Home » This Week in the House » 2017 » Verbatim Report NAS Sitting Tuesday 23rd May, 2017

Verbatim Report NAS Sitting Tuesday 23rd May, 2017

NATIONAL ASSEMBLY OF SEYCHELLES

 

Tuesday 23rd May 2017

 

The Assembly met at 9am

 

National Anthem

 

Moment of Reflection

 

Mr Deputy Speaker in the Chair

 

 

 

Mr DEPUTY SPEAKER

Bonzour tou Manm Onorab e bonzour tou manm piblik, bann staff ki dan Lasanble ozordi. E mon ti a kontan dir osi en gran bonzour tou bann dimoun ki pe swiv Lasanble swa lo televizyon, lo radyo, oubyen lo Internet.  Avan nou konmans nou travay pou ozordi, mon annan zis enn de pti lanons, enn de pti house keeping ki mon anvi fer.  Premyerman depi la semenn  pase ki nou ti vwar plizyer Manm ti absante pour bann rezon valab, pour bann rezon bann Manm pe desarz zot responsabilite koman en Manm Lasanble anver bann  lenstitisyon enternasyonal ki nou Manm ladan ;  in annan  plizyer queries, plizyer konsern ki’n vin a mon latansyon e mon ti a kontan pour lenformasyon piblik deor met serten keksoz annord.  Ler en Manm Lasanble i absante Sekretarya i okouran e bokou fwa ler sa Manm i absante pour bann rezon pou al an misyon aletranze ki i annan pou fer avek Lasanble e nou Lasanble nou fer sa lanons piblik. E semenn pase Mr Speaker ti fer sa lanons piblik pou enform piblik kote zot reprezantan i ete e ki travay zot pe fer. E nou konnen semenn pase ki ti annan plizyer Manm ki ti absante e speaker in fer sa kler me still sa konsern in retournen kot plizyer Manm piblik pe demande me nou pa vwar nou Manm dan Lasanble, me ankor parey mon dir pou lenformasyon sa bann Manm ti absante pour bann rezon valab.  I annan bokou travay ki ganny fer pa selman isi dan Lasanble me osi tou deor Lasanble, kot nou Lasanble sa nouvo direksyon ki i pe pran nou bezwen osi tou aktiv avek ban lorganizasyon enternasyonal ki nou Manm ladan.  Alor mon anvi met sa kler ki pou bann Manm piblik deor ki ler en Manm i absante Sekretarya  i okouran e dan bann moman kot sa Manm i deplase pou bann rezon valab, misyon and all that, Lasanble i  ava fer sa lanons pou zot konman bann Manm Piblik zot ava okouran kote zot reprezantan i ete.  Mwan osi bomaten mon’n, konman mon’n met radyo mon’n atriste pou aprann sa  ensidan L’Angleterre e mon ti a kontan petet lo non nou Lasanble ofer nou senpati, nou kondoleans avek tou bann ki’n perdi, nou konnen poudir nou annan en kous Seselwa, popilasyon Seselwa ki ase o L’Angletere e menm  dan area Manchester and all that i posib ki ti annan Seselwa  osi tou yer swar ki ti dan sa Show so alor petet o non  Lasanble mon ti a kontan petet dir en pti mo pou dir ki nou santi sa ki  pep  Angle pe pas ladan e nou senpatiz avek pep Angle, Gouvernman Angle e tou Manm lafanmir ki’n perdi en pros e bann osi tou ki pe rekipere dan lopital swivan sa lensidan granmaten kot sa Show.  Avek mon ava demann Madam Clerk pou … nou annan en bann First Readings, ok nou annan papers ki’n ganny laid, ok nou ava al direk  lo First Reading.  Mon ava demann Madam Clerk pou fer First Reading bann Bills ki devan nou dan Lasanble, please.

 

MADAM CLERK

Mersi Mr Deputy Speaker.

Premye Bill i The President and Vice-President’s Pension and Other Benefits Bill, 2017.  This Act may be cited as the President’s and Vice-President’s Pension and Other Benefits act 2017.

Dezyenm Bill Industrials Estate Authority (Amendment) Bill 2017.  This Act may be cited as the  Industrial Estate Authority (Amendment) Act 2017.

E 3enm Bill Small Enterprise and Promotion Agency (Amendment) Bill 2017.  This Act may be cited as the Small Enterprise Promotion Agency (Amendment) Act 2017.  Thank you.

 

MR DEPUTY SPEAKER

Mersi Madam Clerk.  Bon ankor pou lenformasyon Lasanble nou ti’n deza met Access to Information Act pou Second Reading ozordi.  Mon konnen Order Paper osi ti’n deza fini ganny fer piblik last week.  Sa Act in ganny remove from the Assembly today pour Second Reading.  I ankor annan en pti pe travay pe ganny fer lo la e nou ava enform Manm Piblik pli tar e bann Manm Lasanble kan sa  Act pou retourn devan nou Lasanble.  Avek sa si napa okenn lezot issue nou ava repran nou travay.  Onorab  Ramkalawan.

 

HON WAVEL RAMKALAWAN

Bonzour Mr Deputy. Bonzour tou Manm. Mr Deputy premyerman mon ti a kontan lo la par bann Manm dan Lasanble felisit Onorab Sebastien Pillay ki’n ganny swazir konman the Head of sa Observer Mission ki Sesel pou partisip ladan lo lapar Commonwealth Parliamentary Association. I pou Head sa delegasyon – en delegasyon enportan ki pou annan anviron 40 dimoun e nou Lasanble pou ganny reprezante par Onorab Pillay avek Onorab Arrisol.  I en loner pou nou Lasanble pour ki enn nou Manm i ganny swazir pou sa Head sa  delegasyon e byensir nou swet li bonn sans dan sa misyon e nou konnen ki poudir i annan sa abilite pou li kapab fer sa travay  ki i ganny demande pou fer.

Dezyenmman  Mr Speaker mon non ti ganny mansyonnen semenn pase e mon pa konnen si Onorab De Commarmond ti ava kontan sa lokazyon lefe ki mon la mon pare pou aksepte en apology lo son par lo sa bann keksoz ki in dir. Be mon ava regarde ki son desizyon ki in pran, me Komite Zil pou zwenn midi e mon pou rezerv okenn deklarasyon ki mon ava fer la ; parski Mr Speaker mwan mon en dimoun ki kontan donn en dimoun ki’n fer en keksoz sa sans pou li koze, se pour sa rezon ki mon’n call en miting Komite Zil me selman mon krwar an menm tan osi ti ava en bon  lokazyon osi pou Onorab De Commarmond – vi ki an plis ki sa i  lo Komite Laverite e rekonsilyasyon Nasyonal pou li petet en semenn pli tar in ganny en pti sans pou li reflesir li kwa egzakteman ki in dir. E Mr Speaker mon pe dir sa avek en lespri ki on pare pou mon move on avek sa, me mon krwar ki lo son kote i annan keksoz ki devret ganny deklare dan sa Lasanble ozordi.  Mersi bokou.

 

MR DEPUTY SPEAKER

Mersi Onorab Ramkalawan. Avan nou proceed mwan osi de la par Sekretarya mon ti a kontan felisit Onorab Sebastien Pillay. Avan nou ti pe.. Sekretarya ti pe met ou konman Head of Delegation me pare nou’n vwar lo kote CPA in menm lev ou pli o, in met ou Head of the whole Observer Mission to the election, UK election in June. Ankor felisitasyon e i en loner pou nou Lasanble. I en loner pou nou pti pei Sesel.  E mon konnen ou avek Onorab Arrisol zot pou fer en bon travay e zot pou fer paviyon Sesel flote. Onorab De Commarmond.

 

HON CHARLES DE COMMARMOND

Mersi Deputy Speaker.  Bonzour tou Manm Onorab e tou bann ki a lekout.  Enn mwan  osi mon partaz mon swe, mon felisitasyon pou Onorab Pillay, mon koleg la lo nou kote latab lo kote Parti Lepep ki pou diriz sa delegasyon an Angleterre pou obzerv eleksyon.  Parey zot in dir nou tou nou konnen poudir Onorab Pillay i annan sa kapabilite e nou konnen ki i pou fer byen e i pou fer nou Lasanble e nou kote lo nou parti fyer pou sa reprezantasyon.  Mr Deputy Speaker lo lot bout, lot pwen Onorab Ramkalawan i pa ti dan pei e lo entervansyon ki mon ti fer semenn pase mwan mon  napa problenm, lefe ki nou bezwen move on nou Komite nou annan en kantite travay pou nou fer Lasanble, si dan sa ki mon’n dir son non in ganny mansyonnen i pa ti la e ki bann alegasyon,  bann pwen ladan in ganny mal enterprete e ki mon bezwen retire mon napa problenm pou dir li eskize nou retir sa ; akoz petet in ganny mal konsevwar or ki i pa reprezant, definitivman i pa reprezant sa ki ou pe mazinen e mon napa problenm pou retir, delete son non lo tou sa bann zafer e withdraw sa bann pwen ; sa bann keksoz ki i annan pou fer avek li lo mon entervansyon semenn pase, mon napa problenm avek sa.  Mersi.

 

MR DEPUTY SPEAKER

Mersi Onorab de Commarmond. Onorab  Ramkalawan.

 

HON WAVEL RAMKALAWAN

Mr Speaker mon ava rezerv mon drwa apre ki mon’n zwenn avek Komite pou mwan fer en Statement apre midi.  Mersi bokou.

 

MR DEPUTY SPEAKER

Mersi Onorab Ramkalawan. Onorab John Hoareau.

 

HON JOHN HOAREAU

Mersi Mr Speaker.  Mon oule lev en matter of privilege anba lartik 36 (1) silvouple? Lo Standing Order.

 

MR DEPUTY SPEAKER

Go ahead.

 

HON JOHN HOAREAU

Mr Deputy Speaker an vi ki Onorab De Commarmond semenn pase ti mansyonn mon non ler Onorab Ferrari ti prezant son statement. Mon santi ki sa in ganny fer dan en fason malisye avek lentansyon pou retir latansyon lo li e met mon repitasyon dan menm sak ki pou li. Mon ti al Desroches en zil Gouvernman ki ouver pou piblik pou repoze pour 4 zour e mon ti pey tou mon bann fre avek IDC mon annan resi la, mon kapab fer ou ganny en kopi.  Mon osi ti  a kontan ki Onorab De Commarmond i prezant en leskiz dan sa Lasanble. Mersi.

 

MR DEPUTY SPEAKER

Ok Onorab Hoareau. Ou annan en kopi? Ou kapab fer mwan ganny en kopi please? Bon mon annan…ok ler sa sityasyon in lev-e e mon osi mon’n aprann ki dan labsans Speaker ki mon pou Chair mon’n fer Clerk donn mwan en kopi Verbatim pou mwan konn en pti pe egzakteman ki pe pase.  I annan 2, apard Onorab Ramkalawan, i annan 2 lezot Manm ki Onorab De Commarmond in mansyonnen dan son repons.  Onorab John Hoareau ti enn apre Onorab Clifford Andre e Onorab John Hoareau in lev son matter of privilege. Wi i annan, in fer mwan ganny en kopi son cash receipt from IDC kot in pey son akomodasyon to Desroches from the 17th to  the 21st of April 2017. Ok ? Sa i la pou rikord Lasanble e mon ti a kontan pas la parol avek Onorab De Commarmond si i annan okenn keksoz ki i oule dir.

 

HON CHARLES DE COMMARMOND

Mr Deputy Speaker nou bezwen en pe pli serye dan Lasanble. Anyway.

 

MR DEPUTY SPEAKER

Order !

 

HON CHARLES DE COMMARMOND

Si Onorab i pa’n osi konpran  dan sa ki mon’n dir semenn pase  e ki in pran sa, petet mwan ki’n mal eksplik mon lekor lo la sorry Onorab ki ou’n pran li dan sa fason ; e i pa mon lentansyon pou fer ou konpran li dan sa fason.  Mwan mon’n dir li dan en fason ki petet i diferan pou li konpran. Non, non napa nanryen e tou sa ki mon’n fer napa nanryen ki malisye sa mon pou dir klerman e Onorab Ferrari mon krwar i pa devret pe dir sa. Mersi.

 

MR DEPUTY SPEAKER

Savedir ou prezant ou leskiz avek nou ? Ok. Bomaten osi mon’n ganny en call avek Onorab Andre. Ler mon’n retourn lo verbatim mon’n vwar poudir i annan serten alegasyon ki li… e sa in ganny pran par Lapres, e nou’n vwar in ganny pran par lapres dan en fason malisyez kot menm serten lapres in dir ki Lasanble Nasyonal i koronpi e sa i en gro alegasyon akoz i pe anmenn nou tou Manm ansanm, i pe anmenn nou Sekretarya  tou, ansanm.  Bon sa nou ava, nou a deal avek pli tar. Me Onorab Clifford Andre in fer mwan konpran poudir napa okenn moman kot li ek son fanmir parey in ganny mansyonnen, ki ti al pas okenn weekend Kempinski. Son biznes Kempinski ki i ti ale i ti al pou en demi zournen, en zournen akoz son travay konman en avoka avek kliyan e en tranzaksyon ki enn son kliyan ti annan avek owner Kempinski. E in demann mwan i pa pou la bomaten i annan en case Ankour, i dir mwan sa osi tou lo son kote i santi ki petet keksoz koripsyon i bezwen ganny fer dan sa laliny alor Onorab De Commarmond mon ava donn ou laparol.

 

HON CHARLES DE COMMARMOND

Mr Deputy Speaker mon pa pou apologise la mon ava rezerv mon parol, mon deklarasyon lo pli tar apre ki Komite in zwenn.  Mersi.

 

MR DEPUTY SPEAKER

Ok.  Mersi.  Onorab Hoareau ou ok lo la ou?  In prezant ou leskiz, in retract ok ?  Mersi.  Onorab Ferrari.

 

HON JEAN-FRANCOIS FERRARI

Mersi Mr Deputy Speaker.  Mr Deputy Speaker an vi ki mwan ki’n lev sa size premye dan Lasanble semenn pase, mon anvi fer en pwen kler. Sa ki’n arive, sa vizit…

 

MR DEPUTY SPEAKER

Order ! Order ! Mon pe donn Onorab Ferrari la parol. Go ahead Onorab.

 

HON JEAN-FRANCOIS FERRARI

Sa vizit ki Onorab De Commarmond in fer lo Zil D’Arros, mwan mon pa pe gete si i annan malisye ouswa napa malisye ; mwan mon pe gete si lo nivo etik i proper pou nou fer sa bann kalite keksoz.  Si i pa pe anmenn nou Lasanble an disrepute.  E mwan sa   ki mon vwar ozordi se Onorab de Commarmond avek son bann koleg pe riye, konmsi i byen gou, konmsi napa nanryen grav.  Mwan mon ti a…permet mwan silvouple.  Permet mwan silvouple Onorab Sebastien Pillay.  Mwan mon dir ki ler en keksoz koumsa ki ganny fer e ki i anmenn  nou Lasanble anba lakizasyon koripsyon, i bezwen annan serten  sanksyon oubyen serten desizyon ki ganny pran.  Mwan mon ti a zis kontan dir Mr Deputy Speaker, ki mon kontinyen demande ki Onorab de Commarmond i sorti lo sa Komite Zil akoz i nepli kapab fer son travay dan en fason endepandan.  In pran en weekend lo Zil in aksepte en weekend pou nanryen avek en dimoun lo Zil i pa akseptab.  Mon osi demande konman en Manm dan sa Lasanble ki Komite, on  desizyon Komite ki pou pran sa desizyon pa mwan ki pou pran sa desizyon me selman  vi ki i afekte Lasanble an antye mon demande, mon sipliye ki Komite Zil i anvoy en mesaz for deor pou ki zot demann avek Mr De Commarmond pou retir li sa  Komite e ganny ranplase ek en lot dimoun e les sa Komite travay dan en fason enparsyal, endepandan e onnet.  Mersi Mr Deputy. 

 

MR DEPUTY SPEAKER

Mersi Onorab Ferrari.  Point taken e parey Chair Komite Zil in dir Onorab Ramkalawan Komite pe meet. Lasanble ti annan lezot travay nou pou fer Assembly Business Committee tou ozordi i demann mwan depi yer pou nou pa met okenn travay Komite akoz Komite zil pe rankontre lunch time pou  zot kapab deal avek sa matter. Bon avan nou fini lo sa pwen mon anvi zis port latansyon,  en moman Onorab Pillay, mon anvi port latansyon Manm Lasanble. Nou deza annan en kod etik, en Kod Kondwit, apard ki nou swiv ki nou tonm anba Public Officers Ethics Code nou osi tou annan nou prop Kod  Kondwit e mon ti a kontan zis petet dir ek  bann Manm retournen al rod zot kopi.  I annan osi lo Website Lasanble zot kapab download akoz i enportan koman en Manm Lasanble nou pa kapab rantre dan bann keksoz ki kapab konpromiz nou pozisyon koman en Manm Lasanble oubyen konman en Manm Komite ki nou lo la. I donn ou sa Kod Kondwit apard from taking the Oath, Swearing Allegiance to the Constitutions to the Republic, i annan lezot keksoz lo fason kondwir personnel. I koz lo entegrite, obzektivite, accountability, latransparans, lonnekte, Leadership, e dan tou sa nou bezwen accountable e être transparan avek piblik.  Si nou dan sa Lasanble ki la konman sa rol oversight  ki nou pe kestyonn tou lezot Departman nou osi tou nou bezwen lead by example. So alor mon ti a kontan demann tou Manm pou evite dan le fitir ki sa bann keksoz i arive, bann keksoz kontroversyel. Ok par ler sa ki nou pe fer nou pe fer li an bon fwa me dan lizye piblik i pa pe ganny vwar koumsa. So alor retourn ver nou Kod kondwit e regarde en pti pe kwa ki gid nou. Nou en Manm Lasanble Nasyonal e tou lizye piblik i lo nou. Alor i annan serten keksoz petet ki nou pa kapab fer parey en Manm ordiner. Ok ? Onorab De Commarmond.

 

HON CHARLES DE COMMARMOND

Mr Deputy Speaker, mon swiv sa ki ou pe dir byen e i enportan osi ki bann Komite Lasanble ler i etabli dan son terms of reference oubyen a diferan moman, i etabli avek son bann Manm Komite serten keksoz ki merit fer, pa merit fer konmsi pou pandan letan sepa i annan en serten travay me si sa pa ganny laid down osi, ki mannyer en Manm pou konnen? Mon pe demande ki bann Komite ki egziste i osi reget zot pou ki i réitère sa ki ou pe dir la pou ki si en dimoun i pa pe swiv keksoz byen be i bezwen sorti sa dan sa Komite i bezwen sorti. Si pa sorti sa ki mannyer Manm pou konnen?  Mersi.

 

MR DEPUTY SPEAKER

Mersi Onorab. Me ankor et en Manm Komite oubyen non, les sa Kod Kondwit ziska ler i ganny revize, nou annan nou Komite ki pou revwar tousala, ki pou revwar Standing Orders. Me antretan mon krwar sa Kod  Kondwit i dir tou. Ok? I la konman en gid pou tou Manm whether ou Manm Komite oubyen ou en pa lo en Komite, i la konman en gidans pou nou. Ok? Bon, avek sa nou ava kontinyen nou biznes pou ozordi. Ok, Onorab Ramkalawan.

 

HON WAVEL RAMKALAWAN

Mr Deputy Speaker, sorry sa dernyen komanter Onorab De Commarmond, mon pa konnen ki arive avek Onorab De Commarmond. Sirman konman bann adilt, nou bezwen konnen kote nou pe ale. Nou bezwen annan en ethics de baz e la fason ki Onorab De Commarmond in dir konmsi si en keksoz pa’n ganny ekri, konmsi nou pa pou konnen. Alor zot, annou serye nou dan sa Lasanble. Mersi bokou.

 

MR DEPUTY SPEAKER

Mersi Onorab. Onorab Sebastien Pillay.

 

HON SEBASTIEN PILLAY

Mersi Mr Deputy Speaker. Mr Deputy Speaker, tou dabor permet mwan poudir mersi Onorab Ramkalawan pou son Statement ki’n fer e osi ou menm e Onorab De Commarmond. Mon konsider en gran loner osi pou nou Lasanble, mon konnen poudir sa i vin apre travay ki nou Lasanble in fer konman en kolektiv. Mon krwar i pa zis Sesel ki pe regard nou me i annan lezot dimoun an deor ki pe regard nou. Lo en dezyenm pwen Mr Deputy Speaker, mon en pti pe konsernen avek lafason ki nou pe apros serten keksoz, e mon krwar bomaten ou’n fer en travay formidab pou kit tou keksoz dan kalm. Me mon krwar Onorab Ferrari ou’n fer en morso dan sa ki ou’n dir, ou’n fer en statement ki li ek De Commarmond ek son bann koleg, konmsi ou pe insinuate ki nou lo sa kote latab nou pe riye or nou pe pran sa alalezer. Napa personn ki pran sa bann keksoz alalezer, mon krwar Onorab Ferrari pou la kantite letan ki ou annan dan Lasanble e souvandfwa ou remontrans nou pou entervenir ler ou pe koze, ou osi ou bezwen lead by example. Ou’n koze nou’n ekout so bezwen osi ou bezwen pare pou ekout ou kanmarad. Ou pa kapab ler ou, ou deside dir en keksoz, ou dir. E mon krwar se sa ki reste Mr Deputy Speaker. Mersi.

 

MR DEPUTY SPEAKER

Mersi Onorab Pillay. Bon nou ava kontinyen avek nou travay.  Madanm Deputy Clerk ou ava fer Minis rantre. Nou pou pran Private Notice Question anmennen par Leader Lopozisyon pour Minis pou Zafer Lafanmir, Mrs Jeanne Simeon e Minis pou Ledikasyon e Devlopman Resours Imen, Minis Joel Morgan. Petet mon ti a kontan zis avertir Lasanble, nou’n vwar lafason ki kestyon in ganny poze, annou evite pou antre en pti pe tro lo sa size lo en baz personnel pou evit en pti akoz nou pa konn sityasyon ki lafanmir i ladan and all that, ki santiman lafanmir. Me nou ava les Leader Lopozisyon ler i poz son kestyon i ava gid nou atraver son kestyon e atraver repons osi nou ava kapab diriz dan en bon direksyon. Bon, mon ti a kontan dir en bonzour e welcome pou Minis pou Zafer Lafanmir, Mrs Jeanne Simeon ki ganny akonpannyen par son PS pou Social Affairs, Mrs Linda William-Melanie, son Special Advisor, Mrs Marie-Josee Bonne, e mon ti a kontan swet labyenveni Minis pou Ledikasyon,  Minis Joel Morgan ki ganny akonpannyen son PS, Dr Odile De Commarmond, son Special Advisor Mrs Delcy e Mrs Desiree Hermitte konman son Principal Counsellor. Mrs Bonne. PS. Ok, mon ganny sa wrong. Mrs Marie-Josee Bonne pou Social Affairs? Family ? Family, ok. Bon, ok, mon ava demann Onorab Ramkalawan Leader Lopozisyon, pou li go ahead pou poz son kestyon. Onorab Ramkalawan.

 

HON WAVEL RAMKALAWAN

Mersi Mr Deputy. Mr Deputy, mon osi mon ava dir bonzour bann Minis, Minis Simeon e Minis Morgan espesyalman Minis Morgan mon remersye li ki dan son konvalesans, in trouv i neseser pou li vin devan Lasanble. Mr Deputy avan ki mon demann mon kestyon mon ti ava kontan swivan ou gidans pou dir avek Lasanble ki ozordi nou pa pe vin pas zizman  e nou pe vin plito regarde ki mannyer nou pou… what is the way forward. Ki mannyer nou pou anpese ki bann sityasyon trazik parey in arive i ariv ankor. E petet la avan mon konmanse menm, mon ti a kontan prezant nou kondoleans konman en Lasanble avek sa fanmir.  E zot pe pas dan zot moman tristes me an menm tan osi zot realize, bomaten mon’n koz avek Mrs Louisa Dodo, gran manman Ryan e mon’n koz avek li lo sa kestyon ki pe vin demande e nou’n ganny en bon antretyen.  E an menm tan osi Mr Deputy Speaker, mon krwar ki en pe parey letan ti ariv lanmor sa zenn garson L’Amérique, son papa ti dir, ‘’Nou tou ki annan zanfan, sa zanfan ki’n mor i nou zanfan.’’ E alors ozordi nou tou ki annan zanfan Sesel, ‘’Ryan i nou zanfan’’ e alor nou bezwen konman en sosyete regarde ki mannyer nou pou avans devan pou nou etabli bann striktir neseser dan nou sosyete pou nou anpese ki bann tel keksoz i arive ankor. Avek sa 2 parol mon kestyon i lir koumsa: ‘’Swivan lanmor en zenn garson 13an dan distrik La Riviere Anglaise dan bann sirkonstans trazik, eski Minis pour Lafanmir ek Minis pour Ledikasyon, i kapab dir sa Lasanble premyerman:

Ki bann aksyon konkret ki Gouvernman in pran pou koup risk ki bann tel lensidan i arive ankor?

Ki program ki sa Minister i annan pou swiv bann zanfan ek bann fanmir ki dan gran difikilte?

Eski ti annan okenn swivi lo sa garson ek son fanmir? Si wi, kote eski keksoz in al mal? Si non, akoz?

E la mon pa ekspekte tou bann detay personnel.

Katriyenmman, ki plan sa 2 Minister pou anmenn en konba serye kont labi sibstans parmi bann zanfan lekol ek bann adolesan an-zeneral? Mersi bokou.

 

MR DEPUTY SPEAKER

Mersi Onorab Ramkalawan. Minis pou Lafanmir, Mrs Simeon.

 

MINISTER JEANNE SIMEON

Bonzour Deputy Speaker, bonzour bann Manm Onorab, bonzour tou dimoun a lekout. Mr Deputy Speaker, pou konmanse mon osi mon ti a kontan lo non Minister Zafer Lafanmir eksprim mon senser kondoleans pou fanmir sa garson apre sa lensidan tre tris. Mon osi ofer mon senpati e sipor avek tou bann partenaire ki’n ofer servis e donn sipor sa garson avek son fanmir tou sa parkour. Mersi Onorab pou ou kestyon. Pou reponn kestyon poze par Leader Lopozisyon dan Lasanble, permet mwan donn en apersi sa Lasanble, lo sa size ki enn ki annan bokou konsern e ki lye direkteman avek sou-kestyon 3 lo nou Order Paper. Sa garson ti en etidyan 13an dan S2 lekol segonder La Riviere Anglaise. I ti konmans son letid segonder an Zilyet 2015. I ti osi a en serten moman lekol Anse Boileau Segonder letan i ti pe reste Vilaz Prezidan. Mr Deputy Speaker, sa garson ti ganny refer pou premye fwa avek Servis Sosyal an Out 2013, a laz 10an ler i ti pe lekol La Rosière primer. Travay sipor ti ganny fer avek sa garson avek son paran e an Novanm 2013 Servis Sosyal ti bezwen met li dan Foster Care avek son marenn ki ti osi son gran tantin. Son marenn pa ti kapab manage son konportman e la i ti ganny retire e plase avek en lot paran. Me ankor sa paran pa ti kapab ed li parey nou ti a kontan. Apre en mwan selman Servis Sosyal ti napa lot alternative me retourn li avek son manman. Travay ti kontinyen avek son manman pou gid li e donn li sipor pou li kapab pran swen avek son zanfan. Son manman ti ganny anrezistre pou swiv progranm parenting kot nou ed bann paran pou zot kapab elev byen zot zanfan, me li i pa ti swiv akoz i pa ti montre lentere e pa korpere. Travayer Sosyal ti lot fason e fer sesyon avek li kot lakour me avek bokou rezistans de son par. Malgre sa bann difikilte travay avek li, avek sa garson avek son manman ti kontinyen par bann lezot profesyonnel tel ki school counsellor, son ansenyan e menm CARE. Mr Deputy Speaker, ler i ti rantre dan lekol segonder, sa garson ti konmans ganny problenm pou li adapte avek lanvironnman lekol segonder ; kot i ti demontre en problenm relasyonnel e i ti rebel e defye lotorite lekol. An Mars 2015, fas avek sa sityasyon dan lekol, sa garson ti ganny anrezistre lo progranm Ledikasyon Alternativ ki ti pe target prensipalman bann etidyan S3, S4. Sa progranm ki ganny ofer par Minister Ledikasyon ti dir pandan 6 semenn. Diran progranm, sa garson in ganny bokou difikilte pou adapte an vi son rezistans anver disiplin ki ti son pli gro problenm. Me malgre sa i ti kapab konplet progranm. A lafen sa 6 semenn i ti ganny reentegre dan son lekol parey tou lezot etidyan ki ti pe swiv sa tel progranm. Pandan sa letan, Servis Sosyal osi ti pe travay avek li e i ti ganny vizit kot lekol avek Servis Sosyal e osi ti annan vizit swivi dan lakour. An Zen 2015 i ti ganny met dan Vilaz Prezidan. Malgre son konportman anti-sosyal ki pa enn bann kriter ki ou pou antre dan Vilaz Prezidan, me Servis Sosyal ti’n travay avek Vilaz Prezidan pou donn li en sans. Akoz nou ti santi ki i ti bezwen ganny proteze. E la i ti ganny transfer pou li al lekol Anse Boileau segonder. Son konportman malerezman pa ti sanze akoz i ti kontinyen an konfli avek lezot etidyan, lager, lensilt avan bann dimoun dan lanvironnman lekol e osi nou Vilaz. Sa garson in osi partisip dan en progranm ki ganny ofer par Servis Sosyal, en progranm Retreat ouswa Retret, kot en group etidyan i ganny met ansanm pou swa en semenn ouswa detrwa zour pou travay avek zot. Pou sa garson an Out 2015 en semenn i ti swiv sa progranm, avek bi pou nou kontinyen travay avek li e donn li bann sipor neseser pou son reabilitasyon. Dan sa progranm i enn kot bann partisipan i ganny sans viv ansanm, ganny bann sesyon counselling e character building e ganny sans pou zot aprann social skills. Swivan Retret i ti retourn lekol Anse Boileau segonder e i ti kontinyen ganny swiv par travayer Sosyal, school counsellor, son ansenyan e lantouraz kot Vilaz Prezidan. Mr Deputy Speaker, le 18 Avril 2016, Servis Sosyal ti forse retir sa garson Vilaz Prezidan a la demann Management sa vilaz. Sa ti arive atraver en email ki Sef Egzekitiv Fondasyon Bann Zanfan ti anvoy pou direkter Servis Sosyal le 2 Avril, baze lo son konportman ki i ti ganny dekrir konman pa akseptab. Servis Sosyal ti kontinyen tap laport bann lezot lenstitisyon pou kapab donn li sa proteksyon, me pa ti fasil pou ganny en dimoun avek bonn fwa pou kapab donn li en labri. Dan sa ka Servis Sosyal ti napa lezot opsyon, me pou remet li kot son manman vi ki Management Vilaz Prezidan ti demande pou tir li o pli vit posib. Letan ki in kot son manman, a plizyer repriz Servis Sosyal in ganny rapor ki in ganny ramase par Lapolis e pas plizyer lannwit dan custody lapolis pou son prop sekirite. Apre ki in ti’n fer en seri lofans, Servis Sosyal ti demande ki i ganny deteni dan kord gard Perseverance, sel landrwa ki ti pe ganny servi pou kit bann miner ki’n fer lofans. Servis Sosyal ti kontinyen swiv li e fer provizyon pou son bann bezwen pou son byennet. Pandan sa letan ki ti an detansyon, Servis Sosyal in kontinyen travay avek son manman ek son boper e apre en seri sesyon avek lafanmir, manman ek boper ti aksepte pou repran sa garson pou donn li en lot sans e donn en sans zot relasyon fanmir. I ti ganny deteni depi Zanvye 2017 ziska le 24 Avril apre ki i ti’n repas devan Juvenile Court. Mazistra ti demann li si i ti a kontan retourn dan lakour e i ti dakor e i ti ganny demande pou kontinyen avek son bann sesyon counselling ansanm avek son manman. Nou oule dir ki pandan sa letan sa garson pa ti pe al lekol. Laranzman ti pe ganny fer pou li retourn lekol dezyenm trimes 2017. Apre tou zefor Minister Ledikasyon pou son paran vin kot lekol avek li, sa pa’n abouti dan nanryen. Travayer Sosyal ti kontinyen swiv li e annan kontak par telefonn avek son manman toulezour pou monitor sityasyon e osi vizit kot lakour ti ganny fer en fwa par semenn. Mr Deputy Speaker, dernyen fwa ki travayer Sosyal ti vwar li, ti Zedi le 11 Me. Apre sa, sa garson ti’n sove kot lakour e travayer Sosyal ti demann lapolis pou rod li. Mardi le 16 Me, sa garson ti pas kot lofis dan distrik pou vin vwar son Travayer Sosyal me malerezman sa zour e sa ler ki ti pase sa Travayer Sosyal pa ti la. Sa Travayer Sosyal ti ganny sa lenformasyon avek en lot koleg ki travay kot Ladministrasyon Distrik. Travayer Sosyal ti pran kontak avek son manman, sa letan sa madanm ti’n ganny admet lopital avek son dernyen zanfan. Li osi i ti montre konsern ki son garson pa’n vin kot lakaz parey son labitid menm ki parfwa i ti absante. Vandredi le 19 Me, ti avek gran tristes ki nou ti aprann lanmor trazik sa garson. Mr Deputy Speaker, parey nou kapab konstate, bokou in ganny fer par Servis Sosyal ensi ki lezot partenaire e lezot Lazans konsernen pou kapab vwar en solisyon pou en tel problenm. Konman en Gouvernman, nou tou nou konsernen avek sa sityasyon. Mr Deputy Speaker, pou nou adres en tel sityasyon e parey Leader Lopozisyon in dir, pou ki i pa ariv avek en lot nou bann zenn ki vwar li perdi son lavi, Gouvernman atraver mon Minister in met an plas en servis Entervansyon e Counselling par Divizyon Servis Sosyal. Bann ka ki ganny raporte avek Servis Sosyal i ganny assess pou vwar ki kalite lentervansyon zot bezwen. Travayer i zwenn avek lafanmir e ansanm eksplor bann mezir pou pli byen kapab target zot lentervansyon. Servis Sosyal i travay avek lezot partenaire osi pou kapab donn sipor e refer bann ka kot i neseser pou ganny servis en pe pli spesyalize. Dan serten ka, kot i nesesit mezir pou retir en zanfan pou son proteksyon, sa rekomandasyon i ganny fer e Direkter Servis Sosyal i rod en lord avek Tribinal Lafanmir. Mr Deputy Speaker, nou bezwen admet ki mon Minister i fer fas avek bokou defi akoz sa bann manifestasyon  ki nou vwar dan lekol i osi manifestasyon ki reflekte sosyete an zeneral. E nou osi annan limitasyon lo serten servis kle, ki nou kapab donnen pou siport bann fanmir ; la mon pe koz lo bann adolesan ki annan bann konportman anti-sosyal. Nou rekonnet ki nou osi mank petet bann profesyonnel pli spesyalize dan sa domenn pou kapab pli byen assess sityasyon e evalye bezwen sa bann adolesan ek zot fanmir. Bokou diskisyon in pran plas avek Lotorite ki zer kad formasyon, training parey nou dir pou kapab ankouraz bann graduates pou pran en karyer dan bann domenn tel ki child psychiatrist, physiotherapist, family therapist ; me pei pa ankor kapab la ozordi annan sifizaman sa bann profesyonnel pou travay avek bann ka ki nou zwenn. Dan kour term, mon Minister avek bann partner, nou travay avek etrwat kolaborasyon pou donn sipor a la mezir ki nou kapab. Kot i konsern en fasilite pou bann zenn avek konportman anti-sosyal, nou’n al vizit fasilite pou vwar si nou kapab abrit bann adolesan ki’n fer lofans e diskisyon i ankour pou nou pran en desizyon konzwent. Lezot demars pe ganny fer pou nou kapab ganny en landrwa tanporer ziska ki en fasilite, custom-built, ki pou ganny zere par Minister Ledikasyon e mon Minister a byento ganny konstri. Deza bann diskisyon avek Minister Finans in fini fer e finansman in ganny donnen dan Bidze 2017 pou konmans materyaliz sa proze. Byento en vizit pou ganny fer kot sa sit par bann Lazans, pou ki plan konstriksyon i ava ganny finalize. Mr Deputy Speaker, mon a profite pou lans lapel avek tou paran ki pe fer fas avek difikilte, pou annan en pe pasyans e travay ansanm avek nou e lezot partner pou nou kapab ede sirmont difikilte ki zot pe gannyen avek zot bann zanfan. Mon konnen ki par ler serten sityasyon i kapab depas nou, depas zot osi me i osi enportan ki dan travay entervansyon ki mon Minister e nenport lezot Lazans i fer avek zot, zot osi angaz zot dan sa prose pou nou kapab ansanm ganny en solisyon pozitiv e dirab. Mersi.

 

MR DEPUTY SPEAKER

Mersi Minis. Mon ti a kontan prezan demann Minis Ledikasyon, Minis Morgan pou azout lo sa ki Minis Simeon in dir. Minis.

 

MINISTER JOEL MORGAN

Mersi Mr Deputy Speaker e bonzour e bonzour tou bann Manm Onorab Lasanble Nasyonal e tou dimoun ki a lekout. Mr Deputy Speaker mon zwenn mon koleg Minis e bann Manm sa Lasanble pou eksprim senpati anver manman e lafanmir sa garson, Dyan Rose ki’n sibir lanmor dan en fason tre trazik semenn pase. Mr Deputy Speaker mon osi eksprim mon soutyen e senpati avek tou bann Lazans ki’n travay avek Dyan me osi ki pe travay avek lezot ka ki nou annan an se moman dan bann lekol e osi an deor bann lekol bann zenn, bann adolesan ki pe pas en pe atraver menm sityasyon ki nou’n vwar ki Minis Lafanmir in fek dekrir devan nou bomaten, en keksoz ki tre enkyetan. Mr Deputy Speaker ki mon ti a kontan azoute briyevman se an sa ki konsern sa katriyenm parti kestyon Onorab Leader Lopozisyon, ki koz lo plan Minister pou anmenn en konba serye kont labi sibstans parmi bann zanfan dan lekol e bann adolesan an zeneral. Minis Lafanmir in donn en pe en apersi atraver son repons, Mr Deputy Speaker, lo bann travay ki nou fer ansanm avek tou bann lezot Lazans, bann NGOs osi an sa ki konsern sa problenm labi sibstans. E mon krwar ki swit a sa ki’n arive la, swit a sa ki’n arive avek sa sityasyon trazik kot Dyan Rose in perdi son lavi, bann sirkonstans i ankor pe ganny determinen atraver bann rapor letopsi, letopsi in ganny fer yer, lapolis in enform mwan ki letopsi in ganny fer yer e rapor in ganny prodwi avek Komisyoner Lapolis e osi avek Minister Lasante ; i enportan ki nou bouz devan avek en plan konkret pou lavenir avek tou bann servis ki nou annan malgre bann defi ki nou pe fer fas avek ozordi an term mank resours imen sirtou e mank serten striktir pou kapab siport sa bann zanfan ki dan labi sibstans e la nou pa ape koz zis drog nou pe koz osi bann lezot keksoz par egzanp lalkol ki en problenm mazer ki nou vwar osi dan bann lekol e an deor lekol. I enportan ki parey Minis Lafanmir in dir nou annan en sant kot sa bann zanfan ki annan behavioral problems, ki rebel, ki sorti dan bann fanmir ki annan bann problenm fonksyonnalite, bann disfunctional families, ki annan problenm lanvironnman, lasosyete otour zot kot zot pe reste, kot i annan bokou bann lenfliyans negativ, ki annan problenm labi sibstans parey drog ouswa lalkol atraver bann diferan modalité, i kapab ki paran pe konsonmen, i kapab ki zot pe ganny servi zot menm zot, parey nou vwar dan serten bann lekol, pou vin vann drog dan lekol ouswa i kapab ki bann zanmi, bann dalon i met peer pressure lo zot pou zot konsonm sa bann sibstans e finalman zot vwar zot in vin addict ; i enportan ki nou annan nou en sant ki ekipe avek bann profesyonnel pou nou kapab retir sa bann zanfan dan sa move lanvironnman e travay fortman ek zot pou reabilit zot. E sa sant Mr Deputy Speaker, i en keksoz ki parey Minis Lafanmir in dir i devret vin en priyorite pou nou akoz ozordi dan Sesel i napa zis Dyan Rose, i annan en bon nonm bann zanfan anba 18an san kont bann adilt natirelman ki en lot kategori, i annan en bon nonm sa bann zanfan ki pe pas atraver menm sityasyon ; e la mon pe koz problenm endisiplin, mon pe koz behavioral issues e mon pe koz problenm labi sibstans. Now sa ki nou bezwen fer e nou bezwen sipor Lasanble Nasyonal pou sa e mon asire nou a ganny zot sipor, se ki nou bezwen envesti dan bann servis spesyalize pou asire ki sa bann zanfan avan ler zot ganny 18an, nou kapab travay avek zot e reabilit zot e prepar zot pou viv en lavi prodiktiv konman bann sitwayen dan nou pei. Mr Deputy Speaker, nou regarde ozordi otour nou dan pei, sityasyon i alarman. Nou vwar otour nou bokou bann sityasyon kot nou devret vwar Seselwa, sirtou nou bann msye, nou bann zonm Seselwa pe travay, me nou pa vwar sa. Dan serten sekter nou vwar i ganny ranplase avek etranze e ler ou regarde problenm, i vre nou annan en problenm mank mendev me osi annan problenm fondamantal an sa ki konsern availability nou manpower pou travay. E sa i relye parey nou tou nou konnen avek bann problenm sosyal ki nou fer fas avek dan lasosyete enkli problenm substance abuse. Nou bezwen fer sir lo nivo Minister Ledikasyon Mr Deputy Speaker, ki ansanm avek tou bann Lazans konsernen, Minister Lafanmir bann NGOs, bann legliz, nou met en progranm konpreansiv pou lavenir pou nou kapab tackle sa problenm, si nou pa tackle li Mr Deputy Speaker, mon pa pe vwar sityasyon pe amelyore e mon pe vwar sityasyon pe agrave. Me sa ki mon ti a kontan dir pou terminen se ki nou annan sa plan an allant de lavan e sa plan nou pou travay avek Minister responsab pou Zafer Sosyal pou asire ki omwen pou bann zenn nou annan sa progranm reabilitasyon pou zot e natirelman i annan bann lezot linisyativ ki pe ganny pran pou bann adilt, Mr Deputy Speaker, atraver bann diferan lorganizasyon, bann lenstans, bann Lazans ki pe deal ek sa problenm sosyal ek sa problenm drog.  Mersi bokou.

 

MR DEPUTY SPEAKER

Mersi Minis Morgan. Onorab Ramkalawan.

 

HON WAVEL RAMKALAWAN

Mersi bokou, Mr Deputy. Mr Deputy, premyerman mon anvi dir ki si nou’n anmenn sa kestyon e Minis Morgan in mansyonnen konsernan sipor Lasanble, mon napa okenn dout ki Lasanble pou donnen tou sipor neseser pou nou kapab avans devan. Me mon anvi demande vi ki ozordi mon ti ava kontan konnen parski tanzantan i annan bann sanzman, ti annan YRTC en letan apre sa YRTC in fermen apre sa zot in al North East Point, apre sa laba North East Point… Konmsi mon ti ava kontan si zot vi ki zot pe koz an term en plan, si zot ava kapab donn Lasanble keksoz konkret ki zot pe mazin fer la. Parski i ankor enn fwa Half-way House, tousala i lye avek bann problenm sosyal. Half-way House pou bann ki ganny bate ensidswit, tanzantan dan sa Lasanble, lotrozour Onorab Esparon in anmenn en Mosyon me tousala se bann vye keksoz ki alor nou, nou ti ava kontan konman en Lasanble si sa 2 Minister ki travay an etrwat kolaborasyon ti ava kapab ozordi dir avek nou dan sa plan, par egzanp kote landrwa ki zot in idantifye pou zot fer sa sant? Dir nou konbyen zot in balanse. Konmsi dir nou ki zot Bidze parski Mr Deputy si mon pe demann kestyon dan sa fason e si mon’n anmenn kestyon ,se parski souvandfwa letan keksoz i arive nou fer bann gran deklarasyon me apre sa nou bliye keksoz. Nou bliye ziska ki en lot maler i arive. Sa i mon premye kestyon pou donn nou keksoz konkret pou ki letan nou pran Bidze an desanm, an Novanm, sa Lasanble Nasyonal i ava kapab donn son full sipor. Me lo lot kote, eski bann Minister prezan zot santi ki poudir a sa moman zot byen ekipe avek bann personnel, mon konnen poudir i annan bokou dimoun ki devoue ki pe fer zot mye, me eski zot santi ki zot byen ekipe pou zot kapab deal avek bann zanfan ki annan sa bann problenm avek zot konportman etandonnen ki ozordi nou sosyete pe fer fas avek sa gro problenm drog ki pe anvair nou dan tou fason. E la deswit an term osi pou annan bann sant detox pou bann zanfan parski 13an, drog pe anvair nou pei. Alors ki zot plan an term zot manpower pou kapab adres sa bann size. Mersi bokou. 

 

MR DEPUTY SPEAKER

Mersi Onorab Ramkalawan. Minis pou Lafanmir ou oule reponn apre Minis Ledikasyon, Minis Morgan i ava kontinyen. Mrs Simeon.

 

MINISTER JEANNE SIMEON

Mersi Onorab Leader Lopozisyon. Konman keksoz konkret ki nou annan e ki osi parey nou’n fer resorti taler en priyorite pou sa 2 Minister se sa sant kot nou kapab reabilit nou bann zenn. Nou’n vwar ki mannyer problenm i arive. Nou’n vwar ki mannyer nou pe travay avek sa bann zenn me nou’n vwar ki nou bezwen a en serten moman annan en lenfrastriktir, annan en sant kot nou kapab travay avek zot pou plis letan, pas plis letan avek zot. Sa sant i pou en sant rezidansyel kot zot pou la e pou resevwar tou bann sipor posib. Pou sa taler mon’n dir poudir nou’n fini diskite avek Minister Finans e already in ganny fer provizyon dan Bidze. Pou 2017, nou’n ganny nou R10 milyon e apre sa nou kapab negosye pou lavenir. Nou, nou ti a kontan konmans sa sant, konmans konstriksyon sa sant sa lannen si i ti posib, ok, akoz nou’n vwar poudir i en gran priyorite me parey mon’n dir taler nou osi annan en plan tanporer pou donn letan pou sa sant ganny konstri. Nou annan en plan tanporer kot nou annan bann fasilite pou nou kapab konmans sa progranm avek bann ka ki pli kritik. Ok? So an tou nou pe anvizaze ki sa sant pou kout apepre R25 milyon e parey mon pe dir nou pe fer tou neseser pou nou kapab ganny sa larzan an kolaborasyon avek Minister Finans pou nou at least konmanse e donn lespwar bann paran, nou bann lezot partner pou dir keksoz i pou arive. Ok? Nou konnen osi parey mon’n dir taler ki nou annan en mankman dan nou bann profesyonnel spesyalize. Nou napa Seselwa ki’n ganny train dan sa bann domenn e sa bann problenm ki nou pe rankontre avek nou bann zanfan ozordi i bann problenm tre, tre difisil, tre konplike, parey mon dir i en refle sa ki pe pase dan lasosyete. So nou osi lo servis ki nou e donnen nou bezwen annan bann spesyalis ki bezwen fer bann diagnosis, bann assessments e osi donn ki kalite progranm nou bezwen fer avek sa bann manrmay. Nou annan en mank, me selman already avek Minister Ledikasyon e Lazans ki ansarz formasyon, ki zer formasyon, nou’n already diskite pou kapab ganny bann zenn pourswiv bann training spesyalize ki ler zot a vini nou ava ganny sipor an attendant nou’n menm osi diskite pou nou kapab rod sipor, rod led avek lezot pei ki dan larezyon ki petet i annan menm problenm ki nou pe fer fas avek. Mersi mon pa konnen si mon koleg Minis i ava kontan azoute.

 

MR DEPUTY SPEAKER

Go ahead Minis Morgan.

 

MINISTER JOEL MORGAN

Mersi Mr Deputy Speaker. Mr Deputy Speaker pou le moman lo nivo Minister responsab Ledikasyon ansanm avek bann lezot Minister ki involve avek Lazenes e Zafer Sosyal – Lafanmir osi avek bann NGOs akoz i annan 3 progranm ki nou pe run atraver Minister Ledikasyon pou esey deal avek sa problenm dan limedya setadir a kour term. Premye progranm i apel Youth Engagement Program ouswa YEP ki en progranm en semenn e li i ede siport bann etidyan atraver bann aktivite ki divert bann etidyan ki annan bann konportman anti-sosyal e donn zot en nouvo loportinite pou devlop bann life skills esansyel kot i annan mankman. Lobzektif sa Youth Engagement Program i adres issue social exclusion, redwir ban ka kot zanfan i sov lekol ; redwir bann konportman anti-sosyal dan bann zanfan ; redres bann zenn ki annan en stil lavi ki anmenn gran risk ; devlop bann progranm baze lo bezwen sa bann zenn ek zot fanmir osi byen ki avek la kominote ; promouvwar en lasante mantal pozitiv pou sa bann zenn adres zot difikilte ek zot bezwen spesifik e promouvwar e lapros travay konzwent avek bann partenaire avek bann fanmir. Bann paran i enplike dan sa progranm aktyelman. E anviron 200 etidyan in benefisye atraver sa progranm depi i ti ganny lanse an 2015. Sa progranm i ganny fer an deor lekol e i ganny fer dan Sant Kominoter ouswa en landrwa parey Sant Kominoter kot bann distrik. Dezyenm progranm, Mr Deputy Speaker, i Youth Intergrated Support Program, YISP. E sa i ganny fer dan vakans Out e i ti 10 a 12 zour. I en progranm rezidansyel ki son lentervansyon i baze fortman lo disiplin, respe e travay an ekip. Sa progranm i deroul lo en kan kot etidyan i pas atraver progranm entansif, 10 a 12 zour lwen avek zot lakour. Rezon pou ofer sa progranm lo en ka lwen avek lakour se pou ki etidyan i pli byen kapab ganny ankadre spesifikman dapre zot bann bezwen. A lafen sa progranm bann etidyan zot retourn kot lakour e dan bann bokou bann ka nou’n vwar bann sanzman pozitiv dan zot konportman latitid e responsabilite, ki montre Mr Deputy Speaker ki ler nou ava annan en sant ki dedye pou sa kot nou kapab fer sa bann progranm bokou pli long term nou pou vwar deza en rezilta pozitiv. Trwazyenm progranm ki nou annan lo nivo Minister Ledikasyon, se Youth Integrated Support Program, son lobzektif Mr Deputy Speaker se challenge latitid e konportman sa bann zanfan. Enstil dan sa bann zanfan disiplin ek respe, ogmant lasante fizik e byennet sa bann zanfan ede pou idantifye ban issues familyal e endividyel ki zot pe rankontre e diriz zot ek zot fanmir ver bann servis ek bann sipor neseser. Anviron 120 zanfan in pas sa progranm Youth Integrated Support e sa ti konmanse an Out 2015. Trwazyenm progranm ki nou annan se Alternative Education Program ki dir 6 semenn e sa i en progranm toulezour. Alternative Education Program i ganny ofer an deor lekol e i ganny konsevwar pou bann etidyan ki pa kapab adapte dan en lanvironnman lekol normal pou plizyer rezon. Sa bann etidyan i ganny loportinite pou swiv zot progranm letid, devlop bann life skills e angaz zot dan bann aktivite vokasyonnel. Progranm i ganny konsevwar konman en alternativ pou lekol formel a plen tan dedye a bann zanfan S1 ziska S4. Mr Deputy Speaker anviron 140 etidyan in pas atraver sa progranm ki ti demare an 2017. Dan kour term an attendant ki nou ganny sa sant, Gouvernman in pran en desizyon pou nou idantifye en landrwa tanporerman kot nou kapab aranz son striktir fer li vin konvenab pou kapab eberz bann zanfan dan en peryod ziska ler ki sa sant i vin operasyonnel, ki pou pran sertennman pli ki 1 an. Alor antretan aksyon imedya se ki Gouvernman in pran en desizyon pou nou rod en landrwa par la, dan en lespas ki available e sa pe ganny fer, sa travay pe ganny fer annefe Minis et moi, nou annan serten vizit ki nou pe al fer apre midi menm pou nou kapab regard enn de bann landrwa. Sa desizyon ti ganny pran dan Cabinet semenn pase. E swit a sa nou pou kapab etabli en sant tanporer pou nou kapab met sa bann zanfan ladan avek bann sipor neseser. Le problenm se osi sa mankman bann dimoun spesyalize. E la konman Minis responsab pou Human Resource Development, mon’n deza koz avek ANHRD pou nou fer sir ki nou ankouraz bann etidyan pran zot bann letid dan domenn ki Minis Lafanmir in koz lo la taler, lo nivo psikolozik, lo nivo lafanmir, lo nivo tou bann eleman sipor ki annan pou fer avek bann Servis Sosyal ki nou bezwen, pou kapab man sa sant dan lavenir. Lo nivo bann lekol direkteman Mr Deputy Speaker, nou annan en MOU ki nou pe al sinyen avek Maurice byento, sa pe ganny finalize la kot nou pou fer apel dan kour term avek bann spesyalis ki petet nou a kapab gannyen atraver sa kolaborasyon avek Maurice, pou travay dan bann lekol ansanm avek nou, bann counsellors, bann spesyalis pou deal avek sa bann case, bann ka kot nou annan dan bann lekol e nou annan plizyer sa bann case dan bann lekol Mr Deputy Speaker. So vwala en pe bann mezir ki nou pe pran a kour term e bann progranm ki egziste konmela pou adres sa sityasyon otan ki nou kapab. Mersi.

 

MR DEPUTY SPEAKER

Mersi Minis Morgan. Yes Onorab Ramkalawan.

 

HON WAVEL RAMKALAWAN

Mr Deputy Speaker, mon zis tann sant, nou annan en sant ki pou kout tan, sa ki mon anvi konnen la parske si zot pe rod sipor Lasanble, Lasanble li i pou kapab donn zot Bidze, Lasanble i pa pou bann counsellors ki pou al travay dan bann sant. Ziska aprezan mon pa ankor kapab tann nanryen konkret lo kote sa sant. Si ou’n dir en Bidze R10 milyon, pou kout R25 milyon, dir nou kote sa sant pe al ganny konstri?  Ki bann fasilite ki pou dan sa sant? Parske si ou’n deza met en chiffre avek ou pou bezwen konnen ki poudir son konstriksyon e sa i zis lo son konstriksyon. Donn nou plis detay lo sa sant parske si non i paret zis konman en castle, en sato ki nou’n konstri dan ler e nou tou nou a pe koz lo sa sato me selman sa sato i zis dan ler. Eski… e ki bann fasilite ki pou annan ladan? Par egzanp lo kote detox. Konmsi dir nou bann keksoz konkret pou ki deza nou konman en Lasanble nou ava konmans prepar pou nou donn zot sa sipor ki zot bezwen.  Parski si zot pa vin ek nanryen konkret nou pa pou kapab donn sipor o kontrer nou pou dir koupe. Mersi bokou.

 

MR DEPUTY SPEAKER

Mersi Onorab. Minis Simeon.

 

MINISTER JEANNE SIMEON

Mersi Onorab. Sa sant pou al ganny fer Cap Ternay. En vizit pe organize sa semenn. Sa desizyon ti ganny pran dan Cabinet of Ministers semenn pase e nou pe al vizite. Sa sant parey mon’n dir i pou en sant rezidansyel kot pou annan fasilite pou bann etidyan reste ladan. I pou annan osi bann lezot fasilite for counselling, for training facilities pou bann zanfan ; pou annan fasilite kot nou kapab resevwar paran ki vin vizit zot bann zanfan laba, kot nou kapab osi travay avek zot on-site avek zot bann zanfan. E parey isi en sant ki pou annan fasilite rezidansyel nou pou annan tou bann staff neseser pou nou kapab travay avek sa, manage sa centre e osi son bann staff spesyalize pou kapab donn sipor nou bann etidyan. Lo kote detox ki Onorab in mansyonnen parey nou konnen nou annan already en progranm, en Lazans ki pe travay avek reabilitasyon –  swivi pou bann dimoun ki servi drog pou zot reabilitasyon e osi prevansyon, sa i pe ganny adrese par sa Lazans avek SS Herminie. Me dan sa Lazans zot osi pou cater pou bann zanfan ki pe abiz sibstans. Savedir dan sa sant kot nou, nou pe al travay Cap Ternay pou napa nanryen pou fer avek labi sibstans, laba nou pe get bann ki annan konportman anti-sosyal kot nou kapab travay pou reabilit zot swa pou zot retourn dan lekol ouswa pou zot retourn dan lezot sant formasyon ki zot ladan ler zot ti rantre dan sa sant.

 

MR DEPUTY SPEAKER

Mersi Minis. Onorab Woodcock.

 

HON WAVEL WOODCOCK

Mersi Mr Deputy Speaker. Bonzour tou dimoun, Minis, koleg Onorab e tou dimoun dan lakour. Mon a konmanse par senpatiz avek lafanmir Dylan pou zot pert. Mr Deputy Speaker, mon pou konmanse par… fransman mon en pti pe dezapwente avek larepons Minis sirtou lefe ki ler mon pe ekout Minis koze, mon’n vwar ki i pe met tou blanm lo Vilaz Prezidan konmkwa… mon pe koz pou Minis Family Affairs, Minis Jeanne Simeon. In the first place Mr Speaker, Vilaz Prezidan i pa en landrwa ki ganny fer pou bann manrmay ki annan anti-social problems, pou bann juvenile delinquent, Vilaz Prezidan ti en landrwa ki ti ganny fer pou cater pou bann orphans e bann social orphans, depi lontan ti merit annan en sant pou bann juvenile delinquent. Mon kontan ki Minis la prezan avek bann lezot partenaire dan Minister in pran sa desizyon pou fer en tel sant pou bann juvenile delinquent me sa ti en keksoz ki lontan ti merit ganny fer. Me selman still sa ki Minis pa pe donn nou leklersisman lo la, ki time frame egzakteman ki sa sant pou pare e osi en kestyon ki mon pou demande si zot annan lentansyon desantraliz sa servis, zot pou ofer li zis pou Mahe ouswa zot pou fer osi Inner Islands? E en lot kestyon mon krwar mon’n tann Minis Morgan kot en pti pe lo la an regardant bann boot camp. Mon rapel en pe letan pase pa tro bokou lannen pase, mon krwar apepre en 2 an pase, ti annan en boot camp ki ti ganny fer kot Police Academy, ti ganny fer pou bann manrmay Anse Boileau ki ti annan bann problenm konportman dan lekol, sa ti vin apre ki bann manrmay ti pe display bann anti-social behaviours, manrmay ti pe bat mis, manrmay ti pe anmenn drog dan lekol – eski zot anvizaze desantraliz sa, annan en boot camp ki fwa par rezyon ouswa par distrik ouswa detrwa distrik ansanm, akoz sa ti en bon program ki’n ede ankadre en kantite bann zenn. Eski zot anvizaze ofer plis sa servis? Mon konnen sa en keksoz ki ganny fer dan plizyer pei aletranze e mon krwar ki nou merit konsider fer li en pti pe pli souvan e pli frekan e osi desantraliz li, fer li Mahe, Praslin e osi menm La Digue. Sa mon kestyon ki mon pe demande, Mr Deputy Speaker. Mersi.

 

MR DEPUTY SPEAKER

Mersi Onorab. Mon a demann Minis pou Zafer Lafanmir avan apre swivi par Minis Morgan. Minis Simeon.

 

MINISTER JEANNE SIMEON

Mersi Onorab. Lo kestyon blanm Vilaz Prezidan, mon pa’n blanm Vilaz Prezidan lo letan mon ti pe konmanse mon ti pe donn en istorik sityasyon sa garson. Diferan Lazans ki’n ganny konsernen pou donn li sipor parmi ti Vilaz Prezidan ki ti pare pou abrit li an kolaborasyon avek Departman Servis Sosyal. Sa ti enn bann servis ki nou ti pe ofer li pou son sekirite. Nou ti met li laba parey mon ti dir menm ki pa ti meet kriter pou li antre dan Vilaz Prezidan, me nou ti pe esey tou fason pou nou kapab donn li sa sipor. Mon ti fer osi resorti, mon ti bezwen fer akoz mon ti pe fer istorik, mon ti bezwen dir poudir baze lo son konportman anti-sosyal letan i ti pe reste lo Vilaz, Sef Vilaz laba ti’n dir nou retir li akoz petet i ti en menas pou lezot etidyan lo Vilaz. E mwan se sa ki mon’n dir. La kot nou ete konmela, nou pa pe kapab montre ledwa personn, ok? E i pa mon lentansyon osi. Mwan mon pe kolaborasyon avek tou bann partner pou nou travay ansanm akoz sa problenm i problenm nou pei, i problenm nou bann zenn so as many partners ki nou kapab ed nou ofer servis pou reabilit sa bann zanfan ansanm avek Minister Ledikasyon nou pe rod sa sipor. Mersi.

 

MR DEPUTY SPEAKER

Mersi Minis. Minis Morgan.

 

MINISTER JOEL MORGAN

Mersi Mr Deputy Speaker. Mr Deputy Speaker an sa ki konsern sa boot camp ki Onorab Woodcock ki fer referans lo la sa ki nou apel Youth Integrated Support Program ki ganny fer dan vakans Out ki dir 10 a 12 zour depandan lo bezwen. Parey mon ti dir sa progranm i konmanse an 2015. Out 2015 ti premye fwa nou ti fer. I annan 120 etidyan ki’n pas atraver sa progranm e intake i 40 etidyan alafwa. Sa bann zanfan i dan en progranm rezidansyel, nou’n deza fer li dan bann diferan landrwa, dernyen fwa nou ti fer li kot Kan Militer, kot Lakademi Militer Ile du Suede e nou annan en ratio 1 dimoun pou tou le 3 pandan dirasyon sa 10 a 12 zour pou supervise sa bann zanfan.  An sa ki konsern desantralizasyon, sa progranm lefe ki rezidansyel nou otomatikman pran zanfan sorti Praslin e La Digue. E bann zanfan, napa en gran nonm zanfan ki sorti Praslin e La Digue sirtou La Digue i annan ankor mwens ki vin dan sa progranm napa sa sitan kantite nonm lekol lo Praslin e La Digue, ou annan 1 lekol segonder, 2 lekol primer lo Praslin e 1 lekol segonder e primer lo La Digue. Alor pou rezon economies of scale pou rezon economical, nou fer en sel progranm Mr Deputy Speaker me i pa anpese ki dan lavenir par egzanp mon konpran poudir lo Praslin pou annan sa nouvo sant, sa ki ti Dove Center, ki pou deal avek sa problenm drog, reabilitasyon pou bann adilt e pou bann juvenile, pou bann zanfan osi. I pou annan serten desantralizasyon bann diferan progranm dan lavenir me sa ki konsern behaviour sa ki konsern lentegrasyon, sa ki konsern bann laspe konportman sosyal dan lekol e dan lafanmir, dan lanvironnman. Sa progranm aktyel nou pe fer li. Prezan si nou bezwen fer li dan en fason pli souvan, mon panse wi, i annan en bezwen pou nou fer li pli souvan e petet vwar ki mannyer nou kapab ganny en landrwa pou nou kapab fer sa pli souvan. Rezon ki nou fer li dan vakans Out se ki lo nivo bann diferan paramet parey tanperatir klima disponibilite bann landrwa ki nou kapab gannyen and so on, tousala i factor in ki nou fer li anrout. Me sertennman nou ava regarde, si i annan sa bezwen pou fer li pli souvan dan sa peryod ki vini devan nou. Mersi.

 

MR DEPUTY SPEAKER

Mersi Minis. Onorab Woodcock.

 

HON WAVEL WOODCOCK

Mr Speaker dan lepase mon’n travay konman en manager avek Fondasyon zanfan e Vilaz Prezidan ti tonm anba nou responsabilite. I la realite ki dan lepase ki ler Servis Sosyal in annan bann case, bann zanfan ki’n display bann anti-social behaviours ouswa bann zanfan, bann juvenile delinquents zot in plase Vilaz Prezidan e si sa sant ti’n ganny fer depi lontan la nou ti pou’n kapab avoid bokou.. ozordi i annan bokou bann zanfan an deor ki sorti Vilaz Prezidan ki zot pa’n vreman ganny ankadre akoz nou napa sa bann servis spesyalize, nou napa sa bann expert pou deal avek sa bann manrmay e la vi ki zot pe fer sa sant mon’n osi par lo la en ex-staff osi avek vye YRTC ki ti fer North East Point. I ti zis en pti trou nennen, i pa ti byen ankadre nou ti napa bann profesyonnel pou travay avek sa bann zanfan. Vi ki nou pe fer en sant la, mwan kestyon ki mon pe demande eski nou pe envesti pou nou train plis bann dimoun pou kapab travay avek sa ban zanfan ki annan sa bann problenm, sa bann anti-social behavior ? Mersi.

 

MR DEPUTY SPEAKER

Mersi Onorab. Minis Simeon.

 

MINISTER JEANNE SIMEON

Mersi Onorab. Mr Deputy Speaker mon krwar mon’n reponn sa kestyon letan mon pe dir nou bann personnel nou manke e ki plan nou annan pou nou ganny sa bann personnel spesyalize akoz problenm ki nou pe fer fas avek pou le moman i bann problenm ki tre difisil, ki tre konplike ; alor nou bezwen sa bann profesyonnel, ok ?

 

MR DEPUTY SPEAKER

Mersi Minis. Onorab Herminie.

 

HON WILBERT HERMINIE

Mersi Mr Deputy. Bonzour Minis avek ou delegasyon. Mon ti annan 2 sizesyon avek en kestyon. Premye sizesyon, mon ti pe sizere ki Minis i seryezman get dan lentansyon pou kree at least en Lakademi Militer, pou anmas bann zanfan ki annan problenm disiplin at en laz tre zenn pou enstil disiplin avek zot parey i annan deor parey bann Boarding School sa ti ava en bon sizesyon. Dezyenm sizesyon ki mon ti annan mon ti ava kontan ki Minis i annan en diskisyon serye avek Minister konsernen pou lakaz pou kree en Polisi pou detri bann lakaz abandonnen sirtou bann dilapidated house ki ganny servi pou bann aktivite delenkan partou atraver pei pou anpes sa bann sityasyon ganny repete ki’n arive o paravan. Mon kestyon ki mon ti pou demande i dan direksyon Vilaz Prezidan, mon pe zis demande si i norm, prosedir normal pou retir zanfan ki annan problenm disiplin dan Vilaz? Mersi Mr Deputy.

 

MR DEPUTY SPEAKER

Mersi Onorab. Minis Simeon.

 

MINISTER JEANNE SIMEON

Mersi Onorab. Mr Deputy Speaker, mon krwar sa ki Onorab Herminie pe mansyonnen sa landrwa kot nou pou kapab met sa zanfan i egzakteman i pou ganny kouver anba sa sant ki nou pe dir nou pe al fer. Kot nou pe anmas sa bann manrmay pou travay avek zot. Lo kote Vilaz Prezidan, nou kapab dir wi, si sa konportman, si sa zanfan dan sa Vilaz son konportman i pe met lezot zanfan a risk, ok so Vilaz Prezidan i kapab demande pou retir sa zanfan si son konportman i met lezot zanfan, Management Vilaz a risk. Lo kote bann vye lakaz parey ou pe dir anyway sa i en propozisyon ki nou kapab follow-up avek. Mersi.

 

MR DEPUTY SPEAKER

Mersi Minis. Onorab Roucou.

 

HON CLIVE ROUCOU

Mersi Mr Deputy Speaker. Bonzour Minis, bonzour tou Manm Onorab. Mr Deputy Speaker mon annan 2 pti kestyon pou Minis Lafanmir. Mon premye se eski ou Minister i annan okenn plan pou li reviz tou bann ka ki prezan devan ou Minister an relasyon avek bann zanfan ki pe  fer bann behaviour anti-sosyal? E mon dezyenm kestyon se si ler zot in egzamin ka Dylan spesifikman si okenn assessment lo son nivo psikolozik par okenn profesyonnel medikal ti ganny fer ki koumsa nou ti kapab balanse si anti-sosyal oubyen si i ti annan problenm mantal? Epi mon trwazyenm kestyon se ; si i norm Gouvernman pou met okenn zanfan ki pe fer bann anti-social behaviour dan custody epi ki swivi pandan ki zot dan custody? Mersi Mr Deputy Speaker.

 

MR DEPUTY SPEAKER

Mersi Onorab. Minis Simeon.

 

MINISTER JEANNE SIMEON

Mersi Onorab. Mr Deputy Speaker, lo kote Departman Servis Sosyal nou bann ka ki nou annan nou pas zot an revi tanzantan pou nou vwar si lentervansyon ki nou pe fer i pe aport rezilta e si non ki lezot kalite lentervansyon nou kapab fer pou ed sa bann zanfan. So bann ka i ganny revize e i annan ka osi ki’n fini ganny retabli kot zanfan in retourn lekol e i annan ka kot nou’n vwar ki nou ti retir li avek son fanmir, nou’n travay avek fanmir e in kapab retourn kot son fanmir e pe kontinyen en lavi ase normal. Ok? E i kapab osi annan lezot ka ki ler i kot fanmir ler nou vwar poudir i bezwen ganny retire, travay i ganny fer. Lo kote assessment ki nou fer lo sityasyon Dylan avan ler, i ti antre dan en progranm avek Minister avek Ledikasyon, en assessment ti ganny fer par en dimoun kalifye ki ti’n etablir son sityasyon. Ok?

 

MR DEPUTY SPEAKER

Mersi Minis. Onorab Roucou, ok?

 

HON CLIVE ROUCOU

Minis pa’n reponn mon trwazyenm kestyon lo ler zot dan custody si i annan swivi. Mersi.

 

MR DEPUTY SPEAKER

Yes Minister.

 

MINISTER JEANNE SIMEON

Bon. Mersi Onorab. Mr Deputy Speaker, pou bann zanfan ki dan custody menm ka avek sityasyon Dylan, nou kapab pran sa parey en legzanp ; menm letan i dan custody pou anti-social behaviour nou kontinyen Departman Servis Sosyal i kontinyen travay avek sa zanfan travay avek son fanmir dan sa letan ki dan custody. Nou annan travayer ki al vizit li laba, ki al fer counselling session avek e osi nou travay avek son fanmir akoz nou konnen poudir ler i sorti i pou bezwen retourn dan sa lanvironnman kot son fanmir. Mersi.

 

MR DEPUTY SPEAKER

Mersi Minis. Bon nou pou pran en Break pou nou retournen ziska 11er akoz mon ankor 13 Manm ki lo mon lalis. I posib pou annan lezot Manm ki pou anvi demann kestyon. Mon krwar i en prosedir, i en process ki nou tou nou pe santi, nou tou nou pe pas ladan nou tou nou anvi vwar solisyon. Mon ti a kontan demann le 2 Minis osi tou pou bear with us, mon krwar Lasanble Nasyonal i konsernen. E nou tou ki pe reprezant en distrik and all that nou tou nou konnen poudir sa problenm i pa restrikte zis dan en serten bout nou pei me i partou dan tou nou distrik nou annan sa problenm e nou tou nou ti a kontan vwar en solisyon pozitiv. E parey loter kestyon in demande, ki nou anvi regard sa way forward pou nou kapab fer sir ki bann tel sityasyon pa repete. So mon a demann le 2 Minis avek zot delegasyon pou bear with us, nou ava pran en pti Break e nou ava retournen 11er pou kontinyasyon. Mersi.

 

 (BREAK)

 

MR DEPUTY SPEAKER

Bon nou a kontiny nou travay.  Prosen Manm lo nou lalis nou annan Onorab Mondon.

 

HON TERENCE MONDON

Mersi Mr Deputy.  Mon kestyon pou Minis se, eski zot in fer okenn assessment pou kapab determinen konbyen zanfan ki tonm dan sa kategori ki pe fer fas avek  bann difikilte ki nou’n koz lo la bomaten?  E dezyenmman akoz Minister Ledikasyon i pa pare pou repran en zanfan ki anvi retourn lekol parey mon annan en ka Takamaka ki en paran 3an pe fer demars pou kapab fer son zanfan retourn dan lekol ki ozordi i annan 16 an, akoz zot vwar li difisil par lefe ki parey in dir dan Lasanble, napa en landrwa spesyal pou sa bann zanfan.  Akoz Minister Ledikasyon i pa ouver son laport pou sa bann zanfan ki dan difikilte?  Mersi.

 

MR DEPUTY SPEAKER

Mersi Onorab.  Minis Simeon oule pran?  Oubyen Minis Morgan?  Yes go ahead Minis Morgan.

 

MINISTER JOEL MORGAN

Mersi Mr Deputy Speaker.  Mr Deputy Speaker i annan travay kontinyel ki ganny fer an term assessment pou tou bann zanfan ki tonm dan sa kategori annan problenm dan bann lekol. E i annan diferan kategori natirelman ki bann zanfan i tonm ladan.  I annan bann ki mwen sever.  I annan bann ki pli sever. E sa bann progranm ki mon’n koz lo la pli boner bomaten i deal avek bann ka ki en pe pli sever.  Antretan dan bann lekol nou annan en Special Needs Coordinator  dan tou bann lekol – sa ki nou apel bann SENCOS e zot travay se pou travay ek bann zanfan ki annan bann bezwen spesyal atraver bann diferan eleman zot bann bezwen i kapab osi en problenm en bezwen konportman, en bezwen pou gid zot, pou travay avek zot e sa bann Special Needs Coordinator prezan ler zot fer  sa travay zot assess sa zanfan.  Zot in ganny training, formasyon pou fer sa.  E answit si zot vwar poudir sa zanfan i bezwen en swen pli spesyalize dan lekol kot i ete zot refer li avek nou servis spesyalize o nivo Minister  li menm li kot nou annan nou bann psikolog avek bann counsellors ki travay avek sa bann zanfan kot i fer en swivi detaye e spesifik lo   sakenn sa bann zanfan ki annan sa bann problenm. E  si nou pe koz lo sa bann zanfan ki annan sa bann behavioral problems ler en swivi  i ganny fer zot ganny monitor, paran i ganny apele kot i neseser e headteacher sa bann lekol ansanm avek sa  bann Special Needs Coordinator nou fer en travay kontinyel.  An term sif ki nou annan mon napa sa sif avek mwan me selman mon  kapab ganny bann statistik e met li a porte Manm Onorab Mondon dan Lasanble pour donn en pe plis lenformasyon detaye lo nonm e ki kalite i annan.

Lo dezyenm kestyon mon krwar tou moman nou devret pare pou entegre tou zanfan dan lekol o tan ki posib.  Mon ava regard sa ka Mr Deputy Speaker an sa ki konsern sa ka spesifik ki Manm Onorab in fer referans lo la, me baze lo sa ki mon konpran i posib poudir bann spesyalis, bann  psikolog e menm son headteacher i santi poudir si i retourn dan lekol a sa moman donnen la avek son konportman aktyel i pou kre plis problenm ki i pou rezourd.  Nou Polisi se ki otan ki posib nou kit bann manrmay dan lekol e otan ki posib nou fer en swivi avek zot dan lekol parey mon’n dir.  Si i annan bann ka spesifik ki e zanfan in ganny expel pou en konportman  pa akseptab ouswa en lot par egzanp in ganny son premye, son dezyenm e son trwazyenm warning in ganny expel ,la i vin en pe pli difisil akoz i annan en istorik konportman ouswa labi sibstans ki tonm dan nou Code of Conduct e nou Polisi lo sa bann  keksoz me sertennman mon ava regard sa ka epi mon a regarde si nou kapab rod en fason pou nou kapab ed sa zanfan, akoz nou pa kapab abandonn bann zanfan.  Mersi.

 

MR DEPUTY SPEAKER

Mersi Minis.  Onorab Henrie.

 

HON GERVAIS HENRIE

Mersi Mr Chair.  Bonzour tou dimoun.  Mr Chair avan mon demann mon kestyon mon ti a kontan dir poudir mon rekonnet enormite travay ki le de Minister pe fer pou deal avek tou sa bann sityasyon e nou konman en Lasanble mon krwar nou anvi zot konnen poudir nou anvi ed zot. Me selman dan sa menm laliny mon ava dir poudir ozordi mon’n vwar i annan  7 zofisye ki’n vini la e letan mon’n ekout bann larepons konmsi mon, I am sorry to say be selman mon pa santi poudir ok mon pa kapab mezir zot lemosyon me selman zot kominikasyon  avek nou mon santi poudir  i napa sa… the urgency pou zot santi  sa ki dimoun dan kominote pe santi vizavi sa ki’n arive.  Par egzanp en senp legzanp lo larepons Onorab Mondon, Minis i dir napa statistik devan li. Be pou nou apresye gravite sa problenm i enportan ki nou dir dan lekol segonder Riviere Anglaise i annan 2 manrmay ki lo kategori  crisis; dan lekol Anse Boileau i annan 5, La Digue i annan 3, lekol Plaisance napa.  Konmsi koumsa prezan mwan mon ganny li poudir ok, vwala problenm i koumsa.

So, having said that selman dan tou adversite parfwa i annan en laklerte e kekfwa Dylan is like a beacon of hope pou lezot zanfan ki dan sa sityasyon ozordi sa garson ti anvi vin en pilot konmsi.  I respektif ki problenm ki i ti annan, get ki i ti pe reve pou li vini malerezman i pa’n ganny sa sans e demen mon vwar ti ava byen petet sa sant ki formen apel li apre li ki konmsi i ava vin en lespwar pour lezot zanfan e dan larepons Minis mon pa’n tann zot koz lo en Care Plan.  Pou mwan i enportan ki zot dir nou ki i annan en Care Plan si manrmay i annan problenm obesite i ava pas ladan, si i annan  problenm labi sibstans i ava pas ladan, konmsi ki  kapab swiv byen e dan sa 3 progranm ki zot in donnen, enn i fer en semenn, lot i fer 10 a 12 zour, lot i fer 6 semenn.  Mon krwar i mank en progranm Mentorship.

Mon’n deza donn en legzanp isi dan Lasanble mon ti vwar en progranm L’Angleterre kot zot ti annan en progranm Mentorship se bann solda, akoz zot bann dimoun disiplinen, bann solda ki sorti servi aletranze, Iraq, Afghanistan ki retourn L’Angleterre zot adopte en zanfan e i annan en swivi kot zot annan en  serten contact hour avek sa zanfan par semenn.  Zot anmenn sa zanfan get foutbol, get whatever konmsi selman i en paran ki sa zanfan napa i tyonbo lanmen sa zanfan pou  mars avek.  E Sesel nou ti kapab fer sa, serten dimoun ki’n fer byen dan lasosyete i sign up pou nou mentor sa bann manrmay.

Prezan mon kestyon i vin lo ki’n arive avek Renesans Sosyal?  Nou’n envestir larzan,  i en progranm Nasyonal ki mannyer sa progranm i e-koule dan tou bann striktir ziska lekol pour ki ozordi nou pa ti ava pe diskit lo sa ki nou pe diskite ozordi.

Eski Minis pou Lafanmir i kapab dir nou ki’n arive avek sa  progranm? E si sa progranm i ankor la e i kapab ede evite ki i annan en lot lensidan parey?  Mersi bokou.

 

HON NICHOLAS PREA

Mersi Onorab.  Petet zis avan Minis, mon a pas la parol avek Minis Simeon mon osi mon en pti pe konsernen mon ti’n note down en pti pwen pou mwan lev-e vizavi statistic pou mon demande konbyen zanfan ki tonm dan sa kategori e nou annan plizyer bann Homes, konbyen bann zanfan si Lotorite i annan rikord konbyen bann zanfan ki dan sa bann Homes e ki bann swivi ki pe ganny fer?  But anyway Minis ti ava fer Lasanble ganny statistics pli tar.  Nou ava kapab konnen.  Petet Minis mon ti kapab menm demande ki apard donn nou statistics sa bann zanfan dan lekol zot bezwen osi okouran dan bann diferan Homes kot sa bann zanfan i ganny mete, donn nou sa osi tou nou ava kapab ganny en nide.  Bon Minis  pour Zafer Lafanmir, Madam Simeon.

 

MINISTER JEANNE SIMEON

Mersi Onorab pour ou kestyon. Mr Deputy Speaker mon ava fer en pti leksplikasyon lo Care Plan ki Onorab Henrie in mansyonnen.

Pou nou Care Plan i en package of support e i komans par assessment sa sityasyon ki nou vwar sa zanfan pe demontre.  I son lentervansyon ki i neseser pou donn li e osi sa constant revision sa lentervansyon ki nou donnen  pou regarde si i annan en lefe pozitif ouswa non.  Dan sa…ou’n met li dan konteks sa sant sa i pou form parti servis ki sa sant  pou ofer an term lentervansyon.  Si i son Care Plan.  Lo kote Servis Sosyal pou le moman an term  statistic, sa ki Servis Sosyal pe deal avek bann zanfan avek problenm, anti Sosyal, delenkans, bann zanfan ki nou kategoriz li konman high risk, nou annan nou 10 a 15 adolesan sa ki nou pe travay avek zot e avek zot fanmir ok ?  E sa osi i ganny refer avek Servis Sosyal sorti kot Minister Ledikasyon.  Sa i bann ka ki vreman high risk lezot ka Minister Ledikasyon atraver son bann diferan progranm i ape adres sa.

Pour progranm Renesans Sosyal parey nou konnen sa progranm i tous diferan laspe, i kouver diferan aksyon ki nou kapab fer pou donn sipor.  I annan son laspe kot i annan sipor lo kote zanfan.  I annan laspe ki annan son sipor lo kote fanmir e konman en progranm ki’n dire pour bann lannen ki’n pase, nou’n vwar in annan serten sikse ladan, serten keksoz ki nou’n kapab fer me osi parey tou progranm letan nou pe deal avek dimoun, avek fanmir, avek  serten lenstitisyon, nou osi vwar ki i annan serten defi. Me nou pe adres sa bann defi e nou pe annan en  letan la kot nou pe revwar bann sikse ki nou’n gannyen e osi bann persistant challenges ki nou’n rankontre pou nou kapab amelyore.  Mersi.

 

MR DEPUTY SPEAKER

Mersi Minis.  Onorab Henrie.

 

HON  GERVAIS HENRIE

Question arising Mr Deputy Speaker, Minis in nonm nou 10 a 15 manrmay me selman mon’n konpran mon pou dir sa sif in ganny li akoz Minister Ledikasyon i okouran  sa bann manrmay kekfwa zot ti dan sistenm skoler.  Eski dan Sesel ozordi as we speak i annan bann ka kot zanfan zot pa dan lekol me selman zot dan laz lekol ki zot zis alatrenn ki ou Minister pe deal avek?  Mersi.

 

MR DEPUTY SPEAKER

Mersi Onorab.  Yes Minis.

 

MINISTER JEANNE SIMEON

Mersi Onorab.  Mr Speaker sa 10 a 15 zanfan ki mon’n mansyonnen la se sa bann zanfan ki out of school ki Servis Sosyal pe travay avek, avek sorti referans sorti kot Minister Ledikasyon, in ganny sispann lekol, atraver son problenm disiplin, sityasyon anti-sosyal nou prezan nou pe take-up e nou pe travay avek Lafanmir avek sans ki i a kapab retourn dan lekol ouswa dan son formasyon Pos- Segonder pou li ganny en sans dan lavi.  Mersi.

 

MR DEPUTY SPEAKER

Mersi Minis. Onorab Arrisol.

 

HON SANDY ARRISOL

Mersi Mr Deputy Speaker. Bonzour Mr Deputy Speaker.  Bonzour tou dimoun a lekout.  Mr Speaker mon ti a kontan mon osi dir mon osi mon kontan mon vwar Madanm Hermitte la parmi delegasyon dan Lasanble Nasyonal ozordi.  Mon ti a kontan felisit  Madanm Hermitte pour sa zoli travay ki ou pe fer pou Minister Ledikasyon avek nou zanfan ki dan problenm e mon toultan demann mon lekor en kestyon si letan ou ale si nou pou annan en lot Madanm Hermitte ki pou kontiny lo sa bon semen, lo sa bon travay ki ou pe fer e Mr Speaker mon ti a kontan demann Minis letan nou pe koz vilaz Cap Ternay i fer mwan rapel bann progranm ki Minister Ledikasyon mon rapel letan Madanm Simeon, Minis  Simeon Minis ti ankor kot Ledikasyon ti annan sa progranm CEPT kot bann zanfan ti ganny anvoye Cap Ternay, bann zanfan ki  ti annan bann problenm disiplin pou zot al aprann bann keksoz vokasyonnel, bann keksoz pozitiv apre zot ti retournen akoz zot pa ti enterese avek bann zafer akademik.  Apre mon rapel letan Minis Simeon ti annan bann kanpman pou bann zanfan ti fer bann kanpman pour bann zanfan avek problenm disiplin.  Kanpman pour bann prefect, kanpman nenport ki laz zanfan sa ti ede tir bann zanfan dan letan vakans kot lakour anba move lenfilyans me ti met zot dan bann landrwa kot zot ti kapab aprann bann keksoz pozitiv.  E ozordi mon kontan poudir Cap Ternay pe al re ganny servi pou en keksoz pozitiv pou nou bann zanfan.

Alor mon ti a kontan demann Minis, Minis Ledikasyon, ti annan en letan dan Ledikasyon kot  ti pou annan en dimoun ki ti pou ganny apwente lo nivo bann lekol ki ti pou al rod bann zanfan ki pa vin  lekol pandan 3 zour.  Ti annan en tit ki ti donnen mwan ki’n bliye, kekfwa PS i a mazinen ti annan en dimoun ki’n arive avek sa ?  Ozordi nou pe koz lo sa bann zanfan ki pa asiste lekol.

Apre dezyenmman mon ti a kontan demann Minis an relasyon  avek bann Fwaye par egzanp Vilaz Prezidan kot mon’n tann Onorab Woodcock koz lo la.  Ki lenpak i annan lo bann zanfan ki reste dan bann fwaye par egzanp kot Vilaz Prezidan letan nou anmenn en zanfan avek konportman anti-sosyal dan sa latmosfer, ki lenpak i annan lo sa bann zanfan an relasyon avek bann konportman anti-sosyal ?  Mersi Mr Speaker.

 

MR DEPUTY SPEAKER

Mersi Onorab.  Minis.  Minis Morgan oule pran avan?  Yes go ahead please.

 

MINISTER JOEL MORGAN

Mersi Mr Deputy Speaker.  Mr Deputy Speaker pou reponn sa kestyon lo sa dimoun ki ti pou ganny apwente pou kapab rod sa  bann zanfan ki pa vin lekol pou 3 zour ouswa plis.  Annefe i annan en tel striktir an plas ozordi.  I pa par lekol.  I par zone ouswa par rezyon.  Nou annan nou sa ki nou apel en Attendance Officer.  Li sa zofisye i kouver, pou rezon bidzeter nou pa’n kapab fer enn pou tou bann lekol.  Pou le moman alors nou pe fer li par rezyon.  Li i kouver sa bann lekol anba son responsabilite.  E son travay li parmi lezot keksoz ki i annan pou fer se egzakteman sa.  I bezwen fer sir ki tou bann zanfan i attend e ganny lalis bann ki pa’n attend tel zour monitor e finalman pran aksyon par rod zot pou regarde kote zot ete  atraver kontak, avek zot paran e si  neseser kontak atraver bann lezot lenstitisyon parey lapolis ouswa Minister responsab pou Zafer Sosyal pou asire  ki nou kapab trace sa bann zanfan ki ler zot sipoze dan laklas zot pa en lot landrwa parey i le ka souvan ler zot pa vin lekol.  I en keksoz ki tre, tre enportan sa akoz bann paran i anmenn zot zanfan lekol ouswa i anvoy zot zanfan lekol e finalman zot pa konnen si zanfan in attend laklas ouswa non.  So nou annan sa responsabilite pou fer sir ki sa bann zanfan i vin lekol e i annan bann mezir ki nou pran apre sa ki natirelman   enkli bann paran pou fer sir ki si bann zanfan i kontinyelman annan sa problenm la nou bezwen elarzi scope travay ki nou fer enkli bann lezot Lazans parey Minister responsab pou Lafanmir pour asire ki nou travay avek sa fanmir e osi avek sa zanfan pou fer li attend lekol.  Truancy parey ou konnen dan  Education Act i pa permet e i en keksoz ki mandatwar.  Lekol i mandatwar pour tou bann zanfan dan Sesel pandan laz skoler e nou bezwen fer sir ki sa i ganny fer.  Ki nou bezwen fer nou bezwen ranforsi sa striktir lo nivo bann lekol kot i annan bokou truancy, bokou sa problenm e sa pe  ganny fer i annan en travay  osi ki pe ganny fer. E la nou rely osi lo staff lekol pou travay avek nou pou enform nou atraver zot class attendance Register ki zot annan, zot school attendance register tou zot ka kot i annan bann persistant offendersSo i en striktir ki an plas e mon krwar i mars ase byen.  Natirelman ou annan bann zanfan ki pa vini lekol.  Ouswa paran pa anvoye lekol ouswa paran  i les zot pa vin lekol.  A sa moman la nou bezwen escalate sa aksyon ki nou pran e involve bann lezot striktir leta pou deal pli aprofondi avek sa issue.  Mersi.

 

MR DEPUTY SPEAKER

Mersi Minis.  Minis Simeon ou le azout keksoz.

 

MINISTER JEANNE SIMEON

Mersi Onorab.  Mr Deputy Speaker.  Mon annan lenformasyon la mon krwar ti annan en Manm Onorab ki ti demande lakantite zanfan ki nou annan dan  bann fwaye pou zanfan.  Nou annan fwaye de Nazareth ki nou annan nou 13 zanfan, Vilaz Prezidan nou annan  nou 35 zanfan, St Elizabeth nou annan nou 10 zanfan e Solitude La Misere nou annan zis 1 pou le moman.

Pou kestyon Onorab Arrisol kot i konsern si nou assess lenpak konportman anti- sosyal bann zanfan e ki ganny mete dan Vilaz Prezidan mon ti a kontan dir poudir dan Vilaz Prezidan  pa tou zanfan ki annan problenm anti- sosyal.  I annan serten zanfan ki ganny mete laba akoz fanmir pa pe kapab deal avek zot problenm lafanmir.  So nou tir zot nou met zot laba in safety and security me pa neseserman ki zot menm zot, zot pe demontre bann problenm anti-sosyal.  Zot al lekol, dan lekol primer Port Glaud ouswa dan lekol Anse Boileau e lekol osi napa gran problenm avek zot.  Me i annan par kont serten zanfan ki letan nou vwar  i annan problenm konportman, problenm anti sosyal la avek Vilaz kot nou travay avek lo sa ki nou apel nou retourn ankor avek Care Plan ki Mr Henrie ti mansyonnen la ki nou deviz en Care Plan akoz dan Vilaz i annan li en Counsellor, i annan nou 2 ansenyan ki baze laba ki travay avek sa bann etidyan.  E nou Care Plan parey nou’n dir i baze lo son assessment lo son entervansyon neseser ki  fodre e nou swiv sa bann zanfan.

 

MR DEPUTY SPEAKER

Mersi Minis.  Onorab Arrisol.

 

HON SANDY ARRISOL

Mr Speaker zis en pti klarifikasyon mon ti a kontan dir Minis Lafanmir poudir mon ti pe demann li ler ou tir sandy Arrisol ki annan en problenm anti sosyal ou met li dan Vilaz Prezidan parmi bann zanfan ki napa problenm anti-sosyal ki lenpak Sandy i annan lo bann zanfan ki reste la an vi ki li Sandy i annan en problenm anti-sosyal?  Sa premye kestyon.

Dezyenm kestyon pou Minis Morgan an relasyon ek sa ki in dir mon ti a kontan si i ti a kapab fer mwan konnen lekel mon attendance officer pou mon zone kot mon distrik i ete silvouple pou mon kapab liaise ek li  an relasyon  ek bann zanfan dan mon distrik ek lezot distrik dan zalantour?  Mersi bokou.

 

MR DEPUTY SPEAKER

Mersi Onorab.  Minis.

 

MINISTER JEANNE SIMEON

Mersi Onorab.  Mr Deputy Speaker, i pa the norm pou nou met manrmay ki annan problenm anti-sosyal dan Vilaz Prezidan.  Letan nou’n mansyonnen taler ka Dylan ti enn bann  leksepsyon.  Nou ti napa en landrwa pou nou kapab donn li en labri e nou’n kontakte Vilaz e Vilaz ti pare pou ofer li en landrwa pandan ki  Social Services ti pe kontinyen rode kwa ki nou kapab fer pour siport sa garson. Vwala koman li in end- up dan Vilaz Prezidan.  Mersi.

 

MR DEPUTY SPEAKER

Mersi Minis.  Onorab William.

 

HON WAVEN WILLIAM

Mersi Mr Deputy Speaker.  Deputy Speaker mon ti a kontan demann Minis pour Lafanmir an menm tan Minis pour  Ledikasyon, lefe ki sa size i konsern tou bann Manm Onorab e mon konnen ki tou bann Manm Onorab zot annan en zistwar akoz zot tou zot sorti dan en distrik.  Minis taler ou’n koz lo en progranm konpreansiv e letan mon pe analize o nivo lokal distrik mon pe demann mon lekor sa kestyon si i annan osi en swivi konpreansiv, akoz ou kapab annan ou en progranm konpreansiv me si ou napa en swivi konpreansiv; akoz mon krwar poudir problenm la i lo sa swivi.

E dezyenmman eski Gouvernman pa’n ler pou petet konsider anmenn on board tou bann lorganizasyon non-sosyete sivil ki kapab donn en gran koudmen Gouvernman akoz Gouvernman pa pou kapab fer tou li menm.  Me mon santi poudir i annan serten lorganizasyon non-sosyete sivil ki pe fer serten bon travay dan sa direksyon e par egzanp la mon pe mazin bann groupman Relizyez lo kote distrik e i annan plizyer lezot ankor akoz i annan serten moman ki i annan en trou vid dan distrik apre lekol, apre ler,  e ou demann ou lekor sa kestyon eski bann akter baze  lo nivo lokal zot in ganny angaze pou kapab vreman donn sa swivi konpreansiv?

E dezyenmman eski nou pe servi nou medya ase byen?  Par egzanp la nou pe diskit lo sa problenm eski medya i tyonbo sa size e donn li  en pti pe plis lanpler sansibilizasyon ki nou bann dimoun zot ganny sansibilize akoz parfwa mon  krwar medya osi i kapab zwe en gran rol.

Deputy  Speaker si ou permet mwan, mon ti a kontan adres en kestyon Minis Ledikasyon.  Par egzanp mon annan en zenn la o nivo distrik,  nou’n sivre tou bann prosedir, e sa zenn li i pa anvi lekol li.  Sa zenn i anvi al travay.  Son paran osi in rekonnet nou’n anvoy en let kot Minister Ledikasyon, akoz san en let otorizasyon sorti kot Minister sa zenn pa pou kapab al dan lanplwa. E mon pe demann mon lekor kestyon se ki tou sa letan nou’n ekrir sa let nou pe esper en larepons nou pa ankor gannyen. E semenn pase Minis Lasante in vin isi dan Lasanble in eksplik nou en pti gin bann problenm ki vir otour bann zenn par egzanp bann zenn petet ki’n konsider komet swisid e tou sa la i konsern nou lo nou bann zenn e par egzanp dan sa ka la sa zenn li  i anvi al travay li be nou pa le larg son lanmen. E prezan parfwa osi mon demande, be akoz nou pa fer bann pti proze pilot osi lo nivo distrik bann Taskforce akoz parfwa i annan en serten problenm letan nou pe koz empowerment distrik i annan serten problenm ki nou kapab atak li o nivo lokal, distrik. Me mon ti a kontan ki i annan en pti pe plis sa partisipasyon lo nivo distrik pou nou  kapab osi ede.  E parey mon’n dir mon krwar poudir sa swivi konpreansiv osi neseser.  Mersi.

 

MR DEPUTY SPEAKER

Mersi Onorab.  I annan mon  krwar 2 bout dan sa kestyon.  Mon pa konnen Minis Morgan mon krwar ou le pran premye?  Apre Minis  Simeon ava swiv.  Go ahead Minis.

 

MINISTER JOEL MORGAN

Mersi Mr Deputy Speaker.  Mr Deputy Speaker mon pou koz lo sa pwen comprehensive follow-up premye epi petet  mon koleg Minis i ava osi pran lo nivo Zafer Sosyal e Lafanmir.  Lo nivo lekol nou annan en progranm swivi konpreansiv ki ganny fer par sa striktir ki mon’n koz lo la boner ki konmans dan lekol li menm li avek Special Needs Coordinator, avek teacher sa zanfan, avek headteacher, avek Management lekol e osi avek Schools Division kot dan Divizyon Lekol nou annan dimoun ki deal avek follow sa bann ka spesifikman, endividyelman dapre sak ka ki prezant son lekor  dan bann lekol e nou fer sir poudir nou sey otan  ki posib annan en progranm swivi pou sak zanfan e sa i ganny fer, e souvandfwa nou bezwen an plis ki sa apre ki in pas atraver en psikolog, in pas atraver en Counsellor lo kote Minister li menm li, ansanm avek paran nou travay avek bann lezot Lazans   Minister responsab pour Zafer Sosyal ensidswit, pou annan en swivi pli elarzi lo nivo lafanmir dan kominote.  So i annan en swivi konpreansiv ki ganny fer.  Petet i annan en mank lo nivo nonm mendev ki nou annan pou deal avek kantite problenm ki nou fer fas avek; ki vedir ki pa neseserman ki nou kapab dedye tou  letan ki nou ti a kontan, avek tou bann  ka spesifik ki nou annan e sa nou’n koz lo la pli boner an term nou mendev kalifye ki nou annan a nou dispozisyon pou nou kapab deal avek sa. Me selman nou  pe fer travay pou nou recruit ankor plis dimoun la mon pe espere ganny en psikolog  byento lo nivo Minister responsab Ledikasyon, mon Minister pou nou siport bann psikolog ki deza la ansanm avek ban lezot staff ki nou bezwen pou nou pou travay lo sa bann   case koumsa.

An sa ki konsern bann sosyete non-sivil, ou’n  nonm bann group Relizye.  Mon ti a kontan enform Lasanble ki mon’n deza zwenn avek Legliz Katolik e osi avek Education ă La Vie e nou dan prosesis pe siny en MOU avek Education ă La Vie ki en group relizye pou kapab entegre zot progranm Education ă La Vie dan PSE, progranm PSE dan bann lekol, Personal and Social Education dan bann lekol pou donn zot en slot spesifik dan sa Curriculum pou zot vin donn leson, pou zot vin prezante, pou zot vin travay avek sa bann zanfan dan laklas.  E sa i konsern laklas an antye nou pa pe target zis spesifikman bann zanfan ki annan problenm, me nou le travay avek tou bann zanfan dan laklas.  Mon krwar sa i en tre bon linisyativ. Mon an diskisyon avek Madanm Adrienne ansanm avek Per Lonnie lo la e i annan bann lezot ankor ki nou pe regarde pou nou kapab asire ki Religious Education par egzanp i ganny ranforsi; bann valer moral, relizye i ganny ranforsi a tou nivo bann relizyon dan bann lekol, pou asire ki nou re enkilke ankor bann bon valer dan nou bann zanfan.

Lo dernyen pwen ki Onorab in fer Deputy Speaker, sa zenn ki in koz lo la ki pa anvi al lekol, mwan mon pa’n vwar son let, me selman sa ki mon konnen se ki si en zanfan i dan S4 ouswa dan S5 e son paran i donn konsantman Minister i  release sa zanfan pou li al dan lemonn travay.  Alors sa i devret en prosedir ase otomatik si i lo nivo S4, S5.  Si i pa anba S4 i vin en pe pli difisil akoz i pa ankor akerir li en ledikasyon fondamantal de baz li nivo S3 ouswa pli ba.  Epi nou annan osi kestyon Employment Act Minimum age ki ou kapab al dan lemonn travay so i annan bann  progranm Apprentiship, i annan bann progranm kot nou plas bann zanfan dan lemonn travay atraver sa progranm ki nou fer  pou aprantisaz dan bann lekol.  So tousala  i bann striktir ki nou servi. Me  sa ka spesifik mon ava regard ladan apre.  Mersi Mr Deputy Speaker.

 

MR DEPUTY SPEAKER

Mersi Minis Morgan.  Minis Simeon.

 

 

MINISTER JEANNE SIMEON

Mersi Onorab.  Mr Deputy  Speaker pou azoute lo sa ki Minis Ledikasyon in eksplike; lo kote Departman Servis Sosyal, nou annan osi  swivi ki ganny fer lo nivo distrik.  Nou annan en Social Worker ki travay lo nivo distrik e i swiv nou bann ka ki nou annan dan son district in particular, i fer sa si i annan pou li kontakte lekol, si i annan pou li kontakte lekol travay konzwentman avek lekol. I travay bokou avek lafanmir.  Lafanmir kot nou annan bokou sa bann ka.  Home visits i ganny fer.  Counselling sessions i ganny fer avek lafanmir e osi nou annan en sistenm ki nou fer en fortnightly review; nou revwar nou bann ka lo nivo distrik lo baz  fortnightly pou vwar kote  nou pe ale eski nou pe achieve sa ki nou pe fer ouswa eski nou devret sanz la fason ki nou travay avek lafanmir.  Nou osi annan de ka kot nou fer bann case conferences avek bann lezot Lazans konsernan en ka kot nou vwar ki zot kapab zot osi donn en soutyen.  Me mon ti a kontan osi menm avek DAs dan distrik, nou annan sa bon relasyon kot nou kapab fer sa bann  swivi.  Mon ti a kontan a sa moman la, koz en pe lo rol fanmir.  Nou kapab fer bokou pou nou bann fanmir, me osi nou bezwen admet ki parfwa i tre difisil avek serten fanmir kot nou vwar poudir zot devret petet pran responsabilite an men e ed nou travay avek zot zanfan akoz nou tou nou pe travay pour byennet sa zanfan.  Son Counsellor kot lekol, son teacher kot lekol, son District  Administrator, son Social Worker nou tou nou bi se ki sou kapab si i annan en zanfan avek  problenm anti- sosyal si nou kapab travay avek sa zanfan e reisir re etabli li e fer li re entegre dan sistenm ledikasyon, sa i ti pou en sikse pou nou tou. E ladan paran i annan en gran rol osi pou zwe.  Ok.  Kan nou, nou entervenir parfwa se ler nou vwar i annan kek mank ouswa kek breakdown dan lafanmir kot nou bezwen donn sa soutyen, donn sa sipor.  Paran kot keksoz i mars byen, tou keksoz i mars byen e nou tou bann travayer ki siporte nou kontan e nou donn zot sa lankourazman pou kontinyen donn sipor zot zanfan. E nou kot nou, sa ki nou entervenir ladan se ler nou vwar poudir keksoz pe konmans degrengole, nou vwar ki zanfan kot lekol per perdi, tanzantan i pe ganny sispann pe anvoy dan lakour ki pa  normal, akoz i pe mank keksoz dan son ledikasyon so se  sa ki nou  met an plas sa ki nou’n dir taler nou Care Plan pou kapab anmenn en stabilizasyon dan  son konportman e fer li ganny sans retourn lekol si  in ganny sispann i dan lakominote. Me ankor enn fwa travay avek fanmir, fanmir osi donn nou sa sipor.  Mersi.

 

MR DEPUTY SPEAKER

Mersi Minis.  Onorab William.

 

HON WAVEN WILLIAM

Mersi Mr Deputy.  Mr Deputy mon ti a kontan dir Minis Morgan ki nou a re  anvoy sa case ankor akoz sa let in ganny anvoye nou a re fer li ganny sa let akoz nou vreman konsernen avek sa ka.

Dezyenmman  baze avek sa Minis Lafanmir in dir, mon ti ava demande si par egzanp zot ti ava konsider osi bann linisyativ lokal akoz i annan  diferan akter o nivo distrik e mon  konnen poudir par egzanp enn i annan District Team me ki nou dekouver se ki i annan en trou vid apre lekol e i annan en  bann ler kot ou trouv zanfan pe fer en serten keksoz ki pa sipoze fer; selman parfwa ou pa kapab tro entervenir akoz ou santi poudir ou pe enterfer ouswa ou ganny dir poudir be la ou pa devret pe  enterfer. Me nou ti a kontan ki enn nou se ki nou ganny en pti pe plis sipor si par egzanp nou vin avek bann linisyativ lokal.  Parey mon’n dir se ki i annan  bann   linisyativ lokal ki parfwa i kapab marse me si  letan ou pe vin devan nou ti a kontan ki Minister petet i konsider travay en pti pe plis avek linisyativ lokal osi tou akoz mon konnen i annan serten linisyativ ki marse.  Mersi.

 

MR DEPUTY SPEAKER

Mersi Onorab.  Minis pour Lafanmir ou le dir keksoz lo la?

 

MINISTER JEANNE SIMEON

Mersi Onorab.  Mr Deputy Speaker, mon byen kontan akey sa sizesyon ki Onorab in mete la, e i enportan ki nou annan keksoz lo nivo lokal, lo nivo distrik.  Se sa ki ler mon ti pe set-up nou  Minister mon ti meet avek nou partner kle.  Nou ti meet avek CEPS, nou ti meet avek SIFCO, nou’n zwenn avek CARE e sa bann Lasosyasyon, Lorganizasyon Civil  Society la, in asir nou ki zot pou donn nou sipor dan okenn  linisyativ ki nou pou fer ki kapab enkli zot ladan pou  asiste zot dan travay ki nou pe fer.  Savedir nou’n already ganny lasirans zot langazman ok? E lo kote distrik osi nou  pe anvizaze parey ou’n mansyonnen la travay avek Ladministrasyon Distrik, travay avek sa travayer spor, Youth dan distrik pou nou kapab  gete ki kalite progranm ki nou pou kapab ofer sa bann zanfan parey ou’n dir. Mon osi mon okouran ki  apre lekol i annan ki paran pa ankor ariv kot lakour, paran  ankor dan travay, apre lekol zot en pti pe larg parey nou dir. So nou pe travay, mazin lo la tre for pou nou kapab regarde si dan sak distrik ansanm avek zot DA zot Youth Worker, zot Counsellor, Lasosyasyon Spor dan distrik si nou kapab met an plas bann progranm kot nou kapab ankadre sa bann manrmay dizon depi 3er ziska 6er parla kot nou konnen poudir la prezans paran in arive kot lakour so zot kapab antre kot zot pou al kontinyen fer zot homework, eksetera. Ok?  Mersi.

 

MR DEPUTY SPEAKER

Mersi Minis, mon krwar i en bon sizesyon akoz bann ler parey, bann fasilite dan distrik i lib i a disponib.  I zis fason ki mannyer nou pou ankadre sa bann zanfan lekol pou kapab kit zot occupied ziska ler zot kapab antre kot lakour.  Onorab Georges.

 

HON BERNARD GEORGES

Mersi Mr Speaker.  Mr Speaker i annan detrwa letan pase nou pli gro problenm isi Sesel ti problenm ekonomik e  nou’n arive rezourd sa problenm.  Ozordi i kler ki nou problenm se problenm sosyal.  Sa nou problenm nimero enn.  Depi bomaten mon pe ekout sa 2 Minis e zot in dekrir nou en levantay keksoz ki annan  dan zot Minister respektif dan distrik eksetera. me still Dylan Rose in mor a laz  13 an dan en fason inakseptab, savedir i annan still malgre tou sa bann linisyativ i annan en mankman  somewhere e mon krwar avek ou permisyon mon ti ava kontan met devan sa 2 Minis ki si sa ki mwan mon krwar i sa mankman  pou zot konsiderasyon.  Tou sa bann progranm ki nou, nou tande depi bomaten, se bann progranm ki disjointed e se bann progranm ki reaktif. E nou tou nou konnen ki problenm sosyal i arive prensipalman akoz – parey Minis  Lafanmir fek dir e mon kontan ki in dir sa, i annan en mank responsabilite dan bokou fanmir pou pran zot responsabilite serye.  I annan donk en travay ledikasyon pou fer dan sa area.  I annan en mank manpower lo teren akoz se lo teren ki travay i bezwen prensipalman ganny fer pou anpes en lot ka parey Dylan Rose arive e nou konnen ki i annan en mankman Travayer Sosyal enorm.  Serten distrik parey sa ki pou mwan i bezwen partaz en Travayer Sosyal avek en lot distrik.  E se sa bann dimoun ki sipoze la koman nou premye lizye dan distrik pou vwar sa bann keksoz.  I annan mankman en sant e la mon bezwen dir ki lontan, lontan nou pe koz sant.  Mwan menm mwan mon’n anmenn en Mosyon da sa Lasanble pou demann en  sant egzakteman  sa ki nou pe koz lo la ozordi e malerezman ti annan 22 Manm lo lot kote e mon Mosyon in ganny defet.  Akoz, akoz a sa moman zot ti dir non, non, non, non se lafanmir ki devret deal avek sa bann dimoun se pa en lenstitisyon ki devret deal avek zot. Ozordi plizyer lannen pli tar nou retourn ankor lo sa ki nou, nou ti’n propoze. Alor mon kestyon pou sa bann Minis ozordi,  se eski zot pa krwar ki avek sa bann defayans ki nou annan e pou anpes en lot  Dylan Rose perdi son lavi, eski nou pa devret recruit, recruit e recruit ankor plis Travayer Sosyal e ogmant, ogmant e ogmant zot saler avek zot kondisyon travay, pour ki sa bann dimoun lo teren ava  kapab ansanm avek sa bann lezot Lazans ki annan i ava kapab an premye lye fer en swivi de baz avek sakenn sa bann  manrmay delenkan?  Mersi Mr Speaker.

 

MR DEPUTY SPEAKER

Mersi Onorab Georges.  Minis Simeon.

 

MINISTER JEANNE SIMEON

Mersi Onorab pou ou kestyon.  Mr Deputy Speaker, mon rekonnet parey  Onorab Georges in mansyonnen mon’n dir taler dan mon lentervansyon ki nou mank mendev kalifye, mendev spesyalize ki kapab travay avek nou bann fanmir avek nou bann zanfan.  Nou rekonnet sa e nou pe fer neseser, nou pe fer bann preparasyon  pou nou kapab ganny sa bann  mendev. E recruitment dan Departman  Social Services nou pe recruit me osi nou bezwen admet ki tanzantan nou osi perdi enn de petet zot in vwar greener pastures me pa zis rekritman ki nou pe angaz nou ladan, akoz la in the last two or three weeks mon krwar nou’n recruit nou apepre 5 Social Workers ki pe al travay lo nivo distrik me sa ki pli enportan osi se sa training. Akoz nou pa kapab pran nenport ki dimoun pou vin en Social Worker.  En Social Worker i bezwen annan son formasyon  neseser si i pou kapab donn en servis de bon kalite lo nivo distrik.  Sa osi i en sityasyon ki nou pe fer fas avek e ki nou pe osi diskite avek Lazans konsernen kot nou kapab recruit sa bann e anvoy zot atraver training avan ler ki nou met zot lo teren pou fer travay ki nou ti a kontan zot fer. Me parey nou pe dir nou konsyan nou bann defi, nou konsyan nou bann mank ki nou annan e nou pe fer en travay pou nou kapab ranforsi nou Minister, ranforsi nou Departman ki nou ava kapab travay avek  bann zanfan, bann paran.

E lo kote Social Workers nou pe revwar zot Scheme of Service pou nou kapab get dan zot  welfare parey nou dir ki zot a kapab ganny en reminerasyon ki egal avek sa travay delika, sa travay difisil ki zot annan pou fer avek zanfan avek nou lafanmir.  So fotespere ler the Scheme of  Service a’n pare mon krwar  byen zot pou vin devan zot a ganny sipor Lasanble, pou nou kapab donn zot sa, zot osi konman Social  Workers sa lankourazman, sa motivasyon pou zot donn nou en bon servis.  Mersi.

 

MR DEPUTY SPEAKER

Mersi Minis Simeon.  Minis Morgan ou le azout keksoz.

 

 

MINISTER JOEL MORGAN

Briyevman Mr Deputy Speaker mon pou dakor avek Onorab Georges dan son obzervasyon ki nou bezwen entansifye travay lo teren e ki i annan en pe mank bann dimoun spesyalize, bann dimoun ki’n ganny formasyon neseser ; sirtou par egzanp lo nivo mon Minister dan bann lekol.  Nou bezwen kontinyen envestir e mon pou osi dakor avek li Mr Deputy Speaker ki ozordi nou problenm pli grav  dan nou pei se sa problenm sosyal.  E sa nou vwar li osi dan lekol, akoz nou vwar rezilta performans bann zanfan desann e i desann  lannen apre lannen e i pe desann.  So i enportan ki nou ratrap sa sityasyon e ki nou envestir dan bann keksoz ki nou bezwen envestir ladan, pou kapab redres sityasyon o pli vit posib.  Mr Deputy Speaker mon ti a kontan zis fer resorti en pwen ki mon’n koz lo la taler an sa ki konsern formasyon training lo nivo bann spesyalis.  Parey mon’n dir zis pou ranforsi sa pwen mon’n demann  ANHRD osi pou ankouraz bann etidyan  ki fini lekol, ki annan grad neseser pou al Liniversite pou fer bann degre neseser, bann formasyon iniversiter neseser, dan bann diferan domenn ki relye avek sa problenm ki nou pe koz lo la dan Lasanble bomaten. So hopefully osi atraver sa nou ava kapab donn en pe plis enpilsyon an term annan dimoun dan nou bann diferan lenstans administratif dan Gouvernman, pou kapab ede avek sa problenm.  Mersi.

 

MR DEPUTY SPEAKER

Mersi Minis.  Bon letan pa dan nou faver  mon ankor annan 13 Manm ki’n lev lanmen so mon ti a zis diriz zot, mon konnen ki i en size ki primordyal ki konsern nou tou, pa fer gran statement si nou kapab al spesifikman lo kestyon pour le 2 Minis e petet ma diriz le 2 Minis pou al en pti pe bref dan zot repons.  Onorab Aglae.

 

HON EGBERT AGLAE

Mersi Mr Deputy.  Bonzour Minis avek PS.  Dan larepons ki Minis in fer sorti, in fer  resorti ki i pa the norm pou zot plas bann zanfan avek diferan problenm spesifik ansanm ki kapab koz serten lezot problenm ankor, alors mon  kestyon i konm swivan.

Dapre zot analiz konbyen kategori zanfan pou bezwen ganny enstitisyonnalize? E baze lo repons ki zot pou donnen konbyen lenstitisyon, mon konnen ki i annan ki deza egziste konbyen lenstitisyon ki zot pou bezwen kree pou  akomod sa bann kategori ?  Mersi.

 

MR DEPUTY SPEAKER

Mersi Onorab.  Minis pour Lafanmir, Minis Simeon.

 

MINISTER JEANNE SIMEON

Mersi Onorab.  Mr Deputy Speaker lo sa ki Onorab Aglae pe avans devan mon pa tro kler lo la, me selman kot i konsern konbyen lenstitisyon ki nou bezwen kree i pa dan nou plan pou nou kree en Lenstitisyon pou  deal avek en kategori zanfan ouswa en lot kategori zanfan ki  annan en problenm anti-sosyal.  Dan sa Sant kot nou pe al kree i pou annan son assessment ki pou ganny fer e baze lo son difikilte ki i pe rankontre, la son progranm ki i pou ofer diferan progranm pa lenstitisyon, pou annan diferan progranm ki pou ganny fer pou kapab ed li avek sa problenm ki i pe fer fas avek.  Se sa ki nou’n dir nou bezwen ban profesyonnel spesyalize ki kapab fer en bon assessment e dir nou eski sa i en problenm medikal ?  Eski sa i en problenm sosyal ki nou kapab apre fer sa plan pour nou kapab donn li son servis, son sipor neseser.  Ok.  So i pa konbyen lezot Lenstitisyon.   Sel ki nou’n dir la bomaten se ki ban  ki annan problenm labi sibstans, sa i pe ganny pran zot reabilitasyon, zot ledikasyon, zot prevansyon, sa i pe ganny pran  an men avek en lot Lazans. So i pa pou dan sa sant.  Nou pa pou ofer li sa progranm pou li rehabilitate li lo son drug abuse ki i annan.  Sa i pou ganny fer avek en lot Lazans.  Nou, nou pou deal avek bann problenm konportman anti-sosyal e apre assessment parey mon’n dir diferan progranm pou ganny met an mars, nou bezwen  pran li dapre son needs.  Nou pa kapab annan en blanket pou kouver zot tou anba la nou bezwen annan assessment e gete kwa ki nou kapab fer pou sa enn. E Kwa ki nou kapab fer pou sa lot e sa ankor mon’n dir mon Minister pou travay avek tou bann Lazans konsernen pou nou kapab arive donn sa servis nou bann zenn zanfan ki pe vwar zot an difikilte, e osi donn sipor zot fanmir pou kapab soutenir zot.

 

 

MR DEPUTY SPEAKER

Mersi Minis.  Onorab Aglae.

 

HON EGBERT AGLAE

Mersi Mr Deputy.  Zis pou eklersi Minis ler mon pe demann sa kestyon mon pou donn en legzanp par egzanp nou annan orphan i deza en lenstitisyon Vilaz Prezidan so ler nou pou annan  bann zanfan parey nou pe koz adikt, nou pe koz zanfan ki delenkans, nou pe koz zanfan ki truancy, konmela nou pe ganny zanfan ki supernatural osi; tousala i bann problenm ki nu pa pou kapab met anba en sel parasol pou deal avek. Se sa ki mon pe demande si nou pou bezwen kree bann lenstitisyon malgre dan sa progranm, sa lenstitisyon ki ou pe fer, ou pou annan bann diferan progranm anba la me selman nou konnen, nou pa pou kapab pran tou sa bann zanfan plas dan menm lenstitisyon plas dan menm building, pou deal avek.  Mersi.

 

MR DEPUTY SPEAKER.

Mersi Onorab.  Minis.

 

MINISTER JEANNE SIMEON

Mersi Onorab.  Mr Deputy Speaker mon krwar mon’n fini reponn sa kestyon, letan mon’n dir poudir nou pa pou kapab dir si ou annan problenm delenkans nou bezwen kre en lenstitisyon pou problenm delenkans, nou bezwen kree en lenstitisyon pou problenm sove lekol, nou pa kapab kre en lenstitisyon pou problenm sove lekol.  Sa ki  nou bezwen fer se bann progranm pou adres sa bann sityasyon. Zot kapab bann ki …sel keksoz ki nou pa pou kapab met anba menm twa se bann ki annan lofans kriminel ok?   Sa i en lot zafer me dan sa sant nou pou annan progranm pou tret bann ki sove lekol, akoz ler i pou vin kot sa sant la i pou’n fini diagnose lekel son problenm e avek  bann personnel ki travay avek sa sant nou pou fer son plan ki mannyer nou pou kapab re etabli li.

 

MR DEPUTY SPEAKER

Mersi Minis.  Onorab Andre.

 

HON CLIFFORD ANDRE

Mersi Mr Deputy Speaker.  Mr Deputy Speaker mon vreman dezapwente letan mon’n tann Minis in dir ki poudir nou napa statistik.  Semenn pase Minis Adam in vin dan sa menm sa Lasanble avek en statistik ki ti’n ganny fer dan lekol.  Eski nou pa pe gaspiy resours – mon bezwen dir li koumsa olye annan 25 survey akoz nou pa ti compile tousala pou nou fer sir no ganny serten statistik ki ti ava reflekte lo nou pou nou kapab fer serten aksyon lo la ? Avan mon kontinyen mon  ti a kontan eksprim non senser kondoleans avek lafanmir vi ki mon konn tou le de kote, lo kote son papa ek lo kote son manman mon ti a kontan eksprim mon senser kondoleans personnel e sa ki pou mon fanmir pou zot.  Mr Deputy Speaker mon egalman, Mr Deputy mon egalman dezapwente akoz i annan en zenn fiy ki ti lekol La Pointe Larue.  In annan bann sityasyon, mwan mon’n deza al kot CID letan li in ganny anmennen dan minot, zenn fiy, dan minot kot gard,  dan minot kot gard.  Son manman in sey fer tou keksoz pou son fiy kapab ganny en sistenm pou li kapab re abrit lo la.  In tir li dan lekol in met li travay.  Lotrozour Minis Simeon in pas  laba kot sa fiy pe travay, son manman in telefonn mwan  a sot larm i dir Minis i dir i pou tir li kot i pe travay kot prezan i annan mwens problenm pou retourn li lekol.  Son manman  i demann mwan be konmsi kwa sa.  So mon pe zis port sa a latansyon Minis ki parler nou osi nou ede pou kree en sityasyon kot manrmay i donn nou problenm.  Sa pou Minis Lafanmir. E boner in dir nou i annan en plan tanporer e kekfwa mon pa’n tande oubyen bokou nou demann kestyon, ki sa plan tanporer ?  Mon pa ankor tann byen.  Lot kestyon se pou mon pe adres li avek Minis Ledikasyon, Minis dan bann lekol – at least sa ki mwan mon’n ganny dir letan 8 er oubyen 8er mwen kar i sonnen baro i fermen.  Manrmay ki vin an retar i ganny fer tournen i pa antre dan lekol.  Eski sa i pa en motivasyon pou bann zanfan ki  zot lentere se pa pou vin lekol, alors zot vin tar, lekol i fer zot tournen aprezan  paran i krwar zot vin lekol e zot dan bann sityasyon ki pa dezirab e ki sosyete  i pa tolere.  Eski osi Minis  i pa annan tro…

 

MR DEPUTY SPEAKER

Onorab round-up.

 

HON CLIFFORD ANDRE

Wi dernyen la.  Nou pe rounding-up menm la.  Eski  i pa annan tro pti git Minis bann sekirite ki train pou kapab idantifye bann sityasyon e osi met sa bann sityasyon an kontrol ? Lotrozour ti annan manrmay i fer sekirite…i harass Sekirite e zot pa kapab kontrol sa bann zanfan.  Eski i pa annan tro pti git sekirite? Kekfwa bezwen met 2 e zot very well train pou kapab tackle sa bann sityasyon.  Mersi.

 

MR DEPUTY SPEAKER

Mersi Onorab.  Mon a demann Minis lafanmir pou pran son bout kestyon swivi par Minis Morgan.  Minis Simeon.

 

MINISTER JEANNE SIMEON

Mersi Onorab.  Mr Deputy Speaker eski nou kapab demann Onorab Andre pou eklersi mwan lo sa kote sa zenn fiy ki lekol La Pointe Larue ki mon’n pas kot i travay e ki mon’n demann li pou li retourn lekol akoz mwan mon napa okenn re- koleksyon.  Mersi.

 

MR DEPUTY SPEAKER

Onorab.

 

HON CLIFFORD ANDRE

Minis mon ava zwenn ou mon ava dir ou akoz mon krwar kekfwa i pa apropriye piblikman, i pa apropriye piblikman pou mwan nonm non sa fiy me selman mon ava dir ou sa letan ou’n fini selman…

 

MR DEPUTY SPEAKER

Mersi Onorab.  Onorab dan Break ler nou pran Break ou ava vwar Minis ou ava donn li sa lenformasyon.

 

MINISTER JEANNE SIMEON

Mersi Onorab.  Mersi Deputy Speaker.  Mon ti a’n voudre omwen  Onorab Andre ti ava dir kote sa zanfan i travay pou esey  ouver mon lespri pou mon konnen kote mon’ n pase pou mwan dir poudir sa zenn fiy i devret retourn lekol.  E si ti annan en ka kot sa ti arive mwan mon pa pe kapab dir sa zenn fiy retourn lekol akoz mon travay avek tou sa bann  lezot Lazans. So si ti annan en sityasyon koumsa premye landrwa kot mon ti pou ale se kot Minister Ledikasyon, akoz si pou entegre li dan  sistenm lekol mon bezwen diskit avek Minister Ledikasyon, mon pa pe kapab al dir sa fiy ou, ou bezwen retourn lekol ouswa ou pa devret la kot ou été.  Si en progranm in ganny fer avek Minister Ledikasyon ki’n plas li dan lanplwa mwan mon pa ti pou tro okouran akoz in met li la, i kapab Apprentiship, i kapab en lesey pou met li dan en lanplwa akoz ou pe dir poudir i annan en problenm konportman i kapab en progranm ki pe ganny fer avek Minister Ledikasyon. E mwan mon pa pe kapab enterfer dan  progranm Minister Ledikasyon vi ki Minister Ledikasyon i enn mon  pli gran partner dan Minister zafer Sosyal. So mon ti a vreman kontan akoz la ou’n mon pran sa konman en lakizasyon ki ou’n met devan somon ti a kontan si ti posib devan sa Lasanble ou ti ava dir lekel sa dimoun, kote i travay pou nou kapab met the  record straight.  Mersi.

 

MR DEPUTY SPEAKER

Onorab Andre  petet san mansyonn non sa dimoun donn en pti leklersisman kote i travay zis pou rafresir memwar Minis.

 

HON CLIFFORD ANDRE

Bon  Minis ankor enn fwa mon pou eklersi ou an term son paran kekfwa i ava vin en pti pe pli kler.  Son paran i travay ek gard e sa fiy in ganny let sorti kot Minister Ledikasyon pou li al lo sa  progranm.  Se sanmenm sa ki son paran letan sa ti’n arive, i pe fer hairdressing li mon pa pou dir nou non, selman i pe fer hairdressing mon a dir ou son non taler, hairdressing letan sa in arive in pran kontak avek mwan, in dir mwan  ki mannyer en bout lebra Gouvernman i dir li al fer sa met li lo sa progranm, in dir mwan apre letan ou ou’n pase in ganny dir poudir nou pou fer  le neseser pou fer ou retourn lekol. Alor se sa ki’n adrese, kekfwa sa i jog en pti pe memory me selman pou dir ou non taler mon ava dir ou son non Minister.

 

MR DEPUTY SPEAKER

Ok.  Minis kontinyen.

 

MINISTER JEANNE SIMEON

Mersi Onorab.  Mon ankor en pti pe konfize so mon pe ekspekte ki Onorab i a kapab eklersi mwan en pti pe lo la taler.  Mersi.

 

MR DEPUTY SPEAKER

Mersi Minis.  Minis Morgan.

 

MINISTER JOEL MORGAN

Mersi Mr Deputy Speaker.  Mr Deputy Speaker mon ti a kontan koriz sa deklarasyon ki Onorab Andre in fer ki’n dir ki mon’n dir nou napa statistik, in fer referans avek Minis Lasante, sa 2 rapor ki Minis Lasante ti prezant avek Lasanble semenn pase.  Annefe Mr Deputy Speaker mon ti pe reponn en kestyon Onorab Mondon ler i ti pe demann mwan lenformasyon, detay lo konbyen zanfan i tonm dan bann diferan kategori e mon ti dir li mon napa sa bann lenformasyon avek mwan la.  Lenformasyon mon ti dir petet Onorab pa’n port atansyon, mon ti  dir ki mon ava fe Lasanble ganny sa lenformasyon.  Mon ti a  kontan asir Lasanble ki nou pa pe gaspiy resours Gouvernman Mr Deputy Speaker.  Sak Departman i kordin travay ki nou fer an term statistik ; par egzanp bann statistik ki Minis Lasante in prezante semenn pase i tre enportan pou nou e nou’n  travay avek zot dan sa legzersis pou koleksyonn sa bann  lenformasyon dan  bann  lekol segonder S1  ziska S5 e parey zot in vwar zot menm sityasyon i ase enkyetan vizavi sa travay statistik ki‘n ganny fer.  Mr Deputy Speaker an sa ki konsern sa kestyon ferm baro e anpes zanfan antre an  2015 ti annan bokou zanfan ki ti ariv lekol tre tar e a sa letan la Minister responsab pou ledikasyon ti pran en desizyon pou ferm baro 8er e a en moman donnen ler sa polisi ti ganny aplike serten sa bann zanfan ki ti ariv sa ler ou swa pare pa ti kapab antre dan lekol, me apre sa Mr Deputy Speaker Polisi in ganny revize e an se moman bann zanfan ki ariv lekol an retar, wi baro i fermen, me zot pa ganny re anvoye se zot ouswa pou  zot al roam around partou  parey nou dir.  Sa ki arive se ki zot ganny met kot baro prezan en zofisye lekol, en Senior Management Officer ansanm avek zofisye sekirite i vin log tou zot bann rezon pou zot lateness, pou zot retar ki zot in gannyen epi zot ganny admet dan lekol.  Lefe ki nou pe fer sa bann paran prezan i kapab fer en swivi pli kontinyel, akoz nou annan lenformasyon ke ler bann zanfan in vini ki’n arive ek zot and so on bann paran i ganny apele, zot ganny feedback lo bann sityasyon.  E nou’n vwar poudir sa sityasyon ariv an retar lekol in bokou redwir dan mazorite  nou bann lekol ozordi e mon krwar i en  keksoz pozitiv ki nou kapab koz lo la konman en good news e sityasyon pe kontinyen amelyore e nou pa pe zis pou reasir Lasanble nou pa pe met zanfan an deor baro dir zot retourn se zot ouswa al marse  wherever anymore nou pe al met zot dan lekol e si neseser nou apel zot paran a sa moman.  Mersi.

 

MR DEPUTY SPEAKER

Mersi Minis.  Onorab Andre vitman.

 

HON CLIFFORD ANDRE

Minis Simeon pa’n reponn sa progranm tanporer.

 

MR DEPUTY SPEAKER

Wi Minis Simeon.

 

MINISTER JEANNE SIMEON

Mersi Onorab.  Mr Deputy Speaker plan tanporer  k Onorab Andre pe mansyonnen se sa ki mon ti’n dir en Sant tanporer pou nou  kapab kontenir sa bann zanfan an atandan ki nou sant Cap Ternay i finalize.

 

MR DEPUTY SPEAKER

Mersi Minis.  Onorab Sebastien Pillay.

 

HON SEBASTIEN PILLAY

Mersi Deputy Speaker.  Mr Deputy Speaker avan mon konmanse mon ti a kontan …personnel lo mon fanmir,  eksprim mon senser kondoleans avek lafanmir Dylan.  I toultan difisil ler ou perdi en manm ou fanmir sirtou enn ki tre zenn so hopefully atraver avek sa ki nou pe fer ozordi nou kapab anmenn en serten solisyon pour ki sa i pa ariv ankor avek lezot zenn.  Mr Deputy Speaker mon ti a kontan demann le 2 Minis la, an vi ki i kler poudir zot annan diferan progranm anba diferan parasol, ki enkorpor diferan lentervansyon ki bezwen ganny fer par diferan Lazans.  Eski zot pe anvizaze dan fitir imedya, pou anmenn sa bann progranm dan en fason kordinen ansanm, pou ki nou pa end up ek en sityasyon kot sakenn pe…tou dimoun i annan bon lentansyon pou sey rezourd sa problenm me selman ou bezwen annan en serten mode kordinasyon.  Mon dir sa Mr Deputy Speaker akoz pandan Break letan ki mon’n ekout bann larepons ki mon’n gannyen mon’n al fer en pe resers pou vwar enternasyonalman ki bann progranm ki annan mon’n  come across bann diferan progranm e enn bann eleman kle dans a bann  progranm se ki zot annan bann plan d-aksyon ki defini bann diferan outcomes ki zot bezwen gannyen.  So ki mannyer…eski zot annan en lentansyon maye sa bann progranm ansanm?  E si zot annan lentansyon fer li ki mannyer zot pou fer li dan en fason ki nou pa met tou nou  dizef dan en sel pannyen pou dir ki sa Reform Centre oubyen lenstitisyon ler i fer i pou rezourd tou problenm.  Be  nou konpran – konmsi nou apresye lefe ki sa problenm i bezwen ganny deal avek, menm ler zanfan pa ankor konmans egzibit sa bann problenm behaviour.  En lot parti mon kestyon Mr Deputy Speaker si ou a permet mwan, mon annan en zanfan ki dan segonder, mon annan en zanfan ki dan primer, mon  al lekol Segonder Beau Vallon ase souvan kan  mon kapab, eski Minister Ledikasyon atraver travay ki Minister Lafanmir pe fer Departman Zafer Sosyal, mon konnen poudir dan Social work i annan bann diferan letap ki ou bezwen swiv, mon krwar assessment e planning entervansyon eksetera;  eski  Minister Ledikasyon an partenarya ankor enn fwa go back ek sa kordinasyon, zot pa pe vwar  nesesite pou anmenn Departman Zafer Sosyal on board pou ki si zot le fer en lentervansyon en pe pli direk lo bann zanfan dan lekol, ki nou annan sa prosedir ki arive avan ki nou move – sa next step pou al anmenn sa zanfan dan bann landrwa pou al rod solisyon.  E si nou pe fer li eski nou kapab ogmant lanpler ki nou pe fer li avek?  Si zot ti kapab reponn sa 2 pti kestyon.  Mersi Mr Deputy Speaker.

 

MR DEPUTY SPEAKER

Mersi Onorab.  I annan 2 kestyon.  Minis Simeon  ou a pran avan apre Minis Morgan i a reponn son morso.  Go ahead Minis Simeon.

 

MINISTER JEANNE SIMEON

Mersi Onorab pou ou kestyon.  Mr Deputy Speaker, bann progranm ki Minister Ledikasyon i fer parey mon’n  dir taler, mon Minister i travay an etrwat kolaborasyon avek lezot Lazans enkli Minister Ledikasyon. So nou travay ansanm par egzanp kot i annan pou fer avek bann assessment, nou travay ansanm pou fer avek bann swivi so i annan already, i annan sa kordinasyon i annan sa partenarya ant nou 2 Minister.  Nou annan bann Social Worker ki travay avek bann zanfan me osi avek konesans, lentervansyon osi lo kote Minister Ledikasyon so nou ki nou kapab fer se ranforsi parey ou pe sizere, ranforsi sa travay ki nou pe fer ki nou kapab petet ganny en rezilta ki pli dirab, me selman i annan sa korperasyon, i annan sa kolaborasyon.  Mersi.

 

MR DEPUTY SPEAKER

Mersi Minis Simeon.  Minis Morgan.

 

MINISTER JOEL MORGAN

Mersi Mr Deputy Speaker.  Mon ava bref akoz kestyon letan.  Mr Deputy Speaker mon ti a zis kontan dir ki wi nou annan en  kolaborasyon etrwat sirtou avek Departman responsab pou Zafer Sosyal.  Nou osi avek bann  lezot Lazans Konsernen par egzanp Departman responsab pou lazenes.  An sa ki konsern parey Onorab Pillay in dir, relye tou bann progranm ansanm.  Marye tou bann progranm ansanm ki nou pe fer.  I annan en prosedir ki nou escalate, ler i konmans dan lekol apre sa i al kot  nivo Minister li menm li; lo nivo bann counsellors, psikolog ki nou annan e sa moman la n ou alert bann partner ouswa menm avan si i en problenm ki konsern lafanmir, nou alert bann lezot partner pou travay ansanm lo en progranm konpreansiv  vize lo sa zanfan e vize lo fanmir sa zanfan e son bann dimoun ki petet i pros avek li.  I en keksoz ki nou pe fer.  I en keksoz ki nou kordinen e ki i mars byen.  Nou annan bann ka of course kot par egzanp dan ka Dylan nou pa’n kapab sov li.  E sa i tre malere, i tre malere me selman nou annan bann success stories.  I annan en kantite zanfan atraver sa bann progranm ki mon’n nonmen bomaten kot nou’n pran 200, nou’n pran 140, nou’n pran 120.  I annan en kantite zanfan ki ozordi i pe fer byen akademikman, lo kote vokasyonnel osi dan bann lekol.  So nou annan sikse ki nou kapab achieve.  So  baze lo la mon krwar zis nou bezwen ranforsi, nou bezwen kordin plis, me selman mon krwar en keksoz fondamantal se ki la sosyete sirtou lo nivo  lafanmir i bezwen bokou pli involve dan sa problenm.  Mersi.

 

MR DEPUTY SPEAKER

Mersi Minis. Onorab Sebastien.

 

HON SEBASTIEN PILLAY

Mr Deputy Speaker zis e dernyen pti pwen. Mon apresye sa lenportans lasosyete involve be personnelman mon’n involve dan en  problenm similar kot i annan en Manm pa dan mon  fanmir me selman ki pros dan en sityasyon konplike, parfwa sa fanmir i vwar li depase malgre  i pe sey tou ki i kapab pou ede i  vwar li depase, se pou sa rezon ki nou bezwen go back to bann lenstitisyon pou vwar ki rol zot kapab zwe davantaz, akoz mon  konnen parfwa nou dir bann fanmir pa fer ase me parfwa i annan fanmir i sey tou, tou sa ki kapab e still petet sa endividi li i pa santi  li ase. E ou pa kapab blanm li akoz li i santi li dan en sityasyon konplike li menm li, i pa konnen kwa ki byen kwa ki mal, akoz in fini vin en viktim sa ki pe  arive avek li.  Sa i konsern en dimoun en pe pli aze, me selman kwa ki  mon ti a kontan sizere. Par egzanp, nou konnen  tou nou bann lekol apre ler i fermen, napa nanryen ki arive.  Eski nou pa  kapab devise bann progranm entervansyon pour bann zenn, bann manrmay ki ankor pli zenn otour bann lekol, donn par egzanp bann ansennyan ki anvi  donn leson apre ler fasilite sa bann lekol pou fer  serten aktivite ?  Konmsi dan plas ki sa bann gran, gran lekol ki nou’n fer i zis dormi la apre ler 2 :30 pm napa nanryen ki pe arive dan weekend ki i annan lavi ki pe arive ladan ki zanfan i kapab kontinyen vini ; konmsi konmans somewhere ki zanfan i a kapab vini, sort of en After School Program. Me selman  rod en keksoz ki nou kapab servi nou bann sa i pou difisil i pa pou fasil pou atrakte dimoun me selman mon krwar nou bezwen konmans somewhere. Mersi.

 

MR DEPUTY SPEAKER

Mersi Onorab Pillay.  Minis Morgan oule take up?

 

MINISTER JOEL MORGAN

Mersi Mr Deputy Speaker.  Mr Deputy Speaker mon toutafe dakor avek Onorab Pillay an sa ki konsern sityasyon grav dan la fanmir kot bann paran zot menm zot, zot santi zot depase pa kapab handle e se la kot bann striktir leta ansanm avek bann NGOs, bann striktir relizye nou bezwen antre la, pou donn sa sipor, sa soutyen e pou ede pou redres ouswa aranz sa sityasyon dan bann fanmir ki trouv zot dan en tel leta ki tre malere.  Mwan mon donn mon commitment lo mon kote e mon konnen mon koleg o-bor mwan nou’n koz lo la oparavan, pou nou kapab travay tre for pou donn sa soutyen sa bann fanmir neseser e sa bann zanfan dan lekol kot i neseser.  An sa ki konsern servi bann lekol apre ler, pou fer bann aktivite rekreasyonnel ki pou ed bann zanfan pou edik zot, ki pou kapab gid zot, bann extra curricular activities sirtou, mon krwar i en keksoz ki nou pran kont seryezman e nou a regarde ki mannyer nou kapab lans en tel progranm.  Mon pe donn sa Lasanble mon  langazman ki, nou ava regard sa nou ava propoz serten progranm.  Nou ava regarde ki son kou, son bann enplikasyon manpower and so on ki mannyer nou kapab osi involve la kominote, dan en zefor pou ansanm avek Minis responsab pou Zafer Lafanmir e natirelman Zafer  Sosyal fer sa ek lazenes fer sa arive.  Mon krwar i ava ed bokou sirtou pou bann zanfan ki ler lekol i fini zot napa en gran keksoz pou fer.  Mersi.

 

MR DEPUTY SPEAKER

Mersi Minis.  Onorab Esparon.

 

HON REGINA ESPARON

Mersi Mr Deputy. Minis ou’n koz lo swivi konpreansiv selman Dylan in sap zot.  Eski zot in analize kote zot in al mal?  Ou menm ou’n aksepte poudir zot pa’n kapab sov Dylan savedir i montre poudir sistenm in fail Dylan.  Pa zis li ki ti annan tor.  Ozordi ou’n dir poudir i annan 10 a 15 zanfan ki tonm dan sa kategori at risk.  En parmi  sa bann zanfan i annan 12an e pe dormi dan en vye  kannot kot Coastguard, eski i pe ganny swivi?  Ou’n dir poudir sa bann zanfan i al lekol, kote sa enn i al lekol.  Nou ti annan YRTC Praslin, in fail.  Nou’n annan kot rehab YRTC – in fail.  La nou plan  se pou konstri en lot Sant Cap Ternay.  Ki garanti ki sa pa pou  en lot failure ? Eski Minister Lafanmir i annan  plan pou revwar striktir oubyen regilasyon, oubyen Care Plan ki gouvern sa bann lenstitisyon pou ki i pa kontinyen vin en lot failure ankor?  Mersi.

 

MR DEPUTY SPEAKER

Mersi Onorab.  Minis Simeon.

 

MINISTER JEANNE SIMEON

Mersi Onorab pou ou kestyon.  Mr Deputy Speaker.  Nou’n aksepte poudir nou pa’n kapab donn tou sipor ki nou ti kapab Dylan, me selman ler mon ti met istorik ater nou tou nou’n kapab swiv kantite e kalite siport ki  Departman Servis Sosyal in kapab donn sa  garson ek son fanmir pou nou pa perdi li.  Sa sityasyon ki’n arive it’s unfortunate. Me i osi en parey nou dir  – i en wake-up call pou nou pou nou kapab prezan vwar ki mannyer nou kapab pa fail lezot ki dan nou sistenm ki nou pe donn sa sipor. Me ankor enn fwa mon’n dir bokou in ganny fer an kolaborasyon avek Lazans konsernen, nou tou nou ti konsernen lo sityasyon Dylan avek son fanmir. E se pou sa rezon ki nou’n swiv fanmir Dylan de pre avek lentervansyon ki nou ti kapab donnen, me malerezman parey ou’n dir nou’n perdi li.  Ou’n mansyonn en zenn aze 12an ki pe reste dan en vye kannot or whatever – anyway nou pa okouran Departman Servis pou le moman nou a kapab rod lenformasyon lo sa zenn e regarde kote i ete e ki nou kapab fer pou li ansanm avek Minister Ledikasyon e lezot Lazans konsernen.

 

MR DEPUTY SPEAKER

Mersi Minis.  Petet Onorab Esparon ou ava fer parey Onorab Andre, si ou annan  plis lenformasyon pandan break ler nou fini ek Minis pas sa lenformasyon  ki petet nou a kapab fer keksoz pou sa zenn.  Onorab Esparon.

 

HON REGINA ESPARON

Mr Deputy Speaker zis pou mon dir Minis poudir son bann Social Worker i okouran sa.

 

MR DEPUTY SPEAKER

Ok.  Ou a donn plis lenformasyon avek son PS pandan Break.  Onorab Chantal Ghislain.

 

HON CHANTAL GHISLAIN

Mersi Mr Deputy Speaker.  Mr Deputy Speaker mon kestyon i al koumsa.  Letan nou pe regarde Minis lenformasyon ki i ti donnen taler sa garson, ti komans annan bann problenm depi laz 9an savedir i ti dan lekol primer.  Mon kestyon i koumsa.   Ki Minis pe fer lefe ki letan i pe donn problenm i pa ti pe enterese dan lekol e nou konnen dan lekol konmela i annan en progranm TVET ki komans dan bann lekol segonder.  Eski Minis i kapab  dir avek sa Lasanble, ki komitman i annan pou fer sa progranm desann ziska primer pour ki letan zot rekonnet bann problenm parey, sa bann zanfan  i direkteman al lo la an mezir ki zot aranz li ki kapab retourn dan stream lekol, dan laklas normal parey lezot. E mon lot kestyon Minis.  Ou’n osi nonm en sif 59 zanfan ki dan bann lenstitisyon konmela, dan bann Fwaye, e zis mon pe mazinen apepre en 4an pase sa nonm zanfan ti pli bokou ki sa.  Eski Minis pe dir nou ki an term sa  rediksyon, konmsi i osi en sikse konmsi ki pou sa akoz pou mwan mon pa pe konsider sa en sikse sa i mon  lopinyon pou mwan. Mon pe konsider sa konman en sityasyon alarman e i fer per osi ki vedir ki sa bann zanfan bokou zot, zot ankor at large dan kominote and all akoz prenan kont sa kantite zanfan ki nou konnen konmela pe sibir bann labi pe sibir bann…ki dan bann sirkonstans en pti pe parey sa garson ki pe menm servi sibstans and all.  Apre osi mon ti a voudre konnen lo sa garson ki rezilta letopsi in dir si i ti pe servi sibstans. Ki Lazans  ki osi ansarz ki responsab osi ki pran ka avek bann zafer drog – si an ka ti annan sibstans drog ki’n ganny dekouver lo sa garson, pe fer dan lekol ; par egzanp CARE ki al dan lekol pou deal ek bann zanfan ki servi sibstans, ki zot relasyon avek ou Minister lo sa size.  E apre osi mon dernyen pti sizesyon, letan mon ti travay SBC mon ti fer en progranm ki appel, ‘’Lo Semen Lavi,’’ kot nou ti deal avek bann ka bann zanfan ki ‘n pas dan bann difikilte parey e apre ou vwar zot, zot in sorti dan sa sityasyon ; savedir i pe montre ou akoz mon leksperyans pou mwan, i montre mwan poudir nou ankor annan lespwar lo sa bann zanfan e zot kapab sorti parske mon’n rankontre en bon pe zot ki ti vreman dan  bann sityasyon vreman, vreman pa bon e mon kapab menm nonmen osi mon pe regard sa Samad  Clarisse ki kot MTC konmela, mon  pe regard menm Romano Songoire ozordi son pozisyon i été ; permet mwan akoz i lo SBC sa. Ou vwar i annan bann success stories e ou pa pe vwar konmela nou pe koz lo sa bann success stories me tandis toultan nou pe koz lo bann keksoz ki deza la alatrenn ; ki finalman dimoun son lespri i lo la tanzantan, nou pe koz lo drog, nou pe koz lo legaliz cannabis, nou pe koz lo every problenm me selman bann dimoun ki annan sikse ki kapab donn legzanp lezot nou vwar dimoun zot pa pe koz lo la.

 

MR DEPUTY SPEAKER

Mersi Onorab mon a a donn la parol Minis Morgan avan apre swivi par Minis Simeon.

 

MINISTER JOEL MORGAN

Mersi Mr Deputy Speaker.  Wi problenm avek Dylan  ti arive ti konmanse ler i ti annan 10 an parey Minis Simeon in dir taler.  E in en zanfan ki’n   parey nou konnen dan  atraver ekspoze ki Minis in fer in annan behavioural issues grav.  Kantmenm nou pou oryant en zanfan ki annan behavioural issues e bann problenm psikolozik lo nivo son konportman lo nivo TVET i pa neseserman akoz i pa en  problenm lekol sa i en problenm pli fondamantal ki  aprann lekol lo nivo vokasyonnel ouswa lo nivo akademik.  Neanmwen bann  zanfan lo nivo primer ozordi zot komans a en laz byen boner ganny ekspoze avek sa ki apel letid vokasyonnel.  Zot aprann en pe lo nivo bann skills.  Zot ganny ekspoze avek sa lo nivo primer me pou anmenn en progranm technical education lo nivo primer li menm li meton ou ti piu anmenn li lo nivo P4 ouswa P6 bann eksper i dir avek nou i tro boner.  I tro boner pou konmans enstrir en progranm  ki plito spesyalize lo vokasyon a sa laz, akoz bann zanfan i ankor bezwen etabli en baz konesans  zeneral lo nivo primer avan ler pli tar al dan bann diferan brans vokasyonnel, akademik and  so on.  So pou le moman i annan sa ekspozisyon, zot ganny ekspoze avek sa lo nivo primer me napa okenn progranm ki anmenn  ledikasyon teknik ek vokasyonnel lo nivo primer.  Sa i ganny fer apre.  E anba sa nouvo  striktir ki nou pe propoze sa komite pe travay lo la pou le moman nou pou annan bann diferan vwa, bann diferan direksyon ki en zanfan i kapab pran ler in ariv S3.  Apartir S3 la i kapab pran en formasyon teknik vokasyonnel ouswa akademik, ensidswit.  So sa i sityasyon an se moman.  Lo  an sa ki konsern CARE Deputy speaker mon ti a kontan enform Lasanble ki mon krwar dan mazorite nou bann  lekol nou annan nou CARE Clubs kot CARE i travay avek bann lekol atraver klib pou bann zanfan pou sansibiliz zot lo sa problenm sibstans;  labi sibstans prensipalman drog ek lalkol.  Pou osi  donn zot bann bon  gidans an sa ki konsern konportman valer and so on.  E parey mon’n dir nou pe taler nou pe al met sa progranm Education a La Vie dan  PSI dan bann lekol – pou osi ranforsi sa travay ki nou pe fer avek bann CARE Clubs.  Success stories, bann role models; ou‘n nonm detrwa i annan en kantite zot success stories wi mon dakor avek ou Onorab ki nou pa koz ase lo la nou bezwen koz bokou plis akoz nou tant pou vwar plis bann keksoz kot petet nou annan bann failure, bann defayans, bann  fait. Me i annan bokou osi ki’n pas atraver e zot in overcome sa bann problenm. E la  mon krwar mon a fer en lapel konman Minis responsab pour Ledikasyon ek Medya annou donn en pe plis la valer sa bann tel lenstans e servi zot konman bann role models.  Nou kapab servi zot koman bann role models. I annan en Manm taler mon krwar Onorab Henrie in koz lo kestyon mentorship, nou kapab servi zot dan lavenir pou kapab mentor bann zenn.   Mersi bokou.

 

MR DEPUTY SPEAKER

Mersi Minis Morgan.  Minis Simeon.

 

MINISTER JEANNE SIMEON

Mersi Onorab.  Mr Deputy Speaker Madanm Onorab in demann rezilta letopsi ki’n ganny fer lo lekor Dylan.  Rezilta letopsi so far pa’n dir nou si Dylan in mor apre en abuse of drugs. In dir nou poudir i annan serten analiz ki pe kontinyen ganny fer ki apre nou ava konnen.  Lo kote bann zanfan  ki dan Fwaye rediksyon dan nonm zanfan  ki dan Fwaye i due to bann fakter – parey zot in ganny sans retourn kot zot fanmir akoz i annan letan kot nou  pran zanfan nou met dan Fwaye akoz fanmir pe pas atraver bann sityasyon  difisil ki apre ler sa i stabilize nou kapab re donn zot, zot zanfan akoz pli bon sityasyon kot en zanfan se dan son fanmir sa fwaye li i pran ka lo en baz tanporer  pandan ki nou travay avek fanmir.  I annan osi bann zanfan ki  dan Fwaye ki travay in ganny fe lo Departman Servis Sosyal pou met zot dan bann Foster Homes.  Sa osi i anmenn en serten rediksyon dan lakantite ki nou vwar dan bann Fwaye.  Mersi.

 

MR DEPUTY SPEAKER

Mersi Minis Simeon.  Onorab Ferrari.

 

HON JEAN FRANCOIS FERRARI

Mersi Mr Deputy.  Tre briyevman.  Mon ti a kontan demann en kestyon apre fer en propozisyon.  Lakour, Tribinal Lafanmir e Tribinal Zanfan i fer  en kantite travay.  Travay enorm mon konnen, akoz mon’n diskit avek bann Mazistra me selman zot feel en pe let down akoz zot napa le mwayen e sirtou apre ki zot in ora e desizyon napa bann striktir pou take up sa bann desizyon.  Mon  kestyon alor se eski Minis i konnen ki sa Stasyon Lapolis Perseverans i vreman en problenm kot par-ler zanfan, bann zenn ki’n ganny detenir, par-ler de mwan e de mwan nou Speaker menm Mr Pillay ti dir nou ka kot en zanfan ti’n ganny detenir  preski enn an en miner.  Parfwa i napa ni matla.  Eski Minis i konnen poudir bann Mazistra dan Lakour in bezwen pas en laket antre zot pou zot aste detrwa matla pou zot met dan sa holding Station laba pou bann miner ?  Donk mon ti a kontan konmsi si zot kapab reakte lo la e dir nou ki zot annan lentansyon fer dan en fason imedyat pou kapab rezourd en pe sa problenm?  Imedyat.  Mwan  prezan mon propozisyon se pour long term.  Mon ti a kontan si Minis ti kapab dir nou si ti ava akseptab pour li dizon dan 3 mwan re vin en kou devan nou  Lasanble, nou ava envit ou devan nou Lasanble vini e vin dir nou ki progre ki zot in fer lo bann plan, lo bann finansman potansyel, lo bann mezir tanporer eksetera, vin dir nou sa dan en mannyer ki nou a santi ki finalman nou pe fer en keksoz pou sa  bann zenn e nou pa pou let down ankor en lot  Dylan. So la i la mon 2 pwen  mon ti a kontan entervenir lo la.

 

MR DEPUTY SPEAKER

Mersi Onorab Ferrari.  Minis Simeon.

 

MINISTER JEANNE SIMEON

Mersi Onorab Ferrari.  Mr Deputy Speaker nou remersye Onorab Ferrari pou sa lenvitasyon pou nou retourn dan sa Lasanble dizon parey in dir dan 3 mwan, 6 mwan pou nou kapab don progre lo bann desizyon ki’n ganny pran la, bann propozisyon osi ki’n ganny met devan par lezot Manm ki nou a travay lo la e nou ava retournen pou vin dir kote kou arive avek sa servis ki nou pe  ofer nou bann zenn pou ki nou kapab bouz devan, kontinyen dan sa parkour pou nou kontinyen donn zot sa servis.  Lo kote bann Young Offenders ki ou’n mansyonnen sa nou ava angaz nou e nou’n already angaz nou avek Zidisyer.  Nou’n annan en miting avek Zidisyer avek Minis pour Home  Affairs deza lo la an Avril pou nou vwar ki mannyer nou pou kapab contain sa bann zanfan ki i annan bann ka Ankour e ki zot bezwen reste an detansyon.  Nou’n already konmans sa diskisyon pou travay avek sa 2 Lazans.

 

MR DEPUTY SPEAKER

Mersi Minis.  Onorab Valmont.

 

HON JUDE VALMONT

Mersi Deputy Speaker e bonzour le 2 Minis e zot delegasyon.  Bonzour Manm koleg Onorab e bonzour tou piblik ki a lekout e ki pe ekout nou.  Bonn apre midi zot letan in pas vitman.  Definitivman mon’n tann le 2 Minis e bann  lezot Manm koz lo lankadreman, intervention, striktir, plan, mezir tanporer e osi mon’n tann nonmen par serten Onorab, Zofisye Sosyal logmantasyon dan saler, logmantasyon dan lakantite.  Minis, tou lede Minis mwan mon pou prezant 2 fe ki mwan mon’n eksperyanse dan mon distrik e mon pou demann zot, zot sizesyon lo la.  Premye legzanp i se ki bann zanfan ki’n ganny sispann kot lekol, paran petet en paran tousel i trouv li pe al travay  e sa zanfan i trouv li definitivman kot lakour e ou vwar li  larg e lanmenm ler i ganny ekspoze avek bann malez sosyal parey labi sibstans, lalkol.  Mon demann  sa kestyon ki nou fer dan sa ka? Dezyenm sirkonstans petet en manman ou konnen en zanfan pou li ganny bann problenm koumsa laplipar di-tan i sorti dan fanmir parey nou’n dir e nou vwar i filtre from paran to zanfan.  Alor mon demande  en paran tousel ki lo drog i annan zanfan anba laz, i ganny pouse kot en lakour ki i pe reste tanporer, ou tande ki i pe dormi lo en lans ek son 2 zanfan prezan mon kestyon i se ki bann Minister i fer pou  anmenn bann Lazans ansanm pou nobou deal ek bann sityasyon koumsa ?  Sa i mon premye kestyon e zis pou met en sizesyon Minis nou’n tann koze lo sa sant.  Mwan mon santi ki petet sa i mon lopinyon personnel koriz mwan si mon mal, mwan mon santi i annan bokou sa bann zanfan ki annan problenm sosyal en gran mazorite i deza dan sibstans drog.  Alor ler nou dir detox drog pou separe avek sa servis ki sa  sant pe ofer mwan en strong sizesyon ki Minis swa i konsider entegre sa progranm detox pou bann miner dan sa sant oubyen etabli en dyalog avek sa lenstans ki deal avek detox. E se sa, se Dokter Herminie, antre dan en dyalog, fer en progranm kler akoz leksperyans mon’n pase dan mon distrik ler bann Lazans ou konnen i deparpiye napa kolaborasyon zot pa koze apre lanmenm ler ou vwar failure.  Se pou sa mon pe demann Minis pou konsider sa sizesyon fortman. Mersi.

 

MR DEPUTY SPEAKER

Mersi Onorab Valmont.  Minis Simeon.

 

MINISTER JEANNE SIMEON

Mersi Onorab.  Mr Deputy Speaker nou ava pran sa dezyenm sityasyon  ki Onorab in mansyonnen kot nou annan en manman ki pe abiz drog ki annan zanfan e ki’n ganny pouse kot i ti pe reste akoz son problenm labi e ki nou’n aprann ki i ti  pe dormi lo lans. Ler nou’n ganny sa lenformasyon Departman Servis Sosyal in al rod sa madanm e swivi pe ganny  fer avek li po le moman.  Mon  ti’n aprann poudir i annan zanfan ki ti’n already  nou’n pran ki en fanmir ti pe donn sipor pandan  ki sa manman li in ganny ankouraze pou li antre li progranm detox pou li kapab re etabli li.  E nou pe osi fer sir ki i  ganny  en sipor finansyel ler i sorti  lo sa progranm pou nou kapab re donn li son zanfan e pou li kapab kontinyen son lavi si nou osi an diskisyon avek Minister pour Labita pou regarde dan le sans si i pou  kapab ganny asiste avek en lozman, akoz  kot i ti pe reste pa kot li en dimoun ki ti’n abrit li pou le moman.  Kot i konsern dyalog avek  detox sa ki ansarz progranm reabilitasyon pou drog already nou’n zwenn, nou’n ganny serten diskisyon avek SS Herminie.  Pou follow- up avek sa progranm nou santi ki i enportan ki sa bann zanfan menm ki zot miner zot pas atraver swa progranm detox.  Nou konnen nou bann resours i limite.  Nou pa pe kapab annan en  progranm laba kot SS Herminie, en lot progranm  detox kot nou Sant Cap Ternay ok ?  Zot a pas atraver sa progranm detox kot Lazans ki annan manda pou fe sa e apre nou, nou ava kontinyen avek son swivi ok.  Ler in fini son détoxification nou  prezan nou ava regarde avek Departman Minister Ledikasyon, ki mannyer nou kapab swiv li pou li si i ti dan lekol pou li retourn dan lekol pou li travay osi avek lafanmir. Mersi.

 

MR DEPUTY SPEAKER

Mersi Minis.  Onorab Valmont.

 

HON JUDE VALMONT

Mersi Mr Deputy Speaker.  Zis en pti ‘question arising.  Minis mon ti a demann zot pou osi konsidere ofer sa servis Halfway  Home parey zot ofer night shelter pou bann madanm.  Petet si zot kapab konsider sa as well ; petet i ava donn nou en opsyon tanporer ziska ler nou ava nobou met lanmen lo sa paran e deal  ek zanfan.  Mersi bokou.

 

MR DEPUTY SPEAKER

Mersi Onorab.  Minis i en sizesyon oule  dir en pti keksoz li la.

 

MINISTER JEANNE SIMEON

Mersi Onorab. Mr Deputy Speaker i en sizesyon e menm avan ki in vin dan Lasanble Onorab Valmont ti’n deza met sa a nou latansyon.  I en sizesyon ki nou pe pran o serye, akoz landrwa i nou a kapab pran bann madanm.  Pou le moman nou pe pran zis bann msye.

 

MR DEPUTY SPEAKER

Mersi  Minis. Onorab Letourdie.

 

HON JANY DE LETOURDIE

Mersi Mr Deputy.  Bonzour tou dimoun.  Minis mon kestyon i diriz ver e pti pe swivi pou bann manrmay.  Nou vwar poudir sa rapor ki Minis  Adam ti fer Merkredi pase i ti fer nou konpran i ti adres 13 a 15 a me la osi nou’n vwar  atraver Onorab Ghislain ki sa servi  sibstans – sa servi drog pli presizeman i kapab al  eske dan lekol primer menm manrmay 5enm, 6enm parey nou dir sa.  Mon kestyon se ki kalite swivi ki fer si en manrmay i ganny teste pozitiv pou drog ki kalite swivi ki arive?  Eski son paran i ganny enkli ladan ?  Eski bann tes ki fer regilyerman pou vwar si i ankor pe servi ? Ki bann difikilte zot gannyen ?  Apre mon lot lobzervasyon si ou le Minis.  Ankor dan  sa rapor Minis Adam nou‘n vwar ki i annan pa mal poursantaz adolesan ki ti dir apepre  12 mon krwar mon’n en pe bliye apepre 12 a 16poursan ki’n konsider pou fer swisid.  Mon konnen poudir i pou difisil pou konnen lekel akoz sa i ganny fer anonim me selman i en konsern akoz i en sif konsiderab e nou konnen poudir en dimoun i pa zis ale fer swisid. I mazin en fwa, apre i mazin 2 fwa akoz sansan nou kapab vwar nou pli tar avek lezot swisid ki pe kontinyen arive, sa i mon lobzervasyon. Me si nou pa konnen lekel sa bann dimoun me selman petet annou sey vwar en fason ki mannyer nou kapab adres sa akoz nou pe vwar poudir zot pe konsider swisid e i a pe ogmante.  Mersi.

 

MR DEPUTY SPEAKER

Mersi Onorab Letourdie.  Ou ti oule Minis Lafanmir oubyen ou le Minis Ledikasyon?  Ou ti le en pti bout ki zwe avek manrmay lekol bann laz lekol e ki  ou’n adres ou kestyon.  Minis Lafanmir?

 

HON JANY DE LETOURDIE

Tou lede.

 

MR DEPUTY SPEAKER

Tou lede. Tou lede.  Ok Minis Morgan ou annan en bout ki konsern bann zanfan lekol.  Go ahead.

 

 

MINISTER JOEL MORGAN

Mersi Mr Deputy Speaker.  Mr Deputy Speaker lo sa ki konsern bann zanfan ki pe abiz sibstans – bann zanfan lekol ki abiz sibstans e zot ganny vwar dan lekol pe fer sa, nou annan nou en Polisi ki’n ganny etabli depi avan pou deal ek sa sityasyon.  Prensipalman sa ki arive se ki bann paran i ganny apele.  Social Worker, District Social Worker i ganny apele, Lapolis i ganny apele e nou demann  sa etidyan pou osi ekri en rapor lo  sa lensidan.  Prezan ansanm avek paran ek Social Worker, Lapolis i fer en travay pou regarde kote sa zanfan in ganny sa sibstans e si i annan lezot ki arive ki relye avek posesyon sa sibstans dan lekol avek sa zanfan par egzanp si i pe vann ouswa si in anmenn pou son prop konsonmasyon.  Swit a sa en investigation i ganny fer avek tou bann  partner.  Bann paran i bezwen la.  Si bann paran pa la Minister responsab pou Zafer Sosyal i met en zofisye la dapre legal requirement e answit apre a investigation sa etidyan si in ganny trouve koupab i annan  par egzanp i annan bann sibstans drog dan son  blood sample par egzanp si in al fer tes, ouswa dan son urine, sa zanfan i pas atraver  en progranm. E sa progranm i enkli sispansyon, e answit en swivi avek bann lezot Lazans konsernen kot nou al pli aprofondi lo sa problenm sibstans ki sa zanfan i annan.  Mon pe koz sibstans la en? E si sa zanfan apre sa progranm i ganny re entegre dan lekol ankor.  Apre sa si i ganny re atrape en 2enm fwa i pas atraver menm prosedir ankor e i ganny refer pou li  al fer bann sesyon pli avanse, bann sesyon therapy pli avanse avek bann lezot  Lazans konsernen savedir nou escalate sa issue.  Trwazyenm fwa swe la kot i ganny expel.  Trwazyenm fwa ki i fer sa lofans i ganny expel kot lekol e  sa i anmenn lo kestyon ki Onorab Valmont ti poze taler, ki arive apre sa e se la kot bann striktir aprezan nou bezwen regard al an avan.  Ki nou fer  ek sa zanfan ?  Akoz enn fwa ki in ganny expel ki i devenir li ?  Pou le moman i napa en landrwa pou li ale.  I bezwen reste dan lakour ouswa i bezwen larg dan la kominote se la kot problenm i kapab vin pli grav e nou  bezwen kapab ankadre sa zanfan dan lavenir e donn li en lenstans, en framework kot li i kapab ganny ankadre pou li al de lavan, aprann premyerman detox si fodre detox ouswa si fodre swiv bann  counselling sessions spesyalize dan landrwa spesyalize e pe aprann en metye.  Ouswa retourn lekol akoz lobzektif se re entegre sa zanfan e se sa kot prezan nou, nou bezwen travay ansanm pou lavenir pou kapab met sa an plas kot ozordi nou annan en serten defayans ladan.  Mersi.

 

MR DEPUTY SPEAKER

Mersi Minis.  Minis Simeon oule  azout keksoz?

 

MINISTER JEANNE SIMEON

Mersi.  Mr Deputy Speaker mon krwar Minis Morgan in reponn akoz ler in ganny sispann parey nou’n dir taler lo kote Sosyal la i ganny refer avek Sosyal, nou annan en progranm ki nou travay avek li e nou travay avek son fanmir osi; akoz nou realize poudir parey nou tou nou konnen en zanfan i dan en fanmir. So i bezwen annan sa sipor osi ki son fanmir i bezwen donn li. So la kot Servis Sosyal i rantre.

 

MR DEPUTY SPEAKER

Mersi Minis.  Onorab Letourdie.

 

HON JANY DE LETOURDIE

Eskize ti annan sa bout ki mon ti’n fer mon lobzervasyon lo sa poursantaz ki swisid pe ogmante. Apre mon ti a pe  demande si zot annan en progranm petet pe mazinen pou fer en progranm pou bann tes mandatwar pou  bann zanfan lekol vizavi sibstans?

 

MR DEPUTY SPEAKER

Ok.  Minis Ledikasyon oubyen Minis Simeon nenport.  Minis.

 

MINISTER JEANNE SIMEON

Mersi Onorab. Mr Deputy Speaker pou bann zanfan ki ti’n ganny mansyonnen dan sa rapor parey ou pe dir ki ti annan sa poursantaz ki annan tandans suicidal ; ankor en fwa nou annan bann  servis ki nou kapab ofer, bann counselling services letan nou vwar kot Sosyal nou mank sa bann sipor nou refer kot Lasante kot nou annan Psychologist laba kot Minister Lasante kot zot osi zot travay avek sa zanfan si in ganny refer kot Departman Servis Sosyal.

 

MR DEPUTY SPEAKER

Mersi Minis.  Minis Ledikasyon, Minis Morgan.

 

MINISTER JOEL MORGAN

Mersi Mr Deputy Speaker.  I vreman malere ki nou’n ariv en staz kot nou bezwen ozordi konsider tes mandatwar pou tou nou bann zanfan dan lekol.  Mr Deputy Speaker wi apartir S1 lannen prosenn tou bann  zanfan pou bezwen fer en tes mandatwar, screen zot pou drog e nou pou reviz nou Polisi e si neseser nou pou bezwen reviz Lalwa  pou nou kapab annan lafors legal par deryer sa linisyativ.  Bi se pour protez nou bann zanfan.  E nou bezwen fer sir ki minorite pa afekte mazorite dan zot bann letid e gat lavenir an menm tan ki nou pe travay e sey sov sa minorite ki ganny aflize par sa problenm labi sibstans.  Mersi Mr Deputy Speaker.

 

MR DEPUTY SPEAKER

Mersi Minis Morgan.  Bon i annan ankor 7 entervenan.  Si nou…si nou…Annou fer li kourt annou fer li tre bref e mon demann le 2 Minis osi tou pou fer li tre bref.  Mwan  osi mon annan en konsern a lafen ki mon anvi partaz avek Minis.  I annan en sityasyon ki nou pa anvi i dezentegre.  Annou target nou ki par 1er en kar nou fini.  Mon demann ek bann entervenan eski nou retournen apre?

 

HON WAVEL RAMKALAWAN

Mr Deputy i think mon krwar ki nou bezwen…  

 

MR DEPUTY SPEAKER

Nou’n exhaust.

 

HON WAVEL RAMKALAWAN

Nou’n exhaust.  nou bezwen…we’ve got to come to an end parski mon krwar depi bomaten nou pe, I mean mwan osi personnelman mon santi ki i annan en kantite larepons ki’n fini ganny donnen e ki nou pe repas lo la so…

 

MR DEPUTY SPEAKER

Ok.  Mon a donn la parol enn lo kote parti lepep e dernyen petet loter kestyon si nou annan okenn lot konser a lev-e.  Mon pa konnen next lo mon lalis mon ti annan Onorab Simon Gill ou le pran laparol ?  Ou le demann en kestyon oubyen ou ava donn avek Leader of  Government Business Onorab De Commarmond ?  Ok Onorab Simon Gill.

 

HON SIMON GILL

Mersi Mr Deputy Speaker. E bonn apre midi tou Manm koleg e Manm piblik  ki pe ekoute.  Mon  ti annan plizyer kestyon onnetman  pou mwan demande Mr Deputy Speaker, me an konsideran letan kot nou’n arive mon krwar mon pou tir tou mon bann kestyon ki mon ti annan e lo lapar  nou bann koleg isi lo kot kote latab, menm in ganny dir nou le prezant nou senser kondoleans avek lafanmir sa zenn garson ki malerezman in kit nou ozordi.  E lans en lapel an menm tan avek tou dimoun dan sosyete ki annou koste ansanm.  Annou devlop sa sinerzi ansanm pou ki nou a kapab a-tan detekte bann zanfan ki pe glis nou pou nou fer sir ki nou pa ganny en 2enm Dylan pou nou pran tou sa letan ozordi e donn li  tou sa lenportans ki i annan ki mon krwar i merite e ankor enn fwa annou nou tou ansanm esey nou mye.  Mon konnen i annan en kantite zefor ki pe ganny fer e i annan  en kantite ki’n ganny fer pou nou tir nou bann zenn ki pe glise. Annou kontinyen e mon a dir zot tou bann ki dan sa batay avek nou kontinyen, mon krwar i pa pou en keksoz ki nou pou ganny son rekonpans tou isi lo later nou ava ganny li sa ki nou mank isi pli lwen.  Mersi bokou.

 

MR DEPUTY SPEAKER

Mersi Onorab Simon Gill.  Onorab Ramkalawan.

 

HON WAVEL RAMKALAWAN

Mersi Mr Deputy.  Bokou in ganny dir.  Mon annan zis e dernyen kestyon.  Dan ka Ryan Rose – Dylan Rose eski zot in konsidere a okenn moman pou ki bann manm lafanmir kote son papa i pran swen avek sa garson ?  Mersi bokou.

 

MR DEPUTY SPEAKER

Mersi Onorab Ramkalawan.  Minis Simeon.

 

MINISTER JEANNE SIMEON

Mersi Onorab.  Mr Deputy Speaker taler mon’n donn en long parkour sipor bann servis ki nou’n donn Dylan e son fanmir e ladan nou’n osi pa’n kit son papa deor dapre lenformasyon ki mon’n gannyen  kot Servis Sosyal e nou’n osi aprann poudir son papa a en serten letan osi ti pe servi santans.  So nou’n seye parey mon’n dir, nou ‘n fer tou sa ki nou kapab e i zis malere ki en lensidan koumsa in arive e nou pe kontinyen fer tou sa ki nou kapab ankor pou nou parey Onorab Leader Lopozisyon in dir dan son kestyon pour di en tel lensidan pa arive ankor.  Nou pa kapab donn a 100% proof ki i pa pou arive me selman nou pou fer tou nou posib i e lot zenn pa perdi son lavi da en tel sirkonstans.

 

MR DEPUTY SPEAKER

Mersi Minis.  Bon lo mon kote mon annan 2 pti konsern mon anvi port latansyon le 2 Minis ki dan nou Lasanble ozordi.  Pandan Break mon’n ganny en paran, en paran zanfan lekol Mont Fleuri  ki’n anvoy mwan en pti text ki vreman alarman. Bann etidyan ki pe skip lekol, ki pe sov lekol.  E aparaman ki i annan en group zot ki al bennyen dan en Basen Rochon ki apel Basen Larme.  Ok so mon ti a kontan ti a regard ladan.  E sa manman in menm dir mwan mon zanfan i enkli ladan, mon garson  i enkli ladan in enform lekol Mont Fleuri, in menm enform lapolis Mont Fleuri, me i paret ziska prezan napa okenn solisyon.  So petet Minis Ledikasyon mon kapab kit sa avek ou.  I montre ankor ki bann  paran pe ekout nou deor, zot osi zot konsernen. E parey Onorab Simon Gill in dir nou tou nou dan sa bato  e nou tou nou bezwen anmenn sinerzi pou nou kapab fer keksoz byen.  La petet ankor petet i plis pou Minis Simeon, ler  nou ti pe koz bokou lo sa bann zanfan dan bann Homes and all that i annan en sityasyon ki mon krwar ou PS osi i okouran kot i annan en group fiy ki ti dan en home, dan en fwaye ki’n ganny retire la  tou resaman me problenm se ki mon pa ankor vreman konn lakoz, mon annan enn sa bann zanfan ki’n…nou pe koz lo sa bann zanfan 16 an 17an ki dan S4, S5 bann laz tre delika, tre vilnerab.  E i annan ki zot pe pran zot letid serye zot pe fer tre byen lekol, sa Mouvman  la kot zot in ganny retire zot in ganny re entrodwir petet dan fanmir ki sityasyon pa tro, tro bon, Minis in dir taler nou regarde ler sityasyon dan fanmir i amelyore nou ankouraz sa zanfan pou retournen.  Mon annan en ka sa fiy ki’n  kontakte mwan, mon konnen poudir sa sityasyon in pli pir ki ler sa zanfan ti ganny retire e ozordi sa zanfan mon krwar in arive 16 an, mon krwar in fek ganny 17an in ganny retournen dan sa landrwa. E petet zis pou partaz avek zot, mon dernyen kominikasyon avek sa fiy ; yer swar in anvoy mwan en pti text, ‘’Sosyal in anvoy mwan kot mwan, lanvironnman  pa bon.’’  Ler ou ganny en text ki swiv i dir, ‘’Please help me ! Please help me !’’ E la tou la ler dan Break mon’n anvoy li en pti mesaz mon konnen i kot lekol mon’n dir li si ou kapab reponn mwan. ‘’Eski bann Lazans Sosyal in vizit ou landrwa avan in anvoy ou laba?’’  ‘’Wi me zot dir mwan napa lot landrwa pou met mwan alor mon oblize  reste la.’’  Mon’n anvoy li en lot pti text ankor ki mon pou raise sa dan Lasanble sa mansyonn okenn non. E mon pou take it up apre avek Minis Lafanmir ek son… I reponn mwan, ‘’I’m not ok. Social Workers don’t look like they care. Ok?’’  In menm demann mwan si i annan landrwa kot mon kapab abit li pou le moman.  ‘I just wanna  leave that place.’’  La ankor i en desperate call.  I en desperate plea kot mon krwar Minis mon  osi mon ti a kontan petet 5 minutes avek ou ek ou PS dan Break pou mwan partaz en pti pe sa lenformasyon avek ou pou nou pa les en lot sityasyon arive.  Parey mon’n dir mon pa konn vreman tou lakoz.  Mon ti a kontan, mon pa’n ganny letan fer bann swivi akoz mon’n okouran sa semenn pase me enn dan sa bann fiy, sa bann zenn fiy ki ankor pe lekol in aport sa a mon latansyon.  Ankor i  montre lanpler problenm dan nou pei e nou tou ankor mon sit Onorab Simon Gill, Onorab Ramkalawan ki nou tou nou konsernen ek sa sityasyon e no anvi vwar solisyon, nou anvi vwar keksoz pozitiv. Parey Minis Morgan in dir i annan success stories nou anvi vwar sa bann   success stories.  Ok so Minis, le 2 Minis mon pa pou anvi en  repons lo la me apre ler nou adjourn mon ti a kontan vwar zot en pti moman pou nou partaz sa lenformasyon ansanm.  Bon mon  anvi zis remind bann Manm Komite  Zil ki i annan en miting deswit konman nou adjourn la dan Speaker’s Conference Room, ok ?  I en miting irzan e tou Manm prezan – aparaman  Sekretarya in fer provizyon pour lunch.  Mon pa konnen si zot le pran lunch avan oubyen sa me zot ava sort out sa ok ? 1 :30 zot ava zwenn napa problenm.  E osi mon fer lapel avek Bills Committee, nou annan en pe Bills ki devan nou ki Bills Committee i organize kantmenm demen nou ganny en miting ; mwan osi mon en Manm lo la, ki nou ganny en miting pou nou kapab scrutinise en pe sa bann Bills.  Ok ?  Avek sa mon ti a kontan remersi le 2 Minis Minis Simeon, Minis Morgan ek zot bann zofisye ki’n pas plis ki en demi zournen avek nou dan Lasanble. E mon swete  ki ler nou Manm Lasanble osi tou nou ava anmenn en konsern devan zot, zot ava sey antre an dyalog avek bann Manm Lasanble ; pa per parey bomaten  nou vwar nou’n antre an dyalog i en sityasyon difisil, delika, nou’n antre an dyalog pou nou tou  ansanm kapab vwar solisyon.  Ler nou amenn  en konsern devan zot pa ezit-e retournen re ganny kontak avek sa Manm pou nou kapab ganny plis lenformasyon pou nou kapab tackle sa bann problenm ansanm.  Se dan sa lespri mon krwar ki nou kapab aranz en pti pe nou sosyete e nou a kapab bouz devan, nou a kapab vwar sa way forward parey loter kestyon bomaten in fer sorti.  Bon avek sa nou ava adjourn e ziska 2.30pm ok.

 

(BREAK)

 

 

MR DEPUTY SPEAKER

Bon bonn apre midi tou bann Manm Onorab e bonn apre midi tou bann dimoun ki kontinyen a lekout ki pe swiv nou bann deliberasyon Lasanble. Avan nou al lo Mosyon, Onorab Ramkalawan ti annan en pti Statement pour fer vizavi zot meeting Komite Zil ki’n fek fer pandan Break. Onorab Ramkalawan.

 

HON WAVEL RAMKALAWAN

Mersi bokou Mr Deputy Speaker. Mr Deputy parey ti ganny mansyonnen Komite Zil ti zwenn 1.30 e sa meeting in ale ziska la 2.30 e nou’n abord diferan size.

E la zis pour met dan son konteks, sa in swiv apre en Deklarasyon par Onorab Ferrari semenn pase e alor Komite in koze.

Nou’n zwenn e nou’n ekout Onorab De Commarmond avek Onorab Andre, sa 2 Manm lo Komite Zil ki zot non ti ganny mansyonnen. E Onorab De Commarmond in prezant son apology; in prezant son leskiz total avek Komite e Komite in aksepte son apology ki’n prezante, in osi prezant son apology anver tou bann Manm ki ti ganny mansyonnen, bomaten ti deza prezant son apology avek Onorab Hoareau.  E dan Komite in osi prezant son apology avek Onorab Andre. E parey mon’n dir, apology in ganny aksepte.

Me swivan sa, Komite in tonm dakor ki poudir lo nou bann Manm lo Komite Zil nou pe met serten restriksyon.

Premye restriksyon ki nou pe met lo tou bann Manm lo sa Komite, se ki napa okenn Manm lo Komite Zil ki ganny dwa vizit okenn zil dan son kapasite prive, me ki nou ava fer li koman en Komite.

E dezyenmman ki nou ava mentenir bann nivo etik tre o pour nou evite ki i annan okenn fo persepsyon, e ki atraver sa i anmenn en laont pour nou Komite Zil li menm oubyen pour Lasanble Nasyonal an zeneral.

E la zisteman Mr Speaker, mon pou dir Komite Zil pe kontiny son bann vizit koman en Komite. Sa Vandredi nou pour vizit Coétivy avek Ile Platte e apre sa nou pour fer vizit lo Silhouette e avek sa i ava kouver tou bann zil IDC. Me la nou pe osi envit, nou pe ekrir bann propriyeter bann lezot zil ek bann Stakeholders an zeneral pour zot vin fer bann prezantasyon.

E mon espere ki poudir letan bann diferan dimoun – e la nou pe mazin, parey mon pe dir bann zil prive me an menm tan osi bann dimoun ki annan pour fer avek lanvironnman bann peser, par egzanp bann peser banbara ensidswit, nou pour envit zot pour vin koz avek Komite.

Me nou pour osi lans en lenvitasyon ouver pour tou dimoun ki i annan en lentere dan zil e ki ti a kontan vin fer en prezantasyon avek nou Lasanble.  E sa lenvitasyon nou pe dir zot kontakte Clerk, e sa i ava lo televizyon dan bwat tou bann Zournal avan le 9 Zen e apre sa nou ava ganny sans pour nou ekout zot.  Mersi bokou Mr Deputy Speaker.

 

MR DEPUTY SPEAKER

Mersi Onorab Ramkalawan. Bon nou kontinyen avek nou travay, e prosennman lo Order Paper nou annan en Mosyon e mover se Onorab Ramkalawan. Onorab mon a demann ou pour prezant ou Mosyon.

 

HON WAVEL RAMKALAWAN

Mersi bokou Mr Deputy. Mr Deputy parey nou konnen sa Mosyon in lo Order Paper pandan en kantite letan. In fact mon krwar depi lannen pase i lo Order Paper e mon byen kontan ki finalman nou kapab diskit lo sa size.

Mon Mosyon i konsern Lagrikiltir e letan zis pour tou dimoun konpran son teks e pour konpran lo kwa ki nou pe al koz lo la, mon Mosyon i lir koumsa:

‘’Avek bi redonn en lansman Sekter Lagrikiltir sa Lasanble i demann Gouvernman pour fer sa bann keksoz swivan imedyatman.

1.Pour met en moratorium

oubyen embargo lo lavant

okenn later ki’n ganny

idantifye koman later

lagrikiltir.

 

  1. Pour rann larzan bann dimoun ki’n aste later Lagrikiltir pour fer en lot proze me ki pa ankor devlope.

 

  1. Pour fer en survey lo later Lagrikiltir kot napa prodiksyon avek bi ankouraz en lansman agrikol e dernyerman pour rod lasistans finansyel pour ki bann fermye i ava kapab ganny en nouvo lankourazman pour al dan prodiksyon agrikol lo tou nivo.

Mr Deputy Speaker nou’n tann koz lo lagrikiltir pandan plizyer Sesyon dan nou Lasanble, e nou ava rapel ki pandan ki bidze ti pe ganny prezante ankor enn fwa nou ti pas bokou letan lo sa size.

E Lasanble Nasyonal ti menm dir avek sa Minister Lagrikiltir akoz nou pa ti satisfe avek sipor ki zot ti pe gannyen, pour zot vin devan nou, avek en plan konkret pour nou regarde ki mannyer koman en Lasanble nou kapab ankouraz promosyon agrikol dan nou pei.

E rezon ki nou’n fer sa i tre senp, lagrikiltir i reste en pwen tre, tre enportan dan devlopman nou pei, me an menm tan osi kot i konsern sekirite agrikol, kot i konsern sekirite sa ki nou manze. E tanzantan letan nou regard televizyon nou tann bann diferan fleo ki pe arive dan bann diferan landrwa e ki mannyer sa i annan en lenpak lo nou pei spesyalman akoz nou depann bokou lo lenportasyon.

Tou dernyerman in annan problenm avek ponmdamour ki enporte sorti Sid Lafrik e apre sa nou’n vwar diferan keksoz ki’n arive e Sesel in bezwen sanz landrwa kot i enport tomat, e tousala i annan son lenpak direk.

Alor Mr Deputy Speaker, ozordi i kler pour tou dimoun ki i annan en problenm avek later Lagrikiltir e avek prodiksyon lagrikiltir.

E la zis mon ava donn detrwa sif ki pour, ki vreman sokan; an 1990, ti annan 60 kilomet kare later ki ti rezerve pour lagrikiltir, e sa ti reprezant 13 poursan total later Sesel.

An lannen 2000, 10an pli tar sa 60 kilomet kare ti’n ganny redwir pour li vin 40 kilomet kare, ki reprezant 8.7 poursan.

An 2011 sa 40 poursan ti’n desann ankor pour li vin 30 kilomet kare, ki reprezant 6.5 poursan. Alor Mr Deputy Speaker sa i montre ki poudir dan lespas 20an lakantite later ki ti’n ganny dezinyen koman later lagrikiltir ti’n desann par lanmwatye sorti 60 kilomet kare oubyen 13 poursan pour vin 30 kilomet kare, savedir 6.5 poursan.

E sa dan li menm li i devret anmenn bokou konsern pour nou tou dan sa Lasanble, me osi pour nou koman en pep ki pe regard en size ki vreman enportan.

E sa konpetisyon, i vreman ant later pour konstriksyon lakaz avek lagrikiltir e lo lot kote nouvo lotel ek nouvo guesthouse.

Ozordi letan Lasanble pe partisip dan sa tel deba lo later lagrikiltir, i ankor annan guesthouse ki pe ganny konstrir lo later Lagrikiltir.

E sa ki vreman sokan Mr Deputy, se ki sa bann landrwa ki’n ganny konstrir lo later Lagrikiltir, apre sa zot fer lezot konplent, non-selman ki zot in pran later Lagrikiltir, me apre sa zot fer konplent ki poudir otour zot i annan loder lagrikiltir.  E sa i pe anmenn son kalite presyon dan li menm.

E letan nou pe koz lo la, nou pa pe zis koz lo Mahe, Amitié Praslin i annan sa problenm, La Digue i annan sa problenm, Au Cap, Anse  La Mouche, e tou bann lezot landrwa.

Alors nou dan en konpetisyon an relasyon avek later lagrikiltir, e la Mr Speaker nou ti ankor dan Lasanble, 4enm Lasanble mon krwar, letan par egzanp Liniversite Sesel ti anvi pran later Lagrikiltir, sa later dan plato opposite vizavi Legliz Anglikan kot ozordi i annan bann gran plantasyon, kot zot ti anvi pran sa later pour zot fer liniversite.

E Lasanble Nasyonal, ti raport laviktwar lo sa enn, e sa pa’n arive. E ozordi mon krwar ki bokou dimoun i satisfe ki sa later i ankor pour Lagrikiltir.

I annan tro bokou later Lagrikiltir ki ozordi pe ganny servi pour lezot rezon. E sa i pe fer ki nou prodiksyon agrikol i dan problenm me an menm tan osi par egzanp Mr Speaker ou ava rapel ki pandan sa peryod 2008 kot nou ti pe pas dan bann problenm forex, problenm ekonomik ti annan bokou bann Laferm ki ti frenmen.

E par egzanp en landrwa koman Hermitage Anse Boileau, ki ti’n ganny dezinyen koman en landrwa kot prodiksyon pork ti’n ganny dezinyen, ti annan 10 laferm ki ti frenmen, e lezot laferm ti redwir zot prodiksyon konsiderableman.

Par egzanp Mr Deputy Speaker i annan en Fermye ki li in kontinyen debat, i ti abitye prodwir 540 ti koson, ozordi i ape prodwir zis 120, e sa letan i ti a pe vann anviron 60 par mwan, oubyen 15 par semenn, ozordi i a pe vann zis 12 par mwan.

E sa dan li menm li, mon pe zis servi sa legzanp pour montre ki poudir i annan en problenm vreman serye e ki nou bezwen servi tou bann mwayen pour nou relans sa prodiksyon lagrikiltir.

E si nou pa premyerman regard sa zafer later Lagrikiltir, pour nou regarde ki mannyer zot pe byen ganny itilize, mon krwar Mr Deputy Speaker ki poudir nou pou tonm ankor pli ba, e non selman ki nou pour tonm ankor pli ba, me nou pour trouv nou koman en pei pe al plis dan lenportasyon.

E la ankor enn fwa lenportasyon, parfwa nou pa ni konnen kwa ki nou pe enporte ; dernyerman la nou’n tann bann problenm avek Argentine kot in annan bokou problenm an term lavyann ki nou pe enporte, e ozordi dan lemonn i kontinyen annan sa bann size ki monte detanzaot.

E nou Sesel, si nou, nou pa organiz nou, nou pour kapab kontinyen tonm viktim avek sa bann keksoz ki arive dan sa bann lezot pei e nou pour met lasante nou pep an danze; me non selman lasante nou pep, me nou riske met nou prop prodiksyon li osi tou an dout fen kestyon.

Alor nou krwar ki poudir i enportan pour ki Gouvernman i a pran en desizyon imedyat, e sa desizyon imedyat, se ki tou later ki’n ganny idantifye koman later Lagrikiltir i ganny rezerve zis pour lagrikiltir, napa okenn lezot keksoz ki ganny fer lo sa later.

E mon dezyenm pwen la se ki i annan dimoun ki’n ganny sa posibilite pour zot aste later Lagrikiltir, me ki zot pa ankor fer nanryen lo la.

Alors mon pe osi demande ki Gouvernman i antre dan negosyasyon avek sa bann dimoun ki’n peye pour sa bann later Lagrikiltir, me ki lefe ki zot pa ankor fer nanryen lo la, Gouvernman i re pran sa bann diferan, sa bann kare later.  E sa Mr Deputy Speaker, se pour senpleman ki nou kapab retourn ankor, relans lagrikiltir, bann later i ava kapab re ganny donnen avek bann dimoun ki enterese pour zot fer lagrikiltir.

Sa bann later i ava la a dispozisyon bann dimoun, bann fermye oubyen bann zenn ki’n al etidye dan nou Lekol Lagrikiltir pour zot kapab ganny sa bann posibilite pour zot rantre dan prodiksyon ki an se moman i tre, tre enportan.

Donk i en desizyon ki Gouvernman dan mon lopinyon i kapab pran imedyatman, parske Mr Deputy Speaker nou pa pour kapab kontinyen trouv nou dan en sityasyon kot prodiksyon agrikol i kontinyen tonbe.

E se pour sa rezon osi ki mon’n, dan mon Mosyon mon pe dir ki Gouvernman oubyen bann lezot Lazans i bezwen rod lasistans finansyel pour ki bann fermye i ava kapab ganny en nouvo lankourazman.

Parske nou pa pour kapab zis dir avek fermye relans zot dan prodiksyon agrikol kan ofet zot napa larzan, e la nou bezwen pran konsiderasyon.  Letan ti ariv kriz Ekonomik an 2008 ki nou ti vwar pe al arive, ti deza annan bann fermye ki ti’n pran bann loan, bann diferan loan e zot pa ti kapab peye akoz zot prodiksyon ti ba.

Alors ozordi i annan fermye ki ankor pe pey bann loan ki zot prodiksyon in arete.

E se pour sa rezon Mr Deputy Speaker i enportan pour ki zot kapab, nou kapab rod bann mwayen, bann Fon ki pour ed pour zot rekomanse.

E lakantite laferm ki’n fermen i vreman sokan, e letan ou pe koz lo prodiksyon, par egzanp dan sa peryod letan ki mon pe koz lo la, mon konn en fermye ki ti annan li 37 bef, ozordi i annan zis 3 bef, savedir son laferm in plizoumwen fermen.

E prodiksyon poul in sorti 80 poursan pour li ozordi tonm lo anviron 30 poursan; pork in sorti anviron 63 poursan prodiksyon e ozordi i tonm anviron 37 poursan.

Nou ti annan nou a en serten moman 16 laferm ki ti pe prodwir poul; ozordi nou annan nou zis anviron 6. E ladan menm i annan sou prodiksyon, savedir zot pa pe prodwir lakantite parey zot ti pe prodwir avan. E par egzanp Mr Deputy Speaker mon kapab dir avek ou ki sa cycle parey nou apel li, sa sirk pour prodiksyon poul ki anviron 6 semenn, ozordi sa fermye i pe prodwir poul, me selman kot oparavan apre sa 6 semenn i ti anmenn tou son bann poul, ozordi i pe fer sa an 3 batch.

I anmenn ozordi, apre sa i anmenn ankor i fer li dan 3, alors bann laferm ki par egzanp ti pe prodwir 40, 000 poul ozordi zot nepli pe fer li.

Kot en moman kot nou ti pe pran pour ariv lo otosifizans, ozordi nou trouv nou, nou’n retourn an aryer.

I annan en Fermye ki’n sorti Mr Deputy Speaker lo prodiksyon 16, 000 poul, ozordi i pe prodwir 4, 500, e sa 4, 500 i dan 3 batch.

E non selman ki nou pe koz lo prodiksyon lavyann ki tre enportan, me lo lot kote nou pe osi koz lo prodiksyon legim, e ozordi nou pe ariv sa pwen kot serten fermye i a pe osi al dan lenportasyon.

E parey nou konnen prodiksyon legim letan ou pour antre avek dan pei, malgre ki tou bann diferan kontrol i ganny mete, nou pour still tanzantan trouv serten zensek ki rantre, e sela aprezan kot tanzantan nou trouv nou pe lager avek en nouvo zensek ki apel Senir Plim, ki apel mous ‘Together, ki apel en lot ki detri nou bann pye Takamaka oubyen ki detri nou bann pye Sandragon, oubyen ki detri nou bann legim.

Alors pour tou sa bann rezon nou krwar ki i enportan, i enportan pour nou re donn en lansman sa Sekter Lagrikiltir.

E parey mon’n mansyonnen oparavan nou ti dir, avek sa Minister Lagrikiltir nou, nou koman en Lasanble nou devret pare pour nou donn zot sa lankourazman.

E nou ti menm al pli lwen pour nou regard Maputo Declaration pour lo nivo Lafrik kot i dir, ki Bidze Nasyonal pour an sa ki konsern Bidze Lagrikiltir i bezwen reprezant omwen 10 poursan, e la pour le moman nou Bidze Nasyonal pour Lagrikiltir i pa pe reprezant 10 poursan, i pe reprezant ofet anba 5 poursan.

Alor nou bezwen pran sa size serye. E in annan bokou bann resers ki’n ganny fer, e mon krwar ki nou koman en Lasanble Nasyonal letan nou ava pe adres sa size, letan sakenn antre nou ava’n met nou pwen, letan nou ava’n regard bann diferan resers ki’n ganny fer, nou ava pe koz lo bann mankman ki egziste, nou ava pe koz lo bann lankourazman ki devret annan,  mon krwar Mr Deputy Speaker ki poudir nou ava kapab ganny en semen pour nou kapab avans devan, me byensir dan milye tou sa bann size, i annan bann konsern ozordi.

I annan bann konsern e nou’n deza abord serten sa bann size; kot par egzanp lo sa levy ki annan ozordi lo lenportasyon lavyann, kot nou pe demande ki sa i ava ganny etale lo plis kalite lavyann e ki sa larzan, par egzanp i kapab vin en komansman pour ki bann fermye i kapab ganny ede.

E sa dan li menm li parske avek sa prodiksyon ki’n tonbe, labatwar osi tou i annan problenm, Labatwar tou i annan bann, i annan en kantite bann konsern e kot bann fermye ki pe prodwir, ozordi zot santi ki poudir zot pa pe ganny sa ki zot merite, e ki la osi tou i bezwen enn bann domenn ki nou regard ladan dan en fason serye; parske fermye pe osi pe ganny afekte.  Mr Deputy Speaker, tousala se bann diferan keksoz ki nou kapab regarde. Par egzanp osi tou, nou pour bezwen al dan regard bann kontrol.

Ozordi napa en incinerator ni lo Por, ni lo Erport pour bann legim ek bann lavyann ki ganny sezi. E letan pe koz lo rubbish dump, e i zis ganny depoze laba, e apre sa eski nou konnen ki arive?

So nou pour bezwen annan bann diferan kontrol pour nou kapab protez nou pei, protez nou pep anmezir ki nou avans devan.

Letan nou pe koz osi lo bann kontrol, sa en lot size ki nou koz lo la, e mon kontan ki poudir ozordi atraver bann presyon ki nou’n mete, i pe annan plis kontrol lo Erport, bann avyon ki vini, ki pa ganny tyeke lo kwa ki zot pe rantre avek, senpleman akoz zot annan bann bon kontak. Tousala se bann keksoz ki nou pour bezwen serye koman en pei pour nou balans byen e pour nou kapab avans pli devan. Mr Deputy Speaker mon’n koz avek plizyer bann dimoun dan sa domenn Lagrikiltir e mon kapab dir avek ki poudir ozordi nou bann fermye zot lo zot zenou, zot in tonm azenou; parske in nepli annan sa lanmour pour sa metye ki zot annan, i plito annan dekourazman.

E alor nou koman en Lasanble Nasyonal ozordi i enportan pour nou donn nou bann fermye tou sa lankourazman ki neseser, i enportan pour nou dir avek zot, Lasanble Nasyonal i lo zot kote, e Lasanble Nasyonal atraver sa Mosyon pe demann Gouvernman pou zwe son rol.

Nou pe demann Gouvernman pour pran sa size dan en fason tre enportan, e atraver sa pour nou kapab relans sa sekter ki sitan enportan lo, ki sitan enportan dan nou lekonomi, me osi pour nou pep.

E la mon anvi dir avek Lasanble ki, letan nou pe regard lenportans sa size dan dernyen rasanbleman Parlman Afriken ki 5 nou Manm la dan sa Lasanble nou ti asiste, mon anvi dir ek Lasanble ki nou pe pran li sitan enportan ki i annan enn nou Manm, se Onorab Simon Gill ki lo sa Komisyon Lafrik, e li i lo sa Komisyon ki tous Lagrikiltir ek tou bann lezot devlopman. Nou ganny drwa al lo en sel Komite dan sa Parlman Lafrik, Pan-African Parliament, e dan sa 5, dan sa 13 Komite, letan nou’n swazir nou’n dir ki i enportan pour nou pe tous Lagrikiltir.

I annan Onorab Lemiel ki lo Komite Gender, i annan Onorab Esparon ki lo Komite Madanm, Lasante, wi ki lo Komite Lasante, Onorab Mondon ki lo Komite Finans, e mwan menm ki lo Komite Human Rights & Justice & Human Rights.

Me zis pour soulinyen ki poudir sa Komite, sa Komisyon Lagrikiltir ki parey nou konnen Lafrik i plito en lekonomi Agrikol, nou’n fer sir ki nou Lasanble i ganny reprezante lo sa Komite pour nou kapab, e la petet atraver sa pour nou dir avek nou bann fermye ki nou vreman pe siport zot.

E alor Mr Deputy Speaker mon pour aret la, me mon krwar ki i tre enportan pour nou aprouv sa Mosyon, e apre sa pour nou fer en swivi. E petet pour kwa pa, mon konnen poudir i annan bokou Komite dan Lasanble me selman a en serten pwen mon krwar Lasanble pour bezwen li menm li etabli en Komite ki i ava annan pour fer avek Lagrikiltir ek prodiksyon manze, pour nou kapab annan sa swivi pour nou donn lankourazman kot i neseser e pour nou kapab koman en pei kapab finalman en zour ariv lo otosifizans. Avek sa detrwa parol mon ava dir ou. Mersi Mr Speaker.

 

MR DEPUTY SPEAKER

Mersi Onorab Ramkalawan, Onorab Afif ou oule segonn Mosyon?

 

HON AHMED AFIF

Mersi Mr Deputy Speaker, mon ti a kontan segonn sa Mosyon par Leader Lopozisyon Onorab Ramkalawan, e osi avek ou permisyon fer en entervansyon.

 

MR DEPUTY SPEAKER

Ok go ahead Onorab.

 

HON AHMED AFIF

Mersi Mr Deputy Speaker, Mr Deputy Speaker sa size Lagrikiltir i en size ki konsern tou Seselwa, i konsern tou Seselwa akoz nou pe koz prodiksyon manze, e nou pe koz lo en keksoz ki nou bezwen toulezour pour nou sirviv, manze.

Byensir dan konteks Sesel en kantite manze i enporte, me i osi enportan pour note ki i annan en prodiksyon agrikol Sesel ki ti o a en moman letan me ki’n desann konsiderableman avek letan.

E mon krwar sa Mosyon ozordi pe adres en pe lefe ki i pe desann. E nou, nou krwar dan Lasanble Nasyonal pou dir nou pa devret les en sekter komans koule.

Pour la senp rezon ki non selman i pe prodwir manze, me manze ki ganny prodwir kot ou, anba ou kontrol e ou sipervizyon i souvandfwa en meyer manze ki en manze ki ou pe al enporte.

Mwan lo kote koman en Manm dan Lasanble pour Anse Etoile, Anse Etoile i annan en kantite Laferm. Mon’n koz ek bokou sa bann fermye pour mwan konpran en pti pe ki bann difikilte ki zot pe gannyen koman fermye.

E vwala detrwa sa bann pwen ki zot pe dir ek mon, zot dir ek mwan bokou zot i ptipti pa neseserman, zot napa en gran laferm, e souvandfwa pour ou komans sa travay ou bezwen en Kapital e ou bezwen lekipman e sirtou avek sa kalite later ki nou annan kot i annan montanny, i annan ros eksetera, e la i vin en gro difikilte pour zot parske kou lenvestisman pour zot kapab kas later, aranz landrwa, etabli en sours delo avek en tenk delo; sa i bann keksoz ki bann fermye i santi Gouvernman i devre annan en Scheme an plas; par egzanp en fermye li i pa pour kapab al envestir dan en JCB pour al kas later, me akoz koman en servis ki Gouvernman i kapab ofer, zot napa en servis kot zot kapab ofer zisteman avek sa bann ptipti fermye pour bann ki en pe pli pti, en servis kot zot kapab lwe a en pri rezonnab.

Bann gro lekipman pa pour bokou zour, petet pour 2 zour, 3 zour kot zot kapab aranz zot landrwa, e enn fwa zot in fer sa, zot in ganny vreman zot lenfrastriktir de baz ki a permet zot komans sa prodiksyon.

Zot in koz bokou lo problenm delo, delo byensir pour depi prodiksyon zannimo depi la plant eksetera, i en keksoz ki esansyel. Me bokou fwa zot trouv zot napa sifizaman delo akoz, pa akoz napa larivyer, pa akoz napa lapli, Sesel i enn bann pei ki annan preski 3 met lapli tou le lannen, e sa i en kantite lapli ler ou kouver teritwar Sesel, me laplipar delo i fini dan lanmer, laplipar delo i kontinyen koul dan sa bann larivyer, i pas o-bor sa bann laferm, me napa en sistenm ki pe mars byen pour fer sir poudir delo i ganny kaptire, delo i ganny anmennen ziska kot en tenk, en rezervwar e answit i ganny distribye dan en fason tre senp kot sa bann Fermye.

Sa bann ptipti problenm. Onorab Ramkalawan in koz en pe lo problenm finansman, me nou annan sours finansman par egzanp IFAD i ti fer en proze Anse Etoile, La Gogue kot zot in envestir dan bann tiyo 3 pous, zot in depans apepre R400, 000 dapre sa ki mon konpran, zot in kre en landrwa kot zot in kaptir sa delo e pour anmenn li, e finalman sa delo zanmen in arive kot fermye, proze in fini dan semen; R400, 000 in ganny depanse, me fermye pa pe vwar son benefis, tiyo i ankor la, selman i vid napa delo ladan.   Sa bann pti keksoz koumsa mon krwar i pa kout bokou larzan si Gouvernman i met en team an plas, pour fer sir poudir delo omwen pour bann fermye i en keksoz ki ganny adrese, tou sa bann retikilasyon ki devret pase, tou sa bann basen ki devret ganny kree, annou fer li, i pour en gran komansman pour zot.

En lot problenm se materyo pour zot travay avek, souvandfwa zot depan lo Minister Lagrikiltir e ler ou al kot Store napa.

E la mon pa ti a kontan senpleman pe dir blanm zot, blanm Minister Lagrikiltir, me mwan mon pe dir annou rode kote problenm i ete, mon’n sey koz ek detrwa sa bann Fermye e pour mon vreman konpran, akoz ler zot al kot Store napa.

E zot dir mon zot krwar sa ki pe arive, se ki ler Store i met son order i bezwen pas atraver en prosedir tender pour al konnen ki bor fourniser i ete eksetera, borde sa i fini zot pour al esper peyman, zour materyo i arive in fini pas 3, 4 mwan ki ti napa, tou dimoun i tay lo la i fini e menm prosedir pe al komans ankor. E si nou pa aranz sa sistenm Procurement, mon pa pe dir les zot enport nenport ki se swar, nenport ki pri, nenport ki landrwa.

Me selman si nou annan en Unit ki son bi prensipal se fer sir i annan materyo pour Fermye travay avek.

Enn son bi, son materyo i devret la toultan irespektiv si i annan problenm Procurement eksetera, materyo i devret la toultan, e zot devret fer sir poudir zot annan sistenm an plas pour fer sir sa i arive.

Vol Mr Deputy Speaker, bann fermye i dir en kantite vol konmela, nou konnen bomaten nou’n koz lo problenm sosyal, problenm drog, me i lye avek lagrikiltir, parske souvandfwa sa bann dimoun ki’n ganny afekte ek tou sa bann problenm drog zot sitan dezespere.

Tou laferm i en Supermarket pour zot, zot pase, zot fer zot shopping, zot ale ek en goni, me sa ki fermye pe dir ek mwan, ok nou konnen nou annan en problenm drog, me selman i pour pran en pe letan, me akoz Lapolis par egzanp ki vwar en dimoun pe pase ek en goni lo son ledo, i pas devan Kordgard avek en goni mang e ou konnen sa dimoun i pa en dimoun ki travay lo laferm, zot konn tre byen ki son profesyon, personn pa aret li, personn pa demann li kestyon, ou dir ek li be akoz, kote ou’n ganny sa?

E zot dir mon lontan ou ganny arete avek en ko-ko, Lapolis i aret ou i demann ou kestyon, petet ti annan serten egzazerasyon, me selman si nou kapab fer bann ptipti pa an avan, par egzanp ek Lafors Sekirite, kot zot arete zot demann sa bann dimoun kestyon, e si i pe al tro lwen, i pa kapab eksplike ou bezwen pran aksyon kont li.

En lot keksoz Mr Deputy Speaker: konsesyon – ozordi bann ptipti fermye souvandfwa zot pa pe fer vin en container, zot pa pe fer vin materyo an kantite, e alor zot pa kapab al, zot pa pour zanmen al met en claim pour en refund lo VAT oubyen lo tax eksetera.

Zot, zot pour al kot en Laboutik kot zot pour aste zot bann keksoz e depandan laboutik kot zot pe ale si i annan VAT, si i annan tax eksetera zot bezwen peye.

Eski pa kapab met an plas en mekaniz ki permet kot zot annan zot resi kot zot in pey tax kot sa i kapab ganny ranbourse, parske koman en fermye si zot annan konsesyon, zot devret kapab benefisye menm ki zot pa pe apply direkteman koman enportater.

Mon annan zis 2 pti pwen pour fini avek Mr Deputy Speaker later ki ganny donnen pour Lagrikiltir, akoz ki en later ki dan en landrwa montagneux, en landrwa ki difisil ki pour Gouvernman ki zot lwe, i ganny lwe menm pri avek en later plat, dizon dan Anse Royale oubyen bann lezot landrwa kot later i pli plat kot fermye pe travay?

Me selman menm later pe ganny, zot pe ofer dimoun dan en landrwa tre, tre difisil menm pri, me li i bezwen al envestir kas later e i tre difisil pour zot travay, sa osi mon krwar set en keksoz ki zot devret regard ladan seryezman.

E finalman lo kote finansman, souvandfwa bann fermye i dir ou poudir ler pour al rod finansman i tre difisil avek bann labank.

E la mon ti ava lans en lapel ankor avek sirtou Labank Devlopman pour ed sa bann fermye pour annan bann Scheme an plas, parske zot pa neseserman doue dan preparasyon en business plan pour fer tou sa bann keksoz me selman zot annan lespri travay, zot annan sa fason pour zot fer sir ki zot kapab re pey zot loan.

Alor annou rod mwayen pour ed zot pli vit posib pour kapab ganny finansman a ler. Mon a donn en ou en legzanp kot finansman i met zot an retar.

En dimoun i vini i dir i bezwen rod en pick-up, dir li be rod en kotasyon, anmenn ou kotasyon apre labank i ava peye.

Alor i ale, i pase i rod son kotasyon i anmennen i plas kot labank, labank i komans fer bann processing, zour zot in fini fer tou zot bann processing, zot bezwen al rod detrwa pri eksetera, finalman ki arive?  Sa transpor ki li i ti pe rode in fini ale, la i bezwen al rekomans ankor e ou’n fini fer li perdi 2 mwan a 3 mwan dan son travay.

Alors se bann ptipti keksoz koumsa ki mon krwar nou devret vreman adrese koman Lasanble nou devret met devan Gouvernman. Mon ti a kontan siport sa Mosyon an antye parske tou sa ki pe demande, se ki pe demande pour lagrikiltir re ganny son plas dan lekonomi, pour ki nou bann fermye kapab kontribye, anploy dimoun, envestir e fer sir ki nou pe manz manze ki bon, e ki finalman pour ed lasante nou popilasyon.

Alor avek sa mon ti a kontan siport sa Mosyon. e mon ti a kontan demann tou Manm Lasanble pour fer parey pour fer sir ki nou Sekter Agrikol i remonte.  Mersi Mr Deputy Speaker.

 

MR DEPUTY SPEAKER

Mersi Onorab Afif. Onorab John Hoareau.

 

HON JOHN HOAREAU

Mersi Mr Deputy. Mr Deputy akoz nou en pti pei avek resours later tre limite, i pour toultan annan konfli lo size litilizasyon later an devloper e agrikilter. Sa nou konsyan.

Alor Mr Deputy koman en pti pei ki pe fer fas avek sa kalite sityasyon, i enportan ki Gouvernman i annan en plan stratezik lonterm lo litilizasyon sa resours tre limite e presye ki nou apel later. An d-iz-an sa, mon krwar ki en pei dan son plan devlopman litilizasyon later i bezwen demark serten rezyon sirtou landrwa ki plat e kiltivab prodiksyon agrikiltirel, e sa detanzaot i bezwen ganny revize.

Si nou serye avek sa size otosifizans, e si nou krwar ki nou dan sa Prensip ki nou vant pa devret zanmen dan lanmen bann etranze, later Lagrikiltir i devret selman ganny konpromize, pour lezot devlopman kan i annan en litilite vreman enportan dan lentere Nasyonal.

I vre ki nou bezwen plis lakaz, plis lotel, plis Lendistri, me nou osi bezwen, me nou bezwen osi etabli en balans lo sa size, parske plis fwaye, plis touris, plis lendistri i egalman bezwen plis manze.

Prodiksyon lokal parey souvandfwa nou’n fer rapel Mr Deputy i pour ede redwir nou trade deficit, i pour donn Lanplwa nou Seselwa e redwir nou depandans lo lezot pei lo nivo kalite prodwir, i enn ki souvandfwa i annan mwens kemikal an konparezon avek bann manze enporte, alor i pli sen pour konsonmasyon. Mr Deputy an di-z-an sa i fer mon rapel en laliny dan en sanson avek tit ‘Zardinyen” ki enn nou defen vedet La Misère lanmizik Kreol Mr François Belmont in sante, i dir si nou tro fye lo sa ki sorti deor nou pei zanmen pour vin an avan.

Mr Deputy mon mazin tre byen dan latet dan bann lannen ’80 dan mon distrik ti annan bokou plis later agrikiltirel notaman ex-Delorie, ex-Khashoggi, kot nou dir Beau Belle, konmela ti ganny servi pour plant fri ek legim par en Lakonpannyen Parastatal ki ti apel SADECO.

Ti annan osi Laferm koson dan sa lokasyon, malerezman striktir Ekonomik nou pei in sanz bokou depi sa letan, in annan en mankman stratezi kler lo ki direksyon ki lagrikiltir pour pran. Avek plis reveni dan Sekter Tourizm e presyon demann lakaz nou’n vwar ki plizyer distrik later Lagrikiltir in zis disparet pour donn priyorite devlopman lakaz e tourizm.

Mr Deputy i kler ki Sekter Lagrikiltir pe pas dan bokou problenm e an se moman nou pe enport preski tou sa ki nou konsonmen e i korek pour dir ki nou vant i preski antyerman dan lanmen etranze. Menm si larealite i montre ki serten prodwir i kout pli bon marse ki pour enporte ki prodwir lokal me lefe i reste ki nou bezwen a tou pri esey prodwir la mazorite keksoz ki nou manze isi, pour rezon sekirite alimanter. Sankwa sityasyon piratri, resesyon ekonomik dan bann lezot pei i kapab met nou vant an otaz.

Mr Deputy dezyenmman sa menm sityasyon kot lenportasyon i vin pli bon marse ki prodwir lokal i osi egziste dan bann plizyer pei menm bann ki Manm dan WTO parey nou.

Alor avek negosyasyon ek WTO, sa Sekter i ganny souvandfwa subsidize pour permet sa bann fermye prodwir e nouri zot pep e pli enportan pour kit manze a en pri abordab.

Mr Deputy Gouvernman i bezwen renouvle son zefor pour ankouraz prodiksyon lokal avek bi pour pey lotosifizans lo prodwir agrikiltirel.

Formasyon bann zenn agrikilter i bezwen pran kont lefe ki nou osi persi teren i limite e i devret kapab donn bann zenn en bagaz pour eksplor bann metod inovativ dan lagrikiltir kot ou servi mwens teren e ou rekolte bokou plis. Mr Deputy Speaker i fer mwan rapel parey Speaker Onorab Pillay ti kontan dir dan son bann diskour ler i ti dan Gouvernman ‘do more with less’.

‘Do more with less’ i devret Prensip ki gid nou devlopman lagrikiltir, dan distrik mon tir sapo avek bann Fermye parey Roch dan leo La Batie ki pe prodwir legim ek gro manze lo en teren tre difisil, Nigel Dan Gala Le Niole ek son Laferm koson, Joel ek son papa laba anler Panorama dan zot laferm bef e lezot ankor.

Mon demann zot pour kontinyen e koman zot Manm Elekte, mon pour touzour donn mon sipor pour zot.

Mosyon Mr Deputy, pe met lanfaz lo relansman Sekter Agricultural en mettant lanbargo lo lavant later agrikiltirel.

Ler nou get statistik lannen 1960 parey Onorab prezantater Mosyon in fer resorti, mwan mon’n ganny sa bann figures an ektar, la i annan 25, 335 ektar later ki ti’n ganny rezerve pour alokasyon devlopman agrikiltirel; La an 2006 nou vwar par egzanp, parey in ganny dir ki sa in redwir sifizaman ziske 2, 060 ektar, sa i anviron 8.1 poursan ki reste lo later orizinal. Ziska 2016 i annan anviron 468 fermye lo State Land e an total 587 plot later ki’n ganny donnen avek fermye. Se pourtan popilasyon sa lepok ti bokou pli mwens. Mon demann mon lekor ki direksyon nou pe ale si nou kontinyen koumsa.

Mr Deputy Speaker, mon krwar ki sa Mosyon i devret target osi lafason ki sa pti morso later Lagrikiltir i reste i ganny partaze.

Nou vwar ki etranze notaman Sinwan in ganny priyorite pour ganny later, pour ganny serten teren plat, kot ti annan tou lenfrastriktir neseser pour fer laferm parey dan Barbarons tandis ki lezot pti fermye Seselwa i ganny dan bwa kot teren i difisil.

Size la partaz later dan dite La Misère, later dan Plato Grand Anse i osi i an konsern, ler mon ti demann kestyon lo sa size dan bidze ki ti pase, mon ti ganny dir ki sa bann etranze pe anmenn nouvo teknik lagrikiltir. Me kestyon i reste lekel sa bann Seselwa ki pe aprann avek sa bann teknik avek sa bann Sinwan ki pe servi? Larepons se personn. Alor mon annan tandans krwar ki sa se zis pour tir manze dan labous Fermye Seselwa e pour met manze dan labous bann agrikilter Sinwan.

Mr Deputy, nou bezwen serye e fer keksoz dan latransparans pour sa ki vin apre nou pa ziz nou koman en zenerasyon ki iresponsab.

Mr Deputy an konklizyon mon ti a voudre vwar Minister Lagrikiltir i osi revwar bann lagrikiltir dan lansanm e revwar bann lezot Polisi, bann fermye dan mon distrik pe demann pour revwar serten sa bann keksoz swivan:

Pri ensektisid, size ki tous mous fri ki mon ti deza demande kestyon lo la, i annan rapor osi ki gro fermye i taye i aste tou bann lensektisid e bann prodwir lagrikiltir ki vini, e pli tar bann lezot pti Fermye i bezwen re al aste avek zot, e zot, zot vann sa a en pri ki tre ser, ki pli ser ki zot ti aste oparavan.

Lafason ki Labatwar i ganny zere kot i annan Konfli Lentere, Propriyeter i fer sir ki son zannimo i ganny touye avan, me parkont pour lezot Fermye i ganny put on hold oubyen i ganny dir vin en lot zour. E la Mr Speaker mon pour blanm sityasyon direkteman lo Minister Lagrikiltir ki ti’n devret vwar ki sa kalite model biznes i pour évitableman kree Konfli Lentere.

Onnetman lekel sa prodikter elevaz lavyann ki ti pour fer otreman?  Me apre tou en agrikilter, i en Businessman li osi.

Alor Gouvernman ti’n devret fer sir ki enn son Polisi, se okenn prodikter elevaz zannimo, pa pran responsabilite en Labatwar. Refri pa kapab li menm vin zwer.

Mr Deputy Speaker dan ou sazes ou konn tre byen sa dikton ki dir ‘if you fail to plan, you plan to fail’.  Alor i osi senp ki sa planifikasyon Gouvernman i devret pli bon.

Size lasistans ekstansyon, Extension Officer ki pa adekwat i osi en konsern, sityasyon manze zannimo i pa toultan annan, oubyen par kalite ki o standar i osi en konsern.

Mr Deputy san revwar lafason ki nou donn akse finans e ed fermye pour retourn lo Laferm, nou pa pour al tro lwen. Mr Deputy Mosyon Onorab Ramkalawan i enn ki pe demann Minister Lagrikiltir pour aret en kou e fer en stocktaking rod bann fason pour relans lagrikiltir. Mon pour donn mon sipor sa Mosyon e demann tou Manm pour fer parey. Avek sa Mr Speaker mon dir mersi pour ekout mwan.

 

MR DEPUTY SPEAKER

Mersi Onorab John Hoareau. Onorab Lemiel.

 

HON SYLVANNE LEMIEL

Mersi Mr Deputy Speaker, bonn apre midi Mr Deputy Speaker.  Bonn apre midi tou bann Manm Onorab. Bonn apre midi tou bann dimoun ki a lekout.

Mr Deputy Speaker lagrikiltir i en Sekter Ekonomik tre enportan an term prodiksyon e sekirite alimanter pour pei. I osi enportan pour kreasyon lanplwa e koman en mwayen gagne pain .

Mr Deputy Speaker dan Anse Royale i annan 11 laferm anrezistre, i annan 6 laferm ki’n ganny konte koman gran, 2 koman mwayen, e 3 pti.

Mr Deputy Speaker dan mon pti enteraksyon ki mon’n annan avek en ‘pti’ fermye dan mon distrik i ti met an akont mwan en pe son dilenm ki i pe fer fas avek, e ki li i pe fer pour li kapab reste dan sa sekter akoz pour li lagrikiltir i tou, lagrikiltir i anmenn li bokou satisfaksyon e i osi koman en terapi pour li.

Mr Deputy Speaker la en pe son propozisyon ki i ti fer pandan ki nou ti pe fer nou pti dyalog. I ti fer mon konpran ki pti fermye i travay tre dir pour zot kapab ariv pli lwen dan sa biznes.

Zot bezwen transport zot legim bazar e deplase pour al fer bann tranzaksyon ki konsern zot biznes.

Alors sa fermye ti pe demande ki Gouvernman i fasilit lasistans pour bann pti Fermye anrezistre ganny akse avek transpor duty free avek kondisyon ki zot pa vann sa transpor avan 10an.

I ti fer resorti ki fermye i fer bokou depans, ti a bon annan en subsidy pour tou pti Fermye ki ankor pe lalit pour ariv kot zot anvi arive.

Serten pti fermye i mank leksperyans oubyen training pour zot kapab prodwir plis, alors i ti sizere ki pti Fermye i ganny bann attachment pratik lo bann laferm ki deza byen etabli, oubyen dan bann pei larezyon par egzanp Maurice.  Sa fermye ti osi trakase akoz i santi ki lenportasyon par bann gro fermye i osi pe touy bann pri Fermye, tou Fermye i devret ganny ankouraze pour kiltiv byen later ki zot in gannyen e prodwir plis olye ki zot enporte.

Lot konsern sa fermye ti lo kote kemikal pour bann plant. I ti fer resorti ki fodre annan plis kemikal bio, e fodre ki toultan i annan stok dan Store Lagrikiltir.

Fodre annan plis resers zenetik ki ganny fer lo kote lagrikiltir pour ki fermye a kapab prodwir pli byen e pandan tou sezon.

I osi annan konsern lo bann kalite e grad lagrenn ki lo Store. I ti osi propoze ki ti a byen si Minister Lagrikiltir i fer provizyon e annan fasilite pour bann pti fermye kapab lwe bann lekipman, par egzanp bann masin kas later, eksetera.

Mr Deputy Speaker, sa pti Fermye ti osi konsernen lo kote lankourazman pour bann fermye. i ti fer resorti ki bann Zofisye Ekstansyon pa pe donn ase sa lankourazman ou sipor bann pti fermye, zot pas lo bann laferm tre rar oubyen fodre ki sa pti fermye i telefonn zot pour zot vini.

Minister i devret fer prosedir pour ki bann Lease Agreement pour bann fermye i ganny donnen dan en dele letan rezonnab. En Fermye pe kiltiv en later pour plis ki 5an, me son Lease Agreement pa ankor pare.

Mr Deputy Speaker sa i pa rezonnab. Sa pti Fermye pa kapab ganny en Loan akoz sa. Mon sizere ki Minister Lagrikiltir i anploy en Legal Officer pour travay lo bann lease, fast track zot e fer sir ki bann Fermye i ganny zot dokiman dan en dele letan pli rezonnab ki ozordi; par egzanp dan en dele 6mwan.

I osi annan retar dan bann anrezistreman fermye kot i pe pran plis ki 3 mwan pour serten pti fermye ganny zot dokiman anrezistreman.

Mr Deputy Speaker, si nou oule vwar lagrikiltir grandi e fermye vin pli prodiktiv, fodre Gouvernman i bezwen seryezman ranforsi lenvestisman dan sa sekter an term finansyel.

Fodre enzekte finans pour Fermye kapab prodwir plis e donn zot sa lankourazman neseser. Mon a donn en legzanp; en fermye i ganny en morso later pour kiltive Anse La Mouche napa delo, ni elektrik, ni semen, pov fermye i fek konmanse, napa ase larzan, i al apply en loan avek DBS anba Fon ADB, la i al ganny en lot latet fermal avek en bann prosedir ranpli papye parti papye, e pour fini i ganny demande pour anmenn Statement Labank son madanm, alors sa fermye i degoute e refize pran sa loan.

Petet la osi Minister Lagrikiltir ansanm avek DBS, i bezwen revwar sistenm donn loan bann fermye atraver sa fon ADB kot i ava vin pli aksesib e fasil pour zot tou.

Kot i konsern later Lagrikiltir mon pour siport sa propozisyon annan en lanbargo. I osi enportan e mon rekomande ki Minister ki zer later Leta dan pei, i transfer tou later ki’n ganny klasifye pour lagrikiltir e met avek Minister Lagrikiltir; koumsa sa Minister i ava annan plis kontrol e osi annan en bon statistik lo ki kantite e grander kare later i annan. I pour osi byen ki sa bann later i ganny remet avek sa Minister konsernen pour ki apre ou pa vwar en dimoun in ganny later Lagrikiltir ouswa fer lakaz oubyen fer lot kalite biznes lo la.

Mr Deputy Speaker i enportan ki Minister Lagrikiltir i ed sirtou bann pli pti fermye otan posib; ed zot avek akse semen pour ariv lo zot laferm, e donn zot lezot fasilite pour komans fer sa laferm marse.

Mr Deputy Speaker, Gouvernman atraver Minister Lagrikiltir i merit pe ankouraz bann nouvo teknolozi ki serten fermye pe envestir bokou larzan ladan.

Sa bann fermye parey i devret ganny serten subsidy pour ki zot kapab kontinyen reste soutenab.

Mr Deputy Speaker, mon vwar ki Sesel nou pe konsantre bokou lo Blue Economy, e sa i tre byen, me mon osi krwar ki nou merit pouse pour promot plis Green Economy osi.

Si nou pa komans la, ankor dan 25an i paret mwan pour napa ankor fermye ankor dan Sesel, ni menm Lekol Lagrikiltir petet pour nepli egziste.  Annou pran aksyon deswit e fer sir ki tou bann Don Finansyel ki ganny donnen pour Lagrikiltir, i al dan lagrikiltir, i tous proze lagrikiltir epi i al ver bann dimoun ki dan Sekter Lagrikiltir.  Mersi Mr Deputy Speaker.

 

MR DEPUTY SPEAKER

Mersi Onorab Lemiel. Mon krwar i en entervansyon vreman passionate. Nou prosen entervenan, Onorab Letourdie.

 

HON JANY DE LETOURDIE

Mersi Mr Deputy. (chanting)

‘’In ariv en letan Seselwa pour nou met laont de kote, annou pran nou pyos pour nou plant nou manze, nou’n fini realize ki lagrikiltir i neseser parske sansan nou tou nou pour mor lafen. ‘’

(APPLAUSE)

 

HON JANY DE LETOURDIE

Mersi Mr Deputy pour permet mon sante dan Lasanble en pti gin, me zisteman sa se sanson zanfan bann Foyer, zanfan Foyer Nazareth dan sa lepok kot progranm lagrikiltir dan Sesel ti top parey nou ti dir, e sa sanson ti rezonnen tou le semenn lo Radyo Sesel pour alert nou ki en lot progranm lagrikiltir ti pe al pase. Mr Speaker sanson i vye wi, me mon asire ki son moralite pe reflekte dan Mosyon Onorab Leader Lopozisyon. Me ki sa bann zenn adilt pa ti a zanmen mazinen, se ki si en zour ti pour napa, nou ti pour annan en mank later pour nou kontinyen devlop lagrikiltir dan Sesel.

Seselwa i en Nasyon ki’n toultan kontan plante e sonny son zannimo pour li ganny son lavyann. Sa bann lepok kot ti napa byen, byen lenportasyon fri ek legim, nou ti kapab gannyen oubyen aste laplipar nou bann fri lokal depi son zanbroza, gouyav, serimolya, korsol, mandarin, en varyete mang, patol, pipangay, kalbas, pousinika, tripsedonn, brenzel, ponmdamour, e osi en varyete bred.

E Mr Deputy Speaker lo valer nitrisyonnel pa seye, zot ti ranpli avek tousala, e tousala plante dan later Sesel. Dan bann lannen 1980 a 1990 preski tou, si pa tou lakour ti annan deryer oubyen dan kote son lakaz son 2 oubyen 3 mayok dife, patat lokal oubyen Taiwan, en pti bed leti ek bred, detrwa plan brenzel, piman ek ponmdamour. Bann ki ti annan plis lespas Mr Deputy ti plant son karo zironmon, sonny omwen 2 koson ek detrwa volay. Sa sete larealite kot Lotorite Lagrikiltir dan Sesel ti annan en gran vizyon ki sa lantouzyazm ki ti annan parmi nou pep Seselwa pour fer lagrikiltir ti a vin enn ki ti a fer nou vreman fyer ozordi.

Gouvernman ti krwar ki en Polisi progresiv anver lagrikiltir, ti neseser e ki ti enportan pour kre en stabilite Ekonomik lonterm pour tou kategori fermye.

Ti osi annan plizyer progranm vize spesyalman anver bann pti fermye pour fasilit zot lavi. Plizyer mezir ti ganny pran pour redwir depans lo manze enporte, e sa i ti anmenn en logmantasyon 500 tonn prodiksyon fri ek legim lokal an lannen1992.

Lavyann pork parey in ganny fer resorti, ti vwar en logmantasyon en si ki lavyann poul lokal.

Ti osi annan 5 gran laferm Leta trouve lo Mahe, Praslin ek La Digue e sa Mr Speaker ti kre Lanplwa lo en baz an plen tan pour 250 fanmir e lo en baz a mitan pour fourni lanplwa pour 700 fanmir. Sesel ti vwar larive bokou Expert sorti en pe partou dan lemonn pour vin met an plas e demar bann proze, e osi donn lantrennman nou bann fermye.

Sant Resers Grand Anse Mahe ti organiz plizyer konpetisyon e Symposium avek bi pour atrakte nouvo lentere dan sa sekter e osi pour rekonpans e ankouraz sa ki pe kontinyen persevere e fer byen.

Plizyer Seselwa la, koman etranze ti lease bann later avek Gouvernman e lans sa lagrikiltir. Me malerezman Mr Speaker, ki ti arive dan lannen 1993? Minister Lagrikiltir avek Lamarin ti abandonn lamenazman sa 5 laferm Leta e ti diviz zot an pli pti plot pour plis, pour lease avek bann endividi.

Mr Deputy Speaker, i vre ki avek logmantasyon nou popilasyon ekstansyon prodiksyon livestock, fri, legim ek gro manze in sibir en defayans akoz Gouvernman in bezwen landrwa pour konstrir lakaz e fer lezot proze.

Me eski i vre ki ti napa lot alternativ?  Eski Gouvernman i satisfe ki in eksplor tou pozisyon pour vwar lezot posibilite?  Me mwan mon asire ki bokou Seselwa, i a mazinen oubyen konn o mwen en Laferm gran ou pti ki ozordi nepli oubyen ki’n tonm dan labandon san okenn siny en devlopman tel kon. Petet Mr Deputy Speaker oubyen pe esper letan prolonze pour ganny en lot Met.

Konbyen proze ki’n komanse epi mor lanmenm? Les mwan revey en pti pe zot memwar; Grand Anse Mahe Research Centre; Indian Ocean Nursery, Laferm Poul dan plato Barbarons, Hydroponic Farm Montagne Posée zis pour nonm detrwa.

Konbyen later ki’n ganny aste avek bann potansyel pour devlop lagrikiltir me ki malerezman, pe ganny servi pour en lot proze oubyen ki la e pe esper en lot lavant pli eleve?

Eski i annan fermye ki pe ganny difikilte pour demare oubyen pri lanmwatye semen e alors pa kapab prodwir?

Konbyen ki’n fer laplikasyon pour ganny later pour fer lagrikiltir?  An se moman ki kantite later Lagrikiltir ki pa ankor devlope ki reste dan Sesel? E taler Onorab Leader Lopozisyon in donn nou en sif. Tousala Mr Speaker, se en survey fran e konplet ki pour met tousala azour.

Pour sa dernyen 8an Gouvernman ti a pe travay lo en Plan Nasyonal pour reviz Sekter Lagrikiltir ek Lapes, pour asir en meyer sekirite lo manze pour nou popilasyon.  Seychelles National Agricultural Investment Plan SNAIP in vin ek en stratezi 4an ki a kouver 2016 a 2020 ki pour kout R1.5 bilyon. Sa ti ganny devwale Mr Deputy Speaker par Minis.

Sa ti ganny devwale par Minis Cosgrow ki ti Minis Lagrikiltir sa letan dan en rankont o nivo ki ti fer Eden Bleu an 2016, i ti annan sa pour dir.

I ti dir ki sa Minister in ganny akize dan lepase konm kwa i negliz sa 2 Sekter pli enportan. I ti dir me ki sa pa ti le ka. I ti osi dir ki kantmenm nou prefer lenportasyon koman en laport fasil, en letid resan i montre ki i annan lespas pour ekspansyon Sekter Lagrikiltir Lokal. Asistan Zeneral COMESA, li i ti dekrir sa rankont koman enportan e ki pour ede dan finansman sa plan lagrikiltir. Pa nou’n tande ki kantite later Lagrikiltir i reste? In dir 30 kilomet kare, mon krwar apepre 6.5 poursan, Mr Speaker, be sa i pa en gran kantite later ki nou merit kontant avek nou, e a tou pri, mon krwar nou merit tenir e pa larg li sa bann poursantaz later.

Annou pran konsyans ki i annan en danze la. Silvouple annou sov nou later, sov nou    fermye e sov nou pei.

Pour terminen Mr Deputy Speaker, mon swete ki sa stratezi 4an ki SNAIP in vin avek i annan en par efektiv ki a tous tou kalite fermye ki annan dan Sesel.

I soulazan pour konnen ki apre 8an e zoli plan ki apel ‘stratezi in ne. Avek bokou lespwar, mon demann  Gouvernman pour fer tou posib pour retir sa plan lo papye e met li dan later. Mwan mon komans par donn sipor sa Mosyon. Mr Deputy Speaker, be pa i gou ler ou plant se ou?  Mersi.

 

MR DEPUTY SPEAKER

Mersi Onorab Letourdie, Onorab Arrisol.

 

HON SANDY ARRISOL

Mersi Mr Deputy Speaker, bonn apre midi tou Manm. Mr Deputy Speaker mon ti a kontan komans lo sa note kot lontan nou granmoun ti dir avek nou poudir bato ti mont lo zil vid, e ler i ti sorti lo zil i ti desann plen. Sa i ti donn mwan…  i ti fer mon konpran poudir nou ti annan bann zil dan lepase kot ti ganny servi koman bann landrwa agrikol; kot nou ti annan bann zil dan lepase kot nou bann Seselwa ti plante, zot ti osi sonny bann zannimo e bato ti monte vid e ti al serse e apre ti desann avek Mahe kot bann isi ti konsonmen.

Mon komans koumsa parske letan mon’n tann Onorab Ramkalawan prezant son Mosyon in osi fer mansyon an relasyon avek konpetisyon later Lagrikiltir i annan avek later pour konstriksyon ozordi.

E dan tou distrik ozordi i annan en leokri lo later pour fer konstriksyon lakaz e osi later pour lagrikiltir. Me malerezman dan mon distrik St Louis nou napa later ni pour enn, ni pour lot.

E malerezman sa ki enteresan se ki, tou bann distrik ki annan later kot zot plante, zot bann prodwir i vin fini dan distrik St Louis dan bazar Sir Selwyn-Clarke Anvil.

Alor mon pou donn mon sipor sa Mosyon, selman i pour enportan pour nou osi rekonnet poudir i annan en kantite keksoz ki pe pase an se ki konsern later Lagrikiltir e mon krwar Gouvernman pour bezwen met zot lipye ater e nou pour bezwen vin fran avek tou bann keksoz ki annan pour fer avek later lagrikiltir.

Premyerman i annan sa ki konsern bann endividi ki’n pran later Lagrikiltir, e zis in gannyen, e later Lagrikiltir i la i pe dormi e i annan en lakaz lo la e nanryen pa pe ganny fer. Sa osi nou pour bezwen revwar.

Lekel bann dimoun ki’n ganny later Lagrikiltir, pour konbyen letan sa i avek li; e akoz i pa pe kiltive? Me letan nou lo later Lagrikiltir i annan lezot keksoz ki mon’n tann lezot Manm koz lo la an relasyon, par egzanp Onorab Afif in koz bann kontrent ki bann fermye i gannyen an sa ki konsern Later lagrikiltir.

Be mwan tou le Sanmdi mon fer en letour dan bazar Sir Selwyn-Clarke Anvil pour mon koz ek bann fermye, prezan dan Bazar ou zwenn fermye, savedir bann dimoun ki plante, ki kiltive apre i anmenn bazar pour li vann.

Dan en lot kwen ou zwenn sa bann ki mwan mon apel zot bann bazardye; bann dimoun ki pa plante, ki napa later, selman li i vini i vin vann.

Taler mon’n tann Onorab Afif koz lo en pwen ki enportan pour nou mazin lo la e pour nou diskit lo la.

Fermye li i rod en loan i plante i ganny son prodwir. Nou annan en lot group dimoun  ki zis zot vini zot rekolte zot. Be e ki zot vann sa bann group dimoun letan zot rekolte?

Plizyer fwa zot vann avek bann group dimoun ki mwan mon apel bann bazardye; bann dimoun ki napa later ki pa plante, be selman toulezour ou vwar li pe vann en prodwir. I annan sa.  Apre i annan bann takeaway; lezot biznes ki aste bann prodwir vole avek sa bann dimoun pour zot servi. Sa osi i form parti problenm ki nou bann fermye pe rankontre ozordi ki nou bezwen tackle ki nou tant pour per pour koz lo la, sa osi nou bezwen vwar. En lot keksoz, letan ou koz ek bann Fermye dan bazar, zot dir ek ou, ozordi Fermye pe demann Gouvernman GOP pour li fer vini 2 Bangladeshi, 2 Sri Lankan pour li met lo son later pour li fer plante; savedir pour li fer prodiksyon, selman sanmenm li menm li sa fermye li i anmenn li 4 dimoun pour fer travay lo son later pour fer prodiksyon, selman li menm li sa fermye i pe enport fri oubyen legim. Eski i balanse sa?

Si ou’n rod dimoun pour fer travay lo ou later, savedir pour ou kiltive, pour plante ,pour anmenn bazar ki tonm dan mon distrik pour nou vann, be akoz ou pe enporte an menm tan ou menm?

Sa letan mon koz ek bann bazardye letan mon fer letour dan Sanmdi. Sakenn i donn ou son versyon, i annan sa.  I annan en lot zafer. Letan ou fer letour dan bazar ozordi nou vwar mazorite tou le Sanmdi i annan diferan kalite etranze ki ou vwar zot pe vann lo bazar anvil.

Swa ou zwenn en Filipino, swa ou zwenn en Bangladeshi, swa ou zwenn en lot etranze ki pe vann dan bazar. Prezan sa lot Fermye Seselwa ki la o-bor i kriy ou, i dir ou, ‘’Be Arrisol be li la ti anmenn li isi pour fer kwa, pour kas later, pour aroze, oubyen pour vin asiz lo bazar pour li vann son prodwir?’’  Sa osi nou bezwen gete, parske tousala i afekte nou Fermye, i annan Fermye ki faithful ek son pyos ek son pik parey nou’n ganny dir, parey mon’n tann Onorab Jany pe sante pour li plante. Me i annan fermye, li i pe mazin lenportasyon.

E ozordi mon anvi dir mon bann frer ek ser ki la dan Lasanble, ler ou fer letour dan bazar ozordi, mazorite prodwir ki lo latab, se bann prodwir ki enporte.

Alor eski vreman nou annan prodiksyon lokal, nou annan prodiksyon lagrikiltir dan nou pei?  Sa i en lot keksoz ki nou pour bezwen revwar.

E letan nou pe koz lo fermye i pour enportan osi pour nou fer sir ki nou bann fermye zot pe itiliz byen zot later ki zot in gannyen, I pour enportan pour nou fer sir ki bann fermye zot pe desarz sa ki zot in dakor pour zot fer. E sa i fer, ki, akoz apre sa i reflekte lo lezot fermye oubyen lo nou ki aste sa bann prodwir.

Mr Deputy Speaker, ler mon lo bazar, i enportan pour nou osi mazin bann fermye ki’n travay, ki zot in prodwir, zot annan zot later, alor zot in kiltive e zot annan en landrwa apropriye pour zot vann sa prodwir. Ozordi letan nou pe get bazar, main bazar ki tonm dan distrik St Louis, i deplorab. Bazar i sal.

Ozordi bann fermye ler mon pase, sak fwa mon pase dan Sanmdi, get anler i annan girlann kot nou, toultan nou le 25 Desanm nou. Akoz?  Senpleman i annan bann prela ki zot in servi pour letan soley, ozordi tousala in preski desire.

Tousala zis i la e personn – personn pa pe fer absoliman nanryen pour soulaz en pe soufrans bann Fermye ki faithful, ki plante e ki anmenn son prodwir dan bazar pour li vann.

E ozordi letan nou get dan bazar, anvil i annan bann fermye ki deza dan zot zone, dan zot distrik, i annan bann fasilite ki Gouvernman in fer pour zot; parske zot ti pe rode, zot MNA in demande, zot in dir rode in donn zot, be zot pa servi sa bann fasilite. Zot tou, zot vin met en presyon dan bazar Santral e sa i fer ki lezot fermye ki napa bann fasilite, nou vwar zot mazorite letan pe vann dan semen, pe vann lo trotwar e Lari Benezet i en difikilte ozordi.

Ozordi ler nou pe koze, lo kote bann fermye, bann ki vann zot prodwir Lari Benezet ozordi i en dezord, mwan mon’n sey demann Lotorite ki nou kapab fer ek Lari Benezet parske bazar dan Sanmdi ler ou pase i annan fermye ki dir ek ou, get sa i annan ki pe vann deor lo bazar senpleman akoz?

Li i pa anvi pey en latab anndan. Alor li i vann lo en pale dibwa oubyen in anmenn son latab fermen i vann dan semen, e la deor i vin en dezord total.

Alor letan nou pe koz fermye donn zot later pour zot plante, nou bezwen mazin osi bann fasilite kote sa bann fermye i kapab vann zot bann prodwir Mr Deputy Speaker.

E i enportan pour letan nou koz fermye i annan en lot pti group dimoun ki ankor atase ek fermye ki nou bezwen mazin zot.

Nou annan bann bouse, sa group dimoun ki li i pas lo laferm i aste sa zoli koson, sa bef ek lezot keksoz pour li vann dan Labousri. Ozordi nou annan nou en pti Labousri ki mon konnen ki baze dan bazar.

E zot kondisyon ozordi letan nou pe koze i deplorab, parske zot landrwa premyerman pa an sekirite, i annan zot laport feray ki’n kase mon krwar i annan mil an pase, personn pa ankor pase pour get zot, ni pour sey aranze oubyen pour annan en keksoz pour nou dir poudir, be get sa nou ava agrandi nou a donn zot plis fasilite oubyen desantraliz li en pti gin dan bann lezot distrik.

Mr Deputy Speaker si nou pour koz lo lagrikiltir i annan en kantite keksoz ki nou kapab dir; be selman an vi ozordi ki Mosyon pe fer referans avek later, pour ki bann fermye zot kapab ganny plis loportinite pour zot agrandi zot biznes, pour zot kapab re pey zot loan, pour zot kapab pran plis prodwir.

Mwan mon pe mazinen ki Gouvernman in ler pour nou negosye pour nou kapab re ouver nou bann zil. Nou annan en presyon later isi lo Mahe, lo main island, nou annan en presyon later parske plis zenn  ki pe rod later ozordi pour fer lakaz e i en problenm. Me parkont nou annan bann zil ki pe dormi, kot nou ti kapab servi bann dimoun ki ti ava enterese an negosyasyon avek IDC, an negosyasyon avek Minis Lagrikiltir, pour nou gete ki mannyer nou kapab servi bann fasilite ki nou annan pour nou kapab ankouraz nou bann fermye pour zot annan plis prodiksyon.

Akoz letan nou annan plis prodiksyon i pour fer ki nou annan mwens bann prodwir kemikal ki pe rantre dan nou pei ozordi. E sa i a fer ki bann lezot keksoz par egzanp bann maladi ki nou’n tann koz lo la, mwan mon ti demann en kestyon avek Minis an relasyon avek fimyen, e Minis ti re asir mon poudir napa okenn fimyen ki pe rantre dan pei unless i ganny byen analize.

E Sanmdi mon pe pase dan laliny trafik zis vizavi avek nouvo building Nouvobanq, en msye i koup semen i vin kot mwan Mr Deputy Speaker, mon dan laliny trafik pe arete, i dir ek mwan,’’ Mr Arrisol mwan mon travay Land Marine. ‘’  I dir ek mwan, ‘’Mon kapab donn ou detay konbyen container mwan mon’n tire koman en drayver e mon kapab dir ek ou lo ki laferm mon’n al anmennen. ‘’

Mon dir ek li, kisisa ki ou’n al anmennen? I dir ek mon sa ki ou ti demann Minis,’’ Fimyen.’’  I dir mwan, ‘’mwan fimyen mwan mon’n tire. mon kapab anmenn ou, dir ek ou kote.’’ Ou konpran? So i annan en kantite keksoz ki mon krwar nou pour bezwen aranze ansanm, travay avek rode, gete ki mannyer nou kapab ed enn.

Parske letan nou annan fermye ki li i pe servi son fimyen lokal pour li kapab aranz son prodwir, pour li kapab vann, be nou annan lezot ki pe fer vini sa bann keksoz, e sa lanmenm la kot bann pti ‘Together,’ bann Senir Plim, sa enn ki reste zis lo pye karipile,  i annan pti lota-lota; i annan pti loto-loto. Tou kalite i annan ozordi dan nou pei.

So i pour enportan pour nou veye, pour nou konnen kwa ki pe pase dan nou pei pour nou kapab fer sir ki nou fermye zot ganny en bon deal.

Me selman Mr Deputy Speaker mwan mon ti a dir i pour enportan osi pour nou veye, veye fer sir ki nou fermye zot ganny proteze an relasyon avek sa ki Onorab Afif in dir taler, an sa ki konsern vol ki pe pase dan bann laferm.

E sa osi i ede pour dekouraz nou bann fermye, akoz parey nou konnen pour travay lo laferm i pa en keksoz fasil ou bezwen dan soley 24 lo 24, e letan ou pe mazin ou prodwir finalman ler ou, ou lev-e bomaten en lot dimoun in pase in rekolte. Sa osi mon krwar i pa byen.

Me selman an vi ki parey mon’n dir ki St Louis nou napa gran kantite later Lagrikiltir, i enportan pour nou siport bann distrik ki annan bann later Lagrikiltir, parske lagrikiltir i nou vant ki nou pe koz lo la, i depan prodwir ki nou bann dimoun i depan lo la, me i osi enportan pour nou kapab soulaz nou bann Fermye dan lezot distrik kot i annan later lagrikiltir.

Mon kontan mon’n tann Onorab Hoareau in koz lo sa zafer labatwar, mon rapel ti annan en sesyon ki mon ti al asiste 2 mwan pase, i annan en zofisye ti dir ek mwan, li i krwar poudir Gouvernman i devret rantre, swa rekonstrir en lot labatwar. Mon ti demann li be pour ki rezon, i dir ek mon non i senp, parske labatwar ki zot annan ozordi, mon pa konnen pour ki labatwar kot i ete labatwar, mon’n tann koz lo Labatwar e mon aprann i somewhere la o-bor kot SEYBREW si mon pa tronpe, i dir ek mon labatwar pour le moman i en problenm, parske sa dimoun ki annan labatwar parey Onorab Hoareau in dir li ki deside kan ou, ou kapab vin anmenn ou livestock la pou process.

Alor, apre i dir ek mon poudir lotel, lotel avan i aste en prodwir avek fermye, lotel i anvi konnen kote sa bann prodwir pe ale e ki fason i ganny touye e pe fer sir ki sa landrwa i prop.

E mwan mon’n ganny dir ozordi poudir laba i sal, alor lotel ki zot fer?  Zot prefere enport zot lavyann akoz zot pa kontan prosedir laba ki mannyer pe ale akoz zot pa pe satisfe avek servis.

Sa osi nou pour bezwen revwar koman en Lasanble serye, koman Gouvernman pour nou rode ki mannyer nou bann fermye pe ganny afekte, nou pour bezwen rode tou sa bann zafer. Nou pour bezwen fer sir met tou keksoz ater, e-tal tou kart e fer sir ki letan bato i mont lo zil i desann plen, avek legim oubyen lavyann ki nou bann fermye lokal in plante oubyen bann zannimo ki zot in sonnyen.

Mr Deputy Speaker mwan sa Mosyon, mon pour siport li 100 poursan parske mwan mon enn bann dimoun ki kontan al bazar, mon kontan mon prodwir lokal konpare avek bann ki rantre dan pei, e se pour sa rezon ki enportan parfwa ou fer en pti letour e ou ganny sans koz avek bann bazardye oubyen bann fermye ki la e zot donn ou zot lopinyon an sa ki konsern tou keksoz an zeneral ki pe pase.

E mon krwar tou bann dimoun ki pour koz lo sa Mosyon zot pour donn full sipor e mwan mon ti pour dir Onorab Ramkalawan mon pour donn ou full sipor menm si nou lo nou kote distrik nou napa sa gran kantite later parey Anse Royale i annan, kot zot ti pe menm mazinen al fer Liniversite lo later Lagrikiltir, be selman mon kontan sa pa’n arive. E mon asire poudir lezot distrik ki annan gran later zot a kontinyen siport zot fermye e fer sir ki nou bann fermye lokal i ganny full sipor ki zot merite pour sa travay ki zot pe fer pour sa louvraz nob ki zot pe fer.

Alor lo sa de pti mo Mr Deputy Speaker mon ti a kontan remersye ou e mon ti a kontan dir loter Mosyon Onorab Ramkalawan poudir nou, mwan mon pour donn li full sipor pour sa Mosyon.  Mersi bokou.

 

MR DEPUTY SPEAKER

Mersi Onorab Arrisol. Bon mon annan apepre 5, 6 entervenan, mon pe zis demande si nou pran en pti Break 15 minit apre nou retournen, oubyen nou fer en sel race, ok? Nou a pran en Break 15 minit apre nou ava retournen.  Ok so nou ava adjourn ziska 4er en kar, 4er 20. Ok thank you.

 

(BREAK)

 

MR DEPUTY SPEAKER

Bon. Nou a kontinyen nou travay. Prosennman lo lalis mon annan Onorab Sebastien Pillay.

 

HON SEBASTIEN PILLAY

Mersi Mr Deputy Speaker. Bonn apre midi. Bonn apre midi tou dimoun. Mr Deputy Speaker mon krwar Mosyon ki devan nou i parey tou Mosyon ki al dan sa laliny, i enn ki toultan reste enportan e i pre avek nou leker akoz i konsern de keksoz primordyalman mon krwar ki tou Seselwa i konsider pour zot 2 size vreman, vreman, vreman enportan. E sa se premyerman lagrikiltir li menm – prodiksyon agrikol, sekirite alimanter. E dezyenmman obviously later, oubyen teren, oubyen resours pour kapab fer sa, fer sa materialize. Me mon ti a kontan osi an komansan dan mon lentervansyon,  prezant petet pa en diferan lopinyon me en lot fason vwar sa size.  E mon ti a kontan zot konpran mwan ler mwan pour pran sa laliny pa neseserman mon konvenki pour dir sa laliny, i totalman korek. Me selman i en keksoz pour nou mazinen. Petet i kapab komans par en kestyon kot nou demann nou lekor pour dir – eski vreman Sesel, nou kapab vin otosifizan an se ki konsern lagrikiltir? Eski vreman si demen, nou ti annan tou sa fermye ki pe prodwir, e zot komans prodwir lo en pli gran nivo; si sa vreman pour rezourd nou problenm sekirite alimanter? Senserman mon pa krwar ki i pour posib ; akoz malgre ki mon realize i enportan pour nou, re dinamiz sa sekter, mon osi realis pour krwar ki nou pour toultan bezwen annan en balans ant sa ki nou kapab prodwir ek sa ki nou bezwen enporte. Me selman sa ki reste pour mwan fondamantalman enportan, e mon krwar laliny ki bann diskisyon pe ale se – eski atraver inputs ki nou kapab mete dan sa sekter, nou kapab ganny en return lo sa bann inputs ki a permet nou zisteman redwir sa ki nou apel nou food bill ?  Larzan ki nou depanse petet lo lenportasyon. Eski atraver redinamiz sa sekter, nou kapab ogmant aktivite ki i annan ladan pour anmenn plis lanplwa, pour anmenn plis devlopman, e anmenn plis krwasans ekonomik, an se ki konsern aktivite relye avek sa sekter?  Lo sa kot mon krwar wi. So ou vwar ki nou bezwen vreman balans, balans tou le de size akoz si i annan en keksoz ki enportan ler nou pe diskit lagrikiltir se kapasite petet nou pei, oubyen kapasite later ki nou annan pour nou kapab devlope lo en nivo lo en gran lesel. E ki mannyer nou kapab anmenn sa devlopman ki dan nou ka nou konsider li pa neseserman 100 poursan otosifizans, me to the point kot nou maximise on the use of the resources ki nou annan.

Mon konnen mon’n sorti en pti dan laliny ki Mosyon in demande me, mon’n fer sa pour mwan prezant en lot lopinyon ki petet i annan, oubyen an relasyon avek sa sekter, e la fason ki i annan lezot dimoun ki vwar sa sekter. Mon reste konvenki  neanmwen Mr Deputy Speaker ki i annan bann mezir ki nou bezwen pran. E mon krwar se la kot sa Mosyon li i pe adres serten mezir ki nou bezwen pran e sa bann mezir i fer sans. I fer sans akoz an menm tan ki pei pe devlope, nou vwar pour dir i annan en konpetisyon pour resours. E sa konpetisyon pour resours i vin dan plizyer domenn. I vin dan konpetisyon pour resours finansyel. I vin en konpetisyon pour resours fizik dan le term later. E i pour vin en konpetisyon pour lezot such as human resources. Par egzanp, ou pour vwar poudir;  annou pran konpetisyon ki i annan ant Lendistri Tourizm  avek Lendistri Lagrikiltir, ou pour vwar pour dir sa lendistri i pour annan, dan sa pozisyon ki i annan ozordi, i pe atrakte plis dimoun pour vin dan sa lendistri. Demen ou kapab ganny plis dimoun ki al dan, ki al ver par egzanp en lot sekter. Me lefe i reste ki ler ou annan sa bann konpetisyon, ki bann mezir ki ou met an plas pour ki par egzanp en sekter petet ki pli sansib dan sa konteks ki nou pe gete ozordi, lagrikiltir – ki mannyer li i kapab kontinyen grosi e survive, e agrandi. Pa zis survive me agrandi, an menm tan ki lezot sekter pe kontinyen progrese ? E se sa la kot mon krwar nou bezwen regarde kwa ki nou bezwen fer. Mon dir sa Mr Deputy Speaker akoz mon oule servi en legzanp pour relate sa avek. Annou pran par egzanp dan lendistri tourizm, mon annan, nou annan sa ki ou apel bann bato charter. En pe letan pase, ou pa ti vwar sa kantite bato charter, sa kantite biznes charter. Me ozordi in vin en lekonomi dan li   menm. E in diversifye. I annan diferan aktivite ki pe go on. I annan bann aktivite ki koz lo bann lotel ki twin avek bann charters, dimoun i dormi dan lotel apre zot fer charter. So i kontinyen bouze. Me par kont dan lagrikiltir, ou pa’n vwar sa menm mouvman pa akoz in napa volante, oubyen in napa plan. Annefe, si ou regard lo kote plan enn bann Minister ki annan en kantite plan se Minister Lagrikiltir. Me mon krwar bout ki’n manke se ki mannyer nou move from sa bout ki annan plan, pour nou fer li move to en faz lenplimantasyon.  E sa i pour demann bann inputs neseser pour nou kapab zisteman realiz sa ki sa bann plan pe dir nou.      Mr Deputy Speaker mon krwar nou’n pratik en lapros dan le pase kot, malgre en fermye in annan en later i pa’n prodwir a la oter nou’n tant pour; i ok, i ava vini, i ava vini ek letan, me sa vini ek letan, i pa’n zanmen vini parey nou ti a kontan vwar. E nou bezwen être realiz lo sa size. E nou bezwen être realis pour vwar ki bann mezir ki nou’n pran pour nou kapab ed sa fermye move dan sa direksyon ki i bezwen bouze. E pour mwan mon konnen pour dir i en kestyon tre difisil akoz mon pa’n zanmen dan sa sekter. Mon’n sey lir, mon’n sey konpran ; teorikman ou kapab annan bann diferan lopinyon ki fer sans otour sa sekter. Me dan son lenplimantasyon dan son fason fer li menm, se lot ki i enportan. Savedir, parey i dir the pulling in the details  li menm. Ki mannyer ou fer li marse an detay pour kapab met li a la oter ki petet nou ti a kontan vwar li.   E mon kontan ler mover Mosyon in raise sa pwen about sa 10% GDP from the Maputo Declaration. E se sa ki’n fer mwan demann sa kestyon orizinalman akoz ler nou get bann lekonomi Lafrik me ki sa i fer, i fer ou realize ki par rapor sa 10 poursan – eski poursantaz ki nou pe mete dan lagrikiltir i proportionate to where we want it to go?        Petet  10%  will not be to that extent. Me eski sa ki nou pe fer ozordi i deza proportionate petet to nou achieve petet 40% sufficiency, or ni menm 50% sufficiency?  Eski i annan en target ki nou’n set ki nou le achieve? E mon krwar i annan en target ki nou’n set. Me the question i ki mannyer nou sey achieve sa target baze lo bann mezir ki nou pe pran. E mon krwar ler nou regard par egzanp bann letid parey CLISSA ki’n ganny fer pour ankouraz small scale farming. Zisteman sa nide kot, ‘Pa i gou ler ou plant se ou,’’ se sa ki mon krwar nide sete pour komans ankouraz sa bann lagrikiltir lo sa nivo osi; Backyard Farming. Me ankor enn fwa nou vwar kot i annan par egzanp si nou konstri plis lakaz e nou pe go vertical. Ki kantite later i pour annan pour sa dimoun ler ou’n mont vertikalman pour li kapab fer sa Backyard Farming ? Ou konpran ?         So, se pour ki ler mon pe regarde, sa mosyon i tre enportan pour nou, akoz i fer nou. Nou bezwen toultan kontinyen koz lo sa size, nou pa kapab aret koz lo la. Me nou bezwen osi pas a laksyon. Ki mannyer nou fer materyalize into something that’s really worthwhile. E mon apresye serten propozisyon ki’n ganny fer. Mon ti a kontan fer serten propozisyon pour mwan menm ; kot par egzanp an se ki konsern par egzanp ADF par egzanp, prosedir anba ADF – Agriculture Development Fund zis parey dernyen fwa ler Minis pour Lagrikiltir, Lapes ti la, mon ti dir li sa prosedir par egzanp anba SME pour en peser aste en masin. Ki kantite keksoz ki ganny demande. Mon pa blanm sa bann lenstitisyon, me eski sa prosedir i relate byen, is in proportion to sa fason ki nou anvi keksoz i ganny fer ? Is this how we want to go ki nou fer li en pti cumbersome?   Nou fer li en pti pe difisil, pa difisil me konplike pour ki sa dimoun i kapab access sa. Eski petet pa in ler pour nou par egzanp en nide ki en dimoun in prezant devan mwan se ki Minister Lagrikiltir li menm, oubyen sey kapab annan en template bann lease. San ki sa prosedir go to en long process. Fasilit sa prosedir par egzanp kot sa lease i vini. Akoz mon konnen pour dir enn bann move ki ti annan, sete pour fer li posib ki avek ou lease lagrikiltir ou kapab al kot DBS, e servi sa koman en collateral pour ou kapab raise en loan pour ou kapab ou biznes.  So eski sa osi i pa posib ?      E trwazyenmman mon konnen pour dir Minis, ansyen Minis Peter Sinon ler  i ti… enn bann keksoz ki zot ti pe fight for, e menm Minis Cosgrow avan sa, e menm mon konnen Minis aktyel – sete pour annan en refurbishment to the Agriculture School.  Akoz ki nou bezwen vwar, nou bezwen osi vwar pour dir i annan en kontinite, e sa kontinite bezwen come from somewhere. E ozordi nou annan sitan keksoz ki nou pe battle with lo kote SFA dan lapes – lo kote sa, nou bezwen vwar petet ozordi si eski par egzanp, mon pe dir sa, mon ti a kontan ki tou dimoun i konpran – konfigirasyon lefe kot ou annan ou en petet, en PS ki pe vwar Lapes ek Lagrikiltir ansanm. Eski sa i pa ti ava bon petet ou ava annan en Departman pour Lagrikiltir li menm – apriori si oule fer en sort of en phase intervention over a period of time,  kot ou annan ou en Departman dedicated to seeing? Mon konnen ou annan en lazans me mon pa le osi fer Gouvernman vin pli gro. Me konsider sa eleman. Akoz deza lapes i en gro portfolio. I konplike.  I annan en kantite moving parts, e i pe vin konplike, akoz i annan diferan aktivite ki pe go on, processing pe antre. So eski i pa’n ler pour nou osi vwar ki mannyer the management of the sector, and therefore the funding of the sector ki antre ladan, si i la fason ki nou devret fer li ? Mon dir sa akoz mwan dan lopinyon pour mwan – petet I stand to be corrected, nou bezwen annan en plan. E sa plan i senp kot nou pe regard letan ki nou annan pour nou kapab achieve en serten goal dan lagrikiltir. E this goal we want to achieve, nou bezwen konnen kantite letan nou pour pran, kantite input nou pour bezwen pour fer li. E mon krwar sa i ava enn bann size ki nou bezwen konsidere. E an terminan Mr, Mr Speaker; bokou bann eleman dan sa Mosyon i konplimant en kantite bann travay ki’n deza komanse. Me i enportan ki sa bann travay i kontinyen. E i byen ki sa Mosyon in vin en moman kot nou kapab annan en diskisyon. E ki nou’n annan travay ki nou fer lo Bidze. Me lefe i reste ki nou bezwen osi parey mon ti komanse pour nou mazinen kote lagrikiltir i sitye son lekor ozordi. E pour bann akter, bann dimoun ki an form ansanm ek sa sekter. E zisteman pour zot konnen egzakteman kote zot in anmenn lagrikiltir. Ki zistans nou oule ale?  What is the low hanging fruit that we are aiming for la pour nou kapab move to the next step; akoz dan lopinyon there is no point nou shoot for the moon e we don’t get anywhere.  Petet nou devret at least konnen ki poursantaz ki nou kapab achieve baze if all the inputs where there. Tou bann keksoz, tou bann eleman ti la ; mettons nou annan 20 fermye, tou le 20 fermye pe prodwir at their optimum. What would be the percentage ki zot pour achieve, ler zot pe fer sa travay?   E prezan, nou prezan, ki bann inputs nou bezwen pour fer zot ariv lo sa poursantaz. And then once nou’n ganny sa poursantaz and we move to the next one until ki petet ki nou kapab ariv enn kot…mwan mon konnen i pa en rev, me en ve ki mon annan se ki en zour Sesel i kapab redwir son food bill. Cut it at least in half. E sa larzan once ki nou’n cut li in half, at least dan mwan lopinyon i kapab plis; me once ki nou’n cut li in half, sa larzan ou konnen i pour al dan lezot sekter. E pour davantaz lezot sekter. Avek sa Mr, Mr Deputy Speaker, mon pour donn mwan sipor pour sa Mosyon. E mon fotespere ki nou ganny, nou ganny tre byento petet ti ava bon ki Minis li menm i vin fer en Statement lo kontrandi, lo kote nou ete akoz baze lo bann…dan bann deba ki nou ti annan dan Bidze ti annan bann serten kestyon ki ti lev-e. E kote ki nou ti krwar kot nou, nou panse keksoz i kapab ale. Mersi Mr Deputy Speaker.

 

MR DEPUTY SPEAKER

Mersi Onorab Pillay. Onorab Ferrari.

 

HON JEAN-FRANCOIS FERRARI

Mersi Mr Deputy Speaker. Mr Deputy mon komans mon lentervansyon ozordi par demann en kestyon. Konbyen en kilo tomat pe vann ozordi lo market?   En kilo tomat enporte pe vann ant R130 a R140 en kilo. Ant R130 a R140 en kilo, mon fek ganny sa lenformasyon kot en dimoun ki enport tomat. Akoz? Akoz i annan en maladi, Onorab Arrisol in apel li Tutta…Pti Loto. Mon pa konn son non egzakt. I annan en maladi dan laplipar bann pei kot nou ti pe enport tomat. E donk nou bezwen al rod tomat en pli lwen. E ozordi tomat ki enn bann legim pli, ki ganny plis servi dan lakwizin lokal pe vann R130 a R140 en kilo. Alor ki sa i dir nou? Sa ki dir nou se ki o kour sa bann dernyen lannen nou prodiksyon lokal tomat in bes en kantite. Preski totalman. Prodiksyon tomat dan Sesel ozordi i forse 5 a 7 poursan demann lo market. Mwan mon vwar li en pe en keksoz ki devret revey nou dan nou sonmey. Ler mon rapel toultan ki ler mwan papa i dir mwan pour dir li in al etidye dokter lo larzan ponmdamour ; ki son frer Praslin ti prodwir ponmdamour. Telman ki ti anvoy Mahe. Telman, telman ponmdamour e ki i ti ase pour pey son letid, zis lo ponmdamour. Ozordi nou pa pe prodwir ponmdamour.  Nou pe enport tomat. La i la kot leta nou lagrikiltir i ete. E pour mwan i en keksoz ki vreman alarman.            Alor lo baz sa konsta mon ti a kontan pran bann pwen, enn par enn ki Onorab Leader Lopozisyon in liste koman son bann demann vizavi Gouvernman.    Premye pwen pour relans lagrikiltir dan Sesel i bezwen annan en kontrol lo lavant okenn later ki’n ganny idantifye koman later Lagrikiltir. Mon krwar sa i vreman enportan. E i devret ganny fer rapidman an menm tan ki nou pe met en moratorium lo gran lotel. Nou devret pran sa lokazyon pour Gouvernman idantifye ofisyelman idantifye tou bann later Lagrikiltir dan Sesel, prive e piblik, prive e piblik mon dir byen. E rod en fason pour met en Lalwa ki protez later lagrikiltir. En regilasyon avek en lafors Lalwa pour ki nou kapab sofgard sa resours pour nou menm, nou bann fermye, nou bann zanfan demen pour ki nou kapab prodwir en pe manze dan Sesel. I pa posib, i pa posib ki nou dan en pei kot nou dir nou pe met 50 poursan later Sesel dan Rezerv Nasyonal ki byen. Me selman nou pa’n met ni en kare later, ni en arpan later koman rezerv, koman rezerve, koman proteze pour later Lagrikiltir. Byensir mon dakor ki i annan sa konfli ant later Lagrikiltir ek later pour lezot bezwen; tel ki lakaz, komers, lotel, eksetera. Me nou pa devret pe viv dan pei kot nou sakrifye enn par rapor a lot. Nou devret toultan annan en balans.  E se pour sa ki nou koz lo en devlopman ekilibre, en devlopman balanse e soutenab. Me souvan Mr Deputy sa bann parol se zis bann zoli parol pour anbet nou.                                 Nou kriye pour dir nou pe fer devlopman soutenab. Me selman ler nou get dan fon ; ler nou lev paye nou get anba nou vwar pour dir i pa soutenab ditou. E san rod en diskisyon avek lezot Manm lo lot kote latab, bokou sa bann keksoz ki ti anba paye nou pe komans vwar la. E nou bezwen pran zot serye akoz tou sa bann lannen ti ganny kasyet anba paye, e menm pour lapes, menm pour lapes ozordi nou pe komans vwar pour dir sa gran lapes soutenab ki nou ti annan, i nepli soutenab parey nou pe dir. Be nou lagrikiltir osi i parey. E sa in ariv pour plizyer rezon. Mon ava pran enn de legzanp. Parey i annan serten zot ki konnen mon ti enplike dan en proze lotel Equator Grand Anse Mahe. E pandan sa letan ki mon ti enplike ladan, mon’n war Grand Anse Mahe sorti koman en laferm model pour vin en nanryen ditou. Ti komans par ler mwan mon ti, Onorab Georges i konnen ler mon ti,  nou ti antre dan sa proze Equator ti annan bann pye limon, bann pye zavoka. E bann pye mang, e bann pye gouyav. Ti tre zoli, me ler nou. Nou ti antre Gouvernman ti fer li en devwar pour detri sa bann keksoz. Akoz zot pa ti tro kontan ou a krwar ki nou’n koste o-bor sa. Menm si nou pa ti pe afekte sa bann keksoz. Me sa in ganny detri pour zot dan larantre lotel Equator fer 2 Blok  Flat – en mannyer ki nou ti a tay en pe pli vit. Efektivman nou’n taye apre. Akoz apre tou sa bann keksoz ki’n arive nou’n bezwen kite taye. Be sa en pe ti lapros. Nou pa’n protez, Onorab mwan rapel, avek…mon bezwen ‘rann Cesar sa ki pour Cesar.’ Mon rapel Onorab William ler nou ti dan Lasanble ti seye anmennen en Mosyon pour protez later Lagrikiltir. Ti seye, mon krwar ti arive lo Order Paper, apre mon pa konnen lekel sa Sef anler ki’n dir tire, zanmen nou’n vwar ankor. Pa ti enportan. Ozordi Grand Anse i sa ki zot konnen. Ok. Mon dezyenm pwen ki montre zot ki mannyer sa lenterferans politik in detri lagrikiltir, mon pour donn zot en lot legzanp ki mon konn tre byen. Mon annan en zanmi ki malerezman in mor i apel Cherubin Morin. Zot in pas 20an, sa Gouvernman in pas 20an pour teroriz li pour dekouraz li, pour persekit li. E pourtan ler i ti mor, en ansyen Minis Lagrikiltir ti dir pour dir i ti enn bann pli gran fermye dan Sesel. Me nou’n kontinyen persekit li. E mon ti a kontan dir avek zot e dir avek piblik ozordi, ozordi la ler nou pe koze sa persekisyon in re komans ankor. Akoz? Mon annan msye ki 45an pase in defris en bout later ki ti annan ros lo la ki Gouvernman ti anvoy li lo la. Ti en later Gouvernman pour li fer en laferm. In travay, in trimouse, in fer sa vin enn bann zoli laferm dan Sesel. Bann dimoun ki’n vin reste dan bor, enkli serten Minis, zot, zot pa oule reste o-bor en laferm zot. Alor zot persekit sa msye. Zot kontinyen. E sa i ganny tolere par Gouvernman.  I ganny tolere sa bann persekisyon koumsa. Akoz nou annan en Gouvernman malerezman, e nou bezwen dir keksoz mannyer i ete ki pa krwar dan lagrikiltir, ki pa krwar. Akoz si nou Gouvernman ti krwar dan lagrikiltir i ti ava met en pti pe plis larzan dan lagrikiltir. 5 poursan Bidze, i nanryen ditou. Donk, in annan, in annan sa bann kalite latitid ki lagrikiltir i pa enportan. Lakaz ki enportan. Lotel ki enportan. Ok. E ozordi ler nou mazinen en dimoun ki ti pe prodwir 600 koson par mwan, ki ti pe prodwir sousout pour Sesel antye, nou oule fer li arete zis akoz nou pa oule la kot i ete. Nou pa oule i reste la kot i ete. Akoz nou fer sa, akoz nou tret nou bann fermye koumsa ?   I pa devret, i pa devret koumsa. Pa akoz en dimoun i en fermye ki li i pa devret ganny larzan en zour. Ki pa devret viv. Be pourtan se koumsa ki’n pase tou sa bann lannen. Alors mwan mon demande, mwan demande ki wi i annan bann proteksyon legal pou later Lagrikiltir dan en mannyer ki sa bann dimoun ki pe dir la ozordi ki zot misyon se pour tir sanz sa later pour fer li vin en later rezidansyel zot pa pour kapab fer. E i pour ganny proteze par Lalwa. E Lalwa pour aret persekit sa bann dimoun ki pe sey prodwir manze pour donn nou pour manze. Sa i mon premye pwen. Mon dezyenm pwen i konsern dimoun ki’n aste later Lagrikiltir. Me ki pe fer en lot proze. Wi mon dakor ki Gouvernman i devret get sa tre byen. Gouvernman i devret regarde akoz i annan dimoun ki’n ganny bokou zoli later. E zot sipoze ganny later pour prodwir. I annan parmi sa bann dimoun. E i annan ki mon ase byen avek zot, mon zwenn zot tanzantan. Zot pe vwar li difisil, e ou vwar zot pe move dan lenportasyon. Mwan mon dir en sel keksoz. Si ou’n ganny later Gouvernman pour fer lagrikiltir, me selman ou vwar i annan plis lavi dan lenportasyon, al dan lenportasyon. Mon ankouraz ou pour al dan lenportasyon, ale. Be les sa later pour en lot dimoun ki anvi plante, oubyen ki anvi fer zannimo. Koumsa i devret ete. Nou pa kapab annan sa gato dan nou fridge, be selman an menm tan nou oule manz sa gato. Swa nou manz li swa nou kit li dan nou fridge. Be egzakteman sa ki pe arive. Nou pran bann zoli bout later, e Gouvernman i soutire i lese. Parey Onorab Arrisol ti pe dir, i annan bann dimoun ki sipoze fermye be sa ki zot pe vann bazar, se bann prodwir enporte. Ou bezwen fer enn, oubyen lot. Donk sa i en keksoz ki enportan ki nou fer. E si sa bann dimoun pa enterese pou prodwir ; si zot annan difikilte, kriye, koze. Me si zot pa enterese pou prodwir, rann sa later silvouple. E lezot dimoun i ava gete ki mannyer i kapab, devlop sa later, e travay. Akoz mon bann koleg, nou, nou sorti dan en lekonomi agrikol nou. Me selman 40an pase ler touris ti ariv Sesel bokou dimoun ti sorti dan lagrikiltir ti al dan tourizm. Be selman lepep Seselwa i ankor annan en lanmour pour later. I annan en kantite pti dimoun ki pa anvi fer en gran laferm li. I anvi fer en pti keksoz. I anvi fer en pti prodiksyon kot li. I anvi viv lo sa pti prodiksyon. Me selman i difisil pour li, akoz nou, nou pa get ki mannyer nou kapab osi soutenir sa bann pti prodikter. Nou pe gete ki mannyer nou pour koup Babarons an 4: en group Sinwan i a ganny enn, en group Endyen a ganny en bout, en group Seselwa ki annan en bon kontak i a ganny en kar. Ok ? Koumsa ki nou pe gete. Nou pa get sa bann pti fermye parey anler kot Onorab Afif in dir anler dan leo Maldive. Nou pa pe get zot sa bann dimoun zot soufrans ki mannyer zot ete. Nou devret rod en fason pour nou ed zot en pe plis. E par egzanp, i annan fason pour ed zot en pe plis. Nou dir pour dir, enn bann pli gro kontrent lo fermye se ki ler in prodwir en keksoz lo son laferm i bezwen lev-e pran, met dan en pick-up, al bazar. Al bazar avek. Ler i bazar i annan bann dimoun ki pe vin fer shopping, zot shopping zot pa fer bazar, zot fer kot sa fermye. Li i bazar, selman zot pe fer zot shopping kot li laba anler. Alors Gouvernman i devret vin avek bann fason inovatif pour zot kapab annan bann lorganizasyon ; Ankouraz dimoun pour envestir, ed bann dimoun ki anvi envestir dan en servis pour aste sa bann keksoz an gro parey msye Barallon Baie Lazare in aste in fer tou son lavi. I annan en kantite sa bann dimoun ki anvi fer sa. Me selman la par egzanp ozordi STC in aret fer vini laplipar legim. STC pa fer vini legim. I aste avek lezot dimoun. Be akfer STC i bezwen annan sa landrwa kot i annan Fruit & Veg. Akfer STC nou bezwen annan sa ? Sa i devret kapab lwe pour bann dimoun koman en landrwa kot ou vini, sa dimoun i vin kot ou ek son pick- up tou le Sanmdi. Ou konnen pour dir i pe pey, i pey leti R10 en pye leti, R25 en kilo tel keksoz. I vini i aste kot ou, sa dimoun i prodwir. Nou pa pe fer nanryen pour nou ed sa bann dimoun. Alors mwan mon anvi ki Gouvernman in reflesir lo bann nouvo metod pour zot kapab ed sa bann pti dimoun pour zot vin gran demen. Nou tou nou’n komans pti, pti. Nou tou nou’n pti, pti la ater. Be si nou pa ganny ede, nou pa pour grandi. Mwan mon pe demann Gouvernman aroze, aroz sa bann pti fermye. Fer zot lavi pli enteresan e apre ler zot komans monte la, les zot monte zot osi zot ganny drwa ganny en pe larzan. Zot osi zot ganny dwa viv byen. Pa akoz ou en fermye ki ou bezwen viv dan matir tou lavi ?  Lot pwen, e sa trwazyenm pwen mon’n aborde, ki lo later lagrikiltir, kot napa prodiksyon. 4enm pwen se lasistans finansyel pour bann fermye ki ava kapab ganny sa lankourazman. Byensir nou bezwen fer lasistans bann mwayen finansyel, bann mwayen finansman en pe pli fasil. Ozordi i tro konplike. Mon zis, mon zis hope. Mon zis reve ki ler Prezidan Faure ti mansyonnen State House semenn pase, ki i annan en sistenm ‘’Keep it simple, pour tax ;’’ ‘’keep it simple pour loan’’ ki osi sa ki pour aplik pour bann fermye, i ‘’keep it simple.’’ I annan larzan ki antre dan Sesel mon bann koleg. I annan larzan ki antre dan Sesel pour ed lagrikiltir. Be selman la parey sa proze CLISSA, i annan en ta milyon ki antre. Be eski i arive kot fermye sa?   Eski i arive kot fermye? Oubyen i reste laba zis dan bann letid, en konsiltan isi, en konsiltan laba. Finalman lotrozour ler pour fer, pour teste en nouvo shade house pa teste kot en fermye, i teste kot Gouvernman. Be ou teste kot sa fermye, si i marse ou vann avek sa fermye. Nou, nou pe pran larzan pour nou ed agrikilter selman nou pe ed Minister Lagrikiltir ki nou paran pli pov dan sa Gouvernman. Alors li osi i pe tranp avek sa larzan CLISSA pour li ganny en pe keksoz. Donk sa i en keksoz ki merit sanze. Mr Deputy, bann baryer tarif. Lanmerik, toulezour, bann pli gran pei dan lemonn, toulezour i pe protez son lagrikiltir. E mwan mon pour fatige, mon pour toufe dir ki nou osi nou bezwen kapab, nou bezwen kapab. Sa zafer WTO la, sa ki zot in dir nou WTO nou pa kapab touse, nou kapab touse. Nou kapab touse, Lanmerik i touse, nou, nou pa kapab touse.                               Nou kapab touse pour nou protez nou bann fermye. Par egzanp dan sezon zannannan, be dan sezon zannannan nou kapab dir avek bann enportater si oule enport dan sezon zannannan, ou a bezwen pey 50 poursan, oubyen 100 poursan duty lo sa zannannan sorti Colombo, oubyen sorti Kenya.                         Akoz Sesel i annan zannannan en kantite zannannan dan sezon zannannan. Selman i zis en mwan. Be annou ankouraz zot vann zot zannannan. Ki nou pour fer, nou pour dir zot aret plante? Non. Nou devret kapab annan bann derogasyon lo sa bann lalwa WTO pour kapab ed sa bann dimoun. Akoz nou lagrikiltir, Mr Deputy malerezman i pa en lagrikiltir ki kapab annan prodiksyon menm keksoz tou dilon lannen. I pa egziste Sesel. Vreman apard bann teknik vreman sofistike anba shade, oubyen koman hydrophonic, i napa. Donk nou bezwen annan bann mezir ki protez prodiksyon ler i vini. Marketing, mon bann koleg R150milyon pour fer tourism marketing pour Sesel. Nou kontan nou’n vote. Be napa en pti milyon pour fer en pe marketing kot bann lotel pour ki i annan en pti Lazans Lagrikiltir i al kot bann lotel i dir avek zot be dan tel sezon la pour annan brenzel. Gete ki mannyer ou kapab met brenzel sa 3 mwan ki pe vini lo ou meni akoz i annan brenzel Sesel. Napa sa pti larzan pour nou fer sa ? Konmsi sa bann fermye zot, zot bann zanfan rezete ? Annou rod en fason pour nou osi kapab donn zot en pti lankourazman ler zot pe travay. Akoz sa bann dimoun se zot pe donn nou manze de kalite. I napa konparezon avek sa ki pe sorti deor. Wi sa ki sorti deor i bonmarse. Wi i bonmarse. Me eski nou konnen ki nou pe aste. Omwen nou ava konnen ki nou pe aste an menm tan nou ava ed enn nou frer ek enn nou ser Seselwa ki pe sey debourye. Alors Mr Deputy Speaker, annou pran en nouvo lapros. E sa nouvo lapros i bezwen baze lo en konsta ki bann lapros presedan in fail.  E se sa, se sa vreman difikilte ki nou koman en mazorite dan sa Lasanble, ki nou annan vizavi Gouvernman Parti Lepep. Nou demann zot pour zot rekonnet ki in fail. Premye pa pour ou korize pour fer keksoz diferan se pour aksepte wi nou’n fail. Tou le lannen later Lagrikiltir pe diminyen. Tou le lannen prodiksyon pe diminyen. Tou le lannen prodiksyon poul pe diminyen… nou’n fail. Be si nou kontinyen dir, ‘’Non, non i ok i pe monte la, la i pe arive la, nou pour al plant, nou pour al fer sa Silhouette, nou pour al fer lot laba anler, i pour monte.’’ Nou pa pour sanze, in fail. Annou prezan pran li la kot in fail, e sey anmenn li pli lwen. E sa i en sanzman, i en sanzman mindset. I en sanzman ki nou bezwen konpran ki nou bezwen, nou pa kapab annan akoz pour en rezon personnel, oubyen pour en rezon politik, pour en rezon sosyal. Mon a donn en 3enm legzanp avan mon fini Mr Deputy. Legzanp lafanmir Pool Anse Boudin Praslin. Bann dimoun ki prodwir en ta, en kantite fri. Ok Jean-Pierre e lezot ; selman akoz aparaman detrwa sa bann dimoun i fim en pe marijuana nou pour detri, nou pour deryer zot, nou pour fatig zot. Nou pour harass zot. Nou bezwen sanze. Nou bezwen sanz nou fason vwar keksoz. Nou bezwen gete kwa ki bann dimoun pe prodwir ki bon. An menm tan ki nou fer en ledikasyon. Si nou pa kontan. Si nou pa oule vwar bann dimoun fim marijuana nou fer en ledikasyon. Be selman nou pa harass, nou pa harass bann dimoun. Nou ankouraz zot, e i annan sa bann dimoun dan Sesel ki anvi prodwir. Zot anvi, zot pe seye. Me selman zot pa ganny rekonnet, ler ou call, ou al kort gard ou dir en dimoun in pase. En tel nou, nou vwar li, i apel. Mon pa pour dir en non pangar i parey non en lot dimoun. Nou konn li sa dimoun la i la in pase. In desann, in anbark dan tel transpor eksetera. Mwan mon konn fermye ki’n bezwen li menm li,  li menm li pran son loto ale, al rod sa dimoun. Pran li, tir sa legim kot li, bat li, al dan Kordgard apre, ok, pour li ganny son keksoz. E ki gard i dir. Gard i dir avek sa boug ki’n pran sa ki pa pour li, i dir granmersi sa msye pa’n tro bat ou en. Ok. Granmersi in zis koriz ou. Akoz in kapab bat ou plis. Selman li sa gard i pa ede li. I bezwen fer tousala. Sa pov fermye i bezwen fer tousala  li menm. I bezwen al worry si ganny langre, si i ganny pwazon lera, pwazon kourpa, si i pour ganny legren. Tousala i bezwen worry.  Be zot be donn sa bann dimoun en break ! Annou konmsi annan en sistenm konmsi ki montre vre nou annou ed zot avanse dan lavi.  Alors Mr Speaker, mwan ozordi mon lentervansyon i kekfwa in pran preski en nespes lapriyer. Wi i en lapriyer. Mon pe sipliye, mon pe sipliye, ki avan nou fini perdi sa zenerasyon net. Avan nou fini perdi sa zenerasyon net. Annou fer en keksoz rapidman. Annou, annou annan en deklarasyon byen for. Annou met bann mwayen, e annou fer sir ki nou pe ed sa bann dimoun ki pe prodwir dan nou pei pour nou pa bezwen pey en kilo tomat R130 a R140. I osi sa. It boils down to rupees and cents. La i la ki pe arive ozordi. E si nou kontinyen koumsa en zour nou pour aste tou nou keksoz laba deor e nou pa pour kapab aste legim. Sa 5 porsyon toulezour nou pa pour kapab servi. Ok. Alors la i la mon mesaz ozordi. E mon remersye Leader Lopozisyon. E mon felisit li pour anmenn sa Mosyon akoz, akoz bann fermye in ganny tro bokou les de kote, e in ler pour nou kapab debout, e fer en keksoz finalman pour zot. Mersi.

 

MR DEPUTY SPEAKER

Mersi Onorab Ferrari. Onorab Roucou.

 

HON CLIVE ROUCOU

Mersi Mr Deputy Speaker. Bon apre midi tou Manm Onorab. Mr Deputy Speaker, mwan mon pour siport sa Mosyon  prezante par Onorab Ramkalawan dan son totalite. Mr Speaker nou sekter lagrikiltir i pe koz lo nou sekirite alimanter. Alor i pe koz lo nou vant. En pei ki pa prodwir ase, i en pei ki dan problenm. Konmdir koze, si bato, oubyen avyon pa vini, alors nou pour fouti. Alors Sesel fodre i prodwir ase manze pour son pep. Mwan mon senserman pa krwar dan sa gran kantite lenportasyon, kot nou later i ase ris pour nou plante, e rekolte. Si nou kontinyen avek sa kantite lenportasyon, nou vwar plis deviz pour ganny servi, e en kantite depans pour ganny ogmante. Alors Mr Deputy Speaker, mon krwar kan i annan plis lenportasyon. I annan ankor sans pour lentrodiksyon diferan kalite pes parey nou’n vwar senir plim, nou’n vwar sa enn ki atak tomat e lezot ankor. Alors Mr Deputy Speaker nou bezwen fer sir ki nou Sekter Lagrikiltir, nou pran li a ‘main’. Napa en keksoz ki pli mon pli fyer, ki ler dan Sanmdi, mon pas bazar, ler mon pas kot Jerris avek Franky mon vwar nou bann fri avek nou bann legim ki’n plante isi lokal. Bann fri ek bann legim ki nou kapab kit dan nou fridge, oubyen dan fritye pour plizyer zour, sa ki zot rann delo, oubyen gate. Alor mon senserman krwar ki Seselwa wi i kapab prodwir. Me ki nou’n vwar. Ki nou’n vwar le kontrer avek sa ki Onorab Pillay in dir nou taler, Parti Lepep pandan sa 40an in fail nou Sekter Lagrikiltir. In fail nou Sekter Lagrikiltir. Ozordi nou vwar nou bann fermye, lanmen in anmare, pe trimouse pour sey fer debout zwenn. Akoz sirkonstans i vin pli difisil, pli difisil zour an zour. Alors mon pour senserman siport sa Mosyon ki Onorab Ramkalawan in anmennen, en ‘ban lo lavant nou later Lagrikiltir. E tou nou later lagrikiltir ki pa ankor ganny devlope, fodre i retourn dan lanmen Gouvernman, e i pour ganny distribye ekitableman par avek bann fermye. Mr Deputy Speaker, en bon devlopman dan nou Sekter Lagrikiltir pour ogmant travay dan nou pei. Alors bann etidyan ki’n konplet zot letid i ava ganny sans devlop sa sekter. Sa sekter ki zot in lekol, ki zot in aprann. E alors nou pour benefisye lo la kantite, lo kalite, e koumsa nou ava…i ava annan pri dan rediksyon dan pri sa bann komodite lo marse. Mr Speaker ankor Sesel later i ankor fertil. Zis mazinen lontan ler dimoun ti sorti dan Sid, enn ler dan Anse Boileau lo blok, ler ti desann plastik ti plen, sak ti plen. Parey mon koleg Onorab Arrisol ti dir taler, ler nou sorti dan zil, bato sirtou ti plen avek nou bann fri avek nou bann legim. Mr Deputy Speaker fermye i dan dir. Alors Gouvernman i bezwen annan bann mekanizm neseser par egzanp loan. Fasilit loan, e loan ki ekitab. Lentere ki ba ki sa bann fermye I kapab invest dan bann lekipman neseser, lagrenn, langre, e bann servis parey delo ki ava kapab ariv lo zot laferm. E tousala i ava ede dan en fason ou en lot pour fer nou bann fri legim e gro manze desann. Mr Deputy Speaker tou sa bann dir ki nou bann fermye i pas ladan en kantite zot i dezapwente e prodiksyon i desann. Alors ankor enn fwa Gouvernman dan en fason ou en lot, i bezwen fasilit, fasilit sa travay ki plis i ganny mete pour bann fermye ki plis bann fermye i kapab tap en laport dwat, gos pour zot kapab met zot lafors dan sa Sekter Lagrikiltir.        Mr Deputy  Speaker, pour konklir mon pour ankouraz tou bann fermye ki pe prodwir pour zot kontinyen prodwir. Bann ki pa pe prodwir ase, pour zot prodwir ankor plis. Mon pour demann tou bann, tou bann Manm pour siport sa Mosyon ki enn fwa pour tou nou pei ava kapab pe prodwir ase, ase pour sa pep, ase ki nou ava viv byen, nou a manz byen, e mersi.

 

MR DEPUTY SPEAKER

Mersi Onorab Roucou. Onorab Sophola.

 

HON NOLINE SOPHOLA

Mersi Mr Deputy Speaker. Bon apre midi tou dimoun. Sa size lagrikiltir i en size ki’n vin dan en moman dan nou Lasanble pour nou diskite. La ki preske mazorite legim ek fri pe ganny enporte. Menm tomat pe sorti Sri Lanka, e tou resaman Minis pour lagrikiltir ti Kenya, kot i ti negosye pour ganny legim ek fri laba. Me nou’n vwar reperkisyon sa bann lenportasyon. Mr Deputy Speaker, mon kontan dir ki loter Mosyon in dir ki Gouvernman i bezwen negosye avek bann fermye pour repran sa bann later Lagrikiltir. Negosyasyon i tre enportan. Akoz ler later ti ganny vann ti annan en kondisyon ki ti ale avek. Alor nou pa kapab zis al pran later sirman nou bezwen annan en negosyasyon avek sa nouvo propriyeter. Petet la a set enstan nou a demann avek Gouvernman pour aret vann later Lagrikiltir. Ou si i annan nesesite revwar bann kondisyon, e etabli en Polisi byen kler pour lavant later Lagrikiltir. Petet si i ankor reste later ki vid. E fer an sor ki ler en morso later i ganny vann ou lease pour en bi spesifik, e si kondisyon avek Polisi ki’n ganny agree par tou dimoun konsernen pa ganny onore. La Gouvernman i pour annan tou dwa pour repran sa later.       Mr Deputy Speaker, La Digue osi i annan later lagrikiltir ki ti ganny vann. Kantmenm i pa bokou me malerezman pa pe ganny eksplwate. Nou tou nou konnen ki later Lagrikiltir ti ganny vann avek lentansyon pour ganny plis fermye pour ki nou ti a kapab vin otosifizans dan sa domenn, e osi ki dan en lakour nou ti a ganny zenn ki pran sa metye. Me i pa’n le ka. Mr Deputy Speaker, en kestyon tre enportan ki nou bezwen poze. Eski nou annan ase fermye la? Ler nou get otour nou, preski mazorite nou bann fermye i aze. Alor i tre byen ki nou pe rod later lagrikiltir. Me anliny avek sa nou bezwen osi pe get lezot alternativ pour atrakte bann zenn dan sa domenn Lagrikiltir. La mwan a dir ki Minis Lagrikiltir i bezwen travay tre pros avek Lekol Lagrikiltir pour sirmont sa mank fermye. Si non, nou pour annan later. Me nou pour napa fermye. Eski nou pour bezwen fer vini fermye osi?       Mr Deputy Speaker mon oule pran legzanp La Digue ankor. Lontan preske kot tou lakaz ti annan son prop zarden. Tou fanmir ti plante pour son prop konsonmasyon. Pour partaz avek vwazen, ou menm pour vann. I annan ki kot son lakour i ti osi anploy dimoun dan plantasyon. E keksoz pli gou, pli byen dan tou sa se ki tou Manm lafanmir ti partisipe.  Sa bann legzanp i montre nou ki dan sa bann fanmir zanfan ti partisip dan aktivite plante, e serten parmi zot pli tar in pran zot karyer dan Lagrikiltir. E mon fyer pour dir ki zot pe tre byen debourye dan sa domenn. Lontan nou ti annan sa ki nou apel bann fermye lo Blok. Zot ti fer sikse. E koman enn, en linisyativ Gouvernman ti vann zot lakaz avek en morso later ki zot ti plant lo la. Lontan La Digue tou sa ki nou ti bezwen, nou ti zis al lo Blok e nou ti gannyen. Prezan in nepli.   La Digue ti sitan otosifizan dan sa letan ki serten planter ti anmenn zot rekolt lo bazar pour vann. E ler zot ti retournen, zot sak ti byen plen pour zot kapab nouri tou zot fanmir. Malerezman Mr Deputy Speaker, nou devret vin realis. Letan in sanze, e konmela avek devlopman sekter tourizm, tou dimoun dan biznes, oubyen konsonmater lokal i fye lo lenportasyon. Sa pour plizyer rezon. E ankor mon demande – eski zot annan swa? En lot problenm se ki konteks enternasyonal, e bann Lakor Enternasyonal ki  nou pei in sinyen i parfwa pa permet Gouvernman protez nou fermye lokal. Koman en Manm lorganizasyon Mondyal Komers, nou devret swiv son bann prensip. Sof si nou’n ganny en Lakor Spesyal pour pa fer li. E prensip nimero 2 sa lorganizasyon, i dir, ‘’enn fwa ki nenport ki prodwir an kontan prodwir agrikol ki’n fini antre lo ou marse, ou devret donn li menm tretman ki ou prodwir lokal.’’ En lot osi i ensiste ki sak pei i devret asire ki i annan en konpetisyon lwayal ant sa de prodwir. Vedir prodwir lokal, e prodwir enporte. Se pandan sa i pa anpese ki nou devlop nou lagrikiltir anliny avek nou devlopman nou Sekter Tourizm. En popilasyon 97mil dimoun apepre, e nou resevwar omwen 200mil touris zis lannen pase. Sa i fer nou en marse pros 300mil dimoun par an. Mon konnen ki bann ekonomis pour dir ki en marse 300mil dimoun i pa en marse konsiderab. Me konbyen nou pe depanse par an pour nourrir nou popilasyon, e nou bann viziter ? Se pour sa rezon ki mon pe dir Mr Deputy Speaker, ki nou devret donn devlopman nou lagrikiltir, ek lapes en priyorite absoli.                Parey nou pe met lanfaz lo devlopman nou Sekter Tourizm, si nou oule ariv a otosifizans alimanter nou bezwen koup lo lenportasyon fri, legim e lavyann. E fourni nou popilasyon e nou bann viziter bann prodwir ki fre, ki’n ganny prodwir lokalman. E devlop nou pti e mwayen biznes dan lendistri agroalimentaire. Mon pour al en pe pli lwen pour sizere osi ki nou konsider devlopman lafore. Par egzanp nou annan nou bann pye dibwa parey bodanmyen, takamaka, e lezot lespes dibwa ki servi dan konstriksyon, e dan fabrikasyon bann meb, ansanm avek lelevaz zannimo lo serten nou bann zil elwanye ki napa en valer lanvironnmantal. Si nou pa fer sa byento nou lafore pour vin dezer akoz pye dibwa osi pe ganny koupe pour fer konstriksyon, e pa pe ganny ranplase. Pour terminen mon annan enn de pwen. Mr Deputy Speaker, mon pour lans en lapel byen for a nou Gouvernman, e plis spesifikman a nou Minister Lagrikiltir ek Lapes pour konsider seryezman devlopman lagrikiltir koman en 4enm pilye nou lekonomi. Pour sa nou pei i bezwen annan en Master Plan pour devlopman Lagrikiltir ki pour enkorpor devlopman bann gran laferm parey Linyon Estate. Devlopman lagrikiltir lo nou bann Zil Elwannyen e osi devlopman Lekol Lagrikiltir parey nou pe Vwar nou pe vwar pour Lekol Maritim pour ki nou annan bann fermye konpetan, e prodiktiv. Mr Deputy Speaker, mank legim souvan fwa pour nou prop konsonmasyon, i vin nou prop lafot, akoz mon krwar e senserman krwar ki sak fanmir i kapab fer son prop zarden. Servi diferan vye resipyan e plant zepis ek legim kot lakour. Nou ti vwar sa ti annan bann konpetisyon dan lepase. Annou reviv sa proze plant kot lakour. Me fer sir ki sa bann pti fermye kot lakour i osi ganny serten fasilite koman akse avek bann nouvo teknik kiltivasyon, e bann pti formasyon de tanzantan parey lezot fermye. Konsernan formasyon, e lankourazman pour plante kot lakour  IFAD, Fon Enternasyonal pour Devlopman Lagrikiltir, atraver zot reprezantan lokal pe deza fer li. Eski nou pa ti a kapab sezi sa loportinite pour fer sa proze ganny en pe plis lanpler? Bann lotel osi i kapab pratik, edible landscaping. Si mon lespri i servi mwan byen lotel Lemuria Praslin ti fer sa byen. Esperons ki sa i ankor an progre. Mon lot rekomandasyon se ki Minister ledikasyon osi i ganny konsilte par Lotorite Planning e ki i annan pouvwar veto lo tou proze devlopman lo later Lagrikiltir ki napa nanryen pour fer avek sa aktivite. Mon sizere ki si apre tou sa bann demars, nou  pa arive asir nou otosifizans, petet nou kapab koman en dernyen opsyon, mon dir en dernyen opsyon komans get posibilite aste petet en morso later dan en lot pei, petet parey Madagascar, e fer plantasyon gro manze fri ek legim e anploy bann planter. Sa i pour parey en pe parey Mauritius pe fer aktyelman lo later lagrikiltir akoz zot in servi later Lagrikiltir, zot in fer bann villa deliks lo la. Alor zot in al aste later Mozambique e kiltiv lo la. Sa i pour osi en debousman pour bann Seselwa ki oule envestir dan sa domenn Lagrikiltir.      Mr Deputy Speaker sa size ki ganny met devan nou i tre enportan, e fodre nou tou, nou tret li byen, e regard li byen avan ki nou fer nou, nou donn nou vot. Mersi Mr Deputy Speaker.

 

MR DEPUTY SPEAKER

Mersi Onorab Sophola. Mon krwar in fer sorti en bann pwen enteresan, bann pwen ki nou kapab asize diskite, analize. E i vre ki Maurice in lans li en pti pe dan sa domenn. Si mon pa tronpe Mozambique avek Madagascar kot in antre i pe lease bann later pour bann proze lagrikiltir. Bon deba in enteresan, deba osi mon krwar i anmenn en souf respirasyon pour bann fermye deor ler zot konnen pour dir Lasanble pe sey lager en pti pe pour zot. I ava en lankourazman osi tou pour nou bann fermye ki pe struggle deor. Mon annan ankor 8 Manm lo mon lalis pour entervenir. E mon asire ki i kapab annan ankor Manm ki pour enterese.  I en deba ki enteresan. Nou pour pran en desizyon pour nou adjourn la. E nou ava kontinyen avek deba demen bomaten 9er. Si i ok avek zot?

Yes. Ok. Nou ava adjourn e nou ava kontinyen demen bomaten 9er.

 

(ADJOURMENT)