Home » Verbatim » 2017 » Verbatim – Thursday 16th February (SONA Reply)

Verbatim – Thursday 16th February (SONA Reply)

NATIONAL ASSEMBLY OF SEYCHELLES

Thursday 16th February,

2017

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bon bonzour tou bann Manm Onorab.  Bonzour tou bann dimoun ki pe ekout nou dan lakour  e an deor lakour.  Mon ti a kontan swet zot tou en bon bonzour e  en zournen beni e kalm.  Letan nou, nou pe komans nou travay pou lannen mon panse ki sa lannen 2017 i pou en lannen tre, tre enteresan pou nou dan Lasanble, pou pei.  Parski i annan en kantite travay pou fer.  Me avan nou komans ek nou deliberasyon pou les zot pran laparol pou donn zot reaksyon lo Diskour Leta Lanasyon ki Prezidan Larepiblik in prezante Mardi le 14,  i annan en de lenformasyon, lanons mon ti a kontan pase.  So donn mwan detrwa minit pou fer sa avan nou komans nou ladres par diferan Manm.

        Premyerman mon ti a kontan remersye tou dimoun ki’n travay pou fer preparasyon pou nou komansman Lasanble Mardi le 14 pou nou swet bann VIP avek Prezidan Larepiblik dan nou Lasanble.  Mon ti a kontan spesyalman remersye Clerk ek son Komite ki’n spearhead sa lorganizasyon.  Me vreman tou dimoun dan Lasanble.  Depi bann maintenance travayer ki’n donn lanmen met karpet partou ;  pou bann ki’n aranz fler, nou vreman apresye.  Parski i ti en reisit e mwan koman Speaker, mon krwar nou tou nou’n fyer ki tou keksoz in deroul byen.

        Alor, mersi Clerk an partikilye.  Les mon dir en pti mo lo travay Lasanble Nasyonal pandan Recess.  Mon krwar i annan en konsepsyon pete oubyen en persepsyon dan gran piblik Sesel ki ler nou ganny Recess nou pran vakans.  Mwan menm mwan dimoun i demann mwan kestyon, mesaz ki mon’n gannyen e menm email.  Zot demande si mon dan biro oubyen si nou pou komans travay le 14 Fevriye.

        Mon oule fer kler pou lenformasyon tou dimoun ki ler nou annan recess bann MNA, enkli Sekretarya Lasanble Nasyonal pe travay.  Le mon dir pe travay, i annan 3 fonksyon ki prensipal ki nou fer.  Enn evidaman se Lalwa –  Lezislatif.  We are the Law makers parey Angle i dir.  Me dezyenm i annan reprezantasyon, nou la.  reprezantan dimoun ki’n reelekte nou.  Ki vedir ki nou bezwen touzour ganny sa kontak avek zot ki dan distrik ; ki vedir ki bann MNA enkli mon menm mwan koman MNA pou Anse Boileau.  Nou bezwen travay dan distrik.

        Savedir i annan miting.  Parey nou’n konnen i annan miting piblik.  I annan bann vizit ki ganny fer.  Parey Mont Fleuri ki Onorab reprezant pou Mont Fleuri in envit Prezidan pou vwar li.  Grand Anse parey.  Onorab William in envit Prezidan pou vin vwar li dan son distrik pou serten proze.   Savedir ki sa reprezantasyon ki nou fer i kontinyen pandan Recess.  Mon krwar i enportan pou dimoun realize ki bann MNA pe travay dan zot distrik kot zot reprezante.

        Epi i annan sa rol oversight ki kontinyen.  Dan sa dernyen Recess ki nou’n fek fini.  Ki nou komans nou travay Mardi,  i annan serten travay ki nou kontinyen fer,  dan mon ka par egzanp, par bann rapor ki mon’n gannyen, mon’n deside al vizit en prizon lo en zil.  E ler mon’n vinabou al vizit enn, mon’n vwar lezot.  I form parti sa rol oversight ki Lasanble Nasyonal i annan pou li fer sir ki keksoz dan lezot  brans Gouvernman i marse.  Sa i osi nou rol.  E pandan Recess nou fer sa.  Epi rapel byen ki Lasanble Nasyonal i fer bokou travay atraver bann Komite.  I annan Standing Committee.  I annan Select Committee.  I annan Ad hoc Committee.  I annan bann Komite ki nou’n kree pou Viktimizasyon, pou Laverite ek Rekonsilyasyon Nasyonal.  Tou sa bann Komite parey Committee on Assurances ki Onorab Henri i Chair, tou sa bann Komite i kontinyen travay pandan Recess.  Recess pa vedir ki nou’n al pran konze e Komite pou Assurances mon kontan ki in vinabou anmenn tou bann Minis la.  I annan zis en Minis ki pa ti kapab vini e i ti telefonn mwan personnelman pou ofer son leskiz akoz i ti ganny sa move flu.  Me larestan tou ti vini, i annan menm bon rapor.  Ki vedir ki travay ant Egzekitiv avek Lasanble i pe marse parey mon’n deza dir e i pou kontinyen marse.

        Alor, mon ti oule zis met sa, fer sa mizopwen pou fer sir ki piblik i kler dan zot lespri ki Lasanble le ri fer Recess i pa dan vakans li.  I pe kontinyen travay e sa i enkli Sekretarya Speaker.  E la mon ti a kontan osi dir ki dan nou Sekretarya pandan sa Recess nou’n fer bokou travay.  Nou’n komans en seri management meeting tou le Lendi nou zwenn 9er e nou ti vwar e bann lacking, enn bann febles dan nou Sekretarya, se lafors Parliamentary Reporting.  Alor avek sizesyon nou’n recruit vitman tanporer bann Staff ki’n vin zwenn nou pou fer Parliamentary Reporting en fason ki nou’n kapab vin pli azour ek nou bann verbatim.  E si en dimoun i demann nou an deor ki ti ganny dir par PS Imigrasyon ler i ti vin devan nou,  keksoz i pli azour konmela.

        Alor sa travay in kontinyen anba direksyon byensir Clerk ek Madanm Dufresne ki la devan ek nou.  E ankor mon remersye zot pou sa travay aprofondir ki zot in fer ki zot in fer, pou fer nou travay mars pli vit.

        3enm pwen ki mon oule fer sorti se dan sez devan la, Deputy Clerk i vid e parey zot in pete okouran Deputy Clerk, Madanm Tirant ti resign mwan pase e nou toudswit nou’n fer le neseser, nou’n fer li parey nou’n dir dan sa Lasanble, tre transparan e  nou’n cast the net wide parey Angle i dir e nou’n advertise pou sa post Deputy Clerk ki’n ganny vacant par depar Madanm Tirant.  E nou ti ganny nou an tou 16 aplikan, 16 kandida e nou ti fer en lenstriman interview e mon remersye ankor piblikman Madame Thelermont ki ansarz nou Accounts ki ti prezid lo sa panel avek 4 lezot senior staff Lasanble ki fer panel 5 ti interview 15 kandida akoz enn a lafen ti withdrawn e mon kontan pou anonse ki bann panelist in plizoumwen tonm dakor lo en frontrunner.  Savedir enn ki en pe pli byen, sorti pli byen ki lezot.  Me HR Manager pe kopil tousala, en fason ki finalman nou espere ki Lendi ler nou re pran nou travay lo Bidze, nou pou annan en Deputy Clerk ki’n ganny apwente, ganny entrodwir avek zot, ek piblik.  E i a asiste Clerk dan en mannyer pli byen pou deroulman prosedir dan Lasanble.

        Si i annan okenn klarifikasyon lo la zot a ganny sans pou demann mwan apre.

        Lot keksoz mon ti a kontan anonse, se ki Zanvye 2018 nou Lasanble pou host enn bann pli gran konferans e sa se sa ki apel CESPOC- CSPOC.  Conference of Speakers and Presiding Offices of the Commonwealth.  E 2enm semenn Zanvye, savedir mwan pase , Clerk ek mwan, nou ti al Lonn pou nou attend the Standing Committee Meeting an preparasyon pou sa gran konferans ki pou fer Zanvye lannen prosenn.  E parey tradisyon i ete, Speaker ki pe Host,  i Chair Standing Committee.  So mon ti ganny sa sans pou zwenn lezot Speaker Commonwealth ki lo Standing Committee e osi zwenn Mr John Bercow who is Speaker House of Commons Langleter.  Ki fer ki in donn both, Clerk ek mwan en sans pou zwenn lezot dimoun me osi aprofondir nou konnesans, attend en sesyon House of Commons,  kot ti annan Question Time ek Premye Minis Theresa May.  Ki fer ki  nou bezwen komans mazin lo preparasyon pou sa konferans Zanvye lannen prosenn kolektivman.

        Evantyelman nou pou annan en Komite ki pou travay lo la e an menm tan osi an Zen nou pou annan en konferans pli, en ti pli ba, pli pti.  Akoz sa i pou SADC Parliamentary Forum ki nou, nou pou host ankor.

        So sa lannen parey mon’n dir taler, i pou en lannen ki pou vreman plen.  En kantite travay pou nou fer e mon kont lo zot sipor e korperasyon pou nou fer sir ki nou fer nou mark pa zis lo nivo Sesel,  dan larezyon SADC, lo nivo Commonwealth ki nou en Lasanble serye e ki nou fer Sesel fyer.

        Dernyen keksoz avan nou komans ekout nou bann prezantasyon, se i fer 4 mwan.  Depi Septanm le 27.  Mwan zot in met mwan koman Speaker Lasanble.  Mon krwar le moman in arive pou nou asize e reflesir lo kot nou oule ale.  Tou Lenstitisyon, tou lorganizasyon i bezwen donn en plan.  Avan i definir sa plan i bezwen annan en vizyon.  So nou ansanm, nou, nou’n dir fer sa nou Lasanble.  Nou tou nou dakor ki i bezwen vin nou Lasanble e dan sa lasal isi, nou bezwen prezan ansanm definir nou vizyon.  Ki mannyer nou vwar Lasanble dan 4an, 2020.  E ler nou’n definir sa vizyon, ansanm nou a definir ki stratezi nou pou annan, ki plan nou pou annan pou nou ariv kot sa vizyon.

        E la pour sa trimes –  sa term Lasanble, mon’n demann konseye spesyal dan mon Sekretarya pou lead sa survey oubyen en seri konsiltasyon ansanm anba mon gidans byensir.  Avek tou bann dimoun konsernen.  Vedir tou bann dimoun dan Lasanble, lezot lebra Gouvernman e piblik an zeneral ki zot espekte ek Lasanble.

        En fason ki ler i ariv Avril plit,.  ler premye trimes oubyen term in fini,  nou pli pre avek en vizyon ki nou a kapab eksplik dimoun kote nou pe ale koman en Lasanble ;  ki nou espekte arive dan 4an.  Byen antandi tousala, i a ganny fer.  Parey Angle i dir, all things being equal.  Savedir sityasyon i reste parey nou ete konmela,  Lo lasenn politik ensidswit.

        Mon espere si i annan okenn kestyon zot a kapab poz, demande pli tar.  Me selman la mon ti a zis kontan dir finalman ki mon’n lo mon bann vizit tou le 3 prizon.  Mon ti a kontan pas en pti en pe lo la, petet dan mon lentervansyon letan nou pe koz lo Leta Lanasyon evantyelman.

        Mersi tou dimoun.  E avek sa mon krwar nou al direkteman lo nou prezantasyon.  Nou repons lo diskour Leta Lanasyon. E mon ti a kontan dir ki dan ABC, Assembly Business Committee, nou’n tonm dakor ki le 2 Leaders –  Leader Lopozisyon ek Leader Government Business pou pran laparol premye.  Zot pou koz ant 30 a 45 minit.  Par laswit nou pou demann bann Manm zot osi pou zot fer –  mon’n ganny li byen non ? 30 a 45 minit.  E answit nou pou demann bann Manm, bann Onorab sakenn pou koze e nou ti a kontan limit zot koze pa pou 45 minit, me ant 10 a15 minit.  Mon averti ki si nou al pli lwen ki 15 minit mon pou aret zot akoz nou annan zis 2 zour pou nou travay.  Demen fodre nou’n fini deba lo Leta Lanasyon.  Koumsa ki Lendi ler nou komanse nou komans direkteman lo Bidze.

        E i pou pli korek si nou fer li en fason ki ler LOTO avek LGB in fini koze, nou fer li enn en konte, enn en kote e nou ava ale koumsa ziska nou fini.  Fotespere napa okenn obzeksyon, i annan en pe lord e mon espere ki sa lannen 2017 mon marto pa bezwen tap tro for.

        Avek sa mon a donn laparol Onorab Ramkalawan pou li delivre son repons pou Leta Lanasyon.  Mersi.

HON WAVEL RAMKALAWAN

Mersi bokou Mr Speaker.  Mr Speaker, Koleg MNA, ser ek frer Seselwa;  le 14 Fevriye zour lafet Sen Valentin, mon ti aplodi diskour prononse par Mr Faure dan son kapasite koman Prezidan.  Mon ti fer li pou detrwa rezon ki enkli.

(1)  I pa ti maltret personn.

(2)  I ti rekonnet sityasyon difisil ki Seselwa i ladan.

(3)  I pa ti fer en diskour Bidze,

e katriyenmman, i ti azir fran e admet ki sa sizyenm Lasanble Nasyonal avek en Mazorite LDS pe fer son travay parey Konstitisyon i demande e pe ede fer bouze sa pei.

        So parol sete;

 ‘‘Lasanble Nasyonal i lavwa lepep Seselwa.  Lasanble Nasyonal pe zwe son rol anliny ek son manda, konstitisyonnel.

 I pe fer bann deba lo bann gran size ki konsern pep Seselwa e son lavenir.  Lasanble Nasyonal pe osi egzamin bann aksyon ki Gouvernman i pran –  ki se swa lo son depans larzan piblik e lenpak son Polisi, stratezi e progranm lo nou popilasyon.’’  Fin sitasyon.

        Mr Speaker, mon realiz e vin pli konvenki ki sa desizyon ki lepep Seselwa ti pran an Desanm 2016, ti enn ki ti bon e ki vreman sa Lasanble in vin Lavwa lepep Seselwa.  Wi, pandan sa 4 mwan nou’n esey met lalimyer lo bokou keksoz dan nou pei e nou’n etablir en bon laliny kominikasyon avek Egzekitiv menm avek Zidisyer.

        Fodre pa alor ki nou les bann Dirizan ki parfwa dir Lasanble i en lobstak dan travay Gouvernman les zot konvenk nou.  O komansman en nouvo lannen, lanmen lo nou leker, LDS i dir nou pe vin travay e nou pe vin propoze solisyon pou bann gran difikilte ki nou pei pe fer fas avek.  Nou enterese parey tou Seselwa pou sanz leta nou Nasyon.

        Mr Speaker, ozordi plis ki yer, mon realiz e ki si dan nou pei ti’n annan en lespri ekoute, aksepte partisipasyon ;  rekonnet lide lezot e rod byennet Sesel e tou Seselwa, nou ti pou lwen.  Larises sa pei ti pou’n byen ganny distribye.  Size lakaz, ledikasyon, drog, lalkol, lapovrete e bokou lezot pa ti pou bann size konsern Nasyonal.  Nou lazenes ti pou epanouir e nou tou nou ti pou viv byen.  Nou’n mank sa balans e ozordi nou ankor pe rod solisyon atraver bann experiment kan nou tou nou realize ki problenm in vin bann gro montanny ki pou demann bokou plis zefor pou sirmonte.

        Me nou bezwen kantmenm pran en konsolasyon dan lefe ki ozordi omwen nou kapab met keksoz o kler ;  asize, dyaloge e adres bann size avek bi anmenn bann solisyon permanan, san ki personn i krwar zis sa ki li i dir ki konte.

        Byensir i ankor annan mefyans dan serten lenstans.  Siporter tou kote i dir fer atansyon.  Me ozordi nou bezwen admet i annan en nouvo lespri dyalog ki fodre i kontinyen pou byennet nou pei.

        Kot i byen nou pou kontinyen e fer tou dan nou posib e apiye.  Me kot i annan dout, nou pou demann kestyon e si fodre tenir pou ganny leklersisman nou ava fer li.  Personn pa devret azir koman bann robot.  Me a tou moman nou lespri ek nou santiman i bezwen gid nou e fer nou vwar meyer semen.  Sa ki pe arive dan nou epi ozordi, i istorik e alor annou viv sa moman byen avek senserite e konfyans pou ki bann zenerasyon apre nou i ava konstri lo sa ki nou pe batir.

        Mr Speaker, i enportan ki atraver sa sityasyon koabitasyon dan nou pei se lepep Seselwa ki sorti venker.  Tou kous nou sosyete i devret benefisye san ki personn i ganny kit deryer.  Sakenn i bezwen pran son responsabilite e asire ki i konsyansye dan son travay e zanmen pran en latitid ‘anvoy pronmnen.’

        Seselwa, letan nou travay nou pa kapab trenn nou lipye.  Si nou fer sa nou pou ganny kit deryer e etranze ki pou ranplas nou.  Sa mon pa aksepte e se pour sa rezon mon lans en lapel avek nou pep pou ki ansanm nou kapab re pran nou pei.  Partaz Byen larises nou pei.  Defann sa ki feb, ankouraz sa ki vayan e kree sa Nasyon Seselwa for e determinen.  Se sa laspirasyon nou tou.

        Mr Speaker, an 2017 i annan plis kouraz.  Seselwa i annan plis kouraz pou debout pou son drwa.  Mon vwar en pep ki pe dir ki personn pa pou anbet li ankor, ki pa pe rod zis zoli parol,  me plito aksyon konkret ki pou anmenn en diferans dan son lavi.  Aprezan nou bezwen al dan direksyon met sa laplenn nivo.  Fer dimoun dan Lotorite koz menm langaz avek nou pep e realize ki i nepli sa moman kot nou kapab tret nou pep koman boulko.  Savedir fer zot monte desann san ganny solisyon.

        I pou bezwen annan en sanzman radikal dan lafason fer keksoz dan nou pei, akoz Seselwa i anvi vwar bon Gouvernans, rann kont ek latransparans.

        Se sa ki mon’n toultan pouse pou vwar arive e ozordi nou bezwen pous plis ankor e pran nou responsabilite la ki nou dan sityasyon kot nou kapab transform nou pei ver sa rev ki dan leker nou Nasyon.

        Seselwa pe demann aksyon konkret.  Eliminasyon konfizyon e divizyon ki donn  direksyon kler.  Nou bezwen direksyon kler san lanbigite.

        Mon ti a propoze Mr Speaker, ki premyerman Mr Faure i ganny sa kouraz pou donn en lord imedyat pou retir portre Mr Michel dan bann biro Gouvernman.  Sa Msye i nepli Prezidan Sesel.  I Dirizan Parti Lepep.  Akoz alor ki son portre i bezwen ankor dan bann biro Gouvernman ?  Sa dan li menm i senm en serten konfizyon.  Kestyon ki lev-e se lekel ki vreman Prezidan ?  E nou’n vwar ki mannyer Zournal Nasyon ek SBC ti donn Mr Michel plis prominans ki Mr Faure dan sa konferans Abu Dhabi.

        Nou pe donn nou pei en nouvo direksyon e parey plizyer desizyon ki Mr Faure in anonse dan son Diskour, nou bezwen ranvers bokou desizyon ki Mr Michel li menm ti pran.  E ki in fer ou pei swa retour an aryer oubyen soufer.  O et depi Oktob 2016, nou trouv nou pe met lord dan nou pei par esey balye en kantite move desizyon rezim Msye Michel.

        Mr Speaker, mon kontan vwar ki malgre Mr Faure ti dan sa menm Ladministrasyon i pe ganny sa kouraz pou li demann leskiz zabitan La Misère.  Aksepte fot pou ferm NIE e menm pare pou ferm Prizon Marie-Louise, ki son predeseser ti dir ki letan bann kondannen Seselwa i al laba, fodre zet lakle.

        Alor, eski enn fwa pour tou portre sa Msye i kapab ganny retire ?  E dan son plas mon ti a propoze ki Sesel i adopte en nouvo tradisyon ;  kot nou nepli met portre Prezidan dan nou bann landrwa piblik, me plito nou senbol Nasyonal avek nou slogan Finis Coronat Opus.  The end crowns the work.  Finisyon en travay i kouronn ou zefor.

        Annou met en lafen avek sa tradisyon glorifikasyon imen e annou bouze sorti dan politik ‘’I did it my way,’’ ki’n zis fer nou ditor;  anmenn divizyon ek lanmertim e annou al ver vre linite.

        Mr Speaker, nou problenm pou kontinyen formant avek nou si nou napa kouraz pou konmsi Angle, ‘take the bull by the horns.’  Gouvernman sa pei ki enkli sa 3 brans i devret annan kouraz pou pran zot responsabilite a fon malgre tou kritik e sa i ava fer nou prodwi bann bon rezilta.

        San en lapros direk e for lo kote laverite ek lazistis,  Lannen ale, lannen vini nou ava ankor pe zwe menm sanson, sant menm litani e kaye lo menm paz.  En nouvo dinamiz i bezwen sezi nou e fer nou realize ki Sesel pa pou les li ganny pran o-taz par personn.  Swa bann dimoun ki swa vin ris lo maler lezot oubyen ki met lobstak dan semen sa pep, dan son lamars ver pli gran prosperite ek lorganizasyon son lavi.

        Mon fer en lapel pou ki sa sistenm protez dalon i ganny aboli e ki laplenn i vreman nivo pou ki sa ki annan bann plan e pare pou travay dir i ganny sa lankourazman neseser pou al pli lwen e ki lo lot kote sa ki anvi viv koman bann dimoun an deor Lalwa i soufer son konsekans.  Si mesaz pa kler nou pou reste otaz.

        Mr Speaker, Mr Faure in servi en fraz ki pou mwan i lakle nou problenm e sours tou nou difikilte an sa ki konsern sa lenzistis ki’n renye dan nou sosyete pandan tro bokou letan.

        Letan i ti a pe koz lo lakaz i ti dir sak fanmir i devret ganny asiste dapre son vre bezwen.  Letan nou met sa dan konteks nou pei,  i vedir ki fodre nou model sosyete i baze lo sa ki zis e ki tou dimoun i ganny regarde avek menm standar e se sa ki pou determinen ki mannyer keksoz i ganny deside.

        Malerezman se sa ki’n manke pandan tro bokou letan.  Wi nou bezwen elimin lapreferans, nepotizm, diskriminasyon ek koripsyon.

        Annou pa oubliye ki se sa bann fleo ki ede detri fondasyon sosyete e anmenn fristrasyon.  Tro bokou lar in koule e dimoun in soufer.  Ozordi fodre ki nou annan sa kouraz pou met en lafen avek sa bann tel latitid ki ankor pe fer letour dan bann biro landrwa pli o dan nou sosyete.

        Mr Faure i bezwen aprezan pare pou tradwir parol son Diskour an aksyon.  E sa i devret komans avek bann o- zofisye dan Gouvernman ki serten i ankor pe plas politik koman zot priyorite.  Annou pa krwar ki sa in arete, sa sanzman dan mindset i bezwen arive.  Letan serten PS i deside pou li pa reponn let bann MNA LDS lo konsern zot zabitan, aksyon i devret ganny pran pou sanz sa mantalite e asire ki sa sitwayen Seselwa i resevwar lasistans dapre son vre bezwen.

        Letan serten DA i kontinyen senm propagann ki pa korek, zis pou senm konfizyon e blok sa MNA LDS.  Sa osi i demann aksyon direk ganny pran.

        Letan dimoun i ankor monte desann dan biro Gouvernman san ganny solisyon pou zot problenm, Mr Faure i devret met son lipye ater koman Sef Egzekitif,  afen ki nou kapab ganny sa transformasyon ki nou pei i bezwen.

        An dot mo, mwan mon a pe dir ki nou sosyete i bezwen vin enn kot i annan menm loportinite pou tou dimoun.  E sa byensir i trouv son fondasyon dan aplik Lalwa pou tou dimoun dan menm fason.  Isi dan Lasanble nou pe travay dir pou nou trouv sa arive.  Nou pa pou repoze ziska ki i anrasin-en koman nou fason fer dan nou sosyete.

        Mr Speaker, nou bezwen sov nou lazenes kont drog.  Nou napa en swa.  I en misyon sakre ki nou tou nou devret angaze ladan dan nou pei.  Malgre serten gro Escobar pa tous sa pwazon, me plito kouver zot avek zot biznes, nou konnen lekel zot.

        Mon konnen ki pli gran leskiz ki ganny servi se ki i difisil pou anmenn levidans kont zot.  Sa leskiz nepli valab.  Ozordi moman in arive pou leta Seselwa azir konmsi vreman i dan en sityasyon lager e servi tou son resours pou raport laviktwar.

        Mon ti mazinen ki sanzman bann biye ti a ede pou idantifye sa bann dimoun ki annan milyon an deor sistenm labank.  Me malerezman nou’n mank sa bato e sa bann dimoun in kapab servi bann mwayen pou lav zot larzan sal san ganny remarke.

        Alor nou pei i bezwen al lo en lot nivo e s ase pa lot ki fer en resers detaye lo Byen sa bann dimoun.  Rod bann eksper pou balans zot reveni avek sa ki zot annan e apartir la pran aksyon konkret.

        Byensir pou annan bokou mirmirasyon.  Me kestyon ki nou bezwen demande se ; eski nou anvi rezourd sa problenm drog oubyen eski nou anvi ki i kontinyen ?

        Mwan Mr Speaker, parey avek ou,  mon anvi vwar elimin eroin.  Akoz mon fatige vwar nou lazenes pe mars parey bann zombi avek sereng.  Manman ki larm zanmen i sek.  Fanmir ki ganny vole zot Byen e travayer ki pe perdi zot zouti travay.  Tandis ki serten i viv koman bann lerwa ki par lao Lalwa.

        Mon demann Mr Faure pou servi tou pouvwar asosye avek son biro pou pa zis koz lo sa problenm me pou pran aksyon.

        Lasanble Nasyonal i pare pou donn tou sipor, an menm tan lo lapar tou Seselwa, mon enplor sa bann Escobar pou retir drog lo market e donn nou pei ek nou popilasyon en sans.

        Komans bann biznes prop e servi en pe zot fortin pou ed bann viktim.

        Mr Speaker, permet mwan lo non Lasanble Nasyonal, lo nou lekip pou felisit Mr Krishna Labonte dan son nouvo responsabilite koman CEO NDEA.  Mon ti ava kontan osi felisit Mr Ted Barbe avek Mr Romano Songor koman son de asistan.  Nou swet zot tou de bon e nou asir zot non sipor total dan sa travay.  Transform NDEA e anmenn sikse dan zot travay.  se sa ki nou pe dir zot.  Mon osi swete ki napa enterferans, preferans oubyen malis dan zot travay.

Dan menm fason sa size lalkol pe depas nou.  Ozordi Mr Speaker, ou antre dan laboutik e komodite ki annan plis varyete se lalkol.  Eski nou pou zis reste trankil lo la ?  Oubyen eski nou pou bezwen pas lo aksyon konkret ?  Eski i pa ler pou nou met tax baze lo poursantaz lalkol dan en fason pli strik ?  Wi, annou annan en bon deba dan Lasanble Nasyonal parey Mr Faure in propoze e fer tou propozisyon pou nobou konbat sa problenm.

Petet dimoun i devret deza komans anvoy sizesyon kot bann MNA an preparasyon pou sa deba Nasyonal.

Mr Speaker, tou dimoun i bezwen kapab viv dan nou epi.  Sa zafer zis gro pwason ki pou manze in ler pou arete enn fwa pour tou.  La mon anvi tous en pe lo sa size vertical integration.  Spesyalman dan lendistri tourism;  kot serten gro operater i krwar ki i zot drwa pou zis zot benefisye menm si zot frer ek ser Seselwa i mor lafen.

Gouvernman pou bezwen annan en nouvo regar lo sa size, a fen ki sa Seselwa ki’n ganny ankouraze pou lev-e debrouye, ki’n pran en loan pou aste en pti bato pou fer ekskirsyon, aste en taxi oubyen antre dan lezot aktivite i kapab li osi ganny en dipen letan sa komodite ki apel touris i vin Sesel.

Nou pti.  E alor i enportan pou analiz byen sa size.  Mon espere ki nou Lasanble i ava annan en bon deba lo sa size osi byento e nou ava kapab fer bann rekomandasyon avek Gouvernman pou entegre dan bann nouvo Polisi.

Sa problenm i vreman for, spesyalman lo zil Praslin e a la mon profite pou felisit bann biznesmenn lo Praslin ki deza pe zwenn ansanm pou form zot Lorganizasyon ki ava ed zot kapab debout pli for.  Mon asir zot tou nou sipor isi dan sa Lasanble.

Dan sa menm lespri, i enportan pou sa size procurement i ganny byen analize.  I annan bokou lenstans kot napa en bon tender process e nou vwar bann dalon ki pe ganny tou biznes e byensir sa i vin ek son koripsyon.  Sa kalite fason gaspiy larzan Gouvernman fodre aret imedyatman.  Fodre en revizyon konpreansiv ki pou anmenn comme bi koup koripsyon.  Servi byen larzan Leta e anmenn benefis pou nou pei an menm tan ki plis Seselwa i ganny sa loportinite pou fer biznes e devlope.

Mon anvi osi azoute ki sa i pou enn bann size ki komite FPAC pou pran li koman en son priyorite sa lannen.

Mr Speaker, la ankor nou bezwen enkilke en nouvo lespri ek etik travay dan nou Seselwa.  Napa nanryen ki pou nanryen dan lavi.  Minis Morgan par egzanp in finalman ganny kouraz pou dir ki ledikasyon pa pou nanryen.  Sa i byen.  Me fodre pa ki nou aret la.  Dan tou lezot domenn osi i neseser pou Seselwa kapab edike a-fen ki i pa tay lwen avek son responsabilite e kit sa swa pou Leta oubyen kominote.

Sa konsep ki politik pou protez ou, fodre ganny eliminen imedyatman dan nou sosyete.  E si tou politisyen – tou politisyen ti pare pou travay pou nou pei, mon plis ki sir ki nou ti ava kapab ede pou aret protez aktivite kriminel e fer nou pep vin en pep responsab.  Si en dimoun i konnen ki i kapab pa donn sa rannman dan travay, me ki i pou ganny proteze nou pa pou avans devan Mr Speaker.

Se sa ki mon apel ‘sa koze direk’ pou nou kapab avanse koman en Nasyon.

Mr Speaker, pandan deba lo Bidze nou’n osi koz bokou lo Bidze lasistans sosyal.  Mwan mon reste en dimoun ki krwar i bezwen annan en bon ledikasyon lo responsabilite sak endividi.  Par egzanp en zenn madanm pa kapab zis fer zanfan e apre espekte ki sosyal ki pou sonny son zanfan.

I nesesit en ledikasyon ki fer li konpran ki fodre ki i rod stabilite dan son lavi avan ki i anmenn en zanfan o monn.  Me sa ledikasyon i osi aplik pou bann zonm.  Akoz apre tou i pran en zonm ek en fanm pou fer en zanfan.

I vre ki sosyete i bezwen pran swen avek bann ki pli feb.  Me mon osi krwar ki responsabilite sa ki swadizan feb pou li, nou bezwen donn li responsabilite e li osi i bezwen pran sa responsabilite pou li pa vin pli feb.

Mon espere ki nou ava vwar plis diskisyon lo sa size sa lannen e ki sa i ava ede pou nou kapab pli byen planifye nou sosyete ek nou fanmir.

Me zisteman, Tribinal Lafanmir i bezwen bouz en pe plis lo sa size alimoni.  En zonm ki ganny anvoye prizon akoz i pa’n pey alimoni pa benefisye en zanfan.

Ranforsi Lalwa pour ki dan bann tel lenstans sa zonm i ava ganny mete dan en lanplwa e alimoni i ava ganny tire lo son lapey.  Sa i ava ed nou sosyete ; sa i ava ed nou dan nou Bidze Sosyal.

Mr Speaker, mon welcome sa lide pou annan en Minister pour Lafanmir.  Sa ti enn ou lide Mr Speaker, pandan ou kanpanny.  Ou’n ensiste lo la e alor mon anvi felisit ou pou ki sa desizyon ozordi pe ganny materyalize.  Mon esper ki sa Minister i ava kapab anmenn anba son lezel tou bann lorganizasyon ek lazans ki annan pou fer avek zanfan e byennet lafanmir.

Ozordi i annan tro bokou problenm e lefe ki i annan plis lorganizasyon non gouvernmantal ki pe ouver pou sey donn en koudmen, i en lendikasyon kler ki lafanmir Seselwa i dan problenm.  Me selman mon bezwen donn en pti parol kosyon.  Annou pa zis anmenn en novo Minister pou lapenn nou annan enn.  Me annou annan enn ki pou fer en diferans.

Koripsyon pa’n ganny mansyonnen ditou dan Diskour Mr Faure.  E pourtan sa i reste en size ki pe afekte nou pei.  Minis Finans i deklare ki plis ki R900 milyon tax pa ganny anmase.  Sa deklarasyon ti vreman sokan e byensir sa i arive atraver koripsyon.  I vreman ler pou ki nou regard bann ports of entry dan nou pei.  Ozordi nou tann tro bokou zistwar lo kwa ki pase kot Por oubyen Erport.  Containers ki kit Por san ki Lotorite i konnen.  Marsandiz ki pa ganny declare, ensidswit.

Annou met plis lanfaz lo tousala e omwen nou pep i ava ganny reveni ki devret gannyen e nou ava pli byen arme pou lager kont lapovrete ek pri lavi ki kontinyen ogmante.

Sa lannen nou pou osi ranforsi Anti-Corruption Commission.  I deza annan propozisyon pou fer sa lamannman e mon espere ki de ki sa komisyon i ava ganny etabli, travay i ava komanse pou nou regard dan bann koripsyon kot larzan nou pep i dan kont bann endividi olye anba kontrol nou labank santral.

Mr Speaker, anmezir ki nou regard Diskour prononse par Mr Faure, nou bezwen osi aksepte ki i pa’n vreman propoz bokou solisyon pou nou problenm ki in mansyonnen.  Se sa ki’n fer mwan dir o komansman mon larepons ki Seselwa i bezwen aksyon konkret.  Mon bezwen azoute ki serten propozisyon ki in fer.  Nou bezwen regard li pirman koman bann size a long term.

        Par egzanp, letan i koz lo ‘tinel’ ant Cascade ek Grand Anse Mahe ;  oubyen ant Beau Vallon ek Glacis, mon pa vwar sa koman bann priyorite imedyat.  Mon plito vwar en bon plan pou kontrol trafik dan lavil koman en size irzan.  Se la kot nou bezwen met nou zefor imedyatman.

        Me an menm tan ki nou fer sa, mon bezwen dir ki mon pa dakor avek sa lide fer en 3enm lane lo semen Francis Rachel ki pou vedir detri Lesplanad – en Sit Istorik.

        Mon’n ganny serten diskisyon avek Mer Lavil Victoria, Mr David Andre ki osi

konsernen avek en tel plan e mon’n promet li mon sipor kont en tel proze.  I osi enportan pou nou regarde ki mannyer nou kapab kontrol trafik ki rantre dan Victoria e ki kalite sistenm transportasyon ki ava bon pour nou lavil si nou anvi par egzanp fer li vin en lavil pyeton avek landrwa ver.  Alor tousala nou bezwen regard byen e diskite.

Mr Speaker, Sa size prizon i enn ki pre avek nou leker.  Depi ki enn mon parwasyen ti mor dan prizon apre ki i ti’n servi en peryod son santans Marie-Louise, mon santiman lo sa prizon Marie- Louise ti vin pli negativ.  Apre ki mon’n antann zistwar lasante serten bann kondannen, sa in osi fer mwan konvenki ki sa prizon i bezwen fermen e nou bezwen en lot fason fer keksoz.

Dan mon kanpanny prezidansyel, mon ti deklare ouvertman ki si mon ti ganny elekte, son lannmen sa prizon ti pou fermen.  La ki ou Mr Speaker, ou’n ganny sans vizit sa prizon e fer ou rapor, mon’n ganny sans tann ou pe koz avek lemosyon lo sa size.  Mon kontan pou antann ki sa prizon pou fermen.

Prizon Marie-Louise ti senpleman en move plan, me enn ki ti annan zis pinisyon, san pran kont sa eleman imen dan son ladministrasyon.  Kestyon ki mon pe demande, se akoz esper tou sa kantite letan pou ferm li? Akoz ki nou bezwen esper Novanm pou nou ferm sa prizon ?  Akoz keksoz pa ganny fer o pli vit posib e sa dan li menm i ava en gran savings pour Leta ?  Mon pe demande ki o-pli vit posib en tel desizyon i ganny pran, definitivman avan Zen sa lannen.

Me Mr Speaker, mon pa pou zanmen kapab oubliy sa lekspresyon ki ou servi letan nou ti an dyalog avek Mr Faure, State House.  Letan ou ti a pe koz lo ki mannyer pwason i ganny transporte sorti Mahe pou nouri bann prizonnyen e ou ti dir, ‘’this is like sending snow to the Eskimos.’’ 

Mr Speaker, lo lot kote i kler ki Montanny Posée sa prizon osi i bezwen pas dan en transformasyon profesyonnel.  Sa lenstitisyon pa kapab kontinyen parey i ete ozordi kot drog i rantre an-abondans, prizonnyen pe ganny Hepatitis C, sitwayen pe ganny menase atraver koud telefonn e dimoun lo rimann i trouv zot pe pik Eroin.  Mon welcome sa deklarasyon Mr Faure ki aksyon imedyat i bezwen ganny pran laba pou retourn li koman en lenstitisyon koreksyonnel e non pa sa ki i ete ozordi.

An plis ki sa, kondannen i merit ganny posibilite pou zot fer serten travay ki ava permet zot ganny en reveni, ki an retour i devret ed zot akonplir zot responsabilite, tel ki; pey zot alimoni, zot loan, ensidswit pour ki zot pa ava perdi tou zis akoz zot dan prizon.

Mr Speaker, mon pou siport tou progranm ki pou anmenn reform dan nou sistenm ledikasyon.  I enportan ki sa partenarya ant etidyan, lekol ek paran i devlop dan en fason pros e ki tou i konpran kanmarad.  I neseser ki tou paran i konpran byen e la ankor enn fwa mon pe koz direk ;  ki paran i konpran byen ki lekol i pa en mwayen adopsyon, kot ou renons tou ou responsabilite pou ou zanfan e fer li vin responsabilite sa ansennyan ek responsabilite ladministrasyon lekol.  E ki ou paran, ou sel responsabilite se pou ou vin zour sa ansenyan, ensilte tou dimoun kan problenm i avek ou e lafason ki ou pe elve ou zanfan.

Ansenyan osi, avek management lekol i bezwen zwe byen zot rol e pa krwar ki zot kapab fer sa ki zot, zot anvi.  Nou bezwen Mr Speaker, retourn disiplin dan nou lekol afen ki tou nou zanfan i kapab profit egalman avek bi ki sa ki for akademikman oubyen annan talan vokasyonnel i ava bouz pli devan dan lavi e donn nou pei talan neseser e sa etidyan li menm i ava vin en adilt responsab dan konstriksyon nou pei.

Letablisman bann legzanmen i ava determinen ki mannyer en etidyan i kontiny son parkour ledikasyon i enportan.  Pou met bann zanfan ki pli bon akademikman ansanm pou senpleman lev standar, ogmant konpetisyon ki pou annan comme bi, prodwi meyer rezilta e la mon trouv Regina Mundi Convent avek Seychelles Collage ki pe retournen e ki’n prodwir ou, Onorab De Commarmond, Onorab George, mon menm e bokou Manm dan sa Lasanble.

Sesel i bezwen bann meyer rezilta ki ava permet nou ganny bann profesyonnel, ki a son tour i ava koup lakantite etranze ki ozordi pe pran lanplwa ki ti devret pour Seselwa.

Mr Speaker, fodre nou fer atansyon ki avek sa nivo lapey ki nou bann profesyonnel pe gannyen ozordi, nou pa trouv nou avek plis Seselwa ki pare pou kit pei e al rod en meyer lavi deor.  Letan nou ti swiv deba lo Bidze, mon ti soke pou antann lapey en profesyonnel avek 2 Masters kot SFA, en minimonm R10 mil.  Si nou anvi atir e gard Seselwa, i pou enportan pou Departman Ladministrasyon regard byen dan reminerasyon ek benefis nou bann travayer.

Mon espere ki letan en Civil Service Commission i ava ganny etabli pli tar sa lannen, enn bann latas enportan ki zot pou bezwen fer se en revi total lo striktir saler dan Gouvernman e byensir sa i ava annan en lenfliyans lo Sekter Prive.

Zisteman Mr Speaker, en lot size enportan i ava posibilite early retirement a laz 55an pou bann dimoun ki’n travay dan en landrwa pour plis ki en serten kantite lannen, dizon 30 a35an anba byensir bann kondisyon spesifik.

Mr Speaker, Mr Faure in koz lo en dezyenm kab soumaren pou donn bann meyer servis internet.  Mon konpran son largiman, me malerezman mon pa konvenki ki problenm servis i zis avek kab ozordi.  Si zot ti servi sa ki nou annan byen, sa nivo fristrasyon parmi nou pep ti pou redwir e dimoun ti ava santi ki zot pe ganny valer pour zot larzan.  Malerezman la pour le moman, sa i pa le ka e nou pa tro sir ki Gouvernman pe fer ansanm avek bann operater pou rezourd sa sityasyon.  Seselwa i anvi aksyon.  Promes en dezyenm kab pa adres son problenm ozordi, me i plito fer li kapab vin pli fristre.

Mr Speaker, dan LDS nou’n fer en kantite propozisyon depi ki nou pe rankontre avek Mr Faure.  Mon bezwen dir ki en kantite sa bann propozisyon in ganny aksepte e fodre ki sa i ganny rekonnet.  Serten bann propozisyon pour lamannman Konstitisyon pou konsern serten sa bann size ;  sa i enkli lamannman Lartik 55 Konstitisyon konsernan ‘Pas Baton.’  Pou nepli annan en tel provizyon.  Size CAA ek Komisyon Elektoral, ki ava vwar sanzman konpozisyon sa bann lenstitisyon e lamannman Seksyon 4, SBC Act lo lapwentman Board SBC, i ava ede pou nou ganny en SBC pli endepandan ki deservi piblik dan en fason enparsyal an donnen bann pwennvi divers.  Nou osi nou pou anmenn serten morso Lezislasyon koman Private Members Bills ki ava ede dan fer agrandi nou demokrasi e ranforsi laliberte nou pep.  I deza annan 4 ki pou ganny debat o-komansman Mars.  Lalwa lo akse avek lenformasyon pou en morso Lezislasyon tre enportan, parski i pou permet tou Seselwa annan pli gran akse avek serten lenformasyon, spesyalman sa ki konsern li.

Dan sa menm lespri, lamannman dan Anti-Corruption Act i ava fasilit travay sa komisyon dan son lalit kont koripsyon.

Mon’n nonm serten sa bann laspe travay pou montre ki ozordi dan nou pei, Lasanble Nasyonal, avek sa mazorite LDS pe travay dan en fason serye.  E nou pa pe gard sa travay zis isi pandan zour ki nou zwenn parey ou’n fer resorti Mr Speaker.  E dimoun i war nou lo SBC.

Pandan Recess, plizyer komite in kontinyen zwenn e travay in kontinyen.  Koman Tyermenn 3 Komite dan Lasanble, mon anvi enform lepep Seselwa ki Komite Finans ti zwenn avek Minister Tourizm ek STB pou adres size zot Bidze.  Letan nou rezwenn pou diskit sa size, nou ava enform zot lo serten dekouvert e ki aksyon nou pou propoze.  Komite lo Laverite ek Rekonsilyasyon Nasyonal i annan lentansyon entansifye son travay pandan mwan Mars, Avril ek Me.  Pour ki lafen dimwan Me, nou pou prezant nou rapor pour laprobasyon Lasanble avan prezant li avek Mr Faure.  Nou espere ki deswit apre, sa Komisyon Nasyonal i ava ganny formen e dimoun i ava kapab vin donn zot levidans pou nou kapab kouver sa sapit dan nou listwar e avans devan ver Linite ek Rekonsilyasyon.

Lo lot kote, Komite ki konsernen avek bann zil in fini annan en premye rankont avek IDC e a parti Sanmdi, nou pe komans vizit bann zil pour nou vwar ki bann plan e ki pe arive e sa apre nou ava prezant nou rapor devan Lasanble pou regarde dan ki direksyon nou pou ale.

Alor parey zot vwar, nou Lasanble pe pran son responsabilite e atraver sa, nou vreman anvi konsolid li koman ou Lasanble, kot ou ava santi ki ou vreman annan par ladan.  Parey tou Seselwa i konnen, malgre bann lesey pou kondann sa Lasanble, spesyalman akoz Bidze pa ankor aprouve, nou ti fer sir ki anba Lartik 155 nou Konstitisyon, ki en rezolisyon pou aprouv R2.7 bilyon ti pase pou asire ki tou travay Gouvernman i kontinyen ziska ki Bidze i ganny aprouve.  E si sa bann zournalis ki ti pe demann Mr Faure kestyon yer swar ti pe vreman swiv sa ki pe pase dan nou Lasanble, zot pa ti ava gaspiy son letan pou sey demann li sa bann kestyon enbesil.

Tousala i fer serten dimoun fristre, me mon senpleman anvi dir ki nou en Lasanble serye, ki konn son responsabilite, ki pe travay pour Seselwa e ki pa enterese zis vin score pwen politik.  Avek en tel lespri matir, mon espere ki nou pou osi sanz politik dan Sesel e fer nou pep konpran ki se bann progranm politik ki pli enportan ki zis lensilt.

Mr Speaker, dan bann deba lo Bidze, tanzantan nou ti koz lo CSR tax, spesyalman an sa ki konsern bann lakonpannyen paraetatik, tel ki SEPEC, STC ek lezot  La ankor enn fwa, mon santi ki nou lavwa in ganny tande.  Me mon bezwen eksprim mon dezapwentman total akoz dapre Mr Faure i selman a parti le 1 Zanvye 2018 ki sa kontribisyon, sa tax pou al anver progranm Gouvernman pou konstri lakaz.  Mon demande ankor enn fwa ki sa i ganny revize e ki sa i komans ganny fer imedyatman.

 Si sa pa arive, mon pou kapab senpleman vwar sa koman en mannev politik pour ki bann Lorganizasyon tel ki Jj Spirit Foundation i kapab kontinyen benefisye parey zot ti a pe fer dan lepase san okenn kontrol.  Nou pou met nou lipye ater lo sa pwen e nou pou ensiste lo en revizyon sa dat imedyatman.

Si nou komans an 2017, letan nou’n ariv an 2018 pei i ava deza annan en bon fon ki ava permet progranm konstriksyon lakaz demare san okenn lobstak.

Parey mon’n dir Mr Speaker, sa pou en gran size deba dan prosen rankont avek Mr Faure padan ki nou regard mwayen Lalwa pou fer li arive.

Anliny avek sa, mon osi dezapwente ki mon pa’n tann nanryen an sa ki konsern plan Gouvernman an-relasyon avek Green Island Construction Company pou bann proze konstriksyon ek lenvestisman.  Nou tou nou ti soke pou antann sa swadizan Private Public Partnership, me ki ofet sete Gouvernman avek enn son prop lakonpannyen e ki mannyer olye vwar pri konstriksyon desann, nou ti vwar li egzorbitan.  Lo sa pwen Mr Faure pa’n ekout nou ditou e fodre nou fer nou lavwa ganny tande.  Nou bezwen ganny en keksoz kler akoz pour lemoman i annan bokou dout, spesyalman ki zot osi zot kapab donn zot CSR Tax e nou pa konnen lekel ki zot pe donnen.

Mr Speaker, letan mon pe al ver lafen mon anvi dir ki Mr Faure in koz lo sa moratorium lo konstriksyon gran lotel.  Mon anvi fer en pwen, en pwen tre kler menm si mon pa ankor vwar lalis bann lotel ki’n ganny aprouve avan ki sa ti ganny fer,  mon pwen i tre senp.  An sa ki konsern Grand Police, nou pou ensiste ki okenn lotel pa ganny konstri laba e ki sa morso nou Patrimwann i ganny garde dan son leta aktyel.  Vyerz e natirel.

Mon espere ki nou demann pa tonm lo bann zorey sourd, akoz sa pou annan son konsekans advers lo nou labote natirel.

Mr Speaker, vreman parfwa nou santi nou pe ferm kazo apre ki lyon in fini sove.  Sa ‘ban’ ki’n ganny anonse lo leksportasyon nwa Coco de Mer i bezwen ganny byen analize.  Mon dakor ki son model aktyel pa pou kapab kontinyen.  Mon konnen ki serten dimoun selman ki ti a pe byen pase e fer milyon tandis ki Gouvernman ti a pe selman ganny detrwa roupi.  Sa ti en lot form koripsyon parey tou dimoun i konnen e ti enkli bann dimoun lo pli o-nivo leadership nou pei.  Me mon krwar ki i ti pou bon pou fer en letid e regarde si sa leksplwatasyon pa ti kapab ganny fer pour ki Praslin Development Fund ek pei an zeneral i benefisye.  An dot mo, ranvers rannman an faver pei.  Sirman i kapab annan dimoun ki ava fer en biznes prop, dan latransparans kot pei i ava benefisye.

Mr Speaker, Sesel i bezwen komans rekonpans son sitwayen ki montre kouraz e vin bann legzanp dan lo kominote.  Mon kontan vwar ki diferan sekter i komans fer sa.  Me eski i pa ler pour nou annan en Award Nasyonal? Mon dir wi.

Pran par egzanp Mr Speaker.  Maurice.  Zot in devlop en Award ki zot apel Order of the Star and key of the Indian Ocean.  Zot rekonpans zot prop sitwayen me osi bann dimoun an deor. Langleter i annan sa ki pour li.  Sa ti ava permet nou rekonnet dimoun ki fer bann travay distenge pour nou pei, oubyen ki montre kouraz egzanpler e la mon mazin par egzanp nou frer Aubrey Jacqueline.  Lannen pase le 15 Out ki ti sov en pti garson e ki ti tenir e son temwannyaz ti tous nou leker.  Mon mazin Mr Luc Grancourt ki letan son bato ti koule i ti annan sa kouraz pou li sov tou sa bann dimoun.  Sa bann kalite dimoun ti ava kapab ganny rekonnet lo nivo Nasyonal.

E alor lide Mr Speaker, se pour nou valoriz Seselwa, me an menm tan letan nou annan viziter enportan, par egzanp en Sef D’eta ki vin lo en vizit ofisyel, koman en zes lanmitye, zot osi zot ti ava ganny dekore.

Mr Speaker, letan mon pe terminen, mon bezwen eksprim mon apresyasyon pour tou bann dimoun ki’n kontribye pou anmenn en nouvo lespri dan nou pei Sesel.  Nou pe reisi retir lafreyer dan nou pep e fer zot konnen ki koman sitwayen sa later beni, zot annan drwa ek responsabilite.

In en travay long, difisil e riske.  Mon konvenki ki si sa eleksyon 2016 pa ti’n donn sa rezilta, nou ti pou ankor dan lafore pe rod direksyon.  Ozordi Leta nou Nasyon in sanze e fodre zanmen nou retourn an aryer ankor.  Nou direksyon se devan avek bokou kouraz.  I annan bokou travay ankor pou fer.  Me nou determinen e alors lafors ki dan nou pep pou permet ki Sesel, Touzour Sesel, i sorti premye.

Mr Speaker, mon’n aprann ki dan lavi fodre ki premyerman ou bezwen krwar dan serten prensip.  Sa se ou lafwa ki donn ou en fondasyon solid.  Pa zanmen vwale kot sa bann prensip i konsernen.  Reste atase avek zot.  Pa konsider ou koman en komodite.  Donn sa ki ou annan pou devlopman ou kominote.  Pa les lobstak fer ou divage e perdi direksyon.  Tenir, menm si sa misyon i paret enposib.  Se sa kouraz ek sa determinasyon ki pou anmenn ou dan sa por.  Vann swet, siklonn, loraz, zekler i kapab frap ou,  me sa ki tenir ziska lafen ki raport laviktwar.

Lazenes Seselwa, avek zot rev, travayer Seselwa avek zot kouraz, Seselwa an retrete, avek zot lasazes, mon envit zot tou pou ede dan transformasyon nou sosyete.  Demen pou tro tar.  Annou fer li ozordi.  Annou les nou Bondye beni nou pep ek nou later e annou permet li nou Bondye tou pwisan pou donn nou sa kouraz pou ‘Pa Zanmen Les Tonbe.’  Mersi bokou.

(APPLAUSE)

MR SPEAKER

Mersi Onorab Leader Lopozisyon e prezan mon a donn laparol Onorab De Commarmond.  Leader of Government Business.

MR SPEAKER

Mersi Onorab Leader Lopozisyon e prezan mon a donn laparol Onorab De Commarmond.  Leader of Government Business.

HON CHARLES DE COMMARMOND

Mersi Mr Speaker.  Mr Speaker, koleg Manm Lasanble Nasyonal,  Pep Seselwa, bonzour.

        Mr Speaker, mon byen kontan pou nou kapab nou Lasanble e pou mwan personnelman komant lo Diskour Leta Lanasyon Prezidan nou Larepiblik son ekselans Prezidan Danny Faure.

        Sa voyaz, nou’n vwar klerman ki nou Prezidan in vin devan nou avek tout lonnekte e in fran avek lepep.  Set en Diskour ki in fer kot in met Leta Lanasyon dan son lanpler e in dir nou kote ki i santi bann problenm i ete dan nou pei.  Lo nou kote nou welcome sa diskour.  Nou welcome son bann lide, son bann pwen ki in fer e nou annan en pe keksoz pou nou azoute.

        Nou remarke seryezman ki Prezidan Faure in gard e in swiv bann prensip e progranm nou Parti ki nou isi nou’n debout for lo la e ki bann prensip ki nob.  Bann prensip ki bon pour lepep Seselwa.

        Lefe ki in gard sa pou diriz li dan son fason panse, dan son fason fer e dan son bann pwen ki in met devan, mon vwar poudir nou kapab siport li dan sa fason e promot e donn li koudmen pou rod solisyon pou sa bann keksoz.

        E nou vwar osi en kantite pwen.  En kantite pwen ki nou isi, ler mon dir nou isi i vedir bann manm Parti Lepep dan Lasanble pandan plizyer lannen nou’n dir en kantite sa bann keksoz.  Me kote problenm i été ? Nou kapab poz nou lekor kestyon.

        Si lontan nou pe dir, in annan bann moman letan osi kot in annan Lopozisyon dan Lasanble.  Kot Lopozisyon osi in donn koudmen pou dir me i pan ganny ekoute.  Kote problenm i été ?

        Avan mon vin lo kestyon kote problenm i ete.  Mon anvi osi fer nou reflesir en pti pe.  Nou dan nou pei nou sorti lwen nou.  Ti annan bann sanzman all along.  Lontan nou ti konplent ledikasyon pa tou dimoun ki ti annan, lakaz pa tou dimoun ki ti annan.  Devlopman pa tou ki ti benefisye ladan.  Ti annan en bann problenm.

        Prezan letan nou’n sanz tou sa.  Kote, konmsi kote prezan nou ete.  Eski sa ledikasyon ki ozordi nou annan i pa fer nou vwar pli lwen devan nou ?  I fer nou reste dan sa problenm ?  Konmsi mon pe poz sa bann kestyon pou fer nou reflesir.

        Ler nou Prezidan i koz lo problenm lafanmir, problenm drog, problenm lalkol,  mon pe demann mon lekor en kestyon.  Lekel ki dan lalkol, lekel ki dan drog ?  Zis en kalite dimoun.  Be nou pa’n edike pandan sa letan ?  Mon oule dir ki dimoun ki edike mon vwar zot osi dan drog.

        Alor sa problenm konmsi mon oule dir i pli gran ki nou, i depas nou.  Se sa rezon ki nou, nou Lasanble nou annan en rol kardinal, mon dir en rol kardinal akoz i en rol for pou nou zwe pou donn koudmen Egzekitiv –  koudmen nou Nasyon pou reflesir pli devan pou permet rod solisyon permanan pou nou bann problenm.

        E la mon kontan lapros Mr Faure in pran, ki nou Prezidan in pran pou kapab rod ansanm ek nou sa solisyon permanan.  E solisyon permanan Mr Speaker, nou bezwen pran bann desizyon radikal.

        Les mwan vin kot mon ti pe sey komanse, lo kestyon sa bann desizyon.  Sa bann problenm ki nou annan.  Nou isi parey mon’n dir, nou’n dir sa bann keksoz depi tou sa letan, me akoz pa’n ganny fer.  Le kestyon i la.  Akoz pan ganny fer ?

        Eski napa striktir vreman ? Eski dimoun ki pa’n ekoute ?  Eski Leadership ki pa’n swiv ?  Kote problenm i été ?  Eski Lasanble li menm, in pa’n pous ase ?  Bann lezot lenstitisyon, zot rol.

        Mon pou retourn ankor en pti pe an aryer pou fer nou realiz lo sistenm ledikasyon.  Mon pran Kolez ek Kouvan, in ganny mansyonnen dan nou Lasanble ozordi.  Me sa kestyon Kolez ek Kouvan, nou pa bezwen retourn li nou ozordi nou.  Mon asire poudir Larelizyon Katolik i pa pou oule al manage tou sa bann zafer ankor ozordi.  Sepa si pou kapab annan sa kapabilite pou fer li.

        Me selman i annan keksoz ki ti bon dan sa bann lenstitisyon.  Mon mwan issue se ki ozordi nou Minister Ledikasyon i bezwen pran sa bann keksoz dan nou sosyete, dan nou past ki’n bon e kontinyen servi li.  Si i ti bon pou nou dan sa letan, bann ki ti Kolez – Kouvan,  be then serten keksoz i kapab ganny fer pou benefisye nou pep ozordi.  Sa i en pwen.

        Lot keksoz se ki tou sa bann pwen ki Prezidan Faure in fer sorti, i bezwen ganny enplimante.  Mwan mon problenm se lekel ki pou enplimant sa bann pwen ?  Mon’n dir taler, en kantite keksoz nou nou’n dir.  Me pa i bann Minis, pa i bann Sekreter Prensipal ?  Ou pran ou taler, ou’n ganny mansyonnen portre Prezidan dan bann biro.  Oule dir mwan fodre Prezidan Faure i dir tir portre Prezidan Michel, nou former President dan bann biro ?  Be pa tou dimoun i konnen poudir eleksyon ti pase e apre nou Prezidan Michel in sorti, in dir i pe ale, in resigned,  me pa tou dimoun i konnen sa ?

        Me sa bann Minis, sa bann CEO, sa bann Sekreter Prensipal,  pa okouran sa ? I pa servi son lespri poudir be la i annan en nouvo Prezidan.  Tire, i kapab kit vid si i oule.  I kapab met nou Crest.  I kapab met portre Prezidan Faure.  Nenport kwa.  Me i kler.

        Konmsi pou mwan, la mon pa kapab konpran.  Eski fodre Prezidan Faure ki vin dir sa.  Sa pou mwan dan li menm i montre kalite nou sistenm, nou Gouvernman, nou mindset ki mannyer i ete dan sa pei.

        Nou kapab tous en kantite pwen, nou pou retourn back lo sanmenm sa issue mindset.

        Mwan, mon a donn en lot legzanp, en lo pwen.  Koz lo prizon.  I kler, ou ti dir mwan Mr Speaker, letan ou ti pe al Prizon Marie-Louise, ou bezwen al get en kou,  be prizon letan nou’n kondann en dimoun –  lontan ou vwar Mr Doway.  Nou ankor mazin Doway nou.  Mr Doway, prizon ou travay e letan ou sorti pa sosyal ki pou donn ou en larzan.  Ou ti’n travay, ou larzan ou’n fer dan prizon i pa pey ou parey, me selman ou annan…. Pa ti en bon pratik sa, akoz ki nou ti bezwen sanze ?

        Annou revwar, si i en ti en bon pratik, annou met li.  Sa i a tir presyon lo sosyal.  I a fer ki sa dimoun letan i sorti i sorti dan prizon i konnen i annan en pti kondyou la.  Sa i ed li pou rekomans son lavi.  An menm tan, si i annan son alimoni ou bezwen fer li travay e tir son alimoni laba.  Pa kapab letan i al dan prizon, prezan son madanm li i pou al devan Sosyal poudir vwala, mon piti son papa i dan prizon.  Sosyal konmsi ou ti fer piti ek Sosyal.  Prezan Sosyal li i pou bezwen donn ou alimoni  pou sa piti.

        Mon krwar mwan, nou bezwen obliz bann dimoun pou ale, si pa konnen lekel paternite, lekel papa,  ale fer DNA, sa nou ava ed li.  Fer son DNA, nou a konnen li papa.  I a bezwen travay laba e i pey son alimoni.

        Lot pwen pou kestyon prizon.  Nou konnen i annan bann dimoun ki’n vole ki al dan prizon.  E letan gard i tyonbo li.  Letan in ganny kondannen i konnen i ti vol tel keksoz pou tel dimoun.  Be ou bezwen fer li travay dan prizon, i rann sa keksoz.  I bezwen rann.

        Mwan mon krwar koumsa i pa kapab zis konmsi vole, i al dan prizon apre i sorti happily ever after.  I bezwen travay e rann sa ki in pran, sa ki in vole pou bann dimoun.

        Mon krwar mwan sa i bann keksoz ki i bezwen o pli vit posib.  Si vreman nou anvi vwar sanzman dan prizon, sanzman dan lafason prizon i ganny administre,  serten sa bann keksoz i bezwen vin vitman sa.  Pa kapab esper lafen lannen.  Pa kapab esper ankor detrwa lannen.  I annan keksoz ki kapab ganny fer vit dan nou pei,  let us do it quickly and now.  Mwan mon krwar koumsa.

        Me selman, i annan osi serten lezot pwen.  Mon pran sa kestyon akse lo lans par egzanp.  Mon pa oule al fer en soz lo la.  Me selman ler mon’n get serten portre dan serten magazin ki’n sorti, lo Facebook tousala,  mon poz mon lekor en kestyon.  Si en akse in blok en lans en konparezon dan sa fason,  i pa kapab son met zis in vini fer koumsa a son plezir.  I annan en fason fer ki ou bezwen pas atraver Planning.  Be Planning i responsab.

        Oule dir mwan Minis in pran Seksyon 10 ?  I kapab. Minis in bypass Planning, in servi Seksyon 10.  I kapab donn permisyon li pou konstrir.  Me konmsi kot i sorti sa Minis ?  Dan Gouvernman ki la.  Ok ?  Be konmsi e sa Planning osi tou sa  Planning Authority.  Be konmsi, me zot lespri i pa dir zot e zot konesans i pa dir zot poudir i annan en Lalwa ki anpes ou konstrir lo lans koumsa dan sa fason ?  Kantmenm ou pou servis Seksyon 10 an konparezon.

        Ouswa whoever ki’n desid sa, me son lespri pa i dir li poudir sa i vreman kont Lalwa ?  Si ou ti a pe dir mwan ou ti pe fer en keksoz ki ou ti dan konteks Lalwa, ou dan konteks Konstitisyonnel,  mon ok mwan.  Ou’n fer li dan sa fason.

        Me selman la i kler. Akoz ki nou fer li ?  Akoz ki nou fer li pou fer ki nou Gouvernman apre ouswa nou Parti ouswa nou Prezidan, apre i ganny mal gete konmsi.  I annan problenm ek dimoun ki annan responsabilite dan pei.  Dan sa bann landrwa ki nou’n donn zot responsabilite, i annan problenm ek zot, zot pa pe egzers zot responsabilite, korekteman.  E mon krwar la i annan problenm.

        E letan mon pe dir sa i fer mwan pe mazin dan lagon la kot Eden Island.  La mon vwar en devlopman in stop.  Nou donn permisyon pou konble, nenport kwa –  nenport ki moman, nenport ki fason.  Selman Cascade kot nou bezwen landrwa pou konble.  Ki dimoun Cascade, sa senp dimoun i napa en landrwa kekfwa i reste en pti pe pli o i napa landrwa pou met son transpor.  I dir be nou a konble en pti bout nou a kapab met nou transpor la.  Sa Planning i a trangle ou i a dir ou non pa posib, pa isi, pa laba.  I pa oule disilt lagon, be selman i oule proteze.

        Be ou pou protez kwa ?  Ou pa oule disilt ou konnen ki pou arive ?  Mr Speaker, ou en syantis ou osi. – ki pou arive, i pou konble son lekor li menm avek lannen.

        Me nou bezwen vwar en fason pou nou manage sa bann landrwa pli byen.  Be mwan mon pa konpran serten keksoz, ki mannyer serten dimoun dan pozisyon, i pe reflesir dan nou pei e zot pe met an egzekisyon serten keksoz ki fer nou ganny mal gete.  Mwan mon dir sa e mon dir fran mon osi,  nou bezwen sanz nou latitid vizavi sa bann keksoz.

        Mr Speaker, mwan osi mon pe koz  koumsa e mon pe lev sa bann pwen akoz i bann keksoz ki pe fatig nou  e ki pe met nou an retar.  Lo sa pwen mon anvi osi dir ki nou Lasanble avan, Senkyenm Lasanble.  En kantite pwen nou’n anmennen pou sanz keksoz dan nou pei.  Par egzanp pran sa kestyon kot nou pou donn permisyon en dimoun ki annan son later pou li kapab subdivide son later pou ed son zanfan.

        Nou’n anmenn bann propozisyon poudir Planning revwar son Polisi vizavi sa.  Sa ki nou apel density issue la.  Be tou dimoun i konnen.  I dir ou wi, i vwar problenm.  Mon’n demann zot laba kot Planning.  Zot vwar, sa ki ansarz Planning i vwar li.  Minis osi i vwar li, i dir ou wi en bon pwen sa.  Selman zot pa fer, zot pa fer.  Fodre Prezidan i dir, ou kwa?

        Mwan mon oule dir la, mon oule lans en lapel pou ki serten keksoz ki kler, serten Polisi ki bezwen ganny sanze,  annou sanz li la. Annou pa esper demen bomaten.  Fodre nou annan legzanp ankor Mr Speaker.

        Ou pran ou Praslin.  Praslin si ou annan en pti lotel la, pti letablisman,  ou napa drwa annan car hire lo ou non – lo non sa lotel la.  Ou bezwen met li lo en lot non.  Non ou piti, lo non mon pa konnen kwa.  Pourtan i annan 3an, pe al lo 3an la Gouvernman dan Cabinet in deside, in dir sa fodre arete.  Mahe li lot fason li.  Mahe ou kapab fer.  Ou kapab met lo menm lenstans.

        Konmsi la Praslin, mon konpran ler zot ti pe demann zafer repiblik Praslin, mon kapab konpran sa.

        Be Mr Speaker, be Cabinet in donn desizyon.  Be nou pa fer ?  Be mon pe konpran ziska la ki mon pe koz ek ou la, i ankor koumsa.  Be i annan problenm avek legzekisyon bann keksoz e sa i fatig nou e sanmenm sa ki fer dimoun fristre.

        Prezidan Faure, in koz en bann zoli keksoz.  Tou dimoun in kontan.  Pou  mwan sa mon dir it’s a people’s speech.  Sa ki in koz i tous lepep Seselwa, i dan benefis e lavantaz lepep Seselwa tou sa ki in dir.

Me prezan lekel ki pou enplimant sa ?  Si nou kontinyen avek sa latitid ki mon pe eksplike, sa bann keksoz pou reste zis lo papye.  Sa bann pwen i pou reste zis lo papye e i pa pou ganny egzekite.  E la nou pe lans en lapel.  Nou Lasanble i lans en lapel e i dir avek Gouvernman, bann Minister, bann Departman silvouple al fer keksoz pou keksoz marse.

Ale al egzekit sa ki Prezidan pe dir la.  i annan keksoz e Prezidan in dir fer lavi dimoun fasil.  Annou fer lavi fasil.

        Ou pran ou Licensing Authority. E  la nou kontan i annan en nouvo CEO laba e li osi i vwar bann pwen ki bezwen sanze.  Bann Polisi ki bezwen sanze.  Ou pa kapab annan  license pou loto, pou enport loto ek license pou enport moter menm parey.  Mon dakor tou lede i annan larou, tou lede i annan en masin avek.  Me selman ou bann kondisyon pa kapab parey.  Par egzanp ou bann deposit ki ou bezwen annan, pa kapab parey.

Ou pa kapab dir mwan ou bezwen annan en deposit sepa 600mil pou loto e pou moter i bezwen parey.  Nou bezwen revwar, i annan serten keksoz ki kler, ki evidan.  Be fodre met legan parey nou dir an Kreol pou fer sa bann sanzman ?

Prezan sa ki vini, ler zot pa fer, ou ganny ou prezan Lopozisyon.  Ou lontan ou pe dir ou.  Prezan li Lopozisyon i vini, ler i dir prezan i vin en presyon.  Ki zot fer epi, Lopozisyon i pran kredi.  Mon dir sa koumsa akoz i pas koumsa.  Ou konpran.  E la -be mon pe dir onnet mwan, mon pe fran mwan.

E la se sa mon pe dir ;  dan Gouvernman, dan Egzekitiv la,  Dan nou ladministrasyon piblik, nou bezwen sanz nou mindset pou revwar keksoz lot fason e mwan sa kalite latitid mon pa dakor avek e mon oule ki vreman, vreman zot sanze pou fer pei avanse e non pa pou zot azanda personnel.

Lo sa pwen i fer mwan osi get detrwa keksoz dan nou pei.  Nou’n fer en kantite devlopman Mr Speaker, nou lekonomi in grandi nou.  Nou’n ganny s aki nou apel economic growth.  Pandan plizyer lannen e i pe kontinyen grosi en.  Nou’n fer miting avek tou bann lenstans, menm IMF, Word Bank in vini,  i dir ou, zot osi zot vwar – Sesel pe grow economically.  Me si i pe grow, Seselwa i bezwen, parey mon’n dir toultan mon annan par ladan.  I bezwen vwar li pe benefisye, pe gannyen.  Me la i annan keksoz ki pa pe aziste byen.

Minister Ledikasyon i bezwen kree sa dimoun pou kapab travay dan sa lekonomi. Akoz la i annan bann challenge la ki vini la.  lekonomi i grandi, nou’n privatize.   Nou’n liberalize.  Ou pe vann bann shares. Eki ou pe vann ?

Be si ou annan en pep li, i pa’n pare li pou li aste share.  I pa’n pare pou li travay dan sa lekonomi.  E li i pa pare pou li envestir dan sa lekonomi e ou pa kree sa lanbyans e sa sityasyon  pou li epanouir li osi, ki ou pou fer ?  Ou pou vwar etranze zisteman ki pou vini, i pou pran sa ki ou, ou pe met devan e li i pou ale avek e nou, nou pou reste deryer.

Alor la mon pe lans en lapel ek Gouvernman, enn.  Gouvernman i bezwen revwar sa fason ki i pe pey dimoun.  i pa kapab pe pey travayer ki annan Degre konmsi i pe pey labourer.  Mon dir li koumsa akoz i kler i koumsa ozordi.

I bezwen sanz son mindset li osi Gouvernman, DPA i bezwen revwar son fason ki i pe azir.  DPA i bezwen vwar li osi sa progre ki nou fer.  I bezwen vwar poudir etranze letan i vini, i pe ganny plis larzan.  Son kondisyon i plis ki sa Seselwa avek menm Degre ouswa menm ki li sa etranze i mwen kalifye ki nou Seselwa.

E alor la i bezwen annan sa lazistis. E mon asire mwan,  si sa Seselwa i ganny peye korekteman i pou kapab fer en pli bon travay dan son lekonomi.

I annan en lot problenm.  Pa kapab dan sa sityasyon kot nou pe enport travayer etranze e ou annan dimoun ki sorti dan ou sistenm ledikasyon ki pa pe travay.  La letan mon pe koze, mon pe mazin detrwa manrmay Cascade, senn dimoun, zenn marmay –  i annan ki’n sorti dan lekol, ki kalifye pou vin en plonber,  me kot i al rod en travay, PUC partou i dir li fodre i annan leksperyans.

Be i fek sorti lekol li, ou konpran.  I kalifye laba kot lekol kot i train plonber, i fer ou vin plonber,  prezan la i bezwen al travay pou li annan leksperyans.

Nou Gouvernman i bezwen imedyatman – e la Minister Lanplwa avek Minister Ledikasyon i be zwen fer ki tou manrmay ki sorti lekol ki letan i fini graduate i ganny en travay.  I bezwen annan travay la, si nou pe enport sa ta etranze la, i bezwen annan travay pou tou Seselwa ater la.

E alor nou bezwen rod en fason pou tou sa bann zanfan antre dan travay.  Kantmenm i ava tanporer ziska ler i a ganny sa ki li i anvi, me i bezwen travay.

Pa kapab etranze i vini,  li i pe travay e ou Seselwa li i pa pe travay.  E la mon demande ki imedyatman aksyon i bezwen ganny pran lo la.  Nou bezwen fer sa zanfan antre dan lemonn travay sansan tou sa ki nou pe koze pou li pran responsabilite, pa pou kapab.  Ou pa donn li en travay ou pa kree kondisyon pou li travay.  Ki oule i fer ?  La i ava annan tantasyon, la i ava al dan keksoz ki pa fodre fer.  E nou, nou bezwen alor don li koudmen.

Letan mon pe dir tou sa, dan sa lekonomi ki nou pe dir i pe grandir e i annan en keksoz ki apel responsabilite osi.  Seselwa i paret la, serten dimoun, mon bezwen felisit zot.  Bann ki pe travay for, bann ki pe fer bokou.  Be i annan lot ki pa fer much.  I annan dimoun ki pa pe pran responsabilite across the board.  Dimoun i pa kapab, i oule sa mantalite parey avan, kot i asize e i krwar sosyete i pou bezwen fer tou pou li.

Mon krwar la i bezwen bouz devan, i bezwen pran responsabilite li osi.  Akoz sansan sa devlopman ki pe arive, sa economic growth ki pou arive, li i pou napa par ladan akoz li i pe prefer pou reste deryer pou deside al dan son drog, dan son lakol,  pa pran responsabilite, zis mont lo Facebook kritike an mal e… -Ou konpran ?

Alor mwan mon krwar Mr Speaker, ki dimoun i bezwen pran responsabilite pou li kapab bouze avek sa sityasyon ki nou pe kree dan pei pou li kapab e osi envestir.  Be la letan mon koz lenvestisman, Gouvernman –  mon ti annan en Mosyon mon ti pase, mon ti met devan Lasanble dan Senkyenm Lasanble ankor.  Kot mon ti dir letan i annan dimoun ki vin avek bann nide inovativ, ki annan inovasyon Gouvernman i bezwen rod en fason pou sipor sa bann nide.  Par egzanp nou pe koz fer desann pri lavi.  E si ou annan dimoun ki vini avek fason konkret pou fer desann pri lavi e li dan proze i pe rod en bout later pou li devlop son konsep ouswa pou li agrandir son biznes –  me ou pa get li ? Ou pa fer li ganny en loan labank ?  Loan Labank ozordi si ou ale, 24 poursan lentere.  I enposib.  Be savedir Gouvernman i oule ki etranze li i vini, i envestir dan ou pei,  i pran tou i ale e Seselwa i pa ganny sans pou devlope akoz i pa ganny sans a kapital.  Kapital i en problenm.  Kapital i reste e dan lanmen etranze e Seselwa li i pa pou gannyen akoz lentere lo kapital, lo son loan ki i pou al pran i tro o e labank la i annan problenm.

Alor la mon, on pe osi lans lapel pou ki Minister Finans, Central Bank spesifikman, i o pli vit posib, mon re dir ankor pli vit posib,   bouze pou ki i fors labank pou labank donn loan korekteman e avek en lentere rezonnab bann dimoun.

Labank pa kapab li i donn ou 2 poursan lo ou savings me selman letan ou vin pran en loan 24 poursan ou bezwen pey li lentere.  I pa marse, pa bon e sa latitid i bezwen sanze.

Nou pe dir pete les bann lezot labank antre ankor.  Fer annan plis ki sa 4/5 labank ki nou annan.  Si zot pe fer koumsa, zot pa pe rezonnab.  So sa i presyon ki mon krwar i Leta nou Nasyon kot i pa pe permet devlopman biznes pou permet Seselwa bouze e avans plis.

Lot pwen Mr Speaker, ou vwar, dan tou sa ki mon pe dir la,  Ou bezwen ledikasyon.  Taler mon ti pe koz lo Minister Ledikasyon.  Ledikasyon i bezwen kree sa travayer ki nou oule.  Si ou pe rod plis Dokter.  Fer krwar la nou pe rod plis Dokter.  Me nou bezwen annan en progranm, dir sa lannen, sa detrwa lannen la plis latansyon i pou lo formasyon Dokter.

Si demen ou bezwen pli enzenyer, ou bezwen dir, la la mon bezwen.  Konmsi dimoun ava konnen, i bezwen annan en latransparans dan en fason, i konnen e li i met li pare pou al dan sa direksyon.

Alor i annan sa kestyon responsabilite ki mon pe dir an menm tan, me i annan osi kestyon kot Minister i bezwen osi kapab focus e vin transparan lo sa bann keksoz ki dimoun ava konnen e i ava al dan sa direksyon.

Lo sa pwen, mon kontan ki nou pe revwar Lalwa ki konsern ledikasyon.  Nou’n sorti lwen, prezan nou bezwen gete ki mannyer nou pou fer pou sustain pou donn sipor dimoun, nou bann zanfan pou kontinyen son ledikasyon.  E mon kontan Lalwa pe vin pou ganny amande dan sa direksyon.

Lalwa osi i bezwen ganny amande kot i konsern lasante.  Lasante nou annan en gro problenm.  I vre Prezidan in mansyonnen, nou bezwen al vwar sa kestyon lasante ki dimoun ki malad ki bezwen al fer tretman deor e osi Doctors Council i bezwen ganny revwar.  Pa kapab annan sa kantite Dokter ki fer bann, ki ou annan bann neglizans.  En bann dimoun pa pe ganny byen tretman e ki i annan bokou neglizans.  Mwan mon santi Doctors Council i bezwen revwar son Lalwa pou kapab met presyon lo bann Dokter pou ki Dokter i delivre pli byen e an menm tan pou ki i annan osi en lasirans ki kouver zot.

So sa osi i enn bann issue ki nou bezwen pe get dan sa direksyon pou ki nou fer ki nou Nasyon i al dan sa fason, dan sa direksyon pli byen.

        Mr Speaker, Leta nou Nasyon ki Prezidan in fer pase, in met devan nou,  mon krwar osi ki i anmenn nou pou vwar kote nou pou ganny larzan pou sustain nou lekonomi.  Mon vwar osi ki bann gro biznes pa pe pey zot tax korekteman.  Mon demande la bann led ki nou gannyen avek IMF, ek World Bank,  letan zot vin isi pou vin fer diskisyon ek Minister Finans, ki Minister Finans i demann sipor e lasistans pou kapab donn koudmen pou al vwar ek bann gro biznes ki zot pey zot tax korekteman.  Pou ki sa larzan i gannyen pou nou kapab sort out bann problenm ki annan dan sosyete.

        La nou pe koz lo kestyon lafanmir.  Minister lafanmir, nou bezwen anmenn Mosyon or nou bezwen anmenn en Bidze Siplemanter dan Lasanble pou ki nou ganny Bidze pou sa kestyon Lafanmir.  Me sa kestyon lafanmir la, nou bezwen fer sir ki nou donn li tou sa sipor e ki sa bann pwen ki nou pe koze dan nou Lasanble ozordi i bann keksoz ki nou pa per pou afransi li.  Nou pa per pou tackle li.  Nou bezwen fer li tou ansanm.  Parey mon kontan, lekol Cascade la deza li ki i pe fer ?  Nou nepli annan 2 komite.  Nou pe annan zis en sel komite kot lekol.  Akoz ki nou bezwen annan detrwa, en ta komite pou fer enn menm keksoz.

        So tou kominote i bezwen vin ansanm pou ki nou tackle bann problenm head on.  Mwan mon krwar sa i lapros ki nou bezwen al de-lavan avek.  E avek sa kalite determinasyon Mr Speaker, i a fer ki nou pei an zeneral e la i anmenn mwan lo sa kestyon lakaz.

        Lakaz li i major dan sa problenm ki nou pe koze kot nou annan problenm lafanmir la.  Akoz dan bann problenm ki nou pe gannyen la, nou annan bann extended family dan en pti lakaz.  Kan enn in ganny son zanfan la, i anvi donn sa latansyon, i oule elve son piti korekteman ou ganny lot i dan drog, i dan menm lakaz li.  Lot ki dan lalkol i dan menm lakaz li. Be i afekte sa enn ki li i oule fer progre.  Li i oule fer avanse son zanfan korekteman.  Li i ganny afekte.

        So la nou bezwen vwar, kalite priyorite ki nou donnen a sa bann fanmir koumsa.  E nou bezwen al dan sa bann fanmir pou sey fason ki mannyer pou rezourd sa problenm at source.

        Pou fini, mwan Mr Speaker, mon ti ava kontan mon osi felisit NDEA.  NDEA la, nouvo management ki pe al pran.  Mon krwar sa bann nouvo dimoun ki pe vini, zot pa ava dir nou, nou konnen lekel ki pe deal ek problenm drog.  Nou konnen lekel ki pe enport drog, nou konnen lekel ki pe fer tel keksoz me selman zanmen zot tyonbo.

        Nou ekspekte sa voyaz zot a pran aksyon korekteman akoz sa kestyon drog.  Mon’n poz mon lekor kestyon lot zour, mon ti demann kestyon isi menm dan Lasanble,  eski pa ler pou nou re diskit, re fer en bon deba lo la.  Gete si nou oule tackle problenm hard drugs, si nou pa devret vin pli lenient lo soft drugs.

        Sa i issue ki nou bezwen nou osi dan nou Lasanble diskite e vwar si nou pa kapab ariv a en fason pou nou anpes nou dimoun ganny problenm e sa bann problenm ki arive ek drog ki nou pa kapab rezourd.

        Mr Speaker, mon krwar ki i annan en kantite keksoz ki’n ganny dir dan nou Lasanble ozordi e i pou ganny dir pandan sa bann letan ki la.

        Pou fini mwan lo sa kestyon contour line lo Praslin, lo La Digue.  50 meters contour line.  Mon demande ki sa i ganny revwar ?  Nou ti met sa pou en rezon.  Eski sa rezon ki nou ti met sa i ankor parey ozordi   Ek devlopman ki pe arive nou pa merit ganny revwar serten sa bann keksoz.  Ou konpran ?

        Lot fwa in annan prononsman lo la, me mwan mon demande ki dan tou Minister zot al fer en legzersis enportan –  en legzersis pou zot revwar tou Polisi.  Tou Polisi egzistan, sa ki zot kapab sanze vitman sanze e sa ki zot bezwen sanz Lalwa pou sanz sa bann Polisi, anmenn Lalwa devan nou Lasanble, pou ki nou kapab sanz sa bann Lalwa o pli vit posib e ki nou kapab vreman al devan e fer nou pei mars pli byen e fer ki dimoun i ava pli happy e pli kontan.

        Dan sa sans la nou swete ki tou dimoun i donn koudmen dan sa bann keksoz ki nou’n dir.  Dan sa lapros ki Prezidan Faure in met devan.  Tou dimoun i devret pe donn koudmen.  Alor lapel i la, se ki dimoun i bezwen pran responsabilite.  Pran responsabilite pou li kapab li menm li avans son lekor devan.  Akoz i pa kapab esper toultan dimoun vin fer pou li, dimoun vin donn li.  Mon krwar la sa en mesaz for nou Lasanble i devret anvoye pou nou dimoun pou ki responsabilite e responsabilite pou zot kapab travay dir pou zot avans devan dan nou pei.  Mersi bokou.

MR SPEAKER

Mersi Onorab De Commarmond.  E prezan nou pran en pause, nou a retournen 11er pou kontiny nou bann deba entervansyon.

(BREAK)

MR SPEAKER

Bon zis avan nou re pran nou bann entervansyon mon ti a kontan zis fer en pti leklersisman, presizyon, petet menm koreksyon.

        I paret ki bomaten ler mon’n koz lo pos Depite Clerk, mon’n dir ki Madanm Thelermont ki ti Chair panel 5, anfet sa ti en fot, i Madam Clerk –  Ms Alexis ki Chair sa panel 5 e ti enkli nou Deputy Speaker, Onorab Prea.  So, sorry Madam Clerk, sorry Madame Thelermont ki mon’n al mis-koz zot devan piblik.

        E avek sa mon ti a kontan fer en lapel pou nou gard nou schedule. Silvouple ler zot fer zot entervansyon sey gard li within sa 10 a 15 minit.  I annan en revey dwat devan sak laliny e sey gard zot entervansyon lo sa Diskour ki Prezidan Larepiblik ti fer Mardi.

        E la mon krwar mon a donn laparol Onorab Prea pou fer ou lentervansyon.

HON NICHOLAS PREA

Mersi Mr Speaker.  Bonzour tou Manm Onorab e tou dimoun ki a lekout e en bonzour spesyal pou tou zabitan Bel Ombre.

Mr Speaker, manda ki pep Seselwa ti donn LDS, se pou travay pou lepep Seselwa e Sesel. Se sa ki nou bann manm LDS nou’n fer pandan sa 4 mwan ki nou’n dan Lasanble.  Nou’n ouver nou Lasanble avek lepep pou zot konnen ki pe pase ; koman Bidze i ganny depanse e fer pase zot kontribisyon. Nou pe senpleman swiv nou slogan, ‘Fer Li Ou Lasanble.’

Lentansyon LDS se pou fer Lasanble vin zot lavwa ; vin pli efektiv e an menm tan respekte pouvwar e responsabilite Egzekitiv pou fer marse pei.  Wi sa Lasanble pandan sa 4 mwan in travay.  Wi depi ki LDS in raport eleksyon, i annan en nouvo latmosfer e Sesel in sanze.

Ozordi Prezidan i rekonnet sa travay me i ankor annan bann latitid ki pa pe reflekte sa dan son Gouvernman.  Pli tar mon pou elabor lo la.

Mr Speaker, Prezidan in fer plizyer lanons pozitiv pou Sesel e nou apresye sa.  Mon pou tous serten pwen ki reflekte leta nou Nasyon ozordi, serten pwen ki Prezidan li menm in koz lo la.

Pou premye fwa pandan sa 40an i annan volonte par tou bann akter pou adres sa size Rekonsilyasyon Nasyonal e Linite.  Nou Lasanble atraver en Mosyon anmennen par Dirizan Lopozisyon, nou’n deza etabli en Komite ki’n komans travay.  Seselwa in pare pou abord sa bann size ki’n diviz nou Nasyon.  Ozordi 2017, moman in arive pou nou pran sa challenge dan en fason brav, moman pou fer fas ek nou listwar e moman pou bouz devan koman en pep fyer e ini.  Moman in arive pou nou pran semen linite.

Mon kontan ki nou pe kapab elimin bann baryer ki’n diviz nou pandan tou sa lannen – pandan tou sa bann letan e ki pa form par en sosyete modern e demokratik.  Ozordi 5 Zen in vin listwar me mon ti a osi swete ki nou al pli lwen.  Sanz non bann semen.  Sanz nom nou Lafors Defans pou sorti SPDF pou vin SDF – Seychelles Defence Forces .

Donn nou Gard Lakot sa lankadreman legal.  Anmenn sa Lalwa ki pou fer zot vin legalman Gard Lakot Sesel.  Sanz kouler Air Seychelles pou  reflekte sa letan ki nou ladan.  I ankor rouz, blan, ver.  25 an apre retour miltiparti e la ek sa nouvo klima politik, sa pa akseptab.

Retir portre ansyen Prezidan dan tou bann biro Gouvernman, dan  Lopital, Klinik e dan Lekol.  Si Prezidan Faure pa kontan met son portre dan tou biro pour kwa pa met nou Crest parey Leader Lopozisyon in fer sorti bomaten, ki an menm tan i a fer nou bann travayer santi sa sans patriyotik e lapartenans pour zot pei.

Re donn nou Lafors Lapolis son vre plas dan nou sosyete.  Mon osi anvi felisit Mr Labonte ki en zabitan dan mon distrik ek son 2 Depite Seselwa ki fek ganny apwente pou diriz NDEA.  E la mon swete ki zot a etabli en pli bon relasyon travay ek Lafors Lapolis ek manm piblik.  Kont lo sipor nou Lasanble.

Mr Speaker, Seselwa i kontan ki sa size SBC pe ganny adrese ozordi.  Lopozisyon in kontinyen fer sorti sa sityasyon pandan bokou lannen.  An 2006 nou ti ganny bate e kas latet apre en demars pou rod laliberte Lapres.  Sa ti swiv par rapor Ziz Riley e malgre 10an pli tar sanzman pe arive.  En nouvo Act pou vin an plas e la mon demande ki Lasanble i zwe en rol dan legzersis pou apwent en nouvo CEO e Board.  Si fodre ki CEO i vin devan sa Lasanble pou ganny kestyonnen lo son plan mon napa problenm.  Nou anvi sa ki meyer pou nou pei.

SBC in ganny bokou larzan pou transformen, pou vin digital, pou  ogmant lakantite channel.  Me ozordi an 2017 nanryen pa ankor arive.  Ki nou vwar depi komansman lannen?  Zis progranm repetisyon dan ‘Bonzour Sesel,’ apre midi e menm dan prime airtime aswar.  E mon anvi fer sorti ki mazorite travayer SBC ki mon’n koz avek, i mekontan ek fason ki zot ganny trete e zot dekouraze.  Plizyer pe deza fer demars pou kite.

I osi annan rapor ki sa bann dernyen lannen in annan tro bokou lese fer e labi kot SBC.  Alor mon ti a demande ki Biro Oditer Zeneral i al fer en odit laba pou lepep konnen koman son larzan in ganny depanse sa bann lannen.

Mon remersi tou bann dimoun ki ti azout zot komanter lo mon post lo Facebook lo SBC Lendi le 6 Fevriye.  Zot sipor in konte, zot sipor in osi ede pou anmenn sa sanzman.

Sa latmosfer politik i menm pous Gouvernman pou aksepte fot ki zot in komet.  NIE ki ti ganny fermen e son rezilta en mankman dan teachers pour nou bann lekol.

Mon welcome desizyon pou aboli prizon Marie-louise.  Lentansyon loter deryer sa proze ti zis pou pini, pini e pini.  Sa kote imen pa ti dan son desizyon e sa mo reabilitasyon pa ti dan son diksyoner.  Depans ki Gouvernman pe rankontre i enorm.

E la Mr Speaker, mon’n osi aprann ki sa 9 prizonnyen ki Coetivy in eksprimen ki zot kapab travay, lapes ase pwason pou fourni prizon Montagne Posée e koup sa depans plis ki R30mil par mwan.  Prodiksyon legim ek zannimo lo sa 2 zil i osi kapab ede pou koup depans Gouvernman.

Ka polisyon delo La Misere, Mr Speaker, in pran 8 an pou Gouvernman aksepte responsabilite.  7an ki mon case i Ankour.  Me mon apresye sa zes ki Prezidan in fer.  In azir brav e fran e pronons sa leskiz piblikman.

Dan sa konteks mon pe diskit avek mon avoka, Onorab George lo mon case Ankour e apre mwan osi mon a  fer mon desizyon piblik.

Mr Speaker, mon partaz lenkyetid plizyer zabitan Bel Ombre lo fason ki nou distrik pe devlope.  Nou napa en Master Plan pou distrik an zeneral e ni pou sa morso konblaz.  Zis Lotorite pe donn permisyon konstriksyon an brit san pran kont bann konsekans tel ki dansite, parking, problenm trafik, problenm desarz, eksetera.  Mon vreman enkyet ek groser e oter serten batiman ki pe konstrir.  Lo sa morso konblaz i paret pou en dezord total.  La koman keksoz pe marse, i paret ki tou devlopman ki pou pran plas sakenn pou annan son prop sistenm desarz e son prop parking.  La mon trakase.

Prezidan i koz lo sa bon relasyon travay ki Gouvernman i annan ek Manm Lasanble, ek nou Lasanble e in koz ankor lo bon gouvernans ek latransparans.  Lo mon kote mon pe fer mon mye koman manm elekte Bel Ombre pou desarz mon responsabilite.  DA ki ti dan distrik malerezman in kite.  Nou’n ganny en acting DA pou 2mwan e la depi le premye Fevriye nou’n ganny en nouvo DA.

Mon’n kapab travay avek acting DA, Ms Sinon, pou sa kourt letan e mon remersi li pou sa korperasyon ki nou’n partaze.  Mon’n komans fer demars pou mwan rankontre nouvo DA pour ki ansanm nou a kapab kontinyen sa travay pou byennet nou distrik.

Me pa tou keksoz ki pe mars parey Prezidan pe dir nou ; pa tou ki pe reflekte sa nouvo latmosfer travay. Anba, anba i annan demars negativ ki pe fer ditor nou bann dimoun.

Le 13 Zanvye mon ti rankontre 3 zenn fiy ki ti vin diskit zot problenm lakaz avek mwan.  Le 16 Zanvye Mr Speaker, mon annan kopi mon bann dokiman la, mon ti anvoy en let kot Minis pou Labita lo sityasyon sa 3 fanmir ki pe pare pou pran zot responsabilite e konstrir zot prop fwaye akote zot paran.

An vi sityasyon, mon ti demann Minis en site visit pou kapab konpran pli byen bezwen sa 3 zenn.  Me dan plas mon ganny en repons, mon aprann ki mon koleg, ki malerezman i pa dan Lasanble la ozordi –  Onorab Basil Hoareau, ki’n kontakte sa 3 zenn e pe diskit menm sityasyon ki mon’n met dan mon let pour Minis Bastienne e menm al pli lwen pe dir nou pou organiz en site visit parey mwan osi mon’n demande.  Eski sa i zis en sityasyon ki’n leve?

Mr Speaker, mon pa krwar.  Sa i montre nou lafason ki sa Gouvernman i kontinyen travay.  Pou serten keksoz pan sanze.  Prezidan pe koz en langaz e pare pou travay ek MNA LDS pou byennet tou dimoun, me serten dan son Gouvernman pe kas anba.  Nou bezwen sanz sa leta lespri kot politik, gen politik, mileage politik i rantre dan tou keksoz.

Mon kit sa la ek Prezidan pou li deside si sa i the way forward.  Si sa i fason ki nou pou travay an 2017.  Mon annan ankor plizyer let ki mon’n ekrir e ki mon pa ankor ganny repons e si sa latitid i kontinyen, mon pou anmenn sa bann ka an piblik dan sa Lasanble.

Me Mr Speaker, lo lot kote mon anvi azoute ki mon’n ekrir PUC ek SLTA plizyer let e mon’n ganny repons on time.  SLTA in al pli lwen e nou’n fer plizyer site visit dan distrik.  Alor mon anvi felisit CEO PUC ek CEO SLTA ek zot bann teknisyen pou sa lespri travay.  E mon anvi dir bann zabitan Bel Ombre ki CEO SLTA in osi asir mwan ki avan lafen lannen 2017 zot pou vin re sirfas semen primer Bel Ombre.

Bann zabitan Ex-Khashoggi zot pou ganny lalimyer lo semen byento e zabitan Dan Vale Le Niol zot semen pou osi konplete tre byento.

Mr Speaker, kot zot fer byen mon pou felisit zot, me kot zot fer mal mon pou name and shame.  Mon distrik i osi ranpli ek problenm sosyal e lakaz i enn pli gran defi.  Mon’n touzour dir ki sa size alokasyon lakaz i devret ganny revwar e i devret ganny fer dapre merit.  Savedir en fanmir i ganny asiste dapre son vre bezwen.  I paret ki bann ki dan bezwen pa pe ganny sa priyorite ki i merite.  LDS i demande ki nou ganny akse ek lalis lakaz e regarde si bann desizyon ki pe ganny pran i byen.

Plizyer fanmir pe pey sa Housing Scheme pou plizyer lannen, me ler lakaz i donnen zot pa lo lalis.  Mon annan plizyer ka ki devan mwan e i annan ki mon deza ekrir Lotorite Lakaz lo la.

Mon apresye ki demann pou fer desann pri lavi ki Leader Lopozisyon ti fer  atraver en Mosyon in ganny ekoute par Gouvernman.  Sa size lapovrete i tous tou distrik dan Sesel.

Mr Speaker, pou terminen, mon ti a kontan dir mersi sa Manm Onorab ki’n tir portre loto ofisyel lofis Depite Speaker e apre met lo Facebook.  En tel aksyon i fer lapenn e montre en mank respe pou mon Lofis e osi pou nou Lasanble ki li osi i form par ladan. Se sa kalite mindset ki fodre sanze.  Se sa kalite mindset ki Onorab De Commarmond bomaten in dir fodre nou sanze dan sa pei

Mr Speaker, tan ka mwan mon pou kit sa la.  Mon pou kontinyen reste pozitiv dan mon travay pou rod sa ki meyer pou mon pep e mon pei.  Sesel i pli gran ki nou tou.  Sesel i pour nou tou e Mon Nicholas Prea, mon pa pou zanmen les Sesel Tonbe.

Mersi Mr. Speaker

(APPLAUSE)

 

MR SPEAKER

Mersi Onorab Prea.  Mon a donn laparol Onorab Sophola.

HON NOLINE SOPHOLA

Mersi e bonzour Mr Speaker.  Bonzour tou Manm Onorab, tou dimoun a lekout e en bonzour spesyal tou zabitan La Digue ek Zil Pros.

        Mr Speaker, ozordi nou pe komans nou premye sesyon.  Premye term Lasanble Nasyonal 2017 avek deba lo Diskour Leta Lanasyon.  Sa pe arive a en moman kot Bidze Nasyonal dan son totalite pa ankor ganny aprouve par nou Lasanble.  Mon swete ki sa pa ariv ankor akoz i en keksoz ki enpakte bokou lo moral nou popilasyon an plis ki son lenpak ki i annan lo lekonomi nou pei ki tre negativ.

        Pandan Linogirasyon e apre Linogirasyon Prezidan Faure, i ti rankontre bokou difikilte.  Me sa i pa’n anpes li travay.  In travay avek tou dimoun.  Prezidan Faure i en zonm realis, i annan en vizyon Sef D’eta.  I krwar dan Sesel.  I krwar dan linite pep Seselwa malgre bann diferans ki kapab egziste antre nou.

        Dan son Diskour Leta Lanasyon in demontre ki i annan en vizyon pou Sesel, en vizyon ki enkli tou Seselwa, en vizyon ki an konformite avek nou realite Nasyonal e nou tenm Nasyonal pou sa lannen e ki devret reste grave dan nou memwar pou touzour.  Sa tenm i, ‘’Seselwa En Sel Desten.’

        Mr Speaker, vizyon Prezidan Faure pou nou Nasyon i sorti dan son leksperyans personnel e osi sa ki son bann predeseser ti’n komanse,  avek en lavolonte ferm pou amelyor keksoz an prenan an kont sizesyon ek kritik ki sorti dan tou diferan kous lasosyete.  I pe walk the talk ;  reste fokalize e viv lespri linite nasyonal, lademokrasi, latransparans, rann kont ek lazistis sosyal.

        Atraver proze lenfrastriktir ekonomik e sosyal, Prezidan Faure in demontre ki i annan lanbisyon e en vre vizyon pou nou pei e pep Seselwa.  Pandan nou bann deliberasyon lo Bidze nou’n tann bokou koze.  I annan ki bann mansonz e ki zot bi se fer la kalonmni abes e imilye dimoun ki nou pa kontan.

        Me nou osi bezwen rekonnet egalman ki parmi sa bann pwen ki’n ganny avanse, i annan ki ti vre e pertinan e ki pou ede amelyor keksoz menm si parfwa zot in ganny prezante zot osi avek en serten larogans e malis.

        Sepandan Prezidan avek son grander lespri, dan son Diskour Leta Lanasyon in entegre laplipar ki neseser e relevan ki nou ti fer resorti pandan nou deba lo Bidze.  Sa desizyon se pou asire ki keksoz i ganny amelyore.

        Malgre diferan nivo apresyasyon konteni Diskour Leta Lanasyon parmi nou popilasyon, mon senserman konvenki ki dan en lavnir tre pros nou pou apresye valer ki plizyer sa bann deklarasyon ek sa lenpak i pou annan lo sakenn de nou.  Swa koman en endividi oubyen koman en fanmir.  Anfen nou tou koman pep Seselwa.

        Nou tou nou annan en par dan sa Diskour, me tou i depan lo profonder nou vizyon e nou lekspektasyon pour Sesel.

        Mr Speaker, apre mon komanter zeneral lo SONA, premye pwen ki mon pou aborde se lakaz.  Lakaz i en nesesite debaz e i en drwa fondamantal tou sitwayen.

        Lannen apre lannen nou kontinyen tann en leokri dan sa domenn.  Malgre zefor enorm ki Gouvernman Parti Lepe in fer pou adres sa size lakaz i napa en sel distrik ki pa pe rankontre en defi lo kestyon mankman lakaz.

        Fodre byen note ki Manifesto Parti Lepep anba direksyon ansyen Prezidan Michel e nou Prezidan aktyel koman son Vis-Prezidan pou lannen 2015, paz 25 in met lanfaz lo langazman pou ed bann fanmir ganny zot prop lakaz atraver diferan Scheme tre abordab.

        Mon kontan vwar ki Prezidan Faure pe ranforsi e met an pratik sa langazman avek plis determinasyon.  Lo nou zil La Digue an partikilye i osi annan demann pou lakaz. Mon konnen ki Gouvernman atraver Ladministrasyon Distrik e Minister Labita pe travay tre dir pou adres sa bann demann.  Mon salye bann mezir ki Prezidan Faure in anonse dan sa domenn.

        Mr Speaker, mon konsyan ki nou defi lo kestyon lozman i pa en defi ki fasil ditou.  Me mon reste konvenki ki donnen nouvo realite si napa okenn keksoz advers ki pou atraver nou sosyete ki nou pou reisi.

        Malgre tou, sa pa vedir ki demann pou lozman pou ganny eliminen.  Non, zisteman akoz sirkonstans i sanze, fanmir, zonm, fanm i evolye e sanze e nouvo demann pou kontinyen antre.  Me mon swete vwar ki nou ava annan en nivo demann ki rezonnab.  Mon swe senser se ki Digwa ki pe viv ou travay lo Mahe, san oubliy nou bann zenn profesyonnel ki pa kapab vin La Digue pou rezon zot profesyon ou zot travay, enkli nou bann zenn ki dan Liniversite Sesel ki zot bezwen en lozman,  i osi sey pran an konsiderasyon serye.

        Felisitasyon Mr Prezidan pou anmenn sa bann mezir tre konkret avek bi adres kestyon demann lozman dan nou pei.  Mon osi salye zefor nou Prezidan pou entrodwi sa Minister pou zafer lafanmir.  Sa Minister si i ganny byen organize avek en bon vizyon pou ede pou tir bokou presyon ki lasosyete pe fer fas avek.

        Nou tou nou konnen ki ledikasyon i komans dan lakour.  Sesel i annan bokou fanmir ki pe fer tou pou elve zot zanfan dan en fason ki lasosyete i egzize.  Me i pa touzour fasil akoz nou vwar paran pe fer 2 louvraz. Ler zanfan i al lekol paran i al travay.  Apre lekol serten zanfan se zot ki ansarz lakour akoz paran in al debrouye.

Me kestyon ki ozordi mon oule demande, lekel ki responsab sa bann zanfan ziska ler paran i arive ? A ki moman ki paran i ganny letan pou ekout e koz ek zot zanfan pou met en pe valer savwar viv dan sa bann zanfan ?  Ki mannyer ki sa bann zanfan i kapab devlop sa lanmitye ek lanmour pou zot paran ?

Si nou zanfan pa ganny sa bon valer moral ek spirityel dan lakour sertennman zot al rod aryer e souvandfwa zot ganny move lenformasyon e tonm dan move lenfliyans.  La zot antre dan drog, lalkol, prostitisyon e lezot vis.

Sa problenm dan lakour i trouv son larantre dan lekol e dan lasosyete.  Dan lekol, sa move lenfliyans i ganny partaze avek lezot e la nou vwar rezilta zanfan an zeneral e lekol i desann, nou rode akoz.

Mon demande akoz ki ansenyan i bezwen pas letan fer louvraz counseling, gard, nurse, paran e osi etabli disiplin dan laklas avan ki i vreman kapab delivre son vre leson apre ki in pas plizyer erdtan pou prepare.

Pou sistenm ledikasyon, avek tou sa ki Prezidan in dir mon ti a kontan dir ki management lekol i ganny plis lotonomi, me tout an tenir  kont ki i annan sa latransparans,  lazistis e rann kont dan sa ki zot fer.

Mon osi kontan ki Prezidan in rekonnet, ki pa tou bann zenn ki ganny menm loportinite pou partisip dan bann aktivite pou zot devlopman.  Akoz lo La Digue tou deplasman i al avek en kou.  Alor mon profite pou demann bann Minis konsernen ansanm avek kordinater e travayer lazenes dan distrik, pou travay lo en plan pou rezourd sa sityasyon.

Mr Speaker, drog pe detri nou zenn e si vreman nou pa travay koman en vre lekip, byento nou lasosyete pou fer fas avek mank mendev e osi nou popilasyon pou desann e sa pou annan en gran reperkisyon lo sistenm lasante e la kominote an zeneral.

Mon pou profit sa lokazyon pou demann en sant reabilitasyon pou nou bann zenn Digwa ki’n pri dan sa serk visye.  La Digue i pti, me sa fleo in fini anvair nou, e ronz nou bann zenn.

Bann paran pe anvoy leokri.  Sa bann viktim drog zot pa travay.  Ka vol pe ogmante, byento krim osi pou swiv.

Mr Speaker, koman en manman, en ansenyan par profesyon,  mon leker i desire ler mon vwar sa bann sityasyon devan mon lizye.  Sa ki pli fermal, se ler mon pe ganny zanfan pe ganny servi par dimoun ki byen plase dan lasosyete.  Silvouple, sov nou bann zenn avan i fini tro tar.

Mon osi profit sa lokazyon pou felisit sa nouvo lekip NDEA ki Prezidan in apwente.  Kouraz dan zot latas.

Kondisyon sosyal e materyel ki nou pe azout avek lapovrete, i bezwen byen ganny analize avan pran okenn desizyon.  Akoz pou mwan i vre i annan bokou ka sosyal, me i pa tou ki vre ka sosyal.

Atraver resers ki mon’n fer, mon konklizyon se ki bann ka kot Lazans Proteksyon Sosyal pou bann diferan kategori sitwayen, pe konstaman ogmante.  I neseser alor ki en analiz profon i ganny fer e asir lazistis dan sa bann diferan demann.

I byen ki i annan en Sekreter D’eta, Mr Dick Esparon,  ki annan sa rol spesifik pou fer sa kordinasyon e met an plas e plan e en progranm ki target bann fanmir avek bi elimin lapovrete e osi fer sir ki nou bann sitwayen pa ganny kit deryer.

Alor si tou sa bann pwen i poz konsern pou lasosyete i montre ki en tel Minister ti’n ler pou ganny met an plas.

A sa staz Mr Speaker, mon ti a kontan propoze ki Minister pou Zafer Lafanmir ki pou ganny kree i etidye posibilite osi, devlop bann Scheme ki pou reentegre bann dimoun aze dan zot fanmir.

Avan mon terminen, o non tou Digwa mon remersye Prezidan Faure pou sa linisyativ pou ofer 49 poursan Par bann rezidan Digwa dan Linyon Estate.  Sa i en loportinite pou Digwa kapab envestir dan devlopman La Digue e sa i vin koman en savings pou nou lavnir.

Sa i demontre ki vreman nou annan en par dan sa SONA ki Prezidan in prezante.  Mon vizyon, i ki Sesel i kontinyen reste sa mervey ki nou konnen.  Ki Seselwa i kontinyen ralye, koste e fer Sesel vin sa bizou parey sa bizou ki mon anvi vwar mon pti La Digue i vini.

Partou kot nou ete nou osi nou avan kapab kriy ‘‘Sesel ,  En sel Sesel, pep Seselwa en Sel Desten.’’  Mersi Mr Speaker.

(APPLAUSE)

MR SPEAKER

Mersi Onorab Sophola.  Laparol prezan, Onorab John Hoareau.

HON JOHN HOAREAU

Mersi Mr Speaker.  Bonzour Mr Speaker, bonzour tou dimoun ki a lekout.  Mr Speaker, Diskour Leta de Lanasyon i en loportinite pou nou fer en refleksyon serye lo nou sityasyon lavi e ki bann defi nou pei pe fer fas avek san en analiz profon lo tou sa bann laspe lavi ki anpes nou re zwir en lavi modern e sen.  E san en redresman kot i merite, nou pou vwar nou pe toultan vir an ron san vwar nou lavi amelyore.

        Mr Speaker, bokou nou bann problenm se vre Leta nou Nasyon i rezilta move planifikasyon ekonomik, viktimizasyon, koripsyon e gaspiyaz ki’n arive dan lepase.  E ankor en defi reel ozordi.

        Msye Faure pe adres serten sa bann sityasyon, me nou bezwen al pli lwen ki sa.  Atraver sa legzersis ki nou ti depouy Bidze tou resaman, bokou dimoun ki’n koz ek mwan in dir mwan ki zanmen zot ti konnen sa kantite koripsyon e gaspiyaz i egziste.

        Mr Speaker, vre Leta nou Nasyon i kapab ganny dekrir koumsa.  Apre 40an Gouvernman SPPF e Parti Lepep i ankor annan bokou dimoun ki pe esper lasistans social housing pou plis ki 20an.  Parey sa madanm ek son zanfan Le Niole ‘Dan Gala ki pe reste dan en lakaz 3 lasanm avek plis ki 9 manm son fanmir.  Sa i pa akseptab.

        Dan mon distrik nou’n ganny en alokasyon 10 lakaz kot Ex-Khashoggi Estate sa lannen.  Me lo lalis i annan 60 ankor ki’n kalifye e zot pe viv dan bann kondisyon ki egalman deplorab.

        Mr Speaker, ki fason ou swazir sa 10 e ki ou dir avek sa 6o lezot ki dan dezespwar e pe espere pou plizyer lannen ?  I annan ki sitan zot pe espere, zot sityasyon lavi in sanze konpletman.  Fanm in perdi mari, manman in perdi zanfan dan drog ou prostitisyon e se fabrik nou sosyete ki kase e degrengole akoz problenm lakaz.

        Mon kontan tande ki CSR tax pou ganny mete dan en fon pou konstriksyon lakaz e 24 unit pou ganny konstrir dan sak distrik dan sa prosen 2an.  Sa i byen.  Me problenm lakaz pou reste grav si plis lakaz ankor pa ganny fer.

        An di-z-an sa mon osi konsyan an term lozistik ki avek resours ki nou annan i pou reste en defi.  Me pour lemoman mon konvenki, ki nou bezwen rod en solisyon e konstri plis pli o si pou nou fer fas avek mank teren.  Sa i en lalit ki nou dan LDS nou pou kontinyen anmennen pou nou bann sitwayen.

        Mon oule profit sa loportinite pou redemann Minister Lakaz, aret trenn lipye.  Fer desizyon lo size sa bann flat lo Société du logement Pascal Village e demars sa proze housing ‘Dan Gala ki  la ki Pension Fund in met R150milyon a zot dispozisyon.  Fodre pa ki Gouvernman i oubliye ki drwa lozman i en dwa konstitisyonnel sa kontra ki Gouvernman in fer avek sa pep.

        Mr Speaker, attainment bann etidyan S5 dan lekol i reste touzour en konsern.  Par egzanp statistic 2015 i montre ki zis 37 poursan bann zanfan ki’n anrezistre pou fer legzanmen IGCSE dan Lasyans Konbinen in ganny en grad C -0 par lao.

        Ankor kestyon se ki ou fer avek sa 73 poursan ki pa’n zwenn sa bann grad neseser ?  Ler ou get leta nou sistenm Ledikasyon nou kontinyelman vwar mankaz teachers e resours neseser – pou non selman ogmant performans, me pou osi motiv e tenir lentere zanfan dan ledikasyon.

        Nou tann koz bokou lo knowledge-based society, me ki mannyer nou pou realiz sa rev si nou pa fer en letid konpreansiv pou konpran lakoz e rod solisyon pou nou bann problenm performans zanfan.

        Mon per ki nou pe vir an ron lo sa size akoz par ler pou nou fer knee-jerk reaction oubyen fer piecemeal job.  Me plito ler pou nou fer en zefor kolabore pou rod solisyon reel.

        Disiplin dan lekol par egzanp, i bezwen ganny reetabli.  La Minister Ledikasyon e la kominote i bezwen tyonbo lanmen kanmarad e vin avek en no-nonsense approach policy.  Paran i bezwen i bezwen pran responsabilite dan  disiplin zot zanfan e Minister Ledikasyon i a fer leres.

        Nou ankor pe vwar en Liniversite Nasyonal ki kout en etidyan Seselwa pli ser ki pou li fer son menm letid Maurice, Sid Lafrik ou Malaisie.  E sa Mr Speaker, i bezwen ganny ranverse.

        Mon sir ki Liniversite i bezwen revwar lafason ki i zer son depans e angaz Sekter Prive dan finansman bann proze ki pou kapab fer desann kou.

        Swen lasante i osi dan en boulvers.  Napa ase ners, Doker pou travay.  Zot lapey i ba e sa pe atir nouvo dimoun pou retenir sa bann ki deza la.  Lizyenn dan bann sant medikal i en konsern.  Nivo lenfeksyon segonder ki dimoun i gannyen dan Lopital pe kontinyelman ogmante e volim travay lo bann Dokter, pe fer ki bokou dimoun pa pe ganny sa latansyon neseser e dyagnostik korek.  Alor pa pe konn zot maladi e zot bezwen al aletranze pou al rode ki zot gannyen.

        Pou bann ki sanse konnen ki zot gannyen, bon kalite latizann i reste en defi e tre difisil pou gannyen.  La mon oule redemann Gouvernman pou etidye posibilite en health insurance plan pou piblik ki a ede retir en fardo finansyel lo Gouvernman.

        Mr Speaker, nivo kriminalite dan nou pei i reste tre o par rapor avek groser nou pep.  Nou annan en popilasyon prizonnyen ki tre o avek bokou zenn dan laz pli prodiktiv laba.  Maladi transmet par sex e pikir drog enfekte parmi sa group dimoun, i alarman.

        Mr Speaker, ler nou get nou Bidze Nasyonal ki’n proporsyon mwens ki 2 poursan depans total Gouvernman dan Sekter Lagrikiltir, i fer nou bokou tris.  Nou pe deplizanpli enport tou sa ki nou konsonmen.  Ankor mon demande ki lespwar mon pou donn Rock ki anvi agrandi son laferm anler La Batie e ki fason nou pou anmenn sekirite alimanter si nou pa pe envestir ase dan nou lagrikiltir ?

        Mr Speaker, i fer mwan tre tris ler mon tann Minis Finans lo medya ti dir ki sa Bidze i prozekte pou anmas plis tax sa lannen, me nou ankor annan en defi mazer pou anmas reveni tax.

        Plis ki R900 milyon pa’n ganny anmase lannen pase kazo bann defayans striktirel ki egziste dan Lorganizasyon SRC ou bann ka kot non- compliance i arive.

        La nou vwar ankor 2 pwa 2 mezir.  Ler nou pe get bann pti biznesmenn ki pe ganny trangle pou zot pey zot tax, tandis ki serten ki byen konekte dan Parti Lepep pa sibir menm tretman.

        Mon pe demann mon lekor ki fason Gouvernman pou finans son progranm si sitan kantite tax pa pe ganny kolekte ?

        Ankor Mr Speaker, nou vwar konfli lentere menm dan Lasanble kot serten Manm Parti Lepep i fer biznes lasirans avek Lasanble.

        Mr Speaker, mon pa pou…..

MR SPEAKER

Onorab Hoareau, mon krwar sa i pa in order.  Mon ti a kontan ou retract.

HON JOHN HOAREAU

Ok, mon retract Mr Speaker.  Mersi.

MR SPEAKER

Mersi.

HON JOHN HOAREAU

Mr Speaker, tro bokou nou bann lazenes in perdi dan labi sibstans e sa i en kriz ki a tou loportinite nou pe koz lo la.  La mon pe demande ki travay konkret i ganny fer pou adres sa sityasyon e sirtou re entrodwi kiltir travay dir avek nou bann zenn, ki anfen nou a redwir depandans lo travayer etranze.

        I ankor annan bokou labi lo lafason ki Gouvernman i depanse.  Serten Minister i vwar li rezonnab e zistifyab pou depans larzan Gouvernman pou aste kado ofisyel, ler 40 poursan nou pep pe viv dan lapovrete.  Sa i ti dan rapor Oditer Zeneral.  Nou semen sirtou morso ki ant Eden Island ek Providence i reste tre danzere en kantite aksidan e dangerous driving me nanryen pa pe ganny fer ziska konmela pou amelyor plis sekirite lo sa semen.

        Konbyen manman pou bezwen plere, met fler lo sa semen ankor aven ki keksoz i ganny fer ?

        Mr Speaker, ler mon antann ki Port Authority pe fer fasilite Ile Du Port pou bann sener etranze pou repar zot masin bato, mon demann mon lekor kan ki zot pou get osi bann peser artizanal e sa bann peser zot pe demande depi byen lontan pou zot ganny en fasilite obor Por pou zot met zot bato ater e fer serten mentenans lo la, me zot pa ankor gannyen.

        Mr Speaker, se koumsa ki mon vwar Leta nou Nasyon.  Mr Speaker, si mon ti en mazisyen e mon ti kapab fer en serten sanzman lo Bidze Nasyonal ki baze lo welfare ek tax, mon ti a ranplas li par enn ki baze lo loportinite devlopman.

Parey nou Manifesto e nou Leader in toultan dir, ‘Lesyel i devret nou limit’  In plis ki ler pou nou met lanfaz lo loportinite devlopman.

Ler Gouvernman i limit loportinite, son pep pou sey rod loportinite a tou pri e a nenport koman.

Malerezman par natir imen i pli fasil pou rod loportinite pou fer larzan vitman atraver kriminalite, ki loportinite pou kree larises dan en fason lezitim.  Parey in ganny dir laport loportinite i fermen alor ou bezwen defons en trou kekpar pou ou pase.

Alor ler ou analiz profonnman Leta nou Nasyon nou vwar ki biznes drog, prostitisyon, mank lentere dan travay desan e menm mank lentere dan ledikasyon ensi deswit, i rezilta direk en sosyete ki pe boulverse e en pei ki pa’n kree ase loportinite pou devlopman soutenab.

Mr Speaker, ler mon pe koz lo loportinite devlopman mon oule osi anmenn sa size travay dir, responsabilite e responsabilite dan travay.

Ler nou ti antre dan Lasanble lannen pase, nou’n demann bokou pou travayer.  La i letan pou nou demann travayer osi pou pran zot responsabilite serye.  San plis prodiktivite zot anplwayer pou vwar li tre difisil pou donn zot bann plis benefis.

Nou bezwen pli responsab e nou bezwen travay serye.  En pei pa pou al lwen si son mendev pa pe reponn bezwen endistriyel e si travayer pa pe zwenn target son lakonpannyen ou lorganizasyon.

Dan Lasanble nou’n demonstre sa travay dir ler nou ti travay ziska tre tar ler ti fodre.  Sa bann bon kalite i bezwen reflekte dan nou sosyete an zeneral.  Se sa ki pou fer nou ladiferans dan Leta nou Nasyon.

Mr Speaker, pou terminen mon ti a kontan fer resorti ki Leta nou Nasyon i bezwen sanze.  La i letan pou tou Seselwa pran sa langazman pou travay ansanm e travay pli dir pou anmenn plis devlopman dan nou pei.

Annou enn fwa pour tou rezet viktimizasyon, gaspiyaz resours leta e koripsyon.  Les bonn gouvernans, latransparans, rann kont, vin sa bann prensip ki diriz nou fason fer.  Nou bezwen plis loportinite pou devlopman anfen ki lesyel i reste touzour nou limit e ki kot ni ras, ni kouler, ni relizyon, ni lapartenans politik pa pou zanmen vin en baryer ou en baraz.  Mersi.

MR SPEAKER

Mersi Onorab Hoareau.  Nou a pran en dernyen entervansyon avan nou adjourn pou dezennen.  Onorab Churchill Gill.

HON CHURCHILL GILL

Mersi Mr Speaker.  Bonzour tou Manm Lasanble.  Bonzour tou dimoun a lekout, espesyalman zabitan Baie St Anne.

Sa Diskour lo Leta Lanasyon, i enn tre ris ki anmenn bokou soulazman pou Seselwa.  Seselwa ti oule tan aksyon e sa ki  Prezidan dizour in anmennen pou met devan Nasyon Seselwa.  San okenn dout sa pei pe al dan bon direksyon.

En keksoz ki pli an demann ozordi se lakaz e later pou nou bann zabitan.  Nou Prezidan i tre konsernen avek sa size.  Se pou sa rezon ki in anmenn devan solisyon pou nou adres sa size.  Pour ki tou Seselwa ki napa en lakaz oubyen en bout later, i ava kapab annan lespwar pou benefisye.

Parey nou tou nou konnen i annan bokou dimoun ki pe espere pou bokou letan.  Enn fwa pour tou zot ava vwar laklerte.  E mon kontan pou note ki distrik Baie St Anne e lezot distrik pou benefisye avek ankor 24 unit lakaz tou le 2an.

Nou tou nou konnen pou donn lakaz tou nou pep i pa en travay ki fasil.  I pe bezwen letan, me selman lenportans se nou pe vwar en direksyon e nou pe annan en lapros kot nou pou vwar bokou plis rezilta.

Menm si Gouvernman di- zour in fer bokou progre pou adres povrete dan pei i ankor en problenm ki pe kontinyen egziste.  E mon tre satisfe lo non zabitan mon distrik, ki nou Prezidan in vin devan avek bann mezir ki pou ede redwir lapovrete dan sa pei.

Me i osi tre enportan ki sak fanmir i pran zot responsabilite an prenan an kont zot priyorite ;  met zot larzan kot i pou benefisye zot fanmir me non pa pou detri zot fanmir.  E la mon pe fer referans avek sa bann fanmir ki travay, ki sa reveni ki zot fer serten poursantaz sa reveni, i ganny depanse dan bann sibstans ki pa neseserman benefisye sa fanmir.

Sa size drog i tre alarman, i pe afekte bokou fanmir dan en fason tre negativ.  I ti’n plis ki ler ki en lapros tre serye i ganny pran

pou sov sa pei kont sa fleo dan en fason tre sistematik.

I en soulazman pou vwar ki Gouvernman dizour in fer en refleksyon tre serye e anmenn devan solisyon pou sey tir sa lenfestasyon drog dan nou pei.

Nou sistenm lasante i touzour annan en rol primordial, pou fer sir nou reste en nasyon an bonn sante.  Sa bann mezir ki’n ganny anonse i tre pertinan pour asire ki tou Seselwa i zwir en lasante pli modern e tre efektiv.

Pour en Nasyon kontinyen mentenir en tre o nivo savwar viv, en nivo ledikasyon tre elve pou rann bezwen nou sosyete i tre enportan ki nou sistenm ledikasyon i tre efikas.  Sa bann mezir ki’n ganny anonse, i zisteman pou adres sa sityasyon.  I montre nou alor ki sa ladministrasyon dirize par Prezidan Faure i tre konsyan sa lenportans en pep byen edike, pou kontyen met zonm ek fanm o sant nou devlopman.

Zil Praslin i bezwen kapab zwir en pe son larises.  Mon tre kontan ki sa Fon PDF pou ganny reactivate e ki reveni tax ki anmase avek Coco de Mer ava ganny met dan sa fon.

Me mon santi nou devret pe ganny en poursantaz larzan tiket ki anmase avek touris ki antre dan Vallée de Mai –  en negosyasyon ki mon pou bezwen pous devan.

Sesel i en pei ki annan bokou potansyel pour en lekonomi tre stab.  Sa lapros ki Gouvernman in pran pou elarzi nou lekonomi i en pa dan bon direksyon ki pou benefisye tou Seselwa.

Me Selman i enportan ki bann Seselwa ki anvi lans dan biznes ki tre profitab zot kapab ganny akse avek kapital, pou zot kapab demare avek zot proze pou kre lanplwa pou nou fere ek ser Seselwa e kontribye dan en fason signifikan dan lekonomi nou pei.

Nou bezwen osi re vizit nou ban Polisi biznes.  Akoz i annan en tandans ki sa ki gro i kontyen vin pli gro e sa ki pti i kontinyen reste ptipti.  Nou Polisi pa pe amen soulazman pou nou dimoun ki vilnerab dan biznes.

Nou souvandfwa koz lo vilnerabilite sosyal, me nou osi annan vilnerabilite avek akse pou fer biznes.  Revwar sa bann Polisi.  La mon pe fer referans sirtou dan biznes touristik an partikilye akoz Praslin bokou pti biznes pe vwar zot en konpetisyon direk avek ban gro biznes.  En batay an ven et sisit.

Pou mwan sa Diskour lo Leta Lanasyon i tre ris avek bokou keksoz tre enportan pou ki sa pei i kapab bouz lo sa lot nivo.

An konklizyon.  Anba Leadership Prezidan Danny Faure mon krwar i en zonm ki’n montre en nivo savwarfer tre elev-e e nou dan Lasanble tout an prenan an kont ki nou pe travay pour tou Seselwa, nou bezwen a-port nou sipor pou Egzekitif.  E dapre bann entervenan ziska konmela, i montre ki wi Lasanble i bezwen tenir son parol e  nou bezwen siport Egzekitiv pou nou vwar bon rezilta pou tou Seselwa.  Mersi Mr Speaker.

 

(APPLAUSE)

 

MR SPEAKER

Mersi Onorab Gill.  Avan nou Break pou dezennen, mon ti a kontan felisit zot akoz mon vwar nivo deba, nivo bann entervansyon i byen, i o e sa ki mon kontan osi, zot pe gard within zot letan 15 minit ki allocated pou sak Manm.

        Mon ti a fer en lapel spesyal ki sa lannen sirtou pandan deba sa mwan nou pa fer okenn latak personnel.  Nou koz lo gran laliny, lo bann konsern ki annan dan Bidze prezante ek Lasanble par Prezidan Larepiblik.

        Mersi e nou a rezwenn 2er.

 

(BREAK)

 

MR SPEAKER

Bonn apre midi tou dimoun,  tou bann Manm Onorab tou manm piblik.  Nou a kontinyen avek nou travay e mon a donn laparol Wavel Woodcock.

HON WAVEL WOODCOCK

Mersi Mr Speaker. Mr Speaker, Manm Lasanble Nasyonal, tou dimoun a lekout, espesyalman zabitan Praslin bonn apre midi.

Ladres Prezidan Faure i enn ranpli avek promes. Dan sa lespri linite, travay ansanm, la bonne gouvernans, i enportan ki i annan latransparans, entegrite e respe dan tou keksoz ki nou fer I dan byennet tou zabitan lepep Seselwa.  Mon toultan dir ki nou bezwen met nou pep premye.

Les mon konmanse par remersye Prezidan Faure pour meeting konsiltativ ki i ti fer avek mwan Praslin e bann zabitan Grand Anse Praslin zis apre son Linogirasyon. Dan sa meeting mon ti met lanfaz lo reviv Praslin Development Fund.

A plizyer repriz dan Lasanble mon’n koz lo lenportans annan en tel Fon. Praslin i kontribye bokou dan lekonomi Sesel, sirtou atraver tourism; atraver nou bann Reserve Nasyonal parey Vallée De Mai e Fond Ferdinand e nou kontribye bokou dan lekonomi Sesel .

Mon apresye lefe ki Gouvernman pe anvizaze kree bann lendistri  e valer azoute asosye avek Coco de mer, e ki tou tax lo sa lendistri pou al direkteman dan sa Praslin Development Fund. Mon swete ki en poursantaz larzan tiket Vallée De Mai kolekte par SIF i osi al dan sa Fon.

Mon sel swe se ki en Bord balanse e byen reprezante i ganny etabli pou zer sa Fon. I osi enportan ki en audit Praslin Development Fund oparavan Iiganny fer pou determinen kote sa larzan in ale, e larzan ki reste i ganny transfer dan sa nouvo Praslin Development Fund.

Sa Fon pou permet Zabitan Praslin envestir dan bann proze ki pou benefisye tou le de distrik Praslin. Olye ki nou zis depan lo bann proze Kapital Gouvernman.

Prezidan Faure in koz bokou lo latransparans e bonn gouvernans, mon dakor ki fodre annan bonn Gouvernans dan tou departman Gouvernmantal, me fodre ki bann minister i responsab e rann kont pour tou zot aksyon.

Mr Speaker regardan sa size rann kont, yer mon ti al fer en visit Ile Eve Baie Ste Anne Praslin.

Mon ti dezapwente pou vwar ki mannyer bann asset Leta, sirtou later pe ganny zere.

En proze konblaz ki ti sipoze benefisye bann zabitan Praslin pe mal ganny zere.

Mon welcome sa Prozedlwa ki pe vin devan sa Lasanble tre byento pour etabli en Lalwa pour donn akse a lenformasyon. Zabitan Praslin i bezwen konnen ki mannyer later Leta pe ganny servi e distribye.

I annan bokou biznesmenn e endividi ki’n kontribye bokou dan lekonomi Praslin ki’n apply pour lease en kare later avek Gouvernman ki’n ganny met akote pour favoriz enn ou de gran konpannyen konstriksyon ou enn ou de endividi byen etabli dan Parti Lepep.

I sagrinan pou vwar ki Vijay Construction in ganny 3 gran kare later Ile Eve. I annan plizyer lezot gran konpannyen Endyen ki pe okip later Ile Eve. Sa ki osi sagrinan se ki i annan enn de endividi ki non selman annan later Ile Eve, me zot osi annan later kot zot in  aste  land bank sirtou Marie-Jeanne Estate.

Later i ganny vann antre fanmir. I annan en ‘cartel’ Praslin Ki Gouvernman i bezwen get ladan. I annan dimoun ki’n aste plis ki en kare later lo land bank pandan ki plizyer zot frer ek ser pe langi pou ganny en pti morso later.

Kantite biznes Praslin in apply pour later Ile Eve, me zot in ganny met akote pour favoriz enn ou de endividi, ki non selman pe aste later pour R1, me pe revann pour  milyon Roupi.

Lease Ile Eve ki’n kout R30 par met kare pe ganny revann pour R3mil par met kare ou plis. Ki mannyer eski lease Ile Eve pe ganny vann  san ki bann Lotorite konsernen I pran aksyon apropriye?  I annan plizyer lokater Ile Eve ki pa’n devlop zot later pour plizyer lannen san ki Lotorite konsernan in pran aksyon apropriye avek zot.

I enportan note ki tou transfer of lease i ganny aprouve par MLUH.

Pa zis Ile Eve, later Gouvernman partou Praslin pe ganny aste pou R1 e revann pour milyon. Fodre met en full stop avek sa.

Donn later sa bann ki napa, fodre met en lafen avek sa bann kalite koripsyon.

Nou pa kapab kontinyen toler sa bann dezord.

Fodre annan lord e accountability dan  tou asset Gouvernman.

Sa bann zafer aste later land bank e revann dan mwens ki 5an pou fer en profi – fodre arete.

I enportan pour bann Minis pran zot responsabilite e pa mislead nou pep. Mon osi dezapwente pour aprann ki deklarasyon ansyen Minis Ste Ange devan 5enm Lasanble le 26 Zilyet 2016 ti zis en mansonz.

Dan mon vizit Ile Eve mon’n aprann ki napa okenn later No. PR 4030 lo Zil Eve pour konstrir en sant kiltirel pour deservi zabitan Grand Anse ek Baie Ste Anne. Dapre Minis sa sant ti pou sipoze enkli Servis Bibliotek, Larsiv Nasyonal, Leritaz Nasyonal e Konservatwar Lanmizik.

Napa okenn allocated land pour en sant kiltirel. Tousala ti bann mansonz pour anbet zabitan Praslin pour ganny vot. Bann Minis fodre zot pli responsab e etre fran avek sa pep.

Tou keksoz ki nou fer fodre nou fer li dan en fason ki drwat, dan laverite e dan la transparans.

Mr Speaker dan sa lespri rann kont e travay ansanm, i enportan pour note ki Praslin bann tender – ‘bid pour netway semen, lans, tir bin salte, land field eksetera pour nepli vin devan Tender Board, me desizyon pour donn ‘bid pour ganny deside par en nouvo task force pour Praslin avek Digue.

Sa task force i en konfli lentere akoz I plizoumwen bann aktivis Parti Lepep ki lo la, I pa pe byen ganny reprezante. I bezwen annan en balans e enparsyalite dan tou keksoz ki nou fer.

Dan son Diskour Prezidan ti osi deklar en ‘ban’ lo leksportasyon nwa Coco-de- mer konman en matyer premyer.

Sa i en keksoz ki tre pres avek mon leker konman en Praslinois, e mon apresye en tel desizyon.

Mon osi anvi remind Prezidan Faure son deklarasyon ki i ti fer pour bann dezabilite lo Praslin dan son premye rankont ki i ti fer Praslin apre son inogirasyon.

‘Konseyon pour bann dezabilite ki voyaz ant Praslin/Mahe lo avyon ouswa bato’.

Mon anvi demann Prezidan pou osi konsider konsesyon lo bus fare pour tou bann dezabilite.

Mr Speaker prezidan in dir dan SONA ki Gouvernman pou konmans en prosesis Konsiltasyon Nasyonal lo nouvo plan devlopman nasyonal pour optimiz bann sekter tel ki lagrikiltir ek lapes.

Mr Speaker konsernan lagrikiltir Praslin, I annan en mank materyo, sirtou Grand Anse Praslin. I annan en mank legren, pwazon kourpa, fertilizers e plizyer matyer de baz, sirtou lo store Amitie. Fodre relans lagrikiltir Praslin.

Pour bokou lannen Pep Grand Anse Praslin pe esper devlopman lasose –Jetty Grand Anse Praslin. Ozordi I annan plizyer Leisure Boat ki pe vin dan labe Grand Anse Praslin, me nou napa en proper Jetty ouswa Marina parey La Digue avek Baie Ste Anne. Marsandiz i kout pli ser akoz tou kou transportasyon Marsandiz pou sorti Baie Ste pour vin Grand Anse i  fer pri monte.

En Jetty  ou en lasose pou accommodate bann bato cargo ek Leisure Boats Praslin pour boost up lekonomi Grand Anse Praslin. Me a plizyer repriz menm si zabitan Grand Anse Praslin pe demande, Gouvernman pa’n ekoute.

Kan ki sa Gouvernman pou donn zabitan Praslin nou lasose ek nou Marina? Pour plis ki 39an  nou a pe espere. Fer rev zabitan Grand Anse Praslin vin vre.

Zis mazinen si nou ti annan en lasose Praslin ki fer provizyon, ice, fuel ek delo, ki peser Praslin pa pou bezwen al Baie Ste Anne pou ganny ice avek labwet. Kot peser Praslin pa pou bezwen pey en transpor ouswa mars apye pou al rod fuel.

Mr Speaker Prezidan in koz lo akse avek bann lans piblik. Mon anvi anmenn dan latansyon Prezidan ki Lemuria Resort osi pe anpes Seselwa ganny akse avek lans Anse Georgette Praslin. Fodre kliyan ek Seselwa i met apwentman pour antre laba.

Fodre ki Gouvernman i get dan sa sityasyon o pli vit posib.

Mr Speaker i annan plizyer artizan ki ankor pe esper enstalasyon bann kyosk o-bor Airport Amitie Praslin pour zot konmans travay. Dapre Minis konsernen, kyosk i annan me napa larzan pour desann avek Praslin sorti Mahe napa.

Mon pe demann Gouvernman pou fer tou le neseser pour rektifye sa problenm.

Mr Speaker ozordi nou annan en sesel ki’n ganny anvai par plizyer fleo Sosyal. Bokou nou bann zenn pe display bann anti-social behaviors, me nou napa en sant reabilitasyon pour bann zenn avek bann tel konportman pour ankadre zot.

Bokou paran in eksprim zot konsern konsernan sa sityasyon. Sispann bann etidyan san en ankadraz pa pou benefisye zot. Fodre ki Gouvernman I fer provizyon en tel sant.

Mr Speaker, parey Leader Lopozisyon in dir pli boner,  ozordi plizyer biznesmenn Praslin pe soufer avek vertical integration.  Se monopoly enn ou de gro biznes ou endividi ki pe kontrol lamazorite market lo Praslin. Bann pti biznes ki’n la pour plizyer lannen pe soufer.

Gouvernman i bezwen fer si ki tou Seselwa pe ganny en bout sa gato ki apel nou ‘lekonomi’.

I nepli ler pou nou viv dan en Sesel  ‘bef dan disab sakenn vey son lizye’, fodre ki nou get dan lentere tou Seselwa.

Larises fodre ganny distribye; sa I enkli state asset parey later avek lakaz.

Mr Speaker konman MNA Grand Praslin mon monte desann ant Mahe avek Praslin pou vin Lasanble. I vreman sagrinan ki I annan Staff SCCA, sirtou bann Aviation security officers ki pour 8an zot ankor lo en basic salary R5mil.

Saler bann Staff Air Seychelles I vreman ba, sirtou pour lakantite travay ki zot pe fer. Fodre reviz salary schemes pour sa bann travayer.

En supervisor ki’n travay pou plis ki 18an ankor pe ganny mwens ki R10,000. Fodre ki Gouvernman I reviz saler bann Staff SCAA e Staff Air Seychelles.

An konklizyon mon bezwen fer resorti ki mon annan en bon lantant avek DA dan mon distrik, I annan bon konsiltasyon antre nou de, me i osi malerezman ki politik popilis i ankor pe ganny itilize dan plizyer Departman Gouvernmantal Praslin.

I nesesit en sanzman mindset, fodre nou travay ansanm e get tou dimoun parey, irelevan ki nou kouler politik.

Mr.Speaker apre en deklarasyon JJ Spirit Foundation ki en CSR tax benefactor ki zot non-political, ti malerezman pou vwar ki kot Award Ceremony pour bann atlet pour Inner Islands tou MNA Parti Lepep ti ganny envite eksepte mwan MNA elekte pour Grand Anse Praslin.

Sete Ex-MNA Parti Lepep pour Grand Anse Praslin ki ti prezant pri. Sa i klerman montre ki JJ Spirit Foundation i en political entity;

Mon anvi fer resorti ki Marc Volcere i nepli MNA Grand Anse Praslin, se Wavel Woodcock ki MNA elekte pour Grand Anse Praslin.

        (APPLAUSE)

HON WAVEL WOODCOCK

Sa i montre ki sa lespri ‘ek nou pa ek nou’ i ankor enkilke dan serten Lorganizasyon e Departman Gouvernmantal. E fodre met en full stop avek tousala. Nou bezwen aksepte la realite e travay pour tou Seselwa, nou pep i vin avan politik. En sel Sesel pour tou Seselwa. Tou lede kote latab nou kontan dir sa.

Mr Speaker Ledikasyon i lakle pour devlopman nou pei,

Nou bann zanfan, nou bann zenn i bezwen ganny en ledikasyon o nivo,

Me i pa zis laprantisaz ki enportan me lanvironnman ki sa zanfan pe viv ladan. Mr Speaker plizyer paran in apros mwan regardan leta Youth Hostel Anse Royale pour bann zelev pos segonder Inner Islands.

Bann paran in eksprim konsern ki zot annan avek move leta ki sa Hostel i ladan. Bann meb e bann fasilite dan bann block I dan move  Blok I dan benn move leta, napa proper maintenance ki pe ganny fer.

Minister fodre get dan Youth Hostel e fer sir ki nou bann zanfan pe viv konfortableman pandan zot laprantisaz.

Mon konpran prezan akoz mon pa ti ganny envite Youth Hostel ansanm avek bann lezot MNA Inner Island, akoz mon pou met laverite deor.

Fodre nou fran, nou pa kapab kasyet nanryen, kot i mal fodre dir i mal, kot i byen, fodre dir i byen, kot fodre aranze, fodre nou aranze.

Mr Speaker mon kontan lapros ki Prezidan Faure in pran, en lapros enklisiv, en lapros kot i annan latransparans e rann kont. Sa lapros ki nou dan Lopozisyon ti a pe demande pour plizyer lannen.

Ozordi dan sa nouvo klima politik nou bezwen vin ansanm konman en sel Nasyon.  Nou bezwen viv konman frer e travay dan linite pour anmenn nou pti pei Sesel pli devan.

Mersi Mr Speaker.

 

        (APPLAUSE)

 

MR SPEAKER

Mersi Onorab Woodcock mon ti pe get lo mon ler ou’ n fer zis 15 minit, so ou ankor ok.  Bon alor nou a pas laparol avek Onorab William.

 

HON WAVEN WILLIAM

Mr Speaker mersi. Mon remersi Bondye pour nou zoli pei Sesel, pour Nasyon Seselwa ki en pep beni e pour tou sa benediksyon ki in donn Sesel.

        Letan botan annou rezouir e letan difikilte konsidere e konpran ki nou kreater in kre tou lede botan ensi ki movetan.

        A sa pwen Mr Speaker mon anvi remersi nou bann Dirizan parey defen Prezidan Mancham, Prezidan Rene, e Prezidan Michel parmi lezot ankor ki’n zwe bann rol enportan dan met fondasyon pour ki sa ki vin apre i ava anbelir devlopman Sesel ek nouvo lapros e vizyon pour sa lot letap devlopman.

        Sa eleman gratitid Mr Speaker pour nou zenes i enportan ki nou preserve.

        Mr Speaker, Prezidan in koze e mon rekonnet ki Prezidan dan en fason zeneral in tous lo serten problenm mazer ki pei e nou pep pe fer fas avek.

        Sityasyon ki merit revwar i sanze pour ki lavi Seselwa iv in pli meyer, Prezidan pa’n zis koz lo problenm me donn son langazman e propoz serten solisyon atraver nouvo plan e stratezi ki pour ganny egzekite par Minister konsernen pour adres sa bann defi.

        Mr Speaker solisyon pour problenm pour depan lo bon gidans e direksyon Gouvernman ek en servis piblik ki efikas ki Seselwa pa ava zis apresye zis zoli parol, me eksperyans en pli meyer servis pour li progrese.

        Mr Speaker, mon bezwen et realis e presi dan prezant realite distrik Grand Anse Mahe, an relasyon avek sa diskour mon fason koze pa vedir ki tou i pa byen, mon anvi montre ansanm ek problenm ki Prezidan pe esey adrese, fer konnen realite distrik Grand Anse Mahe pour en pli meyer servis sorti kot Gouvernman koman fasilitater.

        Mon anvi komans avek sa pwen lakaz, wi Mr Speaker lakaz in ganny fer dan Grand Anse Mahe me lalis aplikan ki ankor pe espere i ankor long.

        Detrwa legzanp se bann ki lakaz ozordi in tro pti pour lafanmir, bann ki lakaz in brile, bann ki merit be ki napa swa ki pe bezwen lwe lakaz prive ki depas zot bidze, e bann ki dan bedsitter ki la akoz i napa swa. Finalman bann ki pe pey lakaz i pe espere depi 8 a 10an pour lakaz.

        Mr Speaker ek nouvo plan stratezi lakaz ki Prezidan pe propoze mon demande ki Planning ek PMC zot vin pli vizilan dan sipervizyon konstriksyon ki pe ganny fer, ki sitwayen ki benefisye en lakaz pa aste kabri dan sak.

        Ki lakaz pa fele apre 6mwan; ki move travay plonber ki persiste i rezourd, dalo ki’n mal plase ouswa basen delo dan plafon lakaz ki son overflow pe pouri plafon, ki bann safety tank e bann sistenm desarz lakwizin, lasanmben e kabinen zot ganny byen fer pour ki nou pa bezwen vwar gaspiyaz larzan pour rezourd problenm si travay ti ganny fer byen depi o komansman; ki Lotorite Planning i fer solisyon, i o-fer solisyon olye vin koman en pin anba lipye Seselwa pour rod tou zistifikasyon pour met bar dan proze olye ki ofer solisyon.

        Sa latitid larg lanmen e anmar lipye, ouswa anmar lipye e larg lanmen par serten civil servant, Seselwa pe demande ki i arete.

        Mr Speaker koman lavwa pep Grand Anse Mahe mon lans en lapel ek Prezidan pour swivre pros nou sivil servis. Ki bann Minister ki la pour enplimant Polisi e plan Gouvernman zot pa kasyet deryer leskiz Polisi, me ki zot fasilit demars sa Sitwayen Seselwa pour ganny solisyon apropriye.

        Parfwa an fas ant baryer e miray mete par serten manm civil servant, ou zis demande akfer ou la si ou pa kapab donn lespwar ?

        Mon pe dir sa Mr Speaker koman en temwen dan demars pour ed sitwayen mon distrik pour realiz son soue e son rev, si mon pa ti antete e fournen pour ganny en rezon pour tir sa bouson e delarg sa nen dan sa lasenn servis nou sitwayen i kapab krwar ki Manm Elekte osi i enplike osi dan ser son file e anpes son proze bouz devan.

        Mr Speaker sa ki malere serten civil servant letan ou fer li fer son travay ki i sipoze fer, i ganny peye pour fer zot vin ou lennmi e fer ou lavi en matir depi nivo Direkter Zeneral ziska nivo Minis ;- ki vwar ou parey en lannwi letan ou pe sey deblok problenm ou distrik. Sa mantalite e sa pratik fodre arete, annou travay ansanm pour ed sa sitwayen progrese dan lavi, pa donn plis traka e bann repons fatige e strese, annou donn lespwar.  Lespwar Mr Speaker pa fer sitwayen dir a plizyer repriz ; ‘’nanryen ou’’ parey koze dan semen mon a ziz ou pandan 5an.

        Mr Speaker en legzanp tipik ler en sitwayen pe reponn dan sa lapel ‘lev-e debourye,’ met tou son pti zefor pour ou rod en Laysenns pour li pa vin mandyan Leta pour lasistans welfare, i pas en matir.

        Ler ou swivre mayon sa servis ki enplik plizyer Lazans Gouvernman ou konpran sa latitid par serten pou touy motivasyon par fer nou dimoun monte desann pour dir zot en zour fer se si, demen al fer se la ki ogmant depans gaspiyaz letan kan tou ti kapab ganny fer dan en zournen Mr Speaker.

        Mr Speaker i pa byen, i pa akseptab. Si i annan problenm vin direk, vin fran pour kapab trouv en solisyon, ki fer mwan konpran akoz ki sitwayen i anvi sanzman baze lo sa kalite leksperyans. Bokou fwa i pa Lazans Licensing ki koupab me serten Lazans Gouvernman ki trenn lipye pour vizit ouswa anvoy rapor devan, sa mank linisyativ pour donn en solisyon.

        Mr Speaker dan Ledikasyon mon kontan aprann ki serten bann sanzman enportan pour ganny fer.

        Sanzman ki merit ganny fer en pe letan pase, me parey Seselwa nou dir plito tar ki zanmen pour ki nou zenn i ganny le meyer ledikasyon pour vin sa ki i anvi.

        I tre byen ki nou pe retourn ek NIE, be i pour enportan ki nou entis nou zenn ek bann Scheme enteresan pour zot pran teaching koman en karyer e ki zot vwar sa transformasyon dan kondisyon e dan lanvironnman lekol ki ozordi pe dekouraz ansennyan ki les mon tir konklizyon ki Leta i annan bokou pour fer dan sa laspe empowerment distrik pour pran desizyon pour aksyon imedya.

        Empowerment i pa vedir zis Komite lo Komite me resours apropriye a dispozisyon lokal dan kominote.

        Mon welcome sa lide, en  Scheme pour ankouraz bann ankadrer dan distrik, wi nou bezwen, i ti’n plis ki ler akoz wi sa i manke dan distrik.  Wi nou bezwen e ti’n plis k ler akoz wi sa i manke dan distrik.  Mon lans en lapel  ki nou komans regard bann ki deza la e la mon mazin Ms Militna – Ms Claudia e Elvis ki’n touzour senser menm si sa Scheme pa ti egziste.

        Mr Speaker en lot konsern nou distrik se sekirite nou sitwayen.  Ki ozordi pe soufer an silans e zot prizonnyen zot prop zefor pou vin en lavi dan lape e trankilite. Mr Speaker ou kapab konpran soufrans sa trwazyenm az ki son larzan sekirite sosyal ki’n travay ozordi pou li re-zwir i ganny vole.  Pour sa fermye ki son viv pe ganny rekolte avek ki li menm i re- -zwir fri son rekolt.   Ou kapab konpran soufrans Tambi dan laboutik ki ganny vole 3 fwa dan en mwan  lizour koman aswar ki afekte plan pou li mete ase marsandiz lo letazer.  E ou kapab kon pran soufrans sa viziter etranze ki ganny vole son paspor, son tiket e son larzan.     Son santiman e son kritik negatif i ganny advertize dan son pei lo Sesel e ki pa fer Sesel dibyen ditou Mr Speaker.  Mon remersi Komisyoner e son lekip pou vin fer sa miting piblik Grand Anse Mahe – pou prezant zot plan e pou ekout sitwayen.  Mr Speaker, nou’n osi.  Mr Speaker  nou’n osi eksperyans ki fason bon korporasyon par Lafors Lapolis ek piblik – ki fason sa community policing i vin efikas dan en sityasyon ant en group depi 3er bomaten ziska 7er bomaten, zot in ede pou idantifye boner ganny egzibit pou ed lapolis prezan son ka zidisyer.

        Mr Speaker,  me nou sitwayen pe soi dir ki Lalwa pa protez ase viktim pou ganny rekour.  Legzanp ganny rann larzan pou son danre ki’n perdi.  Akoz si i annan levidans, egzibit i kler ki sa voler menm si i pa  ankor ganny prouve koupab me ki i annan  ase levidans pou  montre ki i koupab, ki serten poursantaz sa larzan bail pa ganny donnen avek sa viktim.  Akoz ki voler I kontinyen ganny large pou vol ankor  tandis ki viktim I bezwen reste prizonnyen son leksperyans ek sa voler ki larg.

        Mr Speaker, i kler ki i annan travay pou fer e i dezir sitwayen ki Lasanble, Zidisyer e Egzekitiv i travay ansanm pou anmenn bann amannman dan serten Prozedlwa.  Annou fer sanzman neseser pou fasilit travay nou Lafors lapolis e ki sa a ankouraz plis zenn pou zwenn sa Lafors.  Kondisyon nou bann konstab dan stasyon Rezyonal fodre i ganny amelyore e ki  konsiderasyon I ganny pran pou donn bann allowance neseser  e lekipman  pou fer sa travay e ki i a apresye son travay pli byen dan sa Lafors e ki wi i a fyer son liniform  e i a donn 105 poursan toulezour.   Me ki i a pa al travay ek sa lespri, ‘‘ki ou a fer  mon bezwen ale.’’ Menm parey osi serten bann pti zofisye dan civil service kot ladministrasyon son Minister pa pe get dan kondisyon zot travay e renimerasyon.  La mon anvi rekonnet travay dir en gran mazorite  nou civil servant e mon felisit zot pou bann ki pe vreman devoue pou donn sa bon servis.  Mr Speaker, Sesel pour Seselwa.  Sesel i pour Seselwa. Seselwa pa devret ganny anpese pou ganny akse ek lans.  Desizyon pou tir tou baraz par Prezidan, Seselwa i apresye e pe look forward osi pou serten servis piblik pa fer serten sitwayen pa santi li enferyer ouswa koman en sitwayen 2enm Class dan son prop pei.  Serten letablisman Touristik i devret ganny sivre ki pe apes nou abilite Seselwa ki pe abiz nou dinyite nou Seselwa an faver etranze.  Sa pa devret ganny tolere Mr Speaker.

        Mr Speaker, mon remersi Minis Tourizm ti fer sa vizit STA   e ki problenm pe rezourd laba; ki nou etidyan zot lanvironnman letid ava enn ki bon.  Egalman mon remersiman i al pou Minis Lanvironnman, Lenerzi ek Sanzman Klima pou zot vizit dan distrik ek son lekip e ki’n konpran problenm e ki’n donn komitman.  Mon anvi remersi Minis Ledikasyon pour sa rankont ki’n konpran problenm manm ansenyan – problenm ek bann lenfrastriktir lekol ki merit ganny adrese pou amelyor lanvironnman skoler.  Mwan osi remersi divizyon proze Minister Ledikasyon ki’n fer vizit lo sa semen Grand Anse Mahe avek bi  ek Land Transport pou rezourd sa problenm enn fwa pour tou.  Mon pe ankor a-port mon pledwari ek Lazans Transpor pou ki sa lannen zot  realiz sa bout trotwar Barbarons depi sa pti labousri ziska sa roundabout dan krwaze land bank pou evit ankor aksidan fatal.

        Mr Speaker, avan konklir mon oule remersi Prezidan  ki’n rekonnet fot ki ti arive ek aktivite polisyon a 2 repriz La Misère ek ka dyezel dan delo e desarz kabinen dan larivyer dan leo La Misère.

        Mr Speaker, apre miting La Misers mon ti donn mon langazman swivan en let sinyen par Onorab Prea e mwan menm ek gidans Onorab Georges.  Mon’n pouse pou sa miting arive ek Prezidan e mon kontan ki miting in ganny fer.  Mon annan lespwar pou anmenn klotir dan sa ka e i byen ki malgre 7an Gouvernman in rekonnet nesesite pou  ofer en lekskiz a zabitan La Misere e pou ede pou anmenn sa klotir.  Zabitan pou  ganny enformen prosenn miting tre byento.

        Mr Speaker mon akey ou dezir bomaten ki sa Lasanble i bezwen fer en travay pli responsab koman  reprezantan lepep pou donn sa ki meyer.  Ou ganny mon sipor total lo la.  Mon demande ki ou Mr Speaker, ou servi  bann zouti a ou dispozisyon pou vin pli efikas koman sa lenstitisyon  ki reform neseser ki pa demann ankor plis konsiltasyon ki Lasanble i deal avek sa bann defi; ki nou travay koman sa Sizyenm Lasanble ava fer nou sitwayen tre fyer.

        An terminan, mon enplor Prezidan Faure pou vreman sivre nou servis piblik de pros ; ki i vin pli efikas e konsistan dan sa nouvo letap e ki i kit deryer sa latitid business as usual.  Mon remersi zot tou zabitan pou zot sipor kontinyel e mon demande ki nou ini ansanm pou sirmont bann defi e ki benediksyon Bondye i kontinyen dan nou pei e dan nou distrik.  Sikse i depan lo nou .  Personn pa pou vin fer li pou nou si nou pa angaz nou dan devlopman nou distrik e dan nou pei.  Mon dir bon kouraz Prezidan.  ‘Keep it up.’  Ki Bondye i kontinyen ekler nou semen e gard nou beni.

        Mersi Mr Speaker.

        (APPLAUSE)

 

MR SPEAKER

Mersi Onorab William.  Mon kontan sa nide.  Efektivman sikse pa fer house visits – fodre ou al rod li e mon krwar ki ou’n termin lo en bon note.  E mon a donn laparol Onorab Mondon.

 

HON TERENCE MONDON

Mersi  Mr Speaker.

Koleg manm lasanble, zabitan Takamaka mon distrik

Frer ek ser Seselwa ki pe ekout nou, bonn apre-midi.

I en plezir pour mwan aport mon kontribisyon dan sa deba lo Leta Lanasyon.  Dan son Diskour Prezidan in adopte en lapros plito diferan e menm pli pozitiv ki son predeseser .  Alor mon welcome sa nouvo lapros.

Mr Speaker, pou premye fwa dan listwar nou pei nou vwar Prezidan Larepiplik admet piblikman ki  son predeseser avek  son Gouvernman (ki li osi i ti form parti) ti mal azir lo serten size.  Menm si sa in anmenn serten rekour pour bann dimoun ki’n ganny afekte, lefe  reste ki Seselwa i ankor pe sibir konsekans bann move desizyon ki parti o-pouvwar in pran dan lepase.

Mr Speaker, dan son Diskour Prezidan Faure in rekonnet sa rol enportan ki nou Lasanble Nasyonal pe zwe pou promouvwar lademokrasi, bon gouvernans e latransparans. Wi, avek LDS an mazorite dan nou Lasanble,  bokou keksoz pe sanze pou byennet tou Seselwa. Mon profite pou salye tou dimoun ki’n siport LDS dan sa prosesis  akoz se zot ki katalist sa sanzman ki pe arive dan nou pei.

Mr Speaker, menm si Prezidan Faure in donn son langazman pou adres serten size pertinan ki nou pep pe fer fas avek, mon pa vwar li akseptab ki nou annan en Gouvernman ki pran plis ki 15 an pou rezoud en problenm tel ki akse avek lans. Pourtan sa size ‘akse avek lans’ in anmenn bokou lanmertim parmi nou popilasyon. En size ki tous tou Seselwa e in reste en size diskisyon dan tou bann miting piblik pour plizyer lannen.

Mr Speaker, par lefe ki propozisyon prezidan Faure i pou tous enn bann drwa konstitisyonnel en dimoun ki son propriyete i baliz avek lans e sa se  “The right to property” anba Lartik 26 nou Konstitisyon, mon oule sizere ki nou adres sa problenm par en lamannman dan nou Konstitisyon li menm.  En lamannman konstitisyonnel  i pou donn sa size ‘akse avek lans’  en kad legal  avek serten proteksyon kont  bann  sanzman Gouvernman ki pou arive dan lavenir.  I kler ki Gouvernman Lepep I fel dan plizyer domenn.

Mr Speaker, ler Prezidan Faure i donn sa 2 legzanp kot gouvernman in fer fot dan lepase, mon oule dir avek li mersi pou pran sa kouraz me Gouvernman in fer bokou plis fot ki sa. Ler en fot pa ganny adrese  e korize atan, son lefe I kontinyen miltipliye e son konsekans i agrave. Ozordi nou vwar serten Minister in tonm sitan ba e pa pe kapab anmenn sa rezilta ki pep Seselwa pe ekspekte avek li.

Performans Gouvernman dan domenn Ledikasyon, Lasante, Lozman, Lagrikiltir i donn nou en bon apersi leta nou pei ek nou pep.  Prezidan Faure in aksepte ki annan bokou pou fer e performans son Gouvernman in ankor ase lwen avek lekspektasyon nou sitwayen.

 

Ledikasyon: Mr Speaker, leta Ledikasyon ozordi i reflekte kalite desizyon ki Gouvernman in pran dan lepase. Wi, desizyon Gouvernman pou kas progranm NIE i en desizyon ki’n dekouraz bokou zenn ki ti anvi fer formasyon pou vin ansenyan.

Ler nou regard kondisyon nou bann ansenyan Seselwa, mon pa vwar li drol ki Minister Ledikasyon i kontinyen perdi bann ansenyan Seselwa byen kalifye.

Me sa ki difisil pou aksepte, se ki sa Minister i deside pou pa swiv Lalwa Prokirman e bann prosedir finansyel dan plizyer tranzaksyon e zot in fer sa pou 5 lannen konsekitiv depi 2012 ziska 2015.  En desizyon ki pe kout nou pei plizyer milyon parey Oditer Zeneral ti fer resorti dan son bann Rapor  Anyel.

Prezidan i dir nou ki bann lenfrastriktir lekol i enn ki vye e fodre ki nou regard sa size dan en lot perspektiv. Mon vwar plito en sityasyon kot lenfrastriktir lekol pa pe ganny mentenir parey ki i devret. Zis pou donn en senp legzanp ; en zanfan i rantre dan S1 Anse Royale e dan son laklas plizyer lafnet pa fonksyonnen. Sa zanfan i arive fini S5 e sa bann lafnet i ankor dan menm kondisyon. Apre 5an nanryen pa ganny fer.  Napa mentenans.

Mr Speaker, nou pe koz lo nou zanfan ki reprezant lavenir nou sosyete. Nou zanfan ki nou kont lo la pou aprann e fer pli byen dan zot letid. Problenm se pa ki lenfrastriktir lekol i vye, me plito zot pa pe ganny mentenir parey i devret.  Ozordi, nou ti devret annan en lanvironnman lekol ki pli conducive pou laprantisaz sirtou dan segonder. Dan ka lekol Anse Royale Segonder, mon lans en lapel avek Minister pou donn nou bann zanfan en landrwa apropriye pou zot assize e dyaloge pandan zot letan Break. Kondisyon kot Anse Royale i pa akseptab an se moman.  Mon pou osi demann management lekol  osi byen ki bann paran pou zwe en pli gran rol e kree en latmosfer pli pozitiv otour zot lanvironnman lekol.

 

Resours limite : Mr Speaker, mon’n ekout Prezidan Faure atantivman ler ti pe koz lo bann proze sosyal e in pa’n ezit-e pou met lanfaz lo resours limite. Alor, mon vwar li neseser pou donn serten perspektiv lo sa size resours.

Wi Mr Speaker, resours i pou toultan en defi me kestyon ki nou bezwen demande se: eski nou pe servi sa ki nou annan dan en fason efikas? Sa prosesis bidzeter ki nou’n fer tou dernyerman, in permet nou vwar e konpran nivo labi e gaspiyaz ki annan dan plizyer Departman Gouvernman e Lazans piblik. I kler ki dan bann lannen ki’n pase, larzan pep Seselwa i ganny servi koman byen personnel serten dimoun. Mr Speaker, nou kapab fer bokou plis pou nou pep avek resours ki nou annan ozordi.

Fodre ki nou realize ki pli gran resours nou pei se nou pep e lafason ki nou valoriz nou bann frer ek ser  Seselwa i  pou fer sa diferans pou  nou pei.

Gouvernman i devret met plis lanfaz lo anploy Seselwa e dan lot kote Seselwa i bezwen met li a la oter pou protez son lanplwa.

En zenn ki’n termin son letid Pos-Segonder pa devret esper plis ki 3 mwan pou li rantre dan en lanplwa e komans kontribye pou son pei. Ozordi I annan ki esper ziska 2an pou ganny en travay dan domenn ki’n etidye.

Dan lakominote annou siport nou bann frer ek ser ki’n tonbe dan lavi.

Fodre met en ‘Stop avek sa tandans kot Seselwa ensi ki etranze  ki pe viv Sesel, pe anploy etranze pou fer travay domestik.

Ler resours i limite nou ekspekte sa Gouvernman o-pouvwar egzers plis disiplin fiskal e vin responsab dan koleksyon larzan piblik. Dezormen, Gouvernman pou bezwen aret kre bann trou dan Bidze Nasyonal zis pou gen politik. Nou vwar sa dan Bidze Siplemanter 2016, kot plizyer milyon roupi ti ganny servi pou lasistans sosyal zis lavey eleksyon Lasanble Nasyonal.

Mr Speaker, mon oule rapel Prezidan Faure ki nou pei in perdi plizyer milyon roupi dan lepase. Menm ozordi, larzan ki ti devret rantre dan kof Leta, pe pas akote e al dan kont prive. Sa ki pli grav ankor, I annan nou frer byen plase ki pe resevwar larzan piblik atraver bann Kontra manboulouk. Mon swete ki Prezidan Faure i fer en sa zefor neseser pou adres sa bann sityasyon swivan: Premyerman ;

  • Demann Konmisyon kont Koripsyon pou inisye en lanket dan sa 50milyon dolar ki ti ariv Labank Santral en bomaten e disparet son apre midi.
  • Demann Interpol pou track sa imsye Ben Samra ki ti disparet avek plizyer milyon roupi apre ki Minister Lasante ti fer 100% advance payment pou medikaman me ki’n pa’n zanmen ganny delivre.
  • Fer en zefor ekstra pou kolekte tou bann larzan ki bann Lorganizasyon parey ansyen-SMB i drwa Leta parey Oditer Zeneral in fer resorti dan son Rapor anyel a plizyer repriz.
  • Kennsel sa CSR ki bann gran konpannyen pe donn Fondasyon Jj Spirit ki an prensip devret al dan kof Leta.
  • Protez kof Leta kont bann lorganizasyon e lakonpannyen piblik tel ki Green Island Construction ki pe sarz Gouvernman bann pri egzorbitan pou zot servis.
  • Ansyen Prezidan ek zot fanmir pa kapab kontinyen ganny keksoz pour nanryen tel ki karbiran atraver lafors Defans, pandan ki larestan nou popilasyon i bezwen trimouse pou fer 2 bout zwenn. Nou bann ansyen Prezidan in ganny tou keksoz pour nanryen pandan letan ki zot ti pe okip Lofis Prezidan. Alor i pa aksepte ki zot kontinyen abiz lo resours pep seselwa.

Mr Speaker, lalis i byen long e I kler ki Prezidan Faure pou bezwen bokou plis kouraz pou li adres sa bann defayans dan nou sistenm.

Travay an partenarya: Sa i anmenn mwan lo sa size travay an partenarya.

Mr Speaker, mon rekonnet dabor ki i annan serten Sef Egzekitiv e Sekreter Prensipal ki’n montre sa bonnfwa pou travay avek bann reprezantan LDS dan nou Lasanble Nasyonal. Mon remersye sa bann dimoun ki pe fer sa deza. Me malerezman i annan serten endividi ki pa pe reponn ni nou let e ni menm pare pou donn nou en lapwentman. Pli grav ankor, sa endividi in menm koz manti devan nou Lasanble Nasyonal ler i ti pe reponn kestyon enn nou Manm. Dan sa lespri kolaborasyon avek respe mityel ki nou bann Leaders pe promouvwar,  mon pou enplor sa endividi pou sanz sa kalite latitid. I bezwen konpran ki pouvwar sa pei, i reste dan lanmen pep Seselwa e Seselwa in swazir LDS pou diriz nou Lasanble Nasyonal.

Mr Speaker, Fodre ki PS i konpran ki i annan en devwar pou deservi tou sitwayen Seselwa san eksepsyon.  Fodre i realize ki sa sitwayen Takamaka ki bezwen son lasistans pou ganny en semen i osi annan menm drwa ki li.

An konklizyon Mr Speaker, mon pa kapab met ase lanfaz lo lenportans bon zesyon resours piblik e mon kapab imazinen kote nou pep ti pou ete ozordi si Gouvernman ti’n adopte bann prensip bon gouvernans, rann kont e latransparans depi kreasyon nou Trwazyenm  repiblik. Zis imazinen ki kalite lavi nou ti pe viv ozordi si selman parti o-pouvwar ti pare pou ekoute. Nou’n perdi preski 25an kot bon gouvernans, latransparans e ran kont i konsernen.

Mr Speaker, malgre bann letan perdi, mon pou touzour gard sa lespwar pou  en meyer Sesel ; lespwar pou en lavenir bokou pli briyan pou mon zanfan.

Mon remersi ou, Mr Speaker.

       (APPLAUSE)

 

MR SPEAKER

Mersi Onorab Mondon.  Ou osi ou’n fini lo en bon not ;’’ tou lespwar – touzour lespwar. ‘’ Onorab Vidot, laparol i pour ou

HON AUDREY VIDOT

Bonn apre midi Mr Speaker, tou Onorab e tou dimoun a lekout.

Mr Speaker, apre ekout Prezidan Faure prezant diskour Leta nou Nasyon,

mon dekrir li koman en zonm ki a lekout son Pep.

Seselwa in toultan en Nasyon ki kontan letan i annan en zorey ki pare pou ekout li.

  • Ki swa ler i dan problenm.
  • Ki swa i senpleman anvi partaz son lazwa.

E ler mon’n ekout Prezidan Faure koze Mardi; i kler ki i sa zonm ki vreman enterese pou ekout son pep e travay dan lentere pep seselwa.

Bann desizyon ki in pran apre bokou refleksyon lo bann defi Gouvernman ; pe enport lekel ou ; ki ou afilyasyon politik e krwayans relizye, Prezidan Faure in montre ki i pare pou ekout ou.

Mr Speaker,

Diskour Prezidan i reflekte bann bezwen, rev e aspirasyon pep Seselwa.

Bokou pe vwar li koman sa Dirizan ki pou anmenn en nouvo souf lespwar pou Sesel.

Wi i normal pou annan ki pou kestyonn son fason fer; me i enportan note e fer resorti ki son prensip travay pou met son pep e pei a ker e premye pa’n zanmen sanze.

Mr Speaker,

lafanmir i parmi  bann size ki’n byen ganny apresye par zabitan Roche Caiman e san dout popilasyon Seselwa.

Nou pa kapab toler valer lafanmir afeblir dan lakominote.

I devwar sakenn de nou pou tenir for e donn en koudmen partaz bann bon pratik avek nou bann zenn fanmir Seselwa.

I fer mwan rapel lepok, kot paran ti kapab kit son zanfan kot lakour e demann en vwazen pou zet en lizye lo li, e lakominote antye osi ti pare pou zet en koudey.

Nou osi rapel sa lepok kot nou ti pare pou vey lakour nou vwazen dan labsans anka voler i pase, olye nou zanfan pou sot lot kote pou al vole kot li parey i leka ozordi.

Sa lepok kot vwazen ti remontrans en zanfan depi dan semen si i ti pe mal konport li, apre paran ti donn li en lot koreksyon an arivan kot lakour.

Me avek en lerozyon disparisyon bann bon valer lafanmir; ozordi nou pe rekolte en lavalas move manni dan kominote.

E sa, pe afekte osi mon pti kominote Roche Caiman.

Mr Speaker, Roche Caiman i en pti distrik kot nou tou nou vir lanmenm avek kanmarad. E sa bann move fason fer i vreman dekal nou lavi kominoter. E pou bokou nou; lanons par Prezidan pour dedye en Minister pour Lafanmir i en soulazman, pour nou bann zabitan e en lakonplisman pou nou bann ansyen koleg ki ti dan Senkyenm  Lasanble ki zot osi zot in toultan demann sanmenm.

Mr Speaker, Prezidan Faure i fer resorti dan son Diskour ki nou koman reprezantan Lepep nou vwar dega ki drog ek lalkol i anmennen dan nou kominote.

E i reste en konsern pou tou sitwayenespesyalman bann  ki pa dan sa biznes.

Alors bann fanmir Seselwa ozordi, i pli determinen ki zanmen pou vwar lespwar ki sa 2 malez I ganny deal avek en fwa pour tou!!!

Wi i vre;

  • I pa en keksoz ki pou ariv desito…
  • I pa en travay di zour a lanmen…
  • E sertennman pa en louvraz ki kapab ganny fer tousel dan en kwen.

Alors nou pou bezwen agree pou travay ansanm lo sa semen solisyon.

E si nou annan fanmiy ki pe viv dan lapovrete Roche Caiman, sa 2 fleo partikilye I annan en gran rol pou zwe.

Mon pa premye e mon pa pou dernyen ki pou kontinyen koze pou dir ki problenm drog pe afekte Roche Caiman.

Ziska nou bann zanfan pe ganny servi pou vann drog dan lakour lekol.

E la kot sa bann inosan I komans perdi zot bann bon valer e sans devlopman.

I annan zabitan ki’n apresye pou tande, ki pei pe ozordi dedye resours anba direksyon Sekreter D’eta Dokter Patrick Herminie pour komans annan en laklerte e solisyon lo sa size drog.

E  egalman lans en lapel, pour ki sa fleo lalkol i ganny depolitize, e ki bann propozisyon bi partizan i ganny aborde dan en deba fran e onnet par nou Lasanble Nasyonal.

Sa ava ganny propoze ansanm avek Gouvernman e bouz ver anmenn solisyon pou sa problenm.

Mr Speaker, zabitan Roche Caiman ki pe siport lalit kont trafik drog ki senserman apresye bann sanzman ki pe ganny pran pou adres sa fleo drog.

Nou donn nou sipor e langazman nouvo lekip Seselwa ki san dout kalifye e kapab delivre en bon servis dan latransparans me pa non si zot parti politik ou non  me dan bann pozisyon kle pou enn fwa pour tou deal avek sa bann gro pwason ki pe detri nou lasosyete e lafors travayer.

Mr Speaker, Prezidan Faure in dir ki i pe debout for lo son bann prensip, e sa prensip se ‘’travay ansanm’’, dan en fason ki fran e onnet.

E, nou pou kapab vwar e konpran desizyon e direksyon Prezidan Faure pe pran sa pou reflekte dan sa reform dan NDEA.

Nouvo ‘management’ NDEA i bezwen realize ki fanmir dimoun pe soufer, e nou Roche Caiman nou oule vwar laklerte dan nou kominote kot i konsern sa problenm drog.

I fermal – i fermal mon repete pou nou vwar sa bann trafiker monte desann konmsi zot ki la e pe afekte nou bann zenn ki  pe vin lesklav fleo drog.

Sa fleo pe annan en kou enorm lo lavi nou pep, e mon pa konnen ziska ki tan ki nou bann kominote pou kontinyen pey sa pri.

Mr Speaker, realite diriz en pei, se ki ou pa zanmen annan ase resours pou fer tou sa ki ou ti a swete anvi fer.

Napa personn ki ti a kontan vwar son zanfan pa performen lekol ; napa personn ki ti a kontan vwar  son frer ou ser  esper en kantite letan pour li atann lakaz, me larealite ki malgre nou bonn volonte nou pa kapab fer tou en sel kou.

Ler in arive pou nou aret fer politik bonmarse.  Seselwa pa’n elekte nou pou zis konplent, konplent tou lazournen e blanm tou dimoun pou tou keksoz, letan konplent in fini la nou bezwen travay, travay e travay.

Sa ki nou bezwen premyerman rekonnet, se ki i annan bokou ki’n ganny fer lo sa size par sa Gouvernman Lepep.  E sa bann lakaz in ganny mete a dispozisyon pour nou pep.

Me fodre realize ki nou popilasyon in grandi, e nou stil lavi in sanze.  Ozordi Seselwa i nepli  viv dan bann gran “extended families.”  Bann zenn koup i prefere al fond zot fanmir pli lwen separe e pou ganny zot prop lakaz.  Sa i tre normal.

I pour se – la ki mon apresye e rekonnet bann mezir ki Prezidan  in anonse; e parmi Roche Caiman pou benefisye avek nou 10 younit enkli proze Perseverance.  E nou Roche Caiman nou annan ankor propozisyon pou Gouvernman kote nou krwar i annan potansyel pou fer proze lakaz pour nou zabitan.

Lanons Prezidan Faure i en mesaz lespwar pour nou pep san dout bann zabitan Roche Caiman.

Me pli enportan ki sa, bann mezir ki’n ganny anonse i konpreansif, i kouver tou bann aplikan lakaz ek later dapre zot mwayen e zot bezwen.

Sa ava fer ki nou kapab annan en distribisyon resours ki pou bokou pli ekitab.

PMC osi mon kontinyen repete I bezwen plis strik avek bann ki deza dan lakaz ki pa pe pran zot responsabilite pou peye.  Annou mazin bann ki ankor pe espere.  Mr Speaker, mon pa kapab termin mon repons, san koz lo lazenes.

Yer mon’n ganny sans ekout 2 zenn Roche Caiman, kot pe eksplik kanmarad lo sa size ‘test medical’ segonder ki Prezidan Faure in anonse koman ‘National Screening’.

En zenn fiy in fer son zanmi konpran, ki sa i parey letan ki ou’n ganny sa swiv depi pti baba, pour bann tes kot ou bezwen al peze, e zeneralman mezir ou devlopman, ki fer li fasil pou detekte si sa zenn ou zanfan i annan problenm avek son lasante.

Sa fiy ti eksplik li  ki menm lozik i aplik pou bann zenn adilt, ki sa swivi medical ava bon pour son lasante, zeneral.

Mon servi sa leksplikasyon a sa 2 zenn – en kontribisyon direk sorti kot nou zenes Roche Caiman akoz premyerman zot in metriz sa size bokou pli byen ki mon ekspekte; e dezyenmman mon bezwen pran en moman pour nou apresye e salye nou bann zenn ki pe fer byen, e dir zot, ‘keep it up’.

Mon osi kontan pou vwar ki Prezidan Faure pe envestir plis resours pour donn lankourazman nou zenn, avek kontinyasyon ‘Scheme laptop’.

Paran i osi rekonesans ki teknolozi lenformatik I en zouti esansyel dan laprantisaz zot zanfan, e rekonnet ki Gouvernman pe envestir dan sistenm Wifi byento kot bann lekol.

Nou bann zenn i merit valoriz sa loportinite ki zot pe gannyen pou amelyor zot laprantisaz.

Tou nou bann zenn i tre enportan, fodre ki nou rekonnet zot dan bann tel fason ki reel e konkret, e donn  zot tou sa lankourazman ki zot bezwen akoz zot bezwen nou.

Pou konklir Zabitan Roche Caiman i felisit Prezidan Faure pou son bann nouvo fason vwar e pou fer keksoz marse.

E koman serviter lepep ansanm nou pou donn li sa sipor e travay dan lentere Pep Seselwa.

Bann sanzman ki’n ganny anonse, pe sirman ganny byen apresye par tou kous nou bann popilasyon.

Menm lo sa desizyon 5 Zen ki bokou nou lo lot kote latab parfwa nou mansyonnen lo la.

Akoz tou levennman ki arive dan listwar en pei  ki swa i byen swa i mal pa pou zanmen kapab ganny refase akoz I form par nou listwar.

Mersi Mr Speaker.

MR SPEAKER

Mersi Onorab.  Onorab Adelaide.

HON FRANCOIS ADELAIDE

Mersi Mr Speaker.  Bonn apre midi tou Manm Onorab.  Bonn apre midi tou bann dimoun dan lakour ki pe ekoute e bonn apre midi tou Seselwa an zeneral.   Mr Speaker, Leta Lanasyon 2017, nou tou nou kapab dir ki i enn kot nou’n vwar en lot letap lo sa ki konsern nou Nasyon.

Pou mwan, mon pe get sa 2017 dan sa fason:

Ler mon get sa No 2, i fer mwan mazinen ki Sesel I’n touzour annan 2 lafors politik ki’n touzour opoz kanmarad e nou’n vwar son konsekans akoz en parti tou dernyerman, in defann zentere lepep e en lot parti ki ti pe  defann lentere dalon.

Ler mon get sa zero – sa ron, dan en fason i donn mwan lespwar. I donn mwan lespwar akoz mon pe trouve kot tou Seselwa pou dezormen atrap lanmen kanmarad pou le meyer; kot nou diferans I ava sa lakol ki pou bond nou ansanm e fer nou vin pli for.

An dot mo: Savedir ‘linite pou lepep dan diversite!

Ler mon get sa No. 1, i fer mwan mazin lapens dan lakour, kot napa keksoz ki ti reprezant en baryer pou anpes lakour bouze. Menm gro, gro ros, siko e lezot lobstak, sa lapens ti fer li bouze e menm degrengole.

Ler mon get sa No. 7, i fer mwan mazin en pyos: savedir, netwayaz e lanbelisman.

Mr Speaker, en lannen ki menm son sif i koz pou li menm. Kot fodre tire nou pou tire.  Kot fodre anbelir nou pou anbelir.

Mr Speaker, Prezidan Faure in vin devan nou dan son kapasite koman Sef D’eta. Me son konportman i pa’n montre nou ki I pa en Sef ki i vin kraze, enpoze, maltrete, e fer kalonmni. Me koman en vre Leader, ki admet ki Gouvernman aktyel pa’n touzour azir korekteman.  In fer parey en Leader ki brav – kot in bezwen demann leskiz. I pa’n ezit-e pou fer li. Sa wi! Mr Speaker, par ler, ler ou pran bann desizyon ki dwat e ferm, ou pou ganny bokou mekontantman. Akoz dan ou kan, i  annan ki pa kontan ladrwatir e kontan later mou zis pou profite.

Ler ou koz laverite, ou pou toultan ganny persekite.

Depi lontan in koumsa. Me laverite e ladrwatir in touzour mentenir son siperyorite lo dimal.

Mr Speaker, mon mesaz pou Prezidan Faure se  pour li pa dekouraze dan son semen pou anmenn bann bon keksoz pou sa pep Seselwa.

Nou dan LDS, nou pou siport ou otan ki i  fer sa ki byen pou Sesel e pou TOU Seselwa. Ou kapab kont lo nou, si dan ou kote ou santi ki ou pe ganny presyon  e ki pe fer ou gouvern kont ou prensip.

Mr Speaker, ler mon tann Prezidan avoue ki se li ki  ansarz sa pei, mon santi mwan vreman soulaze, akoz nou pa kapab annan de kaptenn lo en sel bato. En pei ki annan en Konstitisyon modern parey pou nou, pa devret en problenm pou gouvernen. Laplipar solisyon e fason fer i fini ganny mete dan en liv e Lalwa i kler lo ki mannyer sakenn de nou, nou devret konport nou.

Dan lepase, nou’n trouve kot Lalwa in ganny kase e pa’n ganny swiv e nou’n vwar plizyer labi. Ler ou menm Prezidan, ou oule mars avek en lagonm pou re-fas Konstitisyon zis pou ou avek ou dalon ganny privilez, i afekte leta en Nasyon.

Pran par egzanp sa pale lo montanny La Misère.  Mwan mon okouran ki en ta diskisyon ti’n ganny deroule lo sa size avek Planning Authority. Me se pa Sef Planning ki annan dernyen grip lo sa sityasyon.

Prezidan, Minis, CEO, PS, Manm Lasanble, avoka, Ziz e tou lezot fodre nou respekte Konstitisyon.

Konstitisyon i Siprenm!

Mr Speaker, fodre ki sa lannen, i annan en lot fason fer keksoz kot i annan plis aksyon, mwens koze.

Napa personn ki endispansab dan sa pei. Sa ki pa pe travay, i devret ganny demande pou resign.

Sa ki fer koripsyon, fodre ganny deal avek accordingly.

Sa ki fer krwar i pa konnen, FODRE FER LI KONNEN.

Mr Speaker, Leta nou Nasyon i en pe parey dan nou Lasanble konmela.

Nou’n vwar kot o-zofisye dan Gouvernman in vin devan Lasanble e koz en ta mansonz. Zot pa ni onte! In abitye koumsa. Me nou, nou bezwen donn valer sa lenstitisyon ki apel LASANBLE NASYONAL.

I tre enportan ki si en dimoun i vin koz lalang dan Lasanble, le moman ki nou ganny sa lenformasyon, nou pran aksyon disipliner kont li.

Mr Speaker, le moman in arive kot nou Seselwa, nou bezwen brav, annan valer moral, spirityel e annan dinyite e prensip.

Nou pa pou vann nou pei zis akoz nou’n parfwa fer bann fot, e solisyon pli vit se vann 2 bout nou Patrimwann e fer Seselwa vin lesklav zot bann move desizyon.

Mon senserman remersye TOU zabitan Baie Lazare, TOU Seselwa isi Sesel e aletranze. TOU sa ki’n ede dan en fason ou en lot pou ki nou reganny posesyon nou lans Valmer.

Mon egalman remersye Prezidan pou sa desizyon ferm ki ou’n pran, gide par prensip e Lalwa Sesel. Mon quote:

It always seems impossible until it is done.”

Yes Mr Speaker.

Menm  nou’n tann Seselwa dir ki i enportan pou bar bann lans akoz lisyen eran e nwizans.

Mr Speaker, Seselwa, nou bezwen en pe plis ledikasyon e Lotorite i devret azir dapre son manda.

Mon oule lans en lapel avek tou dimoun ki pou al lo lans Valmer, silvouple, annou konport nou dan en fason responsab. Pa fer disturbance e fer sir ki nou ranmas nou salte e kit nou lans prop, safe e zoli.

Mr Speaker, sa size later, mon pou bezwen koz lo la avan mon fini mon pti letan.

Baie Lazare I en distrik ki annan plis later Gouvernman parmi bann distrik dan Sesel.

Nou zabitan I martirize zis pou zot ganny akse avek en bout later,. Zot larzan in pare. Alors, avan zot deside ganny tante pou al fer en lot keksoz avek sa larzan. Silvouple, ed sa bann zabitan.

In ler osi pour nou de politiz sa size later ek lakaz. La mon pe mazin sa de ser Libanotis, Mr Confiance, Mr Jeanny, Mr Greles e lezot ankor ki pe kontinyen tourn an ron.   Manrmay i ankor zenn.  Manrmay i bezwen bouze.  Annou donn zot en lapir pou montre zot.  Annou pa ser zot.  Lo kote later pou biznes avek kreasyon mon pe demann Prezidan pou pas en letan avek nou dan Baie Lazare.  Nou pou bezwen diskit lo en bout later pou nou bann peser e bazar avek en landrwa kot pou zot stor zot bann lekipman.  Sa bout later ki ti fer Bazar Ovan koman en landrwa kot aktivite sportif, spor lo delo menm en fun park parey sa enn avan, kot nou zis santi loder donasyon me nou’n pa’n vwar nanryen arive.  Sa  lot bout later kot bazar i ete  e  osi  sa lot bout ki pe ganny lwe zis pou plant fler e nou ti kapab met propozisyon kot pou fer devlopman ki ti pou vreman asiste zabitan Baie Lazare pou fer biznes e  amelyor zot lavi e lavi kominote.

        Mon terminen mon oule met Prezidan okouran ki iannan  en manev pou pez travayer Seselwa sirtou dan bann domenn tourizm.  Nou’n ganny aprose par diferan kous travayer dan mon disktrik e mon konvenki ki Minister Lanplwa i devre pran sa  o serye.  Expatriate pe kolabor avek expatriate, pour ki Seselwa kalifye pa ganny bann plas apre ki zot letan in terminen.  Swa ou trouv zot dan en travay e al dan en lot.  Silvouple sa lannen nou bezwen valoriz nou Seselwa.  Nou bezwen siport nou bann Seselwa e nou bezwen rekonpans nou Seselwa.  Nou pu bezwen edik nou Seselwa pou vin pli matir kantmenm i pou kout nou ser.  Me nou napa en lot swa. Better be safe than sorry.

        Mr Speaker,  mon en garson ki annan lespwar.  Mon konnen nou tou nou devret ganny en 2enm sans dan lavi pou koriz nou lerer e fer pli byen.  Prezidan Faure, avek LDS ou kapab garanti nou sipor.  Nou fer sir ki i annan more devlopman for Seychelles kot nou tou ansanm nou ava benefisye selon nou merit.  Nou ti fer en lapriyer ler nou ti sermante an Septanm annou pa bliy sa bann mo lasazes ki nou kapab tanzantan refer avek sa lapriyer  pour bann bon gidans.  Mon rapel byen sa lapriyer St François        D’assise.  I ti dir, ’Seigneur fais de moi un instrument de votre paix.’’ Lord deliver Seychelles.  Mersi Mr Speaker.

        (APPLAUSE)

 

MR SPEAKER

Mersi Onorab Adelaide sirtou pou lapriyer St François – trez enportan.

Onorab Lemiel.

HON SYLVANNE LEMIEL

Mersi Mr Speaker.  Bonn apre midi Mr Speaker.  Bonn apre midi tou Manm Onorab e en bonn apre midi spesyal  tou zabitan Anse Royale

        Mr Speaker, si mon pou rezim Diskour Leta Lanasyon fer par Prezidan Faure dan zis detrwa mo, sa  se “ Nouvo lespwar pou Lepep Seselwa.”

Tou Seselwa ki viv lo sa later Sesel, i ozordi vwar zot ganny reflekte dan sa Diskour, ki swa, zot bann swe, rev ou laspirasyon, Prezidan Faure in ozordi pran kont bann bezwen tou son pep e son Diskour in demontre son konviksyon pour travay pour byennet son pep.

Dan mon dernyen lentervansyon apre premyer Diskour Prezidan Faure dan Lasanble Nasyonal an Oktob 2016, mon ti dir ki mon santi “en gro divan sanzman  pe vini”.  Mon bann koleg dan LDS ti aklanmen byen for e serten ti menm gognard en pti pe.

Mon bann Koleg, la i la sa sanzman ki mon ti pe koz lo la.   Nou Prezidan i enn ki pran aksyon e pa zis koze. Prezidan Faure in koz avek lepep Seselwa. In donn nou tou en nouvo souf e en nouvo lespwar pou demen.

Mr Speaker, pou nou pei Sesel progrese, i bezwen ki nou tou nou travay ansanm.  Met nou lopinyon politik de-kote, asize diskite, konsilte, agree e pran bann aksyon desiziv pou nou anmenn nou pei pli lwen.

Me sa ki pli enportan, se ki nou osi bezwen annan sa respe pou kanmarad e pou Lalwa si nou oule bouz pli devan.

 

Lafanmir: Mr Speaker, Lafanmir se pilye nou sosyete.  Se dan lafanmir kot tou ledikasyon i komanse – savoir vivre, savoir faire, e lezot bon valer ankor.  San en fanmir solid nou sosyete I fouti. Paran i bezwen pran zot responsabilite anver zot zanfan.

Nou bezwen donn plis sipor bann paran tousel ki pe seye pou elve zot zanfan.  La nou pe koz sipor an term gidans, amenazman zot finans, lasistans finansyel kot i neseser e lezot lasistans ankor.

Kreasyon en Minister pou Lafanmir i prouve ki plis latansyon e sipor i bezwen ganny donnen a lafanmir pou ki nou kapab redres nou Sosyete an zeneral e fer retournen sa bann bon valer moral e spirityel ki nou paran e gran paran ti enkilke dan nou.

Se lafanmir ki azir koman lank, pou gard nou santre lo bon semen lavi ; se lafanmir ki sa fondasyon solid lo lekel ki nou batir nou kominote e nou sosyete.  Alors, i tre enportan ki nou pei i rekonnet le vre valer, e plas lafanmir dan nou sosyete.

Ozordi nou bezwen admet ki lafanmir Seselwa pe ganny atake lo tou kote.  I annan divers kalite fleo ki pe ronz nou fondasyon e la, koman nou tou nou’n agree pou fer en sel lafors, in ler pour nou komans travay pou remet keksoz drwat.

Drog : Mr Speaker, si i-annan en keksoz ki nou’n aprann par nouvel sa bann dernyen zour, se ki bann trafiker pe fonksyonn lo en nivo tre sofistike dan sa biznes trafik drog. Bann trafiker isi Sesel ozordi zot form parti bann diferan ‘cartel’ e rezo krim organize dan larezyon. Sa ki tre kler se ki sa bann dimoun i nepli bann senp pti trafiker ki  pe fer bann ptipti tranzaksyon anba, anba.  Lapolis Sesel, avek NDEA pou bezwen organiz zot pou zot kapab fer fas avek en bann kriminel byen prepare, e tre byen organize.

Se a sa bann moman ki nou pli bezwen travay ansanm, si nou anvi tir nou bann zenn dan sa fleo drog.  La i nepli letan pou zis montre ledwa e blanm kanmarad san rezon. Si nou senser, annou ansanm agree enn fwa pour tou, pou met tou nou zefor pou sey kontrol sa fleo.

Lakaz e Later : Mr Speaker, si I annan en leokri ki pe mont pli for ki tou lezot dan nou pei ozordi, se sityasyon later ek lakaz pour nou pep. Problenm lakaz nou bann dimoun i tre varye. Bann bezwen i diferan sorti kot en fanmir pou en lot, e se zisteman sa, ki Prezidan Faure in pran kont dan son nouvo stratezi lakaz ki in e-tale dan son diskour.

Mon akeyir linisyativ Prezidan Faure pou sa bann nouvo lapros atraver bann diferan polisi e mekanizm, ki pou ganny met anfors byento.  Zabitan Anse Royale osi pou benefisye avek en tel linisyativ.  Mon lans en lapel avek tou ki’n fer zot laplikasyon lakaz pou kontinyen fer zot kontribisyon atraver Home Savings Scheme e sa pou permet zot ganny zot nouvo lakaz demen.

Mon siport sa Proze konstriksyon 24 unit par distrik ki pou osi demare dan sa prosen 24 mwan, bann aplikan mon distrik pou osi benefisye.

Malgre ki lamazorite deba isi dan Lasanble in konsantre lo nouvo lakaz, e lo bann fanmir ki pa ankor ganny lakaz, mwan koman en dimoun ki lontan pe travay lo teren, mon konnen ki problenm i al bokou pli lwen ki sa. Enn bann problenm ki reste dan lobskirite, se sa bann fanmir ki pa kapab mentenir zot lakaz. Serten problenm ki nou ti’n sipoze rezourd depi 15, a 20an pase, in ozordi retournen akoz serten fanmir ki’n deza ganny asiste avek en lakaz, i vwar li enposib pour mentenir sa lakaz.

Sa nouvo stratezi ki Prezidan Faure in anonse, kot pou annan mekanizm spesifik an plas, pour asiste bann fanmir ki pa kapab mentenir zot prop lakaz dan en leta konvenab, pour non selman ede soulaz en pe problenm, me i pou egalman ede pou soulaz sityasyon lapovrete.

 

Ledikasyon : Nou bann Lekol e ansenyan i bezwen nou sipor.  Problenm disiplin dan bann lekol in vreman deborde. Nou bezwen travay ansanm  -paran, ansenyan, Legliz, e lakominote pou kapab rezourd sa bann problem.

Nou bezwen osi revwar lanvironnman lekol kot nou bann ansennyan e zanfan pe lekol ladan. Minister Ledikasyon i bezwen o pli vit posib rezourd problenm mankman ansenyan, mankman meb pou ansenyan e osi pour zanfan. Laprantisaz pa pou kapab pran plas si lanvironnman lekol pa bon.

Mon apresye ki etidyan komansman S1 pou ganny asiste avek en laptop atraver “Laptop Scheme.” Sa pou ed bann etidyan avek bann resers ki lekol i donnen.  La mon ti a sipliy avek bann lakonpannyen TELECOM pou revwar zot tarif ki zot enpoze lo data. Zanfan pou bezwen data pou fer resers e pou le moman pri sa servis i tro o.  Ou a  krwar sa bann lakonpannyen pe “rip off” dimoun.  I byen enportan ki tou lekol i ganny servis “Wifi”e la mon konstate ki sa servis pou ganny enstale kot bann lekol segonder selman.  Mon ti a lans en lapel avek Minister Ledikasyon, pou osi fer en tel servis ariv kot bann lekol primer, ki napa akse avek internet.  E lekol Anse Royale Primer i enn ki pe esper sa servis depi detwa lannen pase.

Mr Speaker, annan koneksyon Internet denozour i pa en liks, me i en nesesite. Ansenyan i osi bezwen fer resers e fer zot leson vin pli enovativ.  Mon osi rekonnet ki en tel servis pou ed tou lekol dan pei an term pas  lenformasyon e resevwar lenformasyon elektronikman ki pli vit… alors kominikasyon pou mars pli byen ant tou bann sekter.

Mr Speaker, si nou pei i oule avans ver lavenir dan sa monn modern, nou pou bezwen en pep ki edike, e pour sa arive i enportan ki i annan en sistenm ledikasyon ki marse, e ki delivre lo bann bezwen e lekspektasyon nou pep.

 

Pri lavi : Size pri lavi i touzour nou konsern. Fodre ki nou kontinyen rod tou fason e mezir, pou nou fer desann pri lavi. Mon apresye sa bann mezir ki Prezidan in anonse dan son Diskour, kot en lalis bann komodite esansyel e lezot pou ganny revwar e ki VAT pou ganny retire lo la.  Sa i tre rekonfortan, me parkont, nou bezwen kontinyen revwar lezot fason osi pou nou fer desann pri lavi dan nou pei.

Lakaz pou dimoun aze :

Mr Speaker, nou bann dimoun aze zot nou sours lenformasyon e bann arsiv vivan.  Nou bezwen ed zot e pran bon swen avek zot.  Nou osi bezwen asire ki zot termin zot vye zour dan konfor. Sekter Prive i bezwen zwenn avek Gouvernman pou asire ki sa i arrive. In plis ki ler ki bann biznes prive zwe en pli gran rol dan lakominote.  Konstriksyon lakaz pou bann dimoun aze in vin en nesesite.  Mon pou sezi sa loportinite, pou egziz bann zanfan pou pran swen avek zot vye paran. Nou pa kapab pran zot met zot dan en “Home” apre oubliye si zot egziste. Nou bezwen touzour rekonesan anver nou granmoun.

 

Loan pou dimoun aze : Mr Speaker, ozordi nou vwar bokou dimoun  – sirtou bann ki pli aze pe viv dan serten sityasyon en pe deplorab.  E sa bann dimoun parfwa zot ganny bokou difikilte ler zot apply en loan, sirtou ler i dir zot rod garanter.  I annan bann ki bezwen kennsel zot demann akoz napa personn ki oule garanti zot. Ozordi, tou dimoun pe pran en loan pou zot kapab amelyor sityasyon lavi. Alors, en tel linisyativ kot aprezan Gouvernman atraver Minister Finans, pou kapab garanti bann loan ziska SR75mil pou bann dimoun aze a vin en soulazman pou zot. La mwan lans en lapel avek sa detrwa  dimoun aze Anse Royale ki’n bezwen kennsel zot loan avek HFC akoz ti napa garanter pou al fer zot laplikasyon e zot a kalifye pou ganny zot loan pou aranz zot lakaz.

 

Akse avek Lans: Mr Speaker, mon totalman dakor ki dimoun i annan akse avek tou lans, sa i fantastic, me fodre pa nou oubliye ki dimoun ki al lo lans swa pou fer piknik oubyen detann nenport li lot fason nou konsyan ki parfwa i annan lezot dimoun ki reste  o-bor sa lans oubyen dan zanmerant.   Fodre pa ki nou disturb trankilite sa bann dimoun osi, mazinen kot ou drwa i fini,  pou en lot i komanse.  Annou gard sa respe pou kanmarad e konprenezon.  Avek sa, mon krwar ki tou pou mars byen.

Mr Speaker, an konklizyon mon oule met lanfaz lo 2 pwen, le 18 Oktob, Prezidan Danny Faure ti prezant son premye Diskour dan sa Lasanble dan son kapasite koman Prezidan Sesel, e i ti promet nou en lot fason fer, en nouvo lespri travay e enterakte dan nou sosyete. E otan ki mon kapab trouve, ziska prezan in azir koman en zonm ki’n gard son parol.  Dan son kapasite koman Sef Egzekitiv, Prezidan Faure pe inisye en nouvo kiltir kot nou tou nou travay ansanm, kot-a-kot pour byennet nou pei. Kot nou tou nou lib pou fer nou politik, me kot politik pa lib pour li blok devlopman pei dan okenn fason.

O-kontrer, nou koman politisyen nou la o servis nou pep, e politik  li menm i zis en zouti gouvernans pour fasilit lavansman nou pep.

Mon krwar ki Prezidan Faure in demontre tre klerman ki i-en zonm ki tre atantiv, e réseptif a bann lide e pwennvi lezot, e ki i pa pou zanmen e-zite pou li fer sa ki byen pour son pep kan i merite.

Mon dernyen pwen i comme  swivan, e la permet mwan pour sit Diskour Prezidan Faure ;

“Sesel i pli gran ki nou tou, e lentere pep Seselwa i pas touzour premye”~ fen sitasyon.

Mr Speaker, Prezidan Faure in delivre en mesaz lespwar avek nou pep ki’n vize non selman pour esey inifye nou, me egalman pou elev nivo dyalog e enteraksyon politik ki pe deroule ozordi dan nou pei. Me tou son bann bon travay pa pour abouti dan nanryen si bann ki pe sipoze delivre lo travay ki zot in ganny delege pou fer, pa pe fer li avek en lanmour.

Fodre ki nou tou nou pare pou realize, e aksepte, ki Sesel i pli gran ki nou tou, e ki letan nou ganny en louvraz pou fer, annou fer li efektivman e dan en dele letan pli kourt posib.  Letan ki nou ganny 10 file, annou eklersi 10 file lo nou latab silvouple, e non pa zis 8. Nou fer li pa pour okenn rezon politik, pa pour prezidan, ouswa politisyen, me plito nou fer li pour nou pei, e pou nou pep ki pe depan lo nou.

Nou bezwen vin en pep ki delivre lo nou bann responsabilite, e non pa en pep ki kale, e kasyet par deryer tou leskiz pou nou pa fer travay ki nou’n ganny demande pou fer, akoz “Sesel I pli gran ki nou tou, e lentere pep Seselwa I pas Touzour Premye.”

Mersi Mr Speaker.

 

(APPLAUSE)

 

 

MR SPEAKER

Mersi Onorab Lemiel. Efektivman Sesel i pli gran ki nou tou.  E nou lo schedule pou nou bann travay ki nou pe fer alor nou  a pran en poz e nou a retournen 4er.

        (BREAK)

MR SPEAKER

Bon nou kontinyen nou repons lo Leta Lanasyon e nou a donn laparol Onorab Georges.

HON BERNARD GEORGES

Mardi, Mr Speaker, nou ti tann en mesaz lo leta nou Nasyon. Pa en diskour Bidze ; pa en diskour politik. Pa lensilt. Pa demagozi. En mesaz lo leta nou Nasyon. Sa ki byen avek nou Nasyon, me osi, e sirtou, sa ki pa byen. Se sa, sa kalite mesaz ki nou popilasyon i merite. Se sa ki pandan tro lontan nou pa’n gannyen. I pa nou rol pou vin felisit Prezidan e dir li ki tou nou dakor avek tou keksoz ki in dir nou. Me i nou rol pou apresye en diferan fason fer, e fer konnen ki nou apresye. I nou rol – sakenn de nou dan sa Lasanble, e sakenn de nou dan sa pei nou ki’n deside antre dan politik, pou rod sa ki meyer pou nou pti pei Sesel e nou pou pep fyer e beni.

Kekfwa Prezidan ti napa swa dan sa ki in fer. Apre-tou, balans pouvwar in sanze dan nou pei depi Septanm lannen pase. Kekfwa in realize ki si li i pa donn direksyon, lezot pou fer. Kekfwa i pe esey senpleman anmyel nou. Kekfwa i senser dan son parol. Nou konsyan tou sa bann posibilite, e nou lizye pa fermen. Me, dan tousala, en keksoz i kler: nou pei in sanze depi Septanm lannen pase, e travay politik in sanz avek. Alor, ler Prezidan i vin devan Lasanble e i donn en mesaz parey i ti donn nou Mardi, i nou devwar aplodi sa nouvo fason fer e ankouraz li plis ankor, pou byennet nou pei e lepanouisman nou pep.

Me annou pa krwar ki tou solisyon pou ariv avek en sel bon mesaz Leta Lanasyon. Tou sa ki Prezidan in fer se tras en larout ki son Gouvernman i anvi swiv. Lalwa lo lenformasyon, restriktirasyon SBC, tousala i byen. Lontan nou pe demande lo sa kote latab. Prezan, I nou responsabilite pou ed li lo sa semen dan en fason ki lo nou kote nou ava kapab retir otan benefis ki nou kapab lo lapar nou sitwayen. E lo sa size, Mr Speaker, i mon devwar lo lapar zabitan Les Mamelles pou akey avek bokou lazwa, promes Prezidan pou lans redevlopman lakaz Lower Les Mamelles sa lannen. Parey zabitan mon distrik i konnen, plizyer minis in promet mwan sa redevlopman ki mon pe demande depi 2004. Sa lannen se Prezidan li menm ki pe vin reponn lapriyer zabitan Dan Laplenn e Lo Lateras. Mwan pase SLTA ti vin re sirfas Semen Bassin Bleu apre ki mon ti demann zot. La i fer de dan mon 5 promes eleksyon ki pe ganny akonpli deza. Si se sa lafason ki travay Gouvernman pou ganny fer dezormen, mwan mon pou dir i byen e se sa sa kalite korperasyon ki nou bezwen ant Egzekitiv e Manm Elekte.

E lo sa size mon oule felisit bann anplwayer servis piblik ki monn angaz avek dan sa detrwa mwan depi eleksyon Lasanble. Se bann dimoun konpetan, travayer, ouver a sizesyon e ki annan lentere Sesel aker. Mon dir zot bravo. In pran zis en eleksyon e en sanzman mindset dan Egzekitif pou remet nou pei lo en lekilib normal kot tou dimoun i santi ki i annan en par ladan. Malerezman, I annan touzour serten ki ankor pe viv anba lenfliyans politik ki pandan tro lontan in detri nou servis piblik, ki ankor anvi viv dan lepase. Mon mesaz pou zot se : sanze, e sanz vit akoz sankwa zot pou ganny balye par sa divan sanzman dan pei e ler zot pou pran kont i pou tro tar.

Pandan ki mon lo sa size, Mr Speaker, mon oule osi profit sa lokazyon pou dir ki depi tou sa bann lannen ki mon dan politik se la ki mon vwar en gouvernman travay avek tou son dimoun. Pandan lontan mon ti fer lapel avek gouvernman pou roul son masin lo tou le 4 silenn, e non pa lo zis de. Sa ti met retar dan devlopman pei. La ki balans pouvwar in sanze dan pei e gouvernman pe donn nou dan lopozisyon nou vre plas, nou war en travay konzwent dan lentere tou nou pep. Popilasyon i pli angaze, i pli enterese dan fason ki son dirizan i travay e rezilta i la pou tou dimoun war. Nou bann lenstitisyon, parey sa Lasanble, Mr Speaker, nepli bann bwat vid ki dekor letazer en Nasyon, me in vin – e pou vin plis ankor avek sa travay lo bidze ki pe ganny fer – bann lenstitisyon performan o servis e pou benefis tou nou dimoun. Letan kot MNA Lopozisyon dan distrik pa i ganny konsilte e sete reprezantan Lepep ki ti annan tou pouvwar, parey Karanja dan sanson, in orevwar.

Me, Mr Speaker, pa tou keksoz ki byen dan nou pei.  Lo nivo Egzekitif, nou nasyon, Mr Speaker, i dan konfizyon. Lo en kote nou war en nouvo Prezidan pe fer bann keksoz ki nou pep pe apresye. Lo lot kote, i paret ansyen Prezidan pe konmans regret son desizyon pou pran son retret. Sa pa byen. Ler ou Prezidan ou pa devret met ou lentere personnel devan ou devwar travay pou ou pei e ou pep (mon mazin batiman Espace kin ganny en zoli bout later pou en pri tre ba kot en batiman pou – why not – minister tourizm ti ava kapab ganny konstri). Ler ou’n kite konman Prezidan ou devret les lespas pou sa ki vinn apre ou. Dimoun pe demande konbyen prezidan nou annan. Sa i kree lensertitid.

Nou’n vwar dan son mesaz lo Leta Lanasyon, en Prezidan ki prese. I anvi travay vit. Nou osi nou prese e nou anvi travay vit pou aranz nou pei e remet li lo en semen drwat.  Travay i la. Lontan nou pe donn lide pou fer avanse nou pei. Depi Septanm 2016 nou’n fer plis ankor. Nou kontan ler nou bann lide i ganny pran e met an-laplikasyon, si sa i dan lentere Sesel. Apre tou, se Egzekitif, parey son non i dir, ki egzekit desizyon. Me se nou ki reprezantan lepep ki annan sa latas donn lide. E nou kapab fyer dan sa Lasanble ki deza nou’n met en seri progranm an mars ki pe ganny sipor Gouvernman e ki pou amenn benefis pou nou Nasyon.

Alor, an mezir ki mon pe remersye Prezidan pou sa ki in promet pou Les Mamelles, mon bezwen demann li pou fer son bann minister azir lo lezot demann ki mon’n fer – an partikilye mon ankor pe esper en larepons lo mon demann pou lwe en biro dan milye Les Mamelles, e pou nou proze Day Care dan sa landrwa kot vye lakres ti ete. Nou oule travay, Mr Prezidan. Les Mamelles pe bouze. Ed nou pou akonplir rev nou bann sitwayen.

Lo sa not, les mwan koz en pe lo drog e prizon. Mon akeyir avek lazwa sa promes pou ferm prizon lo zil Marie Louise. Dan sa Lasanble nou ti pran laparol lo sa kote latab kont sa bann mezir ki Parti Lepep ti’n anmennen avek gran sipor e aplodisman pou anvoy trafiker drog prizon lo zil e pou tir zot remisyon. Nou ti dir ki sa pa pou marse e se pa meyer fason pou dekouraz trafik drog. Nou ti annan rezon. Lannen pase nou’n vwar en sanzman dan Lalwa remisyon. La Mardi, nou’n aprann ki Marie-Louise pe al fermen. Sa i byen, me konbyen larzan ? Konbyen letan ? Konbyen soufrans ki nou’n difize ? Konbyen tourn an ron initil, avan ki nou’n ganny kouraz pou fer sa ki byen? La ki NDEA in ganny en nouvo direksyon, mon profit sa lokazyon pou felisit sa 3 zofisye – an-partikilye, Sef Sirentandan Romano Songor ki en manrmay Les Mamelles – pou zot lapwentman e promet zot tou mon sipor dan sa travay ki zot pe al fer.

Antan ki portparol Lopozisyon lo size drog, e antan ki Manm Lasanble pou en distrik ki’n ganny bokou afekte par sa fleo, mon pe esper avek pasyans Mr Speaker, bann sizesyon Sekreter D’eta lo sa size ki nou’n ganny promet. I kler ki konman en sosyete, nou nepli kapab atak sa fleo zis avek pinisyon. Me nou devret osi regard sa problenm avek en lot lizye – en lizye konpasyon kot tretman adikt pou osi enportan. Dan sa konteks, nou’n elabor en plan konpreansif  pou atak sa size. Pou nou arive rezourd problenm eroin nou pou bezwen konman en Nasyon adopte mezir radikal kot lanfaz i lo redwir risk a lasante e non pa selman lo redwir konsonmasyon drog. Fodre pa nou per pou fer bann pa diferan e menm bann ki difisil pou konpran. Sikse, Mr Speaker, i vin avek mezir brav.

Lo sa size, les mwan siport propozisyon Leader Lopozisyon. I byen ki prizonnyen i ganny posibilite pou travay e ganny en pti larzan ler zot sorti. La mon ti a kontan ki sa progranm i elarzi e ki bann dimoun ki ganny anvoy prizon par Tribinal Lafanmir akoz zot pa’n pey allowance pou zot zanfan, i ganny donnen en travay apropriye e peye dan en fason ki, olye asize e les Welfare sonny zot zanfan, sa larzan i a ava al direkteman kot sa zanfan. Lo en kote sa pou met en ‘Stop avek paran ki prefere pa travay pou pa mentenir zot zanfan ; lo en lot kote sa pou ed devlopman nou pei. Mon konn bokou dimoun ki ti pou pare pou anploy sa bann dimoun lo en baz zournalye konman casual pou rann zot sa servis. Mwan menm mwan mon ava ofer ede. Pou sa ki konsern prizonnyen, en landrwa kot zot ti pou kapab fer en keksoz prodiktif, e an menm tan rann nou pei en servis se dan met kontrol avek bann lalyann anvaisan ki pe koloniz nou fore.

An-konklizyon, mon ti a kontan tous lo en keksoz ki Prezidan in dir. Sa se lo size La Misere. Prezidan in ofer son lekskiz a sa kominote ki ti ganny afekte, ki ti ganny servi, epi in  ganny rezete. Konman avoka sa bann zabitan, mon remersye Prezidan pou son zes. I ti plis ki tan. Prezan, avek lagras, sa bann zabitan a kapab pran kontrol zot claim e resevwar sa ki zot merite pou sa soufrans ki zot in sibir. Pa ti’n devret pran tou sa letan e monte desann Ankour kot Gouvernman li menm olye ed son sitwayen ti’n vin nou prensipal adverser, pou nou ariv la. Pasyans zabitan La Misère in ganny rekonpanse e an ka zot in bliye, sa ti ariv lo 8enm laniverser sa trazedi ki ti ariv– zour Valentine !

Alor, la ki koabitasyon pe marse dan nou pei, olye zis swiv sa ki nou’n fer dan lepase, nou pei in ganny en lelan nouvo dan nou lobzektif konzwent, pou kit fleo sosyal e lapovrete, drog e mank lakaz, deryer nou e fer fas a en lavnir briyan e fraternel. Mon swete ki Egzekitif i kontinyen dan sa direksyon. Lo nou kote nou pou  li  o-kour sa lannen ki devan nou. Mon swet nou tou en bon lannen travay. Mersi Mr Speaker.

(APPLAUSE)

MR SPEAKER

Mersi onorab Georges. Laparol pour   Onorab Aglae.

HON EGBERT AGLAE

Bonn apre midi Mr Speaker, tou Manm, pep Seselwa ki a lekout, spesyalman zabitan Port Glaud. 

Mr Speaker, ler nou koze e analiz lo leta nou Nasyon, nou bezwen analiz li lo en konsyans moral e sosyal.  Nou bezwen analiz konteks lepase e larealite kot mou été ozordi.  Bokou nou ki rapel yer nou konnen e konpran ki sitasyon leta nou ti été plis ki 25an pase, kot ti annan en Sesel kot sistenm klas ti egziste, kot loportinite pa ti vreman egziste e kot zis serten ki ti benefisye.

Mr Speaker,

 Ozordi an 2017 leta nou Nasyon in sanze e pep Seselwa in vin en Nasyon fyer baze lo lidantite e nou ganny rekonnet pou sa ki nou été.  I fasil pou kritike e tonm dan négativité me larealite i ki lepep Sesel in kontinyen transformen e devlope.

Mr Speaker, wi i annan bokou defi pou fer fas avek e en pwen kle ki Prezidan Faure in touse se baz lafanmir.  Nou kominote kot bann malez sosyal pe afekte nou bann progre.  I nepli ler pou asiz lebra krwaze e kritike.  I nepli ler pou larg sa fardo zis lo Gouvernman.

Mr Speaker, Sesel i bezwen sanze.  Wi bokou dan lot kote i kontan pres sa mo sanzman, me vre larealite sanzman se dan nou menm avan. En sanzman dan nou mindset i primordyal.  Bokou fanmir pe soufer avek bann malez sosyal e nou fason viv pe sanze, i pe nepli annan sa linite, sa bann fason viv ansanm, papa, manman, ser, frer, kouzin, kouzen, tonton, tantin, tou pe sanze me pa pou le meyer.

Mr Speaker, se avek sa vizyon ki Prezidan Faure in vwar pou entrodwir en nouvo Minister e sa se Minister lafanmir ki ava mandate pou ede e sofgard e enkilke en kiltir moral, spirityel atraver bann akter e pilye kle dan nou sosyete e sa i ava anmenn en sanzman rekonesan lo valer, responsabilite e disiplin dan lafanmir.  Sak endividi dan en fanmir i merit pran responsabilite e fer son fanmir marse.

Mr Speaker, ozordi leta nou Nasyon nou vwar nou pe fer fas avek en lekspektasyon avanse, modernize e tou Seselwa i anvi tay pli vit dan sa lakours modernizasyon e en o nivo standar lavi, san ki nou realize sa presyon finansyel e ekonomik ki sa in anmenn lo lafanmir, Gouvernman li menm. Alors annou azir onet e balans nou priyorite – vre.

Mr Speaker, ler nou koz priyorite, mon pou dakor pou en fanmir Seselwa ganny en lakaz e mezir pe ganny met an plas pou fasilit asiste sa demars baze lo ou bezwen, dapre ou mwayen.  Bokou zot ki o lalis lakaz pe atann plizyer  lannen e mon welcome desizyon prezidan Faure pou met lenvestisman ansanm ek sekter prive dan domenn lakaz koman enn son priyorite.  Mon osi rekonnet e remersi nou Prezidan Faure lo non tou rezidan Foret Noire Port Glaud ki apre tou sa lannen zot pe fer  sa redevlopman lakaz low cost housing Estate zot rev pe vin en realite. E mon konvenki ki pou annan ankor devlopman lakaz tel ki Ex-Teachers Port Launay a lavnir.

Mr Speaker, devlopman i inevitab dan en bon planifikasyon e mon distrik i annan bokou lespas pou diferan proze, tel ki plis akse semen.  Nou bezwen peron ; nou bezwen lenfrastriktir pou lwazir, lenfrastriktir pou  fermye e peser en landrwa ideal pou fer plis biznes e mon pou lager pour nou kapab ganny sa bann servis Mr Speaker.

Mr Speaker, leta nou Nasyon ki prezidan Faure in adres sa pep, in anmenn  en nouvo souf lespwar e remet konfyans dan sa pep ; en konfyans ki nou zenn i bezwen profite e vwar zot lavenir avek plis lespwar.  En mesaz for pour nou zenn, sezi tou loportinite pou zot vin pli edike, pou kontinyen aprann e aprann plis. Bann etidyan in welcome lanons Prezidan Faure pou extend sa ‘’Laptop Scheme’’ e Wifi. Ki pou benefis  plis ki 50poursan etidyan  Seselwa. Me zenn fodre pran nou responsabilite pou servi sa bann servis dan en fason efikas, moral e disiplin.

Mr Speaker, In ler pou met en fren ek sa tandans zis destriktif, immoral, negatif ki nou vwar nou bann zenn pe egzerse ozordi, ki swa lo rezo sosyal, dan lekol ou dan lakominote.  Zenn se sa pilye fitir zenerasyon. Zenn annou pran nou lavi pli serye.

Mr Speaker, leta nou Nasyon nou vwar nou pe fer fas avek serten form lapovrete ki annan en relasyon direk avek bann problenm sosyal e depandans lo bann sibstans destriktif pou nou legzistans. Detanzaot mon zwenn en paran ki pe plenny son sor, akoz i annan en zanfan adikt.  E de la mon swet sa nouvo lekip NDEA kouraz e plis zefor dan sa lalit e mon pou donn zot  100 poursan mon sipor.

Mr Speaker, larealite e kiltir imen i ki pli ou donn li plis larzan, pli irod fason pou li depanse, me sa kiltir nou bezwen reaziste, sanze e balans vre priorite. Sak endividi dan fanmir i merit kontribye pou fer fonksyonnen son fanmir e soutenir bann ki aze e ki i nou drwa.  Nou drwa zot gran respe.  Mr Speaker, nou zanfan osi, ki pe grandi i bezwen aprann, ganny edike pou zot osi komans kontribye boner,  akoz zot ki pou garanti sa fitir zenerasyon.  Nou bezwen travay e tou travay i annan son valer parey Prezidan Faure in site dan son Ladres.

Mr Speaker, Sesel ek en popilasyon plis ki 90mil pa merit annan mandyan lasarite. Minister Lanplwa i bezwen sorti avek plis viger e determinasyon pou al ver teren ,apros sa bann unemployed ,ofer zot bann loportinite lanplwa e de la zot ava kapab ranplas si plis ki 8mil etranze e nou ava aret tann dir ki etranze pe pran nou travay Sesel.

Mr Speaker,  leta lasante nou popilasyon i telman enportan pou asir plis progre plis prosperite e mon soke ek sa sif konsiltasyon plis ki 340mil dan en lannen pou en popilasyon 95mil e mon panse en letid pli aprofondi i merit ganny fer pou analiz vre leta e lakoz sa sif baze lo servis lasante e la mezir apropriye a ganny pran par Gouvernman.

Mon osi  lans en pledwari avek Prezidan Faure pou konsider avek zabitan Beoliere pou ouver sa Klinik lo en baz 7/7 menm si pa lo en baz 24er.

Mr Speaker, leta nou lekonomi swivan 10an reform IMF i fer ki anba Gouvernman Sesel/Lepep, Sesel in vin pli rezilyan e nou’n ganny rekonnet pou zefor e lantant sakrifis en pep seselwa in fer.  Me sa pa devret fini la. Tou biznes i bezwen pran zot responsabilite dan en fason onnet.  Pey zot tax e kontribye enpe sa profi dan lekonomi e kominote.

Mon oule rekomande ki SRC i vin pli modernize ; ganny plis resours pou li kapab desarz son rol anmans tax ki Sesel i merite e elimin faver ,koripsyon e konpatriyot dan zot travay.

Mr Speaker, mon santi i annan bokou pou fer pou amelyor ‘the ease of doing business’ Sesel e en mezir enportan ki Prezidan Faure in anonse se pou revwar serten Lalwa – pou revwar rol SBFA,  lentrodiksyon en starting Grant pou bann SMEs sa garanti par Gouvernman, sa pou tir en pe presyon finansyel  pou sa zenn ki oule komans son prop bizness. E osi kot nou pou vwar plis siport banker. Seselwa loportinite i la servi li byen. E zabitan Port Glaud ki oule komans zot pti biznes raport devan pour zot ganny sipor.

Mr Speaker,  dan servis piblik nou rekonnet  ki i annan serten defayans e mwan mon pou felisit bann travayer dan servis piblik ki fer en travay nob – ki pran zot responsabilite pou serye.  Me i annal ki  pa pe delivre.  E mon demande ki Gouvernman  i get dan sa bann keksoz pou fer sir ki bann file pa ganny kasyet, perdi, tarde ouswa fer dimoun  vir an ron.

Mr Speaker, ozordi leta nou Nasyon politikman i egzize, ki nou travay ansanm dan en fason koabitasyon.  Wi si nou serye e met Sesel avan tou e kot Sesel i pli gran ki nou, nou pou al pli devan. Politik bonmarse ouswa politik laglwar pa pou anmenn nou okenn par.

Mr Speaker, mon apresye lapros Prezidan Faure pou travay avek Lopozisyon pou ekout zot bann sizesyon ki bon ki pou anmenn sesel pli devan. Nepli letan pou viv dan lepase.  Let bygone be bygone and let’s move on.

Mr Speaker, kot i konsern pri lavi zefor konzwent lo tou lede kote i enportan.  Tou akter i bezwen azir onnet e responsab. Revizyon lalis komodite exempt from VAT i a donn en  bon direksyon e de la nou lans en lapel ek Prezidan ek Gouvernman  pou konsider plis bann prodwir zanfan ek pti baba pou ede tir presyon finansyel lo sa manman, lo sa papa e fanmir an zeneral.

Emon ti a kontan osi Mr Speaker, si Prezidan I consider fer en legzersis kot pou evalye pri serten servis tel ki bann litilite enportan. Sa a osi ede redwir kou lavi.

Mr Speaker, Prezidan Faure  in osi koz lo plan devlopman Nasyonal e  lenfrastriktir. Sa osi in al dan en bon direksyon pou asir bon planifikasyon e anmenn sa ki meyer dan sa fason pli efikas e  inovativ avek en lapros  travay konzwent avek sekter prive. Kot sekter prive pa kapab  arive Gouvernman i ava enplimante .

Mr Speaker, pour Sesel kontinyen progrese, i neseser annan stabilite, trankilite, lord ek lape.  Napa plas pou konfli politik ; napa plas pou lensilt, e tou akter, politisyen, kominote sivil, medya, lapres, Egzekitiv e Zidisyer i bezwen fer son travay dan en fason responsab san faver ou preferans.

Mr Speaker, bokou in dir lo koripsyon e nou bezwen fran ki koripsyon i annan diferan form e i partou, dan Gouvernman, sekter prive, dan bann Lazans e i pou iresponsab pou met sa blanm total zis lo Gouvernman. Nou tou nou merit denons okenn form koripsyon san okenn ezitasyon.

Mr Speaker, Prezidan Faure, in pronons son lekor lo sa size akse ek lans.  I byen lans i pou piblik me ler in donn zot en ledwa annou pa pran lanmen antye.  Azir konsyaman; pa abiz zot drwa e drwa lezot. E pou note ek pep Seselwa pa zis lotel ki baliz ek lans, i osi annan rezidans prive, alors Lalwa i bezwen aplik pou nou tou.

Pou terminen, Mr Speaker, Prezidan Faure in vin fran, in aksepte kot Gouvernman in al mal dan serten desizyon. In ouver lebra avek tou sekter.  In ekoute; in adopte lapros travay ansanm .  Prezidan Faure in osi ekout bezwen pep seselwa.  I en zonm ki pou gard son parol ki swiv par aksyon.  Alors en gro responsabilite i tonm lo nou.  E tou Seselwa i son devwar pou siport sa ki i pe fer dan lentere Sesel san fer okenn propagann politik.

Sesel i nou paradi ; ki Bondye i beni nou Prezidan ek son lekip pou plis sazes dan son desizyon ; ki Bondye i osi beni tou politisyen pou egzers nou politik dan en fason akseptab, rezonnab e ki tou seselwa i vin pli responsab e kontribye dan nou devlopman nou pei sesel .

Mersi Mr Speaker.

(APPLAUSE)

 

MR SPEAKER

Mersi Onorab Aglae.

Laparol prezan i pou Onorab Larue.

HON FLORY LARUE

Bonn apre midi  Mr speaker, bonn apre midi  tou dimoun.

Mon remersi Msye Faure pour bann aksyon ki in pran anver bann fe reel e aktyel ki’n ganny anmennen dan son latansyon. In aksepte ki sa bann fe pa ti dan lentere Seselwa e in pran bann aksyon pour rod solisyon. Mon remersi tou dimoun kin siport LDS e in annan konfyans dan nou. Sa ton SONA iosi montre konfyans ki li Msye Faure in met dan travay LDS ek sa Lasanble ki nou, nou pe fer pour transform nou repiblik.

Mon remersi Msye Faure pour lenvitasyon pour partisip dan “miting piblik”  ki ti fer Anse Royale menm koman en manm proporsyonnel Lasanble Nasyonal, pour partisip dan devlopman distrik e promot dinamiz sa distrik.

Msye Faure in aksepte fot pour ferm NIE ki’n koz en mank ansenyan. Plizyer zenn pe ganny afekte par sa bann desizyon, ki fer ki nou pa’n donn zot tou bann zouti pour devlop dan en adilt ki kapab kontribye plennman dan lasosyete.

Nou’n kree en mank profesyonnel dan serten sekter ; nou’n kree en group zenn kin tonm dan sibstans akoz san en ledikasyon zot pa’n vwar loportinite pour kapab devlope. I byen pour aksepte fot akoz nou annan en pwen depar. Me konbyen lezot fot ankor ki nou pe pey konsekans ?

Mon remersi Msye Danny Faure pour bann premye letap ki in demann pardon pour sa kin arrive La Misere e in dir “Gouvernman pour fasilit prose pour trouv en konklizyon dan sa zafer”

Mr Speaker, alor bann fe ki mwan mon pour anmenn devan, mon osi demann Msye Faure pour trouv en konklizyon dan lentere pep Seselwa e konpran ki mwan osi mon oule vwar en benefis pour tou dimoun ; ki nou dan LDS nou pour kontinyen anmenn bann keksoz ki difisil pour nou aborde.

Depi sa Sizyenm Lasanble in formen nou’n tann souvan sa mo istorik ganny servi pour eksplik sa nouvo klima politik isi dan Sesel. En nouvo lapros , en nouvo vizyon….me sa ki i vedir vreman, i ki pour la premyer fwa dan 40 tan, nou’n vwar en Lasanble Nasyonal, Lebra Lezislatif nou pei ki pa zis dir “Wi” avek nou Egzekitif. Pour la premyer fwa sa mo demokrasi in ganny son valer e i pe ganny pratike. Nou’ vwar li ganny egzerse par komans avek en vizilans pour ki mannyer larzan pour nou Bidze pour ganny servi. In sekwe nou Nasyon.  In montre tou dimoun ki zot tou zot kapab partisip dan devlopman nou pei. Nou tou nou enplike dan leta nou Nasyon.  Nou Leta i son Leta, alor nou tou annou pran responsabilite dan la fason ki i ganny zere.

Dan SONA le 14 Fevriye mon pa’n tann sa mo koripsyon ganny mansyonnen ditou. E letan nou Nasyon kot 40poursan son popilasyon pe viv dan lapovrete e dimoun pe demann bann meyer servis de baz tel ki lasante, ledikasyon ek lenfrastriktir nou pa kapab bouz devan pour elimin sa bann keksoz, si nou pa ekspoz nivo koripsyon dan nou lasosyete.

Koripsyon i en vis, form, ouswa pratik ki anmenn en kou dan devlopman pei ki envizib. I annan en lenpak direk lo lenflasyon. I fer monte kou lavi. Nou bezwen azout kou koripsyon dan tou keksoz.

Mr Speaker, nou pa kapab annan en “tunnel vision” letan nou regard koripsyon. I en keksoz ki letan i ganny soutire, tolere e sirtou pa ganny devwale, son konsekans li i ganny rekolte par bann ki vilnerab.

Mwan mon pour regard en tenm dan leta nou Nasyon e sa se LAKAZ  e pour fer lakaz nou bezwen later. En resours ki’n ganny piye par bann ki ti vin defann nou leritaz,  e defann nou pep, later ek koripsyon in souvan ganny persevwar pour mars lanmen dan lanmen isi Sesel.

Ozordi Msye Faure i dir nou, nou bezwen konstrir pli o posib pour nou kapab donn lakaz, sa i en opsyon me nou vwar ki en ansyen Prezidan li i pe viv lo en propriyete ki mezir 20,000 met kare later dan San Souci.  In aste 3 bout later Gouvernman ansanm pour fer son rezidans.

Me dan distrik Roche Caiman kot Msye Faure in dir i annan en mank later, nou pou vwar 10 unit ganny devlope sa lannen.  Me mon ti a kontan anmenn dan latansyon Msye Faure ki Parti Lepep i annan en bout later Roche Caiman, V10270 e avek sa mank later i ti a en loportinite pour sa Parti retourn sa later kot piblik Seselwa.

Dan menm senaryo ki i ankouraz sekter prive pour envestir dan konstrir bann rezidans pour bann dimoun aze, mon ankouraz Parti Lepep pour rann 4 morso dan sa 40 bout ki zot annan ki fer en total plis ki 75,000 met kare.

Eski sa fason ki Parti Lepep in ganny sa later in ede kree sa lapovrete dan Sesel? Eski sa pa en form koripsyon?

Eski Parti Lepep i pare pour aksepte fot lepase e rektifye sa sityasyon ki kapab ede amelyor leta nou Nasyon?

Msye Faure i dir leta en Nasyon i kapab ganny mezire par leta son bann fanmir alor rann nou Repiblik son bann later malaki pour ede batir leta nou Nasyon.

Konblaz i enn bann solisyon le fitir me pour le moman, later konble i ankor annan. Menm la zis apre Roche Caiman kot nou appel Kosovo ziska apre Intelvision nou vwar ki bokou sa bann morso later in ganny partaze avek bann ansyen Minis, bann zanmi ek bann gran aktivis ek dimoun ki pros avek Parti Lepep. Enn sa propriyete ki plis ki 25,000 met kare i an labandon depi 2008. Sa morso later konble an total nou ti kapab fer 2 fwa sa kantite lakaz ki annan Roche Caiman ki nou osi apel Kosovo, savedir plas pour fer 600 lakaz.

Nou tou nou konnen lekel sa bann dimoun ki bokou zot i telman eze e zot annan bokou lezot later. Plizyer zot pe pey sa bann fame “lease” later – pour KONBYEN????  R1.

En lenvestigasyon imedya i devret ganny fer par Biro Prezidan pour vwar sa bann later konble.

Koripsyon i afekte posibilite pour konstrir bann fanmir stab.

Kou konblaz i form par bann det nou popilasyon, sa osi in ede fer monte kou lavi.

Be sa det ki nou pe peye pa kout R1, alor zot vwar KOU koripsyon. Li menm li ki fer kou lavi Sesel monte. Parey sanson i dir “ nou pe pey lepo kase”

Mr Speaker, zesyon zil i reste anba IDC, 14 nou bann zil i tonm anba sa lakonpannyen parastatal. Li en lakonpannyen ki’n sorti dan son manda, e li menm li in kree en lakonpannyen konstriksyon ki apel Green Island Construction ki fer konpetisyon avek lezot lakonpannyen prive ; savedir i bar loportinite. Sa lakonpannyen konstriksyon in kree en lot lakonpannyen ki apele Green Tree Investment.

Sa lakonpannyen ki PS Payet kot Finans ti eksplike isi dan sa Lasanble ki ti ganny kree pour en sel bi, eksplor Private Public Partnerships ant Gouvernman ek sekter prive me finalman nou ti vwar Gouvernman pe fer biznes ek son lekor.

Me i paret ki PS Payet swa in tronpe ouswa i ti pe mislead the House, akoz Green Tree Investment i osi annan en bout later ki in gannyen avek Gouvernman an desanm 2014 pour R1. Sa later H10952 i mezir plis ki 22, 000 met kare. Menm Oditer Zeneral dan son Rapor i fer resorti en tranzaksyon ki Green Island Construction in fer avek Ministry of Land Use and Habitat ki pa an a-kor pour ganny sa popriete kot Vye Lakour i ete dan sant lavil li osi pour osi en sonm R1. Tou sa bann tranzaksyon i montre klerman ki napa “ la transparans” dan bann tranzaksyon sa bann lakonpannyen ki IDC i zere an plis ki fer son manda.

Sa ki fer li pli difisil pour konpran i ki CEO IDC, Mr Glenny Savy, i osi en Direkter lo enn bann pli gro lakonpannyen prive Sesel apele Corvina  Investment Company.

E ….ekout byen… sa bann lakonpannyen swivan i ganny trouve lo sit “web” group Corvina:

Mahe Shipping

HSavy Insurance

Liquid Air

7 Degrees South

Bunson Travel

Silhouette Cruises

Lemuria Resort

Ephelia Resort

Zot annan par dan Kingsgate House,  Aquarius Shipping,  Seychelles Maritime Services ,  Societe Seychelloise de Navigation e Land Marine.

Eski nou kapab dir ki sa Sef Egzekitiv i pe travay avek determinasyon pour lentere devlopman nou bann zil? Nou vwar klerman ki i kapab arive dan plizyer lenstans kot i kapab annan en konfli lentere avek sa bann lakonpannyen dan group Corvina. Si Gouvernman Msye Faure i ganny gide par rann kont e latransparans, nou bezwen elimin risk konfli lentere e retourn nou bann zil anba direktiv direk nou  Gouvernman.

Mr Speaker, nou vwar osi bann sirkonstans kontroversyel avek sa propriyete kot batiman Espace Building kot JJ Spirit Foundation i baze. En morso later konble ki’n ganny servi pou benefisye en lorganizasyon pirman politik kin abiz pouvwar pour reklanm en morso later ki ti a kapab asiste piblik Seselwa, pour kontribye dan devlopman Sesel.

Konbyen lakaz ti pou kapab ganny fer lo sa later?

Eski sa bann later in ganny tender pour anmenn reveni maksimal pour tou Seselwa?

Si ou, ou ti annan sa kalite later, ou ti pour permet sa kalite tranzaksyon kot ou pa ganny en profi ?

Me solman sa det later konble lekel ki pe peye?  Eski propriyeter JJ Spirit Building i pe peye li? Eski sa pa pe ralanti devlopman dan nou pei ?  Ki mannyer sa bann fot koumsa pour ganny redrese Msye Faure?

Mr Speaker, Msye Faure in fer en pa istorik yer swar. Mon felisit li. In pran sa loportinite pour montre tou dimoun ki Lapres i annan en plas primordyal dan devlopman nou demokrasi. In donn sipor tou Lapres e in ankouraz louvraz medya.  Mersi Msye Faure pour montre ou zefor pour ranforsi demokrasi.

In osi ganny demande dan sa konferans apropo son bann Minis, koleg ek CEO ki’n servi zot pozisyon pour ganny Later Leta mal apropo parfwa plizyer bout. Me Msye Faure levidans in ganny pibliye dan plizyer Lapres, e ou menm ou’n dir “ ou Sef D’eta depi Oktob 2016” e koman Sef D’eta ou pran desizyon pour lentere Sesel.  Later Repiblik Sesel ki’n ganny piye letan ou pa ti Prezidan in ganny anmennen devan ou e koman Sef D’eta  ozordi ou’n idantifye ki pli gro defi ou Nasyon se en mank later.

Ki ou pou fer Msye Faure koman Sef D’eta, Sef Gouvernman e Komander-an-Sef Lafors Defans?

Mr Speaker, Msye Faure in aksepte defi avek Polisi Ledikasyon.  Me bann sif ki in koz lo la pour Lasante, i vreman evidan ki la osi i annan en defi ki’n retard nou devlopman e pe kontinyen kree en fardo pour nou prodiktivite. Fodre ki bokou lanfaz i ganny plase lo bann solisyon pour ede re balans la fason ki Nasyon Seselwa i okip son lekor. Dokter Guy Ah-Moye in en dimoun ki pe konstaman propoz bann solisyon lo medya sosyal, pour bann fleo ki pli dominan, annou donn li sa sipor ki i merite pour ede trouv bann solisyon.

Mr Speaker, mon felisit Onorab De Commarmond ki’n byen eksplik leta nou Gouvernans an zeneral. In montre ki bokou desizyon pa an konfirmite avek Lalwa. En lasosyete kot bann ki enplimant Lalwa napa respe pour Lalwa. Onorab De Commarmond avek mon bann koleg, nou pou demande ki bann dan Lotorite i rann kont zot aksyon.  Alor i montre nou pou kapab kont lo son sipor.

Pour terminen, koman sa reprezantan LDS pour Tourizm e  manm Komite Zafer Etranzer dan Lasanble, mon pran sa loportinite pour fer en komanter lo eleksyon pour Sekreter Zeneral pour lorganizasyon Tourizm dan Linyon Eropeen e mon dezapwente ki mannyer Gouvernman ti zer sa sityasyon. Sesel in kas Lagreman avek Linyon Afriken ek SADC pour soutenir en sel kandida sorti lo kontinan  Lafrik 2016. Sa i pa bon an term konfyans.  I pa bon an term linite avek nou bann partner e en mank la transparans isi lokalman.

Eski sa i Polisi Zafer Etranzer ki nou oule pour nou pei?

Pour konklir Mr Speaker, Msye Faure in donn nou en vizyon pour Sesel avek “tunnels”. En Sesel enspirasyonnel. I byen pour annan bann rev, akoz en rev i donn nou sa lespwar pour kontinyen pour fer nou mye.

Me Msye Faure, annou regard nou problenm delo e rod solisyon. Desalinasyon pa’n zanmen en larepons soutenab. Ozordi dan lemonn modern nou bezwen regard konsomasyon lenerzi e maksimiz bann lenerzi renouvlab. Annou fer planifikasyon pour donn en servis transportasyon piblik prop e fyab.

Bann diferan Minister i bezwen travay lo en plan konpreansib, pour soutenir pei ann antye e non pa travay dan en “tinel”

Mersi Mr Speaker.

(APPLAUSE)

MR SPEAKER

Mersi Onorab Larue.

Onorab Sebastien Pillay.

MR SPEAKER

Mersi Onorab Larue, Onorab Sebastien Pillay.

HON SEBASTIEN PILLAY

Mersi Mr Speaker. Mr Speaker bonn apre midi, mon krwar plito mon dir bon swar, bonswar Mr Speaker, bonswar tou Manm Onorab e bonswar tou dimoun ki a lekout isi Sesel oubyen aryer.

        Mr Speaker sa Diskour ki nou Prezidan in fer lo Leta nou Nasyon i enn kit re enteresan, i enn ki ensit vreman si ou kapab vreman vwar diferan reaksyon dan nou Lasanble ozordi e i enportan ki a premye repriz ki mon koz avek pep Seselwa lo sa bann reaksyon ki’n ganny ensite, pour ki nou konpran vreman dan ki sityasyon ki nou ete ozordi e akoz parfwa nou bezwen tann serten diskisyon ganny fer.

        Rezon mon dir sa Mr Speaker, avan ki mon al lo sa diskour perse li menm i enportan ki nou realize ki dan sa Lasanble i annan Politisyen.

        E Politisyen i bezwen rod en fason pour tir sa ki ou apel en political bite ler keksoz i ganny dir.

        Ler Onorab ki’n koz avan mwan i koz lo bann later ki bezwen ganny rann, mon krwar i bezwen extend son search osi pour tou later, pour tou dimoun ki’n ganny later pa zis dimoun ki konnekte avek Parti Lepep, me i annan dimoun ki pa konekte avek Parti Lepep ki’n ganny plizyer morso later e nou a vwar zot tou.

        Annefe mon ti ava swete vi ki Onorab i annan sa abilite fer resers i ti a’ n kapab ed son Koleg Onorab Woodcock avek resers an se ki konsern sa Praslin Cultural Centre ki zisteman…

 

HON WAVEL WOODCOCK

Matters arising.

HON SEBASTIEN PILLAY

Ki zisteman i met a mon latansyon ki i annan serten dokiman

HON WAVEL WOODCOCK

Point of Order1

 

MR SPEAKER

En moman, Onorab Pillay esper en pti moman, wi Onorab Woodcock.

HON WAVEL WOODCOCK

Mr Speaker mon oule raise en matter of privilege an regardan sa zafer later ki dir, yer mon ti dan en meeting Ile Eve avek Mr Alain Quilindo Deputy Chief Executive Officer of Industrial Estate Authority.

 

MR SPEAKER

Wi?

 

HON WAVEL WOODCOCK

Ti annan en kestyon mon ti demande dan sa Lasanble, sa Mr ti la i dir mwan i pe al fer resers lo sa later PA 4030.

MR SPEAKER

Wi.

HON WAVEL WOODCOCK

Yer avek mon rankont ek li sa Mr in konfirm avek mon in al fer resers e napa en tel later ki allocate pour en Sant Kiltirel Baie St Anne.

        Either sa Mr i konfize or i pa konn son louvraz akoz li i Deputy CEO, Deputy Chief Chief Officer of Industrial Estate Authority i merit annan tou sa bann lenformasyon.

E mon annan kopi sa plan zot ti montre mwan yer ti napa okenn alokasyon later pour en Sant Kiltirel, Onorab Pillay.  Mersi bokou.

 

MR SPEAKER

Byen ou’n fer ou pwen, ou’n fer ou pwen Mr Onorab Pillay ou kapab kontinyen.

HON SEBASTIEN PILLAY

Mr Speaker eski ou pour rann mwan mon 2 minit ?

MR SPEAKER

Wi, wi mon a donn ou, ale kontinyen.

HON SEBASTIEN PILLAY

Mersi bokou Mr Speaker, Mr Speaker ki mon ti pe zis….

MR SPEAKER

Order! Order!

HON SEBASTIEN PILLAY

…ki mon ti pe zis montre Onorab se ki mon’n ganny met a mon latansyon ki i annan en memorandum, en Project memorandum e i annan plizyer dokiman menm costing avek en plan ki’n ganny fer pour sa proze kestyon.

        E si ou get lo Land use Plan pour sa landrwa i menm annan sa site ki’n ganny designate pour bann cultural activities e mon pe zis ed Onorab akoz mon santi in fer en lentervansyon vreman pasyonnen about son distrik e zis mon’n donn li sa lenformasyon ki i kapab ed li prezan pour further sa investigation ki pe fer. Ou konnen se dan sa lespri koabitasyon e sa partenarya ki mon pe ed li Mr Speaker avek en pti pe plis leksperyans ki mon annan.

        Mr Speaker mon pour kontinyen par dir ki ou konnen i enportan ki ler nou met keksoz dan perspektiv nou konpran akoz, ki serten keksoz i bezwen arive.

        Prezidan Faure in vin devan nou e in prezant en diskour avek fransiz, lonnekte e senserite.

        In prezant en plan ki li i annan pour Gouvernman an prenon kont tou nide posib ki kapab fer avanse sityasyon pei. Se sa ki nou bezwen retire dan sa ki Prezidan in met devan nou.

        Mr Speaker mon krwar ki lefe ki Diskour Prezidan in enn ki mon kapab dir petet sok en pti pe mon bann Koleg lo lot kote latab, zot in vwar zot dan en sityasyon kot…

MR SPEAKER

Order ! Order !

 

HON SEBASTIEN PILLAY

Mersi Mr Speaker, zot in vwar zot dan en sityasyon kot zot in bezwen fer serten azisteman e mon apresye Mr Speaker, mon apresye lafason ki zot in apros sa diskour akoz in montre poudir nou annan en grander lespri dan sa Lasanble kot nou apre pour nou met nou diferans a kote e travay ansanm.

        Mon annan gran respe pour mon bann Koleg lo lot kote latab Mr Speaker e mon krwar poudir ansanm nou kapab fer en kantite pour nou pei.

        Mr Speaker mon krwar ki si ozordi en Seselwa i demann sa kestyon son lekor, serten kestyon par egzanp, eski ou satisfe avek ou sistenm lasante ?

        Premyerman ou pou dir ou wi i annan en sistenm lasante me si ou demann li sa kestyon si i satisfe, mon krwar ou pour ganny en mix response.

        E Prezidan Faure in target sa li dan son diskour, in target sa mix response akoz i pa pe koz zis donn sa swen lasante, me i pe koz lo donn sa kalite swen lasante ki sa dimoun i bezwen.

        Prezan Prezidan Faure i pa Minis pour Lasante, i pa Dokter, i pa teknisyen, me i pour bezwen sipor Lasanble e tou bann Brans Gouvernman pour li kapab delivre lo sa plan. E zisteman, zis parey ler in koz lo Ledikasyon, Mr Speaker mon ti en Manm, en Lecturer NIE mon en ansyen etidyan NIE e mon ti la letan NIE ti phase out e bokou nou, nou bann koleg nou pa ti an faver sa phasing out.

        Akoz nou ti santi poudir i ti pour kree en lapsus pandan letan ki NIE ti pour an deor pour li kapab anmenn training bann teachers.

        Me mon byen kontan osi ki Gouvernman i entrodwir SITE ; SITE la pe repran prezan pour li kapab kontinyen me lanfaz i bezwen ganny mete lo sipor ki nou bezwen donn sa bann dimoun ki travay dan sa Lenstitisyon pour zot kapab delivre e anmenn nou lo sa nivo kot nou kapab anmenn nou sistenm Ledikasyon pli lwen.

        Me nou sistenm ledikasyon i pa zis about sa ki Gouvernman i kapab fer, i osi about sa ki nou endividi paran, Kominote nou fer an relasyon avek sa Minister Ledikasyon pe fer.

        Mr Speaker mwan ozordi dan nou letan aktyel mon pa vwar li akseptab ki en paran dan plas al kot Lekol pour rezourd en problenm ki’n arive avek son zanfan, e mon krwar bokou mon koleg lo lot kote latab pour dakor ek sa, dan plas rezourd en problenm ki’n arive avek son zanfan kot lekol i mont lo rezo sosyal e mon’n vwar plizyer ka, mon pa sit okenn ka spesifik, mon’n vwar plizyer ka ki dan plas al kot lekol al deal avek sa sityasyon nou al lo rezo sosyal e la nou ensilte, nou servi bann term dérogatoire ki a mon avi Mr Speaker i pa donn okenn kredi lafason ki nou pe elve sa zanfan.

        Nou pe dir li poudir nou pe condone sa behavior ki dan plas al regard lekol e challenge sa desizyon kot lekol nou pa pe fer li.

        E se sa ki pe undermine rol ki nou teachers i kapab zwe dan nou sosyete, mon pa pe dir zis rol ki nou teachers me rol ki nenport ki vizavi nou zanfan.

        Akoz lontan ou ti pe fer keksoz mal dan semen nenport ki pour dir ou ‘e arete ; ozordi ki lafason ki keksoz i ete dimoun i per pour koz ek zanfan zot kanmarad pangar zot a ganny inifye lo swa rezo sosyal oubyen dan en lot fason.

        Mr Speaker mon pa kont rezo sosyal me annefe, annefe mon’n ganny konvenki poudir rezo sosyal i annan en rol primordyal pour zwe dan akse ki dimoun i gannyen ek lenformasyon. Me nou bezwen servi li byen, nou bezwen servi li byen dan en fason ki permet nou pour nou toultan mentenir en pwen ki Prezidan Faure ti raise dan son Diskour, e sa se en respe mityel ki nou bezwen annan antre nou, se sa en pwen fondamantal.

        Mr Speaker mon’n tous sa 2 pwen akoz mon santi poudir bokou nou bann diskisyon i santre lo tou sa bann pwen, ou lasante ou pep e ledikasyon, akoz ledikasyon i annan pour fer avek nou fitir zenerasyon. Me lasante lo prolonz lavi nou pep, mon dir sa Mr Speaker akoz le de i konnekte avek en lot fleo ki nou pe fer fas avek e sa se sa problenm drog.

        Mr Speaker si nou analize, nou fer en analiz nou pour vwar poudir most men, bann young men ki pour kapab fer zanfan, en gran poursantaz zot pe tonm swa dan lakol swa dan drog.

        E nou pour vwar poudir nou krwasans popilasyon pour redwir lannen a lavenir e dimoun pour reste dan lanplwa plis letan.

        E sa i en keksoz ki, it’s no joke – sa i serye akoz si nou pa pran konsyans sa ki pe arive, nou pour vwar en sityasyon kot demen nou pour annan en ageing population me nou pour napa replenishment of nou bann kad.       E se la kot nou pour bezwen turn kote, avek etranze pour vin ranpli bann louvraz ki nou annan dan nou pei, se sa ki nou pe koz lo la.

        Mr Speaker mwan koman en Manm Lasanble mon pran li koman mon devwar, mon devwar pour reprezant nenport ki – nenport landrwa.

        I kapab en zabitan Roche Caiman, i kapab en zabitan Anse Aux Pins sorti kot mon Koleg Onorab Andre, i kapab en zabitan Grand Anse Praslin sorti kot mon koleg ki mon admir bokou Onorab Woodcock akoz i mon responsabilite ozordi dan sa konzantwir aktyel ki nou trouv nou pour nou travay koman en Lasanble.

        Mon konnen nou bezwen fer bann pwen politik dir en Lasanble dirize par LDS me anfen kont nou en Lasanble e nou reprezant brans Lezislatif nou pei.

        E nou rol anver Egzekitiv se act dan en rol oversight, e non pa pour act koman en pseudo Executive akote Egzekitiv.  Se sa ki nou rol.

Mr Speaker mon konvenki ki Prezidan Faure in fer son Diskour akoz in oule set en record straight as to ki direksyon i santi anba son Prezidans nou pei i bezwen ale.

        In pran li en lapros kot i oule anmenn enklizyon dan nou popilasyon e asire ki nou tou nou vin parti prenan lafason ki nou diriz nou pep.

        Se sa ki esansyel e se sa ki fondamantal. E ladan in fer kler ki nou rol koman en Lasanble se pour debat bann size fondamantal bann size ki enportan.

        Mon bann koleg lo lot kote latab in raise plizyer size, mwan osi mon annan serten size ki mon ti a kontan raise ; par egzanp koman en Lezislater mon ti a kontan vwar ki nou entrodwir en lalwa otour lafason ki nou gard en rikord lasante.

        I enportan akoz i annan serten eleman konfidansyalite ki nou bezwen maintain.  Mon ti a kontan vwar osi ki nou entrodwir en lalwa finalman ki petet tackle sa issue mental health.

        Akoz bokou fwa nou vwar poudir sa bann dimoun i trouv zot dan en limbo kot legalman nou pa konnen ki mannyer nou pour pran pour tackle bann issues ki avek zot.

        Enn bann Lalwa fondamantal ki mon krwar nou devret anmennen Mr Speaker se an se ki konsern an kad Regilatwar pour bann Ners e bann Midwives.

        Protez sa kategori travayer ki mon krwar zot bann teknisyen adept trez enportan dan louvraz ki zot fer.

        Mr Speaker en lot morso Prozedlwa, e lezot area ki mon krwar nou bezwen komans regarde akoz mon vwar en kantite Farmasi pe ouver, se en Medicine Bill as well.

        Se lafason ki nou kontrol serten eleman ki ava permet nou pour asire ki toultan popilasyon i safe an relasyon avek devlopman ki pe arive.

        Mr Speaker lot area ankor ki mon koman en Lezislater mon santi petet nou devret osi regarde se, Lalwa Ledikasyon li menm.

        Mon krwar a sa nivo ki nou’n arive avek lentrodiksyon Wifi, avek lentrodiksyon par egzanp bann tablets bann keksoz koumsa, nou bezwen vwar ki mannyer teknolozi i ganny enkorpore, pa zis dan laprantisaz me dan lavi toulezour ledikasyon.

        Pa pour ganny servi kot bann etidyan pe lager, pa pour ganny servi pour filme bann keksoz ki dérogatoire me plito koman en ed pour avans laprantisaz, pour avans konportman e pour ed nou devlop dan en sosyete pli modern, pli konpran, e pli pare pour fer fas avek levolisyon ki lemonn pe pas ladan.

        E mon kontinyen Mr Speaker akoz mon pe koz from mon pwennvi koman en Lezislater la.

        E en lot area ki mon krwar poudir, petet i ava ed sa ki nou oule fer se pour osi entrodwir, zis parey bann avoka zot annan Legal Practitioners Bill ki gid sa bann dimoun laba.

        Nou osi bezwen regard nou bann accountants par egzanp ;- nou bezwen annan en kad legal. Rezon akoz ki nou bezwen annan sa kad legal Seselwa, bokou Seselwa i devlope.  Ozordi nou annan bokou accountants ki lo en nivo enternasyonal, e i annan osi ki pa lo en nivo ditou e ou bezwen annan serten proteksyon pour bann ki pe fonksyonnen dan sa domenn pour zot kapab ganny proteze avek kont bann lezot pratik ki kapab afekte zot profesyon.

        E la mon pour vin lo en pwen Mr Speaker e ki mon krwar bokou dimoun pour dakor ek mwan se en lot area, mon pe liste sa dan bann areas, Mr Speaker mon pour konklir lo sa size, en lot area Mr Speaker en Lalwa relye avek bann Profesyonnel dan konstriksyon.

        Sa pour asire ki si demen sa madanm ki’n pran sa loan, sa dimoun aze ki’n pran sa loan avek labank i al rod en Kontrakter i ganny li en dimoun ki a la oter, en dimoun ki ganny relye par Lalwa e en dimoun ki apre i kapab ganny rekour si son louvraz pa fini.

        Mon krwar out there ozordi sa ki pe ekout mwan, bokou zot pour relye sa sityasyon kot plizyer fwa zot in vwar zot dan bann sityasyon kot zot in al kot en Kontrakter pour konstriksyon me apre zot pa’n fini oubyen problenm in arive.

        Rezon mon dir sa Mr Speaker, akoz i pa zis dan sa domenn me osi par egzanp par Planning, parfwa ou tann en dimoun pe konplent Planning me ou tande poudir Agent pa’n submit son Bill oubyen lezot eleman in arive.

        So i enportan ki sa bann kad legal pour kapab siport  bann aksyon ki Prezidan i oule pran.

        Mr Speaker mon pour ariv lo de pwen ki ase popilis, premye pwen i konsern sa ki mon krwar i enportan e sa se en Domestic Violence Bill, finalman pour regle an relasyon avek vyolans domestik.

        Mon dir Mr Speaker akoz sa i konnekte avek sa ki Prezidan in dir, in koz lo lalkol, e lalkol i de-koul parfwa dan sa ki arive dan lafanmir.

        E sa ki arive se ki parfwa ou ganny bann vyolans domestik e ki sa bann problenm sosyal kote i ale, i al ran lapel dan lekol e sa bann menm problenm lalkol i kree problenm lasante.

        E nou bezwen annan en fason sosyalman pour  protez bann ki pli vilnerab, e nou’n en sosyete ki toultan promouvwar rol bann madanm me osi petet Mr ki ganny abize domestikman mon pa konnen, i posib, me i enportan ki nou annan en kad pour sa.

        E finalman Mr Speaker mon krwar ki sa bann lamannman ki pe ganny propoze dan Beach Control Act it’s in the right state.

        But at the same time nou, nou bezwen pran konsyans e nou responsabilite anver bann prosedir ki ganny donnen.

        Mr Speaker mon’n fer sa tour lorizon an relasyon avek mon rol koman en Lezislater akoz mon pa konsider mon parti Egzekitiv, I’m not the Executive. I don’t make decisions for the Executive, i mon rol to extend oversight lo Egzekitif.

        E se sa ki mon krwar ler Prezidan in prezant son Ladres Leta La Nasyon i pe demann nou Lasanble koman en kolektif pour fer ki nou’n komans fer.

        In met nou lo en semen kot in prezant devan nou posibilite ki nou pei i kapab annan, bann konsern ki nou pei i annan e ki mannyer nou pour konekte konsern avek posibilite ansanm, pour fer ki nou kapab avans devan.

        Prezidan in koz lo en pwen dan son diskour, i koz lo en ‘tunnel,’ Mr Speaker mwan mon pour relate sa avek sa ki’n arive dan bokou pei kot ler Gouvernman i envestir dan bann proze – e gras a son lenvestisman ki fer dan bann proze konstriksyon drayver pickup i travay, Kontrakter i travay, tou dimoun i travay akoz Gouvernman i annan sa spending power pour li kree lanplwa pour dimoun atraver bann proze.

        E i en proze ki petet si nou pa kapab fer en Danm dan sa rezyon sid, i pa neseserman en ‘tunnel’ ki ava anmenn transpor me i kapab osi ede pour anmenn delo pour sorti dan sa rezyon pour vin en lot landrwa. E se sa mon krwar ki mannyer i pe regard keksoz, e se sa lafason ki nou devret regard keksoz.

        Mr Speaker  mon pa’n pran en spin pour mwan vin dir tou sa ki Prezidan Faure i byen non, mon’n vin koz koman en Manm Lasanble mannyer mon’n enterpret son Diskour e ki mannyer mwan mon krwar mon merit pe travay an relasyon avek son Diskour.

        Mon apresye ki ozordi Mr Speaker nou dan en lot konzantwir politik i annan dimoun ki ava koz lo la apre.

        Me lefe i reste Mr Speaker, Prezidan Faure in prezant son lekor koman Prezidan Sesel e ozordi tou dimoun dan sa Lasanble pe servi sa term Prezidan Faure.

        E sa i en reminder ki ler ou donn en dimoun en loportinite e ou siport li i kapab achieve great things. So avek sa Mr Speaker mon oule remersi Lasanble pour zot latansyon i toultan en plezir pour mwan pran laparol dan Lasanble e mon remersi Mr Speaker pour ou pasyans.  Thank you.

        (APPLAUSE)

MR SPEAKER

Mersi Onorab Pillay.

Mon krwar ki nou’n travay byen ozordi, nou’n ariv zis 5er la.  E lanmwatye Lasanble in koze ki fer ki i tonm byen.  Si nou kontiny koumsa nou pou fini demen 5er.  Alor mon ti a kontan felisit zot akoz mon krwar i en kestyon nivo deba – nivo prezantasyon.  E nou terminen ozordi avek en mesaz lespwar.  Mon’n tann bokou entervenan koz lo lespwar – lo respe, lo lafanmir.  Bomaten mon’n tann sa 2 Leaders felisit sa 3 Msye ki fek ganny apwente, a latet NDEA.  Mwan mon pa ti’n ganny sans felisit zot me mon ti esper dernyen moman ozordi avan nou wind-up pour mwan felisit Mr Labonte, Mr Songor e Mr Barbe.  Mon konn tou le 3 personnelman e mon konnen ki  sa kalite travay ki zot pou fer, i pou anmenn nou devan ek sa fleo ki nou pe konbat akoz  zot 3 dimoun profesyonnel  ki determinen  e ki pou travay pour Sesel.  Alor mon ti a kontan ki avek sa amwen ki i annan en keksoz ki irzan ki zot oule fer sorti. Yes Onorab Prea ?

HON NICHOLAS PREA

Mersi Mr Speaker.  Mou pe oule zis raise en matter  pou Lasanble.  Mr Speaker avek ou permisyon, bomaten mon’n koz lo size sa 3 zenn a propo lakaz ki ti vin kot mwan e deswit apre sa zot in ganny en kominikasyon avek Lotorite – Minister ki pe organiz en site visit, kot sa 3 zenn Dimans.  E ler zot in kominik avek mwan mon’n dir zot Dimans i pa apropriye  pou fer site visit.  Lotorite in retournen – zot in kominik avek Lotorite, in dir ek zot poudir, si ou pa fer Dimans konmsi oubliye pou napa en site visit.

MR SPEAKER

Onorab Prea letan ou koz Lotorite, nou’n koz lo transparans – ki Lotorite ou pe koz lo la ?

HON NICHOLAS PREA

Minister konsernen Land Use.  Me la apre midi, sa dimoun ki annan kontak ek lafanmir se Mr Dan Frichot.  Me ler sa 3 zenn in dir poudir Dimans pa apropriye e nou osi tou an vi ki nou MNA i prezan dan sa site vizit – Mr Frichot i dir ek li, ‘’Donn nou en call demen.’’  Savedir  mwan zot ti pou go on avek sa site visit Dimans  – i en keksoz vitman, vitman me lefe prezan – letan sa 3 fanmir in demande, annou fer li en lot zour, me la in ensiste Dimans.  I dir, ‘’be ok nou oule nou prezan nou MNA, – desizyon in  ganny anvoye la in dir call zot demen.  Demen ki  zot pou konn en desizyon si pou annan en site visit Dimans oubyen non.

MR SPEAKER

So ou pe lev en matter of privilege ?

 

HON NICHOLAS PREA

Vwala.  Mon pe zis montre koman an menm tan ki Prezidan i vini i koz en langaz – nou Lasanble, nou anvi bouz dan sa direksyon me koman bann Minister i kontinyen fonksyonnen. Mersi bokou.

MR SPEAKER

Mersi Onorab Prea.  Mon krwar sa i enportan ki ou’n fer sa pwen.  Mon pe esper demen pour mwan fer mon lentervansyon koman MNA Anse Boileau, me mon krwar Onorab De Commarmond bomaten in fer en pwen tre enportan –  kot in dir ou konnen dimoun in dir i pe esper devolution of power, ‘’responsibilite being given to you.  Be ou’n aksepte en pos ou pran ou responsability ou fer marse.  Si ou vwar Prezidan i annan son portre i la i pa devre la me ou tire. Sa ki en pwen enportan.  Ou konnen konmela nou annan bann dimoun ki sipoze ansarz Minister – mon’n PS – mon’n Direkter me ou bezwen pran ou responsabilite e sa ka ki ou pe fer sorti, i pa en bon fason pou  fer li – it’s not profesionally ethical.  Mon a sizere koman Speaker ki mwan mon krwar Onorab  Prea ou’n detay ou sityasyon as a matter of privilege, ki ou pran kontak avek Mr Frichot – mon konn li i travay dan Minister Local Government koman Advisor i pa travay MLUH – pran kontak ek li, mon sir i a tann sa ki nou pe dir e  dan lespri ki nou pe koz lo la, zwenn ansanm ek li al vwar sa 3 fanmir.  Konmsi aranze parey mon dir, Anse Boileau mon vini pou nou aranze.  Annou aranze.  Selman your point has been made e mon dakor avek ou  sa nespes pas par dernyen fer e mon krwar Onorab De Commarmond in dakor avek mwan – annou fer li byen – ethically.  Mon krwar le pwen in ganny fer.  E mon ti a kontan remersye zot ankor pou zot partisipasyon ozordi.  Mon sir ki piblik i byen kontan ki mannyer keksoz pe ale e demen 9er nou a kontinyen ek lot lanmwatye dan Chamber pou zot kontiny nou diskisyon – bann deba lo Leta Lanasyon.  Bonne fin soirée e bonswar.

        (ADJOURNMENT)