::
Home » Verbatim » Verbatim - Third Term 2015 » tuesday-27th-october-2015

tuesday-27th-october-2015

NATIONAL ASSEMBLY OF SEYCHELLES

Tuesday 27th October, 2015

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon, tou bann ki pe ekout nou.

Ozordi lo nou Order Paper, nou annan nou 2 travay prensipal e sa se en Bill, The Public Assembly Bill e apre en Mosyon.  Me avan ki nou pran sa Public Assembly Bill, nou annan nou 3 First Readings pou nou fer.

So, mon a demann Clerk pou fer sa 3 First Readings.

MADAME CLERK

This Act may be cited as the Environment Protection (Amendment) Act, 2015.

This Act may be cited as the Coco-de-mer Management (Amendment) Bill, 2015.

This Act may be cited as the Conservation and Climate Adaptation Trust of Seychelles Act, 2015.

MR SPEAKER

Ok, mersi.

Bon nou a ganny en Motion for Second Reading.

HON MARIE-ANTOINETTE ROSE

Mr Speaker, bonzour.

Mon move ki nou lir sa Bill en Dezyenm Fwa.

MR SPEAKER

Okenn ki segonde?

HON CHARLES DE COMMARMOND

Mr Speaker, mon segonn sa Mosyon.

MR SPEAKER

Ok, mersi.

Bon mon ava envit Minis pou entrodwir son Mosyon.

MINISTER CHARLES BASTIENNE

Mr Speaker e tou Manm Onorab, bonzour.

Public Assembly Bill, 2015 i en Prozedlwa ki swiv rekomandasyon Komisyon Eleksyon.  Sa Prozedlwa ki mon pe prezante ozordi, pou alor ranplas Public Order Act ki date 2013.  I fer provizyon pou annan kontrol lo bann rasanbleman e lamars piblik e osi pou prezerv e mentenir lord piblik.  I osi deklar serten landrwa koman landrwa kot napa drwa fer bann rasanbleman piblik.  I osi fer provizyon pou annan serten landrwa dezinyen.  Sa ki nou apel designated areas.  I osi anpes serten konportman ki kapab ofans lezot e an rezilta, vyol lape en rasanbleman e lamars piblik.  E finalman, i osi anpes tou konportman ki kapab anmenn dezord pandan en rasanbleman oubyen lamars piblik.

Definisyon en rasanbleman piblik e en lamars piblik i comme swivan:

En rasanbleman i letan 10 dimoun oubyen plis i ralye dan en landrwa piblik, eksepte si zot pe groupe pour rezon biznes oubyen relizye e osi pour en aktivite prive e lwazir.

En lamars piblik osi i kot 10 dimoun oubyen plis i groupe, swa par marse oubyen dan transpor.

Sa Public Assembly Bill, 2015 ki mon pe propoze, i donn lotorizasyon Komisyoner Lapolis pou aret en rasanbleman piblik oubyen lamars piblik dan lentere ladefans, sekirite, lord e osi dan lentere moralite e lasante piblik.

En dimoun ki annan lentansyon pou fer oubyen organiz en rasanbleman ouswa lamars piblik, pou bezwen anvoy en notis an ekrir kot Komisyoner Lapolis.  Fodre ki sa notice i ganny anvoye pa mwens ki 5 zour travay, avan dat sa rasanbleman oubyen lamars pou ganny fer.  Komisyoner Lapolis pou answit enform sa endividi konmkwa in resevwar sa notice.  Sa endividi i bezwen sa acknowledgement sorti kot Komisyoner Lapolis, avan ki i komans fer okenn piblisite pour sa rasanbleman oubyen lamars piblik ki i anvizaze fer.  E anliny avek Seksyon 4, Komisyoner i kapab enpoz restriksyon e kondisyon vizavi sa demann, baze lo si sa rasanbleman oubyen sa lamars i dan lentere ladefans, sekirite e lord piblik, moralite e osi lasante piblik.  I bezwen osi pran an kont landrwa, ler e larout kot sa rasanbleman e lamars pou ganny fer.

Enn bann rezon kot Komisyoner Lapolis i bezwen met kondisyon lo en rasanbleman piblik i si i annan plis ki en rasanbleman ki pe ganny fer dan menm landrwa an menm tan.  E si i neseser, Komisyoner i kapab met kondisyon lo sa enn ki’n donn notice, apre sa premye notis.  Sa endividi i kapab fer rapel avek Sef Ziz si i pa satisfe avek kondisyon e restriksyon ki Komisyoner in enpoz lo li.

Seksyon 5 i klerman note ki en rasanbleman oubyen en lamars piblik pa kapab ganny fer dan en landrwa ki anba en Ladministrasyon, oubyen en landrwa ki pe ganny kontrole par en dimoun oubyen en Lotorite, san en permisyon an ekrir par sa dimoun oubyen sa Lotorite.  Sepandan, i pa neseser pou annan en tel lotorizasyon, si sa rasanbleman oubyen lamars pou ganny fer dan en landrwa ki’n ganny dezinyen.  Setadir, en designated area.

Seksyon 6 i donn Komisyoner Lapolis pouvwar pou aret en rasanbleman oubyen lamars piblik atraver en lord.  I kapab fer sa si sa rasanbleman oubyen lamars pe met an koz ladefans, sekirite ek lord piblik e osi moralite e lasante piblik.  Komisyoner i osi kapab aret en rasanbleman oubyen lamars piblik, si bann kondisyon ek restriksyon ki’n ganny enpoze pa ganny obzerve.

Seksyon 7 i koz lo konsekans en rasanbleman piblik san en lotorizasyon.

Seksyon 9 sa Lalwa i fer referans avek bann landrwa kot dimoun napa drwa fer okenn rasanbleman piblik oubyen lamars piblik.  Sa i konpli kot bann baz ek lenstalasyon militer, kot Stasyon Lapolis e osi State House.

Seksyon 11, 12, 13 i tous bann lofans si zanmen en dimoun i mal konport li kot en rasanbleman oubyen lamars piblik.  Sa ki pa respekte sa Lalwa pou pey en lanmann pa plis ki R25 mil, oubyen fer fas avek en santans prizon ki pa plis ki 2an.

Parey mon’n dir pli boner, sa Prozedlwa ki devan nou ozordi i fer provizyon pou prezerv lape e mentenir lord ek lape dan nou pei Sesel.  Alor, mon demann Manm Lasanble pou vot an faver sa Prozedlwa.

Mersi Mr Speaker.

MR SPEAKER

Bon, okenn ki oule entervenir?  Onorab De Commarmond.

HON CHARLES DE COMMARMOND

Mersi Mr Speaker.

Mr Speaker, sa Prozedlwa ki devan nou, mwan mon welcome li.  Mon kontan sa Prozedlwa.  Ler avan ti pas sa Prozedlwa Public Order Act ensidswit la, mwan mon ti pros pou mor lo lili Lopital dan Lenn.  Mon ti’n vreman konmsi, letan mon tande zot pe al pas sa, mon dir zot, mon ti a voudre mon ti la.  Me mon pa’n la.  La mon la e mon kontan zot pe revwar sa.

I byen, ou konnen dan nou pei Mr Speaker, i enportan nou fer resorti en pe keksoz.  Nou, nou sorti lwen nou e nou dimoun ozordi, sirtou nou zenn, sirtou bann ki ankor en pe pli zenn.  Fodre nou konpran, keksoz i pa ti koumsa parey la nou vwar.  Parey lontan menm, ti napa drwa pour rasanbleman parey nou pe sey rode.  Savedir, nou liberte lontan la, i ti restrikte.  Sanmenm sa ki ou vwar in annan emansipasyon, bann Parti Politik ki’n formen.  SPUP, Demokratik, pe rod plis Drwa, plis liberte pour bann pep, pour bann dimoun dan Sesel.

Sa in ale.  Me nou, nou fer en gran parkour.  Ozordi nou bokou lib, bokou, en kantite.  Nou liberte in ariv lwen konmsi.  Tre devlope, nou demokrasi in devlope.  En letan menm nou’n pas atraver One Party State.  Zot dir dan letan One Party State demokrasi i ganny toufe en pe.

Nou’n sorti dan tousala.  E prezan, la ozordi ki nou pe pas sa Prozedlwa, nou pe ganny ankor Mr Speaker, plis liberte.  Nou pe vin pli lib ankor.  Mon kontan sa Prozedlwa ki mannyer i ete akoz sa semenn la, semenn ki’n pase, mon’n tande bann dimoun pe pase dan pick up Anvil, pe kriye.  Gard pa’n ni arete.  Fantastik mon dir.  Dimoun pe vin pli lib.  Bann Parti Politik, ou bezwen les zot eksprim zot.

E sa Lalwa ki nou pe fer, i pa zis pou Parti Politik Mr Speaker.  Sa Lalwa ki nou pe fer i pou nenport group, nenport Sekter, Seksyon nou popilasyon.  Demen i anvi emansip li dan en serten keksoz, i anvi pous en lide devan.  I anvi mon montre li kont serten keksoz.  I kapab fer li, i pa bezwen esper 50an pou li fer.  I pa bezwen esper en ta letan.  I annan prosedir ki nou pe etablir la, ki fer li vin fasil.

Sa ki nou pe fer.  Sa Lalwa mon kontan li, i dir Public Assembly Bill.  Konmsi rasanbleman piblik, ki pa difisil pou fer.  Pa kapab nou Cascade nou anvi fer en piknik ek nou bann dimoun, ou bezwen al demann 50 permisyon avan ou fer piknik.  Fodre sa Lalwa la, i pa anpes nou, mwan pran en group zenn, en group dimoun Cascade al fer en piknik.  Sa mon pa oule.  Ki mannyer i ete la mon krwar nou devret fer amannman akoz mon krwar i annan landrwa ladan ki pou anpes mwan fer piknik si mon annan plis ki 10 dimoun.  Sorry Minister, mon vwar sa.

Pa kapab Mr Speaker, letan ou pe donn mwan sans pou mwan egzers nou liberte, ou pe dir mwan konte konbyen dimoun pou vini.  Mon pa konnen konbyen dimoun pou vini.  Lo sa notice la, dan schedule. Nimero 11 in mete nou bezwen dir davans number of attendees.  Mon pa konnen konbyen pou vini mwan.  Mwan mon pran en pick up Lari Bazar, mon vire.  I kapab mon’n fou, mwan mon tousel, mon kriye.  Mon kriy sa ki mon anvi kriye.  Ok.  Personn pa vini pou vin ekout mwan.  I ok.  En ta dimoun i vin ekout mwan, i ok.  Dimoun i debout i get mwan, i ok. Mon lib, mon pe dir sa ki mon anvi, mon fer sa ki mon anvi.

Me e prezan mon pa kapab dir ek Gard, ek Komisyoner, pou annan 50 dimoun.  Mon pa konnen konbyen dimoun pou annan.  Savedir sa bout la mon krwar nou devret revwar.  Pa bezwen ki nou dir davans konbyen dimoun pou vini.  Si ler mon pou fer en rally, en lamars oubyen en rasanbleman piblik.

Apre lot keksoz.  I dir name of speakers.  Ankor dan notice la, dan Schedule, pou dir lekel ki pou koze.  Be pa konnen lekel ki pou koze.  I riske napa personn pou koze, zis mon tousel.  I riske en ta dimoun i vin koze apre.  Nou pa konnen, so sa osi mon krwar nou pa kapab dir, dir davans.  Sa boug ki ti pou koze, li apre in malad zour pou koze, ler pou koze, i pa kapab koze, in fini ganase, in fini pa kapab koze.  So, en lot dimoun koz dan son plas.  Sa bann keksoz nou bezwen fleksib.  Mon krwar nou devret fer en pti pe amannman dan sa Lalwa pou konmsi fer ki i annan sa fleksibilite.

Me selman parey mon pe dir, sa Lalwa mon kontan, i dir dan regilasyon, Minis pou kapab fer regilasyon e sa mon krwar nou pa devret tarde avek.  Fer parey Lanmerik in fer, Langleter.  En corner kot en boug i kapab vini.  Pa bezwen okenn permisyon Lapolis li.  I deside ozordi.  Akoz en boug letan i fou, i pa dir i pou fou.  I fou la.  I desann la, i al dan son corner laba, i al dir sa ki i anvi dir, i kriy sa ki i anvi kriye.  Sa ki nou pe dir, sa Lalwa osi pe anmennen sa.  Ou pa kapab vin fou partou.  Ou pou deranz dimoun.  Sa nou dir i bezwen annan en lord.  Ou konpran.  Sa Lalwa i pe vini byen li.  Me selman i dir, ou konnen mon’n ganny konplent mwan semenn pase.  Detrwa dimoun pe dir, be la nou pa kapab travay, tro bokou nespes tapaz dan semen.  Ler pick up ti pe pase pe kriye.  Trafik i annan en landrwa i dir, lala pe blok trafik.  Sa bann keksoz nou bezwen fer atansyon.  Toultan ki nou pe les lib, les fer mannyer nou anvi, korek?  Me selman nou bezwen mazin lezot dimoun.  I dan lazournen, bann biro i ouver, so nou bezwen fer sir ki letan nou pe fer sa, nou pa blok trafik.  Nou pa deranz lezot dimoun ki pe travay, ki serye.  Nou pa impitch public safety. Nou pa andomaz lasante piblik bann dimoun.

Konmsi nou bezwen veye, i annan serten keksoz e sa mon konnen.  Sa Lalwa, i dan Seksyon 6 la i dir, kot Komisyoner i santi i rezonnab, i bezwen anpes sa bann keksoz pour ladefans sekirite piblik, public order, public morality. En boug pa kapab vini, li touni, i vin la dan sa landrwa ouswa i pran Lari Bazar dan en pick up.  Sai mal e sa ou bezwen anpes li.  Ou konpran.  Sa mon kontan i vin ladan.  In dir la, sa Komisyoner i bezwen fer Gard tyonbo li.  La i annan en problenm.  Sansan si ou pa mete, en boug pou fer.  Sesel sa.  Letan ou donn en lanmen, i pran lebra antye.

So, sa ki mon kontan sa Bill pe fer selman, i pe fer li pli fasil pou tou group, tou lobby group.  Dan lanvironnman.  Lanvironnman nou annan pa mal e Sesel i en sanpyon dan lanvironnman.  So, i byen ki nou annan sa, pour ki si i annan en problenm demen par whatever ki kree sa problenm, sa bann diferan lobby group pour lanvironnman i kapab vin devan, vin fer son pli.  Vin kriye, vin organiz son lamars, fer son bann demonstrasyon ki i anvi fer kont sa keksoz.  Dan en fason pozitiv.  E mon kontan mwan ki sa pe ganny fer.  Parey mon dir, an menm tan, fodre pa ki i anpes nou bann dimoun Cascade ki napa en landrwa pou zwe domino, zwe domino kot bazar.  Sansan si nou pa fer atansyon, si nou pa sanz sa bout ki dir 10 dimoun ou plis e  ki kalite aktivite ki pe fer, sansan Gard pou kapab vini fasilman tanto.  Ler nou fini pas sa Bill, i vini i dir, lala i annan plis ki 10 dimoun kot bazar pe zwe domino, fermen.  Akoz kot bazar landrwa piblik, i annan plis ki 10 dimoun, nou pa’n demann permisyon Lapolis.  Mon pa oule ki sa Lalwa i al afekte sa.  Nou pa bezwen al demann permisyon Lapolis pou nou zwe domino kot bazar, kan nou pe zwe li trankil.

Ler nou komans fer dezord, la wi.  La Gard pa kapab les nou fer dezord.  Gard i bezwen antre la.  La nou pe zwe ek lape piblik, la bann manrmay kot bazar i bezwen pa zoure.  Pa fer ensinifyan ki pa fodre fer.  I pa kapab desarz li lanmenm la.  Ou konpran.  I annan bann keksoz ki pa permet fer an piblik.

E la mon demande ki Lapolis i vin vizilan lo la.  Vizilan dan le sans, pa pou zis tyonbo dimoun, fer whatever ek dimoun.  Pou gid dimoun, edik dimoun.  Dir li sa ou pa fer.  Pa koumsa ki fer la.  Ler pe fer rasanbleman, nou bezwen fer konpran poudir i annan en limit keksoz ki ou kapab fer osi.  Ou pa kapab fer rasanbleman e ou pe zis vini zour dimoun.  Maltret dimoun pli ba ki later.  It’s not done.  Nou fer li dan en fason sivilize.  Sa ki nou bezwen, o fiy e anmezir edik nou pep.

E mwan mon lans en lapel avek tou lobby groups, tou Parti Politik, pou ki letan nou pe ganny sa liberte, en liberte ki dan lezot pei, kantite lezot pei napa.  Tre pe pei ki annan sa bann zafer la.  Nou’n ariv en gran sa.  En pti pei parey nou, nou’n ariv lwen dan nou demokrasi.  Nou’n ariv lwen dan laliberte, devlopman laliberte.  So, annou apresye sa.  Annou apresye, annou servi li byen.  Annou konmsi, fer keksoz avek responsabilite.

Nou bann Leaders.  Bann Leaders i bezwen konmsi gid lezot.  Dir gete, nou pe fer li, annou fer li byen.  Servi sa bann moman pou nou edik nou dimoun, pou nou pas nou mesaz korekteman.  Fer krwar ou en Parti Politik.  Be vin dir ou bann dimoun ki ou Parti pe fer, ki son progranm.  Eksplik li.  Ou pa zis vini pou ou fer en zafer e ou maltret dimoun.  Sa i pa pou byen.  Ou konpran.  La savedir, si ou fer tapaz an plis, pa sa Lalwa ki pou deal ek ou.  Be Lalwa Tapaz.  I annan en Lalwa ki dir i annan en serten kantite tapaz e en serten ler ki ou fer tapaz.  Sa Lalwa i bezwen antre an fors.  I bezwen vin aplike.  Public Safety, sa Lalwa i bezwen antre.  Ou konpran.  Sa bann lezot bout Lalwa, li i ava antre a son moman apropriye.

Savedir nou tou la, mon krwar nou devret vreman welcome sa Prozedlwa avek bann amannman ki ava vini parey mon pe dir, ki a permet, permet dimoun pou viv li lib.  Parey mon pe dir, nou deside pou organiz:- Ozordi lanniverser Onorab Charles, nou oule fer:- nou bann Manm Lasanble la, nou annan plis ki 10 nou.  Nou deside, nou envit Onorab Pierre tou i vini, nou pe al lo lans, nou pa bezwen al konmsi vreman ekrir Speaker.  Lala.  Be nou fek deside la.  Nou fek deside, ou konpran.  Nou ale enjoy trankilman, nou pa ni fer tapaz, ni fer okenn dezord.  Be so be it.  Ou konpran Mr Speaker.

Sa ki mon pe sey dir konmsi ki sa Lalwa osi, ler i pe fer la, i pa anpes nou.  Nou group larelizyon Cascade la, nou oule al fer en keksoz, en pti pe sa, sorti kot legliz pou al kot bazar pou nou al beni bato.  Nou pa’n dir Lapolis nanryen.  Nou deside ozordi beni nou bann bato Cascade.  Be i annan plis ki 10 dimoun.  Nou fer nou pti laprosesyon.  Si ou pa fer atansyon, ou pou vin aret nou.  Gard pou vin aret nou.  E la met mwan ek Per tou anndan dan kaso.  Nou pa pou kontan sa i arive.

So, nou pe dir ki vin pli lenient lo la.  Konpran li byen, me selman dan lespri ki Gouvernman pe vin avek sa.  Fantastik lespri.  I byen.  I konmsi i pe permet rasanbleman.  E sa nou merite.  I bon nou pti pei pe avans dan sa bann direksyon.  E sa, ki nou tou nou pa ava konplent.  Nou pa devret les bann group, konmsi touf bann group.  Nou les li breathe. Les lib.  Me selman fer keksoz byen akoz si nou fer keksoz byen la, i vin en ledikasyon pour nou pep.  En ledikasyon pour nou piblik.  E nou ava avanse koumsa.  E lezot pei a pran legzanp lo nou.  Deza zot pe pran legzanp lo nou dan en kantite fason.  I a vin en lot area kot lezot pei dan larezyon, lezot pei dan lemonn i a dir sa pti Sesel la, i ape shine.  I ape al lwen e legzanp lo li, nou bezwen kontinyen servi.  Parey la West Africa, i pe pran legzanp lo nou lafason ki nou kontrol nou piratri.  Ki nou kontrol nou sekirite dan larezyon.  Sanpyon.  E sa tousala in ganny fer anba gidans Prezidan Michel, anba gidans Parti Lepep.  E nou pou kontinyen anmenn plis sanzman ankor dan nou pei, pou fer nou dimoun epanouir ankor davantaz.  Sa lespri Parti Lepep, sa lespri nou Prezidan, sa lespri nou Lasanble ozordi.

Mr Speaker, mon a remersye ou e mon a demann tou dimoun pou siport sa Prozedlwa.  Mon konnen i annan sa bann amannman ki pe vini dan direksyon ki mon’n koze e nou ava siport osi sa bann amannman e mon swete Minis i a konpran dan lespri, ki mon pe dir sa bann keksoz i kapab sanze, i kapab amande, pour ki nou pa met ankor:- nou pe large, ou pa kapab anmare an menm tan.

Mersi bokou Mr Speaker.

MR SPEAKER

Bon, Madanm Charles, ou ganny lanniverser ozordi, non?  Non.  Mon ti pe al swet ou Bonn Anniverser.

Onorab Pillay.

HON SEBASTIEN PILLAY

Mersi Mr Speaker.

Mr Speaker, toultan ler nou annan nou en morso Lalwa ki konekte tre pros avek sa bann prensip ki’n ganny espas dan nou Konstitisyon nou toultan anmenn avek li en kantite deba, en kantite diskisyon lo lafason ki sa Lalwa i ganny enterprete, lo lafason ki sa Lalwa i ganny enplimante.

A labaz en keksoz pli fondamantal ki egziste se Konstitisyon i donn nou serten Drwa, me i osi antas avek sa bann Drwa serten responsabilite enportan, an relasyon avek sa Drwa ki mwan mon annan e sa Drwa ki en lot dimoun i annan.

Mr Speaker, mon krwar ki a priori, en deba lo sa Prozedlwa ki devan nou ozordi i pa devret en deba ki relye zis from en konzonktir politik, me i osi derelye from en konzonktir sivik, kot nou pe koz lo a sa baz prezervasyon lord ek lape dan nou pei.  En pei ki ti pti.  En pei kot sak aktivite, sak sekous i pou annan en lenpak pli enportan, pli prononse ki si sa ti pe arive dan en pei kot i annan bokou plis dimoun.

Mr Speaker, devan nou, nou annan en Prozedlwa ki esansyelman pe repeal Lalwa ki ti ganny pase oparavan e pe entrodwir serten provizyon baze lo bann rekomandasyon ki’n ganny fer.  E mon krwar se sa ki premye leson ki nou bezwen tire dan tousala.  Sa leson i se ki si ti nou, nou ti napa en demokrasi ki vibran, en demokrasi ki marse, nou pati pou ariv lo en letap la kot nou ti pe entrodwir en nouvo Lalwa.  E se sa Lasanble ki la ki pe koriz oubyen pe remedye, oubyen pe met an pratik sa bann rekomandasyon ki’n ganny fer an relasyon avek sa Lalwa, tout an pre-nan an kont bann prensip e bann laspe enportan nou Konstitisyon.

Mr Speaker, Lalwa devan nou ozordi, i fer provizyon pou serten eksklizyon an relasyon avek sa ki nou apel en Public Assembly.  E se pour sa rezon ki ler mon’n komans mon lentervansyon, mon’n koz lo sa delinyasyon ki nou bezwen fer an tret sa Lalwa comme zis en Lalwa ki relye avek en konzonktir politik.  Akoz mon krwar bokou in fer sa e se sa ki pe fer zot par egzanp anmenn serten largiman ki at the end of the day si ou analize, ou pou vwar ki serten aksyon ki menm ozordi serten dimoun pe pran, i kont sa bann Lalwa.  I kont lord ek lape e i pa al dan sa spirit, sa mo ki Onorab De Commarmond in servi dan son lentervansyon.  Sa spirit kot nou fer keksoz dan en fason sivilize.  Dan en fason konpran.

Mr Speaker, si ou pran par egzanp, demen mon deside pou mwan pran en transpor al Anvil.  O plen bout tou trafik ki pe pase e komans fer tapaz e komans blok trafik.  Sa i koz en nwizans piblik.  I pa vedir akoz Konstitisyon i donn mwan sa Drwa pou fer sa, ki mon bezwen fer sa.  I bezwen annan en fason pou poli sa, pou asire ki mwan, ler mon pe egzers mon Drwa, mon pa pe osi afekte Drwa en lot dimoun.  Par egzanp en marsan ki annan son aktivite komers la, oubyen en lot dimoun ki annan son taxi oubyen en lot dimoun ki pe pase, ki annan drwa pase lo semen piblik.  Mon pe bar li.  Ou konpran e tousala i bezwen ganny pran an konsiderasyon e dimoun e lepep Seselwa i bezwen ganny edike pou zot konpran poudir ler nou pe koz lo en Lalwa ki annan pou fer avek lord ek lape i pa zis involve en konzonktir politik e rasanbleman politik.  I involve tou keksoz.

E san ki mon preamp debate Mr Speaker, vi ki mon lo sa pwen ki sa ki constitute en Public Assembly.  Mon byen apresye ki mon vwar poudir nou pe fer en serten delinyason ant bann aktivite, par egzanp, rekreasyonnel ek lwazir, ki Seselwa ozordi in vin parti nou kiltir e sa i fer sa Lalwa vin pli kontekstyel avek sa ki pe pase dan nou pei.  I pli konekte avek sa kiltir ki nou, nou annan.  Par egzanp, ozordi nou vwar bokou dimoun i deside pou al selebre zot Premyer Konminyon lo lans.

Ou vwar Mr Speaker, ki mwan mon pa pe koz lo en rasanbleman politik.  Mon pe koz dan en rasanbleman normal.  Ou konpran.  E sa i fer ki nou bezwen pare pou nou koz lo sa bann laspe lord ek lape e non pa vin bann ipokrit pou nou fokaliz zis lo en pwen politik, parey serten dimoun i fer e apre atake pou dir nou pas bann Lalwa ki pa annord avek Konstitisyon.

Mr Speaker, en lot pwen enportan dan sa Lalwa se ki i pe fer ki repons ki Komisyoner i bezwen donn sa dimoun ki pe fer son aktivite i vin li vit.  E sa i enportan akoz si par egzanp mon pe fer mwan en manifestasyon, par egzanp an relasyon avek mon pa konnen, Cancer Concern, an relasyon avek en Fitness Extravaganza eksetera.  Mon pe mobiliz en kantite resours pou mwan fer sa aktivite.  E si mon pa pe ganny en repons dan en dele rezonnab, i pou fer ki mon resours ki mon’n mobilize, mon kapab perdi akse ek sa bann resours oubyen si sa aktivite pa materyalize a sa moman ki mon oule li materyalize, mon perdi mon larzan ki mon’n envestir dan mon aktivite eksetera.  So, mon krwar sa osi i enportan pou nou note.

En lot pwen enportan ki mon pe vwar dan sa Lalwa Mr Speaker, se ler nou pe koz lo what is bann eleman fondamantal ki sa Lalwa i sipoze secure vizavi lord ek lape.  Nou pe koz lo securing the safety of persons and property. Savedir si par egzanp ou deside pou fer ou rasanbleman, mon propriyete, mon lakaz, mon loto pa devre irezonnableman ganny afekte oubyen ganny andomaze par lefe ki ou, ou pe egzers ou Drwa pou fer ou rasanbleman.  E sa i lozik sa.

En lot pwen enportan se maintenance of supplies, services essential to the life of the community. Ankor en fwa, nou vwar poudir si nou pe fer okenn konk aktivite ki involve en rasanbleman, sa osi i bezwen ganny mentenir.  E se pour sa rezon ki sa i ranforsi le pwen ki mon oule fer pase ozordi bomaten.  Se ki sa Lalwa i pa pe zis koz from en konzonktir politik, me i pe koz from en konzonktir lord ek lape.  Kwa ki nou devret rezonnableman kapab fer san en pei demokratik, dan en pei sivilize, tout an respektan lord avek lape.

Mr Speaker, mon osi kontan pou vwar ki dan Seksyon 4(5), nou koz lo si en dimoun i aggrieved par en desizyon ki Komisyoner in pran, i kapab appeal 36 erdtan avan dat sa Public Assembly, to the Chief Justice.  Mon krwar la nou’n vwar ariv nou lo en balans kot tou dimoun i a dakor, i vin pli fasil pour sa appeals process pase e sa dimoun i ava ganny en rekour baze lo desizyon ki kapab ganny pran pou sa.

Sa ankor, i en eleman kle ki secure en Drwa ki ou annan pou ou demann en appeal to en body ki’n pran en desizyon vizavi en keksoz ki ou oule fer.  So ankor enn fwa sa i pa zis relye avek en konzonktir politik, me i relye osi avek en konzonktir normal, kot si mon, parey mon’n dir oparavan, mon pe fer en aktivite, mon pa ankor kapab ganny en larepons, oubyen mon pa dakor ek sa larepons.  Mon kapab appeal vizavi sa larepons.  Me sa i pa vedir ki si ou appeal, otomatikman ou aktivite pou pase.  Ou pou bezwen avan tou satisfer sa bann kriter kot i dir poudir ou aktivite pa pe afekte sekirite e safety bann dimoun.  I pa pe afekte maintenance of supplies and services.  I pa pou anmenn vyolans, entimidasyon, dezord e krim.  Ok.

So, tousala nou bezwen fer sir poudir ler nou pe prepar nou pou en aktivite, nou reste dan lord.  Mot du jour se lord dan lafason ki nou devret fer nenport kelkonk aktivite.

Mon osi kontan ki entervenan avan mwan in koz lo serten amannman ki pou ganny fer dan schedule e san ki mon preempt the debate Mr Speaker, avek ou permisyon.  Mon osi mon dakor ki ozordi si nou pran li pirman from en konzonktir politik, i pou annan Parti Politik ki pou fer en rally, ki pou napa dimoun ki pou vini.  Preski ditou dimoun ki pou vini.  Alors i pa pou kapab dir ou konbyen dimoun ki pe vin son rally.  I pa pou konnen.  I kapab annan plis loto ki dimoun tou.  I pa pou konnen li.

So, i rezonnableman ekspekte ki sa dimoun pa pou kapab dir ou konbyen dimoun pou vini akoz si non son laplikasyon pou tonbe akoz  i pa pou kapab dir ou konbyen dimoun ki pe vin son aktivite, ekspekte.  Ok.  Par egzanp mon konpran si Parti Lepep i fer en aktivite, laplenn pou tro plen, i pa pou kapab zanmen dir ou  si i pou ganny li 30 mil dimoun ki pe vini.  Ou konpran, akoz ler ou get en aktivite Parti Lepep, lakantite dimoun ki i annan, ou menm napa landrwa pou mete.  Ou konpran mwan.  Me en lot Parti Politik ki pe fer en aktivite parfwa i fer en aktivite, ou vwar i annan 4, 5, 6 parfwa par la pe kasyet, kasyet dan kwen, ou pa ni konnen si zot, si zot pa la.

So, i enportan ki nou osi parey Onorab De Commarmond in dir, konpran sa lanvi sa bann dimoun pou lans zot dan aktivite politik zot pei.  Zot annan plis ki 18an, Konstitisyon i donn zot sa Drwa pou partisip:- la nou pe fer zot annan sa Drwa pou zot partisipe e nou kree sa lanvironnman pou zot partisipe.  Pour ki demen personn pa dir poudir ti napa lanvironnman pou zot partisipe.

E en lot pwen enportan se eski konsern the names of the speakers, sa osi mon krwar ki san ki mon preempt debate, sa osi mon krwar i en pwen kontansye kot rezonnableman ou pa ekspekte li kapab dir ou.  I kapab en zour, sa zour son speaker i deside pa turn up.  Alors, si i napa dimoun pou koze, i bezwen parfwa ler al pik enn parmi sa 4/5 ki i annan pou vin koze pou li.  So, ou bezwen kree sa lanvironnman, sa lespas pou zot kapab partisipe.  E mon krwar sa Lalwa i fer sa tre byen Mr Speaker.

Pou konklir Mr Speaker, mon krwar ki mon pou termin avek lafason ki mon ti komanse.  E la mon pou urge tou dimoun, tou Seselwa.  Tou Seselwa, whoever you are, wherever you are, kwa ki ou pe fer.  Ler ou deside pou ou fer okenn aktivite rekreasyonnel, be itou rasanble lo lans, be it ou rasanble kot en car parkBe it, ou park en loto detrwa dalon.  Tou sa ki ou fer, ou bezwen fer li dan en fason sivilize, dan en fason rezonnab.  Ou pa kapab ekspekte ou rasanble dan en car park, tou dimoun pe zoure, sa ki pe kraz sopin pou kraz sopin, sa ki pou lager, pou lager.  I pa normal sa.  Ou pa kapab ekspekte ou rasanble dan en landrwa kot par egzanp obor en lekol tou dimoun pe fimen, tou dimoun pe fer bann aktivite ki pa normal.  Akoz ou annan en Lenstitisyon Edikasyonnel ki la obor ou.  Ou pa kapab fer okenn aktivite kot ou pa pran konsiderasyon sa ki pe ganny dir.  Kot ou pe ensit vyolans.

Mon krwar Mr Speaker, sa i bann eleman fondamantal ki nou bezwen konsidere koman en pep ki pe grandir, en pep ki pe devlope, nou bezwen konsidere.  Ki mannyer nou aksyon nou tou i kapab enpakte lo lezot.  E mon ti a kontan ki medya ozordi i pran sa pwen tre for.  Akoz ler nou pe antre dan en konzonktir parey nou pe antre ladan ozordi, nou pe apros en Eleksyon evidaman, nou tou nou annan en keksoz pou dir.  Me nou tou nou devret pe servi meyer fason pou dir sa bann keksoz ki nou annan pou dir.  Nou devret servi meyer fason pou fer pase nou mesaz.

E mon ti a kontan osi an terminan Mr Speaker, koz lo en pwen ki mon krwar ki eventually Lotorite pou bezwen konsidere ki mannyer nou edik dimoun.  Nou pa kapab anpes dimoun fer li, me nou bezwen edik dimoun.  E sa se medya sosyal Mr Speaker.  Ozordi nou’n ariv en letap kot nou krwar poudir i en free for all.  Kot nou pa kapab dir en dimoun an fas, nou al dan medya sosyal nou dir nenport kwa.  Nou lans nenport latak.  Sa i ok dan pei ki annan li 36 milyon dimoun akoz sa zafer i dilute sa, dan 36 milyon dimoun.  I ok dan en pei ki annan menm 1 milyon dimoun akoz i dilute.  Me dan en pei ki annan zis 80 mil dimoun e laplipar, en bon pe sa bann dimoun, tou dimoun ki kapab al lo Facebook oubyen ki kapab ganny akse avek medya sosyal, i ganny akse avek, i pa normal pou nou krwar poudir tou keksoz ki nou anvi dir, nou kapab dir.  E nou devret rezonnab ladan akoz nou zanfan pe gete.  Nou zenn ki pe grandir pe gete.  Malgre ki ou krwar ozordi sa bann keksoz ki ou pe fer pa pou afekte ou, demen i pou afekte ou zanfan.  E se la kot ou pou realiz lenpak ou aksyon.

So, nou rol nou tou ozordi koman Seselwa se kontinyen mentenir stabilite dan nou pei, kontinyen mentenir lord ek lape dan nou pei.  Se sa ki nou’n fer pandan tou sa bann lannen ki’n pase e se sa ki nou devret pe fer, going forward.

Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.

Bonzour Minis ek ou delegasyon.  Bonzour tou Manm koleg Onorab e tou bann ki a lekout.

Mr Speaker, ozordi mon kontan.  Mon kontan akoz letan mon get sa Bill ki la devan nou, premye keksoz ki ganny ekrir lo la se ki This Bill seeks to repeal and replace the Public Order Act of 2013.

Mr Speaker, mon oule fer en keksoz kler e mon oule met en keksoz lo rikord.  Ler sa Bill ti pase, ti ganny diskite dan Lasanble Nasyonal, the Public Order Act, 2013 mon pe koz lo la.  Ti ganny diskite dan Lasanble Nasyonal.  Mon ti fer li mon devwar pou mwan vot kont sa Bill.  Mon ti fer kler e mon pou repete.  E rezon akoz mon pe dir sa, i akoz ti annan serten Leader Parti Politik ki an deor Lasanble Nasyonal, ki ti vwar li neseser pou ekrir en lartik e demande ki mon demisyon-nen koman Leader Lopozisyon, akoz mon ti vot pour en Bill ki ti anti-Konstitisyonnel.  Se pour sa rezon ki mon oule met lo rikord ozordi, ki mon ti fer kler dan Lasanble Nasyonal e mon ti dir sa pou termin mon lentervansyon ler sa Bill ti ganny debated. Mon ti dir ki apre ki mon ti’n donn mon bann rezon, mon dernyen fraz ti sa:-

‘Sa Bill i bezwen pli an akordans ek en sosyete demokratik e se pour sa rezon Mr Speaker, ki I’m going to say no to the Bill.’

So, mon oule met lo rikord ki bann deklarasyon ki ti ganny fer dan papye Vizyon ti bann deklarasyon ki ti fo.  Mon pa ti vot pour sa Bill.  Rikord Lasanble Nasyonal i demontre ki non, mon pa ti vot pour sa Bill e sa bann deklarasyon i fo.  Mon krwar sa i bezwen ganny met lo rikord.

Ozordi Mr Speaker, letan mon get sa Bill ki devan nou prezan, mon dir ki i en viktwar pour la demokrasi.  I en viktwar pour laliberte e i en viktwar pou bann Drwa Konstitisyonnel lepep Seselwa.  Sa osi mon oule met lo rikord.

Mr Speaker, the juste of en Bill parey, i se ki nou devret fer li fasil pour en group dimoun oubyen en Parti Politik, oubyen en Lasosyasyon, eksetera.  Nou bezwen fer li fasil pou zot kapab rasanble dan lord ek lape, si zot anvi fer en rasanbleman oubyen si zot anvi fer en prosesyon.  E mwan mon santi poudir sa enn Bill, kontrerman avek sa enn avan, i fer li vin en prosesis ki fasil pou nou fer en rasanbleman.  Se pour sa rezon ki mon apresye sa enn bokou plis ki sa enn avan.

Mr Speaker, Seksyon 3(1), kontrerman avek avan, i fer kler poudir si ou anvi fer en rasanbleman, dizon PDM i anvi fer en rasanbleman, nou zis donn en notice. E letan nou donn en notice, 3(2) i fer kler poudir Komisyoner i bezwen imedyatman acknowledge sa notice ki nou, nou’n donnen.

Seksyon 4 (1, 2, 3), i dir nou poudir Komisyoner i kapab enpoz kondisyon.  Ki sa i normal.  Me Komisyoner pa kapab, i napa sa pouvwar pou li zis vini enpoz bann kondisyon, enkli bann kondisyon ki pa fer en sans.  I bezwen enpoz bann kondisyon ki pou fer sir ki i mentenir, i kapab mentenir lord ek lape.  Si Lafors Lapolis napa kapasite pou li mentenir lord ek lape, sa pa devret ganny gete koman en pinisyon pour sa bann dimoun ki anvi fer sa prosesyon and therefore ou dir li pa fer.  It is entirely up to the Commissioner avek son Lafors, pou fer sir ki i annan resours pou li kapab mentenir lord ek lape e donn bann kondisyon ki rezonnab.

Now, sa ki pli enteresan ek sa enn ankor, i se ki prezan si sa Parti Politik oubyen sa group ki anvi fer en rasanbleman pa dakor avek bann kondisyon oubyen en desizyon ki Komisyoner Lapolis in pran, then i senp.  Seksyon 4.5 i fer sir e i dir poudir zot kapab appeal avek Lakour Siprenm.  E i dir klerman poudir Sef Ziz i bezwen pran sa koman en priyorite.  Sef Ziz savedir i bezwen fer sir ki i donn en desizyon an relasyon avek sa sityasyon, ki pou garanti ki sa bann dimoun pou kapab go ahead avek zot prosesyon, in the event ki i annan en desizyon ki dan zot faver.  Sa pou fer sir ki sa bann dimoun pa pou bezwen kennsel zot prosesyon ki zot ti’n planifye akoz i koute an term letan, an term resours, an term larzan.

Se pour sa rezon ki mon dir e letan mon gete Mr Speaker, mon vwar poudir i dir nou bezwen appeal within 36 hours before the date of the procession. 36 hours. Savedir nou pe dir poudir CJ li i bezwen donn en desizyon vitman.  Komisyoner i bezwen donn en larepons within 48 hours.  Ki fer li en prosesis ki very short e en prosesis ki pou vreman efektiv.

Mr Speaker, Seksyon 6 i donn pouvwar Komisyoner pou fer termination.  Me Komisyoner pa kapab zis fer termination li.  Komisyoner i bezwen zistifye devan en Lakour, akoz pou annan appeal si i zis vini e donn lord pou terminateSo, the restriction an relasyon avek pouvwar ki Komisyoner i annan dan sa Bill, konpare avek dan lot Bill, in bokou, bokou, bokou amelyore.  Son pouvwar ki i ti annan avan, i nepli annan ler sa Bill pou pase.

Mr Speaker, Seksyon 9 osi i donn restriksyon an term landrwa kot en prosesyon oubyen en rasanbleman i kapab ganny fer.  Right.  Nou pe koz dan compound Lafors Lapolis, nou pe koz State House, nou pe koz kot en Kan Militer ki understandable.

Be Mr Speaker, happy to say, prezan nepli annan restriksyon pou en dimoun vin rasanble oubyen vin fer protestasyon par devan la kot Lasanble Nasyonal.  Sa i fantastik.  Nepli annan restriksyon kot Lakour.  Akoz souvandfwa sa 2 landrwa i bann landrwa kot en dimoun i anvi vin proteste.  Lakour in donn en desizyon ki zot pa dakor, zot proteste.  In ariv en keksoz dan Lasanble Nasyonal ki zot pa dakor, zot proteste.  Mon a donn en legzanp.

En pe letan pase letan nou ti annan en Leader Lopozisyon ki ti dir lanmans pwalon i so, gran mersi in perdi Eleksyon.  Dan en pei vreman demokratik, bann dimoun dan Lopozisyon ti pou debout an deor Lasanble Nasyonal avek plakar, i ti pou demann li pou de-misyon-nen.

(Laughter)

HON DAVID PIERRE

So, sa bann dimoun i anvi ganny sa posibilite.

Mr Speaker, nou annan definisyon speakers cornerOk. I byen ki i annan sa me mon santi Mr Speaker, poudir dan Schedule, Minister i bezwen fer sir ki i definir sa speakers corner la.  Sa i bezwen ganny fer o pli vit posib.

Mr Speaker, mon pa krwar nou devret trakase ki akoz sa Bill pe donn nou, oubyen sa Lalwa pou donn nou plis laliberte, i pou fer li pli fasil pou nou rasanble.  Mon pa krwar nou devret pe trakas lo dezord.   Akoz tou keksoz ki ganny fer, i bezwen ganny fer an a-kor-dans avek Lalwa.  I annan Lalwa ki definir sa ki ou kapab fer avek sa ki ou pa kapab fer.  In the event ki ou fer okenn keksoz ki an deor Lalwa, i responsabilite Lapolis pou fer sir ki ou ganny constrained within the limits of the Law.

So, sa ki mwan mon pe demande se ki nou annan nou en Lafors Lapolis ki efikas, en Lafors Lapolis ki profesyonnel, ki kapab garanti ki in the event ki anybody pe kas Lalwa, sa dimoun i ganny anmennen within the limits of the Law.

Mr Speaker, pou terminen mon ti ava osi kontan dir poudir, oubyen Minis si ou oule, donn en leksplikasyon pour sa number of:- son rezon par deryer akoz ki nou bezwen donn the number of attendees, kan nou konnen poudir even if nou pou donn the number of attendees, sa ki nou pou donnen dizon pour en rally, pour en rasanbleman.  Sa ki nou pou donnen pa pou zanmen kapab accurate an term partisipasyon an realite.  So, petet mon avi konn rezondet as to akoz ki sa i ganny mete dan en Schedule e akoz i pa kapab ganny retire.

Avek sa de pti mo, mon ava dir mersi Mr Speaker.

MR SPEAKER

Ok, mersi Onorab.

Mwan, mon pa dakor avek ou.  Mon krwar within the precinct of the Assembly ti dwatet antre la.  I annan en diferans ant deor baro ek anndan baro, but that should be spelled out in the Law.

Onorab, an menm tan ou a pran ou bann amannman.

HON MARIE-ANTOINETTE ROSE

Mersi Mr Speaker.

Mr Speaker, mon pa pou long me selman mon krwar i enportan lo sa Lalwa, ki nou fer en keksoz tre kler pour pep Seselwa konpran tre kler.  This is democracy.  Sa i demokrasi an pratik.  Tou bann dimoun ki koz lo la demokrasi la, zot bezwen konpran ki sa i la demokrasi an pratik.  Sa Lalwa i reprezant sa tyek ek balans ki egziste dan nou demokrasi.  Nou dan Parti Lepep, nou asim nou responsabilite e nou rektifye kot i merit ganny rektifye.  Nou pa per pou adres keksoz kot i merit ganny adrese e nou fer sa akoz nou respekte Lalwa.  Nou la pou reprezant laspirasyon lepep Seselwa e nou Lasanble, nou’n pas plizyer Lalwa ki’n touzour dan lentere Lepep Seselwa.  Nou’n aprouv bokou Lalwa ki’n al dan lentere nou demokrasi e dan lentere lepep Seselwa kot i neseser.  In annan menm Lalwa ki pa’n zanmen ariv devan nou pour aprouvasyon akoz nou’n santi ti demann revwar.  Nou pa’n per Mr Speaker, pou repeal en Lalwa alors ki merit ganny repeal, si sa ki la demokrasi i demande.

Nou dan sa Lasanble, nou pran nou travay o serye Mr Speaker e nou asim nou responsabilite alors.  Si nou ti lev nou lanmen pou aprouv en Lalwa, nou ava lev nou lanmen pou repeal li e nou ava lev nou lanmen pou ranplas li avek en lot, si se sa ki la demokrasi i demande.  Nou, nou napa okenn problenm alors, pou donn nou pep meyer Lalwa ki zot santi zot merite Mr Speaker.

Mr Speaker, avek sa enn de mo, mon ti a kontan soumet devan ou en seri amannman e mon ti a kontan fer resorti ki nou pa zis aprouv Lalwa isi dan sa Lasanble, me nou soumet en seri amannman, kot nou santi amannman merit ganny soumet.  E zis mon a-port ou latansyon avek sa bann amannman si ou permet mwan Mr Speaker, i annan 2 pti amannman ankor ki mon ti a kontan soumet devan Lasanble e sa se dan premye amannman, pou nou retir or entertainment dan sub-section 2:-3 pardon.  Kot nou pe insert sub-section 3, an Assembly of persons held exclusively for the purpose of a private activity. Nou tir or entertainment. Nou ti a kontan osi enkli en nevyenm amannman, e sa i ……

(Interruption)

MR SPEAKER

Non, non.  Be la ou pe fer amannman lo amannman.

HON MARIE-ANTOINETTE ROSE

Wi Mr Speaker, si ou permet mwan.  E mon ti a kontan osi insert en lot ….

(Interruption)

MR SPEAKER

Ale mon a  ekoute ki lot ankor.

HON MARIE-ANTOINETTE ROSE

En lot amannman anba nouvo item10 ki dan schedule. I item 11, me apre ki nou’n dakor ek amannman, i pou item 10.  It is the last item.  Pou nou enkli expected number of attendees, olye number of attendees.  Savedir number i pran small letter e nou insert expected before the word number.

MR SPEAKER

Ok, mon krwar Biro Clerk ek Legal Counsel i a pran notis sa.  Mon a les sa pase.  I pa sitan grav.

HON MARIE-ANTOINETTE ROSE

Mersi Mr Speaker.

MR SPEAKER

OkSo, Right Of Reply, Minister.

MINISTER CHARLES BASTIENNE

Mr Speaker, mersi.

Tou bann Manm Onorab ki’n partisip dan diskisyon. Mersi.

Lakour Konstitisyonnel sa lannen ti rezet an gran parti Public Order Act ki ti vin an fors an Zanvye 2014 akoz dapre sa Lakour, sa bann Seksyon dan Lalwa pa ti an liny avek Konstitisyon pei.  Gouvernman in respekte desizyon Lakour Konstitisyonnel e rekomann avek Lasanble Nasyonal, sa Public Assembly Bill, 2015 pour aprouvasyon.  Akoz parey mon’n dir boner, i kontenir prensipalman bann menm provizyon ki Komisyon Eleksyon ti fer avek Gouvernman an Zilyet 2012, swivan konsiltasyon avek tou parti e piblik konsernen.  Sa dan li menm i demontre matirite nou demokrasi e langazman nou pei, pou asir bon gouvernans e respe anver Lalwa.  Sa Prozedlwa ki devan nou, pe senpleman garanti lape, stabilite e lord piblik, ki bann eleman kle dan devlopman nou demokrasi.  I pa pe anpes dimoun fer rasanbleman piblik oubyen lamars me i pe senpleman asire ki lord, lape, stabilite ek sekirite i ganny respekte e obzerve a tou moman.

En endividi ki anvi fer en rasanbleman piblik parey in ganny dir boner, i annan zis pou notifye Komisyoner Lapolis.  Sa i a permet Komisyoner asire ki tou lozistik neseser e osi bann resours adisyonnel i an plas, pou bon deroulman sa rasanbleman oubyen lamars.  De lot kote, sa endividi pou osi konnen si napa en lot aktivite parey ki pe ganny fer dan menm landrwa an menm moman.  Lape, sekirite, lord e stabilite i reste touzour nou priyorite pour nou pep e nou pei.

Mersi Mr Speaker.

MR SPEAKER

Bon, in ariv ler pou nou pran

en vot lo merit, rensip.

Tou bann ki an faver?  Okenn ki kont?

Bon, mon a ganny en formal Second Reading.

MADAM CLERK

A Bill of an Act to repeal and replace the Public Order Act 2013, to make provision for the protection and promotion of the Right to Freedom of Assembly, the preservation of public safety and order and to provide for connected matters.

MR SPEAKER

Vi ki napa okenn kon-tansyon lo sa bann pti amannman, then mon a ganny mwan petet en Mosyon pou sot Committee Stage.

HON MARIE-ANTOINETTE ROSE

Mr Speaker, mon move ki nou sot Committee Stage.

Mersi.

MR SPEAKER

Okenn ki segonde?

HON CHARLES DE COMMARMOND

Mr Speaker, mon segonn sa Mosyon.

MR SPEAKER

Tou bann ki an faver lev zot lanmen.  Okenn ki kont?

Ok, mon a ganny en Motion for Third Reading.

HON MARIE-ANTOINETTE ROSE

Mr Speaker, mon move ki nou li sa Bill en Trwazyenm Fwa.

MR SPEAKER

Okenn ki segonn sa?

HON CHARLES DE COMMARMOND

Mosyon i ganny segonde Mr Speaker.

MR SPEAKER

Pran en vot lo la.  Tou bann ki an faver?   Okenn ki kont?

Mon a ganny mwan en Third Reading.

MADAM CLERK

This Act may be cited as the Public Assembly Act, 2015.

MR SPEAKER

Bon, Bill in finalman pase, malgre mon pa tro kontan ki napa en restriksyon lo Public Assembly within the precinct of the Assembly.  Me sa i desizyon ki’n ganny pran.

Mon ava alors ekskiz Minis ek son delegasyon parmi nou. E kant a nou, nou ava kontinyen avek nou travay pour ozordi.

Bon nou:- ti annan en keksoz ou ti oule dir Onorab, non?  Ok.  Ou pa pe konteste sa ki mon fek deklare?  Anr, ok.

Bon, nou ava pran Mosyon.  Mosyon se par ou menm, Leader of Government Business.  Mon ava demann ou pou prezant ou Mosyon.

HON MARIE-ANTOINETTE ROSE

Mersi Mr Speaker,

Mr Speaker, Mosyon ki mon’n soumet devan nou Lasanble, pe tou senpleman lans en lapel avek Gouvernman, osi byen ki bann Parti Politik pour ki nou ralye deryer mesaz lord ek lape pour sa Eleksyon ki devan nou.  Nou dan Parti Lepep, nou deplor okenn lesey pou kree en sityasyon enstab dan pei, la ki nou pe apros Eleksyon e nou sezi sa loportinite pou demann nou siporter pou diriz par legzanp dan sa demars. Parti Lepep pe alors ofisyelman lans en lapel avek tou dimoun, pou mentenir en nivo respe pour tou Dirizan, pou pa fer ouswa dir okenn keksoz ki kapab ensit vyolans e lev lakoler parmi lapopilasyon, pou pa manipil lezot dimoun e sey zwe viktim pou ganny senpati, pou zwe en zwe prop e onnet.  Sa i nou mesaz.  En mesaz kler e for pour tou Seselwa konpran e pour tou Seselwa konpran rezon detsa mesaz.

Mr Speaker, en Parti ki o pouvwar e en Parti ki pe al ganny Eleksyon i en parti ki responsab.  Nou responsabilite pandan sa Eleksyon i al odela responsabilite en Parti Politik ki pe tou senpleman konteste en Eleksyon.  Prezidan Michel i non selman en kandida dan en Eleksyon, me i Sef Deta, i Sef Egzekitif e i Sef nou Lafors Militer.  Son responsabilite i gran e bokou plis ki nenport ki lezot kontestan.  Nou en Parti ki o pouvwar, alors sa Parti ki pe diriz nou pei.  Nou responsabilite gouvernen e mentenir en pei pa aret ler en Eleksyon i anonse, me i double pandan en peryod Eleksyon.  En peryod ki normalman enstab pour nenport ki pei.  Se la kot nou bezwen vin pli vizilan.  Se la kot nou bezwen sofgard sekirite Nasyonal e lokal.  Eleksyon ou non, Sesel i bezwen kontinyen fonksyonn normal e lekonomi i bezwen kontinyen performen.  Bann Minister i bezwen kontinyen fonksyonnen.  Nou kontinyen deservi nou piblik.  Bann fonksyonner piblik i kontinyen al travay e Sekter Prive i kontinyen fer marse zot biznes.  Lavi normal e en sans normalcy i bezwen kontinyen prevail Eleksyon ou non.  Pandan ki Eleksyon se selman en levennman, nou dan Parti Lepep nou annan en pei pou batir, nou annan en Nasyon pou siporte, nou annan en zenerasyon pou montre legzanp, nou annan travay pou fer pou kontinyen konstrir sa pei e anmenn li lo pli o nivo ankor.  Vyolans e dezord dan pei i al kont tou sa ki nou anvi fer koman en Parti Politik.  Dezord e vyolans i met nou an aryer dan nou demars ver plis progre.  Dezord e vyolans pa dan lavantaz Parti Lepep.  Nou deplor alors, okenn lesey par okenn Parti Politik ouswa okenn endividi rogue ouswa malisye, pou esey kree en klima enstabilite dan nou pei avan Eleksyon e osi pandan Eleksyon.  Nou pa pe montre ledrwa lo personn, me endividi ki ensilte en Dirizan Politik ouswa servi serten non ofansif pou dekrir nou per fondater, se en endividi ki pe lev lakoler dan en pep e esey kree en serten nivo enstabilite dan nou pei.  En endividi ki servi tou kalite portre pou denigre en Dirizan nou pei, se en endividi ki pe takin son prosen e fors li reakte dan en fason negatif.  En endividi ki pas komanter provokativ an piblik, ouswa en endividi ki esey pas li pour en viktim olye adres vre konsern lepep, sa endividi ki pe esey kree senpati e an retour, lev lakoler dan serten kan.

Sa bann kalite politik Mr Speaker, in fini pase dan nou listwar.  Apre plis ki 20an retour miltiparti dan nou pei, in ler pou nou bann Dirizan Politik anmenn en politik ki serye.  Annou aret sa mantalite kot nou fer leloz e mansyonn tou endividi ki nou pa dakor avek.  Sa ba bon pour nou pei e sa i met nou e nou demokrasi an aryer.

Mr Speaker, nou pe alors lans en lapel serye avek bann lotorite ki mentenir lord e lape, pou pa toler okenn act dezord ouswa malisye pandan sa Eleksyon.

Si en dimoun in dir son lisyen in mor e i krwar i annan dimoun ki’n touy son lisyen, i bezwen fer en konplent Kordgard.  I bezwen dir akoz sa zour i ti fer son bodyguard ale boner par egzanp.  Ouswa prodwi portre lo camera sirveyans, ouswa montre ki i pe fer tou demars pou rod lazistis.  Sa zafer touy lisyen i en vye trik.  Dan lepase in annan plizyer ansyen Dirizan ki’n vin devan e claim ki zot lavi i an danze.  Tousala in fini dan dust bin listwar akoz laverite e rien ki laverite ki’n prevail a lafen dizour.

Sa i en sityasyon ki malere e enn ki pa anmenn nou okenn par.  Rod senpati i selman anmenn en ratifikasyon kou term, me i osi lev lakoler parmi lezot kous popilasyon e sa pa bon pour nou pei.

An menm tan Mr Speaker, nou pep i bezwen realize ki personn dan sa pei pa par lao Lalwa.  Bann kontestan en Eleksyon merit tonm dakor ki lepep pou kestyonn zot.  Zot merit ekspekte ki sa i form parti sa gran prensip demokrasi ki zot tou zot koz lo la.  Si en lofans in ganny komet ouswa non, se Lalwa ki pou deside e pa nou.  Bann Dirizan dan nou pei, sirtou bann ki pe konteste Eleksyon, merit ekspekte ki zot pou ganny kestyonnen a tou pri e a tou kou, pandan ki zot pe demann nou pou vot pour zot.  Sa i en prosesis normal kot zot bezwen pass the test of admissibility.  Parey serten i kestyonn nou kontestan Prezidan Michel, lezot pou kestyonn zot.  Eski en alegasyon i vre ou fo?  Eski en lofans in ganny komet, vre ou fo?  Eski sa zonm i kapab dirize?  Eski sa dimoun i annan sa karakter neseser pou diriz nou?  Eski i annan leskelet dan larmwar? Tousala Mr Speaker, tousala i apel demokrasi.

Nou pep osi merit konpran ki en zonm ouswa en fanm ki anvi diriz Sesel, set en dimoun ki kapab fer nou fyer, set en dimoun avek prensip, set en dimoun ki konpetan, set en dimoun ki annan lafors, ki annan determinasyon e ki son lanvi pou diriz nou pei pa enn ki baze lo vanzans ouswa rankin ouswa lavaris.  Tousala merit ganny egzaminen.  Nou pep merit konpran ki dimoun pou avans devan e rakont zot zistwar.  Ki lezot pou avans devan e eksprim zot sipor.  Finalman, se nou ki pou ziri.  Se nou ki pou deside.  E nou, nou merit gard nou byen enformen.

Eleksyon se pa en zwe zanfan.  Konteste Eleksyon is not a ride in the park Mr Speaker.  Eleksyon set en demann serye pou dirize e en demann serye pou gete si ou kapab dirize.  Every contestant is up for scrutiny. Sa ki nou bezwen mentenir dan sa prosesis se en nivo matirite pou aksepte sa.  Set en nivo matirite pou ekspekte sa.  Set en nivo matirite pou prepare pour sa.  Nou, nou pe demande ki nou fer li dan en fason ki al an akor avek Lalwa e Konstitisyon nou pei.  Kot i mal nou aranze, me kot Lalwa i la, annou nou tou respekte prosedir ki’n etablir.  Annou nou tou tonm dakor pou zwe sa zwe dapre la fason ki zwe merit ganny zwe.  Dapre Lalwa nou pei, dapre prensip lord e lape, dapre prensip demokratik nou Konstitisyon.

Mr Speaker, en Eleksyon parey nou tou nou konnen, i vedir en moman ase enstab dan li menm, kot sak Parti Politik i vin aktiv pou rod sipor pour zot kandida respektif.  I normal alors, kot i annan lesanz lide e pwennvi e ki laplipar bann konversasyon i tourn otour politik.  Nou osi konsyan ki dan nou kiltir Seselwa, Eleksyon i en moman emosyonnel e parfwa lemosyon i o.  I osi dan nou kiltir pou annan satire, pou annan joke, pou annan limour.  Sa osi i normal Mr Speaker.

I normal ki bann Parti Politik i mobilize e ki i annan bann gran rasanbleman e menm bann motorcade.  Mwan osi mon pou fer li.  Mwan osi e nou tou ki la e nenport ki Parti Politik i annan drwa pou organiz li libreman.  Parti Lepep par tradisyon, set en Parti ki vibran e en Parti ki byen organize.  Nou kouler rouz set en kouler determinasyon.  I reprezant nou lalit e ozordi i reprezant en batay asarne pou prezerv sa ki nou’n lite pou akonplir.  Pa fer okenn fot.  Dan sa Eleksyon nou pou bataye avek nouvo viger, avek nouvo lespri e avek nouvo lenerzi.  Nou’n toultan dan nou bann rasanbleman, senm mesaz lanmour e lape.  Nou pou sant bann sanson ki ralye nou ansanm e nou pe demann nou siporter alors pou fer li dan lord ek lape.  Nou annan lendikasyon i annan serten Parti Politik ki kapab ankouraz zot siporter pou met nou triko e vin esey fer dezord.  Nou pe demann Lapolis pou entervenir an ka okenn dezord.  Nou tou nou bezwen pran nou responsabilite dan sa gran legzersis demokratik ki nou pe al pran par ladan.  Mon zwenn demann ki’n ganny fer boner par Onorab De Commarmond, pour ki Lafors Lapolis i ede pou edik dimoun, koz byen avek dimoun, annan en lapros profesyonnel me serye.  Nou depan lo zot pou ede mentenir lord e lape.  Sa ki pa pran son responsabilite, sa ki pa responsabiliz son siporter, sa ki pa pran letan pou koz avek son siporter, i pou bezwen respekte lord e lape ki’n ganny etablir dan nou pei.

Mr Speaker, nouvo Public Assembly Bill ki nou fek pase, i demontre en demars serye par nou Gouvernman pou siport sa prosesis demokratik ki nou pe al pas ladan, a tou pri.  Nou pa zis koze me nou serye dan sa ki nou pe fer.  Sa i rezon akoz mon pe demande koman bann Dirizan Politik lo nivo distrik e reprezantan lepep, pou nou pronons nou lekor e demande ki tou dimoun i asim zot responsabilite, pour ki nou anmenn en politik ki ganny fer dan lord e lape.  Annou adopte sa spirit sivilize parey Onorab De Commarmond in dir bomaten.  Nou travay parey mon’n dir Mr Speaker, pa fini le 5 Desanm.  O kontrer apre le 5 Desanm, nou dan Parti Lepep, nou pou komans en nouvo parkour dan devlopman nou pei.  Stabilite ekonomik nou pei i tre enportan.  Nou’n travay tre dir ansanm pour ki nou reform ekonomik i aport fri.  An 2008, nou pei ti pas atraver en gran moman reform e ansanm nou ti ralye.  Nou lekonomi i ankor lo larout reform e okenn enstabilite i kapab ranvers nou dan sa progre ki nou’n fer.  Annou pa fer nou retourn dan lepok napa.

Nou tou nou’n fer sakrifis ansanm, pou anmenn sa pei kot i ete ozordi.  Bann biznes ki pe prospere i an vi vwar en lanvironnman ekonomik ki stab pou zot kapab kontinyen envestir.  Dimoun ki pe rod louvraz i anvi kontinyen vwar loportinite travay atraver en lekonomi ki dinamik e solid.  Se selman stabilite ekonomik ki kapab akonplir sa.  Etranze ki anvi envestir dan nou pei, i anvi vwar en klima ekonomik ki pou protez son lentere.  I dan lentere tou Seselwa ki kontan Sesel alors, pou mentenir sa nivo sekirite ki neseser pour lepanouisman ekonomik nou pei.

Mr Speaker, bokou zenn ozordi i anvi avanse dan zot letid.  Zot pe esper en Labours.  Zot anvi al Liniversite.  Serten pe look forward pou zwenn lemonn travay.  Bokou endividi ozordi pe atann avek enpasyans pou zot bouz dan zot nouvo lakaz ouswa pou komans konstriksyon zot nouvo lakaz.  Bokou pti biznes ki fek komanse, biznes i ankor frazil.  Zot pe esper Desanm vini pou zot kapab fer en pe profi ekstra.  Bokou dimoun i annan rev pou akonplir.  I annan travay pou fer, i annan lavi pou kontinyen.

Lavi i kontinyen apre le 5 Desanm Mr Speaker e nou, nou annan sa responsabilite pou fer sir ki personn pa esey briz sa rev ouswa kree en kondisyon advers dan sa pei.

Mr Speaker, nou demann alors i serye e mwan ekspekte ki tou Dirizan ki dir i kontan Sesel, ki tou dimoun ki anvi anmenn en politik serye e ki tou dimoun ki pe konteste sa Eleksyon, i swiv nou legzanp e a zot tour, zot pronons zot lekor lo la dan bann zour ki pe vini.

Mersi Mr Speaker.

MR SPEAKER

Bon, okenn ki: – Onorab.  Ou ti oule entervenir?

HON CHARLES DE COMARMOND

Mr Speaker, mon segonn sa Mosyon e mon oule dir de mo.

(Interruption)

MR SPEAKER

Ok, Onorab De Commarmond.

HON CHARLES DE COMARMOND

Mersi bokou Mr Speaker.

Mr Speaker, sa Mosyon i en tre bon Mosyon.  Bomaten lo bann zournal, mon pe regarde, menm Langleter e menm lezot pei deor pe focus lo nou Sesel, lo sa Eleksyon ki pe vini, ki devan nou e zot pe komans dir poudir i annan vyolans ki pe komans ganny zwe dan sa Eleksyon, dan sa kanpanny.  E sa pa bon.  I pa bon ki sa bann pei deor pe get nou mal.  Ordinerman bann Pei deor i get nou byen.  Fek, parey mon’n dir la taler, bomaten.  West Africa laba pe get nou byen.  In vini i pe pran legzanp lo nou.  Plizyer lezot legzanp.  Be la nou pa kapab les nou ganny servi pour en move legzanp ki nou, nou pe fer.  So, mon krwar i demande ki nou, nou viv en pti pe pli byen.  Nou konport nou en pe pli byen, sirtou dan sa kanpanny.

Nou’n fek pas en tre bon Lalwa bomaten Mr Speaker, sa tre bon Lalwa i depan lo nou bon konportman.  Si nou fer en sel fot, en sel fos mannev, sa tre bon Lalwa i kapab vin en move Lalwa.  I kapab vin move pour nou.  I kapab vin pa bon pour nou.  I depan zis en fot la, en dimoun in al fer en zafer ki pa byen, tou zafer i gate.  Be nou, nou ptipti e en senp pti keksoz, son lanpler i gran.  Dan en gran pei en pti zafer i arive, ou pa vwar naryen.  Me dan en pti pei, en pti zafer i vedir en gran keksoz.  So, nou, nou bezwen konmsi ride lo sa bann keksoz ki byen.  E nou kanpanny i devret en kanpanny pli byen.  Mon pa kontan mwan serten keksoz ki mon pe vwar pe arive dan nou pei ek sa kanpanny politik.  Konmsi i vin pli sal ki avan.  Deza avan ou a dir kekfwa ti annan en serten keksoz, be nou ti en pti pe pli mature.  Be la nou pe grandi, nou pe vin pli mature, annou fer pli byen.  Pa bezwen ki nou ensit vyolans.  Pa bezwen ki nou fer bann keksoz, nou koz en bann lalang.  Nou dir en bann keksoz ki fo.  Nou rakont bann zafer ki pa ni egziste.  What is this? Bomaten mwan letan mon desann, mon’n pas la kot Lakour.  Dan mon pase mon zwenn Madanm Amesbury.  Be li Leader en Parti li.  Mon dir li bonzour.  I dir mwan Charles, be ozordi ou’n met kouler nou Parti.  Mon dir, mon pa ti realize.  Mon dir mon krwar mon pe join ou Parti.  Mon’n vini mon pe esper ou kontrer pou ou anrezistre mwan.  Mon fer en joke ek li.  I konnen mon pa pou zanmen join son Parti.  Be selman, akoz mon ti devret ankoler ek li?  Pa neseser.  Mon fer en joke, nou’n riye.  Kontrer mon demann li, mon dir be sa zafer vye tantin la ki ou pe dir, ou pa merit pe dir aunty, pour nou la?  I dir mwan be wi.  Mon dir be pa korek sa, ki ou pe dir lo aunty.  I pa’n egziste.  Bannla pa’n takin li pou zafer politik.  I dir wi, mon dir non.  Mon dir baro, i dir mwan baro in kase.  Mon dir baro la kot Khrisnamart ou konnen la, i annan en problenm.  Sa tantin i annan son baro la, i a reste anndan la li.  Prezan devan, in demann Gard, in met:- Gard ti fer li sa:-Land Transport in fer li met sa zafer parking.  In peye tou en, pou anpes park la devan baro.  Pou li kapab, mwan menm mwan letan mon al vwar li, mon kapab antre kot li.  La ou pa kapab antre la.  Ou pa kapab antre akoz tou dimoun, sa bann la kot Khrishnamart, en dezord konplet la nou konn tre byen.  Gard pa pe zwe son rol e prezan i bloke.  La zot in kas son baro.  Pa politik ki’n kase.  Aunty li i siport nou.  I dan Parti Lepep li.  I pa pou sorti dan Parti Lepep.  I ti dan SPUP lontan.  In reste la li.  I pa pe siport Madanm Amesbury li dan son Parti.  E fodre pa:- konmsi mon dir li ou vwar sa zafer la, fodre pa fini koumsa sa. Epi nou’n riye, nou’n ale, nou fini.  Be nou pa bezwen nerv ek kanmarad.  Sa ki mon pe dir sa koumsa:- la, ou vwar, ler Gard pa zwe son rol byen, i kree en bann zafer.  Prezan baro i kase ou krwar i politik.  I pa politik li, Gard pa’n vin met lord la, prezan bann bandi in vin kase.  Sa ki nou bezwen kontrol en pti pe dan nou pei akoz sa bann dimoun ki en pti pe dan Drog dan bandi, bandi la, i ganny servi par bann Parti Politik osi, pou ensit vyolans.  Mon annan ase laprev, ase keksoz ki mon konnen la, ki zot pe veye ki letan i annan bann Rally, i annan bann Meeting Piblik, serten Parti zot in fini ganny lenz par egzanp Parti Lepep pou mete pou desann, apre pou kraze, pou komans atak e fer anvoy ros, anvoy zafer kot bann dimoun dan Lopozisyon.  E sirtou bann ki pe:- ki’n vire, ki’n vin kot nou la.  I annan en kantite dimoun dan Lopozisyon ki’n zwen Parti Lepep la, zot pe plan pou take in sa bann dimoun.  A servan, zot bann dimoun enfiltre dan nou bann Rally ki nou pe anticipate fer.  Be nou pa sa bann zafer koumsa.  E nou, nou bezwen vin alert.  Mon dir sa, mwan mon pa kanmi, mon dir mwan.  Mon fran, mon pou dir mwan Mr Speaker.  Nou:- mwan, mon lans en lapel ek nou bann dimoun, sirtou siporter Lepep, annou be careful sa bann zafer.  Nou watch out.  Nou be on the alert, nou veye e anpese ki sa bann keksoz i deklanse from our sight.  Annou ankouraz nou kanmarad pou nou pa al ale dan sa bann zafer vyolans.  Pou nou pa al an plis konmsi pou dir en kantite keksoz, pou zoure, pou komans rod problenm.  Annou pa rode.

Me selman, pa rod ek nou osi Mr Speaker.  Kontrer konmsi, ou konpran.  Ou pa kapab.  I annan en limit en dimoun i kapab reste trankil osi.  Ki i kapab reste son silans osi.  So, mwan, mon dir ki okenn bann lensidan, annou sey raporte, nou a sey gete si nou kapab koz ek bann dimoun si i posib, pou koz ek serten sa bann Leaders.  Nou a koz ek zot, nou a dir be gete.  Pa fer sa, pa les sa arive.  Lala ou pou al dan move direksyon.  Mon swete zot ava konpran zot osi, pour ki nou fer en kanpanny de lape.

I enportan Mr Speaker, osi en lot landrwa.  Nou:- serten nou, nou ensit vyolans an aksyon e osi par parol.  An parol e an aksyon.  Gran mersi nou pa pe fer li par omisyon.

Mr Speaker, konmsi lo FacebookFacebook, YouTube, en bann zafer nou dir, pa neseser dir.  Ki nou fer la, ki pa neseser fer.  Lot zour mon pe gete, konmsi, mon’n al vwar Prezidan Rene lot zour.  Be Prezidan Rene pa ni pe anzard li konmsi ek sa politik ki nou: -konmsi i trankil li laba li.  I a dir de mo si i kapab dir, zour nou a dir li dir, i a dir de mo.  Me apard sa i la.  In tir nou lwen laba dan problenm kot nou ti ete dan letan pase.  Mon pa dir ki napa en fot, de fot ki’n arive mwan.  Be nou tou nou gran, napa personn dan nou lakour, kot nou reste, napa personn ki parfe lo sa later.  Be nou’n sorti lwen koman en pep, nou’n ariv en gran zistans.  Nou bezwen apresye serten keksoz ki byen ki nou’n fer.  E Mr Rene in gid nou li.  Mon pa oule anmenn sa bann zafer Mr Rene, me selman pov dyab in la, akfer fodre nou al konmsi dir en bann parol ki pa neseser lo li?  At this stage la, dan nou politik la.  I pa ni la, li i pa ni pe konteste politik, Eleksyon la.  I pa en kandida Prezidansyel li.  I la, mon pa’n tann li koz nanryen, me nou bezwen al dir bann keksoz, bann move parol, bann vilen parol lo li.  Me si prezan mwan or lezot dimoun:- i annan nou, i annan en kantite dimoun ki siport Mr Rene la ater la.  Kantite dimoun ki kontan Mr Rene.  Be ki zot pou fer letan ou pe:- en lot group i pe ensit en bann keksoz koumsa?  I pou dir keksoz li osi, i pou fer keksoz li osi.

Mon pa devret pe dir en bann keksoz mal lo Onorab Pierre.  I Leader en Parti Politik.  Si mon dir, ki i pou fer li?  Li osi i imen.  Me si mon avoid, mon pa dir, li osi i pa pou dir.  Nou fer joke rather than konmsi:- ou ava eksplik ou Parti, lobzektif ou Parti, ou a dir ek dimoun.  I annan bout nou pa pou dakor avek byensir, me ou pa fatig nou.  Nou konnen vote, kantmenm mon pou kriye, ler vote en lot zafer.  Nou ale dan bwat laba nou a vote.  Nou vote Parti Lepep pou nou kapab kontinyen nou parkour dan pei.  Kontrer nou fer sir sa voyaz, pli  kantite dimoun i vot Parti Lepep pou nou kapab kontinyen anmenn pei de lavan.  I byen i annan lezot Parti la.  I konteste li osi sey dir de trwa zafer.  Kontrer nou a ganny ankor enn de dimoun dan Lasanble, nou a kapab dyalog plis.  I ede pour nou Healthy Politic’s.  Pou nou kapab konmsi annan bann checks and balance akoz pangar nou, nou fer fot, laba i dir tyonbo en kou.  Mon krwar kot ou pe ale i en pe soz la.  Sa bann zafer ki zot fer i  pa pou bon pour lepep.  Parti Lepep nou, nou pa lepep me selman nou pe gete sa ki ou pe fer i kont Lepep.  So, i ede ennler pou check.  Nou a ganny ankor 2 dimoun dan Lasanble, a fer 3.  Me ki nou pe dir?  E nou, nou a’n ogmant en pe plis.  Be nou pe dir ki nou bezwen ale devan koman en pep e al byen.  I byen ou dan Lopozisyon, ou dan Parti o pouvwar.  Tou keksoz ki byen la, i byen pour nou tou.  Nou ale koman en Nasyon.  Ler nou fer en devlopman, i annan dimoun ki al deor.  Dan serten Minister mon’n ale lot zour.  Be i annan dimoun dan lezot Parti ki la.

Pa pez dimoun.  Fer marse ou keksoz byen.  Be nou kapab al lwen nou si nou konpran pli byen.  Be si nou anmenn en latitid arogan, en latitid ki vilenn, ki pa byen, i pou met nou an aryer.  Pa pou bon pour nou.  E nou zanfan ki legzanp pou gannyen lo nou?  Ki kalite politik li i pou anmennen prezan?  Nou, nou bezwen kree dan nou pei en kanpanny ki byen ki letan nou bann zenn, nou bann manrmay ki pa ankor vote, letan li i ava vin Dirizan bann Parti Politik, letan li i ava pe konteste Eleksyon, i ava fer bon kanpanny.  I bezwen aprann lo nou.

So, mon pe lans en lapel mwan osi.  Mon kontan sa Mosyon in vin devan nou akoz i neseser.  I neseser ki nou koz ek nou pep, nou fer nou dimoun konpran.  E la mon dir, osi bann dimoun, pa les zot ganny servi par bann move Leaders.  Pa les zot ganny servi par serten dimoun zis pou zot langwas personnel, zot legois personnel, zot lanvi personnel.  Pa les zot ganny servi silvouple.  Si ou vwar i pe dir ou al ensit vyolans, kantmenm i pou pey ou, pa fer.  Don’t do it, just don’t do it. I pa bon pour nou.  Nou pti e nou tou nou annan en relasyon preskrir avek kanmarad.  Annou ini rather than konmsi kree e ensit vyolans.

E se sa lapel ki mwan Cascade mon’n fer.  Mon’n dir ek mon bann dimoun.  Nou konnen, Cascade nou balye.  Nou pa bezwen al nerve pour Eleksyon ki devan nou.  Me nou bezwen fer byen nou travay.  E mon’n dir ek mon bann dimoun, mon striktir e tou e la mon lans en lapel ankor pou zot.  Pa zanmen al dir keksoz mal lo nou opponent.  Les li, li osi.  I pe survive li osi.  I pe dir son politik.  Les li dir son politik.  Si ou tann li dir mal lo nou, vire ale.  Vire, ale les li.  Les li.  I annan en Bondye anler ki vwar tou li, i konn tou li.  Pa bezwen nou, nou osi nou al:- si i pe zoure nou osi nou zoure.  Pa bezwen nou, si i pe dir en keksoz ki mal, nou a raporte, nou al dir lala.  Nou a kapab petet sey koz ek son bann Leaders laba, nou a dir be vey ou bann dimoun, i pe mal ki zot pe soz.  Kekfwa ava konpran.  Ouswa nou koman Leaders, nou a kapab koz ek kanmarad dir ok be pa fer sa akoz si ou fer sa, ou pe anmenn en keksoz ki mal.  Be nou anba, pa bezwen al dir la konmsi pou ensit sa vyolans.  E mon lans lapel ankor ek Leaders, fodre pa, fodre pa ki nou, nou montre nou siporter sa ki move.  Annou montre nou politik, annou montre nou progranm nou Parti.  Sa ki nou devret pe eksplike dan kanpanny.  Ki nou pou al fer pli byen pour sa pep?  Al montre progranm ou Parti.  Si ou annan en Parti, i bezwen annan en progranm.  I bezwen annan en Konstitisyon ou Parti.  I pa kapab zis vini ozordi, ok ou Endepandan, savedir ou vire ou la, ou zis ou pou ale koumsa.  Ou Endepandan, ou pa reprezant naryen.  Me selman i annan Parti ki’n fermen akoz i napa sibstans, i napa son bann zafer.  I zwenn ek Endepandan.  I ede fer ta gro laba, fantastik.  Napa problenm.  I annan in fermen.  I byen, konmsi i dir ok, i pa pou kapab konteste li menm.  I arive.  Dan tou pei i arive sa.  I pa zis Sesel.  Bann diferan Parti Politik i vwar, i pti i gete, i ti pou krwar i pou ganny en ta dimoun.  E i pa gannyen en ta.  Prezan i zwenn ek son kanmarad.  I arive e nou, nou bezwen konpran poudir sa i arive, pa bezwen nou gognarde poudir konmsi lala sepa kwa.  Non, i arive.  I fer son Parti koumsa.  Prezan i ava dir ki i pou fer pou nou.  Prezan nou, nou pa i gran nou?  Pa nou’n edike nou?  En ledikasyon dan nou pei, nou’n avans en kantite.  Be nou konpran nou poudir nou pou al vot pour sa, lala kot i pou anmenn nou.  Nou konpran, nou vot sa Parti, lala progre i la.  Vot ek Lepep, nou al devan, menm pli devan ankor.  So, i a vin koumsa.

Prezan nou bezwen eksplike ki nou, nou pe vin fer nou bann Parti Politik.  Sa ki nou devret eksplike.  Dir nou.  Kekfwa i kapab convince mwan, dir lala na vwar.  Be si ou pe vin ek vyolans, definitivman i pa bon, pa bon.

So, vwala lapel ki nou Lasanble pe fer.  Nou Lasanble pe zwenn avek bann diferan Larelizyon.  Mon konnen dan bann diferan Legliz la, dan bann diferan lezot Larelizyon osi, zot pe dir ki i pa byen.  Ki nou bezwen fer en kanpanny ki onnet, en kanpanny ki nice, ki napa vyolans.  Sa ki Legliz pe dir nou e nou bann Larelizyon i ase kler vwayan pou dir nou sa mesaz.  Pou anvoy sa mesaz.  E nou, nou bezwen ekoute.  Nou, nou, bezwen ekoute, nou pep.  Ou pou annan bann limour, bann keksoz humorous. Be sa i normal, ou konpran.  En pti joke an pasan, en pti satire, sa i egziste.  Me nou pa pou kapab pran sa konmsi pour nou bles kanmarad telman pou nou soz.

So, vwala lapel e lo Facebook Mr Speaker, dan YouTube ensidswit, sa bann kalite keksoz ki pa egziste ki pa vre ki zis konmsi nou pe:-annou, mon dir nou tou arete.  Tou kalite politik ki pe fer sa bann zafer, let us stop it.

Vwala Mr Speaker, mwan mon krwar ki sa Mosyon i bon. E mon swete deor laba bann pei i konnen, i tande.  Langleter, zot a mete osi lo Guardian, lo soz la poudir Lasanble Nasyonal Sesel i pe dir avek tou Parti Politik, fodre pa ki nou fer en move kanpanny, fodre pa ki nou fer en konpanny ki dan vyolans, fodre nou fer en kanpanny dan lape e fer ki nou tou nou a benefisye avek sa Eleksyon ki devan nou.

Mersi bokou.  Annou fer sir nou vot byen e nou vot Lepep.  Mersi bokou.

MR SPEAKER

Bon, avek sa nou ava adjourn ziska 11er.

(BREAK)

MR SPEAKER

Bon nou a kontinyen avek deba.

Onorab Sebastien Pillay.

HON SEBASTIEN PILLAY

Mersi Mr Speaker.

Mr Speaker, Mosyon ki devan nou ozordi, i vin a en moman tre propis, akoz i permet nou isi dan Lasanble pou zwenn sa rol enportan ki nou annan.  Sa se osi edik nou pep lo serten keksoz ki inevitableman arive, baze lo bann sirkonstans, ki pei i trouv son lekor ladan.

Mr Speaker, dan son lentervansyon, mover Mosyon in fer kler ki ozordi nou’n ariv nou en letap dan nou devlopman e dan levolisyon nou demokrasi, kot en kantite bann keksoz ki nou ti fer dan lepase i nepli relevan.  E lafason ki ozordi lepep Seselwa pe apros la demokrasi i en fason tre matir, dan en lanvironnman ki stab.  E ki nou devret fer tou posib pou nou mentenir sa lelan ki nou’n pran e non pa regress e trouv nou dan en sityasyon kot nou pe kree plis diskord, senm plis laenn, oubyen fer plis dezord kot i napa relevans ozordi pou fer sa bann kalite keksoz dan nou pei.

Mr Speaker, mon pe dir sa akoz tanzantan ler mon pe drive mon bat avek en transpor ki deryer lo la in ekrir ‘Don’t let your brain speed up your mouth’ oubyen ‘Don’t speed up your mouth avan ki ou brain i catch up avek.’

Mon dir sa akoz tou sa ki nou dir, tou sa ki nou fer i annan en lenpak.  E lafason ki nou fer keksoz, sirtou dan en konzontir kot nou pe apros en Eleksyon, nou bezwen montre poudir koman politisyen, nou responsab dan nou konportman, dan nou fason azir e dan bann keksoz ki nou dir.

Mr Speaker, dan son lentervansyon, Onorab De Commarmond, letan i pe segonn Mosyon, in koz lo en lartik ki’n aparet lo The Guardian e ki’n ganny mete lo bann rezo sosyal.  Sa lartik ki in fer referans a en pei ki, mon krwar sa Zournal in get the plot wrong totally: akoz sa lartik pa pe koz lo Sesel.  Mon dir sa akoz si en dimoun i santi li normal e i vwar li normal pour ki okenn Zournal aletranze i raport lo nou pei dan sa fason, then sa dimoun mon pou dir i pa kontan Sesel.

Mon dir sa dimoun i pa kontan Sesel akoz yer Mr Speaker, mon en Manm FPAC, nou’n fer en Meeting avek IMF e IMF pe dir nou poudir nou pei i lo bon semen.  Nou on track, nou pe meet nou bann targets. I pa fer premye fwa ki IMF i dir nou, nou on track, nou pe meet nou bann targets. I pa fer premye fwa ki World Bank osi in dir nou, ki nou on track e nou pe meet nou bann targets. E en eleman kle ladan, se Lendistri Tourism ki kontinyen performen, malgre i annan resesyon dan lezot pei dan lemonn.

E mon krwar inevitableman si par egzanp en dimoun pe get sa lartik, i pou pran Sesel parey sa bann lezot pei Lafrik kot i annan bokou dezord, bokou diskord ler i annan en Eleksyon.  E sa pou inevitableman annan en lenpak lo desizyon petet si sa dimoun pou dir, be mon a vin pas mon vakans isi an Desanm, parey nou konnen bokou bann dimoun aletranze, i pran sa letan Winter an Desanm pou zot vin pas zot vakans Sesel, oubyen dan bann pei pli so, dan bann klima pli agreab a sa moman.  E pour nou prezan vwar, krwar poudir sa i en keksoz ki normal, then nou bezwen annan en keksoz ki mal avek nou.

Mr Speaker, nou’n ariv en letap nou devlopman, kot i nepli fer sans pour koman en Seselwa ki kontan ou pei, fer en politik dezord, fer en politik diskord.  I nepli letan pou ou atak bann lenstitisyon, zis akoz ou oule score en pwen politik, san realiz lenpak ki ou pe fer lo sa bann menm Lenstitisyon pli tar, ki pou bezwen asire ki pei i kontinyen avans devan.

I nepli letan osi, pou ou lans bann latak personnel kont bann dimoun, akoz ou bezwen realize poudir sa bann dimoun zot osi annan zot bann siporter.  E par lefe ki ou pe lans:- ler mon pe dir en latak personnel, mon pe dir ou pa pe atak son Polisi, me ou pe atak sa dimoun personnelman, i pa fer sans Mr Speaker.

E se pour sa rezon ki mon kontan ki mannyer sa Mosyon in ganny worded akoz i pe dir ki sa Lasanble pe demann Gouvernman e tou Parti Politik, pou anmenn en Kanpanny dan lord ek lape e ki nou deplor okenn lesey, okenn lesey, pou kree en latmosfer enstab dan pei.

E the key word dan sa Mosyon Mr Speaker, se sa stabilite ki koman en nasyon nou’n zwir pandan plizyer lannen.  E ki’n fer nou progrese pandan sa bann lannen e ki ozordi bokou nou Seselwa, nou lavi in improve, kondisyon lavi nou fanmir in avanse, bokou nou bann zenn Seselwa in ganny sans al etidye, bokou nou bann zenn Seselwa ozordi ki’n etidye, pe pran la relev dan bann diferan fonksyon.  E nou, nou bezwen realiz sa.

Mr Speaker, dan Lasanble osi mon krwar i annan en saying ki dir: ‘Se ou latitid ki definir ki aptitude ki ou pou ale.’  E mon krwar se latitid at the end of the day ki reste apriyori, keksoz pli enportan ki nou koman en pti Nasyon, nou bezwen konsidere.

I pa normal Mr Speaker, pou fer alegasyon derogatwar ki afekte repitasyon ou pei e donn en move lenpresyon lo lafason ki ou Nasyon, dan son gran mazorite, i apros sa prosesis demokratik ki involve en Eleksyon.  I pa normal Mr Speaker.

E nou devret koman leaders, koman bann politisyen, nou devret pare pou nou konpran, akoz nou bezwen a sa moman la, fer keksoz dan en fason pli byen.  E sa ki mon apresye se ki Parti ki mon reprezante, i kontinyelman fer keksoz dan en fason smart. E mon kontan lapros ki Onorab De Commarmond in koz lo la bomaten, se ki ozordi ou vwar bokou keksoz ki ganny dir, ki pou ganny fer e nou get zot.  Nou get zot akoz nou anbarase pou nou vwar kot zot pa pe vwar lenpak zot aksyon.  Zot pe regard zot aksyon zis a sa moman ki zot pe fer li e non pa down the line, sa down stream effect ki ou aksyon pou anmennen.  Mon pou donn ou en legzanp tipik Mr Speaker.

Par egzanp, ou kapab annan ou en dimoun ki san realize, i atak en lot dimoun personnelman, i kontinyen atak sa lot dimoun personnelman, me selman demen, ou riske bezwen sa menm dimoun ki ou pe atak li personnelman.  Sa dimoun i kapab en Dokter, sa dimoun i kapab annan en lot fonksyon.  Mon pa vwar rezondet dan atak en dimoun personnelman, fer alegasyon personnel kont en dimoun, san ki ou realiz lenpak sa aksyon.  So, ou bezwen annan sa sivilite pou konpran akoz ou bezwen fer en Kanpanny dan fason dan lord ek lape.

Now, si ou santi koman en politisyen, ki the mountain is too big for you to climb. Ki par egzanp Parti Lepep petet i tro for pou ou batay avek li par egzanp. Then, ou annan 2 swa.  Swa ou give up ou dir, be, zot sa bann boug tro for.  Mon pa pou kapab lager ek zot.  So, ou join li. Sa ou swa.  I ou swa ki ou kapab fer.  Akoz inevitableman, nou konnen poudir Mr Speaker, mon pa pe preempt the Election results, me inevitableman Parti Lepep pou regannyen Eleksyon akoz se sa Parti ki’n toultan travay e krwar e konvenki ki sa pei i devret avans pli devan dan en fason drwat, dan en fason korek.  E si ou out there, ou en Seselwa ki panse ki i normal ki The Guardian ozordi i ekrir en lartik e i met en gro title:- ‘Trouble in Paradise’, then mon krwar ou bezwen seryezman analiz ou konsyans.  Si ou, ou menm ou, ou en operater en Guest-house, ou santi poudir sa bann Parti, sa ki The Guardian in ekrir i normal, then i annan en disconnection between sa ki ou pe fer dan ou aktivite e konprenezon larealite.  Akoz larealite se ki demen, sa menm dimoun ki pe lir sa lartik pa pou end up dan ou Lenstitisyon.

Mr Speaker, mon krwar nou’n toultan reste en beacon dan larezyon for stability. E mon deplor okenn lesey par okenn dimoun, pou kree enstabilite dan nou pei.  Mon deplor okenn lesey par okenn dimoun, pou fer bann alegasyon ki apre zot konnen napa fondman.  Mon menm deplor okenn lesey par okenn dimoun, pou tret okenn nou bann dirizan lepase dan okenn fason derogatwar.  Akoz let’s face it.  Sa bann dimoun in travay pou anmenn nou pei ariv pli devan.  E nou bezwen donn zot sa respe.

Mr Speaker, at the end of the day i reste en keksoz fondamantal.  Malgre ki nou, nou’n pare pou aksepte poudir ou annan ou fason fer keksoz, nou osi pare pou dir ki me si ou, ou kontinyen vin dan nou figir, ou kontinyen atak nou, nou pou bezwen osi replike.  E se pour sa rezon ki nou, nou pe lans en lapel e nou pe edik lepep Seselwa pou li konpran poudir, ou annan en swa pou ou fer ler ou al vote.  Swa ou vot pour stabilite e kontinite, swa ou fer en lot desizyon.  Me le swa i reste pour ou.  Akoz ozordi, ou bezwen realize poudir nou pei i stab.  Malgre tou sa ki ganny dir lo nou pei, eksper apre eksper i vin Sesel, i dir ou poudir Sesel i on track.  I dir ou poudir nou pe zwenn nou bann target.  Sert, i annan bann limitasyon.  So, i pa kapab ki tou sa bann dimoun ki pe vin Sesel lannen ale, lannen vini, i mal.

Se pour sa rezon Mr Speaker, ki mon krwar mon’n dir poudir sa Mosyon i vin a en moman tre propis e i donn nou Lasanble en loportinite.  E mon ti a kontan ki medya osi i zwe son rol.  Par egzanp ozordi sa deba, carry sa deba to each and every home, pou nou edik Seselwa, pou nou edik nou pep, pour nou fer konpran nou pep ki i enportan ki nou fer keksoz dan respe, nou fer keksoz dan lape e nou toultan respe armonye antre nou Seselwa.  Se sa ki enportan.

Si ou anvi fer ou Kanpanny, ou anvi fer ou rasanbleman, nou fek pas Lalwa lo la.  Ou fer ou rasanbleman, ou fer Kanpanny.  Me pa estige.  Pa gognarde.  Akoz si ou gognard en dimoun e an retour sa dimoun i replike, ou pa kapab apre kriye, foul.

Mr Speaker, an konklizyon, mon rapel tre byen pandan Eleksyon 2011.  O moman ki medya ti pe koz avek bann diferan Leaders politik, ti koz ek tou bann Leaders, ki mannyer Eleksyon pe ale.  Mon rapel ki ler zot ti koz avek Prezidan Michel sa letan ki ti nou kandida, i ti dir be lepep i a fer son desizyon.  Lepep pe fer son desizyon. I ti koz ek lezot Leaders osi, bann lezot Parti Politik.  Zot tou ti dir, lepep pe fer zot desizyon.  Tou keksoz pe pas byen.  Zot dakor ki mannyer keksoz pe pase.  Me low and behold, ler rezilta Eleksyon i anonse, nou tay dan en kwen, nou kriy, foul. Now, lepep i devret note sa.  Lepep i devret remarke sa.  Eski nou pou annan menm latitid safwasi, kot la tou keksoz i ok, nou pe campaign, nou tou nou pe fer pase nou mesaz, nou tou nou pe fer pase nou lideolozi, nou tou nou oule fer pase nou mesaz, nou plan.  Me ler rezilta pou anonse, nou pa pou dakor avek rezilta.

So, nou bezwen pare pou nou konpran e annan en leta lespri pli matir, dan lafason ki nou tret nou prosesis demokratik.  Nou bezwen annan en leta lespri pli matir pou nou dir, be ok, mon’n perdi.  Mon’n perdi because the better candidate won.

Mr Speaker, mon konvenki ki lamazorite, dan son gran mazorite son pli gran mazorite safwasi, lepep Seselwa i konnen kote stabilite i ete.  Dan son pli gran mazorite, lepep Seselwa i konnen lekel ki annan en misyon e en vizyon pou anmenn sa pei pli devan.  E mon krwar dan son gran mazorite, lepep Seselwa pou ekout mesaz ki nou Lasanble pe pase ozordi e ki nou pou sey fer keksoz dan en fason annord, dan lape.  E ki nou pou deplor okenn, okenn mezir pou kree enstabilite dan nou pei.  Annou pa les nou pei retourn deryer, akoz serten nou i santi poudir nou annan en azanda personnel ki nou oule avanse.

Avek sa bref lentervansyon Mr Speaker, mon oule dir ki mon pou donn mon sipor pour sa Mosyon.

Mersi.

MR SPEAKER

Onorab Joevana Charles.

HON JOEVANA CHARLES

Mersi Mr Speaker.

Mr Speaker, mon pran laparol, pou dir de mo lo sa Mosyon e pou siport li.

Mr Speaker, depi lanons milti parti dan Sesel an 1991, nou’n pas atraver en Referendum e plizyer Eleksyon, kot bann tranzisyon si ou oule, pour mwan ti pas ase byen.  Me safwasi avek teknolozi tre avanse dan nou pei, mon santi ki sa Eleksyon in vin enn ki pe anmenn e mon redir ankor, enn ki pe anmenn bokou plis lesey pou diviz bann fanmir, bann zanmi e kree en latmosfer enstab dan pei.

Mr Speaker, mon santi ki lanmour pe ganny ranplase par laenn, lonnekte par lensilt e laverite par manti.

Mr Speaker, mwan pase, 3 mon gro lisyen ti mor.  Premye, Veteriner ti krwar ki in manz zerb ki ti’n fek ganny spray, ki ti touy li.  En semenn apre, dezyenm osi ti ganny menm sentonm.  Me malgre ki zot ti esey fer tou pou sov li, pwazon ti tro for, i ti mor li osi.  Trwazyenm, ler premye dimoun i ariv kot lakaz apre 4 er, ti vwar li in mor.

Mr Speaker, ti sagrin nou akoz nou lisyen ti nou sekirite e nou zanmi.  Konklizyon alor ki nou ti tire dan lakour, sete zot pe touy nou lisyen pou zot kapab antre e vin vole.  Alor, sa ti fors nou revwar nou sistenm sekirite kot lakour.  Zanmen a en moman donnen, ki nou ti mazinen ki touy lisyen ti’n vin en zouti politik pour nenport mon pa konnen lekel, oubyen pou destabiliz oubyen fer ditor okenn politisyen.

Mr Speaker, pa oubliye sa i enn premye.  Sa i en kalite lafreyer ki zot pe senm parmi nou bann dimoun.  Zot konn tre byen ki bokou fanmir i kontan zot zannimo.  Alor, in ler la kot nou’n arive, pou nou aret zwe rikord politik avek lisyen.

Mr Speaker, fini ek lisyen zot pran Larelizyon.  Lopozisyon zot trouve ki i annan politisyen ki’n deside servi krwayans relizye pou ganny lavantaz politik.

Mr Speaker, mwan kot mon Larelizyon i konsernen, mon serye.  E pou mwan sa size larelizyon i tre, tre serye e enn ki tre sansib.  Pa ni politik ki ti anmenn mwan dan Larelizyon kot mon ete e pa ni zot ki pou tir mwan.

Mr Speaker, ou vwar sa bann politisyen, zot memwar i vreman kourt.  Zot oubliye lekel ki ti fer politik dan Legliz e dimoun ti leve ti ale.  Zot oubliye dan ki bann lepok ki dimoun ti pe aret al Lanmes.  Zot oubliye kote e akoz.  Sa ki zot devret pe fer ozordi se ankouraz dimoun pou partisip plis dan zot lafwa relizyez.  Eski si en politisyen i al Legliz, se pou zwe lo santiman bann kretyen pour lavantaz politik?  Eski si en politisyen i al Lanmes, se zis pou donn li lenpresyon, ki i en bon pratikan?  E eski si en politisyen i al Lanterman pou al siport son bann dimoun, vedir i pa senser, i pa onnet?  Si sa bann dimoun pa ti kontan zot bann dirizan vin senpatiz avek zot, zanmen zot ti pou remersi zot bann dirizan piblikman.

Mr Speaker, malere boufon, zwe poupet baba friyapen, zwe kouk kasyet dan lalin kler, napa bokou zot ki’n zwe dan sa Lasanble, apard mwan.  Sa bann dimoun, ki pe fer krwar zot pe anbet nou e senm bann kalite kalonmni lo Larelizyon, Lanterman, la mon anvi dir zot ozordi. Al rod en keksoz pli enportan, pli prodiktiv e pli enteresan pou fer.

Si zot anvi vin en bon politisyen, mon lapel avek zot ozordi se ki zot bezwen vin pli serye.  Zot bezwen respekte lopinyon tou dimoun.  Zot bezwen annan tolerans.  Zot bezwen onnet e senser ek zot lekor.  Zot bezwen konekte ek zot dimoun, parey Prezidan Michel i kontinyen fer e zot a konn dezir e laspirasyon zot dimoun.  Zwe lo moral dimoun pa pou anmenn zot okenn par.

Alor ozordi Mr Speaker, mon’n dir napa malere boufon, napa zwe poupet baba friyapen, napa zwe kouk kasyet dan lalin kler.  Me nou annan ledikasyon mandatwar pour 10an.  Nou annan Post Segonder e son dirasyon i depan lo karyer ki ou anvi pran.  Nou annan Liniversite Sesel e IT Mr Speaker, tou sord kalite.  Menm ki mon per pou nonmen pangar manrmay a riy mwan.

Mr Speaker, se sa ki pou fer dimoun deside pour ki zot pou vote.  Nou viv dan en pei demokratik.  Tou dimoun i annan son Drwa.  Drwa siport nenport Parti ki i swazir.  Son Drwa Vote i inik pour li.  Drwa Lekspresyon, a kondisyon ki i pa ensilte mwan, akoz mon Parti ki mon siporte.  Drwa son Larelizyon ki li i siporte.  Ozordi dan sa pei, tou krwayans i ganny aksepte.  Tou Seselwa i lib pou eksprim zot.

Mr Speaker, akfer nou bezwen ensilte nou bann dimoun e dir ki zot sourd e pa vwar kler?  Akfer nou bezwen fer bann latak personnel lo nou Per Fondater?  Si nou la kot nou ete ozordi, se gras a li.  Akfer nou bezwen dir en bann propagann ki ensit vyolans par bann texts?  Akfer zot bezwen montre lafason ki zot pou trenn Prezidan Michel apre Eleksyon?  Kwa sa Mr Speaker?  Oli respe?  Akfer nou bezwen fer kalonmni lo nou vwazen, fer bann fo alegasyon?  Akfer nou bezwen senm lafreyer dan bann travayer, an di-z-an, ou pou ganny pouse si Prezidan i ganny lot Eleksyon?

Mr Speaker, sa bann zafer in tro bokou.  I zwe lo moral nou bann dimoun e sa osi i met lafreyer.  I kree laenn dan nou bann dimoun.  Me malgre, nou nou’n dir avek nou bann dimoun, reste trankil.  Nou konnen i pa fasil pou les en dimoun ensilte ou e ou pa reponn.  Rann zot repons dan bwat vote, akoz lensilt pa pou anmenn zot okenn par Mr Speaker.

Mr Speaker, ki en dimoun i gannyen dan lensilte, dan koz lalang, fer kalonmni e atak Prezidan personnelman ek son zanfan?  En zanfan ki inosan, i repet avek lezot zanfan.  An retour zanfan i anmenn dan lakour.

Dir mwan Mr Speaker, apre tou sa ki Prezidan in fer pour sa zanfan, pour sa fanmir.  Apre nou rode, oli moral.  Ler Eleksyon, nou oubliy nou zanfan e nou vwar zis James Michel.  Nou oubliye ki Prezidan Michel i Prezidan nou pei.  Oli respe Mr Speaker?  Prezidan Michel i sikseser nou Per Fondater.  Silvouple, annou aret denigre zot.  Annou donn zot respe.

Mr Speaker, mon kontan mon’n kapab azout mon lavwa, avek lezot Onorab ki’n koz avan mwan lo sa Mosyon.  I annan bokou dimoun ki’n zis tann portvwa kot Taksi Stenn Pirat, me zot pa vwar e antann bann Zournal e zot pa vwar lezot medya.  Vwar kwa e ki kalite lafreyer ki Lopozisyon pe semen, pou rod senpati e kree enstabilite dan nou pei.

Mr Speaker, mon pou terminen an di-z-an sa.  Nou pei e nou lekonomi i depan bokou lo Lendistri Tourizm e okenn provokasyon ki kapab senm laterer, parey ki pe aktyelman ganny fer lo bann medya sosyal, pou kapab anmenn lenpak negatif lo nou pep.  Koman en Manm Parlman ki pa’n zanmen krwar dan lensilt, ni dan okenn provokasyon vyolans okenn dimoun akoz son krwayans politik e ki krwar dan en klima stabilite, mon pe lans en lapel ozordi ek mon Parti, Parti Lepep, osi byen ki tou lezot Parti Politik, pou dezasosye zot avek bann menas ki kapab provok vyolans.  Malgre tou nou bann diferans politik ki nou pei in fer fas avek dan lepase, nou’n kapab koman en pep, sirmonte.

Sa enn Eleksyon ki pe vini, pa en leksepsyon.  Annou fer li byen.  Politisyen pa la pou fer kankan, pou senm laterer, me plito pou siport devlopman la demokrasi dan nou pei.  Nou Nasyon i en Nasyon solid, for.  Si ou kontan ou pei, si ou kontan Sesel, annou aret rod senpati politik.  Les Seselwa fer zot swa.

Ki Bondye i kontinyen beni nou pei e fer ki i osi gid tou Parti Politik ver en tranzisyon politik sivilize dan lord e lape.

Mon remersi ou Mr Speaker.

MR SPEAKER

Onorab Maria Payet-Marie.

HON MARIA PAYET-MARIE

Mersi Mr Speaker.

Mr Speaker, pour mwan i en plezir e egalman enportan ki mon a-port mon sipor a sa Mosyon, table par Onorab Marie-Antoinette Rose, Leader Zafer Gouvernman dan Lasanble Nasyonal, ki pe demann Gouvernman e tou Parti Politik pou anmenn en kanpanny dan lord e lape e ki nou deplor okenn lesey pou kree en latmosfer enstab dan pei.

Mr Speaker, Sesel koman en pti leta zil ki pe devlope, malgre tou defi ki i annan, i ganny rekonnet enternasyonalman koman en pei ki stab.  En pei ki stab ekonomikman, ki fer ki plis envestiser i kontinyen vin envestir Sesel e sa i enportan pour nou lekonomi.  E en pei ki stab politikman, kot napa lager, napa versman disan, ki fer ki nou pe kontinyelman vwar en logmantasyon dan viziter ki pe vin Sesel, senpleman akoz isi Sesel, napa nanryen pou zot per, akoz zot kapab osi profit zot vakans dan nou zoli pti paradi, dan trankilite, san ki zot bezwen mazinen si en leta vyolans i deklare, kot zot a kapab vwar zot vin viktim.

Mr Speaker, Sesel i en pei ki osi stab sosyalman, ki fer ki devlopman i tous tou kous nou popilasyon.  Nou sitwayen i benefisye e sa i ankouraz nou bann pei zanmi, sirtou bann ki annan plis resours ki nou, pou kontinyen asiste nou par egzanp avek lekspertiz ek donasyon, pou nou avans pli lwen dan nou devlopman.  Alors Mr Speaker, wi.  Sesel i en pei ki stab e sak sitwayen san leksepsyon, menm avek nou diversite lopinyon, nou devret mazin Sesel avan tou e antretenir pou gard sa stabilite, ki swa avan, pandan e sirtou apre Eleksyon.

Mr Speaker, Prezidan Michel pe ankor enn fwa met son kandidatir pour sa prosen Eleksyon.  I pe fer li akoz i santi ki i bezwen kontinyen sa bon travay ki li avek sipor lamazorite Seselwa ki’n ralye deryer li, ki nou’n komanse e nou bezwen kontinyen.

Mr Speaker, malgre tou sa lenerzi, sa zefor, travay dir ki Prezidan Michel pe fer pour byennet Sesel e Seselwa, i pou toultan annan serten lezot ki pa pou zanmen satisfe avek tou sa ki i pe fer pour Sesel e Seselwa.  E sa i normal.  I enportan rekonnet kantmenm ki lamazorite Seselwa in fer bokou pou nou ariv sa zistans kot nou ete ozordi.  Ozordi nou pei i ganny renonmen e respekte pour bokou keksoz, enkli bann stratezi demokratik e devlopman soutenab, ki sa Gouvernman, anba direksyon Prezidan Michel in met an plas.

Mr Speaker, bokou pei, menm bann ki pli devlope ki nou, pe admir e respekte e menm pran legzanp nou pti pei Sesel.  Ozordi Seselwa i fyer pou voyaz aletranze akoz nou pei, nou Nasyon, nou dimoun i ganny regarde avek dinyite e respe.  E bokou lezot Nasyon ti a swete pe viv parey nou.  Ozordi Seselwa, san leksepsyon, pe gannyen e profit bann loportinite avek lespri antreprener, ki’n karakteriz nou Nasyon depi dan son rasin.  Annou ansanm konsidere pou pa met sa valer an zwe, zis akoz politik, pour prosperite tou Seselwa, san leksepsyon.

Mr Speaker, pou al direkteman lo kanpanny Eleksyon, mon krwar ki tou Dirizan tou Parti Politik ki’n ofisyelman anrezistre pour sa prosen Eleksyon isi Sesel, zot devret pe zwe zot rol koman Leaders tre byen.  Zot devret demontre lasazes e montre lepep Seselwa sa vre leadership.  Zot devret pe met linite ek stabilite koman labaz zot kanpanny.  Annou pa oubliye ki ler ki tou keksoz in terminen, Eleksyon in fer, lavi pou kontinyen.  E se sakenn de nou ki pou kontinyen viv li.  Bann Dirizan Parti Politik i bezwen demann avek zot lekor ki kalite Nasyon ki zot anvi dirize.  Dan ki leta sa Sesel ki zot pe aspire pou dirize, i merit ete.  Eski zot pe anvizaze vwar en Sesel kot Seselwa i divize e pa kapab koste kanmarad parey nou pe vwar lo CNN toulezour?  Eski nou anvi en Sesel, kot tou nou bann aki ki’n pran nou lannen, lasyer ek lenerzi pou konstrir, ganny detrir dan en klendey akoz politik in fer nou vin lennmi nou prop frer ek ser?  Eski nou anvi nou zanfan i grandir dan en Sesel kot lape i zis en memwar e stabilite i zis bann portre dan listwar?  Alor, zot devret demann avek zot siporter pou fer zot kanpanny byen an respektan lezot.  Zot devret demann avek zot siporter pou fer zot devwar koman en sitwayen Seselwa, koman en voter byen, dan lape, san ensilte personn e san ensit vyolans.

Parey mon’n deza dir Mr Speaker, i pa pou fer sans pou nou detrir sa latmosfer lape ek stabilite ki karakteriz Sesel zis akoz en rezilta Eleksyon, akoz nenport ki Parti ki raport sa Eleksyon, pou bezwen fer li son devwar pou respekte, promouvwar e enplimant la demokrasi dan son bann stratezi e nou tou nou konnen ki dan en demokrasi, ki lepep i annan pouvwar e san lord, san lape, pouvwar lepep pou zis kree dezord ek enstabilite.

Mr Speaker, touzour dan sa lespri lord ek lape, Mardi le 13 Oktob, Komisyon Eleksyon ti fer rapel avek tou Parti Politik pou demann tou zot bann siporter pou egzers disiplin, an respektan zot oponan.  Komisyon Eleksyon ti fer resorti ki tou Parti Politik i asire ki Kanpanny Eleksyon i ganny fer dan en latmosfer ki byen, kot napa entimidasyon ou menas e lezot lakizasyon ki kapab kree lakoler e ankouraz dezord.  Ozordi mon profite pou sezi sa lokazyon pou siport sa demann par Komisyon Eleksyon e demann bann Dirizan pou enplor zot siporter ki pe partisip dan Kanpanny Social Media dan bann diferan group, pran en desizyon e komans partaz linite e lanmour, olye laenn antre zot.  Apre tou, se sa bann siporter ki form en bon poursantaz voter e bann Dirizan Parti Politik pa devret pe ankouraz lesanz negativ e menm parler, ensitasyon vyolans antre zot siporter.

Mon repete Mr Speaker.  Fodre pa nou les politik diviz nou.  I byen nou siporte me i osi byen ki nou fer li an respektan lezot nou bann frer avek ser.

Mr Speaker, pou konklir, mon demande ki tou Parti Politik i respekte sa Code of Conduct, prepare e prezante par Komisyon Eleksyon, avek tou Parti Politik resaman.

Mr Speaker, mon pou osi lo non tou mon bann frer ek ser Seselwa ki mon’n koz avek o size sa Mosyon ozordi e ki pa neseserman siport menm Parti Politik ki mwan, pou demande ki pandan sa letan Eleksyon, nou mazin byen konsekans nou aksyon.  Pandan sa Eleksyon, nou mazin lavenir nou pei e non pa detrir nou pei. Nou pa kree dezord e sirtou pa les politik diviz nou.  Pandan sa Eleksyon e osi apre Eleksyon, pou nou kontinyen senm lanmour ek lape.  Ki tou bann Leaders zot koz ek zot siporter e ankouraz zot pandan sa letan Kanpanny e osi byen ki apre Eleksyon, pou siport zot Parti byen, dan lord ek lape.  Eleksyon i zwe en rol enportan e signifikan anver prosesis lape dan en pei.  I neseser ki tou i ganny fer alors, pour ki sa lobzektif i ganny realize pour ki maximum benefis pozitiv pour nou pei, i ganny prezerve e akonplir.  Apre en Eleksyon, lavi i kontinyen e konsekans nou aksyon apre sa Eleksyon pou byensir baze lo nou konportman e latitid.

Mr Speaker, mon pou siport sa Mosyon akoz mon krwar ki nou osi koman bann Leaders isi dan sa Lasanble, nou devret ankouraz sa prosesis Eleksyon pou deroul byen dan lord ek lape.  Frer ek ser Seselwa, annou respekte lopinyon lezot.  Pa les politik, pa les sa rezilta Eleksyon diviz nou.  Annou remersi nou Met, pour ki Sesel nou ankor pe viv dan lape e larmoni antre nou.

Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.

Mr Speaker, Mosyon table par Onorab Rose, Leader Zafer Gouvernman dan nou Lasanble, ki pe dir sa Lasanble pe demann Gouvernman e tou Parti Politik, pou anmenn en Kanpanny dan lord e lape e ki nou deplor okenn lesey pou kree en latmosfer enstab dan pei.

Wi Mr Speaker.  Lavey sa Eleksyon Prezidansyel ki pou fer le 3, le 4 e le 5 Desanm, mon vwar sa Mosyon i annan en lenportans Kapital, kot nou senkyenm Lasanble pe azout son lavwa oubyen zwenn avek lezot Lorganizasyon parey bann groupman Relizye, Sosyete Sivil e menm serten endividi ki’n deza fer zot deklarasyon lo sa size, ki sa Kanpanny Eleksyon i ganny fer dan lape, kot tou bann Leaders Parti Politik i pran responsabilite pou pas sa mesaz lape ek zot bann siporter oubyen senpatizer.

Mr Speaker, Prezidan Michel lo komansman son travay, apre son gran laviktwar dan Eleksyon an 2011, in koz lo plizyer pwen enportan ki i pou baz son travay e atas bann gran lenportans.  E sa enn se kontinyen vwar ki la demokrasi i kontinyen ganny devlope dan nou pei.

Wi Mr Speaker.  En baz fondamantal demokrasi se ler en pep i vote libreman, en laverite absoli, en realite absoli se ki Sesel ozordi i en pei, i en leta souveren e endepandan, kot nou demokrasi pe palpite.

Mr Speaker, Dirizan Parti ki mon reprezante isi dan Lasanble in renouvle nou lapel dan piblik pandan son Diskour Leta Lanasyon sa lannen.  Prezidan Sesel, Leader nou Parti, in demande ki nou tou ansanm, nou anbras sa nouvo ler, nou sezi sa loportinite e legzizans istorik san presedan, ki pe soufle tre for dan larsipel Sesel e ki pe demann Sesel, pe demann tou Seselwa pou ralye e senm mesaz linite e lape.

Mr Speaker, mon reste konvenki ki nou tou ansanm, en sel swa linite.  Linite Sesel, linite popilasyon Seselwa i bezwen depas tou form manifestasyon bann legois ek lanbisyon politik e satisfaksyon endividyel.

Mr Speaker, ozordi Sesel pe selebre trantyenm Festival Kreol.  Nou vwar en pep ki’n desann, pe ralye dan linite pou partisip dan bann aktivite.  Se sa ki sa Mosyon pe demande.  Malgre nou diferans politik, nou koman en Nasyon, dan menm lespri nou fer nou Kanpanny Politik dan lord e lape, an respektan tou bann Lalwa ki an plas.

Mr Speaker, napa en pei dan lemonn ki immune, ki pa’n zanmen fer fas avek dezas, koman en fenomenn natirel.  Dezas i vin dan diferan laform me sa ki enportan, fodre en pei i annan bann plan e striktir ki klerman definir ki mannyer pou minimiz risk dezas ler i arive.  E ki mannyer nou, koman en pei, nou prepar nou pou administre avek lefikasite, nenport ki kalite dezas.

Mr Speaker, nou tou nou konnen ki ler dezas i arive, i koz plizyer kalite problenm.  Parfwa, i annan gran risk ki en pei i tanporerman aret son fonksyon normal.  Plizyer presyon i ganny mete lo enn ou plizyer kominote.  Son lenpak lo lavi imen, lenpak lo lanvironnman, son lenpak ekonomik, lenpak materyel, son lenpak lo sosyete an zeneral.

Mr Speaker, mon’n servi sa legzanp dezas akoz se sa ki arive ler i annan en Kanpanny Politik ki pa ganny fer dan lord e lape.  Dezas politik se zonm ki fer e se zonm li menm ki kapab anpes arive.

Mr Speaker, nou swiv lo Televizyon atraver lemonn, ler i annan dezord politik, kot pep i soufer, sirtou bann ki pli vilnerab parey bann vye dimoun, bann zanfan, bann dimoun avek dezabilite.  Ou vwar ki bann servis esansyel i ganny enteronpe, parey nou bann sistenm kominikasyon, sistenm lasante, ledikasyon, distribisyon delo trete ou sistenm transportasyon e bokou lezot servis ankor.  Tousala i annan gran potansyel pou annan plizyer lefe advers lonterm lo nou sitwayen.

Mr Speaker, Sesel in pas atraver plizyer Eleksyon.  I annan bann moman ki gou be osi bann moman tre tris, ki’n anmenn bann dega materyel.  In afekte dimoun psikolozikman.  Plizyer dimoun ziska ozordi, i ankor tromatize.  Son lefe emosyonnel i ankor la e ekonomikman, in kout pei en kantite larzan.  I annan menm pei ki’n pas atraver dezord politik, pa ankor kapab rekipere ziska ozordi.

Mr Speaker, nou koman Manm Parlman, mon santi mwan tre onore pou koz lo sa Mosyon, pou propaz sa mesaz lape parmi nou popilasyon.

Mr Speaker, apre Eleksyon, lavi sa pep i kontinyen.  Nou reste koman en sel Nasyon.

Mr Speaker, pou anbras vre valer lape e linite Nasyonal, dan konteks Sesel, i demande ki Leader tou Parti Politik i dabor rekonnet nesesite absoli, ki koman en pti pei, Sesel e popilasyon Seselwa i vreman bezwen linite e non pa divizyon, si pou nou fransir sa nouvo frontyer dan nou demars pou kree sa ‘Nouvo Sesel.’

Mr Speaker, nou lespri patriyotik, nou lespri lwayote, nou lespri Sesel avan tou i bezwen ganny ranforsi.  I bezwen ganny devlope ankor plis si nou vreman anvi ki nou fer sikse dan nou demars pou annan en Kanpanny dan lord ek lape.

Mr Speaker, Linite Nasyonal i labaz rekonesans.  Avan tou e apre tou, i bezwen sosyete kot nou depouy nou lekor avek bann lespri endividyalis e legois personnel.  Nou met bezwen tou sitwayen Seselwa dan pozisyon priyoriter.

Mr Speaker, Nasyon Seselwa i en pep entelizan.  Nasyon Seselwa i konnen ki debout e ganny vote pou vin en Prezidan en pei i pa en zwe lasans ou en lotri, ou aste en tiket e apre espere pour ou sans monte.

Mr Speaker, debout lo latet direksyon en Pei p-ei i serye.  Nou’n pas atraver en moman ki nenport fo pa ki ou fer, i potansyel-man kapab briz tou ou lespwar.  I potansyel-man kapab provok destabilizasyon dan nou sistenm koezyon sosyal.  Annou pa fer okenn fo pa dan nou zizman.  Sesel i ozordi plis ki zanmen, i annan en laswaf pour plis koezyon sosyal.  En laswaf pour plis stabilite.  En laswaf pour plis sekirite.  En laswaf pour plis krwasans ekonomik.

Mr Speaker, mon reste konvenki ki Sesel, ki popilasyon Seselwa in ariv lo en nivo matirite, ki pou fer li posib pou ankor enn fwa montre lemonn nou grander lespri.  Montre lemonn ki nou kapab anmenn en Kanpanny dan lape e stabilite.

Mr Speaker, ou ava dakor avek mwan, nou pti an grander me ki nou pwisans an lespri e aksyon e ki ozordi, ki nou reste touzour en pep determinen e ki ozordi koman en pti leta zil, nou reste determinen pou reklanm en plas lezitim dan sa lemonn ranpli avek defi e ki nou’n pare pou bouz devan dan linite.  Ki Bondye i kontinyen beni Sesel.  Ki Bondye i kontinyen gid nou pou fransir sa nouvo frontyer e reisir dan nou demars pou batir en ‘Nouvo Sesel’, kot tou nou pep dan lape, respe, sekirite ek larmoni, i konn vre boner e prosperite dan lavi.  I mon swe senser pour mon Sesel.  Sa nou sel patri.  Annou fer li pour Sesel.

Mr Speaker, mon remersi ou.  Mon pou vot an faver sa Mosyon.

Mersi.

MR SPEAKER

Onorab Leader Lopozisyon.

HON DAVID PIERRE

Mersi Mr Speaker.

Mr Speaker, tou Seselwa ki sain, tou Seselwa ki sivilize i devret kapab konpran lenportans stabilite, lenportans lord, lenportans lape dan en pei.  PDM ozordi i ganny gete koman en Parti Politik ki respekte Drwa fondamantal tou Seselwa, enkli son Drwa pou li rasanble dan lape, son Drwa pou li swiv son Parti Politik, eksetera.  Nou ganny respekte pou etre en Parti ki refize ensilte bann dimoun endividyelman e nou touzour pare pou nou respekte tou Lalwa pei, enkli bann Drwa ki Konstitisyon i donn nou.  Se pour sa rezon ki lo mon kote, an relasyon avek nou Parti, mon pa trakase ki mon bann siporter pou involve dan bann aksyon ki kapab kree dezord dan pei, akoz zot in ganny edike pou zot travay dan lape e travay dan lentere Sesel e dan lentere Seselwa.  Nou respekte tou Larelizyon.  Nou respekte tou Parti Politik.  Nou respekte tou bann Leaders bann Parti Politik.  Nou fer li akoz nou anvi stabilite kontinyel dan nou pei e nou rekonnet poudir ler ou dan en Parti Politik, ou pou toultan annan bann diferans dan lopinyon, dan fason fer keksoz, dan fason trouv keksoz, an relasyon avek bann lezot Parti.  Me i osi toultan annan en posibilite pou nou premyerman rezourd nou diferans dan en fason sivilize, oubyen tonm dakor, oubyen agree ki nou annan en diferans.  E nou agree lo en baz lape.  Nou osi fer li akoz nou konpran lenportans stabilite, an relasyon avek lafason ki en Nasyon i sipoze viv.  Nou pep i devret kapab pe viv en lavi ki normal.  Seselwa i bezwen viv en lavi normal, kot napa ni lafreyer, kot zot pa ganny entimide, kot zot kapab viv zot bann Drwa san restriksyon, apard ki restriksyon ki Lalwa li menm i mete lo zot.  Si prezan i annan Lalwa ki met serten restriksyon, kot sa restriksyon i abiz en Drwa ki Konstitisyon i donnen, then sa Lalwa i touzour kapab ganny challenge e revize e amande.  Se koumsa ki nou Parti i get sityasyon lavi e sityasyon politik.

Nou krwar osi dan stabilite akoz nou konnen poudir i bon pour biznes, sirtou lefe ki en kantite biznes i depandan lo nou Lendistri Touris e stabilite for the Tourism Industry i en keksoz ki primordyal.  En kantite biznes Sesel i kapab ganny enormeman afekte si i annan enstabilite.  Depi si ou en Drayver Taxi, depi si ou annan en laboutik, depi si ou en Peser, si ou en Fermye, si ou en Lotel oubyen ou travay dan en Lotel, eksetera, enstabilite pou anmenn en lenpak direk lo ou.  So, as much ki nou kapab gard stabilite, gard lape e rezourd nou bann diferans dan en fason vreman sivilize, nou dan PDM nou satisfe avek sa.

Mr Speaker, stabilite i osi promot devlopman ekonomik ki promot lanplwa, ki donn lanmen kree larises pour Sesel e larises i ganny partaze dan en fason ekitab a tou dimoun, kot tou dimoun i ava benefisye.  Me selman, i enportan Mr Speaker, pou nou osi refer sorti ki Lotorite i annan en rol primordyal pou zwe, an relasyon avek lape, avek stabilite.  Nou bezwen fer sir ki koman Lotorite, pei i bezwen fer sir ki i annan an plas bann mekanizm, i annan an plas Lalwa apropriye, ki pou permet nou protez tou Seselwa, enkli zot bann Drwa.  Nou bezwen fer si ki napa okenn Seselwa ki ganny abize akoz sa osi pou ede kree enstabilite.  So, nou bezwen fer li byen e nou bezwen get the whole picture.  Parey nou dir, nou bezwen get the big picture.

Alors, kant a mwan avek nou Parti Politik, nou pou pran sa responsabilite pou nou refrain from okenn keksoz ki kapab kree en sityasyon ki pou anmenn enstabilite dan Sesel.

Mr Speaker, pour mwan mon krwar zot konnen poudir mon pa zanmen ensilte okenn Leader en Parti Politik.  Ni Leader Parti Lepep, ni Leader SNP, ni Leader Lalyans, ni Leader ICUS, ni Leader SUP e lezot ankor.  Me selman, i ironik Mr Speaker.  Mon ganny ensilte akoz mon pa ensilte.  Me selman, mon reste trankil.  Mon rise above sa bann dimoun ki pe ensilte mwan akoz pour mwan, there’s absolutely nothing ki en pep i kapab gannyen ler son Leader, ler enn parmi son bann Leaders i ensilte lezot dimoun.  To the contrary, lepep i stand pou ganny plis, letan son Leader i angaz li dan bann travay politik ki konstriktiv pour son pep e pour son Nasyon.  Se sa fason ki mwan mon vwar mon travay politik.  En responsabilite ki gro, ki lour, me ki annan lenportans pour tou Seselwa.  Alors, mon’n toultan fer li dan dinyite, avek lentegrite, dan lape, pour ki mon travay i anmenn benefis pour Sesel e pour Seselwa.

So, mon lapel mwan osi ki mon lanse avek tou bann Leaders, se annou refrain from bann keksoz ki pou anmenn dezord e enstabilite e mon lapel pour Gouvernman se kontinyen kree sa lanvironnman, fer sir zot kree sa lanvironnman ki pou permet tou endividi dan Sesel viv zot Drwa, pour ki nou kapab viv dan lape e viv dan stabilite.

Mersi Mr Speaker.

MR SPEAKER

Leader of Government Business, Right Of Reply.

HON MARIE-ANTOINETTE ROSE

Mr Speaker, i fer mwan en gran plezir ki nou tou otour sa latab, nou dakor ki:- e mon pe asim ki sa Mosyon i devret pase e ki nou merit pas en mesaz tre kler avek bann Leaders, ek bann siporter, pou nou fer sir ki Sesel, pandan sa peryod Eleksyon i en moman ki annan lape, ki i annan lord e ki i annan stabilite.

Avek sa Mr Speaker, mon osi mon demande ki Bondye i kontinyen beni nou pei.  Nou en pei ki beni, nou en pei ki blessed.  E koman bann krwayan e mon mazinen tou Seselwa i annan en krwayans dan en Met.  Koman bann krwayan, nou bezwen osi kontinyen zwenn Legliz e priye pour ki nou pei i kontinyen annan lape ek stabilite.

Avek sa Mr Speaker, mon pou remersi tou bann speakers e tou bann dimoun ki’n pare pou siport sa Mosyon.

Mersi.

MR SPEAKER

Bon, in ler pou nou pran en vot lo sa Mosyon.

Tou bann ki an faver?  Okenn ki kont?

Mosyon in pase a inanim.

Donk, pour ozordi nou fini nou travay e nou pe adjourn ziska le 10 Novanm.

Savedir Mardi prosen nou pa pe zwenn.  Nou pou zwenn le 10 Novanm, 9er bomaten.

(ADJOURNMENT)