::
Home » Verbatim » 2016 » Term 2 » Tuesday 19th July, 2016

Tuesday 19th July, 2016

NATIONAL ASSEMBLY OF SEYCHELLES

 Tuesday 19th July, 2016

The Assembly met at 9 am

National Anthem

Moment of Reflection

Mr Deputy Speaker in the Chair

MR DEPUTY SPEAKER

Bon, mon a dir bonzour tou bann Manm Onorab e tou dimoun ki pe ekout nou la bomaten.  Avek nou ozordi pou vin reponn Kestyon bann Manm, nou annan Minis Christian Lionnet, Minis pour Litilizasyon Later avek Labita e mon ti a kontan swet li la byenveni ek son delegasyon parmi nou.

E nou ava bouz tout swit lo Kestyon 82 Onorab Monnaie.

 

HON FRANCHASCA MONNAIE

Bonzour Mr Deputy Speaker, Minis, delegasyon, tou Manm e tou sa ki a lekout.  Eski Minis i kapab enform sa Lasanble, kan eski promes bann zabitan Vilaz Lespwar, Union Vale English River, pou repar zot septic tank, retir tol asbestos lo lakaz e met lalimyer dan Car  Park sa Vilaz, pou ganny antreprann?

Mersi.

 

MINISTER CHRISTIAN LIONNET

Mersi Mr Deputy Speaker.

Bonzour Mr Deputy Speaker, bonzour Manm Lasanble Nasyonal, bonzour tou dimoun ki a lekout.

Mr Deputy, swivan plizyer entervansyon par Lotorite Distrik La Rivère Anglaise, mon Minister ek PMC in zwenn e diskit ek bann zabitan e bann lezot akter kle, avek bi pou adres bann defayans lo sa Estate ki lo loter Kestyon Onorab Lopozisyon.

Premyerman, lo sa size sistenm desarz, teren  e fason ki Divizyon Later in ganny fer, pa permet sak lakaz pou annan en sistenm Sewage separe lo sak zot propriyete.  Pour sa rezon,  sa bann lakaz i partaz en sel sistenm desarz, ki lo later Gouvernman e ki PMC a kontinyen maintain ziska ler konneksyon avek sistenm Santral PUC a ganny fer.

PMC i deza an kontak avek PUC pou fer en propozisyon e kotasyon pour koneksyon sa Estate.  Kou estimen ki PUC in donnen, i anviron R465 mil.  Avek lasistans finansyel ki PMC in resevwar sa lannen sorti kot Minister Finans, PMC pou kapab abzorb sa kou dan son progranm pou 2016.  PUC pe an se moman, fer survey topografi pou kapab fer plan detaye.  PMC in fini donn konfirmasyon avek PUC pou komans demars pou lans proze avan lafen lannen.

Mr Deputy, lo sa size twatir, sa bann lakaz pa ganny kouver avek asbestos, me plito avek roofing tiles konkret.  Bann propriyete ki’n fini ganny vann,  responsabilite pou kou reparasyon lo twatir, i normalman pour bann zabitan.  Vi ki zot bann lakaz semi-detached, PMC in pare pou donn lasistans teknik pou rod kotasyon e kordin louvraz.  PMC in deza rod kotasyon pou  rekouver sa 8 younit a en to R627 mil.  Sa louvraz pou konpri sanz sa bann roofing tiles pou ranplas avek tol zikelumPMC in deza zwenn avek bann zabitan e annan en Lakor lo kontribisyon sak lakaz anver kou sa proze, e ki kontribisyon PMC pou mete. Louvraz pou rekouver sa bann younit, pou komanse  dan bann zour ki devan nou.

Pou lalimyer dan Parking, lenformasyon ki mon annan se ki i deza annan lalimyer ki’n ganny enstale par SLTA dan Parking sa Estate.

Mersi Mr Deputy.

 

MR DEPUTY SPEAKER

Kestyon siplemanter, Onorab?

 

HON FRANCHASCA MONNAIE

Mersi Mr Deputy.

Eski Minis i annan okenn mekanizm ki an plas, pou tackle bann issues maintenance, ou bann konplent ki bann zabitan Flat Gouvernman in met an plas devan ou Minister a en moman pli konvenab e pa lannen e lannen.

Mersi.

 

MINISTER CHRISTIAN LIONNET

Mr Deputy, wi nou annan en mekanizm ki’n met an plas.  Mon krwar defi pour tou sa bann lannen, se nou issue Bidzeter.  Mon krwar i annan en kestyon ki pe swiv sorti kot Onorab Sylvianne Valmont, ki mon pou koz entansivman lo sa issue, maintenance.

Mersi Mr Deputy.

 

MR DEPUTY SPEAKER

Onorab Vidot.

 

 

HON KEVIN VIDOT

Thank you Mr Deputy Speaker. 

Bonzour Minis, tou Manm Onorab e tou dimoun ki a lekout.

Mr Deputy Speaker, eski Minis  i kapab dir sa Lasanble, zabitan La Rivière Anglaise, espesyalman zabitan Vilaz Lespwar, akoz in pran sa kantite letan – menm apre vizit ki mwan mon’n antreprann avek mon ansyen DA, avek Zofisye MLUH, avek PUC, ki sipoze i annan en plan ki ti’n deside ki i pou konekte sa bann dimoun n avek sa STP – akoz i pran sa kantite letan pou konekte sa bann dimoun pou rezourd sa problenm en fwa pour tou :-e  an sa ki konsern sa problenm roofing, eski Minis i kapab donn nou en garanti, sa bann zabitan e garanti ozordi, ki sa dele letan ki in pran – ki sa bann dimoun pou ganny deal avek sa issue enn fwa pour tou, pli vit posib avek zot led byensir ?

Mersi bokou.

 

MINISTER CHRISTIAN LIONNET

Mr Deputy, rezon ki nou pa’n kapab enplimant sa proze Sewage so far, i zis akoz en Kestyon Bidzeter.  Me avek lasistans ki nou’n gannyen ek Gouvernman sa lannen, i pou fer li posib pour nou kapab fer li e en fwa pour tou adres sa problenm.

Lo kote twatir parey mon dir, mon fini ganny kotasyon avek Kontrakter e travay pe al komanse bann zour ki devan nou.  So, mon konvenki disi 2 mwan – 3 mwan devan nou, nou’n kapab rezourd sa problenm en fwa pour tou.

Mersi Mr Deputy.

 

MR DEPUTY SPEAKER

Kestyon 83, Onorab Jaqueline.

 

HON SULTANE JACQUELINE

Mersi Mr Deputy Speaker.

Bonzour Mr Deputy Speaker, Minis, koleg e tou dimoun ki a lekout, bonzour.  

Mr Deputy Speaker, eski Minis i kapab enform sa Lasanble, kan ki sa bann fanmir Port Glaud ki’n fer laplikasyon later Land Bank Dan Limon, Beolière, Des Arpents e Morne Blanc pou ganny asiste?

Mersi Mr Deputy.

 

MINISTER CHRISTIAN LIONNET

Mr Deputy, parey mon’n toultan dir, mon Minister i reste tre angaze ver politik nob Parti Lepep, pou fer plis Seselwa posib vin propriyeter zot prop lakaz.  Sa politik i enn ki inik dan lemonn, akoz ziska prezan mwan personnelman, mon pa ankor konn okenn pei omonn ki annan en tel politik e pe enplimant li vigorezman, parey nou Gouvernman Parti Lepep.

Ozordi atraver sa politik – Fer sak Seselwa vin son prop propriyeter lakaz, in anmenn Sesel tre lwen dan domenn lozman e in san dout kontribyen enormeman anver batir en Sesel pli for endepandan e pli prospere.  An sa ki konsern Port Glaud, mon Minister in pres ki fini survey lamazorite later ki nou ti’n met lo progranm lenplimantasyon survey dan sa distrik – sirtou bann kot akse avek lenfrastriktir semen, delo ek elektrisite pa en problenm.

Sityasyon i comme swivan:

Beolière dan Limon – Land Bank dan Limon, i annan 5 kare later ki Biro Survey in propoze.  Enn ladan in fini arpante e alokasyon in fini fer, an vi ki akse pa ti en problenm.  Lezot 4 kare, in fini ganny laprouvasyon Lotorite Planning, me vi ki napa akse, Minister pe travay lo provizyon met lenfrastriktir.  Sa proze in

ganny en pe retar, vi ki teren i poz serten defi tel grander rezerv oubyen buffer, ki nou’n bezwen kite pou drenaz ensi byen ki oter sa later avek nouvo semen grannrout.  Travay teknik lo bann lenfrastriktir sirtou semen avek drenaz, pe ganny prepare. Selman apre ki survey pou kapab finalize pou met taso.

Finansman pou met lenfrastriktir pa ankor ganny prioritize e mon Minister i annan lentasyon fer demann Bidzeter pou lenplimantasyon sa proze an 2017.  Selman vi ki distrik Port Glaud, in fini anvoy lalis bann dimoun ki pou benefisye anba sa proze, mon Minister pe prepar let aprouvazyon an prensip.  Distrik in osi met a nou latansyon ki i annan serten dimoun ki lo sa lalis, ki kapab kontribye anver lenfrastriktir e mon Minister pe etidye sa posibilite.

Lo kote Des Arpents Land Bank, i annan 10 kare later rezidansyel ki’n ganny aprouve par Lotorite Plan.  Enn parti sa Land Bank i deza annan lenfrastriktir semen.  Alor Divizyon Survey in fini finaliz met taso, pour nou kapab fer alokasyon 5 kare later.  Nou pe ekspekte ki sa 5 kare later pou kapab ganny donnen ver Out/Septanm sa lannen.

Sa lot 5 kare ki reste, mon Minister pe travay lo plan teknik pou konn kou pou met lenfrastriktir avan fer desizyon, si nou pou fer alokasyon san semen, oubyen si nou pou bezwen esper konstriksyon semen avan ki nou allocate sa bann later.

Fodre fer sorti ki teren pour sa bann kare ki mon fek koz lo la, pa get tro difisil pou enplimant en proze semen. E tre probab nou pou kapab vann sa bann kare, menm dan labsans semen e semen ava swiv apre.

Morne Blanc, i annan 2 Land Bank ki Minister pe antreprann – Upper Morne Blanc avek Dan Diri.  Upper Morne Blanc i annan 7 kare later rezidansyel ki Survey in travay lo la – 3 kare ki baliz avek semen in fini ganny fer alokasyon e 4 kare ki en pe pli lwen, pou depan lo enplimantasyon lenfrastriktir.   Minister i an diskisyon avek serten aplikan ki’n pare pou konstri semen par son prop mwayen.  Si sa diskisyon i en sikse, mon Minister pou finaliz arpantaz e fer alokasyon sa 4 kare later, pli tar Septanm sa lannen.  Fodre fer sorti ki nou’n fini ganny laprouvasyon Planning pour tou sa bann kare later.

Dan Diri, i annan 10 kare later rezidansyel ki’n fini ganny arpanter.  Ladan i annan 4 kare ki dimoun pe deza reste lo la.  E sa ki nou apel bann house plot, mon Minister in deza dan prosedir fer alokasyon sa 4 fanmir zot kare.  Tandis ki sa lezot 6 kare, mon Minister in fini inisye prosedir alokasyon bann aplikan. Ver Out a Septanm sa lannen, sa alokasyon pou konplete pour sa Land Bank an antye. Bann lenfrastriktir pour sa Land Bank in fini an plas.

Mersi Mr Deputy Speaker.

 

MR DEPUTY SPEAKER

Kestyon siplemanter Onorab?

 

HON SULTANE JAQUELINE

Mersi Mr Deputy Speaker.

Mersi Minis pour sa bon travay.

Mr Deputy Speaker, eski Minis, i kapab enform sa Lasanble, etandonnen ki i annan serten aplikan ki oule partisip dan konstriksyon striktir parey semen, ki mekanizm son Minister i anvizaze met an plas, pou fer sa bann dimoun partisip dan bann tel striktir, pour zot ganny zot later o  pli vit posib ?

Mersi Mr Deputy Speaker.

 

MINISTER CHRISTIAN LIONNET

Mr Deputy Speaker, mon Minister i konstate, ki partisipasyon prive dan devlopman nou pei i kle, pou fer nou pei bouz pli vit – a lavan.  Byensir, si i annan okenn dimoun endividi , ki bann First Time Buyer ki pe rod later e ki zot pour en rezon zot annan mwayen, petet en pti Kontrakter eksetera, zot annan mwayen pou konstri semen – nou, nou welcome sa bann loportinite.  E i annan plizyer ka deza, ki nou’n deza komans enplimant bann tel proze parey.

So, wi nou pou ankouraze avek Lotorite Distrik, nou ava idantifye sa bann dimoun, dan en mannyer ki nou kapab ouver sa bann semen, pour nou kapab allocate plis later dan en dele letan pli kourt.

Mersi Mr Deputy.

 

MR DEPUTY SPEAKER

Kestyon 84, Onorab Valmont.

 

HON SYLVIANNE VALMONT

Mersi Mr Deputy.  Bonzour.

Bonzour Minis ek ou lekip e tou dimoun a lekout.

Mr Deputy, eski Minis i kapab enform nou Lasanble, lo plan son Minister kot i konsern reparasyon bann twa lakaz dan Housing Estates, ensi ki plan maintenance pour sa bann lakaz:-e konbyen pou kout son Minister pou enplimant en tel progranm?

Mersi Mr Deputy Speaker.

 

MINISTER CHRISTIAN LIONNET

Mersi Mr Deputy.

Bann louvraz maintenance reparasyon dan Housing Estates, i ganny antreprann par Property Management Corporation – PMC ki annan manda pou zer bann Estate, ki Gouvernman i konstri.

Lannen pase, PMC ti depans anviron R41 milyon  anba son Vot Estate Maintenance.  Parmi sa, R9.3 milyon ti al dan bann louvraz mazer, ki konpri ranplas twatir serten Blok Flat.  Sa depans  R41 milyon i reprezant en pe plis ki 80 poursan koleksyon reveni PMC par lannen.  Gouvernman in realize, ki an mezir bann Estate i avarye, kou reparasyon i ogmante e ki reveni PMC pa pou kapab permet tou louvraz ganny fer dan en dele letan pou gard son bann kliyan satisfe.  Gouvernman in alor pran desizyon pou asiste PMC avek Bidze an plis, ki reveni ki reveni ki PMC i kolekte, pou asire ki PMC i catch up avek bann reparasyon ki pe pran tro lontan pou materialize.

Pou 2016, PMC pou ganny asiste avek R15 milyon an plis.  An sa ki konsern reparasyon twatir, PMC i annan responsabilite, e organiz son travay dan sa bann fason swivan;

Bann Blok Flat dan sa bann batiman, PMC i annan responsabilite pou zer bann parti sa batiman ki bann common elements ki tou younit i benefisye avek, par egzanp twatir, staircase, sistenm desarz.  Pour le moman an vi ki Provizyon Condominium Act pa ankor ganny aplike lo bann Estate PMC, PMC i gard responsabilite pou finans tou louvrwz lo sa bann common element, enkli twatir.

Pour sa bann kalite lakaz, PMC i fer en progranm dapre demann, kot i annan problenm an mezir ki bann batitman i avarye.  Komansman  lannen 2016, an vi problenm avek bann lakaz ki ti kouver avek tiles konkret  ler zot ti  ganny konstri,  Gouvernman tip ran desizyon pou rekouver tou bann Blok  ki kouver avek tiles, an servan tol ki pli adapte avek nou kliman.  PMC in alor fer evalysyon lo kote ki annan problenm pli grav e pe deza enplimant en plan lenplimantasyon pou rezourd problenm  koule dan en fason sistematik, pandan sa 2an ki devan nou.  Anba sa progranm deza, 2 Blok Marie Jeanne Estate in fini ganny rekouver ensi ki 5 Blok Flat Anse Boileau kot Vilaz Lesperance.  Kontra pou rekouver bann Blok Flat Remiz Anse Royale in fini award e Kontrakter in fini mobilize depi le 17 Me e louvraz in fini komanse :- e en Blok in fini ganny rekouver.

I annan 19 lot Estate ki kouver avek tiles konkret, ouswa ki zot twatir in tro avarye e ki bezwen nouvo twatir.  PMC in fer provizyon pou R8 milyon sa lannen e en provizyon R12 milyon pou lannen 2017.  Nou ekspekte ki sa lenvestisman, i ava en fwa pour tou, rezourd sa bann problenm koule dan bann Blok Flat e rann lavi zot bann zabitan pli agreab.

Bann lakaz ki dan laform semi-detached ouswa terraced houses, kot sak younit i lo en morso later e sak younit i annan son prop twatir, pour sa bann lakaz, si zabitan i lo en house purchase agreement, responsabilite maintenance i lo sa bann zabitan.  Malgre sa, PMC avek Minister, i osi  asiste avek kordinasyon louvraz si zot bezwen fer plizyer younit alafwa, akoz bann lakaz i atase ek kanmarad.

Lo kote finansman, pou permet bann proze ki konpri plizyer lakaz  materyalize, atraver HFC i annan bann HIL ki bann zabitan i kapab raise pour sa louvraz ganny antreprann avek.  I annan ka osi, kot PMC i finanse.  I rantre dan en Lagreman pour bann zabitan rann PMC sa larzan, par en repeyman tou le mwan.  I osi annan serten sirkonstans kot Gouvernman i osi fer serten kontribisyon atraver Bidze MLUH, pou asire ki proze i vin enn ki en sikse, si bann kontribisyon lezot parti pa kapab kouver kou an antye :-ouswa si i annan sirkonstans kot louvraz konstriksyon inisyal pa ti lo en standar rezonnab.   Pour sa bann kategori proze, Minister ek PMC i deside ansanm  avek bann Lotorite Distrik, ler i annan bann demann konzwent par lakominote.  An vi ki sa bann ka, PMC napa en rol pou zer bann maintenance, akoz sak younit i lo son propriyete respektif.  Anba sa kategori kot bann zabitan in fer zot kontribisyon e PMC/MLUH i kordin lenplimantasyon, i annan sa bann proze swivan ki pe ganny antreprann sa lannen ; Marie Jeanne Estate, Moulinie Estate, Vilaz Lespwar e osi 20 younit Roche Caiman. Pour sa bann proze ki’n mansyonnen, an 2016 in estimen ki zot pou kout anviron R5.1 milyon dan ki nou ekspekte atraver HIL, bann zabitan pou kontribye R1.6 – Gouvernman atraver Bidze MLUH, R1.6 e PMC R1.9 milyon.

An sa ki konsern lezot louvraz reparasyon mazer ek proze ki PMC i annan progranmen, i pa ki bann louvraz routin.  PMC pe komans en  progranm entans pou rezourd bann problenm ki bann Estate pe fer fas avek, pour en bon pe letan – par egzanp problenm Sewage, problenm tenk delo dan plafon e osi problenm bann mank firewall ant younit ek common area. 

Bann problenm tenk delo dan plafon ek firewall kot bann Estate ki pou ganny nouvo twatir, ava ganny antreprann ansanm avek proze twatir.  Pour lemoman PMC pe konsantre zefor lo serten Estate ki annan problenm Sewage, an vi danze sa i reprezante pou lasante piblik. PMC pe tackle bann problenm Sewage dan 4 fason.

Premyerman, bann Estate poudir i annan posibliltite extend laliny PUC pou konnekte avek en sistenm Tretman Desarz.  Sa solisyon pe ganny adopte kot sa laliny ava kapab servi lezot devlopman dan mwayen term.  Sa, PMC avek MLUH, pe travay avek PUC pou etabli kote sa i fezab e kou pou enplimante.

Bann Estate ki’n ganny priyoritize, pour sa kategori se Mont Signal, Copolia –  kot Kontrakter in fini ganny selekte, me i annan serten retar avek ganny tou bann wayleave – Vilaz Lespwar osi.

I osi annan Ex-Troyen Estate kot ler STP, proze XION, i pare ver lafen lannen, laliny pou ganny extend pou konnekte avek Ex-Troyen.  Laliny Copolia pe deza ganny finanse anba  Bidze MLUH.  Pour sa 3 lot Estate, i ekspekte kout anviron R6.2 milyon.  Bann Estate ki zot lokasyon i été napa sistenm santralize, dan en reyon ti kapab permet zot ganny konnekte –  e kot nepli annan teren pou konstri nouvo pi perdi ouswa  drainfield, solisyon se pou enstal bann pti STP bann Stasyon Tretman Desarz.  Gouvernman in deza envestir anviron R19 milyon  dan konstriksyon sistenm tretman, kot 4 Estate ki ti annan gro problenm dan lepase : Anse Gaulette, Moulinie, Baie Ste Anne, Karl Tamatave Grand Anse Praslin, e Vilaz Granit, La Gogue.  Sa solisyon i kout bokou e alor bon priyotizasyon kot i  pli kritik, i bezwen ganny pran kont.

Bann Estate ki’n ganny  konsidere koman priyorite se Carana, Vilaz Lesperance.  Nou kou pour sa 2 proze, pa ankor ganny definir – Konsiltan i ankor pe prepare zot propozisyon.

I osi annan bann Estate, ki annan problenm avek sistenm egzistan, me ki annan opsyon dan zanmerant pou konstri lezot drainfield ou pi perdi.  Bann landrwa ki priyorite e ki demars laprouvasyon Planning avek Tender pe ganny fer  komans enfiltrasyon sa lannen se, La Retret, Bamboo Estate Anse Royale, Valdandor e Ex –Wilson Vital.  Nou ekspekte depans anviron R3.3 milyon lo sa bann proze.  La Retret avek ‘Wilson Vital  i deza dan staz avanse.  Zot planifikasyon i ekspekte ganny Tender avan milye Out sa lannen.

I osi annan bann Estate, kot i annan plan devlopman par PUC, dan fitir pros, pou donn servis Sewer.  Pour bann Estate dan bann rezyon ti napa landrwa pou fer en nouvo sistenm, pour le moman PMC i bezwen zis asire, ki i ponp bann septik regilyerman pou anpes bann over flow. Sa i kout PMC bokou. Me ziska ler solisyon permanan i vin an fors, i sel opsyon pou evit kontaminasyon.

An 2015, PMC ti depans R3. 3 milyon lo ponp bann sistenm e fer lezot bann pti reparasyon lo sistenm Sewage.  Sa bann detay louvraz ki PMC i anvizaze anliny avek komitman Gouvernman, pou rezourd bann problenm pertinan dan bann Estate, ki pe sibir pour en bon pe letan.  PMC osi an adisyon avek sa, kontinyen avek son bann louvraz routin e enprevi ler i annan bann ka ki lev-e.  Anba sa progranm ki konpri, penn bann batiman pour 2016, louvraz lo 11 Estate in ganny progranmen pou en kou estimen anviron R6.9 milyon.

Mersi Mr Deputy.

 

MR DEPUTY SPEAKER

Kestyon siplemanter, Onorab ?

 

HON SYLVIANNE VALMONT

Mersi Mr Deputy Speaker.

Permet mwan dir Minis ek son Minister ki travay i la e sa Gouvernman pe vreman…..

 

(Interruption)

 

HON SYLVIANNE VALMONT

….met Bidze a dispozisyon.

Wi, Mr Deputy Speaker, eski Minis i kapab dir nou Lasanble, si   dan bann ka kot en lokater i ganny afekte par diferan fakter, ki nesesit maintenance – parey in nonmen ki twa koule, miray sal, twalet par egzanp – twalet kase, eski kot son Minister  pa pe kapab antreprann sa travay dan limedya akoz petet Bidze, ki rekour sa lokater i annan pou adres sa problem?  Eski Minister i pare par egzanp, pou refund sa dimoun son larzan ki i fer sa travay maintenance pour son prop konfor ?

Mersi Mr Deputy Speaker.

 

MINISTER CHRISTIAN LIONNET

Mr Deputy, wi, travay i la, me nou pli determinen ki zanmen, pour nou adres sa bann issue.

So, mon krwar propozisyon Onorab, i enn ki enportan.  Si i annan en dimoun ki vwar i annan serten defayans, ki i an vi adrese, i kapab antre dan en dialog avek PMC,  e vwar ki meyer solisyon pour zot kapab adres sa sityasyon

Mersi Mr Deputy.

 

MR DEPUTY SPEAKER

Onorab Dokter Payet.

 

HON DAVID PAYET

Mersi Mr Deputy.  Bonzour tou dimoun.

Mr Deputy, Eski Minis i kapab enform sa Lasanble, si son Minister dan lekzekisyon sa progranm ranplas twa e maintenance, pou konsider bann priyorite bann Housing Estates, kot twatir a leternik parey sa Flat Malaysian Glacis, vi ki sa materyo i koz en risk pour lasante piblik.

Mersi Mr Deputy.

 

MINISTER CHRISTIAN LIONNET

Mr Deputy, lenformasyon ki mon annan dapre bann Teknisyen, se ki tes in  deza ganny fer e sa materyo pa asbestos.  Me selman si i annan ankor konsern kot zabitan, nou avan repase, nou ava fer bann tes ki neseser ankor pou kalme zot lespri lo sa size.

Mersi Mr Deputy.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mersi Mr Deputy Speaker.  Bonzour Minis. Bonzour Mr Deputy Speaker.  Bonzour tou dimoun ki a lekout.

Mr Deputy Speaker, eski Minis i kapab enform nou Lasanble, ki bann mezir irzan ki son Minister atraver PMC pe fer pou protez bann dimoun ki annan bann tenk delo ki trouve dan plafon – sa bann Flat, ki i pe mansyonnen – parey bann Flat Cascade i annan – e kot  en bann ensinifyan i ganny fer avek sa bann tenk delo:-par egzanp dimoun ki vol delo kanmarad avek rakor – i vini i pran rakor dan ou tenk la, i fer desann dan en lot lakaz – dimoun ki pran bann keksoz sal ki zet dan tenk koman – condom.  Dimoun ki dormi dan plafon – i annan bann ensinifyan la ki vin dormi dan plafon:-e an menm tan ki – dan sa bann Flat ki ou’n mansyonnen taler kot i konsern koneksyon ek Sewage, akoz ki ou pa’n mansyonn bann Flat Brillant Petit Paris EX-LTD sirtou avek Vilaz Ste Andre, kot i annan gro problenm Sewage dan sa bann landrwa.

Mersi.

 

MINISTER CHRISTIAN LIONNET

Mr Deputy, mersi.

Wi, nou okouran ki i annan serten issue ki arive dan bann twatir kot bann tenk delo i ete.  Nou pe anvizaze ki letan nou met sa zafer Condominium Act ansanm, kot bann dimoun i reste dan bann Blok Flat i annan responsabilite pou zer zot bann younit, ki i ava kapab annan en fason pour nou kapab deal ek sa bann problenm. Nou pa kapab met lock lo sa bann landrwa ki ou pase pou ariv dan plafon, akoz parfwa zour  i ariv en delo kase, ou bezwen ganny akse pour ou kapab ganny lakle avek en dimoun ki la, parfwa i pa sitan fasil.   Me nou ankor pare pour nou kontinyen koze, diskite e vwar en solisyon pour nou kapab sort out sa problenm.

Nou’n dir ki sa lannen,  nou pou al tir tou bann tenk ki dan bann Flat, ki par lao bann Flat e met zot dan bann common areas.  Nou pou fer sa over sa lannen ek lannen prosenn.

Lo kote bann Housing Estates ki Cascade, nou annan en plan lenplimantasyon pour bann zafer Sewage e sa i feature Onorab, pandan 2017.  So, dimoun Cascade i kapab reste asire ki M        inister parey nou’n dir – pandan sa 2an – savedir 2016 – 2017, nou pou fer tou sa  ki posib pour nou kapab adres sa bann issues kot sa bann Estate.

Mersi Mr Deputy.

 

MR DEPUTY SPEAKER

Onorab Payet-Marie.

 

HON MARIA PAYET-MARIE

Mersi Mr Deputy Speaker.  Mr Deputy Speaker, an vi ki Bidze i en konsern in regards to maintenance, kestyon ki devan nou, eski Minis i kapab enform nou Lasanble, ki mekanizm ki annan an plas, pour monitor travay bann Kontrakter ki fer bann travay lo bann Flat PMC, pour ki travay i lo standar e byen:-e Minis si ou kapab petet dir nou kan ki Vilaz Granit sa proze penn pou fini?

Mersi Mr Deputy Speaker.

 

MINISTER CHRISTIAN LIONNET

Mr Deputy, mon napa  larepons lo Vilaz Granit, me mon kapab rod sa larepons e pas avek Maam Onorab.

Lo lot kote, pour maintenance, Bidze i toultan en issue.  E i vre letan nou fer en keksoz nou depans en larzan  nou merit fer sir poudir sa larzan in ganny byen depanse, pou asire ki nou pa bezwen retournen, pou al adres sa sityasyon.

So, PMC an se moman i annan son bann Teknisyen ki vizite ki regarde.  E osi nou servi bokou Lotorite Distrik, pou ed nou, pou asire pour letan ki en Zofisye i sertifye en louvraz, sa Lotorite Distrik i osi kapab sertifye sa.  Sa i marse pour bann louvraz maintenance, koup zerb eksetera, netway rigol, eksetera me i osi kapab marse pour bann lezot louvraz – sirtou bann louvraz mazer, akoz bann pti louvraz petet i pou annan tro bokou pou distrik sertifye :-  solman parey penn Blok Flat eksetera, sa i a obviously ganny konsidere ki Lotorite Distrik i osi sertifye sa travay avan ki peyman i ganny fer ek Kontrakter.

Mersi Mr Deputy.

 

MR DEPUTY SPEAKER

Onorab Pillay.

 

HON SEBASTIEN PILLAY

Mersi Mr Deputy Speaker.

Mr Deputy Speaker, dan son larepons Minis, in mansyonn sanzman twatir lo bann lakaz, me  mon ti oule rod en leklersisman spesifikman – dan bann sirkonstans kot bann dimoun in pey zot lakaz e twatir i en common roof, e ki si en propriyeter i ale e i sanz kot li, i annan gran posibilite ki ler i sanz kot li i pou afekte son vwazen, si keksoz pa’n ganny fer – ki prosedir ki son Minister pe met an plas, pou kapab adres bann problenm dan bann Housing Estates avek sa kondisyon:-e dezyenmman eski Minis i kapab klarifye, an se ki konsern par egzanp bann bedsitters ozordi ki dan en kantite sirkonstans zot in fini outgrow zot use, eski dan son Minister pe konsidere dan bann landrwa kot i annan teren ki deza la, pour zot extend sa bann bedsitters e convert li dan bann 2 bedrooms – kanmenm zot a reste bann lakaz tranzitwar, me zot a kapab vin en pe pli konfortab pour bann dimoun ki deservi sa bann lakaz.

Mersi Mr Deputy Speaker.

 

MINISTER CHRISTIAN LIONNET

Mr Deputy, dan larepons mon kestyon orizinal mon’n dir ki mon Minister i kordinen dan bann landrwa kot i annan bann semi-detached oubyen bann terraced house, akoz pou rezon ki ou kestyon i ete, se eski en dimoun i pare pou fer e lot pa ankor pare pou fer e i poz serten konpleksite teknik.  Selman i kordinen.  E i annan serten landrwa osi nou menm met en bout larzan.  Parey mon’n donn en legzanp – sa lannen dan sa bann kategori nou annan R5.1 milyon ki nou’n anvizaze – R1.6 pou sorti kot Gouvernman – R1.6 kot sa bann dimoun e R1.9 sorti kot PMC. 

So, nou deza pe fer li – nou deza pe kordin travay pou asire ki travay i kapab ganny fer san okenn difikilte, pour sa bann dimoun.

Lo kote bedsitter pour le moman Polisi  ki an plas, se ki nou anmas nou stok bedsitter e 1 bedroom pour bann fanmir ki ase ti pti.  Si ou regard demann lakaz, demann aktyel baze lo grander fanmir, nou annan bokou plis demann pour bann 1 bedroom ki 2 bedroom avek 3 bedroom a se  moman.  So, Polisi aktyel, se ki nou rezerv nou stok, me solman sa pa verdir ki nou pa kapab asize, regarde si kot sa younit i été napa en posibilite pou fer bann pli gran lakaz dan lefitir, kot nou kapab vann sa dimoun.  E en dimoun i kapab aste sa lakaz pour li vin pou li.

Mersi Mr Deputy.

 

MR DEPUTY SPEAKER

Onorab Arnephy.

 

HON BERNARD ARNEPHY

Mersi Mr Deputy Speaker.  Bonzour tou dimoun.

Mr Deputy Speaker, an vi ki Gouvernman pe depans en kantite larzan, pour sa bann travay konstriksyon nouvo lakaz e an menm tan maintenance, ki garanti eski Minis pe dir nou, kapasite son Minister pou asir quality control pou asire ki sa bann materyo pe ganny servi dan konstriksyon, i bann materyo ki pou last pour en kantite lannen e non pa, nou vwar nou 2an – 3an pli tar, pe retournen pe fer travay mazer  lo bann lakaz zis parey  dan Perseverance ozordi – kot Gouvernman pe depans en kantite larzan, an menm tan sa pe met retar bann dimoun ki lo lalis ki atann pou ganny asiste avek social housing.

Mersi Mr Deputy.

 

MINISTER CHRISTIAN LIONNET

Mr Deputy, mon toultan dir avek mon bann staff dan mon Minister, letan nou depans 1 sou Gouvernman, nou bezwen get li parey nou pe depans 1 sou ki pour nou.  Letan nou pe konstri 1 lakaz, nou bezwen donn tou latansyon parey nou ti pou donn en lakaz ki pe konstri pour nou.  E mon krwar sa i antre dan lespri bann travayer Minister.  Zanmen keksoz i parfe – mon konpran sa, mon aksepte sa.  Me mon krwar i kler ki nou anvi adres sa bann problenm enn fwa pour tou.  E Minister ansanm ek PMC – konzwentman ek PMC e osi bann lezot Teknisyen prive ki pe donn nou en sipor dan sa zafer, nou pe fer sir ki larzan ki nou depanse i al avek kalite.

Mersi Mr Deputy.

 

MR DEPUTY SPEAKER

Onorab Vangadasamy.

 

HON SHERYL VANGADASAMY

Mersi Mr Deputy Speaker.

Mr Deputy Speaker, an prenan kont larepons Minis, Gouvernman pe fer en kantite an se ki konsernm lozman, eski Minis i kapab dir sa Lasanble, ki son Minister  pe fer ansanm ek lezot Minster parey PUC, pou asire ki letan sa bann proze – bann nouvo proze, ki zot konsevwar septic tank ouswa kwa, zot fer en sel sa konneksyon Sewage – Central Sewage System parey i pe fer Perseverance ki i ava evite alevenir annan sa  sityasyon:-e osi ki zot pe fer pou pous pli devan sa Condominium Act ki Seselwa i a pran en pe plis responsabilite an term zot lozman, an se ki konsern Gouvernamn in subsidize en kantite lozman dan pei e fer en kantite pou mentenir sa bann lozman ki i pe donn zot a sa pri.

Mersi Mr Deputy Speaker.

 

MINISTER CHRISTIAN LIONNET

Mr Deputy, nou’n deza fini anonse ki nou Polisi regarding Sewage pou bann gran Housing Estate – bann Housing Estate o dansite, se ki a lavenir nou pou enplimant en STP. Pou napa konneksyon sewage nou i annan konneksyon sewage nou pou konnekte avek Sewage Santral.

Bann proze ki online ki pe ganny fer la, i deza pe enplimant sa Polisi.  XION Barbarons, nou pe fer en sistenm SewageEx-Desaubin, Takamaka  nou annan en STP pe ganny konstri.  Kashoggi Beau Vallon/ Bel Ombre i deza pe kapab konnekte avek laliny Santral.  So, tou bann nouvo Estate ki nou pe ganny fer, nou pe pran sa an kont – akoz vre sa problenm i en problenm ki enorm e si nou pa kapab adres li,  komansman proze, i pou fristre nou bann dimoun dan bann Housing Estate.

Lot kestyon Onorab, ekskiz mwan in sap mwan?

 

HON SHERYL VANGADASAMY

Mon demann Minis en permisyon, Mr Deputy Speaker:-ki i pe fer pou pous Condominium Act, pou fer nou pep Seselwa konsyan poudir ki an menm tan ki zot pe benefisye avek en lakaz ki ganny subsidize par nou Gouvernman:- e an menm tan osi pe benefisye avek maintenance – pou ankouraz zot osi pou annan sa sans responsabilite pour zot kit zot lakaz e mentenir zot lakour ki zot pe gannyen.

Mersi.

 

MINISTER CHRISTIAN LIONNET

Mersi Mr Deputy.

Mr Deputy, mon Minister in deza komans  atraver son progranm pour li transfer bann younit ki dan bann Blok Flat  -bann propriyeter, nou’n deza komans fer bann meeting avek bann dimoun dan sa bann Estate.  E, wi responsabilite bann dimoun dan sa bann Estate, i kle pou fer sir ki nou annan en Estate ki annan en lanvironnman sen e agreab.

So, nou a kontinyen pas sa mesaz avek zot pandan bann meeting. E evantyelman ler dimoun in pare, zot a kapab pran en pe plis responsabilite.

Me antretan Gouvernman Parti Lepep, i reste angaze pou fer sir ki nou donn maintenance ki neseser lo bann Estate.

Mersi Mr Deputy.

 

MR DEPUTY SPEAKER

Kestyon 85, Onorab Lebon.

 

HON LENNY LEBON

Mersi Mr Deputy.

Bonzour Mr Deputy, Minis e ou delegasyon e tou dimoun ki a lekout.

Kestyon:- eski Minis i kapab enform sa Lasanble kan eski sa proze lakaz rezyonnal Grand Anse Mahe pou konplete?

Mersi.

 

MINISTER CHRISTIAN LIONNET

Mr Deputy, proze XION i parmi 3 proze ki pe ganny finanse atraver don sorti kot Gouvernman Abu Dhabi.   Sa proze i en rezilta direk sa diplomasi aktiv ki Prezidan Michel in anmennen depi ki in pran lofis an 2004.  En serten group dimoun dan pei pe dir ‘Arab, go home.’ Arab e lezot nou bann zanmi aletranze ki aktivman ede pou anmenn plis larises e amelyor standar lavi nou sitwayen.

Plan devlopman, XION, i prevwar konstriksyon 84 younit rezidansyel.  Proze ki  pe ganny antreprann pour lemoman, i konpri 42 younit dan premye faz sa devlopman.  22 (3) lasanm e 20 (2) lasanm.  Proze ti demare an Zilyet 2015.  Proze in ariv apepre 30 poursan lenplimantasyon.  Minister i ekspekte konplet louvraz lo 5 Blok – setadir 30 younit ver Desanm, 2016.  Larestan 12 younit i ekspekte ver Mars, 2017.

Anliny avek nou nouvo Polisi kot i konsern sistenm desarz, sa proze i osi konpri konstriksyon en Stasyon Tretman Desarz pou kolekte sewage sorti dan sa nouvo Estate.  Ler sa proze i konplete, nou ekspekte osi konnekte Ex-Trouillon Estate avek sa STP pou rezourd problenm sewage ki  nou pe fer fas avek.

Kou konstriksyon pou premye faz XION i ariv R49.9 milyon.

Mersi Mr Deputy.

 

MR DEPUTY SPEAKER

Kestyon siplemanter, Onorab.

 

HON LENNY LEBON

Mersi Mr Deputy.

Mr Deputy, anliny avek repons Minis, eski Minis i kapab eksplik sa Lasanble, kan – in koz lo premye faz, ki 42 younit – an tou ti annan 84 lakaz younit lakaz ki ti sipoze konplete – kan eski  dezyenm  faz pou komanse:-an menm tan eski si ler pe fer dezyenm faz proze lakaz, si pa pou afekte bann dimoun ki deza in move dan premye faz – an menm tan bann dimoun ki pe reste lo sa sit?

Mersi Mr Deputy.

 

MINISTER CHRISTIAN LIONNET

Mersi Mr Deputy.

Gouvernman pe aktivman rod finansman pour nou kapab kontinyen sa bann proze.  A ler aktyel nou pa ankor konfirm sours finansman.  Me solman lendikasyon i montre osi ki Abu Dhabi, i annan posibilite i kapab kontinyen sa bann proze dan dezyenm faz.  Tou lendikasyon i la – me solman mon Minister i reste angaze pou rod tou posibilite ki annan, pour nou kapab fer sa proze kontinyen once ki sa premye faz in fini.

Lo issue, si bann dimoun ki pour lo sa sit pou ganny afekte – mon krwar definitivman  i pou annan en serten lenkonvenyans ki pou ganny poze, me solman nou pou kapab manage. Annou pa oubliye ki i annan deza proze dan pei ki pe arive, kot i annan dimoun ki pe reste, me i annan proze pe kontinyen :-  Perseverance i en legzanp – Corgat Estate i en lot.

Mersi Mr Deputy.

 

MR DEPUTY SPEAKER

Kestyon 86, Onorab Jeannevol.

 

HON BEGUITTA JEANNEVOL

Mersi Mr Deputy. Bonzour.  Bonzour Minis ek ou delegasyon.

Eski Minis i kapab dir avek zabitan Corgat Estate ki pe arive avek kontinyasyon dezyenm faz proze lakaz Corgat Estate ?

Mersi.

 

MINISTER CHRISTIAN LIONNET

Mr Deputy, pour lemoman, Gouvernman in konplet 2 faz re-devlopman Corgat Estate.  An 2008 faz A (1)  ki ti konpri 13 younit ti ganny konplete.  An  2015 faz A  (2)  avek 20 younit ti konplete.  Proze ler i konplete pou konpri 191 younit.  Gouvernman Sesel in ganny finansman avek Gouvernman Lasin, pou enplimant ankor en faz adisyonnel – faz A (3).  Progre lo en kontinyasyon sa 3enm faz i comme swivan;

An Fevriye 2015, Gouvernman Sinwan ek Gouvernman Sesel, ti siny en Lakor ki ti konfirm finansman konstriksyon ankor 32 younit 3 lasanm – an term 4 Blok Flat.

An Zen 2015, lekip teknik sorti Lasin ti vin Sesel pou vin komans travay lo design proze.

An Zilyet 2015 osi, en lot group Teknisyen Sinwan ti vin fer en site investigation lo kondisyon later ek teren.

An Mars 2016, bann plan e spesifikasyon ti ganny sirkile sorti Lasin pour mon Minister fer komanter.  Apre plizyer lesanz, Minister in retourn son bann komanter final lo design lafen Avril, 2016.  Gouvernman Sinwan pe finaliz  desen  ek zot prosedir pou rod kotasyon e selekte Kontrakter.  Mon Minister i an kontak regilye avek Gouvernman Sinwan atraver Minister Zafer Etranzer e osi Lanbasad Lasin isi.  E nou konvenki ki travay konstriksyon lo sa 32 nouvo lakaz, a komanse avan lafen lannen.

Mersi Mr Deputy.

 

MR DEPUTY SPEAKER

Kestyon siplemanter, Onorab?

 

HON BEGUITTA JEANNEVOL

Mersi Mr Deputy.

Mr Deputy, an vi larepons Minis, eski Minis i kapab dir nou, vi ki sa i en don Lasin, konbyen eski Gouvernman si i annan okenn kontribisyon – ki Gouvernman pou depanse dan sa proze :-e osi eski Minister pe konsider Self-Financing Scheme ki petet i ava kapab kontribye pou konplet sa proze en pe pli vit.

Mersi.

 

MINISTER CHRISTIAN LIONNET

Mr Deputy, finansman proze pe sorti Lasin, me solman Minister – Gouvernman i annan kontribisyon pou fer, par egzanp, nou pa sarz Tax  lo bann keksoz ki vin dan pei pou proze e lezot kontribisyon teknik ki nou ofer pandan bann proze Bilateral parey sa enn.

Lo kote Self-Financing  – wi, mon Minister pe eksplore posibilite pour nou  kapab devlop parti Corgat Estate atraver Self-Financing Scheme.  E plan i deza pe travay lo la e byento nou ava kapab anmenn sa devan bann dimoun Corgat Estate pour nou ganny zot lopinyon e pwennvi, avan ki nou kapab met en tel Scheme an plas pou mars  a lavan.

Mersi.

 

MR DEPUTY SPEAKER

Kestyon 87 Onorab Vangadasamy.

 

HON SHERYL VANGADASAMY

Mersi Mr Deputy Speaker.  Eski Minis i kapab dir sa Lasanble, si son Minister pe konsider met Polisi an plas e ankouraz plis Public-Private Partnership (PPP) pour Self-Financing ek Self-Benefit Schemes, pou met plis lakaz available?

Mersi Mr Deputy.

 

MINISTER CHRISTIAN LIONNET

Mr Deputy, i dan plan mon Minister pou rod tou fason pou ogmant lakantite lakaz ki ganny delivre e vin lo marse, ave bi pou fer pri lozman vin enn ki abordab dan Sesel.  Ler Minister i sorti ek bann Scheme e mekanizm lenplimantasyon, i bezwen fer sa avek bon prediksyon, lo ki fason nou pou annan lenpak lo bann prensip de baz nou  progranm lakaz.  Sa se donn loportinite bann sitwayen ki pa ankor deza ganny asiste e ki napa propriyeter ouswa en lakaz lo zot non :-e lasistans baze lo bezwen.

Laplipar bann mekanizm ki an mars  pour lemoman, i bann proze pilot.  Minister i alor pa ankor pare  pou lans en Polisi formel.  Me nou’n deza konsyan pou diriz nou bann aplikan dan Scheme ki pou anmenn plis benefis pour zot, enkli redwir letan ki zot bezwen esper lakaz.

Pli gran motivasyon a ler aktyel pou met bann mekanizm PPP, dan Sekter Lakaz, se akoz defi lo kote finansman atraver Bidze.  Minister in inisye deza plizyer Scheme oubyen zis pour sa proze ki permet finansman an deor Bidze Kapital Gouvernman.

Pou nonm serten bann Scheme ki’n ganny inisye ziska prezan, Self-Financing Scheme, Minister pe enplimant sa an servan PMC koman en veikil lenplimantasyon.  Sa Scheme i permet bann dimoun ki pou benefisye, a-port zot prop finansman pour PMC konstri lo zot par, dapre plan ki’n ganny fer pour sa Estate.  Premye proze lo Perseverance pe byen ale e nou pou lans Tender pour en dezyenm group lakaz dan bann mwan ki pe vini.

Ziska prezan nou santi ki sa Scheme, ki sa enn ki tous pli gran kous nou bann aplikan lakaz.  Proze Condominium Ile Perseverance,  i osi prometan pour nou group zenn Profesyonnel.  Nou santi ki sa kategori aplikan – nou kliyan in kapab servi mekanizm PPP plis, anvi abilite sa group pour en prodwi pli elve, ki bann  partner prive i kapab ofer.

Dan mekanizm Condominium, Gouvernman i  ofer later  pour proze lo en pri nominal, en serten poursantaz younit i ganny konstri, i ganny ofer lo en open market pou cross-subsidize pri bann younit  ki pou vann avek bann First Time Buyers lo en nivo abordab.  Atraver proze Ile Soleil, devlopman lenfrastriktir lo sa zil pou met loportinite kare later, in fer avek reveni ki sorti kot lavant bann  morso later.  Menm si proze pe montre ki i pou en sikse,  i annan challenge lo volim kliyan ki pare pou pran sa kalite loportinite.

Lo Ile Perseverance, Minister in osi met plizyer plot later – mix-use lo Tender kot bann lakaz letaz anler i bezwen ganny servi koman apartman rezidansyel.  Sa Scheme i annan bi ogmant lakantite younit lo market rental e an rezilta sa fer pri lakaz  lwe vin pli abordab.  I annan bokou lentere dan sa Tender, e Minster i optimis ki i pou a-port bann rezilta.

Mr Deputy Speaker, avek kou konstriksyon ki ankor ase elve Sesel, e kou finansman ki osi o, Minister i prevwar ki en gran porsyon  nou bann kliyan lakaz, pa pou kapab antre lo bann Schemes, PPP.  Akoz sa, i annan plis rezon pou etabli en gid kler, lo ki mannyer nou distribye bann loportinite pour asire bann kliyan i benefisye avek solisyon ki meyer pour zot – san ki zot afekte loportinite bann group ki pli vilnerab.

Minister pou diskit avek Departman Finans, lo pli bon fason pou ekrir en Polisi lo sa ki konsern alokasyon bann loportinite e demann pour diferan kategori loportinite, pour nobou etabli en pipeline proze PPP pli soutenab.

Departman Finans, i deza annan en Polisi draft lo seleksyon devloper, pour bann proze dan en fason transparan e konpetitiv.  Me i reste ankor travay pou fer lo kote idantifikasyon proze, ki vyab atraver PPP e ki adres demann nou kliyantel dapre nou bann Polisi.

Mersi Mr Deputy.

 

MR DEPUTY SPEAKER

Kestyon siplemanter Onorab?

 

HON SHERYL VANGADASAMY

Wi,  Mr Deputy Speaker.  Mon annan 2 kestyon.  Eski Minis i kapab dir sa Lasanble, prenon kont son larepons, ki ou’n dir poudir proze pilot in byen demare e osi savedir i bon – i montre ou bann bon lendikasyon – ki i pe fer an term son Minister pou annan en plan konkret pour sa 2 SchemeSelf-Financing Scheme avek Self-Benefit Scheme ,pou li kontinyen – espesyalman pour sa kous nou popilasyon ki ou menm ou, ou dir Minis sa kous nou popilasyon – bann returning Graduates – bann Profesyonnel ki pe espere e  vreman dan bezwen :– ki ou pe fer la konkretman pou asire ki sa i kontinyen e ki sa Polisi i pa drag on, nou vwar li materyalize dan bann peryod letan ki vini pour ki sa kous dimoun i santi li pe benefisye avek sa 2 Scheme :-e osi Minis, eski ou kapab dir sa Lasanble, apard sa 2 Scheme ki bann lezot Scheme osi ou deside, ouswa si ou Minister pe mazin lo la pou antreprann, pou asire ki pa zis en serten kous popilasyon ki benefisye, me lezot kous osi parey mon ankor mon pou dir – bann Profesyonnel ek bann zenn Graduates, i ganny osi byen ankadre pour zot benefisye avek zot premye lozman?

Mersi Mr Deputy Speaker.

 

MINISTER CHRISTIAN LIONNET

Mr Deputy, nou pe fer tou nou mye pour nou met plis loportinite pour sa group dimoun, ki Onorab pe mansyonnen.  Proze Condominium lo Ile Perseverance i enn.  Nou annan lezot proze Condominium ki nou’n ganny planifye, dan bann distrik – Mont Buxton mon konnen nou  annan enn.  Nou annan lezot proze en pe partou.  Nou annan later ki nou pe mazinen al allocate sa lannen ver lafen lannen, Ile Aurore ki pou osi ofer loportinite bann dimoun pou kapab ganny en bout later pou zot konstri zot lakaz.

Nou pe vwar plizyer Scheme finansman kot Sekter Prive i kapab antre, pou ed nou devlop bann kare later :-  par egzanp, proze Land Bank nou santi ki nou kapab ganny nou bann dimoun ki pe esper en morso kare later, pou kontribye en pti pe plis ver kou lenfrastriktir dan en mannyer nou kapab fer bann proze dan en dele letan pli kourt.

Mersi Mr Deputy.

 

MR DEPUTY SPEAKER

Kestyon 88, Onorab Arnephy.

 

HON BERNARD ARNEPHY

Mersi Mr Deputy.

Mr Deputy, Mr Deputy mon pe demann sa kestyon on behalf of  Onorab Lucas pour Baie Lazare, eski Minis i kapab donn nou Lasanble, en lendikasyon kan ki proze lo Housing Estate, Ex-Hunt, Housing Estate e proze Land bank R.C Mission (Roman Catholic Mission) e survey e sub-division lo kare later Ex-Regis Robert pou komanse dan distrik Baie Lazare?

Mersi Mr Deputy.

 

MINISTER CHRISTIAN LIONNET

Mr Deputy, ozordi Seselwa i annan en stil lavi ki konparab avek bann pei pli ris – kalite lozman e akse avek later pou konstri lakaz, Gouvernman SPPF e la Parti Lepep in met an plas, in zwe en gran rol pou fer sa arive.  Ozordi, si 75 poursan Seselwa i propriyeter son prop lakaz, sa i montre ki sa Gouvernman Lepep in travay dir e san ses pou fer sa arive.

Bokou pei ris, pa’n reisi kapab fer li e personn pa kapab dir nou le kontrer.  Malgre nou bann sikse, nou toultan reste limite par defi finansyel pou devlop lenfrastriktir, pou kapab fer plis later vin aksesib ensi byen ki kalite teren ki bon pou konstri lakaz.  Baie Lazare i pa en eksepsyon kot nou dernyen alokasyon, en gran proze Land Bank ti an 2006 Ex-Hunt, kot nou ti fer alokasyon 70 kare later rezidansyel.  Nou dernyen proze lakaz an 2007 Gondwana – en proze 60 lakaz.

Lo kote later, dan nou zefor pou met plis later a dispozisyon zabitan Baie Lazare e dan larezyon, mon Minister in komans fer serten travay arpantaz pou release  apepre 45 kare later dan sa bann prosen mwan ki devan nou.  Sa pou dan bann landrwa kot lenfrastriktir semen, delo e elektrisite i deza egziste oubyen pa pou kout Gouvernman bokou, pou met bann tel lenfrastriktir dan en dele letan ki rezonnab. Detay sa bann kare i comme swivan ;

Dame Le Roi kot Ex- Regis Robert nou annan plan pou 20 kare later.  Ankor Dame Le Roi Ex-Hodoul nou annan nou 17 kare later.  Apre Ex-Hunt nou annan nou 8 kare later.  Fodre fer sorti ki sa bann proze later ki mon’n fek nonmen, i pou faz 1 proze later pou distrik Baie Lazare.  Pou annan lezot faz devlopman later lannen prosenn e bann lannen ki pou swiv tel ki,  Ex-R.C. Mission. Nou pa’n kapab met en proze later rezidansyel sa lannen, vi ki sa landrwa napa lenfrastriktir.  Me mon Minister pou komans bann groundwork lannen prosenn, pou determinen konbyen kare later nou kapab gannyen dan sa landrwa e ki son kou pou devlope.

Nou santi avek sa bann proze, nou a kapab redwir lalis demann later Baie Lazare e bann distrik dan zalantour, konsiderableman.

Proze lakaz Ex-Hunt i proze ki pe ganny anvizaze konstri lo kare later C4835 ki donn en siperfisi 11, 537 met kare.  Minister in deza evalye en porsyon sa teren e nou ti deza annan en plan pou konstri 12 younit lo la.  Swivan demann Lotorite Distrik, nou dan prosesis reviz sa plan pour nou kapab azout ankor 12 younit an plis lo en morso teren ki’n ganny idantifye pou li kapab ganny devlope.  Nou pe planifye pou konstri 12 younit 2 lasanm e 12 younit 3 lasanm dan sa proze.  Bidze pour sa proze, nou estimen pou anviron  R20.4 milyon.  Minister i ekspekte finaliz sa plan e ganny laprovasyon Lotorite Planning, avan  lafen lannen.  Minister pe bidzete pou komans sa proze pandan premye kar 2017.

Mersi Mr Deputy Speaker.

 

MR DEPUTY SPEAKER

Kestyon siplemanter, Onorab?

 

HON BERNARD ARNEPHY

Mersi Mr Deputy.

Mr Deputy, an vi larepons Minis e kantite lenvestisman ki Gouvernman pe fer dan asiste bann dimoun avek later ek lakaz, eski Minis i kapab donn nou status lo  kantite rezidan Baie Lazare ki pe esper en  morso later e pe esper en lakaz avek Gouvernman ki pe fer zot peyman:-e an menm tan eski Minis i kapab dir  nou, si zot annan okenn defayans an term surveyor – ase kantite surveyor pou fer ki bann later ki’n ganny atan pou ganny survey i ganny fer dan bann  dele letan ki pli rezonnab e ki bann dimoun ki lo latant pou ganny asiste i ganny asiste dan en dele letan ki rezonnab.

Mersi.

 

MINISTER CHRISTIAN LIONNET

Mersi Mr Deputy.

Dapre nou rikord, i annan 233 dimoun ki lo lalis lokasyon later pou Baie Lazare.  E pour Housing, nou annan 81 dimoun ki lo Home- Saving Scheme e ladan i annan 22 ki ozordi in kalifye pour lasistans.

Lo kote surveyor, Mr Deputy, mon Minister in etansifye sipor dan bann dernyen lannen pour nou ogmant kantite survey ki nou fer par an.  Mon krwar si ou get statistik survey kantite later, kantite travay ki survey in fer pandan sa dernyen 2an in deza ogmante.  Nou rely en kantite lo bann surveyor prive osi.  E Minister Finans tou le lannen i donn nou en Bidze pour nou kapab ganny surveyor prive pour kapab ed nou dan sa latas ki survey i annan devan li.

Mersi Mr Deputy

 

MR DEPUTY SPEAKER

Kestyon 89, Onorab Dugasse.

 

HON MELVAL DUGASSE  

Mersi Mr Deputy.

Eski Minis i kapab enform bann zabitan La Retraite Housing Estate – deryer Lekol, ki zistans in arive ek sa proze pou elimin sa problenm drenaz, osi byen pou konstrir en mini Sewage Treatment Plant (STP), plan ki ti ganny prononse dan sa Lasanble le 25 Septanm 2013?

Mersi Mr Deputy.

 

MINISTER CHRISTIAN LIONNET

Mr Deputy, parey ti ganny eksplike an 2013, sityasyon dan sa STP in koze an vi sa landrwa ki sa landrwa i dan en vale i annan bokou glasi.  Akoz sa topokrafi, delo i natirelman koul ver sa landrwa e an vi prezans glasi, enfiltrasyon i tre ba.  Menm si i annan drenaz ki’n ganny konstri pandan proze, e apre nou ti annan delo sirfas pandan lapli i ankor annan groundwater ki koul ver sa landrwa e kontinyen menm pandan letan sek.

Problenm drenaz, diskisyon e progranm avek led Departman Lanvironnman pou netway larivyer o-bor Lekol La Retraite e fer disilting lo en baz pli regilye, dan en fason ki sours exist sa delo i mars pli efikas posib ti’n deza ganny agree.

Minister i annan 2 proze par lao sa Estate pour pli byen channel bann delo sirfas e fer zot ariv kot larivyer ou desarz e redwir lefe lo sa bann lakaz ek semen.

Premye proze e drenaz sorti kot sa  Parcel 85041 kot Madanm Marie-France Samson ziska kot Lekol.  Pour sa konponan, nou pe finaliz design pou kapab rod bann wayleave avan bouz lo plan lo faz enplimantasyon

Dezyenm proze, se pour osi mye konnekte delo sirfas sorti dan zanmerant H8048 kot lakaz Mr Patrick Quatre, pou zwenn rigol semen pli ba.

Pour sa proze design, i ekspekte konplete avan lafen Zilyet pou soumet kot Lotorite Planning ava pas lo faz lenplimantasyon.

An sa ki konsern problenm avek bann septic tank ek pi perdi, sel solisyon pou evit delo ki filtre anba later, melanz e afekte bann pi perdi, se pou konekte tou desarz sa  bann lakaz ki anba dan vale e anmenn zot atraver en sistenm tiyo, kot en teren i kapab pran enfiltrasyon.

Minister in fini fer design pour sa sistenm retikilasyon e pou konstri en gran drainfield lo en siperfisi anviron 800 met kare, lo HI20 kot Laplenn La Retraite.  Sa plan i avek Lotorite Planning pour laprouvasyon avan ki nou bouz lo faz lenplimantasyon.

Pour sa proze drainfield nou pe bidze R1.2 milyon ler nou konsider plan long term pour sa rezyon avek devlopman Ile Aurore, nou prefere al pour sa solisyon dan plas konstri en STP.  Ler Ile Aurore pou devlope, pou annan en STP rezyonal ki pou PUC ki pou pran desarz sorti Perseverance ek Rezyon Nor.  Sa  STP pou lo rezyon Nor Ile Aurore.  Ler sa Stasyon i komisyon-nen en Stasyon Laponp ava ganny konstri kot nou’n fer sa gran drainfield pou anvoy tou sa sewage atraver konneksyon sorti La Retraite pre kot laboutik Per Houareau,  pou al Ile Aurore kot Stasyon Tretman.

Nou ekspekte, konplet tou le 3 proze mansyonnen anler, ver 2017 si nou reisi ganny tou plan, tou bann laprouvasyon ek Lotorite Planning.

Mersi Mr Deputy.

 

MR DEPUTY SPEAKER

Kestyon siplemanter Onorab ?

 

HON MELVAL DUGASSE

Mersi Mr Deputy.

Minis, etandonnen ki sa bann proze ki ou’n mansyonnen, in pran plis ki 2an pou lenplimantasyon, ki bann difikilte ki ou Minister in rankontre pou obou finalman kapab antreprann sa proze?

Mersi Mr Deputy.

   

 MINISTER CHRISTIAN LIONNET

Mr Deputy, mon krwar pli gran difikilte, se nou mwayen pou finans proze.  Me solman avek led ki Gouvernman in dir i pe donnen sa lannen e ki nou’n komans gannyen osi, i fer li posib prezan, pour nou kapab bouz dan faz lenplimantasyon.  In osi pran en bon pe letan pour nou diskit ek Minister Lanvironnman pour nou kapab vwar en solisyon ki letan pe enplimante, i en solisyon ki pou  marse e sa problenm pa pou repete.

Mersi Mr Deputy.

 

MR DEPUTY SPEAKER 

Kestyon 90, Onorab Dugasse.

 

HON MELVAL DUGASSE  

Mersi Mr Deputy.

Eski Minis i kapab dir nou Lasanble, ki zistans in arive avek proze pour devlopman Ile Aurore ?

Mersi Mr Deputy.

 

MINISTER CHRISTIAN LIONNET

Mr Deputy, Ile Aurore i en zil ki ti ganny konble ver bann lannen 2000 anba proze –ECP 3- East Coast Project Phase 3 e i annan en siperfisi 56.7 Hectare later.  Konblaz ti ganny konsevwar pou  nobou donn en platform pou plis devlopman dan nou pei a sa letan, pour sa  prosen 20 – 25an.  Ler  nou get staz devlopman lo tou sa bann zil konble, nou senpleman bezwen admir vizyon e grander lespri nou bann Leaders  pou asire ki sa zenerasyon e fitir zenerasyon, i annan plas pou grandir dan en  Sesel meyer.  Zil Eve lo Praslin pe byen avans devan e ozordi pe donn Pralinois akse avek bann lenfrastriktir enportan pou devlopman zot zil, san koz lo loportinite teren pou fer biznes ki’n ganny met a zot dispozisyon.

Perseverance plis ki mil fanmir Seselwa ozordi pe re- zwir en meyer lakaz e bokou biznes Seselwa in osi ganny loportinite laba.

Zone 18 Providence in ofer bokou antreprener Seselwa loportinite pou fer biznes.

Ile Soleil, Anse Aux Pins, devlopman lenfrastriktir pe byen avanse e tre byento bann Seselwa ki’n aste en morso teren laba ava kapab komans konstri zot lakaz.

Romainville dedye ek lenerzi renouvlab in deza fer li posib, pour nou kapab prodwi elektrisite atraver divan. E tre byento nou pou vwar en devlopman ki pou permet pei prodwi apepre 5 megawatt lenerzi par bann pano soler.

Eden Island i koz pou li menm.  Bokou Seselwa pe ozordi ganny loportinite travay e fer biznes lo sa zil, san oubliy loportinite lwazir e entertainment pour nou bann zenn.

Mr Deputy Speaker, dir sa ki zot oule, me nou Gouvernman, Gouvernman Lepep i vreman annan en plan pour nou pei.  Laprev i la pou tou sa ki anvi vwar, pou vwar.  Nou  pa pou aret la e Ile Aurore i donn nou sa platform pou anmenn plis devlopman pour sa prosen 5/10 ki devan nou.

An 2011, Prezidan Michel ti fer en Deklarasyon ki Ile Aurore, pou ganny dedye pou met plis loportinite dan domenn Lozman, Komers, Edikasyonnel, Tourizm e devlopman lwazir.  Baze lo sa gid, plizyer plan lamenazman later, sa ki  nou apel Land Use Plan, in ganny konsevwar par mon Minister e osi par Lakonpannyen  20/20 Development.  E tou resaman pandan legzersis pou konsevwar en plan stratezik lamenazman later pou pei, en plan ki ti ganny fer pou Sesel par Seselwa, avek led nou bann zanmi etranze.  Sa dernyen plan i fer provizyon pou kree en  nouvo kominote modern o-bor lanmer, avek posibilite pou plis ki 1500 nouvo lakaz – bann Sant pou fer biznes e Komers, Lekol Prive e Gouvernman, fasilite sportif tel ki Laplenn, Lotel ek marina, devlopman lo lakot e kreasyon nouvo lans – lespas ver, fasilite pou pyeton ek siklis, bypass lakot Les, provizyon teren  e sistenm Sewage Santralize pou rezyon English River, Perseverance, Anse Etoile an montan Nor e bann lezot lenfrastriktir neseser.

Sa lannen, dan son Ladres Leta Lanasyon, Prezidan Michel ti dir ki sa lannen Gouvernman pou komans met a dispozisyon kare later lo Ile Aurore, a nou Seselwa.  Mon Minister in deza fini komans angaz li dan demars pou fer sa arive.  Sa lannen nou’n vwar Pon ki konekte Ile Aurore ek Perseverance ganny konplete e la ler aktyel travay  pou konekte sa Pon ek semen Anse Etoile e network semen lo Ile Perseverance pe ganny antreprann par Konpannyen UCPS.  Travay ti komanse le 27 Zen e dapre Kontra travay i sipoze konplete pandan en peryod 13 semenn. Sa i vedir ki ver lafen Septanm, trafik ki sorti dan Nor e pe vin Lavil ou le kontrer, pou kapab deservi sa nouvo semen bypass.

Mr Deputy, nou kapab komans vizyaliz lenpak pozitiv, ki sa pou anmennen pour bann dimoun sa rezyon e pei an zeneral sirtou kot sa ki konsern sirkilasyon trafik dan bann peryod peak.  De ki sa travay ki pe ganny fer par UCPS i ganny konplete, sa i a osi fer li posib pou mon Minister delivre lo komitman ki Prezidan in fer avek pep Seselwa.  Alor  nou ekspekte ki disi lafen lannen, nou a kapab remet sa bann First Time Buyer ouswa Lakonpannyen ,ki ti ava oule fer bann rezidans rezidansyel later lo Ile Aurore. Bann lezot lenfrastriktir neseser pou permet devlopman sa zil, ava swiv dan bann lannen ki devan nou.  E nou pe eksplor tou bann mekanizm posib pou fer sa arive dan dele letan akseptab.  Sa byensir, i enkli bann mekanizm PPP.

Mersi Mr Deputy.

 

MR DEPUTY SPEAKER

Kestyon siplemanter, Onorab ?

 

HON MELVAL DUGASSE

Mersi Mr Deputy.

Baze lo larepons Minis, eski Minis i kapab dir ek nou Lasanble,  ki  kondisyon ki VIJAY Construction ti ganny en bout later lo Ile Aurore:- e si i deza annan Seselwa ki ti eksprim lentere pou ganny en morso later lo sa zil:-e Minis i kapab dir nou apard ki VIJAY, si i annan okenn involvement bann Sekter Prive, sirtou dan met bann lenfrastritir de baz lo Ile Aurore?

Mersi Mr Deputy Speaker.

 

 

MINISTER CHRISTIAN LIONNET

Mr Deputy, ler mon ti ganny apwente Minis, mon ti ganny dir, think outside the box.  E sa proze Pon lo Ile Aurore, i enn bann proze ki nou’n think outside the box, akoz si nou ti ankor pe esper Bidze Gouvernman, pou finans Pon Ile Aurore, la nou ti  pou ankor bezwen bato pour nou sorti Perseverance pou al Ile Aurore.  So, sa proze Pon ki nou’n fer Ile Aurore/Perseverance, i enn proze ki nou kapab apel li en PPP akoz i en form PPP – kot VIJAY  a sa letan ti apros mon Minister, pour zot ganny enplas pou zot bouze lo Eden Island, akoz Eden Island ti pe fini e zot ti bezwen bouz en landwar pour zot kapab met zot bann travayer e zot bann lezot keksoz.  E VIJAY parey  nou konnen osi, i annan lekipman pour li fer Pon.  I annan lekipman pou li pile e nou ti vwar li en loportinite pour nou asize eksplik VIJAY pou nou kapab fer sa Pon materyalize.  Ozordi mon fyer letan mon regarde sa Pon Ile Aurore pe debout pe esper koneksyon semen sorti Anse Etoile, pou kapab ed nou bann dimoun –sa.

So, ki Minister ki ti fer, nou ti antre dan en Lagreman avek VIJAY.  Pon an total in kout nou R21.649 milyon.  Kontrakter li menm li in kntribye R1.5 milyon.  Nou’n ofer li en lease later lo Ile Aurore  – en 15 mil kare later, ki i ganny drwa servi sa bout later pou 10an pour son travayer konstriksyon.  Me apre i oze  – i bezwen deservi sa later dapre ki  Land Use i dir li.  E sa bout later i kout R7.5 milyon an terms monneter.  Nou’n osi, i ti annan en propriyete ki i ti gannyen 20an pase lo Providence e anliny avek bann propozisyon kot nou,  nou ofer bann dimoun en one–off payment dan plas en annual payment, in pey R2 milyon pour sa.  Gouvernman li in kontribye R9.4 milyon.  Apre osi nou’n donn disab pou proze Pon lo ….lo Ile Du Port lavaler R1.249 milyon.

So, basically sa en laranzman ki nou’n  think outside the box – en PPP e ozordi nou annan en Pon ki preski pare pour nou kapab servi e tir sa problenm trafik ki nou annan dan Anse Etoile/ English River :- e osi donn nou posibilite pour nou kapab ouver Ile Aurore ki kle pour nou devlopman dan sa 5an – 10an ki devan nou.

So, sa en pti pe.  Wi, i annan dimoun osi ki ‘n fer demann.  I annan plizyer dimoun ki’n fer demann.  Nou annan IOT par egzanp ki’n fer demann pou ganny later lo Ile Aurore, pour zot kapab konstri zot prop lozman pour zot group travayer. E sa i en keksoz ki mon ankouraze, akoz mon’n dir a  plizyer fwa dan Lasable akoz si IOT, i konstrir lakaz pour son prop travayer  en sel kou, nou pou annan nou 50 lakaz dan pei ki pou vin available pour nou Seselwa kapab lwe. Ozordi IOT pe compete avek nou Seselwa ki pe rod en lakaz.  So, i bann proze parey ki nou oule ankouraze, pour nou kapab ogmant loportinite lozman dan pei.

Minister, pou kontinyen rod tou Sekter Prive ki enterese pou donn en koudmen dan konstriksyon lenfrastriktir lo ile Aurore.  I annan bann proze ki nou E-mark lo Ile Aurore ki nou vwar l ii bann proze ki pou anmenn – ki pou en catalyst – VIJAY in catalyst Pon, me solmani  annan bann lezot proze ki nou pe planifye, par egzanp sa Marina kot sa lenvestiser i kapab vini, kapabfer en kontribisyon sibstansyel dan kou lenfrastriktir lo zil  ki a permet nou kapab met later o pli vit posib a nou dimoun.

Mersi Mr Deputy.

 

MR DEPUTY SPEAKER

Onorab Payet-Marie.

 

HON MARIA PAYET-MARIE

Mersi Mr Deputy Speaker.

Mr Deputy Speaker, sa proze Ile Aurore pou anmenn bokou benefis.  Mon ti a kontan demann Minis ziskan ki extend ki sa proze pou benefisye bann zabitan Anse Etoile :-e si Minis in fer okenn meeting avek bann stakeholders par egzanp bann Peser in regards to sa proze ki pa ankor terminen, akoz i paret ki i annan en pe konsern lo sa size.

Mersi Mr Deputy Speaker.

 

 

MINISTER CHRISTIAN LIONNET

Mr Deputy, wi mon o-kouran ki i annan serten konsern an rezilta travay ki pe  arive par lakonpannyen UCPS.  Me selman yer mon PS  ti al lo site ti ava vwar sityasyon, e nou annan keksoz anba kontrol.  Nou  pou travay ek bann Peser pou fer sir ki letan nou sorti ek sa proze, nou annan bann fasilite ki pli meyer ki sa ki zot annan ozordi.  So, napa nanryen pour bann Peser trakase. Ile Aurore pou anmenn en kantite benefis pour zabitan Anse Etoile.  I pou anmenn bann pti kominote biznes si oule – en bann pti sant Lavil – si oule pli pre avek zot kot zot kapab ganny plis akse avek bann loportinite parey – Lekol pour bann zanfan Anse Etoile.  I annan en kantite keksoz ki proze pe planifye kot dimoun Anse Etoile pou kapab benefisye avek.

Mersi Mr Deputy.

 

MR DEPUTY SPEAKER

Bon, avek sa nou’n ariv a lafen Question Time pour ozordi.  Nou ava remersye Minis e son delegasyon e nou ava ekskiz zot parmi nou.

 

 (THE MINISTER AND HIS DELEGATION WAS EXCUSED FROM THE HOUSE)

 

MR DEPUTY SPEAKER

Bon, nou ava aprezan pran premye Statement lo nou Order Paper e nou ava esper Minis fer son larantre dan nou Chamber.

Bon, avek nou bomaten, parey lo nou Order Paper, nou annan Minis Joel Morgan ki pou vin fer en Statement, dan son kapasite koman Minis pour Zafer Etranzer e Transpor.

E nou ava envit Minis pou prezant son Statement.

 

MINISTER JOEL MORGAN

Mersi Mr Deputy Speaker.  Bonzour tou Manm Lasanble Nasyonal.  Bonzour tou dimoun ki a lekout.

Mr Deputy Speaker, mon a komans avek en lentrodiksyon.

Vi ki Sesel i en pti pei ki ouver avek lemonn, i normal ki sak fwa ki i annan en sanzman politik dan en rezyon lemonn, an partikilye dan bann pei ki nou annan bann relasyon stratezik avek parey Rwayonm Ini, ki nou a analize e evalye son lenpak lo nou.  Nou en pti pei ki vilnerab e nenport ki sok eksteryer i kapab afekte nou.  Dan sa konteks, Brexit, setadir sorti La Grand Bretanny dan Linyon Eropeen, i en desizyon politik tre enportan, vi ki nou relasyon avek Rwayonm Ini e Linyon Eropeen i enportan pour nou, lo kote korperasyon enternasyonal, lasistans devlopman, komers e touris.  Pou evalye lenpak Brexit, nou devret vwar sa dan 2 fason.  Dabor, nou devret vwar li lo kote bilateral, savedir ki mannyer sa pou afekte nou bann relasyon avek Rwayonm Ini.  Answit, lo kote milti lateral.  Savedir, ki lenpak Brexit pou annan lo nou relasyon avek Linyon Eropeen, Commonwealth e NATO, pou nonm en pe.

Mr Deputy Speaker, si Rwayonm Ini i sorti dan Linyon Eropeen, lenpak pou plis lo kote ekonomik ki lo kote diplomatik.  Ozordi, Rwayonm Ini i enn bann pei ki kontribye plis anver Fon Eropeen pour Devlopman, EDF, ki en lasistans devlopman ki Linyon Eropeen i donn bann pei ki pe devlope, tel parey Sesel.  Annefe, Rwayonm Ini i trwazyenm pli gran kontribiter dan sa Fon.  Anba onzyenm European Development Fund, Rwayonm Ini in kontribye en sonm R409 milyon Liv Sterlen, ki reprezant 14.8 poursan kontribisyon total EDF, par deryer Lalmanny avek 20.58 poursan e Lafrans avek 17.81 poursan.  Menm si bann pei Linyon Eropeen in fini angaz zot ziska 2020 pour finansman anba onzyenm European Development Fund, diskisyon i deza ankour lo ki kalite relasyon pou egziste avek Linyon Eropeen, apre 2020.  An prenon an kont ki nouvo fasilite i kapab egziste apre 2020, i annan gran posibilite Rwayonm Ini pa pou pe kontribye dan sa Fon.  Ki vedir, resours finansyel anba Fon i riske redwir konsiderableman.  Avek mwens resours finansyel, sak pei benefisyer i riske benefisye mwens, espesyalman bann pei ki dan kategori high income parey nou menm.  Anba EDF, preski tou Sekter Lekonomi Sesel in benefisye Mr Deputy.  Par egzanp Lapes, Lagrikiltir, Ledikasyon, Delo, Lenerzi, Lanvironnman e bokou lezot.  Pou note, lenpak direk lo EDF pa pou afekte Sesel ziska 2020, akoz Linyon Eropeen in fini komet 2.2 milyon Ero ki Rwayonm Ini in osi kontribye ladan avek Sesel.  E i osi enportan note ki Linyon Eropeen in fini komet 1.3 bilyon Ero anver progranm bann Lorganizasyon Rezyonal ekonomik, ki Sesel i osi manm ladan.  Kontribisyon total pour Sesel anba EDF depi ler nou’n komans sa progranm, National Indicated Program, i anviron 46.4 milyon Ero, depi ki premye Konvansyon Lome ti ganny sinyen an 1976.

Korperasyon avek bann Lorganizasyon Rezyonal.  Mr Deputy Speaker, si Rwayonm Ini i sorti dan Linyon Eropeen apre 2020, i kapab annan en lenpak lo resours bann Lorganizasyon Rezyonal ki Sesel i en manm.  Savedir lo resours COMESA, SADC e COI, ki 85 milyon Ero pour COMESA, 50 milyon Ero pour COI e 90 milyon Ero pour SADC.  Linyon Eropeen i en gran kontribiter anver Sekretarya e progranm COMESA, SADC e COI.  Par egzanp, pandan sa dernyen 5an, anviron 70 poursan Bidze sa bann Lorganizasyon i kontribisyon sorti kot Linyon Eropeen.  Parey nou konnen, sa bann Lorganizasyon Rezyonal, zot osi ofer bann progranm dan plizyer Sekter ki zot manm tel parey nou menm, i benefisye.  Par egzanp Lagrikiltir, Ledikasyon, Lasante, Lendistri, Lenfrastriktir Rezyonal, pou nonm en pe.  Dan en sityasyon kot Rwayonm Ini i sorti dan Linyon Eropeen e i pa kontribye dan sa fasilite ki finans progranm bann Lorganizasyon rezyonal, pou annan mwens resours a dispozisyon bann Lorganizasyon rezyonal.  Avek mwens resours, i tre probab ki sa bann Lorganizasyon ki Sesel i manm ladan, pou bezwen reviz zot bann aktivite.  Sa i baze lo lasonpsyon ki Rwayonm Ini i en gran kontribiter dan sa bann fasilite finansyel ki Linyon Eropeen i donn bann Lorganizasyon rezyonal.  Avek mwens resours, bann pei manm sa bann Lorganizasyon rezyonal pou bezwen rod mwayen pou zot soutenir zot Lorganizasyon.  Pou fer sa, i re probab ki bann pei manm pou bezwen ogmant zot kontribisyon oubyen rod bann lezot fason finansman.

Sa i kapab vin en defayans pour Sesel Mr Deputy, akoz koman en pti pei ki’n deza manm 3 Lorganizasyon Ekonomik, nou kapabilite pou fer fas avek sa bann logmantasyon i kestyonnab.  Dan en lot posibilite, i kapab annan en rediksyon dan progranm ki adres bann diferan Sekter e i pou vin en sityasyon ki bann propozisyon ki pe met an plas konmela pou adres lentegrasyon rezyonal i pa vin soutenab.

Marse Komers.  Mr Deputy Speaker, parey ou konnen, Sesel in siny en Lakor Ekonomik Partner avek Linyon Eropeen an 2008.  Anba sa Lakor, bann prodwi ki Sesel i kapab ganny akse avek marse Linyon Eropeen lo en baz duty free e en baz quota free, ler zot ganny eksporte sorti isi.  Sa i vedir ki bann prodwi ki’n ganny fer Sesel e ki kalifye anba lareg lorizin ki’n ganny negosye ant Linyon Eropeen e Sesel, pa bezwen pey Tax Komers ler zot antre lo marse Linyon Eropeen.  Dapre sa Lakor, Sesel i osi bezwen liberaliz son marse gradyelman pandan en peryod 15an, an faver bann prodwi Linyon Eropeen, a leksepsyon bann prodwi ki nou’n determinen koman sansib pour nou lekonomi.  Sa Lakor in osi ganny sinyen par 3 pei larezyon, Moris, Madagascar e Zimbabwe.  Depi ki sa Lakor in ganny sinyen, leksportasyon Ton dan bwat ki sorti Sesel, pa bezwen pey duty ler zot antre lo marse Linyon Eropeen, ki an se moman enkli natirelman Rwayonm Ini.

Sesel in osi benefisye avek en Don 1 milyon Ero dan lannen 2015, anba dizyenm European Development Fund pou enplimant sa Lakor e Sesel pou benefisye avek en Don 7 milyon Ero an 2007, anba onzyenm EDF.

Mr Deputy Speaker, nou pa pe ekspekte ki Brexit pou annan okenn lefe imedya lo sa Lakor.  Ziska sa letan ki Rwayonm Ini i inisye Lartik 50 pou li sorti dan Linyon Eropeen, pou napa okenn sanzman lo marse komers ant Sesel e Rwayonm Ini.  Mon osi anvi mansyonnen ki an 2014, marse Rwayonm Ini ti reprezant 32.6 total leksportasyon ki sorti Sesel e an 2015, sa poursantaz ti desann a 23.4 poursan.  Me pour premye kar 2016, leksportasyon ki Sesel i fer a Rwayonm Ini ti R209 milyon, ki reprezant 24.3 poursan total eksport nou pei.  Marse Rwayonm Ini i osi reprezant 36 poursan leksportasyon Ton dan bwat, ki fer ki Rwayonm Ini i nou dezyenm pli gro marse dan Linyon Eropeen.  I pa posib pou predir ki kalite Lakor Sesel pou annan avek Rwayonm Ini, an vi ki Lartik 50 pa ankor ganny inisye.  Rwayonm Ini i annan li 2an pou li negosye son sorti dan Linyon Eropeen, apre ki in inisye Lartik 50.  Sa i fer ki si inisye Lartik 50 an 2016, posibilite i egziste ki lannen 2008, Lakor Ekonomik ant Sesel e Linyon Eropeen pou nepli aplikab ant Sesel e Rwayonm Ini.  Alors, nou pou bezwen negosye en nouvo Lakor avek Rwayonm Ini, an vi ki Sesel i eksport Ton dan bwat lo sa marse.  I osi posib pour bann manm Linyon Eropeen agree pou kontinyen negosyasyon, apre sa 2an.  Ki vedir ki i pa posib pou determinen en dat egzakt kan negosyasyon komers ant Sesel e Rwayonm Ini pou kapab komanse a sa staz.  I bon note ki i annan plizyer opsyon ki Rwayonm Ini e Linyon Eropeen i kapab pran.  Sa i enkli en single ou common market, en customs union ouswa en free trade area.  I osi posib pou Rwayonm Ini pa negosye okenn Lakor ekonomik avek Linyon Eropeen.  Si Rwayonm Ini i negosye en Lakor Free Trade Area ou menm si i pa negosye okenn Lakor avek Linyon Eropeen, Rwayonm Ini pou lib li, pou li negosye en Lakor avek Sesel, me i osi posib ki en nouvo Lagreman avek Sesel i pa pli favorab ki sa Lagreman ki egziste an se moman, tout an prenon an kont ki marse Rwayonm Ini i reprezant zis 5 poursan nou lenportasyon, ouswa R151.49 milyon an 2015.

I osi posib Mr Deputy Speaker, pour Rwayonm Ini pa eksprim okenn lentere pou negosye avek Sesel.  Si Rwayonm Ini i negosye en Lakor Customs Union avek Linyon Eropeen parey La Tirki in fer, Rwayonm Ini pou adopte menm tarif ki Linyon Eropeen in adopte avek lezot pei.  Sa pou fer ki kondisyon komers anba Lakor Ekonomik ant Sesel e Linyon Eropeen pou aplikab ant Sesel e Rwayonm Ini.  An swivan bann devlopman ki pe arive an Rwayonm Ini, nouvo Minis Finans Chancellor Phillip Hammond in deza eksprimen ki Rwayonm Ini pou nepli form parti single market avek Linyon Eropeen.

Sa i les ouver Mr Deputy Speaker, opsyon pou li negosye Lagreman Free Trade ouswa en Customs Union avek Linyon Eropeen.  I bon note ki kantmenm kondisyon komers i reste parey i ete konmela, sa pa pou neseserman enkli lezot konponan ki aplikab dan nou Lagreman avek Linyon Eropeen, parey konponan korperasyon, devlopman e lapes.

Mr Deputy Speaker, nou osi kapab ekspekte ki negosyasyon ant Sesel e Rwayonm Ini pou pran en pe letan pou konklir.  Alors, i posib ki pour en serten letan ou apre 2018, prodwi sorti Sesel pou ganny sarze en tarif ler i antre lo marse Rwayonm Ini.  Sa pou fer ki prodwi Sesel ki ganny eksporte a Rwayonm Ini, pou ganny trete dapre kondisyon most favoured Nation status anba kad World Trade Organisation, ki vedir ki en tarif 24 poursan pou ganny enpoze lo nou prodwi.  Sa i fer ki Sesel i kapab perdi marse Rwayonm Ini koman en marse leksportasyon akoz demann pour Ton dan bwat ki sorti Sesel i kapab redwir.  Me i osi enportan pou note ki sa menm senaryo i kapab aplik pour lamazorite pei ki fer komers ozordi avek Rwayonm Ini.

Parey mon’n mansyonnen oparavan, lefe Brexit i kapab benefisye Sesel an menm tan ki i kapab vin en dezavantaz pour nou.  E sa i tou depan lo relasyon ant Rwayonm Ini ek Linyon Eropeen, apre konklizyon zot negosyasyon.  Alors, sa i fer li difisil pou nou kapab donn en prediksyon egzakt an se moman, lo lefe komers ki pou annan lo Sesel a long term.

Korperasyon bilateral ant Rwayonm Ini.  Mr Deputy Speaker, prezan, si nou pe adres spesifikman korperasyon bilateral ant Rwayonm Ini avek Sesel, i bon note ki sa relasyon ti etablir depi 1976.  Rwayonm Ini i en partner tre pros avek Sesel.  An prenon an kont nou bann lyen istorik e nou bann komitman e valer Commonwealth, mon konfidan ki Brexit pa pou afekte nou relasyon politik.  Rwayonm Ini i siport Sesel dan devlopman bann diferan Sekter kle tel ki Ledikasyon, Militer, Lapes, Sekirite Maritim e tre resaman dan domenn Lekonomi Ble.  I osi tre enportan note ki Rwayonm Ini i reprezant anviron 9 poursan nou marse touristik ki sorti Lerop.  An zeneral, nou relasyon avek Rwayonm Ini in enn ki’n toultan for e amikal.  I annan en posibilite ki lefe Brexit i kapab kree serten enstabilite finansyel pour Rwayonm Ini e sa i kapab fer ki lasistans devlopman pour Kontinan Lafrik ki enkli Sesel, i redwir konsiderableman sorti kot sa pei.  A sa staz, i tre difisil pou prevwar reperkisyon desizyon sa Referandum pour Rwayonm Ini.  Pou lemoman, nou kapab dir ki si Brexit i ofisyelman pran lefe, nou relasyon diplomatik avek Rwayonm Ini i kontinyen parey labitid.

Korperasyon Milti lateral.  Mr Deputy Speaker, menm si mazorite sitwayen in vot pour Rwayonm Ini separe avek Linyon Eropeen, Rwayonm Ini i reste en manm NATO e osi en manm permanan Konsey Sekirite Nasyon Ini.  Savedir, zot Polisi anver NATO ek Nasyon Ini pa pou neseserman sanze, ki fer ki nou pa prevwar okenn gran sanzman dan zot sipor pour sa 2 Lorganizasyon kle.

An sa ki konsern Lafors Naval Eropeen, EU Nav 4, ki fer loperasyon Atalanta dan Losean Endyen, lanse an 2008 anba framework European Common Security and Deffence Policy, manda sa loperasyon militer ki resaman ti ganny prolonze ziska 2018 par European Council, ki annefe an menm letan ki Rwayonm Ini i ekspekte termin bann prosesis formel pou sorti dan Linyon Eropeen.  An dot mo, nou prevwar ki partisipasyon Rwayonm Ini dan loperasyon Atalanta pa pou ganny afekte.  Savedir, tou bann Lakor ki Linyon Eropeen, enkli Rwayonm Ini in konklir avek Sesel, pou reste an fors ziska lafen 2018, kan loperasyon Atalanta i terminen e Rwayonm Ini i sorti osi dan Linyon Eropeen.

Sesel ti siny en MOU lo transfer pirat avek Rwayonm Ini, le 27 Zilyet 2009.  Nou pa anvizaze ki prosesis Brexit pou annan okenn lefe lo sa MOU.  Resaman pandan diznevyenm sesyon plenyer contact group on piracy on the coast of Somalia, Rwayonm Ini ti fer en handover zot travay kotyer capacity building group avek Somali e bann pei Losean Endyen.

Mr Deputy Speaker, an sa ki konsern Lorganizasyon Commonwealth ki ti ganny formen avan Linyon Eropeen, relasyon ant bann pei Commonwealth i al pli lwen ki relasyon politik e komers.  Sa relasyon i enn ki fonde lo bann lyen istorik, kiltirel e personnel ki rapros nou bann pei dan Commonwealth.  Rwayonm Ini i pei ki fer pli gran kontribisyon finansyel dan Bidze Sekretarya Commonwealth.  E son bann langazman ki in fini anonse, ki enkli premye renyon bann Minis Commonwealth pour Komers an 2017 e renyon bann sef Gouvernman e Sef Leta pei Commonwealth an 2018, tou-lede pou ganny fer an Rwayonm Ini, ki demontre ki rwayonm Ini pou reste angaze dan Commonwealth dan lavenir.  Letan nou regard sityasyon aktyel, nou pa pe revwar okenn gran lenpak Brexit lo Lorganizasyon Commonwealth.  Toudmenm, mon Minister pou kontinyen swiv sa sityasyon de pre.  Nou prezimen ki bann lenpak pou vin pli aparan anmezir ki Rwayonm Ini i finaliz bann negosyasyon pou li sorti dan Linyon Eropeen.

Mr Deputy Speaker, an sa ki konsern relasyon pei Lafrik, Karaib, Pasifik ek Linyon Eropeen e osi Linyon Afriken, nou prezimen ki lenplikasyon i pou plizoumwen parey lenplikasyon lo bann Lorganizasyon Rezyonal ki mon’n koz lo la.  Sa i vedir ki sa bann Lorganizasyon pou bezwen idantifye neseserman bann lezot fasilite finansman pou soutenir sa bann Lorganizasyon.

An konklizyon Mr Deputy Speaker.  Parey ou’n kapab konstate dan mon analiz, o moman aktyel i ankor tro boner pou konnen egzakteman ki bann lefe Brexit pou annan lo Sesel.  Nou prediksyon se pou annan lefe lo kote ekonomik, me pa lo kote politik e lyen bilateral ki egziste ant Sesel e Rwayonm ini, pou reste plizoumwen parey.  Sepandan, i osi kler ki a mwayen a long term, relasyon ekonomik ant Sesel e Rwayonm Ini e menm Sesel avek Linyon Eropeen, pou annan en gran sanzman.  Sa i an term bann fakter ki nou’n konsidere dan sa analiz, tel ki korperasyon, komers e lasistans devlopman.  Parey mon’n mansyonnen oparavan, Rwayonm Ini i bezwen inisye Lartik 50 Lakor Linyon Eropeen, pou li kapab negosye son depar dan Linyon Eropeen.  O fir e anmezir ki Rwayonm Ini i konklir negosyasyon avek EU, en prosesis ki pou pran en pe letan natirelman, sa i ofer nou en loportinite pou nou prepar nou lekor stratezikman, tou depandan lo bann opsyon e plan d-aksyon ki Rwayonm Ini i kapab adopte.

Mersi Mr Deputy Speaker.

 

MR DEPUTY SPEAKER

Bon, fodre note ki Statement Minis i an rezilta en Kestyon Irzans ki Komite Zafer Enternasyonal Lasanble Nasyonal ti anvoy kot son Minister.  E se pour sa rezon mon pou donn priyorite bann Manm Komite Zafer Enternasyonal nou Lasanble, byensir si zot annan.

Onorab Samson.

 

HON DEREK SAMSON

Mersi Mr Deputy.  Bonzour.  Bonzour Minis avek ou delegasyon.

Mr Deputy, mon ti a kontan demann Minis, apre ki mon’n ekout son Statement bomaten, eski Sesel, Gouvernman Sesel, Parti o pouvwar i annan otan kapasite ek leksperyans pou navig otour sa sityasyon Brexit ki’n arive Langleter e eski Minis osi i kapab petet fer mansyon dapre son leksperyans, lefe ki kapab annan lo nou Sekter Tourizm silvouple.

Mersi.

 

MINISTER JOEL MORGAN

Mersi Mr Deputy Speaker.

Mr Deputy Speaker, si i annan en Gouvernman ki kapab handle sa sityasyon pli byen se Gouvernman Parti Lepep, akoz se Gouvernman Parti Lepep ki’n la toultan pou kapab, an relasyon avek Linyon Eropeen li menm li, avek Rwayonm Ini e nou’n tou le long tou sa bann lannen depi ki nou’n siny premye Konvansyon Lome an 1976 ler nou ti vin en pei endepandan.  Tou le long sa bann lannen apre sa, sof sa peryod inisyal avan le 5 Zen 1977, se Gouvernman Parti Lepep/SPPF ki’n handle sa relasyon ant Linyon Eropeen, La Grand Bretanny e nou pei.  Sa relasyon in dan plizyer Sekter, plizyer domenn parey mon’n koz lo la e in pran son form milti lateral e son form bilateral.  E nou annan nou en lekip, dan nou Gouvernman, nou annan nou en lekip ki kalifye, ki deza la, ki annan sa leksperyans e ki kapab asire ki Sesel i fer sa tranzisyon dan son relasyon avek Rwayonm Ini e dan son relasyon avek Linyon Eropeen, parey mon’n dekrir dan mon Statement, sa bann sanzman ki pou arive apre.  Nou annan nou sa lekip ki kapab tackle sa avek leksperyans e osi avek konesans sa sityasyon.

Nou annan nou deza, parey mon’n eksplike, en stratezi ki nou pe regarde pou nou met an plas an sa ki konsern nou negosyasyon direk avek Linyon Eropeen, swit a Brexit, apre ki Lagreman onzyenm EDF i terminen an Zen 2020.  Me osi avek Rwayonm Ini direkteman akoz sa i pou annan en lenpak an 2018.  So, nou pe prepar nou e se sa Gouvernman ki annan sa kapasite a mon avi, pou nou kapab fer sa, pou nou kapab asire ki Sesel i reste dan en pozisyon pozitiv an term nou lekonomi, an term lenpak lo nou e an term par egzanp, nou relasyon avek Rwayonm Ini ek Linyon Eropeen.

An sa ki konsern tourizm Mr Deputy Speaker, ozordi parey mon’n dir, nou annan en marse touristik enportan.  Annefe, Rwayonm Ini i katriyenm pei Lerop, apre Lafrans, Lalmanny e Itali.  E ozordi, Rwayonm Ini i reprezant apepre 9.71 poursan marse Linyon Eropeen, touristik ki vin Sesel.  Savedir i en marse enportan pour nou e nou bezwen asire, dan nou bann travay ki nou fer avek zot direkteman lo nivo bilateral, ki sa marse pa ganny afekte otan posib avek Brexit akoz zot en kontribiter enportan dan lekonomi Sesel e mon Minister, ansanm avek Minister responsab pour tourizm, nou bezwen travay ansanm pou asire ki sa pa ganny enpakte, otan ki posib.

Mersi Mr Deputy Speaker.

 

MR DEPUTY SPEAKER

Onorab Leader Lopozisyon.

 

HON FRANCHASCA MONNAIE

Mersi Deputy.

Deputy, eski Minis in konsider lenpak imigrasyon in regards to Brexit Sesel, spesifikman Seselwa ki pe reste dan bann pei Linyon Eropeen anba paspor Angle.  Si son Minister pe travay avek Home Affairs pou fer ki i pli fasil pour bann spouses ki ti ava voudre relocate avek:- konmsi sa Seselwa avek son fanmir ti ava voudre relocate Sesel, instead of going to the UK.  Si i annan okenn lenpak imigrasyon, in regards to bann Seselwa ki pe hold bann paspor Angle, ki pe reste Linyon Eropeen, zot ti a voudre relocate isi Sesel?

 

MINISTER JOEL MORGAN

Mr Deputy Speaker, si i annan bann Seselwa ki annan par egzanp doub nasyonalite, dual nationality, zot annan en paspor par egzanp Angle, zot pe reste dan Linyon Eropeen pou lemoman.  Zot pa neseserman pe reste Rwayonm Ini direkteman, zot annan sa free access dan bann pei Linyon Eropeen.  Avek Brexit, nou pa ankor kler egzakteman ki lagreman i pou annan vizavi bann sitwayen Britanik zot menm zot, ki pe reste dan bann pei Linyon Eropeen akoz en nouvo Lakor pou bezwen ganny negosye ant Linyon Eropeen ek Rwayonm Ini swit a sa.  An term zot bann dimoun ki pe travay dan Linyon Eropeen.  I annan en kantite Britanik ki pe travay dan Linyon Eropeen ozordi.  E osi, lo lot kote sa, i annan en kantite bann sitwayen manm pei Linyon Eropeen ki pe travay Grand Bretanny.  Par egzanp, bann Italyen, bann Grek, bann Franse, bann Polone ensidswit.  So, tousala pou annan en gran lenpak.  Pou annan en gran sanzman dan sa sityasyon, si La Grand Bretanny pa ariv avek en Lakor avek Linyon Eropeen, lo sa kestyon imigrasyon e permi travay.

An sa ki konsern bann Seselwa direkteman, ki annan nasyonalite doub, ki pe tenir en paspor Britanik e en paspor Sesel, paspor Seselwa, ki pe reste dan Linyon Eropeen, i pou depan prezan lo ki mannyer La Grand Bretanny li i negosye son pozisyon avek Linyon Eropeen, vizavi imigrasyon akoz zot annan en paspor Britanik.  Savedir, si La Grand Bretanny i negosye en Lakor avek Linyon Eropeen pou dir son bann sitwayen i kapab kontinyen reste e travay dan Lerop, i pa afekte zot direkteman pou lemoman.  Me si i pa reisi negosye sa Lakor, zot pou bezwen sorti dan bann pei kot zot pe travay dan Lerop e retourn either isi ouswa retourn Grand Bretanny.

An sa ki konsern bann madanm, bann spouses ouswa bann msye ki’n marye avek bann dimoun ki annan bann paspor Britanik e Seselwa an menm tan, i deza annan bann provizyon anba nou Lalwa Civil Status, anba nou Lalwa Imigrasyon isi, pou permet zot kapab vin retourn Sesel pou vin reste.  So, mon pa vwar okenn difikilte avek sa Mr Deputy Speaker.

Mersi.

 

MR DEPUTY SPEAKER

Onorab Arnephy.

 

 

HON BERNARD ARNEPHY

Mersi Mr Deputy.  Bonzour Minister avek ou tim.

Minister, an vi ki mon mazinen ou Minister Foreign Affairs ki pe kordin en pe sa bann devlopman, ki relasyon travay eski ou Minister ansanm avek Minister Finans zot pe travay lo la, an relasyon avek Gouverner Labank Santral, pou asire ki whatever devlopman ki pe arive, i pa pe neseserman annan en lefe sitan negativ lo nou resours finansyel, sirtou an relasyon avek nou rezerv Labank Santral, an vi ki nou tranzakte en kantite avek Liv Sterlen?

Mersi.

 

MINISTER JOEL MORGAN

Mersi Mr Deputy Speaker.

Mr Deputy Speaker, i deza annan sa kordinasyon ant mon Minister, Minister responsab pour Finans e Labank Santral, pou nou travay lo en plan d-aksyon, pou nou kapab minimiz lenpak Brexit, si i arive an 2018 ouswa apre 2018.  I pou depan kan Lartik 50 parey mon’n eksplike, i ganny met an aplikasyon.

Prezan lo kote nou bann rezerv e nou sityasyon ekonomik, parey mon’n eksplike, i pou annan en lenpak apre 2020, an sa ki konsern European Development Fund, EDF li menm li.  Avan 2020, pou napa en lenpak an sa ki konsern European Union.  Me si Rwayonm i sorti an 2018 dan Linyon Eropeen, i definitivman parey mon’n eksplike, pou annan en lenpak ekonomik lo Sesel akoz nou pe eksport en poursantaz enportan nou Ton ver sa pei.  E si nou pa kapab negosye en Lakor pou tarif customs avek La Grand Bretanny, i pou annan en tarif 24 poursan ki pou ganny mete lo nou bann prodwi leksportasyon sorti Sesel ki pe antre dan Rwayonm Ini e vis versa.  Setadir menm keksoz pou aplik pou nou an sa ki konsern bann prodwi Rwayonm Ini ki pe vin Sesel ozordi.  So, dan sa konteks, i pou afekte nou marse leksportasyon Ton si nou pa kapab negosye en Lagreman direkteman lo nivo bilateral avek Rwayonm Ini.

Prezan lo bann lezot lenstans, lo kote tourizm par egzanp, sa i pou depan osi lo ki mannyer Liv Sterlen, li koman en lanmonnen global, i ganny afekte swit a Brexit.  Parey nou’n vwar, in annan en rediksyon dan lavaler Liv Sterlen.  La i pe komans repran en pe.  Me in annan en rediksyon inisyal tre for dan lavaler Liv Sterlen, menm vizavi Roupi Seselwa e se ki Gouverner Labank Santral osi in koz en pe lo la dan son Interview ki in donnen lo Televizyon.

Now, si i annan sa rediksyon kontinyel dan lavaler Liv Sterlen Mr Deputy Speaker, then pou annan en lenpak lo marse touristik osi.  Parey mon’n dir, marse La Grand Bretanny i reprezant apepre 9.3 poursan marse Linyon Eropeen ki pe vin Sesel.  E si sa i leka, i pou fer ki Sesel i vin pli ser pour bann Britanik ki pe vin isi pour en vakans.  E zot riske swazir bann lezot destinasyon ki mwen ser ki nou dan Losean Endyen par egzanp.  Dan larezyon.  Alors, i kapab annan en lenpak enportan la, menm imedyat akoz sa problenm devalyasyon Liv Sterlen.  Me sa nou bezwen vwar o fiy e anmezir ki lannen i kontinyen progrese.  Nou bezwen vwar ki mannyer Liv Sterlen i fer en recovery vizavi nou Roupi e vizavi bann lezot lanmonnen, parey Dolar ek Ero.

Mersi Mr Deputy Speaker.

 

MR DEPUTY SPEAKER

Onorab Houareau.

 

HON HERBERT HOUAREAU

Mersi Mr Deputy.  Bonzour Minis ek ou lekip.

Mr Deputy, kestyon pour Minis i, eski Minis i kapab eksplik sa Lasanble ozordi, ek kondisyon ki Lerop avek Langleter i ladan, en Seselwa ki ti pe benefisye pou antre Langleter i ganny en Visa 6 mwan larantre e avek sa Gouvernman Parti Lepep ki’n negosye osi dan lepase avek Lerop, pour ki en Seselwa i antre Lerop san en Visa, eski en seselwa ki ariv Lerop ozordi e pou al Langleter i pou rankontre difikilte, ou viv versa, letan i Langleter pou antre Lerop, i pou ganny difikilte?

Mersi.

 

MINISTER JOEL MORGAN

Mr Deputy Speaker, swit a travay ki sa Gouvernman in fer pandan tou sa bann lannen, pou negosye bann Visa free ou sa bann Visa waver agreements avek tou bann pei, ozordi Sesel i vwar li dan en pozisyon ki nou pa bezwen en Visa, ouswa nou ganny en Visa ler nou arive, pour 130 pei lemonn.  Ki fer nou annan en paspor ki pli for dan Lafrik e pli for ki bokou lezot pei osi dan lemonn.  Prezan, sa i en travay ki demontre poudir nou pei i en pei ki ganny respekte atraver lemonn, pa la grand mazorite manm Nasyon lemonn, akoz si i pa ti leka, nou pa ti pou’n gannyen sa bann kalite Lagreman ki nou annan ozordi, avek sa bann pei.

E an sa ki konsern Linyon Eropeen e La Grand Bretanny, Rwayonm Ini, vizavi akse nou bann dimoun ki dan Linyon Eropeen, ki anvi al La Grand Bretanny, ouswa La Grand Bretanny ki anvi al dan Linyon Eropeen, i pou depan lo 2 keksoz.  Premyerman, i pa pou en problenm pou dimoun sorti dan bann pei ki dan Linyon Eropeen, kot zot ete ozordi, pou al La Grand Bretanny, Rwayonm Ini, akoz nou en manm Commonwealth.  E anba Lagreman ki nou’n negosye atraver sa fasilite Visa waver pour bann pei Commonwealth, Seselwa pa bezwen en Visa pou al Rwayonm Ini.  So, no matter kot nou ete, nou pa bezwen en Visa pou nou al Rwayonm Ini avek en paspor Seselwa, akoz nou annan en Lagreman separe anba Commonwealth.

Me prezan, pour bann Seselwa ki pe reste Rwayonm Ini e ki napa en paspor Angle me ki annan zis en paspor Seselwa, nou form parti, nou ti negosye avek group Schengen ki en sub group dan rezyon Linyon Eropeen, ki en sub group dan EU.  Sa group Schengen nou pa bezwen paspor pou al kot zot.  Epi nou annan serten lezot pei lo nivo Linyon Eropeen li menm li, bilateral kot Sesel in negosye, kot nou pa bezwen paspor pou nou ale.  Alors pour sa, nou pa pou bezwen okenn Visa pou nou sorti Rwayonm Ini pou nou al dan sa bann pei Linyon Eropeen ki mon’n koz lo la.

Me pour bann lezot pei kot nou napa en Lakor Linyon Eropeen, la nou pou bezwen en permisyon vizavi Visa, atraver en Visa, pou nou kapab al dan sa bann pei dan lavenir.

Mersi.

 

MR DEPUTY SPEAKER

Bon, nou pou aret la avek Statement Minis e nou ti a remersye li ek son delegasyon e ekskiz li parmi nou.

Lasanble i a pran en Break e nou ava rezwenn 11.15.

 

(BREAK)

 

MR DEPUTY SPEAKER

Bon.  Nou a kontinyen nou travay lo nou Order Paper.

 

MINISTER JEAN-PAUL ADAM

Mr Deputy Speaker, Leader Zafer Gouvernman dan Lasanble Nasyonal, Leader Lopozisyon dan Lasanble Nasyonal, ser pep Seselwa, bonzour.

Dan Diskour Leta Lanasyon ki Prezidan Michel ti prononse le 16 Fevriye, i ti anonse ki Gouvernman pou travay lo en sistenm Tax progresiv lo saler apartir 2017, pou anmenn en meyer nivo lavi pour tou pep Seselwa.  Sa reform pe ganny enplimante an faz, pou ariv lo en sistenm Tax progresiv konplet an Zanvye 2017.  An Avril sa lannen, nou’n delivre lo sa premye faz nou langazman.  Tou travayer lo saler minimonm i nepli pey Tax lo zot saler ozordi.  Sa i vedir ki en dimoun lo sa saler de baz R5050 in ganny en logmantasyon R757.50.  E sa i konsolid sa logmantasyon R1000 ki in deza gannyen avek logmantasyon saler minimum sorti 4050 pou ariv 5050.

Gouvernman Parti Lepep in fer sir pou anmenn sa 2 mezir ansanm, pou maksimiz lenpak pozitiv pour sa ki pli bezwen sa sipor.  Nou ava rapel ki sa Rapor lo lapovrete dan Sesel ki ti ganny pibliye an Desanm 2015, ti etablir R3900 par mwan, koman sa threshold lapovrete.  E atraver sa premye staz reform Tax, ansanm avek logmantasyon dan saler minimum, i kler ki pouvwar pou elimin lapovrete dan nou pei i ozordi dan lanmen sak travayer Seselwa.  Me fodre nou rapel ki lapovrete i pa zis en kestyon larzan.  Lalit kont lapovrete se osi pou nou pli byen enstri nou pep pou envestir pour son lavenir e pou nou donn li mwayen pou li fer li.  Pou nou regard pli lwen ki zis sa bann byen materyel imedya e pou nou definir nou boner dan en fason pli larz, dan en fason ki fer en diferans pour nou zanfan e pou nou pa defini nou boner zis atraver bann byen materyel par egzanp flat screen e lezot keksoz.  Vre byennet i vin atraver lenvestisman dan lavenir nou prop lekor, nou fanmir, nou kominote e nou Nasyon.  Sa reform Income Tax lo en baz progresiv, i kree sa loportinite e sa lespas pour travayer Seselwa pli byen envestir pour nou demen.

A lafen sa mwan ki pe vini, plis ki 50 poursan bann salarye dan nou popilasyon, pou benefisye avek dezyenm staz sa reform, kot tou dimoun ki zot saler i par anba R8555.50 pa pou pey okenn Tax lo zot saler.

Tou dimoun ki zot saler i R8555.50, pou benefisye alor avek R1283 an plis dan zot pos.

Pour bann dimoun ki zot saler i ant R8555.50 ek R10,065.29, en formil in ganny adopte pou asire ki sa bann dimoun ki dan sa group saler, pa ganny dezavantaze.  Par egzanp, nou anvi asire ki en Supervisor i pa tanporerman dan en sityasyon kot i pe ganny mwens ki sa bann anplwaye ki travay avek li.  Sa sistenm Tax progresiv ki pran lefe an Zanvye, pou osi asire ki menm bann dimoun ki par lao sa bann threshold ki nou’n koz lo la, pou resevwar en benefis e mon ava eksplik sa en pe pli an detay ozordi.

Nou konnen ki en tel reform i kapab parfwa paret konplike akoz i nesesit en travay aprofondir e en travay teknik.  Nou konnen osi ki i annan bokou dimoun, swa akoz zot lentere personnel oubyen pour zot lentere politik, pa an faver sa reform e zot in fini komans esey met bar dan nou larou.  Me pour tou dimoun ki ozordi pe ganny R8555.50 e ki pe benefisye ek sa logmantasyon plis ki R1200, nou anvi asir zot tou ki nou ‘Pli determinen ki zanmen’ pou anmenn vre benefis pour travayer Seselwa.

E pour bann travayer ki pa ankor benefisye an Zilyet, nou rapel ki sa sistenm progresif ki pou vin an aplikasyon an Zanvye 2017, i asire ki la grand mazorite travayer Seselwa i pli byen plase pou envestir dan son prop lavenir.

Mr Deputy Speaker, ozordi dan mon kapasite koman Minis Finans, mon pe vin devan sa Lasanble pou prezant zot detay lo sa sistenm Tax ki pou ganny enplimante apartir Zanvye 2017.  Avan ki mon Minister in ariv lo sa propozisyon ki mon pe prezante ozordi, i enportan ki tou dimoun i konpran ki bokou analiz in ganny fer, pou fer sir ki sa nouvo sistenm Tax ki nou vin avek i anmenn plis legalite dan sistenm Tax dan nou pei e ki i benefisye tou kous nou sosyete.  I rekonnet sa nesesite pou aplik Tax baze lo kapasite pou kontribye.  Nou’n komans travay lo sa sistenm depi 2013, letan nou’n apros IMF pou siport sa tranzisyon sorti sa ki nou apel en sistenm Flat Tax kot tou dimoun i pey 15 poursan, pou entrodwir en sistenm Progresif.  Avek led e lasistans teknik sorti kot IMF ki’n prezant son Rapor avek nou an Zanvye 2016, nou’n kapab travay lo bann threshold ki asire ki nou pli byen adapte nou sistenm avek realite saler ki egziste dan nou pei ozordi.  E osi prevwar levolisyon sa bann saler.

Sa ki kler osi apre bann analiz e bann odit ki’n ganny fer se ki bokou reveni endividyel pa pe ganny byen respekte dan bann statistik aktyel e i kler ki i annan serten reveni endividyel ki pa pe ganny kaptire dan sistenm aktyel.  Alors sa reform i osi enkli ranforsman dan kapasite imen e teknik Komisyon Reveni, pou pli byen reponn bezwen nou popilasyon.  Nou lentansyon se anmenn en sistenm pli zis e ekitab.  Se dan sa konteks ki sa propozisyon ki mon’n met devan, ki mon’n met devan zot, devan sa Lasanble, pu benefisye plis ki 98 poursan bann salarye dan nou popilasyon.  Ozordi nou pe prezant zot ek en reform Tax ki pou permet nou pep anmenn plis larzan kot zot lakour.  En reform ki pou kree plis legalite.  En reform ki pou permet sa fanmir ki pe debrouye me ki pe touzour vwar li pe trimouse tou le mwan pou kapab azout 2 bout ansanm, i kapab arive fer sa saving.  En reform ki pou permet sa fanmir envestir plis ankor kot lakour.  En reform ki siport sa graduate, sa Profesyonnel e bann dimoun osi ki dan milye.

Ozordi, Gouvernman Lepep i fyer pou kapab prezant en sistenm Tax ki zisteman pli zis e pli ekitab.  Dan Manifesto Parti Lepep, nou ti angaz nou lekor pour sa reform, pou nou pli byen siport travay ki sak Seselwa i fer dan nou lekonomi.  E sa reform i rekonnet nesesite pou donn plis sipor avek sa ki pli dan bezwen.

Mr Deputy Speaker, Income Tax i reprezant plis ki en bilyon Roupi dan nou Bidze anyel.  Napa fason ki nou kapab enplimant en tel reform, san pran an kont rediksyon dan reveni ki sa reform i kapab anmennen, me nou konvenki ki i posib e ki i neseser, anliny avek bezwen nou pep.  E Gouvernman in touzour pare pou met son pep o sant tou devlopman.  Nou konvenki ki atraver bann mezir pli sever ki nou pou met an plas pou nou kapab reisir retresi sa lekar e anmas sa reveni atraver bann gro biznes e osi bann gran endividi ki ozordi, malerezman souvan pe servi tou mwayen pou pa pey Tax ki zot devret pe peye.

Mr Deputy Speaker, Gouvernman pe met en tel sistenm Tax an plas, pou fer sir ki napa okenn Seselwa ki ganny kit deryer.  E avek en tel sistenm, Seselwa pou ozordi kapab non selman aste zot bezwen de baz, me osi kapab annan plis larzan dan zot lanmen pou reenvestir.  Reenvestir dan zot lekor, dan zot fanmir, dan zot pei.

Mr Deputy Speaker, apartir Zanvye 2017, nou pou aplik Income Tax anba sa sistenm progresif pour tou Seselwa comme swivan e avek sa bann prensip swivan.

Premyerman, bann saler sorti 0 ziska R8555.50 pa pou bezwen pey Tax lo zot saler.  E tou Seselwa pou benefisye atraver sa premye R8555.50, kot zot pa bezwen pey Tax lo sa parti zot saler.  Nenport kwa zot saler lafen di mwan, zot benefisye avek sa lavantaz lo sa premye parti dan zot saler.

Dezyenmman, apartir R8555.50, nivo Tax ki en dimoun i peye, pou ogmante progresivman.  Savedir nivo Tax 0 e 8555.50 e i ogmante progresivman 1 poursan, 2 poursan, 3 poursan, eksetera.  Ozordi parey nou konnen, tou dimoun i pey 15 poursan.  Me sa sistenm progresiv i vedir e sa sistenm ki nou pe met an plas, i vedir ki se selman letan ou saler i ariv R35,667, ki ou pou bezwen pey sa nivo 15 poursan ki egziste ozordi.  Sa i vedir Mr Deputy Speaker, ki tou dimoun ki pe ganny en saler mwens ki R35,667 ozordi, pou vwar en benefis direk lo zot saler an Zanvye 2017.  Tou dimoun ki tonm dan sa kategori pou vwar zot pey mwens Tax ki zot pe peye ozordi e an retour, zot pou al avek en larzan ekstra kot zot lakour e pou zot kapab envestir sa larzan.

Mr Deputy Speaker, permet mwan pou mwan sit detrwa legzanp pou montre sa reform an pratik.  Ozordi si en dimoun pe resevwar saler R10 mil, i pe pey R1500 anver Income Tax.  Savedir i anmenn R8500 dan lakour.  An Zanvye 2017 avek sa reform, i pou benefisye avek R1283 an plis e sa i vedir i pou anmenn se li R9783 dan lakour.  Sa i reprezant en logmantasyon preski 15 poursan e annefe, i pe pey en nivo Tax zis 2 poursan.

En lot legzanp Mr Deputy Speaker.  Ozordi si en dimoun pe resevwar en saler R12 mil, i pey li R1800 Income Tax.  Apartir Zanvye 2017 avek nouvo reform, sa dimoun pou pey li selman R618.68 koman Income Tax.  Sa i vedir ki i pou annan li R1183.32 an plis.  En logmantasyon R1183.32 an plis ki i pe gannyen ozordi, dan son pos.  E i pou al se li avek R11,383 dan lakour.

Mr Deputy Speaker, en dimoun ki son saler i R15 mil e ki ozordi i pe pey li R2250 an Tax, apartir Zanvye 2017 i pou pey selman R1216.68 Tax.  Ki vedir i pou annan li en total, en logmantasyon R1033.32 an plis ki i annan ozordi.  E savedir, i pou anmenn dan lakour R13,783.

Mr Deputy Speaker, en dimoun ki son saler i R20 mil ozordi, i pey li R3 mil Tax.  Apartir Zanvye, i pou pey zis R2417 e i pou ganny en lavantaz, en logmantasyon R783 an plis ki i pe gannyen ozordi.

Dernyen legzanp Mr Deputy Speaker.  En dimoun ki son saler i R25 mil ozordi, i pe pey R3750 an Tax.  Apartir Zanvye, i pou pey li R3216.68 e sa pou anmenn li en benefis, en logmantasyon R533.32.

Mr Deputy Speaker, sa i serten legzanp kot bann dimoun ki zot saler i mwens ki R35 mil e pou benefisye atraver sa reform.  Komisyon Reveni pou pibliy dan Zournal dan bann zour ki pe vini.  En latab ki montre tou bann nivo saler e sa Tax ki zot pou bezwen peye.  Mon envit tou Seselwa pou konsilte sa dokiman, pou vwar kote zot tonbe dan sa nouvo sistenm Tax progresif.  Nou annan tou konfyans ki pep Seselwa pou vwar son benefis e i pou vwar son lavenir dan sa reform.

Katriyenm pwen Mr Deputy Speaker, ki nou bezwen gard antet dan sa reform lo Tax Progresif se nivo Tax pou ogmante pour tou dimoun par lao R35,6657.  Me ankor enn fwa, sa pou ganny fer lo en baz progresiv.  Par egzanp si en dimoun ki son saler i R50 mil, pou aprezan pey R8217 an Tax, ki oparavan i ti pe pey R7500.  En dimoun ki son saler i R70 mil, pou pey R12,217, konpare avek 10,500 aktyelman.

Senkyenm prensip pou nou note dan sa reform Mr Deputy Speaker, se ki nivo Tax pou mont par lao 30 poursan lo bann saler ki par la 83,333.  Dan sa nouvo sistenm Tax Progresiv, nou pe aliny nou sistenm Income Tax avek sistenm Business Tax e nou ava rapel ki biznes i pey ozordi 30 poursan lo zot profi.  Sa i permet plis liniformite dan sistenm ki Konmisyon Reveni pou servi e pou osi asire ki biznes koman endividi i deklar zot reveni dan en fason pli transparan e ki permet en fason anmas Tax ki pli zis e ki pli ekitab.

Dernyen pwen pou notre dan sa nouvo sistenm Mr Deputy Speaker, se ki sa nouvo sistenm i prepar lavenir kot nou santi ki nou kapab anmenn plis reveni, baze lo lefikasite dan metodolozi pou anmas Tax, ranforsman an kapasite imen e teknik e osi bann odit bann gran Konpannyen e osi bann endividyel ki petet pa pe pey sa nivo Tax ki zot sipoze pe peye.

Mr Deputy Speaker, parey mon’n anonse avan, sa bann sanzman lo reform Income Tax ki Gouvernman Lepep pe prezante ozordi, i vize ver anmenn plis legalite pour tou travayer Seselwa.  Sa travayer ki ozordi pe travay dir pou fer sir ki son fanmir i annan tou son bann bezwen de baz.  I kouver osi sa bann dimoun dan milye, bann Profesyonnel, sa bann graduate, ki bezwen kapab rezouir zot travay dir.  Ozordi sa ki nou pe prezante i en propozisyon pour en sistenm Tax ki adres laktyalite ozordi.  En sistenm Tax ki nou touzour pe ekout nou pep ek i nou pe rod tou mwayen pou fer sir ki pep i reste o sant nou devlopman.

Mr Deputy Speaker, i enportan note ki pou kout Bidze pei anviron R400 milyon pou nou entrodwir en sistenm Tax Progresiv lo saler.  Gouvernman Parti Lepep i vwar sa koman en lenvestisman.  En lenvestisman dan son pep, en lenvestisman ver lavenir nou pei.

Mr Deputy Speaker, dan sa reform Tax ki Gouvernman pe propoze.  I enportan pou nou osi note ki nou pe prevwar en lankadreman spesifik pour bann travayer etranze, ki diferan avek sa ki pe prevwar pour travayer Seselwa.  Rekonesan ki en travayer etranze i vin Sesel avek serten kondisyon dan son Kontra e sa i enkli laranzman pour son lozman e souvan, serten lezot sipor ki i kapab gannyen, par egzanp atraver transportasyon.  I osi enportan pou rapel ki travayer ki vin Sesel, i vin pour en peryod letan ki souvan ki defini e ki i pe benefisye avek sa bann lenfrastriktir ki gouvernman i met a son dispozisyon pandan sa letan ki i isi.

Dan sa konteks, bann rediksyon e lavantaz ki mon’n site, ki aplik pour travayer Seselwa, pa pou aplike pour travayer etranze.  Savedir ki an Zilyet, napa sanzman kot i konsern Tax ki ganny peye par bann travayer etranze e zot pou kontinyen peye parey zot pe peye ozordi.

An 2017, nou pe propoze ki logmantasyon dan Tax ki ganny peye par etranze ki pe ganny plis ki R10 mil, i vin an aplikasyon.  E sa pou lo en baz progresiv.  Apartir Zilyet 2017, bann rates progresiv lo bann travayer etranze pou comme swivan.

Premyerman, 0 ziska R10 mil, i 15 poursan.  Savedir pour sa group dimoun, napa sanzman baze lo sa ki zot pe peye aktyelman.

Dezyenmman, bann saler R10 mil, R10 mil ek R1 ziska R83 mil 333, i pou 20 poursan e sa i reprezant en logmantasyon lo en baz progresiv.

E trwazyenmman, par lao R83 mil e 333, i pou 30 poursan.  Gouvernman i osi pran an kont ki i annan dan serten lanplwa, par egzanp Ansenyan e Ners kot zot pe travay dan Gouvernman e ki zot pe ganny anploye anba en Scheme of Service spesifik e dan sa bann ka spesifik, nou pou bezwen fer sir ki zot pa dezavantaze, konpare avek en travayer Seselwa.

Mr Deputy Speaker, dan nou analiz nou’n osi vwar ki nou annan en defayans lo nou bann lenformasyon e bann data ki egziste lo saler.  Alors en parti entegral sa reform se pou osi propoze pou fer sir ki tou anplwayer i soumet en pay roll elektronik avek Komisyon Reveni, SRC.  Pou lemoman, serten pti biznes napa sa kapasite e nou konpran sa.  Nou pou met an plas en sibvansyon pour bann pti biznes, pou zot kapab fer sir ki zot ofer sa servis e zot kapab soumet zot pay roll elektronik, menm letan ki zot annan mwens ki 25 travayer akoz ozordi, i prevwar ki si ou annan plis ki 25 travayer, tou fason ou bezwen soumet ou lalis pay roll elektronik-man e dan sa reform, nou pou fer sir ki nou annan lenformasyon lo tou saler dan nou pei lo en baz elektronik e sa i pou permet nou pli byen adres bann reform an zeneral, kot i konsern Tax,  nou’n osi konstate ki pou annan travayer ki annan parey i leka ozordi, zot annan detrwa lanplwa, ouswa pe ganny lezot income.  Par egzanp zot kapab pe ganny bann board fees.  Vi ki sa threshold ki nou pe etablir, plis ki R35 mil i vreman avantaze, Komisyon Reveni pou met a zot dispozisyon, en sistenm pou zot raport zot reveni, pou fer sir ki zot pa pey tro bokou akoz si zot pe ganny takse endividyelman lo sa bann saler, i kapab arive ki zot pey tro bokou.  E sa sistenm pou osi permet kot sa bon nivo Tax, savedir ki en endividi i fer sir ki i pe pey sa nivo Tax ki i sipoze pe peye e pa pe fer bann fo deklarasyon.  Bann ka kot en dimoun par egzanp in kapab pey plis Tax ki i ti sipoze, se par egzanp kot en dimoun in travay dan en lanplwa pour en serten peryod letan me in arete dan milye lannen.  Par egzanp in travay ziska Septanm me apre in bezwen kit pei par egzanp an Oktob pou li al fer letid, me son Tax i baze lo son lannen antye.  E sa i bann sityasyon ki nou pou met an plas bann sistenm ki pou evite ki sa bann dimoun i pey tro bokou Tax.

Mr Deputy Speaker, sa reform e sa bann propozisyon threshold i reprezant sa travay aprofondi ki Gouvernman in fer pou alafwa prezant en sistenm progresif pou donn plis valer travayer Seselwa, me ki osi rekonnet bann sanzman fondamantal ki’n annan dan nou lekonomi dan sa bann dernyen lannen.  I kler ki nou pou avans devan si nou tou nou vin ansanm dan en lespri partenarya.  Minister Finans pe angaz li dan diferan konsiltasyon, pou prezant sa bann sizesyon lo sa nouvo reform.  E pou fer sa reform marse, nou bezwen ankor pwennvi bann diferan partner, pou asire zisteman ki nou delivre en reform dan lentere tou Seselwa.  Mon Minister e Gouvernman an antye, nou a lekout.  Nou pou osi fer bann lezot konsiltasyon dan Medya, dan distrik e bann lezot Sekter pandan sa bann prosen 3 mwan, avan ki nou finaliz Lalwa pandan prezantasyon Bidze 2017.  Mon ti a kontan rapel sa Lasanble ki an mezir ki nou pe fer sa bann reform, tou bann legzanpsyon ki egziste pour Income Tax, i reste parey.

Mr Deputy Speaker, sa reform i antre dan kad nou vizyon pou kree loportinite pour Seselwa envestir dan lavenir e sa i kapab vin en lot moter dan nou lekonomi.  Nou dan en moman nou devlopman ki se lenvestisman par Seselwa e pour Seselwa ki pou fer en pli gran diferans.  E sa reform i vedir ki sa sans lenvestisman i pa rezerve zis pour bann dimoun ki annan bokou mwayen oubyen zis pour bann gran msye.  I en loportinite pour tou dimoun.  Pli boner sa lannen par egzanp, nou’n anmenn sa letap privatizasyon Seychelles Commercial Bank, kot bann anplwaye e bann account holders in kapab envestir.  Prosennman, nouvo loportinite atraver privatizasyon e proze Partenarya Piblik Prive pou osi ganny propoze koman bann loportinite lenvestisman.  Nou pe osi akse-ler mezir ki pour permet Seselwa aste zot prop lakaz, oubyen en morso later e ankor enn fwa, envestir dan zot lavenir.

Annou sezi sa loportinite byen pour nou prop lavenir e lavenir nou zanfan.

Mersi Mr Deputy Speaker, tou bann Manm Onorab e mersi pep Seselwa pou don zot sipor pour lenplimantasyon sa nouvo sistenm Tax lo en baz progresiv.  Mon kont bokou lo zot langazman.  Mon kont bokou osi lo bann sizesyon ki pou vini dan bann konsiltasyon ki pe kontinyen pou nou enplimant sa sistenm ki dan benefis tou Seselwa.

Mersi bokou Mr Deputy Speaker.  Mersi tou Manm Onorab.

 

MR DEPUTY SPEAKER

Bon, Minister in prezant son Statement.  Mon a permet detrwa kestyon.

Onorab Houareau.

 

HON HERBERT HOUAREAU

Bonzour Minis ek ou lekip.

Mr Deputy, vi ki larepons Minis konsernan Tax lo saler e income, eski Minis i kapab dir ek sa Lasanble ozordi, klerman si overtime ki dimoun i fer i merit ganny takse par anplwayer akoz ozordi dan Sesel, malere pe ganny vole lo zot saler, en serten kantite poursantaz Tax e Gouvernman pe ganny blanmen pou nanryen, konsekitivman.

Mersi.

 

MINISTER JEAN-PAUL ADAM

Mersi Mr Deputy Speaker e mersi Onorab.

E sa i en kestyon tre enportan akoz mon oule rapel sa Lasanble e tou pep Seselwa ki bann peyman overtime ozordi i parmi bann egzanpsyon lo Income Tax.  Savedir, personn pa sipoze pe pey Tax lo overtime ki i pe fer.  Si i annan bann ka ki sa pe arive, i bezwen ganny raporte avek Komisyon Reveni e osi avek Minister Lanplwa.  Me mon oule rapel ki overtime i en eleman ki ozordi i egzanpte anba sa Schedule ki egziste lo Personal Income Tax.

Mersi Mr Deputy Speaker e Onorab.

 

MR DEPUTY SPEAKER

Onorab Arnephy.

 

HON BERNARD ARNEPHY

Mersi Mr Deputy Speaker.

Bonzour Minis avek ou delegasyon.

Mr Deputy Speaker, avek zefor Gouvernman pou kontinyelman amelyor lavi Seselwa, baze lo Statement Minis, eski Minis i kapab donn nou Lasanble detay lo ki rapor ki ou Minister Finans i annan avek bann Departman tel ki DPA, Minister Lanplwa, Zafer Entern, pou asire ki larzan ki Gouvernman i vote dan Bidze, otan ki posib, se bann Seselwa ki pe okip sa bann post e ki Seselwa ki benefisye.

An menm tan, eski Minis i kapab dir avek nou Lasanble, ler sa reform i vin fully fledged an Zanvye 2017, konbyen Seselwa, poursantaz Seselwa ki pou benefisye avek sa Tax free lo zot saler e an menm tan Minister, eski ou pe konsider egzanpte bann serten benefis ki travayer i gannyen tel ki Transport Allowance, Housing Allowance, kot nou egzanpte sa pour sa bann dimoun pa ganny takse, koman en lankourazman pou zot kontinyen deliver plis e donn plis dan zot landrwa travay?

Mersi.

 

MR DEPUTY SPEAKER

Non, mon oule remind bann Manm, nou ganny drwa demann en kestyon siplemanter.  La n’al 3 la.

Bon, nou a les pase me lezot, fer atansyon.

Proceed Minister.

 

MINISTER JEAN-PAUL ADAM

Mersi Mr Deputy Speaker e mersi Onorab.

An sa ki konsern travay ki nou fer avek bann lezot Minister tel ki Departman Entern, Departman Ladministrasyon e Departman Lanplwa, nou pe touzour met an plas bann Polisi ki maksimiz rol ki Seselwa i zwe dan bann pozisyon kle.  E resaman osi, atraver partenarya ant par egzanp Komisyon Reveni e Departman Entern, nou pe fer bann odit pou asire ki bann ekspatriye ki antre dan pei pou fer en louvraz i byen, premyerman byen pey son Tax akoz i enportan ki nenport ki travayer, ki se swa en Seselwa oubyen en etranze, i pey son Tax parey i sipoze peye, parey i prevwar dan Lalwa.  E nou bezwen fer sir ki sa i ganny fer byen par bann anplwaye, atraver bann anplwaye e nou bezwen osi fer sir ki bann travayer ki antre dan pei i vin pour sa louvraz ki zot sipoze pe fer.

Lot eleman e sa i en travay ki kontinyen an korperasyon avek sa bann diferan Departman.  E mon krwar i pe anmenn deza serten rezilta.

Lot eleman ki bon pou nou note se ki avek sa nouvo sistenm ki nou pe enplimante apartir 2017 avek sa sistenm progresif, avek en sistenm en pti pe diferan ant sa ki pou aplik lo bann ekspatriye ek bann Seselwa, i osi dan en fason kree en incentive pour Sekter Prive, pou zot osi regard sirtou dan bann pozisyon lotorite, bann pozisyon responsabilite, pou ot fer en formasyon a lonterm pour Seselwa.  E nou annan bokou konfyans ki sa sistenm pou mars byen avek par egzanp nouvo Lalwa Lanplwa ki pe al ganny prezante devan sa Lasanble e bann lezot reform ki nou pe fer pou maksimiz rol e loportinite ki Seselwa i gannyen pou devlop zot karyer, vi ki nou pe envestir en kantite larzan tou le lannen osi pou nou kontinyen form Seselwa pou zot pran bann pozisyon kle.  E nou santi ki nou pe al dan en bon direksyon me sa reform i kapab ankor kree sa bann loportinite.

An sa ki konsern bann benefis ki ou’n site.  Bann benefis par egzanp Housing Allowance oubyen Transportation Allowance.  Parey leka i ete ozordi, si sa bann benefis i ganny peye koman cash.  Savedir i vin lo zot saler.  Savedir i en lavantaz moniter.  I ganny takse dan nou sistenm aktyel, sa i leka ozordi.  Si enn sa bann benefis i ganny donnen par en anplwayer akoz par egzanp en lakaz i kapab ganny met a dispozisyon en anplwaye par en anplwayer.  Oubyen en transpor i kapab ganny met a dispozisyon en anplwaye par en anplwayer.  Sa i ganny konsidere en benefit in kind e li osi i ganny takse atraver sa anplwayer.  Alor ozordi, sa bann Allowance efektivman i ganny takse e nou lo sa sistenm Flat Tax.

Letan nou al dan en sistenm progresiv, par egzanp bann graduates.  Si nou pran legzanp bann graduates ki ozordi i benefisye avek en Housing Allowance, zot pou benefisye en kantite dan sa sistenm progresif akoz menm si pou annan en Tax, akoz i ganny konsidere dan zot saler total.  Sa nivo Tax ki zot pou peye i mwens ki zot pe peye ozordi.  I mwens ki sa 15 poursan e zot pou benefisye avek plis larzan dan zot lanmen.  E ankor, mon envit dimoun pou konsilte sa bann latab ki nou pou pibliye prosennman, sirtou bann zenn graduates ki pe antre par egzanp dan Sekter Piblik, pou zot regard zot nivo saler, enkli avek zot bann Allowance, pou zot vwar ki mannyer zot pou benefisye.

Mon ava rapel ankor ki bann lavantaz ki egzanpte ozordi dan Lalwa, nou pa pe sanz sa dan Lalwa me i annan en konsiltasyon ki nou pe dir nou pou fer avek tou dimoun dan nou sosyete dan bann mwan ki pe vini, pou nou vwar ki pli bon fason pou nou met an aplikasyon sa bann threshold ki devan zot ozordi e ki anmenn plis legalite dan nou sistenm Tax e ki permet nou reflesir zisteman a lonterm, ki mannyer nou adres sa bann diferan income me rekonnet lafason ki dimoun i kapab benefisye o maksimonm, baze lo zot bezwen.

Mersi Mr Deputy Speaker e Manm Onorab.

 

MR DEPUTY SPEAKER

Onorab Valmont.

 

HON SYLVIANNE VALMONT

Mersi Deputy Speaker.  Bonzour Minis e ou lekip.

Minis in mansyonn ki pa tou salarye ki ganny kaptire dan sistenm Tax e osi mansyonnen ki SRC i merit plis resours.

Eski Minis i kapab dir nou, ki mekanizm pli efikas e efektiv pe ganny met an plas, pou asire ki tou anplwaye san leksepsyon dan Sesel, ki merit kontribye ou pey Tax, i fer li son devwar pou pey son Tax byen?

Mersi Mr Deputy Speaker.

 

MINISTER JEAN-PAUL ADAM

Mersi Mr Deputy Speaker e Manm Onorab.

Enn bann premye mezir ki mon’n deza anonse dan sa propozisyon reform se ki nou pou al ver en electronic pay roll ki pou kouver tou travayer Seselwa.  Savedir tou larzan ki en endividi i gannyen koman en reveni, i ganny deklare atraver sa pay roll e i pou pey sa nivo Tax parey i sipoze peye.  E parey nou’n dir, nou bann threshold ki nou’n etablir i avantaze pour travayer Seselwa e nou santi ki i pou dan lavantaz bann dimoun ki pe travay ozordi annefe, pou fer zot bann deklarasyon, pou zot fer sir ki zot benefisye dan sa fason korek e alor, pa bezwen pey plis Tax ki zot sipoze peye.

Serten bann lezot mezir ki nou bezwen pran e enn bann mezir ki mon’n site se ki nou pe aliny sa nivo Tax pli o, 30 poursan, avek nou sistenm Biznes Tax akoz ozordi, bann odit ki nou’n fer i montre ki wi, i annan serten biznes, par lafason ki zot striktire e ki zot etablir zot bann kont, ki i annan bann reveni ki petet an realite i bann saler, me ki i pase atraver, i ganny kasyet anba bann lezot mekanizm dan zot bann biznes prive.  Byensir.  I enportan ki biznes prive i kontinyen benefisye e nou progranm Reform Tax pou gard sa antet me i enportan osi kot en reveni i ganny resevwar e sa reveni i en reveni personnel ki sa dimoun i pey Tax lo la e ansanm avek sa electronic pay roll e sa alinyman nou sistenm Business Tax avek nou sistenm Personal Income Tax, i pou permet nou pli byen idantifye bann dimoun ki petet pa pe ozordi fer sa deklarasyon neseser dan sistenm.

Apre nou annan serten lezot kategori biznes kot i annan sa bann loportinite atraver lafason ki sa biznes i ganny takse ozordi, ki zot kapab fer pase serten reveni san ki nou petet realize anba nou sistenm aktyel me ansanm avek sa reform e osi ranforsman bann odit ki ganny fer par Komisyon Reveni e zot kapasite imen.  Nou annan konsyans ki nou kapab osi adres serten sa bann mankman.

Mersi Mr Deputy Speaker e mersi Onorab.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mersi Mr Deputy Speaker.

Bonzour Minis e son delegasyon.

Mr Deputy Speaker, eski Minis i kapab:- en sizesyon en.

Eski Minis i kapab dan sa lalis ki i pou prodwir, ki montre sa bann diferan Tax la ki pou ganny pran, diferan saler.  Eski i kapab osi pibliy.  Ler ou pibliye, pibliy en lalis tou bann Benefis e Konpansasyon ki takse ek bann ki pa takse.  Tou dimoun e travayer e anplwayer a konnen, a konpran, personn pa a sov kanmarad.

Epi, si ou kapab osi:- taler ou’n mansyonnen sa 30 poursan Tax kot i aplike.  Si ou ti kapab repete akoz mon panse ki i annan en keksoz ki pa tro kler.  A ki pwen ki 30 poursan i komans aplike lo ou sistenm ki ou pe entrodwir avek nou.

Kestyon Mr Deputy Speaker.  Eski ant la ziska Desanm, eski Minis i kapab dir nou ki pou arive ek bann travayer ki baze lo sa latab.  Sa latab i pa pou aplike pour zot.  Alor ki mannyer travayer pou vwar zot ladan akoz mon krwar i annan en lenkyetid la ki pa kler, ki dimoun i krwar poudir i pe mal ganny gete.

Mersi.

 

MINISTER JEAN-PAUL ADAM

Ok.  Mersi Mr Deputy Speaker e mersi Mr Leader Zafer Gouvernman.

An sa ki konsern bann lalis bann egzanpsyon ki egziste ozordi, mon krwar i en tre bon sizesyon ki nou ava fer sir nou a pibliye.  I annan en kantite keksoz ki deza egzanpte anba Lalwa.  Sa i enkli par egzanp Gratite ziska R10 mil.  Osi an sa ki konsern bann Bonus, bann Service Charge ziska en kantite R10 mil kot i annan sa bann egzanpsyon.  E osi par egzanp Pansyon.  Bann Pansyon i ganny egzanpte.  Alors, sa i detrwa bann legzanp ki deza egziste anba Lalwa e parey nou’n deza dir anliny avek en kestyon ki’n ganny demande se osi overtime ki egzanpte.  Alor tou sa bann eleman, nou ava fer sir ki nou pibliy li ankor enn fwa.  I baze dan bann regilasyon ki tou dimoun i kapab konsilte me nou ava fer sir ki anliny avek sansibilizasyon piblik Seselwa, ki nou met sa a zot dispozisyon.

An sa ki konsern sa threshold, sa 30 poursan, sa i pou aplik selman lo pli o nivo bann saler.  Sa i vedir apartir R83, mil 333.  E set a sa staz ki sa pli o nivo Tax 30 poursan pou ganny aplike.  E ankor sa i lie avek nou progranm kot i konsern Business Tax, kot nou pe aliny sa pli o nivo Tax, 30 poursan, avek nou sistenm:- nou Personal Income Tax threshold i ganny alinyen avek Business Tax ki 30 poursan.

An sa ki konsern bann dimoun ki pa pe benefisye imedyatman me ki pou benefisye an Zanvye 2017.  Mon krwar i enportan pou nou rapel ki premyerman, sa threshold ki’n ganny etablir, sa Tax Free Threshold ki R8555.50 ki pran lefe an Zilyet, i kouver, baze lo data ki nou annan, baze lo lenformasyon ki nou annan, plis ki 50 poursan bann salarye.  Alor, i annan plis ki 50 poursan bann salarye ozordi, apartir semenn prosenn letan zot pou ganny zot pay slip, zot pou kapab vwar en vre benefis kot zot pa pou ganny takse lo sa saler.  E lentansyon ki nou’n fer li dan sa bann faz se zisteman pou rekonnet poudir sa dimoun ki pe ganny sa sonm 8555 ozordi, i pe ganny serten difikilte letan ou pe get son bann peyman ki i bezwen fer, si i en manman tousel ki annan zanfan e i en Profesyonnel souvan.  I en dimoun ki pe fer en gran zefor pou fer nou pei marse me sa 15 poursan i lour lo li.  E nou rekonnet sa atraver sa dezyenm staz sa reform ki konplemant sa premye staz ki ti lo saler minimonm.  Alor sa prosen letap se pou nou tir Tax lo sa bann saler par lao 8555 e ki nou fer li lo sa baz progresif.  Tou dimoun par lao 8555 pou kontinyen peye Income Tax, selman lo sa baz progresif.  Rezon ki nou pa kapab fer sa imedyatman an Zilyet se premyerman, parey sa Lasanble i konnen, nou annan en Bidze.  E nou ti vin avek en Bidze Siplemanter pli boner sa lannen an Mars, kot atraver bann prensip osi bann Bidze Siplemanter, ou vin avek serten lamannman me ou pa pou vin avek konpletman en nouvo Bidze.  Ou bezwen travay en pti pe lo labaz ki ou deza pe travay.  E si nou ti pe vin avek en sanzman R400 milyon, i pa ti pou rezonnab vizavi bann priyorite ki’n deza ganny etablir devan nou.  E nou travay lo en Bidze ki nou enplimante pour lannen.

Me nou ti santi i pa akseptab pou nou atann 2017, pour sa bann dimoun ki pli dan bezwen kapab benefisye.  E se pour sa ki sa sonm:- tou bann dimoun anba 8555.50, i benefisye imedyatman la an Zilyet.  Alor, i annan sa formil ki osi pe ganny aplike pour bann dimoun ziska R10 mil 65, akoz sa bann dimoun si ou ti kontinyen aplik sa 15 poursan, ti pou ganny mwens ki sa sonm 8555 e i pa ti pou ekitab e i pa ti pou zis e alor nou’n fer sa formil koman en baz enterimer.  Pour sa 5 mwan ziska Zanvye 2017, kot sa progranm antye lo Progressive Income Tax i ganny aplike e wi mon konnen ki serten dimoun pe dir be ki mannyer mon benefisye.  Mon envit tou dimoun pou konsilte sa latab akoz sa progranm ki nou pe met devan i pa zis pour demen, i pa zis pour lannen prosenn.  Nou pe regard lavenir nou pep.  Nou pe regard posibilite ki zot annan koman Seselwa pou envestir dan zot pei.  Sa larzan ki pe ganny remet dan pos pep Seselwa i en larzan ki zot kapab envestir e fer marse nou lekonomi, kontinyen kree krwasans, kree loportinite pou nou kontinyen donn sa sipor avek pep Seselwa, ki nou kapab donnen.  E se pour sa ki nou bezwen fer li an faz.  I enportan pou dimoun regard son kapasite a lonterm.  E letan nou pou pibliy sa latab, letan tou dimoun pou regarde sa ki zot kapab benefisye, mon annan bokou konfyans ki zot pou vwar valer sa reform.  E bann dimoun ki par lao 8555, ozordi an Zilyet, zot pa pou ganny sa gran benefis me an Zanvye 2017, lavaler zot benefis pou reflekte dan sa sistenm Tax Progresif konplet.

Mersi Mr Deputy Speaker e mersi Onorab.

 

MR DEPUTY SPEAKER

Onorab Payet-Marie.

 

HON MARIA PAYET-MARIE

Mersi Mr Deputy Speaker.

Mr Deputy Speaker, mon ti a kontan demann Minis ki aksyon ki ganny pran kont sa bann biznes ou sa ki devret pe pey Tax, ki swa biznes ou Income Tax, me ki zot pe zwe kouk avek sistenm aktyel?

Mersi Mr Deputy Speaker.

 

MINISTER JEAN-PAUL ADAM

Mersi Mr Deputy Speaker e mersi Onorab.

Nou bann Lalwa kot i konsern Komisyon Reveni i deza fer provizyon pour bann lanmann ganny mete lo bann biznes par egzanp ki pa swiv bann regleman e ki zot bezwen parfwa pey bann Tax siplemanter baze lo sa bann odit ki Komisyon Reveni pe fer.  E sa i en keksoz ki nou bezwen ranforsi nou kapasite pou nou kapab fer sa bann odit e anmenn sa bann rezilta.  E mon annan bokou plezir pou deza dir avek sa Lasanble ki par egzanp atraver rekritman ki Komisyon Reveni deza in komans fer, nou pe vwar serten rezilta.  Nou pe vwar pli bon performans an sa ki konsern Tax ki pe ganny anmase.  E letan nou prezant bann rezilta mid-term review avek Lasanble, zot pou vwar ki mannyer reveni pe progrese.  Zot pou vwar osi bann landrwa kot nou santi i annan lespas pou nou amelyore.  I annan serten reform osi dan sistenm Business Tax ki nou bezwen vin avek e sa i form parti osi nou travay ki nou pe fer avek IMF, ki pou konplemant lenplimantasyon nou reform dan Personal Income Tax.  Me nou santi ki sa bann reform, letan ou pou met li ansanm, i pou donn nou en baz pour lavenir nou pei, ki parey mon’n dir, i permet Seselwa envestir dan son pei.  Lenvestisman par Seselwa e pour Seselwa.

Mersi Mr Deputy Speaker e mersi Onorab.

 

MR DEPUTY SPEAKER

Bon.  Vi ki i deza midi e nou annan en lot Statement pou nou pran, nou ava termin la avek Statement Minis Finans.  Nou ava remersye li ek son delegasyon e ekskiz zot parmi nou.

 

(Minister and his delegation were excused from the House)

 

MR DEPUTY SPEAKER

Bon, nou annan plezir pou akey Minis Charles Bastienne parmi nou, Minis pour zafer Intern. Ki i pou vin fer Statement lo reform dan service prizon

E mon annan plezir pou  envit Minis, pou presant son Statement.

 

MINISTER CHARLES BASTIENNE

Mr Deputy Speaker, Leader Gouvernman dan Lasanble, Leader Lopozisyon, tou Manm.  Bonzour.  En prizon i sipoze en landrwa kot en kondannen i ganny anvoye par Lakour pou dabor ganny prive son liberte e osi kot i ganny sipor neseser pou fer transformasyon dan son lavi ki pou ed li vin en meyer sitwayen konpare avek letan i ti antre dan prizon.

Pandan bann lannen ki’n pase Lotorite Prizon in sey anmenn bann diferan progranm pou ed prizonnyen pou vin en meyer sitwayen.  Parey nou konstate i pa’n touzour mars parey nou ti a swete e osi i pa’n ase konpreansiv.

Depi komansman sa lannen mon Minister ansanm avek Lotorite Prizon, nou’n asize ansanm e revwar kote sa bann defayans i ete e vin avek bann aksyon konkret ki pou permet nou ganny rezilta e osi avek lentrodiksyon Misuse of Drug Act, 2016 ki’n pran lefe le 1 Zen sa lannen, in annan en seri reform ki’n komanse dan Departman Prizon.

Mr Deputy Speaker, avan ki mon koz lo sa bann konponan sa reform, mon ti a kontan pas en revi lo striktir briyevman lo striktir prizon aktyelman.

Prizon Montagne Posse i prizon prensipal avek en kapasite anviron 600 kondannen enkli rimann ek kondannen madanm.  Prizon Marie Louise i dedye pou bann kondannen ki’n ganny kondannen pou trafik drog, bann ki’n komet lofans mert e bann ki’n komet labi, sirtou lo bann zanfan.  Pour le moman i annan en swasantenn kondannen laba e kapasite i pou 100 kondannen.

Trwazyenmman i annan nou open prison lo Coetivy, i pe ganny servi koman sa transit fase ant Montagne Posée ek lemonn travay.  Kot Prizonnyen ki pe ganny anvoye laba i ganny re entegre dan lemonn travay apre.  Avek nouvo lapros ki nou pe pran, sa prizon Coetivy pa pou neseser aprezan.

Mr Deputy Speaker, konsernen rimann.  Prison Act i fer provizyon pou bann rimann ganny separe avek kondannen kot i posib.  Dan kad sa bann reform en lenfrastriktir apropriye anba o sekirite in ganny idantifye, travay in preski terminen e disi Out laplipar rimann pou ganny mete dan sa landrwa.

Mr Deputy Speaker, pou retourn lo bann reform dan Departman Prizon, parey mon’n dir travay in deza komanse pou ki apartir Out sa lannen piblik Seselwa i a kapab komans vwar serten transformasyon dan prizon.

An total sa bann reform i kapab ganny rezimen dan 5 konponan e tousala i annan bi pou, premyerman asire ki prizonnyen i pas atraver bann progranm reabilitasyon ek reentegrasyon neseser.

Dezyenmman, re donn prizonnyen zot sans responsabilite.

Trwazyenmman, fer zot vin prodiktiv e partisip dan lekonomi nou pei.

Katriyenm, rann sosyete pou sa ditor ki zot in koze.

Senkyenmman, fer sir ki zot lavi pa vin enn kot i vin en complete stop ler zot sorti dan prizon.

Sizyenmman, fer zot angaze dan lavi prizon.

Setyenmman, anpese ki bann keksoz ilegal i antre dan prizon e wityenmman, redwir koripsyon dan prizon.

Mr Deputy Speaker, premye konponan dan kad sa bann kad reform in annan pou fer avek legzersis entansif klasifikasyon bann prizonnyen.  Depi mwan pase, Departman prizon in komans sa legzersis entansif pou evalye e klasifye sak prizon baze lo zot nivo risk.  Sa legzersis pe fer an kolaborasyon ant lekip prizon ek zofisye probasyon.  In annan plizyer laspe ki’n ganny evalye depi back ground kriminel, ledikasyon ek lanplwa.  Sityasyon finansyel, sityasyon familyal, lenfliyans vizavi drog ek lalkol.  Kondisyon emosyonnel e latitid an zeneral sak kondannen.

Bann konponan adisyonnel sa evalyasyon i comme swivan.  Risk sa prizonnyen i re komet lofans, nivo lentervansyon ki sa kondannen i bezwen an term reabilitasyon e osi nivo sipervizyon ki sa kondannen i bezwen letan i dan prizon e apre ki in sorti prizon.

Sa pou permet Lotorite Prizon konn detay aprofondir sak kondannen.  Sa legzersis i tre enportan akoz pou premye fwa Lotorite Prizon pou konn kalite son prizonnyen baze lo en assessment e mezir enternasyonal.

Dezormen, ler en prizonnyen i antre dan prizon i bezwen pas atraver sa ki nou apel en reception committee ki konpri counselors, zofisye probasyon, zofisye medikal e zofisye prizon parmi lezot.  Zot travay se pou evalye e assess sa prizonnyen pandan sa 7 premye zour.  Ler sa evalyasyon i konplete i pou permet sa reception committee pou kalifye sa kondannen.  Sa i a permet li konn stati lasante detaye sa kondannen, zizman detay son kondannen.  Son bann skill e abilite, si i en first time convict e osi lezot lenformasyon personnel parey son larelizyon.

Fodre note, ki en norm enternasyonal pou kalifye tou prizonnyen.  Deza zofisye prizon avek lasistans zofisye probasyon pe travay dir pou asire ki sa klasifikasyon i konplete ankor dan en mwan.  Akoz sa i neseser pou ede plas prizonnyen lo bann diferan progranm ki prizon i ofer, ki nou pe al entrodwir.

Mr Deputy Speaker, dezyenm konponan touzour an lir avek sa bann reform i konsern en letid integrated, biological behavioral survey ki pe al fer dan prizon byento.  Sa letid pe ganny fer an etrwat kolaborasyon ant mon Minister e Minister Lasante.

Prizonnyen normalman i en group a risk e aktyelman napa lenformasyon presiz lo prevwayans HIV, Epatit C, Konportman seksyel e osi litilizasyon drog dan prizon.  Lannen pase dan sa 103 ka HIV ki ti ganny detekte lo nivo nasyonal, 28 parmi i bann prizonnyen ki pe servi drog dan lavenn.  Dan sa 28 ka, 19 ka i ko enfekte avek Epatit C.  Bi prensipal sa letid se pou konn prevalans HIV, Hep C e osi lezot maladi transmisib dan prizon.  Konn latitid e konportman seksyel bann prizonnyen.  Bann aktivite a risk ki zot angaz zot ladan e osi konn zot konesans dan sa bann domenn.

200 kondannen pou ganny selekte at random pou partisip dan sa letid ki espekte ganny fer pandan 2 mwan.  Lentansyon sa letid se pou kouver tou prizonnyen enn fwa ki sa 200 in fini ganny screen.  Tou prizonnyen ki ganny dekouver avek okenn maladi pou ganny tretman neseser.  Bann zofisye Lasante in komans fer kozri avek bann kondannen pou enform zot lo sa letid.

Trwazyenm konponan Mr Deputy Speaker, ki nou pe entrodwir methadone dan prizon.  I pa en sekre ki i annan drog dan prizon.  Bann kondannen ki depan lo sa sibstans pou bezwen pas atraver en faz physical stabilization dan prizon menm.  Sa pou ganny fer atraver methadone e naltrexone.  Tou prizonnyen ki lo drog pou evantyelman bezwen pas atraver sa staz physical stabilization.  Sa dan li menm pou konbat drog dan prizon akoz letan sa kondannen i ganny mete lo tretman i pou ganny separe avek lezot prizonnyen e akse drog pou preski minim.

Mr Deputy Speaker, servis counseling i en konponan endispansab dan progranm reabilitasyon.  Mon Minister in vwar li neseser pou kree en servis counseling ki aprezan pou tonm direkteman anba mon sekretarya.  Prosedir pou anploy en group probation officers in komanse, i annan deza ki pe komans travay tre pros avek sa bann prizonnyen depi ler zot komans zot santans ziska ler zot pou kit baro prizon.

Nou’n konstate ki prizonnyen i bezwen sa constant monitoring kot counseling i konsernen.  An plis ki sa i pou rol sa bann zofisye probasyon pou travay direkteman avek Lakour.  Se zot ki pou responsab pou donn rapor zidisyer pou fer desizyon lo okenn ka konsernan bann kondannen.

Katriyenm konponan i annan pou fer avek Misuse Drug Act 2016.  Avek lentrodiksyon Misuse Drug Act, 2016 ki sa Lasanble ti aprouve, prizonnyen ki’n ganny kondannen pou drog i kapab fer laplikasyon pou zot santans ganny revwar.

Zofisye prizon ek zidisyer in fini travay lo en bon pe laplikasyon e i deza annan ki dan lanmen Attorney Zeneral.  Mon’n ganny enformen par Sef Ziz ki panel ki konpri Ziz ek Mazistra, 4 zot an tou pou komans ekout sa bann ka komansman Out.  Zidisyer i espekte omwen 300 prizonnyen fer laplikasyon.

Mr Deputy Speaker, progranm reabilitasyon i lakle prensipal sikse sa bann reform dan prizon.  Aktyelman pa tou prizonnyen ki angaze dan bann progranm reabilitasyon e reentegrasyon pa tou ki pe partisip dan aktivite ek lavi prizon.  I annan ki lev ler zot anvi, i dormi ler zot anvi.  I osi annan ki refize pou fer travay prizon.  Avek sa bann reform ki mon pe entrodwi sityasyon dan prizon pou oblize sanze.  Si non, kondannen pa pou zwir serten benefis parey bann ki compliant.

Mr Deputy Speaker, enn fwa ki nou reform i komanse an Out, fini sa letan kot nou kondannen pou refize partisip dan aktivite prizon.  Bann ki pa angaze lo sa bann progranm travay ki mon pou elabor lo la dan en pti moman, zot pou bezwen partisip aktivman dan bann aktivite prizon par egzanp travay konstriksyon, travay lakwizin, netwayaz parmi lezot.  I annan depandan lo zot nivo risk pou osi partisip dan aktivite kominoter.  Lotorite prizon pe travay lo en progranm reminerasyon pou zot osi.

Depi lannen pase Departman Prizon in entrodwi 2 progranm e mon fyer pou dir ki zot pe mars tre byen.  Nou premye progranm i annan pou fer ki nou apel nou release on license ki ti ganny entrodwir an Out lannen pase.  Sa progranm pe ganny fer an kolaborasyon avek nou partner kle IDC.  Sa progranm i benefisye bann prizonnyen ki’n deservi omwen lanmwatye zot santans e ki annan bon konportman.  Ed zot vin prodiktiv, ganny en saler ki a ed zot kontribye pou zot fanmir.

I annan 14 kondannen ki lo sa progranm pour le moman e plizyer zot in byen enstale lo bann zil elwanye pe travay, rezouir serten benefis parey nenport ki travayer IDC.

Dezyenm progranm reabilitasyon i progranm day release.  Kot prizonnyen i al travay dan bomaten e apre retourn prizon aswar.  Land Marin, enn nou premye partner ki’n anbark lo sa progranm ti deside ofer loportinite travay bann kondannen zonm.  Depi Septanm lannen pase, plizyer prizonnyen avek bon konportman e ki pe al termin zot santans byento in partisip dan sa progranm day release.

Aktyelman i annan 16 ki ankor lo progranm e Land Marin in montre lentere pou ogmant sa kapasite.  Parfwa depandan lo nesesite, Land Marin i anploy en adisyonnel 35 lo baz zournalye, parey nou dir casual.

Fodre note ki i annan prizonnyen ki zot santans in fini e swivan zot bon konportman e performans dan travay Land Marin in anploy zot.  An tou i annan 6 ki’n fini ganny anploye par Land Marin apre ki zot in fini deservi zot santans dan lavi prizon.

IPHS pe osi partisip dan nou progranm.  Boner sa lannen zot in anploy an mwayenn 40 prizonnyen lo baz casual ler i annan bato.  Anba sa progranm prizonnyen i ganny peye en saler debaz e zot osi benefisye avek over time.  Lo sa saler debaz, prizon i gard en tyer e sa i ganny depanse dan bann depans ki prizon i fer parey deplasman pou anmenn zot kondannen travay parmi lezot.  Sa de tyer i reste pou sa kondannen.  Serten i kontribye dan zot lavi fanmir, i annan ki pey alimoni e serten i kolekte zot larzan letan zot sorti prizon.

Depi Zanvye ziska lafen Zen sa lannen, Lotorite Prizon in anmas R1 milyon an total atraver sa progranm.  Swivan sikse ki sa progranm pe anmenn, nou’n deside pou agrandir sa progranm day release.  Deza negosyasyon in komanse avek Ladministrasyon IOT pou zot osi partisip dan sa progranm.  Tou lendikasyon i montre ki i pou posib pou komans sa progranm avek zot osi.  Enn fwa sa i finalize i pou ouver en laport pou anploy en norm prizonnyen sibstansyel.

Dan sa progranm avek IOT nou espekte ganny gran partisipasyon prizonnyen madanm osi.  Anliny avek sa bann progranm, mon Minister an konsiltasyon avek biro Attorney Zeneral e lezot Lenstitisyon pou met an plas en scheme saler debaz pou bann prizonnyen.  Kot lapey bann ki pe travay i ganny divize an 3 parti.

1 tyer pou sa prizonnyen, pou li aste son bann keksoz debaz parey biskwi, juice, sigaret, brosadan parmi lezot.  En lot tyer pou al pou Lotorite Prizon pou basnn depans debaz parey mon’n nonmen boner, transportasyon.  En trwazyenm tyer ki nou apel social contribution, pou ganny servi dan sirkonstans sosyal kot prizonnyen i bezwen pey alimoni, pey en loan si i ti annan.  Kontribye dan depans son fanmir olye ki fanmir i depan antyerman lo lasistans sosyal ek Gouvernman.

En prizonnyen i osi kapab servi sa porsyon saler pou pey son kontribisyon volonter dan fon pansyon e pour kwa pa al pli lwen, pey son home saving scheme.  En fason ki letan i sorti prizon i annan posibilite ganny en lakaz li osi.

An plis ki sa, dan serten sirkonstans kot Lakour in enpoz en lanmann an plis ki santans prizon, nou espekte ki sa prizonnyen i pey son viktim atraver Lakour, en sonm baze lo valer lobze ki in vole.  Par egzanp dison en prizonnyen in kondann 2an prizon e en lanmann R10 mil pou vol en televizyon.  I pou bezwen rann son viktim atraver Lakour menm par dizon R1000 par mwan.  Aktyelman i tre difisil pou fer en prizonnyen rann son viktim son televizyon e dan ka kot i pa rann i bezwen retourn ankor prizon pou deservi en lot santans.  Tro souvan ler nou piblik in vin en viktim i rarman ganny rann sa ki in perdi, i bezwen al kontinyen travay dir pou li ranplas sa ki in ganny vole.

An konklizyon Mr Deputy Speaker, avek tou sa progranm e reform nou espekte ki nou pou annan en nouvo zenerasyon prizonnyen ki an pli bon kondisyon lasante, moralman e fizikman pli byen prepare avek nouvo loportinite lanplwa a zot laporte ler zot sorti dan servis prizon.

Mersi Mr Deputy Speaker.

 

MR DEPUTY SPEAKER

Bon sa i Statement Minis, mon a permet 2 kestyon.  Onorab Payet-Marie.

 

HON MARIA PAYET-MARIE

Mersi Mr Deputy Speaker.

Mr Deputy Speaker, Minis in prezant bann bon progranm konsernan prizon.  Dan sa 300 prizonnyen ki Zidisyer in dir ki espekte fer laplikasyon, eski Minis i kapab enform nou Lasanble konbyen prizonnyen ki pou successful e konbyen ki zot santans pou ganny redwir e pou bann ki pa anvi partisip dan sa bann progranm ki’n ganny prezante avek nou par Minis.  Ki Minis i annan lentansyon fer oubyen dir nou about sa.

Mersi.

 

MINISTER CHARLES BASTIENNE

Mr Deputy Speaker, pou premye kestyon dan sa 300 ki nou espekte fer laplikasyon anba Misuse Drug Act, 2016 avek diskisyon mou annan avek Zidisyer nou espekte apepre en santenn i kapab successful.  Setadir swa zot santans i ganny redwir oubyen petet i annan i ganny large.  Me si zanmen zot ganny lager, zot pou ganny large avek serten kondisyon e parmi se ki avan zot ganny large si i annan ki lo drog oubyen kwa, zot bezwen pas atraver sistenm detox physical stabilization parey nou apel li avan ler ki zot ganny release.

Pou dezyenm kestyon Mr Deputy Speaker, sa progranm ki nou pe fer la, nou pe fer li pou bann prizonnyen nou pa pe vwar okenn rezon akoz okenn prizonnyen pa pou le partisip ladan.  Parey mon’n dir se ki p atou prizonnyen ki pou al partisip dan sa progranm imedyatman.  Evidaman letan en prizonnyen pou antre prizon i pou bezwen pas atraver diferan faz.  Counseling, restorative justice. Met li pare avan ler i al swiv sa progranm.  I pa vedir ki i si en prizonnyen i antre dan prizon ozordi, demen sa prizonnyen i komans al travay.  Non.  I pou bezwen pas atraver serten faz avan ler ki i pou allow li e sa counselor avek panel prizon i satisfer zot lekor comme quoi ki li in pare fizikman, moralman pou li kapab ale al travay.

E ler i al travay, parey monn dir i annan assessment ki nou fer dan prizon kot nou evalye prizonnyen.  i annan prizonnyen ki low risk, medium risk avek high risk.  Nou pa pe espekte poudir bann prizonnyen ki pou al travay dizon Land Marin, IPHS oubyen ITO.  Once ki progranm i mase i  pou bann prizonnyen ki high risk oubyen medium risk.  Tou bann prizonnyen ki pou al travay se bann prizonnyen ki low risk as per assessment ki’n ganny fer.

E prezan si en prizonnyen i deside i en high risk i deside pa partisip dan lavi prizon, i pa partisip dan travay kominoter dizon, oubyen si i medium risk, i pa pou progrese atraver sa prosesis ki nou pe met an plas.  E an plis ki sa Sirentandan Prizon i la, i konn tre byen, si i annan okenn prizonnyen pou okenn rezon pa oule compliant avek direksyon ki prizon i donnen, then i annan sa sistenm remisyon ki Sirentandan toutfwa i kapab servi koman en zouti pou koman en dekourazman si zanmen zot desid epou zot pa partisipe e ekout direktiv ki Sirentandan i donnen.

Mersi Mr Deputy Speaker.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mersi Mr Deputy Speaker.

Bonzour Minis e Komisyoner Prizon.  Mr Deputy Speaker, avek tou sa bann progranm e reform ki Minis in enform nou Lasanble, eski i kapab eksplik nou Lasanble, si ek tou sa en prizonnyen i kapab ganny li en police character certificate ki permet li kapab entegre e ganny en travay konvenab dan sosyete apartir sa ki’n ganny eksplike.  E si i posib osi ki i tous en pe sistenm payroll ek remisyon ki i pa’n mansyonn an gro dan prizon.

Mersi.

 

MINISTER CHARLES BASTIENNE

Mr Deputy Speaker, nou espekte ki letan nou prizonnyen in pas lo sa progranm, setadir si in kondann 10an prizon nou pa’n kit li behind bars pandan tou sa letan, nou pa’n donn li sa sans pou li reabilit li e in pran loportinite ki prizon in donn li, nou espekte ki apre 5an, 10an ki in pas prizon i pou vin en meyer sitwayen e Lorganizasyon kot i pou al travay pou donn li serten referans.

Me a se moman la konsernan police character certificate la, vi ki mon panse Lalwa i egzize ki i pran omwen 5an pou refas en krim.  Sa mon pa pou kapab fer komanter lo la.  Me mon konfyan poudir vi i pou’n deza antre dan sistenm travay direk, mon kapab dir se ki Lorganizasyon mon krwar zot pou feel pli konfyan pou pran en prizonnyen ki pe travay pandan 2an, 3an, 4an dan en serten Lorganizasyon olye ki sa prizonnyen pa pou ganny louvraz si zanmen i sorti dan prizon direk.

Dezyenmman konsernan remisyon Mr Speaker, remisyon i ganny egzerse, normalman si ou kondann ou en serten norm prizon ou servi 2 tyer ou santans e sa en tyer i ganny refase depandan lo ou bon konportman dan prizon.  So, sistenm remisyon i la e sistenm remisyon i en zouti parey mon’n eksplike pou management prizon servi pou kapab ensure poudir i annan bon konportman e compliance dan prizon.

Mersi Mr Deputy.

 

MR DEPUTY SPEAKER

Onorab Souris.

 

HON MIRENA SOURIS

Mersi Mr Deputy.

Mr Deputy, an vi ki Minis in dir sa reform in komanse depi Out lannen pase, eski Minis i kapab enform sa Lasanble ki difikilte ki in rankontre depi ki sa reform in komanse.

Mersi.

 

MINISTER CHARLES BASTIENNE

Mr Deputy, progranm pou komans an Out sa lannen me depi Out lannen pase nou’n komans nou progranm day release progranm.  Parey mon’n dir se ki in al tre byen.  Defi ki nou’n gannyen se ki ler prizonnyen pou al travay, menm anba nouvo progranm.  Nenport ki moman prizon i kapab al fer en tes drog lo zot.  Pou kapab etablir si zot drug free a tou moman.

Ki nou’n vwar nou, bann difikilte ki nou’n gannyen ler nou’n entrodwi sa progranm.  Ti annan serten prizonnyen ki ti ankor pe abiz sibstans drog e zero tolerans lo la, imedyatman zot ti ganny retourn dan prizon e zot in perdi zot sans, kot zot bezwen al re swiv progranm reabilitasyon avan pou met zot pare pou zot kapab al travay.

Me apard sa an term konportman, zeneralman avek Land Marin nou pa’n ganny difikilte.  Me si zanmen bann low risk prisoner letan zot al travay pou okenn rezon, zot dezobeir okenn direktiv ki’n ganny donnen par landrwa travay, par supervisor then imedyatman zot pou retourn Montagne Posse e zot pou repas atraver sistenm, re ganny counseling en fason pou kapab ed zot pou kapab aksepte zot tor.  Petet zot pa ti ankor tro pare pou zot kapab kontinyen travay.

Mersi.

 

MR DEPUTY SPEAKER

Onorab Jaqueline.

 

HON SULTANNE JAQUELINE

Mersi Mr Deputy Speaker.  Mr Deputy Speaker, eski Minis i kapab dir sa Lasanble ki plan en pti pe pli konpreansiv lo kestyon reabilitasyon pou bann madanm konsernan travay apard ki in mansyonn IOT, akoz bann madanm i en pti pe pli pasiv dan prizon e zot ti a kontan zot osi partisip dan bann aktivite travay parey bann imsye.

Mersi Mr Deputy Speaker.

 

MINISTER CHARLES BASIENNE

Mr Deputy Speaker, se egzakteman sa ki pe arive, madanm la pou partisip aktyelman.  Pour le moman mon kapab dir zot poudir manm pa pe partisipe parey dan nou progranm Land Marin oubyen IPHS.  Me anba sa progranm la madanm i annan en rol kle.  Annefe mon kapab dir ou nou bann diskisyon inisyal ki’n gannyen avek IOT.  Enn fwa ki enn de pti zafer teknik nou rezourd, i oule pran maksimonm madanm ki annan.  So loportinite osi i la pou madanm.  Apart ki madanm, la i annan serten ki pe engage dan bann travay kominoter ek serten legliz.  Me zot pa ti lo lanpler parey nou pe fer avek pou imsye.  Me la mon krwar zot pou at par lo menm nivo parey nou pe fer ek bann imsye.

Mersi.

 

MR DEPUTY SPEAKER

Onorab Murielle Marie.

 

HON MURIELLE MARIE

Mersi Mr Deputy.

Minis an term bann lensidan ki arive dan prizon, parey en lanmor en prizonnyen.  ki bann prosedir ki ganny antreprann e si Minis i kapab enform sa Lasanble ki rezilta lanket an sa ki konsern en prizonnyen ki ti mor resaman.

 

MINISTER CHARLES BASTIENNE

Mr Deputy, konsernan lensidan ki ti arive boner sa lannen Montagne Posée ki vreman sagrinan kot en prizonnyen ti mor.  Mon kapab konfirm ek sa Lasanble poudir tou travay in ganny konplete par lapolis, par bann eksper neseser.  Ti menm recruit en ballistic expert sorti Sid Afrik, in vini pou nou konn trazektwar kote fizi e tou sa ti ganny tire.  San al dan detay sa lanket ki mon kapab konfirmen se ki Attorney Zeneral in konfirm avek mwan poudir in fini anvoy kes kot Lakour e ki i espekte poudir sa inquest i komanse aparti le 21 Septanm sa lannen.

Mersi Mr Deputy.

 

MR DEPUTY SPEAKER

Onorab Ghislain.

 

HON CHANTAL GHISLAINE

Mersi Mr Deputy.  Mr Deputy, mon kestyon in fini ganny demande.

Mersi.

 

MR DEPUTY SPEAKER

Onorab Arnephy.

 

HON BERNARD ARNEPHY

Mersi Mr Deputy.  Mr Deputy, an vi ki sa bann reform i egziz en kantite lo bann staff prizon.  Eski comme par sa reform minister Gouvernman pe osi mazin revwar scheme of service bann staff prizon pou asire ki zot donn koudmen dan fer sa reform vin en sikse.

Mersi.

 

MINISTER CHARLES BASTIEN

Mr Deputy, pour lemoman nou pape touse scheme of servis prizon.  Me ki mon kapab dir ou, pou prizon mars parey nou swete i marse, se ki gard prizonnyen, en prison officers pe al ganny training entansif.  Nou fer sir poudir nou re get en kou kalite gard prizonnyen ki nou annan pou nou fer sir zot alaoter at all times.  E si zanmen i annan ki gard prizonnyen nou pe vwar poudir zot pa alaoter pou kapab ed nou anmenn sa transformasyon dan prizon, then nou pou napa swa, nou pou bezwen les zot ale.

Me selman an sa ki konsern scheme, pour lemoman nou napa lentansyon pou revwar scheme of service akoz an zeneral san al an detay mon kapab dir poudir prizon i annan li en very good scheme of service. 

Mersi Mr Deputy.

 

MR DEPUTY SPEAKER

Bon nou’n ariv a lafen Statement avek Minis pou zafer Entern.  Nou ava esper Minis e nou ava eskiz li parmi nou e Lasanble ava break e nou a re zwenn 2er apre midi.

 

(Lunch)

 

MR DEPUTY SPEAKER

Bon bonn apre midi tou Manm e tou dimoun ki a lekout.  Nou a kontinyen avek nou Order Paper.  E nou a pran bann Mosyon, e Mosyon ganny table par Onorab Leader Zafer Gouvernman.  Onorab Charles De Commarmond e mon ava envit li pou prezant son Mosyon.

 

HON CHARLES DECOMMARMOND

Mersi Mr Deputy Speaker.

Mr Deputy Speaker, Mosyon ki devan nou i en Mosyon ki senp e straight forward.  Mosyon i lir koumsa, ki dan en lespri pou ede kree e platform pli zis e kree plis loportinite nou Lasanble pe demann Gouvernman pou konsider grant koman en lankourazman pou biznes.

Mon anvi etablir premyerman pou sa mo grant la fodre pa ki nou zis pran li konmsi Gouvernman mon Mosyon pe demann Gouvernman nek i donnen.  Deza Gouvernman dan Sesel i donn en kantite keksoz, en kantite resours a son piblik, a son popilasyon.  Mon pa pe dir i zis en kestyon donnen, left, right and center.

E sa call pou en grants scheme, pou en scheme grant i anliny avek komitman Gouvernman Mr Deputy Speaker.  Pou kree en platform, si ou le dir, pou anmenn economic growth.  Devlopman ekonomik, pou permet annan loportinite, zis petet soustenabilite e an menm tan kree larises pou pei.  An menm tan se en propozisyon ki Gouvernman i kapab gete, ofer dan serten Sekter spesifik Mr Deputy Speaker.

En Gouvernman parfwa i regarde, i dir ok a sa moman nou anvi met lanfaz lo tel area devlopman.  Par egzanp aktyelman la, Gouvernman Sesel i pe met lanfaz lo blue economy.  Lo devlopman bann resours maren, lekonomi ble ensidswit.

Nou annan en lot area parfwa ki Gouvernman i dir la osi nou oule konsantre lo lenerzi renouvlab.  En lot Sekter ki i oule en promosyon.  I oule dimoun i al dan sa direksyon pou anmenn soustenabilite, pou anmenn economic growth ensidswit.

I annan serten lezot area.  Par egzanp i annan pou bann kestyon lanvironnman.  Pou fer ki bann keksoz ki resiklaz, pou anmenn en lankourazman pou nou kapab resikle keksoz par egzanp koman papye, boutey ensidswit.  Tousala i bann area ki parfwa en Gouvernman i kapab dir mon oule ankouraz sa kalite devlopman.  Ou parfwa en Gouvernman i kapab ouver laport pou en bon pe letan, me i kapab osi donn en serten letan spesifik.  5an, 4an ensidswit.

En lot area, se ki Gouvernman i kapab dir par egzanp sa i anliny avek mon bann Mosyon ki mon’n pase avan, tou dernyerman dan Lasanble.  I kapab dir ok, nou oule get inovasyon.  Dimoun ki vin avek bann keksoz inovativ dan biznes, dan lekonomi, nou devret donn zot en lankourazman.  En push pou zot kapab perform pli byen.

Ou annan en lot area, par egzanp lo pou promot si oule dir bann nouvo konsep biznes, so sa osi i en lot area kot Gouvernman i kapab dir bann dimoun ki vin avek bann nouvo konsep nou osi donn li en lankourazman.  Apre nou annan osi nouvo biznes.  E an menm tan nou kapab dir ki dan plizyer area, plizyer domenn dan lekel Gouvernman i kapab dir en biznes ki pe kree en sel kou en bon pe lanplwa.  Konmsi personn pa’n mazin lo la e en dimoun i vini i mazin lo la i dir be ok, en bann biznes koumsa nou kapab donn zot sa kalite lankourazman en grant.

Ou annan osi en lot dimansyon sa ki mon pe demann Gouvernman pou entrodwi.  Serten keksoz en pti pe parey en scheme ti ete en letan, me kot ou target osi nouvo biznesmenn.  Nouvo dimoun dan biznes.  Akoz parey mon ti pe dir, dan dernyen Mosyon, si mon met en koneksyon ant sa ki mon pe propoze la ek sa ki’n deza pase se ki Gouvernman i depanse ek son dimoun, en kantite.  Nou Gouvernman in train plizyer kalite travayer.  Nou’n traindepi teacher, nou train depi nurse, nou train depi pilot, kaptenn, you name it.

Tou sa i annan en kou ki vin avek sa.  Me dan biznes parey nou dir, nou pe promot pti biznes, SME’s, me an menm tan letan ou gete i annan en de ekilib.  De ekilib dan le sans ki ou annan bann gro, gro biznes ki’n deza etablir, deza pe perform fantastik, i lwen li.  Li i ganny konsesyon, nou’n vwar en kantite konsesyon ki’n ganny donnen dan nou pei.  Kantite.  E ki letan ou met son value ansanm nou pe koz mil e parfwa milyon menm.  Plizyer mil e menm dan milyon bann biznes in gannyen.

Par kont sa ki li i pe komanse li, avek tou sa domenn ki mon’n dir avan, en biznes ki pe komanse li napa kolateral par egzanp.  I oule seye, i annan tou sa bann bon nide.  Me i napa kapasite, kapabilite pou komanse.  Se la kot ou anvi ou pti biznes, ou anvi ou Seselwa i monte dan pou kree economic growth.  E dan bann diskisyon nou osi vwar poudir i annan plizyer largiman ki ganny anmennen poudir ki pti biznes i anmenn i zwe en rol enportan dan kreasyon economic growth.

Alor, si nou krwar ladan si i korek sa, nou merit annan en fason pou donn li en push sirtou pti biznes, sirtou biznes serye avek inovasyon. Par egzanp mon pe dir, dan serten sa bann kategori.  Gouvernman i a deside li dan ki moman, ki kalite kategori, ki kalite group ki i krwar i bezwen annan sa push sa lankourazman, pou kree en serten platform ekilibre.

Akoz sansan sa pti biznes la SME’s, i pa pou kapab zanmen grandi.  Sa bann push i ed li pou li kapab monte e grandi e compete.  Konpran?  I ava ed li pou devlope.  I ava si oule vin sa Grant.  Alor Gouvernman li i kapab pa bezwen al re-envant larou.  Deza la ou annan SBFA.  I kapab met sa responsabilite ek SBFA. Prezan i annan en Board son Board li i deside dan sa kategori.  I pa bezwen al donn biznes left right and centre, sa.  Me dan sa kategori ki i oule sa performans i ganny akseler-e, i ganny ogmante, i ganny ankouraze.  E sa i ava ankouraz nou bann biznesmenn Seselwa pou kapab antre dan biznes.  Sansan i vin difisil e ekstrememan difisil parfwa, pou li kapab antre dan biznes e komans zwe en rol enportan li osi.  I pou vwar poudir larises son pei, biznes dan son pei, i al pou en bann lezot dimoun i pa li ki lobzektif Gouvernman.

So, se sa rezon mon Mosyon i pe demande alor ki Gouvernman, i get sa Grant la dan sa dimansyon.  Prezan li i kapab deside son Grant i kapab ant R20mil ziskan R300 mil si oule plis, mon pa konnen.  Sa amount la i ava ganny deside.  Mon pa pou al antre ladan dan sa Mosyon.

Me, Mr Deputy Speaker sa ki mon pe propose mwan, i pa en nouvo keksoz.  En kantite pei i annan sa kalite sistenm.  Langleter zot apel sa Seeds capital.  Plizyer lezot pei i annan bann sistenm parey.  I ankouraz.  Lerop lezot landrwa Lerop, Lalmany i annan tel sistenm.  An France i annan tel kalite sistenm. Tousala pou ankouraz serten Sekter, serten groupman biznes.

Par egzanp, Gouvernman i kapab dir, dan sa peryod kot nou ete la, nou oule donn en push lagrikiltir, prodiksyon manze, Food Security, ok.  Alor si i dir, bann  dimoun, bann biznesmenn ki oule al dan sa direksyon, nou pou donn zot en pushSa enn ki dan taxi pa pou benefisye li.  Sa enn ki fer lezot kalite zafer ki enport marsandiz pou vann i pa ladan li.  I dan sa Sekter spesifikman, alor i a permet growth dan sa Sekter.  E sa i a bon.  E se sa parey mon pe dir dan serten biznes dan serten pei kantite pei, i annan en tel sistenm.

So, nou pe demande ki nou osi Sesel, nou ganny en tel sistenm entrodwi dan nou pei, kot nou kapab toulezan, Gouvernman i met akote en serten sonm larzan dizon R60 milyon dan le zanviron pour sa kalite devlopman biznes e nou donn li koman en Grant parey nou dir.  Nou’n vwar dernyerman bann Mosyon ki’n vin devan nou Lasanble, isi kanmenm sa bann dimoun i dir nou pa pe travay, nou pe travay en kantite.  Nou’n vwar poudir bann Labank i fer en baryer avek devlopman biznes.  Dimoun pa kapab gannyen, pa fasil pou ganny en loan.  I annan tout en bann kalite kondisyon ki normalman nou bann SME’s i vwar li difisil pou li meet.

So, sa Grant la, i avan ed li pou fasilit sa komansman akoz enn fwa ki in komanse, i ale byen.  Ou konpran?  I pa en kestyon ki Gouvernman i pran larzan i met dan lanmen sa biznesmenn.  Pa sa ki nou pe dir.  I annan en fason ki sa i kapab ganny fer Gouvernman i vwar son fason meyer, kot i pey direk par egzanp a sa dimoun kot i pe fer vini sa masin, sa raw materials ensidswit pou permet sa biznes sa Sekter biznes devlope.

Alor ki sa dimoun.  Prezan ou monitorI bezwen annan en sistenm, en sistenm kot i ganny monitor.  So, Gouvernman i a etabli sa bann regleman, son sistenm evalyasyon e son sistenm kontrol.  I preski parey pou bann loan normal zis la i vin koman en form of a Grant.

Mr Deputy Speaker, sa ki mon pe dir la mwan, i en bon a mon avi, i en bon keksoz.  I en keksoz ki biznesmenn, sirtou bann ki serye i ava annan en lankourazman.  E la nou pe koz sirtou bann biznes ki annan en pe high risk.  En dimoun ou vwar poudir i pe al pran en risk ki i demann sa sipor.  I demann sa sipor.  Bokou dimoun la ater la, i annan bann zoli lide bann bon lide, me i napa kapasite pou met sa lide an valer pou met sa lide an real economic term e pou anmenn larises pour nou pei.

Dan sa lespri ki mon pe demande alor, ki Gouvernman i vwar posibilite entrodwi sa sistenm Grant, pou biznes dan sa bann diferan Sekter ki li i ava deside entrodwi e etabli.  Parey mon dir i ava annan sistenm Board en sistenm kontrol.  I ava annan en fason byen etabli ki sa bann Grant ava ganny kontrole, i a konmsi ganny fer ki dimoun pa ava abize lo la.  Sa ki nou oule evite, evit labi evit abuse, akoz nou annan osi bann rikord dan lepase kot dimoun i vini, in benefisye ek bann keksoz ki Gouvernman in entrodwi e i pa’n fer sa keksoz korekteman.  E ou vwar poudir sa i pa byen. Me la nou pe dir en keksoz ki bezwen ganny byen kontrole byen ganny met an valer.

Ou annan en lot area ki mon ti ava kontan mansyonnen, kot en tel sistenm Grant ti kapab osi vin an mars.  En group pou protez nou bann leritaz.  Ecotourism oubyen koman ou dir sa, nou kiltir pou promot nou kiltir.  La la nou’n vwar Patrick Victor in etabli en Fondasyon byen, fantastik, nou siport sa.  E pou promot e kree valer ladan, dimoun osi i kapab al dan sa bann direksyon.  E parfwa nou vwar dimoun ki oule met an valer bann Sit Kiltirel, pou kapab vin en keksoz ekonomik en keksoz ki ava atrakte touris, me i napa sa komansman.

Kekfwa sa Sit i trouv lo son later kekfwa sa Sit i trouv lo later Gouvernman, I don’t know, me selman dimoun ki oule fer marse sa, alor li i napa sa komansman, se sa ki mon pe demande mwan.  Ki Labank i pa pe kapab ed li e nou demande alor ki, pou li ganny sa start up la sa komansman, en Grant byen organize, byen etabli i kapab vin sa loportinite pou permet dimoun, biznesmenn devlope e al de lavan dan nou pei.

Avek sa mon ti ava demande ki mon ganny sipor nou Lasanble.  I pa en Mosyon ki konplike, me i en Mosyon ki fer en kantite sans pou dimoun ki oule al dan biznes, ki serye.

Mr Deputy Speaker, I beg to move. 

Thank you.

 

MR DEPUTY SPEAKER

Bon, Mosyon in table devan nou Lasanble, in ganny prezante, okenn Manm ki oule segonde?

Onorab Pillay?

 

HON SEBASTIEN PILLAY

Mersi Mr Deputy Speaker.  Mon oule segonn sa Mosyon e mon ti a kontan dir detrwa pti mo.

 

MR DEPUTY SPEAKER

Proceed.

 

HON SEBASTIEN PILLAY

Mersi Mr Deputy Speaker.

Mr Deputy Speaker. An 2014, Lasanble ti pas en Lalwa pou kreasyon en Lazans ki nou ti apel li, The National Institute of Science Technology and Innovation e mon krwar Mosyon ki Onorab De Commarmond in anmennen ozordi, i konnekte avek sa Lalwa ki nou ti pase an 2014.  It was assented to on the 15th of April, 2014.  E sa National Institute of Science and Technology enn son rol primordial sete pou foster inovasyon an relasyon avek biznes e pa zis biznes me inovasyon dan domenn Lasyans, dan lezot domenn.  E i ti pou fer sa atraver diferan mechanism.  E enn bann konponan sipor enportan sa mechanism, se en laspe finansyel ki anba sa Lalwa in defini ki; the fund of the institute shall consist of monies appropriated by the National Assembly for the purposes of this Act.  Monies accredited from its operations.  Monies from time to time received by the Institute with the approval by the Ministry by way of donations and Grants from any source whatsoever. 

So, Basically sa Mosyon i pe konekte avek en mechanism ki nou deza annan an plas, ki nou kapab met lanfaz ki nou komans fer li marse for the purpose of focusing en pti pe lo kreativite e inovasyon.

Les mwan pozisyonn byen sa ki mon pe sey dir la Mr Deputy Speaker, akoz souvandfwa ou konnen nou tant pour nou fokaliz en kantite lo bann lezot issues e nou oubliye poudir dan nou pei, i annan dimoun ki annan en kantite lide ki anvi fer en kantite keksoz me zot pa ganny sans akoz bann lezot issues i pran presedans.  E Nasyonalman nou nasyonaliz sa bann keksoz, ouswa nou politiz sa bann keksoz, kot apre ou vwar poudir malgre ki sa dimoun ti pou annan en nide, i difisil pour li kapab antre e fer avan sa nide pou fer li al pli devan.

Mon pou donn ou en legzanp tipik Mr Deputy Speaker.  Dan mon lanmen la, mon annan Official Gazette limero 44 ki’n ganny table devan Lasanble e lo son dernyen paz son Official Gazette, i annan en Notice ki en Cautionary Notice ki’n ganny mete par en dimoun ki mon prezimen i en envanter e sa msye i en msye Sid Afriken.  E lo la in met en Copyright lo en nide ki i apel en Heat Exchange Assembly.  Ok, i en lekipman ki mon prezimen, akoz dan sa Notice i dir ou koumsa poudir;

Notice is hereby given that Harry Dean Kassel, a South African National of No.1 Morningside Sandton Gauteng bla, bla, bla.  I dir ou li ki annan patant lo sa nide e okenn dimoun ki kopi, imite sa nide in any way infringes the rights of the said design and be proceeded against according to the Seychelles law under the protection of design registered in the United Kingdom.

So, nou vwar poudir all ready la i annan de sirkonstans kot dimoun ki anrezistre pattented ideas ki zot in fer, pour ki zot kapab protez zot nide.  Be difikilte avek sa, se ki sa bann dimoun zot pa bann biznesmenn zot.  Sa lide i vin en biznes apre ki sa dimoun in fini ganny ase letan pou li reprodwir oubyen refine son lide, pou li ganny en product, en final product pou li al vann ek son bann konsonmater.

Me dan moman kot i pe come up avek sa nide, sa dimoun parfwa i napa mwayen pou li kapab aste bann materyo de baz ki i pou bezwen pou li kapab come up ek sa nide.

Mon pou donn ou en lot legzanp tipik.  Dan bokou ka mon krwar lo televizyon bokou zot in bezwen vwar, kot i annan bann avertisman pou diferan kalite prodwi ki ede pour ou slim.  I annan ki apel Arm Blaster, i annan ki donn bann diferan kalite non.  Me tou sa bann prodwi ki ou vwar i ganny prezante dan sa bann progranm commercial, sa bann commercial koumsa, i ganny fer pou teste vyabilite sa prodwi komersyalman.  E a son lorizin sa prodwi, se en dimoun ki’n design sa nide, ki’n patent li e ki in bezwen al kot en lot pli gran distribiter ki li i annan akse avek finans, avek funding pou li market sa prodwi.

E mon krwar isi Sesel i bezwen annan dimoun ki pe rod sa loportinite, me ler ou pou regarde par egzanp let’s say demen mon dir ok, mon’n come up avek en nide ki pou, mon pa konnen, ki pou revolutionize Maritime Safeties isi.  Ler mon pou al kot en Labank ki donn loan, i pou dir mwan koumsa fodre mon annan en viable business plan.  Mon annan en nide ki mon kapab kree en keksozMe ozordi  nou pa pe vwar sa loportinite, sa lespas kot sa dimoun i kapab vini, prezant son nide e ganny en serten sours finansman ki permet li realiz sa nide dan en serten fason e apre sa nide i a vin komersyalman vyab.

E fodre pa oubliye, ki en kantite bann keksoz ki nou servi ozordi, mobile phones, headphones, you name it, in ganny design by someone somewhere ki i ti hold sa patent originally me ki’n arive avek letan ler keksoz in komersyalize, sa keksoz in vin en lekonomi dan li menm pou serten pei.

Sesel ozordi nou pe fas avek serten issues an se ki konsern resours natirel e i enportan pour nou kapab promot sa lespri kreativite e inovasyon dan nou bann zenn depi en tre zenn az.

Mon pou donn ou en lot legzanp, Mr Deputy Speaker, kot sa i kapab fer referans avek sa ki nou pe dir.  Mon pa konnen si i annan nou ki rapel, pandan bann Science Fairs lontan ki ti ganny organize pou bann Lekol, Lekol Point Larue ti kontan vin avek en proze kot mon krwar i ti pe fer, en letan i  ti pe servi pano soler, eksetera.  E sa ti bann tre, tre bon nide ki en Lekol ti pe servi e why not si nou ti annan posibilite pou donn sa Lekol en Grant, a sa moman, pou fer li al fer en pe plis resers oubyen aprofondi en pti pe plis, dan use of that technology ki manrmay menm ti pe come up with avek help zot Science Teacher.  Ki mannyer sa ti pou kapab benefisye zot?

Mon rapel Mr Deputy Speaker, ler mon ti NYS, par egzanp, ti annan Science Fair ankor, ti annan bann manrmay ki ti pe fer technology e zot ti design en traffic light, ki mannyer i marse.  Ou konnen all this e mon pe koz ou that was back in 1994.  Malgre ki sa teknolozi was around, but that was something ki sa bann manrmay in come up dan en Lab.  En Laboratwar NYS isi Sesel, non pa dan en gran Lab Palo Alto California oubyen dan bann lezot pei kot i annan bann gran, gran teknolozi, bann gran, gran abilite.

E mon krwar en keksoz ki bokou Seselwa nou fer parfwa, nou sell short nou prop Nasyon e krwar poudir nou annan en limit.  Me nou napa en limit.  Pour nou Seselwa, nou abilite pou nou kapab fer en keksoz the sky is the limit.  E mon asire ozordi si ou al fer resers dan bann gran, gran Company partou deor, ou pou come up avek bann Seselwa ki annan bann pozisyon kle, ki pe travay dan sa bann Konpannyen.

Me si nou retourn back to nide sa Mosyon, se entrodwi en Grant e mon krwar dimoun i bezwen konpran why ki Lasanble ozordi pe koz lo en Grant apre ki nou’n fek koz lo en Mosyon ki konsern kontinyen promot sa bann nide ki come out of the National Show.  Mon krwar i ti pou pli bon si nou ti kapab vwar en National Show kot en lannen en dimoun i vin avek en nide e son lot lannen ler i vin dan National Show, in grandi e la in anmenn avek li 3/4 dimoun ki pe travay ek li, ki pe aprann fer sa biznes.  Olye annan sa over-reliance lo bann established institutions, sa bann dimoun i kapab devlop nouvo fason fer keksoz ki pou en lavantaz pour pei e i vin en lavantaz pour kreativite.  E pli enportan, i pou motiv zenn dan Lekol, pou li aprann plis pou li devlop plis konpetans.

Ozordi, Mr Deputy Speaker, mon pa pe vwar menm lanfaz ganny met, par egzanp lo Science Fair pour bann Lekol.  E pou mwan mon vwar poudir sa, si i annan, petet i devret annan en pe plis medyatizasyon sa bann keksoz, akoz i annan en bann nide ki come out of sa, ki kapab benefisye pei.  Bokou gran pei ozordi i servi sa bann Science Fairs tel koman Zapon, Lanmerik, Lasin, Sengapour, i servi Science Fairs ki ganny organize pour bann Lekol, pou li kapab capture bann nide.  E i annan bann dimoun ki vini, sorti dan bann gran Konpannyen, ki vin ofer sa bann zenn bann Grants bann Research Grants pour zot further zot nide pli tar.

Ozordi nou annan Liniversite Sesel ki pe komans devlope e why not ki demen nou napa nou en National Centre for Research an se ki konsern Tropical Diseases par egzanp oubyen an se ki konsern Environmental Science.

Ozordi nou pe fer fas avek bann problenm Hairy Caterpillar,  nou pe fer fas avek bann lezot problenm avek bann lezot pti bestyol ki fatig dimoun.  Me i posib ki out there, i annan en Seselwa ki annan en lide ki i pe servi ki i pe deal avek sa sityasyon, me i pa kapab komersyaliz sa nide akoz i napa abilite.

So, mon krwar ki Mosyon i en tre bon Mosyon e dimoun i devret pran li from sa perspektiv ki i pe demann something other than the usual way ki nou servi pour nou kapab fasilit epanouisman biznes.  Ok i normal mon dir ok, mon oule fer en pti biznes mon ou le fer en biznes transpor.  I ok.  Tou dimoun i vwar vyabilite akoz ou pou ganny kliyan touris ou pou ganny eksetera.

En lot biznes pour mwan fer snacks kot mwan dimoun i vwar vyabilite akoz mon kapab al vann snacks.  Me ler en dimoun i vin avek en nide ki petet paret en pe abstract, dir li al kot en Labank, i pou vwar li vreman difisil pour li kapab ganny okenn Grant oubyen okenn loan, pou li kapab fer son biznes.  Me souvandfwa sa i dekouraz en dimoun, akoz ler i kalkile poudir swa i bezwen vann son transpor, swa i bezwen al rod prete larzan i dekouraz li.  I dir plito mon pa fer.  E fodre nou pa oubliye poudir en kantite inovasyon ki’n arive dan lemonn ozordi i vin gras a bann dimoun ki’n asize dan zot garaz, ki’n asize dan zot lasanm, ki’n come up avek bann keksoz ki ozordi nou tou nou pe servi.

Ozordi Sesel mon vwar bann zenn i komans devlope avek social media eksetera.  Why not demen nou zenn i pa komans en mon pa konnen mwan en site something like that.  Mon pa en koneser dan web design eksetera, me selman mon krwar i annan zenn ozordi ki pe devlope.  Why not en zenn Seselwa pa ekrir en Game, ki bokou zenn i kontan enjoy. 

Mon krwar parfwa, nou annan en Sesel, nou’n devlop en tandans pou nou always treat the serious issues.  Only treat the serious issues.  Only treat the Housing issueIt is important, yes. Education issues, yes.  Me kan ki nou pou tret bann issues ki fer nou konmsi happy as a person? Ki fer nou konmsi annan sa nide pou think beyond lorizon ki nou annan ozordi.  And this is something ki nou bezwen fokaliz lo la en pti pe e mon krwar ler nou pe regard sa Mosyon sa Mosyon i vin a en moman tre propis.

But at the same time Mr Deputy Speaker, mon pou repet en keksoz ki mon ti dir ler nou ti pas sa Lalwa e mon ti kosyonn sa Minis ki ti prezant sa Lalwa, se ki ler nou prezan en Lalwa nou bezwen osi met mechanism pour nou kapab fer li marse.  E nou’n vwar poudir avek National Show ki nou’n vwar, EXPO ki nou’n vwar, loportinite e kantite nide pou kapab tire from sa, i bokou.  Ki ou bezwen sey fer fason pou ou kapab dekouver sa bann Lazans, fer zot marse davantaz.

E mon oule an terminen remind Lasanble, par egzanp si nou regard lo televizyon ankor nou pou vwar poudir Barclays, Langleter i ofer serten Grant pou Innovation.  Sid Afrik i annan Konpannyen Telekominikasyon ki ofer Grant pour bann zenn ki pe devlop fer bann pti films par egzanp bann short films, short stories.  En Grant i pa vin zis ki mon pou al fer en keksoz ki mon kapab tyonbo dan mon lanmen tanzivman, ale al anmennen, al vann.  I annan en kantite nide ki abstre ki ou pa pou kapab vreman quantify, me ki apre selman i annan en rannman ler ou kapab translate li dan en keksoz reel.

Koman en ansyen Ansennyan Matematik, mon kapab dir sa Lasanble poudir en kantite nide ki ou pou come up avek dan Matematik i pou look abstract, me ler ou kapab translate li lo papye i bann keksoz ki annan en kantite valer.  Me at the same time, nou pa pe promot sa kreativite.  And this is a worry Mr Deputy Speaker, akoz ozordi si ou dir ek en zenn dan lekol, ekri en konpozisyon, i pou ekri ou en descriptive composition.  I a dekrir en keksoz, be ler ou dir li critically analyse en keksoz, par egzanp akoz sa ver i bezwen annan sa kalite shape ki i annan, pour ki rezon en keksoz i koumsa, they fall shortAnd they are falling short because as a society, nou pa pe fer ase pou nou promote that innovativeness.  And that is why ki mon santi poudir mon ti bezwen entervenir lo sa Mosyon, koman en former educator, akoz tousala, sa ki manrmay I vwar i dekoul from sa ki pe sorti dan son lanvironnman.

So, Mr Deputy Speaker, mon krwar sa Mosyon i enn ki trez enportan e mon ti a kontan ki mover Mosyon ler i fer son Right of Reply, i fokaliz lo sa mechanism ki deza annan an plas pou ki ou kapab anmenn sa bann Grants ansanm.  E i pa vedir poudir demen, i pou annan 20 dimoun an deor sa Lazans ki pou vini i pou ganny sa Grant, non.  I pou annan en prosesis ki ou met an plas.  Me annan abilite pour ou al ganny sa Grant is a first step pou ou kapab annan sa innovativeness dan nide.

Avek sa Mr Deputy Speaker, mon oule dir mon pou donn mon sipor e mon pou toultan donn sipor bann Mosyon ki donn loportinite pep Seselwa devlop bann nouvo nide kree bann nouvo keksoz.

Mersi.

 

MR DEPUTY SPEAKER

Onorab Samson.

 

HON DEREK SAMSON

Thank you, Mr Deputy Speaker.  Mr Deputy, sa Mosyon devan nou apre midi, mwan mon retir en lobzektif prensipal ladan, se ki finalman nou ti a kontan ki nou bann i dimoun i benefisye bokou plis.  Ler mon dir nou bann dimoun, nou bann sitwayen ki pe travay, ki pe viv tou le zour.  Ki pa neseserman dan biznes, me ki benefisye lo prodwi ki bann biznes i donn nou dan pei.

Vedir ki parey nou konnen dan concept Economy, si i annan plis supply en item lo marse dizon ki en biznes pe prodwi, nou konn tre byen ki sa item pou bezwen pli bon marse.  Supply and demand.  Nou konn tre byen ki mannyer sa konsep i marse.

So, the more business ki Sesel i kapab pe rezouir, pe vwar be it ti pti, mwayen oubyen gro.  Finalman se nou popilasyon, se lepep ki benefisye avek bann prodwi ki en pti pe pli abordab, favorab pou konfor son lavi e lavi son fanmir.

Me parey mover Mosyon in dir ler in komanse, ki mon pa oule fer gran repetisyon Mr Deputy.  Mosyon malgre i ganny prezante koumsa ozordi, poudir Gouvernman i bezwen vwar posibilite pou donn Grant, sirtou bann pti biznes, bann emerging businesses.  Gouvernman in fer en kantite pour biznes dan nou pei.  E konsesyon i en legzanp tipik ki mon pa pou al bokou lo la, me selman nou bezwen realize ki i annan bokou kalite group biznes ki pe benefisye avek kantite konsesyon dan sa pei e ki kapab ganny konpare avek dizon en Grant ki zot pe deza gannyen.  Si nou al dan Sekter Tourizm li menm premyerman, i enkrwayab kantite konsesyon ki egziste kot i annan bann tax ki serten group dan biznes Tourizm pa pe peye.  Konsesyon Fuel ki egziste dan Sekter Lapes, dan Sekter Lagrikiltir osi i annan en kantite konsesyon ki Gouvernman Parti Lepep.  Ki Gouvernman Parti Lepep in fer depi ler i egziste koman en Parti ki pe diriz sa pei.

E Mr Deputy Speaker, nou petet nou popilasyon petet i pe abitye avek the term Grant, ler dizon bann pei zanmi i abitye donn nou bann gran kantite larzan, ki byensir definisyon i Grant pou diferan domenn dan nou devlopman pei.  E bokou fwa parey nou konnen, en Grant ler i donnen ou pa bezwen re peye i pa en loan, me i en lump sum larzan ki ou resevwar pou ou fer en keksoz spesifik ki ou’n tonm dakor avek sa dimoun ki pe donn ou pour ou envestir avek sa larzan.

Mon pa pou al dan detay, Mr Deputy akoz mover Mosyon in koz en pe lo la.  Me mon kontan lafason ki mover Mosyon in dir ki nou pa pou kapab donn sa Grant nenport ki dimoun, oubyen nenport ki biznes pou kapab resevwar sa Grant dan nenport ki fason osi.

Mon a donn en legzanp Mr Deputy.  Nou konnen ki konmela, pou komans en biznes ou bezwen al kot en Labank Komersyal e menm parfwa i annan detrwa Labank ki Gouvernman in sey enfliyans serten rediksyon dan tax oubyen kot Gouvernman in etabli serten kondisyon ki pli favorab avek serten group anba nou sistenm Gouvernman.  Parey in ganny mansyonnen pli boner SBFA petet i enn.

Me nou konn tre byen ki lamazorite Labank Komersyal enn ki vin dan mon latet la se DBS, nou konn tre byen ki a en pwen ou en lot ler ou pou demann en loan sa bann Labank pou komans en biznes zot pou dir ou vin avek en kontribisyon.  E mwan mon krwar sa i en lespas kot petet sa ki nou pe demann Gouvernman la pou anmennen as Grant, i devret kapab antre.  Si en Labank pe demann en dimoun ki pe al komans en biznes en serten poursantaz kontribisyon pou olye al burden sa dimoun ki deza napa nanryen pou komans en biznes, petet Gouvernman i kapab la antre avek en kondisyon pou dir, be gete, sa ki Labank pe demann ou as kontribisyon, nou, nou pou donnen pour ou, ou pa bezwen rann nou nanryen an retour.  Mon krwar sa i le meyer fason.

E petet en lot laliny ankor pour nou vwar otour sa Mosyon kot i konsern Grant, ki Gouvernman i devret kapab donn bann pti biznes, Mr Deputy, se sours sa larzan.  Kote Gouvernman pou gannyen li?  Kote Gouvernman pou kapab pran oubyen gannyen poudir, be vwar la mon pe donn ou sa larzan, sa Grant pour ou kapab komans ou biznes.

Mr Deputy, mon’n dir taler i annan ti pti, mwayen e gro biznes dan sa pei.  Nou konn tre byen ki bann gro biznes pe pey CSR Gouvernman.  Nou konn tre byen ki toulezan i annan en kantite milyon ki serten biznes i donn Gouvernman an term CSR lo kalite profi ki zot in kapab fer dan peryod en lannen.  E byensir ou’n fini vwar, Mr Deputy, kote mon pe ale avek sa largiman.

Nou devret kapab petet servi sa CSR pou fer li desann towards bann pti emerging business ki pe monte.  E enn bann field enportan ki mon krwar ler nou dir emerging businesses,pti biznesmenn, i annan the famous Blue Economy ki nou Prezidan i pe sanpyonnen pour en bon pe letan ziska la.  Ki dimoun, nou popilasyon i kapab envesti ladan.

So, mwan mon krwar ki petet enn parmi bann premye areas ki Gouvernman i devret konsantre lo la, pou donn Grant bann pti biznes se dan Blue Economy li menm, kot nou ava kapab, en legzanp se Aqua Culture.  Nou ava kapab annan sa loportinite pou nou ogmant lakantite pwason oubyen bann fridmer ki nou kapab sonnyen pou finalman i kapab antre dan lekonomi nou pei.

E Mr Deputy, letan mon pe al konklir la, mon ti a va kontan zis partaze pour mwan anmenn en pti pe pli lwen sa Mosyon, ki Grant i pa neseserman zis towards business ki mon krwar Gouvernman i devret kapab ankouraze.  Si nou pe koz Grant towards small businesses oubyen emerging businesses, nou devret osi kapab ankouraz bann biznes prive ki parey taler mon’n dir,  zot pe donn CSR Gouvernman, zot pe fer en kantite profi pou vwar lezot loportinite pou siport lezot biznes ki pe kapab monte dan lavenir.

E mwan mon pou al pli lwen mon pou al lo zisteman sa meeting ki Liniversite Sesel ti fer, Sanmdi midi kot Liniversite Sesel Anse Royale.  En pwen ki personnelman mwan menm mon ti anmennen pandan sa meeting, ki mwan mon krwar bann biznes i devret kapab ofer Scholarship bann etidyan sirtou bann ki pe anvizaze dizon dan Business Administration.  Ki anvizaze partisip dan bann letid ki annan pou fer avek Lanvironnman, Lekonomi nou pei, pti biznes, Business Administration dan pei.  Petet ofer serten Scholarship en serten group etidyan dan nou pei, olye ki toultan nou esper NHRD pou fer sa, atraver Bidze ki nou vot lo la toulezan.  Me pou ankouraz nou bann biznes pou al bokou pli lwen, ki zis regard zot biznes, fer grandi zot biznes.  Me ankouraz konpetisyon e petet parey mon pe dir donn scholarship bann manrmay ki pou annan lentansyon dan lavenir pou fer en biznes pou komans en pti biznes.

E finalman parey mon’n komanse Mr Deputy, se pa nenport ki pe benefisye finalman.  Se nou popilasyon, se lepep finalman ki pou ganny li en lavi pli konfortab, en lavi kot i pou petet pli fasil pou li kapab sonny li ek son fanmir apre ki nou pei, in kapab ganny sitan kantite biznes dan Private Sector ki pe fer marse parey nou konnen moter nou lekonomi e nou bann dimoun ava dan en pozisyon pour dir, be vwala sa Gouvernman pe vreman bouz pei.  Sa Gouvernman pe vreman travay.

E Mr Deputy, sa travay i komans la anndan, akoz se nou la anndan ki pe dir ki pou fer.  Se nou la anndan ki pe dir ki mannyer nou ti a kontan vwar nou bann biznes dan pei i grandi.  Pa neseserman zis bann gro biznes kontinyelman grosi, me bann pti biznes avek respe mon dir, bann pti dimoun ava kapab zot osi en zour ganny en biznes.  Fer grandi pei e ki tou dimoun finalman ava satisfe, ava kontan.

So, finalman pou terminen Mr Deputy, mon pou donn full sipor sa Mosyon e mon ti a kontan felisit nou Leader Zafer Gouvernman pour en tel Mosyon.

Mersi bokou.

 

MR DEPUTY SPEAKER

Onorab Arnephy.

 

HON BERNARD ARNEPHY

Mersi Mr Deputy, bonn apre midi Mr Deputy, bonn apre midi tou dimoun.

Mr Deputy, mwan osi mon pou zwenn avek mon bann lezot koleg pour mwan siport linisyativ propoze par Onorab De Commarmond, akoz mon panse ki i fer en kantite sans.  Nou pe koz lo kwa egzakteman?  Nou pe koz lo anmenn plis sipor pou bann endividi ouswa group ki annan sa lespri inovatif pou zot kapab ganny sa posibilite pou zot kapab devlop sa lespri bokou pli lwen.

Mr Deputy Speaker, lide par deryer Mosyon se annou fer sa diferans ant en Grant ki nou apel en don avek bann Traditional Loan Scheme ki egziste.  So, parey bann lezot koleg in dir isi Sesel ozordi en kantite scheme loan i annan an plas, ki ed en kantite dimoun.  Me sa ki nou osi konstate se ki sa bann scheme loan i annan en kantite kondisyon ki atase avek e ki souvandfwa i vin en deterrent pour en dimoun ki vreman annan sa lespri pou fer bouze son lespri devan, me i santi li bloke akoz sa bann kondisyon.

Devlop bann tel lide parey loter Mosyon in fer resorti, pou annan diferan lavantaz.  Enn, economic growth nou pei ki nou pe koz en kantite lo la ozordi.  Ozordi Gouvernman pe sorti dan biznes as usual e pe pas sa avek Sekter Prive.  Me an menm tan nou konnen ki malgre Sekter Prive i moter lekonomi, still nou bezwen bann striktir Gouvernman an plas, atraver bann Policies, atraver bann lezot sipor, pou kapab ede pou fer sa economic growth kontinyen grandi.  E la mon mazinen sipor finansyel i pou en eleman enportan.

Ozordi osi nou konnen poudir nou pe koz lo en kantite lo loportinite lanplwa, sirtou pour nou bann zenn.  Nou’n kree en kantite Lenstitisyon atraver nou sistenm Ledikasyon.  Ozordi nou annan nou en kantite bann Lenstitsyon ki train nou bann manrmay e sa bann Lenstitisyon en kantite zot, manrmay i aprann en kantite lo inovasyon.  Par egzanp ozordi nou annan Seychelles Institute of Technology,SIT.  ok, kot bann etidyan an menm tan ki zot fer bann pratik curriculum en pe tradisyonnel, me i osi annan sa konponan inovasyon avek, kot mon mazinen bann diferan kour ki donnen lo baz Sertifika, Diplonm, Diplonm Avanse i annan en kantite zenn ki kapab vini avek bann nide inovatif, me apre kote son lide i ale?

Si i napa sa sipor, nou vwar poudir posibleman son bann lide i mor lanmenm.  So, mon mazinen Gouvernman si i konsider en tel demann ki nou Lasanble pe fer, li Gouvernman i ava rod son mekanizm ki mannyer li i pou ganny son finansman, pou li an retour kapab siport sa bann endividi ouswa group ki zwenn ansanm pou zot kapab devlop bann tel lide.

Mr Deputy Speaker, mon konnen poudir i annan serten Lorganizasyon Enter- Gouvernmantal ki asosye par egzanp avek bann pei ki koz Franse.  Nou annan Confejes ki i pe kit son mark dan Sesel.  E Confejes ki i fer li, i donn sipor atraver Grant sirtou nou bann zenn ki anvi devlop zot bann lide inovatif.  E sa so far i pe mars tre byen.  Bann zenn i come up avek zot project proposal, zot bann pti plan ki zot annan pou fer e si sa bann plan, i annan en Komite ki asize, si zot vwar poudir sa bann lide, i ganny vwar koman bann bon lide ki kapab ganny pous pli devan, then i annan bann sipor finansyel ki vini.  E parey mon pe dir avek Confejes i pe mars tre byen e mon mazinen osi sa propozisyon pou Gouvernman antre anmenn serten sipor, mon mazinen i pou en pti pe dan sa direksyon.

Mr Deputy Speaker, an 2013 mon ti ganny sans ansanm avek Onorab Jaqueline, nou ti ganny sans pour nou attend en seminar Lasin ki ti apel Seminar on Industrial Structure Adjustment and Development Policies for developing countriesE dan sa seminar ki nou ti konstate, ki nou ti vwar, se egzakteman sa ki Onorab De Commarmond pe fer sorti ozordi.  Kot bann group ouswa bann endividi ki annan sa bann lide inovativ, i annan en lankadreman Minister Komers laba Lasin avek en Komite pou devlopman bann pti SME’s, zot zwenn ansanm e zot vwar koman zot kapab pous sa bann nide inovativ ki sa bann dimoun i annan.

E atraver sa, Gouvernman i aport serten sipor finansyel atraver Grant pou kapab ed zot devlop zot nide.  E sa ki ti pli enteresan ladan, se ki nou ti vwar poudir zot ti pe menm at that time ki nou ti laba, zot ti pe devlop en Scitec Park en Scientific Technology Park ki avek le bi pou fer ki ozordi sa kantite Sinwan, par egzanp ki annan pe travay atraver lemonn.  Bann zenn Sinwan ki spesyalize dan bann diferan areas teknolozi, zot pe donn kontribisyon dan bann lezot pei Lanmerik, Larisi and so on.  So sa Scitec Park li, ki i ti pe fer, se egzakteman pou atrakte sa bann Sinwan pou retourn dan zot pei e dan sa Park ti prezant tou fasilite.  Akomodasyon, tou bann lezot fasilite e sa zisteman ti pou ed zot pour zot kapab devlop zot bann lide e aport sa kontribisyon anver zot pei.  E zot motto ki zot ti pe koz lo la se, olyeMade in China zot pou vin avek en nouvo lapros, Created in China.  Akoz ozordi en kantite keksoz ki pe ganny fer Lasin, i pe ganny asanble Lasin, dan bann gran, gran faktori, me i pa neseserman bann lide orizinal Sinwan.

So, zot ki zot ti anvi fer se ki en kantite Sinwan i annan en bann lide inovativ, me sa bann intellectual properties i pe ganny aste par bann lezot dimoun dan lezot pei.  Zot, zot ti anvi ki zot bann lide inovatif, orizinal i reste dan zot pei e zot, zot devlop li atraver Created in China.

So mon mazinen dan sa loptik Seselwa osi nou annan en kantite nou bann zenn.  Ozordi nou invest en kantite dan bann Degre Liniversiter.  En kantite nou bann zenn i al deor e i malere ki en kantite apre ki Gouvernman in invest en kantite dan zot training, nou vwar zot olye retourn dan pei pou kontribye, zot deside pou reste a leksteryer.  Posibleman akoz i annan plis loportinite pou lanplwa, plis loportinite pour zot devlope.

So, atraver en tel mekanizm mon mazinen sa i pou ed plis, i pou ankouraz plis nou bann zenn Profesyonnel ki’n ganny train dan diferan domenn, pou zot reste dan pei e pou zot kapab devlop zot lide bokou pli lwen.

Me an menm tan, Mr Deputy Speaker, nou osi bezwen konstate poudir avek en tel linisyativ i pou annan en kantite pros avek en kantite cons.  E la mon mazinen poudir posibleman bann cons i pou en pti pe plis ki bann ‘pros, bann kontrent.

Ozordi pour ou ganny en loan tradisyonnel avek en Lenstitisyon, i time consuming.  I time consuming akoz ou bezwen fer sir ki ou annan ou en proper project plan.  E posibleman se sa ki manke dan nou pei.  En kantite dimoun i zis deside i dir mon anvi  al fer biznes without proper plan, project proposal ensidswit.

So, petet sa i ava pous en pti pe nou bann dimoun pour zot montre ki zot serye.  Mon anvi fer en keksoz.  Mon vini avek en plan konkret e whoever the funding body ki pou ed ou, i dir vwala sa dimoun i serye, sa plan ki i pe vin avek i en plan ki pou anmenn benefis pei.  I pou anmenn benefis pou kreasyon lanplwa ensidswit e vwala kot funding i vini.

E nou bezwen osi pran kot poudir ozordi dan nenport ki biznes ou anvizaze antreprann, i annan tough competitionSo tousala i bann fakter ki ou bezwen pran an konsiderasyon.  E dan lemonn biznes ozordi i annan bann strict rules.  I annan bann regilasyon ki ou bezwen deal avek.  So, tousala i en pti pe bann deterrent ki mon mazinen nou bezwen komans kase si nou anvi ankouraz plis nou bann dimoun pou antre dan bann inovasyon, dan bann areas kot i annan sa posibilite pou devlope

So, lide Mosyon li menm i senp parey nou loter in dir, me dan son lapratik i pa neseserman that simple, akoz ler en dimoun i deside donn ou en Grant, i ekspekte ki an retour ou pe servi li byen e ki ou pe aport rezilta.

So, parey mon’n dir whoever ki, demen si Gouvernman i deside pran sa lide, met an mars pou asiste bann endividi, then whoever ki deside pou li lans li ladan, i bezwen fer sir ki i serye e i anvi fer keksoz konkret ki pou anmenn benefis, pa zis pour li me pou pei, pou kreasyon lanplwa.

All in all mon mazinen ki i en bon lide e mon pou siporte.  Prezan li Gouvernman li atraver son bann striktir, ki mannyer i pou fer li, i a rod son fasilite pour li asiste.  Me sa Grant li menm i sa lide ideal akoz parey mon pe dir, en kantite dimoun ki anvi lans li i santi li difisil, akoz i napa en komansman.  I annan bann kolateral si i pou al demann en Labank en loan ensidwit, tousala i konplike.  So, atraver en Grant sa i pou ed zot pou zot kapab pous zot lide bokou pli devan.

So, avek sa detrwa mo Mr Deputy Speaker, mon pou siport en tel linisyativ.  Mersi.

 

MR DEPUTY SPEAKER

Onorab Valmont.

 

HON SYLVIANNE VALMONT

Mersi Deputy Speaker.  Mr Deputy Speaker, sa Mosyon table par Onorab De Commarmond, Leader of Government Business, i en Mosyon ki enportan pou devlopman pti biznes dan nou pei.  Petet pa zis pti biznes, me lezot parey nou bann kanmarad Onorab in deza koz lo la.  I annan diferan e kategori biznes ki bezwen devlope e reste soutenab.

Mon toutafe dakor avek Grant, sa lide Grant.  Me de lot kote osi Mr Deputy Speaker, mon krwar ki Gouvernman dizour pe fer bokou osi pou ankouraz lanvironnman biznes dan nou pei, pti e gran, konsyan ki sa bann biznes i en lebra enportan pour nou lekonomi.

Akoz mon dir koumsa Mr Deputy Speaker, se ki nou annan diferan si oule Lorganizasyon dan nou pei, ki kapab osi donn en koudmen Gouvernman anmenn sa nide e devlop li pli devan.  Mon bann kanmarad Onorab in koz dan diferan konteks si oule sa lide Grant.

Mon konnen poudir parey nou konnen Gouvernman, pe fer ase par annan SBFA pou ed nou bann pti biznes, oubyen mwayen biznes, menm gran biznes.  Nou annan Labank Developman ki pe fer tou li osi pou si oule anmenn sa Lanvironnman biznes dan en fason pozitiv.  Me an menm tan, nou pou bezwen petet konsider sa lide Grant dan en fason alternative.

Mr Deputy Speaker, loter Mosyon in koz lo inovasyon ki fantastik e sa lide osi in ganny mansyonnen osi par 2 ou 3 nou Onorab ki’n koze deza.  E dan en tel domenn si oule, Gouvernman i kapab entervenir par son bann Lazans, mon krwar Onorab Arnephy in deza mansyonn sa.  Bann Lazans ki konsernen kot i annan osi en mekanizm an plas, pou kapab soutenir sa bann biznes pou zot etabli e devlope e grandi.

Dan sa konteks Mr Deputy Speaker, mwan mon ti a kontan anmenn devan sa lide ou konsep, Incubation.  I pa en nouvo lide.  In deza ganny koz lo la oparavan, me si par egzanp Gouvernman pou konsider donn en Grant en endividi oubyen en pti biznes ki’n groupe 5/6/10 dimoun, mon krwar i bezwen konsider ki mannyer osi i kapab fer sa lide kreativ, sa lide inovativ devlop dan en fason soutenab.

Sa Grant ki Gouvernman i donnen, i kapab al avek sa Lazans ki kapab tel par egzanp dizon SENPA ki look towards devlopman bann pti biznes, mwayen biznes dan pei.  Kot i pran sa bann lide inovativ la, i travay avek sa dimoun oubyen ek sa group dimoun, i fer sa devlope dan en peryod letan.  E i tenir sa biznes oubyen sa konsep ki pe ganny devlope, pou en letan ki sa biznes in ariv lo sa peak ki i kapab debout lo son lipye.

E an menm tan, nou pou vwar Mr Deputy Speaker, ki sa larzan ki Gouvernman pe envesti dan sa biznes, i pou dan en fason en devlopman enportan, konsiderab ki pou anmenn oubyen kree lezot biznes a la longer ditan.  Tro souvan parfwa bann dimoun i kontan zis demande pou ganny en loan oubyen en Grant, zot komans en biznes e zot asiz lanmenm.  Petet parfwa i en lide inovativ ki tre, tre bon, me solman i pa pe ganny sa sipor, i pa pe ganny, si oule kondwir atrap son lanmen pou li devlop sa biznes e fer tre byen ladan.

So, sa lide mon krwar avek en Grant, avek sa sipor ki i pou gannyen par sa mekanizm Gouvernman an plas, i pou fer bokou dibyen pour devlopman si oule soutenab pour sa biznes.

En lot pti keksoz ki mon ti a kontan dir osi, Mr Deputy Speaker, nou konnen poudir mon krwar lide sorti kot Onorab Samson in mansyonnen osi.  Nou annan gro, gro biznes dan pei ki Gouvernman i kapab antre in partnership avek zot, pou kapab devlop sa bann nide inovatif ki vin par nou bann etidyan, zenn si oule, ki anvi antre dan biznes oubyen en endividi ki come up avek en bon linisyativ, en bon konsep pou devlopman en bon biznes.

Nou konnen poudir, par egzanp an se moman. Gouvernman pe donn en funding, CEPS ki oule sa umbrella pou plizyer lezot NGO dan pei.  E bann NGO osi i bezwen kapab travay ansanm avek nou bann lide si oule ki ganny devlope, nou bann lide inovatif par bann endividi e ansanm rode avek bann Lorganizasyon enternasyonal oubyen menm nou bann gro biznes dan pei.  Lorganizasyon rezyonal parey in mansyonnen par Onorab Arnephy, Confejes.  Devlop sa bann nide.

Mon krwar nou pa kapab toultan kontinyen met keksoz lo Gouvernman.  So, petet Gouvernman i bezwen rod sa fason, ki ansanm avek lezot partner e sa dimoun, sa endividi, sa group ki pe antre dan sa biznes, i kapab devlop sa biznes in partnership e i kapab devlop sa biznes byen a la longer di-tan ki i vin si oule i donn travay lezot dimoun.  Sa pti biznes ki devlope oubyen sa lide ki devlope i devlope i agrandir, i anmenn plis pour nou lekonomi.

Mon bann, si oule kanmarad Onorab in koz lo devlopman dan Blue Economy ki tre byen, Sa osi mon krwar bann konsep, bann lide ki sorti ladan, bann gro biznes i kapab atrap bann ki pli pti pou devlop zot, pou anmenn zot pli devan.  Zot kapab travay in partnership, si oule lo diferan nivo.

Mr Deputy Speaker, mon konnen par egzanp ankor petet in deza ganny mansyonnen, ki Labank, menm Barclays Bank si ou annan en bon proze ki’n byen definir avek si oule, bon lobzektif sa i kapab ganny siporte par Labank.  Zot konsep si oule, zot analiz sa konsep ki sa endividi i come up avek e zot donnen.  Zot donn menm plis ki R150 mil pour ou kapab devlop en konsep, en proze, en biznes ki ou ti a kontan  si oule enplimante e ki ou pe donn lanplwa.  Ou pe kree, si oule aktivite ekonomik pour lezot dan sosyete.

Mr Deputy Speaker, mon pa ti pou koz lontan.  Mon krwar lide anmennen par sa Mosyon table par Leader of Government Business, i tre byen e mon pou anmenn mon sipor pour sa Mosyon.

Mersi Mr Deputy Speaker.

 

MR DEPUTY SPEAKER

Right of Reply, Onorab De Commarmond.

 

HON CHARLES DE COMMARMOND

Mersi Mr Deputy Speaker.

Mon byen kontan bann entervansyon ki’n ganny fer.  Mon remersye tou bann Manm Onorab ki’n entervenir lo mon Mosyon.  Zot lentervansyon i valab, tre valab.  En kantite lide ki zot in met devan, i montre mwan poudir sa Mosyon i en bon Mosyon.  I en Mosyon ki merit ganny vitman pran an kont par Egzekitiv, met li dan Bidze pour 2017 e komans enplimante.

Ou vwar Mr Deputy Speaker.  Sa bann diferan lide ki’n vini, i montre ou poudir i annan diferan kalite grant.  Diferan grant, diferan kalite grant.  Grant sorti diferan landrwa me osi, plen dimoun pa konnen poudir i annan sa bann ……

 

(Laughter)

 

HON CHARLES DE COMMARMOND

Plen dimoun osi pa konnen poudir i annan sa bann kalite grant ki kapab benefisye zot partou.  E Mosyon i osi pe demann Gouvernman pou li osi partisipe, li osi kontribye dan sa bann diferan grant e an menm tan, promouvwar sa bann grant la.  Fer dimoun konnen poudir i annan sa bann diferan grant, pour ki dimoun i eksplwat sa bann posibilite, sa bann diferan grant, pou kapab permet zot kot zot a kapab tape e laport ava ouver.  Kot zot a kapab:- kot nou piblik konmsi ava konnen poudir la i annan tel laport mon kapab tape pour mon lide, pour mon konsep, pour mon patant, ensidswit.

Mon vitman pe fer mazin en pti pe.  Ou vwar ozordi dan Sesel, koman en dimoun i komans en biznes, taler tou dimoun i fer parey e apre en serten letan, sa biznes i nepli vo lapenn tou dimoun i fer parey prezan profi pa marse.  Tou i bezwen fermen.

Par kont, si nou fer sa zafer grant avek inovasyon la, ou pou vwar pa tou dimoun ki kapab neseserman al dan sa bann direksyon.  Mon pe mazin la zisteman.  Lontan nou ti tir kannel.  Ozordi la si ou dir mwan annou al tir kannel parey lontan, forget about it.  Personn pa oule al dan bwa pou al tir kannel.  Pourtan, kannel la valer son lesans in monte dan lemonn.  Ou kapab ganny plis larzan.  Patsouli menm zafer.  E petet en dimoun i vini avek en lide inovativ, ki mannyer pou eksplwat kannel ouswa patsouli, ou en lot plant medisinal par egzanp.  Me nou bezwen ankouraz li.  Nou bezwen rod fason akoz Gouvernman i kapab deside, dir okenn prodwi, okenn biznes ki annan:- ki pe gear, ki ou pe vizyonn ki sa promoter, i pe vizyonn ver leksportasyon.  Savedir, pou anmenn plis larzan, deviz etranzer dan pei, nou siporte pou komanse.

Ozordi ou annan tou dimoun ki annan en pti larivyer kot li, i pe fer delo boutey, i vann.  Bann ki napa, i rod larivyer.  I annan ki sey kree bor holes i rode pou li fer delo pou vann.  Prezan tou nou delo, mon krwar preski mazorite si pa tou nou delo, i vann lanmenm la ek nou lokalman.  Saler, Arab in vin isi prezan Arab li i napa delo kot li, i annan Dezer.  Be i sey fer delo, i fer vini delo sorti diferan landrwa.  Me krwar mwan si nou, nou fer delo la, nou vann ek Arab, vann ek bato.  Bann bato lapes ki vin isi, zot rod zot delo.  Bann Franse i rod zot delo i vann.  Zot delo sorti an Frans laba.  E ou bezwen fer vini sa delo, vann ek zot.  Bann dimoun ki fer bann ship chandlers la, zot fer vini delo, vann ek sa bann bato.

Be nou bezwen kapab, petet en zour en dimoun la i vini avek lide i dir mwan mon oule al pli devan ek sa delo.  Olye vann zis lokalman, mon oule vwar bann properties ki annan ladan, me mon napa kapasite pou kapab al de lavan ek sa, pou mwan kapab anmenn li lo nivo enternasyonal, pou mwan vann, pou eksporte lo nivo leksportasyon.  Alor la, Gouvernman i kapab donn li sa koudmen.  Donn li sa lapiy.  Mon pe zis dir sa me Gouvernman li menm i kapab vwar atraver mekanizm ki ava etablir, pou vwar tou sa bann lide ki’n ganny mete par diferan dimoun.

Nou pa pe re-envant larou.  Deza la i egziste serten kalite grant dan en serten fason.  Bann Child Minders lot zour la, in ganny anonse poudir i annan en pti grant zot kapab tap in si zot in anrezistre, si zot in fer sepa kalite staz.  I annan sa posibilite.  Dan lapes in annan grant plizyer fwa, plizyer moman.  I annan letan bann masin bato ti donn bann peser or ti ganny vann a en pri redwir.  Diferan kalite fason sa ki nou pe koze la, i kapab.  E nou ki nou pe dir nou, se osi fer sa dimoun fer son…… memorandum.  Ed li fer si i pa kapab fer.  Tousala i form par dan sa grant, kot en dimoun i kapab konmsi ki i pran li serye, ki i pa vin zis en zwe.  I pa vin zis pran larzan apre pa konnen ki i fer avek.

Be ou vwar, nou bann Manm ki’n entervenir pe pran legzanp ki’n arive an Sin oubyen dan lezot pei.  Tousala, incubation period pour incubation dan biznes sa.  Be bann lide fantastik ki nou osi nou bezwen kapab petet vwar e eksplwate, pou fer ki sa senp Seselwa la, sa dimoun, nou Seselwa ki vini avek bann diferan lide, ki son lide i pa perdi.  Ki i vwar benefis son lide.  Ki i vwar son lide grandi avek li.  Ki i vwar son lide si ou oule dir, anmenn rannman pou li, son fanmir ensidswit e son sosyete.  Sa bann keksoz koumsa mon krwar Mr Deputy Speaker, nou merit donn sipor.  Nou merit ede pour ki nou bann zenn, nou bann dimoun, nou bann Seselwa i kapab al de lavan avek son bann lide.

Mon kontan mon’n vwar antreprener Seselwa lot zour pe fer moringa oliofera la, Bred Mouroum.  Bred Mouroum zot pe fer latizann avek, pe vann.  Be mon krwar zot pe vann aletranze.  Mon pa tro, tro vwar isi lo market lokal.  Kekfwa en pti gin.  Me i bezwen annan promosyon lo la.  E sa i bann bon keksoz.  Me nou bezwen promouvwar sa bann zafer la.  Nou bezwen al en pti pe plis ki Ton Ferdinand i annan kot li.  Ou konpran.  Li i sey fer son best me nou bezwen pas sa bann staz.  E Gouvernman mon krwar mwan, mon believe i bezwen anmenn sa bann sipor dan sa fason, pou kapab fer ki biznes i kapab zwe en rol, bann biznes i kapab grandir, biznes potansyel, biznes i kapab si ou oule dir, devlope pou anmenn larises ekonomik, larises pour nou pei, pour nou, nou menm nou koman en pep, sa pti gin nou ki annan, pour ki nou kapab viv pli byen.  Pour ki nou kapab epanouir dan en fason korek.

Mr Deputy Speaker, avek sa mon a demann tou dimoun pou siport sa Mosyon akoz mon krwar mwan, i en bon Mosyon.  Tou dimoun i ava kapab benefisye e kapab annan lide inovativ demen dan nou pei e Gouvernman li, ekoute ki Lasanble pe dir.  Dir sa i bon, annou met keksoz an pratik dan nou pei.

Mersi bokou Mr Deputy Speaker.

 

MR DEPUTY SPEAKER

Bon, lo sa Mosyon nou pran en vot.

Tou Manm ki an faver, lev lanmen.  Inanim.  Mosyon in ganny aprouve.

E avek sa nou terminen pour ozordi e Lasanble i ava adjourn e nou a rezwenn Mardi le 26 Zilyet.

 

 

(ADJOURNMENT)