::
Home » Verbatim » Verbatim - Third Term 2015 » tuesday-2oth-october-2015

tuesday-2oth-october-2015

NATIONAL ASSEMBLY OF SEYCHELLES

Tuesday 20th October,2015

The Assembly met at 9am.

National Anthem

Moment of Reflection

Mr Speaker in the Chair.

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.  Tou bann ki pe ekout nou dan lakour, bonzour.

Ozordi avek nou, nou annan Minis pour Lasante, Minis Mitcy Larue, ki pe vin reponn plizyer kestyon konsernan son Minister.  E nou komans avek kestyon 170, Onorab Bernard Arnephy.

HON BERNARD ARNEPHY

Mersi Mr Speaker.

Bonzour Mr Speaker.  Bonzour Minis avek ou delegasyon.  Bonzour tou bann Manm Onorab e tou dimoun ki a lekout.

Mr Speaker, mon kestyon pou demann Minis, ki mekanizm e progranm entern i annan dan son Minister, pou ekip bann staff avek meyer Customer Services?

Mersi Mr Speaker.

MINISTER MITCY LARUE

Mersi Mr Speaker.

Bonzour Mr Speaker.  Bonzour tou bann Onorab e bonzour tou dimoun a lekout.  Mersi Onorab pour ou Kestyon.

Mr Speaker, Prezidan Michel, in a plizyer repriz dan son Diskour pour Lazournen Nasyonal e osi a lokazyon Public Service Day, met bokou lanfaz lo lenportans kalite servis ki Servis Piblik i delivre.  E mon Minister in toultan pran sa o serye e pran en holistic approach, kot i konsern training bann diferan Kad Profesyonnel ek lezot staff Lasante.  I enportan pour ki tou Travayer Lasante i komann en o nivo konpetans e konesans, dan lafason ki zot kominik avek zot Siperyer, zot koleg, lezot Profesyonnel, zot pasyan e osi piblik an zeneral.  En kantite lanfaz i ganny mete pou ogmant konesans e kapasite tou Travayer Lasante.

Customer Care i en topik enportan, ki Departman Resours Imen dan mon Minister, i ziska prezan met en gran lanfaz lo la.  A sak lenstans ki staff i rankontre, i en loportinite pou enkli en eleman Customer Care.  Progranm lantrennman ki staff Lasante i swiv, i ganny konsidere apropriye pour sa travay ki zot fer e sa i en legzersis kontinyel.  Otan ki i enportan pour en profesyonnel lasante vin konpetan dan son domenn profesyonnel, i bezwen lezot konpetans parey kominikasyon, latitid, caring e konpasyon.

Sa bann konpetans i vreman neseser, si ou pe travay avek dimoun malad e zot fanmir ki bokou fwa i enkyet e strese ler zot fanmir i malad.  Dan sa dernyen 3an, preski tou Travayer Lasante, in swiv en formasyon lo Effective Communication. Sa ti atraver en kour ki ti ganny delivre par staff SIM.  Pli resaman an 2014, Desanm 2014, Minister atraver en Konsiltan, ti delivre en Kour lo Communication Specific pour Lasante, avek 2 group Travayer Lasante.  Dan tou bann diferan Kour ki NIHSS i ofer, i annan en module lo Kominikasyon de Baz, Baryer a Kominikasyon, Issue Emosyonnel, Professional Boundaries dan Health and Care Approach, i ganny adrese.  Tousala i bann laspe ki’n ganny konsidere koman enportan dan devlopman nou Staff.

An menm tan, nou bezwen devlop lezot konpetans dan nou Staff, akoz Customer Service lo li menm i pa sifi.  Sa i ganny fer, atraver osi zot Kod Kondwit ki zot obzerve koman Profesyonnel, osi koman en Zofisye Piblik.  Apre bann training, i annan en sistenm an plas, ki enportan pou determinen, si nou staff pe met sa bann konpetans ki zot gannyen, an pratik.  La, sak responsab Unit e Departman, i bezwen monitor konpetans bann travayer, ki tonm direkteman anba zot responsabilite.

En mekanizm i an plas e travayer i bezwen ganny met okouran, par egzanp kan zot annan febles e mannyer pou amelyor ou sanz sa febles, pour en meyer servis.  Souvandfwa, se sa ki manke.  Lanfaz i bezwen ganny mete la, pou vwar sa sanzman.  E osi staff i bezwen ganny felisite osi ler zot fer byen, pour ki zot ganny lankourazman pou fer pli byen.  Sa i merit e i bezwen vin en norm dan nou Minister.

Dan tou sesyon oubyen rankont ki ganny fer avek diferan Kad dan Minister, sa laspe Customer Care i ganny souleve e ranforsi, akoz nou pasyan i premye dan tou sa ki nou fer.  Respe pour Lotorite, respe pour zot menm e respe pour pasyan avek lezot kliyan, i osi ganny anmennen a zot latansyon.  E mon pou dir, sa osi i en gro defi.  Defi i toultan dan son lenplimantasyon Mr Speaker.  Minister i kapab anmenn fasilitater pli profesyonnel pou fer lantrennman, me latitid parmi serten travayer, i reste sa pli gro defi ki nou bezwen adrese.

Dan mon Minister, i osi annan en lofis Customer Relations Unit. Pasyan e tou sa ki antre an kontak avek Travayer Lasante, i anmenn zot konplent swa an ekrir, par telefonn e parfwa nou ganny osi de-satisfaksyon ek manm piblik, atraver Social Media.  Tou sa bann rapor i ganny analize dan en fason pozitiv, pou lezot anmenn sanzman neseser.  Sa rapor i ganny anvoye dan sa Departman konsernen e sa bann endividi ki enplike i bezwen fer rapor.  E sa i ganny trete dapre bann striktir ki an plas.  E aksyon disipliner osi i ganny pran kan i fodre.

Me fodre fer remarke Mr Speaker, ki 90 poursan nou travayer, zot devoue e delivre en servis avek pasyans, konpasyon e komitman.  E zot bezwen ganny felisite e apresye par bann piblik.  Bokou, bokou progre dan Minister pe pran plas me souvandfwa, sa pti group avek en latitid negativ, i fer ki Minister ek Gouvernman i ganny bokou kritike.  E sa i

aplik souvandfwa, pour en pti group pasyan ek fanmir, ki osi zanmen vwar bann bon keksoz ki pe arive, me zot kritike e fer bokou tapaz.  E persepsyon alor, se ki tou dan Minister Lasante pa byen.

Nou annan ankor bokou defi pou anmenn sa servis kalite, ki nou Gouvernman i demann nou toulezour e ki nou piblik i demande.  Me nou bezwen fer li ansanm.  Travayer, ensi ki piblik.  Kot i mal, nou bezwen fer kritik konstriktiv, pour ki nou a kapab aranze ansanm.  Me an menm tan, nou bezwen osi kapab dir mersi e felisit bann ki pe travay dir, akoz sa osi i kapab lev moral staff.

Mersi Mr Speaker.

MR SPEAKER

Onorab, siplemanter?  Okenn siplemanter?

HON BERNARD ARNEPHY

Mersi Mr Speaker.

Mr Speaker, eski Minis i kapab dir ek nou, ki mezir eski zot pran avek sa pti group, ki malgre tou sa zefor ki ganny fer, li i tant pou lower down sa travay ki pe ganny fer, pou donn sa servis dan Minister Lasante?  Donn nou detay lo bann mezir ki pe ganny pran avek zot.

MINISTER MITCY LARUE

Mersi Mr Speaker.

Mr Speaker, mezir i vin an diferan form nou kapab dir, akoz premyerman, ou bezwen annan levidans, levidans konmkwa sa travayer in fer en keksoz ki i pa ti devret fer.  Premyerman, i pas atraver son responsab sa unit.  Ler li in vwar sa, i bezwen apel sa travayer, koz ek li pou dir li poudir sa ki in fer, i pa an norm avek lafason ki zot devret ganny fer.  Rapor i ganny soumet avek Lofis Ners Prensipal pour Lopital.  Answit, zot ganny apele ankor e diskit lo la.  Me si i vreman serye, sa rapor i ganny menm anvoy kot Council.  Si en Ners, i ganny anvoy kot Council. E la en panel i ganny mete pou diskit lo sa ki sa dimoun in fer, si i vreman grav.  E aksyon disipliner i kapab an term warning e i kapab menm an term sispansyon.

Mersi Mr Speaker.

MR SPEAKER

Wi, Onorab Vidot.

HON KEVIN VIDOT

Thank you Mr Speaker.

Bonzour e bonzour tou dimoun ki a lekout. 

Mr Speaker, eski Minis i kapab dir nou, ki fason i kapab pran sa bann staff ki annan sa bann bon pratik, servi zot menm pou al ver sa bann lezot staff: ouswa fer bann Lecture ek bann lezot staff lo sa bon Customer Care. E ki fason osi ki kapab enkorpor en benefis pour sa bann ki pe travay byen, pe donn sa bon care bann pasyan, an term sa trezyenm mwan saler ki Prezidan in koz lo la?

Mersi.

MINISTER MITCY LARUE

Mersi Mr Speaker.  Mersi Onorab.

Nou servi.  Mon krwar i enportan pou servi bann travayer ki vin sa bann role model, akoz nou annan en kantite parey mon’n dir.  90 poursan nou bann dimoun i travay dir e se zot ki vin sa bann role model, pou ed lezot ki annan sa bann latitid negativ.  E zot ganny servi par egzanp, lo zot Ward:- zot ganny servi parski zot annan bann meeting avek zot bann staff, montre zot poudir, – fason ki nou devret fer i bezwen fer koumsa.  E i annan zot plan ki zot servi.

Me an menm tan, mon krwar i enportan pour nou get dan posibilite, atraver appraisal ki nou fer sak lannen: akoz nou pe revize aktyelman nou appraisal ki nou pe fer, akoz nou krwar i pa anliny ozordi avek nouvo devlopman.  Nou pe refer en revi lo nou Appraisal Form. E se la kot nou bezwen appraise nou staff tou-dilon lannen.  Pa zis a lafen lannen, me tou-dilon lannen, appraise staff endividyelman: kot ler nou vwar i annan sa problenm, kot i annan en weakness, i annan en problenm, nou bezwen asiz ek sa staff, diskit avek li, fer li vwar son problenm.  Akoz souvandfwa, i annan de fwa i arive kot staff petet, annan de fwa i pa fer ekspre.  Mon pou dir, pou li ler i gete, i pa en problenm.  Me nou, nou vwar li en problenm.  Pasyan i vwar li en problenm.

Alor, i enportan ki nou anmenn sa a son latansyon pou dir li, be sa i en problenm.  I pe kree fristrasyon.  Ou pa pe donn sa care neseser pour pasyan.  Alor, ler in konnen, ou asiz ek li, ou montre li.  Ou dir li, ‘mon oule vwar en sanzman pozitiv, akoz a lafen lannen si ou fer byen, nou kapab annan en progresyon dan ou saler.  Oubyen ou kapab ganny ou promosyon.’

Alor i enportan ki sa appraisal, nou bann dimoun i fer li byen, throughout the year.  Pa zis a lafen lannen, but throughout the year, pour nou kapab rekonpans nou bann dimoun ki fer byen.  Mon krwar nou annan en defi la, ki nou bezwen adrese.

Mersi Mr Speaker.

MR SPEAKER

Kestyon 171, Onorab Maria Payet-Marie.

HON MARIA PAYET-MARIE

Mersi Mr Speaker.

Eski Minis responsab pour Lasante, i kapab enform nou Lasanble, kwa ki son Minister pe fer, an relasyon avek servis ki Minister Lasante i ofer, pou fer ki i reflekte pli byen logmantasyon, ki Minis Lasante i resevwar atraver Bidze Nasyonal?

Mersi Mr Speaker.

MINISTER MITCY LARUE

Mersi Mr Speaker. Mersi Onorab pour ou kestyon.

Bidze Minister Lasante, parey zot tou zot konnen, akoz se zot ki vot pour Bidze dan Lasanble, i ogmante lannen apre lannen.  E pour plizyer lannen la, se nou Minister ki pli o, ki ganny pli o alokasyon parmi tou bann lezot Sekter.  E pour mwan koman Minis Lasante, ki’n ganny sa loner ek responsabilite pour lasante nou Nasyon, sa i reprezant en gran lakonplisman nou Gouvernman e nou sosyete.

Lefe ki nou depans sa kantite lo lasante nou Nasyon, i reflekte lenportans ki nou Gouvernman, i mete lo byennet Seselwa.  Nou Gouvernman i met byennet nou sitwayen o sant devlopman e avan tou.  E se sa ki fer nou, lannen apre lannen, envestir plis dan lasante nou pep.  Wi.  Depans lo lasante i vreman en lenvestisman dan lasante Seselwa.  En lenvestisman ki nou pare pou fer, akoz nou konsyan ki lafors en Nasyon i depan lo lasante son pep.  En pep an bonn sante i pli prodiktiv.  Sa prensip in toultan gid nou zefor dan domenn lasante.

Resaman, apre bokou travay, nou bann Profesyonnel dan Minister e apre konsiltasyon avek tou Sekter, Gouvernman in adopte nou National Health Policy.  En Polisi Nasyonal, pou gid devlopman lasante nou Nasyon dan bann lannen avenir.

Byensir, sa logmantasyon dan Bidze sak lannen, i merit ganny reflekte dan en amelyorasyon lo nivo lasante nou popilasyon.  Nou depans plis lo lasante e alors, i merit annan en meyer rezilta e meyer rezilta pozitiv.  Mon ti a voudre si mon ti kapab, prezant zot en latab ki montre depans e rezilta, an term pli bon lasante pour tou Seselwa.  Malerezman, i pa fasil oubyen posib.  Byensir, ler nou envestir plis dan en servis, nou bezwen vwar amelyorasyon.  Si nou entrodwir en nouvo tretman, nou vwar ki dimoun i ganny tretman pli efikas e son douler i disparet e i viv bokou pli lontan.  Sa par egzanp, i leka ozordi.  Par egzanp loperasyon pour problenm leren, zenou, tretman serten Kanser e tretman Dyaliz.  Tousala i bann devlopman ki nou’n fer avek logmantasyon Bidze, dan bann dernyen lannen.  E nou vwar ki rezilta i meyer.

Me souvan, sa logmantasyon dan Bidze Lasante, i senpleman osi pou fer fas avek logmantasyon dan demann servis lo lapar nou popilasyon, akoz nou dimoun ozordi i demann servis pli sofistike, pli o kalite e pli pre avek zot.  An menm tan, nou pe fer fas avek en Lepidemi Maladi Kardyovaskiler, Dyabet e Kanser e osi lepidemi lenfeksyon ki persiste, parey Leptospiroz, VIH ek Epatit C.

Pa bliye osi ki nou pe eksperyans en dekalaz dan lasante zonm, konpare avek bann madanm e ki nou bezwen adres problenm lasante bann zonm dan en fason pli sistematik.  Tousala alor, i fer ki depans pour lasante i bezwen e i kontinyelman ogmante.  E nou pa pou neseserman vwar rezilta pozitiv la dan limedya.  Me sa pa vedir ki nou pa bezwen kontinyen sa lenvestisman.  Me i vedir ki nou bezwen pli sistematik dan nou planifikasyon ek lorganizasyon.

E nou bezwen vin pli efikas dan nou lapros.  En responsabilite pou fer sir, ki nou tir rannman maximum san rezon, sa resours presye ki’n ganny met a nou dispozisyon.  Nou bezwen fer sir ki nou kontrol depans.  Nou redwir gaspiyaz a tou nivo e nou fer nou profesyonnel lasante ek piblik an zeneral, pli konsyan lo vre kou e depans lasante.  Sak keksoz ki nou servi i koute.  Depi sa pti bout koton, ziska sa MRI ki ganny fer lo en pasyan.  Alor, i osi en loportinite, pou met lanfaz lo rol ki nou popilasyon i bezwen zwe, pou protez e promouvwar zot lasante.  E dan sa domenn, nou’n fer bokou dan sa 2 lannen.

Dan kad sa mouvman lasante nou Nasyon, nou pe anmenn sa kanpanny ‘Mon lasante, mon responsabilite, komans dan lakour.’  E mon fyer ki sa kanpanny pe fer bokou sikse atraver nou pei e dan bann kominote.  Lafason ki tou distrik lo Mahe, Praslin ek La Digue, diferan Lorganizasyon e Sekter Prive in angaz zot dan sa kanpanny, i montre ki potansyel i annan pou devlop partenarya pour lasante.  Byensir, nou pou kontinyen e an menm tan, mon pran e profit sa lokazyon pou remersye tou bann Manm Onorab, ki’n pran en pa aktiv dan bann devlopman o nivo zot distrik.

Alor, i lentansyon mon Minister pou fer sir ki tou logmantasyon dan Bidze Lasante, i ganny zere byen e ki nou servi resours kot i anmenn bon rannman pour lasante nou pep.  La mon bezwen admet ki dan lepase par egzanp, nou pa’n met ase lanfaz lo prevansyon e nou’n konsantre bokou plis lo tretman.  Nou bezwen redres sa sityasyon e se sa ki nou pe anvizaze fer e nou pe komans fer.  Lakle pou fer fas avek nou bann problenm lasante ozordi se prevansyon.  Mon konnen i fasil dir e pa toultan fasil pou fer.  Me nou bezwen pli serye e met plis resours e zefor dan prevansyon.  Sa i pa pou enplik zis mon Minister, me osi tou bann Lazans dan sistenm lasante, par egzanp: Health Care Agency, Public Health Authority, National AIDS Council avek tou profesyonnel lasante e tou lezot Sekter dan pei.

E la mon a dir ankor ki se nou dimoun dan lakour, dan fanmir, dan nou kominote ki bezwen osi zwe en rol pli for.  E nou, dan tou Lorganizasyon ek Sekter, Gouvernman, Sosyete Sivil e Sekter Prive, nou bezwen donn sipor, pour ki ansanm, nou protez e promouvwar lasante nou Nasyon.

Mersi Mr Speaker.

MR SPEAKER

Kestyon 172, Onorab Mirena Souris.

HON MIRENA SOURIS

Mersi Mr Speaker.  Bonzour Mr Speaker.

Eski Minis i kapab enform sa Lasanble, kwa ki son Minister pe fer, pou ankouraz nou bann profesyonnel pou reste dan sa profesyon?

Mersi Mr Speaker.

MINISTER MITCY LARUE

Mersi Mr Speaker.  Mersi Onorab.

(Interruption)

MR SPEAKER

Minister, avan ou kontinyen.  Mon vwar Onorab Payet, ou pe proteste.  I’ve got time to manageRight.  Yes, I’ve got time to manage.  And the Minister in pran 10 minit pou reponn en Kestyon.  I’m calling you to Order.

Onorab Souris.

MINISTER MITCY LARUE

Minister Lasante, i reste sa Lorganizasyon ki anploy plis profesyonnel lasante dan Sesel.  Alor i enportan ki mon Minister i rekrit e retenir profesyonnel avek konpetans, pou asire ki i annan en bon balans konesans ek leksperyans, pou adres bann nouvo defi ki sanzman dan maladi e nouvo teknolozi dan lasante i anmennen.

Mon Minister in pandan plizyer lannen, etablir bann mezir enportan, pou asire ki nou staff i grandir e devlope e reste dan servis.  E nou annan travayer ozordi ziska 40an servis, pli o travayer ziska 40 a 45an servis dan Lasante.  Vwala en pti pe bann legzanp, bann keksoz ki nou’n fer.

Nou’n fer revizyon bann diferan Scheme of Service e dan ka ners ek dokter, sa in ganny fer 2 fwa dan sa dernyen 5an.  Nou’n fer kreasyon nouvo Scheme pour lezot kad staff ki ti napa.  E an tou, i annan 23 Scheme of Service dan mon Minister.

Provizyon Teknolozi Lenformasyon, Intranet dan preski tou servis e dan ladministrasyon.  Letablisman en Sant Dokimantasyon byen ekipe dan en nouvo lokasyon pli apropriye.  Kolaborasyon avek bann Lorganizasyon Nasyonal e enternasyonal, avek bi pou devlop bann staff profesyonnel.  Sa in permet plizyer profesyonnel swiv diferan lantrennman: kour a mwayen e a long term, swa aletranze oubyen lokal, avek lentervansyon bann Lenstitisyon etranze.  Par egzanp, bann Kour BSC pour ners, pou travay an kolaborasyon etrwat avek bann Konsey Profesyonnel ek bann Lasosyasyon.

Sak lannen, travayer avek 25an servis, i ganny rekonpanse.  Travayer pli lontan dan servis osi, i ganny rekonpanse sak lannen.  Sistenm Gratwite i an plas.  Reste an diskisyon kontinyel avek DPA pou amelyor kondisyon travay tou staff.  Fleksibilite dan kondisyon travay ners.  Par egzanp, sistenm part-time e egzanpsyon Night Duty kan i posib, in permet serten staff ki pe rankontre difikilte, reste dan servis e kontinyen amelyor zot konpetans.

Renovasyon bann Ward, bann Sant Lasante ek lezot fasilite, in permet ki staff i travay dan en lanvironnman pli agreab e pli an sekirite.  Lentrodiksyon bann nouvo lekipman elektronik e digital, in fasilit travay nou bann profesyonnel.  Nou pe osi reviz format appraisal pour tou staff.

Mon Minister i kontinyen pe rod loportinite kot tou profesyonnel lasante, a kapab kontinyen devlope e progrese.  Tou resaman, bokou sa bann loportinite pe vin atraver bann diferan korperasyon ki nou annan avek diferan pei.  A ler aktyel, nou annan nou 15 ners, ki pe swiv en lantrennman 18 mwan, pou vin Midwives. E byento, en group 26 Dental Therapists – zanfan, pou komans en Kour avek Liniversite, Kwa-Zulu Natal, pou tradwir en Diploma an en BSC dan Dental Therapy. Sa pou osi ogmant zot konpetans, ki zot pou kapab delivre sa servis avek bann adilt apre.

I osi kontinyen annan plizyer lokazyon kot staff i rankontre pour ledikasyon kontini.  Par egzanp, dokter i rankontre tou le Vandredi apre midi, kot en topik i ganny prezante e diskite.  Pour ners ek lezot profesyonnel, sa i pran diferan form e parfwa, sa i fer dan zot landrwa travay e atraver refleksyon lo bann ka spesifik.

Atraver striktir ki egziste, staff ki enterese pou agrandir zot konesans dan Management, atraver en kour kot SIM ou dan IT, i normalman ganny permisyon pou swiv sa bann laklas, atraver en Study day.  Par sa, mon Minister i ekspekte bann ki swiv en kour dan Management, pou apre asir en nouvo sipervizyon pli eleve dan zot unit.

Lannen prosenn, nou pou annan plis attachment avek lezot Lopital dan larezyon, pour tou kad travayer dan Lasante, lo en baz kour a mwayen term.  E sa i ava ed zot, pou aprofondir e ganny sans bann ekspoze dan bann Lopital pli gran, ki a ed zot devlop zot abilite e kapasite.  Nou bann Profesyonnel ki prepar nou bann etidyan lasante kot NIHSS, zot osi zot mye kapab desarz zot responsabilite prezan.  Laplipar zot, i annan en BSC dan en spesyalite e omwen 2 Masters.

Malgre tou bann zefor ki mon Minister pe fer, i still annan bann fakter ki travayer i santi nou bezwen adrese.  E lefe ki nou bezwen plis levidans, pou fer bann lentervansyon apropriye, mon Minister in deside pou lans en Survey parmi tou travayer lasante, pou idantifye bann fakter de-satisfaksyon, kot apre nou pou kapab met bann mekanizm an plas, pour nou kapab vwar ki mannyer nou pou amelyor sityasyon servis, ki nou bann dimoun pe donnen, pour ki zot kontinyen reste dan nou servis.  Vwala Mr Speaker.

Mersi.

MR SPEAKER

Onorab Souris, okenn siplemanter?

HON MIRENA SOURIS

Mersi Mr Speaker.

Mr Speaker, an vi larepons Minis kot in donn nou detay lo tou sa bann bon keksoz ki Minister pe fer, eski Minis i kapab donn nou statistik lo lakantite profesyonnel ki’n kit sa profesyon pandan sa dernyen 3an e ki rezondet?

Mersi Mr Speaker.

MINISTER MITCY LARUE

Mersi Mr Speaker.

Mon regrete Onorab ki mon napa sa statistik.  Me selman menm ki nou tande i annan en kantite profesyonnel ki’n kit Minister Lasante, i pa leka.  I annan ki kit Minister Lasante e i annan osi ki mon pou dir, zot kit Minister Lasante pour 3 mwan.  Apre 3 mwan zot retourn ankor dan Lasante.  Zot sey al deor dan prive, me apre 3 mwan zot retournen.  Nou annan detrwa ka – bann ners ki’n retourn dan Lasante, apre ki zot in kite.

Me an menm tan, ler nou dir bann ki kite, enn de ki, personnelman mwan mon’n annan en antretyen avek zot, i annan diferan rezon.  I annan ki kite akoz i santi ki an deor dan Sekter Prive, i kapab ganny en pli o saler e i pa bezwen travay aswar.  Sa i enn.  Apre nou ganny bokou osi ki dir ou poudir, travay shift konmela i difisil, akoz laplipar parey zot konnen, travayer dan Lasante i bann madanm e laplipar i annan zanfan.  E zot santi zot en pti pe kwense pour zot fer bann night shift, akoz napa personn pour zot kit zanfan avek.  Sa bann rezon ki zot donn ou.  E an menm tan nou, nou sey ki nou fer annan serten fleksibilite, pou accommodate otan.  Me an menm tan, nou tou nou bezwen konpran ki, nou en servis 24 lo 24 e i pa posib pour nou kapab les tou dimoun travay zis lizour e aswar napa dimoun ki pe travay.

Alor, i annan diferan rezon e i annan i kite pou al aletranze.  Nou annan enn de ka ki’n kite, ki zot in al aletranze. So, rezon i varye.

Mersi Mr Speaker.

MR SPEAKER

Kestyon 173, Onorab Mirena Souris.

HON MIRENA SOURIS

Mersi Mr Speaker.

An vi demann pour plis spesyalizasyon e avek logmantasyon dan bann ka maladi kronik, eski Minis i kapab donn detay, si i dan plan son Minister, pou ofer training Dokter dan Family Health?

Mersi Mr Speaker.

MINITER MITCY LARUE

Mersi Mr Speaker.  Mersi Onorab.

Mr Speaker, mon annan rezon pou krwar, ki tou bann dokter dan nou sistenm Lasante i bezwen oubyen deza, oubyen ganny en bon pe training dan Family Health: oubyen parey nou dir, Lasante Lafanmir.  Family Health oubyen Lasante Lafanmir i senpleman vedir, tou sa bann striktir ek prosesis ki egziste, pou promouvwar, proteze e reetablir lasante fizik, mantal e sosyal tou manm lafanmir.  Depi en pti baba ziska sa dimoun aze.  Fodre pa nou oubliye ki sak endividi, i form par entegral en lafanmir.

Alors, Family Health oubyen Lasante Lafanmir, i enplik tou sa bann zefor prevansyon maladi e tou sa bann zefor, pour gerizon maladi.  E i osi enplik tou bann zefor pou reabilitasyon bann endividi, ki’n akeyir oubyen kek dezabilite apre en maladi, pou fer sir ki zot reganny zot bann fonksyon apre sa maladi.

Par egzanp, Vaksen ki nou donn bann zanfan, travay ki Sanniter i fer, travay ki bann Physiotherapist oubyen Dantis, oubyen bann Sikolog i fer.  Tousala separeman e ansanm, zot tonm dan kad stratezi pou promouvwar Lasante Global Lafanmir.  Annefe, tou sa ki nou bann travayer lasante i fer toulezour e par konsekan, tou sa bann ki bann dokter osi i fer toulezour, i tonm dan kad Lasante Lafanmir.

Mr Speaker, dan la pratik medikal ozordi, i annan en spesyalizasyon ki apel Médecin Lafanmir.  I annan en pti nyans ant Médecin Lafanmir ek Lasante Lafanmir.  Médecin Lafanmir i devlope koman en spesyalizasyon medikal, pou asire ki bann Dokter Zeneralis parey nou dir, lontan nou ti dir bann GP, zot in ganny formen koman en Spesyalis dan domenn Medécin Lafanmir.  Zot menm nivo ki en Spesyalis dan Lopital.

Alor, mon Minister, in vwar nesesite depi 2013, swit a en travay ki en Task Force – bann eksper lokal lo Lasante ti fer, pour ki nou servis lasante i annan plis Seselwa ki spesyalize dan domenn Medécin Lafanmir.  A ler aktyel, nou annan zis en sel dokter Seselwa ki’n spesyalize dan sa domenn.  Nou annan en lot, ki pe fer son letid spesyalizasyon an Nouvel Zelann.  E la tou resaman, nou annan en lot zenn Dokter Seselwa, ki pou byento komans son letid dan sa domenn.  E nou pe atas ozordi, bann zenn Dokter dan kominote, pou sey donn zot en lanvi pou spesyaliz dan sa domenn.  E i annan en bon pe zot, ki pe montre sa lentere.

Estimasyon mon Minister, se ki dan lavenir, nou pou bezwen omwen en dokter spesyalize dan domenn Medécin Lafanmir, dan sak Sant Rezyonal.  Fodre mon osi fer resorti tre for Mr Speaker, ki meyer stratezi kont bann maladi kronik se pa pou nou ganny plis Dokter ki spesyalize dan Medécin Lafanmir, me se pour nou tou ansanm kontinyen sansibiliz nou pep lo zot menm.  Adopte stil lavi ki meyer e diminyen zot risk pou ganny bann maladi kronik.

Mersi Mr Speaker.

MR SPEAKER

Okenn siplemanter, Onorab?

HON MIRENA SOURIS

Mersi Mr Speaker.

An vi larepons Minis Mr Speaker, eski Minis i kapab donn detay, lo konbyen i pou kout Minister pou train enn sa bann Dokter dan Médecin Lafanmir?

Mersi.

MINISTER MITCY LARUE

Mr Speaker, petet mon ava zis:- mon pou napa pour Family Doctor konbyen i koute, me selman mon ava kapab donn en lide, konbyen i koute pour nou train bann dokter.  Par egzanp, si nou pe train bann dokter an Manipal, par egzanp, i kout nou R1.8 milyon par dokter.  Si nou pe train nou dokter an Lenn, i kout nou 3 milyon.  Slovakia, i kout nou 1.8 milyon.  Czechoslovakia i kout nou 2.3 milyon e Hungary i kout nou 2.6 milyon.  Alor, i tou depan ki pei, kote nou pe anvoy train pou Dokter.

Mersi Mr Speaker.

MR SPEAKER

Onorab Barbe.

HON NICHOLE BARBE

Mersi Mr Speaker.

Anliny avek larepons Minis, eski Minis i kapab enform sa Lasanble, si Minister pe travay an kolaborasyon avek NIHSS, pou petet met en pe plis zefor pou kapab ranforsi sa laspe Family Health, pour training pour lezot Health Professionals?

Mersi.

MINISTER MITCY LARUE

Mersi Onorab.

Mon krwar tou bann:- parey NIHSS, nou pe train nou bann diferan kad, Nursing, EMTs, eksetera.  E dan tou training, sa bann laspe i antre.  Me parey ou konnen, nou pa fer training pour spesyalizasyon dan Dokter isi Sesel.  Me selman par egzanp bann dokter, bann zenn dokter ozordi, letan zot pe ganny atase dan bann klinik: zot pe vwar ki mannyer zot bezwen apros lakominote, bann lezot dimoun – Ki bann kiltir dan lakominote.  Mon krwar i bann fakter ki ed zot pour zot kapab mye konpran ki zot pou anvizaze, ler zot antre dan sa domenn Family Doctor.

Mersi Mr Speaker.

MR SPEAKER

Onorab Leader Lopozisyon.

HON DAVID PIERRE

Mersi Mr Speaker.  Bonzour Minis ek ou delegasyon.  Bonzour tou Manm koleg Onorab e bonzour tou bann ki a lekout.

Mr Speaker, eski Minis i kapab dir sa Lasanble, dapre zot prozeksyon, konbyen dokter zot bezwen – Sesel i bezwen train par lannen: e eski dapre zot prozeksyon, zot pe reisir kapab meet sa demann?

Mersi Mr Speaker.

MINISTER MITCY LARUE

Mon pa konnen akoz kestyon i lo Family Doctor.  Si ou pe koz lo Family Doctor?  Akoz si ou pe koz lo Dokter Lafanmir parey nou’n dir, Family Doctor, Spesyalis pour Lafanmir la, parey mon’n dir, nou bezwen annan nou:- nou vizyon se annan en dokter dan sak rezyon.  Sak  rezyon.  E letan nou gete, nou annan konbyen rezyon?  An tou i fer 6 mon krwar.  6 rezyon, enkli Praslin/La Digue.  E byensir nou pa kapab annan zis 6.  Nou bezwen annan ki pou ler 1 i al lo konze ensidswit, nou bezwen annan nou en rezerv petet, ankor en 4 ankor.  Petet nou ti a dir en 6 Dokter ki nou pe mazinen.  6 Dokter Family Doctor pour sak rezyon.

E la nou deza annan nou, parey nou dir: nou annan 1 ki deza Family Doctor.  Nou annan 1 ki pe train.  Nou annan 1 ki pe ale.  Apre nou annan nou bann nouvo dokter, ki pe montre sa lanvi, sa lanbisyon pour zot antre e nou pe promot zot pour zot ale.

E se sa en pti pe nou vizyon, pour nou fer sir ki nou gannyen dan sa domenn.  Me pour lemoman ki nou napa, nou pou bezwen annan dokter etranze pou pran sa pozisyon ,ziska ler nou kapab ranplas par nou Dokter Seselwa.

Mersi Mr Speaker.

MR SPEAKER

Onorab De Commarmond.

HON CHARLES DE COMMARMOND

Mersi Mr Speaker.

Bonzour Minis, bonzour Mr Speaker.  Bonzour tou dimoun ki a lekout.

Mr Speaker, eski Minis i kapab enform nou Lasanble, si i ankor annan bann kour ki ganny ofer a nou bann dokter, lo baz bann Korperasyon Bilateral, kot Gouvernman pa bezwen peye parey lontan.  Parey letan Dokter Herminie, Dokter Payet in al training – ki nou kapab benefisye parey lontan?

Mersi.

MINISTER MITCY LARUE

Mersi Mr Speaker.

Wi.  I annan bann Korperasyon ki egziste ant Sesel avek serten pei, kot nou ganny bann kour, kot nou pa bezwen peye.  Me selman dan domenn spesyalizasyon, i en pti pe pli restrikte.  Me selman nou, nou pe travay en pe pli pros ankor avek nou bann Korperasyon.  Par egzanp, nou pe travay bokou avek:- ozordi nou pe travay avek Sid Lafrik, nou pe travay avek Lenn, avek Sri Lanka.  Renyon i enn nou bann korperan ki vreman, vreman enportan.  Nou pe travay avek zot pour nou kapab ganny:- pour nou ganny en pe ki, al san bezwen peye.  Parey ou dir?  Parey i annan dan lepase.

Me an menm tan, i annan lezot ki nou bezwen:- lefe ki nou annan lakantite dokter ki taler dan lot Kestyon mon pou reponn: kot nou kapab annan bokou plis dokter ki ale.  Me i annan ki Gouvernman i peye e bann ki ganny free Scholarship.

Mersi.

MR SPEAKER

Kestyon 174, Onorab Bernard Arnephy.

HON BERNARD ARNEPHY

Mersi Mr Speaker.

Mr Speaker, eski Minis i kapab donn detay lo plan e progranm son Minister vizavi deteksyon e prevansyon maladi kronik, tel ki tansyon e dyabet a la baz kominote?

Mersi Mr Speaker.

MINISTER MITCY LARUE

Mersi Mr Speaker.  Mersi Onorab.

Onorab, Minister Lasante in toultan annan en plan vizavi deteksyon e prevansyon maladi kronik.  E fodre fer remarke ki ler dimoun, i koz lo maladi kronik, koman tansyon ek dyabet selman.  Me i annan lezot maladi ki nou osi nou konsider zot kronik tel ki: epilepsy, lagout, malad leker ek HIV, eksetera.

Ozordi dan tou Sant Lasante Sesel, i annan en progranm pou kontrol bann maladi kronik e sa i fer an diferan form.  Nou osi annan progranm pou deteksyon, ki nou’n mete e pe ganny ranforsi.

Minister par egzanp depi lannen pase, in lans sa kanpanny prevansyon anba tenm: Mon Lasante, Mon Responsabilite.  E sa lannen, nou pe kontinyen.  Me met plis lanfaz pe vize ver bann lakour, akoz tenm i: “Mon Lasante, Mon Responsabilite I Komans Dan Lakour.’’

Par egzanp nou organiz konferans rezyonal lo: “Mon Lasante, Mon Responsabilite’’: kot nou’n anmenn diferan group dimoun dan sak kominote ansanm.  Diskisyon in tourn otour tou bann diferan maladi ek fakter risk, ki koz maladi relye ek lifestyle.  En bilan lo ki nou’n akonpli e desid lo en plan pour lavenir, pou form nou plan stratezik ki nou pe devlope, apre ki nou’n finaliz nou National Health Policy, ki’n ganny aprouve par Cabinet.

Ners ek dokter i osi fer kozri lo prevansyon sa bann maladi, dan bann diferan meeting ek diferan group dimoun, dan diferan distrik e diferan landrwa travay.  An plis, sak klinik i annan televizyon pou ledikasyon zot piblik, ki pe vin rod en servis.

En lot laspe progranm bann maladi kronik, i ganny fer an deor Sant Lasante.  Bann klinik e Unit Kardyovaskiler par egzanp, i organiz vizit dan landrwa travay souvandfwa, pou zot fer depistaz lo sa bann maladi.  Tansyon, dyabet, HIV.  Apard bann landrwa travay zot osi al fer sa bann aktivite, dan lavil atraver bann distrik, kot bann rankont piblik i ganny fer o nivo Nasyonal e menm o nivo kominoter.

Nouvo progranm ki nou’n komanse: dan sak klinik ler pasyan i al vwar en dokter, zot pou ganny ofer bann tes tel ki: tes pou nivo disik, tansyon, leker ek lezot.  E menm ganny ofer en tes pou HIV.  Sa pou ed zot konn zot stati, apre zot a ganny konseye e ganny tretman neseser.  E sa pou osi ganny fer onivo bann ward ler pasyan i ganny admet.  Alor la mon a demann tou pasyan, pou ensiste ler zot al vwar en dokter ki dokter i fer sa bann tes.  Zot demann sa bann tes e dokter i bezwen fer sa bann tes avek zot.

Vizit kot bann lakour par dokter, ners, pou donn plis ledikasyon e menm fer bann depistaz e apre edik bann dimoun e donn tretman si neseser.  Polisi lo nitrisyon pou son lenplimantasyon: plis lanfaz lo bann school program an kolaborasyon avek Minister Ledikasyon.  Entansifikasyon ek monitoring tou bann progranm.

Nou pe osi monitor bann School kantin, pou vwar kalite snacks ki pe ganny servi.  Nou pe travay an etrwat kolaborasyon avek Minister Lagrikiltir, lo sa National Nutrition Policy e pli tar dan son lenplimantasyon e sirveyans a tou nivo.

Nou osi annan Seksyon Santral UPCCD, ki kordin avek bann Ners dan distrik, pou asiste zot avek zot progranm lo nivo kominoter.  Kantite resers osi pe ganny fer e pe kontinyen lo bann maladi kronik.  E detanzaot Minister, i envit bann diferan dimoun dan lakominote, dan bann lezot Sekter ek piblik an zeneral, pou vin sa bann sesyon e pou koz lo sa bann rezilta – bann resers.

Nou’n lans en kanpanny pou teste popilasyon lo HIV e les mon a dir ki zis an Out, nou ti teste 1800 dimoun.  E an Septanm, nou’n teste 1500 dimoun.  Ansanm avek sosyete sivil, nou pe fer osi door to door, pou counsel e ganny dimoun pou fer zot tes: pou konn zot stati pour zot kapab ganny tretman.

Pou kontrol bann maladi kronik, Klinik spesyal osi i ganny fer zis pou bann maladi kronik.  E lanfaz i ganny mete lo tretman sa bann maladi, pou anpes zot vin pli grav e pou anpes bann konplikasyon.  Apard bann tretman, ki pasyan i bezwen swiv seryezman, i osi annan tes ki bezwen ganny fer detanzaot e letan zot vin fer zot check up.  Lo kote prevansyon ankor, bokou lanfaz pe ganny mete lo stil lavi e kalite nitrisyon pou servi.  Akoz lanfaz pe ganny mete, pour tou dimoun an zeneral, pou pran zot responsabilite anver zot lasante.

Mersi Mr Speaker.

MR SPEAKER

Onorab.

HON BERNARD ARNEPHY

Mersi Mr Speaker.

Mr Speaker, an vi sa kantite lenvestisman ki Minis in koz lo la dan sa area:  defayans ozordi i reste, sirtou kot i konsern swen a domicile.  Bann pasyan ki dan lakour, pa kapab deplase.  Ki Minister pe fer konkretman, pou kapab adres sa sityasyon once and for all: pou asire ki sa bann dimoun ki dan lakour ki bezwen sa swen, i ganny sa swen neseser comme il faut.

Mersi.

MINISTER MITCY LARUE

Mersi Mr Speaker.  Mersi Onorab.

Mon konnen, i vre sa ki ou pe dir, ki nou annan en defayans lo nivo domicile: la nou pe koz lo bann dimoun ki pa kapab deplase, pou vin rod tretman, oubyen ki bezwen sa servis a domicile.

Mon bezwen fer remarke, ki nou osi annan en kontrent resours.  Nou annan en kontrent resours, ki nou pe adrese.  Me an menm tan nou pe demann sak klinik, savedir klinik dan rezyon, pou annan en lalis byen, kot zot konnen kantite pasyan a domicile ki zot, zot bezwen al vizite.  E ler zot in fer sa lalis, zot bezwen annan bann frekans ki zot al vizit sa bann pasyan e sa bann frekans i bezwen ganny respekte.

Souvandfwa i annan, mon pou donn en legzanp, en fwa mon al Anse Boileau.  Ler mon vin Anse Boileau klinik dan bann 2er, mon ariv Anse Boileau, ler mon vini mon vwar ki napa bokou dimoun pe atann dokter.  I annan apepre en 10.  Ti annan en dokter deza pe fer Klinik, me ti annan 3 ki ti pe asize.  Pe asize e lanmenm ler mon demann zot, mon dir,’’ be 2er, 1.30 akoz zot pe asize?  Zot pa sipoze pe asize, zot sipoze pe al vizit kot lakour.’’  Al fer zot bann vizit a domicile, parey nou dir, ou vye dimoun.  Apre ou door to door kot, parey nou’n dir  – pou al fer sa.  Ou konpran?

In annan sa mankman kot nou profite.  Nou profite, nou asiz.  E ler mon demande, repons se ki, ‘’napa transpor pou met mwan dan sa landrwa.’’  Bon i annan en transpor.  Nou pa bezwen – si 3 dokter, nou pa bezwen 3 transpor pou met 3 dokter.  Dokter i antre dan en transpor, sa transpor i drop li kot Madanm Pierre, li i kontinyen.  Transpor i ale, i drop lot dokter kot Madanm Pauline.  Li i kontinyen.  Apre i drop lot kot lot.  E nou kontinyen.

Ou konnen, zot toultan pe met bann baryer, pou anpes keksoz arive.  E la nou pe adres sa sityasyon.  Nou dir, ‘’ non.  Apre midi dokter ler pa pe vwar pasyan, zot bezwen ranpli zot zournen e zot bezwen al fer zot bann vizit kot lakour.’’  E nou, nou bezwen vwar en progranm ki ganny fer e nou bezwen monitor sa progranm.  Pa zis met en progranm, akoz nou kapab dir, ‘’wi nou pe fer.’’

Me i bezwen annan sa sistenm monitoring in ganny met an plas, pour ki nou asire ki ler ou’n dir, ‘’dat, dat, dat,’’ ou’n al vizit Msye Pierre, Pol, Jacques, ou’n bezwen vizite e ou pasyan in ganny lasistans ki neseser.

Alor mon donn ou garanti Onorab, ki nou pe adres sa problenm, akoz mon santi personnelman i en problenm ki nou bezwen adrese.

Mersi Mr Speaker.

MR SPEAKER

Onorab Barbe.

HON NICHOLE BARBE

Mersi Mr Speaker.

Eski Minis i kapab enform sa Lasanble, si son Minister i annan plan antreprann en pilot study dan en distrik an partikilye, pou teste efikasite en tel progranm?

Mersi Mr Speaker.

MINISTER MITCY LARUE

Mr Speaker, non.  Mon krwar sa i ava vin en loportinite, kot nou ava fer en pilot parey ou pe dir.  Mersi pour sa propozisyon.  Nou ava fer enn par enn.  Nou a regard en distrik petet.  Mon a pran Anse Boileau menm, kot mon’n vwar i annan a mankman ler mon’n fer mon vizit: akoz mon kontan fer mon vizit at random.  Pas la en pti kou, gete ki pe pase.

So, nou ava fer en pilot study lo sa landrwa, pou vwar son lefikasite: koumsa nou ava kapab amelyor lo lezot distrik.

Mersi.

MR SPRAKER

Kestyson 175, Onorab Bernard Arnephy.

HON BERNARD ARNEPHY

Mersi Mr Speaker.

Mr Speaker eski Minis i kapab donn nou Lasanble detay, lo progranm spesyalizasyon pou bann zenn Dokter Zeneralis, ki pe travay avek Minister?

Mersi.

MINISTER MITCY LARUE

Mersi Mr Speaker.  Mersi Onorab.

Mr Speaker, an Fevriye sa lannen dan diskour lo Leta La Nasyon, nou Prezidan ti donn son langazman, ki Gouvernman pe donn priyorite spesyalizasyon bann zenn Dokter Seselwa.  E an Zen sa lannen Kongre Parti Lepep, ti re afirm sa langazman dan en son bann rezolisyon.  Alor Minister Lasante in pran sa bann langazman tre seryezman.  E ansanm avek Minister, ki responsab pour Devlopman Resours Imen, nou pe travay tre di,r pou asire ki tou nou bann zenn Dokter, i ganny sans spesyalize dan domenn ki zot in swazir e dan domenn ki en priyorite pour nou pei.

Mr Speaker, Minister Lasante i aktyelman annan li 22 zenn Dokter Zeneraliz ki’n kalifye dan sa dernyen 3 a 4an, ki anploye avek nou.  Apard sa 22, nou annan ankor apepre 5 lezot Dokter Zeneraliz, ki’n la pou en bon pe letan e ki pour en rezon oubyen en lot, pa’n deside pou fer bann letid pli spesyalize.

Bann zenn Dokter ki’n vini sorti etidye deor, zot bezwen fer zot 2an internship isi Sesel.  Si sa progranm letid ki zot in swiv aletranze pa’n enkli, en peryod internship.  Dan sa 22 zenn Dokter Zeneraliz, 15 in fini fer zot internship e zot in pare pour zot al spesyalize.  Me zot tou zot konnen e nou osi nou konnen, ki domenn ki zot anvi al spesyalize.

Dan sa bann ki pare pou al spesyalize, i annan enn ki sipoze kit pei sa mwan, pou al spesyalize dan pedyatri.  I annan en lot ankor ki pe kit pei menm, pou al spesyalize dan domenn lasante piblik.  En lot dokter ki fek ganny ofer en plas spesyalizasyon, dan Medécin Lafanmir ek en Liniversite ki baze an Lacoste. E i annan ankor 2 lezot dokter ki pe swiv en post graduate certificate, dan lasante zanfan avek en Liniversite an Ostrali.

Apard sa bann, nou annan osi en Dokter Seselwa ki pe spesyalize Cuba dan domenn ortopedik.  En lot Dokter Seselwa ki pe spesyalize an Sid Lafrik dan domenn sirizi bann zanfan.  2 Dokter Seselwa, ki pe spesyalize an Nouvelle Zelande. Enn pe spesyaliz dan Medécin Sportif e lot pe fer Medécin Lafanmir.  Nou osi annan en dokter ki’n ganny en plas pou spesyalize an Sid Lafrik sa lannen, me malerezman in deside, pou pa pran sa plas akoz serten problenm personnel.  Nou osi annan apepre 5 zenn Dantis ki pe espere pou al spesyaliz dan domenn lasante Labous.

Mr Speaker, an Zen sa lannen, Minis pou Lanplwa ek Resours Imen, ti diriz en delegasyon ki ti enkli zofisye sa Minister, zofisye mon Minister e Minister Zafer Etranzer, pou al negosye posibilite, ki nou bann zenn dokter ek dantis, zot kapab spesyalize dan bann bon fasilite an Sid Lafrik.  Zot in fer kozri avek plizyer Liniversite.  E delegasyon ti osi fer kozri avek Konsey bann Profesyon Lasante an Sid Lafrik.  Sa i sa Konsey ki anrezistre bann Dokter e donn zot permisyon pou train an Sid Lafrik.

Tou sa bann kozri in tre, tre pozitiv.  E nou pe anvizaze vwar serten nou bann dokter komans al spesyalize dan Sid Lafrik, tre byento.  Mon pa kapab dir egzakteman kan, akoz sa pou depan lo serten prosedir, ki an plas e ki nou bann kandida zot bezwen swiv.  Nou’n deza zwenn avek bann zenn dokter e nou’n donn zot tou bann lenformasyon neseser, pour ki zot met zot an preparasyon.

Fodre fer resorti sepandan ki depi 2006, Sesel ti siny en lagreman ek Sid Lafrik e sa lagreman i fer provizyon, pour kolaborasyon dan formasyon resours imen, pour lasante.  Alor la nou pe vreman activate sa korperasyon.  E fodre fer resorti osi ki tou dernyerman Sid Lafrik, pe favoriz lantrennman bann sitwayen pei SADC.  Alors sirtou bann ki pa kapab fer zot prop formasyon e sa i tonm byen pour nou, akoz nou form parti SADC.

Mr Speaker, apard sa bann zefor ki mon’n nonmen, nou pe osi fer kozri avek La Reunion e i posib ki nou ava annan a lavenir Seselwa, tre byento, petet lannen prosenn, Seselwa ki ava al spesyalize laba.  La ki La Reunion i ofer bokou domenn spesyalizasyon.  Annefe avek La Reunion, nou pe toultan annan bann lesanz ek bann formasyon tre sofistike, pa zis pour nou bann dokter, me osi pou nou bann ners.

Nou pe eksplwat lezot posibilite dan lezot pei, par egzanp an Slovakia, Sir Lanka, Lenn, eksetera.  E Cabinet osi in aprouve, ki in pran desizyon ki prezan tou bann, nou bann zenn profesyonnel ki etidye medicine, zot pou bezwen fer zot internship dan sa pei kot zot pe etidye, avan zot retournen.  Mon krwar sa i ava en lavantaz.  Me Malaisie par egzanp, i pa fasil pou fer sa, akoz lakantite etidyan ki zot annan, zot plas i tre limite.

Mr Speaker, fodre mon soulinyen ki spesyalizasyon bann Dokter ek Dantis i pa parey spesyalizasyon bann lezot profesyonnel, dan lezot profesyon.  En Dokter oubyen en Dantis, ki anvi spesyalize dan en pei, i bezwen dabor ganny anrezistre dan sa pei par Konsey Medikal oubyen Danter sa pei.  Dan bokou ka sa lanrezistreman i ase konplike, akoz dan bokou ka sa bann Konsey, zot demande ki bann Dokter oubyen bann Dantis, i fer enn ou plizyer legzanmen adisyonnel, pou kapab ganny admet dan en progranm spesyalizasyon: spesyalman si ou pa’n etidye dan sa pei.  Oubyen si napa kek laranzman spesyal, ki’n ganny fer pou admet sa kandida.

I souvan osi annan bokou konpetisyon ant bann kandida Nasyonal ek bann kandida etranze, akoz plas dan bann spesyalizasyon i tre limite.  I ase difisil pour en etranze ganny en plas dan en progranm spesyalizasyon, si i pa’n etidye la dan sa sistenm: akoz priyorite i ganny donnen souvan a bann sitwayen Nasyonal sa pei, oubyen a bann Dokter ki’n etidye la.

Spesyalizasyon Dokter ek Dantis fodre fer remarke, pa fer dan Liniversite.  I fer dan bann lopital ki afilye avek bann Liniversite.  E i fer avek vre pasyan dan bann sityasyon reel.  E se pour sa rezon ki plas i souvan tre limite.

Mersi Mr Speaker.

MR SPEAKER

Dokter Payet, Onorab Payet.

HON DAVID PAYET

Mersi Mr Speaker.  Bonzour tou dimoun.

Mr Speaker, eski Minis i kapab enform sa Lasanble si sa progranm spesyalizasyon i baze pou ganny formen par ………. kapasite bann zenn………….

Mersi.

(Laughter)

(Interruption)

MR SPEAKER

Ou’n konpran kestyon?

MINISTER MITCY

Mersi Mr Speaker, i pa ti ankor tenny pou li.

MINISTER MITCY LARUE

Mersi Mr Speaker.

Mersi Onorab.  Onorab nou konn nou bezwen pei: byensir nou konn bezwen pei – dan ki domenn nou bezwen spesyalizasyon: e prezan nou tant pour nou gid, nou bann Dokter vizavi sa bann ki pei i vreman bezwen.

Mersi.

MR SPEAKER

Onorab De Commarmond.

HON CHARLES DE COMMARMOND

Mersi Mr Speaker.

Mr Speaker, eski Minis i kapab enform nou Lasanble, lekel pei, kot nou bann zenn Dokter tre motive pe al spesyalize parey in dir, ki rekonnet internship ki ganny fer Sesel: e depi kan internship ki fer isi Sesel in ganny rekonnet par sa bann pei parey in dir?  E akoz alor prezan, tou internship ki ganny fer par bann Dokter ki al fer zot formasyon deor, i bezwen ganny fer laba deor dan sa bann pei?

Mersi bokou.

MINISTER MITCY LARUE

Mersi Mr Speaker.  Se sa rezon akoz Gouvernman, in pran desizyon ki nou pou bezwen fer bann zenn Dokter fer zot internship dan sa pei kot zot pe etidye, akoz i pli bon.  Parski nou pou dir ki Sesel, dan Lopital Sesel nou ti annan en problenm avek internship, pour nou bann zenn Dokter.  Nou ti annan en problenm.  E se sa, i pa ti ase striktire.  I ti napa en, ki mannyer mon pou dir, en progranm byen striktire, ki kapab rekonnet par serten pei e sa ti en defi.  Ok?

E sirtou i bezwen dan en Teaching Hospital, akoz nou Lopital i pa vreman en Teaching HospitalSo vwala en pti pe nou pti sa.  E se sa ki Gouvernman i pran a defi ki prezan dokter i ava fer zot internship, apre zot a fer en sel al spesyalize: olye ki zot vin fer li Sesel.

Me sa bann ki nou pe fer la, dokter, nou CMO, in take over sa e i pe fer sir ki si i annan sa striktir an plas, kot bann dokter i fer sa ki neseser, pou kapab ganny rekonnet dan sa bann pei kot zot pou al ganny spesyalize.  Sid Lafrik in definitivman aksepte sa.

Mersi Mr Speaker.

MR SPEAKER

Kestyon 176, Onorab Bernard Arnephy.

HON BERNARD ARNEPHY

Mersi Mr Speaker.

Mr Speaker, eski Minis i kapab dir nou Lasanble, ki’n arive avek propozisyon pou retourn servis Laundry avek Health Care Agency.

Mersi Mr Speaker.

MINISTER MITCY LARUE

Mersi Mr Speaker.  Mersi Onorab.

Mr Speaker, Lopital Sesel parey zot konnen, in pou plizyer lannen ti annan en landrwa kot selman lenz Lopital ti ganny lave.  E sa servis ti osi egziste kot plizyer lezot fasilite parey: Lopital Anse Royale, Kazern sa lepok, e Les Cannelles e osi ki North East Point Hospital la.

Serten lezot klinik ti servi par egzanp, en pti masin pou ki i lav zot bann lenz.  Kot Lopital Sesel, landrwa ki nou ti lave, ti ganny ekipe avek 2 a 3 masin: lave endistriyel, masin pou fer sek e preswar pou drese.  O fir e anmezir ki Lopital ti ganny renove, nouvo Sant Lasante ti ganny konstrir, servis ti ogmante e osi lakantite lenz pou lave ti ogmante.

Dan bann lannen 2001, landrwa kot ti lave kot Lopital Anse Royale ek North East Point ti fermen e lenz serten Sant Lasante, ti pe osi ganny lave kot Lopital Sesel.  Avek kriz mank delo e masin sa lepok, ti pe komans kase, akoz sa volim lenz ki ti pe ganny lave, ti pe vin difisil pou asire ki Lopital ek lezot fasilite, i ganny fourni lenz prop atan.

Serten, sa ti annan en rezon pour sa bann difikilte.  E la nou ti pe eksperyans bokou problenm pour nou fer lenz sek.  A sa moman la, kot nou ti apros Dobi Laundry Service e i ti vin asiste Minister Lasante a sa letan.  E tou ti pas byen.  E mon profite pou remersye li, pour sa servis ki i ti ofer nou a sa lepok ki nou ti vreman dan difikilte.  Nou pa kapab bliy sa.  I ti ed nou.

Fodre note ki a sa moman 2001, nou ti annan sa volim 184mil 350 kilo lenz, ki ti pe ganny lave par an.  E sa ti fer en kont 15mil 362 kilo lenz par mwan.  E swivan bann reform, ki ti ganny entrodwi an 2008, ti vin obligatwar pou outsource laundry service.  Depi sa tou lenz Lopital e osi bann Sant Lasante, tou ti ganny lave kot Dobi. Vedir la nou ti outsource avek Dobi Laundry Service. Zot ti ganny sa kontra.

E a sa moman 2008, en volim 255mil 657 kilo lenz, ti pe ganny lave par an.  E sa ti fer en kont 21mil 304 kilo lenz par mwan.  Sa ti reprezant en logmantasyon 6mil kilo lenz.  E a ler aktyel sa in double, akoz lopital i admet plis pasyan e nou servis partou in ogmante.  Par egzanp dan North East Point Home, nou annan nou plis ki 648 pasyan, pa pasyan, rezidans.  E lopital li menm i annan son kont, Hospice i annan pour li.  E servis in ogmante kot in double lakantite lenz ki nou lave.

Me depi en serten letan, Lopital Sesel e osi tou fasilite lasante lo Mahe, pe eksperyans plizyer difikilte avek lakantite dra, tetdorye e lezot materyel ki nou bezwen, pou donn en servis e rann lavi nou pasyan konfortab.  I fer ki nou ganny bann lenz an retar.  E ler nou ganny lenz an retar, nou pa ganny tou sa ki nou anvoye.  I fer ki i kree fristrasyon parmi nou bann staff, ki pe esper dra pou aranz lili: fristrasyon pour nou pasyan ki pe admit – pe esper lili fini aranze.  I kree en fristrasyon pour tou: pour nou Minister.  E nou pa pe donn sa servis ki nou krwar nou devret donnen.  Petet nou dra i devret ganny sanze bomaten, me nou bezwen sanz li pli tar dan lazournen, akoz nou ganny an retar.

So, tousala in kree sa fristrasyon kot nou dir be non, nou bezwen fer keksoz.  E la nou’n zwenn avek responsab Laundry, nou’n asize – en tete a tete pour nou diskite: be pou nou vwar ansanm, ki bann problenm ki annan.  Akoz nou, nou pe pey pour en servis e nou bezwen ganny sa servis de kalite.  E nou’n vwar ki i annan en kantite problenm avek sa Laundry service. En kantite problenm: plizyer problenm.  Problenm mendev, problenm transpor, problenm lekipman.  E ler nou get tou sa problenm, nou problenm pa pou rezourd.

So, nou’n apros Procurement e Procurement Unit osi, in fer en diskisyon avek zot pour nou vwar ansanm ki mannyer nou kapab amelyor sa sityasyon.  Desizyon ki nou pe pran, ki nou bezwen pran, se ki nou’n bezwen dan sak, par egzanp: North East Point, nou pou bezwen al met nou 2 a 3 masin, pour nou komans lav en pe nou prop lenz nou menm – lo site.  Anse Royale, petet met 1 ou 2 masin, pour nou lav en pe lenz lo site.  Menm kot Lopital Sesel met 1, 2 pour nou lav nou lenz zot menm.

Epi larestan, nou kit avek Dobi pour lemoman.  E nou pe osi al fer renovasyon la aktyelman, lo vye landrwa kot nou ti fer laundry dan lepase, kot Lopital Sesel.  Re aranz sa landrwa la e tender Laundry service pour ki:  kot Lopital Sesel, mon pou fer remarke ki i pou tanporer, akoz landrwa pa vreman ideal.  Me nou napa swa pour lemoman.

Me pli tar ler nou master plan in fini, pou donn nou vreman lide kote nou pou met nou Laundry, la nou a fer en proper Laundry. Me nou pou outsource.  Zis i ava la, me nou pou outsource pour ki nou kapab ganny sa servis, ki nou krwar nou piblik i bezwen.  E ki nou kot Lasante, nou feel nou bezwen, pour nou kontinyen donn sa servis.

Mersi Mr Speaker.

MR SPEAKER

Okenn siplemanter Onorab?

HON BERNARD ARNEPHY

Mersi Mr Speaker.

Mr Speaker, eski Minis i kapab dir nou avek sa kantite kilo lenz ki in koz lo la, konbyen sa pe kout Gouvernman par lannen?  E dezyenmman, eski Minister pe mazin apard sa bann pti quick fix ki nou pe mazin pe fer: eski nou pe mazin fer en proper cost analysis, pour nou fer sa servis retourn konpletman avek Health Care Agency, malgre nou pou outsource li: an vi ki lizyenn, linen Lopital i en keksoz primordyal pour bann pasyan e bann travayer ki servi sa servis.

Mersi.

MINISTER MITCY LARUE

Mersi Mr Speaker.

Mr Speaker, parey mon’n dir, bann desizyon ki nou pe pran la, i zis tanporer.  Zis tanporer.  Byensir nou pe fer bann cost analysis pour nou vwar vreman, ki mannyer nou pou fer li dan lavenir.  Me selman la i tanporer, nou bezwen fer li vitman, akoz nou sityasyon i kritik.  Me nou pe pey anviron R7 milyon par an pour nou laundry service.

Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.

Mr Speaker, eski Minis i kapab dir avek sa Lasanble, eski ti annan e in annan proper tendering? E akoz ki zot pa pe outsource sa servis avek bann lezot service providers.

Mersi Mr Speaker.

MINISTER MITCY LARUE

Mr Speaker, i annan bokou laundry service dan pei ki pa pe pran: akoz nou pour nou donn en servis Lopital, nou bezwen en Laundry Service kot i pran zis lenz Lopital.  I pa kapab pran lezot lenz.  Ok?  Me selman nou pe al, parey mon’n dir la, letan nou pe aranz kot Lopital la, nou pe al tender nou – nou pe al tender nou.  Nou pa pe kit li la pour zis pour en dimoun.  Nou pe al tender, kot i ava annan bann dimoun ki a bid. Apre the best i a ganny sa tender.  Ou konpran?

Me selman si en Laundry, par egzanp i pe lav tou lenz bann lotel, i pou lav lenz Lopital ansanm.  I pa normal, i pa tro normal, parske ou bezwen lav selman lenz Lopital.  Parske lenz Lopital i annan diferan prosedir.  Diferan fason fer.  Akoz ou annan diferan kalite lenz.  I annan lenz ki vreman sal: pou protez ou kont lenfeksyon, i annan kalite detergent ki ou bezwen servi.  I pa parey bann detergent, ki nou servi toulezour kot lakaz.  I annan diferan keksoz ki bezwen ganny servi.   I annan triyaz ki bezwen ganny fer.  I annan lenz ki bezwen met separe avek lezot.  I annan en kantite keksoz ki bezwen ganny fer.

E sa bann prosedir, bann dimoun ki ler i met en tender pour li al ladan i bezwen – savedir sanmenm sa ki nou tender ler nou pe mete, tou sa bann zafer i bezwen antre ladan, pour zot konnen ki zot ekspekte, ler zot pe vin pran sa laundry servis avek Lopital.  Me selman nou reasir Lasanble, ki nou pe met lanmen lo la e nou pou fer li the proper – the proper procedures.

Mersi Mr Speaker.

MR SPEAKER

Bon avek sa nou’n ariv a lafen Kestyon pour Minis e nou remersye Minis Larue ek son delegasyon.  E nou ava pran lot Minis.  Nou ava eskiz Minis Larue dabor.

Mon ava envit Minis Dogley pou pran plas dan Ministers’ Chair.  E Minis Dogley i ek nou ozordi bomaten pou reponn en Kestyon Dirzans, par Leader of the Opposition.  Onorab David Pierre, lo koupir elektrisite.

Onorab.

HON DAVID PIERRE

Mersi Mr Speaker.

Mr Speaker, eski Minis i kapab donn detay sa Lasanble, lo kwa ki ti koz sa koupir kouran preski partou lo Mahe, Sandi le 10 Oktob sa lannen.

Mersi Mr Speaker.

MINISTER DIDIER DOGLEY

Mr Speaker, mon ti a voudre premyerman dir bonzour Mr Speaker, tou bann Onorab isi dan lasal e tou bann dimoun ki pe ekoute dan lakour.

Mr Speaker, avan ki mon donn bann lenformasyon ki nou annan lo kwa ki ti arive Sanmdi le 10 Oktob kot main stasyon elektrisite PUC: mon ti a voudre eksplike ki mannyer sistenm zenerater kot PUC i marse, pour ki i pli fasil pou konpran sa lensidan Sanmdi pase.  Mon oule osi refer sorti ki lanket dan sa zafer, i ankor pe kontinyen, pour nou fer sir ki nou annan tou lenformasyon lo kwa ki’n arive.  Bann lenformasyon ki nou pou donnen, i lenformasyon ki nou annan selman an se moman.

Isi Mahe, PUC i prodwi elektrisite kot 2 stasyon elektrisite.  Sa i kot son main stasyon elektrisite, Roche Caiman kot i annan 9 zenerater, ki donn elektrisite lo Mahe an antye.  Dezyenmman elektrisite, i osi ganny prodwir kot son stasyon Nouvo Por, ki nou apel Victoria B: kot i annan 6 zenerater, ki osi donn elektrisite lo Mahe.

Sa bann zenerater kot Roche Caiman, zot in ganny enstale e organize dan 2 group.  En premye group ki kote Sid e en lot group ki kote Nor stasyon.  Dan group kote Nor i annan 4 zenerater ki ganny kontrole par en sistenm elektronik e computer tre sofistike, ki regle bann loperasyon sa 4 zenerater 6 megawatt sakenn.  An tou sa bann zenerater, zot annan kapasite pou prodwi 24 megawatt.

Pour group zenerater ki lo kote Sid stasyon, zot osi zot ganny kontrole par en lot sistenm elektronik e computer.  Zot, zot annan kapasite pou prodwir 34 megawatt.  Problenm ki nou konnen in arive Sanmdi le 10 Oktob, i avek en sistenm elektronik power supply unit, ki donn kouran sistenm computer ki kontrol bann zenerater, lo kote Nor stasyon elektrisite PUC, Roche Caiman.

Ler sa lekipman elektronik, i nepli fonksyonnen, sa in fer ki kouran nepli al kot bann sistenm computer, ki kontrol bann zenerater kote Nor stasyon Roche Caiman.  E ler sa in arive, ou ganny ou sa ki nou apel an angle en domino effect: ki vedir ki enn apre lot bann sistenm computer, apre zenerater lo kote Nor, ti aret marse.

Akoz sistenm bann zenerater i depan lo lenformasyon sorti kot bann sistenm computer pour zot marse, le moman ki sa bann sistenm computer i tennyen, zenerater osi i aret marse.  Ler tou zenerater lo kote Nor, ti aret marse nou’n annan en sityasyon kot demann pou elektrisite ti tro bokou pour bann zenerater lo kote Sid ki stasyon laba Roche Caiman.  E avek Victoria B, ki baze Nouvo Por ki’n koz ki en overload. E sa osi in fer, ki sa 2 restan zenerater ki ti reste, pour zot osi tennyen e sa in koz sa blackout ki nou ti vwar ti arive Sanmdi le 10 sa mwan.

Bann enzenyer PUC in fer zot mye, pou trouv sa problenm pli vit posib e remet bann zenerater an mars.  Apre, apepre 1 erdtan, bann enzenyer ti kapab determin sa problenm.  E la zot in komans fer le neseser, pour remet bann zenerater an mars.

Mr Speaker, se sa an gro ki nou konnen in arive kot stasyon PUC Roche Caiman, Sanmdi pase.  Me parey mon’n dir, lanket i ankor pe kontinyen.

Mersi Mr Speaker.

MR SPEAKER

Okenn siplemanter Onorab?

HON DAVID PIERRE

Mersi Mr Speaker.

Mr Speaker, eski Minis i kapab dir nou so far, baze lo levidans e lanket ki zot in anmase: eski Minis i kapab dir nou, si sa problenm ti en problenm ki ti avoidable oubyen non?  Dezyenmman, eski zot in fer en analiz, lo konbyen sa problenm in kout bann businesses isi Sesel: e ki lenpak in annan lo lekonomi Sesel an zeneral, osi byen lo ki lenpak in annan lo bann Seselwa ordiner.

Mersi Mr Speaker.

MINISTER DIDIER DOGLEY

Mr Speaker, parey mon pe dir, ler ou annan bann lensidan parey, i annan plizyer teori e i annan plizyer keksoz ki ganny dir.  E i annan diferan dimoun ki’n met diferan lenformasyon devan.  E nou, nou pa kapab taye pou tonm a en konklizyon, egzakteman ki’n arive Sanmdi le 10 Oktob.  Me sa ki mon kapab dir, se ki nou’n met nou en group enzenyer e bann dimoun osi ki pa enzenyer, pou koman sa lanket e fer sir poudir nou triy bann lenformasyon: ki lenformasyon ki a lafen, ki nou pou annan, i bann lenformasyon ki konkret.  Pou fer sir poudir, si i annan okenn neglizans ki’n arive atraver bann travayer ki ti pe travay kot PUC sa zour, then PUC i a bezwen fer le neseser pou pran bann aksyon ki neseser.  Me pour lemoman an nou napa sa bann lenformasyon.  Nou bezwen atann ziska ler ki sa lanket in fini ganny konplete.

Konsernan biznes ki’n ganny afekte, mon lenformasyon ki mon annan se ki PUC – a problenm ti arive 7.30 bomaten son Sanmdi e pli boner 9.30 anvil, serten landrwa deza PUC ti’n komans donn elektrisite.  E pli tar dan 11.30, preski tou landrwa dan zalantour Victoria: enkli Victoria ti’n fini ganny elektrisite.  Se bann landrwa lo kot Sid Mahe e pli lwen, ki in pran en pe plis letan – ki a lafen ver dan er, 1.30 ki PUC in kapab donn elektrisite sa bann landrwa.  Nou pan zanmen fer en letid e nou napa kapasite pour lemoman, pou fer en letid konkret, egzakteman konbyen ki’n kout bann biznes e bann endividi, konsernan sa blackout ki’n arive sa zour: Sanmdi le 10 bomaten.

Mersi Mr Speaker.

MR SPEAKER

Bon si napa okenn lezot kestyon, nou ava remersye Minis e eskiz li parmi nou.  Mersi.

Bon avan nou adjourn nou ava fer en First Reading.

ASSISTANT CLERK

This Act maybe cited as the Public Assembly Act, 2015.

MR SPEAKER

Bon nou ava adjourn ziska 11er.

(Break)

MR DEPUTY SPEAKER

Bon, bonzour tou Manm Onorab e tou dimoun ki a lekout.  Nou a kontinyen avek travay lo nou Order Paper. E mon ava envit Onorab Mirena Souris pou prezant nou son Mosyon.

HON MIRENA SOURIS

Mersi Mr Deputy.

Mr Deputy, devlopman se Lasante.  Letan nou dir ki devlopman i dan nou pep, nou pe dir ki tou sa ki nou fer isi Sesel, i merit ganny reflekte dan leta byennet nou pep.  Set akoz lasante i en prensip fondamantal parti o pouvwar, Parti Lepep ki sa size i ganny aborde dan pli o lenstans sa parti: e osi ganny mete dan progranm politik, nou dirizan Prezidan James Michel.

Mr Deputy, sa ti ganny reflekte dan bann rezolisyon ven nevyenm Kongre Parti Lepep, le 5 Zen 2015 e dan diskour Prezidan Michel lo Leta La Nasyon le 26 Fevriye sa lannen.  Plas lasante dan Kongre Parti Lepep e dan diskour Prezidan Michel, lo Leta La Nasyon, i demontre lenportans sa Mosyon ki mon annan loner pou prezante devan nou Lasanble.

Mr Deputy, lefe ki pli o lenstans parti o pouvwar e pli o personnalite dan nou pei, pe atas lenportans avek sa size lasante, o menm moman ki nou pep pe osi koz lo sa size, sa i montre klerman ki Parti Lepep, i reste konekte avek laspirasyon son pep.

Lartik 29 nou Konstitisyon i dir klerman, ki swen lasante primer i en drwa fondamantal pour tou Seselwa.  Parkont sa Gouvernman Parti Lepep, i al pli lwen e pe ofer menm swen lasante spesyalize pour tou Seselwa, ki annan bezwen.  Esa i ganny fer gratwitman.

Mr Deputy, koman en parti e Gouvernman o pouvwar, nou’n fer bokou an term devlopman lasante nou pep.  Nou’n konn bokou sikse.  Sa pa kapab ni demanti e bomaten Minis in fer resorti. Me parkont i reste ankor bokou pou fer, akoz lasante i pa reste statik.

I vre ki ozordi pep Seselwa pa pe trakase, si son zanfan pou kapab vwar dokter si i tonm malad.  Akoz avek akse avek dokter.i asire: akoz nou servis lasante piblik, i gratwit.  Sa ki preokip Seselwa ozordi, se sa kalite swen e ki nou servis lasante piblik pe delivre.  Ozordi Seselwa i anvi vwar en swen lasante pli bon e ki ganny delivre pli pre avek zot, kot zot reste.

Alor nouvo defi nou sistenm lasante piblik, se pou delivre en servis swen lasante de o nivo dan distrik e lo nivo rezyon.  Sepandan bann ki responsab pou planifikasyon nou sistenm lasante, i bezwen fer sir ki letan nou bann servis i ganny desantralize, zot nivo litilizasyon i sifizan pou zistifye sa bann lenvestisman dan bann resours an term lekipman e mendev.

Mr Deputy, Mosyon devan nou Lasanble i vin an sipor, fer par Prezidan Michel dan ven nevyenm Kongre le 5 Zen 2015, pou met plis servis lasante spesyalize e ot kalite, pli pre avek lepep nou bann sant rezyonal.  Lobzektif en tel Mosyon, se pou fer sir ki Minister Lasante, i kontinyen met resours adekwat pour prezerv protez lasante nou pep.

Dezyenmman se pou redwir letan ki nou bann pasyan ouswa kliyan i espere, pou ganny en randevou spesyalis: e an retour, pour ede ogmant nou prodiktivite e osi redwir konplikasyon pandan letan ki pasyan pe esper son randevou.

Klinik out-patient, sa ki nou dir SOPD, i le sel landrwa, ki ti pe ofer tou swen e servis spesyalize, tou pep Seselwa, apard nou zil pros.  Statistik pandan sa dernyen 4an, i demontre ki lannen 2011, ti annan en total 13,211 nouvo kliyan ki ti ganny refer kot sa younit pou vwar diferan spesyalis.  Tandis ki an 2012, ti annan 11,085 kliyan.  2013, ti annan 11,848 e 2014 ti annan 11,438 nouvo ka.

Mr Deputy, Minister Lasante osi dan son sazes, in osi prenon kont laspirasyon nou pep e in vwar li neseser, pou komans entrodwir serten sa bann servis o nivo rezyon.  E par egzanp a ler aktyel dan Sesel, dan sa bann 4 rezyon apard nou bann zil pros, sant lasante dan Nor pe ofer spesyalis lapo, spesyalis fizisyen, spesyalis pour tretman mantal e spesyalis pour endokrinolozi, ki annan pou fer pour tret bann dimoun avek dyabet.

Tandis ki sant lasante English River, pe ofer lasante spesyalis pour lapo e vascular surgeon, ki annan pou fer avek tretman bann lavenn varis e sirkilasyon.  Tandis pou sant lasante Anse Royale, pe ofer servis sirizyen: ankor vascular surgeon, fizisyen e speech therapist. Anse Boileau pe ofer servis pour spesyalis lapo, vascular surgeon. E la avek sa nouvo devlopman ki’n arive avek Lasosyasyon Endyen, byento klinik Anse Boileau, pou osi benefisye avek servis spesyalize pour zanfan e community physician.

Mr Deputy, merit sa Mosyon i kler, akoz i annan en bezwen pou met plis lezot servis spesyalize dan nou 4 sant lo Mahe.  Met plis servis lasante spesyalize e ot kalite, pli pre avek lepep dan bann Sant Lasante Rezyonal, i pou anmenn bokou an term benefis pour pasyan ouswa kliyan.  Konplikasyon i kapab ganny dekouver boner e tretman apropriye a ganny inisye.  Sa pour ede redwir letan espere pour pasyan e an retour ede pour ogmant nou prodiktivite e fer sir ki nou lekonomi i reste de lavan: redwi fristrasyon parmi pasyan ouswa kliyan atraver solisyon pour zot problenm: ogmant konfyans nou pep dan nou servis lasante: anmenn servis spesyalize pli pros avek nou popilasyon.

Mr Deputy, Mosyon pe koz pour sa madanm dan Beau Vallon, ki swete vwar plis servis spesyalize, tel parey spesyalis Lezo vin pli pre dan nou distrik.  Pour sa madanm dan Le Niole ki anvi vwar servis Lizye vin pli pre dan nou distrik e osi sa msye Le Niole ki swete vwar servis sirizyen ganny ofer dan rezyon.

Pou konklir Mr Deputy, mon konsyan ki pou annan en kou adisyonnel lo Minister Lasante, pou fer sir ki serten lekipman adisyonnel i ganny mete dan sa bann sant rezyonal, pou kapab delivre sa servis spesyalize alaoter.

Osi nou bezwen anmenn plis spesyalis pou travay Sesel

Oubyen train plis dokter Seselwa.  A sa pwen mon propoze ki sekter prive, sosyete sivil, bann kominote biznes, i zwenn ek sa Minister, pou donn en koudmen atraver sponsorship, pou ede met plis

lekipman neseser dan bann Sant Lasante Rezyonal.

Mon osi propoze ki Minister Lasante i met plis resours imen an term bann spesyalis, pou kapab ofer sa bann tel servis.  Mon osi propoze ki Minister Lasante i fer en odit dan son bann sant rezyonal, pour asire ki sa bann servis i a kapab ganny delivre.  Mr Deputy, mon envit Lasanble pou siport mon Mosyon pour benefis lepep.

Mersi.

MR DEPUTY SPEAKER

Bon, Mosyon in ganny table e prezante.  Okenn Manm ki oule segonde?

HON DAVID PAYET

Mr Deputy, mon segonn sa Mosyon.  Emon oule dir enn de pti mo.

HON DEPUTY SPEAKER

Hon Dokter Payet, proceed.

HON DAVID PAYET

Mersi Mr Deputy.

Mr Deputy, sa deba lo Mosyon table par Onorab Souris, i en levennman dan li menm.  Mon dir ki sa deba i en levennman, akoz sa Mosyon pe abord en size, ki tous tou Seselwa.  E i fer sa dan en fason entegral e konpreansiv.

Sa Mosyon pe get sistenm lasante piblik Sesel dan son globalite e fason pour amelyor son performans.  Sa Mosyon i osi tre anbisye, akoz si nou Lasanble i adopte li e Gouvernman i answit enplimant li, sa pou reprezant reform pli profon nou sistenm lasante piblik, depi ki in ganny etablir an 1977.  Sa Mosyon pe viz ver donn Sesel en sistenm lasante piblik, ki pou reponn a bezwen e lekspektasyon sitwayen Seselwa, ki konsonmsa servis.

Mr Deputy,Mosyon ki devan nou i demande ki Lasanble, i siport en rezolisyon dernyen Kongre ordiner,parti ki o pouvwar, Parti Lepep ki demande ki Gouvernman i fer 6 keksoz an sa ki konsern nou sistenm lasante piblik.

Sa 6 keksoz ki Gouvernman i bezwen fer se: envestir bokou plis resours dan prevansyon maladi e promosyon lasante: redwir letan ki sitwayen i espere pou resevwar okenn servis lasante, sirtou servis spesyalize, met plis servis spesyalize e ot de kalite pli pre avek lepep Seselwa.  Setadir dan bann Sant Lasante Rezyonal.  Met plis resours dan formasyon bann zenn Seselwa, pour ki zot vin bann spesyalis devoue e konpetan: kontinyen sansibiliz bann sitwayen pou kontribye zot par, pou gard zot lekor an bonn sante e pran zot tou mezir ki neseser, pour kontinyen amelyor e moderniz sistenm lasante.  E fer ki tou Seselwa i ganny konfyans total dan nou sistenm lasante.

Mr Deputy, sa 6 pwen ki mon’n fer resorti dan sa rezolisyon le ven nevyenm Kongre ordiner Parti Lepep, i form sa 6 pilye sa gran reform nou sistenm lasante piblik, depi son letablisman.  Sa 6 pilye reform, pou konsolid nou sistenm lasante piblik, akoz zot pou adres bann problenm ki piblik Seselwa, i fer fas avek e bann defi ki nou sistenm lasante pe rankontre.

Mr Deputy, nou sistenm lasante pa malad, me i anba bokou presyon.  Lo en kote, i annan levolisyon dan sa ki nou apel, disease pattern: oubyen bann maladi ki afekte nou pep.  Sa bann nouvo maladi, i kree demann lo lapar nou popilasyon an term tes, lekipman pour detekte sa bann maladi, lekspertiz medikal pou tret zot e fasilite tretman aletranze.

Presyon dan nou sistenm lasante piblik, i vin an rezilta kontrent dan kapasite nou servis lasante, pou delivre lo sa bann demann.  I pa akseptab, ki rezilta tes i perdi.  I pa normal ki en sitwayen i esper bokou, letan pour li vwar en spesyalis.  I enkyetan pou konstate ki nivo konfyans dan nou sistenm lasante piblik, in bese.

Mr Deputy, tou sa bann problenm ki mon’n site, pa merit egziste dan nou sistenm lasante piblik.  Nou sistenm lasante piblik, i baze lo prensip gratwit.  Swen gratwit.  Ki vedir ki swen lasante i pour nanryen.  Me pa akoz i pou nanryen ki sa servis, pa kapab de ot kalite.  En sistenm lasante piblik i baze lo en prensip gratwit, pa kapab fer pasyan esper bokou letan, pour vwar spesyalis oubyen resevwar en rezilta tes medikal.

Mr Deputy, parey mon’n dir pli boner, sa gran reform ki sa rezolisyon Kongre Parti Lepep, pou enspire dan nou sistenm lasante piblik, pou konsolid nou sistenm lasante piblik, akoz zot pou ranforsi sa baz ki nou’n deza konstri.  Sa baz se prensip aksesibilite.

Nou sistenm lasante piblik, i baze lo prensip aksesibilite.

I annan plizyer form aksesibilite.  I annan aksesibilite ekonomik, kot en dimoun i kapab afford swen lasante.  Nou sistenm i garanti

aksesibilite ekonomik atraver prensip gratwit, akoz lasante i pou nanryen.  Aksesibilite i osi enplik en dimansyon fizik, kot en servis lasante i ganny ofer.  La ankor, nou sistenm i garanti sa atraver prensip desantralizasyon swen lasante.

Sa ki sa rezolisyon Kongre pe demande, se ki nou ranforsi prensip aksesibilite e anrisi nou progranm desantralizasyon.  Nou fer sa letan nou desantraliz servis spesyalize.  Nou fer sa letan nou anmenn plis lekipman modern, dan nou sistenm lasante piblik.  Nou fer sa letan nou prodwi plis spesyalis Seselwa.  Letan nou fer tousala, nou pou ogmant kalite swen lasante Seselwa e an retour Seselwa pou annan plis konfyans dan nou sistenm lasante piblik.

Mr Deputy, en bon sistenm lasante pa zis la pou tret maladi, me i osi konsilte bann dimoun ki an bonn sante e ed zot reste an bonn sante.  Ensi ki ankouraz lezot pou adopte zot stil lavi, pour ki zot osi zot kapab viv an bonn sante.  Se sa prensip positive deviance, kot nou etidye bann bon konportman e fer zot vin bann norm dan lasosyete.

I annan Seselwa ki reste an bonn sante tou zot lavi, ki viv lontan e reste for menm dan zot vye zour.  Si i annan Seselwa ki kapab fer sa, bokou nou osi nou kapab fer li.  Nou bann progranm prevansyon e promosyon bonn sante, i merit idantifye sa bann Seselwa, e etidye zot stil lavi e disimil sa bann lenformasyon dan popilasyon, pour ki nou pep i vin en nasyon an bonn sante.

Mr Deputy, sa pa en rev, me en lanbisyon ki nou kapab realize, si Gouvernman i egzekit sa 6 pwen, ki’n ganny resorti dan sa rezolisyon dan dernyen Kongre Parti Lepep.  Gouvernman i annan li en devwar pou fer li.

Mr Deputy, mon pou siport Mosyon anmennen par Onorab Souris.

Mersi.

MR DEPUTY SPEAKER

Onorab Jacqueline.

HON SULTANNE JACQUELINE

Mersi Mr Deputy Speaker.

Mr Deputy Speaker, sa Mosyon ki Onorab Souris in prezant devan nou Lasanble ozordi, in demontre komitman Parti Lepep anba leadership byensir Prezidan Michel, pou kontinyen elev nivo servis lasante e byennet nou pep, par met plis servis lasante spesyalize e ot kalite, dan bann Sant Lasante Rezyonal.  E sa Mr Deputy Speaker, i gratwit.  Pasyan pa pey nanryen pou konsiltasyon e tretman.

Letan nou asize dan nou salon, pe get bann world news kot politisyen dan bokou pei, menm dan pei devlope parey Lanmerik, kot Prezidan Obama i ankor pe lager pou fer ki swen lasante, i vin pli aksesib e a laporte son pep.  Nou pa kapab pa rezonnen.  Nou pa kapab Mr Deputy Speaker, san dir ki nou isi Sesel, nou dan byen.  Annou pa bliye ki i annan nou frer ki’n deza mor dan pei parey Sid Lafrik, akoz i pa ti kapab montre ki mannyer i ti pou pey son tretman, si i ti pou ganny admet lopital.  Pourtan sa bann pei i sipoze annan pli bon lopital avek servis e swen spesyalize a tou nivo.  Me san larzan, ou pa pou kapab akse sa bann servis spesyalize e ot kalite.

Mr Deputy Speaker, i pou san dout en gran soulazman pou dimoun ki pe viv e soufer avek maladi kronik, parey: tansyon, dyabet, malad leker, asma, lapo e lezot ankor, pou al dan zot sant lasante pour zot vwar en spesyalis.  Mon pe koz an faver sa Mosyon Mr Deputy Speaker, akoz mon konnen ki dimoun dan mon distrik, dimoun dan distrik Port Glaud, pour benefisye enormeman avek bann tel servis, ki pou vin pli pre avek zot.

Mon pe mazin sa madanm ki pa war kler, ki pa kapab marse: bann ki’n vye e dan douler, ki ganny tromatize a sak fwa ki zot bezwen deplase pour al Twa Zonn pou kit zot randevou oubyen fer en check-up Lopital Sesel.  Sa deplasman souvandfwa, i kout zot bokou an term letan.  Zot bezwen asize, parfwa granmaten zot desann, me apre midi, 1er i sonn zot ankor lo ban.

I pou kout zot mwens finansyerman Mr Deputy Speaker, pou lwe en transpor, akoz pa zot tou ki kalifye pou ganny servis lanbilans.  Mr Deputy Speaker, mon osi swete ki sa Sant Lasante Rezyonal, zot osi sezi sa loportinite, pour annan en pli bon zesyon, kot i konsern fason pou kit rikord pasyan e dokimantasyon, pour pli byen fasilit swivi e tretman bann pasyan.  Sirtou bann ki sorti Grand Anse Mahe, oubyen Port Glaud, ki tonm dan rezyon sant lasante Anse Boileau.

En bon sant lasante i enn ki donn lenformasyon e ledikasyon lo ki mannyer pou viv an bonn sante.  Avek lemerzans bokou maladi, i annan en bezwen pou annan plis progranm edikasyonnel, pour sansibiliz e konsyantiz bann pasyan, avek bann tel maladi.  Progranm i bezwen sistematik e kontinyel.

Progranm ledikasyon i bezwen ganny fer avek bann group, ed zot pli byen kapab cope avek zot maladi e adopte en healthy lifestyle. Nou swete ki bann ners avek dokter ki asiste avek sa bann spesyalis, i kontinyen fer sa swivi avek bann dimoun dan zot klinik.

E la Mr Deputy Speaker, mon kontan ki bann paran i pe ganny sa servis pedyat dan sant lasante Anse Boileau.  Mon mazinen Mr Deputy Speaker, ki kalite servis ki bann spesyalis pou anmennen apard konsiltasyon e preskripsyon latizann, i plis letan pou koze,e eksplik pasyan zot maladi: donn konsey e annan en pli bon swivi lo bann ka endividyel.  Lizyenn, ki mannyer pou prepar zot ladyet. Atraver diskisyon e lesanz, zot a kapab siport kanmarad.

Se tou sa Mr Deputy Speaker, ki pou byensir anmenn sa kalite servis ki nou pe antisipe, dan nou bann sant lasante.  E dan serten ka spesifik, sa servis i devret osi ariv kot bann dimoun, ki vreman bezwen sa servis kot lakour, etandonnen larepons Minis bomaten dan sa Lasanble.

Mon swete Mr Deputy Speaker, ki Minister Lasante i osi kontinyen elev kalite servis ki bann klinik i donnen, ki osi bezwen bann resours esansyel e endispansab parey: loksizenn, en bon farmasi.  E pli enportan, ekipe avek ners ek dokter akoz sa bann klinik osi, zot fer fas avek emergency pou sov lavi.

Pour terminen Mr Deputy Speaker, nou kapab annan pli bon sant lasante dan lemonn, me swa pou viv an bonn sante i depan lo sakenn de nou.  Nou lasante, lasante nou zanfan e lasante nou fanmir, i depan lo nou.  Nou bezwen a tou pri adopte en stil lavi, ki diminyen e ilimin tou risk pou fer ditor nou lasante.  E nou evite al dan sa bann risk.  Mon lasante, mon responsabilite, i komans dan lakour.

Mersi Mr Deputy Speaker.

MR DEPUTY SPEAKER

Bon, avek sa si napa lot entervenan, Onorab Pierre?

HON DAVID PIERRE

Mersi Mr Deputy Speaker.

Mr Deputy Speaker, Mosyon ki devan nou, i pe demande ki nou siport lanons ki ti ganny fer par Prezidan Michel, dan ven nevyenm Kongre Parti Lepep, ki ti fer le 5 Zen sa lannen.  E zot pe rod pou anmenn servis Lasante spesyalize e ot kalite pli pre avek lepep Seselwa, dan bann Sant Lasante rezyonal.

Mr Deputy, i vre ki si nou ti kapab fer sa, i ti pou sertennman ede enormeman, sirtou pour bann dimoun aze ki souvandfwa, zot bann dimoun ki pli bezwen sa servis spesyalize.  Me mon kontan lapros ki’n ganny fer par de entervenan, dan sa Lasanble bomaten.  Kot Onorab Payet, in bored en pti gin lo sa nesesite pour nou get nou sistenm Lasante Piblik dan en fason pli globalize: dan en fason pli gran.  Onorab Jacqueline osi, in pran en lapros kot in demande ki nou osi donn kalite servis dan nou bann klinik partou atraver Sesel.

Mr Deputy, se lo sa de not, ki mon an vi fer mon lentervansyon.  Nou isi Sesel, nou pa ankor kapab donn servis spesyalize lo en efficiency ki Seselwa i kapab apresye e ganny konfyans lo en nivo nasyonal.  And yet nou pe sot baryer e demande ki nou fer sa menm servis ki nou pa kapab provide, lo en nivo nasyonal, nou pe demande pou anmenn li lo en nivo rezyonal.  Me selman i pa egziste sa lefikasite lo en nivo nasyonal.  Premyerman mwan krwar, nou devret lo sa nivo nasyonal, kot nou Lopital Victoria, nou main lopital, nou devret kapab ofer sa servis, a sa nivo efficiency ki Seselwa i aspire gannyen dan son pei.

Mr Deputy Speaker, i kler ki nivo servis Lasante, an term standar ki lepep pe aspire gannyen, i lwen avek realite isi Sesel.  Pirman, akoz resours ki nou annan e aksesibilite parfwa pou serten kategori dimoun, pour sa bann resours ki egziste.  Mon krwar poudir Lasanble Nasyonal, i bezwen dakor e aksepte ki bann servis de baz, premyerman, i devret ganny revize e i devret ganny amelyore.  Nou devret improve, oubyen amelyor sertennman nivo:-menm nivo lizyenn dan tou nou bann Lopital.  Nou bezwen met resours pou garanti, ki bann lenfrastriktir i reste lo sa nivo ki i devret reste.  E ki reflekte nou nasyon Seselwa.  Seselwa dan sa pei i devret kapab reganny konfyans dan nou sistenm Lasante dan tou nivo e sa i en remark ki’n osi ganny fer par Onorab Payet.

Mon konnen Mr Deputy, it’s a tall order.  I pa en keksoz ki fasil, me nou devret pe aspire koman en nasyon, pour nou kapab achieve sa nivo.

Mr Deputy Speaker, i kler ki over the years, in annan bokou lenvestisman dan nou sistenm Lasante.  Me i egalman kler ki nou bezwen annan en sistenm kot nou kapab kontinyelman revwar efficiency, fer cost effective analysis, cost effectiveness analysis, pou garanti ki sistenm i konnen a tou moman nivo outcome, nivo output, nivo efficiency avek en sel bi: avek en bi pou amelyor sistenm an antye pou satisfer lepep Seselwa.  Si napa bon lasante, napa nanryen.  Lekonomi pou ganny tape, sistenm Ledikasyon pou ganny tape, tou sekter Gouvernman, tou sekter Piblik enkli sekter Prive pou ganny tape.

Mr Deputy, i egalman kler ki nou bann profesyonnel, i zwe en rol kle dan nou sistenm Lasante e dan ki mannyer nou delivre Lasante pour nou pep.  Ozordi, nou vwar nou dan en pozisyon, kot nou pe recruit foreigners: nurses, dokter, eksetera.  E nou vwar nou pe donn zot bann kondisyon ki pou entice zot: ki pou fer zot vin travay Sesel.

Me sa bann kondisyon Mr Deputy Speaker, i bokou meyer ki bann kondisyon, ki nou bann lokal pe gannyen.  Wi, i annan morso ki zistifyab.  Me selman si nou kapab donn nou bann lokal en bon proporsyon, dizon 75 poursan sa ki sa bann dimoun pe gannyen, akoz i annan ki wi, nou pa pou kapab donn zot – i pa pou fer sans.  Me i annan ki nou kapab amelyore vizavi nou bann lokal.  Sa Mr Deputy, i pou ede motiv nou bann lokal e pou fer zot travay pli dir.  E letan zot travay pli dir, nou pou amelyor delivery dan nou servis Lasante.

Mr Deputy Speaker, menm bomaten in kler, ki isi Sesel dan nou sistenm e dan nou servis Lasante, nou bezwen adequate staffing.  I annan en kantite Seselwa, ki’n dan sa profesyon e ki’n kite e nou bezwen fer en zefor pou re-ganny zot.  Nou bezwen fer en zefor, pour osi egalman gard bann ki dan sistenm ozordi.  Se pour sa rezon ki mon pe dir, nivo servis, kalite servis pou amelyore konsiderableman si nou kapab get dan welfare bann staff, welfare bann dimoun kle dan nou servis Lasante e amelyor zot standar e amelyor zot sityasyon.  Nou bezwen donn zot competitive wages, nou bezwen donn zot bann benefis, kot pei i kapab afford.  Nou bezwen donn zot fleksibilite e abilite pour zot care pour zot pasyan, san ki zot bezwen vwar zot pe sot bann baryer.

Mr Deputy Speaker, zot bezwen practice dan en lanvironnman ki ranforsi rol profesyonnel:-pour ki i ranforsi zot rol profesyonnel, ki donn zot plis lotonomi, ki donn zot plis fleksibilite.  Nou bezwen donn zot plis resours.  Nou bezwen egalman Mr Deputy, demontre en high quality managerial support, dan en fason ki konsistan e donn zot quality leadership.

Mr Deputy, nou devret kapab menm al sa zistans kot nou enstitisyonaliz decision making dan Minister Lasante.

Mr Deputy, tou Seselwa i konnen ki Nursing Care e en core service dan okenn Lopital.

Mr Deputy, nou bezwen donk fer sir ki nou annan toultan en supportive environment avek en bon nivo staffing, kot nou kapab garanti lenvestisman dan sa direksyon, nou bezwen fer li.  I kapab paret ki lenvestisman o komansman an kour term, i kapab paret lo en nivo ki nou dir nou pa pou kapab afford.  I kapab paret bokou.  M e sa ki mon garanti sa Lasanble Nasyonal, bann tel lenvestisman pou pay off in the long term, akoz nou pou ganny meyer rezilta e lepep Seselwa pou satisfe.  E nou pou kapab etablir en sistenm Lasante, dan ki lepep Seselwa pou kapab annan konfyans total.

Nou pou annan less staff turnover e nou pou kapab retenir plis nou Seselwa.  Annou envesti e annou donn lepep Seselwa sa nivo e kalite servis Lasante, ki zot pe aspire gannyen e ki zot konnen zot kapab gannyen from Sesel, from zot pei.  Ler bann nurse e bann dokter i happy: ler nou pran swen ek zot: ler nou ganny bon kondisyon: ler zot ganny byen respekte: nou pou ganny definitivman better outcomes.

Nou bezwen Mr Deputy Speaker, kapab annan mentorship e ofer educational oubyen training opportunities pour tou nurse kapab kree: pour donn zot loportinite pou kree bann pathways pou avans zot karyer dan sa sekter.  In ler pour nou get beyond sa ki nou abitye.  In ler pour nou elev nivo.  In ler pouR nou envesti dan tou kwen nou servis Lasante.  E in ler pour nou rod kalite servis e aret aksepte medyokrite dan nou servis Lasante.  Avek sa de pti mo, mon a termin la Mr Deputy Speaker.

MR DEPUTY SPEAKER

Onorab Rose.

HON MARIE-ANTOINETTE ROSE

Mersi Mr Deputy.

Mr Deputy, mon pa ti’n prepar mwan pour sa Mosyon e mon pa ti pou entervenir ziske ler mon’n tann Leader Lopozisyon koz lo sa Mosyon.  Mon krwar inside track en pe lo lesansyel sa Mosyon, ki Onorab Souris in met devan nou.  E mon ti a kontan remet lesansyel devan:-lo latab devan nou Lasanble.

Nou Mosyon pa pe dir, nou pa pe fer tousala, oubyen nou Mosyon pa pe dir ki Gouvernman Parti Lepep pa merit fer tousala.  Sa Mosyon pe, si oule, lev en deba lo ki nou merit fer dan nou Sistenm Lasante a lonterm.  Ou konnen i:-reaksyon Leader Lopozisyon i fer mwan mazin menm deba ki nou ti annan detrwa lannen pase: ler nou isi dan sa Lasanble, nou ti koz lo konblaz.  Oubyen ler nou isi dan sa Lasanble, nou ti koz lo Liniversite Sesel; oubyen ler nou isi dan sa Lasanble, nou ti koz lo long term vision ki nou parti i annan pour sa pei e lot kote latab ti dir nou,’’non, non, non.  Pa koz lo long term vision, look at the current health system’’

Mr Deputy, 3an pase ler nouvo Minis Lasante ti ganny apwente, i ti vin dan nou Lasanble e i ti pas apepre 3 erdtan tan avek nou e i ti fer en Statement lo: The State of The Health Care System In Seychelles. Sa ki Leader Lopozisyon in vin koz lo la, 3an pase, nou Minis ti vin dan nou Lasanble e i ti dir nou egzakteman sa ki li in fer.  E mon ti a kontan ki nou Minis i retournen e i donn nou en review lo, ki in fer avek sa plan ki i ti annan, pou met lanmen lo bann sityasyon imedyat ki annan dan Minister Lasante.

Se pa Leader Lopozisyon ki’n dir nou fer sa.  Se nou Gouvernman, ki ti deside fer li e i ti komans fer li 3an pase.  E en kantite keksoz in ganny fer.  Annou pa fer krwar napa nanryen ki pa’n ganny fer.  Ler mon al dan Lopital, toulezour mon vwar en nouvo Ward, en nouvo Unit ki’n ganny renovate: mon vwar nouvo lekipman.  Minis Lasante bomaten in vini, in dir nou i annan sepa konbyen ners ki’n fer zot BSC: sepa konbyen dokter ki pe spesyalize: sepa konbyen etidyan ki pe antre dan lekol.  Nou koz lo professional development – be sa ki Minis in vin dir bomaten i professional development.

Sa ki mon dakor avek Leader Lopozisyon, se ki nou bezwen renimer tre byen, byen e tre byen nou bann staff Lasante.  Sa mon dakor avek li.  E nou demann Minister Lasante pou fer sa dan en fason byen, dan en fason profesyonnel, dan en fason sistematik.  I pa sifi ki nou donn en dimoun en degre e nou ekspekte li satisfe avek en degre.  Sa dimoun ler i ganny sa degre, i bezwen ganny sa reminerasyon, sa rekonpans neseser ki al avek sa degre.  Sa mon dakor avek.

Me annou pa bliye osi ki Minis Lasante bomaten in dir nou, i kout R1.8 milyon a R3 milyon pou train en ADokter ozordi. Annou pa bliy the other side.  Nou dakor e mwan, mon enn bann dimoun ki sak fwa mon al Lopital, bann ners i koz mwan, bann dokter i koz ek mwan.  Nou bezwen revwar kondisyon travay bann profesyonnel lasante.  But this is being done. E nou parti, nou Gouvernman, dan Lasanble nou pou kontinyen met presyon lo Minister Lasante pou fer li, pou kontinyen fer li e pou fer li pli byen ki i pe fer ozordi.

Me sa pa sa ki sa Mosyon pe demande.  Sa Mosyon pa pe demann sa li.  Sa Mosyon pe demann nou pou asize e sisit en deba, on the long term plan ki Minister Lasante, ler li i pe rezourd bann problenm ki merit ganny rezourd ozordi, an menm tan ki nou pa bliye ki en kantite keksoz pe ganny fer dan Minister Lasante, annou pran letan pou regarde ki nou kapab fer a lavenir.

Semenn pase Mr Deputy, in annan en gran kolok lo en Millennium Development Goal, ki nou pa ankor kapab akonpli.  Personn pa’n dir nou’n akonpli.  Nou pe dir nou pa ankor kapab akonpli.  Me nou’n asize e nou pe regard plan lonterm ki mannyer nou kapab fer fas avek lepidemi Sida, Hepatitis C ek lezot maladi kontazyez.

E nou Lasanble, nou devwar isi dan sa Lasanble, se pa zis konplent, se pa zis rod defayans, me nou deba dan sa Lasanble se sisit en deba lo lavenir nou pei lo ki nou:-e mon kontan ki sa Mosyon in sorti dan en kongre nou parti.  Nou parti nou pa la, nou en parti ki’n o pouvwar: nou en parti ki o pouvwar, nou pa la zis pou al fer kankan politik.  Nou la pou asize e rod solisyon lonterm, a bann bezwen reel ki nou pep i met devan nou.  Sa i legzistans Parti Lepep Mr Deputy.  Sa i travay ki nou’n ganny mandate, ki nou’n ganny elekte pou fer dan sa Lasanble e ki nou Gouvernman in ganny elekte pou fer e ki nou pou kontinyen fer.  Lefe ki nou pe koz lo long term plan, i vedir ki nou parti, we are here to stay Mr Deputy.  E sa i enportan pour lepep note.

Mon’n bezwen remet sa deba an perspektiv, akoz we should never lose sight of the bigger picture. Politisyen should never lose sight of the bigger picture.  Politisyen pa kapab vwar la, i pa kapab vwar zis kot son bout nennen i fini: oubyen i pa kapab vwar zis ozordi.  En politisyen ki regard zis ozordi, i pou mor demen.  I pa pou survive e i pa pou kapab reponn lapel nou pep a lavenir.

E Parti Lepep pa pe zis get ozordi.  Nou’n regard yer, nou pe regard ozordi.  E sa plan ki Leader Lopozisyon in vin avek, i nou plan, i plan ki nou Minis in vin dan nou Lasanble 3an pase ti met devan nou: i plan ki pe ganny enplimante.  Wi, i annan defayans, mon pa poudir napa.  I plan ki pe ganny enplimante e sa Mosyon pou azout avek sa plan, for the future of Seychelles, the future that we want Mr Deputy.

Mersi.

MR DEPUTY SPEAKER

Right of Reply Onorab Souris.

HON MIRENA SOURIS

Mersi Mr Deputy.

Mr Deputy, mon pou remersye tou bann entervenan e osi mon ti a kontan klarifye en pti keksoz avek Onorab Pierre: kot i dir nou sistenm Lasante i mank aksesibilite.  Zis pou rapel li ki an 1978, nou dirizan ti siny sa deklarasyon ALMARTA, kot ti pe demande ki Lasante i vin pli pre avek nou bann pep.  E de la an 1980 ki Minister Lasante ti komans ouver bann Sant: ki vedir depi 1980 nou, Gouvernman SPUP, Parti Lepep, nou pe deza:-nou ti’n deza komans desantralizasyon depi 1980, odela ozordi.  Apard sa, mon pou osi dir poudir nou Lasante i nou responsabilite.  Minister Lasante i pou kapab fer tou, me a lafen dizour i reste lo sak endividi pou pran nou responsabilite.  Me osi nou pou demann Minister Lasante pou met plis lanfaz lo prevansyon akoz sa i lakle.  Apre sa de pti mo Mr Deputy, mon pou remersi e mon pou swete ki tou bann dimoun i vot an faver sa Mosyon.

Mersi.

MR DEPUTY SPEAKER

Bon, lo sa Mosyon nou pran en vot.  Tou Manm ki an faver lev lanmen?  Okenn Manm ki kont?  Mosyon in ganny aprouve par en gran mazorite.

E avek sa nou pou adjourn e Lasanble pou rezwenn Mardi le 27 Oktob.

(Adjournment)