::
Home » Verbatim » Verbatim - Third Term 2015 » tuesday-22nd-december-2015-

tuesday-22nd-december-2015-

NATIONAL ASSEMBLY OF SEYCHELLES

Tuesday 22nd December, 2015

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal.  Bonzour tou bann ki pe ekout nou dan lakour.

Mon oule welcome back bann Manm Lasanble Nasyonal ki ti’n al lo en recess akoz Eleksyon Prezidansyel in pli long ki nou tou nou ti ekspekte, me ozordi nou bezwen zwenn pou nou termin serten biznes enportan pour ki pei i kapab fonksyonnen.

Premye keksoz ki nou pou fer ozordi se nou ava pran First Reading Appropriation Bill.

ASSISTANT CLERK, MS LUISA WAYE-HIVE

This Act may be cited as the Appropriation Act, 2015.

MR SPEAKER

Bon.  Dezyenmman, nou annan nou en seri Mosyon ki pou aprouv nouvo Gouvernman e bann Minis.  E parey i tradisyon, sa bann Mosyon pou ganny prezante par Leader of Government Business.

Nou pou al dan sa fason.  Leader of Government Business pou prezant Mosyon enn par enn.  Savedir, sak Minis ki’n ganny nominen pour laprouvasyon.  Apre pou annan en deba lo Cabinet an antye, savedir tou Minis ansanm.  E ler in fini annan deba, nou ava pran vot lo sak Minis enn par enn.  I kler sa pour nou tou?

So, mon ava envit Leader of Government Business pou fer son bann prezantasyon.

HON MARIE-ANTOINETTE ROSE

Mersi Mr Speaker e bonzour tou dimoun.  Tou dimoun ki a lekout.

E Mr Speaker, mon premye Mosyon i lir koumsa:-

Mon demande ki sa Lasanble i aprouv apwentman fer par Prezidan Larepiblik, pour ki Mr Vincent Meriton i vin en Minis anba son Gouvernman.

Mersi.

MR SPEAKER

Okenn ki segonde?

HON CHARLES DE COMMARMOND

Mr Speaker, mon segonn sa Mosyon.

MR SPEAKER

Ok, lot Onorab.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Mr Joel Morgan koman Minis.

MR SPEAKER

Okenn ki segonde?

HON CHARLES DE COMMARMOND

Mr Speaker, mon segonde.

MR SPEAKER

Trwazyenm.

HON MARIE-ANTOINETTE ROSE

Mr Speaker, mon demande ki sa Lasanble i aprouv apwentman Madanm Macsuzy Mondon koman Minis.

MR SPEAKER

Okenn ki segonde?

HON CHARLES DE COMMARMOND

The Motion is seconded Mr Speaker, Sir.

MR SPEAKER

Katriyenm.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Mr Jean-Paul Adam koman Minis.

MR SPEAKER

Okenn ki segonde?

HON CHARLES DE COMMARMOND

Motion is seconded Mr Speaker.

MR SPEAKER

Senkyenm.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Madanm Mitcy Larue koman Minis.

MR SPEAKER

Okenn ki segonde?

HON CHARLES DE COMMARMOND

Mon segonn sa Mosyon Mr Speaker.

MR SPEAKER

Sizyenm.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Mr Alain St Ange koman Minis.

MR SPEAKER

Okenn ki segonde?

HON CHARLES DE COMMARMOND

Motion is seconded Mr Speaker.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Mr Christian Lionnet koman Minis.

MR SPEAKER

Okenn ki segonde?

HON CHARLES DE COMMARMOND

Mon byen kontan pou segonn sa Mosyon Mr Speaker, Sir.

MR SPEAKER

Ok.  Wityenm.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Ms Idith Alexander koman Minis.

MR SPEAKER

Okenn ki segonde?

HON CHARLES DE COMMARMOND

Segonde Mr Speaker.

MR SPEAKER

Nevyenm.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Mr Charles Bastienne koman Minis.

MR SPEAKER

Okenn ki segonde?

HON CHARLES DE COMMARMOND

The Motion is seconded Mr Speaker.

MR SPEAKER

Dizyenm.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Mr Didier Dogley koman Minis.

MR SPEAKER

Okenn ki segonde?

HON CHARLES DE COMMARMOND

Mosyon i ganny segonde Mr Speaker.

MR SPEAKER

Onzyenm.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Mr Michael Benstrong koman Minis.

MR SPEAKER

Okenn ki segonde?

HON CHARLES DE COMMARMOND

Seconded Mr Speaker.

MR SPEAKER

Douzyenm.

HON MARIE-ANTOINETTE ROSE

Mr Speaker, mon move ki sa Lasanble i aprouv apwentman Mr Wallace Cosgrow koman Minis.

MR SPEAKER

Okenn ki segonde?

HON CHARLES DE COMMARMOND

The Motion is well seconded Mr Speaker.

MR SPEAKER

Ok.  La i enportan pou note ki kantite nonm Minis i an konformite avek Konstitisyon.  Setadir, ant 7 a 14.  I annan 12 Minis e deba i ouver.

Onorab Leader of Government Business.

HON MARIE-ANTOINETTE ROSE

Mr Speaker, ozordi nou pe aprouv Cabinet nouvo Gouvernman elekte, ki’n donn Prezidan Michel en nouvo manda pou diriz sa pei.  Desizyon dernyen Eleksyon i kler.  Ki sa pep in deside ki se Prezidan Michel e non pa en lot pou diriz nou pei e in demann li pou al fer sanzman neseser pou amelyor plizyer keksoz dan nou pei.  Prezidan Michel a son tour, in asir pep Seselwa stabilite ekonomik, politik e sosyal, plis devlopman e meyer service delivery.  In mandate ki dan son premye 100 zour, keksoz imedyat i ganny fer.  Sa nouvo Cabinet i mark kontinite ki bezwen egziste, si nou anvi ki bann Minis i al dan zot Minister respektif e enplimant sanzman.  I annan Minis ki’n la pour plizyer lannen e zot in annan leksperyans plizyer portfey.  Zot anmenn leksperyans ki neseser ler sanzman pe ganny fer.  Zot anmenn wisdom dan lafason ki sanzman pou ganny enplimante.  Zot anmenn en nouvo lapros osi, akoz se sa ki lepep in dir zot al fer.  Mesaz pa’n zanmen pli kler ki sa.

De lot kote, nou annan en group zenn zonm ek fanm ki’n annan detrwa lannen leksperyans koman Minis.  Zot osi zot in komans fer serten travay dan zot Minister respektif.  Deza, anba zot direksyon, sanzman ti’n komanse e la ankor enn fwa, Prezidan Michel in dir zot al travay e fer reform neseser, pou amelyor servis ki nou pep i ekspekte.

Nou Lasanble Nasyonal lo kote Parti Lepep, nou krwar dan sa prensip ‘Together’ akoz Sesel i bezwen tou son zanfan.  Reform ki ekspekte pran plas dan servis piblik, i reform neseser pou fer ki sa ki nou ofer nou pep Seselwa i plis, pli byen, pli bon, pli efikas e pli efektif.  I pa en sanzman detrir pou rekonstrir me en legzanmen, en odit kot nou kontinyen amelyor sa ki byen me arete fer sa ki mal e adopte en nouvo lapros pou fer sa ki byen.

Sa retonbe reform ki nou ekspekte apartir ozordi, swivan laprouvasyon nouvo Cabinet Minis, i al odela en portfey Ministeryel.  En Minis i annan en Management, en middle Management, en lower Management e osi lezot travayer ki osi bezwen ganny revwar, ganny reformen, ganny odite e ganny reevalye.  Nou felisit bann travayer Servis Piblik ki’n tann lapel nou Prezidan alors, pou redouble zefor pou anmenn ver nou, nou pep en pli bon servis e nou demande ki bann ki pa ankor tann sa lapel, i fer en rezolisyon lannen pou fer li.  Fer li pour Sesel, fer li pour nou pei.  Fer li koman en patriyot e non pa en partizan.  Ankor enn fwa, Sesel i bezwen tou son zanfan.

Mr Speaker, manda Prezidan Michel set en manda lezitim.  E Eleksyon in ganny fer e nou tou nou’n desann e eksprim nou.  Lepep in koze.  Parey Prezidan Michel in dir, nou napa letan pou gaspiye.  Nou letan ki nou annan se pou travay ansanm.  Zonm, fanm e zanfan Seselwa ki viv Sesel e ki konpran tre byen kwa ki merit fer pour nou tou, mon dir nou tou, al an avan.  Sa i demande alors ki nou pep osi i fer sa sanzman ki li menm li i pe rode.  Parey nou dir an angle, be the change you want to see.

Souvandfwa, nou’n koz isi dan sa Lasanble lo en sanzman mindset.  En sanzman fason fer, fason azir, fason reazir.  Plan Prezidan Michel pour sa prosen 5an se en plan realis.  I pa’n promet lesyel ek later me en plan konkret ki pou amelyor lavi nou pep, tenir nou lekonomi, ogmant krwasans e larises e retir bann fleo sosyal ki pe detrir nou.  I annan en rezon alors akoz ki Parti Lepep in swazir sa tenm ‘Ansanm’ dan son Eleksyon.  Sa set akoz se selman ansanm, nou tou ansanm, ki nou pou kapab realiz sa plan.  Sa tenm ‘Ansanm’ alors pe envit ou pou ou osi donn koudmen dan sa devlopman.  Nou dan Parti Lepep, nou pa vin pil lo personn.  Nou pa la pou kree divizyon.  Nou pa la pou detrir Sesel.  Nou pa la pou fer Sesel plere.  Nou pa la pou viv lo fristrasyon en pep e ankouraz li pou pil lo son prosen, me nou la pou travay ansanm.

(Applause)

HON MARIE-ANTOINETTE ROSE

Alors, ou sa enn ki’n santi ou konfize e menm fristre pandan sa peryod Eleksyon, les sa tenm ‘Ansanm’ fer ou reflesir ki ou osi ou annan en par dan devlopman nou pei.  E travay ki bann Minis in ganny demande pou fer, merit ganny siporte par ou kontribisyon.  Prezidan Michel in dir ki i Prezidan tou Seselwa e son Gouvernman alors i Gouvernman tou Seselwa.

Ou, sa siporter Lepep senser, ou sa enn ki’n sikonbe, fer sakrifis personnel.  Donn en koudmen pou anmenn sa mesaz ‘Ansanm.’  Prezidan Michel i konnen ki ou en vre patriyot.  Enn ki pa’n les fristrasyon personnel eblouir ou lespri, me enn ki’n met Sesel premye.  Mersi.  Mersi pou sov Sesel e fer sir ki tou sa ki nou’n travay pou akonplir i ankor la entak e solid.  E mersi ki sa mersi pa fini zis ozordi, me ki i anmenn avek li en nouvo lapel pou nou kontinyen travay pour sa nouvo Sesel.  sa nouvo ladministrasyon alors, merit vin pli atantif, pli sansib, pli realis, pli pratik, pli rezonnab, san ki nou bliy nou bann prensip nob ki’n anmenn nou kot nou ete ozordi.  Zanmi Lepep.  Sa Parti Lepep.  Sa gro ros i ankor entak parey sa glasi lo Montanny Trwa Frer.  En siklonn in soufle lo nou e en lavalas in desann lo nou me ler soley in leve son lannmen, sa gro ros lo Montanny Trwa Frer i ankor reste entak.

(Applause)

HON MARIE-ANTOINETTE ROSE

Ozordi i letan pou re batir e rekonstrir e prouve ki lepep in fer en bon swa.  Pa zanmen oubliye ki nou’n lager kont tou kalite lafors e dan bann pei kot sa in arive, Gouvernman in tonbe.  Isi Sesel nou ankor pe debout.  Lafors en Parti pa zanmen ganny teste ler i pli for me ler i fer fas avek plis defi.  Nou’n al lo fron batay, zot in lager antoure me nou’n sorti venker.  Venker avek imilite.  Venker avek plis lasazes.  Venker avek en leker pou pardonnen e rekonsilye pour lanmour Sesel.

Mr Speaker, mon swet sa nouvo Cabinet Minis tou de bon.  Nou senser felisitasyon.  Nou’n lo fron batay ansanm e nou pou kontinyen travay ansanm.  Pa bliye ki zot Lepep zot.  Al travay avek leker Lepep, fason fer Lepep, prensip Lepep pour Lepep Seselwa.

Mersi.

(Applause)

MR SPEAKER

Onorab Chantal Ghislain.

HON CHANTAL GHISLAIN

Mersi Mr Speaker.  Bonzour tou dimoun.

Mr Speaker, ankor dan selman 9 zour soley pe al kouse lo 2015 e byensir nou pe al akey en nouvo lannen 2016.  De lot kote pandan sa 9 zour ki’n pase, nou’n annan nou Eleksyon, in annan nesans bann nouvo baba, Dimans Prezidan Michel in sermante, yer nou’n dir adye en bon travayer e zanfan La Digue: e devan sa Lasanble ozordi i Mosyon pou aprouv Cabinet Minis dan Gouvernman.

Mr Speaker, ozordi i plis ki ler pour nou aret en kou, pou en gran moman refleksyon.  Me nou bann pli gran refleksyon i devret al ziska pli boner pandan sa enn lannen.  Refleksyon lo lannen ki’n pase, sa ki nou’n arive akonplir koman en kominote, koman en etidyan, koman en Travayer Piblik, koman en Sitwayen nou pei.

Levennman sa dernyen 6 mwan, in devret fer zot realiz en keksoz tre fondamantal senser e serye.  Sa se pouvwar Lasanble Nasyonal e pli enportan, pouvwar sa mazorite ki Parti Lepep i annan dan sa Lasanble.  Sa menm Parti ki’n donn mwan e ki’n donn zot tiket pou voyaz lo la.  Prezidan i apwent son bann Minis e se Lasanble ki konfirm zot dan sa post.  An dout mo se nou dan sa Lasanble, ki dir ki pou fer.  Se nou ki dir zot, si zot pou vin Minis ou non.  Sa ki annan son pei aker, i konn tre byen ki mon pe dir e lo non tou mon bann kominoter, nou dir zot ‘mersi’ pou reste senser avek nou, senser avek nou Gouvernman e senser avek nou Parti.

Me gar a selwi ki krwar son lanbisyon personnel ti pou pas avan tou.  Me dan zis 2 pti mo mon a sey rezim en pti pe, sa ki mon pe sey dir sa.  Lekel ki pou krwar si ou pou kraz nou lanmen, sa menm lanmen ki pou ede nouri ou, bers ou, ozordi sa menm lanmen ou krwar ti pou’n fini geri e annan lafors pou leve pou aprouv ou dan post Minis?  Sesel i nou pei e parey Prezidan Michel i toultan dir, e yer in repet ankor, Sesel i bezwen lanmen tou son zanfan.

Mr Speaker, mon napa 24an dan sa Lasanble parey Onorab Onorab Charles De Commarmond e osi Onorab Jeovana Charles – tro bokou Charles dan Lasanble.

Parey mon’n dir Mr Speaker, mon napa 24an dan sa Lasanble me selman 4an, e pandan sa 4an mon’n antann nonm en kantite koz lo sa zafer Service Delivery isi dan sa Lasanble.

Prezidan li menm koman Dirizan sa pei, in met li pli direk: aranz nou, aranz zot.  Mwan menm mon randi avek koz lo la.  Sa zafer fer dimoun tourn an ron parey toupi, fer zot monte desann – call pas enn – ‘’alo mon pe regarde ki zistans mon dokiman in arive.’’  ‘’Hold on mon a pas ou ek Zorzet.  Zorzet i pas ek Pyer.  Pyer i transfer call avek Paul e sa dimoun a sak letan, li nek i pe repete menm.  Kwa, akfer i pe call sa Minister ouswa sa Departman?

Pa fini Paul pou retourn ankor kot Zorzet li.  I poudir, Hold on i ava regarde avek Zertrid si li i konnen ki pe pase.  Me plito pas mesaz, Zorzet li i pou dir ou, i ava al vwar ou file, call demen tyeke ouswa menm parfwa repons –‘’Kit ou limero nou a call ou ler nou trouve.’’

Me nou tou nou konnen ki arive.  Sa call pa zanmen vini, ziska sa dimoun i bezwen re call li menm.  Bann Zofisye Servis Piblik, se zot ki ansarz servis lepep e zot devret akonpli zot fonksyon avek konpasyon e enparsyalite pou zot ganny respe e konfyans popilasyon.  Sa i neseser pou akonpli en bon nivo gouvernans.  Bann benefis ki ganny rekolte atraver bon gouvernans i kapab akseler-e devlopman dan nou pei e amelyor lavi e byennet nou pep.

Mr Speaker, i malere pou dir ki an 2015, nou ankor pe tann sa mo ‘Birokrasi’ dan bann Departman Gouvernman.  En mo ki nou ti’n devret aret tande depi plis ki 15an pase, ler nou ti antann nonm Prezidan Rene sa letan, dan son Diskour i ti dir, arete ek sa zafer Birokrasi dan bann Departman Gouvernman – arete osi kasyet sa zafer – kasyet file dimoun –donn repons dimoun pou let ouswa telefonn pour zot korespondans.  Sete sa menm letan, ki sa zafer sa letan 14 zour pou reponn en let, ti vin Regilasyon.

Me ki malere ankor 2015, apre sa zafer 14 zour in rarman ganny espekte.  Lenformasyon ki piblik i gannyen, pa kredib e i pa presi osi.  Piblik i ankor pe monte desann plizyer fwa, zis pou zot vwar en Zofisye.  Sa zafer respe piblik ouswa kliyan nepli annan.  Dir piblik ki zot pou ganny larepons dan 14 zour e apre sa, piblik i bezwen esper 3 mwan ou menm 6 mwan pou li ganny en repons.  Met piblik asize pou plis ki en demi zournen, san mazinen poudir i pe gaspiy letan, larzan, e lenerzi e li menm li i pa pe al travay.

Lalis i long Mr Speaker, e sa bann tel sityasyon ki fer nou piblik fristre.  E se sa ki’n arive o kour sa dernyen 5an.  Zot ankoler, maltret tou Lorganizasyon Gouvernman e byensir zot zeneraliz tou problenm.

O kour sa dernyen 4an, sa in vin pli evidan.  In vin en zouti politik masiv, ki’n fer alors refoul lo ledo Prezidan li menm ek son Ladministrasyon.

Mr Speaker, mon ankor krwar dan kapasite tou nou bann Minis pou delivre pou sa pep. Me pou arive fer sa, zot zorey i devret vin pli atantif a leokri piblik, lizye pli atantif  a zot bann Zofisye dan sakenn sa bann Minister e Departman, pou evite ki enn antre zot, i zwe politik avek Lanplwa, Sekirite, Trankilite, Stabilite, Talan, Tranzaksyon, Demars e  pli grav zwe politik avek Lasante, Ledikasyon e Vant dimoun.

Mr Speaker, nou bezwen admet, ki annan Departman ki’n annan bokou lamelyorasyon. Mon profite pou salye devouman e travay dir gran mazorite travayer Seselwa, ki swa dan Gouvernman ou menm dan prive, ki pe kontinyen travay pou byennet e devlopman nou pei, san les politik e lezot diverzans lopinyon vin en baryer anver zot servis pou piblik.

Pou sa minorite ki ankor krwar ki zot kapab kontinyen met file dimoun anba latab, fer dimoun tourn an ron, monte desann, in ariv ler e in plis ki ler pou zot deside ki zot anvi fer, akoz dan Gouvernman pou nepli annan plas pou sa kalite latitid e move fason fer.

Mr Speaker, petet la mon ti a sizere, posibilite annan bann dimoun spesyalman dan Biro Prezidan, ki pou atase direkteman avek bann Minister, sirtou bann pli gran ki ti ava osi zet en latansyon spesyal, lo servis bann Zofisye.  Kot Minister Lasante par egzanp.

Mon ti a sizere osi kekfwa kot bann Lopital, Klinik zot ti ava annan bann Hospital e Clinic Managers, ki ava ede dan sipervizyon ladministrasyon sa Klinik, Sant Lasante Lopital.  La mon pe koz lo Zofisye ki pa’n kalifye dan domenn Lasante – pa neseserman kalifye dan domenn Lasante me ki kalifye dan ladministrasyon.  Zot pou en lot lizye pou sa Minis li menm e pou Prezidan osi.

Mr Speaker, nou pep ozordi in vin enn tre egzizan.  Menm tro egzizan, ki zot in perdi preski tou sans larealite: sa menm realite ki’n fer en kantite ganny anbete.  Sa realite i se ki napa nanryen ki vin dan dalo e napa nanryen ki zis sorti anler e bat ater.  Napa personn ki annan baton mazik.  Nou bezwen travay: travay e travay pli dir ankor.

Larealite se ki lavi ozordi i ranpli avek defi.  I Drwa e devwar sakenn de nou, pou debout ferm e plis ki zanmen pou pran nou responsabilite pou travay dir, pou sirmont tou bann defi devan nou.  Koman en Parti nou’n prouv sa o kour sa Eleksyon.

Parey nou Motto i dir: Fearless in Dignity. Fas a okenn defi, nou pa per.  Sa ki sap nou, nou ava ranmase, rekomans a zero si fodre e ansanm nou pou kontinyen.  Prezidan Michel, in montre nou pep e lemonn antye sa an 2008 ler lanmans pwalon ti so, i pa ti taye li.  I pa ni ti al dormi e i pa ni menm ti swazir pou al plant ni bannann, ni menm pou asize e triye dan sa lepep lekel ki lera, lekel ki ibou ouswa poul ki i devret proteze dan kazo.  Me i ti reste e fer fas kont sa lasaler pwalon e nou osi nou’n aprann tyonbo lanmans pwalon so nou osi e debout ferm kont 5 oponan, pou fer sir ki Sesel pa lev avek en lizye anfle bomaten, zis akoz in plere tou lannwit.

Mr Speaker, set avek menm viger, ki mon salye sa zonm Digwa ki nou’n dir adye yer, akoz in travay ziska son dernyen zour e sete dan son Bitasyon Tomat, Grand Anse La Digue, ki i ti donn son dernyen kouraz.  Set avek menm viger ki mon salye bokou fanm e zonm Digwa e osi bann ki sorti Mahe e Praslin, ki menm avan soley i pet montanny, zot in fini leve pou debourye dan zot Guesthouse e menm bann ki al fer 3 ou 4 job.

Pa akoz zot mizer sa msye, en.  Digwa i fer 2 a 3 louvraz akoz senpleman, akoz i son swa: akoz in pran loan pou fer son lakaz.  Pli tar i trouv li posibilite pou tourn sa lakaz an Guesthouse.  I fer 2 ou 3 job akoz i fasil pou fer sa lo nou zil, olye al anpar lanmen avek Welfare.

Laprev se ki nou dimoun lo La Digue ki lo Welfare, pa zanmen depas 20 dimoun e tou dimoun i dan lanplwa.  Laprev ki Digwa i en pep ki’n abitye travay dir e Digwa i konn travay, Mr Speaker.  Sa disan travay dir i merit koul dan lavenn tou dimoun, ki anvi vwar nou pei progrese.  Napa plas pou lapares lo nou zil ki pe devlop sitan vit.  Nou profit tou loportinite ki Gouvernman i met a nou porte, pou debourye olye zis anpar lanmen e espere ki nou pei i kapab fer pour nou.

E finalman nou’n vwar ki’n arive.  Nou’n konn dir ‘mersi’ e set avek 70 poursan ki nou’n dir ‘mersi’ Prezidan Michel.  An konklizyon, Mr Speaker, mon reste konvenki, ki nou tou ansanm nou kapab fer nou bann Minister e pei marse – anmenn plis larises e fer lafyerte nou pei.  I responsabilite sakenn de nou sa.  I nepli tan pou reste deryer e kritike san lev en pti ledwa pou ede.

Mr Speaker, la ki nou pe apros bann moman festivite, mon swete ki tou Seselwa, mon dir tou Seselwa, pe enport ki Parti Politik ou siporte parske letan festivite, napa politik ladan.  Nou fer bann bon refleksyon: refleksyon kote nou sorti, kote nou’n arive e kote nou anvi ale.  Sa i en swe senser ki mon les avek zot ozordi, akoz si nou pa asize e komans retir tou sa ki pe ris nou deryer, tou sa ki fer nou pa bouze dan nou lafanmir, dan nou lavi, nou pou touzour trouv nou trouv nou dan det, trouv nou pa pe kapab okip nou lekor, okip nou zanfan, okip nou lakour.

Mon swet bonn swe lannen 2016 Prezidan Michel avek tou son Staff, Vis-Prezidan Faure, tou bann Minis, koleg MNA. E tou bann dimoun Seselwa, mon dir zot fet en bon Zwaye Nwel e mon dir zot Meyer Ve.  Ki Bondye i kontinyen beni nou zil e beni nou pei.

Mersi.

MR SPEAKER

Onorab David Pierre.

HON DAVID PEIRRE

Mersi Mr Speaker.  Bonzour tou Manm koleg Onorab e tou bann ki a lekout.

Mr Speaker, Mosyon devan nou i pour nou aprouv nominasyon bann Minis dan Gouvernman ki’n fek ganny re-elekte.  Letan mon get lalis bann Minis, mon vwar ki sa lalis i reste parey.  Ki vedir ki sa bann Minis ki pou ganny aprouve, i bann ki’n deza pas devan Lasanble Nasyonal pou zot laprouvasyon.  Alors dan sa konteks mon pa pou long.

Tou fason Mr Speaker, mon santi ki i devwar e i responsabilite sa nouvo Gouvernman atraver son bann Manm Lasanble dan Lasanble Nasyonal, pou li rod son bann zonm ek son bann fanm ki li i panse i pou kapab ed zot fer marse sa pei, fer marse zot progranm anliny avek zot bann Polisi e anliny avek zot prensip.

E tan ka mwan, mon la ozordi pour mwan lans en lapel ek zot sa bann Minis, ki mon konnen pou ganny aprouve.  Pour mwan lans en lapel e dir avek zot ki zot devret travay dir e zot devret travay dan lentere tou Seselwa.  Pou zot mazin zot pei an premye e pou zot fer sir ki zot travay pour tou Seselwa dan lentere Sesel osi byen ki byensir dan lentere sak Seselwa.  San pran kont zot lapartenans politik, ou lapartenans politik sak endividi.

Mr Speaker, mon konsyans koman en Politisyen i dir mwan ki en Minis, i devret a tou repriz travay lo sa nivo ki reprezantatif e ki commensurate avek sa kalite saler ki zot pe gannyen.  Zot devret pe travay san diskriminasyon, san ki zot abiz pouvwar, san preferans e tout an respektan bann gran norm enternasyonal an relasyon ek fason ki servis Sekter Piblik i fonksyonnen dan en demokrasi.  Mon lapel se pour zot travay an metan bann striktir, ki pou permet tou Travayer Sekter Piblik konnen e konpran kwa ki zot bezwen fer pou zot avanse dan zot travay, pou zot ganny promote e pou zot ganny rekonpanse.  Met bann striktir an plas ki pou promot prodiktivite e ki pou deal efektivman avek medyokrite.  E sa i devret lo tou nivo.

Bann norm Mr Speaker, i devret ganny etablir pour ki enn fwa pour tou, Seselwa i konn son limit, Seselwa i konn son boundaries dan tou landrwa travay.

Dan lentere Sesel Mr Speaker, politik i devret ganny tire dan Sekter Piblik, politik partizan, politik opoze, politik laenn, politik destriksyon, politik viktimizasyon, i devret ganny met deryer nou.

Mr Speaker, koman bann Minis, zot devret strive pou promot profesyonnalizm, promot travay dir, travay konstriktiv e travay pou byennet Sesel e pour tou Seselwa.  Mon swe pour zot, se pou donn     Seselwa the best public sector that we have ever seen dan nou pti pei Sesel.  Enn kot travayer i ganny respekte, i ganny menm sans, i ganny menm loportinite e kot travay dir i ganny rekonpanse apropriyeman, san pran kont lekel ki’n delivre sa travay.

Mon swet tou bann Minis bon travay e bonn sans e mon demann zot ankor enn fwa pou konsyansyezman Mr Speaker, pou konsyansyezman travay pour tou Seselwa e dan lentere Sesel, olye ki dan lentere personnel.  Lepep Seselwa pe demann en servis piblik ki efikas, ki profesyonnel, ki performan e ki enparsyal.

Mr Speaker, mon kontan ki ozordi dan Lasanble Nasyonal mon’n antann menm bann reprezantan lo kote Parti Lepep, pe met zot lipye ater e pe demande ki nou ganny en Sekter Servis Piblik ki profesyonnel e ki respekte tou Seselwa.

Mersi Mr Speaker.

MR SPEAKER

Hon Jeovanna Charles.

HON JEOVANNA CHARLES

Mersi Mr Speaker.

Bonzour Mr Speaker.  Bonzour tou Manm Onorab e tou dimoun a lekout.

Mr Speaker, mon kontan pou dir ki mon’n apresye deklarasyon fer par Leader Lopozisyon kot in ganny sans aksepte pou donn nouvo Cabinet loportinite pou travay e travay pou Sesel.  Prezidan Michel zour i ti ganny Eleksyon i ti promet tou Seselwa ki i pou travay pou Sesel e pou Lepep Seselwa.

Mr Speaker, i fer mwan en gran plezir pou pran laparol pou sa sesyon apre en moman en istorik an konsekans nou Eleksyon Prezidansyel ki’n fini.

Mr Speaker, mwan osi mon ti a kontan pran sa lokazyon, pou salye e remersye tou zabitan distrik Roche Caiman ki’n renouvle zot konfyans dan Prezidan Michel.  Nou dir Prezidan Michel felisitasyon e mersi.

Mr Speaker, swivan Eleksyon Mr James Michel koman Prezidan Larepiblik, sa i swiv ki i bezwen form son Gouvernman.  E parey mon’n dir taler, i en plezir ki ozordi mon akey sa bann dimoun ankor enn fwa ki pou form parti son Cabinet.  Si Prezidan in swazir zot, byensir in trouv sa ki bon dan zot.  In trouve, ki zot ankor annan kapasite e sa kalib pou kontinyen fer sa travay ki zot ti pe fer.

Mr Speaker, tou bann CV in ganny sirkile avek tou Manm Lasanble Nasyonal.  Preski tou sa bann dimoun pa nouvo lo lasenn politik.  Sa ki tou sa bann Minis i bezwen mazinen se ki zot Lepep e Lepep i travay pou Lepep.

Mr Speaker, Sesel i en pti pei i napa plas pou divizyon.  I napa plas pou laenn, napa plas pou egoizm, i napa plas pou konfli antre nou.  Lepep in koze e ler Lepep i koze nou ekoute.  Nou bezwen respekte swa Lepep.  Nou bezwen stabilite pou plis progre.  Sesel i bezwen tou son zanfan, Prezidan Michel in dir.

Mr Speaker, Dimans Prezidan in koz lo bann priyorite ki demann latansyon irzan e enn parmi se sa fleo drog kot bokou paran pe soufer e bann zenn pe pran kontrol lakour.  I tris Mr Speaker, me sa travay i ekstrememan enportan ki nou tou ansanm nou donn en koudmen pou kapab trouv en solisyon.  Ansanm nou bezwen revwar reabilitasyon nou bann viktim.

Tou kou ki ganny met lo paran, ki zanfan i anvi al detox.  En paran pa pou zanmen anvoy son zanfan pran drog e i met en lot problenm lo li, akoz i anvi e i vwar ki i anvi son zanfan i sanze.  Me pa kapab fer li avek sa pri lavi ki afekte tou fanmir.

Wi, Prezidan, nou tou nou bezwen travay ansanm.  Nou bezwen re get sa package an antye.  Lokalman e enternasyonalman.

Mr Speaker, Prezidan Michel in pronons li fortman lo en size ki sak fwa mon ganny en loportinite, mon koz lo la e sa se service delivery.  Wi, Lepep in koze ankor.

Mr Speaker, yer nou ti vwar en nouvo komansman e bann Minis ki pe ganny aprouve ozordi fodre zot kapab reget e enplimant bann Polisi ki Lepep atraver Prezidan Michel, pe demann zot pou enplimante.

Mr Speaker, in plis ki ler pou nou retir politik dan servis piblik.  Nou bezwen annan bann civil servants ki konpran e respekte desizyon Lepep.  Nou, nou la koman Politisyen pou nou formil Polisi e donn civil service pou zot enplimante.  Sa bann zafer fer dimoun tourn an ron, kas anba, fer li perdi son letan, vin fristre, in ler pou fini dan sa pei.

Mr Speaker, ler en dimoun i ganny en direktiv pou fer en travay, i bezwen fer sa travay byen.  Nou bezwen travay.  Nou pa kapab pran lord dan nou menm oubyen pran lord sorti lezot landrwa.  Nou pa kapab zwe avek dimoun, nou pa kapab anpay nou dimoun, nou pa kapab zwe malis, zwe bibouk pou anpes nou progrese.  Nou bezwen konpran tre byen.  E letan mon’n koz lo en nouvo komansman, mon pape koz lo nouvo komansman zis pou nouvo Gouvernman.  Me ki tou dimoun dan civil service e tou dimoun ki travay dan sa pei i bezwen fer en nouvo komansman.

Mr Speaker, en Ansenyan i la pou edik nou zanfan.  I pa la pou fer politik li.  En Nurse i la pou donn swen dan Lopital me i pa la pou fer politik.  En Travayer Sosyal i la pou ekout problenm en dimoun, me i pa la pou fer politik avek sa dimoun.  En Zofisye Lapolis i la pou asir sekirite Lepep Seselwa, me pa pou fer politik.

Mr Speaker, en Tourist Guide i la pou donn servis touris, i pa en azan politik li.  En Taxi Driver, i osi la pou servi touris, me i pa la pou fer politik avek nou bann touris.  En Cabin Crew osi, i la pou servi touris e non pa pou fer politik.

Mr Speaker, sa pep antye i bezwen konnen, ki nou bezwen nou tou travay ansanm, pou nou ansanm anmenn sa pei pli devan.  Lepep in koze e nou bezwen ekoute e mwan mon senserman krwar ki si nou tou nou al ansanm, napa fason ki nou pa pou fer li.

Mr Speaker, pou terminen mon ti a kontan felisit tou sa bann dimoun ki’n ganny nonmen koman Minis.  Mon swete ki zot ava fer en bon travay dan zot Minister respektif.  Mon demann zot pou vreman asire ki zot menm e zot staff zot regard byennet tou Seselwa e pei osi.  Travay i la, nou napa letan.  Annou get nou zanfan, nou fanmir, nou pei.  Mon vreman swete ki la avek sa nouvo komansman, sa nouvo manda ki sa nouvo Cabinet, nouvo Gouvernman a kapab fer tou posib pou retir politik, lapares ki la mère de toute les vices dan civil service.  Pou ki ansanm nou trouv en nouvo latmosfer dan pei ki pou fer nou avans pli devan.

Mr Speaker, ansanm nou pou kapab fer li e ansanm nou pou fer li.  A sa moman vreman enportan, mon ti a osi kontan remersi tou bann ki’n travay dir pou anmenn sapei kot in arive ozordi.  Nou pou fer li pou Sesel.

Mersi Mr Speaker.

(Applause)

MR SPEAKER

Kwa sa zwe bibouk? Ki savedir sa?  Ou’n servi sa term zwe bibouk.  Ki savedir?  Nou annan pou nou rule si i parlmanter ouswa non.

Pardon?

Parlmanter.

Onorab Rose, petet ou ava dir nou kwa sa vi ki ou’n dir nou i parlmanter.

Right of Reply.

HON MARIE-ANTOINETTE ROSE

Mr Speaker, nou bann Manm Lasanble in koze e nou’n koz tre for lo kwa ki merit ganny fer e nou, nou reste reprezantan Lepep.  Nou reste bann reprezantan dan nou distrik e nou osi nou annan travay pou fer, pou siport sa Gouvernman.  Nou’n koz en kantite lo bann Minis, lo ki zot merit fer, kote nou krwar merit amelyore.

E nou isi dan sa Lasanble nou annan 2 rol.  Nou’n fer li pandan 4an e mon krwar ozordi parey serten Manm in dir bokou dimoun i bezwen ekout lavwa Lasanble, akoz nou annan en rol oversight: nou annan en rol enportan pou fer sir ki nou Gouvernman i delivre pou Lepep Seselwa.  E nou osi nou bezwen renouvle nou langazman.  Nou osi nou bezwen fer en odit, nou osi nou bezwen revwar nou travay, nou osi nou bezwen fer en legzanmen de konsyans.  Nou osi nou bezwen revwar lafason ki nou’n travay pandan sa 4an e lafason ki nou pe al travay avek sa nouvo Ladministrasyon.

Mr Speaker, nou annan en lot rol e nou rol se ki nou en bann Dirizan dan nou bann distrik respektif e nou depan lo 2 keksoz pou delivre.  Nou depan lo kapasite Gouvernman pou delivre e nou osi depan lo nou prop kapasite pou delivre.  Pou nou retourn ver Lepep, pou nou re koz avek nou pep, pou nou osi aranz nou.  Pou nou osi re dres nou e pou nou osi donn en koudmen e reponn lapel Prezidan pou aranz nou, leve al debrouye pou sa pep.

Alors nou felisit bann Minis e nou donn zot nou langazman total anver sa travay ki zot pe al fer.  Nou donn nou Prezidan nou langazman total anver sa travay e sa langazman ki i pe la fer.  Nou donn sa pep ki’n elekte nou dernyen Eleksyon en langazman pa 100 poursan me 200 poursan anver zot pou nou retourn ver zot.  Nou’n zwenn zot pandan Eleksyon, zot in koz, zot in eksprim zot mekontantman e nou annan en sans pou nou retourn kot zot, re al dyaloge, re koze e re komans travay apartir ozordi.

Mr Speaker, ou’n demann mwan ki savedir koul bibouk.  Koul bibouk se savedir nou pa vin fer ipokrit, nou vin travay avek leker senser, nou vin travay avek lespri kler, lespri onnet e avek en nouvo lenerzi apre sa Eleksyon, pou nou kontinyen fer sir ki pep i fer nou konfyans e ki nou Lasanble nou retourn dan sa Lasanble avek en gran mazorite dan sa Eleksyon ki devan nou.

Mersi Mr Speaker.

MR SPEAKER

Bon in ariv ler pou nou pran bann vot, parey nou’n tonm dakor nou pou vot lo sak nominasyon endividyelman.

Nou ava komans avek Mr Vincent Meriton.  Tou bann ki an faver ki son nominasyon i ganny aprouve ozordi lev zot lanmen.  Okenn ki kont?

Mr Joel Morgan, ki vin en Minis.  Tou bann ki an faver. Okenn ki kont?

Ki Madanm Macsuzy Mondon i ganny apwente koman en Minis.  Tou bann ki an faver.  Okenn ki kont?

Ki Mr Jean-Paul Adam i ganny apwente koman en Minis.  Tou bann ki an faver.  Okenn ki kont?

Ki Madanm Mitcy Larue i ganny apwente koman en Minis.  Tou bann ki an faver.  Okenn ki kont?

Ki Mr Alain St.Ange i ganny apwente koman en Minis.  Tou bann ki an faver.  Okenn ki kont?

Ki Mr Christian Lionnet i ganny apwente koman en Minis.  Tou bann ki an faver.  Okenn ki kont?

Ki Madmwazel Idith Alexander i ganny apwente koman en Minis.  Tou bann ki anfaver.  Okenn ki kont?

Ki Mr Charles Bastienne i vin en Minis.  Tou bann ki an faver.  Okenn ki kont?

Ki Mr Didier Dogley i ganny apwente koman en Minis.  Tou bann ki an faver.  Okenn ki kont?

Ki Mr Micheal Benstrong i ganny apwente koman en Minis.  Tou bann ki an faver. Okenn ki kont?

Ki Mr Wallace Cosgrow i ganny apwente koman en Minis.  Tou bann ki an faver.  Okenn ki kont?

Tou le12 Mosyon in ganny aprouve e anliny avek Lartik 75(1) Prezidan in osi enform mwan ki son Minis Dezinyen se Mr Vincent Meriton.  Alors Mr Vincent Meriton i vin Minis Dezinyen dan sa nouvo Cabinet.

Avek sa nou’n ariv a lafen nou travay pou ozordi e nou pou zwenn demen bomaten pou nou pran Budget Speech par Minis Finans.

(AdJOURNMENT)