Home » Verbatim » 2017 » Verbatim Report NAS Sitting Tuesday 13th June, 2017

Verbatim Report NAS Sitting Tuesday 13th June, 2017

NATIONAL ASSEMBLY OF SEYCHELLES

 

Tuesday 13th June, 2017

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou dimoun.  Bonzour tou bann koleg Onorab, bann dimoun ki pe ekout nou.  Annou konmans nou travay pou lasemenn.  Parey labitid pou nou fer sa ki nou krwar i byen pour Sesel.  Premyerman mon ti a kontan swet Bon  Retour nou 2 koleg ki ti al obzerv Eleksyon England.  Onorab Sebastien Pillay ek Onorab Sandy Arrisol.  Mon pa  konnen si zot in zwe okenn rol dan determinasyon rezilta eleksyon me omwen zot in ganny en bon leksperyans ki a ed zot avek bagaz zot a kapab partaz avek nou dan Sesel, sirtou an se ki konsern dan lorganizasyon eleksyon a lavenir.  Mon ti a kontan osi felisit Minis Finans Dr Larose ki resaman in ganny elekte koman Chairman International Advisory Group ki baze England e mon krwar tousala osi i ede pou anmenn vizibilite e parey Angle i dir hoist the flag of the nation o pou montre kapasite.  Zot ava rapel ki Onorab Pillay ti ganny elekte konman Head of the observer group of England – so tousala i ede dan en fason ou en lot pou ed nou pei annan plis vizibilite, annan pli respe.

Mon ti a kontan osi anonse ki Chairman FPAC ti’n demann en rapor pli detaye lo sa kestyon Tribunal e bann detailed expenditure.  Mon ti a  kontan anonse ki Minis Finance in prezant mwan en dosye bomaten ki toudswit apre mon a pas avek Chairman FPAC, ki  a diskit avek son Komite e zot deside si pou sirkil avek tou Manm epi evantyelman si i annan nesesite pou diskit lo la nou a diskite.  Me zis pou anonse ki sa i deza la e Minis in onor son lobligasyon pou anmennen. I en file ek tou bann detay ki a la ki mon a pas avek FPAC.  Bomaten nou annan nou Order Paper devan nou e vi ki nou annan serten kestyon ki enplik plis ki Minister Finans mon deside ki i byen ki pou sa enn sesyon pou sa enn seri kestyon for Oral Answers petet vi ki i annan bann zofisye sorti Central Bank en kestyon tre spesifik sorti kot Onorab Leader of Government Business,  pou sa enn sesyon nou al dan Staz Komite ki Minis i a reponn kestyon zeneral, me i annan bann teknisyen ki a reponn bann kestyon spesifik sirtou pou Onorab LGB.  Alor Mr Sergeant-at-Arms si ou a kapab fer le neseser e bouz Mes.  Wi Onorab …

 

 

HON CHARLES DE COMMARMOND

Mr Speaker mon bezwen demann kestyon avan ki nou al dan Staz Komite.

 

MR SPEAKER

Non mon krwar ou kestyon i kapab vini apre ki nou’n konmans demann Minis Larose pou fer son statement zeneral.  Ou ti le demann ou kestyon ?

 

 

HON CHARLES DE COMMARMOND

Mon krwar mon bezwen demann kestyon avan apre la i ava annan Mosyon pou move dan Staz Komite.

 

 

MR SPEAKER

Ok.  Dan sa ka…

 

HON WAVEL RAMKALAWAN

Mr Speaker?

 

MR SPEAKER

Yes?

 

HON WAVEL RAMKALAWAN

Mr Speaker bonzour e bonzour tou dimoun.  Mr Speaker mon pa anvi go against sa ki ou’n dir, me selman mon krwar ki Question Time is addressed to the Minister e mon krwar ki nou pou degrad Question Time si nou konmans, turn Question Time into Committee Stage.  A Minister is in charge of son Minister.  I devret konnen e resevwar konsey e se pou sa rezon  ki son bann konseye i vin o-bor li e se li ki reponn kestyon parski sansan nou Lasanble pa pou vin en Lasanble me i pou vin en Komite Lasanble e mwan mon – lo nou kote, e an plis ki sa pou nou rantre dan Committee Stage an prensip nou devret pran en vot. E lo nou kote Mr Speaker mon bezwen note pou ou latansyon ki poudir nou kont ki Question Time i vin en Komite e ki Lasanble i devret pandan  Question Time adres sa Minis ki li i ansarz son Minister e non pa kestyonn son teknisyen.  Mersi bokou.

 

 

MR SPEAKER

Onorab Ramkalawan mon’n note.  Mon note ou pwen e mon konsider li koman enportan.  Les mon fer zot rapel ki mon pa kont e mon pa pe anvi degrad Question Time pou fer li vin en moman kot nou zwenn dan Komite me mon ti a kontan fer zot mazinen ki lepase ler ti annan kestyon pour STC, tou dimoun ti dakor ki STC i bann kestyon tre spesifik ler Minis responsab pour Finans ti vini i ti vin avek madanm Veronique Laporte ek serten dimoun ki ti reponn kestyon tre spesifik lo STC ki mwan mon krwar  i pa ti pou zis pou demann Minis pou reponn sa kestyon.  Not withstanding ki mon dakor avek ki ou pe dir ki se pou sa rezon ki mon’n dir i annan kestyon spesifik ki Manm Central Bank ki  mon santi i devret reponn e par la swit nou a kontinyen avek Committee as a whole pou lot Minis ki pe vini oubyen kestyon i zis pou Minis.  Se sa ki mon ti pe dir.  Onorab De Commarmond.

 

 

HON CHARLES DE COMMARMOND

Mr Speaker mersi ou’n dir en bout la ki mon ti pe al dir poudir i annan presedans lo la, apre mon anvi fer sorti klerman mwan mon pa pe demande pou mon al dan Staz Komite mon kestyon, mwan mon’n vin demann mon kestyon.  Zot ki pe deside pou al dan Staz Komite.  Mwan si zot le i ok si zot pa le i ok pour mwan.  Mersi.

 

MR SPEAKER

Ok mon krwar ki ou oule demann ou kestyon premye Onorab De Commarmond?  Wi?

 

HON CHARLES DE COMMARMOND

Si ou le, ou ki…

 

MR SPEAKER

Pardon?

 

HON WAVEL RAMKALAWAN

Non mon pe dir pa li ki premye lo Order Paper.

 

MR SPEAKER

Sorry.  Les mon a regard mon Order Paper

 

HON WAVEL RAMKALAWAN

Zis pou atir ou latansyon Mr Speaker se zisteman apre sa leksperyans STC ki nou ti sant ki i neseser  pou adres zis Minis pou kas sa presedans.  Mersi.

 

MR SPEAKER.

Ok.  Ok. Alright.  Bon les nou a dan sa ka nou a konmans avek Order Paper ki Mr Mondon, Kestyon nimero 1, Mr Mondon in demande.  Nou a deside taler kot nou pou ale dan Staz Komite oubyen non me  la pou le moman nou gard Committeee on the Whole.  Ek sa nou a demann Onorab Mondon pou depoz  ou kestyon.

 

HON TERENCE MONDON

Mersi Mr Speaker.  Bonzour tou  bann koleg…Bonzour Minis avek ou lekip e tou dimoun ki pe ekout nou.   Mon  kestyon pe demann Minis responsab pour SBFA ki pou arive avek sa group dimoun ki’n fini ganny zot let ki zot loan in aprouve, me ki ankor pe      espere ziska prezan?  Mr Speaker mon oule osi met ou latansyon kestyon ki ti ganny submit an Oktob lannen pase e i pa mank bokou letan pou vin 1an apre mon zis mazinen ki nou kestyon i ankor relevan ziska  prezan.  Mersi.

 

MR SPEAKER

Minis.

 

MINISTER PETER LAROSE

Mersi Mr Speaker. Bonzour Mr Speaker.  Bonzour Leader Lopozisyon Onorab Ramkalawan.  Bonzour Leader of Government Business Onorab De Commarmond, bonzour tou bann Manm Onorab isi e tou dimoun ki pe ekout nou partou kot zot ete Sesel ou sinon an deor Sesel.  Mr Speaker mersi bokou pour ou konpliman ki ou’n felisit mwan pou sa lapwentman e mon krwar i mon devwar se ki pou kontinyelman fer monte paviyon Sesel.

An se ki konsern kestyon Onorab Mondon, mersi bokou Onorab konsernan ou kestyon lo sityasyon Small Business Financing Agency, ki’n aprouv loan zot kliyan e zot pe esper larzan.  Onorab Mondon sa en tre bon kestyon.  Mon pa pou fer okenn leskiz ou sinon fer fo deklarasyon isi.  Mon repons a ler aktyel se ki SBFA napa ase larzan pou onor tou zot komitman ki zot in fer.  Parey CEO SBFA in dir, ti anonse dan Lasanble Nasyonal  boner sa lannen ler i ti pe prezant son Bidze ki SBFA pe ekspekte fini clear backlog ver mwan Zen 2017.  La nou mwan Zen la.  Pou lenstan preski tou keksoz pe al dapre SBFA ki zot ti’n prevwar.  Nou’n ganny  lasirans par management ki lamazorite kliyan ki ti’n ganny en premye bout loan zot in fini ganny tou zot larzan ziska aktyel.  Bann ki ti’n ganny zot let aprouvasyon  me pa ti ankor ganny zot loan ti annan ki’n ganny en parti zot loan, e la i annan osi ki’n ganny en premye bout zot loan  oubyen zot dan prose pou ganny tou zot larzan.

Mr Speaker SBFA pe travay lo dernyen batch file pou finaliz bann prosedir neseser pou disburse sa bann loan.  Sa prosedir administrative i ekspekte konplete ver milye Zilyet si tou lenformasyon e dokiman i annord.  Petet Onorab ou a demann mwan, eski ou ti okouran sa sityasyon?  Mon repons pou sa kestyon ki mon’n demann mon lekor.  Wi.  Ki Minister Finans pe fer pou regle sa problenm ? Mon repons ankor mon reponn mon lekor.  Mon konsernen avek en tel sityasyon akoz i pa donn en bon limaz sa Lenstitisyon.  Mon pe deza diskit avek management sa Lazans pou vwar konbyen larzan zot bezwen pou pey tou zot loan ki zot aprouve ziska maintenant.  Zot pou bezwen osi donn Minister Finans en Plan Biznes pou eksplike ki mannyer zot pou kontinyen fer fonksyonnen sa lenstitisyon ki nou  pa pou tonm ankor dan en menm sityasyon a lavenir.  En nouvo Board pou ganny apwente pou fer sir ki sa Lazans i fonksyonn dapre son manda.  Mersi Mr Speaker.

 

MR SPEAKER

Onorab Mondon.

 

HON TERENCE MONDON

Mersi Mr Speaker.  Si Minis i kapab donn nou en montan apepre konbyen larzan ki SBFA i bezwen pou kapab satisfer demann?  Mon ti ava apresye. Mersi. 

 

MINISTER PETER LAROSE

Mersi bokou Mr Speaker.  Mersi Onorab.  Dapre nou kalkilasyon i annan apepre R11milyon.  Mersi.

 

MR SPEAKER

Onorab Ferrari.

 

HON JEAN-FRANCOIS FERRARI

Mersi Mr Speaker e bonzour Minis, bonzour tou dimoun.  Mon ti a kontan demann Minis pou lo kote accounting sa bann larzan eski bann vot ki’n ganny fer pou SBFA pou 2017 se sa larzan ki pe ganny servi pou klersi bann backlog 2016? Just from an accounting point of view eski  and eski sa i vedir ki napa New Approvals pou 2017 ? Donk zefor i zis lo clearing the backlogs? E  eski se larzan 2017 ki pe servi pou clear 2016?  Mersi Mr Speaker.

 

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Tre bon kestyon Onorab Ferrari.  Koman ou konnen sa lakonpannyen, sa Lazans si ou le i en growing concern.  Se savedir en serten moman i zis pa arete unless si i pe fermen ou konpran?  Natirelman i annan si ou le bann det ki kontinyelman peye fir e an mezir ki ganny nouvo larzan. E dapre nou, dapre nou Bidze ki nou’n gannyen pou 2017 se 25 milyon me konman ou konnen parfwa ler ou fer en serten provizyon pou demann pou loan a se zour se larzan i kont en kantite. E natirelman i annan en gran, gran demann pou loan e sirtou pou bann pti loan.  Mersi.

 

MR SPEAKER

Onorab Churchill Gill.

 

HON CHURCHILL GILL

Mersi Mr Speaker.  Mon kestyon i apepre dan menm laliny me selman i pou 2016.  Pou letan sa bann backlog  i relye ek 2016, prezan an 2016 ti annan bann dimoun ki ti’n fer laplikasyon ki zot, zot laplikasyon pa ankor ganny touse.  Menm si nou la 2017.  Eski Minis i kapab donn nou en nide ki pou arive avek sa bann dimoun ki’n fer laplikasyon?  Konbyen letan zot pou bezwen espere avan ler zot laplikasyon i ganny deal avek ?  Mersi.

 

MR SPEAKER

Minis.

 

MINISTER PETER LAROSE

Mr Speaker avek ou permisyon mon a demann Onorab pou repet son kestyon akoz mon ti pe ganny en briefing lo la silvouple.

 

MR SPEAKER

Onorab Gill.

 

HON CHURCHILL GILL

E en pe, pe ganny servi pou clear bann backlog 2016.  An 2016 nou annan bann laplikasyon ki pa ti ankor ganny touse, pou aprouve; prezan mon pe demande be konbyen sa bann dimoun ki’n fer laplikasyon an 2016 ki zot file pa ankor ganny touse pou bezwen espere  pou zot file ganny travay lo la ?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Gill.  Pour lenstan mon pa konnen ki kantite  file pa ankor travay lo la.  Parey konman mon’n dir lo mon opening remarks, repons se ki ladministrasyon pe travay lo bann back log e natirelman mon kapab ganny en sif e mon ava donn sa Lasanble pli tar me lentansyon se pou klersi tou sa bann loan ki relman nou’n anvoy let, ki’n fer komitman.  Ler ou fer komitman la ou bezwen desarze e i pa  donn en bon limaz, mon’n dir i pa donn en bon limaz pour sa lenstitisyon e mwan mon pa dakor avek sa natirelman.  E mon pe demann pa zis ki nou pe regard 2017 a lavenir se  sa ki mon pe demann li en Business Plan pou mon regard lavenir ki sa dan 2an dan 3an ou  5an.  Mersi.

 

MR SPEAKER

Onorab Valmont.

 

HON JUDE VALMONT

Mersi Mr Speaker e bonzour.  Bonzour Minis ek ou  lekip.  Bonzour tou koleg MNA.  Minis dan menm laliny ek kestyon Onorab Gill anvi sa sityasyon avek SBFA mon ti a voudre  demann Minis si pou le moman SBFA pe pran nouvo laplikasyon?  Mersi.

 

MINISTER PETER LAROSE

Mersi bokou Mr Speaker.  Mersi bokou Onorab Valmont.  Non parski si nou pe kontinyelman pran sa ki nou met sa bann keksoz anba kontrol, natirelman nou pou reste toultan an dezord.  Nou bezwen a en serten moman met en stop ziskan ler nou regle sa sityasyon finansyer epi nou pou kontinyelman operate.  Mersi.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker. Bonzour Mr Speaker.  Bonzour Minis ek ou delegasyon.  Bonzour tou dimoun, Manm Onorab e tou dimoun ki  a lekout.   Mr Speaker eski Minis i kapab enform nou Lasanble lefe ki nou pa ankor al dan mid-year  review eski dan mid-year review SBFA pe met en provizyon pou ganny en nouvo sonm larzan pou zisteman asiste pli byen  sa bann back log e bann nouvo ka dan laliny kestyon ki’n fek ganny demande avan e ki sa lannen napa nouvo ka ki zot pe pran, nouvo laplikasyon.  So eski i annan en bout larzan ki zot pe demande dan mid-year review pou kapab asiste  bann dimoun ki bezwen sa loan, vreman, vreman enportan pou zot.  Mersi.

 

MR SPEAKER

Mersi bokou Mr Speaker.  Mersi bokou Onorab De Commarmond.  Natirelman konman nou pe apros mid-year nou a pe  met lanfaz ki SBFA i donn nou  egzakteman en prozeksyon, konbyen larzan i bezwen, si i annan larzan adisyonnel natirelman nou  ava, avek permisyon Lasanble nou ava prezant le ka pou zot Lasanble konsidere.  Mersi.

 

MR SPEAKER

Onorab Afif.

 

HON AHMED AFIF

Mersi Mr Speaker.  Bonzour Minis ek ou delegasyon.  Mr Speaker mon ti a kontan demann Minis dan bann loan ki SBFA in deza donnen, ki poursantaz ladan pe re pey dapre zot schedule?  Eski i 25 poursan, 10 poursan ? E si i pa pe  re pey dapre schedule eski se pa sa ki pe koz difikilte finansyel?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Afif.  Mon krwar sa i en tre bon kestyon.  Le bi kot ou vwar sa Lazans in tonm dan sa sityasyon finansyel, difikilte i vedir dimoun pa pe re pey zot loan dapre lagreman e kot i konsern repeyman poursantaz pa ankor kapab re peye, mon pou napa sa sif la fransman pou donn ou e sa mon ava rode pou fer sir ki mon donn Lasanble.  Me koman  nou konnen poudir i pa zis SBFA sa i annan bokou Lenstitisyon finansyel kot dimoun i pret larzan pa re peye.  E natirelman mon pa surprised si SBFA pe pas atraver sa difikilte pou lenstan.

 

MR SPEAKER

Onorab Ramkalawan.

 

HON WAVEL RAMKALAWAN

Mersi  bokou.  Mr Speaker. Mr Speaker premyerman  mon ti a kontan demann Minis vi ki i kapab dir ki sa i en keksoz ki in erite, akoz ki i ti la avan ki i ti vin Minis.  Eski Minis pe fer tou bann prosedir pou asire ki letan en dimoun i pran en loan, i annan en garanti, i annan tou bann prosedir normal pou anpese ki sa SBFA i vin zis en fon politik kot en Minis i telefonnen  i dir donn tel dimoun, lot i telefonnen i dir  donn tel dimoun e finalman ou end up dan sa sityasyon kot ou ete.  Dezyenmman vi ki bann lezot Lenstitisyon zot fer en fason pou zot kapab, pou zot kapab rekiper zot larzan.  Eski Minis is satisfe ki poudir an se moman i annan bann mekanizm efektiv pou zot  kapab swiv bann dimoun oubyen eski ankor enn fwa nou dan e sityasyon kot sa bann larzan se bann larzan ki’n fini perdi sa e lepe Seselwa in zis peye me zanmen pou ganny rekipere pou rezon pirman politik.  Mersi bokou.

 

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Ramkalawan.  Ankor enn fwa en tre bon kestyon. Mon krwar ki nenport ki Lenstitisyon finansyel se i pa zis donn larzan an bonnavini.  Natirelman i bezwen annan enserten sekirite e sekirite i kapab  i annan Bonds i kapab petet osi propriyete ensidswit.  Me kot i konsern prosedir sa mon pou bezwen regard ladan e parey mwan mon’n dir se ki nou bezwen reorganiz sa SBFA, met en nouvo Board kot sa bann prosedir a sivre.  Mwan konman Minis mon pa tolere larzan lepe ganny donnen an bonnavini i pa kapab ganny re kouver parske a lafen di zour mon pou vwar mwan pe reponn  kestyon ki petet keksoz ki’n traverse dan lepase alor mon krwar mon pou bezwen met en serten disiplin, en latansyon lo sa SBFA, non pa zis SBFA me petet osi, Development Bank e lezot Lenstitisyon Gouvernmantal.  Mersi bokou Onorab.

 

MR SPEAKER

Onorab Ferrari ou kestyon i lo …

 

HON JEAN-FRANCOIS FERRARI

Mersi pou donn mwan la parol Mr Speaker.  Mr Speaker pou nou ed Minis e Minister Finans mon ti a demann Minis si i pa krwar i devret pran sa lokazyon pou li dir avek piblik si apard Welfare Agency si i annan okenn lot Departman, okenn Lazans dan Gouvernman ki donn larzan pou nanryen?  Konmsi fodre piblik i konnen akoz piblik i mazinen i dir, ’’be sa CC member ki’n pase ki’n dir mwan ki’n donn mwan mon 25 mil mon pa peye.  Sa larzan Kanpanny sa.  Eski apard Welfare Agency ki ed bann dimoun  ler zot napa zot dan problenm, eski i annan okenn Lazans Gouvernman ki fer kado larzan?  Sa i mon kestyon.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Ferrari.  An tout fransizman mon pa tro konnen sa sityasyon donn larzan an bonnavini.  E mon reelman pa konnen – be la ou tir mon latansyon e petet kekfwa si ou ete fran sey mansyonn mwan alor mon a  pran not e mon a bezwen  regard ladan toudswit konman  mon sorti dan sa Lasanble. E vwala mon repons kestyon.  Mersi.

 

MR SPEAKER

Onorab Ferrari ou napa okenn sizesyon ki i pou al investigate non?  Ou napa okenn sizesyon pou Minis investigate?

 

HON JEAN-FRANCOIS FERRARI

Non, non sertennman Mr Speaker.  Nou ava koz en pti kou an deor.  Mersi.

 

MR SPEAKER

Onorab Simon Gill.

 

HON SIMON GILL

Mersi bokou Mr Speaker.  Bonzour Mr Speaker.  Bonzour Minis ek ou delegasyon. Bonzour tou koleg Onorab e  manm piblik.  Mr Speaker pou de rezon ekonomik me non pa politik, pou de rezon pou donn posibilite bann zenn dimoun pou zot devlop kapasite lantreprenarya e kree en biznes e vin endepandan.  Mon pe demann Minis ki bann laranzman, bann demars ki pe ganny fer pour ki nou donn kapasite neseser pou sa bann dimoun ki’n pran en pti loan avek SBFA pour ki zot kapab vreman ranport  sikse dan  sa biznes ki zot in pran ; oubyen dans a aktivite ki zot in trouv nesesite pou rod lasistans finansyel avek SBFA?  Sa i mon premye kestyon.

Dezyenm kestyon eski Minis i ava konsidere dan limedya pou donn lenstriksyon neseser pou fer en lenvestigasyon, konbyen bann dimoun ki’n pret larzan avek SBFA me ki trouv zot dan difikilte par lefe ki zot biznes pa pe kapab marse  pour de rezon reel, pa bann rezon ki zot in evante avek bi zisteman pou kapab fer zot rekipere e kapab fer zot biznes  marse e a fen kont servi zot lobligasyon oubyen deservi zot lobligasyon re pey zot loan avek SBFA.  Sa i 2 kestyon Mr Speaker mon ti a voudre Minis i reponn avek bi pou ed nou Lasanble e pou ed manm piblik ki pe ekout nou la ozordi.  E mon annan ankor 2 kestyon si ou permet mwan apre mon  a kapab demann sa  lot 2 kestyon Mr Speaker.  Mersi bokou.

 

MR SPEAKER

Minis i annan sa 2 kestyon ki’n ganny poze.

 

MINISTER PETER LAROSE

Mersi bokou Mr Speaker.  Mersi bokou Onorab Gill. Kot i konsern si ou le pou ed en pe nou dimoun et pli okouran ki mannyer pou manage zot biznes, mon konnen ki Morel Institute in donn  serten training e in ed en pe bann zenn pou kapab konpran ki si sa en Financial statement malgre zot, zot annan zot lide  ki mannyer pou konsevwar zot  biznes e ki kalite biznes zot le fer.  Me mon ale en pe pli lwen Mr Speaker se ki parey mon ti dir dan mon Budget Speech 2017, se ki mon pe prevwar ki nou pou annan en advisory service under one- stop shop Financial Services Boutique e sa diskisyon i an progre.  Mon’n idantifye serten dimoun pou met sa an mars pou fer sir ki i annan sa advisory service ki ed dimoun ki pe fer fas avek difikilte finansyer pou fer sir ki zot re pey larzan ki belong to the Public Fund.  Sa i mon repons kestyon Onorab Gill.  Mersi bokou Mr Speaker.

 

 

MR SPEAKER

Onorab Herminie.

 

HON WILBERT HERMINIE

Mersi Mr Speaker.  Bonzour Mr Speaker.  Bonzour Minis ek ou delegasyon.  Mon kestyon i lo sirtou bann dimoun ki’n deza ganny zot premye porsyon.  Mon kestyon se ki dele letan ki akseptab ouswa ki norm pou zot espere ler  zot in request zot 2enm instalment? Mersi.

 

MR SPEAKER

Minis.

 

MINISTER PETER LAROSE

Mersi Onorab Herminie pour ou kestyon.  Anvi ki ou pe demann mwan en pe keksoz an teori parski la pratik i kapab telman diferan.  E normalman se ki mwan mon ti a kapab krwar lide ideal si ou’n donn li e premye porsyon larzan i pa ou cash flow.  Petet son lot semenn apre ouswa lot mwan apre i ganny la diferans ankor  enn fwa i depan anler lo cash flow me sa i tou depan larzan ki available e sa i diskresyon management parski si natirelman ou pe fer bokou plis commitment ki ou annan ase larzan la ki ou tonm dan en difikilte finansyel.  E ler i pou montre ki ou iresponsab.  Vwala ou kestyon.  Mersi.

 

MR SPEAKER

Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker sa ki mon paret kontroversyel eski bann kestyon ki, i paret bann kestyon ki Lopozisyon pe demande ki nou ferm SBFA e la alor dimoun i ava al kot labank e la zot ava pas atraver en bann difikilte pou zot ganny en loan avek labank pou zot fer zot fer zot biznes.  Zis mon ti a kontan demann Minis Mr Speaker eski atraver letan ki SBFA in an egzistans, konbyen dimoun ki’n ganny loan atraver sa lorganizasyon?  Konbyen ki’n nobou konmans zot biznes?  Konbyen ki’n nobou kapab ganny loan zis avek SBFA akoz labank i demann zot, ti pe demann zot garanti, sekirite, e personal contribution?  Si ou ti a kapab klarifye sa pou mwan Minis mon ti ava annan en pti siplemanter avek ou permisyon Mr Speaker mon ti a kontan demann en siplemanter apre.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab.  Mon ti a kontan annan tou bann sif devan mwan pou reelman donn ou ki kantite dimoun in benefisye avek SBFA be dapre mannyer mon konpran i annan en bon pe dimoun in benefisye.   Mon pa kapab donn ou sif egzakt, e kot sif i konsernen mon bezwen annan en serten accuracy e sa lenformasyon mon kapab donn Lasanble pli tar.  Mersi.

 

 

MR SPEAKER

Ou annan en kestyon siplemanter?  Wi Onorab.

 

HON SEBASTIEN PILLAY

Mersi Mr Speaker.  Mr Speaker zis en pti komanter an pasan se sanmenm sa se ou sazes bomaten ki ou’n propoze ki nou al dan Committee Stage kan i annan bann zofisye kot nou kapab fer fini travay en zour kan i annan bann zofisye.  Me mon ti a kontan zis dir Mr Speaker.  An vi ki i annan sa kantite dimoun ki’n benefisye avek SBFA eski i lentansyon Gouvernman pou kontinyen avek rol ki SBFA pe zwe? E kontinyen ankouraz bann dimoun ki bezwen bann loan pou konmans zot biznes pou al ver SBFA tout an metan an plas bann sa ki nou dir an angle, bann safe guards,  oubyen bann kriter ki ava kontrol, pa kontrole me ki ava ede pour ki sa bann dimoun letan zot vin rod sa loan ler zot fini ganny sa loan i ava annan en swivi ki a permet zot devlop zot biznes en pe pli byen.  Mersi Mr Speaker.

 

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab pou ou Kestyon Siplemanter.  Nou sa Lazans i Small business Financing Agency.  Natirelman si nou kapab striktir  nou lekonomi, napa telman bann gran, gran corporate e nou lekonomi i fonksyonn bokou anler lo bann pti biznes. E natirelman mon krwar Gouvernman pou bezwen ankouraz zot sa bann pti biznes ki dan en serten fason zot ava osi ede dan lekonomi pei e sa i nou bi pou lavenir.  Nou pa kapab ferm SBFA unless i annan en serten desizyon otherwise ki dir.  Me tout sord fason kote sa bann dimoun pou al rod en finansman?  Kekfwa nou a bezwen re organiz Development Bank.  Nou bezwen vwar en fason pou nou asiste sa bann dimoun.  Sa i enportan.  Nou pa kapab konmans keksoz epi nou kit dan semen konman i annan difikilte.  Si i annan en problenm prosedir administratif kontabilite  nou bezwen regard ladan pou fer li marse.  Napa nanryen ki enposib.  Mersi.

 

 

MR SPEAKER

Petet avan nou pran kestyon Onorab Hoareau, Minis mon pa konnen si CEO SBFA in donn ou serten lenformasyon pou ou kapab reponn Onorab Pillay avan ?  Wi.

 

MINISTER PETER LAROSE

Mr Speaker mon fek ganny lenformasyon la depi 2012 ziska 2016 i annan 2473 kliyan ki’n benefisye.  2473 kliyan ki’n benefisye, mersi.

 

MR SPEAKER

Mersi Minis. Onorab John Hoareau.

 

HON JOHN HOAREAU

Mersi Mr Speaker.  Bonzour Mr Speaker.  Bonzour Minis.

 

 

MR SPEAKER

Onorab Hoareau esper en pti moman.  Mr De Commarmond ou annan en point of order?  Onorab…

 

HON CHARLES DE COMMARMOND

Mr Speaker wi zis mon pe sizere ki bann dimoun  Central Bank i la.   I ti kapab avans isi e madanm Alcindor i kapab vin o-bor…

 

 

MR SPEAKER

CEO SBFA i vin la.  Napa problenm petet i a fasilit keksoz.  Mr Edmond ou pa pou mind sanz plas avek Madam Rosanda Alcindor? I a fasilit keksoz pour tou dimoun.  Mersi pou ou sizesyon LGB.  Pou bann ki pa ti konnen vwala madanm Alcindor, madanm Rosanda Alcindor i CEO SBFA ok.  E prezan nou ava al kot Onorab Hoareau. Ou kestyon Onorab Hoareau.

 

 

HON JOHN HOAREAU

Mersi Mr Speaker.  Bonzour Mr Speaker.  Bonzour Minis ek ou delegasyon.  Bonzour tou Manm piblik.  Bonzour tou Manm Onorab.  Mr Speaker si mon memwar i servi mon byen dan letan Bidze ti annan en komitman ki pou annan en Lasirans zisteman, en Scheme Lasirans ki pou kapab mitigate en pe pou bann dimoun ki pran bann loan, bann pti business loan koumsa e anfen in kont zot in remarke ki zot biznes pa kapab ganny sustainSo mon pe demann ek Minis pou donn en pti kont randi lo si sa  Scheme i an mars oubyen si i pa ankor met an mars, oubyen si i pou met an mars pli tar?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Hoareau pou ou kestyon.  An se ki  konsern sa Scheme ankor pe still diskite avek bann lakonpannyen Lasirans.  Natirelman ler ou fer diskisyon pou fer met nouvo prodwi ki reelman pou deal avek sa bann zafer business sirtou bann business failure insurance, ki sa i telman tre enportan e i annan en serten diskisyon epi petet i annan bann trade-off ki zot, zot oule natirelman pou zot kapab met sa bann prodwi anler lo market pou fer sir ki sa bann kliyan i benefisye be sa i ankor an diskisyon, i an progre be osito ki  nou’n pare nou ava fer Lasanble konnen.  E natirelman pa zis Lasanble nou a fer dizon medya konnen kot tou dimoun ava okouran kote ki nou’n arive, ki progre ki nou’n fer.  Mersi.

MR SPEAKER

Onorab Ernesta.

 

HON PAUL ERNESTA

Bonzour Mr Speaker.  Bonzour Minis ek ou lekip, bann koleg e tou dimoun a lekout.  Mr Speaker mon kestyon pour Minis i konm swivan.  Eski Minis i kapab eksplik sa Lasanble ki kriter ki ganny servi pou aprouv bann loan ki bann aplikan i ganny fer?  Mersi.

 

MINISTER PETER LAROSE

Mersi bokou Mr Speaker.  Mersi bokou  Onorab Ernesta.  SBFA i fonksyonn en pe parey si ou le en corporative bank.  E natirelman i pa kapab zis donn larzan an bonnavini en dimoun i vini  ek en papye e i dir i ganny rekomande par en Minis ou sinon par en lot dimoun pou donn larzan an bonnavini, non.  I bezwen sivre en prosedir.  I bezwen en pti business plan pa telman konpreansiv olye eksplik nou obzektif son biznes ki i sipoze fer, konbyen larzan i pe rode, ki son kapasite pou re peye sa se lakle sa.  Dimoun pa kapab zis pret larzan epi i napa kapasite i dir ar be mon’n pret larzan la mon pa kapab re peye.  Natirelman sa se bann  kriter ki SBFA i sivre si i annan  en posibilite pou fer en site vizit parey en labank osi i fer, i bezwen ale al regarde si sa biznes i an  egzistan.  Vwala se bann kriter basic parske nou pa kapab konplik lavi Seselwa.  Mersi.

 

MR SPEAKER

Onorab Ernesta ou annan en… ?

 

HON PAUL ERNESTA

Yes Mr Speaker.  Mersi.  Zis an pasan taler Onorab Ferrari in fer komanter ki dir i annan bann CC, bann, bann lenfliyans ki ganny fer letan pou donn bann loan.  Eski dan sa laliny mon pa konnen si Minis i kapab konfirm sa otherwise, eski i annan en panel ki on Board letan sa bann desizyon i ganny fer, si i annan CC an deor ki vini ki lo  sa panel?  Mersi.

 

MINISTER PETER LAROSE

Mersi bokou Mr Speaker.  Mersi bokou Onorab Ernesta.  Mon konpran i annan en loans Committee ki operate me mon pa konnen si i annan CC anler lo la.  Mersi.

 

MR SPEAKER

Mersi.  Ou annan en kestyon relye avek sa Mr Gill?

 

HON SIMON GILL

Wi. Wi.

 

MR SPEAKER

Ok, enn apre nou annan en dernyen kestyon kot Onorab Aglae.

 

HON SIMON GILL

Mr Speaker dan laliny bann loan ki’n ganny aprouv in ganny endorse par sa Komite ki diskite e vwar kredibilite bann demann mon trouv i annan en sif ki nou’n gannyen la 2473.  Mon krwar nou bezwen annan bann success stories pou rakont sa Lasanble e si Minis ti a voudre rakont bann success stories ki i pa tro 2473 ki en total failure malgre i annan bann difikilte reel ki’n ganny dir.  Probableman mon  krwar i enportan ki nou koz osi lo son success stories ki i annan ; akoz mon krwar dan sa 2473 i annan enn kantite sa bann pti antreprener ki pe fer ekstrememan byen me i annan osi byensir ki annan bann difikilte reel ki bann  economist parey Onorab Afif i konnen ki bann difikilte reel ki bann pti lantreprenarya i kapab fer fas avek.  Mersi.

 

 

MR SPEAKER

Kestyon in poze…Minis.

 

MINISTER PETER LAROSE

Mersi bokou Mr Speaker.  Mersi bokou Onorab Gill.  An vi ou entervansyon, ou menm ou ou dir i annan success stories.  Fransman dir ek ou mon pou bezwen fer en pe plis resers, donn an detay lekel,  dan ki Sekter sa bann pti biznes in fer success e sa mon krwar se en keksoz nou kapab disclose avek Lasanble. Me pour lenstan mon reelman annan zis sa sif an term data me i bezwen drive success stories somewhere ; tousala pa kapab business failure.  Mersi.

 

MR SPEAKER

Dernyen kestyon siplemanter Onorab Aglae.

 

HON EGBERT AGLAE

Mersi Minis ek ou lekip e tou dimoun a lekout.  Minis par lefe ki bokou dimoun ki oule komans son pti biznes i al kot SBFA se akoz i annan en lentere ki favorab ki ba e mon kestyon i vin dan sa laliny se ki dan loperasyon SBFA ou’n dir ki i pou annan R11milyon e SBFA tou-le-z-an i bezwen en Bidze atraver gouvernman pou siplemant li kapab fer son aktivite.  Eski dan son loperasyon osi i pa kapab  konsider osi en pe parey sa model ki HFC i adopte kot i al negosye ek bann labank li osi pou ganny en lentere ki ba pou kapab enzekte dan son Bidze li osi pou kapab donn loan son dimoun.  Mon pe dir sa petet akoz i a redwir en pe presyon lo Bidze Gouvernman an menm tan responsabiliz en pe  nou bann dimoun ek bann labank osi pou kapab asiste nou bann pti biznesmenn.  Mersi.

 

MR SPEAKER

Minis.

 

MINISTER PETER LAROSE

Mr Speaker mersi bokou e Onorab Aglae, mersi.  Si ou pa mind repet ou kestyon akoz mon sorry mon pa’n tro konpran.

 

HON EGBERT AGLAE

Minis mon kestyon parey HFC son loperasyon se ki i pret larzan avek bann labank, i negosye a en to lentere pli ba.  Eski SBFA li dan plas tou le z-an i bezwen depan lo Bidze Gouvernman i pa kapab li osi pran menm lapros en model en pe parey pou kapab ganny Kapital pou li kapab kontinyen donn loan son bann dimoun.  Mersi.

 

MINISTER PETER LAROSE

Mersi bokou Mr Speaker.  Mersi bokou Onorab Aglae.  La ou kestyon i telman pli kler la.  Mon apologise si mon’n fer ou repete.  Me natirelman i tou depan lo management  SBFA ansanm avek Gouvernman parski labank osi i pa pou dir ok akoz ou, ou SBFA pti biznes mon pou pret ou.  I annan serten kondisyon e si ou regarde labank Komersyal i met bokou kondisyon konmela sirtou ler i pret bann Lazans Gouvernmantal e petet osi i pa donn ou gras an bonnavini.  Mersi.

 

MR SPEAKER

Bon mersi Minis.  Nou al lo 2enm kestyon lo Order Paper e mon a demann Onorab Terence Mondon  pou poz son kestyon.

 

 

HON TERENCE MONDON

Mersi Mr Speaker.  Mon kestyon pou demann Minis responsab pou finans ki son Minister pe fer pou adres sa sityasyon kot en dimoun i vwar li pe fer en ta depans avan menm ki son loan i aprouve avek labank ? E si son Minister i anvizaze vin avek bann prosedir pli senp e ki pa koup otan ler en dimoun i fer en laplikasyon labank.  Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi  bokou Onorab Mondon.  Ankor enn fwa ou’n lev en tre  bon kestyon ki konsern prosedir labank vizavi bann kliyan an se ki konsern loan.  Mon dakor ki bann labank se ki zot pou bezwen fer zot en credit assessment evaluation ki zot regard tou zot kliyan.  Sa i toutafe normal.  E an se ki konsern pratik normal ki swa par en labank lokal ou enternasyonal natirelman sa credit evaluation bezwen ganny fer.  Me kot i konsern labank  lokal Onorab Mondon mon antyerman dakor avek ou ki letan se larzan e i koute.  Sirtou si sa kliyan pe fer an avans an respektan son loan.  Plis ki sa en prosedir birokrasi i kree fristrasyon enorm e a lafen di zour i kout bokou.  Nou Sesel konman en pti pei malgre nou bezwen swiv nonm enternasyonal nou kapab sivre en prosedir e fer lavi nou kliyan mwen difisil.  Mon bezwen fer en progranm, nou bezwen fer en progranm ledikasyon lo servis banker pou benefisye tou Seselwa e etranze osi  ki travay isi dan nou pei.  Apre tou se la fason ki labank i kominik avek son kliyan, ki enportan.  Mr Speaker pou tou bann envite ki ti partisip dan Seychelles Finances Industry Day Vandredi pase 9 er bomaten avek en tenm Shaping The Future organize par Seychelles Investment Board, mon ti  met lanfaz ki si nou pei pou le fer plis progre ekonomik nou Sekter Servis Finansyel i bezwen vin pli inovativ e pli efikas.  Nou napa swa.  Anvi  ki Labank Santral i regilater bann labank Komersyal Minister Finans i bezwen travay avek labank Santral  pou vwar en solisyon pou sa sityasyon.  Labank Santral an kolaborasyon avek Minister Finans in fer sorti en reglemantasyon ki gouvern tou bann fre e sarz banker e sa labank mon krwar pe met anler lo latansyon zot bann manm kliyan.  Mersi.

 

MR SPEAKER

Onorab Mondon.

 

HON TERENCE MONDON

Mersi  Mr Speaker.  An vi ki Minis in dir nou ki deza labank Santral pe fer serten travay eski i pe donn nou en garanti ki sa lannen menm nou kapab vwar en diferans dan lafason ki sistenm banker pe asiste bann aplikan?   Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab pour ou kestyon siplemanter.  Nou bezwen refer li o pli vit posib parske letan pa esper personn.  Se nou lekonomi  ki enportan e natirelman nou bezwen travay o pli vit posib e sa osi an kolaborasyon avek bann labank Komersyal.  Parey mon’n dir tou taler se en kestyon de kominikasyon e pou fer sir nou senplifye nou bann administrasyon ki nou fer sir sa bann loan i en pe pli fasil ki nou pa bezwen dir ek en dimoun be ale al rod tel, rod ou kart idantite, e in tournen, retourn ankor se li al rod en lot petet sertifika, rod en petet en clearance parla.  Finalman nou a pe zis vreman retard progre lekonomi e sa bann labank i annan en responsabilite telman enportan pou zwe pou fer sir ki  nou lekonomi i vin pli efikas e nou kapab annan sa economic zone parey nou dir tou lazournen dan nou term economist.  Mersi.

 

MR SPEAKER

Mersi Minis.  Vi ki napa okenn  lezot kestyon siplemanter pou kestyon nimero 2 nou ava al direkteman lo Order  Paper nimero 3 e mon ava demann Onorab John Hoareau pou poz ou kestyon.

 

 

HON JOHN HOAREAU

Mersi Mr Speaker.  Mr Speaker mon kestyon pou Minis Larose se eski Minis pour Finans i kapab dir sa Lasanble ki pe arive lo plan Gouvernman pou aste bann flat Société du Logement Pascal Village?  Mersi

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab pour ou kestyon.  Minister pou later ti resevwar en let sorti kot Chairman Société du Logement limited le 17 Novanm 2014.  Sa let ti pe demande si Gouvernman i enterese lezot propriyete avek bann referans konm swivan :- Parcel V8708 en Blok Flat 5 apartman ki avek 3 lasanm.  En lot parcel number se V8709 avek en Blok 5 apartman avek 3 lasanm.  V8710, 5 apartman li osi.  V8711 li 4 apartman e V8712 i 5 apartman li osi.  Apre  assessment ki Gouvernman ti komans negosyasyon pou aste sa bann  propriyete an Avril 2015, ti annan en miting ant reprezantan Société du Logement Limited le 27 Avril 2015 e Gouvernman ti prezant sa Companie avek en counter  offer.  Le 4 Septanm 2015 tou lede parti ti tonm dakor lo en Lagreman ki Gouvernman i kapab aste tou sa bann propriyete ki mon’n mansyonnen pou en sonm R7milyon 800mil.  Dapre Lagreman avek Société Limited sa sonm R7milyon 800mil pou ganny peye dan en peryod 3 an depi Zanvye 2016 ziska Zilyet 2018 en sonm R1milyon 300mil avek 5 poursan lentere.  Dokiman pou transfer sa propriyete in sinyen e anrezistre depi le 12 desanm 2016. Propriyete  parcel V8713 e V3078 ti annan en  semen ki ti servi Pascal Village.  Société du Logement Limited in donn sa semen Gouvernman gratwit sa okenn konpromi avek sa tranzaksyon lavant propriyete.  Mersi.

 

MR SPEAKER

Onorab Hoareau.

 

HON JOHN HOAREAU

Mersi Mr Speaker zis en pti kestyon siplemanter.  An vi ki ti napa okenn budget line ki ti  pe preskrir larzan pou fer sa tel keksoz, eski  Minis i kapab eklersi nou ki fason ki sa bann sours finansman pe ganny peye si i sorti kot Consolidated Fund oubyen si i sorti dan en loan oubyen  kek lezot keksoz?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Hoareau.  Dapre mannyer mon konpran  sa tranzaksyon ti travers dan Land Acquisition, ti deza annan en Bidze pour sa.  Mersi.

 

MR SPEAKER

Onorab Hoareau  ou ok ?  Ou napa kestyon siplemanter?  Dan sa ka nou ava al direkteman lo kestyon nimero 4 lo Order Paper e mon a demann Onorab Regina Esparon pou poz son kestyon.

 

HON REGINA ESPARON

Mersi Mr Speaker.  Bonzour tou dimoun.    Mon ti a kontan demann Minis pou Finanse eski Minis pour Finans i kapab dir sa Lasanble, konbyen larzan i ganny depanse dan Fon Children’s  Fund depi Zanvye 2015 ziska Desanm 2015        e  depi Zanvye 2016 ziska Septanm 2016, e dir nou pour ki rezon?

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Esparon pou ou kestyon an koneksyon avek depans dan fon Children’s Fund pou lannen 2015, 2016.  Pou lannen 2015 depans ki’n fer in ariv en total  4milyon,  822mil, R246 pou 6 kategori proze.  Sa sif i enkli bank charges e kou check book.  An lannen 2016 depans in ariv 4 milyon 199mil R436 osi pou 6 kategori proze.  Pour plis detay mon’n fer sirkile en spreadsheet e mon espere ki tou lezot Manm dan nou Lasanble in ganny en kopi.  Mr Speaker mon oule enform  Lasanble ki nou’n fek ganny kont odite Children’s Fund e nou’n fer laranzman bomaten pou prezant, pou soumet en kopi avek ou biro pou an retour soumet avek FPAC.  Mersi bokou Mr Speaker.

 

MR SPEAKER

Onorab Esparon.

 

HON REGINA ESPARON

Mersi Minis.  Mersi Mr Speaker.  Minis eski ou kapab dir nou ki prosedir ki an plas pou fer en laplikasyon pou ganny asiste dan sa fon  Children’s Fund?  Prosedir, dezyenmman ki kriter ki ganny servi pou ganny asiste dan sa Fon?  E donn detay sa Lasanble lo balans aktyel dan sa fon e konbyen zot pe ranmase par lannen?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab pour Kestyon Siplemanter.  Lannen 2016 nou ti annan en total 7milyon, 335mil, R688 e nou pe met en Board an plas  pou fer  sir ki tou bann reglemantasyon i ganny  sivre e natirelman nou ava fer en Press Release ou sinon nou ava fer en disclosure avek medya  ki tou dimoun ava okouran ki prosedir ou  bezwen ganny fer pou kapab ganny akse avek sa fon.  Mersi bokou Mr Speaker.

 

MR SPEAKER

Onorab Esparon.

 

HON REGINA ESPARON

Mersi Mr Speaker.  Minis ou pa’n dir mwan ki kriter ki ganny servi pou ganny asiste dan sa Fon.  Ou dir mwan zot pe etabli prosedir me son kriter?

 

MINISTER PETER LAROSE

Mersi bokou Mr Speaker.  Mersi bokou Onorab.  Se ki konsern kriter ou ava vwar mon krwar mon annan en kopi sa spreadsheet ki nou’n sirkile e nou a vwar kategori se natirelman bann  Lenstitisyon ki tonm anba responsabilite Children’s Welfare Educational Development, Community Development and Youth activities, Youth Welfare activities, Sports Development epi bann zanfan ki malad.  E vwala sa 6 kategori ziska maintenant ki larzan in ganny depanse e sa i form par sa bann kriter.  Mersi bokou.

 

MR SPEAKER

Onorab Esparon.

 

HON REGINA ESPARON

Eskiz mwan Mr Speaker.  Mersi Minis.  Mersi Mr Speaker.  Mr Speaker mon ti ava kontan Minis i eksplik nou kote sa bann dimoun i ale pou kapab fer sa bann laplikasyon akoz dimoun deor pa konnen.  Petet i annan dimoun ki dan bezwen, zanfan ki dan bezwen zot pa konnen ki prosedir.  Zot pa konnen kote ou ale pou fer laplikasyon.  Eski i al kot Welfare, i vin kot Minis Finans, i al kot Sosyal?  Eksplik nou en pti pe, donn nou en pti pe detay.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab.  Pour lenstan si sa bann dimoun i oule ganny akse ek sa fon i al kot biro Prezidan e tre byento nou pou met en Board an plas e sa bann dimoun i ava al kot sa Board e sa ava ganny enformen avek medya.  Vwala prosedir pour lenstan.  Mersi.

 

MR SPEAKER

Onorab Arrisol.

 

HON SANDY ARRISOL

Mr Speaker mersi.  Bonzour  Minis avek ou lekip.  Bonzour tou Manm e bonzour tou bann ki a lekout.  Mon ti a kontan demann Minis lo papye expenditure ki’n donn nou pou larzan Children’s Fund i annan 6enm, ‘’Assistance to sick, children’’, mon ti a kontan demann Minis si ou kapab dir ek nou an vi ki  lo rezon sosyal tou resaman ti annan en pe paran pe tap laport, e kriye pou rod en pe lasistans pou zot zanfan, menm lo televizyon nou’n vwar paran pe ganny serten donasyon si Minis ou ti kapab dir ek nou anba sa lasistans, anba sa fon konbyen zanfan ki’n ganny asiste la an relasyon avek bann maladi kronik ki zot annan,  si ou kapab dir ek nou konbyen zanfan in ganny asiste anba sa Fon?  Nou bann zanfan seselwa.  E dezyenmman mon ti a kontant demann Minis kote Children’s Fund i ganny son fon atraver larzan tax ki nou peye lo Seybrew ?  Donn nou silvouple bann sours kote zot ganny swa Fon pou Children’s Fund e konbyen i reste nou la depi Zen nou pe koze ziska Desanm konbyen i  reste nou dan sa Fon pou nou gannyen pou nou servi ziska Desanm ?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Arrisol pou ou kestyon.  E kot i konsern  bann zanfan ki malad i vre mwan osi mon ti vwar sa tel sityasyon se ki, selman mon senpatiz ek sa paran e natirelman kantite zanfan ki’n ganny asiste dan sa kategori 6 mon napa egzakteman nonm me mon kapab fer Lasanble gannyen.  Kot i konsern kote ki ganny son Fon, i sorti dan Bidze. E vwala se ki larepons.

 

MR SPEAKER

Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon ti a kontan demann Minis si i kapab mon mazinen pa la selman ler nou sorti dan sa Lasanble si i kapab donn  nou kote nou kapab  al  vwar bann detay pou sa sif  dan bann detailed accounts 3 pou lannen 2016 2milyon R891 mil ki ti ganny servi pou asistance pou for Community Development and youth activities.  Mon pe demann sa kestyon akoz sa i fer, i plis ki lanmwatye sa Bidze e leksperyans i montre ki ler nou dan en lannen eleksyon, larzan i ganny servi pou pas atraver pou al fer kanpanny dan distrik.  So si Minis i kapab, si i annan avek li i kapab donn nou sa breakdown sa 2milyon R891mil?  Sa i mon premye kestyon.  Mon dezyenm kestyon se eski Minister Finans ti a pran sa lokazyon  pou eksplik piblik lo sa R2 ki zot mete lo sak sopin labyer akoz mon krwar i vin plis ki, i vin plis ki R5milyon par an.  Sa R2 sa levy ki ou ti pou zanfan.  Me si Minister Finans per anmas en levy lo labyer Seybrew ki ganny prodwir isi, lo lasirans ki sa i al pou zanfan, me i paret mwan ki i pa pe ale pou zanfan i annan zis 5 milyon ki pe ale pou zanfan so kekfwa i lokazyon pou Minis oubyen Minister Finans dir nou egzakteman ki pozisyon lo sa larzan akoz mon krwar bann paran, e sa bann zanfan zot menm zot ti ava kontan konnen.  Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab  Ferrari.  An se konsern depans pou sa 2.8 milyon preski 2.9 milyon, kategori 3 mon ava demann Oditer Zeneral pou itemised expenditure  mon ava fer ou avek  Lasanble ganny sa. E kot i konsern sa zafer larzan R2 ki Seybrew i mete mon ava verifye sa e mon ava donn en kont avek FPAC ek Lasanble.  Mersi bokou Onorab pou ou pasyans.

 

MR SPEAKER

Mersi Minis.  Onorab Afif.

 

HON AHMED AFIF

Mersi Mr Speaker.  Mon ti a kontan demann Minis lo sa latab ki in montre nou lo bann depans 2015 e 2016 si i kapab dir nou si i annan okenn leksplikasyon premyerman akoz an 2015 pou lasistans pou bann lenstitisyon ki tonm anba responsabilite Children’s Welfare zot ti pey 1.6milyon apepre e son lannen answit i tonm preski net zis R81mil.  Pareyman pou lasistans pou

bann Lenstitisyon i sorti R1.1 milyon i tonm preski R300mil e dezyenmman si i kapab dir nou si  sa bann kont in ganny odite deza ?  Mersi.

 

MINISTER PETER LAROSE

Mersi bokou Mr Speaker.  Mersi bokou Onorab  Afif.  E kont mon’n fini anvoy kot FPAC, e avek plis detay ou ava kapab rod avek Oditer Zeneral.  Mersi bokou.

 

MR SPEAKER

Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker prenan kont lenformasyon ki nou’n gannyen lo sa latab mon leksperyans personnel dan mon distrik kot mon reste mon rapel poudir Children’s Fund ti osi ede pour konstrir en Day Care Centre.  Eski an relasyon avek sanzman sa Board ek kriter eski pou annan loriyantasyon pou bann proze kot parfwa i en pe difisil atraver bann laliny bidzeter ki deza egziste atraver bann Minister, eski sa pou still annan serten sipor ki bann kominote dan bann diferan distrik i kapab gannyen avek sa fon ki zisteman vize strikteman ver ed bann zanfan sirtou par lefe ki dan serten landrwa par egzanp mon konnen  dan leo North East Point, Glacis ki’n vin en kominote bokou pli larz.  Ozordi napa en Day Care Center, bann dimoun ti a kontan ki pe fer sa Childminding kot zot ti a kontan ganny serten lasistans me i pe difisil bezwen al kot labank, bann konplikasyon.  Eski sa i bann keksoz ki kapab vin pli proactif pou zot regarde olye esper sa bann dimoun vin kot zot ?  Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Pillay.  An se ki konsern bann progranm pou zanfan nou kapab revwar sa.  Fer sir ki nou annan en Headline ki dir, ‘’Nou Zanfan, Nou Trezor, Nou lavenir.’’  E mon pa kapab abandonn zot.  E byensir natirelman mon pou fer sir ki zot ganny lasistans.  Mersi.

 

MR SPEAKER

Onorab Ramkalawan.

 

HON WAVEL RAMKALAWAN

Mr Speaker mon ti ava kontan zis Minis si i en dimoun eksperyanse  ensidswit, i annan kalifikasyon ek son lekip, si i pa vwar li mon retourn ankor lo sa  papye la, sa spreadsheet avek bann detay.  Si i pa vwar li drol ki pou lannen 2015 sa 2 sif lo ‘’assistance for institution,’’ avek lot pou ‘’educational development,’’ sa 2 sif  i donn en total 2.6 milyon ok.  E apre sa son lannen answit i ariv zis, i pa ni arive menm R400mil.  So from 2.6 milyon i desann R400mil.  Ok?  An 2016.  E apre sa an 2015 sa sorry.  Prezan an 2016, pou Community Development i 2.8 konpare avek son lannen avan 790 mil, ni menm en milyon.  Konmsi eski seryezman sa bann sif pa montre nou ki’n arive sa Children’s Fund ?  Ki poudir 2015 eleksyon prezidansyel larzan in ganny servi sa 2.6 milyon, in ganny servi an relasyon avek Eleksyon Prezidansyel e dezyenmman an 2016 sa 2.8 dan bann zafer Kominote vi ki ti en Eleksyon Lasanble i ganny servi dan bann distrik pou rezon politik.  Mon pe met sa e Minis krwar mwan mon pe priye pou ki sa Board avek en proper set up en pe parey SBFA i ganny fer imedyatman, pou nou kapab aret servi larzan lepep Seselwa pou rezon politik parski sa bann sif la zot koz avek nou e zot dir nou ki poudir zot in ganny servi pou rezon politik e menm parey SBFA mon kapab dir avek ou lala, la i annan en labank pe write-off R100mil ki bann det pa kapab, bann dimoun pa kapab re peye atraver sa bann prosedir.  Mersi bokou.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab.  Fransman dir ou se ki ou kapab enterpret sa sif avek gran lentelizans parske 2015 mon pa ti la mwan.  E natirelman se ki, posibleman kekfwa si ou le an vi Chair FPAC nou kapab donn ou detay anler lo sa bann sif ki ava en pe pli kler e pou lenstan mon pa kapab fer okenn komanter politik anler lo la Mr Speaker.  Mersi bokou.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker mon ti a kontan demann Minister Finans vi ki i annan 2 dimoun Minister Finans la.  Eski i posib ki dan serten ka oubyen dan bann ka kot nou pe vwar logmantasyon dan bann sif, eski i posib ki in annan bann Capital projects spesifikman ki Children’s Fundfund dan sa lannen spesifik ki fer alors ki sa sif i diferan avek lot lannen?  Eski i posib?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab.  I kapab ki i annan me an vi an relasyon avek Onorab Ramkalawan les nou a kapab ganny en pe plis detay ki nou ava kapab eksplike, donn en pe plis detay ki sa bann sif i reprezante.  Mersi.

 

MR SPEAKER

Onorab Aglae.

 

HON EGBERT AGLAE

Mersi  Mr Speaker.  Minis mon kestyon i konm swivan.  Dan diskisyon Bidze ti annan serten lanons, rekomandasyon li menm ki ti ganny met devan lo kot lizaz Children’s Fund kot i konsern Children’s Day, eski sa lannen 2017 okenn larzan in ganny servi dan Children’s Fund pou cater bann zanfan lekol swivan zot Children’s Day?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Ankor enn fwa Onorab les nou rod lenformasyon parske  nou pa kapab fer en deklarasyon ki mon pa konnen. Les nou ava ganny lenformasyon  en pe pli kler e nou ava fer Lasanble ganny kopi tou sa bann kestyon ki nou pa kapab reponn right now.  Mersi.

 

MR SPEAKER

Bon mersi Minis, vi ki nou napa okenn lezot kestyon lo kestyon limero, okenn kestyon siplemanter lo kestyon limero 4 nou ankor annan en pti git letan nou al direkteman lo kestyon limero 5 e mon a demann Onorab Ferrari pou demann son kestyon.

 

HON JEAN-FRANCOIS FERRARI

Mersi Mr Speaker.  Mr Speaker eski mon kapab demann Minis pou Finans si i kapab dir sa Lasanble si i annan okenn proze lenvestisman dan Lendistri Lapes, dan Tourizm oubyen dan bann devlopman rezidansyel ki pe aktyelman benefisye avek konsesyon dan sa faz konstriksyon oubyen osi dan son faz operasyonnel?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Ferrari pou ou kestyon.  Dapre bann  Lalwa aktyel i annan diferan provizyon i donn incentive an term konsesyon pou bann aktivite ekonomik, sa i enkli bann proze envestisman dan diferan sekter.  Tel ki Lendistri Lapes, Touris e devlopman rezidansyel.  Onorab Ferrari mon pou reponn ou kestyon koumsa.  Premyerman pou Lendistri Lapes bann envestiser i kapab benefisye avek egzanpsyon VAT pou enportasyon bann prodwi e lekipman ki zot servi dan zot aktivite.  I bon note ki bann envestiser i osi benefisye avek konsesyon 50 poursan excise tax lo transpor enporte ki ganny servi spesifikman pou aktivite lapes.  Konsernan trade tax, customs duty li ki  pran kapital labwet, proteksyon ki ganny servi dan aktivite lapes, li osi pa bezwen pey tax lo enportasyon.  Reveni ki kolekte par envestiser ki fer aktivite lapes i osi pey business tax.  Anplwaye ki zot saler i par lao R8555mil i pey zis R100 e bann ki par anba sa sonm i pa pey tax.   Mon le fer sorti ki  envestiser ki benefisye avek egzanpsyon e konsesyon i fodre anrezistre avek Minister ki responsab pour Lapes oubyen Lotorite Lapes Sesel e laprouvasyon pou sak enportasyon  fodre i ganny donnen osi.  I bon note osi ki sa i enkli dan faz konstriksyon e loperasyon. Me dapre rikord sa bann benefis i plizoumwen dan faz loperasyon dan faz lapes.

Dan Sekter Devlopman Rezidansyel Lalwa VAT i fer  provizyon pou egzanp servis ki ganny ofer pou konstriksyon rezidansyel.  Pour Touris bann envestiser i benefisye avek 15 poursan biznes  tax.  Zot osi  benefisye avek deferred payment bank mechanism pou VAT pou lekipman Kapital ki kout par lao R100mil.

Mr Speaker 2enm parti kestyon Onorab i se ki konsern proze ki pe aktyelman benefisye dan sa 3 Sekter. Mon le dir ki zis dan Sekter Tourizm ki Gouvernman i donn laprouvasyon pou serten

egzanpsyon e konsesyon pou serten proze spesifik, dan faz konstriksyon e operasyonnel e ki anliny ek Lalwa aktyel parey mon’n eksplike avan.  An se ki  enkli anba proze Petite Anse Development e osi Eden Island Development Company Limited nou’n vwar ki i annan konsesyon ki’n ganny donnen anba sa 2 proze e ki an deor sa Sertifika Tourism Incentive ki  dan zot posesyon.  Nou Minister pe rekonsider bann provizyon sa 2 Lagreman pou re negosye sa 2 Lagreman avek bann envestiser.  E vwala repons Onorab Ferrari.  Mersi.

 

MR SPEAKER

Onorab Ferrari.

 

HON JEAN-FRANCOIS FERRARI

Mr Speaker ou ava dakor avek mwan poudir Minis in donn nou en kantite lenformasyon la e mon vreman apresye.  E i en pe difisil pou mwan dizere tousala so ki mon sizere.  Mwan mon annan en kestyon konsernan lapes.  Eski sa bann konsesyon ki bann operater i benefisye, eski tou operater i  benefisye parey ?   Ptipti, gro sa ki fer vin en lekipman, IOT, msye Beaty. Hoareau oubyen msye Keith Andre, eski tou dimoun i benefisye parey?  Sa i en kestyon enportan akoz i nou filozofi lo sa kote latab ki laplenn i nivo pou donn sans tou dimoun.  Sa i mon premye kestyon.

Mon 2enm kestyon i en pe,  Mr Speaker sa ki mon ti a demann Minis si ler in fini reponn sa kestyon si nou kapab pran en break pou mon kapab dizer sa ki in donn mwan akoz vreman i annan en kantite keksoz ki in donnen la ki mon ti a  kontan  vreman ganny detay lo la.  E par egzanp lo proze, lo proze rezidansyel.  I annan 2 proze ki aktyelman an mars la.  I annan proze Pangia, Providence, Roche Caiman, Providence.  I en proze rezidansyel.  I annan proze La Misère Royal Palme.  Pou sa mon ti a kontan konnen sa bann proze la  ki kalite konsesyon zot annan pou ki, akoz sa se 2 etranze ki pe fer, si Seselwa i kapab ganny menm konsesyon?  Kekfwa zot osi zot ti a kontan fer sa bann keksoz koumsa.  Konmsi sa i mon 2 kestyon pou le moman me Minis mon pou annan  en kantite kestyon an ekri apre ler mon a’n lir ou statement byen an detay. Mersi.

 

MR SPEAKER

Minis petet ou kapab reponn sa premye 2 kestyon akoz in deza ariv ler pou pran en pause kafe me nou a les ou reponn sa 2 kestyon pare nou a kontinyen.

 

MINISTER PETER LAROSE

Mersi bokou Mr Speaker.  Mersi bokou Onorab Ferrari.  An se ki konsern lapes Lalwa mon krwar i dwatet aplik pour tou dimoun ki swa  ptipti, mwayen, ou gro e mon sir ki petet si i annan serten anormali pa ezite petet pou met mwan okouran e natirelman konman ou’n lev sa kestyon e mon  a fer sir pou fer sir ki laplenn i nivo.  E kot i konsern sa proze rezidansyel e mon pa tro konpran lekel sa proze la, Pangia?

 

HON JEAN-FRANCOIS FERRARI

Avek ou permisyon.  Minis ou menm ou ou’n dir ki i annan 2 proze ki egziste en pe letan setadir Eden Island avek Petite Anse Development ki’n ganny bann konsesyon en pe an deor e ki sa se bann anomali.  Mwan sa ki mon pe sey konpran se eski menm si in annan sa anomali nou pe kree ankor 2 anomali akoz i annan  2 nouvo proze rezidansyel ki ongoing  pou lemoman savedir Pangia Beach Limited e La Misère anler dan leo kot Ex-Petit and Dumbleton laba anler ki apel mon krwar Royal Palm Development.  Sa ki nou ti a  kontan konnen se ki eski sa bann proze zot osi zot pe tonm dan menm kategori pou ganny bann benefis spesyal ? Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Ferrari.  Sa Royal Palm Development Company i deza annan en License TIA Tourism Incentive Act.  Pou sa lot proze fodre mon a regard ladan.  Si posib apre break mon a kapab donn ou en pe plis detay.  Eski i ok ?  Mersi bokou Mr Speaker.

 

MR SPEAKER

Ok, mersi Minis.  Mon konnen annan lezot kestyon siplemanter lo kestyon limero 5.  Par la swit i annan ankor 6 kestyon ki lo Order Paper pou Minis Finans reponn.  Mon sizer a sa pwen nou pran en poz kafe e nou retournen 11er.

 

(BREAK)

MR SPEAKER

Bon nou a kontinyen avek nou bann Kestyon Siplemanter lo kestyon limero 5 e mon a donn laparol Onorab Ferrari.

 

HON JEAN-FRANCOIS FERRARI

Mersi Mr Speaker.  Mr Speaker mon annan 2 kestyon.  Parey mon ti pe dir taler i paret mwan e i ase konplike sa bann kestyon konsesyon e nou, nou santi i dan lentere piblik ki sa bann keksoz i ganny met kler, sa bann ki gannyen i gannyen.  Sa bann ki pa merit gannyen i pa gannyen.  Alor mon pe demann Minis 2 keksoz.  Premyerman, vi ki Minis in mansyonnen taler, ki i annan en konpannyen omwen ki pe operate anba TIA Tourism Incentive Act e ki mwan dan mon konprenezon sa Act i sipoze in nepli an aplikasyon ou alors sa Act ti sipoze vin an ekspirasyon pli tar 2018.  Mon ti a kontan si Minis ti kapab dir nou si Gouvernman pou tenir sa deadline 2018 pou fer sir ki tou bann vye konsesyon ki’n gannyen dan lepase i arete e ki napa okenn konpannyen ki kontinyen benefisye avek konsesyon pou larestan lemonn ziska ler lafen dimoun i arive?  Sa i mon premye kestyon.

E mon 2enm kestyon pou ed nou konman en Lasanble e la mon donn Minis swa pou li donn sa lenformasyon swa avek FPAC, swa avek nou dan Lasanble nou ti a vreman kontan si Minister Finans i donn nou en lalis konplet egzostif tou bann konsesyon ki aktyelman pe donnen anba Trades Tax Act anba VAT Act, anba ki mannyer i dir sa, Levi, regulations bann keksoz koumsa?  E osi si i kapab donn nou en lalis konplet sa?  E osi lekel sa konpannyen ki pe benefisye ? Mon krwar sa i vreman enportan, akoz i annan bann konpannyen Sesel ki en pe dominer ki zwe gro lebra e zot i annan de lannen  e de lannen zot ankor pe benefisye avek sa bann konsesyon e finalman zot pa pey zot fair share of tax parey tou dimoun i ete.  So mon pe demann sa 2 kestyon avek Minis.  Mersi.

 

MR SPEAKER

Avan Minis i reponn si ou annan lenformasyon Onorab Ferrari kan lafen dimoun pe arive les nou konnen.  Minis.

 

HON JEAN-FRANCOIS FERRARI

Zisteman Mr Speaker, zisteman.  Akoz lafen dimoun i lwen e mon pa anvi sa bann konsesyon i kontinyen lwen ankor dan le fitir.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Ferrari.  An se ki konsern sa bann TIA laplipar pou ekspire lannen 2018.  I toutafe normal ki nou regard negosyasyon, regarde  lekel sa bann konpannyen ki’n benefisye.  Nou bezwen diskit avek lendistri.  Nou pa kapab zis abruptly li sa committment ki nou’n fer akoz sa nou’n fer lo behalf pei ; akoz sa i enplik envestiser.  Kot i konsern lezot lenformasyon Onorab Ferrari mon ti kapab fer Lasanble gannyen avek FPAC e sa si ou tonm dakor anler lo la nou ava donn an ekri byen detaye.  Mersi bokou.

 

Mr SPEAKER

Mersi Minis.  Onorab Sebastien.  In sorti en pti kou ?  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker dan menm loptik, eski sa bann konsesyon ler i pou ganny ekspire i annan posibilite ganny renouvle imedyatman? Enn.

E dezyenmman eski Minis i kapab enform nou Lasanble ki proze Tourism li Royal Palm pe fer?  Mon kapab konpran sa zafer Petit Anse i annan bann proze poudir lotel sepa Four Season sepa kwa, lot Pangia i kler sa i annan en proze la lo beach pou annan touris pou vini, lot ki proze tourizm sa enn la lo montanny pe fer?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab De Commarmond.  Kot i konsern konsesyon i deza dan Lalwa enn sa?  2enm kestyon.  Palm Development Company Limited sa se en keksoz kot nou annan en lalis.  Mon pou bezwen investigate li pou regarde lekel son bann envestiser e ki zot ape fer. E  natirelman  Lasanble osi nou kapab donn zot en lalis konplet lo tou bann konpannyen ki ganny TIA e dan sa ka i ava et en pe pli kler pou nou  Lasanble.

 

MR SPEAKER

Onorab De Commarmond.

 

HON CHARLES DE COMMARMOND

Mr Speaker premye kestyon ki mon demann Minis i ler ki expire sa bann konsesyon mon demann li eski i pou annan posibilite ganny renouvle ouswa i fini letan i fini, letan i fini expire konmsi la Gouvernman pa pe al donn ankor konsesyon?

 

MR SPEAKER

Minis.

 

 

MINISTER PETER LAROSE

Mersi bokou Mr Speaker.  Mersi bokou Onorab De Commarmond.  Ler i expire se en kestyon regarde ki kalite negosyasyon in antre ladan e sa se, letan in ariv lannen, avan lannen 2018 e la sirtou 2enm parti lannen 2017 nou bezwen vwar en pti pe tou sa bann konsesyon ki nou donnen ki son lenpak ekonomik  ki annan anler lo nou bidze parske  ler ou donn konsesyon natirelman sa bann reveni ki pa kapab  kolekte sa nou bezwen fer en evalyasyon anler lo la si i annan en sipozisyon kot nou kapab tir sa bann konsesyon savedir nou bezwen amann Lalwa.  Mersi.

 

MR SPEAKER

Onorab Churchill Gill.

 

HON CHURCHILL GILL

Mersi Mr Speaker.  Mr Speaker i kler ki nou bann businessman oubyen bann ki pe plan pou vin fer en biznes dan Fisheries, Tourism apre devlopman rezidansyel ki pa bokou zot ki konnen i annan tou sa kantite incentive.  Mwan mon ti a sizer ek Minis ki nou fer en pe piblikasyon, sansibilizasyon konsernan sa bann incentive ki pe ganny donnen dan sa bann diferan aktivite ekonomik.  E mon ti a sizere ki sa nou konmans toudswit atraver medya kot tou dimoun ki dan sa bann sekter i ava kapab benefisye.  Apre pou ler nou dir nou pe reviz konsesyon, tou nou bann konsesyon ki nou donnen Sesel i toultan dan faver bann dimoun ki vin envestir anba preteks nou pe atrakte envestisman.  Me la ler mon pe ganny sa sans pou ou al revize an 2018 mon ti a  sizere prezan nou get e fason kot sa bann dimoun ki’n benefisye ek sa bann konsesyon, zot biznes in grandi, ki  la prezan nou vwar en pe ki mannyer pei i kapab benefisye avek sa bann biznes.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Gill.  Kot i konsern ledikasyon pou enform dizon ki swa envestiser lokal ou etranze mon antyerman dakor avek ou nou bezwen fer sa legzersis kot tou dimoun i ganny menm sans.  Me kot i konsern sa bann Companie ouswa envestiser ki’n benefisye atraver bann incentive e natirelman si zot in benefisye parey Onorab Ferrari in dir zot pa kapab benefisye pou leternite.  Mersi.

 

MR SPEAKER

Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon annan, mon kestyon i baze lo sa lenformasyon ki Minis in pas avek nou la ozordi.  So mon demann Minis si an relasyon  avek sa bann konsesyon ki zot in donnen si eski Minister Finans i fer okenn letid oubyen okenn assessment pou vwar, ki kantite  benefis sa ban konsesyon in anmennen pou pei?  E si baze lo sa letid si zot pa ankor fer li si zot annan lentansyon fer li pou etabli vreman kwa ki nou pou al devan avek an relasyon avek sa bann konsesyon?  Sa i en bout.  E osi mon ti a kontan klarifye Mr Speaker, ler Minis in koz lo sa R100 mil an relasyon avek bann lekipman mon konpran ou pe koz lo accelerated negotiations.  Eski Minis i kapab dir nou si son Minister pa pe propoze pou revwar sa montan R100mil an relasyon avek en pti e gran lotel?  Si mon ti kapab zis eksplik mon lekor Mr Speaker.  En pti lotel pou li depans R100mil i en depans sibstansyel me en gran lotel  ou pe donn li sa konsesyon lo R100mil e i pe aste lekipman ziskan R1milyon ; ki fer ki i donn li petet dan mon lopinyon mon pa en expert dan sa domenn  – en lavantaz lo petet en pti letablisman ki pe sey osi bouz devan.  Eski sa i en keksoz ki’n regarde?  E prenan kont ki Minis in mansyonn Eden Island, eski an relasyon ek Eden Island Minister Finans pe fer tou le neseser pou asire tou bann aktivite ki pe pase lo Eden Island i ganny takse  parey i devret ganny takse e i pou asire ki sa bann tax i vin dan, i sa tax ki nou devret gannyen avek sa bann aktivite ki pe ganny pase lo Eden Island.  I enkli yacht, i enkli tou bann lakaz ki’n ganny fer Eden Island.  Mersi Mr Speaker.

 

MR SPEAKER

Minis.

MINISTER PETER LAROSE

Mersi bokou Mr Speaker.  Mersi bokou Onorab Pillay.  Mon pou reponn ou dernyen kestyon kot i konsern Eden  Island.  Nou annan en plan pou nou takse Eden Island, tou tranzaksyon, tou aktivite komersyal ki travers laba parske petet ler nou ava fer sa legzersis nou ava vwar ki kantite larzan sa pei in perdi.  Me sa se en legzersis ki nou bezwen fer.

I annan tranzaksyon yacht  parey ou’n mansyonnen, lakaz ensidswit.  Tousala nou bezwen regard ladan parski ler nou pe dir i annan en tax system, tax system i lo Souverennte Sesel.  E kot i konsern montan R100mil mon antyerman dakor avek ou, nou bezwen regarde donn plis lankourazman bann pti letablisman kot zot  kapab benefisye.  E kot i konsern assessment kantite larzan nou’n perdi, an relasyon avek sa bann incentive kot ou’n donnen nou rod  en propozisyon pou nou fer sa legzersis, parske nou  bezwen prepar nou pou lannen 2018 fiskal e lavenir. Mersi.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Zis en pti question arising.  Prenan kont ki nou pe donn serten konsyesyon e lo lot kote i annan posibilite ki annan transfer pricing ki bann gran letablisman pe fer ;  ki ou Minister pe fer pou vwar e anpese ki sa pe arive an se ki konsern reveni ki pei i sipoze kolekte? Akoz si nou pe donn konsesyon e en biznes pe fer byen nou osi ekspekte ki sa biznes pe pey sa larzan ki pei i devret gannyen.  So eski zot pe  sey tackle sa size transfer pricing ki’n ganny mansyonnen plizyer fwa e ki mon rapel osi dan bidze ti annan serten commitment ki ti ganny fer lo lapar SRC pou zot kapab met an plas en mechansims pou deal avek sa sityasyon.  Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Pillay.  Transfer pricing pou en pei i kout en kantite. Parske natirelman ou napa kontrol lo la e sel fason se ki ou bezwen fer en odit e mon krwar sa i en legzersis ki nou bezwen fer e natirelman nou annan en plan pou nou konplet sa legzersis osito posib kot nou kapab fer evalyasyon kantite larzan sa pei in perdi atraver transfer pricing.  I pa zis Sesel.  Bokou pei sirtou bann pti zil si ou napa ase kapasite pou kapab detekte sa bann kalite tranzaksyon koumsa.  Mersi.

 

MR SPEAKER

Onorab Afif.

 

HON AHMED AFIF

Mersi Mr Speaker.  Mon ti a kontan demann Minis pour Finans si i kapab konfirm ek sa Lasanble si Polisi in sanze konpare ek bann desizyon mon rapel ti’n ganny pran depi 2011 kan ti dir poudir TIA pou nepli e  mon a quote ou le 29 Novanm 2011 Bidze  Minis Finans ti dir : ‘’bokou biznes ozordi i annan en Sertifika anba TIA e Agriculture Fisheries and Incentive Act. E zot a rapel ki plizyer Sertifika ti pou ekspire an Desanm 2011.  Gouvernman in deside pou prolonz tou sa bann Sertifika ki ti pou ekspire ziska Zen 2012. En fason ki i koensid avek lentrodiksyon VAT le 1 Zilyet 2012.  Alors en desizyon ti’n ganny pran.  Answit anba VAT Act li menm schedule 20, Validity of certificate of entitlement i dir :- ‘’A certificate of entitlement shall remain valid until the date stipulated in an existing and valid certificate,’’ savedir dizon ti annan enn ki ale ziska 2015  i ti ok; ‘until b, until the 31st December 2012  or earlier than the date specified in the valid certificate of entitlement as mutually agreed by the holder of the valid certificate of entitlement and administer.’’  Alor i kler poudir desizyon ti’n ganny pran an 2011 poudir i pa pou desot 2012.  Alor mon trouv drol ki ozordi nou pe koz ankouraz nouvo dimoun ganny Sertifika anba la oubyen i annan dimoun ki’n fek gannyen parske si in gannyen mon pe demann ou si sa desizyon in sanze?  Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Afif e natirelman tou sa bann egzanpsyon  ti fer depi 2008 e la mon vwar ki 2018 pou ekspire.  E natirelman parey ou’n quote dan sa Budget Speech e serten Lalwa ki ou’n quote osi i vre ki sa sityasyon in sanze. E natirelman se sa ki nou bezwen re vizit sa avan 2018 i arive.  Mersi.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker eski Minis i kapab donn nou Lasanble lalis sa bann konpannyen ki pe ganny konsesyon dan sa 3 domenn ki in dir nou?  E eski i kapab konfirm ek nou Lasanble si anba dan Lendistri Lapes bann konsesyon ki tonm anba la, si bann ki annan reefer containers lo Port Providence, Port SFA Providence, i ganny konsesyon pou pa pey kouran, akoz mon aprann ki i annan pandan dernyen 2an en bon pe letan an tou leka zot pa pe pey ditou kouran laba kot SFA.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi  bokou Onorab De Commarmond.  Lalis mon kapab fer ou gannyen, enn.  Kot i konsern konsesyon reefer container Providence e si zot pa pey kouran, sa mon pa okouran mon fek tann li la koman ou’n fer ou lentervansyon.  Mersi.

 

MR SPEAKER

Onorab Ramkalawan.

 

HON WAVEL RAMKALAWAN

Mr  Speaker mon pe ekout sa bann larepons e kestyon e mon bezwen dir ki nou dan en mess.  En Lalwa i ganny fer, en Statement i ganny fer, lot keksoz i ganny fer.  Nou dan en total mess e koman en pei ozordi nou napa en lide ki kantite larzan ki lepep Seselwa ti devret pe gannyen e ki in perdi.  Eski Minis dan sa, dan milye sa dezord, mon apel li en dezord total, eski i kapab donn nou en parol ki tou sa bann Lalwa letan i vin prezant son Bidze oubyen avan i ava kapab donn nou en keksoz kler pour ki lepep Seselwa e bann envestiser, i ava konnen egzakteman kwa ki i annan en kwa ki napa.  Parske ozordi i resanble ki se bann etranze atraver zot bann koneksyon ki pe ganny bann konsesyon, ki pe ganny bann posibilite tandis ki sa Seselwa li i pe trimouse.  Alors en keksoz kler pou nou konnen dan ki direksyon nou pe ale.

E dezyenmman mon pa konnen si Minis pou annan sa larepons  nou pa pe  ganny bokou larepons depi bomaten.  Eski sa batiman Laxmanbhai ki’n fer dan milye lavil la, eski in ganny konsesyon li? E anba ki progranm ki in ganny konsesyon?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker.  Mersi bokou Onorab Ramkalawan.  Kot i konsern sa dezord, nou  bezwen met en lord.  Mon dakor avek ou nou bezwen met en lord.  Nou pa kapab fer diferan Statement, Lalwa i dir en lot ensidswit, en konfizyon, parske nou pa kapab mars dan en konfizyon. Pli nou fer Statement nou kontradir Lalwa i vin plis konfizyon – i pa bon pou nou limaz konman en destinasyon pou envestiser ki swa lokal ou foreigners.

Kot i konsern sa building Laxmanbhai la fransman dir ou mon pa konnen si in ganny konsesyon, me mon a regard ladan. Mon a fer ou konnen.

 

MR SPEAKER

Mersi Minis pou donn nou sa bann lenformasyon evantyelman.    Nou ava al drwat lo kestyon nimero 6 e mon a demann Onorab Ferrari pou poz son kestyon.  Mersi Minis. Onorab Ferrari.

 

HON JEAN-FRANCOIS FERRARI

Mersi Mr Speaker. Mr Speaker eski mon kapab demann Minis si in annan en desizyon ki’n ganny pran par Board Fon Pansyon. Si i okouran. Pou pa al dan bann heightened high  devlopman. Parey sa bann flat R24mil ki piblik in toultan dir be ki mannyer nou larzan i kapab al bann lakaz ki nou, nou pa pou kapab zanmen reste ladan.

I annan en desizyon ki’n ganny pran pou move more towards lenvestisman ki pou benefisye plis Seselwa.  Savedir microenterprise e bann proze pli abordab. Sa i mon premye kestyon.

Mon 2enm kestyon vi ki Fon Pansyon i pou nou tou, e ki nou kontan si i ganny en led avek Gouvernman ; eski Minis i kapab dir nou si sa bann later kot Fon Pansyon pe fer bann devlopman, eski i ganny li avek Gouvernman e si en lease oubyen i aste, oubyen i al dan prive ? Sa i 2enm.

E mon 3enm pwen se eski Minis i kapab asir Lasanble, ki bann lenvestisman ki Fon Pansyon i fer, i vreman son depans i vreman ganny kalkile dan en fason vreman byen, pou ki nou larzan konmsi i ganny byen depanse e ki, sak sou i ganny byen accounted for ? Mon krwar piblik i anvi tande sa i anvi konpran pou dir pou dir ler nou pe koz R330 milyon nou bezwen asire nou pe ganny valer R330 milyon. Nou pa pe zis pe pey bann konpannyen an fou. Bann arsitek an fou. Me ki i annan double checking – triple checking, konmsi pou fer sir pou dir nou annan en bon rannman.  Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Ferrari. Ou premye e kestyon kot i konsern desizyon Board pa pou al dan heighten development. E mon krwar pou dir semenn pase mon ti pe swivre en klip nouvel kot, sirtou lo Praslin ti annan serten konsern par serten endividi ki dir sa nou larzan, i pe compete avek nou. Ou konpran ?

E kot i konsern later. Sa cette en kestyon kot mon napa ase lenformasyon pou lenstan. Mon a fer Lasanble gannyen.

E kot i konsern lenvestisman Kapital. Mon swete ki sa tim advisor finansyer konsiltan, zot byen kalkile kot parey ou’n dir Onorab Ferrari larzan Fon Pansyon i pou nou tou. Nou bezwen servi li telman byen. E ekonomikman dan en serten fason kot nou annan rannman. Nou pa pou kapab tonm dan en lot parey plizyer pei, i fer fas kot dizon Fon Pansyon in faid pli tar.  Mersi

 

MR SPEAKER

Onorab Ferrari.

 

HON JEAN-FRANCOIS FERRARI

En dernyen kestyon Minis. Mon ti a kontan demande si Fon Pansyon in fer okenn lenvestisman ziska prezan an partenarya avek okenn lezot dimoun dan prive ? Eski i egziste  sa ?konmsi oubyen eski tou bann lenvestisman Fon Pansyon i pou Fon Pansyon ? Apard byensir PS, apard byensir bann lenvestisman dan bann korporasyon parey Seychelles Breweries bann keksoz koumsa.

Me okenn dimoun prive ki pe ganny anmennen dan Fon Pansyon, akoz nou tande pou dir i annan enn de etranze ki konmans met zot ledwa ladan dan sa cause – Fon Pansyon, ki zot ki pe drive the whole process.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Ferrari. Dapre mon lenformasyon se ki napa etranze ki’n al joint li avek Fon Pansyon pou fer lenvestisman.

Petet kekfwa i annan serten diskisyon ki pe ongoing, me sa mon pa okouran.  Mersi.

 

MR SPEAKER

Onorab Woodcock.

 

HON WAVEL WOODCOCK

Mersi Mr Speaker. Bonzour Minis ek ou delegasyon. Mr Speaker mon kestyon i en pti pe lo ou kapab dir en question arising lo kestyon ki Onorab Ferrari in demande apre statement ki Minis in fer. Sirtou an regardan sa miting ki fek deroule Praslin. Regard bann lenvestisman sirtou par Fon Pansyon Praslin.

Mon kestyon i konm swivan eski avan ler zot fer okenn lenvestisman. Eski zot pe konsider lefe ki parfwa bann lenvestisman ki zot pe fer i pa pe annan en lenpak ou en lefe direkteman lo bann biznes ?

Si nou pran kont bann letablisman touristik lo Praslin. Bann lotel, bann pti guesthouse e bann lezot etablisman touristik pe konplent konm kwa ki sa proze Praslin Holiday Home pe compete avek zot. E non mwan mon konsern se ki sa i nou larzan ki pe envestir. Fon Pansyon se nou larzan, se nou larzan.

Me solman ki mannyer eski zot pe pran desizyon pou fer bann proze kan i pou annan bann lefe advers lo bann lezot businessman ki pe afekte zot osi. E menm zot kontribisyon ki zot pe fer avek dan Fon Pansyon?

Parey annou pran kont i annan bokou bann letablisman Praslin ozordi zot bezwen ferm zot laport, zot pe lay-off workers. Akoz Praslin Holiday Home li i pe lwe son bann rent. I pe lwe son bann lasanm a en pri bokou pli ba ki tou bann lezot letablisman ki annan dan Grand Anse Praslin. E menm Baie Sainte Anne. En konpetisyon direk.

Eski sa i pa pe afekte sa bann biznes Praslin ? E osi zot kontribisyon ki zot pou fer. E sa bann travayer i kapab fer dan Fon Pansyon ? Sa i mon kestyon Mr Speaker.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Woodcock pou ou kestyon. Mon lenformasyon se ki Fon Pansyon i regard return ki kapab generate.  Parske parey mon’n dir e se ki nou pa kapab vwar nou dan en sityasyon ankor dan 2an 3an i dir be Fon Pansyon napa larzan in bankrupt, kot i pou ale ? I pou bezwen vin rod kot Gouvernman, parske sa i pa i larzan bann dimoun ki’n kontribye dan sa fon.

Me natirelman kot i konsern konpetisyon avek bann lezot businesses, ki osi kontribye direkteman dan Fon Pansyon. La mon krwar cette en kestyon kot mon krwar Board i bezwen revwar zot investment policy dan en serten fason ki zot pa tonm an konfli avek menm dimoun ki zot policyholder.  Mersi.

 

MR SPEAKER

Onorab Woodcock.

 

HON WAVEL WOODCOCK

En pti siplemanter en keksoz ki mon pe demande. Eski ot kapab konsider konsilte avek bann piblik avan ler ki zot antreprann bann proze ?

Akoz i annan plizyer proze ki nou’n antreprann dan lepase. Ki apre piblik menm bann dimoun ki pe pey dan sa menm fon, zot annan konsern zot pe fer bokou konplent konsernen sa bann tel proze. Sa i en keksoz ki mon pe demande.

Si bann konsiltasyon i kapab ganny fer premye pou okenn bann lenvestisman bann proze ki zot fer dan lefitir.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Woodcock. Mon krwar i toutafe normal dan sa lanvironnman modern kot nou annan konsiltasyon avan ler ki nou fer lenvestisman. I kapab petet osi lenvestisman prive osi si bann lenvestisman prive i le fer tel, serten proze, i bezwen konsilte lakominote kot i pe fer lenvestisman. Be sa i en tre bon kestyon.  Mersi bokou.

 

MR SPEAKER

Onorab Sebastien.

 

HON SEBASTIEN PILLAY

Mersi Mr Speaker. Mr Speaker avek tou respe mon annan pou Minis mon pa pou antyerman dakor avek sa Statement ki Fon Pansyon i annan en obligasyon statitwar pou envestir larzan ki pa zis mon, pa zis ou, me tou Seselwa in met ladan konman en Fon Pansyon.

So nou bezwen garanti sa return lo Fon Pansyon. Pa anvi ki Fon Pansyon li menm li dernyen fwa ki in fer prezantasyon in montre ki nou annan en ageing population. E Fon Pansyon i bezwen annan li en investment portfolio ki permet li generate larzan. Sa osi i pe envestir dan en landrwa dan en domenn ki fer 2 rol partikilye.

Premyerman se ki kre konpetisyon, obviously pri i bezwen desann.  Dezyenmman nou pa kapab curtail Fon Pansyon dan son investment portfolio. Akoz zisteman ki nou pe fer, nou pe kree kondisyon ki bann dimoun ki kapab afford pou fer lenvestisman, pou fer lenvestisman e pou close out lezot dimoun ki pa kapab fer li.

So mon krwar Fon Pansyon i annan en rol pou zwe. So kestyon ki mon ti a kontan demann Minis. Se ki Gouvernman pe fer pou asire an menm tan ki Fon Pansyon pe envestir dan bann diferan proze ki mon krwar dan mon lopinyon pou nou kapab ganny larzan pansyon ki pou dimoun demen ler i retire i annan son larzan pansyon. Ki Gouvernman pe fer pou vwar ki mannyer Gouvernman i kapab revwar lafason ki Fon Pansyon i manage sa pansyon ki bann fason pli proaktiv ki nou kapab servi sa pansyon ; par egzanp pou en retrete ki’n ariv en serten larz ki annan li R120 dan Fon Pansyon ki annan 65an i pa kapab ariv kot en labank pou li ganny en loan. Ki mannyer sa larzan i kapab ganny servi konman par en garanti. Ki bann keksoz inovativ ki nou kapab anmennen pou fer ki en dimoun i benefisye atraver son Fon Pansyon.

Me mon pa pou dakor Minis, Mr Speaker sorry ki nou anmenn okenn sityasyon kot nou curtail lobligasyon statitwar Fon Pansyon avek son investment portfolio pou li generate larzan ki demen i pou benefisye sa bann menm travayer ki pe dir Fon Pansyon pa envestir.  Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Pillay. Regilater Fon Pansyon i tonm anba Financial Services Authority. E natirelman nou pou fer lamannman anler lo la. Me kot ou’n dir se ki natirelman Fon Pansyon i annan en lobligasyon pou fer sir i annan en maximum return. Sa mon antyerman dakor avek ou. Me sa se bann desizyon Board sa ki pou ganny fer.  Mersi bokou.

 

MR SPEAKER

Mersi Minis. Onorab Ernesta.

 

HON PAUL ERNESTA

Mersi Mr Speaker. Mr Speaker mon kestyon preski anliny avek serten bout kot Onorab Pillay in fer resorti.        Mon ti zis anvi konnen basically si oule si Minis i kapab enform sa Lasanble si bann profi ki Fon Pansyon dan son bann investment ki ganny fer.  Si son bann profi i al pou kouver pansyon nou bann, dimoun letan zot ariv zot retire age.  Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Ernesta. Fon Pansyon i annan en tim ki apel …. Natirelman zot fer tou sa bann kalkilasyon pou fer sir ki Fon Pansyon i annan ase larzan pou met son lobligasyon ler i due. Me parfwa osi se ki ler ou fer serten lenvestisman ou bezwen kalkil son risk aspect osi to it en ?  Mersi.

 

MR SPEAKER

Nou ava al tout swit lo nimero lo kestyon nimero 7. Onorab Ferrari.

 

HON JEAN-FRANCOIS FERRARI

Mersi Mr Speaker. Mon dernyen kestyon pou ozordi, se pou demann Minis pou finans, si i kapab donn detay Lasanble bann laranzman ki’n ganny fer pou konstriksyon e occupancy, nouvo extention Independence House ?

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Ferrari. Proze Independence House Annex i en proze ki ti ganny konsevwar avek lobzektif swivan.

Konstrir en batiman pou ogmant kantite biro ki Gouvernman pe lwe lespas avek sekter prive avek en bi ki larzan ki depanse pou sa bann lokasyon, i vin en lenvestisman pou benefisye lonterm

Amelyor servis ki Gouvernman in donnen dan kad fasilite lenvestiser ek biznes par group par bann Departman e Lazans ki ofer bann servis sipor dan en sel landrwa.

Par egzanp Independence House is lofis lespas Registrar of companies e Land  Registrar and Division of Survey e Later.

E Lotorite Plan, Servis GIS, Departman Imigrasyon Independence House Annex in permet ozordi pou Departman Lanplwa e Antreprener Biznes Devlopman e Inovasyon. SIB pou osi vin dan en sel lokasyon osi.

Proze in osi permet maksimiz sa morso later 676 met kare kot parking Independence House ti ete oparavan. An term sa teren dan sant lavil, pou kapab met ankor 3mil met kare. Lofis i osi reprezant en benefis ekonomik lo itilizasyon prime space.

Sa proze pou konstrir sa striktir, ti reprezant 3600 met kare i kout R113 milyon. Koman Gouvernman ti annan lezot priyorite pou adres avek finansman dan son Bidze Kapital a en moman ki desizyon ti ganny fer, pou konsevwar sa proze en fason inovativ ki pa ti pou efekte Capital Expenditure ceiling, Gouvernman ti bezwen ganny eksplor serten opsyon pou sa proze kapab materyalize par Zen 2016.

Se pou sa ki a proze i ti ganny enplimante atraver mekanizm Public Private Partnership ; kot en konpani Gouvernman in kapab rod finansman avek Labank Komersyal, avek lefe minimal lo depans Kapital.

Laranzman pou enplimantasyon sa proze i konm swivan. Later ki footprint sa batiman i lo la V18455 in lease avek en special purpose vehicle company. E sa se Green Tree Investment Company pou en term 30an pou R1.

Sa lease  in permet sa SPV company annan en kolateral pou kapab pran loan pou konstrir sa batiman.

Green Tree Investment i a son tour i annan en Kontra konstriksyon avek Green Island Construction Company pou konstrir sa batiman.

Minister Land Use and Housing lo par Gouvernman, i annan en Lagreman avek Green Tree Investment pou lwe sa batiman antye pou en peryod 9an, e enn fwa ki repeyman lokasyon pou sa batiman apre sa peryod in fini ganny kouver, sa lenvestisman Green Tree in fer sa batiman, e pou avek later retourn pou Gouvernman.

Bann term sa Lagreman ant Green Tree Investment ek Gouvernman i konm swivan ; peyman davans R784,656.79 sou, pou loan arrangement fee lo konmansman proze.

Peyman pou servis lentere lo loan pandan peryod konstriksyon R773,609 par mwan. Peryod konstriksyon ti antre an Novanm 2014 ziska 2015 an Desanm. Lokasyon batiman ti konmans depi Zanvye 2016 pou en sonm R1milyon 949 mil 433 par mwan   sa i enkli VAT. Sa peyman in enkli bann fre ladministrasyon e lasirans pou batiman ki Green Tree ti pe peye.

Rent review in ganny fer depan lo sanzman to lentere lo loan ki’n ganny pran pou konstrir batiman. Pou lenformasyon Lasanble depi Zen 2016 lentere in ogmante pou vin 11poursan.

Lokasyon ki pe peye par Gouvernman in prezan ariv R2 milyon 156 mil 483 par mwan an se moman.

Minister i bezwen antre. Minister i bezwen antre anba en maintenance contract pou sa batiman avek Green Island Construction pou preventive maintenance lo batiman. Sa i kouver servis bann lift, air condition, plumbing, internal electrical. Sa Kontra maintenance pou 2016 ziska 2017 i kout R57 mil 3san par mwan.

Tou bann kou itilite, delo, elektrisite, servis telekominikasyon i responsabilite Gouvernman pou peye avek tou son bann fre. Netwayaz propriyete i osi responsabilite Gouvernman. Vwala repons Mr Speaker.  Mersi.

 

MR SPEAKER

Onorab Ferrari.

 

HON JEAN-FRANCOIS FERRARI

Mersi Mr Speaker. Mr Speaker konm dir Onorab Gill mon annan apepre 15 kestyon. Me selman mon a demann zis 2. Akoz pou lezot demande.

Premyerman Minis konman bann finansye ki la isi devan nou. Eski ou santi poudir i en desizyon entelizan pou fer en partnership kot partner i al prêt larzan 11 poursan pou li fer sa proze e sa lentere se Gouvernman ki peye. Kan Gouvernman li menm i kapab ganny larzan pou bokou mwens lentere.

Konmsi nou  ti a kontan nou konman en Lasanble konpran, akoz ki Gouvernman i bezwen al antre dan en Kontra avek en lot konpannyen Gouvernman menm, pou Gouvernman menm sa lot konpannyen. Green Island Construction and Green Tree Investment. Tousala Gouvernman menm, IDC.

        Eski i normal ki Gouvernman i al fer Kontra ek en lot Gouvernman pou ki en lot Gouvernman ki ganny profi or whatever lo sa keksoz?

E prêt larzan 11 milyon 11 poursan. Sa i en kestyon ki, mon pa konnen, kekfwa ou kapab reponn mon pa konnen. Mon ava zis espere.

Mon 2enm kestyon. Dapre normal bann prosedir normal. Ler en kontrakter i handover en building fini. I annan en peryod garanti ou kapab apel li garanti lo la , Kot sa kliyan i retenir en serten amount o ka ki i annan en defo kelkonk. Annou apel li en garanti.

Eski Minis i kapab zistifye avek sa Lasanble ki building fek handover. Me nou bezwen pey en maintenance contract. Nou ti ava ekspekte ki at least ti ava en grace period oubyen en garuantee period kot si i annan maintenance fodre krwar sa konpannyen ki’n konstrir ki keksoz pa’n marse 100 poursan byen.

Savedir li i ava son responsabilite pou sa premye 2an oubyen sa premye 3an pou fer sir ki tou keksoz i mars ok – free of charge, pa en maintenance contract.  So lo sa 2 kestyon Minis eski ou ti a kapab reponn mwan ?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Ferrari. Kot i konsern sa proze ti dwatet tender. Premyerman e sa i pa’n tender.

Dezyenmman kot i konsern ki ou’n dir zafer garanti  sirtou ler i annan en konstriksyon ki ganny fer pou fer sir ki i dapre plan epi sa konstriksyon se si oule i an bonneta ki pa bezwen fer depans ekstra nou apel sa en Performance Bond.

E natirelman mon krwar pa si i annan en Performance Bond. Mon pa kapab defini sa pou lenstan. Me kot i konsern sa laranzman kot en Lazans Gouvernman in pret larzan pou al lo behalf Gouvernman kot Gouvernman ti kapab raise son fund li menm – sa cette en Lagreman kot mon pou bezwen regarde. Parske natirelman mon pa ti okouran sa.  E pou vwar son fezabilite akoz ti fer koumsa. Petet i annan en serten rezon ki mon pa konnen. E mon a kapab rann ou repons en pe pli tar lo la.  Mersi Mr Speaker.

 

MR SPEAKER

Onorab Ferrari ou ok ek ou 2 kestyon? Lezot ou a garde. Onorab Ramkalawan.

 

HON JEAN-FRANCOIS FERRARI

Non onnetman Mr Speaker mon pa ok. Me solman parey sa bann size ki tre konplike, i pou demann en bon pe refleksyon lo la pou nou sey konpran. Parey Minis in dir. Akoz ki Gouvernman in al dan sa kalite laranzman ? Kan Gouvernman  ti kapab zis ale, borrow larzan pli bonmarse, pey en kontrakter antre dan son building pou li i pey sa 2milyon ki peye tou le mwan ; 24 milyon par an, Mr Speaker 24 milyon par an finalman. Actually 25 milyon par an lo 9an.

Savedir en building  in kout nou 1. Pwen – R111 mil. 111 milyon finalman ler nou pou’n fini peye i pou en minimum 175 milyon. So vwala.

 

MR SPEAKER

Minis in dir i pou investigate i pou al fouy en pti pe pou konn en pe plis. Onorab Ramkalawan.

 

HON WAVEL RAMKALAWAN

Mersi Mr Speaker. Me zisteman mwan mon ti anvi demann Minis avek tou sa bann sonm sa bann chiffre ki in  donnen,  konbyen sa batiman pou kout Gouvernman letan apre 9an sa batiman i retourn antyerman pou Gouvernman?  Sa batiman konbyen ki pou son kou total?

E dezyenmman mwan mon’n deza pronons mwan lo sa zafer sa Private Public Partnership. – parske mon pa krwar dan sa konsep ki Gouvernman in vin ladan. Si tou lede kote si sa lakonpannyen i form parti en Parastatal, Parastatal i pou Gouvernman. Gouvernman pa kapab dir ki poudir i en Private Partnership.

        Mon ti ava kontan konnen klerman akoz  – akoz ki Gouvernman li menm i pa’n pas atraver prosedir tender pou en depans parey. Parske la i pe fer 2enm proze ki nou ki pandan sa 2 dernyen semenn, nou pe ganny lenformasyon ki pou dir ti napa okenn tender. Sa Remand Center akoz kontrakter dapre li i ti sel kontrakter ki kapab fer en batiman avek sa lavites. E la private partnership.

Akoz ki prosedir tender pa’n ganny swiv? E si sa pa form parti ankor enn fwa sa dezord – sa dezord ki egziste ozordi dan Gouvernman ki kapab donn rezon pou kestyonnen e menm pou li met lo anba sa mo Koripsyon.  Mersi bokou Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Ramkalawan pou ou kestyon. Kot i konsern sa Kontra pa’n ganny pas atraver Tender Board. Dapre mannyer mon konpran se regilasyon Public Private Partnership i pa travers anba Procurement Oversight Unit. E sa cette en keksoz kot parey ou’n dir, i en kestyon en Lazans Gouvernman avek Gouvernman li menm, olye en private strictly private sector.

E kot i konsern kou ziska 9an i pou aprosan R225 milyon.

 

MR SPEAKER

Onorab De Commarmond. Sorry go on Onorab Ramkalawan.

 

HON WAVEL RAMKALAWAN

Mr Speaker mon ti ava kontan si Minis i ti ava kapab dir nou egzakteman, kote nou pou vwar sa bann regilasyon an term sa, sa ki pou dir pa bezwen pas atraver tender.

Parski dan nou understanding tou sa bann  -Gouvernman li menm ki’n fer son Procurement Act. E dan son Procurement Act i met klerman kwa ki i bezwen fer. Zisteman pou nou pa al end up dan sa bann Procurement Act ti vini pou nou al lager kont koripsyon.

E si aprezan Gouvernman li menm li i pe vin pli gran culprit pou li kas sa,  mon pa ganny en konpran mon Minis. Mon pa pe ganny en konpran ki mannyer Gouvernman i kapab fer en keksoz koumsa pou en sonm R225 milyon1

E dezyenmman ankor enn fwa mon krwar ki in ler pou nou eklersi sa bann zafer Private Public Partnership.

Parski i pa akseptab ki nou met sa anba PPP. Kan in fact se en papa avek son avek son zanfan. Sa ou pa kapab dir be sa i apel en incest. I pa apel PPP sa, sa i apel incest Mr Speaker.  Mersi bokou.

 

MR SPEAKER

Minis ou anvi fer komanter lo la.  Minis ?

 

MINISTER PETER LAROSE

Mersi bokou Mr Speaker. Mersi bokou Onorab Ramkalawan. Kot i konsern regilasyon PPP nou ape re vizit sa pou nou finalize kot tou keksoz i pou bezwen tonm, parey ou’n dir – se Procurement Oversight Unit se pou met serten kontrol disiplin.

Me natirel se ki nou pou bezwen fer sir ki tou bann proze menm ki enkli Public Private Partnership proze i ganny tender out. Sa cette en legzersis kot nou pou bezwen swivre tre pros a lavenir.

Me malerezman sa se en tranzaksyon ki’n pase dan lepase. Se i donn nou serten met nou lo en serten alert pli pou être pli  vizilan – pou être pli disiplin a lavenir.  Mersi.

 

MR SPEAKER

Onorab Ramkalawan.

 

HON WAVEL RAMKALAWAN

Sorry mon bezwen met ankor en parol. Mr Speaker tou sa ki nou pe tande la, i montre nou ankor enn fwa ki mannyer anba ansyen Prezidan James Michel, sa pei in perdi li, nou pa konnen konbyen milyon.

E sa ankor enn fwa i montre nou ki pou dir sa Komisyon Anti-Koripsyon pou bezwen al fouye. Parski sa pei pe perdi tro bokou larzan e regilasyon i ganny fer isi regilasyon i ganny fer laba. I ganny kase nou konsesyon i ganny donnen.  E napa nanryen ki vin ofisyel.  Napa nanryen ki en Lalwa zis nou pou revwar.

Be mwan mon anvi konnen, ki mannyer nou pou kapab  reganny sa bann larzan ki lepep Seselwa in perdi atraver sa bann tranzaksyon.  Mersi bokou.

 

MR SPEAKER

Minis. Apre Onorab De Commarmond.

 

MINISTER PETER LAROSE

Mersi bokou Mr Speaker. Mersi bokou Onorab Ramkalawan. Mon krwar pou kapab relman si i annan en serten levidans kot natirelman larzan in perdi mon krwar Anti-Corruption Commision zot ava fer zot travay e tou bann facts come to the National Assembly e la lepep Seselwa i a konnen.  Mersi.

 

MR SPEAKER

Onorab De  Commarmond.

 

HON CHARLES DE COMMARMOND

Mersi Mr Speaker. Mr Speaker premye keksoz mon ti ava kontan dir lo sa kestyon. Se i annan bann proze – dapre ki nou konpran, semenn pase mon krwar ti sorti, e mon krwar in ganny dir ankor – i annan serten proze avek laspe sekirite ki kapab pa pas atraver prosedir tender normal.

Si sa alor i en prosedir i en Polisi – me annou met sa Polisi, si kekfwa i annan dimoun dan nou pei ki pa konn sa Polisi, pa konnen si egziste. Mon ti ava demann Minis Finans si i egziste sa anba Lalwa, fer pibliy sa Lalwa dan bann zournal – en fason dimoun i a konnen.

E dezyenm pwen. I enportan fer resorti keksoz dan nou  Lasanble. Dan letan Bidze nou ti osi koz sa size sa Independence House Annex la. E ti annan en komikman fer par Minister Finans ki i ti dir zot pou get dan posibilite pou zot raise sa larzan pay-off sa kontrakter ki pou ki napa sa akimilasyon larzan ki pa vin en gro sonm. Parey in ganny dir la. E ki konmsi ou pay li off. Apre Gouvernman li i ava annan sa det pou li peye ouswa i ava vin dan son Bidze. Ti a bon ki Minister Finans i donn nou en update lo la lo sa desizyon. Si zot in fer keksoz ouswa si zot  trenn lipye zot pa’n fer nanryen. Fer nou konnen ki’n arive lo la.

Apre sa issue PPP Public Private Partnership osi si i annan en keksoz an ekrir lo la. I annan en Polisi, i annan en direktiv i kler. Non si i napa i napa, nou a konpran. Me si i annan pibliye tou dimoun i a konnen.

Petet i ava annan serten lezot Seselwa ki anvi avek bann lide inovativ ki bokou Seselwa i annan, i anvi antre dan Private Partnership ek Gouvernman pou serten keksoz, i ava konnen ki semen pase ki i pou pase. E konmsi tou dimoun i ava konn tou keksoz ki pe pase dan pei.  Mersi.

 

MR SPEAKER

Minis.

 

MINISTER PETER LAROSE

Mersi Mr Speaker. Mersi Onorab De Commarmond. Kot i konsern sa Private Public Private Partnership Agreement la, natirelman se ki nou ava regard dan sa bann Lalwa ki diriz sa kalite tranzaksyon koumsa.

E nou ava fer piblikasyon kot tou Seselwa i ava être okouran ki sa Lalwa i demande. E ki lobligasyon i annan ant 2 diferan parti.

E kot i konsern ou lot kestyon Onorab ?

 

HON CHARLES DE COMMARMOND

Mon demann osi, lo kestyon, sa kestyon serten proze avek laspe sekirite. Mon krwar dapre dir i kapab ganny fer san tender. Sa osi ti bon sa latransparans lo la. I ganny pibliye pou dimoun konnen si nou pe al dapre Lalwa ouswa si i pe kas Lalwa si kwa.

Apre ti annan ‘komikman ki Minister Finans ti fer dan Lasanble letan Bidze. Lo sa Independence House Annex la. Ti bon zot donn nou en update ki’n arive ek sa komikman ki zot ti fer dan  nou Lasanble Minister Finans – si i annan serten desizyon in ganny pran, si zot pe bouze, si zot in les tonbe sa zafer.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab De Commarmond. Kot i konsern serten tranzaksyon direct bidding i permet anba Lalwa. Nou ava pibliye – ou’n demann nou pou pibliye  nou ava fer li.

E kot i konsern ?

 

MR SPEAKER

Sekirite pou serten konstriksyon ?

 

MINISTER PETER LAROSE

Mr Speaker kot mi konsern sa Lagreman pou revwar PPP Agreement. E sa ki nou ti’n promet-e dan Lasanble nou pe vwar li dan mid-year review Onorab De Commarmond.  Mersi.

 

MR SPEAKER

E dernyen kestyon siplemanter Onorab Ferrari. Apre Onorab Larue.

 

HON JEAN-FRANCOIS FERRARI

Mersi Mr Speaker. Mr Speaker mon pa en ni en ekonomis ni en accountant. Selman mon pa tro bet. Mon’n fer en pti kalkil. En proze ki kout 118 milyon. Ou pe prêt larzan 11 poursan. E pou re pey li lo 9an. Normalman ou devret pe re pey apepre R1.6 milyon par mwan lo 9an.

Sa konpannyen ki Gouvernman sa pti konpannyen Green Tree Investment i pe demann Gouvernman pou rann li R2.1 milyon par mwan. Ki fer R5 san mil an plis ki sa 1.6 ki mwan mon’n kalkile would be a reasonable payment.

R5 san mil par mwan, si mon kalkil i bon. R5 san mil par mwan i en kantite larzan. i fer 6 milyon par an. I fer 56 milyon over that period. I en kantite larzan. So mon ti a kontan repran sa pwen ki Onorab De Commarmond in fer taler. Si i pe kout nou sa kantite ; si sa deal ki nou’n fer en papa ki’n fer ek son piti i pe kout nou pei R5 san mil par mwan. Be annou rod en fason pou nou sorti dan sa deal.

Akoz nou pou mor, nou pou koule. Nou pa pou kapab kontinyen peye a bann gro, gro sonm larzan. Ler sa bilding pou fini dan 9 an zot menm zot ki pou dir la in ler pou fer renovation ankor pran ankor en 40, 50 milyon ou a fer renovation. Nou pa pou fini Minis. Konmsi mon ti a vreman kontan si ou kapab dir nou pou dir ou still angaze dan rod en solisyon a lonterm pou sa proze e met lo latab, en vre terms Public and Private Partnership.  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mersi bokou Onorab Ferrari. Anvi ki ou’n fer ou kalkilasyon les nou prouv ki ou kalkilasyon i byen. Nou a ganny bann detay. Nou ava donn ou. Si i annan okenn keksoz ki mal nou ava re negosye. Parske sa i fairness and justice.  Mersi.

 

MR SPEAKER

Onorab Larue.

 

HON FLORY LARUE

Mersi Mr Speaker. Bonzour tou dimoun. Bonzour Minis. La nou vwar Green Tree Investment ki propriyeter sa building. Li son propriyeter se Green Island Construction. Green Island Construction ki ti kree sa lakonpannyen ki apel Green Tree Investment. E li Green Island Construction li i ti ganny kree par IDC.

Nou vwar osi ki Green Island Construction in fer en lot lakonpannyen. Ki apel Green Oak  ki li i pe fer Supreme Court pe renovate Supreme Court ansanm avek Green Island Construction. Osi anba PPP. E Green Tree Investment li i ti ganny en bout later pou R1 ki pa ti ganny tender lo Ile Aurore  pou en lot proze ki pe al fer.

Lefe ki la nou vwar ki IDC i annan li Green Island Construction, Grenn Tree Investment, Green Oak, mon ti a kontan demann Minis si i kapab dir nou si IDC ouswa  GICC, si zot annan ankor. ‘piti ki nou kapab konnen.

 

(laughter)

 

HON FLORY LARUE

E si zot kapab garanti nou ki lafen lannen Green Oak, Green Tree  ek Green Island Construction pou montre nou en profi apre tou sa laranzman ki’n ganny fer, pou zot kapab ed Gouvernman Sesel.  Mersi.

 

MR SPEAKER

Well ou kestyon i an deor the scope of sa enn ki ou ti’n ki Onorab Ferrari ti’n demande. Ki zis spesifikman lo extension Independence House. Me solman mon ti a sizere Onorab Larue, mon ti a sizere ki ou annan drwa pou anmenn en kestyon. Spesifikman lo Green Peace, Green Tree and Green wathever. Anmennen e am sure Minis i a reponn, oubyen Minis ki responsab i a anmennen. Onorab Larue ale ou annan en dernyen mo. Wi.

 

HON FLORY LARUE

Non mon remersi ou  bokou Mr Speaker. Me prezan Minis i konnen ki annan diferan Green Tree e 2 lezot PPP an plas i annan sa enn pou Supreme Court e ava annan sa Ile Aurore.  Mersi.  I pa ti konnen avan.  Mersi.

 

MR SPEAKER

Mersi Onorab Larue. Mon sir Minis i apresye e ou pe enform nou tou pa zis li. Onorab Ramkalawan ou ti annan en dernyen pwen.

 

HON WAVEL RAMKALAWAN

Yes Mr Speaker. Vi ki lo tou lede kote latab an relasyon avek sa kestyon. Tou lede kote latab nou’n vwar ki pou dir sa kantite larzan, ki Gouvernman pe antreprann pou sa batiman i eksesiv.

Eski Minis pa kapab anpes sa lemorazi ?  Aret sa lemorazi deswit silvouple?

Eski Gouvernman pa kapab pran en desizyon pou ki sa, parey nou ti’n tonm dakor – ki enn fwa pou tou nou fini avek sa bann zafer plis ki 5san mil, plis ki 2.4 milyon. Once and for all nou fini avek sa.

E nou konnen ki pou dir sa batiman pa pou ariv 225 milyon. I fini vin pou nou. I fini vin pou nou. Ganny en laranzman konkret avek IDC atraver Green Island, Green Tree ensidswit, pou ki once and for all nou fini avek sa. Menm parey osi pou debaras nou avek ansyen Lakour tou sa bann zafer.

Annou sorti dan sa pyez kot nou ete. E mon krwar ki se sa ki Lasanble pe dir. Annou sorti dan sa pyez pour ki larzan i ava vin kler. E Lepep Seselwa i ava benefisye avek son larzan e kou lavi i ava desann.

 

MR SPEAKER

Minis avan ki ou reponn mon krwar Leader Government Business i annan keksoz pou dir dan sa laliny. Onorab De Commarmond.

 

HON CHARLES DE COMMARMOND

Mersi Mr Speaker. Se egzakteman sa ki mon’n demande ki zot pa’n reponn. Se sa konmsi ti annan en komikman ki ti ganny fer dan nou Lasanble to that effect.

Me dir nou Minister Finans. Zot in fer, zot pa’n fer, zot anvi fer, zot pa pou fer. Pou nou konnen se tou.  Mersi.

 

MR SPEAKER

La, tou lede kote, tou lede Leaders in koze. Minis ou prononse avan nou pran nou break.

 

MINISTER PETER LAROSE

Mersi bokou Mr Speaker. Mersi bokou bann Onorab ki poz kestyon. E i en sityasyon kot nou bezwen re negosye tou sa bann laranzman ki’n traverse dan lepase.

Natirelman nou bezwen regard ki swa son Green Island, Green Oak, Green Tree IDC whatever the whole lot. Nou bezwen reorganiz nou dan en serten fason parey Onorab Ramkalawan in dir. Ki nou aret sa lemorazi enn fwa pou tou.  Mersi.

 

MR SPEAKER

Mersi Minis. Avek sa mon krwar nou pou adjourn pou poz dezennen.

Mon ti annan 2 lanons pou dir ki imedyatman apre nou adjourn Truth and Reconciliation Committee pe zwenn dan Room 3.

Zot oule finaliz zot rapor lo travay lo Komite. Parey, zot ti’n donn en commitment lafen Zen pou zot soumet avek Prezidan.

Apre osi Komite Zil 1er apre midi dan Committee Room 3 zot pe zwenn ankor pou konplet zot rapor premye parti zot travay.

Alor sa 2 Komite direkteman apre sa Truth and Reconciliation 1er pou annan Komite Zil dan Room 3.

Avek sa Minis ou annan ankor 4 kestyon pou reponn apre midi. So mon sipoze i ok avek ou pou retournen 2er ?

 

MINISTER PETER LAROSE

Mr Speaker, ozordi i mon zour pou reponn kestyon – mon a retournen.  Mersi.

 

MR SPEAKER

Tre byen. Savedir ou a retournen 2er. Onorab Ramkalawan ou annan en pwen oule fer sorti.

 

HON WAVEL RAMKALAWAN

Mr speaker zis mon ti anvi dir ki dan sa miting Komite Zil, nou ti ava kontan si tou bann dimoun, tou bann Manm Lasanble ki’n akonpanny nou lo serten bann vizit zot osi tou zot ti ava join nou lo sa dan sa miting 1er dan Room 3.  Mersi.

 

MR SPEAKER

I enkli savedir Clerk osi ki’n laba? Mersi. E osi nou a donn ou Rapor ki finans in donn nou pou FPAC. Bon avek sa nou a rezwenn 2er isi pou nou kontiny nou travay.

 

(BREAK)

 

 

MR SPEAKER

Bon, bonn apre midi tou dimoun, nou a kontinyen avek nou travay ki nou’n konmanse bomaten. Fotespere tou dimoun in pran en bon repa e zot annan bokou lenerzi pou sa long apre midi. Nou ava al toudswit lo kestyon limero 8 egzakteman. Kestyon limero 8 e nou a demann Onorab Sylvanne Lemiel pou poz son kestyon pour Minis Finans. Onorab Lemiel.

 

HON SYLVANNE LEMIEL

Mersi Mr Speaker. Bonn apre midi tou dimoun. Eski Minis pour Finans, i kapab dir sa Lasanble, si son Minister i kapab etablir en sistenm atraver Labank Santral, pou kontrol e redwir lentere lo bann loan par egzanp fer ki sa lentere pa depas plis ki 10 poursan? Mersi Mr Speaker.

 

MR SPEAKER

Minis.

 

MINISTER PETER LAROSE

Mr Speaker, kestyon ki Onorab Lemiel pe demande i pe preokip bokou Seselwa ki annan en kont avek Labank Komersyal, an vi ki lekonomi Sesel i liberalize, Gouvernman napa kontrol direk lo to lentere ki ganny sarze lo loan. Savedir parey le ka dan bann lezot marse lib, to lentere lo loan i ganny libreman determinen par marse parey le ka par to lesanz dan marse deviz etranzer. Atraver son Polisi monneter, Labank Santral i endirekteman donn en lendikasyon ki direksyon to lentere i merit bouze dan lekonomi. Labank Santral i okouran ki bann direktiv pa pe neseserman ganny transmet ziska kot zot kliyan dan marse finansyer. Pou sa rezon zot pe re-vizit lafason ki zot enplimant zot Polisi Monneter pou fer ki mouvman dan lentere kot bann labank komersyal i konsistan avek direksyon ki Labank Santral pe donnen. Pou ede fer lentere desann, Gouvernman an partenarya avek Labank Komersyal, in entrodwir diferan Scheme spesyalman pou pti biznes. Gouvernman i sibvansyonn loan ki fer Seselwa i pey en pe mwens sirtou pou bann pti biznes. Pou promot sa konpetisyon e benefis ki to lentere i redwir, piblik i ganny demande pou negosye avek zot labank avan ki zot antre dan en kontra loan avek zot labank. Si i annan kliyan ki kapab ganny en pe pli mwens meyer kondisyon avek en lot labank zot osi ganny avize pou esey vwar si zot kapab sanz labank si i posib. Parfwa se ki dan en pti lekonomi, i pa telman fasil pou ou kapab sanz labank de zour a lannmen parske ler ou’n sanz en labank ou al kot en lot labank i pou kapab konmans demann ou en seri kestyon akoz ou pe vin kot li. Avek en tel sityasyon nou bezwen zwenn bann labank e osi Central Bank pou vwar ki mannyer nou kapab adres sa problenm an ansanm. Mersi Mr Speaker.

 

MR SPEAKER

Onorab Lemiel.

 

HON SYLVANNE LEMIEL

Mersi Minis pou ou larepons. Minis be letan mon pe get sityasyon mannyer i ete i paret ki mazorite bann labank komersyal zot menm zot pe vreman swiv sa Polisi zot. Me Labank Santral li i pe dir wi poudir i pe al revwar son Polisi an plas. Me selman mon pe mazinen napa kek negosyasyon ki kapab ganny fer petet menm pa ek en labank komersyal mon pa konnen si kantmenm DBS, nenport kekfwa ki kapab ede pou fasilit lentere lo loan redwir, fer li vin pli ba? Mon pa konnen si ou’n konpran mon kestyon Minis. Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker e pou reponn ou kestyon Onorab Lemiel, se ki i annan en tandans kot nou pou bezwen fer sa travay ansanm ki swa Minister Finans, Labank Komersyal e Labank Santral. Set en lagreman kot nou tou nou bezwen al tonm dakor ansanm kot parey si reelman nou demann ki Labank Komersyal i redwir zot lentere, natirelman petet i pou annan lezot fre osi ki zot pou esey fer monte e nou bezwen fer sa ansanm dan en dyalog. Mersi.

 

MR SPEAKER

Onorab Valmont.

 

HON JUDE VALMONT

Mersi Mr Speaker. Bonn apre midi. Minis dan laliny kestyon Onorab Lemiel e mon’n tann ou mansyonn negosyasyon avek bann labank, Central Bank, petet mon pou demann ou pou konsider osi Credit Information System, sa sistenm la. Mon a donn ou en legzanp senp mon annan en zabitan, en koup, zot apply en loan ek HFC, madanm i end up pe pey sa loan, msye pa peye, i al labank pou apply en pti personal loan pou en pti transpor, zot dir li akoz sa CIS, i pa pe ganny konsidere pou en lot loan. Petet an negosyasyon mon ti a sizere osi get sa pou fasilit lavi Seselwa. Mersi.

 

MR SPEAKER

Minis.

 

MINISTER PETER LAROSE

Onorab Valmont, sa i en tre bon sizesyon, nou a pran li an konsiderasyon. Mersi.

 

MR SPEAKER

Onorab Ferrari.

 

HON JEAN-FRANCOIS FERRARI

Mr Speaker, mersi. Mr Speaker, mon ti a kontan demann avek Minis si normalman dan tou bann ekonomi modern napa en fourset rezonnab e akseptab ant deposit rate, on borrowing rates ek savings rate ? Konmsi akoz isi Sesel ou a krwar konmsi ou ganny en pti morso ler ou depoz ou larzan, ou pey en kantite ler ou pret larzan. Konmsi napa sa fourset la, pa kapab fermen en pe pou fer li vin annan en standar kekfwa enternasyonal oubyen kekfwa si i annan ban spesifisite pou Sesel ou a kapab dir nou ki mannyer sa i devret marse. E vwala. Mersi Mr Speaker.

 

MR SPEAKER

Minis.

 

MINISTER PETER LAROSE

Mersi Mr Speaker. Kot nou regard to lentere lo savings avek lo loan, i annan en gran diferans – e si nou regarde petet nou fer en pti analiz lo tou bann labank zot diferan akoz zot operating structure. E si nou regarde se ki sa bann labank zot sivre en stratezi ki a leksteryer apard ki nou 2 labank Seselwa ; me sa osi i en sizesyon kot nou kapab petet analize letan nou pe diskit redwir to lentere. Mersi.

 

MR SPEAKER

Onorab Ferrari.

 

HON JEAN-FRANCOIS FERRARI

Mersi Minis pou ou repons. Minis eski ou kapab eksplik nou ki egzakteman i vedir ler nou koz lo lendepandans Labank Santral e market forces dan lekonomi ? Akoz bokou dimoun, enkli mwan menm, ki pa en ekonomis pa vreman kapab konpran akoz Labank Santral pa kapab entervenir pou fer bese to lentere ? Akoz i pa kapab entervenir ? Konmsi kwa eski sa i normal ou eski i en direktiv IMF? Eski… Akoz tou piblik pe dir ‘‘be Gouvernman ki i pe fer, Labank Santral ki pe fer’’ ? Bann to lentere i la. La nou’n vwar poudir lo en loan, Gouvernman ki ti pe pey R1.9 milyon par mwan, i pe pey li R2.1, lo en loan en pti logmantasyon lentere, i pe kout Gouvernman R200 mil par mwan. Konmsi i vre ki zot pa kapab entervenir oubyen i zis ki par ler nou pe behave en pe pli katolik ki Lepap isi. Mersi.

 

MR SPEAKER

Minis.

 

MINISTER PETER LAROSE

Mersi Mr Speaker. Onorab Ferrari se ki se vre lendepandans Labank Santral se ki alor li i fer son desizyon dapre ki direksyon ki son Bord i donn li ek son management team, i fer bann analiz lo lekonomi lokal e eksteryer e natirelman se ki Labank Santral i annan en serten pouvwar si ler i donn en direktiv labank zot pa sivre sa direktiv, i annan en serten provizyon ki donn li sa pouvwar pou li fine sa bann labank komersyal. Petet kekfwa nou bezwen vwar ki mannyer nou kapab servi sa Lalwa, pou fer sir ki sa bann labank komersyal i sivre direktiv ki nou donnen. Mersi bokou.

 

MR SPEAKER

Onorab Churchill Gill.

 

HON CHURCHILL GILL

Mersi Mr Speaker. Minis sa sityasyon si meton akoz nou pe koz sa en pe letan la, depi letan Bidze, depi lannen avan nou pe koze e petet in plis ki ler ki Central Bank vreman i servi son provizyon akoz si non, Labank Komersyal pou annan en tandans ki zot preski kapab fer sa ki zot le. Personn pa pe kapab dir zot nanryen e son danze ladan se si demen nou vwar dan nou lekonomi nou vwar ki sa bann dimoun i deside squeeze nou pou letan zot santi zot pa pe ganny challenge avek sa bann provizyon ki kapab challenge zot petet nou pou vwar nou dan en sityasyon difisil. Mon krwar in ler la san plis koze nou bezwen vwar sa provizyon e konmans aksyonn lo la. Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mon toutafe dakor avek ou Onorab Gill kot in ler petet pou Labank Santral servi son pouvwar pou fer sir ki sa bann labank komersyal i sivre direksyon e lenstriksyon ki zot ganny demande pou redwir lentere dan en serten fason ki zot pa antre zot dan en loss-making. Parske ler en labank i fer en loss, i annan son lot lenplikasyon. Lenplikasyon i tou depan ki groser loss i fer akoz i kapab annan inter-banking relationship avek lezot labank ki kree en systemic risk nou apel sa, an term banker. E la si en labank, depandan groser loss ki i fer si nou pa fer atansyon i pou trenn lezot labank avek li e natirelman sityasyon pou reelman tonm anler lo Gouvernman pou sey fe en fason pou fer en rescue plan pou save nou sistenm finansyel ki telman tre enportan. Nou kapab petet kekfwa napa diri pou en zour me si i annan en problenm avek labank, pa kapab fonksyonnen, la pei pou an danze. Mersi bokou.

 

MR SPEAKER

Mersi Minis. Si napa okenn lezot kestyon siplemanter lo… Onorab Afif.

 

HON AHMED AFIF

Mersi Mr Speaker. Mon ti a kontan demann Minis si i pa krwar poudir son lentervansyon konman propriyeter 2 labank i kapab ede pou redwir lentere ? Mon pe dir sa parske Nouvobanq i en gro labank Gouvernman anfen 78 poursan par i pou Gouvernman e answit ou annan Seychelles Commercial Bank li osi pou la pli par son bann par ladan pou Gouvernman, eski zot pa kapab met presyon lo sa 2 labank san ki zot perdi larzan parske Nouvobanq li pou 2015 in fer R185 milyon, i pa konmsi i pros pou li konmans perdi larzan kantmenm i ti fer li R50 milyon ou ti a ganny ou R130 milyon lentere ki dimoun ti a pey mwens dan pei ki en kantite larzan. Sa i zis enn be selman son benefis se ki ler li i pou fer desann tou larestan pou bezwen fer desann parske si non zot pou perdi biznes. E la dan sa fason ou ti a vwar en kantite lentere partou dan pei. Eski i napa posibilite pou Gouvernman fer sa ? Mersi.

 

MR SPEAKER

Minis.

 

MINISTER PETER LAROSE

Mersi Mr Speaker. Mon krwar Onorab Afif in met en tre bon sizesyon e se sa ki mon pe sey fer fason pou nou servi nou labank lokal ki labank Gouvernman konman en anchor pou fer sir ki larestan lezot labank i sivre sa trend. Mersi.

 

MR SPEAKER

Mersi Minis. Nou ava al direkteman lo kestyon… Eski kestyon limero 9, mon kapab demann Onorab Ramkalawan dan labsans Onorab Georges pou poz kestyon limero 9, silvouple ?

 

HON WAVEL RAMKALAWAN

Mersi bokou Mr Speaker. Lo la par Onorab Georges ki’n bezwen malerezman sot en pti kou Ankour pou en case. Mon a demande Eski Minis pour Finans, i kapab donn sa Lasanble, en lalis tou bann

Lorganizasyon ki pe aktyelman benefisye avek kontribisyon Corporate Social Responsibility Tax (CSR) peye par Lakonpannyen Sesel? Mersi.

 

MR SPEAKER

Minis.

 

MINISTER PETER LAROSE

Mersi Mr Speaker. Bomaten mon’n soumet en lalis avek tou Manm Lasanble, fotespere tou Manm in ganny en kopi ki mansyonn sa bann lorganizasyon ouswa group ki resevwar sertifika ou en let CSR. Sa lalis i konpreansiv e mon swete ki tou Onorab petet in ganny en sans pou pas en pti pe lo la pandan lunch time e si i annan okenn kestyon adisyonnel nou pare pou reponn. Mersi.

 

MR SPEAKER

Onorab Ramkalawan.

 

HON WAVEL RAMKALAWAN

Yes. Mersi bokou Mr Speaker e vre nou’n ganny sa lalis. Mr Speaker lo sa lalis mon pa vwar Jj Spirit Foundation ki mon konnen i enn bann lorganizasyon ki ti pe resevwar CSR tax sorti kot enn de bann gro lakonpannyen. Mon vwar enn ki apel Jejoyty mon pa konnen si in sanz non. Eski Minis i kapab dir nou si sa lorganizasyon i ankor pe resevwar sa tax CSR? E an plis ki sa eski i posib pou serten lorganizasyon ganny sa tax dan en fason anba latab? Mersi bokou.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Kot i konsern Jj Spirit Foundation son sertifika in ekspire depi Desanm 2016 se la en rezon ou pa vwar li lo sa lalis. E kot i konsern lezot group kot i kapab ganny CSR natirelman nou kapab fer nou Seychelles Revenue Commission regarde ki pozisyon anler lo la. Mersi.

 

MR SPEAKER

Onorab John Hoareau.

 

HON JOHN HOAREAU

Mersi Mr Speaker. Bonn apre midi Mr Speaker. Mon ti le konnen Mr Speaker ki kriter ki ganny servi pou donn sa bann diferan lorganizasyon CSR tax. Mersi.

 

MR SPEAKER

Onorab Minister.

 

MINISTER PETER LAROSE

Mersi bokou Mr Speaker. Pou reponn Onorab Hoareau ou kestyon sekter ki kalifye i annan Proteksyon, Prezervasyon Lanvironnman ; i annan ledikasyon e Capacity Development, Community Development, Sports, Health, Social, Arts and Craft epi Prevention of Drugs and Abuse expenditure. Mersi bokou Mr Chair.

 

MR SPEAKER

Onorab Hoareau.

 

HON JOHN HOAREAU

Mersi Mr Speaker. Menm si ou’n klarifye en pti Minis, bann diferan lorganizasyon ki fason zot ganny kalifye pou zot ganny sa, mon still vwar ki i annan serten lorganizasyon, dizon par egzanp mon pa napa lentansyon pou ni rasizm me selman par egzanp mon vwar Seychelles Tamil Moondrum mon ti le konnen ki fason, dizon en group Tamil en lasosyasyon Tamil i tonm anba sa bann kriter ki ou pe dir. Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Seychelles Tamil Moondrum ki Onorab Hoareau in mansyonnen, si zot fer okenn special program, i annan en serten kondisyon ki zot ganny sa CSR. Mersi.

 

MR SPEAKER

Onorab Afif.

 

HON AHMED AFIF

Mersi Mr Speaker. Mon ti a kontan demann Minis si i kapab donn nou en lenformasyon adisyonnel se sa bann lorganizasyon konbyen zot in resevwar an CSR sakenn pou sak lannen ? Si i ti kapab osi donn nou Jj Spirit Foundation, konbyen in resevwar parske i ti pe resevwar, kantite larzan an CSR. Finalman si i kapab dir ek nou, si i annan sa lenformasyon kot serten lakonpannyen zot pa donn en lakonpannyen CSR me ki zot fer se zot dir ek Gouvernman zot pe vin fer en proze e sa proze zot, zot a finanse olye pey Gouvernman sa CSR. Sa nou ti ganny en legzanp par egzanp o bor Airport ler i ti pe fer louvraz si mon pa tronpe en lakonpannyen konstriksyon e i annan plizyer ankor. E alor si zot kapab dir nou konbyen sa bann louvraz ki pe ganny fer ki pa antre dan Bidze me selman i pe ganny fer e i pe ganny finanse atraver CSR ?  Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Kot i konsern detay anler lo CSR fransman mon napa full database figure avek mwan me nou a fer zot gannyen. E kot i konsern Jj Spirit osi nou a petet osi an menm enstan profite pou donn full report anler lo la. Si i annan konpani ki ganny serten privilez, sa osi nou a bezwen mansyonnen lekel sa bann konpannyen ki annan sa privilez anba sa CSR. Parske nou pou bezwen aplik sa dan en fason pli zis. Mersi bokou.

 

MR SPEAKER

Onorab Larue.

 

HON FLORY LARUE

Bonn apre midi Mr Speaker. Mersi bokou. Eski bann NGO swa bann Fondasyon, eski ki zot annan drwa pou advertise ki zot kapab resevwar CSR tax lo zot website akoz mon vwar tou le 2 Jj Spirit ki son website in ganny update an 2017 lo kote donasyon i dir ki li i kapab resevwar CSR tax. Osi James Michel Foundation son brochure 2017 lo paz 28 i dir ki li osi i kapab resevwar sa CSR tax. Eski ou kapab eksplik nou akoz? Eski sa pa frod? Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Kestyon, mon repons pou Onorab Larue se ki mwan mon pa’n vizite website James Michel Foundation. E dezyenmman kot i konsern NGO kot sirtou kot i konsern CSR Tax, sa osi se ki mon annan sa lalis, mon pou bezwen fer en pe plis travay anler lo la e i pa en kestyon ki petet mon pe fer leskiz, non si mon pa’n fer en travay anler lo la mon pa konn ase lenformasyon, mon bezwen dir ek sa Lasanble tre fransman. Mersi bokou.

 

MR SPEAKER

Wi, Onorab Larue.

 

HON FLORY LARUE

Eskiz mwan, with all due respect Mr Speaker, mon pa tro kler lo larepons Minis, eski i pe dir nou ki sa lalis i pa up-todate ouswa i pe dir nou ki konmsi… mon pa pe konpran letan i pe dir nou i pa ankor fer ase travay. Mon pa konpran son larepons.

 

MR SPEAKER

Minis petet ou a eksplik ankor sa ki ou’n fek dir pou Onorab Larue.

 

MINISTER PETER LAROSE

Mr Speaker, natirelman mon pou bezwen regarde tou sa bann group ou endividi ou si non Foundation ou si non NGOs ki’n resevwar sa fasilite CSR. E kote i konsern James Michel Foundation, mon pa telman kapab donn en larepons direk la parske mon ti okouran si li in advertise anler lo son website poudir i kapab resevwar CSR receipts. Mersi.

 

MR SPEAKER

Wi, Onorab Larue, eski ou pe al demann nou lo sa group ‘Nou La Pou Ou’?

 

HON FLORY LARUE

Mersi bokou Minis pou sa lesplikasyon savedir i garanti nou ki pou 2017 i napa en sertifika pou li ganny CSR?

 

MR SPEAKER

Minis petet re-eksplik ankor.

 

MINISTER PETER LAROSE

Mersi bokou Mr Speaker. Mon krwar se Onorab Larue pe challenge Larose la set apre midi la. E si reelman, natirelman ki son Sertifika in ekspire 2016 e 2017 natirelman napa, mon krwar i pa normal sa. Mersi.

 

MR SPEAKER

Ok. Onorab Aglae. Onorab Aglae, en pti moman lo menm laliny Onorab Ramkalawan.

 

HON WAVEL RAMKALAWAN

Wi, Mr Speaker i en sityasyon serye sa e mon pe demande ki aksyon ki Minister Finans i pran avek bann lorganizasyon ki pa devret resevwar CSR e ki donn piblisite zot lekor konmkwa zot kapab resevwar CSR ?  E mon ti ava osi demande si Minister Finans ti ava kapab dan sa ka, lefe ki tou le 2 e mon pe regarde la tou le 2 pe advertise ki zot kapab resevwar CSR si Minis ti ava kapab donn nou o pli vit posib si i kapab avan lafen sa semenn donn nou en lendikasyon si depi 2017 sa 2 lorganizasyon in resevwar okenn CSR avek okenn lakonpannyen e dan sa ka zot in fer, i ilegal e dir avek nou ki kalite aksyon zot pou pran? Mersi bokou.

 

MR SPEAKER

Petet dan menm laliny Minis si i ti kapab klarifye si zot donn en Sertifika. Mon krwar PS Payet ki Chair sa CSR Committee si zot donn en papye, petet mwan mon pe mal konsey dimoun. Mon’n ganny demande semenn pase, mon’n dir zot ekri PS Payet. Petet dan laliny kestyon Onorab Larue ek Onorab Ramkalawan ou a kapab anmenn en pe leklersisman pou piblik.

 

MINISTER PETER LAROSE

Mr Speaker, an relasyon avek kestyon par Onorab Ramkalawan, i ou le lenformasyon, nou a fer li ganny lenformasyon o pli vit posib. Si i annan okenn ki’n donn CSR sa 2 lenstitisyon, nou a fer Lasanble konnen. Mersi.

 

MR SPEAKER

Onorab Ramkalawan, wi.

 

HON WAVEL RAMKALAWAN

Eski Minister Finans i annan… ki pouvwar zot annan pou zot pran okenn aksyon kont en lorganizasyon ki’n resevwar CSR me ki zot pa annan okenn license pou zot resevwar ? Parski sa Mr Speaker i ekivalan avek en frod, parske ou’n resevwar larzan san ki ou devret, ou napa permisyon. Mersi.

 

MR SPEAKER

Minis Finans. Order1

 

MINISTER PETER LAROSE

Mr Speaker, si sa 2 lorganizasyon napa en valid certificate pou zot resevwar CSR savedir zot an defo, enn. Dezyenm nou bezwen regarde lekel sa bann konpannyen ki’n finans CSR e nou, nou bezwen pran aksyon avek zot parske natirelman dimoun ki entitled pou resevwar CSR i bezwen prodwir en Sertifika ou si non en let. Mersi.

 

MR SPEAKER

Onorab Aglae.

 

HON EGBERT AGLAE

Mersi Mr Speaker. Bonn apre midi Minis. Minis dan lespri…

 

MR SPEAKER

Order ! Onorab Aglae kontinyen.

 

HON EGBERT AGLAE

Minis dan lespri transparans e dan sa lespri osi kot nou pe elimin bann form koripsyon ki striktir ki ou annan, sa Komite CSR, mon konnen i ganny Chair par PS Payet, ki annan an plas pou kapab, premyerman fer bann sistenm verifikasyon. Si fodre fer auditing osi pou vwar ki bann deklarasyon CSR ki sa bann entity, company ki pe donn sa bann benefactor ki i vre, sa bann claim i vre e ki zot pe donn sa ki in stipile ki zot in donnen antretan ki ler zot pe vin fer zot claim osi ki i annan sa balans Minis. Mersi.

 

MR SPEAKER

Minis.

 

MINISTER PETER LAROSE

Mersi Mr Speaker. Pou reponn Onorab Aglae lo sa Komite, i annan en dimoun Tax, i annan en dimoun SRC e sa natirelman si nou sispekte ki i annan keksoz ki pa annord dapre Lalwa nou kapab fer en lenvestigasyon avek sipor Oditer Zeneral toudswit e la nou kapab pran aksyon neseser. Mersi.

 

MR SPEAKER

Onorab Georges.

 

HON BERNARD GEORGES

Mersi Mr Speaker. Mr Speaker mon demann en kestyon siplemanter dan laplas mon kestyon. Avan ki mon demann mon kestyon, mon kestyon siplemanter Mr Speaker, mon bezwen anliny avek nou prosedir dan Lasanble fer en deklarasyon e sa se mon en Trustee lo ICS ki i ganny 5 Corporate Social Responsibility payments. E mon kestyon siplemanter, mon kestyon se sa pou Minis ; mersi Minis pou annex 1 avek lalis bann lakonpannyen ki mon ti’n demande. Ler nou regard sa lalis nou vwar ki i annan serten ki byen merite, bann ki pe travay avek kanser eksetera me nou vwar osi i annan serten lorganizasyon ki pe ganny sa tax, parey Round Table, Rotary eksetera ki zot menm zot bann lorganizasyon ki lev fon. Nou vwar osi ki serten lekol i gannyen e serten PTA i gannyen me serten lekol pa gannyen, serten pa gannyen. E sa i paret ki bann ki annan kontak i kapab ganny en CSP, bann ki napa pa pou gannyen, CSR. Mon kestyon alor se sa, eski Gouvernman i krwar ki sa set en bon fason pou prosede? Ankouraz kontak direk ? Oubyen eski Gouvernman i krwar ki en fason en pe plis striktire kot i ava annan plis egalite dan bann recipients e kot bann dimoun ki pe ganny sa tax i ava bann ki merite, plis ki bann ki merit mwens. Eski Gouvernman i krwar nou devret reste avek sa, mannyer nou ete la konmela, ki en pti pe dezord e kot kontak i marse ? Oubyen eski Gouvernman i krwar nou devret anmenn en pe plis striktir dan sa prosedir ? Mersi Mr Speaker.

 

MR SPEAKER

Minis.

 

MINISTER PETER LAROSE

Mersi Mr Speaker. Pou reponn Onorab Georges se ki mon krwar an vi ki ou’n spot en serten anomali dan sa lalis ki nou’n prezante, mon krwar ti a meyer ki nou re-vizit sa lalis, refer en travay dan en fason pli zis pli annord. Me si i annan serten lorganizasyon ki an bezwen sa CSR si zot pou fe laplikasyon, i annan Komite ki ava konsidere e la mon krwar i ava en pe pli annord. Me senpleman parey ou’n sizere, mon krwar nou pou bezwen met nou house in order. Mersi.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker dan menm laliny bann kestyon la, ki mannyer ki Minis i kapab monitor, garanti ki i annan en monitor sa bann lorganizasyon, zot bann aktivite e ki mannyer zot pe… e si zot pe servi sa CSR byen? E si i kapab eksplik nou diferans ant Island Conservation Society ki trwazyenm lo son lalis ek sa bann ICS Silhouette, ICS Alphonse, ICS Desroche, ICS Farquhar, ICS Poivre Foundation? Konmsi ou nonm… taler Onorab Georges in nonm 5 la mon vwar ek sa enn i fer 6 ouswa i annan en diferans ant sa 2 ? E dernyerman eski, lo sa lalis mon vwar en bann lorganizasyon ki dan larealite normal ou pa tann zot, ou pa konnen si zot egziste, zot pa egziste, konmsi zot aktivite ki zot fer par egzanp LILA Jivan Education Foundation, ki i fer sa? St Louis Legendary Athletes Association, mon pa tann okenn konpetisyon ki zot pe fer ki i partisip ladan. Global Shapers Community, i osi ganny CSR, ki i fer li? Wise Ocean Seychelles, Anse Kerlan Avangard, mon konnen SPPF ti en parti avan gard lontan e nou ankor… Non SPPF nepli la prezan Parti Lepep ki avangard be la nou annan Anse Kerlan Avangard. Nou vwar par egzanp The Ocean Project Seychelles, Child Evangelism Fellowship of Seychelles, UN Youth, depi UN tou nou donn soz laba, nou donn CSR nou Sesel, Sesel en… The Meraki Foundation, konmsi lekel sa bann zafer nou pe donn CSR ? Nou pa ni konnen ki zot fer nou pa ni tann zot ni SBC pa dir nanryen lo zot, si ou kapab donn nou en pti pe klarite lo la. Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. E pou reponn Onorab De Commarmond, ou’n mansyonn en bann lalis, bann resipyan sa CSR ; e lo sa lalis ki nou’n donnen i pa dir lobzektif sa bann resipyan e mon krwar pou et en pe pli fair avek Lasanble nou a pas anler lo bann file parske zot bezwen donn serten dokimantasyon, anrezistre e ki zot donn en pe plis lenformasyon ; e alor petet kekfwa mon pa pou kapab reelman defini ki lobzektif sa bann diferan group. Alor nou a fer zot ganny sa prezan si i annan lezot kestyon siplemanter, mon a fer ou gannyen. E en tre bon kestyon Onorab De Commarmond. Mersi.

 

MR SPEAKER

Onorab Ferrari.

 

HON JEAN-FRANCOIS FERRARI

Mersi Mr Speaker. Mr Speaker mon ti a kontan demann Minis dan lespri transparans e…

 

MR SPEAKER

E?

 

HON JEAN-FRANCOIS FERRARI

Non, mon ti pe al dir Onorab Pillay en keksoz, lese mon pa ava dir li. Non dan lespri transparans, mon ti a kontan si Minis, si Minister Finans i pare pou konsider en Rezis pou nou pa vini, ale vini, lannen ale vini vin demann zot lekel entel i annan, Onorab Simon Gill i ganny CSR, i pa gannyen. Onorab Noline Sophola in gannyen i pa’n gannyen. Si nou kapab annan en rezis ki finalman ki li ki met sa dimoun, son bann obzektif e dan en fason ki sa i mars byen. Mon dezyenm keksoz lo baz en pe sa ki Onorab De Commarmond in dir en kantite ladan i deserve me selman mwan ki en dimoun ki pratik son larelizyon, mon pa satisfe vwar okenn larzan pe ganny okenn Larelizyon. Vreman mon believe seryezman ladan ler zot pou revwar sa, sa i Corporate Social. Si i annan bann, e mon krwar ki Gouvernman i devret annan bann channel ki i ede e ankouraz bann lorganizasyon relizye me pa atraver Corporate and Social.  Sinon nou pe melanz tou keksoz e nou pou vwar akoz i annan Minis, i annan en de bann nouvo… bann dimoun ki en pe expert lo raise larzan pou lo baz larelizyon, i konmanse li menm li en Per, dan 2 semenn i en Levek ki ansarz en sa e i ale. So nou bezwen veye pou nou fer sa byen. So mon, sa i en rekomandasyon e mon ti a kontan konnen si zot pare pou zot take onboard sa rekomandasyon. Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Kot i konsern en Rezis mon krwar i en tre bon sizesyon e nou pou al en pe pli lwen ki sa, nou bezwen publish li lo nou website kot dimoun i ava vwar lekel ki entitled pou sa bann CSR receipts. Mersi.

 

MR SPEAKER

Onorab Sebastien Pillay.

 

HON SEBASTIEN PILLAY

Mersi Mr Speaker. Mr Speaker prenant kont ki nou pe koz lo CSR e bann modalité ki egziste otour CSR, eski Minis i kapab klarifye i annan bann konpannyen ki tonm anba Company Special License Act 2003, e dan trwazyenm schedule Lalwa ki deal avek CSR i mansyonn egzanpsyon ki sa bann konpannyen i sipoze gannyen, eski Minis i kapab klarifye lekel bann konpannyen ki tonm anba sa kategori Company Special License ki ganny exempted from paying CSR ? Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Pou repons Onorab Pillay, se bann CSL parey ou mansyonnen, bann Company Special License ki ganny egzanpte, e sa natirelman se banne sa, sa bann konpannyen ki tonm anba Company Special License Act. Mersi.

 

MR SPEAKER

Onorab Pillay.

 

HON SEBASTIEN PILLAY

Mr Speaker, mon ti a kontan demann Minister Finans pou provide nou Lasanble avek en lalis bann konpannyen ki tonm anba Company Special License Act 2003. Mon ti a kontan klarifye eski bann Corporate Service Providers ki an 2003 ti ganny mete anba sa egzanpsyon ki ozordi given growth dan Sekter Offshore zot osi ganny exempt form paying okenn CSR, si wi akoz? Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. E natirelman pou bann Corporate Service Providers si ou le en lalis nou a fer ou gannyen e sa natirelman ti depi 2003 mon konpran… Depi 2013, pardon. E natirelman nou a kapab donn ou lalis bann konpannyen ki ganny egzanpte.

 

HON SEBASTIEN PILLAY

Mr Speaker, mon ti le klarifye ki…

 

MR SPEAKER

Dernyen kestyon siplemanter. Dernyen.

 

HON SEBASTIEN PILLAY

Thank you. Mersi Mr Speaker, mon preempt pou sa, eskize Mr Speaker. Mon ti le zis klarifye akoz ki prenant kont turnover bann Corporate Service Providers ozordi ki zot ankor pe tonm dan sa kategori konpannyen ki ganny egzanpsyon from paying CSR as opposed to lezot lakonpannyen ki pe bezwen pey sa CSR baze lo zot turnover parey Lalwa i spesifye.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Pou sa letan mon krwar mon ti met li anba sa lalis e nou kapab re-vizit sa ; parske i toutafe normal ki s pa kapab kontinyelman en defini. Mersi.

 

MR SPEAKER

Onorab Ghislain. Ou ti le en klarifikasyon lo sa ki fek ganny dir? Ok.

 

HON SEBASTIEN PILLAY

Mr Speaker, mon ti a kontan demann Minis pou provide nou Lasanble avek en lalis tou bann CSPs ki pe ganny exempt anba sa Lalwa, anba CSL, ki tonm anba CSL ki ganny exempt pou ki nou kapab vreman vwar ki pe arive dan Sekter Offshore e whether or not bann tax burden ki asosye avek lezot sekter pa pe ganny manke pou ganny asosye avek bann konpannyen ki trouv zot dan Sekter Offshore pou nou fer sir the playing field is equal pou tou dimoun. Mersi Mr Speaker.

 

MR SPEAKER

Eski sa i posib Minis pou annan sa lalis?

 

MINISTER PETER LAROSE

Wi Mr Speaker, nou ava donn Lasanble en lalis konplet. Mersi.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker. Mr Speaker mwan mon kestyon i koumsa, dizon par egzanp nenport endividi in deside fer en keksoz par egzanp in al en sponsored walk in fer, en pti proze ki’n demann CSR avek bann lakonpannyen, how do sa lakonpannyen i claim son CSR ou lefe ki sa endividi i napa en sertifika pou kapab prouve ki kapab kolekte CSR ? Mersi Mr Speaker.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Ou bezwen fer li atraver progranm ou si non en serten lenstitisyon ki kalifye pou kalifye pou kapab ganny sa CSR. Mersi.

 

MR SPEAKER

Dernyen kestyon siplemanter, Onorab Gill, Onorab Simon Gill.

 

HON SIMON GILL

Mersi Mr Speaker. Bonn apre midi tou dimoun. Mr Speaker annou met tou bann politik de kote, i enportan ki Minis konman i la nou profite pou li donn en leklersisman. Baze lo zot klasifikasyon ki ot annan lo nivo Minister, lo lezot bann lorganizasyon ki kalifye pou resevwar CSR, mon kestyon eski Jj Spirit Foundation i tonm dan sa kategori lorganizasyon ou lasosyasyon ki kalifye pou li ganny CSR ? Premye kestyon. Dezyenm kestyon, eski James Michel Foundation i tonm sa kategori lorganizasyon ou lasosyasyon ki kalifye pou ganny CSR ? Annou met sa la, klarifye, pou ki nou kapab met keksoz an perspektiv epi si i annan nesesite Mr Speaker, ou a permet mwan mon a kapab follow-up avek bann kestyon. Mersi.

 

MR SPEAKER

Minis petet ou kapab klarifye sa 2 kestyon silvouple.

 

MINISTER PETER LAROSE

Mr Speaker si par egzanp Jj Spirit avek James Michel Foundation i fer keksoz ki i annan en relasyon avek Polisi zot pa kalifye, me tandis si zot fer keksoz ki anmenn en benefis sosyal la zot annan en serten… dapre guideline zot kapab kalifye pou sa me sa i bezwen en progranm spesifik, sosyal, ki mon’n mansyonnen dan nou CSR guideline me non pa pou politik. Mersi.

 

MR SPEAKER

Mersi Minis. Mon krwar ou’n fer kler ki i annan en Social… i annan en guideline pou CSR. Avek sa nou ava al lo lot kestyon limero 10 e mon ti a demann petet Mr Georges Tirant pou vin en pe pli pre ek Minis pou okenn lenformasyon ki oule donnen apre nou a demann PS Payet pou retournen. Sorry about that be kestyon pratik. E toudswit mon a demann Onorab Churchill Gill pou li poz son kestyon pou Minis Finans, Limero 10.

 

HON CHURCHILL GILL

Mersi Mr Speaker. Eski Minis i kapab eksplik sa Lasanble, ki travay ki NATCOF e Fair Trading Commission pe fer, pou asire ki zot travay i enpakte dan en fason pozitiv lo tou konsonmater dan Sesel? Mersi.

 

MR SPEAKER

Minis.

 

MINISTER PETER LAROSE

Mr Speaker, pou met sa kestyon Onorab Churchill Gill an perspektiv i enportan pou konpran ki FTC i fer envestigasyon konplet bann biznes ki ofer servis tel ki konstriksyon e osi fer lenvestigasyon dan bann biznes ki pe vann bann prodwi. Pou fer sa FTC i bezwen travay avek bann lezot regilater tel konman Lotorite Planning, Lotorite Lasante Piblik, pli enportan dan nenport ki lenvestigasyon FTC i bezwen fer sir ki i annan en fair hearing parey Lalwa i demann li. Lobzektif son travay i koumsa ledikasyon konsonmater ki zot konnen zot drwa e zot responsabilite, ledikasyon biznes afen ki zot konn zot responsabilite anba Lalwa, fer bann lenvestigasyon bann konplent, enspekte bann biznes regilyerman. Mr Speaker mon le dir ki Praslin ek La Digue pa’n ganny kit deryer dan sa legzersis. Mersi bokou Mr Speaker.

 

MR SPEAKER

Onorab Gill.

 

HON CHURCHILL GILL

Mon ti a kontan demann Minis ki status sa Prozedlwa ki FTC pe travay lo la ti ganny mansyonnen dan meeting Praslin e si ler sa draft in fini si son konteni in ganny met a dispozisyon bann lasosyasyon biznes enkli lasosyasyon biznes Praslin pou plis diskisyon avan ki i vin dan Lasanble. Mersi.

 

MR SPEAKER

Minis.

 

MINISTER PETER LAROSE

Mr Speaker, Lalwa deza dan en staz final, konsiltan pe ganny demande pou fer serten koreksyon serten fot ki’n fer, pou etabli ki letan neseser pou fer ki sa Lalwa pli efikas e ler sa Lalwa in konplete dan en fason akseptab ki i annan… napa fot ki kapab ganny mal enterpret e natirelman sa i ava ganny pibliye. Mersi.

 

MR SPEAKER

Onorab Esparon.

 

HON REGINA ESPARON

Mersi Mr Speaker. Eski Minis i kapab dir sa Lasanble i nonm 2 lotorite ki NATCOF e FTC i travay an kolaborasyon avek me eski FTC avek NATCOF i travay an kolaborasyon avek SBS, Seychelles Bureau Of Standards pou asire ki bann prodwir ki rantre dan pei i lo standar e ki konsonmater pa depans zot larzan lo keksoz ou prodwi ki pa lo bon standar? E eski i annan okenn regilasyon an plas pou dekouraz e konsey bann enportater lo kalite prodwir ki zot fer rantre dan pei. Parski i annan en kantite dimoun ki’n aste bann prodwi ki pa bon kalite e an retour zot pa pe reganny zot larzan malgre ki FTC in entervenir. Mersi Mr Speaker.

 

MR SPEAKER

Minis. Ou kapab pran ou letan pou konsilte CEO FTC.

 

MINISTER PETER LAROSE

Mr Speaker, mon’n ganny enformen ki regilasyon pe ganny diskite ek FTC pou propoze e natirelman sa pou ganny diskite avek Gouvernman me parey mon’n dir dan mon repons se enn bann lobzektif travay FTC se pou fer ledikasyon konsonmater ki zot konn zot drwa e zot responsabilite e egalman ledikasyon biznes afen ki zot konn zot responsabilite anba Lalwa. E kot ki i annan konplent natirelman fodre konsonmater i fer konplent la FTC natirelman i a fer en lenvestigasyon e apre son lenvestigasyon FTC osi i annan sa provizyon kot bezwen vizit sa bann biznes pou fer ki parey Onorab Esparon in dir ki nou pa ganny serten komodite ki sub-standard. Mersi.

 

MR SPEAKER

Mersi Minis e avek sa nou a bouz direkteman pou al lo kestyon limero 11 e mon a demann Mr Hassan pou vin pran plas Mr Tirant. Mr Tirant mersi pou ou letan ki ou’n vini e anfet nou kapab eskiz ou pou ou kontiny ou travay. E avek nou ava al toudswit lo kestyon limero 11 e mon a demann Onorab Charles De Commarmond pou poz son kestyon.

 

HON CHARLES DE COMMARMOND

Mersi Mr Speaker. Mr Speaker, Swivan Deklarasyon Merkredi pase par Labank Santral Sesel, ki United Helvetic Bank Limited (UHB) ki ti’n fini ganny son banking license pou konmans son loperasyon koman en Labank, in “surrender” son license. Eski Minis pou Finans, Komers ek Planifikasyon Ekonomik i kapab enform nou

Lasanble ki bann rezon ki sa labank in donn Gouvernman pou li pran sa desizyon? Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Repons pou Onorab De Commarmond i koumsa ; an relasyon ek sa Labank United Helvetic Limited an akronim UHB. Sa labank ti ganny son license le 16 Avril 2015, sa license ti ganny donnen lo kondisyon ki sa nouvo labank i etabli relasyon avek 2 labank enternasyonal pou ede ki kapab fer son loperasyon prensipal ki enkli tranzaksyon an Dolar Américain. Se senpleman apre ki ti’n etabli entel relasyon avek sa 2 labank ki UHB ti pou kapab konmans son loperasyon banker. Le 4 Me 2017 zis mwan pase UHB ti enformen Labank Santral ki i pou rann son license an vi ki i pa’n posib pou li etabli relasyon avek son 2 correspondence bank ki zot ti pe anvizaze diskite avek pou finaliz zot Lagreman. an rezilta UHB bank, pa’n kapab konmans son aktivite banker. Dan son let pou enform Labank Santral ki ti pou rann son license i ti eksplike ki menm dapre bokou zefor i pa’n reisi etabli relasyon neseser avek sa 2 correspondence bank overseas. UHB in note ki rezon ki i pa’n kapab etabli relasyon avek sa 2 labank enternasyonal e pa zis akoz sityasyon global kot labank pe redwir zot risk alor zot ti en pe pli serye lo kriter ki zot in servi pou etabli relasyon avek okenn partner. E an plis zot in annan en persepsyon negativ lo Sesel dan Sekter Global Finansyer. UHB ti eksplike ki sa sityasyon i an deor zot kontrol e avek sa rezon zot pa pou kapab akonplir kondisyon ki Labank Santral in atase avek zot license. Mr Speaker, an konklizyon mon le dir se ki sa rannman license ti vin en lartik dan zournal depi semenn pase. Mersi bokou Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker, mon note ki sa bann pwen i bann pwen serye e kestyon persepsyon negativ lo Sesel par Lazans Finansyel Enternasyonal – dan sa sans la ki Sesel pe fer, Minister Finans, Central Bank pou amelyor zimaz Sesel lo nivo enternasyonal kot i konsern nou Sekter Finansyel e eski sa i vedir sa ki Minis in eksplike son larepons, i vedir ki Sesel i reprezant en high-risk ?  E si sa i le ka ki Gouvernman Sesel pe fer pou amelyor sa sityasyon pou permet ki nou bann labank isi e bann nouvo ki ava ouver, i ava ganny sa ki nou apel sa corresponding bank, i ava kapab marse pou ki sa sityasyon i ava sanze. Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Kot i konsern sa piblikasyon negativ lo Sesel i vedir ki Sesel i en high risk petet pou bann labank enternasyonal. E an kestyon ki Onorab De Commarmond in demann mwan, ki Minister Finans pe fer e mwan mon kapab dir ek sa Lasanble ozordi se ki leta mon ti al Spring miting avek IMF, World Bank, mon ti diskit sa konsern parske de plis an plis i annan bann labank komersyal ki pe perdi correspondence banking as a result of derisking. E natirelman se ki mon ti eksprim nou konsern poudir nou, nou en pti pei nou depan anler lo foreign exchange pou natirelman nou enportasyon. E i annan osi bann Seselwa aletranze ki anvoy larzan pou zot fanmir isi e si sa i bloke i kree en serten difikilte. Konman en pti pei nou bezwen se si ou le, annan sa flow of foreign exchange pou nou kapab sirviv ; parske pa tou keksoz ki nou prodwi dan sa pei. Lot keksoz ankor ki Onorab De Commarmond in demann mwan, ki nou pe fer? Natirelman mon’n propoze e avek natirelman blessing Gouvernman nou pou organiz nou en very high level Forum lo derisking kot nou pou envit tre high profile personality menm bann reprezantan bann labank konman JP Morgan, Dutch Bank, World Bank, IMF, e menm US Treasury, kot savedir zot pou vin Sesel e nou pou annan osi medya enternasyonal kot nou pou montre poudir be bon Sesel malgre nou ptipti i annan serten limaz negativ lo nou me natirelman nou sivre bann norm enternasyonal e sa mon krwar sa forum i ava ganny realize avan lafen sa lannen pou nou efas en pe sa move limaz ki i annan anler lo Sesel. Mersi bokou Mr Speaker.

 

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker dan laliny avek larepons Minis ki in donn nou, eski Minis i kapab osi dir ek nou Lasanble ki Minister, Central Bank ek lezot lenstans FIU, Seychelles Financial Authority, ki zot pe fer pou satisfer bann lobligasyon bann lenstans enternasyonal parey FATF ensidswit, pou ki nou Sekter Finansyel i reste lo nivo akseptab par OECD e tou sa bann lezot Lazans ki nou pe nonmen pou fer nou reste lo en bon zimaz?

Mersi.

 

MR SPEAKER

Minis.

 

MINISTER PETER LAROSE

Mr Speaker avek kolaborasyon Labank Santral, nou pe fer national risk assesment, mutual evaluation. Nou pe osi strengthen  nou Anti-money laundering, Counter Finance Terrorist Scheme. Kot nou pe ranforsi sa an menm tan osi avek nou correspondence bank nou a pe dir zot ki nou pe ensiste ki Sesel is not a high risk. Ou konpran ? Petet kekfwa i annan serten lezot tranzaksyon ki zot krwar poudir mon form par ladan. Alor nou pe sey fer fason pou tir sa negativite anler lo zimaz Sesel. Mersi.

 

MR SPEAKER

Onorab Sébastien Pillay.

 

HON SEBASTIEN PILLAY

Mersi Mr Speaker. Mr Speaker sa ki pe pase Sesel i pa nouvo avek bann Pti Leta Zil ki pe… Dan nou konteks akoz Pti Leta Zil ki pe eksperyans sa. Resaman nou misyon ki nou ti ale L’Angleterre mon ganny sans koz avek bann Manm Parlman sorti Lagiann e lezot teritwar Angle  ki dan Caraib. E enn bann kardinal ki pe sorti se lefe ki bann correspondence bank pe pull out, an gran mazorite – bann Labank Americain e bann Labank Eropeen.  Alors mon ti a kontan demann Minis Mr Speaker – an vi ki sa i en problenm ki pe afekte globalman bann pti restriksyon ; e la mon pale met sekter offshore ladan me enn bann lakoz ki’n ganny mansyonnen se, aktivite ki pase dan Sekter Offshore. Eski Minis, ki pozisyon Sesel i pou pran si i ariv en moman kot sa Labank i obliz nou pou fer serten konsesyon an relasyon avek nou bann Lalwa e nou bann provizyon legal, nou legal framework, pou ki zot santi zot satisfe oubyen konfortab pou antre dan tranzaksyon avek bann labank lokal lo en baz korespondans ?  Mon le fer rapel Mr Speaker as of today i annan zis 2 labank ouswa 3 labank ki ankor annan relasyon. E mannyer mon konpran Barclays i annan sa relasyon, zisteman akoz i nepli annan aktivite dan Sekter Offshore. Mon pou annan en Siplemanter apre Mr Speaker. Mersi.

 

MR SPEAKER

Minis.

 

MINISTER PETER LAROSE

Mr Speaker larepons Onorab Pillay nou Sekter Finansye i telman tre enportan pou nou pei, e nou, nou bezwen sivre norm enternasyonal. Natirelman dan lentere pei si i annan sa bann correspondence bank ki krwar nou bezwen amelyor nou Lalwa alor nou ava konsidere ki sizesyon zot vin avek. Dan en serten fason nou ava fer sir ki nou comply to the international law. Sa i enportan parske nou pa kapab relman fonksyonn dan izolasyon sa mon krwar se en kestyon ki nou kapab pran tou bann sizesyon. Diskite vwar ki mannyer nou kapab safeguard nou banking system. Mersi.

 

MR SPEAKER

Wi Onorab Pillay ou annan en dernyen siplemanter ?

 

HON SEBASTIEN PILLAY

Wi mersi Mr Speaker. Mon apresye larepons Minis me mon krwar poudir nou bezwen admet poudir malgre nou pa pe vwar sa problenm la, i pou vin en problenm, sirtou nou annan en etidyan aletranze ki nou bezwen anvoy larzan pou zot. Sa ki annan son fanmir aletranze  kot ou bezwen fer transfer larzan pou li. E pou annan  de sirkonstans  kot ou pa pou kapab fer li akoz serten pei pou napa en Labank Korespondan ouswa i pou difisil. Alors mon ti a kontan demann Minis pish  comes to shove Minis. Si nou trouv nou dan en sitasyon kot nou bezwen fer serten konsesyon, eski Labank Santral atraver son bann negosyasyon oubyen atraver son miting ki in gannyen avek tou son stakeholders enternasyonal ; eski zot in ganny en lide kwa ki nou bezwen fer pou nou kapab tackle sa sityasyon ?

Akoz pou le moman i ankor reste vag. Mon pou dir nou reste vag akoz nou tann koz lo FATF     ek rekomandasyon 24, ki dir nou pa pe comply nou pe tann lezot keksoz. So i annan tro bokou keksoz ki nou pe tande – eski Labank Santral i kapab klerman dir nou, kwa ki nou bezwen fer pou nou tackle sa sityasyon ?

Akoz i paret mwan there’s too  much of passing the buck –  Labank Santral, lot, lot. So annou ganny en keksoz kler. Mersi.

 

MR SPEAKER

Minis.

 

MINISTER PETER LAROSE

Mersi bokou Mr Speaker. Mon krwar nou bezwen être en pti pe pozitif dan nou PR campaign – enn. Dezyenm nou bezwen annan en pe plis transparans dan sekter parey konman ou’n dir offshore. E natirelman nou bezwen travay avek nou bann partner etranzer. Parske nou pa kapab travay lo nou menm. Nou pou bezwen vwar ki zot sizesyon e ki mannyer nou kapab amelyor nou relasyon avek zot eksteryer. Mersi.

 

MR SPEAKER

Dernyen kestyon, well Onorab Gill ti’n met son lanmen avan. Onorab Simon Gill.

 

HON SIMON GILL

Mersi Mr Speaker. Mr Speaker mon krwar probableman i annan en kantite keksoz ki nou pa pe ganny li kler. Nou konnen problenm. Nou deza pe ganny afekte avek problenm. I bezwen annan. Akoz si nou napa corresponding bank nou pe deza ganny en challenge dan sa domenn, eski Labank Santral i okouran ki bann standar ki bann benchmark sa bann lorganizasyon enternasyonal bann lenstitisyon enternasyonal i oule ki Sesel i attain pou ki nou kapab amelyor sityasyon kot nou bann Labank lokal pa ganny okenn problenm pou etablir relasyon avek bann Labank enternasyonal  pour sa ki zot apel corresponding bank ; pou ki nou sistenm finansye i mars dan en sistenm respektab e ki keksoz i flow ki pa kre en problenm mank konfyans dan nou sistenm banker isi Sesel. Mon krwar se sa ki nou pe rode. Eski zot okouran what are the issues ? Annou met ater. Call bann diferan partner ki nou bezwen call -met tou dimoun ansanm ki nou kapab move and find a way forward. Annou aret diskite. Nou pe dir isi – isi laba me nou pa pe adres bann issues. Who is responsible please Thank you.       

 

MR SPEAKER

Minis.

 

MINISTER PETER LAROSE

Mersi bokou Mr Speaker. Parey mon’n dir an repons sa kestyon, nou pe sey organiz en fason ki nou a en Forum enternasyonal hosted in Seychelles. E la kot nou kapab anmenn tou nou bann partner tou nou bann Labank ki nou annan correspondence bank avek e anmenn plizyer agencies kot nou kapab deal avek dan le fitir. Ki nou annan en Forum tre transparan. Natirelman i annan serten menm Sef D’eta ki sorti dan lezot Pti Leta Zil ki’n pare pou vin Sesel. I pou en high profile Forum. I pa pou zis en keksoz ki nou pou fer li zis dan en pti lasal  detrwa dimoun ladan. Non, nou pou bezwen anmenn tou dimoun ki konsernen e natirelman ansanm nou kapab asize dyaloge. Met keksoz annord dan en serten fason ki nou tou nou konpran nou responsabilite  – nou obligasyon. E lala kot nou kapab bouz devan. E sa i pou demann natirelman zefor  de lapar Sesel. E mon krwar Gouvernman in pare pou fer sa parske nou vwar nou sistenm finansye i at risk e nou pa kapab afford pou nou tonm dan en deklen parske sa i en fenomenn ki konsern bokou pei. E bokou pei mon krwar pou partisip dan sa Forum. Mersi bokou Mr Speaker.

 

MR SPEAKER

Onorab Ramkalawan.

 

HON WAVEL RAMKALAWAN

Mersi Mr Speaker. Mr Speaker mon premye kestyon se pou mwan demann Minis si sa msye Peter Tankov ki ansarz sa Labank si i annan, si i kapab konfirmen si sa msye i annan nasyonalite Seselwa. Si i ti ganny nasyonalite Seselwa e ki sa i permet li pou li menm aste propriyete lo Praslin. Aste Villa en pe partou, ensidswit. E ki in fer pou li ganny sa nasyonalite Seselwa ?  Dezyenmman vi ki nou pe koz lo sa Labank e tou keksoz ki konsernen avek sa Labank, eski Minis i kapab dir avek nou si tou sa zafer avek FIU avek sa ki bann Irlande in fer kot ozordi nou ankor pe fer bann demars anba, anba ; Pe amenn dimoun Cork Irlande olye anmenn zot Sesel pou sey fer en fason lav sa $30milyon ki zot in sezi san okenn rezon ; eski tousala se pa bann keksoz ki fer nou ganny problenm avek corresondence banking ?

E an plis ki sa eski Minis i kapab dir avek nou, si i vwar li drol ki letan nou dan nou kote LDS, nou ape fer en fason pou nou met lord pou nou sanz Lalwa lo kote Parti Lepep zot deside vot kont sa bann lamannman ki nou sey anmennen dan – ladan. E ki alor tou sa bann diferan problenm eski Minis i trouv li drol ki ozordi konpare avek detrwa lannen pase, kot nou ti napa okenn kot nou pa ni ti konn correspondence banking ki ti en problenm ozordi nou pli gran problenm se correspondence banking ?

Mersi bokou Mr Speaker.

 

MR SPEAKER

Mon prezimen Onorab ou pe koz lo en msye ki responsab pour sa Labank ki nou pe koz lo la, me i al dan menm laliny ki Onorab Gill pe demande, lekel ki responsab ?   Minis.

 

MINISTER PETER LAROSE

Mersi Mr Speaker. Sa msye Peter Tankov la mon konpran son nasyonalite i Austrian e i ti sipoze annan 85poursan par dan sa UHB e  mwan personnelman mon pa konn li.  E kot i konsern natirelman lefe ki nou annan sa bann piblisite negativ lo Sesel, petet kekfwa i rezilta bokou fakter. E la  pou lenstans i se sa ki mon kapab reponn dan Lasanble. Mersi bokou.

 

MR SPEAKER

Onorab Ramkalawan.

 

HON WAVEL RAMKALAWAN

Mr Speaker mon demande spesifikman si i annan nasyonalite Seselwa. E ki tousala  petet i ava ed nou pou konpran ki mannyer.

 

MR SPEAKER

Minis Finans eski ou okouran i annan nasyonalite Seselwa ?

 

MINISTER PETER LAROSE

Mr Speaker pou rann repons Onorab Ramkalawan mon pa okouran ditou si i annan nasyonalite Seselwa. E dapre rikord ki mon annan devan mwan i en Austrian – en ?

 

MR SPEAKER

Onorab Ramkalawan ou annan lenformasyon.

 

HON WAVEL RAMKALAWAN

Mr Speaker eski Minis i kapab donn nou sa lenformasyon, parski ankor enn fwa tousala se bann keksoz ki ede pou met nou dan problenm kot tou kalite dimoun i vin isi Sesel. Zot vin konman Austrian apre nou aprann poudir zot vin Seselwa. E mwan mon anvi dir avek Minis poudir sa msye i annan en paspor Seselwa e ki petet osi i annan en bann kalite roulman ki pe pase. Mersi bokou.

 

MR SPEAKER

Ok Minis, Minis mon pa konnen si oule fer en dernyen komanter lo roulman. Oubyen ou pa okouran sa bann roulman ?

Minis.

 

MINISTER PETER LAROSE

Mr Speaker dan latransparans kot nou koz en kantite anler lo la. Mon a fer sir sa lenformasyon i a sorti, ki sa i en Austrian ouswa Seselwa ou sinon en lot nasyonalite nou a konnen ki li sa msye. Mersi.

 

MR SPEAKER

Mersi Minis Finans e sa ki mon kontan avek ou, ou touzour pare pou al fouy en pti pe pou al rod plis leklersisman pour Lasanble. Mon krwar Onorab De Commarmond i osi annan en dernyen, dernyen kestyon.

 

HON CHARLES DE COMMARMOND

Wi Mersi Mr Speaker. Mr Speaker mon anvi fer resorti ki Parti Lepep li nou pa kont Lalwa ki anmenn lavantaz pou Seselwa pou nou pei. Me nou kont lalwa ki pou anmenn lavantaz pou serten endividi selman. So dan sa sans la, eski Minis i kapab travay for avek Central Bank pou kapab donn lepep Seselwa dan latransparans bann keksoz konkret e spesifik kot i konsern nou banking sector oubyen finacial sector. Pour montre si i annan problenm oubyen defayans i été pou nou adrese e si i annan solisyon pou nou kapab avans pli devan dan pei pou tou dimoun happy. Mersi.

 

MR SPEAKER

Me zisteman mon krwar ki sanmenm sa ki tou le de Onorab Ramkalawan ek Onorab Simon Gill ti pe demande. E Minis in dir i pou al fouye i pou al anmenn bokou lenformasyon lo UHB ki mon menm mwan pa ti’n menm konnen ki egziste. E nou espere sa bann lenformasyon i a forthcoming i a anmenn en pe leklersisman dan lespri Lasanble e osi piblik. Since nou’n koz lo la ozordi. E avek sa mon ti a kontan remersye Minis Larose ki depi bomaten ou’n vini, ou’n bare, ou’n tenir kestyon. Ou lekip PS Payet, Deputy – First Deputy Governor Mr Christophe Edmond, Mr Hassan Acting AG mersi pou vini, Ms Cesar ti la trankil Ms Sidna kanmenm i pa’n koze i pe donn sipor. Mersi e avek sa nou a eskiz zot e avek sa nou swet zot bonn kontinyasyon. Minis Larose ?

 

MINISTER PETER LAROSE

Mr Speaker pou konklizyon mon ti a kontan remersye tou Manm Onorab ki’n demann mwan kestyon ozordi e en long lazournen. E natirelman mon swet zot en bon lapremidi, mersi bokou Mr Speaker.

 

MR SPEAKER

Mersi bokou Minis avek ou lekip. Alor nou a kapab eskiz ou prezan.

 

 

(MINISTER  LAROSE AND HIS DELEGATION WAS EXCUSED FROM THE HOUSE)

 

MR SPEAKER

Vi ki nou annan de kestyon pou Minis Tourism, Civil Aviation e Ports Authorities mon krwar nou a pran en break ziska 4er. La i pe al preske 3er edmi, nou a pran en break ziska 4er. A mwen ki zot le pran de kestyon nou kontinyen. Zot le pran en vot, zot le pran en break, zot le kontiyen I’m easy. Nou pran en break ?  Bon nou pran en break nou a retournen 4er e nou a envit Minis Lousteau Lalanne pou vin zwenn nou 4er.

 

(BREAK)

 

MR SPEAKER

Mon swet byenveni Minis Maurice Loustau-Lalanne, Mr Garry Albert ki PS pour Lavyasyon Civil Por ek Marine, Kaptenn Valmont sorti SMSA e Mr Roy Kinnear osi Chief Executive Air Seychelles. E san plis tarde petet nou a zis dir zot eskize nou’n fer zot esper en pe letan me sa Minis ki’n la avan ou ti’n ganny, annan en kantite kestyon e pou sa rezon ki nou’n fer zot esper en pti letan. So, eskize pour sa pti retar, nou a toudswit lo kestyon – Premye kestyon ki Onorab Churchill Gill i demann Minis Loustau Lalanne, mon a donn laparol Onorab Gill.

 

HON CHURCHILL GILL

Mersi Mr Speaker, bonn apre midi Minis ek ou delegasyon. Mon kestyon i lir koumsa, an rezilta bann aksidan fatal ki’n arive pandan weekend selebrasyon lafet travayer le 1er Me; A) eski Minis i kapab dir sa Lasanble ki Gouvernman pe fer pour adres size sekirite lo lanmer dan limedyat. E garanti ki bann tel aksidan pa repet son lekor?

  1. B) ki safety ratio ant nonm pasaze ek lekipaz lo diferan grander bato?
  2. C) ki bann Lalwa ki Gouvernman i bezwen met azour, pour anforsi pour adres sa bann konsern sekirite lo lanmer a lonterm? Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mr Speaker, tou Manm Lasanble bonn apre midi. Mr Speaker, Onorab Churchill Gill konm repons mon ava reponn ki dan limedya en task force in ganny kree anba gidans SMSA pour aret e board tou bato. E poz serten kestyon ki lo en checklist pour verifye nivo safety ek sekirite lo bato. Par egzanp si bato in averti por avan kite, kote bato pe ale, si bato i annan life jacket, flares e konbyen, mwayen kominikasyon ensidswit…

Sa task force i konpri zofisye marine police, coast guard e osi SMSA, e i pou ganny revize tou le mwan pou vwar ki fason pou pli byen fonksyonnen. An menm tan i annan Marine Accident Investigation Board MAIB, ki li i pe fer lenvestigasyon dan sa aksidan fatal avek en bi pou fer bann rekomandasyon avek Gouvernman. Sirtou lo kote regilasyon ou Lalwa ki fodre Gouvernman i met an plas ou amande ki pou anpes tel aksidan repet ankor.

Mon biro in resevwar raport preliminer e vandredi pase mon’n resevwar raport final MAIB lo sa aksidan. Pou limero B, safety ratio: dan le moman, anfen dan lemonn maritim olye, servi sa term safety ratio nou servi minimum safe manning. Ki tou bato nenport ki groser i bezwen respekte, sa minimum safe manning requirement i aktyelman ganny trouve dan nou Lalwa Merchant Shipping Act. E i vin dan laform en Sertifika ki determinen lakantite manm lekipaz enkli zofisye ek lezot maren ki en bato i m navig merit navig avek – an prenan kont groser bato avek zistans ki sa bato i  ganny drwa navige dan lanmer Sesel e osi bann ki navig aletranze.

Sa minimum safe Manning Certificate i osi determin ki training e kalifikasyon ki zofisye e lezot manm lekipaz i bezwen annan. Pou amelyor plis lo nivo safety lo bann bato ki pe anmenn pasaze, SMSA pe fer li mandatwar pour tou sa bann manm lekipaz swiv en Crowd Management Training. Sa i zisteman akoz dan nou Lalwa Merchant Shipping Act en bato ki pe anmenn plis ki 12 pasaze i ganny konsidere konman en passenger vessel ou en bato pasaze.

Sa sistenm safety ratio SMSA pe anvizaze entrodwi li lo plito bann bato ki pe fer ekskirsyon. E ki a en moman bato i arete e mouye e ki vwar son bann pasaze sot dan lanmer pour swa naze, ou fer lezo aktivite parey snorkeling, diving ensidswit. Pour sa aktivite spesifik, SMSA pe propoze pou met dan Lalwa ki pe ganny amande notaman Control of Hire Craft Act en Safety ratio 6 pour 1. Sa i vedir ki pour sak 6 pasaze ou pou bezwen annan en manm lekipaz ki pou siperviz sa 6 pasaze dan delo.

Pour say bann Lalwa ki SMSA pe revize i konm swivan, Beach Control Act sa Lalwa pe ganny amande pour SMSA kapab control water craft. Set a dir bann pli pti bato ki enkli jet ski e speed boat prive e komersyal ki pa ti pe ganny kontrole anba okenn nou bann Lalwa lanmer. Sa Lalwa pou fer li mandatwar pour tou sa kategori bato anrezistre e fer survey tou le lannen, pour mentenir sa nivo standar safety. An menm tan fer li mandatwar pour sa bann kategori bato pran Lasirans e sa dimoun ki pou pran sarz sa bato annan Sertifika Proficiency.

Sa Sertifika pour ganny donnen par SMSA apre en oral test pour satisfer konpetans sa dimoun pour anmenn sa bato. Lot se Control of Hire Craft Act, sa Lalwa SMSA pe anmenn li pour fer ki tou bato ki pou fer biznes charter isi Sesel i pran Seychelles flag. Ki tou bann regilasyon e lezot Lalwa lanmer Sesel i kapab ganny aplike lo zot osi. Bato ki anba paviyon en lot pei pour ganny opsyon pran paviyon Sesel direkteman oubyen sa ki nou apel parallel registration ki nou Merchant Shipping Act i deza fer provizyon.

A lafen dizour se sa paviyon Sesel ki pour pran presedans lo sa paviyon etranze. Sa Lalwa pe fer osi provizyon pour SMSA pran licensing of hire craft avek Licensing Authority. Ki vedir ki survey bato ek son licence pour operate komersyalman pou ganny fer kot SMSA. Lot se SMSA Authority Act, sa Act i pou fer SMSA vin otononm e fer SMSA anmas ase reveni pour li kapab soutenir son lekor e an menm tan fer provizyon pour li vin mandatwar pour bann bato lapes ki anrezistre avek Seychelles Fishing Authority, fer zot  annual survey kot SMSA. Ki ava sertifye sea worthiness sa bann bato lapes.

Sa aksyon i vin swivan plizyer rekomandasyon ki Marine Accident Investigation board in prezant avek Gouvernman swivan bann aksidan lapes ki’n arive oparavan. E dernyen se Merchant Shipping Act sa Lalwa pe ganny amande selman pour kapab armoniz li avek lezot Lalwa ki pe ganny amande ou propoze. Son lamannman total i pou ganny fer avek seksyon legal SMSA pli tar, apre ki nou’n fini konplet tou lamannman irzan osi met azour bann konvansyon enternasyonal ki Sesel i bezwen sinyen e ratifye. Mersi Mr Speaker

 

MR SPEAKER

Onorab Gill.

 

HON CHURCHILL GILL

Mersi Mr Speaker, Mersi Minis pour sa bann larepons tre detaye. Mon kestyon siplemanter se lo safety ratio pour sa bann hire craft ki pe ganny propoze pou sa nouvo Lalwa. Parey ou konnen Praslin i annan pa mal bato ki fer sa biznes ekskirsyon enkli La Digue e prezan dapre leksperyans sa bann dimoun ki dan sa biznes, zot in fer sorti fortman ki sa ratio 6 pour 1 i zot ti a pli, zot propozisyon ti a plito 5 pour 1. I annan zot in fer sorti baze lo leksperyans parfwa zot annan bann kliyan parey Sinwan, Zaponnen ler zot pe pran ekskirsyon, ler i demann zot si zot konn naze, mazorite fwa zot dir wi. Me selman apre nou vwar bann lenstans kot bann aksidan in arive kot ler zot in sot dan delo zot tou, apre i annan parmi pa konn naze.

E prezan nou’n menm annan sityasyon fatal Baie Ste-Anne, Cote D’Or rather ; donk zot pe sizere ler sa propozisyon Lalwa ki zot pe travay lo la si pa kapab fer li 5 pour 1 dan plas 6 pour 1. Mersi Minis,.

 

MR SPEAKER

Minis.

 

MINISTER MAURICE LOUSTAU-LALANNE

Mersi, Mr Speaker, bon mon krwar ki nou kapab konsidere akoz nou pa ankor finaliz li si i 6 pour 1 or 5 pour 1. Me mon krwar lenportans tou bato pare ou konnen i bezwen annan en minimum lekipaz. I ti a preferab ki sa minimum lekipaz i li menm sa safety ratio. Ki mon pe dir sa, set a dir ki en bato ki i annan li mon pa konnen 80 pasaze. I anmenn 80 pasaze, konmela sa bann kalite katamaran i annan li apepre 8 lekipaz ki bezwen abor. Alor si i 6 pour 1, i vedir ki pa tou 80 pasaze pour sot dan delo an menm tan. Si nou servi sa safety ratio 6 pour 1 –  ou ganny mwan ? Set a dir en serten kantite en 40enn i sot dan delo i ganny sipervize par sa bann lekipaz. E apre lezot manm i mont abor larestan i sot dan delo, nou pa oule tro fer dimoun zis met en kantite lekipaz zis pour annan sa ratio in one go. Ou konpran ki mon sey dir ou, alor i en keksoz nou kapab regarde si i 6 pour 1 ou 5 pour 1. Mersi bokou Mr Speaker

 

MR SPEAKER

Ok Onorab Gill, Onorab John Hoareau.

 

HON JOHN HOAREAU

Mersi, Mr Speaker bonn apre midi Mr Speaker, bonn apre midi Minis avek ou delegasyon. Mr Speaker mon annan 4 kestyon pour mwan demande, mon ti a demann ou permisyon si mon kapab demann 4 kestyon ?

 

MR SPEAKER

Sey demann de apre nou a regarde.

 

HON JOHN HOAREAU

Eski Minis i kapab dir sa Lasanble kote ki bann dimoun pouvwar bann Marine Accident Investigation Report? Ki bor i ganny garde sa bann report? Par egzanp ti annan sa enn ki ti ganny fer le 15 Out ki ti arive, sa lensidan ki ti arive le 15 Out lannen pase. Bokou dimoun ki ti a kontan konnen kote zot pou vwar sa Report.

2enm kestyon Minis – eski ou kapab dir, dir, Lalwa sekirite maritim si zot prevwar, ok,  ki annan ase stok life jacket, life raft, flez ensidswit ki anvant. Pour si sa Lalwa parey pe ganny revize i sorti bann dimoun pa vwar zot bezwen anmar zot bato. Zot vwar zot dan en sityasyon si zot annan zot larzan zot kapab al dan en outlet e ganny sa bann keksoz? E si i annan ase teknisyen osi pour sertifye bann life raft pour fer sir ki zot ganny byen maintain e fer sir zot dan en bon kondisyon parey IMO i demande? Mon trwazyenm kestyon.

 

MR SPEAKER

Petet Onorab Hoareau annou demann sa de pour le moman. Akoz i annan lezot dimoun ki anvi koze e i annan problenm letan ok, les Minis i a reponn sa de kestyon.

 

HON JOHN HOAREAU

Mersi.

 

MR SPEAKER

Minis Lalanne.

 

MINISTER MAURICE LOUSTAU-LALANNE

Mersi Mr Speaker, Mersi Onorab pour sa de kestyon. An sa ki konsern premye kestyon wi mon krwar ki sa bann rapor apre ki in ganny soumet a mon biro, e nou’n fer nou, nou assessment. Nou kapab fer li met dan Domenn Piblik pour lezot dimoun lir sa bann rapor apre tou se dan lentere tou dimoun. Mon pa konnen si sa premye rapor in ganny fer, me si i pa’n ganny fer mon a fer li ganny fer.

Sa 2enm rapor le 1er Me, mon fek resevwar li vandredi pase parey mon’n dir. Nou bezwen etidye zot bann rekomandasyon, fer sir nou tyek tou keksoz. E li osi parey lezot rapor i ava ganny mete dan en libreri kot SMSA kot nenport ki dimoun i kapab vin konsilte. An sa ki konsern bann lekipman safety, sekirite, sovtaz eksetera, mon krwar o-fir an mezir ki sa responsabilite i ganny transfere kot SMSA. SMSA  i ava bokou dan en fason i a konn plis konbyen bato konbyen lisans eksetera ki minimum life jacket fodre i annan pour tou sa bann bato parey ou konnen osi i annan en standar ki dir pour kantite life jacket ki ou bezwen ou bezwen 1 pour tou dimoun lo en bato me selman ou bezwen anmenn 10 poursan an plis. An ka enn in kase, en zanfan in pran enn in al avek pour zwe whatever it is  – ou konpran.

So, nou pou bezwen, nou pou konn byen kantite nou bezwen annan e SMSA i ava bezwen travay avek bann konpannyen prive ki enport sa bann, sa bann keksoz pou fer sir ki toultan i available. Ou war e si fodre nou santi i annan en risk kot i kapab, i annan en mankman ou kapab servi medya pour enform dimoun. Ou vwar – so i pou en zafer ase enteraktif kot nou pou toultan nou pour gard dimoun okouran. Me mon krwar ki lide ki SMSA i take over nou ava met nou dan en meyer pozisyon pou fer sir ki napa mankman ditou lo sa bann safety equipment.

E mon ti a profit lokazyon pour demann tou sa bann dimoun fer sir ki sa bann lekipman enn fwa ki zot in aste zot met li lo zot bann bato e zot tyeke toultan avan zot sorti ki zot annan sifizaman. I annan osi en pwen ki’n ganny prezante isi se ki lo site, lo website SMSA nou pou annan osi sa bann rapor. So, ou kapab konsilte website e ou a ganny akse osi ek sa bann rapor. Mersi Mr Speaker.

 

MR SPEAKER

Mon ti a demann bann entervenan sey demann en kestyon, akoz nou ankor annan en PNQ ki nou pa ankor touse e Minis in la depi lontan, Onorab Ferrari.

 

HON JEAN-FRANCOIS FERRARI

Mr Speaker lo kestyon enforcement ki si Minis i kapab dir nou ki that’s the weakest link akoz aparaman tou bann Lalwa i annan, although zot bezwen ganny amande me napa okenn enforcement. Marine police i la o-bor Eden Island me selman i pa kapab anpes okenn dimoun fer jetski fer son ta tapaz, tou dimoun i anvoy pronmnen bann Lotorite. E, e sa vreman Minis mon ti a kontan konnen ki mannyer ou pou enforce bann Lalwa akoz napa respe pour lotorite pour le moman? Me Mon kestyon prensipal se lo kestyon Bareboat Charters, Minis i en gran lendistri Bareboat Charters i annan dimoun ki debarke ki anbark direkteman lo zot bato. Zot sorti zot pas laboutik zot pran 8 kes Takamaka Bay zot al lo bato. Napa personn ki tyek zot license, zot Certificate of Proficiency, SMSA i fermen Sanmdi e Dimans donk i annan en gro problenm a sa nivo la. E mon ti a kontan si ou ti a kapab adres sa size ; e dir nou ki mannyer nou pour kapab fer sa lendistri vin pli safe. Annan bann skippers ki annan proficiency e ki a… e sirtou ki nou adres sa size ki Mr Valmont ti dir pou dir bann skipper Seselwa i bann droger. Ki fer bokou dimoun ankoler ok, e ki nou pa pe fer nanryen pour nou adres sa size. Pour nou fer sir ki nou annan bann bon skipper Seselwa ki responsab e ki nou pa zis apel zot bann droger. Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab pour sa de kestyon. Lo kote enforcement ; wi ou annan rezon parey mon’n eksplike taler dan repons se ki i annan serten kategori sa bann bato kot napa Lalwa ditou. E parey zot konnen nou’n donn en lasirans ki nou pou fer amande Lalwa neseser e nou’n deza fer en Memorandum Cabinet nou’n amen en draft Legislation kot Cabinet ki’n ganny aprouve. In retourn kot Attorney Zeneral akoz i annan serten lamannman, e donk byento i pou ganny resoumet dan son final kot Cabinet e apre sa nou pou anmenn li isi

Nou ti ava vreman swete ki nou kapab anmenn li isi avan menm ki sesyon, sa sesyon Lasanble i fini pour donn nou tou sa bann Lalwa, donn nou tou sa enforcement neseser. Pour sa bann Lazans pran zot responsabilite, so, la omwen nou pe fer en pa pour koriz en sityasyon ki’n la pour en pe letan. E mon ti a kontan swete ki nou pou ganny zot sipor pour nou nobou fer pase sa Lalwa.

So sa i enn. Lo sa ki konsern bareboat charter, wi menm resaman in annan en aksidan. Parey zot konnen Ile Ronde o-bor Praslin kot en bareboat charter operation in malerezman mont lo brizan. Me la mon kapab konfirmen ki dan sa ka, sa Polone ki ti skipper sa bato i ti annan son Sertifika Competency. Me i pa neseserman anpes nou regarde ki fodre ki nou annan kekfwa en dimoun abor ki sa bann konpannyen ki fer bareboat charters zot annan en  pe local knowledge abor. Ou vwar so, sa osi nou bezwen regarde e dir zot osi kwa ki fodre fer kwa ki pa fodre fer nou pa kontan navigasyon aswar. Akoz aswar i pli difisil so, tou sa bann keksoz bann mezir ki nou bezwen koze ek sa bann operater fer sir ki zot pratik li. Zot pa anpese me zot dekouraz lo sa bann bareboat charters operators si i konpletman bareboat pou fer sa bann navigasyon aswar e se la kot bann aksidan i arive. So i en keksoz ki nou bezwen koze toultan, e parey ou konnen ozordi letan mon regard sa taskforce ki nou’n met an plas resaman o mwan Me – nou annan nou 16 rapor ki’n antre kot sa pti group marine police, SMSA li menm in mont abor 16 bato pour kontrole war e nou’n gannyen korperasyon. Ozordi nou annan en nimero telefonn ki dimoun i bezwen telefonnen pour dir zot pe kite. Vwar ? So nou annan deza nou pe konmans anmas bann lenformasyon e dimoun i konmans abitye vwar sa pti group dimoun pe sirkile pe aret zot. Akoz nou pe fer sa avek lide annan zero aksidan, so nou pe mete sa bann keksoz an plas me nou bezwen sa enforcement parey ou’n dir. Mersi Mr Speaker

 

MR SPEAKER

Onorab Aglae en kestyon.

 

HON EGBERT AGLAE

Mr Speaker mon a restrikte mon pwen kestyon mersi. Bon, bonn apre midi Minis. Minis mon kestyon pour al en pti pe dan lanfaz lo sa laspe sirveyans avek enforcement Lalwa. Minis mwan mon ti kontan petet ou ava dir nou sa bann revizyon zot bann Polisi eski zot pe mazin osi sirtou kot i konsern dan weekend kot sirtou bann labe. Mon pe koz en labe partikilye dan mon distrik kot ki ava annan en limit ki kantite bato ki nou allowed. Bann hire vessel sirtou, ki nou kapab allowed at one go dan en rezyon pour anpese premyerman bann ankonbreman ki parfwa i koz serten problenm. E dezyenmman pour evite ki i annan bann aksidan ki arive. E an menm tan letan zot pe fer sa dan sa enforcement parey sekirite routyer nou fer. Vi ki i annan bann konsonmasyon lalkol bann partying ki ganny deroule. Si zot osi zot annan en mechanism pou vwar ki sa skipper, sa kaptenn ki lo bato i pa anba okenn lefe? Mersi

 

MR SPEAKER

Minis.

 

MINISTER MAURICE LOUSTAU-LALANNE

Wi mersi Mr Speaker. Mersi Onorab pour ou kestyon e ou sizesyon. Sertennman mon krwar kekfwa par le pase nou pa’n tenir an kont bann kekfwa bann levennman ki in annan plis bato, plis dimoun dan delo sale eksetera. Kot nou bezwen pli vizilan, donk nou annan en sistenm an plas kot par egzanp pour lafet 15 Out sa voyaz nou pou annan en prezans nou pa pou esper en aksidan arive apre nou pou sey mobilize. Se pa koumsa ki nou pou al travay nou pou fer li dan lanvers.

Donk, pou annan en tim ki pou la pour zisteman fer sa louvraz monitoring, koz ek dimoun, fer sir zot pran zot bann mezir sekirite o serye. Donk sa i en keksoz ki nou anvi fer e ou annan parfetman rezon mon krwar ki nou pou bezwen anmenn en alcohol blood limit pour bann skipper bato, pour bann dimoun ki pe anmenn bann bato parey i annan lo semen. E sa osi i dan nou bann konsiderasyon ki nou le propoze. Mersi Mr Speaker

 

MR SPEAKER

Onorab Sebastien Pillay en kestyon.

 

HON SEBASTIEN PILLAY

Mersi Mr Speaker, Mr Speaker depi ki sa aksidan in arive anvi ki mon, mon osi kontan frekant lanmer. Mon’n fer en bon pe resers pour mwan vwar ki bann diferan lankadreman legal ki ganny met an plas pour asire ki annan serten, en proper policing of the whole sector. E ki mon’n vwar, mon’n vwar pour dir letan mon pe regard nou Control of Hire Craft Act e lezot Lalwa lezot pei. I annan serten eleman ki mon pa war nou pe enkli dan nou Lalwa par egzanp kategori lanmer, lanmer move, Vandswet eksetera.

So, mon ti a kontan demann Minis an relasyon avek bann revizyon ki zot pe fer dan Lalwa eski zot pe enkli sa bann eleman akoz mon krwar i form par safety of life at sea. Pour ou konsider sa bann eleman;  akoz given ki ou annan bann skippers sirtou bann bareboat charters ki etranze ki pa konn  lanmer zot riske sorti dan bann letan ki pa neseserman apropriye e la i koz plis danze. E prenan kont osi ki ou annan bann pti vessels ki less than 24meters ki pa neseserman  toultan zot carry abor life jackets, eski zot pa pe anvizaze sa bann dimoun ki  fer sa bann dimoun ki fer sa bann aktivite  bann spesified departure points kot sa bann departure points prezan ou ava annan bann safety regulations e ou ava annan bann safety requirements ganny mete la ki menm piblik ; akoz piblik i vin pli difisil parfwa kot zot pa konpran akoz parfwa kot serten mezir sekirite pe ganny pran, kan i kapab mezir  sekirite pour zot prop dibyen.  Mersi Mr Speaker.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab.  Wi mon krwar nou kapab regard osi sa  propozisyon.  Mon konnen ki par egzanp letan en aksidan i arive premye keksoz ki nou fer, se nou demann en weather report kot sa aksidan in arive ou konpran? Akoz letan nou pe etidye raport nou regarde si sa letan i annan en fakter ki’n   kontribye pour sa lensidan –  i servi en rol; donk nou bezwen servi bann weather report pou osi planifye en larout.  I annan de ka kot ou bezwen abandonnen  – ou pa al ditou. So nou bezwen kontinyen serve metrological advisory ki zot donnen e  fer sir nou broadcast sa e donn tou dimoun.  Ou vwar? E si nou pa pe fer li sifizaman nou fer sir ki dan nou bann  weather report nou fer li on a daily basis donn dimoun letan lanmer; kote i pli bon; kote pa pli bon eksetera.  Me sertennman n ou kapab regarde kote nou pou annan bann spesifik departure point oubyen si nou pou  baz nou de pan kote ki annan plis trafik parey Onorab ti dir taler pou fer sa  – pa sa kontrol me pou fer sa Advisory.  Mon krwar i pou zwen en gran rol  pou minimiz.  Problenm se sirtou  e la mon  pa oule  personnaliz sityasyon se sirtou bann bato lapes ou konpran kot nou bezwen improve seamanship sa bann skippers – sa bann dimoun  ki pe anmenn sa bann bato.  E se sa ki nou santi letan nou  pou fer sa seaworthiness report sa bann bato lapes – endepandan son kategori nou ava nobou ede pou  fer annan en better seamanship lo sa bann bato savedir met en life jacket –  si  ou annan en pti bato  ou bezwen met life jacket ou pa kapab kit li pran anba tyak apre ou servi letan problenm i arive.  Ou vwar dimoun pou bezwen fer labitid.  Parey letan nou ti entrodwir safety belt lo semenn bokou dimoun kanmenm ti Lalwa pa ti oule mete;  ozordi tou dimoun i ‘click’ apre zot ale.  So i pran en pe letan  – i bann keksoz koumsa ki nou oule fer sir ki nou team Enforcement i touzour vizilan lo sa bann pwen.  Mersi bokou Mr Speaker.

 

MR SPEAKER

Onorab Sophola en kestyon.

 

HON NOLINE SOPHOLA

Mersi Mr Speaker.  Bonn apre midi Minis ek ou lekip.  Minis o komansman ou prezantasyon ou’n koz lo taskforce pou verifye bann pti bato.  Mon krwar ki ou ti pe fer refer plis lo Mahe.  Ler mon regarde La Digue osi in annan plizyer lensidan ou petet mon kapab dir aksidan ki’n arive lekel ki responsab pou verifye sekirite sa bann pti bato ki pe fer ekskirsyon lo bann zil otour La Digue ?  Mersi.

 

 

MR SPEAKER

Minis.

 

MINISTER MAURICE  LOUSTAU-LALANNE

Mersi Mr Speaker, mersi Onorab.   Mon pe ganny dir ki sa taskforce avek marine police akoz nou  servi  bato marine police.  Nou enkli osi Praslin ek La Digue.  So kekfwa nou pa’n vin pli souvan ki nou pe fer  lo Mahe me mon kapab regarde dan sa 16 rapor kot nou fer bann boarding egzakteman kote nou fer.  Me lide se pa oubliy Praslin ek La Digue.  Parey mon konnen sa ki nou pe sey fer la,  se i annan enn de bann operater lo Praslin ek La Digue ki pour le moman zot ilegal.  Nou’n rankontre avek zot; nou’n annan en diskisyon  nou pe propoze avek zot ki mannyer nou pou legaliz zot.  I pa zis pou dir zot, ‘’Ok ozordi ou legal non, non, non. Nou annan bann prosedir ki nou’n diskit avek zot. Sant Maritim i involve  e  nou pou donn zot en license anba 2mil notik ki permet anba nou Lalwa, pou ede zot nobou operate e vin legal. So, i annan tou sa louvraz ki nou’n fer lo Praslin ek La Digue osi pou sey met zot osi an sekirite. Mersi Mr Speaker.

 

MR SPEAKER

Onorab Georges, en kestyon.

 

HON BERNARD GEORGES

Mersi Mr Speaker, Mr Speaker mon Kestyon pour Minis i konm swivan. Eski Minis i satisfe ki i annan sifizaman bato tel parey life boat dan tou le 4 kwen Mahe, Praslin ek La Digue? Pou ki ler bato i an detres sa bato i kapab ganny sekour dan en fason vitman san ki i bezwen esper swa marine police, swa coast guard sorti dan en lot landrwa pour vin a son sekour? Mersi

 

MR SPEAKER

Minis?

 

MINISTER MAURICE LOUSTAU-LALANNE

Mersi Mr Speaker, mersi Onorab. Bon, Ozordi parey ou konnen se coast guard ki annan sa manda search and rescue. E nou konnen ki coast guard par egzanp lo dernyen aksidan ki’n arive coast guard in respond. Be kekfwa in pran en pe letan, akoz kot i ti ete pou li ariv laba in pran en ventenn minit eksetera. Me li se first responder dan sa ka e coast guard i ekipe avek bann bato ki rapid ek bann dimoun kalifye. Me par ler nou bezwen osi servi bann lezot bato a vwazinan akoz zot lo scene pli vit. E se pour kwa ler nou pou increase sa seamanship sa bann dimoun i kapab peser ou menm. Mon konnen ou annan en bato osi ou kontan sorti par ler, ou osi ou kapab involve donn en koudmen.

Se sa ki nou anvi raise, akoz nou napa sa, sa larzan si oule pour nou annan bann life boat, bann life station partou, partou dan bann landrwa kot i annan bokou kongregasyon sa bann bato. So, nou preferab servi bann fasilite ki nou annan e upgrade sa bann, sa bann kapasite sa bann dimoun ki servi lanmer toulezour konman en first response. Mersi Mr Speaker.

 

MR SPEAKER

Dernyen kestyon Onorab Ghislain. En kestyon.

 

HON CHANTAL GHISLAIN

Mersi Mr Speaker, Mr Speaker mon kestyon i vize a bann, sa ki nou dir bato fiberglass bann Mini Mahe. Tou sa bann bato konmela, sa bann pti mini Mahe zot osi zot fer bann traze lo lanmer. Si nou konpar lo later, nenport ki vehicle ki pas lo later zot annan en license menm en senp pti moter. Akoz ki en fiberglass, fiberglass sa bann Mini Mahe zot osi zot pa kapab pey en license akoz zot osi zot transport pasaze ? Mersi.

 

MR SPEAKER

Minis.

 

MINISTER MAURICE LOUSTAU-LALANNE

Mersi Mr Speaker, mersi Onorab. Zisteman se sa ki nou’n konstate i sanble mwan i annan en serten kantite sa bann pti Mini Mahe ki ozordi zot pa legal. Zot pe donn en servis me selman zot pa legal. Alors se sa group ki nou oule legalize. E desizyon ki nou’n pran ozordi i annan en kategori ki dir ‘up to 2miles.’ Ou vwar i annan 4 kategori sa bann bato hire craft me nou kapab met zot anba sa kategori under 2 nautical miles. E se sa louvraz ki nou pe fer pou le moman, e Gouvernman in pran en desizyon ki nou pou license zot anba 2 nautical miles. So, i en keksoz avek nou prop Lalwa ozordi nou kapab fer li. Oparavan nou pa ti pe donnen license pou pran sa bann bato anba 2 miles. Mersi Mr Speaker.

 

MR SPEAKER

Mersi  Minis e avek sa nou pou pas lo PNQ pou apre midi.  Mon sizere – I suspect Mr Kinnear you do not speak Kreol – can I suggest that Kaptenn Valmont you move one seat down and you come and take the present position where Mr Albert is, so that for the sake of the public that is listening to us the Minister will answer the questions and if there is any translation to be done Mr Albert is a very good translator.  At least he learned from today.  Please come and join nou Minister in the front and Kaptenn Valmont, mersi bokou. Yes Onorab Ramkalawan?

 

HON WAVEL RAMKALAWAN

Mr Speaker, mon pe zis demande si vreman nou pou kontinyen – sa ler ki’n arive si vreman nou pou  fer justice, akoz i annan en kantite  bann pwen enportan e la i deza 5 mwen 20.

 

MR SPEAKER

As usual mon touzour pare pou ekoute pou nou fer sa ki byen  pou nou tou.  I annan 2 swa – swa nou komans pran sa PNQ parski ver i annan 5 konponan sa kestyon e mon konnen i pou siste en kantite kestyon siplemanter – me i a zot pou deside si nou pou adjourn e nou pran 9er bomaten demen. Me avan  nou ler si nou pou pran sa desizyon nou pou bezwen demann Minis Loustau-Lalanne ek son lekip si zot available demen.  Eski mazorite zot, zot anvi pran en vot nou retournen demen e nou adjourn la ?  Wi Onorab Prea ?  Onorab Ramkalawan ?

 

HON WAVEL RAMKALAWAN

Mr Speaker, pou nou pa – pour ki demen i pa pran plis letan, I mean mon krwar ki sa Urgent Question ki Onorab De Commarmond in demande kekfwa li i vin pli senp parski i plizoumwen dan zar en Statement an relasyon avek Qatar.  Si mon ti ava kapab propoze ki  nou pran sa 2enm  – sa Urgent Question la apre sa – sa enn la ki dernyen yes – e apre sa si Minis pe kapab vini demen ki demen bomaten nou kick-off avek sa PNQ mon krwar ki i ava fer plis zistis dan tou kote.

 

MR SPEAKER

Sa osi i en opsyon ki posib akoz dernyen kestyon  lo nou  Order Paper ozordi i en Urgent Question par LGBLeader of Government Business.  Mon a demann li son lopinyon lo la.

 

HON CHARLES DE COMMARMOND

Mr Speaker mwan si Minis i  kapab vini demen bomaten nou ava anvoy tou lede pou demen bomaten – nou adjourn la.  Sa mon sizesyon ki  mon oule met devan.

 

MR SPEAKER

Eski mon  kapab prezan poz kestyon  avek Minis vi ki ozordi nou’n  fer ou esper en pe letan – eski  ou available avek Mr Kinnear avek Mr Gary Albert demen 9er bomaten pou pran tou lede kestyon ?  Minister Lalanne ?

 

MINISTER MAURICE LOUSTAU-LALANNE

Mersi Mr Speaker.   Bon  mon  annan Cabinet miting demen me mon ava demann leave of absence pou vin reponn sa 2 kestyon e apre sa mon a join Cabinet apre sa.  Mersi Mr Speaker.

 

MR SPEAKER

Onorab Sebastien Pillay.

 

HON SEBASTIEN PILLAY

Mr Speaker koman en solisyon petet why don’t we start demen avek en lot item  lo Order Business of the House e apre Minis i a  attend son Cabinet miting akoz it’s a Cabinet meeting after all.

 

MR SPEAKER

Me Minis in dir i kapab demann leave of absence ek Cabinet  e savedir i kapab vini e ler in fini – nou pa pou gard li bomaten antye.  Ler i fini i a kontiny Cabinet.  Onorab Ferrari ?

 

HON JEAN-FRANCOIS FERRARI

Wi Mr Speaker mon krwar ki  sa ki Onorab Ramkalawan in propoze would probably most suitable pour Minis akoz Minis i anvi vini demen bomaten.  He doesn’t want to stay here a long time.  So if we can disposed of some business  – at least part of the business now it will be less time than the Minister pou kapab – pou bezwen asize ankor demen.  So mon pe sizere ki nou pran sa Urgent Question.  Mersi.

 

MR SPEAKER

Onorab De Commarmond i dir li in pare pou demann son kestyon demen ; Minis i dir ki koupab pran leave from Cabinet pou li vini annou adjourn nou a rekomanse demen parski Minis in donn nou son parol ki i kapab vini demen.  Ok ?  Mon krwar sa  nou annan konsansis lo la e avek sa nou remersi Minis pou konprenezon e ou bonn volonte pou retournen pou reponn ou kestyon demen.  Nou a zwenn demen bomaten 9er.

 

(ADJOURNMENT)