Home » Order Papers » 2017 » Verbatim Report NAS Sitting Wednesday 17 May, 2017

Verbatim Report NAS Sitting Wednesday 17 May, 2017

NATIONAL ASSEMBLY OF SEYCHELLES

Wednesday 17th May, 2017

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou dimoun, e ankor enn fwa mon swet zot labyenveni pour lasiz Lasanble pour ozordi Merkredi le 17 Me. E ozordi parey nou ti eksplike, oubyen nou ti anonse yer, nou pour komans avek en Statement par Minis pour Lasante, Minis Jean-Paul Adam, e Minis i akonpannyen avek son delegasyon.      Nou swet zot labyenveni Dr Jude Gedeon, Ms Barathi Viswanathan, Dr Loren Reginald, ek Ms Hannah Jeannevol. E apre ki Minis in fer son Statement, nou a ganny en sans pour kestyonn li, lo… poz kestyon.  E nou espere ki tou Manm Lasanble ki zot pour ganny en soft copy sa Statement ki Minis pour fer. Wi Onorab Larue.

HON FLORY LARUE

Bonzour Mr Speaker, mon ti a kontan raise en matter of privilege, under 36(1).

MR SPEAKER

Under 36 (1). Wi, ki matter ou anvi raise Onorab Larue ?

HON FLORY LARUE

Mr Speaker, yer letan nou ti in the House – letan sesyon ti ouver, a en serten moman SBC ti koupe, e ziskan prezan SBC pa’n vwar li korek pour remontre nou sa bout ki ti ganny ouver avek yer letan Onorab Ferrari ti fer son prezantasyon.          E mwan mon krwar koman en Manm dan Lasanble, kot sa i en fason ki pep Seselwa i ekout nou. Mon krwar ki SBC i merit remontre sa transmisyon pour bann ki…akoz pep Seselwa in manke sa transmisyon kantmenm zot, zot in rikorde, zot pa’n rezwe.

MR SPEAKER

Ok. Tre byen Onorab Larue. Si sa i le ka, mon a verifye avek CEO SBC pandan Break. E mon ava vwar ki zot dir nou. We will take up the suggestion ki ou’n mete. E mon a raporte apre Break to the House. Yes Onorab Larue.

HON FLORY LARUE

Eskiz mwan Mr Speaker, mon’n verifye avek Mr Onezime sa pa ankor ganny re transmet. E an plis ki sa nou vwar nou Prezidan in fer en live Press Conference, e ankor SBC pa’n montre sa, e eskan prezan…I pa ankor ganny upload pour nou bann sitwayen ki reste aletranze, e sa osi i vreman deplorab de lapar de SBC. Mersi Mr Speaker.

MR SPEAKER

Ok. So sa en 2enm pwen ki parey mon dir, mwan ava koz avek CEO SBC pandan Break. Parey nou fer dan labitid ler i annan en matter of privilege. Epi mon a raporte apre ler nou zwenn. Onorab Prea ou annan en konsern?

HON NICHOLAS PREA

Mersi Mr Speaker. Bonzour tou dimoun. Mr Speaker mon, mon ti panse par egzanp menm sa press conference i live stream.

MR SPEAKER

Be sa nou ti pe ekspekte. Me Onorab Larue pe dir nou otherwise. Onorab Larue si mon’n ganny en konpran ou byen, ou pe dir i pa ti live stream. Savedir bann dimoun deor overseas pa ti tande. Se sa ki ou pe dir non?

HON FLORY LARUE

Wi Mr Speaker, ti annan de fason. Ti annan en fason ki ti ganny fer live lo televizyon ki Seselwa isi ki pe regarde, toudswit sa ti pe zwe. Me solman i annan en YouTube page pour SBC kot premye Press Conference ki ti ganny fer li i ti ganny stream, live. Savedir dimoun aletranze ouswa ki ti napa televizyon ti kapab vwar lo enternet. Sa pa’n ganny fer.           An plis ki sa zot ti kapab met li apre ki i ti’n ganny pase. Me ziskan prezan zot pa ankor upload li. Savedir napa fason pour dimoun aksed sa.

MR SPEAKER

Tre byen. Ok. Mon’n konpran ou. Mon ava take up parey mon dir avek CEO SBC pandan Break. E mon a raporte ler nou repran nou sesyon pli tar bomaten. Si napa okenn lezot entervenan. Nou ava donn laparol toudswit a Minis Adam pour fer ou Statement.

MINISTER JEAN-PAUL ADAM

Mr Speaker, Deputy Speaker, Leader Zafer Gouvernman dan Lasanble, tou bann Manm Onorab, e tou bann dimoun ki a lekout, bonzour.                               E premyerman Mr Speaker, mersi bokou pour sa Lasanble donn mwan lokazyon pour mwan vin koz lo sa 2 Letid ki annan bokou lenportans pour lavenir nou Nasyon. Annefe ozordi mon Minister in deside vin dan Lasanble pour koz lo sa size, akoz i bezwen nou latansyon dan en fason irzan koman en Nasyon. E sa byensir i konsern lasante nou zenn.          Nou stratezi pour lasante, i vize anmenn en meyer lenvestisman dan kalite. Sa lenvestisman dan kalite, i vize pour anmenn nou sistenm lasante lo en standar global. Me pour nou fer sa, nou bezwen osi byen evalye bann risk ki devan nou, e sa 2 Letid ki mon pour koz en pti pe plis lo la i demontre serten bann risk pli alarman ki devan nou.       Mr Speaker, an 2015 Gouvernman in fer 2 Letid kle lo bann risk lasante ki nou bann zenn i fer fas avek dan zot landrwa letid e osi dan zot lavi toulezour. Ozordi mon pe partaz bann gran laliny sa bann Letid avek bi pour nou ralye nou popilasyon ansanm pour nou asir en lavenir an bonn sante pour nou zenn.          Nou tou nou konsyan ki ozordi pli gran defi dan Sesel lo plan lasante, se bann maladi non kominikab, e sa bann maladi i baze sirtou lo stil lavi. Bann endikater ki sorti dan sa bann rapor i montre ki menm parmi nou zenn, nou annan en gran travay devan nou pour asire ki zot osi zot pa vin viktim bann maladi non-kominikab.                       I en size ki nesesit en lapros kordinen ant tou brans Gouvernman, e osi avek sipor sekter prive, lasosyete sivil, e sirtou bann zenn zot menm. Nou bezwen adres li avek fransiz. E nou bezwen osi koz avek en sel lavwa akoz napa letan pour perdi dan bann aksyon ki bezwen ganny pran. I enportan pour analiz sa bann rezilta akoz bann labitid ki ganny pran dan lazenes i ganny konsolide pli tar, e atraver sa bann letid nou kapab deza antisipe ki presyon lo nou sistenm lasante pour kontinyen ogmante. Pour nou delivre en pli meyer kalite dan nou sistenm lasante, i komans atraver en meyer prevansyon. E nou bezwen sanz sa direksyon avan ki i tro tar.           Mr Speaker, dan premye parti nou prezantasyon, nou pour souliny bann rezilta mazer dan sa 2 Letid. E answit nou pour propoz serten solisyon, e osi enterakte avek zot dan Lasanble lo bann stratezi ki kapab ganny met an plas. Mon oule dir ki napa okenn stratezi ki fikse. Nou bezwen annan en deba, e tou nide i devret ganny konsidere. Sa 2 Letid in ganny fer atraver pei dan en group ase larz dan bann zenn adolesan ant 13 e 15an dan tou bann lekol segonder dan Sesel an 2015, e in kouver 2540 zenn. Sa i vedir ki nou’n ganny en partisipasyon ka 82 poursan par rapor a bann zenn ki nou’n sey targete dan sa letid. Sa letid annefe, in regard plis, in regard en group zenn ki pli larz osi, pa zis 13 a 15an. Me pour bann rezon konparezon nou pe fokaliz lo sa group 13 a 15an.          I enportan a sa staz pour mwan mansyonnen ki sa letid in osi deza ganny fer oparavan an 2002 e 2007, e bann rezilta ti ganny partaze avek bann group konsernen. Se pour sa rezon osi ki nou kapab vwar en tandans dan sa bann konportman, ki ozordi nou vwar li neseser pour fer en tel ladres akoz nou war malerezman ki keksoz pe vin pli difisil.                    Sa 2 Letid in ganny fer an kolaborasyon avek Lorganizasyon Mondyal pour lasante ki an Angle nou dir li par son ‘sig –WHO, e avek sipor sant Ameriken pour Prevansyon e Kontrol Maladi ( the US Centre for Disease Prevention and Control), e osi avek Liniversite Lausanne baze an Swiss.                                                 Sa premye letid ki son tit i Seychelles 2015 Global School- Based Student Health Survey, ti egzamin bann konportman relye avek lasante tel ki zot ladyet, aktivite fizik, labi lalkol, ek lezot sibstans.  E osi zot konportman seksyel.                 Sa 2enm Letid Seychelles 2015 Global Youth Tobacco Survey ti regard selman topik konsonmasyon taba, oubyen sigaret. Mr Speaker, nou’n vwar li enportan ki nou kontinyen fer bann tel letid akoz an obzervan bann konportman riske bann zenn adolesan. Nou kapab osi predir ki kalite adilt ki nou pour annan dan ou pei. Bokou bann konportman relye avek lasante, i kapab annan en lenpak a kourt term me osi a lon term ki kapab koz menm parfwa dezabilite, ou bann maladi ki kapab avek en dimoun pour lavi. Sa i enkli bann maladi mantal, osi byen ki bann lezot maladi non-kominikab ki kree bokou presyon lo nou sistenm lasante tel ki tansyon e dyabet.       Mr Speaker, mon pour pas an revi serten bann rezilta pli enportan ki anmenn nou lo refleksyon bann aksyon ki nou bezwen pran en stratezi ki nou bezwen adopte. An se ki konsern Lobesite. Premyerman ler nou regard bann statistik sa letid, nou vwar ki 16 poursan bann zenn i ganny konsidere koman annan tro bokou pwa ; savedir overweight, e 9 poursan i ganny konsidere koman obez. Sa i montre ki en etidyan dan 4, i annan en problenm pwa a en tre zenn az.  E sa in osi ogmante par rapor ek 2007 kot 14 poursan ti annan en problenm pwa. Alor en logmantasyon 2 poursan. Sa tandans e sa sif i alarman, akoz i montre ki annan en gran logmantasyon konpare avek bann lannen presedan. E sa i en konsern serye pour Lasante Piblik akoz i endik, i endik nou ki plis zanfan ki gro i vedir en logmantasyon dan dimoun ki a risk pour devlop dyabet, tansyon, e lezot konplikasyon. Dezyenmman Mr Speaker, an se ki konsern size Ladyet. Osi enkyetan dan sa letid i ladyet ki nou bann adolesan pe swiv. Ler nou regard statistik 2007 e 2015, nou vwar ki i annan en tre gran rediksyon dan lakantite adolesan ki pe manz fri ek legim regilyerman. Mwens ki lanmwatye, sif egzakt 39 poursan, zis 39 poursan bann etidyan i manz legim oubyen fri omwen 5 fwa par zour parey i ganny rekomande. Sa i konpare avek 46 poursan ki ti’n raporte manz omwen 5 fri ek legim par zour an 2007. An menm tan, en laz mazorite etidyan i konsonm bann limonnad oubyen soft drinks e bann pake zi fri ki annan bokou disik plis ki en fwa par zour.                                    I alarman akoz enn bann koz primordyal obesite ek dyabet, se zisteman konsonmasyon sa bann kalite prodwi. Nou ava note ki 10 poursan bann etidyan i konsonm plis ki 4 soft drinks par zour. E 38 poursan i konsonm omwen enn.                   Mr Speaker trwazyenmman, nou pour regard bann rezilta sa letid an se ki konsern aktivite fizik. An se ki konsern aktivite fizik i enkyetan pour vwar ki mwens ki lanmwatye sa bann etidyan ki’n pran par dan sa letid i fer en form aktivite fizik, omwen 4 fwa par semenn pour omwen 60 minit par zour ki sa kantite ki rekomande pour annan en lavi an bonn sante. Sa i demontre en tandans pour nou vin mwen aktiv konpare avek lepase. E sa i lye avek sa logmantasyon dan problenm pwa, lobesite, e bann dimoun ki pe ganny dyabet e tansyon deplizanpli zenn.                  Si nou regard bann statistik an se ki konsern bann zenn ki regard televizyon, i vreman enkyetan pour vwar ki 40 poursan etidyan i regard televizyon plis ki 2 erdtan par zour. Petet ankor pli enkyetan se ki parmi sa group, i annan menm 16 poursan ki raporte ki zot regard televizyon plis ki 6 erdtan par zour. E dan totalite nou kapab note ki 80 poursan, nou popilasyon zenn i regard televizyon omwen 1 erdtan par zour. Nou pa pe dir ki nou pa devret regard televizyon, me sa bann statistik i demontre, en stil lavi ki pe al mwens ver aktivite fizik, e plis anver bann aktivite pasiv. An se ki konsern konsonmasyon sigaret. Mr Speaker, 21 poursan etidyan in raporte ki zot in esey en sigaret dan dernyen mwan letan zot ti ganny kestyonnen.                                 Nou ava note ki konsonmasyon sigaret i adiktiv, e sa i kree bokou presyon lo nenport ki sistenm lasante dan lemonn. An se ki konsern konsonmasyon sigaret, nou vwar ki par rapor avek 2007, tandans dan nou pei se en rediksyon dan konsonmasyon sigaret an zeneral. Me sa letid i montre ki parmi bann zenn 13 a 15an, konsonmasyon i reste plizoumwen parey, e in plizoumwen lo menm kantite.         Lot konsern ki nou annan se ki sa sif i bokou, bokou pli o ki lezot pei dan Lafrik, e nou bann zenn alor a en zenn az pe komans konsonm sigaret. Mr Speaker, 5enm eleman ki sa letid in regarde, se lalkol. Mr Speaker, preski 50 poursan etidyan ant laz 13 a 15an ti konsonm lalkol omwen en fwa dan dernyen 30 zour letan zot in ganny kestyonnen. Sa i en sif vreman alarman. Sa sif i osi demontre en kiltir lalkol dan nou popilasyon ki met nou tou a risk. Lefe ki litilizasyon i telman o parmi bann zenn, i lye osi a lezot problenm ki nou annan dan ou sosyete; tel ki vyolans domestik, tel ki labi seksyel, tel ki depresyon e lezot ankor.                                            Labi lalkol i pa en nouvo fenomenn dan nou sosyete. Me akse avek lalkol i kontinyen ogmante,  e sa letid i demontre ki sa i enn bann fakter pli a risk pour nou bann zenn. Nou ava osi note ki lavertisman pour lalkol i kontinyen miltipliye. E nou pas anba nenport ki laboutik ozordi nou pour vwar lavertisman pour plizyer kalite lalkol. E bokou osi ki petet atiran pour bann zenn.                      Sizyenmman Mr Speaker, nou’n regard sa kestyon konsonmasyon drog parmi nou bann zenn. Mr Speaker 10 poursan, nou bann zenn in raporte ki zot in servi kanabis, e osi 10 poursan parey in osi raporte ki zot in servi lezot drog tel ki eroin, oubyen kokain. Nou’n deza konnen ki nou annan en problenm drog mazer, e ki anmenn nou dan en sityasyon kritik dan nou pei. E sa letid i demontre ki akse avek drog i komans a en tre zenn az. E osi ki egziste dan nou bann lekol. Mon krwar nou deza konnen sa, me sa letid i donn nou en sif spesifik, e i montre ki en gran poursantaz nou bann zenn i a risk.                                 Mr Speaker setyenm eleman ki’n ganny regarde dan sa letid, se aktivite seksyel. Mr Speaker nou ava note ki 40 poursan, bann zenn ant 13 a 15an in raporte ki zot in angaze dan aktivite seksyel. Parmi sa group ki aktiv, zis 50 poursan ki’n raporte konm kwa zot in servi en kapot pandan zot dernyen aktivite seksyel. An plis ki sa, en gran proporsyon etidyan in osi raporte ki zot in annan plis ki en partner seksyel.     Sa i anmenn nou pour poz bokou kestyon, e osi fer refleksyon lo bann valer ki nou anvi enkilke parmi nou bann zenn. E osi ban mezir ki nou bezwen pran an se ki konsern ledikasyon seksyel nou bann zanfan dan bann lekol, e pour nou, pour fer zot, e pour nou fer zot konpran byen bann risk avek bann tel konportman.     Mr Speaker wityenmman, nou’n regard sa kestyon labi seksyel.  E sa sif ki nou’n gannyen i vreman alarman. Sa letid in demontre ziska 17 poursan zenn adolesan in eksperyans labi seksyel dan en form oubyen en lot. Osi sa letid in demontre ki en gran parti sa labi i swa ganny fer par en manm dan fanmir, oubyen menm dan serten ka i ganny enfliyanse par en manm dan fanmir sa zenn.                                Mr Speaker, nevyenm size ki’n ganny regarde dan sa  letid i size bullying, ki mon konnen ki sa Lasanble in met bokou lenportans lo la osi. E sa letid in note ki ziska 50 poursan bann etidyan in raporte ki zot in eksperyans en form bullying pandan dernyen 30 zour. Sa i en sif ki demontre lesel sa problenm e lirzans pour nou kontinyen azir kont sa fenomenn.                                   Mr Speaker, dizyenm size i konsern lasante mantal. E lo sa size en etidyan dan 5 in raporte ki zot in konsider swisid dan sa dernyen 30 zour. I kler ki depresyon i en size irzan parmi nou bann zenn,  e ou bezwen etidye bann koz an menm tan ki nou donn plis sipor pour zot koz lo zot difikilte, e bann zenn i kapab santi ki zot kapab partaz zot bann konsern dan en latmosfer ki sen, e ki zot osi an sekirite.             Dan menm laliny sa letid in montre ki mwens ki en tyer bann zenn in santi ki zot kapab dir zot paran, oubyen ki zot kapab santi ki zot paran i konpran zot traka e zot konsern.     Mr Speaker, i annan bokou bann lezot eleman dan sa letid, me sa i 10 eleman mazer. E sa bann konsern i demann aksyon irzan. I enportan pou nou konsider bann stratezi apropriye.  E i enportan pour nou osi revwar bann polisi aksyon   ki’n deza ganny met an plas pour nou vwar lekel ki’n marse, lekel ki bezwen ganny ranforsi.              E mon ava sit serten bann Polisi ki deza an plas avan ki mon osi pas lo bann nouvo propozisyon ki nou pe met devan Lasanble, e osi bann propozisyon ki pour bezwen ganny debat en pti pe plis. Me avek bi pour nou pran aksyon dan nou bann lekol, dan nou bann lakor, dan nou kominote.         Premyerman, i enportan pour nou note ki tou bann size a risk ki’n kouver dan sa letid, i deza ganny adrese dan curriculum PSE – Personal and Social Education ki Minister Ledikasyon i servi. Me i evidan atraver sa bann rezilta ki nou bezwen revwar sa curriculum, e adapte li si i neseser. Me osi revwar son lenplimantasyon, e son modalite ki nou servi pour nou angaz nou bann zenn lo sa bann size. Akoz letid i montre ki pa tou mesaz ki pe pase dan en fason sistematik.                         Dezyenmman i enportan pour nou note  ki Minister ledikasyon i deza annan en Polisi an plas ki anpes lavant limonnad oubyen soft drinks ki annan bokou disik dan bann lekol. Me nou ava note ki malgre ki sa Polisi i an fors, i annan bokou marsan, bokou laboutik otour tou bann lekol ki vann sa bann keksoz.  E parey letid i montre bann zenn i annan akse avek sa bann soft drinks, e konsonmasyon i vreman o.                                       Trwazyenmman, nou ava note ki proze pour enstal bann water fountain dan bann lekol in komanse pli  boner sa lannen lamazorite lekol pe ganny sa bann fasilite. Me menm avan ti deza annan delo ki disponib gratwitman pour bann zanfan dan bann lekol. Me sa bann water fountains i donn li dan en sirkonstans ki meyer pour sa bann zanfan.             Katriyenmman, progranm aktivite fizik i egziste deza dan tou lekol. E i annan osi bann lezot progranm pour promouvwar aktivite fizik dan lekol e an deor lekol, tel ki par egzanp Seychelles Х 30; sa progranm ki ankouraz legzersis pour omwen 30 minit  parmi tou manm nou sosyete. Me lefe i reste ki letid i montre ki aktivite fizik, i pa sifizan, e nou bezwen regard mobilizasyon nou bann aktivite dan en fason sistematik. Me osi pour mye konsyantiz nou popilasyon lo nesesite fer legzersis. Senkyenmman Lezislasyon i egziste deza pour anpes fimen dan landrwa piblik ki fermen, dan landrwa travay, e dan transpor piblik. I anpes osi lavertisman lo sigaret ek taba, e i anpes lavant avek dimoun anba 18an, e i annan osi bann lavertisman lo risk lasante lo bann pake sigaret. Nou’n vwar ki an zeneral, in annan en rediksyon dan konsonmasyon sigaret dan nou popilasyon depi 2007 par egzanp me parmi bann zenn sa konsonmasyon in reste statik. E alor nou bezwen vwar  ki bann aksyon adisyonnel nou bezwen pran pour nou adres sa problenm.           Mr Speaker, sizyenmman nou stratezi lo maladi non- kominikab i an aplikasyon deza,  e prevwar plizyer lentervansyon pour adres sa bann size. En Komite O Nivo pe asir son lenplimantasyon. Me sa letid i demontre ankor ki nou bezwen donn plis sipor pour zot bann aksyon.                     Mr Speaker,  sa bann letid i montre nou en pei ki malgre bonn fwa par bann paran, par kominote, par profesyonnel, dan ledikasyon dan lasante, bonn fwa e volonte par bann Leaders dan kominote ki an zeneral nou pei i pour swiv en stil lavi ki reste pa soutenab. Nou pe deza vwar sa bann rezilta dan nou bann sant lasante toulezour. Nou pe vwar pasyan parfwa ki pa ankor ganny 25an pe deza annan tansyon ek dyabet.  E sa bann kondisyon i reste avek pasyan pour lavi. Enn fwa ki ou’n ganny dyabet, ou pour touzour annan dyabet. I en kestyon pour ou annan zesyon sa maladi.                                    Nou osi annan en sosyete ki deplizanpli oriyante otour konsonmasyon. I enportan ki nou diriz lenerzi nou popilasyon e nou zenn sirtou anver plis prodiktivite. Mr Speaker, mon pour aprezan prezant serten stratezi ki nou pe met devan Lasanble pour konsiderasyon. Serten stratezi in deza komanse. Serten in deza an mars. Serten nou bezwen konsilte. Nou bezwen koze. E nou bezwen sansibiliz nou popilasyon. Me avek bi ki nou ralye nou pep. Ki nou ralye nou pep anver en nouvo lapros pour nou redwir risk pour nou zanfan, nou fanmir, e nou menm.                                     Premyerman Mr Speaker, nou bezwen regard promosyon en ladyet sen e balanse dan nou lekol, e dan lasosyete.                Minister Lasante pe travay avek Minister ledikasyon pour nou revwar manze ki disponib dan lekol e son lanvironnman. Nou rapel ki manze i disponib pour tou etidyan dan lekol atraver servis school meals. Me sa servis pa pe ganny servi bokou. Sa letid i demontre ki zenn i tant pour diriz son lekor bokou plis anver bann manze ki nou apel fast food. E paran osi i tant pour donn goute, oubyen larzan ki ganny depanse lo manze ki annan mwens valer pour nitrisyon, e ki reprezant bann manze vitman. Me pa forseman bann manze ki koresponn avek en ladyet balanse.                          I enteresan pour vwar serten bann sif par egzanp lo larzan ki ganny donnen avek bann zenn letan zot al lekol. Bann sif i montre ki 28 poursan bann etidyan i ganny plis ki R50 par zour pour zot al lekol. I montre osi ki i annan 23 poursan ki ganny ant R41 ek R50. I annan 10 poursan ki ganny ant R31 ek R40.  I annan 17 poursan ki ganny ant R21 ek R30. I annan 8 poursan ki ganny ant R10 a R20. I annan 5 poursan ki ganny mwens ki R10. E i annan 10 poursan ki dir zot pa ganny okenn larzan pour toulezour. Nou vwar atraver sa bann sif bann etidyan souvan i annan bokou larzan pour depanse. Serten i annan bokou larzan pour depanse.             Me sa depans pa forseman ganny dirize anver bann swa ki bon. I enportan alor dan nou stratezi ki nou donn plis opsyon, ki nou miltiplir bann opsyon pour bann varyete manze ki bon pour lasante dan bann lekol. Nou bezwen osi travay avek bann operater prive ki vann manze dan vwazinaz lekol, e ki sa bann operater i zwe en rol pozitiv pour promouvwar en fason manze ki pli sen. I enportan ki sa konversasyon i ganny fer dan en fason larz akoz son solisyon i pa fasil.          Nou anvi, nou anvi ankouraz lantreprenarya, me nou anvi osi asire ki sa lantreprenarya i osi anliny avek en fason viv ki pli sen e ki pli bon pour lasante nou bann zenn, e tou dimoun.                             Dezyenm eleman stratezik Mr Speaker, i konsern promosyon aktivite fizik dan lekol e an deor. E i kler ki nou bezwen ranforsi bann provizyon aktivite fizik dan lekol. E la nou bezwen osi revwar par egzanp bann leson Ledikasyon Fizik ki deza ganny fer, e vwar ki partisipasyon dan sa bann leson. E si nou bezwen ranforsi sa bann provizyon. E nou bezwen osi travay avek kominote, e avek bann volonter pour nou ofer plis aktivite an deor. Enn bann eleman ki nou Minister pe travay avek departman Gouvernman lokal, se pour nou ankouraz sak distrik osi pour li vwar ki bann eleman ki kapab met an plas dan son distrik pour ankouraz dimoun fer legzersis, e aktivite dan zot kanton.                               Trwazyenmman, nou bezwen revwar ranforsman sipor pour rezilyans bann etidyan kont labi sibstans. Nou pour travay an kolaborasyon avek Minister Ledikasyon pour revwar sipor ki ganny donnen avek bann zenn dan lekol pour ranforsi zot rezilyans kont lalkol, sigaret, e drog. Nou annan bann councelors deza ki travay dan bann lekol, e nou annan osi bann ners ki travay dan bann lekol. Me sa ki kler se ki nou bezwen donn plis sipor bann zanfan dan lekol, pour zot pli konpran bann risk, e revwar zot rezilyans kont bann presyon ki kapab ganny mete par zot koleg dan lekol, e osi atraver bann lenfliyans an deor lekol enkli dan fanmir.                 Katriyenmman, nou bezwen annan en stratezi pour revwar ledikasyon seksyel dan bann lekol. Nou bezwen travay avek bann ansenyan pour revwar disimilasyon bann lenformasyon avek bann zenn lo bann risk aktivite seksyel. E osi bann mezir ki zot kapab pran pour protez zot lekor. E nou bezwen revwar alor bann eleman ki bann zanfan ; ki bann zenn i bezwen pran pour zot protez zot lekor osi kont bann maladi ki ganny transmit par rapor seksyel.                          Senkyenmman nou bezwen devlop nouvo progranm dan lekol ki pour ranforsi bann sipor pour bann etidyan. I evidan ki nou bezwen ofer plis loportinite pour zenn kapab koz lo problenm lasante mantal. E osi kot i neseser pour ganny siporte pour azir kont bullying, e osi kont labi seksyel.                     Sizyenmman nou bezwen devlop nouvo progranm pour travay avek paran  lo lasante zot zanfan. Nou pour travay avek Minister Ledikasyon pour ofer plis sipor pour bann paran vin konsyan lo sa ki zot zanfan i konsonmen. E osi aktivite fizik, e zot byennet an zeneral dan lanvironnman lekol.                 Setyenmman, nou bezwen annan en ranforsman laplikasyon lalwa an se ki konsern lavant lalkol avek sigaret, avek bann zenn. E sa i vedir travay avek bann marsan. Me i vedir osi ki Gouvernman atraver Lotorite License e osi atraver Lapolis pour azir kont bann marsan ki pe vann lalkol oubyen sigaret avek bann dimoun anba laz.            Wityenmman, Mr Speaker, sa bann rapor i osi rekomande ki nou revwar bann pake sigaret e kondisyon lavant. Dan plizyer pei dan lemonn zot in adopte en lapros pour vann sigaret dan en pake ki napa okenn branding lo la. E sa i fer ki sigaret i vin mwen atiran. E sa in anmenn bokou rezilta dan sa bann pei. E sa i osi e rekomandasyon lorganizasyon mondyal lasante WHO. Sa i en eleman ki nou bezwen revwar. Mon krwar Sesel nou’n deza fer bokou an se ki konsern packaging. Me nou bezwen revwar si nou pour al pli lwen.                                        E nou bezwen osi kestyonn pratik ki egziste konmela pour vann sigaret an detay akoz sa i en fakter enportan ki permet zenn anba laz konsonm sigaret. Mon konnen Mr Speaker, ki bann tel mezir i difisil pour koz lo la e i pa popiler. Me i enportan ki nou konsider tou eleman pour nou redwir lenpak sigaret lo lavenir nou zanfan.                             Nevyenmman, Mr Speaker, Gouvernman parey in deza ganny annonse par Minister Finans pe revwar osi bann taks lo bann labwason ki annan bokou disik. Resers lorganizasyon mondyal pour lasante WHO i demontre ki taks ki ganny enplimate lo labwason ki annan en gran poursantaz disik, i en stratezi efektiv pour redwir lensidans lobesite. Sa de letid ki’n ganny fer i deza montre ki zenn dan nou bann lekol pe konsonm sa bann labwason an ekse.                        I enportan ki nou diriz zot ver bann opsyon ki a lafwa pli bon pour zot lasante, e osi bann opsyon ki pli bonmarse ki finalman i siport osi bann fanmir. Gouvernman i annan lentansyon pour poz lentrodiksyon sa taks prosennman an dyalog byensir avek sekter prive. E i enportan pour nou note ki rezon ki sa taks i regard sirtou disik dan labwason, se ki disik dan labwason i napa en gran valer pour nitrisyon en endividi. Savedir ki sa disik ki dan en sityasyon kot i dan en likid i vitman ganny abzorbe, e i vitman ganny transformen an lagres ki apre i kree plis problenm lobesite. Byensir sa i lye osi avek en mank aktivite fizik parmi nou bann zenn.                Dizyenmman, Mr Speaker, nou’n deza anonse resaman Minister Finans in deza ogmant bann taks lo lalkol ek sigaret. Malgre ki taks lo nenport ki prodwir i pa popiler, resers par Lorganizasyon Mondyal pour Lasante, e lezot lorganizasyon i montre klerman ki sa bann taks i marse pour enfliyans aktivite konsonmater.       I enportan pour note ki konsonmater pa forseman reponn deswit par zot aksyon me dan lon term sa i montre klerman ki i annan en lenpak. E i enportan ki nou annan konfyans dan nou popilasyon pour li kapab fer bann swa ki bon pour li menm e pour son lasante a lon term.                   Onzyenm eleman ki nou bezwen revwar an term nou bann stratezi, se pour nou kestyonnen si nou bezwen annan serten restriksyon lo lavertisman lo lalkol. Nou kapab vwar ki restriksyon lo lavertisman lo sigaret in annan en lenpak pozitiv pour redwir konsonmasyon sigaret.                     Lo lalkol nou pe vwar deplizanpli miltiplikasyon bann lavertisman, e i enportan pour nou note sa i pa zis baze lo en sirkonstans lokal, me osi enternasyonal kot nou pe vwar nou pe annan plis deplizanpli akse avek bann medya enternasyonal e dan sa bann medya in annan en miltiplikasyon sa bann lavertisman. Sa bann akse avek bann progranm enternasyonal lo televizyon par kab i vedir ki konsonmater Seselwa pe ganny nou kapab dir bonbarde avek lavertisman lo lalkol.                        Lefe ki bokou sa bann avertisman pa sorti isi Sesel nou konsyan ki i pa forseman en keksoz fasil pour nou met bann restriksyon. Me se pour sa Mr Speaker ki i enportan ki nou annan en deba aprofondi lo sa size, e ki nou vin avek bann stratezi, mon ti a dir petet inovatif pour nou kapab adres  sa size. E pour nou vreman anmenn plis konsyans parmi pep Seselwa lo lefe negativ ki konsonmasyon lalkol an ekse i kapab annan. Nou bezwen reflesir ansanm lo sa size, e gard antet sirtou lenpak lo nou bann zenn.                  Mr Speaker, sa bann diferan stratezi i nesesit deba refleksyon e osi aksyon. Nou pe osi envit sekter prive Seselwa pour devlop e ofer prodwir lokal ki donn plis swa konsonmater Seselwa pour konsonm bann prodwir de kalite me ki osi bon pour zot lasante.  E i enportan pour zot fer konnen ki i annan dan zot prodwir. Ki bann keksoz ki i annan dan zot prodwir.                 I annan bokou dimoun ki anvi konsonm sa bann prodwir fre e lokal zisteman akoz zot konsernen avek zot lasante. Minister lasante in pare pour travay avek zot, avek sekter prive pour donn zot sa sipor pour zot kapab par egzanp teste zot prodwir. E asire ki zot pe donn sa bon lenformasyon, e kot i posib zot an konformite avek bann meyer standar posib, e osi ki zot prodwir i kontribye anver en lavi pli sen e an bonn sante.

Mr Speaker anliny avek sa bann laliny mazer sa bann letid ki mon’n prezant avek Lasanble, prosennman nou pour osi lans bann prezantasyon pour sansibiliz nou popilasyon dan en fason pli larz. Sa pour komans avek bann prezantasyon dan bann lekol zot menm: bann prezantasyon avek management lekol, avek bann headteachers, avek bann ansenyan, bann prezantasyon avek bann etidyan zot menm. I enportan ki nou konsyantiz nou bann diferan kous nou popilasyon pour zot kapab osi fer sa bann bon swa.                         Nou pour osi annan bann prezantasyon ki pour ganny fer avek lasosyete sivil pour nou envit zot pour partisipe dan sa aksyon ki neseser pour nou al pli devan. Mr Speaker, nou pe osi propoz avek sa Lasanble ki nou kree en Komite O Nivo pour revwar bann aksyon dan en fason ki ini, e ki nou anmenn tou dimoun ansanm. Mon ava rapel ki nou deza annan en Komite lo kestyon bann maladi non-kominikab, bann non- communicable disease.                     Me i enportan mon krwar osi ki nou anmenn en nivo pli elve pour nou asire ki nou tou nou lo menm paz pour diriz sa aksyon, e mon enterese pour nou kontinyen konsilte avek ou Mr Speaker, e avek bann diferan Leaders lo Lasanble pour anmenn partisipasyon Lasanble dan sa aksyon. Mr Speaker, an konklizyon nou pei i annan en swa devan li. E fodre nou konpran ki sa swa i komans lo en baz sak endividi osi byen ki dan sak fanmir. E i osi en swa pour nou koman bann dirizan pour nou montre direksyon ki nou anvi nou pei i swiv.

Sa swa petet pa pour satisfer tou dimoun akoz i konsern lavi toulezour nou sitwayen. Me se zisteman akoz nou viv dan en sosyete kot nou ganny bonbarde avek bokou swa. Se sa osi letan nou viv dan en sosyete kot i annan laliberte swa, bokou sa bann swa ki nou ganny bonbarde avek i pa forseman bann swa ki bon. Oubyen i bann swa ki nou bezwen fer avek moderasyon.                 Me nou kapab swazir sa ki bon pour nou lasante. Nou kapab swazir osi sa ki pa bon. Sak swa i annan en konsekans. E tou dimoun i bezwen pran responsabilite dan son swa. Me nou rol se pour asire ki nou donn otan lenformasyon ki posib, ki nou donn otan sipor ki posib pour fer swa ki bon pour ou ; ki bon pour mwan, e ki bon pour nou tou.                                     Mersi bokou Mr Speaker, e mersi bokou pour donn sa lokazyon pour partaz sa bann rezilta avek zot, e pour nou diskit lo sa bann stratezi ki telman enportan pour nou pei. Mersi Mr Speaker.

MR SPEAKER

Mersi Minis. Annefe nou dan Lasanble koman reprezantan diferan dimoun, diferan distrik ki’n elekte nou ki devret remersye ou avek ou lekip. Premyerman ou lekip ki’n fer sa survey. Sa 2 survey; enn lo lizaz Tobacco – Tobacco Survey, Global Youth Tobacco Survey. Apre sirtou sa enn lo risky behaviors – Students-Based Health Survey.                              Mon krwar sa bann rezilta ki ou’n met li dan en fason tre succinct, e tre kler. I montre ki nou annan en kantite travay pour fer ansanm. E mon repete ansanm. I annan en kantite pwen ki ou’n fer sorti. I enportan, e i byen ki piblik pe ekout nou. Akoz sa i pa konsern zis Minis ek son Minister. Pa zis Speaker ek Lasanble, i konsern nou tou dan Sesel.                           Alor mon remersye ou ki ou’n pran sa lokazyon pour vini pour pas sa letan avek nou, pour eksplik nou rezilta sa survey. E ansanm nou a komans en konversasyon pour nou vwar ki mannyer nou kapab tyonbo lanmen kanmarad pour nou avans devan, pour fer sir ki nou adres serten konsern ki ou’n souleve bomaten ki tre, tre enportan.  E avek sa mon a ouver deba pour lo sa bann size. E mon a donn laparol Onorab Ghislain.

HON CHANTAL GHISLAIN

Mersi Mr Speaker. Bonzour tou dimoun. Bonzour Minis ek ou delegasyon, e bonzour tou dimoun. Minis mon’n ekout ou lentervansyon avek ase pasyon, e mon santi mon osi ki sa lirzans pour nou kapab fer keksoz. E i ase alarman letan nou pe ekoute. Mon premye kestyon Minis mon ti anvi demande ki kantite invloved bann stakeholders tel ki Minister Ledikasyon ansanm avek komite, kominote biznes in involve dan sa letid ?                    Apre Minis, lobesite letan ou’n koze dan lekol, dan zanfan, byensir i direkteman relye avek lekol. E nou konnen konmela dan lekol ledikasyon fizik i fer 80 minit – savedir 2 peryod par semenn. E  konpare avek lontan lekol, wi ou ti annan sa 2 peryod. Me ti annan bann lezot aktivite ki ou ti fer apre lekol. Savedir ledikasyon ki ti pran responsabilite son, pour organiz son bann aktivite, e sa i ti ale dan lekol, apre lekol, e menm dan kominote i ti desann avek. Ki kantite involve mon pe dir ki Minister Ledikasyon i involve ladan  e pour ki ledikasyon i repran son bann aktivite pour grassroots sports dan lekol non pa kit sa avek NSC ?                                        Apre osi letan nou pe koz, ou pe koz lo labwason sikre, i annan osi en keksoz ki ou pa’n tous lo la se bann twisties, chips, tou kalite ki ganny enporte konmela. Tousala nou konnen i annan en kantite lagres. E menm konmela ou vwar chips bannann ki nou osi… ki nou, nou prodwir lokalman, me selman i annan plante ki li menm li bannann, ou war i ganny enporte, i annan chips manyok, patat an everything. La nou pe koz ou stakeholders ki ou bezwen pe koz avek se SENPA. Ki kantite involve ki sa Minister i pare pour involve SENPA ladan pour kapab adres osi sa sityasyon ? Mersi.

MR SPEAKER

Minis ou oule reponn kestyon straight away, oubyen oule pran enn de kestyon apre ou a reponn? Swa i pour ou.

MINISTER JEAN-PAUL ADAM

Mersi Mr Speaker, mon pare pour mwan ganny gide osi vi ki ou’n donn mwan laparol, petet mon a reponn sa enn. Me mon napa problenm swivan sa si plizyer entervansyon i ganny pran. E mon ava reponn dan son globalite. I ok Mr Speaker?

MR SPEAKER

Wi, wi Minis go ahead.

MINISTER JEAN-PAUL ADAM

Mersi. An se ki konsern sa letid li menm li. Sa letid ti pour demann baze lo sa kestyon lo si, ki kantite, ki kantite partisipasyon ti annan par egzanp Minister ledikasyon oubyen bann biznes dan sa survey. Sa letid li menm li, i ti en letid ki’n ganny fer avek bann zenn zot menm. Savedir i ti ganny fer dan bann lekol. Alor ti annan partisipasyon Minister Ledikasyon. Me bann rezilta ki nou pe vwar, i bann rezilta baze lo bann larepons ki bann zenn in donnen zot menm.                   I pa baze lo kestyon ki’n ganny donnen par egzanp bann ansennyan, oubyen avek bann biznes. I bann repons ki bann zenn zot menm zot in vin devan pour donnen. Zot ti ganny donnen en kestyonner, e zot in reponn sa Kestyonner dan en fason anonim. Akoz bokou sa bann lenformasyon byensir ti sansib. Me nou kapab vwar atraver sa Kestyonner ki bann zanfan, bann zenn in vreman fran dan la fason ki zot in reponn. Me sa pwen ki ou pe fer se ki nou bezwen fer sir ki i annan sa travay aprofondi ki ganny fer avek ledikasyon. Sa prezantasyon in ganny fer avek bann serten reprezantan Minister Ledikasyon.                        E premye parti nou stratezi parey mon’n dir se fer bann prezantasyon dan bann lekol. Akoz rezilta sa letid i permet nou travay avek bann lekol lo serten stratezi. Mon’n koz lo serten stratezi ki deza nou pe diskite avek Minister Ledikasyon par egzanp revwar bann aktivite fizik ki ou’n koz lo la. E ou propozisyon mon krwar i enn ki tre bon.             E zisteman nou pour koz avek bann headteachers pour nou dir kwa ki bann lekol i kapab fer ki an plis. Me i pour nesesit partisipasyon tou dimoun. Akoz i annan konsern bann paran, par egzanp an term sekirite zot zanfan apre lekol. Nou bezwen fer sir ki sa i ganny reponn. I annan kestyon transpor; akoz enn bann eleman ki ou’n souleve osi se ki aktivite fizik in sanze.        Lontan lamazorite zanfan petet ti marse pour al lekol. Konmela laplipar swa i al dan transpor oubyen dan bis. E i annan mwens aktivite fizik ki ganny fer otour, e osi dan bann lezot, dan zot lavi toulezour i annan mwens aktivite fizik. Parey mon’n demontre dan letid osi, i montre ki zot pe pas plis devan televizyon. Petet lontan zot ti kot lakour pe tay, taye, pe fer plis aktivite fizik dan lakour. Tandis ki konmela i annan mwens. Me sa bann propozisyon lo kote ledikasyon fizik i mon krwar i bann propozisyon ki bon. Nou pour kontinyen vwar avek ledikasyon dan en fason sistematik ki mannyer nou kapab enplimant sa bann rekomandasyon.                 An se ki konsern sa kestyon twisties ek chips eksetera, sa nou vreman konsernen lo kote Minister Lasante.  E nou pe, nou pe sey vwar ki bann stratezi ki nou kapab adopte. I enportan, e pour mwan eksplike akoz nou’n koz lo en taks lo bann labwason ki annan disik ladan, akoz sa i en fason fasil pour adres enn bann koz mazer dan lobesite. Ok.                          Alor bann letid i pa vedir ki twisties ek chips i pa en problenm. Definitivman i en problenm me atraver bann letid ki’n ganny fer en pti partou dan lemonn, in montre ki labwason sikre i enn bann eleman pli mazer an se ki konsern bann problenm lobesite, akoz sa disik i dan en likid, e i napa okenn lezot valer nitrisyon ki i anmennen. E se pour sa ki sa taks i pli fasilman sible lo bann labwason sikre. Tandis ki lo bann twisties ek chips i annan par egzanp napa bokou disel, i annan ki byen ganny fer, napa bokou disel par egzanp. I annan serten sa bann chips ki bon pour lasante. Oubyen si ou pe fer legzersis ki ou pe servi dan en fason responsab i kapab anmenn serten lezot benefis pour nitrisyon. Si ou pran en chips friyapen par egzanp i pa forseman en move keksoz si ou pe fer bokou legzersis. Alor i enportan pour nou pa zis target sa group dan en fason ki annan en lenpak ki negativ ki kouver sa sekter antye.                        Me nou pe kontinyen regarde an term lasante, e diskit osi avek bann sekter prive ki mannyer nou kapab met serten restriksyon a lenportasyon par egzanp kot nou santi wi i annan en kantite prodwir avek move kalite ki pe antre dan pei. E sa i en eleman irzan ki nou bezwen adrese, e i pour nesesit en konsiltasyon pli larz. Zis pour note ki sa bann letid nou osi ganny prezante dan kad Non-communicable Diseases Committee ki mon’n koz lo la. E lo sa komite i annan lasosyete sivil, e i annan osi sekter prive. Alor in annan zot langazman. Mersi Speaker.

MR SPEAKER

Petet nou a kontinyen parey labitid avek sak entervenan dan lord ki zot in demande. Onorab Henrie.

HON GERVAIS HENRIE

Mersi Mr Speaker. Pour mwan i pa telman en kestyon. Me mon zis anvi partaz en propozisyon avek Minis. So permet mwan.

MR SPEAKER

Wi, go ahead.

HON GERVAIS HENRIE

Mr Speaker yer swar mon’n fer en konversasyon avek en manman Mont Buxton ki rakont mwan ki mannyer son pti fiy 6an, anba sirveyans son garson 18an in sibir en labi seksyel. E i tous en pe sa zafer labi ki Minis in koz lo la. E konmsi sa ki sa madanm in rakont mwan yer swar in fer mwan pa dormi byen akoz mon realize ki mannyer nou kominote i malad. Ki mannyer nou pei i malad. E nou pe koz en pti fiy 6an, en garson 18an ki ti sipoze pe vey li.                                E ankor ki mannyer nou bann zenn i annan en keksoz mal ek zot. E nou bezwen alor parey ou menm ou’n dir, parey Minis in dir ansanm nou bezwen fer en keksoz. E sa ki mon ti a kontan propoze, mon war ki Minis in met bokou bann sizesyon.                                Mon krwar pour dir sa i en moman oportinen  pour nou donn sosyete sivil vreman son plas dan pour fer bann progranm outreach pour kominote.  E dan Bidze, dan deba Bidze 2017, nou’n annan en pe problenm avek ki mannyer i annan serten NGO pe ganny larzan ek Gouvernman, en pe pa pe gannyen. Alor mon krwar la i en moman pour nou kapab donn bann NGO plas, les zot run sa bann progranm. Tender out an konsiltasyon avek Gouvernman ki Gouvernman i oule zot sikse sa bann progranm a kapab ganny byen mezire, e si zot pa pe fer byen, zot pa ganny ankor sans pour run sa bann progranm. Enn mon vwar i tir presyon lo Gouvernman pour fer sa bann progranm ki swa Minister Lasante, ouswa ledikasyon. De i tir presyon lo nou bann teachers ki zot ti sipoze pe konsantre dan lansennyman.            I ava fer sa bann NGO vin en pe pli aktiv, e zot ava kapab travay en pe pli byen avek kominote.                   Dezyenmman pwen ki mwan mon ti ava kontan kekfwa Minis la i elabor en pe plis lo la se empowerment nou popilasyon. Konmsi mon vwar pour dir sa eleman in manke. Nou pe koz bokou lo kontrol; nou pour anpes advertising, nou pour mont plis taks, malgre Minis in koz lo swa popilasyon me kot nou fer nou popilasyon sirtou bann zenn reflesir pour dir sa i nou pei. E nou, nou bezwen konmsi pran swen avek li.    E alor mon ti ava kontan ki nou annan sa loportinite pour popilasyon partisip plis. E sirtou, sirtou, e la mon fer en lapel pour bann dimoun dan Mont Buxton kot bann dimoun ki dan lepase in bann bon atlet, bann profesyonnel. Konmsi vin devan  ki nou kapab pas nou konesans avek bann zenn ki mannyer nou’n sape dan lavi e nou pa’n fer sa bann keksoz ki zot ozordi zot pe fer. Konmsi zot leksperyans ti ava vin en leson lavi pour bann ki pe monte. Mersi.

MR SPEAKER

Mersi Onorab Henrie. Bann bon sizesyon.               Onorab Arrisol.

HON SANDY ARRISOL

Mersi Mr Speaker. Bonzour Minis avek ou delegasyon. Bonzour tou Manm. Mr Speaker mon osi pa neseserman kestyon. Minis in dir annan en pti diskisyon. Annou partaz nou nide. Mwan i annan trwa pti keksoz mon ti a kontan koz lo la Minis. I annan sa zafer ledikasyon seksyel.           Mon santi pour dir ledikasyon seksyel i ganny met lanfaz lo la letan zanfan i dan segonder. Be selman letan mon’n ekout bann poursantaz, bann rezilta ki ou’n donnen i montre nou pour dir komans bokou pli ba konpare avek bann marmay ki segonder.               Ou konnen toultan mwan riye letan i montre sa progranm, yer swar fek montre ankor, annou viv byen san drog. Kot i montre bann manrmay primer pe fer sa. Be dan 100 manrmay primer, pa manrmay primer ki fim drog. Mazorite bann zanfan ki’n komans segonder ki komans met drog dan labous. Sa i premye.  Me zanmen nou vwar manrmay segonder pe fer sa. I zis parey letan i annan lamars kont torti. Annou pa manz nou torti. Se manrmay primer ki fer sa bann lamars.                                     Be pa manrmay primer ki an gaz li dan manz torti. Se adilt avek bann ki pli… be nou pa vwar sa bann dimoun pe fer sa. Toultan nou vwar bann manrmay primer pe fer bann keksoz pour prezerv en keksoz, be selman adilt ki fer. Mon pe dir ledikasyon seksyel parski mon santi pour dir ler i ariv primer in fini tro tar. Mon krwar i enportan pour nou enkilke sa dan primer. Me selman i ava depan lo langaz ki nou pe servi avek nou bann zanfan pour nou eksplik li lalkol, kwa ki bon, sigaret kwa ki bon. Akoz ki nou pa devret pran. Ki son konsekans olye esper sa ariv dan letan science letan in ariv segonder. Be sa letan in fini met sigaret dan son labous. Sa i premye.                    Dezyenmman mon’n tann Minis koz lo Schoolmeal. School meal avek bann keksoz ki nou zanfan i servi dan bann lekol. Mon ti annan en propozisyon Minis. Par egzanp letan mon get school meal, mon rapel School meal ler mwan mon ti lekol ti annan sa gro kastrol NYS ki ti vini, e nou ti manz dan bann lasyet fayans dan Schoolmeal, dan nou lasal a manze.         Ozordi bann zanfan, zot sitan modern. Parski ozordi ler mwan mon ti lekol, mon ti kont ek lagrenn lagati. Ozordi bann zanfan zot bezwen en scientific calculator. Nou bezwen donn zot parski lemonn pe fer provizyon pour sa. Nou pa kapab retourn zot dan lagrenn lagati. Prezan mon pe mazin school meal. School meal i ti ava pli atraktan, i ti ava napa diskriminasyon, parski Onorab Larue li son manman in donn li en takeaway, e mwan Onorab Arrisol mon manman in dir mwan mon bezwen al manz dan school meal laba dan sa gran lasyet fayans. Prezan tou manrmay pe get mwan pe antre dan lasal a manze, mon bezwen al manz sa. Sa i fer i annan sa diskriminasyon ant bann zanfan dan bann lekol. Mon mon krwar school meal i bezwen improve.                   School meal par egzanp i ti kapab, ozordi school meal i R2, nou ti kapab dir ok annou fer school meal R5, sa R3 i a vin pour sa bwat takeaway kot zanfan ki pe manz school meal, i osi prezantasyon dan lasal a manze, son manze i ganny mete dan en bwat takeaway, i met son non lo la, Arrisol, Larue, Pillay, kot letan mon pe asiz obor Onorab Larue, napa distenksyon. Nou tou le de nou dan en bwat takeaway. Sa i fer li pli atrakte pour sa zanfan ki pe manz sa manze.                      Dezyenm keksoz lo la. Letan nou pe koz bann keksoz ki pa devret ganny vann dan bann tuck shop, dan bann lekol, mon ti pe mazin en propozisyon vi ki la nou annan bann zafer dedicated fund. Nou annan Children Fund, e la Seybrew in ogmante. Mon mazinen pour annan plis taks ki pour ganny anmase avek li, zis parey i devret ganny anmase avek tou bann lezot lorganizasyon ki pe prodwir lalkol dan ou pei. Mon mazinen sa larzan nou ti kapab komans avek lekol primer.                 Kot bann lekol primer nou annan mwens zanfan konpare avek lekol segonder. Me La Rosière mon konnen i annan en bon pe. Nou ti kapab dir par egzanp dan bann lekol primer bann zanfan ler i konsern 10er paran pa bezwen met nanryen dan sak. Akoz lekol nou pe enplimant en keksoz nitritif. Tou zanfan pour lekol primer La Rosière  par egzanp, ozordi Lendi zot pour ganny zot sepa en pti sandwich legim sepa ki sa, lekol ki pour donnen sa. Nou komans avek primer sa. En legzanp nou kapab komans avek, pa vedir ki nou bezwen fer, kot ozordi zot pour ganny zot boutey delo, kot ozordi laba demen nou pour donn yogurt, apredmen nou pour donn en pake dile. Konmsi bann keksoz nitritif ki nou kapab ed sa zanfan gradyelman konpran akoz i bezwen pe manz sa bann keksoz ki Minister Lasante i anvi enplimante. Sa mon mazinen i ava fer ki dousman, dousman sa zanfan pour konpran pour dir be non, dan bomaten pa kapab en gro samoosa, en kilo delwil avek en gran pet limonnad, me i ava enportan pour manz en pti git cornflakes, oubyen en lot keksoz pli nitritif; en pe dan sa laliny.                                     Apre letan i konsern ledikasyon fizik – mon retourn ankor lo evolisyon. Ledikasyon fizik lontan, mwan mon ti fer dril dan son soley kontan, pa kontan ou ti bezwen left right, left right.                                                 Ozordi dan bann lekol mazorite bann lenfrastriktir sport, ledikasyon fizik, napa boul, swa net pa bon. Swa ring pa bon, alor bann zanfan segonder zot tant pour pa enterese avek sa bout ledikasyon fizik. Tou leskiz, mon pa’n anmenn lenz, mon lipye i fermal, mwan mon manman in dir mwan ganny asma alor mon pa kapab tay bokou akoz mon pour touf avek ou. Alor sakenn i vin ek en leskiz. Be nou kapab ankor improve par egzanp dan segonder, nou kapab servi segonder pour nou dir get sa ler ou’n ariv dan segonder, nou ava arete avek sa zafer volleyball, football, me i ava annan son zour volleyball football, menm napa laplenn…. Be nou entrodwir bann zanfan avek bann gym ki nou annan Sesel. Nou bann zanfan segonder ki en pe pli matir. Entrodwir zot avek bann gym, oubyen entrodwir avek basen naze.      Konmsi nou tir zot en pe dan lanvironnman lekol kot zot anvi ganny tire pour zot al laba e nou a fer ki sa de peryod 80 minit ki Onorab Ghislain in koz lo la i ava tonm dernyen peryod pandan lazournen, olye koman ou vini 8er bomaten ou pe transpire apre pour asiz dan laklas. So mon mazinen bann pti keksoz koumsa kot nou kapab asize diskite ansanm avek Minister Ledikasyon, Lasante pour nou sey vwar ki mannyer nou kapab atrakte nou zanfan pour zot kapab komans bann keksoz en pti pe pli fizik ki bon pour lasante. E an menm tan pour nou kapab kekfwa ariv lo sa ki ou pe dir Minis. E mwan mon kontan Statement ki ou’n ganny fer parski mon krwar i enportan pour nou koman bann paran ki la, e osi koman bann edikater, osi Manm Lasanble pour ganny sa bann lenformasyon ki ou’n partaze. Mersi bokou Mr Speaker.

MR SPEAKER

Mersi Onorab Arrisol. Onorab Vidot.

HON AUDREY VIDOT

Mersi Mr Speaker. Bonzour Mr Speaker, tou Manm Onorab, Minis ek ou delegasyon tou dimoun a lekout.                             Minis mwan mon annan kestyon avek rekomandasyon. Mon ti a swete ki si i posib pour Minis kapab fer nou ganny en rapor, kopi sa letid. Akoz sa i ava ed enn de bann komite ki egziste pour kapab siport en pti pe nou kontribisyon anver bann issues ki pe lev-e pour nou bann zenn. E osi mon kestyon mon ti anvi demande. Dan sa letid eski i annan ki demontre en pti lo nivo rezyon, ki bor ki i annan plis sa bann konsern. sa osi pour ed nou baze lo lenformasyon pour nou kapab gete petet ki rezyon nou devret pe focus en pti pe an plis lo la. Dan demars ki ou Minister pe fer avek bann lezot Minister pour vwar en pti pe kwa ki kapab ganny fer pour amelyor en pti sa bann kontrent ki nou bann zenn pe pas ladan. Mon ti ava rekomande ki i vin en lobligasyon kot kominoter, Local Government ti ava byen ki sak kominoter i ava annan, en aktivite legzersis ki ganny fer pandan lasemenn at least 3 fwa dan lasemenn pour nanryen ki a benefis kominote. Ki pa zis pour zanfan, me pour paran. I a komans avek paran pour li ankouraz son zanfan pour anmenn avek li pour li fer aktivite legzersis dan kominote.   Mon pour siport pwennvi Onorab Ghislain kot i konsern lekol. Mon rapel Plaisance segonder ti top avek son bann aktivite HouseInterhouse Competition apre ler lekol. Mon sizer nou bann Youth Workers dan bann distrik i ganny osi atase for avek lekol. Montre zot langazman akoz i annan i manke sa langazman avek lekol pour zot kapab donn en sipor. Anmas nou bann zenn apre lekol. Si bann ki reste lanmenm la dan kominote, fer bann aktivite sportif ki osi i ava montre zot sipor anver 30 minit legzersis pour nou bann zenn. Mon pour met lanfaz lo medya. Medya i bezwen zwe son rol akoz nou pa kapab  parey i dir zis montre lavertisman lo lalkol, me siport bann progranm aktivite. Pa pran li ser ki bann groupman, bann NGOs  ki pe fer bann lavertisman pour zot bann progranm ki tous benefis bann zenn ki abordab ki i kapab ganny pase lo medya. Pa zis televizyon, me osi bann zournal. E osi montre nou bann zenn dan Lasanble, Lasanble zenn, ki zot pe koze lo lavwa lazenes pour kontribye pour sansibilize pour koz lo lavwa bann zenn pour dir, ki bann difikilte ki zot pas ladan. E osi montre ki langazman ki zot pe montre lo nivo zot distrik ki zot pe fer.                             Bann NGOs osi avek bann klib lanvironnman letan zot pe fer bann aktivite, medya i bezwen zwe en rol, pa zis kouver i annan en kantite nouvel dan Sesel, be al tous sa bann groupman, montre ki vreman bann zenn pe fer.  E petet sa osi i ava atrakte pour bann ki pa konnen ki zot pe manke dan zot bann distrik, dan zot bann kominote. E osi avan mon terminen. Mon ti a kontan osi ki paran i zwe en rol ler nou annan bann aktivite ki bann zenn i progranmen o nivo kominoter, i annan komite zenn, i annan bann lezot komite, bann dimoun a laz. E osi i annan NRA. Zot mank sipor paran. Paran nou konnen i annan sa bann aktivite dan kominote; lavertisman in pase, mon vwar i annan zenn i pase, me zot tir leaflet partou. Me paran pa met presyon lo sa zanfan pour dir li be gete ou pour zis asize la ater devan televizyon. Ou pa pour fer nanryen. Be ale, al partisipe, i annan en kantite progranm ki kapab dan ou benefis, fizikman e moralman ki pour donn zot sa ledikasyon e okip zot an bonn sante. Sa i mon kontribisyon ki mon ti a kontan fer Minis. Mersi bokou.

MR SPEAKER

Avan mon donn parol Minis. Zis pour mwan redir ki sak Manm sipoze gannyen, oubyen pour al gannyen en soft copy rapor ki Minis in anvoye. Zot a kapab lir li at your leisure pour ganny bann detay. Pardon? Already sent. Mon’n ganny enformen. So ou’n resevwar.               Ok nou a kontinyen Minis mon pa konnen si oule reponn pour le moman, oubyen oule kontiny avek en lot kestyon?

MINISTER JEAN-PAUL ADAM

Mersi Mr Speaker. Petet mon a pran sa bann ki’n vini apre nou ava kontinyen si ou agree. Premyerman mon apresye komanter par Onorab Henrie. Akoz in koz lo en size ki zisteman problenm ki nou annan se ki nou pa koz ase lo la. Se sa kestyon labi seksyel. Akoz ki nou pe vwar dan sa rapor ki  17 poursan nou bann zenn dan en survey anonym pe dir zot in eksperyans labi seksyel. E dan lamazorite ka i konsern manm fanmir. Savedir problenm se nou pa pe koz lo la koman en sosyete. Sa ki en problenm akoz sa…letan ou donn dimoun sa sans pour zot koze anonym zot dir sa problenm. Me koman en sosyete zis en pti poursantaz ki pe vreman ganny raporte. Apre ankor en pli pti poursantaz ki pe ganny prosekite.                              E nou bezwen kree en lanvironnman kot nou fer dimoun pa per pour vin devan akoz sel fason pour aret sa se si i annan konsekans pour move aksyon. I bezwen annan konsekans pour move aksyon. E ozordi malerezman pandan, pour en poursantaz alarman parmi nou bann zenn, sa kestyon labi seksyel i en realite. Alor mon apresye lefe ki Onorab in met sa pwen devan. E mon dir avek pep Seselwa, e osi avek tou dimoun ki i enportan ki nou koz lo sa size ki nou rod en fason pour nou vin devan. Nou bezwen, nou bezwen rod fason ki annan plis fason ki en dimoun i kapab vin devan kot i ganny siporte, kot i ganny sa sekirite, kot i ganny sa santiman ki ou pour ganny proteze. Sa mon krwar ozordi nou bezwen onnet antre nou lekor, i pa sifizan ozordi kot i ete. Letan en dimoun in ganny abize seksyelman. Eski i santi i kapab vin devan? Dan serten ka in ganny fer me, nou bezwen ranforsi sa, e nou bezwen kree plizyer eleman, plizyer loportinite pour sa bann dimoun partaz zot leksperyans.    Mon konnen dan Minister Lasante par egzanp bann psikolozik  ki nou deza annan, zot pe deal avek en kantite sa bann case, bann dimoun ki’n vin devan. Me sa rapor i montre ki i annan en kantite ki pa pe vin devan. Sa ki sa rapor i pe montre nou. I annan en kantite ki per pour koz lo la, e fodre koman en Nasyon nou koz lo la, nou briz sa silans. E osi letan i arive, nou fer sir ki i annan en swivi ki sa kestyon i ganny anmennen devan lazistis e ki sa dimoun i ganny sa sipor ki i bezwen.                                   Mon dakor osi avek propozisyon Onorab, ki nou bezwen regard enteraksyon avek lasosyete  sivil. E mon krwar i annan previzyon deza ki pe ganny war deza par Minister Finans pour nou annan plis langazman atraver bann progranm. Nou ava rapel ki ti annan sa Small Grants Programme ki ankor egziste  ki ganny ofer avek bann lorganizasyon non- gouvernmantal pour zot fer bann progranm sible. Malerezman mon krwar pour le moman napa enn ki’n regard par egzanp ledikasyon seksyel oubyen sipor pour labi. Me in annan bokou dan sekter sosyal.    E mon dakor osi ki nou kapab ofer plis loportinite dan sa sekter. Me nou bezwen fer sir osi ki sa bann lorganizasyon dan lasosyete sivil pe ofer sa sipor apropriye. Savedir ki par egzanp counseling   zot bezwen fer sir ki sa bann dimoun ki pe ofer sa counseling i bann dimoun ki’n ganny train.                     E nou kapab travay avek bann lorganizasyon ki annan bokou leksperyans dan sa bann keksoz. Mon pe mazin par egzanp Red Cross, me i annan lezot kot nou kapab travay avek zot pour ofer plis sa bann formasyon, e ganny sa sipor.          Sa kestyon empowerment 100 poursan, sa i en pti pe lakle annefe sa ki nou bezwen fer. Akoz i revin lo sa swa personnel, e se sa konklizyon mon statement se ki nou bezwen fer sir ki sak endividi, sak fanmir i konpran ki zot aksyon i konte ; pare nou donn sa sipor. Sa bann eleman taks i en eleman. Me nou bezwen montre ki mannyer sa i siport en dimoun. Par egzanp ozordi, annou pran legzanp en Pet, en pet limonnad, sa bann boutey 750ml i kout R17. Ok. Konpare avek delo ki ou kapab gannyen dan water fountain ki pour nanryen.                                  Alor annou montre sak fanmir ki mannyer zot kapab ekonomiz larzan dan en fason pozitiv. Nou bezwen fer progranm sansibilizasyon apre nou bezwen ofer swa avek sa bann fanmir, ofer zot sa bann swa dan en fason pozitiv kot zot pe vwar zot pe fer sa diferans. E sa i lye avek sa nide anmenn atlet, mon krwar sa osi i en tre bon nide. Annou kree sa partaz leksperyans dan kominote e dan bann lekol.                    Lo bann pwen Onorab Arrisol. Ledikasyon seksyel mon dakor avek li. E enn bann rekomandasyon lo sa rapor, e ki nou deza pe koz avek Minister ledikasyon, se pour komans li pli boner,  se pour komans li dan primer, pa selman dan segonder. Parey ou’n deza dir ou bezwen fer li avek latansyon, avek respe pour sa bann zanfan, e respe osi pour zot paran. Me i bezwen ganny fer. Sa rapor i montre nou sa i bezwen ganny fer. I pa zis en kestyon en swa. Nou bezwen adres dan en fason sistematik.               E osi sa bann propozisyon an se ki konsern manze dan lekol. Zisteman sa ki nou’n dir. Sa letid i montre nou ki nou bezwen revwar li konpletman. Ozordi ou kapab ganny akse avek en repa balanse dan lekol, dan lekol segonder pour R2. Ok ? Sa ki pe montre se sa poursantaz dimoun ki pe servi sa servis i minim.                               E Gouvernman i depans en ta larzan lo la. Akoz Gouvernman i donn en subsidy pour ofer sa pri a R2. Si mon pa tronpe Gouvernman i pey 50 poursan. Gouvernman son kontribisyon i 50 poursan sa kou pour annan sa manze dan lekol.                                                 Me si dimoun pa pe servi sa servis, i pa vedir aboli sa manze R2, o kontrer i dir sa servis i egziste, i bon, bann dimoun ki pe servi annou regarde lekel bann ki pe servi. Prezan bann ki pa pe servi ki zot, zot ti ava kontan vwar dan lekol. E ki mannyer nou kapab ofer bann servis dan lekol, bann opsyon pour bann repa ki pli apropriye, mon krwar Onorab Arrisol ou’n byen dir pour dir nou bezwen rod en servis ki pli ekitab, kot tou dimoun i annan akse avek sa manze dan lekol a en pri ki baze lo zot mwayen. Me ki reponn a zot bezwen nitrisyon.  E se sa ki nou pe travay avek Minister ledikasyon. Me mon apresye e kantite sa bann pwennvi ki’n ganny met devan. Nide osi pour servi Children’s Fund, par egzanp lo nivo bann lekol primer pour donn en goute ki balanse. Mon krwar sa nide i enteresan.                       An menm tan ki nou mon dir i enteresan akoz mon toultan mon al lo prensip annou siport nou bann zenn ; annou siport bann zanfan, e si nou kapab asire ki zot ganny en pli bon nitrisyon i bon.                Me nou…ki sa rapor i montre nou osi se ki i annan en lapros pasiv par bann zenn. E mon retourn en pti pe lo pwen ki Onorab Henrie in dir lo empowerment. Sa rapor in tant pour montre ki annan en lapros pasiv. Alors si ou pe donn dimoun en keksoz, wi i kapab annan en bi a kour term. Mon krwar atraver proze parey nou kapab asire ki omwen dan lekol primer zot pour annan en bon goute ki balanse. Me nou bezwen fer sir sa i swiv apre letan zot al dan segonder. Alor mon ti a dir annou regard tou opsyon, nou pa zis regarde pour donn sa konpletman gratwitman.  Me annou regarde ki mannyer nou kapab travay avek bann lekol pour fer sir ki i vin en form dan zot ledikasyon pour zot konpran sa i en goute ki balanse. Sa son, sa i en legzanp ki mannyer nou kapab fer li, e parey ou’n dir serten legzanp, e ki sa i ganny anmennen pli tar. E osi pour revwar ledikasyon fizik, nou toutafe dakor.  E sa i swiv en pti dan sa ki Onorab Vidot in dir. Revwar bann aktivite legzersis dan lekol, revwar, e Onorab Ghislain osi avan in dir, nou bezwen revwar la kantite erdtan ki ganny konsakre pour sa.                  Nou bezwen revwar bann zanfan ki par egzanp pe evite fer ledikasyon fizik. Parfwa paran osi pa pe donn sa sipor pour sa bann zanfan fer ledikasyon fizik. E ranforsi sa atraver travay ki ganny fer dan kominote, e Onorab Vidot mon krwar in fer en tre bon propozisyon pour annan en minimonm en standar ki nou dir dan sak kominote, i bezwen annan tel progranm ofer gratwitman dan bann kominote kot dimoun i kapab partisipe. Me nou revin ankor lo sa kestyon empowerment.             Nou bezwen ki dimoun i vin devan, e ki dimoun i pran sa en pti pe koman en challenge, pran sa koman en defi. Mwan mon pour fer sa diferans dan mon lavi, dan lavi mon zanfan. E sa se sa en pti pe bi ki nou pe vin dan Lasanble ozordi. Sa problenm i la. I annan diferan eleman ki nou bezwen servi. Nou bezwen annan en pe regilasyon. Apre bezwen servi en pe sa eleman regilasyon. Apre nou bezwen ankouraz dimoun pour pran sa responsabilite zot menm pour osi fer aksyon. Lo kestyon avertisman ki Onorab Vidot in osi dir pour nou fer li fasil pour fer avertisman pour bann aktivite fizik.                           E sa i en propozisyon tre valab. Mon konnen ki i annan deza en sipor par SBC an se ki konsern bann aktivite…bann progranm lasante. Me nou kapab vwar ki nou elarzi sa en pti pe dan konteks aktivite fizik pour nou amelyor sa partisipasyon dan en fason pli larz dan nou sosyete. E mon krwar nou bezwen travay avek bann lekol pour nou annan bann target partisipasyon dan bann aktivite fizik, e osi lo nivo kominote.

Kestyon ki ou’n demande lo, eski i annan bann diferans dan bann rezyon ? Sa letid pa’n montre sa. Sa letid in ganny fer dan 14 lekol segonder ki enkli bann segonder prive. E ki nou’n war sa bann problenm i dan tou lekol. I napa forseman en landrwa kot ou annan en plis problenm ki dan en lot. Dan sak lekol ou annan sa eleman.           E i montre ki sa bann,  sa bann eleman konsonmasyon ki nou pe vwar. Sa bann pratik. Sa bann konportman i zeneralize dan laplipar lekol segonder. E se pour sa osi akoz i irzan ki nou azir. Mersi Mr Speaker.

MR SPEAKER

Onorab Afif.

HON AHMED AFIF

Mersi Mr Speaker. Mr Speaker mon osi mon annan detrwa komanter an relasyon avek prezantasyon bomaten. Mersi Minis pour tou sa bann detay ki ou’n donn nou. Mwan mon ti a kontan petet komans an di-z-an. Ti a bon nou regarde ozordi kwa ki’n sanze ki fer ki nou pe ganny bokou sa bann statistik ki ou pe koze. Par egzanp 40an pase kan mwan mon ti lekol. Kan Dr Gedeon ti ankor ansanm lekol eksetera.             Sa bann statistik definitivman ti diferan. E mon krwar i enportan ki sa i zis mwan sizesyon ki Gouvernman i sey regard en pti pe kwa ki’n sanze pandan 40an, lo nivo lekol, lo nivo sosyal, lo nivo lafanmir pour vwar si i annan serten eleman ladan ki petet ozordi Gouvernman i a kapab ede adrese.

Mon krwar si nou regard zis pirman statistik, konsekans ki pe arive i pa pour neseserman montre nou sa portre sa bann solisyon ki nou devret gannyen. Mon krwar nou devret osi regard en pti pe ki nivo lentere lafanmir  i annan dan sa bann problenm. Par egzanp, dan lepok mon paran, ou paran Minis eksetera. Petet zot ti annan en diferan valer sosyal.                               Petet zot ti annan en diferan kiltir ki zot ti promouvwar kot lakour. Petet ti annan en diferan kiltir kot lekol. E alor tousala si nou konnen ti annan bann bon eleman dan lepase. Annou trouve ki mannyer nou kapab re vin avek sa bann bon eleman ki ozordi petet nou a kapab petet ed sa bann zenn.                 En lot problenm ki mon krwar i petet nou pa pe koz lo la. Me selman i annan en lyen direk avek tou sa bann problenm ki nou pe vwar, se lapovrete. Mon krwar lapovrete set en keksoz ki afekte la fason nou reazir si nou en zanfan. I afekte la fason paran i kapab reazir. Parske i napa mwayen. An plis ki i napa mwayen, petet in perdi lespwar. E ler ou perdi lespwar se sanmenm sa letan kot ou bliy tou moralite. Ou bliy tou lozik, ou bliy tou fason fer keksoz ki dan lentere ou zanfan, lentere ou fanmir. Pa ni menm lentere a lon term. Ni a kourt term ou pa enterese.          Alor mwan mon krwar si nou kapab trouv fason pour redwir lapovrete, i pour ede sertennman pour nou adres en kantite sa bann problenm. E ler mon pe koz lapovrete, petet annou get en pti pe sa eleman lakaz. Mon krwar lakaz i anmenn konfor. Lakaz i anmenn en soutyen. Lakaz i ed tou dimoun depi paran, depi sa zanfan. E wi nou pe koz, nou pe koz bann problenm a lon term ki pour kout pei en kantite larzan si zis pirman ou dir be ok, be 15 poursan nou bann zanfan, pour bann zanfan ki pour obez, oubyen ki pour annan problenm dyabet, problenm leker eksetera. E sa pour kout nou en fortin pour nou al trete.                                        Be an menm tan si nou ti fer sir pour dir nou bann zanfan i pe viv dan en landrwa sen avek paran ki konfortab. Pa konfortab i annan liks, me selman, i konfortab dan lesans kot i trouv mwayen ki a de kwa pour li kapab okip son zanfan toulezour. Mon krwar sa bann keksoz pour ed en kantite.               Lo nivo sportif, mon konnen tou le lannen, resaman nou’n pas dan legzersis bidze 80 ekek milyon roupi i ganny depanse pour sports. Me selman ankor enn fwa, mon get dan mon distrik kot sa mon mazinen i aplik pour tou distrik kot sport nou tou nou konnen i en keksoz ki i pour ede tir en kantite zenn dan sa bann tandans pour al dan drog, oubyen dan bann kalite lavi sosyal ki pa vreman dezirab ozordi.                           Be si nou ti kapab trouv bann fason senp pour permet ki sa bann zenn i trouv sport koman en keksoz ki en fason. En fason viv ki pour, ki pour donn zot en lepanouisman. En keksoz ki pour demen fer zot fyer. Si nou ti kapab trouv sa bann fason pour fer li. Mwan mon krwar nou ti pour ed en kantite dan sa bann problenm ki ou pe dir. E mon pour donn ou detrwa pti, pti legzanp kot sport sa mon pa pe fer politik akoz mwan mon anvi ede ki nou tou ansanm nou trouv solisyon.                                   I annan bann senp keksoz par egzanp ozordi bann manrmay ki zwe basketball dan distrik. Zot dekouraze pour zot al zwe, parske zot dir ou en net zot pa kapab gannyen. Zot dir ou en boul zot pa kapab gannyen, e zot vin met presyon lo MNA, lo DA, lo tou lezot politisyen pour zot sey trouv en fason – en boul, zot napa soulye.                     Mon pe koz bann eleman, bann keksoz ki pa kout bokou larzan an relasyon avek – mon konnen sa kantite larzan ki ou pe mazin pour al depanse pour rektifye tou sa bann problenm ki nou annan. Me si nou ti kapab par egzanp bann manrmay ki fer sport tou le swar, en kantite zot pa anvi al fer sport parski sa zistans ki zot bezwen al kouver apre ki sport in fini pour zot mont se zot. Napa pick- up, napa transpor eksetera. Tousala i fer zot dekouraze. Zot dir ou be konmsi, ler nou sorti travay nou vini, nou fatige la aprezan pour nou al zwe ankor, nou pou’n deza fer en gran sakrifis. Nou bezwen al pey ankor en pirat pour nou mont se nou eksetera. Sa bann pti, pti keksoz si nou ti kapab fer ban zenn annan sa fasilite atraver – atraver Local Government, atraver sport eksetera. I ti pour fer tou larestan zenn dan sa distrik, regarde e dir be get sa, mwan mon pe regard en zwer ki mon vwar li pe vreman progrese. Mon vwar li koman en model.  E mon ti a kontan swiv li. E bokou zenn ti pour swiv sa kalite model. Me zot pa pe war sa bann model. Parski gradyelman avek lenfrastriktir sipor sirtou, sipor. Sa bann manrmay pa santi pour dir i en fason, i en fason debousman apre travay pour ou al dan sport. Parski i kout ou tro bokou.                            Saler ler ou regard ki kantite ekstra ki Leta, oubyen lotorite ti kapab met dekote pour fer sir poudir sa bann sport i vreman a la oter pour ankouraz bann zenn zisteman pour al ladan pour zot fer keksoz ki pour vin en legzanp pour lezot – ler ou regarde i pa bokou. Be selman se la ki mwan mon krwar nou devret kapab nou koman Gouvernman, zot koman Gouvernman, nou koman Lasanble, e politisyen, travay ansanm pour fer sir pour dir resours i ganny mete dan en fason ki efikas, kot zanfan i benefisye. Sport i epanouir dan sa distrik.                                     E finalman Mr Speaker mon ti a kontan petet sizer avek Minister ankor dan sa bi pour kapab trouv solisyon se sey regarde lekel pei ki’n pas en pe dan sa traze kot Sesel nou ete ozordi. E ki atraver leksperyans e petet bann bon pratik ki in nobou met an plas, in kapab rezourd en kantite sa bann problenm.                     Mon konnen ou pa kapab pran en nenport ki solisyon dan nenport ki pei, e pran li enpoz li lo pour ou. Me selman ti a bon si nou sey regarde lekel bann pei dan lemonn ki parey nou menm pe fer fas avek; problenm drog, problenm labi, problenm dimoun obez, dimoun ki pe mal nourrir eksetera, e ki zot pe fer pour zot trouv solisyon, olye zis esey trouv solisyon lo nou menm. Mon krwar ti ava bon byensir ansanm avek WHO pour nou kapab trouv bann solisyon ki vreman pour aplike pour Sesel. Me selman mon krwar lakle ladan finalman, lakle ladan se ki Gouvernman pour bezwen trouv li resours pour redwir lapovrete, pour met resours a dispozisyon bann zenn pour fer sir ki sport i kapab devlope byen dan sa…dan tou distrik atraver Mahe. E fer sir ki sa valer lafanmir i remonte, e i re donn moral nou sosyete. Mersi Mr Speaker.

MR SPEAKER

Mersi Onorab Afif. Minis mon sizere ki i annan en bon pe entervenan ki anvi koz lo sa prezantasyon sa statement ki ou’n fer. Ki mon krwar i byen. I pe sisit bokou lentere, e mon ti a siny ki piblik i enterese pour ekoute. Mon ti a sizere vi ki i 10er edmi in sonnen ki nou pran nou break, pause cafe.         Bann ki pa ankor ganny sans, oubyen ki pa ti la – parske mon remarke ki i annan enn de ki’n ariv en pe an retar, ki ler Minis ti fer son Statement. Mon redir ki tou dimoun in ganny en soft copy sa Statement ki Minis in fer. So, sa peryod 30 minit si i annan ki le al regard recommandations, oubyen the summary i a donn zot en nide lo kwa ki Minis in koz lo la, e nou a repran 11er pour nou kontiny nou deba lo sa Statement ki pour mwan i tre, tre enportan pour la Nasyon. Mersi nou rezwenn 11er.

(BREAK)

MR SPEAKER

Bon, fotespere tou dimoun in ganny akse avek zot soft copy lo sa Global School-Based Student Health Survey. E toudswit nou a kontinyen avek nou deliberasyon lo sa Statement ki, e sa survey ki Minis Adam in fer. Onorab Prea.

HON NICHOLAS PREA

Mersi Mr Speaker, Mr Speaker mon krwar rezilta ki Minis in e-tal devan nou bomaten i enkyetan e mon partaz en pti pe sa konsern. Akoz ler mon’n sorti osi dan Break mon ganny1, 2 call enn, 2 mesaz osi tou ek manm piblik deor ki pe dir, ki a lekout ki pe swiv sa deba. Ki dir pou dir i en rezilta enkyetan, e ki nou bezwen être fran, nou bezwen bold, dan bann desizyon ki nou bezwen, ki nou pou pran pou benefis lavenir nou pei.            E mon pe dir sa akoz Mr Speaker Minis in dir dan son rapor, dan son Statement, lazenes ozordi se zot ki pou vin adilt demen. Si ozordi nou annan en problenm ek sa lazenes se sa ki nou pou erite demen. Si ozordi sa lazenes a en laz byen boner i pe rantre dan bann aktivite ki pa bon pou son lasante, se sa ki nou pou erit demen e nou pou vwar serten malez dan, par nou sosyete. Mon dir sa akoz ler mon regard  plizyer serten, sa bann statistik ki’n ganny donnen. Par egzanp lo sa sityasyon drog, si ozordi sa poursantaz lazenes in komans tous drog. E nou konnen pou dir drog i en keksoz parey lalkol ki adiktiv, ki rezilta demen?            E Nou konnen atraver dimoun ki servi drog i annan osi sa ki apel sa peer pressure ki ganny mete lo lezot pou zot antre ladan, e nou kapab osi mazinen si sak zenn ki’n komans tous drog i pe persyad enn oubyen de pour swiv dan menm laliny,  ki rezilta nou pou ranmase demen.                                    Mr Speaker mon krwar an 2007 oubyen 2008 ler nou ti pe diskit the New Tobacco Control Act, ti ankor White Paper stage mon ti ganny sans koman en Manm Lasanble, katriyenm Lasanble pou swiv enn pti pe bann deliberasyon e fer serten, serten, serten, pou ede pou anmenn serten provizyon dan sa Act.                       Par egzanp kot nou diskit longman lo, pou servi sigaret dan bann landrwa piblik, dan restoran, dan bann landrwa kot ou annan en roof and so on. I pa ti bann desizyon fasil me nou ti bezwen pouse pou nou kapab fer sa arive pou protez lezot dimoun ki pa pe servi tobacco. Enn bann pwen ki mon, mon ti lev-e se sigaret. Nou bezwen veye enn pti pe byen komans sigaret i ganny pozisyonnen dan laboutik. dan bann landrwa lavant. Ki i pa aksesib, i pa dan la vue sirtou bann zenn. En dimoun ki fim son sigaret i ava antre i ava demann sa boutikye, whether i tir anba kontwar whatever i ava donn li.

Me mon ti al pli lwen mon ti dir ki annou revwar sa sityasyon  vann single sticks. Sa ti lev en deba a ou konnen kekfwa en dimoun napa larzan pou li aste en bwat sigaret i aste en sigaret, de sigaret, trwa sigaret bomaten i pe al travay. Mon kontan ki ozordi ki Minis in relev sa ankor, mon krwar nou bezwen bold akoz se bokou zanfan ki al pou single stick. Si sa dimoun i fimen i avan aste son bwat sigaret. Si i anvi fim de ozordi i ava fim son de i ava anmas larestan and all that. Mon pa pe dir, mon pa pe pini sa dimoun ki fimen me selman i ava konnen i ava planifye and all that.

Be petet ankor mon servi sa legzanp Bhutan : Bhutan i en legzanp kot in al bokou pli lwen ankor. I pa pe regard menm sa excise tax ki Gouvernman pe ranmase li, i pe regard lefe pli lwen lo son lasante. How much son Gouvernman i depanse pou tret bann maladi asosye avek tobacco e zot in fer li en fason laba ki tobacco i ilegal. Ilegal dan sa konteks ki si sa dimoun li i fimen, se li ki apply pou en permit pou son usage personnel, e i enport son tin sigaret ou whatever pou son usage.

Si i ganny atrape ki i pe vann sa i ganny sarze, i ganny kondannen and all that. So, zot in vwar pou dir depans ki zot ti fer vizavi tretman bann maladi asosye avek the usage of tobacco in vreman redwir e sa i balans enn pti pe sa larzan ki zot perdi avek excise avek duty lo la and all that. So, mon pa konnen mon pe met sa i bann deba ki petet pei pou bezwen antre ladan pli tar si sa pou ed nou.

Mr Speaker, Minis in koz lo obesite, lo mank partisipasyon dan aktivite sportif and all that, wi mon krwar tou Manm ki’n koze nou’n rekonnet sa. E ozordi mon kapab dir ki i annan dan tou distrik i annan fasilite. I annan fasilite, petet i a mank resours lo, par egzanp Onorab Afif in dir lekipman, net, boul, soulye and so on, me fasilite i la. Nou bezwen regarde kwa ki’n fer pandan sa dernyen 10an, 15an ki ozordi nou pase, nou vwar fasilite i reste vid i reste dormi.

E i annan menm zerb, court ki, ki beton oubyen i koltar – zerb pe pouse lo la dan tou son bann crack akoz napa sport ki pe ganny pratik apre ler. Mon pran en legzanp Bel Ombre, Bel Ombre kot lakour lekol primer kot i ti en laplenn later rouz nou’n komans train volleyball lo la. Dousman nou lekip volleyball nou ganny sponsor sirman tou le swar nou met en bout beton.

Larive Per De Commarmond ki ti headteacher  lekol Bel Ombre avek Manmzel Rousseau nou ganny en kours koltar. Nou met en kours koltar lo la nou ganny nou en zoli court ki tou le swar swa ou ti war volleyball oubyen basketball pe practice lo la. I annan apepre 3an a 4an la sa court ki en bon court napa nanryen, apre ler lekol napa nanryen lo la.

So nou bezwen regarde kote n’al mal sa lepok letan mon pe koze Bel Ombre ti annan en lekip hockey, Bel Ombre ti annan en lekip volleyball zonm, madanm. I ti annan basketball, i ti annan en group atletik, i ti annan judo, i ti annan foutbol, foutbol mon krwar ti annan de lekip. Ozordi, barely nou annan en lekip foutbol e nou annan en lekip volleyball madanm ki mon krwar i annan 6 oubyen 7 zwer.

Ok ? Tousala nou bezwen regarde kote nou’n al mal. Mass sport, mass sport in ganny redwir mon pa konnen si, mon konnen i tonm anba Local Government, mon pa konnen si i mank ankor resours ladan. Nou’n kestyonn Minis pou Sport boner dan sa lasanble e i sipoze retournen pour li donn nou nouvo Polisi. Pou regarde koman atraver Minis sport e Gouvernman lokal e parey Minis in dir ankor kominote nou tou ansanm nou kapab zwenn pou nou re en stil sport dan nou zenes dan nou bann kominote.

E la mon fer en lapel ler Minis pe koz avek zot Minister. Nou annan bokou sportsman, sportswomen ozordi ki’n pran retret me ki pare pou retournen pou donn sa 1erdtan oubyen  2 erdtan tou le semenn pou ranmas bann zenn. Mon’n fer en lapel avek lekol Beau Vallon, mon mon’n pare pou mwan donn de fwa par semenn. Lekol Beau Vallon depi S2 ziska S5 pou mwan ganny bann manrmay ki enterese dan volleyball. Ziska prezan mon pa ankor ganny nanryen Mr Speaker. Mon pare pou mwan ede avek en bi se sov sa zenes ki pou vin adilt demen. Mr Speaker, mon’n fer sa de pti komanter akoz pou mwan i enkyetan, me mon anvi partaz en pti keksoz avek Minis avek nou Lasanble.

Ladyet i byen nou bezwen donn opsyon manrmay lekol, me mon krwar tuck shop i en keksoz lontan ki Minister Ledikasyon, Minister Lasante in koz lo la. Me mon pa konnen si i annan en swivi akoz nou apre tuck shop i tonm dan menm sityasyon parey avan. Bann keksoz ki pa bon pou zanfan i retournen dousman, dousman i rantre, ti annan en moman ti annan en progranm ki ti pou met fri dan tuck shop ki ti pou vann a en pri abordab.

Mon krwar most of the tuck shops kot lekol nepli annan sa. Si ou donn sa zanfan sa opsyon pou li aste en ponm pou son goute dan plas de samoosa, gato piman, gato bannann and all that I’m sure pou son lasante i pou al pou sa ponm, me si sa ponm pa available alor.

Mr Speaker mon ti a kontan zis round-up avek en pti sizesyon, en pti konsern mon gannyen avek en paran ler mon’n sorti dan Break. Mon konnen petet pa nou tou ki pou pran li an byen me annou pran li dan en fason pozitiv.

Sa paran in dir ek mwan, akoz li i en paran ki’n ganny viktimize, i dir mwan viktimizasyon osi tou in zwe en rol. En rol dan sa degradasyon bokou paran apard zot travay ki ti pe pran serten responsabilite, pou ed zanfan pou ed zenn zot in vwar, swa zot in ganny viktimize dan zot travay ki letan zot in sorti prezan in vin en sityasyon mwan mon vey kot mwan ou demerd ou vey sa ki pou ou.

So, in vin enn pti pe koumsa e in fer sorti poudir ki i annan bokou dimoun ki’n pas ladan. Dan bann departman Gouvernman kot bann dimoun in ganny viktimize e in santi pou dir be mon pa, mon lentere mon, mon professionalism ki mon annan i pa pe ganny servi byen par sistenm e sistenm pa pe aksepte e par lo la mon ganny viktimize mon ganny forse pou mwan kite.

I annan teachers ki’n ganny victimize akoz petet son fason travay e i ti anvi, parey ler laklos i sonnen 2er edmi i pa anvi zis pran son sak al se li. I anvi reste pou pran en group zanfan swa i anmenn plis anver son letid oubyen lezot aktivite pour diriz sa bann zenn dan en lot direksyon.

So, nou bezwen, nou bezwen tous enn pti pe sa, sa paran in fer sa sorti pou regarde pou dir si nou annan volonte, si nou annan paran, si nou annan dimoun ki enterese pou rantre ladan pou ede nou bezwen welcome tou dimoun. I nou pei e sa fitir osi tou, nou osi tou nou pou viv avek. So, alor mon pe dir ki parey Minis in dir in lans en lapel nou annan nou en zefor global kot nou tou ansanm nou kapab met lanmen e ede pou nou kapab sanz sa tandans. Mersi.

MR SPEAKER

Nou a donn laparol Onorab William avan ma demann Minis pour respond.

HON WAVEN WILLIAM

Mersi Mr Speaker, Mr Speaker mon a komanse par dir de pti fraz ki ‘l’homme dans l’opulence’  i oubliy son nesans, e ki ‘’nou rekolte sa ki nou’n senmen.’’ Mr Speaker  sa de fraz souvandfwa nou bann gran paran i kontan dir nou sa e nou kapab aplik li dan diferan fason dan son terminolozi. Mr Speaker sa, mon kontan ki Minis in vin devan avek sa rapor ki byen, me mon a dir ki size sa rapor dan lepase in ganny touse a diferan moman par diferan pti group.

E in annan bann diskisyon me nou pa’n kapab reisi, mon kapab dir vin devan e fer li vin pli vizib anmenn nou dan en pli gran lanpler. E mon swete, mon swete ki lefe ki Minis in vin dan Lasanble avek sa bann rapor ki i avan en sansibilizasyon parmi piblik parmi nou bann dirizan ensidswit ki nou a kapab petet pran moman pou nou kapab analize e pran bann aksyon, ki nou kapab fer imedyat.

Mr Speaker,  letan mon regard nou devlopman e taler mon’n tann Onorab Afif dir en keksoz ki mon konnen petet i pa’n vwar li dan en pti pe pli larz. Mon pa krwar pou dir lapovrete  tousel ki fer dimoun reazir dan set fason akoz letan mon get la fason ki en bon pe nou nou’n grandi dan lapovrete, me pa neseserman nou’n al tonm dan sa bann serten bann keksoz ki ozordi nou bann zenn pe fer.                               Mr Speaker, i fer osi mazinen eski dan nou devlopman koman en pei par egzanp, ou pran lepok nou ti anba kolonyalizasyon, nou’n ganny lendepandans, in annan Coup D’etat, e nou’n al dan Trwazyenm repiblik, e nou’n al dan miltiparti e nou al dan liberalizasyon.

Eski a sak sa bann letap sa trwa brans gouvernans mon pe koz ou Egzekitif mon pe koz ou Zidisyer e Lezislatif. Eski a sak sa bann letap – akoz pa bliye pou dir nou aprann an mezir nou pe devlope – eski a sak sa bann letap nou’n pran bann desizyon ase konpreansiv nou’n met an plas bann Lalwa eski nou bann aksyon ti azour. E parey nou pe dir checks and balances eski nou evalye lenpak ki annan avek tou lenpak sanzman evolisyon ki nou’n pas atraver ?

Mr Speaker mon pou dir pou dir ki pa zis Sesel pe fas avek sa, sa, sa, sa sityasyon akoz lefe ki mon’n ganny sans voyaz en pe. Mon konnen pou dir bann pei Lafrik dan groupman ACP. Zot osi konsernen avek sa bann menm devlopman dan zot pei. Me i fer ou kestyonnen Mr Speaker ki lenpak liberalizasyon, ki lenpak bann Trete Enternasyonal ki nou’n sinyen i annan lo nou osi.?

Eski ozordi  nou kapab dir, senserman pou dir dan tou son sans nou en pei souveren.

Akoz in annan lerozyon, letan ou pran tou sa bann letap in annan lerozyon ki fer ki i fer li en pti pe difisil. Wi nou pou kapab pran en serten aksyon me lo pli gran kestyon se eski Nasyon Ini li menm li dan son fason fer i pe ed bann pei dan zot devlopman avek bann laliny ki zot pe pran ? Konmsi nou pe regard li lo baz lokal an menm tan nou bezwen elarzi li akoz ozordi Sesel pa pe viv an izolasyon sa bann desizyon ki nou pran i enpakte lo nou.

E prezan ou annan en lot konsern rezo sosyal, medya, ki lenpak in annan ? Eski ozordi nou kapab anpes nou bann zenn ganny akse avek plizyer lenformasyon ? E mon kontan ki Minis in tous nou fason viv, nou fason viv e bann sanzman ki’n annan.

Me Mr Speaker mon kontan ki parey mon dir sa size in vini, petet Minis mon ti ava demande ki i annan en kanpanny Nasyonal ki nou servi nou medya pou kapab sansibiliz e angaz dimoun pou partisipe dan sa diskisyon an menm tan parey nou’n dir ; sak sitwayen Seselwa ki mwan personnelman mon kapab fer pou anmenn en diferans ? Akoz i pou bezwen annan en zefor konzwent e mon swete ki sa volonte politik  osi ki tre enportan, i kle sa volonte politik fodre i konsistan pou nou kapab fer sir ki nou anmenn sa diferans.

Mr Speaker, parey nou bann vye dimoun i dir ; ‘’plutôt  tard que jamais’’, mon krwar pou dir nou kapab fer keksoz, me i pou bezwen pran en lanpler konpreansiv. E mon kontan ki Prezidan Faure in anmenn serten nouvo striktir dan gouvernans par egzanp kote drog, lafanmir ensidswit.

Mon krwar nou bezwen ansanm Mr Speaker parey ou’n dir ansanm avek Minis regard dan tou sa bann keksoz. Be selman Mr Speaker, nou tou anndan la nou annan en zistwar pou akonte akoz nou sorti dan en distrik. Mon osi mon konn zistwar mon distrik. Si ou pou demann mwan si mon happy avek sa devlopman mon pou dir ou non. Akoz letan mon get parkour mon, mon parkour politik dan mon distrik mon’n vwar sa degradasyon.

Mr Speaker i annan en lot keksoz se ki parfwa, akoz mon koz avek tou sa bann akter ki vin travay o nivo distrik. E parfwa ou demann ou lekor en kestyon, mon kontan mon’n trouv Onorab Arissol pe anmenn en Mosyon taler ; parfwa ou demann ou lekor be mon anvi serten keksoz. I annan serten Lazans i dir be non ou pa pou kapab enterfer akoz lalwa ki mannyer i ete ouswa prosedir ou pa annan drwa enterfer e i annan sa travay ou ti kapab fer o nivo kominote.

Be nou bezwen revwar tousala petet parey Minis in dir o nivo lokal nou kapab fer en diferans me ki mannyer lalwa i ete i pa permet ou kapab vreman fer sa diferans ki ou ti a voudre. E bokou bon keksoz ki ti egziste lontan avek modernizasyon par egzanp ma donn ou enn se : Lean Government more governance. Petet dan serten fason nou dir be sa i en bon best ki nou evalye lenpak.

Mon kontan ki Prezidan in dir be pou annan sa Scheme ankadrer o nivo distrik. Petet i ava ed nou en pe akoz ozordi nou bezwen bann ankadrer. Mr Speaker, avek sa de pti mo mon pou termin la, be parey mon’n dir i pa bann keksoz ki nouvo e mon swete ki ozordi e lefe ki nou’n anmenn sa nou ava donn li en lot lanpler pou nou kapab vreman anmenn sa diferans dan nou pti pei. Mersi.

 

MR SPEAKER

Minis petet ou ti kontan respond apre sa de entervenan

MINISTER JEAN-PAUL ADAM

Mersi bokou Mr Speaker, e mersi tou bann Manm Onorab pou zot kontribisyon.

Premyerman pou pran en pti pe bann propo ki’n ganny met devan par Onorab Afif. Mon krwar definitivman i enteresan pou nou analize kwa ki’n arive pandan sa dernyen 40an.

E dan sa rapor an detay letan bann Onorab pou pas ladan zot ava vwar ki bokou bann eleman I ganny met devan koman serten bann lesplikasyon. I annan serten dan sa rapor li menm li, i annan serten mon kapab dir endis ki montre serten keksoz ki’n sanze. Par egzanp mon’n sit, mon’n sit lenpak ki televizyon in annan lo nou bann fanmir.

Sa i zis en legzanp mon pa’n al dan tou, me mon bezwen dir ki mon en pti pe konsernen dan lapros ki Onorab Afif in pran akoz mon’n santi in pe pran en serten lapros politik. Konmsi lo sa peryod 40an, non be nou bezwen koz fran, nou bezwen koz fran, nou bezwen koz fran…

MR SPEAKER

Order silvouple.

MINISTER JEAN-PAUL ADAM

Si nou pou al komans nou deba ozordi pou dir ki sa bann problenm i egziste zis akoz Gouvernman pandan 40an nou pe reve. E nou pa pou gannyen solisyon akoz pandan sa 40an pou nou, sa bann keksoz nou pe koz lo la nou pe koz lo fanmir, nou pe koz lo bann keksoz, pa tou keksoz ki tonm zis lo ledo Gouvernman.

Mwan, mon pa pou dir ou ki Gouvernman in parfe e mon pa pe sey fer krwar pou dir Gouvernman in fer ase. Kot Gouvernman pa’n fer ase nou bezwen azir me si ozordi nou pe sey fer en deba pou nou dir pou dir sa pou marse zis akoz Gouvernman fodre fer sa, sa, sa nou pe al fail.

Nou pou reisi si nou tou nou deside pou dir solisyon i avek nou tou e mon vwar zot pe dir nou dakor mon kontan. E zisteman lo kestyon sa bann largiman lo sa kestyon ki mannyer sa bann eleman in sanze. Kwa ki’n sanze dan sa 40an. Alor premyerman, Onorab Afif in koz enn pti pe lo fanmir e striktir, oubyen kiltir ki ganny swiv dan fanmir e parmi bann diferan lakour.

Sertennman i annan serten eleman ki annan pou fer avek sa, me nou bezwen analiz li dan son fon. Premyerman annou note ki ozordi dan la pli par fanmir, laplipar dimoun ki annan sa laz travay i pe travay pa mazorite, avek serten leksepsyon me la mazorite zot pe travay.

Ki diferan par egzanp dan zenerasyon mon paran. Kot toultan ti annan en dimoun kot lakour swa ti manman, swa ti gran manman toultan ti annan dimoun kot lakour. Sa i keksoz fondamantal ki’n sanze dan nou sosyete akoz i annan plis dimoun ki aktiv dan lemonn travay.

E letan nou’n fer reform ekonomik an 2008, Onorab Afif i konn byen nou ti fer en gran zefor pou nou anmenn plis dimoun zisteman dan sa lemonn travay. I annan dimoun ki ti pe fer bann louvraz petet kot lakour ki’n antre dan lemonn travay sa i annan serten lenpak an term nou sosyete definitivman. I vedir osi ki bokou bann manman ki konmela pe travay an plen tan plus, manman, mon dir manman me osi bann paran tou le de paran pe travay a plen tan e letan zot ariv kot zot, parfwa televizyon i vin babysitter.

Nou bezwen koz sa fran i en realite ok, e sa i lye avek serten sa bann eleman ki nou vwar klerman dan sa rapor. Mon dakor avek Onorab Afif ki lapovrete i en eleman, me si nou pou dir zis lapovrete nou pa’n konpran sa rapor. Par egzanp mon donn bann sif lo, lo larzan pos, lo pocket money ki bann zanfan i gannyen pou al lekol.

Sa rapor in tous plis ki 2500 etidyan dan sa 2500 etidyan…, e sa bann etidyan i en pti pe at random nou rod en group reprezantatif e la dan 52 poursan i ganny li plis ki R40 roupi par zour. 52 poursan pe anmenn plis ki R40 roupi par zour. Savedir dan en mwan dan pos sa bann manrmay i annan plis ki R1000 roupi dan en mwan si ou pe kont 5 zour dan en semenn.

E sa i en sonm konsekan e ki rapor pe montre ou pe dir ki si en zanfan i annan larzan si napa larzan i pa pe fer bann bon swa. Sa ki sa rapor pe montre nou i pe montre nou pou dir zot pe swazir fast food, zot pe pran bann soft drinks, bann limonnad, zot pe aste bann keksoz ki pa forseman bon pou zot lasante.

Mon re vin lo sa pwen avan ki nou’n dir ki nou bezwen ofer plis swa dan bann lekol Onorab Arrisol in fer sa pwen. Nou bezwen regard ki bann fakter konsonmasyon dan lekol e kwa ki ed nou pli, fer, ed sa bann zanfan sa bann zenn, fer en pli bon swa dan zot konsonmasyon.

Lo kestyon lakaz ki en pwen ki Onorab Afif in fer resorti e sa i enportan pou fer nou konpran osi la realite ozordi ki i vre nou annan, nou oblize pou nou kapab donn plis lakaz avek dimoun. I vedir ki dimoun i viv plis o-bor kanmarad parfwa i annan flat e tousala i fer en lenpak lo lespas zwe ki dimoun i annan, ki zanfan i annan.

E sa i vedir osi ki annan en tandans pou dimoun, e osi avek lezot risk ki paran pe konsyan lefe ki zot pa anvi ki zanfan i dan semen alor zot…

Ankor i vin sa nivo kot ki zanfan i ganny ankouraze mwens pou al zwe dan semen. Parey lontan dimoun ti fer, konmela dimoun pa fye pou les zot zanfan zwe dan semen. Zot a plifere met zot devan televizyon dan lakour me sa i annan son lenpak.

E se pour sa nou bezwen regard sa striktir lo ki mannyer nou siport, nou siport plis aktivite fizik, me kot i ganny fer, kot i ganny byen ankadre kot nou rekonnet la realite ozordi kote dimoun i viv ki mannyer dimoun i viv. E la ankor pou vin lo kestyon kwa, ankor kwa ki’n sanze oubyen kwa ki pa’n sanze. En eleman nouvo ki nou war dan sa rapor.

Premye keksoz en pwen ki mon bezwen fer se sa rapor i osi permet nou konpare ant 2015 avek 2007 avek 2002. Sa rapor i konsernan akoz sa bann problenm pa ti komans ozordi li depi lontan in komanse. Sa pli konsernan ozordi se ki sa tandans pa pe sanze savedir an 2007 nou ti deza vwar 14 poursan zanfan par egzanp avek lobesite an 2007, an 2015 sa in vin 16 poursan.

Alor la sa ki bezwen fer nou tou konsyan se ki sa tandans pe ranforsi. Savedir nou bezwen fer plis zefor ozordi pou nou sanz sa bann labitid akoz sa bann tandans in komanse depi avan.

I annan serten eleman dan sa rapor ki ti napa dan rapor avan. Alor par egzanp en eleman ki sa lannen, i fer dan 2015 premye fwa ki ganny demande se sa kestyon lo labi seksyel. E parey mon’n dir 17 poursan zenn in dir pou dir zot in deza sibir avek labi seksyel.

Bann rapor presedan pa ti demande sa kestyon, alor nou napa fason pour nou konpar li me mon pou dir avek pep Seselwa ozordi, si nou krwar pour dir labi seksyel in komans ozordi ankor nou pe reve. Akoz nou tou nou konnen, mon asire nou konn en dimoun dan nou kominote letan i ti zenn i ti ganny abize me sa ti ganny balye anba karpet.

I annan en madanm in vin vwar mwan dan Minister lasante resaman e sa madanm ti eksplik mwan letan i ti ganny rape par son tonton. E ozordi, ziska ozordi sa madanm i annan pre 60 an i annan bann konplikasyon medikal. E sa bann letan i ti dir i pa anvi koz lo la, e ozordi i pa anvi koz lo la piblikman.

E sa i en zistwar ki egziste dan nou sosyete i egziste toulezour, e fodre nou sanz sa zistwar fodre nou koz lo la, e fodre nou pa politiz li. Akoz i konsern nou bann fanmir i konsern bann realite ki pe arive dan nou sosyete e si nou krwar in komans ozordi, osi nou pa pou ganny son bon solisyon.

Labi lalkol bann Onorab, labi lalkol pa’n komans ozordi i en keksoz ki depi lontan i annan dan nou sosyete. Me kwa ki nouvo se akse avek lalkol, miltiplikasyon dan avertisman pou lalkol son distribisyon, son fasilite avek ki ou annan akse. E osi sa disposal income ki dimoun i annan pou met akote pou met lo lalkol – tousala i bann keksoz ki realite dan nou sosyete.

An se ki konsern sport, mon dakor avek Onorab Afif ki nou bezwen regard lefikasite bann resours ki ganny envestir dan spor, e Onorab Prea in al en pti pe dan sa laliny e mon toutafe dakor nou bezwen regard ed an en fason fondamantal pou dir ki nou kapab met sa resours kot i donn nou pli bon rannman.

Me mon krwar se zisteman problenm akoz letan mon’n ekout zot mon tann zot nonm problenm lekipman, soulye eksetera… mon mon’n deza fer sport e mon pa krwar ki zot pe dir, pe dir ki Gouvernman i sipoze donn sak sportsman en soulye. Mon krwar pa sa, sa pa pou marse.

Mon letan mon ti komans naze mon servi mon legzanp personnel. Nou ti naz dan delo sale ti napa swimming pool, mon ti naz dan delo sale. Nou ti bezwen fer lantrennman dan delo sale nou pa ti ganny okenn lekipman avek Gouvernman ti zis en realite.

Bokou mon bann kontanporen ki’n fer Jeux Des Iles avek mwan dan sa bann letan ki ti fer foutbol zot ti fer foutbol nipye. Mon krwar nou tou konnen pou dir, pou nou vreman batir en sportsman i pa zis en kestyon pou donn li lekipman. Lekipman i enportan mon pa pe dir i pa enportan. E definitivman nou bezwen regard striktir la fason ki siport bann sport dan nou kominote pou fer sir ki sa bann kominote i vin vibran.

E mon apresye bann pwen ki, ki Onorab Deputy Speaker Prea in dir an si konsern par egzanp i annan fasilite dan tou distrik. I annan fasilite dan tou distrik ki bezwen ganny servi pli byen e nou bezwen demann nou bann kestyon akoz napa sa bann miltiplisite bann diferan tim sportif dan distrik. Me ankor nou bezwen demann kestyon eski se rol Gouvernman pou al kree sa bann tim sportif dan distrik.

Gouvernman i bezwen kree sa kad ki fasilit sipor pou sa bann tim me Gouvernman pa kapab fer tou keksoz pou sa bann tim. E mon kontan legzanp ki Onorab Prea in donnen sa bann letan ti Father De Commarmond ki ti fer sa zefor avek bann dimoun dan kominote.

Sa bann dimoun i ankor la dan kominote, nou ankor annan bann group relizye dan kominote. Nou ankor annan lasosyete sivil dan lakominote, e se nou tou san leksepsyon san regard kouler politik, san regard bann kestyon relizye nou tou nou bezwen vin ansanm, e regarde ki mannyer nou pou fer viv bann eleman dan nou distrik.

Sa rapor i montre nou bann defi ki al avek pou nou kapab rasanble dimoun. Akoz mon’n sit en pti pe akoz ki nou bann zenn pa pe desann lo court apre ler. Pour serten ka petet paran i annan  problenm. Paran i konsernen, i konsernen akoz letan son zanfan pe al laba pe dir a i pe al frekant, pe al frekant bann move frekantasyon sa i en eleman.

Lot eleman eski lankadreman i ase bon, tousala i bann kestyon ki nou bezwen adresse apre la fason ki dimoun i viv eski i pli fasil zis pou mwan kit li devan televizyon akoz sa ki sa rapor pe montre nou. Sa rapor pe montre nou ki ozordi sa zanfan i annan bokou swa lo ki i kapab fer apre ler e pour nou, nou kapab byen idantifye nou bezwen regard li koumsa.

Onorab Afif mon’n al en pti pe ant bann diferan pwen Selman Onorab Afif ti osi dir ki annou regard bann pei ki’n pas en pti pe dan sa bann lekpersyans e mon krwar sa i en bon nide. Serten, serten bann eleman ki nou’n met devan nou’n pran baze lo leksperyans lo lezot pei.

Si nou pran legzanp sa sugar tax ki nou’n met devan sa WHO in fer bokou travay par egzanp avek Mexique. Ki zisteman en pti pe parey nou ti vin middle income vreman vitman e zot in war en gro logmantasyon leksplozyon dan konsonmasyon sa bann labwason,  e letan zot ti met enn tax lo sa bann labwason ki annan disik ladan zot ti vwar gradyelman en rediksyon dan litilizasyon e zot nivo lobesite in konmans stabilize. Ok.

Alors Sesel sa ki fer nou konsernen la realite ki nou annan lobesite i pa en nouvo keksoz sa ki konsernan se ki i kontinyen ogmante. Nou bezwen fer li, nou bezwen tourn sa paz e fer nivo lobesite redwir. Onorab Deputy Speaker in osi koz lo sigaret e lenportans pour nou bold, e mon apresye en kantite sa, sa kouraz ki in met sa pwen devan akoz sa pwen i sansib, nou tou petet nou konnen…

MR SPEAKER

Minis eskize pour mwan enteronp ou, me mon ankor annan nef dimoun ki anvi entervenir. I enteresan e mon ou pasyonnen lo sa size. Me sey think of brevity, e fer ou pwen…

MINISTER JEAN-PAUL  ADAM

Mersi Mr Speaker eskiz mwan, mon prezant mon leskiz. Me an term sa eleman sigaret mon krwar i enportan zisteman pou nou regard sa kestyon lavant sigaret an detay, e sa i en rekomandasyon kler dan sa rapor. Enkli avek lezot revizyon dan sa lalwa mon krwar nou bezwen mazinen osi parey in dir dan sa rapor ki mannyer nou pou regard kestyon lalkol. Legzanp Bhutan mon krwar i kapab tre enteresan i kapab ed nou.

An term sa ki konsern bann tuck shop –  sa i annan en standar ki Minister Ledikasyon in met an plas. Avan ki mon’n vin dan Lasanble nou’n fer en pti meeting avek Minister ledikasyon e zot in dir ki i annan ki pe fonksyonn byen kot zot in fer bann verifikasyon, i annan kot i annan en kantite lespas pou amelyorasyon e i enportan pour nou met sa pwen devan. I enportan pour nou koz lo la e pour nou fer kler nou lekspektasyon koman paran kwa ki nou anvi ganny vann dan nou bann lekol.

E osi mon pran sa pwen ki enportan ki nou, nou ankouraz bann ansennyan pour partisipe dan sport e  dan bann aktivite apre ler e mon krwar toutafe i politik Gouvernman pou nou ankouraz sa. E menm i annan serten striktir ki an plas me petet nou bezwen ganny ranforsi.

Mon apresye osi pwen Onorab William e mon krwar monn kouver serten sa bann eleman en pti lo lapovrete. Nou annan sa kestyon liberalizasyon e sa i en pwen tre enportan akoz i lye avek lefe ki ozordi nou popilasyon i annan bokou plis swa ki ti annan dan lepase.

E i annan serten keksoz ki i difisil pou nou restrikte, si nou pe koz par egzanp lenportasyon. Wi nou annan serten trete par egzanp nou antre dan Lorganizasyon Mondyal Komers. I annan serten keksoz ki nou kapab restrikte me nou bezwen fer li dan en fason ki korek.

Alor par egzanp pour nou diferansye ant serten lenportasyon. Nou’n koz lo twisties Onorab Ghislain in koz lo la avan, ki en problenm. Me i annan serten kalite ki vreman pa en bon kalite nou bezwen regarde ki mannyer nou pou adres sa. Me nou bezwen fer li avek lentelizans e baze lo bann Trete ki nou’n sinyen pou fer sir ki nou reste an konformite.

Apre zis dernyen pwen mon krwar ki mon krwar Onorab William in fer sorti ki tre enportan  se la realite ozordi medya sosyal. Lakantite letan ki dimoun pe pase lo enternet e la fason ki nou fer osi sansibilizasyon avek bann dimoun. Akoz dan lepase petet nou fer bokou progranm dan lekol me rezilta sa rapor i montre ki sa bann progranm son lenpak i minim.

Alor nou bezwen rod lezot fason pour nou angaz avek dimoun e pour pran pwen ki Onorab Prea in fer sorti osi. Se ki sak dimoun ki sey drog i osi  sey anmenn en lot dimoun avek li. E, e alor nou, nou bezwen rod en lot fason pour nou counteract sa pou nou travay avek bann dimoun ki a risk e fer sir lekontrer ki sak dimoun ki pran en desizyon pour li viv en lavi an bonn sante an sen, e dan en lavi sen se li ki anmenn dimoun avek li. E se pa bann dimoun ki pe al dan bann move direksyon. Mersi Mr Speaker e Mersi pour ou tolerans.

 

MR SPEAKER

Mon krwar nou a pran ankor 2 Onorab ala fwa e ankor time waits for no man. I pros midi, fer sir ki zot fer zot sizesyon pa fer gran komanter plito sizesyon pou ed nou tou lasante Lasanble Sesel pou move forward. Onorab Sophola, epi Onorab Valmont.

 

HON NOLINE SOPHOLA

Mersi Mr Speaker, bonzour Minis ek ou lekip, tou Manm Onorab, e tou dimoun a lekout. Mr Speaker, Minis ek son lekip pe fer en bon travay mon acknowledge sa. I en bon linisyativ sa semen ki zot pe pran. I montre ki zot konsernen avek lasante nou zenn e osi ofe lasante tou popilasyon.

Mon napa kestyon me plito mon pour elabor lo de pwen pour plis refleksyon. Enn parmi sa bann rekomandasyon ki’n dir se devlop lentervansyon pour adres bullying ek vyolans dan lekol. Lannen pase lanmenm la dan sa Lasanble nou ti debat lo bullying. E sa zis en sel kou kot ou ti pase ou ti tann bullying. Ou zis petet by mistake ou’n tap ek en dimoun ou dir ou pe bully mwan. Sa ti’n ale e ou ti santi ki petet i ti annan en lenpak. Me pour mwan ki’n arive avek? In napa swivi, in mor lanmenm, nou arete. E se sa ki Minis taler in dir, ti napa lenpak lo bann keksoz ki’n fer avan. Ou petet lenpak ti minim.                             Par egzanp, dan lekol ti annan  councelor. E sa ler mwan mon ti dan lekol ti annan lenpak lo lezot kanmarad akoz i pli fasil pour en zanfan enfliyans en zanfan rather ki en adilt. E oli, ki’n arive avek? Napa. Tousala nou’n komanse. Zenn ki pe servi lalkol, i pa nouvo parey Minis in dir. Sa osi dan lekol ti ganny tackle. Ki’n arive avek? E ankor mon retournen napa swivi.                    E en keksoz ki nou ti pe fer tre byen set entrodwir en valer tou le mwan dan lekol, dan lasosyete. Ler sa le mwan i fini, ou a dire ki sa paz liv i vire, sa valer osi i toufe. Napa nanryen ki nou fer avek. Kan en valer i devret pe ale, nou viv ek li toulezour. E sa osi mon pour servi ankor sa term – napa swivi.

Mon lot keksoz se ki mon konsernen avek healthy eating. Parfwa nou bezwen regard en keksoz lo de kote. Lekol i fer son bout. E mwan mon oule poz en kestyon  – oli rol paran? Si paran menm ki prepar sa pti bwat, i anmenn tou sa bann unhealthy food ladan pour son zanfan. Nou ki pe sey enplimant sa ki nou rol?                  E la lo la mon dir ki nou bezwen fer swivi tre, tre rapid lo la. E osi ler nou regard lasosyete, nou get otour nou – parfwa sa paran in anmenn en keksoz ki unhealthy. Akoz chips lokal bannann ek friyapen i vann pli ser ki chips enporte. Be sa osi nou bezwen revwar. Nou pa pou kapab kontinyen. Friyapen nou pa aroze, bannann nou pa aroze; we don’t take care these plants. Be akoz i pli ser. Sa osi nou bezwen revwar.

Nou pa pour kapab kontinyen. Mon krwar ki nou bezwen annan en Polisi kot nou fer paran vin azour avek laktyalite avek sa ki nou pe demann zot, vin – konmsi vin part and parcel dan sa ki nou pe fer.  Pa lekol i la, paran i debout an deor baro, i gete ki pe pase konmsi i pe get match foutbol. In ler pour nou anmenn paran on board, e pour nou kapab fer sa mou bezwen annan en Polisi an fors.

Nou bezwen annan Lalwa ki nou etablir. Annou nou tou ki la nou vwayaze, e ler nou vwayaze nou pa zis al fer shopping. Nou tou nou al met nennen dan en morso keksoz ki konsern nou. E mwan souvandfwa ler mon vwayaze landrwa enportan kot mon ale se kot i annan en lekol. Mon al regarde ki pe pase anndan. E laba dan bann plizyer lekol, i annan lalwa ki fors paran, ki obliz paran. E nou, nou napa. Zis nou dir paran ou bezwen fer sa. Si paran pa fer ki son lakonsekans, nou napa. E mwan mon dir ankor, fodre nou met Polisi. E si Polisi I an fors, paran pou pran zot responsabilite. Mr Speaker mon pa pou fer long mwan, parey ou’n dir. Mr Speaker mon krwar ki nou bezwen revwar Polisi enportasyon. Mon konnen ki nou annan en marse lib, me nou ki nou fer dan sa direksyon. Nou pa kapab met marse lib en kote, me nou Selman nou pe dir lot kote. Si nou anvi arrive nou tou nou bezwen travay ansanm. Regarde ki zot anmennen dan pei. Si zenn pa war sa bann unhealthy food, unhealthy drinks zot pa pou ganny tante. Adam e Eve ti ganny tante, akoz zot ti vwar sa fri. Annou pa les nou zanfan parey redwir, redwir sa bann keksoz. Mon krwar nou bezwen adopte en holistic approach. Anmenn tou dimoun onboard, pa les person deor. E si nou fer sa mon krwar nou pou kapab sirmont sa defi. E pwen pli enportan ladan se swivi i tre enportan. Si nou fer keksoz napa swivi nou pou fail. Ki mannyer nou pou fer, sa nou ava vwar pli tar. Me selman pou le moman mon dir swivi I bezwen annan. E annou lans en demars tre vit pou sa bon linisyativ ki Minis Lasante in konmanse. Mersi Mr Speaker.

MR SPEAKER

Mersi Hon Sophola. Hon Valmont sey gard li within 4 minit parey Hon Sophola in fer.

 

HON JUDE VALMONT

Mersi Mr Speaker, e bonzour tou Manm koleg Onorab. Bonzour Minis e ou delegasyon, e tou manm piblik ki a lekout. Mwan mon apresye Minis in vin devan avek sa rapor. Mon koman en zenn fransman i tous mwan. Bon i fer mwan rapel mon letan lekol. Ou konnen, mwan mon pou dir zot laverite, petet mwan osi lavi ki mon viv koman en zenn i fer mon reflesir lo demen. Petet vre en letan ti annan, ti annan… en ponm nou ti swazir petet nou ti a pran en  gato bannann avek son lasos disik ou konpran. Me selman i fer mon realize sa rapor i fer vwar ki leta lasante nou Nasyon i pe degrade. E sa parey Minis in dir mwan osi mon, mon rekonnet. I pa regardless of Gouvernman ki la pou 40an oubyen non. Mon krwar sa i form par levolisyon. Limanite mon krwar i dan limanite pou fer keksoz, si ou vwar ou thrive dan keksoz ki fer nou ditor. Anou get 4 keksoz senpleman Mr Speaker, drog, zarm, lalkol avek sigaret. Bann, sa bann lendistri ki fer bokou larzan sa, en kantite larzan. Me selman mon, ganny mwan kler pep Seselwa, Mr Speaker e Minis mon pa pe al dan en laliny ki mon pe al siport ni lalkol, ni sigaret me selman mon pe fer en lopinyon, sa i mon lopinyon personnel. E parey zot, bokou zot, zot konnen sel mon krwar lakonpannyen ki fer sigaret isi i trouve dan Pointe Larue. Mon angaz mon dan konversasyon avek sa lakonpannyen, e en keksoz mon fer remark – ou konnen sa lakonpannyen la aparaman son CSR taks i pa kapab ganny zere li. Mon krwar 2006 oubyen 2009 WHO ti dir en keksoz, be mwan mon anvi prezant en largiman inovatif. Onorab Arrisol in fer resorti ki ou bezwen fer parey bann program dan lekol, nitritif bann keksoz koumsa. Onorab Afif in koz en pe lo sport, Mr Deputy Speaker osi. Minis mon ti a voudre koz lo CSR dan sa ka. Akoz nou pa konsider ban lakonpannyen parey lalkol avek sigaret dan plas ogmant taks. Akoz zot bizness zot osi, zot pe rod zot lavi zot osi. Alor dan plas ogmant taks  akoz nou pa, nou pa get zot CSR. Vir zot CSR ver bann progranm ki pou ed sosyete, ki pou give back. Tretman kanser, akoz nou pa vir zot CSR taks ver tretman kanser. Sigaret pa nou fimen nou ganny kanser annou anvoy lo la ? En lot keksoz ankor lalkol ki mannyer ki mannyer nou viz CSR taks lo lalkol. I annan fason senp, detox. Nou konnen i annan progranm detox pou lalkol osi. Petet nou pran sa larzan nou anvoy laba. Nou paran, nou frer, nou zanmi ki dan lalkol i ava annan lespwar ki kekfwa i a sorti. E se sa bann lakonpannyen egzakteman sigaret avek lalkol ki pe fer sa. Minis mon pou zis azoute avan mon terminen Mr Speaker. Nou kapab osi viz CSR lo bann aktivite rekreasyonnel. Nou Seselwa si ou gete nou annan en kiltir dezormen mon poudir sa me Seselwa i annan en kiltir bwar, en kiltir lalkol akoz ? Probableman akoz nou napa, petet nou napa mon pa pran mwan an mal. Petet nou napa bokou keksoz ankor pou fer. Ler i dir ou 6er diswar anvil i frenmen, tou keksoz i frenmen tou dimoun i dan lakour. Be ki ou fer ou sorti, ou sorti ou al tou dimoun i konnen ou al Ste Anne ou asize avek bwar ou bwar. Si nou ti annan aktivite rekreasyonnel ou ti annan keksoz pou ou fer petet nou, nou ti a met lalkol de kote en kou. Mon pran legzanp lo Lasin. Mwan, mon’n fer en pe letan laba, mon vwar aswar ler i dir ou 9er diswar tou pti kominote. Court i alimen, ou vwar ou vwar en tantin oubyen tonton in vini avek son pti boom box i met sa on, i pran i i fer kour danse be nou kapab fer sa kiltir relman. Kanmtole, moutya tousala nou kapab nou kapab fer i pa pran bokou. Petet en pe lankourazman wi alor nou kapab viz sa bann larzan ver sa osi. E osi sport nou’n tande e mwan mon anmenn en largiman e mon pou kontinyen anmennen mon dir CSR mon santi ki CSR lakonpannyen alkolik  merit pran son responsabilite atraver zot CSR taks pou ed  sa bann lekip sportif. Definitivman Gouvernman pa kapab pran tou responsabilite be selman sport, sport se sa ou fer pou ed sa… ou konnen en legzanp se at least ou pe invest en pe larzan ou pe met li dan en klib sportif. Vo byen dan detrwa klib ki pou pran sa 1erdtan 2erdtan ki ou ti pou asize anba pye kalis Pointe Larue pe bwar ‘pti zonn’ omwen ou al dan sport ou pe fer en keksoz fizik ou pe tir ou lespri lo sa bann keksoz. E pou terminen Mr Speaker mon trwazyenm pwen konsernan sa se ki, annou viz en pe sa bann CSR anver ledikasyon. Bann pti adverts, ou konnen dimoun ler ou repet en keksoz twa kat senk fwa evantyelman i pou bezwen tande a en pwen son lavi li. Annou fer bann pti adverts Minister dan Annou servi nou bann transpor piblik annou met plis adverts senp. Nou pa bezwen fer gran lartik en pti cartoon en keksoz koumsa. Annou konsantre lo la. Mon krwar avek sa Mr Speaker mon a terminen e mon krwar mon pwen a ganny byen ekoute par Minis e son lekip. Mersi.

 

MR SPEAKER

Mersi Onorab Minis ou ti a kontan briefly respond to Onorab Spohola, Onorab Valmont avan nou pran de lezot entervenan. Bear in mind i midi mwen 5.

 

MINISTER JEAN-PAUL  ADAM

Mersi Mr Speaker mon ava fer li vit. Premyerman mersi pou sa de Onorab pou zot entervansyon. An se ki konsern follow-up ki en pti pe pwen ki Onorab Sophola in fer mon krwar i en pwen ki valab. Dapre mon konesans tou le de progranm ki’n mansyonnen sa enn kont bullying apre bann valer dan lekol. Tou le de kestyon i annan en swivi ki pe ganny fer par sa bann Minister. Me ankor mon vin, nou aksepte petet ki i bezwen ganny fer dan en fason pli aprofondi me lezot  lot eleman ki mon bezwen mon krwar zis bezwen konsyan se larealite lemonn ki nou ladan ozordi, i annan en kantite, i annan en  kantite diferan mesaz pe pase par egzanp dan social media dan bann diferan medya. Lespas i limite e souvandfwa nou vwar par egzanp bann bon konmansman dan bann kanpanny, me apre i ganny pa  neseserman sa kanpanny in arete li, me i annan en lot keksoz ki’n vin parey nou dir trending ki’n vin limero enn dan en pti pe lo sa ki dimoun pe regarde. Pou sa  nou bezwen kontinyelman inovatif e pou pran en pti pe ki Onorab Valmont in dir nou bezwen rod diferan fason pou nou kominike pa zis en sel fason pa zis met lo televizyon, oubyen dan nasyon oubyen dan zournal me servi medya sosyal, servi bann lezot metod. Apre sa pwen mwan mon personnelman mon toutafe dakor se regard Polisi enportasyon si nou kapab pran en lapros pou redwir en pti pe eleman negativ sorti aletranze. Rapidman osi mon krwar Onorab Valmont in fer tre enportan e mon apresye in servi son legzanp personnel akoz letan nou regard sa rapor i difisil fer sa bann swa. I difisil.  Nou bezwen konpran, met nou lekor dan soulye sa bann zenn. Letan ou annan par egzanp petet menm mete dan lekol nou reisir konpletman tir bann swa negativ ; me letan ou sorti dan lanvironnman en lekol ou kapab zis deor ou kapab annan en dimoun pe espere pe vann ou en keksoz ki i annan bokou disik e ki atiran. E nou konpran sa zenn i zenn nou bezwen fer li konsyan sak swa ki i pe fer. E osi nou pa pe dir li pa zanmen manz gato bannann oubyen samousa, me nou bezwen pe dir manz li an moderasyon kot i kapab. E si i pe fer bokou legzersis, si i pe viv en lavi ki byen balanse sa i fezab. Me ozordi nou bezwen realize ki napa sa konsyans sifizaman, apre dezyenmman napa ase kontrol petet lo lafason ki sa bann keksoz i ganny vann dan sa bann lanvironnman kot sa bann dimoun i sitye toulezour. E pwen lo CSR lo bann konpannyen lalkol avek sigaret nou, nou pran not sa. Annefe sa mon konnen enn bann konsern ki nou annan Sesel se ki, akoz miltiplikasyon sa bann avertisman e pa tou ki sorti isi. Si ou al lo rezo sosyal ou pou vwar bann avertisman pou diferan par egzanp  labyer enporte ki lye avek bann konpetisyon foutbol bann sanpyonna e tousala nou napa kontrol lo la. E menm si nou ti anvi takse zot ki mannyer nou pou takse zot ? E sa i annan en lenpak alor ki mannyer nou pou revwar sa eleman CSR me nou bezwen fer sir nou pou diskit sa en pti pe avek Finans pou nou ganny en solisyon me nou bezwen fer sir ki sa solisyon ki nou pou gannyen atraver CSR i pa vin en promosyon davantaz pou lalkol oubyen sigaret. Apre mon agree 100 poursan lo sa lide pou nou fer plis aktivite dan distrik e pa zis sport kanmtole moutya, annou fer viv nou kiltir i en fason pou nou viv byen. Mersi.

 

 

MR SPEAKER

Nou a pran ankor 2, Onorab Adelaide avek Woodcock. Onorab Adelaide avek Woodcock gard li kourt. Onorab Adelaide.

 

HON FRANCOIS  ADELAIDE

Mersi Mr Speaker. Bonzour zot tou. Anyway mon pa pou al tro long lo Minis mon annan petet en pti kestyon. Eski petet dan Departman Lasante zot annan bann agent ki al kot sa bann lekol, ki al vizit sa bann tuck shop e petet gete ? Akoz ou konnen nou tou nou pe fer biznes, parler nou ganny tante pou amenn en pti keksoz en pe pli bon marse pli dou nou vann me nou pa  konnen ki pase. Apre mon dezyenm pti kestyon i mon kontan ler u nonm sa kote labi seksyel selman mon ti a kontan petet konnen ki nivo incest i antre ladan. Akoz mon okouran poudir i annan bokou bann paran ki zot pa la kot lakour me ou trouve ki zot zanfan pe ganny abize san ki zot konnen e nou annan en gran zafer incest ladan. Apre mon lot pti konsern lo kote Onorab Valmont mon ti a kontan petet ou konsidere akoz zis parey Baie Lazare tou dernyerman nou ti napa ditou sport e ler mon vini nou’n seye e i pe bouze. Be mon annan en lakonpannyen ki’n apros mwan, ki annan en Casino Baie Lazare zot anvi fer en pti keksoz pou nou Playground. Me selman anba FSA zot pa kapab donn en pti larzan, so tousala mon krwar ti a bon ki nou get ladan. Anyway parey mon dir ou mon pa pou long me sa de pti kontribisyon mon aret lanmenm. Mersi.

 

MR SPEAKER

Mersi. Onorab Woodcock.

 

HON WAVEL WOODCOCK

Mersi Mr Speaker. Nou ariv midi. Bonn apre midi Minis, koleg Onorab avek tou dimoun dan lakour. Mon annan zis trwa pti pwen sizesyon pou mon met devan mon pou ase bref. Minis mon mazinen ou Minister i pe network avek bann lezot Minister tel ki Gouvernman lokal, ledikasyon, lazenes e menm spor, pou tou solisyon pou sa bann problenm ki nou bann zenn pe fer fas avek e sirtou ou Minister. I mean i alarman ki 10 poursan zenn ant 13an a 15an pe servi kanabis e 10 poursan osi pe servi bann lezot hard drugs parey eroin e kanabis. E osi mon krwar mon ganny sa fact sa stats byen 40 poursan zenn ant 13an a 15an i aktif seksyelman e ladan 50 poursan zot pa pe servi contraceptives. E i en konsern in ganny lev-e parmi bann plizyer Onorab ki la se ki enn bann sitasyon ki nou annan se ki nou napa ase ankadraz pou bann zenn dan distrik. E en konsern ki mon’n deza souleve dan lepase se sirtou konsernan bann Youth Workers dan distrik. Kekfwa sa en sizesyon ki mon pe fer mon pe mazinen bann youth workers i bezwen plis empowerment. En lot sizesyon ki mon pe fer se ki sa en konsern ki plizyer Youth Workers i anmenn kot mwan se ki alokasyon Bidze ou larzan ki zot pe gannyen pou fer bann aktivite dan distrik i tro ba. Mon krwar mon pa konnen si zot in ogmante apre nou dernyen diskisyon mon krwar dan deba Bidze ti R1000 tou le mwan ki zot ti pe gannyen bann  Youth Worker dan distrik pou fer bann pti aktivite. Mon krwar sa i en keksoz ki kekfwa Minister i kapab get ladan Minis pou lazenes ouswa local Government  kapab get ladan pou increase sa lokasyon ki zot donn bann Youth Worker dan distrik pou fer aktivite. Akoz i  vre napa ase aktivite pou bann zenn  me bann Youth Worker i more or less, zot target zot bann peers zot bann dimoun ki zenn e zot konpran bann needs bann keksoz ki bann zenn pe fer fas avek. En lot keksoz ki ou’n fer resorti se ki 17 poursan bann zenn dan sa letid 13 a 15an pe soufer avek labi seksyel. Sa i vreman, vreman alarman. Me selman mon travay avek plizyer bann NGO dan lepase avek bann lorganizasyon i annan en keksoz ki zot fer si ou pe vin travay pou sa lorganizasyon ou bezwen go for what we call sexual abuse prevention training. E mon pa konnen si bann teachers osi go for such training me selman mon pe ankouraze ki tou bann departman or menm Governman oswa menm lekol or whatever lazenes bann Youth Worker they must go. Zot bezwen fer sa pas dan en tel training e kekfwa nou kapab amenn li lo en larger scope. Kot nou kapab fer kekfwa Minister Ledikasyon i kapab organiz bann tel training dan lekol pou bann zanfan ; e menm pou bann paran i kapab vini zot al atraver sa training. Kot zot aprann bann plizyer keksoz ou aprann ladan. Ki mannyer ou kapab detekte si en zanfan in ganny abize ouswa bann prevansyon bann ki ou kapab pran ouswa bann, ki mannyer ou kapab detekte bann at risk area bann dark colours bann sityasyon ki kapab arive kot en zanfan i kapab ganny abize. Mon krwar kekfwa sa i bann keksoz nou kapab konsidere pou le fitir pou fer pou bann paran e osi pou bann dimoun ki travay avek zanfan e menm pou bann teachers dan lekol. Let us be realistic, mon travay dan lekol dan plizyer bann bann avek bann NGOs in annan bann konsern ki menm bann etidyan e menm bann teachers dan lepase in abiz bann zanfan dan lekol. E sa i en lefe reel e mon krwar poudir i enportan pou annan bann tel training pou bann dimoun ki travay avek zanfan e menm pou bann paran dan distrik. Nou extend en lenvitasyon pou zot vin en kou pou fer sa bann kalite training. En lot keksoz ki ou’n fer sorti se 50, poursantaz bullying i 50 poursan dan lekol e sa i osi Onorab Gill ti anmenn en mosyon lo la e mwan mon ti segonn sa Mosyon mon rapel me selman parey Onorab Sophola in dir se ki napa ase follow-up. Nou pan vreman tande ki bann desizyon ouswa ki bann program ouswa ki bann plan stratezi ki zot in pran pou deal avek sa sityasyon. Akoz nou konnen poudir a lon term pou sa bann zenn dan le fitir zot devlop bann problenm psikolozi ki afekte zot dan zot adulthood. E en keksoz ki ti ganny souleve dan sa Mosyon se ki nou napa en sant, nou napa en sant, en Juvenile Centre pou ankadre bann bullies. E menm dan lekol napa sa bann progranm pou ankadre sa bann manrmay tou kou nou rod pou deal avek viktim me nou pa pe vreman fer bann keksoz pou ankadre sa bann bullies manrmay ki pe bully bann lezot manrmay dan lekol. E sa mon kwar i en kestyon ase serye ki en Juvenile Centre i enportan pa zis enn pou Mahe. Kekfwa enn pou Mahe e pou enn osi pou Inner Islands sa en keksoz kekfwa ou Minister i kapab konsidere konman en priyorite pou le fitir. Mersi Mr Speaker.

 

MR SPEAKER

Mersi Onorab Woodcock. Minis eski ou annan okenn obzeksyon si nou ale ziska 12.30pm ?

Akoz i ankor annan 5 dimoun pou koze. Mon ti a kontan zot koz, zot entervansyon very briefly apre ou a fer en sel round-up. Is that ok avek ou ?

 

MINISTER JEAN-PAUL ADAM

Napa problenm Mr Speaker.

 

MR SPEAKER

Ou pa pe pran avyon 1er ?

 

MINISTER JEAN-PAUL ADAM

Non i ok.

 

MR SPEAKER

Very good. Onorab Ernesta avek Onorab De Letourdie sey gard li kourt silvouple.

 

HON PAUL ERNESTA

Mersi Mr Speaker. Bonn apre midi Minis avek delegasyon, tou bann koleg Onorab e tou dimoun a lekout. Wi Mr Speaker mon a sey maximum pou gard li kourt pou nou kapab fini. Mon osi parey sa rapor ki’n ganny met devan nou mon osi mon vreman konsernen akoz sa nou pe koz nou zenerasyon demen. E i konmans ozordi, e dan sa rapor letan in ganny prezante bokou kestyon ki’n ganny sorti dan sa 10 domenn akoz? Akoz? Akoz? E ou menm ou’n dir ki bann rapor in ganny prezante baze lo bann survey depi 2002, 2007 avek tou bann lazans konsernen me olye nou vwar en amelyorasyon me nou plito vwar keksoz i deteryore. Keksoz ki mon kapab vwar ki ou menm ou’n fer resorti ki annan en pti improvement dan konsomasyon sigaret. This is the success story kot mon krwar i enportan nou sey vwar kwa ki’n anmenn sa amelyorasyon ki nou kapab servi li dan lezot fakter. E nou osi koz lo bann stratezi pou improve sa sityasyon mon mazinen sa proposed strategy in ganny fer lo nivo lasante e osi lo nivo ledikasyon petet. Mon mazinen i enportan akoz sa 10 domenn i pa restrikte zis pou lasante e osi pou ledikasyon. I enportan ki in ganny tou bann fakter tou bann lazans involve. Ozordi  nou annan en Minister Lafanmir li osi i pou bezwen en rol kle pou zwe petet dan next survey keksoz a kapab amelyore. Nou annan lazenes ki’n ganny koz lo la i osi i en lorganizasyon ki nou kapab servi li. E mwan mon en pti pe konsernen en pti pe lo sa propozisyon pou increase taks, taks lo lalkol e sigaret. Wi mon a dakor nou rekonnet ki increase lo taks i ede amenn rediksyon dan konsonmasyon. Bann goods – bann depans e osi en lot lavantaz ki i annan i anmenn en income dan lekonomi. Mwan mon pou demande si zanmen Minister in deza fer okenn survey lo kote konsonmasyon lalkol e sigaret. Akoz nou konnen mantalite behaviour nou bann dimoun lokal ki mannyer zot behave towards konsonmasyon lalkol ek sigaret. Eski i annan okenn resers ki’n ganny fer pou prouve si logmantasyon taks i pe anmenn vreman en rediksyon dan konsonmasyon sa de goods. E sa i ekstrememan enportan pou nou kapab konnen si i efektiv or not. Si nou kapab dan process anmenn lezot mezir ki kapab siport sa logmantasyon ki si zanmen zot pe mazin lo taks. Akoz nou konnen Sesel largiman ki i annan ou kapab monte labyer fer monte sigaret par R5 par R10 Seselwa pou aste e sa i anmenn en lot lefe lo lezot komodite ki dimoun zot pou plito pran priyorite. Aste son sigaret aste son labyer me sa dipen pou son zanfan i pa pou aste. Mon krwar sa i annan en largiman kot nou bezwen ekstrememan etablir enportan ki nou etablir pou vreman konnen si sa i anmenn en lefe pozitiv dan konsonmasyon. Apre Minis petet en propozisyon mon pou demande parey Onorab Valmont in demande, li in koz lo CSR. Petet lo sa ogmantasyon ki zot pou mete lo taks nou’n koz lo obesite konsonmasyon bann goods i mean dan lekol nou bann diet. Why not sa pti logmantasyon ki nou pou mete transfer li lo sa par egzanp kot lekol ki annan sa bann zanfan ki vilnerab  ozordi nou konnen petet an mwayen pe met R10 lo latet sak zanfan dan lekol pou zot ganny zot pti goute 10er ; petet avek en increase dan zot Bidze i kapab fer zot ganny en pli bon diet akoz ozordi nou a dakor en ponm en zoranz pou zot ganny en healthy eating is not that cheap. I bezwen met serten plis larzan lo la. So Minis an gro, mon met sa de propozisyon pou ki nou kapab sey vwar ansanm ki mannyer nou kapab ede anmenn sa improvement dan lifesyle nou bann dimoun, akoz ozordi nou a dakor avek evolisyon avek sanzman ki’n arive dan sosyete dan pei sa 20an pase ozordi e nou’n vwar ozordi tou sa bann lefe nou pe anmase ozordi.  So ansanm nou bezwen travay pou vwar ki mannyer nou kapab nou kapab ed piblik pou demen. Mersi Mr Speaker.

 

MR SPEAKER

Onorab De Letourdie. Apre Minis pou reste zis 2 dernyen  apre  ou a round-up.

 

HON JANY DE LETOURDIE 

Mersi       Mr Speaker.  Bonzour tou dimoun.  Mr Speaker sa raport ki Minis in donnen  mon krwar nou tou nou devret santi nou konsernen avek akoz apre tou se enn nou etidyan  e nou fitir zenerasyon ki an zwe – mon mazinen mwan osi e mon kontribisyon ki mon fer kekfwa ki mon’n fer  pou ede  fer sa ariv koumsa.   E la ozordi mon ti a kontan lans  en lapel pou tou bann paran akoz apre tou avan-ler nou zanfan i sorti i al kot lekol i sorti dan lakour avan e petet nou pe regarde, tou sa bann sif  la ki Minis in donnen kekfwa i annan en kantite keksoz ki ladan ki  nou ti’n kapab  ede pou redwir.  Zis mazinen si pa ti a bon  nou pe dir 50poursan nou bann etidyan  pe fer en progre par rapor avek son letid dan lespas 30 zour?  Minis mon  kontribisyon i al pou konsonmasyon lalkol plito.   Moon pe mazinen akoz ki fodre  nou display bann kantite lalkol dernyen kontwar bann magazen?  Petet sa osi i vin en fason lavertisman akoz ler nou zanfan i vini, nou vwar tou sa kantite lalkol nou kapab ganny atrakte.  Apre mon lot mon pe dir si pa ti en bon nide petet pou restrikte  vann lalkol avek bann liquor stores – si pa ti en bon nide akoz parey nou konnen bann liquor stores parey mon pou sit enn de parey nou konnen i annan Kumar & Kumar Shopping Centre   Mohan, nou konnen i annan  Krishnamart e sa, sa bann dimoun zot, sa bann marsan zot a vann zis bann lalkol sa ki nou dir Spirit. Apre nou konnen osi  poudir I annan bann ptipti stores ki zot, zot vann zis divin, labyer, gines.  La pou le moman ki nou pe vwar Minis, se ki lakantite laboutik ki pli ale  i pe ganny license pou vann lalkol e ler ou a pe gete, ou a krwar ki bann marsan i pe abiz lo nou Seselwa akoz zot pe vreman konsider nou koman en Nasyon ki vreman alkolik.  E vwala, sa mon kontribisyon.  Mersi.

 

MR SPEAKER

Mersi Onorab De Letourdie.  Onorab finalman Onorab Loizeau e Onorab Basil Hoareau.

 

HON BASIL HOAREAU

Bonn apre midi Minis ek ou delegasyon e   bonn apre midi tou dimoun.  Mr Speaker, mon komanse par dir si  nou annan nou en zenerasyon zenn ki an bonn sante, i vedir ki demen nou pei pou annan bann Leaders ek en workforce an bonn sante.  E sa i vedir ki letan ou annan ou en workforce ki an bonn sante, nou pou annan bann dimoun ki kapab fer bouze nou pei e an menm tan pou napa bann burden lo kote lasante lo nou pei.  E sa i pou vedir ki nou annan larzan pou nou kontribye  dan devlopman nou pei.  Alors i enportan – i enportan ki nou instil dan nou bann zenn en lifestyle ki an bonn sante pou asire ki nou pei i annan en lavenir ki briyan.  E letan mon get statistics ki’n ganny anmennen  devan nou par Minis nou vwar wi i annan en decrease dan bann zenn ant 13an a 15an ki pe servi sigaret – in desann pou ariv 15poursan e  letan mon’n fer en pe konparezon avek bann lezot pei – mon vwar par egzanp Indonesie  – an 2014  ti fer menm legzersis ki nou’n fer la an 2015 ki nou pe koz lo sa rapor ozordi li i dan menm kategori zenn – i ti annan li 19.4 poursan zenn ki ti pe servi sigaret.  E an Langleter li i pa’n fer en rapor parey pou nou, me I ti fer en statistik  on ‘Smoking’ An 2016 e li dan sa kategori zenn ki pe koze 13 a 15an li i annan li18 poursan ki pe servi.  Savedir si ou gete sa Global – sa Action  15 poursan  i reste en a global trend ki nou pe vwar. E  i vedir ki i annan ankor louvraz pou nou fer, pou nou nobou fer desann sa.   I annan 2 keksoz ki ou kapab fer Mr Speaker, i annan Lalwa me letan ou’n fer Lalwa i annan osi sa bout lenplimantasyon Lalwa.  Nou’n fer  Lalwa deza ki dir ki nou pa kapab vann sigaret ek manrmay – ek dimoun ki anba 18an.  Me eski i pe ganny enplimante? I pe ganny respekte?  E mwan mon pou dir Mr Speaker poudir sa i bann lalwa ki menm Lotorite  i konsider li koman miner.  En zofisye Lapolis probableman par-ler i ferm son lizye lo en sityasyon koumsa.  E nou‘n dir nou annan Lalwa ki nou’n fer resaman kot nou’n restrikte landrwa ki kapab fimen; dan transpor; dan bann landrwa ki anfermen ek piblik.  Me eski sa pe ganny respekte?   Me eski sa pe ganny respekte?  I  pa pe ganny respekte? So  ou kapab annan Lalwa me ou bezwen osi  konsyantiz dimoun pou respekte sa bann Lalwa e  lotorite i bezwen pran son responsabilite pou fer sir ki sa bann Lalwa  pe ganny respekte Mr Speaker.  E nou annan osi  – e annefe ki letan nou pe koz lo la sigaret i annan pei  e sa in ganny  proven dapre bann rapor ki mon’n lir ki zot in fer  en Lalwa kot ou pa kapab vann sigaret  ek en dimoun ki anba 21an.  E sa in ganny proven  pou dir in ede pou redwir kantite dimoun e menm zenn ki servi drog parske in fer monte sa laz dimoun ki ou kapab vann sigaret avek.  E petet menm si nou age of emancipation se 18an, petet nou devret konsider osi sa.  Sa i en  proposal ki nou kapab konsidere.  E lot eleman se edik nou bann zanfan – ledikasyon.  Mon pa krwar mwan si poudir nou annan Lalwa – mon pa krwar nou pou kapab substitute okenn keksoz  pou ledikasyon.  Se lanfaz i ganny mete dan lekol, dan lafanmir.  E la petet Minister Lasante ansanm avek nouvo Minis pour Lafanmir i devret zwenn ansanm e travay ansanm dan menm direksyon avek lafanmir akoz tou keksoz i komans dan lakour.  E mon krwar si lafanmir i annan en bon fondasyon lafanmir i ganny endike lo sigaret lo labi lalkol, sa i pou ede pou bann travay bann ansenyan ouswa bann dirizan dan lekol e Minister Lasante osi  pli fasil parski  nou pou deza inculcate dan nou zanfan sa nesesite pou pa servi lalkol; pa servi sigaret Mr Speaker.     Mr Speaker i annan en lot trend ki pe vini e letan mon get lo mon rapor i annan e -cigarette ki li osi in komans en trend e annefe in montre Langleter poudir bann zanfan ki pe teste sigaret, i annan plis ki’n teste ecigarette ki sigaret normal.  Sa osi nou bezwen pe adrese nou bezwen pe ganny met antet Mr Speaker.  Lo kote pricing Onorab Prea in koz lo aste lo en single unit.  Annefe  dan mon resers mon’n vwar poudir Langleter in anmenn en lalwa kot ou pa annan drwa dan en pake sigaret ou pa annan drwa annan mwens ki 10 sigaret.  Ankor pe fer ki plis i annan plis sigaret dan en bwat plis i vin pli ser  e otomatikman i pa met sa a laporte bann zanfan ki  13 a 15an.  Petet sa i bann propozisyon ki nou devret pe met kalkile e met antet e pran bann legzanp ek bann lezot pei.  Lo kote obesite, mon konnen zot pa pou oule krwar letan zot get mwan la, me mon rapel letan mon ti lekol  – letan mon ti lekol, spor letan i dir ou 11.35 i sonnen pou sa lunch break ni manze nou pa pe mazinen; foutbol pe al ganny zwe ouswa volleyball pe la ganny zwe.  Sa ti en kiltir dan li menm.  Sete 10er letan 10er – 10.15 nou al zwe foutbol. Ti en kiltir spor sa e tou manrmay ti vini ti partisipe.  Me konmela sa in ganny sanze. Olye fer outdoor activities nou  vwar zenn en IPad – ek telefonn pli to bann couch potatoes parey nou dir.  I en latitid ki’n sanze  – ki mon krwar nou devret pe  petet remet lanfaz lo la pour ki sa tandans  – tandans spor i reste dan nou zenn.  Parski mwan osi letan  – mon ti  kontan spor ler ou’n fini mon ti al zwe dan en tim foutbol  dan mon distrik sa letan – Grand Anse Praslin e mwan parey Onorab Prea in dir mon rapel dan mon letan,  ti annan 3 tim foutbol dan tim Grand Anse Praslin, selman e  spor ti en keksoz ki en keksoz ki tou zenn ti pe fer e ou bann group zanmi ki ou frekante pe fer sa e tou dimoun ti pe fer sa.  E malerezman poudir sa konmela i nepli le ka.  E ankor mon krwar i pou en legzersis re sansibiliz nou bann zenn.  E Mr Speaker mon pou terminen mon pou kourt – mon pou dir poudir  i enportan – petet nou pe pran li  nou kapab  zis pe  get li ozordi, me i enportan parske se lavenir nou pei ki nou pe koz lo la.  Mersi Mr Speaker.

 

MR SPEAKER

Mersi Onorab Hoareau.  Onorab Loizeau.  Fer li kourt.

 

HON NORBERT LOIZEAU

Mersi Mr Speaker.  Bonzour tou dimoun.  Mr Speaker mon lentervansyon pou kourt.  Mon ti annan bokou pwen me solman  mon a fer li kourt.  Me solman parey nou konnen ler ou fer li kourt i pa sorti sitan byen avek dimoun pou nou tay, tay en pe partou; me solman mon a eseye.  Mr Speaker mwan mon lentervansyon ki  plizoumwen bann sizesyon  e petet bann konsern ki petet Minis i kapab pran li onboard.  E pou komanse mon anvi dir ki tou sa bann keksoz ki nou’n koz lo la, la, ledikasyon tou sa bann keksoz i merit komans byen boner dan bann lekol primer e apre nou’n mont avek akoz nou pa kapab ler pye in tord prezan nou oule met en baton avek.  Ou sey  fer li repous drwat.  Ou bezwen  komans li a en tre zenn-az.   E la Mr Speaker, mon pou diriz mon lentervansyon lo kote  lobesite.  Lobesite osi tou i en problenm.   Mwan tou le zour mon kot lekol mwan.   Sel lekol ki mon vizite tou le zour akoz mon annan zanfan laba se lakol Bel Eau.   Mon vwar lobesite i en problenm.  Me solman i annan en keksoz.  Mon vwar lobesite i en problenm.  Me solman in annan en keksoz ki mwan mon pe vwar Mr Speaker ki ozordi annou get en kou otour tou bann lekol sirtou bann lekol lavil.  Ki nou vwar bann pti caravan Fast Food o-bor preski tou lekol Mont Fleuri – Butchers Grill i o-bor lekol segonder e manrmay i sorti la i vin la Plaisance i annan e o-bor tou pti lekol  – tou lekol i annan enn sa pti caravan ki pe vann sa bann Fast Food. E la mwan mon anvi dir ek Minister Lasante vi  ki nou annan bann nitrisyonnis kot minister Lasante e bann license mwan mon panse  ler i ganny donnen Minister Lasante i bezwen vin onboard.  Si nou pou met sa o-bor lekol i pou bezwen annan bann kondisyon ki nou i a vin avek.  E bann nitrisyonnis kot Minister Lasante i ava ed zot diriz zot en pe  lo ki kalite manze ki nou, nou ti a kontan vann la kot lekol akoz Mr Speaker i annan tro bokou Fast Food.  O-bor Lekol Ladans i annan en Fast Food koman manrmay i fini danse, ou  vwar zot pase ek en pti bol chips en sosis en dizef.  I la.  I dan lizye manrmay e manrmay  – manrmay i zot bann endividi ki fasil fer biznes ek zot; i fasil fer biznes drog ek zot akoz zot zanfan.  I fasil.  I fasil ankouraz zot pou manz sa kalite manze (1) akoz zot zanfan.  E     mwan mon krwar sa i en nide ki mon anvi avans devan.  Mr Speaker mon pou sorti en pti kou  vi ki mon letan pa tro soz, nou pou al lo drog ek lalkol.  Ozordi wi I en konsern; ozordi i annan sa problenm manrmay pe fer seks boner.  Laplipar manrmay ki fer seks boner zot end up  fer zanfan boner.  Ozordi tou bann paran bann zenn manman,  ki annan 30an – 32an zot annan en zanfan 18an.  E alors mwan mon vwar sa, zot bwar ek zot zanfan akoz?  Akoz zot zanfan i preski menm laz ek zot.   Zot anmenn petet sa zanfan I annan bann labi ki arive kot lakour.  Sa zanfan 18an son manman i anmenn en boper.  Lala kot Onorab Adelaide ti pe koz lo la taler ler manman petet pe al travay aswar boper I la.  I annan tou bann kalite keksoz.  Alors i annan en ledikasyon total pou nou anmennen pou nou kapab anvlop tou dimoun  ladan akoz sa keksoz i serye Minis en – i serye mon dan distrik mon pe vwar tou lezot  mon pe vwar sa bann keksoz.  I annan e i la o-bor nou.  Mr Speaker lo kote spor.  Mwan mon krwar dan lekol ozordi ECA i nepli fer dan lekol.  Kot manrmay apre lekol ti annan aktivite spor konmela ou pa tro, tro vwar.  Sa ti tir manrmay en pe dan bann move frekantasyon.   Kot lekol Bel Eau en egzanp zot pe Entrodwi Hockey – byen kontan Lasosyasyon Hockey pe entrodwir en keksoz mon pti garson in ale in komanse – la zot in ganny dir pou napa.  Manrmay i back out ler napa nanryen.  Inter house Competition ki  ti fer kot lekol lontan tou dapre lekol ti annan bann aktivite inter house  kot nou ti fer  nou ti kit manrmay  la, nou vini nou fer apre nou al se nou.  Konmela napa.  NSC i sipoze annan en liaison officer ki pe liaise avek lekol pou sak Disiplin mon krwar pou ede anmenn spor kot lekol.  Napa.  Zot asiz dan biro nanryen  pa ganny fer.  Ti annan sa bann pti konpetisyon enter skoler ki ti ganny fer tel Term – si premye Term Volleyball nou ti zwe ek Beau Vallon lot, lot ti annan en final mon pa vwar konmela.  Zis foutbol ki mon vwar konmsi zot pe sey fer en pti keksoz en pe enteresan.  Lo kote  basketball mon pa pe trouve tous a bann keksoz.  Mr Speaker en lot keksoz ankor avan mon al fini dan distrik lot zour nou’n koz lo Youth Worker, vreman  bann la i mank zot mendev.  Mon annan en Youth Worker Sans Sousi, dan sa mwan la i pa’n organiz en konpetisyon. I   Youth Worker Bel Air.  Zis en lamars ziska Port Launay apre  napa nanryen ankor.  Tousala lo nivo distrik i manke e sa bann sport lo kote skoler Mr Speaker se sa ki ti anmenn manrmay ansanm dan distrik.  Ozordi pou fer en lekip sport dan distrik ou bezwen mars partou dan tou sa distrik.  Lontan pou mwan ou fer en tim basketball dan Bel Air zis mon al  la ater dan o-bor semen nou gannyen akoz tou manrmay ti angaze.  Ti annan sa bann aktivite  e ou ti kapab swazir.  Mr Speaker, mon krwar mon pou termin la.  Mon ava  al lot en dernyen pwen – bann Take Away ki provide manze kot lekol – sa mon krwar i en pwen enportan pou nou soz sa.  Zot ganny soz pou provide manze kot lekol ki kalite manze zot provide?  Chips, makaroni ki’n dan sepa ki zafer se tou.  Napa ni en satini frisiter – en pti bouyon blan pou ankouraz manrmay – sa bann manze ki fer ek pwason napa kot lekol.  La ankor kot nou – kot Minister Lasante ek lekol i bezwen angaz zot avek sa bann Take Away ki pe supply lekol manze pou vwar  ki  kalite manze pou anmennen kot lekol ki en fason ki nou kapab ede pou nou kapab koup sa bann zafer obesite  e fer manrmay  manz pli healthy.  Mr Speaker mon pou termin la.  Mon annan en ta koze ki mon anvi koze solman mon a koz sa en lot fwa.  Mersi.

 

MR SPEAKER

Mersi pou ou brevite Onorab Loizeau.  Onorab John Hoareau.  Pou fer en quick intervention avan  nou round-up. 

 

HON JOHN HOAREAU

Mersi Mr Speaker.  Bokou in ganny dir lo sa size ki’n ganny prezante bomaten.  Parey ou konnen i en problenm Nasyonal ki bezwen ki bezwen annan en solisyon Nasyonal alor nou pa bezwen okenn shift-made approach lo sa size.  Me par kont mon ti a kontan anmenn serten refleksyon oubyen serten pwen ki mon  ti a kontan ki Minis Lasante i take on board.  Premyerman lo size lobesite mon ti a kontan ki Minis petet i  osi atraver en Minister get en pe lo kalite manze ki ganny enporte Sesel akoz bokou fwa dan lezot pei  kalite manze ki annan sirtou bann traver hormones ki annan bann growth hormones – bann steroids ladan sa osi i fer ki i annan en pwen valans  dan zanfan ler zot manze pou zot manz bokou plis e sa i en pwen.  2enm pwen mon ti oule met en pti pe lanfaz lo sa size ledikasyon anvi ki lontan ti annan en size ki ti apel Home Economics kot ti ganny montre dan bann lekol  konsep manze li menm – e konsep manze li menm sa ki bon pou manze ti ganny adrese.  Sa konsep home cooking ki mannyer  nou kapab pran en pti keksoz anmenn ek nou pou nou manze – en pti sandwish en keksoz ki balanse e sa nou’n vwar i ti’n preski perdi dan bann lekol.  Ozordi zour  en zanfan in ariv 14an i pa konnen poudir en salad ou  kapab pa fer li avek en dressing – i  krwar poudir en salad ou bezwen zis pran en ta salad cream met ladan.   So sa bann pti keksoz koumsa i devret ganny enkilke, ganny met onboard, ganny met onboard, ganny taken onboard.   I annan sa size labi seksyel ki la ankor ki zot bezwen pran en lapros enter-Minister – Minister Lafanmir/ Minister Ledikasyon e osi paran i devret osi anmenn serten responsabilite ladan ki i al sleep-over detrwa fwa dan en semenn kot son bann zanmi kot ou konnen keksoz i kapab mal marse dan sa nivo koumsa osi.  I annan osi sa size advert ki atrakte bokou zenn  – I trendy I annan bokou  keksoz ki ganny servi ek lanmizik ensidswit pou advert kalite manze e kalite drink ki manrmay i tonm lo la.  Me mwan mon ti ava voudre ki Minis i anmenn en serten Lalwa ki forse ki ler ou fer swa bann advert I donn en ‘disclaimer ki dir konmkwa  ki dir sa manze i annan serten poursantaz disel ladan oubyen I annan serten poursantaz disik ladan ki pa bon oubyen pa konseyab pou servi tro bokou avek bann zenn.  E se sa en pti pe ki mon ti anvi koz lo la. Mersi.

 

MR SPEAKER

Mersi Minis.  Avan mon donn ou laparol ou permet mwan en minit pou fer en sizesyon. E la mon  pa pe koz koman en Speaker mon pe koz koman en Manm Elekte Anse Boileau.

 

 

HON PATRICK PILLAY

Mon krwar letan ou ti komans ou statement an di-z-an ki 80 poursan ou sample survey bann zenn i regard televizyon at least 1erdtan par zour. Bokou bann Manm Onorab ki’n koze in koz lo sansibilizasyon, ledikasyon, peer education, parental education. Mwan mon krwar ki la ki SBC in al digital e ki i annan ekstra channel. Mon okouran ki i annan lakonpannyen prive, en group zenn Seselwa prive ki in apel zot lekor ‘Radius Plus’, zot pe fer bann progranm eksepsyonnel. Mon konnen zot in interview Prezidan, zot in interview loto, zot pe al interview LGB, zot pe fer bann progranm anrisi konnesans popilasyon lo bann levennman bann personnaz dan pei. I ti ava enteresan pou Minister e Gouvernman petet ou Minister atraver Cabinet ankouraz bann dimoun ki annan leksperyans ki’n kite kot SBC oubyen ki annan leksperyans Audio Visual Production pou form en serten lakonpannyen. Nou mansyonn finansman Onorab Valmont in koz lo CSR i annan en lot Onorab in koz lo Children’s Fund. I annan diferan… ou menm ou’n koz lo Small Grants. I annan diferan fason finans li ki ou ava annan ou en channel dedicated pou bann zenn, fer par bann zenn zot menm. Onorab Basil Hoareau in koz lo son letan foutbol Grand Anse, Onorab Grand Anse Praslin Onorab Prea in koz lo son letan volleyball Belombre. Petet i ti  kapab montre zot konman legzanp zot pe zwe volleyball avek foutbol pou enspir bann zenn. Me lide se ler nou pe koz lo tou sa bann topik. Ou annan ou en mwayen kot bann zenn antre zot menm zot evidaman dirize e par en production team ki annan bann progranm ki pou adres tou sa bann keksoz. Akoz i annan en kantite keksoz dan sa Statement ki ou’n dir. Mwan en keksoz ki’n vreman amen mon latansyon e en pti pe fatig mon kot ou’n dir 21 poursan bann etidyan ki’n ganny interview in konsider swisid pandan sa dernyen 12 mwan. Sa i fatig mwan akoz an dernyerman nou tan tro bokou swisid e sirtou bann zenn dimoun petet i devret annan en progranm kree par bann zenn zot menm. Par egzanp dan sa ka spesifik dan sa sample survey ou pou konnen lekel ki’n sey attempt swisid. Petet i annan ki pa pou vin devan petet i annan ki pou vin devan. Kwa ki bann fakter ki’n arive pou vin pros avek touy zot lekor. E atraver counselling oubyen bann ex-teachers dimoun ki’n train Madanm Beryl Young Dodin ensidswit… i kapab vin dir ki ou kapab fer pou anpes ou ariv o-bor sa presipis the brink kot ou santi ou bezwen pann ou lekor. I annan en kantite keksoz nou kapab fer atraver serten progranm e mwan mon krwar personnelman nou pa pe servi medya ase pou edik zenn lo diferan posibilite. Nou koz lo swa manze swa isi swa laba me i annan diferan swa ki ou kapab pran dan lavi ki nou bezwen met zot ansanm e met devan. Alor mwan mon propozisyon konkret, ti ava ankouraz formasyon serten group ki annan sa leksperyans atraver serten konsesyon serten loan serten lankourazman CSR Children’s Fund you name it kot zot kapab prodwir progranm avek SBC petet ansanm avek Minister Lasante zot annan en progranm kot i adres sa bann size pou zenn. Parey Marie Claude D’unienville i adres ‘Alo Dokter’ nou kapab adres ‘Alo bann Zenn,’ esey vwar. Annou koz lo ozordi lo obesite next time nou pou koz lo labi seksyel ki en paran i konmans edik son zanfan depi i annan 4an laba personn pa touse si ou touse vin dir manmi oubyen papi.  Bann keksoz simple practical advice ki evantyelman ou pou santi sa bann dimoun bann zenn parey i ganny dir sa bann zenn zot menm zot demen zot pou vin nou, nou laz ki nou’n arrive zot pli byen prepare ki nou. Alor mon krwar sa i en sizesyon konkret e mon konnen in ariv 12.36pm Minis mon a donn ou 5minit pou ou sey reponn sa kantite kestyon. Me mon konnen poudir ou’n absorb e ebib bokou akoz mon konnen ou annan en pasyon avek en misyon pou sey sanz sityasyon. Laparol i pou ou.

 

MINISTER JEAN-PAUL ADAM

Mersi Mr Speaker e mersi tou bann Manm Onorab akoz mon pou fer en pe vit eskiz mwan si mon pou mank en pwen spesifik, me mon’n fer mon mye pou pran not. E lide se ki nou pe konmans en konversasyon avek bi azir. Alor tou bann, bann lentervansyon nou pou pran kont. Premyerman konsernan bann tuck shop en kestyon lev-e par Onorab Adelaide, wi aktyelman nou dan Minister Lasante nou annan UPCCD ki fer bann vizit kot sa bann tuck shop ensi byen ki Nutrition Unit e osi School Health pou fer bann verifikasyon. E bann verifikasyon i ganny fer dan en fason ase sistematik problenm se ki i annan en kantite keksoz ki arive petet letan nou pa al vizite an deor bann ler. E mon krwar en lot en lot Onorab ti mansyonn sa kestyon par egzanp Take Away dan lekol mon krwar Onorab Loizeau ki ti mansyonn sa me sa i pa en keksoz sanksyonnen par lekol. Nou okouran nou’n dekouver ki serten lekol par egzanp i annan bann group paran ki’n met ansanm pou fer vini Take Away oubyen i annan take away ki’n fer laranzman avek serten ansenyan sa pa sipoze me i bann laranzman ki egziste kot dimoun i sey pas en pti pe akote. Lo kestyon ki’n ganny lev-e lo sa kestyon Casino avek son sponsorship nou ava lev sa avek FSA e pou mwan i sanble en pti pe drol mon pa sir akoz zot in dir sa. Akoz mannyer mon konpran napa en lalwa spesifik ki anpes zot fer sa sponsorship me mon ava verifye mon ava retourn kot ou. An se ki konsern bann pwen ki in ganny met devan par Onorab Woodcock mon note son lenportans ki in mete lo swivi lo follow-up ki ganny fer lo diferan progranm spesyalman bullying e mon konnen ki i annan progranm ki an kour. Difikilte parfwa se sa konpetisyon bokou diferan linisyativ pou fer sir ki linisyativ i reste relevan. E la kot i enportan ki nou gard sa momentum nou tou nou koz lo sa bann size nou kontinyen kit sa presyon e osi ki napa ase ankadraz dan distrik mon krwar i en pwen ki’n ganny partaze par lezot osi oparavan e ki sa I bezwen ganny ranforsi  enkli sipor ki ganny donnen dan distrik. Osi sa nesesite pou nou annan plis formasyon an se ki konsern prevansyon labi seksyel sa legzanp ki’n ganny servi dan sosyete sivil mon krwar i enn ki enteresan. Mon konnen ki ansenyan zot ganny serten formasyon me a ki nivo mon pou bezwen klarifye avek Minister Ledikasyon. Me sertennman swivan sa rapor i kler ki nou bezwen fer plis zefor dan sa direksyon. Onorab Ernesta in demann sa kestyon akoz sa bann kestyon I kontinyen persiste e akoz ki nou, nou kontinyen fer fas avek sa bann problenm se ki serten bann lentervansyon mon krwar ki nou pe fer in anmenn serten rezilta. Nou pran legzanp sigaret konman ou’n sit sa konman en legzanp e kwa ki’n fer sa marse. Enn bann eleman mon krwar zis pou donn en legzanp se advertisman lo sigaret nou nou ‘ban li Sesel me osi lavantaz se dan lemon osi dan lamazorite pei i osi ganny ‘ban savedir menm letan ou annan dimoun ki pe swiv par egzanp lo medya sosyal oubyen lo Cable TV zot pa pe ganny ekspoze alor menm nou zefor isi i ganny ranforsi en pti pe atraver sa ki pe pase enternasyonalman. Kontrerman par egzanp avek lakol kot menm si nou sey met serten kontrol ozordi isi i annan en kantite exposure ki arive sorti en kantite diferan landrwa. Me nou bezwen pran en pti pe sa bann legzanp e gete kwa ki marse mon krwar serten bann kanpanny in marse lo nivo sigaret par egzanp en pti pe lo packaging sa in annan en lenpak e nou bezwen adres en pti pe sa size. Lo kote lalkol akoz ou’n demann en pti pe ki… i annan lenpresyon ki Seselwa zis nou kontinyen bwar. Statistik bon i enportan pou nou regard sa bann statistik avek serten kestyon antet. Statistik annefe i tant pou montre ki konsonmasyon lalkol par Seselwa dernyen statistik nou annan i an 2013 i pa telman pe ogmante. I pe reste plizoumwen lo menm nivo. Me i enportan pou nou note ki lenportasyon lalkol in ogmant en kantite sirtou akoz tourism i annan en gran logmantasyon dan tourizm. Konsonmasyon par Seselwa li menm li pa pou dir i pa pe ogmante i pe ogmante me par pti gin. Me sa ki pli konsernen si mon ti pe mon pe servi sa rapor ki the National Survey of Non- Communicable Diseases 2013-2014 letan pe regard avek sa ki konsernen sa ki pli alarman se la fason ki nou  konsonm lalkol. Kot nou annan bokou plis binge drinking nou annan bokou plis e osi ki zenn i servi li boner e osi i annan sa problenm ki nou pe ganny bonbarde avek swa an term lalkol. I annan en kantite diferan plis swa e dan serten dan serten ka sa volim lalkol ki ganny konsonmen dan en pti lespas letan par egzanp dan bann parti oubyen dan bann piknik i vreman gran. E sa i lye ou kapab vwar sa osi dan sa statistik lasante ou pou vwar sa atraver bann lensidan trauma ki ganny prezante kot ICU kot Casualty par egzanp i annan bokou plis aksidan ki lye avek lalkol. Me i enportan pou nou pa mal konpran en pti pe sa bann statistik. Sa ki kler ki sorti dan sa rapor se ki nou bezwen konsernen ki zenn i annan akse avek lalkol e ki la mazorite la mazorite zenn 50 poursan zenn pe servi lalkol a en tre zenn laz e sa i vedir ki nou bezwen azir. An se ki konsern logmantasyon taks mon le dir tre klerman sa ki Gouvernman i gannyen an term reveni i pti gin par rapor avek sa ki nou bezwen depanse pou fer fas avek bann konsekans lalkol oubyen sigaret. i enportan pou nou regard osi bann lezot mezir e i osi kapab… i enportan pou nou vwar ki mannyer serten bann larzan ki sorti dan sa bann sekter i kapab ganny transfere en pti pe plis direkteman dan bann aksyon konm sport konman bann aktivite ki redwir ki redwir konsonmasyon lalkol avek drog. Onorab De Letourdie ou’n fer de pwen tre enportan se ki konsern lalkol ki mannyer i ganny mete dan laboutik ki en form avertisman e mon krwar ki nou bezwen travay osi par egzanp lo bann posters ki konsyantiz dimoun lo litilizasyon lalkol ki dan bann landrwa parey laboutik oubyen dan bann landrwa ki ganny konsonmen. E osi sa lide pou restrikte en pti pe bann license kot i konsern lavant lalkol sa i en propozisyon ki Gouvernman etidye seryezman. Onorab Hoareau in… mon krwar bann pwen ki ou’n fer kot ou konpar avek bokou lezot pei ki swa middle income ouswa high income i enteresan akoz ou vwar en pti pe ki nou en pti pe dan menm laliny direksyon avek sa bann pei. Lo kestyon ecigarettes sa pe aktyelman ganny regarde par tobacco control board e zot pa ankor pran en desizyon lo ki mannyer zot pou fer regilasyon lo la, akoz i annan serten… en eleman ki dir sa i ede pou redwir konsonmasyon sigaret. Dan en lot kote i osi anmenn dimoun ladan alor zot pe regarde e prosennman zot a fer en rekomandasyon. Lenportans met lo bokou lanfaz lo ledikasyon in ganny note e pou nou kre sa kiltir sport e mon krwar sa i en pwen ki’n ganny sorti tre fortman par tou bann lentervansyon. Onorab Loizeau lenportans pou nou adres lobesite dan bann lekol atraver ledikasyon e nou toutafe dakor lo nivo lasante sa konsern nou partaz sa konsern kot i konsern sa fast food tou otour bann lekol. I en size ki byensir nou bezwen adres li avek pragmatizm akoz parey mon dir nou annan en kiltir lantreprenarya ki’n devlope. Nou anvi fer sir ki sa bann antreprener i kapab kontinyen devlope me an rekonesan sa risk sa bann keksoz ki anmenn dan nou dan nou sosyete. E nou bezwen rod en solisyon ki pragmatik lo sa bann size, nou bezwen annan dialog avek sa bann operater e nou bezwen osi realis. Nou pa pou kapab kontrol tou keksoz me nou kapab met serten kriter de-baz, I annan serten pei ki’n fer Lezislasyon par egzanp otour bann lekol en serten zistans, me mon krwar ki premye staz premye faz se angaz sa bann operater fer zot pli konsyan sa problenm ki annan e apre travay lo en seri aksyon ki permet nou azir dan en fason sistematik. Apre sa nesesite pou nou siport aktivite sportif dan distrik, ou’n donn serten legzanp kot serten keksoz in konmanse me apre i pa’n kontinyen nou bezwen analiz byen kwa ki sa problenm. Eski i en problenm mobilizasyon volonter, eski i en problenm resours finansyel mon krwar probableman larepons se en pti pe dan tousala. E alor nou bezwen annan en fason sistematik asire fer en challenge dan sak distrik ki nou annan sa. Onorab Hoareau in koz lo bann kalite manze ki’n ganny enporte an se ki konsern par egzanp hormones nou pe fer de deplizanpli tes lo nivo Lasante Piblik nou pa tro lontan ki nou’n konmanse alor nou pa ankor dan en staz ki nou kapab donn bann findings dan en fason sistematik. Me prosennman nou espere nou kapab fer plis tes e nou kapab osi donn serten gidans lo ki mannyer nou kapab restrikte serten lenportasyon. Sa pwen lo Home Economics an teori sa i deza kouver dan aktyel dan PSE mon dakor avek ou ki rezilta sa letid i montre ki nou bezwen regard son lapratik ki lenpak i annan. Apre osi pwen lo avertisman monk vwar i valab ki nou bezwen regarde ki mannyer nou adres sa. E Mr Speaker mersi pou sa sizesyon pou nou angaz plis avek zenn atraver bann medya e mon dakor avek ou mon partaz sa lopinyon ki nou bezwen fer plis avek medya e rekonnet osi lafason ki medya i fonksyonnen ozordi i diferan avek sa kid an lepase nou pa kapab zis fonksyonn dan bann metod tradisyonnel nou bezwen annan plizyer platform. E i enportan en pwen ki ou’n fer sorti ki mon krwar i vreman enportan se i enportan ki zenn zot menm pe amen sa mesaz ki se pa zis nou konman adilt oubyen konman Manm Lasanble ki pe dir zenn fodre fer koumsa fodre fer koumsa. Fodre zenn zot menm zot, zot annan sa ownership lo sa mesaz mon krwar i annan zenn ki byen konpran sa enn nou bezwen amenn sa pli devan. Mr Speaker mon remersye Lasanble pou sa lapros langazman – sa lapros konstriktiv anver sa size ki tre sansib nou pou etablir sa Komite e nou pou atraver ou Mr Speaker nou ava envit bann Manm Lasanble pou partisip ladan e apre nou ava vin devan avek bann mezir ki konkret. Mon sit serten me nou ava vin devan lo lespri konsansis pou nou enplimant serten mezir ki pou amelyor lasante nou pep an komans avek nou zenn. Mersi bokou Mr Speaker pou sa letan avek sa loportinite.

 

MR SPEAKER

Mersi Minis avek ou lekip. Nou donn ou nou langazman konman Lezislatif konman Lasanble Nasyonal pou donn ou tou sipor akoz nou rekonnet apre sa rapor ki ou’n anmennen ki i keksoz tre serye ki afekte pei e ki nou kapab aranze nou kapab sanz direksyon ki sa serten trend pe ale. Nou swet ou tou de bon, mon aprann ou pe vwayaze. Have a very successful trip overseas e kontinyen avek ou lekip ki mon konnen, mon 4an lasante mon konnen ou annan en bon lekip otour ou. Mon sir ‘the man with the passion and a mission will deliver’. Mersi nou a rezwenn 2er isi.

 

(BREAK)

 

MR SPEAKER

Bon apre midi tou dimoun.  Welcome back.  Apre midi nou annan  nou 2 Mosyon ki ti lo working paper depi yer.  La nou’n fini avek bann kestyon nou a pran nou premye Mosyon  e mon a demann Onorab Ahmed Afif koman mover sa Mosyon pou prezant Mosyon.

 

HON AHMED AFIF

Mr Speaker, tou bann Manm Onorab bonn apre midi. Mr Speaker mon Mosyon i swiv en Komite ki ti ganny etablir dan premyer Trimes sa lannen e sa Komite ki apre the Committee on Eve Island and Marie-Jeanne Estate.  Mr Speaker sa Komite ti ganny etablir esansyelman akoz ti annan Manm Lasanble Nasyonal ti annan bokou konplent ki  i annan serten fason  ki  later  ti pe ganny allocate lo Praslin, me sirtou lo Eve Island e Marie-Jeanne Estate ki ti pe koz bokou distansyon ; dan le sans  ki dimoun ti santi ti napa en lazistis dan lafason ki later ; dimoun ti santi petet ki ti napa en fason ki pe asir byennet devlopman Pralinwa ; ki ti pe asir byennet devlopman ekonomik lo sa zil e swivan

sa,  Komite ti ganny etablir e lo sa Komite i annan tou lede kote latab : lo nou kote latab – Komite i ganny Chair par  Onorab Wavel Ramkalawan, i annan mwan menm, Onorab Jean-François Ferrari e Onorab Wavel       Woodcock, e lot kote i annan Onorab Leader of Government Business Onorab Charles De Commarmond, Onorab  Sebastien Pillay e  Onorab  Churchill Gill.  Swivan letablisman sa Komite, sa   bann Manm ti zwenn e se la kot sa ki nou appel bann terms of reference sa Komite, ki vreman dann li son bagaz pu li travay  e la nou ti ansanm met en seri 5 pwen ki definir en pti pe travay sa Komite.   E mon ti a kontan  avek ou permisyon zis pou lir sa 5 pwen ;

 

Terms of Reference of the Committee on Eve Island and Marie-Jeanne Estate

 

  • To carry out an audit of ownership and allocation of land on Eve Island and Marie Jeanne Estate II. Sa se premye.
  • To determine if land allocation on Eve Island and Marie-Jeanne Estate II was done in accordance with written policy and to establish if the principle of fairness, equal opportunity of access and efficient land utilisation were the primary criteria underlying these land allocations or subsequent transfers approved by Government.

 

  • To highlight specific areas where injustice or unfair practices may have occurred in land allocation at Eve Island and Marie-Jeanne Estate II or where opportunities may have been lost and to propose remedies that should be considered in the best interest of Praslinois and the economy in general.

 

  • To recommend policies that will ensure that land at Eve Island and Marie-Jeanne Estate II are allocated such as to allow businesses to thrive in a manner to benefit Praslinois above all ; and that this is done where wealth distribution and economic benefits will accrue to Praslin and the economy in general.

 

  • To submit a report to the National Assembly covering all the above points and to raise a motion from the National Assembly to the Executive based on the findings of the Committee.

Alor Mr Speaker se vreman sa an gro ki  nou ti a kontan ki Lasanble i aprouve ; donn nou, nou  manda travay ; alor vreman fer sir ki nou konnen lekel ki propriyeter e fer sir poudir an regardan sa lalis nou, nou a kapab satisfer nou lekor ki sa lalis in vreman ganny fer dapre kriter ; fer sir poudir napa okenn lenzistis ki’n ganny fer dan alokasyon sa bann later ; fer sir poudir annefe sa ki pe pase, laba lo en pwennvi ekonomik pe benefisye Praslin  – lekonomi, answit prezant en rapor ek Lasanble Nasyonal.    Alor Mr Speaker, mon ti a kontan zis pou demann Lasanble Nasyonal  mon Mosyon aktyelman i dir ; ‘’this Assembly gives its approval to the terms of reference of the Committee on Eve Island and Marie-Jeanne Estate’’ – mon pe rod sipor Lasanble Nasyonal pou donn nou sa manda pou nou travay.  Zis pou mwan azoute Mr Speaker,  parske mon ti tann serten komanter ki’n ganny fer sirtou dan  Conference de Presse resaman par serten Lapres, i dir poudir Lasanble Nasyonal pa enterese dan bann zafer later ; Lasanble Nasyonal pe pas son lentere plis dan lezot size tel ki dan zil eksetera.  Vwala en legzanp kot nou, nou pe sertennman pran nou responsabilite serye pou dir, nou koman en Lasanble, nou pe asir koman en tyek vreman lo Egzekitiv pou fer sir poudir enn bann resours pli enportan dan sa pei se later ; pou fer sir ki  sa resours i ganny itilize byen, ki lafason later i donnen,  i ganny fer dapre Polisi e pou fer sir byensir ki tou popilasyon –  e la nou pe koz Praslin an zeneral, ki zot tou zot kapab benefisye atraver tou sa bann loperasyon.  Alor mon ti a kontan demann laprouvasyon – sipor par Lasanble Nasyonal, pou asire sa bann term referans i ganny aprouve e ki nou kapab komans travay.  Mersi Mr Speaker.

 

MR SPEAKER

Mersi Onorab Afif.  Onorab Ferrari.

 

HON JEAN-FRANCOIS FERRARI

Eski mon ti kapab dir 2 parol?

 

MR SPEAKER

Wi.

 

HON JEAN-FRANCOIS FERRARI

Avek ou permisyon, mersi Mr Speaker.  Mr Speaker mon pa pou long ditou.  Mon ti a kontan segonn sa Mosyon ki prezan bann term referans ; savedir sa kad dan lekel nou pe travay. Mon ti a kontan azoute ki sa ki Onorab Afif in dir ki sa travay  – eksplik en pti pe an rezilta serten lenformasyon, e kestyon  – serten demann ki zabitan Praslin ti fer e bann pwennvi ki zot in eksprimen lo ki mannyer alokasyon in ganny fer lo sa 2 later – sa 2 parsel Zil Eve avek Marie-Jeanne Estate II.  Nou koman en Lasanble e Mr Speaker ou’n repete plizyer fwa, ki mannyer nou travay i bokou e ki nou pa kapab get tou keksoz – nou pa kapab ; nou bezwen sey dapre nou konsyans get bann keksoz ki relevan e sey atak zot e servi piblik  e reponn  lekspektasyon piblik dan en fason meyer ki  nou kapab.  Sa legzersis ki nou pou fer, o size Ile Eve e Marie-Jeanne Estate II i pou parey nou pe pran en sample lo nivo Nasyonal lo ki mannyer alokasyon later in ganny fer, depi tou sa bann lannen.  Nou pa pe al avek okenn prekonsepsyon.  Nou pa pe al avek okenn lide fix.  Nou pe al avek en lespri ouver pou nou.  E nou’n menm dir ki kekfwa nou pa pou vwar nanryen mal, me kekfwa nou pou vwar serten keksoz mal, me solman nou lespri i vreman ouver lo sa legzersis.  Me pou nou fer byen sa travay, i enportan ki nou ganny serten sipor e nou ganny serten konprenezon avek bann dimoun Praslin – sirtou Baie Ste Anne Praslin.  Akoz personn pa kontan ler ou pe vin regard dan son bann keksoz ki’n ganny fer  – konmsi dimoun i vwar ou kekfwa pe demann kestyon  oubyen pe pase, oubyen pe tir en portre.  Nou pa pe al laba pou nou al enterfer fan lavi okenn dimoun.  Nou, nou ti a kontan pou nou travay mars byen, ki si bann zabitan Baie Ste Anne e Grand Anse i vwar sa komann en loportinite  pou zot osi, angaz avek nou pran kontak avek nou – sirtou lo sa Komite nou annan MNA Baie Ste Anne e donn nou zot lopinyon, fer nou konnen si zot krwar i annan en keksoz ki’n mars byen, oubyen si i annan keksoz ki’n mars mal.  I ava ed nou  avans pli vit dan sa travay.  Donk, sa i en lapel ki nou pe lanse avek bann zabitan sa  bann zabitan Praslin.  Mon 2enm pwen Mr Speaker, se pou demande ki nou ganny lasistans avek Minister Later e avek bann diferan Lazans ki okip bann Industrial Estate –  sa i annan en Lazans ki okip sa   e Minister Later HFC oubyen wi Minister Lenfrastriktir ki okip par egzanp later Marie-Jeanne Estate.  I enportan ki nou ganny sa kolaborasyon, akoz se avek zot ki nou ou travay byen vit e ki nou pou kapab prezant en rapor byen vit.  Alor Mr Speaker, lo sa 2 pwen mon pe lans en lapel ki nou angaz nou, nou tou ansanm ; nou pran li koman en legzersis Nasyonal pou nou kapab fer sa travay.  Rezilta sa travay i ava donn nou en serten model ki mannyer nou devret avans a lavenir ; ki kalite rekomandasyon nou devret pe fer avek Gouvernman non selman  lo Marie-Jeanne Estate e lo Eve Island me lo Sesel – lo teritwar Sesel an zeneral.  Nou ava vwar bann best practices, nou ava rekomann sa bann keksoz.  E sa i ava ed Gouvernman  e nou pei pou nou avanse.  Donk lo sa 2 pwen mon siport Mosyon e mon demande ki Lasanble i adopte sa  kad referans as in ganny mete la lo Order Paper.  Mersi Mr Speaker.

 

MR SPEAKER

Mersi Onorab Ferrari.  Onorab Sebastien Pillay.

 

HON SEBASTIEN PILLAY

Mersi Mr Speaker.  Mr Speaker mon pran laparol koman en Manm lo sa komite. Mon krwar ki mover Mosyon in fer prezantasyon lo  bann diferan terms of reference e  entervenan avan mwan, in koz en pti pe lo rol sa Komite  e mon krwar ler entervenan avan mwan in koze en  pti pe – in elarzi  en pe elarzisman en pti scope ki nou annan anba terms of reference.  Alor ki  mon ti ava propoze mon ti ava propoze ki nou fer en lamannman e nou azout en proposition dan sa terms of reference ki pou lir koumsa – ki nou a dir, ’to make any such necessary enquiries and to receive proposals from members of the  public, ’Which is going to  tie in line ;akoz mannyer ou ti pe dir i pa ti’n enkli dan terms of reference akoz i ti ase spesifik. So mon’n fer notes sa propozisyon  la ki  mon ava pas li avek mover Mosyon ki ava ganny mete dan terms of reference.  Avan mon kontinyen osi Mr Speaker, mon oule osi a-port latansyon Lasanble lo 2 pti sanzman – 2 pti typo ; nou pe koz lo 4enm bullet point on the 2nd sentence dan plas dir met ‘‘such as’’ nou met ; ‘’ so as to allow businesses ‘’ – Onorab Afif ou pe swiv mwan en?  Ok?  4th bullet point 2nd sentence apre allocated the word ‘’such’’ nou sanz li par ‘’so’’ which  reads better.  Apre son sentence below li kot i fini ; kot i ‘’this is done where ‘’ nou met li ;’’this is done so that’’ ok ?  E dernyen pti propozisyon ki mon  annan i pou submit en report kot the National Assembly addressing all the above points.   E ki nou ava fer nou ava fer sa vin dernyen pwen – nou a fer sa pwen ki mon fer propoze as an addition.  Wi.  Li i a vin dernyen pwen konmsi.  Sa report i  a vin the final document  – the ultimate document i vini.  Mr Speaker, rezon ki mon krwar ki i enportan ki Lasanble i angaze dan bann tel Komite, mon  krwar ozordi ler nou vwar ki koman en Lasanble zeneralman nou pa pe fer politik lo en size oubyen polemic i montre ki  nou  kapab achieve en  kantite keksoz. E mon krwar se sa laliny ki well mwan mon oule al ladan, e mon asire ki lot kote i oule al ladan pour ki sa ki benefisye se lepep Seselwa an zeneral, e ki nou donn lepep Seselwa en better deal. E mon krwar osi i enportan ki  lepep Seselwa i realize ki par annan bann terms of reference kler, nou pe osi strenghten the Institution of the National Assembly, ki demen whoever comes in i ava annan li en bank of document, pou kapab swiv lo la e build lo la e kontinyen travay ki nou, nou’n komanse.  So avek sa 2 pti mo Mr Speaker, mon pou siport sa Mosyon. E mon pou  demann lezot Manm Lasanble osi pou siport sa Mosyon.  Mersi.

 

MR SPEAKER

Onorab Woodcock.

 

HON WAVEL WOODCOCK

Mersi Mr Speaker.  Mr Speaker sa Komite ki’n ganny formen pou investigate Eve Island e Marie-Jeanne Estate i en Komite ki tre enportan.  In fact mon pou dir i premye Komite ki’n ganny etabli pou fer lenvestigasyon lo kote Praslin.   Tou kou nou konnen  poudir Praslin i more or less en  pti pe ganny izole.  Sa i en konsern ase pertinan pa zis lo kote distrik Onorab Gill lo kote Baie Ste Anne.  I osi en konsern en konsern ase pertinan osi  lo kote Grand Anse.  Ti annan bokou bann fristrasyon par bann manm piblik  sirtou lafason ki bann later ti‘n ganny allocate       Ile Eve e bann konsern, se ki ti annan bokou bann rezon politik par deryer enn de bann alokasyon, oubyen en keksoz vreman serye ki toultan sorti an regarding   Marie-Jeanne Estate e osi Ile Eve se lefe ki bann Polisi  ki ti an plas pa ti kler.  En konsern ki ti’n ganny lev-e se ki e bokou bann biznesmenn ti vin devan i bann later ki ti’n ganny vann  – ti’n ganny lease pou vreman, vreman ou kapab dir ase ba ; par R30 par met kare, ti ganny revann pour sepa konbyen milye Roupi par met kare i annan dimoun ki’n vann lease – zot lease pour milyon Roupi e bokou bann biznes  in apros nou ki dir i annan en serten dimoun – bann serten dimoun lo later Ile Eve, ki’n apros zot pe ofer zot lease  – zot later pou R1.4 milyon  e menm plis.  E sa i en pwen ase pertinan ki montre ki poudir i annan en defayans dan zesyon dan lafason ki Minister pour Land Use and Habitat pe allocate e zer later Marie-Jeanne Estate.  E bokou keksoz ki’n  sorti  osi in annan serten konfizyon ant Industrial  Estate Authority an menm tan avek Ministry for Land Use and Habitat.  E i enportan ki sa Komite in ganny etabli pou zot reviz sa bann prose – konpran en pe akoz ki tou sa bann defayans – akoz ki tou sa bann  keksoz in arive e ki afen nou bann investigation nou ava kapab prezant en rapor avek Lasanble. Donk piblik ek tou lepep Seselwa – sirtou bann zabitan Baie Ste Anne avek Grand Anse, zot ava konnen ki mannyer later Leta pe ganny zere ; kot bann defayans i été ; kot bann problenm i été e ki mannyer nou kapab remedye sa sityasyon, pou ki demen sa bann keksoz pa ariv ankor ozordi.  E annefe Mr Speaker  en keksoz ki mon ti a a kontan vwar ki i pa zis Ile Eve ki nou pe investigate konsernan later – alokasyon later or lease dan bann lezot Industrial Estate area.  Annefe nou bezwen fer li partou lo nivo Nasyonal ; Praslin, Mahe, La Digue partou , nou bezwen investigate kot i konsern alokasyon e lavant later piblik ; akoz i annan en bon pe defayans partou.  Avek sa Mr Speaker, mon pe dir ki mwan mon pou donn mon full sipor sa term of reference  sa Komite e mon asire ki Onorab Gill osi lo kote Baie Ste Anne koman en Pralinois nou devoue pou nou travay, pou nou fer sir ki tou sa bann keksoz i vin o-kler e tou  sa bann keksoz konsernan sa 2 landrwa konsernan Ile Eve e Marie-Jeanne Estate, i ganny fer dan en fason transparan – dan en fason ki byen dan en fason ki drwat e zis.  Mersi Mr Speaker.

 

MR SPEAKER

Mersi Onorab Woodcock les mon a zis remind zot ki terms of reference anba sa Mosyon ki nou pe koze, pe regard lo spesifikman Eve Island e Marie-Jeanne Estate Praslin.  Mon konnen i deza annan  serten lentervansyon dan lepase kot nou’n  lo la pli lwen lo Mahe, me  la nou pe koz lo sa 2 landrwa  – Eve ek Marie-Jeanne Estate.  So  silvouple annou sey focus  nou lentansyon lo sa 2 sa akoz epi parey Onorab Ferrari in dir, napa okenn prezize, i en terms of reference pou en Komite ki pou al set en investigation.  E parey Onorab Afif in demande koman loter sa Mosyon, nou pe rod korperasyon tou dimoun.  E mon krwar i kler kwa ki nou pe sey fer.  Onorab Churchill Gill.

 

HON CHURCHILL GILL

Mersi Mr Speaker.  Bonn apre midi tou Manm.  Mr Speaker sa Komite, i tre enportan, akoz dan mon distrik mon’n koz ek en bon  pe  nou bann zabitan Baie Ste Anne e i kler ki i annan en dezapwentman  lafason  ki later in ganny zere  dan sa 2 landrwa ; e mon asire la avek sa Komite i annan bokou dimoun Praslin ki zot soulaze ki dezormen zot ava annan sa konfyans ki dan fitir zot ava ekspekte keksoz i a ganny dan en fason transparan.  E tou dimoun i a satisfe e mon a kapab promet bann dimoun ki tou pou fer sa travay tre serye, akoz nou anvi ki de-lavan keksoz i ganny fer dan en fason, ki tou dimoun i satisfe. E sa ki gannyen i ganny dapre son merit ki en norm ki tou dimoun i ava apresye.  Alor mwan osi mon ti ava demann Manm pou donn sipor pour sa terms of reference pou kapab fer sa travay e anmenn sa Rapor kot Lasanble.  Mersi.

 

MR SPEAKER

Mersi Onorab Gill.  Onorab William.

 

HON WAVEN WILLIAM

Mersi Mr Speaker.  Mr Speaker mon ti napa tro gran keksoz pou dir eksepte ki si mover Mosyon  i ava konsider pou met en lamannman, akoz letan mon pe lir bullet point 3 avek 4 mon ti anvi propoze ki si i ti a konsidere ki nou met en ‘fullstop’  (.) apre ‘opportunities may have been lost ‘’ ; epi koupe met  ‘’to propose possible remedies and policy recommendation for consideration ; that will ensure… ‘’  sa i a vin nou bullet point 4.  If the mover i aksepte sa pti lamannman, akoz  ou a krwar pe koz en pti pe lo menm keksoz.  Mon pa  konnen si ou ava konsidere.  Mersi.

 

MR SPEAKER

Mersi Onorab William.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker sa Komite  la pa en travay spesifik e se sa ki sa terms of reference i koumsa.  Letan nou’n fini travay lo Eve Island avek Marie-Jeanne Estate11 apre sa Komite i fini fermen ; en Select Committee.  Sa travay i bon li akoz nou vwar poudir sa 2 morso later i Praslin spesifikman dan distrik Baie Ste Anne e  Praslinois i bezwen benefisye atraver bann devlopman ki annan kot li ;  e nou’n vwar parey in ganny dir poudir i annan keksoz ki pe ganny adrese ki pa tou sa aporsyonnman later, sa fason ki’n ganny distribye ki  nou pe panse i korek.  Se sa  ki nou bezwen gete en pe pli pros.  E an menm tan i permet nou osi petet revwar son land use par egzanp si letan nou pe gete osi si tel morso later pou tel kalite proze i ok kot i été – si petet pa’n merit en pli gran bout morso later.  Si en proze son lokasyon i pou pli bon ouswa si i  pa devret bouz dan en lot morso  sa landrwa osi.           Sa  osi petet i fer nou pran konsyans letan nou pe get sa sityasyon.  Me osi  pwen pli enportan, mon krwar dan bullet point 3.2 sa i sorti byen kler e byen for lentere dimoun Praslin ; lentere Praslinois.  Mon krwar sa.  E la letan nou pe koz lentere Praslinois  – lentere dimoun Praslin se osi nou pe osi regard fortman lo pri lavi.  Bann proze ki vin dan sa area  ki form par sa bann devlopman, i bezwen osi – konmsi ler nou pe dir les en dimoun ganny en bout later pour fer devlopman, sa devlopman i bezwen donn en benefis direk  pou Praslinois, dan le sans ki pri lavi pou li i bezwen desann.  Nou’n vwar plizyer keksoz kot ler en prodwi en keksoz – en komodite ki Praslinois i bezwen ouswa dan sa ka La Digue osi ler i sorti Mahe pou ariv dan sa bann zil, ler i ariv laba pri in monte egzorbitan. Alor dan sa legzersis ki nou pe fer nou pe osi pran konsyans ki Praslinois – dimoun La Digue – Digwa i osi bezwen ganny en better deal dan sa  desizyon ki nou pou pran an tenir kont sa bann terms of reference ki annan pour sa Komite ki devan nou.  Mon krwar  nou devret donn sipor sa Komite.  Parey mon dir i pa pou al…i pou spesifik e letan i fini son travay i dir lala ek Lasanble e nou donn Egzekitiv son rapor li i  a vwar son findings ki nou’n fer ki pou fer avek.  Mersi.

 

MR SPEAKER

Mersi Onorab De Commarmond. Si napa okenn lezot entervenan, mon a donn laparol loter Mosyon pour li koz lo la, e osi konsider sa 2 lamannman ki’n ganny propoze.  Onorab Afif.

 

HON AHMED AFIF

Mersi Mr Speaker.  E mon ti a kontan  pou komanse remersye tou bann entervenan ki pe vreman ofer zot sipor pour sa Mosyon.  Premyerman konsernan  bann amannman ki pe ganny propoze par Onorab Sebastien Pillay.  Mon an a-kor avek sa bann propozisyon komansman bullet No.4 e answit pou azout sa bout.  Mon ti a apresye si ou ti kapab sirkil an ekri sa morso ki ou pe azoute ; me solman esansyelman ki ou pe demande se permet bann enquiries ki  kapab ganny fer lo la e envit piblik pou kapab  donn serten zot lopinyon ki kapab ed nou dan sa travay.  Mon antyerman an a-kor avek sa.  Lo sa pwen ki Onorab Waven William in propoze, mon ti a sizere kit li koumsa parski sa pwen nimero 3, i pe koz spesifikman lo bann lenzistis ek bann unfair practises ki deza egziste e answit i pe propoz alor bann remed ki kapab ganny konsidere.  Me solman bann remed ki vreman an relasyon avek lenzistis ki kapab in ganny fer.  Tandis ki pwen limero 4 i pa koz zeneralman lo bann Polisi ki pou asir byennet e devlopman Eve Island en Marie-Jeanne Estate.  Alor Mr Speaker, mon krwar ki sa bann pwen ki’n ganny met devan se bann pwen ki tre relevan  e mon apresye bokou sipor ki pe ganny donnen.  Zis pou azoute ki nou travay i en travay sa ki nou apel en Select Committee.  Savedir sa Komite i la senpleman ki pou li enplimant manda ki sa Lasanble  pe donn li e answit sa Komite li i fini son travay.  Me solman byensir Lasanble li, i pou vwar li enportan i kontinyen regard tou bann size later e parey Onorab Wavel Woodcock in mansyonnen later i tre, trez enportan e i pou bezwen annan en moman letan kot sa Lasanble konm enn son louvraz oversight, se fer sir ki tou larestan alokasyon later osi dan Sesel, i ganny fer dan en fason ki korek. E petet sa i fason premye pou nou donn en legzanp ki mannyer nou, nou kapab fer sa travay oversight.  E avek sa Mr Speaker mon ti a kontan remersi tou dimoun ki’n siporte.  Mon ti a kontan remersi Lasanble pou aprouv sa bann term referans e ki i kapab donn nou sa koudanvwa pou nou komans nou travay.  Mersi bokou.

 

MR SPEAKER

Mersi Onorab Afif avek sa lamannman ki  ganny aksepte propoze  par Onorab Pillay.  Eski nou kapab pran en vot terms of reference pou sa Komite as proposed  Motion No.1  proposed par Onorab Ahmed Afif.  Tou bann  ‘pour lev zot lanmen?  Okenn dimoun ki kont?  Clerk.

 

MADAM CLERK

Mersi Mr Speaker.  Mon’n rikord tou bann Manm ki prezan  – mon’n rikord 20 Manm ki’n vot an faver e personn kont.  Mersi.

 

MR SPEAKER

Savedir ki Mosyon nimero 1, Lasanble i a aprouv term of reference on the Committee on Eve island and Marie Jeanne Estate 2.  E avek sa nou’n aprouv sa Mosyon nimero 1. Nou al toudswit lo Mosyon nimero 2. E sa i en Mosyon propoze par Onorab Sandy Arrisol, Manm Lasanble pou St Louis. E mon a demann Onorab Arrisol pou prezant son Mosyon.

 

HON SANDY ARRISOL

Mersi Mr Speaker. Bonn apre midi tou Manm.  Bonn apre midi tou dimoun ki a lekout. Mr Speaker, avan mon Mosyon, ou’n donn mon permisyon pou pas lo mon Mosyon ; in enteresan ki Lasanble in pran en desizyon an sa ki konsern en lot Mosyon anmennen par Onorab Afif senpleman pou annan Select Committee an sa ki konsern later lo zil Eve ek Praslin.  Me dan mon pti refleksyon letan mon pa’n koze, mon’n zis mazinen poudir si MNA, ti ganny enplike dan bann desizyon an sa ki konsern later distribisyon oubyen sa ki annan pou fer dan son distrik, kekfwa nou pa ti a’n bezwen retourn la pou re demann ankor Manm Lasanble pou zot fer serten lenvestigasyon oubyen dan en Komite an relasyon avek nou prop distrik, oubyen nenport ki lezot distrik.

Alor Mr Speaker, mon Mosyon i lo menm laliny. Mon pe anmenn sa Mosyon ki pe demann Lasanble pou demann Egzekitif pou reviz rol Gouvernman Lokal, pou permet ki tou dimoun ki annan rol dirizan dan distrik, i ganny enkli dan desizyon ki afekte sa distrik.  Akoz ozordi dan plizyer distrik, sakenn antre nou, nou pe fer diferan keksoz ki parfwa i pa vreman laspirasyon nou Elektora dan nou distrik.

Mr Speaker i enportan pou nou konman en Nasyon, pa oubliye ki bann dirizan nou pei lo en lot nivo, zot annan sa laspe dyalog ki’n ganny etablir.  E sa in fer ki nou pei in avans en pa pli devan konpare avek bann lannen ki’n pase. Ozordi bann Leaders dan nou pei, in konnen kisisa konsiltasyon. E met tou form divizyon de kote.  E sa in fer ki nou pei in rankont laviktwar dan plizyer lenstans. En legzanp se le 5 Zen ki sa lannen pou nepli en konze piblik. Akoz sa dat in mark plizyer nou Seselwa. Dezyenm legzanp bann lapwentman ki’n ganny fer an konsiltasyon ek tou bann sekter, e dirizan dan nou pei.

Mr Speaker, mon’n konmans mon lentervansyon koumsa. Akoz mon santi ki dan nou distrik i manke sa bann latous. Dan distrik i annan en striktir ki apel District Team. Sa i konpri plizyer Leaders dan en distrik ki asize otour en latab e zot diskit, e menm, pran serten desizyon dan sa ki konsern en distrik, oubyen mon distrik.  Me i annan en keksoz ki mal avek sa. Keksoz ki mal avek sa se manm Lasanble Nasyonal pa ganny enkli dan sa tim. St Louis, mwan mon pa ganny enkli dan sa tim.

Si mwan ki sipoze anmenn bann konsern Nasyonal pou mon distrik, e nou pou nou distrik – me nou pa ganny enkli dan bann desizyon ki nou distrik i pran, ki mannyer pou kapab byen reprezant nou distrik. Nasyonalman ?  Sa i fer ki zot koman en group, i annan keksoz ki zot konnen ; i annan keksoz ki zot rode. i annan keksoz ki zot oule fer – ki nou konman bann Manm Lasanble nou pa okouran ki pe pase dan nou prop distrik.  Alor mon pe demann Gouvernman Lokal pou revwar fason ki dan sa bann tek aktivite i ganny konsevwar dan nou distrik. Akoz mon pe dir sa ? Premyerman dan St Louis, par egzanp bann dirizan ki asiz lo District Team mon pa konnen lekel zot. Ki zot dan rol dan lasosyete ? E ki bann desizyon zot pe pran. Pou nou bann Elektora ki’n vot pou mon reprezant zot, e koz pou zot e menm pran serten desizyon lo zot par ?  Mr Speaker sa size in lev-e dan plizyer rankont ki nou’n gannyen, e plizyer Minis – kot lezot Lazans ki nou’n zwenn pandan recess ; Kot parfwa dimoun i krwar nou reste dan lakour nou dormi.

Me nou pe travay pou nou rod pli bon fason fer, pou nou kapab amelyor nou fason travay pou zot dan distrik.  Sa diskisyon ti lev-e kot nou ti pe zwenn enn sa bann diskisyon ti lev-e letan nou ti pe zwenn nouvo Minis.  Sa se Minis Lafanmir ; kot ansanm mon ti pe rode ki bann problenm frekan ki annan dan nou bann distrik. E ki fason nou travay ansanm. Travay ansanm pou edik nou Elektora lo zot responsabilite anver zot zanfan, zot fanmir, pou ki bann kominote i vin pli gou pou viv.

E yer dan sa menm Lasanble Nasyonal, nou’n tann Onorab De Commarmond pe enplor avek Minis pou enkli li lo bann desizyon, lo bann diskisyon, ek bann rankont ki zot anvizaze fer an sa ki konsern son distrik ki nou koz lo la yer.

Dezyenmman Mr Speaker. Si konman en lekip dirizan, nou ti kapab desid lo menm laspe nou distrik. I ti ava en pli bon fason avans devan. Lekel ki desid sa ki ganny lakaz dan distrik? Swa lekel ki deside lekel ki ganny en bout later? Lekel ki deside ki priyorite lo lalis? Swa lekel ki son ka i pli serye? Nou pa ava ganny trouve pe fer lo diferan keksoz. En legzanp kler, se letan en Manm Lasanble pe demann kestyon en Minis ki sa menm kestyon in ganny reponn par sa menm Minis atraver en let pou District Team dans on prop distrik.

Trwazyenmman i pou osi enportan ki Gouvernman Lokal, i konpran rol ek fonksyon sa Manm Lasanble Nasyonal ki’n ganny elekte. Pou nou pa zis siport proze Gouvernman ; me ki Gouvernman i osi i aprouv e siport proze ki’n ganny propoze par nou, konman Manm Lasanble Nasyonal pou nou distrik.  Akoz sa i pou vin an konsiltasyon e laspirasyon nou bann Elektora. En legzanp en semen ki pe al ganny fer byento Belonie pou deservi zabitan sa sou distrik. Sa in ganny fer an konsiltasyon ek Ladministrasyon Distrik.  Bann zabitan in ganny konsilte pou ki bann prosedir wayleave i al bokou pli vit. E mwan Konman Manm Lasanble Nasyonal pou sa distrik, mon  ti diskit, e fer rekomandasyon ki mon ti fer dan ladres Bidze lannen pase. E mon’n osi vot lo sa Bidze – pou distrik i ganny sa finansman neseser. Pou ki sa proze i materyalize.  E tou diskisyon ki Land Transport in ganny fer, meeting in ganny fer dan nou distrik.  E tou in pas byen ziska prezan, e byento nou semen i sipoze demare.

Mr Speaker letan nou tou

nou atrap sa enn bout, nou koz menm langaz, keksoz i bouze. E byensir Mr Speaker i ava annan lezot proze, ki nou a kapab fer an diskisyon avek tou bann dirizan nou distrik.   Mon a donn detrwa legzanp. Par egzanp anler St Louis basen, i annan bann zabitan ki’n reste laba pou plizyer lannen, zot pe rod en bon fasilite parking pou zot transpor. Sa fasilite i ava fer ki a deservi lafanmir Ernesta, Robert, Jean, e plizyer lezot fanmir ki reste dan sa landrwa.

En bon fasilite parking avek drenaz pou bann zabitan Belonie ki’n espere pou plizyer lannen. Sa i deservi lafanmir Aglae par egzanp kot Ms Jourdanne Loze. Ms Odile Octave. Ek lezot plizyer fanmir ki servi sa landrwa. En bon fasilite parking osi pou bann zenn dan Belonie kot Clement Confait, ki’n reste la pou plizyer lannen. E zot in lev-e zot in debourye, ozordi zot in kapab ganny en pti transpor me zot napa en landrwa pou park zot transpor.  Tousala i bann travay ki nou kapab fer an konsiltasyon avek tou bann sekter, ek tou bann dirizan dan mon distrik.

Mr Speaker, mon

senserman krwar ki bann desizyon dan distrik i devret enplik tou dirizan sa distrik. Mon osi konvenki District Team i desid pou zabitan, san konsilte zabitan. Me par kont nou konman bann Manm elekte dan nou bann distrik, ki konn e ki’n ekout aspirasyon nou dimoun letan nou’n pase vizit zot. Oubyen letan zot eksprim zot konsern atraver en let. Parey mon konnen Madanm Noeline Hoareau St Louis toultan i ekrir mwan en let. I fer konman sa i son swa. Oubyen ou ganny en lot dimoun ki donn ou en kout telefonn pou donn zot pwennvi. Zis parey Madanm Ah-Tou avek Madanm Chetty i kontan fer detanzantan. Mon ti ava kontan fer en lapel avek Minister Gouvernman Lokal Mr Speaker, ek tou bann dirizan ki annan lo nivo distrik. Pou zot annan en bon lantant travay avek kanmarad. Pou nou tou annan en bon lantant travay avek kanmarad. E osi avek nou konman bann Manm Lasanble Nasyonal.  La ki pou annan en District Council Election an 2018. I pou enportan pou nou, konman en lekip konmans etablir en bon baz lo konfyans, dyalog ek respe pou nou tou ansanm kapab travay ansanm. Sa i vedir tou dirizan dan bann distrik. Sa i ava anmenn en latmosfer prodiktiv, konstriktiv pou nou distrik. Me non pa enn ki mon pou anmenn konfli antre nou. Mr Speaker mon ti ava kontan termin mon pti lentervansyon lo sa Mosyon an ser an sa joint statement ki zot konman bann dirizan sa 3 Brans Gouvernman zot ti fer resorti. Sa ti Prezidan Larepiblik, ou konman Prezidan Lezislatif, e osi Zidisyer ki zot ti pibliye le 9 Me 2017.

Zot katriyenm gran liny, ti koz lo travay ansanm pou ki Sesel i bouz lo en fason ouver, e dan en fason demokratik.  Alor si lo sa nivo zot pe mazin travay ansanm pou Sesel mon Mosyon pe demann egzakteman sa. Ki tou bann dirizan dan distrik, i ganny enkli dan bann desizyon, ki annan pou fer avek nou distrik. Pour ki personn pa ganny kit deryer ; pou ki nou ava vin en vre Sesel, en vre desten. Mr Speaker mon ti a kontan lo sa pti pwen remersi Lasanble pou zot lekout. E mon ti a kontan demann zot sipor pou sa Mosyon. Mersi Mr Speaker.

 

MR SPEAKER

Mersi Onorab Arrisol. Onorab Larue.

 

HON FLORY LARUE

Mr Speaker mon segonn sa Mosyon. E mon ti a kontan osi demann ou permisyon pou entervenir.

 

MR SPEAKER

Go ahead. Laparol i pou ou.

 

HON FLORY LARUE

Mersi. Bonn apre midi tou dimoun. Nou vwar dan distrik otour Mahé Praslin ek La Digue, ki dan tou distrik i annan en biro Ladministrasyon Distrik. Sa biro i en Biro Gouvernman. I sel Minister Gouvernman ki annan en biro dan tou distrik. Sa i fer ki bokou servis i ganny desantralize e ganny anmennen pli pre avek piblik. Sa bann biro i parey nenport ki biro Gouvernman ki nou vwar anvil. E sa bann biro i tonm direkteman anba Minis pour Gouvernman Lokal Madanm Macsuzy Mondon. Fodre pa dimoun i konfiz sa avek Biro Brans Parti Lepep ki biro politik sa parti e non pa en biro Gouvernman, ki i ti kapab leka dan lepase. Mr Speaker an 2015 nou ti vwar ki sa Lalwa Gouvernman Lokal ti re ganny prezante dan 5enm lasanble par Minis pour Gouvernman Lokal sa letan Msye Vincent Meriton ki ozordi i Vis-Prezidan pei. Sa lepok i ti vin prezant bann sanzman ki ti pou anmenn Konsey Distrik. Sa i en Eleksyon ki’n ganny repouse par Gouvernman Lepep ziska 2018 ; menm si ti annan bokou fan-far sa letan pour montre ki zot ti pe delivre pep Seselwa avek vre demokrasi.  Depi sa nou’n vwar ki la vre demokrasi ti vin avek laviktwar 15 lo 10 pour Eleksyon Lasanble Nasyonal ki fer ki finalman LDS ti annan en mazorite dan Lasanble Nasyonal, e pour premye fwa nou’n vwar nou anba en Gouvernans ki pe ganny apele en koabitasyon.  Pour le moman sa i la realite pei. E parey in touzour leka, Seselwa i santi ki zot MNA i bezwen konnen ki pe pase lo nivo distrik. Zot koz bokou lo zot bann difikilte ki zot rankontre apropo lakaz, later, semen, lalimyer, lanplwa e led Sosyal avek zot reprezantan Lasanble Nasyonal. Pour bokou letan zot MNA, in osi sa dimoun ki asiz dan Biro Brans Parti Lepep e souvan dimoun ti bezwen kasyet zot pwennvi akoz zot ti annan lafreyer, letan zot ti pe rod en lasistans. Sa pa ti devret zanmen leka.  Ozordi ki sa in sanze e nou pe tann sa term travay ansanm, keksoz i bezwen sanze. Letan Vis- Prezidan Meriton ti vin prezant Prozedlwa an 2015, i ti koz lo bann zoli parol la demokrasi anmezir ki nou met Konsey Distrik an plas. Pandan sa letan 2 an in pase. Msye Chang Him ti dir,  ki si pa sa sityasyon 15 lo 10 depi Septanm 2016, bokou keksoz ti pou reste parey. E la ki keksoz in sanze nou le vwar sa bann zoli parol ganny aplike. Mr Speaker, yer menm dan sa Lasanble, nou ti tann Onorab De Commarmond in eksplike ki i ti a kontan konnen ki bann aktivite ki pe pase dan son distrik letan i ti pe koz lo bann pye sed ki pe ganny koupe. Me sa bann desizyon pour enplimant bann aksyon dan distrik pou lemoman i ganny pran dan sa meeting ki ganny fer tou le mwan par meeting District Team. Alor li menm i dakor ki fodre bann MNA i ganny enkli.

An Zanvye 2017 Msye Danny Faure konman Sef Egzekitif, ti donn gidans e direksyon ki son Gouvernman pou pran apropo travay ansanm lo labaz distrik.  Dan son vizit Anse Royale I ti envit 2 MNA. E i ti eksplik son rezonnman deryer son aksyon.

Mr Speaker, Msye Danny Faure ti dir nou, dan konteks sa dyalog ouver ki nou pe fer, letan zot get lo latab zot a demande zot a vwar 2 Onorab. Me State House in deside envit tou dimoun. Akoz polisi Gouvernman ozordi, se nou pa kit okenn dimoun deryer. State House i krwar ki nou devret annan en devlopman enklisiv. E pou sosyete devlope tou dimoun, tou son zanfan, san eksepsyon i bezwen ganny met dan konteks sa prosesis konsiltasyon e devlopman. ‘’ I en krwayans ferm ki mon krwar ladan,’’ Prezidan ti dir. ‘’I enn bann lobzektif ki mon pou pourswiv san dormi lo la i enn ki pour benefisye Nasyon Seselwa san eksepsyon e i enn ki pour benefisye nou pep e vwala akoz tou bann reprezantan i la dan sa meeting.’’ Ti annan 2 MNA ki ti pe asize dan sa meeting Anse Royale. Mwan menm avek Onorab Lemiel.  Msye Danny Faure in fer en langazman pour anmenn en fason fer ki sipoze gid tou son bann Minis. Me i pa sokan pou vwar ki sa pa pe arive. Ozordi. Mwan ki sipoze pe swiv dosye Tourizm ek Por, mon ti fer en meeting formel le 13 Fevriye avek Minis Lousteau- Lalanne zis apre son lapwentman. Enn parmi bann konsern ki nou ti diskite, ti bann aktivite ki ganny fer lo baz distrik. Nou ti diskit spesifikman sa konpetisyon Cultural District Award pour 2017. En konpetisyon ki bezwen lentegrasyon konplet Ladministrasyon Distrik pour li kapab demare e fonksyonnen. Mon ti a kontan anmenn latansyon piblik ki ziska prezan mon pa ankor tann nanryen apropo sa levennman ki ase konplike pour enplimante, akoz i sipoze fonksyonn pandan 2 an avan i ganny evalye.  Minis ziska prezan pa ankor donn mwan en larepons lo ki pe arive lo sa sityasyon. I montre klerman ki bann Minister pa pe kominike, e a lafen la nou vwar kominote lo nivo distrik ki perdi dan en lanpler finansyel.  Mr Speaker, akoz sa konpetisyon li i sipoze idantifye bann keksoz dan sak distrik alor dan tou distrik, ki pour angaz viziter sorti aletranze lo kote lar lenfrastriktir, bann personnaz e bann zwe ek ladans tradisyonnel. Atraver Ladministrasyon Distrik, sa bann keksoz i pou ogmant aktivite, e lentere dan nou bann distrik e osi pour angaz bann zabitan pour ganny en lafyerte lo sa ki pase dan zot distrik.  Akoz mwan mon krwar ki si mon ti ganny enkli lo sa meeting District Team dan Anse Royale, i enn bann keksoz ki mon ti pou pouse pour ganny enplimante pour demar aktivite lo nivo distrik.  Mr Speaker sa i montre ki mannyer keksoz ki ganny promet pa pe ganny met an aksyon. Bann lezot keksoz tel ki problenm lakaz, semen e lasistans sosyal, i souvan topik ki pli ganny met devan ; me fodre pa oubliy bann lezot keksoz ki fer en kominote devlope, tel ki : dan Anse Royale bann zabitan i ankor pe esper en Plan Devlopman. Sa Plan ti ganny met devan piblik depi lannen 2005 Mr Speaker. Konbyen lannen i fer? Menm sa lepok Mr Barry Faure ti dir ki fodre sa Plan i ganny formalize akoz apre nou pou ganny en problenm. Sa letan an 2005 i ti idantifye problenm trafik e problenm re alokasyon fermye.

Ozordi 12an apre, nou komans vwar nou dan Anse Royale avek sa bann problenm. Me lekel ki ganny afekte letan keksoz pa bouze? Se bann dimoun dan distrik. Bann zabitan nou bann distrik. Koman en manm Lasanble Nasyonal par baz proporsyonnel, mon santi ki mon ganny pli met akote par Egzekitiv, letan zot vin fer bann enteraksyon dan bann distrik. Mon annan en legzanp kler ; letan en vizit ti ganny fer kot Lopital Anse Royale par Minis Lasante Mr Jean-Paul pli boner sa lannen, e lenvitasyon ti ganny fer zis pour Onorab Lemiel.   E an plis, letan Mr Jean- Paul Adam ti vin dan Lasanble Nasyonal, e pandan en entervansyon mon ti fer li rapel ki mon pa ti prezan dan sa vizit, Minis ti re fer mwan mazinen ki mon pa en Manm Elekte alor se pour sa rezon li i pan envit mwan.

 

MR SPEAKER

Order! Order!

 

HON FLORY LARUE

Ozordi  zot Prezidan Msye Danny Faure  i dir zot fodre zot travay avek nou.   I dir ki i  ankor Sef sa menm Egzekitif e mon demann li si i ankor annan menm krwayans  ki i ti dir an Zanvye 2017 letan i ti vin Anse Royale, akoz mon pa vwar sa pe ganny aplike. Mon demann li pour pas sa direktiv avek  bann Minis  premyerman avek Minis pour Gouvernman Lokal e lezot e les tou bann Leaders dan distrik, ki enkli tou bann MNA nou lo kote latab  e bann lo kote latab, pour ganny enkli dan devlopman zot kominote. Alor ansanm avek son Vis- Prezidan ki’n deza Minis Gouvernman Lokal e zot 2 ki gid Egzekitif pran en desizyon pour enkli tou dimoun. Ozordi nou dan en  “koabitasyon.’’  E yer dan son Press Conference Msye Danny Faure ti eksprimen ki fodre dimoun i ganny sans premyerman pour koze, e dezyenmman zot lopinyon pa neseserman bezwen parey, me fodre tou dimoun i ganny tande.  Kot nou’n arive ozordi Gouvernman Lokal pa kapab kit serten dimoun deor akoz se devlopman Sesel ki an zwe.  Se lentere tou dimoun ki an zwe.  Parey Danny Faure i dir, “Sesel i pli gran ki mwan ! Sesel i pli gran ki nou tou.’’

 

MR SPEAKER

Onorab Larue.

 

HON FLORY LARUE

Pardon. Eskize.

 

MR SPEAKER

Onorab Larue retract sa. Ou bezwen… ou konn Standing Order byen kler.

 

HON FLORY LARUE

Eskize Mr Speaker, mon toultan apel li Danny Faure mon pa’n tipe. Parey Msye Danny Faure i dir eskiz mwan, mon retract. Parey Msye Danny Faure… ‘’I pa neseserman mon kriy li Prezidan.’’ Parey Msye Prezidan Danny Faure i dir, ‘‘Sesel i pli gran ki mwan, Sesel i pli gran ki zot, Sesel i pli gran ki nou tou.’’ E mon donn mon soutyen konplet pou sa Mosyon. Mon remersye ou Mr Speaker.

 

MR SPEAKER

Mersi Onorab Larue. Onorab Afif.

 

HON AHMED AFIF

Mersi Mr Speaker. Mr Speaker bokou in ganny dir mon ti le zis azoute ki pou mwan sa Mosyon i annan bokou merit, bokou merit parske i pe demande ki tou bann dimoun ki annan en rol dirizan dan distrik, i devret ganny enplike dan tou sa ki pe pase dan sa distrik. Akoz sa i enportan? I enportan parske bann dimoun ki ganny klasifye konman dirizan, zeneralman se bann dimoun ki’n fer keksoz byen pou zot distrik – se zeneralman bann dimoun ki annan leksperyans, se zeneralman dimoun ki popilasyon in met konfyans ladan. Dan le ka ki nou, nou pe koz lo la ozordi, nou pe koz sirtou konman bann dirizan LDS Manm Lasanble Nasyonal, elekte oubyen non. Mon pe koz konman Manm Elekte Anse Etoile, e pou mwan sa Mosyon i fer en kantite sans. En kantite sans parske dimoun i regard ou dan sa distrik konman sa dimoun ki konn zot problenm. Pa neseserman ou pe al rezourd zot problenm me ou konn zot problenm. Dimoun i regard ou konman sa lavwa ki kapab fer en sanzman pou zot dan fason ki zot viv ek zot fanmir ek zot zanfan e donn zot sa lalimyer pou krwar ki zot lavenir demen pou pli bon. Me an menm tan lo kote ou annan byensir Egzekitiv ki li son rol se, fer marse pei e dan fer marse pei pou fer marse ou distrik osi. E dan sa travay ki zot pe fer mon krwar i trez enportan. Nou konpran byen diferans ant Egzekitiv e bann Manm Parlman, i annan en diferans ant zot rol. Me selman dan sa lespri koabitasyon, dan sa lespri fer sir ki nou tou nou lo menm paz ; prenan kont ki Sesel i ptipti, nou pa en gran pei kot nou annan menm ki nou pa kapab tous en dimoun dan sa Lasanble Nasyonal pou donn li son lopinyon ; petet nou annan en kantite lezot dimoun dan sa distrik nou kapab koz avek. Nou napa sa kalite resours enfini dan en distrik. Alor mwan pou mwan plis ki Gouvernman i kapab kriy lo tou son bann sitwayen, son bann sitwayen ki annan leksperyans, son bann sitwayen ki dimoun i regard zot konman bann dimoun ki kapab anmenn solisyon, Gouvernman i devret koz avek zot. Nou pa pe dir ki sak fwa i fer en desizyon dan en distrik fodre ganny ou laprouvasyon konman en Manm Lasanble Nasyonal. Mon pa ekspekte sa parske se zot ki Egzekitiv se zot ki annan sa drwa pou enplimant keksoz dan sa distrik. Me selman i enportan ki zot ganny lopinyon e partaz en bon pe bann pwennvi lezot dimoun parske finalman, se sanmenm sa bann dimoun ki pep Seselwa i met zot konfyans ladan, ki’n partaz bokou zot soufrans avek, ki’n partaz en pe zot bann rev avek sa bann dimoun. E sa bann dimoun i osi annan lide lo ki mannyer nou kapab amelyor sa distrik, amelyor lenfrastriktir e anmenn dibyen zeneralman pou popilasyon sa distrik. Mon a pran par egzanp dan mon distrik, Anse Etoile, kot en bann pli gran problenm se lakaz e nou plis ki 6 mwan depi ler mon’n vin MNA pou Anse Etoile e malerezman ziska ozordi bokou bann problenm ki mon okouran, i ankor parey. Mon pa ankor kapab ziska ozordi, ganny en lalis tou bann ka ki ganny prezante devan Gouvernman konman bann lalis lakaz. Se pourtan nou’n tann koz lo point system, nou’n tann koz lo nouvo fason regarde eksetera.  Me malgre tou sa bann zoli parol, mon pa ankor kapab vwar en lalis konkret, black and white parey nou dir, kot mon kapab dir avek en tel dimoun, ‘‘Mwan osi mon okouran ou laplikasyon, vwala kot ou ete lo sa lalis e vwala ki mon krwar i kapab ganny fer dan ou ka.’’ Mon pran legzanp bann fermye ki Anse Etoile e i annan en kantite zot. Ankor enn fwa bokou zot in eksprim plizyer kalite konsern ki zot annan konman fermye, konman dimoun ki antreprener pe esey devlope pe travay pe kree lanplwa, me i kler poudir bokou zot pa vwar ki sa Plan Devlopman kler ki annan dan distrik. Menm zafer i aplik pou lapes. Yer nou ti ganny sans koz avek Minis pour Lapes e mon ti envit li e mon kontan i ti pran sa dan en fason tre pozitiv e i dir i pare pou li vin koz avek nou. Se dan sa lespri ki mon konnen ki Onorab Arrisol pe pouse ki tou sa bann Minister, tou sa bann Departman Gouvernman dan Egzekitiv, ki konnen poudir zot annan serten Plan Devlopman pou pei, byensir bokou i pas dan bann distrik, mon ti ava ankouraz zot fortman koz avek tou bann dirizan dan sa distrik. Fer sir tou dimoun i lo menm paz. Nou pa pe vin zwe politik, dan lesans ki nou pe rod nou ki’n anmenn sa devlopman. Nou pa pe rod poudir Gouvernman, Parti Lepep oubyen se LDS ki annan pli bon lide. Nou pe rod en keksoz ki meyer pou Sesel. E ler i meyer pou Sesel, i meyer pou nou tou. Alors se vreman en pti pe dan sa lide ki mwan mon vwar sa Mosyon pe ganny anmennen par Onorab Arrisol pe pouse ; set en fason regard keksoz ki probableman avek toultan ki sa Gouvernman in abitye regard keksoz. Zot in kontan petet pou regard li dan en fason se zot Gouvernman ki pe fer keksoz, alor se zot ki devret ganny sa kredi. E alor dimoun i devret rekonnet zot tel konman zot in vwar serten sikse ki’n arive. Me sa loter Mosyon pe demann en keksoz diferan. I pe dir annou travay ansanm dan en fason kot popilasyon i vreman valoriz nou konman dirizan. Popilasyon i regard nou konman bann dimoun ki pe anmenn devlopman ki pou tous zot dan en fason ase vit, me ki an menm tan ki pou fer pei osi bouz dan en bon direksyon. E alor kan mon regard zeneralman merit sa Mosyon, mwan mon satisfe ki i pe demann en keksoz ki lezitim, i pe demann en keksoz ki byen, i pe demann en keksoz ki pou anmenn dibyen pou Sesel demen. E avek sa, mon ti a kontan siport son Mosyon e mon ti a kontan e mon vreman sipliye ki Lasanble an antye siport sa Mosyon, pou ki nou kapab annan nou en Egzekitiv e lezot Brans Gouvernman ki pe travay vreman konzwentman pou anmenn lentere pep Seselwa dabor, premye, e fer  sir ki nou pei i kontinyen bouz dan en fason pozitiv a lavenir. Mersi Mr Speaker.

 

MR SPEAKER

Mersi Onorab Afif. Onorab Sebastien Pillay.

 

HON SEBASTIEN PILLAY

Mersi Mr Speaker. Mr Speaker, Mosyon ki devan nou i enn ki tre enterese, enn ki i pa sa son merit, me selman nou bezwen osi konsider serten eleman enportan dan lafason ki nou’n prezant sa Mosyon e dan lafason ki nou’n ekrir li ; akoz i enportan pou nou konpran en pti pe rol ki nou konman Manm Lasanble nou bezwen zwe, an relasyon avek rol ki Egzekitiv i bezwen zwe. Mon dir sa Mr Speaker, akoz si nou end-up avek en sityasyon kot se nou ki form parti sa desizyon, apre sa alors lekel ki pou fer oversight ki nou menm nou, nou pou form parti pou nou pran? Nou pou kree en sityasyon kot nou pe fer oversight lo nou menm, ki pa fer sans. Se sa nou rol. E mon konpran kot entervenan avan mwan in koze, kot nou pe koz lo konsiltasyon. E se pou sa rezon ki, avan mon kontinyen mon ti a kontan propoz avek mover Mosyon pou konsider sa eleman. Ou Mosyon i koz ganny enkli dan desizyon.  Mon ti a prefere vwar oubyen mon krwar i ti a meyer pou nou vwar, kot nou pe koz plis konsiltasyon ant tou dimoun ki annan rol dirizan dan distrik, avan ki desizyon ki afekte sa distrik i ganny pran. Rezon pou sa se akoz ler ou dir li dan la fason ki ou’n dir li avan, i vedir poudir ou parti prenant sa desizyon ki’n ganny pran. Akoz desizyon final i bezwen reste en aksyon Egzekitiv pou ki nou konman Lasanble Nasyonal, nou kapab egzers nou rol oversight lo la. Si nou cross sa boundary e nou antre dan en eleman kot nou overlap desizyon ki nou pran, eski alor nou pe osi dir ki Egzekitiv i kapab antre dan desizyon ki Lasanble Nasyonal i pran ?   E finalman eski nou pou annan en sityasyon kot nou pou annan en lot overlap dan desizyon ki Lakour pou pran avek Lasanble Nasyonal ek Zidisyer ? Nou’n etabli en sistenm gouvernans kot nou le maintain en separasyon pouvwar. Si nou oule maintain en separasyon pouvwar.  Si nou oule maintain en separasyon pouvwar,  then nou bezwen apresye lenportans separasyon pouvwar e rol ki Lasanble Nasyonal i bezwen zwe. Par egzanp nou’n servi legzanp ki Onorab De Commarmond in vini avek yer pou demann kestyon Minis. Mon pa krwar ki Onorab De Commarmond ti pou etikman byen si i ti vin demann sa kestyon si li i ti’n pran par desizyon ki ti’n ganny pran kot landfill a sa letan. I ti pou dan en catch 22 akoz i ti pou’n partly responsible pou sa problenm ki’n ganny kree. E apre i ti pou pe demann kestyon lo menm problenm ki li i ti’n donn lanmen kree.  Me par kont, si i ti’n ganny konsilte e par lefe ki se li ki reprezant dimoun Cascade, i ti’n ganny konsilte, dimoun Cascade ti ava’n met son konsern devan li e la li i ti ava’n kapab transmet sa bann konsern tel konman bann ki’n adrese atraver bann kestyon ki’n anmennen yer. Se pou sa rezon ki nou bezwen konpran rol ki nou zwe konman MNA, pe enport si ou en MNA proporsyonnel ; si ou’n ganny elekte Mont Fleuri ; ou’n ganny elekte Anse Boileau, ou’n ganny elekte Bel Ombre, e anywhere else okenn dimoun ki i annan en problenm i vini i vin vwar  ou, i  pou dir ou, ‘‘Onorab mon annan en kestyon mon le demann ou, mon annan tel issue.’’ I ou rol, i ou devwar konman MNA ou sey pas sa konsern devan. Si par egzanp mon santi ki poudir lopital Anse Royale i annan en issue avek, mon pou al kot Minister Lasante mon pou demann poudir, ‘‘Be mon anvi al Anse Royale pou al vizite.’’ Mon pa pou demann permisyon ni MNA Anse Royale, mon pa pou demann permisyon personn, akoz i mon rol mon la konman en reprezantan lepep dan Lasanble Nasyonal. Se sa rol Lasanble Nasyonal. Enn son rol se reprezantasyon ; dezyenm rol se oversight e trwazyenm se Lezislasyon.  Me nou dan nou pei e bokou lezot pei Commonwealth la nou’n azout en katriyenm rol e sa se ledikasyon. Kot nou edik nou pep lo son drwa, lo son rol ki i annan pou li zwe.     I certe ki klima politik i fer ki nou annan lezot deba ki nou ti napa avan. Be i neseser akoz evolisyon koumsa i pase. Nou pa kapab dir ki nou le sa deba, me apre nou le kree en menm sistenm ki nou ti annan oparavan ; ki nou menm nou nou’n dir i pa’n marse, i pa bon. Konbyen fwa nou’n tann konplent ki en dimoun, desizyon in ganny pran par Lotorite Distrik en dimoun pa’n ganny involve eksetera. Nou pa kapab kree menm sityasyon. E i pa vedir ki si demen okenn antre nou, i antre dan Gouvernman whether lo lot kote ouswa lo sa kote, nou pou kapab rezourd tou problenm dizour o lannmen. Sa ki’n travay dan Civil Service i konn tre byen ki pa tou problenm ki ou kapab rezourd dizour o lannmen. Me sa ki reste primordyalman enportan, se ki ou bezwen annan en checks and balance ; ou bezwen annan en dimoun ki pe dir ou, ‘‘ E, sa direksyon ki ou pe ale la, i pa en bon direksyon.’’ E se sa rezon akoz ki nou la konman Lasanble Nasyonal. E se pou sa rezon ki Mosyon konman in ganny worded e mon konpran lentansyon mon frer Onorab Sandy Arrisol kot pe vini, ler in met sa Mosyon devan nou, me mon krwar poudir son bi se koz lo konsiltasyon ki devret annan pou ki i ganny enkli dan sa konsiltasyon. Mon pa krwar Onorab i le enkli dan desizyon li menm akoz sa i met li dan en sityasyon kontansye, ler li i bezwen al fer en kontansyon anver sa desizyon ki’n ganny pran. E se sa ki mon ti a kontan lezot Manm Lasanble i apresye anver nou rol konman Manm Lasanble Nasyonal. Nou bezwen aprann apresye sa separasyon pouvwar, ki bann Leaders, nou bann diferan Lenstitisyon in koz lo la resaman dan en Press Release. Akoz i sacrosanct. Once nou konmans overlap sa, Egzekitiv i enterfer dan Lasanble, Lasanble i enterfer dan Zidisyer, nou annan nou en nespes kalite dezord, ki nou pa konnen kote nou pe ale, kote nou pe vini. So mon ti a kontan konnen ki pozisyon ki mover Mosyon pou pran lo la, pozisyon Mosyon anfendkont. I pa mon lentansyon pou mwan retir karpet anba son lipye, amann son Mosyon e fer li vin en lot zafer, me selman kontrerman avek lezot Onorab lo lot kote latab, ki mon konnen poudir zot pe enpasyan pou reponn komanter ki mon’n fer e mon ava ekout avek latansyon komanter ki zot fer. Mon ti a kontan Onorab ou konsider mon pwen, pa akoz i en Manm Lopozisyon ki’n anmenn sa Mosyon ; me akoz mon en Manm Lasanble e mon pran li konman rol Lasanble kote nou sipoze stand e kwa ki pou permet nou delivre nou louvraz efektivman. Nou rol is oversight on the action, not the action itself. Se pou sa rezon ki nou annan Egzekitiv. Se pou sa rezon ki nou bezwen les li enplimant son progranm. Si son progranm pa bon, se la kot nou pou dir i pa bon. Si en Fisheries Agreement pa bon, se la ki nou pou dir pa bon. Si i annan en eleman ki pa bon se la ki la ki nou form en Komite pou investigate. Se sa nou rol, se pour sa ki dimoun in met nou la – pou reprezant zot. E wi sertennman mon krwar fermeman dan konsiltasyon, akoz parey nou tou nou’n dir, i annan en memwar istorik dan serten landrwa kot en miray pe ganny fer e kot en larivyer i pase kot petet enzenyer i pa’n pran konsiderasyon, me ki sa dimoun i konnen. Me si i napa en dimoun pou anmenn sa pwen devan, kote i pou anmennen ? Mon krwar zot pe konpran mwan. So se pou sa rezon ki mon ti ava enplor Onorab ki’n bouz sa Mosyon konsider revizyon, si nou pe koz lo desizyon annou plito koz lo part of the consultation process zis parey mon krwar Onorab Afif ti pe lead dan direksyon ki i pe ale, me dan plas ki nou koz lo enkli nou dan sa desizyon li menm. Mersi Mr Speaker.

 

MR SPEAKER

Mersi Onorab Pillay. Onorab Ernesta.

 

HON PAUL ERNESTA

Mersi Mr Speaker. Bonn apre midi Mr Speaker e tou bann koleg Onorab e tou bann dimoun a lekout. Mr Speaker mon pran laparol ozordi, mon santi mwan en pti pe avantaze lo sa Mosyon ki’n ganny anmennen, par le fet kot mon menm, mon’n deza en ansyen Administrater Distrik e sa i permet mwan konn en pti gin konteks ki Onorab Arrisol pe anmennen, son largiman e mon pou osi dakor avek Onorab Pillay dan son lentervansyon kot in dir nou bezwen fer sir ki nou, nou pe zwe byen nou rol as oversight. Me i enportan ki nou konpran reelman kwa District Team. Petet mon a donn en pti apersi, District Team i sa body kot i anglob tou bann Lazans, nou pe koz Sosyal, PUC, kote kot Sport, name it, Welfare, tou bann dimoun i zwenn ansanm kot zot diskit, parey i annan bann konsern ki i anmennen. Me lo sa platform napa okenn desizyon ki ganny mete, akoz la nou pe annan zis bann reprezantan e MNA pa’n zanmen dan okenn lenstans asiz, form parti sa Komite. E la sa bann konsern ki ganny anmennen, par egzanp si i annan en konsern SPTC, sa reprezantan SPTC i pran son konsern i anmenn kot son Lotorite e kot son siperyer, la zot pran desizyon. E la apre i report back to lo Komite baze lo desizyon ki son Lorganizasyon in pran. Mr Speaker, Sesel li i annan li en sistenm prezidansyel ek Gouvernman. I striktire dan sa 3 Brans parey Onorab Pillay in dir Zidisyer, Lezislatif e Egzekitiv. Dan nou Konstitisyon referans i ganny fer lo sa 3 Brans e bokou i ganny dir lo zot rol e sirtou lo sa laspe separasyon pouvwar. Aktyelman i annan en seri meeting ki pe ganny fer lo nivo distrik par CEPS e la ki zot pe eksplik reelman kwa ki bann rol sa 3 Brans Gouvernman. E osi zot koz byen kler lo rol nou konman sa Lezislatif ki ganny fer. Minister Gouvernman lokal li i annan en rol fasilitater e administratif lo nou distrik. Me malgre i form parti Brans Egzekitiv, Minister i toultan annan li en lapros kolaboratif avek en reprezantan dan Lasanble Nasyonal. Apre eleksyon Lezislatif, nou ava mazinen,  nou rapel kot Minister Gouvernman lokal ti fer en seri miting avek nou tou bann Manm MNA Elekte ansanm avek Minister Gouvernman Lokal ; kot la zot ti etabli en prosedir ki mannyer keksoz pou ganny fer ; ki bann rapor nou kapab anmennen e nou Lezislatif avek lo nivo distrik. Petet la pa konnen si keksoz ki pa pe mars ase byen, petet sa ki pe prompt Onorab Arrisol pou anmenn sa Mosyon devan e petet i bezwen annan plis kolaborasyon, plis konsiltasyon ki nou pe demande. Mon get mwan par egzanp dan mon distrik depi ler nou’n  ganny elekte, nou pe travay e kot mon’n ganny sans zwenn avek mon DA kot ansanm, annefe nou napa en DA actually la nou annan en Acting DA, kot mon’n ganny sans zwenn pou nou kapab diskit bann keksoz an relasyon avek konsern nou bann zabitan e osi vwar ki bann fason pou nou kapab anmenn solisyon pou rezourd bann problenm. E la petet lanfaz i bezwen ganny mete lo sa kolaborasyon ki bezwen ganny annan ant MNA e osi avek DA.  Parey nou ti ganny zwenn letan nou ti konmanse, i enportan si nou, nou pa pe ganny sa sipor neseser, annou retourn kot Committee Development, annou retourn kot zot annou dir, ‘’Vwala bann difikilte ki nou pe gannyen, ki nou pe fer fas avek.’’ Kot zot osi zot ava kapab anmenn solisyon, nou pa zis reste dan kwen apre nou dir, annou fer koumsa. Non. Nou la konman sa Lotorite dan distrik  pou nou kapab anmenn nou konsern devan avek Committee Development. E osi i enportan ki parey nou’n dir tou nou bann mechanism lo nivo distrik i ganny respekte. Par egzanp la ki nou pe koz lo sa District Team, District Team i ganny etabli pou rezon annan en lapros komen par bann Lazans ki ofer servis lo nivo distrik. District team i en forum parey mon’n dir pli boner, i en forum aksyonner kot bann manm i zwenn enn fwa par mwan kot zot deal avek bann ka pertinan e ansanm solisyon posib. E atraver zot travay, zot ede devlop sa lespri partnership osi byen ki sa lespri lekip. Zot osi partaz lenformasyon an relasyon avek bann servis ki’n ganny ofer lo nivo distrik. E i enportan pou fer resorti ki DA pa pran okenn desizyon li tousel. Desizyon i ganny pran an konsiltasyon avek zabitan enkli MNA e i enportan ki dyalog ant DA ek MNA i la. E  i enportan ki zot koze e dyaloge ek kanmarad e sa i ganny fer avek respe e vize ver byennet zabitan e lakominote. Mr Speaker, sa size separasyon pouvwar i enportan – sirtou avek eleksyon nouvo Konsey Distrik lannen prosen i enportan ki sa kolaborasyon i egziste, sa dyalog i egziste me sak Brans pa devret pe ganny vwar pe enterfer dan fonksyon. Mr Speaker, i vreman enportan sa. I enportan ki sakenn de nou, nou fer sa zefor pou ki sa lespri kolaborasyon i marse e desizyon i ganny pran dan lentere zabitan e kominote an zeneral. Mon pa vwar ki Minister Gouvernman Lokal i bezwen reviz son rol. Sa konsiltasyon i deza egziste, nou konman MNA nou bezwen osi konpran nou rol byen e devlop en relasyon avek travay avek DA. Dan sa konteks mon pa krwar ki Lezislatif, Egzekitiv i devret reviz rol Minister Gouvernman Lokal, nou annan en Eleksyon Konsey Distrik devan nou e sa osi pou anmenn serten sanzman dan lafason ki Administrasyon Distrik i fonksyonnen, tou an prenant kont bann rol Egzekitiv. So Mr Speaker parey Onorab Pillay in demann Onorab Arrisol pou li kapab sey revwar the context par fason ki’n anmenn sa Mosyon, kot la i ava kapab anmenn, demann plis sipor, plis kolaborasyon avek District Team e Konsey ki pe vini tre byento. Mersi Mr Speaker.

 

MR SPEAKER

Mersi Onorab. Onorab De Commarmond.

 

HON CHARLES DE COMMARMOND

Mersi Mr Speaker. Mr Speaker sa Mosyon ki devan nou, malgre mon konpran son lentansyon, son wording definitivman i bezwen sanze.  Petet  ansanm la nou ava fer en serten provizyon.  Me apre nou bezwen get dinamik ki  nou ladan.  Enn  Lalwa Gouvernman Lokal in fini sanze akoz nou Lalwa District Council in fini,  nou’n fini pas lo la in fini vote in fini aprouve.   E Lalwa District Council.  E Lalwa District Council i pou  permet sa bann lenstans dan distrik ki nou pe koze, sa bann lafors, sa bann dimoun ki annan en rol Leadership whatever – i pou enkli dan sa prosesis konsiltasyon ler District Council i ganny elekte.  Sa en pwen.  2enm pwen se ki, ki  nou pe dir ant la ek eleksyon District Council dan sa peryod letan nou pe demann Gouvernman, nou pe demann Gouvernman pou ler i pe pran desizyon ki sa desizyon pou annan en lefe, en lenpak lo sa distrik, pe demande ki Gouvernman i enkli Lotorite Distrik.  E la Lotorite Distrik i pa zis DA i enkli  MNA si i annan en 3enm, en 4enm dimoun mon pa konnen ki form par sa Lotorite Distrik i ava ganny enkli dan sa prosesis konsiltasyon pou ki sa desizyon pou ganny pran en pe parey yer mon ti pe sey sizere mon ti met devan Minis, be sa ou pa pou bezwen al amann Lalwa Gouvernman Lokal ankor sa.  Nou pe dir Gouvernman antretan, akoz Gouvernman in fini pase Lalwa pour District Council.  E District Council i pou permet sa, i pou ok li letan District Council i ganny…e li antretan  nou pe dir avek Gouvernman silvouple enkli Lotorite Distrik dan prosesis konsiltativ letan en desizyon ki annan en lenpak dan en distrik or lo en distrik, i ganny pran.  Mon – e mon krwar si i al dan sa direksyon loter Mosyon – si  i ok avek ou mon krwar koumsa or nou kapab azout sa pti bout dir, ‘’antretan ki  Eleksyon Distrik Council i ganny fer.’’  So pou mwan si koumsa  mon ok mon krwar i ava en bon Mosyon so nou kapab nou tou siporte.  Si i pa koumsa then mon vwar li en pe parey mon koleg Onorab Sebastien in dir then i pou impede lo nou rol oversight.  Sa i serye e nou  menm nou, nou pa kapab fer sa bann melimelo.  So vwala m on pwen an bref e mon sizer sa. Mersi.

 

MR SPEAKER

Mersi Onorab De Commarmond.  Onorab Loizeau.

 

HON NORBERT LOIZEAU

Mersi Mr Speaker.  Bonzour tou dimoun, bonn apre midi.  Mr Speaker mon pe fer  mon lentervansyon pou mon donn sipor anmennen par Onorab Arrisol, akoz mon santi ki vreman nou merit ganny enkli lo serten  desizyon koman bann Leaders ki’n ganny elekte dan nou distrik.  Me par kont Mr Speaker mon’n tann Onorab Ernesta in koz lo – i enportan ki MNA i koz avek nou DA.  Pou le moman korperasyon avek mon DA mwan i fantastik,  nou koze.  Me selman apre en bon pe tapaz ki mon’n fer dan  Lasanble kot mon’n tap zot en pe, la apre ki mon’n vwar keksoz in konmans aranz en pti git.  Akoz senpleman  ki nou pa ti pe ganny nanryen avek bann DA.  Nou ti zwenn  DA nou pa ti pe ganny nanryen, zis vini nou zwenn nou sorti koumsa menm nanryen pa’n marse.  Me petet si nou koman   MNA elekte nou ti ganny enkli dan sa miting olye ki DA i vin dir nou i ti pou pli bon. Ou ti pou tann sa keksoz dan nou prop zorey.  Nou pa ti pou tann li dan en fason ki DA  pou vin dir nou.  DA li i annan son fason pou vin dir nou.  Petet i annan keksoz ki’n pase ki  pa pou zanmen dir nou.  E de plis ki sa  Mr Speaker akoz ki mwan mon ti a kontan lo sa District Team, senpleman akoz sa District Team nanryen pa marse.  Zot konn tre byen.  Onorab Ernesta in donn en legzanp lo bann diskisyon ki zot fer.  In donn en legzanp lo bis, si zot annan en problenm bis, zot deal avek sa dimoun ki soz ek SPTC pour soz – Distrik Bel Air i annan problenm bis i date depi de lannen.  I annan lannen mon ti dan Lasanble katriyenm Lasanble i annan problenm ziska ozordi i ankor la.  Pa mars zanmen.  Kan ki keksoz i marse Mr Speaker, se kan MNA i vin fer tapaz dan piblik, tou dimoun i tande la ki keksoz i marse.  Tan ki i annan sa pti group sekre laba ki pe diskit bann keksoz nanryen pa pou marse. Les mwan koze Sebastien…apre ou a…relax ou lekor ou.  Mr Speaker mwan mon anvi, mwan mon ti a kontan parey  Onorab Arrisol in dir pou ganny enkli lo sa bann team, District Team ki pran bann  desizyon distrik.  Senpleman akoz ? Mwan konman Manm Lasanble pou Bel Air mon pa pe fer sa zis pour mwan mon.  Mon pe fer li pour Sesel.  La nou pe deal avek  lavenir Sesel la.  E de plis la zot le sanz  wording Mosyon.  Pandan tou sa Lasanble ki’n la zot annan mazorite zot.  Zot in vin ek tou sort kalite keksoz la dan Lasanble – nanryen pa’n marse.  Ozordi zot pou vin montre fodre sanz wording.  Selman zot avan zot pa ti fer.  Onorab Sebastien ou’n dan Lasanble, 5enm Lasanble zanmen nanryen in marse selman ou la.  La ozordi ler Onorab Arrisol i met  Mosyon ou trouve wording i mal  fodre sanz ‘wording. ‘

 

MR SPEAKER

Order! Order! 

 

HON NORBERT LOIZEAU

Fodre sanz ‘wording.  Nou, nou le vin ek sa nou akoz nou anvi keksoz marse, Onorab Arrisol, nou anvi keksoz i bouze.  Sa ki nou anvi nou.  Ou krwar nou pe fer li pou nou?  Pou nou ganny popilarite?  Nou anvi ki nou distrik i bouze Mr Speaker.  Ozordi Mr Speaker, zot pe koz lo konsiltasyon.  Gouvernman pe konsilte, akoz pe konsilte? Akoz zot anvi nou fer li ansanm parey Onorab Gill i kontan dir, ‘’Together!’’  Nou pe fer li ‘together’ nou ansanm avek zot.  Pa krwar nou pe  propoz sa akoz nou anvi fer li nou tousel.  Nou anvi. Mon’n koz ek  Onorab Ernesta taler in dir mwan li i pa lo sa District Team.  I pa lo sa District Team.  Mon’n koz ek li mon’n vwar lo son figir i ti a kontan lo la li ler in koz ek mwan.  Mon’n santi, mon’n vwar i ti a kontan   lo la.  Mr Speaker ou vwar parfwa, parfwa ou konnen akoz keksoz zanmen i marse? Akoz zot le fer keksoz toultan zot tousel  Mr Speaker.  Ozordi si nou ti fer keksoz ansanm District Team nou ti enkli nou ti konnen ki pe pase, ozordi mon asir ou Onorab De Commarmond i pa ti pou  pe lager avek loder lo landfill li tousel!  Nou osi nou ti [ou la pou soutenir akoz nou ti pou konnen sa problenm.  Ozordi i pe lager ek landfill i annan 25an i pe lager ek landfill, loder, salte sepa ki zafer.  25an Mr Speaker akoz nou pa pe ganny enkli lo la.  Pa pe konnen ki pe arive alors nanryen pa  marse.  La gran mersi in vin ek sa dan Lasanble, mon  krwar i fer pres 5enm fwa depi ler Lasanble in vin ek sa.  Mwan mon la mon’n tande.  In deza vin avek sa bann keksoz.  La ler in vini ansanm ek nou ‘Together nou’n  kestyonn Minis ; nou’n anvoy enn de pti labwet nou osi, pou sey gete ki mannyer pou kapab rezourd sa problenm laba.  Mon krwar Onorab De Commarmond i pou dakor ek mwan lo sa size.  Mr Speaker, zot merit konpran  laba, en mayon dan en lasenn i bokou pli bon ; i fer li en pti pe pli gran, i fer li pli for.  Omwen  i fer ou ariv ankor en pti bout devan.   Ou vwar?  Mr Speaker la en keksoz ki mon anvi vin tous lo la – sa District Team mon krwar i annan en serten Proze Distrik ki zot tous lo la.  Mwan mon’n antre dan Lasanble Septanm, bout Septanm bann pti proze ki’n organize pou fer dan distrik, mwan mon pa’n konnen.  Kan  ki mon konnen ?  Sa lannen la ki mon’n ganny detrwa dokiman konmkwa i annan tel proze in ganny fer.  Mon pa’n konnen mwan.  Sa lannen ki mon konnen. In fini ganny fer, in fini peye.  Mwan osi mon ti a kontan involve, konnen sa bann pti proze.  Si i enkli dan District Team sa bann pti proze kot  zot diskite konbyen pou arive ;  kot mon ti ava vwar ki sa peron kot madanm  Savy Bel Air, 5 mars peron pa arive R75 mil parey ki mon’n vwar lo papye.  5 mars peron R75mil.  Kot petet mon ti a konnen, mon ti a dir,’’ Be non R75 mil tro bokou.’’  5 peron petet R25 mil, 4 bal siman, lot, lot, lot.  R75 mil.  Bann Bus Stop R3milyon ki pe fer, ki zot diskite an sekre.  Zis nou vwar. Petet nou ti a la zot konman bann MNA  si zot pa lo la, zot ti ava lo la pou zot vwar mannyer sa bann keksoz i vini. E de plis Mr Speaker mwan mon en Manm Lasanble Elekte dan distrik.  Lanmwatye dimoun Bel air in vot pour mwan pou vin koz lo zot problenm, pou koz isi.  Mon’n debout pou LDS konman kandida pour LDS. Me ozordi mon Manm Lasanble pou tou dimoun Bel Air. Alors i enportan ki mon enkli ladan.  Mon enkli pou mwan konnen parey Onorab Afif in dir lekel ki lo priyorite lakaz ?  Mon fek ganny en form la lekel  ki lo priyorite.  Mon pa’n diskite sa mwan. Zis mon’n ganny en form i annan sa, sa, sa, sa li i lo priyorite. Mannyer i diskite mon pa konnen, selman mon MNA tou lazournen bann dimoun pe call mwan. Ou vwar.  Pa ankor gannyen, fer tapaz, koz lo…

 

MR SPEAKER

Onorab Vidot.

 

MR SPEAKER

Onorab Loizeau,  esper en pti moman.

 

HON NORBERT LOIZEAU

Yes, sorry Mr Speaker.

 

MR SPEAKER

Onorab Vidot si ou anvi koze lev ou lanmen, mon a met  ou non lo mon papye.  Pa ou ler koze la.  I annan en lot dimoun pe koze.  Kourtwazi komen i demande pou ou ekoute.  Fotespere ou’n ganny mwan kler.  Kontinyen Onorab Loizeau.

 

HON NORBERT LOIZEAU

Mersi Mr Speaker.  Mr Speaker mersi e an terminan Mr Speaker, mon a anvi fer zot konnen ki ler mon’n  etidye pandan tou sa bann lannen mwan mon pa pe akiz zot mwan konmkwa ki zot pa pe fe nanryen, me selman pandan tou sa bann lannen mon kapab konpran akoz nanryen pa’n fonksyonnen; se akoz sa latitid sekre laba.  Sekre keksoz an sekre pa pou anmenn zot nanryen.  Ozordi nou dan koabitasyon ki nou pe fer.  Keksoz pe marse nou kapab koze ansanm.  Zot, zot kapab agree lo serten pwen.  I annan serten keksoz ki zot,  zot dir laba ki mon kontinyen, ki mon dakor avek.  Taler Onorab Valmont in fer sorti enn de pwen serye avek Minis Adam, mwan mon’n aknowledge.  Mon kontan.  Sa ki nou pe fer la nou pe fer li pou Sesel. E alors nou bezwen travay ansanm.  Parey mon’n dir Mr Speaker an terminan en mayon an plis dan en lasenn i en pti pa an avan.  Alors konpran nou ler nou pe vin ek sa, akoz mwan dan distrik bel Air mon santi mwan kwense akoz mon pa tro, tro konpran ki pe pase.  Ok ?  Avek sa, petet a permet mwan konpran en pe pli byen.  Partisip en pe pli byen dan mon distrik, fer bann propozisyon ki valab  lo sa  District Team la ; akoz lo sa District Team la zot vini  zot fer miting sa ki zot koze i fini la anndan, nanryen pa marse.  Mr Speaker mon pou termin la e mon a dir ou mersi pou donn mwan sa  pti sans pou entervenir.  Mersi.

 

MR SPEAKER

Mersi Onorab Loizeau.  Onorab Woodcock.

 

HON WAVEL WOODCOCK

Mersi Mr Speaker.  Mr Speaker pou konmanse mon a zis relir sa Mosyon ki pe ganny prezante par Onorab Arrisol ;  ‘’Sa Lasanble i demann Egzekitiv pou reviz rol Gouvernman Lokal, pou permet tou dimoun ki annan rol dirizan dan distrik pou ganny enkli dan desizyon ki afekte sa distrik.’’  Mon repete,  ‘’ki tou  dimoun ki annan en rol dirizan dan distrik.’’  Me selman Mr Speaker la realite se ki pa tou dimoun ki annan rol dirizan dan distrik ki pe ganny involve dan District Team.  E sa nou konn tre byen lo sa kote latab i marse e lo sa lot kote latab osi i konn tre byen.  Dan lepase les mwan vreman eksplike  ki si sa District Team dan en distrik.  District Team dan  distrik – dan le pase in toultan en zouti politik.  Dan laplipar distrik plis ki 90 poursan bann District Team se bann siporter e aktivis Parti Lepep.  Ekoute.  Nou’n vwar plizyer fwa e dan plizyer Eleksyon dan lepase, sa bann menm dimoun lo District Team zot menm zot ki pe savoy dimoun dan Eleksyon, zot menm zot ki pe louvraz campaign lo semen.  District Team i larealite.

 

MR SPEAKER

Onorab Woodcock.  Pause.  Wi Onorab Ernesta.

 

HON PAUL ERNESTA

Mersi Mr Speaker.  Mon pou demann Onorab Woodcock pou li  substantiate sa ki i pe dir akoz sa  ki i pe dir i pa le ka parey mon ‘n eksplike.  Konpozisyon District Team i reprezantan tou bann Lazans ki annan pou fer avek travay dan distrik par egzanp, SPTC, PUC, Employment e menm mon rapel letan mon ti DA dan konpozisyon District Team Takamaka ti annan reprezantan bann dimoun Lopozisyon osi ki ti form parti sa Komite.  Mersi Mr Speaker.

 

HON WAVEL WOODCOCK

Mr Speaker, li i pe koz pou li, mwan mon pe koz dan mon konteks dan distrik ki mon sorti. Larealite se ki dan sa District Team, mon annan manm ki’n vin kot mwan avek bann recording bann keksoz ki’n ganny dir dan District Team kot bann fo propagann pe ganny fer kont bann MNA Lopozisyon. E pa zis mwan ki konn sa. Mwan mon pou dir ou Mr Speaker se i la realite lepase, tou lepep Seselwa i konn sa, nou dan Lopozisyon nou konn sa tre byen ki District Team dan lepase in ganny servi konman en zouti propagann. I pa’n zanmen ganny byen reprezante. Ok, annou get legzanp Grand Anse Praslin District Team, sa bann dimoun ki reprezant Lasosyasyon bann Businessmen ; tou sa bann businessmen kle ki i annan Praslin ou pa vwar zot. I annan plizyer bann leaders, bann dimoun kle dan Praslin ki ti merit lo sa District Team zot pa lo la. I larealite e mwan kontrerman avek sa ki Onorab Loizeau pe dir, mwan mon asire e mon krwar dan lepase ki menm MNA ki ti avan mwan la, avan, ti ale dan bann miting District Team e dan plizyer distrik bann MNA Lepep, zot in lo District Team. Kekfwa enn ou de me selman la mazorite bann MNA dan lepase, zot in la dan bann miting District Team ki’n ganny fer. In fact sa ki i enteresan se ki menm pou note, kekfwa i pou sorti pli tar, menm bann kandida Lepep ki’n perdi dan Eleksyon lepase zot pe atenn bann miting District Team dan serten distrik. Anyway Mr Speaker, mon sa ki mon anvi se dir se, Mr Speaker, se ki le problenm, Prezidan Faure in koz lo egalite, latransparans…

 

MR SPEAKER

Hold on, Onorab Woodcock, mon a ekout Onorab Pillay i dir i annan en point of order ; dir mwan ki point of order ou annan Onorab Pillay. Silvouple.

 

HON SEBASTIEN PILLAY

Thank you Mr Speaker. Mr Speaker, mon konpran mon koleg pe fer son pwen dan son konteks me selman mon ti a kontan ou substantiate. Ou’n dir i annan distrik ki annan bann kandida ki’n perdi eleksyon ki lo District Team. Mon ti a kontan ki ou substantiate e ou dir nou vi ki nou dan en Lasanble ki ouver… Non, non, ou substantiate ki distrik ki annan sa kandida ki pe atenn sa District Team meeting, please.

 

MR SPEAKER

I dir eski Mr Onorab Woodcock, eski ou dir ki pe oubyen ki ‘ti’?

 

HON WAVEL WOODCOCK

Non, ki ‘ti’.

 

MR SPEAKER

Mwan mon konpran, kantmenm mon zorey, Onorab Pillay.

 

HON WAVEL WOODCOCK

Non, ok, mon a eklersi sa Mr Speaker.

 

MR SPEAKER

Mon zorey i en pti pe pares me selman mon konpran ki ti. Eski ou kapab confirm sa?

 

HON WAVEL WOODCOCK

Wi, ki ‘ti’ Mr Speaker.

 

MR SPEAKER

Eski ou annan problenm avek sa Onorab Pillay? Akoz nou bezwen fer distenksyon, tou Manm Onorab ki la, zot politisyen. Ler en Onorab i fer en entervansyon i annan drwa eksprim en lopinyon politik, pour vi i pa pe anmenn okenn non personn endividi into disrepute. Alor Onorab Woodcock si i dir i ti annan dimoun ki li i konnen ki ti sa, i son drwa pou li eksprim sa. Ou satisfe ek sa? Silvouple kontinyen Onorab Woodcock.

 

HON WAVEL WOODCOCK

Ok, Mr Speaker. Ou konnen Prezidan Faure in koze ki ozordi zour napa nanryen ki kasyet, tou keksoz i ouver – in the open, dan lespri konsiltasyon, dan lespri transparans, la demokrasi, me le problenm se ki still, mwan mon konn sa tre byen e ki District Team pa byen ganny reprezante. I annan bann dimoun ki ti kapab dan Lotorite dan distrik ki ti merit dan sa District Team, zot pa lo la e bokou fwa i pou rezon politik. Parey en konparezon Praslin, bann Leaders Relizyez, i annan bann lezot Departman, bann Lasosyasyon, tousala. Mon krwar i enportan kot i annan en lopinyon lo bann issues distrik. Ok? So mwan mon pe dir fransman Mr Speaker, poudir District Team i merit, i met en tim ki enparsyal, ki annan bon reprezantasyon. E i enportan osi pou Manm Lasanble Nasyonal kapab at least detanzantan, detanzaot, zwenn avek sa tim osi. Akoz nou osi nou annan en lopinyon, nou osi en Lotorite distrik. nou bezwen kapab… nou ki ansarz distrik, nou ki Manm Elekte sa distrik, ki mannyer nou pa kapab, i annan bann issue ki pe ganny diskite lo nivo distrik ; nou pe anmenn konsern nou zabitan devan dan Lasanble Nasyonal, bann keksoz pe ganny diskite deryer nou ledo, laplipar di-tan i dan kasyet. E dan sa bann miting en bann mannigans pe deroule ki mwan mon pe dir ou, i annan bann dimoun dan distrik i anmenn bann recording bann keksoz ki pe ganny dir, e menm bann fo propagann lo mwan konman en MNA Grand Anse Praslin in arive. Mon pe dir sa in arive dan lepase e pa zis mwan. E pa zis mwan. Mr Speaker sa ki mon pe dir, se ki nou bezwen sanz sa bann lapros, nou bezwen annan en District Team ki byen reprezante. Nou bezwen arete avek sa bann zafer servi bann pti groupman sekre, pou nou fer bann propagann politik oubyen pas ou letan kritik e undermine bann travay oubyen Lotorite ki la, Manm  Lasanble Nasyonal. Mr Speaker i en realite lefe, this is the elephant in the room ki nou pa pe adrese e ki tou lepep Seselwa i konnen. Sa ki mon pe dir Mr Speaker, mwan mon pou donn mon full sipor sa Mosyon, akoz mon krwar si nou pe koz dan lespri latransparans, la demokrasi fodre tou keksoz i bezwen kler, i bezwen drwat, i bezwen in the open, kot tou dimoun i okouran ki pe pase. Mersi Mr Speaker.

 

MR SPEAKER

Mersi Onorab Woodcock. Avan mon donn laparol lot entervenan, Onorab Ghislain mon pa’n konpran ki ou pe esey fer mon siny. En pwen klarifikasyon ? Ok, go ahead.

 

HON CHANTAL GHISLAIN

Mr Speaker, letan mon pe ekout Onorab Woodcock, annou pa konfiz dimoun ler i dir nou en District Team ki regroup tou bann Lazans Gouvernman, be nou pa kapab anmenn Pret, i pa en Lazans Gouvernman. Nou pa kapab anmenn bann businessmen ki pa form parti Lazans Gouvernman, pa konfiz dimoun. Sa mon pwen klarifikasyon Mr Speaker.

 

MR SPEAKER

Mersi. Onorab Woodcock, ou le anmenn en…

 

HON WAVEL WOODCOCK

Mr Speaker, mon annan mon lalis mon District Team pou Grand Anse Praslin, i enkli bann dimoun ki involve avek business e plizyer dimoun ankor, bann lezot Leaders dan lakominote. So mon pa konnen ki mannyer pou La Digue dan lepase ti marse, akoz i nepli MNA Elekte pou La Digue kekfwa Onorab Sophola i kapab eksplik nou ; me selman Grand Anse Praslin lo District Team i annan plizyer bann lezot dimoun ki pa neseserman dan Lotorite LWMA ouswa MLUH, i annan bann lezot dimoun bann leaders ki lo sa District Team e sa se larealite. Mersi.

 

MR SPEAKER

Tre byen. Bon, avan on donn laparol Onorab Ghislain petet pou klarifikasyon. Si mon zorey in tann ou byen taler, Onorab Ernesta ou dir ler ou ti DA ou ti lo District Team, eksplik nou, pou Takamaka mon sipoze ou pe dir ou ti DA, donn nou lalis lekel ki ti lo ou District Team ler ou ti DA Takamaka.

 

HON PAUL ERNESTA

Mersi Mr Speaker. Dan konmansman mon lentervansyon mon ti dir ki District Team son konpozisyon i enkli bann parey Onorab Ghislain i dir bann Lazans Gouvernman ki enn par egzanp SLTA, SPTC, PUC, Employment, tou sa bann Minister, teachers, tou sa bann… Lasante, tou sa bann zafer ki i annan en servis ki pe rann lo lakominote. Zot zwenn ansanm enn fwa par mwan, sa konpozisyon e plis ankor. I pa personn ki nomin sa bann dimoun pou asiz lo sa Komite, i zot Head sa lorganizasyon ki nomin sak endividi pou pran par, pou vin asiz lo sa Komite, reprezant sak distrik. Mersi Mr Speaker. Pou klarifye ankor MNA pa asize lo sa Komite parey mon’n dir sa Komite i zis en Komite kot bann keksoz i vin ansanm e bann desizyon apre bann issue ki ganny lev-e, i anmenn kot zot bann lorganizasyon; par egzanp, parey mon’n dir si SPTC i annan en konsern bis dan sa distrik, sa reprezantan SPTC swa Lapolis nenport i pran sa konsern i anmenn kot sa lorganizasyon pou zot deal avek. E apre the next month, the next meeting i vin ek report lo la, i vin de diferan zafer pou pa konfize. Mersi Mr Chair.

 

MR SPEAKER

Ou’n reponn mon kestyon, mon annan entervansyon e serten komanter pou fer dan sa laliny konman MNA Anse Boileau ; evantyelman me i annan lezot dimoun ki oule koze avan, mon les zot koze. Ou annan en pwen klarifikasyon Onorab Ghislain.

 

HON CHANTAL GHISLAIN

Mr Speaker, mon ankor pe koriz li ankor akoz i pe brouy tou dimoun la finalman. Pa mwan. Ou’n dir poudir La Digue ti sa, pa konfiz DSC ki District Social Committee avek DCC, ou pe koz lo DSC District Social Committee ki enkli Pret laparwas, ki enkli tou bann lezot ti bout, sa ki ou pe koz lo la Mr Speaker. Mersi.

 

MR SPEAKER

Point of order, Onorab Pillay, point of order.

 

HON SEBASTIEN PILLAY

Mersi Mr Speaker. Mr Speaker Mosyon Onorab ki’n ganny propoze i en Mosyon ki pas an merit me mon krwar ki deba pe debord dan en lot size ki pa neseserman size ki sa Mosyon pe adrese. Mon dir sa Mr Speaker akoz sa Mosyon pa pe koz lo revwar konpozisyon District Team, sa Mosyon pe koz lo enkli tou bann Leaders dan distrik dan bann desizyon ki konsern distrik e Mosyon i valid akoz bann MNA i bezwen ganny enkli dan sa decision process.

 

MR SPEAKER

Ok, your point of order is taken, an fet mwan mon ti pe al koz mon leksperyans Anse Boileau akoz avan sa mon pa ti MNA, mon ti Minis and what have you. Depi Septanm mon le koz mon leksperyans dan sa laliny me annou esper lezot dimoun koze. Onorab Ferrari ou ti’n lev ou lanmen.

 

HON JEAN-FRANCOIS FERRARI

Ok, mersi Mr Speaker. Mr Speaker, mwan mon pou napa bokou keksoz pou mon dir e mon ava esey dir zot briyevman. Premyerman lo wording sa Mosyon ki in annan ban propozisyon pou sanz sa wording, mwan mon ti a kontan  dir ki bann Manm ki pe fer sa bann propozisyon, zot pe fer bann largiman akademik. Napa nanryen mal avek sa wording e mwan mon dir avek Onorab prezanter Mosyon ki son wording i ok. Mon santi ki pe arive la, sa ki pe arive se ki bann Manm lo lot kote latab, zot, zot pa santi, zot pa okouran akoz zot pa’n pas ladan ki nou bann Manm dan Lopozisyon nou pas ladan konman bann Manm dan Lopozisyon. Nou pa ganny menm akse avek bann lenstitisyon avek bann Lazans Gouvernman avek bann travay bann Komite dan distrik, nou pa ganny akse avek. E nou alors e nou bezwen lager pou nou ganny akse avek, nou bezwen kriye parey Onorab… Onorab Woodcock, Onorab Loizeau in dir i bezwen fer tapaz Bel Air. Mwan dimoun i dir poudir mon agresiv, mon pa agresiv plis ki personn, me selman vre ler mon ver in tro plen e mon nepli kapab tenir, mon al dan biro Gouvernman e mon fer tande mon lavwa. E se sa ki nou bezwen fer e mon pa anvi fer sa bann keksoz. Mwan mon ti a kontan parey Onorab Arrisol pe propoze ki i annan en sanzman mindset e en sanzman fason travay pou ki nou ganny enkli dan bann desizyon. Setadir ki nou met an pratik enn sa 3 pilye ki Prezidan Faure i kontan dir, setadir senpleman latransparans. Nou pa nou ki deside defini ki bann keksoz ki pou ganny fer akoz Egzekitiv i kapab deside. Nou, nou la nou annan en rol konsiltatif e nou annan en rol oversight. Si ou pa ganny konsilte akoz zot dir nou sa i dan purview Egzekitiv, be akfer nou la. Nou ki reprezant e zot e nou, nou tou ki la dan sa Lasanble nou annan en rol reprezantasyon e nou anvi ganny konsilte ; akoz nou pa kapab en zour aprann ki i annan en peron ki’n ganny konstri kan se pa en peron ditou ki ti merit ganny konstri. Se sa bann dimoun ti pe rod en pti pon pou zot sot larivyer, finalman en peron in ganny fer en lot landrwa apre zot dir ‘‘Be, ki mannyer in ariv sa ?’’ Pa’n konsilte. E mwan mon ti a kontan dir avek zot ki i annan en gran mank konsiltasyon. Onorab De Commarmond in fer nou konpran yer poudir i annan en gran mank konsiltasyon. Si Onorab De Commarmond, Leader of Government Business, a sa nivo i santi i annan mank konsiltasyon e mank kominikasyon me ki nou, nou pou dir? Nou bann senp Manm ki napa en tit plis ki MNA, nou napa sa tit, nou napa sa kontak, nou napa sa laport pou nou ouver laport. Ki nou pou dir? Me se zisteman sa pwen ki mon konnen ki Onorab Arrisol pe fer resorti, nou bezwen, nou anvi ganny konsilte pa pou e nou pa ekspekte ki toultan e ki okenn zot pou pran nou desizyon. I pa obligatwar me selman omwen nou’n ganny konsilte e ler nou dir annou pa fer en peron, sa madanm i bezwen en pti pon pou li sot son larivyer, zot, zot deside zot pou still fer en peron, omwen nou, nou kapab dir, ‘‘ok, be zot ki deside,’’ Be nou, nou ava dir avek sa dimoun laba poudir nou, nou pa anvi sa, pa nou ki’n dir sa. Konpran? So at least nou’n ava fer nou travay konman bann reprezantan sa distrik. sa i premye pwen. Dezyenm pwen mon ti a kontan dir ki si ozordi sa deba in ariv lo latab se ki vreman i annan serten Lazans Gouvernman ki preski enposib pou travay avek zot. I vreman, vreman difisil e si i annan en Lazans Gouvernman, mon ava dir se tou sa ki i annan pou fer avek lakaz. Mon pa konnen akoz i annan mindset ki telman – pou servi en mo ki Onorab Simon Gill ti a kontan servi akoz bann kominis, i en mon en pe kominis, ki telman la mantalite telman retrograd. Telman retrograd, ok ? Zot pa le dir nou, zot pa le ganny kontak avek nou. Nou pa ganny lenformasyon, ler nou sey rode nou ganny en lenformasyon ki bankal, ki pa li. Nou ganny dir poudir keksoz pe ganny fer kan pa pe ganny fer. In zis enposib pou nou fer nou travay konman bann reprezantan akoz nou zis pa pe gannyen sa lenformasyon ki nou bezwen. E nou pa pe demann bokou, nou pe demann… Mwan konman MNA Mont Fleuri mon pe zis demande, lenformasyon. Mon ti a kontan dir isi klerman e mon konnen poudir sa pou ganny valide dan distrik Mont Fleuri, akoz tou dimoun i konnen ki mwan mon pa enterfer dan travay DA pandan sa 6 mwan ki mon’n la, mon pa’n enterfer. Me selman mon ekspekte ki DA a sak lokazyon, i konsilte e i enform mwan lo bann keksoz ki ganny fer e son desizyon se en desizyon ki sorti kot Egzekitiv e mon pa enterfer ladan. E keksoz i mars rezonnableman byen sel keksoz parey mon’n dir ki pa pe marse byen se ki DA li menm li, parey mwan pa pe ganny sa bann lenformasyon sorti kot bann Lazans. Se pour sa ki nou, nou demande ki regilyerman nou kapab asiz otour en latab avek sa bann Lazans pou nou dir avek nou, ‘‘Be tyonbo en kou, i annan Madanm en tel, li i annan 10 an la tou son let la, in ganny dir an 2001 poudir i pe bouze, i ganny dir an 2003 poudir pa li ki pe ale i pe al Perseverance ; in ganny dir an 2006 non, nou pe sanze akoz nou pe rod en bedsitter. Eksplik nou en kou.’’ Me nou pa vwar, nou pa gannyen sa sans pou nou enterakte lo sa bann desizyon enportan e nou, nou annan nou travay pou nou fer pou nou servi bann dimoun ki’n ed nou enkli bann dimoun ki pa’n elekte nou. Donk nou pe rod sa konsiltasyon e mwan mon felisit Onorab Arrisol pou sa Mosyon ki’n anmennen ozordi akoz i permet nou kriye byen for. E mwan mon pe kriy for, mon pe kriy o sekour Departman Gouvernman ki okip lakaz, silvouple koz ek nou onnetman, byen, dir nou ki pe arive. Nou at least nou ava konnen, nou ava travay avek zot pou nou kapab fer avanse bann size ki annan an relasyon avek lakaz. Pa bezwen vin dir nou sa, i fini sa lepok, sa lepok kot ti dir, ‘‘wi sa lannen nou pou fer 250 lakaz,’’ apre finalman nou pa fer, problenm i vin an ta e ozordi nou pa konnen ki pe pase.

 

MR SPEAKER

Ok. Ou pe round-up ?

 

HON JEAN-FRANCOIS FERRARI

Mon pe round-up Mr Speaker, in fact i mon dernyen pwen. Mon dernyen pwen se ki nou pa kapab pran sa lapros parey Onorab Pillay in defann ki konpartmantaliz bann aksyon. Nou en pti pei e mon krwar nou tou isi ki la nou bann dimoun rezonnab, nou tou nou konnen ki nou limit, nou konnen ki nou rol e nou konnen kwa ki nou devret fer e kwa ki nou pa devret fer. Me selman nou pa devret retourn nou dan en sityasyon kot prezan nou bezwen blanm kanmarad. Mwan mon pou blanm DA, mon pou dir ek dimoun ‘‘Be mon pa konnen, DA pa dir mwan.’’ DA prezan pou dir, ‘‘Mwan mon pa konnen. Minister Lakaz pa dir mwan nanryen.’’ Nou pa kapab viv koumsa. Dan Mont Fleuri mwan mon ti a kontan partaz avek zot, i annan en relasyon travay ki mars plito byen. Si nou kapab get involve lo tou sa bann size ki nou merit get involve lo la e  ki i annan en lot metod travay, mwan mon santi poudir nou distrik pou mars bokou pli lwen. Alors mon sa ki mon vwar dan sa Mosyon Mr Speaker, se en lapel pou konsiltasyon e latransparans. E sa pa mwan ki pe demande toulezour, Prezidan Larepiblik ki pe demande sa. Sa latransparans, be dir nou. Dir nou, nou pa kapab in ariv 6 mwan, i annan parmi nou ki pa ankor ni konnen ki sa lalis priyorite. Be ki annan pou kasyet? I en lalis priyorite, se tou. Omwen nou ava dir ek dimoun ‘‘Ou pa lo la. Sorry ou pa lo la. Mon a fer en fason ou ava vin lo lannen prosenn.’’ Mon pou kapab tou le lannen servi mon distrik dir zot, ‘‘Sorry mon pa konnen. Bannla pa le dir mwan.’’ Non. Annou bouze, mon bann koleg. Annou bouze, annou bouz dan en direksyon ki efektiv, annou bouz dan en direksyon kot nou pa bezwen kapab dir ‘‘La in koup pye sed lo konblaz, in tonm dan delo dan lapas Cascade, mwan mon pa konnen ki pe arive.’’ Nou pa kapab kontinyen koumsa. Nou pa kapab, en pei pa kapab kontinyen fonksyon koumsa. Nou bezwen mars ver efikasite. Se sa ki nou pe rode e mwan mon sipliy avek zot pou zot vot pou sa Mosyon e nou ava hopefully anvoy en mesaz serye kot Gouvernman pou dir, wi nou bezwen annan en nouvo lapros travay ant Gouvernman Lokal e bann MNA e Ladministrasyon Distrik. Mersi Mr Speaker.

 

MR SPEAKER

Mersi Onorab Ferrari. I 4 er mwen 4, i ankor annan 7 entervenan ki anvi koze lo sa Mosyon ki mon konsider enportan. Vi sa pasyon avek ki tou dimoun pe koze e sa se dimoun i enkli MNA Anse Boileau. Mon ti a kontan ki nou pran en Break, nou a pran en pti pause, apre nou a tournen. Eski nou sizere, nou retourn 4.15er oubyen 4.30? 4.15 er? Tre byen, 4.15 er.

 

(BREAK)

 

MR SPEAKER

Bon nou a pran nou dernyen  lap pou ozordi.  Onorab Basil Hoareau.

 

HON BASIL HOAREAU

Mersi Mr Speaker.  Mr Speaker mon pe sey en pe bref mon konnen  ler nou pran dernyen lap i vedir ki nou  bezwen sprint.  Mon pe sey fini pli kourt ki mon kapab.  Mr Speaker mon komanse par fer referans avek Lartik (1) nou Konstitisyon ki dir; ’Seychelles is a sovereign democratic republic.’ Mon fer referans ek sa Lartik senpleman parski sa Lartik i trouv the separation of powers. Separation of powers ant Zidisyer, Lezislatif e Egzekitiv i ganny baze lo sa Lartik.  E i enportan  ki nou met sa Mosyon ki nou’n anmennen dan konteks nou Konstitisyon kot nou pe koz lo separation of powers.  Poudir nou bezwen konpran rol Egzekitif e konpran rol Lezislatif. Nou pa kapab  fer sa mistake an ekspektan an krwayan ki Sesel nou annan  dan sak distrik en Prezidan.  Napa 25 Prezidan.  Nou annan 1 Prezidan ki ganny trouve dan Egzekitiv.  Zot bann Manm ki’n ganny elekte dan sa distrik nou – zot Manm Lezislatif ansanm avek bann Manm ki‘n antre koman bann Manm proportionately elected nou comprise  of the National Assembly.  Nou form sa National Assembly  e  ki rol – ki rol en Manm Lasanble? En Manm Lasanble parey Onorab Pillay in dir i annan li 3 rol prensipal; son premye rol  ki the principal role se; to legislate – pas Lalwa.  E 2enm rol sa Lasanble ki 2enm rol bann Manm Lasanble se sa ki nou apel en ‘oversight ou en ‘supervisory role.  An dot mo, se pou fer sir ki Gouvernman Egzekitif pe fonksyon dan en fason demokratik – dan en fason transparan – dan en fason kot i  accountable.  3enm rol se sa ki no apel ‘presentative role; savedir kot sa Manm Lasanble i reprezant son bann constituent.  Vre ki letan i pe pas Lalwa – letan i pe zwen son bann rol oversight  still i pe prezant son bann constituents, me i annan en specific role osi pou li  get son distrik  – get son bann dimoun ki reprezant sa distrik  – pa zis bann dimoun ki’n vot pou li parey Onorab Hoareau in fer kler – i pa pou get zis dimoun ki’n vot pou li  me zabitan sa distrik an antre.  E se la kot nou vwar sa Mosyon ki Onorab Arrisol in anmennen i vin dan sa konteks an relasyon avek sa representative role of the National Assembly.  Me nou bezwen annan en balans.  Mon konpran sityasyon.  Mon konpran.  Mon pa pou dir   mon pa konpran sityasyon.  E mon konpran ki loptik Onorab Arrisol in anmenn sa Mosyon, me an menm tan nou bezwen annan en balans kler.  Whilst ki i enportan ki koman en MNA i ganny konsilte lo serten size me an menm tan, MNA pa kapab antre dan rol Egzekitiv.  Onorab Ferrari in donn en legzanp apre nou’n vwar li donn en legzanp en peron;  mon pa krwar poudir en MNA pou ganny en rol pou kote pou fer en peron ouswa pa pou fer.  Me lo bann gran proze par egzanp en lekol ki pou ganny fer  – en fasilite Lasante ki pou ganny fer dan en  distrik.  Sa en MNA i devret ganny konsilte e sa mon dakor avek.  E me an menm tan en MNA i la pou li letan i pe reprezant dan sa representative capacity; e la pou li fer sir ki si son distrik i annan keksoz ki pe mars mal ladan an servan bann zouti ki annan koman bann MNA dan Lasanble swa Mosyon swa  demann kestyon Minis – fer sa bann konsern, met a latansyon sa bann Komite.  MNA osi i pou annan pouvwar obviously pou li ekri en Minister pou demande ki pe arive dan son distrik.  Egalman en MNA i kapab swiv e monitor bann proze ki pase dan son distrik e sa i normal e mon konpran.  Me i annan en limit kot i pou kapab  antre an relasyon ant sa ki pase dan en distrik.  Pa tou desizyon; par egzanp desizyon lo ki  pou allocate lakaz.  Mon pa krwar sa i  en desizyon MNA.  Pa li ki pou deside lekel ki pou ganny lakaz.  Sa se Egzekitiv an servan banns sistenm bann Polisi ek bann prensip ki’n ganny etabli, as long ki sa bann prensip ek sa bann Polisi i kler e transparan. E se la ki mwan mon osi mon pou annan en pe rezervasyon avek Mosyon Onorab Arrisol, ki si nou merit plito konsilte me pa bezwen ki i ganny enkli ouswa ki li i devret decision-maker. Non.  Konsilte.  E annefe Mr Speaker letan nou get dan sa Local Government Act 2015,  lii dir ek nou klerman poudir sa District Council ki pou ganny etabli evantyelman ganny elekte li i kapab konsilte the MNA lo bann important issues.  Mon dakor  petet mwan letan mon’n gete mon‘n dir important issues i  en pe vag.  Ki mannyer nou determinen what is an  important issue or not?  E se la petet nou – menm parfwa mon ti pe asize mon ti pe mazinen – mon dir, eski fodre a en moman nou anmenn en Lalwa ki determin  – nou deza annan Konstitisyon – wi – ki donn nou en pe gidans me solman nou anmenn en Lalwa ki determin egzakteman ki rol e  pouvwar en Manm Lasanble?  Pou at least pou annan en kler gidans?  Mon konnen kote sa konfizyon in vini e la nou bezwen et fran kote sa konfizyon in vini parski petet dan letan Eleksyon ouswa dan le pase, en MNA son rol MNA in ganny enlarged beyond son ambit for political expediencyfor political reason zis nou’n enlarge li, zis pou petet kree en persepsyon poudir MNA i annan plis pouvwar ki aktyelman annan.  E mon kapab konpran kote sa konfizyon in kapab vini.  Nou bezwen et fran e admet sa bann sityasyon e nou bezwen  edik nou pep  pou nou pep konnen ki rol en MNA ; ki rol en MNA.  En MNA pa pou vin donn ou lakaz li.  En MNA pa pou vin la poudir ou fodre fer sa semen kot ou.  Sai rol District Administration.  En MNA li i la pou li met bann proze distrik devan e pou li parey mon’n dir monitor e supervise  poudir sa bann proze pe ganny enplimante. E lo bann gran plan distrik definitivman i devret ganny konsilte  parski apre tou li reprezantan son bann dimoun e i byen pou li ganny konsilte; e akoz letan sa eleksyon pou’n ganny fer sa bann Councillors osi pou dir ek ou, ‘’me mon osi mon reprezant sa bann dimoun akoz mwan osi mon’n ganny elekte. ‘’ E sela kot la mon krwar ki  once ki the Act will come into force  – I mean it’s already into force but it will be implemented kot nou pou vwar vreman sa distenksyon ant  rol MNA ek rol District Council.  E mon  ti a petet demann Onorab Arrisol petet sanze – petet met konsilte pou le moman e mon krwar nou a bouz dan en bon direksyon.  Mersi Mr Speaker.

 

MR SPEAKER

Mersi Onorab Hoareau.   Onorab Prea.

 

HON NICHOLAS PREA

Mersi Mr Speaker.  Mr Speaker, mon direksyon ki mon pou al ladan petet pou en pti pe diferan ek lezot Manm akoz  mwan mon pa anvi pou al dan en sityasyon kot nou pa atak okenn dimoun or whatever, me solman petet mon pou dir si bann petet bann keksoz in ariv dan en serten fason dan le pase nou pa kapab  blanm sa DA.  Sa DA li i ti pe act lord sorti kot en Minis ki ti pe ansarz Gouvernman Lokal e nou konnen dan le pase, i annan serten Minis ki’n dir, ‘’Mon DA  i devret siport mon parti e i pran lord  pou fer mon parti avanse – pou fer mon parti ganny elekte dan distrik.’’  Mon pa pou al nonm non – nou konnen  bann minis ki’n ansarz Gouvernman Lokal avan bann statement parey ki zot in fer.  Mr Speaker mon kapab depi Eleksyon Septanm 2016, mon distrik Bel Ombre in pas atraver 3 DA.  Ti annan enn ki ti la pandan Eleksyon apre Eleksyon in kite in ale.  Nou’n ganny en 2enm e 2enm in vin par enterim in fer 2 mwan e nou’n komans en tre bon lantant ansanm; nou’n komans fer serten travay ansanm e malerezman i pa’n reste. In fer mwan konpran poudir  i pa pou la pou reste.  E nou’n ganny en nouvo DA an Fevriye la sa lannen e mon kapab dir ki travay  lantant – pe la mon pa pou dir byen, me ase byen an ka ki petet demen mon pou bezwen retournen  pou kestyonn serten keksoz.  E la aktyelman mon kapab petet zis dir en pti keksoz ki kwa ki pe arive.  Aparaman i annan en miting District Council ki en dimoun Bel Ombre fek call mwan la – in teks mwan pou dir i annan en  Lafis lo bann poto elektrik Bel Ombre ki i annan en miting District Council demen 5er si mon’n ganny envite e mon‘n dir non.  Pourtan nou pe liaise tre, tre pros nou de ek distrik DA, me sa enn mon pa okouran.  Me par egzanp ler bann lezot Onorab in koz lo District Team  ki enkli  SPTC, PUC  and all that, mon’n ganny envite pou nou organiz en reprezantan SPTC.  So mon pa konnen ki mannyer, keksoz pou zot i  marse; si District Team pa enkli MNA me mwan mon DA pe envit mwan pou nou ganny en miting avek reprezantan SPTC ki sipoze bann stakeholders lo District Team. Ok?  Mon pe dir sa Mr Speaker akoz  dan  le pase in touzour annan sa roulman kot MNA sirtou  si ou dan Lopozisyon ou ganny ekskli dan bann desizyon ki ganny pran dan distrik. E sa i fer ki en kantite keksoz in al mal.  Proze in mal fer; proze ki pa’n fini; proze ki’n ganny sipoze fer e gro, gro sonm larzan in ganny disperse e  in ganny disbursed, ki  apre sa proze pa’n fer e mon annan enn la ki ler mon ti dan 4enm Lasanble, mon pa konnen. Nou pe lager District Team or whatever, me solman dan 4enm Lasanble mon ti ganny envite avek DA sa lepok, mon vin asiste e an konsiltasyon ki ti apel DCC – District  Community Committee – whatever – pa DSE – DSE non. Ti DCC.  Ok? Kot ankor sa ki Onorab Woodcock in dir taler, i annan laverite ladan.  Lo sak Komite ki mon ti ganny envite ti annan bann Sekreter Sekter lo la e nou konnen Sekreter Sekter lekel?  Ki zot rol e  zour Eleksyon kote nou vwar zot?  Depi 4er bomaten zot pe tranpe avek sa vye dimoun pou anmenn vote and all that.  Ok?  Me solman anyway mwan pour mwan i ti en prosesis, dyalog, konsiltasyon akoz mon ti anvi vwar serten proze marse; mon ti anvi vwar mon distrik marse.  Me apre 3 miting mon pa ti ganny envite ankor, akoz mon ti pe poz kestyon.  Distrik ti’n komans ganny sa alokasyon larzan anba Bidze pou bann Pti Proze e la  kot mon ti komans kestyonnen akoz keksoz ti pe al mal.  Ti annan serten Sekreter Sekter osi tou ti vwar keksoz pe al mal e zot osi zot ti kestyonnen e zot osi apre zot in ganny kite an deor.  So mwan mon pe dir ki nou bezwen regard keksoz ki mannyer in pase dan lepase e nou pa anvi arive demen ki mon krwar i pou arive ki LDS i form Gouvernman eski zot, zot ti a kontan servi menm sistenm pou ekskli zot – zot ganny elekte dan distrik zot ganny ekskli?  Non, nou pa oule sa nou.  Nou dan LDS nou pa anvi ki nou servi en fason pou ser lezot pou anpes pei marse.  Nou. Nou anvi kot i mal korize e fer li byen kot pei i bouz devan.  Ler mon koz lo proze,  mon koz osi tou lo lezot keksoz  ki’n al mal; alokasyon later; alokasyon lakaz.  Ozordi distrik Bel Ombre nou konnen tre byen ki  tre byen poudir i annan dimoun ki annan later, i reganny later ankor; i annan dimoun ki annan lakaz ki reganny lakaz ankor, tandis ki akoz i bann desizyon ki’n pas atraver         Biro Ladministrasyon Distrik. E   par-ler ou vwar sa DA li tousel i pe fer desizyon; oubyen parey dan serten ka petet avek sa kandida Parti Lepep i pe fer sa desizyon pou lekel ki ganny later ek sa.  Non, mon pa pe dir  Onorab  Hoareau – Onorab Sebastien Pillay  – mon pe zis servi serten legzanp.  Ok?  Me dan sa  ki nou pe demande atraver sa Mosyon  ki bann dirizan dan distrik, i ganny anmennen onboard kot atraver konsiltasyon desizyon ki nou a pran i a en desizyon ki bon pou nou dimoun e pou nou distrik.  Mr Speaker parey mon’n dir depi Septanm 2016 e depi larive nouvo DA  on vwar i annan en serten sanzman mindset.  Mon’n kapab a 2 repriz anmenn Lotorite Por – Maritime Safety, SFA, Minister Lapes  – Minister MLUIMinistry of Land Use and Infrastructure, menm DA ansanm tou bann lotorite ki annan pou fer  avek devlopman Por, sekirite Por and all that, nou’n kapab ansanm dan 2 miting ki’n vreman pozitif e ankor avek Lasosyasyon Peser Bel Ombre e  plizyer peser osi.  Si nou’n kapab fer 2 miting ki pozitif e nou pe vwar en way forward mon krwar sa Mosyon osi pe diriz nou dan sa fason kot distrik i devret pe travay kot i devret annan konsiltasyon akoz sa ki nou pou fer sa desizyon ki pou ganny pran dan distrik, i pou en desizyon ki pou enpakte lo nou kominote e an menm tan i pou annan probableman lenpak finansyel lo nou pei.  Alor avek sa bann dimoun nou kapab fer en desizyon ki saz – nou kapab fer en desizyon ki byen e  en desizyon ki ava kapab anmenn benefis pou nou kominote.  Mr Speaker mon pa pou tro long mon  anvi zis petet partaz en pti keksoz avek nou bann Manm Lasanble.  Ok?  I annan propozisyon ki’n ganny  fer vizavi pou sa Mosyon amande mon mazinen sa mon ava kit avek loter Mosyon.  Mwan osi mon santi petet ki i annan bezwen nou ava kapab amann sa Mosyon.  E mon  believe e mon respe drwa   rol MNA ki annan sa rol oversight ki demen sa desizyon osi in mal fer malgre nou’n ganny konsilte, nou kapab still anmenn Minis responsab pou nou kapab kestyonnen.  Me mon anvi termin avek sa Mr Speaker, mon kontan servi legzanp Maurice i la me i akote  – nou vwazen.   Maurice i fer keksoz diferaman pou plizyer lannen – konsiltasyon dan bann distrik. Zot annan en sistenm ki zot apel sa Prezidan Distrik en Konsey Distrik e i ganny prezide par  en serten dimoun e sa Manm Elekter i osi asiz lo sa nespes komite.  I vwar tou devlopman – i vwar en devlopman – i a kapab en devlopman prive e ler avan i ganny son laprouvasyon final avek Planning i pas atraver sa Komite – sa Komite Lokal dan distrik.  Ok?  E sa Komite li en son bann dimoun dan distrik i al vizit sa site i al regard lanpler sa proze – lenpak sa proze dan son distrik – lo son bann services and so on ki ler zot met zot bann sizesyon  – zot bann propozisyon i al kot Planning  – Planning  i konsidere. Maurice i mars koumsa.  E ozordi Maurice i ganny rekonnet koman Kapital pli ris dan Lafrik.  Se atraver bann  konsiltasyon se atraver  bann travay koumsa.   I       pa tro tar.  Parey mon’n dir, annou fer li byen annou fer li pou Sesel kot i annan nou, ki  pe ale demen lo back nou kapab  dir  par egzanp- pou Bel Ombre nou fer sa ki nou kit deryer son lenpak i pozitiv e i anmenn benefis. Pou nou kominote pou nou pei.  Vwala mon kontribisyon Mr Speaker e mon pou siport sa      Mosyon.  Me parey mon pe dir i annan posibilite ki loter Mosyon i ava anmenn en lamannman lo la.  Mersi Mr Speaker.

 

MR SPEAKER

Mersi Onorab.  Mon re fer rapel ki nou dan dernyen lap – nou dernyen lap si zot ti ava kapab sprint – mars en pe vit.  Onorab Adelaide.

 

HON FRANCOIS ADELAIDE

Mersi Mr Speaker.  Mr Speaker mon osi mon anmenn mon  laprouvasyon pour sa Mosyon akoz i en Mosyon ki vreman  bon.  Sa Mosyon pe demande ki  tou personnel dan lotorite dan distrik zot ava kapab konnen ki pe pase, dan son distrik  – donn zot pwennvi e kontribye pozitivman dan devlopman zot distrik.  Mon’n toultan dakor ki  2 lide i pli bon ki enn.  E plis nide i vreman  enportan.  Ler nou pe pran bann desizyon enportan pou distrik ki reflekte  lo en Nasyon an zeneral.  Mon oule met lo rikord Lasanble ki  nou Baie Lazare nou’n vreman mal demare. Ler pou aprouv Bidze Mr Speaker mwan ki ti aprouve me ki mannyer ler pou depanse, zot  pa oule enkli mwan?  Ki   latitid sa Mr Speaker?  I pa mon lentonasyon pou mwan anpes mon distrik bouze.  Otan nou Baie Lazare  nou pe bouze, bonpye devan.  Progre ki nou oule trouve.  Lo sa kote latab nou trouv nou pe ganny difikilte avek Gouvernman pou partisip dan devlopman nou distrik pa akoz nou pa konpetan, me mindset dan Gouvernman Lokal ki paret mwan pa ankor sanze.          Mr Speaker mon mesaz i kler pou Egzekitiv partikilyerman Prezidan Faure.  Pa vo lapenn fer bann zoli promes si ou Cabinet –kominikasyon pa bon.  Mr Speaker, a mon’n avi sa se en fason visye ki Gouvernman Lokal pe sey fer nou pas ladan bann MNA Lopozisyon an giz pou  reganny konfyans avek piblik – sa konfyans ki zot in perdi.  Ki nou trouve?  Zot ser nou zigo tou bann Manm Lopozisyon   – anpes nou bann proze bouze en fason elektora i a  dir bann MNA pa pe travay.   Les mwan met sa kler dan lespri tou sa ki a lekout ozordi.  Seselwa in perdi konfyans dan Parti lepep e mwan vi ki mon kontan ede, vwala mon konsey Prezidan Faure; ‘’silvouple sanz non sa Parti dan Kongre ki pe vini.’’  Mr Speaker nou annan en IT Centre  ou konpran?  Nou annan nou en IT Centre  konpran mwan byen, depi an Septanm, nou IT Centre pa ankor operasyonnel.  Gouvernman Lokal in vini  nou koze nou’n eksplik li, i ti dir nou ki set SNYC SNYC  i dir nou Gouvernman Lokal.  Mon ti ganny en miting avek Minis Gouvernman Lokal 2 semenn pase i ti permet mwan ki  Vandredi ki’n fek pase nou rezo pou’n fini mete e nou Internet   ti pe marse.  Mr Speaker ziska ozordi, nanryen pa ankor ganny fer.  Ki MNA pou fer se sa bann desizyon ki nou pe demande  pou nou kapab kontribye.  Desizyon se desizyon.    Mwan Mr Speaker ki mon pe dir avek Prezidan avek ou Cabinet e fer sir ki zot tret nou bann MNA Lopozisyon koman bann dimoun pa pran nou koman bann bon nanryen. Nou pe fer en bon travay pou sa pei.         E nou pe debourye nou distrik pe bouze.  Lakourtwazi ki nou pe demande silvouple.  Tret nou bann MNA avek respe e donn nou valer.  Pour an  terminan Mr Speaker mon pa pou long zis mon a pran en dernyen pti legzanp.   Nou annan en Msye Dine Baie Lazare i en pansyoner – manrman mon pa konnen kantite letan son lakaz  pres pou  tonm lo li.  Nou’n koze; nou’n eksplike nanryen pa ankor ganny fer.  Vandredi 5er mon ganny en call mon’n bezwen al vwar sa msye  e mon’n bezwen pran en desizyon.  Se sa desizyon  ler en distrik pa kapab  nou MNA osi nou annan sa oversight, an menm tan nou kapab pran en desizyon so mon pe dir ki sa Mosyon ki Onorab Arrisol in anmennen set en bon Mosyon. E mwan mon pou siport li pou ki  nou a vwar en sanzman dan bann desizyon ki ganny pran dan  distrik.    Mon remersi ou Mr Speaker.  Mersi bokou.

 

MR SPEAKER

Mersi Onorab.  Onorab Vidot  sey tay en pe vit.

 

HON ANDREY VIDOT

Mersi Mr Speaker.  Mon pa pou tarde.  Mr Speaker  – bonn apre midi tou dimoun. Mwan mon lentervansyon mon pou ranforsi en pti pe lo en pwen ki Onorab Ernesta ti dir taler, ler i ti dir kot tou dimoun – tou Manm Onorab ler ti sermante, nou ti rezervwar sorti kot Gouvernman Lokal pour ki n ou koman en Parlman nou konnen ki rol ek fonksyonnman Ladministrasyon Distrik.  The way forward nou koman Leaders pou nou travay ansanm pou byennet distrik.  I malere, si  i annan serten distrik   bann Manm Elekte i ankor  pe ganny sa difikilte atraver zot Ladministrasyon Distrik me i pa sipoze – i pa sipoze akoz i annan sa lantant  pou nou kapab konpran ki  mannyer nou kapab travay pou byennal pou nou vwar progre lo nivo distrik.  E i ti sa sans isi koman nou bann Manm Parlman, pou nou klarifye okenn keksoz ki nou vwar nou pa ti pe konpran fonksyonnman, oubyen bann rol ki Ladministrasyon Distrik i fer – i zwe lo nou kominote.  Mon dir sa ankor akoz, dan nou deliberasyon la apre midi, mon santi ankor i annan nou Manm Parlman, nou pa ankor konnen vreman ki bann striktir ki an plas  lo nivo distrik e ki son rol ki i  zwe e ki mannyer nou – lo nivo Parlman nou kapab la pou nou travay avek Lotorite Distrik, pou nou vwar progre.   Onorab Loizeau Mr Speaker, taler  ti mansyonnen ti dir en lanmen an plis i anmenn dibyen me en lanmen an plis i kapab  anpay nou.  Ki mannyer mon dir sa akoz nou, nou sipoze zwe sa rol oversight lo fonksyonnman ki mannyer rol distrik, bann desizyon  ki distrik  lo kote DA i fer  i dir,  ki  nou kapab kestyonn Gouvernman e lafason lo keksoz ki nou vwar pa pe marse lo nivo nou distrik,  ki nou ti a kontan nou amelyore, i ganny fer byen.    Si nou, nou pe enterfer dan desizyon ki mannyer nou kapab re-kestyonn nou prop desizyon ki nou, nou’n donn lanmen fer demen?  Se sa ki mesaz kler ki nou pe sey apros ek Onorab Arrisol,  petet pou dir pa rey  mon vwar tou lede kote latab nou’n fer sorti sa 2 pwen, se  oversight e osi sa konsiltasyon ki osi  bann Manm Parlman nou zwen en rol lo nivo distrik pou dir vwala bann konsern ki nou, bann dimoun pe dir nou, nou met sa devan Lotorite Distrik  kot DA e DA li  atraver son striktir ki   Gouvernman in donn li pou li fer sir ki sa bann problenm  nou bann dimoun, on ki ganny adrese.  Mwan mon leksperyans being a past DA ler mon ti English River sa letan, Mr Kevin Vidot ki ti Manm Elekte, i ti mon responsabilite koman en Lotorite Distrik en Leader – en Manm Parkman i vin vwar mwan pou met serten pwen  devan mon latansyon.  I pa ti fasil koman en Da   bann desizyon ki ou pran lo nivo distrik akoz ou konnen ki ou kapab ganny kestyonnen; akoz ou bezwen fer sir ki ou annan latransparans.  Nou ti travay.  Me i pa vedir  poudir tou sa ki  sa msye ti dir devan mwan ki mwan koman en DA  mon ti oblize fer akoz ou bezwen mazinen i en Manm Parlman wi me mon bezwen get nivo sa bann dimoun ki mon responsab dan sa distrik.  Nou ti bezwen annan en konsansis vwar ki mannyer sa bann keksoz i ete.  E si i en keksoz ki dan  byennet, lentere zabitan sa distrik definitivman parey nou dir nou travay ansanm  me  – nou share diferan lopinyon.  Parey en DA avek en MNA i fer.  So sanmenm sa nou bezwen annan sa konsiltasyon pou nou vwar keksoz marse, me non pa dir nou antre dan en desizyon apre demen lekel nou pou kosyonnen – nou prop keksoz  ki nou fer.  So sa i mon pwen  for ki mon ti anvi fer sorti Mr Speaker.  Somon pa pou long akoz mon krwar dan mon lentervansyon ki mon ti pou fer Onorab Pillay avek Onorab Ernesta in sorti bann pwen vreman valab, so mon pa pou al plis ki sa.  Mersi.

 

MR SPEAKER

Mersi Onorab   Vidot.  Onorab William.

 

HON WAVEN WILLIAM

Mersi Mr Speaker.  Mr Speaker lo sa Mosyon mon ti a kontan dir sa 2 pti mo.  Premyerman se ki letan nou pe regarde gouvernans santral  e nou annan en gouvernans lokal e depi Septanm, lannen pase i annan en seri levennman  ki’n pase dan pei vizavi bann desizyon ki’n ganny pran dan Egzekitif  e nou vwar plizyer nivo konsiltasyon ki’n pase e otreman dir, direksyon e laliny in fini ganny tire e Prezidan Faure in donn direksyon e in tir laliny.  E letan nou  servi sa bann mon ki i atas lenportans avek letan nou pe koz bonn gouvernans nou pe koz latransparans, e nou pe koz rann konn e letan dan sa lespri nou pe koz Linite Nasyonal met  pei premye, i annan sa nesesite pou merit sa Mosyon. E  mon pa trouv okenn problenm e mon aprann  – e mon krwar Deputy Speaker in edike ki pou annan en lamannman, e mwan osi mon ti kapab anmenn en deba akademik ouswa dir ki teknikman, i annan en problenm ek sa Mosyon me lentansyon e motif Mosyon i bon. E mwan mon pou donn mon sipor sa Mosyon.  E parey mon’n dir, mon aprann i pou ganny amande e mon pa trouv okenn problenm e nou bezwen get lentere Nasyonal e nou bezwen regard sa konzankir politik ki nou ladan e  ki nou anvi pour Sesel.  Mr Speaker atraver sa Mosyon osi mon ti ava demande, ki dan lavenir Lasanble i kapab konsider si evolye lafason ki i entrodwir bann Mosyon sirtou dan sa Konsanktir kot nou ete, letan i annan Mosyon ki annan pou fer avek lentere Nasyonal, nou konpran lespri lentansyon, mon krwar i devret annan en Select Committee ki vwar sa Mosyon e ki nou pa  annan bokou  mon kapab dir vas et viens lo la, nou kapab pran en desizyon e letan Mosyon i vini i dan lentere Nasyonal nou avans devan. E mon krwar nou pou avans pli vit.  E avek sa 2 pti mo Mr Speaker parey mon dir mon pa trouv problenm avek sa Mosyon – plito ou fer li  ki ou ganny forse pou fer li e mwan mon pou donn sipor sa Mosyon.  Mersi bokou.

 

MR SPEAKER

Mersi Onorab William.  Onorab Henrie.

 

HON GERVAIS HENRIE

Mersi Mr Speaker.  Mr Speaker mwan mon  lentervansyon ozordi mon oule ki bann dimoun ki’n elekte mwan  ki mon reprezante dan distrik Mont Buxton, i konpran akoz mon koz dan en fason ki mon koze.  Akoz sa ki nou pe fer la anndan  – sa ki nou pe dir i pa neseserman  realite laba deor.  Wi mon pa’n  la komansman deba akoz mon’n bezwen asiste lanterman en dimoun ki’n mor ki reste dan Mont Buxton, me letan mon’n vini mon’n ekout en pe lot kote latab e konmsi zot pa’n zanmen form parti problenm ki’n amenn sa Mosyon la.  En kantite zot in DA en kantite zot in reprezantan politik zot parti dan distrik e zot konn byen ki zot in fer dan lepase ki’n anmenn nou, pou anmenn sa Mosyon ozordi; e malgre ki Msye Faure dan son kapasite koman Prezidan i pe koz lo rann kont, latransparans e bonn gouvernans, larealite  politik dan distrik i pa sa ki li i oule zot fer.  Bann akter Parti Lepep  i ankor dan sistenm e zot fason panse i ankor diferan ek sa ki pou li  – nou menm tann li prezan koz lo li i annan responsabilite ver Konstitisyon  pa sa ki son  parti – son parti pe dir li non.  I annan en kontradiksyon dan zot kan.  E se sa ki mwan mon ankor pe sey lager avek pou kas sa bann kontradiksyon.  Mon ava dir  bann dimoun dan Mont Buxton 3 legzanp keksoz dan distrik Mont Buxton.  Premyerman nou konnen ki poudir i annan en major capital project ki pou fer…i tonm St Louis, me i konsern Mont Buxton/La Rosiere – lekol La Rosiere.  Me premye vizit inisyal ki ti al ganny fer lo sa site  ki ti annan en gran reportaz dan tou medya: NASYON, televizyon, SBC zot ti ava konstate al dan  Larsiv NASYON ozordi pou dir ki zot ti vwar dan sa delegasyon DA Mont Buxton sa lepok ki ozordi i DA Bel Ombre e ti osi annan kandida Parti Lepep ki ti pe debout kont mwan.  I ti  napa en rol ofisyel li ki i ti pe fer  dan sa delegasyon la ki ti pe ganny konsilte lo en proze Kapital sa nivo. Sa i en legzanp.

Dezyenmman mon’n mansyonnen dan sa Lasanble lannen pase ziska ozordi, letan i annan dimoun ki pe fer bann demars lakaz, zot pe ganny demande pou al vwar ansyen MNA Mont Buxton akoz?  Akoz lalis         lakaz ki pou al ouver byento Mont Buxton  ex-Dominic Savio aparaman in fini fer e sa MNA ti involve dan konsiltasyon  letan zot in anvoy laba prezan zot dir al vwar li gete si ou…. sa i 2 legzanp. Ok? I pa MNA ozordi i en Special Advisor  –        Egzekitif.

3enm legzanp.  I sipoze annan en  proze Kapital semen ki pou fer  bor Roche Bois Belonie.  En dimoun lot zour i vin dan mon biro i montre mwan en papye i dir mwan be mon’n ganny demande pou siny sa.  Mon dir li be mon gete mon dir ek li mon pa krwar sa i korek.  Mon tir en portre sa let mon konsilte SLTA lo la.  Dabor mon demann li, ‘’Be kot ou’n ganny sa ou?’’ I dir mwan DA       ti pas avek en dimoun ki ti anmennen. So mon enformen lekel sa dimoun e sa dimoun aparaman i Chairman Brans Parti Lepep dan distrik Mont Buxton.  Sa boug li i pa en official –  ki mannyer mon dir sa  – i napa en tit ofisyel Gouvernman.  Sa ki zot pe fer  Parti Lepep ilegal – almost kriminel. Zot pe fer dimoun sinyen en bann papye  e  letan Land Transport in gete i dir mwan be sa bann dokiman i konpletman mal, zour sa bann dimoun i siny  sa. E si zot fer maler sinyen, zot in fini give zot ‘Right’ away – letan demen i kapab mont lo zot later akoz i annan en process sa.  I annan bann correct step ki ou bezwen swiv. So ki mannyer zot bann zofisye pe ganny enplike  pou zot?  Zot pe get sa komann bann dirizan distrik. Me nou  lo sa kote lontan ki’n ganny elekte nou  pa ganny konsilte. E parey mon bann koleg avan in dir  – nou, nou’n vote pour ki Bidze distrik i a ganny donnen  – nou tou. E zot osi tou, zot annan en lalis proze ki’n konplete depi 2016, right?  Be proze ki pou annan 2017 nou pa vwar nou?  So ki mon kapab mont anler dan Mont Signal  – mont partou gete si vre pe fer. Pou mon oversight role ki Onorab Hoareau fek lecture nou lo la, nou konn byen nou sa separasyon pouvwar ki i pe koz lo la.  Be sa ki nou pe dir sa Mosyon i kler e  Kreol zot pa vwar mo ‘konsiltasyon’ ladan fodre i absoliman  i spell ‘konsiltasyon’?  I pe dir ki tou bann dimoun ki annan en rol dirizan dan desizyon.  Me ganny enkli i vedir konsiltasyon.  Fodre we spell it out?  Seryezman you guys are that – konmsi, ‘slow?  Be i enkli ‘konsiltasyon’.

 

MR SPEAKER

Order! Order! 

 

HON GERVAIS HENRIE

Mr Speaker mon pe tir sa lakizasyon si mon’n dir zot ‘slow’ – mon retire.  Alor sa ki nou pe dir avek sa bann dimoun  laba deor, pou zot konpran se ki larealite politik Sesel in sanze e nou, nou anvi ki sa sanzman i ganny reflekte dan lavi toulezour.  Minister Gouvernman Lokal ziska ozordi letan mon pe koze pou Parti Lepep i ankor en antite Gouvernman ki zot servi pou dan zot lavantaz politik.  Sa Minister i ankor pe ganny servi.  Mazin byen bann dimoun ki pe ekout mwan.  Tou keksoz ki nou fer dan lavi nou distrik e kote pou met en bin; lalimyer; pye dibwa pou koupe, tousala i pas atraver Ladministrasyon Distrik.  E i fasil alor pou en boug kontrol ou pez ou en pti gin.  Ozordi en dimoun  pe al etidye e zot pe demande lekel son paran be kote  ki fer pa Ladministrasyon Distrik?  So nou, nou pe dir ki nou oule kas sa bann anpayer – sa bann mannigans ki pe ganny servi e nou pe dir enkli tou bann dirizan.  E letan nou  pe dir dirizan  anfet par egzanp ozordi nou annan sa zafer District Team  – en District Team still  i pa konekte ek distrik.  Akoz en District Team pa konnekte ek distrik. Akoz? Normalman se en reprezantan bann antite Gouvernman ki deal  direkteman avek distrik ki i asize lo la.  SPTC i kapab  en boug dan distrik Baie Lazare ki kapab asiz lo pou  Mont Buxton.  Lekol La  Rosiere wi en ansennyan i sorti laba ouswa PUC i en boug Roche Caiman ki asiz  lo pou Mont Buxton.  Ok kekfwa Mont Buxton i nou napa en klinik nou napa en Kordgard me pou bann distrik ki annan sa  bann dimoun  ki ti merit pe asiz lo sa bann District Team la, sa Headteacher, sa dimoun ki ansarz sa Kordgard  – en zofisye ki ganny pike.  E MNA i en dirizan li  – i en dirizan.  I normal pou mwan koman MNA Mont Buxton ozordi konnen ki bann proze ki distrik Mont Buxton in table, pou fer pandan 2017 baze lo sa Bidze R1.6milyon  apepre ki nou’n vote – mon’n lev lanmen  pou sa mwan.   Mon oule bann dimoun Mot Buxton i ganny zot bann pti  – zot railing  – zot bann pti peron – zot bann keksoz koumsa.  Me ozordi mon bann dimoun Mont Buxton, mon pe dir zot mon pa konnen letan mon pe dir avek zot la.  So mon’n demann DA sa semenn, in dir ek mwan i pou bezwen al demann msye sepaman Mr Adeline Local Gouvernman ki anvoy tou le 3 mwan sepaman tou le 4 mwan en lalis.  Me Ladministrasyon Distrik ki soumet sa.  By July koumsa zot bezwen soumet.  Be i annan en kopi laba zot donn mwan en kopi.  Kwa ki difisil ek sa bann zafer? So mwan mon pou siport sa Mosyon. E ankor mon oule bann dimoun konpran, akoz nou pe anmenn sa akoz Msye Danny Faure dan son kapasite koman Prezidan, letan in koz lo latransparans,  bonn gouvernman e rann kont, sa ki lideal ki i pe sey achieve me larealite dan distrik e kot Ladministrasyon Distrik zwe politik i ankor pe ganny fer  sa, pa kwa i pou la.  E nou dan LDS avek sa lafors ek sa lafwa, ki nou annan, nou a pe donn zot en koudmen pou met sa pei drwat. E dan sa lespri ki nou’n amenn sa Mosyon  pour ki akoz zot in vot pou nou mazorite,  zis pou nou partisip dan lavi distrik, kot desizyon i ganny pran, pou kapab reponn lavwa bann sitwayen – tou bann sitwayen irespektiv lekel ki’n vot pou nou.  Mersi bokou.

 

        (APPLAUSE)

 

MR SPEAKER

Mersi Onorab Henrie.  Mon vwar en lanmen anler eski ou annan en lobzeksyon Onorab Pillay?

 

HON SEBASTIEN PILLAY

Mr Speaker mon napa okenn lobzeksyon. Onorab Henrie i  free pou li eksprim son lekor. In ganny elekte i bezwen reprezant son bann zabitan, me solman mon krwar mon oule draw latansyon Onorab Henrie  to Order 54 (7) nou Standing Orders.  Mr Speaker letan tou Manm lo sa kote latab in pran laparol, an relasyon avek Mosyon ki Onorab Arrisol in avanse, mon krwar tou Manm i en lagreman  ki Mosyon  Onorab Arrisol is not without merit; i annan bann bon propozisyon ki pe ganny fer e nou pare pou nou vwar en common ground pou nou sipor Mosyon Onorab Arrisol.  Me malerezman Mr Speaker pa akoz, ozordi ki LDS i annan en mazorite dan Lasanble ki en Manm pou servi sa term pou dekrir en lot kote  latab koman ‘that slow’.  Mon  krwar  that is offensive that. ….

 

MR SPEAKER

Onorab Pillay i ti retract   sa.

 

HON SEBASTIEN PILLAY

Mon pa krwar poudir i dan lespri ki nou, nou pou fer….

 

MR SPEAKER

Onorab Pillay i ti eksplike in dir – in dir en parol in retire.

 

HON SEBASTIEN PILLAY

Mersi Mr Speaker.  Mon a go with your  ruling  Mr Speaker.

 

MR SPEAKER

Ok.  Onorab Georges.

 

HON BERNARD GEORGES

Mersi Mr Speaker. Mr Speaker alors en fwa ti annan en dimoun ki ti pe sorti Lazil ki ti’n pas apepre 25an Lazil akoz i ti anba en lenpresyon ki i ti en lagrenn mai.  Bokou dimoun i konn sa zistwar me mon krwar i en zistwar enteresan.  E zour i ti pe ganny large akoz zot ti krwar ki i ti’n byen. An sortan i dir avek Dokter i dir, ‘’Dokter ou, ou konnen mon pa en lagrenn mai – mwan mon konnen mon pa en lagrenn mai, me sa pou deor laba i konnen mon pa en lagrenn mai li?’’

Me mon komans koumsa Mr Speaker, taler Onorab Hoareau in koze taler in fer mwan mazin mon premye PPBB ki mon  ti fer mon premye Eleksyon Les Mamelles an 2002.  E mon ti dir e annefe i  pa ti menm   – i ti mon premye Eleksyon ki mon ti perdi 1993 distrik Plaisance.  E mon rapel tre byen e mon ti dir pa MNA ki pou fer lakaz dan distrik – pa MNA ki  pou fer bis ariv anler dan distrik – pa MNA ki pou fer sa bann keksoz sa se travay Gouvernman sa se travay DA.  E mon ti’n menm oubliye si mon ti’n dir sa ziska lot zour enn nou bann koleg Mr Frank Ally in fer mwan mazinen sa parol in frap li akoz letan lezot  bann dimoun ki pe fer zot PPPB pe promet lakaz, semen, bis saler, sekirite sosyal eksetera  mwan mon ti pe dir petet sa se pa rol MNA.  Ozordi tou sa bann lannen pli tar nou ankor lo menm deba e savedir ki nou pa ankor bouz ditou e nou pa ankor bouz ditou e pou en senp rezon  se ki nou, nou konnen sa  keksoz nou, me eski li i konnen li i pa en lagrenn mai?  Eski Gouvernman i konnen li i pa sa keksoz?  E se sa se keksoz ki nou, nou bezwen demande.  I kler sa.  I devan nou tou me still i annan serten dimoun ki pa anvi krwar, ki pa’n konpran ki pa konnen e  i fer mwan bokou latristes ki lannen ale lannen vini, nou bezwen retourn loo menm size, koz lo menm kalite keksoz e menm mwan ki annan mon krwar meyer relasyon avek mon DA; e parmi  bann MNA Lopozisyon e ki’n annan sa relasyon pandan en bon pe letan, mon still  vwar mwan an minorite dan mon distrik.  Lotrozour menm, anfen la,la, la lanmenm konmela ler pou al red en lakaz bann dimoun i vin kot mwan i dir mwan,  ‘’Mon al demann Mr Federia.’’  Mr Fideria i en bon garson, i ti en MNA Lasanble, i ti en dimoun ki reprezantan son parti dan mon distrik;  i en dimoun valab, me i napa nanryen pou fer avek alokasyon lakaz e menm avan sa i ti devre  napa.  Si li i ti napa oubyen si li i ti annan, ozordi se mwan ki ti devret annan sa relasyon.  Ler mon al dan en miting avek mon DA tou bann Heads – tou bann Komite Distrik, Lazenes, Trwazyenm-Az eksetera, tousala mon konnen zot pa sorti dan LDS.  Lotrozour nou‘n al louvertir nouvo klinik Les Mamelles  mon ti sel dimoun LDS dan sa louvertir, only one  – enn  akoz tou lezot ti Minis avek bann aktivis SPPF apard staff Minister Lasante, tou bann envite, mon ti sel dimoun LDS la.  Come on nou pa pou kapab kontinyen koumsa lannen ale lannen vini.  Sa ki arive Mr Speaker se ki i fors nou  fer keksoz lo nou tousel.  Ler ou konnen ki ou napa sipor dan distrik oubyen sa ki pe arive ou  pa ganny  include ladan,  ou pa ganny konsilte  – ou pa ganny anmenn ladan ki ou fer ou  fer sa ki mwan mon fer – mon ekrir direk mwan.  Mon ekri lazans Proteksyon Sosyal; mon ekrir SPTC, mon ekrir Minis, mon ekri MLUH mon ekri partou mwan.    Me eski i byen?  Eski i  byen ki dan en  distrik 2 dimoun  pe bos en kote?  La lot zour mon’n ekri zot in enn mon bann pledge mon kapab fer resurface semen Bassin Bleu.  E mon DA li i dir mwan. ‘’Ar ou’n kas anba mwan akoz mon pa’n konnen?’’ Is this right?  Of course it’s not right.  Nou devret fer sa ansanm.  Ou pa devret annan 2 dimoun pe tir sakenn lo son kote dan menm distrik.  Nou devret pe tou lede pe travay ansanm fer lalis  priyorite lekel gete ki priyorite.  Kekfwa Bassin Bleu pa ti  priyorite.  Kekfwa ti ava annan en lot ki ti priyorite.  Me si ou pa koze?  Si ou  napa konsiltasyon?  Si ou pa pran par parey Mosyon i demande  lo desizyon ki ganny fer dan distrik sa ki pou arive se ki ou pou tir 2 kote at the end of the day, se ou distrik ki pou perdi e se  sa kestyon ki  nou pe sey sove. I pa byen e pandan ki mon la e ki mon’n dir ki mon pe ekri al gos adrwat pou kapab fer marse mon distrik,  mon ti a kontan Mr Speaker rapel MLUH ki mon’n ekri zot 4 let ziska prezan pou demann zot lwe en vye lakaz pou fer Biro MNA dan Les Mamelles, e depi Septanm mon krwar mon 4 let in reste  san repons.  Mon’n ekri  Minis e Minis osi pa ankor reponn mwan, alor mon  pe enplor Prezidan Faure si i pe ekout son pti radyo la anler State House, silvouple fer en dimoun ekri mwan, e dir mwan wi mon pou gannyen oubyen nou ou pa pou gannyen; pa zis asiz lo en let pandan 6 mwan.  Pour tou sa bann rezon Mr Speaker malgre ki nou pa anba okenn ilizyon ki sa keksoz pou arive demen, me mon krwar i enportan soulinyen atraver sa Mosyon ozordi ki the status quo pa byen e ki nou devret sanze.  Pour sa rezon ki Onorab Arrisol pou ganny tou sipor Les Mamelles dan son  Mosyon.   Mersi Mr Speaker.

 

MR SPEAKER

Avan mon donn Onorab Arrisol laparol pou li round-up Onorab Andre ou ti demann pou koze?  Ok pa tarde akoz parey mon’n dir nou dernyen lo nou  dernyen lap.

 

HON CLIFFORD ANDRE

Mersi Mr Speaker.  Mon  pran konnesans ki nou lo dernyen 100met dan en lap alors nou bezwen al en pti pe pli vit pou gete lekel ki ariv premye.  Mr Speaker, mon  ti a kontan dir poudir mon’n deza dan sa soulye ki zot pe dir mwan pa sa grander.  Mon’n deza mete sa soulye: mon konnen ki mannyer i pase.  DA, MNA i asiz ansanm i diskite ki sennla ki pou ganny lakaz, ki proze pou fer; ki i siporter; ki son papa; ki son manman; ki mannyer pou fer.  Mon ti deza laba  – mon ti deza fer sa.  Ki mon pe dir, akoz mon’n komans koumsa Mr Speaker, se pour mwan montre  ki poudir letan nou aksepte i annan en realite se sa ki nou kapab rode ki mannyer nou amelyor sa.  Sa sityasyon Mr Speaker, in sanze letan mwan mon’n pran en lot pozisyon e mon lapartenans in sanze osi e konmela i  L.D.S.  Mwan  mon’n fer li mon devwar – Onorab Vidot in dir nou, nou ti ganny en let.  Wi, mwan mon’n fer li mon devwar pour mwan ariv kot mon DA pour mwan annan en dyalog e annan sa lantant ki mon pou dir i pe mars tre byen.  Me selman  kote en sityasyon se ki tou lede lofis  – pour mwan i dan St Michel Complex, pou li pa tro lwen avek pou mwan e mwan – ki mwan mon’n demande, se ki letan ou pe anvoy en lalis lakaz – dimoun ki pou ganny lakaz, zis dispatch 2 lalis.  Oubyen si ou pe anvoy par email anvoy li son email – cc tou MNA.  Nou ganny menm zafer e prezan letan nou, nou zwenn nou kapab diskite lo en keksoz ki kordinen, nou pa pe bezwen gaspiy letan pou nou kapab al rode oubyen li ki pou fer sa bann kominikasyon vin vas et viens parey nou’n ganny dir. Mr Speaker, Onorab Hoareau in dir nou dan Lartik (1) nou Konstitisyon – i en zoli Lartik e i dir ki poudir Sesel i en pei souveren demokratik, me i al pli lwen; Konstitisyon i pa fini avek Lartik (1).  I  annan Lartik 24 (1) i lir koumsa.  I dir; ‘’subject to this Constitution every citizen of Seychelles who has attained the age of 18 years has a right to take part in a conduct of public affairs either directly or through freely chosen representative.’’  Ki nou’n mete Mr Speaker.   Zot in – mon prezimen Anse Aux Pins sa 1455 ti lib.  La mon krwar i annan apepre 2000 la.  So Mr Speaker,   se  zot oule zot reprezantan i partisipe  – i konnen ki pe pase. e se sa ki pou fer nou kapab egzers nou drwa oversight.  Si nou pa konn en keksoz ki pe pase nou, nou  demann  Minis – Minis i dir, ’’be mwan mon’n fini dir DA fer sa  prezan  mon pa konnen si sa i entansyonnel, konmsi sa Manm ki pe demann sa kestyon Lasanble ki  i pe dir.    E sa i ganny reflekte dan rezo sosyal konmkwa Onorab Andre pa konnen ki i pe dir.    Me si i ti annan  sa kontak, sa partisipasyon sa ti pou fer li byen kontan.  Mr Speaker mon pa pou long, me solman letan nou gete akoz pandan Kanpanny nou vwar DA – in ganny dir boner  i pe mars avek kandida,  – nou en kandida lepep li.  Proze in  ganny fer i annan dan en lakaz proze i ganny fer  pou semen ariv kot li, solman i annan lezot dimoun ki pa ankor ganny lakaz.    Kote sa bann desizyon in ganny pran?  Avek kandida  pou kapab fer sa akoz sa enn ki nou  – akoz sa enn laba  pa ek nou les li  i a kontinyen demann lakaz li.  Letan MNA i vini.   Konmela I annan ki dir ki dir Mr Speaker, mon pa konnen si ou ganny sa, kekfwa Anse Boileau ki dir ou al kot Clifford Andre pa ou vot pou li?  Me akoz nou bezwen koz koumsa letan sa dimoun pe anmenn son problenm?  Sanmenm sa ki enportan ki nou annan bann striktir ki senkronize.  Prezidan Faure pe donn en legzanp.  Onorab William in dir  in fini set sa bar.  In dir nou  e letan nou vwar bann lapwentman in ganny fer in mete lo website State House post ki mete – an konsiltasyon avek Leader Lopozisyon.  Leader Lopozisyon i dan Lasanble li, me nou annan sa konsiltasyon.  Ok?  Sa  i bann keksoz ki byen.  Nou dan en koabitasyon  annou konsilte ek kanmarad – annou gete ki nou kapab fer byen pou nou pep e pou fer sir ki tou dimoun i benefisye.  Mr Speaker, mwan pou a-port sipor Anse Aux Pins pou sa Mosyon. E mon ti a kontan ki nou tou, nou ti a kapab fer sa marse pou ki nou Lasanble i ganny plis respe e nou osi nou a-port nou respe plis pou Egzekitiv e pou sa lot lebra nou Konstitisyon – nou Gouvernman ki Zidisyer.  Mr Speaker avek sa mon oule remersye ou pou  sa letan ki ou’n donn mwan.

 

MR SPEAKER

Mersi Onorab.  Avan mon donn laparol loter Mosyon,  mon bezwen zis dir enn de parol koman MNA mon pe separ mwan  koman Speaker la.

 

HON PATRICK PILLAY

Mon osi … koman MNA Anse Boileau –  mwan premyerman mon dakor avek  – anfet mon’n angaz mwan avek sa kestyon konsiltasyon  – travay ansanm.  I enportan.  Mon rekonnet nesesite pou annan separasyon pouvwar.  Zot in vwar resaman serten kominike ki  Sef Zidisyer  –  Prezidan Lakour D’Apel avek Sef Ziz –  Prezidan Egzekitiv avek Speaker Lasanble  in fer konzwentman – napa problenm lo sa kote.  Si i annan en mo ki nou devret sanze dan Mosyon  se petet sa mon desizyon.  Petet san en diskisyon oubyen konsiltasyon parey  in ganny dir me i  sous entendue ki  ler ou’n pran en desizyon  ou bezwen konsilte.  Alor lo la mon dakor avek Onorab Henrie.  Me mwan mon ti anvi zis koz lo 2 fe.  Onorab Vidot in dir ki i ti propoze ki nou zwenn avek bann zofisye Gouvernman Lokal oubyen Community Development.  Malerezman pou mwan  Anse Boileau  mon bezwen fran ek dimoun Anse Boileau.  Sa ki mon’n tann Onorab Georges dir ek Onorab Loizeau ek Onorab Andre in dir i pa’n leka pou mwan.  Mon’n reach out mon’n seye finalman mon’n dir be ok mon’n fer li pli fasil – mon’n koz ek Minis Gouvernman Lokal; Finalman in aranze in anvoy PS Gouvernman Lokal e PS Vidot mon krwar ou pe ekout mwan ou ti vini ou, ek Mr Dan Frichot ek ou DA ek son asistan DA – nou’n koze e tou sa ki zot pe dir  nou’n tous lo la.  Mon pa anvi  vin pran bann desizyon personn koman MNA – premye fwa mon‘n MNA  –  zanmen mon’n DA parey serten me si nou koz lo rol oversight ler nou pe konsilte, ou kapab konbin sa rol konsiltasyon avek oversight ansanm.  Onorab Prea in dir en keksoz ki  egzakteman vre – i pa zis dan son distrik  – i annan lezot distrik kot in arive kot ou pa’n ganny konsilte e ou tande menm dimoun ki annan later li menm li i kapab ganny en 2enm bout later.  Me petet si ti annan sa District Team ki tou dirizan dan distrik parey Mosyon i dir i ti ganny envite, ou ti a’n egzers ou rol oversight there and then  pou ou dir be this i right avan ki mon al kot Minis pou mwan fer en lot rapor kot Ombudsmen kot lot, nou ti kapab al bokou pli vit an term gouvernans si ti annan sa konsiltasyon  – sa diskisyon ansanm.  E letan mon’n koz lo fact ler nou’n koze mon‘n dir ek PS me i annan District Team akoz  – pa ti  ankor annan sa deba – me akoz MNA pa lo la?  I pa en dirizan?  Son repons e Madanm Vidot fotespere ou pe ekout mwan ou a koriz mwan si  mon’n mal tande, parske parey mon dir en ler zorey i komans vin pares.  Me mon’n konpran ki ou’n dir mwan sa ti en desizyon Cabinet  e mwan mon repons se ki si Cabinet in fer sa desizyon, petet i devret revwar dan sa nouvo dispansasyon  – nouvo koabitasyon  – nouvo lespri travay ansanm, e pou  sa rezon ki  mon vwar sa Mosyon ki Onorab Arrisol in anmennen i tre bon e i azour  i bon. And at this point in time, ki nou revwar – nou pa ankor kler sa  ki dan mon lespri lekel sa District Team?  Pour mwan dan distrik Anse Boileau si ou pe koz lo kordinasyon pou fer Anse Boileau bouse, ou bezwen anmenn sa ki ansarz Klinik Anse Boileau.  Ou bezwen anmenn sa Commander oubyen sa SI  ki ansarz rezyon Was ki ansarz Kordgard Anse Boileau.  Ou bezwen anmenn Per Patris akoz li ki pe – laparwas i Per.   Ou bezwen anmenn sa Headteacher ki  Primary School Ms Melena.  Ou bezwen anmenn sa Headteacher Secondary School – Ms Gina e mon pa vwar akoz ou pa kapab anmenn MNA pa akoz i anvi fer en desizyon dan son plas, me i annan konsiltasyon ki Gouvernman pou pli efikas akoz nou tou, nou  pou la nou pe pran en desizyon oubyen nou pe konsilte pou nou pran en desizyon ki pli valab; ki pli profitab pou distrik.     E pou sa rezon ki mwan mon krwar ki  i annan bokou merit ladan pou donn ou sa  direktiv sey revwar rol Gouvernman Lokal.  Ler nou dir sey revwar  rol Gouvernman Lokal, nou pe met son scope rol bokou pli larz kot i koste oubyen i border avek konsiltasyon; i border avek oversight; i border avek reprezantasyon ki nou, nou’n elekte pou met sa bann dimoun laba.  E mon krwar at the end of the day, mon krwar nou pou bezwen tonm dakor ki desizyon si pou ganny pran dan lentere endividi en kominote en distrik, i bokou pli  ris en diskisyon – konsiltasyon, ki annan.  Nou tou nou dakor lo la.  E alor mwan mon pa vwar akoz dan en moman la ki Egzekitif revwar, mon krwar sa  louvraz, Mosyon ki Onorab Arrisol in anmennen i tre enportan.  Petet i annan serten enbegite oubyen polemic lo operative word  – desizyon e pou sa rezon ki mwan mon dir, mon ti napa okenn obzeksyon si zot ti anvi substitute ‘’desizyon’’ avek ‘’desizyon ek konsiltasyon’ ‘me pou mwan sa Mosyon i tre, tre enportan a sa pwen dan listwar politik e nou devlopman; akoz nou bezwen annan en District Team ki enkli tou dimoun ki annan en rol pou anrisi desizyon  DA,  si li ki pou pran desizyon on behalf of the executive.   Parski an menm tan nou pe deservi nou premye rol koman MNA nou pe servi li koman reprezantasyon e nou 2enm rol osi. E an menm tan oversight. E mon krwar si nou konbin tou sa bann fonksyon ansanm, gouvernans dan son term pli larz, i pou benefisyel pou sa bann distrik.   That apar mon pe koz lo Anse Boileau.  Mon pa al lo okenn  politik ki mannyer ti ete avan; ki mannyer ti ete apre – mon pe rod pou demen e se sa mon dernyen final ki mon ti anvi dir  – mon dernyen mo pou demen nou tou nou’n dakor – nou tou dan sa Lasanble nou dakor ki nou oule fer en fason en prosesis ki pou byen ki pou korek pou nou distrik; pou nou zenn ; pou nou pep.

 

MR SPEAKER

Onorab Arrisol, round-up avan nou pran en vot.

 

HON SANDY ARRISOL

Mr Speaker mersi bokou.  Mon  ti a kontan premyerman dir mersi tou bann Manm ki’n fer en pti deliberasyon  lo sa Mosyon.  In en Mosyon enteresan, parski in fini avek lagrenn mai avek  poul e sakenn dan son fason in eksprim zot lentere lo sa Mosyon.  E in osi annan propozisyon pou fer serten lamannman dan fason ki wording in ganny mete – i annan Onorab ki’n fer pas zot pwennvi relasyon avek zot distrik.  Mon krwar i enportan pou letan mon pe koz lo sa Mosyon pou nou et fran parey tou larestan Manm in fer zot in et fran e sakenn in donn zot pwennvi an relasyon avek zot distrik.  E letan mon’n ekout bann entervenan in montre  klerman poudir i annan problenm dan distrik, an sa ki konsern District Team parski letan mon’n tann plizyer entervenan sakenn in  dir lekel ki asiz lo zot District Team  – Mahe i annan en kalite e letan mon’n tann Onorab Wavel Woodcock in kot lo pou li, li in dir i annan serten  lezot dimoun.  Letan mon’n tann Onorab  Clifford Andre Anse Aux Pins in  dir li letan i ti ek Parti Lepep sa letan li  i ti laba, e in vwar lekel sa bann dimoun ki asiz lo District Team.  Mon ti anmenn sa Mosyon akoz en tel Mosyon Mr Speaker, parski sete dan laliny kot Onorab Henrie in ale.  Dan distrik ozordi i annan plizyer keksoz ki pase  e mon kontan letan Onorab Vidot in dir  poudir, i pe vwar en pe drol akoz nou ankor pe ganny serten problenm  an sa ki konsern distrik. Malerezman letan ou dan Gouvernman e letan ou dan Lopozisyon i 2 keksoz konpletman diferan.  Ozordi nou, ki dan Lopozisyon LDS pa neseserman  nou tou parey Onorab Prea in dir nou pe ganny difikilte pou rankontre oubyen ganny serten lenformasyon dan distrik.  Me sa ki enportan pou note Mr Speaker, se ozordi nou ankor annan dimoun  – bann kandida Parti Lepep – bann ki’n perdi dan Eleksyon ki ankor annan  serten lenfliyans an sa ki konsern desizyon ki annan pou fer avek distrik.  E         ozordi letan nou pe koze i annan plizyer distrik parey Onorab Henrie in dir kot dimoun pe ganny dir retourn – parey Onorab Georges in dir retourn kot sa kandida oubyen retourn kot sa MNA ki ti deza la.  Me kestyon ki nou devret pe demann nou lekor eski sa MNA ki li in ganny defet dan dernyen Eleksyon i annan okenn say – i annan okenn desizyon ki annan pou fer avek distrik.  Oubyen eski pa devret enplik sa MNA ki’n ganny elekte, ki Lepep ki LDS pou li donn en koudmen dan desizyon ki annan pou fer  pran avek distrik.  St Louis  letan ou  pou vizit bann dimoun  pou koz avek zot, zot pou dir ek ou desizyon ki Ladministrasyon Distrik i pran, ki i konsern  DA ; ki i  konsern District Team, zot ed zis en sel kote.  Sa pti peron i ganny aranze zis kot zot bann aktivis; pon i ganny fer zis lo en sel kote.  Bann dimoun ki pa siport zot pa ganny gete ditou.  Be si ansanm nou ti kapab asize pou ou vwar tou sa bann problenm sa ti a fer ki letan dimoun i vin  kot Ladministrasyon Distrik i pa ti a ganny dir parey nou’n tande –‘’Pa ou ti vot pou  Arrisol ou? Al kot Arrisol ki ou vin rode kot mwan?’’  Me pourtan Ladministrasyon distrik i en landrwa fokal kot dimoun i devret vini dapre Gouvernman Lokal pou zot si zot annan zot problenm oubyen serten pwennvi i premye laport ki zot kapab tape.  Me malerezman Mr Speaker, mwan mon rapel en pe letan pase  ti annan en madanm ki reste dan distrik St Louis, ti’n fer laplikasyon  en plas travay lo Erport.  En zour swar i telefonn mwan i dir mwan,’’ Mr Arrisol mon anvi rod en lesplikasyon’’ – mon ti dan 4enm Lasanble – mon dir ek li,  ‘’Me zisteman akont mwan.’’  I dir mwan in fer en laplikasyon  pou li ganny en plas travay Erport selman DA in call li pe rod serten lenformasyon avek li.  Prezan mon dir avek li, ‘’Me kot ou ti fer laplikasyon,  ou ti vin rod plas travay dan  Ladministrasyon distrik oubyen kot Erport?’’  I dir mwan non, mon ti al kot Erport.  Me solman  mon papye in sorti laba in ariv dan Ladministrasyon Distrik.   Prezan mon rod serten klarifikasyon akoz?  Mon ti ganny en konpran  poudir sa  letan ‘security clearance’ i  ganny fer koumsa. Ou papye i retourn dan distrik se DA ki donn go-ahead –  lekel ou?  Ki ou manman?  Lekel ou afilyasyon ki ou siporte.  Konmsi Ladministrasyon Distrik in pas sitan keksoz ki in fer, ki ozordi mazorite distrik SPPF ti for ladan zot in perdi se senpleman sa akoz lafason zot in manage keksoz e dimoun in asize in vwar. Lalis lakaz i enn ozordi.  Ozordi letan nou pe koze i annan plizyer dimoun ki call ou i dir koumsa, ‘’Mr Arrisol i dir  zisteman ava Eleksyon mon ti koz avan kandida en tel, i dir mwan mon tan tyenm lo lalis. Ou kapab tyeke?’’  Mon fer li konpran, ‘’Be madanm oubyen msye mon  napa sa lalis mwan.’’ Be i dir ek ou,’’ Be kandida ki ti la  kanmenm i pa’n ganny Eleksyon me i ti konnen ki tyenm mon ete li!’’

Zot, zot annan serten lenformasyon me ler zot, dan SPPF pou zot i fasil lo nou kote i pa neseserman fasil.   Se pour sa rezon ki d pou enportan dan lespri travay ansanm pou nou asize kwa ki meyer pou nou distrik.  Par egzanp Mr Speaker, mon kontan letan Onorab Basil Hoareau avek Onorab Sebastien Pillay in dir ek nou rol Lasanble Nasyonal.  Ki nou rol? Pas Lalwa; oversight apre reprezantatif me solman parfwa mon demann mon lekor, letan nou pe debout dan Eleksyon eski se sa ki nou dir dimoun dan distrik?   Nou rol se oversight. Oubyen mon vwar en pick-up materyo i monte         Bel Ombre avek plizyer blok ladan – 10 i debark kot madanm Hoareau – 10 i debark kot madanm Arrisol 15 i debark kot madanm Pillay.     Eski i oversight sa?  I Lalwa sa?  Eski i reprezantatif sa?  I annan tou sa bann zafer ki pou bezwen dan sa lespri travay ansanm  pou nou kapab anmenn nou distrik drwat, parey nou anvi.  I enportan ki tou sa bann zafer i ganny netwaye.  Alor mwan  dan sa lespri ‘travay ansanm’ parey nou pe dir Mr  Speaker, i enportan ki  nou tou nou pe fer menm keksoz.  Nou konnen  kwa ki  pase dan nou lakaz.  Mon pa kapab pe kestyonn Minister Lasante, solman St Louis dan mon distrik, mon pa konnen vreman ki pe arive.  Mon’n tann i annan i annan DSC – Action Team taler mon’n tann Onorab Prea in mansyonn DCC kot i annan tou sa bann zafer  dan nou distrik,  nou koman Manm Elekte nou pa vreman  konnen kwa ki pe pase  dan nou distrik.  Alor Mosyon se senpleman pou fer sir ki nou komann bann Manm Elekte – bann Manm ki’n ganny swazir par nou pep, pou nou vreman kapab fer en travay kolektif – zis parey nou’n dir, zot bann Leaders lo sa nivo zot in deside pou ‘travay ansanm’. E mwan mon anvi ki sa i ariv osi lo nivo distrik pou ki nou pa vwar nou parey mon’n dir – kot nou pe fer diferan keksoz.  Alor pou konklir mon ti a kontan lo nivo lespri ‘travay ansanm,’  i annan plizyer Manm ki’n propoz  serten lamannman so mon ti ava kontan propoz serten keksoz Mr Speaker avek ou permisyon, e nou ti ava gete si nou tonm lo la ansanm pou nou gete kwa ki meyer pou distrik e pei; me pa zis mon tousel  ki’n anmenn sa Mosyon.  Mon  ti a kontan lir sa pti lamannman ki a lir koumsa; ‘’Sa Lasanble i demann Gouvernman pou permet ki tou dimoun  ki annan en rol dirizan  dan distrik, i ganny konsilte dan desizyon ki afekte sa distrik.’’

 

MR SPEAKER

Lamannman i devan zot eski i annan  lagreman lo la?   I annan lagreman across the board nou pa bezwen vot lo lamannman?  Wi Onorab? Ou segonn lamannman?  So tre byen. Mersi.

 

HON SANDY ARRISOL

Mersi Onorab Pillay.

 

MR SPEAKER

Mersi Onorab Pillay. Se sa lespri  ki nou ladan 2017.  Eski nou pou bezwen pran en vot oubyen nou pou pran en vot lo  the amended  Motion?  Tou dimoun i kler lo  the amended Motion?  Relir Onorab Arrisol.

 

HON SANDY ARRISOL

Mon  relir; ‘’Sa Lasanble i demann Gouvernman pou permet ki tou dimoun  ki annan en rol dirizan  dan distrik, i ganny konsilte dan desizyon ki afekte sa distrik.’’  Mersi.

 

MR SPEAKER

Kler?

 

HON BERNARD GEORGES

We vote on the amendment first.

 

MR SPEAKER

Nou ti’n vwar taler that  was unanimous be lev lanmen tou sa bann ki dakor ek lamannman? Clerk?

 

MADAM CLERK

Mersi Mr Speaker 24 Manm an faver.  Mersi.

 

MR SPEAKER

Savedir lamannman i ganny aksepte par Lasanble Nasyonal eski nou kapab vot lo sa Mosyon as amended prezan?  Tou bann ki dakor  pou sa  Mosyon No.2 ozordi ki Onorab Arrisol in anmennen, amande segonde par Onorab Sebastien Pillay  lev lanmen?  Clerk?

 

MADAM CLERK

Mr Speaker 24 Manm an faver.  Mersi.

 

MR SPEAKER

Mersi bokou.  Sa i vedir ki  sa Mosyon propoze par Onorab Arrisol in ganny aksepte par Lasanble e nou espere k nou ava annan kominikasyon parey nou’n dir, nou pou fer ki nou ava anvoy en synopsis sa  Mosyon as accepted  pou Sekreter Cabinet parey nou tou nou’n dakor, ki  koumsa Egzekitif i ganny posibilite konnen kwa ki nou’n tonm dakor lo la; e sa i  tou lede kote in tonm dakor, in vote pou zot fer le neseser, pou asire ki ‘Assurance i ganny attended to.  I annan en lanmen anler – Onorab Ferrari.

 

HON JEAN-FRANCOIS FERRARI

Mersi Mr Speaker, avek ou permisyon zis pou fer en pti lanons ki enteres Lasanble; zis pou enform Lasanble ki Komite Zafer Enternasyonal – IAC in pran konesans demisyon travayer dan    Minister Zafer Etranzer e nou’n fer li nou devwar nou pou rankontre sa bann travayer,  diskit avek zot – ekout zot; e byento nou pe al rankontre management Minister. E mon ti a kontan stress e sa i en keksoz ki nou’n tonm dakor lo sa Komite ki nou rol nou sey vreman  pou anmenm nou kontribisyon  – sey ede si i posib pou vwar en solisyon.  E donk nou ava gard Lasanble okouran okenn progre ki nou fer dan sa travay.  Mersi.

 

MR SPEAKER

Onorab De Commarmond ou annan en lanons pou fer ou osi?

 

 

HON CHARLES DE COMMARMOND

Non Mr Speaker, pa en lanons me en reaksyon lo sa ki Onorab Ferrari pe dir.  Mon  pa krwar i  proper sa mwan.  Mwan mon krwar i  mal.  Komite International Affairs la sa i pa form par son manda – son rol sa.  Petet sa issue, ti ava’n vin devan ou Komite – Komite Anti-Victimization probableman.  E prezan sa bann issue la nou bezwen fer atansyon ki nou pe fer pangar nou pe enterfer kot nou pa fodre enterfer; akoz letan en group travayer  ouswa i annan travayer dan en landrwa travay i   ganny en problenm, nou bezwen gete si in pas tou sa bann prosedir ki neseser.  Konmsi mon en pti….sansib.

 

MR SPEAKER

I sansib annou sey ale… ou fears les mwan tann Onorab Prea koze avan, apre mon a eksplike.  Onorab.

 

HON NICHOLAS PREA

Mersi Mir Speaker.  Mon ti en Manm e osi antan ki Deputy Speaker ki sa bann travayer ki demann mwan pou rankontre avek.  Ti annan plizyer non; zot ti met zot serten problenm e zot serten nide osi tou lo latab e   apre nou’n pran en desizyon pou  anmenn devan Komite Zafer Enternasyonal  – IAC pou IAC take up sa diskisyon avek sa bann travayer e avek Foreign Affairs akoz Foreign Affairs i liaise avek Komite Lasanble Nasyonal e Komite Lasanble Nasyonal i liaise ek Foreign Affairs.  Sa group dimoun in ekri en let ki’n vin dan mon lofis ki zot in aksepte ki IAC i take up the matter.  Mon’n met en pti note in al devan Speaker e mon santi  mon krwar ki Lofis  Speaker mon krwar i aksepte ki the way  to deal with it nou kit ek Komite Zafer Etranzer.  Mersi Mr Speaker.

 

MR SPEAKER

Avan  mon entervenir, mon a les Onorab Ferrari ti annan leklersisman pou anmennen ankor apre Onorab Pillay.

 

HON JEAN-FRANCOIS FERRARI

Mr Speaker nou, nou pa bann birokrat.  I annan bann dimoun ki a lekout lepep; ki a lekout bann travayer.  Nou pe ekoute akoz zot in demann nou pou  ekout zot koman bann MNA   endividyel epi International Affairs Committee.   Nou pe zis ekoute – nou pe sey  anmenn – nou pa pe fer lanket  – nou pa pe al gete lekel ki annan rezon – lekel ki annan tor.  Ok?  Nou pe zis anmenn en led akoz nou partner – nou partner avek Minister Zafer Etranzer.  So annou pa get li dan en fason negativ ok?  Annou pa get li dan en fason negativ annou get li dan en fason kolaboratif e se sa vreman  nou ki nou anvi fer.  Mersi.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker i pa nou lentansyon pou get li dan en fason negativ.  Annefe mon krwar I byen entansyonnel me solman i pa dan la direksyon ki i devret ale.  IAC i annan en terms of reference ki  relate avek Polisi  ki annan pou fer avek International Affairs; me par kont si par egzanp  ou koman en Manm  ou ti’n demann en kestyon en Minis pou li vin reponn la anndan that would have been your ambit.  However  i ki sa problenm i konsern en group travayer – si sa group travay i feel aggrieved dan okenn fason, i annan premyerman, enn i annan PSAB; dezyenmman i annan Ombudsmen e trwazyenmman pli enportan i annan Komite Anti-Viktimizasyon ki sa ki ava kapab deal ek sa.  Mon krwar  sa bann dimoun i devret ganny ekoute Mr Speaker – senserman they have to be listened to.  Mon konpran lentansyon  was the right  intention to do it, me solman pa as a Komite of IAC to do itLet the right channel deal with it akoz apre i pou afekte the solution down the line. Mersi.

 

MR SPEAKER

Les mon a klersi.  Sa request ti vin lo mon latab.  Anfet sa bann dimoun i bann ekonomis e  zot lalis ki zot in anvoye kot mwan ti zot e alongside ti ki  distrik ki zot ladan e lekel zot MNA dan distrik e zot in demann  pou entervenir lo baz ki zot ti santi i pou afekte serten proze dan Minister Zafer Etranzer.  I pa vreman en kestyon ki zot pe akiz personn.  E ler nou’n koze avek Deputy Speaker, epi mon’n diriz li ver IAC, lide  ti pou ekout zot epi anmenn lotorite sa Minister pou vwar menm dimoun e dir, ‘’look  oli problenm? ‘’ Nou ti kapab fer  li en lot fason  fer li vin kot Anti-Viktimizasyon, me mon pa’n santi poudir dimoun pe ganny viktimize.  I annan en issue ki zot pe kite prezan nou oule konnen – akoz?  E mwan dan mon lespri mon dir be pli bon metod, vi ki IAC i travay an kolaborasyon avek Ministry Foreign Affairs mon dir, ‘’Look koz ek PS Ministry Foreign Affairs apre koz ek Foreign Secretary Morel apre ki ou’n ekoute, what are the issues.’’  Si i annan serten sonm larzan pertinan ki ti enplike e nou ti annan en kestyon  letan pou nou pa perdi sa larzan.    Vwala i pa ti en kestyon enterfer.  Petet prosedir ti devret kapab fer lot reman; i annan diferan larout.  ‘There are many ways to kill a cat.’  Me  la nou ti anvi zis kill li personn pa perdi.  That is it – personn pa ti anvi konmsi kas kontour.  Ou konpran mwan ou?  Ok?

 

HON SEBASTIEN PILLAY

Mr Speaker mon krwar mon konpran lentansyon Onorab Ferrari.  Petet dan son lesplikasyon i pa’n met tou keksoz dan perspektiv apre sityasyon nou’n konpran so that’s the sityasyon ok. Thank you.

 

MR SPEAKER

Ok.  Kler, kler eski i annan okenn lezot lanons oubyen i annan okenn keksoz ki zot anvi dir?

 

HON JEAN-FRANCOIS FERRARI

Mr Speaker dan sa sousi – dan sa vreman sa sousi pou nou pa kree problenm kot napa problenm. Mon ti a zis kontan klarifye en keksoz ki ou’n dir – in case i ganny mal enterprete – ler ou’n mansyonn pou dir, i annan serten sonm larzan  ki pe… Mon fer kler i annan serten loan enportan ki pe ganny negosye – napa personn ki’n pran okenn larzan – napa larzan ki’n perdi  – i bann loan. E nou santi  en  pe enkyet pou gete ki mannyer sa process pou nou ganny sa bann larzan, pou nou kontinyen negosye – i ava pase.    The whole idea is to help if we can.  Mersi.

 

MR SPEAKER

Mon krwar sa i tre enportan  sa adisyon pou eklersi e nou pe koz larzan perdi; napa personn ki’n tous larzan Gouvernman, oubyen en overseas organizations oubyen en funding government. I en seksyon  – en Divizyon plito ki ti pe deal ek sa. E nou, nou krwar i devret vitman ganny rezourd pou nou pa perdi sa larzan dan en sans ki i pou anvole, me ki nou kapab ganny li pour benefis Sesel.  So mersi pou sa presizyon.  Avek sa mon remersye zot pou  zot partisipasyon.  Mwan mon repet sa ki mon’n deza dir avan;  mon krwar latmosfer ek lanbyans ki nou pe ale, i byen.  Nou fran ek kanmarad e sa i enportan e nou pou kontinyen koumsa.  Nou’n byen komanse  nou 2enm Trimes.  Tou rapor – feedback ki mon’n gannyen  pandan Break ek lo mon telefonn, i pozitiv. So annou kontinyen kit sa bar tre o kot i ete for the sake of Seychelles.     Wi Onorab Larue?

 

HON FLORY LARUE

Ekskiz mwan Mr Speaker, mon ti anvi zis klarifye si kekfwa  nou ti ganny okenn klarifikasyon sorti kot SBC apropo bann ….

 

MR SPEAKER

Wi mersi pou lev sa mon ti’n oubliye.  Thank you.  Petet Onorab Pillay i a ed mwan ler mon ti telefonnen i ti la o-bor an ka ek lafatig mon oubliy en bout. Me mon’n mon koze avek Mr Onezime – parey mon ti dir – e in dir ki Vandredi 9er lo SBC i pe pas sa bout ki Onorab Ferrari letan i ti pe koze dimoun pa’n tande, akoz ti annan sa power cut. Vandredi savedir sa semenn  la 9er diswar pou repase kekfwa ki tou dimoun i ganny sa sans pou  zot vwar.  Alor piblik ki pe ekout nou, zot a konnen, zot a vinabou vwar sa Vandredi 9er.  An se ki konsern, pou bann dimoun aletranze, mannyer mon’n konpran li sa in deza lo YouTube, me petet bann lespri en pe pli zenn  – en pe pli fresh i a eksplik pli byen.   Onorab Pillay.

 

HON SEBASTIEN PILLAY

Mersi Mr Speaker.  An se ki  konsern sa kestyon ki ti annan pou fer avek sa Press Conference pou krwar ki ou ti demann mwan bomaten,  ki pa ti ankor ganny upload. I ti’n donn son garanti ki sa ti pe ganny fer during the course of the day e ki  sa should be on that site ki bann dimoun i kapab ganny access avek.  Ok?  By the end of today, i ti’n dir.  If it’s not there then, nou kapab come back and check with them.  Lot se Vandredi 9er diswar.  Mersi e nou a zwenn zot Mardi prosen 9er.

 

(ADJOURNMENT)