Home » This Week in the House » 2016 » Verbatim Report NAS Sitting Wednesday 24th May, 2017

Verbatim Report NAS Sitting Wednesday 24th May, 2017

NATIONAL ASSEMBLY OF SEYCHELLES

 

Wednesday 24th May 2017

 

The Assembly met at 9am

 

National Anthem

 

Moment of Reflection

 

Mr Deputy Speaker in the Chair

 

MR DEPUTY SPEAKER

Bon, bonzour tou Manm Onorab e tou dimoun ki a lekout ki pe kontinyen swiv nou deba isi dan Lasanble Nasyonal. Avan nou repran mon anvi zis partaz en de pti keksoz avek zot vizavi lafason ki nou travay in deroule yer. Mon panse zot osi konman Manm zot ganny bann feedback from piblik. Me lo mon kote mon’n ganny bann feedback ki’n sorti kot Sekter Lagrikiltir kot serten fermye ; e menm bomaten kot en travayer ki travay dan Minister Lagrikiltir pou eksprim en pti pe zot konsern, en pti pe lentere lafason ki deba pe ale. I montre ki nou deba lo sa Mosyon i pe al tre byen e mon ti a swete ozordi bann entervenan osi ti a kontinyen dan sa laliny e ki nou fer ki i sorti bann rekomandasyon solid, for, ki Gouvernman i ava ekout lavwa lepep e nou a kapab redonn sa souf sa sekter e parey nou tou kontan koz lo sekirite alimanter, nou tou nou ava santi ki nou pei pe diriz dan sa direksyon. Se lo sa de pti mo ki nou ti anvi partaz avek zot. Si napa okenn matters, napa nanryen lo okenn kote, nou ava kontinyen avek nou deba kot nou’n kite yer. Ok. Nou ava kontinyen e prosennman lo mon lalis mon annan Onorab Henrie. Onorab Gervais Henrie.

 

HON GERVAIS HENRIE

Mersi Mr Deputy Speaker. Bonzour tou dimoun. Mr Deputy Speaker sa Mosyon ki devan nou, i en Mosyon ki  tre senp e i en keksoz ki pou benefis bann dimoun dan lakour ki petet yer pa’n ganny sans antann konmansman deba. I Mosyon table par Dirizan Lopozisyon e ki pe demann laprouvasyon sa Lasanble pou ki Gouvernman i fer 4 keksoz spesifik an relasyon avek Sekter Lagrikiltir. Premyerman pou met lanbargo lo lavant okenn later ki’n ganny idantifye konman later lagrikiltir. (2) pou rann bann dimoun ki’n aste later lagrikiltir pou fer en lot proze me ki pa ankor devlope. (3), pou fer en survey lo later Lagrikiltir kot napa prodiksyon avek bi ankouraz en lansman agrikol. E katriyenmman pou rod lasistans finansyel pou ki bann fermye i ava kapab ganny en nouvo lankourazman pou al lo prodiksyon agrikol lo tou nivo. Mr Deputy Speaker, sa Mosyon parey Mosyon semenn pase pou ban dimoun ki pe swiv en pti pe travay Lasanble Nasyonal e sirtou bann ki’n validate progranm LDS pou vin dan Lasanble, i i form parti sa azanda lezislatif ki nou annan ki tous bann sekter kle pou kapab vreman anmenn en diferans dan Sesel, pou diferan Sekter, semenn pase nou ti koz lo Gouvernman Lokal, la nou pe koz lo lagrikiltir, pli tar pou annan bann lot Mosyon, ki pe adres bann size spesifik, e ki koumsa nou’n tann koz koabitasyon, nou pe osi donn parti ki o pouvwar en koudmen redres keksoz. E sa Mosyon, Mr Deputy Speaker, parey ou’n dir bann dimoun ki dan Sekter Lagrikiltir in koz avek ou, e i annan osi serten nou ki bann dimoun pe koz avek, nou le ki bann dimoun laba deor i ganny en keksoz byen. I pa en kestyon nou dan Lasanble zis nou dir nenport kwa. Nou souvan konsilte avek nou bann dimoun, nou ganny zot bann lopinyon avan ki nou partisip dan deba me sa ki i enportan, bann dimoun ki travay avek Sekter Lagrikiltir dan Minister, zot, zot bann public servant e nou rekonnet tou sa travay ki zot pe fer pou adres bann kontrent ki Sekter Lagrikiltir pe fer fas avek. Me dan sa menm panse, nou bezwen realize poudir parfwa kote nou’n al mal se lo nivo politik. Politik ki diriz Lagrikiltir, parski nou vote pou elekte en Gouvernman e zot ki annan en Polisi ki vin avek en sa Polisi parfwa i pa neseserman sa ki the best advice ki bann public servant i donn zot. Mon a donn zot en legzanp ; an 2011 Prezidan Michel avek Parti Lepep i ranport eleksyon prezidansyel. Zot ti annan en Manifesto then an 2011, solman 2013, 2 an pli tar zot fer sorti stratezi 2017 ki i koz lo en lot keksoz pou Lagrikiltir ki totalman diferan avek Polisi ki zot ti’n al pouse dan Manifesto. So se politikman parfwa kot nou’n annan en problenm avek fason ki Lagrikiltir in ganny zere dan nou pei. Enn bann premye gro mo mon ti aprann dan mon lanfans – mon ti annan 10 an apepre dan sa letan ’82, se ‘lotosifizans. Se dan letan Parti Inik, SPUP ti vin avek sa konsep ‘lotosifizans. Be ozordi letan nou pe ekout deba depi yer, konmsi mon bezwen demande be ki’n arive avek sa Polisi? E mon prezimen ki Onorab Gill lo kote pou koze taler, i pou koz en pti pe probableman dan sa direksyon e la nou ava antann kekfwa ki annan pou dir sa ki mon preempt ki li i pe al dir, me solman akoz sa ti en Polisi Parti SPUP ki zot ti vin avek e mon demann mon lekor apre tou sa letan ki’n arive alor avek sa ? Donk i enportan alor ki bann dimoun ki travay avek Lagrikiltir bann public servant me pli enportan bann fermye, bann prodikter manze i ekout byen letan politisyen pe dir i pe vin fer sa, fer sa, fer sa, e zot, zot bezwen regroupe met sa presyon neseser, pour ki sa bann dimoun i deliver sa ki zot in promet pou fer ; akoz si nou les zot file apre nou pou dan sa problenm kot nou ete ozordi, kot an ’90, 60 kilomet later ti pe dedye pou lagrikiltir e an 2011 nou aprann poudir sa in desann par lanmwatye pou ariv zis 30 kilomet kare. E sa i en problenm. E lala ler nou pe koze i ankor annan sa bann presyon e i annan ki pou vin dan domenn piblik byento. Par egzanp la mon’n aprann poudir kot sit Veteriner kot i ete Union Vale, Minister Later pe met presyon pou ki Veteriner i sorti, e zot servi sa landrwa pou fer Flat. Be sa servis Veteriner pe deza ofer en servis avek Sekter Lagrikiltir, kote i pou ale ? So ki mannyer nou kree sa balans e mon bann koleg Onorab pou koz lo bann lezot legzanp ankor ki nou pou tande ki pe vini. E Mr Deputy Speaker nou pe koz lo sa zafer later. Mwan ozordi mon demann mon lekor, lekel vreman ki annan kontrol lo sa zafer later ? Mon konpran byen poudir dan le pase, Minister MLUH sa lepokla in sanze la i annan lenfrastriktir ladan, zot ki ti zer tou lo zafer later ; me apre sa in ganny pass on avek Lagrikiltir e mwan mon krwar vwala kot serten problenm in arive kot bann dimoun ki dan bann pozisyon pou pran sa bann desizyon – nou bezwen gete dan sa bann zafer, nou bezwen gete. E mon konnen poudir nou annan en Komite ki pe etidye zafer later Zil Eve avek Marie-Jeanne Estate. Sikse zot travay i ava probableman dan lavenir, donn en lelan pou al dan bann lezot bout, Providence, later lagrikiltir, pou gete sa bann zafer. Barbarons la dan plato kot ti annan zafer lagrikiltir, ki pe arive? En dimoun i call mwan semenn pase, i dir ‘‘be pase al regarde, bann Endyen pe reste la anndan, nou’n tande Sinwan pe al ganny en bout.’’ Ki mannyer sa bann keksoz pe arive? Lekel ki pe pran sa bann desizyon?

Nou konman en Lasanble e sirtou lo nou kote ki nou annan sa number la pou nou pouse sa bann… met nou lipye ater, annou al fouye, annou al rode pou nou met sa bann keksoz drwat ; akoz i pa pou nou benefis sa, me benefis nou pei. Nou pe zwe avek – nou pe koz lo manze, nou pe koz nou vant pou servi en lekspresyon Mr Faure dan son dernyen Press Conference, ‘‘Bol diri Seselwa’’. Dezyenm pwen ki mon le vin lo la, Mr Deputy Speaker, se pwen ki Onorab Manm elekte pou La Digue, Onorab Sophola ti pe koz lo la yer e mon le al expand sa pwen en pti pe. I ti pe koz lo sa relasyon ant Lagrikiltir avek Sekter Tourizm. E i annan rezon letan i koz lo statistik. Ler ou get nou popilasyon apre ou get lakantite touris nou pe gannyen, 300 mil plus, i fer apepre 400 mil. So i annan en marse la e pou Sesel konman en Pti Leta Zil, sa  i en area kot nou bezwen regard en pe pli pre. Akoz i annan en lyen direk ant Lagrikiltir avek Tourizm, pou la senp rezon ki konman en Pti Leta Zil nou bezwen realize poudir vre Lagrikiltir i anba en kantite presyon ; pou kestyon later, napa ase resours imen apre fasilite pou enporte i bokou pli vit. Me letan dan menm tan  dan  Tourizm konmela nou pe koz soutenabilité – nou pe koz lo homegrown, nou pe koz lo lotantisite prodwi, be vwala kot bann gran lotel i pe kapab fer bann lyen komers direkteman avek bann pti planter. Mon pe mazin par egzanp anler Mont Signal i annan sa 2 frer ansanm la, Ted ek Terence ki annan pti plantasyon anler lo lateras, be kekfwa en lotel pti pe kapab pe pran zannannan spesifikman avek zot e letan ou pe met sa lo ou menu ou pe dir be sa zannannan i sorti la dan tel kanton, konmsi i fer sa touris, mon krwar annan en pe plis lapresyasyon pou sa prodwi akoz i fre akoz i homegrown parey sa ki mon pe dir. Mon pe mazin mon zanmi Derek Amade, ki i prodwi zepis e i vre i annan lotel ki ankor pe pran avek li me solman i pa pe vann lakantite ki ti pe vann detrwa lannen pase akoz en bo zour en manager dan en lotel i lev-e i ganny en bon nide i dir ‘‘be a mon ava zis enporte.’’ Me sa i pa byen. Mon konnen poudir nou problenm se ki akoz laplipar sa bann gran lotel i pa pou Seselwa, management pa Seselwa, sa bann boug pa care about nou zot.  Zot pe zis vin pran sa ki zot gannyen, zot pe al avek. Zot pe zis eksplwat nou resours. Be mwan mon pe dir sa akoz mon en Seselwa e mon anvi vwar poudir Sesel i devlop dan en fason konpreansiv kot tou Seselwa pe partisipe e benefisye avek Sekter Tourizm ki nou delwil. Tan ki nou pa ankor dekouver sa vre delwil. Alor mon krwar poudir Sekter Tourizm e la Minister Tourizm, lasosyasyon ki regroup bann lotel, mon swete ki zot ava pran kont sa. Ler ou pou fer sa keksoz koumsa ou pe kree metye pou bann zenn, kree lanplwa. Akoz mon krwar le moman in arive pou nou edik nou popilasyon poudir manze i ganny prodwir par lasyer travay dir en dimoun. E i en keksoz nob sa. I pa zis vin par mazik dan en supermarket kot nou’n al aste li kot in byen anbale. Nou pe koz sekirite alimanter, nou pe koz ladyet balanse, manz an bonn sante, nou pe koz lagrandisman lekonomi. Tousala nou bezwen pran kont e alor nou bezwen regard bann fason inovativ ki mannyer nou kapab benefisye plis. Kekfwa pou tro lontan nou’n annan en pe tro… nou pe tro koz lo defi, me kekfwa le moman in arive pou nou annan en vizyon en pe pli optimistik, remet nou lenerzi dan sa sekter e vwar bann solisyon ase senp e solisyon lokal ki mannyer nou kapab devlop Sekter Lagrikiltir ki swa dan prodiksyon fri ek legim e osi elevaz zannimo. E en lot pwen, Mr Deputy Speaker, bokou bann Manm yer ti pe koz lo zot pe trakase ki dezormen tou bann fermye pe vye ; konmsi ler nou pe koz lo fermye nou pe mazin en bonnonm dan en sapo lapay anler lo en lateras. Be tou sa letan ki Polytechnic as it is, in egziste, oli tou sa zenn ki pei, Leta Sesel in depans larzan avek pou donn zot en ledikasyon dan Sekter Lagrikiltir. Ki’n arive? Konmsi ankor i vwar i retourn lo mon pwen ki mon ti konmanse. I politik. Akoz politik. I annan en Gouvernman ki’n elekte, zot ki bezwen annan sa responsabilite pou asire, ki sa bann keksoz pe ganny fer.  Ki sa larzan pe byen depanse, ki sa Polisi ki zot in dir pou fer, zot anbelir li – konmsi. Be nou pep osi laba deor annou konmans reveye.  Nou pa kapab kontinyen letan en boug i fer en keksoz mal, nou kontinyen gard li la. Si i pe mal fer 40 years on  nou pe koz ki Lagrikiltir in ariv sa sityasyon letan mon pe dir zot an ’82, mon premye fwa mon aprann sa mo ‘lotosifizans. E ozordi kote nou’n arive? E petet pou mwan terminen, Mr Deputy Speaker, mon ava dir nou dan sa Lasanble – ankor enn fwa nou kapab koz lakantite fwa ki nou kapab koze ; me alafendefen ki arive ? Nou, nou fer en bout.  Nou met sa size a laporte Nasyonal. La i pe pas lo radyo, lo televizyon, lo internet. Dimoun laba deor pe ekout nou, me solman apre ki arive?   Mwan mon pa en planter mwan. Mon koleg o-bor mwan zot pa dan lagrikiltir. Lagrikiltir i annan en group dimoun laba deor ki pe fer. Zot osi zot bezwen fer zot bout. Regroup zot, vin ansanm. Ti deza en lasosyasyon apre in falter, zot ti pe vin ansanm konman en Korperativ, konmsi… Non selman zis bann dimoun dan Lagrikiltir sa, tou sekter ; maren, ansenyan, teachers, partou nou tande i annan problenm, i annan fristrasyon. Be ki mannyer nou rezourd sa bann problenm si nou pa vin ansanm, – si nou pa trouv bann pwen  an komen ki anmenn nou ansanm e pou nou fer en diferans pou nou lekor an premye lye, avan ki Lasanble, avan ki Gouvernman, avan ki Minister i tyonbo zot lanmen i anmenn zot devan. So koz avek en sel lavwa. Koz for. Regroup zot, rod led e koumsa nou ava kapab bouz devan. Lide ki mwan mon’n met devan se ki mannyer pou annan en maryaz byen ant Tourizm avek Lagrikiltir. Be kekfwa zot bezwen regroup zot al vwar bann dimoun SHTA ; al vwar bann managers lotel ; al vwar Minis Tourizm, esey trash out the idea ki mannyer ansanm zot kapab fer sa bouze. Akoz mon krwar, mon konvenki poudir i annan potansyel ladan ki swa pou vann fri ek legim ouswa lavyann e menm pou bann peser osi. So i annan sa potansyel. E lo en dernyen pwen Mr Deputy Speaker, nou Minis pou Lagrikiltir ozordi, i en dimoun ki mon tou letan ki mon’n konn li in dan Sekter Labank, Finansyel. E kekfwa sa ki mon ti ava dir, se ki mon ti a kontan vwar nou Minis i get lagrikiltir konmsi ki mannyer i kapab devlop li konman vreman en biznes. E anmenn sa lide pou anmenn lasistans finansyel pou fer bann dimoun annan en bon business plan. Sa i bann keksoz ki labank i demande be si ou transfer sa dan lagrikiltir – akoz parfwa letan nou bann dimoun i al dan politik i ganny en pozisyon politisyen parfwa zot bliy bann keksoz senp ki zot kapab fer. E alor i fer ki keksoz pa al telman byen. Alor mon sa ki mon ti ava kontan advice, annou regard ankor lagrikiltir nou pe koz li konman en biznes, i fer larzan i kree lanplwa, ki mannyer alors sa i kapab ganny servi bann fason inovativ e annan en vizyon optimis pou nou kapab relev Sekter Lagrikiltir enn fwa pour tou, ki dan 1an nou pa ava revwar en lot Mosyon parey i ganny anmennen dan Lasanble pou nou koz lo problenm, problenm, problenm dan Sekter Lagrikiltir. Mersi bokou.

 

MR DEPUTY SPEAKER

Mersi Onorab Henrie. Onorab Woodcock.

 

HON WAVEL WOODCOCK

Mersi Mr Deputy Speaker. Bonzour Mr Deputy Speaker, koleg Onorab e tou dimoun a lekout dan lakour. Ozordi sa Mosyon lo Order Paper, i enn ki vreman enportan e mon konnen ki sirtou bann planter Praslin, bann fermye, lontan pe esper sa Mosyon vin devan Lasanble. Mr Deputy Speaker i enportan pou relans lagrikiltir Sesel. Lontan Praslin ti en hub pou lagrikiltir sirtou lo Blok Amitie, Grand Anse Praslin kot pli gran poursantaz lagrikiltir i ete. Lontan nou ti savoy fri ek legim sorti Praslin pou al vann Mahe. Ozordi later Lagrikiltir, Mr Deputy Speaker, pe ganny vann morso par morso antre fanmir ek zanmi e osi avek bann zwer politisyen ouswa aktivis Parti Lepep. Mr Deputy Speaker, mon fek aprann ki en gran porsyon later lagrikiltir par deryer biro Lagrikiltir Amitie pe al ganny pran par MLUH pou fer Housing Estate ek lezot devlopman. Sa i enkli parsel limero 2735. Sa bann later i pe deza ganny okipe par plizyer fermye. Mon okouran ki Minis Lagrikiltir ek Lapes i an konfli avek Minis pou Land Use and Habitat lo sa size. Bann zofisye dan Minister Lagrikiltir i kont MLUH pran sa bann later Lagrikiltir. Mr Deputy Speaker, en Housing Estate i vreman enportan be bann later ki zot ti kapab fer Housing Estate lo la in ganny partaze ankor enn fwa antre fanmir ek zanmi. Tro bokou labi lo later Gouvernman Praslin. Mr Deputy Speaker, byento LDS pou met en pe lekleraz lo sa bann labi. I annan dimoun ki’n aste plis ki en kare later lo Land Bank e later lagrikiltir. Le kestyon se ki mannyer Planning e MLUH in aprouv sa bann demagozi sirtou bann proze lotel ek lakaz lo later lagrikiltir ? Mr Deputy Speaker, lo Praslin napa kontrol, napa en lord lo later Lagrikiltir. I annan en bann ki fer sa ki zot ou le. Mon mazin Mr Pool ki later ki i ti pe plante lo la, PR3172, in ganny subdivide e relocate san ki Minister Lagrikiltir in enform li. Later in ganny subdivide san son konesans an 2 morso, parcel 6645 ek 6646. Tou le 2 parcel pe al ganny servi pou fer 2 lakaz lo la. I annan plizyer later Praslin ki pe ganny sezi par malis par bann zofisye Lagrikiltir san menm donn notis bann fermye ki pe lease sa later. Sa bann later pe reganny distribye avek bann zanmi, ouswa bann manm fanmir bann staff ki travay avek Lagrikiltir Praslin ouswa avek bann dalon aktivis. E sa ki pli pir se ki sa bann dimoun pa pe ganny compensate pou depans ki zot in fer lo sa bann later Praslin. Mr Deputy Speaker, mon mazin Mr Morley Esther, Praslin ki’n rente e ede pou devlop lagrikiltir Praslin, la ozordi in ganny laz e son lasante pa bon, zot le zis repran sa later ki in devlope, ki’n konble tou sa lannen san ki zot donn li konpansasyon pou tou sa bann devlopman ki in fer lo sa later. Mr Deputy Speaker sa i pa zis. Wi, nou bezwen relans lagrikiltir Praslin, me pa pini bann planter ki ozordi zot in vye e zot pa pe kapab fer zot travay parey zot ti fer avan. Si zot repran later at least donn zot 3 mwan Notice parey i sipoze e compensate zot pou bann depans ki zot in fer lo sa later. I annan later ki Gouvernman pe repran ki deza annan rekolt e plizyer prodwi agrikol lo la. Mon mazin Mr Savy Cap Samy, Baie Ste Anne, kot sak fwa CCCL i tir lanmin, plizyer son bann poul i mor. Ladan menm zot oule tir en problenm kot lafimen ki sorti dan lizin ki fer sarbon pe afekte bann zabitan Marie-Jeanne Estate e relocate sa lizin lo later Lagrikiltir o-bor sa laferm ki pou afekte tou son bann livestock ; sirtou son bann poul ek son bann koson. Mr Savy in met son konsern devan Minister pour Lagrikiltir avek Lapes – ziska prezan zot sourd lo li akoz i en siporter Lopozisyon. Nou ti annan nou en labatwar ki ti deservi tou bann fermye Praslin, sa labatwar avek tou son dokiman ti ganny sponsor par Gouvernman Belge. Ozordi labatwar i nepli fonksyonnen. In anvai e bann fermye napa landrwa pou zot tou zot bef ouswa koson. Zot bezwen touy kot laferm ki pa ideal, ou izyenik. Le kestyon nou pe demande akoz ki sa labatwar in fermen ? Gouvernman i bezwen rann kont. Ziska prezan nou napa en labatwar pou deservi nou bann fermye Praslin. Mon mazin Mr Jourdan Barbe, lo blok Amitie ki’n travay pou 28 an pou lagrikiltir e reste lo blok Amitie pou 27an. Ozordi en let i vin kot li sorti kot Lagrikiltir e dir li ki i bezwen sorti kot i ete. Sa msye napa okenn landrwa pou li ale. Son lasante pa bon. Zot aras li later e lease avek fanmir en staff for dan Lagrikiltir ki en konfli lentere. Sa Msye i demann zot pou zis vann li sa pti kare e sa pti lakaz ki i pe reste ladan. I annan plis ki 10an i pe demann sa. Sa later ki Mr Barbe pe reste lo la se bann later 5mil. Mon konnen Onorab Hoareau i konnen ki mon pe koz lo la e bann zabitan Amitie i konnen ki mon pe koz lo la. Mon krwar ki i mank enparsyalite dan lafason ki later Lagrikiltir pe ganny zere Praslin. Bann zabitan Amitie sirtou bann planter ek zot fanmir i fristre. Mr Deputy Speaker, mon lans en lapel avek Minis pour Lapes avek Lagrikiltir pou fer en miting avek bann fermye Grand Anse Praslin, pou ekout bann problenm ki sa lendistri pe fer fas avek. Mr Deputy Speaker, Prezidan Faure, Minis pour Later ek Lagrikiltir fodre zot fer en lenvestigasyon konsernan sa bann later e sa bann dimoun ki pe abiz sa later land bank e later Lagrikiltir Praslin. Tro bokou labi Praslin Mr Speaker. Mon repet ankor tro bokou labi lo later Lagrikiltir Praslin. Sa size fodre osi ganny taken-up par Anti-Corruption Commission. Nou dan LDS nou deza pe fer nou resers e lenvestigasyon lo la, ‘Watch This Space’. Mr Deputy Speaker vreman i annan dimoun ki’n anrisi zot avek later Leta. Zot pa ti pe ekspekte ki LDS ti pou en zour pran distrik Grand Anse Praslin. Mr Deputy Speaker, depi ler mon’n konmans met lekleraz lo sa bann keksoz. I annan plizyer latak personnel ki ganny anvoye lo mwan e mon fanmir – sirtou lo rezo sosyal. Menm Minis pour Land Use and Habitat, Minis Bastienne pe pourswiv mwan ek Onorab Larue pou R3 milyon zis akoz nou admin Seychelles Daily, la mon Somonn la Mr Deputy Speaker. Mon anvi dir zot ki sa i fer mon Wavel Woodcock ‘Pli Determinen Ki Zanmen,’ pou ekspoz sa bann labi ek koripsyon dan later Gouvernman e later Lagrikiltir sirtou lo Praslin. Fodre ki tou keksoz i ganny fer dan en fason drwat e dan latransparans. Mr Deputy Speaker, fodre en resansman tou bann later lagrikiltir Praslin i ganny fer e later land bank osi akoz sa 2 i interconnected. Mr Deputy Speaker, i annan fermye Praslin, ki krwar ki en konplo pe ganny fer kont zot, pou zot degout later ki zot plant lo la. Sirtou vi ki lamazorite bann fermye Praslin i siport Lopozisyon. Mr Deputy Speaker, store Amitie i trwa kar di tan vid, napa langre. Fermye i bezwen fer zot prop debrouy. Napa pwazon kourpa, napa insecticide, napa legren. Ouswa si i annan, bann vye legren ki fermye nepli kapab servi. La depi ler sa Mosyon i vin lo Order Paper, Minis in al fer en pti debrouy Providence, pou met en de pti zafer lo store Amitie. Mr Deputy Speaker, bann fermye pe demann en kestyon ; eski Gouvernman i anvi pran sa bann later pou partaze pou fer proze touristik ? Ouswa 1, 2  Sef i le partaz sa bann later avek zot bann dalon parey zot in fer dan le pase?  I deza annan en lotel ki’n ganny fer lo later Lagrikiltir e Met sa lotel pe konplent ki loder koson, fimyen, insecticide i fatig nennen son bann kliyan e i fatig son nennen osi. Sa bann later i sipoze pour Lagrikiltir me non pa pou fer lotel. Mr Deputy Speaker, prezan pou kouver sa Msye zot le pran later Lagrikiltir pou fer Housing Estate. Mr Deputy Speaker, fodre ki sa bann labi i arete. Later Lagrikiltir se later Lagrikiltir. La ki sa Lalwa 50 met in ganny retire, Gouvernman i merit ase later pou konstri lakaz pou zabitan Grand Anse Praslin. Ti sipoze annan en proze lakaz Koko Rouz 2, Grand Anse Praslin, le kestyon ki zabitan Praslin pe demande, se akoz ki MLUH in pran sa later lo oter Koko Rouz e osi avek ki ? Annou servi later Lagrikiltir pou lagrikiltir. Annou pa met touris parmi koson, bef avek kokonm apre konplent ki bef, koson e kokonm pa merit la.  Mr Deputy Speaker, sa bann later pa later lotel sa, se later Lagrikiltir. I annan bokou later Lagrikiltir Grand Anse Praslin ki’n ganny vann. Me pou plizyer lannen napa nanryen ki’n ganny fer lo la. Later pa’n ganny devlope, Gouvernman i bezwen repran sa bann later e rann sa bann dimoun zot larzan. Sa bann later fodre ganny servi pou lagrikiltir. Mr Deputy Speaker, ozordi napa ase resours pou bann fermye. Bokou laferm pe ganny inonde avek gro lapli akoz napa bann bon sistenm drenaz e Praslin i pli worse. Mr Deputy Speaker, i sagrinan ki Grand Anse Praslin pa zis fermye ki pe ganny afekte me peser osi. Problenm i en ta avek en pake. Lanmen peser ek fermye in ganny anmare. Fermye ek peser i dan gran difikilte Praslin. Mr Deputy Speaker mon pe demann mon lekor ki Minis pour Lagrikiltir avek Lapes pe fer pou rezourd tou sa bann problenm Praslin? Kan eski i pou fer en meeting avek bann fermye e osi bann peser Grand Anse Praslin ?

Pa pou Praslin zeneral me pou bann fermye e peser Grand Anse Praslin? Si i oule mon ava organiz en miting e mon ava envit li ek son lekip e fodre espere i vini. Avek sa mon pou donn mon full sipor Mosyon Leader Lopozisyon e demann Minis, Egzekitiv silvouple vin get en pe dan sa bann demagozi ki pe deroule dan later Lagrikiltir Praslin ; e osi pou met en pti pe plis lanfaz lo relans lagrikiltir Sesel e sirtou lo nou pti zil Praslin. Mersi Mr Deputy Speaker.

 

 

(APPLAUSE)

 

 

MR DEPUTY SPEAKER

Mersi Onorab Woodcock. Onorab Aglae.

 

HON EGBERT AGLAE

Bonzour Mr Deputy. Bonzour tou Manm a lekout e bonzour tou Seselwa. Mr Deputy Speaker, mon pou fer mon lentervansyon lo sa Mosyon san fer okenn politik bon marse lo la. Mr Deputy Speaker, i enportan ki ler nou pe koz lo later Lagrikiltir…

 

HON WAVEL RAMKALAWAN

Mr Deputy Speaker, … imputing improper motive.

 

MR DEPUTY SPEAKER

Order ! Order !

 

HON EGBERT AGLAE

Mr Deputy Speaker. Mon kapab kontinyen?

 

MR DEPUTY SPEAKER

Kontinyen Onorab. Kontinyen.

 

HON WAVEL RAMKALAWAN

 

(Mic Off)

 

MR DEPUTY SPEAKER

Non, non, Onorab in fer en statement, i pa pe fer politik dan son lentervansyon. Order ! Order ! Onorab Aglae kontinyen.

 

HON EGBERT AGLAE

Mr Deputy, mon’n dir pa fer politik, mon pa’n met bon marse avek.

 

( Laughter)

 

MR DEPUTY SPEAKER

Kontinyen Onorab.

 

HON EGBERT AGLAE

Mr Deputy Speaker, napa okenn pei o monn ki napa en Sekter Agrikol. E fermye i enn bann pilye ki garanti nou sekirite alimanter. Ler nou pou swiv listwar Sesel dan sa domenn ki fer mon retourn dan letan kolonyal menm si mon pa ti ankor ne, me listwar ki mon’n fer dan lekol, i montre poudir Sesel ti annan bann lendistri dan letan kolonyal, parey kopra, kannel, patsouli, zepis, lavanniy. Sa bann letan sete bann gran propriyeter ki ti annan sa bann later, me apre Koudeta ki ler Gouvernman SPUP, apre SPPF ti vin o pouvwar ti refer distribisyon sa bann later ti redistribye avek nou bann dimoun lokal ki sa bann letan dan letan kolonyal ti bann soubalter e la lagrikiltir ti konmans devlope dan Sesel. Lentrodiksyon bann Blok ti konmanse ; nou ti vwar nou bann fermye ti lev-e debrouye. Dan Sanmdi nou ti vwar bann gro pannyen lo latet pe ganny anmennen e nou ti annan sa ki Onorab Henrie ti’n fer sorti en lotosifizans dan prodiksyon. Mon konnen ki’n arive, espere ou. La ki parey dan mon distrik ki osi enn pilye lagrikiltir, distrik Port Glaud ki annan bann non ki dan le pase ti renonmen e zot ankor la sa bann fanmir tel ki parey lafanmir Port-Louis, lafanmir Cesar, Essack, lafanmir Grele, lafanmir Ladouce, Julie, sa bann dimoun zot in reste rezilyan e zot fanmir zot ankor pe fer serten prodiksyon malgre bann defi. Ler mon pe koz bann defi, i bezwen nou. Bezwen  poz kestyon, ki’n arive ozordi?

Apre lannen ’80 ki nou’n vwar en boom dan lagrikiltir kot nou ti pe al ver en lotosifizans, nou ti antre nou dan sa peryod ki nou apel ‘Beyond 2000’ kot teknolozi modern ti pe antre e Sekter Lagrikiltir an dizon avek sa ‘Beyond 2000’ avek sistenm mekanik keksoz ti pou pli fasil pou bann fermye. Me sa i pa’n leka, nou vwar nou Sekter Agrikol kontinyen pran en lapant in desann. I annan serten keksoz ki’n arive ki’n koz sa bann keksoz. Fer nou rapel ki lontan, mon rapel bann Seselwa ordiner, nou bann ki ti mizer, ti reste dan leo, ti plante. Sa bann letan bann ki ti annan larzan ti reste o-bor lanmer. E sa bann dimoun leo se zot ki ti pe plante me selman i ti ariv en letan kot konstriksyon ti bezwen ganny pran plas. E bann ki ti dan leo ti bezwen desann bor lanmer, aret serten prodiksyon, aret zot aktivite e la nou ti vwar ki bann ki ti annan larzan ki ti o-bor lanmer ti mont dan leo osi. Sa nou bezwen aksepte e zot osi zot in kontribye pou kapab detri sa problenm later Lagrikiltir. Mr Deputy Speaker, lontan laplipar lekol, Onorab Henrie in koz Polytechnic, mon rapel laplipar lekol ti annan en serten aktivite agrikol. Mon rapel lekol Anse Royale kot mon ti lekol, ti annan laferm par deryer lekol, ti annan elevaz poul par deryer lekol, me tousala ti ganny arete pou diferan rezon e dan lekol li menm en metye parey fermye ti ganny gete konman en metye enferyer. Sa osi i pa’n ankouraze ki nou bann zenn i kontinyen. Ozordi nou preski napa zenn ki annan lentere dan lagrikiltir. Dan mon distrik mon annan 42 fermye ki’n anrezistre me ladan mwens ki trantenn ki ankor aktiv. Ankor kestyon se akoz?   Menm si ozordi avek tou modernite avek tou lavansman teknolozi ki i annan fermye ti sipoze pou nepli annan sa bann hard labour ki nou apele avek sistenm mekanize me selman napa loportinite kot zot in kapab bouze pou zot avanse e fer zot biznes grandi. Fermye pe fer bokou fas avek defi. Ler mon koz ek mon bann koleg fermye ki dan distrik, bann problenm ki zot met devan se premyerman sa akse avek kredi. Minister Lagrikiltir, Lazans, i dir poudir fermye i en biznes, mon dakor ek sa in nepli en zafer kot zis ou pyose, ou met en lagrenn, ou aroze e plant i pouse. I vin en biznes. Me letan ou dir en fermye fer son business plan, submit devan li, i pey en larzan i fer en dimoun fer e ler i anmenn son business plan, en legzanp si i dir ou i ariv R1 milyon, ou dir li non i pou ganny zis 300 mil ouswa 400 mil. Ki mannyer  ou ekspekte sa fermye realiz sa plan lo sa business plan?

Be la a en pwen i konmans fail la. I pa pou kapab bouze. Bann kou lenfrastriktir nou bezwen pran kont, semen i koute pou fer. En fermye ozordi i bezwen shade house avek sa bann sanzman klima. I bezwen annan en stokaz ki zot egzize ki pestisid i pa kapab ganny met ek langre ouswa ansanm ek rekolt. Tousala i bezwen fer diferan sistenm stokaz e sa i kout larzan e i en konponan ki i bezwen dan son business plan. Fermye i koz ek ou, i dir ou i annan problenm delo. I annan letan ki letan lapli i tonbe, delo i annan, lasesres, napa delo. Sistenm stokaz i annan bann ki date depi plis ki 25 an pase pa’n ganny mentenir, pa pe refer pou fer sir ki fermye i annan delo. E bann proze e mon kontan poudir Port Glaud in benefisye avek en proze IFAD kot alafendefen serten fermye lo blok Des Arpent, i kapab ganny en pe delo pou zot kontinyen fer zot aktivite. Me in annan ki’n bezwen arete sirtou bann ki ti pe fer livestock ki ti pe sonny 100 koson, in bezwen arete e napa larelev pou li kontinyen e laz in antre in bezwen arete. Mr Deputy Speaker, nou annan sa problenm pes ki pe avarye ki pe afekte nou fermye e mwan mon pou lans en lapel pou ki Sekter Lagrikiltir avek sa seksyon ki tonm dan Bio i bezwen vin en ti pe pli avan gard ki ler en keksoz i deklare dan pei, nou vitman lo la pou fer analiz e donn fermye lenformasyon osi. Annou pa esper keksoz vin grav apre pou nou dir nou pou bezwen al deor al fer teste… pou fer… e lenformasyon nou pa ni konnen, nou pa pe ganny lenformasyon pou dir nou ki pe arive kot i sorti, bann keksoz koumsa ki fer nou en pe par ler fristre, Mr Deputy Speaker. Nou annan kalamite natirel ki zot ki zot pe fer fas avek. I annan en Lasirans ki’n ganny entrodwir en pe letan pase pou bann fermye, me selman sa Lasirans li menm i pa pe benefisye fermye. Nou dir fermye pou benefisye si i annan en dezas natirel, me selman nou pa kapab defini sa dezas natirel ; kwa ki dezas natirel? Gro lapli tonbe, mon pe koz lo bann fermye ki lo blok Des Arpent kot plato Mahe Beach, flooding i kontinyen pou 2 zour, 3 zour, fermye i perdi rekolt, ler i al claim, i dir ou pa en dezas natirel. Alor kwa ki nou konsider dezas natirel?  Fodre i annan tranbleman de ter ouswa i annan bann deboulisman isi laba ? Mr Deputy Speaker sa bann keksoz i bezwen kler. Akoz ler fermye in envestir larzan pou li kapab fer son biznes marse, i bezwen ganny en rekolt pou li reganny en reveni, i pa kapab perdi larzan. E ler mon pe koz lo sa plato Mahe Beach, e la mon pou lans e pledwari ki sa landrwa malgre in annan bann prononsyasyon ki ti ganny fer ki pou annan serten devlopman, mwan mon pou met lipye ater ki sa later i reste later Lagrikiltir pou nou bann fermye kontinyen fer zot bann kiltivasyon. Nou later pe fini, nou pa kapab kontinyen perdi later. Bann fermye i koz lo materyo de baz. Materyo de baz pa konstan. Ozordi ou al lo store i dir ou i annan lagrenn demen, ou ale i dir ou napa lot, napa pestisid, napa konsistan. E la ki nou bezwen lans en lapel pou ki Sekter Lagrikiltir, atraver SAA, si fodre anmenn partner prive pou donn en koudmen anmennen. Akoz i annan dimoun ki’n pare. I annan dimoun ki’n deza fer vini langre me selman malgre store napa, zot pa oule pran sa langre ek sa dimoun, zot refize, ki mannyer zot oule sa sekter i bouze si nou pa pe travay an kolaborasyon? Yer Onorab Ferrari, in nonm marketing, mon pou dakor avek Onorab Ferrari, nou’n envestir en kantite dan marketing pou tourism me dan marketing pou nou bann fermye?  Ozordi plis ki zanmen nou annan plis lotel dan sa pei me lotel ler nou pti fermye i apros sa lotel i dir, ‘‘Mon annan mwan tan kilo legim, tan kilo fri.’’ Sa lotel pa anvi pran ek sa fermye e par ler sa fermye i bezwen pran swa i donnen swa i pouri lanmenm. Kote nou pe ale?

Nou bezwen ki Minister Lagrikiltir i zwenn avek fermye pou kapab ganny en konprenezon avek Minister Tourizm pou dir alors i ava en poursantaz ki zot bezwen pran avek nou fermye lokal e si zot anvi enporte i pou normal pou zot enporte ; akoz i annan prodwi ki nou napa dan pei, nou pa kapab plante osi isi, i pa pou pouse. I normal me selman nou bezwen annan en balans ki fer ki fermye lokal i benefisye e lenportasyon sorti deor osi i ava annan son plas pou li zwe. En lot konponan enportan ki mon anvi koz lo la se transportasyon, Mr Deputy Speaker. Transportasyon, lontan, parey mon’n dir taler ti met lo pannyen ti pe desann kap ros, ozordi preski partou i annan semen me en transpor pou en fermye aste ozordi i kout li ser. Mon byen kontan ki Onorab Lemiel ti fer resorti, annou entrodwir en Scheme, annou donn zot serten incentive ki zot kapab fer vini en pti transpor a pli meyer marse ki zot kapab fer zot biznes bouze. En lot konponan Mr Deputy Speaker, se vol, fermye ozordi la ki nou annan sa fleo lapoud ki dan pei, pe sibir bokou. Ou plant ou 10 pye bannann, ladan petet ou rekolte zis 5, eski i ankourazan pou fermye?

E ler sa fermye i al lapolis, i pou ale i pou dir, ‘‘Mon pe ganny vole detanzaot,’’ i annan bann rekomandasyon ki lapolis i dir li. Fermye pa pe kapab fence son landrwa, i koute pou fence partou, pou li met sekirite. I pa pe kapab fer sa. So nou, nou bezwen pare pou nou ed fermye pou ki fermye li osi i kapab kontinyen garanti nou sekirite alimanter. Alors Mr Deputy Speaker, si nou anvi ed sa Sekter, nou tou nou bezwen donn en koudmen, pa zis Gouvernman tousel ki pou kapab tir fermye kot i ete. Nou tou nou bezwen donn en koudmen. Parey Prezidan Faure i refer resorti annou keep keksoz simple. Mwan mon pou met serten rekomandasyon pou fer lavi fermye vin pli fasil e petet loter Mosyon dan son Reply i pou annan serten rekomandasyon ki kapab pran ladan li osi. Premye rekomandasyon petet ki mwan mon santi nou bezwen tous lo la se fer fasilite, akse avek kredi vin pli fasil. Sa bann Grant ki nou pe gannyen avek IFAD, CLISSA, BADEA, i devret al kot sa ban pti fermye, pa zis get sa bann gro fermye milyonner ki egziste dan pei. Anmenn sekter prive ansanm avek nou e ankouraz zot pou envestir dan bann lenportasyon materyo de baz pou fermye a en to redwi ouswa san taks. Sa Livestock Fund ki egziste fer li al pou bann fermye ki pe fer livestock. Ozordi mon annan en fermye dan mon distrik ki pe fer prodiksyon dizef, sel fermye ki pe fer poul dan mon distrik e in demande osi pou li kapab fer poul lavyann, i pe ganny en bann blokaz, en bann retar. Sa boug i anvi bouze. Annou vwar li, koz ek li, rod en fason tir en pe larzan dan sa Livestock Fund, ede. Bann ki pe pas dan serten difikilte osi, anmenn zot ansanm, sa larzan ti ganny mete pou kapab soutenir zot e sa larzan i bezwen ganny servi dan sa fason. Fodre Mr Deputy Speaker, ki Lazans i zwe zot rol regilatwar e edikasyonnel pou bann fermye. Dan lekol aret pran metye fermye konman sa dernyen louvraz e Minister Ledikasyon i bezwen vwar li ansanm an partenarya avek Minister Lagrikiltir, pou vwar ki mannyer pou ankouraz bann etidyan pou kapab pran sa domenn e anmenn, fer sir ki ler zot fini lekol, sa bann zanfan ki’n lekol dan lagrikiltir i pa al fer en lot louvraz dan en lot domenn ki pa’n lekol e pou sa arive nou bezwen kree bann incentives pou zot kontinyen bouze. Fodre ki Minister Litilizasyon Later i aret pran later Lagrikiltir pou fer bann devlopman lenfrastriktir ki pa’n ganny dedye pou sa later. Nou devret etabli en ‘No-Touch Zone’ deswit avek sa bann later, sa 30 kilomet kare ki reste e se sa ki Mosyon pe demande ki i annan en embargo i ganny mete lo la e mon siport sa. Fodre i annan detrwa Scheme osi anmars ki ava ankouraz bann nouvo lentere ki vin avek linovasyon, pou fer sir ki fermye sirtou nou bann zenn ki azour avek bann teknolozi, i kapab antre ladan e swiv. Fodre ki nou entansifye sa progranm ki ti konmanse, plant kot lakour pou bann ki annan later. Annou entansifye sa progranm pou fer sir kot bann ki annan later i kapab met detrwa keksoz dan later, akoz FAO in site dan enn son rapor, ki bann backyard i en pilye kontinite pour Lagrikiltir. E pou bann parey Mosyon pe demande ki’n ganny later lagrikiltir, ki i pa kapab devlope pou diferan rezon ; swa medikal swa finansyel ouswa bann rezon, lot, fanmir, Minister Lagrikiltir, Lazans i ava antre dan negosyasyon si zot pou rann later, zot a rann e donn bann lezot ki kapab devlope. Mr Deputy Speaker, mon konnen ki sa travay pou remet Sekter Lagrikiltir kot i ete, retourn li kot i ti sipoze ete, i pa fasil. Me selman avek en plan pli konpreansiv, avek plis larzan ki pou dan Bidze, nou konman bann Manm MNA ki ler Bidze sa lannen i vin devan nou, annou donn sipor e menm rekomande ki Minister Lagrikiltir si i pa pou ganny sa 10 poursan be kantmenm en 8 poursan i ava gannyen, ki i ava fer ki sa sekter i ava bouze. Nou fermye la deor ki pe ekout nou, pe ekout avek optimis ; i pe ekout nou avek en lespwar ki nou, nou pou bezwen get zot. Ki nou pa pou pran zot febles pou fer vin en palto fann deryer pou nou Lasanble. Nou konman bann MNA, nou konman bann dimoun ki bann dirizan, nou bezwen depi ozordi annan en sel lavwa se donn sa sipor nou Sekter Lagrikiltir. Alor Mr Deputy Speaker mon pou dir mersi.

 

MR DEPUTY SPEAKER

Mersi Onorab Aglae. Onorab Flory Larue.

 

HON FLORY LARUE

Bonzour Mr Speaker, bonzour tou dimoun. Mersi. Sa Mosyon in fer nou regard en topik ki mwan mon vreman kontan, later e sa voyaz i later Lagrikiltir. Nou pe gete ki mannyer sa bann later dan nou ka i ganny zere.  Si kantite later Lagrikiltir Sesel i ogmante letan nou’n fer rann bann ki pa pe ganny devlope i a donn plis sans bann ki anvi seye. I a ogmant loportinite dan sa sekter. Mon bann koleg ki’n koz avan mwan, in dir ki demann pou prodwi lagrikiltir i an gran demann. Loportinite i la pou nou devlop sa sekter. Alor annou ankouraz bann zenn ki dan Lekol Lagrikiltir avek en don later Lagrikiltir pour bann ki fer byen. Sa i a en motivasyon pour bann ki fer meyer pour ganny en debousman e en komansman dan son karyer. I a fer bann etidyan annan en bi kot direkteman i pour kapab lans li dan sa sekter. An traver en benefis direk avek en morso later nou a osi elev ki mannyer nou get sa sekter dan nou lasosyete. Nou bezwen tou sort kalite spesyalis dan sa sekter, pa zis dan kote medikal ouswa Lalwa ki nou bezwen enzenyer ouswa Dokter. Sa sekter osi i form enzenyer ek dokter. Annou pa fer nou zenn krwar ki i annan zis labourer dan Sekter Lagrikiltir. Nou bezwen reget ki mannyer nou promot Lekol Lagrikiltir. Bann ki annan lanmour pour later i devret ganny ankouraze, akoz se zot ki nouri nou e en zenn i a konnen ki son karyer i literalman dan son lanmen. Nou’n vwar plizyer repriz ki mannyer letan napa en plan ki kler se nou sitwayen ki soufer. Nou vwar ki dan sa Lasanble ki lot kote latab in vin rod kiltir. Eski Gouvernman pe donn sipor sa sekter? Si lenportans pa ganny donnen pour sa Mosyon, nou pou tann en Manm pe osi vin rod lagrikiltir Sesel byento. Mr Deputy Speaker, mon zwenn mon koleg Onorab Ferrari pou enplor Gouvernman pou asiste Labank Devlopman, pou fer sir ki zot met profesyonnel ki konpran ki mannyer loan finansyel i ganny donnen avek fermye. Mon pran en legzanp La Réunion dan en Labank Lagrikiltir tel ki Credit Agricole se bann zenn enzenyer Agrononm ki ankadre bann dimoun dan Sekter Lagrikiltir letan zot vin rod lasistans finansyel atraver en loan. Fermye i fer repeyman diferan, pa parey bann lezot loan ki ganny pran. I en spesyalizasyon ki la pour kapab siport bann fermye letan zot pare pour fer devlopman e fer bann sistenm ki ed zot tras zot depans. Fodre Gouvernman i met bann plan finansyel spesyal avek Labank Seselwa avek en amortisman loan pou lenvestisman long dire pou bann lekipman ki kout bokou, be ki vreman neseser. Fermye pa kapab zis pey en loan, 3, 4 an letan e pe aste li en trakter ouswa i pe fer bann ….

Later i rar, wi Onorab Aglae me lekel ki vann later Sesel, pa LDS alor nou bezwen get politik dan sa kote. Pou nou kontinyen, nou pou vwar ki later vin pli rar akoz tou sekter pe rod later pour devlope. I annan demann pour trouv plis later pour fer lakaz. Alor nou bezwen protez sa bann later pour lagrikiltir ki parey sif in desann dan prosen 20 an nou kapab vwar li desann ankor par 50 poursan, ki fer ki pou napa preski ditou later. Dan sa laliny mon vwar sa sizesyon embargo i bon pour regle ki mannyer nou pou bouz devan. Mon ti a kontan ankouraz Gouvernman pou get bann dimoun ki’n fer demann me zot pa’n ganny asiste letan zot ti anvi fer devlopman. I annan en legzanp ki’n ariv dan sid Mahe, Anse Forbans, Takamaka, kot en dimoun ti anvi ogmant kapasite plante otour son later ; alor i ti fer aplikasyon akote son laferm pou li ganny plis later. I ti ganny anvoye demen tanto apre i tande ki en lakonpannyen ki apel Reem Ltd in ganny sa later plot number T2236, anba en lease pour R1 par an pou 99 an. Sa later ti ganny demarke konman en later Lagrikiltir. I mezir 215,000 met kare. Konbyen laferm nou ti a kapab fer lo la. Sa propriyeter, Mr Suliman, i menm dimoun ki ti rann 10 bout later Beau Vallon apre diskisyon avek Msye Danny Faure pli boner sa lannen. Sa ti ariv an 2008 e ziska prezan napa okenn devlopman lo sa later e byen sir napa okenn laferm lo sa later. Sa later i menm en later ki Gouvernman ti sezi pour lentere Nasyonal. Sa zenn li i ti kapab kontinyelman agrandir son prodiksyon. Kote i ti a kapab ete ozordi dan sa lendistri? Oli lentere Nasyonal si 10 an apre napa en devlopman? Alor si Gouvernman I negosye pour rann sa later, nou a kapab azout ankor enn pti bout avek sa 30 km kare ki Onorab Ramkalawan i dir i reste. Mr Deputy Speaker, mon siport sa Mosyon pour Gouvernman reget distribisyon later lagrikiltir akoz lasante en pep i egal avek son kalite manze ki i konsonmen. Mersi.

 

MR DEPUTY SPEAKER

Mersi Onorab. Onorab De Commarmond.

 

HON CHARLES DE COMMARMOND

Mersi Mr Deputy Speaker. Mr Deputy Speaker, sa Mosyon  i en bon Mosyon. I difisil vot kont sa Mosyon akoz i konsern vant. Nou lo sa kote latab nou pou siport sa Mosyon definitivman, me petet zis i bon antre dan en fason tre kourt pou nou, nou Lasanble reflesir lo detrwa keksoz. I kler atraver bann komanter ki’n ganny fer poudir i annan en moman dan bann letan ’80, dan bann lannen ’80, nou lagrikiltir ti’n monte, nou prodiksyon ti’n monte. Depi lo kote poul, pork, bann legim ensidswit. Prezan la nou dir in desann, i bezwen i annan en keksoz ki’n arive. Prezan lo lot kote, mon rapel ti annan NYS, pa direkteman link avek lagrikiltir, me ti annan en rol ki i ti pe zwe. In fermen bokou dimoun ti pouse pou dir fermen, fermen, fermen, in fermen. Mon rapel osi en pe letan nou’n koz lo liberalizasyon me avan dan sa bann letan, lannen ’80 ti annan SeyCom, bann, koman dir sa, bann korperativ ki ti marse. Me selman dan sa bann entity, korperativ, SeyCom, NYS, ti annan osi problenm. Mon pe dir ki pa tou ki ti byen. Ki mon pwen argimant mon oule avan se ki dan nou pei e menm ozordi nou kontinyen petet fer li. Nou kree serten lorganizasyon, body, entities, whatever ki nou oule apel zot, me letan nou kree definitivman i annan bann mankman, i annan bann problenm avek. Me nou konman en pep olye ki nou gete kote sa bann mankman i ete pou nou aranze, anbelir, met lide ansanm pou nou kree e fer sa keksoz ki nou’n kree vin pli bon, pli itil pou nou menm nou. bokou nou, nou fer en bann demagozi avek nou fer bann problenm e nou dir petet fermen, petet arete, petet fer isi, fer laba, ki apre sa bann menm keksoz ozordi nou vwar poudir i manke e sa i annan en lefe e sa lefe i negativ lo petet prodiksyon agrikol ensidswit. Sa i en pwen, mon oule zis met devan nou Lasanble, san ki mon al pli lwen, avek sansan zot a mal pran sa ki mon pe sey dir. Me prezan an menm tan loter Mosyon in met devan nou serten keksoz ki dan son resers ki fer sans. Lakantite later lagrikiltir in redwir, en konsern me ladan osi nou vwar poudir i annan dimoun ki’n ganny laferm, papa in konmans travay me apre napa swivi. Dan en moman letan Gouvernman, in vini in donn konsesyon e plizyer konsesyon. I annan ki’n servi byen sa konsesyon, i annan osi nou bezwen aksepte ki’n mal servi sa konsesyon. Mwan mon konn fermye ki’n ganny pick-up me apre olye servi pick-up pou lagrikiltir, pick-up in vin business dan li menm e sa bout lagrikiltir i tonbe. So i annan diferan sa. Prezan ou annan osi dimoun ki’n ganny later lagrikiltir, i vann sa later lagrikiltir, sa lease. I annan ki’n vann menm ek etranze e Gouvernman li in donn sanksyon, i donn permisyon pou sa ganny fer. Napa problenm me mon problenm mwan se sa follow-up. Si ou’n donn sanksyon pou les en later lagrikiltir ganny sanz lanmen, menm avek en etranze, en konpannyen etranze, nenport, me ou bezwen swiv ki sa lagrikiltir ki i ganny devlope. Si ou’n donn sa sanksyon apre ou’n ferm lizye, i annan en problenm. Nou’n vwar osi pandan sa bann lannen ler lagrikiltir in monte apre bann dimoun ki ansarz nou lagrikiltir, in mal zer sa Minister. Ler mon dir Minister la mon pa pe met ledwa zis lo Minis mwan, me depi son bann teknisyen, advisor, tou sa ki i annan pou zwe en rol. Me prezan nou al pli devan ki sa e mwan mon kontan pou fer resorti avek nou Lasanble, dan Manifesto Parti Lepep nou annan enn de pwen lo lagrikiltir e ki mon panse Prezidan Faure an Juillet letan i pou mansyonn bann zafer akse avek labank, sa bout osi i ava resorti. Akse avek finans be si fermye napa be nou’n fini anmar son lanmen. Pa kapab avek sa lentere o ozordi, en fermye i pa pou kapab ale dan lagrikiltir, i pa pou kapab. So i bezwen annan en keksoz ki ganny fer dan sa direksyon, parey dan nou Manifesto i dir. E mon espere ki sa i a ganny fer dan en fason tre kourt e ki nou bann fermye i a vwar sa nouvo souf pou li al devan. Me i annan en lot keksoz ki Gouvernman i responsab osi, la mon pe koz lo Bidze Lagrikiltir. Bidze Lagrikiltir i bezwen ganny ogmante. Nou pa kapab dir nou oule en ogmantasyon dan prodwi agrikol, nou oule ki bann fermye i fer pli byen, me selman Bidze Lagrikiltir i reste ptipti. Nou koman sa Lasanble la, nou pou bezwen dan sa voyaz ki vini, lot fwa nou’n konmans diskit lo la ; sa voyaz nou bezwen pli, diskit li dan en fason pli viger – avek plis viger.

E dan sa lespri la, mon pour demande ki Onorab Simon Gill ki responsab – si oule nou pei, nou Lasanble, lo nivo Lafrik la kot i sorti dan sa Komite, avek Pan-African Parliament ; tre byento mon demann li semenn prosen si neseser, e nou Lasanble Mr Deputy Speaker, mon konnen ou pour donn sa fasilite anmenn Mosyon. En Mosyon pour kree en Komite lo Food Security, en Komite nou Lasanble lo Food Security. I enportan sa Komite akoz sa Komite i pou bezwen tou sa bann konsern ki nou bann Manm ozordi, e yer ek ozordi pe dir, i pour bezwen ganny fer en swivi. Nou pour nepli bezwen kapab kontinyen en zour nou anmenn en Mosyon i pas en pe letan nanryen pa fer, lot group i anmenn en Mosyon, en lot dimoun i anmenn en Mosyon. Nou pa kapab kontinyen koumsa.  I bezwen an fason pli koeran, pli for e sa Komite ki mon pe nonmen la.

Onorab Ferrari konmsi, sey serye ou en pe… sa Komite li bezwen pe get sa bann keksoz. Par egzanp i bezwen pe travay pli pre avek Minister Lagrikiltir pour fer sir ki sa bout Bidze i ogmante. Pour fer sir ki sa bann later, nou pe koz embargo lo later Lagrikiltir ki napa bann move desizyon ki ganny fer kot i konsern Later lagrikiltir. Ensidswit, bann issues serye ki bann fermye i annan, i kapab osi ganny get par sa Komite. Sa i en sizesyon ki mon’n mete – en propozisyon e ki sa i a ganny fer pour ki i annan osi en lenstans ki pe swiv nou Sekter Agrikol e osi a pe gete ki Gouvernman pe fer vizavi sa sekter.

En lot pwen mon le avanse Mr Deputy Speaker, Lagrikiltir versus nou tourism. Nou’n ogmante dan tourism lakantite touris ki vin Sesel in ogmant en kantite fantastik. Me nou bezwen  sa touris. Be prezan i annan, ankor mon kontan pou fer resorti dan nou Manifesto  paz 10 i dir, i koz lo lagrikiltir organic farming. Be organic farming ; savedir sa touris letan ou pe dir li vin Sesel, ou pa pour manz poul Brazil, me i annan en poul ki nou’n prodwi la e ki healthy ki bon pour ou lasante, wi i pou fantastik.

Be nou bezwen pe ankouraz sa fermye pour li prodwi sa poul. E sa poul i pa kapab egzorbitan ki nou, nou pa kapab aste.  E sa i le retonbe i annan en lefe ; i pa zis lo sa touris li, lo nou pep, ozordi nou pep sa kantite kanser pe ogmante e nou konn tre byen. Kantmenm nou pa ankor tou sa bann tes nou lespri i dir nou, pou dir i annan en relasyon direk avek serten kalite lenportasyon ki nou pei pe fer avek bann prodwi ki annan en bann keksoz ki pa normal ladan, e ki i pe afekte nou pep.

Alor si nou pe promot en Sekter Agrikol ki bon, ki sen sa i pou ed nou lasante as well. I pou fer ki sa kalite depans, sa kalite fason ki nou pe manage nou lasante, depans ki nou fer dan lasante, i ava ganny fer en lot fason, i ava redwir. E ki la nou a vwar bann benefis ki Sekter Agrikol i kapab anmennen. Nou annan en lot area.

Nou annan ozordi dan nou pei, en ogmantasyon enorm dan lakantite avyon ki vini – fantastik. Be sa i en loportinite dan li menm. I vini i anmenn touris. Me nou ti a voudre ki i fer 2 keksoz sa bann ta avyon ki vini. Ler i ale i al avek en pe prodwi ki nou nou’n prodwi isi Sesel, pour vann deor. Si nou fer monte, si nou prodwi en kantite keksoz, dizon poul,  en letan mon rapel dan Sesel dir non ou pa kapab i annan en limit ki nou donnen pour prodwi poul.

Tan kantite i annan en ceiling, apre non akoz si i ariv en maladi tou pou mor apre nou tou pou mor nou osi. Konmsi nou pa pou ganny soz, pa pour ganny ankor poul. Alor ou bezwen kit en bout pou fer vini. Mon Napa problenm ek sa mwan. Les ou bout fer vini ou si oule ou, be les osi prodiksyon lokal ogmante, i annan en dinamik letan i monte. Les vin, les li flood market ou. Si i flood market ou fer ki pri pou desann. Si pri i desann nou pep benefisye akoz la nou pe koz lo son kout lavi, pri lavi i a desann li osi. Si i flood market i annan tro bokou i a eksporte. Ozordi i annan enta avyon, i ava anvoy li dan bann pei akote pei Arab olye rod poul laba Brazil i a ganny sa poul isi. Kekfwa i ava pli ser napa problenm, me zot annan larzan pour aste. E si ou dir li healthy i pou pran. I annan sa kalite dinamik ki nou bezwen eksplwate, be sa fermye petet i annan serten ki ptipti. Be i annan enn de ki gro.

E i annan lezot ki ptipti i pa kapab lo li tousel. Nou bezwen donn li sa koudmen. E la ler mon pe koz sa kantite avyon transpor aeryen ki nou annan, nou pe koz osi pour sa bann gro fermye. Gro fermye  bezwen al deor osi, ale challenge konmsi the world, the region. Rod later deor i annan sa bann posibilite ki egziste ozordi lefe ki nou dan COMESA e tou, i annan posibilite pour nou fermye al envestir dan bann pei akote.

E sirtou kot nou vwar sa bann avyon i ale, ki zot kapab prodwi anmas laba, e fer vini, enport, savedir ou enport ou prop prodwi fer pour Sesel. I kapab ede sa, i annan parey mon dir i annan en dinamik la ki kapab egziste. E ki nou bezwen eksplwate. E sa nou fermye, so what si en Seselwa i devlope, i vin pli ris, e pli ris i vin en milyonner be napa problenm. O-kontrer nou devret fyer. Nou devret kontan. Pa kapab tande ki dimoun de zis, deor laba ki’n ris. I bon tande osi, i annan Seselwa avek loportinite ki son pei in donn li ki’n kree, e ki’n, li osi in al devan in monte menm, in vin milyonner, milyarder – no problem.

Mwan mon krwar sa bann direksyon ki nou devret pe pran. E an menm tan Mr Speaker sa Komite li i a fer tou sa bann swivi. Lotrozour letan nou pe koz lo Food Security, e avek Tourism, Minis lapes ti la. I annan en dimoun ki demann en kestyon; nou pe koz en peser, en dimoun Praslin, bann pti peser tradisyonnel i dir si li i pran de touris i anmenn lapes Minis pa’n prononse lo la. Me konmsi i annan la ater ki pe think outside the box. I pa pe mazin sa touris zis gro charter ki gannyen. Li sa, dan son pti bato, dan son pti fibreglass i osi i kapab si i neseser pran de touris i anmenn lapes lo koray la, be fantastik, si i kapab fer sa mon napa problenm.

Mwan mon krwar i annan en ta loportinite, en ta fason la ater, me nou osi nou, nou bezwen siport nou fermye. Ouver son lizye, me petet i annan ki deza vwar kote pour pase. Lotrozour i annan en zenn garson sorti Glacis, i dir mwan li i pas partou i aste bann fri, i vann ek lotel. E i pe rode. I dir mwan in demann en bout later pour li kapab debrouye lo la akoz in sorti dan Lekol Lagrikiltir li. Difisil – ziska ozordi i pa ankor gannyen. Pour mwan mon vwar i drol. Pourtan nou dir i annan later Lagrikiltir la ki nanryen fer, ki ideal, ki mank dimoun pour met lo la. So i annan, i kler pour dir, i annan en problenm i annan problenm. E ki sa bann, sa komite mon pe, ki mon pe nonmen la, i kapab osi pous Minister pour kapab rezourd sa bann problenm enn pti pe pli vitman.

E petet serten sa bann dimoun. Nou pe koz WTO, be WTO li osi in vini in zwe son rol li. Ler nou’n dan reform pli move IMF, World Bank i dir ou lala, fason fer se koumsa. Be nou napa problenm. I annan detrwa si oule dir body enternasyonal ki nou bezwen form par ladan, sa osi i annan dimoun ki’n pouse ki’n dir nou bezwen antre dan WTO. Ok, i annan serten keksoz ki nou’n ganny pouse pou fer me nou, nou bezwen koman en pep dir tyonbo en kou. I annan en limit ki nou, nou pou aksepte keksoz. Sa bout la nou pa pou dakor. Ki mannyer La France li i donn konsesyon son fermye, nou, nou le touy nou fermye nou, nou oule trangle li. Non i bezwen, nou bezwen met devan WTO, e souvandfwa letan nou met devan zot, zot tande zot, me si nou pa dir nanryen, si sa bann ki responsab pour promot sa pa dir nanryen be zot get away with it.

So, sa Komite li osi i a donn koudmen, pour li kapab rod en fason pour fer sa bann swivi, pour kapab nou Sekter Agrikol al devan dan en fason pli robis, pli dinamik e sa mon garanti i pour anmenn sa bann benefis ki mon’n mansyonnen pli boner lo la. Alor Mr Deputy Speaker, sa Mosyon nou pour siporte, e nou’n koz lo labatwar. Mwan lot zour ler mon ti al Praslin, mwan mon’n ankoler ler mon get sa labatwar, i zis la en soz koumsa menm, en fenomenn koumsa menm. Prezan mon demande be lekel ki ti fer, i dir Gouvernman ki’n organize pour  fer atraver bann Fon ki in gannyen deor.

Be something wrong somewhere. Ou’n fer prezan i reste la koumsa, i dir in vann ek en prive prezan. Privatizasyon. En bann dimoun ti pe kriye privatizasyon, i dir lala in privatize; prezan sa prive in kit li lanmenm. I mal, i annan en problenm. Nou koz labatwar ti annan Farmers Association, Famers Council se pa lekel i dir donn zot, zot a fer marse en kou. Sa osi in pase dan nou pei sa. In donnen depi food soz la, Animal Feed, in donnen e la ozordi nou dan en pli gro problenm. Nou bezwen revwar tousala. I annan serten kestyon sa bann Council la Farmers Association ouswa Farmers Council la i bezwen vin reponn nou Lasanble ankor. I annan kestyon ki pa ankor ganny reponn la. Sa osi i bann issues ki nou bezwen, nou bezwen vwar. En dimoun in, enn nou bann Manm in koze yer pour sa zafer lotel i pa oule, kantmenm i ti ava oule aste avek nou fermye i dir kot in touye laba i en problenm.  I vre. Sa osi mon’n ganny, plizyer dimoun in vin kot mwan pour met sa konsern.

Be sa i bezwen ganny met lanmen lo la vitman. Lagrikiltir pa kapab konmsi, Minister pa kapab les sa bann zafer pase. I bezwen li vin proaktiv osi e anmenn medya, vini, sa latransparans la bezwen, marse dan sa pei, bezwen konnen, i vini, e nou a vwar. Si prezan nou’n donn en dimoun en keksoz pour fer marse i pa kapab, i pa pe fer li bye. Be nou bezwen rod en fason pour repran, pour re rod fason pour nou refer li marse ; akoz pei i pti, pti, nou pa kapab annan en ta menm keksoz partou, sansan i pa pou vin vyab.

E dernyen keksoz mon pour dir se ki mannyer in dispose sa bann keksoz ki nou enporte e ki pa bon. Lotrozour letan mon ti al lo dumpsite. Tomat ki annan sa bann lenfeksyon avek in ganny mete zis koumsa. Pa ni kouver nanryen, zis in ganny large lo dumpsite. I annan en problenm. E Minister Lasante pa ni pe swiv ki pe arive, e i pa pou kapab swiv. I laba dan biro en boug in al zet sa lot dumpsite kote li i pou devinen. I pa pou konnen pourtan i annan ki pe manage dumpsite, ki i pa pe fer son louvraz. I devret lir LWMA koman i vwar, i dir ou pa tande. I bezwen alert lotorite. I bezwen annan sa, sa bann dimoun ki annan zot responsabilite i bezwen fer li en pti pe pli byen. E ki nou, nou bann fermye osi nou lans en lapel avek zot. Ozordi dan lemonn zis sa ki ou prodwi. Pran ou dan Lafrik sirtou bann pei Tyermonn, ou prodwi kakao,  sa boug ki’n prodwi kakao li, i pa fer bokou larzan li, sa boug ki fer sokola ki ganny plis larzan.

I annan en dinamik la, nou fermye si i prodwi zis mayok, i pa ase, i bezwen fer son chips i bezwen fer lezot zafer la ki i pour kapab sa valer azoute la ; sa boug ki fer zis pork la, i sonny koson epi i vann li – pa ase. I bezwen met son valer azoute e Gouvernman, Minister i bezwen rod fason pour travay avek li pour anmenn sa lankourazman pou fer sa bann valer azoute arive pou ki sa  bann prodwi i kapab ed nou pep, i ava bann prodwi ki pli bon. E li osi sa fermye i ava benefisye, e tou dimoun i ava ganny en fason pour li kapab avanse dan sa direksyon.

Vwala Mr Deputy Speaker avek sa bann propozisyon avek sa bann komanter mon ava demande ki nou siport sa Mosyon ki devan nou. Mersi.

 

MR DEPUTY SPEAKER

Mersi Onorab De Commarmond, Onorab Esparon.

 

HON REGINA ESPARON

Mersi Mr Deputy, sa Mosyon ki’n ganny prezante par Leader Lopozisyon pe demande ki Gouvernman i remet lanfaz lo bann fermye pou ki nou Sekter Lagrikiltir i re ganny e lelan kot fermye i a santi ki zot kapab vin pli prodiktiv. E sa dan li menm a fer ki nou prodiksyon lokal a ganny valorize e fermye a pli ganny ankouraze pour reste dan Sekter Lagrikiltir e elevaz zannimo.

Mr Deputy Speaker, Mosyon pe osi demande ki Gouvernman i revwar sistenm alokasyon later Lagrikiltir pour met a dispozisyon sifizaman later pour dimoun ki anvi fer sa travay agrikol e elevaz zannimo. Ozordi bokou fermye ki ti pe fer byen dan sa sekter i dekouraze akoz mankman resours ek sipor kot zot vwar zot an fas difikilte e zot in prefere angaz zot dan lezot aktivite, dan lezot kalite travay akoz zot, zot santi ki Gouvernman pa’n donn zot sa lankourazman kot i neseser. Malgre ki Lasosyasyon Fermye in pouse pou adres zot problenm, me parfwa zot pa arive rezourd tou problenm ki fermye pe fer fas avek.

Dan bokou ka zot war zot fas a bann difikilte kot i mank bann resours de-baz e a zot dispozisyon pour fasilit zot travay tel parey langre, legren, pestisid eksetera. Sa i sirtou bann pti fermye akoz bann ki pli gro i aste an gro pou stokaz e bann pli pti fermye i vwar zot kwense. Mankman bann lezot lenfrastriktir parey delo, move kondisyon semen, napa bon sistenm irigasyon e osi bann lobstak ki fermye i rankontre.

Mr Deputy Speaker en lot dekourazman dan Sekter Lagrikiltir se sa sityasyon kot Gouvernman i pran later Lagrikiltir pour fer konstriksyon lo la parey loter Mosyon in fer resorti. I annan ka kot dimoun ki napa nanryen pou fer avek lagrikiltir i ganny donnen en bout later. E mon pou dakor ler loter Mosyon i dir ki dimoun ki’n aste later Lagrikiltir pou fer proze ki pa ankor devlope, i devret rann Gouvernman e Gouvernman a reallocate zot avek en lot bout later.

Akoz dan bokou ka li sa dimoun ki napa okenn lentere dan plante sa later, i ganny itilize pour en lot proze ki pa neseserman annan pou fer avek prodiksyon manze. De lot kote ou vwar bann sityasyon kot sa fermye ki li i annan lentere pou plante son non i reste lo en Waiting List e i pa ganny sa loportinite pour li ganny lease en bout later Gouvernman pour li devlope. Mr Deputy Speaker, ou annan bann lot sityasyon kot tou fasilite i ganny met a dispozisyon en sel dimoun e lezot i ganny reste deryer.

Ozordi i enportan note ki i annan 121 fermye lo Waiting List pe espere pour ganny en morso later Lagrikiltir. E sa i dan diferan distrik lo Mahe, Praslin avek La Digue. Mr Deputy Speaker lo sa note mon ti a kontan siport propozisyon fer par Onorab Lemiel pour ki later Lagrikiltir i ganny met dan lanmen Minister Lagrikiltir Minister ki responsab pour Lagrikiltir e sa i ava fasilit alokasyon.

Mon’n mansyonnen ki i kontinyen annan diferan problenm ki dekouraz fermye. Mon konnen ki i annan en survey ki’n fer dan lepase, pou idantifye e rektifye sa bann problenm. Me ziska prezan, ziska ozordi en kantite fermye i war zot ankor pe fer fas avek menm sityasyon, malgre ki survey in fini konplete.

Nou’n tann Minis pour Lagrikiltir pronons son lekor dan Lasanble lo Bidze, ki i pou regard dan problenm ki fermye pe fer fas avek. Fodre espere i gard son parol akoz parfwa Mr Deputy Speaker, Gouvernman i taye, i fer bokou survey ki pa neseserman anmenn solisyon. Ou vwar soulazman pour bann problenm.

En lot problenm se move sistenm ou fasilite drenaz, ki koz inondasyon parey nou’n tann koz lo la pli boner.  E letan gro lapli i tonbe, fermye i vwar zot plantasyon pe noye e parfwa tou sa ki zot in pran letan pour plante i ganny detri en sel kou. Si vreman nou anvi redonn bann fermye sa lankourazman, i osi neseser pour war fasilite kredi pour bann fermye ki dan bezwen pour ki zot ganny akse pour zot ganny larzan sirtou anba SME Scheme avek lezot labank avek en lentere rezonnab.

I osi enportan ki Minister Lagrikiltir, i travay pros avek lasosyasyon e bann fermye pour donn zot konsey e osi ed zot pour soulaze, sirtou dan bann ka kot sa fermye li menm in mal kalkil serten keksoz ouswa serten keksoz i an deor son kontrol ki pe afekte li.

Mr Deputy Speaker, atraver sa Mosyon ki mon pour donn mon sipor, mon demande ki Minister i regard bann mekanizm ki an plas, pour ankouraz bann zenn graduate dan lagrikiltir pour ganny akse avek bann fasilite Kredi, pour zot kapab konmans zot prop biznes.  Sa i tre enportan sirtou si nou anvi ankouraz, e relev nou Lendistri Agrikol nou bezwen empower nou bann zenn fermye pour ki demen zot pran la relev.

E dan sa menm laliny Gouvernman i bezwen revwar la fason ki Livestock Trust Fund i ganny zere pour li pli byen benefisye e asiste bann fermye. Son bann lobzektif i bezwen ganny revwar pour gete si i azour avek demann aktyel ki fermye i bezwen e vwar ki mannyer sa Fon pe ganny distribye. Dan sa fason,  tou dimoun ki enplike a konnen ki pou espekte e osi konnen si sa bann larzan pe ganny zere, dan  lentere sa bann ki dan bezwen.

Mr Deputy Speaker, ozordi ler ou koz ek bann fermye ki pe fer elevaz zannimo, zot pli gran problenm se labatwar. Dan en antretyen ki mon ti gannyen avek Mr Tedi Songoire – en fermye ki lontan pe fer elevaz zannimo ki mon krwar tou dimoun i konn li, koman en travayer en debrouyer, i met a rakont mwan bann problenm ki zot pe fer fas avek kot labatwar. I dir ki depi ki Gouvernman in transfer labatwar dan prive, zot pa pe servi balans. Tou fermye pe konplent ki zot perdi ek sa sistenm mezir likou pour kalkil son pwa olye ki zannimo i ganny peze lo en balans.

Tedi in dir mwan in fer bokou konplent. In monte ziska State House pour fer demars e zot in ganny en balans. Me problenm i se ki labatwar pa oule servi sa balans. Mr Songoire i kontinyen, e donn mwan legzanp ki ler son koson i sorti lo son laferm i peze, les dir en koson i pez 110 kilo ler labatwar i mezir likou son koson i tonm anviron 86 kilo, e li ki perdi larzan. Sa i dekourazan i dir. Si ou gete letan i sorti lo laferm i pe kalkil 110 kilo e ler i al peze i ganny 86 in deza perdi li 24 kilo. E 24 kilo par R45 i tonm li anviron R1000 ekek.

En lot problenm se sa zafer ki ler ki zannimo i pare pour touye, labatwar pa oule pran. I fer mwan konpran ki sa sistenm met randevou e donn quota ki labatwar in entrodwi pe fer zot fristre. Ler li in pare pour tir 30 koson labatwar i dir anmenn zis 10, e si i anmenn plis ki sa labatwar i fer li retourn avek. Mr Tedi ti fer mwan konpran ki ler en park in pare pour tire, ou pa kapab tir par morso, i met zot an retar dan prodiksyon. Apre lavyann i sote, i sot grad, i fer ki kalite lavyann ki ou prodwi pa bon kalite. Me plito plis lagres ki lavyann e sa pa bon pour lasante.

Mr Deputy Speaker, Mr Songoire i dir mwan ki lontan, kot labatwar ti annan bann fasilite kot ou ti kapab konserv ou lavyann, e distribye lannmen, e sa ti donn zot sa swa pour touy zot zannimo ozordi e tir zot lavyann demen. Me ozordi labatwar nepli ofer sa bann tel kalite servis. Alor Mr Deputy Speaker nou demande ki Gouvernman atraver Lasosyasyon Fermye i rod en solisyon pour sa bann problenm ki fermye pe fer fas ladan o pli vit posib. E donn zot sa lankourazman avek en bi ankouraz plis prodiksyon lokal e koup lo lenportasyon. Avek sa de mo Mr Deputy Speaker mon pour donn mon sipor pour sa Mosyon. Mersi

 

MR DEPUTY SPEAKER

Mersi Onorab Esparon. Si mon pa tronpe i annan en diferans ant what we call live weight avek dead weight. Mon krwar i annan en pti keksoz ki bann fermye i lev-e tanzantan sa en, i annan en diferans la ki ler ou anmenn en zannimo vivan kot labatwar, i annan en pwa, Me ler i touye i annan e lot pwa. I annan en keksoz ki marse ladan. Wi. Anyway sa i keksoz ki bann expert i kapab pli tar vin dir nou.

Bon. Mon annan ankor plizyer entervenan lo mon lalis, nou ava pran en Break la e nou ava retournen 11er pour kontinyasyon deba….

 

(BREAK)

 

MR DEPUTY SPEAKER

Bon. Avan nou repran nou travay mon anvi zis partaz en pti keksoz avek zot ki ankor i montre ki bann fermye pe ekout nou deor e zot okouran kwa ki nou pe diskite e zot pe partaz en pti pe zot lekspertiz avek nou.

Nou’n koz en pti pe, mon’n fer komanter lo sa zafer weight, live weight ek dead weight, e monn ganny en fermye ki’n anvoy en pti mesaz ki’n dir; wi, i vre; ‘’loss between live and dead weight is approximately 19% ; weight is also lost during transportation by dehydration. That is why butchers pay less when purchase on the farm and more when purchase after slaughter or at the abattoir before slaughter. All fetch different prices for obvious reasons. This is all part of the negotiation between the buyer and the producer. ‘’

I byen en pti lenformasyon ki petet nou lezislater nou pa vreman okouran be bann expert ki deor i pe ekout nou, i pe partaz sa avek nou. So, i annan sa discrepancy la. Bon, nou ava kontinyen nou deba. Mon annan Onorab Basil Hoareau.

 

 

HON BASIL HOAREAU

Mersi Mr Deputy, Mr Deputy Mosyon ki’n ganny anmennen e ki nou a pe diskit lo la e debat lo la ozordi, i enn ki konsern en sekter tre enportan pour nou lekonomi. I enn ki parey bokou Manm in dir i pou asir nou sekirite alimanter. Me i annan plis lavantaz ki sa. Premyerman si nou’n nobou prodwi nou prop, pour nou prop konsonmasyon i vedir ki mwens lenportasyon. Mwens lenportasyon, i vedir mwens presyon lo nou foreign exchange, larzan i reste dan nou lekonomi e nou a servi sa larzan pour lezot devlopman, lezot benefis ekonomik pour nou pei.

Lot lavantaz ki i anmennen i al anver nou Biosecurity, mwens lenportasyon manze; legim, fri, ouswa menm lenportasyon lavyann i vedir mwens risk ki bann maladi ki bann plant i kapab anmennen i antre dan nou pei. Sa i bann lavantaz ki nou kapab gannyen si nou pe prodwir nou prop manze e nou prop, nou bann prop prodwi.

Mr Deputy nou bezwen get keksoz ki mannyer i ete ozordi, la realite. E larealite ki devan nou se ki sa Sekter lekonomi Lagrikiltir in ganny neglize sa i la realite, nou’n petet plito focus lo tourizm, lo lapes, lo menm sa ki nou’n apel mon krwar nou ti apel li the third pillar of our economy, offshore industry. E lagrikiltir in ganny met akote.  E mon krwar i enportan ki nou go back to basic e re donn lagrikiltir son valer ki i devret annan dan nou lekonomi.

E mon pou siport sa Mosyon Mr Deputy. Mon pou pran, mon pou pran premye bout a Mosyon bann bout A ki dir met en embargo lo lavant ki’n ganny idantifye koman later Lagrikiltir. Mon konpran bi sa bout sa Mosyon  parske nou resours lagrikiltir dan li menm, later ki nou kapab servi dan en fason fizik pour fer lagrikiltir in deza limite li. Sesel napa en gran bout later ouswa en ta later ki nou kapab fer lagrikiltir.

So, i enportan ki sa pti git ki nou annan nou servi li byen, nou zer li byen e nou maximize li. E se la kot sa i enportan ki nou pa servi sa later lagrikiltir pour en lot purpose. Parski in deza limite dan li menm, sa ki natirelman nou annan. E prezan si nou konmans servi li pour fer en lot keksoz avek nou pe limit li plis. E mon pou siport sa bout ki dir annou met en embargo, annou fer sir later Lagrikiltir, i ganny servi pour lagrikiltir.

E mon siport Onorab Woodcock lo la letan in dir sa, e mon krwar sa i vreman enportan. Mon rapel vre Praslin, mon rapel Onorab Ferrari in koz lo la. Mwan mon rapel  dan bann lannen’ 80 letan mon pe grandi Praslin ti napa en landrwa ki ti prodwi plis ponmdamour dan Sesel. Mon rapel SEYCOM, mon rapel SEYCOM ti ankor la kot legliz, kot St Joseph, kot i annan en laboutik konmela. Apre i ti bouz anba pli, kot later Mr Joseph Albert ti annan ponmdamour la, e ponmdamour dan granmaten  si ou ti pou al lasose. Mon rapel ler mon ti pti, pti mon al lasose ek mon papa parfwa ou vwar kes ponmdamour ki pe ganny mete lo bato dan 5er bomaten ki pou ganny transporte Mahe.

Konmela malerezman, malerezman Praslin pa pe prodwi sa kantite ponmdamour, parske sa ti landrwa dan Sesel ki ti prodwi plis, plis ponmdamour. E sa i en, i en, i en legzanp tipik kot nou Sekter Lagrikiltir in al an aryer.

Lot Mosyon Mr Deputy, i dir ki rann larzan bann dimoun ki’n aste later Lagrikiltir pou fer en lot proze me ki pa ankor devlope. Si mon konpran byen loter Mosyon ki i pe dir, se ki bann later ki ti pou lagrikiltir, ki nou ti kapab fer lagrikiltir avek, me ki’n ganny vann ouswa petet lease avek en lot dimoun pour li fer en lot proze e i pa ankor devlope then sa bann dimoun i ava rann sa bann later Gouvernman. E Gouvernman i ava rann zot, zot larzan.

Mon konpran mon dakor ek sa nide me nou bezwen en pe cautious avek, an term en issue legal ki pou vini osi la. Parske sa dimoun i a dir ou si ou’n antre en lease ek li e ou’n donn li, son lease dan ou Lagreman avek li ou’n dir li fer serten proze then ou pa pou kapab zis vin pran avek li. Otomatikman si ou pou bezwen al pran ek li, ou pou bezwen anba Acquisition of Land Act pour ou repran avek li.

E la i vin en tout en issue legal, en issue Konstitisyonnel tou. E petet ki, ki pou arive, se ki, Gouvernman i devret antre an negosyasyon ek sa bann dimoun e gete si zot pa ankor devlop zot proze repran sa bann later ek zot e donn zot serten konpansasyon ; serten konpansasyon. E si bann dimoun i annan ki’n breach Lease petet zot letan ki zot ti sipoze fer zot proze, zot pa’n fer then Gouvernman pour annan sa drwa.

Mon asire dan zot Lease Agreement pou annan en provizyon pou dir si ou pa’n devlop ou, ou, fer ou devlopman dan sa letan ki ou ti devret fer then Gouvernman pou kapab repran, repran sa bann later. E mon konpran si, kantite later ki nou ti kapab rekipere ; rekipere pour remet zot dan lanmen lendistri lagrikiltir nou devret pe fer li. E mwan mon pour siport sa. Me selman nou bezwen fer sir atansyon pour dir letan nou pe fer sa legzersis nou pa al breach Drwa sa bann dimoun, zot Drwa Konstitisyonnel.

Lo trwazyenm bout Mosyon ki’n ganny anmennen par Mr Ramkalawan, Onorab Ramkalawan i dir fer survey lo later Lagrikiltir kot napa prodiksyon avek bi ankouraz en lansman agrikol. La avek sa i amenn mwan lo sa, lo sa B ek C i anmenn mwan lo en pwen. I annan serten later lagrikiltir ki’n ganny donnen osi pour proze lagrikiltir me ki pa pe ganny devlope.

Mwan mon krwar Gouvernman i devret fer sir pour dir later ki’n ganny donnen pour proze lagrikiltir e ki pa pe ganny servi, Gouvernman i devret pran. Mr Deputy mon’n fer mon resers. Annefe, yer swar mon’n al dan verbatim Lasanble, mon’n vwar poudir le 27 Me 2008, 1an, 9 an, 9 an 27 Me 2008. Ti annan en Deklarasyon ki ti ganny fer par the then Minister of Agriculture. E dan sa Deklarasyon ki Minis ti fer an 2008 i ti dir, i ti adres sa issue repran later ek bann dimoun ki’n ganny later pour fer proze lagrikiltir, me ki pa ti pe fer. Sa ti 9an pase.

Me kestyon se, kwa ki’n ganny fer dan sa laliny?  Mon krwar si nou être fran nanryen pa’n ganny fer dan sa laliny. Nou bezwen fer aksyon, nou bezwen aret koze dimoun ki’n ganny later Lagrikiltir e ki pa pe devlope nou bezwen repran. Annou, nou bezwen fer sa zefor. Parske parey nou’n dir i limite, i limite sa resours. Annou zer li, annou servi li byen. E mwan  mon pou enplor Gouvernman pour nou fer sa legzersis. Annou konmans sa legzersis annou fer li byen, e petet ki la Onorab Woodcock…Konmsi nou bezwen balanse. Onorab Woodcock i dir i annan keksoz mal ki pe pase dan fason ki pe ganny pran. Mwan mon pe dir, annou get byen parski pour annan dimoun osi ki letan ou pour la pran ek li, i pour konplent, i pour rod en rezon. Me Gouvernman i bezwen fer sa legzersis, fer li dan en fason transparan, e zis.

E lo kote survey, la mwan mon dakor nou devret fer sa survey, pour nou konnen ki bann later ki nou kapab devlope pour lagrikiltir. E Onorab Ferrari mon pour zwenn li lo la. Sa survey i devret enkli later Gouvernman, as well as later prive.

Annefe, Mr Deputy anba Town and Country planning Act, Lotorite Planning i annan en lobligasyon pour devlop sa ki annan en Development Plan. En Development Plan ki sipoze ganny fer, e i sipoze ganny revize at least en fwa tou le 5an. Difikilte ki nou annan la, nou napa en Development Plan la. I annan sa ki Minister Later in servi i apel sa en Land Use policy, but i pa legal. I napa en valer legal, e si mon pa tronpe sa dernyen Development Plan ki ti’n ganny fer, ti’n ganny fer pour Praslin, e lakour in deklar sa ilegal akoz i pa ti’n ganny fer dapre Lalwa. I pa ti’n trouv, swiv tou son bann prosedir. Sa Development Plan i enportan.  E la dan sa Development Plan kot bann later pour ganny klasifye swa Agricultural Land  – Residential, Industrial, ouswa Commercial. Se la ki nou bezwen fer sa legzersis. So nou annan mechanism dan Lalwa. E annou aplik li town and Country Planning Authority i devret pran son fer sa, e idantifye sa bann later ki devret al kot lagrikiltir.

La pour annan en issue obviously. En dimoun petet ki in aste son later, pa neseserman ek Gouvernman, me prive, i vwar son later tonm dan zone lagrikiltir, pa komersyal – ki vedir otomatikman si i pour tonm dan zone lagrikiltir, i pa komersyal, i pa pour kapab fer lezot devlopman. Otomatikman pour annan sa. La kot Gouvernman i devret antre dan en…annan en mechanism kot i kapab negosye ek sa dimoun petet donn li en lot bout later, e pran sa bout later lagrikiltir.

Sa nou bezwen annan. Gouvernman i kapab acquire wi. Me mon pa krwar pour dir petet acquisition is the sole, i solisyon. Mwan mon krwar parski sa dimoun pou feel aggrieved. Mon krwar petet nou devret get en lot, dan Acquisition of Land Act i annan en pti bout Gouvernman i kapab komans sa ki nou apel notice to treat kot i komanse, i antre dan negosyasyon. Me mwan mon krwar petet nou devret get en lot legal, en lot legal framework an deor Acquisition of Land Act dan bann sityasyon koumsa kot Gouvernman i antre an negosyasyon amikal avek sa bann dimoun pour ki, i nobou trouv en solisyon amikal pour exchange later Lagrikiltir sis a bann dimoun pa anvi fer lagrikiltir. E donn zot en lot bout ki en mannyer Gouvernman i a ganny sa later Lagrikiltir pour fer sir ki devlopman lagrikiltir i ganny fer.

Mr Deputy letan mon pe get bann rezon petet akoz ki nou ozordi nou vwar nou an aryer an term lagrikiltir. Vre in annan sa neglect ki’n arive. Sa sekter in ganny neglize. Me osi i annan serten lezot rezon ki sa in kapab arive. Enn bann rezon se ki letan nou lekonomi in expand, bann dimoun in trouv zot donn loportinite dan bann lezot sekter; tourizm, lezot komers. E sa i pa’n zis kree en presyon lo later, an relasyon ek later pour servi pour sa bann proze.  Me lo manpower. Lo resours, human resources, dan le sans ki ou annan prezan bann lezot loportinite travay e dimoun petet, bann dimoun ki ti pour anvi al dan lagrikiltir in santi annan lezot loportinite pour al dan en lot sekter. E sa in ede. En lot keksoz, e mon demande petet nou reflesir dan en fason rezonnab lo la; SMB. Eski napa en lyen direk, ou endirek kot letan SMB in sorti sa Sekter Lagrikiltir osi in tonbe ?

Annefe Mr Deputy kot mon’n ganny sa mwan se ek en fermye. En fermye i dir ek mwan koumsa. Letan mon’n koz ek li, i dir ek mwan pour dir SMB ti donn zot, i servi sa term ek mwan, i ti donn zot en garanti pour zot prodwi. Ti donn zot sa outlet, e ki pour vann zot bann prodwi. E zot ti ganny sa garanti.

Aktyelman li in fer, i dir mwan koumsa zot ti komans ek SEYCOMSEYCOM ti aste tou sa ki zot ti prodwi. Apre an ‘83 ler sa ki li i dir mwan, I might be wrong, i dir mwan 83, ti sorti, i ti koz mwan, i kriy mwan Mr Maxim Delpech, enn de dimoun. Apre ‘83 i dir mwan in sorti in vin mon krwar SMB sa letan. Mon pa konnen. Mon pa konnen, son lannen ki li in dir mwan, mon pa konnen si sa i korek.  E i dir mwan SMB pa ti menm kondisyon ki SEYCOM, me selman nevertheless i ti donn zot sa outlet pour vann. E letan SMB in sorti la kot zot demand in redwi. Obviously in afekte supply prodiksyon. So sa nou bezwen gete. E petet la kot Gouvernman petet nou ti devret realize osi pour dir letan SMB pe sorti, gete ki mannyer nou pour re aziste sa issue demand an relasyon avek bann prodwi agrikol, e pou fer sir ki nou pa ti, nou pa’n ariv la kot nou’n arive. Sa i bann keksoz ki petet nou’n devret pe met lanfaz lo la. E pe reflesir lo la.

Katriyenm parti Mosyon e dernyen parti i dir rod lasistans finansyel, pour ki bann fermye i ava kapab ganny en nouvo lankourazman pour al dan prodiksyon agrikol lo tou nivo. Lo tou nivo.

Ankor mon pour siport sa bout Mosyon parski sa i fer sans. Nou bezwen siport nou bann fermye. Nou bezwen donn nou fermye sa abilite, e mwayen pour li nobou prodwi. E nou bezwen asiste zot. Parski Lagrikiltir i pa fasil. Nou tou nou konnen i pa fasil. E i annan bann risk ki atase avek lagrikiltir. I annan en ta risk; en dezas i pase, ou annan flooding. En sel kou sa fermye tou son lenerzi, tou son resours ki i ti’n met dan son travay ki in met ladan, i vwar li i perdi. E alors nou bezwen fer sir ki nou kapab soutenir nou fermye. Soutenir li pour komanse. Pour li nobou debout lo son 2 lipye. Me osi soutenir li an ka i annan sa bann risk ki i fer fas avek.

E Onorab Woodcock in koz lo annou pa servi later Lagrikiltir pour tourizm. Mon dakor ek li lo la to a certain extent. Me osi i annan en konbinezon ki nou kapab fer la. Kot nou apel ecotourismecotourism, agrotourism, yes, agrotourism li ansanm ek i vin en pe ek ecotourism. Agrotourism li i pour ede pour annan sa kot ou mix sa 2 ansanm kot sa fermye, i kapab ganny sa serten reveni atraver serten tourism activity ki i fer lo son laferm, swa I don’t know en pti restoran, Self-catering Establishment. E i combine sa ansanm.

E sa i bann keksoz ki nou devret pe gete. Mon pa krwar pour dir nou pour kapab fer sa lo en large scale as such. Me i en posibilite kot nou kapab combine sa 2 ansanm. E la kot parfwa dan sa Land Development Plan ou pour kapab annan bann bout later ki ganny servi pour bann mix activities. So both tourism and agricultural ansanm. E la ki mon krwar sa i pour enportan.

I annan en term ki letan mon’n fer mon resers i annan en term ki mon’n come across se agricultural independence – se kot en pei i basically i vin endepandan an term lagrikiltir. I prodwi tou son keksoz, i vin otosifizan an dot mo pour servi mo Onorab Henrie. Me kestyon se petet – eski Sesel nou pour vreman en zour ariv otosifizan, nou pour achieve agricultural independence?  Petet non.

Menm si nou pa kapab achieve li nou kapab redwi nou lendepandans lo bann prodwi ki nou pe enporte. E la, e la Mr Deputy i anmenn mwan lo mon lot pwen. En pwen ki mon krwar Onorab Aglae in koz lo la, se sa ki nou ti apel li lekol lagrikiltir avan ki konmela i apel Seychelles Institute of Agriculture and Horticulture.

Eski nou konnen nou annan en statistik ki montre nou konbyen zanfan ki graduate from sa bann, sa institute, konbyen manrmay, konbyen graduate nou annan from that institute ki sorti ki sipoze al dan Sekter Lagrikiltir? E konbyen ki vreman al travay dan Sekter Lagrikiltir. Parski i bann dimoun ki nou’n ankadre. Ki nou’n donn zot knowledge, e zot annan sa abilite. Me eski zot ale dan Sekter Lagrikiltir ouswa zot al dan en lot sekter ? Parski sa i afekte nou manpower dan sa domenn. E nou bezwen parey nou dir letan nou pa zis met sa, met nou bann manrmay, nou bann zanfan dan sa lenstitisyon, ankadre zot, donn zot sa bann bagaz pour al travay dan lagrikiltir, me nou bezwen fer sir, nou donn zot lankourazman pour al dan sa Sekter Lagrikiltir, al prodwi. Parski apre tou se zot, se zot ki pour annan sa knowledge e sa abilite pour fer bouze sa Sekter Lagrikiltir. Mon dernyen pwen ki mon ti oule fer sorti Mr Deputy, nou bezwen fer sir – Onorab De Commarmond in koz en pe lo la, letan nou pe koz prodwi lagrikiltir annou pa koz lo kantite. Me kalite, la kot i anmenn mwan lo ecoagriculture. Organik, kot nou bezwen fer sir pour dir ki bann prodwi ki nou bann fermye i prodwi, i pa zis annan en kantite me kalite. Kalite ki bon pour nou lasante. Nou’n vwar risk ki nou kapab, nou pe met nou lekor avek letan nou pe enport bokou prodwi avek sa skandal lavyann poul ki’n arive resaman Brazil. Me nou osi, nou bezwen fer sir ki letan nou pe prodwi locally, nou prodwi keksoz ki bon kalite, ki bon pour lasante nou bann dimoun. E pour fer sir pour dir sa ki nou pe met lo market i enn ki pour kit nou pep an bonn sante.

I enportan ki nou fer sir sa i arive. E ecoagriculture osi i enportan parski i annan en keksoz ki pour fer avek nou lanvironnman. Nou’n deza dir nou resours i limite. Nou bezwen fer sir ki nou pa afekte nou bann later ki nou annan. Met bokou pestisid kot a long term, nou later, nou resours i ganny afekte ki nou pa kapab servi. Nou’n abiz li olye servi dan en fason ki byen.

E la kot ecoagriculture i devret met lanfaz lo la. Parski nou bezwen annan en Sustainable Agricultural Sector ki i la pour lontan. Pa zis pour ozordi kot nou prodwi en kantite apre dan I don’t know 30an nou dir be nou pa pe kapab servi sa bout later ankor.

E petet la kot Gouvernman, i devret annan en Special Scheme pour bann fermye ki anvi al dan ecoagriculture bann ki oule fer organik. E mwan avek sa bann, sa bann mo, mon pour donn mon sipor sa Mosyon. Mersi Mr Deputy.

 

MR DEPUTY SPEAKER

Mersi Onorab Hoareau.

Ankor en entervansyon vreman enteresan. Onorab Nobert Loizeau.

 

HON NORBERT LOIZEAU

Mersi Mr Deputy Speaker. Bonzour tou dimoun. Mr Deputy Speaker ozordi Mosyon i enteresan. E mwan en Mosyon parey mon pour toultan donn mon sipor. Akoz personnelman mwan mon, menm si mon pa en planter, zanmen mon’n plante. Mon santi, e mon vwar ki vreman lagrikiltir in tonbe. In tonbe dan Sesel Mr Deputy Speaker.

E ler mon ariv lo la, sa i fer mon mazin lontan kot tou dimoun ti met en pti keksoz dan kwen ros –  kot parfwa ou pa ni menm ti bezwen desann bazar pour ganny legim. Kot ou ti bezwen en pti ponnyen bred lanmar, nek nou desann kot msye Maxwell anba, nou ganny nou pti zafer. Mr Moise lot kote li i ti plant sousout, nou ganny en pti sousout. Nou mont lo glasi kot Mirabeau anler, nou ganny en pti tomat, nou ganny en pti piman.

E sa ti fer ti soulaz en pe nou lanvironnman nou distrik akoz sa bann letan nou ti en pti kominote Mr  Deputy Speaker. E sa i fer mwan mazin osi ler mon pas Valdandor par egzanp, i annan en pe dimoun pe plante, me i annan serten landrwa ki mon vwar napa prodiksyon pe fer. E sa i fer mwan mazin lontan ti annan en msye, mon pa konnen si Onorab Adelaide i a mazin li nou ti dir li Pti Bic; sa msye ti plante.

E tou le mwan nou ti monte  pe asize dan dan pick- up, nou ti al kot li. E kler nou desann Mr Deputy Speaker plas dan pick-up ti pres pour nou napa pour asize degre nou ti’n byen pase avek bann legim. Mon pe koz lerouy, mayok, bann gro manze. Mon pe koz lo tou bann legim ki sa msye ti plante. E sa i fer mwan mazin La Misère osi Mr Deputy Speaker, ti annan en msye – msye Odas ti en gran zanmi mon papa. Sa msye ti plante, e tou le mwan nou ti al kot li.

E mwan koman mon vini premye keksoz ki i fer i donn mwan en pti kouto, i konnen ki pe al arive li.  E mwan mon pas mon letan dan zarden laba mwan. Mon fer mon zafer. E Mr Deputy Speaker, ki nou’n arive – oli sa bann dimoun konmela ki ti plante ?  Pourtan sa bann dimoun, zot ti plant zot menm zot. Zot pa ti anploy ni en etranze, ni en Bangladesh, sorti Bangladeshi  – si sepa ki zafer, zot ti plant zot, zot madanm, ek zot fanmir. E i ti annan, e prodiksyon Mr Deputy Speaker ti bon. Ki’n arive set akoz bokou lenzistis in arive lo sa bann zafer lagrikiltir.

Bokou dimoun ki ti anvi plante zot pa kapab war zot pe ganny allocate en landrwa pour zot kapab plante. Mon pe koz bann ki ti plant zot menm.  Me plito ki nou’n vwar Mr Deputy Speaker, nou’n vwar bann ki pa kapab plante. Selman akoz i annan koneksyon li avek en gro zofisye dan Gouvernman, li i pour gannyen li. Li i pour gannyen, i pour rod son Malbar, i pour rod son bann etranze, son bann Endyen, eskiz mwan, i pour fer vin plante.

Tandis ki sa pti boug li ki kapab plante e ki i annan sa lanvi pour plante, li i ganny kit deryer. E la i fer mwan mazin enn mon zanmi Mr Deputy Speaker. Enn mon zanmi i reste Sans Soucis; Mr Micheal Belle. Sa boug i en boug entelizan, pa’n lekol, Lekol Lagrikiltir, selman in lekol pour dan laboratwar li i ti travay. In lekol kot Lasante. Me ki i ti fer ? Son le mwayen pa ti permet li pour ganny en laferm, i ti sorti, i ti al travay Canada.

In travay en pe letan Canada, in anmas son larzan. E ozordi, en pe letan in desann Sesel. I ti annan son larzan. In demande pour li ganny en landrwa; i pa’n gannyen. Pourtan i pa ni ti pe demann zot larzan li, i ti pe demann zot en landrwa akoz i kontan plante. Zot pa’n donn li, ki in fer Mr Deputy Speaker, e si mwan mon ti, si ti mwan mon ti fer parey. In mont anler dan kwen danm sa bout ki vir Copolia, in monte, in antre dan fore volonterman li menm san lord, in koupaye, in plante. Ozordi zot onte bann dimoun lagrikiltir pour mont laba pour gete mannyer sa fore in vin en laferm.

Be aprezan. Ler nou vwar sa boug li i enterese, in montre sa lentere, in monte in fer sa ou pa ed li. In fer en pti gento kot i store son bann zafer; elektrisite zot pa permet li gannyen. Be vi ki nou’n vwar ? Sa  msye in monte, in plante. In montre ki i enterese – i pa bezwen zot larzan li. Be napa en pti bout Anse Royale? Ou pa oule i plant la ; ou pa donn li elektrisite. Napa semen, i bezwen trenbal son legim tou le Vandredi, sorti en zistans anba, anba laba dan fore pour anmenn o-bor semen pour li amenn bazar dan Sanmdi bomaten.

Desann bazar demande lekel Micheal Belle, zot a vwar kalite legim ki sa msye pe plante. I pa ni pe servi okenn byen, byen pestisid li akoz landrwa i veyez. Sa boug pe travay. Se sa bann dimoun koumsa ki nou devret ankouraze. Me Gouvernman pa’n fer sa. In kit sa bann dimoun, laplipar sa bann dimoun in ganny kit deryer.

La kot mon pour fer en pe politik kantmenm zot pe dir politik, i annan i pa kontan politik dan Lasanble, Msye Faure in dir politisyen i ganny peye pour fer politik. Sa bann zafer, ek nou pa ek nou ki’n fer, ki’n detri lagrikiltir. I annan i annan gran, gran morso Anse Royale akoz i siport Lepep. Li i annan drwa annan 50 Endyen. Tanzantan ou vwar en bout pe avanse. La Flory, Onorab Larue i dir mwan in ganny bazar tou. Pourtan mon konn serten sa bann dimoun Mr Deputy Speaker, zot ti reste dan ros anler Bel Air. Dan ros mon konn tre byen, zot ti plant dan ros parey msye Micheal Belle ozordi pe plante laba Copolia. Ozordi zot in donn li en loportinite pour vin dan plato kot i pli fasil. Get ki i pe fer laba.

Be si ou donn sa ou msye, ki i ti pour fer ? E la osi Mr Speaker, i fer mwan ariv, al lo en lot pwen ankor. I annan en zenn garson dan mon distrik, Nelson Renaud, nou konnen Bel Air  napa later, zot dir napa later pour fer lakaz, napa later pour fer nanryen. Me sa garson li i enterese ek lagrikiltir li. Ki ou fer, ou kit li ater?

I annan de son zanmi, mon krwar i ek zot, zot in fer en proze. Napa ki zot in pa’n plan. Zot in anmenn devan. Bannla i kit zot ater. Ki zot in fer ankor. Zot in mont Anse La Mouche, zot in antre lo en bout, zot in plante. Personn pa kapab dir zot nanryen. Zot in monte, zot pe plante. Dan Sanmdi demann Onorab Arrisol. Desann dan kwen kot Batman la, ou vwar zot ek zot legim pe vann anba pye mang. Pe vann, sa bann zenn koumsa fodre nou pous zot. Nou sanmenm tou…mwan mon kontan ler Onorab Ramkalawan toultan i dir ; nou bann zenn la, nou pour met divan anba zot lezel. Be mete, akoz zot pa mete anba lezel sa bann zenn? Mete zot ava ale. Sa bann gro, gro zans ki annan larzan, zot servi zot larzan pour aste pour fer sa bann zafer zot. Me donn sans sa pti dimoun.

Mr  Deputy Speaker ozordi atraver bann lenzistis ki’n arive avek lagrikiltir, i annan bokou fermye ki’n ganny afekte. Lo Praslin i annan dimoun ki’n ganny afekte. I annan later ki’n pran lo Praslin avek serten fermye. Gran fermye, ozordi Onorab Hoareau in koz lo ponmdamour. Onorab Hoareau i konnen kot mon pe koze li. Later in ganny pran, in fer pour donnen pour fer lakaz. Zot donn li en rekonpans R35mil lo en later ki ti annan prodiksyon pour plis ki milyon Roupi Mr Deputy Speaker. Mon pa pe nonm non personn. Sa ki konnen, zot konnen ki mon pe koze.

Ou pran en later Lagrikiltir ou donn en boug R35mil, i ti pe prodwi Mr Deputy Speaker. I ti annan anviron 18 bef, in bezwen vann tou son bef asize, pardfors akoz i napa landrwa plante. Sa se bann lenzistis ki’n kree ozordi, lagrikiltir i dan problenm.

Onorab Woodcock in koze taler. Nou pran later Lagrikiltir pour donn en boug pour fer lotel, apre ou konplent loder. Loder pestisid, loder fimyen. Be si ou vin lo landfill, ou fer lakaz lo landfill, be ou pour santi loder poul pouri parey Onorab De Commarmond in dir ? Be ou pour santi tou sa bann loder ki bannla i vin zet la.

Akoz la pa sipoze fer lakaz, i sipoze zet salte. Onorab De Commarmond i dakor ek mwan.  E la lo sa laferm sa msye ki’n fer sa lotel, i pa ti a fer lotel si pa ti santi loder en; loder bef, loder koson, loder fimyen, i pa ti ava vin fer la. Tousala se bann lenzistis, e sa bann dimoun ki pe fer sa bann lotel dan sa bann landrwa Mr  Deputy Speaker zot byen eze. Zot napa en lotel zot, zot in deza annan lezot biznes. Selman Mr Deputy Speaker, akoz zot annan koneksyon, zot egois, alor zot a pran.

Ozordi, Nelson Renaud ti a kapab pran sa bout laba ki’n fer lotel, ti ava prodwi, olye mont Anse La Mouche zis pran en later pardfors – pa i ti ava ganny en morso, i ti ava plante? Tousala Mr Deputy Speaker, be bann keksoz ki mal. Ozordi nou tande i annan bann gran bout later ki’n vann pour fer lotel, kote Anse Forban, 200mil met kare pour en msye Suliman, mon pa konnen si vre, mon pa tro kontan nonm nou i dimoun. Mwan mon kontan koz laverite.

Akoz apre mon pa anvi tonm ‘an zenou’ pour demann pardon parey serten Mr Deputy Speaker. Se pa konbyen mil met kare, donnen. Be sa pti, sa pti dimoun Takamaka ki li in koz lo Port Glaud, Onorab Aglae ki ozordi lakaz pe fer dan montanny. In nepli kapab plant mayok Takamaka. Akoz ou’n dir Port Glaud, Takamaka i parey. Siperfisi later i parey. I pour bezwen desann. Eskiz mwan mon pa tro, tro konn sa bann term. Petet taler Onorab Pillay i ava ed mwan lo la. Bann akademis. Be sa msye ti a  kapab desann anba dan sa plato kot sa msye in gannyen pour fer lotel. Gran bout nou ti kapab met apepre konbyen; 5,6 fermye partaze sakenn en pti bout. Devlop sa later. Zot osi zot a ganny en pti reveni. Mr Deputy Speaker, en lot keksoz mon anvi koz lo la.

Backyard Farming, ti en lepok lo televizyon, ou ti tande pe ankouraz dimoun pour plant deryer lakaz, dan dalo, lo tartar, dan bake, bann potsanm ou anmase, ou plant ladan, zepis whatever ti dir. Dan letan eleksyon 2015, 2016 sa ti vin en ‘sanson lo radyo sa kot nou bezwen fer. E i annan ti ganny pti loan pour fer Backyard Farming Perseverance. Ozordi ou pas Perseverance, ni en Backyard Farming napa.  Sa ki’n pran larzan, in met zot sliding door, in met zot laport, burglars bar, zis pour zot pa’n ganny lenfirmite pour zot la fer Backyard Farming akoz bann pti man lapoud pour vol tou. Bannla i sekirite zot lakaz ek sa larzan.

Mr Deputy Speaker tousala ti annan. Mr Deputy Speaker ozordi. Ozordi mwan dan mon distrik Bel Air.  Nou annan rezerv zot dir. Nou napa later Lagrikiltir. Mwan mon krwar i annan serten morso ki nou, nou pe dir dan Rezerv ki nou kapab gete. Nou pa donn bann dimoun ki pa plante, nou donn bann ki enterese pour fer lagrikiltir. Zot a fer lakaz ki eco-friendly. Zot a plant fri, zoranz parey lontan dan leo pour al Grand Anse la kot ti plant limon ou konnen. Onorab William i konn byen. I ti ava plant limon, zoranz, ou ti a met 2 papay, e pti zavoka, en pye mayok. Konmsi i ti ava eco-friendly vi ki dan rezerv, tousala se bann keksoz ki bezwen fer. Micheal Belle ti a ganny en bout la. Mon zwer Sans Soucis, olye al laba kot napa semen. Vwar i ti a plant en pti lerouy.

E la mwan pe koz lo lerouy Mr Deputy Speaker. Lerouy si ou antre dan laboutik pe vann lerouy. Si ou annan lanmson dan ou pos, swa lanm dan ou pos, ou pa pour aste lerouy. En ler ou bezwen fer sir ki ou annan lanm dan ou pos pour ou pa tir larzan. Mon pas en landrwa mon pran 2 lerouy, enporte. Nou pe koz kalite lerouy nou Mr Deputy Speaker. Lerouy lokal ou pa ganny byen, byen. Lerouy enporte. Mon pran 2, pti pe pli pti ki mon koudpwen. Mon ti kit lo kontwar. Mon ti kit lo kontwar, mon bezwen fer krwar i annan lanm dan mon pos pour mwan pa peye akoz ki ti ariv R300; 2 lerouy. Me ozordi avek sa ki mon pe dir la, ti kapab ganny 2 pti lerouy lokal. Ok ? E deplis nou pe koz lo kalite legim. Sa bann lerouy sorti Kenya. E lerouy sa groser, ler ou fini plis li, mon pa ankor vwar en keksoz ki mon kapab donn en legzanp, i vin pli pti ki mwan koudpwen. I annan i maf, i pouri – sorti Kenya. Nou pa kapab manze.

Mr  Deputy Speaker, mwan kontan sa Mosyon in vin, in vin dan Lasanble, e ozordi mwan mon pour donn mon sipor mwan sa Mosyon. Ozordi mwan kontan Onorab, Onorab, o-bor, Onorab De Commarmond, in admet ki i annan serten dimoun ki’n abize lo sa bann zafer lagrikiltir.

I annan ki’n ganny en morso later apre ki zot fer? Tenir la, apre zot vann milyon ek en boug; etranze. Onorab De Commarmond in fer sa byen kler. Tousala se bann labi, be lekel, lekel ki’n ankouraz sa bann labi ? Lekel ki’n soutir sa, se Gouvernman. Selman nou, ansanm ek zot, nou pour ede pour nou kapab aranze ki sa bann labi pour nepli ankor annan. Mon kontan Onorab Leader Gouvernman in fer resorti sa. E sa en pwen ki byen.  E sa pa’n ariv zis lo later Lagrikiltir. In ariv lo plizyer later ki mon pa pour koz lo la akoz napa nanryen pour fer en kestyon lagrikiltir.

Mr Deputy Speaker ozordi mon pour al en pti kou lo labatwar. Enn de nou in koz lo labatwar. Labatwar mon annan en zanmi, son madanm i frekant kot labatwar in tir portre in montre mwan ; labatwar i enn bann landrwa pli pa izyenik pour le moman. Ou trouv sa pwa disan – mwan mon’n frekant labatwar Mr  Deputy Speaker konsernan mon travay mon ti al ek mon zwer ki fer bann louvraz cold store, nou’n deza al travay laba. Sa en pe 10an pase. Ti ankor en pti pasab. Me ozordi enkrwayab. Mon per pour manz sa lavyann poul.

Mon per.  La lately mon pa ti aste poul enporte mwan, lavyann enporte, mon ti aste zis bann poul Kokoriko, lot ki fer lokal. Ki breed lokal, mon get zot pake mwan. Mon nepli aste. Mon manz zis pwason. Zis ler in montre kot sa preparasyon i fer kot labatwar Mr Deputy Speaker, enkrwayab. Bake poul ki’n fini large ankor la ater sepa konbyen… sa disan in kaye pour detrwa…e menn i annan in koz lo cold storage. Lontan ti annan cold storage kot sa fermye i kapab store son bann lavyann si pa’n kapab vin anmase. E Onorab Alcindor in koz lo la i pe fer mwan mazinen la. Laplipar bann cold store in vye. Pa ni pe  ganny byen maintain. Selman labatwar i fonksyonnen. E dapre en lenformasyon Lasante, bann Sanniter in dir zot fodre fermen.

Me selman dapre ki mwan pe konpran. I annan serten dimoun en pe o plase ki annan koneksyon avek lagrikiltir. Ki annan koneksyon avek sa dimoun. Akoz li i la, labatwar pa pe fermen. Tousala se bann keksoz ki fer ki nou pa al devan Mr Deputy Speaker. Ki mannyer nou pour al devan? Nou pour kontinyen reste lo sa standar. La mwan pe dir ek tou dimoun si labatwar pa aranze, annou pa manz okenn poul ki prepare laba. Akoz mon’n vwar sa portre, i pa gou.

E mon kontan pas sa lenformasyon avek bann dimoun. Parey mon’n dir mwan mon kontan koz fran, byen pour nou fer konpran. E dan tousala Mr Deputy Speaker parey Onorab De Commarmond in dir taler dan bann lannen 1980, nivo prodiksyon ti a en oter. Kwa ki’n arive? Atraver sa bann lenzistis, atraver tou sa bann magouy ki’n arive ki’n fer. E sa Mr Deputy Speaker mwan mon pour blanm poor leadership lo lapar Gouvernman Parti Lepep, sa dernyen 15 a 20an ki’n fer ozordi. Tou sa bann keksoz pe pet an fler Mr Deputy Speaker.

Yer nou’n koz lo fleo sosyal, nou’n koz lo drog. Semenn pas, nou’n koz lo lasante problenm. Nou’n koz lo tou e la ozordi lagrikiltir in vin en problenm dan Sesel. Se akoz poor leadership lo lapar Parti Lepep – Gouvernman Parti Lepep. Mon konnen i annan pa pour kontan. Me selman i vre. I annan pour dir mon pe fer politik, wi mon pe fer politik akoz mon pe koz sa ki vre. Sa dernyen 15 a 20an ki’n pase in annan poor leadership.

Labi – akoz nou’n kontinyen les sa bann labi parey Onorab De Commarmond in dir? I annan labi selman nou kontinyen. Nou dirizan i les zot. Sanmenm sa ki nou apel poor leadership Mr Deputy Speaker. Mr Deputy Speaker mon pour termin la. Selman mon anvi dir mon pour siport sa Mosyon akoz mon santi ki vreman nou bezwen fer keksoz pour nou relev nou lagrikiltir pour nou pous dimoun dan lagrikiltir, pous bann zenn ki anvi parey, parey Renaud St Louis, parey Micheal Belle ki anvi travay, donn zot sa sans, donn egalite sans pour tou Seselwa ki anvi al dan sa direksyon ver lagrikiltir pour nou kapab retourn sa nivo kot Onorab De Commarmond ti dir nou ti ete an 1980; kot nou prodiksyon i ava monte, e nou ava aret enport poul, lavyann enporte, bann lerouy maf sorti Kenya ki pe vann sepa konbyen.

Nou ava annan nou prop keksoz isi lokalman. Mr Deputy Speaker mon pour siport sa Mosyon akoz Mosyon i valab, i annan merit. Mersi bokou.

 

MR DEPUTY SPEAKER

Mersi Onorab Loizeau. Bon i reste nou 15 minit. Mon prosen entervenan lo mon lalis i enn ki kontan koz bokou. I annan bokou pwen. Mon ti a demann si i santi 15 minit pour ase.

Si non mon kapab donn en lot Manm avan ou. I ava koz pour son, pour apepre sa 15 minit akoz nou annan 2 Komite ki  pe meet dan lunch break, e mon osi tou mon annan en meeting avek Sosyal, avek Minister Ledikasyon follow-up mon meeting yer.

So ou a vin a pre lunch. Ok. So mon a demann Onorab Adelaide pour entervenir.

 

HON FRANCOIS ADELAIDE

Mersi Deputy Chair. Bonzour tou bann dimoun a lekout. Deputy Speaker, sorry.

Ler nou nom lagrikiltir, mon krwar distrik ki monte dan nou latet nou tou se Baie Lazare. En popilasyon ki bokou zot i fer lagrikiltir. Me selman tou dernyen er zot in ganny let down. Mon pa kapab dir par zabitan Baie Lazare li menm me se par Gouvernman ki o-pouvwar e ki ti o-pouvwar sa bann letan. En Mosyon manifik ki mon krwar egzekitif avek popilasyon Sesel an zeneral i devret ekoute, e pran li vreman serye.

Ler mon tann nou bann Onorab koze isi lo kote latab. Apre tou sa letan, nou’n fer latres vin balans. Nou ankor dan sa letan la, nou ankor pe mezir koson, dan plas pez koson. Eski vreman nou’n bouze ? Nou koze, nou dir Lafrik nou premye. Mon kit sa avek zot. Seselwa mon kit zot avek sa leksplikasyon Sesel nou ankor pe servi latres pour fer vin balans.

Later Lagrikiltir. Wi. Nou vreman dakor ki sa embargo i mete akoz ki nou pe trouve? Mon pe dir ou dan legzanp Baie Lazare. Nou trouv bann dimoun pe pran later Lagrikiltir pe aste byen bonmarse, e zot pe fer milyon parey mon koleg in dir lo la. Vann antre dalon milyon de milyon. Lotorite i reste trankil, zot pa ni enterese avek sa zot. Pour vi zot bann dalon pe bouze, larzan pe antre, i korek. Nou, nou bann fermye i kontinyen reste deryer, i kontinyen dekouraze.

E mon krwar sa pratik, i devret sanze, e Gouvernman pran en desizyon. Nou donn sa pri later Lagrikiltir son valer. E sa ki demen i deside vann, i a vann sa later son menm pri. Me non pa milyon ki benefisye zis bann ki annan larzan e bann ki napa larzan i reste deryer.

En lot pratik ankor ki vreman dekouraz nou bann zabitan Baie Lazare sirtou bann pti agrikilter. Ler nou donn zot en bout later, nou donn zis gale, ranpar, lafore. Nou tande i annan sinwan ki ganny zis bann later plat. Zot ganny semen. Zot ganny tou bann lenfrastriktir, zot, zot lavi I fasil. Me pour nou Kreol, pour nou komanse, nou bezwen al rod en loan. Zis sa loan ki ou gannyen ler ou’n fini netwayaz, ou pa pour kapab ni menm aste en legren pour ou plante. Ki mannyer nou pe promot lagrikiltir?

Ki mannyer nou pe promot sa pti dimoun ki sipoze bouze, me nou anmar son lipye. Nou dir li be ou lanmen i lib. Travay son lipye i anmare. Nou pa pour bouze devan avek sa kalite latitid kot nou kontinyen pez nou Seselwa, e donn loportinite etranze zis akoz i annan larzan, i annan kontak, i kapab anrisir nou pos, nou fanmir, nou bann rezon personnel.

Mr Deputy Speaker, mon vin en pti kou dan Baie Lazare. Rafal Msye Michel ti pe fer son konpanny Prezidansyel, i ti donn detrwa dimoun later pour fer lagrikiltir. La mwan mazin madanm Philomene, Bernadette Antat i ti ganny li en bout later avek Msye Michel, ou konnen ozordi ki zot pe dir li sorti lo la. Nou bezwen rann. Sa madanm in komans plante, dir later pour MLUH. Sorti. Mr Deputy Speaker ki mannyer nou kapab annan konfyans dan sa bann kalite desizyon banal ki zot pran apre zot kontinyen ranverse, e ki pa zot ki soufer.

Se ou kontinyen dekouraz sa bann fermye pour kontinyen plante. E si ou vwar poudir nou lendistri lagrikiltir i dan problenm, nou pour blanm lekel ankor Mr Deputy Speaker – LDS ? Pirman Gouvernman Parti Lepep. Zot ki responsab, e fodre aksepte pour dir zot ki responsab. E nou pour bezwen rod fason ansanm pour nou bouze. Pa sot anler, pa kasyet, pa taye, zot ki responsab. Mon pa pe dir zot ki la lo latab. Mon konnen pour dir, zot inosan zot osi. Mon trouve pour dir zot inosan. Yes. Be zot pe servi en master. 3 master. Non pa pe dir zot mwan.

Solman konmsi ler mon pe koze, mon pe get zot. Me i fer mon leker fermal mon pe akiz bann dimoun ki zot menm zot, zot pa merite ganny lakiz. Me akoz zot anba a portre mon bezwen dir zot menm laba, pour zot la dir zot bann sef laba. ou tann mwan, korek. Napa problenm. Wi Mr Deputy Speaker, be nou pa pour kapab kontinyen avek sa bann kalite mantalite. Nou bezwen bouz devan. Nou bezwen donn valer nou Seselwa pour ki nou kapab bouze.

En lot keksoz ankor ki dekouraz lagrikiltir; akse avek bann funding. Mon pe ganny konpran ki annan bokou bann funding ki ankor, Gouvernman pa ankor depanse, i ankor la. Zot pe vey en letan pour zot kapab tir sa larzan pour zot bour dan zot pos. Bann funding ki ankor la. Onorab Hoareau, we. Bann Grant, nou bezwen rode. Ed nou, pa kasyet, ed nou. Nou ava rode, nou ava rode detay. Mr Deputy Speaker, mon bezwen kontinyen koze. Mon pa pe donn personn lespas, zot in ganny letan pour koze.

Mr Deputy Speaker, i annan en lot keksoz ankor ki afekte lagrikiltir. Mwan, mon apel sa bann mersener dan lagrikiltir. Kat, 5 zot, zot konplote. Zot deside ki zot pour anport zot bann legim. Donn lenpresyon ki nou bann legim isi pe ganny tel problenm, tel isi laba, zis parey zot ti fer avek bann proze, bann prodwi zannimo. Fer monte lavyann, sepa, isi, laba zis pour zot benefisye. Sa bann mersener lagrikiltir ki pe hijack nou Sekter Lagrikiltir, mon krwar Gouvernman i bezwen pran en aksyon avek. Pran en aksyon avek sa bann mersener. Mon apel zot mersener akoz zot vreman bann mersener ki pe anpes nou bouz devan.

Mr Deputy Speaker i vin en lot pwen ankor Baie Lazare, nou ganny en ta problenm. Nou annan bann dimoun ki par lao Lalwa i dir ou Lalwa pa kapab fer mwan nanryen. Mwan mon ti dan Koudeta, sa mon rekonpans. Donn li bann later ki nou pa ni konnen si EIA ti fer lo la ki pe polye tou nou bann delo, pe polye tou nou bann larivyer, i ganny en bout later pour nou sonny son bann bef, e nou vwar i pe sonny bef lo semen. Minister Lagrikiltir i annan, Public Health i okouran, Departman Lasante i okouran. Minister Lanvironnman i okouran, nanryen pa ganny fer.

Se bann dimoun ki par lao Lalwa Mr Speaker, nou bezwen dan Lasanble fer en Lalwa ki zot pour tonm anba la. E sa nou pour bezwen fer li o pli vit posib. Napa bann zafer Koudeta ou ganny priyorite, si ou pa ti fer Koudeta, ou pa ganny priyorite.

Mr Deputy Speaker, nou vin en lot pti pwen ankor, mon pa pour tro tarde midi pe al sonnen. Wi. Nou annan en prosedir konmela pour ou vin en fermye, pour anrezistre koman en fermye. Mon annan en msye Moosa depi ler mon ti ankor pti, pti sa msye pe plante. Ziskan ozordi i pa kapab anrezistre li koman en fermye. Ou konnen akoz? I napa en bout later ki atase avek son non.

Fodre ou annan en bout later pour anrezistre koman en fermye konmela. Fer sa resers gete. Mwan annan msye Sylvenn Boniface i osi en bann letan i pe plante. I al rod en lanrezistrasyon pour li vin en fermye, zot dir li non. I pa kapab anrezistre akoz i napa later. Se pour tan i pe fer tou son demars pour li ganny en bout later. Mon menm sey ed li. Lanvironn…soz…Minis, Minister Labita i dir ou pour Lagrikiltir deal avek Lagrikiltir.

Departman Lagrikiltir i dir ou pa pour zot deal avek Labita. Kote nou pour ale? Nou pour vir an ron koumsa. Sa sistenm pour kontinyen fer nou vir an ron ? Mr Deputy vreman nou sekter i dan bann problenm grav e mon krwar la i demann volonte parey mon abitye dir. Nou demann volonte avek tou dimoun ki konsernen. Si nou vreman anvi bouz devan. Si nou vreman anvi protez sa vant Seselwa ki nou pe koze labous plen. Annou pran en desizyon serye dan sa Lasanble. Annou pa zis vin koze. Me annou fer keksoz bouz devan pour ki vreman nou ava trouve ki i annan en sanzman dan latitid, dan fason fer, e nou sekirite alimanter i ava vreman amelyore.

Mr Deputy Speaker en lot bout ankor, mon annan en lot fermye ankor, taler nou’n tann Anse Forban, Mr Robin Magnan, i pe lwe en bout later prive, sa garson i debourye, i travay. Tou sa letan i pe rod en bout later avek Gouvernman, zanmen i ganny asiste. Later nou konnen son pri par met kare i pli pti git, i pli mwens me pour later prive i pli bokou.

Sa garson i ankor pe debourye. I ankor pe travay. Annou ankouraz li silvouple. Donn li en bout later. I annan sa bout later Anse La Mouche kot nou’n donn lotel, nou’n donnen pour fer lotel avek. En lot bout later Lagrikiltir ki si nou servi li byen ti pour vreman benefisye bann dimoun Baie Lazare avek bann dimoun Anse Boileau.

Nou prefere ankor donn etranze ki i annan larzan. Mon pa konnen ki sa larzan in fer nou. Kote i ale sa larzan mon pa konnen, nou, nou kontinyen reste mizer. Kreol i kontinyen trimouse. Me nou vann later, bann bon later, bann gold mine etranze ki gannyen. Kreol pa pour gannyen sa li.

En lot ankor, Mr Hensel Moustache. I pe determinen pour li ganny en bout later pour li fer son bann proze agrikilter, we. Bann ki nou pa servi langre, nou fer li byen, natirel. Depi lontan sa garson pe rod en bout later; Organic Farming. Sa Gouvernman si i pa’n dakor avek ou akoz ou annan en lot lopinyon, i pa vedir ki ou mal. Zanmen zot pour larg ou. Se pourtan, ler i dir mwan, i dir mwan i ti dan Youth League pe donn lanmen defann larevolisyon zis akoz i napa menm lopinyon konmela, zot pa pe larg li. Nou annan bokou, nou annan ankor en lot, bann ki dekouraz, bann travayer Seselwa, bann zenn.

I annan, mon pe dir ou Baie Lazare i annan mon koleg Colin Payet, i annan tou son sertifika, i pe travay avek Minister Lagrikiltir. Son Sertifika pa ganny rekonnet. Se pourtan tou son Sertifika i bon. Pour donn li larzan akoz i pa oule koze, i tou kou i timid. Nou fer mannyer mon kapab apel sa. Nou pa viktim. Nou viktimize dan en fason, nou pa donn li son valer pour son bann Sertifika. Ki mannyer oule ankouraz en zenn pour li vin dan Sekter Lagrikiltir pour li donnen. Me selman ler i donn ou son Sertifika, ou devret pey li, ou prefere pey en etranze plis ki li. Ouswa enn ki napa Sertifika. Me in la pour bokou letan.

Li i napa nanryen li zis in ganny mete la dan en pozisyon. Me bougla i annan son Sertifika – valoriz son sertifika. Donn li sa ki i merite. Se koumsa ki nou pour envit bann zenes pour pran sa karyer, e pour devlope. Mr Deputy sa detrwa pti legzanp ki mon’n donnen. Si nou vreman nou ekout li atantiv, e nou met li an pratik, mon krwar nou lagrikiltir pour bouze.

E mwan mon tou kou, mwan annan en lot pti zafer ankor lo kote lagrikiltir. Nou annan en tandans konmela si sinwan i plante i korek, si Kreol i plante i pa korek. Nou annan sa zafer ki mon pe demann Minister Lagrikiltir pour get irzaman ladan. Nou refize les sa bann laferm, i annan bann zot ki le plant zot kann. Nou refiz zot. Nou dir zot non. Pa kapab – zot kann. Kann i en cash crop. Savedir ou vann larzan pour larzan. Takamaka Bay i rode, i en prodwi. Les sa bann dimoun plant zot kann akoz i vann sa.

En lot fason pour bann dimoun ganny larzan pa met okenn lobstak dan zot larou. Mon bann lezot propozisyon ki mon annan Mr Deputy. Annou fer parey dan letan kolonyal. Kot nou ti vwar Gouvernman, i fer bann Blok ki ankouraz bann dimoun pour vini. Ler zot vini zot vin… ganny en lakaz, zot reste ladan. zot vini zis pour plante.  E ler zot fatige plante, ou sorti dan sa lakaz, ou donn sa lot ki le vin plante. Tousala mon krwar nou devret kapab enplimante pour  re donn sa sekter bann lot keksoz ki fer li vivan pour atrakte zenes. Anmenn bann teknolozi modern. Aret fer krwar dan sa letan kot in arive ki nou bezwen ankor kontinyen servi pyos.

I annan bann diferan fason. Menm mwan, mon en zenes, ou vini, ou montre mwan pyos mon pour taye. I annan bann lezot teknik bann keksoz ki ou anmennen ki ou pour ankouraz sa bann zenn pour pran sa metye lagrikiltir. Ankouraz plis outlet parey nou pe dir, ki fermye ava konnen kot i kapab vann son legim, e i konnen pour dir son legim pa pour reste avek li.

E menm fer vini bann lekipman pou sekiriz zot laferm parey nou fer dan Baie Lazare. I annan en msye ki bezwen met camera dan son bannann pour li vey voler. Tousala nou bezwen fer sir ki nou met akse nou bann dimoun ki dan sa field Lagrikiltir pour ki zot a vreman kapab bouze e re fer ki nou donn en lot souf sa sekter ki nou apel lagrikiltir ki bokou nou i depan lo la pour nou ganny nou lavi.

Mr Deputy, i en tre bon Mosyon ki Onorab Ramkalawan in anmennen. E mon oule asir li zabitan Baie Lazare i deryer li pour donn li full sipor pour fer ki sa Mosyon i pase. Mersi Mr Deputy Speaker.

 

MR DEPUTY SPEAKER

Mersi Onorab Adelaide. Bon nou pour kontiny nou deba lo sa Mosyon apre midi. Mon pe zis en enform bann Manm Bills Committee ki i annan meeting dan Komite Room 2 deswit la pare nou adjourn. Bann Manm ABC  – Assembly Business Committee, 1.15 dan Speaker’s Conference Room. E mon anvi zis partaz avek Lasanble, e manm piblik deor – update lo sa size ki mon ti lev-e yer, akoz i annan enn de bann dimoun pe demande kwa ki pe arive, kwa ki pe ganny fer.

Swivan sa Deklarasyon ki mon’n fer yer, mon’n ganny en meeting avek Minis Ledikasyon, e Minis Lafanmir, e tou zot bann delegasyon ki ti avek zot, bann PS.  E i annan serten swivi ki pe ganny fer lo zot kote, e lo mwan kote osi tou mon’n fer serten bout yer.  E apre midi la, 12.30 mon pe rankontre PS William Melanie, e posibilite osi tou Mrs Hermitte from Minister Ledikasyon. I annan en sityasyon ase grav konsernan detrwa zenn fiy ki’n ganny retire dan en fwaye, e swivi, e lanvironnman osi tou ki zot ladan. So i en konsern, i en konsern piblik, i en konsern pour bann lotorite osi. Nou pe sey regarde kwa nou kapab fer.

Ok. Avek sa de mo nou ava adjourn, e nou ava repran nou travay 2er apre midi.

 

(BREAK)

 

MR DEPUTY SPEAKER

Bon. Bonn apre midi tou Manm Onorab, e bonn apre midi tou dimoun ki a lekout e ki pe swiv deba nou Lasanble.                           Avan nou kontinyen, nou repran nou travay, nou annan zis en pti amannman nou’n fer lo Order Paper. Nou’n fer en revise Order Paper. Nou annan en lot Bill ki nou’n mete pour First Reading. E mwan a demann avek Deputy Clerk pour fer First Reading.

 

MADAM DEPUTY CLERK

Mersi Mr Deputy Speaker.               This Act may be cited as the Seychelles Media Commission (Amendment) Act 2017.

 

MR DEPUTY SPEAKER

Mersi Madam Deputy Clerk. Zis petet pour mwan remind zot, nou annan sa enn ki nou fek fer la; Seychelles Media Commission. Nou annan Industrial Estate Authority. Apre nou annan President’s and Vice-President’s Pension and Other Benefits Bill ki nou’n fini fer First Reading pour bann komans met zot pare pour si Mardi prosen i monte pour Second Reading pour prepare pour nou fer deba lo la.                    Ok. Onorab. Wi Onorab Loizeau.  Wi Onorab Loizeau?

 

HON NORBERT LOIZEAU

Mersi Mr Deputy Speaker. Bonn apre midi tou dimoun. Mr Deputy Speaker mon anvi fer koreksyon lo en keksoz ki mon’n dir pli boner dan mon deliberasyon. Si ou kapab permet mwan.

 

MR DEPUTY SPEAKER

Yes. Go ahead.

 

HON NORBERT LOIZEAU

Mersi. Mr Deputy Speaker, taler dan mon deliberasyon mon ti mansyonn en brand en lavyann poul ‘Kokoriko. E la fason ki mwan ti mansyonnen mon ti pe relye li avek labatwar Le Rocher. Me mon’n ganny sans koz avek propriyeter sa lavyann ‘Kokoriko, sa lavyann poul, e in dir mwan ki son lavyann in ganny process dan en nouvo labatwar ki apel West Hill Farm, Grand Anse.                     Alors mon anvi dir ek tou lepep Seselwa ki’n ekout mwan taler, e ki pe ekout mwan ozordi pour dir ki la sa lavyann poul brand Kokoriko i parmi bann meyer lavyann ki zot kapab konsonmen. E mwan mon pour rekomans aste li, e mon kontan sa dimoun in fer mwan konn sa. E deplis ki sa, mon anvi dir ek bann fermye, tou fermye, swa ki prodwir agrikol ou poul ki mwan 100 poursan deryer zot akoz mon konnen ki zot pe pas ladan. E la Mr Deputy Speaker mon anvi tonm lo mon zenou en kou. En keksoz ki mon pa kontan fer pour mwan demann en gran leskiz sa propriyeter ki prodwi sa brand ‘Kokoriko, e mwan anvi dir lepep Seselwa ki ‘Kokoriko i brand ki nou kapab manze Sesel. Mersi Mr Deputy Speaker.

 

MR DEPUTY SPEAKER

Mersi Onorab Loizeau. Nou. mon krwar nou Lasanble i apresye, etre fran onnet, kot nou fer en fot, apre nou kapab korize.                                            E petet, petet dan sa laliny kot nou vwar serten deba i pe al ver, mon pa dir en lakizasyon, me petet nou pe vwar pour dir petet nivo hygiene, nivo standar, nou main labatwar i pa bon. Mon swete ki atraver sa deba, the owner i pa pran li koman en keksoz negativ. Me i ava war si I annan room for improvement. E petet si menm Lotorite  Lazans Lagrikiltir i kapab rantre pour regarde ki problenm. E la ankor kot nou pe dir ki Lotorite Lagrikiltir i bezwen ede dan sa bann demars koumsa. Ede pour fer sir ki nivo standar i monte pour ki bann lavyann ki pas atraver bann process parey, i meet sa standar ler i ariv lo market. E manm piblik i kapab konsonmen. Ok?                  So nou ava kontinyen, e mon ti’n anonse ki Onorab Simon Gill pour pran laparol. Me Onorab Ernesta i annan en komitman apre. So mon pour donn li laparol pour li kontinyen deba lo Mosyon Lagrikiltir.                                   Onorab Ernesta.

 

HON PAUL ERNESTA

Mersi Mr Deputy Speaker. E bonn apre midi. Bonn apre midi to bann koleg Onorab, e tou bann dimoun a lekout ozordi.           Mr Deputy Speaker komansman deba ozordi depi lazournen, nou’n aprann ki sirtou sa sekter aktivite lagrikiltir dan bann lannen ‘80, annou dir ‘80, ‘90, i en peryod ki’n anmenn bokou dinamik dan domenn lagrikiltir sa letan. Si nou a realize selman  mon a dakor ki ti annan en relasyon eksepsyonnel ant Gouvernman e osi bann fermye.                           E ti annan sa lot trwazyenm sa se bann nou popilasyon li menm. Partou dan tou kwen, ou ti vwar kot ti annan bann pti, bann pti laferm ki ti pe devlope. E menm dan serten bann lakour ti annan parey sa ki nou apel Backyard Farming. E sa Mr Deputy Speaker, i ti anmenn bokou, bokou prodiksyon e asire ki nou ti annan en bon nivo konsonmasyon  ek nou bann dimoun.

E lot kote letan nou gete Gouvernman li ki i ti pe fer – i ti annan laferm Sadeco sa letan kot osi ti pe anmenn ankor prodwi agrikol lo marse e dan son bann Store nou ti vwar ti annan bann bon materyo parey bann legren, bann langre ki ti lo bon standar. E osi bann materyo lagrikiltir ti annan adekwat sa letan.

Nou al pli lwen ankor lo nivo ledikasyon, e sansibilizasyon, nou ti vwar lo televizyon tanzantan ti annan bann promosyon, ti annan bann aktivite – E edikasyonnel pou ankouraz popilasyon pour zot angaz dan en tel aktivite. Me malgre tou sa zefor, nou a dakor, e menm sa sityasyon i ankor pe arive ozordi Mr Deputy Speaker, kot nou vwar prodwi enporte, i ankor pe kontinyen dominan, e sa ti la sa letan. E ozordi nou ankor pe fas avek.                                 Letan nou asize nou get sityasyon ozordi ki nou ladan, nou vwar ki sa kalite boom dan devlopman agrikol sa letan, e ozordi i totalman le kontrer. E menm sa nou’n vwar ki i annan bokou zefor ki’n ganny mete par Gouvernman, pour fer sir ki i annan en boost dan sa sekter. Par egzanp mon’n tann zot pli boner, in koz bokou lo labatwar. En keksoz ki Gouvernman in fer, in privatiz labatwar. E labatwar ozordi pe ganny manage par en prive. E aktyelman Speaker, ou’n mansyonnen kot ou’n demann Gouvernman pour zot sey antre avek sa owner ki pe manage labatwar, pour annan serten negosyasyon e wi, nou kapab konfirmen i annan serten travay ki Minister ledikasyon, I mean Lagrikiltir pe fer avek sa, avek sa prive pour fer sir ki i annan en improvement lo labatwar, lo nou main labatwar Mahe.

E osi nou’n vwar bann linisyativ osi, osi ki’n ganny fer, nou’n vwar kreasyon Lasosyasyon Fermye. Ozordi kestyon i reste ki mannyer i ete. Ankor nou’n vwar lenstalasyon delo. En legzanp parey lo Cap Samy. E plizyer, bann plizyer lezot site ankor. Aktyelman Gouvernman pe travay lenstalasyon bann lenfrastriktir parey semen, dan bann landrwa.                                        E nou’n vwar osi reform dan bann Polisi pour fer sir ki sa, ki sa sekter i pouse. Nou’n koz finansman. Yer nou ti annan dan seksyon lagrikiltir, ti annan zis R250mil ki ti ganny mete pour loan pour dan sa sekter. Ozordi in sorti 250mil pour ariv 1milyon. E tousala bann travay ki ganny fer atraver Gouvernman. Me ozordi ki nou tou kestyon ankor pe reste sa sityasyon ki nou ladan akoz, akoz nou ladan?

E mon osi a plen fwa letan mon’n ekout Mosyon, mon’n lir Mosyon mon’n vwar in sa kestyon in click akoz ozordi nou sityasyon lagrikiltir i konm tel ? Konklizyon ki mon’n kapab tire, i annan diferan fakter. Nou a dakor menm si i annan petet pa nou neseserman agree avek mwan, in annan sa sekter ki nou apel privatizasyon. In annan sanzman klima osi ki pe enpakte lo nou.

Teren pour bann aktivite lagrikiltir parey sa ki loter Mosyon in anmennen in komans rar. E nou a dakor 35an pase, 20an pase nou popilasyon pti, pti. Nou’n sorti, nou en popilasyon apepre 70mil zabitan kot nou’n ariv nou 90mil zabitan ozordi. E tousala i bann fakter ki afekte osi lo nou Sekter Lagrikiltir. Nou’n vwar louvertir dan nou lekonomi. Se sa in anmenn plis lenvestiser dan nou pei. Plis devlopman bann letablisman touristik, e plizyer lezot fakter ankor. E tousala Mr Deputy Speaker in anmenn, in anmenn en lenpak lo nou demann pour later agrikol ozordi. E osi en lot keksoz ki sekter ozordi pe fer fas avek sa se kreasyon, I mean mankman bann mendev.

E ki son konsekans ki sa in anmennen Mr Deputy Speaker? Nou’n vwar ki gradyelman sa 400 ektar later ki nou annan pour prodiksyon lagrikiltir, in ganny limite. Mon dir sa akoz ozordi, nou pe vwar ki bokou sa bann teren pe ganny servi pour en lot purpose. Mr Deputy Speaker, e se pour sa ki nou vwar ozordi nou dan sa Lasanble nou pe diskit lo en tel Mosyon.

E sa Mosyon Mr Deputy Speaker i en wake-up call pour fer sir ki nou re met lanfaz lo sa sekter ki osi enportan ki’n ganny neglize pour bokou letan. I annan en dikton ki dir; ‘’sak vid pa debout.’’ E sa sekter i se li ki ranpli sa sak vid. En pei i kapab annan tou me si i pa kapab asir en nivo prodiksyon agrikol pour asir son sekirite alimanter, sa Mr Deputy mon pa krwar ki nou pour annan en fitir.

E mwan letan mon pe get sa Mosyon, i anmenn mwan en lespwar.  Sa pour mwan koman en konsonmater, e osi pour bann pti fermye ; presizeman nou bann pti fermye Takamaka ki la mon kapab dir i annan apepre en 20enn zot. Mwan mon dir i en sours lespwar Mr Deputy Speaker akoz mwan mon pe vwar ki sa Mosyon pour fer sir ki César pour re ganny zon keksoz ki pour li.

E mon konnen ki César an retour   li i pour okip e anmenn son keksoz byen. Akoz baze lo konsiltasyon ki mon’n fer a 2 repriz ek serten zot sa bann pti fermye Takamaka, mon santi sa lanvi e sa komitman dan zot i ankor la. E so nou, nou bezwen fer sir ki nou kapab pous sa. Me an menm tan. Menm si nou pe dir zot, zot ankor annan sa lanvi, me zot annan osi serten dekourazman avek sityasyon ki mannyer i ete ozordi.                     Bokou sa bann konsern ki zot in met devan mwan – yer letan mon ti pe ekout lentervansyon Onorab Lemiel mon ti pe tann mon bann pti fermye letan zot ti pe dir mwan zot konsern dan sa de meeting ki mon’n ganny sans fer avek zot komansman sa lannen. Mr Deputy letan mon’n ekout zot, mon’n realize ki konsern dan sekter lagrikiltir i bokou plis ki zis ki sa konsern later parey Mosyon pe dir nou. Zis pour pa repet sa ki’n ganny dir. Mon pour souliny enn de konsern ki zot in met devan mwan. Zot konsernen avek nivo konpetans bann extension officer, e osi vizit monitoring ki pa pe fer ase par bann zofisye.    Zot santi ki bann pti fermye pa pe ganny byen gete. Tou privilez i pour bann gro fermye. Zot napa en bon outlet pour zot kapab vann zot prodwi. Store pa pe vann bann materyo pour lagrikiltir avek tou dimoun. Par egzanp ozordi nou vwar bann kontrakter konstriksyon, ki zot pe vin lo store pe vin aste bann pyes tiyo e rakor ki ganny mete pour bann fermye akoz sa i senpleman akoz keksoz sa bann pyes i vann en pri redwir lo Store pour bann fermye.

E zot an retour bann kontrakter zot al sarz sa lot pti malere dan konstriksyon si zot pe fer zot lakaz, zot pour sarz sa pti malere sa pri ki zot pe aste. Sa materyo dan en lot laboutik lo marse an deor apard lo Store. E osi zot konsern sepa bokou in ganny dir lo la se sa bann pwazon kourpa ki ganny vann.

E nou vwar bann boutikye ki zot, zot vini zot vin aste sa bann pelet pa en gran kantite, apre zot met li dan pti pake, zot al vann dan bann lezot laboutik. E prezan letan sa bann fermye, zot, zot vin lo Store pour zot vin aste sa bann prodwi, zot ganny dir napa, swa in fini. E osi zot konsernen Mr Deputy, mon lo sa bann pti loan pour fermye ki sa i pe donn zot bokou difikilte. Zot tarde pour ganny lease lo later Lagrikiltir, e plizyer lezot ankor.         Mr Deputy, an ekoutan sa bann konsern, e lezot fakter asosye avek Lagrikiltir i reponn mwan kestyon ozordi. Akoz ki sa sekter i dan sa kalite sityasyon?        Pli sagrinan ankor, ozordi Minister Lagrikiltir i annan li en back log plis ki 200 aplikan ki pe esper later. E de lot kote i annan bokou sa bann later ki’n ganny allocate ek bann dimoun ki pa pe devlope, ouswa pour zot fer en lot proze an deor lagrikiltir. Alor Mr Deputy, mon rekomande avan nou terminen ki Minister Lagrikiltir nou tou nou’n koze lo la ki i bezwen annan ganny sipor. Nou’n dir ozordi nou pe vwar en Bidze pour Minister Lagrikiltir ki mwens ki 10 poursan. E nou pour demann zot petet pour re sir ki zot revwar byen zot bann konsern e vin avek en Bidze devan sa Lasanble pour lannen 2018, e a lavenir. En Bidze ki vreman reflekte zot bezwen ki nou, nou kapab siport zot akoz nou konsernen avek sa bann sityasyon ki sa Minister pe fer fas avek.

E sa Mosyon osi Mr Deputy Speaker, i en komansman dan sa bon direksyon. E mon osi parey bokou bann Manm ki’n entervenir avan mwan. Mwan pour aport mon sipor pour sa Mosyon. E an menm tan mon demann Gouvernman pour fer en bon letid dan sa sekter. E anmenn bann bon rekomandasyon sirtou finansyel pour re lev sa sekter. Osi, mon demande ki Gouvernman i konsider alokasyon later pour kapab komans aktivite agroindustry e ou sa pti fermye ki pe fer fas avek bann difikilte, reste solid dan ou travay. Napa en travay ki napa son difikilte. Avek plis sipor mon konnen ansanm nou tou nou pou reisir.                                 Mersi Mr Deputy.

 

MR DEPUTY SPEAKER

Mersi Onorab Ernesta. Onorab Simon Gill.

 

HON SIMON GILL

Mersi Mr Deputy Speaker. Bonn apre midi. E bonn apre midi tou koleg Manm Lasanble, piblik ki pe ekout nou.

Mr Deputy Speaker, depi yer nou pe debat lo en Mosyon prezante par Onorab Ramkalawan kontenir 4 pwen prensipal lo relansman sekter lagrikiltir dan Sesel. In demann Lasanble pour konsider sa bann pwen swivan;

(1)Met en embargo lo lavant okenn later ki’n ganny idantifye koman later lagrikiltir.

(2)Rann larzan bann dimoun ki’n aste later lagrikiltir pour fer en lot proze, me ki pa ankor devlope.

(3)Fer en survey lo later lagrikiltir kot napa prodiksyon avek bi ankouraz en lansman agrikol.

Katriyenm pwen rod lasistans finansyel pour ki bann fermye ava kapab ganny en nouvo lankourazman pour al dan prodiksyon agrikol lo tou nivo.

I annan en kantite keksoz in ganny dir lo sa 4 pwen Mr Deputy. Parfwa bann pwen i konfli, i kree konfli avek kanmarad par rapor avek bann diferan pwen. Bann largiman ki mannyer i ganny devlope. E I annan moman kot mon pa’n tro sezi vreman ki bann largiman pe ganny dir. I annan en keksoz ki mon krwar sa Lasanble dan tou bann lentervansyon in tonm dakor lo la.

E mwan mon pour al lo tou bann lentervansyon ki’n fer, e pwen ki nou’n tonm dakor lo la. Tou bann entervenan in dakor ki a serten moman dan Sesel ti annan en o nivo prodiksyon agrikol. Napa enn selman ki’n manke pour dir ki a serten moman ti annan en nivo prodiksyon agrikol –  fri, legim, lavyann.

Tou in tonm dakor lo la. E kestyon ki nou poze – lekel Gouvernman ki ti la a sa moman ki nou dir ti annan en o nivo prodiksyon fri, legim, lavyann?  Mon prezimen zot pe dir nou ki Parti Gouvernman, Parti SPPF, Lepep ki ti la dan sa peryod letan. E i annan bann keksoz ki i ti pe fer ki ti byen. E dan moman kot nou ti pe fer bann keksoz ki ti byen. Se pour sa rezon ki ti annan en lantouzyazm serye.  E prodiksyon ti annan. Me pa zis prodiksyon ki ti annan. Ti annan osi garanti aster sa bann prodiksyon. E se sa ki ti annan sa lantouzyazm. Se sa ki ti annan en gran prodiksyon.

Lekel premye eleman ki ti garanti pour aste bann prodwi ki ti pe ganny prodwi par nou bann fermye ?  E sa sete pa lot bann striktir ki Gouvernman ti met an plas. Mon tann atraver latab pe dir ti forse vann. Ti forse vann. Annou al lo premiz ti forse vann parey mon tann nou bann Onorab lo lot kote pe dir. E taler letan Onorab Ferrari i ava entervenir i ava al argimant lo la si pour koz ankor en kou.

Be ler ti forse vann pour mwan servi zot mo. La baz se ki ou ti konnen pour dir i annan landrwa kot ou kapab vann.  E ler ou vann ou garanti ki ou annan en reveni ki rantre. Now kestyon ki poze – eski la fason ki mannyer keksoz ti pe ganny manage a sa moman. Eski i ti satisfer tou dimoun. Tou fermye or tou prodikter ? Nou kapab dir non. Me prodiksyon ti kontinyen.

2enm pwen, 2enm pwen ki ekstrememan enportan pour nou konsidere ; apre ki Gouvernman in ekout bann kritik ki’n ganny fer lo la fason ki keksoz ti pe ale, lo son striktir ki ti an plas pour garanti debousman lavant pour bann fermye. Gouvernman ti pran en desizyon pour sanze. E ler  Gouvernman i pran desizyon pour sanze – ki nou vwar? Lot  kestyon enportan. Nou vwar problenm i komanse, e problenm i agrave. Nou trouv sekter prive in seye pour pran kontrol bann dimoun klopi klopan. In seye pour zot fer marse lo zot menm, pa’n tro reisir.

Akoz pa’n tro reisir? Si ou napa en garanti lavant ou bann prodwi tre pe keksoz ou kapab fer. Si ou napa garanti sipor Gouvernman tre pe ou kapab fer. Me se nou menm nou ki’n dir Gouvernman sorti ladan. Nou’n dir li sorti. Me kree bann lanvironnman favorab pour nou operate. Pa nou menm ki dir sa ? Vin en fasilitater. Nou menm nou ki’n demande sa. Nou menm nou ki’n dir. E in annan son lenpak. I annan son lenpak sa.

Nou annan nou an zeneral, mon krwar nou bezwen analize e get byen. Dan Sesel Mr Deputy, nou annan nou pa mal dimoun ki kapab fer bon keksoz dan Sekter Lagrikiltir. Me nou annan dimoun malgre tou zefor ki zot fer, zot pa kapab fer gran keksoz. Mon pa bezwen al sit bokou legzanp, be selman nou anvi antre dan sa sekter.  E i en sekter ki ranpli avek challenge.

Dan bann lentervansyon ki’n ganny fer, nou’n bliye pour dir nou’n koz liberalizasyon. E liberalizasyon in annan son lenpak. In annan son lefe lo prodiksyon agrikol, prodiksyon fri, legim, lavyann dan Sesel. Nou bliye Mr Deputy Speaker, pour dir nou sosyete in evolye. E sosyete in evolye sitan vit. E pa nou tou ki’n kapab cope avek sa lavites ki nou’n ale. In annan fakter pa zis Nasyonal. Me in annan fakter osi enternasyonal ki’n kree en doub challenge pour nou Sekter Lagrikiltir dan Sesel. E sa i serye.

Ler 2008 kriz ekonomik finansyel mondyal i tap nou, i tap lemonn i sa moman kot nou Sekter Agrikol in ganny tape severman. E Gouvernman in antre avek en bi pour sey reform sa sekter. E donn plis responsabilite sekter prive. Onorab Afif i konn sa tre byen. E si i pa ti ankor entervenir probableman i ti ava koz lenpak bann fakter ekstern lo Sekter Lagrikiltir dan Sesel 2008 an desandan, an 2008 an montan.

Bann prodwi ki nou ti bezwen pour anvoy kot Animal Feed Factory, prensipalman mai ti double son pri lo marse enternasyonal. Ti annan en kriz serye dan prodiksyon manze zannimo dan sa pei. E en bon pe bann prodikter lavyann ti bezwen or ti oblize koup zot prodiksyon. Tousala nou zwe bliye, e nou met tou blanm lo zis Gouvernman.

Gouvernman i annan son responsabilite byensir, me i annan serten fakter, ki ler i tap ou ; nou’n eseye, nou’n reisir sorti dan sa kriz. E Onorab Bernard Georges yer letan i ti pe fer son lentervansyon lo dan PNQ yer, i annan en Statement ki Onorab George ti fer. E mwan a rapel Lasanble ki son Statement ki i ti fer. Nou ti annan plizyer problenm dan Sesel – problenm ekonomik.

Me ozordi nou’n nepli annan problenm ekonomik dan Sesel. Avek leskiz Mr Georges si an ka mon pa’n quote ou egzakteman me the statement was made. Ou ti aknowledge ki Sesel i nepli annan en problenm. Ki montre ki nou pa’n tro mal fer, nou pa’n tro mal fer, me sa pa vedir ki tou keksoz i byen. Pa vedir ki tou keksoz i byen. E si i annan en parti, si i annan en Gouvernman Mr Deputy Speaker, ki siport fermye malgre tou sa ki zot kapab dir le kontrer, se byensir sa Gouvernman ki la ozordi, Gouvernman Parti Lepep.

E bann fermye, bann prodikter lavyann fri, legim, fodre pa zanmen doute sa. Mr Deputy Speaker sel dimoun ki pa fer fot dan lavi, e sel Gouvernman ki pa fer fot dan lavi, dan son parkour devlopman sosyete, se en Gouvernman ki asize pa fer nanryen.  E sel zonm ki pa fer fot dan lavi se en zonm ki asize pa fer nanryen. E i normal, i normal, i par legzistans zonm, i par legzistans imen pour parfwa fer bann glisman. E avek tou lonnekte nou kapab dir, pour dir sa Sekter Lagrikiltir dan Sesel, i demann donnen en nouvo souf. Nou tou nou tonm dakor avek sa.

Si in annan bann mankman, nou pa kapab asize al komans kritik tou bann teknisyen dan Minister Lagrikiltir. Nou pa kapab al komans al atak tou Minis ki’n pas dan Sekter Lagrikiltir. Me sa ki mwan mon krwar nou devret fer lo definir the way forward. Se tonm dakor e dir avek nou Gouvernman; dir avek leadership pei pour dir ozordi nou bezwen tonm dakor ki dan Sesel annou definir bann sekter ki tonm dan kategori prodiksyon agrikol fri, legim, lavyann, lekel konponan ladan ki devret met plis pwa; met plis pwa avek bi ariv lo sa nivo minimonm sekirite alimanter or fer sir ki da sa kategori, dizon si nou dir ozordi Sesel, nou santi ki nou kapab ozordi prodwi tou nou dizef ki nou bezwen. Then nou dir ok sa i en domenn ki fodre nou fer sir ki lenportasyon i ganny koupe net. Si dizon nou tonm dakor ki ozordi dan Sesel nou kapab prodwi tou nou lavyann poul ki nou konsonmen, lenportasyon i ganny koupe net.

Si nou dir nou kapab prodwi tou lezot fri definir bann teknisyen bann expert ki nou kapab prodwi lokalman, lenportasyon i ganny koupe net. Now ozordi nou annan en problenm reel. Sa problenm reel se in liberaliz lenportasyon. Nou enport tou kalite fri, legim, lavyann ziska dizef tou. E nou antre an konpetisyon direk avek bann prodikter lokal. E sa i en desizyon ki nou bezwen antre lo la, deswit.

Me liberalizasyon ankor enn fwa. Mon’n koz lo la taler. Nou menm nou’n demann liberalizasyon e sa i annan son lefe. E nou ti vwar en gran logmantasyon dan lenportasyon lavyann, fri eksetera dan en moman ki nou ti annan antre dan sa kriz – kriz bann raw material pour nou kapab prodwi bann manze zannimo. Lenportasyon ti shoot up, e nou’n preski pa rekipere.

Bann prodikter lokal ti oblize enport lavyann pour soutenir zot biznes. E zot kontinyen ozordi pe enport lavyann ; pe enport fri pour soutenir zot biznes, e pour fer byen dan zot biznes.

Now lot pwen enportan Mr Deputy Speaker, mon ava dir ou ki nou bann fermye nou mindset, nou bezwen sanze. Nou bezwen tonm dakor ki nou pa zis antre dan prodiksyon agrikol zis akoz probableman i gou pour nou prodwir serten keksoz. Nou bezwen devlop sa lespri biznes.  Nou antre dan Sekter Lagrikiltir koman en businessman, avek bi pour nou kapab fer sa sekter ki nou ladan or sa domenn spesifik ki nou ladan vreman bouze. Vreman marse. Sa i anmenn mwan lo en pti pe lanfans avan ler mon bouz lo lot pwen.

Mwan mon fanmir, e bon pe dimoun i konnen, in annan bann blok Anse Boileau,  e ozordi mon bann fanmir i ankor dan Sekter Lagrikiltir. Zot in fer ekstrememan byen serten zot. E mwan mon lanfans, mon en dimoun ki anmoure avek plante. Mon ti santi mwan oblize plante pour mwan kapab ganny larzan pour mwan pey mon lekol pour mwan siport mon fanmir. Pour mwan ed dan lakour. E ozordi mwan mon dir nou pa ti fer koman en biznes nou. Me koman en sibzistans pour nou survival koman en fanmir, me pa neseserman pour fer biznes.

Me ler nou pe koz biznes, nou pe dir ou pa zis prodwi, ou bezwen al odela prodiksyon. Gete ki mannyer bouze, ou evolye, ou al process sa ki ou prodwi. E ozordi nou napa bokou fermye, or nou napa bokou dimoun dan Sekter Lagrikiltir ozordi ki pe process sa ki zot prodwi. Si ou menm ou pa kapab antre staz pour ou process sa ki ou prodwi, devlop en partenarya avek bann lezot partner, bann lezot dimoun ki enterese pour adorned avek ou biznes. Pour link avek ou biznes, e pour antre lo staz prodiksyon.

Sa i ava donn en valer azoute e i a fer ou kapab ganny akse avek plis larzan. I ava kapab fer ou vin en dimoun ki byen pozisyonnen dan sa biznes or dan sa sekter kot ou ete. Sa i tre enportan. Sa i pa zis lo kote Sesel. Mr Deputy e bann Manm Onorab ki otour latab mon krwar zot ava dakor avek mwan, enn bann pli gro fakter ki anmenn Lafrik se zisteman sa, sa mankman.

Lafrik pour zenerasyon lannen, e lannen Mr Deputy Speaker in sitye son lekor koman zis fourniser bann prodwi brit. Tou bann gran lendistri i Europe. Nou zis nou donn zot bann raw materials. Nou donn zot kakao zot al England, zot al lot pei laba partou, zot al re travay lo sa kakao ki zot pran dan Lafrik, zot fer sokola. Zot fer kafe, zot package zot kafe, zot package zot sokola. Zot pran zot retourn Lafrik zot vann nou menm nou. E pli ser ankor. E zot vin bann multimillionnaire lo prodwi ki sa senp 50enn, 200enn zonm, fanm dan sa santye prodiksyon kakao.

Mr Deputy Speaker sa ki mon pe dir i serye. I serye sa sityasyon la.  Nou bezwen rod en fason pour ki Sekter Lagrikiltir dan Sesel i evolye, i al lo en lot staz. I al lo en lot staz nou kapab ganny pa bann gro, gro lekipman ; bann lekipman ase mwayenn pour nou kapab reprodwi, reprodwi process bann keksoz ki nou isi menm nou pe prodwi atraver nou bann fermye. Ekstrememan enportan sa.

E ankor enn fwa, ankor enn fwa i enportan, nou pa kapab al target tou keksoz dan Sekter Lagrikiltir. Mon krwar nou bezwen met lanfaz lo detrwa area ki nou santi, ki nou kapab sustain li, e fer li bouze i ava annan en lenpak lo lenportasyon. I ava annan en lenpak lo nou koup nou litilizasyon nou foreign exchange. I ava annan en lenpak lo fournisman sa bann prodwi dan nou bann lotel, dan nou bann restoran pour ki nou bann lenportasyon ou koup 100 poursan. And this is the way forward.

Si nou fer sa, nou ava remarke ki pour dir nou pour fer en gran progre.  E nou rod bann dimoun nou fer lapel, nou rod bann dimoun. La la i annan bann sekter kle ki nou’n idantifye la. Lekel ki enterese. Nou oule dan sa prosen 5an, koup lenportasyon 100 poursan dan lavyann poul, dan lavyann pork, dan lavyann bef, vwala bann sekter. Lekel ki enterese vin devan.

Finansman i annan. Annan bouze. E Mr Deputy Speaker, krwar mwan nou ava fer gran sikse. Nou fini target sa bann sekter, nou a bouz lo en lot group sekter. Nou pa pour attend koupir 100 poursan, me probableman nou ava aim pour koup li par 25 poursan lenportasyon.

Now i annan en lot keksoz ki pour al avek sa. Ki lot keksoz ki pour al avek? The standard, the quality.  Now akoz i annan ozordi, i annan lotel. I annan bann magazen mon pa’n nonm non pangar epi mon pour bezwen demann leskiz. Me i annan bann magazen ozordi ki spesyalize pour enport bann prodwi deor, zot rode partou lo marse enternasyonal ki dapre zot i meet bann standar ki bann lotel pe rode.

Be annou nou osi annan bann labatwar pour nou meet bann standar ki sa bann lotel pe rode. E nou ava obliz zot pour pran sa bann prodwi avek sa landrwa ki ava pe prodwi. E nou pa pour donn ou okenn clearance pour enport nanryen ler nou satisfe ki nou’n meet sa standar.

Vwala bann kontrol ki Gouvernman i kapab zwe. E vwala bann mezir ki nou kapab pran, pour ki an retour bann dimoun ki dan sa sekter…dan sa aktivite spesifik ki nou’n ava alinyen. I ava konnen pour dir nou annan nou en garanti ki nou bann prodwi pe ganny vann akoz nou meet sa standar ki bann lenstitisyon, bann letablisman pe rode. Alor there is no issue.

Mr Deputy Speaker, mon trouv i annan en pti pe mirmirasyon lot kote. Zot pe dir ou pe donn mwan en pti pe plis letan. Mon pa tro konnen konmsi si zot…

 

MR DEPUTY SPEAKER

Onorab ou ankor annan 5 minit.

 

HON SIMON GILL

Oule donn mwan ankor 5 minit. Bon ava konklir lo mwan, lo mwan dan mwan 5 minit ki ou’n donn mwan. Bon mwan mon a dir, mwan a dir Onorab Henrie dan mwan konklizyon akoz bomaten in dir Onorab Gill letan i a koze, i ava koz lo ‘lotosifizans.

Be lotosifizans in evolye. In evolye, wi probableman in pran gear hybrid. Me Sesel ler ti pe servi sa konsep lotosifizans ti en lepok, ti en faz. Me Sesel avek tou respe, avek tou lonnekte pour tou dimoun Sesel ler nou ti pe koz lo lotosifizans nou ti pe koz konmsi nou kapab koup tou nou lenportasyon dan prodiksyon agrikol, koup tou fri, legim, lavyann, eksetera.

Me ozordi li sa konsep li in ganny sanze. Ozordi nou koz sekirite alimanter dan Sesel. Konsep lotosifizans nou pa pour koze dan sa Sekter Lagrikiltir. Me nou kapab koz lo lotosifizans dan bann diferan eleman, ki tonm dan sa Sekter Lagrikiltir. Par egzanp mon pe dir si demen bomaten nou pran en desizyon nou ralye 10 fermye. Nou donn zot tou sipor neseser. Nou dir pou prodwi 40mil poul, ou prodwi 20mil, ou prodwi 50mil. Nou donn ou tou bann bagaz, nou koup tou lenportasyon lo poul, nou meet bann standar ki enternasyonal. E nou’n vin lotosifizans dan sa sekter. Ok ? So vwala en pti pe. I annan en restriksyon an term litilizasyon sa konsep.

Me dernyen pwen Mr Deputy Speaker, i lo size ki Onorab loter Mosyon ti lev-e ler nou ti pe attend sa Parlman Afriken depi le 8 ziska le 19 Me. Mon ti ganny tonm dakor parmi nou lekip pour al lo sa Komite or sa groupman laba ki annan plizyer pei lo la ki tonm Sekter Lagrikiltir. E lezot lenfrastriktir, konponan ki tonm ladan. Nou annan nou en madanm Vis-Chairman ki en madanm Onorab Egyptien.  E nou’n ganny en koze tre serye avek sa Onorab ki dan Parlman Egyptien. I annan deza en lenvitasyon ki la. Nou’n ganny demande pour met an mars en striktir lokal pour nou kapab vreman vwar ki zot, zot pe fer. E ki bann probableman nouvote ki annan dan sa sekter e nou kapab devlop sa korperasyon.

Mon konnen deor la Mr Deputy Speaker ki dimoun in fatige avek Komite dan Lasanble Nasyonal. Dimoun pe dir pe annan tro bokou Komite lo nivo Lasanble Nasyonal Sesel. Me mon ava dir zot, zot bezwen sey tonm dakor avek nou ki bezwen annan sa Komite ki ganny formen isi Sesel pour kapab link nou avek Parlman Afriken kot delegasyon Sesel ti al reprezante, e Onorab Ramkalawan in deza koz lo la si i pour elabore taler i ava elabore dan son konklizyon. Me i en Parlman ekstrememan enportan. Nou trouv sa koman en loportinite pour Sesel e zis nou ava dir avek manm piblik zis konpran nou. I pa zis en lot komite ki nou pe an plas dan nou Parlman isi. I serye e nou ekspekte ki ler bann laranzman entern i fini ganny fer, nou ava annan bann lezot dimoun ava kapab vin lo sa Komite, e pour nou bouz de lavan.

Lot pwen dan konklizyon Depite Speaker. Apre tou sa letour analiz ki nou’n fer, mon krwar i enportan ki nou tonm dakor ki nou bann fermye pour nou dir ek nou bann fermye deor, or tou nou bann dimoun ki dan Sekter Lagrikiltir – pe enport ki ou pe fer, nou sa Lasanble Nasyonal mon pa pe koz lo tit endividyel personnel. Nou dan Lasanble Nasyonal nou deryer zot. E nou pour fer tou sa ki posib pour nou vreman donn sa nouvo souf ki sa sekter nou santi i merite. Akoz mwan mon personnelman la, mon senserman konvenki ki Sesel nou kapab fer pli byen dan Sekter Lagrikiltir. E annou tonm dakor – nou annan nou bann diferans byensir. Mwan mon’n prezant en laliny largiman, sakenn i prezant son laliny largiman. Nou pa pour al dispute lo la. Mwan pa’n kree konfli ek personn. E mwan panse ki nou bezwen donn lespwar nou bann dimoun deor.

Annou pa point finger. Me annou donn lespwar. Bann lerer ki’n ganny komet parey mon’n dir in ganny komet, nou acknowledge serten lerer, serten mankman in ganny komet. E la annou tonm dakor pour tir nou lipye dan lepase, e annou step into the future.                 E avek sa, nou dir avek nou bann fermye nou la deryer zot. Sa Lasanble pour siport zot. E nou dir avek nou bann teknisyen, nou bann expert dan Lagrikiltir Sesel si zot bezwen led tap nou laport nou la. Mersi bokou Mr Deputy.

 

MR DEPUTY SPEAKER

Mersi Onorab Simon Gill. Mon krwar i en zoli entervansyon. Fran e bold.

Onorab Steve Pillay.

 

HON STEPHEN PILLAY

Mersi Mr Deputy Speaker. Bonn apre midi a tous.

Mr Deputy Speaker, mon osi mwan oule aport mon sipor pour sa Mosyon ki Onorab Leader Lopozisyon in fer resorti dan sa Lasanble. E en pwen ki pe met kler se sa ki konsern imedyat. Nou bezwen pran sa bann Mosyon dan konteks. Nou bezwen met en nouvo souf dan sa Sekter Lagrikiltir.

Mr Deputy Speaker, mwan a komans lo sa zafer embargo lo lavant later lagrikiltir. Sa i en keksoz ki mon pe demann mon lekor. Depi kan, e ki pour ki rezon ki in annan okenn lavant later? Mwan mon’n touzour aprann ki si ou pe rod en bout later pour proze lagrikiltir ou ganny lease non pa vann. E avek serten kondisyon tel ki parey letan pour pran pour devlope ; kalite lakaz ki ou pour met lo la, e bann lezot kondisyon. Si ou pa ti pe zwenn sa bann kriter later parey zot in ganny demande. Later i ganny re pran. Ti senp koumsa. Akoz mon konn sa ti aplik pour mwan. Me mon demande akoz lezot zot pa’n ganny lease, zot in ganny vann. La prezan nou pe rod pour re  pran, pour re aste.

Mr Deputy Speaker later i ganny lease me non pa vann. Akoz ler ou vann li, i anmenn bokou problenm parey in ganny fer re sorti. Me later Sesel nou konpran i rar. E i annan bokou demann pour lezot devlopman. A ler, alor ler ou pe vann li sa bann devlopman pe ganny met an risk. E en rezon senp se ki sa ki kapab aste, i aste. I asiz lo la pour fer spekilasyon dan bokou ka.  Alor mwan mon pe siport sa mo ‘imedyatman’ en full stop la konmela. Nou pour bezwen osi dan sa konteks rode lekel ki’n otoriz sa bann lavant later ? Fodre vey byen ki napa okenn vilen latet koripsyon ladan.

Mr Deputy Speaker ler nou lo sa size, nou bezwen demann nou lekor si menm sa bann later ki’n ganny lease, konpare  ek vann, pa devret ganny investigate. I annan ase lakizasyon ki serten dimoun in ganny tretman preferansyel pour ganny later Lagrikiltir. Mon koleg Onorab in dir pli boner, ki menm Anse Royale i annan 6 a 7 gro fermye. Me ladan, i annan ki annan de bout dan sa bann gro laferm. I annan ki annan en bout later ki in aste adjacent avek sa bout later ki i pe lease avek Gouvernman.

Sa mon krwar i bezwen investigation ladan. Au Cap osi i annan bokou lakizasyon ki fodre met o kler. Mon’n ganny demande par serten zabitan pour met o kler sa tranzaksyon apepre 75mil met kare ki son met in gannyen me pa pe kapab devlope. Me ki in fer? In donn en lot fermye ki deza annan en laferm par lao 65mil met kare pour devlope. Menm si i bezwen fer vini etranze pour travay lo sa laferm.

Mr Deputy Speaker, sa bann lakizasyon fodre ganny investigate. E si aksyon i devret ganny pran si vre sa bann sef i devret vin ran kont sa bann tranzaksyon. Nou annan lezot konsern ki’n arive avek hydrophonics Au Cap kot Golf Course. En kontrandi i neseser. Alor Mr Deputy Speaker en survey ek en investigation a fer kler ki napa zafer dalon, fanmir, oubyen ‘ek nou pa ek nou’ dan sa bann zafer later Lagrikiltir.

Me nou demande si Minister pa kapab pran sa premye pa serye Lasanble a bezwen fer son bout pour apel sa bann dimoun pour fer parey in deza ganny dir – vin rann kont. Lo sa size Mr Deputy Speaker sa survey a osi kapab met o kler bann later ki ti pe ganny promet anba giz lagrikiltir – me an realite i pe vin an faver pour later rezidansyel dan long term. Tou dimoun pe rod en bout later pour reste oubyen fer en biznes.

Alor fer sa survey. Si desizyon i ganny pran pour reste oubyen fer biznes, oubyen lagrikiltir, sa survey a ganny pran pour balanse lagrikiltir, oubyen rezidansyel. Me i fer kler i ganny fer dan latransparans. Later Lagrikiltir wi in ganny pran par ler pour fer rezidansyel. Au Cap sa 24 lakaz dan 24 mwan, dan 24 distrik, zot pe fer 24 lakaz parey Onorab mon koleg i konnen kot Sadeco. En gran laferm ki’n abandonnen. Me in abandonnen si zot fer dan latransparans pe al rezidansyel – fair and square pa fer nanryen dimoun i ganny lakaz.

Me i annan bann konsern osi kot sa lasistans finansyel ki nou pe konsidere Mr Deputy Speaker. En size sansib sa. Parey Onorab Gill in fer re sorti tre kler; laferm pa en hobby, laferm se en biznes. E o komansman tou biznes, ou bezwen Kapital pour devlop ou laferm. Pour mentenir ou laferm ziska i breakeven ou bezwen Kapital. Pour agrandi ou bezwen Kapital. Si i pour tou biznes. Sa i devret pour lagrikiltir osi. En fermye i konpran ki sa biznes pa pour anmenn larzan deswit. Me alor kote sa fermye pour raise sa Kapital inisyal? Byensir ek en labank. Me en fermye pa pe demann lasarite konpare avek bann gro laferm zot napa sa bann assets an se moman pour garanti en loan. Me la se Gouvernman ki devret antre. Parey in ganny dir pour provide akse ek Kapital. Sa fermye parey in ganny dir i pe run en biznes, e i konnen, e pare pour re pey son loan.

Parey in ganny dir, kou inisyal pour devlop en nouvo bout later i koupe. En excavator R5mil par zour pour en nouvo bout later. Transportasyon, en pick-up, menm 2enm men i koute. Shade house pour komanse, e pa bliye ziskan ler ou ganny ou premye rekolt, ou bezwen viv ou osi ek ou fanmir pour manze. La ki enportan ki Minister i fer sir ki bann fermye ki pe komanse, e bann osi ki la parey Onorab Gill in dir, i annan en bon business plan pour komans avek. Pa komans 2 lipye anmare.

Mr Deputy Speaker, lo kote zil, Komite Zil pour bann later Lagrikiltir, Mr loter Mosyon pli tar pour annan rekomandasyon ki pour ganny fer.  Mon pa pour kapab al lo la. Me bann lezot zil pour prodiksyon agrikol i pour ganny resorti atraver nou Chairman Mr Ramkalawan. Mr Deputy Speaker avan terminen mon oule met lanfaz lo sa zafer import legim parey bann fermye pe konmela ki parey zot dir tomat in ariv R100 ekek kilo. Sa mon krwar fodre arete. Si ou plante, ou plante. Si ou sonny zannimo, sonny ou zannimo. Si oule enport legim ou al dan lenportasyon. Donn sa later plante en dimoun ki anvi plante. Alor Mr Deputy Speaker, ankor mon oule dir, mon oule asir loter Mosyon pour mwan sipor. Akoz nou bezwen re donn nou lagrikiltir sa nouvo souf.

Pa kapab ganny later pour nanryen e rod milyon avek en lot fermye ki pe rod en bout later. Sa bann spekilasyon arete. Ankor nou dir pa vann. Si pa le devlope re pran. Si ou pe donn dalon pour plante pour pey ou, repran. Repran nou later Lagrikiltir. Mersi Mr Speaker.

 

MR DEPUTY SPEAKER

Mersi Onorab Pillay. Onorab Churchill Gill.

 

HON CHURCHILL GILL

Mersi Deputy Speaker. Bonn apre midi tou Manm e tou piblik ki pe ekout nou.

Sa Mosyon i en Mosyon tre enportan akoz i tous tou distrik dan nou pei. Nou bann fermye pe fer pa mal difikilte pour zot kapab realiz zot biznes dan lagrikiltir ozordi. Mon krwar pour nou kapab realiz sa lekspektasyon dan lagrikiltir, nou bezwen an premye annan en plan Nasyonal. Tre konpreansiv, byen detaye pour ki pour kourt term, long term, mwayen term, e long term.

Kwa e ki lapros nou bezwen pran pour relans sa sekter ? An plis ki sa, nou bezwen vwar ki bann meyer metod, nou kapab adopte pour asire ki prodiksyon agrikol i al lo en lot lesel favorab pour nou popilasyon. Si sa i verdir, nouvo letid, pour kwa pa angaz dan letid. Mon krwar nou bezwen osi angaz dan en seri meeting dan tou distrik avek bann fermye, pour anmas lenformasyon lo konsern e sizesyon ki zot a kapab annan. Akoz i kler ki ler sa bann meeting pour fer pour annan bokou lenformasyon ki pour kapab anmase.

Premyerman ; fermye pe ganny problenm pour kapab ganny akse avek finansman. E mon krwar in ler pour Minister travay tre pros avek labank.

 

MR DEPUTY SPEAKER

Onorab, Onorab, Onorab Gill. Zis petet met ‘Off en pti kou mic apre re met li ‘On. Nou pe ganny problenm ‘son. Ok. Sey re met ‘On.

 

HON CHURCHILL GILL

Ya, mon krwar ki fermye pe rankontre bokou problenm pour zot kapab ganny akse avek finansman pour zot kapab kontinyen zot biznes. I kler ki nou bezwen travay pre avek sa labank konsernen pour nou kapab vwar en solisyon pour nou bann fermye.

In ler pour fasilit prosedir pour retir fristrasyon ki kontinyen agrandi dan nou bann fermye. An rezilta, sa i abes prodiksyon ki zot pour kapab fer. Akoz ki en kote nou oule bouz devan dan sa sekter, me nou pa rod fason pour fasilit prosedir finansman e lezot pour nou fermye kapab fer sa latas ? E mon krwar ki bomaten i annan serten Manm ki’n mansyonnen, ki pour kapab donn bann gro lekipman tou fermye. I en keksoz ki kout tre ser. E mon krwar ki Gouvernman atraver Minister Lagrikiltir, i devret kapab fer fasil pour bann fermye, e annan sa bann lekipman ki bann fermye i a kapab lwe avek zot pour kapab defriz zot later, e fer bann lezot mannev lo later Lagrikiltir. Sa i en fason fasilit sipor pour bann fermye. Nou osi bezwen annan en bon progranm akse avek delo, ek semen kot bann later ki ganny met a dispozisyon bann fermye.

I devret annan diskisyon kontinyel avek Minister Lagrikiltir pour asire ki set fwasi sa sekter, i kapab bouz lo sa lot nivo. An menm tan vwar tou sa bann finansman donasyon ki sa Minister i gannyen, pour asire ki sa bann fermye i ganny akse avek sa bann larzan.

Vi ki Praslin i annan bokou fermye, mon pare pour ede si Komite i ganny fer pour bann fermye Praslin fer tande zot lavwa. Pandan diskisyon Bidze nou ti ganny dir ki pour annan, ki annan en Fon ki annan R40milyon ladan. i ti pour annan bann manm ki ti pour ganny elekte pour zer sa bann larzan. Me ziskan konmela, nou pa ankor ganny okenn lenformasyon si sa bann dimoun in ganny elekte, pour nou kapab koz ek zot ki nou bann fermye a kapab ganny bann debousman.

Dan mon distrik Baie St Anne, nou annan en landrwa ki apel Dawn Dew ki konsidere koman later Lagrikiltir. Mon pe lans en lapel ek sa Minister konsernen. I annan en lenfrastriktir pour biznes ki ti fer delo pour en bon letan. E sa biznes in aret fonksyonnen. Alors mon pe demann sa Minister ki sa bann lenfrastriktir i ganny tire, pour ki lezot fermye ki lo lalis i kapab ganny later pour zot osi kapab al debourye.

An terminan, mon a swete ki nou kapab vwar en komitman tre serye par tou bann akter pour ki sa sekter i ava bouze, e vin tre prodiktiv. Mon osi mon pour aport mon sipor pour sa Mosyon, pour ki fermye lo Praslin i ava asire zot a ganny zot sipor. Mersi.

 

MR DEPUTY SPEAKER

Mersi Onorab Churchill Gill.

Onorab Georges.

 

HON BERNARD GEORGES

Mersi Mr Deputy Speaker. Mr Deputy Speaker bokou in ganny dir lo sa Mosyon i pa mon lentansyon apre midi pour repet akoz mon kontan mon lavwa. Sa ki deza in ganny dir. Me mwan annan 4 sizesyon pour mwan fer. E avek ou permisyon mon ava met en pti pe konteks avan ki mwan al lo sa 4 sizesyon.

Lagrikiltir isi Sesel i fer fas parey tou entervenan lo sa Mosyon in dir, avek bokou defi. Nou later i pov. Lapli ek inondasyon i afekte bokou agrikilter. Sa ki pa ganny afekte avek inondasyon, i ganny afekte avek vol. Mwan menm dan lakour mwan annan detrwa pye bannann, sak fwa ki mon dir demen mwan a koup en rezim, son met i pase e rekolte avan bomaten. I annan mankman sipor finansyel. Napa subsidy. Pes i en problenm. Mank legren ek latizann zensek. Zalouzi. Lekonomi lesel – nou en pti pei e nou pa kapab compete avek bann pli gro prodikter.

Nou standar i annan de fwa pa o nivo sa ki bann dimoun, bann konsonmater pe rode. Nou annan problenm, nou pa prodwi menm keksoz tou dilon lannen. Tousala in ganny dir apre midi. E sirtou i annan en mankman – ou in annan en mankman ki pe kontinyen dan lentere ek lasistans, ek linisyativ lo lapar Gouvernman dan sa sekter.

Tousala i fer ki bann fermye, bann dimoun ki dan Sekter Agrikol, zot, zot vwar zot lekor pe mont en montanny ki rar zot pour ariv anler lo la. E pourtan Mr Deputy Speaker, e pourtan nou annan en kantite keksoz ki favoriz devlopman nou lagrikiltir isi Sesel.

Nou’n koz bokou lo mankman later. E i vre, nou en pti pei. E i annan en mankman later agrikol.  E sa pti git ki nou annan, in ganny dir plizyer fwa i bezwen compete avek bann lezot devlopman ki bezwen later.  Sirtou e se sa set enn bann pli gro problenm ki nou’n annan dan bann lannen ‘90, in annan bokou lakaz ki’n ganny fer lo later agrikol, akoz i pli fasil. Later i plat, i pli aksesib, e bokou lakaz in ganny fer pandan sa 10 lannen lo later ki ti’n devret ganny sofgarde pour lagrikiltir. E sa tansyon ki egziste ant devlopman avek lagrikiltir pour toultan egziste. E se pour sa rezon ki, e mon limit mon lekor lo sa premye, ant sa 4 pwen ki lo sa Mosyon – Leader Lopozisyon i demann en Moratwar ki nou annan tel parey nou’n fer lotrozour dan devlopman, dan domenn touris. Nou annan en Moratwar lo lavant, oubyen lo litilizasyon later lagrikiltir ziskan ler en bon Census in kapab ganny fer e en bon Land Use Plan in kapab ganny met an plas pour nou sofgard sa lagrikiltir – sa later Lagrikiltir ki reste.

Me malgre sa i annan selon mwan sifizaman later agrikol pour bann demander ozordi. I annan sifizaman ki kapab redres sa, sa sekter. I annan later plato, me i annan osi later montanny. E parey nou konnen lagrikiltir i ganny e egzerse dan nou pei e lo plato parey nou vwar Anse Royale, Anse Pool Bleu bann landrwa koumsa. Me osi lo later montanny parey Montanny Posée, Valdandor, Dame Le Roi, bann landrwa koumsa. E i annan, i annan still en kantite segment later ki reste pour ganny eksplwate. Serten i aksesib en bann i mwens aksesib. Mon pe mazin enn par egzanp ki ti en later agrikol byen ris dan lepase ki ti pour lanmisyon – Mare Aux Cochons i en sit kot bokou touris i kontan al vizite.

Me i osi i annan en potansyel agrikol akoz i en later ki fertil; i annan bokou delo.  E ki i annan en semen ki san gran depans ti a kapab vin motorable pour anmenn bann prodwi lo marse. Nou annan still bann gran morso later.

Onorab Sophola in koz state La Digue. E sa i vre. Onorab Churchill Gill in koz Dawn Dew Farm Cote D’or Praslin.  E sa i vre se bann gran morso later ki kapab ganny eksplwate. Apre fodre pa nou bliye ki nou annan bann zil e fodre pa nou bliye ki item nimero 8 lo bann lobzektif, lobzektif nimero 8 IDC, se pour devlop bann zil lo en nivo agrikol. Sa ki nou bezwen, e mon krwar se sa ki Mosyon pe demande, se pour sa rezon ki i pe ganny sipor sa Lasanble apre midi. Se ki nou pa zis konnen ki sa bann morso later i egziste, me ki nou pran en ka imedyatman pour dir ki sa se bann later agrikol avan ki MLUH i vini i fer en Housing Estate lo la. Oubyen Minister Tourizm i vini, e i donn permisyon pour fer en lotel lo sa bann landrwa. I annan 3 keksoz ki mon ti a kontan port a nou latansyon apre midi avan ki mwan pas lo mon 4 sizesyon.

Premyerman se bann gran laferm. I annan bezwen dan en pei, pou annan bann laferm a en pli gran lesel. E nou vwar ki i annan serten sa bann laferm ki pe prodwi sirtou dan bann landrwa plat e Anse Royale set enn ki nou vwar ase souvan, e nou bezwen annan sa bann laferm. State Farm pa’n marse pour bann rezon ki nou pa bezwen al ladan ozordi. Me bann pli gran moros later fertil ki ganny kiltive par bann fermye profesyonnel i bezwen la pour form en – pa labaz akoz labaz mon krwar i en lot keksoz. Me pour form en segment dan sa sekter ki pour prodwi bann legim ki nou bezwen konsonmen isi.  Me se bann smallholders, nou’n apel sa Backyard Farm, backyard plot eksetera se bann smallholders mon krwar Mr Deputy Speaker ki nou devret focus lo la bokou, bokou plis.

E nou konnen ki dan bokou pei. E nou vwazen Mauritius i en legzanp fragran, se bann pti fermye, bann pti dimoun ki annan en pti morso later ki prodwi la totalite zot bezwen an term legim ek fri pour konsonmasyon lokal. Se pa bann gran laferm, se sa bann pti dimoun ki pe kiltiv annan de fwa en 100, 200 met kare later ki pe, me i fer li dan en fason entans ki pe prodwi la mazorite keksoz.

Nou kapab dir se bann SMEs isi Sesel, se bann Small and Medium Enterprises dan domenn agrikol, e se zot ki selon mwan i form labaz nou Sekter Agrikol. E se zot sa bann dimoun ki bezwen ganny ankouraze. Zot in toultan prodwi e zot ankor pe prodwi ozordi. Mon ti ava kontan zis donn  detrwa legzanp.

Onorab Esparon pli boner, in koz lo fermye prensipal dan mon distrik, Mr Tedi Songoire ki li i annan laferm, pa ni lo plato lo nanryen, i lo en bout montanny. E pourtan in kapab, i fer bef, i fer koson, in plant bannann, e in kapab devlop en laferm lo en landrwa ki pa ti vreman en teren agrikol. Bomaten nou’n koz lo en lot dimoun dan mon distrik, Mr Dereck Amade, me nou ti a kapab osi Mr Deputy Speaker koz lo en kantite, en kantite dimoun e nou tou nou konn zot.

La mwan konn la fanmir Tirant, Gertrude avek Hence anler dan leo Anse Boileau, Anse Louis, dan en landrwa kot zanmen ou ti pour dir, i ti a kapab vin en teren lagrikiltir. Pourtan zot, zot pe prodwi. I annan mon prop boper defen Philippe Moulinier paren ki La Misère i ti annan pa bokou later me in kapab prodwi. E pandan bokou lannen viv lo akoz i ti enn sa bann Minis ki pa ti qualify pour en pansyon. Alor i ti bezwen ziska ler in mor, kiltiv son pti plantasyon. I ti fer li, i ti fer grandi, i ti fer grandi son fanmir lo la.

E nou tou nou konnen Mr Deputy Speaker ki i annan en kantite sa bann dimoun. E mon mazin ankor dan mon prop distrik, mon bezwen salye Mervin Sanmdi ki reste li dan en flat, me ki annan en pti bout later deryer,  e ki’n arive kiltiv sa later. E en lot mon bann dimoun dan mon sirkonskripsyon Maxwell Moustache ki nou apel li Gran James – li in kapab bar en pti bout li osi avek lasenn, e in rod detrwa barik, e i pe prodwi leti, bred, eksetera. Se sa bann dimoun Mr Deputy Speaker, ki mon krwar plito ki bann gran fermye. Me mon pa oule pa siport bann gran fermye. Zot annan en gran rol pour zwe. Me sa bann pti dimoun ki kapab prodwi. E ler ou met tousala ansanm, zot fer en prodiksyon vast ki nou bezwen osi e kontinyelman ankouraze.

I annan en trwazyenm sekter ki mon ti a kontan soulinyen. E trwazyenm vole kekfwa – e sa se, e ankor enn fwa nou’n koz lo la apre midi, e sa se ki nou pa pour kapab prodwi tou keksoz a tou moman dan nou pei. Me sa ki nou kapab fer. E mon krwar sa ki nou kapab fer tre byen e ki nou pa pe eksplwate ankor, se en prodiksyon selektif. I annan serten keksoz ki nou konnen ki nou kapab fer, nou kapab fer li tre byen. Ler Komite Zil ti lo Desroches, nou’n vwar ki zot pe fer en trial laba pour plant fig. i en keksoz ki zanmen nou mazinen. Me si i pouse, i pous tre byen lo Desroches i pa pous byen dan bann lezot landrwa set en prodiksyon targeted ki nou kapab fer.

E lo Zil Poivre nou’n vwar ki kantite limon ki sa zil i kapab prodwi ki en prodiksyon vast, e ki kapab ankor pli vast. Lo Fregate mwan mon konnen, Fregate ti prodwi zoranz a en serten moman ti annan telman zoranz ki zoranz ti pouri anba pye. Alor se bann sekter ki nou kapab prodwi e sel keksoz nou kapab fer, nou devret fer se trouv en fason e mon a vin lo la taler – pour pran sa bann prodiksyon pour anmenn li lo marse pour ki i pa pouri anba pye.

Me nou’n vwar i annan lezot dimoun ki kapab e ki fer travay tre, tre byen dan distrik Anse Royale, ki mon pase tanzantan ; Onorab Lemiel, ek Onorab Larue i konn tre byen. Sweet Escott ti annan en pti bout lanmar avek fore. Vreman i ti en pti bout lanmar avek fore. Sa bout landrwa in ganny netwaye, e pye dibwa in ganny koupe, lanmar in ganny amelyore. E ozordi i en laferm ki prodwi papay, ki prodwi zariko – i prodwi en seri keksoz.  E sa dimoun in rod son pti bout later. In reclaim sa pti bout later avek en lafore ek en lanmar. E in kapab, in kapab prodwi keksoz enteresan.

Anler Valdandor i annan laferm ki spesyaliz dan kabri. Ti annan laferm lontan ki ti spesyaliz dan zannannan Victoria. La ozordi i annan en laferm ki specialize dan dragon fruit. En keksoz ki rar isi Sesel. Me en dimoun in trouv en sekter. Anba dan distrik Takamaka, i annan enn ki spesyaliz dan fri la pasyon. Alors si nou spesyalize, e tou sa bann keksoz, se bann keksoz ki nou Lendistri Tourizm i bezwen. E si nou kapab parey mon’n dir zwenn prodikter avek marse touristik mon krwar nou lavenir, i en lavenir briyan.                 Sa ki fodre pa nou sey fer e mon krwar nou tou nou dakor lo la se esey vin en pei ki pour prodwi karot avek betrav, ponm, avek pwa, pez bann keksoz koumsa. Nou pa pour arive fer sa. Me sa ki nou kapab prodwi si nou focus lo la Mr Deputy Speaker, nou kapab fer li tre byen. Mwan mon annan en zanmi lekol ki mon konn tre byen ler mwan mon ti pe al etidye pour avoka, li i dir mwan ler ou retournen mwan mon a montre ou lekel ki fer larzan. I ti plant bannann Sen Zak. E i ti fer li avek en pti bout later, pa plis ki en arpan later R1milyon avek son bannann Sen Zak. I annan larzan pour fer. I annan posibilite si ou focus, si ou target si ou fer sa ki mon espere mon’n kapab atraver sa detrwa legzanp montre la apre midi.

Alor kote sa, kote sa pour anmenn nou ? Mr Deputy Speaker, mon krwar i annan 4 keksoz ki fodre nou tenir antet. Premyerman nou bezwen embargo litilizasyon later agrikol dan en fason pour nou sofgard sa ki nou annan deza, e pour donn zot avek bann dimoun  ki anvi devlop sa bann later. E sa se premye pwen ki dan sa Mosyon. E i ganny mon sipor total.

Dezyenmman, nou bezwen re etidye la fason nou pour devlop plizyer sekter nou lekonomi. Nou pa kapab lager avek later agrikol. En fwa ki nou’n met en embargo, e ki nou’n idantifye en later agrikol, i devret reste koman en later agrikol. Nou pa devret taye pour fer lakaz dan plato. Annou plito fer lakaz lo en kolin kot later i pov, e kot nou pa kapab fer agrikol, fer leksplwatasyon agrikol pour nou kapab fer nou lakaz…nou later, servi nou later agrikol pour lagrikiltir. Alor lakaz lo move later, Lagrikiltir lo sa ki bon.

Trwazyenmman ; annou ankouraz bann smallholders pour zot prodwi ankor plis, e pour spesyaliz, e focus, e target lo sa ki zot pe prodwi. Swa en kalite fri, swa zepis, swa whatever. E target en keksoz ki marse i bezwen.

A serten lepok mon rapel defen mon boper ti plant en sel keksoz – celery. E i ti sel dimoun ki ti plant celery isi, e tou dimoun ki ti anvi aste sa komodite ti bezwen al kot li. Alor si avek en pti pe lespri, mon krwar nou kapab sorti dan sa loptik kot tou dimoun i plant leti, tou dimoun i plant bred, tou dimoun i plant zariko eksetera, eksetera.

E 4enm, e dernyen pwen nou bezwen retourn avek en kalite incentive. E la lo sa pwen mwan annan, mwan ti a kontan koz le de keksoz SMB. SMB i ti en konsep ki ti pour en letan, e at the end of the day i pa’n marse akoz nou’n realize ki en lekonomi santralize pa meyer fason pour nou devlope. Me, me dan en serten fason i ti en subsidy. Akoz ou ti kapab sir ou prodwi konnen ki ou annan en marse garanti. SMB li i ti perdi larzan akoz i pa ti’n kapab transform sa bann keksoz ki i ti bezwen aste avek en lavant, e se la kot in fail. Me vizavi agrikilter, i pa ti en move keksoz akoz i ti donn en marse garanti.

Tel parey i arive partou dan lemonn – America, Europe eksetera i annan bann marse garanti. Ou sanmenn sa ou annan bann ‘butter mountain’, ‘ou annan bann ‘wine lake ‘eksetera, akoz i annan en marse garanti. Les Gouvernman. Apre gete ki i pour fer avek but at least ou konnen ki ou pe subsidize ou sekter, e ou pe vin, ou pe vin otan otosifizan dan en serten sekter ki ou kapab arive.

Nou’n konnen nou’n kapab fer tourism incentive. E tourism incentive sete donn, donn dimoun akoz nou ti napa ase zoli lotel. Nou ti napa ase lotel modern. Nou ti annan en vye stok lotel. Nou ti bezwen ankouraz dimoun pour vin envestir.

Ki nou’n fer? Nou’n donn zot tax break. Nou’n donn zot bann fasilite tousala set en incentive.  Si nou’n kapab fer sa pour tourizm – akoz ki nou pa kapab fer sa pour lagrikiltir osi pour lev sa sekter?

Alor vwala mon 4 sizesyon Mr Deputy Speaker; embargo, focus lo kote ou pour devlop later, ankouraz small holders, e incentivize. Rod en incentive ek en subsidy pour relev sa sekter. Mon a fini Mr  Deputy Speaker, an reprenan sa ki mon ti dir yer e ki Mr Onorab Simon Gill in fer mon mazinen taler; ki i annan serten keksoz ki i annan serten defi ki nou kapab sirmonte, e i annan serten keksoz ki nou kapab fer tre byen. I annan 2 legzanp devan nou ki nou viv avek toulezour. Enn se sa enn ki mon ti mansyonnen yer. Nou ti annan en problenm ekonomik avek lasistans bann Lazans nou ti arive sirmont sa problenm. Kekfwa nou pa kapab fer tou keksoz nou menm. Me avek lasistans nou kapab arive fer li.

E dezyenmman nou annan Sekter Tourizm. Nou’n kapab montre ki mannyer nou kapab annan en Sekter Tourizm, ki marse ki prodiktiv e ki alaoter. Si nou’n kapab fer li pour nou problenm ekonomik avek nou Lendistri Tourizm, mon pa vwar Mr Deputy Speaker akoz avek lavolonte, avek en zefor konserte, avek sipor sa Lasanble, nou pa pour kapab demen relev nou Sekter Agrikol dan menm fason. Mersi bokou.

 

MR DEPUTY SPEAKER

Mersi Onorab Georges. Bon i reste 2 entervenan. Apre loter Mosyon pour fer son konklizyon. Mon sizere nou pran en Break. E nou retournen 4er pour nou kontinyen. Ok ? Nou adjourn ziska 4er.

 

(BREAK)

 

MR DEPUTY SPEAKER

Bon. Nou a kontinyen nou deba lo Mosyon. Mon annan Onorab William.

 

HON WAVEN WILLIAM

Mersi Mr Deputy Speaker.

        Mr Deputy Speaker, mon’n al rod gidans bomaten lo lefe ki mon entervansyon pa sinyale ki i annan en konfli lentere. E ou’n dir mwan pour dir mon kapab koz lo sa Mosyon.

 

MR DEPUTY SPEAKER

Sey lev en pti ou mic konmsi sound pa sorti tro, tro byen.

 

HON WAVEN WILLIAM

Wi. Mon dir mon ti’n rod ou gidans bomaten pour mwan entervenir lo sa Mosyon. E pour.

 

MR DEPUTY SPEAKER

En moman. E moman nou a, en minit 2 minit. Sound pa pe sorti byen. Ok. Annou kontinyen.

 

HON WAVEN WILLIAM

Yes mon’n rod ou gidans Mr Deputy Speaker bomaten pour mwan kapab entervenir lo sa Mosyon. E pour mwan entervansyon pa ganny vwar koman en konfli lentere.

Mr Deputy Speaker tou dabor mon ti a kontan dir ki mon pour siport sa Mosyon. E mon kontan la fason ki Mosyon in ganny drafte. E mon vwar Mr Deputy koman en wake-up call. En wake-up call, akoz i annan bokou problenm ki Sekter Lagrikiltir pe fer fas avek. E a parey nou konnen nou pe koz lo 2 parti la. Nou pe koz Gouvernman koman fasilitater.

E nou pe koz lo bann fermye avek bann prodikter. E avan mon ti a, mon kontinyen, mwan ti a kontan dir ki mwan ti a swete ki dan lavenir, nou pran en lot direksyon dan la fason ki nou deal avek bann Mosyon, akoz i bon ki nou pe ganny bann reaksyon piblik deor – spesyalman bann ki dan Sekter Agrikol, lagrikiltir.

Par egzanp mon’n ganny dir pas sa mesaz. E  an menm tan en lenvitasyon avek Lasanble sa dimoun ki pe okip labatwar in dir mwan les en… I lans en lenvitasyon avek Lasanble pour zot vin fer en vizit akoz i annan serten keksoz ki’n dir petet ki pa’n sorti ase byen. I pa parey Lasanble pe enterpret li. Alors in lans sa lenvitasyon avek Lasanble pour vin fer en vizit.

E dezyenmman, i annan sa madanm ki Onorab Adelaide in tous lo la; madanm Boniface e mon’n ganny dir ki zot pe esper sa madanm pour vin siny e dokiman. E in annan en, wi in annan en problenm dan kominikasyon, me kot sa dimoun in ale petet in mal ganny gide ti a bon ki sa madanm ou pas sa mesaz ek sa madanm.

Mr Deputy,  i annan bokou persepsyon. E osi nou bezwen etre realis dan la fason ki nou vwar keksoz. Mr Deputy mwan mon ti ava sezi lokazyon pour felisit bann dimoun ki ankor dan Sekter Lagrikiltir ozordi akoz mon a dir ki lagrikiltir dan Sesel ozordi i pa sitan fasil. I annan bokou defi. E plizyer Manm in koz lo sa bann defi. E wi nou bezwen met en Moratorium lo later Lagrikiltir. E mon ti pe al demande parey lezot Manm in dir ki nou redonn Minister Lagrikiltir kontrol lo later Lagrikiltir.

Mr Deputy letan mon dir sa, mon osi konstate ki letan bann desizyon ti ganny pran letan pase – par egzanp dan mon distrik i enn ; kot lakaz ti bezwen ganny fer. Ti bezwen ganny fer akoz ti annan en bezwen. Sa lepok ti napa Moratorium lo later Lagrikiltir. E ti annan bezwen, e en bon pe manm fanmir dan Sesel, swa dan lot kote ki siport Lopozisyon, menm lo kote Gouvernman, ozordi zot annan en bout later. E zot annan en lakaz ki mon krwar i byen. Zot ti a pe swete. Akoz mwan mon rapel. Ti annan bann vye, vye lakaz bann lepok kolonyal, Angle ki nou ti kapab apel zot bann squalid condition, ki mon kontan ozordi nou’n kapab sanz sa bann realite e ki sa bann dimoun ozordi zot satisfe. I ti bann desizyon ki ti bezwen ganny pran sa lepok.

Mr Deputy mon osi konsyan ki nou pti pei Sesel, nou’n pas atraver bann lepok, nou’n pas atraver bann faz devlopman ki fer bann diferan parti in eksperyans bann diferan sekous. Me atraver sa bann letap devlopman – an menm tan nou’n ganny liberalizasyon, mon santi poudir  in annan serten dekoneksyon. Dekoneksyon akoz mon konnen pour dir nou bann fermye koze en kantite dan lepase. Mon rapel Mr Deputy mwan avek ou menm ki ti form parti Komite IAC, nou ti enkli dan serten bann diskisyon – sirtou dan prosesis letan pour al zwenn avek WTO.

Nou’n ganny sans enterakte avek bann dimoun ki lo lasosyasyon fermye. E in annan en seri problenm. E i annan menm bann problenm ki ozordi pa ankor kapab rezourd. Par egzanp, i annan bann prodikter lavyann ki pe dir mwan pour dir be problenm ozordi dan Sesel se lavant. Zot pe ganny problenm avek lavant akoz nou pe enport bokou lavyann aletranze, e i kout pli meyer marse.

E ki fason letan nou pe koz soustenabilite, nou pe koz sekirite alimanter, nou pe koz guarantor of supply, e dan en lanvironnman liberalize kot nou Seselwa ozordi, ki dan biznes zot konsyan sa eleman ‘trade.  Zot konsyan pour dir zot bezwen gard e tenir zot biznes pour zot kapab viv. E letan ou dan biznes, biznes se profi. Bezwen rod profi. Ou pa zis toultan pe rod breakeven. Ou bezwen rod tou sord mwayen pour ou kapab reste vivan. E Mr Deputy i enportan ki mon fer sorti akoz petet serten pa pe realize ki fason Sesel konpare ek letan lontan letan nou ti pe eksport kannel, eksport kopra, ozordi in nepli sa. Akoz i annan lezot pei pe fer li pli meyer marse ki nou. E i pli konpetitiv pour fer li.

E par egzanp ozordi nou bezwen enport travayer etranze. Lontan nou pa ti tann koz lo la. E mon konnen pour dir dan sa milye osi ozordi Minister Lanplwa i annan en bon pe analiz en diskisyon ki zot pe fer vizavi sa. Mr Deputy, mwan mon ti a demande ki Minister Lagrikiltir – akoz sa i en krwayans ki mon annan, mon pa krwar pour dir zot bezwen tret tou bann fermye, ouswa tou prodikter lokal parey. Mon krwar nou bezwen kategorize parey Onorab Gill in fer sorti.

Akoz si nou pa kategoriz li, nou pour dan problenm. E mon pa krwar ki en dimoun ki anvi al pli devan i annan sa kapasite, nou bezwen limit li. Nou bezwen donn li sa sans, les li ogmante. E les diversifye, les li fer plis. I vin en benefis pour pei. E ou annan bann ki napa kapasite.

Me la mon santi e mon dakor avek bann entervenan ki’n koz la ki, nou bezwen revwar en pti pe sa bann Scheme ki an mars ozordi. Eski i relevan ozordi avek nou lepok, avek sa letan ; avek sa transformasyon ki Sesel pe pas atraver?

Mr Deputy Speaker, mon’n ganny sans al aletranze, mon’n trouv en pti pe kwa ki pe pase. Par egzanp L’Inde ; in annan en transformasyon mon pe dir – mon pa pour dir Sesel i parey L’Inde. L’Inde in konn son first Green Reform e la dezyenm Green Reform. Me L’Inde mon santi i en pei ki ozordi i annan plis ki 200 ekek Lenstitisyon Resers ki mon swete ki Sesel – akoz mon’n ede pour inisye – pour siny en lagreman avek ICAR, e i annan bokou eksper ladan.

I annan bokou keksoz ki dan letan pase nou’n pran avek L’Inde ki nou pa pe tro servi. Me mon ti ava demande ki nou osi konsider rod sa bann lasistans, akoz parfwa i annan serten keksoz isi nou pa pour kapab fer li. Mon pe demande ki Minister Lagrikiltir i vin osi proaktiv. Servi nou bann Lanbasad osi deor akoz, mon konnen pour dir i annan en ta keksoz deor ouswa petet kominikasyon neseser pa pe ganny fer, i annan en ta lasistans ki nou kapab gannyen. E par egzanp mwan kontan ki Onorab in tous en pwen. E dan sa groupman ACPE, i annan en ta problenm ki pei Lafrik Carribean, Pacific i fer sorti akoz desizyon ki pe ganny pran o nivo Europe, i pe afekte sa bann pei. Akoz zot, zot anvi, zot anvi market share global. Nou dan en lemonn konpetitiv.

Mr Deputy tou keksoz ozordi i en konpetisyon lo tou nivo. E nou’n ganny dir osi si nou pa keep up, nou pour ganny kit deryer. Me i en gro challenge Mr Deputy Speaker.  E par egzanp lo kote sipor apard ki met Moratorium lo later Lagrikiltir. Mr Deputy Speaker, si ou asize parfwa ou koz avek bann fermye – i annan plizyer dan mon distrik. E mwan i enteres mwan.

I en size ki mon pasyonnen avek. Mr Speaker, Mr Deputy, ou’n plante ou. Mon kontan Onorab Georges in tous lo sa fleo sosyal ki asosye avek drog.  Sa fermye in plante li me sa fermye ozordi i bezwen depans bokou lenerzi depi letan I met sa plan dan later ziska rekolt pour li kapab vreman tir sa benefis. Akoz si non, i annan dimoun ki pase ki fer rekolt avan li. Letan i ti’n kalkile pour li fer tan larzan e profi, i pa pe kapab arive fer li.

E la ankor mon ti a dir ki lezot lazans konsernen ; par egzanp si ou pran parey bazar. Petet Minister Lagrikiltir i bezwen revwar en pti pe bazar osi. Nou annan ozordi nou annan bazardye. Nou annan fermye.

Me i annan en lot group dimoun ki antre. Bann dimoun ki vole aswar. I kapab pey son R1500. I osi i en bazardye tanporer li. Ou pa vwar li tou letan dan bazar. Me sa osi i en konsern ki bann fermye pe fer sorti. En lot konsern Mr Speaker, Mr Deputy. Nou’n koz lo maladi. Me ozordi en bon pe nou i at risk Mr Deputy. Par egzanp bokou dimoun pe aste takeaway menm lotel, ouswa bann middleman. Zot pa konnen kan sa legim in ganny spray avek kemikal.

E prezan letan sa bann vol pe arive, pour satisfer serten lanvi, e sa pe ganny vann lo market. E bann dimoun ki pe aste e pe konsonm sa bann legim Mr Deputy, i poz en danze. Menm pour nou Lendistri Tourizm.

Mr Deputy en lot pwen se marketing. Promosyon. Eski apard ki bann gro fermye ki annan kapasite pour fer li – eski nou bann pti fermye ozordi pe gannyen sa debousman?  Nou’n deza koz lo gro pwason manz pti pwason.

Nou’n koz lo liberalizasyon wi. Me dan en pti pei parey Sesel liberalizasyon total, i pa tro marse. I annan serten sekter i kapab marse. Me i annan serten sekter i pa pour marse. Mr Deputy Speaker, i annan tout en seri problenm parey mon pe dir vizavi sa. Taler i annan plizyer ki’n koz lo inputs. Mr Deputy, bann imputs letan i ariv dan pei, i annan bann dimoun ki annan kontak dan Minister ki letan sa materyo i ariv lasose in fini ganny lenformasyon li, e zot pe aste pa gro kantite. Akoz zot annan sa kapasite, zot annan serten lenfliyans. E la serten eleman koripsyon I antre.

Sa pti fermye li ki napa sa gous pour donnen, li letan i al lo Store i pa pe gannyen. E oli sa lankourazman. Mr Deputy mwan mon demande ki Minister Lagrikiltir, (1) i sezi sa loportinite avek sa Mosyon pour vreman, vreman analiz sa servis. Analiz sa servis pour relasyonn li avek nou realite ozordi. Realite ki nou bann fermye lokal, e prodikter pe fer fas avek. Mr Deputy Speaker, nou’n siny en ta Lagreman, nou ankor pe sinyen dan la rezyon.

Mwan mon krwar pour dir, nou bezwen rode ki fason nou kapab protez ankor plis nou bann fermye e prodikter lokal. Akoz si nou pa fer li, personn pa pour fer li pour nou. Si bann lezot pei ki nou pe enterakte avek, zot, zot pe sofgard zot lentere.

I annan bokou lobbying ki ganny fer konmela. Letan plizyer bann etranze i antre dan nou pei, zot annan bann diferan lentere. Zot vin regarde dan ki domenn, dan ki sekter zot kapab antre, ouswa anvoy zot zanmi. Menm bann Don ki nou gannyen. Mwan i annan en etranze ki ti’n deza dir mwan e ki mon krwar ladan se ki napa keksoz ki pour nanryen. En Don, en Kredi, i annan en benefis pour sa dimoun ki pe donn ou sa pour li tire pli tar.

Be selman i pa met li sirfas, i pa met li lo sirfas pour ou trouve. Me selman napa keksoz ki pour nanryen. Mr Deputy Speaker baze lo mon leksperyans mon ti komans mon karyer dan lagrikiltir, mon rapel pour dir i annan en bon pe keksoz ki ti bon, ki ti byen, ki nou ti pe fer. I annan serten pa relevan ozordi. Me mon pour dir ki enn nou annan serten defayans avek nou Sekter Extension Service. Akoz sa i en sipor neseser e kle pour bann fermye. Mon rapel en lepok nou ti pe koz lo nou prop Seed Bank, akoz i annan bann legren ki nou kapab, i adapte avek klima Sesel. Me i annan ki pe donn nou bokou problenm.  E mon’n ganny dir pour dir ozordi prive i kapab fer vin nenport keksoz eksepte bann pestisid. Me mon pe demande lekel ki pe fer swivi lo Sekter Prive, pour vwar ki sa ki zot pe enporte pa pe donn nou plis problenm. Mon pa pe dir tou pa zwenn standar. Me selman sa ki mon konnen se ki i annan en bon pe, bann resers pe ganny fer, bann dekouver ki pe montre poudir i annan serten pes e maladi ki pe anzandre dan pei.

Mr Deputy Speaker ou reste La Misère ou, e mon konnen ki ou konnen pour dir La Misère lontan, kreson avek sousout pa ti konnen ki pour fer avek. Me nou’n vwar avek devlopman, klima in sanze e sa 2 prodwi in dezenere, in ganny afekte. E i annan plizyer keksoz parey mon dir, ki nou bezwen vwar akoz keksoz parfwa letan ou pa pe sanz li, ou pa pe rod nouvo fason fer, nou apel sa bann hybrid, ou pour ganny problenm. E sa prodiktivite, sa kalite ou pa pe kapab arive fer li.

Mr Deputy la mon pour koz en pti lo debousman. Par egzanp bann lotel ozordi zot koz lo Grading, ler zot koz lo Grading, bokou nou bann pti fermye pa pe kapab arive meet sa bann standar.  E mwan pe demann mon lekor sa kestyon – eski Lekol Lagrikiltir avek sa sanzman transformasyon, sa tranzisyon nou pe pas atraver – eski nou pe donn sa kalite traning pour nou reponn bezwen ozordi? Eski pa i annan sa nesesite pour revwar. Par egzanp ou pou dir en zenn wi ou’n fini ou training? Letan i regard bann difikilte ozordi. E loter Mosyon in byen dir sa akse avek finansman, akse avek sa bann lekipman si i pa pe ganny pour li kapab bouz devan, i pa ankourazan.

Par egzanp nou’n koz lo difikilte pour nou kapab repran serten bann Blok. Mr Deputy, analiz se ki letan sa bann fermye sa lepok. Letan zot in vyei la, in napa la relev dan fanmir. Ki lankourazman, ki enteraksyon ki’n gannyen byen boner avek sa bann vye dimoun avan zot, zot retire pour kapab annan en la relev? E ozordi mon konnen pou dir Minister Lagrikiltir pe fer fas avek en serten difikilte kot later pour…lakaz  demarkasyon in ganny fer pour sa fanmir reste ladan. E prezan pour ou donn parti sa blok en lo dimoun i osi anvi en landrwa reste.

Me i annan sa nesesite pour plizyer Lazans antre pour vwar, ki fason nou kapab rezourd sa bann problenm osi tou. Mr Deputy ti annan bann mansyon lo bann laferm dan mon distrik, nonm Sinwan, Endyen, me lenformasyon se ki, mazorite se bann Seselwa ki okipe.  Me nou’n sanz Lalwa, nou’n permet bann Seselwa ozordi annan partner etranze. Alors i pa devret en problenm sa. Akoz Lalwa i permet en Seselwa annan en partnership avek en etranze pour li fer biznes.

Me i annan enn ki mon’n ganny dir ti met lo Tender. Ti met lo tender sa lepok. Me mon pa konnen si sa lepok akoz sa dimoun ki ti fer sa i  pa dan pei konmela. Me mon tande en etranze ki ti ganny ‘tender. Me i montre ou pour dir in annan serten mankman. E mwan mon demande ki Gouvernman i revwar en pti pe osi bann Lalwa. Bann Lalwa ki annan pour fer avek sa sekter ki nou kapab fer sir ki nou kapab donn serten nivo proteksyon nou bann fermye lokal, e ki nou donn serten garanti, en serten nivo sekirite alimanter parey plizyer Manm in koz lo la oparavan.

Mr Deputy, mon dernyen pwen se ki dan sa letap kot nou’n arive, mon krwar nou bezwen ed nou bann pti fermye en pe plis, akoz si deor bann gran pei pe kapab subsidze zot bann fermye akoz ki nou, nou pa kapab revwar pour donn plis lankourazman nou bann fermye pour kapab fer en pti pe plis? Akoz sa i posib. Mr Deputy mon pour termin la an di-z-an ki ankor enn fwa mon pour aport mon sipor pour sa Mosyon. Mersi.

 

MR DEPUTY SPEAKER

Mersi Onorab William. Bon avan mon donn laparol loter Mosyon, mwan osi mon annan enn de pwen mon anvi fer sorti lo sa Mosyon. I en Mosyon ki enteresan. Mon pa kapab les sa loportinite pase.

 

HON NICHOLAS PREA

Premyerman mon ti a kontan mon osi zwenn plizyer Manm  pour felisit tou sa bann fermye ki’n pas atraver bokou difikilte depi parey Onorab George taler in dir, depi 2008, mon krwar Onorab Simon Gill osi in dir parey. E zot in kontinyen persiste. E ziska ozordi zot ankor pe prodwi pour konsonmasyon piblik. Zot zefor ek sakrifis in ganny vreman apresye. E ozordi sa Mosyon swiv par sa deba sa kalite deba ki nou’n gannyen i vin koman en lankourazman pour zot.

Mon swe se ki lavenir a pli briyan pour zot. Ler nou koz lo met en embargo, en moratwar lo lavant later. Mwan mon ti a kontan petet nou al pli lwen. Ozordi nou annan lalwa ki prezerv serten landrwa ki fer li vin bann Rezerv Natirel, ki fer li vin bann National Park. E mwan mon ti a panse ki enn fwa ki nou’n idantifye bann later Lagrikiltir, i bezwen annan en Lalwa ki protez sa bann later Lagrikiltir ki okenn lezot devlopman pa kapab antre lo la.

Mon krwar  nou bezwen al dan sa direksyon. Si fodre anmenn en lankadreman legal pour fer sir ki later Lagrikiltir ki deza limite i ganny proteze. Sesel in zwenn bann pei lemonn pour siny bann SDGs – Sustainable Development Goals. E goal nimero 2, dan sa 17, i pe demande ki lemonn I reach ‘Zero Hunger ‘by 2030.

Sa i ganny fer par ogmantasyon dan prodiksyon lagrikiltir. Petet nou napa sa problenm. Me petet mon krwar dan parey mon’n tann serten Manm in dir dan sa prosen 5an, 10an, nou kapab omwen meet sa ki nou apel sekirite alimanter pour nou prop dibyen, pour nou prop sekirite, an vi nou vilnerabilite vizavi kwa ki enport dan pei. Tou dernyerman nou’n vwar sa zafer Lavyann Brazil – e Brazil i en landrwa, i en marse kot nou pe ganny bokou nou bann lavyann. Ok ? E menm lo sa laspe legim, ek fri ki kapab anmenn maladi dan pei.

E mwan mon panse pour dir dan sa prosen 5an, 10an si nou serye nou kapab attend sekirite alimanter. Ki pozisyon Gouvernman? Mon krwar ki Gouvernman ozordi lapel ki pe sorti dan sa Lasanble, Gouvernman i bezwen vin bokou pli serye, e Minister Lagrikiltir i bezwen vin bokou pli proaktiv.

I annan en demann in sorti si bezwen annan en departman ek en dedicated PS pour Lagrikiltir annou fer li. Bidze Nasyonal. Nou tou nou konnen poudir i annan en demann, en demann mon krwar par FAO ki omwen 5 poursan nou Bidze Nasyonal i allocate avek lagrikiltir. Ozordi nou Bidze Nasyonal i pa ni menm mon krwar 1 poursan nou Bidze Nasyonal. Ok ? Sa nou bezwen, sa nou bezwen regarde.

Subsidy – Onorab William in byen dir. Ler nou ti dan IAC dan katriyenm Lasanble. Wi nou ti ganny anmennen on board negosyasyon WTO. Me by the time nou ti rantre sa Sekter Lagrikiltir negosyasyon ti’n fini, ti’n fini frenmen. E i malere ki nou’n donn tou. Me an menm tan ler nou war bann Blok parey EU ki pe dir ek nou ki nou pa kapab fer isi nou pa kapab fer laba no pa kapab subsidize zot, zot subsidize. Zot menm subsidize pou fermye prodwir an plis e zot ganny peye pou detri sa prodwir an plis.

Tandis ki, ozordi mon krwar nou annan plis ki 20 milyon dimoun dan Horn of Africa, ki dan problenm hunger ok ?  E nou pa pe kapab nouri zot. Pourtan lemonn i prodwir ase ki nou tou dan lemonn nou kapab ganny ase pou nou konsonmen.

Sa ankor Sesel osi tou i bezwen revwar. Mwan krwar i annan 2 oubyen 3 Onorab ki’n fer sorti sa. Nou bezwen kapab negosye avek WTO pou dir nou osi tou nou annan serten proteksyon nou bezwen anmennen pou nou fermye. Ou, ou pe donnen dan ou pei laba, nou osi nou bezwen raport siport pou nou bann fermye isi.

Sityasyon lo bann zil. Mon ti’n mete posibilite ek potansyel lo bann zil. Me mwan santi ki Komite Zil atraver son bann rekomandasyon sa i a kapab ganny fer sorti. E Lasanble Gouvernman i a kapab donn sipor.

Lekol Lagrikiltir : eski nou ki dan sa Lasanble nou okouran leta Lekol Lagrikiltir. Mon annan en fermye ki en Manm lo sa Komite ki deal avek Lekol Lagrikiltir in partaz en pe letan avek mon son konsern. E plizyer rekomandasyon in sorti lo sa Komite in al kot Minister, pou serten renovasyon, serten reparasyon miner. Ziska prezan for years nothing done.

E la bomaten menm en staff in anvoy mon en text. In enform ki leta i kritik, menm pou lemoman la zot pe ganny plis etidyan ki pe al dan Ortikiltir zot pa pe kapab prodwir. Fermye, zot pa pe kapab prodwir bann pou al travay ek later ek zannimo. Teknisyen, i pe dir mon zot Curriculum i mal. E par lo la zot annan konsern, zot annan en direkter ki i en Columbian – ki aparaman i pa azour avek devlopman lagrikiltir dan nou pei.

Mon pe  met sa, bann konsern ki’n ganny lev-e. Mon annan tou taler mon annan en fermye ki’n dir mwan Onorab Adelaide petet in bliy li. In anvoy mon en text en fermye Valdandor i annan en basen Valdandor ki’n ganny konstrir for so many years. I vid, zot ankor pe esper delo pou vin ladan. Tandis ki fermye i pe servi delo trete e pe pey delo trete tou le mwan pou zot kapab irrigate zot laferm. Sa basen i reste la vid. E zot pa konnen ki problenm, ki lazans pa kapab fer sir ki delo i antre ladan pou fourni bann fermye.

Nou koz lo bann lenfrastriktir. Nou konnen nou 2 Onorab William nou’n okouran en pti pe bann roulman. Parey bann Manm i dir IFAD i donn en kantite larzan. E la mon donn en senp legzanp 2 fermye Grand Anse ki mwan konn tre byen nou dyaloge tre byen. I annan Mr Bastienne, i annan Mr e Madanm Beryl Payet, Mr Madanm Daniel Payet. Ki sa bann fermye ki’n struggle, ki ankor pe struggle. Me lefe ki zot in konmans dan sa metye depi laz 15 an, ozordi zot in sot 50 an. Ki zot pou fer? Frenm laferm al dan en lot keksoz. E par lo la zot annan en manman det lo zot.

I annan ki menm lipotek zot prop propriyete pou kapab sey service zot det. Me ki nou war. Onorab William i konn tre byen. Sa semen pou access sa 2 laferm ki pou mwan i 2 gran laferm. I enkrwayab pou regard son leta. E pourtan ler nou ti pe diskit Bidze Lagrikiltir ti en size ki mon ti lev-e en konsern ki mon ti lev-e avek Minister Lagrikiltir. Zot gannyen bann Grants zot gannyen bann Don pou ed bann fermye.

I annan Manm ki’n mansyonn akse avek delo, ki bann fermye ankor pe lite ankor pe lager. So la ankor kot mon war serten defayans vizavi Lazans Lagrikiltir. I annan fermye ki’n dir mon zot in bezwen abandonnen. Mon konn Msye Gaetan Moustache, ki ti annan en gro laferm anler Valdandor. I ti sonny koson, poul i ti plante. Ozordi i en pti vander Anse Aux Pins o-bor semen.

E in sorti laba avek en date i pe sey kontinyen pou li kapab service son det. Mon konn Mr Corgate, no matter what i annan, i kapab kritike ; ki li osi tou in zwenn mwan detrwa fwa, i pe dir mon ki groser det i annan lo son latet. I pe debourye li osi, i pe seye, i pe extend menm kot Fresh Cut.

        Mon konn Mr Jean-Pierre Morin ankor, ankor se selman atraver. Konmsi in kontinyen persekite pou li survive. Me tousala zot annan bann gro, gro det. Mr Matombe dan plato Anse Royale. Pou zot kapab kit prodiksyon pou zot kapab kontinyen donn Seselwa manze.

Ler nou koz lo kalite. Nou bann fermye pe donn nou kalite. Petet zis mon ava partaz avek zot, e pou lapopilasyon deor. Sa poul enporte ki sorti Brazil. I napa en dat lo la ki dir ek ou kan in ganny touye. I napa en expiry date. Me zot konn en keksoz ki serten marsan avek lotel zot demann bann fermye lokal? Pou nou pran ou prodwir ou poul dan ou lanbalaz lo ou packaging fodre ou met dat ki ou’n touye, e en dat kan i ekspire. What is this?

Me selman nou pran prodwir Brazil, nou anmenn dan lotel, nou anmenn dan nou magazen. E pou zot lenformasyon sa bann poul i kontenir ziska 36 poursan brine, sa ki nou apel salt water, ok ?

E dan nou prodwir lokal nou napa sa. Se sa rezon ki nou vwar, nou al laboutik, tou sa bann poul, nenport ki ou swazir i 400 granm. Si oule 500 granm, nenport dan sa batch ki ou swazir i 500 granm zanmen i en granm an mwens, zanmen i annan en granm an plis.

E zis nou mazinen osi tou ki kantite milyon sa bann poul i ganny prodwir lo laferm. Parey mon’n dir taler, kan i ganny touye ? Konbyen letan i fer laba avan i ganny anvoye isi Sesel ? Solman pou awareness, public awareness kwa ki nou pe konsonmen?

Marketing, mon krwar lagrikiltir bann fermye in fatige demann avek Minister, ed zot pou fer marketing. Fermye pa kapab prodwir, touye, anbale, transporte, delivre zot menm. Ed zot pou fer marketing.

Si lotel pe demann en serten standar – lazans rantre ed sa bann fermye. negosye ek lotel kwa ki ou pe demande and all that. E mon’n aprann ankor ek Mr Bastienne semenn pase. In dir ek mwan pou dir i annan en group viziter Arab, pa bann dimoun ki pe aste later isi – me i annan en group ki en fwa de fwa par an zot vin vakans isi Sesel, zot konsonm selman poul lokal. Poul ki Seselwa, Sesel i prodwir. Si i ankor i montre taler, parey Onorab De Commarmond in dir, petet i annan posibilite, nou prodiksyon nou kapab i sitan en kalite, ki nou kapab regard en pti pe market eksportasyon.

Minister Touris, rantre si ou pe dir viziter i bezwen vin gout Sesel. Nou pa vin gout Sesel, solman nou pe manz poul Brazil. E manz legim tomat kan Sesel pe prodwir tomat ek dizon zannannan. Nou pe ganny bann kalite zannannan ki sorti dan en lot pei, ki menm i pa mir i forse mir i pouri. En?  Nou kapab fer tou sa bann keksoz.

Ozordi ler nou pe koz Korperativ. Korperativ i pa move nide. Dan bokou bann pei, Korperativ i egziste alongside  en marse lib. I marse L’Angleterre i marse fantastik. La France i marse fantastik. Nou kapab me solman ankor, petet pou run sa Korperativ mon pa konnen si fermye i devret antre direkteman ladan. Oubyen si en lot group dimoun i rantre ladan. Me ankor Gouvernman i bezwen antre, regarde koman i kapab ede.

Onorab Georges in mansyonn Mare Aux Cochons. Wi Mare Aux Cochons ti en later ki prodiktiv. Me solman ozordi Mare Aux Cochons i devret retourn dan rezerv. E avek son potansyel delo ki annan laba i pa vreman fezab pou rantre ankor dan Lagrikiltir, e mon krwar Onorab Georges in fer sa sorti. Ok nou bezwen fer atansyon kwa ki nou sa Ecosystem laba kwa ki nou zwe avek.

Nou koz lo etranze ki travay lo laferm. Ankor fermye in dir ek mwan i pli fasil pou zot pran Seselwa pou travay lo laferm. I difisil, ou menm ou pe lager ek ou laferm pou fer li marse, pou ou al konmans rantre dan process al rod GOP. Al zwenn sa dimoun lo Erport. Fer bann kondisyon Kontra. Rod akomodasyon pou zot. And so on.

I pa fasil. I pli fasil pou zot anploy Seselwa. Me zot pa pe ganny Seselwa. E ankor lekol pa pe prodwir. Nou bezwen revwar lekol. E la mon dir Minister Lagrikiltir – Lazans i bezwen regarde aparaman i annan en staff movements. I annan staff pe kite, ki dekouraze dan Minister e menm la ki annan pou fer avek lekol.

Nou’n koz lo, Onorab Simon Gill in koz lo ozordi nou kapab prodwir dizef. E wi nou kapab prodwir dizef e nou’n war ler ou kapab flood the market. Flood the market se konsonmater ki benefisye, pri i desann.

Ok ? Me an menm tan ti annan en moman kot nou ti kapab prodwir pti poul osi isi. Me tou dernyerman nou’n pas dan seren problenm. Mon krwar sa pe re aranze dousman, dousman.

Nou’n koz lo en Komite. Mon osi mon krwar mon fer sa mwan dernyen pwen, non mon ava tous en pti pe lo Livestock Trust Fund koman mon dernyen pwen – Komite Lasanble, tou Manm mon krwar i agree ki nou bezwen en Komite Lasanble ki pou deal avek sa. Akoz si ankor i fer plizyer fwa nou anmenn sa konsern lagrikiltir, si nou kit li koumsanmenm

Mon krwar i pou reste dan menm leta. Nou pou bezwen met en Komite Lasanble an plas. Ki ava fer swivi. E apre sa Komite 3 mwan 6 mwan i a kapab vin raporte.

I annan en ta problenm nou’n soulinyen. Menm sa zafer pou al vizit kot bann Departman kot lekol tou, sa Komite i bezwen al fer sa bann swivi parey.

Livestock Trust Fund ti ganny etabli ankor koman en subsidy pou bann fermye. Me bann fermye i dir zot pa pe santi sa, zot pa pe gannyen. Alor i ankor i parmi bann leokri bann led ki fermye pe demande.

Mon’n anvi fer zwenn avek zot pou fer sa detrwa pti pwen, pou zis montre lenportans, lenportans sa Mosyon. E pou nou ansanm kapab donn en lankourazman nou bann fermye deor. E pou nou kapab raport siport pou tou bann dimoun ki pe ki dan sa laliny prodiksyon. Be it gran fermye, oubyen pti fermye.

 

MR DEPUTY SPEAKER

Avek sa 2 mo ki mon pou pas laparol avek loter Mosyon, Onorab Ramkalawan pou fer son konklizyon. Onorab.

 

HON WAVEL RAMKALAWAN

Mersi bokou Mr Deputy. E mersi bokou tou bann Manm ki’n partisipe. Dan bokou sans ou a krwar in vin konman en repons lo Leta Lanasyon. Parski apart 4 Manm ki pa’n entervenir tou bann lezot in koze. E zot in fer bann pwen ki vreman valab.

Mr Deputy mon krwar ki dan sa deba enn bann kestyon ki mwan finalman mon’n poz mon lekor, se ki mon pe sey rod larepons akoz letan ou demann ou lekor en kestyon savedir ou pe sey rod larepons ou menm.

Se eski Gouvernman in vreman vin en fasilitater pou nou bann fermye e pou devlopman lagrikiltir an zeneral?  Oubyen eski zot in vin en lobstak?

E letan mon’n ekout tou bann diferan pwen. Mwan krwar ki nou bezwen aksepte, ki sa rol fasilitater i pa’n vreman leka.

Si nou pe demande e tou bann Manm ki’n koze i dakor ki nou fodre nou met en embargo, nou met en nou arete vann later Lagrikiltir ; Ki nou fer en resansman lo later lagrikiltir. E ki si annan later Lagrikiltir ki’n ganny vann e ki pa ankor devlope ki nou retourn li dan stok later Lagrikiltir, se parski zisteman sa enn ki ti sipoze protez later Lagrikiltir, ki ti sipoze pe promot lagrikiltir, konman en fasilitater i pa’n fer son responsabilite.

E pli boner letan Onorab Loizeau, in koz lo governance, konmsi ki mannyer management pa’n mars byen mon pou dakor avek li. E ofet mon ava dir avek zot ki Onorab Waven William i konn sa byen. Akoz letan mon’n ekout son lentervansyon, mon’n kapab idantifye kote in tir serten pwen dan son lentervansyon. E si mon ganny li byen, in tir serten pwen dan en papye stratezik ki ti pibliye an Zanvye 2015, ki ti apel the reorganization and strengthening the Governance framework of Seychelles Agricultural Agency – SAA.

        E dan sa bann pwen i annan par egzanp lo pwen 15, zot mete napa Leadership, napa Leadership e napa vizyon. E  Mr Deputy Speaker mwan mon krwar ki nou bezwen aksepte. Nou bezwen aksepte ki pou dir ozordi nou bann fermye zot pe naz ki mannyer zot kapab naze. Nou bezwen aksepte sa.

Konmsi pa akoz mwan dan Lopozisyon ki konmsi mon pe atak Gouvernman, me mwan krwar nou bezwen aksepte ki pou dir se sa larealite.

Si fermye lo en kote i nonm ou later ; Onorab Loizeau ankor enn fwa in mansyonn Mr Belle, in mansyonn Mr Renaud. Onorab William in dir avek Onorab Adelaide sa madanm konmsi en problenm kominikasyon. Kan Sesel ozordi i koz labous plen i dir nou premye dan kominikasyon per capita da Lafrik.

Me solman pou en madanm, pou nou ariv kot en madanm ki’n fer en aplikasyon. nou ganny problenm. E letan Mosyon i monte la aprezan nou call, nou dir be dir li vini.

So i montre nou ki pou dir i annan problenm e dimoun partou kote pe espere. En Manm in dir Onorab Esparon, in dir ki i annan in nonm nou sa chiffre lakantite dimoun ki lo Waiting List 121. 121 dimoun lo Waiting List, e nou tou letan nou fer letour, tou bann landrwa kot lagrikiltir i sipoze sa area in ganny rezerve pour lagrikiltir ; pourtan nou tou nou war bann laferm ki pe plant fatak. Bann laferm ki pe plant zerb ko-ko. Be si annan zerb Lelefan well zerb Lelefan konmsi bef i kapab manze.

Me si annan tou sa bann diferan sityasyon, be sa 121 dimoun la zot pou mor lo lalis. Nou’n ganny dir, e nou tou nou konnen ki pou dir i annan serten landrwa kot dimoun i dir be get sa mwan mon anvi plante akoz mon pa anvi al fer keksoz ilegal mon pa anvi al vol keksoz dimoun. Alor mon rantre lo sa later mon prodwir e mon ale mon vann sa bann prodwir.

Alor i kler ki pou dir nou dan en pozisyon ozordi kot Lagrikiltir i bezwen sakouy li. E la mon ava dir Mr Deputy Speaker. E petet mon kapab eksprim sa dezapwentman lo lapar Lasanble Nasyonal – letan delegasyon Minister Lagrikiltir ti vini an Desanm pou defann zot Bidze, nou tou nou ti dir avek zot, donn ou en plan. Nou pare pou donn zot larzan. Nou pare pou nou ogmant sa ki zot pe gannyen.

E letan nou ti demann zot be ki zot plan? Zot dir, ‘’Ou konnen ok nou ava retournen pli tar nou ava…’’ E pourtan se en Lasanble ki ti annan sa pouvwar pou koupe. E pou azoute osi ki ti a pe demann zot me, mon pa vwar zot in vin ek gran keksoz. E ziska ozordi depi sa mwan pa ankor vwar gran lanons ki’n ganny fer.

E letan ou koz ek bann fermye, i ankor preski menm sityasyon. E alor sa zafer napa Leadership ek Vizyon mon krwar senserman i en size ki bezwen ganny adrese.

E mon annan en zenn zonm, i pa tro zenn kekfwa la i pe ekoute fer en pti sourir. In dir avek mwan sa management ki annan ozordi fodre zot Re- Envant zot lekor. E nou konman Lasanble Nasyonal ki pe koz fran, ki pe adres en size ki konsern nou, fodre ki nou dir avek Minis Lagrikiltir, avek son lekip, avek son Lazans Re- Envant zot lekor.

Parski Lepep Seselwa i anvi en Sekter Lagrikiltir ki solid. En Sekter Lagrikiltir ki donn nou lespwar. En Sekter Lagrikiltir ki konnen ki pou dir devlopman lagrikiltir i pou ede pou nou annan en pep ki viv an bonn sante. E non pa en pep ki deplizanpli i parey bann statistik ki Minis Lasante ti vin donnen ki nou vin pli obese akoz nou pa pe ganny sa manze ki bon.

E an plis ki sa parey Onorab De Commarmond in mansyonnen – lo kote lasante – lakantite kanser ki kontinyen ogmante. Mon krwar tousala se bann keksoz ki nou konman en pep nou bezwen enpoz lo sa Minister.

E la par egzanp Mr Deputy, zisteman mon ava tenir en pti git lo sa size kanser. Eski nou konnen ki kalite lavyann pork ki nou pe enporte? E i annan resers ki mannyer zot in ganny manipile ki pou dir en koson dan 2 a 3 mwan in fini ariv son slaughter size. E i annan resers ki montre – mon krwar mon’n deza dir sa dan sa Lasanble, si ti les tou sa bann koson viv pou plis letan zot tou zot ti pou mor avek kanser.

E nou se sanmenm sa ki nou pe manze. Se sanmenm sa ki nou pe manze, se sanmenm sa ki nou pa konnen. E aprezan letan nou war ki pou dir kanser sitan o dan nou pei. Eski i etonan? Mwan pou mwan, mon krwar pa si i etonnan.

Mr Deputy Speaker, letan nou pe dir ki retourn later avek lagrikiltir. Mwan mon krwar e petet sa Mosyon son bi osi, se pou nou e nou bezwen parey mon’n dir taler enpoz lo sa Minister pou zot vin avek en plan konkret. Pou nou retrouv nou bann laferm pe fonksyonnen. Pou nou pe retrouv prodiksyon legim avek fri – pou nou kapab retourn ankor dan sa moman kot prodiksyon lagrikiltir vin enportan.

E sa ki ou’n fer resorti Mr Deputy Speaker, ki pou dir lekol laba i pe dir ou plis manrmay pe al dan Ortikiltir. Be mon pa etonnen avek sa mon. Ortikiltir ou konnen ki pou dir ou ava ganny fler e tou bann dimoun pou aste fler. Me tandis ki e an menm tan osi ou ava dekor ou lakour e i a fasil pou ou pran sa ki bann fler pou ou vann.

Tandis ki lagrikiltir ou bezwen bokou plis lespas. E alor ozordi ek sa lavi kot i ete, definitivman manrmay pou al kot i pli fasil, e kot an plis ki sa i less challenging. So sa dan li menm li i montre nou. E mwan depi en pe letan pase Mr Deputy mon’n vwar manrmay ki’n sorti premye dan Lekol Lagrikiltir. E si en manrmay i sorti premye savedir in konsantre dan son letid. Pe rod en bout later pa gannyen.

Mon konn manrmay Mahé ki’n pas dan sa sityasyon ki pa gannyen. Mon konn manrmay La Digue ki’n ganny premye pri, zot osi tou zot in pas dan sa bann menm sityasyon.

Alor, se pou sa rezon ki manrmay letan zot in fini en kors letid, apre sa zot rod en lot deboursman. E la mon ava osi dir lotrozour well letan Komite Zil ti pe vizit Aldabra. Nou vwar deza en zenn fiy ki’n sorti premye pa domenn lagrikiltir, me ki’n sorti premye dan son Lekol Maritim ki i pe al fer, i pe al travay koman en warden lo Aldabra. Senpleman akoz ankor enn fwa se sa deboursman ki pa arive. E alors manrmay …

Donk nou pe dir donn later Lagrikiltir. Me selman letan mon pou retourn lo sa mo fasilitater oubyen lobstak. E i annan plizyer Manm ki’n koz lo letan guesthouse in ganny fer dan later kot lo later Lagrikiltir. Me aprezan sa bann menm dimoun zot menm zot ki konplent loder, ki konplent isi ki konplent laba.

Mr Deputy Speaker, be sa i  pa sorti zis lo nivo bann sitwayen ordiner. Malerezman se bann dimoun osi ki annan bann opozisyon bann pozisyon enportan dan Gouvernman ki fer sa. Onorab Ferrari ti mansyonn defen msye Cherubin Morin. Mr Deputy sa ki dan mon lanmen la se bann let ki en Minis, en Minis in ekrir apre ki sa boug li depi lontan in etabli son laferm. Li i vin la, i ava ekrir :’’ we are being badly affected by the stink of pig faeces, since the weekend. It is intolerable really. We are getting very aggrieved by this, and are also very fed up.  It is unfair to us the rest of the law abide this citizen of this area. ‘’

Be mon frer be ou ki’n vin reste dan sa area lagrikiltir. Ki mannyer aprezan ou vin reste dan en area ki’n ganny designated konman later Lagrikiltir, e akoz ou en Minis, e pourtan i ti Minis Lagrikiltir i osi, sa Msye, li ki pe fer konplent pou ki sa laferm i frenmen.

E sa i ale in ale, ale ziska in ariv Ankour. Zis pou fer sa bann zafer. Me pourtan letan i fer en survey bann zabitan i dir sa loder pa fatig nou. E akoz zot dir pa fatig zot se parski zot konnen pou dir zot dan area laferm.

Mon’n deza dir sa dan sa Lasanble letan en nenport dimoun ki debark dan Dublin Ireland letan ou pe ale, be byensir ou dan en pei kot i annan sa keksoz agrikol. Ou santi loder lagrikiltir.

E alor akoz sa ou pou dir frenm tou sa bann laferm ensidswit ? Ou bezwen adapte ou avek sa. E mwan krwar dan sa Lasanble ti annan en dimoun ti dir tou dimoun i le manz pli bon lavyann, selman personn pa anvi reste o-bor en laferm, personn pa kontan loder laferm.

Menm parey tou dimoun i anvi dustbin, me solman personn pa anvi dustbin i vin met… Me tousala la eski tou bann dimoun English River, bann dimoun St Louis, bann dimoun Mont Buxton nou pou fer petisyon pou dir frenm IOT. akoz pandan Vandswet tou sa bann loder ton i mont bor anler ?

Me i form parti lavi. Bann dimoun ki reste o-bor SEYBREW eski letan SEYBREW pe bwi son bann lagrenn pou fer SEYBREW, nou pou dir frenm SEYBREW akoz i annan sa loder ladob ki monte. Nou bezwen aprann viv avek.

E nou konman en pti pei ki annan zis 155 whatever square kilometres of later, nou bezwen ekspekte ki pou dir nou pou i annan posibilite pou nou reste, e pou nou ganny sa loder lagrikiltir.

Alor letan nou pe al dan sa bann keksoz. Mr Deputy Speaker mon ava pas lo sa lalis 16 keksoz, ki zot idantifye koman bann weakness dan nou sistenm lagrikiltir.

I annan mank lentere, ek lenvestisman dan lagrikiltir. Savedir nou, nou bezwen redonn sa lentere se pou sa rezon ki Lasanble Nasyonal e la mon anvi ki tou Seselwa i realize ki pou dir Lasanble Nasyonal in pran 1 zour edmi, pou li adres sa size lagrikiltir. E nou’n fer sa akoz nou konsider li koman vreman enportan.

Bann extension services. Swa zot pa vreman fonksyonnen. Nou vwar pou dir bann fermye pe vin pli vye. E alors prodiksyon i tonbe. E sa se parski nou bann zenn pa pe ganny sa lankourazman. Later i limite. Me si later i limite aprezan ou’n donn sa Msye laba sepa konbyen mil square kilometres, e byensir i pou vin pli limite.

Si sa Msye ki annan en guesthouse Bel Ombre. Ki annan en lot guesthouse La Digue. Aprezan li Gouvernman i donn li en lot bout later L’Amitie lo Praslin pou li fer guesthouse ankor. Me byensir i pou limite.

Napa Polisi. Napa Polisi kler lo Lagrikiltir, ki nou kapab vreman dir la i la. Parey nou koz lo serten keksoz. E napa Polisi. Napa Polisi an zeneral pou lagrikiltir, napa polisi  lo later ki kler. Napa preparasyon pou dezas pou bann fermye.

E la lo zafer dezas i annan en fermye, mon bon zanmi Sok, petet zot konn li sok dan bazar i kontan koze li. Li i dir si annan Eleksyon toulezour i kontan menm i ti ava vote toulezour. Akoz i anvi sanz sistenm.

I ti ganny dezas. Ou konnen konbyen lagrikiltir ti donn li Mr Deputy? Lagrikiltir ti donn li en tyek R7.50 pou son pou compensate li pou on domaz ki i ti gannyen.

Wi zisteman nou tou ki la nou pou vwar sa vreman drol. Me sa i serye. I ti ganny en tyek R7.50 pou domaz ki ti’n pase lo son laferm. Wi sa papye tyek i pli ser ki sa sif ki i ti ouver. Pou li sanz sa tyek i ti pou bezwen pey en bis R5 pou li desann anvil. R5 pou li retournen e i pa ti pou ganny nanryen. Se pou sa rezon i dir napa preparasyon pou dezas.

E parey plizyer lezot Manm tou in dir i annan fermye ki perdi. E apre sa zot pa vreman gannyen. Napa kalite kontrol lo sekirite alimanter. Napa bon marketing, kou prodiksyon i tro o. Napa kontrol efikas lo pes. Napa staff. Napa statistik konpetisyon enzis dan lidealizasyon.

E akoz i vin konpetisyon enzis? Ou annan ou prodiksyon ki ser, ki o. E apre sa ou fer fas avek ou bann prodwir enporte ki bokou pli bonmarse. Alors sa otomatikman i pou touye.

Donk Mr Deputy, i enportan pou nou fer sa survey. Met tou keksoz o kler. Apros sa bann dimoun ki lo sa Waiting List, dir zot ki mannyer pou fer ki mannyer zot pou kapab ganny sa demars sa deboursman.

Prezerv later Lagrikiltir. E la ozordi anba kot ex-Orchid Farm kot ex-Orchid Farm  prodiksyon i preski zero. Pourtan letan bann dimoun ti ganny laferm ti dir sa i en landrwa ki plat ensidswit, i ava annan bon prodiksyon.

Ti annan plizyer Lakonpannyen Konstriksyon ki ti sipoze vin avek bon fason modern pou prodwir. Ozordi Mr Deputy Speaker, pas laba ou pou vwar ki pou dir napa prodiksyon preski ditou.

Me tousala sa bann later, be annou donn bann dimoun ki enterese. Annou regarde, pli boner in koz lo Hydroponics ; Hydroponics la deryer kot Golf Course  ti ete la lontan.

Be zofisye Lagrikiltir menm ki’n aste sa bann serten sa bann hydroponics. E plan lagrikiltir i dan problenm, me solman zot, zot biznes pe marse. Alors i annan problenm ankor. Mon kontan letan Onorab Lemiel in koz lo bann konsesyon spesyal pou bann pti fermye. Ozordi Mr Deputy i annan en JCB lo Por. Por i annan en JCB ki i pa bezwen JCB. Selman fermye napa okenn landrwa pou li ale pou li dir be get sa mon bezwen en led pou mon kapab lwe 4 masin oubyen lwe en masin ki pou aranz mon later.

E la mon ava dir zot enn bann keksoz Maurice dan son prodiksyon kann. Maurice dan son prodiksyon kann Gouvernman i sitan pe donn li lankourazman, letan en fermye apre ki’n fer son rekolt, apre 7 an i bezwen met nouvo kann.

Me letan in ariv sa ler la, i kapab ale ganny en lasistans avek sa avek en Lorganizasyon ki Gouvernman i ede pou ankouraze kot i lwe masin. Sa masin i vini, i netway son later e li sa boug apre i vini i plant son bann nouvo boutir kann.

E an plis ki sa akoz zot konsider sa, konman en sitan enportan, zot annan zot prop laboratwar la Moka, Moka mon ti reste pre letan mon ti pe etidye Maurice, kot toultan zot pe regarde ki bann nouvo kalite kann ki zot kapab prodwir ki pou vin pli ptipti i pou servi mwens delo. Me i pou prodwir plis disik.

E nou ozordi lontan, e laba pre kot Onorab William i reste lontan, tanzantan ou ti tande ki poudir Grand Anse Mahé pe fer en nouvo experiment. Ti annan La Digue osi – ti fer byen bon. Ou ti tann nouvo experiment ti annan nouvo kalite patat. Patat Formoza ki ti zonn. Ti annan lot kalite zafer ankor. Ti bann annan diferan pye papay. Letan ou ti pase dan plato tanzantan ti annan en nouvo prodwir ki zot ti a pe….

Ozordi napa nanryen -napa nanryen. E nou trouv i drol ki pou dir ki tou bann lotel ensidswit pe enporte. Zot bezwen enporte akoz isi lokal zot pa pe prodwir.

E ankor enn fwa letan mon lo Grand Anse, Onorab William e nou tou konn byen, letan nou ti ankor pli ptipti. Mwan letan mon ptipti mon konn sa landrwa la kot ou antre pou al kot Equator. Menm kot lekol Grand Anse i ete ozordi. kot lekol Grand Anse i ete ozordi ti en plantasyon limon. Ou pa ti konnen ki pou fer avek limon. Me ankor in fact sa landrwa i apel ‘Dan Limon.’

Zot ‘Dan Limon’ i pli o. bor dan kote dan Beoliere. Zot fer Housing Estate, lo later ki ti annan limon apre zot apel zot detrir tou limon e zot pel sa Housing Estate ‘Dan Limon.’ ‘Dan Limon’ this is se sa lafason entelizan ki nou fer keksoz. E Onorab Hoareau, Onorab Woodcock ensidswit Onorab Ferrari in mansyonn ponmdamour. Parey mon’n deza dir plizyer fwa, mwan osi mon konn byen dan Blok L’Amitie.

Akoz ponmdamour, mwan mon ti annan en tantin Tant Belzine son nanm devan Dye, li osi tou ti plante lo Blok L’Amitie. Mon ti abitye al laba sa bout L’Amitie kot lagrikiltir mon konn li par ker. Ti napa en kare later ki ti annan zerb lo la. Tou dimoun ti plante. Mon kouzen Anse Marie-Louise defen Phillip, li osi tou i ti zis plante. I ti zis plante i ti prodwir sa ponmdamour.

Mwan mon ti abitye vann ponmdamour bazar dan Sanmdi – ok ? E tousala se bann keksoz ki ti arive. Parey Onorab Hoareau i dir bato Ero Louis Alfred ti sorti Praslin ranpli avek ponmdamour ti desann Mahé. E dimoun Praslin pa ti konnen ki pou fer avek ponmdamour.

Tandis ki ozordi, lo lasose Mahé, ponmdamour sorti Colombo i anbark dan bato pou al Praslin. Trafik in sanz fason. Me tousala i  montre nou ki nou bezwen, nou bezwen pran en keksoz serye.

E la par egzanp mon mazin 2 zil ki ase pre avek nou ok ? Parey en Manm in mansyonnen, nou later, Onorab Georges in mansyonn later disab, ki bon pou ponmdamour ; ki bon pou brenzel, ki bon pou serten pou patat ensidswit.

E lot later pli o ki bon pou mayok ensidswit tou sa bann diferan lezot legim. Me si nou annan nou en plan serye – pran par egzanp nou annan nou 2 zil ki ase gran, ki o-bor nou. Nou annan Silhouette, nou annan Sainte Anne. Oule dir mon sa 2 zil la, nou pa kapab…

Si nou al lo Zil Elwanye pou dir nou konmans nonm problenm transpor  ensidswit tousala. Me Sainte Anne avek Silhouette nou pa kapab devlop zot ? E zot tou lede zot annan later disab. E zot annan later rouz, later ki sa de kalite salt ki nou annan pou lagrikiltir.

Be annou dezir en bon morso later, olye donn en boug Sainte Anne pou R1. Olye donn Sainte Anne pou R1 me nou pa kapab claim konman en pep pou nou dir Sainte Anne nou pou met lanfaz lo la lagrikiltir lo Sainte Anne avek son devlopman lotel. I ase gran. Annou balans tou lede.

Laba Silhouette nou lotel lo en kote e nou pa kapab annan lezot kalite prodiksyon ? E tousala Mr Deputy Speaker, nou pe dir sa pou nou pep. Nou a pe dir sa pou nou kapab devlope.

E letan nou pe koz Lekol Lagrikiltir, e sa i en pwen ki nou lo Komite Zil nou’n deza konmans koz lo la. pou nou kapab ankouraz nou bann zenn pou al deor.

Nou pe dir Lekol Lagrikiltir, nou pa kapab entegre dan zot progranm. En Placement pou nou bann zenn. Ki dan bann diferan domenn enkli lagrikiltir – kot zot ava pas en peryod zot letid laba lo zil pou rantre dan bann serten proze lagrikiltir. Me an menm tan osi pou zot kapab adapte avek zil e pou kwa pa ki demen nou ava annan plis dimoun ki ava pare, nou ava annan plis Seselwa ki ava pare pou osi al travay lo bann zil.

E mon kontan letan Onorab Sebastien, Onorab Pillay i dir fodre i annan en plan konkret pou prodiksyon. Wi nou bezwen. Nou bezwen annan en plan konkret pou prodiksyon. E pou nou kapab met serten standar. E pou nou regarde sa Lendistri Tourizm ; pou nou regarde sa bann lotel la ki zot bezwen.

E nou tou nou konnen pou dir parfwa zot bezwen prodwir en serten groser. Se pa si tel pou kou tomat zot le en kalite tomat tel groser. Me annou rantre ladan pou ki ISPC pa ava enporte. Pou ki dir lot laba global pa ava enporte.

Me ki zot ava pe ganny sa bann keksoz la ater. Ziska bannann i enporte ozordi. Me nou pa kapab balanse pour ki la i la nou pe met lanfaz lo prodiksyon. Gouvernman pou akt konman sa fasilitater e i pou donn tousala.

Parski finalman letan nou pe fer, letan nou pe koz lo tou sa bann keksoz Mr Deputy Speaker, letan nou pe koz lo later Lagrikiltir nou a pe koz lo prodiksyon, nou ape koz lo lankourazman. Tousala i annan konn bi fer desann pri lavi. Fer desann pri lavi pou nou pep.

Omwen nou pep i a kapab ganny bann prodwir lagrikiltir a en pri rezonnab ki son pwason, ki son pwason nou ava regarde, me la osi tou vizavi pwason.

Ozordi nou pe koz lo bycatch. E mwan enn bann keksoz ki mon met lanfaz lo la sa bycatch pa devret spesyalman bann skipjack ki bann peser i servi konman labwet.

Sa bann bato ton i devret met a dispozisyon bann peser tou sa bycatch. Pour ki zot pa ava bezwen pey en bal labwet R500.

Met sa donn bann peser ki peser Mahé, ki peser Praslin nenport ki landrwa, pou zot kapab al lapes. E sa i ava fer pwason desann. Si nou al dan prodiksyon lavyann e donn bann lankourazman sa osi tou son pri i ava desann. Sa bann manze ki nou pe aste isi letan nou pe konpar li, letan ou konpar son pri avek Maurice par egzanp ou vwar ki poudir i annan en gran dekalaz.

Me la ankor enn fwa prodiksyon i ava desann, lagrikiltir nou ava pe prodwir plis. E pri lavi li menm li i ava ed nou i ava ede pou desann mwen ki lo kote manze. Manze pa ava pran sa poursantaz nou Bidze parey i ete ozordi i ava diminyen en kantite e sa sak fanmir i ava kapab servi zot larzan i ava reste zot plis larzan. E koumsa bann fanmir i ava pli byen viv.

Parski ozordi Mr Deputy Speaker letan mon pe al ver lafen,  ozordi letan nou pe regarde later, i kontinyen ganny abandonnen.

I annan dimoun ki pe rod later. I annan dimoun ki menm pey loan. Me solman zot pa pe kapab prodwir nanryen.

Montagne Posée la en dimoun in anvoy en mesaz pou mwan – i  dir avek mwan i annan later ki’n ganny abandonnen – later Lagrikiltir ki’n ganny abandonnen. Me i lo non dimoun. I lo non serten dimoun e sa dimoun li i L’Angleterre. Fermye Mahé i anvi later pou zot plante. Napa nanryen ki pe arive, son owner i L’Angleterre.

Me non. Nou bezwen pran keksoz serye. E nou bezwen balanse. Alor Mr Deputy Speaker, wi nou bezwen sorti dan serten bann move keksoz ki’n arive dan lepase.

Par egzanp ti annan serten moman ti annan zis, ti annan serten moman e taler nou ti pe mansyonn sa ; kot dan sa bann progranm lagrikiltir zis lafason ki zot ti pe kontrole ensidswit – fer sir ki serten dimoun li i avanse. Zis serten dimoun ki ti annan dwa annan Vera koson.

Ti en lofans pou ou annan en Vera koson. Pangar ou ti ava fer prodiksyon. E apre sa ti ganny apre sa ti annan osi bann restriksyon lo ki landrwa kot ou kapab sonny koson ensidswit.

E pourtan, nou tou nou rapel byen sa bann letan kot ti form parti nou kiltir ki met en koson dan park, sonny li. Paret John Wirtz i sante zour lannen nou touy nou koson nou tann ‘Twee, twee, twee !’

Me pourtan ti napa sa kantite kanser. Mon konpran zot pe koz lo lasante lot laba. Me solman ti napa sa kantite kanser sa letan. E dimoun ti viv byen. Onorab Gill mon konnen ki pou dir ou avek mon ti annan sa pti koson nou ti donn lanmen peze pou touye pou zwe foutbol avek son blad, parske nou ti napa en bon foutbol ; zwe foutbol avek son blad e this was part of our childhood. Akoz nou pa ti asiz devan en computer dan lakour, me nou ti enterese avek sa outdoor life

Ok ? Nou’n touy sa – nou’n touy… mon mazinen nou tou ki en pe pli vye la nou tou ki en pe pli vye ki pa lao 50 an nou’n zwe foutbol avek blad koson. Menm anba 50an ou osi tou ou’n zwe?

Onorab se sa ki ti fer Onorab Ghislain vin en bon zwer volleyball. Li i pa ti zwe foutbol avek blad koson i ti zwe volleyball. Ok? So Mr Deputy Speaker, mon vwar ki mannyer ler in arive, me selman mon krwar lenportans se ki nou konman en Lasanble nou met lanfaz lo pou ankouraz sa Sekter Lagrikiltir.

E mon krwar ki nou pe al dan sa direksyon absoliman parey letan nou ti koz problenm lakaz. Letan nou ti pe pas Bidze nou ti pe rode kote nou pou koup larzan pou nou al dan fer lakaz. Mon krwar ki ozordi nou vwar nou dan en sityasyon kot nou bezwen trouv lazan dan sa Bidze pou nou kapab fer li met li adispobilite nou bann fermye, atraver sa e an menm tan osi annan en plan konkret, e mwan mon krwar ki pou dir Minister Lagrikiltir nou, nou bezwen met en presyon lo li.

Si par egzanp nou dan mwan Me nou pe al konmans Zen. Annou met en presyon lo lagrikiltir. E Minis i espere i ava pe tande. E Mosyon i pou al kot Gouvernman ki dan mwens ki 2 mwan,

Minister Lagrikiltir i bezwen vin devan sa Lasanble, donn nou zot plan prodiksyon. Ki mannyer zot pou ankouraz bann dimoun ki anvi al dan prodiksyon. Both lo kote zannimo e lo kote lagrikiltir. E nou, nou ava donn zot sa lankourazman.

E bann fermye ozordi ki trouv zot pe struggle, nou ava kapab osi fer sir ki zot ganny en serten lankourazman bann zot ava ganny serten konsesyon, ensidswit pou nou relans sa Sekter Lagrikiltir. Mr Deputy Speaker mon terminen an di-z-an.

Mersi bokou pou tou bann Manm ki’n koze. Nou’n koz dan lentere Nasyonal. Dan lentere nou pei. E pou sa mwan anvi osi dir tou bann fermye kouraz, e ki zot annan sipor Lasanble Nasyonal. Mersi bokou Mr Deputy Speaker.

 

MR DEPUTY SPEAKER

Mersi Onorab Ramkalawan. Bon in ariv ler pou nou pran en vot lo Mosyon. Tou Manm ki an faver. Ok? Okenn Manm ki kont. Clerk.

 

MADAM CLERK

Mersi Mr Deputy Speaker. 28 Manm tou bann ki prezan i vot an faver sa Mosyon, e personn kont. Mersi.

 

MR DEPUTY SPEAKER

Mersi. Savedir Mosyon in pase. Bon avan nou adjourn pou Mardi prosen, mon annan zis en pti lanons ankor pou mwan fer. Nou Clerk pou absante ant le 28 a le 31 Me. Sa zis pou en swivi sa progranm Sexual Reproductive Health Rights. HIV and AIDS Convenance Projects.

        E i annan 7 pei ki kot sa proze pe ganny enplimante, e Sesel i enn parmi. E Madanm Clerk pou al attend sa konferans ki pou fer Maurice.

E sa progranm i ganny fully funded by Norway and Sweden through SADC-PF.  Bon avek sa nou ava adjourn ziska Mardi prosen. Nou konnen i annan en bann i annan 3 Mosyon ki nou’n pa’n ganny letan pran. I ava carry forward pou next week.

        I annan bann kestyon ki ti monte lo Order Paper me anvi dan labsans bann Minis. E bann Minis ki pou rantre semenn prosenn, nou pe fer laranzman as much as possible, ki nou kapab pran sa bann kestyon irzan Mardi prosen. Ok ? Avek sa nou ava adjourn ziska Mardi prosen 9er bomaten.

 

(ADJOURNMENT)