e nou annan plis ki nou bezwen senpleman akoz nou annan sa training plan akoz nou oule zot konverti. So wi i annan landrwa kot nou bezwen plis dimoun. E i annan landrwa kot pour le moman nou ase, nou annan ase, be i reste fleksib pour nou anploye.

So vwala Mr Speaker mon larepons pour sa 3 kestyon ki’n ganny poze par Onorab. Mersi bokou.

 

MR SPEAKER

Onorab Georges.

 

HON BERNARD GEORGES

Mersi Mr Speaker. Mr Speaker mon kestyon pour Minis i konsern bann staff Air Seychelles ki lo avyon, bann cabin crew – espesyalman ki ler zot fly natirelman zot ganny en allowance an plis ki zot saler basic. E si zot pa fly zot pa ganny sa allowance.  Se sa nou konpran.  Me annan de fwa pour rezon lasante, zot pa kapab fly akoz zot in tonm malad, oubyen bann madanm i ansent e zot pa kapab fly. E dan sa de ka, i paret ki zot pa ganny zot allowance.  Eski Air Seychelles, eski premyerman sa i vre. E si i vre, eski Air Seychelles i annan okenn lide pour donn sa bann ki pour en rezon lasante, oubyen pregnancy, zot pa kapab ganny sa allowance.

Eski i annan en solisyon ki Air Seychelles i kapab anmennen pour sibvansyonn zot ler zot pa kapab fly pour rezon ki an deor zot kontrol ? Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab pour kestyon. Wi mon krwar sa flight allowance si nou pour apel li sa i ganny peye senpleman letan ou pe fly.

Stratezi se fer sir ki nou annan ase cabin crew pour permet ki tou sa lekipaz pandan le mwan zot pe vwayaze, zot pe gannyen sa allowance. So it’s akoz nou ganny reglemante osi par erdtan ki zot kapab fly. Me i annan le ka pour divers rezon zot pa kapab. E ou annan rezon letan zot pa kapab zot pa gannyen.

Lalwa ki egziste Sesel, i antre. Set a dir si i annan li en sertifika dokter i pa kapab, i pa kapab, ou konpran. Me si pa turn up, sa i en lot zafer. Me mon krwar pa pour le moman ki Air Seychelles i annan en fon kot i kapab tou tir en larzan pour compensate dan sa bann 2 ka ki ou’n, ki ou’n site spesifikman.

At the end of the day lesansyel se ki nou bezwen osi tenir kont ki Air Seychelles i en konpani enportan, stratezik pour nou lendistri tourizm, e tou sa. Me finalman son profitabilite i pa tre gran. I annefe border line parey nou’n konstate. So i pa parey en lot konpannyen, mwan a sit Qatar Airways, senpleman parske i fek prodwi son bann kont resaman kot li in fer en kantite profi. So i annan li en pe plis posibilite donn serten benefis son bann travayer eksetera ki pa vreman le ka kot Air Seychelles i konsernen.

So nou pare pour nou redistribye sa ki nou annan a en fason ase ekitab e se pour kwa ki mon pe dir ki nou anvi konsantre plis li ground staff pour le moman.  Se pa ki pa nou pa anvi donnen, oubyen me nou bezwen regarde, fer en letid kler pour nou konnen kwa ki nou kapab donnen.  Mersi Mr Speaker.

 

MR SPEAKER

Onorab Aglae i dan menn laliny ki Onorab Georges in demande?

 

HON EGBERT AGLAE

Wi Mr Speaker.

 

MR SPEAKER

Alright go ahead.

 

HON EGBERT AGLAE

Yes. Minis zis pour en follow up sa ki Onorab Georges in demande. I en kestyon konparativ li. Akoz ki mon krwar pa si annan bokou staff crew ki ansent dan en lannen bokou – akoz ki ler li in grounded pour sa 9 mwan, ok, i konparatif ki sa staff ki li i ground all the time, ou pa kapab at least mezir, anmenn li lo sa package ki sa staff osi ki pe gannyen ater pandan sa letan. Petet shift lo sa package tanporerman pour sa 9 mwan. Apre i ava re ganny shift back to son crew package.   Mersi.

 

MR SPEAKER

Petet avan Minis i reponn, Onorab Georges ou ti annan en kestyon dan menm laliny ankor.

 

HON BERNARD GEORGES

Wi Mr Speaker, mon ti anvi demann Minis, e swivan kestyon Onorab, pou asir nou ki en fwa ki Air Seychelles i antre dan en pli meyer profitabilite ki tou dimoun i ekspekte, e ki nou siny ki ou pour arive en zour, ki sa keksoz i ava ganny pran kont, me antretan mon ti a kontan siport linisyativ Onorab ki fek koze ki antretan as a stop gap measure etandonnen ki napa sa kantite depans ki pour arive, ki Air Seychelles i pran sa an konsiderasyon, e i regarde ki mannyer i pour kapab ed sa pti poursantaz staff pour sa bann pti peryod letan.  Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker mon’n pran byen note sa 2 propozisyon. Mersi, nou ava tenir li an kont.

 

MR SPEAKER

Onorab Larue.

 

HON FLORY LARUE

Bonzour tou dimoun, mersi Mr Speaker, bonzour Minis. Dan Bidze nou ti ganny dir ki R45milyon ti ganny peye avek Etihad pour louvertir nouvo larout pour al Paris pour marketing, e parey ou’n dir marketing Etihad ki fer, e Air Seychelles ki ti peye. Akoz letan pour fer depans, letan ki nou vwar ki Etihad i annan 40 poursan e Air Seychelles i annan 60 poursan – akoz letan pour fer depans Air Seychelles ki peye, me non pa Etihad? E anba ou Minister i annan STB ki fer marketing e sa sif R45milyon ti a kapab al anver son Bidze pour li kapab fer marketing pour Sesel e pour Paris si nou ki’n peye, si Air Seychelles ki’n pey Etihad silvouple.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab pour ou kestyon.  Bon si nou pran STB premye.  Dan Bidze STB i annan en larzan pour fer marketing pour siport bann larout ki Air Seychelles i fly.  Parey mon’n dir dan mwan bann larepons bomaten,  nou tenir an kont stratezi Gouvernman dan   Lendistri Tourizm avek sa ki Air Seychelles i fer.

So i annan en maryaz. E mon kapab konfirm ek ou – par egzanp pour larout Dusseldorf pour larout Durban ki 2 larout ki fek ganny met an plas, e sa 4enm flight ki Air Seychelles in mete lo Paris, in annan en approval ki’n ganny pran kot STB i donn R1.6milyon son Bidze pour siport bann zefor marketing Air Seychelles lo sa 3 larout. So i annan en sipor sorti kot STB touzour pour Air Seychelles direkteman.

Parey ou konnen STB osi i travay avek bann lezot Airline, pa zisteman avek Air Seychelles, me dan sa ka spesifik i koumsa. Enn, de loperasyon ki mwan mon rappel – par egzanp letan Air Seychelles ti al HongKong i touzour an partnership avek Etihad, tou bann kou louvertir sa laliny, fer piblisite pour sa laliny,  ti annefe ganny peye par Etihad, e non pa par Air Seychelles.

Paris resaman, letan nou ti retourn Paris nou tousel oparavan parey ou konnen nou ti bezwen pas atraver Abu-Dhabi, se nou ki’n pey depan…letan mon dir nou pardon se Air Seychelles, e nou ki’n pey depans sa bann sware, eksetera. Air Seychelles, STB i annan biro Paris kot li osi i siport Air Seychelles.  So partou kot nou annan nou biro STB, nou siporte. Dan Lagreman Etihad osi i met son bann biro a dispozisyon Air Seychelles.  E la nou kapab met dimoun dan sa bann biro, nou pa pey rent sa bann biro, nou ganny li pour nanryen.  Me nou, nou bezwen rod nou dimoun pour met dan sa bann biro Etihad si nou oule antre ladan.  Me malerezman mon krwar ki Air Seychelles pa’n servi sa opsyon ziska konmela. Mersi Mr Speaker.

 

MR SPEAKER

Onorab Larue.

 

HON FLORY LARUE

Letan Minis in reponn, i pa’n koze lo sa sif R45milyon pour en destinasyon pour Paris, pour ouver Paris. Is that, i en pri ki nou’n peye ki ou krwar i rezonnab? Akoz Etihad ki fer marketing, zot ki fer bann figures, e Air Seychelles li i peye. Akoz sa ki mon’n konpran ou’n eksplike avan.

Lo kote marketing desizyon i ganny pran lo kote Etihad, Air Seychelles ki’n peye pour market sa – en destinasyon, en larout 45milyon. Eski sa i korek?

 

MR SPEAKER

Minis.

 

MINISTER MAURICE LOUSTAU-LALANNE

Non mon napa sa sif. Mon krwar pa ki Air Seychelles, kekfwa son loperasyon  e la mon pe zis anmenn en pe klarifikasyon, kekfwa eski sa loperasyon Paris i pa rantab. Me mon krwar pa ki Air Seychelles, oubyen Etihad nou al depans R45milyon pour fer marketing lo Paris.  Sa mon pa krwar ki i en sif ki korek. Mersi Mr Speaker.

 

MR SPEAKER

Onorab Ferrari.

 

HON JEAN-FRANCOIS FERRARI

Mersi Mr Speaker. Mr Speaker mon kestyon i annan pour fer avek bann lakaz ki Air Seychelles i lwe. Minis vi ki Minis Finans ti dan Lasanble yer e in dir avek nou ki annan enormeman konsern lo ki mannyer sa biznes Eden Island pe ganny, pe deroule, e ki mannyer sa pe kout nou pei Gouvernman dan tax ki i bezwen al revwar si i pe peye, si pa pe peye – tou bann konsesyon ki zot gannyen.

E la Air Seychelles li i deside pour li annan koman en privilege partner Eden Island. Mon demann mon kes…e sa i kout $90mil par mwan ki mon’n kalkile.  Eski ou koman en Minis sa Gouvernman ki ou annan e lentere osi pour vwar kont piblik i dan en bon leta – eski zanmen zot in kapab konsidere?   Par egzanp Pension Fund in fer en building deliks, i zis R24mil, i zis, i R24mil savedir i mwens ki i Eden Island,  i en sekirite. I annan miray otour, i annan 24 apartman, e zot, zot bezwen 27 apartman, e la pe rann egzakteman 24 apartman ki zot ti kapab gannyen si zot fer en Lagreman avek en konpannyen ki pour lepep Seselwa.

Eski zot pare pour zot get sa direksyon ?   E la mon krwar mon kalkil se ki zot pour kapab fer en lekonomi plis R500mil par mwan Air Seychelles pou fer. Donk, eski zot pare pour zot get dan sa ?   Akoz, e akoz Mr Ramkalawan in demann sa kestyon lo lekel ki own sa bann apartman Eden Island Minis ?   I annan serten Seselwa ki, serten dimoun pa neseserman Seselwa ki own sa bann apartman ki zot, zot al met presyon lo VMA pour Air Seychelles lwe zot apartman, pour zot ganny sa larzan ! E tousala mon krwar i pa tro byen. I pa tro etikman korek. Alors mon pe demande si Air Seychelles ti ava konsidere pour zot fer sa lekonomi, fer nou Pension Fund grandi, e fer nou pei avanse. Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Mwan dakor kot ki nou kapab ganny li meyer marse, nou merit ale rod en fason pour nou negosye ganny li meyer marse. So lo prensip mon dakor.

Mannyer mon konpran oparavan Air Seychelles ti pe lwe ziska 50 apartman Eden Island atraver VMA. In touzour servi sa VMA akoz sa se sel konsesyon ki Gouvernman ti donnen pour 375 lasanm, non Villa pardon. Eskiz mwan, 375 Villa lo Eden Island pour pas atraver sa lorganizasyon VMA. E ozordi i annan zis 28 mon krwar ki reste.    E o fir an mezir nou pe ale nou pour redwir sa nonm parey mon’n eksplike. So si i annan en lot loportinite ki arive, sertennman i dan lentere Air Seychelles pour zot regarde, e mwan ava fer sir ki sa osi i ganny fer.

Pour ou lenformasyon, inisyalman dan sa 50 Villa, sa remark ki ou’n fer i korek. Ti annan Seselwa ki ti osi dan VMA, e Air Seychelles, anfen i pa deside pran sa enn la, pran sa enn la. I fer request kot VMA, e VMA i dir li be i annan sa, sa, vin vizite si i dakor i pran, si i pa dakor i pa pran. Me mannyer mon konpran ti annan.  Ozordi dan sa ki nou pe lwe la ozordi napa. Tou bann propriyeter mannyer mon konpran i etranze. Mersi Mr Speaker.

 

MR SPEAKER

Onorab Ferrari.

 

HON JEAN-FRANCOIS FERRARI

Short follow-up Mr Speaker. Minis eski ler ou pe sey al tackle sa problenm, get en kou dan lefe ki dan lenformasyon konmkwa, si en pilot dizon par egzanp i annan en girlfriend Seselwa i deside opt pour li pran sa allowance, ki mannyer ou’n dir sa?  Sa allowance allocation ?   I annan en keksoz ki ou’n dir. Si i deside pour li pran sa, li i pa gannyen sa ki zot pe peye Eden Island, i ganny lanmwatye.

Savedir sa osi i montre pour dir Eden Island pe ganny privilezye. Si ou al Eden Island ou pey full, Air Seychelles i pey full. Selman si i al kot en Seselwa, i ganny lanmwatye sa allowance. So get ladan osi akoz sa osi i fer ki i de-balans limaz Air Seychelles, e ki nou ganny lenpresyon ki Air Seychelles pe zis favoriz serten group dimoun. Mersi.

 

MR SPEAKER

Minis.

 

MINISTER MAURICE LOUSTAU-LALANNE

Wi. Mersi. Mon note ou konsern Onorab. Zis pour mwan profit lokazyon pour osi dir ki dan Lasanble mon ti dir ki nou pour al vizite, nou pour al fer en kontrandi sa bann Villa ki zot lwe osi ek touris oubyen pa ek touris.  Nou’n fer bokou travay. Nou’n ariv, mannyer mon konpran ozordi i annan 68 Villa. Si i lwe ek touris, oubyen si i lwe a long term avek lezot dimoun sa fodre mon a vin konfirmen.  Me i annan 68.  E nou, nou’n vizit anfen Departman Tourizm in vizit 64 avek bann zofisye Licensing eksetera. So nou travay pe ariv a lafen, e mon ava nobou pli tar vin donn en leksplikasyon isi, kote sityasyon i ete. Mersi Mr Speaker.

 

MR SPEAKER

Onorab Prea, ou kestyon i related?

 

HON NICHOLAS PREA

Mr Speaker, mon’n, lefe ki ou pe extend en pti sa ,mon ti’n lev mon lanmen ki a lafen. Mon a donn sans lezot Manm ki pa ankor…

 

MR SPEAKER

Onorab Woodcock.

 

HON WAVEL WOODCOCK

Mersi Mr Speaker, bonzour Minis, koleg Onorab. Mon kestyon i sirtou konsern bann staff ki travay lo airport Grand Anse Praslin; sirtou bann ground staff, air traffic controller, porter, e menm bann staff Aviation Security, mon konnen zot tonm anba ICA.  Zot konsern se ki zot pe ganny overworked par lefe ki napa ase staff e pour sa travay ki zot pe fer, zot saler ki zot pe gannyen i vreman, vreman ba.

Annefe mon konn en Supervisor Airport ki pour 18 ki i pe travay Air Seychelles ti pe ganny mwens ki R9mil par mwan. E mwan mon konsern ki ou Air Seychelles i anvizaze fer pour rezourd sa bann problenm staff avek bann problenm saler, bann staff Praslin ?    Mersi bokou.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Wi mon okouran, mon’n vizite Praslin. Mon’n vizit loperasyon Air Seychelles osi Amitie, e mon osi okouran sa supervisor ki pe tous en saler  ba. Mwan a dir li koumsa. Mon’n port a latansyon CEO. E ankor sa group travayer lo Praslin i osi dan sa group dimoun ki pour ganny regarde dan sa mwan ki i pour bezwen soumet sa rekomandasyon avek mwan. Me mon ti a kontan osi enform Lasanble ou vwar – ozordi Air Seychelles pe operate li 6 twin otter, e tou twin otter i parey, e in annan en logmantasyon vol lo Praslin, strikteman lo Praslin.  I sorti apepre 25 vol par zour – dan weekend sirtou i ariv 40, ziska 80 vol par zour. So sa ki ou pe dir i konfirmen ki definitivman lot kote ou bezwen resevwar bann vol, tret sa bann vol. Alor in annan en gro logmantasyon.

Mon krwar i annan 2 zour lasemenn kot napa bokou; anfen i annan apepre en 20enn flight. Me dan weekend i annan en kantite flight. So tousala i bezwen ganny tenir an kont letan nou regard sa bann keksoz. Mersi bokou Mr Speaker.

 

MR SPEAKER

Onorab Loizeau.

 

HON NORBERT LOIZEAU

Mersi Mr Speaker.  Bonzour tou dimoun. Minis mon kestyon pour vir en pti otour bann travayer engineering. Eski Minis ou kapab dir nou si annan okenn plan training pour bann enzenyer Seselwa ki travay avek Air Seychelles, akoz konsern ki pe monte se ki i annan anviron 3an okenn enzenyer Seselwa pa ankor ganny okenn training ni lokal, aletranze.

E osi Minis be ler mon pe ekout en pe zafer Air Seychelles la, mon pe gete i pe vir otour Etihad, Abu-Dhabi – eski Minis personnelman, eski ou kapab dir nou si vreman nou pe fly the Creole Spirit, ouswa nou pe fly en lot Spirit, UAE Spirit, or Abu Dhabi Spirit mannyer mon pe get sityasyon la.  Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab. Parey mon’n dir i annan 2 ekspatriye dan engineering e pour le moman Air Seychelles i bezwen sa 2 dimoun, me nou plan se nou pour kontinyen train pour nou ranplas zot. Lamazorite enzenyer se Seselwa. I annan ki’n la depi tre lontan. E se zot ki vreman tenir bann pozisyon kle.

E mon krwar byento i annan en enzenyer Seselwa ki pour pran responsabilite sa Departman.  Letan nou ti fer sa maryaz avek Etihad, in annan lezot enzenyer Seselwa ki’n prefere pa reste, e zot in al rod louvraz avek lezot konpanni aeryen. Sa osi in arive. Si nou annan en plan ?   Wi nou annan en plan akoz nou’n osi train, mon krwar i annan 7 bann engineering graduates ki’n sorti dan sa Lekol Etihad Engineering ki’n rekomans travay isi Sesel.

Si annan 3 ki pa ankor ganny training mon ava regarde lekel egzakteman lekel sa 3, pour nou get li pli spesifikman. Bon i vre ki oparavan ti annan en pe si oule sa Etihad spirit dan sa bann avyon ki Air Seychelles ti pe servi. Parey nou’n eksplike ti annan en peryod tranzisyon, avyon ti kouler Etihad, anndan son bann lanons ti komans par Arab, langaz Arab eksetera. Me ozordi, ozordi lo Air Seychelles sa bann avyon in nepli lo Rezis Arab, i lo Rezis Sesel, e nou bezwen o fir an mezir fer sir ki nou maintain nou rezis korekteman. I annan Lalwa ki gid sa. E parey nou bann enzenyer, z ot pour pran sa bann nouvo responsabilite.  Zot pour sorti kot Etihad. Akoz se nou ki met sa lo nou Certificate of Air Worthiness Sesel. So i ankor en peryod tranzisyon.

Me par kont a lenteryer sa bann avyon priyorite i bezwen Kreol. E mon konnen ki enn sa nouvo Airbus 330 ki incidentally i 11an, en  –  son laz i 11an, i pa 15an parey mon ti dir taler. Mon fer en koreksyon – i annan 11an. Letan i ti ganny livre kot nou pour komans bann flight pour al Dusseldorf avek Paris, malerezman langaz ti touzour an Arab pour komanse. Me la in ganny sanze mannyer mon konpran.  So nou pe retire sa bann pti problenm teknik ki ti egziste, e mwan mon ensiste ki nou Creole Spirit must fly. Mersi Speaker.

 

MR SPEAKER

Lo menm kestyon?   Wi Onorab Gill.

 

HON SIMON GILL

Mersi, mersi Mr Speaker. Mr Speaker dan sanmenm sa laliny pli boner mon’n demann Minis si i annan, zot plan stratezik in konfirmen, wi i annan, e mon prezimen sa ki ou’n eksplike osi i bezwen tonm parmi sa plan stratezi. Eski Minis i ava konsidere atraver ou Mr Speaker, pour fer en prezantasyon sa stratezi Air Seychelles/Etihad pour ki nou vwar ki mannyer zot pe antisip evolisyon par sa maryaz pour ki finalman the real Creole Spirit Sesel i ale – san byensir met an koz okenn relasyon ki nou annan, ki’n ganny etablir avek Etihad byensir; ki mon prezimen baze lo deklarasyon ki ou’n fer.   I pa neseserman en bad story  – ki i annan en kantite eleman success ki ladan.

E probableman nou ti a kapab tann sa osi, laspe sikse ki annan. Mersi bokou.

 

MR SPEAKER

Ou pe koz en prezantasyon pa forseman ek Lasanble me ek piblik. Pou piblik. Minis.

 

MINISTER MAURICE LOUSTAU-LALANNE

Wi mersi Mr Speaker, mersi Onorab. Mon pa vwar okenn difikilte avek sa. Mon krwar ki resaman Air Seychelles son Chairman, son CEO, menm avek mon PS, zot in fer en seri konsiltasyon. Mon bliye mannyer zot in apel sa en Roadshow kot zot in rankontre sak seksyon bann Departman Air Seychelles, kot CEO avek Chairman Mr Wheeling, in eksplik tou staff Air Seychelles pozisyon konpannyen ozordi – kot konpannyen pe ale, e ekout zot reaksyon.

E mon PS in la dan sa bann meeting. Mannyer mon konpran bann meeting in al byen, in byen ganny resevwar. E se en pe dan sa laliny ki ou pe poz sa kestyon, e mon pa vwar okenn lenkonvenyan ki nou fer en summary, e nou demande ki nou vin prezante. Mersi Mr Speaker.

 

MR SPEAKER

Onorab Lemiel.

 

HON SYLVANNE LEMIEL

Mersi Mr Speaker.  Minis mon ti a kontan konnen eski sa Kontra ki Air Seychelles ti sinyen dan lepase avek ILFC – eski i ti en pli bon Kontra ki sa enn ki nou’n sinyen la avek Etihad ?   Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi madanm.   Ou poz mwan en kestyon en pe difisil en pe lo tar. Si mon memwar i bon, sa bann, si nou regard son lease rate, akoz ou ti pey ILFC, i ti donn nou en avyon, nou, nou ti pey li en rental tou le mwan. Mon krwar mon kapab konfirm ek ou, ki sa 2 pli vye avyon, sa bann 767200 la, zot, zot lease rate ti vreman ba. Akoz tou le fason sa bann avyon ti vreman vye.  Ozordi sa lease rate ki nou pe pey Etihad pour sa 320, i en pe pli ser, be sa avyon li i annan zis 14an. Sa lot ti annan 2 fwa sa laz.        Sa bann Boeing 767300 ki Air Seychelles ti pe lwe avek ILFC son lease rate li i pli ser ki sa lease rate ki mon’n enform Lasanble ozordi ki $575mil par mwan. So sa bann avyon Boeing 767 ti pli ser ki sa ki nou pe peye ozordi. Mon kapab zis komant lo ILFC koumsa akoz nou ti pe pey en lease rate pour en lease rate.  E bann avyon, sa bann Airbus parey mon dir ou i annan 11an, e non pa 15an parey mon ti dir Lasanble taler. E sa bann Boeing 767 lepok, i annan enn mon krwar ti en pe pli zenn, me kekfwa lezot ti en pti pe pli vye. Mon pa egzakteman rapel. Me selman vwala bann sif ki mon kapab donnen. Mersi Mr Speaker.

 

MR SPEAKER

Onorab Lemiel wi?

 

HON SYLVANNE LEMIEL

Minis savedir ek Etihad i en pli bon deal then?

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, wi mon krwar i en pli bon deal. Mersi.

 

MR SPEAKER

Onorab Churchill Gill.

 

HON CHURCHILL GILL

Mersi Mr Speaker. Minis vi ki sa Scheme of Service ki ou’n mansyonnen ti fer an 2016, ki ti enkli bann cabin crew ladan. Bann cabin crew i santi fortman pour dir proposal ki’n ganny fer ek zot, pour zot sa letan, e zot santi pour dir i pa adekwat e zot osi krwar pour dir lenformasyon parey in ganny fer sorti avan, serten leksplikasyon ki nou pe gannyen la i pa korek. Alor ki mon ti a sizere Minis, petet ou zwenn ek zot, ekout zot, gete kwa ki zot annan pour dir, e sa i ava ede pour nou alleviate sa sityasyon akoz mon krwar cabin crew i annan en rol tre enportan pour zwe dan Airline. So i enportan ki nou ekout zot, e vwar ki kapab fer pour zot.

Apre lo pour Praslin, mon pe zis gete si i annan serten alokasyon ki ganny kite pour etranze akoz ler ou pe fer booking en Seselwa pe call Air Seychelles, pe fer booking, souvandfwa ou ganny dir pour dir flight i plen. Me selman apre ler ou vin kot Airport ou pe esper en lot flight, ou vwar ki sa flight i sorti pa neseserman plen. Prezan mon kestyon se eski dan zot sistenm i annan en sistenm alokasyon kot zot dir be fini ranpli avek etranze avan si i reste nou a donn Seselwa. Eski i koumsa?   Mersi Minis.

 

MR SPEAKER

Minis.

 

MINISTER MAURICE LOUSTAU-LALANNE

Mersi Minis, Speaker, mersi Onorab, mon krwar ou sizesyon i valab akoz si cabin crew i santi ki i ankor annan serten nen dan sa bann zafer, mwan mon pare pour rankontre zot. E parey mon’n deza dir mon’n rankontre serten, so si fodre rankontre zot mon ava rankontre zot ansanm avek Air Seychelles pour regarde ki mannyer nou kapab avans devan ek sa zafer. Akoz meyer keksoz se touzour kominike me koz lo bann fe. So letan nou pour rankontre zot fotespere osi nou ganny bann fe pour nobou deside lo sa sityasyon. So mersi pour sa propozisyon e mon aksepte antyerman.

Mon konnen ki Air Seychelles oparavan ti annan en sistenm an plas kot pour ou ganny seat – difisil, ou vini i dir ou i plen, ou ale i vid, me an plis zot in met en restriksyon, zot ti dir ou fodre ou vin la 1 erdtan avan pour ou pran en avyon ki pour pran 15 minit pour al anmenn ou Praslin.

Ti annan en bann konplikasyon, e mon konnen ki prezan zot in sanze sa sistenm. Ozordi ou pa bezwen ariv 1 erdtan avan pour ou check-in, ou kapab ariv en demi erdtan avan. So deza sa i ede pour bann kliyan Air Seychelles mont lo son avyon pour li al Praslin. E sa ou vwar akoz ozordi i fleksib. Tou avyon i parey, si i annan plis dimoun, e sa vol 7er i plen, sistenm booking bezwen met li lo 7:15, oubyen ou demann en lot avyon akoz avyon i annan pour pran trafik ki pe build up.  Ou  vwar ?   So i bezwen annan en sistenm kot Rezervasyon pe konfirmen, pe kominik ek operasyon, ou met en lot avyon.

E Air Seychelles pe fer sa tou le fason. Akoz parey mon’n dir dan lasemenn nou 20 vol, a 40 vol, dan weekend 40 a 80 vol. So kekfwa sistenm pa performan to the extent ki nou maksimiz li. Me nou bezwen tenir li an kont, akoz ozordi napa rezon akoz nou pa kapab remain flexible. Mersi Mr Speaker.

 

MR SPEAKER

Onorab Afif.

 

HON AHMED AFIF

Mersi Mr Speaker. Mon pe zis retourn lo sa pwen ki mon ti a kontan demann Minis lo lease rate sa bann avyon. Lenformasyon ki mon annan se ti annan 3 767300 S7ASY, S7FCS, avek S7AHM. Enn ti annan 10an, sa enn ASY ti annan 10an 2012;  2011 ler zot ti pe lwe li, FCS ti annan zis 12an e AHM ti annan zis 15an. E sa enn ki annan zis 12an, zot ti pe lwe li $204, 733 par mwan.

Sa enn ki annan 10an 513mil, pli ba ki sa ki zot pe peye ozordi. E sa enn S7AHM ki zot ti apel li Vallee De Mai i ti pe pey $441mil par mwan. Alor sa bann avyon avek ILFC ti bokou pli ba ki sa ki zot pe peye ozordi. Mon pe demann ou pour konfirmen si sa i korek. Mersi.

 

MR SPEAKER

Minis.

 

MINISTER MAURICE LOUSTAU-LALANNE

Wi. Mersi Speaker, mersi Onorab. Obviously ou annan sa lenformasyon available. Mon pa pour kapab dispute sa lenformasyon ki ou pe donnen akoz mon napa en lot lenformasyon pour mwan counteract it. So I’ll take it on face value.  Mersi pour donn sa lenformasyon. Mersi Mr Speaker.

 

MR SPEAKER

Onorab Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker mon ti ava kontan komans par lir zis en teks ki mon’n gannyen ki mon krwar i enportan. Sa i sorti kot en cabin crew.  Sa cabin crew i dir ; ‘’I am so angry. Mon larm i koul tousel, ek tou parol ki mon pe tande. It’s all lies.’’ Cabin crew.  E an plis ki s, nou tou ki la dan sa Lasanble nou’n ganny plizyer teks sorti kot bann cabin crew. E i annan en kantite lenformasyon Minis ki ou’n donnen bomaten ki pa li.

Sa zafer lapey pour cabin crew, ant 14mil avek soz ann average sa dan bokou lenstans sa pa arive. I senp, si en staff, si en cabin crew, i annan cabin crew ki lo standby pour plis ki 2 semenn. Cabin crew ki lo standby pour plis ki 2 semenn. E apre sa si zot ganny detrwa flight Maurice, oubyen Joburg i pa ariv zot gran keksoz. Staff pour le moman pe depann en pe lo Paris, Beijing akoz laba ki zot, ki konmsi keksoz i pli bon.

Alor mon osi tou dan menm direksyon avek Churchill Gill, mon krwar i enportan pour, e la mon ti ava demande ki en meeting i ganny fer. E sorry Mr PS, be zot ava korize – eski PS in asiste okenn sa bann Roadshow parski lenformasyon anyway, kekfwa sa cabin crew pa ti la – in dir PS zanmen in asiste.

Mr Speaker ankor enn fwa mon demann Minis lo kote lapey – eski zanmen zot in dakor pour ki Cabin Manager I ganny R15mil koman son basic salary, Senior Cabin Officer 12mil, e cabin crew 8mil. Se sa ki zot…Minis a konfirmen si se pa sa ki zot ti tonm dakor dan zot meeting ?   E apre sa zot in al lo kestyon poursantaz. Ankor enn fwa eski Minis i kapab regard ankor ladan pour ki, pour mazinen ki pour dir letan en staff in pran en loan e apre sa i bezwen reste ater, la ankor enn fwa mon retourn ankor son basic salary, son payslip, mon annan payslip la dan mon lanmen. ki mannyer cabin crew ki pour anmenn dan lakour R6774 i pour kapab kontinyen pey son loan ki souvandfwa i plis ki sa si i pa pe ganny sa bann, sa bann soz, sa bann flight.

Apre Mr Speaker, eski Minis, ankor enn fwa pilot in anvoy mwan mesaz, pilot. E la mon ti ava demande eski Minis ti ava kapab zis pour nou prop konesans, ti ava kapab donn serten bann Kontra pilot Seselwa, pilot etranze. Akoz i annan zis en pilot Seselwa. Mon pa pour nonm non, ou ki’n nonm son non bomaten, i annan zis en pilot Seselwa ki anmenn kot li plis 140mil e sa se akoz serten Lagreman avan. Pilot Seselwa pe dir ki pe fly jet ki pou dir sa pa korek sa lenformasyon ki ou’n donnen. E eski nou kapab ganny en konfirmasyon sa IT Contract,  eski Minis i kapab konfirm avek nou si i pa en Kontra 9an atraver IBM. E ki sa Kontra, ofet sa software ki zot pe supply, i pa vreman, bon pour nou kot i annan en kantite bann, en kantite bann problenm.   Mr Speaker, mwan bezwen dir ki ti ava bon pour nou si Minis ti ava pare pour donn nou en pe tou sa bann keksoz pour nou kapab balans byen. E pour nou kapab lo en kote siport Air Seychelles, ki nou National Airline, e ki merit tou nou sipor ; lo lot kote sipor tou nou Seselwa ki pe travay, e ki pe donn en bon servis.

Mwan sak fwa mon travel Air Seychelles, mon ganny the best service lo avyon e mon pour dir ki the cabin crew, I mean that’s the best service ki mon’n gannyen lo any airline. E la mon konpar zot menm avek Emirates, I get the best service. Alor Mr Speaker, eski Minis i kapab donn nou tou sa bann keksoz pour nou kapab koman en Lasanble donn tou sipor ki neseser, e fer sir ki at the end of the day Air Seychelles, e Sesel i sorti as the konmsi koman pli gran gannyan. Mersi bokou.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab leader Lopozisyon. Bon i tre malere ki cabin crew. An fen ou dir mwan en cabin crew ki’n anvoy en mesaz, i santi li koumsa.  Akoz mon tou dabor se pa mon lentansyon vin isi pour mwan vin rakont zistwar.

Mwan toultan mon’n en dimoun ki kontan koz laverite, rod lenformasyon ki korek. E partaz lenformasyon.  Se baze lo la ki nou kapab met bon desizyon. Akoz si non desizyon pa pour zanmen korek.  Alor an sa ki konsern cabin crew, nou’n fini dakor ki mwan pour rankontre zot avek sa lespri. Me mwan ti a kontan zis re konfirmen ki letan mon’n donn sa sif R14mil 200 par mwan an mwayenn pour bann flight attendant sa i baze lo 129 flight attendant, zot pe anvol 60 erdtan par mwan. Zot annan en duty hour 117 erdtan par mwan. Zot lapey fix i R6200, zot lapey varyab avek sa bann hours ki mon’n koz lo la, i ganny konverti, i vin li R8mil par mwan, e i fer R14mil 200.  E sa i baze parey mon pe dir lo en crew ki pe fly 60 erdtan an mwayenn, 117 erdtan on duty. Cabin Supervisor i annan 25 zot, e zot, zot pe fly 64 erdtan e 122 erdtan duty.  Zot pe ganny zot en fix pay R8mil 500, e son porsyon varyab i fer 9300, i fer 17mil 800 par mwan.

Cabin Manager i annan 26 zot parey mon’n dir, zot fly 64 erdtan, e zot duty hours i 111 erdtan an mwayenn par mwan. Zot saler de-baz i R10mil 800, e zot ganny zot R9mil 700 avek sa bann allowance letan zot pe fly baze lo sa bann sif mwayenn ki mon’n donnen, e sa i donn zot R20mil 500 par mwan. Se la kot sa bann sif Mr Speaker, i sorti; setadir mon’n dir flight attendant i ganny li 14mil, e Cabin Manager i ganny li 20mil 500.  Me parey mon’n dir, zot pe fly 60 erdtan pour flight attendant, 64 erdtan, e zot annan en duty hour ant 117 a 122 erdtan par mwan. Sa i bann sif ki mon annan ki nou kapab asize regarde. I kapab annan bann ka parey ou’n eksplike. Onorab Georges in dir i annan bann lansentman kot vre  zot take home pay i kapab mwens ki sa.  I annan de ka ki i pour koumsa. So vwala Mr Speaker.  An sa ki konsern pilot, lenformasyon ki mon annan, se ki pilot, top of the scale pour pilot, e i annan 2 Seselwa, mon repete i annan de Seselwa  ki ganny peye top of the scale i R58mil 100 saler, e i annan en konponan an Dolar $6mil ki fer li $10mil 500 par mwan. Sa mon repete i lenformasyon ki mon annan la, e dan Scheme nou kapab share, e nou kapab rankontre pilot, mon kapab share avek zot, i annan pour bann pilot en advancement otomatik; ki vedir tou lannen, si ou ankor en pilot sertifye, ou’n pas ou medikal, ou pe fly, ou ganny ou en pe plis ki R2mil par mwan ogmantasyon tou le lannen pour en peryod 20an. Kan ou ariv sa 20an ou bloke, e ou ariv lo sa scale ki mon fek donnen la. Vwala Mr Speaker lenformasyon ki mon kapab donnen an sipleman sa 2 kestyon ki Onorab in poz mwan.

An sa ki konsern IT, mon napa lenformasyon.  Mon’n pare pour mwan rod sa lenformasyon, e provide lenformasyon a Manm Onorab Sa Lasanble. Mersi Mr Speaker.

 

MR SPEAKER

Onorab Ramkalawan.

 

HON WAVEL RAMKALAWAN

Mr Speaker, mon pa pe mazinen si mon ti’n mansyonn li konsernan bann enzenyer.

I annan bann enzenyer Air Seychelles parey ou pe dir sa bann ki’n retournen,  e ki an prensip zot bezwen ganny konsidere koman bann graduates e dan Scheme Gouvernman zot sipoze ganny en pti larzan pour Housing. Me ziska aprezan i resanble ki Air Seychelles li i pa pe swiv sa Polisi Gouvernman pour donn sa bann enzenyer zot, konmsi pour enkli dan zot lapey, sa housing allowance e alor mon anvi zis, konmsi sa pwen spesifik – eski Minis i ava regard dan sa sityasyon pour fer sir ki sa bann zenn Seselwa ki’n train e ki, training difisil e ki annan bokou responsabilite ki zot ganny tou zot bann allowance ki zot devret gannyen. E apre Mr Speaker, sorry, sorry, zis pour sa basic salary pour cabin crew, mon krwar nou pa lo menm paz, sa pay slip ki mwan mon annan i 5022, in fact i pli ba ki minimum salary. E i annan en lot dimoun ki’n anvoy mwan en lot pay slip ki dir 5200, me i pa arive R6mil. I ariv R6mil letan zot azout sa crew monthly allowance ki 1176, e ou letan ou’n donnen ou’n azout li ki i pour tonm, ki pour tonm plis.  E zis avek sa, si i ansent letan i pour anmenn dan lakour, i pour anmenn R6mil 74.

 

MR SPEAKER

Minis.

 

MINISTER MAURICE LOUSTAU LALANNE

An sa ki konsern, mersi Mr Speaker, mersi Onorab. An sa ki konsern Housing Allowance, mwan ava regarde. An sa ki konsern saler definitivman nou bezwen annan zis en saler ki aprouve, nou pa kapab annan 2 kalite.  Mwan mon annan enn, ou, ou annan enn – i pa korek. Donk linisyativ sa meeting, nou ava nobou klarifye sa once and for all. Mersi Mr Speaker.

 

MR SPEAKER

Nou annan 2 dernyen kestyon avan nou move pour dernyen Urgent Question.  Onorab Prea.

 

HON NICHOLAS PREA

Mersi Mr Speaker.  Ankor mon komans ek 2 pti sizesyon pour Minis, apre mon annan 2 pti kestyon. Minis avek tou respe konpetans CEO pa pe ganny kestyonnen, me bann staff i demande ki zot ganny en pti pe plis respe from CEO. Son konpetans pa pe ganny kestyon. Ok ?   Me zis zot anvi en pti pe plis respe.  Bann cabin crew, zot pe dir ki zot zanfan ler i ariv 30an, zot ganny exclude dan Rebates. Tandis ki zot frer ek ser, zot manman, zot papa i kontinyen me zanfan i siblings  –  i fanmir prop pour regard ladan.

Bon mon 2 pti kestyon, eski Minis i kapab dir nou si sa 2 nouvo larout Durban ek Dusseldorf pe fer profi ? E ansanm avek sa ki rezon ki lo ou bann flights – aparaman mon’n ganny spesifikman sa 2 – mon mazinen lo tou flights ki delo ki pe servi on board i sorti spesifikman Abu-Dhabi, me i pa pe sorti Sesel.  Eski nou delo Sesel i en grad ki pli ba ? Lo kote enzenyer Minis lannen 2000, enzenyer ti pe ganny en shift allowance R1200. Sa moman la Dolar ti 5.50 ki ti fer zot 218 Dolar.

2017, 17an pli tar, zot shift allowance i reste R1200 at a dollar rate of 13.50 ki fer zot $88. Si Minis i kapab eksplik nou en pti pe sa. Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mwan remersye ou pour sa komanter an sa ki konsern respe ki CEO i merit donn son staff, mon toutafe dakor avek ou. Mwan dyalog avek li toultan. Donk mwan ava fer sir ki mwan pas sa avek li dan son langaz ki i ava konpran korekteman. E mon osi, mon atas bokou lenportans avek sa. Sa zafer 30an, wi, ok, mon santi sa pwen ki ou pe fer sorti. Nou ava etidye.

Dusseldorf ek Durban pour le moman ni enn ni lot pa pe fer profi. Akoz nou fek demare. I annan en serten senzonalite avek sa flight. E nou pe ekspekte ki la an Zilyet, Out, sirtou nou ava vwar en ogmantasyon lo frekantasyon lo sa bann vol. Delo, les mwan ava konfirmen, si nou delo pa bon pour bwar e lot delo  i pli bon pour bwar, mon ava regarde.   Mon konnen ki lontan nou ti pran delo lokal. Enzenyer premye fwa ki mon aprann sa.  Kekfwa dan sa bann meeting ki nou pe fer, i ava permet mwan pour osi note e elabor li plis. Mersi bokou Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.

 

MR SPEAKER

Onorab Larue ou fek antre, ou ti deor. Mon ti dir i annan zis de dimoun ki reste pour koze, midi in sonnen nou annan en lot kestyon. Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker sa issue ki devan nou i serye. E propozisyon fer par Onorab Churchill Gill, i en propozisyon enportan, etandonnen gravite sa sityasyon, nou demande ki Minis o pli vit posib, i fer sa meeting avek bann staff Air Seychelles, sirtou bann cabin crew, e ki i annan latransparans; savedir ki medya i vini, e tou dimoun a konnen ki mannyer cabin crew pe ete, son kondisyon, e tou. E an menm tan i ava ankouraz plis Seselwa ki anvi vin cabin crew pour konnen ki kondisyon, ki mannyer i ete, epi i a vini.

E dan sa Monsieur  le Ministre, nou demann ou en keksoz, sa basic salary  crew la ki ti 5022 la ozordi i 5050 i bezwen ganny ogmante, ogmant li en pti pe ankor pour cabin crew ganny en keksoz ki rezonnab pour li kapab al devan avek !  E finalman lekel kot Minister Finans, oubyen lezot area dan Gouvernman ki ti sirvey, oubyen get sa lagreman Air Seychelles/Etihad – ler Gouvernman ti antre ladan pour advise Gouvernman pour dir i bon, pa bon ?   Konmsi, lekel, ou annan en nide konmsi lekel ki dir get sa?  Mon pa pe atak personn personnelman. Konmsi ozordi la nou pe koz lo tou sa. Then, personn pa’n war nanryen konmsi ?   Donn nou en pti nide lo la.  Mersi.

 

MR SPEAKER

Minis Lalanne.

 

MINISTER MAURICE LOUSTAU-LALANNE

Mersi Mr Speaker. Mersi Onorab De Commarmond.  Wi, zis mon pe repete ki mon pour rankontre avek zot le pli vit posib e si fodre fer li dan latransparans, en keksoz ki mwan osi mwan atas lenportans avek.

E parey ou konnen mon’n site la ki mwan mon sif basic salary i pa ni 5mil ekek, oubyen 5mil ekek, i 6200, ou vwar ?   So mon pa konnen lekel ki pe donn, ki kalite lenformasyon, me nou ava nobou klarifye sa once and for all. Prezan letan ou pran tousala, si en cabin crew i ganny li 14mil parey mon sif ki mon annan, mon bezwen servi sif ki mwan mon annan; R14mil 200 par mwan kan i pe fly sa bann ler ki mon’n dir, e ou konpar li avek lezot kalite saler ki Gouvernman pe peye dan Gouvernman; bann graduates par egzanp, son saler i preski ekivalan en graduate. So i annan osi en ki mannyer nou apel sa, en regar nou bezwen donnen, letan nou pe get sa bann saler. Me pour tou bann diferan propozisyon ki’n ganny fer isi, mon konpran tre byen ki i sanble mwan neseser pour ogmant sa basic salary akoz zot annan sa bann problenm al rod loan.

Mannyer mon konpran Air Seychelles li koman en lakonpannyen, in deza ganny met devan. E li, in ale, in al negosye, e mannyer mon konpran in negosye ek en labank pour le moman.  Be pa tou cabin crew. Pa tou anplwayer Air Seychelles ki reste ek en labank.  Zot annan divers labank. Aparaman i annan en kondisyon ki annan ozordi, kot Air Seychelles in ekrir en let en serten labank pour dir zot sa bann dimoun, zot annan 2 payslip.  Zot annan en payslip Roupi, apre i annan en payslip Dolar.  Zot dir kimil sa 2, se sa ki zot gannyen alor siport zot ek loan accordingly.

E mannyer mon konpran I annan en labank ki pare pour fer sa. Donk dan sa bann diskisyon nou pour gannyen, nou a nobou met tousala a plat, koumsa tou dimoun ava konnen ki pe pase.  E ou lot kestyon, mon pa konnen lekel ki’n fer sensitivity, si i bon, si i pa bon lo sa Kontra avek Etihad avan ki i ti ganny sinyen.  Mersi Mr Speaker.

 

 

MR SPEAKER

Minis petet mon a demann en kestyon avan nou move on to lot kestyon, se sa kestyon rankont ki Onorab De Commarmond in koz lo la. An 2012 nou ti dir ti annan sa Lagreman ki’n sinyen ant Etihad HM ek Gouvernman Sesel.  Me a sa moman ti annan diferan dimoun ki ti ganny fer redundant. E mon konnen i Ankour, e i subjudice, be selman eski dan sa kestyon rankont pa ti kapab osi zwenn sa bann dimoun pour revwar si pa kapab annan en settlement kot zot kapab kontinyen ek zot lavi ?

Mon konnen ou pa ti la sa letan. Me la ou la pour le moman koman Minis ki responsab.

 

MINISTER MAURICE LOUSTAU-LALANNE

Mersi Mr Speaker mon ava demann Air Seychelles lalis sa bann dimoun ki’n fer aret travay, e mon ava gard, zet en regar e mon ava raporte. Mersi.

 

MR SPEAKER

Mersi Minis. Wi.

 

HON WAVEL RAMKALAWAN

Mr Speaker, zis dan sa laliny i enportan parski i annan etranze ki ozordi pe fer travay serten sa bann Seselwa, e i annan plizyer Seselwa la dan mon lespri i vin 2 pilot, enn pilot jet, lot pilot twin otter ki’n soz. Me apre zis pour dir ek Minis letan i fer sa bann meeting mazinen ki pour dir se pa zis cabin crew, parske i annan bokou lanfaz ki’n mete lo cabin crew, me in donn sa committment vizavi bann ground staff, me i enportan pour o pli vit posib fer sa meeting pour ki ground staff osi tou i ava santi ki pour dir zot pe ganny valorize. Mersi bokou.

 

MR SPEAKER

Anfet mon kestyon ti zisteman lo pilot. Lo sa 2 pilot ki ou pe koz lo la ki mon krwar in ler pour zot move on apre 5, 6an ek zot lavi.  E dan tou nou pe koz ground staff osi.  Souvandfwa ou tann konplent ek bann dimoun ki travay dan sekirite kot Airport, mon krwar Minis tousala ou kapab anglob tou dan ou bann rankont.

Mersi pour ou bann repons, nou a pas, si personn napa obzeksyon nou a pas, nou a pas, si personn napa obzeksyon nou a pas en kou lo dernyen kestyon avan nou release Minis. I annan en Urgent Question sorti kot Leader of Government Business. Mon a demann Onorab De Commarmond pour demann ou kestyon.

 

HON CHARLES DE COMMARMOND

Ok. Mersi Mr Speaker. Mr Speaker eski Minis responsab pour Zafer Etranzer dan sa ka la Minis Tourism, i kapab dir ek nou Lasanble Nasyonal ki pozisyon Sesel vizavi sa sityasyon ki’n devlope an Moyen Orient kot 6 Leta Arab in kas tou relasyon avek Qatar ?   Mersi.

 

MR SPEAKER

Minis, mon sipoze sa i pe viz plito ver Lavyasyon Tourizm, pa plito diplomasi me mon osi lo domenn diplomasi, i osi ou domenn. E ou kapab reponn.

 

MINISTER MAURICE LOUSTAU-LALANNE

Mersi Mr Speaker. Onorab De Commarmond pour ou kestyon. Gouvernman Sesel pe swiv de pre sa sityasyon ki pe deroule dan Moyen Orient.  Nou ava rapel ki se le 5 Zen sa lannen L’arabie Saoudite  Emirat Arab Uni, Barain  Yemen  ek Egypt in deside kas tou relasyon, notaman bann relasyon diplomatik e ekonomik aeryen, teres ek maritim avek Qatar. Zot akiz Qatar konm kwa i pe siport en finans terorizm.

Anbasader Qatar dan sa bann pei in ganny 48an pour kit pei.  E son bann resortisan in ganny 14 zour pour fer zot bagaz e kit pei. L’arabie Saoudite , in menm koup sinyal Al Jazeera dan son pei, in osi enterdi Bein  Sport. Tenan kont ki Qatar i enport laplipar son bann marsandiz L’arabie Saoudite, sa kriz pe klerman afekte li. Fodre sepandan note ki 2 pei Golfe in refiz koup zot relasyon avek Qatar. Sa i Kuwait ek Oman e Emir Kuwait i pe zwe rol medyasyon ant bann parti. In fini rankont lerwa L’arabie Saoudite , Riad, ek Lemir Qatar Doha.

Nou Sesel nou bezwen rapel ki tou bann pei dan rezyon Gulf enkli Qatar i reste bann partner kle e fondamantal dan konteks relasyon bilateral, e dan tranzitwar devlopman Sesel. Gouvernman Sesel pe byen swiv sa sityasyon ki pe deroule dan Moyen Orient de pre. An vi relasyon ekselan ki Sesel i partaze avek tou bann pei Golfe nou pe demande, bann pei larezyon o sen lorganizasyon Gulf Cooperation Council, e bann lezot pouvwar mazer, ek parti prenan pour dyaloge, e arbitre pour rezourd sa sityasyon pour ki stabilite e lape i kapab ganny re etablir.

Sesel i espere e swete, ki medyasyon ki pe ganny antreprann par Emir Kuwait i prodwi rezilta, e ki sa dispit i ganny rezourd par dyalog, konprenezon e negosyasyon o pli vit posib, e retir tou tansyon ki egziste ozordi. Sa sityasyon in koz bokou problenm pour bann Konpani Avyon sa bann pei konsernen. Qatar Airways ki baze Doha in ganny plis afekte, 18 destinasyon Qatar Airways in cancel totalman. Menm bann vol kotidyen Qatar Airways Sesel in ganny retarde.  Aprezan i annan en nouvo timing akoz Qatar Airways i bezwen fer en larout pli long avan i ariv Sesel. Qatar Airways  i ariv Sesel prezan 9:50 bomaten, olye 8:50 e kit aswar 18:25, olye 19:25. Okenn son bann vol pa’n ganny cancel. Vol Emirates Dubai, Etihad, e osi  vol Air Seychelles Abu-Dhabi pa’n ganny afekte. Mersi Mr Speaker.

 

MR SPEAKER

Mersi Minis, Onorab De Commarmond.

 

HON CHARLES DE COMMARMOND

Mersi. Mersi Mr Speaker. Mr Speaker eski Minis i kapab eklersi nou Lasanble si sa ki in eksplik nou, eski sa pour annan okenn lefe an zeneral lo nou Lendistri Tourizm a long term si sa sityasyon i kontinyen.

E an menm tan petet lefe ki nou konnen osi pour dir sa problenm, sa relasyon diplomatik, i osi a labaz bann zafer ISIS ensidswit, mon pa oule nou antre ladan as such la dan nou Lasanble. Be selman eski nou koman en Nasyon Souveren nou pe osi etre virzilan lo sa sityasyon. Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab. Lo lefe tourizm mon krwar ki pli sa sityasyon i dire i vin deplizanpli probab ki i kapab afekte nou Lendistri Tourizm Sesel. Sa ki nou bezwen proteze se ki Qatar Airways i kontinyen deservi son larout Sesel.

Parey ou konnen i annan serten Gouvernman pei Golfe Gulf ki’n deza donn lord zot konpani aeryen pour pa pran lo zot bann avyon, bann Qatari. Me nou, nou pa ankor gannyen sa direktiv. Alor i montre ki nou kapab kontinyen fer nou biznes normalman, me ou pa konnen kekfwa demen sa i kapab arive. Me pour lenstan nou kontinyen parey labitid. Mon pe monitor bann vol Qatar ki pe vin Sesel. E parey mon’n eksplike, i napa disruption, e son kantite touris ki i pe anmennen, i a nivo normal. Mersi Mr Speaker.

 

MR SPEAKER

Onorab Sebastien Pillay.

 

HON SEBASTIEN PILLAY

Mersi Mr Speaker. Mr Speaker Minis in anmenn sa pwen lo sa travel exclusion ki’n ganny enkli lo bann pasaze, oubyen bann dimoun ki sorti South Quatari eski i kapab dir nou si nou pe ganny okenn presyon from le 2 lezot carrier ki pe vin isi – Emirates, Etihad ki form parti sa group ki zot in ronpe zot relasyon avek Qatar?  E eski i annan okenn presyon lo sa 2  carrier, ou ki pe vin lo Sesel pour ki Sesel osi i fer en move pour pa aksepte sa bann avyon, oubyen bann pasaze sorti Qatar, oubyen pour zot pran bann pasaze Qatari lo zot avyon osi.

E si sa i le ka, eski sa pour annan en lenpak lo Qatar as a hub ki deservi serten rezyon ki Sesel i deza, ki Air Seychelles osi i annan codeshare avek ?   Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Pour le moman non. Napa okenn presyon ki’n ganny manifeste vizavi Sesel. Me parey mon’n eksplike, si sa sityasyon i dire dan letan, e tansyon i ogmante, i pour kapab ariv en moman kot sityasyon i vin pli konplike. So i dan nou lentere nou tou pour asire ki Emir Kuwait i reisir dan son dyalog, e mon konnen ki la osi menm ozordi ki Prezidan La Turquie pe osi antre dan sa medyasyon.  Donk i annan lezot Gouvernman, e lezot, bann gran pei ki pe anmenn zot soutyen pour ki sa sityasyon i ganny debloke atraver dyalog diplomatik.

I annan serten Konpani Aeryen sa bann pei ki’n met sa blokaz kot zot, zot lenstriksyon i kler pour pa pran sa bann dimoun. Me pour lenstan sa pa pe afekte Sesel. Mersi Mr Speaker.

 

MR SPEAKER

Onorab Ramkalawan.

 

HON WAVEL RAMKALAWAN

Mersi bokou Mr Speaker. Mr Speaker Minis in koz plis lo tourizm.  Me nou annan bokou Seselwa ki pe travay Qatar. Mon konnen kekfwa, me selman son leksperyans avek Zafer Etranzer mon krwar Minis i ava kapab donn nou en larepons.

Ki mannyer sa sityasyon pe afekte, oubyen i kapab afekte nou bann Seselwa ki pe travay Doha, vi ki Lanbasad Sesel i trouve UAE, i trouve Abu –Dhabi ? E letan Minis in dir ki, zot in donn direktiv me nou ziska aprezan – eski Minis pe dir avek nou ki Sesel li si laba i donn en direktiv nou, nou pour swiv zot direktiv, oubyen nou, nou en pei Souveren, e nou, nou fer sa ki, sa ki nou, nou santi i dwat ?  Mersi ?

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab Ramkalawan. Wi kekfwa mon mo ki mon’n servi i en pe misleading.  Non, non, non, setadir par ler zot demann ou pour pa pran Qatari lo ou avyon, ou konpran ?   Be desizyon final se nou menm. Ou annan parfetman rezon, me nou pa ankor menm ganny demande. Se sa pwen ki mon ti pe sey fer resorti.

An sa ki konsern ou dezyenm pwen napa okenn lenpak pour le moman akoz parey ou konnen Qatar i pe kontinyen fonksyonn normalman. Qatar Airways i kontinyen operate. Annefe i en mirak a mon avi ki mannyer i kapab kontinyen operate son bann avyon ozordi. Sof sa 18 destinasyon kot in ganny cancel konpletman; i pa kapab fer. Me lezot tou bann vol Europe, LAZI, L’Amerique, menm lo L’Afrique pa’n ganny afekte, zot in ganny retarde, me pa’n ganny afekte. E mannyer mon konpran  lo plan ekonomik, Qatar i annan ase finans pour nobou tenir le kou pour en peryod ase long.

So mon pa war pour le moman okenn difikilte akoz sa blockade i sanble mwan i pa vize direkteman a bann sitwayen, bann pei ki pe viv Qatar, spesifikman, e kekfwa menm pa spesifikman viz bann sitwayen Qatar zot menm. Mersi Mr Speaker. Wi. Non napa.

 

MR SPEAKER

Onorab Georges.

 

HON BERNARD GEORGES

Mersi Mr Speaker dan menm laliny Mr Speaker mon ti a kontan demann Minis; la ki Emirat Arab Uni in fer sorti en Proklamasyon ki montre senpati pour Qatar i vin en cybercrime ki kapab, ki ou kapab al prizon. Ki Minis, oubyen Gouvernman i kapab donn Seselwa koman konsey.

Eski si sa Seselwa i al Qatar nou pour ganny problenm pour antre Abu-Dhabi dan en lespas fitir akoz stanp dan nou paspor ? E si nou al Abu Dhabi, eski nou pour ganny problenm antre Qatar a en peryod fitir akoz stanp dan nou paspor ?   Eski i annan okenn konsiny ki Gouvernman Sesel i kapab donn bann Seselwa ki pour vwayaz dan sa bann pei. Nou ale, nou pa ale ?   Mersi.

 

MR SPEAKER

Minis ou pour ale pa pour ale ?

 

MINISTER MAURICE LOUSTAU-LALANNE

Wi nou ale. Mon krwar pour le moman parey mon’n eksplike sa dispit i riske pran en pe pli lontan pour regle. Me nou tou nou ti a kontan enkli Emir Kuwait ki sa i ganny rezourd le pli vit posib. Parey mon konstate menm dan Konsey Minis UAE yer zot abord sa kestyon. E i annan en Kominike ki’n sorti ki montre ki zot pa oule target bann sitwayen direkteman, akoz sa i plito en zafer Gouvernmantal. So pour le moman annou ale, annou retournen, annou kontinyen akoz napa sa tansyon, ou menm sa demann pour anpese. Me si sityasyon i sanze, nou ava of course kominik accordingly.  Mersi Mr Speaker.

 

MR SPEAKER

Onorab Ferrari.

 

HON JEAN-FRANCOIS FERRARI

Mon ti a kontan dir, demann Minis vi an menm tan ki nou Gouvernman i rekonnet ki Qatar i enn bann pei pli demokratik ki annan dan  Moyen Orient e ki zot devret enn nou zanmi. Eski Minis in, eski Gouvernman pe deza reflesir ofet laplipar nou, nou dizef tourism, nou tourism basket i pas atraver.

MR SPEAKER

Onorab, Onorab Ferrari, petet ou a refraz sa.

 

HON JEAN-FRANCOIS FERRARI

Non pe vwar…

 

MR SPEAKER

Mon konnen i sezon dizef zwazo.  Be la annou. Re-fraz li silvouple.

 

HON JEAN-FRANCOIS FERRARI

Ok. Non, non. Nou, vi ki sa lendistri depan fortman lo Moyen Orient e ki menm sa 4 avyon ki nou’n koz lo la bomaten zis lapentir ki lo la ki pour nou mon  krwar.  Eski Gouvernman, eski Gouvernman in komans reflesir a diversifye en pe akse touris ki vin Sesel, e devlop bann menm senaryo ki nou’n fer Paris ankor, Madrid, Italy, La Suisse parey nou ti fer avan akoz  i paret mwan dan sa rezyon lemonn i pe sofe. E i pa pour responsab, i pa pou en keksoz responsab pour en Gouvernman les sityasyon blow, avan nou fer sityasyon. So eski Gouvernman i konsernen e i pe reflesir dan sa diversifikasyon?  Mersi.

 

MR SPEAKER

Minis.

 

MINISTER MAURICE LOUSTAU-LALANNE

Wi mersi Mr Speaker. Mersi Onorab Ferrari. Mon krwar i annan de keksoz. Premye keksoz parey mon dir nou pe swiv sa sityasyon de tre, tre pre. Akoz nou ti a kontan en rezolisyon le pli vit posib. Akoz si napa en rezolisyon, i riske annan lezot konsekans. So sa se priyorite. Be en pli a long term ou annan parfetman rezon, e toultan in en keksoz sirtou dan domenn Tourizm, Lavyasyon Sivil, nou’n regarde kwa son alternatif. Akoz nou bezwen annan nou par egzanp bann avyon ki kapab over fly sorti dan nou bann marse emeter pour vin Sesel, pa neseserman bezwen apoz dan sa bann landrwa. So sa nou deza ekipe.

E parey ou’n sit Paris, Dusseldorf nou’n azoute direkteman,  i nepli pas atraver sa bann pei. So deza nou annan, nou annan en rezilta si oule.  Me nou bezwen regard de plis, e se pour kwa nou osi pe diversifye nou bann marse, nou pe al an Chine, nou pa bezwen pas atraver laba pour al an Chine, eksetera. Nou annan nou lezot marse potansyel ki nou kapab devlope dan le fitir. Mersi Mr Speaker.

 

MR SPEAKER

Onorab Basil Hoareau.

 

HON BASIL HOAREAU

Mersi Mr Speaker. Mr Speaker eski Minis i kapab donn garanti sa Lasanble e pep Seselwa an zeneral ki okenn pozisyon ki Sesel pour pran an relasyon ek sa sityasyon pour enn ki Sesel pa pour les li ganny met presyon par okenn lorganizasyon, ouswa okenn lezot pei, e ki i pour enn ki pour ganny pran touzour dan lentere Sesel, e Seselwa ?

 

MR SPEAKER

Bon kestyon. Minis.

 

MINISTER MAURICE LOUSTAU-LALANNE

Mersi Mr Speaker. Mersi Onorab, wi efektivman nou bezwen regard nou pozisyon ou konpran.  Nou kapab osi ede dan nou anmenn nou kontribisyon dan sa dyalog eksetera kot nou kapab koz ek nou partner, akoz zot osi nou bann partner. Tou sa bann pei kot i annan sa konfli nou bann partner. Nou pour zwe nou bout, me finalman ou annan parfetman rezon desizyon final, se nou desizyon. Mersi Mr Speaker.

 

MR SPEAKER

Onorab Larue mon’n ganny en note ki ou annan levidans pour prodwi devan The House. Levidans lo kwa, lo Qatar avek son bann vwazen, oubyen, eski nou pe koz lo en kestyon spesifik, Urgent Question LGB in demande ?

 

HON FLORY LARUE

Eskiz mwan Mr Speaker. Mon’n anvoy note kot  Madam Clerk. Ti annan en klarifikasyon kot Minis a lot kestyon oparavan ki mon ti anvi klarifye – en figure ki mon ti donnen e Minis i dir mwan i pa konnen sa sours sa figure. E mon ti zis anvi klarifye ek li ki sa i sorti dan Bidze le 24 Fevriye e PS Payet ki ti donn sa Bidze, sa figure, ti $4.5milyon ki ekivalan R60milyon. Mwan mon ti’n times (x) li by 10 ki ti ganny peye pour Marketing Flight Paris, destinasyon Paris, e sa verbatim mon annan, e mon kapab fer en kopi vin kot ou, e ou a kapab montre Minis. mersi.

 

MR SPEAKER

Ok. Me mon krwar Minis i ava resevwar kopi ki ou annan, e mon sir i a gete ki i pour fer avek sa si ou annan sa levidans. Mersi.

 

HON FLORY LARUE

Mersi Mr Speaker. Mersi bokou.

 

MR SPEAKER

Onorab Aglae ou annan en dernyen, dernyen kestyon ?

 

HON EGBERT AGLAE

Mersi Mr Speaker. Mr Speaker dan larepons Minis in fer resorti ki dan zot pe monitoring, zot bann vol Qatar in reste parey. Mon kestyon i lo kot i konsern bann kargo ki sorti Qatar ouswa dan bann pei larezyon ki Sesel ouswa bann businessman Seselwa pe fer biznes avek laba Qatar, eski ou pe remarke ki annan en sanzman ladan?

E mon dezyenm bout vi ki la resaman osi i annan 2 pei larezyon, Comores avek Maldive osi mon krwar ki’n zwenn dan sa laliny pour boycott. Eski sa osi pour annan bann lefe lo petet bann transit ki  ganny arive dan pei ? Mersi.

 

MR SPEAKER

Minis

 

MINISTER MAURICE LOUSTAU-LALANNE

Mersi Mr Speaker, mersi Onorab.  Mon krwar si i annan kargo ki pe vin par air freight lo Qatar Airways i en pti avyon. So kekfwa pour napa bokou akoz mon konnen deza zot annan en pe load restriction, zot pran plito pasaze, pa telman kargo. Me i pa anpese ki letan ou aste en keksoz Qatar ou kapab aranze to ship it pour vin Sesel. So sa mon krwar pa pe ganny disrupt, amwen ki i bezwen pas par bann Por UAE. Me dan lezot por parey Salalah Oman, eksetera napa blokaz avek Oman; akoz Oman i en osi en pei ki pa’n zwenn bann lezot pei GCC pour fer sa blokaz.  An sa ki konsern Emirates avek Etihad, zot, zot pe kontinyen operate normalman. E zot anmenn kargo normalman atraver sa bann pei. So napa problenm kontinyen fer biznes.

An sa ki konsern lezot pei.  Bon sa se zot desizyon pour zot menm.  Nou, nou, nou pa anvi pour le moman pronons nou lekor plis ki nou oule ki sa zefor diplomatik i ganny, i rezourd sa problenm. Bann trafik tranzit ki nou annan, i plito  L’Afrique du Sud, Madagascar, atraver Sesel pou al plito dan L’Inde. I annan en pe trafik ki sorti Madagascar ki mont Paris. So sa pa pe ganny vreman afekte. I annan en pe trafik ki mont lo Etihad/Air Seychelles ki al Abu-Dhabi sorti Madagascar e sa pa pe ganny afekte. Mersi Mr Speaker.

 

MR SPEAKER

Avek sa mon ti a kontan. Sorry. Mon pa’n konpran. Oule demann en pti kestyon?

 

HON WAVEL RAMAKALAWAN

En pti follow-up lo sa size.

 

MR SPEAKER

Wi, wi, go ahead.

 

HON WAVEL RAMAKALAWAN

Mr Speaker vi ki Minis in donn nou tou sa bann detay, mon anvi demann li si Sesel i annan en Konsil Qatar ki pe konmsi ki lo teren ki pe regard tou sa bann size avek; avyon, blokaz, e an menm tan osi lo Seselwa ki pe travay laba?   Konmsi pour reasir zot.

 

MR SPEAKER

Minis.

 

MINISTER MAURICE LOUSTAU-LALANNE

Mersi Speaker. Mersi Onorab. Mon pour bezwen al pran lenformasyon pour mwan donn ou akoz i vreman enportan sa kestyon ou’n poze e mon napa son lenformasyon. Mersi bokou.

 

MR SPEAKER

Bon. Avek sa nou ava remersye Minis pour son letan ki ou’n pas ek nou depi yer bomaten pour reponn en levantay kestyon e bann lenformasyon ki ou’n dir nou ou pour donn nou. Nou espere by Vandredi 4er nou an ganny sa bann lenformasyon pour eklersi bann dout ki bann Manm Onorab i annan. Nou ti a profit lokazyon pour swet ou tou de bon latet en Minister ki gran, e ki tre enportan pour pei.  E avek sa nou ti a kontan eskiz ou, bann Manm reste nou annan en lanons pour fer. Mersi Minis Maurice Loustau-Lalanne ek ou lekip, e nou a eskiz ou.

 

MINISTER MAURICE LOUSTAU-LALANNE

Mersi Mr Speaker. E mersi Manm tou Onorab. Mersi, bonn apre midi.

 

(MINISTER MAURICE LOUSTAU LALANNE AND HIS DELEGATION WAS EXCUSED FROM THE HOUSE)

 

MR SPEAKER

Bon nou a, nou a al, nou’n fini nou bann kestyon pour ozordi pour bomaten. E mon ti a kontan anonse ki i annan, pour annan en meeting IAC (International Affairs Committee) dan Room 2, 1er edmi la apre midi pandan lunch break. E nou a retournen 2er akoz nou annan nou Mosyon pour nou kontinyen travay lo la. So nou a pran en break la. Eskize nou’n al en pti pe tar, be mon krwar ti enportan pour nou klersi tou sa bann pwen ki nou’n klersi, e nou a retournen 2er.

 

(BREAK)

 

 

MR SPEAKER

Bon. Bonn apre midi tou Manm Onorab e bonn apre midi tou bann dimoun ki a lekout. Nou pou kontiny lo nou travay Lasanble Nasyonal pour sa apre midi. E nou pou kontiny avek Mosyon ki nou ti’n komans pran semenn pase, Mosyon ki Leader Lopozisyon Onorab Wavel Ramkalawan in anmennen lo La Digue. Mon deza annan en lalis bann Manm ki’n eksprim zot lentansyon pour fer zot deliberasyon lo sa Mosyon. E si i annan okenn lezot Manm osi tou ki enterese zot a kapab lev lanmen e mon ava note. Ok, nou pou demare avek Onorab John Hoareau.

 

HON JOHN HOAREAU

Mersi Mr Deputy Speaker, bonn apre midi tou Manm Onorab, bonn apre midi tou sa ki pe ekoute. Mr Deputy Speaker mon pou siport Mosyon Onorab Ramkalawan totalman, akoz sa Mosyon in vin dan, dan en letan apropriye kot klima politik in sanze dan Sesel. Ozordi LDS ki an mazorite dan Lasanble, e mon ler fer rapel ki dan en leta koabitasyon, nou bezwen travay ansanm pou fer marse sa pei. In nepli letan kot bann striktir dan distrik oubyen parey Mosyon pe fer referans lo La Digue, ki pa reflekte la realite politik pour kontinyen egziste.  Sa Mosyon i anliny avek prensip la demokrasi, latransparans, rann kont ki Prezidan Faure ti dir pou dir sa pou diriz son manda.

Alor Mr Speaker, Mr Deputy Onorab Sophola pa devret per nou fer sorti sa bann sityasyon dan pei kot nou vwar kot i mank latransparans, i mank la demokrasi mank rann kont. Ler Onorab Sophola in koze semenn pase in antre lo en ton larogans e defansiv. Konmsi tou keksoz La Digue i byen, e tou keksoz pe byen marse. La Digue pa propriyete personn. Alor ler Mosyon i vin lo platform Lasanble nenport ki Manm Lasanble i kapab koz lo sa size. Mon pa kapab konpran akoz ki Onorab Sophola pe demande ki nou pe rode ek La Digue e akoz nou pe koz lo La Digue?

Pour azout avek sa ki Onorab Henrie ti fer resorti semenn pase, mon’n vwar Onorab  Sophola in mank sa loportinite pour li rod plis pou La Digue. In zis sey defann san pran le vre loportinite pou sey rod solisyon e anmenn sizesyon pour sa kantite problenm ki Digwa pe fer fas avek. Zisteman ozordi lo rikord Minister Lasante La Digue i annan rikord pour plis ka Dengue lo

Sesel. Sa i montre ki i annan en problenm delo sal oubyen resipyan ki pe gard delo en pe partou, partou, kot moustik i miltipliye. Ogmantasyon, otomatikman sel konklizyon se i annan nesesite pour netway La Digue e retir sa kantite resipyan e konstri dren delo sal ki pa gard Moustik.

Kwa ki fer, ki fer … les mwan koze, les mwan koze, ou’n ganny ou sans koze les mwan koze.  Ok.

 

MR DEPUTY SPEAKER

Onorab kontinyen, Onorab Ghislain ou vin apre ou a fer sorti ou bann pwen. Onorab Hoareau kontinyen.

 

HON JOHN HOAREAU

Zisteman parey mon’n dir lo rikord Minister Lasante La Digue, in rikord plis ka Dengue lo Sesel, sa i montre ki i annan en problenm delo sal oubyen bann resipyan ki pe gard delo en pe partou, partou kot moustik i miltipliye. Otomatikman sel konklizyon se ki i annan en nesesite pou netway La Digue e retir sa kantite resipyan e konstri bann dren e desarz delo sal, pour ki i pa gard moustik. Kwa ki fer sa madanm ankoler ler nou pe dir pour dir i annan bokou salte La Digue?  Ler nou pe dir annou fer La Digue pli prop, annou, ler li i demande oli problenm?   Be se sa problenm1

I vre ki serten kantite salte osi i ganny anmennen par viziter, alor i neseser pour rod solisyon pour sa problenm parey lakantite bin ki i annan, ranforsi Lalwa kont literring, revwar sistenm anmas salte. Si sa bann Board ki la pa’n promouvwar sa alor zot striktir i defayan. Mr Speaker, Mr Deputy Speaker lekol e lopital se 2 size ki la depi lontan, plis ki 15an pase rafal ki mon ti pe fer lekol La Digue sa size ti ganny koz lo la lo nivo Gouvernman. Ozordi plis ki 15an pli tar nanryen pa ankor ganny fer, Mr Deputy Speaker ankor konklizyon se sa striktir ki an egzistans i pa efektiv.

Onorab Sophola i bezwen aksepte sa; tro lontan zis en pti group elit Parti Lepep kontrole par Komite Santral ki pe fer tou desizyon lo La Digue. Menm si Onorab Sophola in dir ki se dimoun La Digue ki pou desid lo devlopman La Digue, nou’n vwar ki serten dimoun i  sorti Mahe in vin asiz lo zot bann Board. sa pa reflekte klima politik aktyel plito en pti group ki pe zis protez zot lentere zot form parti sa political machinery ki’n senm lafreyer enorm avek lepep La Digue, pou fer zot krwar pou dir si zot pa avek Parti Lepep zot pa pou ganny okenn servis Gouvernman.  Mr Speaker sak fwa mon ganny loportinite pou al La Digue, mon koz bokou avek mon bann zanmi Digwa e zot fer resorti zot problenm.

Mr Deputy, zabitan La Digue i dir mwan ki, i dir mwan ki Board La Digue i koronpi.  E zot in permet serten letablisman touristik La Digue ki substandard pou ganny konstri, akoz afilyasyon politik ou serten faver ki’n ganny donnen, kantmenm travel advisory lo internet in koz lo sa size nanryen pa’n ganny fer. Tandis serten lezot dimoun pa’n zanmen kapab demar zot proze.

 

MR DEPUTY SPEAKER

Order! Order! Order! Onorab, Onorab Hoareau en pti moman, Onorab Ghislain ou pe al koze apre Onorab Hoareau ou a fer sorti ou pwen, ou a fer sorti ou pwen dan ou deliberasyon.

 

HON CHANTAL GHISLAIN

Mon le ki i retract sa ki in dir.

 

HON JOHN HOAREAU

Non mon pa pou retract nanryen.

 

MR DEPUTY SPEAKER

Kwa ki ou le, kwa ki ou le ki i retract.

 

HON JOHN HOAREAU

Mon’n dir ou dimoun La Digue

i dir.

 

HON CHANTAL GHISLAIN

Eski i pe dir ki dimoun lo Board La Digue i koronpi?

 

MR DEPUTY SPEAKER

Ok, ok Onorab Hoareau in dir Board, dimoun La Digue in dir Board i koronpi.

 

HON CHANTAL GHISLAIN

Be dir li repete – pa dir dimoun La Digue.

 

MR DEPUTY SPEAKER

Wi, wi, wi annan drwa repete i pa’n fer okenn lakizasyon msye entel, madanm entel. In dir Board. Ou annan ou sans, ou sans apre, apre sa ou annan ou sans pour ou koze ou ava met keksoz annord an perspektiv. Onorab Hoareau kontinyen.

 

HON JOHN HOAREAU

Wi mon ava repet sa, malerezman sa madanm i en pe malelve in disturb mwan en pe. Mr Speaker zabitan La Digue in dir mwan, la mon repet ankor in dir mwan ki Board La Digue i koronpi. E zot in permet serten letablisman touristik ki substandard pou ganny konstri akoz afilyasyon politik ou serten faver in ganny donnen.

 

MR DEPUTY SPEAKER

Onorab Hoareau, Onorab Hoareau atann en moman.

 

HON WAVEL RAMKALAWAN

Mr Speaker point of order, mon pe sey swiv sa deba e Onorab Ghislain.

 

MR DEPUTY SPEAKER

En moman, en moman met ou, met ou mic off. Yes?

 

HON WAVEL RAMKALAWAN

Mr Speaker konman loter Mosyon mon pe sey ekout sa ki sa dimoun ki pe koze pe dir. Pour mwan si i annan pwen pour mwan note, me Onorab Ghislain pe kontinyelman entervenir. Si i kontiny koumsa mon pou demann ou si ou pa kapab call her to order pour ki nou a kapab annan en deba kot en dimoun i koze a la fwa. Mersi.

 

HON DEPUTY SPEAKER

Ok, mon appeal avek tou Manm i en Mosyon ki’n konmanse depi semenn pase wi nou konnen sa, sa deba ki’n ouver i annan serten tansyon. Nou kapab interject – mon pa mind nou interject across the table me a en serten level ki ou pa anpes sa lot Manm koze.  Ok?  Mon tolere ziska en serten level ok, me si zot ensiste, i al an deor sa mon pou bezwen apply Standing Order. Ok? Onorab John Hoareau kontinyen, wi Onorab Sebastien Pillay.

 

HON SEBASTIEN PILLAY

Mersi Mr Chair, Mr Deputy Speaker, Mr Deputy Speaker mon pe zis port latansyon Onorab Hoareau to Order 54, (7) (d).  Lefe ki Onorab Ghislain, mon pe sey zis eksplike ki mannyer ki sityasyon in ariv tel. Lefe ki Onorab Ghislain i en Manm ki lo sa Board, par sa largiman ki ou’n fer ou impute en improper motive par dir ki sa Board i koronpi. Therefore Onorab by extension Onorab Ghislain i koronpi, mon krwar statement ki ou devret pe fer se ki pa mwan ki dir me se dimoun La Digue ki’n dir koumsa i ava sa. Pa sa ki in dir, se pa sa ki in dir en, se pa sa ki in dir Mr Deputy Speaker.

 

MR DEPUTY SPEAKER

Ok, mersi Onorab Sebastien Pillay, mon krwar sa ki Onorab Hoareau in dir e in repete ankor apre i kler. Onorab Hoareau pa bezwen repet li en 3enm fwa move on kot ou’n arive avek ou deliberasyon.

 

HON JOHN HOAREAU

Mersi, Mr Deputy Speaker, tandis ki serten lezot dimoun pa kapab demar zot proze akoz Board i rod tou sort lipou avek zot avan ki i donn go ahead pour fer zot aplikasyon al kot Planning Authority.  Mr Deputy i annan Lalwa ki anpes konstri lo shoreline, me ankor i annan serten laprouvasyon ki, ki’n ganny donnen pou konstri lo shoreline akoz koneksyon familyal e tandis ki lezot i bezwen sivre Lalwa. Dimoun La Digue i ankoler Onorab Sophola e Onorab Ghislain, pri lavi lo La Digue i en gro konsern ki Onorab Sophola ti’n devret sezi sa lokazyon pou koz lo la si i vreman enterese avek sor La Digue parey i pe fer krwar.

Mr Deputy en Digwa i bezwen depans plis ki enn fwa edmi pou fer en lakaz an konparezon avek dimoun Mahe. Sa pa zis.  I pa tro for lo sa zenn koup ki anvi konstri en premye lakaz. Alors si ti annan en Board efektiv i ti devret pe propoz ek Gouvernman bann fason ki pou fer desann pri lavi La Digue. Onorab Sophola ti devret pe koz avek sa bann dimoun parey Lenny Durup, parey Frank, lo La Belle Seraphina e lezot ankor e ti a dir li ki problenm ki La Digue i annan.

Size konsesyon fuel pour sa bann bato ki anmenn marsandiz, size fer desann Harbour dues pour fer kou lavi vin en pe pli ba. I devret sa bann ki devret domin son bann diskisyon. Mr Deputy Speaker i annan bokou konplent lo La Digue menm eskiz mwan, Mr  Deputy Speaker i annan bokou konplent La Digue menm si Onorab Sophola pe dir nou ki tou keksoz i an roz. Lo size later mon krwar Onorab Flory Larue in fer zistis sa size, kan i ti koz lo sa Minis, sa ansyen Minis ki ti’n abiz sistenm e pandan sa bann lepok in fer, in aste plis ki 52 morso later, ki parmi i annan en kantite lo La Digue ki’n revann apre, serten kantite in revann.

E mon, mon le fer, mon le fer en pti anekdot osi kot en dimoun ki ti al aste en morso later ek Gouvernman e sa Minis ti dir koumsa pour dir ki, ‘’ler mon pe vann ou sa later plant en pye fri ki pous gous.’’ E ler ti vir avek sa Minis i ti dir li koumsa, ‘’be ki kalite ki mon pou plante pye zak oubyen pye santol?’’  I dir, ‘’mon pa enterese avek sa fri mwan mon enterese avek sa gous.’’  E pa zis li i annan ankor pou ganny trouve, pou ganny deviste dan sa kalite zwe.  En lot Manm Onorab i ava kapab take up sa bann matter pli tar.

Lo size license pour pick up, buggy e taxi e lezot problenm menm ankor; alors sa Mosyon ki Onorab Ramkalawan in anmennen i pou met latansyon lo en striktir ki pli bon ki pa koronpi e mal organize.  I enn ki pou met, i en ki pou demann, ki en striktir i reflekte larealite ozordi. I enn ki pou ekout dimoun La Digue, Mosyon pe demande ki sa bann striktir non-performan i ganny met ater e ganny ranplase par enn ki ekout bann sor bann dimoun La Digue.  E anmenn latransparans, bonn Gouvernans, rann kont e i ava, sa bann keksoz i ava fason fer e vwar keksoz.

Pour terminen mon pou demann tou bann Manm Onorab lo lot kote latab, sirtou sa 2 Manm ki sorti La Digue pour donn nou sa sipor e met La Digue premye. Donn La Digue en sans.  Mersi.

 

MR DEPUTY SPEAKER

Mersi Onorab John Hoareau. Onorab Chantal Ghislain.

 

HON CHANTAL GHISLAIN

Mersi Mr Deputy Speaker. Mr Deputy Speaker ti annan en keksoz ki Onorab in dir mon ti oule i retract. Ler i ti dir Minis, Minis ti vin dir ki La Digue i pli o dan Dengue. Sete Anse Royal e La Digue ti 5enm. Dir li aret mislead the House e aret mislead pep Seselwa. Mersi. I pa’n nonm sa li.

 

MR DEPUTY SPEAKER

Order! Order! Order! Onorab kontinyen.

 

HON CHANTAL GHISLAIN

Mr Deputy Speaker, dapre nou granmoun en zwazo ki napa en brans pou apoze, zot touzour dir li i en zwazo move zorgir. Me en zanfan ki napa ni papa ni manman – i en orfelen.  La Digue parey tou Digwa e Digwaz pe enport ki kote zot ete ozordi, menm si zot pe viv Mahe ou Praslin, La Digue i touzour en zil ser pour mwan e pli ser ankor pou nou tou. Sa i meyer kado mon lavi e meyer kado tou bann Digwa e Digwaz. Mon zil byenneme, zil mon nesans e zil mon lanfans. Se pour sa rezon ki mon gard li byen pros avek mon leker.  La Digue se touzour avek bokou lemosyon ki mon koz lo ou.

Mr Deputy Speaker Sesel i en Pti Leta Zil byen determinen, determinen pou fer lemonn ekout li; determinen pou fer li ganny rekonnet e respekte pour sa ki i ete. E ler mon get Sesel pe lager pou rod son plas dan sa lemonn, mon konpar li avek mon pti zil La Digue.  Nou osi nou pti e nou osi nou pe lager pour nou ganny ekoute e pou kapab ganny rekonnet parmi tou sa lezot 25 distrik dan nou pei.

Wi nou spesyal.  I vre ki nou kapasite gannyen lo zil i plis ki bokou dimoun lo Mahe. Sa i akoz nou bann dimoun i souvandfwa swazir e i annan letan pour zot kapab al fer de louvraz par akonpli zot rev pour zot kapab, pour zot kapab akonpli zot rev pour zot lekor e zot fanmir.

Digwa e Digwaz i konn zot priyorite dan lavi. Me kestyon i eski nou plis ris ki tou bann lezot dimoun lo Mahe? Mon repons i non. Parey loter Mosyon in fer sorti, kou transportasyon  pou ariv La Digue i o. Me sa ki loter Mosyon pa’n fer ankor son homework, se ki depi lannen pase, in nepli annan VAT lo okenn transportasyon materyo konstriksyon ki ariv La Digue. Si sa bann propriyeter pa pas sa bann benefis lo kliyan, sa i zot ki an defo. Parey i pa’n fer son homework pour konnen ki La Digue nou’n nepli bezwen mont Mahe pou al fer Passport. Sa depi dan Senkyenm Lasanble mon’n deal avek; savedir sa bann sif sepa konbyen ki i pe nonmen pour en Digwa fer Passport i senpleman bann lalang, mansonz ki in bat avek nou.

Ler loter Mosyon in koz lo la kantite ki en bato i devret peye, tou sa ki in dir i vre. Akoz in spesifye dan Harbour Act me loter Mosyon pa’n fer son homework pour li konnen ki i annan en derogasyon pour bann bato Praslin e La Digue, kot zot ganny 60 poursan discount lo kou kot zot reste avek lasose.  Me pour La Digue bato pa pey nanryen akoz zot napa landrwa pour zot mouye pour lemoman. Meeting ti ganny fer avek tou bann met bato kargo, ki zot ti al Praslin e zot ti ganny dir ki zot pa bezwen peye pour le moman pour zot kapab, akoz zot napa landrwa pour zot mouy zot bato e sa ti osi enkli dan weekend osi.

Sel depans ki bann bato kargo La Digue i peye, i selman sa R60 pour sak fwa ki zot koste lasose Mahe e R60 ki zot koste avek lasose La Digue.  E ladan i enkli delo e lalimyer ki zot servi pour nanryen lo lasose. Si nou pran La Belle Seraphina par egzanp zot pey zot zis R120 par zour ki egal R2400 par mwan – se tou ki zot peye. Sa zafer ki zot bezwen peye pour reste avek lasose ki loter Mosyon in dir nou i lalang; bann bato La Digue i pey zis R60 clearance e pa peye berth. Tandis ki Spirit of Ton Joe li i pey R110 clearance akoz son tonaz i pli o.

Mr Deputy Speaker, lannen apre lannen nou’n lager isi dan sa Lasanble pour atak bann sityasyon kou pri lavi lo zil.  Eski nou totalman pa krwar ki dan nou prop frer, nou pa krwar dan nou prop frer, nou pa krwar dan nou prop ser e frer Digwa, ki fer nou bezwen esper zans Mahe pou nou vin dir nou problenm, zis pour esey re ganny mileage politik? Nou Digwa nou kapab byen koze nou e nou byen kapab rezourd nou problenm dan nou fason, e nou pa bezwen zans Mahe pou vin dir nou ki pou fer, e ki mannyer pou fer lo nou zil. Pa bokou lezot distrik, parey bokou lezot distrik e lefe ki La Digue i pti tou-le-z-an nou organiz en meeting piblik lo zil. Sa DA ki organiz meeting piblik ansanm avek lofis MNA.

Si ou vreman senser e vreman annan frer Digwa e ser Digwa a ker, akoz ou pa ti vin meeting e met ou pwen devan. Si zot konsern tou sa letan sete pou rod konsesyon lo fuel ou vin asiste sa meeting e ou met ou pwen devan e nou ava anmenn devan. Ki sa nou bezwen esper, asiz dan nou pti kwen konplent apre esper zans Mahe desann lo nou zil, pou vin dir dimoun La Digue ki pou fer?   Prezan pe zwe pli gran malen kree en striktir pour anmenn sa devan sa ki enteresan zanmen ou’n vwar sa bann dimoun dan meeting. Tou-le-z-an ou vwar menm dimoun dan meeting.  Wi nou annan problenm lo zil, me sa ki mon kapab garanti zot, se ki La Digue i pli dan bon ki bokou distrik.

Pli dan bon ki Corgat Estate; par egzanp. Mon bezwen zis riye la. Ou konnen ler mon debark La Digue ou konnen ou marse dan ou savat may dan pous lo ou bisiklet, konmsi sa lafreser e ou kapab konpar sa avek Corgat Estate ouswa nenport ki distrik Mahe? Konmsi enn ler mon zis mazinen be parfwa ki zot ti pe vin fer?   Seryezman?   La Digue nou pli ok ki bokou lezot distrik lo Mahe.  I en fe!  Pas partou La Digue – napa en payot – napa en dimoun ki pe dormi lo kanmarad, e napa en lakaz an fey ouswa en lakaz fay, fay kote.  Tou nou lakaz La Digue i byen zoli e byen up-to-date. Nou napa zenn vyeyar; nou napa Top-up, nou napa ghetto e nou napa dimoun ki pe dormi lo semen!

Me i pa vedir ki nou napa drog dan nou distrik.  I pa vedir ki nou napa problenm. Problenm nou annan, me pa tro krwar in pli deborde ki dan tou sa lezot 25 distrik.  Me parey tou Digwa, nou en group dimoun fyer debrouyer e travay dir. Sa i apel lord e non pa dezord.  Donk pa vwar li drol si lo en popilasyon 3mil, zis 15 dimoun ki lo Welfare. Pa tro krwar sa 15 dimoun zot reste lo welfare pou lavi en?   Tanzantan sa bann non dimoun i sanze lo sa lalis akoz Digwa i konn byen akoz Welfare ti la – pou ed zot kan zot mank en pti bout larzan pou zwenn avek en lot. Ouswa letan zot trouv zot dan en problenm finansyel – a en serten pwen zot lavi e apre zot fer zot prop debrouy. Sa i apel lord Mr Deputy Speaker. Legzanp pour lezot distrik. Se sa la realite La Digue ozordi.

Mr Deputy Speaker dapre dernyen statistik kot Minister Lanplwa unemployment rate La Digue i zis 1 poursan. I byen nou koz larealite me i enposib al devan si pa konn koz, nou pa konn nou pase. E pour ou konn nou pase ou’n bezwen viv ladan. E pou kapab koz nou zil ou bezwen konn nou zil. Ou’n bezwen viv la.  Zans Mahe pa kapab debark La Digue en zour fer en pti letour dan La Passe dan en club car apre i le vin claim ki la i konn La Digue byen menm. I zis parey en dimoun i al vizit en landrwa i zis al dan en pti trou apre i claim i konn sa landrwa.

Mon frer ou konn zis sa pti trou kot ou al vizite souvan sey vizit lezot trou. Mont montanny vizit plato osi. En boug i ganny envite kot en lakour par kourtwazi ou asiz anba lavarang e les son met envit ou dan salon.  E non pa fer malelve pas anpasan bag direk dan lasanm apre pa ankor pas en lannwit ou le pran kontrol lanmwatye lakaz ladan menm ou le ganny lodas e toupe maltret son met lakour. Se sa ki pe arive la avek sa Mosyon – zans Mahe i oule vin domin nou lo nou zil.  Zot krwar zot pli konn koze pli konn defann nou lentere, Mr Deputy Speaker Digwa i ankor ankoler pour zot komanter ki zot ti fer lo nou lopital.  Enn ti menm dir ki nou lopital ni menm son koson i pa pou met ladan – pa vre Onorab Ferrari?  Nou lopital i vye wi, me i byen prop e i annan lizyenn tou ladan. Manman i ankor pe donn nesans dan sa lopital, nou bann nurse ki 90 poursan zenn Digwaz, zot in bann nurse kalifye….

 

MR DEPUTY SPEAKER

Onorab, Onorab, Onorab Ghislain en moman. Ki ou point, ki ale, Order! Order! Order! Yes Onorab Ferrari. Tenny ou mic Onorab Ghislain.

 

HON CHANTAL GHISLAIN

Be mon kapab pa koze Mr Deputy Speaker?

 

HON JEAN-FRANCOIS FERRARI

Mr Speaker.

 

MR DEPUTY SPEAKER

Zis i pe raise en matter, yes  Onorab Ferrari.

 

HON JEAN-FRANCOIS FERRARI

Mr Deputy.

 

MR DEPUTY SPEAKER

Mon’n donn laparol Onorab Ferrari. Onorab Ferrari state your point.

 

HON JEAN-FRANCOIS FERRARI

Yes, mersi bokou. Si Onorab Sebastien avek Onorab Basil Hoareau i aret enterpret, enteronp mwan mon ava koze. Mon oule zis dir mwan mon les tou dimoun koze la selman si ou pe dir pou dir mwan mon’n dir ki lopital La Digue mon pa pou met mon koson ladan. Mon pe demann ou pour ou retire si ou pa’n dir sa dir mwan ou pa’n dir si wi retire akoz mon pa’n, mon pou al vwar, lo Minutes, lo Verbatim e ou pou vwar pou dir mon pa’n dir sa. So si mon pa’n dir sa mon pe senpleman demann ou dir retire silvouple. Mersi bokou.

 

MR DEPUTY SPEAKER

Mersi Onorab Ferrari, Onorab Ghislain ou’n fer.

 

HON CHANTAL GHISLAIN

Mr Deputy ….

 

MR DEPUTY SPEAKER

En moman, en moman mwan ki annan laparol, ou’n fer referans avek Onorab Ferrari si ou debout lo ou referans i annan en drwa pour li pli tar al regard verbatim  e fer, raise en matter of privilege. Si ou santi ki ou referans ki ou’n fer i mal ou le retract mon pe donn ou sa sans pour ou retract. Si non si ou debout, ou pou debout lo la i pou annan en drwa pour li al regard verbatim e raise en matter apre. Onorab Ghislain.

 

HON CHANTAL GHISLAIN

Mr Deputy Speaker mon pou relir sa ki mon’n dir.  Mr Deputy Speaker.

 

MR DEPUTY SPEAKER 

Onorab Ghislain kontinyen, en moman, en moman, Onorab mon’n donn laparol apre Onorab Hoareau.

 

HON CHANTAL GHISLAIN

Digwa i ankor ankoler pour zot komanter ki zot ti fer lo nou lopital La Digue ler zot ti vin vizite. Digwa parey taler i ti dir Digwa ki ti dir enn ti menm dir ki dan nou lopital ni menm son koson i pa pour mete. E mon’n dir pa i vre Onorab Ferrari…..

 

MR DEPUTY SPEAKER

Ok, ok, ok, yes Onorab ok, mon’n fer le pwen mon’n fer le pwen Onorab Ghislain kontinyen.

 

HON CHANTAL GHISLAIN

Nou lopital i vye wi, me i byen prop e i annan lizyenn ladan. Manman i ankor pe donn nesans dan sa lopital nou bann ners ki 90 poursan zenn Digwaz  zot in bann ners kalifye e zot travay avek devouman pour okip tou zot bann frer e ser Digwaz.  Aret denigre nou bann nurse e aret denigre nou. Konmsi nou bann pli dan mal e kot nou pli sal ki tou lezot. Sa Allisop ki zot ti pe koz labous plen lo li, dir sa pep ki zanmen sa boug in ganny sans koze akoz zot ti aras li son mikro letan i ti anvi koze.  Mr Deputy Speaker pour ou koz La Digue fodre ou’n viv La Digue ou’n konn son pase e son prezan apre ou a koz lo son fitir. Defen Francois Havelock in sante – ‘’Mon ofanse kan mon tann zot pe maltret mon pei.’’

E mwan konman en Digwaz en zanfan zil mon santi mwan blese e ofanse e mon konnen ki Digwaz osi i santi zot parey ler zans Mahe i osi kot zot dan zot distrik ki ranpli avek problenm vin pas en zour La Digue, apre pou dekrir nou bann, nou zoli zil trankil konman dezord.  La Digue nou sel landrwa kot nou ankor respe nou kanmarad, sa i apel lord ek respe e pa dezord Mr Deputy Speaker. Ariv en maler pe enport keler tou dimoun i rasanble pour anmenn sipor sa i apel lord ek respe.  La Digue i sel landrwa ki ler i annan en lanterman tou laboutik i fermen e si ou laboutik, ou dan laboutik a sa moman ou reste anndan sa ziska sa Kortez i pase sa i apel lord ek respe.

Si transpor ou menm bisiklet e menm lezot dimoun ki pe monte e Kortez pe desann, zot arete ziska ki kortez i pase sa i apel lord ek respe. Zis kot nou ki annan sa. Napa en dimoun ki pey okenn transpor ki servi dan lanterman.  Sa osi i apel lord ek respe, tousala Mr Deputy Speaker nou’n fer li nou menm e nou pa’n bezwen okenn zans Mahe pou desann pou vin dir nou ki pou fer. Mr Deputy Speaker ler mon get mon zil i fer mwan mazin Sesel dan bann letan kot ler ti pe lager pou trouv son plas dan sa monn. Tou ti trouv li konman enn pti dot lo map lemonn e personn pa ti pe mazin son pwisans konman en pei.

Nou’n debat pour nou Lendepandans, nou konbat lenzistis sosyal, nou’n liber nou pep. E ozordi nou debout konman bann zonm ek fanm ki annan dinyite. Sesel ti menm fer foulkan en group mersener e ozordi se La Digue ki pe lager pou trouv son plas konman en zil e kominote egal a lezot, kot nou lavi i vin pli eze. Nou osi nou pou fer foulkan okenn zans Mahe ki debark lo nou zil angiz vin disturb nou peace e krwar zot kapab vin ganny mileage politik lo nou ledo.

Mr Deputy Speaker, nou napa privilez pou mars dan en loto parey tou lezot Seselwa Mahe.  Sa i parmi bann kantite sakrifis ki konman Digwa e Digwaz nou bezwen fer pou ki nou zil i reste parey i ete tout an prezervan son bann larsitektir e idantite kiltirel. Tousala nou’n fer li nou tousel, ti napa personn sorti Mahe pou vin gouvern nou sa letan e pou dir nou ki pou fer. Ozordi sa ki own en transpor lo La Digue i en privilez pour li.  Ou konnen akoz?   Sa i pa akoz i annan larzan pour li aste sa. I akoz ler i own en transpor lo La Digue set akoz son lezot kanmarad pa kapab annan. I pa akoz sa dimoun pa kapab annan larzan me i bann striktir ki deza an plas.

Me si ou ganny en transpor lo en permi pour tel ou tel biznes si ou biznes i faid, si sa dimoun in kit nou e napa okenn zanfan, i alors normal ki ou ganny demande pour retir ou transpor La Digue e donn sans donn en lot Digwa ganny sa transpor pour son biznes marse. Oli problenm la? Sa pa dezord sa, sa i apel lord Mr Deputy Speaker.

E les mwan fer rapel ki dan tou sa bann transpor La Digue, nou napa ni en pti loto sa i akoz nou pa bezwen loto La Digue. Sa i apel lord e pa dezord. Mr Deputy Speaker ler mon reget sa Mosyon sa i fer mwan mazin en madanm Digwaz byen brav Madanm Thedora Radegonde mye konni konman Diva ki ti toultan dir sa parol. “La Digue chaque chose en son temps” en madanm ki ti annan en vizyon pour nou zil, me zis domaz in mor tro zenn.

La Digue i en distrik parey tou lezot distrik lo Mahe ek Praslin i pli byen annord ki bokou distrik. I annan pourtan pa mal problenm dan sa bann distrik.  Sa ki’n vin konplent isi menm dan sa Lasanble kaka friyapen dan zot distrik, lakaz deplorab, desarz delo sal, sewage en pil ek en pake problenm drog problenm sosyal ki pe manz kanmarad dan zot prop distrik, pa’n tann enn ki anmenn en Mosyon pou form okenn striktir spesyal pou rezourd zot problenm.

Kestyon i akoz La Digue; ti a enteresan konnen kwa ki dan zot aryer panse?  Mwan mon dir Prezidan pa ekout se zans, me ekout dimoun La Digue. Ekout sa ki in ne e grandi lo sa zil e non pa ekout 30 dimoun dan en meeting ladan 15 sorti La Digue e 15 sorti Mahe. La Digue nou annan ase dimoun entelizan pour nou nobou desid nou lavenir.  Mr Deputy Speaker yer swar mon manman in fer mwan rapel en koze ki’n ganny koze. Ler zot ti dir ki si zot vin o-pouvwar prepar nou pou mars ek kartron dan nou fon kannson. E parey nou’n konstate depi ki zot in ganny sa pti mazorite tanporer dan sa Lasanble, si en siporter lepep ouswa i ganny en Kontra avek Gouvernman ouswa lwe son landrwa avek okenn servis Gouvernman i paret ou pa pou manze dan sa pei.

Eski mon pe konpran ki lefe ki 1200 Digwa ki egal 73 poursan, i lepep si zot rantre La Digue tou sa 1200 lepep pou bezwen mars ek kartron dan zot fon kannson?   E zis sa 100 dimoun ki siport Lalyans e sa 300 ki siport SNP ki pou manze? Mr Deputy Speaker ki lezot larealite La Digue?   Larealite ozordi se ki nou’n vin en pep egzizan e menm tro egzizan ki fer nou’n vin depandan antyerman lo Gouvernman pour tou keksoz. Egzizan ki ozordi tou sa ki ariv mal avek nou ouswa mal otour nou se Gouvernman ki ganny blanmen.

Rezilta ozordi in fer nou krwar ki lanatir nepli annan rezon. Lapli i tonbe napa problenm me si i deside tonm an tro ek kree dega, se Gouvernman avek son bann dirizan ki ganny blanmen. I byen ki Gouvernman i bezwen met lenfrastriktir an plas me mon kestyon se ki rol sekter prive? Konbyen biznes ki i annan ek ki ganny afekte direkteman avek delo monte lo La Digue?   In nepli tan zis pour zot vin fer larzan lo zil apre ale san pran li kont enn zot responsabilite sosyal pour redonn en pe sa kominote ki ozordi i zot ‘gagne pain.

Pe rod striktir La Digue? Be nou deza annan en striktir ki tou lezot distrik i napa. Sa i apel La Digue Trust Fund.  E son rol se pou rod larzan pou fer bann devlopman lo La Digue zis akoz Gouvernman pa kapab fer tou, e koman son Trezorye se en dimoun Minister Finans nou pa kit larzan lo zil nou. Konbyen biznes lo La Digue ki met larzan dan sa Trust Fund pour ede avek devlopman sa zil?   Nou annan tou lezot striktir ki parey i annan dan tou lezot distrik e administrater distrik, District Team ki annan reprezantan tou Minister lo la, District Social Committee la nou fek aprouve ki bann Dirizan dan distrik i ganny enkli lo bann desizyon ki ganny pran dan distrik. Eleksyon District Council pe vini li osi e La Digue nou pli sanse ankor, nou annan 2 lavwa dan sa Lasanble.

Dir nou si i annan zot dimoun ki pa oule travay lo sa zil e pe rod en louvraz pour li?  Dir nou Digwa i anvi konnen. Mr Deputy Speaker parey dan bokou lezot distrik ler lapli i tonm tro bokou La Digue i inonde. Me sa i nou benediksyon Mr Deputy Speaker ou konnen akoz?   I lav tou sa ki move lo nou zil zis parey rezilta Eleksyon. Zot ti ganny balye fermal menm e rezilta in desann; anfet Ton Edward i ankor la li zorey pa tro tande me ler lespri i ankor fonksyonnen.

Al demann li listwar linondasyon La Digue i ava rakont zot e ki zot ti fer pou retir delo. Sa pirog ki la devan son laport pour en kantite lannen ti degaz bokou lasasen. Konbyen zanfan sa letan ti tyake kot i Mr Varice andesandan dan pirog pour al lekol ek lapli. Me sa i pa vedir ki nou bezwen kontinyen desann dan pirog, nou bezwen aranze. Me pou aranz drenaz dir mwan en fason pour nou fouy drenaz si nou pa fouy trou, napa lot fason nou bezwen fouy trou. Wi, La Digue in toultan inonde e i annan detrwa rezon akoz; premyerman son water table parey Pointe Larue par egzanp i tre eleve ki fer pa bezwen tonm en kantite gran lapli pour son plato inonde.

Later i satir byen vit me sa bann granmoun dan zot sazes ti fer sir ki delo pa reste akimile dan tou sa zour. Eski zot in demann zot lekor akoz delo pa ti osi antre dan lakaz okenn dimoun?   Wi sa i senpleman lespri bann granmoun; bann granmoun Digwa ki ozordi nou trouv zot nide konman bet e depas zot letan, bokou leson pour retire dan nou listwar. Plato La Digue zeolozikman i parey en lespes bol. Kot lakot i  pli o ki son plato. Trwazyenmman tou dilon nou lakot depi La Passe tou dilon Anse Reunion ziska L’Union i ranpli avek konstriksyon lakaz, lotel ek guesthouse – ki i fer i anpes delo lapli natirelman trouv son direksyon ver lanmer.

Lontan lo tou sa plato depi plato La Passe, Plato Melon, dan Rezerv, lo Kannal koumsa menm Kannal in ganny son non  – Kokoibri akoz i ti toultan inonde.  Ti napa sa kantite lakaz sa letan me byensir avek devlopman lakaz, delo nepli vwar son semen pase, i akimil lanmenm o-bor lakaz. Me avek devlopman in annan bokou konstriksyon dan milye plato e lotorite konsernen pa’n pran mezir neseser pou fer sir ki i annan drenaz apropriye pour retir bann delo ki’n ganny ranmase, lo tol.

Sa i akoz priyorite sa bann letan sete fer lakaz pour dimoun. En dernyen pti mo avan mon aret koze lo sa size ekoute, rod konsey avek sa ki vreman konn listwar sa zil. Mr Deputy Speaker zot koz dezord ek problenm La Digue, selman zot menm zot dir ou zot vin La Digue. Zot vin desarze. Mon bezwen riye ou konnen?  Mon oule krwar i vre sa en, me aret vin desarz sa ki move lo nou zil. Tou sa ki zot vin akimile Mahe nek zot vin desarz lo nou zil.

Mr Deputy Speaker Ton Edward ti rakont lepok dan zot pti payot lo kart delo kot i inonde. Nou granmoun pa ti dormi aswar akoz zot ti bezwen pran tou sa ki zot ti annan met lo zot kal ouswa lili.  E apre delo desann zot repran sa nide, se pour sa rezon ki zot ti fer zot bann lakaz lo de, sa ti zot letan sa. E ozordi La Digue osi i pe fer parey tou bann lakaz i pli o. San menm sa malgre i annan inondasyon napa delo ki rantre dan lakaz, linondasyon i pase byensir zot ti kapab dormi.

Mr Deputy Speaker parey ki nenport ki distrik, La Digue osi i ranpli ek en kantite defi devlopman. Wi nou annan problenm e wi sak sa bann problenm pe rezourd a son tan anmezir ki nou pei i ganny finansman.  Mon kestyon i akfer en lot striktir lo La Digue kan i deza annan sa ki demande se pour beef-up nou bann striktir aktyel donk, lefe ki zot desizyon pour en nouvo striktir pe deside lo en pti meeting 15 dimoun mazorite Digwa i dir zot, ‘Zet Anba.’

La Digue nou annan en MNA elekte ki’n ganny elekte 73 poursan Digwa. La Digue in swazir li pour lavwa dan sa Lasanble, vey kot zot li i a vey kot li. Sa i zis fer mwan mazin sa pti zistwar baton mazik ki zot in mars avek partou. En baton mazik ki zot in sey vann partou dan plizyer distrik e pa’n marse la ozordi zot oule vin vann Digwa sa menm baton mazik of guise pou fer disparet tou nou problenm lo zil dan en sel striktir, kan salte devan zot laport pe ranpli pe manz kanmarad.

La Digue nou annan ase dimoun entelizan mon dir entelizan pou travay e fer bouze nou zil. Parey nou’n abitye fer san zot. Wi nou bezwen en ice plant, store pou bann peser en bazar.  Travay in fini komanse lo bazar e Store Peser, zot pa’n vwar letan zot in vizit La Digue. Bann drenaz pe ganny fer non?   Sa zot pa’n vwar?    Zot in koz lo sa enn dren ki fer La Passe, ki’n fer La Passe e ki napa debousman. I annan son rezon akoz i bouse devan. Set akoz i devid lo en lans.  E nou pa kapab kit en gran trou ouswa louvertir lo en lans.  E ler napa delo i bouse byensir.  Ler i ava annan delo lapli dan sa dren i senp sa parey tou pti lanbousir ou pas en senp pti baton e i kas son lekor li menm, delo i ale.

Zot pa konnen. Ler zot pa konnen zot demande non pa vin fer show isi dan sa Lasanble sa i se nou sa e nou ki konnen. Digwa e Digwaz nou pti zil i byen e an bonn sante mon kontan vwar zot pe asize dan zot Lasanble ‘anba Bodanmyen parey zot apele.  Me annou gete osi si sa ki ekoute i deside anmenn zot bann pwen devan pe vreman fer li pou li, pou, pou zot, ouswa i pa pe fer li pour son lekor en.  Pa ler ou konplent club car li i pran e i deside al sey rod 10 pour fer biznes Club Car Hire avek.

Ler ou konplent pri materyo konstriksyon i pa pran pour li al sey rode ki mannyer i pou al fer biznes pour son lekor. Apre nou La Digue nou konplet zans Mahe i vin pran tou nou biznes lo zil. Mr Deputy Speaker nou tou nou konnen ki pri materyo konstriksyon lo nou zil ozordi i ser. Me eski sa dimoun ki reste Baie Lazare ouswa Takamaka i pli dan bon ki nou?   Mon pa pe sey zistifye sa pri blok R24 mwan. Mon pe zis met keksoz an perspektiv e koz lo larealite.

En blok 4pous vid ler i ariv devan ou laport La Digue mon dir devan ou laport. I kout R24 wi ozordi e sa i enkli tou son kou transportasyon, me annou get osi en kou konbyen sa menm blok i koute ler i ariv Takamaka ouswa Baie Lazare.

Sa i enkli pick-up laba Baie Lazare e osi sawa.   Mes  chers amis sa menm blok pour li ariv devan ou laport Takamaka i kout ant 15 a R18, e se menm si pa pli ser osi. Donk i zis montre ou ki pli ou reste pli lwen plis ou bezwen pey plis.  I normal sa. Me mon pe donn lespwar Digwa ki nou problenm materyo konstriksyon pou rezourd tre byento avek proze ki en group Digwa in fini prezant avek Gouvernman pou quarry lo nou zil. La Digue i ranpli avek ros en pe partou lo zil ki nou kapab fer makadanm, lapousyer ros ek blok.

Mon 100 poursan deryer nide Gouvernman pou donn konsesyon lo fuel pou sa bato ki anmenn marsandiz ki osi enkli manze toulezour lo nou zil. Donk nou pa bezwen nou striktir lo La Digue. Sa ki nou bezwen se pour nou rezourd sa zafer problenm lopital ek lekol La Digue. Mon sizere ki Minister i anploy en Administrater Lopital e lekol pou deal avek tou bann issues lopital ek lekol.

Nou annan en kantite zenn Digwa e Digwaz ki’n al Lekol Biznes Ladministrasyon ek Management La Digue.

 

MR DEPUTY SPEAKER

Onorab i reste ou 2 minit, 2 minit.

 

HON CHANTAL GHISLAIN

Sa Administrater pa pou bezwen ni menm en ners oubyen en teacher li; sa Administrater i ava answerable direkteman avek Minis. Sa Head nurse ek Headteacher i a konsantre lo teaching e nursing olye al sey tyek sez, toilet, laport e lezot keksoz ki’n kase dan lopital ek lekol. DA aktyelman i annan zis en laliny kominikasyon, e sa i direk avek Minister Gouvernman Lokal ki fer en problenm avek PUC – par egzanp ouswa lezot Lazans e Minister. DA i bezwen ekrir Gouvernman Lokal e set apre sa Minister i koz avek lezot in ler pou kas sa birokrasi –  donn DA son lotonomi e pouvwar pou adres problenm administratik son distrik direkteman avek sa Minister, Departman e Lazans konsernen. Donk nou pa bezwen en striktir spesyal lo zil Mr Deputy Speaker. Mon pour kontinyen ansanm avek tou mon frer ek ser Digwaz lager kont bann zans Mahe ki oule vin domin nou, se nou zis akoz zot krwar zot pli konn koze ki nou prop Digwa.

Akoz mazinen demen zot pou retourn se zot byen e nou, nou pou reste tousel lo nou zil ler keksoz i vin sal en zour.  Parey tou Digwa mon anvi kontinyen lev-e bomaten lo mon zil trankil vwar sourir mon zanfan. La Digue i enn mon Bizou ki form parti nou pei Cherie. Annou  anpes li ganny desire par laenn, zalouzi pou lezot e sirtou desire par politik reste ferm dan nou konviksyon e kontinyen travay dir e nou a touzour sant; ‘La Digue mon ankor kontan ou.’’ Mersi Mr Deputy Speaker.

 

(APPLAUSE)

 

 

MR DEPUTY SPEAKER

Mersi Onorab Ghislain. Bon avan mon demann lot Manm pour pran laparol. Mon annan verbatim ki Onorab Ferrari in met devan mwan. Onorab Ghislain ou’n fer referans avek Onorab Ferrari vizavi lopital La Digue sel mansyon ki Onorab Ferrari in fer vizavi sityasyon medikal La Digue, se in fer en mansyon avek lanbilans – Konm kwa i annan en problem avek sa 2 lanbilans – enn i marse oubyen si enn i marse lot pa marse. Me i pa’n fer mansyon avek ni lopital – ni travayer lasante.

Alors sa referans ki ou’n fer vizavi Onorab Ferrari i pa korek e mon ti a demann ou pou ou retract.

 

HON CHANTAL GHISLAIN

Mr Deputy Speaker mon krwar Onorab Ferrari pe zwe pa konpran ki mon’n dir. Mwan mon pa’n dir in dir dan son speech mwan. Mon dir ler, dimoun Digwa i ankor ankoler ler zot ti vin vizit La Digue, zot ti vin vizit lopital La Digue, akoz i la dan sa bann papye la mon pa per – vwar byen e zot ti dir. Akoz dimoun La Digue in tann zot pe dir pou dir ni menm zot koson zot pa pou met dan nou lopital e mon’n dir pa i vre Onorab Ferrari akoz ou ti dan sa group. Mersi Mr Deputy Speaker.

 

MR DEPUTY SPEAKER

Ok. Onorab parey Onorab Ferrari in donn mwan levidans mon ti a kontan ou fer mwan ganny sa levidans. Akoz Onorab Ferrari in fer son entervansyon devan sa Lasanble e i pa’n nonm sa bann keksoz. Si en keksoz in pas La Digue, in pas La Digue, me li i pa’n fer sa entervansyon lo lopital.

 

HON CHANTAL GHISLAIN

Be mon pa’n dir sa mwan mon pa’n dir dan Lasanble ki in dir mwan. Non, non, non.

 

MR DEPUTY SPEAKER

Ou’n fer, ou’n fer referans.

 

HON CHANTAL GHISLAIN

Non Mr Deputy Speaker non.

 

MR DEPUTY SPEAKER

Ou’n fer referans, ou’n fer referans akoz Onorab Ferrari in fer son entervansyon lo sa Mosyon semenn pase. Ou fer referans.

 

HON CHANTAL GHISLAIN

Mr Deputy Speaker mon krwar mon’n fer parey Onorab Hoareau in dir sa ki in tande dimoun La Digue in dir mon osi mon’n vin repet sa ki dimoun La Digue in dir sa ki mon pe dir. Mon pa’n dir in dir la dan Lasanble mwan.

 

MR DEPUTY SPEAKER

Ok, ok atann Onorab Ferrari ok dan sa ka ou pa kapab fer sa referans direk. Ou bezwen dir ki dimoun La Digue ki’n dir parey Onorab ok … Order! Order! Onorab John Hoareau in fer sa referans osi sa ki dimoun La Digue in dir ok? Parey mon’n dir Onorab Ferrari in fer son entervansyon i pa’n mansyonn sa bout ou. Ou’n fer ou entervansyon ou’n mansyonn ki ou fer referans avek li ki direkteman in mansyonn lopital and so on.

Si ou pe enplike ok, si ou pe enplike ki dimoun La Digue ki’n dir sa then i ok. Wi, Onorab Ferrari.

 

HON JEAN-FRANCOIS FERRARI

Avek ou permisyon mwan mon pa pou lager avek Onorab Ghislain mwan. Akoz mwan mon lo en lot nivo. Mwan sel keksoz ki mon anvi dir ou. Zis dir, zis dir dan sa Lasanble pou dir mwan, les li kantmenm i pa le dir li – z  is dir ki pou dir ki mon pa nonm ni lopital ni koson sanmenm tou ki mon oule ou dir. Apre dimoun i a fer zot lopinyon lo Onorab Ghislain.  Se tou ki mon le lo la, mon’n anmenn verbatim e ladan…

 

MR DEPUTY SPEAKER

Mersi Onorab. Mersi Onorab.

 

HON JEAN-FRANCOIS FERRARI

E clerk anler in konfirmen in al lo son computer in tap sa mo koson in tap sa mo lopital i pa’n aparet ditou dan mon Speech silvouple.  Mersi.

 

MR DEPUTY SPEAKER

Mersi, mersi Onorab Ferrari mon krwar mon’n fer sa klarifikasyon ki dan ou verbatim napa, ou pa’n ni mansyonn lopital e menm ki lopital ou’n konpar li avek en park koson ok? Non, in fer referans ki dimoun La Digue ki’n dir li sa

 

HON JEAN-FRANCOIS FERRARI

Les li si i pa withdraw Onorab, les li si pa withdraw.

 

MR DEPUTY SPEAKER

Annou move on.

 

HON JEAN-FRANCOIS FERRARRI

Les li si pa withdraw akoz li ou konnen kalite dimoun i ete nou konnen.

 

MR DEPUTY SPEAKER

Mersi Onorab. Onorab Woodcock.

 

HON WAVEL WOODCOCK

Mersi Mr Deputy Speaker. Mr Deputy Speaker mwan mon kapab dir mwan en pti pe soke menm dezapwente avek lentervansyon Onorab Ghislain. Mon krwar, pour en Lasanble Nasyonal lo sa nivo mon ti ekspekte plis sa matirite en pe plis respe. Mon pa ganny en konpran ki mannyer en Onorab i kapab pe dir dimoun La Digue, lager avek dimoun Mahe ki pe kree en kalite iminite avek bann zabitan La Digue avek bann zabitan Mahe.

Mon pa vwar en sans sa bann keksoz pe ganny dir Mr Deputy Speaker kan Mosyon i kler ki nou lentansyon se pour nou vin met enn pti pe lord, dan enn de bann dezord, ki li menm li dan en serten sans in admet i annan serten dezord dan La Digue.

Mr Deputy Speaker avek sa mon pou al lo mon entervansyon dezord La Digue Mr Deputy Speaker i annan. Mon konman MNA Grand Anse Praslin mon ganny plizyer call avek bann zabitan La Digue i annan menm ki vin Praslin ki vin vwar mwan. E La Digue i en distrik ki mon kontan mon fek La Digue resaman pa tro bokou letan pase pour en lanterman ki mon’n ale. E Mr Deputy Speaker konsern i annan, e ozordi sa Mosyon, ki sa Mosyon pe sey fer se pour nou ede kree en nouvo striktir ki pou vin anmenn en pe lord dan sa bann dezord dan sa bann enstabilite, ki annan dan sa distrik.

Ki nou pe sey dir Mr Deputy Speaker se ki napa en centralize system ki marse La Digue. Problenm La Digue se ki i annan tro bokou latet, ou annan La Digue Trust Fund, L’Union Estate, La Digue Consultative Board, ti annan La Digue Trust, La Digue Trust Fund avan la in fermen. Ti annan, ou konnen ki nou pe dir Mr Deputy Speaker  problenm ki nou, nou pe dir se ki zot pe mont lo lipye kanmarad. Problenm se ki, ‘’there are too many chief and not enough Indian.’’  Sa problenm.

Mr Speaker parey Onorab in dir Ghislain in dir menm si Parti Lepep i annan 2 MNA dan Lasanble, 3 Manm Komite Central ki sorti La Digue ek zot parti, ek zot parti ki form Egzekitif prezan ki nou vwar problenm La Digue pe akimile. Mon osi dezapwente Mr Deputy Speaker avek lentervansyon ki Onorab Sophola ti fer semenn pase ti donn lenpresyon konmkwa La Digue tou keksoz i an roz La Digue napa problenm. La ozordi Onorab Ghislain i kontradi tou sa ki Onorab Sophola ti dir Merkredi pase.

E sa ki enteresan Mr Deputy Speaker se zis apre son entervansyon ki i ti fer Merkredi pase aswar ti annan en progranm ‘’Zil Pros An Mouvman.’’ E bann zabitan La Digue sa ti lo SBC menm zour menm son aswar e bann zabitan La Digue ti pe eksprim zot dezapwentman – zot bann konsern e zot ti pe koz lo pri lavi La Digue ki vreman ser.  Zot pe koz lo bann problenm konstriksyon problenm docking, problenm transportasyon, problenm kou materyo tou keksoz i a en pri vreman eleve.

So, mon pa pe ganny en konpran ki mannyer Onorab i kapab vin devan en Lasanble e penn en portre konm kwa tou keksoz i ok  – napa problenm, kan an realite zabitan La Digue i annan plizyer konsern e zot konsern pa pe vreman ganny met devan. E sa Lasanble in vin la pou nou sey donn en pe vizibilite bann sityasyon, bann difikilte bann zabitan La Digue pe pas ladan.  E nou abitye fer dan le pase. Zisteman pa tro bokou letan pase Onorab De Commarmond ti vin devan Lasanble ti pe koz lo problenm Landfill. Lo problenm loder Cascade, be tou bann Onorab, la mazorite bann Onorab dan sa Lasanble nou ti entervenir lo sa, dan sa, lo sa sityasyon nou ti koz lo la. E Onorab De Commarmond pa ti konplent li!   I pa ti ti dir a pa vin koz lo loder dan mon distrik.

Kontrer i ti ganny sipor sa Lasanble regardan dan sa problenm nou tou nou ti koze, nou ti donn li en sipor nou ti ed li. Onorab Churchill Gill pa bokou letan pase ti koz lo problenm Zenerater, lo problenm Power Plant Baie Ste Anne. Mon ti entervenir mwan osi mon ti koz lo la, mon ti pe aport en sipor Onorab Gill akoz en problenm pertinan dan distrik Baie Ste Anne ki osi afekte mwan, i afekte nou tou. Problenm ki afekte La Digue la i afekte Sesel antye, akoz nou tou nou Seselwa.  Annou aret kree lanmertim e lanimozite kot napa.  Nou la nou tou konman en Lasanble pour nou ed kanmarad e ed nou frer ek nou ser dan lezot distrik.

Pa nou tou nou Seselwa?  La Digue eski La Digue i en Nasyon endepandan li?  Non. Mon sorti Praslin problenm Praslin mon pa mind in fact Churchill Onorab Gill ti koz lo landfill.  E apre son, sa i ti koz lo la. Mwan osi mon’n azout mon pwen lo la – ou konnen ki pou arive Mr Deputy Speaker?   Onorab Gill ek mwan nou tou lede nou pe al Grand Anse Praslin Vandredi bomaten 10er ansanm. Pourtan i Onorab Baie Ste Anne i pe vin Grand Anse pour nou al deal sa zafer landfill.  Be mon apresye siport ki i pe donn mwan Mr Speaker, ler i ti anmenn son Mosyon zafer lekol, likeBullying dan Lekol’ mon ti siport li mon ti segonn son Mosyon. Akoz son konsern i osi mon konsern akoz nou tou nou Seselwa. Mwan mon krwar in ler pour nou montre en pe plis matirite.

Sa pour mwan i en laont e mwan mon asire pou dir bann zabitan La Digue la zot onte lafason sa 2 Onorab in koze dan sa Lasanble. Mr Deputy Speaker mon pou demanti enn pti pe bann keksoz ki Onorab Sophola ti dir Merkredi pase. Onorab Sophola ti dir ki  ki tou keksoz lopital i ok. Zot annan ase ners La Digue; zot annan Dokter zot annan ase staff lopital. Mr Sophola pe mislead sa Lasanble. Mwan mon konn sa, Onorab Sorry, Onorab Sophola pe mislead sa Lasanble.

Mr Speaker en kantite ners, plizyer ners i bezwen sorti Praslin pou al donn en koudmen La Digue, akoz napa ase ners La Digue. Pa zis ners Mr Deputy Speaker bann Gard osi, mon’n fek al en lanterman La Digue pa bokou letan pase mon ti bat avek SP…. Sa SP i fek ganny sanze la i dir mwan,  ‘’Mon bezwen monte desann pou  mwan al La Digue akoz i annan en prizonnyen in ganny large pe pas partou pe kas lakaz pe vole.’’ Napa ase Gard i bezwen desann pou al tay deryer voler La Digue akoz napa ase Gard La Digue.

I larealite. I annan sa problenm i egziste napa ase ners, napa ase Gard annou pa koz manti. Kot i annan problenm annou dir i annan problenm. Kot fodre aranze annou aranze, kot i bon nou dir i bon. So, Mr Deputy Speaker an parlan lo sa size ki mon pe koze sa bann ners ki mon pe koz lo la, la zot in vin kot mwan zot in dir mwan pou dir despite tou sa bann extra workload ki pe ganny met lo zot, zot pa ni pe ganny en pti extra allowance pour sa. Sa bann Gard i dir kondisyon ki zot pe reste ladan La Digue i enpitwayab.

Sa allowance ki zot pe gannyen i pa vo nanryen. Sa bann konsern i annan, sa bann issue i annan. Annou aret kanmi pou koz lo bann problenm. Sa bann sistenm Parti Inik in fini. Nou bezwen aret per pou koze, nou bezwen pare pou koze pou koz lo bann problenm, pou koz lo bann sityasyon ki pep pe fer fas avek. Annou koz laverite.  Mr Deputy Speaker i fer mwan mazin en komanter ki ti ganny dir semenn pase, in fact Onorab Larue ti pe koz, ti pe ekspoz bann koripsyon lo later. Lo bann zafer aste Later Leta, aste later land bank apre revann – e i ti menm koz lo, sirtou notaman i ti koz lo former Minister Dolor Ernesta avek son 52 bout later; ki by the way in ganny taken up by Anti-Corruption Commission ki pe al investigate.

E en Onorab i vin devan sa Lasanble i sot anler i a dir koumsa pou dir Onorab Larue i an deor kontrol, i an deor Mosyon. Sa ki i pe dir napa nanryen pou fer avek sa Motion ki at hand, e sa, sa pa lot ki Onorab Ernesta. Prezan ou pa konnen si en pti fanmir avek Dolor Ernesta prezan i pe sey kouver son fanmir akoz lo sa lot kote latab zot bar byen, zot kouver byen zot bann Minis.

 

MR DEPUTY SPEAKER

Non, Onorab, Onorab, Onorab Woodcock, Onorab Woodcock retract sa.

 

HON WAVEL WOODCOCK

Ok, Mr Deputy Speaker Mon retract, mon retract sa Mr Deputy Speaker mon retract napa problenm.

 

MR DEPUTY SPEAKER

In fini retract.

 

HON WAVEL WOODCOCK

Mr Deputy Speaker mon retract.

 

MR DEPUTY SPEAKER

In retract, in fini retract, Onorab Woodcock ou retract.

 

HON WAVEL WOODCOCK

Non mon retract Mr Deputy Speaker mon retract yes mon apologize Mr Deputy Speaker mon apologize.

 

MR DEPUTY SPEAKER

Kontinyen Onorab.

 

HON WAVEL WOODCOCK

Mr Deputy Speaker prezan zis pour mwan koz lo enn de, lo enn de bann konsern ki bann zabitan in met devan mwan. In fact zis apre entervansyon Onorab Sophola Mr Deputy Speaker sa lannwit mon telefonn in kase avek kantite zabitan La Digue ki’n call mwan i annan ki’n vin vwar mwan tou pandan weekend.  E zot fristre, Zot ankoler akoz larealite pa pe ganny dir bann sityasyon ki pep Digwaz pe fer fas avek, pa pe vreman ganny met devan Lasanble.  Zot pa pe vreman koz lo sa bann keksoz; en kantite keksoz pe kasyet pe kouver e ozordi mon pou koz en pti pe lo enn de sa bann keksoz.

Mr Deputy Speaker, annou koz en pti pe lo Kontra, bann pti Kontra pou bann louvraz Maintenance bann louvraz MLUH, SLTA parey pou fer pothole  drenaz, rigol eksetera. Mr Deputy Speaker mon rapel detrwa letan pase mon ti koz lo, lo Mosyon lo Ile Eve pour etablir komite Ile Eve. Mon ti dir ki Ile Eve priyorite i merit pou bann businessman ki sorti Praslin. E egzakteman bann pti Kontra, bann proze MLUH ek SLTA bann Kontra Maintenance i merit pou bann zabitan ki sorti La Digue. Me ou konnen ki pe arive larealite Mr Speaker se tender i ganny osi fer Praslin e, e parfwa ou vwar ki priyorite pour sa bann Kontra maintenance pe ganny donnen avek bann dimoun ki sorti an deor La Digue.

Kant menm ou sorti Praslin mwan mou pou dir ki priyorite i pour sa bann tel kontra i merit pou bann zabitan La Digue. E bann Digwaz pe konplent pou dir i annan sa issue e parfwa zot dir pou dir si ou dalon ek entel ou ganny priyorite. I annan bann dimoun ki sorti Mahe, Praslin pe anmenn zot excavator, zot kanmiyon tou zot bann zafer La Digue. E ou en Digwaz oule aste anmenn enn de lekipman, oule anmenn en transpor ou pe ganny difikilte anmennen. Li sa enn an deor i kapab anmennen akoz i dalon entel.

Mr Deputy Speaker sa i bann realite ki pe arive La Digue e ki bann zabitan pe koz lo la e zot konsernen. Mr Deputy Speaker mwan mon krwar bann Kontra pou bann Maintenance, mon zanmen mon’n deza tande pou dir, zabitan La Digue pe vin Praslin pou met tender pour bann Kontra bann pti proze parey maintenance, rigol, drenaz or whatever – I mean come on! Ou le dir mwan napa ase Digwaz ki kapab fer sa bann proze sa bann travay?  Mwan mon vwar sa i en i, mon pa krwar pou dir vreman La Digue bann businessman, zabitan  La Digue pe ganny loportinite sa priyorite parey, parey zot merite.

Sa i en konsern ki zot in met devan mwan Mr Deputy Speaker.  Mr Deputy Speaker mon anvi koz enn pti pe ozordi lo transpor La Digue. Ozordi mon krwar bokou nou ki al La Digue souvan nou vwar poudir pli ale transpor La Digue pe akimile – i annan bokou transpor La Digue. Me sa i annan en senp rezon pour sa Mr Deputy Speaker pandan letan Eleksyon Parti Lepep i donn fridge, cooker washing machine pour aste vot Seselwa, La Digue ou konnen ki zot donnen?  Permisyon pour ganny transpor. Se pour sa rezon ki ou vwar en kantite transpor in ariv La Digue ozordi. Olye aste vot avek fridge ek washing machine ek televizyon la, donn permisyon pour anmenn transpor La Digue. Sa i bann zouti politik ki zot pe servi La Digue.  Sanmenm sa ki ou vwar ozordi i annan sa problenm transpor lo La Digue. E zabitan Digwa i konnen akoz en kantite zot ki’n apply pour ganny transpor, zot pa’n gannyen, senpleman akoz zot ganny pini akoz zot kouler politik. E i annan viktimizasyon politik La Digue, en kantite dimoun pe fer fas avek sa.  E mwan pour tous en pti pe plis lo la.

Mr Deputy Speaker en propozisyon ki bann zabitan in met devan se ki, in fact detrwa zot in met sa devan mwan, se pour Gouvernman etablir e landing fee ki tou bann etranze touris ki debark La Digue i merit pey en landing fee. Sa fee i kapab ganny met lo tiket bato. Sa larzan ki ganny kolekte i kapab al dan en fon pour La Digue. Mon konnen pour dir i annan La Digue Trust Fund.  Me selman zabitan La Digue pe konplent. Zot pa vwar kot sa larzan pe ale.  Zot pa vwar ki mannyer sa bann larzan pe ganny servi. I mank en pti enparsyalite. I mank en pti pe transparans lo lafason ki bann larzan, ki sa bann fon pe ganny zere La Digue. Akoz dimoun La Digue i ankor dan fernwanr, zot pa konnen mannyer sa bann keksoz pe deroule. Later pe ganny vann, zot pa konnen, zot pa konnen later pe ganny vann.

Mr Deputy Speaker mwan asire pou dir ankor lo sa size later pour annan ankor enn de bann keksoz sokan pour sorti pli tar.  En senp drenaz La Digue pa pe kapab ganny fer. E sa problenm trou partou e bon letan sa problenm pe persiste. La Onorab Ghislain pe dir koumsa pour dir pour aranz sa, sa problenm, pour fouy trou, pour fer drenaz isi, laba, tou sord kalite leskiz i pe donnen, me an realite se ki trou partou pour vwar trou. E sanmenm sa rezon ki ler lapli i tonbe, sa bann trou i ranpli e moustik i an abondans La Digue, moustik pe manz dimoun La Digue akoz zot napa en plan stratezik. Sa bann problenm pe persiste pour plizyer lannen, kantmenm i pour sey bare tou zabitan La Digue i konnen pou dir sa bann keksoz pe persiste.

I annan de lannen, e de lannen, e de lannen, i annan bann trou ki’n la pour se pa konbyen letan sa bann trou i ankor ganny ekspoze, pa ankor bouse. Sa bann problenm i la realite, e nou bezwen aksepte pour dir sa bann problenm i egziste, e sa bann problenm i reel. Mr Deputy Speaker zis pour mwan tous en pti problenm ki bann zabitan in met devan mwan se ki, i napa kontrol lo bann dimoun ki lwe bisiklet. Sa en konsern ki bann dimoun ki rent out bann bisiklet in dir mwan. I dir i annan ki pe lwe bisiklet san license. Zot pe dir ki fodre lotorite konsernen i fer sir ki bann operater ouswa bann endividi i bezwen annan en license pour zot kapab fer sa kalite biznes.

I deza annan bann dimoun ki pe lwe bisiklet ki met liniform ozordi. E plizyer dimoun ki dan sa biznes Mr Deputy Speaker, zot pe propoze ki sa i vin en polisi ki sa i vin en Lalwa pour ki tou zabitan ki pe fer sa biznes zot bezwen met en liniform. Pour le senp rezon Mr Deputy Speaker se ki sa i pou permete pou met en lord e idantifye bann dimoun ki annan license ouswa bann dimoun ki napa license. E osi pou bann kliyan ki ler zot pe vin rann zot bisiklet zot konnen avek ki zot pran zot bisiklet akoz zot idantifye sa niform e sa pou osi anpes vol bann bisiklet La Digue.

Mr Deputy Speaker bisiklet i ganny vole La Digue i al Mahe i al Praslin, i al en pe partou i annan en kantite issue La Digue. Me selman Mr Deputy Speaker sa ki mon pa pe vwar ozordi, nou annan 2 Onorab sorti La Digue. Zot in ganny en loportinite ozordi, vizibilite ozordi se pour La Digue. Olye jump on the bandwagon, olye ansanm avek nou sipor annou koz avek Egzekitiv, annou met sa bann problenm ki pertinan ki pe afekte zot zil. Zot pa pe fer li Mr Deputy Speaker zot pe prefere fer en bann kankan, e this is not the House pou vin fer kankan. Ok?

E Mr Deputy Speaker mwan mon santi pou dir sa 2 MNA zot pe mank en loportinite, zot pe mal servi loportinite pour met, pour kler sa tors 12 batri konmsi Onorab Loizeau lo La Digue, pour nou kapab ede bouz La Digue devan, akoz apre tou La Digue i form parti Sesel e nou tou, avan tou, nou tou nou Seselwa apre nou a vin Digwaz, Praslinwaz.  Sa ki pli enportan Onorab Ghislain ek Onorab Sophola se nou tou, nou tou nou Seselwa e sa i priyorite.

Avek sa Mr Deputy Speaker mon donn mon sipor total sa mosyon akoz pou dir annou met en striktir an plas. Ki pour arete, en striktir ki pou nepli annan sa bann zafer … lipye kanmarad, ki nepli set a ki sakenn pe redi son kote. Kot keksoz i a vin annord, i a vin drwat e en fwa pour tou, tou sa bann dezord ki pe arive La Digue i ava ariv en lafen enn fwa pour tou. Mersi Mr Deputy Speaker.

 

MR DEPUTY SPEAKER

Mersi Onorab Woodcock. Onorab Simon Gill.

 

HON SIMON GILL

Bonn apre midi Mr Deputy Speaker.  Bonn apre midi tou koleg Onorab e bonn apre midi tou manm piblik. Mr Deputy Speaker Mosyon prezante par Onorab Ramkalawan i lir koumsa; ‘’Avek tou bann konsern ki zabitan La Digue pe eksprimen, sa Lasanble i demande ki en nouvo striktir pou zer La Digue i ganny etablir pou nobou adres tou bann konsern zabitan La Digue.’’ Mr Deputy mon pa ti krwar si sa 3 laliny Mosyon pour anmenn sitan polemik e en pe eleman tre kontroversyel, dan sa prose depi ler sa deba in konmanse depi Merkredi pase.

Mon krwar i annan en fason – i annan en fason pour nou adres tou bann size ki nou santi i annan en nesesite pou adrese dan Sesel. Nou ganny drwa.  E  mon santi mwan annan sa drwa e rezerv sa privilez ki nou Lasanble Nasyonal i donn nou. E sa drwa e sa privilez ki lepep Seselwa in donn nou konman en Lasanble Nasyonal, pour nou koz lo tou size e ki depas e ki debord nenport ki teritwar ki nou menm nou pa reste ladan or ki nou reste ladan. Mon santi mwan annan sa drwa koman en Manm Lasanble e sa privilez pour mwan koz lo en konsern ki kapab relasyonnen, avek ki distrik kot okenn Manm Elekte i ganny elekte direkteman ziska pli lwen ki Port Glaud.

E pli lwen ki Bel Ombre or La Digue, Baie Ste Anne, Grand Anse Praslin. Me an menm tan ki nou annan sa drwa sa privilez. La drwates e lapolites limilite i obliz nou fer tou sa ki nou fer avek respe.  E ozordi ler mon pe entervenir lo sa Mosyon Onorab Ramkalawan mon pe dir li, ki sa Mosyon i annan serten limitasyon. Konman en koleg Manm Lasanble, mon dir li i annan limitasyon pour plizyer rezon. Enn, se ki la baz konsiltasyon probableman i ti devret kapab konsidere pour a grandi labaz konsiltasyon.

Me lefe nou rekonnet ki in size en loportinite, pou anmas en santiyon lenformasyon e lopinyon. E ou ti envit tou dimoun wi dan ou lapel me malerezman dimoun in swazir pou pa vini.  E nou pa kapab blanm bann ki pa’n vini e ni blanm bann ki’n vini. Me sa ki in vini in sezi en loportinite pou fer en kontribisyon.  Prezan sa kontribisyon ki’n ganny fer se sa ozordi ki lobze nou dezyenm zour deba lo sa Mosyon.

Now, eski i annan en merit pou annan en nouvo striktir pou zer La Digue, an relasyon avek bann konsern ki’n fer resorti dan sa rankont ki Onorab Ramkalawan ti dirize? Mon prezimen ou ki ti dirize. Eski i annan en merit? Mwan mon a dir donnen la kantite Komite, striktir ki annan lo La Digue, mon krwar nesesite pour form en nouvo striktir, napa en merit. Zis sezi mwan byen. En nouvo striktir napa en merit baze lo la kantite striktir ki annan lo La Digue ozordi.

Now kestyon i poze, si en nouvo striktir nape en merit ki nou fer?   E ki nou fer pour nou kapab bouz devan an relasyon byensir avek bann problenm ki’n fer resorti? Ki nou fer Mr Deputy Speaker si mon kapab sizere?  Ar nou gete ki mannyer nou fer en remayman tou sa bann striktir ki egzistan. E gete mannyer nou kapab met an mars, oubyen met an egzorsis, an egzistans, en striktir ki probableman le nou’n met li an aplikasyon, i ava kapab annan sa lefikasite, sa lefektivite, e kapab vwar keksoz avek en lezot dimansyon.

E vwar keksoz dan en lot perspektiv. Now lefe i reste ki probableman nou bezwen konsidere pour nou donnen sa menm legzersis ki nou bezwen fer avan met en nouvo striktir, pour nou kapab al fer plis konsiltasyon.  E kapab anmenn bokou lezot dimoun, enkli nou 2 Manm ki dan sa Lasanble Nasyonal ozordi, Manm elekte La Digue ki a parti dan sa legzersis. E mon pa konsider Onorab Ghislain koman Manm Elekte La Digue, me i en Manm Proporsyonnel ki vwar keksoz dan son totalite, dan son globalite o nivo Nasyonal. Me par lefe ki en rezidan La Digue probableman nou ava konsidere, pour ki li osi i form parti sa striktir. E par lefe ki mon konpran i lo enn sa bann striktir egzistan, i ava kapab antre ansanm, met latet ansanm e rod the way forward.

Be mon krwar ki sa i sel fason pour nou evite ki i annan tou sa bann komosyon ki nou’n tande la. Ok? E nou bann koleg dan Lopozisyon, lot kote latab laba, avek tou zot lantouzyazm ki zot annan – mon konnen zot an mazorite, zot pe eksprim… Mon konnen ler ou an mazorite i donn ou en lenerzi ekstra pour ou kapab vini e fer keksoz bouze.  E nou kantmenm nou an minorite, nou annan en lenerzi eksepsyonnel, ekstraordiner dan nou. E se pour sa rezon ki nou pe pans parey nou panse. Fodre pa zot souzestim nou minorite. Nou pe pans parey nou panse akoz nou konnen poudir nou la pa konman 2 diferan group. Me nou la koman en Lasanble Nasyonal.

En Lasanble Nasyonal, pa LDS, Pa Lepep, en Lasanble Nasyonal. Pa Lasanble La Digue. Wi. Bon. Nou la koman en group, koman en lekip pour nou travay. E mwan mon a demann Onorab Ramkalawan pou konsidere ler i bouz pour fer son summing-up pour konsider fer en lamannman dan son Mosyon. Mon pa pour propoz en lamannman, nou a kapab diskite epi pour dir ki donnen sityasyon pour mannyer ou’n formil li la, ‘’nou pe demann lotorite konsernen pour etidye – etidye ki mannyer nou kapab met an mars en group.’’ Mon pa oule tro servi sa mo Komite, ‘’met en group ki nou kapab etidye meyer opsyon pour nou kapab bouz devan lo La Digue.

Me mwan mon pou dir en lot keksoz. Mon pou dir nou bezwen tonm dakor ki si nou met en striktir diferan lo La Digue, nou bezwen prepare pour nou dir ki sa nouvo striktir ki pe vini an 2018 ki nou apel li District Council ki probableman pour napa enn lo La Digue or probableman pour napa enn lo Baie St Anne, pour napa enn dan Grand Anse Praslin. Nou pe think aloud la. Pa i vre nou pe think aloud. Akoz mon pe dir sa? Mon pe deza antisipe ki District Council pe vini, nou pe demann en nou striktir pour al met an plas. Finalman ou pour annan ou en duplication ankor.

E probableman parey zot pou servi zot terminolo in servi ‘’pe mont lo lipye kanmarad. ‘’Eske se sa ki nou oule ankor? So nou pe bezwen pe kapab nenport ki formil. Nenport ki solisyon ki nou aporte Mr Deputy Speaker pour think beyond 2018, e bann lezot striktir ki nou’n dir pour etablir e striktir ofisyel ki nou konnen se District Council ki pe vini. Now lot keksoz ki probableman nou, mon ava demann nou bann koleg laba lo lot kote latab; eske nou devret revwar striktir District Council? Donn nou ankor plis letan, olye bouz avek Eleksyon 2018, donn nou ankor plis letan pour nou kapab etidye sa formil District Council. Donnen sirkonstans sityasyon aktyel, eske sa striktir, i en striktir ki pour vyab oubyen non? Eske lafason ki’n ganny konsevwar dan Lalwa – eske i en striktir ki pour vyab, pa pour vyab?   Eske i pa en striktir ki nou devret petet met li akote all together? E prepar en lot lapros pour nou kapab adres bann konsern?

Mr Deputy Speaker, mon pe met sa la, akoz mon krwar i bann eleman, i bann kestyon ki nou devret kapab reflesir lo la, e pous nou pour nou bouze, e provoke refleksyon, provok plis refleksyon dan sa laliny. Me mon pa oule tre long ozordi Mr Deputy Speaker, ler mon ava dir ki sa Mosyon baze lo son konteni ki annan avek propozisyon pour nou fer serten lamannman, nou kapab travay lo la ler nou sorti break, sa pa elimin sa pozisyon zeografik ki La Digue i ladan, pe elimin sa pozisyon zeografik ki Baie St Anne e Grand Anse Praslin i ladan. Zot pou reste si napa okenn deliz pe arive avek sanzman klima, zot pour reste dan zot pozisyon zeografik kot zot ete.  E par lefe zot kot zot ete Mr Deputy Speaker nou lapros i bezwen en lapros kit tret La Digue Baie St Anne e Grand Anse Praslin baze lo zot sirkonstans reel ki zot ladan. E akoz zisteman akoz zot diferan, e zot bezwen bann tretman diferan. E  vwala ankor mon baz, mon kestyon – eski prosennman ler nou pour antre dan Eleksyon District Council 2018, striktir District Council pour ede pour adres sa bann challenge ki nou, nou pe dir La Digue, e bann lezot zil i pe fer fas avek ozordi. Mon’n tann en legzanp, nou legzanp pri blok, R24. Mon’n tann zot dir Takamaka oubyen Port Glaud pri R17 or R18.   Sa i vre.

Now eske napa okenn lezot fason fer keksoz pour La Digue pour ki an retour atraver aksyon konserte, nou fer devlop sa sinerzi avek tou bann akter ki konsernen avek pran materyo Mahe anmenn La Digue, pour nou kapab vreman donn bann Digwa en better deal?  Be mon krwar sa nou tou nou tonm dakor lo la. Be Onorab Sophola i premye dimoun pour tonm dakor lo la li.

E parey zot pe dir zis en kwensidans, zis en koensidans ler nou fini diskit sa Mosyon Merkredi pase aswar mon pe swiv sa progranm mon osi lo televizyon SBC. E i reel sa. I reel. Now i reel par lefe ki mannyer zot in fer sorti. Me ler nou al dan zot profonder – eske tou sa bann lenformasyon ki’n ganny fer sorti, i parey, i reel?   Ki solisyon nou kapab aporte dan sa direksyon pour nou bann dimoun La Digue?

Mon krwar i enportan, e mon krwar i annan en kantite refleksyon ki Onorab Sophola in fer avek son lekip, san ki mon bezwen ponp li tro bokou. Mon krwar i en madanm ki annan en nivo lentelizans, rezonnab. E mon konn en pe bann diskisyon, bann deba ki in fer lo La Digue atraver son striktir entern ki in etabli. Mon konnen ki sa size in deza ganny diskite. Me probableman sa ki pa’n fer se ki i pa’n fer piblisite lo sa bann diskisyon ki’n ganny fer, me in ganny restrikte akoz bann moman ki sa bann diskisyon ti pe ganny fer, i pa ti ankor en Manm Elekte dan Lasanble Nasyonal.

Mwan mon okouran sa mwan. Mwan okouran akoz dan letan son kanpanny, dan letan kanpanny pour Eleksyon Prezidansyel, mon pe koz 2016, sa bann size ti monte, e sa bann size ti ganny diskite. Parey mon pe dir limitasyon ki in annan se ki i pa ti ankor annan sa privilez pour ganny elekte konman en Manm Lasanble. E in napa piblisite akoz i ti plizoumwen a lenteryer striktir nou parti ki sa bann diskisyon ti pase. E pour sa mon pe dir Onorab Sophola, nou donn ou kredi pour sa, malgre in napa piblisite me nou konnen poudir i konsernen e nou tou dan sa Lasanble ozordi, nou reste konsernen avek respe, ankor enn fwa pour ki nou donn bann Digwa. E nou donn tou nou bann dimoun lo nou bann zil ki en pti pe defavorize par zot zistans e en better deal. E mon a dir annou met latet ansanm, annou vin devan avek bann lide pour nou donn nou bann dimoun en better deal; pe enport kot zot ete. Me la dan nou ka nou bann Digwa – ‘‘lets move forward.’’ Annou donn zot en better deal. Mersi bokou Mr Deputy Speaker.

 

MR DEPUTY SPEAKER

Mersi, mersi Onorab  Simon Gill.  Bon annou, annou reflesir en pti lo entervansyon ki Onorab Simon Gill in fer. I byen, mon kontan le 2 entervenan ki’n delibere, Onorab Woodcock, Onorab Simon Gill i pa’n al fer bann lakizasyon personnel, e si nou kapab fer nou bann entervansyon dan sa direksyon kot nou pa al personnel pour nou evit bann lezot deba lev-e, bann lezot sityasyon.

Nou pou pran en break la. E mon ti a kontan ki bann Manm Assembly Business Committee, nou kapab meet en pti moman, 5 minit zis pour nou kapab regard en pti pe Lord du jour pour semenn prosenn. So dan Speaker’s Conference Room, deswit apre ki nou adjourn la. So nou ava adjourn, nou ava retourn dan 4er.

 

(BREAK)

DEPUTY SPEAKER

Bon. Nou a kontiny  nou travay. Yes Onorab Sophola?

 

HON NOLINE SOPHOLA

Mersi Deputy, Mr Deputy mon pe fer en pwen leklersisman. Onorab Woodcock in dir ki Onorab i lalang mon’n dir napa problenm La Digue, dan mon verbatim mon al rode, mon ti a kontan ki si Mr Deputy ti a vwar kote ki mon’n dir napa problenm?  Sa mo pa’n zanmen sorti dan mon labous.   I normal pou zot fer politik, me dir keksoz ki mon’n dir. Alor Mr Deputy mon ti a kontan ki Mr Woodcock i retract sa ki in dir.

 

MR DEPUTY SPEAKER

Ok. Onorab Sophola mon krwar son, sa ki Onorab Woodcock in dir i pa’n vin en latak personnel; i pa’n vin nanryen pour denigre ou ok?  Wi dan verbatim ou’n mete lo paz 5, wi ou’n dir, ‘’lekel la parmi sa bann Onorab ki annan en distrik ki napa defi – ki napa defi dan zot distrik? Akoz ki nou krwar, akoz ki nou krwar La Digue i devret en, vin en leksepsyon ? Ou aksepte ou osi ki La Digue i annan serten problenm.

 

HON NOLINE SOPHOLA

Mr Deputy mon pe dir in dir poudir.  ‘’Onorab i lalang ! In dir poudir La Digue napa problenm !’’ Mon pa sa ki mon’n dir, mon pa’n dir ki La Digue napa problenm mwan. Mon dir La Digue …

 

HON WAVEL RAMKALAWAN

 

(Mic Off)

 

HON NOLINE SOPHOLA

Be ou Mr Deputy ou? Ou pa Mr Deputy ou!

 

MR DEPUTY SPEAKER

Kontinyen Onorab – kontinyen..

 

HON NOLINE SOPHOLA

Parey mon’n dir dan mon verbatim napa sa mo, napa sa fraz kot mon’n dir La Digue napa problenm !

 

MR DEPUTY SPEAKER

Non i pa a-tan. Mon pa, mon pa vwar li konman en sityasyon kot in tant pou li denigre ou. In fer son deliberasyon ok ?   In fer son deliberasyon in dir poudir ou’n dir La Digue napa problenm. Me mon pa vwar li en keksoz ki pou denigre ou. Ou verbatim ki mon’n lir la, i montre poudir ou’n aksepte ok ?

 

HON NOLINE SOPHOLA

I vedir Mr Deputy i annan drwa pou li dir, ‘’Onorab i lalang?’’ I annan drwa dir Onorab i lalang? Sa i term ki nou servi dan Lasanble?

 

MR DEPUTY SPEAKER

Eski i dir Onorab i lalang ? En moman, en moman, en moman, en moman. Onorab Woodcock ?

 

HON WAVEL WOODCOCK

Mr Speaker mon pa’n apel Onorab Sophola, Onorab lalang, me selman si mon’n ofans li dan okenn fason mon apologize.

 

MR DEPUTY SPEAKER

Mersi. Ok? 

 

HON WAVEL RAMKALAWAN

Mr Speaker sel keksoz ki Onorab Woodcock ti dir, i annan en serten moman i apel li, ‘’Mr Sophola’’ – sa mon rapel byen. Me dan son entervansyon konbyen fwa in dir,’’ Oli problenm.’’ Manrten!’

 

HON WAVEL RAMKALAWAN

Pa mwan ki’n dir tousala.

 

MR DEPUTY SPEAKER

Ok, ok, Order! Ok nou..

Ok, Onorab Sophola, Onorab Woodcock zot ok?  Bon nou ava kontinyen avek deliberasyon lo Mosyon. Prosennman lo mon lalis mon annan Onorab Loizeau.

 

HON NORBERT LOIZEAU

E ou la ! Arwi ! Bonzour Mr Deputy Speaker, bonn apre midi Mr Deputy Speaker, bonn apre midi tou dimoun, bonzour tou dimoun a lekout.  Mr Deputy Speaker ozordi pour mwan personnelman i en privilez pour mwan ganny en sans koz lo La Digue. En zil ki kanmenm Onorab Ghislain i krwar i zis pou zot – mon osi mon kontan.

Mon kontan La Digue akoz mon osi mon’n pas serten, mon letan La Digue ti annan en serten moman. Kot mon ti vin fer serten travay La Digue senpleman akoz ti napa bann dimoun kalifye dan sa domenn, e nou nou ti vini nou ti vin ed La Digue.

E pandan sa bann letan Mr Deputy Speaker, mon’n fer bokou zanmi, mon annan zanmi dan lepep mon pa pou mansyonn zot non. Menm si mon, mon ti SNP sa bann letan, mon ti al kot zot ganny resevwar nou ok. E mon annan zanmi, bokou zanmi La Digue Mr Deputy Speaker e enn mon meyer zanmi La Digue se en dimoun La Digue se Jose Payet enn mon meyer zanmi. Nou vizit kanmarad souvan. Alors, permet mwan alors pour mwan fer lentervansyon lo La Digue.

Mr Deputy Speaker mon’n ekout tou deba mannyer i ete mannyer in deroule. Mon’n tann Onorab Ghislain pas son letan koz lo trou, plato, lasanm, trou. Mon pou sey fer fason Mr Deputy Speaker ki mon pa pou al o-bor okenn sa bann trou mwan ! Mon pour fer sir, ni tonm dan sa bann trou – mon pou fer sir mon pou pas o-bor.   Mon pou zwe lo plato. Akoz mon pa konnen si sa bann trou en bann trou san fon apre mon pa pou kapab monte. Mon pou kit sa bann trou trankil.

Mr Deputy Speaker ler mon’n ekout deba, mon kontan Onorab Gill ler in antre. Lentervansyon Onorab Gill i fer mwan mazinen ki Onorab Gill ti pe pase dan fernwanr La Digue, i ti vwar 2 madanm sakenn lo bisiklet dan fernwanr. E Onorab Gill li in vwar ki sa 2 madanm i dan en fernwanr i kapab tonm dan enn sa trou. I ti anmar 2 gran tors lo zot gidon pour zot, pou eklersi en pe zot semen. E mon kontan Onorab Gill ler in fer sa Mr Deputy Speaker.

Mr Deputy Speaker ler mon’n ekout Loter Mosyon Onorab Ramkalawan, vreman i montre nou ki, i annan serten problenm lo La Digue annou onnet ek nou lekor; problenm i annan – bokou problenm. E mwan ler Onorab Sophola ti pe koze dernyen fwa Mr Deputy Speaker, mon ti ganny bokou text sorti kot mon bann zanmi La Digue ki ti en pe ankoler  ek ou – kot zot in dir olye, olye ki ou vin koz lo bann sityasyon ki pou ed zot amelyor zot lavi, ou’n plifere vini fer en pe kankan, maltrete Mr Deputy Speaker. Challenge Onorab Ramkalawan e sa dimoun La Digue pa’n kontan.

E kwa ki fer mwan krwar ki annan problenm La Digue Mr Speaker semenn pase dan sesyon Reponn Kestyon, Onorab Noline Sophola ti koz, ti vin en kestyon lo club cars, be nou ti vwar i annan dezord. I annan dezord, ou sipoze annan 5 lasanm pou annan club cars – i annan ki annan 3 pe gannyen. I en dezord sa. E sa se bann problenm ki mon krwar Onorab Sophola ti merit adrese.

Onorab Sophola ou konnen mon zanmi ek ou mwan, pou respe ki mon annan pou ou mon pa’n kontan mannyer ou’n adres sa.

Me, Mr Deputy Speaker olye ki Onorab Sophola in vini vreman adres bann problenm ki annan lo La Digue in plito atak loter Mosyon. Menm challenge loter Mosyon pou vin debout ek li La Digue. Loter Mosyon pa anvi debout ek ou La Digue. Loter Mosyon Mr Deputy Speaker i en kandida Prezidansyel i pa pou kapab debout ek ou La Digue. Prezan mon pa konnen mwan Mr Deputy Speaker si dan dernyen Kongre Ordiner, konmela zot nepli fer Kongre  Ekstraordiner zot fer bann ordiner – mon pa konnen si non Onorab Sophola in monte pou debout dan eleksyon Prezidansyel pour Parti Lepep mon pa konnen petet. Me selman Onorab Ramkalawan i en kandida Prezidansyel, Mr Deputy Speaker e mannyer mon pe gete la mon war li konman lot Prezidan Sesel 2020. Mwan mon pe vwar, mon pa konnen si zot pe vwar sa. Mwan mon pe vwar sa.

Mr Deputy Speaker lafason ki ozordi osi Onorab Ghislain in koze zot 2 lentervansyon sirtou pour en dimoun, pour 2 dimoun ki’n sorti La Digue. Dimoun La Digue i vreman ankoler. E la mon a dir ou parmi nou la kantite text, kantite phone call ki nou’n gannyen avek lakoler in annan anviron 200 dimoun. E sa i montre petet, ki nou’n nepli annan 400 ekek dimoun nou’n fini mont dan 600, 700 la.

Mr Deputy Speaker mwan mon ti Onorab Sophola ti annan zis en keksoz ki mon ti pou fer. Mon ti pe koz sa avek Onorab Simon Gill, mon ti pou vini mon ti pou koz byen lo sa Mosyon. E menm ou konnen ki mon ti pou fer, mon ti pou fer fason mon ti pou hijack sa Mosyon avek tou sa bann keksoz ki Onorab Gill in dir. Ou ti annan plan depi avan ou vin dan Lasanble mon ti pou met tousala ansanm mon ti pou met la lo latab Mr Deputy Speaker mon ti pou hijack sa Mosyon.

Me sa ti pou bon pou dimoun La Digue akoz nou isi dan LDS, tou sa bann keksoz nou pe fer toultan mon dir zot, nou sa bann keksoz Mr Deputy Speaker nou fer li pour Sesel. E si Onorab Ramkalawan in mont La Digue akoz in anvi fer sa pou dimoun La Digue. E en keksoz ki zot pa pe mazinen lafason zot in entervenir zot de Onorab Ghislain, zot ankor still annan sa mindset ki zot krwar zot an mazorite. Non zot an minorite. E de plis mon a dir zot en keksoz Mr Deputy okenn keksoz ki zot met devan la, tan ki zot dan Parti Lepep zanmen pou marse. Ler nou, nou pou met nou lipye ladan la ki pou marse. In montre nou’n vwar.  En bon pe keksoz ki nou nou’n dir Prezidan Faure in pran, akoz, i ekout nou. E i konnen tou, wi nou lanmen ladan.

I ekout nou akoz i konnen tou sa ki nou fer, tou sa ki nou dir i annan en merit parfwa. Mr Deputy Speaker mon anvi koz en pe lo bann problenm ki annan La Digue. Ozordi zot pe dir ki oli problenm La Digue, ozordi La Digue i annan bann Housing Estate legzanp annou al L’Union, L’Union Estate later in vann dimoun in fer zot lakaz, dimoun zis i pas partou lo propriyete dimoun pour antre se zot. Napa en lord.  Napa ni semen, zis dimoun i rondi zis ou vwar en boug pase devan ou laport lo en bisiklet i ale.

Napa en lord, i annan en dezord total. Mwan mon’n al laba mon’n vwar Mr Deputy Speaker. E deplis ki sa, pou ou ganny later La Digue si ou napa koneksyon ou pa pe gannyen. E la Onorab Ghislain in koz bon labous in dir li en Digwa, nativ, ne. Onorab Ghislain in kit La Digue en bon pe letan pase li. In kit La Digue me in retourn La Digue akoz, akoz i ti ganny demande pou vin debout La Digue. La i ti tourn La Digue sansan ou ti pou vwar Onorab Ghislain Mahe. E de plis ki sa Onorab Ghislain in pas lo priyorite parmi bokou dimoun La Digue lo kote lakaz ek later.

Ozordi i annan dimoun La Digue ki annan plis ki 15an, 20an ankor pe rod later ek lakaz, Onorab Ghislain konman in antre in gannyen. Be sa pti boug laba ki annan 20an pe espere be li osi pa i ti a kontan annan son landrwa? Mr Speaker ozordi ler nou pou koz lo bann problenm, problenm i annan en ta.  Mwan mon konn dimoun La Digue ki pa’n ganny later La Digue ni lakaz zot in ganny lakaz Perseverans. Mon konn ners ki’n ganny lakaz Perseverans, ozordi ek sa ta bann morso later ki mon tande son msye in pran malapropo; be pa ti a bon pour sa bann dimoun ganny en morso batir zot ek zot fanmir bann natif La Digue. E la sa fiy ki mon pe koz lo la i en ners, olye ki ners i sorti Mahe Mr Deputy Speaker ouswa Praslin pou vin travay. La Digue, ti ava en ners la ki pe reste la e ki pe travay la ki en Digwa e ki konn son dimoun. Mr Deputy Speaker e deplis ki sa mwan dernyen fwa ler mon’n tann Onorab Sophola koze, mon’n ankoler lafason ki in ensilte bann travayer lasante. Ki mannyer ou kapab dir sa? Akoz sa bann dimoun, zot pe eksprim zot lopinyon zot pa happy dan zot travay, petet serten keksoz zot pe vwar i mal ou a dir zot ipokrit ?

Mr Deputy Speaker be sa en move mo i mal, ipokrit ki mannyer ou kapab tret en travayer ki pe sey met, ki pe sey met son problenm devan ou apel zot ipokrit ?  Selman nou kontan La Digue okontrer ed zot, sa en keksoz ki ou ti merit fer ale vwar sa bann dimoun, gete ki zot problenm, koz ek zot.  Se sa ki ti annan pou nou fer. Mr  Deputy Speaker ozordi nou pe dir napa problenm lo La Digue problenm drog, drog lo La Digue i annan en problenm, vol Mr   Deputy Speaker.

E la si mon pou koz lo drog mwan mon’n deza ganny dir par Onorab Ghislain konmkwa ki Praslin, La Digue bann dimoun i fim pli bon eroin i laba ;  en fwa dan nou pe koze. Pli bon eroin mon ti ganny dir ki bann dimoun Praslin ek La Digue ki pe servi Mr Deputy Speaker nou ti pe koze deor la. Nou pe koze deor dan dite avek Onorab Ghislain ou rapel nou ti pe koz en problenm sosyal mon pa pe dir i pe ankouraz drog.  Selman nou ti pe koze nou ti pe dir, wi, ti dir ki pli bon eroin mon repete i Praslin ek La Digue be alors pa i en problenm Mr Deputy Speaker.

I en problenm, i en problenm akoz ozordi nou annan en problenm lalkol tou lo La Digue nou pa kapab dir manti, mon mon’n al La Digue mon’n vwar. Sport, sport La Digue in tonbe lontan nou ti tann La Passe, Anse Reunion pe fer sikse konmela oli,  nou pa tande.  Oli zenn, oli zenn ki pe fer sa bann sport Onorab plis zwer i dan drog e zot tim sport pe tonbe.  Mwan mon en dimoun ki swiv, ki swiv sport Mr Deputy Speaker mon vwar, mon swiv mon trouve sa defayans i annan en problenm.

E alors sa se bann problenm ki mon krwar ki Onorab Sophola ek Onorab Ghislain ti merit adrese pou donn lespwar sa bann zenn La Digue. Ki nou pe lager kont drog ki nou anvi tir zot ladan nou merit vwar sa bann keksoz. Se sa sa bann keksoz, omwen zot ti a vwar, ‘’men be mon Onorab pe pouse pour mwan. Olye vini fer sa bann kalite konversasyon koumsa parey ki’n arive, nou’n tande bomaten taler apre midi e semenn pase. Mr Deputy Speaker problenm, problenm lo La Digue mwan mon debark La Digue mon rod en public toilet napa.

Tou etranze pe rode kot pou al dan toilet, ou bezwen al demann permisyon kot biro Cat Cocos laba la si bougla i kontan ou mannyer i a prêt ou lakle ou ava al anndan. Sa i en problenm, i annan bokou touris ki vizit zil, ou vwar bokou ki vizit zil e sa, e sa ti ava en bon keksoz pour nou Mr Speaker. E la Mr Deputy Speaker taler mon’n tann Onorab, Onorab Woodcock e menm Onorab Gill in koz lo sa progranm ‘’Zil Pros an Mouvman.’’ Mwan mon ti ekoute mwan ou ti ekoute sa Onorab Sophol ?   Ou pa ti trouve sa ou.  Mr Deputy Speaker ou pa ti trouve? Mr Deputy Speaker mwan mon’n gete mwan.  Ler mon’n get sa progranm e ler mon’n ekout prezantasyon Onorab Ramkalawan, i zis konmsi ou a dir Onorab Ramkalawan in ekrir en script in donn SBC in dir zot fer sa progranm. Wi, ou pa ti la ou ti L’Angleterre pe enjoy ou laba.   Ou ti L’Angleterre ou ti pe travay an menm tan ou ti pe enjoy – sa i byen. Mr Deputy Speaker sa letani problenm dan sa progranm i enkrwayab, i enkrwayab, sorti kot bann sitwayen Digwa e Pralinwa. E la i fer mwan mazin sa propriyeter bato, bougla pe plenny son sor en ta koze sa boug in koze. I pe plennyen se sa problenm zot devret adrese.   Ler mon get sa zenn madanm ki pe sey konstri son guest house.

In akonte tou sa diferan problenm ki i pe gannyen, son nyes, ok son nyes. Tou sa kalite problenm ki sa sister pe eksprimen dan sa progranm, e in menm dir ki ek 5 lasanm i pa fasil pour li pey son loan. La en keksoz ki Onorab Sophola konman MNA i devret lager for, lager pour olye vin 5 lasanm i vin 8 lasanm pour sa madanm kapab pey son loan. Sa bann keksoz ki nou merit al ladan. E la Mr Speaker mon mazin sa pti kontrakter, la osi pe plennyen. Bougla pe plennyen e menm i pe dir, zot dir napa problenm La Digue, bougla pe ganny problenm lanplwa, problenm dimoun lokal pou travay dan son konpannyen – travayer.

I anvi anmenn detrwa travayer etranze zot in dir ki i bezwen annan omwen 60 a 80 poursan workforce Seselwa. Be napa, eroin in pran tou plas dan La Digue. I annan. Nou pa kapab dir napa. Mwan mon annan dimoun ki laba La Digue i dir mwan i annan Mr Deputy Speaker. Mr Deputy Speaker en lot keksoz ankor ki ti fer lapenn, ki ti fer lapenn i en ou msye in bezwen fer sir dan son zenn tan in aprann tou sa kalite travay ki i konnen, ki i konnen i annan dan konstriksyon, akoz pou li kapab fer son lakaz li menm.  Akoz sansan zanmen i pou kapab.   In pran li 2an, li tousel pou vwar li kot  i pe,..mwan ler mon ti vwar sa mon admir sa boug; 2an pour li fer son lakaz.

E ler i pe koz ou 4 blok R100 lavi i an roz La Digue ?   Non lavi pa an roz La Digue. I annan keksoz ki nou bezwen aranze e nou isi dan LDS, nou anvi ki sa bann keksoz i aranze, pou ki bann dimoun lo La Digue zot lavi i amelyore.  Pa krwar nou pe fer sa pou mileage politik. Nou pe fer sa akoz nou anvi vwar La Digue bouz devan Mr Deputy Speaker.  E la permet mwan ler mon ti war sa 2 madanm ki pe leve debrouye ki vann zot juice ki pe vann zot bann fri. En keksoz pli sad ki mon’n vwar ek sa, ek sa 2 dimoun napa fri lo La Digue. Be ki pe arive zot pa plante lo La Digue ?

Napa fri sa madanm i dir i bezwen enport son fri sorti Mahe.   Mazinen !  Be konbyen i pou vann en ver juice ?  Konbyen i pou vann en ver son juice ki i fer ek sa fri ki sorti Mahe ?   Sa madanm ti dir. E pourtan zot pe kontribye sa bann dimoun Mr  Deputy Speaker, zot pe kontribye dan lo kote touristik, e  la dapre konpran, zot menm pe ganny demande pou sorti laba zot  pti stall. Ki sa i mal. E nou, nou pe dir zot pa sorti akoz zot pe fer en keksoz ki byen. E nou dan LDS nou siport sa bann dimoun, ki pe bouze ki pa pe al kas lakaz dimoun ki pe rod en keksoz pour zot fer.

E, e sa i fer mwan vi ki nou pe koz lo zil pros Mr Deputy Speaker mazin sa zenn garson ‘rasta mon krwar Mr Ismael, li  osi pe kontribye for, for dan lo kote touristik ; bann gro, gro bis lotel zot annan drwa pase tir portre son ghetto anler selman zot pa arete pour sa touris vin aste en mang ek li en fri selman zot oule tir son portre.  Si i fer zot peye in dir ?  Ou vwar i pe fer en travay.  Nou bezwen gete sa bann dimoun zot pe lev-e zot pe debourye. Zot pe debourye e nou dan LDS se sa ki nou le toultan Onorab Ramkalawan in dir sa.

Nou, nou met divan dan zot lezel, pli lwen ki ou arive i bon pour nou. San menm sa ki ou trouve Onorab Ramkalawan la in mont La Digue pour al vwar akoz i annan sa bann konsern.  Malgre zot pe dir ti annan 15 dimoun les li nou, nou ti dir ti annan 75 dimoun ok ?   Mr Rene le ti fer Koudeta mon krwar ti annan 10 sepa 9 zot, apre zot ti mont lo radyo ou konnen ki zot ti dir, ‘’ahhh en group dimoun i fer koudeta alors in dir mwan vin diriz pei1’’ Ti annan forse 12 zot non ?   Ok, nou alors si ti annan 15 nou i ok – nou’n fer nou meeting e nou pa’n fer okenn revolt laba Mr Deputy Speaker.

E de plis ki sa Mr Deputy Speaker mon anvi, be Onorab Sophola ti dir ek Onorab Ramkalawan ki ou’n fer dan bann distrik ki ou’n gannyen. Mon asir ou si Onorab Ramkalawan ti’n ranport eleksyon dan en distrik ler nou ti an mazorite la en ta keksoz ti pou arive. En ta keksoz ti pou ganny fer menm si nou ti an minorite Mr Deputy Speaker ok ?   Menm si nou ti an minorite Mr Deputy Speaker i annan nou nide ki’n ganny pran.  Zot ti pran, pran fou laba dan kwen, nide Onorab Ramkalawan sa li tousel, in deza li tousel, son lide i deza ganny pran apre zot in pas en pti sifon lo la met devan zot dir pou zot.

Nou annan en ta bann Lalwa ki’n pase bann letan ki li i ti li tousel, in fer. E si mon asire i ti dan mazorite sa letan, nou ti pou lwen pei ti’n sanze Mr Deputy Speaker.  E, e la fer mwan, mon anvi dir en keksoz ankor zot dir, zot pe challenge Onorab Ramkalawan, Ramkalawan i kapab perdi si i oule. Selman i en boug ki krwar dan demokrasi, zanmen i pou fer bann act malfeter li. Onorab Ramkalawan zanmen, zanmen pou fer, pou servi fizi, pou fer Koudeta, mars ek tant vakwa bonm met partou zis pou fer per dimoun.

Onorab Ramkalawan i krwar dan laliberte en pep!   I enportan ki zot konpran sa. I enportan sa. Parey mon’n tann Onorab Ghislain in koz lo depi mannyer pei in vini, depi kolonyal in monte liberasyon. Wi, liberasyon ti fer Koudeta nou, nou pa pou fer sa nou, nou, nou pou fer nou kontribisyon la – konman sa mazorite ki la nou pou fer sa pei sanze !  Sa pei pou sanze, pa pou nou, pour nou tou. E nou pou fer La Digue sanze Onorab Ghislain ek Onorab Sophola. Pa krwar nou, nou lennmi ek zot nou, nou anvi fer La Digue bouze.  Nou anvi ki bann dimoun La Digue i viv en meyer lavi, ganny tou bann sans ki i annan dan nou pei Sesel.  E La Digue i pa, i pa zis pou Digwa – La Digue i pour Sesel.

Mr Deputy Speaker ozordi mwan mon anvi fer en lapel ek bann dimoun La Digue pour dir ki nou dan LDS la nou lo zot kote. Kantmenm serten pour sey fer krwar ki nou, nou pe zis fer bann latak lo La Digue – non.  Nou kontan La Digue e nou pou fer tou pour La Digue ganny sa ki i bezwen. E la Mr Deputy Speaker mon anvi dir ek bann dimoun La Digue pa per pour sa Eleksyon. Pa per zot in vwar mannyer pei pe marse – bokou laverite pe sorti ;  san menm sa ki liber zot sa ler laverite i sorti. Pour bann ki’n siport Parti Lepep, dan le pase ozordi nou pe fer zot war mannyer bann dimoun dan lepep ti pe bous zot lizye. Konbyen bann gro gro morso later ki pe ganny pran pe donn ek zot dalon, ki  ozordi tou sa bann dimoun La Digue ki ankor pe esper en lakaz ki ankor pe esper en later ti ava ganny en morso dan sa gro gro kopo ki zot pe gannyen – ki zot pe pran.

E la Onorab ok, la Onorab Larue pe montre mwan en papye la ki kot bann act malonnet in arive. In montre mwan la i annan en madanm en Antoine Sophola mon krwar en, en madanm selman konm son non ki’n ganny later 30mil apre in vann later konbyen ?   1.1.   Savedir ou pa ti bezwen later ?  Be sa pti dimoun pa ti ava ganny sa later si ou pa ti bezwen. Ou pran pou ou al vann 1milyon ?   En ?  Be kit sa ater pou sa pti dimoun laba ater kapab gannyen li osi. I a ganny en survive.. anr ou …Noline an wi son lekritir i en pti pe pal, mon pa’n tro byen gete.  Annou partaze.

Mon konnen akoz ou pe siport sa. Ou annan condominium i byen – i ok.

 

MR DEPUTY SPEAKER

Onorab ou annan ou ankor 2 minit.

 

HON NORBERT LOIZEAU

Wi, wi, be bann dimoun La Digue osi bezwen ganny en keksoz. Mr Deputy Speaker an konklizyon mon anvi dir bann dimoun La Digue tenir solid deryer LDS. LDS i sa parti ki pou anmenn plis laklerte, plis laverite e ki pou fer ki en zour La Digue pou re ganny zot, zot liberte. Zot pou re ganny zot liberte, zot pou kapab koze, zot pa pou per ; zot pa pou per akoz tel parti nou’n ladan de sepa letan. La Digue se nou ki pou liber La Digue. Mr Deputy Speaker mon pou termin la. Mersi.

 

MR DEPUTY SPEAKER

Mersi Onorab Loizeau. Onorab Herminie.

 

HON WILBERT HERMINIE

Mersi Mr Deputy, Mr Deputy Speaker Manm koleg Onorab, tou dimoun a lekout bonn apre midi. Mr Deputy ‘’you may not like the singer but you must learn and respect the song. ‘’Mon komans mon lentervansyon koumsa akoz i kler i annan en latak personnel lo Onorab Sophola.  Mr Deputy Speaker les mwan par komans remind sa Lasanble lo sa ki nou tou nou abitye dir ; ki nou Lasanble nou’n ganny elekte pour vin travay pour sa pep e lepep Seselwa.

Alors si loter Mosyon ti vreman krwar ladan, si loter Mosyon ti vreman annan lentere Digwaz a ker, e son lentansyon ti pir,  e i ti ava konsilte Onorab Sophola e anmenn en Mosyon bipartisan pour demann, pou aranz en nouvo striktir pou La Digue. Eski sa i pa dan lespri travay ansanm? Eski sa i pa dan lespri pou bouz La Digue devan?  Eski loter Mosyon i pa krwar ladan? Akoz ki sa ti ganny fer dernyen fwa lo pou Praslin kot ti annan en Mosyon bipartisan pour iverb, Ile Eve sorry.

Akoz ki loter Mosyon pa ti swiv dan menm laliny pour sa enn Mosyon ?   Eski i pa krwar dan konsiltasyon ?   Mr Deputy Speaker detrwa semenn pase Onorab Arrisol ti anmenn en Mosyon dan sa Lasanble, pour demande ki tou dirizan dan distrik, i ganny enkli dan bann desizyon ki ganny pran apropo zot distrik.  Mon vwar sa i drol e sa i en ranversman total dan sa ki menm LDS i dir e fer.

Akoz sa?  Sa set akoz en zour zot dir enkli – e lot zour zot anmenn en Mosyon san enkli.  Mr Deputy ozordi mon demande ki LDS i vin kler ek sa Lasanble ek avek lepep Seselwa e dir nou fran ki zot vreman oule. Eski zot oule enkli e travay ansanm? Oubyen zot pa anvi enkli e zot oule travay zot tousel? Mr Deputy Speaker an sir respe pour bann Digwaz e zot swa pou elekte Onorab Sophola an gran mazorite, i fer plis sans pou les Onorab fer son travay ki in ganny elekte pou fer.

Zot oule travay ek li – travay ek li. Me si zot annan zot prop azanda ki al kont son travay pou vre progresman La Digue, parey Onorab Sophola in dir zot, si zot oule zot sans i annan Eleksyon ki pe vini. Digwaz in fer zot desizyon e les Onorab Sophola travay. Mr Deputy Speaker lekel ki pli byen konn sor son zabitan, kondisyon e lanvironnman son zabitan, si pa Onorab Sophola li menm ?   En zabitan sa zil ki viv e pe viv dan menm lanvironnman ek zot.  Pou sa enn ki pa’n zanmen viv dan sa lanvironnman, pou sa enn ki pa ni konn vre sor sa bann zabitan ; pou sa enn ki’n zis tann koze pa’n zanmen eksperyans lavi bann zabitan ki pe vreman viv.

Mr Deputy Speaker negativite e plis negativite ankor. Enn ler mon ekout bann Onorab lo lot kote latab koze, mon zis demann mon lekor, eski tou sa Gouvernman, Gouvernman Parti Lepep in fer pou sa pei i mal? Eski tousala i mal pour zot e ot zot pou fer tou keksoz pli byen? Mr Speaker, Mr Deputy kot i mal nou ava aranze e kot i  byen nou ava anbelir. Akoz Gouvernman i toultan krwar dan fer keksoz pou amelyor lavi pour son pep, e sa i evidan.

Akoz si pa ti Gouvernman dirize par Parti Lepep ozordi ti pou napa sat a devlopman ki annan lo La Digue.

Mr Deputy Speaker parey serten Onorab in touse en pe lo bann transe e i dir sa i en dezord. Les mwan donn enn pti pe leklersisman lo, lo sa size. Mr Deputy Speaker sa bann transe ti ganny fouye pandan Siklonn Felleng ki ti afekte La Digue detrwa lannen pase. Akoz topografi La Digue i enn ki anserkle par montanny lo son bout deryer e lo son milye i annan en plato ki ganny bare par delo sale. Prenon kont ki coastline i pli o lo kote plato e delo napa sa proper gradient pou li desarz son lekor. Ti annan de proze mazer ki ti ganny fer pou fer 2 outlet pou ede retir delo ; enn lo La Passe e lot lo L’Union. E osi ti annan proze pou desilting lanmar, pou agrandi larzer fonder, larzer e fonder sa kapasite sa bann lanmar pou pran plis delo.

Mr Deputy Speaker, bann transe in ganny fouye pou konplemant sa sistenm, pou tir delo kot bann propriyete prive. Par devan sa bann transe i annan bann sours gate pou anpes lanmer antre sa bann transe pandan mare o.   Sa i en sistenm ki ganny servi pou manage flood dan bann low lying area. Eski sa i en dezord Onorab? Eski pa’n ed, ede pour amelyor lavi bann Digwaz? Mr  Deputy Speaker tou bann problenm ki loter Mosyon in dir nou semenn pase eski tou sa bann problenm pa egziste lo Mahe? Akoz ki in target La Digue spesifikman?  Eski tou sa bann problenm ki in vin avek Lotorite La Digue pa okouran? Eski nanryen pa pe ganny fer dan sa direksyon pou adres sa bann problenm? Eski son nouvo striktir ki pe vin avek pou annan en baton mazik pou deal avek tou problenm?

Apre ki mon’n ekout MNA pou La Digue koze i fer nou ganny en konpran ki sa bann keksoz ki loter Mosyon in koz lo la i annan bann ki’n ganny adrese e i annan ki pe, i annan travay ki pe ganny fer lo la. Alors Onorab mon sizere ki ou pran kontak avek Onorab Sophola pour zot travay ansanm, pour zot kapab bouz La Digue pli devan. Silvouple kot napa dezord annou pa al met dezord. Kot i annan problenm annou entansifye zefor pour par bann striktir ki deza an plas pou pran zot responsabilite e travay pou amelyor sityasyon.

Kominikasyon i lakle.  Nou la pou travay pou sa pep e nou pa vin konfiz zot an krwayan pou fer pli byen pou pas pou pli bon, pou nou pas pou pli bon e ganny vwar ki nou pe pli byen travay. Avek sa Mr Deputy Speaker mon demann avek bann Digwa pou kontinyen reste en zil trankil e anpese ki dezord i ganny anmennen kot e a tou pri. Akoz i vreman, akoz si vreman sa bann dimoun ti annan zot zentere a ker zot ti ava travay ansanm avek zot MNA ki zot zot in elekte e reprezant zot isi dan Lasanble. Mersi Mr Deputy Speaker

 

MR DEPUTY SPEAKER

Mersi Onorab Herminie.   Onorab Afif.

 

HON AHMED AFIF

Mersi Mr Deputy Speaker. Mr Deputy Speaker mwan tou dabor komanse an di-z-an ki mon’n vizit La Digue a plizyer repriz. Mon pa rapel mon premye vizit me selman sertennman bann vizit travay ti dan 1997. Mon ti ankor dan Gouvernman.  E les mwan dir ki mon lenpresyon La Digue, se bann dimoun ki vreman akeyan, bann dimoun ki fer ou feel at home ler ou ariv La Digue. E mon leksperyans La Digue in toultan en bon leksperyans – an term lafason ganny lakey, la fason ou enterakte ek dimoun e vreman ou sezour laba i en zoli landrwa e mwan mon’n vreman apresye sa.

Me selman mon konpran antyerman akoz Onorab Ramkalawan in anmenn sa Mosyon. Akoz en ti pe parey Mahe e Sesel an zeneral avek 93mil dimoun, nou annan nou serten difikilte konpare avek par egzanp Maurice oubyen en pei dan Lafrik. Akoz? Zot bokou pli gran, sa menm Airport dan zot pei pou deservi tou zot popilasyon alors sakenn i bezwen pey mwens pour sa Airport pareyman pou zot Por.

E ler ou regard La Digue li osi i pou bezwen annan serten problenm akoz, tou keksoz ki nou, nou gannyen isi Mahe, ki vin direkteman lo Airport oubyen lo Por e ariv se nou i ganny delivre. Pou zot, zot annan en lot problenm zot, zot annan sa problenm lozistik en transportasyon. Sa ki mon rappel, se ki depi sa letan i ti en gro problenm, depi mwan mon’n vizit La Digue depi 1996, 1997 eksetera – i ti en gro problenm.

Me ozordi i aparan ki sa problenm i pa’n rezourd e i menm pli grav. I pli grav sa senp legzanp si en landing craft par egzanp i vin La Digue i reste 24er lenformasyon ki nou annan ek bann operater. Zot bezwen pey akout 28mil roupi pou zot reste 24er ek lasose. Sa se operater ki pe dir nou. Be si in anmenn 100tonn i ariv R280 1tonn, zis pou koste sa. Ki i bezwen pas avek Digwa. E alor i annan plizyer lezot problenm, lezot Manm in koz lo la mon pa pou repete. Esansyelman Digwa i trouv zot ki zot soufer, akoz tou keksoz i pli ser ou bezwen transporte e i pa prodwi bokou. Bokou desizyon i bezwen ganny fer Mahe e alor pou fer en desizyon i pran plis letan ki Mahe souvandfwa

E bann servis ki zot gannyen tel ki lopital i bann servis ki en nivo ki pou pli ba ki zot ti a gannyen swa Praslin swa Mahe.  Alor loter Mosyon pe dir La Digue mon asire depi Gouvernman ozordi i rekonnet i annan en problenm. Se pou sa rezon ki an ‘98 zot ti annan zot premye lorganizasyon ki ti La Digue Fund ki ti ganny etabli. E in konmans sey regard en pe sa bann problenm. Mon pa krwar in kapab rezourd tou keksoz. Answit nou tande li in arête, La Digue Trust fund in ganny kree e plizyer lezot ankor.

Me apre tou eski nou’n vwar pri keksoz desann La Digue. Eski nou’n vwar sa birokrasi vin mwens La Digue? Eski nou vwar pri transportasyon ek lozistik ganny rezourd? Non, i pa ankor ganny rezourd.   E nou lo sa kote latab e loter Mosyon pe dir nou anvi donn en koudmen tou sa bann lorganizasyon pou ed dimoun La Digue. Nou pa pe dan okenn fason esey denigre dimoun La Digue, parske dimoun La Digue zot Seselwa parey nou tou, e zot osi zot annan, zot lanmen in anmare akoz problenm zeografik ki mannyer i ete.

E nou, nou pe rod en fason ki olye annan tou kalite striktir pou adres sa, nou bezwen annan en striktir ki efektiv.  Ki efektiv; ki donn plis pouvwar La Digue ek son administrasyon mon pa konnen ki mannyer i pou apele sa administrasyon. Me kot desizyon i fer vit ; kot sa bann problenm lozistik i ganny adrese e kot pep Digwa i a vwar en laklerte dan sa difikilte ki zot annan La Digue. Mr Deputy Speaker mon ti a kontan pirman lo en pwennvi ekonomik, dir ki La Digue pour mwan i bezwen ganny konsidere koman en landrwa enportan lo en pwennvi touristik. Lenformasyon ki mon annan avek Biro Statistik, i endike ki anviron 7poursan bann lili dan nou Sekter Tourizm i La Digue.

Alors si nou pe, bann sif IMF i montre ki 2017 par egzanp, pei enkli La Digue pour prodwi $434milyon avek tourizm, zis ek tourizm. Pour pran sa 7 poursan La Digue i bezwen pe anmenn li $30.3, $30.4milyon. Zis son VAT i anviron $4.6milyon  ki apepre 62milyon Roupi.  Zis VAT lo tourizm ki La Digue pe kontribye apepre 1milyon Roupi par semenn. Kantite larzan La Digue  pe anmennen.  Be si i koumsa akoz nou pa kapab, nou pa kapab rod en fason pour fer ki bann fasilite ki La Digue i annan, i kapab ganny amelyore.  Oubyen bann servis, bann tarif ki pe ganny enplimante, i ganny fer dan en fason ki tou sa bann operater ki La Digue zot a trouv zot ki petet zot kapab ofer en meyer servis La Digue.

En servis ki i a en meyer pri e alor e anmenn plis reveni. Parske ler ou pe, ou pe fer en booking online konman en touris ou pe get pri lasanm e ou vwar son pri i bokou pli o dizon ki tou larestan landrwa dan Sesel, petet ou dir mon pa pou al laba. Alor ou pe defavoriz sa zil. I annan e dezavantaz. Si nou pe ganny nou R1milyon par semenn zis pou donn en legzanp konman zis VAT sa – mon pa pe enkli ki VAT ki Digwa pe peye ler i aste marsandiz ; mon pa pe enkli income tax ki bann Digwa ki travay pe peye eksetera, sa zis lo tourizm R1milyon par semen.

Akoz par egzanp ki in pran sitan lannen  – annefe ti an 2015 ki Gouvernman ti deside pran R1.8milyon –  pa ni R2milyon pour li met dan en mortuary. Ki La Digue ti bezwen. Akoz par egzanp nou pa pe rod pou amelyor bann senp keksoz ?  Mwan mon ti sanse pou al sa meeting La Digue ki ti ganny,  dimoun La Digue ti ganny resevwar nou tre byen. E mwan mon pa ni pou argimante si ti annan 75 si ti annan 15 si ti annan 30 – i pa enportan. Me sa bann dimoun ki’n vin la sete  bann dimoun ek en konsern, dimoun ki annan en konsern zot reprezant plizyer fanmiy. En kantite zot ti bann operater oubyen bann dimoun dan biznes. I enportan nou ekout sa bann dimoun.

E mon partaz en kantite zot soufrans, parske zot pe sey dir ou konmsi,’’ Be annou rod en fason – annou rod en solisyon pou aranz sa bann keksoz.’’  E la mon krwar ki Gouvernman i devret vreman met en zefor serye pou fer sir ki zot pe ekoute. Ler zot pe dir nou par egzanp kot lopital. Mwan personnelman mon ti enn sa bann dimoun ki ti al kot sa lopital.  Mon’n koz ek sa bann ners mon’n koz ek tou sa bann dimoun. E zot bann dimoun ki travay tre, tre dir. Ler mon get zot, ler mon ekout zot, ler mon’n demann en pe lo, lo sa ki pase kot sa lopital. Zot pe travay tre, tre dir avek tre pe. Annefe mon admir zot pour lafason zot travay. En ners par egzanp i dir ek mwan ler i pe travay i Senior laba, i napa en lot dimoun son nivo dan sa lopital. Alors si par egzanp i ariv en aksidan en emergency dan en lot landrwa i pou bezwen deplas premyerman drayver lanbilans, pour li al rod en lot dimoun ki sipoze la o-bor li me ki pa la. Ki lo standby li, i bezwen servi en lanbilans pou al rod en travayer e apre anmenn al lo site.

E ler pou ariv lo site pou napa ni en paramedic pou napa, akoz zot napa. Be  mon admir sa bann dimoun lafason zot pe travay ozordi.  Erezman i napa bokou aksidan. Pareyman sa ners i dir mwan si, Dokter i avek en pasyan i pe sey konsilte li i anvi zis fer en pti Tes Disan, i napa Laboratwar, en pti Laboratwar. Ozordi ou al plizyer bann pti klinik prive isi Mahe, zot in envestir, i pa kout 2 milyon de Dolar pou fer en pti Laboratwar. Kekfwa 2, 3 san mil Roupi. Be en zil ki pe prodwi ou plis ki R1milyon par semen eski pa normal pour nou krwar ki i devret ganny sa pti lenvestisman?

E toudswit kot sa dimoun ki vin kot sa klinik, sa Digwa oubyen sa touris deswit i ganny  en Blood Test zot a dir li si i ganny tel maladi ou non. I pa bezwen pran sa, sa pti lesantiyon anvoy Praslin espere ki i ganny sa menm apre midi oubyen petet son lannmen.  Bann ptipti keksoz koumsa.  En lanbilans eski pa i devret ekipe avek tou keksoz ki en lanbilans normal i devret annan ?   Si sa bann problenm ki Digwa pe met devan. Zot Por ; zot pti Jetty ki en Jetty ki’n la pou en bon pe letan ki in byen servi i ki annan bokou bato ki vin lo la, akoz ki nou bezwen sarz sa bann bato ‘otan pour zot vin koste e dekoste ? Petet si Gouvernman ti revwar bann tarif ki pe sarz zot petet ti a fer desann kou lavi. Parske transportasyon i enn bann fakter pli enportan, ki pe fer monte pri lavi La Digue – transportasyon.

Alor si Gouvernman, i trouv li en landrwa ki pe anmenn sitan larzan pou sa pti zil, be akoz zot pa dan en fason, pa bezwen met sa bann gro tarif les sa bann dimoun fer biznes fer plis biznes anmenn plis touris anmenn plis VAT pou Gouvernman. Ki apre finalman nou tou nou a gannyen olye fer bann keksoz ki mal.   Mon ti a kontan osi fer port latansyon avek, avek Gouvernman avek Egzekitiv ki akoz nou annan serten keksoz ki pa byen par egzanp Por.   Lenfrastriktir Por kot La Digue e serten lofis ki i pe lwe, akoz sa bann lofis i bezwen, bann lofis ki zot pe pey avek en parti politik pour en rent ?   Eski sa i egziste wi ou non?  E si sa pe pase akoz i koumsa?  Mon krwar se sa bann keksoz ki nou, nou vwar konman bann keksoz ki enzis ki pe kree, ki pe kre lenzistis pour bann Digwa e se la bann pti keksoz ki Gouvernman e tou dimoun konsernen i devret travay ansanm pou aranze.

Mwan mon krwar ki loter Mosyon i pe anmenn en keksoz ki byen ; ki zot devret fer mon, mon pa krwar se mwan ki annan en solisyon pour La Digue. Mon krwar i devret en group dimoun ki konpran vreman bann problenm, bann problenm ki Digwa pe pas ladan – Gouvernman ansanm si zot anvi enkli bann parey nou lo sa kote latab nou tre kontan pour nou partisipe. Me finalman i bezwen en keksoz ki sorti ek Digwa.   Fodre zot, zot take ownership.  E nou, nou pou ankouraze pour bann keksoz koumsa arive ki zot annan en striktir ki delivre.

Akoz mwan mon pou dir ou ozordi si ou demann mwan si i pe delivre? I pa pe delivre. Sa litani problenm ki nou’n koz lo la apre midi e Merkredi pase i kler pa pe delivre. Tou keksoz, pa tou keksoz, en bon pe keksoz ki enportan pa pe marse, pa pe mars byen e i enportan nou fer zot marse. Alors mon krwar en striktir ki efektiv ki pou marse e ki meyer ki sa ki la e petet ranplas ki sa ki la i devret ganny fer. E mwan mon pou aport mon soutyen mon sipor total pour sa Mosyon. E mon espere ki nou kapab pas sa avek en mesaz tre for ek Gouvernman, ki serten keksoz ki irzan e i devret ganny fer dan lentere pep Digwa.  Mersi Mr  Deputy Speaker.

 

MR DEPUTY SPEAKER

Mersi Onorab Afif.  Bon mon annan ankor 8 entervenan lo mon lalis.  Nou pou aret la pou ozordi. Nou ava kontiny lo nou deba semenn prosen Merkredi prosen ok? Mon napa okenn lanons pour mwan fer. Ok yes sorry tou bann Manm Truth and Reconciliation Committee demen zis en reminder pour zot. Demen i annan meeting isi kot Lasanble 8er edmi bomaten ok?   Nou fer tou bann keksoz neseser nou konnen i en public holiday ki zot ava ganny bann lasistans neseser avek Sekretarya ok?   Yes Onorab Sebastien Pillay.

 

HON SEBASTIEN PILLAY

Mersi Mr Deputy Speaker, Mr Deputy Speaker mon pa pou pran tro bokou letan Lasanble. Mon pou zis fer eksprim, eksprim nou,  mwan e Onorab Sandy Arrisol nou oule eksprim nou gran remersiman pou Sekretarya Lasanble e O Komisyoner Derick Ally L’Angleterre  ki ti resevwar nou tre byen pandan letan ki nou ti lo misyon. E mon oule osi dir ki ti en plezir travay akote en koleg Seselwa ki’n donn mwan sipor e nou’n fer nou pei loner dan sa misyon ki nou’n ale.

Nou ti pli pti pei parmi sa bann pli gran me lefe ki nou’n montre ki nou annan en kapasite e en profesyonnalizm enkrwayab. Mon krwar sa in ganny byen apresye e mon, mon prezimen ki sa osi pou ouver laport pour ki nou Lasanble i kontinyen partisip dan sa bann tel levennman pli tar. E mon oule, mon ti a swete ki tou Manm, mon pou kit serten dokiman kot Library pou ki tou Manm i regard sa dokiman.  Pou ki bann misyon fitir ki vini ler zot ale, zot ava osi prepare e zot a kapab delivre sa oter. Mon pa konnen ki si Onorab Arrisol ti annan okenn keksoz i ti le azoute, me chapeau Sekretarya Lasanble ki’n, ki’n fasilit nou deplasman e osi ed nou ek bann lorganizasyon. Mersi Mr Deputy Speaker.

 

MR DEPUTY SPEAKER

Mersi Onorab Sebastien Pillay, Onorab Arrisol ou le dir… ? Non ?   Ok, bon ok. Mersi pour sa de pti mo, e mon krwar ki i annan bokou zefor e ki’n ganny met deryer pour sa deplasman isi.  E nou konnen nou okouran ki lakey osi in bon lo kote O Komiser Sesel Londres nou apresye, e mon krwar sa fason ki nou bezwen kontinyen travay. Ok, avek sa nou ava adjourn ziska Mardi prosen 9er bomaten.

 

(ADJOURNMENT)