::
Home » Verbatim » 2016 » Term 2 » Tuesday 21st June, 2016

Tuesday 21st June, 2016

NATIONAL ASSEMBLY OF SEYCHELLES

Tuesday 21st June, 2016

The Assembly met at 9am

National Anthem

Moment of Reflection

Mr Speaker in the Chair

 

 

MR SPEAKER

Bonzour tou bann Manm Onorab, bonzour Minis ek son delegasyon.  Bonzour tou bann dimoun ki pe ekout nou dan lakour.  Ozordi avek nou dan Lasanble i annan Minis pour Lanvironnman, Lenerzi e Sanzman Klima, Minis Didier Dogley ki vin reponn plizyer kestyon konsernan son Minister.

Nou ava komans avek kestyon 49 par Onorab Bernard Arnephy.

 

HON BERNARD ARNEPHY

Mersi Mr Speaker.

Bonzour Mr Speaker, bonzour tou dimoun.  Mr Speaker, eski i dan plan Minister pou fer provizyon bidzeter anyel ki adekwat pou desilting e elarzisman sa 2 Lanmar prensipal Anse Boileau, ki souvan inonde pandan letan gro lapli e afekte bokou lakour rezidansyel e osi serten laferm dan sa rezyon e dan pei an zeneral kot i annan en tel problenm?

Mersi Mr Speaker.

 

MINISTER DIDIER DOGLEY

Mr Speaker.  Manm Onorab Lasanble, Sekretarya Lasanble, bann dimoun ki pe ekoute dan lakour e dan zot landrwa travay bonzour.

Mr Speaker, tou le an Minister i prezant son Bidze avek Minister Finans lo bann travay priyoriter ki neseser pou antreprann dan bann distrik lo Mahe, Praslin e La Digue.  E sa i enkli distrik Anse Boileau.

Sa i ganny fer apre ki nou konsilte bann Administrasyon Distrik e osi nou plan drenaz Nasyonal.  Nou bi prensipal se pou redwir risk linondasyon partou lo Mahe, Praslin e La Digue.

Pou ed Onorab pli byen konpran lenvestisman ki Gouvernman pe fer, mon ti a voudre donn sa Lasanble bann depans ki nou Minister in fer depi 2013 dan distrik Anse Boileau.  An 2013, nou ti depans R551 mil, an 2014 nou Minister ti depan en total R471 mil e an 2015, R398 mil.  Pou amelyor e antretenir bann Lanmar e Larivyer dan distrik Anse Boileau.

An 2015 osi Lanz pou Lagrikiltir ti konstri en nouvo pon pou ogmant kapasite sa Larivyer sorti Bonne Espoir.  Sa ti kout Gouvernman R180 mil.  Sa lannen nou pou depans en total R307 mil pou antreteni bann Larivyer ek Lanmar Anse Boileau.  An plis ki sa nou pe travay lo plizyer proze avek Minister Ledikasyon pou retir later ek gravye ouswa desilting dan Lanmar kot Lekol Segonder Anse Boileau.  An tou i espekte pou kout Gouvernman apepre R1.3 milyon pou konplet sa travay.

Mr Speaker, depi 2013 ziska lafen sa lannen, Gouvernman pou’n depans li R3.2 milyon pou adres bann problenm Lanmar ek Larivyer zis Anse Boileau.  An tou depi 2013 ziska lafen sa lannen Gouvernman pou’n depans li plis ki R80.3 milyon lo Mahe, Praslin ek La Digue pou li adres bann problenm linondasyon.

Baze lo bann letid ki’n deza ganny fer in montre poudir Gouvernman in deza pe depans li apepre 6 poursan son bidze anyel pou adres bann problenm dezas ki enkli problenm inondasyon e pou fer pei vin pli rezilyans kont bann peryod ler i annan bann dezas dan pei.

Pandan sa lannen nou’n fer plizyer proze lo Mahe, Praslin e La Digue.  Lo Mahe nou pe konsantre lo bann landrwa ki ti ganny afekte avek dezas koze par siklonn Feleng parey dan plato Anse Aux Pins e Au Cap.

Lo Praslin nou pe fer plizyer proze dan distrik Bais St. Anne e Grand Anse.  La Digue osi nou’n envestir plis ki R15 milyon depi 2013.  Tou nou bann proze drenaz mazer pou sa lannen in fini komanse ou konplete.

An se moman Minister pe antreprann en travay retir gravye ek later dan Larivyer ek Lanmar ki pas kot Bahaï Center ki fini kot Cap St. Marie.  E sa travay pe kout Minister R70 mil e i pou ganny konplete sanmenm sa semenn.

Minister  Lanvironnman e Minister Ledikasyon pou konzwentman antreprann en travay pou retir gravye dan sa Lanmar ki pas devan Lekol Segonder, deryer Sant Desalinasyon e osi dan sa pasaz delo ki pas deryer Lekol segonder par anba Legliz.

Minister pe plan pou retir later ek gravye an 2017 dan sa 2 Larivyer ek Lanmar prensipal Anse Boileau. Sa i kot Cap St. Marie e Hermitage.

Antretan parey in ganny fer resorti, Minister i reste angaze pou mentenir sa 2 Lanmar pou fer sir ki zot ganny debloke souvan, pou ki risk linondasyon i ganny redwir.

Mersi Mr Speaker.

 

MR SPEAKER

Okenn siplemanter, Onorab.

 

HON BERNARD ARNEPHY

Mersi Mr Speaker.

Mr Speaker, vi ki sa bann travay ki Minis in koz lo la, bann aksyon ki pe ganny pran i kout sonm ase sibstansyel.  Eski Minis i kapab dir avek nou Lasanble ki kalite sistenm monitoring i annan an plas pou asire ki ler sa bann louvraz pe ganny fer i bann louvraz ki ganny fer byen.  E eski Minis i kapab dir nou Lasanble si pandan ki bann travay parey pe ganny fer, vi ki i delika.  Eski i annan serten konsiltasyon avek konesans lokal, la kominote, vi ki zot ki la, ki konn bann problenm e Lotorite Distrik osi pou asire ki nou pe ganny valer pou nou larzan e ki bann travay i last once ki i ganny fer.

Mersi.

 

MINISTER DIDIER DOGLEY

Mr Speaker, laplipar bann proze ki nou pe travay lo la i bann proze ki’n deza, i annan en team enzenyer ki nou apel nou drainage task force ki basically zot konsilte bann dimoun dan distrik, zot travay anmas bann data syantifik e zot fer bann kalkilasyon akoz sa problenm delo i pa en kestyon ki ou zis senpleman kapab dir ok, nou pou fer sa, ouswa nou pou fer li tel mannyer e ki ou ale ou fer li.

Ou pou bezwen fer sir ou baz li lo lenformasyon ki konkret, ki korek.  Apre la avek ou  bann eengineering lenformasyon, la ou kapab design li.  E sa bann dimoun i annan en team ki sorti dan diferan Minister, ki nou apel li nou drainage task force.  Zot, zot ale zot konsilte, zot pran bann lenformasyon e apre ki zot design bann drainage.

Dan Minister i annan en team ki zot, zot travay se pou fer sir ki ler sa bann design in ganny fer, zot tender li.  E ler in fini ganny tender i ganny anmennen kot tender board e tender board ki pran a dernyen desizyon, lekel sa kontrakter ki pou ganny sa louvraz.  E apre parey Onorab in dir, louvraz  i ganny enplimante e nou, nou annan en team dan Minister ki son rol se fer sir poudir travay ki ganny fer i alaoter.

Me si konnen dimoun ki vwar poudir i annan keksoz ki pe ganny fer ki par egzanp ki annan serten defayans.  Minister Lanvironnman i toultan ouver pou resevwar okenn kritik e pou nou vwar ki mannyer ki nou kapab fer sir poudir sa bann travay i ganny fer o pli byen posib pou benefis bann dimoun ki reste dan sa landrwa.

Mersi Mr Speaker.

 

MR SPEAKER

Kestyon nimero 50, Onorab Arnephy.

 

HON BERNARD ARNEPHY

Mersi Mr Speaker.

Eski Minis i kapab eksplik nou Lasanble, ki zistans demars lo propozisyon pou fourni serten fanmir Anse Boileau Upper avek delo trete sorti lo proze Caiman Estate in arive?

Mersi Mr Speaker.

 

MINISTER DIDIER DOGLEY

Mr Speaker, PUC in fek konplet proze delo Caiman Estate a en kou R3.8 milyon ki pou deservi apepre 120 fanmir.  Tou bann fanmir dan sa landrwa i devret kapab ganny delo trete aprezan.  Sa group dimoun ki Onorab pe fer referans dan sa kestyon, zot en pe retire avek proze Caiman Estate e konsekaman PUC bezwen met an plas en nouvo proze avek en nouvo Bidze pou kapab deservi sa bann zabitan.

PUC pe estimen ki i ava kapab komans sa proze boner lannen prosenn.  Estimasyon preliminer ki PUC in fer i montre ki pou kout apepre R2 milyon pou antreprann sa nouvo proze ki pou kouver apepre 20 lakaz inisyalman.  Me avek posibilite dan le fitir ki pou enkli 30 nouvo kare later kot pou fer lakaz pli tar.

PUC pe komans fer en survey pou li determinen egzakteman ki kantite resours ki pou neseser pou sa proze e osi pou fer design pou enstalasyon tiyo, rezervwar e la pomp pou donn sa bann dimoun delo trete.

Mersi Mr Speaker.

 

MR SPEAKER

Okenn siplemanter Onorab.

 

HON BERNARD ARNEPHY

Mersi Mr Speaker.

Mr Speaker, vi ki sa demann pou sa nonm fanmir i en demann ki la ase lontan, eski Minister Gouvernman, pe mazin met sa koman enn son proze priyoriter parey Minis in ganny dir pou lannen pase e si wi, eski Minis i kapab donn sa Lasanble en garanti poudir lannen prosenn pou vwar sa travay demare.

Mersi.

 

MINISTER DIDIER DOGLEY

Mr Speaker, larepons i wi.  PUC in fini asir mwan poudir zot in komans fer sa survey pou determinen konbyen egzakteman pou koute apre pou design sa proze.  E le moman ki zot in fini fer tou zot bann travay teknik lo teren, nou espekte poudir proze pou komanse.

Mersi Mr Speaker.

 

MR SPEAKER

Kestyon 51 Onorab Meggy Marie.

 

HON MEGGI MARIE

Mersi Mr Speaker.

Bonzour tou Manm Onorab.  Bonzour Minis ek ou delegasyon, bonzour tou dimoun ki pe ekoute.  Mr Speaker, eski Minis i kapab eksplik zabitan Anse Aux Pins akoz ki i pe pran bokou letan pou rezourd problenm Larivyer Gran Basen ki baliz ek Au Cap e osi Larivyer Capucin ki tin ganny promet depi dezas Feleng?

Mersi Mr Speaker.

 

MINISTER DIDIER DOGLEY

Mr Speaker, travay pou rezourd problenm drenaz Anse Aux Pins e lezot distrik i kout ser e parfwa tre konplike.  Me Gouvernman in donn son komikman pou rezourd sa bann problenm inondasyon atraver pei enkli sa bann landrwa ki Onorab in nonmen.

An 2013, zis apre dezas Feleng premye faz travay pou amelyor drenaz Anse Aux Pins ti komanse e zot in ganny konplete.  Sa ti enkli travay ki’n ganny fer depi deryer emergency flats, kot Larivyer ki zwenn ek Larivyer Karyol e osi sa bout Larivyer Grand Basen ki zwenn Lanmar kot Ameng.

Sa ti enkli koup e retir bann pye dibwa dan Larivyer, retir gravye ki tin akimile e osi elarzi bann pasaz delo.  Tousala ti kout Gouvernman apepre R650 mil.  Sa in amelyor bokou kapasite sa Larivyer pou desarz delo pandan gro lapli.  An plis ki sa mon Minister in enplimant bann proze ki konpri sa 2 pou’n kot Reef Apartment e kot Victoria Car Hire ki’n kout Gouvernman plis ki R6 milyon.  Sa 2 proze kapital pou retir plis delo dan letan gro lapli dan sa landrwa ki enkli Larivyer Gran Basen. Sa i dapre rekomandasyon baze lo letid ki’n ganny fer pou rezourd problenm linondasyon dan distrik Anse Aux Pins e Au Cap.

Dezyenm faz travay mazer ki pe kontinyen ganny enplimante dan distrik Anse Aux Pins, sa i konpri konstriksyon plan kot Carefree Guesthouse e en seri travay pou amelyor pasaz delo dan rezyon Chetty Flat.  Tousala pou kout Gouvernman apepre R8 milyon.

Trwazyenm faz travay kot Larivyer Gran Basen se pou kontinyelman retir gravye ki akimile e elarzi serten seksyon sa Larivyer pou ogmant son kapasite pou retir pis delo dan letan gro lapli.  I pou osi neseser pou fer rock armoring dan serten landrwa dan sa Larivyer.

Dan Leo Capucin, bann travay pou ganny enplimante dan trwazyenm faz.  Proze pou redwir risk linondasyon dan sa distrik.  Sa pou enkli elarzi Larivyer e elev oter bann pon pou ogmant kapasite sa Larivyer pou desarz delo dan letan gro lapli.

Pou Minister kapab fer sa travay i pou bezwen korporasyon bann rezidan ki zot propriyete i baliz ek Larivyer pou zot donn way leave pou ki travay ava kapab ganny fer.

Nou plan se pou komans serten travay dan leo Capucin ver Out sa lannen avan letan gro lapli i komanse.  Minister pou osi met lezot sa bann proze trwazyenm faz dan son Bidze pou 2017.  I bon fer resorti ki Gouvernman in fer en kantite dan plato Anse Aux Pins e depi ler sa 2 pon kot Ex Reef Hotel ek kot Victoria Car Hire in konstri, Anse Aux Pins pa ankor ganny afekte avek okenn gran linondasyon mazer.

An tou Gouvernman pou’n depans R16 milyon pou amelyor drenaz dan Anse Aux Pins ver lafen sa lannen ler proze Chetty Flat i konplete.

Mersi Mr Speaker.

 

MR SPEAKER

Okenn siplemanter.

 

HON MEGGY MARIE

Mersi Mr Speaker.

Mr Speaker, eski Minis i kapab dir zabitan Anse Aux Pins kan ki sa konstriksyon pon kot Carefree Guesthouse pou komanse e kan zot ekspekte konplet sa proze.

Mersi Mr Speaker.

 

MINISTER DIDIER DOGLEY

Mr Speaker, sa pon kot Carefree Guesthouse nou espekte li komanse ver Septanm sa lannen.  Nou ankor annan enn de pti problenm way leave ki nou pe sort out epi i annan enn de kestyon konpansasyon ki nou ankor pe sort out.  Me le moman ki sa bann kestyon i a’n fini ganny rezourd nou espekte ver dan Septanm sa lannen pon i ava’n komanse.

Mersi Mr Speaker.

 

MR SPEAKER

Onorab Jasmin.

 

HON JENNIFER JASMIN

Mersi Mr Speaker, bonzour tou dimoun.

Mr Speaker, eski Minis i kapab enform nou Lasanble si son Minister ansanm avek lezot Lazans konsernen, enkli Disaster Committee, in fer en evalyasyon lo travay reabilitasyon dan sa bann distrik Les Mahe ki ti ganny afekte par dezas asosye avek siklonn tropikal Feleng avek bi fer rekomandasyon apropriye avek Gouvernman e rezourd bann problenm drenaz dan lezot distrik afekte par egzanp dan Plato Point Larue.

Mersi.

 

MR SPEAKER

Out of Order.  Kestyon 52, Onorab Meggy Marie.

 

HON MEGGY MARIE.

Mersi Mr Speaker.

Mr Speaker, eski Minis i kapab enform zabitan Anse Aux Pins spesyalman bann ki annan plan biznes, kan ki Sewage System pou pare pou servi?

Mersi Mr Speaker.

 

MINISTER DIDIER DOGLEY

Mr Speaker, plan pou lonterm PUC se pou annan sistenm sewage pou deservi maksimonm posib tou rezyon lo Mahe, Praslin e La Digue.  An se moman i annan en sanitation master plan ki pe ganny fer zisteman pou fer en letid fezabilite pou regard bann diferan sistenm sanitasyon pou kouver Mahe, Praslin e La Digue.

Dan ka spesifik Anse Aux Pins, li i tonm dan rezyon East Coast kot i annan en letid pli avanse ki pe ganny konplete e sa letid pou kouver rezyon sorti Point Aux Sel ziska Briyan.

Pour lemoman sa seksyon ki sorti depi kot Point Aux Sel ziska Anse Déjeune in fini ganny konplete e letid pe kontinyen pou kouver sa rezyon depi Anse Déjeune ziska Briyan.  I kouver osi Cascade.

Deza Mr Speaker, sa letid pe montre ki i pou kout apepre en demi-bilyon Roupi pou kouver sa rezyon depi Point Aux Sel ziska Anse Déjeune.  Avek en sistenm sewage e nou ekspekte i pou kout apepre parey pou kouver sa lot rezyon ki komans depi Anse Déjeune ziska Briyan.

Deza zefor pe ganny fer pou nou kapab rod finansman neseser pou komans sa proze ki pou kouver rezyon Point Aux Sel ziska Anse Déjeune.

Alors desito ki nou kapab ganny sa finansman pou fer sa louvraz, PUC i ava komans sa proze.  Pour le moman Anse Aux Pins pe ganny deservi zis kot Chetty Flat avek sistenm sewage.  Sa sistenm i kouver apepre 40 Housing Unit.  Osi dan distrik Point Larue i annan en lot sistenm Sewage separe ki kouver apepre 270 lakaz dan Nazyon Estate.

Mersi Mr Speaker.

 

MR SPEAKER

Okenn siplemanter Onorab.

 

HON MEGGY MARIE

Mersi Mr Speaker.

Mr Speaker, eski Minis i kapab dir avek sa Lasanble si son Minister in fer en lanaliz bann kour ekonomik, sosyal e lanvironnman ki lefe ki sa rezyon pa konekte avek en sistenm sewage?

Mersi Mr Speaker.

 

MINISTER DIDIER DOGLEY

Mr Speaker, nou pa ankor fer en tel letid akoz en tel letid i pou kout en bon pe larzan pou fer.  Me an zeneral mon krwar baze lo common sense i kler poudir si nou anmenn en sistenm sewer lo kote lanvironnman i pou anmenn en kantite benefis akoz i pou rezourd en kantite nou bann problenm sanitasyon.  E osi pou bann biznes, zot pou kapab servi pli byen zot bann teren e menm rezidansyel i pou ed en kantite avek kantite later ki kapab ganny mete a dispozisyon pou devlopman.

So an zeneral nou konpran bann benefis ki en sistenm parey pou anmennen.  Me pour lemoman nou pa ankor vwar li neseser pou al fer en gran letid detaye akoz nou annan bann lezot priyorite ki nou pou bezwen met sa bann larzan ladan.

Mersi Mr Speaker.

 

MR SPEAKER

Onorab De Commarmond.

 

HON CHARLES DECOMMARMOND

Mersi Mr Speaker.

Bonzour Mr Speaker, bonzour Minis e bonzour tou dimoun ki a lekout.

Mr Speaker, mon remersye Gouvernman pou ekout reprezantan Cascade apre tou sa porsyon pou sa proze sewage dekales pou Cascade antye.  Eski Minis alors, i pe garanti nou Lasanble ki sa proze sewage ki pe mansyonnen e ki pou enkli Cascade antye pou ganny realize dan sa don BADEA ki sa proze an antye pou ganny fer ladan?

Mersi.

 

MINISTER DIDIER DOGLEY

Mr Speaker, plan se pou enkli depi Point Aux Sel ziskan Brilant.  Alors definitivman Cascade i tonm ladan.

Nou pa ankor determinen egzakteman lekel bayer fon ki pou donn sa larzan.  I posib poudir BADEA i ava sa enn ki prefere.  Me nou ape fer demars, PUC an se moman pe fer demars pou idantifye lekel ki pou kapab donn li, ki pou kapab loan li.  Konmsi donn li sa larzan pou kapab fer sa lenvestisman a en kou ki rezonnab akoz nou pe koz nou plis ki en bilyon Roupi lenvestisman ler nou pe regard antye sa proze.

Mersi Mr Speaker.

 

MR SPEAKER

Onorab Natasha Esther, kestyon 53.

 

HON NATASHA ESTHER

Mersi Mr Speaker.

Mr Speaker, Minis ek ou delegasyon e tou dimoun ki pe ekout nou bonzour.

Mr Speaker, eski Minis i kapab enform sa Lasanble, ki plan son Minister pou adres sa problenm delo monte dan plato Cote D’or?

Mersi.

 

MINISTER DIDIER DOGLEY

Mr Speaker, serten travay in ganny fer dan lepase pou redwir risk linondasyon dan plato Cote D’or, par egzanp retir later dan Lanmar Citronnelle.  Re fouy drenaz obor semen Cote D’or, retir gravye dan Larivyer kot bann laferm ki konekte avek Mouliner Estate e retir later dan Lanmar Mouliner e konstriksyon bann pti pon lo sa bann culvert e amelyor drenaz dan rezyon Lotel Le Duc pou ed redwir risk linondasyon dan rezyon Cote D’or.

Tou resaman en proze in ganny enplimante depi kot semen ki antre kot Marie Jane Estate vizavi kot Ex Casino Des Ile ziska kot lanbousir Aux Cap lo semen Anse La Blague.

Sa proze i pou an 2 faz.  Premye faz proze ki’n fini konplete an Me sa lannen ti enkli fouy en drenaz a en longer plis ki en demi kilomet ziska Lanmar Duronto e apre kontinyen ziska kot lanbousir.  Ki an tou i apepre en kilomet longer pou retir delo lo semen Cote D’or e dan zalantour.  Sa proze in kout Gouvernman R565 mil.

Dezyenm faz sa proze se pou met beton dan sa dren.  Mont li avek blok e refer sa pon atraver semen ki al kot Lanmar Duronto e sa proze pou kout Gouvernman anviron R1.2 milyon.

Minister i deza pe fer diskisyon avek SLTA pou inisye en proze drenaz lo semen Cote D’or depi kot Ex Tant Mimi Restoran ziska kot Lotel Cote D’or Foot Print.

Sa pou enkli osi travay pou retir sa pon kot Lanmar Citronnelle pou ki i desarz plis delo dan letan gro lapli.

Mersi Mr Speaker.

 

MR SPEAKER

Onorab.

 

HON NATASHA ESTHER

Mersi Mr Speaker.

Mr Speaker, eski Minis i kapab dir avek sa Lasanble ki progranm mentenans ki son Minister i annan pou sa proze, enkli sa proze avan ki depi Ex Tant Mimi Restoran ziska Praslin Mize e si Minis i kapab dir ek sa Lasanble kwa ki zot pe fer pou ankouraz bann propriyete ki baliz avek sa proze pou konekte zot dren pou ede adres sa problenm dan son totalite.

Mersi.

 

MINISTER DIDIER DOGLEY

Mr Speaker, Minister i annan en progranm tre elarzi pou li mentenir tou bann Lanmar ek bann rigol ki nou, nou konstrir tou dilon lannen e tou le lannen.  Parfwa i pa posib pou fer tou, tou le lannen me selman le moman ki nou vwar i annan en nesesite pou fer li, nou fer sir poudir nou retournen e nou fer sir poudir sa bann rigol ek sa bann Lanmar i ganny antretenir.

Lakantite demann an zeneral i bokou, akoz sirtou ek sa kantite devlopman ki annan, nou vwar nou poudir menm ki bann Lanmar ouswa bann rigol ki nou fek netwaye, apre ou vwar bann sitasyon i re akimil tre vit apre bann gro lapli.

Me selman nou pou annan en komikman ki nou’n donn pep Seselwa e ki nou fer nou mye pou fer sir tou sa bann landrwa i ganny antretenir o pli mye posib baze lo resours ki nou annan.

Nou pa ankor apros bann dimoun pou fer bann mentenans lo bann rigol piblik obor semen.  Mon krwar sa i en keksoz ki nou kapab regarde, enkli CSR pou regarde si nou kapab ganny en pe plis larzan pou met dan sa bann zafer mentenans e pou netway bann rigol e mentenir bann Lanmar.

Mon ava pran sa sizesyon e nou ava regarde ki mannyer nou kapab travay avek Minister pou avans sa an avans.

Mersi Mr Speaker.

 

MR SPEAKER

Onorab Houareau.

 

HON HERBERT HOUAREAU

Bonzour Mr Speaker.  Bonzour Minis, mersi.

An vi larepons Minis Mr Speaker, mon ti a kontan demann Minis vi ki ozordi bann plato lakot obor lanmer i pli o ki deryer.  Si son Minister i anvizaze a lonterm entrodwi bann laponp mekanik pou ponp dan bann basen deryer, dan bann retansyon pou anvoy dan delo sale olye kontinyen fer rigol ki delo i kontinyen ranpli avek delo sale.

Mersi.

 

MINISTER DIDIER DOGLEY

Mr Speaker, nou prefere servi bann sistenm kot delo i flow avek gravity.  Akoz ler ou annan en sistenm laponp i anmenn bann lezot kout mentenans menm avek elektrisite eksetera ki ou bezwen peye.

Nou konnen i annan serten landrwa kot gravite li menm i pa pou sifi pou rezourd sa bann problenm.  Par egzanp i annan Point Larue ki nou konnen i enn bann landrwa ki dan lepase nou’n regard dan posibilite pou entrodwi laponp.

Me pour lemoman tan ki i fezab nou pli vomye over bann lanbousir, kree bann loportinite ki delo i flow dan li menm e trwakarditan nou’n vwar poudir sa i marse.  Me si dan serten landrwa parey mon’n nonmen, Point Larue, pli tar nou vwar poudir i annan en nesesite pou entrodwir laponp, alor nou pou bezwen fer li.

Mersi Mr Speaker.

 

MR SPEAKER

Kestyon 54, Onorab Esther.

 

HON NATASHA ESTHER.

Mersi Mr Speaker.

Mr Speaker, eski Minis i kapab enform sa Lasanble, ki plan son Minister pou rektifye problenm Lanmar, spesifikman Marie-Jeanne Estate, Ton Black, Cap Samy e pre kot Madanm Bedier dan distrik Baie Ste Anne?

Mersi.

 

MINISTER DIDIER DOGLEY

Mersi Mr Speaker.

Travay pou minimiz lenpak linondasyon Cap Samy e dan rezyon Marie-Jeanne Estate 1 ek 2 in deza komanse.  Sa i enkli retir later ek gravye ki’n akimil dan sa Lanmar depi kot Ex Casino staff quarters ziska lanbousir Cap Samy, kot semen prensipal e sa pou kouver Marie-Jeanne Estate 1 ek 2.

Pou osi annan konstriksyon bann pon e retir bann feyaz ki pe pous dan pasaz delo pou amelyor sirkilasyon delo.  Pou annan an tou 5 pon ki pou ganny demolir e re konstrir.  An tou sa proze pou kout plis ki R2.8 milyon.  I pe ganny finanse anba proze Eco system Base Adaptation. En proze ki pe ganny finanse par Lasin e i ekspekte konplete dan 4 mwan.

Kot Ton Black, en proze in ganny propoze ou konstrir en pon lo pilye pou ki bann zabitan sa landrwa i a kapab travers dan letan gro lapli e osi retir later ki’n akimil dan sa Lanmar e elarzi sa pon.  Minister pe konsider enplimant sa proze pli tar sa lannen.

Kot Madanm Bedier en proze in ganny propoze pou re fouy drenaz ki pas devan son larantre pou ki i konekte avek Lanmar Salazi lo kote semen.  Pou osi annan konstriksyon en pti pon pou ki i konekte kot sa depresyon, kot larantre Lotel Le Duc.  Sa proze i ava rezourd problenm drenaz ki bann rezidan dan sa landrwa pe fer fas avek.

I pou ganny enplimante sa lannen e i pou kout anviron R320 mil.  An plis ki sa Minister pou kontinyen avek son progranm netwayaz bann Lanmar ek Larivyer dan rezyon Cote D’or parey dan tou distrik.

Minister pou osi met bann kontrakter lo standby dan letan gro lapli pou debous bann lanbousir, pou redwir risk linondasyon dan bann landrwa rezidansyel.

Mersi Mr Speaker.

 

MR SPEAKER

Onorab, yes.

 

HON NATASHA ESTHER

Mersi Mr Speaker.

Mr Speaker, eski Minis i kapab enform sa Lasanble kan ki son Minister i espekte adres enn parmi sa bann problenm pon.  Spesifikman sa pon kot Lanmar Citronnelle ki nou dir li kot pti lavil, ki enn parmi bann lakoz delo monte dan Marie-Jeanne Estate.

Mersi.

 

MINISTER DIDIER DOGLEY

Mr Speaker, sa pon kot Lanmar Citronnelle i en pon mazer.  I en travay ki Minister pa pou kapab fer li, li tousel, i pou bezwen ganny fer ansanm avek Lazans pou Transpor lo Later.  Nou deza an diskisyon avek zot konsernan sa pon.  Me nou napa en dat ferm egzakteman kan ki nou pou tous sa pon spesifik.  Me selman nou deza pe fer tou bann travay ki neseser dan zalantour pou amelyor omwen bann drenaz ki konekte avek li e pou fer sir poudir Lanmar Citronnelle li menm i ganny mentenir regilyerman.

Me le moman ki nou ava’n santi nou, nou dan en pozisyon finansyerman pou fer li, akoz i pou en gro travay.  Ansanm avek Lazans pou transpor lo later, nou ava fer le neseser pou nou adres sa problenm.

Mersi Mr Speaker.

 

MR SPEAKER

Onorab Murielle Marie, kestyon 55.

 

HON MURIELLE MARIE

Mersi Mr Speaker, bonzour.

Mr Speaker, eski Minis i kapab enform sa Lasanble ki zistans PUC in arive avek proze koneksyon delo trete dan distrik Au Cap?

Mersi.

 

MINISTER DIDIER DOGLEY

Proze delo tret Au Cap ti komanse an Fevriye 2015 e pe ganny enplimante dan plizyer rezyon dan sa distrik.  Sa bann rezyon i enkli Lower Point Au Sel, Upper Point Au Sel, Sawasawa Farm Estate, Doffay Estate, St Roch e Green Estate.

An vi ki proze pe ganny fer dan plizyer rezyon, PUC in apwent 4 kontrakter pou antreprann sa bann travay.  I pou kout PUC anviron R17 milyon pou konplet tou sa bann proze.  Sa bout proze ki pou kouver Point Au Sel Lower ek Upper i enkli konstriksyon 2 stasyon ponpaz e osi 2 rezervwar avek kapasite 150 met kib e 200 met kib.  Pe osi enstal apepre 1.6 kilomet tiyo.  In fini ganny konplete.

Sa proze i espekte deservi anviron 400 fanmir evantyelman.  PUC pe deza konekte bann fanmir ki’n fini fer zot aplikasyon pou ganny en koneksyon delo trete.

Travay ki pou kouver St. Roch, Sawasaw Farm ek Doffay Estate i konpri en stasyon ponpaz ek en rezervwar 200 met kib e pou enstal 3 kilomet tiyo.  I annan serten retar lo sa bout proze akoz problenm way leave e osi akoz in annan gro lapli pou en pe letan.

Aktyelman apepre 2.8 kilomet tiyo in fini ganny enstale e osi sa stasyon ponpaz in fini ganny konstri.  An adisyon, malerezman akoz difikilte avek kontrakter ki ti pe travay lo sa proze, PUC in bezwen re apwent en nouvo kontrakter e sa in kree serten retar ki prezan PUC pe espekte ki i pou kapab konplet sa bann travay ver lafen Out sa lannen.  Sa enn proze pou evantyelman kouver 280 lakaz.

Sa seksyon proze ki i pe kouver Green Estate i konpri konstriksyon en stasyon ponpaz ek en rezervwar 100 met kib e enstalasyon 600 met tiyo.  Sa stasyon ponpaz ek rezervwar in fini ganny konplete e PUC pe an se moman fer bann travay pou met bann laponp dan stasyon.  Pou sa seksyon, travay i osi avanse.  I espekte ki i pou terminen ver lafen Zen 2016.  Savedir ankor dan 1 semenn.

PUC pou toudmenm met lanons lo media a sa moman apropriye pou enform bann zabitan dan sa bann rezyon kan ki zot pou kapab vin fer zot laplikasyon pou ganny en koneksyon delo.

Mersi Mr Speaker.

 

MR SPEAKER

Okenn siplemanter Onorab.

 

HON MURIELLE MARIE

Mersi Mr Speaker.

Mr Speaker, an vi ki kontra i en keksoz legal, eski Minis i kapab enform sa Lasanble ki son Minister pe fer pou asire ki bann kontrakter i respe zot kontra e si Minis i kapab garanti zabitan Ex Sadeco Flat, Point Au Sel kan zot pou kapab ganny konekte avek delo trete pou envit fristrasyon.

Mersi Mr Speaker.

 

MINISTER DIDIER DOGLEY

Mr Speaker, definitivman ler en kontra i ganny sinyen i annan bann kondisyon ki ganny mete dan sa kontra e tou lede partner ki annan pou fer ek sa kontra zot bezwen fer sir poudir zot meet sa bann kondisyon ki’n ganny mete dan kontra.  E PUC i annan en kantite kontrakter ki i travay avek.  I annan plis ki 40 proze an se moman ki i pe enplimante e PUC i annan en seksyon ki zot travay se senpleman travay ek bann kontrakter e fer sir poudir bann proze ki ganny fer i ganny fer byen.  E dan bann ka, parey dan sa ka laba kot Sawasawa Farm kot louvraz pa’n ganny fer byen ouswa lo nivo ki PUC ti pe espekte.  Then bann mezir neseser, disipliner i ganny pran e si pa ganny rektifye a lafen, PUC definitivman i bezwen fer aret sa travay e la i rekomans prosesis pou li donn larestan travay avek en lot kontrakter ki pou fini sa louvraz.

Pou bann dimoun ki malerezman pa ankor ganny konekte ziska aprezan.  Si i annan okenn dimoun ki annan difikilte, mon ava koz avek Mr Morin pou fer sir poudir nou annan bann dimoun kot PUC ki ava dispozisyon pou resevwar sa bann dimoun.  Resevwar zot call, zot bann demann e nou a fer sir poudir nou ava anvoy bann enzenyer avek bann teknisyen pou travay ansanm ek sa bann dimoun pou fer poudir zot ganny konekte o pli vit posib le moman ki proze i ganny konplete.

Mersi Mr Speaker.

 

MR SPEAKER

Onorab Samson.

 

HON DEREK SAMSON

Bonzour Mr Speaker, mersi bokou.  Mersi Mr Speaker.

Mr Speaker mon ti a kontan demann Minis si sa proze i over lap dan okenn lezot distrik akote e si i kapab dir nou osi konbyen kontrakter ki’n ganny anmenn Ankour pou bann retar ki zot in mete dan bann proze e konbyen letan apepre sa bann retar i pran pou retarde, ki bann zabitan i ganny delo trete.

Mersi.

 

MINISTER DIDIER DOGLEY

Mr Speaker, mon napa sa bann detay egzakteman la ek mwan.  Mr Morin in enform mwan poudir i annan apepre 2 kontrakter deza ki’n anmenn Ankour.  Me si ou le, mon kapab donn ou bann detay egzakteman konbyen kontrakter ki PUC dan lepase in bezwen al Ankour avek akoz zot pa’n onor kondisyon zot kontra.

Mersi Mr Speaker.

 

MR SPEAKER

Kestyon 56, Onorab Murielle Marie.

 

HON MURIELLE MARIE

Mersi Mr Speaker.

Mr Speaker, eski Minis i kapab enform sa Lasanble, ki zistans Minister in arive avek proze koneksyon drenaz Turtle Bay e sa pon Green Estate, ki ti ganny anonse dan sa Lasanble?

Mersi.

 

MINISTER DIDIER DOGLEY

Mr Speaker, proze drenaz Turtle Bay in fini konplete lafen Me sa lannen.  Proze in ganny serten retar akoz nou ti bezwen bouz lekipman PUC ki ti dan sa landrwa.  An plis gro lapli ki’n kontinyen tonbe in ede pou retard proze.  Me i bon fer resorti ki Minister in ganny bon korporasyon avek bann zabitan pou realiz sa proze ki’n kout Gouvernman R1.2 milyon.

Lo kote proze Green Estate, travay pe byen avanse.  Tre byento kontrakter pou komans fouy dren pou konekte sa bout drenaz Green Estate ek sa bout ki kot Reef Golf Course.  Ex Hydroponic landrwa.

Travay pou konstri semen

alternativ ouswa en diversion in preski konplete.  I reste selman koltar e bann sir trafik pou enstale.  Kan sa i a fini travay pou demolir sa vye pon pou komanse e sa i dan apepre 3 semenn.  Kontrakter i sipoze rann sa proze dan 4 a 5 mwan.

Mersi Mr Speaker.

 

MR SPEAKER

Okenn siplemanter Onorab.

 

HON MURIELLE MARIE

Mersi Mr Speaker.

Mr Speaker, eski Minis i kapab

enform sa Lasanble, ki plan lonterm son Minister pou maintenance sa Lanmar Turtle Bay pou asir ki i abzorb tou bann delo ki sorti lo semen letan gro lapli pou evite ki sa landrwa i kontinyen inonde.  E kan ki zabitan Green Estate pou kapab servi sa semen alternativ ki Minis in mansyonnen akoz nenport ki moman sa pon pou collapse.

Mersi.

 

MINISTER DIDIER DOGLEY

Mr Speaker, konsernan sa semen diversion ki Minister pe fer anse moman, parey mon’n dir dan mon larepons, nou ekspekte li ganny konplete ankor dan 3 semenn ki dimoun i kapab servi.  E nou deza okouran poudir nou bezwen speed up e nou’n demann kontrakter pou fer son mye pou konplet sa proze as soon as possible e dapre son kontra dan 3 semenn i bezwen rann nou sa semen e i pa reste gran keksoz pou fer de tout fason.

Konsernan mentenans bann Lanmar deryer Turtle Bay, Minister depi 2013 in fer en kantite louvraz pou toultan fer sir tou bann Lanmar, sirtou dan Au Cap e Anse Aux Pins nou’n fer nou maksimonm pou fer sir poudir tou sa bann Lanmar i ganny antretenir.  E an 2017 nou sipoze retourn ankor Turtle Bay par deryer kot Mandarin Estate pou fer serten travay ankor pou amelyor sa bann Lanmar e pou fer sir poudir desarz osi i re ganny ouver pou fer sir poudir delo i flow.

Alor i dan nou progranm pou nou kontinyen mentenir sa bann Lanmar dan sa bann landrwa.  Ankor tousala i depan lo lakantite resours ki nou annan a dispozisyon e osi bann priyorite ki annan dan bann lezot distrik.

Mersi Mr Speaker.

 

MR SPEAKER

Onorab Sebastien Pillay.

 

HON SEBASTIEN PILLAY

Mersi Mr Speaker.

Bonzour.  Bonzour Minis, bonzour tou ki a lekout.  Mr Speaker, prenan an kont ki i paret ki in vin en konsern ase enportan ki bann Lanmar ek sa bann issue drenaz pe monte regilyerman, eski Minis i kapab dir nou si son Minister pe met an plas okenn mekanizm pou etidye lefikasite sa bann dren ki deza an egzistans dan sa landrwa e lezot dren ki pou ganny konstri prenan an kont devlopman ki pou annan dan sa landrwa.  Akoz i parey ki si sa bann sityasyon i kontinyen then nou pou toultan pe retournen pe koz lo nou bann remedial action rather than bann aksyon lonterm ki pou kapab efektivman deal avek sa bann problenm.

Mersi Mr Speaker.

 

MINISTER DIDIER DOGLEY

Mr Speaker, parey mon’n nonmen avan, i annan en team enzenyer ki travay lo nou bann design pou bann dren ki nou fer atraver pei, Mahe, Praslin e La Digue.  E normalman zot kalkil li pou bann, sa ki nou apel bann worse scenario.  Savedir ler ou annan bann movetan ki vreman ekstrenm.  Kot ou pe ganny ou plis ki 150, 200 a 300 milimet lapli dan 24ertan par egzanp.  E sa i normalman ganny konsider bann kondisyon ki vreman ekstrenm.  E laplipar sa bann rigol an beton ki nou, nou fer ouswa bann drenaz ki nou fer i baze lo bann kalkilasyon lo volume delo ki i kapab pas dan sa bann drenaz par segonn.

Alor, ler sa bann dren i ganny design, normalman in ganny design pou li fer fas avek sa bann kondisyon parey.  Me sa ki nou vwar nou pe fer fas avek, ki i vin pli konplike.  Akoz nou vwar nou pe depans apepre R3.4 milyon tou le an zis pou netway Lanmar ek Larivyer.  Sa i enkli bann problenm ki asosye ek bann dimoun ki zet, malerezman i ankor annan serten group dimoun dan nou lasosyete ki servi Lanmar koman bin, ki si fo met zot salte dan en dustbin zot pran zot set dan Lanmar ouswa dan Larivyer.  E sa i kout en kantite larzan tou le an pou nou vwar nou pe kontinyen vwar nou pe met larzan pou tir sa bann salte dan tou sa bann Larivyer, dan tou sa bann Lanmar.

E osi avek sa speed devlopman ki Sesel pe ale, ler ou annan bann gro lapli, si i annan bann lateras ki’n ganny koupe, miray pa ankor ganny fer ouswa zerb pa’n ganny pouse.  I annan en kantite sediman ouswa bann later ki ganny lave e ki desann i al fini dan Lanmar.  Alor menm si ou’n fek fini tir gravye avek later sa lannen dan Lanmar, ankor dan 2an pli tar ou vwar sitasyon in retourn parey ti ete.

Alor nou bezwen konstaman vwar nou ki nou bezwen ale pou retir gravye, retir later e fer desilting partou.  Se sa en pe nou bann problenm ki nou annan.  Me selman son design bann rigol limenm, normalman i ganny design avek the worse scenario.

Mersi Mr Speaker.

 

MR SPEAKER

Kestyon 57, Onorab Alderic Bristol.

 

HON ALDERIC BRISTOL

Mersi Mr Speaker.

Bonzour Mr Speaker, Minis ek ou delegasyon e tou ki a lekout.  Mon kestyon i koumsa.

Avek be redwir koupir kouran e bann kou reparasyon e domaz lo PUC, eski Minis pour Lanvironnman ek Lenerzi, i kapab enform sa Lasanble, ki plan son Minister pou extend koupayaz lo bann laliny elektrik low voltage osi, sirtou dan bann rezyon ki retire avek grannrout?

Mersi Mr Speaker.

 

MINISTER DIDIER DOGLEY

Mr Speaker, dan sa dernyen lannen PUC in entansifye son zefor pou koup dibwa partou lo Mahe, Praslin e La Digue ki pre avek tou son laliny elektrisite.  Sa bann dernyen letan PUC in donn priyorite bann laliny high voltage akoz ler zot ganny andomaze bokou konsonmater i ganny afekte.

Deza Mr Speaker, PUC in komans entansifye zefor pou retir dibwa partou lo Mahe, Praslin e La Digue ki pre avek bann laliny low voltage.  Nou plan se osi pou kontinyen avek zefor pou met plis laliny izole ki ava ede pou redwir lenpak ki i a kapab annan lo lenfrastriktir PUC e lekipman konsonmater ler dibwa i tonm lo laliny.

Zis lannen pase PUC in depans apepre R10 milyon pou pey bann kontrakter ki pe asiste li avek koup dibwa ki pe pous pre avek laliny.  PUC i osi annan son prop lekip ki travay kontinyelman pou retir dibwa ki pre avek laliny.  Pou sa lannen PUC pe entansifye son zefor pou koup ankor plis dibwa ki pe poz danze avek laliny elektrisite e in bidze li R12 milyon pou fer sa travay.

Sa legzersis pou retir dibwa pre obor laliny elektrisite in vin ankor pli difisil ozordi avek sirkonstans ki PUC pe fer fas avek kot i annan bokou propriyete ki plant pye dibwa, enkli pye bannann, eksetera anba laliny.

I annan bann ki menm reziste korpore avek PUC pou li antre lo zot propriyete pou retir sa bann dibwa lo laliny.  PUC ti a voudre lans en lapel avek piblik pou evite plant pye dibwa anba laliny silvouple.  E osi mentenir zot bann pye dibwa ler i pre avek laliny.

Mr Speaker, i annan detrwa lannen la ki PUC pe adopte en lapros otan posib ki nouvo lenfrastriktir i ganny fer avek kab izole ouswa zot ganny met anba later.  Mon ti a voudre fer le pwen, la ki nouvo laliny 33 kilomet volt pe al ganny enstale dan Sid Mahe otan ki posib bann kab pou ganny et anba later.  Menm lapros pou ganny servi ler proze 33 kilo volt Nor Mahe i ganny enplimante.

Mersi Mr Speaker.

 

MR SPEAKER

Okenn siplemanter Onorab.

 

HON ALDERIC BRISTOL

Wi Mr Speaker.

Mr Speaker, mon ti a kontan demann Minis si zot in fer en survey konpreansiv pou vwar sitasyon sa bann sityasyon dan sa bann landrwa izole e avek ki vites zot pe mazin komans sa proze netwayaz.  E osi, eski i annan okenn travay sinerzi ki zot fer avek Lotorite Distrik pou asire ki en travay netwayaz konpreansiv e kontinyel dan sa bann landrwa izole e respektif i ganny fer.

Mersi bokou Mr Speaker.

 

MINISTER DIDIER DOGLEY

Mr Speaker, PUC avan ler i pou antreprann sa bann louvraz, i bezwen.  Parey mon’n di ri bezwen pase regarde egzakteman kote problenm i pli grav.  I selekte bann landrwa priyorite premye e apre bann ki en pe mwens problenm pou li fer.  E parey mon’n dir avan PUC ti pe focus mainly ouswa i ti pe fer plis bann louvraz lo bann laliny ki high voltage akoz se sa bann laliny ki anmenn elektrik dan bann vilaz kot bann dimoun i reste ouswa kot bann biznes.  Tandis ki bann low voltage i plis distribye elektrik direkteman kot bann lakaz.  E ler ou ganny en problenm lo en high voltage cable, se sa ki kree sa bann problenm.

Alor, PUC i deza pe fer son travay baze lo bann priyorite pou li kapab fer sa.  I bezwen al dan bann landrwa pou li vwar egzakteman ki mannyer sityasyon i ete e kot i neseser i pou konsilte.  Mon krwar konsilte nou toultan kapab amelyore e mon krwar nou ava demann Mr Morin pou fer sir poudir nou konsilte en pe plis avek bann distrik pou nou fer sir poudir bann landrwa ki kekfwa bann enzenyer ek bann travayer PUC pan kapab ale pou vwar ki zot kapab ganny bann lenformasyon sorti kot distrik osi pou amelyor zot survey ler zot fer sa bann survey.

Mersi Mr Speaker.

 

MR SPEAKER

Onorab Fideria.

 

HON EMMANUEL FISERIA

Mersi Mr Speaker.

Bonzour tou dimoun.  Mr Speaker, vi ki Minis in mansyonnen ki i pe kout PUC 10 milyon a 12 milyon par lannen pou fer sa bann travay koupayaz lo laliny.  Eski Minis i kapab dir ek sa Lasanble ki mekanizm i annan an plas pou bann kontrakter ganny tender pou fer bann travay.

Mersi.

 

MINISTER DIDIER DOGLEY

Mr Speaker, tou travay ki PUC i fer.  PUC parey mon’n nonmen pli boner i annan li plis ki 40 proze ki i contract out avek bann kontrakter.  PUC pa kapab fer tou bann louvraz ki annan pou li fer li menm akoz i enn bann pli gran lakonpannyen ki annan Sesel e i annan en kantite travay pou fer.  E zot annan parey mon’n nonmen en seksyon ki zis deal avek proze e zot annan en sistenm tre kler, prosesis pou zot tender bann travay.  E PUC, parey tou bann lakonpannyen Gouvernman i swiv sa ki nou apel Procurement Act ki an plas atraver Minister Finans e okenn proze ki annan pou li contract out i bezwen pas atraver Minister Finans ek Tender Board avan ler ki i kapab donn sa proze okenn kontrakter pou fer.

Alor, bann sistenm i an plas pou fer sir poudir sa 10 ouswa 12 milyon ki PUC i depanse i swiv bann prosedir ki Gouvernman in met an plas.

Mersi Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.

Mr Speaker, mon ti a kontan demann Minis prenan an kont ki sa bann problenm i tre frekan, sirtou dan bann landrwa ki annan bann gro, gro pye dibwa.  Ki dele letan PUC i pran between ganny enformen ki i annan sa problenm e apre pou li koup sa bann pye dibwa ki lo sa laliny.

E dezyenmman dan sirkonstans kot i annan lezot problenm avek laliny, par egzanp kot bann poto elektrik i ganny andomaze zisteman par bann pye dibwa oubyen par bann lezot aksyon.  Ki dele letan PUC i pran pou li vin repar sa bann poto elektrik akoz i annan de sirkonstans kot piblik pe dir ki i pran tro bokou letan pou vin aranz oubyen deal avek sa bann sityasyon e la apre kot i kapab arive kot pye dibwa i tonm lo laliny e koz koupir kouran.

Mersi Mr Speaker.

 

MINISTER DIDIER DOGLEY

Mr Speaker, ler i annan bann lensidan ki arive normalman PUC i ganny enformen atraver piblik.  PUC i annan en sant ki deservi piblik, ki travay 24 lo 24.  Anytime ki i annan en lensidan, ki i annan en koupir kouran nou konnen otomatikman PUC i call sa call center ki PUC i annan.  E le moman ki PUC i ganny sa lenformasyon i annan son dimoun ki travay 24 lo 24.

PUC i enn sa bann Lorganizasyon ki travay 24 lo 24.  Li tan ki i fezab i anvoy en team lo teren pou al regarde egzakteman ki’n arive.  Si i en travay ki kapab ganny fer deswit, PUC i tant pou fer li pandan bann erdtan si oule apare sa bann ensidan.

Si i en louvraz kot pli konplike kot nou ganny par egzanp loto ki’n bat dan poto elektrik kot ou bezwen al tir en poto pou met en nouvo poto, la i annan bann sityasyon ki kapab aprann en pe plis letan.  Akoz PUC i pou bezwen al regarde, i bezwen al rod en lot poto, i pou bezwen fer fouy en nouvo trou, fer sir poudir sa nouvo poto ki’n mete i solid, apre transfer son laliny lo sa lot poto.  Se la apre ki dimoun i kapab ganny kouran.

Alor, sak sirkonstans i diferan depandan konplikasyon bann ka  egzakteman ki sityasyon in arive.  Me selman mon definitivman okouran akoz mon swiv en pe personnelman letan i annan sa bann sityasyon kot dibwa par egzanp i tonm lo laliny, ouswa bann dimoun dan pe travay, zot pe koup pye dibwa ki pa’n demann PUC permisyon pou vin met laliny ater, zot zet bann brans dibwa lo laliny.

PUC i sey fer son mye pou fer sir poudir dimoun, bann rezidans, bann biznes i ganny rekonnet o pli vit posib.  Mon konnen poudir i annan sa determinasyon dan management PUC pou fer sir poudir i donn pli bon servis posib bann dimoun.

Sa ki annan pou fer avek bann mentenans, sa mon napa tou bann detay, mon kapab tyek avek PUC si ou le, nou ava fer ou ganny en larepons an ekrir.  Me selman mon konnen PUC i bidzete tou le mwan, i fer son planifikasyon tou le an pou fer sir poudir i mentenir bann laliny kot i annan bann danze kot dibwa i kapab tonm anler lo la.  Me selman konbyen letan i pran ant ler i idantifye sa problenm ziska ler i ganny fer sa mon pa pou kapab donn ou bann detay la konmela, mon pou bezwen al rode.

Mersi Mr Speaker.

 

MR SPEAKER

Onorab Houareau.

 

HON HERBERT HOUAREAU

Mersi Mr Speaker.

Mr Speaker, an vi larepons Minis, mon ti a kontan Minis i eklersi sa Lasanble lo en kestyon ki PUC ozordi napa ase mendev kalifye, eksperyanse pou travay e mentenir bann laliny PUC, elektrik dan pei e se sa ki okazyonn bokou retar.

Mersi.

 

MINISTER DIDIER DOGLEY

Mr Speaker, wi i annan serten demann pou nouvo dimoun kalifye e PUC pe fer son mye pou li anploy Sesel pou fer sa bann kalite louvraz.  I pa toultan posib e menm dan PUC nou’n met en sistenm pou nou train omwen a maksimonm Seselwa posib.  Nou pe regard atraver SIT pou regarde si nou kapab train plis teknisyen ki kapab pran plis responsabilite.  Ki zot ava swiv en progranm City and Guilds omwen ki nou ava kapab annan plis bann middle

 

(Technical Problem)

 

MINISTER DIDIER DOGLEY

Bann dimoun, bann teknisyen de kad ki nou kapab formen isi.

Nou’n regard avek UAE kot nou’n anvoy en group nou bann travayer pou al train sa lannen.  An tou i annan 45 ki pe ale sa lannen e nou’n diskit avek bann lezot landrwa pou gete ki mannyer nou kapab train plis dimoun dan en fason ki PUC i ava annan ase dimoun pou train.

Me i kler parey nou konstate, dan laplipar sekter dan Sesel avek lavites devlopman ki pei pe al avek i en pe difisil pou ganny bann dimoun kalifye, sirtou enzenyer pou fer tou sa bann louvraz ki PUC pe fer.  Mon’n nonmen poudir PUC pe fer plis ki 40 gran proze sa lannen tousel…

 

(Technical Problem)

 

MINISTER DIDIER DOGLEY

PUC i enorm.

E nou, nou pou kontinyen fer nou mye pou ganny maksimonm Seselwa.  PUC pe fer bann talks menm kot Lekol SALS e bann Lekol segonder pou ganny plis Seselwa pou antre dan sa filed.  Me malerezman pandan bann letan ki nou napa nou pou bezwen depann anler lo bann lekspertiz sorti an deor ziska ler nou kapab dousman, dousman re atrape e annan ase Seselwa pou fer sa louvraz.

Mersi Mr Speaker.

 

MR SPEAKER

Kestyon 58, Onorab Bristol.

 

HON ALDERIC BRISTOL

Mersi Mr Speaker.

Mr Speaker, eski Minis i kapab donn sa Lasanble en bilan lo progre sa proze PUC, South Mahe Water Supply, depi Barbarons ziska Takamaka?

Mersi Mr Speaker.

 

MINISTER DIDIER DOGLEY

Mr Speaker, sa proze in presi konplete, i reste apepre 400 met tiyo dan rezyon Takamaka pou ganny enstale pou ariv kot rezervwar Quatre Bonne.  Sa proze ti komans lannen 2010 e in kout anviron R15 milyon pou konplete.  I annan en pe retar pou fini sa proze akoz difikilte pou ganny way leave tou dilon lakot Was Mahe.  E osi pou enstal sa tiyo i pan fasil akoz PUC in rankontre bokou ros tou dilon semen.

Sa proze Mr Speaker, i pe deza permet PUC pou transfer delo sorti dan Larivyer Mar Aux Cochon, Larivyer L’ilette, Larivyer Grand Anse e Larivyer Caiman tou dilon Lakot Was Mahe.  E osi permet PUC pou transfer delo atraver Les Cannelle, dan Sid Les Mahe.  Ler sa 400 met tiyo ava ganny konplete PUC pou annan an realite en serk fermen, ouswa si ou le en loop dan Sid Mahe kot nou ava kapab transfer delo dan Sid Mahe dan 2 direksyon.  Savedir sorti Le Cannelle, mont Par Anse Royale, mont Anse Forbans pou arive Quatre Bonne e lo lot kote pas par Bais Lazar, Cap Maravi pou ariv Anse Royale.

Sa Mr Speaker, i ava donn PUC en gran fleksibilite dan son loperasyon.  I ava permet PUC redwir difikilte transfer delo pandan bann letan lasesres e i a donn PUC en loportinite pou donn bann konsonmater en meyer servis dan letan normal e osi pandan lasesres.

Proze i sipoze konplete ver lafen sa lannen.

Mersi Mr Speaker.

 

MR SPEAKER

Okenn siplemanter Onorab.

 

HON ALDERIC BRISTOL

Wi Mr Speaker.

Mr Speaker, eski Minis i kapab dir nou si PUC pou osi annan lentansyon pou ogmant kapasite stokaz dan bann rezyon, dan sa rezyon Sid Was e ki lefe benefis sa gro proze pou annan lo bann rezyon ki en pe retire dan distrik.  Tel parey Anse Marie-Louise, leo Takamaka e Quatre Bonne e dan Penpen.

Mersi Mr Speaker.

 

MINISTER DIDIER DOGLEY

Mr Speaker, sa proze parey mon’n dir i pou donn PUC posibilite pou transfer delo depi L’ilette, depi Port Glaude annefe, delo ki sorti Mar Aux Cochon, L’ilette, menm Grand Anse.  I pou kapab transfer delo depi Caiman, tou dilon e anvoy li Takamaka.  E ler ou annan sa kalite posibilite ou pa bezwen vreman stok en gran kantite delo Takamaka li menm.  Ou kapab stok delo tou dilon andesandan, par egzanp Anse Boileau i annan en gro tenk delo ki li i kapab stok ase delo pou transfer pou al dan Sid Mahe.  E i annan bann lezot tenk ki PUC pe konstrir tou dilon e Takamaka osi i pe met bann stokaz delo pou fer sir poudir bann dimoun i ganny deservi ek delo.

E bann dimoun osi ki Anse Marie-Louise, zot osi zot ava benefisye avek en sistenm parey e mon konnen poudir PUC pe travay lo en sistenm laliny delo pou donn sa bann dimoun osi delo dan sa landrwa e osi bann lezot landrwa ki retire ler sa kantite delo i a kapab ganny transfer dan 2 direksyon pou al Takamaka.  I pou fasilit distribisyon delo an antye dan sa landrwa ki dan lepase mon konnen ti annan en kantite problenm ler ti annan lasesres.  Me avek sa kapasite ki’n ganny ogmante, Takamaka i a vwar li dan en pli bon pozisyon pou ganny delo trete sorti dan bann lezot landrwa lo Mahe.

Mersi Mr Speaker.

 

MR SPEAKER

Okenn siplemanter Onorab.  Ou’n fini demann siplemanter.  Ok, so si napa okenn kestyon siplemanter, donk mon ava remersye Minis e eskiz li parmi nou.

 

THE MINISTER AND HIS DELEGATION WAS EXCUSED FORM THE HOUSE

(Interruption)

 

MR SPEAKER

Bon nou annan nou en kestyon dirzans ki nou tin enform Minis pou pran 10:15.  I reste nou ankor 5minit.

 

(Interruption)

 

MR SPEAKER

Aparaman in arive.

Bon nou ava kontinyen avek nou travay. Nou annan en kestyon dirzans par Manm Onorab pou distrik Bel Air, Onorab Nichole Barbe pou Minis pou zafer Etranzer e Transpor lo Later –  Minis Morgan.

So mon ava envit Onorab Barbe pou demann son kestyon.

 

HON NICHOLE BARBE

Mersi Mr Speaker.

Mr Speaker, tou dimoun bonzour.

Mr Speaker, swivan sa lensidan Bel Air ki’n arive le 24 Me, 2016 kot plizyer zabitan in sibir domaz elektronik e ki okenn Lotorite pa pe pran responsabilite;-e lefe ki plizyer lensidan similer i kontinyen arive akoz bann gro transpor pe pas nenport ki ler lo semen piblik e pe may dan bann difil, eski Minister pour Transpor i kapab eksplik sa Lasanble, akoz ki personn pa pe pran okenn responsabilite lo kestyon Konpansasyon pour bann zabitan ki viktim sa bann tel lensidan e akoz ki son Minister in les en tel transpor pas dan sa rezyon san okenn sipervizyon?

Mersi Mr Speaker.

 

MINISTER JOEL MORGAN

Mersi Mr Speaker.

Bonzour Mr Speaker, tou Manm Onorab dan Lasanble, tou dimoun ki  a-lekout.  Mon swet zot en bon lazournen.

Mr Speaker, sa lensidan ki Onorab Barbe  pe demann en leklersisman lo la, annefe ti ariv Mardi le 24 Me, 10.30 bomaten.  Departman Transpor ti ganny alerte ki ti annan en transpor Land Marine ki ti pe transport en konntener lo larout Bel Eau ki ti’n tap avek bann kab Litilite Piblik.  Deswit Komisyoner Transpor lo Later ti fer en site vizit lo sa sit.  E la i ti remarke ki kab Litilite Piblik ti’n tonm ater.  E dapre bann temwen ki ti la pandan sa lensidan, sa transpor Land Marine ki ti pe anmenn sa kab – sa konntener ti’n tap ek kab ant 2 poto elektrik, alor ki ti arive, sa transpor ti pe anmenn sa container ti tap avek sa kab ant 2 poto elektrik.  I ti ganny raporte ki drayver ti pe fer en manœuvre kot i ti pe al delivre sa konntener – en landrwa Bel Eau letan ki i ti tap avek en kab Intelvision ki ti sa kab ki ti pli ba lo poto. Ler sa ti arive i ti kre en lensidan kot kab PUC ti ganny afekte e sa ti koz en power surge lo laliny PUC dan rezyon Bel Eau.

Lofis Children’s Foundation e 15 lezot lakaz ki’n ganny trouve dan sa rezyon ti ganny afekte avek sa power surge. Plizyer zot bann lekipman elektrik e elektronik, ti ganny andomaze akoz sa.  An vi sa bann kab Litilite Piblik ti pour PUC ek Intelvision, zot ti ganny alerte pou vin rektifye sa sityasyon e ki PUC i osi fer le neseser pour ki sa rezyon i reganny kouran o pli vit posib.

Mr Speaker, in annan bokou dimoun ki’n ganny afekte par sa lensidan e ki natirelman pe demann Konpansasyon pour zot bann lekipman ki’n ganny afekte.  I annan en Criminal Investigation ki pe ganny aktyelman fer par Lapolis e baze lo la, en desizyon pou ganny pran lo okenn aksyon Legal ki pou swiv.

An se ki konsern mouvman bann oversized vehicles parey sa bann transpor Land Marine ki anmenn bann container, sa i ganny kontrole par Road Transport Act ki donn pouvwar Road Transport Commissioner pou etabli ler e larout ki sa bann oversized vehicles i kapab sirkile lo nou bann semen.  Aktyelman zot pa ganny drwa sirkile lo semen depi 7er bomaten ziska  8.30 bomaten – 11.45 bomaten ziska 1.15 apre midi e depi 3.45 apre midi ziska 4.45 apre midi.  Byensir sa i ede kontrol mouvman sa bann vehicle oversized e asire ki zot pa koz konzesyon e pa okazyonn okenn lenkonvenyans pour bann motoris pandan zot bann mouvman dan sa bann letan ki nou’n konsider koman bann peak hours.

Alors letan sa lensidan ti arive, Land Marine ti an konformite  ek sa bann ler mouvman pour zot bann veikil. Me si pandan sa lensidan ti annan rash and negligence de- lapar sa drayver Land Marine, ki ti pe transport sa konntener oubyen sa drayver ki ti pe escort sa drayver – sa container- vehicle, ki’n kapab okazyonn sa lensidan, sa nou pou bezwen esper lenvestigasyon Lapolis fini pou determin sa.

I en portan pour note ki lofis Komisyoner Transpor lo Later ti osi ekri tou operater bann veikil oversized dan pei le 23 Avril, 2015 pou fer zot rapel bann kondisyon ki asosye ek mouvman zot bann veikil ki oversized. Nou osi depan lo enforcement sa bann kondisyon par Lapolis Trafik.

Mr Speaker, an sa ki konsern bann spesifikasyon oter bann kab Litilite Piblik o bor bann semen, sa i ganny preskri anba bann Road Act  Act 1 Public Roads and Highways Section 4, ki donn pouvwar Komisyoner Transpor lo Later pou set bann restriksyon ki relye ek lafason ki bann travay i ganny fer lo semen – e osi par lao bann semen ouswa dan bann rezerv semen. Enn sa bann restriksyon i oter bann kab Litilite Piblik ki ganny mete o bor semen.  Oter ki in ganny set, i ki tou bann kab Litilite Piblik fodre pa pli ba ki 4.5 met par lao nivo semen.  Sa i enportan akoz i asire ki bann veikil ki oversize i kapab pas lo semen san tap avek bann kab.

I annan 2 Lorganizasyon ki met anfors e sirvey sa kondisyon, Mr Speaker.  Sa se Departman Transpor ek Planning Authority atraver Utilities Committee. I enportan note ki spesifikasyon konsernan oter bann kab elektrik pour PUC, i osi ganny kontrole anba Public Utilities Corporation Act. Vi ki Departman Transpor ti deza okouran ki ti annan serten landrwa dan pei kot bann kab Litilite Piblik pa an konformite avek sa 4.5 met oter, ki’n ganny spesifye par Komisyoner Transpor lo Later, alor se pour sa rezon tou bann Litilite Piblik ti ganny enformen depi Out 2015 pou revwar zot bann kab ki pa an konformite e pou asire ki zot zwenn kriter an sa ki konsern oter zot kab avek semen.  Malerezman, ziska prezan pa tou landrwa ki sa problenm in ganny rektifye dan pei.  Alor pou rezourd sa problenm enn fwa pour tou Mr Speaker, an se moman menm, i annan en legzersis ki’n ganny inisye par Chairman Utilities Committee an kolaborasyon avek Departman Transpor, pou idantifye tou sa bann tel lokasyon e pou mark sa bann kab Litilite Piblik, ki pa an konformite avek en lapentir oranz.  E tou bann Litilite Piblik konsernen, pou ganny en deadline pou asire ki zot bann kab i vin an konformite avek sa 4.5met oter par lao semen, san leksepsyon.  Mon repete, san leksepsyon.  Sa lenformasyon in fini ganny transmet avek zot tou depi le 17 Zen, 2016 pou fer sir ki zot komans bann travay neseser pou rektifye sa bann problenm.

Mr Speaker, dapre lenformasyon ki mon Minister in gannyen sorti kot PUC ki’n fer en survey swivan sa lensidan, lakantite domaz ki’n ganny okazyonnen par sa lensidan, i apepre R225mil pour tou bann lakaz e Children’s Foundation.

An sa ki konsern lekel ki pou responsab pou pey Konpansasyon pour bann zabitan ki’n sibir bann domaz swivan sa tel lensidan, Gouvernman i rekonnet, ki sa bann prosedir i kapab pran letan, alors dan limedya pou ed sa bann dimoun, Gouvernman pou asiste zot – pou asiste sa bann dimoun an ranplasan zot bann lekipman ki’n ganny andomaze, san ki Gouvernman i pran okenn liability antretan ki investigation – lenvestigasyon i kontinyen lo sa lensidan.  Sa ki liable – evantyelman, pou bezwen ranbours Gouvernman pour sa depans ki nou pe fer.

Sa bann dimoun ki’n ganny afekte par sa lensidan, i osi an plen drwa kapab fer en civil case separeman, atraver zot prop Avoka si zot santi zot, zot kontinyen ganny aflize par sa lensidan ki’n arive.

Mersi Mr Speaker.

 

MR SPEAKER

Onorab Barbe, okenn siplemanter?

 

HON NICHOLE BARBE

Mersi Mr Speaker.

Mr speaker, baze lo son larepons, eski Minis i kapab enform sa Lasanble, kan ki bann zabitan ki’n ganny afekte pou kapab komans ganny lasistans pou ranplas zot bann lekipman ki’n ganny andomaze. E dezyenmman, eski Minis i kapab enform sa Lasanble, ki dele letan ki son Minister in set pou konplet sa legzersis idantifikasyon bann kab, ki pa an konformite avek sa 4.5met oter par lao nivo semen?

Mersi Mr Speaker.

 

MINISTER JOEL MORGAN

Mersi Mr Speaker.

Mr Speaker, sa bann dimoun ki’n ganny afekte, PUC ti’n deza komans fer en travay avek zot, pou esey repar bann lekipman ki ti’n ganny andomaze ki kapab ganny repare.  Par egzanp si fuse ti’n brile – bann keksoz koumsa, PUC in fer serten travay deza kot sa bann lakour.  Me dan limedya la, swit a sa, Gouvernman atraver PUC pou antreprann sa legzersis imedyatman, pou komans ranplas bann lekipman ki pa kapab ganny repare lo en baz likes for likes – setadir en fridge tel brand, tel spesifikasyon Gouvernman atraver PUC pou eseye ranplas preski dan en fason idantik, imedyatman.  Alor PUC pou ed Gouvernman – Gouvernman pe pran sa responsabilite – me PUC pou ed Gouvernman pou fer sa lo en baz imedya, akoz survey in fini ganny fer avek tou bann lakaz e tou lenformasyon i la. Alor PUC i ava inisye sa lo lapar Gouvernman Sesel, pour nou kapab ede rezourd sa problenm.

An sa ki konsern timeframe pour sa legzersis pou idantifye tou bann kab, Mr Speaker, ler mon’n konsilte avek Road Transport Commissioner e Utilities Committee, zot in dir mwan dan sa prosen 3 – 4 mwan sa legzersis i ava’n ganny konplete e tou bann kab i ava’n fini ganny marke.  E a sa moman la osi, bann Lakonpannyen responsab ki zot bann kab i pli ba  ki 4.5met oter par lao semen, zot ava ganny en dele letan ki ava ganny preskri par Road Transport Commissioner pour zot achieve compliance avek Regilasyon ki anfors.

Mersi.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.

Mr Speaker, Minis in koz lo oter – maksimonm ki preskri dan Lalwa zot bezwen met sa bann laliny, se 4.5 e lefe ki nou bann transpor oversize i plis – i annan ki ariv ziska 5 met, eski PUC pe revwar oter ki zot pe remet sa bann laliny; e eski Minis i kapab osi eklersi sa Lasanble, lo si PUC in sanz zot kalite poto sorti ‘Mahogany pou vin Pine pou fer pli fasil pour bann transpor tap ladan e kase?

Mersi.

 

MINISTER JOEL MORGAN

Mersi Mr Speaker.

Mr Speaker, sa oter 4.5met annefe ler nou’n vwar bann container ki pe ganny transporte aktyelman lo nou bann semen – lo bann larout primer prensipalman, me osi lo serten larout segonder – sa oter 4.5met i adekwat; setadir  i en container lo en loader lo en transporter i donn apepre 4.1met.  So, i annan ase oter, baze lo la pou asire ki sa bann container i kapab pase san okenn problenm.Me annan de ler i annan difikilte akoz zot annan bann crane ki par lao sa bann transporter – ki si crane pa ganny byen plase, sa crane li prezan i kapab may dan sa bann kab li osi. Alors sa legzersis ki nou pe fer la, avek Utilities Committee, i ava determin tou sa bann fakter pou vwar si esansyelman nou bezwen reviz sa standar4.5met.  Me reviz sa  standar 4.5met pou vin a en kou enorm spesyalman pou PUC – akoz ozordi mazorite nou bann laliny – nou bann headlines dan nou pei, ki pe meet sa 4.5met oter pour 3 phase415 – 415voltse pou lezot voltaz pli o, i annan bann oter ki ganny spesifye anba PUC Act ki pli o ankor.  Alor pour lemoman nou bezwen revwar sa me asire ki an menm tan bann transpor ki vin lo semen – ki nou donn permisyon pou ganny enporte dan nou pei koman bann oversized vehicles, i meet sa spesifikasyon in order pour nou avoid en kou mazer pou PUC e bann lezot service providers bann telecoms providers, par egzanp dan pei – ki a lavenir.

Lo kote sanzman poto – mon napa sa lenformasyon Onorab, me mon ava demann PUC sa pou klarifye e nou  ava transmet sa lenformasyon evantyelman.

Mersi.

 

MR SPEAKER

Onorab Pool.

 

HON ANDRE POOL

Mr Speaker, mersi.

Mr Speaker mon ti anvi demannMinis, si a-lavenir son Minis pa ti ava kapab konsider meyer opsyon pou demann bann service providers pour zot pas zot bann kab anba later olye anler, pou evite ki i annan bann tel lensidan dan lavenir.

Mersi.

 

MINISTER JOEL MORGAN

Mersi Mr Speaker.

Mr Speaker, mon ti a kontan remersi Manm Onorab pour sa kestyon, akoz i donn mwan loportinite pour mwan adres sa issue.

Deplizanpli nou pe demande – nou pe ensiste ki tou bann kab i vin anba later espesyalman pour bann telecoms providers, akoz PUC son bann poto elektrik i pou li e in donn sa servis dan lepase bann telecoms prensipalman; parey Cable & Wireless, Airtel, Intelvision and so on pour zot kapab pas zot bann kab – asiste zot avek sa servis ki zot pe donnen.  Me deplizanpli  nou pe vwar poudir sa pe kree problenm e i neseser pou PUC liber son bann poto pou li kapab zis li donn son servis atraver son provizyon supply elektrisite. E nou pe demann bann service providers pour zot met zot bann kab anba later sirtou lefe now, ki zot pe al ver bann fiber optic cable.Sa i premye pwen.

Dezyenm pwen Mr Speaker ki mon oule fer resorti, an repons sa kestyon, se ki nou pe osi demann PUC avek bann lezot Lakonpannyen Telekominikasyon pou esey evite ler zot pas bann kab anba later, pas anba semen – akoz sa i kree bokou problenm osi pour nou kote Departman Transpor, akoz ler i annan en fot lo kab ouswa ler i annan en problenm avek en laliny tele kominikasyon, semen i bezwen ganny kase e souvan nou’n vwar nou – mon’n vin dan sa Lasanble, mon’n reponn kestyon kot nou’n fek resurface en semen detrwa mwan apre ou vwar i ranpli avek bann problenm – kot bann trou i bezwen ganny fill in ankor akoz sa problenm.

Alor ki nou pe demande se annan bann service corridors ki pe ganny etabli kot napa ase lespas, zot pe pas anba bann rigol – anba bann dren pou asire ki nou bann semen; ki enn fwa ki nou’n refer nou bann semen, i pa ganny andomaze ankor dan lavenir akoz sa problenm.

Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.

Mr Speaker, 2 pti… detrwa pti kestyon.  (1) petet Minis i kapab eksplik nou Lasanble, bref-man rol escort vehicle si parey Minis pou revwar peak hours petet ki bann transpor parey i pas ladan; e eski ordinerman i abitye Land Marine al dan sa landrwa anmenn sa bann container? Akoz toulezour i pa tap  ek sa kab e ki ozordi in tape ?  E finalman Mr Speaker, eski lefe ki Planning Authority ki’n les bann kab ganny mete an deor konformite Lalwa e an menm tan li menm li Planning Authority ki’n les Container Park ganny fer anler Bel Eau kot i difisil pou monte, eski pa li ki liable pou…e pran responsabilite pour sa bann domaz ?

Mersi bokou Mr Speaker.

 

MINISTER JOEL MORGAN

Mersi Mr Speaker.

Mr Speaker rol en escort vehicle i pou alert trafik – oncoming sirtou incoming traffic e trafik ki pe sirkile zeneralman lo bann semen, ki i annan en oversize vehicle ki pe vini.E sa ki nou’n vwar se ki sa bann escort vehicles zot al vit devan e zot kit sa oversized vehicle en bon zistans par deryer avan ler ki ou rankontre sa oversized vehicle lo semen ler ou pe pase dan ou transpor.  So, definitivman i annan en nesesite pour Departman Transpor – Road Transport Commissioner revwar e call to order sa bann escort vehicles ki pe fer sa travay avek bann oversize vehicles.  Me osi zot rol se pou fer sir ki ler bann oversize vehicles i pase, sa drayver sa oversize vehicle i kapab clear sa bann laliny ki petet i pli ba ki sa oter 4.5met ki mon’n koz lo la, ler zot pe pase.  Zot bezwen supervise. Zot bezwen fer sir ki sa i ganny aplike pou avoid okenn lensidan kot bann kab i ganny kase.  Nou’n annan lensidan dan le pase Union Vale, Pointe Conan kot menm zafer in arive Mr Speaker.  E la ankor enn fwa, i responsabilite sa Lakonpannyen – i responsabilite sa escort vehicle e drayver sa oversize vehicle pou fer sir ki zot pa andomaz okenn nou bann lenfrastriktir Litilite Piblik, parey bann kab PUC ouswa bann kab telekominikasyon ler zot pe transport bann oversize container.

Mr Speaker, an sa ki konsern sa kestyon pour Planning Authority, vreman mon pa dan en pozisyon pour mwan reponn sa akoz mon pa Minis responsab pour Planning Authority. Me sa ki mon kapab dir se sa Container Park kot i ete, at the moment kot i annan sa bann container i lo en semen ki etrwat – i lo en semen ki difisil pou manouvre e i lo en semen ki bann oversize  vehicles i vreman annan bokou difikilte pour zot pase.  Me mon pa  konn bann desizyon vreman ki ti lead pour Planning Authority kapab donn permisyon pou kapab store container la anler Bel Eau.

Mersi Mr Speaker.

 

MR SPEAKER

Bon, avek sa nou ariv a-lafen nou Question Time e nou ava adjourn ziska 11er.

(BREAK)

 

 

MR SPEAKER

Bon, nou ava kontinyen avek nou travay pour ozordi.  Lo Order Paper nou annan nou en Bill, en Children (Amendment) Bill, 2016, ki pe ganny prezante par Minis Meriton, Minis responsab pour plizyer Minister.  Local Government, Sosyal eksetera.

Bon, parey labitid, mon a ganny mwan en Motion for Second Reading.

 

HON CHARLES DE COMMARMOND

Mersi Mr Speaker.

Mr Speaker, mon move anba Order 64(2), ki Children Amendment Bill, 2016 i ganny lir en dezyenm fwa.

 

MR SPEAKER

Okenn ki segonde?

 

HON GEOVANA CHARLES

Seconded Mr Speaker.

 

MR SPEAKER

Bon, mon a envit Minis pou entrodwir son Bill.

 

MINISTER VINCENT MERITON

Mersi Mr Speaker.

Bonzour Mr Speaker, bonzour tou Manm Onorab e okenn piblik dan Galeri.

Mr Speaker, mon responsab pour Zafer Sosyal, Devlopman Kominoter e Spor, pour prosperite Lasanble Sir.

Mr Speaker, mon pe anmenn lamannman dan Lalwa Zanfan, Children Act, pou met annord ladministrasyon Tribinal Lafanmir.  Parey nou konnen, an 1998, Children Act ti ganny amande pou etablir Tribinal Lafanmir e donn li tou pouvwar pou desid lo ka ki konsern Custody, Swen, Akse ek Mentenans Zanfan.  Matrimonial Causes Act 1992 ki ti adres zafer Custody ek Mentenans Zanfan apre en Divors e Summaries Jurisdiction, Wives and Children Act 1963 ki ti adres ka bann zanfan ki ti ne an deor maryaz pour Custudy ek mentenans, ti osi ganny amande pour ki tou ka zanfan ti ganny adrese anba en sel Lakour oubyen Tribinal.  An lannen 2000, Tribinal ti ganny lotorite pou osi adres bann ka vyolans lafanmir, pou fer Lord Proteksyon pour bann viktim, anba Family Violence Protection of Victims Act, lannen 2000.

Mr Speaker, depi son kreasyon, Tribinal Lafanmir in annan en rol quasi-Judicial.  In ganny administre par Minister ki annan responsabilite pour Zafer Sosyal.  Avek dezyenm zenerasyon reform dan servis piblik, Gouvernman ti pran desizyon pou stream line servis e anmenn tou bann Tribinal anba ziridiksyon Zidisyer.  Apre ki bann negosyasyon in pran plas, Ladministrasyon Loperasyon Sekretarya Tribinal Lafanmir ti ganny transfer avek Zidisyer le 1 Zanvye 2015.  Sa ti enkli son Bidze R6 milyon e son 28 staff.  Ozordi, mon pe demann Lasanble pou aprouv lamannman Children Act, pou konplet sa transfer legal Tribinal Lafanmir, pou li tonm direkteman anba Lotorite Sef Ziz e Zidisyer.

Mr Speaker, lamannman mazer i comme swian:-

Premye.  Redwir membership pou sorti 15 pou vin 8.  Sa i pour 1 Chairman, 2 Vis Chairman avek 5 manm.  Lapwentman a ganny fer par Prezidan, ape konsiltasyon avek Sef Ziz, olye Minis.

Dezyenm.  Anmenn Tribinal Lafanmir anba Ladministrasyon Zidisyer.

Trwazyenm.  Donn Sef Ziz pouvwar pou etablir regilasyon konsernan prosedir dan Tribinal.

Katriyenm.  Donn Sef Ziz pouvwar pou rod akomodasyon e lezot fasilite pou Tribinal kapab desarz son fonksyon dan en fason efektiv.

Senkyenm.  Donn Sef Ziz pouvwar pou apwent Sekreter ki diriz Sekretarya Tribinal.

Sizyenm.  Fer provizyon pour en dezyenm opsyon fer rapel devan Lakour Dapel, akoz Lalwa egzistan pa ti permet en dezyenm rapel si en dimoun ti perdi son case devan Lakour Siprenm.

Setyenm.  Fer provizyon pour ki bann kliyan Tribinal Lafanmir pa bezwen pey okenn fre ki normalman ganny asosye ek Lakour, anba Zidisyer.  Savedir, sa servis pou kontinyen gratwit.

E wityenm.  Elarzi provizyon ki konsern medyasyon, pour ki pa zis Sekreter ki kapab fer medyasyon, me osi bann lezot Manm.

Mr Speaker, pandan tou sa lannen, Tribinal in akonplir son travay e desarz son bann lobzektif pou donn servis lafanmir, sirtou zanfan Seselwa e proteksyon lezot dimoun ki fer fas ek ka vyolans.  Malgre difikilte, bann staff in donn tou.  Zot in donn zot mye e zot ankor pe fer li, pou donn soutyen nou bann fanmir.

Pou terminen Mr Speaker, mon oule dir ki sa lamannman pe zis met annord ladministrasyon e loperasyon Tribinal Lafanmir, anba ziridiksyon Zidisyer.

Mr Speaker, mon soumet sa Bill a laprouvasyon Lasanble.

Mersi Mr Speaker.

 

MR SPEAKER

Bon, deba i ouver.  Onorab Pillay.

 

HON SEBASTIEN PILLAY

Mersi Mr Speaker.

Mr Speaker, devan nou Lasanble ozordi i annan en Lalwa ki tre, trez enportan akoz i pe deal avek en size ki dan nou sosyete, nou’n toultan konsider li tre, trez enportan e sa i en size ki retourn otour lafanmir e sirtou proteksyon zanfan.  E mon krwar, avan ki mon al an detay an relasyon avek sa Prozedlwa li menm, i enportan pou nou popilasyon konpran akoz sa bann Prozedlwa i ganny met an enplimantasyon e dezyenmman, kote zot sorti, kote pouvwar i sorti pour sa bann Prozedlwa vin lavi.

Premyerman mon krwar i enportan pou nou popilasyon konnen ki Lartik 137 nou Konstitisyon i prevwar ki nou kapab annan the establishment of Courts of Tribunals which are subordinate to the Court of Appeal and Supreme Court.  In this Article, referred to our subordinate Courts and Tribunals. Ki annefe, sa Tribinal i tonm anba Lartik 137.

Dezyenmman, en konponan tre enportan sa lamannman ki nou pe fer, se nou pe met ziridiksyon administratif.  Ozordi sa Tribinal, anba Lakour, anba Zidisyer.  E mon krwar i tre enportan akoz par lefe ki Lartik 119 nou Konstitisyon i koz the Judicial power of Seychelles shall be vested in the Judiciary which shall consist of the Court of Appeal, Supreme Court and c, such other subordinate Courts or Tribunals as established, pursuant to Article 137, ki mon’n fer referans avek oparavan.

Mr Speaker, mon krwar sa i tre trez enportan pou nou soulinyen akoz mon krwar finalman nou’n etablir sa ki nou apel klarite dan lafason ki sa Tribinal i fonksyonnen, par lefe ki prezan vi ki i pou tonm anba Administrative Controls of Zidisyer e i deza anba supervisory controls Zidisyer, i a fer ki tou keksoz i ganny armonize pou nou annan en sityasyon pli efektiv pou deal avek efektivman konteni ki sa bann Lalwa i sipoze pe deal avek.

Mr Speaker, mon krwar ki lesansyel la, i pou asire ki at the end of the day, Zidisyer ki annan tou konpetans legal, tou konpreansyon legal an sa ki konsern bann diferan konsern legal e menm Konstitisyonnel, kot zot a kapab met an aplikasyon bann diferan eleman neseser pou fer sa Tribinal vin pli fonksyonnel, me osi provide pour ki nou annan bann regilasyon ki pli petet relatif avek konteks legal, ki a fer at the end of the day, ki nou ava annan bann provizyon e bann mezir ki pli byen deal ek bann sityasyon ki ozordi Tribinal Lafanmir ti pe fer fas avek.

Me selman nou bezwen soulinyen ki Tribinal li menm li, i bezwen vin en last recourse.  I en dernyen mezir ki bezwen ganny pran dan bann sirkonstans kot par egzanp si i annan dimoun ki pa pe pran zot responsabilite byen.  E mon krwar se la kot nou bezwen pozisyonn byen e klerman sa ki nou bezwen dir avek popilasyon an zeneral e fer konpran popilasyon.

Mr Speaker, tou resaman nou pe remarke ki i annan bokou lanfaz ki pe ganny mete lo responsabilite ki tou dimoun i bezwen pran anver bann aksyon ki zot fer e enn bann aksyon pli enportan ki mon krwar 2 imen i deside pou fer se fer en zanfan parfwa e mon krwar se la kot mon oule pozisyonn mon largiman an sa ki konsern rol ki sa Tribinal i zwe an proteksyon Drwa Zanfan.

Mr Speaker, mon dir sa akoz i kler ki si nou pa pran serten mezir pou deal avek sa sityasyon, eventually nou pou vwar nou dan en sityasyon pe met an plas bann lezot mezir pli drastik, pou fer ki dimoun i pran zot responsabilite.  Mon krwar nou pa oule al dan sa direksyon me nou oule plito devlop oubyen empower dimoun, oubyen intrincicly, devlop sa sans responsabilite dan dimoun pou pran zot responsabilite.

Mon oule fer referans avek en keksoz la Mr Speaker, kot mon krwar i en eleman ki konekte avek sa.  Ozordi par egzanp nou vwar nou bann zenn pe vin pli a risk e zot pe devlop bann konportman en pe diferan avek lepase akoz nou sosyete pe devlope, keksoz pe sanze.  E avek sa bann konportman, i enportan ki nou fer sir poudir bann lalwa oubyen bann regilasyon oubyen bann lezislasyon ki nou annan an plas, i ganny plase dan landrwa apropriye, dan bann ziridiksyon apropriye ki pou deal avek sa bann Lalwa.  Ler nou regard ozordi par egzanp Mr Speaker e resaman mon’n fer en pti tour Victoria pou mwan vwar, enn bann keksoz ki mon remarke par egzanp se i annan bann landrwa kot bann zenn i zwenn en kantite, sirtou par egzanp anba bann Shoping Centres par egzanp.  Orion Mall i enn e mon krwar i komans vin en konsern akoz par lefe ki la  kot bann zenn i enterakte e dan sa enteraksyon ki pe arive la, i annan dimoun:- nou tou nou konnen poudir zenn i siseptib avek peer presure ek bann lezot presyon.  Kot i annan dimoun ki kapab servi sa koman en loportinite pou fer lezot aksyon.  Par egzanp, mon pa konnen.  Promot oubyen promot serten aksyon endesan oubyen menm promot lavant sibstans ki kapab afekte sa bann zenn.  Tousala i konekte avek nou lanfaz ki nou bezwen mete pou protez nou bann zenn akoz nou tou nou’n zenn en nou konnen poudir ou pa kapab annan en serten fason pou zot epanouir.  Me selman mon krwar si taler menm en dimoun i pase i regarde. I get par egzanp anba Orion Mall, i pa neseserman zis Orion Mall me lezot landrwa.  Ou pou vwar ki i annan en kantite zenn ki vin la apre ler Lekol.  E enn bann keksoz ki mon krwar nou bezwen mazinen prezan se ki mannyer nou kapab asire ki atraver bann Prozedlwa ki nou pe anmennen e par egzanp sa Tribinal Lafanmir son rol se protez lafanmir esansyelman, se act as a deterrent pour lenstans kot en fanmir pe kase e nou vwar poudir zanfan i at risk.  E mon krwar ki nou bezwen fer, nou bezwen realize poudir ki bann lezot mezir ki nou bezwen pran an relasyon avek sa, tout an prenon an kont ki ozordi nou’n vest administrative power, administrative control of this Law with the Judiciary.  Prezan i reste bann lezot mezir sosyal ki nou bezwen pan avek bann lezot Lazans.  Mon pa konnen, Lapolis oubyen bann owner sa bann letablisman, pou asire ki kot sa bann zenn pe zwenn par egzanp kot zot pou al fer shopping oubyen eksetera, nou annan serten kontrol oubyen nou annan serten monitoring ki pe pase, akoz esansyelman sa bann zenn i at risk.

Mon konnen poudir sa i debord en pti pe sa size Mr Speaker, me selman mon ti oule profite pou koz lo la akoz mon oule fer le pwen lo lefe ki nou bezwen a tou repriz, anmenn proteksyon zanfan pli devan posib.

En lot pwen enportan mon krwar e sa i konsern dan sa ki konsern bann provizyon ki pe ganny mentenir e kot mon krwar ki i tre byen ki nou mazin lo sa size.  Par egzanp sa payment of no fee in proceedings before the Tribunal.  Sa mon krwar i en konponan tre trez enportan e ki nou bezwen mentenir.  And at the same time, nou bezwen osi par egzanp al pli devan ki sa, kot par egzanp nou bezwen entrodwir serten fason par egzanp, kot let’s say nou pe koz lo maintenance par egzanp ki en paran i bezwen peye pour son zanfan.  Ki mannyer nou rod bann fason pli azour avek sa ki sosyete pe fer fas avek, pou nou deal ek sa sityasyon.  Par egzanp ozordi si en paran pa pey Maintenance, how do we deal with that situation. Eski sa paran si i pa pe travay, ou pou anvoy li mon pa konnen, dan Prizon eksetera.  Eski sa pou ede avek sa sityasyon kot i pa pe pey sa Maintenance Fee.  Oubyen eski i pa ti a pli bon ki ok, nou etablir e la petet ti ava bon annan diskisyon avek Zidisyer, etablir serten regilasyon otour sa Lalwa, kot nou compell sa dimoun pou li fer serten community service ki ava pey li en serten larzan, ki apre i ava come back to as part of son Maintenance contribution towards sa zanfan.  Sa i bann prosedir mon krwar ki nou bezwen konsidere akoz at the end of the day, pou met sa dimoun dan Prizon doesn’t really get us anywhere akoz i dan Prizon i pa pe kontribye, i pa pe fer nanryen.  I pou sorti e likelyhood ki i al peye apre, i still very low.

En lot eleman enportan se sa eleman the second appeal to the Court of Appeal. Mon krwar ki dimoun i bezwen konpran sa tre byen.  Why this is extremely important.  Ou konnen, Custody ou zanfan i en keksoz ki tous ou vreman, vreman, vreman lo en nivo personnel.  Deep down lo en nivo personnel.  E mon krwar ozordi, nou sosyete Seselwa mannyer nou ete, nou bann dimoun very caring Seselwa.  Nou bann dimoun ki kontan nou fanmir.  Nou bann dimoun ki kontan reste avek nou fanmir e perdi Custody oubyen perdi Vizit ou zanfan, par egzanp mwan koman en papa, mon pa kapab mazinen pa pe vwar mon zanfan.  E mon krwar bokou papa, bokou paran i santi zot koumsa.  E nou tou nou pa parfe, nou tou nou pa en faib, kot i pou ariv en moman donnen dan nou lavi kot nou pas dan bann sityasyon difisil, kot nou kapab reakte dan bann fason ki pa neseserman nou pou’n koz harm sa zanfan, me i posib ki nou’n koz harm nou family unit.  E prezan pou ou ganny pini pour en keksoz ki pou dir sitan kantite letan ki kapab prezan fer ou menm ou sa dimoun pa ganny lanvi repran ou lavi, pa ganny lanvi revin en kontribiter, en effective contributorNot only to the family me to sosyete.  Mon krwar i en keksoz ki pour mwan ti en pti pe, i pa tro asiz byen.  E mon krwar annan sa posibilite ki ou annan en second appeal dan sa bann desizyon, i enportan.  E la mon oule dir poudir i pa vedir ki ler ou ganny en second appeal i garanti ki ou pou ganny sa second appeal. Of course i pou go through the procedure ki ganny etablir, i pou go through the motions ki’n ganny etablir, pou asire ki si ou pe met en second appeal, ou annan grounds pour en second appeal. E mon krwar, mon trust ki Zidisyer, avek leksperyans ki nou bann dimoun Legal i annan dan nou pei.  Nou bann Avoka, nou bann Ziz.  Mon trust dan zot leksperyans, mon konnen zot bann dimoun ki toulezour zot pe enterakte avek Lalwa.  So, zot konn tre byen ki zot louvraz, zot konn tre byen ki mannyer Lalwa i devret fonksyonnen e kwa ki enportan dan Lalwa.  So, mon krwar sa i en keksoz ki enportan pou nou konsidere.  E en pwen petet ki dan sa Lalwa ki mon krwar osi dan sa bann lamannman ki mon krwar petet i aparet kosmetik me i osi donn serten lanpler.  Ou konnen, Seselwa nou en Nasyon ki vreman vizyel e lo persepsyon parfwa nou get en kantite keksoz koumsa.  Ou konnen, ler ou get par egzanp kot Tribinal Lafanmir par egzanp ozordi i asize, ok.  E ou get si par egzanp Lakour Siprenm par egzanp i donn li en landrwa, ou donn li sa lanpler, bokou dimoun i respekte persepsyon parfwa vizyel estetik ki zot vwar an relasyon avek en Lenstitisyon.  E mon krwar i enportan sa morso Prozedlwa, kot ler ou konnen poudir sa Tribinal i anba, ou ganny konpran sa Tribinal i anba kontrol administratif Zidisyer, Lakour Siprenm.  Ou konnen, ou pa pou ganny sa mank respe petet ki mon santi parfwa.  Mon pe dir sa, mon napa tou levidans me selman parfwa ki en dimoun i kapab annan an relasyon avek sa Tribinal.  So, i enportan osi ki nou konsider this is very important pour sa Tribinal li menm.  Konmsi pou raise son lanpler.  Pou donn li son pozisyon ki i devret annan ozordi dan konteks Legal, pou sa travay vreman enportan ki i bezwen fer.

E pour mwan se sa rezon ki mon vwar poudir ti enportan ki mon dir detrwa pti mo an relasyon avek sa Lalwa.  Koman en ansyen edikater Mr Speaker, mon toultan, mon pa pou zanmen perdi en loportinite pou mwan toultan koz lo bann keksoz ki protez Drwa Zanfan.  I dan mwan sa, in mon vokasyon e en keksoz ki mon krwar fermeman ladan.  E mon krwar ki ozordi plis ki zanmen, mon ti a kontan lans en lape.  Bann paran i devret asire ki zot zwe en rol primordyal dan lavi zot zanfan, konekte avek zot zanfan lo tou nivo e asire osi ki par egzanp si ou konnen par egzanp ozordi ou zanfan pe desann pou al tel Show, tel Nightfair tel aktivite, ou konnen kote i pe ale, ek ki i pe ale, ki mannyer i pe retournen akoz tousala i bann sirkonstans kot ou zanfan petet i en bon zanfan, me at the same time, once i antre dan bann eleman kot i pe ganny presyonnen pou fer serten aktivite oubyen serten aksyon, i osi kapab siseptib.  E sa i normal akoz i en zenn e zot siseptib to bann peer presure ki kapab arive avek zot.

So, mon krwar poudir si ozordi Gouvernman in vwar li en nesesite pou move sa administrative control back to the Judiciary, it’s not just about moving the administrative control. I annan tout en seri ledikasyon ki nou bezwen kontinyen fer otour sa Tribinal e otour travay ki sa Tribinal i bezwen fer.  E mon krwar la mon bezwen felisit bann dimoun ki’n travay avek sa Tribinal, ki ankor pe travay ek sa Tribinal.  Mon krwar ki zot fer en louvraz tre difisil.  I en louvraz ki pa fasil ditou.  Nou bann Travayer Sosyal osi zot fer en louvraz ki pa fasil.  Zot sa bann dimoun ki lo Tribinal, sa Chairman Tribinal osi pa pou fer en louvraz ki fasil akoz pran bann desizyon koumsa, an relasyon avek en fanmir i pa zanmen en desizyon fasil e sirtou par lefe ki Sesel i en pti pei.  Okenn desizyon ki ou pran, ki favoriz, ki paret pe favoriz en dimoun, i pe osi paret pe defavoriz en lot dimoun.  E nou konnen poudir Seselwa pa’n zanmen per pou li dir ou sa ki i anvi dir ou, si in santi poudir in ganny defavorize.  E alors mon krwar poudir nou tou parfwa nou bezwen egzers serten kosyon dan lafason ki nou apros nou reaksyon anver desizyon Tribinal.  Mon krwar Tribinal i pa fer desizyon pour li nwir personn.  I pa fer desizyon on purpose pou li afekte personn me i fer desizyon baze lo the best evidence ki ganny prezante devan li e lo kwa ki pli enportan dan tousala se proteksyon sa zanfan oubyen sa fanmir ki’n ganny mete devan sa Tribinal.  E mon krwar si nou maintain sa e nou fer sir poudir:- e dan lefitir nou kontinyen met plis lanfaz lo la, i pou ede pou nou stabiliz en bon konponan nou sosyete.

Avek sa Mr Speaker, mon pou dir ki mon pou donn tou mon sipor sa Prozedlwa.

Mersi.

 

MR SPEAKER

Onorab Vidot.

 

HON KEVIN VIDOT

Mersi Mr Speaker.

Bonzour tou dimoun ankor enn fwa.  Minis, delegasyon.

Mr Speaker, tantasyon i la ler en tel lamannman i vin devan nou, ki nou kapab deborde pou al koz en pti pe an zeneral lo lafanmir, lo zanfan.  Me mon a sey limit sa tantasyon ozordi bomaten, si nou kapab reste anliny avek letan e reste anliny avek sa Mosyon, sa lamannman ki devan nou, ki ase bref toudmenm.

Mr Speaker, Minis in koz lo ki 1998, kot lamannman Children Act ti ganny anmennen pou entrodwir Family Tribunal e sa ti en bon move.  Mon mazinen sa bann letan ou ti dan Lasanble Mr Speaker.  That was a good move ki Lotorite ti pran, politisyen ti pran pou kapab vreman adres bann issues ki ti egziste avan 1998, ki mon krwar Minis i kapab konn tre byen.

Mr Speaker, apre sa lamannman ozordi ki la nou prezan nou koman bann politisyen responsab nou pe al pase, se pou nou anmenn Family Tribunal anba Zidisyer.  Mwan personnelman koman en politisyen e osi koman en paran, mon krwar sa i en bon move.  Enn, mon panse i a donn li en pti pe plis lenportans.  Dimoun ava atas en pti pe plis lenportans avek, vi ki la Tribunal i anba Zidisyer.  I ti a ganny vwar koman en lot pti Lakour parey nou dir, toultan nou dir, ki ler dimoun ava prezant zot lekor devan Family Tribunal, zot ava pe get li avek en lot lizye, avek en lot splander, ki zot pa pe zwe avek Tribinal ouswa pou zwe avek son Chairman, ouswa son Vis Chairman.

Mr Speaker, en lot keksoz ankor se latansyon ki a ganny donnen atraver sa.  Mon mazinen Zidisyer ler Family Tribunal ava anba li konpletman, i a kapab donn li en pti pe plis latansyon kot training neseser a kapab ganny fer ek bann staff enn, e mon krwar Minis osi a kapab dir nou en pti pe pli tar taler, akoz ki i annan sa rediksyon, kekfwa zis pou dimoun konpran akoz i annan sa rediksyon.  Kekfwa i annan a krwar ki ar, la prezan i anba Zidisyer, prezan nou pe tir plis staff, kekfwa pou napa ase staff pour sa travay.  Kekfwa Minis ava fer pep Seselwa konpran akoz ki i annan sa rediksyon, ki la prezan zot pe move anba Zidisyer.

Mr Speaker, en lot keksoz ki i pou donn li se parey mon’n dir, dimoun a pran Family Tribunal pli serye.  Zot a ganny en konpran ki Family Tribunal i en no nonsense Tribunal.  Dan lot mo, ler ou pe aparet devan Tribunal ouswa ou ganny demande pou aparet devan Tribunal, ou pa vin zwe la.  Pa en landrwa kot ou vin bat latet son Chairman, ou vin bat latet bann dimoun ki pe asize la, pou ou vin fer sa ki ou anvi.  Ou vin zwe ek Lakour parey nou dir, vin zwe ek Tribunal, ou ava vin ler ou anvi, ou ava vin dir sa ki ou anvi e lafanmir in the process, swa zanfan plis ankor, ki li i kontinyelman ganny afekte e son bann douler i kontinyen prolonze, prolonze.

Mr Speaker, i pa en sekre si nou al dan Verbatim nou pou vwar premye Mosyon ki mwan koman en Manm elekte pour distrik English River mon ti anmennen dan sa Lasanble se pou nou revwar bann Lalwa e fer bann Lalwa vin pli sever anver bann dimoun ki abiz bann zanfan.  Sa ti en Mosyon ki mwan mon ti anmennen e sa ti mon premye Mosyon.  E pour mwan ozordi pou koz lo en tel lamannman, i en privilez e en plezir akoz mon krwar en Tribunal avek tou son bann Lalwa an plas, mon krwar Minis osi, i devret annan en pwen kot nou revwar tou bann Lalwa ki atase dan The Children Act e si i annan keksoz ki outdated, mon krwar nou bezwen, dan en fason pli vit, anmenn devan sa Lasanble, pou nou kapab vwar kot nou kapab amande, petet nou kapab fer li vin en pti pe pli serye, en pti pe pli sever e ki vreman bann dimoun ava pran zanfan e lafanmir pli serye Sesel.

Mr Speaker, nou konnen ki mannyer bann fanmir pe pas atraver ozordi Sesel.  Nou konnen bann lenfliyans ki annan eksteryer e enteryer ki pe arive.  Nou konnen parfwa bann fanmir i ganny kase pour en pti rezon ki nou ti kapab deal avek depi o komansman.  E i bezwen end up devan Tribunal.  E dan process ki arive, se zanfan ki ganny afekte.  Se zanfan ki toultan sa viktim.  Fodre zanmen dan nou parkour, enn koman paran, enn koman politisyen e bann dimoun ki lo sa Tribunal, ki nou fer sir ki nou bann zanfan pa vini en viktim.  Me nou bann zanfan a en fason ou en lot, i sorti koman viktorye akoz nou koman adilt, nou kapab fer bann mistake dan nou lavi, me nou kapab viv en serten nivo nou lavi kot demen nou kapab zis kontinyen nou lavi.  Me en zanfan a en zenn laz, si son lavi i ganny marke par en keksoz ki move, i atas ek li pour larestan son lavi.  E i kapab afekte son gran-disan dan term teenager, demen i a vin en zenn adilt e ler li osi i pou vin paran.  I kapab mark li dan en fason negativ.  E mwan mon oule, menm si nou pe koz lo Tribunal ozordi, sa lamannman ki pe ganny fer, mon ti a kontan ki bann Minister konsernen, ansanm ek Tribunal, parey en Onorab in dir avan sa, ki nou kapab organiz bann progranm ansanm ki kapab promot bann bon valer pour lafanmir.  Ki mannyer nou kapab diriz nou zanfan byen, ki mannyer nou kapab ankadre nou zanfan, ki mannyer nou kapab protez nou zanfan.  Mon krwar en keksoz ki nou bezwen kontinyen ranforsi e met plis lanfaz lo la, se ki mannyer nou protez nou zanfan.  Nou pa kapab zanmen ase promot sa Mr Speaker.  Zour ki en pei i dir in ganny ase avek ki mannyer i protez son zanfan, sanmenm sa zour sa pei i devret fermen.  Mwan mon krwar nou bezwen kontinyen, kontinyen zour apre zour promote ki mannyer nou kapab protez nou zanfan.  Si pa nou koman bann adilt, koman bann politisyen ki met Lalwa an plas, ki met prosedir an plas pou nou protez nou zanfan, lekel ki pou fer li?  Nou annan sa manda, nou annan sa rol, nou annan sa responsabilite pou nou fer li.  E nou devret fer li akoz en zanfan i en inosan.  En zanfan i vilnerab li, me se nou bann ki annan responsabilite, ki kapab montre li ki vwala.  Nou la pou nou protez ou nou.  E Family Tribunal mon krwar i devret la pou protez zanfan.

Mon konnen i annan bann lezot case ki pou vini parey nou’n tann koze an deor kot menm zanfan ozordi i kapab anmenn paran, bann issues koumsa, me selman a lafen se bann zanfan i bezwen ganny proteze.  Bann bon valer i bezwen ganny kiltive, i bezwen ganny enkilke, i bezwen ganny promote.

Mr Speaker, en bon move sa.  It’s a good move pou nou bouz Family Tribunal anba Zidisyer e mon swete ki Sef Ziz a donn li tou son lanpler, tou son latansyon ki i devret ganny donnen.  I pa ganny vwar koman zis en adisyon, me i a ganny vwar koman en Tribunal ki annan lenportans, ki annan valer e ki bezwen ganny kontinyelman ganny promote e fer sir ki laba bann korek desizyon i ganny pran, bann korek Lalwa i ganny servi e ganny aplike e ki nou zanfan parey mon repete, i ganny proteze e i ganny elve pou diriz zot ver fitir sa pei as en zenerasyon ki’n ganny swazir.

Mr Speaker, avek sa mon pou vot an faver sa lamannman, tou mon sipor total.

Mersi bokou.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.

Bonzour Mr Speaker.  Bonzour tou Manm koleg Onorab, Minis ek ou delegasyon.

Mr Speaker, mon pa pou repet sa ki mon 2 koleg in koz avan mwan me selman permet mwan pou fer resorti.  Koman en pti ziridiksyon Sesel, mon’n toultan dir poudir nou en pei avek en Konstitisyon ki vreman alaoter.  Nou en zenn demokrasi me avek bann Lalwa ki tre modern.  I vre nou annan ankor serten Lalwa ki’n ariv ler pou nou regete me selman nou osi, nou en zenn demokrasi ki vreman pro-aktiv.  Fiy e anmezir, nou pe revwar bann Lalwa, fer lamannman neseser kot i merite.  E pour sa, mon pou dir felisitasyon nou Gouvernman anba direksyon Prezidan Michel e osi ki sa i kontinyen kot i merit annan bann revizyon, bann Lalwa parey detrwa nou bann Lalwa ki ankor en pe outdated.

Mr Speaker, lo sa not, mon krwar i enportan pou nou konpran poudir Sesel nou annan en deba ozordi lo separasyon pouvwar.  Mon pou dir sa akoz Tribinal Lafanmir avan sa ti tonm anba Minister Sosyal ki nou pou dir Egzekitiv e ozordi, nou pe fer sa pa pou nou bouz li anba Zidisyer, ki sa lot lebra nou Leta ozordi.  Mon krwar sa ozordi i montre osi devosyon e osi langazman nou Gouvernman, pou demontre ki nou annan, petet nou pa ava dir a clear cut balance seperation of balance of powers, me selman nou kapab dir poudir nou annan en fine, nou pe sey rod nou en metod tre byen pou nou annan en bon balans pouvwar, pou asire ki nou demokrasi i reste vibran, pou asire ki nou Lalwa e nou sosyete i modern e osi azour avek evantyalite ki pase globalman.

Mr Speaker, mon koleg par devan mwan in koz lo respe pour Tribinal.  Nou apel sa en hierarchy of Court ozordi.  Dan en Legal System i annan en hierarchy of Courts e normalman, i annan sa ki nou apel at the smallest or the lowest Courts as the Tribunals e i swivi par bann magistrates.  So, i otomatikman si dan en hierarchy of Courts ki sipoze Courts parey nou pe dir, sipoze tonm anba Zidisyer, i normal savedir Tribunal as a lower.  A very lower Court, i vwar son plas anba sa hierarchy dan Zidisyer kot bann Lakour i ete.  Mon krwar sa i enn bann largiman fondamantal ki nou pe fer.  Nou pe senpleman aliny nou Tribinal koman en lower Court, pou met li anba sa hierarchy of Courts dan nou trwazyenm lebra nou Leta ozordi.

Mr Speaker, osi lo sa not, Gouvernman resaman in bouz Tribinal Lanplwa osi in bouz li anba Zidizyer, mon krwar 3 mwan ou 4 mwan pase, nou ti fer lamannman lo Misuse of Drugs Act, kot osi ladan ti sipoze annan en small Tribunal ki ti pou revwar ouswa bann pti lofans ki konsern drog.  Sa osi i montre ou ki mannyer nou Gouvernman pe vin pli pro-aktiv pou pran bann pti Tribinal, pe plas zot dan bann landrwa, pe plas zot anba Zidisyer kot zot merit ete pou zot ganny sa bon ankadreman Legal e osi pou asire ki son fonksyonnman koman en small Court i pe ganny byen zere.  Mon krwar sa le bi ki nou Gouvernman pe fer e i en tre bon pa an avan.  An tou prenon an kont ki nou konnen Tribinal Lafanmir i annan en logmantasyon dan bann ka Alimoni, Vyolans Domestik, bann keksoz koumsa, mon krwar ek Zidisyer, koman en lebra separe e anba Zidisyer, i ava ganny en pti pe plis resours ek latansyon pou li kapab deal avek sa bann sityasyon pli efektivman.

Mr Speaker, nou’n toultan dir poudir ki nou zanfan i en special group.  E mwan mon pou solider avek sa e mon krwar an menm tan osi ki letan nou pe plas Tribinal Lafanmir ki pe revwar en pti pe fonksyonnman Tribinal Lafanmir ki pe revwar son lankadreman anba Children Act, nou pe osi donn en pti pe plis lenportans nou zanfan.  Nou pe donn en pe plis respe sa Lakour.  Koriz mwan si mon mal Minister.  Sa Tribinal Lafanmir i ti Victoria House.  Kot i ete ou monte la dan peron obor batiman HFC.  Kot Victoria House i ete, Teemooljee la.  Pandan en peryod letan i ti la e parfwa letan ou vwar bann dimoun ki pe al kot HFC ozordi li e i annan en kantite dimoun dan sa koridor.  Ti annan en rafal, en lepok mon rapel, mon ti ankor dan Lapolis, en kantite dimoun ti dan koridor la, sirtou letan case ti pe al ganny ekoute.  Mon santi petet avek Zidisyer, nou a vwar en fason fer, pour ki pa zis respe.  An term plas li anba Zidisyer pou li ganny revwar me an term respe atraver li koman en Tribinal.  Son landrwa kot i ete, son lokasyon.  Son fason ki i ekout case, son letan ki i ekout case, kan, petet i kapab fer li en pti pe pli frekan, bokou pli frekan ki la.  Mon mazinen petet sa, sa rediksyon ki nou pe vwar dan nou bann Manm, pou asire ki zot la petet a plen tan e ki nou vwar petet ki case i al en pti pe pli vit ki aktyelman i pe ganny fer.  Pa ki nou pe dir poudir i pa bon, me nou pe dir poudir nou tou konsyan limitasyon resours ki i annan e osi limitasyon resours ki Gouvernman osi i annan an term landrwa e osi an term resours imen.

Nou pe osi:- mon’n tann Minis in nonmen dan son lamannman, in koz pour medyasyon ki ava elarzi bann scope of medyasyon letan zot tonm anba Zidisyer.  Ki sa mon krwar e toutafe dakor avek ou Minis.  I pa zis elarzi bann medyasyon me selman i pli proactive ozordi.  Ozordi dan plas ki nou vwar ki santans ki ganny donnen pour bann paran ki pa pey Alimoni, dan plas en kondannasyon prizon, petet nou ava vwar bann fason pli proaktiv pou fer zot asire ki zot pe kontribye anver zot zanfan me selman an menm tan osi, parey santans kominoter ki nou’n toultan koz lo la.  Pou fer zot osi vwar sa larzan pou zot kontribye back dan plas ki nou, nou anvoy zot prizon kot zot pou al asize lo Tax Payer’s money laba dan en lot fason fer, me still zot pa pe fer sa kontribisyon anver zot zanfan.

Mr Speaker, mon’n konpran poudir rekomandasyon pou sorti kot Chief Justice avek Prezidan pour bann apwentman Chairman ek bann manm.  Mon krwar osi sa i en pa pou montre osi ki matirite ozordi pou nou, nou pe move away en pti pe, ki nou les sa avek Zidisyer pou li santi lekel li ki i krwar ki kapab Chair son Tribinal e osi asiz lo son, koman bann manm.

Mon ti pou fer en propozisyon anliny avek Children Act.  Mon krwar prenan an kont ki nou pe koz lo Lalwa Zanfan ozordi.  Mon 2 koleg in sorti en pti pe an deor sa.  Mon krwar i montre osi en nesesite ki nou annan en one stop place ouswa en one stop:- mon pa pou dir en one stop shop.  Parey Unity House i ete la, mon krwar PS William ki prezan avek nou la, kot son bann Social Workers i baze, Children Protection zot baze la Unity House, i annan nou bann Zofisye Lapolis ki deza la ansanm avek zot.  Sa in fer pou annan en meyer kordinasyon letan i annan bann ka lofans kont nou bann zanfan.  Mon krwar osi prenan an kont ki nou annan sa lot group ki anler kot Lopital.  Sa Child Protection Unit ki Lopital, mon krwar petet a lavenir Gouvernman i merit mazin en landrwa fokal ouswa santral, kot sa 3 Departman i annan en landrwa ansanm, ki letan en zanfan i annan en ka, be it dan en Vyolans Domestik parey Minis in dir kot ou bezwen al fer removal, ouswa i annan en labi ki’n arive ki ou bezwen al sa, sa zanfan i a la, son Social Worker i la, son Zofisye Lapolis i la.  I annan en Dokter.  Son Dokter i pa tro lwen avek li pou fer son tes lanmenm, ki pa pe vwar li pe bouz: – kot i konnen poudir Tribinal pa tro lwen.  Tribinal osi i lanmenm la pou ekout son ka.  Ouswa si i pou al kot Lakour pli o, i annan en fason akoz ozordi ki nou vwar.  Nou vwar nou pou bezwen al Unity House, an menm tan letan ou sorti ou bezwen al Lopital pou al anba kot sa pou al fer, pa konnen ki ou pou …..

(Technical Problem)

 

HON SHERYL VANGADASAMY

…. ki li ki dan figir dimoun e ou pe asize la, ou pe espere.  Mon krwar sa anliny ki nou pe moderniz, pe fer bann reform koumsa, ki sa osi petet a lavenir letan resours i ganny mete, i osi ganny prenan an kont.

Mr Speaker, mwan lo sa not mon pou dir sa i en tre bon move e mon krwar i en bon desizyon ki Gouvernman in fer.  E mon krwar avek reform ki pe ongoing dan Zidisyer.  E ozordi nou vwar en Zidisyer ki vreman proaktiv, i pe bouze.  Mon krwar anba direksyon Madanm Towmey, mon a santi ki Tribinal Lafanmir i ava reganny en nouvo lelan e nou a vwar en lot Tribinal ki pe kontinyen fer son travay, me selman petet anba son proper parasol parey i ti merite.

Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.

Mr Speaker, mon pa pou long.  Mon pou tre bref annefe.  Mon pou pran zisteman kot Onorab Vangadasamy in kite.  E mwan mon dir, rendre a Cesar ce qui appartient a Cesar.  Konmsi nou bezwen donn Zidisyer sa ki appartient a Zidisyer laba.

E selman sa ki nou pe fer i byen.  Nou pe transfer sa responsabilite back ek Zidisyer, byen.  Be Minis petet ti a bon eksplik nou, eklersi nou en pti pe, eski letan sa responsabilite i ganny fer, eski fizikman sa bann Lakour i pe vin la kot Palais de Justice akoz nou sa ki nou ti ava kontan vwar se ki pa zis sa responsabilite ki vin avek Zidisyer me ki fizikman sa bann Lakour i sorti dan sa bann pti trou Anvil.  Sa bann Tribinal i sorti dan sa bann landrwa Anvil la, i vin la Palais de Justice.  Mon krwar i annan ase bataz.  Later i annan, si fodre fer ankor en pti batiman a rod en sponsor parla ava fer, a ganny plis lespas.  Lot zour mon’n al kot Employment Tribunal, mon vwar i annan plas vid.  I kapab accommodate touzour.  Nou kapab regarde.  Par kont Anvil letan sa bann Lakour i Anvil, sa bann Tribinal i Anvil, i kree en bann konzesyon parfwa.  Erezman nou pep ankor byen zantiy, pa ankor ariv bann kalite komosyon me i pa mank lontan kapab arive letan ou get keksoz ki mannyer pe bouse.  So, mon ti a kontan si ti annan en leksplikasyon, en leklersisman plito par Minis lo fizikman sa bann Tribinal, bann Lakour par egzanp pour Juvenile Court.   Menm zafer.  Eski Juvenile Court par egzanp pa ti kapab bouz anba menm sapo, anba menm responsabilite?

Mersi bokou Mr Speaker.

 

MR SPEAKER

Bon, napa okenn ankor, okenn lezot entervenan.  Si non then mon ava demann Minis pou sum up son Right of Reply.

 

MINISTER VINCENT MERITON

Mersi Mr Speaker.

Mr Speker, mon ti a kontan tous detrwa pwen mwan osi bref-man, me avan remersi tou bann entervenan ki’n siport sa Prozedlwa.

E mon dakor avek bann entervenan, sirtou Onorab Sebastien Pillay ki’n dir ki Tribinal Lafanmir i dernyen lenstans ki nou servi.  Si ou’n fer ou piti, sonnyen.  I pou evit ou tou sa bann problenm si ou sonny ou piti.  Tou sa bann imilyasyon dan koridor ki nou dir nou pou vwar la, sonny ou piti.  Konmsi ou pa kapab sonny ou piti, apre demen ekspekte ki Leta pou sonnyen.  Ler pou fer ou piti, Leta pa la.

Mon kontan nou’n koz responsabilite paran.  Pa kapab ler pou pran en desizyon, msye ek madanm darling I love you, ler pou sonnyen prezan, vin devan.  Wi, nou pran swen ek nou zanfan.  Nou kontan nou zanfan me selman i reste ou responsabilite.  Mon pa konnen konmsi si, annou pa mank sans parey Onorab Vidot in dir.  Annou kontinyelman koze, repete akoz malerezman i annan en tandans ki pe tir son latet, ki pe viv ozordi.  E si demen mon pa gannyen, Leta i la pou donn mwan.  Sa i enkli pour mon piti.  Wi nou annan en sistenm proteksyon sosyal ki vreman modern.

Onorab Vangadasamy i dir nou annan en Konstitisyon pli modern.  I sitan modern ki lezot pei pe vin kopye lo nou.  Me bann ki isi anndan pa vwar ki i modern akoz zot dir zot oule plis sanzman.  Wi i annan sanzman e bann sanzman pe ganny fer dousman, dousman.  La enn la nou’n anmennen pou kapab met li annord avek bann tandans modern e pou asire ki Tribinal Lafanmir, malgre in sorti Victoria House dan en pti kwen, ki la ozordi i Unity House an tranzisyon, ziska ler mon konpran nou a ganny nou en zoli building avek tou son bann fasilite apropriye, pou kapab kontinyen servi dimoun.  Me selman malgre nou lespas ti kwense depi 1998, nou’n deservi en kantite fanmir.  Zis pran lannen pase, nou’n anmas nou pres R18 milyon e dan 23 mil deposit ki’n fer.  Mazinen konbyen manman oubyen papa ki’n ganny sans benefisye atraver en servis ki otreman nou pa ti pou gannyen.

So, nou krwar ki in ariv ler pou nou anmenn li lo en lot staz e se pour sa rezon nou’n anmenn sa Prozedlwa.  Sistenm in la e taler bann entervenan in dir ki ler en sistenm Lakour, pou donn li plis respe.  Wi, dan en serten sans plis respe, me respe ou donn ou fanmir, ou madanm oubyen ou msye e ou pa bezwen vin kot Tribinal.  Zot dakor avek mwan?

So, wi sa Lakour pou desarz son responsabilite, parey tou sa bann staff dan lepase in desarz zot responsabilite.  Parler dan bann sityasyon difisil, parler anba en kantite presyon me mon krwar zot in deservi en gran parti lapopilasyon e nou bezwen dir zot en gran mersi.

Mr Speaker, mon krwar ki Tribinal Lafanmir i tous bann ki a risk, i tous bann ki viktim dan bann ka mentenans zanfan oubyen dan bann ka vyolans dan lafanmir, vyolans domestik.  Bann lezot Lazans i annan manda pou donn bann servis lo nivo prevansyon.  Nou’n koz bokou lo preparasyon lafanmir, nou’n koz lo nesesite annan bann progranm ki pou ed dimoun annan plis responsabilite oubyen kree en platform ki dimoun i kapab vreman viv bann valer enportan.  I annan bokou Lorganizasyon ki pe zwe sa rol.  I annan NCC, Zafer Sosyal, Care, Legliz, APSHF, ASFF.  Tou sa bann Lorganizasyon non-Gouvernmantal ki pe zwe en rol pou donn en sipor bann fanmir ki dan bezwen pou zot kapab, enn, enterakte byen koman imen, koman zonm ek fanm.  E osi, ki mannyer pou prepar lavenir e ki mannyer pou fer grandir zot zanfan.

Mr Speaker, nou trouve, fodre mon dir sa bout la, ki tro souvan bann paran ki’n separe i servi zot zanfan pou kapab bles son ex.  Tro souvan sa.  Tro souvan konmsi nou sey kas Lalwa e la parey in ganny dir, fotespere anba Zidisyer konmsi nou vin pli serye avek sa.  Koman en boug i esey kas Lalwa, nou deal avek li.  Tro souvan nou sipoze donn akse Vandredi, ou pa vini Vandredi ou.  Ou tenny ou telefonn, nek Sanmdi bomaten.  Konmsi la nou pe azir dan meyer lentere zanfan e pa fer ditor ou msye oubyen ou madanm, me get sa zanfan.  Ki sa ki pou ed li grandir byen.  Konmsi si mon kapab repete.  Annou pa servi nou zanfan pou bles sa partner ki nou’n separe.  Zot pa anvi sa arive, este ek ou partner, sonny ou zanfan zot.  Pa i senp sa?

Mr Speaker, servis ki nou’n donnen parey mon’n dir, in ed de milye paran. Tanporerman in sorti Victoria House i Unity House e i pou bouze parey diskisyon avek Zidisyer nou konpran, i pou donn li son fasilite apropriye.

Mr Speaker, ler nou ti komanse an ’98, nou ti komans santi ki nou ti bezwen anmenn en tel servis akoz nou ti pe santi ki bann paran pa ti pran zot responsabilite.  Nou’n demande toultan, eski nou bezwen met tou bann responsabilite sosyal dan en Lalwa, malerezman wi.  En entervenan in dir ki eski dan Lalwa i annan ki ou kapab pourswiv zanfan ki pa pran ka ek son paran, wi.  Zot telefonn mwan zot dir mwan, la mon papa, ki mon fer avek?  Be ou papa, ou papa.  Ki mon annan pou fer ladan?  Konmsi nou pa kapab pran nou papa akoz nou annan nou lavi.  Mon dakor me selman ou papa ek ou manman ti trimouse pou ou, La ozordi ler ou’n ganny ou fanmir ki ou fer, ou’n bliy li.  I normal sa?  Annou konmsi get sa koman en sosyete avek en figir imen, parey ler nou ti pe gele, nou pa ti konpran nanryen, nou ti ankor tip ti, nou manman ek nou papa ti leve, ti bers nou e ozordi la nou pa kapab rod tou kalite lekskiz, zis pou pa donn li en serten soutyen.  Nou en sosyete ki pran swen ek nou dimoun.  En sosyete i ganny zize par lafason i tret son zanfan e osi par tret son dimoun aze.  E anba sa Children Act i annan tou-le-de.

E mesaz ki mon pe sey pase malgre i an deor sa bout Lalwa Mr Speaker, donn mwan permisyon, se annou pran ka ek nou pros akoz si nou pa fer li, lekel ki pou fer li.  E apre ler i tonm dan semen, ou konnen kantite kritik ki vini.  Konmsi in vwar en dimoun pe asize latet anba, nou tir portre nou met li an kouler, nou donn tou kalite zistwar.  Nou menm pei ki pli pa bon, nou menm Gouvernman ki pli pa bon.  Si nou en Gouvernman ki ti pa bon la, nou pa ti pou’n kree tou sa bann Lenstitisyon ki pe ed dimoun kapab debout lo son lipye.  Si nou ti en pei ki ti pi pa bon, nou pa ti pou kapab met an plas bann Lalwa revolisyoner ki pe gete ki mannyer nou pou ed sa zenn ki’n viktim e ed li repran son lavi an men e pou kapab zwe so rol dan devlopman pei.

So, mon krwar i enportan ki dimoun i kapab annan bagaz pou analize.  Taler Onorab in dir ki mannyer nou kapab tonm pyez dan bann defi.  Be nou bezwen kapab ekrir lo nou tablo, lo nou tablo …………, bann keksoz ki bon, ki ler nou devan bann sityasyon konpleks, nou konnen mon al a gos oubyen a drwat, oubyen mon dir non.

So, mon krwar en kantite keksoz pe ganny fer e travay ki nou pe dir, bann progranm ki zot pe dir pou ed bann fanmir kapab pli arm zot, empower zot parey angle i dir, pou zot kapab fer fas ek defi lavi e fer elve bann zanfan.  Sa la, i zis en pti bout, en gout delo dan tou sa gran lasenn proteksyon e devlopman zanfan e fer marse nou pei koman en sosyete imen.  Mentenir sa fitir imen ki bokou lezot pei ti a kontan annan.

Mr Speaker, mon pa al an deor ankor, taler ou ava aret mw.

Sorti 15 pou ariv 8.  Lalwa ti donn nou permisyon, 1 Chairman, 2 Vis Chair avek ankor 12 manm pou fer 15.  Zanmen nou’n apwente 15.  Maximum nou’n arive se 8 e ti en pe ……….  Zot rapel zot, nou ti ganny prete en Ziz ki pa ti full time avek nou.  Me la mannyer keksoz, deza nou’n sanze la avek Zidisyer, sorti 2 fwa edmi par semenn, in ariv 3 full sitting par semenn.  So, nou pe pli byen repartisyonn nou bann manm pou kapab donn en meyer servis avek byensir en zournen plen par mwan Praslin.  Be fodre osi dir ki sa 28 manm staff ler ti transfer la, se sa ki permet ki sa bann Board ler zot asize zot pran desizyon la, tou sa bann travay ki pran plas deryer rido ki nou pa vwar la, se sa 28 staff ki fer li marse e zot pa’n ganny redwir.  Zot avek mwan selman.  So, la 2 mo.

Fodre osi dir Mr Speaker, ki nou pou bezwen pa zis nou bann manm Board ganny training lo best interest of the child e ki mannyer nou pou enterpret bann Lalwa ki annan pou fer avek Proteksyon Zanfan.  La nou pe koz Children Act.  Onorab Vangadasamy in koz lo Penal Code osi dan son lentervansyon.  Ki mannyer bann lezot Lazans i bezwen ganny train.  Sosyal, Nurse, Gard.  Ki mannyer nou pou pli byen kolabor avek kanmarad.  Ki mannyer nou pou pli byen kapab prepar en case pour ki ler i ariv Ankour, nou kapab deal avek sa.  Wi i annan en nesesite nou kontinyelman donn nou lekor bann dernyen mo teknolozi, dernyen mo Lalwa e ki mannyer i pase dan lemonn pou nou kapab pli byen deservi nou servis.

E by the way.  Mentenans nou koze ler nou pe koz sipor pour zanfan.  Mentenans.  Alimoni ler ou pa’n pey ou msye oubyen ou ex-madanm.  Zis en pti detay nou ti pe dir.

Vwala Mr Speaker sa bann pwen ki mon’n met devan pou donn en serten leklersisman ki bann entervenan in mete.

Mr Speaker, fotespere mon’n adres tou bann kestyon ki’n leve.

Mersi Mr Speaker.

 

MR SPEAKER

Ok, mersi.

Nou ava pran en vot lo merit e prensip sa Bill.  Tou bann ki an faver?  Okenn ki kont?  Ou an faver ouswa ou kont?  Ou an faver.

Mon a ganny mwan en Formal Second Reading.

 

MADAM CLERK

A Bill of an Act to amend the Children Act, Cap 28.

 

MR SPEAKER

Ok.  Eski nou pou al dan Committee Stage, Onorab?

 

HON CHARLES DE COMMARMOND

Mr Speaker, lefe ki nou napa okenn lamannman, mon pe move anba Order 91(1), ki nou sispann Lartik 65-70 lo Standing Order, pou sot Committee Stage.

 

MR SPEAKER

Ok, okenn ki segonde?

 

HON JEOVANA CHARLES

Seconded Mr Speaker.

 

MR SPEAKER

Bon, nou a pran en vot lo la.

Tou bann ki an faver?  Okenn ki kont?

Bon, nou a ganny en Motion for Third Reading.

 

HON CHARLES DE COMMARMOND

Mr Speaker, anba Lartik 71(1) nou Standing Order, mon move ki Children Amendment (Bill) 2016 i ganny lir en Trwazyenm Fwa.

 

MR SPEAKER

Ok, okenn ki segonde?

 

HON JEOVANA CHARLES

Seconded Mr Speaker.

 

MR SPEAKER

Bon, nou pran en vot.  Tou bann ki an faver?  Okenn ki kont?

Bon, Third Reading.

 

MADAM CLERK

This Act may be cited as the Children Amendment Act, 2016.

 

MR SPEAKER

Ok.  Nou’n ariv alafen deba lo Bill e Bill in pase.  Donk nou a remersye Minis e ekskiz li parmi nou.

E kant a nou, nou pou rezwenn 2er pour Mosyon, ki pou ganny Chair par Deputy Speaker.

 

(LUNCH)

 

 

MR DEPUTY SPEAKER

Bon, mon a dir bonn apre midi tou Manm Onorab avek tou bann lezot dimoun ki pe ekout nou.  E nou ava kontinyen nou travay parey lo Order Paper. E lot item se en Mosyon ki’n ganny table par Onorab Jeniffer Jasmin, Manm Elekte pour Pointe Larue e mon ava envit Onorab Jasmin pou prezant son Mosyon,

 

HON JENIFFER JASMIN

Mersi Mr Deputy.

Bonn apre midi tou dimoun.  Mr Deputy set apre serten lobzervasyon –bokou konsiltasyon e en refleksyon profon ki mon’n deside vin avek sa Mosyon dan Lasanble Nasyonal, pou demann avek mon bann koleg pou zwenn mwan dan sa gran deba e pou fer lapel avek kominote Banker dan Sesel.  I mon swe ki deba lo sa Mosyon i enn ki ris ian term kalite largiman ki bann Manm Onorab i avanse e osi ki sa deba i termin par en gran mazorite an faver sa Mosyon, pou anvoy en mesaz for e kler  kot Gouverner Labank Santral ek Management bann diferan Labank Komersyal dan pei; ki lepep Seselwa atraver son bann reprezantan dan sa Lasanble, i oule vwar en amelyorasyon sibstansyel dan serten zot konportman anver serten zot kliyan bann Labank Komersyal.

Mr Deputy, mesaz santral ki sa Mosyon pe anvoye, se ki bann Labank Komersyal in fer bokou pou amelyor kalite e ogmant kantite servis ki zot ofer zot kliyan – e ki Labank Santral pe fer en bon travay pou mentenir en sistenm Banker ki kapab soutenir devlopman ekonomik pei.  Me nou oule ki bann Labank Komersyal  e Labank Santral i fer ankor en zefor pou amelyor sa bann servis.

Mr Deputy, mon pou demar mon lentervansyon par en refleksyon lo rol Larzan dan lemonn e lenportans sistenm Banker dan en lekonomi parey Sesel.  Larzan i endispansab dan en lekonomi akoz i permet e fasilit bann tranzaksyon.  Letablisman e devlopman serten Lenstitisyon ki spesyaliz dan larzan i form parti devlopman ekonomik en Nasyon.  An gro i annan 2 kalite Lenstitisyon ki spesyaliz dan larzan.  I annan Labank e marsan Finansyel sa ki nou apel stock exchange. En Labank i en lentermedyer ant son bann kliyan ki depoz zot larzan dan bann savings account e lezot kliyan ki pran loan. Dan en marse finansyel de lot kote, i napa okenn entermedyer ant saenn ki annan larzan pou prete e sa ki oule pret sa larzan.  Sa 2 group dimoun i zwenn lo stock exchange kotki annan sa larzan i pret sa ki pe rod prete an ezanz pour bann shares dan son Lakonpannyen.  An prensip, lefe ki lo marse finansyel napa lentermedyer parey en sistenm Banker, i pli bon marse pou pret larzan lo marse finansyel ki dan en sistenm Banker.

En lot lavantaz marse finansyel se ki i ofer plis prodwi, par egzanp lo bann marse finansyel tre devlope i annan sa ki nou apel bann dérivatives ki i en prodwi ki permet en dimoun pli byen manage bann risk.

Mr Deputy, dan tou pei i annan sa 2 sistenm – i annan enn ant sa 2 sistenm ki dominan.  Par egzanp Lanmerik i annan en market-based financial system akoz plis larzan i pas atraver bann marse finansyel ki sistenm Banker; tandis ki Lerop i annan en bank-based financial market akoz plis larzan i deroul atraver sistenm Banker  ki lo marse finansyel.

Mr Deputy, Sesel nou annan en bank-based financial system akoz pratikan toutranzaksyon finansyel i pas atraver Labank e nou stock exchange i tre pti e pa devlope.  Deplis Labank in tre entegre dan lekonomi akoz laplipar dimoun i servi Labank.Sa i fer ki nou popilasyon i depann bokou lo nou Labank.  E sa depandan i parfwa kree en vilnerabilite akoz Seselwa napa lot swa ki Labank pou rod en loan. Mon Mosyon i viz sa vilnerabilite e sa Mosyon pe adres sa size.

Mr Deputy, en sistenm Banker i sa bann relasyon ki egziste ant bann Labank.  Sa ki nou apel Labank Komersyal ek Labank Santral ki Lotorite.  Labank Santral i egzers son Lotorite atraver sipervizyon aktivite bann Labank Komersyal e osi akoz Labank Santral i kontrol lakantite larzan dan en lekonomi; sa ki nou apel lamas monneter.Par kontrol kapasite bann Labank Komersyal, pou donn kredi atraver bann Polisi Monneter.Mon Mosyon pe demann Labank Santral pou ranforsi son rol koman en Lotorite dan nou sistenm Banker.

Mr Deputy,mon Mosyon i merit ganny vwar dan konteks kontinite bann aksyon ki’n ganny pran depi en serten letan.  Depi en pe letan, Gouvernman pe pran bann mezir ki pe amelyor klima pour bann biznes.  Nou dekrir sa bann mezir koman business-friendly.  An konsekans sa bann mezir, Gouvernman in sorti dan biznes e adopte en rol fasilitater.  Atraver sa rol fasilitater, Gouvernman in met an plas bann Regilasyon ki benefisye biznes,me osi konsonmaterki enkli bann kliyan bann Labank.  Enn sa bann mezir ki Gouvernman in pran ki benefisye bann Labank osi byen ki zot kliyan, se lamannman dan Kod Penal ki sa Lasanble fek pase 3 semenn pase.  Avek sa lamannman bann kliyan bann Labank e sa bann Labank i ganny proteze kont bann frod lo bann masin ATM.  Gouvernman in fer son bout e bann Labank in osi fer bokou pour zot kliyan.  Bann Labank i envesti bokou pou moderniz zot bann servis.Dan sa menm lespri ki zot in envesti pou amelyor servis zot bann kliyan, nou pe demande pour zot kontinyen fer sa par met lanfaz lo  bann servis partikilye.

Mr Deputy, parmi bann servis ki en Labank i ofer son bann kliyan se akse a bann loan.  I annan serten problenm avek sa servis ki ganny resanti koman en lenzistis par serten sitwayen.  Letan en Labank i donn en loan, i demann serten sekirite pou fer sir ki i reganny larzan ki in prete e an plis lentere lo la. Sa bann sekirite i enkli en lipotek ordinerman lo sa byen ki sa dimoun pe al aste avek sa larzan loan e garanti par 1oubyen 2 lezot dimoun.  Si sa dimoun pa re-pey son loan, Labank ikapab sezi sa byen ki in aste e revann pou li reganny son larzan ; oubyen i kapab fer en salary deduction lo sa dimoun ki’n garanti son loan. Problenm i leve letan en dimoun i azir dan en fason malonnet e i deside pran son larzan loan e apre sanz travay, landrwa reste e telefonn dan en fason ki Labank pa kapab retrouv li.  Lefe ki sa dimoun in disparet, Labank i bezwen sezi son byen me souvandfwa Leta letan i dan en pozizyon pou sezi sa byen, prosedir Lakour i tro long ki letan in ler pou sezi sa byen, in telman depresye ki Labank pa kapab retir son larzan si i vann li.  Sa sityasyon i fer ki Labank i swazir lopsyon ki pli fasil – savedir i al kot garanter pou fer li repey sa loan. Sa garanter i vwar li dan en sityasyon kot i bezwen repey en loan e sa i afekte son Bidze.  I bezwen fer plis depans e mwens savings, oubyen i bezwen menm koup lo serten lezot depans ki i abitye fer.  Si sa dimoun i retrouv li dan en sityasyon kot i bezwen li menm rod en loan, i pa pou kalifye probableman pour sa loan akoz sa loan ki in garanti i afekte son credit worthiness. Sa sityasyon i tre enzis e i merit ganny korize.

Mr Deputy, mon konn en ka kot en dimoun ti pran en loan avek en Labank e i ti annan 2 garanter.  Apre en serten letan sa dimoun in deside pou aret pey son loan e koup tou kontak ek sa Labank. I ant sa 2 garanter i osi in sanz son landrwa travay ki vedir Labank pa kapab fer salary deduction lo li pou repey lanmwatye sa loan ki reste.  Sa Labank i deside fer toulede salary deduction lo sa lot garanter ki pa’n sanz landrwa travay.  Sa dezyenm garanter i vwar li dan en sityasyon tre konplike akoz i bezwen pey doub sonm ki i ti dakor pou peye.

Mr Deputy, nou bezwen adres sa bann sityasyon.  Mon pe demande ki bann Labank Komersyal i revwar bann kondisyon ki zot enpoz lo en dimoun ki pran loan e bann dimoun ki vin zot garanter.  E ki zot ranforsi zot Departman Debt Recovery pou fer zis ki personn pa santi okenn lenzistis. Avek sistenm ki nou annan dan pei, i fasil pour Labank konnen si en dimoun i kit pei, ki bor i pe travay e reste – si in sanz landrwa travay e reste e ki son nouvo limero telefonn si in sanze.  Department Debt Recovery pou rod sa bann lenformasyon avek bi retrouv sa dimoun  e fer li pey son loan. Sa dimoun osi pou osi pey tou fre ki Labank in sibir pou retrouv li.  Labank Santral pou siperviz bann kondisyon loan ki en Labank i enpoz lo sa kliyan pou fer sir ki sa i enkli sa bann nouvo prosedir.  Sa bann kondisyon pou enkli kapasite pour bann Labank kapab demann salary deduction lo en dimoun ki pret larzan – si sa dimoun i sanz landrwa travay san fer son Labank konnen. Mon pe osi demande ki Labank Santral i travay avek Biro Attorney General pou revwar bann prosedir e travay avek Zidisyer pou etabli en Lakour Komersyal ki ava fast track bann prosedir sezi byen en  dimoun ki azir malonnet e pa oule re-pey son loan. En garanter pou entervenir pou re-pey en loan ki in garanti selman dan ka kot tou sa bann posibilite in ganny eksplore e pa’n marse.

Mr Deputy, en lot size ki mon ti a kontan adrese se to lo lentere loan.  I vre ki parler lentere i kapab reflekte Polisi Monneter me i paret ki an zeneral lentere i o lo loan dan Sesel.  Sa i afekte kapasite en dimoun pou ganny akse avek kredi e afekte rantabilite en biznes.  Mon pe demann Labank Santral, pou fer en letid lo lenpak lo to lentere – lo akse avek kredi pour serten kategori dimoun e biznes e pou vwar si lentere ki serten Labank i sarze i pa  eksesivman tro o.  Mon pe demann Labank Santral pou port en latansyon partikilye lo diferans ant to lentere ki bann Labank i sarze lo loan ki zot prete e sa menm to ki zot donn zot kliyan lo zot kont Savings.

Mr Deputy, Polisi serten Labank Komersyal lo loan i diskriminatwar  kont serten kategori dimoun ki anvi pran en loan.  Gouvernman i met an plas en lanvironnman ki business-friendly, me serten Labank Komersyal pa pe swiv avek en Polisi lo loan ki client-friendly.Parmi bann dimoun ki ganny espesyalman afekte par sa Polisi, se bann zenn ki anvi komans en biznes oubyen en start-up. Olye zis pran en mortgage lo sa lekipman ki sa zenn antreprener i anvi aste Labank i osi demann li lezot collateral. Vi ki sa dimoun fek komanse, byensir i napa sa e sa i diskalifye li pour en loan lo baz son larises e non pa lo son baz kapasite pou fer biznes.  Sa i enzis.

E en dezyenm group dimoun ki ganny afekte par sa Polisi lo loan, i en fanmir ki trouv li dan en nesesite finansyel a kour-term kot lakour.  Sa bann fanmir ki annan en reveni feb pa kalifye pour en pti loan e pou aste dan en ka irzan menm parey, menm si zot saler in pas dan sa Labank  pou plis ki 15an e sa Labank i kapab fer salarydeduction e osi annan lenformasyon lo zot spending pattern.

Mr Deputy, sa bann legzanp i montre nou klerman, ki Polisi lo loan pratike par  serten Labank Komersyal i fer diskriminasyon kont bann pti biznes, bann zenn e bann ki annan revini feb. Parey mon’n fer sorti pli boner, Gouvernman e sa Lasanble nou’n fer nou bout.  Me i reste bokou pour bann Labank Komersyal fer.  Mon pe demann Labank Santral pou travay avek Lasosyasyon Banker pou fer sir ki zot Polisi Loan, i vin pli sansib e reponn pli byen bezwen tou kous nou popilasyon.  Mon pe demann bann Labank pou fer bann laranzman neseser pou asire ki zot bann kliyan i ganny akse avek bann fasilite ki Gouvernman in met a dispozisyon bann sitwayen atraver plizyer Scheme parey sa enn pour bann pti biznes.

Mr Deputy, sa ki’n  motiv mwan pou vin ek sa Mosyon, se drwa tou sitwayen Seselwa pou ganny akse avek kredi.  I drwa tou sitwayen pou ganny proteze koman bann garanter.  Serten kondisyon lo loan e to lentere tro o i parfwa anpes serten sitwayen egzers sa drwa.  Sa sityasyon i menm parfwa pous dimoun ki bezwen en loan me ki pa zwenn bann kriter Labank pou al ver loan sharks ki abiz lo zot.  De lot kote bann garanter i osi merit proteksyon kont bann dimoun ki rod loan e pe azir an movezfwa.  Drwa imen i osi vedir drwa sitwayen pou ganny akse avek loan e zot drwa koman en garanter pou ganny proteze letan zot garanti en dimoun.

Mr Deputy, mon pe demann tou Manm Onorab pou koz an faver sa Mosyon.

Mersi Deputy, I beg to move.

Mersi.

 

MR DEPUTY SPEAKER

Bon, Mosyon in ganny prezante, okenn Manm ki oule segonde?

Onorab Pillay, proceed.

HON SEBASTIEN PILLAY

Mersi Mr Deputy, mon oule segonn sa Mosyon e mon oule dir 2 pti mo.

Mr Deputy Speaker, mon krwar sa Mosyon pe abord en size ki si ou regard otour nou dan lemonn, i en size ki’n ganny diskite, in ganny debate debate pandan bokou lannen e pandan bokou letan.  E an plizyer repriz mon krwar in annan bann mezir ki’n ganny pran par bann diferan zirestriksyon par bann Lotorite konsernen pou try – pou sey fer fas avek bann sityasyon e cope avekbann  lezot demann –e bann egzizans.  Rezon an det, mon krwar an det mon krwar en tel Mosyon nou bezwen eksplor byen kwa ki rol Labank Santral i bezwen zwe – ki rol bann Lasosyasyon Banker dan lekonomi e ki rol koman kliyan – sa dimoun ki met ou larzan Labank ou bezwen zwe.  Pou nou kapab fer sa  nou bezwen byen eksplor sa problenm pa zis dan son totalite – me regard bann diferan facet sa problenm ki fer ki nou annan sityasyon ki nou annan ozordi.

Pour mwan, i en keksoz ki konmsi which comes downto ki kalite servis ou donnen pour sa patron-az ki ou donn en Lenstitisyon Banker e lekel ki protez ou lentere koman en sitwayen an relasyon avek sa Lenstitisyon Banker?  E nou bezwen regard li from sa perspektiv osi.

Premyerman, rol Labank Santral li se pou act koman en regilater e annefe se li ki sipoze pe met lord dan Sekter Banker.  E se li ki set out bann diferan Polisi, Regilasyon ki annan pou fer avek lafason ki bann Labank i sipoze konport zot. E Lasosyasyon Banker li i a komans entermedyer kot i pou reprezant sa platform dan mon leksperyans pou mwan mon vwar li koumsa – i reprezant sa platform ki sipoze anmenn bann diferan sizesyon – sorti kot bann Labank, kot Central Bank e la zot find bann common ground pour zot anmenn bann Polisi e bann Regilasyon oubyen propoz bann servis ki pou vin par benefis popilasyon.  Be ki nou pe vwar?  Nou pe vwar deplizanpli dimoun pe reklanmen ki sa bann servis oubyen sa bann prodwi ki pe ganny ofer pa neseserman benefisye zot, akoz zot santi zot ganny kite an deor benefis ki sa bann servis petet ti kapab anmennen pour zot.  E prezan serten nou, nou  demann en kestyon fondamantal  e mon krwar bann Labank in bezwen analiz sa tre byen.  Lekel ki kapab annan en kont Banker ozordi konpare avek lepase? Si ou regard lepase ti zis en pti group dimoun ki ti kapab annan en kont Banker – ki alors bann Labank ti act avek tou impunity kot menm serten dimoun ti zis en restriktiv konesans pou annan en kont Banker dimoun ti napa – konesans pou ouver en kont Banker dimoun ti napa.  Me ozordi deplizanpli, dimoun pe ouver kont Banker ziska la tou dernyerman.  Tou Etidyan par egzanp ki ganny en allowance i ganny ankouraze pou ganny en kont Banker.  Ou kalkile i bann zenn ki pe komans al Lekol ki ler zot pou al travay sa bann kont Banker i gard menm patronaz avek sa Lenstitisyon Banker kot zot in ouver zot kont.  Me alors pour sa servis pour sa lwayote sa kliyan i demande serten servis ki alaoter, sa lwayote.  Esele mon krwar ki i annan en breakdown dan rol ki bann Labank petet i kapab pe zwe an plis an relasyon avek sa. Mon konnen i annan bokou bann Banker pa pou dakor avek sa ki mon pe dir me nou vwar poudir ozordi dimoun pe dir otreman ki sa bann servis pa alaoter sa ki zot ti ekspekte.

Annou pran serten legzanp.  Annou pran legzanp par egzanp en Etidyan ki annan en kont Banker avek Labank, son credit risk i veryhigh – in fek ouver en kont, e I basically prohibitive pou li kapab pran en loan.Me si par egzanp i ale par egzanp let’s say la nou’n entrodwir Liniversite – nou pe koz Sesel pe bouz devan – let’s say sa dimoun i deside al rod en Student Loan, i pou difisil pour li kapab ganny en Student Loan. Very difficult pou li kapab ganny en Student Loan akoz i pou bezwen serten sekirite, serten garanti ki pou ganny demande lo la ; e la sel garanti ki sa dimoun pou annan se probableman propriyeter son fanmir.  E kot lot problenm prezan pou vini se si son fanmir par egzanp, son manman, son papa let’s say i pran lakaz i met koman sekirite pou fer sa zanfan  ganny en loan, en Student Loan – let’s say i kapab ganny en Student Loan sa i sekirite, sa paran prezan pa pou kapab zanmen pran ankor en loan – i pou very restrictive pou li  kapab pran en lot loan pou li kapab al fer en lot keksoz. Unless sa Labank i aksepte pour li pran en second linemortgage lo sa lakaz – ki mon krwar pa  tou  Labank ki an faver sa.  Si i annan en movable asset par egzanp en transpor i  met son transpor an gaz – sa transpor i bezwen annan en serten laz.  I bezwen within en agerangemon krwar 2an a 3an me mon krwar pa plis ki 5an – mon krwar ouswa i annan en serten laz ki ganny mete akoz depresyasyon i ganny mete lo valer sa transpor.  So,ou kapab konpran ki mannyer i restriktiv malgre ki paran sa zanfan in kapab  in bank ek sa Labank tou son lavi – in met tou son savings dan sa labank e in ankouraz son zanfan pou ouver en kont ek sa Labank.  Savedir sa paran in ankouraz son zanfan pou vin en kliyan sa Labank – annefe in fer promosyon pour sa Labank.  E nou kapab vwar ki mannyer prezan i annan en mis-match bezwen sa servis ki pe ganny provided e nesesite ki annan out there e nesesite pour dimoun ganny akse avek serten kredi.

Mon pou donn ou en lot legzanp Mr Deputy Speaker.  Pran legzanp en dimoun ki pe fer lakaz.  Ozordi dimoun pe fer en lakaz ki tonm dan en serten income bracketi napa  en lot rekour apar ki al kot HFC.  I napa en lot rekour apar ki al kot HFC akoz ler i pou apros bann Labank Komersyal e ler sa dimoun i balans kou sa loan ki i pou’n  pran, at theend of the day lentere ki i pou’n peye pour saloan, pou sitan bokou ki sa dimoun li menm ki pou santi li dekouraze avan ki i al kot en Labank Komersyal.  E la kot en lot problenm i vini kot sa dimoun ler i al kot HFC la kantite dimoun ki pe al kot HFC pou ganny akse ek sa loan, i deza bokou.  Mon krwar si demen nou ale nou fer en analiz e nou regarde ki kantite dimoun ki pe apply par egzanp en Home Improvement Loan kot HFC en R50mil– ki sa dimoun ti kapab gannyen ek en Labank si  Labank ti met an plas en sistenm kot serten kategori kliyan i provide zot serten servis – mon konnen Labank i pa dan biznes fer social welfare oubyen ou ki mannyer ou kapab apel li, me solman mwan mon krwar Labank i annan en responsabilite sivik si ou pe viv dan lekonomi kot ou pe zwir serten gro profi pou ou kapab give back to that country – sa popilasyon – sa landrwa kot ou pe fer ou biznes.  Akoz at the end of the day HFC pa pou kapab cope ek tou dimoun ki pe vin kot li pou demann li loan. E ki nou vwar ki Gouvernman in bezwen fer – Gouvernman in  bezwen entrodwi lezot loan pour bann dimoun ki par lao 63an akoz zot ganny konsidere koman bann pedigrees. E en dimoun ki annan 63an e unless i en kliyan sa Labank – in en kliyan ki sa Labank i konsider li koman en high level client ou kapab dir sa – i pou very difficult pour li kapab ganny en loan unless i annan substantial assets par egzanp.

So, nou bezwen konpran ki sa Mosyon ki pe ganny demande ozordi i en directresponse sa ki dimoun pe dir ou out there.  A plizyer reprise Mr Deputy Speaker, mon vwar bann dimoun ki vin kot mwan – bann per fanmir oubyen en koup ki oule komans zot lakaz e zot dir ou poudir zot pe apply HFC e zot pe esper en kantite letan – e mwan mon konnen son semenn pase i vin ankor 4 koup in vin vwar mwan e pe dir mwan menm zafer.  Akoz tou dimoun i bezwen al kot HFC set akoz posibilite pou li ganny en loan avek HFC a en to pli ba i sel opsyon ki li i annan pou li kapab fer en lakaz, me solman at the end ofthe day mon krwar – fotespere bann Banker i konpran ler mon dir sa, me lot fason vwar poudir bann Labank pe poste substantial profits at the end of the year. So, how much from that profit ki zot pare pour zot redonn dan zot bann servis e re-buildsa konfidans ki dimoun i annan.  Mon konpran poudir be dimoun napa lot opsyon.Son lot opsyon se pran son larzan met anba son matla e la kot i pou envit en dimoun pou kas son lakaz pou antre anndan kot li.  Me mon kapab dir ou Mr Deputy Speaker, ki I annan plizyer dimoun ki mon’n koz avek ki pe konsider fer bann keksoz koumsa,akoz zot  dir ou be i pou met dan Labank konbyen lentere i pou gannyen?  I pa pou ganny okenn lentere, son larzan i konnen i kot li ler i anvi servi zis i servi.Me solman ou konnen sa i vi, i vin en risk pou li akoz i pe kit larzan kot son lakour e la i vin en risk akoz i pe ankouraz voler  oubyen burglar pou vin kas son lakaz.  So, mon krwar i annan tout en bann  keksoz ki konekte ek kanmarad nou bezwen met en perspektiv e sirtou mon krwar ki prezan nou bezwen vin mindful of lafason ki konteks pei in sanze. Konpar lepase lakantite dimoun ki ti annan akse ek en kont Labank –lakantite dimoun ki ti pe save zot larzan pou komans zot fanmir ti mwens.  Nou’n vwar deplizanpli bokou dimoun pe bouze sorti dan lower income to middle income. E sa bann dimoun prezan in vwar li restriktiv akoz  zot pa pe ganny akse ek bann Loan Schemes; akoz bann Loan Schemes parfwa ki bann Labank i ofer i tro restriktiv oubyen it’s too expensive.I stand to be corrected.Mon sweki Lasosyasyon Bankeri ava vin devan ava dir whether or not zot bann servis e zot bann prodwi ki zot pe provide i pa restrictive oubyen i pa tro ser. Me sa ki mwan mon pe vwar e sa ki mwan pe konstate that is the problem.

Me prezan let’s go back to the role of the regulator.  So nou avarecall Mr Deputy Speaker, ki Lasanble in pas serten Prozedlwa ki vreman enportan.  Par egzanp nou koz lo Secured Transaction par egzanp e nou’n pas sa Lalwa.  E sa Lalwa i en Lalwa en portan ki pou allow par egzanp si mwan let’s say mon en operater Taxi let’s say mon oule sanz mon loto dan plas al kot DBS, mon kapab aste mon lot loto koman garanti – mon loto i vin mon garanti  mon al kot mon Labank Prive i donn mwan en loan.Me how many Labank ki pe fer sa konmela?  Is it being practiced?Sa Lalwa in ganny pase e mon krwar nou bezwen  – ler nou pas en Lalwa rod en fason pour nou met li an aplikasyon.  I bezwen  benefisye dimoun.

Dezyenman, nou pe kozlo Hire-Purchase par egzanp.  A very good law. Gouvernman in met sa devan me nou bezwen vwar kote regilater avek bann Akter dan Sekter pa pe kapab enplimant sa Lalwa.  Akoz par egzanp ozordi let’s say mwan mon en operater Car Hire, mon oule sanz mon fleet loto.  Right? Mon pa kapab bezwen retourn ankor kot DBS – ki ti donn mwan en komansman pou reganny loanankor akoz DBS a donn en lot dimoun ki pe komanse.  Mwan  mon ariv en  nivo kot mon’n pratike mon oule sanz mon loto – mon fleet i kapab vin koman – mon kapab aste mon fleet lo Hire-Purchase. Me oli sa bann posibilite ki nou’n met an plas pour ki bann dimoun i kapab swiv. And that’s the role of the regulator e se samon’n dir ki i annan en dual role ki bann dimoun i bezwen zwe pou konekte ek kanmarad pou fer sir ki nou bring about bann keksoz enportan – signifikan ki improve lafason ki Sekter pe fer performen.  Otherwise ki pou arive?  Nou pou toultan perform parey nou ete e dimoun pou  kontinyen konplent.  And it will come a time kot dimounpou dir enough is enough.

En lot pwen enportan ki  mon oule koz lo la Mr Deputy Speaker, mon krwar i konekte ek sa ki nou pe koz lo la se Fiscal Policy, ok?Ozordi Polisi Monneter ki  nou pe practice se sa moping up of liquidity e mon krwar parfwa petet i favoriz bann Labank pou pa donn loan.Ou konpran?  Akoz si par egzanp en Labank i konnen poudir i kapab pe envesti dan bann Treasury Bills avek high returns par egzanp.  Mon pa en expertdan finans, me selman ki mon pou fer mwan en Labank mon annan R2OO milyon mon kapab envesti dan sa, mon pou envestir laba.  Mon konpran sa enteraksyon finansyel ki bezwen annan – as a laymen mon konpran li dan perspektiv. Be as a laymen mon pe osi demande ki ler mon al Labank fodre mon pe ganny akse ek kredi–pour mwan kapab fer keksoz.  Mon anvi fini rann sa Labank son loan. Me souvandfwa ou vwar poudir en kantite dimoun ki petet en Labank menm pa ti pou ekspekte pou re-pey son loani actually pe re-pey li pli byen ki en dimoun ki sa Labank ti ekspekte pou re-pey li. So, mon krwar i enportan ki nou komans regard sa akoz out there dimoun pe komans fristre – dimoun pe komans fatige avek sa sityasyon.  E zot pe turn towardsbann Banking Institutions ki Gouvernman in met an  plas.  Me sa bann lenstans ki Gouvernman in met an plas i for bann incubator systems;-par egzanp, SBFA i en incubator li, i pa sipoze pe kontinyen fer biznes grandi – epanouir.E si ou  regarde par egzanp ozordi ou koz avek SBFA ou pou vwar lakantite laplikasyon pour loan pti biznes ki i pe gannyen.  I pou nepli kapab cope. E ki nou realize, sa bann pti biznes par egzanp i kapab komans dan kominote i anploy 4,5 dan kominote e tir zot dan Drog, tir zot dan Lalkol i bann keksoz ki konekte avek  the Socio Economic implicationki annan e mon krwar se sa ki nou bezwen komans pran perspektiv lo la.  Mon dakor i annan bann diferan Polisi  finansyel ki baze lo bann teknik, ekonomis eksetera, eksetera. Mon konpran sa.  But at the bottom line lekel ki enportan sesa dimoun ki bezwen benefisye avek sa servis.  Sa dimoun i konnen poudir mon’n bank mon larzan avek Labank X apre 15an mon al Labank X apre 15an mon dir mon oule en loan R100mil ou pa vin demann mwan X,Y,Z,W, isi laba, pour mwan kapab ganny en loan ek ou. Me solman ler ti pou mwan ouver mon kont ti ok, mon larzan ti ok pou met dan sa kont. Akoz si nou dimoun e bann investors i komans perdi konfidans dan nou banking system, at the end of the day se sa ki pou ariveakoz mon krwar for too long our banks dan Sesel –pardonmwan pou dir sa ankor – for too long bannbanks dan Sesel zot in viv dan en comfort zone ki’n fer zot epanouir, grandi e grosi without realizing the implication of zotroleki zot annan pou zwe dan en lekonomi.  For too long.E souvandfwa zot in annan en over reliance lo Gouvernman pou li met an plas schemes e apre popilasyon i blanm Gouvernman – mepa realize poudir sa menm popilasyon pe blanm Gouvernmanyou’re part of the Government akoz zot Taxpayers contribute  to that Loan Scheme ki vini- the Taxpayers money contributeto DBS.  So, we shouldbe lookingat the other entity laba lot kote li be li ki i pe fer li? Ki son rol laba li?

Now, en lot pwen mon krwar ki mon pa oule tro long lo sa size, me solman mon en pe pasyonnen akoz mon’n vwar piblik resaman Mr Deputy Speaker, detrwar dimoun ki mon’n vwar resaman e  bokou dimoun ki’n  vin kot mwan I koz mwan lo sa issue e menm i annan dimoun ki dir mwan i pa kapab ganny garanter par egzanp. Be akoz?  En dimoun pou reluctant pou garantyokenn en dimounakoz i konnen ler i garanti sa enn li menm li i pa kapab pran en loandemen.  That’s one point.

The second point i garanti sa dimoun, Labank li i pa pou fer okenn lezot zefor pou al rod sa lot dimoun li.  Son risk assessment i stop kot ou sagaranter.  So, si sa dimoun ki’n garanti li i kapab annan 5, 10 biznes Labank pa fer okenn resers ankor plis ki sa li.  That’s it fini la.  I pou vin kot ou.  Prezan ou pou bezwen al tay deryer sa dimoun e mon konpran that’s your own risk ki ou pran pou garanti en dimoun.  Mon konpran the logic behind this.  But at the end of the day, Mr Deputy Speaker, i annan dimoun pa pou zanmen kapab pran loan dan sa pei unless ki Gouvernman i kontinyen met an plas subsidize Loan Schemes – sa dimoun pa pou zanmen kabap pran loan.  E bokou nou, nou pe fer en ta tapaz, nou pe kriy en ta koze, me annou regard byen ki pe pase.  Akoz ozordi i annan dimoun par egzanp ki pou li aste en transpor i pa pou zanmen kapab aste.  Malgre ki i kapab peye – i kapab fer byen i pa pou kapab fer li, ou konpran? E mon krwar nou bezwen realize poudir in ariv en moman pour nou konsidere –what can be done about this?

And the final point here Mr Deputy Speaker, e mon krwar ki Mosyon ler i pe koz Labank Santral -ler i pe koz Lasosyasyon Banker i pe koz as a collective ansanm.  I pa pe koz enn enpoz lo lot me i pe koz as a collective. Kwa ki bezwen ganny fer ansanm pour zot kapab improve keksoz.

E la mon pou koz lo bann servis ki ganny ofer avek dimoun.  Mon vwar poudir bann Labank i envestir bokou pou provide dan bann servis – me eski zot envestir as much dan zot Staff as well? Eski zot envestir dan training zot Staff? Dan renumeration zot Staff? Souvandfwa nou koz – on the other side of the mirror – nou koz nou sa refleksyon ki nou vwar ler nou al en Labank.  Me par deryer sa kontrwar zot vwar i annan en dimoun ki pe servi nou, i osi ki annan en fanmir.  Eski sa bann Staff lekel ki pe monitor pou vwar si within the banking sector bann Staff pe ganny well renumerated; – pe ganny bann terms and conditions ki enportan?  Akoz sa bann dimoun i travay en kantite as well. E eski sa bann Labank pe provide bann kondisyon travay pou favoriz dimoun konpetan pou travay within the banking sector?  Si ou al aletranze Mr Deputy Speaker, ou pou vwar poudir i annan en term ki apel – the golden parachute ki’n ganny servi bokou fwa kot i dekrir bann dimoun– bann Egzekitif ki ler zot kite Labank zot ganny zot de milyon Dolar milyon Liv Sterlen malgre ki en Labank i fer fait.  Mon kapab koz lo World Bank of Scotland. Pandan credit crunch ki ti arive an 2008 ki ti arive e son Egzekitif ti ganny peye en kantite larzan  e ti annan en outcry Langleter akoz sa.  Me ozordi mon krwar nou osi bezwen koz pou bann travayer ladan e mon krwar se sa rol Labank Santral pou antre e investigate e monitor whether or not si en  Labank i dir i pe supply servis A to Z – ki bann kriter ki i bezwen meet an relasyon avek sa servis ki i pe supply? Si mon vin Labank par egzanp – mon pe debout sepa konbyen letan pour mwan kapab tir mon larzan la – I mean ki kalite servis ou pe provide ek mwan? There are simple things as well ki bezwen ganny fer to improve the level of service which is given to the customer. E sa i tre trez, enportan akoz at the end of the day, sa dimoun ki vin la anndan, i pe ekspekte i annan en servis, akoz i pe rely lo en Lotorite – lo son  Gouvernman – lo Lotorite pou kapab speak on their behalf.  E mon krwar la se la kot rol Central Bank i antre.

So, Mr Deputy Speaker, i annan en kantite keksoz i kapab ganny dir lo sa Mosyon.  Mon pa pou al ankor la, mon pa pou  donn ankor plis detay.  E mon a donn lezot sans lezot dimoun pou koz lo la, me mon krwar poudir i en tre bon Mosyon e mon ti a kontan ki medya  – sa i en size ki enportan, ki zot kapab osi koz lo la e menm par egzanp fer en pe investigative reporting – al vwar la dan bann Labank ki mannyer bann diferan servis i ete – anmenn sa  lo frontline, fer dimoun konn en pe ki bann servis bann Labank i ofer.  Fer bann Labank vin pli proaktiv dan advertise zot bann servis as well. Mon krwar tousala i bann keksoz ki nou bezwen travay lo la pour nou improve lafason ki Sekter Monneter i marse dan nou pei.

Avek sa, Mr Deputy Speaker, mon oule dir ki mon pou a-port tou mon soutyen sa Mosyon.

Mersi.

 

MR DEPUTY SPEAKER

Onorab Fidera.

 

HON EMMANUEL FIDERIA

Mersi Mr Deputy Speaker.

Mr Deputy Speaker, mon remersi Onorab Jeniffer Jasmin en Ekonomis par profesyon, pou vin avek sa Mosyon – akoz mon krwar ki sa size pou permet nou fer en refleksyon profon e senser lo lenpak sistenm Banker lo lavi lepep Seselwa.  Size sa Mosyon pe trete enn ki tous preski tou fanmir Seselwa e mon eksprim mon swe ki Labank Santral e Labank Komersyal i swiv byen sa deba.  Pran not bann konsern ki nou souleve e adres sa bann konsern dan en dele letan rezonnab.

Mr Deputy Speaker, size sa Mosyon ki devan nou, se relasyon ant Labank Santral ek bann Labank Komersyal.  Mon oule tou dabor fer en remark.  Serten dimoun i riske dir ki Lasanble Nasyonal,  pa merit enterfer dan relasyon ant Labank Santral ek Labank Komersyal, akoz premyerman Labank Santral i endepandan e dezyenmman, akoz nou dan en lekonomi lib, marse lib e bann Labank Komersyal koman nenport ki biznes prive, i lib pou fer sa ki zot oule.  Mon oule koriz sa persepsyon akoz i fo.  Labank Santral ti ganny etabli anba en Lalwa ki’n pase par Lasanble Nasyonal.  Se Lasanble Nasyonal trwazyenm repiblik, ki ti pas Lalwa pou fer Labank Santral Sesel vin endepandan. Alors Labank Santral, i bezwen ekout bann Manm Lasanble Nasyonal. Se nou ki’n etabli zot e fer zot vin endepandan. Lendepandans i vedir ki Labank Santral i merit met lentere lepep Seselwa avan tou e refiz-e pour sibir okenn presyon ki al kont sa lentere.

Mr Deputy Speaker, lo size bann Labank Komersyal i vre, ki nou dan en lekonomi marse lib – me en lekonomi marse lib i mars dapre bann Regilasyon ki bann biznes enkli bann Labank Komersyal, i merit swiv.  Sa Mosyon pe senpleman demann Labank Santral pou azir dan en fason endepandan e pou bann Labank Komersyal fer biznes dan en fason ki zot Polisi pa penaliz serten sitwayen enzisteman.

Mr Deputy Speaker, Labank Santral i annan li 2 rol. Premyerman, se pou siperviz bann Labank Komersyal dan pei. E dezyenmman, se enplimant Polisi Monneter dan pei.  Bann Labank Komersyal ki lye avek Labank Santral atraver 2 fonksyon Labank Santral, zot bann aktivite i ganny sipervize par Labank Santral e zot azir koman bann azan Labank Santral vi, se ki zot ki prensipalman atraver zot Polisi Monneter, ki ganny deside par Labank Santral e zot ki enplimante.  Sa relasyon ant Labank Santral ek bann Labank Komersyal, i demontre klerman ki Labank Santral i annan en gran lenfliyans lo bann Labank Komersyal menm si zot biznes i prive.

Mr Deputy Speaker, atraver bann lannen ki’n pase, bann Labank in zwe en rol trez enportan dan lekonomi nou pei. Zot in anmas bann deposit ek bann sitwayen ouswa atraver lezot aktivite – apre zot ofer sa bann larzan an loan avek bann endividi oubyen bann Konpannyen pou envestir dan bann Sekter prodiktif. Lezot aktivite ki zot fer se aste foreigh exchange apre zot revann li lo marse pou zot ganny en profi.  E nou osi  nou’n vwar bokou Bureau d’echange ki dan sa aktivite isi dan nou pei.

Mr Deputy Speaker, nou’n kapab osi obzerve kot i annan plizyer fasilite ki’n ganny entrodwir isi Sesel. Plizyer outlet ATM machine, Internet banking. Nou’n vwar osi modernizasyon dan servis peyman. Lontan en check ti pran 3 zour pou ganny clear, ozordi sa i ganny fer dan en dele letan rezonnab.

Mr Deputy Speaker, Labank Santral i la pou protez bann deposit ki’n ganny fer dan bann Labank.  Si zanmen en Labank pe trouv li dan problenm atraver serten mezir ki Labank Santral i enpoze lo bann Labank Komersyal kot zot oblize kit 13 poursan zot rezerv koman sekirite si zanmen bann sitwayen i vwar zot dan problenm – parey in deza arive ek serten Labank isi dan Sesel. Menm ki i kapab ofer zot en laliny kredi pour zot fer zot sorti dan sa kriz finansyel.

Mr Deputy Speaker, i enportan note ki Labank Santral i bezwen travay anliny avek bann Regilasyon Enternasyonal. Sa Mosyon pe demande ki Labank Santral, i servi sa lenfliyans dan en fason pozitif – savedir dan en fason pou protez lentere lepep Seselwa.

Mon pou servi  legzanp pou eklersi mon pwen.  Letan Labank Santral i deside lans en Polisi Monneter, i byen ki i mazin son lenpak lo lekonomi an zeneral – sa ki nou apel lenpak makro ekonomik. Me fodre osi nou mazin son lenpak lo bann endividi.  Sa bann Ekonomis i apel li mikro ekonomik.  Mon dir sa akoz par ler bann Polisi Monneter i vreman annan lenpak negativ lo bann fanmir.  Pran ou par egzanp en Polisi Monneter ki pe tir bokou likidite dan lekonomi. Bann Labank Komersyal pou transmet sa Polisi lo zot bann kliyan par ogmat lentere lo loan e enpoz bann kondisyon ki fer li difisil pour ou ganny en loan. Sa mezir ki kapab bon pour pei me i tre fermal pour nou bann sitwayen. Pour serten sitwayen, sirtou bann ki pe pey en loan sa Polisi Monneter i ganny resanti an term pli gro morso saler son i al dan pou repey loan e mwens larzan pou li servi pandan le mwan.  Parfwa lentere i telman for ki i deranz Bidze lafanmir.  Mon demande ki Labank Santral i travay avek bann Labank Komersyal, pou devlop serten mekanizm ki protez bann travayer ki annan en reveni ki ba e ki bann pti Biznesmenn ki enn ler dan logmantasyon lentere ki zot osi zot soufer.

Dezyenm legzanp, Mr Deputy Speaker, i sa sistenm sekirite loan parey bokou bann lezot Onorab in koz lo la.  Letan en dimoun i al pran en loan, Labank i demann li serten sekirite pou asire ki Labank pa perdi son larzan.  Koman sekirite, Labank parfwa i osi demande ki sa dimoun ki pret larzan i osi annan garantor parfwa 1 – e parfwa 2.  Dan serten ka kot sa dimoun ki’n pret larzan in deside aret pey son loan e fer tou fason pou sov Labank – la Labank i al direkteman lo salary deduction lo sa garantor. I paret sa prosedir Lakour pou egzekit lezot sekirite parey pou sezi sa bann byen ki bann dimoun in aste avek sa larzan, i konplike.  Me i kler, ki parfwa Labank pa fer okenn zefor pou rod sa bann dimoun ki’n pran loan e fors zot re-pey-e.  Zot rod en solisyon fasilite e tonm lo garantor. Sa pou fer ki garantor i vwar li pe pey en loan ki i pa’n e ki pa’n benefisye li.  Garantor i pey lepokase pour bann preter malonnet.  Mon demande ki Labank Santral ek bann Labank Komersyal pou travay avek Lakour ek lezot Avoka, pou devlop bann mekanizm ki fer sir, ki en dimoun ki pran loan i repey li e sa lour pa  tonm lo garantor.

Mr Deputy Speaker, a sa pwen mon ti a kontan demann 2 pti keksoz – ki Labank Santral i travay ek Labank; ki zot met plis Kapital a dispozisyon bann pti antreprener; Labank Santral i rod en mekanizm pou vwar ki si Labank pa kapab reste ouver ziska en pti pe pli tar, akoz devlopman ki’n arive dan pei;  e bann Labank dan bann letan lafen-dimwan kot zot met plis Cashier pou rezourd sa problenm esper en kantite letan zot bann kliyan; ki bann Labank i ofer en servis de kalite pour bann kliyan par egzanp; en dele letan rezonnab pour en dimoun ganny en checkbook e en dele letan rezonnab pour en dimoun ganny en repons  pour en loan ouswa lezot tranzaksyon.  En kestyon Mr Deputy Speaker, ki mon ti a kontan demande, ki arive ek bann larzan ki dan bann kont abandonnen dan bann Labank?  Eski pa’n ler pour nou reviz prosedir ki egziste pou permet en etranze ki’n marye ek en Seselwa ki pe travay Sesel pou ouver sa kont en pti pe pli fasil? Eski bann Labank pe swiv Lalwa ? Pa in ler pour zot ogmant zot virzilans lo bann endividi ki depoz gro sonm larzan dan zot kont – ki napa laprev ou lorizin sa bann larzan?  Mon dir sa Mr Deputy Speaker, akoz souvandfwa Gouvernman ki ganny akize pou soutir larzan sal antre dan nou sistenm Banker.

Lot kestyon Mr Deputy Speaker, ki relasyon ki Labank Santral in etabli avek SIB ler i annan gro biznes etranze ki pe vin envesti dan nou pei?  Sa osi pour mwan, i enportan ki sa larzan ganny envesti dan pei i en larzan prop e kredib.  Avek sa 2 pti mo, mon pou vot an faver sa Mosyon.

Mersi Mr Deputy.

 

MR DEPUTY SPEAKER

Onorab Payet-Marie.

 

HON MARIA PAYET-MARIE

Mersi Mr Deputy Speaker.

Mr Deputy Speaker, sa Mosyon i enn ki tre enportan.  Ozordi Sesel pe koz lo pti biznes e lezot epanouisman. Napa okenn pti biznes ki komanse avek lentansyon pou reste pti.  Zot tou zot anvi grandi, anploy plis travayer e kree larises – pa zis pour sa ki dan biznes, me larises pour nou pei an zeneral.

Mr Deputy Speaker, larises e prensipalman larzan e propriyete. Pou kree plis larzan nou bezwen larzan.  Kote nou pou ganny larzan?  Labank i sa Lenstitisyon ki mandate pou pran larzan avek manm piblik e osi fer profi avek zot prosedir lenvestisman.

Mr Deputy Speaker loter Mosyon pe demande ki Labank Santral e Minister Finans i zwe en pli gran rol pour ki Labank Komersyal i zwe zot rol pli byen.  Konbyen fwa  nou tann Prezidan Michel pe sipliy avek bann Labank Komersya,l pou zwe en pli gran rol dan nou lekonomi par fasilitet kredi pour nou bann biznes – espesyalman bann ki pti.  Malerezman, laplipar sa bann lapel i tonm dan zorey sourd.

Mr Deputy Speaker, mon krwar ki se sa ki’n motiv loter Mosyon pou vin ek sa Mosyon ozordi. Parey nou konnen Guvernman pou kapab fer Labank komans zwe en rol serye ti bezwen entrodwir SME Scheme kot bann pti biznes in benefisye ek bann loan ek kondisyon favorab avek backing Gouvernman.  Menm anba SME Scheme nou’n vwar  dan ki fason rasyonnen ki Labank pe donn sa bann loan.

Mr Deputy Speaker, parfwa ou a dir ki Sekter  Banker i sel Sekter nou lekonomi, kot napa ase konpetisyon, akoz i paret ki zot tou zot dan zot comfort zone -parey Onorab Pillay in fer resorti. Mon krwar ki in plis ki ler, ki Labank Santral e Minister Finans, i zwe en pli gran rol pou fer Labank Komersyal  ekoute.

Mr Deputy Speaker, akoz?  Akoz an menm tan ki nou pti biznes pe kontinyen rod loksizenn pour kotinyen sirvir e agrandi, zot bann Labank Komersyal pe kontinyelman fer gro, gro profi.

Mr Deputy Speaker, permet mwan, pou donn enn, de legzanp dapre lenformasyon ki mon’n resevwar.  Pour lannen 2015 Barclays Bank ti fer R198 milyon profi avan Tax. Nouvobanque ti fer li R280 milyon profi avan Tax e MCB ti fer li R112 milyon profi avan Tax.

Mr Deputy Speaker, laplipar sa bann profi, apard ki pou Nouvobanque bann lezot Labank ki mon’n mansyonnen – Labank Barclays ek MCB, sa bann profi in kit pei.  Sa bann menm Labank zot kontinyen benefisye e sa bann pti biznes ki met larzan dan zot Labank, i bezwen kontinyen struggle.

Mr Deputy Speaker, eski sa i akseptab?  Non, i pa akseptab ditou. Eski i akseptab ki Labank Santral i zis asize e vin en ekspektater as if business as usual. Non, i  pa akseptab.  Eski i akseptab ki Minister Finans osi, i zis gete e pa fer nanryen menm si pa li ki regulate Labank?  Non, Mr Deputy Speaker, i pa akseptab.  Mon krwar ki sa 2 Lenstitisyon parey loter Mosyon in demande, i devret zwe pli byen zot rol pour ki pei i annnan en sistenm ki dinamik, parey dan serten lezot pei.  Mon demande ki Labank Santral  i rod tou mwayen e mekanizm pou fer sa bann Labank vin business-friendly avek tou kliyan.

Mr Deputy Speaker, eski Labank Santral par egzanp, pa kapab enpoz en maksimum lending rate pour tou Labank?  Eski Labank Santral, pa kapab egzize ki en minimum kantite larzan i ganny prete dan diferan Sekter?  Par egzanp en poursantaz zot portfolio dan pti biznes e pourquoi pas en serten poursantaz dan loan lakaz? E si zot pa achieve sa bann target, zot a kapab fer fas avek en penalty. Si nou arive fer sa Mr Deputy Speaker, nou pou vwar Labank pou bezwen oubyen oblize al rod kliyan pou donn loan olye kliyan vin rod zot.  E an menm tan, sa i ava ede pou kree plis konpetisyon ant bann Labank. Mon’n menm aprann ki i annan serten Labank ki prefere gard zot larzan a 0 lentere san envestir, akoz zot pa anvi pret ek nou Seselwa.  Sa pa akseptab ditou, Mr Deputy Speaker.  In ler  pour Labank Santral aret vin commercial-bank-friendly, me plito public and business-friendly akoz apre tou, zot accountable ek tou Seselwa.  Lo lot kote, eski Minister Finans pa’n ler pou li get bann Lalwa apropriye e fer azisteman neseser?  Par egzanp, eski i pa’n ler pou enpoz en Tax pli for lo profi Labank?

Ozordi nou lekonomi i for e pe vin bokou pli for.  Me menm sa malerezman, bann Labank pe zis rekolte e tou profi i reste pour zot.  Nou rekonnet sepandan bann risk ki petet Labank i bezwen pran, me a-lafen dizour zot toultan annan mekanizm an plas pou avoid risk oubyen annan bann solisyon apropriye pou rezourd problenm.  Nou vwar ki zis Gouvernman atraver son bann Lenstitisyon parey HFC ek SBFA, ki pe donn lamazorite loan.

Mr Deputy Speaker, par egzanp, SBFA an 2015 in resevwar anviron 900 demann pour loan pour anviron R13 milyon ; e an 2016 depi Zanvye ziska Me, SBFA in resevwar 344 demann pour loan, pour en sonm R54 milyon.  A son tour, nou’n vwar ki se Lorganizasyon parey HFC ki bezwen al pret an gro e avek en lentere ase eleve, pou re-pret bann kliyan.  I enportan pour note, ki HFC pe donn li en loan anviron R21 milyon par mwan e sa sif pe kontinyelman ogmante, akoz demann i kontinyelman ogmante.

Mr Deputy Speaker, in ler pour nou et realis.  Eski Gouvernman  pou kapab kontinyen satisfer tou sa demann pour loan dan nou pei?  Larepons se byensir, non.

Mr Deputy Speaker, pour konklir, ler mwan felisit loter sa Mosyon, Onorab Jasmin pou prezant en tel mansyon pou demande ki Labank Santral e Minister Finans i zwe en pli gran rol; ki Labank Komersyal i zwe son rol pli byen.

Mon rekonnet, ki i annan serten zefor ki pe ganny mete an menm tan bokou plis zefor i devret ganny mete, pour ki demann nou Seselwa ki’n leve e pe debourye – sa menm Seselwa ki kapab fer bokou plis, pou fer son biznes agrandi e kapab kontinyen benefisye dan en fason soutenab pour son fanmir e son pei.  Akse avek kredi i reste en defi.  Me avek tou defi i bezwen annan en solisyon.

Mr Deputy Speaker, mon krwar senserman ki where there is a will there is surely a way. An dot mo -si i annan en volonte pou fer en keksoz pli byen dan lentere nou pep, mon pa vwar okenn rezon akoz nou pa kapab fer li.  Mon demande Mr Deputy Speaker, i alors asiz ansanm e ansanm konsider sa ki pli byen e enportan pour nou pep.  Nou bann Manm Lasanble Nasyonal, nou vin isi dan sa Lasanble pou demann Kesyon – pou met devan pwenn-vi nou elektora  – nou frer ek ser Seselwa.  Alors mon demande ankor, ki otan ki posib tou nou pwen i ganny pran an kont e enplimante o pli vit posib, pou benefisye lepep Seselwa.  Annou fer li  pour lepep Seselwa.  Mon pou siport sa Mosyon, Mr Deputy Speaker.

Mersi.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mersi Mr Deputy Speaker.

Mr Deputy Speaker, Mosyon ki devan nou i pe demande ki Labank Santral avek Lasosyasyon Banker i repozisyonn zot pou pli byen reponn lepep Seselw. E la definitiveman set en bezwen finansyel.  Set en bezwen akse avek kredi – bezwen larzan – bezwen lamonnen, lamonnen parey Hudson Dorothee i sante.

Mr Deputy Speaker, ozordi tou keksoz preski i nesesit ki en dimoun – en travayer i annan en kont Labank.  Menm si ou bezwen en lasistans sosyal, sosyal osi i komans dir ou pour sa lasistans ki i pe donn ou ouver en kont Labank i a met laba.  Ou Pansyon osi i dir ou ouver en kont ou a met laba.  En boug i oule vol ou – deor i oule vol ou, zot teks ou ouswa zot pe anvoy bann mesaz – i dir ou sepa ou’n ganny en lotri laba ou ti annan fanmir laba deor – i dir ou dir ou kont Labank – i a anvoy sa ladan – pour li vol ou menm. Tou keksoz Mr Deputy Speaker, i nesesit en kont Labank.  Selman prezan nou, nou pe gete Labank letan nou, nou donn li nou larzan, nou, nou pa poz kestyon ki i al fer avek.  Nou konnen i envesti epi lafen lannen nou tande tel Labank – akoz i  vin kot nou menm Manm Lasanble sa –bann Labank i donn zot Rapor Finansyel – zot audited account e nou vwar in fer en kantite de milyon e de milyon profi.  I byen.  Me de lot kote, ki nou pe dir ek Labank atraver sa Mosyon, nou pe dir ek Labank ek bann Lenstitisyon Finansyel ki pret larzan dimoun, nou pe dir fer ki sa bann kliyan i ganny en pli bon akse avek kredi dan zot Labank.  Akoz Labank li, i pa pou donn ou kredi si ou pa annan kont ek li.  Ou pa kapab ou napa kont ek Barclays ou vin kot Barclays ou demann li kredi, i pou donn ou.  Ou pa kapab si ou napa kont avek Nouvobanque ou vini ou dir donn ou en kredi – donn ou en advance i pa pou donn ou. I fodre ou annan kont avek li.  E alor la, Mosyon pe dir Labank i pa fonksyonn lo li menm li, i annan lezot lenstans ki get li Labank – ki mannyer i pe marse dan en pei; akoz Labank i kapab koul en pei one time. Labank i kapab sov osi en pei. E la nou, nou pe dir Labank sov nou.  Bann Labank ki nou pe dir – bann Lenstitisyon Finansyel sov nou pep kot i konsern zot pti loan -akse avek kredi. E ki nou pe gete ler nou get bann – kont bann rikord bann Labank nou pe vwar poudir i annan 2 area, 2 risk ki Labank – bann Labank e Lenstitisyon Finansyel i pe fer tre, tre byen.  I annan loan pou Transpor se ki  loto e loan pour Lakaz.  Sa 2 risk Labank pa perdi.  Zot gannyen.  Alor letan nou pe gete sa 2 kategori zot pe fer en kantite profi – nou pe dir zot pa met presyon tro bokou lo dimoun.

Annou gete ki arive dan larealite, pour nou kapab konpran ki loter Mosyon pe sey demande e sa osi i a lev lizye Gouvernman – i a fer Gouvernman Egzekitiv, pli konsyan – sirtou Minister la Finans e pli konsyan – Labank Santral lo sa sityasyon.  En travayer, en zenn travayer i oule en loto.  I oule en loan loto i al kot son Labank, akoz letan in komans travay nou’n met presyon lo li.  Nou’n dir li ouver son kont pou li met son larzan dan son kont.  Prezan i en zenn li.  I pe get son demen.  I oule en lakaz. Ki arive? Zot dir li – lontan ti annan Gouvernman dan letan Parti Inik i donn lakaz bann dimoun ou pa bezwen ni kontribye – ozordi la nou dir li kontribye.  Nou dir li komans peye ou lakaz.  So, i konmans peye  pou li ganny son lakaz.  I tir lo son kont laba – lo son saler. E  prezan li sa zenn i anvi en transpor li osi.  I al kot son Labank, i demann en loan pou aste en transpor.  E la ki nou vwar – en senp loan transpor Mr Deputy Speaker, Labank i demann li garanti isi, garanti laba – tou kalite pledge par kote. Me sa boug pou mor. E alor i demann li osi garantorgarantor an plis ki sa bann pledge – an plis sa bann garanti, i demann li en dimoun pou vin garanti li ki annan en lot kont ankor Labank.  Labank pa fini la pour sa pti loan loto ki sa zenn pe demande, ouswa sa dimoun pe demande.  Labank i dir li – ou bezwen pran en Mortgage Insurance. En Mortgage Insurance Mr Deputy Speaker, se pour ki si sa boug i mor son Lasirans i pey Labank  pour son loan – take note of that. Labank pa fini la ek li.  Labank i dir ou pran en Comprehensive Insurance pour sa transpor. Savedir i bezwen pran en Lasirans Comprehensive si an ka sa transpor i ganny aksidan pour li pey Labank pou li rann Labank sa larzan – an ka i annan tor; akoz si i annan rezon se sa lot dimoun ki annan tor ki pou peye – son Polisi pa pou ganny afekte.

Labank pa fini la Mr Deputy Speaker.  Labank  i dir ek sa zenn la – ek sa dimoun – i dir ou bezwen kontribye sa 20-25 poursan kontribisyon personnel Mr Deputy Speaker. Be la Labank i nepli rezonnab. Me kote sa dimoun pou gannyen? Me nou pe trangle nou Seselwa.  Nou pe trangle nou senp dimoun.  Nou lepep – nou pe trangle nou lepep. I pa pou kapab epanouir – i pa pou kapab devlope – i pa pou kapab avanse Mr Deputy Speaker.

Mr Deputy Speaker, sa mon pe koz ou lo loan loto.  I worse lo loan lakaz ki Labank i fer bokou, bokou larzan.  Annou gete ki arive avek loan lakaz.  En zenn garson- en zenn dimoun- en travayer li in save son larzan oubyen son fanmir in donn li en bout later – son later i lo li – i annan son bout later.  Oubyen in ganny li atraver bann plan Gouvernman ki annan pou ed nou dimoun; e li i la kot Labank i oule en loan pour son lakaz.  Mazinen Mr Deputy Speaker, i en loan pour son lakaz i pou tir fardo lo Gouvernman.  Gouvernman i annan en responsabilite pou donn shelter dapre noou Konstitisyon – tou bann dimoun otan ki posib.  E Gouvernman i vwar li en challenge pou li kapab donn shelter, donn lakaz tou dimoun.  I difisil – pa ankor kapab donnen ziska konmela.  I seye. Pourtan lakaz en kantite in fer dan sa pei.  Me selman alor, sa bann Lenstityson  Finansyel, i la pou ed Gouvernman.   Se sa ki Gouverman i annan en rol ki i zwe vizavi zot zerasyon – zot kontrol. Nou  bezwen gete ki pe arive.  Se sa ki  ou annan en Labank Santral ki tir bann Polisi; i gete ki Labank pe fer, si pa pe al an tro. Ensidswit.  E alor pour ki sa bann Labank, sa bann Lenstisyon Finansyel zot zwe en rol – en rol enportan pou ed Gouvernman –desarz sa resonsabilite pou donn lakaz dimoun. E bann dimoun alor, i pran zot responsabilite – ki annan en kont Labank i vin kot son Labank – e i dir ek son Labank – la mon annan en bout later – la mon annan mon plan- mon lakaz e mon plan in aprouve par nou bon Planning Authority e alor ed mwan pou ganny en loan. Annou gete la alor la osi ki Labank i fer.  Labank i fer li pran tou sa kalite pledge, ankor – tou sa bann kalite garanti, ankor – tou sa bann kalite lezot garantor ankor.  E Labank i dir li ou bezwen met kontribisyon finansyel ladan – ou personal contribution – ankor 20 poursan sepa  25 poursan.  Mr Deputy Speaker, ankor ennfwa mon poz la kestyon.  Kote sa dimoun pou gannyen? It’s impossible. Dan serten ka i vreman nou pe touy nou dimoun – nou pe trangle nou dimoun.  I pa akseptab e nou Lansanble isi i kondann sa bann keksoz. I nou dir avek Gouvernma lev ou lizye al gete ki bann Labank pe fer. E nou demann ou fortman; zwe en rol Gouvernman akoz parmi sa bann Labank la ou annan osi ou bann Labank. Ou annan osi bann Labank ki ou shareholder. E nou pe dir ek Gouvernman – Egzekitiv, pran ou responsabilite – al gete ki pe arive kot sa bann Labank ki ou annan shareholder, akoz zot pe touy nou dimoun – zot pe trangle nou dimoun – zot pe anpes nou dimoun devlope.  E ki ou vwar la ki i fer alor?  Apre tou sa ki in demann ek sa dimoun, i dir li osi pran en Mortgage Insurance parey in pran pou loto la, i pran enn osi pour lakaz.  I dir an ka  ou mor pour ou piti pa ganny burden – pour ki Lasirans i a pey Labank sa ki ou reste dwa.  I  dir li osi ou pran en Lasirans Lakaz pou fer sir si annan domaz ki arive avek ou lakaz pa Labank ki pou peye – Lasirans i a peye.  Fantastik.

Mr Deputy Speaker, kestyon ki ganny poze i senp. Ler sa boug i vin demann en loan lakaz – en loan pou fer lakaz – ler sa lakaz in fini, sa propriyete – ki enkli prezan sa later ek sa lakaz lo la, son valer in bokou plis ki sa loan ki sa boug ti demande.  E alor dan en ka kot Labank i bezwen – si sa dimoun pa kapab re-pey son loan pour en serten rezon Labank i oule re-met lasezi lo sa lakaz ki in pledge – in pledge ek Labank – sa propriyete i enkli son lakaz ek son later. Me i sifi.  I sifi. Labank pou tir son larzan e i pou rester sa dimoun larzan. Akfer ou bezwen pran kontribisyon ek li? E kestyon i demande la; akfer Labank pou bezwen vin pran ankor ek li.  E la ki nou pe demann Gouvernman poudir sa la, i pa avek zis ek Barclays sa. I ariv ek son HFC tou.  Nou pe dir Gouvernman ouver son lizye lo sa bann Lenstitisyon ki annan around us. Sa bann Lenstitisyon Finansyel depi son Credit Union, son DBS, son SBFA, son HFC, son Nouvobanque, Seychelles Commercial Bank e lezot Labank prive.  Tousala i pe donn sa ki pa byen nou dimoun.  Mon pa oule servi lezot mo – ki pa bon pour dimoun sa ki pe ganny fer dan la pratik, Mr Deputy Speaker.

E ou konnen Mr Deputy Speaker, alor nou pe dir avek Gouvernman fer li vin pli senp – ale ou ki Labank Santral i dan ou lanmen – ki oversee sa bann Labank koz ek zot – sirtou sa bann parey mon’n dir taler ki ou annnan share ladan. Ou dir ek ou en shareholder – fer koumsa – pa fer koumsa.  Fer parey nou pe dir la. Ou pa pou perdi de tout fason, akoz i annan senp keksoz pour ou fer avek sa dimoun ki vin pran en kredi ek ou.  (1) ki swa en loan transport ki swa en loan pour lakaz, ou zis dir li i bezwen vreman pran en Mortgage Insurance. Sa i normal an ka i mor i pa ankor fini peye – ou pa kit burden pour son piti – la Lasirans i vini i pey Labank.  Sa i fantastik.  I bezwen egziste.  En Comprehensive Insurancer pou loto – pour transpor oubyen en Lasirans normal pour lakaz; sa osi i bezwen.  I en nesesite.  Me apre pledge lo sa loto oubyen pledge lo sa propriyete – sa lakaz ek sa later. I sifi.  Pa bezwen ou fer li fer en kontribisyon personnel.  I napa Mr Deputy Speaker.  I napa e la prezan leten i napa pour son lakaz i re-tay kot Gouvernman e i dir Gouvernman lakaz prezan ou bezwen donn mwan; sansan ou ti’n tir sa burden lo ou.  Nou ti a kapab en lot ki pli dan bezwen.  I ti a kapab ede pour ki nou pei i avans pli byen devan e al pli lwen e ki nou pep i a santi vreman i annan en Gouvernman ki dan zentere lepep.  La ki mannyer i ete konmela la, sa bann Labank ki mannyer pe fer, i pa dan zentere lepep. E nou, nou pe dir fortman, Prezidan ek Lekip  get en kou sa zafer de pros, akoz i pa dan len-te-re lepep. E nou pe dir nou Lasanble, nou ava – apre sa Mosyon,  nou pou pran sa bann pwen enportan dan sa Mosyon; en rezimen sa Mosyon – mwan mon pou fer li mon responsabilite koman Leader Zafer Gouvernman, mon pou anmenn kot Prezidan, mon pou dir li lala ki in dir dan nou Lasanble, ou’n anvoy mwan laba pour en travay, mon pe vin avek serten keksoz ki in ganny dir dan nou Lasanble, pour mwan donn ou pou dir – lala ki Gouvernman i devret fer koumsa ou kapab fer ki i pe fonksyon sa Gouvernman; akoz i Gouvernman Lepep ki o pourvwar la – ki pe fonsyonn dan zentere lepep.

Mr Deputy Speaker, ou vwar sa ki nou pe dir la, ozordi i pa zis pou lakaz.  I annan en loan lala ater la ek Labank la.  Loan pour bann zafer Lanvironnman nou Prezidan lot zour in dir, bann dmoun ki annan bann devlopman pou fer dizon – pe netway semen oule pran bann keksoz ki pa pou servi bokou delwil ki pou konmsi environmental-friendly, oubyen ki pou servi bann zafer solar system sepa kwa la – bann lenerzi soler ki konmsi nou  pa pou polye lanvironnman i annan bann loan Spesyal Labank i sipoze donnen ki lentere pa sipoze for lo la – preski nanryen ditou.  Be pa tou dimoun ki konnen sa bann zafer.  E Labank osi pa dir nanryen li. Sometime, nou Minis pour Lanvironnman mon krwar i devret vin dan nou Lasanble dir nou en pti pe keksoz; par egzanp olye Kestyon i ava vini donn en Statement. Mon krwar i devret vini eksplik nou. Prezan tou dimoun a tande, akoz labank pa pe zwe son rol li.  Labank pa pe dir nanryen li – akoz manke lentere la i ba. I pa pou ganny bokou.  I pa dir nanryen.  Be  nou bezwen gete.  Nou bezwen pe poz kestyon e pe get tou sa bann keksoz.

Pour fini, Mr Deputy Speaker, ou vwar Labank i devret osi servi lespri byen – konmsi son bann Manager i bezwen gete en dimoun i vini i vin pran en pti loan ek ou – pa bezwen ki ou al demann li 4,5 garantor. Sa boug i pe travay li – i en travayer- i annan son Pansyon laba kot Fon Pansyon. I peye.  I annan son larzan kot Fon Pansyon.  Servi sa larzan kot Fon Pansyon pour sa travayer ki vin rod en loan ek ou la – fer sa vin koman en collateral pour sa loan. Oli problenm?  Oli problenm Mr Deputy Speaker?  Si nou ti pe servi byen nou lespri – si nou ti pe konmsi get en pti pe pli lwen ki zis get sa gro profi ki devan nou – si nou ti pe mazin lentere nou pep – lentere sa bann ki bezwen kontinyen trimouse, nou ti pou vwar poudir i annan fason pli fasil pli byen, pli friendly ki nou kapab fer letan nou pep i oule kredi avek son Labank ki i met son larzan ladan.

So, i sa bann pti keksoz ki nou tou nou devret  nou devret pe vwar.  Gouvernman i devret pe vwar – Labank Santral i devret pe vwar e  i  pe met presyon lo Labank normal – Labank Komersyal pour ki i kapab konmsi fer ki nou bann dimoun –nou travayer ki pe debourye, ki pe kontribye dan nou pei, i kapab gany sove par sa bann senp keksoz – bann senp Scheme – bann senp fason – pa ni konplike pou li kapab ganny son loan pou li osi devlope. I a ganny son pti transpor i a ganny son lakaz – son pti biznes i ava kapab osi devlope e i pa ava ankoler, i ava happy.

Mersi bokou Mr Deputy Speaker.  Mon pou siport sa Mosyon.

 

MR DEPUTY SPEAKER

Right of Reply Onorab Jasmin.

 

HON JENIFFER JASMIN

Mersi Mr Deputy.

Mr Deputy, premyerman les mwan remersye bann Manm koleg Onorab ki’n koz an faver sa Mosyon e osi lezot Manm ki pou a-port zot sipor atraver zot vot pour sa Mosyon.  Mon krwar Lasanble Nasyonal ki reprezant lavwa lepep, in reflesir e diskit a-ot-vwa lo en size ki tous tou Seselwa.  E atraver sa Mosyon, mon swete ki bann Labank Komersyal swa endividyelman ouswa kolektivman atraver zot Lasosyasyon zot a pran kont  desizyon ki nou bann Manm, nou’n pran ozordi e zot a reviz zot bann Polisi lo zot bann loan e servis ki zot ofer, dan en fason ki zot servi dan en fason pli byen e pli zis lepep Seselwa.

Mr Deputy, Sesel i en pei ki annan en lekonomi ki pe modernize. E sa i vedir osi ki tou Sekter lekonomi  osi i bezwen bouz ansanm anver sa modernizasyon;e vin pli inovativ. E sa i konsern Labank Komersyal ki size sa Mosyon pe touse ozordi.  E ki zot rann zot kliyan en servis ki pli alaoter.

Mr Deputy, isi dan sa Lasanble, nou’n fer ozordi plizyer kontribisyon – rekomandasyon ki mon swete bann Lazans, tou bann Akter konsernen i pran li dan en fason pozitif.  E parey nou’n dir, Gouvernman i zwe sa rol fasilitater. E Gouvernman Parti Lepep, pe fer bokou pou zwenn laspirasyon  pep Seselwa. Me nou bezwen realize ki i annan en limit ki Gouvernman i kapab fer.

Zis pou sit 1,2, legzanp ki Gouvernamn Lepep in fer atraver sa Lasanble osi.  Nou’n pas Lalwa Hire-Purchase. I annan bann Schemes ki pou bann mwayen ek pti lantrepriz. I annan Lazans pour bann pti e mwayen biznes SBFA. I annan 2nd Housing Scheme. E resaman Presidan Larepiblik in lans sa Scheme pour en group dezavantaze e sa se efektiveman sa bann Scheme pour bann Pansyonner.  E i annan osi Smart Subsidy lo loan lakaz e mon ti a swete ki pep Seselwa i vwar lekel ki vreman met ‘Zonm o sant devlopman e sa se byen Gouvernman Lepep.  E nou bezwen rekonnet ki Seselwa i en pep ki anbisye.  E atraver sa Mosyon nou pe demann Labank Komersyal atraver Labank Santral, pou ede liber potansyel nou bann Seselwa, afen ki zot ava realiz zot rev.

Mr Deputy, sa Mosyon  i demande ki Labank Santral i al osi en pe pti pe pli lwen. E dan lespri legalite, loportinite ki nou bann reprezantan Parti Lepep, nou pe demande ki Labank Santral avek Lasosyasyon Banker, i repozisyonn zot; pran bann rekomandasyon e reponn pli byen bezwen lepep Seselwa.

Avek sa Mr Deputy, mon a remersye ou.

 

MR DEPUTY SPEAKER

Bon, lo sa Mosyon nou pran en vot.  Tou bann ki an faver lev lanmen.  Okenn Manm ki kont? Mosyon in ganny aprouve par en gran mazorite.

E avek sa Lasanble i ava adjourn e nou a rezwenn Mardi prosen le 28 Zen.

 

(ADJOURNMENT)