::
Home » Verbatim » 2016 » Sitting of Tuesday 8th March, 2016

Sitting of Tuesday 8th March, 2016

NATIONAL ASSEMBLY OF SEYCHELLES

Sitting of Tuesday 8th March, 2016

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.

Ozordi dan Galeri, nou annan nou en group etidyan ki sorti Seychelles Institute of Teachers Education.  Nou swet zot osi la byenveni parmi nou.

Avan nou komans avek nou bann Kestyon e parey nou konnen ozordi se Minis Meriton ki pe vin reponn plizyer Kestyon konsernan son Minister – mon ti oule senpleman swet Bonn Fet tou bann Madanm ki dan nou Lasanble Nasyonal.  Parey zot konnen, nou enn bann Parlman avek pli o poursantaz reprezantasyon Madanm.  Pa zis dan Lafrik, me dan lemonn an antye: preski 48 poursan.

Mon oule osi swet Bonn Fet: ler mon get anler, mon vwar zis Madanm konmsi.. I annan garson la anler parmi bann etidyan?  I annan zis 1 ok.  I annan zis 1.  So, ankor nou vwar lafors bann Madanm partou ozordi.   Mon oule swet zot osi Bonn Fet.

E parey nou konnen ki Madanm i pilye sosyete Seselwa; san Madanm nou fouti.  Fransman mon a dir… E alors mon krwar, ki zot bezwen e merit sa Zournen, sa Lafet e ki zot pas tre byen zot Zournen.

An vi ki i en lokazyon spesyal, mon ti a donn laparol le 2 Leaders, pou dir pa bokou mo, akoz nou annan plizyer Kestyon devan nou lo sa size Madanm e lefe ki ozordi i Zournen bann Madanm.  Mon krwar ki nou ava komans:-malgre ki toultan nou komans avek ou, ozordi an vi ki lafet bann Madanm, nou ava komans avek en madanm.

So, Onorab Marie-Antoinette Rose.

HON MARIE-ANTOINETTE ROSE

Mersi Mr Speaker.

Bonzour Mr Speaker.  Bonzour tou dimoun ki a lekout.

Mr Speaker, mersi pour sa pti loportinite.  Pour mwan osi a mon tour lo non mazorite dan Lasanble Nasyonal e sirtou lo non bann Madanm dan Lasanble Nasyonal, pour nou remersi ou pour sa zoli roz ki nou’n gannyen bomaten koman nou’n arive.  Mersi pou rekonnet nou zefor e travay ki nou fer isi dan sa Lasanble.  E mon ti a kontan osi lo non kote mazorite, swet tou bann Madanm en zwaye Women’s Day.  I en Lazournen Spesyal, me i osi moman pou reflesir lo bokou travay ki i annan ankor pou fer an sa ki konsern lemansipasyon bann madanm: en target 50/50 par lannen 2030: ki mon krwar i en kantite travay pour nou fer.

Mon ti a osi kontan sezi sa loportinite, pour nou salye 2 madanm ki’n kit nou. Me 2 madanm ki’n pilye nou sosyete e sa se Madanm Joyce Lepathy ek Madanm Melanie, ki’n kit nou semenn pase.

Mersi Mr Speaker.

MR SPEAKER

Onorab Pierre, mon mazinen ou  annan en kantite pou ou dir lo Madanm.

(Laughter)

HON DAVID PIERRE

Mersi, Mr Speaker. Bonzour.

Bonzour tou bann Manm Onorab.  Bonzour Minis avek ou delegasyon.  Bonzour tou bann ki dan Galeri e tou bann ki a lekout.

Mr Speaker, mersi pour sa loportinite malgre ki i annan bokou pou dir, mon konnen poudir letan pa permet; me selman premyerman tou dabor les mwan permet tou bann Madanm Seselwa: tou bann ki parmi nou ozordi bann Manm koleg Onorab, bann ki dan Galeri, me tou Seselwa partou kot zot ete en bonn Zournen e en Bonn Fet.

Mr Speaker, mon swe senser, se ki mon ti ava voudre ki partou dan lemonn, bann madanm i ganny sa loportinite pour zot kapab ganny empowered, pour zot kapab attain equal status ki bann zonm dan sosyete; e pou zot ganny respekte as such. E mon swete ki Tenm Nasyon Ini, i ava ganny attained within lannen avan ki nou ariv lannen 2030.  So, Bonn Fet bann Madanm e bonn sans dan tou sa ki zot fer e mon swet zot sikse touzour.

Mersi Mr Speaker.

MR SPEAKER

Mersi bokou.  Bon nou ava komans avek bann Kestyon e nou ava komans avek ou menm ou Onorab David Pierre.  Kestyon limero 11.

HON DAVID PIERRE

Mersi ankor, Mr Speaker.

Mr Speaker, eski Minis i kapab enform sa Lasanble, si son Minister, i annan plan irzan pou reget dan kondisyon travay bann Homecare’s kot Gratwite, Konpansasyon e Saler Minimonm Nasyonal i ganny enkli koman parti zot package?

Mersi Mr Speaker.

MINISTER VINCENT MERITON

Mersi Mr Speaker.  Bonzour Mr Speaker.

Bonzour tou Manm Onorab.  Bonzour tou bann zenn Ansenyan ki isi anler dan Gallery e bonzour tou dimoun ki a lekout.

Mr Speaker, mwan osi mon ti a kontan servi loportinite pou swet tou bann Madanm Bonn Fet: be mon a rezerv sa pou plis detay taler a lafen kot mon pou annan en Deklarasyon avek ou permisyon.  Mersi Onorab pou ou kestyon.

Mr Speaker, swivan lanons fer par Prezidan Michel dan son Diskour Leta La Nasyon, nou pe propoze avek Gouvernman, ki allowance bann Carer i ganny ogmante pou vin lo en saler minimonm.  Bann detay ava ganny donnen pli tar ler nou fini travay lo la.

Mr Speaker, mon ti a kontan osi anonse, ki an se moman nou pe komans fer en travay aprofondi lo Scheme bann Homecarer dan son totalite e apre ler sa legzersis i ava’n terminen, ler bann desizyon i ava’n ganny pran, nou a vin devan, devan Lasanble pou kapab donn plis detay.

Mersi Mr Speaker.

MR SPEAKER

Onorab Pierre, okenn siplemanter?

HON DAVID PIERRE

Mersi Mr Speaker.

Mr Speaker, malgre sa ki Minis in dir mon konpran, be selman mon ti a kontan si Minis i kapab a sa pwen, petet donn nou en pti pe detay lo: eski bann konsiderasyon parey Konpansasyon e Gratwite pou osi form parti sa plan ki Minis i dir mwan zot pe met ansanm pour le moman.

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, parey mon dir in en travay aprofondi ki pe ganny fer e ler nou a fini, akoz i annan en kantite laspe ki nou pe gete.  E le moman nou a fini, nou a vin isi pou donn en detay:  i ava enkli tou keksoz.

Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.  Bonzour tou Manm Onorab.  Bonzour tou bann dimoun dan Galeri.

Mr Speaker, dan kad zefors Gouvernman, pou amelyor package bann Carer, si dan lavenir Minister, pe mazin annan en mekaniz an fors, pou siport bann Carer sirtou ler zot pe rod loan, akoz dan bokou bann sirkonstans zot rankontre difikilte, sa bann Lenstitisyon i demann zot pou annan en co-applicant; ki sirkonstans ozordi, i tre difisil pou ganny en co-applicant: e si Minis osi i kapab enform sa Lasanble si dan lavenir son Minister pe mazinen ki ler ki bann Carer i travay, i ganny agrandi, ki serten dimoun i ganny Carer aswar, akoz zot demann i aswar, non pa zis sa 8er 4er.

Mersi.

MINISTER VINCENT MERITON

Mersi Mr Speaker.  Nou ava pran konsiderasyon tou sa bann Demann ki ou’n met devan Onorab.  Me selman sa ki mon konnen, se ki si en Carer i bezwen en loan, i annan serten difikilte, nou pa bezwen ezit-e pou pran kontak avek lofis CEO Mr Simeon, nou kapab adres serten size, pou antretan ki nou finaliz sa travay ki nou pe fer.

Mersi Mr Speaker.

MR SPEAKER

Onorab Ghislain.

HON CHANTAL GHISLAIN

Mersi Mr Speaker.

Mr Speaker, eski Minis i kapab enform sa Lasanble, si i dan plan son Minister ouswa Gouvernman, pou osi enkli Carer koman en karyer Profesyonnel, pour ki sa bann travayer zot osi zot kapab benefisye avek tou sa bann package.

Mersi.

MINISTER VINCENT MERITON

Mersi Mr Speaker.

Mr Speaker, parey mon’n dir, tou sa bann Kestyon i ava ganny reponn, le moman nou fini fer sa legzersis e nou pe pran bann konsiderasyon, bann pwen ki zot pe dir an konsiderasyon.

Mersi Mr Speaker.

MR SPEAKER

Bon, nou a pran lot Kestyon Onorab Mirena Souris, BeauVallon, Kestyon limero 12.

HON MIRENA SOURIS

Mersi Mr Speaker.   Bonzour Mr Speaker.

Eski Minis responsab pour Zafer Sosyal ek Devlopman Kominoter, i kapab enform sa Lasanble, si i annan plan pou revwar alokasyon Sport o nivo distrik?

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, mon Minister in resevwar R1.13 milyon comme lasistans pour bann Lekip Sportif, ki operate dan distrik.  E sa i parey Bidze ki nou ti gannyen lannen pase.  Ladan alokasyon pou bann Disiplin i comme swivan.

Foutbol premye Divizyon R13 mil par Lekip.  Foutbol lezot Divizyon R8 mil par Lekip. Beach Football R6 mil par Lekip. Youth Team R4 mil.  Volleyball premye Divizyon R8 mil. Volleyball lezot Divizyon R6 mil, Basketball premye Divizyon R8 mil. Basketball lezot Divizyon R6 mil. Netball, Handball, Hockey, Badminton R3500.  Domino, Judo, Karate, Bisiklet, Atletik, Tenis de tab, Bokse, Petank R3 mil.  Spor de mas R3 mil par distrik.  Donk nou alokasyon total pou sa 134 Lekip ki annan dan 25 distrik enkli Perseverance, i fer nou en sonm R911,500 mil, En lot R388,500 mil i ganny dedye pou Transportasyon e i ganny partaze ant sa bann distrik, baze lo zistans e lo kantite Lekip ki i annan.  Answit anba alokasyon Bidze nou Departman i osi ganny R205 mil pour Lasirans e R50 mil pou anrezistreman bann Lekip e sa i ganny fer direkteman par Departman.

Mr Speaker, parey nou kapab realize, i enposib pou Minister e Gouvernman, kapab fourni tou le 134 Lekip avek tou bann materyo e lekipman, bann resanz ki neseser pour zot kapab perform byen.  Sa ki nou donnen, i en kontribisyon senbolik me avek legzistans TAX CSR, posibilite i annan pou kapab ganny plis reveni pou ogmant bokou plis sa ki Gouvernman, pe donnen.  E deza i pe ganny fer dan distrik e i annan serten diskisyon ki mon Minister, pe pran vizavi sponsorship, ki apre once i terminen, nou ava ganny sans brief Lasanble lo la.

Mersi Mr Speaker.

MR SPEAKER

Onorab?  Onorab Souris.

HON MIRENA SOURIS

Mersi Mr Speaker.

Anliny avek larepons, eski Minis, i kapab eksplik sa Lasanble, ki rol sa Fon Spesyal ki pou ganny kree pou devlopman progranm dan distrik, ki ganny trouve dan Manifesto Parti Lepep 2015 pou zwe, pou ede anbelir sa bann alokasyon sportif?

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, sa Fon Spesyal ki nou pe koz lo la, i en linisyativ ki’n met devan e Prezidan i ti koz lo la osi dan Diskour Leta La Nasyon.  I konplemant sa travay ki pe ganny fer lo nivo distrik parey ki mon’n dir.  Me i en Fon kot nou pe envit: Gouvernman, i met serten sonm e kot Sekter Prive i ganny envite li osi pou zwenn nou, pour nou kapab gete.  Nou pran serten proze oubyen serten progranm spesifik, pa neseserman bann progranm ki pe pase dan distrik, parey nou konnen: me en bann progranm spesifik ki nou kapab asize atraver bann kriter, nou kapab met devan pour nou kapab ed bann progranm oubyen proze spesifik, pour ki bann zenn i kapab benefisye.

Mersi Mr Speaker.

MR SPEAKER

Onorab Samson.

HON DEREK SAMSON

Mersi Mr Speaker. Bonzour.  Bonzour tou dimoun; bann envite dan Galeri.

Mr Speaker, mon ti a kontan demann Minis, si son Minister dan lefitir pe mazin anba sa alokasyon pou spor dan bann distrik, enkli Bidze pou mentenans bann fasilite sportif ki distrik i ava kapab entertain li menm pou repar par egzanp Anse Royale, Court tenis kase, Court ki anba difikilte – problenm: e si i kapab partaz ek nou, konbyen larzan son Minister, i balanse pou mentenans bann fasilite sportif dan bann distrik.

Mersi.

MINISTER VINCENT MERITON

Mersi Mr Speaker.

Mr Speaker, lo en plan pli zeneral mentenans lo bann lenfrastriktir Gouvernman, i en domenn ki nou bezwen fer pli byen ladan.  Zot tou zot in kapab lemwayen leta serten lenfrastriktir ki nou depans de milyon pou fer, me apre pa pou move rezon, me pou mank resours ki nou pa kapab mentenir en Kalandriye mentenans: e a longer ditan nou vwar ki serten sa bann lenfrastriktir, i kout nou bokou pli ser ler ou pe fer en gran mentenans Kapital.

Nou pe travay avek Sekter Prive atraver PPP e osi anba CSR, pou gete ki mannyer nou kapab amelyor leta nou bann lenfrastriktir lo nivo rezyonnal e osi lo nivo distrik.  Me sa pti larzan ki nou gannyen avek Finans, pa ase pour nou kapab adres tou sa bann size.  I annan en demann ki pe ganny fer; i annan en travay ki pe ganny fer lo nivo Gouvernman, an antye pou vwar leta bann lenfrastriktir e gete ki mannyer nou kapab osi aporsyonn serten parti Bidze, pou kapab met lo mentenans, pou fer sir ki nou pa perdi apre ki nou’n envesti de milyon dan bann enfrastriktir.

Kot i konsern pou sports, i en pti larzan ki nou gannyen anba kot Departman Devlopman Kominoter anviron R2 milyon, ki parey ou, ou santi nou kapab partaze.  Me selman kot i konsern – ou’n nonm sa lenfrastriktir Anse Royale, i annan en proze spesifik ki pe ganny fer avek Sekter Prive, pou gete ki mannyer nou kapab met li azour.  Me la ankor son mentenans i vin en defi ki nou bezwen ansanm gete ki mannyer nou kapab trouv en solisyon.

Mersi Mr Speaker.

MR SPEAKER

Onorab Vidot.

HON KEVIN VIDOT

Mersi.  Bonzour Mr Speaker.  Bonzour tou dimoun ki a lekout.

Mr Speaker, eski Minis i kapab dir nou an term bann sif, bann sonm ki in mansyonnen par egzanp, pou Domino R3 mil, si zot pa pe konsidere pou ogmant sa bann fees, akoz pou prenon kont pou depans ozordi, ki bann Tim Sports dan distrik i bezwen fer, pou zot kapab kontinyen fer zot spor i en pe o.   Par egzanp zot bezwen bann Tim Domino e lezot Tim parfwa i bezwen deplase, pou al lo lezot : parey Praslin ou La Digue.  So, si zot pe vreman pran konsiderasyon pou solidifye bann kou, ki bann Tim dan distrik pe fer fars avek.

Mersi.

MINISTER VINCENT MERITON

Mersi Mr Speaker.

Ou’n koz Domino, Laboks, mon 2 manrmay pe fer Bokse: ou konnen konbyen i vann en koute en legan?  En soulye la kot Federasyon Foutbol, plis ki R1000 mil en per soulye.  Be savedir ou menm pa pou ase pour sa larzan ki’n donnen pou Foutbol, pa pou ase pour kapab donn ou Lekip Foutbol ki annan 22 zwer ladan.

So, sa ki parey mon’n dir, sa ki nou’n donnen i en pti larzan senbolik, i koute.  Me mwan mon lev Domino; mon bezwen lev Petank.  Mon bezwen lev tou le O Disiplin: depi Volleyball, Basketball, Foutbol.  So i en legzersis ki nou plito anvi fer li atraver Sekter Prive, me o fir e anmezir ki Gouvernman, i donn nou en pti pe plis Bidze, byensir nou pou rod formil pou elev li dan en fason proporsyon.

Mersi Mr Speaker.

MR SPEAKER

Onorab Payet

HON DAVID PAYET

Mersi Mr Speaker.  Bonzour tou dimoun.

Mr Speaker, vi ki Bidze konmela i baze lo prensip Performance Budgeting, eski Minis pou Spor e Devlopman Kominoter, i kapab enform sa Lasanble pour bann kriter e endikater performans, ki Departman Spor e NSC in retenir, pou determin nivo alokasyon Bidzeter pour bann Disiplin Sportif dan bann distrik.

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, Onorab i demontre son kapasite – pe swiv sa bann devlopman pros ki pe arive dan PPPB.  Wi, i en legzersis: i en fason zesyon ki permet bann Managers annan plis say lo zot bann progranm: annan plis say lo bann diferan proze dan Sekter, dan zot Sekter loperasyon.

Mon Minister, nou pe al role out sa an 2017 e Cabinet ti fek fer en prezantasyon la e osi bann Sef Egzekitif, in ganny sans pli byen aprofondi zot konnesans, atraver leksperyans.  Serten Minister ki’n deza antre ladan, kot i a permet ou: parey ou’n dir etablir serten kriter.  E sak bann keksoz ki ou pou fer, i pou dapre bann kriter ki’n ganny byen etabli, pou ou kapab fer sir, ou kapab mezir rannman a lafen en serten peryod spesifik.  E i pou kapab met ansanm si oule, bann keksoz si oule bann keksoz ki parey:-dizon nou pe koz NRA.  Ou a pran tou bann progranm ki tous Zenn, Zanfan ou kapab met ansanm e i a permet ou partaz resours atraver bann Departman, atraver bann Divizyon e osi atraver bann Minister, kot nou kapab pli byen tous nou bann manrmay.

Par egzanp, ozordi ou pe koz bennzin pou biro Minis.  I pou nepli koumsa.  I pou group zesyon tou ansanm, apre i group pou bann progranm tou ansanm,: i group pou bann servis tou ansanm, pou pli byen kapab ankor dan lespri pli byen depans larzan e evit gaspiyaz e annan pli byen sa sans rann kont: e pour ki bann dimoun i kapab dir ki zot in fer avek larzan e pour nou kapab mezir sa meyer servis ki Prezidan in demann, nou dan konteks son nouvo manda.

Mersi Mr Speaker.

MR SPEAKER

Onorab De Commarmond.

HON CHARLES DE COMMARMOND

Mersi Mr Speaker.  Bonzour Mr Speaker.

Bonzour Minis. Bonzour tou dimoun ki a lekout e nou bann envite isi.

Mr Speaker, dan laliry sa Kestyon, eski Minis, i kapab eksplik nou Lasanble, etan donnen difikilte vwar finansman pour devlopman Sports pou bann Lekip e ki sa kontribisyon ki Gouvernman, i fer i zis senbolik:  eski Minis i kapab dir nou dan ki dele letan pli kourt posib, ki sa Legzersis ki zot pe fer la pou revwar sa kontribisyon Sports, i pou ganny fer: e dan sa Legzersis eski zot pou pran konsiderasyon, bann diferan pwen ki mon’n met devan sa Lasanble, a diferan repriz konsernan Sponsorship: son serten kalite Lalkol dan Sports.

E an menm tan, eski Minis pe diskit osi avek Minister Finans, pou kapab vwar konsiderasyon en biznes or en entity, ki oule donn tou son CSR, Sports, ki sa i kapab fer, olye parey konmela, ki Lalwa i fors ou donn lanmwatye.  E lanmwatye ou bezwen donn Gouvernman pou li fer whatever ki i anvi avek.  Me konmsi la mon pe ensiste pou ganny:-i annan biznes ki oule donn tou sa CSR en serten Sport, en serten Klib, en serten – dan sa direksyon.  Ki son Minister pe fer dan sa direksyon?

Mersi bokou Mr Speaker.

MINISTER VINCENT MERITON

Mersi Mr Speaker.

Mr Speaker, Onorab in tous en keksoz novel la e mon’n tann li nonm Lalkol.  Be nou bezwen gete ek devlopman ki mannyer keksoz pou ale.  E parey mon dir nou an diskisyon kot i konsern Sponsorship Sports an zeneral. E ou pwen ava ganny pran an konsiderasyon.

Ozordi en kar poursan ou kapab donn Sports parey ou pe dir e en kar poursan fodre i antre dan Kof Leta.  Ki ou pe demande, ki sa kar poursan ou kapab totalman dedye ansanm ek sa lot kar, fer vin pou Sports.  Ozordi i annan serten Lorganizasyon atraver sa Lorganizasyon Sportif ki zot pe travay avek, i kapab demann Minis Finans, si Minis Finans i kapab waive sa.  Mon pa krwar anba Lalwa, i annan sa posibilite.  Me selman lo en kote, nou bezwen rod bann resours, bann sours finansman pou Gouvernman, ganny sans kontinyen fonksyonnen.  Lo lot kote, ki nou bezwen rod en fason pour nou kapab ganny plis reveni, pou fer marse Sports.  So, mon krwar dan bann diskisyon nou pa pe koz en logmantasyon Tax, me gete ki mannyer nou kapab repartisyonn li ki i vin normal, i vin rezonnab: akoz vre ou annan rezon ki ou pe kas isi, ou pe kas laba.  Tou Konpannyen ler:-tou bann Sports, bann Klib Sports i vin kot menm Lakonpannyen.  E nou vwar ki sa Lakonpannyen li osi menm, si son dizon, son Bidze CSI R500 mil par an, i fini sa byen boner.  So, nou bezwen gete ki mannyer i ava annan lord ki mannyer nou fer li. Me byensir tout an respektan desizyon ki sa Konpannyen i annan, pour li gete lekel ki i oule donnen.  E mon krwar i annan petet en nesesite kontiny diskisyon,  kontiny bann negosyasyon pou streamline fason ki nou ganny sa larzan ek Sekter Prive pou kapab tous Sports.

Pa bezwen bliye poudir dan CSR napa zis Sports Onorab, i annan en bal keksoz ankor ki antre e mon krwar senserman priyorite se Sports.  Inisyalman lide ki nou ti lager lo kote Departman Devlopman Kominoter, ti pou bann progranm ki tous Zenn, Lafanmir e osi Sports.  So, mon krwar la 2 area prensipal:-be o fir e an mezir ki diskisyon in pran plas avan ler Lalwa, ti vin an fors, bokou lezot keksoz in antre ladan.  Nou bezwen gete ki mannyer nou fer sa maryaz, an restan konsyan priyorite ki Sports i reste en platform, kot i pa zis fer konpetisyon, be i tir manrmay dan bor semen, anpes zot tonm dan lapoud oubyen bann lezot deal.

Mersi Mr Speaker.

MR SPEAKER

Kestyon limero 13, Onorab David Pierre.

HON DAVID PIERRE

Mersi Mr Speaker.

Mr Speaker, eski Minis i kapab enform sa Lasanble si zot annan okenn plan pou rekonstrir sa pti laplenn foutbol Dan Gala ,ki’n ganny neglize pour plizyer lannen?

Mersi Mr Speaker.

MINISTER VINCENT MERITON

Mr Speaker, sa laplenn ki Onorab pe fer referans avek, en pti laplenn Segonder ki an bonn eta; i an bonn eta.  Sa laplenn i annan fencing toultour, i annan en miray ki tenir lateras pou anpes li grennen e i annan en bon drenaz toultour Mr Speaker.  Son sirfas i an bonn eta e tou le mwan zerb i ganny koupe.  Tou le mwan.

Mr Speaker, preski tou le weekend bann zenn dan Gala, Le Noile, i ganny sans zwe foutbol oubyen fer bann lezot aktivite lo sa pti laplenn.

Mr Speaker, petet Onorab pa okouran, mon Minister, i travay an etrwat kolaborasyon avek Ladministrasyon Distrik e si i annan en nesesite pou fer en pti amelyorasyon, byensir Lotorite Distrik ti a’n met li dan son pti proze oubyen les nou konnen.  Selman parkont Onorab, sa ki annan, i annan 2 brans dibwa ki’n anpandan, nou’n dir ek Zofisye al koupe.  Be selman leta sa laplenn i bon.

Mersi Mr Speaker.

MR SPEAKER

Okenn siplemanter Onorab?

HON DAVID PIERRE

Mersi Mr Speaker.

Mr Speaker, eski Minis i kapab konfirm avek sa Lasanble, ki zot annan en plan konkret lo mentenans sa laplenn for a full year?

Mersi Mr Speaker.

MINISTER VINCENT MERITON

Wi, Mr Speaker, tou le mwan zerb i ganny koupe e o fir e an mezir ki nou detekte lezot pti bezwen, nou deal avek.  Wi, i annan Mr Speaker.  Amwen ou pe koz en lot laplenn, dezyenm laplenn dan Gala ki mon pa okouran?

(Interruption)

MR SPEAKER

Ok, Dan Gala i annan zis en laplenn.  Kestyon limero 14 Onorab Meggy Marie.

HON MEGGY MARIE

Mersi Mr Speaker.

Bonzour Minis ek ou delegasyon. Bonzour tou Manm Onorab.

Mr Speaker, eski Minis i kapab eksplik nou Lasanble, akoz ki en dimoun i bezwen kontinyelman renouvle son benefis sosyal menm si i annan en dezabilite permanan?

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, anba Lalwa Sekirite Sosyal i napa en benefis ki donn kouvertir direkteman, donn kouvertir permanan bann dimoun ki annan en dezabilite e ki sa dezabilite i anpes li travay.  Lasistans ki bann dimoun ki annan en dezabilite i ganny ofer, se atraver swa benefis envalidite oubyen atraver lasistans sosyal.  Benefis envalidite, sa lasistans li i ganny renouvle tou le 2an, pou permet sa resipyan ganny sans ganny son abilite – ganny evalye dan ka, ki’n annan en amelyorasyon dan son sityasyon: dan son kondisyon.  Anba lasistans sosyal, sa i ganny renouvle tou le z-an.

Anliny avek bann reform ki pe ganny fer avek bi pou amelyor servis ki Gouvernman i ofer, mon Minister pe propoz serten reform dan Lalwa, Lalwa Sekirite Sosyal pou vwar kreasyon en benefis pou dezabilite.  Atraver sa benefis, lasistans pli permanan pou ganny ofer.  Sa lasistans i pou menm nivo ki benefis envalidite.  E sa benefis pou kouver bann zanfan ki’n ne, oubyen devlop en kek form dezabilite pandan lanfans e osi pou bann adilt ki devlop en dezabilite lonterm: swa par aksidan ou maladi ki anpes li, ki anpes zot travay dan bann ka spesifik.

Nou pe osi al komans en Legzersis pli aprofondi pou re-evalye, met azour tou bann benefis anliny avek bezwen dimoun e sa i pou ede amelyor servis e koriz serten defayans ki kapab egziste parey dan sa ka la.

Mersi Mr Speaker.

MR SPEAKER

Bon, okenn siplemanter?

HON MEGGY MARIE

Mersi Mr Speaker.

Eski Minis i kapab dir nou Lasanble, konbyen dimoun ki pe benefisye avek sa benefis Dezabilite Permanan e ki dele letan i pou pran Gouvernman, pou revwar sa mekanizm ki pou kapab improve sa servis?

Mersi Mr Speaker.

MINISTER VINCENT MERITON

Mr Speaker, mersi.

I annan 1200 an se moman. E sa lannen menm nou pe aranz sa.  I pa poz en difikilte, zis fer en pti amannman ek Lalwa.  Larzan pa pou an plis akoz menm sif, menm kantite dimoun pou tonm anba la.

Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.

Mr Speaker, dan sa letid ki Minis i dir i pe al antreprann, eski i kapab dir nou si i pou pran bann best practices ki ganny practice dan lezot pei, ler i pe fer sa evalyasyon: akoz parfwa sistenm ozordi, nou annan zis en Dokter ki evalye bann dimoun e parfwa Dokter i dan konze, sa i kree osi serten lenkonvenyans: e si Minis osi i kapab dir nou dan son plan stratezik, pou annan en Social Worker pou sak distrik, akoz parfwa Social Worker osi i mele dan renouvelman sa bann benefis pou bann dimoun: e si dan le fitir, zot annan lentansyon recruit en pti pe plis bann Senior Welfare Officer, pou fer keksoz mars en pti pe pli byen, malgre mon tre mannyer satisfe mannyer Welfare pe ale ozordi.

Mersi.

MINISTER VINCENT MERITON

Mersi Mr Speaker.

Mon a komans avek ou dernyen bout Onorab.  Mersi pou aksepte ki nou pe debourye.  E dan lespri amelyor servis wi, nou pou swiv bann best practice ki fer dan lezot pei.  Be selman pa bezwen o bliye nou en best practice nou menm.  Bokou pei ti a kontan annan en sistenm Proteksyon Sosyal parey nou annan.  Nou tou ki’n voyaz e dan lemonn in vwar ki mannyer i ete: trimouse avan ler ou gannyen.  Wi, nou pou gete ki mannyer nou pou kapab amelyor nou personnel kot i konsern Travayer Sosyal dan distrik.  Nou bi se annan 1 par distrik.  Be petet i annan ki kite, nou bezwen ranplase, i pran en pe difikilte pour nou kapab ganny bon kandida, akoz Travay Sosyal pa zis en travay, i en Vokasyon, i en calling ki ou bezwen ganny bann dimoun apropriye, pou fer sir ki zot annan leker pou travay avek nou bann dimoun, nou bann kliyan.

E kot i konsern nou bann Senior Welfare Officer wi, i en Legzersis kontinyel, pour nou kapab ganny bann meyer dimoun ki pou kapab deal ek bann problenm vitman koman i eleve.  E mon krwar i en keksoz ki’n ganny fer pandan sa dernyen 1an la.  Nou oule mentenir sa tempo malgre i met presyon lo bann Zofisye, zot osi zot dimoun.  E nou remersi zot pou konpran, pou reste sansib avek sa: e remersi zot pou sa kolaborasyon ki zot donnen.

Mersi Mr Speaker.

MR SPEAKER

Apre Onorab Fideria, petet si mon ti zis kapab azoute, ki i annan diferans Sant Dezabilite permanant e bann ki al lo Welfare.  I pa korek pou dir i annan zis en Dokter ki deal avek.  I annan en komite Dokter, akoz mon’n deza Chair sa Komite e mon konnen i annan bann diferans ki petet i bon nou vin okouran.

Onorab Ghislain.

HON CHANTAL GHISLAIN

Mersi Mr Speaker.

Mr Speaker, mon oule remersye osi bon travay ki Lazans Welfare pe fer ziska ozordi.

Mr Speaker, eski Minis i kapab eksplik sa Lasanble, baze lo bann diferans: akoz i annan – aparaman i annan 2 Board ki diskit lo bann Dezabilite.  I annan sa Board Medikal e osi Board Sekirite Sosyal.  Eski Minis i kapab eksplik diferans ant sa 2 Board, parske nou vwar osi en dimoun ki menm in koup lipye, nou konnen son lipye pa pou bezwen pous ankor e still ou vwar li pe monte tou le 2an, pou li al renouvle son lasistans ki i bezwen gannyen.

Mersi.

MINISTER VINCENT MERITON

Mersi Mr Speaker.

I annan en sel Board, be selman bann dimoun depandan lo laplikasyon, i bezwen ganny refer.  Pour bann dimoun ki annan welfare, i bezwen al kot Occupational Health Unit pou ganny Sertifika pou kapab ganny konsidere.  Selman napa 2 Board, i en sel Board.

Mersi Mr Speaker.

MR SPEAKER

Ok. Mon krwar mon a les zot.  Mon ti a voudre kapab azout lo sa…

(Laughter)

MR SPEAKER

Onorab Payet.

HON DAVID PAYET

Mersi Mr Speaker.

Mr Speaker, eski Minis i kapab enform sa Lasanble, si avek bi elimin en lenkonvenyans pour serten bann sitwayen ki pe deza soufer avek en dezabilite e osi amelyor nou sistenm Lasistans Sosyal, pou fer li vin pli user’s friendly, si son Minister pe etidye ki mannyer lezot pei i adres sa problenm, avek bi pou fer li pli apropriye pou Sesel.

Mersi Mr Speaker.

MINISTER VINCENT MERITON

Mersi Mr Speaker.

Onorab parey mon fek dir wi, i dan nou lentansyon pou kapab get best practices dan lezot pei.  E mon krwar sa propozisyon ki nou met devan, i ava fasilit bann prosedir ki pou permet ki en dimoun ki dan bezwen, i ganny sa lasistans pour li kapab kontiny son lavi.

Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.

Mr Speaker, eski Minis i kapab dir avek sa Lasanble, si zot annan okenn plan, pou anmenn parite ant benefis ki en dimoun avek dezabilite permanan i gannyen e larzan ki en dimoun aze i gannyen anba Sekirite Sosyal?

Mersi Mr Speaker.

MINISTER VINCENT MERITON

Mersi Mr Speaker.

Dan tou sa bann kalkilasyon, bann reform ki nou pe fer, ASP i deza annan propozisyon pou kapab pran sa bann benefis ki mon’n dir e peg li avek minimum wage.

Mersi Mr Speaker.

MR SPEAKER

Onorab Kevin Vidot.

HON KEVIN VIDOT

Mersi Mr Speaker.

Mr Speaker, eski Minis i kapab dir nou an term ler i pe revwar Lalwa, si pou annan en clear definisyon swa en re-definisyon Envalidite dan sa Lalwa, pou fer tou keksoz kler across the board, pour tou nou bann sitwayen: e si i kapab donn sa Lasanble en garanti, en dele letan, kan sa Lalwa ki pe al entrodwir pou ganny ariv devan nou Lasanble: ki ava soulaz en pe bann soufrans nou bann dimoun.

Mersi bokou.

MINISTER VINCENT MERITON

Mersi Mr Speaker.

Mr Speaker, Lazans Proteksyon Sosyal, i lebra prensipal ki’n ganny kree pou donn en proteksyon nou bann dimoun ki vilnerab.  Kot i konsern sa lobzektif, mon krwar zot a dakor ki i annan en kantite ki ganny fer.  Mon pa oule dir ki nou san fay, be selman i annan en zefor ekstraordiner ki ganny fer pour ki, nou pa kit personn deryer.

Me sepandan baze lo bann diskisyon ki Lasanble in met devan, nou santi ki i annan en nesesite fer en distenksyon ant bann dimoun ki pe ganny benefis Envalidite e bann dimoun ki annan en dezabilite.  Se pour sa rezon mon pe propoz sa sanzman dan Lalwa, pour ki i pli kler: e nou’n dir ki sa 2 benefis i pran menm nivo.  Mon ekspekte ki avan lafen term sa Lasanble, nou fini table sa e si i annan okenn keksoz nou kapab dir.

Mersi Mr Speaker.

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker.

Mr Speaker, eski Minis i kapab dir bann dimoun ki pe ekout nou, pa nou la anndan bann dimoun ki pe ekout nou, ki annan en dezabilite permanan, savedir son lipye pa pou repouse: eski Gouvernman i kapab konsider tir sa clause 2an pour ki sa dimoun enn fwa ki i ganny son benefis i ava kontinyelman ganny son benefis san ki i monte desann.  Mersi.

MINISTER VINCENT MERITON

Wi Mr Speaker, se egzakteman sa ki nou pe propoze, ki si en dimoun in ne ek en dezabilite ki, amwen ki teknolozi e lasyans i devlope i vwar ki nou kapab donn sans sa dimoun servi son bann fakilte, ki nou a fer li bokou pli fasil pour ki dimoun i ganny son lasistans.  I pa a bezwen ganny demande pou vin fer sa bann renouvelman parey i ete ozordi.

Mersi Mr Speaker.

MR SPEAKER

Non, be ou bezwen san ki mon enterfer dan sa diskisyon;  ou bezwen sa zafer tou le 2an zisteman ou annan prosthetic ozordi ki kapab fer sa dimoun ki annan lipye koupe fonksyonn byen.  So, i retournen 2an pou tyeke:-SIDA par egzanp en lepok ler en dimoun ti ganny SIDA, i ti ganny konsidere dezabilite permanan.  Me apre 1an/2an ek lenvansyon Medikal, ozordi i nepli leka.   I vin review apre 2an.  The review is important, en. Sorry mon’n entervenir me Minis i oule azoute?

Yes?

MINISTER VINCENT MERITON

Mr Speaker, mon dakor avek ou e mon dakor sa ki Onorab pe demande.  Si en dimoun i paraplegic, i en vegetable parey nou dir an angle la, la ki mon krwar sa ekstrenm ki pa bezwen nou fer dimoun vreman sibir sa bann lenkonvenyans.  Sa ki nou pe dir: konmsi ki montre sa konpasyon.  Gete, nou’n arive nou.  Kot nou’n arive en ta pei pa pou arive, zot kapab mor pa pou arive, be selman ki nou pe dir, annou go that little extra mile: konmsi donn li sa dernyen pti bout sipor konmsi i a santi li konfortab.  Mon dakor avek sa.  E se sa langazman ki nou pe donnen ozordi.

Mersi Mr Speaker.

MR SPEAKER

Ok, Onorab Pillay.

HON SEBASTIEN PILLAY

Mersi Mr Speaker.

Mr Speaker, zisteman dan menm laliny ki sa diskisyon ti pe ale, eski Minis i annan plan avek partenarya avek Lazans Proteksyon Sosya,l pou met an plas en mekanizm ki kapab monitor e assess bann dimoun ki deza lo sa lalis ki pe ganny sa bann benefis, pou vwar si sa bann dimoun i reelman pour le moman ankor pe soufer avek sa dezabilite, oubyen si i annan ki kapab retourn dan lanplwa: oubyen lafason ki sa larzan ki zot gannyen pe ganny zere: e dezyenmman en lot pwen, dan sirkonstans kot par egzanp en dimoun i lo sa benefis in ale 1an, 2an, 3an, 4an, ki mekanizm ou pe met an plas pour ki dan sistenm zot flag sa bann ka e zot refer sa bann ka avek Lazans oubyen Board oubyen Komite apropriye, pou vwar si sa bann dimoun finalman enn fwa pour tou, i kapab retourn dan lanplwa oubyen sa dezabilite oubyen sa injury ki zot in gannyen, i pou anpes zot re-fonksyonnen normalman pli tar.

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, wi i dan nou plan e annefe nou pe travay an etrwat kolaborasyon.  Parey ou konnen nou pa eksper dan sa Domenn, nou bezwen apir lo Minister Lasante avek bann Spesyalis ki kapab ziz sa an servan bann metod modern ki lasyans in devlope: e permet nou kapab etidye e dokimant leta, kondisyon sa bann dimoun ki pe ganny bann benefis.  E an menm tan parey ou dir, ler ou santi en dimoun ki’n kapab amelyore swa atraver son lasante in amelyore li menm, oubyen atraver bann rezilta prodwi teknolozi i kapab bouze, re anvoy li dan travay, me an menm tan pa fer li perdi:-akoz ki mannyer i ete ozordi, le moman ou retourn travay, nou tou nou koup ou benefis.  Be pa koup son benefis en sel kou, be al gradyel.

So, i annan tou sa bann keksoz dan plan, ki nou oule i vin avek pli tar.

Mersi Mr Speaker.

MR SPEAKER

Kestyon limero 15, Onorab Meggy Marie.

HON MEGGY MARIE

Mersi Mr Speaker.  Mr Speaker, eski Minis i kapab eksplik sa Lasanble, ki pe arive avek renovasyon ansyen Lakres Anse Aux Pins, vi ki tou prosedir in fini ganny fer pou fer sa landrwa koman en Day Care?

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, letan mon ti vin reponn kestyon lo sa size lannen pase, mon ti dir ki nou bezwen esper bann prosedir Legal konplete, pour ki nou kapab reganny sa landrwa pour nou fer proze Day Care parey ti’n ganny progranmen.

Bann prosedir Legal in konplete e Minister Later avek Lakaz, in remet sa batiman avek nou.  Nou ti bezwen antre an negosyasyon avek sa Legliz ki ti pe servi sa landrwa e esper zot ganny en nouvo landrwa pour zot kapab etablir zot.  Annefe in pran nou 5 mwan pour sa Legliz sorti – lefe ki zot ti pe rod landrwa pour zot ale.  E nou remersi zot pour zot konprenezon e sipor dan sa demars pour ki, Anse Aux Pins i ganny li en Day Care ki modern e konvenab.

Osito ki Kontrakter ti sorti an Zanvye Mr Speaker, nou’n komans bann prosedir pou demoli sa batiman.  Nou ti komans par dekouver li e anmezir nou pe koze la, striktir pe ganny demoli.  Antretan nou pe finaliz plan pour soumet avek Planning e nou krwar ki si tou keksoz i mars byen, nou kapab komans konstriksyon trwazyenm kar sa lannen.  E nou ekspekte fini lannen prosenn.

Nou annan nou, R1 milyon ki nou’n gannyen sa lannen lo sa proze, e nou’n remet larestan pour lannen prosenn.  I pou kout nou apepre R4 milyon pour konplet sa proze e i pou an konformite avek tou bann standar ICCI.

Mersi Mr Speaker.

MR SPEAKER

Okenn siplemanter, Onorab?

HON MEGGY MARIE

Mr Speaker mersi, Mr Speaker.

Mr Speaker, eski Minis i kapab dir zabitan Anse Aux Pins, eski tou mekanizm in fini an plas pour tender sa nouvo Day Care: e ki bann kriter ki pou ganny servi pou fer alokasyon avek dimoun ki enterese pour tender?

Mersi Mr Speaker.

MINISTER VINCENT MERITON

Mersi Mr Speaker.

Parey mon’n dir, plan pe finalize la.  I ava al kot Planning.  Le moman i fini kot Planning, nou ava fer en open tender: kot i ganny pibliye dan Nasyon e parey Procurement Act i egzize i ava annan en Komite ki ganny met an plas pou selekte bann Kontrakter e desizyon parey labitid i ava ganny anonse.  E si i annan okenn bann dimoun ki annan okenn lobzeksyon, i pou annan en dele letan – mon mazinen 10 zour, ki i pou kapab fer rapel, apre sa si napa appeal then sa Kontrakter i fini ganny son Bid.  I a siny kontra e proze a demare.

Mersi Mr Speaker.

MR SPEAKER

Onorab Valmont.

HON SYLVIANNE VALMONT

Mersi Mr Speaker.  Bonzour Minis e tou dimoun a lekout.

Mr Speaker, eski Minis i kapab dir nou, si sa landrwa ki pe ganny devlope koman sa Day Care, pou benefisye zis bann dimoun Anse Aux Pins.  Sa ki mon oule dir la – zis bann tender pou konsider dimoun Anse Aux Pins, etan donnen ki i annan bokou bann pti landrwa Anse Aux Pins ki bann dimoun pe vey zanfan.  So, si priyorite pou donnen pour dimoun Anse Aux Pins ler tender i ouver.

Mersi.

MINISTER VINCENT MERITON

Mersi Mr Speaker.

Mr Speaker, evidaman Anse Aux Pins i en catchment. Get sa depo – sa mini terminal ki SPTC in fer, kantite dimoun ki i anmenn la e mon krwar kot i konsern nou bann zanfan, mon asire ki pou annan lezot dimoun osi sorti lezot distrik ki pou servi sa fasilite.  E apre Onorab, PS in port a latansyon Onorab Marie – in dir mwan pa sa kestyon ki ou ti pe demande – petet in sap mwan.

Fason ki nou pou swazir dimoun ki pou operate sa Day Care, i baze lo en standar ki nou’n met dan ICCE, ki i annan 5 dimoun lo en panel, sorti Departman, sorti dan distrik, sorti ICCE, sorti kot Ledikasyon ek Lasante – en panel ki deside.  E tou sa bann dimoun ki’n Bid zot osi, zot case pou ganny met devan Komite e Komite i ava swazir lekel dimoun ki’n fer en pli bon Bid, pour zer sa fasilite.

Mersi Mr Speaker.

MR SPEAKER

Bon, Kestyon 16, Onorab Meggy Marie.

HON MEGGY MARIE

Mersi Mr Speaker.

Mr Speaker, eski Minis, i kapab dir nou Lasanble, si i annan plan pou fer en Fitness Trail lo Ile Soleil, avek bi ankouraz plis legzersis parmi nou zabitan.

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, parey mon ti dir lannen pase, i dan plan Minister e NSC, pou annan en Fitness Trail partou kot i posib.  Me la ankor nou bezwen ganny permisyon – nou bezwen ganny sa landrwa – nou bezwen ganny resours finansyel pou kapab met li an aplikasyon.  An se moman i annan en lespas La Promenad lo zil Soleil, ki nou kapab fer en Fitness Trail. E annefe, yer mon ti pe koz avek Chairman Sosyete ki pe zer zil Soleil.  I dir mwan i annan en circular road. Savedir nou kapab fer en Fitness Trail toultour evantyelman, kot dimoun i kapab vreman antre dan sports – e evantyelman avek bann demars ki zot ava fer, ganny bann outdoor Gym e lezot fasilite, ki pou promouvwar spor parmi lazenes e popilasyon Anse Aux Pins.  E pa zis sa – dan lezot distrik dan zalantour e pour Seselwa antye.

Mersi Mr Speaker.

MR SPEAKER

Onorab?

HON MEGGY MARIE

Mersi Mr Speaker.

An vi larepons Minis, apard zis Fitness Trail, in nonm Gym e lezot lenfrastriktir sportif, eski Minis i kapab dir nou Lasanble, lekel ki pou zer e maintain sa bann fasilite, apre ki in fini ganny fer?

Mersi Mr Speaker.

MINISTER VINCENT MERITON

Pardon Mr Speaker, ler mon dir zot – mon ti pe kalkil Lotorite Distrik Anse Aux Pins antre an partenarya avek bann lezot dimoun al rod bann Gym, zot ava zere osi koman dir – boul retour non?

(Laughter)

MINISTER VINCENT MERITON

Mersi Mr Speaker.

MR SPEAKER

Ou’n fini ek li…  Onorab Ghislain.

HON CHANTAL GHISLAIN

Mersi Mr Speaker.

Mr Speaker, Minis in nonm bann landrwa ki sirkiler.  Lefe ki laplipar bann Sports Complex atraver pei, konmela i deza annan sa lespas tout o tour, eski Minis pe mazinen, ki zot kapab fer sa bann Fitness Trail dan sa bann distrik?

Mersi.

MINISTER VINCENT MERITON

Wi, byensir, Mr Speaker.  Depandan lo lespas parey nou’n dir – permisyon bann dimoun ki annan later e apre resours finansyel e apre volonte tou dimoun konsernen pou fer en keksoz, apre gard li byen normal.

Par egzanp Golden Mile ,Beau Vallon, Onorab Souris i konnen, nou’n met en seri Gym ki pe byen ganny servi.  Dimans mon’n al jog ek mon bann manrmay – i annan en kantite dimoun la dan 8er e 9er bomaten ki pe servi sa Gym.

So, mon krwar fer enn – servi li i 2, apre gard li an bonn eta, i 3.

Mersi Mr Speaker.

MR SPEAKER

Onorab Souris, Kestyon 17.

HON MIRENA SOURIS

Mersi Mr Speaker.

Mr Speaker, eski Minis i kapab donn detay nou Lasanble lo sa Scheme Day Care e konbyen dimoun ki’n benefisye?

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, ziska Fevriye 2016, 716 lakour in benefisye avek Child Care Support atraver Lazans Proteksyon Sosyal.  Sa lasistans ti ganny kree an Me 2015, anba nouvo mezir – nouvo mezir lasistans Byennet Sosyal.  E sa i ganny administre par Lazans Proteksyon Sosyal.

Pour sak zanfan ant 0 a 4an, ki dan en Day Care, oubyen pe veye kot en Child Minder, ki enn son paran i dan lanplwa, sa lakour si i kalifye, i ganny alokasyon R500 par zanfan.  Sa fanmir pou bezwen fer laplikasyon welfare dan son distrik.  E larzan i ganny donnen – inisyalman nou ti dir – larzan pou ganny avek sa dimoun ki pe run sa Day Care oubyen sa Child Minder – e dan bann ka, sa paran i kapab gannyen direk.

Nou pe travay avek bann Child Minders, avek bann Day Care, pour ki zot osi zot annan zot kont ki nou kapab transfer sa larzan direk, pour minimiz bann cash transfers.

Mon Minister pe aktyelman revwar sa lasistans e propoze ki i vin en ‘stand alone’ – savedir nou a tir li dan ta Weights e fer li vin en lasistans separe, Mr Speaker.

Mr Speaker, nou’n entrodwi sa Scheme pou ed bann paran ki annan enn, oubyen detrwa zanfan e ki pe ganny difikilte fer 2 bout zwenn, ki pa pe travay e donn zot en incentive, pou al travay e gete mannyer zot kapab fer zot lavi an men.

Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.

Mr Speaker, eski Minis i kapab dir nou si dan lavenir, zot pe travay lo en mekanizm pou amelyor sa sistenm peyman – sa larzan ki sorti kot Lazans, ki al direkteman dan kont bann Child Minders, akoz pour le moman, i annan serten difikilte kot bann Child Minders pa pe ganny sa larzan e bann paran pe vwar zot pe monte, desann kot Sekirite Sosyal, pou kapab rezourd sa problenm.

Mersi.

MINISTER VINCENT MERITON

Efektivman, Mr Speaker.  Onorab, mersi.  Nou’n santi ki nou pe ganny difikilte, akoz i dan Weights. Sanmenm sa nou oule fer li separe – apre i a pli fasil pou transfer dan kont sa Child Minder, oubyen dan bann sityasyon eksepsyonnel nou kapab pey sa paran tousel.  Be selman, nou pou adres sa tre byento.

Mersi Mr Speaker.

MR SPEAKER

Onorab Souris.

HON MIRENA SOURIS

Mersi Mr Speaker.

Mr Speaker, eski Minis i kapab donn detay sa Lasanble, ki limit saler ki en endividi, i ganny asiste anba sa Scheme Day Care: e ki poursantaz paran tousel ki pe ganny asiste?

Mersi.

MINISTER VINCENT MERITON

Mersi Mr Speaker.

Mr Speaker, pour le moman i baze lo Weights ki nou’n etabli.  Savedir sa bann diferan konponan ki antre dan Basket la, i annan premye sipleman pour adilt, apre sipleman pour dezyenm adilt, apre sipleman pour zanfan – i annan Housing – i annan Litilite – i annan Transpor apre i annan sanmenm sa Child Minder. Konmsi tou reveni ki antre dan lakour, i pou ganny adisyonnen e i pou ganny konpare avek sa bann Weights la.  Apre si i sorti – si ou kalifye then ou gannyen – si ou pa kalifye, ou pa gannyen.

Me nou pe fer li pli fasil, sanmenm nou oule fer li separe – pour nou kapab process li pli vit, pou ed sa manman oubyen sa papa ki oule sorti kot lakour e al travay pou fer marse son fanmir.

Mersi Mr Speaker.

MR SPEAKER

Bon Onorab Pillay, dernyen?

HON SEBASTIEN PILLAY

Mersi Mr Speaker.

Mr Speaker prenon kont ki sa progranm Child Care i annan 2 konponan: i annan konponan benefis avek lasistans apre i annan en konponan provizyon sa Child Care, eski Minis avek son Minister, i annan plan antreprann serten konsiltasyon avek bann distrik, pou konsider konstriksyon oubyen fasilitasyon provizyon bann servis Day Care oubyen Child Minding dan bann sou rezyon kot i annan gran konsantrasyon popilasyon: par egzanp enn ki vin dan lespri la se North East Point/ Glacis akoz Day Care i trouve santralman e i difisil pour bann paran travel sa zistans pour anmenn zot zanfan – i pli pre pour zot: e dezyenmman prenon kont ki Child Care i annan sa konponan Finansman e sipor ki i donnen, eski sa progranm pe pran an konsiderasyon, bann kondisyon ki serten zanfan i annan par egzanp Autism, kot bann paran i bezwen fer serten sakrifis, pour zot kapab okip sa bann zanfan e parfwa i annan serten demann an plis lo zot menm.

Mersi.

MINISTER VINCENT MERITON

Mersi Mr Speaker.

Mr Speaker, nou pe met nou konsantrasyon lo bann Day Care, kot nou santi i annan en bezwen: par egzanp si dizon nou dir distrik Glacis Santral i annan son Day Care, ki byento nou pe al ouver, akoz nou ti’n pret Minister Ledikasyon avek rekonstriksyon Lekol: prezan nou santi poudir North East Point i bezwen, nou pou focus lo North East Point. Be solman nou pa oubliye, ki i annan lezot distrik osi i anliny, pe bezwen tel fasilite.

Pli nou kapab fer li pli vit, byensir i pou pli bon.  Se pour sa rezon ki nou pe osi – zot konnen nou pe komans anvizaz travay lo PPP – ki mannyer nou kapab ganny en dimoun dan prive, ki ava antre an kolaborasyon avek nou pour kapab annan en tel lenfrastriktir.  Me tout-an prenon kont ki bann lenfrastriktir sosyal ki nou pe fer parey Day Care la, ou pa ekspekte ki sa dimoun ki pe run, i pe al sarz en malere en ta larzan, akoz en servis sosyal nou pe donnen.  Nou pe ekspekte lwe sa en dimoun a en pri tre ba, apre sa dimoun i oule al fer en bal profi lo malere.

So, nou bezwen annan sa bann fason pour nou diskit avek bann dimoun ki gannyen.  Me an menm tan, nou bezwen provide en serten lenfrastriktir ki reponn bezwen nou bann manman, en bann papa, bann fanmir, dan bann lokalite.  Pa neseserman zis en landrwa santral, sirtou dan bann distrik ki etale, ki eparpiye.

Dezyenmman bann kondisyon spesifik wi, i annan defi e o fir e an mezir ki nou pe devlope, nou pe pran an konsiderasyon bann kondisyon spesifik.  Se pour sa rezon, lannen pase, ki ler mon ti al La Renyon apre Zwe De Zil, nou ti pran kontak avek Otizm La Renyon.  E i annan son Prezidan ti vin isi an Desanm, le 8, le 9, le 10, le 11, le 12 Desanm, kot nou ti fer training ek bann paran ki annan zanfan ki annan Otizm, apre nou ti fer avek bann Ansennyan.  E la nou pe al devlop en lot….  Nou pe al anmenn li lo en nivo pli o kot nou kapab prepar e form bann Ansennyan e lezot kad ankor Profesyonnel lo sa sityasyon – lo sa kondisyon – pa zis sa, me osi lezot kondisyon ki nou bezwen port a latansyon bann dimoun, ki pe annan bann Child Minding Service ek Day Care, lo ki mannyer zot pou apros sa ban ka plis spesifik: oubyen fer en dispansasyon spesyal pour bann paran, ki annan zanfan ki ganny attempt par sa bann kondisyon.

So, i en travay konpreansiv ki Gouvernman pe travay lo la.

Mersi Mr Speaker.

MR SPEAKER

Ok, avek sa nou’n ariv a lafen Question Time.  Me selman nou pou demann Minis pou reste avek nou la an vi ki i annan en Statement ki i oule fer a lokazyon Zournen Enternasyonal bann Madanm.  Minis.

MINISTER VINCENT MERITON

Mersi Mr Speaker.

Mr Speaker, bomaten, ou menm, Leader Zafer Gouvernman dan Lasanble, Leader Lopozisyon.  Tou le 3 zot in zwenn ansanm pou swet e apresye rol madanm dan nou pei.

Ozordi i lazournen enternasyonal bann madanm.  E permet mwan mon osi sezi sa lokazyon pou sezi tou bann Manm Onorab isi prezan pou zot lakonplisman, Onorab Madanm pou zot lakonplisman, perseverans e devosyon dan zot travay.  E an dizan sa zot ganny apiye par zot bann koleg Imsye akoz ler nou pe selebre bann madanm nou pe selebre limanite bann zonm.  Ki bann zonm i konpran bann madanm.  Ki madanm ou devret anmenn li lo en plato lor e ki madanm pa tanbour.  E mon krwar sa mesaz kler ki nou pe pase nou a retourn lo la taler.

Mr Speaker, Sesel i fyer ki san quota nou annan en Lasanble Nasyonal kot dan 32 Manm, 14 i madanm.  Ou annan en zenn madanm ki Leader Zafer Gouvernman dan Lasanble Nasyonal.  Pa bokou i annan dan Parlman dan lemonn.  Sa i reprezant 44 poursan bann madanm e fer nou premye dan SADC.  E parey Mr Speaker in dir taler, byen o dan lemonn.  I en keksoz ki fer nou fyer, i en keksoz ki montre poudir dan 40 an nou’n fer keksoz ki byen.  Sa i zis enn ladan.

Me nou pa devret get zis sif.  Annou gete ki zot bann madanm dan Lasanble zot in zwe en rol enportan dan devlopman nou pei, dan devlopman zot distrik.  Zot in fer tande lavwa bann sitwayen.  Bann ki for e bann ki feb.  Kot i annan en bezwen elimin en komen trou, zot in dir.  Kot in en bezwen fer en peron, zot in dir.  Kot in annan en bezwen adres bann defi sosyal, zot in koz lo la.  Kot in annan en nesesite felisit nou bann zabitan pou bann bon keksoz ki zot in fer, zot in dir.

Pa bezwen sou estim zot rol.  Dan devlopman, dan listwar nou pei zot zwe en rol enportan.  E mon demann zot avek ou permisyon Mr Speaker, donn zot lekor en manman lanmen silvouple, enkli bann dimoun dan Galeri.  Donn zot en lanmen silvouple.

(Applause)

MINISTER VINCENT MERITON

Mr Speaker, annou pa get zis sif e tou, annou get osi sa ki zot on fer.  Mesaz ki signifikan deryer sa sif 44 poursan i ki Sesel i krwar dan son bann fiy ek son bann madanm.  Nou annan konfidans dan zot kapasite.  Zot in demontre sa sesyon i demontre e lezot sesyon ki pou vini lafen sa lannen.  Pou demontre ki bann madanm pou ankor kontinyen vin sa bann sanpyon lakoz devlopman nou pei.

Me pli enportan Mr Speaker, se nou bann Madanm MNA i en legzanp.  Zot en legzanp pou lezot dimoun e zot kapab enspir lezot pou pa zis reve me konnen ki loportinite a tou nivo i egziste isi pou bann madanm e fiy Seselwa.  Swa ki ou en fiy, ou en madanm oubyen en garson, oubyen ou en Msye.

Mr Speaker, dapre rapor pibliye lannen pase par Forum Global Ekonomik i pou pran 118 an pou anmenn egalite ant zonm ek fanm dan lemonn antye.  118an.  Bokou nou pa pou la, nou pa pou la nou tou annefe.  Mon demann bann Manm Onorab e piblik an zeneral pou reflesir lo sa pwen.  118an i en kantite letan.  Nou pe koz dan lannen 2134 kot zanfan nou zanfan e petet zanfan nou zanfan nou zanfan ki pou pe diriz nou pei.

Me Sesel pa parey larestan lemonn.  Nou pa bezwen esper 2134 pou realiz egalite ant zonm  ek fanm.  Les mwan dir avek konfidans, ek fyerte ki egalite ant zonm ek fanm Sesel i en realite ki nou Gouvernman in anmennen dan nou pei.  In antre dan nou Konstitisyon, dan nou bann Lalwa, dan nou fason fer e dan nou lavi toulezour.  E laprev i la, toultour nou.

Mr Speaker, mon napa ase letan pou sit tou legzanp.  Me permet mwan pas brefman lo serten pwen pou rapel nou piblik ki zistans Sesel in arive.  Souvandfwa nou pran nou bann lakonplisman a lezer.  Nou menm par ler gognard nou.  Nou rod zis problenm e nou bliye kot nou sorti.  Ki kantite sakrifis bann avan nou in fer pou kapab atenn sa progre, sa progre ki nou’n fer dan 40an.  Nou pa’n pran 118 an Mr Speaker.  Zis 40an.

Sesel 2016 i en Sesel kot tou Seselwa, irespektiv ou sex, ou larelizyon, ou ras pa determinen ki ou ete, ki rol ou zwe dan sosyete.  Tou Seselwa i en être imen.  E koman en pei ki krwar dan drwa fondamantal sak endividi, Sesel 2016 i parey in toultan leka.  In met son dimoun premye.  Se sa ki nou apel met dimoun o sant devlopman.

Sesel 2016 i en pei kot lasante ek ledikasyon i aksesib pou tou sitwayen.  I pa en sistenm parfe me personn pa bezwen mars 100 kilomet pou ariv kot en Klinik e vwar en dokter oubyen al lekol.

Nou zanfan Seselwa pa forse pou kit lekol pou travay pou ed zot fanmir.  Me nou zanfan Seselwa i ganny demande pou servi tou loportinite pou zot pran lavol e vin sa ki zot ete.  Pa zis reve me realiz zot rev.  Napa okenn diskriminasyon kont nou bann fiy, zot Seselwa, zot annan menm drwa ki bann garson.

Sesel 2016 i en pei kot nou bann madanm i Sef Ziz, nou annan en madanm ki Ziz Lakour D’appel.  2 madanm ki sorti Lakour Siprenm, 2 madanm ki Mazistra.

Fanm Seselwa 2016 pa zis reste kot Lakour.  Zot osi ansarz Lakour, nou’n konfye zot nou Lakour pli o dan Sesel.

Sesel 2016 i en pei kot fanm pa zis ners e ansenyan, zot dan biznes, zot dan lekonomi ki pe fer marse nou pei.  Ozordi nou annan en Gouverner Labank Santral ki en madanm.  Kot Labank Devlopman se en madanm osi ki ansarz.  Kot SBFA ek SNPA se osi bann madanm ki ansarz.  Parey zot konnen, SRC, STC, Lotorite Servis Finansyel se bann madanm ki an têt.

Fanm Seselwa 2016 pa zis fer Bidze kot lakaz, me zot fer Bidze Nasyonal.  Zot pe kree larises pou sa nouvo Sesel.

Mr Speaker, mon pa ankor fini, i ankor annan.  Mon’n koz lo sa Lasanble, me fanm pa zis vizib dan Lezislatif ek Zidisyer.  Zot osi dan Egzekitiv e dan Administrasyon.  Madanm Seselwa ozordi i Minis, Sekreter Zeneral dan Biro Prezidan.  Chef Secretary dan Ladministrasyon Piblik, bann Anbasader, bann Sekreter Prensipal.  Bann Direkter Zeneral, bann Administrater Distrik e Mer Lavil Victoria i en madanm e Vis Prezidan Lasosyasyon Enternasyonal ki regroup bann Mer.

Fanm Seselwa 2016 i bann Leaders dan sosyete sivil.  Kot legliz, dan kominote zot pa zis koze me zot fer keksoz marse.

Le pwen Mr Speaker, se ki ozordi le 8 Mars nou pe selebre en Sesel kot Seselwa i kapab reve, en Sesel kot i posib pou fer sa rev vin en realite.  Ozordi alor nou pe selebre tou fanm Seselwa.

Mr Speaker, zot partou.  Zot anmenn nou travay bomaten dan bis.  Zot anmenn nou aletranze dan avyon.  Zot dan nou Liniversite, dan nou lekol, dan nou Lopital, dan nou Lorganizasyon Biznes.  Zot lo court, lo laplenn, lo stage pe performen.  Fanm Seselwa i lafyerte nou nasyon.

Fanm Seselwa 2016 in emansipe dan tou konteks.  Resaman nou’n temwanny listwar dan politik ler nou ti annan en premye kandida pou pos pli o dan pei.  Wi Sesel 2016 i en Sesel lib.  Kot napa okenn baryer ki anpes personn vin devan, koze, kontribye, kritike mannyer zot oule pou fer nou pei mars pli byen.

Par kont Mr Speaker, mon oule termin lo en pwen kosyon.  Nou’n sorti lwen, ledikasyon in liber nou pep.  Tou Seselwa i debout egal devan Lalwa avek kanmarad.  Annou pa les nou vin viktim bann sirkonstans.  Vyolans domestik i ankor en menas dan bokou lakour e malerezman se fanm ki dan son mazorite sibir sa kriyote.

Nou pe dir dimoun respekte kanmarad, nou pe dir ki vyolans pa zanmen rezourd okenn problenm.  Me nou pe al pli lwen.  Dan kad proteksyon bann madanm avek en nouvo Lalwa ki nou ava anmennen avan lannen fini.

Lot defi ki nou bezwen adrese Mr Speaker, se kondisyon nou bann madanm tousel.  Statistik i montre ki plis ki anviron 60 poursan bann dimoun ki fer laplikasyon welfare se bann madanm tousel.  I annan bokou koze resaman lo size lapovrete.  Mon fyer pou dir ki Prezidan in adres sa size dan son Diskour Leta Lanasyon.  Saler minimonm pe ganny ogmante, tax pe ganny retire lo saler anba R8555.  Trezyenm mwan saler pe ganny peye e i en realite dan Sekter Piblik.  I annan 25 poursan rediksyon dan pri lakaz dan serten scheme. Pou annan plis servis day care dan distrik e stabilizasyon dan pri komodite de baz.

Mesaz i kler Mr Speaker, sa Gouvernman pa kit personn okenn son sitwayen deryer.  Nou pa’n zanmen fer li e nou pa pou fer li.

Mr Speaker, Gouvernman in sinyal son lentansyon byen kler ki lo kote bann ki pli vilnerab.  Avek tou bann mezir ki’n ganny anonse par Prezidan, en madanm tousel ki lo en saler minimonm e ki pe pey son lakaz i kapab fer li en savings apepre R21 mil par an.  Sa sif i pran an konsiderasyon zis 2 mezir ki nou’n nonmen Mr Speaker.  I annan ankor ki mon pa’n nonmen ki egziste.

Pou terminen Mr Speaker, mon oule fer rapel sa Lasanble ki ler nou koz lo byen net imen annou mazinen lekel ki’n tir sa pep dan lamizer nwar.  Lekel ki’n donn sa pep son dignite e son lidantite atraver ledikasyon, lasante, lozman e lezot konsiderasyon sosyal ki for dan Gouvernman.

Nou Gouvernman in toultan demontre son langazman e se nou popilasyon ki’n benefisye.  Ozordi bokou madanm tousel pou annan plis mwayen finansyel pou leve e debrouye pou pran swen ek zot zanfan e atraver loportinite ki deza la fer sa pa an plis pou debout for lo zot prop lipye.

Mr Speaker, mon oule remersi sa Lasanble pou donn mwan sa loportinite pou fer en deklarasyon ozordi.  I enportan ki nou pa’n zis koze me osi retras en pe kot nou sorti koman en pep.  I enportan nou’n fer en revi pou vwar levolisyon e progre nou nasyon.

Ozordi le 8 Mars, lazournen enternasyonal bann madanm i en moman ideal pou nou dir avek pep Seselwa ki nou fyer nou bann madanm.  Nou rekonnet zot kontribisyon lo nivo nou sosyete, lo nivo lakour, lo nivo landrwa travay.  E nou remersi zot pou sa diferans ki zot anmennen dan lavi nou bann zanfan e nou bann zonm Seselwa.  Mon swet tou madanm en tre bon lazournen.

Mersi Mr Speaker.

(Applause)

MR SPEAKER

Tre byen Minis, eksepte ou’n oubliye dir ki Sekretarya Lasanble i ganny dirize par en madanm e 90 poursan nou travayer i madanm.

(Applause)

MR SPEAKER

Bon parey i tradisyonnelman le ka, nou ava pran enn de bann kestyon.  Nou ava komans avek.  Nou pou donn priyorite madanm la.  Onorab Vangadasamy.

HON SHERYL VANGADASAMY

Mersi Mr Speaker, bonzour Mr Speaker, bonzour Minis, bonzour tou Manm Koleg Onorab ek tou bann dimoun ki pe a lekout.  E tou bann madanm bonn fet.

Mr Speaker, mon kestyon i koumsa.  Minis prenan kont ki ou’n dir poudir isi Sesel nou’n arive achieve egalite ant bann madanm ek bann imsye.  Mon annan en konsern e en kestyon pou ou lo ki ou Minister pe fer an menm tan ki nou pe pouse pou kontinyen empower bann madanm.  Ki nou pe fer pou nou bann zonm osi ki sa achievement ki nou bann madanm pe atenir, ki nou pa pe kit nou bann imsye deryer.

Rezilta sa, ki ozordi nou pe vwar, parey ou menm ou’n anonse ki i annan bokou bann madanm tousel.  Ki nou pe fer pou ed nou bann zonm zot osi kontinyen lo sa menm laliny ki nou pa pe vwar nou, kot bann madanm i bokou pli an avan e bann msye i bokou pli an aryer.  E nou vwar nou bann imsye pe pran zot rol e zot responsabilite koman bann papa dan lakour, zot pe kontribye dan travay zot osi e parey letid kot lekol i montre, bann fiy pe sirpas bann garson dan lekol la.  E ki nou pe fer pou fer sir ki sa balans e sa egalite i reste dan nou zoli pti Sesel.  Mersi.

MINISTER VINCENT MERITON

Mersi Mr Speaker.  Mr Speaker, mon pa ti’n prepar mwan pou kestyon selman ki ou a fer.

Mr Speaker, i pa mon Minister tousel ki pe adres sa size.  Mon krwar se Gouvernman, se sosyete, se Lasanble, se sosyete sivil, se legliz, se nou tou ansanm.

Onorab mersi pou fer kler lefe ki ler ou pe koz madanm ozordi ou pa pe dir madanm kont zonm, nou pe dir madanm i konplemant zonm akoz Bondye i dir zot 2 zot vin ansanm, zot vin enn.  E ki nou pe dir, nou bezwen asire ki zot reste enn.

Defi ozordi se ki vre, nou’n protez nou bann fiy ozordi, bann fiy pe kit nou bann garson.  Ou’n byen dir dan lekol e nou bezwen.  I annan progranm ki deza an mars pou gete ki mannyer nou kapab empower nou bann garson, permet zot demen vin bann zenn ek bann zonm responsab akoz tro bokou zot ozordi i kapab si nou pa vreman met lanmen lo la kapab perdi.

Lekol i reste en fron batay.  Kominote i reste en fron batay e fodre ek lekol ek kominote nou tou nou lager antoure.  Nou pa kapab al avek en lapros sa pa konsern mwan, i konsern en lot Minister oubyen en lot Departman.  I konsern nou tou.  Ler ou leve Dimans bomaten mon ti al jog Beau Vallon.  I annan 2 bann dimoun ou vwar pe dormi.  I konsern mwan.  Nou’n fer serten keksoz me i demann en travay bokou plis ki sa.

I demann ou rewind 20 an aryer e pou nou pa kontinyelman rewind 20 an aryer nou bezwen lager la ozordi dan lekol pou nou kapab idantifye lekel sa bann zanfan ki nou santi atraver zot konportman, nou kapab detekte serten defi ki nou bezwen met lanmen lo la atraver tou bann fors sivil, bann fors viv ki annan pou nou kapab les sa pov ansenyan vini zis montre lir, konte avek ekrir e pa les li vin nou manman ek nou papa.

Mon responsab, nou responsab, paran i responsab, sosyete an zeneral i responsab.  Ki nou kapab ankadre sa bann zanfan, sirtou nou bann pti garson pou zot vwar en rezon det dan lavi.  Zot benzwen vwar bann figures ki avek zot.  Bann father figure akoz manman i toultan la.

Sa 60 poursan fodre nou diminyen li.  I difisil.  Sa deba en lot konversasyon, en lot deklarasyon mon a vin fer.  Me selman i demande ki nou travay lo nivo sosyete sivil.  E legliz pe fer en kantite pou kapab donn nou en koudmen.  I annan bokou progranm ki tous zonm.  I annan bann kids for Christ, youth for Christ, couple for Christ.  I annan bann progranm Zezi vre zonm.  Tou sa bann progranm zonm ki annan dan tou bann legliz pe kapab don valer nou bann zonm.  Montre zot ki être en zonm se pa zis kapasite fer zanfan oubyen bat en lot oubyen fim lapoud, me osi kapab pran responsabilite pou aprann dan lekol.  Pou fer byen dan travay e pou fer lafyerte ou fanmir e pas letan ek ou fanmir.

Ozordi dan lavi i annan en kantite presyon ki vre zonm i anba presyon e vre bann madanm i kapab tenir bokou plis presyon ki nou bann zonm.  Ou pa vwar madanm i pann, pti git.  Me ou vwar plis zonm konmsi ki al dan sa bann domenn konmsi tandans suicidal parey Angle i dir.

So i annan en travay konpreansiv ki pe ganny fer par tou Lazans, par Minister Lasante, par Minister Ledikasyon, par Minister Lakaz, par mon Minister anba diferan progranm.  Anba sapo progranm renesans sosyal.

Pran par egzanp ‘mon lasante, mon responsabilite’ enn bann target enportan se nou bann garson a pli zenn az anmezir zot grandi.  Akoz lasante i donn ou en sans pou kapab apresye lavi.  Ledikasyon i donn ou en sans pou kapab dekouver lemonn e nou tou nou bezwen lager antoure pou kapab fer sir ki nou bann pov ansenyan i ganny en sans pou zot respire akoz zot anba en kantite presyon zot osi.

Si nou dir i annan serten defi kot ledikasyon avek kot lasante ou byen konpran presyon ki sa bann dimoun i travay anba la.  Ou bezwen konpran ki mannyer nou bezwen focus nou bann lenerzi pou nou ganny plis dimoun pou al pran en domenn dan vokasyon sosyal, pou kapab pran en vokasyon dan lansennyman, en vokasyon dan lasante pou nou ankadre nou bann zenn manrmay pou kapab permet zot kapab grandi dan bann zenn garson responsab ki konbatan, ki batan, ki oule vreman fer en perse dan lavi kot i konsern zot ledikasyon, zot lasante e zot responsabilite lo nivo sosyal dan kominote e dan distrik.

So vwar la Mr Speaker, mon napa en larepons defini la ozordi.  Me en travay ki nou tou nou fer.  Sak Lazans i annan en progranm byen defini kot nou target nou bann zenn, nou bann garson pou kapab annan en lobzektif Nasyonal ki a permet ki nou bann garson i ava konplemant e siport nou bann fiy pou nou kapab atenn lobzektif Nasyonal.

Mersi Mr Speaker.

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker.  Minis mersi pou ou konpliman e mon vwar bokou madanm dan Galeri ozordi.  Minis mon ti a kontan konnen ki pe arive avek progranm renesans sosyal akoz otan ki nou annan en kantite lakonplisman ki ou’n site ki nou byen kontan ki ou’n sit sa, pou nou pa bliye.  Nou osi annan en responsabilite anver bann ki riske ganny kit deryer.  Alors si ou kapab donn nou en pti kont randi lo progranm renesans sosyal vizavi bann madanm ki pe fer fas avek bokou defi sosyal.  Prensipalman labi anver zot zanfan, oubyen zot zanfan anver zot ek zot imsye e osi drog.  Mersi.

MINISTER VINCENT MERITON

Mersi Mr Speaker.

Mr Speaker, progranm Renesans Sosyal i pa zis problenm.  Nou ti’n dir, nou ti’n advocate e nou ti’n demann Lasanble pou ed nou advocateIt is about living.  I fason ki mannyer nou viv.  Ki mannyer nou travay, ki mannyer nou etidye, ki mannyer nou pas letan, letan, kalite ansanm.  Progranm Renesans Sosyal i ganny delivre atraver bann progranm sak bann Lazans ki tonm anba parasol Renesans Sosyal.  I annan en kantite ki ganny fer dan domenn ledikasyon.

I annan en kantite progranm ki’n ganny fer, par egzanp progranm Care an partenarya avek Minister Ledikasyon.  Care ki’n selebre son 20an lannen pase, in adopte en lapros whole school approach, dan le sans ki progranm lalit kont drog i pa zis pour bann manm Care Club, me pour lekol an antye.  I annan en kantite progranm ki ganny organize ekstra skoler e koman i form parti Curriculum kot nou ganny sans aprann bann valer, bann fason viv ki permet nou kapab apresye ki nou ete nou menm.  Apresye nou dan sa kosmos dan nou fanmir, dan Sesel, dan lemonn.  Ki sa ki nou’n vini lo later pou nou fer.  Son sitwayennte, bann valer sivik, bann valer sosyal, ki mannyer nou kapab apresye ledikasyon ki nou pe gannyen dan lekol e ki mannyer nou kapab viv byen avek nou pti kanmarad.  Me i osi demande ki nou al pli lwen ki zis ki lekol me nou al dan fanmir pou gete kisisa ki pe ganny fer avek bann fanmir.

Lo nivo lekol ankor, i annan Personal, Social and Sivic Education ki’n ganny entrodwir an rezilta progranm Renesans Sosyal, kot nou ranforsi sa bann progranm avek plis Ansennyan de kalite e avek plis bann progranm ki anmenn bann zanfan ansanm an deor lekol e pandan lekol.

Lo nivo kominote, nou’n deza tous en kantite bann paran ki nou santi i bezwen, atraver sipor lafanmir, bann Parenting Sessions ki’n ganny fer atraver pei.  Nou’n ganny sans fer bann progranm sansibilizasyon bann paran lo kestyon labi parey ou’n dir e mon satisfe ki swivan en desizyon ki Prezidan ti pran, nou’n kapab, an partenarya avek Lapolis, annan en Unit spesyal ki ler i annan ka labi, i travay avek Minister Lasante e lezot Lazans konsernen, pou kapab process bann case pli vit ki posib, met kot Biro Attorney Zeneral.  E bann case ki nou process depi ler nou’n fer sa nouvo Child Protection Unit la, i preski dir 100 poursan water tight akoz bann bon:- lefe ki nou’n swiv bann prosedir ki nou’n mete e lefe ki nou pe ganny bon kolaborasyon avek bann paran ler bann ka labi i arive.  I reste ankor annan serten paran ki ler in donn son statement, apre, madanm par egzanp, i deside protez sa zonm, i dir tir statement e la kot zafer konmsi i pran letan, i drag.  So, i annan osi lezot progranm ki’n ganny fer o nivo kominote, pou ranforsi kapasite bann lezot progranm sosyal ki tous bann diferan kous lasosyete, pou donn zot lespas pou kapab vin ansanm, pa neseserman atraver lalkol, bann aktivite, me osi atraver bann spor, atraver lezot moman lwazir kot neseserman, ou kapab envit fanmir.

Lapolis in kapab rikord en diminisyon dan krim, ki montre bann stratezi ki Lapolis in pran, in port fri.  E kot i konsern nou bann zenn ki’n ganny afekte par fleo, i annan en kantite progranm ki nou pe fer.  Progranm Dove, an kolaborasyon avek Minister Zafer Entern, Lapolis.  I annan bann staz stabilizasyon, reabilitasyon ki pe ganny pran Praslin e lezot zil, ankor pou donn en louvertir bann zenn ki’n ganny afekte.  Permet zot repran zot semen an lavi.  I annan serten soutyen ki nou pe donn bann Lorganizasyon Non-Gouvernmantal, ki pe ed bann dimoun ki’n ganny afekte.  I annan lezot proze ki Gouvernman i annan dan pipeline pou fer, pou kapab permet bann dimoun ki ganny afekte annan en serten soutyen, en drop in Centre, kot dimoun i kapab ganny stabilize.  Avek Minister Lasante i annan depi son Wellness Centre, i annan progranm Mont Royale.  Tou sa bann progranm met ansanm, in tous en bon nonm la popilasyon.  Me selman mon pa oule, mon repete.  Progranm Renesans Sosyal i pa zis rezourd problenm.  I permet ki dimoun i viv byen, ki dimoun i travay byen, ki dimoun i etidye byen, ki dimoun i viv byen dan lakour.

Pa mwan ki pou dir ek sa madanm kan i deside fer zanfan.  Pa mwan ki pou dir ek ki i deside fer zanfan.  Pa mwan ki pou dir konbyen zanfan i deside annan.  I en swa ki li i pran.  E ozordi, a lokazyon Lazournen Enternasyonal bann Madanm, ler en madanm i pran sa desizyon, i bezwen kalkile, son partner i bezwen la for the long haul.  Tou madanm i oule en partner ki la for the long haul akoz i pe koz stabilite son piti, i pe koz stabilite son lakour, i pe koz en sekirite pour ki ler i mars ek baton, i pou annan dimoun ki pou siport li.  I pe prepar son baton vyeyes.  I bann swa ki nou bezwen fer dan lavi e sak desizyon ki nou pran i annan responsabilite ki mars avek.  Gouvernman nou kapab donn ou serten soutyen, serten sipor, me selman desizyon i depan lo sak endividi e nou oule servi sa platform Lazournen Enternasyonal bann Madanm, pou pas en mesaz ek nou bann zonm.  Mersi bann msye ki pe bat latet avek mwan, zot dakor ki nou bezwen edik nou bann zonm, parey Onorab Vangadasamy in dir.  Nou bezwen responsab.  Nou bezwen responsab anver sa desizyon ki nou pran anver sa madanm.  E nou’n deside fer zanfan, i fasil sa.  Me sonny sa piti ki li.

Lot zour mon’n al dinen weekend, mon’n vwar en group zenn pe enjoy.  Mon demann zot, 3 garson, ki plan ou annan pour sa bann fiy la?  I dir mwan, nou pe enjoy.  Mon dir be apre, kalkil byen mon zonm.  Kalkil byen.  E sa mesaz ki nou, nou anvi pase e ki nou bann garson, nou bann zenn garson:- akoz nou protez nou bann fiy byen.  I annan lespas pou nou ale ankor, me selman nou bezwen protez nou bann garson, ki demen zot pa vin en fardo.  Nou pa oule, nou pa oule.  Ozordi a lokazyon Lazournen Madanm, ki Tribinal, ou bezwen anvoy dimoun Montanny Poze.  Nou pa anvi ki statistik Tribinal i ogmante.  Nou bann zonm i kapab pran zot responsabilite.  Zot aprann, zot ganny gidans dan fanmir pou zot vin bann zonm ek papa responsab.

Mersi Mr Speaker.

MR SPEAKER

Onorab Charles.

HON GEOVANA CHARLES

Mersi Mr Speaker.

Mr Speaker, ler mon’n ekout Minis depi bomaten, mon’n realize ki bann madanm, nou plis ki bann bon manman, bann bon madanm, bann bon ser, bann bon travayer, bann bon zanmi, bann bon antreprener ki travay tre dir.  E Minis in dir ki nou’n pran 40an pou nou ariv kot nou ete ozordi.

Alor, eski Minis i kapab dir nou konbyen madanm ki’n tonm akote e ki dan Prizon ozordi e ki progranm reabilitasyon pe ganny fer, pou kapab retourn sa bann madanm dan lasosyete e fer zot vin bann madanm ki Minis fek nonmen taler?

Mersi Mr Speaker.

MINISTER VINCENT MERITON

Mr Speaker, mon napa sif egzakt konbyen bann madanm ki’n tonbe, ki dan Prizon, me zot dir mwan anviron en senkantenn.  Be 50, i 50 tro bokou.  I 50 dimoun ki ti kapab ozordi en MNA, en Ansennyan, en manman me ki akoz sirkonstans lavi, petet mank gidans, petet en move swa, in tonm li dan en sityasyon parey.  Dan devlopman pei, malerezman i annan bann casualty.  Me selman ki nou dir, nou pa oule ki nou vin casualty.  Nou oule ki nou vin beneficiaries akoz mon form parti sa akter ki pe ede kwi sa gato, mon oule en bout sa gato e mon pa oule vwar mwan dan lafreser deor, ler bannla pe manz gato.  Se sa ki pe arive avek sa 50 dimoun akoz bann swa dan lavi ki’n arive.  San blanm zot.  Mon krwar sosyete i ankor en sosyete ki pa kit personn deryer e i annan kot Prizon, en travay ki pe ganny fer pou kapab amelyor fason ki nou travay avek bann madanm ki dan Prizon, atraver annan bann fish teknik lo zot ler zot antre, pou gete ki progranm nou kapab servi, depandan lo sirkonstans krim, gravite lofans zot in fer.  Ki mannyer nou kapab redonn zot serten sans dan lavi e baze lo zot konportman, gete ki mannyer nou kapab travay ek zot pou ed lezot pou fer serten proze dan kadreman Prizon li menm.  Nou ti annan en proze ki Miss Seychelles ti fer lannen pase.  Ti fer en Playground kot zanfan bann inmates ti ganny sans zwe e ou ti vwar ki talan sa bann madanm i annan.  I annan en kantite talan ki nou bezwen nurture malerezman, pou permet zot prepar zot ler zot sorti, sey kapab re entegre dan zot fanmir.  Malerezman i annan ki nou perdi.  Me nou oule fer sir ki nou perdi mwens ki posib.  Se pour sa rezon nou pe dir, focus dan lekol, focus dan kominote pou nou perdi bokou mwens, pou gete ki mannyer ki nou kapab adres sa bann size.  Mon ti oule salye bann madanm, bann Lorganizasyon ki pe travay ek sa bann madanm ki dan Prizon e dir zot ki zot zefor pa anven.  Ki otan ki posib, Gouvernman i donn soutyen atraver perfeksyonn son bann servis ki i donnen.  Donn training, donn formasyon son bann kad, pou kapab donn en sipor bann dimoun ki pe lo nivo sosyete sivil, ki pe donn en sipor pour ki bann dimoun i kapab debout lo zot lipye ler zot sorti dan Prizon, pour bann ki sorti.

Mersi Mr Speaker.

MR SPEAKER

Pour lenformasyon Lasanble, i annan en group madanm apre midi ki pe al vizit bann madanm prizonnyen, parey zot fer tou-le-an.

So, ankor i montre ou langazman bann Madanm Parlmanter Seselwa dan zot zefor pou annan en pli bon sosyete.

Onorab Ghislain.

HON CHANTAL GHISLAIN

Mersi Mr Speaker.

Mr Speaker, mon kestyon i baze lo konparezon ant en baba ki dan vant avek en zanfan ki deza pe viv.

Mr Speaker, nou bann madanm nou porter lavi.  Savedir nou annan pouvwar pou nou anmenn sa lavi e nou annan pouvwar osi pou nou detri li osi.  Nou pa oblize:- napa okenn Lalwa ki obliz nou pou nou kapab anmenn sa zanfan byen dan nou vant parski nou ant lavi ek lanmor si nou pa fer li.  Nou pa bezwen fer sa.

Eski Minis i kapab dir ek sa Lasanble, pre-nan an kont konpare avek sa baba ki dan vant avek sa enn ki pe viv, si i annan okenn Lalwa an plas pou obliz, ou menm fors sa manman pou kapab okip son zanfan byen, pou li pa abandonn li, pou annan responsabilite, menm responsabilite ki sa manman i annan anver sa zanfan ki dan son vant, pou anpes li tonm dan dekadans ouswa menm ganny labi, ou menm ganny vwar partou dan bann landrwa kot i pa devret ete?

Mersi.

MINISTER VINCENT MERITON

Wi.  Sa enn nou pa ti ekspekte sa kestyon.

Mr Speaker, le 8 Mars i pe montre:- mon pa konn Lalwa, selman mon oule enterpret Lalwa ki lemoman ki en zanfan i ganny konsevwar, parey Bondye i dir, in fini vin en etreSo, i bezwen sibir tou proteksyon ki Lalwa i kapab donn li.

Eski i annan en Lalwa ki fors sa manman, mon bezwen al vwar teknikman ki mannyer i ete.  Me ou’n donnen larepons Onorab.  Lefe ki ou’n anfant sa zanfan ki ou pe anmenn li, lefe ki ou’n pran desizyon pou annan en zanfan, i anmenn avek li en lobligasyon, en Lalwa si ou oule ki pa ekrir, ki ou pou protez li ziska ou dernyen respirasyon.  So, sa 9 mwan i form parti tout en preparasyon pou anmenn sa zanfan o monn, me ki ou’n deza pran en desizyon pou kontan li e pou protez li depi day 1.

So, i en keksoz ki nou bezwen vwar me selman mon krwar pour sak fanmir, ler sa madanm ek sa msye i deside antre anvwadfanmir, i en preparasyon, i en nespes kontra ki ganny pran, ki zot fer tou pou fer sir ki sa pti inosan i ganny byen proteze ler i dan vant son manman e osi ler i vin o monn.

Mersi Mr Speaker.

MR SPEAKER

Yes.  Child Neglect Minis.  I deza annan en Lalwa lo Child Neglect.  Ya.

Leader of the Opposition.

HON DAVID PIERRE

Mersi Mr Speaker.

Mr Speaker, eski Minis i kapab dir sa Lasanble, kwa spesifik ki zot annan an plas pou monitor e evalye bann landrwa travay, pou garanti ki tou nou bann madanm i ganny respekte toultan e kot napa okenn diskriminasyon kont zot, kot zot pa ganny defavorize pour okenn pozisyon dan tou nou bann landrwa travay isi Sesel?

Mersi Mr Speaker.

MINISTER VINCENT MERITON

Mersi Mr Speaker.

Onorab, fer mwan vin Minis Lanplwa la.

Mr Speaker, mon kapab dir dapre mon leksperyans, ki Sesel nou en manm aktiv ILO.  Enn bann pei ki’n ratifye bann Konvansyon, bann kor Konvansyon e bann lezot Konvansyon ki koz lo proteksyon Drwa Travay.  E Sesel nou krwar fermeman dan lefe ki travay menm valer i bezwen ganny menm lapey.  Pa msye ek pa madanm.

Dezyenmman, diskriminasyon kont madanm.  I annan en Seksyon anba Employment Act ki koz lo la.  Be Gouvernman pe travay pou anmenn en nouvo morso Lezislasyon, kot nou pou fer li pli kler, pli for ankor, ki ou pa kapab viktimiz en madanm pour serten faver ki ou’n kapab demann li, ki in refize donn ou.  Lo nivo sak landrwa travay, sa HR, Human Resources Management la, i devret annan en sistenm ki i devret vey sa osi akoz dan landrwa travay i annan e zonm e fanm e petet ti a bon annan en pti survey, en pti legzersis pou vwar konbyen tel ka ki’n ariv devan e sansibiliz lo la e petet servi sa platform le 8 Mars ozordi, pou dir bann madanm ki santi li dan en serten fason pe ganny diskriminen kont:- i annan serten diskriminasyon kont li, ki fer son lavwa tande, ki vin devan.  I annan son Union, i annan son Supervisor ki i kapab koz lo la.  Antretan ki parey mon dir, Gouvernman i vin avek serten morso d’Loi ki i kapab fer sa pli kler.

Mersi Mr Speaker.

MR SPEAKER

Onorab De Commarmond.

HON CHARLES DE COMMARMOND

Mersi Mr Speaker.

Mr Speaker, etandonnen nou commitment pour bann madanm e a sa lokazyon, sa zournen spesyal ozordi, eski Minis i kapab konsider diskit dan Cabinet pou revwar Maternity Leave aktyelman pour bann madanm.  Byensir aktyelman i 3 mwan.  Mon pe demande pour ki i ganny konsidere en lot 3 mwan, lo baz half day, dan bann landrwa travay.  Maternity Leave.

Mersi bokou Mr Speaker.

MINISTER VINCENT MERITON

Mersi Mr Speaker.

Mr Speaker, ozordi i 14 semenn.  2 semenn avan si ou bezwen.  Si non ou al direk zero e apre ou ganny ou 14 semenn en sel kou.  E apre 5 zour pour sa papa.  Fodre in deklar sa piti.

So, Onorab ou pe demande si nou kapab donn ankor 14 semenn, sa voyaz a demi tan.  Ok.  Bann pei Norde ki fer sa.  i annan bann pei i donn ou 6 mwan, konmsi pran leave.  Mon pa kapab donn ou okenn langazman lo la.  I pa dan mon portfolio, selman mon a met sa devan mon koleg Minis Lanplwa pour son konsiderasyon.

I bann pa sosyal progresiv ki nou pe pran me selman pou sa madanm kapab ganny ankor 14 semenn demi tan, fodre i annan lezot dimoun ki pe travay, ki pe trimouse pou fer sir ki prodiktivite i annan pou nou kapab anmas ase tax, pou kapab ganny ase larises, pou nou kapab siport sa 14 semenn a demi tan.  Konmsi i parey dan 2 balans.  Zour ou tir en kote, lot kote i monte.  Nou pe esey rod sa equillibrium ki pou kapab permet nou soutenir nou pti pei.

Mersi Mr Speaker.

MR SPEAKER

Selman ti a fer plis sans 7 semenn plen tan, non Minis?

MINISTER VINCENT MERITON

……….. Kalkil la, Onorab Matematisyen ti kapab ed nou ek sa.

(Laughter)

MR SPEAKER

Bon, avek sa nou’n ariv lafen Statement.  Nou a remersye Minis e ekskiz li parmi nou, avek son delegasyon.  Parey i toultan leka ler Minis Meriton i dan Lasanble, en kantite:- Lasanble i gou.  Bann manrmay i dir i gou.

So, mersi bokou Minis.

Bon nou, nou annan en dernyen travay pou nou fer e sa se nou annan nou First Readings, 3 Bill.

MADAM CLERK

This Act may be cited as the Constitution of the Republic of Seychelles, (Seventh Amendment) Act, 2016.

This Act may be cited as the Constitutional Appointees Emoluments (Amendment) Act, 2016.

This Act may be cited as the Penal Code (Amendment) Act, 2016.

MR SPEAKER

Bon, avek sa nou’n ariv a lafen nou travay pour ozordi.  Parey labitid nou annan Meeting ABC.  E parey mon ti’n deza enform le 2 Dirizan, semenn prosen pour semenn Frankofoni e Lasanble pou la premyer fwa ganny fer an franse.  So, komans pratik zot franse e prepar zot diskour an franse.

Mersi Bokou.

(ADJOURNMENT)