Home » Verbatim » 2017 » Verbatim – Friday 17th February (SONA Reply)

Verbatim – Friday 17th February (SONA Reply)

NATIONAL ASSEMBLY OF SEYCHELLES

Friday 17th February 2017

The Assembly met at 9am

National Anthem

Moment of Reflection

Mr Speaker in the Chair

 

MR SPEAKER

Bonzour tou Manm Onorab.  Bonzour tou bann dimoun ki dan lakour ki pe ekout nou e ki parey mon dir tou le bomaten sa ki an deor lakour.  Fotespere zot in pas en bon  sware e ki ozordi i dernyen zour travay dan Lasanble pou sa semenn ki zot osi zot a pas parye nou en bon lazournen.  Yer parey zot in tann nou nou’n fer en zournen travay ki mon krwar ti ris e mon ti a kontan dir ki mwan ler mon’n ariv se mwan yer swar, mon’n santi mwan konmsi optimist parske mon vwar en kantite lalimyer ki kler lo Sesel.  Mon vwar ki sa bann moman fernwar oubyen darkness ki ou’n pas ladan, i pe ale – sa bann nyaz pe ale e mon santi ki i annan en lalimyer e nou, nou pe fer nou marse koman en Lebra Gouvernman  – Lasanble Nasyonal.. E bomaten  letan mon pe reflesir – mon pe fer mon refleksyon, mon’n mazin en parol ki Onorab Adelaide ti dir yer e son non i apel Francois e i ti envok lapriyer St Francois D’assise.  Alor pou fer mwan  mazinen mon’n al lo mon laptop e mon’n goggle sa lapriyer e ler mon regarde I dir ,’’make me an instrument of your peace’’, Lapriyer St Francois.  Mon ti a kontan lir sa avek zot avan ler nou komanse bomaten akoz i dir  – akoz mon vwar sa koman en lapriyer Iniversel – Endou – Mizilman, Buddhism  tousala ki kapab fer.

’’Lord make me an instrument of your peace.  Where there is hatred let me sow  love;   Where there is injury  pardon;   Where there is doubt; where there is despair – hope;   Where there is darkness – light;   Where there is sadness  – joy.  Oh divine Master grant  that I not so much seek to be consoled as to console.  To be understood as to understand; to be loved, as to love for it  is in giving that we receive and in pardoning that we are pardoned, it is in dying that we are born again to eternal life.’’

Mon fer sa refleksyon avan nou fer nou deliberasyon akoz Prezidan Faure ler in fer son Diskour in adres en size ki parey Onorab Ramkalawan in dir yer – i  tre dear to my heart  – parey Angle i dir sa zafer family.  E i vre ki ler mon ti retourn dan politik an 2014/ 2015 sa ti enn mon battle cry.  I devret annan en focus – en lalimyer tors i kler lo  lafanmir.  Tou sa ki nou’n koz lo la, respe – isi laba – lespwar i evolved otour  en mwayen linite dan sosyete ki apel lafanmir e nou, nou pe zwe nou rol isi koman Lasanble Nasyonal pou anmenn sa lalimyer lo Sesel – Zidisyer pe fer pou li Egzekitif pe fer pou li petet piblik pe demande ki nou kapab fer?  E vwala ozordi mwan koman Speaker, mon pe koz lo tou bann Manm Onorab dan Lasanble ki zot, se zot, koman en fanmir fer zot zenn parske konmela tou dimoun ki annan laptop; dapre konpran depi S1 pou annan byento P1 tou pou annan, so fer zot bann zenn – bann paran ki pe ekout nou, al enprim sa lapriyer St François ki Onorab Adelaide in koz lo la yer  avan wikenn i komanse.  Si zot laptop pa koz Kreol,  i pa koz Francais al kot laport Dr Goggle pez Prayer of St Francis of Assisi enprim li anmenn kot zot.  Si zot napa printer, ekrir dan zot kaye anmenn kot zot tanto e ansanm nou pe koz lo en nouvo Minister Lafanmir annou komans nou menm nou  sakenn de nou se nou.  Menm si ou tousel, ou napa zanfan ou annan  neve ek nyes, e se sa, sa zafer lafanmir evantyelman  mon ti a kontan koz lo la akoz nou krwar lafanmir  fodre i annan en papa – en manman  – ek 2 piti the ideal  nuclear family.  I kapab  pran diferan laform; I kapab  zis en manman avek son sel piti i en fanmir; I kapab  en tantin avek en piti son bann ser, I en fanmir e mon krwar i enportan pou nou sa ki Prezidan Faure in anonse I tre, tre enportan e nou si nou kapab komans  – nou tou sakenn de nou manm piblik, komans fer sa zefor anmezir nou pe esper sa Minister Lafanmir kree, pou nou priy ansanm sa lapriyer St François.  E mersi Onorab Adelaide e mon krwar i pa ti en kestyon par azar petet ou ti en mesaze ki’n dan Lasanble pou ed nou.  Alor donn Onorab Adelaide en bon lanmen.

(APPLAUSE)

 

MR SPEAKER

  Bon mon pa pe al antre per pa trakase mon pe reste dan politik.  Avek sa mon krwar nou a komans nou deliberasyon e mon ti a kontan donn laparol Onorab Ramkalawan.

HON WAVEL RAMKALAWAN

Mersi bokou Mr Speaker pou ou refleksyon bomaten e pou konsey ki ou’n donn nou.  Bonzour tou Manm Onorab e tou dimoun ki pe ekoute.  Mr Speaker mon  anvi raise en pti matter of privilege  e sa i konsern SBC an relasyon avek life streaming lo internet.  Konmsi mon santi ki SBC en pe parey dan lespri ki nou’n koze lo fairness, letan Msye Faure in vin adres nou isi tou son sistenm Internet ti pe marse, live streaming pour ki tou dimoun kot zot ete, zot kapab gannyen.  Letan in fer Press Conference live ankor enn fwa i ti annan live streaming lo Internet.  Me solman le moman ki nou, nou, al dan Lasanble in  komans nou deliberasyon SBC in deside switch off son live streaming e mon santi li i malere akoz i annan bokou Seselwa atraver lemonn ki pe swiv bann deliberasyon i menm annan Seselwa isi dan Sesel osi tou ki swiv atraver internet e zot pa’n ganny sa privilez pou zot swiv sa.  Mon konnen poudir         SBC i sipoze endepandan me solman dan sa lespri ki nou pe koz lo la kot nou pe koz lo latransparans – nou ti pe koz lo donn lenformasyon, konmsi mon santi li i malere konmsi SBC  ki abitye donn sa servis apranti yer – son lavey in fer li  – son lavan vey in fer li, me zis yer letan nou, nou’n komans nou travay in deside  pou li swit off sa.  Alor mon ti ava demande si i posib pou ou Lofis  pran kontak avek SBC e dir avek zot sa ki nou pe fer isi i pa zis pou nou rod score pwen politik parey nou deba in montre me nou pe rod en fason pou nou rod lenformasyon e anmenn nou pei.  Alor silvouple zot osi tou zwe en rol ladan.  Mersi bokou Mr Speaker.

MR SPEAKER

Mersi Onorab Leader Lopozisyon mon kapab konfirmen ki vre.  Mwan tou le semenn mon annan 2 zanmi Australie enn Bruxelles ki fer komanter lo Lasanble e mon realize ki I annan de moman ki mwan mon’n mank en keksoz ki en Manm in dir   zot, zot pe dir  mwan – demann mwan en kestyon lo la.  So definitivman ou annan rezon ki i annan lentere ek kominote Seselwa atraver lemonn pa zis Australie ek Lerop me par tou ki  menm Sesel pou swiv  e i malere ki sa in arive mon pa ti okouran me mon a donn ou garanti ki pandan Break 10er,  mon a sey rod CEO, SBC si mon pa ganny li parey mon ti fer lannen pase mon a sey ganny Chairman SBC – Mr Nanty e nou  a sey rezourd sa.  Me ou pwen i totalman valab e akseptab.  Onorab Prea. 

 

HON NICHOLAS PREA

Mersi Mr Speaker, pou donn mwan en minit.  Bonzour tou Manm Onorab.  Bonzour tou dimoun ki a lekout, mon anvi fer en pti klarifikasyon lo mon matter of privilege ki mon  ti’n lev-e yer apre ki mon’n ti’n fini Sesyon.  Mon’n ganny kontak avek Mr Dan Frichot nou pe sey sort out keksoz nou annan en bon lantant la bomaten pou nou schedule en site visit e mon anvi prezan en lekskiz avek Onorab Basil Hoareau, ki aparaman mon‘n eklersi son sityasyon ladan kot lafanmir ti pe vwar keksoz pe ti pe bouze aparaman mon krwar le 8 Fevriye  zot  ti an kontak avek son biro e li i ti donn zot en lodyans pou sey regarde koman i kapab help sa bann fanmir.  Alor mon prezant mon lekskiz e  mon dir osi tou mon lentansyon ler mon’n mansyonn non Mr Dan Frichot se pa ti en move lentansyon, me pou mwan regarde koman mon kapab  fer en kontak avek li direkteman pou nou kapab sort out.

        Mersi.

 

MR SPEAKER

Tre byen mon remersye Onorab Prea.  Se dan sa lespri ki nou travay ansanm parey mon ti dir yer annou aranze – mwan mon motto Anse Boileau se annou aranze.  E sa dan sa lespri ki nou mazin Sesel avan e mon kontan ki sa in eklersi.  Mon sir ki i pa ti ou lentansyon pou fer okenn keksoz derogatrwar lo personn.  Onorab De Commarmond.

HON CHARLES COMMARMOND

Mersi Mr Speaker.  Bonzour tou dimoun.  Mr Speaker ler ou pe pran kontak avek Mr Onezime tou sa zafer SBC la ti bon ou met transparan osi e ki donn nou byen lenformasyon ki egzakteman ki’n arive akoz mon’n aprann serten keksoz  – mon aprann poudir – konmsi fer nou konnen si i vre eski Mr Onezime ki’n dir stop sa?  Eski i annan Board Members ki in dir?  Si i annan Staff ki in dir?  Ti a bon nou konnen where the problenm  is akoz parey i paret i annan keksoz SBC ki sakenn pe fer en fason konmsi pou menm Board Members i esey enterfer zot dir mwan i annan ki al sey donn lanmen organiz Lamars – i annan ki pe sey organiz ankor Lamars mon aprann.  Tousala mon aprann i annan keksoz pou fer.  So i bon ou tyek byen e donn nou byen lenformasyon.  Pep Seselwa i anvi konn vreman kwa ki pase dan son pei.  Mersi.

MR SPEAKER

Ok, Onorab De Commarmond mon donn ou sa garanti ki mon  a fer li mwan menm – mon pa pou demann Clerk  – mwan menm mwan mon a koz avek Mr Onezime oubyen Mr Nanty. Mon pa okouran ki i annan okenn Lamars.  Nou’n koz dan Lasanble ki nou’n koze ou ti la nou’n koze avek Prezidan Larepiblik lo review SBC Act, so mon pa konnen ki sa Lamars ki zot pe dir.  Me mon a find out e ler nou retournen  apre Break mon a donn zot  en briefing lo la.  Ok?  Napa okenn matters of privilege nou a komans nou deliberasyon e mon krwar Onorab Afif ou ti anvi pran laparol e si zot dakor yer ti mars byen.  Nou a fer menm formil – nou a pran enn kote LDS epi nou a pran Onorab Ghislain dan son zoli rob ble ozordi next.  Onorab Afif.

 

HON AHMED AFIF

Mr Speaker, tou Manm Lasanble e tou dimoun a lekout bonzour. Mersi pour donn mwan sa loportinite reponn bomaten.

Mon kontan ki Prezidan Faure i realis lo problenm ki nou fer fas avek. Sa bann realite ki nou dan LDS, a sak lokazyon kot nou’n kapab koz avek pep Seselwa, nou’n fer resorti.

Sa bann lide tel ki retourn valer moral, sa fleo drog ek lalkol ki pe ronz prodiktivite e loportinite lanplwa pour Seselwa; gro defayans dan finansman ek bann proze lakaz, en sistenm ledikasyon ki malerezman pa pe prodwir rezilta akseptab; en sistenm lopital ki li osi pa kapab delivre a la oter lekspektasyon nou dimoun, ki pe rod tou mwayen pour sov zot lasante dan klinik prive ouswa aletranze.

Mon’n ekout atantivman bann lanaliz Prezidan e serten bann propozisyon.

Mon aklanm lide konstrir plis lakaz, menm 1500 lakaz Ile Aurore. Me oli larzan dan Bidze 2017 oubyen menm dan prozeksyon 2018?  Oli sistenm ki pour anpes zis serten kontrakter benefisye tandis ki kalite lakaz ki pe ganny delivre i annan gro defayans parey bann Perseverans kot bokou gaspiyaz in arive enkli la pert 4.5milyon Dolar plis ki 10 an pase? Nou bezwen pran mezir pour konpran fot lepase pour anpes sa kalite skandal ariv ankor si nou pe al konstrir 1500 lakaz.

Si nou dir ki Fon Pansyon pour pret R150milyon pour fer lakaz e i pour koup lo sa sonm egzazere R450milyon  kot Pirates Arms, konbyen lakaz nou pour gannyen?  E ki grander zot pour ete pour sa R150milyon? Eski menm kontrakter Fon Pansyon ki pour vin fer sa bann lakaz?  Sa bann kestyon i bezwen ganny adrese dan en fason sistematik e serye si nou pou redwir koripsyon ki finalman i a la baz mankman larzan e alors fleo sosyal.

Lo problenm drog, i byen ki nou komans reorganiz NDEA e mon swet sa nouvo lekip Seselwa dirize par Mr Krisnan Labonte tou le meyer. Me mon osi ensiste dan lespri la transparans e rann kont, ki nou fer lanket dan lekel ki responsab pour tir plis ki R15milyon tou le lannen pandan sa dernyen 10 an  – ase pour konstrir 300 lakaz – dan Bidze NDEA ek FIU pour pey en lakonpannyen lokal ki zot pa kapab devwale lekel e pour kwa? Eski i vre ki bann sef Irlande in kit pei san rann kont?  Fodre nou met keksoz o kler – pa zis efase, bliye e rekomanse sirtou kot koripsyon i konsernen. Nou pour tonm dan menm pyez si zis nou koz lo rann kont, me personn pa rann kont e nou Seselwa nou bezwen zis pey lepokase!

Prezidan in koz lo Scheme pour animater pour devlop sports dan distrik. Mon siport li. Me les mwan donn zis detrwa pti legzanp ki pa bezwen ni Scheme, ni animater, ni bokou larzan me ki pou ed bokou zenn dan mon distrik Anse Etoile.

Nou 2 tim basketball enkli lekip madanm i bezwen sanz dan lapay o-bor semen pour al pactise basketball pour zot distrik kan biro Sant Kominoter distrik i 2 pa lanmenm e i annan twalet ek changing room; zot pa kapab ganny en laranzman pour servi sa fasilite. Kan bann zwer  lekip  basketball i bezwen pey dan zot pos pou aste en net pour zot court ler nou annan en Bidze pour Sports ki plis ki R65milyon; ankor pa bezwen Scheme pour aranz sa. Kan manrmay foutbol i bezwen en transpor 2/3 fwa per semen pour praktis oubyen pour al zwe match anvil, pa bezwen okenn Scheme. Nou annan 2 tim beach football o nivo Anse Etoile me fasilite training i en gro problenm kan i annan landrwa dan distrik ki kapab avek detrwa kours disab ganny prepare vitman. Kan bann tim napa ni first aid kit, ni en ice box pour met delo; pa bezwen Scheme, zis partaz sa alokasyon larzan Gouvernman lokal e osi Bidze Sports korekteman. Sa bann pti keksoz pa pour kout sa pei nanryen ekstra, me i pou sanz motivasyon nou bann zenn ki pe fer gran zefor pour devlop zot dan domenn sportif e mwan felisit zot.

Mon konsey pour Prezidan Faure, avek gran imilite, sanz mindset sa bann travayer dan ou Gouvernman ki’n deside ki zot pa pe sanz sa mantalite parti inik.  Les mwan dir ki mon kontan vwar serten lenstitisyon pe  parey Angle i dir“walk the talk” kot mwan ganny zot korperasyon tel ki lapolis, NSC, HFC, SLTA, lanvironnman, DRDM, LWMA, Ladministrasyon Piblik, Imigrasyon me i ankor annan ki pa pro-aktiv, ni reponn email tel ki kot Minister later kot problenm i pli grav. Mwan koman MNA pli gran distrik dan Sesel, mon pa ankor ganny en apwentman pou vwar PS Labita depi mon’n demande depi le 14 novanm 2016. Si  a sa nivo, zot sourd lo nou, pli ba nanryen pa pou marse apard zoli parol. Eski i annan en plan pour eksklir MNA LDS dan zot bann plan pour rezon politik?

Mr Speaker lalis priyorite pour lakaz dan mon distrik, mon pa ankor gannyen ni lalis tou bann aplikan. Me lo mon kote, ozordi mon annan en lalis detaye lo tou bann problenm lakaz dan mon distrik ki mwan mon’n dekouver e ki mon partaz avek Minister Later ki li pa zanmen donn mwan okenn lenformasyon reel apard diriz mwan kot biro DA, ki li i dir i pa fer alokasyon later ek lakaz. Alor mon pe vir an ron parey mon zabitan. Sa  i   pa akseptab dan en sosyete kot nou sipoze premye dan la rezyon dan lenformatik, selman tou dimoun pe vir an ron ek mank lenformasyon!

Lo size ledikasyon, lanaliz Prezidan ankor avek respe – i pa nouvo pour nou dan sa Lasanble. Ozordi, baze lo rezilta ki ti ganny pibliye par Minister Ledikasyon lannen pase,  dan 30 zanfan ki dan laklas primer ozordi, zis 5 ki pour reisir ganny en bon rezilta A Level zour zot fini lekol.  Be ki mannyer nou pour ranplas etranze ki dokter, enzenyer, kontab, avoka, arpanter, arsitek eksetera ?  Par mwayen dan lemonn, rezilta Cambridge enternasyonal i montre ki dan en laklas 30 zanfan ozordi dan primer, 10 pour reisir avek en bon rezilta A Level. Savedir kot nou prodwir 5 zanfan A level parmi 30 zanfan lekol, lemonn  e bann pei ki pli pov ki nou pe prodwir 10 dan menm grander laklas, 2 fwa rannman ki Sesel I prodwir. Oli solisyon alors?

Mwan, mon kontan pour tou zanfan ki pour ganny en laptop anba nouvo Scheme. Me eski sa pour double nou rannman? Ki pe arive ek tir politik dan lekol? Ki pe arive pour donn plis pouvwar ek teachers; desantraliz kontrol e les headteacher annan en Bidze pour zer son lekol san enterferans Minister, me byen sir an swivan  tou bann lareg finansyel. Ki benefis pour annan  Wifi si ler i kase, zot bezwen esper Minister anvoy dimoun pour aranze e sa pour pran 2 semenn? Annou met progranm pour fer paran vin pli pres ek ansenyan e atak bann fleo direkteman ansanm ek lezot partner. Mwan mon pare pour donn en koudmen dan sa direksyon dan sa 2 lekol Anse Etoile.

Prezidan in koz lo lankadreman pour donn labours. Petet i a ede me sa ki pour fer diferans imedyat se aret pran larzan Gouvernman pour donn en lorganizasyon parey Jj Spirit ki klerman a la baz politik pour li donn labours. Rann sa larzan ek Leta e Leta atraver son lenstitisyon, i a donn labours selon son kriter, pa kriter politik.

Permet mwan regard sa lot sekter enportan  – lasante. Mr Speaker, i byen ki Prezidan i rekonesan ki nou sistenm lasante i dan boulvers. Mon siport son Polisi prevansyon. Me la devan nou, annou get gaspiyaz ki pe ronz nou resours. Mon pa ankor ganny en kopi sa kontra avek en lakonpannyen Abu Dhabi ki pe kout nou preski R47milyon zis pour dyaliz.

Dan lepase, sa menm louvraz ti ganny fer par 2 Cubain e Bidze pour dyaliz ti zis R19milyom. Ozordi nou pe depans plis ki 2.5 fwa pour menm servis. Petet landrwa I pli izyenik e standar en pe pli o. Me nou menm ki’n pey sa depans kapital me selman ozordi nou pe pey 2.5 an plis pour fer dyaliz.

Annou regard dan bann Kontra outsourcing, eski I normal kan ou anvoy 100 dra lopital pour lave e zis 50 ki tournen akoz zot dir ti tro sal oubyen i annan keksoz ki pe al mal? Kan dernyen fwa zot ti fer tender pour fourni manze ek lopital? Lekel ki pe ganny sa Kontra?  Ki pri ki zot peye? Se la kot gro larzan pe perdi.

Mwan mon pe ensiste pour nou annan vre solisyon ki pour annan vre lenpak imedya, annou pa vir an ron otour problenm, atak li e  mwan devan mwan, mon vwar sa fleo koripsyon koman target No.1.

I byen ki Gouvernman i konsernen avek pri manze e i anons mezir pour tir VAT lo lezot prodwi manze. Me kwa ki pe anpes zot fer ki en pti bwat ton kot IOT ki   pe vann R22 lo plizyer letazer? Dan plizyer laboutik?  Sa menm bwat ton ti vann R5.50 ler Dolar ti kout R8.  Akoz i pa pe vann dizon R12 kan pri Dolar pa’n double?  Gouvernman i annan par dan sa faktori. Lekel ki pe fer sa gro benefis lo lasyer Seselwa? Ankor enn fwa, mwan mon vwar sa fleo koripsyon koman target No. 1.

Mon kontan atann ki pour annan lenvestisman dan proze Kapital,  an agrandisman Por, konblaz, kab soumaren, souteren, eksetera. Pour nou koman konsonmater, mon konpran lide stratezik pour annan 2 kab. Me sa ki mon osi konnen se Internet ek data i tro ser Sesel. Si zot pe al met 2enm kab,  i   pou vin pli ser ankor.

Seselwa pe zis rod en pri rezonnab. Mon a sit en legzanp; Sesel mwan mon  dan lakour apepre 200 Ero pour ganny 30GB data, tandis ki mon koleg an Luxembourg kot zot saler i 6 fwa pli o ki nou, i pey zis 10 Ero  e i napa limit lo data kot son lakour. Apre nou rode akoz larzan i al zis en bor Sesel?

Avek respe Prezidan, pa les personn fer ou per avek gro sif ek largiman Sesel i ptipti. Mon rapel byen an 2007 kan serten zot ti dir pour kout 60milyon Dolar pour met en kab soumaren, mon ti a latet  sa lekip anba ou gidans Prezidan Faure ki ti met sa kab pour zis par lao lanmwatye sa pri.  Ouver sa marse. Les Seselwa envestir dan  biznes dan latransparans avek partner a aletranze si fodre. Fer konpetisyon zis, zot a vwar ki mannyer sa marse pour re aranz son bann pri e nou tou nou pour benefisye. Annou rod solisyon pa plis letid ou kontrol oubyen nouvo kab.

Mon kontan ki marse transportasyon aeryen i pou ouver e lenvestisman lo zil osi pour ouver. Me si IDC i kontinyen avek menm lankadreman kot zis li ki fer Lalwa, li ki ziz, lapolis, lotorite li menm e enpoz nenport kondisyon lo zil ki zis dan son faver e ki pa zis, personn pa pour envestir.

Dan lespri la transparans, annou fer pep Seselwa konn tou kondisyon anba ki tou nou zil ti ganny finalman lwe ou donnen ek sa bann envestiser e  lekel zot?

Mon pa’n tan koz lo lapes dan ladres Prezidan. Se pourtan i en sekter enportan dan nou pei. Eski nanryen pa pou ganny fer pou aret destriksyon nou ton e lezot pwason an mas par sa bann tonnye? Oli plan pour fer sa lapes vin soutenab e ekolozik sirtou kan zot pey nou zis i zour pour 30 zour lapes? Pa’n ler pour revwar sa bann Lakor si nou vreman serye pour anmenn plis larises pour nou sitwayen, enkli bann doker ki travay anba kondisyon difisil pour detrwa roupi par tonn?

Finalman, Mr Speaker, mon rekonforte par latitid Prezidan Faure. Me pou transform Sesel, nou bezwen vre aksyon pour adres problenm mazer, lapovrete e sirtou koripsyon. Mon remersye mon bann koleg dan LDS ki pa’n zanmen les tonbe e mon fyer pour zwenn ek zot pour kontinyen tap sa laport ki pe ouver gradyelman, pour fer tou Seselwa konpran la realite. Pour mon bann koleg lot kote latab, e mon dir sa ek respe i kler ki Prezidan Faure ozordi i dakor avek la realite ki nou dan LDS nou pe koz lo la. I pa neseser pour santi zot ofanse e atak nou an person akoz nou kritike kot i mal. Mantalite parti inik pa pou anmenn nou okenn par. Nou dan LDS nou pe rod le meyer pour Sesel bouz devan akoz nou kontan Sesel. E nou pour toultan met Sesel premye e wi avek Lagras Bondye nou pou delivre Sesel!

Mersi Mr Speaker.

 

                (APPLAUSE)

 

MR SPEAKER

Mersi Onorab.  Nou a donn laparol Onorab Ghislain.

HON CHANTAL GHISLAIN

Mersi Mr Speaker.  Bonzour tou dimoun.  Mr Speaker tou dimoun   i annan drwa balans son lebra nenport ki direksyon i anvi. Me sa drwa i aret  letan ou lebra i ariv kot bout nennen sa dimoun.  Sa i lesplikasyon pli kler e fasil ki mon kapab donnen  ler mon dekrir drwa nenport ki endividi.  Mon’n komans mon lentervansyon koumsa akoz sa lesplikasyon i osi aplik  ek leta nou Nasyon ozordi.  Tou dimoun i annan drwa dormi anpe dan son lakaz parey ou osi ou annan ou drwa zwe ou lanmizik, me si ou lanmizik i anpes mwan dormi la  ou pe vyol sa drwa ki ou annan.  Parey i ou drwa ki ou ganny akse avek tou lans Sesel, i osi ou drwa pou respekte drwa trankilite sa bann letablisman touristik ensi ki trankilite sa bann fanmir ki zot lakour i bord avek lans.  Ok i byen ki nou tou nou koz  oule akse avek lans, me konbyen fanmir ki ozordi i reste dan leo, ziska ozordi i ankor pe lager pou ganny en akse  semen ideal pou li ariv kot son lakour, zis akoz sa ki reste dan leba zot ankor voras pa pou donnen me pou vann en pti morso zot later zis pour ki Gouvernman i kapab konstri en semen pour sa ki reste pli o ki zot osi zot kapab ganny akse pou ariv kot zot dan en transpor. I byen nou’n lager pou ki Gouvernman in egziz sa ki’n bar akse avek lans pou piblik, me ler Gouvernman i apros ou pour en bout later,  pou akse semen pou bann ki reste pli o azir konsyansye ou osi e asiste  e asiste sa bann frer ek ser Seselwa.  I malere poudir ki sa size akse i ankor en gro problenm dan laplipar distrik e kanton ozordi.

        Mr Speaker, sete avek bokou imilite tandres e lonnekte, e senserite ki Prezidan in koz  avek  son pep akoz i en ladres ki fran e apropriye a sa moman e lepok.  Prezidan in dir bokou keksoz dan son ladres.  Bokou keksoz ki afekte Seselwa direkteman mon pou limit mon komanter lo son Ladres lo en sel pwen.  Sa i bann fleo ki pe kontinyelman ronz nou sosyete; ronz nou bann lekol ; ronz nou bann kominote e ronz nou pei; bann fleo ki’n de bord miray nou lakour e ariv ziska dan  baro lekol e pli tar fann lo semen e dan nou kominote. Lefe ki tou i komans dan lakour – dan nou fanmir in neseser alors ki nou retourn dan lakour pou rezourd problenm.  Desizyon pou en Minister Lafanmir i ava direkteman ede pou rezourd sityasyon.  Ler ou asize  e fer refleksyon lo sa bann fleo sosyal ou realize ki zot relye ek kanmarad dan en fason ou en lot depi son drog, lalkol problenm  disiplin dan lekol konportman anti-sosyal  – bullying, prostitisyon, negliz bann zanfan e bokou lezot.  Tou sa ler ou regarde  son lakoz, i dan lakour.  Mr Speaker, i malere  poudir lakantite zenn vyeyar ki kontinyen ogmant,  Zenn in vin vye avan zot ler zis akoz lalkol ek drog.  Sa size drog ek lalkol pour mwan i  en size tre sansib e i bles mwan en kantite sak fwa ki mon koz lo la.  Mon’n konn vre soufrans en zenn ler i ankor pe etidye ki  mannyer i tromatizan ler ou annan en papa ki konsonm lalkol ki mannyer i pa ti gou pou viv dan lakour.  I fer mal antann zistwar kot en papa  – en frer i deside zet son lavi an plenn mer zis akoz in les lalkol pran kontrol son zizman ler i trouv li dan problenm.  Mon partaz soufrans sa manman ki’n perdi son 2 zenn garson an rezilta sereng sal.  Mon egalman partaz soufrans sa manman ki tou le 3 son bann garson i lo eroin ozordi.  Mon’n ganny sans pas en pe letan Anse Aux Pins lannen pase  pli presizeman Chetty Flat,  mon leker ki oule desire letan mon ti temwanny sa kantite zenn garson ek fiy ki ti pe enzekte zot lekor avek drog kanmenm ou pe sey koz ek zot, zot labous pe bate pe sey reponn ou, me zot lizye pe ferm tousel akoz sa drog ti pli for ki zot laliny panse.  Zot in fini vin bann viktim; viktim en sibstans ki zot lekor pa kapab reziste.  I annan ki oule arete, me zot zis pa kapab sepandan li sa enn ki vann sa bann sibstans, son zanfan i trankil kot li byen gro gra  pe enjoy zot lazenes.  Parfwa mon demann mon lekor,  akoz sa bann gro msye – gro madanm sa bann trafiker pa esey omwen esey enzekte en pti pe sa eroin dan lavenn en zot prop zanfan e  koumsa zot osi zot a konn soufrans sa bann fanmir.  Mr Speaker i sagrinan trouv sa kantite paran in les zot zanfan sap zot e ki ozordi zot in nepli kapab annan kontrol lo sa bann zanfan.  Sa bann menm zanfan ki pran  Mis koman zot dalon zis akoz kot zot, zot pran zot paran koman dalon.  Sa ansenyan zis pe seye met en lord akoz taler sa menm paran ki  son zanfan in nepli annan respe pou li i pou  vin deswit kot lekol pou  pik zip ek Mis.  Me kan pou vin diskit progre son piti kot lekol li menm  pou trouv li mil rezon akoz i pa kapab ariv kot lekol.  Me kan pou  vin ensilte e zour Mis kot lekol, byen granmaten in plake kot baro lekol.  Mon  zis demann mon lekor kote nou pe ale koman en sosyete.  An rezilta tousala, ansenyan I dekouraze, zot prefere al swiv en lot karyer e apre se tou lezot zanfan ki soufer.   Napa ansenyan Lasyans, napa ansenyan Matematik eksetera.  Lontan lekol, rezilta bann zanfan ti pli byen.  Ou konnen akoz Mr Speaker, akoz lontan zanfan ti anvi sorti dan lapovrete – anvi sorti dan sityasyon ki zot ladan.  Me ozordi I nepli annan sa driving force pou fer zot etidye e pou ganny en  bon karyer.  3 kar zanfan ozordi depi dan vant i deza konnen ki zot annan en leritaz – lakaz, loto dan bann ka ouswa menm en biznes alor ki volonte zot pou annan alors  zot pou annan pou etidye?  Zot in deza annan tou.  Mr Speaker, mon ankor rapel byen sa pti garson 11an ki ti ganny sispann lekol.  E manman ki li i ti’n deside ki i napa letan pour sa zanfan dan pti 5er apre midi  pou kriye byen for, ;’’Sorti la al lwen mon pa oule vwar ou la.’’

        Mr Speaker, sey dir mwan dan sa ler rendi, kote en zanfan pou ale ler son manman in dir li ale.  Eski sa paran pe dir ki sa zanfan in nepli son responsabilite me plito responsabilite vwazen?  E pov li  kantmenm i pe dir ou ,’’Ou konnen manman I pous mwan?’’ Manman pa tann nanryen li.  Si sa laz ou pe pouse e deza in ganny sispann kot lekol ler in ariv 15an/16an ki ou pou fer avek mon ser?  Mr Speaker sa i zis en pti legzanp ki mannyer nou menm paran nou afekte en zanfan olye asiz en moman avek li e  sey ekout li en kou.  Mr Speaker, depi ki mon‘n antre dan politik mon’n deside deklar en lager kont bann ki krwar akoz zot groser, grander e lotorite zot krwar zot kapab kontrol lezot e menm fer ditor sa ki zot konsider i pli feb ki zot.  Tou dimoun i annan drwa pou santi li an sekirite toultan.  Sa i en drwa imen fondamantal depi  sa pti baba ki premyer fwa ouver son lizye e salye sa monn ziska sa vyeyar, ki nenport moman pou ferm son lizye e dir adye sa monn.  Me parfwa se nou menm zonm ki’n pran tou drwa e desten dan nou lanmen e komans dikte  avek ki nou frer lekel ki nou pou atrap lanmen lekel ki nou pou lev anler – lekel ki nou pou pez anba lipye – lekel ki nou pou proteze e lekel ki nou pou abize.  Me i malere Mr Speaker ki sa bann ki zonm i deside pez anba lipye oubyen abize se bann ki pa kapab defann zot lekor e sa se bann zanfan e bann madanm.

        Mr Speaker nou pe koz lo Leta Lanasyon annou koz osi lo letan nou bann fanmir;  Ki arive avek bann lensidan ki pe ronz nou bann fanmir e kominote san ki i a ganny raporte oubyen bann fanmir I deside kasyet?  Annou pran bann ka incest. Pour konbyen lannen ankor, ki bann fanmir pou kontinyen kasyet sa bann lensidan?  Pour konbyen letan ankor ki nou pou kontinyen tolere ki akoz sa in pas dan lafanmir, donk i devret reste dan fanmir.  Mon konpran parfetman, ki lenz sal i lav antre fanmir.  Me in tro sal aprezan.  Sa delo ki nou pe lav li ladan in tro sal avek lave re-lave dan menm delo.  Eski nou pa konsider troma ki sa zanfan pe pas ladan e ki kapab ale e reste pou en bon pe lannen an mezir ki sa zanfan i grandi?  Dan bokou ka sa bann lensidan parey  i ariv dan fanmir pli vilnerab kot tou lede paran i deza dan lanplwa sa abizer, set en dimoun ki tou sa zanfan enkli paran i  annan konfyans ladan.  Nou tou nou konnen ki i difisil pou remet en manm lafanmir dan lanmen lapolis, sirtou ler sa menm dimoun ki prezan en figir tre anzelik  me sa ki nou oubliye se ki tou dimoun i annan drwa pou li viv an sekirite.  Si nou protez sa zonm ou fanm avek son figir anzelik ki pou arive avek sa zanfan ki li non selman i en lanz lo figir me i  en lanz inosan dan son lekor osi.  Byen souvan ler ou regard kot ti komanse ou pou remarke ki sa in komans byen, byen lontan.  Si sa fanmir i annan 6 fiy tou le 6 fiy i resevwar zot  pwen avan legzanmen pou en draze oubyen en pti gato.  Sa i desann pou ariv kot bann nyes e lefe  ki in tro ganny kasyet ziska  kot sa pti garson osi pou resevwar son pti tik.  Ziska ki tan lafanmir pou kontinyen fer krwar sa pa pe arive; envant en lot zistwar lo sa ki’n arive fer krwar ki  zot santi zot ok; fer krwar ki keksoz pa grav; izol sa zanfan pou fer sir ki i pa akont sa ki’n pase kot lakour parske paran i fer zot krwar ki personn pa devret konn sa.

        Mr Speaker, ozordi mon oule lans en lapel avek tou mon bann fanmir Seselwa – nenport ki kote oubyen pozisyon nou ete; pou lev-e e pran nou responsabilite pou byennet nou fanmir e lavenir nou zanfan nou kominote nou pei. Akoz? Sey dir mwan depi kan nou bann zoli fanm Seselwa  – zoli fanm Kreol abitye asize e pa travay?  Depi kan nou bann fanm Seselwa nou’n abitye lev midi?  I malere pou dir ki sa i  rezilta ozordi dan nou pei.  Mon kontan ekoute a sak fwa  ki en madanm Seselwa i selebre son laniverser  100an. Mon kontan ekoute akoz mon kontan ekout zot pe rakonte ki mannyer zot ti viv lontan e ki mannyer zot ti travay dir – trimouse parey zot pou zot fer sir ki zot zanfan i annan keksoz dan sa lasyet tou le swar.  Fanm Seselwa, ou vwar sa Parti ki o pouvwar ozordi pou konnen ki ti son lafors dan sa lalit fanm.  Ti pran detrwa msye pou mars devan, me ti bezwen bann fanm pou pous pli for; kriy pli for e azir pli determinen.  Ozordi nou bann fanm nou redonn nou langazman pou fer parey avek nou fanmir  – nou zanfan.  Langazman pou tonbe lev-e pli for ki zanmen avek pli viger e determinasyon pou defann nou lafanmir pou ariv pli devan.  Ou sa manman tousel ki pe travay dir menm fer 2 louvraz pou asire ki ou zanfan i ganny en twa lo son latet ; ou sa manman tousel ki travay dir pou asire ki ou zanfan i vin byen, i al lekol – i etidye i annan  en karyer mon retir mon sapo avek ou.  Ou sa fanm Seselwaz ki lev-e tou le bomaten pou al travay e ou osi ki malgre ou pe travay pou ou kontribye pou lekonomi nou pei ou still vwar li difisil pou fer sa 2 bout zwenn, mon zwenn avek ou  dan sa lager pou ou ganny sa lasistans an plis pou fer sa 2 bout zwenn.  Mon dir ou bravo akoz se ou kouraz e determinasyon ki pou kree bann prosen dirizan sa pei.  Me pour ou i pa ankor trouv li neseser pou lev-e al fer en louvraz avan rod welfare apre se ou menm ki pou asize anba pye Takamaka, avek en sak labyer e ki sak laniverser  i vedir en parti – mazinen ki sa enn ki li i pe trimouse toulezour pou pey tax i trouv ou e ozordi i fristre e ankoler avek ou. An konklizyon Mr Speaker, mon reste konvenki ki nou tou ansanm nou kapab ranvers sa sityasyon ki ranpli avek defi sosyal, kot nou pe anmenn nou bann zanfan e nou kominote – anmenn plis larises e fer lafyerte nou fanmir.  I responsabilite sakenn de nou sa.  Tou sa ki demande se sa volonte politik pou fer li.  I nepli tan pou reste deryer e kritike san lev en pti ledwa  pou ede.  Mon swete ki nou tou Seselwa nou fer bann bon refleksyon  – refleksyon kote nou sorti  kote nou’n arive e kote nou  anvi ale.  Si sa i en swe senser, akoz si nou pa asize e komans retir tou sa ki pe ris nou deryer, tou sa ki fer nou pa bouze dan nou fanmir e dan nou lavi – nou pou touzour trouv nou dan det – trouv nou  pa  pe kapab okip nou lakour – trouv nou pa pe kapab trouv nou  pa pe kapab okip nou lekor – okip nou zanfan e byensir nou pa pe kapab okip nou lakour.  Mersi Mr Speaker.

        (APPLAUSE)

 

MR SPEAKER

Mersi Onorab Ghislain  e met lanfaz lo responsabilite lafanmir.  Trez enportan. Mon a donn laparol Onorab Letourdie.

 

HON JANY DE LETOURDIE

Mersi Mr Speaker.  Bonzour Mr speaker.  Bonzour tou dimoun  a lekout.

Mr Speaker, le 14 Fevriye 2017, nou ti antann en Diskour lo Leta Lanasyon fer par Prezidan Faure. san okenn dout sat i en Diskour ki’n anmenn en pe soulazman e en pe lespwar. Pour dan LDS, in sirman zwe lo nou lemosyon akoz pour premye fwa Lopozisyon pa’n vwar li pe ganny  maltrete e ni pe ganny blanmen. Diskour Prezidan Faure in anmenn en melanz lemosyon  kanmenm sirtou enn ki’n kit bokou dan dout e pa ankor kapab arive krwar ki sete en Prezidan Parti Lepep ki ti pe koze. Mr Speaker, parmi mon febles, mon enn parmi bann ki ankor annan dout me mon’n osi aprann ki fodre donn benefis du doute kan i neseser. An di-z-an sa mon pa bliye ki se ou Prezidan Faure ki’n ganny swazir pou fer tonbe selebrasyon le 5 Zen pour ki i a reste ryen ki listwar aprezan. Mr Speaker Paulo Coelho ti pou kontan koz lo sa lasyans  e mon krwar i vo lapenn pou mansyonn sa lasyans ki’n arive Mr Speaker; zis ekout sa;  le 5 zen 1977 Danny Rolande Antoine Faure pa ti ankor annan laz vote, apenn 17an parey mwan menm.  Le 5 Zen 2016, LDS ti fer en Rali La Retraite e la  nou tou siporter ti abiy an nwar pou montre en siny dey pour sa dat. 2017 Prezidan Faure i egzekit lide LDS e sa se aret selebre le 5 Zen.

        (APPLAUSE)

HON JANY DE LETOURDIE

Mon kontan  ou lapros Prezidan Faure ou lapros gouvernans  akoz I diferan avek ou bann predeseser. Mon kontan ler ou deklare ki Lasanble Nasyonal i lavwa lepep Seselwa akoz  ou konnen kwa?  Sa i  zisteman leko Manifesto LDS ki dir’’ FER LI OU LASANBLE’’ e ou menm Prezidan ou pe fer li ou Lasanble. Mr Speaker, i vre ki en lot latmosfer pe rennyen dan nou pei, kot en nouvo lespri travay pe antre, enn kot i annan dyalog, konsiltasyon, e respe mityel, me Mr Speaker sa mon krwar I pa sifi akoz nou osi bezwen en plan stratezik pou kapab atenir sa bann gol.  Fodre plan I kler e solid.

Prezidan Faure,  mersi pou envit mwan dan  ou meeting konsiltativ ki  ti fer Roche Caiman.   Ou ti dir sel fason pou fer fas avek bann defi, se pou atrap lanmen kanmarad e pou  kapab fonksyonnen  ou bezwen  atrap lanmen ou partner  san okenn lafreyer.   La se selman apre sa ki nou pou kapab sot sa bann lobstak.  Ou ti osi dir ki fodre nou aret pas zizman lo en sitwayen san’ ki nou’n ganny sans koz ek li pou konn li. Ou ti osi azoute ki koman Prezidan aprezan ou vwar 360 degree e ki ou vwar en kantite keksoz ki ou pa ti vwar ler ou ti Vis- Prezidan. Mr Speaker   le pwen i reste, eski sa i vedir ki son pouvwar ti ganny limite? Pe enport Msye Faure, aprezan ou ki Prezidan e ou anvi  fer sa bann aksyon  e ou anvi par sa bann aksyon  montre ki ou vre lentansyon.  Sa mon krwar I byen si ou anvi re-fas sa bann fot lepase  ki ou ouswa ou Parti in fer sa I pli byen ankor.

Mr Speaker, Seselwa pe mazinen anvi ganny en lavi meyer kot pri komodite esansyel i a vreman a en pri abordab, e ki son saler i a reflekte son lasyer pour ki i a kapab met en pti larzan de kote koman savings. Li sa enn ki pe travay dan koltar depi plis ki 10 an, Mr Speaker I a pe mazinen si i pou kapab pran son retret a laz 55an akoz son lasante i a risk.  Sa msye ki’n ganny victimize akoz koripsyon  kelkonk e i  pa pe  ganny sa ki i  ti merite, i pe mazinen si zanmen i pou vwar lazistis; sa fanmir ki lakour in tonm an de pi akoz bann fleo sosyal  e aprezan napa okenn lantouzyazm,  e I pe zis vwar fernwanr e I pa konnen akoz i pe viv.  Mr Speaker, sa pti fiy 12 an ki pe ganny abize depi 5an ek son boper, sa 4 fanmir laba Roche Caiman ki pe viv 14 dimoun dan 2 lasanm, Mr Speaker zot, zot pa pe port latansyon  bokou avek en tren Express, ni  tinel, ni  en 2enm kab soumaren, malgre ki tousala i form parti nou devlopman. Me li pour li i pa pe vwar sa akoz Mr Speaker, santi li touzour ankor anvlope e pe esper  en ladelivrans.

Mr Speaker, mon soulaze pou antann Prezidan dir ki en nouvo sistenm pou ganny enplimante apartir Zanvye 2018, akoz pa sa lannen me plito tar ki zanmen. Prezans nou kiltir pou form parti bann kriter ki pou enfliyans en letablisman term lapentir, lanmizik, lakwizin e lezot form lar. Sa i en bon nouvel pour artis me fodre i vin en realite, Mr Speaker, I domaz ki mon pou bezwen fer konnen ki i self-employed ki pa tro, tro pe kontribye anver Fon Pansyon par neglizans, me souvandfwa akoz en mank travay lo marse local e alors napa gran reveni ki antre. Byensir mon pa pe zeneralize, akoz i annan parey mon’n dir en pti poursantaz ki  pe kontribye akoz i pe mazin son vye zour. Mr Speaker Minister konsernen i bezwen o pli vit posib,  ganny en dyalog-  en rankont  e fer en deba avek  nou bann artis e ed zot pou trouv en way forward.

Mon dakor ki i a annan en Minister pour Lafanmir pour vi ki zot pa mars lo lipye kanmarad zot de Zafer Sosyal. Mwan mon vreman kontan pour sa Minister  egziste, akoz pour mwan pwen lesansyel se, ledikasyon sirtou pour nou bann  madanm e nou bann zenn fiy, pou zot annan respe pour zot lekor, responsabilite,  e osi pour zot annan direksyon lo family planning, avek bi pou elimin lansentman anba laz, bann STDS, bann lansentman ki pa’n plan,  aborsyon e osi  prostitisyon Mr Speaker.

Pou konklir Mr Speaker, mon oule fer resorti   en quote Prezidan Faure  i ti dir dan son Diskour .  I ti dir, “Mr Speaker se bann kondisyon sosyal e materyel ki pa ganny adrese a tan e dan en fason sistematik ki fer en poursantaz nou popilasyon tonm dan sa ki nou dir lapovrete. ‘I ti dir, ’’Sa i en fe e sa i en realite.” Bokou mon bann koleg in dir aret fer politik bon marse e annou travay ansanm si nou serye. Se selman si nou  serye ki nou pou kapab fer tou sa bann keksoz ki nou anvi i egziste.  Alors set aki Msye Prezidan e Mr Speaker set atraver ou mon pe dir, savedir sa msye Roche Caiman ki’n ed son lekor par konstri son prop miray alors mon panse i ekspekte ganny asiste avek DA akoz li ki’n fer ‘ed toi le ciel t’aidera’ e prezan  DA i a kapab prezan en li ganny en pe materyo pou li krepi son miray akoz prezan  in tir en pe depans lo Gouvernman Lokal.  Mon bann ser, frer annan konfyans dan LDS.  Zot trouve ki poudir sel semen  e ki Bondye pe vreman delivre Sesel.   E zot mon bann ser ek frer lo lot kote latab mon ti a kontan dir zot pa per pou  dyalog avek nou LDS, akoz se nou ti touzour anmenn nouvo nide pou fer sa sanzman ki  neseser.  Mersi Mr Speaker.

 

(APPLAUSE)

 

MR SPEAKER

Mersi Onorab De Letourdie. E ki ou anmenn en pe lavwa pou bann artis, i byen. Nou a donn laparol Onorab Basil Hoareau.

HON BASIL HOAREAU

Mersi Mr Speaker. Bonzour tou bann Manm Onorab, bonzour Mr Speaker e tou bann dimoun ki a lekout. Mr Speaker, Prezidan Faure dan son speech Leta De Lanasyon in fer kler kote nou Nasyon i sitye, kote son leta i sitye. Prezidan for in osi fer kler ki son bann plan e son bann mezir ki i anvi met an plas pou anmenn Sesel pli devan e pou amelyor tou nou bann Seselwa.   Sa ki i enportan dan sa Diskour Mr Speaker, Prezidan pa’n zis dir nou kwa ki anvi fer me in dir nou ki mannyer i pou fer. I kler ki son plan e son bann mezir ki i annan i enn ki vyab e ki realis. Mr Speaker, nou pei i dan bon lanmen. Me kanmenm sa, nou annan bann defi ki nou bezwen adrese, Mr Speaker. Prezidan Faure in fer li kler pou nou adres sa defi nou bezwen travay ansanm. Nou bezwen zwenn ansanm nou tou pou nou adres sa bann defi. Nou tou nou bezwen met nou bann propozisyon devan e nou bann bon nide. Napa personn ki annan monopoli lo bon nide dan sa pei. Parti Lepep i annan bann bon nide, egalman LDS i annan bann bon nide. Annou pa lager lekel ki annan pli bon nide ouswa lekel ki pli malen. Annou travay pour Sesel e pou Seselwa, Mr Speaker.

(APPLAUSE)

HON BASIL HOAREAU

Mr Speaker, letan Prezidan Faure in koz lo travay ansanm i vedir ki nou dan Lasanble, sa 2 Parti i bezwen travay ansanm. I osi vedir ki Egzekitiv e Lezislatif i bezwen travay ansanm e tou Seselwa i bezwen ansanm pou travay Mr Speaker. Prezidan Faure i donn sa legzanp ki mannyer nou bezwen travay ansanm parske i pe met an pratik bann bon propozisyon ki sorti dan sa Lasanble, ki swa propozisyon sorti kot LDS, ki swa sorti kot nou Parti Lepep. I annan en sel kondisyon ki Prezidan Faure in mete sa propozisyon i bezwen bon pou Sesel e pou Seselwa. Si i bon pou Sesel e Seselwa, Prezidan Faure pou met li an pratik parske son ladministrasyon i annan en sel lentere, lentere Seselwa, Mr Speaker.

Prezidan Faure in osi adres en lot topik dan son Diskour e sa se respe, in koz lo respe mityel. I vedir ki nou dan sa Lasanble nou bezwen annan respe pou kanmarad pandan ki nou pe fer nou bann deliberasyon. Me i osi i enportan Mr Speaker ki nou dan sa Lasanble nou annan respe pou bann dimoun an deor e bann lenstitisyon an deor.

Wi nou annan en drwa e i nou devwar pou nou kritike kan i mal, pou nou dir bann fe me bann fe ki korek Mr Speaker. Wi nou annan en drwa anba Konstitisyon e nou ganny proteze pou sa ki nou dir dan sa Lasanble kot nou pa kapab ganny pourswiv ankour me i enportan Mr Speaker letan nou koz lo respe, letan nou koz lo latransparans ki nou fer sir bann fe ki nou mete devan sa Lasanble i korek. Annou pa fer bann rimer lo dimoun. I annan en tandans Mr Speaker avek tou respe ki mon annan pou mon bann koleg e mon pa pe akiz personn, sa i ariv lo tou le 2 kote. I annan en tandans pou krwar konmela poudir letan ou pran en rimer ou vin dir li dan Lasanble, ou fer li vin laverite. Mon apel sa blansisaz rimer. Akoz ou’n dir li dan Lasanble then i laverite, i pa korek. Annou fer sir avan nou fer sa bann statement Mr Speaker, nou fer sir nou ganny bann fe ki korek e ki byen parske annou pa abiz sa drwa ki nou annan, ki konstitisyon in donn nou, annou servi li byen pou promot nou la demokrasi. Mr Speaker…

MR SPEAKER

Order ! Order ! Order !

HON BASIL HOAREAU

Mr Speaker, Prezidan in koz lo drog e in fer li kler ki nou bezwen konbat sa fleo lo tou bann fron. Nou bezwen fer sir ki bann trafikan i ganny dealt with dan en fason sever. Me bann ki bann viktim nou bezwen ed zot. Nou bezwen fer sir ki sa drog, sa supply ou drugs i ganny redwir oubyen ganny eliminen dan nou sosyete pou fer ki nou bann zanfan e nou bann fanmir nepli ganny afekte par sa fleo. En keksoz enportan ki mon kontan ki Prezidan Faure in fer se sa nouvo team ki pe lead NDA, en team Seselwa. En team ki pou konpran nou bann problenm konman bann Seselwa. Ki pou konpran letan en manman i vin koz ek zot petet ouswa lenformasyon i ganny donnen avek zot. Zot pou konpran bann lokalite Sesel e bann mantalite Seselwa. Sa i enportan. E mon fyer konman en Pralinwa poudir i annan 2 Pralinwa dan sa team, Mr Labonte e Mr Barbe.

Mr Speaker, Prezidan Faure osi in koze in koz lo lefe ki i pou ede pou konbat sa problenm drog nou bezwen annan Regional Coorperation. Mon krwar sa i tre enportan. Nou Sesel lo nou menm nou pa pou kapab konbat drog antre dan nou pei.  nou bezwen travay avek bann pei dan larezyon pou fer sir ki drog pa antre dan nou pei. Lalkol in ganny koz lo la e nou konnen sa osi pe afekte nou sosyete. Prezidan Faure in montre sa konfyans ki i annan dan nou Lasanble lo sa size. In demann nou dan sa Lasanble pou annan en deba ouver lo sa size e pou donn bann propozisyon avek Gouvernman. Sa i montre ki Prezidan Faure in konnen ki nou dan sa Lasanble nou kapab donn bann bon propozisyon avek Gouvernman e in met konfyans dan nou. E alors mon pou demande ki sooner rather than later nou adres sa size e nou nobou met bann propozisyon avek Gouvernman Mr Speaker.

Mr Speaker, sa i anmenn mwan lo Minister Zafer Lafanmir nou’n koz lo la, Mr Speaker ou menm bomaten ou’n koz lo la. Nou konnen fabrik nou bann fanmir i ganny afekte. Lafanmir nepli annan sa menm lenportans ki ti annan dan le pase. Mon rapel letan mon ti pe grandi ki valer lafanmir ti annan dan sosyete. Sosyete nepli antas menm valer Mr Speaker. Mon mazinen ki avek en Minister Zafer Lafanmir nou a nobou revaloriz valer Lafanmir. I a osi ede pou protez bann ki pli vilnerab dan lafanmir parey zanfan pou fer, parske nou konnen, zanfan demen zot ki pou leaders, bann dirizan nou pei. Nou bezwen fer sir ki nou enkilke dan zot bann bon prensip e fer sir ki zot ganny proteze afen ki demen pei i ava dan bon lanmen Mr Speaker.

Prezidan Faure in koz lo lakaz nou konnen i en size ki tre pre avek bokou dimoun avek nou bann politisyen. Sa i en legzanp kler kot Prezidan Faure in fer ker ki mannyer i pou rezourd sa problenm. I pa’n zis dir nou i pou rezourd sa problenm me in met bann mezir e ban plan kler devan sa Lasanble ki mannyer sa problenm pou ganny rezourd. In fer li kler ki nou nepli kapab annan en sel fason, en sel prensip pou adres bann aplikasyon ki ganny mete an relasyon ek lakaz.

Nou bezwen fer sir ki bann bezwen dimoun i ganny kategorize afen kot zot bann bezwen i ava ganny adrese. En mezir ki mon’n kontan pou tande ki Prezidan in fer e en mezir inovativ sorti kot Prezidan, in dir poudir bann CSR public enterprises pou nepli ganny servi as Zanvye 2018, pou nepli ganny servi pou lezot keksoz apard ki finans proze lakaz. Sa en mezir ki mon konmann Prezidan pou sa e mon salye li pou sa.

Mr Speaker, Prezidan in fer kler ki kot i konser lakaz, bann laplikasyon i bezwen ganny dealt with dan en fason transparan e zis. Ankor i montre nou poudir letan i ti koz lo latransparans, lo rann kont dan sa Lasanble, le 18 Oktob 2016, i ti senser dan sa ki i ti pe dir. En lot mezir inovativ sorti kot Prezidan Faure ek son ladministrasyon Mr Speaker, se sa legal framework ki i pou anmennen pou 2 Lalwa. 1 Lalwa ki konsern sponsors bann etidyan pou al liniversite e lot Lalwa ki konsern pou ed bann dimoun ou asiste bann dimoun, nou bann sitwayen ki malad pou ganny servis medikal aletranze Mr Speaker.

Sa i 2 Lalwa ki bon. I bon parske premyerman an relasyon ek bann sponsorship pou bann etidyan aletranze Mr Speaker i pou fer ki i pou transparan, i pou annan rann kont. Etidyan pou konnen kwa ki zot bezwen ki bann kriter zot bezwen zwenn pou ganny sponsorship pou al liniversite.  E si en etidyan i santi poudir son drwa in ganny vyole, i pou kapab annan rekour a Lakour. Sa i vreman enportan e i montre ki administrasyon i 1 ki anvi met bann mezir transparan. Egalman an relasyon avek Lalwa pou bann Seselwa ki pou bezwen al ganny asiste pou servis medikal aletranze, sa Lalwa pou fer li kler ki kriter ki pou ganny servi pou pran desizyon lo la.

E si en pasyan i santi son drwa in ganny vyole i ava annan rekour a lakour. Sa i bann bon mezir Mr Speaker. In ganny dir dan sa Lasanble Mr Speaker ki Prezidan Faure pa’n koz lo koripsyon, mon pa dakor avek sa Mr Speaker. Nou pa bezwen koz lo koripsyon par mansyonn koripsyon. Letan nou mazin sa bann mezir ki Prezidan Faure in met an plas, i pe adres koripsyon. Letan i pe fer sir i annan latransparans, i annan rann kont, i annan bonn gouvernans, i pe adres koripsyon. Nou pa bezwen koz lo koripsyon selman par mansyon koripsyon me bann mezir ki ganny met an plas i pe adres sa size Mr Speaker.

Mr Speaker mon kontan letan Prezidan Faure in fer li kler ki Seselwa i bezwen ganny respekte dan son pei. Etranze ki vin Sesel nou donn zot lospitalite, zot bezwen enjoy sa lospitalite me pa abiz li. Sesel i pou Seselwa e i pou reste pou Seselwa e nou, nou bezwen pas an premye dan nou pei. Prezidan Faure in koz lo sa size Mr Speaker, letan in adres sa issue akse ek lans.

I enportan Mr Speaker ki Seselwa i kapab enjoy son pei san okenn lenterferans e sirtou par en lenterferans par bann etranze Mr Speaker. E mwan mon kontan letan Prezidan Faure in dir poudir akse ek lans pou vin en legal obligation byento e mwan mon pou dir annou al en pti pe pli devan, annou criminalize sa size, annou fer ki okenn dimoun ki enterfer avek en dimoun pou ganny akse ek lans ouswa en parti lans san rezon legal ki sa i vin en lofans Mr Speaker.

Dan son Leta De Lanasyon, dan son Diskour Prezidan Faure in osi mansyonnen ki i annan plan pou kree plis loportinite biznes pou nou bann businessmen Seselwa. Pou annan business aeryen ki pou ganny ouver ant Mahe, Praslin e bann Zil Pros. Sa i en bon linisyativ. I annan proze pou vilaz soutenab ki Seselwa pou kapab aste Par, sa i pou ede pou Seselwa partisip dan son lekonomi e osi rezouir bann benefis ki sa lekonomi i donnen. Sa mon krwar i en step in the right direction.

Mr Speaker mon kontan pou tande letan Prezidan Faure in deklar son sipor pou sa 2 komite. Se 2 komite ki parmi bann diferan komite ki nou’n etabli dan sa Lasanble, komite Anti-victimisation Committee e komite lo Laverite e Rekonsilyasyon. Sa i montre mwan ki Prezidan i senser letan in dir ki i anvi en Sesel kot i annan lape, kot nou tou nou a santi nou, nou annan par dan Sesel e kot pou nepli annan bann divizyon Mr Speaker. I montre nou ki Prezidan Faure pa pe get zis ozordi me i pe get bokou pli lwen, kot Sesel demen, pou annan en Sesel kot tou dimoun i a santi zot, bann malez ki’n arive, bann soufrans ki’n arive si in ariv i ganny geri e kot Sesel nou a viv an pe.

An konklizyon Mr Speaker mon anvi dir sa bann mo swivan. Prezidan Faure pe tenir byen for e i pa pe large bann prensip tel ki bonn gouvernans, latransparans e egalite dan loportinite.

Mr speaker le 18 Oktob 2016 letan Prezidan Faure ti fer son Diskour dan sa Lasanble bokou nou ti pe demande eski i pe koz zis zoli parol ?  Eski i ti senser dan sa ki i ti pe dir? Mon krwar ki i kler ki i ti senser dan sa ki i ti pe dir. I pa ti pe zis koz zoli me la i pe fer osi zoli aksyon osi Mr Speaker. Mr Speaker mon kontan letan mon’n tann Onorab Adelaide dir ki i soulaze ki Prezidan Faure ki a latet nou pei. Onorab mon annan bon parol pou ou, reste soulaze, reste soulaze parske Prezidan Faure pou a latet sa pei ziskan 2025.

Mersi Mr Speaker.

(APPLAUSE)

MR SPEAKER

Mersi Onorab Hoareau. Mon krwar bokou keksoz pe sorti dan Lasanble.  Fotespere madanm Flora Ben-David ki direktris Lenstiti Kreol ek bann ekriven Seselwa in tann byen sa term blansisaz-rimer.

(LAUGHTER)

MR SPEAKER

Petet sa i kapab form en tit enn bann zistwar kourt prosen Festival Kreol.  E osi Dr Marie-Reine Hoareau in anmas sa pou met dan son liv bann lekspresyon imaze.  Mersi Onorab Hoareau.  Nou a donn laparol Onorab Roucou.

HON CLIVE ROUCOU

Mr Speaker.  Bonzour Mr Speaker.  Bonzour tou Manm Onorab, espesyalman zabitan Plaisance.

Mr Speaker avek gran plezir ki mon pe a-port mon kontribisyon pour sa Ladres Leta Lanasyon par Msye Faure pour sa lannen2017

E pour komanse mon anvi dir avek Onorab Hoareau, mersi a lafen defen  ou’n arive vwar ki dan LDS i annan bann bon lide.  Mon ti ava kontan ou ti ava dir sa avek ou ex-Prezidan akoz ki li i pa ti krwar ladan.  Mersi Onorab Hoareau.  Mr Speaker mon anvi konmans mon lentervansyon lo baz 2 kestyon. Mon premye  kestyon se AKOZ in pran Msye Faure 19an  – pardon mon langaz  – pou li come his senses, ki in vwar  ki sa pei anba Prezidan Michel ki i osi i ti form par   – nou ti pe al dan en presipis ?  la realite? Me solman plito ‘tard que jamais’ in vwar avan  nou fini mor.  Dezyenmman  ler mon regard sa Leta Lanasyon, mon’n demande si vre sa Diskour  plan Msye Faure i pou anglob lepep Seselwa e zabitan Plaisance ?

Par ler mon en pti pe konfize la aprezan.  En tel Diskour par Msye Faure mon pe zis swete ki pa akoz sa levennman ki ti arive an Septanm 2016 ki apel 15/10,  ki’n fer li sanz son mindset li osi.  E ankor mon donn li son benefis.

Mr Speaker ler mon tann Msye Faure dan en fason ou en lot, mon soulaze ;- mon soulaze akoz a lafen defen tou keksoz ki Msye Faure in koz lo la in egzakteman tou sa ki nou dan LDS nou’n koz lo la e apre, e apre pour en kantite letan. Par egzanp drog, lasante, ledikasyon tousala si zot ouver dan nou Manifesto zot pou vwar.  Ankor mon abitye ek sa bann keksoz ki tou lede parey Onorab Hoareau in dir i sorti kot LDS.

Mr Speaker mon   asire in pran Msye Faure en kantite lafors e kouraz pou li admet laverite ; en kantite lafors e kouraz.  En kantite keksoz in mars mal dan sa pei ankor in anba gidans son predeseser ankor kot li osi i ti form parti sa sistenm.  E parkont ler mon get bann gran laliny kot in koz lo la parey drog e Mr Speaker drog in tous leker en kantite akoz tou sa kantite letan ki mon travay koman en ners dan Lopital Sesel mon’n vwar zenn zonm – zenn fanm ki’n mor avek drog e lezot konplikasyon ki’n relye avek drog.  Mon swete ki sa voyaz Msye Faure avek  lapwentman sa nouvo tim travay a pli entans e travay i a pli focus ki enn fwa pour tou sa bann escobar, ki nou koz lo la apre e apre,  nou ava kapab met en pwen e en lafen avek zot.  Mon fatige vwar nou bann frer e nou bann ser ki parey bann zombie o-bor semen.  Alors Msye Faure lo kote drog mon asire ou pou ganny sipor tou dimoun dan sa Lasanble espesyalman lo kote nou dan LDS.

En lot pwen ki Msye Faure in koz lo la se lozman. Ankor enn fwa lozman – lakaz i lo tou azanda. Ozordi sa pep pe soufer ankor akoz politik ti zwe  en rol ; politik ti en kriter pour ou ganny lakaz. Ozordi en kantite dimoun ki ti dan bezwen ganny lakaz in zis pa’n gannyen akoz zot pwennvi  politik. E mon reste optimizm avek sa landscape politik ki’n sanze mon swete keksoz i a kapab fer dan en lot fason.

Dan son Ladres Msye Faure in koz lo 3 Housing Estate ki lo son priyorite.  Sa bout mon santi mwan en pti pe sagren.  Mon dir mon santi mwan en pti pe sagren  akoz Housing Estate lakaz Lanmisyon ki nou apel lakaz Per Belvédère pa’n ganny touse. Msye Faure sa bann fanmir I dan lapenn, e zisteman sak fwa  – sak fwa eleksyon in arive lakaz Per Belvédère in en pwen politik kot tou sa bann dimoun i ganny anbete – i ganny bat latet ki lakaz pou ganny fer, lakaz pou ganny fer ziska ozordi zot dan en sityasyon deplorab.   Alors mon ava envit Msye Faure formelman pour li vin get mwan en kou dan Plaisance epi pour nou vin get sa bann dimoun dan vilaz Belvédère ki mannyer zot pe viv.

Lot problenm lakaz se lakaz Kan Gard ki vir lo kote Plaisance.

Mr Faure I annan 6 blok flat ki’n fini ganny fer – ki’n fini pare.   Ankor nou vwar politik pe fer letour sa 6 blok flat.

Par koensidan i annan 2 ki’n fini ganny donnen me avek

aktivis Parti Lepep ; aktivis Parti Lepep  ki’n mars deryer MNA dan sa dernyen eleksyon.

I annan 4 ki ankor available e  pa ankor deside me parkont

Minis Bastienne dan sa Lasanble kestyon ki mwan mon ti demann li ki mannyer i pou distribye sa bann lakaz?  Son larepons se lakaz Kan Gard pou ganny distribye avek dimoun Kan Gard akoz i pouf en proze rellocation. Ziska ozordi sa 4 fanmir ki pe espere ankor in ganny kit dan en limbo.

Alor Msye Faure mon ti ava kontan ou ti ava get dan sa sityasyon.  Me parkont mon santi mwan soulaze apre mon diskisyon apre mon diskisyon avek Minis Joel Morgan konsernan enfrastriktir lekol primer Plaisance, mon miting avek District Team avantyer, mon’n soulaze ki lekol Plaisance, lenfrastriktir i ganny travay lo la.  Mersi Mr Morgan.

En lot topik ki, Msye Faure in koz lo la se nou sistenm Lasante.  Ankor  sa sistenm Lasante, i pros ek mon leker. Koman en ners pour 20an dan Minister Lasante mon pran li koman mon pti baba.  Alors  mon leker i fermal

Ler mon get mon bann koleg

travayer lasante ki pa pe ganny trete byen. Mon pe demann Msye Faure silvouple pa zis ekout Management oubyen bann dimoun dan Red Roof  ki mannyer sistenm Lasante pa marse.

Silvouple al lo field koz avek  nou bann koleg ners; koz avek  nou bann koleg paramedic, lab teknisyen, drayver lanbilans, porter  – zot ava eksplik ou zot soufrans ki zot ladan.  Ners zot ankor pe esper en Scheme of work.  Zot pe ankor pe ganny peye peanuts.  Toulezour nou tande ners i en profesyon nob ; en kantite dedication i ganny donnen pou fer sa travay.  Me yet again sa bann dimoun pa pe ganny trete byen.  Msye Faure pran sa koman en langazman ankor ; gete ki mannyer nou bann kad travayer Lasante pe ganny trete.

En keksoz ki mon leker i oule fermal ankor se ICU. Lannen apre lannen nou’n ganny promete ki pou annan  en nouvo. ICU ; kil er ICU i plen pe ganny D’Offay Ward  pou tretman.  Msye Faure get dan sa sityasyon.  D’Offay Ward  i pa ideal  pou tret en pasyan ki son iminite I deza ba ou pe met li dan en landrwa ki lenfeksyon i 100 lo 100.  Ki ou ekspekte prognosis pou été ?  Alors get ladan sa proze ki ti annan pour ICU – sey gete ki mannyer  ou kapab fer li marse.  E mon bann koleg  ki dan ICU i kapab travay dan en lanvironnman ki conducive and I know zot pe done zot  very best – ners ek dokter me lanvironnman  I ava ganny aziste.

Parkont mon bann koleg ankor

drayver ek porter lanbilans, porter  – zot kondisyon travay pa bon ; zot ler travay pa bon  e zot saler pa bon.   Msye Faure silvouple get dan sa bann sityasyon.

Ankor Msye Faure in koz lo lafanmir. Pour mwan tou problenm ki arive si napa en bon fanmir solid – fanmir i linite en sosyete; si fanmir pa solid ki mannyer en sosyete  pou bouz devan ?

Lo mon kote mon donn Msye Faure sa sipor ki wi nou devret tackle lafanmir lo son pli pti nivo ki demen  – ki demen pli i fleri pli sa bann zanfan i grandi pou vin dan lasosyete, nou ava annan en bann dimoun egzanpler ki pou fer marse sa pei.

Pou terminen mon anvi remersye tou dimoun ki’n vot pour LDS, ki’n vot pour sa tim LDS . Mon garanti ki si ti napa LDS nou ti pou ankor dan en fernwanr – nou ti ankor pe tat, tate pe rod semen desann e ki mon asire nou pa ti pou vwar.

Mr Speaker,  mon anvi dir Msye Faure laverite i toultan vin par lao mansonz.  I parey delwil lo delo.  Me garanti Msye Faure si ou travay ou ganny nou sipor.  Mersi  Mr Speaker.

MR SPEAKER

Mersi Onorab Roucou, sirtou pou ou pasyon pour Lasante Onorab Valmont.

 

HON JUDE VALMONT

Mersi Mr Speaker.  Bonzour Mr Speaker. Bonzour tou koleg Onorab.  Bonzour tou Seselwa ki pe swiv nou.  E en bonzour spesyal pour tou zabitan Pointe Larue

Mr Speaker, Mardi le 14 Fevriye in en zour ki nou dedye pour lanmour ; e se egzakteman sa ki Prezidan Danny Faure in senmen pa dan son premye Ladres Leta Lanasyon. An plis, in osi senm lespwar pour Tou Seselwa. Ladres nou Prezidan in prouv avek nou ki vreman li sa zonm for a latet f nou pei ki a lekout tou kous son pep.  E i kontinyen ganny gide fortman par bann prensip nob tel ki lazistis, legalite dan loportinite, lazistis sosyal, e redistribisyon larises.

Sa i zisteman anforsi vizyon nou Parti ki kontinyen lite pour met Pep Seselwa o sant devlopman. Permet mwan Mr Speaker, pou Sit nou Prezidan lo sa pti bout ki’n tous mon leker. Mon komans mon sitasyon ; “Kot Sesel i reisir, Nasyon Seselwa i osi reisir”. Fen sitasyon.

I enportan pour fer lepep Seselwa mazinen ki dan son Ladres Inogiral konman Prezidan pei, Msye Faure ti met bokou lanfaz lo “Linite e Rekonsilyasyon Nasyonal”, e pandan son parkour ziska ozordi, lepep Seselwa nou’n vwar pour nou menm ki se selman par travay Ansanm ki nou pou vwar benefis pour tou Seselwa. Se li menm sa zonm ki pe fer mo vin aksyon konkret atraver “set” bann dat pour bann lanons dan medya ek propoz bann Prozedlwa ki pour vin devan nou Lasanble.

Mr Speaker, permet mwan pour met lanfaz lo serten pwen for Diskour nou Prezidan ki mon santi pour enpakte mon zabitan mon distrik Pointe Larue e Seselwa an zeneral.

Mr Speaker, nou Prezidan dan tou son sazes, in rekonnet ki Leta nou Nasyon i depan lo sa bann eleman kle;

Leta nou fanmir, leta nou Sosyete e nou demokrasi.

Wi, Mr Speaker, mon antyerman dakor avek nou Prezidan ler i fer resorti ki nou fanmir pe rankontre plizyer difikilte. Mon emosyonnel ozordi akoz mon santi pour Tou fanmir Pointe Larue. Mwan osi mon partaz zot soufrans toulezour, akoz nou konman bann Leaders nou senserman konnen ki bokou zot, bann problenm sosyal i relye direkteman avek problenm lakaz ek bann malez sosyal.

Fleo drog : Nou lalit kont fleo drog i real, Pointe Larue nou pe soufer avek sa fleo e mon redir ankor ki drog i enn parmi bann pli gran lakoz lapovrete dan nou pei. Atraver sa nouvo lapros ki nou Prezidan in pran dan lalit kont sa fleo, mon konvenki ki avek sipor neseser, o nivo kominoter nou kapab vreman Ansanm ede pour osi redwir lakantite drog ki sirkile dan nou distrik, e pli enportan permet nou kontinyen travay avek nou bann zabitan pour empower zot pour sorti dan sa lesklavaz.

Mr Speaker, parey bokou i deza konnen, Pointe Larue ti’n deza konmans en proze pilot dan sa lalit kont drog. Progranm in ariv dan son premye lannen. Nou’n pas dan bokou difikilte, sirtou an term kolaborasyon, ek kordinasyon ant bann diferan Lazans e Minister konsernen. Me kantmenm sa nou’n persevere. Ozordi mon oule enform sa Lasanble ki dan 40 dimoun ki ti konmans sa progranm DETOX, nou’n kapab tenir omwen 8 ki ankor pe lite kont sa tantasyon. Pou mwan sa i ankourazan ; sa i en laviktwar dan li menm.

Atraver mon leksperyans, mon’n kapab konstate ki vreman solisyon i o nivo kominote, pour sa mon remersye tou bann paran e fanmir ki kontinyen siport nou, e osi remersye bann reprezantan distrik ki’n reste konman sa pilye sipor pour nou bann zanmi lo progranm.

Me i pa fini la, nou’n konmans en progranm ki’n donn lespwar bann fanmir Pointe Larue, e mon egzize ki nou kontinyen a tou repriz pour angaz bann ki’n tonbe, siport zot fanmir kot nou kapab e redonn zot lespwar ki demen zot osi zot a kapab sorti dan sa lesklavaz.

Se dan sa lespri ki mon akeyir reform dan NDEA, e mon envit zot pour antre an dyalog avek nou Lasanble osito posib. Dan sa laliny mon ti a voudre felisit nou bann zofisye Seselwa ki’n ganny sa latas pour diriz sa Lazans.

Lapolis osi i annan en gran rol pour zwe dan sovgard sekirite e lape dan pei. Se pour sa rezon ki mon demann tou zofisye lapolis, espesyalman bann ki baze Anse Aux Pins pour vin pli atantif ver bezwen nou kominote, ogmant otan posib sa laspe Community Policing ; angaz nou bann zabitan pour donn zot en koudmen. Pointe Larue nou pare pour ede avek lespwar ki “response time” a redwir konsiderableman. Mon salye kouraz tou zofisye lapolis dan lafors!!!

Lapovrete : Fe ozordi se ki lapovrete I egziste dan Sesel. Premye pa in ganny fer e sa se rekonnet ki I vreman  la otour nou. Mon rekonforte par lefe ki nou Prezidan osi i o fe avek sa problenm e mon konfidan ki atraver Mr Dick Esparon, Sekreter D’eta pour Eliminasyon Lapovrete, fanmir Pointe Larue e Nasyon Seselwa ava kapab vwar en zefors kordinen e koeran pour ki nou Gouvernman i vin avek bann plan e progranm efektiv pour ede redwir, e menm pour kwa pa, ede elimin lapovrete dan Sesel.

Sa latas i pa enn ki fasil me pa enposib. Mwan ankor enn fwa o non tou zabitan Pointe Larue, envit Gouvernman pour pa tarde e konmans sa letid Nasyonal lo nivo lapovrete dan Sesel isi dan nou distrik li menm.

Pri lavi : Permet mwan Mr Speaker pour konmann nou Prezidan pour ekout lapel nou Lasanble, pour adres problenm pri lavi ki osi kontribye enormeman pour fer nou popilasyon santi lapovrete. Mon napa okenn dout ki lalis komodite ki pou napa VAT lo la a en konmansman pour kapab ede pou fer desann pri lavi, me sa pa devret aret la!!!

Lalkol :Konsonmasyon lakol in ariv a en nivo alarman dan nou pei. Mon osi mon partaz konsern nou Prezidan, espesyalman ler sa I afekte nou bann zenn e nou bann fanmir. Mon akeyir propozisyon pour en deba isi dan Lasanble Nasyonal.

Mr Speaker, lakle dan tou nou zefor kont sa bann fleo Sosyal, in ganny trouve par nou Prezidan, sa se pa lot ki kreasyon sa nouvo Minister Lafanmir. Mon felisit Prezidan Faure pour son regar ver lavan, e siport SIFCO e sosyete sivil pour vin avek en tel propozisyon. Dan sa laliny mon ti a kontan propose ki sa Minister i konsidere entrodwir en progranm pour ede empower bann paran tousel pour enkilke bann valer fondamantal lafanmir.

Lakaz: Mr Speaker, problenm lakaz isi Sesel I grav. Mon kontan ki dan Leta Lanasyon Prezidan Faure in refer sorti ki Gouvernman pe vin avek en lapros kot diferan polisi e stratezi i ganny servi pour adres problenm lakaz dan diferan kous nou sosyete.

Se sa lapros ki mon’n toultan demande ki nou adopte. Mon rekonforte ler mon tann nou Prezidan anons lespwar pour sa zenn garson dan Nageon Estate, ou sa zenn fiy dan Karyol Pointe Larue ki’n aste son later me pa pe kapab konstrir son lakaz akoz son mwayen pa permet. Lespwar pour sa zenn koup ki napa zanfan i ganny ranforsi, e mwan mon kontan, akoz Prezidan in tann mon lapel, in tann zot lapel.

Ou sa zabitan Pointe Larue ki pe esper ou lakaz, ki pe fer ou kontribisyon, mon donn ou garanti ki apartir le 10 Mars 2017 ou pou konnen klerman kote ou plase lo lalis lakaz enn fwa pour tou. Mon felisit Prezidan Faure e Minister konsernen pour anmenn latransparans dan sa zafer lakaz.

Ou sa sitwayen aze ki osi anvi amelyor kondisyon ou lakaz, nou Gouvernman pa’n bliy ou. Se pour sa rezon ki apartir le 15 Avril, ou pou annan sa opsyon pour pran en loan avek labank komersyal e garanti ki Gouvernman a siport ou avek en garanti pour ki ou osi ou a viv an konfor ki ou merite.

Pour konklir lo size lakaz, mon oule ankor enn fwa remersye nou Gouvernman pour son komitman anver redevlopman Nageon Estate. Mon fyer pour enform tou zabitan Pointe Larue ki sa proze in ofisyelman demare le 15 Fevriye e mon garanti zot sipor Gouvernman, sipor nou Prezidan ki sa proze pour kontinyen ziska ler distrik in satisfer demann tou bann ki tonm anba sa progranm. Byento demars neseser pour konmanse pour dezyenm faz.

24 Unit Lakaz dan 24 distrik i target nou Gouvernman pour sa prosen 24 mwan.  Sa i en plan konkret e byen ganny akeyi. Mon ti a swete ki dan bann plan lakaz Minister i konsider met fasilite pour bann avek dezabilite osi, e konsantre lo fer plis lakaz 3 lasanm, bedsitters nepli efektiv, lespas i limite!!!

Mr Speaker mon ti napa okenn dout ki ler Prezidan Faure ti anons enklizyon Departman Transpor avek Minister pour Lenfrastriktir e later, sa ti pou anmenn plis devlopman, akoz parey mon’n dir oparavan, kot ou vwar semen ou bezwen vwar devlopman.

Mr Speaker, Pointe Larue i annan bokou potansyel, e nou donn Minister konsernen randevou dan sa bann prosen mwan ki vini pour ansanm avek mwan, e mon bann zabitan pour eksplor vre potansyel sa distrik ki bord avek Erport enternasyonal Sesel, sa prosen distrik ki potansyelman annan sa abilite anmenn soutyen pour bokou Seselwa ki pe esper zot lakaz oubyen later. Pli enportan ankor se nou sa distrik ki pour kapab anmenn sa solisyon pour konzesyon trafik ver ou sorti dan rezyon Sid Mahe.

Ledikasyon :Mr Speaker, ozordi set avek en lemosyon doub ki mon tous domenn ledikasyon, lo en kote mon sagrinen pour aprann lanmor enn nou bann teachers lekol Segonder Pointe Larue, Mis Gina Clarisse. O non tou zabitan mon distrik, mon pas mon senser kondoleans avek son fanmir, tou son bann koleg ansenyan ek son bann zelev. Nou priy Bondye pour ki i repoz dan lape.

Me Mr Speaker, ozordi mon egalman santi mwan zwaye akoz atraver Leta Lanasyon Prezidan in anmenn lespwar pour en sistenm ledikasyon pli reformen e disiplinen.

Mon ti a kontan sizere ki atraver dyalog ki Minister Ledikasyon pour annan avek tou son bann partner, sa Minister I konsider fortman sa bann propozisyon swivan;-

  • Lentrodiksyon “Student Profiling” depi ler zot antre dan Sa i a permet pour ki zot ava annan sans swiv en progranm letid pli targete, e garanti exposure tou bann etidyan dan lemonn travay a en tre zenn az.
  • Konsider en Juvenile Correctional Centre ou en Sant Reabilitasyon pour bann zenn ki sa bann ki kontinyelman komet bann aksyon anti-sosyal ou lofans dan lekol a kapab ganny reformen e sipervize dan plas zis ganny sispann en reste kot lakour parey mon koleg Onorab Ghislain in fer resorti pli boner.
  • Minister i konsider amelyor sistenm sipor dan ledikasyon pour bann zanfan Autism ek bann ki annan dezabilite.

Disiplin dan lekol i konsern nou tou, e se zisteman dan sa lespri ki mon oule enform Pep Seselwa ki mon’n deza soumet en lalis kestyon pour Minis Ledikasyon lo ki plan son Minister i annan pour adres bann problenm disiplin e sekirite dan nou bann lekol.

Mr Speaker, mon ti a osi voudre sizere ki Minister Ledikasyon i get dan posibilite amelyor allowance pour bann etidyan Liniversite Sesel pour ki a permet zot vin o par avek bann ki lo letid aletranze.

Bann zenn, sa Diskour Leta Lanasyon i dedye pour zot. Servi bann loportinite ki Gouvernman in met a zot porte e konsantre dan zot letid. Performen e zot a ganny rekonpanse avek en lavenir pli briye.

Lasante : Mr Speaker, nou lasante i konsern nou tou, i nou responsabilite primordyal. Pointe Larue, parey zot konnen nou napa nou prop klinik, alors mon akeyir komitman nou Prezidan pour asire ki Gouvernman i kontinyen oryant servis ver prevansyon o nivo distrik.

Nou Prezidan in ekout mon lapel, e ozordi mon optimis ki finalman serten servis esansyel a ganny met a dispozisyon zabitan mon distrik atraver nou Sant Kominoter.

Mr Speaker, permet mwan lans en lapel avek Prezidan Faure e Minister Lasante pour demann zot pour konsider ogmant kapasite lenfrastriktir pour kapab anmas e okip bann dimoun avek problenm mantal ki dan bann kominote.

Lanvironnman biznes : Mr Speaker, mon dakor avek Prezidan Faure ki lavenir nou lekonomi i depann lo nou bann pti biznes. Wi, mon rekonesan ki bokou in ganny fer pour siport zot krwasans, me i reste bokou lespas pour lamelyorasyon. Alors mon “welcome” reorganizasyon SBFA pour vin konman sa vre fasilitater pti biznes. Mon swete ki ou sa enn ki’n apply en loan avek sa lazans, ou a finalman ganny debloke e ganny en konmansman. Servi li byen!!!

Rol Lasanble e Egzekitiv : Mr Speaker, mwan konman en zenn Parlmanter elekte par Zabitan Pointe Larue dan sa 6enm Lasanble, mon ankouraze par komitman nou Prezidan ki Egzekitiv i a lekout e pare pour pran nou bann kritik e kontribisyon pozitiv pour asire ki Gouvernman i pran bann mezir neseser pour enplimante kot i posib. Sa i vreman laprev ki nou Prezidan e egzekitiv i angaze pour reste konekte ek lepep e pran bann aksyon ki dan zot lentere.

Pour konklir Mr Speaker mon oule a-port en mesaz pour tou Seselwa, espesyalman pour mon bann zabitan Pointe Larue;

Prezidan Faure i en zonm senser, i sa Prezidan pour tou Lanasyon. Annou get lavi dan en fason zis, Ansanm annou rod fason pour ed tou nou frer Seselwa san get zot kouler politik.  Sa i sel fason pour inifye nou pti  pei Sesel. Divizyon politik nepli en opsyon.

Ozordi Prezidan Faure in vin sa dirizan ki pour anmenn nou ver sa lot letap devlopman nou pei, en devlopman pour benefis TOU Seselwa san leksepsyon.

Annou Ansanm pran nou responsabilite, annou pran nou fitir anmenn e travay dir avek nou Prezidan pour garanti en Sesel ki pou reisir pour OU, pour LI, pour ZOT, pour NOU e Nou  zanfan demen.

Mersi.

 

        (APPLAUSE)

 

MR SPEAKER

Mersi Onorab Valmont.  Onorab Ramkalawan ou annan en pwen?

 

HON WAVEL RAMKALAWAN

Mr Speaker, en point of clarification.  Dan son lentervansyon  Onorab Valmont in donn en dat ki bann zabitan dan son distrik ki pe esper en lakaz pou konnen egzakteman kote zot ete.  Nou ti ava kontan konnen ki mannyer li i ganny sa e konmsi  pou ed nou pour ki bann lezot Manm osi i a kapab…

 

MR SPEAKER

Ok Onorab Valmont?

 

HON JUDE VALMONT

Mersi Mr Speaker.  Mr Speaker atraver ou mon a  enform Onorab ki mwan mon’n swiv Leta Lanasyon ki i endike ladan, si  ou annan en kopi ou a kapab konsilte e ou a ganny li ladan – mon’n tir sa latab.  Mersi.

 

MR SPEAKER

Sa dat ki ou pe dir ou pe dir ki Prezidan Faure in spesifye sa dat?  Dat ki konteks Onorab Valmont?

 

HON JUDE VALMONT

Yes Mr Speaker, se ki Msye Prezidan in dir apartir sa dat Minister Labita Lenfrastriktir e Transpor pou eksplike ek bann kriter.  Se sa mon ‘n pran sa lo la.  Mersi.

 

HON WAVEL RAMKALAWAN

Mr Speaker, be alors sa ki in dir i  pa vre poudir….

 

MR SPEAKER

…pou zis Pointe Larue.  Mon krwar sa ki ou pe dir se ki Prezidan ti dir lo nivo Nasyonal?

HON JUDE VALMONT

Se sa Mr Speaker.  Se sa.

MR SPEAKER

Ok.  Bon mon krwar in ariv ler pou nou pran en pti tas kafe.  Nou adjourn e retournen 11er.

 

        (BREAK)

 

 

MR SPEAKER

Bon nou a repran nou travay.  Parey mon’n ganny demande, mon’n telefonn Mr Onezime CEO SBC e lo sa kestyon internet e in eksplik mwan e [pou fer keksoz pli kler,  depi yer nou annan en Manm Lasanble ki  lo Media Committee Onorab Larue depi yer i ti pe swiv sa de pre.  Yer swar in dir mwan in koz ek Mr Onezime e dan mon Biro mon’n les li koz ek  CEO SBC pou li ganny en lesplikasyon  e prezan mwan mon donn li laparol,  pou eksplik nou kwa ki’n arive e si i annan kestyon zot a poze.  E nou’n dir ek Mr Onezime si prezan Lasanble i santi ki zot oule plis klarifikasyon, apre midi nou a demann li pou vini 2er ler nou komanse.  Onorab Larue si napa obzeksyon mon a donn  Onorab Larue laparol pou li eksplike tou sa ki’n ganny dir e si i annan kestyon par laswit zot a poze.

 

HON FLORY LARUE

Mersi Mr Speaker.  Alors sa sityasyon ki’n devlope zis pou donn en pti pe lesplikasyon piblik  pour zot konpran lo kwa nou pe koze.  Pour lemoman SBC pe servi radyo ek televizyon pou donn akse avek piblik live sa ki pe pase dan Lasanble, me nou’n vwar letan SONA ti ganny donnen Mardi apre midi, e osi sa Press Conference ki ti ganny fer State House, son zour apre tou lede  ti servi  en nou vo format pou al live.  Sa format ti internet e lo internet i annan en channel – en sit ki apel You Tube e lo sa sit You Tube, SBC i annan en channel e i ti servi  sa channel – sa form pou li rikord sa live e an mezir ki i rikorde sa keksoz i pase lo YouTube e letan i fini pase sa keksoz i reste lo YouTube.  Ozordi ou apel li i pe stream sa keksoz live.  Me apre sa recording i reste.  Si en dimoun in mank Lasanble oubyen i oule vwar zis en dimoun spesifik koze i ti kapab retournen gete ki pe pase.  Akoz pour le moman, letan Lasanble in fini pase live lo radyo ek televizyon napa okenn landrwa i a kapab ale pou li rewind e get en bout spesifik e letan Onorab Ramkalawan ti donn son repons Leta Lanasyon li I pa ti ganny sa privilez avek SBC.  I fer ki letan i ti fer son larepons, SBC pa ti servi sa lot form medya. I ti servi radyo – i ti servi television me i pa ti servi sa live streaming e sak pti kestyon ki nou retourn lo la ki Onorab Ramkalawan ti demande akoz sa privilez pa ti ganny donnen e nu vwar ki letan  Onorab Ramkalawan ek Onorab De Commarmond ti fini donn zot larepons, sa video ti ganny upload apre.  Kestyon  i pa lo apre.  I lo akoz menm privilez pa ti ganny donnen live streaming letan  sa ti pe pase?  La i sa kestyon i  larepons ki Mr Onezime pa pe donnen pou mwan menm i pa kler akoz i pe servi en pwennvi legal e mwan mon feel dan mon kapasite pour mwan mon santi ki son lesplikasyon i devret ganny donnen direkteman akoz pour lemoman sel form ki lepep Seselwa ti  pou annan pou retournen pou vwar ki pe pase dan son Lasanble ti atraver sa live streaming ki ganny upload e sa  ti  pou ganny rikorde e I ti kapab reste la pour sa dimoun fer

referans avek.  E mwan kon krwar ki Mr Onetime in devret vin eksplik nou pli kler akoz i pa kapab fer sa.  Akoz ozordi nou pe koz lo latransparans akse avek lenformasyon en manm piblik Seselwa  ki pa oule al lir verbatim lo  sit Lasanble Nasyonal i devret kapab annan akse pour li retournen rewind e pout Onorab Hoareau ouswa Onorab Ghislain ouswa enn son Onorab ki li i ava tande e sa format i available e Mr Onezime i devret donn sa akse avek piblik Seselwa isi Sesel e a enternasyonal osi.

 

MR SPEAKER

Onorab Larue mersi pour ou leksplikasyon eski i annan okenn kestyon ki zot oule demande ouswa okenn komanter avan ki nou kontinyen?  Wi Onorab Ramkalawan?

 

 

HON WAVEL RAMKALAWAN

Mr Speaker, petet bann avoka ki dan lasal i kapab ede pou klarifye sa pwen.  Me sa ki Onorab Larue in eksplike li i  pe dir akoz sa kestyon i reste la sa alors si i annan keksoz difamatwar ki’n ganny dir, li i  kapab ganny problenm.  Alor ti ava bon bann avoka i a kapab balanse pou regarde parski SBC, i annan sa iminite, letan keksoz pe go out live parski I napa kontrol pou li konnen ki poudir la ou pe al  dir en keksoz difamatwar me  lefe ki se pa SBC ki pe al servi anything difamatwar then si li i servi, then i liable me si sa keksoz i la e i annan tou leksplikasyon akoz i la eski sa i vreman vin difamasyon?

MR SPEAKER

Ok.  Kestyon Onorab Georges.

 

 

HON BERNARD GEORGES

Mersi Mr Speaker.  Mersi pou ou lenvitasyon e lenvitasyon Leader Lopozisyon pou nou eklersi en pti pe sa pwen.  Annefe sak fwa ki en dimoun oubyen en lenstitisyon i repet en keksoz ki’n ganny dir difamatwar, i re kree sa difamasyon ankor enn fwa alors si SBC i repet en keksoz ki difamatwar SBC i vin osi responsab pou  sa parol menm si pa li ki’n dir sa parol.  E nou apel sa ‘publishing’ dan term legal.  Donk i annan en posibilite  ki SBC pe argye ki avek live streaming ki in koupe i pou napa okenn kontrol lo sa ki pe  ganny dir akoz i pe al dan en lot format i pe al lo en lot sit ki li i napa okenn kontrol lo la.  I annan en defans posib ki SBC i annan e sa se pa en defans total, me en defans parsyel se ki SBC i kapab dir  i sa ki nou apel an term legal i en innocent disseminator setadir ki sel keksoz ki i pe fer se i pa disseminate en keksoz dan en fason kot i inosan i pe provide en servis e i napa okenn fason pou kontrol sa ki pe ganny dir.  Me sa parey mon dir i en defans parsyel, i pa en defans total i redwir son konsekans me i pa absolve konpletman.

 

MR SPEAKER

Onorab Hoareau.

 

HON BASIL HOAREAU

Mersi Mr Speaker.  Mr Speaker mon dakor parsyelman avek sa ki Onorab Georges in dir  e parsyelman  sa ki Onorab  Ramkalawan in dir.  Si en keksoz pe pase live  – SBC  pe broadcast live menm SBC pa pou liable akoz i pou napa kontrol lo sa ki pe pase.  Me lemoman ki SBC i annan kontrol savedir   kot i pe kit sa dan en status permanan then i pou liable.  E parey Onorab Georges in dir annefe i pa pou en defans perse me i pou zis redwir son kantite domaz ki i kapab peye.  So vre si an konklizyon si i annan difamasyon ki’n pase dan Lasanble e SBC i kit sa dan en fason ase permanan ki SBC i a kapab ganny akse avek, then i pou pe republish sa difamasyon e i pou liable.

 

MR SPEAKER

Me mwan mon pa en avoka me  ki diferans ek sa ek verbatim? Verbatim  i permanan i la dan Lasanble me menm zafer i ganny dir lo sa?  Sey eksplik mwan ki diferans?

 

HON BASIL HOAREAU

Bon letan ou pe dir mwan verbatim ou pe dir mwan kot nou kapab ….

 

HON PATRICK PILLAY

Wi pran en kopi sa ki’n ganny dir – Onorab  Gill in dir sa dan  verbatim   dan son lentervansyon osi i pa kapab dan en server …permanent me i annan  sa verbatim kot In dir sa ki in dir. So i annan sa permanans sa rikord.

HON BASIL HOAREAU

Wi me sa verbatim letan i ganny donnen i ganny donnen zeneralman – kekfwa en  Manm Lasanble ki al demande pou li vwar kwa ki’n ganny dir e…Non  se sa Mr Speaker mon pe dir lo site kot nou kapab ale ekoute – sa Lasanble…

 

MR SPEAKER

Wi.

 

HON BASIL HOAREAU

Well teknikman i en republication e i pa pe ariv dan Lasanble teknikman i kapab – pour mwan….

 

HON PATRICK PILLAY

Parske i annan rikord isi.

 

HON BASIL HOAREAU

Teknikman i en republication Mr Speaker.  Teknikman i kapab render Lasanble liable pou lefe ki Ii sa…

 

MR SPEAKER

Ok.  Al right annou ekout lezot dimoun ankor.  I annan Onorab  Larue ti‘n lev son lanmen apre Onorab Andre apre Onorab Ghislain.  Onorab Larue.

 

HON FLORY LARUE

Mersi Mr Speaker.  Mr Onezime ti osi koz lo letan ou koz lo bann reporters – ou koz lo code of ethics solman mon krwar ou bezwen donn en pe respe pou nou Lasanble Nasyonal sans ki nou sorti avek en keksoz difamatwar outright i vreman slim, so deza sa i en baz.   Me solman lo sa sit la, SBC i annan full akse avek.  Si la nou fini dir en keksoz, sesyon 10.30 i fini ti annan en keksoz difamatwar ki’n ganny dir toudswit i kapab al retire savedir akse  pou li retir sa pti bout difamatwar  dan tou sa ki nou dir dan Lasanble i vreman  a son porte.  Apre letan ki ou dir koumsa ki sa ki nou dir – nou verbatim avek nou audio I annan osi en recording audio ki  Lasanble i fer, tou lede i ganny retrouve lo nou sit Lasanble ki anybody i annan akse avek e nou pa retire nou; e si i annan okenn keksoz difamatwar      Lasanble pa retire i pa retire e i reste lo son sit….

 

MR SPEAKER

Ok. Mon pou zis donn parol sa 2 dimoun apre mon pou fer en sizesyon.  Onorab Andre apre Onorab Ghislain.

 

HON CLIFFORD ANDRE

Mersi Mr Speaker.  Mr Speaker, mon krwar i pa Lotorite SBC  pou deside kwa ki’n ganny dir par en Manm  Onorab koman difamatwar pou nou.  Sa i  en lot lenstitisyon 3enm Lebra Gouvernman  ki kapab fer sa desizyon si sa i difamatwar ou non.  Sa i Zidisyer e si I annan okenn lenterferans parey in ganny propoze par Onorab Larue, mon krwar sa  i mal,  akoz si mwan mon’n dir en keksoz  demann en lot dimoun ki’n al gete ki Clifford Andre ti dir, Onorab Andre ti dir i bezwen kapab ganny akse avek sa konteni antye pou li kapab fer en konklizyon si i pou pran serten aksyon oubyen si  pou demann serten klarifikasyon.

MR SPEAKER

Mersi mon a donn laparol Onorab Ghislain.

 

HON CHANTAL GHISLAIN

Mon ti anvi eksplik ler ou pe demande  akoz ler i lo site Lasanble.  Sa ki lo site Lasanble, i ti  a property once ki i lo site Lasanble, lefe ki nou annan immunity dan Lasanble so pou nou i ok; menm si  en dimoun in pran lo site i ok sa.  Akoz nou, nou annan eminite  pour Lasanble…

MR SPEAKER

Mon pa  oule ki nou komans en deba lo la akoz nou pa pou fini, nou pe koz lo Leta Lanasyon la, ok?

        Order! Order!

        Mon sizere ki Media Committee i zwenn avek Mr Onezime, takin sa problenm e raport avek nou swa pli tar avek nou swa pli tar semenn prosenn pou nou rezourd sa.  Pour le moman  i a live lo radyo ek lo televizyon annou aksepte  li koumsa.  Nou pa pou ganny letan pou koman en deba lo sa.  Media Committee, Onorab Larue in koz avek Antoine Onezime devan mwan zwenn  si fodre anmenn Mr Onezime zot oule mon telefonn li pou li vini I a vini – ozordi oubyen pli tar zot a  raporte e  nou a fer par laswit.  La nou bezwen  kontinyen ek nou deba – nou Letan Lanasyon pou nou fini apre midi.  Eski Ii annan okenn dimoun ki anvi entervenir?  Onorab Andre.

HON CLIFFORD ANDRE

Mersi Mr Speaker.  Mr Speaker lalang Kreol serten mo in ganny azout ozordi bomaten-  – blansisaz rimer i enn.  Onorab  Hoareau in anmenn en mo ki mon krwar li menm in vin en legzanp letan  nou’n komanse.  In dir  avek Onorab  Adelaide ki pa bezwen trakase ki Prezidan Faure i pou reste Prezidan ziska 2025 – sa i en rimer.  Onorab  Hoareau in vin blansi sa rimer pou  fer

 

(APPLAUSE)

 

HON CLIFFORD ANDRE

…Seselwa kraswar ki sa ki leka depi 2015.  Nou pou annan en eleksyon e son legan i a ganny definir.  Mr Speaker dan Diskour Leta Lanasyon Prezidan Faure in dir  dan paragraf 5 in dir sa;’’ En lot latmosfer pe rennyen dan pei.’’

        Mr Speaker, mon’n analiz sa e mon’n tonm lo serten konklizyon.  Sa menm Prezidan parey in ganny dir, in fer en tour  360 degre pou  li kapab vwar en pti pe partou e sa i mon tre ki in annan en viraz 360 degre lo sa parol ki i ti dir letan i ti Anse Aux Pins dan en Rally ler i ti dir ki i annan en zenn onm ki pe pase Anse Aux Pins e LDS son definisyon se ; ‘’Less Development  for Seychelles.’’  Mon kontan ozordi ki sa mo in ganny definir pou vin’ ‘’Lots of development for Seychelles.’’

 

(APPLAUSE)

 

HON CLIFFORD ANDRE

Mr Speaker dan son Diskour Prezidan in dir nou, ki avan nou kapab konpran Leta nou Nasyon ki nou kapab konpran leta nou fanmir –letan nou kominote nou sosyete e nou demokrasi.  Sa i vreman enportan.  Mr Speaker mwan  mon pou konman lo get lo leta Anse Aux Pins; letan Anse Aux Pins ki mon kominote i grav.  Dan Anse Aux Pins i napa dimoun ki resevwar lakaz tou dernyerman.  Sa i serye, Mr Speaker.  I annan dimoun Anse Aux Pins ki pe peye lannen 2000 Mr Speaker e ozordi i  pa ankor ganny lakaz.  Pa zis sa Mr Speaker.  Larzan ki i  pe peye ki i tire lo son saler pa ganny reflekte lo sa statement ki ganny donnen e sa I dan mon biro  e mon pe travay lo la.  Mr Speaker sityasyon lakaz i deplorab Anse Aux Pins.  I annan dimoun ki pe pey lakaz kot napa elektrik.  I annan dimoun ki pe reste dan lakaz Mr Speaker, kot zot  lavarang i ankor later rouz. Mr Speaker sa i fer mwan lapenn letan mon’n pase ler mon ti pe fer kanpanny.  Mr Speaker, I annan bann zenn dimoun ki’n komans fer zot kontribisyon lakaz e zot pe reste dan en lakaz   – en lakaz ki en dimoun ti’n gannyen sa dimoun pa lefe ki son sityasyon In sanze in bezwen al travay aletranze alors i pe demann Gouvernman si i kapab vann sa lakaz avek sa dimoun ki pe okip sa lakaz.  Mr Speaker sa demann in ganny fer depi lannen pase ozordi i pa ankor ganny okenn repons eski sa i lafason ki nou merit travay?  Prezidan Faure letan i ti vin dan Lasanble an Oktob i ti dir ek bann zofisye Gouvernman 48er deal avek en file  – donn sa dimoun en repons – Mr Speaker sa i enportan – in vin ankor le 14 Fevriye pou li dir nou ki i oule son Ladministrasyon i travay efektivman, alor mon pou demann avek sa bann PS  avek sa bann CEO – avek sa bann zofisye dan bann Minister respektif pou travay lo sa bann file get  sa bann dimoun e nou ava annan nou en pep ki ere.  Se sa swe Prezidan Faure e se sa swe LDS.

Mr Speaker, i osi annan en konsern kot dimoun in dir ki lakaz ki pe ganny fer sa  bann lasanm dan sa bann lakaz, i en pe tro ptipti alors mon ti a demann Prezidan Faure pou sey donn lenstriksyon oubyen vwar ansanm ki mannyer nou kapab get en pti git size sa bann  lakaz e si sa  size sa bann lasanm rather i rezonnab ki fer ki letan sa bann dimoun ki’n okip sa bann lakaz ki’n ganny sa lakaz si zot fanmir i agrandi par enn ou 2 zot still kapab met en lot lili dan sa lasanm pou kapab cater pour sa  zanfan menm si i en garson oubyen en fiy.  Sa i enportan Mr Speaker, ki nou revwar.  Mr Speaker mon ti dir ki mon pe get kominote.  Anse Aux Pins lo laplenn Karyol mon aprann ki larzan ti’n ganny donnen pou fer proze letan mon pase mon vwar zis en pti lakaz – en vye pti batiman en changing room ki’n ganny fer e in fini   ganny bann zerbaz lo la.  Mon ti a kontan demann Prezidan Faure pou lans en investigation pour sa larzan ki ti pou devlop anler lo laplenn Karyol  i ganny vwar e  sa dimoun  ki responsab si sa larzan in ganny pran aksyon i ganny pran apropriye – ti annan en lot MNA sa lepok. Mr Speaker kominote Anse Aux Pins nou klinik i deplorab.  Klinik i en keksoz ki dimoun I al servi pou li ganny rekour  pour letan I santi son lasante in ganny afekte pou en rezon ou en lot.  I enportan ki nou regard sa sityasyon kot dimoun i vin vizit e zot santi zot konfortab.  Mr Speaker, Anse Aux Pins i en landrwa kot in ganny bokou semen me i annan semen ki’n ganny fer pou benefis lafanmir. I normal me i enportan Mr Speaker, ki sa bann semen in ganny kontinyen  pou benefisye lezot fanmir Anse Aux Pins.  Mon pe dir sa Mr Speaker akoz anler Dan Kreson i annan bann fanmir Payet ki reste anler laba zot aze, zot bezwen pas parey nou dir Mr Speaker avek ou permisyon, pou mwan droge servi langaz parlmanter ki annan ‘kaka friyapen ki zot bezwen pas ladan  e zot tonbe par ler.  I pou enportan  pou konnen Mr Speaker ki i enportan dan lanbilans zanmen pou oule mont laba aswar alors si lanbilans i a kapab ariv kot sa bann dimoun – nou pa pe demann en semen kot i annan 2 lane,  en lane kot lanbilans i kapab monte pou li atenn sa dimoun dan son sityasyon malad e i ava kapab ariv lopital a-tan pou li ganny nou servis lopital ki i donn zot.  Mr Speaker, mon’n ganny enformen pandan Break ki i annan en sityasyon kot i annan en later prive ki devan  i annan lezot ki par deryer e sa bann dimoun ki reste par deryer bann Delorie – annefe Jeffrey Delorie i  pe espere pour ki Lotorite i fer sa konpasyon ki i sipoze fer avek sa dimoun ki par devan pou zot kapab ganny akse pou lezot dimoun deryer i ganny zot propriyete.  Mr Speaker sa i bann  long standing matter e mon ti a demande ki sa bann sityasyon i ganny attended to e ki sa bann dimoun I a kapab zot osi devlop zot propriyete tir en burden lo Gouvernman e nou a fer ganny serten dimoun ki annan lezot lakaz dan sa sityasyon.

Mr Speaker lot sityasyon ki mon  pe koz lo mon kominote avan ki mon  vin lo Leta Lanasyon Prezidan in dir, se maintenance bann Housing Estate ki deza annan Anse Aux Pins.  Sa i en gran problenm.  Mon’n ganny enformen – Onorab Ghislain in dir i ti’n pas en pe son letan fer kanpanny kont mwan  lo Chetty Flat – lo sanmenm sa Chetty Flat, kot bann dimoun in dir mwan ki maintenance lo sa Estate pa’n ganny fer e mon demann Gouvernman pou revwar en pti pe dan sa sityasyon Mr Speaker.  Mr Speaker i enportan pou note, ki dan Leta Lanasyon ki Prezidan in fer avek nou le 14 Fevriye paragraf 26 i dir sa nouvo Sekreter D’eta Dr Patrick Herminie pou donn plis detay lo sa demen le 15 Fevriye.  Mr Speaker nou –pa’n tann nanryen le 15 Fevriye ; eski sa i vedir ki sa Ladres i annan serten ki pa  pe ekout Prezidan letan i pe  dir sa?  Onorab Valmont in dir nou i annan en dat ki’n mete  le 10 Mars, fotespere lo 10 Mars I a ganny sa ki  i pa rode akoz nou pa’n gannyen le 15 Fevriye e nou pa’n ganny okenn leksplikasyon akoz sa pa’n ganny fer sa i enportan pou Prezidan met lanmenm lo la deswit ki nou kapab, fer sir ki nou pep letan i ganny dir en keksoz  lezot i respekte.

Mr Speaker, nou’n vwar komansman lannen oubyen an terminen lannen pase pri lavi in monte – pri lavi in monte e i pres pou defons plafon Mr Speaker.  Nou pep pe soufer eski sa ti neseser?  Gouvernman pa ti kapab pran bann mezir apropriye pou anpes sa arive?  I enportan ki  bann mezir i ganny met an plas – nou pa vini apre pou nou dir ki nou pe al rod tou bann komodite esansyel pou nou al tir tax ki la – nou devret  anpes li monte epi nou ava gete ki mannyer nou  pou kontinyelman fer desann.  Nou pa kapab les li monte apre nou pou dir nou’n fer desann par 50sou Mr Speaker.  Sa i vreman enportan pou nou.  Mr Speaker, mon pou felisit Ladministrasyon Prezidan Faure pou  lapros ki i pe pran dan Ledikasyon  e parey nou’n dir parey li si in dir dan son Conference De Presse defi i la  – bokou bann zenn dimoun ii oule konnen si i pou annan teacher dan son laklas ler i pou al lekol.  Sa i enportan en keksoz ki nou bezwen tackle deswit.  Mr Speaker, zabitan Anse Aux Pins in dir mwan ki i pa zis lakaz ki ganny gete koman en size politik me osi loan.  Letan zot apros labank pou pran en loan zot afilyasyon politik I ganny gete  e zot ganny refiz-e loan lo sa baz e sa i kler kot SBFA.  Mr Speaker sa i bezwen dis kontinyen.  Tou Seselwa i bezwen kapab zwir loportinite pou li fer biznes.  Prezidan Faure in  dir i pe al kree bann lanvironnman pou Seselwa kapab fer biznes i bezwen get byen nou pa dir zis Parti Lepep Seselwa se LDS – Parti  Lepep e nou tou – nou tou nou Seselwa e nou viv dan  sa Sesel ki nou tou nou kontan Mr Speaker, alors pa bezwen politiz loan ki pou donn dimoun en loportinite pou li fer agrandi lekonomi son pei.  Mr Speaker mon pou vin lo sa eleman   trafik.  Prezidan in dir nou ki i  pou konsidere pe fer en tinel sorti La Rivière Anglaise pou ariv Beau Vallon e enn sorti Cascade pou ariv Grand Anse Mahe.  Mr Speaker, bann zabitan Anse Aux Pins i oule ariv travay boner – ariv travay a-tan.  Bomaten ler zot desann en tinel sorti Cascade pour ariv Grand Anse pa pou ed zot; annou gete ki mannyer nou kapab rezourd problenm trafik sorti Au Cap pou nou ariv anvil.  Mr Speaker zour Leta Lanasyon, mon ti sorti kot mwan 4er e sa se Anse Aux Pins.  Si mon pa ti fer serten emergency oubyen evasive action mon pe ti pou ariv a tan.  I ti neseser  ki mon fer sa alors Mr Speaker, dan plas nou pe rode si en tinel i vyab oubyen i pa vyab mon a sizer serten keksoz avek lotorite, pou li konsidere – mon pa en spesyalis dan transpor me solman  mon krwar mon annan serten lide.  Dan bokou pei i annan  bann ‘flyovers Mr Speaker alors olye nou pe pran larzan pou nou al krez dan granit annou envestir dan fer bann ‘flyovers.  Kekfwa nou kapab menm met bann zebra crossing an servan bann ‘flyovers kekfwa i ava redwir sa presyon ki annan lo trafik anba pou kapab ede ki nou ariv travay a-tan.

Mr Speaker lapovrete i reste en  keksoz ki enportan.  Nou’n tande ki i annan en Sekreter D’eta pou sa domenn me ziska ozordi Mr Speaker, nou pa ankor tann okenn mezir ki pe ganny pran pou kapab rezourd sa problenm lapovrete.  Ozordi Mr Speaker,  nou preski per pou ariv kot en laboutik akoz koman ou arete dimoun i demann ou si napa nanryen.  Mr Speaker sa i deplorab akoz lontan nou ti napa sa.  Si mwan mon anvi donn en dimoun en keksoz I normal pou mwan kapab donn li me solman nou pe vwar tro bokou dimo0un ki pe vin demande letan ou ariv kot en laboutik.  Mr Speaker, en lot domenn ki mon krwar i enportan ki nou tous lo la se sistenm lenportasyon.  Bis Mr Speaker mon ti a demann Gouvernman pou ouver sa sekter e permet bann lezot lakonpannyen prive pou kapab envestir dan provide public transport.  Nou pe ouver nou laliny aeryen akoz nou pa ouver nou laliny lo later? Sa i ava ede ki i annan plis servis  – i kapab fer li pli konpetitiv Mr Speaker e ki i ava on time.  I annan en dimoun in dir mwan ki letan i  esper bis Lo stenn bis anvil, e lapli pe tonbe sa  PA Sistenm letan bis pe vini pa efektiv Mr Speaker.  Nou bezwen annan bann mekanizm ki enform dimoun byen ki sa transpor pa pe vini oubyen pou li kapab fer bann lezot laranzman alternatif se sa ki pou fer nou lekonomi vin pli efektiv.  Mon ti deza vwar lo Facebook kot enn bann aktivis SPPF ti dir in esper bis pour 1erdtan edmi.  Sa i mal selman i ti’n devret kapab pran en lot mezir  kekfwa i ti a’n pey en pti taksi pirat oubyen en taksi normal pou li desann vin travay e fer son kontribisyon dan nou sosyete.  Mr Speaker, i annan en konsern ki’n lev-e atraver ban polisye.  Bann polisye sa ki’n apros mwan in dir mwan zot pe ganny anpese pou ekout sa ki pase dan Lasanble live e sa i enportan  ki nou revwar akoz zot osi zot bann dimoun.  Letan Komisyoner ti dir ki bann polisye i ganny R12 bokou zot ti enform nou poudir sa pa korek zot ganny R7500.  Alors set akoz zot ti pe ekoute ki zot ti konnen sansan ti pou annan en lenformasyon ki pa korek.

Mr Speaker lanplwa; lanplwa i en topik ki pa’n tous ditou.  I annan bann zenn dimoun  – mwan mon konn en zenn onm ki’n etidye aletranze Lanmerik  ki’n vin Sesel pou fer son placement i  pa pe demann Lotorite pou pey li me i pe ganny difikilte.  Eski sa i akseptab Mr Speaker?  Non.  Akoz nou fer sa avek en zenn Seselwa?  I pa byen.   E i ti al kot Air Seychelles kot Mr De Commarmond ki ansarz HR laba e sa sityasyon ki i ti pe rankontre e finalman son paran in bezwen fer li retournen e al vwar lezot keksoz laba.  E ankor dan laliny lanplwa letan in fer reform bann nouvo Minis ki pa’n ganny aprouve, in annan reform ki’n ganny fer – reshufflement i annan serten bann travayer dan Gouvernman ki’n bezwen fer en pay cut Mr Speaker, plis ki R4mil pou li kapab reste kontinyen eski sa i akseptab Mr Speaker?

Pour mwan konklir, avek 2 pwen se mon ti a demann Lotorite pou revwar en pti pe ka sa 3 prizonnyen ki Lezip e zot fanmir i anvi vwar zot arive e Secretary of State Barry Faure ti al fer bann diskisyon e zot ti’n ganny promet pou retourn isi   – sa ti a bon zot ganny enformen.  Bann dimoun ki oule fer devlopman garaz, provide zot avek later.  Mr Speaker pou mwan fini se bann casual labour ki travay dan sekter lapes.  Sekter Lapes MR Speaker, i enportan pou nou lekonomi.  I annan Lagreman ki’n ganny fer san konsiltasyon serten lotorite me zot in ale pou fer bann negosyasyon pou benefisye zot me pa pei.  Alor i enportan ki nou vwar sa sitasyon casual labour dan sekter lapes.

Mr Speaker pou

mwan fini mon  ti a kontan remersye ou e  remersye bann Manm Onorab ki’n donn mwan sa pti git letan an plis pou mwan kapab koze e pou mwan kapab donn mon reaksyon lo Letan Lanasyon e pou dir sa  mwan mon dir LDS se sa parti  li ki pou defini Sesel e son sinifikasyon ozordi se Louer Dieu tout Seychellois – LDS!

 

(APPLAUSE)

 

 

MR SPEAKER

Mersi Onorab Andre. Mon ti a kontan zis dir dan langaz parlmanter mon les ou servi sa mon ozordi ou ti kapab  servi malpropte friyapen oubyen salte friyapen.  Laprosenn fwa mon pa pou aksepte sa.  Nou met nou en lot en pti pe nivo. Petet mon  konservatif me mon krwar i annan serten lapropte dan nou langaz ki nou servi Lasanble. Onorab Herminie laparol i pou ou.

(LAUGHTER)

HON WILBERT HERMINIE

Mersi Mr Speaker.  Mr Speaker, ser, frer Manm Onorab, tou zabitan La Rivière Angaise,   bonzour.    Ki i reste mwan ankor pou azoute?

Ki i reste mwan ankor pou dir letan mon vwar ki Diskour Leta Lanasyon in ganny en aplodisman an debout par Leader Lopozisyon e tou lezot Manm Lopozisyon?

Ki i reste mwan ankor pou dir?

Mr Speaker, mon krwar i annan en lagreman inanim ozordi dan nou Lasanble Nasyonal ki Prezidan Faure pe anmenn sa pei dan en bon direksyon.

Son bann lentervansyon i montre nou ki i ankor krwar dan bann prensip de-baz nou parti.  Ki swa lo lasante, lo ledikasyon e menm pou asir sekirite e dinyite nou bann vyeyar.  Son lentervansyon i montre nou ki sa bann prensip i reste touzour relevan, e ki Parti Lepep i reste relevan.

Ozordi i pe asir lenplimantasyon sa bann prensip, dan en nouvo lanvironnman e servi bann zouti bokou pli modern pou meet the challenges of changing times.

Sapo a Prezidan Faure.

Sa laklamasyon an debout ki nou tou nou ti donn li Mardi dan sa Lasanble, i koz pou li menm.

Atraver sa Diskour, nou’n osi vwar en Prezidan, en zonm ‘pli determinen ki zanmen’ pou fer sir ki lalwa i ganny respekte e lalwa i ganny ranforsi.  Letan Prezidan Faure i koz lo nesesite pou piblik ganny akse avek lans, i pa pe envant nanryen nouvo, i pa pe reponn en demann ki Onorab Adelaide in fer.  Me i senpleman pe demann bann dimoun konsernen, pou enplimant en lalwa ki egziste pandan plizyer deseni lannen dan nou pei.  Se sa trademark prezidans e administrasyon Msye Faure – Aksyon!

Ozordi Prezidan Faure n koz lo nesesite pou permet bann dimoun ki’n ariv 63an kapab kontinyen dan lanplwa ziska laz 65an e an menm tan ganny son Sekirite Sosyal osi byen ki son saler.  I demontre konpasyon lo son par, me an menm tan i montre nou progre ki nou’n fer dan lasante sa pep; kot ozordi nou bann dimoun pe viv bokou pli lontan, e tou sa i rezilta nou Polisi pou asir en meyer lavi pour pep Seselwa.

Mon oule osi tir mon sapo a desizyon Prezidan Faure, pou envestir plis ankor dan rediksyon dan demann pour drog dan nou kominote.

Ki drog i en fleo, e ozordi lennmi No.1 dan Sesel – i san okenn dout.  I kler pou nou tou ozordi ki sa i leka.  I pe menm menas legzistans nou prop Nasyon.  I pe detri kominote e anmenn soufrans pour bokou fanmir.  Bokou bann zenn pe pri dan drog e pe vwar zot enkapab pou prodwir, pou travay, pou al dan lanplwa, pou defann pei e menm dan bokou lenstans pou fer zanfan, pou reprodwir e asir nou legzistans koman en Nasyon.

Partou o monn Mr Speaker, kot Gouvernman in pran en lapros pinitiv viz-a-vi sa problenm drog, e konsantre zis lo trafik drog, partou o monn, depi Lanmerik ziska Sid Lafrik, sa stratezi in toultan fail.  Levidans i montre nou, le sel fason pou nou kapab deal avek sa problenm drog, se pou anmenn en progranm agresiv pou redwir demann ansanm avek met presyon neseser pou redwir lakantite drog ki antre dan pei.

Alors nouvel ki NDEA pe al ganny revwar, i enn ki nou byen akeyir.

NDEA i bezwen met plis lanfaz lo lentelizans e sirtou lo lentelizans finansyel.  En Lalwa kardinal dan biznes drog se ki eskobar zanmen i mars ek drog, me plito i zis zer larzan sal ki i rekolte avek sa aktivite kriminel.  I neseser pou NDEA devlop son kapasite pou follow the money and seize the assets.  An menm tan bann endividi ki oule kontinyen entrodwir drog dan nou lekol, dan prizon e dan bann progranm reabilitasyon osi byen ki dan kominote ,i bezwen ganny deal avek seryezman.

Mon konfidan ki sa nouvo stratezi ladministrasyon Prezidan Faure anba en leadership kalib i enn ki pou en reisit.   Mon ava sizere osi ki en komite ki pou enkli tou bann akter konsernen ek sa problenm, osi byen ki reprezantasyon Lasanble Nasyonal i ganny kree pou konsey sa progranm.

En lot fleo ki pe afekte nou pti pei se labi lalkol.

Lalkol in vin parti nou kiltir.  Lalkol i ganny konsonmen dan tou aktivite e lalkol pe osi detri kapasite nou zenn pou travay e prodwir.  I neseser pou nou met an plas nouvo mezir pou deal avek problenm lalkol.

Eski pa in ler Mr Speaker pou nou konsider landrwa kot i vann lalkol?  Eski i pa’n ler pou nou aret vann lalkol dan nenport ki laboutik ki nou zwenn dan tou vilaz – me annan bann stor spesyal kot nou vann lalkol parey i ete dan bokou pei o monn ?

Eski pa’n ler osi pou revwar laz ki en zenn i kapab aste lalkol, sorti 18an pou vin 21an?

Eski i pa’n ler pou nou ranforsi kapabilite Lapolis pou met en fren avek drunken driving?

I bann mezir ki mon senserman krwar o ava ede konsiderableman pou redwir sa problenm lalkol dan nou pei.

Lo tinel, mon pa pou dir bokou, akoz parey Leader Lopozisyon in dir, tinel set en proze a lonterm e alors annou les bann letid ganny fer pou gete si i fezab ouswa non.

Me selman i en lesey pou rezourd problenm trafik ki nou tou nou ava dakor ki i en problenm masiv e lendikasyon devlopman ki sa Gouvernman in anmennen dan Sesel pandan sa dernyen deseni.  Nou’n kree en gran laklas mwayenn menm si malerezman bokou ladan in oubliye kot zot sorti.

Mr Speaker, si mon ti pou annan en kritik pou fer lo Diskour Prezidan Larepiblik se senpleman lakantite lakaz ki i anvizaze fer dan distrik La Rivière Anglaise.

Nou problenm primordyal ozordi se, zisteman lakaz e i form parti mon vizyon osi byen ki mon promes eleksyon pour ki dan sa prosenn 4an ki pe vini, nou pou konstri omwen 100 younit lakaz dan mon distrik.  Mon remersye Prezidan pou fer en komitman pou konstri 24 younit dan 24 mwan.  Me nou konstate ki avek sa sityasyon lakaz ozordi, i pa pou sifi.

Nou annan later, nou annan en plan e ozordi mon pe fer en demann formel ki Gouvernman i rekonsider sa sif e fer le neseser ki pandan sa prosenn 3 a 4an nou ganny nou omwen 100 nouvo younit dan distrik La Rivière Anglaise,  avek bi pou ede redwir sa problenm ki ozordi pe afekte bokou endividi sirtou bann zenn fanmir.  Mon oule osi Mr. Speaker fer en lapel avek MLUH, pou silvouple respekte bann Lagreman ki’n ganny fer avek son predeseser.

Bann ki’n fini ganny enformen ki zot pe al ganny zot lakaz, ki’n fini aste zot meb, silvouple fer le neseser pou zot ganny zot lakle o pli vit posib.

Bann ki dan Condominium Union Vale, ki’n ganny promet ki zot pou bouz dan nouvo Condominium Perseverance, akoz problenm striktirel ki annan avek sa bann Condominium, ankor mon demande ki sa komitman i ganny onore.  La mon ava dir Onorab Larue, ki sa later ki’n ganny vann avek GICC pour 1 roupi, i pou konstri Condominium lo la.  Si GICC ti pou aste sa later a son pri reel parey ou pe demande, en Condominium pa ti pou kout 1 milyon roupi me plito 2 a 3 milyon roupi.

So ler ou demande lekel ki’n benefisye avek sa tranzaksyon, se non pa GICC me plito sa bann zenn e zenn fanmir ki pou al reste dan sa bann Condominium.  E finalman mon sipliy avek MLUH pou konsilte avek Lotorite Distrik avan zot pran okenn desizyon lo alokasyon later avek lakaz dan distrik La Rivière Anglaise.

En Prezidan avangard avek prensip avangard ; en Prezidan ki krwar dan linite Nasyonal e ki konvenki ki sa i le sel fason pou nou al devan.

En Prezidan ki pou premye fwa dan nou listwar depi trwazyenm repiblik in komanse, in reisi ganny Lopozisyon pou debout pou aklanm son Diskour.

I en Prezidan prometan ; i en Prezidan ki nou kapab fer konfyans pa zis la ozordi me pou bokou lannen ki pe vini ankor.

Avek sa Mr Speaker mon remersye ou e mon a dir ou mersi.  Sorry Mr Speaker  ti annan zis en pwen klarifikasyon.

MR SPEAKER

Wi Onorab Herminie?

HON  WILBERT HERMINIE

Ti annan zis en pwen klarifikasyon.  Lo kote akoz mon fek ganny advise par enn mon zabitan Mr Dr Patrick Herminie ki sa  deliberasyon ki I ti pou fer le 15 Fevriye ti’n ganny kennsel akoz SBC ti pe atenn pour mon krwar sa Press Conference ki Prezidan ti pe fer anler State House.

 

MR SPEAKER

Dakor so i  kler Onorab  Andre i kler la ou’n ganny…

 

HON CLIFFORD ANDRE

Prezidan ti dir Dr Herminie pou pas serten klarifikasyon le 1.  Prezidan mon sir ki i ti konnen ki I pe al fer sa 7er diswar I pa ti dir 7er diswar Dr Herminie  pou vin donn sa so pa korek.  Mon krwar pa  – pa sustain water. Thank you.

 

MR SPEAKER

Ok.  Onorab  Valmont.

HON JUDE VALMONT

Mr Speaker mon krwar mon’n met lanfaz lo dat. Mon  santi atraver ou mon a  reponn Onorab Andre.  Mon krwar lenportans nou’n ganny klarifikasyon  nou bouze la mon krwar in dir – mon krwar in donn en dat la; in donn en rezon spesifik.

MR SPEAKER

Eski in donn en dat Onorab Herminie?

 

HON  WILBERT HERMINIE

Non mon pa’n donn dat mwan.  Zis mon’n donn en lesplikasyon.

MR SPEAKER

Ok, ok in donn en lesplikasyon  mon ti a sizere  Onorab Herminie vi ki ou pe koz enn ou bann constituents petet donn nou en tentative date apre midi kan i pou fer koumsa napa okenn polemik vi ki Prezidan in dir  i pou annan klarifikasyon.  Onorab Esparon.  Mon  a les ou koze 10 a 15 minit.

 

 

HON REGINA ESPARON

Mersi  Mr Speaker,

Koleg MNA,  manm piblik ki pe ekout nou,spesyalman zabitan Glacis, bonzour.

Mr Speaker, bokou in ganny dir ziska prezan lo Diskour prononse par Prezidan Faure. Parey lezot dimoun mwan osi mon obzerv sa nouvo ton ki  Prezidan Faure in pran dan son Diskour. Sa i byen pour nou pei e mon swete ki en tel lapros i ava ede anmenn solisyon pour bann problenm ki lafanmiy Seselwa pe fer fas avek.

Mon  vwar en Prezidan ki vin admet ki  keksoz pa an roz, e ki plizyer fleo, tel ki drog ek lalkol,  i bann problenm mazer isi. In menm admet ki i annan move pratik ki pe deroule dan prizon malgre ki i pa’n  donn detaye akoz; mon sipoze i konnen ki mazorite Seselwa i deza okouran kwa ki pase laba.

Ozordi en manman ki son piti i al prizon i pli enkyet ankor, akoz i preski en garanti ki apre son santans i pou’n fini rafinn tou son bann move skil e i pou sorti pli pir ki letan i ti rantre. Annou admet  Prizon nepli en landrwa reform, me in vin plito en lenstitisyon aprann plis vis. Sa i en pe parey nou lopital, kot dokter menm i konsey ou parfwa pou pa admet, akoz ou riske sorti avek maladi ki ou ti napa letan ou antre.

Mr Speaker, Prezidan in  koz lo respe mutyel ki pou donn konfyas pou fer Sesel bouz devan. I kler ki la osi i pe pran en nouvo lapros, akoz nou kapab demande lekel ki responsab pou touy sa bann bon valer ki paran lontan ti  enkilke dan zot zanfan? I kler ki atraver bann lannen, Gouvernman limenm in pli gran koupab. Bann lensilt, viktimizasyon, imiliasyon ek sistenm ser sitwayen in ede pou anmenn lamertim dan leker bokou dimoun. E dan soufrans tou striktir i kase e dimoun i rode ki mannyer pou sirviv e se la kot parfwa prensip ‘bef dan disab’ i vini e respe i perdi konpletman e anmenn dekadans  dan sosyete.

Prezidan in koz lo valer moral e valer spirityel. Mon toutafe dakor. I pou pran en kantite travay pou refer sa. Nou bezwen aksepte ki ozordi nou sosyete in vreman degrade e nou tou nou trakase. Me selman si Prezidan i pare pou al dan sa nouvo direksyon, kot i ekoute e travay avek tou dimoun, mon pa vwar nanryen ki enposib. Senserite e aksyon pozitiv i ava fer koste ansanm bann dirizan ek dimoun konsernen pour nou refer nou pei e sa a ed lafanmir reganny bon direksyon. Me pa zis koze. Aksyon i bezwen swiv, alor annou walk the talk.

I byen ki Prezidan Faure i dir ki leta nou Nasyon i enportan pou nou konpran leta nou fanmiy e ki nou bezwen en sanzman radikal dan nou lapros.  I kler ki nou pou bezwen sa, si nou anvi avans devan, e parey plizyer MNA LDS in dir avan mwan fodre ki sa i komans avek Gouvernman li menm. Aret servi politik koman en zouti. Petet sa son parti ti a kapab aret zis maltret dimoun pli ba ki later atraver sa torson sal ki apel ‘People Plus –  e dan ‘Rigol Lari Bazar’ e ‘Anba Langar lo Facebook.

Eski Prezidan pa realize ki sa ki i pe dir e sa ki Parti, dirize par Msye Michel pe fer i en kontradiksyon? Ler li anler State House i lapes e met pwason dan bato, me Msye Michel, anba L’Espace i zet tou pwason atraver ‘People Plus e son lot zournal ‘Times of Seychelles. Eski i krwar i pou reisir dan en tel sityasyon?

Mr Speaker sa bann latitid i kontinyen met nou pei an aryer e i fer popilasyon  soufer e menm ankoler. Alor i demann en sanzman dan latitid. Malgre in pran bokou letan, omwen dousman dousman zot komans realize, e nou komans tann bann parol positive. Mon espere ki nou kontinyen dan sa direksyon e ki a okenn moman zot pa kas kontour zis pour lavantaz politik akoz sa pa pou bon ditou pour nou pei.  Mr. Speaker nou reste optimis e nou esper bann aksyon ki pou marse anliny avek  bann zoli parol.

Msye Prezidan in dir ki pou annan plis komodite lo lalis bann ki napa VAT lo la. Sa i en demann ki depi ki SNP ti dan Lasanble nou ti fer. Plito tar ki zanmen. Me mon osi krvwar ki malgre ki nou dan en sistenm marse lib, pou bezwen annan serten dyalog ant Gouvernman e bann marsan. Marsandiz i tro ser e zot ogmante anba nou lizye. Sa i apel vol dimoun e i en krim. Kan en paran e en dimoun ki pre avek mon kominote, mon pa kapab aksepte sa. Nou popilasyon i merit en meyer deal pour sa pti larzan ki zot gannyen.  Mon espere letan VAT i ganny tire, nou vwar en diferans dan pri akoz ozordi dan letazer dan laboutik ou pa konnen lekel ki annan VAT  lekel ki napa akoz tou komodite i ser.

Mr Speaker, menm si nou bann paran nou anvi donn nou zanfan manze  ki bon pour zot lasante, malerezman sa bann kalite prodwi i vann ser. Sa ki bon marse i lavyann poul enporte sorti Brazil ki posibleman ranpli ek bann organizm ki’n modifye genetikman. I annan en logmantasyon dan Kanser. Annou fer en letid e explor relasyon ant sa Kanser ek sa ki nou manze, enkli sa kalite legim ki nou prodwi  anterm bann kemikal ki servi dan lagrikiltir. Mr Speaker mon konsern i reste lafanmiy Seselwa ek son bann defi. Mon pou siport tou mezir seser e responsab pou amelyor lavi nou pep.

Mr Speaker pri bann litilite i tro ser e dan laliny kot PUC ou tan setaki pe plennyen ki bil in monte. Mon rekonnet ki in annan zefor pou tenir enpe pri elektrisite, me pri delo i kontinyen monte e i vreman tro kan nou pran kont ki nou pa pe ni menm ranmas en kar sa delo ki koule sak fwa lapli i tonbe.

Mon konvenki ki Gouvernnman i merit eksplor bann diferan fason stok delo pou asir en provizyon delo potab ki a la oter pou tou Seselwa e ki ava fer nou aret bvwar delo sale.

E la mon ti a kontan sizere Mr. Speaker, ki avan ki nou rev tinel, nou revvwar tou bann letid ki’n ganny fer lo posibilite konstri en lot Danm. Nou pli bezwen en Danm  pou ranmas delo ki tinel  sorti Belombre pou La Rivière Anglaise.  E mon asir zot ki a lekout zot a dakor avek mwan. Sel keksoz ki vin dan mon latet letan nou koz Grand Anse, Mahe se en Danm e pa en tinel. Menm sa letid pou kout detrwa milyon. Annou plito fer en Danm ki son letid in deza ganny fer.

Leta nou Distrik Glacis:

Mr Speaker,  mon ti a kontan en kou leta nou distrik,

Kord gard

Kord gard i dan en leta pa tro bon e Komisyoner lapolis ti enform nou ki Kord Gard Glacis i reste koman en  police post, e tou zot loperasyon i deroul Bovalon.

Ser Zabitan mon’n apros Komisyoner pour ki ansanm avek Ladministrasyon Distrik nou zabitan nou a entretenir sa Kord Gard, nou a donn li en facelift, pour ki sa bann zofisye ki ganny poste laba a senti zot pli konfortab, e a rann nou kominote en  pli bon servis.

Lekol

Annou  get Lekol: wi bann zanfan Glacis in ganny nouvo  lekol. Nou apresye e nou dir mersi, me  deryer sa bann zoli baro nef, annou gete ki pe pase. Fodre Msye Faure i note,  I fer 6 semen depi lekol in komase e laklas P2 napa teacher. Zanfan in byen ganny fonde dan P1 akoz nou konnen ki ler ou’n pas dan lanmen Mis Mariane sa bann zanfan in ganny tou sa ki bon,  e prezan  zot pe perdi.

Minis Morgan lo non bann paran laklas P2 lekol Glacis nou pe demann ou pe get dan sa problenm o pli vit posib, pa les nou zanfan perdi.

Lo nivo P5 ek P6 i mank 3 teachers. Mr Speaker  si nouvreman anvi ki nou zanfan I develop zot lentelizans, nou bezwen  fer sir ki zot annan resours neseser, e resours imen i enportan pou laprantisaz sa bann zanfan.

 Nou konpran ler Prezidan i dir ki zot in fer en fot lo ferm N.I E. Me eski nou zanfan ki devret pe ganny pini pou zot fot?

I bon note ki dan en miting ki mwan- menm ek DA, nou ti annan ek headteacher 2 semenn pase, in  fer resorti ki depi Septembre lannen pase in fer son rekomandasyon lo nivo Minister, me nanryen pa’n ganny fer. Oli long term plan?  Oli plan pou nou zanfan nou Trezor – nou Lavnir, zot in les tonbe?

Mr Speaker, Prezidan in koz lo  bezwen e dezir nou lazenes  ki pou ede dan son devlopman. Sa i byen.   Mon profit sa lokasyon pou fer en lapel ek Minis pour Ledikasyon pou fer tou demars pou ki zanfan lekol Glacis i ganny zot play ground.

Mr Speaker nou bezwen note ki malgre ki batiman i nouvo, i annan son defayans ki si ou pa maintain. i pou deteryore. Lenstalasyon elektrisite, pa  lo standar e i fer ki i annan serten lekipman ki pa  pe marse.

Mon kontan ki Prezidan in koz lo teknolozi dan bann lekol; kot sak lekol a ganny akse ek Internet ek Wifi e sa dan li menm a benefisye ansenyan   lekol Glacis ki ozordi napa akse avek Internet.

Lazenes

Mr speaker, lo non lazenes Glacis, mon pe enplor ek Mr. Prezidan pou fer le neseser pou ki  sa morso later, deryer Ladministrasyon Distrik i ganny devlope dan fasilite sportif pou benefisnou bann zenn dan distrik. E vi son proximite  ek lekol, i a kapab osi benefisye zanfan lekol Glacis. Peser osi pe esper  bann meyer fasilit,

Day Care

En lot konsern ki paran pe demande se  fasilite Day Care. Nou pe lans en lapel ek lotorite konsernen pou akseler prosedir pou ki sa Day Care ki la depi 2011, in fini konstri  i  vin an operasyonel pour ki bann manman dan distrik  a osi ganny akse ek sa fasilite.

Semen

I annan bokou proze pti semen ki’n ganny marke dan distrik Glacis e negosyasyon i ongoing pou finalize. Mon espere ki byento zot a komanse. Mon’n osi diskit lo bann Proze Bus-Stop e lalimyer lo semen kot napa, ki i a ganny latasyon Minister konsernen.

Mr Speaker a sa pwen mon oule repet en keksoz pou met a latansyon Msye Faure, en keksoz ki’n frap mwan ler mon pe vin Lasanble; sa kantite zanfan lekol ki ti pe esper bis dan lapli. I annan ki’n koup semen, pou al maske lapli anba laboutik. Mr speaker i neseser pour ki Lotorite, Transpor i rezourd sa problenm bus shelter dan sant Glacis  irzan.  Mon’n koz ek PS pour Transpor, mon met a latansyon DA, fodre ki keksoz i ganny fer dan limedya pou ed sa bann zanfan lekol.  Nou konnen  sa landrwa ki mon pe koze o-bor laboutik Tamby o-bor laboutik Malbar o-bour Sant Glacis in deza annan aksidan ki ti pre pou fatal. Alor annou pa esper aksidan ariv fatal apre rezourd sa problenm silvouple.

 

Lakaz ek Later

Mr Speaker  demann pou lozman  dan distrik Glacis i kontinyen reste en problenm. Lalis i kontinyen grandi, priyorite i  pas devan priyorite e i annan ki pe espere plis ki 20an. I annan  ki pe peye plis ki 5an.  Dimoun i fistre, sirtouler zot vir an ron e pa konnen kan zot pou ganny asiste. I annan ki monte desan kot DA ki parfwa napa lenformasyon pou donnen. Housing i anvoy kot DA.  DA i dir Housing. Ziska ki tan nou pou fer dimoun monte desan?

Ou ekri ou pa ganny larepons pourtan dan son Diskour  2 mwan pase letan  Msye Faure ti adres Lasanble, i ti dir ki fodre pa ki nou fer dimoun monte desann.  I  ti dir ki  bann Minister fodre  rann dimoun larepons, pou zot konsern piblik dan en dele 2 semenn.

Msye Faure sa pa ditou leka, dimoun i ankor pe espere pa konnen kote zot ete pou en morso later oubyen  kote zot ete lo lalis lakaz – parey nou’n tann Onorab Afif bomaten dir.  Mon pa konpran akoz in pran 4 mwa  pou biro Housing konfirn avek DA, pou li konnen lekel ki pe ganny lakaz Perseverans. Akoz ki sa i bezwen reste en sekre?

Mr Speaker, i annan bokou dimoun ki annan later, me zot pa kapab afford pou konstri akoz pri ki materyo konstriksyon i tro ser. Zot prefere fer laplikasyon  pou ganny en lakaz Gouvernman e sa i met bokou presyon lo lalis lakaz.

Ozordi en  semp lakaz 2 lasanm, pe kout  anviron 800mil a 1milyon pou konstri – sirtou si ou met dan lanmen en  kontrakter. Mon pe lans en lapel avek Prezidan pou etidye bann mekanizm ki kapab fer desan pri materyo konstriksyon, pour ki sa pti malere ki annan e morso later, li osi ya kapab afford pou komans met debout ansanm e demen ganny son prop lakaz parey i zot Polisi .

Mr Speaker, mon swete vwar en sanzman latitid dan bann zofisye Gouvernman e sa lespri ‘travay ansanm’ i ava vreman vin nouvo fason travay.

Mon anvi vvwar aksyon pour nou kapab bouz pli devan e soulaz sor lafanmir Seselwa ki dan soufrans. Se sa ki nou pei i bezwen.

Avek kouraz ki mon annan, mon pou kontinyen fer sa ki mon kapab e kontribye dan konstriksyon ek devlopman mon pei, e pli an-partikilye district Glacis.

Ki Bondye i  vers tou son benediksyon lo nou e kontinyen protez nou pti pei Sesel.

Mersi Mr Speaker.

 

        (APPLAUSE)

 

MR SPEAKER

Mersi Onorab Esparon. Mon krwar ou’n lev en size ki konsern tou distrik i pa konsern zis Glacis e sa se mank teachers dan  lekol  Mon konnen i konsern lekol  primer Anse Boileau e lekol segonder Anse Boileau e mon konnen ki i annan serten paran ki’n ekri Vis-Prezidan e Minis Morgan zot in anvoy zot kopi kot mwan – i annan ki vin vwar mwan.   Mon krwar in ariv en staz kot Minister Ledikasyon  i bezwen regard serten mezir emergency.  Ou pa pou kapab  annan en laklas S4 ek S3 ki napa teachers pour bann size. E sirtou dan bann pti laklas osi.  Petet i annan en kantite dimoun ki’n retire a laz 63 ki dan en ka spesyal konmela kot nou dan emergency i kapab retournen  e vin donn en koudmen; mwatye lazournen  – 2 zour par semenn i annan diferan formil ki nou kapab regarde pou donn li en special allowance par lao son pansyon.  En formil ki parey Prezidan Faure in dir ki par lao 63an ou kapab al travay ankor  ou ganny ou sekirite.  Mon krwar Minister Ledikasyon nou pa kapab kontinyen avek sa sityasyon napa teachers.  I inakseptab.  Anse Boileau nou’n komans lekol sa term I annan  zanfan ki pe asiz 2 zanfan lo en sez.  Sa i pa akseptab.  I annan 6 semenn pour nou planifye.  E la mon dakor avek Leader of Government Business  in dir oli nou responsabilite? Ou pa kapab fer teachers – nou kapab fer sez.  Si ou pa kapab  fer sez ou kapab aste sez.  So nou bezwen  pran nou responsabilite pou nou fer sir  keksoz i marse e nou bezwen think outside the box pou nou vwar ki mannyer nou annan teachers dan lekol e sa i trez enportan parski mon konnen ler mon’n al vizit Montagne Posée, Mr Maxime Tirant i dir mwan i annan dimoun ki anvi  vin fer laklas  ek bann prizon e i dir mwan be bann teachers ki’n retire.   So be akoz bann teachers ki’n retire dan sa ka emergency pa kapab al donn en koudmen?  Mon konnen La Digue i annan dimoun ki’n retire  me si ou demann li pou vin donn en koudmen lanmwatye en zournen oubyen  2 zour par semenn i a rezourd sa problenm.  Let’s think outside the box.  Mon a les zot al dezennen nou a  re kontinyen 2er.

 

         (BREAK)

 

MR SPEAKER

Bonn apre midi tou dimoun – tou dimoun dan Lasanble, tou dimoun dan lakour.  Nou a kontiny nou bann deliberasyon e mon a envit Onorab De Commarmond.

 

HON CHARLES DE COMMARMOND

Mr Speaker, en pti pwen lesplikasyon.  Dan lazournen la nou’n koz lo sa  zafer lekol dan bann zafer lekol kot napa teachers la – mon ‘n zis fer en pti cross-check avek Minister Ledikasyon e mon’n ganny garanti ki I annan Fon  pou peye bann teachers sirtou bann ki’n retire e i annan lankourazman  poudir zot vini vin donn koudmen.  Mon krwar la i depan lo bann headteacher.  Mon ti ava profite lo  nou Lasanble lans en lapel ek tou bann headteacher vwar kote i annan sa bann mankman pou zis fer request avek Minister Ledikasyon e nou demann osi bann past teachers ki’n retire pou osi tann nou lapel e konsider pou vin donn sa koudmen.  Mersi.

 

MR SPEAKER

Konmsi mannyer mon vwar body language Onorab Pillay i  pe dir mwan ale al donn koudmen laba –  kit Lasanble.

 

(LAUGHTER)

 

MR SPEAKER

Anyway zis pou dir ki sa pwen ki Onorab De C ommarmond in fer sorti I tre valab akoz mwan osi ler mon’n fer sa lentervansyon  apre Onorab Esparon mwan osi ler mon’n al dan biro, konmsi  mon’n  dir mon a teste sa.  So mon’n telefonn en zanmi ki La Digue ki mon konnen i ti en specialist Maths Teacher ki mon konnen I ti fer Lasyans letan mon  ti ansarz lansennyman Lasyans dan lekol in retire, e mon’n koz ek li i dir mwan egzakteman si zot ti’n demann li i ti a’n vini dan sa ka spesifikman La Digue pou li ede e si i annan  sa problenm akoz i pe donn leson prive.  So mon krwar parye Onorab De Commarmond pe dir, i en keksoz si Fon i annan la bann headteacher kontakte bann dimoun ki’n retire ki ankor anvi  akoz i en sityasyon  emergency nou fer serten demann oubyen lapel emergency. Si i annan larzan tou dimoun ki’n retire i a ganny son pti larzan sekirite i pa mind ganny en pti larzan ekstra olye al donn leson prive, I pran en laklas 30 manrmay sirtou bann lakas kot pou   al fer legzanmen lafen lannen – mon pe koz P6  S4 – S5.  So mon kontan ki ou’n anmenn sa klarifikasyon e fotespere  tou bann headteachers ki pe ekout nou e bann paran ki pe ekout nou akoz nou’n dir dan sa zafer la pou lavnir nou tou nou ansanm – nou tou nou bezwen ed kanmarad piblik, paran, Lasanble, Egzekitiv so headteachers ek paran ek teachers ki’n retire donn en koudmen pa les nou bann laklas tousel ek bann zanfan.  Bon, wi Onorab Herminie?

 

HON WILBERT HERMINIE

Mersi Mr Speaker.  Avek ou permisyon  mon ti demann en lenformasyon ava nou ti Break mon’n ganny enformen ki sa Press Conference pou fer Lendi ki pe vini 10er bomaten e tou bann Media House in ganny envite. Rezon ki pa ti’n kapab fer le 15 Fevriye sete en keksoz teknik lo lapar SBC.  Mersi

 

MR SPEAKER

Mersi Onorab Herminie pour sa klarifikasyon e fotespere tou bann Media Houses i ava ganny sans pou zot partisipe si zot oule.  Avek sa mon ava donn laparol Onorab Ernesta.

 

HON PAUL ERNESTA

mersi Mr Speaker.  Mr Speaker

koleg Onorab, zabitan Takamaka e tou dimoun a lekout bonn apre midi.

Mr Speaker, letan nou koz lo Leta Lanasyon. savedir nou pe fer en analiz lo sityasyon aktyel lo lekonomi, politik e sosyal  en pei.

Mardi le 14 Fevriye 2017, Sesel e lepep Seselwa ti temwannyaz en lot sapit son listwar ganny ekrir.

Atantivman, nou’n ekout nou Prezidan Sesel Msye Danny Faure, delivre son premye Leta Lanasyon pou lannen 2017.

Parey tou Seselwa, monn vreman enpresyonnen ek Diskour nou Prezidan. in enn ki fran, ranpli ek imilite in anmenn nou dan realite nou pei dan en fason onnet e zis. in soulev bann konsern reel ki pe preokip nou popilasyon.

Atase ek sa in osi pran bann mezir e aksyon konkret ki pou adres bokou sa bann problenm. konsekaman, amelyor lavi nou pep.

Mr Speaker, mon napa okenn dout ki dan son ladres, nou Prezidan in anmenn repons, solisyon e rekonfor pou sakenn de nou dan en fason ou en lot.

Keksoz pli enteresan ankor, in re anmenn nou pep ansanm. Pour mwan sa i ekstrememan enportan akoz nou Nasyon ti pe dousman konmans divize zis akoz politik. Zot ti pe menm konmans perdi sa joie de vivre ki nou ti annan.

Lentansyon nou Prezidan i kler. I anvi vwar en Sesel modern ; en pep inifye kot nou pe viv ansanm dan lape, dan lanmour e larmoni.

Pour mwan dan sa letan ki nou ladan Msye Faure. i sa vre e sa sel dirizan ki nou pei i bezwen.

Prezidan lepep i deryer ou e pe donn ou tou zot sipor. Keep up the good work. Ou lo bon semen pou batir sa Sesel modern ki nou tou nou swete vwar.

I enportan note, ki bokou sa bann pwen ki’n ganny souleve i reflekte bann gran prensip nou parti, Sa se pa lot ki parti lepep. Sa bann prensip i baze lo lazistis, legalite dan loportinite, lazistis sosyal e redistribisyon larises avek nou pep.

Lo menm not, i bon fer remarke – la mon pou repet en pwen ki mon ti dir dan enn mon lentervansyon lannen pase. Mon ti dir e mon repete ; ‘’vre sanzman se Parti Lepep ki kapab fer napa en lot parti ki kapab fer parey nou.’’

E sa semenn Prezidan Faure in konfirm sa par donn nou sa vre sanzman ki nou pei i bezwen.

In anmenn bann sanzman pozitiv, dan lape san ki personn i ganny afekte ; en sanzman  baze lo konsiltasyon e an ekoutan e respekte lopinyon tou bann akter nou sosyete, enkli lopinyon lopozisyon osi. Sa ki bon pou lepep in pran e met an aplikasyon, pour lentere  son pep.

Mr Speaker, Prezidan in fer en sanzman ki  kontrerman ek sa  kalite sanzman ki Lopozisyon ti pe prese. sa sanzman ki zot pe rode ti pou kapab anmenn plis problenm pou nou demen.  Annou zis get lanmerik ki pe arive ozordi. leson i la devan nou pou nou tire.

Letan nou pe koz lo sanzman, permet mwan pou koz lo serten sa bann desizyon ki Prezidan in fer. La mon pou adres zot par reflekte santiman serten bann zabitan takamaka, ki monn ganny sans koz avek pandan sa de dernyen zour.

E osi, bann konsern ki’n ganny met devan mwan atraver mon konsiltasyon e vizit ki mon’n fer menm avan Leta Lanasyon ti ganny prezante.

Premyerman, zabitan i dir chapeaux Prezidan pour sa bon Leta Lanasyon. enn ki ranpli ek lespwar.

Zot apresye, pou sa lepa an aryer ki Prezidan in pran pou re anmas nou bann valer moral e spirityel, ki devlopman pe kit deryer.

Mr Speaker, en moman dan listwar nou pei valer lafanmir ti pilye nou sosyete. Sa lepok, zanfan ti respekte bann adilt. Menm kot lakour ou ti toultan respe sa ki pli aze  ki ou, swa ou ser, frer, tonton, tantin eksetera. Dan sa lepok ti pran en kominote pou fer grandi en zanfan. ‘’Bonzour, koman sava, e mersi’’ ti bann parol routin pou nou.  Bann fleo sosyal parey drog, ti preski en mo enkoni.

Me avek sanzman ki’n arive avek letan, lefe globalizasyon e lenfliyans lemonn eksteryer e avek plizyer lezot fakter nou’n eksperyans en de balansman dan nou bann fanmir.

I annan bann ki’n kase e perdi direksyon. E an rezilta sa, nou pep in konmans rankontre bokou problenm. Konsonmasyon lalkol, in vin en kiltir parmi nou pep. Zanfan pe ganny spoil avek bann keksoz materyel e plizyer lezot ankor.

Me Prezidan in rekalibre tousala.  In kree en Minister pour pran ka ek nou lafanmir.

Lo sa pwen mon pa tro sir ki pou manda spesifik sa Minister. Me mon ti a propoze ki en striktir Nasyonal i ganny met an plas, pou siport nou bann dimoun ki pe fer fas ek bann problenm negativ ki pe enpakte lo zot lavi lafanmir.

Revwar rol D.A.C ki ozordi nou pa pe tann li ditou. e osi ankouraz bann diferan groupman relizyez, sosyete sivil, pou vin zwe en rol pli aktif dan sa domenn.

Mr Speaker, depi son legzistans Parti SPUP, SPPF la Parti Lepep in toultan fer li son priyorite pou met a dispozisyon lakaz konvenab pou nou bann fanmir ki dan bezwen, atraver sa ki nou apel sosyal housing.

menm avek bokou difikilte, bokou kritik e fristrasyon parmi nou pep. Nou parti in toultan fer son mye pou delivre lo son promes. Me mon rekonnet, ki malgre tou sa zefor ki’n ganny fer, sa i pa’n ase pou adres sa kantite demann pou lakaz ki pe kontinyelman ogmante.

Stratezi ki pe al ganny adopte pou adres sa problenm i enn ki ankourazan.

Mr Speaker, ozordi Takamaka i annan apepre 293 laplikasyon pour lakaz. e preski lanmwatye ladan pa pe kontribye anver zot Housing Scheme pou diferan rezon.

La les mon a fer remarke ki i annan serten dan sa group dimoun ki pa pe kontribye, pa akoz zot pa anvi kontribye. i senpleman akoz zot mwayen finansman pa pe permet zot fer li.

Aktyelman, i annan manman  tousel ki pe dormi ek son 2 zanfan lo zis en matla dan salon kot son paran.

i annan menm fanmir ou manman tousel ki pe lwe lakaz prive 8 a R10 tou le mwan, e an menm tan sey fer zot kontribisyon.

Ki mannyer sistenm i ete ozordi, sa bann tel fanmir ki pa pe kapab satisfer sa kriter  pa pou zanmen kapab ganny en lakaz en zour.

Me la Prezidan in anmenn lespwar pou sa bann fanmir. kot en fanmir i ava kapab ganny asiste selon son mwayen.

Osi ek sa nouvo stratezi, tou aplikan ava kapab ganny en lendikasyon kler kan zot sipoze pou ganny asiste ek en lakaz, ouswa ek en morso later. De lot kote, mon apresye lespri pou apartir 2018 met tou larzan CSR dan bann proze lakaz.

Me la mon a demann Prezidan pou osi revwar en lot mekanizm pou ede siport nou bann klib sport e lezot progranm ki sa larzan CSR ti pe ede dan zot finansman.

Akoz bokou sa bann klib sirtou lo nivo sports, parey South Olympic e lezot klib sports dan mon distrik i depan bokou lo sa bann tel finansman.

Mr Speaker, lasante nou pep i enn ki tre enportan. Mon’n etonnen pou aprann ki, dan zis en lannen nou’n rikord nou en total plis ki 340,000 konsiltasyon.

Mon osi realize avek sa to konsiltasyon lakantite latizann ki’n ganny donnen i osi o.  Dapre resers zis Takamaka tousel, i pe servi plis ki R210mil ; latizann dan en lannen.

La mon sizere ki Minister lasante i fer en bon letid pou adres sa sityasyon. akoz  mon santi i kapab annan en pe labi ek gaspiyaz.  Par egzanp, i annan serten zour dan lasemenn e moman dan le mwan ki lakantite konsiltasyon dokter i plis ki lezot zour. Mon a demande osi pour ki i annan en pli bon amelyorasyon e planifikasyon dan servis nou bann profesyonnel lasante. sirtou bann spesyalis. Letan zot donn lapwentman en pasyan pou en servis spesyalize, silvouple, fer sir ki zot respekte li.

Akoz sa i kout nou zabitan bokou pou vin zot lapwentman.

Mon osi demann Minister lasante pou regard dan posibilite pou redwir lakantite letan ki en pasyan i bezwen espere pou fer en scan, MRI ouswa lezot tes. Akoz sa kantite letan espere i en pe tro bokou. Sa propozisyon pou fer pasyan ki annan en maladi kronik ganny akse avek latizann dan nenport klinik, i enn ki tonm bon pou nou zabitan. An prenon kont ki farmasi takamaka i ouver zis 2 fwa par semenn. e sa i kree bokou lenkonvenyans pou nou zabitan sirtou bann ki travay an deor distrik. La mon anvi demann tou nou zabitan ki servi sa servis e tou lezot servis lasante pou nou pa abize. Annou servi li byen.

Mr Speaker, lannen pase bokou koze in ganny fer lo sa size progressive tax.  Prezidan in ase for pou li pous lenplimantasyon sa lot faz pli lwen dan lannen.

E mon demande ki en pli bon assessment i ganny pran lo la e en mezir pli soutenab e ideal i ganny adopte.

Lanvironnman nou distrik i enn ki ankor preski dan son letap vyez. Nou distrik i en distrik avek plis lans lo Mahe. E plis landrwa ki torti i vin ponn. I ris dan son biodiversite ek bann sit istorik e natirel.  Wi i nou responsabilite pou prezerv li. okenn devlopman ki ganny fer, i bezwen ganny byen kalkile e enn ki soutenab.

Louvertir akse ek nou bann lans i en tre bon nide anmennen par Prezidan.

Me an menm tan, nou bezwen pran nou responsabilite. Annou servi nou bann lans byen.  Annou respekte tou sa ki nou vwar lo sa lans. Letan nou fini servi sa bann lans annou retourn li dan sa leta ki nou ti  zwenn li.

E mon demann Minister lanvironnman pou zot osi vin en pe pli serye dan lenplimantasyon zot bann Lalwa.

Pou konklir, ozordi nou pe eksperyans  lafors e lasante nou la demokrasi. Dan en pti lespas letan sa sizyenm lasanble ki konpri manm Parti Lepep ek LDS  e osi avek Prezidan Faure ki pe diriz Egzekitif nou’n arive akonplir bokou.  Tout fwa nou bezwen rekonnet ki nou pa ankor arive kot nou anvi arive.

Zanfan ou ki nou fitir, servi byen sa loportinite ki annan devan ou. Travay dir lekol, respekte propriyete lekol ek leta, annan sa bon disiplin.

Paran annou pran nou rol, elve nou zanfan ek sa bann bon valer spirityel e moral.

Zenes pei i dan ou lanmen, pa les ou ganny derive lo semen lavi. Reste focus. Sosyete annou ed sa zenn ki’n deroute. E ou sa zenn ki’n deroute aprose, vin devan ed ou lekor lavi pa ankor fini.

Nou bann aze annou re konekte e pas nou konnesans ek sa nouvo zenerasyon. pour ki nou a kit sa Sesel parey nou ti zwenn ou menm fer li pli meyer. E nou konman Lezislater nou annan en rol enportan pou zwe pou anmenn en lavenir meyer pou nou pep.

Sesel i pou nou tou e annou met nou diferans de-kote annou travay ansanm pou nou anmenn sa ki meyer pou nou pep.

Pou lepep Seselwa, in nepli ler pou nou asize e demann Sesel pou fer tou pou nou. Annou konmans fer en kou pou Sesel.

Ki Bondye i vey e beni nou pti pei Sesel.

Mersi.

(APPLAUSE)

 

MR SPEAKER

Mersi Onorab Ernesta e sirtou pou ou mesaz pou bann zenn.  Fotespere bann zenn i ekoute.  Aprezan mon a donn laparol  Onorab Loizeau.

HON NORBERT LOIZEAU

Bonzour Mr Speaker.  Mersi pou ganny en pti sans pou koze ozordi.  Bonzour tou Manm Onorab.  Bonzour lepep Seselwa ki a lekout.  Mr Speaker, pou komanse mon anvi dir ki mon’n apresye Diskour Mr Faure  -son Diskour Leta Lanasyon ler ti prezante Mardi. Mon ti apresye son Diskour akoz son ton – ton son Diskour Mr Speaker, ti kalm e  tou keksoz mon  krwar ti ok pou nou tou isi.  Akoz Mr Speaker?  Avan eleksyon pandan kanpanny ler LDS ti ganny gete koman, ‘‘Less Development for Seychelles,’’ e  nou ti a ganny dir ki nou ti pou vin fer parti dan Lasanble  nou ti fer Lasanble vin en dancehall; kot  nou ti pou pile. E nou ti ganny osi dir ki nou pou ganny trete koman bann lisyen dan semen.  Mr Speaker, mon anvi dir sa servi sa detrwa pti mon pou demontre sa gran sanzman dan latitid Mr Faure.  Ozordi nou’n remarke ki LDS in nepli vedir sa bann keksoz ki mon’n dir.  Ozordi LDS i vedir ‘’Lots of development for Seychelles’’.  Lekleraz dan Sesel  – lazistis dan Sesel e laverite dan Sesel se sa ki nou reprezante dan Sesel e Msye Faure, In rekonnet sa Mr Speaker e nou tou ki la  dan lasal mon krwar ki nou rekonnet sa.  E wi Mr Speaker parey Onorab Herminie in dir taler, wi nou ti aklanm li nou ti donn li en Standing Ovation nou pa’n donn li sa akoz nou’n anmoure ek son bann parol Mr Speaker, ouswa nou’n tonm anmoure avek li, li menm.  Nou ti donn li sa Mr Speaker akoz enn parey Leader Lopozisyon ti dir I pa’n maltret personn.  Son ton ti ok.  I pa’n fer parey lezot son bann predeseser ler zot ti vin dan Lasanble kot zot ti maltret nou solman apre par deryer nou bann bon lide ti ganny pran zot ti fer en pti netwayaz avek  apre sanmenm sa nide ki zot ti anvoy ek nou.  E li Msye Faure i pa’n fer sa. I konnen nou annan bann bon lide  e in aksepte Mr Speaker dan son Diskour.  Me parkont Mr Speaker, apre ki Msye Faure in fer en zoli Diskour konmsi mon’n feel en mannyer  ler mon‘n tann serten Onorab legzanp Onorab Sebastien Pillay par egzanp Mr Speaker,  ki in vin fer nou krwar ki dan Diskour Prezidan Faure napa nanryen ki nou  dan LDS nou kapab asosye nou avek Mr Speaker.  Mon a dir ou akoz Mr Speaker.  I ti dir  nou ki Msye Faure in sok nou.  Msye Faure in sok nou ek kwa Mr Speaker? Mon pa vwar akoz in sok nou.  Akoz (1) mon a dir  li Mr Speaker, tou sa bann keksoz ki Mr Faure in koz lo la, ou menm ou, ou pou admet Mr Speaker nou’n ansanm dan bann travay lo teren  bann lepok eleksyon tou sa bann keksoz  nou’n koz lo la.  Nou’n koz lo Ledikasyon.  Nou pa’n koze lo Ledikasyon ?  Menm si ozordi in vini.  Nou’n dir met resours dan lekol ozordi en ta zot in koz lo la; koz ek bann paran tousala nou’n dir lo pickup; fer sir ki nou lekol i en landrwa kot i gou pou bann manrmay aprann Mr Speaker ,kot paran e lezot pti dimoun ordiner ki ti dan lekol Gouvernman senpleman ki sistenm laprantisaz pa tro, tro bon zot al       Independence School pou ki zot kapab ganny sa konfyans dan nou lekol, zot ava vin met zot zanfan  kot zot osi zot kapab fer en pti saving – tousala nou’n dir Mr Speaker.  Nou’n koz lo la fortman.  Nou’n koz lo Lasante mon pa trouv nanryen  keksoz dan sa  ki in dir ki In sok nou Onorab Pillay.  Nou’n koz lo Lasante.  Nou’n dir ki Lasante fodre ki nou aranz Lasante; fodre nou fer dimoun ganny konfyans dan nou Lasante donn resours nou bann Dokter – bann ners pour ki dimoun I ava annan konfyans dan nou lasante pou li ler zot al lopital zot per an krwayan  ki … la konmela  i annan en persepsyon  ki i annan lo Lasante i si  ou antre ler ou sorti, ou pou sorti dan 4 plans.  Koumsa i ete. Dimoun i prefere al Sri Lanka – dan Lenn.  Nou’n dir nou’n met resours pou devlop nou Lasante.  Mr Speaker, nou’n koz lo pri lavi.  Nou’n koze nou’n dir nou’n koz lo bann komodite.  Onorab Leader Lopozisyon Onorab Ramkalawan i annan plis ki 20an i pe pres lo tou sa bann keksoz ki la  – nou’n koze nou’n dir.  Ozordi zot dir ki nou soke.  Mr Speaker nou’n koz lo drog  – nou pa’n koze lo la?  Nou osi nou’n koze.  Nou’n koze ki mannyer drog pe afekte nou pei; ki mannyer ki fodre nou pran bann mezir neseser pou nou elimin li akoz bokou nou zenn.  Onorab Noline in koz lo la la Digue ki mannyer nou bann zenn pe ganny afekte.  Nou’n koz lo la nou osi Mr Speaker, kot bann paran  – nou bann vyeyar – bann vye dimoun pa kapab fer en bon retret Mr Speaker, par bann zenn ki lo drog pe vol zot.  Nou’n koze lo la Mr Speaker.  E zot dir ki nou’n soke.  Mwan mon pa’n sok lo  nanryen Mr Speaker akoz tou sa bann keksoz  ki la Mr Speaker nou isi dan Lopozisyon i annan… mwan i annan 15an mon’n dan politik fulltime mon’n koz lo la e I annan 25an ki nou pe koz lo la e zot ozordi ki zot pe koz lo la  zot  dir zot nou’n soke.

        Mr Speaker taler Onorab Basil Hoareau  annou pa lager nou de  – mon donn ou tou parfe rezon Onorab Hoareau wi nou pa lager nou de me solman  kot I annan kredi pou donnen  nou bezwen donnen.  Onorab De Commarmond yer dan son diskour in dir tou sa bann nide ki  Msye Faure in vin avek se sa bann bon nide ki zot in mete dan zot Manifesto Mr Speaker.    Me mon a dir li en keksoz; eski Minis pour Lafanmir ti annan dan zot Manifesto?  Napa Mr Speaker e mon a dir ou en keksoz Mr Speaker, ou  si mon manti ou a dir mwan; ou ki ti koz lo la en zour dan en miting.  Ou ti dir dapre en vizit ki  ou’n fer – ou’n vwar lapovrete – ou’n vwar sityasyon bann fanmir Mr Speaker.  Ou’n dir ki si ou ti annan pouvwar en zour ou ti pou kree en Minister ki apel Minister pour Lafanmir.  Si mon manti Mr Speaker ou a dir mwan.   Me sa be  pa se nou nide pa dan Manifesto Parti Lepep sa…

HON CHARLES DE COMMARMOND

Mon pa’n nonm Manifesto mwan! !  I didn’t mention that!

MR SPEAKER

Ok. 

 

HON NORBERT LOIZEAU

Ou ti dir – wi, akoz petet si mon pa’n konpran byen set akoz ou pa’n koz ditou lo repons Leta Lanasyon.  Onorab.

 

MR SPEAKER

Onorab Loizeau kontinyen.

 

 

        (LAUGHTER)

 

HON NORBERT LOIZEAU

Ekskiz mwan pou dir Onorab Pillay osi….

 

        (LAUGHTER)

 

HON NORBERT LOIZEAU

Mr Speaker, mon kontinyen mon diskour – an sortan lo drog ki mon’n koz lo la taler mon anvi vin koz en pe lo bann travayer etranze ki nou’n koze; problenm ki i pe koze dan pei.  Nou pe dir annan kouraz nou bann travayer Seselwa pou pran bann plas.  Ozordi nou’n koz longman lo NDEA – zot rapel?  Zot ti dir, ‘’Ar ki nou problenm ek Irish?’’Nou ti dir ki i en depans si nou annan Seselwa ki kapab fer sa bann louvraz zis nou larzan pe ganny tire pe pey sa bann dimoun.  Ozordi Mr Speaker, ozordi nou vwar Msye Faure in apwent 3 dimoun pou vin ansarz NDEA e ler mon get sa CV sa bann dimoun Mr Speaker mon pou dimonn ou zis enn.  Mr Labonte, en Seselwa in fer 37an dan Lapolis.  I ti Depite Komisyoner dan Lalwa Mr Speaker.  Mon’n al lo internet mon ‘n ganny sa.  Pour Mr Scully zanmen mon’n vwar nanryen lo li ki annan.  Mr Speaker.

(LAUGHTER)

 

HON NORBERT LOIZEAU

La ozordi mon vwar ki nou annan Seselwa kalifye e mon asir ou Mr Speaker si nou al fouy ankor, kantite Seselwa kalifye ki nou annan pou fer bann travay Mr Speaker i enkrwayab.  Mwan mon enn Mr Speaker.

 

        (APPLAUSE)

 

HON NORBERT LOIZEAU

Mr Speaker e be parkont Mr Labonte ti kapab vin Komisyoner Lapolis olye anmenn sa ta Sid Afriken ki nou tande ki avek Lapolis.  Me pa nou annan dimoun?  Lala!  Nou annan dimoun kalifye ki kapab fer sa.  Zis ti en depans Mr Speaker e tousala ti en bann fardo ki in anmennen lo nou.  Mr Speaker, ozordi mwan mon apresye – mon apresye travay – mon apresye travay ki nou  Lasanble pe fer e Prezidan Faure In dakor ek nou.  E Mr Speaker e la mon pou donn ou en aplodisman ek ou Leadership ek ou Sekretarya ler nou ti antre avek pti git resours sa travay  ki nou’n fer Mr Speaker, i vo plis ki sa 5an ki en group dimoun dan mazorite ti fer dan Senkyenm Lasanble, Mr Speaker.

       

(APPLAUSE)

 

 

HON NORBERT LOIZEAU

E mwan mon pou donn ou en lanmen pou sa akoz ou en dimoun ki  pandan sa 3 mwan ou‘n montre ki nou kapab travay.  Mr Speaker, mon kontan ki Msye Faure in admet – in admet ki LDS in nepli ‘’Less development for Seychelles.’’ Ozordi Mr Speaker nou, nou pe ganny gete koman bann boug rezonnab ki zot kapab frekante.  Lontan non!  Lontan non Mr Speaker.  Nou nide pa ti enportan pour zot menm ti bann bon nide – mon pa konnen ki sa sanzman ki’n arive e Mr Speaker mon anvi dir ozordi si sa bann keksoz pe arive, mwan toultan mon dir mwan – mwan mon pe get zot avek lizye byen kler mwan ;eski si zot ti an mazorite eski tou sa bann keksoz ti pou arive Mr Speaker?  Sa ki  mon pe met dan mon lespri.  Mwan mon pa tro krwar i ti pou arive tou sa bann keksoz Mr Speaker akoz (1) Msye Faure pa ti pou Prezidan ozordi.  Ou konnen akoz?  Msye Michel pa ti pou sote.

        (APPLAUSE)

 

 

HON NORBERT LOIZEAU

I pa ti  pou ale Mr Speaker, akoz li i en boug ki kontan kontrol li!  Si zot lakaz ti ariv ziska la ou ti pou trouv li Leta Lanasyon la.  Akoz in perdi kontrol i pa kontan travay koumsa; in sorti.  Alors se pour sa rezon ki Msye Faure in gannyen.  E mon asir ou si zot ti an mazorite, sa bann keksoz pa ti pou sanze Mr Speaker, keksoz ti pou kontinan parey avan  – kontrol, kontrol e kontrol!  Sa koumsa i ete Mr Speaker.  E mwan mon krwar ladan.  Mr Speaker sa i fer mwan mazin lontan ki zot ti dir?  I annan sa fame sanson ki zot ti sante Mr Speaker dan zot Rally partou; ‘’Si ou balans sa latab ou lasyet manze pou savire!’’

Zot mazinen Mr Speaker?  Zanmen mon a oubliy sa sanson.  Sa sanson pa pou zwe ankor Mr Speaker.

 

        (LAUGHTER)

 

HON NORBERT LOIZEAU

Mwan, mwan mon pa pe riye mwan Mr Speaker.  Mwan ler mon koze i annan ki krwar mon pe dyok – mwan mon pe koz serye sa sanson pa pou zwe ankor sa Mr Speaker. Akoz ozordi, lepep Seselwa in met konfyans dan nou.  Ozordi latab in balanse in menm ranverse napa okenn lasyet manze ki’n savire.  O kontrer Mr Speaker, lasyet in vin pli gran.  Ozordi mon a dir zot dimoun  pe ganny plis ki zot pe gannyen.  Mon a donn zot en legzanp Mr Speaker.  Akoz ozordi latab in balanse, plis dimoun lapey in ogmante.  Dimoun ozordi pe ganny 8mil e pli ba, zot pa pe pey tax menm si i pa ase  – mon konnen i pa ase, selman in mont en pti gin.  Nou bann dimoun aze, ozordi zot sekirite sosyal in ogmante sorti 3mil in ariv R5050 me latab in balanse; zot lasyet pa’n savire Mr Speaker.  Trezyenm Mwan Lapey in plis Mr Speaker.  Sa tousala  ti bann propagann Mr Speaker ki zot ti pe servi zis pou kit zot la.  Me ozordi Mr Speaker, mon  remersye tou dimoun lepep Seselwa ki  sa voyaz pa’n ekout zot, Mr Speaker.  Nou bann dimoun pa’n ekout zot e nou bann dimoun in donn LDS sa manda pou vin travay.  E Mr Speaker, tou sa bann bon nide ki nou pe met devan i annan dimoun ki a pe mazinen akoz lontan zot pa ti la?  Mwan dimoun dan distrik i dir.  I annan  dimoun ki siport Parti Lepep i dir mwan, ’’Onorab Loizeau, mon regrete konmsi dan lepase mon pa’n vot pour zot.’’ Dimoun pe vwar e Prezidan Faure pe vwar sa travay ki nou pe fer Mr Speaker e zot ozordi zot pe  vwar.  Nou ozordi Mr Speaker avek en mazorite nou pe fer zot laba kapab  koze tir sa lo zot lestoman Mr Speaker.  Nou, nou pe fer zot fer sa.  Ozordi Mr Speaker, si Onorab De Commarmond ki ti siport Prezidan Michel koze so, ozordi I kapab lager  ek portre Msye Michel lo miray dan partou  met dan  bin.  …

(LAUGHTER)

HON NORBERT LOIZEAU

Si ozordi i a kapab fer  sa Mr Speaker se akoz nou isi la; nou isi Mr Speaker.  E parey Onorab Hoareau taler Mr Speaker i gou pou riye, me selman keksoz i  serye.  Annou riye wi me selman met dan nou latet sa bann keksoz  i serye.  Ozordi Onorab Lemiel  – i fer mwan mazin ou mon ser – Onorab Lemiel yer in admet ki i annan en divan sanzman ki’n pase.  Mr Speaker me kot nou ti pou tann sa lontan?  Nou, nou ti pe rod sa divan sanzman – nou’n rode lontan Onorab Lemiel in koz lo la nou kontan.  Savedir Mr Speaker i montre ki i annan bokou zot  ti pe espere sa sanzman me solman zot ti pe ganny anmare zot pa ti kapab fer nanryen.  Ozordi mon byen kontan.  Ozordi nou kapab koze, koze byen.  E menm taler ler mon ti debarke Mr Speaker, lapli ti pe tonbe mon’n ganny prete en parasol Rouz avek Onorab Valmont pou mwan pa mouye.

(LAUGHTER)

HON NORBERT LOIZEAU

Nou ti kouver nou de, so nou ti vini.  Ozordi in montre ki atraver lamazorite nou’n sanz mindset sa Gouvernman.  Mon konnen zot in soke.  Zot in soke vwar Prezidan Faure ozordi pe ekout nou. E nou konnen Mr Speaker tou Leaders konmela zot annan zot azanda.  I pa vedir ki sa bann bon parol zot v in dir sa ki zot anvi dir.  Zot vin dir zis pou zot reste la pou en ta letan.  Onorab Hoareau in dir taler – ki Prezidan Faure pou la ziska 2015.  Savedir mwan mon anvi dir avek lepep Seselwa pa  tro tonm anmoure avek sa bann zoli parol Mr Speaker akoz bann Leaders zot anbisye.  Sa bann zoli parol zis pou zot kit zot la.  Tan ki nou, nou ankor Lopozisyon la zot ok pour zot – li Gouvernman.  Mwan mon anvi remind bann dimoun ozordi zis mazinen Mr Speaker, sa bann bon lide ki nou pe met devan zis mazinen si  ti en Gouvernman LDS ki ti an plas?

        (APPLAUSE)

 

HON NORBERT LOIZEAU

Zis mazinen.  Onorab De Commarmond ou pe riye?  40an zot in la ou pa ti a kontan vwar en nouvo Gouvernman?  Zis mazinen mannyer nou ti pou tret zot  – byen.  Zot nide ti pou ganny pran.  Nou ti pou travay ansanm Mr Speaker.  ou konnen akoz nou ti pou fer li byen Mr Speaker?  Nou ti pou fer li ek leker nou.  Nou pa ti pou zis koze.  Akoz nou konnen kwa soufrans – kwa Lopozisyon nou ti pou fer li ek leker.  E Mr Speaker an terminan, mon anvi remersi lepep Seselwa ki’n  donn sa sans Sesel – zot in donn en sans Sesel pouvwar pou donn nou sa sans pou anmenn en laklerte Mr Speaker dan nou pei.  Ozordi nou dan LDS Mr Speaker nou’n parey en tors  – nou’n parey en gran tors 12 batri Mr Speaker nou kler partou .  Nou’n kler partou Mr Speaker dan tou sa fernwanr.  Mr Speaker mazinen petet zot pa pe realiz sa.  Nou dan nou pei, nou pei i parey nou lakaz Mr Speaker, e ler nou netway li prop nou anmenn laklerte i bon pour tou Seselwa.  Se sa ki  nou’n fer dan LDS.  Nou’n klere Mr Speaker.  Nou’n kler dan tou trou; nou’n vwar bann Alibaba; nou’n vwar bann serpan Mr Speaker e menm sa dernyen pit lakaz zarennyen  anler dan kwen nou’n klere nou’n fer netwaye Mr Speaker.  Nou’n fer li akoz?  Nou’n fer li pour Sesel e pour tou Seselwa.  E nou dan LDS, nou pou kontinyen travay nou e mwan mon anvi dir avek zabitan Bel Air dernyen fwa en fwa dan en konvansyon, mon it dir mon’n donn mon lavi  mon distrik.  Wi mon’n fer li sa voyaz nou fer sir ki nou travay pour Sesel e pou mon distrik – mon anvi dir ek zabitan mon distrik kont lo mwan.  Nou pou travay pou nou  pous nou pei pli devan .  Mr Speaker mon remersye Bondye ki mon ankor annan sa kouraz, lafors pou mwan kontinyen kapab fer sa travay  e mon felisit zot ankor en fwa mon bann zanmi, akoz sa ki nou pe fer parey toultan mon dir Onorab Herminie ti remind mwan lot zour nou pe fer li pour zot osi.  Toultan mon pou repet sa Mr Speaker.mon pou fer li  – nou pou fer li pou zot, ler zot osi zot pou vin parey nou dan lot kote ler nou pou vin dan Egzekitiv Mr Speaker, nou pou fer li pour zot; pour zot osi zot pou kapab fer parey nou , nou pe fer ozordi.  Mr Speaker, mon a dir ou mersi, mon konnen mon’n koz en pti pe plis  – mon a dir ou mersi e laprosenn fwa.  Mersi Mr Speaker.

 

(APPLAUSE)

 

MR SPEAKER

Aktyelman Onorab Loizeau ti komans koz 2er 24 ou ti ankor annan ou ankor 5 minit pour koze akoz mon ti’n met ou ziska 2er 49.

        Be pa fer nanryen ou’n round-up, eski mon kapab donn laparol Onorab Gill?

HON NORBERT LOIZEAU

Mon ankor annan detrwa pwen nou a resit en lot zour.

MR SPEAKER

Onorab Gill laparol i pour ou, Onorab Simon Gill.

HON SIMON Gill

Bonn apre midi Mr Speaker, bonn apre midi tou Manm Onorab Lasanble, bonn apre midi tou manm piblik ki pe ekout nou.

        Mr Speaker si Onorab Loizeau i anvi konsonm son bann lezot minit avek ou permisyon mon kapab les li konsonm son bann lezot minit.

MR SPEAKER

Mersi c’est gentille konmdi Franse, me kontinyen.

HON SIMON GILL

Mersi bokou Mr Speaker, Mr Speaker depi yer bomaten mon’n ekout tre atantivman tou bann lentervansyon ki’n ganny fer lo kestyon Diskour lo Leta Lanasyon ki Prezidan Faure in delivre dan nou Lasanble isi.

        In annan plizyer reaksyon byensir e piblik deor pe reakte diferaman lo konteni Diskour e mon pa trouv drol ki isi dan nou Lasanble, nou osi nou pe reakte diferaman lo konteni Diskour Lanasyon.

        Sa i reprezant en labote nou demokrasi, akoz la demokrasi li menm li i pa vedir ki nou tou nou bezwen pans parey, i pa vedir ki nou tou nou bezwen tonm dakor lo tou keksoz.

        E byensir la demokrasi Mr Speaker pa vedir ki tou keksoz ki ou, ou vwar i mal ki tou dimoun i bezwen vwar li i mal.

        E i pa vedir osi ki keksoz ki nou, nou krwar i byen ki i enplike ki tou dimoun i devret krwar i byen.

        La baz se ki lonnekte imen, disiplin imen i egzize, i egziz sakenn de nou pour nenport ki pozisyon nou ete pour donn en respe lopinyon sak endividi.

        Donn respe sak sitwayen nou agree pour dezagree e Mr Speaker lo sa pwen mon agree pour dezagree avek diferan fason ki nou bann koleg in abord Diskour Leta Lanasyon.

Mr Speaker Prezidan Danny Faure pe lead Sesel dan en moman istorik ki totalman diferan avek son bann predeseser.

        E la nou pe koz lepok ki defen Mr Mancham ti pran la labar Sesel koman premye Prezidan pei, nou pe koz lepok ki Mr France Albert Rene ti pran labar Sesel atraver en aksyon ki listwar ozordi i kestyonnen.

        Me ki lemonn a lepok i acknowledge ti dan en diferan lepok istorik e moman ki nou Ex Prezidan James Alix Michel ti pran pouvwar ki nou apel li pas baton 2004 ti en moman totalman diferan avek sa lepok.

        Sa lepok 2016 ki Prezidan Faure in pran labar Sesel ; en zenerasyon 1962 or zenerasyon ’60, i sa lannen 62 ki Mr Faure ti ne dan en moman kot lemonn ti pe eksperyans en kantite problenm.

        E Lafrik li menm li Mr Speaker ti pe pas atraver en transformasyon fondamantal Lendepandans pour Lafrik, dekolonizasyon Lafrik.

        I ti normal ki nou bann Leaders sa lepok ti kapab sezi sa moman e diriz Sesel ver sa semen ki ti al an ankor avek legzizans sa lepok.

        E labote pozisyon Mr Faure Mr Speaker, se zisteman i pe sezi legzizans sa lepok ki pe viv ozordi. E se pour sa rezon ki son bann aksyon, son bann desizyon pe al an lakor avek legzizans politik sa lepok al le kontrer avek legzizans sa lepok Mr Speaker.

        Si mon a dir li an Angle, you’re doomed to failure e fodre pa zanmen en politisyen i fer fot pour li pa al an lakor avek legzizans son lepok.

        E nou bezwen aplodi bann sanzman fondamantal anba Leadership sa nouvo zonm Mr Danny Faure, Prezidan Danny Faure.

        E Mr Speaker ler mon dir Prezidan Danny Faure, ou ava dakor avek mwan ki nou, nou bann Manm Lasanble nou egzize ki nou ganny apele bann Honorable Members of the National Assembly.

        E mon respekte drwa tou dimoun pour pa dir Prezidan Danny Faure, me si nou egzize ki nou apel bann Honorable Members or dimoun i apel nou bann Manm Onorab probableman lonnekte e imilite i egzize ki nou dir li Prezidan Danny Faure.

        Mr Speaker ler mon’n dir lo sa pwen mon pour bouz lo lezot eleman ki mon konsider ekstrememan enportan pour nou tou konpran e pour nou tou apresye labote sa lepok ki nou pe viv ladan. Bann desizyon ki’n ganny pran, bann desizyon ki pour kontinyen pran i pa kapab annan en lot misyon.

        E son misyon istorik ki bann desizyon i annan pour akonplir se pour asire ki sosyete Seselwa i ganny transformen dan tou son profonder.

        E sa transformasyon Mr Speaker i enplik langazman tou Seselwa e se sa deklarasyon ki Prezidan Faure in fer dan sa Lasanble depi le 18 Oktob letan i ti adres nou e ler in adres nou dan son Diskour Leta Lanasyon le 14 Fevriye 2017.

        Si Seselwa pa angaz li dan tou son dimansyon, dan tou sa bann transformasyon ki nou Sosyete ozordi i egzize, nou pour fini kont par kontinyen kont par blanm Prezidan.

        Mon pe dir sa Mr Speaker dan avek en presizyon, mon oule ki nou konpran li tre byen, annou pran depi lepok ki nou Ex-Prezidan James Alix Michel ti pran labar an 2004 -e avek sanzman 2016 dan nou servis piblik Mr Speaker, apard enn de bann dimoun ki’n pran zot retirement, nou annou nou en mazorite ki ankor la ki entakt dan nou servis piblik, zot ankor pe okip zot bann diferan  pozisyon e i annan in ganny promosyon malgre tou bann kritik ki nou’n fer zot in ganny promosyon.

        Dan en moman kot lepep i egzize ki nou servis piblik i delivre dan en fason efikas e avek efektivite ki mon’n tande depi yer e ozordi.

        Now ki nou problenm Mar Speaker ? Zonm in reste sa bann zonm, sa bann fanm in reste sa bann fanm dan bann Departman Gouvernman dan zot bann pozisyon parey mon dir zot in ganny promosyon.

        Nou pe dir ki servis piblik pa marse, akoz pa marse ?  En sel keksoz akoz pa marse, nou annan en problenm nou leta lespri apard Leta Lanasyon Seselwa dan lafason ki nou vvwar nou travay, dan lafason ki mannyer nou bezwen delivre sa servis vizavi nou popilasyon.

        Malerezman Prezidan Danny Faure pa kapab miltipli li pour li ranplas sa 10 mil or 9 mil plus travayer dan servis piblik, i kapab donn Leadership, kapab pran bann desizyon.

        E nou konnen ki bann kritik in annan otour serten desizyon ki’n ganny pran, me nou, nou pe dir ozordi ler ou pe fer nou refleksyon lo Diskour Leta Lanasyon se pour nou demann avek nou bann dimoun dan servis piblik pour nou tonm dakor e resolve pour nou anmenn en transformasyon dan lafason ki nou vwar keksoz e dan lafason ki nou fer keksoz.

        Si nou kapab delivre en desizyon dan 24er, delivre dan 24er, si nou kapab fer en file bouze annou fer sa file bouze, annou pa pran 10 zour, 15 zour, 20 zour pour nou fer en file bouze.

        E Prezidan Faure pa kapab, i pa en mazisyen pour detekte si ou pe dormi lo en file, be sa ki nou bezwen tonm dakor dan moman ki nou pe egzize ki lepep i oule en servis efikas anba sa nouvo Leadership se ki nou bann dimoun i bezwen pare pour pran konsekans zot aksyon.

        Mr Speaker ou’n alert nou ki ou osi ou pour koz lo sa size e mon panse mon pe adres en pe lo ou behalf.

        E nou tou nou bezwen anvoy en sel mesaz, se nou oule transformasyon dan sa servis piblik ; nou oule sanzman dan mindset bann dimoun dan servis piblik pour ki sa pep i kapab satisfe ki wi mon annan en servis piblik anba Leadership en Gouvernman, anba Leadership en Prezidan ki wi i pe koze e ki wi nou pe tande.  Moman pour nou kasyet file dimoun anba latab oubyen pran li met dan bin listwar silvouple.

        Moman pour nou trennen avek desizyon annou met li dan bin listwar.  Annou bouze, annou bouze.

        Ler mon pe dir sa i pa mannyer nou ti fer, i parey mannyer in ganny pratike, parfwa pour de rezon ki zot menm zot konnen ki mon pa oule adres li la akoz son sensivity e mon pa oule mon Diskour ozordi i pran en pwen derogasyon negativ akoz si mon komans point finger nou pour al tro lwen lo la.

        Now lot size ki mon oule aborde Mr Speaker lo Diskour Leta la Nasyon se bann desizyon ekonomik ki Prezidan Faure in anonse.

        E mon a dir li kontinyen think big, kontinyen think big Prezidan Faure, kontinyen vwar pli lwen ki nou, mon dir sa akoz in ganny kestyonnen lo si nou neseser annan tunnel.

        I zis parey letan nou ti komans konble Providence nou ti ganny demande eski i neseser annan en konblaz Providence Mr Speaker. E zis parey letan nou ti konble Roche Caiman nou ti demande si ti ler pour konble Roche Caiman ?  Egalman letan nou ti konble Perseverance nou ti ganny demande si ti neseser konble Perseverance e ….Perseverance anfen kont.

        Me listwar in montre nou poudir wi ti en nesesite istorik i ti en desizyon entelizan ki ti montre nou kapasite Leadership pour vwar bokou pli lwen.

        E ozordi nou demann nou lekor kestyon si pa ti annan en Roche Caiman, si ti napa en Providence, si ti napa en Perseverance, kote nou ti pour desarz e de-foul tou sa bann aktivite ozordi ki’n anmenn lepanouisman e kree loportinite pour bokou sitwayen Seselwa.

        Yes Prezidan Faure think big e Seselwa i bezwen kontinyen think big, nou bezwen pran bann risk, bann risk ki nou kapab kalkile e mezire.

        E ler nou dir ki nou bezwen en dezyenm kab soumaren, mon konpran largiman Onorab Afif lo sa size with respect Mr Afif.

        Me ou konnen danze en legzistans zis en kab soumaren, ou konnen sa ou, mon pa bezwen donn ou en lecture lo la you know it.

        Now si nou konnen moman pli apropriye the timing ki nou mars avek en dezyenm kab soumaren i ava permet nou antre e kree loportinite adisyonnel pour sa pep.

        Mr Speaker dan en demokrasi, si ou pep  pa santi li i posed en morso ou lekonomi i pa bon pour ou demokrasi.

        Nou pe koz lapovrete, si nou pep pa ganny en sans vin en parti prenan dan parti aktivite ekonomik son pei i kre en problenm, e bann desizyon ki donn bann loportinite pour Seselwa ganny plis par dan bann diferan aktivite ekonomik ki Prezidan Faure in anonse.

        I bann mouvman, i bann desizyon dan bon direksyon, nou bezwen kontinyen donn sa ki nou apel dan term Ekonomik, Economic empowerment nou pep.

        Nou pep i bezwen pran pouvwar ekonomik dan son lanmer, nou menm nou nou’n dir kantite fwa poudir etranze ki pe vin met dan Sesel.

        Seselwa pe  pas koman bann medium class citizens, nou ki’n dir sa e Prezidan Faure pe act accordingly.

        Mersi Prezidan Faure pour ou kapab kontinyen avek sa lelan pour fer nou pep take ownership son lekonomi e par konsekans nou a kapab avek sertete byensir anmenn nou pep ver en sityasyon kot nou napa sa fenomenn ki mwan mon kestyonnen ki apel lapovrete.

        Si mon koz lo lapovrete Mr Speaker koman mon lot pwen, nou Prezidan in acknowledge lapovrete.  Wi in acknowledge e nou pe demande ozordi, pa fer premye fwa ki nou pe demande ki en legzersis serye aprofondize i ganny fer – pour ki nou konnen dan ki distrik, ki kote sa zonm, fanm, sa fanmir ki prouve – in etablir en bann barenm Nasyonal kot nou tonm dakor lo la, sa i minimum larzan ki nou ekspekte pe antre dan bann fanmir pour nou dir wi i dan lapovrete, ou non i pa dan lapovrete.  Ler nou’n konn sa, Prezidan Faure in anonse the 4 pillars dan son Diskour ki ankre nou Sosyete, bann safety net ki nou annan, nou sistenm Sekirite Sosyal eksetera.

        Nou a kapab donn nou pep bann ki dan lapovrete sa soulazman pour fer sir ki ler nou ariv lannen 2020 nou elimin sa fenomenn lapovrete dan vokabiler Sesel, Sesel i tro pti pour nou koz lapovrete dan Sesel.  Mr Speaker ou’n voyaz bokou plis ki mwan e bokou nou otour sa latab in voyaz bokou plis ki mwan, zot konnen ki mannyer lapovrete i ete zis la dan Losean Endyen.

        La lo Kontinan Lafrik nou vwar li e i aras ker.  E ler mon get Sesel e mon konpare Mr Speaker, mon vwar en kontras, mon vwar en diferans esansyel e mon kontan ki nou still pa satisfe baze lo nou bann standar ki nou pe etablir.

        Mr Speaker permet mwan bouz lo mon lot pwen, mon lot pwen pour anmenn mwan pour koz lo ledikasyon.

MR SPEAKER

Onorab Gill mon a note ou ti komans 2.46 mon a donn ou ankor 5 minit, mon a donn ou ankor 5 Minit…

HON SIMON GILL

Mersi bokou Mr Speaker mon kontan, Mr Speaker lo ledikasyon mon’n tann en komanter ki ou’n fer la apre midi.

        Ki mwan mon pe dir ozordi nou’n ariv en staz dan Sesel kot nou annan mankman teachers, mankman teachers me sa i pa neseserman negativ li.

        Mon eksplike akoz, i pa neseserman negativ akoz i depandan lo ki perspektiv nou pe vwar li, be ou konnen ki’n arive ?  Be ou konnen ki’n arive, Sesel ozordi nou krwar tou keksoz konmsi nou lev-e nou konfortab. Be eski nou vwar ki kantite nou zanfan ki lekol ozordi ?  Wi preske 100 poursan nou zanfan i dan lekol ozordi e sa i labote nou sistenm ozordi.

        Me fodre pa fodre sa labote nou sistenm pour edik nou pep i ganny tournen pour li vin en negativite zis par serten dimoun pa pran son responsabilite.

        Mr Speaker ou a dakor ek mwan lo sa size.  E parey ou’n dir nou pe koz empowerment nou bann headteachers, nou bann diferan konsey ledikasyon mon krwar ki nou pe bouze.

        I pa pran bokou lespri pour ou konnen poudir ou bezwen teacher an plis nouvo lannen skoler pe ouver, ki kantite lespri ou bezwen annan pour sa ?

        I pa bezwen tro bokou, mon krwar si ou en dimoun ki serye dan ou responsabilite koman en headteacher oubyen koman en School Director Administator  ou bezwen pe kapab plan ahead.  E Prezidan Faure pa pou konnen tou sa bann detay annou pa blanm li – annou pa blanm li.  Nou bezwen koman responsabiliz sak nou bann headteacher dan nou bann diferan lekol kot zot été.  Plan ahead e fer sir ki napa en moman ki nou zanfan Mr Speaker i reste san okenn teacher pou li kapab kontinyen devlope. Nou pep i oule avanse, nou pep i oule progrese e nou bezwen fer sir ki napa personn par linaksyon pa pe tann dir in negliz ledikasyon nou zanfan Mr Speaker.

        Mr Speaker, mon konpran i annan kontrent letan me mon pou al lo mon konklizyon akoz mon santi ou‘n donn mwan ase letan.

        Mr Speaker konklizyon.  Mr Speaker dan mon konklizyon mon touzour viv avek lespwar, e Prezidan Faure dan son Diskour Leta Lanasyon Mr Speaker in fer en lentervansyon ekselan  e kot in donn lespwar sa pep.  E nou isi dan sa Lasanble, nou responsabilite se pou nou osi donn koudmen sa pei pour ki sa pep, i kontinyen vvwar devan li non pa en gro nyaz me ki i vwar devan li en loportinite san frontyer e dan nou kapasite koman bann Leader politik   dan bann diskite kot nou été dan nou bann Diskour kot nou fer – Mr Speaker annou retir nou lipye dan lepase.  Annou  step into the future and let’s move.  Annou koz keksoz  ki byensir pou anmenn Sesel devan..  Nou’n ouver sa lespas – nou’n kree sa lanvironnman politik probableman pa ni nou ki ti demande me lepep ki’n met nou dan sa sityasyon e Prezidan Faure in dir nouvo latmosfer in rantre dan Sesel e mon kontan ki nou pe kapab diskite ki nou pe kapab dyaloge.  Annou kontinyen diskite napa personn ki annan monopoli lide – tou lide i enportan ki no kapab ekoute e dizere analize e nou’n tonm dakor pou bouz lo la e anfen kont i pou benefisye Sesel e i pou benefisye lepep Seselwa.

        Me mwan Mr Speaker mon vwar en lavenir briyan pou nou pep e mon vwar Sesel pe fleri dan bann lannen ki pe vini.

        Mersi bokou Mr Speaker.

        (APPLAUSE)

 

MR SPEAKER

Mon a remersye Onorab Gill.  Anfet mon dakor ek ou antyerman lo bokou pwen lo Ledikasyon, savedir la olye koz 10 minit  ou’n koz zis 5.  Mon dakor avek ou sa nouvo mindset antyerman dan servis piblik headteachers annou pa esper Minister dir nou.  Annou pran nou responsabilite annou fer marse nou lekol.  E mwan osi parey ou mon vwar en Sesel briyan lavnir si nou  tou nou’n kontinyen travay ansanm.  Eski mon kapab donn laparol prezan Onorab  Stephen Pillay ?  Wi laparol i pou ou.

 

HON STEPHEN PILLAY

Mersi Mr speaker.

Bonn apre midi tou dimoun a lekout.

Mr speaker, Prezidan in vin dan Lasanble le 14 Fevriye pou prezant son Diskour lo Leta nou Nasyon, e parey i ti dir le 18 Oktob ki  i pare pou travay ansanm ek sa Lasanble, le 14 Fevriye in dir wi nou pe travay ansanm, menm si parey in fer sorti i annan bokou defi pou sirmonte.

Mr Speaker, mon’n apresye son Diskour. I pa’n kasyet nanryen, in fran avek son plan fer Sesel al devan. Nou tou ansanm. Reaksyon deor i pozitif ki nou kapab travay ansanm, pour en sel Sesel. En nouvo letap in lanse par Prezidan dan politik Sesel parey lezot MNA in dir.   I pou annan ki pa pou konfortab ek sa nouvo apros.

Sa i en bann defi ki Prezidan pou bezwen adrese. Pou fer sir ki son bann parol i ganny transformen en aksyon. Sipor pou enplimantasyon son bann plan fodre sorti kot manm son Gouvernman. Sa pou montre nou ki vre direction nou anvi avanse ek nou pei Sesel. Nou dan Lasanble parey zot konnen si i bon pou nou, nou approuve.  Si i bon pour Sesel.

Tou Manm ki’n koze avan mwan, zot in aksepte e fer resorti sa bann defi ki nou pu bezwen sirmonte pou fer nou pei avans devan. Pwen kle ki Prezidan i bezwen fer fas avek se pou anmenn son bann Minister en ligne avek son plan travay ansanm pou tou Seselwa. Avek mon leksperyans sa 4 mwan pase dan Lasanble mon’n vwar ki en pe son Minister i pare pou travay ansanm avek nou, pour en sel pei Sesel. Me par kont leksperyans i montre ki enn de lezot i resanble zot pa ankor pare pou kit zot vye sistenm deryer e enplimant en nouvo sistenm travay parey Msye Faure pe propose.   Mon a donn plis  detay lo la apre.

Mr Speaker mon oule asir Msye Faure ki si i kapab deliver lo son bann parol, pou tou Seselwa, nou sipor i la. Parey mon dir, sa ki bon pou Sesel, i bon pour LDS.

Mr Speaker, Prezidan Faure in aksepte ozordi ki nou lafanmir Seselwa pe rankontre plizyer problenm ki direkteman relye parey problenm lakaz ek fleo sosyal – prensipalman drog. A sa pwen mwan osi mon a pran sa loportinite pou felisit bann nouvo apwentman Seselwa kot NDEA, Mr Labonte, Mr Barbe e Mr Songor. Fotespere en nouvo lapros lo konba kont drog a rezourd sa problenm. Mon ti a kontan an pasan demann sa nouvo tim, pou osi fer en pti letan pou fer en odit lo bann aksyon lepase, sirtou lo sa lakonpannyen nanm ki i pe pey bann Irlande.

Mon regret mon pa’n ganny sans ganny dokiman Dr Herminie me parey mon’n aprann i pou donn plis detay lo la pli tar.  Me i kapab kont lo mon sipor dan sa lalit. Sa bann hard drugs i en defi ki fodre nou tou noue de pou rezourd. I pa eparny personn, demen i kapab nou piti oubyen piti nou zanmi ki tonm ladan.

Mon kontan ki ankor enn fwa Prezidan in donn son langazman pou adres sa size lapovrete dan nou pei. Me mon annan en pti konsern ki la fason zot  pe rezourd sa. Mwan personnelman mon pa krwar ki en progranm proteksyon sosyal ; ki pou permanan sa problenm. I pou zis tenir sa bann dimoun mwen fortinen  parey nou dir lo borderline. Zot pou tou kou an bezwen.  Wi, pou annan ki toultan  nou bezwen donn en lasistans permanan. Me pou annan labi Me nou bezwen revwar sa sistenm ki pe soutir parey en madanm, 3 fiy (ki annan zanfan asize pa travay e de depann welfare. Kan son vwazen en manman li osi parey i pe lev-e i pe met son piti dan Day Care e i al travay. En pti soutenir R500 Welfare pe refiz li.  Sa bann labi mon demande ki Prezidan i met en lafen avek.

Mr Speaker, in osi koz lo sa problenm lalkol ki pe afekte lasante nou popilasyon. Wi bann zenn enkli manrmay lekol pe met zot lavenir ek lasante a risk avek sa kalite lalkol parey Prezidan in dir lo market. Wi nou lo sa kote nou pare pou fer deba lo sa size e anmenn bann rekomandasyon devan pou Prezidan konsidere. Sa en travay nou kapab fer travay san politik, akoz i pou lavenir nou zanfan demen.

Mr Speaker, mon pe konpran akoz ki Prezidan i met lafanmir koman pwen kle lo sa size. Me mon pa tro konvenki en pe lo sa zafer Minis Lafanmir. Wi nou aksepte en bon pe nou fanmir i dysfunctional, parey nou dir me kekfwa en resers pli detaye devre fer e prezante ek piblik. Osi an pasan mon  pe zis mazinen lekel ki pou fer en larantre dan Cabinet par kapitaliz febles. Mon a esper le 15 Mars pour gete lekel ki ganny sa responsabilite.

Mr speaker, Prezidan in osi koz lo sa problenm lakaz. Sa i en topik ki napa en MNA dan sa Lasanble ki pa tous son distrik.   E mon kontan ki Prezidan pe sey adres sa size.  Me ankor en konsern i lev-e. Prezidan i dir ki Minis Bastienne pou donn detay le 10 Mars. La sa konsern aprezan i la.  Mon konsern ek lenkyetid se en lot progranm ki pou fer tou dimoun rekomans ankor lo la menm laliny depar ki nou’n komanse lannen pase.   Msye Faure, mon kapab asir ou pa tro krwar  Seselwa pe kontinyen annan pasyans.  Pasyans pe fini ek sa zafer lakaz. Fristrasyon i aktyelman pe monte .

E dapre leksperyans, konfyans dan sa Minister Labita  ek son tim i vreman ba. Zot pa pe travay parey ou’n demande, e sa mon’n vwar pour mwan menm. Wi Mr Prezidan, dan nenport sosyete ou pou annan fanmir ki pa pou kapab aste later ek lakaz parey ou’n dir. I pa pou kapab peye.  Me eski akoz i annan lezot ki kapab peye; i kapab pran son loan fer son lakaz akoz ki li i ganny neglize e kit deryer an faver sa enn ki pa kapab.  Non. Fodre tou le de i bouz ansanm. E sa lapros i sel fason pou rezourd problenm lakaz ki pa pou kout Gouvernman bokou. Enn pou soutenir lot.

Mon pou esper ankor parey mon dir le 10 Mars e gete ki Minis i vin avek, me deor e mwan personnelman, mon napa bokou krwayans konfidans ki sa Minister pou anmenn en bon  plan.  Me mon a donn li sans pou eksplike le 10 Mars.  Parey mon’n dir, sistenm lakaz dan distrik – mon pa konn  lezot distrik me mwan Au Cap en travayer ki reprezant Au Cap kot Labita, apre 4 mwan i pa ankor donn mwan en lalis dimoun ki pe esper lakaz.  Sa i menm apre son Sef in donn go ahead pou donn mwan sa lalis. Sa bann travayer pa pe tann sa ki Msye Faure pe dir – parey sa ki serten Onorab i dir.   Son PS pa ankor menm kapab rann en repons nou bann korespondans.

Se sa latitude ki ranforsi krwayans ki sa sistenm’ ek nou pa ek nou’,  i vivan kot Labita.  I  ganny vwar koman en zes sabotaz anver Prezidan Faure. Reprezantan Gouvernman Lokal i enform mwan Desanm lannen pase pou annan 10 lakaz Perseverance pou allocate pour Au Cap.  Zanvye i desann 5, e la ziska ozordi pa tann zot ditou. Kekfwa  – me zot tronpe si zot krwar zot pe pini mwan. Zot pe pini nou bann Seselwa ki pe rod en lakaz e ki bezwen.  Non zot pe fer lakoler monte kont zot. Me regard byen  napa pou Au Cap annou al fer en vire Perseverance, lakaz dimoun pe antre.

E zot oule nerve ler dimoun i dir zot pe donn zis dalon lakaz.  Sa i en persepsyon kekfwa.  Me epi nou vwar sa ki reste, si i reste, i  a dir la la, enn ou de.

Mon   a demann Prezidan, ki i konsider en en reprimann sever lo bann travayer koumsa.  I kapab  menm dir si zot pa deliver, met deor.  Fodre pa ganny tolere sa kalite latitude.

Lot problenm se later Gouvernman.  Serten enkli bann returning graduates zot sote 15an pe esper aste en bout later – pa pou nanryen.  La avek nouvo plan ki Minis Labita ek Later, i pa pou drol si zot al back to square one.

En pwen ankor ki mon pa tro dakor ki Prezidan in fer sorti ki depi ozordi dimoun pou napa drwa idantifye en bout later pou li aste. Me mon’n vwar dan le pase ki se par sa sistenm ki nou ti dekouver bann pratik koronpi kot dalon ek zanmi ler nou vwar en bout later i dir in fini ganny allocate.  Me sa ankor fodre sanze.

Mr Speaker, sa zafer later si Minis Labita ti ekout byen tou zot problenm resours pou fer lakaz ti an rezourd. Sa 24 lakaz dan 24 distrik solisyon ti la. 1500 lakaz Ile Aurore, mon anvi i materyalize, me konfyans dan sa Minister mon pa pe vwar li pe materyalize.  Me mon a donn li benefit of the doubt ziska le 10 Mars.

Mr Speaker, en lot problenm ki Prezidan i devret get ladan, se pa zis ek labank pou pti biznes, lentere fodre get ladan e fer desann, kantmenm par  zis 1 unit sorti 10 poursan e vin 9 poursan.   I a fer en gran diferans lo sa bann  biznes.

En reduction lo kou Dolar devret osi kekfwa osi i devret get ladan. Sa i ava ede fer desan pri lavi, vi ki laplipar nou enport ki nou konsonmen nou enporte.

Mon pe osi esper sa Lalwa Lanplwa ki Prezidan in koz lo la pou anmenn dan Lasanble. Fotespere i regard lo kote Seselwa sirtou bann counterpart bann expats. Fodre met nou Nasyon avan tou.

Mon pe osi akey byen lanons Prezidan pou plan devlopman Nasyonal sirtou pou Lapes ek Lagrikiltir, e devlopman Zil Elwanye dan sa 2 domenn.

Mon konnen IDC nou pe al vizite byento  e I pou donn sa langazman.  Avek sa Mr Speaker mon pou terminen an di z-an  mon look forward pou travay ek Prezidan dan son demars pou fer Sesel antye san leksepsyon bouz devan, san kit personn deryer. Mersi Mr Speaker.

 

(APPLAUSE)

 

MR SPEAKER

Mersi Onorab Pillay. Ou’n tous bann pwen enportan.  I annan mon ti a kontan repran par rapor Anse Boileau.  Donn mwan 5 minit ki mon pou koze – petet la ki nou ti kapab fer – i annan zis 3 dimoun pou koze – 3 MNA e si nou kapab pran en Break e nou  a retournen 4er dan en fason ki avan 5er nou an fini nou a round-up e mwan mon a round-up pou remersye zot tou.  So nou adjourn. 

 

(BREAK)

 

MR SPEAKER

Bon nou a kontinyen avek nou bann lentervansyon.  I reste zis 3  Onorab pou koze. Onorab Henrie ou annan laparol.

 

HON GERVAIS HENRIE

Mersi Mr Speaker,

Zabitan Mont Buxton, koleg MNA, ser, frer Seselwa, bonn apre midi,

Mr Speaker avan ki mon  donn mon pwennvi lo Leta Lanasyon, mon ti a kontan dir ki lo mon sertifika nesans ouswa menm mon kart idantite mon non i senpleman Gervais Henrie.  Napa en tit Onorab devan –savedir mon pa’n ne ek sa tit ki fer ki si demen kolektivman Lasanble nou anvi retir sa tit, anfet sa i en  prensip ki bokou pei pe fer akoz i annan Manm  Lasanble ki zot aksyon i pa onorab e  alor bann pei pe dir be akfer nou bezwen  apel zot onorab ? Zot  apel kanmarad msye, madanm, manmzel, mon pou napa okenn difikilte avek sa e i en keksoz pou nou koman en Lasanble kolektivman reflesir lo la.

Mon lenpresyon zeneral lo Diskour Leta Lanasyon Msye Faure se ki in pran en lapros san risk.

In plito tous bann size de-baz ki dan lagete : problenm dan sistenm ledikasyon ; lasante, defi dan sekter lozman e lanvironnman ; difikilte pou ganny akse avek lans e problenm drog avek lakol nou koz lo la toulezour.

Dan tou diskour nou kanpanny, dan medya Nasyonal e Manifesto bann Parti Lopozisyon in adres seryezman sa bann konsern.

Mon rekonnet  i pa’n maltret personn. I pa’n pran en lapros partizan – en sel fwa i pa’n mansyon Parti Lepep dan son Diskour.   Son ton pa’n negativ ou agresiv e i pa’n kas Bidze Minis Finans.

Me annou pa tonm anmoure  tro vit avek sa Msye. Nou konn li depi byen lontan menm si denozour i pe vann nou en lot fasad. Nou konn tre byen Msye Faure in etidye lasyans politik ; in fer sa Cuba, e alors koman politisyen sa ki i fer in ganny kalkile politikman.

Pandan kanpanny eleksyon Lasanble Nasyonal 2016 letan i ti pe ed son parti raporte, pour li LDS ti vedir ‘Less Development for Seychelles.’ Avan sa dan kanpanny eleksyon prezidansyel, i ti menm al osi lwen pou dir nou propozisyon pou donn bann aze en pansyon ki ekivalan saler minimonm pou fait pei dan 3 mwan.

E sa i fer mwan demann mon lekor, si zot ti’n ganny mazorite dan Lasanble si zot ti pou pe servi sa term ‘Travay Ansanm’ ozordi ?

Me la ki in aksepte pou pran baton prezidansyel e i vwar li State House, i napa lot kart pou zwe : i bezwen anmar laroul LDS pou li ariv byen ater e evite kraze dan brizan avan prosen eleksyon prezidansyel.

Msye Faure pour mwan pa’n al ase lwen lo plizyer size ki nou bezwen adrese dan en dyalog Nasyonal fran e onet, pou tous lavi sakenn de nou koman en Seselwa.

Sa i enkli bann sezi parey : kout lavi ; latitid travayer vizavi zot lanplwa ; lokalizasyon bann pos travay dan Sesel ; ogmant prodiktivite lokal sirtou dan sekter Lagrikiltir  avek Lapes; devlopman dan sekter lenerzi renouvlab pou redwir konsonmasyon avek depans pei lo karbiran ; rol bann Seselwa ki pe viv aletranze i kapab zwe dan sa nouvo Sesel ; koripsyon ; rediksyon dan krim e akimilasyon larises Nasyonal.

Mon rekonnet ki in lans en platform pour nou koman en Lasanble serye an konsiltasyon avek zabitan nou distrik met devan lezot size e ki mannyer nou pou rezourd zot.

In osi prezant li koman en partner ki non selman pare pou fer Brans Egzekitiv travay avek Lezislatif, me osi pare pou travay avek LDS ki Lopozisyon lezitim Sesel.

Sa Mr Speaker i rezim en pe mon pwennvi zeneral lo SONA 2017.

Aprezan mon anvi tous en size ki en konsern pou piblik e nou isi anndan koman politisyen.

I annan en malaise Nasyonal ki pe ravaz nou Nasyon – sa se linefikasite Servis Piblik. Linefikasite Servis Piblik in enn bann pwen for ki’n sorti dan miting piblik ki mon ti organize pour tou zabitan Mont Buxton, ki mon pe reprezante isi anndan, pe enport zot lapartenans politik. Sa miting ti fer Sanmdi le 11 Fevriye.

Mon not labsans Onorab Gill ki enn mon Constituent dan sa miting – me mon ekspekte vwar li laprosenn fwa ki mon organize.

Piblik dan  sa miting an gran mazorite  ti eksprim zot  fristrasyon avek Servis Piblik pour plizyer rezon : birokrasi ; mank konpasyon ; fer dimoun vir an ron e monte desann ; latitid ‘ek nou pa avek nou’ ; pran dimoun zis pour en non ou en sif lo en ‘file’ e entimidasyon manm piblik par serten politisyen.

Pour 40an sa bann move mers pe bourzonnen dan nou sistenm Gouvernman. E pour 40an se parti SPUP, SPPF e Parti Lepep ki’n o pouvwar – pa LDS. Lontan nou’n averti zot ki fodre zot sanz zot mantalite fer e vwar keksoz. Pour 40an zot in sourd lo nou.

Sa problenm i grav! Parti repons Dirizan Zafer Gouvernman yer in souliny sa ki mon pe adrese.

In dir nou i annan problenm avek dimoun ki’n ganny responsabilite; i annan problenm ki mannyer bann decision-makers e policy- makers pe reflesir; zot pe mal zer serten sityasyon e fer zot Parti ganny mal gete; e in dir i annan problenm ek lekzekisyon bann desizyon.

Son kestyon sete eski bann fonksyon piblik pe travay pour zot azanda personnel ?

Mon en pe trakase avek sa sizesyon Mr Speaker, pour la senp rezon ki i kapab ouver laport pour en witch hunt kont bann fonksyonner piblik Sinyor ki zot sispekte pa senpatiz avek zot krwayans politik e alor blanm zot pour tou sa ki ariv mal dan Servis Piblik.

Letan mon tann Msye Faure admet ki i pa ti okouran serten laspe realite parey i ti fer Corgat Estate mon dezapwente.

Pourtan, pourtan zot konnen lekel manm sa Cabinet ki’n deservi plis letan ?  Msye Faure li menm. Lannen prosen pou fer 20an depi ki i ti ganny apwente Minis pour premye fwa.

Depi sa in Minis Ledikasyon, Minis Finans, Minis pou ICT e osi Minis pour Servis Piblik.

Dan ka son premye Minister in dir nou « Ledikasyon i annan bann defi reel.”

Zis 1an pase, pandan SONA 2016, Msye Michel ti dir menm zafer. I ti menm pli sever dan son kritik vizavi Minister Ledikasyon e osi Lasante. Zot rapel? Ki’n arive depi sa? Nanryen! Dan ka son 2enm Minister, nou’n antann Minis Larose dir ki pei pe perdi anviron R900 milyon akoz defayans Seychelles Revenue Commission (SRC) pou kapab delivre lo son manda.

Dan ka son 3enm Minister, servis Teknolozi Lenformasyon avek Kominikasyon i tro ser e i pa alaoter ! Pourtan Gouvernman i annan par dan sa lakonpannyen ki zer sa kab fib optik ki ti sipoze donn nou Internet bon marse.

Finalman dan son 4enm Minister, Servis Piblik, politik partizan i ankor lord dizour.

Le 30 e le 31 Oktob 2016 Msye Faure ti deside apwent 21 ansyen MNA Parti SPPF/Parti Lepep ;  ansyen MNA  SPPF/Parti Lepep   – 5  ansyen kandida dan eleksyon Lasanble Nasyonal sa menm parti ; 1 manm Komite Santral e lezot gran siporter son parti dan bann pozisyon kle Gouvernman.

Ki mannyer i ekspekte sa bann dimoun annan konpasyon pour nou ozordi, ler yer zot ti fer tou pou met bar dan larout nenport ki, ki pa desann lo laplenn tout an rouz parey zot ? Mon’n fer en tour lorizon e regard 4 Minister ki Msye Faure in dirize pandan sa dernyen 19an pou fer konpran piblik Seselwa ki i ti dan Gouvernman tou sa letan e i pran letan pour sa bann defayans ki Msye Faure  in koz lo la arive.

An plis Msye Faure in Vis-Prezidan depi le 1 Zilyet 2010.

I ti la o-bor Msye Michel pour sa dernyen 6an koman son segon. Dan sa menm letan Gouvernman in komet lerer vizavi bann rezidan La Misère, e osi dan son desizyon vizavi NIE e Lenstiti Guy Morel.

Alor eski sa bann letan ti pe annan dyalog, konversasyon e konsiltasyon pour asire ki Sesel e Seselwa i ganny sa ki meyer ? A sa pwen mon envit ou koman en Seselwa pou fer en refleksyon profon. Demann ou lekor ki mannyer ou, ou’n  fer ?  Ki mannyer ou, ou’n kontribye pou leta nou Nasyon ariv kot i ete ozordi.

Eski ou realize ki nenport ki, ki dan en pozisyon pou tro lontan zot vin letarzi e fasil trenn zot lipye ?

40an Seselwa dan son gran mazorite in kontinyen retourn Parti SPUP, SPPF e Parti Lepep State House eleksyon apre eleksyon. Si en Gouvernman i kontinyen pa delivre, eski nou kontinyen donn zot en manda ?  Demann ou lekor sa kestyon.

An menm tan bann lenstitisyon Leta ki annan responsabilite sirvey travay Gouvernman in fel zot manda, an komansan par Lasanble Nasyonal. Ant 1993 a 2016, Lopozisyon in tou letan an minorite isi anndan. Nou’n lager mannyer nou kapab e zot in sourd lo nou. Nou’n debout for – nou pa’n les tonbe. Nou’n persevere e nou anmenn kantmenm pa mal sizesyon ki Gouvernman in adopte dousman, dousman, depi lepok ki Onorab Ramkalawan ti isi li tousel. I regretab ki lezot lenstitisyon ki ankor kapab fer en diferans tel ki SBC, Ethics Commission, Komisyon Eleksyon, Biro Ombudsman, Komisyon Drwa Imen, e lapolis parmi lezot pa’n tou letan proactif pou provok sanzman kot i neseser.

Me lespwar i ankor la.

Avek sa ta louvraz e louvertir sa kote latab in enfliyans-e depi Septanm lannen pase, annan konfyans ki nou kapab fer ankor pli byen.

Me tan ki nou pa ariv State House pou evantyelman fer sa vre sanzman, nou pou kontinyen tande dan sak Diskour Leta Lanasyon ki tel ou tel problenm pe kontinyen ronz nou sosyete.

Aprezan Mr Speaker, mon oule adres detrwa pwen konsernan mon distrik.

Dabor mon oule akeyir nouvo DA dan nou distrik, manmzel Bernadette Rosalie e mon swete ki nou etablir en bon relasyon travay, pour Mont Buxton.

Sityasyon lakaz, drog, semen segonder e mank fasilite e aktivite lwazir i parmi bann demann pli irzan.

Mon enteraksyon avek bann dimoun ki pe rod later avek lakaz, in ed mwan konpran mannyer sa Gouvernman i zwe avek dimoun.

Mon pran sityasyon en zenn manman koman legzanp. Apre ki son savings in fini dan pey en Guest House pou abrit son 2 zanfan, ozordi i vwar li pe dormi dan lafreser anba lavarang en bon samariten.

Sa menm apre ki in ekri Prezidan.  Mon’n ekri 2 minis lo son par. Son ka i ganny refer avek en Sekreter Prensipal ki son reaksyon in endiferan.

Apre i annan involvement ansyen MNA Mont Buxton, Ms Sheryl Vangadasamy dan bann demars lakaz. Akoz zabitan distrik ankor pe ganny anvoye kot sa manmzel ki ozordi i Konseye Spesyal pour Lapolis?

2 dimoun an partikilye in eksplik mwan sa ka kot zot in ganny dir al vwar li.  Si i ti oule reste MNA  ouswa menm DA pou assiste dimoun dan distrik  i ti touzour kapab fer li.  Me pa duplicate rol.

Msye Faure pe koz en langaz, me dan servis piblik sakenn pe donn son bal e met konsiderasyon politik avan tou keksoz. Mon demande si sa bann menm Sef ki in apwente pe sourd lo li.

Sa ki zabitan Mont Buxton i oule se ganny dir laverite. Mon krwar dan ‘byen koze, i fer byen konpran.’

Eksplik nou akoz retar dan proze rekonstriksyon lekol La Rosiere, dir nou akoz i annan semen segonder ki 20an i lo plan e pa ankor kapab konstri ziska konmela?

E touzour lo size lakaz, parey bann zabitan mon pe esper avek pasyans pou antann deklarasyon Minis Bastienne lo kriter ki pou servi dezormen pou vann later ouswa lakaz Gouvernman.

I annan tro bokou zes pe pase. La sa mwan mon konn dimoun lo lalis voter Mont Buxton ki’n ganny lakaz Ile Perseverance, kontrerman avek deklarasyon ki’n ganny fer dan sa Lasanble ki sa plis ki 80 dimoun ki lo lalis kalifye pour en lakaz pou ganny selman dan sa 36 unit ex-Dominic Savio ki pou partaz an 4 ant Bel Air, St Louis, La Rivière Anglaise e Mont Buxton.  Ti ganny dir la ki Mont Buxton pa pou ganny lakaz Ile Perseverance.

Mon kontan pour bann ki’n benefisye, me mon anvi rekonfort mwan ki prosedir ti kler e transparan e ki’n napa lapreferans.

Mon dernyen mo i pou ou ki pe ekout mwan. I enportan ki ou ki pe soufer kont okenn lenzistis ki pe afekte ou drwa koman sitwayen ou en travayer ou debout e ou ganny konte.

Ou sa zofisye lapolis ki ou konnen ou saler i pa sa ki ti ganny dir isi dan Lasanble resaman, ki ou kondisyon travay pa pe enkli lasirans, ou pe travay 4 shift olye 3 parey lezot e menm ou pe ganny anpese pou ekout travay Lasanble an direk lo radyo, debout !

Ou sa travayer kot batiman Sant Kiltirel Nasyonal, Victoria ki ankor pe ganny afekte avek fungus e ki’n ganny en konpansasyon selman 2800 roupi, debout !

Ou sa doker ki pe ganny peye nanryen ditou pour sak tonaz ou pe tire e pe pey tax lo sak bout saler ou pe fer dan en mwan, debout !

Ou sa support staff dan sistenm ledikasyon – lab technician, librarian eksetera e ki zot kondisyon pa egal avek sa bann ansennyan, debout !

Linyon i fer lafors. Ase reste sakenn dan son pti kwen e plennyen antre nou.

Vin devan. Fer tande ou lavwa. In nepli tan pou per politisyen. Reklanm ou drwa.

E dan sa menm lespri ki mon pe envit tou zabitan Mont Buxton pou vin devan e pli enplike dan lavi zot distrik. Zot ti fer resorti plizyer pwen dan miting piblik e mon’n challenge koman sitwayen pou demande ki zot, zot kapab fer pour zot distrik avan demande ki Gouvernman ouswa Ladministrasyon Distrik i a kapab fer pou ou.   Alor mon swete  ki ou donn ou partisipasyon e koman MNA mon pe enform bann dimoun Mont Buxton ki mon lofis kot mon vwar dimoun i pe fonksyonnen.  Nou dan batiman St Claire lasanm No. 47.  Mon vwar dimoun laba dan Lendi.  Tou le Sanmdi mon fer letour distrik alor i pa difisil pou pran kontak avek mwan ouswa mon constitituency clerk ki appel Aaron Bonnelame savedir napa lekskiz la pou dir ou pa vwar ou MNA ouswa ou pa konnen ki bor i été.

San ou partisipasyon direk, leta nou Nasyon pa pou amelyor dan sa fason e avek lavites ki nou anvi.

Pour terminen, Mr Speaker, mon remersi ou, e tou zabitan mon distrik ozordi pou ekout mwan. E mon swet tou bann Onorab Lasanble Nasyonal sikse dan zot travay pour sa lannen. E mon swete ki ansanm nou fer en diferans pou Sesel.

Mersi bokou.

(APPLAUSE)

 

MR SPEAKER

Mersi Onorab Henrie.

Mon a donn laparol Onorab Arrisol.

 

HON SANDY ARRISOL

Mersi Mr Speaker.  Mr Speaker avan mon komanse mon ti a kontan al lo en pwen klarifikasyon an konsernan bann headteacher ki mon’n tann zot pe koz lo la dan Lasanble Nasyonal.  Mon krwar I enportan pou nou kit antet poudir bann headteacher zot napa lotonomi lo zot lekol.  Si zot pa ganny ansenyan, zot pa kapab al lo semen pou zot recruit bann ansenyan.  Headteacher i fer son rekomandasyon avek Minister Ledikasyon; i Minister Ledikasyon ki forni bann lekol ek  headteacher avek teacher.  Ler zot dir  ek ou napa, ou pa kapab fer nanryen, alor mon krwar nou bezwen donn nou bann headteacher en pe kredi zot pe sey zot mye, me  malerezman Minister Ledikasyon ki napa teacher pou donn  bann headteacher pou fer marse lekol.  E sa legzanp ki ou’n donnen  an relasyon avek bann ki’n retire sa mon krwar I en bon propozisyon  e mwan mon siporte.  Mersi Mr Speaker.

Mr Speaker, le 15 Septanm  2016 lepep Seselwa dan son gran mazorite ti fer konfyans en lekip zonm ek fanm pou reprezant zot ; defann zot e koz pou zot.  Sa se pa lot ki lekip LDS ki la avek en mazorite dan sa lasanble pou reprezant lepep Seselwa.

E la ler nou pe koze les mwan dir ou Mr speaker, ki Seselwa i atantif lo ekout Lasanble Nasyonal konpare ek en pe letan pase ki Lasanble Nasyonal ti en progranm ki pa ti enteres personn dan nou pei. Ozordi tou pti radyo in fini lo market ;  e ler ou pase dan Recess, sel keksoz ki zot demann ou se kan Lasanble pou repran pou zot tann nou koze. Mr Speaker se sa leta nou Nasyon ozordi.

Nou pep i enteres avek sa ki pe pase dan son pei e  kwa ki son reprezantan pe dir.  Alor fodre nou fer byen atansyon spesyalman bann ki lo lot kote latab avek bann blansisaz rimer.

Ozordi avek en mazorite LDS dan Lasanble i annan en nouvo fason fer keksoz. Lasanble pa vin zis vote, me ozordi i annan  parey sa stanp ki nou met lo paspor me ozordi i annan konsiltasyon, diskisyon, deba aprofondi e osi bann desizyon ki  konsern lavi nou pep.  Se sa ki Msye Faure li menm in rekonnet pe arive dan sa Sizyenm Lasanble.  Sa i enportan Mr Speaker akoz sa Senkyenm Lasanble ti fini zot travay laplipar di-tan midi e ti napa nanryen vreman konstriktif.  Msye Faure i kontan  ki li i pe travay ek en group travayer ki delivre.  Premye fwa Bidze Nasyonal i ganny met anba mikroskop parey Bidze 2017.  E menm si serten sa bann zournalis smart ti a pe sey trangle Msye Faure – sa Msye ti konnen lekel ki pe travay dan sa pei  e in kit zot ater trankilman avek zot swadizan ‘Independent’ ek zot ‘Time’ ki out of date.  Me selman mon vwar drol ki Onorab Sophola in vin konplent lo Bidze me se pourtan se Onorab De Commarmond ki ti anmenn en Mosyon anba Lartik 155 Konstitisyon pou aprouv en sonm R2.7 bilyon pou asire ki Gouvernman i kapab fer son travay.  Mr Speaker lo sa pwen mon ti anvi nou fer en serten keksoz kler.  Akoz sa in en Kanpanny ki plizyer bann zofisye Gouvernman Parti Lepep in fer o komansman Zanvye.  Ou zanfan pa’n ganny lekol akoz napa ase larzan kot Minister Ledikasyon ; proze dan distrik pa pou materyalize akoz LDS pa ankor fini vot lo Bidze ; pou napa larzan pou donn ou akoz bann         MNA LDS pa ankor fini vot lo Bidze.  Me anvi ki mon lo La Digue mon ti a kontan fer serten eklersi zabitan La Digue  avek Onorab Sophola ki la ozordi.  Mon ti a kontan demann serten kestyon an relasyon avek nou Bidze.  Eski  nou  Manm Lasanble pou La Digue pa’n ganny son saler Zanvye ?   Ki mon asire ki in gannyen.  Kordgard La Digue i ankor pe fonksyonnen sa i vedir ki lapolis in ganny peye.   Lekol bann zanfan i ale larantre sa i vedir ki bann teachers in ganny zot saler ; SLTA parey e lezot Departman Gouvernman.  Mr Speaker, si zot in ganny zot larzan set akoz Gouvernman i annan larzan pou fer marse pei.   Sa i tipik sa bann kalite mansonz ki Onorab Hoareau ti pe fer sorti bomaten.  In plis ki ler pou nou aret blansi  nou rimer dan Lasanble Nasyonal akoz i reste en rimer.

Mr Speaker regard en pe travay ki nou’n fer pou anmenn sanzman. Pran NDEA. Apre deba dan Lasanble kot nou’n war en etranze vin koz ek nou ki ti en katastrof, sanzman in arrive. Me zot konnen, si pa ti LDS, Bidze NDEA ti pou’n fini ganny aprouve e tou keksoz ti pou kontiny dan menm fason. Pa sanmenm ki ti arrive an 2015? Me avek kestyon ki LDS in anmenn devan, Msye Faure in bezwen pran en desizyon. Ki nou vwar e ki nou tande? Bann Irish in ganny dir mersi bokou pour zot servis e ozordi se en lekip Seselwa ki pe ansarz sa Lorganizasyon.  Felisitasyon nou bann Seselwa.    Mwan mon annan konfyans ki nou bann Seselwa pou fer  en bon travay e avek sipor tou dimoun enkli nou dan Lasanble  mon annan  konfyans pou met eroin anba kontrol e mon annan lespwar pour mon zanfan e osi mon pti zanfan.

Menm Prezidan in aksepte ki in annan en kantite travay ki’n ganny fer pandan sa 5 mwan ki’n pase, plizyer Manm Lasanble Parti Lepep zot menm zot in soke parfwa, pou aprann plizyer keksoz ki pe pase dan zot distrik menm parfwa san zot konnesans. Sa Seselwa ki’n fer sa Lasanble vin SON  Lasanble  li menm li in avoue ek plizyer nou ki nou pe travay pour sa pep e de plis pou tou Seselwa san kit person ater, Se sa leta nou Nasyon.

Zia mazinen – zis mazinen si nou ti dan Gouvernman ki kantite ki nou ti’n kapab fer pou byennet nou pei zis pandan zis sa 5 mwan e pour lepep Seselwa.   Me nou annan lespwar.   Mon kontan pour ki ozordi zot zil IDC, ozordi in vin nou zil,     Mr Speaker.  Mon kontan pou aprann ki Marie-Louise koman en prizon pou ganny fermen ; sa i  atraver vizit ki ou koman Speaker  ou’n fer ;  ki LDS ek lezot konsiltasyon ki sa desizyon in ganny pran. Oli problenm ?  Nou pe travay pou sa pei.

Mon kontan pou aprann ki bann zabitan La Misère pou ganny e en bon deal lo sa zafer kontaminasyon delo.  Se nou Deputy Speaker Mr Nicholas Prea  en lot LDS ki ti anmenn en protestasyon  lo semen pou rod zot rezon lo sa size letan Onorab William ti en Anbasader dan        Lenn. Lekel avoka ki’n debout lo kote Onorab Prea ek zabitan La Misère ?       Wi Mr Speaker Onorab Bernard Georges – en lot LDS sa ou  a dir mwan bann dimoun ki debout lo kote Seselwa.   Zot lans ki zot ti pe fer dominer avek ozordi koman en Seselwa mon fyer pou tande ki tou nou lans pou retourn pou nou bann zanfan Seselwa san restriksyon.

Mon kontan pou mon frer Onorab François Adelaide depi in ganny elekte sa in enn son lager ki in anmennen e ozordi koman en LDS son lavwa e  son lapriyer St François D’Assise in  ganny egzose.

        (APPLAUSE)

HON SANDY ARRISOL

E tou bann dimoun ki’n vot pou li e ki’n vot byen zot osi zot lavwa in ganny tande.  Me selman in ganny maltrete par sa menm ‘Times’ ki’n out of date koman en manter.  Ki mannyer nou apele tousala ?

Leta nou pei se dan figir nou bann zanfan ki nou zwenn lo semenn dan nou distrik,

Leta nou pti ei i reflekte dan lizye nou zenerasyon ozordi.

Ozordi mazorite nou fanmir i soufer ; swa akoz i napa en lakaz afordab e abordab pou li ek son fanmir ;swa akoz drog in anvi son fanmir e son prop zanfan swa son mari pe vol li pou al vann ; swa akoz son mwayen pa permet menm si i fer de zournen pou fer sa 2 bout zwenn.  Sa se leta nou pti pei ozordi.

Konversasyon ki ou gannyen avek Seselwa se sa twa topik prensipal,

Lakaz, Drog swa Larzan pa ase ki konpri pri lavi i o.

Mon ava konmans ek lakaz : lakaz li  en kosmar pou mazorite Seselwa. Ozordi kantite Seselwa pe lwe en landrwa byen ser, avek bi pou li en zour ganny son prop landrwa, atraver en kontribisyon en 2enm peyman  ki i fer avek HFC pou li tonm lo sa swadizan lalis priyorite.

Lakaz en letan ti en zouti oubyen en rekonpans politik ; sa ki’n fer ki sa ki priyorite li i ganny kit deryer. In leka dan mon distrik e i leka dan plizyer distrik, Ler mon’n fer kanpanny Perseverans oubyen lezot distrik, se parfwa bann zenn, ki ou’n zwenn kot lekol dan ou karyer, ki ou vwar zot ki’n ganny lakaz ; bann zenn manman ki parfwa ou zanfan i bokou pli vye ki zot zanfan, me se zot ki’n ganny flat avan ou, e se zot ki’n vin priyorite lo lalis DA. Akoz sa Mr Speaker?  Politik ?  Sa osi i en gro fot Msye Faure.

E parfwa dan bann distrik se DA e kandida Parti Lepep enkli zot CC Member ki’n par deryer tou sa, bann mannev  pour ki ozordi   nou dan en kriz lakaz.    In ariv moman pou nou revwar sa bann kriter ,revwar sa ki nou apel priyorite. Pa in ler pou nou fer en levanter lo lekel fanmir ki’n pli benefisye lo sa zafer lakaz ?  konbyen zonm ek fanm ki’n marye in ganny lakaz ;  Zot kite still zot ganny priyorite pou  zot ganny en lot lakaz par devan en lot ki’n lo lalis espere. Konbyen ki’n sorti aletranze ki’n ganny lakaz avan sa enn ki espere pou plizyer lannen, e in swiv tou son kriter.   Konbyen manman ki vin gran manman e ankor pe esper en lakaz ?  Ler mon lo size lakaz mon pou osi bezwen tous size later : later ozordi sesel annan ki annan detrwa morso, Selman Polisi i zis en morso pou sak sitwayen. I annan ki aste en morso bonmarse ek gouvernman apre in revann ek etranze pou milyon roupi. I annan in fer sir ki son zanfan ki pa’n zanmen lo en lalis later li i ganny son morso.  Eski pa in ler pou bann ki annan plis ki en morso, pou zot rann sa bann later pou ki tou Seselwa i avar kapab aste en morso li osi ?  Sa i ava fer ki zabitan St Louis ki zot non in rouye lo en lalis  parey sa nou nouvo roupi ki nou’n gannyen avek Labank Santral li osi zot i ava benefisye en morso. Tou dimoun i bezwen ganny asiste dapre  son vre bezwen, e sak fanmir i bezwen kontribye dapre son prop mwayen. E

Larzan dan pos  travayer i en lot topik ki plizyer dimoun i kontinyen koz lo la. Larzan zanmen i ase parey nou dir Selman en bon saler i fer en travayer vin efikas,  parey  nou’n tann bann Sid Afriken ki ti  pe ganny R100mil par mwan pou train lisyen.  Nou koman en mazorite LDS  dan sa Lasanble nou pou kontinyen koz an faver sa travayer lo  zot benefis, kondisyon travay konpetisyon  ki i annan ant zot ek bann etranze.  Nou pou rod sa ki meyer pou nou pep.

Mwan mon anvi zis dir ek tou travayer Seselwa enkli mwan menm, pou nou pran nou travay o serye ;  nou pei i pli gran ki nou ; annou pran plas bann etranze ki’n anvair nou pei ; annou ansanm koman en Nasyon  efas sa tas nwanr ki’n kole lo nou kol semiz an di-z-an ki, ‘’Seselwa se bann donner poum ki pa oule travay. Me plito ou kapab kont lo sa etranze.’’ In ler pou nou  repran Kontrol nou pei nou lekonomi ek nou larzan. E mwan koman Manm Elekte LDS pou distrik St Louis mon pou kontinyen siport tou travayer Seselwa akoz lavi pa fasil  ozordi. Letan nou lavi pa fasil Mr Speaker, mon ti a kontan donn en legzanp.

Parey sa manman ek sa papa ki  tou lede ganny en saler  ki R5040, par mwan   ler zot met ansanm e i fer en total R10,080 par mwan, e ler zot in pey en lakaz  – zot pe lwe en lakaz R5 mil par mwan zis pou tonm  en sif pli bon marse, zot pey HFC ankor R1000 mil,  avek lekspektasyon ganny en lakaz – pey delo ek elektrisite, telefonn, en boutey gas, zanfan pou al lekol, en pti larzan dan pos, kestyon parfwa  ki nou bezwen demann nou lekor eski sa fanmir i dinen ouswa zot  dezennen – ouswa si zot pa fer nenport kwa akoz napa larzan  ek sa ki zot gannyen lafen di-mwan.  Dan sa sityasyon i fors sa paran pou abandonn zot zanfan, pou al rod en lot bout pou met ek sa bout pou ki zot kapab soumet zot demann koman paran.  E la kot labi sibstans i antre parfwa.

Zanfan i reste tousel e tou keksoz i  vin en katastrof.  I annan gro travay pou fer e   e fodre nou koste byen ansanm  pou donn en gran koudmen.  In ler pou nou revwar tou bann Scheme of Service tou bann travayer, pou vwar si i pe accomodate nou bann travayer, In ler pou revwar saler tou bann travayer sekter piblik sirtou bann ki  dan zot profesyon pou plis ki 25an selman pe ganny pli ba lapey. Zot devre ganny byen rekonpanse.

Bann travayer Seselwa ki dan bann profesyon pou tou sa letan zot merit en bon package. Dan zot letan ti napa extra class ; ti napa liniversite, me zot in travay onnetman pou kree en baz pou bann zenn ki annan zot Degre alor nou pa devret kit  sa bann Seselwa ater.   Donn zot siport e  soulaz zot saler sa i ava fer ki zot avar pran zot Retret lo en pli bon package. Sa pansyon an plis i devret imedyatman akoz zot bezwen li. 

Mr Speaker, pou konklir pou en pep epanouir i enportan ki nou pep i an bonn sante ; An bonn sante vedir legzersis regilyerman wi, me osi bon kalite manze. Eski ozordi pa in ler pou nou get en kou kalite manze ki nou pep pe konsonmen ?  Ki kalite manze ki pe antre dan nou pei ;  bann manze zenetik, kemikal, ki pe zis antre ? Kalite delo ki nou pe bwar, desalinasyon eski pa i lakoz plizyer maladi relye ek kardyovaskiler ? Ozordi nou Seselwa pe mor ek Kanser toulezour, sa se leta nou pti pei.  Nou koman en Lasanble serye sa i osi bann topik ki nou devret adrese, e anmenn devan Gouvernman,

Petet olye rod tinel mon pou plito fer siport bann Onorab ki’n koz lo en plan pou annan plizyer Danm dan nou pei parey enn Grand Anse Mahe akoz nou’n ganny promet tren 2enm lavil e ziska prezan nou pa’n vwar nanryen lo la.  Sa ki bon pou LDS i osi bon pou lepep Seselwa.   Sa lasanble i apel NOU Lasanble, Sesel i apel nou pei, e ansanm nou pou bezwen defann li,  protez li e gard li pou nou fitir zenerasyon.

Mersi zabitan St Louis pou zot sipor ; zot kontribisyon, ek zot konfyans. Ansanm nou pe rod sa ki meyer pou nou pei ek lepep Seselwa.

Mr Speaker, mersi bokou.

 

        (APPLAUSE)

 

MR SPEAKER

Mersi Onorab Arrisol.  Mon a donn laparol Onorab Sophola.

 

HON NOLINE SOPHOLA

Mr Speaker mersi. Mwan Noline Sophola mon‘n ganny 70 poursan pou vin reprezant La Digue dan Lasanble.  Ler mon vin koze mon  koz ek mon fe. Mwan koman en Manm Lasanble mon  pou  dir ouvertman – note ki mwan ozordi le 17 ki mon’n ganny mon dues ki mon ti sipoze gannyen dan sa Lasanble.  Ler mon ti telefonnen, mon  ti ganny dir ki poudir larzan pa ankor pare, alor mon  pe koriz Onorab Sandy Arrisol sa ki in dir.   Mersi.

MR SPEAKER

Mersi Onorab Sophola.   Onorab De Commarmond.

 

HON CHARLES DE COMMARMOND

Mr Speaker, pour mwan sa se blansisaz rimer at its best. Ou konnen sa 1/3 budget ki nou ti aprouve dan sa Mosyon devan nou Lasanble pou anpes zisteman ki Gouvernman i collapse.  E PS Finans ti eksplik klerman poudir sa i pou permet ki Gouvernman i kontinyen fonksyonnen, me i annan serten depans ki pa pou kapab ganny antreprann sirtou bann proze kapital ensidswit ziska ler Bidze an antye i ganny aprouve.  So mon ti zis koriz sa lo sa ki in dir rimer.

MR SPEAKER

Epi nou pe komans Lendi.  Nou fini ozordi avek Leta Lanasyon Lendi nou pe repran Bidze, nou ekspekte fini Vandredi prosen, koumsa ki nou kapab komanse son semenn answit nou Biznes.  Onorab Ramkalawan.

HON WAVEL RAMKALAWAN

Mr Speaker mon ti ava kontan si Sekretarya ti ava kapab dir akoz ki Onorab li son lapey pa’n gannyen akoz mon vwar ki poudir nou tou nou lapey in marse.

 

MR SPEAKER

Ok.  Onorab Sophola ou pwen in note mon a take up avek Mrs Thelermont e Lendi bomaten mon  a donn zot en repons mon a vwar si i annan okenn dimoun ki pa ankor ganny peye.

 

HON NOLINE SOPHOLA

Mr Speaker, mon dir all my dues.  I didn’t say my salary.

 

MR SPEAKER

All  your dues ?

 

HON NOLNE SOPHOLA

Yes.

 

MR SPEAKER

Eksplike ki savedir bann ‘dues ?

 

 HON NOLINE SOPHOLA

My housing allowance and my travelling fares etcetera.  Mon’n fek gannyen ozordi e i byen note ki ler nou pa konn keksoz osi annou pa rabase.   Mersi.

MR SPEAKER

Ok.  Bon note.  Onorab Ferrari. Ou annan laparol.

 

HON JEAN-FRANCOIS FERRARI

Mersi Mr Speaker.  Mr Speaker. Mon ti krwar mon ti pou ganny loner pou koz dernyen lo repons lo Leta Lanasyon me sa loner i ava pour ou mon krwar.  Donk Mr Speaker i fer apenn 4mwan ki Pep Seselwa in donn nou sa responsabilite pou vin zot lavwa dan Lasanble e pou koz pou tou bann ki napa lavwa. Sa responsabilite i enorm e travay i bokou. Depi Septanm lannen pase, nou’n aksepte sa latas e nou’n esey fer nou devwar avek konsyans e lonnekte. I pa’n touzour fasil, nou’n souvan ganny kritike, i annan ki pa’n konpran nou, me nou’n kontinyen avek sa menm determinasyon ki nou annan pou amelyor nou pei e amelyor kondisyon lavi nou bann ser ek frer

Dan son Diskour lo Leta Lanasyon, Msye Danny Faure in rekonnet piblikman ki nou’n fer en bon travay ziska prezan, menm si nou pa’n toultan dakor. Sa Iibyen.  I annan ki’n soke pou vwar Msye Faure azir parey in fer. Mwan mon pa’n soke akoz sa i pirman fason ki mon ekspekte en Prezidan i azir vizavi Lopozisyon. Sa ki’n sok mwan se ler mon’n realize ki sa dernyen 23an  in tap mwan, ki nou ti zis ganny ensilte dan  sa Lasanble  ek tou Diskour – tou  le Fevriye nou ti ganny nou doz dan  Leta Lanasyon. Sa ki’n sokan.  Erezman,  mon dir sa bann move pratik in aprezan dan desbin listwar.

Ler en keksoz i byen, ou dir i byen. Ler en keksoz i mal, nou dir i mal. Msye Faure in fer en bon Ladres e sa i byen e nou pran not. Ler i pou malfer, se nou ki pou premye pou dir li ki i mal. Aksepte kritik e rekonnet fot i en par dan lavi e i fer ou grandi byen.

Mon pou koz lo detrwa size enportan e apre mon pou vin lo distrik Mont Fleuri.

Byensir  bokou bann size – tou bann size in ganny touse par zot tou ki’n koze e akoz mon a limit zis enn de size.  Premyerman mon trouv li tris ki Sef Pei in koz pou plis ki en erdtan e i pa tous lendistri lapes ditou. Menm si Ii pa’n fer li ekspre, sa pa en leskiz. Pa ni en mo lo sa lendistri ki sipoze 2enm pilye nou lekonomi e sa lendistri ki pe pas dan tirbilans konmela. Sa lendistri nepli soutenab. Stok ton pe degrade e sa pe menas aktivite ekonomik dan Por e travay nou bann doker. Menm lapes artisanal pe vin deplizanpli difisil. E ni Lekonomi Ble ek son fondater pa pou tir nou ladan. Se nou ki pou tir nou lekor ladan.

Gouvernman i bezwen pran sa lendistri pli o serye. Pa fer parey zot in fer ek Lagrikiltir – les li mor net apre sey resisit li. Mon enplor Msye Faure pou rankontre bann akter dan sa lendistri byen vit e rod bann solisyon lonterm pour lavenir. Sipor Lasanble Nasyonal pou la.

Sa ki mon dir i tre enportan e irzan, akoz saler bann doker,  e tou lezot travayer lo Por – plizyer santenn dimoun, i depan lo en lendistri lapes komersyal ki mars byen. Mwan, mon pe lager pour meyer lapey pou bann doker e lezot travayer dan lendistri lapes, me mon realize ki  si napa lendistri, napa larzan, napa profi, napa saler. Annou pa bliye ki dan Was Lafrik, sa lendistri in disparet preski net akoz move zesyon par bann Gouvernman. Alors, annou azir vit.  2enm size. Konman Chairman IAC dan Lasanble, mon konsernen avek sa sityasyon kot Sesel pe kas son komitman avek Lafrik pou donn sipor en kandida Seselwa pou pos Sef Tourizm kot Nasyon Ini. Ler nou annan en Lagreman, nou respe sa Lagreman, menm si nou pe sey pous an avan nou Seselwa. Msye Faure fek dir kot Linyon Afriken i fer rezolisyon e apre bann Sef D’eta pa respekte  sa bann parol. Be la ki nou pe fer ? Nou lasanble pe esper leksplikasyon lo sa.    Akoz sa i tre, tre anbarasan. Ler mon ti Maurice pou reprezant Lasanble Nasyonal  mon’n ganny demande sa bann kestyon.  E  mwan mon ti mazinen Mr Speaker ou ki’n  deza Minis Zafer Etranzer, ou konpran mwan byen lo la. So mon ti a kontan ganny en  leksplikasyon ki pe arive.

Aprezan, les mwan koz lo distrik ki mon reprezante ; Mont Fleuri.

Lannen pase, bann zabitan ti elekte mwan pou travay pou zot. Tou dimoun i vwar ki wi, mon pe travay. Lo tou bann size esansyel tel ki lakaz, lasante, semen, lekol, lanvironnman, lanplwa mon’n travay. Mon’n sekwe tou biro, tou Departman tou Lazans, e menm biro Prezidan pou alert zot lo bezwen distrik. Nou ti dir 1 zour travay par Lasanble Nasyonal pa ase. Nou pou travay 3 zour par semenn. Mwan mon konnen ki nou lo sa kote latab,  pa 3 zour ki nou pe travay. La nou pe travay 6 lo 7 e  mannyer keksoz pe ale nou pou travay 7 zour lo 7. Akoz travay i la.  E ki rezilta ?

Rezilta se ki  bann zabitan in kapab konstate pour zot menm ki nou pe ganny en bon pe sikse. Pour premye fwa, en Prezidan in vin personnelman vizit nou distrik. In trouve, in ekoute, in santi en in anonse ki i pe pran aksyon. In vizit e vwar problenm nou klinik. Nou semen pe konmans aranze, proze lakaz pou demare byento, e pou annan en progranm spesyal pour Corgat Estate akoz sa vilaz i bezwen latansyon spesyal. Land Transport pe met lavi pou zwenn nou bezwen pou bus shelter, lalimyer ek trotwar.

Msye Faure in donn lord bann Minister e Lazans Gouvernman pou vin ansanm, diskite, negosye e rod bann solisyon. Deza sa bann rankont in konmanse sa semenn menm e zot pou byento konstate ki keksoz pe bouze. Mon remersye tou dimoun ki pe donn zot letan e mon ankouraz zot pou gard sa komitman.

Byensir, i annan ki dir, e zot annan rezon pou mefyan, “fer sir sa msye pa pe bat nou latet. Tou sa lannen zot in bat nou latet… La i pe zwe bon boug pou ganny lot eleksyon.” Sa bann dimoun i annan rezon  pour zot doute akoz laverite se ki nou pe deal avek sanmenm sa group ki’n met nou dan problenm depi 40 an. Me les mwan dir ek tou dimoun sirtou  bann zabitan Mont Fleuri  mon pa dormi sonmey. Mon pe veye e mon pou konstaman met presyon. Grenwir parey zot konnen i dormi tar.  Menm si Skorpyon i pase Grenwir i ankor pe kriye li.

Alors, mwan mon pe travay, Msye Faure pe travay me ou, zabitan Mont Fleuri, ki ou kontribisyon pou lev ou lekor, pou lev ou fanmir e ou distrik e fer li re fleri?  Sa i en kestyon ki mon adres ek mon bann zabitan Mont Fleuri.  Akoz ou osi ou bezwen kontribye, akoz nou’n antre dan en nouvo lepok, kot napa nanryen ki vin pou nanryen. Nou tou nou bezwen fer nou bout.

Ou ki ankor zenn, for e an bonn sante fer ou mye pou sorti lo sa welfare e antre dan lanplwa. Msye Faure in promet ki bann Lazans Gouvernman pou ede. Mwan mon pare pou ede. Nou DA i pare pou ede.  Alors, annou silvouple ed nou lekor. Konpran ki si ou pe esper en lakaz me nou pa travay, nou sans i vin pli mwens.

Ou ki sipoze pey ou housing scheme, fer sir ou peye, akoz si ou pa peye, ou non pou degrengole lo lalis, e personn pa pou kapab ed ou.

Ou ki dan en vye lakaz, pran swen avek li an atandan ki ou ganny enn nef.

Ou ki servi nou klinik, servi li byen san abize. Gouvernman in promet pou rekonstri sa vye klinik, alors antretan annou pasyante e pa abize ni gaspiye.

Ou  sa pti kontrakter ki’n ganny Kontra pou netwaye e fer  bann pti proze dan nou distrik, silvouple travay avek konsyans akoz letan in fini kot sa ki pa deliver, li menm ki reganny menm Kontra lannen apre lannen.

Ou ki annan zanfan dan lekol Mont Fleuri, pa pran sa bann landrwa konman en Day Care kot ou depoz ou zanfan dan bomaten e apre ou anmas li  apre midi. Fer ou bout pou swiv progre oubyen difikilte ou zanfan. Pran ou responsabilite konman en paran.  Donn sipor bann ansenyan akoz zot fer bokou pou nou. Deza, mon kapab dir zot, ki mon’n fer plizyer rankont avek  Management Lekol e mon’n osi konmans diskit avek Minis Ledikasyon pou atak serten difikilte e defayans kot nou lekol.

Ou ki dan drog e ki anvi sorti dan sa kosmar, mon donn ou lasirans ki sa i posib. Ou pou ganny lasistans si ou vreman anvi.

Ou ki pe trafik drog dan nou distrik, nou dir ou arête gat nou landrwa.  Lapolis pe vin pli serye e mon pou siport zot 100 poursan pou elimin sa fleo ki pe detri nou lazenes, nou fanmir e nou pei. Trafiker byento pou nepli annan landrwa kasyet oubyen dimoun pou protez zot. Pa krwar zot pou sorti Mont Fleuri pou al Mamelles, sorti Mamelles pou al Anse aux Pins. Pa pou fasil akoz nou determinen pou serkle partou. Kit sa biznes konman i ankor tan oubyen fer fas avek bann konsekans sever.

Mon remersye bann dirizan Relizye pous sa led ki zot pe donnen ot osi pou fer sa transformasyon. Problenm i pou tou dimoun e nou tou nou bezwen donn lanmen pou rod solisyon.

Alors, mon bann zanmi, mon pe sipliy zot, zot  tou pou zwenn dan sa gran zefor pou lev nou distrik ; sa distrik ki nou tou nou kontan. Ozordi, i annan en gran lenerzi dan Mont Fleuri.  Ou a dir i annan keksoz eksitan ki pe pase.  Vini ou osi, vin donn lanmen, siporte, ankouraze.

Aprezan Mr Speaker, les mwan dir  ki malerezman pa tou dimoun ki pe met lafors pou rod solisyon. Nou  bann dimoun – Prezidan in vwar i dan bann sityasyon difisil.  Parfwa zot tonbe e nou bezwen donn zot sa lanmen pou  zot lev-e menm si se zot ki responsab pour zot fot.   I ankor malerezman annan Lazans ek Departman Gouvernman ki ankor dan mantalite fer malis, trenn lipye, fer politik dan travay. Mon pran legzanp Departman Lakaz ek PMC ki pe konport zot konmsi it’s business as usual. Zot pe refiz-e donn lenformasyon lo lalis aplikan pour lakaz e zot status e lo son kote PMC pe fer sa ki li i anvi san okenn sanzman dan fason fer. Ki mannyer mwan konman MNA mon pou adres problenm lakaz si ou  en Departman Gouvernman ou pe refiz-e donn mwan lenformasyon lo ki problenm ki nou ladan ?

En legzanp : 2 semenn pase mon ganny en let sorti kot PMC pou dir mwan ki en tel pa kapab ganny lakaz Mont Fleuri akoz i reste Au Cap. Byen. La ozordi, sa menm lorganizasyon pe esey met en zabitan St Louis dan en lakaz Mont Fleuri. Sa i mal, sirtou ki sa lakaz vid ti’n deza promet avek en zenn manman ki pe reste 8  zot dan en lakaz 2 lasanm. Ki rezon zot pa pe donn li ?  Se akoz i en pti pe an retar dan peyman son Housing Scheme. Mon’n dir boner ki sa i en fot.  Me  selman mon dir toultan dimoun i fer fot e nou pa devret kondannen.  Wi e mon repete e sa i en fot, me  i kapab ariv avek tou dimoun, me pour lenformasyon, sa zenn manman in fer son devwar e aprezan ozordi la nou pe koze, in fini pey tou son retar e i azour avek son bann peyman. Sa i fantastik e mon ti a kontan dir zot si i annan pe mazinen mon pa’n donn li en sout pou li peye.  Mazinen.  Ok ?  In fer sa lo son zefor li menm.  Still – still zot pa pe aksepte, menm ki in aste son pake e i pare pou bouze – in ganny dir ki li ki pou bouze e i pe  anmenn avek li 3 dimoun ankor.

Annou sanz nou latitid silvouple.  Annou rod ed dimoun ki dan problenm plito ki rod tou leskiz birokrasi pou bar son semen, pou pez li, pou fer en lot dimoun pas devan li. Annou annan en sistenm ki zis e ki aplik parey pou tou dimoun. Ekout ankor mesaz Msye Faure e zot ava konpran ki keksoz in sanze e nou bezwen travay en lot mannyer. Mwan mon dir ek Mercianne ki nou pou persiste e pa trakase, nou pou trouve solisyon akoz nou pe rod lazistis e nou pou fer tou pour ou antre byento dan en lakaz byento.  Menm si bann ki ti fer CD pou Parti Lepep pou eleksyon zot, zot in fini ariv Perseverance zot.  Ou, ou ankor deryer me ou osi ou tour pou vini e mon pou apiye pou ou avek tou lezot ki merite ganny en lapiy.

Pour terminen, les mwan dir sa Lasanble ki ler mon ti pran mon plas konman en MNA lannen pase, Mr Ramkalawan ti donn mwan portfolio lakaz pou mwan okipe. Mon’n pran sa latas avek pasyon e keksoz pe bouze, pa zis pou Mont Fleuri, me pou Sesel an antye. Pour zot tou – pour nou tou.  Mon kontan. Mon ti osi pran responsabilite pou get byen pre sa bann msye Irish ki ti’n mont en sistenm Mafia dan nou pei e ki ti pe fer Msye James Michel tranble avek tou kalite menas ki zot ti pe evante kont li. Nou’n klere e nou’n dekouver ki nou ti pe ganny anbete e sa sistenm ti pe kout nou pei milyon depi 10 an. Nou’n koup zot Bidze e Msye Faure in pran aksyon neseser e sa bann boug ‘lake  au dos’. Ozordi nou pe vwar ki NDEA ek FIU pe ganny reorganize e nou’n redekouver parey mazik ki wi, nou annan Seselwa ki kapab travay.  Nou ti krwar nou napa.  Yer nou ti krwar nou napa la nou’n vwar 3 profesyonnel ki pare pou zot pran an sarz sa NDEA.  En Irish ti dir mwan en zour ki sa louvraz i sitan danzere ki okenn Seselwa pa pou kapab fer. No, nou  pa IRA  nou pa met bonm, me personn pa pou fer nou krwar ki Seselwa i per e ki Seselwa pa konn travay.

En lot keksoz ki ti lo mon lalis sete IDC. E i ankor lo mon lalis. Msye Faure in anons serten sanzman, tre, tre timid, me i en komansman.  Nou Komite lo zil pe travay. Pandan 2017, mon pou ankouraz plis latransparans dan sa konpannyen piblik e meyer relasyon avek piblik Seselwa. Nou’n fer sa Lasanble vin nou Lasanble, aprezan nou pou fer zil sa msye vin NOU zil. Nou dakor avek sa mon Non ?   Annou donn en lanmen pour sa.

(APPLAUSE)

HON JEAN-FRANCOIS FERRARI

Wi mon bann zanmi.  Wi, travay i la! Prezan ki i annan travay!  Me solman parey mon’n dir boner zouvriye i ankor pe. Nou welcome Msye Faure pour lafason ki li osi in fer sa Lasanble vin son Lasanble; e nou donn li en lanmen.

(APPLAUSE)

 

HON JEAN-FRANCOIS FERRARI

Nou welcome nou bann koleg lo lot kote latab pou zot desizyon pou osi pous dan menm direksyon. Nou remersye bann travayer dan sekter piblik ki pe met plis lenerzi. Nou remersye bann biznes, bann envestiser ki pe kree lanplwa, bann travayer ki pe prodwir plis akoz zot in ganny en pe plis.   2015 ek 2016 bann anplwaye ek bann anplwayer in benefisye en pe. 2017 ek 2018 mon ti a kontan dir, nou merit met latet ansanm pour nou sey ed bann biznes e bann lenvestiser ki bezwen sipor pour  zisteman kree plis lanplwa e  donn meyer saler.

I reste pour mwan ankor enn fwa lans lapel ek tou Seselwa pou sorti dan sa sonmnanbil 40 an. I annan en divan ki pe souflé e sa pe anmenn gran lespwar.  Mon’n tande taler ki i pe soufle i pe mont dan Anse Royale.  I pe arive Anse Royale li osi.  Mon demann avek tou dimoun lev-e, bouze, pran zot responsabilite pour zot fanmir – zot lavi. Travay plis, travay pli for e zot ava ganny plis. Pa zanmen bliy sa parol ki “se atraver travay ki ou nou trouv ou laliberte”. Zis Mazinen, zis mazinen si nou ti’n fer sa sanzman pli boner! Zis mazinen kote nou ti pou ete ozordi!

(APPLAUSE)

HON JEAN-FRANCOIS FERRARI

Me i pa tro tar. I pa tro tar nou ankor kapab fer li e alors mon demande ki nou tou nou fer li pour Sesel. Mersi Mr Speaker.

 

(APPLAUSE)

MR SPEAKER

Mersi Onorab Ferrari.  Mon krwar sa mesaz i en mesaz ki sirman i klerman tou dimoun in aplodi.  I en mesaz ki tou bann MNA nou krwar i enportan e mon pe koz lo sa mesaz ki nou bann dimoun dan bann distrik osi i bezwen  lev-e zot osi e ed zot lekor e nou pou ed zot.  Mon pa krwar ki i annan okenn dimoun  dan Lasanble – okenn dimoun ki pe ekout nou deor ki pa dakor avek sa.  Alor ou mesaz i kler e mon remersi ou.  E mon a round-up since mon ti’n donn Onorab Gill 3 mon minit i reste mwan 2 pour mwan koz lo Anse Boileau. 

 

HON PATRICK PILLAY

Mon a pran enn mon a koz en pti kou.  Letan mon ti pe kanpanny Anse Boileau mon ti koz lo later, lakaz ek semen segonder koman 3 fakter kle ki  mon bezwen adrese si zot in elekte mwan.  Zot in elekte mwan mon’n vin Speaker e mon remersye zot. E premye pwen ki mon ti a kontan met devan  Prezidan Faure se ki in koz lo lakaz, lo later e sa i byen.  I annan en gran bout later ki tonm dan distrik Anse Boileau ki borde avek Baie Lazare.  Anfet i Anse La Mouche e i en later kot Qatar ti pou fer en gran lotel.  Mon ti ankor dan Cabinet ler sa proze ti ganny prezante e pour et fran sa proze ti vreman, vreman enpresyonan.  Apre mon pa konnen ki’n arive e Qatar pa’n kontinyen e proze in tonm dan delo. La mon tande i annan lot gro konpannyen  – gro msye ki lizye i lo la.  Mon pa oule fer blansisaz rimer, me solman mon pe dir ki sa gran bout later, ki dan plato ki’n ganny bare avek fencing wire ver sa i devre vin pou zabitan Anse Boileau ek Baie Lazare ki baliz ek nou.  Akoz sa i en proze ki  – mon’n tre kontan taler sa ki  Onorab Stephen Pillay in dir.  Wi nou pe fer social housing, wi i annan 10 unit isi ; i annan 10 unit  Mont Fleuri ensidswit, me i annan profesyonnel ki pe rod en bout later, pou zot fer zot lakaz e zot annan zot larzan.  Alor mon oule fer 2 pwen – nou osi dan Anse Boileau nou ti a kontan annan en ‘stake’  – for lack of a better word, kot bann profesyonnel i kapab ganny zot prop later – fer zot prop keksoz.  E i annan en proze ki mon’n lir resaman kot Thailand i annan serten Citée kot Gouvernman in met later a dispozisyon ki anvi vin envestir Thailand e sa i plito bann dimoun lo zil Sinwan i annan sirtou bokou bann Sengapouryen e paralelman i annan en labank ki’n fer en Scheme spesyal kot  i donn loan  – i donn bann pre a lentere tre ba.  Mon krwar   sa i en proze ki Gouvernman i devret   pe mazinen pou nou dan Anse Boileau ki vwazin avek Baie Lazare kot annou pran sa later donn nou bann zenn profesyonnel, i a deblok sa kestyon sa kantite dimoun ki pe esper lakaz ;  i a  tir sa fristrasyon dimoun ki anvi aste me i pa konnen kot i pou aste – e prive i tro ser.  E trwazyenmman labank Nouvobanq  si mon’n byen konpran, Gouvernman i majority shareholder e parey Onorab De Commarmond in dir a plizyer repriz Gouvernman i kapab fer zot to lentere desann.  E sa si nou annan en proze ki vinabou annan en Scheme presizeman pou ed bann profesyonnel – bann graduates ki retournen pou ganny en bout later k en loan ek  en loan a en to lentere enteresan, i pou fer bokou plis lavantaz pour nou –

  • Nou a gard nou

profesyonnel.  Dantis pa pe retourn New Zealand – Dokter pa pe retourn Australie e bann dimoun ki deor osi  a kapab vini ; – i annan serten kriter ki

nou a mete pour  zot  kalifye e Anse Boileau i annan sa gran bout latet ki Onorab Adelaide ek mwan nou’n koz lo la, plis ki 1 fwa.

        Lo kestyon semen segonder, mon ti a kontan zis dir dan en mo dan en minit, pour zabitan Anse Boileau ki mon‘n fer en premye rankont avek PS Marie-Celine Vidot ki PS Community Deveolpment  Local Gouverment ek Mr Frichot son Special Advisor e DA Ms Naiken e son asistan Ms Rosemond Monthy, ti tre, tre successful – ti tre reisit ; prezan la prosen miting ki nou pou fer se avek Minister ki responsab pour Later ek Lakaz ansanm avek Transpor.  E sa msye ki ansarz Transpor i  a donn nou bann detay  – bann semen segonder, ki pou ganny fer dan Anse Boileau.  Me pour le moman DA in konfirmen pou zot ki pe ekout mwan  Anse Boileau ki sa Bus Stop zot ti pe rode anba  madanm Mayer  – pli ba ki madanm Mayer Montagne Posée – DA in konfirmen ki sa pe al ganny fer pe al komanse  e nou pe rod wayleave sa lot Bus Stop ki pou fer o-bor Mr Bouchereau sa ki nou apel Kouzen Pierrot.  So sa 2 pou marse me bann semen segonder pou mont kot madanm Mathurin – kot madanm Louis, tousala  nou pou travay lo la.  Lo kestyon prizon mon ti a zis kontan dir 2 mo.  Nou’n koz lo prizon, zot okouran mon’n al Marie-Louise zanmen mon ti mazinen mon ti pou enterese dan prizon – mon ti enterese dan Ledikasyon e Kiltir me ler mon’n al Marie-Louise mon’n vwar keksoz ki’n konfirm sa ki mon ti tande e ki bokou dimoun in koz lo la.  Dimoun i fer fot  – pa akoz in fer son fot    – mwan en dimoun ki krwar  ki ler  i fer en fot i  ganny son pinisyon dayer mon fiy i en Senior Magistrate so mon krwar ladan.  Me selman par kont en dimoun i fer son fot i ganny pini i annan bann drwa de-baz ki i bezwen gannyen koman Seselwa. E sa nou ensiste lo la e mon dakor antyerman avek sa ki Onorab Ramkalawan in dir akfer esper Septanm pou ferm Marie- Louise ferm  Marie-Louise la lafen Fevriye – sa 17 prizonnyen ki reste anvoy zot Coetivy i annan plas – Madanm Agathine a resevwar zot.  I annan Mr Robert Albert ki sorti Anse Royale ki i konnen ki i pe fer, i a resevwar zot ; met zot laba.  Annou komans travay.  Msye Faure in donn mwan garanti ki prosennman i pou apwent en Komite ki pou regard Reform Prizon.  Mon ti a kontan antre lo la, akoz la mon osi parey Onorab Ferrari, i dir i pasyonnen avek  bann keksoz lakaz ek International Affairs – mwan mon’n enterese dan prizon, akoz mon vwar i annan en kantite travay pou nou fer ek prizonnyen.  E ler mon ‘n al Montagne Posée mon’n zwenn Mr Tirant  – malerezman mon ti’n demande zot in donn mwan en pti livre  zot strategic plan, mon ti’n demande pou vin dan mon folder me i  pa’n arive – pe enport, me li i komans avek en quote kot zot quote Mr Mandela, ki zot konnen in pas 27an dan prizon kot in dir koumsa  – mon ti a kontan sa i ti la,  mon ti a’n lir li egzakteman me i al  en pe groso modo koumsa ;’ou angaz’ oubyen ou gaged ‘ou mezir sikse, e care en sosyete par pa latansyon ki ou donn dimoun  ki pli o me bann dimoun ki pli ba – ‘’The wretched of the earth’ – parey Frantz Fanon i dir ki dan prizon.  E mon krwar sa nou annan en devwar pou nou travay ansanm avek Lotorite Prizon pou fer sir ki keksoz i sanze e nou met lanfaz lo reabilitasyon.  I annan lide fantastik ki’n sorti ki mannyer nou kapab fer prizonnyen travay pou ;

 (1) rann dimoun sa ki in vole.  In vol televizyon laba Belvédère i ava travay e rann ou valer, ou televizyon pour ou gannyen  – p0u ou aste.  Dezyenmman i a annan son zanfan ki lasistans pe gannyen avek Servis Sosyal les li sorti Montagne Posée vin ed nou dan Anse Boileau fer semen, evalye pey li son lazournen  toulezour, ler in fini son 6 mwan in ganny tan, ou a larg li i pey sa dimoun alimoni – son piti– son zanfan.  I sorti e i refer akoz  i santi ki si  retourn ankor i pou bezwen travay pou li rann – pey sa alimoni, oubyen  rann sa larzan – valer keksoz ki  in vole.  I pou resanz son psikolozi, akoz i vwar i pa pe al dan lotel Montagne Posée pou lev 10er bomaten – keksoz in sanze.  I annan en keksoz avan mon arete lo prizon ki mon krwar ki Onorab Ghislain ti fer sorti e mon kontan mannyer ou’n donn sa apelasyon e mon quote ; en  Juvenile Education Centre mon‘n note.  Onorab Ghislain,  fantastic.  I  pa devre en Reform School i pa devre en  Detention Centre.  Mon ti koz avek zot pli boner sa lannen oubyen petet lafen lannen – en zour mon’n ganny envite pou al Perseverance, dan kaso mon vwar en garson 15an  – 15an sorti Au Cap, Gaza, in fer plis ki 1an dan en cell ki ti petet 4pye e 6 pye oter.  Mazin ou si ti ou piti oubyen ou pti frer.  1an dan en pti kaso parey en kazo.  Me eski nou tret dimoun koman zannimo isi ?  Nou bezwen  en Juvénile Education Centre kot nou  a kapab dir bann dimoun – mon pe koz Anse Boileau par egzanp, nou annan teachers ki’n retire ki Maths Teacher – mon pe koz dimoun ki mon konnen – parey mon’n dir zot mon ti koz ek Ms Nella boner La Digue i pare pou ede ; Anse Boileau nou annan dimoun  ki’n retire ; i  annan en kantite teacher  ki’n retrie ki‘n pare pou ede menm a tan parsyel dan en Juvénile Education Centre nou annan gard ki’n retire – lot zour mon  zwenn Mr Zab frer Father Danny – dan STC ; nou koze  mon dir li ki ou fer konmela i dir mwan  pe ede i dir mwan i ti a kontan ed bann zenn.  Mon dir, ‘’be zisteman si ti annan en Juvenile Education Centre ou deza en gard ou konn disiplin ou ti  kapab travay pou ed bann zenn ki dan difikilte.  Ou’n en police officer, ou tre enplike avek larelizyon.  I annan tousala pou nou fer  ki nou kapab travay lo la.’’  Avan mon al lo mon dernyen pwen mon  a zis  lir sa ki mon ti pou lir avek zot.  Vwala ki ex-President of South Africa Nelson Mandela ti dir ; ‘’it is said that no one truly knows a nation until one has been Inside the jailsA nation should not be judged by how it treats its highest Citizens but its lowest.’Beautiful quotation e sa i enportan pour nou e parey mon’n dir ler mon’n al kot Mr Tirant laba, mon’n koze i annan keksoz ki zot in fer akoz zot pa’n ganny enplimante God alone knows.  I demann zis  nou go back ankor.  Onorab De Commarmond in dir, ou ganny en responsabilite pou fer marse en lenstitisyon. I pou Sesel sa fer li marse ; pran ou responsabilite.  Avan mon arete, mon ti a kontan swet sa Select Committee ki pe al Farquhar demen tou de bon, retournen nou bezwen zot parey Onorab Ferrari in dir IDC i bezwen vin ‘nou zil’ – dapre Lasanble i pe vin’ nou zil.’  Do come back Onorab Ramkalawan avek ou lekip.

MR SPEAKER

Aprezan mon ti a kontan dir demen i lanniverser Onorab Churchill Gill, mon pou Praslin – Onorab Arrisol in dir nou pa manz sa bann manze GM me si  ou kwi en bon kari koko poul taye mon a vini mon a vin manze kot ou.  Lendi  Clerk pou ganny sworn-in as Clerk akoz sa i dapre prosedir in fini son period probasyon in ganny apwente koman Clerk nou pou entrodwi nou nouvo Deputy Clerk ki pou vin pran son plas o-bor Clerk, mon ti ava apresye si 9er zot tou zot la pou fer sir ki keksoz – nou donn li sa sipor akoz i pa ti  konnen –  ler nou ti’n vini parey en dimoun in dir taler, nou ti dan brouyar nou’n ale ler nou’n antre le 27 Septanm dimoun in ale in kit nou, nou’n debourye nou’n al lwen avek zot sipor. Alors be there Monday morning 9 o’clock pou donn ms Jutta sa sipor.  E finalman, finalman vreman, vreman mon sipoze tou sa ki konn mwan, i konnen ki mannyer mon pe enjoy being the Speaker.  Sa Speakership i vreman enportan pour mwan akoz mon santi ki mon pe ganny zot korperasyon.  Sa 2 zour has been absolutely parey Angle i dir marvellous ou konnen akoz ?  Tou dimoun in gard zot letan 10 a 15 minit.  Enkli Mr Gill  ki  mon ti donn li 3 pour mwan.  E pour sa mon fyer e parey mon dir mon pou kontinyen travay pour Lasanble  – pour Sesel mon fer zot mazinen ler ou’n pas 63an pa anpes ou travay.  Mon fek dir ek Madanm Linda William, Melanie yer mon oule vwar sa policy lo Ageism akoz nou tou  – mon ariv 67an mon napa lentansyon arete avan Gran Met i kriy mwan.  Pas en bonne soirée en bon wikenn mon tre fyer tou sa travay ki nou pe fer ansanm e mon dir Msye Faure nou dan Lasanble nou pou donn zot tou sipor  ek ou, ou Egzekitiv pou fer sir Sesel i vin en meyer Sesel.  Bon wikenn ā tous e mersi ankor.

 

(APPLAUSE)

 

 

(ADJOURNMENT)