::
Home » Verbatim » 2016 » Term 2 » Tuesday 28th June, 2016

Tuesday 28th June, 2016

NATIONAL ASSEMBLY OF SEYCHELLES

Tuesday 28th June, 2016

The Assembly met at 9 am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Onorab. Bonzour Minis ek son delegasyon. Bonzour tou bann dimoun ki pe ekout nou dan Lakour.

Ozordi avek nou, nou annan Minis  pour Zafer Etranzer e Transpor Mr Joel Morgan ki pe vin reponn plizyer kestyon lo son Minister.  E nou ava komans Kestyon 59 Onorab Derek Samson.

 

HON DEREK SAMSON

Mersi Mr Speaker.

Mr Speaker bonzour.  Minis, koleg Onorab tou dimoun a lekout, bonzour.  Mr Speaker, eski Minis pour Transpor i kapab dir nou Lasanble, ki zistans son Minister in arive avek legzersis pou evalye leta tou bann pon ki trouve avek larout primer e segonder dan Sesel, ki son Minister ti anonse pou komans ganny antreprann detrwa lannen pase?

 

MINISTER JOEL MORGAN

Mersi Mr Speaker.

Bonzour Mr Speaker, tou Manm Lasanble e tou dimoun ki a lekout. Mon swet zot tou en bon lazournen.

Mr Speaker, swit a lanons ki mon Minister ti fer konsernan sa legzersis pou evalye leta bann pon, mon ti a kontan fer resorti ki bann lenspeksyon bann pon atraver Mahe, Praslin e La Digue, i pe ganny fer koman en aktivite kontinyel prezan par Lazans Transpor lo Later, pou asire ki tou bann pon i lo en nivo standar e i an bon kondisyon pou asirsekirite manm piblik ki servisemen ek sa bann pon an zeneral.

Lazans Transpor lo Later, i antreprann 2 kalite survey e sa i premye; survey detaye vizyel lo bann pon mazer e osi lo bann culvert tou le 2 an.  Answit limero 2, survey lo bann pon ki pli pti e bann culvert ki pli pti e sa i ganny fer tou le z-an.Atraver sa bann survey bann diferan proze pou repar serten pon i ganny enplimante, Mr Speaker.  Lalis swivan se bann proze ki SLTA in enplimante lo bann pon ki ti bezwen renovasyon ouswa bezwen ganny rekonstrir.Mahe premye, pon Anse Etoile apre Ladministrasyon Distrik.  Dezyenm, Pon Au Cap semen Green Estate.  Trwazyenm, Pon Cascade apre Ladministrasyon Distrik.  Katriyenm, Pon Anse Boileau Petit Barbarons.  Senkyenm, Providence Bridge.  Sa a en kou total R3.966 milyon.  Praslin e La Digue Pon Roche Corbigeau vizavi Ex-YRTC, Pon Anse Gaulette o-bor Le Relax Beach Hotel Resort.Culvert Baie Ste Anne dan krwaze semen Pointe Cabri e semen ki al ver Lasose.  Pon ki al Anse Lazio vizavi larantre Simityer Anse Boudin.  Pon Anse La Blague semen ki al Rocky Baye Culvert Ton Black semen Athanase e sa a en kou R1.089 milyon ki fer ki Gouvernman in depans R5.055 milyon dan sa dernyen 4an pou repar sa bann pon.  Pour sa lannen, nou annan en proze zenerasyon pon ki pou komanse tre byento e sa i konpri renovasyon Pon Anse Boileau kot Ladministrasyon Distrik a en kou apepre R696 mil. I osi annan lezot proze ki’n ganny rekomande e sa i pou ganny fer ler finansman i vin disponib pour nou kapab enplimant sa bann proze.

Sa bann proze i swivan: Renovasyon Pon Anse Poule Bleu; renovasyon Pon semen Canada, Beau Vallon, renovasyon Pon semen dan Banbou Beau Vallon, renovasyon Pon semen Sans Souci dan zanmirant kot Konsil Lagres; renovasyon Pon semen Mandarin Estate Au Cap, renovasyon Pon semen Anse Royale Plato o-bor Landfill.

Mersi Mr Speaker.

 

MR SPEAKER

Okenn siplemanter Onorab?

HON DEREK SAMSON

Yes, Mr Speaker, mersi.

Mr Speaker, mon ti a kontan demann Minis, apard ki laz bann pon ki nou annan dan Sesel, kwa ki pe ankouraz ki serten nou bann pon pe ganny andomaze; e dan menm laliny, eski Minis i kapab dir nou osi ki son Minister pe fer pou redwir ki parfwa serten transpor ki pa lo tonaz i sirkil sa bann larout e sirtou bann pon osi ki pa kapab soutenir lakantite pwa ki sa bann transpor parey i annan.

Mersi.

 

MINISTER JOEL MORGAN

Mersi Mr Speaker.

Mr Speaker, bokou nou bann lenfrastriktir pon e semen ti ganny konstrir depi bann letan kolonyal – byen avan menm pandan sa bann lannen avan nou Lendepandans.  E ozordi nou annan nou bann lenfrastriktir ki nou bezwen maintaine fer renovasyon e souvandfwa rekonstri akoz sa bann problenm ki nou gannyen avek zot degradasyon.

Prensipalman domaz i ganny koze, non selman par laz li menm li – degradasyon akoz laz – me osi akoz bann pwa sa ki nou apel bann axel weight ki bann gro transpor i annan, ki pas lo sa bann pon.  E sa bann pon bokou pa ti zanmen ganny design pou pran sa bann gro pwa – sa bann loads e ki prezan ki i fer ki deplizanpli nou bezwen kontinyen envestir pou ranforsi e repar sa bann pon.

An sa ki konsern sa ki pe ganny fer pou anpes sa bann gro transpor petet andomaz sa bann pon, i tre difisil pour nou akoz nou bezwen asire fire anmezir pei i devlope, ki i annan bann sirkilasyon sa bann transpor en pe partou, akoz zot anmenn container – zot anmenn bann lezot materyo lour parey bann materyo konstriksyon blok, lapousyer ros and so on coralfill – en pe partou dan nou pei.  Eswit a sa i fer li difisil pour nou kapab restrikte – apard ki nou bann semen segonder, i fer li difisil pour nou kapab restrikte sa bann transpor lo bann semen primer. Me ki nou bezwen fer koman Lazans Transpor lo Later, koman Departman Transpor, nou bezwen asire ki nou kontinyen upgrade kapasite sa bann pon kot i posib e kot i  pa posib then, nou bezwen forseman limit sa pwa – sa  tonaz sa bann transpor ki pou kapab pas lo nou bann pon dan serten landrwa, kot nou vwar i pa striktirelman  – posib pour zot fer li.

Mersi.

 

MR SPEAKER

Kestyon 60 Onorab Ghislain.

HON CHANTAL GHISLAIN

Mersi Mr Speaker.

Bonzour tou dimoun.Eski Minis pour Transpor i kapab enform sa Lasanble, ki Polisi son Minister an se ki konsern bann semen mazer ki ankor form parti bann later prive?

 

MINISTER JOEL MORGAN

Mersi Mr Speaker.

Mr Speaker, Polisi mon Minister an sa ki konsern bann semen mazer ki ankor form parti later prive, se pou ganny lasistans avek Minister Litilizasyon Later ek Lakaz pour arpant, tou sa bann semen e pour apre aste sa bann seksyon semen avek bann propriyeter, kot sa i neseser pour nou fer li.  Okenn semen ki pa ankor ganny proklanmen, nou bezwen fer en legzersis e apre zot proklanm zot.Pour bann lezot semen segonder e semen Estate nou deza annan en legzersis ki pe ganny fer, ki osi enkli donn bann non apropriye sa bann semen e apre pou proklanm zot.

Mr Speaker, sa i en prosesis kontinyel ki ganny fer par Lofis Komisyoner Transpor lo Later, an kolaborasyon avek Biro Attorney Zeneral pou asire ki tou bann semen mazer ki ganny servi par piblik e ki ganny trouve lo later prive, i ganny proklanmen par Gouvernman, pou fer zot vin bann semen piblik.

Byensir, sa i ganny fer an konsiltasyon e avek konsantman propriyeter sa bann later prive e osi avek piblik an zeneral.  Si napa okenn lobzeksyon, prosedir Legal i ganny fer pou proklanm sa bann semen ki apre tonm direkteman anba responsabilite Gouvernman pour son bann antretyen.

Mersi Mr Speaker.

 

MR SPEAKER

Okenn siplemanter?

 

HON CHANTAL GHISLAIN

Mersi Mr Speaker.

Mr Speaker, eski Minis i okouran ki i annan bann semen ki’n komans fer me selman i bann semen – bann main roads nou pe koz lo la, e lefe ki i annan bann bout kot sa propriyeter i ankor pa pe aksepte poudir sa bann semen i kapab ganny konstri e ou vwar dan bokou sa bann semen, bann bout ki pa ankor ganny fini fer.

Mersi.

 

MINISTER JOEL MORGAN

Mr Speaker, wi sa i korek.  Par egzanp dan ka Kestyon ki Onorab pe poz mwan i lo La Digue. Nou annan plizyer seksyon semen ki pe ganny konteste, kot Gouvernman pe esey antreprann proze pou konstrir bann semen ki’n egziste depi byen lontan – ki la, me ki serten propriyeter pe reklanmen ki i tonm lo zot propriyete e zot pe demann serten laranzman Konpansasyon, avan ki nou kapab proceed an menm tan ki sa travay pe ganny fer.  Me osi i annan serten propriyeter ki’n les nou pase an konprenezon ki, sa pe ganny settle e i deza annan settlement ki’n ganny fer pour serten propriyeter.  Tou salegzersis pe ganny fer an se moman, par egzanp lo La Digue – mon fer referans spesifik lo La Digue la.  E nou pe sey rezourd tou sa bann problenm pou kapab asire ki nou bann proze semen ki nou pe fer, i kontinyen san enteripsyon pour deservi lakominote.  Akoz finalman en proze semen i en proze lenfrastriktir pour lakominote.  E mon krwar bann propriyeter ki pe travay avek nou zot bezwen konpran osi ki, sa i dan zot benefis – benefis tou dimoun e ki Gouvernman a fer son neseser, a fer son devwar pou donn zot en Konpansasyon apropriye, pour sa bout semen ki nou pe pas lo la – sa bout later ki nou pe pas lo la pou fer semen pour lakominote.

Mersi.

 

MR SPEAKER

Yes, Onorab Bristol.

 

HON ALDERIC BRISTOL

Bonzour Mr Speaker.

Mr Speaker, monti a met a latansyon Minis osi ki i annan pa zis semen piblik osi– i annan osi footpath – ki i arive dan bann lenstans kotbann negosyasyon entans in ganny fer e still napa okenn solisyon kot propriyeter i aksepte.  Ki Gouvernman – ki son Minister i fer dan sa ka, then?

Mersi.

 

MINISTER JOEL MORGAN

Mersi Mr Speaker.

Mr Speaker dan sa bann ka koumsa, prosedir i ganny definir anba Lalwa Acquisition Act, kot nou – si negosyasyon i fail, then nou demann Minister Litilizasyon Later ek Lakaz pou initiate the Compulsory Acquisition procedures anba Akizisyon serten seksyon later pour bann litilite piblik ouswa pour bann lezot lenfrastriktir piblik parey Lekol and so on, Lopital – anba sa Lalwa.  Me sa i en dernyen resort kot ler negosyasyon vreman pa kapab abouti e nou bezwen kontinyen ek saseksyonsemen – la nou fer bann compulsory acquisition procedures atraver MLUH.

Mersi Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.

Bonzour e bonzour Minis e bonzour tou dimoun ki a lekout.  Mr Speaker, mon ti a kontan demann Minis prenon an kont sa issue semen – later prive e an se ki konsern devlopman ki bann propriyeter pe fer an relasyon avek bann propriyete  ki o-bor semen,eski son Minister pe negosye oubyen pe asire ki sa bann propriyeter ler zot pe fer sa devlopman, zot kit ase lespas dan zot devlopman e sa semen, pou asire ki nou kapab annan bann dren ki neseser ; e osi dan bann sirkonstans kot en semen in deza ganny konstri, kot i annan bann later prive, si son Minister pe angaz zot dan en contingency pou met an plas – par egzanp posibilite ki demen sa bann semen i kapab ganny elarzi – an vi ki konstriksyon pe ogmante dan serten landrwa pou asire ki an fen kont sa bann semen ki ganny fer, i kapab vreman provide en akse ki konvenab pour bann dimoun – en akse ki ava allow en transpor  oubyen 2 transpor pase.

Mersi Mr Speaker.

 

MINISTER JOEL MORGAN

Mersi Mr Speaker.

Mr Speaker, mon ti a kontan fer resorti ki Kestyon devlopman bann propriyete i anba Planning Authority e ki Departman Transpor i ganny reprezanteloPlanning Authority atraver Sekreter Prensipal Departman Transpor.  E la ler i annan bann nouvo devlopman ki’n ganny propoze, toultan nou fer sir ki lo Planning Authority nou fer reprezantasyon kot i neseser, pou asire ki bann lespas apropriye i ganny donnen ant semen egzistan ek sa nouvo devlopman pour accommodate plizyer keksoz.

Premyerman, si i annan en pavement ki nou bezwen fer – sa nou bezwen fer lespas pou li.  Si i annan okenn plan pou elarzi sa seksyon semen dan lavenir, nou bezwen fer lespas pour li osi. E pou asire ki tou bann service ducts – tou bann keksoz ki annan pou fer avek litilite piblik – par egzanp bann tiyo ki pas par anba semen konmela ki nou pe retir anba semen pour avoid zot kontinyen kas semen toultan, i ganny mete akote semen.  So, sa i ganny fer.  Konmela i ganny fer atraver Planning Authority.E mon krwar an zeneral i pe mars ase byen.  Me i annan serten lenstans kot in annan devlopman ki’n ganny , fer kot nou,  nou ti an prefere vwar kot i annan plis lespas ki ganny donnen par egzanp pour lavenir,pour semen kapab ganny elarzi, akoz nou bezwen mazinen ki deplizanpli i annan plis transpor pe antre dan nou pei – deplizanpli nou bann semen pa pe vin ase pour nou kapab cater pour sa bann nonm transpor ler pei pe kontinyen devlope.  E i inevitab ki nou pou bezwen elarzi nou bann semen dan lavenir, preski partou dan bann semen primer e serten semen segonder, pour nou kapab asir bon sirkilasyon trafik e osi safety pour nou bann pyeton.

Mersi Mr Speaker.

 

MR SPEAKER

Kestyon 61 Onorab Roma Edmond.

 

HON ROMA EDMOND

Mr Speaker, mersi.

Mr Speaker, etan donnen zistans ki zabitan distrik sou-distrik Frichot Estate i bezwen marse pou ariv lo grannrout, dapre demann sa bann zabitan, eski Minis pour Transpor i kapab enform sa Lasanble, si in annan okenn konsiderasyon par son Minister, pou met en bis SPTC kantmenm lo en baz one-way anfezan letour par Belvedère?

Mersi.

 

MINISTER JOEL MORGAN

Mersi Mr Speaker.

Mr Speaker i annan en pe letan deza ki SPTC in ganny demande pou regard dan posibilite entrodwir en servis bis dan Frichot Estate.An Desanm 2012, Zofisye SPTC ansanm avek serten sa bann zabitan FrichotEstate, ti vizit sa landrwa pou evalye posibilite pou ofer en tel servis e sa ti ganny fer an itiliz-an en bis SPTC ki pran 30 pasaze.  Apre sa SPTC ansanm avek bann Zofisye SLTA, in fer ankor en lot vizit kot Frichot Estate pou evalye kondisyon semen e fer rekomandasyon,  Bann lobzervasyon i comme swivan:

Premye, sa morso semen li menm i etrwat e i difisil pour transpor sirkile, prensipalman bann bis SPTC.

Dezyenm, serten lakaz in ganny konstrir tre pre avek semen e sa i poz en kontrent pour drayver e osi danze pour sa bann bis.

Trwazyenm, i annan serten kontour ki tre sere ki fer li difisil pour sa bann bis vire ler zot pe  pas lo semen Frichot Estate. Annefe ler zot ti fer sa legzersis, zot ti ganny bokou difikilte pou fer sa bis 30-seater kapab sirkile lo sa semen.

Mr Speaker, baze lo lobzervasyon e osi bann rekomandasyon sorti kot Lazans Transpor lo Later, kot Road Transport Commissioner e SPTC li menm li, pour lemoman SPTC pa dan en pozisyon pou ofer en servis bis Frichot Estate –pa akoz i pa anvi fer li, me senpleman akoz ki pakapab fer li etandonnen..ki semen i tre etrwat parey mon’n eksplike.

Mersi.

 

MR SPEAKER

Okenn siplemanter?

 

HON ROMA EDMOND

Mr Speaker, baze lo repons Minis e konplikasyon ki i pe fer resorti, eski Minis i kapab eksplike, si son Minister pe mazin en posibilite pou transform sa semen Frichot Estate koman en one-way an fezan letour par Belvedère pour retire kontrent e blokaz trafik monte-desann e fer ki i annan sa bann siny apropriye lo tonaz transpor ki devret deservi sa morso semen.

Mersi Mr Speaker.

MINISTER JOEL MORGAN

Mr Speaker, wi i annan en legzersis ki nou pe fer konmela avek Road Transport Commissioner ek Lazans Transpor lo Later, pour nou regarde si i neseser pour nou convert sa pour nou fer li en one-way sorti anler ki en pe pli o e desann an de-sandan ouswa sorti ande-sandan pou mont pli o, depandan lo kondisyon ki bann Teknisyen i kapab come up avek.  Me esansyel la, se nou bezwen asire ki,sa sirkilasyon i en bon sirkilasyon; ki asire ki i osi i pa koz lenkonvenyan pourbann lezot dimoun ki pe servi ouswa ki pe reste dan sa zanmirant Frichot Estate.E sa travay pe ganny fer la e byento nou ava kapab fer serten lanons lo la – enkli of course met bann siny neseser ek bann laglas neseser kot nou bezwen mete – pou asir sekirite lo sa seksyonsemen  – ki parey mon’n dir i tre etrwat.  A-lavenir, nou ti a kontan vwar posibilite pour nou elarzi sa semen.  Me pour lemoman akoz kontrent lakaz – bann lakaz kot in ganny pozisyonnen i pou tre difisil pour nou fer li.

Mersi.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker, eski Minis i kapab dir nou si SPTC i annan okenn plan kot i ferbann assessmentan relasyon avek bann tel kominote, pou vwar ki bann bezwen transportasyon ki sa bann kominote i bezwen, an vi ki i annan nouvo konstriksyon lakaz e nouvo devlopman dan sa bann landrwa Sesel.

Mersi Mr Speaker.

 

MINISTER JOEL MORGAN

Wi, Mr Speaker, mon konfirmen ki lo en baz kontinyel, SPTC pe fer bann survey dan tou bann kominote fir e an mezir vi ki bann demann i ganny fer, sirtou atraver DA ouswa MNApou kapab asire ki nou deservi o maximum posib tou bann kominote.  E la nou pe regard bann pli pti bis, akoz pour kapab asire ki nou donn bann servis dan bann landrwa ki pli difisil pour bann gro bis kapab monte ouswa pase.  E sa, sa legzersis i ganny fer lo en baz kontinyel.  E SPTC pe kontinyen azout bann nouvo larout lo son schedule – lo son servis ki i ofer pou deservi bann nouvo kominote ki pe devlope.

Mersi.

 

MR SPEAKER

Bon, si napa okenn kestyon siplemanter, Kestyon 62 Onorab Volcere.

HON MARC VOLCERE

Mersi Mr Speaker.  Mr Speaker, bonzour.  Bonzour Minis ek ou delegasyon e tou dimoun a lekout.  Mr Speaker, mon ti a kontan demann Minis pour Transpor.si son Minister i annan plan pou re-fer semen La Plaine Hollandaise vin aksesib pou transpor?

Mersi.

MINISTER JOEL MORGAN

Mersi Mr Speaker.

Mr Speaker, i deza dan plan mon Minister pou re-fer semen la Plaine Hollandaise e fer li vin aksesib pour transpor pandan bann letan dirzans.  Sa semen alternativ pou konekte distrik Baie Ste Anne avek distrik Grand Anse, Praslin.  An vi ki i annan zis 2 semen mazer ki konekte sa 2 distrik an se moman – sa i semen Vallée De Mai e semen Consolation, i enportan ki i annan ankor en lot semen alternativ ki an ka ki i annan bann dezas natirel ki kapab blok bann lezot semen ki deza la.  Par egzanp, an 2014, ti annan en deboulir later dan semen Vallée De Mai ki ti okazyonnen par gro lapli, ki ti paraliz sa semen e afekte mouvman trafik dan sa rezyon pandan en bon-pe letan.  Sa ti afekte kominote Praslin an antye, alors i toutafe neseser ki semen La Plaine Hollandaise i ganny re-fer pou vin aksesib pour transpor.

Mon’n deza an diskisyon avek Minister Lanvironnman dan preparasyon plan pour sa semen.  Nou osi bezwen pran kont lanvironnman sa landrwa e ki nou pa afekte li.  Letid in deza ganny fer lo konbyen pou koute pou re-fer sa semen e estimasyon i apepre R8.6 milyon.  An vi ki sa i en kou sibstansyel, mon Minister pe fer le neseser pou ganny finansman pour sa proze kapab demare. Kan egzakteman, i tou depan kan finansman pou vin disponib pour nou kapab fer li.

Mr Speaker, i enportan pour note ki La Plaine Hollandaise, pou kontinyen reste koman en strik Rezerv Lanvironnman. E ki sa semen pou ganny konstri pou selman ganny servi koman en emergency access road pour letan dirzans.  Setadir, i pa pou reste ouver toultan me pou ganny ouver zis ler i neseser.

Mersi Mr Speaker.

 

MR SPEAKER

Onorab.

 

HON MARC VOLCERE

Mersi Mr Speaker.

Mr Speaker, anliny avek larepons Minis konsernan laspe Lanvironnman, kot zot pe propoze ki sa semen i reste fermen, mei ganny servi zis dan bann ka emergency – eski ou Minister in fer en evalyasyon ek analiz, pou vwar  benefis ki nou lekonomi ti a  kapab ranmase, si sa semen ti ganny ouver toulezour ou kapab dir – an term fuel consumption ki bann transpor i bezwen servi fer sa gran letour par Baie Ste Anne, pou al dan rezyon Anse Boudin – Anse Lazio.

Mersi.

MINISTER JOEL MORGAN

Mersi Mr Speaker.

Mr Speaker, definitivman i pou annan bann benefis ekonomik, akoz sa semen i donn en traverse across sa zil bokou pli kourt ki semen aktyel konmela.  E definitivman pour en dimoun ki pe al kote Anse Boudin, ensidswit i pou bokou pli bon pour zot servi sa semen, sorti lo kote Grand Anse e visversa.  Me le problenm se ki La Plaine Hollandaise in ganny deklare koman en Rezerv Lanvironnmantal strik, akoz i en leta ki anba ‘Our NaturalBeauty i annan en  kantite La Flore e La Faune andemik  dan sa landwar e Minister responsab pour Lanvironnman e Gouvernman an zeneral i santi ki si sa semen, i ganny ouver, i kapab pave the way – i kapab  donn sa posibilite pour bann devlopman ganny fer dan sa landrwa, akoz i annan semen deza.  I pou met presyon pou devlopman ganny fer dan sa landrwa ki deza anba Rezerv Natirel.

So, i en kestyon ase delika – i en size ase delika si nou ouver li pou donn bann benefis ekonomik ouswa nou kit li fermen pou prezerv son leta natirel lanvironnman dan sa landrwa.  E desizyon ki ti ganny pran en pe letan pase, se ki nou pou prezerv li.

Mentnan, si i annan  nesesite pou re-vwar sa, mon pou bezwen retourn ver Gouvernman – natirelman e re-diskit sa size.

Mersi.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.Bonzour tou Manm Onorab.

Mr Speaker, an vi sa larepons Minis konsernan pour sa semen sa sif sibstansyel preski R8 milyon, e par nou lenportans sa semen eski Minis i kapab dir ek sa Lasanble, si Lazans  konsernen, i pe konsidere pou fer sa semen par faz?

Mersi.

 

MINISTER JOEL MORGAN

Mr Speaker, wi, enn fwa ki nou’n prepar nou plan final, nou kapab enplimant li par faz.  Me ler nou enplimant en keksoz par faz, natirelman i kout en pe pli ser akoz ou annan mobilizasyon, demolizasyon.   Kontrakter lo sit. Ou annan stokaz materyo ou bezwen stoke apre re-tire lo sit and so on.Me sertennman si nou Bidze pa permet nou fer li, i en nesesite mon konnen pour Praslin pour nou kapab fer sa semen alternatif, definitivman par egzanp – si lannen prosenn nou ganny lanmwatye larzan ouswa nou ganny en tyer sa larzan, nou pou posib pou enplimant li par faz.

Mersi.

 

MR SPEAKER

Onorab Esther.

 

HON NATASHA ESTHER

Mersi Mr Speaker, dan menm laliny avek kestyon Onorab Fideria, eski Minis i kapab enform nou, si zot pe konsider rod led a lenteryer pour sa proze semen, an vi son bezwen e nesesite?

Mersi.

 

MINISTER JOEL MORGAN

Mr Speaker, etandonnen ki nou’n vin en pei high-income statusprezan led eksteryer pour bann proze tel parey semen, i vin deplizanpli difisil apar ki petet bann– bann loan ki nou kapab pran avek Lazans par egzanp bann Labank Afriken pour Devlopman ouswa  Abu Dhabie Fund ouswa European Investment Bank, ensidswit. Deplizanpli sa i vin en difikilte pour nou atraver bann Grants,so, i pa posib vreman pour nou kapab fer sa semen atraver bann finansman Grants. Me nou a regarde lo  – an term Bidze li menm li – an term Minister Finans ki mannyer i balans son Bidze, si i bezwen fer serten external borrowings pour finans bann proze lenfrastriktir kontinyel dan  nou pei, akoz i annan en nesesite irzan pour nou kontinyen devlop nou lenfrastriktir e met nou azour avek bann bezwen pou deservi lekonomi – deservi mobilite piblik, nou ava vwar avek Minister Finans ki mannyer sa i ganny fer.

Mersi.

 

MR SPEAKER

Onorab Bristol.

 

HON ALDERIC BRISTOL

Mersi Mr Speaker.

Mr Speaker, mon ti a kontan demann Minis, si i okouran akoz sa semen ki en road – ki tre enportan, akoz ki sa semen ki ti fonksyonnel avan –i ti ganny aret servi e ki larzer zot pe mazin la avek sa nouvo – ki larzer zot pe mazinen fer li?

Mersi.

 

MINISTER JOEL MORGAN

Mr Speaker, sa semen wi, mon rapel semen La Plaine Hollandaise ler mon ti ankor en pe pli zenn, ti annan akse – nou ti kapab sirkile depi en kote Praslin pour al lo lot kote atraver semen La Plaine Holladaise sa letan la.  E mon remarke ki sa semen apre en serten letan ti ganny abandonnen e finalman i deteryore dan en fason ase signifikan ki ozordi pa kapab ganny servi. Serten seksyon definitivman i inaksesib pour transpor ozordi,  ler mon ti dernyen pase pou mwan regard leta sa semen.  Rezon ki i ti ganny abandonnen ti akoz sa landrwa ti ganny dedye koman en Rezerv Natirel strik e ti pran en desizyon sa letan la ki pa pou annan okenn sirkilasyon trafik e pou les sa landrwa dan son leta natirel.  Me parey mon’n eksplike prezan, swit a bann dezas ki’n arive kot nou’n vwar semen Vallée De Mai, par egzanp ti bloke konpletman pandan en bon-pe letan, nou’n vwar li neseser pour nou re-vwar – reviz sa desizyon e parey mon’n eksplike, ouver sa semen pandan en serten letan ler nou bezwen pandan bann letan dirzans.

An term ou dezyenm parti Kestyon – Finansman, Larzer semen – larzer semen i pou en semen ki pou permet sirkilasyon trafik dan 2 direksyon.  I pa pou zis one-way akoz longer sa semen  i pa pou permet ki nou annan zis en semen one-way.  Me nou a fer li lo en lespas ase limite – petet 3 1/2 met pou asire kot nou annan lay-bys kot ineseser, nou a fer bann lay-bys neseser osi. Enn fwa ki plan in ganny finalise, mon a kapab donn plis lenformasyon detaye lo egzakteman spesifikasyon sasemen.

Mersi.

MR SPEAKER

Kestyon 63 Onorab Jacqueline.

 

HON SULTANE JAQUELINE

Mersi Mr Speaker.

Mr Speaker, an vi move kondisyon serten parmi semen Morne Blanc e Beolière ziska Des Arpents, eski Minis i kapab enform sa Lasanble, ki plan son Minister i annan pou met koltar pou amelyor sirfas sa 2 semen?

Mersi Mr Speaker.

 

MINISTER JOEL MORGAN

Mersi Mr Speaker.

Mr Speaker, mon a kapab fer resorti ki semen Morne Blanc e Beolière ziska Des Arpents, i lo nou lalis semen ki pou ganny re-sirfas sa lannen dapre  nou plan.  Travay i ekspekte komanse ver lafen Mwan Zilyet sa lannen.  Sa proze pou komans Barbarons, i pou pas par Grand Anse par al Beolière answit Port Glaud e apre i pou kontinyen lo semen Morne Blanc ziska Sans Sousi kot i pou al zwenn sa lot seksyon semen ki nou’n fini fer ki fini anler kot Exile.  I pou mezir 13 kilomet an longer an tou.  Sa travay i ekspekte kout R38 milyon e nou ekspekte konplet li milye lannen prosenn, depandan lo kondisyon letan e osi disponibilite finansman dan nou Bidze pou 2017.

Mersi Mr Speaker.

 

MR SPEAKER

Okenn siplemanter Onorab?

 

HON SULTANE JAQUELINE

Mersi Mr Speaker.

Mr Speaker, eski Minis i kapab eksplike, an vi bokou domaz ki ganny koze lo sa bann semen i an rezilta bann – sirtou Morne Blanc, gro rasin bann pye dibwa Albizia ki pour pres o-bor semen; e osi mankman drenaz ki delo i pas bokou lo semen – sirtou Beolière, eski Minis i kapab enform sa Lasanble, si zot annan plan pou koup sa bann pye dibwa?

Mersi bokou Mr Speaker.

 

MINISTER JOEL MORGAN

Mr Speaker, Kestyon pye dibwa koz domaz lo bann semen i en pe partou lo Mahe, Praslin e La Digue ki nou vwar sa.  Me an menm tan nou annan sa eleman prezervasyon sa ki nou apel –ombre, shade pour nou sa bann semen  pour asire ki nou gard li dan son labote otan ki nou kapab pou asire ki nou pei i reste zoli.

So, nou annan bann conflicting objectives la me otan ki posib, nou prezerv bann pye dibwa ki pa poz en danze pour bann semen kot nou kapab fer li.  Me kot nou vwar i poz en danze e definitivman  nou bezwen retir sa bann pye dibwa e re-plant li en pe pli lwen avek semen.

Mr Speaker, lo Kestyon drenaz i enportan pou kapab ler nou re-fer nou bann semen met tou bann drenaz neseser, pour avoid destriksyon dan nou bann sirfas semen li menm li ler nou’n fini fer en proze re-sirfas semen, pour avoid gaspiy larzan ki nou envestir dan sa bann semen. O-tan ki posib pour nou bann proze ki nou pou fer, nou pou osi enkli bann drenaz kot i neseser.  I dan nou plan me le problenm la se i en Kestyon nou kapasite finansman pour nou fer sa bann drenaz an menm tan ki nou pe fer proze re-sirfas semen.  Ler nou finansman in permet pour nou fer li, nou fer li an menm tan.  Me ler nou finansman i pa permet, nou definitivman bezwen fer proze re-sirfas avan akoz sa i pli enportan – i pli irzan an term bann veikil ki pe servi sa bann semen e apre nou swiv avek bann proze drenaz o pli vit posib apre sa, depandan lo finansman ki nou annan.

Mersi.

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.

Bonzour Mr Speaker.Bonzour Minis.  Bonzour tou dimoun ki a-lekout.

Mr Speaker, eski Minis i kapab eksplik nou Lasanble, ki mannyer son Minister i etabli priyorite pou repar sa bann semen parey Morne Blanc e Beolière ; e akoz ki son Minister i kontinyen les plant sa bann pye dibwa ki kas semen lo bor sa bann semen primer, parey Morne Blanc e Beolière ?

Mersi.

MINISTER JOEL MORGAN

Mr Speaker, priyorite i ganny determinen par Lazans Transpor lo Later e Komisyoner Transpor lo Later baze lo kondisyon bann semen, e baze lo kantite veikil – setadir litilizasyon sa bann semen an term bann veikil ki servi sa bann semen.

I annan en kantite nesesite pour nou fer bokou travay lo nou bann semen pour nou kapab amelyor kondisyon sa bann semen deservi bann transpor ki sirkil lo sa bann semen.

E an term priyorite, nou regard sa kondisyon semen li menm li.  Nou regard son nivo deteryorasyon.  Nou regard lakantite transpor ki pe servi sa semen e nou regard osi ki dernyen fwa i ti ganny en nouvo sirfas, vizavi bann lezot landrwa ki an bezwen sirfas e vizavi bann kontrent bidzeter ki nou annan, dapre Bidze ki nou’n gannyen pou travay pour sa bann lannen konsernen. Par egzanp sa lannen SLTA ti ganny R19 milyon pou li travay lo bann proze semen.  E la nou pou bezwen al pran en nouvo Bidze Siplemanter, akoz sa R19 milyon in fini ganny epize baze lo re-surfacing ki nou pe fer ziska prezan. Nou bezwen ankor apepre  pour sa lannen nou bezwen ankor apepre R20 milyon an term en Bidze Siplemanter, pour nou kapab fini bann travay ki nou oule fer pour sa lannen, pour nou kapab dapre bann semen kot nou santi atraver bann kriter ki nou’n defini la kot nou bezwen fer met en nouvo sirfas dan en fason ase irzan.

Mr Speaker, i en travay kontinyel konsernan bann Kestyon pye dibwa.Pye dibwa i pa devret ganny plante dapre en serten zistans avek semen – sirtou bann semen primer – bann semen segonder.  Nou eseye pour ensiste ler bann travay i ganny fer ki sa pa ganny fer dan en fason ki pou afekte semen dan lavenir.  E progresivman nou pe fer li.  Me i annan bann serten ka natirelman kot nou vwar bann pye dibwa in ganny plante,e apre san petet konsiltasyon, avek Lazans Transpor lo Later e i koz nou problenm en pe pli tar.  So,lanou pran bann aksyon neseser avek bann lezot Lazans lo kote Lanvironnman pour nou kapab rektifye sa bann problenm. E i annan en travay ase enportan ki nou bezwen fer la, pour nou asire ki nou pa kontinyen afekte nou bann semen, malgre nou oule prezerv  nou labote natirel nou lanvironnman. Me ki bann pye dibwa i ganny plante a en zistans apropriye pour pa afekte nou bann semen a lavenir.

Mersi Mr Speaker.

 

MR SPEAKER

Onorab Lebon.

 

HON LENNY LEBON

Mersi Mr Speaker.

Bonzour a tous. Mr Speaker, anliny avek repons Minis – Minis in koz en pti pe lo Barbarons ek Grand Anse, eski i dan plan son Minister osi pou re-surface La Misère, akoz i form par dan distrik Grand Anse Mahe; e osi si son Minister pe met bann lezot lenfrastriktir ki permet annan vizibilite lo semen ?

Mersi.

 

MINISTER JOEL MORGAN

Mr Speaker, pour travay ki nou pe fer lo Mahe, e Praslin ek La Digue pour sa lannen, i annan en bon pe travay ki nou’n deza konplete dan lalis ki mon annan la devan mwan la – i en pe long so, mon pa pou neseserman lir tou sa bann semen primer ek segonder ki nou’n fer ziska prezan, me mon ti a kontan fer resorti ki nou’n deza depans R19 milyon lo bann proze e nou pou bezwen ankor R20 milyon parey mon’n dir, pou kapab konplet sa travay.

Sa semen La Misère ki Onorab pe fer mansyon avek, i enn bann semen ki nou pe met dan nou plan pour nou kapab kontinyen fer sa travay apre.  Me i pa pour sa lannen – probableman i pou boner lanner prosenn ler nou pou kapab fer li, akoz i annan lezot landrwa ki semen i dan pli move kondisyon – ki bezwen plis latansyon imedyat kot nou bezwen focus nou bann zefor pour lemoman.  Me sertennman i dan nou plan pour nou kapab fer li, e mon pe mazinen avek Bidze 2017 nou ava kapab enplimant li.

Mersi.

 

MR SPEAKER

Onorab Monnaie.

 

HON FRANCHASCA MONNAIE

Mersi Mr Speaker.

Bonzour Mr Speaker, Minis, tou sa ki a lekout – bann Manm.

Mr Speaker dan larepons Minis in fer sorti re-surfacing priyorite e frekans lo semen koman bann fakter ki pe ganny servi pou re-surfacing semen, e in mansyonn Bidze Siplemanter osi; eski Minis pe mazin pou sorti Morne Blanc e Beolière -eskize pou sorti lo la – lo kote sa sityasyon re-surfacing ki pou ganny pran Sesel, eski Beau Vallon sa sistenm semen ki annan re-surfacing i tonm dan bann plan Gouvernman pou refer semen Beau Vallon, akoz i en semen mazer i ganny servi par bokou Seselwa ki komans St Louis pou desann Beau Vallon – Bel Ombre e….

 

MR SPEAKER

Out of Order.

 

(Intervention)

MR SPEAKER

Out of Order, …nouletan i en annan pe tight sansan nou pou annan nou 25 Kestyon lo 25 distrik.It’s not a supplementary Question per say akoz koz lo Morne Blanc, Beolière,  epi nou pou al Beau Vallon, nou pou al Grand Anse, nou pou al English River – it will never end, en.

Out of Order.

Kestyon 64.

 

HON FRANCHASCA MONNAIE

Mersi Mr Speaker.

Eski Minis i kapab enform sa Lasanble, lo ki pe arive avek sa proze semen ‘Dan Gala’?

Mersi.

 

MINISTER JOEL MORGAN

Mersi Mr Speaker.

Mr Speaker sa proze lagrandisman dan semen ‘Dan Gala; Le Niole ti enn ki ti ganny inisye an 2013 avek bi pou amelyor akse sirkilasyon bann gro transpor, pou asir sekirite lo sa semen.  Sa semen aktyel i mezir zis 3 met larzer avek bann pti lay-bys ki fer li byen difisil pour 2 transpor kapab pase an menm tan.  Semen ‘Dan Galai mezir apepre 580 met longer an tou.  Ti ganny propoze ki sa semen i ganny agrandi sorti 3 met pou vin 5 met larzer pou kapab deservi sirkilasyon 2 transpor dan 2 direksyon an menm tan.  E osi bann gro transpor ki bezwen pase detanzaot.  I pou enkli en landrwa vire dan finisyon sa semen anler ‘Dan Gala.  Pou reisir fer sa, ti neseser antre lo detrwa propriyete prive e konstri miray dan serten landrwa osi pou sofgard bann propriyeter semen li menm li.  Sa proze i osi enkli amelyorasyon sistenm drenaz an antye sa semen.  Dapre Bidze ki ti ganny approve, sa proze ti bezwen ganny enplimante an 2 faz Mr Speaker.

Premye faz sa proze, ti mezir 200 met longer e ti komanse an Zanvye 2014 e ti ganny konplete an Septanm 2014 a en kou anviron R2.553 milyon.

Dezyenm faz sa proze, ti komans an Zilyet 2015 e i ankor an mars ziska konmela.  Sa dezyenm faz proze, i kout R2.784 milyon e i ekspekte ganny konplete avan finisyon lannen 2016.  An tou alor Mr Speaker, sa proze pour semen ‘Dan Gala, Le Niole pour kout apepre R5.4 milyon.

Mersi.

 

MR SPEAKER

Okenn siplemanter, Onorab?

 

HON FRANCHASCA MONNAIE

Mersi Mr Speaker.

Minis eski SLTA in pas dan bann lezot defi apard ki bann propriyete prive; e ki bann solisyon ki pe ganny enplimante?

Mersi.

 

MINISTER JOEL MORGAN

Bann defi prensipal Mr Speaker, se bann retaining  wall kot bann propriyete prive ki’n pran nou en pe letan e osi pou kapab work out en sistenm drenaz ki apropriye pour pa flood bann lezot propriyete an mezir ki sa semen i ganny re-konstrir.  Mon krwar se sa bann defi prensipal apard natirelman, bann defi ki nou’n fer fas avek an term lenplimantasyon proze an 2 faz akoz finansman.

Mersi.

 

MR SPEAKER

Bon, si napa okenn Kestyon siplemanter ankor, Kestyon 65 Onorab Monnaie.

 

HON FRANCHASCA MONNAIE

Mersi Mr Speaker.

Eski Minis i kapab i kapab enform sa Lasanble, si zot annan okenn plan pou enstal lalimyer dan semen Gala?

Mersi

 

MINISTER JOEL MORGAN

Mersi Mr Speaker.

Mr Speaker, Lazans Transpor lo Later, i annan lentansyon enstal en total 12 lalimyer, LED dan semen ‘Dan Gala apre ki dezyenm faz proze pou amelyor semen i ganny konplete avan lafen sa lannen.  Sa i pou tonm dan en proze separe pour amelyor vizibilite lo semen pandan lannwit e pour bann rezon sekirite natirelman.  Sa proze i estimen pou kout anviron R72 mil.

Mersi Mr Speaker.

 

MR SPEAKER

Onorab Leader Lopozisyon okenn siplemanter?

HON FRANCHASCA MONNAIE

Mersi Mr Speaker.

Eski  Minis i kapab dir nou si lo sa semen Gala osi pou annan lalimyer ki enstale apre dan son vizibilite ; par egzanp dan sa semen Le Niole ki kontinyen monte –napa bokou vizibilite dan sa semen.

Mersi.

 

MINISTER JOEL MORGAN

Mr Speaker, sa Kesyon i tonm dan kad nou proze Street lighting an zeneral e la mon ti a kontan enform Lasanble ki nou’n resevwar en nouvo stok lalimyer – Lazans Transpor lo Later in resevwar en nouvo stok lalimyerLEDki nou pe al kontinyen avek nou progranm ansanm avek PUC pou enstal bann lalimyer – par egzanp kot Onorab pe fer referans Le Niole.  E sa i ganny determinen atraver Ladministrasyon Distrik – bann priyorite ki Ladministrasyon Distrik i donn nou pour nou enstal sa bann lalimyer.

Lenstalasyon lalimyer li menm li i ganny fer par PUC e nou depan lo PUC pour sa servis.  E petet annan de ler i annan en pti pe retar se akoz PUC li osi i annan serten priyorite ki i bezwen tackle Mr Speaker, ki met nou en pe retar dan nou proze enstalasyon lalimyer dan nou bann distrik e ki nou ti a kontan vwar li al en pe pli vit. E mon kontan enform Lasanble, ki nou pe travay ek PUC pou rod bann lezot Kontrakter a leksteryer pou sub-contract sa travay, pour nou kapab speed up lo lenstalasyon lalimyer,akoz nou nepli annan en problenm napa lalimyer.  La nou problenm se lefikasite, lavites lenstalasyon ki nou kapab fer li.

Mersi.

 

MR SPEAKER

Kestyon 66, Onorab Marie.

 

HON MEGGY MARIE

Mersi Mr Speaker.

Bonzour Minis ek ou delegasyon.Bonzour tou bann Onorab e tou zabitan ki a lekout. Mr Speaker, eski Minis i kapab eksplik nou Lasanble, si i dan plan son Minister pou konstrir en pavement o-bor semen depi Care Free ziska kot Katiolo, vi ki i en landrwa danzere pour pyeton?

Mersi Mr Speaker.

MINISTER JOEL MORGAN

Mersi Mr Speaker.

Mr Speaker bann kriter pour nou fer bann trotwar i depan lo serten fakter  ki ganny pran an konsiderasyon, ler bann Transport RoadCommissioner e bann Zofisye Lazans Transpor lo Later, i al fer zot bann vizite e fer zot bann survey preliminer lo bann lokasyon kot trotwar pou ganny konstrir. Lenformasyon i ganny anmase ler zot fer sa bann survey;

Premye, lakantite pyeton ki pou servi ouswa ki pe servi sa trotwar.

Dezyenm, larzer semen e kantite lespas ki annan poukonstri sa trotwar.

Trwazyenm, volim trafik lo sa semen.

Katriyenm, tipografi teren kot trotwar pou ganny sitye e senkyenm,  lakantite aksidan veikil ki enkli osi aksidan en pyeton ki ganny rikorde dan sa landrwa.

Lazans Transpor lo Later, in deza fer resers dan le pase lo  sa seksyon semen e zot in idantifye ki sa seksyon semen sorti depi kot Care Free Guesthouse, ziskan kot sa trotwar ki trouve par lao Lakademi Lapolis ki mezir anviron 750 longer, i en landrwa ki neseser pou konstrir en trotwar an term  en priyorite.  E sa i anliny avek vizyon Gouvernman pou met a dispozisyon piblik bann lenfrastriktir semen ki met li an sekirite pour tou dimoun sirtou lavi nou bann pyeton e bann motoris ki pe servi  sa bann landrwa.

Sa proze spesifik pou osi enkli son drenaz e osi bann miray pou bezwen ganny konstri pou anmas laterans  lo kote later kot i neseser.  E i estimen akoz i annan en kantite bann glasi la  – i annan en kantite bann ros la, sa trotwar i estimen pou kout apepre R2.2 milyon akoz bann konplikasyon ki mon’n eksplike.

Lazans Transpor lo Later, i annan lentansyon pour enplimant sa proze lannen prosenn, osito ki nou ganny finansman.

Mersi.

 

MR SPEAKER

Onorab.

 

HON MEGGY MARIE

Mersi Mr Speaker.

Mr Speaker, eski Minis i kapab dir nou Lasanble, kan ki Gouvernman i anvizaze fini sa proze, an vi ki konstriksyon  rigol kot Care Free Guesthouse pe al komanse soon; e kan ki sa proze trotwar li menm li i anvizaze pou konplete?

Mersi Mr Speaker.

 

MINISTER JOEL MORGAN

Mr Speaker, nou kapab konplet sa proze dan 6 mwan.  Lazans Transpor lo Later i enform mwan ki pou pran apepre 6 mwan pour kapab konplet sa proze, apre ki nou’n komans li.  E parey mon’n dir i en priyorite lefe ki i annan sa nouvo proze drenaz ek sa pon kot Care Free Guesthouse pe al ganny fer, nou ti a kontan an menm tan boner lannen prosenn komans sa proze pour nou kapab al fer li zwenn sa bout pavement ki par lao Lakademi Lapolis.

Mersi.

 

MR SPEAKER

Onorab Houareau.

 

HON HERBERT HOUAREAU

Bonzour Mr Speaker.

Mr Speaker, an vi repons Minis, eski Minister in pran kont sa pavement – sa rigol ki pou fer lo main road? E pran kont osi sa bann delo ki sorti anler lo sub-road par lao Katiolo partou e desann pou anmas depi anler pou desann avek ziska anba?

Mersi.

 

MINISTER JOEL MORGAN

Definitivman Mr Speaker, nou pou bezwen pran kont tou bann delo ki desann sorti kot bann propriyete ki par anler e bann semen ki par anler – par egzanp Onorab in fer sa mansyon sa semen ki sorti vizavi Katiolo par anler, pour nou kapab fer en sistenm drenaz ki apropriye e nou a desarz li dan lagon pli ba lo sa kote.  Me ler nou’n ariv lo oter nou pou bezwen desarz li lo sa bout ki desann ver lo kote La Pointe Larue – par lao sa seksyon Lakademi Lapolis kot i deza annan en drenaz en pe pli ba.

Mersi.

 

MR SPEAKER

Kestyon 67 dan labsans Onorab Vangadasamy, mon’n ganny enformen se Onorab Vidot ki pou demann sa Kestyon.  Proceed.

HON KEVIN VIDOT

Thank you. Bonzour Mr Speaker.Bonzour Minis e tou dimoun ki a lekout.

Mr Speaker, Kestyon i lir koumsa, eski Minis i kapab dir sa Lasanble, kan ki son Minister pe mazin re-vwar Lalwa Trafik pou fer li pli azour ek modernite e devlopman pei?

Mersi bokou.

MINISTER JOEL MORGAN

Mersi Mr Speaker.

Mr Speaker, Lalwa Trafik i pa enn ki statik.  I enn ki kontinyelman ganny re-vwar, zisteman pou fer li vin azour avek devlopman e modernite dan pei.  Bi sa travay se pou asire ki tou itilizater semen i fer li dan en fason ki prezerv safety lo semen a tou moman e asir ki bann bon kontrol lo lafason ki bann veikil i servi semen i ganny mete. Alors sa i vedir bann Regilasyon Trafik i ganny re-vwar kan i neseser pou attain sa bann lobzektif ki mon’n mansyonnen.  Sa i ganny fer par Lofis Komisyoner Transpor lo Later an konsiltasyon avek Departman Transpor li menm e an kolaborasyon avek Lofis Attorney Zeneral.  Tou resaman i annan plizyer nouvo Regilasyon ki pe ganny met an fors e sa i osi enkli enn ki pe vini byento kot i apel Demerit point systempour bann drayver e osi nou pou annan bann regilasyon pou wheel clamping e towing away ki pe ganny finalize.

Mr Speaker, tou letan nou reviz nou bann Lalwa – nou bann Regilasyon an sa ki konsern Road Act avek Road Transport Regulations e pou fer sir ki nou kontinyen met li azour swit a bann devlopman e bann problenm ki nou fer fas avek lo bann semen.

Mersi.

MR SPEAKER

Onorab Vidot. okenn siplemanter ?

 

HON KEVIN VIDOT

Yes,Mr Speaker, mersi bokou.  Mr Speaker, eski Minis i kapab dir nou, si i annan okenn konsiltasyon ki pe fer avek bann dimoun konsernen – bann Lotorite konsernen ou piblik an zeneral an sa ki konsern propozisyon lo lamannman ki zot ti a kontan vwar dan revizyon Lalwa Trafik, eski Minis i kapab dir nou anliny avek Bidze 2015 ki ti annan finansman ki ti ganny met aprouve par Lasanble pour prepar lespas pour landrwa ideal pour drive racing, ki zistans sa i ete anliny avek Lalwa Trafik ki nou pe koz lo la?

Mersi bokou.

 

MINISTER JOEL MORGAN

Mr Speaker, mersi.

Wi, konsiltasyon in ganny fer se pour sa rezon ki mon’n etabli sa gran Komite ki apeltheRoad Safety Committeeki annan enn bann fonksyon pour advise mwan atraver Departman Transpor lo bann nouvo Regilasyon – bann nouvo amannman Lalwa ki nou bezwen fer, pour asir sekirite lo semen tou dimoun enkli natirelman bann pyeton.

So, Road Safety Committee i pe travay lo plizyer bann nouvo lamannman e propozisyon pour Road Transport Act – Road  Transport Regulations – Road Act, li menm li pou asire ki nou kapab kontinyen met li azour pour attain nou bann lobzektif ki mon’n koz lo la.

An sa ki konsern drive racing Mr Speaker, sa i en keksoz ki Gouvernman i anvi fer – i anvi enplimante – i anvi enplimant en drive race track pour nou bann antousas ki kontan sa spor ki anvi fer sa spor e mon note koman Minis Transpor ki i annan en kantite reprezantasyon ki ‘n ganny fer avek Gouvernman avek mon Minister pour nou kapab provide sa fasilite.  Nou pe travay avek Komite ki’n ganny etabli lo kote sa bann antousas pour en tel obzektif.  Problenm ki nou annan la pour lemoman se idantifikasyon en lespas – en bout seksyon later ki pou mezir apepre 775 met longer pour nou kapab donn zot en drive racing. I annan opsyon pour nou convert en parti sa semen ki la devan nou ki sorti kot round about Union Vale pou vin isi kot Lasanble Nasyonal lo sa seksyon semen la  – an paralel fer en drive race la.  Me in annan serten konplikasyon.  In annan serten lobzeksyon osi pou servi sa bout semen la. akoz serten problenm ki pou kree.

Problenm prensipal la se pa par lavolonte Gouvernman pou fer li, me se en problenm kote i apropriye pour nou fer li akoz i annan bann eleman disturbance – i annan bann eleman letan zot pou servi sa semen, sa semen pa pou ganny kapab ganny servi par bann lezot motoris.  E nou bezwen kontinyen travay avek Minister Litilizasyon Later, pour nou identify en landrwa pour nou fer li.

Mersi.

 

MR SPEAKER

Onorab Houareau.

HON HERBERT HOUAREAU

Mersi Mr Speaker.

Mr Speaker, an vi repons Minis, mon ti a kontan demann Minis si son Minister i anvizaze re-vwar bann tiket parey kot bann dimoun i park dan nou parking area – double yellow line ouswa yellow line, si i annan lide re-vwar lafason ki sa bann tiket i ganny ekrir e donnen; e osi re-vwar bann tiket ki Lapolis i issue – par egzanp intend prosecution ki anba Regilasyon Trafik kot en transpor i park e en lot i tap lo li, me sa dimoun ki’n park dan parking, ki annord e an reg i trouv li pe ganny intend prosecution notes ki pa azour ozordi.

Mersi.

MINISTER  JOEL MORGAN

Mr Speaker, an sa ki konsern bann parking tickets, mon’n fer mansyon demerit pointsystem e dan nouvo demerit point system osi, bann dimoun ki park dan double yellow lines ouswa ki par egzanp i pa obzerv bann lenstriksyon bann siny trafik zot pou ganny bann pwen tire lo zot license koman en mezir adisyonnel pour konpleman sa issue donn parking tickets; kot ozordi en kantite parking tickets pe donnen dimoun i peye – i annan serten dimoun pa peye zot al devan Tribinal – zot al devan Lakour pou pey zot lanmann si i  neseser ouswa si i pa neseser – si Lakour pa trouv zot pa koupab.  Me i en  gro problenm ozordi.  Mon krwar ki lafason osi ki bann tiket i ganny issue parey Onorab pe dir, i en kestyon ki nou bezwen kontinyen train nou bann Traffic Wardens e nou bann Zofisye Lapolis ki dan Seksyon Trafik pour zot kapab fer sa travay dan en fason pli byen pour lavenir.

So, bann training neseser osi pe ganny fer an menm tan ki nou pe enplimant demerit point system, pou kapab konplemant sa travay ki mon’n koz lo la, Onorab.

An sa ki konsern sa ka spesifik kot in annan sa lensidan, kot en dimoun ti’n park, mon napa sa lenformasyon,e mon pa kapab reponn li right now, me selman mon a kapab petet esey vwar ki lenformasyon mon kapab fer a lavenir avek Lasanble Nasyonal.

Mersi.

 

MR SPEAKER

Se son case.

Onorab Fideria.

 

HON EMMANUEL FIDERIA

Mersi Mr Speaker.

Mr Speaker, eski Minis i kapab dir sa Lasanble si dan revizyon Lalwa Trafik a lavenir, ki pe ganny fer ek bann Traffic Wardens ganny plis pouvwar pour zot ranforsi Lalwa Trafik; e si zot annan ase resours a zot dispozisyon parey Transpor pour zot fer pli byen zot travay?  E anliny avek Lalwa Trafik, eski Minis i kapab eksplik sa Lasanble, ki mekanizm ki egziste ki determinen ki landrwa apropriye pou met bus stop e si dan sa prosesis lezot Lotorite Distrik i ganny konsilte?

Mersi Mr Speaker.

 

MINISTER JOEL MORGAN

Mersi Mr Speaker.

Mr Speaker, wi, nou pe revwar ki mannyer nou pou kapab empower nou bann Traffic Wardens pou donn zot en pti pe plis pouvwar, sirtou avek sa demerit point system ki pe antre la byento.

So, i annan Licensing, i annan Traffic Police, i annanbann Traffic Wardenszot menm zot pou ganny bann pouvwar adisyonnel, ki anba Regilasyon Trafik Minis i kapab donnen pour kapab fer zot travay  dan en fason pli byen.

An sa ki konsern nou bann bus stops – mon kapab konfirmen ki nou konsilte Ladministrasyon Distrik a tou moman ler nou pou konstrir en bus stop e souvandfwa se Ladministrasyon Distrik menm ki idantifye bann landrwa kot bann bus stop i neseser vizavi bann popilasyon – bann nouvo kominote ki pe vini e zot enform Lazans Transpor lo Later pour konstriksyon busstop dan sa landrwa.  I en progranm kontinyel ki nou fer tou- le-z-an nou fer bann nouvo bus stop – sa bann bus lay-bys. Me problenm prensipal ki nou annan se lespas lo semen dan bann serten landrwa ki koz bann danze pour nou kapab konstri bann bus stop; ki vedir ki i pa egzakteman ki nou ti a kontan met li, akoz sa problenm safety – sa problenm danze lo semen e nou bezwen alor depas li en serten zistans en pe pli ba, ouswa en pe pli o pou kapab accommodate en bus stop dan sa bann landrwa, ki fer ki nou bann pyeton i bezwen mars en pti pe plis.  E mon ti a kontan konmsi eksplike ki i pa entansyonnel pour nou fer sa – me en Kestyon safetydan sa bann landrwa, kot nou pa kapab build sa bann bus stop egzakteman kot nou ti a kontan vwar li ganny mete.

Mersi.

 

MR SPEAKER

Onorab Maria-Payet.

HON MARIA PAYET-MARIE

Mersi Mr Speaker.

Mr Speaker, mon ti a kontandemann Minis, si son Minister pe mazin re-vwar rol ek responsabilite son Departman ki deal ek bann issues Trafik pour zot vin pli efikas e si Minis i kapab petet partaz ek nou Lasanble, ki bann issues prensipal ki zot pe rankontre kot Lalwa Trafik pa pe ganny respekte?

Mersi Mr Speaker.

MINISTER JOEL MORGAN

Mr Speaker, wi nou bezwen definitivman ranforsi Lofis Transpor Komisyoner lo Later.

(1) I napa ase Staff pour li travay.  I napa ase manpower pour kapab desarz son bann responsabilite fas a bann demann kontinyel ki pe ganny mete lo son Lofis pou kapab fer bann travay neseser an sa ki konsern son fonksyon anba Lalwa.  Sa i premye.

(2) Nou bezwen kapab osi anba Lazans Transpor lo Later annan plis nou bann Zofisye Trafik pou monitor sityasyon dan Lavil e pou ed asire ki i annan bon sirkilasyon trafik sirtou dan Lavil.  Me i annan bann lezot landrwa osi; par egzanp i annan Pointe Larue, i annan Anse Aux Pins kot nou pe vwar bann konzesyon trafik ki pe ogmante deplizanpli.So, sa i en lot nesesite pour nou kapab ranforsi an term resours imen – an term formasyon e an term lekipman li menm li, enkli Transpor pour nou kapab desarz sa bann travay ki neseser.

Lo kote kas Lalwa, deplizanpli sa pe vin en gro problem pour nou Mr Speaker, akoz bann motoris bokou – sirtou pandan letan wikenn – pandan leta Lafet, zot dray anba lenfliyans lalkol – zot fer bokou speed – zot fer bann aksidan ki vreman pa ti neseser – pa ti pou’n arive si zot pa ti anba lenfliyans bann sibstans.  E zot pa obzerv bann Lalwa Trafik – zot pa obzerv Highway Code, Mr Speaker.  I kree en kantite problenm pour nou.  Zot al dan en junction zot pa arete.  Zot force zot way out dan bann junction ler zot sipoze pe give way.  En kantite problenm – en kantite konzesyon e osi aksidan i ganny okazyonnen par mis-behaviour serten nou bann motoris lo semen.  Me mon pe enform zot ki nou pou pran aksyon neseser dan en fason apropriye avek sa demeritpoint system.  Zot pou komans  lo 12 pwen e finalman zot pou vin lo 0 pwen si zot kontinyen fer bann keksoz ki kas Lalwa Trafik.  E ler zot in ariv lo 0 pwen, zot perdi zot license Mr Speaker. So, sademerit point system mon espere i ava ede pour konsyantiz sa bann dimoun fir e anmezir ki Road Safety Committee e nou bann advert lo Televizyon ki nou pase souvan i kontinyen ede pour edik nou bann motoris lo Highway Code.

Souvandfwa, dan mon lopinyon Mr Speaker, dan lopinyon Departman Transpor osi, i pa ki zot pa konn zot Highway Code akoz zot in pase zot tes.  Zot in fer zot teori, zot in fer zot pratik, me ki zot in devlop zot bann move habits – bann move fason lo semen kot zot in plito agresiv – zot dis-regard Lalwa e la nou pou bezwen kontinyen edik nou bann dimoun – remind zot dan en fason pozitif akoz nou bezwen travay avek zot dan sa fason,me osi nou pou bezwen pran aksyon kot i neseser, pour nou asire ki bann ki pe servi semen dan en fason apropriye i pa ganny met an danze atraver bann aksyon iresponsab par bann lezot dimoun.

Mersi.

 

MR SPEAKER

Bon, avek sa nou’n ariv a-lafen Question Time.  Nou ava remersye Minis e ekskiz li parmi nou.

THE MINISTER WAS EXCUSED FROM THE HOUSE

 

MR SPEAKER

E kant a nou, nou pou kontinyen avek nou travay.

Nou annan en Mosyon.  Nou annan ase letan, so,nou pou adjourn akoz Mosyon pou ganny pran par Deputy Speaker.  Nou avaadjourn pou detrwa minit.

(BREAK)

MR DEPUTY SPEAKER

Bon, mon a dir bonzour tou Manm Onorab e tou dimoun ki pe ekout nou e nou ava kontinyen avek nou prosen item lo Order Paper.  E sa se en Mosyon table par Onorab Charles De Commarmond, Leader Zafer Gouvernman; e mon ava envit li pou prezant son Mosyon.

 

HON CHARLES DE COMMARMOND

Mersi Mr Deputy Speaker.

Mr Deputy Speaker, mon Mosyon i senp.  Set en Mosyon ki i demann nou Lasanble  – nou Lasanble Nasyonal i zwenn avek tou pep Seselwa pou selebre 40an Lendepandans nou pei.

Mr Deputy Speaker,  sa Mosyon i koensid avek 40enm laniverser nou Lendepandans.

Mr Deputy Speaker, sa Mosyon i en Mosyon senp parey mon’n dir – alokasyon 40an nou Lendepandans.  Mwan mon zis anvi atraver nou Lasanble Nasyonal, e atraver sa Mosyon, ki nou reflesir ansanm koman en pep – koman en Nasyon – nou Lasanble i osi reflesir  – nou fer en refleksyon dan kad sa selebrasyon, pour  nou kapab gete kwa ki nou’n fer – kote nou sorti – sa parkour ki nou’n fer ansanm.  E mon anvi ki nou Lasanble Nasyonal, osi koman en Lenstitisyon ki pran kont son evolisyon li menm li.  E  si oule mon anvi ki nou kalkile – nou seryezman kalkile ki nou fer prezan?  Ki nou fer?  Nou’n ganny 40an Lendepandans aprezan nou bezwen asize take stock an menm tan ki nou pe selebre, sa achievement; e osi pou gete ki mannyer nou afransi lavenir – i enportan pour nou.

Si oule Mr Deputy Speaker, mon anvi nou reflesi parey mon dir – apartir de la sa Lendepandans la prezan ki nou pou get devan ki mannyer nou pou vwar lavenir.  Sa Mosyon li i pa la pou vin vwar tou solisyon li – e konmsi annan tou lide dan nou Lasanble.  Nou osi nou imen.  Nou annan bann limit, me selman nou anvi pous en pe refleksyon – vwar en pe lide ki mannyer nou kapab – parey nou’n vwar SBC in fer.  SBC in fer plizyer Foronm – bann lezot Zournal, bann lezot Lenstitisyon in reflesir osi.  I annan ki’n fer gran interview. I annan tou sa bann demars ki’n ganny fer e tousala se bann bon keksoz ki’n ganny fer pou fer lepep reflesir lo sa 40an son Lendepandans.  E ou vwar alors ki bann pwen valab nou bezwen tenir – ki bann pwen ki nou bezwen ride lo ride lo la.  Nou pa bezwen ki nou partaz menm pwen-vi.  Nou pa bezwen ki konmsi nou tou nou krwar dan menm kalite ideolozi, ouswa menm kalite prensip Parti.  Me i enportan ki nou bann Leaders kanmenm dan tout kategori ki swa bann Leaders politik dan diferan Parti – ouswa bann Leaders Relizye- tou kalite Leaders ki nou annan dan nou pei – konmsi i pran sa bann pwen ki nou ava dir dan Lasanble la, ki nou ava mazinen, osi pozitiv; ou vwar alor ki kalite keksoz ki koman Leaders zot kapab ansanm, met ansanm pour nou kapab vwar sa lavenir.  Pour nou kapab vwar konmsi ki zot osi zot pa kapab – akoz enn ler i arive kot Leaders li i kwar son lide pli bon. Ou konpran?  I annan serten Parti, ouswa serten groupman, i krwar li ki annan monopoli lide.  Nou, nou pe sey dir la – atraver sa refleksyon, atraver mon Mosyon la, konmsi annou aret en kou – ekout en kou nou pep.  Nou pep i ganny 40an – i pe gran li parey Leon.  40an ki in aprann pandan sa 40an?  Ki in fer?  Ki in gannyen? E prezan ekout li en kou.  Si nou krwar nou’n en pe matir.  Ekout pep en kou – gete ki pep pe dir pour nou kapab vwar sa lavenir ki devan nou.

Therefore, Mr Deputy Speaker, parey mon pe dir nou Seselwa li in – ozordi letan nou pe get pei – nou Seselwa in bokou delire; konmsi 40an pase e mwan mon enn sa dimoun ki’n la 40an pase.  Mon’n vwar tou sa bann transformasyon, tou sa bann sanzman. E nou vwar, nou’n avanse.  Nou’n bokou pli edike koman en pep e alor si nou’n bokou pli edike, savedir nou annan plis kapasite pou fer sa bann bon refleksyon ansanm. E fer avanse bann bon pwen-vi.   Alors nou pe dir ek nou Leaders osi an menm tan, fodre pa ki sa ki nou pe reflesir ansanm la, nou pran – sa bann bon lide –kantite bon lide pou sorti dan tou sa bann refleksyon.  Fodre pa ki sa bann bon lide i ganny pran e kit lo letazer parey bann bon thesis ki nou bann zenn – nou bann Etidyan ler i al etidye la, i fer bann thesis apre letan i vini – ladan i annan bann bon lide me ki i ganny fer?  I ganny pran i met lo letazer ouswa dan en bife, i lock nou pa vwar li ditou ankor.  E nou pa kapab aprann e benefisye avek sa.

Nou pe  dir – dan sa bann legzersis ki nou pe fer la, pour sa roulman Lendepandans la -40enm Laniverser la, annou pa les sa bann bon lide al dan bife koumsanmenm.  Annou pran sa bann bon lide e nou pe demann ek tou Leaders pour nou servi sa pozitivman, pour nou lavenir.

Mr Deputy Speaker, personn pa kapab dir ki sa pti Nasyon Sesel – sa pti Nasyon Seselwa, nou pti pei, pa’n fer progre pandan sa 40an Lendepandans.  Personn pa kapab deny sa.  Si i annan dimoun ki dir nou pa’n fer progre, mon krwar i annan problenm ek li menm li.  Nou tou nou vwar en kantite progre in ganny fer.  Me sa ki pli enportan ki’n ganny fer dan nou pei, se ki – ki mwan mon santi – se ki nou’n sanz tout en sistenm.  Ler nou ti pran Lendepandans, ‘76’ e ozordi letan mon pe gete, se nou’n sanz tout en sistenm, Mr Deputy Speaker.  Savedir set en transformasyon imans – en transformasyon nou sosyete.  Sa dan li menm, i pli gran keksoz ki’n arive avek nou pep e nou Nasyon.  Dan sa parkour nou’n agrandi osi fizikman.  Pei in vin pli gran akoz nou’n devlope.  Nou’n konble.  Nou konble pei – in fer son teritwar vin pli gran ki i ti ete.  Nou’n etabli nou EEZ Exclusive Economic Zone e la osi nou vwar tou dernyerman letan sa in  ganny regilarize byen normal nou teritwar ki ti 1.3 million square kilometres la in monte, i ariv pros 1.4.

So, pei parey mon pe dir in vin pli gran pandan 40an.  Sa i en achievement sa.  Pa tou pei ki fer son pei vin pli gran.  Pei i annan en bann i lager i perdi pei tou – nou pour nou, nou’n vin pli gran.  Parey mon pe dir osi sa transformasyon set  en transformasyon enportan – en transformasyon – en sanzman profon sistenm sosyete.  Sa in arive.  E sa in anmenn ek li sa transformasyon sosyo ekonomik e kiltirel  e ideolozik nou pei.

Sa i bann pwen for Mr Deputy Speaker e tou keksoz – tou bann lezot sanzman, mon bann lezot koleg taler ava a koz lo plizyer lezot pwen e tou in de-koul atraver sa ki mon’n dir la –sa transformasyon fondamantal.  Sa in kree en baz alor – en nouvo platform pour devlopman Sesel.  E nou’n vwar lontan kalite lekonomi ki nou ti annan. Ti baze lo nou Patsouli, Kannel, Kopra,  me ozordi nou ankor annan Kannel, nou ankor annan Koko, be al dir dimoun la al tir Kannel ou pa pou ganny person preske – mon krwar taler byento la nou pou fer vini etranze pou al tir Kannel.  Nou annan en problenm la, pourtan  pri Kannel deor la in monte.  So, nou bezwen gete ki sa ki nou kapab re-vwar la.  Nou ti annan – nou lekonomi ti baze en pe lo la – i pa ti vedir tro bokou keksoz, me i ti vedir en keksoz. So, la lo la, nou annan pou reflesir ki nou pou fer.  E Kannel letan ou gete ozordi i vin pli gro ki avan.  Li osi in devlope, mon krwar pandan sa letan Lendepandans.  So, i bann keksoz  ki nou bezwen gete e …Nou tourizm in devlope en kantite.  Prezan nou bezwen gete ozordi in devlope – gran, gran Lotel in vin fer.  Wi, ti ti annan enn de gran Lotel osi avan.  E la lekel ki benefisye avek sa devlopman?  Sa i osi reste en keksoz fondamantal ki nou bezwen regarde.  Devlopman pour ki? Kestyon i bezwen ganny demande pour nou kapab vwar lavenir ki nou fer?  Nou al dan menm direksyon or nou dir – la nou’n etablir en baz e prezan ki nou bezwen fer ek sa baz – ki mannyer prezan nou met striktir avek li ki pou benefisye sa pep Seselwa.  Akoz si sa pep Seselwa li i pa santi li i annan ownership son devlopman – i pa santi li annan ownership son pei an form teritwar, i pa santi li annan ownership bann laspirasyon sa devlopman e son pei, pou annan problenm avek li.  Sa i en keksoz ki mon pe met devan –  ki pou permet nou think – ki pou permet nou reflesir ki mannyer alor nou get sa future.

Mr Deputy Speaker, nou bann Rights pandan sa 40an la Konstitisyon parey in deza ganny dir mon krwar, Konstitisyon in sanz 3 fwa.  E dan Konstitisyon ozordi bann Rights in ganny enshrine. In ganny mete pour pa tire.  I annan serten Drwa ki lontan ti napa – letan nou ti fek Lendepandans ti napa, in ganny mete – in fer sir in antre e pou tire.  Nou demokrasi in evolye.  In agrandi bokou, bokou, bokou.  Kanmenm nou pe konplent la, annou gete kote nou sorti 40an pase nou pou vwar ki sa ki nou’n fer i enorm, enorm pandan sa pti letan.

Ozordi nou bezwen veye si sa demokrasi ki nou’n sitan devlop li pa anpay nou, akoz demokrasi nou pa fer atansyon i anpay ou li en?  I pou met retar ek ou.  Ou pou krwar en bann i pou avanse e ou pep pou reste an aryer.  Lo sa nou bezwen careful. Alor, i bezwen annan en refleksyon nou tou ansanm tou dimoun i bezwen fer.  Taler mon avans lide ki mannyer alor nou bezwen fer sa refleksyon.

Mr Deputy Speaker, me Telekominikasyon dan pei, mon krwar dan larezyon, dan Lafrik, nou preski limero 1 e dan lemonn nou pa ni lwen ditou.  Si lezot laspe; par egzanp ease of doing business e en pe lezot bann keksoz ankor, ti al dan lafason ki Telekominikasyon ek I.T. in devlope dan pei nou ti lwen, lwen e lwen.  Sa i bann keksoz ki ou vwar nou fer en gran manman lepa dan en direksyon, me dan en lot direksyon i annan en mankman. Mon pe dir tou sa pou fer nou reflesir.

Mr Deputy Speaker, nou vwar poudir dan Lapes  – ou vwar nou Sesel, i annan bann nouvo konsep ki ozordi lemonn pe al avek  Sesel – sa pti Sesel – pti pei pandan sa letan 40an nou’n entrodwir. Konpran – bann konsep par egzanp Klima – sanzman klima –bann zafer pti zil – devlopman pti zil – Small island developing states. La dernyen kou la nou annan Lekonomi Ble.  Ok? Tousala i bann konsep ki’n originate from Seychelles.  Ok? Sesel ti pti ki i ete in navig sa gran lemonn e in dir lemonn lala bann – ou konnen in met son thinking cap. Sa en keksoz bann achievement ki pti Sesel in fer lo nivo – bann perse lo nivo enternasyonal.  E pour mwan mon proud – mon santi mwan fyer letan nou pe get sa ki nou’n fer.  Me ler mon gete osi mon dir ok, Lapes, Devlopman Lapes, mon vwar la in donn bann fuel incentives taler a tire be la ti’n donnen; prezan mon dir be ok – Food security i pa zis Lapes.  Nou Lasanble letan nou al deor dan bann diferan Forum – diferan meeting ki nou ale, nou vwar poudir   pe koz for lo Food security. Be depi ler ki nou’n fer 40an Lendepandans la, nou dir tou later lagrikiltir annou tire – annou met la pour pa touse.  Pa’n fer.  Sa bout pa’n fer.  Mon santi mwan poudir nou merit pli serye lo la.  Nou merit la petet vwar vreman  -kanmenm i annan bout ki ou pou sey gete apre, me la ou bezwen tire.  Dir lala nou pa touse.  Sa i pou nou Food security, la.  Konpran. Ou kapab vwar ki mannyer nou ogmant prodiksyon lokal.  Nou ti pti, wi.  Nou konnen nou market i ti pti.  Sa pa bezwen personn vin dir nou.  Nou vwar market i ti pti – nou popilasyon i pti.  Be Selman i pe vin pligran avek kantite touris ki antre.

Me eski nou kontinyen enport bann zafer – ou annan privatization la ek liberalization ki’n antre osi. Nou’n sanz kalite lekonomi, prezan ek liberalizasyon sa boug i fer vini son prodwi kanmenm Brazil – kanmenm pou touy ou, i fer vini li. Be prezan, pour ou prodwi lokalman pou meet sa ou pa’n kapab.  Ou pa pou kapab.  I enposib.  Prezan Gouvernman li i bezwen vwar.  Lala, mon pe dir sa i bann keksoz ki nou bezwen reflesir ansanm pour lavenir.  Nou bezwen vwar ki mannyer nou ogmant prodiksyon.

Lontan nou bann paran letan ti annan lager – zot rakont nou, nou history sa – ti annan bann koupon ti servi, ti annan bann kalite manze – ti dir lala rasyon – ti donn rasyon dan letan premye ger – dezyenm ger mondyal; nou’n pas ladan. E sa i devret servi koman bann legzanp pour nou vwar poudir i annan problenm  i kapab arive demen  – si bato pa vini. Le lot zour Pirat ti pe pran tou bato.  Si bato pa arive ki nou fer ? Ki nou manze ? So, i bann keksoz ki nou bezwen reflesi en pe plis – ki nou abitye reflesir ansanm.

Mr Deputy Speaker, nou kapab koz lo kantite, kantite keksoz; Lozman, Kiltir Langaz, Afabetizasyon.  Ozordi nou proud sa ki nou’n fer pandan 40an konsernan Alfabetizasyon.  Nou vwar li nou bann Drwa.  Sa i ok – bann devlopman biznes, bann Lendistri, Sports – kantite devlopman – Stadium nou’n fer ankor enn pandan sa 40an, ensidswit.  Larme nou ti napa nou’n gannyen.  Preservasyon – Konservasyon nou Lanatir, nou Later, nou Lanmer – ou vwar ? E Sesel i parmi bann pei ki annan prezervasyon son teritwar.  La nou’n prezerv  kantite later,  La prezan nou pe al prezerv en bon pe lanmer, pou fer nou ariv lo en lot nivo ankor, dan sa parkour.

Mr Deputy Speaker, airline nou ti komans par Air Mahe, me la nou annan Air Seychelles e la nou annan lot ki pe al ganny ankor – lot airline. La osi in annan kantite devlopman dan sa kalite keksoz la  – dan sa Lendistri.

Mr Deputy Speaker, prezan ki nou fer?   Tou sa bann zoli zafer in fer  – pep in avanse – fantastik ! Be nou annan devan nou en bann lot problenm.  Nou ‘n vwar avek tou sa devlopman, nou annan problenm sosyal.  Problenm sosyal la i pe manz nou la.  Drog, fleo drog, fleo bann lalkol e tou. Bann substance abuse, i pe anmenn nou an aryer.  I pe anmenn nou an aryer akoz nou labour force in ganny afekte enormeman e la nou pour nou kontinyen survive nou bezwen rod etranze pou vin donn nou en koudmen.  Sa Seselwa pour nou, li travay in vin en problenm,  E prezan i pa zis travay – in komans koumsa li – pli tar i pou lezot keksoz.  Ou vwar ?  I annan dimoun ozordi i komans enport msye – i komans enport madanm tou.  Ou vwar sa problenm la, si ou ogmante.

Me zis gete si drog i kontinyen ronz ou Mr Deputy Speaker, ronz tou ou zenn, ou zenn i pou nepli kapab ni prodwi ni nanryen.  Prodwi nanryen pa pou kapab. Sa i bann keksoz ki nou bezwen reflesir -mazinen ki nou pou fer then ?

Mr Deputy Speaker, se la kot mwan mon dir ki nou bezwen fer – mon pa pou apel sa en meeting mwan, me i bezwen annan bann konsiltasyon lo nivo Nasyonal – gran konsiltasyon pour ki tou nou pep i partisip lo reflesyon pour nou lavenir.  Zis apre nou selebrasyon Lendepandans la, mwan mon pe lans en lapel.  I bezwen annan en group – en Komite ki ganny etablir, pou fer en refleksyon.  Nou pep i bezwen vin ansanm, akoz mon pe get mwan, nou ti’n komans – ti annan divizyon – i annan dimoun ti dir ti annan divizyon dan pep ensidswit; E pei ti’n komans linite.  Sa pep la kantite linite ti’n ganny fer.  Mwan mon pe ekout parol nou bann lim Nasyonal  – bomaten menm mon’n ekoute sirtou sa enn dan dezyenm Repiblik,  i pe koz Linite.  Tout an fen kont i pe koz linite.  Be prezan Mr James Mancham in vini – mwan mon rapel li – la in vini e li osi in unite li – in konpran.  Be solman mon pe vwar mwan i annan en pe mankman linite ki pe vini, akoz mon santi i annan en pe larogans, vyolans ki komans ogmante dan nou pei.  Sa demen i pou vin en problenm. Ler mon pe gete – mon pa pe vin konmsi pour soz politik ki mannyer mwan.  Be solman letan mon pe gete en boug i dir mwan – la Cascade i dir mwan, i pou pil lo mwan – ouswa dan kot ou pase en boug – Be lekel  sa dimoun ki pou les en lot boug pil lo li ? Personn. Ki ou pou fer ?  Ou pou defann ou lekor.  Ler ou vin ek sa kalite politik,   i vin en problenm la.  Mon pe dir sa pour nou reflesir.  Eski nou kontinyen koumsa ?  Eski nou stop en kou, tou dimoun i vini annou reflesir en kou.  Konmsi i bezwen annan bann Forum la –  ki nou dir  – vini, annou dir nou pei – nou mother-land ki nou pou fer dan sa lot parkour 40an ?

(1) parey mon pe dir ou – lo Kestyon nou linite li menm – lo Kestyon nou Konstitisyon li menm ki mannyer nou devlop en pti pe plis.  Lo Kestyon ownership, devlopman biznes.  Nou bezwen deside ki mannyer nou fer pour ki nou tou nou dir wi, lala semen pou ale.  Letan nou tou nou’n dir semen pour ale, prezan i bezwen annan transparans ladan.  Ler i ava annan latransparans tou dimoun a konnen kwa  ki nou pe fer.  La prezan nou a kapab konpran e tou dimoun a konpran, lala semen i la.  Prezan ou kapab vini ou – ou annan 4,5,10,12 Parti Politik si oule.  Solman tou i konnen semen i la, akoz nou tou ansanm nou’n diskite  – nou’n dir lala semen pase  ok ? Lala ki nou pou fer.  Prezan ki mannyer ou pou ariv pli vit – pli soz, sa en lot zafer.  Me nou, nou konnen poudir semen i la.  Devlopman nou demokrasi menm zafer. E lo prodiksyon parey mon pe dir – Food security – prodiksyon manze, menm zafer.  Nou bezwen konmsi angaz nou pep.  I pa kapab zis detrwa dimoun ki reflesir dan sa pei.  I bezwen tou dimoun angaz li.  I bezwen – nou Leadership i bezwen ekoute e pran sa bann pwen e dir lala pep.  Fer transmet sa lo SBC.  SBC fer nou ekoute.  Fer nou dimoun tande ki pe dir – ki nou tou nou a vin sansib a nou lavenir.  Nou tou nou a konnen nou annan en lavenir, ansanm. Sansan mon pe santi nou annan danze devan nou Mr Deputy Speaker.  Danze dan le sans, ki si nou pa fer li byen, nou pou annan en pei ki divize.  Nou pou annan en pei kot en bann pou oule pli soz ki lot.  En bann – pa zis sa – ou annan osi etranze ki pe antre – i pe envestir li.  Ler mon get nou zenn pour nou, li in dan drog, dan lalkol – in fini, lekel ki pou diriz pei ?  Lekel ki pou fer marse pei ?  I bann keksoz ki nou pou bezwen reflesir.  Be annan de zour  etranze  ki pou pran pei. Mon vwar sa mwan – si nou pa fer atansyon.  So, nou, nou bezwen careful ki nou pe fer e vwar nou future ansanm.

So, i lo sa baz ki mwan mon ti ava kontan,  nou pas sa

moman selebrasyon 40an nou Lendepandans dan lape.  Nou demann tou dimoun pou sey konmsi – met en kou bann pti diferans dekote, si i annan ; gran diferans osi met li dekote. Annou sey ansanm selebre sa 40enm lanniverser nou Lendepandans.  Annou vwar sa ki i annan pozitiv ladan.  Sa ki negatif nou pa pou kapab al devan avek.  I pou zet nou dan delo.  I pou zet nou akote.  Annou pran sa ki pozitiv  annou bouz avek.  E annou sey rod en fason pour nou zwenn ansanm, pour nou reflesir sa ki negatif pou dir vwala sa pa bon nou met akote e pour nou kapab vwar sa lavenir ansanm.

Avek sa Mr Deputy Speaker, mwan mon ti a kontan swet tou dimoun – tou nou pep antye isi aryer en Bonnfet Lendepandans.  Mon re-dir ankor, mon ti a kontan vwar ki nou vin pli unite – nou vin plis ansanm pour nou zanfan.  Nou zanfan li i pa pou kontan vwar sa diferans.  I pa pou kontan vwar sa bann problenm negatif ki annan dan nou pei.  Ki mannyer nou pou fer li – dan bann detay sa dan refleksyon, dan diskisyon nou a kapab soz.  Me selman vwala ki mwan mon ti pe sey reflesir lo la e ki mon dir mon dir, mon ava met alor sa dan en Mosyon.  Mon swete lezot dimoun ava kapab dir en pti keksoz, epi bann dimoun konsernen ava tande e a gete ki mannyer nou kapab al devan ansanm, Mr Deputy Speaker,  – en fason ou piti – mon piti, piti nou tou, i a kapab – savedir nou bann zanfan – nou future zenerasyon, i a kapab pa perdi,  Zot a kapab kontinyen tenir Sesel anler e kapab kontinyen benefisye ek Sesel dan tou son larises – ek tou son devlopman, zot osi.

Mersi.

 

MR DEPUTY SPEAKER

Bon, Mosyon in ganny prezante, okenn Manm pou segonn sa Mosyon?

 

HON JEOVANA CHARLES

Seconded Mr Deputy.

 

MR DEPUTY SPEAKER

Onorab Jeovana Charles i segonde. E ou ti oule koze?  Bon, nou ava met ou premye lo lalis ler nou re-pran apre break.

E sa Lasanble i a break e nou a re-zwenn 11.10am.

 

 

(BREAK)

 

MR DEPUTY SPEAKER

Nou ava kontinyen avek deba lo sa Mosyon table par Onorab De Commarmond e mon ava envit Onorab Jeovanna Charles.

 

HON JEOVANNA CHARLES

Mersi Mr Deputy Speaker.

Bonzour Mr Deputy Speaker, tou Manm Onorab, tou dimoun a lekout.

Mr Deputy Speaker, koman en reprezantan sa Nasyon Seselwa i enportan ozordi ki nou definir klerman dan lespri e par nou aksyon ki nou rol e nou responsabilite vizavi sa bann menm dimoun ki’n met nou dan sa Lasanble.

Mr Deputy Speaker, rezon ki mon’n komans mon lentervansyon koumsa se akoz i tre enportan ozordi ki napa okenn dout e okenn konfizyon dan lespri nou dimoun lo kestyon krwar ki pe arive dan nou pei.

Mon’n pran an kont ki nou bann dimoun i bezwen toultan ganny dir, re dir kote nou sorti, kote nou ete e kote nou pe ale.

Mr Deputy Speaker, listwar ek la realite ozordi in montre nou ki lafyerte ek boner en pep i sorti non pa dan byennet materyel bann endividi me dan son dimansyon imen.  Dan lafason ki sak paran i edik e elve son zanfan.  Listwar in osi montre nou ki pou en nasyon ek en pe avanse i bezwen reste ini, reste solider, travay dir e viv an armoni.

40an lendepandans koman en zenn nasyon, nou tant plito pou nou get listwar lezot pei e tir bann leson pou kree nou prop listwar ki pou pas ek nou bann prosenn zenerasyon.

Mr Deputy Speaker, en pti pei parey Sesel, konmdir Msye Mannkanm ‘Napa plas pou lager e desir kanmarad konmsi dyab dan delo beni’.

Mr Deputy Speaker, mon’n pas la mazorite mon lavi pe travay an kontak direk avek sa Seselwa ordiner ki nou koz lo la ozordi.  Ki swa koman en ansenyan, en direkter lanplwa e en Manm Parlman.  I annan en keksoz ki mon’n realize, sa se ki Seselwa i en nasyon entelizan.

Mr Deputy Speaker, ozordi nou pei Sesel pe non zis pozisyonn li koman en sanpyon lakoz pti leta zil me osi en sanpyon dan Lafrik.

Mr Deputy Speaker, tou kondisyon neseser pou sa arive i deza an plas e i kler ki Prezidan Michel koman en dirizan enternasyonal in fer son mark.

Malgre tou zefor malisye par en group dimoun pou met presyon lo bann kominote enternasyonal lo Sesel e malgre zot zefor pou sali non Sesel dan vid avek tou kalite lamars, tou zot bann post lo Face Book.  Komite Enternasyonal e sertennman bann ki enportan pou lemonn e Sesel pe rekonnet Sesel konman byen plase, pou ofer zot lopinyon diriz lezot e ganny servi koman en legzanp pou devlopman imen.

Mr Deputy Speaker, i kler alor, lemonn pa pe pran parti lopozisyon o serye e i enportan rekonnet akoz.  Si en parti i napa prensip de baz lo ki i pozisyonn li, i vitman tonbe.  Akoz parey zot pe fer, zot sanz zot prensip detanzaot pou satisfer zot bezwen imedya.

Dan politik Mr Deputy Speaker, sa pa tenir akoz apre en pe letan bann Gouvernman e Lenstitisyon ki serye i realiz sa.  Si en parti pa prezant li koman en alternativ konkret pou Gouvernman dizour i vin pli kler alors ki zot bi.  Zot tou se zot byen personnel non pa Nasyonal.

Mr Deputy Speaker, se pour sa rezon ki taler mon’n dir ki sa pep Seselwa i en pep entelizan.  I annan bokou kestyon ki zot bezwen poz zot lekor e i annan bokou larepons ki zot bezwen reponn zot menm.

Mr Deputy Speaker, bokou keksoz in ganny fer dan sa pei.  40an Lendepandans Mr Deputy Speaker, sa vizyoner Mr France Albert Rene ti annan en vizyon.  I ti annan en plan kler e konkret pou Sesel e Seselwa.  Kot Seselwa ti sorti anba dominasyon kolonyal, sorti dan sa povrete ekstrenm kot tou zanfan i al lekol olye al anmas koko ek kannel.  Kot tou fanmir i ganny en lakaz konvenab pou reste ladan e en lanplwa desan pou kapab sonny son fanmir.  Kot en dimoun i kapab ganny akse avek lasante.

Mr Deputy Speaker, ozordi mon pou tous selman 2 pwen.  Ledikasyon ek lozman.  Zot kapab mazin 40an pase, nou bann paran ki mannyer zot ti an swete zot ti an ganny en sans pou al lekol.  Me erezman ozordi napa lenkyetid, tou paran irespektiv son stati sosyal i konnen ki son zanfan i garanti omwen 12an ledikasyon gratwit depi lakre e menm posibilite son zanfan avanse ziska nivo pos segonder e si i fer byen, menm pou li ariv Liniversite.

Mr Deputy Speaker, tousala san okenn gran demars lo son par oubyen lo lapar son paran.  Apar byensir garanti ki son zanfan i annan labaz pou parfekte son laprantisaz.  Parey en liniform prop e son bann zafer lekol.

Ledikasyon ozordi Mr Deputy Speaker, in vin enn sa bann garanti ki sa Gouvernman in met a dispozisyon son pep.  Fini sa letan kot nou bann zanfan ti bezwen rente akote zot paran dan plantasyon Msye.  Fini sa letan kot ti bezwen savoy bal koko oubyen pake zerb lo latet.  Fini sa letan kot zot ti bezwen get bann pli fortinen byen sanze epe al lekol kolez, tandis ki zot, zot ti bezwen paran semen gran bwa pou al bat kannel ek zot paran.  San okenn lespwar ki en zour zot zanfan ti pou ganny sa sans zwir bann benefis en sistenm ledikasyon ki pou permet zot epanouir parey sa zenerasyon aktyel i fer ozordi.

Mr Deputy Speaker, an 1964 fondater nou parti, Mr France Albert Rene ti dir dan portrait of a struggle, ki en zanfan lavenir pa merit zanmen konn lapovrete ek bezwen.  Ki zot merit ganny edike pou travay dir dan konesans ki zot pe travay pou zot pei.  40an pare nou lendepandans, nou’n realize ki se zisteman sa e plis ki Gouvernman lepep in fer.  In arive donn nou tou sa ki sa zenerasyon avan ti pe rode e ankor plis.

Mr Deputy Speaker, ankor enn fwa mon dir nou en pep edike ki nou konnen krwar ki a nou porte e ki mannyer nou pou ganny plis.  Mr Deputy Speaker, me avek bokou devlopman, teknolozi avanse, fleo sosyal in antre aven en vites enorm.  I normal alors ki nou rod pli bon fason pou kapab deal avek sa bann problenm.  Si zot nou kapab rektifye nou pwen feb.  Anbelir nou pwen for e angaz nou tou dan sa larout, mon napa okenn dout ki nou pou kapab elimin sa bann fleo e kontinyen progrese dan lavi.

Mr Deputy Speaker, 40an lendepandans avan lendepandans Sesel ti en Koloni Angle e avan sa ti en koloni Franse.  Nou tou nou konnen ki dan sa letan kolonyal ti annan selman detrwa gran imsye ki ti propriyeter bann gran, gran morso later.  Pei ti ganny partaze parmi sa detrwa e sa ki pa ti pou zot ti pou lanmisyon.  Nou Seselwa ordiner ti bezwen lwe en pti morse later avek zot pou met zot pti payot debout.  Ouswa zot ti lwe sa bann pti payot menm avek sa bann gran Msye.

Mr Deputy Speaker, 40an pare nou lendepandans nou koz bedsitter, nou koz one bedroom house, 2 bed room, 3 bedroom. Ozordi nou koz master bedroom, nou koz la salamanze, lasal de ben.

Wi Mr Deputy Speaker, lekleraz sa bann letan ti selman labouzi, en fannal oubyen en lalanp petrol.  Delo pou bwar ek kwi manze, zanfan ti bezwen al serse kot ti annan tiyo piblik.  Tandis ki lenz ti lav dan larivyer.  A en moman apre lendepandans nou ti trouv larive karavann.  Erezman Msye Rene, i ti en zonm ki ti non selman annan en vizyon pou sa pei me osi en determinasyon pou fer sir ki keksoz i sanze.

Pou komanse en target ti ganny mete lo lakantite lakaz ki ti pou ganny fer tou le an.  Avek nouvo Polisi Gouvernman SPPF pli tar, nou’n vwar plizyer kreasyon bann vilaz.  Apre anmezir ki teknolozi in avanse e nouvo stil bann lakaz an bwa ek tol ti ganny ranplase par bann lakaz an blok.

40an apre lendepandans Mr Deputy Speaker, nou koz bann housing estate partou lo Mahe, Parslin ek La Digue e sa i kontinyen kot avek sak nouvo lakaz ki Gouvernman i konstrir, in amelyor an se ki konsern stil, grander e osi bann fasilite ki zot ofer.

Mr Deputy Speaker, sekirite lozman i osi en konponan enportan dan kapasite prodiksyon en pep e Gouvernman SPPF/ Lepep ti angaz pou konstrir tan kantite lakaz par an.  I ti fer an sort ki lafors travayer i kapab konsantre dan prosedir konstriksyon en nasyon avek en lespri anpe.

Mr Deputy Speaker, listwar pa kapab ganny efase.  40an progre in ganny aggrave partou dan tou kwen Sesel.  Sa ki pa oule krwar zis desann Roche Caimen e al vwar expo 2016.  Zot a vwar 40an progre kot in ganny display.  Sa expo i montre klerman krwar ki Sesel in achieve pandan sa 40an.  I demontre talan, lide, travay dir nou pep.

Mr Deputy Speaker, en lalit anmennen par nou per fondater pou donn nou sa vre liberte koman en nasyon pou epanouir e vin sa ki sakenn de nou in vini ozordi.  Ozordi 40an pli tar lafyerte e lepanouisman, lakonplisman e rezilta travay dir sa pep in ganny ekspoze pou tou sa ki annan lizye pou vwar.

Wi Mr Deputy Speaker, ler prezidan Rene ti pas labar avek Prezidan Michel.  Prezidan Michel in konsolid tou bann aki ki nou pei avan, apre, apre sa in enstal nou lo lasenn enternasyonal.  Prezidan Michel in fer tou lede avek sikse.  E la mon pou salye tou zefor Prezidan Michel pou fer monte nou paviyon partou kot in ale.

Mr Deputy Speaker, 40an apre lendepandans mon get devan mwan avek loptimizm pou nou pep.  Mon vwar en lavenir briyan pou tou nou zanfan.  Mon vwar en Sesel kot tou nou zenn i annan son konpetans.  Mon vwar en zenerasyon fyer ki pe monte e mon vwar en zenes ranpli ek determinasyon e pe prepare pou pran labar.  Mon fyer pou s aki mon’n arive kontribye pou fer sa pei ariv kot i ete.  40an nou lendepandans e mon tre ere ki nou ankor lo bon direksyon.  Wi nou’n avanse, wi avek lepep tou i posib.

Mr Deputy Speaker, an terminan mon ti a kontan dir en gran mersi tou bann dimoun ki’n fer bokou sakrifis, bokou zefor pou ede fer nou pei progrese malgre lensilt, maltrete e tou kalite tret.  Mon mazinen tou travay dan Sekter Piblik, Prive, Zidisyer e non menm Lezislatif, mersi e bonn fet 40an nou lendepandans dan lape e linite.

Mr Deputy Speaker, se avek gran plezir ki mon pou donn tou mon sipor sa Mosyon, pou ki nou Lasanble i zwenn ek tou Seselwa pou selebre 40an lendepandans nou pei.

Mersi Mr Deputy Speaker.

 

MR DEPUTY SPEAKER

Onorab Houareau.

 

HON HERBERT HOUAREAU

Bonzour Mr Deputy.

Bonzour tou dimoun dan lasal, en bonzour spesyal pou dimoun ki pe ekoute espesyalman pou bann zabitan St. Louis.

Mr Deputy, lendepandans Sesel se listwar Sesel e se en vre listwar.  Mr Deputy, letan mon mazin 40an lendepandans i fer mwan vwar ki sa i konsern nou tou Seselwa.  Sak segonn ki’n pase dan sa 40an, sak minit ki’n pase.  Sak erdtan ki’n pase, sak mwan ki’n pase e sak lannen ki’n pase.  Nou tou, nou annan keksoz pozitiv e negativ ki’n mark nou.  E mwan mon pou pran en laliny pou fer mon bann frer ek ser reflesir e mon laliny i pou kos laverite, rien ke laverite ki nou’n fer fas avek.

Ozordi nou pe koz lo lendepandans Sesel, nou pe koz lo lendepandans nou bezwen al detrwa lannen an avan 1976.  Nou bezwen al an 1064 kot bann premye parti politik ti ganny formen, enn par Msye Rene ki ti vin avek parti Sosyalis e lot par Msye Mannkanm ki ti vin avek parti Demokratik.

Pandan sa lepok Seselwa anba kolonizasyon Angle kot bann blan ti sourd lo nou bann gran paran e kot lamizer ti egziste e kondisyon lavi ti tre terib.  Sa ki mon dir in resaman ganny demontre dan laform en bann portre ki ti ganny mete par Msye Paul Chow lo facebook e la mon montre enn kot i annan bann diferan vye laboutik kot nou gran paran ti pe travay pou fer bann pti dalo an tol.

Mr Deputy, apre ki nou bann gran paran ti’n ganny ase avek pouvwar kolonyal, proteste, lager, reziste.  Angle tin ganny ase, zot ti deside sede e donn nou pei e nou pep son lendepandans le 29 Zen 1976.

Le 29 Zen, 1976 Mr Deputy, mon pa pou zanmen oubliye kot paviyon kolonyal ti desann e nou nouvo paviyon ki ti ble, blan ek rouz ti monte ki osi sa letan ti reprezant 2 pli gran parti politik dan pei.  Sa paviyon pa ti dire parey son leader osi pa ti dire.  E dapre larsiv Angle ki’n ouver ozordi, 30an apre ki’n vwar ki Sesel pa ti pe anmenn naryen pou zot e zot tin menm fatige ekout Msye Mannkanm e zot ti prefere deal avek Msye Rene, ek Msye Guy Sinon ki ti mont Langleter pou vwar zot sa letan.  Sa pa mwan ki dir me arsiv Angle ki dir, ki’n ouver ozordi.

Lenzistis ti pli kler, kot par egzanp se bann letan mwens ki 15 Seselwa ti ganny sans fer A level.  Dapre lenformasyon ki mon’n resevwar ek bann istoryen, Msye ek Madanm George ti parmi bann ki ti osi annan drwa pou zot asiste e pas en A level sa letan.

Mr Deputy, parmi nou ti osi annan lager bann Zil BIOT tel ki Farquhar, Déroche e Aldabra, kot Angle ti oule servi Aldabra pou kraze pou fer zot Baz Militer.  E apre ki parti SPUP ti lager lebra kase zot ti oblize rann sa group zil e fer zot baz militer aryer, ki nou konn li koman Deograsyas ozordi.

Avek bokou konfizyon ziska Msye Rangoulanm, Moris sa letan ti oule pran Sesel e fer li atase avek Morsi.  E si sa ti arive, nou tou nou ti pou Morisyen non pa Seselwa.  Si SPUP pa ti lager lebra kase.

Le 4 Zen, 1977.  Aswar en gran group Seselwa ti pran nou pei an men, anba direksyon Msye France Albert Rene.  Le 5 Zen bomaten nou pei ti anba leta syez.  Wi Mr Deputy, se sa ki nou tou nou konn li e apel li koman koudeta 1977.  Depi 1977 ziska 1986 Sesel ti adopte en paviyon rouz, blan, ver.  Sa letan lepok SPUP e SPPF.  Kot tou ti an abondans.  Bokou in ganny fer e menm bann Dodin ek bann Hermine ti ganny sans pou al etidye, peye par Gouvernman sa lepok.

Mr Deputy, an Zen 1996 nou pei ti adopte en nouvo paviyon ki nou pe vwar ozordi.  Sa in posib apre en prosesis miltiparti e plis demokrasi par Prezidan Rene.

Mr Deputy, dan sa lalit politik ki nou pei in traverse nou’n touzour vwar lenterferans bann pei etranze, tel ki an 1991 le 25 Novanm kot Sesel ti ganny atake par bann mersener Sid Afriken.  Bann loter sa latak i ankor vivan e zot in ganny pardonnen ozordi.  An 1982 zanmen mon pou oubliye, nou pei ti fer fas avek en rebelyon sorti kot Kan Larme UVC baze Union Valle. Sa enn ti en kosmar pou nou pep, menm nou militer akoz nou ti bezwen fer fas avek nou prop frer.  Avek pasyans tou ti ganny met dan lord.  Sa letan Mr Deputy, mon ti ankor zanfan avek en lafreyer ki bann rebel ti pe senmen.  Pou blow pa pou blow.

Avek sa Mr Deputy, mon oule osi pran mon lavi an kont dan mon deba.  Pou bann ki pa konnen, mon’n grandi dan en fanmir ki ti mizer dan Semen Kato, St Louis.  Lavi lanfans pa ti enn ki ti fasil.  Partaz menm lasanm ek mon gran tonton, ansyen Kaporal Evaris Houareau ki ti deservi Larme Angle e ti vin endikape apre dezyenm ger mondyal isi lo later Sesel, fot Msye Dokter Ferrari.

 

MR DEPUTY SPEAKER

Relevancy.

 

HON HERBERT HOUAREAU

Eskize Mr Deputy.  Nou lakaz ti an tol, planseye avek dibwa, lafnet dibwa e laport dibwa ki ti ganny lock anndan avek krose.  Mon ganny siporte avek mon fanmir e osi par mon vwazen Msye Wanmkalawan ki ti en gran aktivis SPUP sa letan e se akoz li ozordi ki mon siport Parti Lepep.  E se gras a li ki’n toultan dir mwan en zour si sa parti i ale nou pep e nou pei i fini.

Mr Deputy, mon’n aprann viv ek tou mon bann frer ek ser Seselwa, mon’n aprann konpran zot.  Mon’n aprann atrap zot lanmen e mars ansanm avek zot letan mon ti al NYS.  Wi Mr Deputy, mon’n fer li.  NYS ti la, ti ede pou edik nou sa bon savwar viv e zanmen mon pou oubliye mon 2 animater St. Anne 1, Msye Athanase e Msye Antat.  Sa i apel progre depi 1976.

Mr Deputy, ozordi nou bann zenn pe viv dan lakrenm diber.  Zot in ganny en lasal dev ki’n byen renovate ozordi.  Zot in ganny bar, kazino, e bokou discotheque a la oter nivo enternasyonal ozordi.  Zot in ganny Mercedes Benz e gro bato deluxe pou mars ladan.  Zot in ganny lalimyer ek plizyer materyel elektrik dan lakour enkli gro cooker, fridge ki nou ti napa dan lepase.

Zot in ganny masters e doktora.  Zot in ganny menm sans ki bann Eropeen e bann Ameriken i annan e menm bokou plis ki bann Ameriken, akoz laba si ou napa larzan ou mor.

Seselwa sa i ape progre an plis ki progre a ekstremite.  Mon apel en vye Msye Lawenn, Curio Road, St Louis ki’n kit nou.  En zour i ti vin kot mwan e i ti dir mwan.  En zour dan 50an Sesel e Seselwa pou mazin Msye Rene koman en sen.  Akoz tou sa ki in fer napa personn ki pou fer li ankor pou Seselwa.  Sa Msye ti dir mwan dan bann lannen 1948 zis bann ki ti annan propriyete ki ti annan drwa vote dan sa pei e ti annan anviron 25 dimoun.  Ozordi tou Seselwa i kapab vote.

I ti azoute ki Sesel i le sel pei dan Lafrik ki’n nobou avanse depi sa lepok lalit e Seselwa pa’n manz kanmarad parey dan milye Lafrik.

Msye Lawenn pou sa 40an lendepandans mon mazin ou e mon demann Bondye pou ouver laport paradi ek ou, ki’n lalit pou sa pei.  Ou bann parol ti byen plase.

Ansanm nou kapab progrese, ansanm nou kapab tonm dakor pou ki nou pep i a kapab viv anpe e ansanm si nou tou nou pardonn kanmarad pou sa karantyenm laniverser lendepandans nou pei i a kapab annan en gran sourir e nou zanfan pa bezwen vwar e antann bann ki gran e ki pres laenn.

Sa 40an i dir pou li menm, mon demann mon pep pou vin pli matir politikman ki a ede batir en lavnir pou nou zanfan demen.  Me i enportan pou note ki nenport parti politik kot ou ete, pe enport panse ki ou annan, pe enport kalite laenn ki ou annan dan ou panse ou dan ou leker.  Si i annan ki’n ganny blese, si i annan ki kek lokazyon in mark zot e zot viv avek dan zot leker koman en laenn, mon demann zot en leskiz ozordi e mon demann zot tou annou atrap lanmen kanmarad e annou avans devan.  Retourn dan lepase i pa pou montre nou naryen, i pa pou fer naryen pou nou.

Pou sa lokazyon mon oule dir zot tou mersi ki’n kontinyen dan en fason ou en lot.  Ki swa dan politik, Gouvernman ou dan biznes pou anmenn sa pei kot i ete ozordi.  Sa i en gran travay ki swa ou, gos ou drwat.  Me tou in ganny fer avek kouraz e disiplin pou ki Sesel i kontinyen flote parey nou paviyon i flote tre o e sa i fer nou Seselwa tre fyer.

Mon profit sa lokazyon pou swet tou Seselwa, san eksepsyon en bonne fet lendepandans.  Mersi Mr Deputy, ki Bondye i touzour Béni nou pei Sesel e ki dyab i reste lwen avek nou lakot e ki nou pep i ganny touzour proteze kont dimal.

Mersi Mr Deputy.

 

MR DEPUTY SPEAKER

Onorab Bresson.

 

HON GALEN BRESSON

Mersi Mr Deputy.

Lapo kannel larzan, fey patsouli lanmonnen.  Mr Deputy, mon komans koumsa akoz en parkour ki loter Mosyon li menm in dir.  Ozordi 2016, lannen i 2016 e aprezan ki fey patsouli i anmenn plis lanmonnen e lapo kannel li menm parey loter Mosyon in mete, Onorab De Commarmond i anmenn gro lanmonnen.  Me pa ozordi zour sa sanson in ganny ekrir e progre dan nou pei i kontinyen.

Mr Deputy Speaker, en parkour ki Onorab Charles, mon’n asize monn ekout li, ki bokou pli vye ki mwan, in fer e in vwar bokou.  E pou mwan mon apel mwan koman en zenn, mon krwar i enportan note ki wi, pandan sa 40an monn la, me i annan bokou.  Ler komansman 40an i pa vreman en re koleksyon ki mon pou mazinen.  Alor mon dir mersi pou bann ki’n koz par avan mwan ki’n fer mwan realiz bokou e bokou ki ganny dekrir par portre.

Me koman en zenn mon osi anvi repas lo sa 40an.  Mr Deputy, kiltir en nasyon.  Si en nasyon napa en kiltir,  vreman i tonbe e retonbe i for.  Akoz menm si nou’n ariv 2016, 40an apre, nou bezwen toultan mazinen ki koman en pep, koman en nasyon nou annan serten keksoz ki nou apel pou nou Seselwa.  E sa loter Mosyon bomaten in koz lo la, en linite.

Lontan Sesel kot nou ti pase, bonzour Msye, bonzour Madanm, koman sava.  I pa neseser ki mon konn ou.  Me sa i ti en parti nou kiltir an gran disan ki nou aprann.  Msye, ou pa konn sa Msye, ou dir li Msye, Madanm ou pa konn li, tantin, tonton.  E menm ozordi avek lonnekte mon ankor dir bann Msye, bann Madanm, bann gran Tonton.  Mon ankor dir zot tonton, tantin e zot get mwan zot riye.

Me i en kiltir, i en kiltir, en parti nou nasyon ki nou’n erite, ki nou merit kontinyen adopte.  I annan bokou dan nou kiltir ki nou merit kontinyen ki vre enn pe dan en serten fason disparet.  Me se avek nou kiltir ki kit nou koman en nasyon Seselwa, ki fer mwan mazinen ozordi mon krwar bokou nou pe regard Foutbol 2016.  E enn bann lekip La France, i annan enn bann zwer ki’n pa mal shine avek son sinyatir Payet.  Ler ou regarde sa Msye i sorti La Réunion, en zil pa tro lwen avek nou.  I pe zwe dan La France e La Réunion reste anba dominasyon La France.  E ozordi pa okenn komanter pa’n zanmen fer sa Mosyon ouswa in dir sa i en garson de zil sorti La Réunion.  E pou mwan i en keksoz ki vreman enn ler, pou en garson kekfwa ki’n grandi lo zil, en lorizin, en idantite enn ler i vreman ou vwar kot i enportan.

Ozordi mon fyer pou dir mon en Seselwa e mon reste lo en zil.  Menm i fer mwan mazin ler mon ti al Liniversite, en parkour ledikasyon ki monn kapab benefisye pandan sa 40an.  Bokou mon bann koleg ler i demande kote ou sorti, mon dir Sesel.  Zot dir ou reste dan bann pti lakaz an pay, obor lanmer.  La ou pe met lenz ler ou vin Lerop.  Manke ou mars dan bann grass skirt.

E i montre dan bann lannen 90 ki mannyer dimoun ti pe mazin bann zilwa.  Lakaz anpay, ou mars demi touni e konmsi Lerop ki pou montre nou ki mannyer pou met lenz.  Idantite.

Me en evolisyon, ler mon dir zot be mon krwar mon a montre zot portre ki pe arive Sesel.  Zot soke nou annan lakaz,  later ki’n evolye, lakaz ki preski parey lo nivo Lerop e laverdir ki nou annan.  Mr Deputy, sa laverdir ki nou annan, ki bokou dimoun pa vwar menm resaman mon ti al en spektak kiltirel avek en group sorti Lasin.  E sa Msye dan son lentrodiksyon i dir ler i debarke erport Point Larue i vwar en siny i mete Eden Island.  I dir i konfize, i dir kisisa Eden IslandEden Island mon’n lir dan liv.  I dir kot Adam ek Eve ti ete, me sa zil Eden Island, be ou a dir mwan kote.  I dir in pas zis 24 er lo Mahe, i dir i fyer poudir i realize ki savedir Eden Island e li koman en Adam i pe rod en Eve sorti Sesel.

So, nou annan en kantite aki ozordi koman en nasyon 40an apre ki nou’n prezerve, nou’n garde ki bokou dimoun i adore.  Akoz tourizm i reste nou pilye lekonomi.

Me Deputy, pandan sa parkour mon enn ki fer bokou lamars dan teknolozi e teknolozi in devlop sitan vit.  Mon mazin dan bann lannen 90 tar 90 ler mon retournen sorti mon letid.  Ler mon ti pe etidye dan Liniversite, en keksoz ki apel enternet ti pe ganny lanse avek bann etidyan laba.  Ti pe dir nou fer en email address, pe rode ki sa en email address.  Me ti nouvo e i ti nouvo pou Lerop.  Me by the time mon ariv Sesel, bann lannen 90, Sesel tin deza, menm letan ki Lerop pe dekouver, pe eksplore avek enternet, an 95 Sesel i lans son premye koneksyon enternet isi Sesel par telefonn.  Bann ki mazinen, konekte en laliny telefonn i pran sitan lontan pou ou konekte ek enternet.

Avan sa, telegraf.  Ki mannyer nou ti al kot Cable & Wireless ki’n isi plis ki 100an.  Anvoy en mesaz.  Tap, tap bann mwayen kominikasyon avek sa ki nou apel en kab, sa letan ti fer avek copper.  Ozordi Sesel in arive antre dan lemonn teknolozi.  Fib optik in ariv isi menm Sesel e ozordi sa kab i konekte nou avek lemonn antye.  Konnekte nou pli vit ek lemonn antye.  Avan sa ti satelit e Sesel in sitan bouze ki menm enn ler ou per.

Statistikman lo Lafrik nou pei ki annan plis gadgets elektronik par tete habitant.  2.5 mobile par tete habitant.  3 televizyon par tete habitantVCR avan, konmela i dir ou DVD, pe disparet osi DVD, ranplase par lot teknolozi.

Me i sitan efreyan avek teknolozi, me selman si nou vwar sa parkour kot nou kapab ganny en akse.  Menm ozordi mon pe koze la, i annan pei pa kapab servi kominikasyon parey watsapp.  Ozordi dimoun i dir ou annan fer en call watsapp.  Kekfwa, mon pa konnen si tou bann Manm dan Lasanble i konnen kwa ki mon pe koz lo la.  Me selman watsapp i la.  Ou pa ni bezwen dial en nimero, me si ou dalon i la ek ou lot kote lemonn ou kapab call.

Me pran en avyon nou al pa lwen dan en serten pei, watsapp i pa allow.  I pa les ou koze par watsapp.  Pa egziste.  Pou montre ki zistans nou’n arive avek nou teknolozi isi Sesel.  Kominikasyon nou par devan en kantite pei.  Kalite telefonn, gadget ki nou vwar dan nou epi ozordi i annan serten pei pa ankor vwar.

Mr Deputy Speaker, mon’n fer mon parkour dan teknolozi pa mal letan e mon ti abitye atenn sa ki nou apel bann konferans e bann konferans ski vize lo ki bann diferan marse i vann.  E ti sirprenan.  Ozordi si mon sey eksplik sa lo laspe televizyon.  Ozordi nou annan LCD, LED, Plasma e bann dimoun i konnen bann televizyon avan.   Mon pou dekrir sa en pti pe an Kreol parey nou dir, nou dir sa ti annan en gro fes deryer, en gro deryer.  Me la ozordi i fen.

Me pa tro lontan pase, en pti pe 6an, 7an de la, mon atenn en konferans e i koz lo Sesel vizavi Lafrik kot pe vann televizyon.  Ler dan lakonpannyen kot mon pe travay nou pe order LCD, LED, tou bann lezot suppliers sorti lo Kontinan Lafrik i get mwan i dir be ou le dir mwan ou’n ariv sa nivo.  Mon dir wi, Sesel ozordi nou pe koz LED. I dir be sa Lerop, ki mannyer zot pe rod LCD.  Nou, nou ankor pe rod bann televizyon ki nou isi nou dir bann gro deryer, ki preski CRT, son mo teknik.  E zot ankor pe rod container load, zot ankor pe rod radyo.  Radyo sa ki lontan bann pou mazinen ti komanse nasyonal, la apre Phillips in fer en bon non lo radyo.  Zot ankor pe rod sa.  Mon dir zot be ki zot pe zwe CD, zot dir mwan non, nou ankor pe rod casette.

Parkour teknolozi Sesel i enkrwayab Mr Deputy Speaker.  E ler ou baz ou lo bann kontinan Lafrik an gran, an zeneral bokou bann pei i ankor kekfwa 3an par deryer nou.  3an par deryer nou akoz zot popilasyon, kous zot popilasyon ki ankor pe ekout radyo.  E kekfwa e bokou Manm Lasanble in fer bann parkour dan bann pei Lafrik.  Ou vwar ki zot annan en televizyon.  Isi mon kapab met sa dan term parey en sant sosyal. Tou dimoun i al laba pou regard sa televizyon ansanm pou zot kapab vwar ki pe arive.  Si i annan en foutbol.  Lafrik i annan bann zwer foutbol ki’n al Lerop ozordi, so i montre ki mannyer nou, nou’n devlope ozordi par tete habitant.  Nou pe koz nou 3 televizyon.  Akoz baze lo enportasyon 3 televizyon par tete habitant.  Savedir dan tou lakaz at least i annan enn.

Me Mr Deputy, apre sa 40an parkour.  Analis i bezwen ganny fer.  Menm koman en zenn ou bezwen asize analize, regard ou kot ou ete e ki ou anvi pou le fitir e ou bezwen annan lizye e ekoute ki ou pe vwar letour.  Pa zis get dan bann zournal lokal e regarde ki pe arive e krwar sa ki pe ganny dir.  Pran enternet ki la, al en kou.  Pa zis al download bann film ek sanson.  Al get en pe lenformasyon.  Bann pei a staz devlopman, bann sanzman ki zot in fer ki mannyer in afekte zot, pozitiv negativ.

So Mr Deputy Speaker, apre 40an mon krwar i en keksoz ki bokou dimoun i bezwen fer.  Asiz en kou e reflesir.  Nou koman en imen ler nou ganny 40an bokou dimoun i fer lafet.  Me osi nou reflesir.  40an pou bann Msye, lanmenm ler i dir ou komans fer plis ou bann tes prostat, fer tes laba.  Akoz la bann sistenm i komans ariv lo en serten laz.  So al en pti pe plis kot Dokter, komans fer en pti pe plis legzersis.  So en analis ki ou bezwen fer lo ou, lo ou pei, lo son parkour e osi byen get letour.

Avan mon terminen Mr Deputy, ozordi nou vwar ki komen en pei kantmenm nou’n fer en 40an parkour nou osi part of sa ki nou apel the global village.  Met televizyon on, get en pe nouvel.  Al lo BBC, pa al lwen.  Regarde ki pe arive en pti pe Langleter apre sa pti sanzman ki’n arive la.  Fer en refleksyon lo nou pei.  Kou ou, ou ti a vwar ou ankor dan 5an.  Pa bokou 5an.

Mr Deputy Speaker, 40an les mwan osi zenn mon bann Koleg ki’n koz avan mwan e bann ki pou koz apre mon asire.  Zwenn avek sa mesaz ki Leader Government Business oter Mosyon in dir.  Pou ki tou dimoun, tou Seselwa i vin ansanm dan lape, dan linite e lespri pozitiv pou selebre sa karantyenm laniverser e ki nou a selebre dan lazwa e ki nou tou nou apel nou kanmarad frer e ser Seselwa.  E ler nou zwenn kanmarad, no matter what kouler politik, larelizyon nou a dir koman sava mon zanmi.  Ou en Seselwa, mon en Seselwa ozordi nou selebre nou karantyenm laniverser  Lendepandans.

Mersi Mr Deputy Speaker.

 

MR DEPUTY SPEAKER

Onorab Monnaie.

 

HON FRANCHASCA MONNAIE

Mersi Deputy Speaker.

Mosyon pe demande ki nou zwenn ek Seselwa pou selebre 40 lannen lendepandans.  An premye mon ti  a swete ki tou Seselwa i fyer pou être Seselwa e nou pe viv dan en pei endepandan.  En pei kot tou Seselwa par lao 18an i kapab partisip lo en nivo gouvernans son pei dan en fason ou en lot.  Kot nou viv dan en pei kot nou kapab elekte nou reprezantan dan Gouvernman.  Kot nou kapab viv anba en konstitisyon i dir tou Seselwa i egal.

Nou devret fyer pou dir nou en Seselwa, nou devret fyer pou viv dan en pei beni.  Nou devret dir mersi nou gran dieu ki nou’n ne dan sa pei.  Mon pa pe dir ki nou dan dimyel ou ki tou keksoz i an roz, non.  I annan bokou Seselwa ki pe fer fas avek bokou defi e ki pe pas dan en ta birokrasi e ki fristre.  Koman en pti nasyon nou devret kapab rod solisyon sa bann problenm.  Koman en aksyon endepandan la  demokrasi in ganny plase koman nou norm e sa i en sans pou tou Seselwa ki enterese pou konteste en eleksyon pou fer li.  Fodre koman bann Seselwa nou donn respe drwa lezot e annou respe drwa lezot pou partisip dan politik.

An plis, in plis ki ler ki annan en mobilizasyon pou edik tou Seselwa zot drwa anba Lalwa.  Me annou pa oubliye ki avek drwa i osi annan responsabilite.

Mr Deputy Speaker, sa i anmenn mwan lo size responsabilite en sitwayen.  Se nou responsabilite pou viv endepandaman.  Pou travay e kontribye dan nou pei e  nou kominote.  Lendepandans i devlop nou komen en nasyon e donn nou sans pou form nou idantite.  Pou nou devlope nou bezwen en bon baz ledikasyon.  Reform dan ledikasyon i enportan.

Onorab De Commarmond in fer sorti ki nou’n fer bokou devlopman sa 40an.  I vre ki i annan bokou devlopman, me i osi enportan pou note ki dan nou devlopman i annan bokou ki’n ganny neglize e ki pan ganny monitored, evaluated or updated.

Nou dir nou devlope, me eski nou pe kontinyen envestir dan lenfrastriktir, dan linovasyon, dan teknolozi e dan resours imen.  Eski nou pe met lenportans neseser dan ledikasyon e devlopman bann zanfan e zenn Seselwa.  Se lazenes e zanfan byen devlope, byen edike ki tenir lakle problenm sosyal nou pei.

Fleo sosyal pa pou disparet dan zis en zenerasyon.  Me i responsabilite nou Gouvernman pou donn nouvo zenerasyon tou baz e loportinite neseser pou sorti dan sa fleo sosyal ki i pe viv ladan.  Pou fer sa nou bezwen tou bann akter.

Minister Ledikasyon, Lapolis, Larelizyon, Lasosyete Sivil e tou lakominote Seselwa.  Me se Gouvernman ki pou bezwen fer bann desizyon ki pou afekte lasosyete e fotespere son lefe i pozitiv.

I nepli ler pou viv zis pou nou lekor.  I enportan pou viv pou ou pei, pou kontribye dan nou kominote.  Fodre nou pa dekouraze, kot fodre sanzman fodre nou fer li.  Kot fodre amelyore, nou amelyore.  Kot fodre kit parey, nou kit parey.

Pandan sa refleksyon ki Onorab De Commarmond in fer sorti, mon ti a voudre azout en pti pwen refleksyon kot nou kapab dir regard tou nou devlopman a, b, c ziska z nou dir nou être fyer.  Me annou osi dir a, b, c ziska z i annan tel defi e vwar la solisyon.  Annou analiz nou bann devlopman koman bann stepping stones pou mentenir kot devret e improuve kot devret.  Fodre pa per linovasyon e definitivman pa per plis lenvestisman dan ledikasyon, teknolozi e resours imen.

Nou osi ozordi kapab dir ki nou’n fer 40an devlopman.  Me ozordi nou devret met nou regar lo lefitir.  Kan nou fer okenn plan devlopman, proze ou mouvman nou devret fer li avek en vizyon, pou sa ki vin 40an pli tar i kapab dir ki i fyer devlopman sa zenerasyon ozordi.  Parey Lasanble ozordi in eksprimen zot lafyerte dan devlopman sa dernyen 40an

Pou terminen mon swet tou Seselwa en bonn fet 40an lendepandans.

Mersi.

 

MR DEPUTY SPEAKER

Onorab Bristol.

 

HON ALDERIC BRISTOL

Mersi Mr Deputy.

Mr Deputy, mon pa long dan mon lentervansyon lo sa Mosyon.  Ozordi ler mon pe koz la Mosyon mon santi mwan tre emosyonnel e tre privilezye.  Pou mwan i spesyal akoz par kwensidans mon osi mon selebre mon laniverser le 29 Zen.

Le 29 Zen sa lannen mon selebre 49an, 9an pli vye ki nou lendepandans.  Me lefet ki sa zour i spesyal, i tonm le 29 Zen alors mon osi mon dir ki mon en Seselwa endepandan, libere e tre fyer.  E nou tou ki la nou konnen ki mannyer nou kontan ler nou ganny nou laniverser e nou reflekte lo nou lavi e ki zistans nou’n arive dan lavi.

Mr Deputy, le 29 Zen 67 mon ti ne koman en nouvo endividi lo sa later Sesel.  E koman en pti baba mon pa’n zis reste la koman en pti baba me mon’n roule lo lili, mon’n marse ek vant, monn al kat pat apre mon’n debout e mon’n debourye.  Mon’n sorti pti baba, mon’n vin en zenn pti garson e mon’n devlope mon’n grandi e mon’n grandi pou vin en zonm ozordi.  Pa vre Onorab Arnephy.  Mon’n pran bann linisyativ pou devlop mwan plis ankor e ozordi mon en zonm 49an e mon’n progrese dan lavi.

Mr Deputy, se egzakteman koumsa mon get lendepandans mon pei Sesel.  Nou en nasyon ki ti ne le 29 Zen 67.  En nasyon ankor pti baba fek ganny delivre.  Nou’n devlope e nou’n persevere.  Ozordi 40an pli tar vwar la kot nou’n arive.  Nou’n vin en nasyon ki ganny rekonnet dan lemonn antye.  Mon krwar nou nepli en pti nasyon konmela, nou ti pti lo groser me selman lo devlopman, lo lezot keksoz, ledikasyon and all, nou vwar nou koman en gran nasyon.  E mon krwar ase fason ki lemonn osi i get nou konmela.

Mr Deputy Speaker, ti neseser ki nou ti dir avek bann Angle, non zot pa kapab asize laba London e dikte nou ki mannyer nou pou viv nou lavi isi dan pti Sesel.  Ironikman, ironikman detrwa zour pase sa menn Langleter ti vote dan referanndonm pou sorti dan Linyon Eropeen akoz parmi lezot rezon zot ti dir ki pa kapab en Gouvernman ki pa’n ganny elekte i asize Brussel e dir zot ki zot pou fer Langleter.  Ironikman s ai fek arive detrwa zour pase.

Savedir nou ti annan rezon rod nou lendepandans nou osi.  Nou ti annan rezon rod fason zer e diriz nou pei, nou prop biznes e nou prop desten.  Nou ti annan rezon malgre serten mannev pou nou pa ganny nou lendepandans.

Mr Deputy, lendepandans i pa en pti zafer li.  Lendepandans i en keksoz ki nou pa zis dir lo lalev me ki nou osi nou devret pe pratike.  E nou bezwen realize ki nou pa kapab dir ki nou pe met nou 2 lipye enn dan pirog, lot dan en speed boat e gete ki mannyer zafer i ale.  Mon krwar i enportan ki nou zwenn ansanm e nou deside poudir wi, sa lendepandans ki nou’n viv li pou 40an nou kontinyen fer li vin en realite.  Nou kontinyen fer li fonksyonnen.

Mr Deputy, nou ti bezwen fer le neseser pou fer sa lendepandans vin parey mon dir, en vre realite kot tou dimoun dan Sesel i benefisye.  Tou dimoun dan Sesel i benefisye e sa i anmenn mwan pou mwan koz en pe lo nou bann distrik.  Lendepandans vizavi nou bann distrik ki sirtou dan lakanpanny.  Bann distrik ki lontan nou ti dir i bann distrik ki dan bwa, ki retire avek lavil, ki petet ti napa sa lenportans parey por Victoria ti annan.

Sa lendepandans mon vwar li i reflekte dan nou kominote.  I reflekte lo nivo lokal kot dimoun i pe epanouir, i pe viv li, i pe viv li avek en leker kler.  I pe viv li byen e i pe pran bann benefis ki pe koule pou li kapab fer viv ou grandir zot fanmir e zot menm.  Sa lendepandans ki pa ti egziste, ki ti plito, ki ti ganny ranplase par en lamizer nwar.  En lamizer ki pa nou bann gran paran ki ti enpoz lo zot, me i enn ki zot ti vwar zot malerezman ganny anvair ladan, ganny toufe ladan.

Zot ti dir ki zot ti bezwen sa letan aksepte.  Parey nou dir, baggers can’t be choosers.  Ti fer mal, ti fer lapenn.  Mon’n viv en pe sa bann letan mon osi parey Onorab Madanm Jeaovanna Charles in fer sorti, bann letan kot zot bezwen servi touk dife, lalanp petrol.  Delo dan ladal ouswa al sers delo lot kote dan larivyer pou nou kapab fer viv fanmir e ede kot lakour.  E ki mwan ozordi zour mon byen kontan ki mon pa vwar mon bann pti nyes ek neve pe fer sa.  Ou pa vwar zot avek seo pe al sers delo.  Ou pa vwar zot pe bezwen netway dan zorey avek dan nennen tou le semenn pou tir carbon lalanp petrol.  Zot vwar zot anba lalimyer elektrisite.  Si i koupe pou 2ertan i en problenm.  Mon dir zot vreman sanse en.  Zot vreman sanse ki napa bos dan zot latet, zot vreman sanse ki zot pa pe savoy dibwa.

Mon pe dir sa akoz sa i bann keksoz ki mon’n viv e ki lendepandans Sesel in nobou vwar en fason pou get rid off, pou nou osi avanse.  Parey Onorab Bresson in dir, pou nou ariv en nivo ki bokou avanse konpare avek lezot pei Lafrik.

Nou konnen poudir letan nou ti ganny lendepandans nou ti santi.  Nou per fondater, Prezidan Rene ti santi, nou ti vwar poudir i paret ki ti en lendepandans ki zis lo lalev.  Alors ti annan en nesesite pou fer bouze sa lendepandans dan en dimansyon ki pli larz, rezilta 1977 ki vreman nou tou, blan nwar, zonn, rouz, ver, mizer ou ris.  Gran propriyeter, bann ki ti pe viv lo lazwisans gran propriyeter zot ti kapab vwar zot ganny en lidantite pou zot, en lidantite kot zot kapab dir, mwan mon en Seselwa, mon fyer mon en Seselwa.  Partou kot mon pou ale mon pou dir mon en Seselwa e dimoun pou annan sa respe pou mwan as en Seselwa.

Ler nou dir sa, nou bezwen prezan Mr Deputy, fer vreman atansyon.  Nou bezwen fer vreman atansyon sa ki nou konstrir dan 40an la, i fasil pou nou detrir dan zis 2 zour.  Nou bezwen fer sir ki sa lendepandans la, nou anmenn li byen, nou tenir li byen.  Nou fer sir ki sa lendepandans ki nou’n gannyen i toultan la pou benefis nou pep pou nou kapab kontinyelman fer Sesel avanse dan tou donnen posib.  Mon pa pou sit legzanp akoz i telman annan bokou keksoz ki nou’n fer ki byen, ki’n marse e se gras a sa lendepandans.

Pou 40an, 40an i ankor vreman en pti git letan li.  40an dan lavi en pei i en pti morso letan e nou konnen poudir nou annan ankor en kantite, mwan mon pa konnen si mon pou desot 40an me selman mon konnen Sesel i pou al plis ki 40an and nou annan bokou, bokou keksoz pou akonpli ankor an reflektan sa ki’n pase dan last 40an e ki mannyer nou pou fer pou nou fer keksoz vin pli meyer dan sa prosen 40an ki vini.

Mon pou profite pou mwan remersi tou bann lite, tou bann ki’n krwar dan nou per fondater.  Ki’n krwar dan sa ki i ti anvi fer pou Sesel, ki’n krwar dan kot i ti anvi tir nou, parey nou kontan servis sa ilizyon tir nou dan en fernwar pou anmenn nou dan laklerte.  Bann ki’n bataye, bann ki’n tonbe leve, bann ki’n mor lo fon batay e nou dir zot mersi, mersi, mersi ki zot in anmenn Sesel sa zistans ki i ete.

E pou fini, mon pou profite pou mwan swet tou Seselwa, tou bann ki pe ganny laniverser demen parey mwan, tou bann ki kontan Sesel, ki annan Sesel a ker en bonn fet 40an lendepandans.  Annou servi sa 40an koman en stepping stone pou nou komans lager pou sa lot 40an pou fer Sesel en pei bokou pli meyer ki i ete ozordi.  E se avek sa ki Mr Deputy, mon dir ou mersi bokou e mon pou donn sipor sa Mosyon.

Mersi.

 

MR DEPUTY SPEAKER

Bon mon krwar mon a profit sa lokazyon, lo non Lasanble pou wish ou en happy birthday ensi ki tou lezot Seselwa ki pe swet zot laniverser.  E avek sa nou a pran en break e nou a re zwenn 2er apre midi.

 

(LUNCH)

 

 

MR DEPUTY SPEAKER

Bon, nou a dir bonn apre midi e nou ava kontinyen avek nou bann lentervansyon lo Mosyon.  E mon envit Onorab Lebon.

 

HON LENNY LEBON

Mersi Deputy Speaker.

Mr Deputy Speaker, ler nou ouver levantay listwar 40an nou pei, sirtou dan domenn ledikasyon, i annan bokou pou dir e bokou pou rakonte.  Koman en pti leta zil e en pei ki pe devlope, Sesel i enn parmi tre pe pei dan sa kategori, ki’n kapab avek fyerte, etablir ledikasyon iniversel o nivo primer e segonder.  Sa reisit i pli remarkab ler nou pran an kont ki sa ki’n arive pandan sa dernyen 40an selman.  Plizyer fakter in ede ver sa demars me 2 pli enportan nonmen, enn en vizyon politik, dezyenmman dedikasyon e ko-mit-man Gouvernman pou demokratiz akse a ledikasyon.

Mr Deputy Speaker, avan Lendepandans, ledikasyon Sesel ti ganny dominen par bann misyonner ki ti asosye avek swa Legliz Katolik Romen, oubyen Legliz Anglikan.  Par egzanp, larive bann Ser De Cluny an 1881, ti evantyelman anmenn letablisman Regina Mundi pour bann fiy e bann matrix brothers ki ti ariv Sesel an 1884, ki ti pli tar kree Seychelles College.  Gradyelman, Gouvernman kolonyal atraver Education Ordinance e letablisman ledikasyon pour nanryen o nivo Primer, ti komans pran kontrol sistenm ledikasyon me zot ti fer sa tout an travayan, an kolaborasyon avek bann misyonner.  Dan en tel konteks alors, i pa ti drol ki progranm letid sa lepok ti tourn otour lansennyman larelizyon e ki medium lansennyman ti swa angle ouswa franse.  Sa ki ti osi markan e an menm tan sagrinan se ki sete en pti group zanfan Seselwa ki ti benefisye anba en tel sistenm, parey Onorab Charles ti fer resorti bomaten.  Sa pti group ti sorti plito dan bann fanmir pli elit nou sosyete sa letan.

Sa lepok Mr Deputy Speaker, mazorite nou bann zanfan Seselwa ti ganny prive sa sans e en vre ledikasyon ki ti pou empower zot pou fer en diferans dan zot lavenir.  Me an 1977, Gouvernman SPUP, avek en sistenm Gouvernman sosyalis o pouvwar, ledikasyon ti vin en zouti transformasyon pour nou sosyete.  Avek nou prensip sosyalis, ledikasyon ti fer transformasyon pour en sosyete ki dir non a diskriminasyon sosyal e inegalite.  Kree en Nasyon lo linite e promosyon lidantite kiltirel.  Lekspansyon e diversifikasyon dan lekonomi.  Preparasyon en lafors travay pour devlopman nou pei.  E se la kot sa Seselwa ti ganny son idantite e atraver prensip ki met zonm o sant nou devlopman.

Mr Deputy Speaker, avek volonte pou fer sa bann lobzektif en realite, Education Reform an 1978 ti ganny formile.  Sa ti permet parmi plizyer lezot devlopman.  9an ledikasyon obligatwar e gratwit, apartir laz 6an.  Evantyelman, Gouvernman ti pran kontrol total lo ledikasyon.  An 1991, NYS ki nou ti apel li National Youth Service ti ganny etablir e an 1982, Kreol ti vin medium lansennyman dan serten nivo Primer.  An 1991, ti osi annan en lannen ki ti mark nou sistenm ledikasyon.  Ledikasyon obligatwar ti sorti 9an pou vin 10an.  NYS ti ganny redwir par en 1an e Lekol Segonder ki nou apel li Segonder S1 ziska S4 ti ganny etablir o nivo rezyonal.  Sa letan Mr Deputy Speaker, nou ti vwar retour milti parti.  Ankor enn fwa, nou sistenm ledikasyon ti bezwen readapte me tout an restan solid lo prensip donn ledikasyon gratwit e obligatwar pour tou zanfan Seselwa.  Ti sanmenm letan ki NYS ti fase out.  Nouvo Polisi Minister Ledikasyon for learning society ti ranplas education for new society.  Dan sa menm laliny ki progranm alfabetizasyon ti ganny entrodwir, avek bi pou redwir in-alfabet dan Sesel.  Sa progranm i ankouraz dimoun tou laz, tou klas pou aprann lir e ekrir.  I bon note ki sa progranm ki ankor an mars, in devlop bokou dimoun ki ti ganny prive en bon ledikasyon dan lepok kolonyal.

Wi Mr Deputy Speaker.  Bokou keksoz pozitiv in arive atraver bann devlopman ki’n arive dan ledikasyon e bokou sanzman in arive pandan sa dernyen 40an, me menm tousala, Gouvernman in kapab retenir mazorite zanfan dan sistenm depi Pre-School ziska Segonder.  Retenir mazorite etidyan Segonder pou anmenn zot o nivo Post Segonder.  Gard literacy rate tre o parmi popilasyon.  Gard nou apartenans e nou idantite kiltirel.

I annan bokou plis ankor lakonplisman ki’n arive Mr Deputy Speaker, me ozordi si nou koz lo la, letan pa pou ase.  Ozordi zour, sakenn de nou i bezwen apresye ki sa pei, atraver sa sistenm ledikasyon, in fer bokou kantmenm i annan defi.  E sa i fer mwan mazin parol ki mon ti dir dan deba lo Leta Lanasyon 2013 e mon site.

‘Sa deba lo Leta Lanasyon alors, i sans pou mwan koz lo bokou bann keksoz ki met o defi sa legzistans e sa dezir profon e sa dezir partaze pou kontinyen reste sa bizou ki nou ete.  Bann defi tel parey ki mannyer nou pou kontinyen adres konsern ledikasyon, sours nou resours imen, sours formasyon nou bann bon sitwayen, sours kapasite sa pep pou kontinyen sirviv e devlope.  Ledikasyon i labaz e petet solisyon bokou bann problenm ki nou pe fer fas avek ozordi, sirtou an sa ki konsern en nouvo zenerasyon ki pe grandir, dan en lepok a lafen eksitan e plen avek pyez.’  Fen sitasyon.

Mr Deputy Speaker, ler nou vir nou regar ver lefitir, apre sa 40an, nou pe get lefitir i fer mwan osi mazin parol Prezidan Michel dan son Ladres lo Leta Lanasyon, menm lannen an 2013, kot i ti fer nou rapel atraver en anekdot, ki bokou lanmen i neseser pou kontinyen prepar lavenir nou Nasyon.  I annan bokou defi ki pe esper nou tel koman nou stabilite politik, kontinite dan Gouvernman e en Gouvernman ki pran son responsabilite total pour provizyon ledikasyon i lakle nou sikse.  Nesesite annan bann personnel kalifye lo tou nivo devlopman nou lekonomi.  Lasistans finansyel sorti kot bann pei oubyen Lorganizasyon Enternasyonal.  Sesel in benefisye bokou avek lasistans finansyel oubyen atraver labours.  Me la ki nou nepli kalifye pour bokou international funding, sa i prezant en gran defi pour nou.  Nou osi annan nou bezwen amelyor performans tou zanfan dan tou domenn e lo tou nivo.  E sa Mr Deputy Speaker, i montre en pe sikse pandan sa 40an dan nou sistenm ledikasyon ki ozordi i labaz sa sikse dan nou lekonomi.

Avan mon terminen, mon oule swet tou Seselwa en bonn fet 40an Lendepandans.

Mersi Mr Deputy Speaker.

 

MR DEPUTY SPEAKER

Onorab Fideria.

 

HON EMMANUEL FIDERIA

Mersi Deputy Speaker.

Deputy Speaker, konteni Mosyon ki devan nou Lasanble, i fer mwan rapel ki 40an pase mon ti annan zis 14an.  Ozordi 40an pli tar, listwar mon lanfans dan en sosyete san lespwar i reste grave dan mon memwar.  Tou bann gran defi lavi ki sosyete avan, spesyalman rezerve pour mwan e tou bann fanmir parey mwan mon’n ne e grandir ladan 54an pase, pa kapab ganny efase oubyen ganny bliye fasilman.  Lavi ti dir e difisil.  En sosyete divize par larises, akapare par en pti minorite e en gran mazorite ti ganny kondannen pour eksperyans en labote e kriyote defigire, kan en manifestasyon vivan ou pozisyon sosyal lanmizer nwanr ti ou sinyatir.  I reste grave dan mon memwar ki ler ou zanfan en paran ki sorti dan klas travayer, sa i sinonim avek ne, viv e grandir lanmizer.  Mon manman ek mon papa, gran ser ek gran frer ti bezwen fer fas avek bann pli gran defi lavi pou reisir grandir.  Pa ti fasil.

Mr Deputy Speaker, dan listwar nou lalit politik, lalit pour Lendepandans, sa ti vre lalit lamas klas travayer Seselwa pour en meyer Sesel.  Anba gidans ek direksyon Parti SPUP sa lepok, forme le 2 Zen 1964 lo later Sesel.  Ozordi pa mon lentansyon antre dan polonik batay politik ant bann diferan lafors ki ti opoz vre lendepandans Sesel.  Sepandan, levidans vivan i la, tou levidans ekrir i la.

Mr Deputy Speaker, dan memwar Sesel in ganny enprimen lekel lafors politik ki ti kont e lekel ti an faver son vre Lendepandans.  Mwan Zen pou reste pour leternite, sa mwan pli spesyal dan parkour istorik Sesel.  Mwan Zen i spesyal akoz bokou bann levennman trez enportan ki’n mark nou koman en pep, ki’n mark nou koman Nasyon, ki’n fer nou sa ki nou ete ozordi.  Sa bann levennman i ganny ankre dan nou vre listwar koman bann dat istorik avek en dimansyon non selman lokal, rezyonal me osi byen enternasyonal.  Pa bokou letan pase, nou’n selebre senkant-dezyenm laniverser formasyon nou Parti, SPUP, SPPF, Lepep.  Ozordi lavey selebrasyon enn bann pli gran lakonplisman istorik Sesel e pep Seselwa, mon asize isi dan sa Lasanble Nasyonal, mon realize ki mon’n enn parmi bann prodwir ki’n reste fidel avek vre rezondet lalit klas travayer Seselwa.  Ozordi moman i apropriye pou mwan salye tou bann konbatan lalit pour vre Lendepandans Sesel.  Mon salye zot determinasyon, mon salye zot vizilans, mon salye zot konbativite e dir zot mersi.  Mersi pou fer Sesel ariv kot i ete ozordi.  Mon konsyan ki napa nanryen ki parfe me osi konsyan ki pa egziste en lemonn parfe.  Dan menm konteks, mon rezouir pour zot desizyon pou kontinyen lite pou anmenn plis progre e prosperite pour Sesel ek tou Seselwa.  A lokazyon nou karantyenm lanniverser nou Lendepandans, i en moman propis pou rann omaz tou bann konbatan lalit ki’n kit nou.  San okenn dout, nou bokou pli byen ki nou ti ete 40an pase.  Remersiman tre spesyal i al pour sa bann vre zonm ki’n definir direksyon lalit sa premye mouvman politik progresis lo later Sesel.  Lemonn antye i konn li.  I pa lot ki Mr France Albert Rene.  Mr France Albert Rene, antoure avek tou son bann kolaborater senser e konbatif, i sa zonm ki dan son lepok in konn apresye soufrans en gran mazorite travayer Seselwa.  Sa zonm ki byen zenn in ekoute, in tann en leokri son pep ki ti swaf ladelivrans.  Wi.  Sa lamas travayer Seselwa, kondannen pou viv dan lanmizer nwanr, Parti SPUP, SPPF, Lepep ti sa sours vre lespwar delivrans ki’n aboutir avek vre lendepandans Sesel le 29 Zen 1976.  Dan bann menm sirkonstans ekstrenm konpleks e difisil, ranpli avek bokou defi, Mr Rene in annan lodasite manifeste en pwisans son determinasyon.  En determinasyon eksepsyonnel, pwisans ekstraordiner, anfen an fen resolve pou liber son pep avek tou son lenzistis ek diskriminasyon.  Deklar en batay pou elimin lapovrete, linegalite dan loportinite, mank lenvestisman e sou devlopman.  San okenn dout, sa 40an pour nou isi prezan ozordi e se selman reprezant 40an progre, non pa 40an regresyon.  40an progre an fas avek tou bann adversite e defi lavi.  Defi ki lemonn in prezante.  Malgre tou nou’n konn bokou sikse, tout an rekonesan ki i reste ankor bokou pou fer.  Nou pa devret zanmen satisfe, osi lontan ki annan enn de nou frer ek ser ki son bann bezwen esansyel, son bann rev osi byen laspirasyon dan lavi pa ankor vin en vre realite.  Nou lalit pou kontinyen.  Nou pa bezwen ganny donnen en lektir lo sa kestyon, akoz Parti SPUP, SPPF, Parti Lepep, son lesansyel vre rezondet se touzour met zonm tou sa ki i fer.  Son byennet se ki i fer tou pour nou tou ki egziste.  Efektivman, napa okenn pei, pep sivilizasyon lo later ki’n pas atraver menm leksperyans ki nou, pep Seselwa.  Nou’n viv.  Sa ki fer nou inik se sa ki fer nou eksepsyonnel.  Se pour sa rezon napa okenn lezot pep ki annan plis rezon pou selebre, apard ki nou, pep Seselwa.  Nou dir sa avek san okenn larogans oubyen vantardri, dan nou menm prop kapasite, ni menm avek lentansyon pou ofans personn.  Me nou dir sa avek tou ferver, avek tou lodasite e lespri konbatif e militatif, tout an rekonesans zefor enkondisyonnel sa gran poursantaz pep Seselwa ki reste sistematikman angaze dan kreasyon larises, avek bi pou nou tou vwar e viv dan en Sesel ki bokou pli meyer.  Ozordi personn pa kapab kestyonn rezondet nou lazwa, nou lakontantman pou selebre kontribisyon tou sa ki’n kit nou isi dan sa pei, dan bann kondisyon bokou pli byen ki nou ti ete yer.  Sa gran lakonplisman ki ranpli sourir lo figir nou zanfan, nou bann sitwayen aze, nou lazenes, osi byen tou nou bann adilt.  Wi.  Zefor nou lalit in kouronn nou laviktwar e sikse pou met zonm o sant tou sa ki nou deside fer.  Nou annan tou rezon pou nou selebre.  An plis ki selebre tou nou bann lakonplisman.  Ozordi nou bezwen anvoy en mesaz pli kler, ki Parti Lepep i pli determinen ki zanmen, pou kontinyen plis raport laviktwar e lo sa premis, kontinyen pran nou responsabilite ki limanite in konfye dan nou.  Se pou kontinyen diriz desten Sesel, kontinyen diriz desten tou bann frer e ser Seselwa, atraver kontinyen akonplir bann responsabilite lo nivo rezyonal e osi enternasyonal.  Les nou determinasyon gid nou.  Les tou nou sikse lepase servi nou koman sa sours motivasyon e lenspirasyon.  Pa pou anmenn vanzans me pou selman kree kondisyon, pour ki sakenn de nou i kontinyen aspire ki en zour i vin sa ki i oule vini.  E dan sa fason, garanti kontinyite sa lakoz nob ki form lesansyel nou legzistans koman en vre zonm ou fanm konplet.  San okenn dout, san okenn move lentansyon pou repros personn.  Ozordi, an fas avek bann defi nou lepok, i reste en laverite absoli, ki an fas avek defi lemonn i met devan nou, i normal pou dir nou pei Sesel pe ekspekte bokou plis sorti kot sakenn de nou.  Annou renouvle nou sans patriyotik koman en vre Seselwa ki touzour perse pou konstrir e non pa pou fer kalonmni e viv dan negativite destriksyon.  Ozordi, malgre ki nou pti an siperfisi, Sesel i prezant en lafors tre enportan pou kontinyen enfliyans non selman nou prop desten, me atraver nou Gouvernman anba Leadership Mr James Alix Michel.  Avek tou lezot dimoun angaze direk oubyen endirekteman, Sesel pe pran son responsabilite vizavi lezot pep e Nasyon dan lemonn.  E i pe ede tras en nouvo lord mondyal depi sanzman klima ziska devlopman soutenab.  Tousala i annan en sel bi.  Se travay pou kontinyen garanti boner e prosperite lemonn an zeneral e an partikilye pour tou bann ser, frer Seselwa.

Mr Deputy Speaker, Patrick Victor i dir:- ‘Oh, si pa mon Sesel, dir mwan lekel.’  Nou devret fyer nou en Seselwa.  Nou devret fyer tou nou bann lakonplisman.  Nou fyer nou lakonplisman koman en Nasyon, koman en pep.  Sesel in ganny renonmen dan lemonn bann gran pwisans.  Bann pti leta zil i apresye ki latitid Sesel anver zot i enn ki kordyal e senser.  Nou pase, nou prezan i laprev nou bann lentansyon pou travay avek tou pei dan lemonn, tou pei dan en lespri baze lo zenerozite nou pep, lo bonn volonte nou pep, lo bann demars pou touzour rod sa ki meyer pour Sesel, tout an respe-k-tan zot drwa lezitim pou diriz zot desten san okenn lenterferans.  Nou relasyon avek tou pei, pep dan lemonn i tre trez enportan me san okenn dout, sa ki ankor pli enportan se sa relasyon ki’n etablir e manifeste antre nou menm isi dan Sesel.  Relasyon ant sak sitwayen, pa en relasyon laenn ek vanzans.  Mon envok parol saz anfe, defen Mickey Mancham.  ‘Annou viv koman frer.’  Mon regrete pou dir ki si nou pa fer atansyon, batay politik modern dan Sesel pou potansyel-man kapab fer nou detrir tou sa ki nou’n batir.

Mr Deputy Speaker, isi dan sa Lasanble Nasyonal, an plis mon la lo platform mon Parti, Parti SPUP, Parti SPPF, Lepep, mon osi lavwa pour mon distrik Les Mamelles.  E par konsekans, sa lavwa pour tou zabitan Les Mamelles, par lekstansyon en lavwa pour tou Seselwa, pe enport lapartenans politik.  Alors mon mesaz senser ozordi se dir ki nou annan en gran responsabilite nou tou koman en pep.  Nou responsabilite se pou kontinyen asire ki personn pa servi sa sistenm demokrasi milti-parti, servi laliberte lekspresyon avek tou kalite larogans pou detri sikse nou lakonplisman.  Malgre tou, napa okenn rezon akoz nou bezwen per fitir Sesel.  Seselwa i annan en fitir pro-me-tan, briyan anba direksyon e gidans Parti Lepep.  Nou bezwen apresye ki nou annan devan nou, en gran defi.  Zanmen nou’n per pou fer fas avek defi e nou pa pou zanmen aret rod solisyon pour tou nou bann defi, ziska ki nou reisi met anba kontrol e kontinyen anmenn vre lazwa pou viv, dan leker tou Seselwa.

Mr Deputy Speaker, Sesel Seselwa esper sa gran zour.  40an Lendepandans, 40an pli tar, en lepok totalman diferan avek kot nou ti ete 40an pase.  Nou latas ozordi i diferan avek latas ki nou bann gran paran ti oblize fer fas avek.  Me sa ki listwar in garde pour nou zenerasyon ozordi, se sa lespri konbativite.  Sa lespri pou touzour fer pli byen ki yer.  Sa determinasyon ki napa nanryen ki enposib.  Sa lespri konstan sistematik pou konbat dan sirkonstans advers, pou raport laviktwar.  Se sa ki pa devret zanmen sap nou.  Ki ou en etidyan dan Lekol Primer, Segonder, Liniversite.  Ki ou en Manager, CEO, Labourer, Fermye, anfen pe enport, travayer.  Annou apartir demen le 29 Zen 2016, renouvle nou determinasyon.  Annou manifeste en pli o langazman dan tou sa ki nou fer, dan nou lavi toulezour.  Touzour, avek bi pou anmenn boner e plis prosperite pour Sesel ek Seselwa.  Ozordi plis ki zanmen, nou tou annan en posibilite reel pou fer pli byen dan lavi.  Annou sezi tou loportinite lavenir i pro-me-tan.  Osi lontan ki nou pare pou siport enn a lot, olye kraz enn a lot.  Pa les divizyon politik briz tou nou lavenir.  Les nou determinasyon rezonnen dan tou kwen Sesel e Les Sesel konnen ki nou’n pare pou apiy li pou li pa tonbe.

Bonn fet karantyenm laniverser Lendepandans tou Seselwa.  Tou mon bann frer nou Lasanble Nasyonal, mersi pou ekout mwan.

Mersi Mr Deputy Speaker.

 

MR DEPUTY SPEAKER

Onorab Valmont.

 

HON SYLVIANNE VALMONT

Mersi Deputy Speaker.

Bonn apre midi.  Bonn apre midi tou koleg Onorab.

Deputy Speaker, mon pe zwenn avek lezot koleg pou mwan siport sa Mosyon, table par Leader of Government Business. Non selman akoz son lobzektif, me osi akoz lenportans bann refleksyon ki lobzektif sa Mosyon i motiv nou pou fer ozordi, sirtou bann parey mwan ki parmi bann pli aze dan sa Lasanble.  Tou nou Seselwa i merit pe selebre 40an nou Lendepandans, avek bokou fyerte e dinyite.

Mr Deputy Speaker, premyerman mon kapab e fyer pou dir ki Lendepandans pour Sesel an 1976 pa ti zis en prosesis istorik pour nou pei, konpare avek en bon pe pei lafrik, me osi en prosesis dinamik, sirtou apre 1977, san ki mon al an detay.  Transformasyon nou sosyete depi sa letan ziska prezan, in enn ki’n sirman remarkab dan plizyer domenn.

Mr Deputy Speaker, bokou nou ki’n temwanny bann vre sanzman lo nivo sosyal, edikasyonnel e ekonomik pei, i vreman emosyonnel lo plizyer size konmela, ler nou mazin lafason ki nou ti pe viv koman en pei kolonize, sirtou ler nou tann bann teknisyen koz lo lapovrete dan nou pei ozordi.  Mon koleg Onorab Bristol bomaten in donn nou enn de pti zistwar enteresan e mwan mon pou demann enn de kestyon.

Eski nou pep i mazin letan nou ti dan lakaz an fey, letan lalanp petrol ou delwil koko ki nou ti bezwen servi?  Eski nou ti mazin lepok mars apye sorti kot nou pou al Anvil, oubyen dan en lot distrik?  Eski nou mazin lepok manz mai vomye ki diri?  Eski nou mazin Saler Minimum sa lepok?  Eski nou konnen konbyen nou bann dimoun aze ti pe gannyen koman Pansyon?

I annan bokou pwen ki lezot Manm Onorab e loter Mosyon in koz lo la bomaten, ki pou ed nou fer en bann refleksyon osi profon lo sa 40an Lendepandans ki nou pe selebre demen.

Mr Deputy Speaker, wi.  Nou pou annan en poursantaz minim nou dimoun ki pou bezwen lasistans akoz zot kondisyon sosyal e vilnerab, ki kapab ganny rezourd.  Parfwa nou vwar bann kondisyon ki bann dimoun in zot menm kree, me ki nou vwar.  Se sa Gouvernman o pouvwar i etablir bann sistenm e met bann mekanizm an plas, pou donn proteksyon neseser sa bann ki dan bezwen san leksepsyon.

Mr Deputy Speaker, depi ki Parti SPUP, SPPF e Parti Lepep pe diriz sa pei, bann desizyon pou met zonm ek fanm o sant devlopman in touzour an priyorite.  Bann sanzman e mon fyer pou dir, bann vre sanzman ki’n ganny fer dan pei, in toultan pran an kont nou dimoun, nou laspirasyon, nou fason viv avan tou.  Bann desizyon brav in ganny pran pou non selman garanti en lavi meyer pour tou Seselwa, me osi pou  devlopman ekonomik e sosyal pour nou pei an zeneral.

Mr Deputy Speaker, ler nou bann Dirizan ti deside pou donn nou, nou idantite koman bann vre Seselwa, malgre bann mekontantman.Ozordi nou fyer pou nou dir nou en Seselwa ki koz 3 lalang ofisyel.

Mr Deputy Speaker, bokou latansyon in kontinyelman ganny mete lo nou kiltir, nou fason viv dan sa pei, apard ki labote Sesel li menm, pour ki nou Lendistri Touris par egzanp, ki nou gannypen primordyal i devlope dan en fason dirab e soutenab.  Nou pei ozordi i ganny rekonnet partou dan lemonn pour son stabilite e son leadership.  I menm vin en role model parey nou dir, pour plizyer pei.

Mr Deputy Speaker, i evidan ki nou pei in ariv kot i ete ozordi.  Bokou in ganny fer a plizyer nivo.  Nou bann lenfrastriktir ou sistenm lozistik tel ki semen, elektrisite, delo, lakaz, bann batiman piblik tel ki Klinik ek Lopital in ganny fer e amelyore, sirman avek bokou led e resours bann Lorganizasyon etranze.  Nou bann zanfan e zenn adilt ki pe grandi, i bezwen ganny dir tousala, pour ki an retour, zot aprann apresye sa ki zot pe vwar e zwir ozordi.

Mr Deputy Speaker, 40an, 30an ou menm 20an pase, en kantite keksoz ki zot pe zwir ozordi, ti napa dan sa pei.  Zis get otour nou, nou a konpran.  Pa bezwen ki nou al dan detay.  An menm tan, nou osi rekonnet bann defi sosyal ki vin avek devlopman e louvertir nou pei dan en monn global.  E Sesel parey nou konnen, i pa leksepsyon.  Sa ki enportan se ki sa bann solisyon apropriye i ganny rode pour ki nou pei i kontinyen sirmont sa bann defi.

Mr Deputy Speaker, konparab avek bokou lezot pei pli devlope, menm avek bokou plis resours ki nou pti zil Sesel, zot bann zabitan pa kapab viv e zwir sa bann aki parey nou ki pe viv dan lape e larmoni isi.  Zis get dan Nouvel, parey lezot koleg in dir, dan lemonn, lo CNN, BBC, Al Jazeera, you name it, ozordi ki nou bann dimoun Sesel pe kapab zwir e nou a konpran.

Mr Deputy Speaker, parey promoter Mosyon in dir, tou sa 3 lebra Gouvernman in fer bokou pour lavansman pozitiv nou pei.  Progre ki’n ganny fer pandan sa 40an speak volume parey nou dir an angle. Nou osi rekonnet ki i annan ankor pou fer, pour ki nou kontinyen fer pli bon dan pli bon direksyon, lo tou nivo ankor.

Mr Deputy Speaker, mon mesaz pour nou Nasyon, lepep Seselwa an antye ozordi, se annou kontinyen viv dan lape, dan larmoni e dan linite.  Nou pei i en pei beni.  Annou respekte nou bann frer ek ser.  Annou kontinyen travay dir pour sa Sesel ki nou tou nou kontan.

Mr Deputy Speaker, mon ti a profit sa lokazyon pou mwan swet tou Seselwa an zeneral, nou bann Leaders, mon bann koleg Onorab, Bonn Fet Lendepandans.

Mersi.  Mon pou siport sa Mosyon.

 

MR DEPUTY SPEAKER

Onorab Volcere.

 

HON MARC VOLCERE

Mersi Deputy Speaker.

Mr Deputy Speaker, Mosyon pe demande ki nou Lasanble i zwenn ansanm avek tou Seselwa, pou selebre 40an Lendepandans nou pei.

Mr Deputy Speaker, koman en zabitan Praslin, mon osi vwar mwan dan sa Mosyon e alor mon swete ki tou zabitan zil Praslin, zot osi vwar zot form par sa Mosyon.

Mr Deputy Speaker, 40an pase mwan osi mon ti dan selebrasyon sa zour istorik.  Mon rapel apre plizyer lanons e sanson pou demann nou pou desann pou vin fet nou Lendepandans, nou ti desann an fanmir pou nou osi al selebre sa zour.

Mr Deputy Speaker, sa letan mon ti annan zis 9an e nou ti bezwen desann apye akoz sa letan, bann fasilite transpor pa ti osi parey konmela.  So, nou ti bezwen desann depi kot nou ti reste Anse Kerlan, kot sa aktivite ki ti pe ganny fer Grand Anse.  Levennman pou mark sa lokazyon lo Praslin ti vreman istorik parey mon’n dir, akoz sa zour nou ti vwar devwalman en Moniman ki nou apel Moniman Lendepandans, ki ganny trouve o-bor dan Sant Grand Anse, o-bor Bazar konmela.

Mr Deputy Speaker, pour sa lokazyon, ti osi paviyon ti ganny fer desann e nouvo paviyon ti monte e bann Lim Nasyonal ti ganny sante.  Sa ti ganny asiste sa moman par Mr David Joubert ki ti reprezantan Gouvernman pour Praslin sa letan.  E parey mon’n dir Mr Deputy Speaker, sa Moniman ti ganny devwale e lo la kot nou ti vwar bann senbol istorik pour Praslin, kot ti annan 2 Kato Nwanr, en Kokodmer mal avek son femel e osi ti annan 2 Lezar ki ti plase lo la.  Lenportans sa Moniman ti en lafyerte pour nou zil ek nou pei.

Mr Deputy Speaker, i sel Moniman Lendepandans ki trouve dan Sesel e sa Moniman ki trouve Grand Anse Praslin.

Dapre resers ki mon’n fer Mr Deputy Speaker, i paret ki sa Moniman i pa ankor ganny nonmen koman en Moniman Nasyonal.  E alors, an vi son letan ki sa Moniman ti ganny enstale zour nou Lendepandans, mon pe koz 40an pase, mon ti a lans en lapel avek Board ki deal avek bann size Moniman Nasyonal, pou pran an konsiderasyon pou nomin sa Moniman koman en Moniman Nasyonal.  E osi, nou santi ki i devret annan bann lezot travay ki devret ganny fer lo sa Moniman, bann renovasyon ki devret ganny fer petet, pou remet li parey i ti ete lo komansman, ki a donn nou sa loner ankor pou nou kapab:- ki ler ou pas dan sa landrwa, i donn ou sa santiman poudir i fer ou rapel sa letan kot Sesel ti ganny son Lendepandans.

Mr Deputy Speaker, parey in ganny dir par plizyer koleg avan mwan, me mon pe koz spesifikman la pour Praslin, Lendepandans in anmenn bokou devlopman lo Praslin.  Nou a komans avek nou lavi sosyal, kot nou vwar bokou amelyorasyon.  Koleg Onorab Takamaka taler in koz lo savoy delo, rod dibwa, elektrik.  Sa letan ti napa elektrik, kot nou ti servi plizyer bann lezot keksoz pou nou kapab ganny laklerte.

Dan domenn Lasante Mr Deputy Speaker.  Tousala in annan kantite amelyorasyon ki’n ganny arive.  Ozordi nou vwar nou annan en nouvo Lopital, nou annan Klinik ki’n vreman avanse e kot Gouvernman i envestir en kantite pour nou bann dimoun ki malad kapab deplase pou zot kapab vin lo Mahe pou zot kontinyen ganny sa lasante ki zot pe rode.

Lo nivo Ledikasyon osi, nou’n vwar kantite amelyorasyon.  Nou’n vwar nouvo Lekol ki’n ganny fer e menm ozordi, pli fasil pour nou bann etidyan, pour nou bann zenn ki kalifye, kapab deplase pou zot vin etidye lo Mahe, pou zot kapab ganny zot ledikasyon lo Mahe.

Lo kote Transpor, lo tou le 3 domenn Transpor, lo later, lo lanmer e dan lezer.  Ankor la nou’n vwar bokou amelyorasyon.  Ankor nou a rapel, bann dimoun ki ti vwayaze lontan, sirtou sorti Praslin pou:- Mahe/Praslin e Praslin/Mahe, kot nou ti bezwen servi bato, bann bato vwalye a en moman e apre nou’n annan bann lezot bato ki’n antre en pti pe pli vit.  Nou annan Lady Esmee.  Kot ti vreman en kosmar sa letan pour nou zabitan kapab vwayaze.  Lady Esmee mon krwar bann ki rapel li byen, ou pa ankor anbark lo la, ou komans rann tou sa ki ou’n mete.  So, la nou’n vwar bann devlopman ki’n arive lo sa nivo.  Ozordi nou annan bann fast ferry, ok.  Cat Cocos, Cat Rose, ki’n vreman en gran amelyorasyon dan domenn transportasyon lo lanmer.  Nou osi annan transportasyon lo later.  Ok.  Kot nou’n vwar amelyorasyon premyerman lo nou bann semen, kot nou ti annan bokou semen later.  Ok.  Semen later rouz, sak fwa lapli i tonbe, ti en difikilte pour bann transpor kapab sirkile.

E menm dan lezer, nou’n vwar osi bokou amelyorasyon lo la.  Ozordi nou annan bann avyon ki pli vit, ki pli konfortab.  Nou annan nou runway in sorti pou vin Erport ozordi.  Nou annan Erport ki si nou pou konpar li avek Erport Mahe ozordi, i vreman bokou avanse.  I annan bann servis petet ki pe ganny ofer lo Erport Praslin, menm si i en Erport Domestik, ki petet lo nivo Mahe nou pa pe gannyen.

Mr Deputy Speaker lo kote touris nou’n osi vwar bokou devlopman.  Ozordi nou annan bann Lotel 5 Zetwal dan plizyer rezyon lo Praslin.  Nou annan bokou Guest House. So, tousala in ede pou anmenn sa devlopman ekonomik ki anmenn bokou benefis pour nou zabitan lo Praslin.

Nou annan nou servis Cargo ozordi li osi ki’n amelyore, ki ede pou nou ganny bann marsandiz si ou oule, lo en standar en pe pli o, kot i pran mwens letan pou zot ariv Praslin e sa osi i ede dan lekonomi nou zil.

Mr Deputy Speaker, en domenn ki nou pa kapab oubliye, bann servis ki Gouvernman i ofer.  Ozordi mazorite si pa tou, sa ki pe ganny ofer lo Mahe lo Praslin osi i annan.  Nou kapab konte lo nou ledwa, tou bann servis ki pe ganny ofer lo Mahe e Praslin osi pe ganny ofer.  Nou bann biznes, plizyer kalite biznes ozordi nou vwar pe ganny antreprann lo Praslin.

Mr Deputy Speaker, lo size lakaz ankor, en kantite amelyorasyon in ganny fer.  Bann lakaz ki nou ti vwar nou zabitan pe viv ladan ozordi, petet ozordi i nepli annan.  I fer mwan mazin bann lepok kot bann lakaz ti pe ganny fer avek:- ganny borde si ou oule, avek barik koltar.  Nou kapab mazinen, barik ki ou’n tir koltar ladan e sa pe ganny servi pou bord lakaz avek.  Ki kantite lenkonvenyans e sa bann lakaz ti ganny lwe avek nou bann dimoun.  So, i montre nou ki zistans nou’n sorti dan tou sa bann domenn.

Dan domenn sport, nou vwar ki Praslin pe fer bokou sikse.  I annan bann lezot fasilite ki nou’n gannyen ki ti napa.  Ozordi nou annan en Stadium ki menm ler ou get son nivo, petet i en pti pe pli:- son nivo i en pe pli o ki Stadium ki nou annan isi Mahe.  So, tousala in ganny envestir pandan sa bann letan Lendepandans ziska ozordi.  Nou’n vwar tou sa bann sikse pe ganny fer.  E mon ti a demande la lo nivo sport, ki gouvernman i kontinyen vwar nesesite pou donn sipor nou bann atlet lo Praslin, pou zot osi kontinyen ganny sa lankourazman, sa zefor pou zot kapab kontinyen compete avek bann lezot sportmen isi lo Mahe.

Mr Deputy Speaker, pou nou arive ganny nou Lendepandans e pou nou ariv kot nou ete ozordi, definitivman i bezwen annan en vizyon.  En vizyon pouse par nou Per Fondater ki’n vreman donn son lavi pou kapab anmenn nou pep kot nou ete ozordi.  Mon krwar i vreman enportan ki nou bezwen eksplik nou dimoun, sirtou nou bann zenn, kote nou ti ete, kot nou’n sorti e kot nou’n arive ozordi.

Mr Deputy Speaker, nou bezwen realis.  Nou bezwen realize poudir Lendepandans 40an, sikse ki Lendepandans in anmennen dan nou pei, i pa’n kout en sou.  In kout nou bokou e fodre pa zanmen nou fer sa fot pou les tou sa ki nou’n fer pandan sa 40an e les nou retourn an aryer.  I annan de nou ki bliy tro vitman Mr Deputy Speaker.  Zot bliye kot nou sorti, dan ki sirkonstans nou ti pe viv ladan.  Nou bliye lekel ki’n fer sa sakrifis pou anmenn nou kot nou’n arive ozordi.  Nou bliye pou dir mersi e rekonnet dibyen, rekonnet zefor ki lezot i fer e pe kontinyen fer pour sa sosyete.  Pour nou sosyete ki nou ozordi nou pe al selebre son karantyenm lanniverser Lendepandans.

Mr Deputy Speaker, nou bezwen toultan remersye nou Kreater ki’n donn nou sa zoli pei ki nou pe viv ladan e pe kontinyen eparny nou kont tou bann danze e bann gran katastrof ki nou ti a’n kapab pas ladan.  Nou bezwen kontinyen remersye nou Kreater pour sa 40an ki’n pase, kot i pa’n les nou pei tonm dan move lannen.  In annan plizyer levennman ki nou pei in pas ladan.  San proteksyon nou Kreater ek vizilans nou bann Dirizan, nou ti a’n kapab vwar nou dan en lot sityasyon.

Mr Deputy Speaker, bann tel levennman parey, nou ti deza en repiblik me annou pa bliy repiblik Praslin, konplo 412, latak mersener e rebelyon ti a’n kapab anmenn nou pei dan en lot letap e ozordi nou pa ti ape koz 40an progre nou Lendepandans.

Mr Deputy Speaker, annou pa bliy bann Eleksyon ki nou’n pas ladan.  Nou kapab mazinen, si zanmen nou Kreater ti’n vir lizye lo nou e nou pei ti’n tonm dan move lanmen.  Pou nou antre dan prosen letap nou devlopman, pou nou kapab arive kontinyen selebre lanniverser nou Lendepandans, nou annan en devwar nob pou nou fer.  Nou bezwen kontinyen asire ki nou annan en Gouvernman ki annan sa pep aker e kontinyen pran lentere sa pep.  En Gouvernman ki pou kontinyen pouse e rod tou sord fason pour son pep epanouir.

Mr Deputy Speaker, mon swe pour prosen lavenir se ki nou kontinyen vwar amelyorasyon dan tou bann servis ki nou ofer nou zil, me pli enportan, a en kou ki nou kapab afford.  Mon pe alors lans en lapel avek nou Gouvernman, Sekter Prive e tou Lazans, pou kontinyen fer tou sa ki neseser, pou kontinyen soulaz e e-lev lavi nou dimoun.

Mr Deputy Speaker, wi nou rekonnet ki’n arive dan nou pei e osi lo nou zil, apre sa 40an ki’n pase.  Wi, nou rekonnet koman en pti pei, nou annan en resours limite an term finansyel e resours imen, me sa pa devret anpes nou kontinyen rod sa ki meyer pour nou pep.  Nou kapab fer li e ansanm nou pou fer li akoz ozordi nou pli determinen ki zanmen.  Alor, mon ti a demann nou pep pou desann e vin selebre 40an lanniverser nou Lendepandans.  Dan nenport fason ki zot kapab, anmiz zot dan linite ek dan lape.

Mr Deputy Speaker, avek sa detrwa mo, mon pou san dout anmenn mon sipor pour Mosyon Onorab De Commarmond.

Mersi.

 

MR DEPUTY SPEAKER

Onorab Pillay.

HON SEBASTIEN PILLAY

Mersi Mr Deputy Speaker.

Mr Deputy Speaker, sa Mosyon ki devan nou i enn ki pou anmenn nou fer en refleksyon enportan lo konzonktir ki nou pei i trouv son lekor ladan ozordi e ki sa ki nou’n fer pou nou ariv kot nou ete ozordi.

Ou konnen, i fasil pou nou parey mon bann koleg avan mwan in soulinyen, pou nou reste en pti pe endiferan oubyen pa vreman remark progre ki nou pei in fer, sorti kot i ti ete e sirtou pour bann zenn ki vreman napa sa relasyon avek nou listwar, pou zot konpran vreman ki mannyer keksoz in amelyore, ki mannyer keksoz in sanze dan nou pei pandan sa dernyen 40an.  E i fer lapenn osi pou ou vwar osi kot nou annan dimoun, Seselwa ki viv aletranze, ki ozordi i pe promot en mesaz konmsi ki nou pei pa’n avanse, ki nou pei i ankor parey i ti ete 40an ekek pase.  Mon krwar la i en pwen kot nou bezwen soulinyen e fer tou dimoun konpran kwa egzakteman ki’n arive dan nou pei, pandan tou sa letan ki nou pei in avanse.

Mr Deputy Speaker, si nou pran en pti pe listwar nou pei, nou regard politikman ki mannyer nou pei in formen li menm, nou kapab konstate atraver listwar, ki Seselwa orizinalman ti napa en lidantite politik. Basically, Seselwa pa ti form par sa ki ou apel an angle, the landed strata of the population sa letan.  Savedir sa bann dimoun ki ti ganny drwa partisip aktivman dan aktivite politik zot pei.  Sa i en Drwa ki ganny garanti dan nou Konstitisyon ozordi, ki okenn Seselwa aze 18an ou plis, i annan drwa partisip aktivman dan lavi politik oubyen dan public life son pei.  I pa ti en Drwa ki ti garanti a tou Seselwa sa.  Si nou go back dan listwar nou pei, byen lwen dan listwar nou pei, nou pou kapab konpran ki mannyer keksoz ti ete oparavan.

Par egzanp, ler nou regarde byen lwen dan lepase, pou ou annan Drwa Vote ou ti bezwen pas en Literacy Test.  Savedir avan ou vote, ou bezwen ale, pas en Legzanmen pou ou kapab vote.  E sa letan, par lefe ki laplipar bann dimoun ki ti annan akse avek ledikasyon, pa parey ozordi.  Se sa bann dimoun ki ti kapab vote e non pa en lot kous popilasyon ki li i ti napa oubyen i pa ti kapab afford pou anvoy son zanfan lekol.  E bann ki pli vye ki mwan i konpran tre byen sa.  E malgre ki apre sa in annan sanzman, bann ki pli vye ki mwan, ki’n viv dan lepok 1960, 1970, i konn tre byen poudir malgre in annan amelyorasyon, sa pa’n amelyor a sa pest oubyen avek sa vites ki popilasyon ti a kontan vwar li, parey keksoz in amelyore apre 1976 onwards ziska ozordi.  E si ou pran sa byen e ou regarde parfwa ozordi ou tann dimoun pe dir ou poudir par egzanp Gouvernman Lepep in entrodwir NYS pou en-doktrin zot, me Gouvernman Lepep in les ou al etidye aletranze.  In les ou epanouir kot ou’n obzerv diferan kiltir, ou’n obzerv diferan fason fer.  I pa ti a fer sa si i ti anvi kit ou anba en sub serviance kot ou bezwen siport li tou ou lavi.  Me sa letan, si ou ti annan en serten sinyatir oubyen ou ti napa en propriyete, oubyen ou ti napa mwayen, ou pa ti ganny sans al lekol, alors ou pa ti kapab pas en Legzanmen pou ou vote.  E dapre lenformasyon ki mon annan, dan listwar ki nou’n konstate, apepre 2000 dimoun ti kapab vote dan premye Eleksyon.  E sa menm group dimoun in partisipe dan tou bann Eleksyon e ki fer ki ti zis en serten group dimoun ki ti toultan kapab oubyen gard pouvwar pour en bon pe letan ziska apepre 1963 dan nou pei.  E la sa letan, zot ti apel zot lekor the Seychelles Taxpayers and Producers Association. Ozordi nou napa sa bann kalite konzonktir dan nou pei, me lontan nou ti annan.  E i enportan pou nou zenn pou zot kapab al dig en pe dan listwar, find out kote zot pei i sorti e ki mannyer zot pei vreman in vin sa ki i ete ozordi.

Mr Deputy Speaker, following sa in annan plizyer zefor pou nou kapab sanz konteks nou pei, me lefe i reste ki par reprezantasyon ki pouvwar kolonyal ti annan dan Gouvernman, i ti kontrol politik pei.  Savedir malgre ki ou ti pou elekte en reprezantan, li i ti annan bann nominated representatives ki ti fer ki i ti outnumber e lefe ki i ti preside over Lezislasyon sa letan, over petet kontrol politik pei, vreman popilasyon pa ti kapab fer nanryen.  I ti depan lo zot sa group dimoun pou zot deside kwa ki pou ganny fer.  E se la kot in annan tout en seri travay oubyen en seri zefor lo lapar en kantite pionye ki’n vin avan nou dan konteks Lezislatif Sesel, pou kapab sanz keksoz en pe pour ki ozordi nou zwir sa bann Drwa ki nou pe zwir, ki nou koz Konstitisyon bokou ozordi.

Mr Deputy Speaker, mon’ fer en parkour dan listwar, pou mwan vwar kwa ki’n pase pandan sa bann letan e i enteresan pou ou konstate ki mannyer bann diferan eleman ki’n vini e mon oule rapel Seselwa ki parfwa ou koz lo progre me ou pa vreman regarde ki kalite progre ki’n arive otour ou.

Par egzanp Mr Deputy Speaker, mon en zabitan Glacis e mon rapel tre byen dan nou distrik nou annan en rezyon ki apel La Gogue kot mon fanmir i sorti e pandan plizyer lannen ti napa kouran, elektrisite.  E mon papa ki ti en Mekannisyen ti annan en batri ki i ti sarze ti anmennen e i ti konekte avek bann glob pou mon tantin kapab ganny lalimyer dan son lakaz.  E ozordi nou pa vwar sa.  Me selman bokou nou ozordi, nou bliye poudir sa in akoz zefor ki nou tou nou’n mete, i akoz zefor ki Gouvernman dizour, lanfaz ki in mete lo anmenn devlopman dan nou pei, me nou pa fokaliz lo la.  Bokou zot ki la, bokou nou ki’n viv, bokou bann dimoun ki’n viv dan 1960, ’70 an montan, i konn tre byen ki mannyer en kantite akse zot ti gannyen avek bann keksoz, teknolozi par egzanp, ki ozordi nou pran li for granted.  Me selman nou pa realize akoz nou pa vreman apresye progre ki nou’n fer.  Se pour sa rezon ki mon krwar poudir nou bezwen toultan mazin lo la.  Mazinen kwa ki nou’n fer pou nou ganny sa pei parey i ete ozordi e akoz nou bezwen mentenir sa ki nou’n gannyen e non pa pran li pou zet li dan bin listwar.

Mr Deputy Speaker, mon krwar i reste relevan ozordi ki nou bezwen mazin byen poudir ozordi nou koz lo en bann size ki nou krwar poudir tou sa bann size i nouvo.  Par egzanp nou koz lo sa size Tax me byen avan sa, in annan diskisyon ki’n ganny fer lo sa size Tax e nou ti vwar poudir sa ti pe defavoriz bann dimoun.  E ozordi en Gouvernman ki nou annan in respond pozitivman an relasyon ek sa size Tax e still bokou nou pa pe vwar ki se sa progre, se sa koumsanmenm progre i vini.

Mon oule osi highlight Mr Deputy Speaker, ki mannyer atraver sa devlopman ki’n arive dan sa 40an, bokou keksoz in sanze.  Pandan bann lannen avan par egzanp dan bann lannen 1976, avan 1976, en dimoun ki ti pe reste dan en low rent house oubyen social house, pa ti kapab aste son lakaz akoz Polisi sa letan pa ti permet li pou aste sa lakaz, a leksepsyon serten landrwa kot i annan special tendencies ki ti ganny donnen avek bann dimoun.  Me ozordi laplipar dimoun ki ganny sans ganny zot lakaz, zot aste zot lakaz e i vin pour zot.  So, eski nou pe mazinen, lakantite zefor ki nou’n mete koman en popilasyon, pou nou ariv lo sa nivo kot nou ete ozordi.  E i annan bann anekdot fasinan pandan sa letan, ki nou kapab konstate e ki fer nou konpran ki mannyer nou’n avanse koman en popilasyon, nou’n avanse koman en pei e ki nou pa kapab bliye sa.

Mr Deputy Speaker, enn bann anekdot enteresan ki mon’n vwar ler mon pe fer en pe resers e annefe i annan en liv tre enteresan.  Mon pou sit loter a lafen mon prezantasyon, se ler sa film Joyce ki mon rapel, mon pa konnen si bokou dimoun i mazinen, ti ganny ban isi.  Bokou bann zenn pa konnen sa.  Nou pa konn nou listwar Lezislatif ki sa ti ganny ban.  Me ler nou koz censorship konmela, konmsi nou koz censorship ki zis Gouvernman SPPF, Parti Lepep ki’n anmenn censorship.  Me sa ti ariv well avan 1976, pandan sa bann letan.  So, mon krwar i annan tout en de-balans dan lafason ki nou apros vwar keksoz, dan lafason ki nou regard keksoz ozordi.  E sela kot i anmenn mwan lo pwen fondamantal, ki kantite devlope nou’n devlope pandan sa dernyen 40an.  Ler nou konstate ki pandan sa dernyen 40an, par egzanp ler mon regard statistik ki nou pe koz lo la pour People’s Assembly ’79 a ’93, in annan plis ki 100 Prozedlwa ki ti ganny pase petet around ’79 a bann lannen ’80.  E bann Prozedlwa mazer ki ti ganny pase par egzanp, sete pou sanz laz mazer Sesel, pou fer li sorti 21an pou vin 18an.  E ozordi bokou zenn i take it for granted, ki zot pou al vote 18an, zot pou al vote, zot pou al fer isi, zot pou al fer laba, me zot bliye lekel ki ti donn zot sa Drwa Vote 18an.  Nou bliye ki kantite zefor pei in mete, pou met an plas en sistenm kot ou kapab vote a laz 18an.  Kot ou kapab epanouir depi laz 18an onwards, zisteman pou ou partisip aktivman dan aktivite politik ou pei.  Personn pa pe fors ou pou swazir en kote ou lot kote, me ou pe ganny demande pou fer en desizyon ki rezonnab, en desizyon ki realistik e en desizyon ki relevan avek konteks ki ou pei i ladan ozordi.  E mon krwar se sa bann keksoz ki ozordi bann zenn pa pe vreman apresye.

Si par egzanp nou regard lakantite distrik ozordi ki i annan Mr Deputy Speaker.  Ozordi nou annan a kantite distrik zisteman akoz progre e devlopman ki’n annan dan sa bann distrik.  E ozordi nou annan plizyer distrik akoz zisteman nou’n anmenn sa bann progre kot dimoun i ete.  E mon krwar Lafrik i annan en term ki zot servi, kot ou anmenn devlopman kot dimoun e non pa ou pa tir dimoun pou anmenn zot kot devlopman akoz la ou destabiliz zot family unit, ou destabiliz sa kote kominoter ki sa kominote i annan.  E ozordi bokou pei Lafrik pe fer fas ek sa problenm kot semen i pa kot bann dimoun i ete me bann dimoun i bezwen al o-bor semen pou zot kapab reste.  Me isi par kont, nou esey konstrir semen pou anmenn semen o-bor lakour tou dimoun.  Delo par egzanp, sa bann dimoun i bezwen sorti pou al reste o-bor rezervwar pou zot ganny akse ek delo.  Me isi par kont, nou anmenn delo potab kot tou lakour.  E tousala i bann pwen relevan ler nou pe koz lo progre ki nou’n fer pandan sa dernyen 40an.  Sa lazournen ozordi, nou lazournen Lendepandans, i pa zis en lazournen kot nou ganny en zour konze, nou poze ne i en lazournen kot nou bezwen osi reflesir lo kwa ki nou’n arive ek nou pei e ki mannyer nou pei i devret kontinyen avans devan.  Pour en zenn ki pe etidye, ou bi se etidye, fer pli byen posib dan ou letid, ariv pli o nivo ki ou kapab arive, pou ou kapab fer en diferans pa zis dan ou lavi, me lavi ou fanmir.  Me pour en dimoun ki ozordi ou pe travay, ou bi se asize, mazinen kwa ki mon kapab fer pli byen demen, pou mwan kapab kontinyen amelyor lavi mon fanmir.  Se sa ki nou bezwen koz lo la.  Me ki nou pe vwar?  Nou pe vwar deplizanpli, serten santiman eksprimen e mon pou dir ankor enn fwa.  Eksprimen par bann dimoun ki pa reste Sesel pour en bon pe letan, an relasyon avek kwa ki nou devret fer.

Par egzanp, nou devret polariz nou lekor politikman pandan letan Lendepandans.  E kot mon pa vwar okenn keksoz ki fer sans akoz Lendepandans i pour nou tou.  Si ou lopozisyon, si ou Katolik, si ou Protestan, si ou Mizilman, Lendepandans i pour nou tou akoz i en zour pour tou Seselwa.  I pa en zour pou zis en group Seselwa.  E nou tou nou bezwen santi nou proud to be Seychellois.  Kot nou ale, kot nou kapab ete, nou bezwen proud to be a Seychellois.

Mr Deputy Speaker, mon oule remind sa Lasanble ki ou konnen, parfwa ler nou demann en keksoz ki nou pa konnen ki nou pe demande, keksoz i kapab grav pour nou.  Nou’n tann bokou koze lo sa exit Langleter from European Union.  Mon krwar i relevan osi ozordi ki nou pe koz lo la akoz lefe ki Sesel ti en ansyen Koloni Angle.  E mazinen si ozordi nou ti ankor en Koloni Angle, ki ti pou arive avek nou, Langleter pe sorti avek European Union, Langleter esansyelman i napa en Konstitisyon ek li.  I ti baz en kantite son bann prensip Legal lo bann Charters European Union.  In santi poudir sa bann Charters pa devret dikte ki mannyer i performen dan son pei, me selman ki nou’n vwar following sa exit.  Premyerman moodies in sans son rating from a positive credit rating to a negative credit rating, son bann Labank in perdi son tripple rating e la, posibilite ki Langleter, Rwayonm Ini i kase akoz Lacos ki li 62 poursan son dimoun in vot an faver pou li reste dan Lerop, pou posibleman al dan ankor en Referrandum pou demann son Lendepandans from United Kingdom.  E la mon pe regarde sa bann Seselewa ki pe reste Langleter, mon wonder si zot, zot in vot pou exit oubyen zot in vot pou reste Langleter.  E si zot in vot pou reste Langleter prezan, ki zot pou dir prezan?  Akoz esansyelman en kantite bann prensip sosyal ki Langleter ti pe anmennen, ti baze lo bann prensip Linyon Eropeen. Bann prensip Imigrasyon ti baze lo bann prensip Linyon Eropeen ki ti ganny enpoze par lefe ki Langleter ti form par Linyon.

So, ennler ler nou demann keksoz ki nou pa konnen ki nou pe demande e sa ki enteresan bomaten, bokou Angle pe kestyonnen, sirtou bann zenn.  Bann zenn Angle an gran mazorite pa ti vwar sa en bon move pou zot sorti dan Linyon Eropeen akoz sa ti fer zot parti en pli gran kominote kot zot ti kapab ganny akse avek plis loportinite.  E la ki nou pe vwar nou isi, nou pe vwar nou dan en sityasyon pa similer, me en sityasyon ki annan serten relevans par lefe ki nou bezwen demann nou lekor, 40an progre, what next? ki nou anvi apre sa 40an progre?

Mr Deputy Speaker, mon’n digress en pti pe from sa deba pou mwan fer referans ek sa pwen Langleter akoz mon kontan vwar parfwa nou bann Seselwa ki aletranze zot partisipe.  Mon kontan sa, i anrisi nou deba.  Me parfwa osi zot bezwen osi prezan demann bann kestyon fondamantal lo eski sa bann keksoz ki zot pe dir oubyen ki zot pe propoze pou fer i fer sans, an relevans avek kote nou pei i ete.  E pli boner Onorab Bresson in fer referans avek La Reunion.  E wi.  Esansyelman La Reunion i napa en idantite akoz ozordi sa garson i apel son lekor en Franse.  Personn pa fer referans avek lefe ki sa garson i en Renyonnen.  I fer referans avek sa garson, comme lefe ki i en Franse.  La Reunion i servi Paris koman Le Metropole.  Sa idantite ki sa bann dimoun i sipoze annan, zot napa me sa i ok petet akoz zot in sosyalman kondisyonn zot lekor pou viv koumsa.  Me nou isi nou annan en idantite.

Mr Deputy Speaker, bomaten mon’n regard lo Today in Seychelles e mon’n vwar en Interview avek nou Per Fondater, Mr France Albert Rene.  I annan en kestyon ki’n demann li, si bann zenn i konnen ki progre.  In reponn en larepons tre saz.  I up to zot bann zenn pou al fer resers e pou zot vwar kwa ki’n arive dan zot pei e pa zis dan tou kwen semen e dir ar, ozordi mon pa’n kapab aste 2 labyer, Gouvernman pa bon.  Mon pa’n kapab fer sa, Gouvernman pa bon.  Delo in monte la anba, Gouvernman ki pa bon.  Lapli in tonbe in antre dan mon lakaz, Gouvernman pa bon.  Lanbilans in tard 5 minit, Gouvernman pa bon.  Akoz si nou devlop en kiltir pou nou konplent tou keksoz a tou repriz, nou pou bliye ki nou menm nou, nou bezwen fer serten keksoz pou nou prop lekor.  Nou bezwen nou osi form parti sa devlopman ki nou anvi vwar.

Mr Deputy Speaker, mon’n vreman, vreman, vreman kontan, mon’n ganny sans pas kot Expo 2 fwa e mon’n vwar ki mannyer Seselwa, mon bann frer ek ser pe debrouye, sa ki pe sey fer son biznes, sa ki pe sey promot son biznes, sa ki pe fer diferan keksoz e mon demann mon lekor be, i bezwen nou’n devlope si nou’n ariv sa nivo.  Be still ou pou vwar i annan dimoun pa pe vwar sa.  Zot pa pe konstate sa.  E i enportan ki nou kontinyen edik nou lekor lo lenportans ki nou form parti en kominote Seselwa, pour ki nou kapab apresye lefe nou idantite koman Seselwa.

E mwan Mr Deputy Speaker, mon en dimoun tre patriyotik, mon en dimoun tre pasyonnen avek lefe ki listwar mon pei i en listwar fasinan, i en listwar tre enportan.  E ler mon regard parkour ki mon pei in fer pandan sa dernyen 40an, pou napa en pei Mr Deputy Speaker, pou napa en pei dan lemonn kot mon pou ale, kot mon pa pou zanmen proud pou mwan dir mon en Seselwa.  E mon pou reste fermeman konvenki ki Sesel i meyer pei kot mon kapab reste.

Mersi Mr Deputy Speaker.

 

MR DEPUTY SPEAKER

Onorab Ghislain.

 

HON CHANTAL GHISLAIN

Mersi Mr Deputy.

Mr Deputy Speaker, 40an pa 40 zour e non pli 40 minit.  Mwan mon a sey fer mon rezimen dan 4 minit.  Pour sa, 40an Lafet Lendepandans parski Onorab Volcere in fer en pti parkour lo devlopman Praslin e devlopman La Digue osi i similer.  So, mon pa pou repete.

I dir ou life start at 40.  Mon dir sa akoz mon refleksyon in anmenn mwan pou realiz 2 keksoz.  40an apre, Sesel in ariv dan en krwaze semen e dezyenm refleksyon in anmenn mwan pou konpar Sesel avek en lakaz.  En lakaz i ganny konstrir lo en fondasyon.  En fondasyon byen for ki malgre tou tes ki zot pas ladan, sa fondasyon pou reste solid.  Kontan pa kontan, zot napa okenn swa me aksepte ki sa fondasyon ki apel Sesel, ti mete par Mr France Albert Rene e in fer li, i pa’n mank ni menm en blok ladan.  Zot kapab sanz fasad, sanz kouvertir, sanz kouler, grandir li, resanz partisyon ladan, me fondasyon pou touzour reste sa fondasyon ki nou Per Fondater in mete.  40an mes chers amis, sa pei in parey sa lakaz.  Fondasyon in reste solid.  Fer plas ladan dan lakaz pour tou nou zanfan, pe enport ki ou kote ki ou siporte, me nou pa devret kapab vann nou lakaz.  Nou pa kapab sanz son met parski nou tou nou konnen ler nou sanz met lakaz, ki arive.

Mr Deputy Speaker, deza 40an.  40an depi ki nou ti’n vin en repiblik.  40an ki nou pep Seselwa in sorti anba dominasyon Britanik e mwan sa vre zanfan zil ki’n viv dan omwen 3 lepok nou listwar e ki pa’n zanmen bliye kot mon sorti.  40an pli tar, mon annan tou rezon pou zwenn ansanm avek tou Seselwa pou selebre avek sa pep ek sa pei ki’n bers mwan, ki nouri mwan e fer mwan grandir.  Me pou selebre ozordi, nou bezwen mazin kot nou sorti, kot nou’n arive e kot nou pe ale.  3 staz nou devlopman koman en pei lib, ki osi reprezant 3 lepok dan listwar nou pei.

40an pase, mon ti annan selman 7an e dan mon pti memwar lanfans lo mon zil La Digue, ti’n penny 3 pti gongon dan mon latet, en pti rob Polyester zonn, en ganmel delo lo mon latet, mon frer dan son kannson kaki Meriken e lo son latet en touk manze koson.  Mon pa rapel ler paviyon ti desann me mon rapel ti annan bokou selebrasyon.  Me en zimaz ankor grave dan mon memwar ziska ozordi.  Pour en kantite lannen, sa zimaz kole lo lakaz Mr Evariste Ernesta, portre en pti garson nwanr zis dan en pti bout kannson sal, son vant gonfle e en gro lonbri.  Atraver sa portre, marke an rouz, ti Lendepandans.  En zimaz tre pwisan, servi sa letan par Parti Demokratik, ki ti pe esey dir nou ki Lendepandans pou anmenn lafamin Sesel.  Me pour sa zonm saz, fondater nou Parti SPUP, Mr France Albert Rene, ki ti komans son karyer politik lo en tron koko La Digue, sa vre zonm deryer lalit pour Lendepandans.  Son lalit pa ti pou arete, tan ki nou pep pa ti aret ganny oprimen.  Sa gran disparite ant sa ki annan e sa ki napa, lepok gran blan e lenzistis sosyal ti ankor evidan dan nou pei.

Mr Deputy Speaker, in plis ki ler pou sa ki pe zwe bliye, reflesir en kou.  Pa bliye ki sete ou papa e gran papa ki’n lager kont sa papa e gran papa e zot sistenm, pour ki Seselwa i ganny son dinyite.  Se ou papa e gran papa ki’n redistribye larises e later Sesel, pour ki ou ganny en se ou.  E ozordi ou ganny lodas pou pil lo memwar ou prop papa e gran papa, pou ed zot zanfan ozordi prezan repran sa ki dapre zot ti pou zot depi zot nesans.  Mon bann frer e ser Seselwa.  Sesel i apel nou pei.  Donk, mon repet ankor.  Mazin byen kot nou sorti, kot nou’n arive.  Reflesir kont ki nou’n lalit e ki sa gran papa, ou prop gran papa in lalit e pour kwa i ti pe lalit.  Reflesir 40an pase kote sakenn de nou ti ete e kote nou ti pou ete ozordi.  Kant a mwan, 40an pase mon pa tro krwar ozordi ti pou annan en Onorab Ghislain dan Lasanble.  40an pase, tou dimoun i ne avek son lentelizans me kestyon i eski pou ou kapab ganny en Degre, ou ti pou bezwen el lekol.

Mon dir sa Mr Speaker, akoz i annan en pe letan kot largiman Lopozisyon se ki Parti SPUP, SPPF, Parti Lepep pa’n donn li son Degre akoz li in ne avek son lentelizans.  Me nou tou nou’n ne avek lentelizans me pou ou devlop ou lentelizans, ou bezwen al lekol.

Ou konnen Mr Speaker, ozordi mon manman i annan li 85an. I ekrir e lir byen Franse, lir byen Angle.  Son rev sete touzour vin en Ansennyan, me mon manman in balye semen, kwi manze kot Lekol La Digue e pli tar School Meal Centre.

Mon’n pran sa legzanp Mr Deputy Speaker, zis pou montre ki mon manman pa’n kapab akonplir son rev, menm si i ti ne avek son lentelizans.  Pa akoz i pa ti al lekol me senpleman akoz son paran pa ti kapab afford pou li kapab kontiny son letid.  E sa sel Labours ki Gouvernman ti donnen sa letan, ti baze plis lo kouler lapo sa zanfan, oubyen menm dan ki klas sosyal son paran ti sorti.  Donk, mon manman pa ti tonm dan sa kategori.  Par kont, mwan mon’n vin zwenn sa lepok kot selman 6 zanfan sorti dan Lekol Gouvernman ti kapab ganny Labours Gouvernman pou kapab al kontiny zot letid.  Konbyen ki ankor mazin zot sa sans manke e fermal ki zis akoz i pa’n kapab sorti sa 6 premye dan son Legzanmen Entrance, me par kont, reisi kontinyen ou letid si ou ti kapab peye, menm si ou’n sorti setyenm.  Me ozordi par kont, kantite zanfan ki kontinyen zot letid ziska Liniversite.  E ozordi ziska menm Master.

Mr Deputy Speaker, sa ki pa vwar sa i zis senpleman pe zwe aveg.  Ou ki pe rod sanzman, reflesir byen.  Eski ou pe rod sanzman pour ou lekor oubyen sanzman pour li?  Ou ki pe pile ozordi, reflesir byen lo kwa ou pe pile.  Pour kwa ou pe pile.  Napa nanryen ki parfe dan sa pei me se selman ansanm ki nou pou kapab reisir amelyor nou lavi e lavi nou fanmir.  Mon konsey i sa pour ou.

Mr Deputy Speaker, lavi i dir ou mefye ou kont sa enn ki plennyen me ki pourtan byen portan.  Mazin byen i pe zwe avek ou konsyans e i pe fer ou krwar ki se li ki mesi pou li vin sov ou.

Mr Deputy Speaker, apre ki nou’n fer tou sa traze koman en pep, 40 ozordi Sesel i devret pe riye, me i malere pou dir ki Sesel pros pou komans plere.  Sesel pou plere mes chers amis akoz sa kalite politik divizyon ki lopozisyon pe zwe.  Ozordi koman en fanm, mon larm i marse dan mon lizye e i fer mwan poz en milyon kestyon, kote nou Nasyon pe ale.  Mon vwar e antann mon bann frer e ser Seselwa ki nepli annan konpasyon, lanmour e respe pou kanmarad.  Kan eski nou pou realize ki nou tou Seselwa? En pep, en Nasyon ki pe viv isi lo sa later Sesel, nou pou kontinyen viv o-bor kanmarad pour plizyer lannen ankor.  Kan ki nou pou realize ki nou pou otomatikman bezwen annan lanmour pour kanmarad e viv dan lape, parski mon dir nou pou kontinyen viv o-bor kanmarad, malgre tou keksoz ki arive.  Olye kiltiv laenn, revanz e rankin kont kanmarad.  Si nou pa fer li, enn sezour nou pou pler sa kantite lanmor, letan nou pou komans kont lekor nou bann frer e ser Seselwa par grap, parey nou pe vwar lo Televizyon ozordi.  Bokou zenosid in ganny provoke par bann menas e lensilt sorti kot politisyen.  Mazin zenosid Rwanda, masak George Town Guiana.  Eski sa ki nou anvi vwar Sesel?  Donk mon bann frer e ser Seselwa, annou retourn dan liv nou zanset e relir sa paz kot ti deside ekrir listwar sa pep.  En listwar ki’n desid desten nou pei, en listwar ki’n anmenn nou kot nou ete ozordi, en listwar ki pou desid nou lavenir.

Mersi.

 

MR DEPUTY SPEAKER

Bon, Right of Reply, Onorab De Commarmond.

 

HON CHARLES DE COMMARMOND

Mersi Mr Deputy Speaker.

Mr Deputy Speaker, premyerman mon oule remersye tou bann entervenan lo sa Mosyon e in annan bokou lentervansyon.  Lentervansyon tre ris.  Lentervansyon ki’n anmenn nou en pti pe dan parkour nou lepok 40an Lendepandans.

Mr Deputy Speaker, sakenn in rakont son sakenn.  Sakenn in rakont son leksperyans ek son souvenir 40an nou Lendepandans.  La nou ki pe rakont listwar nou Lendepandans.  Mon asire mwan, si nou Lendepandans ki ti kapab rakont nou son memwar, nou ti pou soke.  Manke i ti pou penn nou en mozaik ki nou bann gran, gran pent pa ti pou kapab fer.  I ti pou en mozaik enkrwayab.

Mr Deputy Speaker, nou Parti, Parti Lepep, i konnen li ki in fer e ki lalit in anmennen.  E mwan letan mon pe dir Parti Lepep la, se Parti ki de-koul de Parti SPUP.  Mon oule osi met devan nou, ler mon pe dir ki nou konnen ki lalit ki nou’n fer, ki nou’n anmennen, mon pe mazinen pandan letan Lendepandans, nou’n re-partaz later pandan sa 40an la.  Teritwar Sesel nou’n re-partaze.  Bann ki ti napa later in gannyen.  Prezan mon pe mazinen, alors nou bezwen fer atansyon pangar personn:- konmsi nou bezwen fer atansyon ki personn pa vin revanze pli tar, pou dir sa ti mon later, mon repran.  Sa osi i kapab arive sa.

Mon pe dir sa pour ki nou vin konsyan tou sa ki nou pe sey fer dan nou pei.

Mon obzerve osi dan nou pei ozordi, bomaten ti annan kestyon lo zafer transpor la, zafer lo semen.  Be ou konnen, i annan sa keksoz ki apel respe, lord e lape.  Sa osi dan nou pei, mon krwar i annan zefor ki bezwen ganny fer pou nou tous li pandan sa peryod Lendepandans akoz ler mon’n ekout bann entervenan, mon pe ganny sa feeling ki lontan ti annan en bon pe sa zafer la, ki apel respe, lord e lape e prezan ou a krwar, avek devlopman, in annan en dekalaz lo la.  Pwen de refleksyon.  In annan serten Sekter letan mon pe ekoute, mon’n swiv deba, mon’n note ki in annan serten Sekter kot nou’n komans tre byen.

Mon a donn en legzanp zis an pasan.  Pran ou lo prodiksyon poul, koson.  Lavyann.  Be en letan ti’n ariv 80 poursan sa.  Prodiksyon lokal.  Ozordi nou’n desann en kantite.  Menm nou’n pran tousala nou’n met dan lanmen Lasosyasyon Fermye, zot pa’n fer le meyer.  Mon pe poz mon lekor kestyon Mr Deputy Speaker.  I paret mwan nou bann forefathers, bann dimoun ki’n la, ki’n tras sa larout ti konnen ki zot pe fer.  Nou ti annan nou bann bon prensip, bann bon vizyon.  Bon vizyon nou ti annan.  Me i pare mwan letan pou met an pratik, in annan problenm ki’n arive.  Alor annou pa rod zis sanze, pa konnen kwa ki nou pe sanze.  Ozordi dan nou pei, sistenm ki’n etablir, i annan kantite keksoz ki bon.  I baze lo bann prensip for, bann prensip fondamantal serye e ki nou bezwen fer sir nou pa dekale.  Nou pa dekale akoz sansan lakaz a tonbe.  E mon pe dir sa avek en lespri byen kler, en vizyon byen etablir, ki nou pep i bezwen reflesir davantaz, lo kwa ki pe arive dan son pei ozordi.  E kwa ki i pou fer dan prosen lavenir.  Fodre nou pa zis swiv sa ki ganny pase lo internet, konmsi nek nou pran bann trend.  La i koumsa nek ou swiv sa san konnen larealite li menm.  Nou bezwen kit nou si ou oule, pli sansib a larealite lo teren dan nou pei.  Vwar sa ki vreman i ete rather than zis dan internet.  Ou konnen ou pa ni pe get deor, ou la lo masin ou pe, e ou krwar lavenir i al lo la.  Mon oule dir sa senserman, ki nou bezwen blend sa bann keksoz la.  I bezwen:-

Vwar, nou kiltir ek nou listwar, nou bezwen kontinyen edik nou pep.  Plen nou dimoun sirtou nou zenn, pa ni konnen kiltir, nou listwar pa pe konnen.  La nou’n dir en pe ozordi.  Nou swete en pe a tande, zot ava sey swiv.  E sa in annan moman letan la, nou pe manke sa.  Si ou pa konnen alor, ou kiltir, ou listwar, kwa ki ou fer pour ou lavenir.

Mr Deputy Speaker, nou moralite e nou spirityalite dan nou pei ozordi, mwan mon obzerve in degrad en kantite.  E sa i rann mwan mal.  Mon pa kontan, vreman i fer leker dimoun fermal.  I pa normal e mon krwar la, nou bezwen diskit ansanm e nou bezwen vwar e reos, refer monte sa kestyon moralite, spirityalite e respe ki mon’n dir toutaler e nou bezwen ansanm vwar koman nou pou kapab fer li revin vivan.  Reos li, sansan ki pou arive Mr Deputy Speaker si nou pa fer atansyon, nou pou plonz nou dan en fernwanr kot soley a pran bokou letan, bokou plis letan pou li leve.

Mr Deputy Speaker, nou kapab get lavenir koman en lavenir briyan me i kapab osi en sel kou lavenir vin en lavenir sonm akoz i pou depan ki mannyer nou, nou desid li.  Nou kapab devlop plis sa ki nou’n gannyen pandan sa 40an la e kapab fer keksoz fantastik pou nou, koman nou kapab fasilman perdi tou en sel kou, depandan kwa ki nou fer, kwa ki nou deside lo sa lavenir la.

La i fer mwan Mr Deputy Speaker, mazin sa fanmir.  En fanmir Mr Deputy Speaker, ki avan 1976 ti napa landrwa reste.  Ti napa en landrwa konvenab dizon.  Dan sityasyon ki parey bann koleg la in eksplike toutaler.  Sityasyon vreman difisil kot i pe reste.  An 1981 apre nou Lendepandans byensir, Gouvernman i donn li en lakaz konvenab pou reste.  Fantastik.  Ler sa paran i mor, sa zanfan ki’n noye dan drog, i pran sa menm propriyete e i vann.  E ozordi i pe rod li en landrwa reste.  I napa en landrwa reste.  I pli pir ki son paran ti ete avan ’76.  Sa ki enportan pou nou reflesir lo la, sa ki nou’n fer e ki mannyer i kapab sap nou si nou pa fer atansyon.

Sa Mr Deputy Speaker, mon pa pe evante mwan.  Mon pe koz larealite. Mon pe koz sa ki vre e sa ki la devan nou.  Eski alor nou pou dir dan en ka koumsa, ki sa dimoun in fer li pov oubyen sosyete ki’n fer li pov, ouswa li menm li ki’n anmenn li dan lapovrete. Tou sa i bann kestyon Mr Deputy Speaker.

Mr Deputy Speaker, pou fini, koman konklizyon, les mwan lans en mesaz linite avek tou Dirizan nou pei, dan sa moman ki nou ladan, dan sa lepok ki nou ladan la.  Mon demann avek tou Dirizan nou pei, tou.  Accross the board.  Mwan mon pe demande ki, mon fer en lapel ek zot.  Annou les tonbe tou sa bann laenn e rankin ki dan nou leker.  Les tou sa bann vanzans ganny dezenere dan losean nou pase e annou viv ansanm, annou vin ansanm pour lanmour Bondye e pour lanmour Sesel.  Annou vin ansanm osi dan en Forum Nasyonal Mr Deputy Speaker.  E annou fer en seri konsiltasyon dan tou distrik e avek tou nou pep.  Pa lo nou pase ki mon anvi nou koze mwan.  Les nou pase trankil, me annou koz lo nou lavenir e sa ki nou a deside ansanm Mr Deputy Speaker, nou ava mars lo la koman en pep, nou a dir lala tel fason nou pou devlope, nou pou avanse koman en pep.  Koman sa pep Seselwa.  Mon mesaz se sa e pour mwan sa set en mesaz lespwar.

Viv nou Lendepandans Mr Deputy Speaker.  Bonn fet Lendepandans tou nou Seselwa.

Mersi bokou.

 

MR DEPUTY SPEAKER

Bon, lo sa Mosyon nou pran en vot.

Tou Manm ki an faver?  Inamim.  Mosyon in ganny aprouve.  E avek sa mwan osi mon ti a profite pou swet zot tou e tou Seselwa en bonn fet Lendepandans.

E Lasanble i ava adjourn e nou ava rezwenn Mardi le 5 Zilyet.

 

(ADJOURNMENT)