::
Home » Verbatim » Verbatim - Third Term 2015 » tuesday-13th-october-2015

tuesday-13th-october-2015

NATIONAL ASSEMBLY OF SEYCHELLES

Tuesday 13th October 2015

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Onorab.  Bonzour Minis e son delegasyon.  Ozordi dan Galeri nou annan bann zanfan lekol primer Anse Etoile.  Nou swet zot labyenveni parmi nou.  E mon osi dir bonzour tou bann dimoun ki pe ekout nou dan lakour.  Ozordi avek nou, nou annan Minis pour Tourizm e Kiltir, Mr. Alain St Ange ki vin reponn plizyer kestyon konsernan son Minister. E nou pou komans avek kestyon 162 par Onorab Meggy Marie.

HON MEGGY MARIE

Mersi Mr Speaker.

Bonzour Minis ek ou delegasyon.  Bonzour tou Manm Onorab.  Bonzour bann etidyan Anse Etoile.  Bonzour tou dimoun ki a lekout.

Mr Speaker, eski Minis responsab pour Tourizm ek Kiltir, i kapab enform sa Lasanble, lo statistik bann etidyan STA ki’n al etidye aletranze e ki’n retournen:- e enform sa Lasanble lo zot sityasyon travay aktyel?

Mersi Mr Speaker.

MINISTER ALAIN ST ANGE

Mersi Mr Speaker.

Mr Speaker, sa course ADHM progranm, i en course ki bann etidyan i bezwen konplet 3an kot Lakademi Tourizm La Misere, STA, 1an kot Shannon College of Hotel Management an Irlann e 9 mwan work attachment ki obligatwar dan en lotel respektab aletranze, ouswa dan en lotel isi Sesel.  Si zot konplet avek sikse, zot graduate avek en bachelor’s degree in International Hotel Management.

Pour lemoman i annan 3 cohort zenn Seselwa, ki’n konplet zot bachelor’s degree kot Shannon College of Management an Irlann.  E katriyenm cohort pe fer zot work attachment e zot espekte graduate an Mars 2016.  Nou osi annan en senkyenm cohort ki pe fer zot staz kot Lakademi Tourizm STA.

Parkont Mr Speaker, pou kapab al Shannon College, nou bann zenn etidyan pou bezwen dabor pass zot legzanmen ADHM. Answit en panel pou interview sak etidyan, pou asire ki zot zwenn kriter determinen par Shannon College.  Selman apre sa, ki bann kandida ki’n reisi, i kapab zwenn Shannon College.  Nou bann etidyan i ganny tenir okouran lo sa bann formalite neseser.

Mr Speaker, Minister Tourizm e Kiltir, i fyer sa reisit ki nou bann zenn pe fer lo non Sesel e pour Sesel.  Bann reisit ki pou ed konsolid nou Lendistri Tourizm.  Dan premye cohort ti annan 13 etidyan e zot tou zot in retournen e pe travay dan Lendistri Tourizm.  Sa bann graduates pe okip bann pozisyon tel ki:- supervisor, asistan manager e menm managers.

Dezyenm cohort ti konpri 11 etidyan e parmi 10 in retourn dan pei e 8 in deza dan lanplwa.  I annan zis 2 graduate ki pa dan lanplwa.  Enn i dan konze maternite e enn pe refiz lanplwa.  En etidyan dan sa dezyenm cohort i ankor aletranze.  E dan trwazyenm cohort, ti annan 15 etidyan e 12 in deza ganny anploye, 2 graduate pa dan lanplwa, parmi enn i lo konze maternite e nou espekte ki li i pou rod en plas travay apre son konze.  Zis en graduate ki ankor pe rod lanplwa e enn ki ankor lo work attachment aletranze e i pou antre dan pei byento.

Mr Speaker, mon anvi fer kler ki al etidye pour sa diplonm ADHM, i premye faz en larantre dan Lendistri Tourizm.  Pass ou course e ganny ou diplonm, i reste dezyenm requirement pour sa larantre dan sa Lendistri Tourizm.  Sa Lendistri ki’n vin, deplizanpli enportan pour Sesel e se sa Lendistri ki ozordi pei pe appel, pliye lekonomi Sesel.

Apre ki en graduate in retournen, zot bezwen prouv zot lekor e travay omwen 5an pou ariv lo nivo middle management tel ki Front Office Manager ouswa Food & Beverage Manager. E pou vin en General Manager dan en gran lotel, nou anvizaze ki norm i dir, ki i kapab pran ant 12 a 15 an.

An se moman nou pe travay vreman pros ek bann lotel, pou ankouraz zot pou konsider sa bann graduates dan bann tel pozisyon.  Nou osi anvi ankouraz tou nou bann graduates, pou travay pli dir e montre zot determinasyon pou okip sa bann pozisyon dan nou Lendistri Tourizm.

Minister Tourizm e Kiltir, ti a kontan lans en lapel e an menm tan ankouraz tou bann zenn graduates pou reste dan nou Lendistri Tourizm e fer sir ki zot konesans travay, i ganny aksepte e osi ganny apresye.  Se pour kwa ki Minister in etablir en Mentors Committee, ki nou’n resaman apwente.  Lide deryer sa Committee se pou get dan welfare, dan training e dan career path nou bann graduates, en si ki pou ankouraz zot e gid zot otan ki posib.

Sa Komite pe ganny Chair par Sekreter Prensipal pou Tourizm, Madame Anne Lafortune.  Bann lezot manm i enkli:- PS Lanplwa, CEO e NHRD, Principal e lezot reprezantan Lakademi Tourizm, STA. Mr Phillips Smith li menm ki Direkter Shannon College of Management e osi plizyer General Managers bann Lotel.  Nou’n fer sir ki tou bann Lorganizasyon konsernen i ganny reprezante lo sa Komite.

Mr Speaker, Gouvernman Sesel in met its money where its mouth is.  Nou’n envestir pou antrenn nou bann zenn Seselwa.  Nou krwar dan nou Lendistri Tourizm e nou pe provide lantrennman neseser pou annan Seselwa ki a pran la relev dan sa Lendistri.  Sesel, pa pou kapab dir sekter prive anploy Seselwa, si nou napa trained Seselwa pou pran sa bann pozisyon.  Gouvernman Sesel, in swiv sekans neseser e ozordi nou pei i annan zenn Seselwa profesyonnel dan nou Lendistri Tourizm e nou sekter prive pe swiv sa devlopman de pre.

Mersi Mr Speaker.

MR SPEAKER

Bon okenn siplemanter Onorab Marie?

HON MEGGY MARIE

Mersi Mr Speaker.

Eski Minis i kapab dir nou Lasanble, ki mekanizm i annan an plas, pou fer sir ki sa bann etidyan i reste dan Lendistri Tourizm:- e dan sa 33 ki’n graduate, konbyen zot ki pe travay dan Lendistri Tourizm li menm?

Mersi Mr Speaker.

MINISTER ALAIN ST ANGE

Mersi Mr Speaker.

Premyerman Mr Speaker, mon bezwen dir napa okenn mekanizm ki kapab fors en dimoun reste dan Lendistri Tourizm.  I en laliberte Seselwa.  En laliberte ki nou Konstitisyon i provide.  En dimoun i annan swa pou li tournen, pran travay ki li i le pran.

Me avek fyerte mon kapab dir, tou bann ki pe travay ozordi, apar sa 2 ki ankor lo konze maternite e 1 ki pa pe travay, tou pe travay dan Lendistri Tourizm.  Ler mon dir Lendistri Tourizm, pa neseserman dan lotel.  Si ou pe travay dan en DMC swa si ou pe travay avek Helicopter Seychelles, Helicopter Wing Airport, swa Air Seychelles li menm, i still Lendistri Touris.  Travay Minister Tourizm avek STA se pou nou train dimoun, tournen pou pran bann pozisyon kle.  Bann pozisyon kle dan Lendistri Tourizm nou pei.

Mon espere en zour enn i kapab osi Sekreter Prensipal Tourizm, swa Minis Tourizm.  I pa neseserman ki i pe travay dan en lotel.  Minister e Gouvernman Sesel, i fasilitater pou ouver laport pour bann Seselwa mye kalifye, mye kalifye posib pou antre dan sa Lendistri dan tou son lanpler e dan tou bann pozisyon neseser.

Mersi Mr Speaker.

MR SPEAKER

Onorab Leader lopozisyon.

HON DAVID PIERRE

Mersi Mr Speaker.

Bonzour Minis ek ou delegasyon.  Bonzour tou Manm Koleg Onorab e bonzour tou bann etidyan lekol Anse Etoile.

Mr Speaker, eski Minis i kapab dir sa Lasanble, si zot annan en Polisi kler vizavi ratio Seselwa pou etranze ki travay dan bann lotel, sirtou dan sa bann pozisyon ki ou’n mansyonnen ?  E eski sa Polisi pe ganny respekte?

Mersi Mr Speaker.

MINISTER ALAIN ST ANGE

Mersi Mr Speaker.

Gouvernman Sesel, e la mon oule dir Konsey Minis nou pei, ti aprouv en rekomandasyon anmennen par Minis responsab pour Lanplwa, Madanm Alexander e avek bokou diskisyon avek nou menm kot Minister Tourizm.  Wi i annan en pozisyon tre kler, tre kler ki Sesel, tou lotel i ganny sa ki nou apel en quota system e sa i baze lo lakantite dimoun ki li i annan, ki Seselwa e konbyen etranze i kapab anmennen.  I annan bann ratio ki 60:40 swa 55:45, me i depan lo lotel e si i en 5 star i ganny en pe plis, akoz i bezwen.

Finalman nou pa an konpetisyon ek nou lekor.  Nou an konpetisyon ek lemonn.  Nou an konpetisyon ek Moris, Maldive.  Nou bezwen donn servis adekwat si nou oule ki Sesel nou Lendistri Tourizm, i vreman ganny konsidere koman en destinasyon ki kapab compete avek lemonn.

Me sa ki mon kapab asir Onorab Sef lopozisyon, Gouvernman Sesel i anvi vwar son Seselwa travay an premye.  Me pou nou arive fer sa, nou’n bezwen fer.  E se sa ki taler ler mon ti reponn kestyon mon ti dir, nou’n put nou money where our mouth is. Nou bezwen antrenn dimoun, pou nou asire ki nou annan dimoun antrennen.  Lotelri i en profesyon e ou bezwen ganny train dan tou son aspe, pour nou arive pran bann plas: bann plas management.

Se pour sa rezon ki Gouvernman i envesti tou le-z-an, en sonm larzan konsiderab, pou anvoy nou bann zenn Seselwa al etidye aletranze.  Ozordi nou bezwen atraver nou Mentors Committee, kontinyen swiv nou bann zenn Seselwa e a fer sir ki zot monte progresivman e en zour nou a vwar en General Manager Seselwa.  Bann nouvo zenn Seselwa ki aparet.

Wi nou’n annan defayans.  Nou bezwen aksepte poudir en peryod letan, nou pa ti pe anvoy etidyan deor.  Me sa Gouvernman du jour, Gouvernman ozordi, i annan katriyenm cohort pe al lo senkyenm cohort ki al aletranze.  E sa in kout Sesel en fortin, pou antrenn sa dizenn swa kenzenn Seselwa tou le an.  Nou fer li akoz nou lanvi vwar nou Seselwa dan plas: pe anmenn kouler lokal dan nou bann lotel.

En lot pwen ki a enteresan pour Onorab Pierre, se ki anba sa ki nou pe apel klasifikasyon lotel, kouler lokal i zwe son plas.  Ou pa pou ariv en 5 zetwal si napa Seselwa.  Si napa sa kouler lokal ki anmenn kreolite a lavan.  Nou pa kapab dan nou pei.  E sa i en desizyon ki Gouvernman in repete a plizyer repriz, ki sel bout ki lokal avek ou lotel, se Paviyon Sesel ki pe flote deor.  Nou pou bezwen annan plis ki sa dan nou bann lotel.  E konponan travayer Seselwa, i enn bann konponan kle, ki pou justify en lotel ganny 5 swa 4 zetwal lo son laport e dan son marketing.

Mersi Mr Speaker.

MR SPEAKER

Kestyon 163, Onorab Fideria.

HON EMMANUEL FIDERIA

Mersi Mr Speaker.

Bonzour tou Onorab.  Bonzour Minis.

Mr Speaker, eski Minis i kapab enform sa Lasanble, si dan le fitir son Minister, i annan plan met en zofisye kiltir, atase ek en rezyon pou ede detekte e devlop bann talan e ede organiz bann aktivite kiltirel o nivo distrik?

Mersi Mr Speaker.

MINISTER ALAIN ST ANGE

Mersi Mr Speaker.

Mr Speaker, pour lemoman napa zofisye kiltirel ki atase an plen tan avek okenn distrik.  Sa ki nou annan, se en Komite teknik, ki pe kordin sa progranm konpetisyon distrik kiltirel.  Sa Komite i annan reprezantan artis, zofisye sorti kot Leritaz Nasyonal, sorti kot Mize, kot Archive.  Reprezantan Latroup Nasyonal e osi Zofisye Progranm sorti kot Minister Devlopman Kominoter.

Rol sa Komite, se pou ed distrik mont zot bann progranm pour zot devlopman kiltirel e osi anmenn sa sipor teknik, pou lenplimantasyon sa bann progranm.  An se moman, nou pe fer sa avek 13 distrik ki’n vin a lavan pou met zot distrik dan sa konpetisyon enter distrik.  Me Mr Speaker, lezot distrik ki bezwen sa kalite sipor, zot osi zot kapab demande.  Kot sa Komite i vwar ki napa ase konpetans parmi bann Manm Komite Distrik, alor la i fer demann kot i fodre e pou fonksyon neseser e apropriye.

Mr Speaker, Minister Tourizm ek Kiltir e la pli partikilyerman Departman Kiltir, i santi ki en tel lapros i sifi pour lemoman.  An vi lakantite aktivite kiltirel ki pe devlope o nivo distrik pa osi entans e ki pou nesesit prezans en zofisye an permanans:- anvi Bidze ki nou pei i vreman kapab ofer sa Departman, pou devlop sa servis.

Me Mr Speaker, letan distrik i montre, ki volim aktivite kiltirel i ogmante dan zot distrik e an fezan sa demontre nou, ‘nou bezwen en prezans zofisye kiltirel lo en baz pli permanan.  La Mr Speaker, nou ava sanz gir nou osi e antreprann mezir neseser pou delivre ankor plis, pour nou bann distrik e pour nou pep.  Nou reste sa fasilitater koman Gouvernman.  E sa fasilitater ki la pou ouver laport pour nou pep.  E dan domenn kiltirel, reponn demann pou fasilit lepanouisman nou pep.

Permet mwan pou azoute Mr Speaker, ki apar lentervansyon sa Komite teknik o nivo distrik, i annan lezot Lenstitisyon Kiltirel ki disponib pou travay avek distrik e ki serten distrik i deza pe benefisye avek sa servis.  Par egzanp i annan Konsey Lar, NAC e osi Konservatwar Nasyonal, ki distrik i kapab benefisye avek zot servis.  Sa 2 Lenstitisyon i la pou ed distrik arive delivre lo lekspektasyon e lo demann son pep.

Mr Speaker, Minister Touris ek Kiltir i panse sa ki pli neseser an se moman e selon rekomandasyon Komite teknik pri distrik kiltirel, se ki distrik i mobiliz plis zot zabitan, pou partisip dan bann levennman kiltirel e osi bann aktivite pou promouvwar zot bann rises kiltirel.

Gouvernman li i met kiltir o sant devlopman tourizm nou pei.  Ler Gouvernman i fer sa, Gouvernman Sesel annefe pe mete pep Seselwa o sant son devlopman, devlopman nou pei.  Akoz pour nou annan kiltir, nou bezwen annan nou pep.

Mersi Mr Speaker.

MR SPEAKER

Okenn siplemanter Onorab Fideria?

HON EMMANUEL FIDERIA

Wi Mr Speaker.

Mr Speaker, an vi repons Minis, eski Minis i kapab eksplik nou Lasanble, ki loportinite ki egziste pour sa zenn fiy ou sa zenn garson, ki’n demontre en kapasite eksepsyonnel atraver domenn kiltirel i egziste dan nou pei.  Eski Minis osi i kapab dir nou, nou kiltir i nou lidantite, nou manze, nou langaz, nou ladans, nou lar.  Avek devlopman rapid ki pe arive dan Sesel, ek lezot lenfliyans kiltirel ki pez lo nou pep, ki plan Minister i annan dan sa 10an ki pe vini, pou asire  ki nou kiltir i reste entakt?

Mersi Mr Speaker.

MINISTER ALAIN ST ANGE

Mr Speaker, i pa rev Minister Tourizm e Kiltir, me i rev pei vwar ki son kiltir i pran bokou plis lanfaz nasyonalman.  Nou tou, nou tou koman Seselwa, nou annan menm rev poudir ki nou kiltir i en keksoz ki nou bezwen, si nou oule en pei ki byen baze avek en fondasyon solid.

Weekend pase nou ti Praslin:- kot Praslin, 2 MNA, 2 DA e Praslinois par son milye, ti desann pou met kiltir Seselwa a lavan.  Nou lapel nou, se ki tou zenn ki oule vwar en karyer dan sant kiltirel, tou sa zenn i devret pe rod son fason pou li premyerman ganny vwar, pou li demontre ki i kontan kiltir.  Ou pa kapab kontan kiltir, asiz kot ou anba en lavarang e dir, ‘mwan mon kontan kreolite.’  I bezwen li ganny vwar e sa i osi pour tou Manm Lasanble.  Nou tou si nou kontan kiltir, nou sorti e parey angle i dir, ‘be seen and be counted.’ Nou tou nou bezwen prezan dan bann levennman kiltirel nou pei.          Dan 2 semenn nou pou annan Festival Kreol e nou konnen tradisyonnelman, konbyen Seselwa ki desann pour Festival Kreol.  Eski nou kontan nou kiltir si nou zis dir nou kontan, swa nou kontan li ler nou partisip ansanm avek Seselwa, ki pe les son lekor epanouir dan devlopman son kiltir.

Me pou pli spesifikman loportinite pou en zenn dan Pri Distrik Kiltirel, ki Minister Devlopman Kominoter avek Minister Touris ek Kiltir in met a lavan, i ouver bann laport pou bann zenn dan tou le 26 distrik nou pei.  Prezan ki i annan 2.  Dan tou le 26 distrik, nou’n ouver laport pour bann zenn sorti, fer li ganny vwar dan son distrik: pran en par aktif dan devlopman kiltir dan son prop distrik e de la, vin lo en baz nasyonal.  E finalman ler nou pei pou’n vreman santi poudir in arive, se ler nou komans eksport nou kiltir.  Ler nou komans vwar nou bann zenn pe perform aletranze lo tou nivo: ki swa ekrir, ki swa poenm, ki swa teat, swa ki swa danse ek lanmizik.

Nou, nou lanvi Mr Speaker, e mon oule asir tou Lasanble, Bel Air zis en semenn pase, 2 semenn pase, Bel Air ti met a lavan en legzanp kler pour nou tou.  Kot zot ti pe donn pri zot bann dimoun Bel Air, ki’n partisip dan devlopman kiltirel.

Praslin osi avek kiltir, pa zis danse ek lanmizik.  I annan manze wi, me i osi annan sa ki nou fer, nou bann batiman e Praslin, mon bezwen redir ankor, chapeau a sa 2 MNA Praslin ek zot 2 DA, zot in met an plas 2an konsekitiv en striktir kot bann artizan Praslin i devlop bann kiosk.  Olye vwar zis bann kiosk enporte avek bann pti latant ble, nou vwar bann kiosk fer par Sesel avek en stil karakter Sesel e Seselwa kreol.  E sa i montre ou, poudir ler nou tou nou travay ansanm koman en pei, nou arive anmenn a lavan devlopman nou kiltir e met li lo en baz, en vre baz solid pour tou zenn i kapab vwar li ladan, e tou Seselwa i kapab vwar li ladan.

Mersi Mr Speaker.

MR SPEAKER

Onorab Sultanne Jaqueline.

HON SULTANNE JAQUELINE

Mersi Mr Speaker.

Mr Speaker, an tenan kont larepons Minis, eski i kapab dir sa Lasanble, si son Minister pe mazin anmenn en nouvo lapros ki annan an sinerzi avek lezot Lazans, sirtou bann ki travay avek zenn.  Pour ki son Minister i kontinyen promot en spearhead, bann aktivite kiltirel lo en baz kontinyel lo nivo nasyonal e osi lo nivo distrik.  Pa zis pandan letan Festival Kreol an Oktob, me osi pandan lannen.

Mersi Mr Speaker.

MINISTER ALAIN ST ANGE

Mersi Mr Speaker.

Nou annan plezir kapab dir MNA, ki resaman nou ti annan en meeting avek reprezantan lazenes e avek CEO Mr. Alvin Laurence, kot nou’n regarde ki mannyer nou bann lazenes, sa bann dimoun ki pou vin nou bann future leaders e osi bann ki pou pran nou kiltir anmenn li a lavan resaman:- pou gete ki mannyer.  Avek reprezantan lazenes, nou pe travay etrwatman.  E avek CEO Alvin Laurence, nou’n aksepte poudir dan tou levennman nou pei, i annan 12 dan lannen ki fer preski enn par mwan, lazenes Seselwa pou enplike a tou nivo.

E Msye Laurence li menm, pou asiz avek nou, swa enn son reprezantan dan Komite ki organiz nou bann levennman nou pei.  Sa i nouvo.  I nouvo me myevo tar ki zanmen.  Ki bann lorganizm nou pei, ki nou Gouvernman, nou Bidze i ede met an plas.  Nou pe travay bokou pli etrwatman.

Me sa ki enportan osi pou dir Onorab.  Nou pa pou pran leadership role ladan.  Nou tou nou travay a par egal.  Sakenn i annan son bout.  E lazenes li i bezwen vwar, sa ki enteres lazenes tou senpleman, avek loriyantasyon la pour kiltir, pour sa kreolite.  Me nou tou nou asiz ansanm, nou tou nou asiz apar e nou tou nou annan en bi.  Met Sesel premye e fer Sesel al a lavan.

Mersi Mr Speaker.

MR SPEAKER

Kestyon 164, Onorab Natasha Esther.

HON NATASHA ESTHER

Mersi Mr Speaker.

Mr Speaker, Minis ek ou delegasyon, tou bann etidyan dan Galeri sorti lekol Anse Etoile, tou dimoun a lekout, bonzour.

Mr Speaker, an vi ki Minister in ganny allocate ek en plot later lo Eve Island pou konstrir en Cultural Centre, eski Minis i kapab enform sa Lasanble ki status sa proze?

Mersi.

MINISTER ALAIN ST ANGE

Mersi Mr Speaker.

An 2011 Gouvernman ti donn en kare later nimero PR4030 lo Zil Eve, pou konstri en sant kiltirel ki a servi tou lede distrik- distrik Bais Ste Anne e osi distrik Grand Anse lo Praslin.  Swivan sa Departman Kiltir in angaz en arsitek pou travay lo en konsep tenan kont, bann servis ki Minister i annan lentansyon anmennen ouswa devlope lo Praslin.  Tel ki: servis Bibliotek, Archive Nasyonal, Leritaz Nasyonal e Konservatwar Lanmizik e en Mize Natirel dedye a Coco de Mer, eksetera.

Ozordi nou kapab konfirmen, ki nou’n fini resevwar sa konsep e nou’n osi deza konsilte Praslinois lo la.  E sa nou’n konpran ki Praslinois i an faver sa propozisyon ki Minister ti met a lavan.

Apre sa konsiltasyon nou ti soumet propozisyon avek Cabinet, avek Konsey Minis, ki ti retourn ver nou avek serten lamannman pou fer son design reflekte plis karakter Praslin.  Sa letan ki Gouvernman ti pe prevwar pou konmans met a dispozisyon fon neseser pou demar proze an 2014.  Me tou sa ti ariv avan Mars 2012 letan ki Departman Kiltir, ti zwenn pou form par koman Minister Tourizm e Kiltir.  Etandonnen ki Minister pa ti resevwar finansman parey ti ape prevwar, proze ti ganny tenir.

Nou pe konsidere aprezan, pou aprezan re egzamin plan e vwar an menm tan, koman pou entegre serten nouvo konponan, ki a permet en Praslin campus pou Lekol Otelyer, nou Tourism Academy.  Sa i ozordi ganny vwar koman en nesesite an vi ki Lakademi Tourizm, in prezan komans anmenn son servis osi lo Praslin e bokou zenn Praslin ek La Digue pe swiv sa course bokou pli pre avek zot fanmir.

Mr Speaker, nou kapab anonse ki dan preparasyon Bidze, ki fek fini pran plas aktyelman, Minister in fini diskisyon avek Minister Finans e Bidze pou Cultural Center lo Praslin i en pwen ki’n ganny diskite.

Minister Finans in byen akeyir propozisyon e in menm sizere ki en PPSP, Public Private Sector Partnership Scheme ti a en bon propozisyon pour sa proze lo Praslin.  Nou koman Minister nou espere ki sa proze aparet dan Bidze, pour lannen ki pe vini.  E alor mon a demann Lasanble, pou ede aprouv sa Bidze e Praslin a kapab ganny son prop Cultural Center.

Mersi Mr Speaker.

MR SPEAKER

Okenn siplemanter?

HON NATASHA ESTHER

Mersi Mr Speaker.

Mr Speaker, eski Minis i kapab dir nou Lasanble konbyen, dapre zot plan, konbyen letan nou espekte vwar sa proze konplete, si i ganny sa sipor finansyel e ki nou pou pouse, i pou gannyen:- e si zot pe ekspekte fer li par faz oubyen konplet li an antye?  E Mr Speaker, bann zenn artis osi in vwar bezwen pou annan en studio lanmizik lo Praslin, eski Minis pe mazin enkorpor sa servis osi dan sa sant?

Mersi.

MINISTER ALAIN ST ANGE

Mersi Mr Speaker.

Mon a pran son bout ki pli fasil.  Wi, annan en studio, en recording studio Praslin i en nesesite ozordi.  Nou tou nou’n antann resaman Prezidan Michel ti resevwar en studio, tou son lekipman, en studio ler i ti Lenn dan son dernyen vizit ofisyel.  Nou kontinyen fer lapel avek bann pei zanm,i pou nou kapab kontinyen ganny bann fasilite neseser pou Minister kapab les nou bann zenn epanouir.  La sa studio pe ganny mete kot NCPA e la bann zenn, bann budding artist ki anvi lans en premye CD, a ganny ede pou ouver lanmen sa Seselwa.

Me batiman lo Praslin, malerezman i en batiman e nou pou bezwen fer li dan en sel kou.  Pa pou kapab fer en bout e dir,’ kit en pe feray deor.’  Parey ler ou pas en pe Moris ou vwar en ta lakaz ek en ta feray.  Nou pou bezwen fer li en sel kou e fini li enn fwa pour tou.  Me konbyen letan pou pran, si mon reponn ou sa enn, mon ape manti e vi ki mon en Sen ek en Lanz, i difisil pou mwan manti.  Alor mon pou bezwen sey tenir the norm, e dir nou pa konnen.

Si Bidze i aprouve par Lasanble byento, la nou a kapab pran dezyenm faz, fer structural engineer fer bann plan detaye e retourn kot zot isi e dir, ‘la la, nou’n pre.  Me mon panse ki dan enn, de-z-an, trwa-z-an maksimonm, nou’n devret kapab annan en Cultural Center dan tou son lanfaz e pou donn vreman…  Vi ki i lo delo e fer fas avek stasyon lapolis Baie Ste Anne, i en lokasyon ideal pou annan en keksoz ki a vreman- kapab annan restoran, en restoran d-aplikasyon pou Lekol Otelyer, annan laboutik lo ground floor e nou, nou a servi bann landrwa ki pli o.

Mersi bokou Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker.

Bonzour Minis ek ou delegasyon.

Mr Speaker, mon ti a kontan demann Minis, an vi ki Praslin, bann sirtou bann mizisyen, santer, zot napa en landrwa apropriye ou kapab dir, pour zot fer en show mizikal: eski dan sa proze pou annan en lasal osi ki pou ganny enkorpor pour bann mizisyen?

Mersi.

MINISTER ALAIN ST ANGE

Mersi Mr Speaker.

Mr Speaker, nou ti a kontan annan en batiman ki fit tou keksoz ladan.  Me i pou enposib.  I pou enposib sirtou kot i baze.  I pou enposib pou nou annan en lot ARTS Village avek en Music Stadium.  Nou’n an diskisyon avek Minis Meriton, pou regarde si nou kapab sa 2 hall ki annan Praslin, 2 hall Gouvernman, bann sant ki annan, ki ti ganny fer en bon pe lannen pase.  Si nou kapab remodel sa bann sant, avek bi kapab servi li pour bann, kot i annan bokou plis son ki a kapab pli adekwat pou fer bann show mizikal.

Ou ti avek mwan zis Sanmdi pase, ler Patoustous ti pe zwe dan sant Grand Anse e nou tou nou santi ler ou ladan poudir i pa ideal pou fer okenn show, akoz i tro anfermen.  Me mon panse Onorab, ki avek ou sipor e Onorab responsab pou Baie Ste Anne, nou devret ansanm kontinyen diskisyon lo regarde kote ki nou kapab annan en lot teren.  En teren ki a kekfwa lo Eve li menm.  Me pour nou kapab servi-pa neseserman zis pou fer lanmizik, me dan diferan lot manifestasyon, kot nou bezwen en landrwa ouver, ki fermen ki solid.  Ki osi annan en sekirite neseser, pour nou kapab servi pou as bann aktivite ki a les nou bann artis, ki a les nou bann zenn, epanouir e diverti kontan.

Sesel nou bezwen annan landrwa, landrwa ki akseptab pou les nou bann zenn Seselwa de foule.  I en keksoz ki neseser e nou’n vwar sa apre ki nou’n fer sa Open-air film studio ki la Roche Caiman.  Nou’n santi lakantite dimoun ki la tou le swar, poudir i annan nesesite pour nou kontinyen devlop konsep- annan landrwa ouver, pou les nou zenn ale and be themselves.

Sa i en keksoz ki lo lalis nou koman kiltir.  Me i lo lalis osi devlopman kominoter, i lo lalis ledikasyon, i lo lalis tou bann Minister ki annan pep koman enn son preokipasyon.

Mersi Mr Speaker.

MR SPEAKER

Kestyon 165, Onorab Bernard Arnephy.

HON BERNARD ARNEPHY

Mersi Mr Speaker.

Bonzour Mr Speaker.  Bonzour tou dimoun.

Mr Speaker, mon kestyon ou demann Minis pou donn detay nou Lasanble, lo plan e depans vize ver sa 31 poursan logmantasyon dan kontribisyon Gouvernman, anver marketing pour Sekter Tourizm?

Mersi Mr Speaker.

MINISTER ALIN ST ANGE

Mr Speaker, pou kapab promouvwar en destinasyon, nou bezwen sifizaman resours finansyel.  Sa i norm pou tou destinasyon touris dan lemonn.  Sa ki osi norm se ki lakantite aktivite ou kapab fer pou promouvwar ou destinasyon pandan en lannen, i depan antyerman lo lakantite Bidze marketing, ki ou’n gannyen pour sa lannen.  E sa i depan lo Lasanble Nasyonal.  En pei ki aprouv sa Bidze anyelman.

Mr Speaker, mon note ki Onorab Arnephy dan son kestyon devan Lasanble, pe koz lo en logmantasyon 31 poursan sorti 2014 pour sa enn 2015.  Mon a eksplik en pe Bidze marketing baze lo sif ki Lasanble in aprouve pour Board Tourizm.  Pou lannen 2014, Board Tourizm ti resevwar en rediksyon.  Wi, en rediksyon dan son Bidze marketing, pou sorti apepre R60 milyon pou al R57 milyon.  En rediksyon 4 poursan.  E deswit, e mon re dir Mr Speaker, deswit nou’n vwar reperkisyon dan performans larive touris, akoz laplipar nou bann lofis ki baze dan nou bann pei emeter, bann pei kot nou ganny nou touris, nou bann biro ti bezwen koup serten bann aktivite promosyonnel, ki zot ti pe fer lo sa marse spesifik.  Bann aktivite promosyonnel ki ti neseser pou kapab kit Sesel vizib e asire ki Sesel i reste relevan koman en destinasyon ki oule ki son Lendistri Tourizm i marse.

Mr Speaker, fer marketing pour en destinasyon i en aktivite ki bezwen kontinyel, si nou anvi vwar vre rezilta.  Parey lekspresyon i dir, ‘out of sight, out of mind.’  Nou asire ki zot tou, zot bann Manm elekte pou defann zot distrik e alor bann pti biznes ki depan lo Lendistri Tourizm pou viv, i zot responsabilite.

Zot konnen ki zot bann elekter dan zot distrik pe dir e sa pe dir zot, ler zot pe pas kot sa bann letablisman.  Kot bann propriyeter bato, bann ki lwe loto, swa bisiklet, bann artizan, bann restoran, bann entertainers, bann fermye, bann peser, bann taxi.  Swa bann ki annan Dive centres, bann entertainers ouswa bann ki anmenn dimoun hike, eksetera.  Zot tou zot konnen ki marketing pou Lendistri Tourizm napa, ‘stop and goMarketing ler ou’n komanse, i annan zis ‘go’. E i reste en prosesis kontinyel.

Pou lannen 2015, nou ti kontan pou vwar ki Minister Finans ti aksepte pou ogmant nou Bidze par en pe plis ki 22 milyon ek 2 Roupi.  Mon ti a kontan sezi loportinite pou remersye Minister Finans, pou ekout nou demann.  Demann ki pou nou kapab fer larive touris ogmante dan Sesel.  Sa lannen nou ti pou bezwen en Bidze ki ti pli adekwat.

Wi, rezilta in montre klerman, ki aktivite an plis ki nou bann biro dan nou bann marse in arive angaz zot in a- port fri.  E akoz ozordi nou kapab vwar logmantasyon dan larive touris pour sa lannen, en logmantasyon 20 poursan, en senkyenm an plis ki nou ti annan lannen pase.  Tou nou bann marse in perform ekstrememan byen, sof pou Larisi ki nou konnen ti pe pas dan bann difikilte ekonomik swivan lager Ukraine.

Mr Speaker, sa ki nou kapab fer an plis, se donn ou bann marse emeter priyorite en pe plis Bidze e sa bann marse ki’n benefisye avek logmantasyon pour sa lannen ti :-La Frans, Lalmanny, Larisi, Lasin, Lenn, Mwayen Oriyan ek Sid Afrik.  Nou ti osi kapab ogmant Bidze Italy, Rwayonm Ini ek Irlann avek La Renyon e osi dan seksyon digital marketing, sa seksyon ki’n vin pli enportan ozordi ki zanmen in deza ete oparavan.

Nou Bidze in ouver laport pour nou Board Tourizm kapab osi, angaz nou pei dan en pe plis aktivite vize ver konsonmater.  La en legzanp tipik, i sa kanpanny lo Taxi dan Paris.  Kot nou lofis La France in kapab egzekite an Me sa lannen avek partner Air Seychelles ek Etihad.  Sa zefor siplemanter i pa zis lo La France ki nou’n kapab fer en diferans.  Me lo tou nou bann marse priyoriter, nou’n kapab fer en pe plis sa lannen, sa bann aktivite, ki vize ver konsonmater swa gran piblik.

Nou’n osi kapab envestir en pe plis lo bann kanpanny lo internet.  Ansanm avek bann tour operater online e lefe direk, nou’n vwar deza.  Bann letablisman, sirtou bann mwayen e pti ki depan lo sa bann rezo in eksperyans en logmantasyon booking ki’n vin atraver sa bann diferan rezo.  Sa in fer ki laplipar zot, in kapab ganny booking e business right atraver lannen.

Nou’n menm osi kapab envestir dan bann nouvo marse.  Par egzanp Israël.  Pour zot ki’n swiv nouvel tou resaman, zot in kapab vwar ki sa lannen Sesel in ganny plis ki en lakonpannyen Charter pou deservi sa marse e sif larive touris pou marse Izraelyen in double.  Bann aktivite parey i donn konfidans nou bann partner, akoz ler zot vwar ki nou pe envestir lo en marse zot osi zot met en pe plis zefor lo zot kote, pour osi kapab devlop sa marse.

I ekstrememan enportan ki nou kapab kontinyelman kit nou bann partner angaze avek nou e fer promosyon Sesel, ansanm avek nou.  Akoz menm si 80 milyon i paret en gro sonm, i pa sifizan konpare avek nou bann konpetiter e sirtou ler nou pran kont nou to lesanz pour Dolar, sa lanmonnen ki nou servi pou tou bann peyman aletranze, ki pe kontinyelman ogmante e ki pe kontinyen annan en lenpak advers lo nou Bidze.

Mr Speaker, dikton i dir ki the proof of the pudding is in the eating.  An 2009 ler mon ti antre dan Tourism Board e apre vin Minis, nou pei ti pe resevwar 157, 541 touris par lannen.

Ti’n pran Sesel 38an pou arive anmenn 157 mil touris isi.  Me depi sa, 7an sa lannen, avek en nouvo lelan, Sesel in ogmant son larive dan Lendistri Tourizm pou vin 232 mil 667 mil an 2004.  Swa 75 mil an plis.  E sa lannen nou pou bat lo 260 mil apepre.  Sa i fer 100 mil an plis dan zis 7an, lo sa ki ti pran nou 38an pou anmennen.

Mr Speaker, lo non Minister Tourizm ek Kiltir e lo non Tourism Board, nou kapab dir ki nou Lendistri Tourizm i dan bon lanmen e ki i pe mars byen.  Tenir lanmenm, akoz management sa Lendistri i reflekte direkteman lo lekonomi Sesel.  Ler Lendistri Tourizm i eternye, lekonomi Sesel i ganny en lafyev deswit apre e tou biznes, tou biznes Sesel, i ganny Asma e komans mank loksizenn imedyatman.  Annou asire ki Bidze marketing i reste adekwat toultan.  Se pour sa rezon ki Board Tourizm pe demann 6 poursan increase pour fasilit kontinyite pour lannen 2016 e asire ki Sesel i reste relevan koman en destinasyon touristik.

Mr Speaker, an terminan i enportan pou redir sa ki nou’n deza dir: Marketing pou Lendistri Tourizm Sesel, i parey en peser ki al lapes.  Sa peser i bezwen al lo bar pwason pour li lapes.  Marketing i fer dan bann pei kot nou ganny nou touris.  Peser ki asiz anba son lavarang pa pou vann pwason lo bazar.  Sa i parey sa ki fer marketing dan en biro, a vwar touris dan son rev.  Tourism Board i bezwen al rod sa touris e fer sir ki i travay avek son bann partner e ki sa travay i kontinyel.

Mersi Mr Speaker.

MR SPEAKER

Ok, biznes i ganny Bronsit i pa ganny Asma.  Onorab, okenn siplemanter?

(Interruption)

MR SPEAKER

Onorab, okenn siplemanter?

HON BERNARD ARNEPHY

Mersi Mr Speaker.

Mr Speaker, avek bi tenir nou Lendistri Tourizm e pa large, eski Minis i kapab dir ek nou Lasanble, dan son plan marketing, eski i pe anvizaze anmenn plis vol direk Sesel e petet bann nouvo laliny aeryen?  E dezyenmman, eski Minis i kapab dir ek nou si dan son Minister i annan en sort of Inspectorate Unit, pou asire ki bann travayer lotel zot osi atraver zot travay dir, zot benefisye plis atraver sa income, ki sa logmantasyon dan Tourizm pe anmennen dan pei?

Mersi.

MINISTER ALAIN ST ANGE

Mersi Mr Speaker.

Mr Speaker, Onorab pe fer mwan reponn en kestyon ki pa tonm dan mon Minister.  Vol direk i avek bann nouvo konpanny aeryen.  Me mon a pran kanmenm, mon a en pti pe brav, mon a dir ki nou rev koman Sesel, se pour nou omwen annan bann laliny direk sorti kot tou nou bann pei emeter prensipal.  I enportan si nou oule touris sorti La France, nou’n vwar byen ek Bill Air Seychelles i lo sa nouvo laliny.  Ozordi son to ranplisaz i pli o ki zot menm zot ti ekspekte.  Dimoun i oule al laliny pli direk pour li kapab annan fasilite pli fasil e a en pri ki pli akseptab pour li.  Sa i norm partou.

Bann nouvo konpanny aeryen?  Wi.  Nou pou bezwen annan nouvo konpannyen aeryen, pour nou kapab konekte avek bann diferan source markets, nou pou bezwen annan bann laliny ki konekte nou ek sa bann source markets. Mon pa pe dir ki nou pa pou bezwen servi bann hubs dan middle east, ki swa Dubai ouswa Abu Dhabi, swa Etiopie, swa Kenya.  Zot osi zot bann pti hubs.

Tousala i bann hubs e bann nesesite, pour zot siport Lendistri Tourizm.  Me to ou tar, laliny ki pli direk, se sa ki pou fer marse sa marché. Si ou vwar nou’n dousman dan lans, La Chine, se ki ziska ozordi nou napa en vol direk lo La Chine.  Ler L’Ile Maurice pe pas li a 12 la mon krwar in arive par semenn, nou, nou ankor annan enn via Hong Kong:-sorti Hong Kong pas Abu Dhabi. E nou annan detrwa ki sorti Beijing avek Shanghai e pas atraver Abu Dhabi ek Dubai e osi Etiopie.  Nou pou bezwen to ou tar koman en pei, re o gard nou lekor e dir ki nou bezwen rod nou key source markets e al vwar sa bann konpanny neseser e travay avek zot.

Me sa Departman Transport pe fer li ozordi.  Mon kapab asir Onorab, ki Departman Transpor e sa an diskisyon avek Minis Morgan zis Merkredi pase, ki byento pou annan en pe lanons lo bann nouvo laliny ki Air Seychelles li menm pe met an plas.

Air Seychelles ti ganny konsevwar en bann lannen pase, koman lasirans Lendistri Tourizm nou pei.  E pour sa lasirans, nou bezwen ki i pran nou bann marse emeter prensipal e donn sa fasilite pour nou bann touris kapab debark kot nou.

Lo inspectorates pou asire ki nou bann travayer Seselwa i benefisye avek Lendistri Tourizm, nou travay etrwatman avek Minister responsab pour Lanplwa.  Nou travay etrwatman pou asire ki nou Seselwa, i vwar bann benefis direk koman en anplwaye dan en lotel.  Nou annan, fodre panse Gouvernman i reste fasilitater, me osi sa regilater.  Se Gouvernman ki donn permi travay e se Gouvernman ki a lafen les larg lanmen swa ferm en pe lanmen en lotel, ki pa pe zwe boul avek Sesel, pour benefisye nou pei.

I annan de keksoz ki nou, nou koman Minister.  Nou vizit bann lotel regilyerman.  Nou’n fer sa pandan 3 dernyen lannen, lo 4 lannen:- kot nou antre dan lotel, nou zwenn bann travayer, nou zwenn management.  Nou fer letour lotel e nou asiz ansanm avek travayer e osi byen ki management pour nou vwar kote pe ale.

Enn bann resan, sete Ile Du Nord kot ti annan en pe brouhaha ki ti pe ganny koz lo la.  Nou ti desann, nou ti pas en lannwit.  E la nou’n zwenn tou staff, san eksepsyon.  Enn par enn e par bann pti group par Departman.  E sete pou gete kote ki zot annan defayans.  Deswit apre nou ti anvoy en rapor kot Head Office e kot propriyeter sa lotel.

E mon kapab asir Onorab, ki lotel ek son owning company in pran desizyon, pou netway en pe bann anomaly ki nou, nou ti vwar.  Nou fer li dan tou lotel e nou’n fer li akoz i esansyel ki nou, depi Minis, Sekreter Prensipal, zofisye ki get Licensing, pou al dan sa lotel kot pa neseserman ki nou warn zot:-nou pe vini.  Me nou fer li pour nou kapab annan en kont, ase egzakt lo sityasyon sa lotel.

Nou pa kapab apar minimum saler dan pei, dir en lotel:- ‘ou bezwen pey tan.  Me sa ki nou kapab dir ek en lotel se ki:- ‘si ou donn en Seselwa, menm travay ki ou pe ofer en etranze e ou pa pe donn li menm lapey ki li i pa enterese pran e ou kontinyen demann en Seselwa, to ou tar sa fasilite ki ou gannyen pou anmenn en dimoun pou met dan sa pozisyon, pou nepli en keksoz ki ou pou annan.

Lot bout ki mon oule asir Onorab dan sa klasifikasyon ki nou pe fer, ki pou komans-i pou vin kot zot byento, an 2017.  Premye Zanvye 2017.  Dan peryod 2016 an antye, nou pou donn klasifikasyon ki nou panse en lotel apre lenspeksyon i gannyen.  De la i pou ganny li en peryod letan, pou rektifye bann anomaly.

E enn bann anomaly:-se ki mannyer i annan Seselwa ki pe travay dan son lotel, lo bann pozisyon kler ki a lavan.  A l’arriere pa tro, tro fatig mwan.  Me sa kouler lokal devan, i enportan pour Sesel.  Dezyenm klasifikasyon ki pou annan se:-eski i pe vann en repa Kreol?  Si i annan 3 restoran, eski enn ki dedye a Kreol?  E trwazyenmman se dan en laboutik, en laboutik ki annan:-made in Seychelles, kot li.

I enportan pour nou vwar nou lekor, i nou Lendistri Tourizm, pour nou pei Sesel.  E i bezwen benefisye Sesel son Seselwa e an menm tan lekonomi Sesel.  Mon oule asir ou Onorab, ki nou pe fer tou le mye koman Gouvernman pei e la travay avek tou mon bann koleg, pour nou anmenn otan benefis posib pour Seselwa, dan nou Lendistri Tourizm.

Mersi Mr Speaker.

MR SPEAKER

kestyon 166.  Onorab Kevin Vidot.

HON KEVIN VIDOT

Mersi.  Bonzour Mr Speaker.

Bonzour Minis ek ou delegasyon.  Bonzour tou zenn e tou dimoun ki a lekout.

Mr Speaker, eski Minis i kapab dir avek sa Lasanble, ki rezon ki son Minister in deside pou pran laplenn English River, pou fer en Stad Lanmizik lo la?

Mersi bokou.

MINISTER ALAIN ST ANGE

Mersi Mr Speaker.

Mon ti a kontan reponn sa kestyon an servan laliny ki purpose en laplenn La Riviere Anglaise, in reganny vwar avek bi pou anmenn pep Seselwa ansanm atraver zot kiltir, olye dir ki sa laplenn in ganny pran.  Gouvernman Sesel i krwar, ki an met-an kiltir son pep a lavan e an les-an kiltir son pep epanouir, i ava pe met pep Seselwa an antye o sant devlopman son pei.

Sa konsep ki’n ganny byen entegre dan nou pei ozordi, in ganny vwar koman en revolisyon kiltirel par bann artis.  E sa se bann artis ki pe dir zot menm.  Gouvernman li i dir, ki pou napa en pep solid, si napa son kiltir ki pe ganny respekte, ki pe ganny apresye e annan sans ganny vwar, pour li kapab epanouir.  Avek sa konotasyon antet e lo latab devan pei, ki Gouvernman ti pran desizyon kot Cabinet of Ministers, pou reallocate sa morso later, kot i aktyelman en laplenn dan distrik La Riviere Anglaise, pou konstri non selman en Stad Lanmizik, me osi en ARTS Village pour Artis Seselwa dan leker Victoria, sa Kapital lemonn Kreol.

Sesel e tou Seselwa, in toultan kontan dir ki nou fyer nou sa Kapital lemonn Kreol.  Nou’n toultan dir ki nou fyer nou kreolite.  Nou’n toultan dir ki nou bann granmoun, i bezwen en landrwa detant kot zot kapab rankontre zot zanmi dan en latmosfer lokal, en latmosfer kreol e kot zot annan sans vwar zot menm, koman bann arsitek deryer sa fasilite.  Sa landrwa, nou’n napa.  E kote sa meyer landrwa pou annan enn si pa dan Victoria, sa Kapital lemonn kreol.

Mr Speaker, fodre fer resorti ki an se moman artis Seselwa, napa en landrwa konvenab pou fer spektak oplenner, pou divertisman pour tou Seselwa.  Rezon prensipal akoz ki laplenn Larivyer Anglaise in ganny idantifye koman sa lokasyon, se prensipalman son aksesibilite e pwen santral ki conducive pou fer en show.

Pour plizyer lannen, artis in bezwen servi Freedom Square, Mini Stadium ou NSC Hall, pou fer zot bann spektak.  E tou sa bann fasilite, i tonm anba ladministrasyon Minister Devlopman Kominoter e Spor.  Alor in toultan en kontrent pour bann sportsman, ler artis in servi sa bann fasilite.  Apre in kout nou bann artis bokou pou lwe sa bann fasilite.

Nou tou nou dir, ki nou kontan nou lanmizik.  Nou kontan nou mizisyen alor nou’n dir, les mizisyen travay dan en landrwa ki apel kot zot.  Se sa pwen, mon krwar Mr Speaker, ki mon asire ki Onorab Vidot i a dakor avek mwan, ki sa move, sa bann devlopman e sa se vreman lemansipasyon kiltirel ki Minister Tourizm e Kiltir pe anmennen.

Alor nou kiltir, i osi bezwen ganny siplemanter e ganny gide par bann lenfrastriktir neseser e lenfrastriktir ki apropriye.  Nou pei i bezwen annan en proper Stad Lanmizik e osi en ARTS Village avek tou bann bezwen teknik e ki fasilman akse avek piblik.

Mizisyen, entertainers, zenn koman bann ki mir dan sa game, in osi zwenn pou dir mersi Gouvernman, ki sa fasilite pe vini, dan Victoria.  E non pa pe ganny kasyet dan en fen fon, kot personn pa pou vwar zot.  Nou pa kanmi nou kiltir, alor dan Kapital, nou met nou kiltir a lavan.  Sesel pa onte son kiltir kreol e Sesel i fyer son bann artis e son bann artizan.

Mr Speaker, nou tou nou bezwen admet ki ozordi animasyon kiltirel e artistik in pran en lot dimansyon parmi Lepep Seselwa e osi parmi artis Seselwa.  Artis, parey mon’n dir pli boner dan mon repons, i apel sa en revolisyon kiltirel.  Alor i neseser ki pa zis Gouvernman, me Sesel an antye komans an par Lasanble, zot ki reprezant nou bann pep ki enkli, The world of artistsArts and Innovation i donn sa sipor pou kontinyen lo sa larout ki met nou Kominote Artis a lavan.  Sa Stad Lanmizik, i a sirman ede dan devlopman nou Lendistri kiltirel, ki Departman Kiltir pe met a lavan.

Mr Speaker, mon pa pou kapab mank sa loportinite, pou dir de mo pour tou zabitan La Riviere Anglaise e tou sa Seselwa, ki reste dan greater Victoria. Sa i kouver zil Perseverance, St Louis, Mont Buxton, Bel Air, Mont Fleuri, Roche Caiman ek Plaisance.

Sa proze, sa ARTS Village ki pou ganny atase avek sa Music Stadium, pou anmenn dan Victoria en fasilite pour tou zenn koman vye.  Lo devan sa Music Stadium pou annan en konblaz, ki pou annan lo la en waterfront development kot Seselwa a marse, a detann zot lekor mannyer zot oule.  Pou annan pti restoran.  Pou annan en boulangerie stil kreol a lepok.  Landrwa kot en bouse a prepar boucher, a prepar bouden, graton.

Mr Speaker en waterfront ki a reviv kiltir Seselwa, avek le pase pour Seselwa annan quality time an fanmir, dan leker Victoria.

Mersi Mr Speaker.

(interruption)

MR SPEAKER

Onorab Vidot, okenn kestyon siplemanter?

HON KEVIN VIDOT

Mersi Mr Speaker.

Mr Speaker, mon ti a kontan demann Minis, ler in koz lo bann artis ki zot a ganny landrwa pou fer zot bann aktivite:-osi si in konsider sa bann zenn La Riviere Anglaise ki train la lo sa laplenn, ki mon zwenn ler mwan osi mon al lo sa laplenn, pou al fer legzersis:- kote zot, zot pou al zwe zot foutbol?  Kote zot pou al antrennen?  E si Minis osi i kapab dir nou, kwa ki’n anpes son Minister ek lezot partner ki’n zis pran sa desizyon, pou fer okenn konsiltasyon avek distrik ek Lotorite distrik La Riviere Anglaise, pou pran sa desizyon:-e dir nou si sa Stad ki zot anvi fer, pa pou vin en lot Stad Lanmizik ki’n pouri, apre pa’n kapab servi.

Mersi.

MINISTER ALAIN ST ANGE

Mr Speaker, mon a pran dernyen pwen Onorab Vidot.

Napa nanryen ki mon’n fer ziska ozordi ki’n pouri.  So, sa enn osi pa pou pouri, mon asir li.  Me dezyenmman, bann zenn ki practice lo sa laplenn, annou sey konte.  Onorab Vidot i devret onnet pour zabitan La Riviere Anglaise, osi byen Kominote Artis e tou Seselwa.  Konbyen laplenn ki tonm la dan zanviron La Riviere Anglaise?

I annan pti stad en pe pli devan.  I annan Freedom Square. Tousala i dan menm vwazinaz.  Sesel pour son pti grander, si nou annan 3 laplenn dan La Riviere Anglaise, nou bezwen kapab dir, enn i bezwen tous Kominote Mizisyen, sa artis.  Sa artis ki fer ki ler Onorab Vidot bomaten i ouver son radyo, i tann lanmizik lo la.  Si nou napa landrwa pour artis kapab epanouir, nou pei pou fer mars aryer.  E nou bezwen Onorab Vidot, nou bezwen, annan respe pour artis dan sa pei.

E se pour la raison ki avek Minister responsab pour Kominoter, Mr Meriton, nou’n asiz ansanm, nou’n al vizit ansanm e nou’n rod landrwa apropriye.  I pa ti pour akseptab ki nou al kasyet nou bann artis konmsi nou kanmi zot.  Sesel i fyer son artis.  I fyer son kreolite, i fyer son lanmizik e i fyer son kiltir e nou met li dan leker Victoria.

Victoria an li menm, fodre nou pran Victoria, koman sa bout ki leker Sesel e i bezwen annan tou fasilite posib.  Ozordi dan Freedom Square nou fer legzersis sportif.  Nou annan landrwa kot bann artis ki desann.  Fer letour la, al gete si i annan dimoun la dan laplenn.  Ou a vwar 2 pe tay taye.  I annan ase fasilite sportif dan tou distrik e nou bezwen koman en pei, mentenir nou bann fasilite sportif e fer zot vin plis extra dimension wise, pour plis artis kapab servi.  Nou pa kapab annan laplenn apre laplenn e dir sa enn i pour artis.  I annan 4 ki practice lo sa enn e lo lot napa menm letan.  Nou bezwen servi tou nou fasilite.  Tou nou fasilite.

I annan distrik ki napa, laplenn.  Mon rapel, mon ti Manm pour Bel Air, ti annan zis en pti trou la o bor kort ki ti annan, ti annan en bout feray ladan.  E nou nou’n rode sa laplenn.  Me nou pa kapab demann Gouvernman pou rod en laplenn, ler napa landrwa.  E se pour sa rezon ki zot, zot desann dan Freedom Square e zot practice lo Freedom Square. Baya avek lekip Bel Air i desann, zot fer legzersis lo Freedom Square.

Nou annan fasilite Onorab Vidot.  Nou annan fasilite sportif la, La Riviere Anglaise kot i annan mini-stadium e akote La Riviere Anglaise.  So, i pour en kalonmni poudir ki Gouvernman Sesel in pran laplenn La Riviere Anglaise e pa’n donn fasilite zenn La Riviere Anglaise.

Mersi Mr Speaker.

MR SPEAKER

Kestyon 167, Onorab Maria Payet-Marie.

HON MARIA PAYET-MARIE

Mersi Mr Speaker.

Eski Minis responsab pour Tourizm e Kiltir, i kapab enform nou Lasanble, ki pe arive avek Creative Industries and National Event Agency CINEA.

Mersi.

MINISTER ALAIN ST ANGE

Mersi Mr Speaker.

Mr Speaker les mwan remersye Onorab Payet, pour sa kestyon ki ofer Minister Minis e Kiltir en loportinite pou retourn ver reprezantan nou pep, isi dan nou Lasanble, pour met azour sityasyon CINEA.

Lespri pour kree CINEA, sete pour nou pei annan en lorganizasyon ki a gouvern e organiz, tou aktivite nou Nasyonal dan en fason efikas e dan en fason metodik.  CINEA i pou vin sa masin, ki pou pran laspirasyon Gouvernman dan domenn kiltirel e ouver laport pour pep Seselwa arive, non selman annan zot bann aktivite kiltirel, me osi ofer loportinite pour pep Seselwa pou vwar zot dan sa bann levennman.  An dizan sa Mr Speaker, i enportan pou fer resorti, ki lanbisyon Gouvernman i reste pour fasilit atraver sa bann seri levennman, loportinite pour Seselwa.  Wi, sa larme zonm ek fanm, ki fer nou pei bouze pour zot kree bann pti biznes ki marse apartir bann levennman.

CINEA i pou mars koman en masin kot i annan tou son lenfrastriktir e lozistik neseser, pou kapab organiz bann gro levennman ki an se moman pe ganny fer par Minister Tourizm e Kiltir, Departman Kiltir, Konsey Nasyonal pour Lar e Bord Tourizm Sesel.

Lo nou kalandriye i deza annan plis ki 12 aktivite Nasyonal enkli Karnaval ek Festival Kreol, ki sa 2 pli gro manifestasyon kiltirel, ki Sesel i organize.  CINEA i pou ede maksimiz bann resours.  Akoz tou nou bann resours, i pou ganny mannyer par en sel antite.  Sa i enkli, ICCS, enkli Stad Lanmizik ki pe vini parey nou’n anonse e ARTS Village dan le fitir.  Tou bann lespas neseser pour artis epanouir e kot pep i kapab diverti kontan, pou tonm avek CINEA.  Dezyenm fonksyon CINEA, se pour ede avek lenplimantasyon sa lendistri kreatif dan domenn Artistik, kot i ede kree lanvironnman ideal.

Mr Speaker, Bill pour CINEA in fini fer son final Draft. Retar ki Minister in fer fas avek, se ki dan konteks kreatif CINEA, in neseser pou revoke en parti Act Seychelles Tourism Board e National Arts Council. E revwar osi fonksyonnman Departman Kiltir e osi byen Tourism pou retir doubling up responsabilite.

An se moman formalite in fini ganny fer e i kot AG’s office, kot biro nou Prokirer Zeneral e pe travay lo bann rekomandasyon final.  I neseser pou fer resorti, ki sa trantenn anplwaye CINEA pou ganny plase kot ICCS. An se moman Minister Transpor pe okip lespas dan serten landrwa ICCS e an menm tan zefor pe ganny fer, pou annan landrwa apropriye pou met travayer CINEA. Nou’n konstate ki dernyen faz kreasyon CINEA, i ava pran plas byen boner an 2016, ler Lasanble i zwenn.

Mersi Mr Speaker.

MR SPEAKER

Onorab Payet, okenn siplemanter?

(Interruption)

HON MARIA PAYET-MARIE

Ok. Mersi Mr Speaker.

Mr Speaker, mon konnen Minis in dir sa Agency dan son staz avanse petet:-si in annan okenn konsiltasyon avek bann diferan artis ki pou tonm direkteman anba sa Agency, pou vwar en pti pe zot rekomandasyon, pou fer ki sa Lazans i vin enn ki efikas e dan benefis tou artis.

Mersi Mr Speaker.

MINISTER ALAIN ST ANGE

Mersi Mr Speaker.

Mon kapab asir Onorab Payet-Marie, si i annan en Act, en Prozedlwa, ki’n ganny diskisyon avek artis e tou dimoun konsernen, se byen CINEA.  Nou’n annan think tank NAC, nou’n annan meeting kot Savoy.  Nou’n annan diferan landrwa kot bann artis in vin vwar nou e anmenn a lavan propozisyon.

Zot a rapel en pake mwan pase, mon krwar menm sote en an, ler mon ti koz lo CINEA isi.  Ti annan lide pou tir NAC avek Heritage Foundation e fer tou antre dan CINEA. I ti pou en gro masin.  Me apre diskisyon e la mon oule kapab asir zot, ki Gouvernman i ekoute.  Gouvernman i ekout dimoun e pran lide dimoun e re anmenn anndan pour rediskite.

Dan Konsey Minis, nou’n diskit li de, trwa repriz.  E toultan avek bann feedback ki nou’n gannyen, sorti dan Kominote Artis, me osi dan bann dimoun ki organiz levennman, pour nou pa zis annan en striktir ki napa sipor Seselwa a l’arriere.

Ozordi nou kontan ki nou pe bouz a lavan, menm pa avek lide ki nou ti annan orizinalman pou form en CINEA, ki ti a retir 3 lorganis dan pei e fer vin enn.  Me nou’n aksepte pwennvi dimoun e nou’n ekout pwennvi dimoun atraver konsiltasyon ki pe ganny fer.

Bann lamannman dan Creative Industry ki nou’n re anmenn dan CINEA, sa in ganny fer antyerman par bann rekomandasyon bann artis zot menm.  Mr Speaker, mon dir sa avek bokou lafyerte ki koman en Minister e koman en Gouvernman, Sesel i ekout dimoun e pran konsiderasyon feedback ki dimoun i anmennen.

E nou pou esanz sa ki nou menm nou, nou ti’n planifye pou fer rantre lespri Seselwa dan sa ki nou pe propoze.  Person napa sa eksklizivite lo lide.  E nou, nou zwenn dimoun e nou pran sa bann lide nou bann dimoun toultan.  E nou mars avek bann dimoun ki enplike dan sa bann seksyon, ki nou pe anmenn a lavan dan formasyon CINEA.

Mersi Mr Speaker.

MR SPEAKER

Kestyon 168, Onorab Maria Payet-Marie.

HON MARIA PAYET-MARIE

Mersi Mr Speaker.

Anvi lenportans ki Sekter Tourizm i annan anver lekonomi nou pei, eski Minis i kapab enform nou Lasanble, si in annan okenn resers pou kapab idantifye lekel bann kategori touris ki depans plis:- e lekel ki depans mwens?

Mersi.

MINISTER ALAIN ST ANGE

Mersi Mr Speaker.

Mr Speaker, an se moman Biro Nasyonal Statistik an relasyon avek Sekter Tourizm, i enform nou ki statistik ki ganny kolekte, pa ganny kategorize.  Me ki plito lo en baz zeneral.  Biro Statistik i enform nou ki dan zot manda, zot annan dan zot manda pou kree sa ki nou apel en Tourism Satellite Account, ki ava fer ki sa bann lenformasyon ava pli byen ganny kaptire dan le fitir.

Parkont, nou kapab dir ki bann viziter ki reste dan nou bann lotel 5 ek 4 zetwal e pe servi sa bann fasilite sa lotel tel ki:-restoran, zot pe depans plis konpare avek bann viziter ki reste dan bann pti guest house e self-catering, tou senpleman akoz pri lasanm e servis i diferan.

Nou kapab osi presize, ki sa touris 4 ek 5 zetwal, pou annan plis mwayen pour zot vizit plis bann diferan zil, al lo bann diferan ekskirsyon, lwe bato lwazir oubyen fer en Course diving. Sa se baz lozik.

Me depans plis e konbyen sa depans ki reste isi Sesel, i osi en letid ki pou enportan pour Labank Santral e Minister Finans.  Nou dir sa Mr Speaker, pou met an valer osi bann viziter ki pe reste dan bann pti guest house e self-catering. Akoz zot depans i osi enportan pour lekonomi Sesel.

Vi ki lamazorite propriyeter sa bann pti letablisman i Seselwa, sa larzan ranmase i reste dan nou pei.

Sa bann viziter i osi depans dan nou bann laboutik, servi taksi, car hire ki ed nou bann pti biznes lokal, devlope.  Sa ki sa bann viziter pa depans lo lasanm lotel, zot depans dan vwazinaz, dan nou bann kominote.  Akoz se nou bann pti lotel ki anploy sa zabitan ki reste zis akote kot li, ouswa aste sa prodwi lokal kot en vwazen lanmenm o bor.  Mr Speaker, mon dir sa pour esey konpran kestyon ki’n ganny poze ozordi.  Valer pour pei, vre valer pour nou pei i konbyen viziter in depanse, pa neseserman konparab ni kapab ganny analize dan sa equation. Sa analiz i konpleks.  E pli konpleks ler nou get valer azoute.

Ler en pti Seselwa i dan lendistri Tourizm avek son pti guest house, i pe edkonsolid lendistri Tourizm ki pliye lekonomi.  E i pe defann sa lendistri kont bann Seselwa souvan, ki o bliy lenportans sa lendistri.  Sa valer sa pti Seselwa pour Lendistri Tourizm i masiv.  I pa pe fer rantre en fortin par zour, me dan value-added, son partisipasyon i enportan, menm si i reste konman dir angle:-in kind.

Mersi Mr Speaker.

MR SPEAKER

Okenn siplemanter?

Onorab De Commarmond?

HON CHARLES DE COMMARMOND

Mersi Mr Speaker.

Bonzour Mr Speaker.  Bonzour Minis.  Bonzour tou dimoun ki a lekout.

Mr Speaker, eski Minis i kapab eksplik nou Lasanble, ki Minister Tourizm e Kiltir pe fer, ki mannyer i pe travay an vre sinerzi avek lezot stakeholders, pou kree bann prodwi a pri abordab e afordab pour bann touris ki vin isi depans plis?

Mersi bokou.

MINISTER ALAIN ST ANGE

Mersi Mr Speaker.

En tre bon kestyon poze par Onorab De Commarmond.  Nou pei tanzantan nou koz yield.  E nou pei, nou yield i baze lo en konponan:-lasanm lotel ek restoran dan lotel.  E se pour sa rezon, ki toultan nou pe misguide nou pei lo ki larzan Lendistri Tourizm i fer antre dan nou pei.  Nou bezwen get tou bann adisyon ki en touris i depanse:- ki swa artizana, ki swa pran en bato pou al Praslin, ki swa lwe en yacht, mon pa’n vwar Onorab De Commarmond lo en yacht pou al pas lazournen an mer ouswa en wikenn.  Akoz sa i ganny fer par touris e nou bezwen kaptir tou depans ki touris i fer dan nou pei, pou anmenn sa yield ki nou pei i fer avek Lendistri Tourizm.

Me an dizan sa, enn nou bann defayans e Onorab De Commarmond i annan antyerman rezon:-en pli gran defayans pei, se ki ase souvan ler nou fer bann survey erport, touris i dir:-nou ti annan en bidze pour depanse Sesel, me nou pa fini depans nou bidze akoz napa nanryen pou aste.’  Mon lapel e la set ansanm avek nou koman Departman Kiltir, ansanm avek SENPA, ansanm avek tou lezot lorganizm nou pei, nou bezwen gete ki mannyer nou annan sa bann prodwi-made in Seychelles, bann fasilite ki Seselwa ki’n nobou ofer touris ki zot pa gannyen dan en lot landrwa.

Nou, nou apel sa Cultural Tourism.  Cultural Tourism i en pe Praslin e mon a repran Praslin ankor en legzanp.  Pandan 2 zour, lakantite touris ki ti Cote D’Or, ki swa pe tir portre sa senn display, swa pe manz manze lokal, akoz ti annan Pralinwa ki ti’n met zot linisyativ a lavan, ti pe griy kordonnyen o bor lans, ti pe ofer manze Kreol.  E sa ki nou pa vwar ase Sesel.  La i semenn Kreol pe vini, nou pou vwar en kantite, apre nou pa vwar li pour ankor 365 zour.

Sa i bann defayans nou pei.  Nou bezwen.  Nou bezwen kapab annan plis ekskirsyon, ki les nou dimoun dekouver nou pei.  Nou bezwen kapab annan plis ekskirsyon, ki met labote nou pei a lavan.  E mwan mon’n fer en lapel avek bann BMC. Nou’n bouze.  Nou’n bouze swadizan koman en pei.  Lontan nou ti annan kanmiyon kot dimoun ti asize avek lafreser, nou antre dan bann pti bis ki fermen ek air condition e a lafen bann touris i dir ou:-be mon pa’n vwar bokou.  Nou pa vwar bokou akoz nou fermen a lenteryer.  Tandis ki sa kanmiyon zot ti apiye.

E ozordi Gouvernman in sanze lalwa.  I lese lwe license en kanmiyon, pou kapab met dimoun deryer.  Nou’n fer sa akoz nou pa pe re envant lafarin.  Si i bon pour Bahamas ouswa Jamaica, ouswa Bermuda, i bezwen bon pour Sesel.

Si en zenn Seselwa i oule larg son lekor dan Lendistri Tourizm, an rod enn sa bann kanmiyon parey i annan La Digue ankor e anmenn Mahe e ladan ofer snorkeling kot en lans, travay avek en lot koleg kot i kapab fer en pti barbecue o bor lans.  I bann aktivite ki touris pou pran.  Sa ki tro fasil, sa ki paret fasil:-vann en ekskirsyon, fer half day Mahe North, half day Mahe Sid, i pa pe anmenn nou rannman neseser e bann touris pa pe kit Sesel avek vreman sa lantouzyazm, ‘ki nou’n vwar sa pei.’  Sa bann ekskirsyon pou bezwen reflekte sa ki nou annan koman pei.

Se pour sa rezon, ki avek Minister Devlopman Kominoter avek Minis Meriton, nou’n lans sa pri Distrik Kiltirel.  Pour nou kapab fer ki touris i sorti dan son lotel e ki i al vwar keksoz dan nou bann distrik.  E toultan mon koz lo Onorab Pool avek Anse Boileau, kot zot dans Kontredans, zot connus pou dans Kontredans.  Tou konpetisyon lontan ti gannyen par manrmay Anse Boileau.

Si Anse Boileau ti annan en nespes grannkaz, kot ti annan en boufe deor, Kreol e ladan bann dimoun ti kapab vini 2 fwa, 3 fwa par semenn apresye sa Kontredans, nou ti a vwar ki touris ti a sorti, ti a vin la.  E sa ekskirsyon ti a pran en taksi, swa en loto lwe, swa en ekskirsyon par organize par en BMC.  E sa ti a fer, ki nou bann dimoun i ganny en leksperyans kiltirel.

Nou, nou’n deside koman Minister, ki nou pa kapab fors lotel ni BMC fer sa.  E lantman, nou pou rod bann Lazans ki a travay avek nou koman Minister, pour nou sey fer sorti dimoun dan bann lotel e al apresye.  Bann levennman i deza en keksoz.  E Praslin was the classic, kot nou’n vwar lakantite touris ki ti deor, ti enkrwayab.  Menm mwan mon pa’n otan vwar touris dan nou bann levennman kiltirel, ki ti annan Praslin.

Me bann lotel i lo Komite ki organiz Lafet Praslin e lotel zot menm in asire, ki zot touris ti sorti pou al Cote D’Or akoz zot menm zot ti annan bann kyosk.  E dan zot bann kyosk zot ti pe donn manze zot bann touris respektif, menm ki sa kou ti lokal.

Me Praslin ti osi fer mwan vwar en keksoz, akoz avek PS nou ti fer letour bann lotel ki ti’n provide en repa spesyal pour Lafet Praslin.  Sa ti remarkab.  Nou ti fer en maraton:-al vizit lotel apre lotel aswar pou get bann dinen Kreol.  E Onorab De Commarmond mon asir ou, ki si ou ti’n kapab fer en traze koumsa, ou ti pou apresye lakantite varyete manze Kreol, ki en lotel i kapab prepare.

Me nou pa fer li toulezour.  Nou esper annan en lafet.

Ou a krwar en ler nou kanmi nou kreolite, nou kanmi nou kiltir.  Me se pour sa rezon ki atraver grading, sa klasifikasyon, lotel pour bezwen si i oule ganny 5 zetwal ouswa 4, annan repa Kreol, animasyon Kreol, lanmizik Kreol e ‘Made in Seychelles’ products, ki Kreol, ki met a lavan pour touris depanse.

Nou pli gran defayans se ki touris, pa pe depans zot bidze ler zot vin isi.  Nou pe fer menm ekskirsyon ki nou ti fer 30an pase e nou’n depase.  Sa touris pe rod plis Cultural Tourism, en cultural experience. Se sa ki Gouvernman ti atas Kiltir avek Tourizm.  Pou esey anmenn sa a lavan.  Nou’n anmennen, me nou still nou pa ankor ganny ase dan Sesel, pour touris eksperyanse.

Mersi Mr Speaker.

MR SPEAKER

Kestyon 169, Onorab Bernard Arnephy.

HON BERNARD ARNEPHY

Mersi Mr Speaker.

Mr Speaker, eski Minis i kapab dir nou Lasanble, ki demars Minister pou ankouraz tou lotel pou annan bann Kids Club, koman en zefor pour diversifye bann servis ki sa lendistri i ofer?

Mersi Mr Speaker.

MINISTER ALAIN ST ANGE

Mr Speaker, pa tou lotel dan Sesel ki annan en servis Kids Club. Me sa servis i ganny ofer dan bann gran lotel ki annan en tel demann.  Par egzanp lotel Constance Ephelia, Beach Comber Ste Anne ek Savoy, pou mansyonn zis detrwa legzanp.

Sa servis ki zot osi apel child minding, i ofer bann viziter en landrwa pou gard zot zanfan pandan ki bann paran i partisip dan aktivite tel ki:- diving, fishing excursions eksetera, ki pa apropriye e safe pour zanfan.  Dan sa Kids Club, sa bann zanfan i ganny sans pou fer diferan aktivite edikasyonnel e rekreasyonnel.

Kids Club i ganny devlope koman en fasilite pour atir fanmir ki annan zanfan, pou vin pas en vakans Sesel.

Parkont, bann pti lotel, guest house e self-catering, pa pe ofer sa servis, akoz zot napa ase lespas, ni finans neseser pou antreprann en tel proze.  I osi annan lotel, ki zot pa bezwen en tel servis e lotel ki pa pe aksepte zanfan anba en serten laz, akoz zot letablisman pour rezon kot zot lokasyon, i santi ki zot pa safe pour annan zanfan dan lotel.

Mr Speaker, nou ti a kontan ankouraz tou nouvo proze letablisman touris, pou konsider diversifye zot prodwi e ofer sa servis.  Me i bezwen dapre zot plan marketing, zot kliyantel ki zot pe target e demann ki zot santi zot annan.  Akoz i en desizyon komersyal.  Kestyon se:- eski annan en Kids Club, i en lavantaz pou marketing sa letablisman?  Repons tou senpleman i wi.  Me sa desizyon komersyal i reste desizyon, ki dan lanmen nou sekter prive.

Mr Speaker, nou konnen ki laplipar touris ki vin Sesel, i ganny akonpannyen par zot fanmir.  Dan lemoman ki bann koup pe fer decouverte nou pti pei Sesel e pe repoze, i enportan ki zot zanfan i annan en landrwa an sekirite, avek bann dimoun ki annan ekspertiz pou pran swen avek zot.

Set avek sa rezon antet, ki lotel Constance Ephelia, pour byento lans sa proze Kids Club, kot bann zenn i ganny training pou kapab travay e okip bann zanfan dan en konsep Kids Club. Sa aktivite pou sa training ki pe ganny pran an sarz par lotel, pou ed soulaz nou lendistri, akoz training i reste baz ki a ed nou ofer en eleman an plis an term servis, ki Sesel i ofer a son Lendistri Touris.  Nou lakademi Tourizm, STA, pou vin sa fasilitater pour sa training, ki pou ganny fer kot lotel Ephelia li menm.

Mersi Mr Speaker.

MR SPEAKER

Onorab, okenn siplemanter?

HON BERNARD ARNEPHY

Non Mr Speaker.  Ok.

MR SPEAKER

Bon, si napa nou ava adjourn ziska 11er.

(BREAK)

MR SPEAKER

Bon, nou ava kontinyen avek nou travay pour ozordi.  Prezan avek nou se Vis Prezidan, Mr Danny Faure, ki vin prezant en Bill.  En lamannman, The Elections (Amendment) (Number 2) Bill, 2015. E mon a ganny mwan en Motion for Second Reading.

Oh wi.  I sipoze fer First and Second Reading. Mon a ganny mwan en First Reading.

ASSISTANT CLERK, MS ANGELIC APPOO

This Act may be cited as the Elections (Amendment) (Number 2) Act, 2015.

MR SPEAKER

Nou pou bezwen weave 7 day requirement.

HON MARIE-ANTOINETTE ROSE

Mr Speaker, anba Order 91(1), mon move ki nou sispann Order 64(1), pour nou allow for the Second Reading.

MR SPEAKER

Okenn ki segonde?

HON CHARLES DE COMMARMOND

Mr Speaker, mon segonn sa Mosyon.

MR SPEAKER

Ok.  Nou pran en vot lo la.  Tou bann ki an faver?

Ok, bon.  So, mon a ganny mwan en Motion for Second Reading.

HON MARIE-ANTOINETTE ROSE

Mr Speaker, anba Order 64(2), mon move ki nou lir sa Bill en Dezyenm Fwa.

MR SPEAKER

Bon, mon ava envit Vis Prezidan pou fer son prezantasyon.

HON CHARLES DE COMMARMOND

The Motion is seconded, Mr Speaker, Sir.

MR SPEAKER

Ya.   Paret mwan mon prese ozordi.

Mon ava envit Vis Prezidan pou fer son prezantasyon.

Mon prezimen ki si zot in dakor pou sispann First Reading pou fer Second Reading, then zot oule fer Second Reading.

So, Vis Prezidan.

VICE PRESIDENT, MR DANNY FAURE

Mersi Mr Speaker.

Bonzour Mr Speaker.  Bonzour tou bann Manm Onorab.

Mr Speaker, Lalwa Eleksyon tel parey i ete ozordi, i fer provizyon pour Zofisye Ansarz Eleksyon, met bann fasilite pour bann voter dan bann kriter ki byen definir anba Lalwa.  Par egzanp premyerman, si en voter i tanporerman lo Mahe zour Eleksyon me ki li sa voter in anrezistre lo Lalis Voter Grand Anse Praslin, Baie Ste Anne Praslin e bann Inner Islands, parey nou dir, La Digue e Silhouette.

E dezyenmman, pour bann voter ki par rezon zot travay, zot pe reste tanporerman lo Praslin e Inner Islands, me ki zot non i lo Lalis Voter bann landrwa elektoral lo Mahe.

E trwazyenmman, i pour bann dimoun aze.  Nou apel sa enkapasite, me ki rezid dan bann Lenstitisyon.  E Lalwa i fer kler lekel sa bann Lenstitisyon.  I dir North East Point Hospital e North East Point, Lakaz pour nou bann dimoun aze.

E katriyenmman, Lalwa i fer provizyon pour bann voter ki lo Lalis Voter nenport distrik, me ki dan en lanplwa en servis esansyel.  E la ankor, Lalwa i dir lekel sa bann servis esansyel me selman, zot devret pe lo duty zour Eleksyon.  Tel ki bann Ners ki pe travay lopital, Lapolis, ensidswit.  Sa Lalwa i fer kler.

E dernyen-man, Lasanble ti aprouve ki Zofisye ansarz Eleksyon i osi devret, anba Lalwa ki zot in aprouve zot menm, met bann fasilite pour bann voter ki lo an detenir.  Nou apel sa bann rimann me ki pa ankor komans fer en santans.  Sa, ziska prezan i dan Lalwa.

E swivan rekomandasyon sorti kot Komisyon Elektoral e ozordi bomaten, mon ti a kontan demann Lasanble pou aprouv en sizyenm kriter, en sizyenm provizyon dan Lalwa.  E sa lamannman i dir ki Zofisye Ansarz Eleksyon, i devret met bann fasilite pour bann voter dan bann sirkonstans spesyal ki sa Sef Zofisye Ansarz Eleksyon i konsider koman apropriye.

Sa i ava sizyenm provizyon e Mr Speaker, mon demande ki Lasanble i siport sa rekomandasyon ki Gouvernman pe met devan Lasanble, swivan rekomandasyon sorti kot Komisyon Eleksyon.

Mersi.

MR SPEAKER

Ok.  Deba i ouver.  Okenn ki oule entervenir?

Onorab Pillay.

HON SEBASTIEN PILLAY

Mersi Mr Speaker.  Bonzour Mr Speaker.  Bonzour Vis Prezidan avek ou delegasyon e bonzour tou dimoun ki a lekout.

Mr Speaker, mon krwar sa ki enportan pou nou tire ozordi bomaten, se lefe ki nou’n kontinyen evolye dan lafason ki nou fer keksoz dan sa pei.  E nou pe vwar nou dezormen pe aplik bann prosedir, ki fer ki nou Sistenm Elektoral i komans vin pli for, i vin pli dinamik, pou kapab reponn a bann bezwen ozordi, bann legzizans ki nou pei i trouv li ladan ozordi.

E sa mon krwar i enn bann pwen fondamantal ki nou bezwen tire avek tousala, akoz lenportans an sa ki konsern Eleksyon se ki tou dimoun i bezwen ganny enfranchised pou zot vote.  E en dimoun pa devret irezonnableman ganny disenfranchised par lefe son lokasyon kot i trouve a sa moman, pour li vote.  E si son lokasyon pa permet li pou li ariv dan son sirkonskripsyon elektoral pour li vote, parey Vis Prezidan in fer tre kler.  E mon krwar sa i en tre bon pwen.  En pwen tre enportan ki nou pe fer ozordi.  E i montre ankor, ki nou’n ariv en nivo matirite dan nou pei, kot nou pe konsider bann eleman esansyel e enportan nou kad elektoral ki fer li vin pli for e fer li vin pli reliable e pli valid.

Me i osi annan en lot pwen tre trez enportan dan sa konzanktir politik, ki nou pei i trouv li ladan ozordi e sa i konsern lefet ki Komisyon Eleksyon li i pe met son lekor pare li, pour Eleksyon.  I pe met son lekor pare e bann parti politik osi i bezwen met zot lekor pare, pou al dan Eleksyon.  En parti politik pa kapab deside poudir li, ariv lavey en Eleksyon, i pa ankor pare.  Me ler nou dir sa, sa parti politik pa ankor pare.  Ou pa ankor pare pou al dan Eleksyon, me eski ou’n pare prezan pou gouvern en pei?  And that’s the fundamental question ki ou bezwen demann ou lekor.  Akoz Komisyon Eleksyon in anonse poudir vwala, Eleksyon ………

(Interruption)

MR SPEAKER

Onorab, relevance en.  Relevance.

HON SEBASTIEN PILLAY

Thank you Mr Speaker.

The relevant point ki mon oule fer sorti an relasyon avek sa, se lefe ki Komisyon Elektoral li i pe fer sir ki nou pare pou al dan Eleksyon e i follow suit ki nou swiv parey, bann parti politik, pour nou pare pou al dan en Eleksyon.  E mon krwar ki vi ki nou pe fer en lamannman tre enportan e parey Vis Prezidan in fer resorti, pou konsider par egzanp, bann rimann ki pa ankor ganny kondannen, pou zot vote.

Sa i a fer ki nou retir en pe bann kestyon ki’n deza annan dan lepase, vizavi stati sa bann dimoun.  E mon krwar sa i tre byen.  E i montre parey mon’n dir Mr Speaker, sa devlopman nou demokrasi, sa evolisyon dan nou demokrasi, ki’n fer ki nou pei ozordi i vin en pei bokou pli stab.  En pei ki politikman nou stab, ki permet nou pour davantaz kapab devlope e avans pli devan.

Mr Speaker, avek sa bref entervansyon, mon oule dir ki mon pou aport tou mon sipor pour sa Prozedlwa e mon oule demann tou mon bann koleg pou fer parey osi.

Mersi Mr Speaker.

MR SPEAKER

Okenn lezot entervenan?  Onorab Pierre.

HON DAVID PIERRE

Mersi Mr Speaker.

Mr Speaker, lamannman ki devan nou i enn ki ase senp me an menm tan, i enn ki tre enportan.  Me selman nou ava rapel ki semenn pase, nou’n aprouv en lamannman pou basically fer Perseverance vin en distrik elektoral e mon konnen ki anba Konstitisyon, Lartik 116(5), sa i pran lefe ler i pou annan the next disolisyon Parlman.  Donk, mon krwar dan menm laliny, i pou enportan pour nou osi kapab pas sa lamannman, pou fer special provizyon petet pour bann dimoun Perseverance kapab vote.

But Mr Speaker, sa lamannman ki ti devan nou, knowing full well parey Vis Prezidan in dir, ki nou pe fer provizyon osi pour bann dimoun ki pe rimann kapab al vote, nou pou fer provizyon pour bann dimoun Perseverance kapab vwar li pli fasil pour zot al vote.  Me nou ti kapab anmenn sa lamannman ki devan nou la semenn pase, ansanm avek sa lot lamannman ki nou’n aprouve, si nou ti’n kapab prevwar poudir nou pou bezwen fer sa lamannman pli boner.  E nou ti’n devret prevwar poudir sa lamannman pou bezwen vin devan Lasanble Nasyonal, akoz presizeman akoz sa ki Lartik 116(5) nou Konstitisyon i dir.  Alors, olye fer lamannman apre lamannman, apre lamannman lo en Act, ti ava pli preferab, pli pridan si nou ti kapab fer bann lamannman ki nou kapab prevwar a en moman kot potansyel-man, nou ti’n kapab prevwar li.

Dan menm laliny Mr Speaker, parey Lartik 116 nou Konstitisyon.  116 i koz en pti gin lo sa issue ki devan nou la.  E 116(5) i dir, “When the draft Order laid before the National Assembly under Clause 4, is approved by resolution of the National Assembly, the President shall make an Order which shall be published in the Gazette, in terms of the draft and the Order shall come into force on the next dissolution of the National Assembly, after the Order is so published”. Petet sa i en pti pe restriktiv.  Anliny avek sa lamannman ki nou pe fer, petet sa pe dir avek nou koumsa poudir, petet a lavenir, nou devret gete si nou pa devret fer en revizyon dan nou Konstitisyon, an relasyon avek sa size.

Trwazyenm pwen Mr Speaker.  Sa lamannman devan nou prezan i dir, In any other special circumstances, the Chief Electoral Officer considers it appropriate. Mon swete ki sa i pa pou donn en kart blanche, pour nou ouver bann Stasyon Vote right, left, centre dan pei, kot i kapab annan en labi.  E mon hope ki the Electoral Commission and the Chief Electoral Officer i fer sa legzersis dan bann lenstans kot i vreman en special circumstance e nou pa vwar labi, an relasyon avek sa lamannman ki nou pe fer la.

So, pour mwan, mon pe zis anvoy en not prekosyon pour si sa lamannman i pase, pour nou servi li dan en fason ki apropriye e dan en fason ki pridan, san ki i annan okenn labi.

Pour mwan sa i 3 pwen ki mon ti anvi refer sorti, an relasyon avek sa lamannman ki parey mon’n dir, i ase senp.

Mersi Mr Speaker.

MR SPEAKER

Ok.  Zis pour gidans.  Last week nou pa’n aprouv en lamannman.  Last week nou’n aprouv en Draft Order.  I annan en diferans fondamantal ant le 2 e zot 2 issues diferan.

Yes.

HON MARIE-ANTOINETTE ROSE

Mr Speaker, mersi.

Mon pa oule repet sa ki ou’n dir, me i egzakteman ki mon ti pou al remind the House ki i annan 2 issue diferan.  Reelman, nou pa devret melanz delo avek diven.

Mr Speaker, sa Lalwa ki devan nou, sa lamannman ki devan nou, i pe siport rekomandasyon Komisyon Elektoral ki en Komisyon endepandan.  E mon krwar nou bezwen remind the House nou rol koman Parlmanter.  Nou rol koman Parlmanter se pou as much as possible, dan nou travay, pas Lalwa oubyen pa pas Lalwa, nou devret pe fer sir ki nou reprezant bann voter e elektora ki’n met nou la.  E sa Lalwa i direkteman annan en lenpak lo the most fundamental, enn bann Drwa sakrosan ki zot annan, enn bann Drwa sakre ki zot annan.  And that is the Right to Vote. E sa i premye pwen.

Dezyenm pwen, Komisyon Elektoral i en Komisyon endepandan.  Nou, nou pa la pou dir Komisyon ki pou fer, ki pa pou fer.  Me mon krwar nou devret servi nou pouvwar ki lepep in donn nou, pou siport en rekomandasyon ki Komisyon in soumet devan nou, pour li kapab fer son travay pli byen posib.  Pou personn pa konplent.  Pou personn pa dir in ganny disenfranchised.  Pou personn pa dir laplenn pa nivo.  Pou personn pa dir i pa ankor pare.  Pou personn pa dir i napa cap, i napa t-shirt.

Mr Speaker, mwan mon vwar ki Komisyon Elektoral, an vi ki Eleksyon in ganny anonse, i pe prepar li pour sa latas ki i annan pou fer.  E nou, nou bezwen annan en lespri ouver pou allow li pou fonksyonn as best as it possibly can, pou fer son fonksyon.  Si nou pa donn li sa sipor, demen i pou dir be donk, Lasanble Nasyonal pa’n donn mwan sa sipor neseser pour mwan kapab fer mon travay ki mon merit fer, avek tou mon lendepandans.  E mon krwar nou devret ziz zot lasazes, zot grander lespri, zot integrity e allow zot pou fer travay ki zot santi zot bezwen fer.  Sa i sa ki sa lamannman pe propoze.

Dezyenmman Mr Speaker, se pe allow voters the right to exercise, the Right to Vote.  I pou pe ed voter e Sesel i en pei kot nenport ki kwen ki ou ete lo Mahe, Praslin La Digue e lezot zil, ou annan sa Drwa, ou kapab ale, al vote.  Ou kapab Aldabra.  Komisyon i ariv kot ou.  Pa ou ki al kot Komisyon.  Drwa Vote i ariv kot ou.  Pa ou ki al rode sa Drwa Vote.  E sa i en legzanp pour en kantite pei Lafrik, kot en kantite dimoun pa ganny drwa, pa kapab partisip dan prosesis elektoral akoz zistans.  Akoz kapasite zot Komisyon napa sa kapasite oubyen Lalwa ki gouvern zot Komisyon.  Napa sa pouvwar, napa sa kapasite, napa sa liberte pou vreman kapab les tou voter vote.  E nou koz bann pei ki akote nou.  Nou koz bann gran demokrasi ki koz lo la demokrasi, konmsi se zot ki’n dekouver la demokrasi.  Nou koz lo diferan pei kot en kantite voter pa ganny drwa, pa kapab, par zistans oubyen par enkapasite, oubyen par bann baryer Legal e regilatwar, zot pa kapab arive cast vote.

E Sesel mon krwar, nou bezwen remind voter ki anba Lalwa e anba pouvwar ki Komisyon Elektoral i gannyen, voter Sesel i kapab al cast son vot dan bann Stasyon dan en fason konfortab, dan en fason ki ganny fer smoothly.  E nou, nou la koman Lezislater pou fer sir ki tousala i ganny fer dan faver sa bann menm dimoun ki’n elekte nou, ki’n met nou la.

Avek sa Mr Speaker, byensir mon pou siport sa Prozedlwa.

Mersi.

MR SPEAKER

Right Of Reply, Vis Prezidan.

VICE PRESIDENT, MR DANNY FAURE

Mr Speaker, Lalwa in definir tre kler responsabilite en Zofisye ansarz Eleksyon.  Lalwa i dir ki en Zofisye ansarz Eleksyon, i travay anba direksyon Komisyon Eleksyon e i siperviz Eleksyon e Referendum.  I kler.  Me pou li kapab siperviz Eleksyon, i bezwen annan li bann Lalwa ki kler.  Bann lareg ki kler.  E ozordi si Lasanble i aprouv sa lamannman, nou pe donn Komisyon Elektoral ki a donn direktiv Zofisye Ansarz Eleksyon en lareg pour li kapab fer sir ki i met bann fasilite vote ki pa afekte nou bann sitwayen, pour zot desarz zot drwa sivik.

E ozordi, mwan mon pa kapab dir kote sa pou ganny fer, akoz sa provizyon pa pe dir kote.  Sa provizyon i dir, sirkonstans spesyal.  Sirkonstans spesyal pour ki sa Zofisye Ansarz Eleksyon, i a konsidere kot i apropriye.  Me si demen i dir, sa pou ariv Perseverance, i ava gras a sa Lasanble Nasyonal ki’n donn li, ki’n permet, ki’n aprouv sa lamannman e in fer li posib.  E zot ava vwar zot ladan.

Mersi Mr Speaker.

MR SPEAKER

Ok.  Bon, nou ava pran en vot lo merit.  Tou bann ki an faver?  Okenn ki kont?

Mon a ganny mwan en Formal Second Reading.

ASSISTANT CLERK, MS ANGELIC APPOO

A Bill of an Act, to amend the Elections Act, (Cap 68(A).

MR SPEAKER

Ok, mon mazinen nou ava sot Committee Stage.  Okenn Mosyon pour nou sot Committee Stage?

HON MARIE-ANTOINETTE ROSE

Mr Speaker, mon move ki nou sot Committee Stage.

MR SPEAKER

Okenn ki segonde?

HON CHARLES DE COMMARMOND

Segonde Mr Speaker.

MR SPEAKER

Pran en vot lo sa.  E bann ki an faver?  Okenn ki kont?

Bon.  Motion for Third Reading.

HON MARIE-ANTOINETTE ROSE

Mr Speaker, mon move ki nou lir sa Bill en Trwazyenm Fwa.

MR SPEAKER

Okenn ki segonde?

HON CHARLES DE COMMARMOND

Segonde Mr Speaker.

MR SPEAKER

Tou bann ki an faver?  Okenn ki kont?  Bon, nou a ganny nou en Third Reading.

ASSISTANT CLERK, MS ANGELIC APPOO

This Act may be cited as the Elections Amendment (Number 2) Act, 2015.

MR SPEAKER

Bon, Bill in pase.  E nou ava ekskiz Vis Prezidan ek son delegasyon.  E nou a remersye li.  Kant a nou, nou annan lezot travay pou fer.  Nou pou reste deryer.  Mersi.

Nou annan lo Order Paper, en Mosyon par Onorab Leader of Government Business.  Ofet, i en ratifikasyon lo Arms Trade Treaty.  Mon a demann Onorab Rose pou prezant son Mosyon.

HON MARIE-ANTOINETTE ROSE

Mersi Mr Speaker.

Mr Speaker, mon pe demann sipor Lasanble, pour nou aprouv ratifikasyon the Arms Trade Treaty. Annefe sa Trete i en trete vreman resan.  I tre nouvo e dan listwar bann trete.  I enn bann trete ki’n vreman ganny sipor mondyal dan en dele letan vreman vit.  Sa Trete ti ganny adopte par Lasanble Zeneral Nasyon Ini an Avril 2013.  E i ti ganny ouver pour bann sinyatir, an Zen 2013.  E Sesel in deza enn bann parti prenan.  In deza siny sa Trete.  E dan 1an edmi, i ti’n fini rantre an fors, ki dan listwar bann trete, i enn bann trete ki’n vreman vit pou rantre an fors.  Deza, plis ki 50 leta in ratifye sa Trete.  I ti antre an fors an 2014.  Savedir, i deza an fonksyon.

E Sesel ziska ozordi, 73 pei in deza, zot Parlman in deza ratifye sa Trete e si nou fer li la bomaten Mr Speaker, nou pou vin swasant-katorzyenm parti a sa Trete.

Now, Sesel ki sa Trete pou fer Mr Speaker, se selman i pou regulate bann transfer enternasyonal an sa ki konsern bann Arm Konvansyonnel.  I bezwen annan en Lalwa, en bann regilasyon enternasyonal an sa ki konsern servi transbordman registration and control of conventional arms. I pou osi ede etablir standar e Protokol an sa ki konsern Trade bann Arm konvansyonnel.  Trade, savedir aste, vann, aste revann e fer profi out of conventional arms. E i pou osi ed bann Gouvernman pou annan plis oversight, lo sa ki konsern global arms sales e ensure accountability.

Mr Speaker, parey nou, nou konnen, isi Sesel nou napa en Trade.  Arms trade nou napa.  Me selman nou en manm aprezan World Trade Organisation. Nou’n vin en manm World Trade Organisation. E osi Sesel i en pei kot en kantite avyon, bato i pase e i annan transbordman.

I annan transbordman ki ganny fer isi Sesel.  I osi annan en kantite illicit arms trade ki ganny fer.  En kantite dan nou rezyon Lafrik kot nou trouv nou.  E malerezman, en kantite pei Lafrik, nou pa prodwir zarm, me i annan en kantite legal and illegal Arms Trade ki ganny fer kantite lo nou Kontinan.

Sa Trade Mr Speaker, i kout-i en Industry of billions of dollars.  I en lendistri ki annan bilyon e bilyon dolar.  E i en lendistri ki souvandfwa i ganny enplike dan bann skandal e dan bann murky deals, zisteman akoz i annan pou fer avek arms.  E i en lendistri ki kolekte bilyon dolar me i osi en lendistri avek potansyel pou detrir bilyon lavi, milyon lavi.

Progre in terms of billions of dollars. E nou, nou’n vwar sa lo nou Kontinan.  Koman Afriken mon krwar, nou bezwen santi nou tre konsernen avek International Arms Trade.  Nou bezwen santi nou bokou pli responsab, an sa ki konsern kote sa bann zarm i arive e ki lefe sa i annan lo nou lekonomi, lo nou sosyete, lo progre ki nou anvi nou Kontinan i fer.

Si i annan progre lo nou Kontinan, i annan progre ki arive dan Sesel.  E menm si Sesel nou napa Arms trade, nou annan Arms osi.  Nou en pei ki annan Arms.  Nou annan en lafors militer.  Nou annan lafors lapolis.  E sa osi Sesel i annan en responsabilite pour li report on okenn Trade ki ganny fer an sa ki konsern Arms, ki ganny fer, as a countryAs a StateSo, tousala i tonm anba sa Trete Mr Speaker.

Sa ki enteresan avek the Arms Trade ler mon’n lir, ler mon’n aprann lo la, se ki i enn bann trade ki very poorly regulated. Annefe, i annan bann lezot tradeTrade dan lezot domenn, dan lezot lendistri.  Annefe, i annan en joke ki-bananas are more regulated than Arms. So, i enn bann trade ki very poorly regulated.  Se pourtan i enn bann prodwi avek potansyel pou fer plis dega.  E nou, nou konnen lo nou Kontinan, kantite dega sa in fer.

Sesel i en pei anpe.  Nou en pei ki enjoy stability e nou en legzanp lo nou Kontinan, lo ki stabilite, stabilite politik, stabilite ekonomik, stabilite sosyal i kapab fer.  E mon krwar i moman apropriye Mr Speaker, pour nou remind nou pep ki ler nou, nou pe ratifye sa trete, nou bezwen santi nou en pei beni, akoz nou en pei ki anpe.

Nou en pei ki napa lager cross border.  Nou en pei ki napa lager sivil.  Nou en pei ki napa lager etnik.  Nou en pei ki pa’n zanmen eksperyans sa bann kalite destabilizasyon.  Nou en pei ki politikman stab.  Nou en pei ki ekonomikman stab.  Nou en pei ki sosyalman stab.  E nou stabilite in fer ki nou’n kapab devlope.

Si nou desann dan semen nou al Bazar, nou aste nou legim nou retourn kot nou, set akoz nou en pei ki stab.  Nou pa pe get deryer nou, get devan nou pou regarde si i annan en dimoun ki pe maske, eksetera.  Nou annan prosperite ekonomik isi Sesel.  Nou annan koezyon sosyal isi Sesel.

Nou annan stabilite politik isi Sesel e nou annan human progress isi Sesel Mr Speaker.  Tousala i akoz nou byen kosyon, nou byen conscious frazilite e lenportans pou annan en pei ki stab.

Mr Speaker, avek sa mon ti a kontan demann nou Lasanble pou siport sa Trete.  Mon ti a kontan demann Lasanble pou siport sa Trete.

Mersi Mr Speaker.

MR SPEAKER

Ok, okenn ki segonde?  Onorab De Commarmond ou ti anvi entervenir?

HON CHARLES DE COMMARMOND

Mr Speaker, mon segonde e mon ti anvi dir de mo.

MR SPEAKER

Ok.

HON CHARLES DE COMMARMOND

Mersi bokou Mr Speaker.

Mr Speaker, sa Trete ki devan nou, i en trete enportan e menm ki nou isi Sesel, nou pa eksport, nou pa fer bann trafik e eksport zarm.  Me definitivman zarm i ganny:-koman dir sa, transit atraver Sesel parfwa avek nou vast lanmer ki nou annan.  E nou konnen nou annan en sel por, nou annan en ta zil.  So, fasilman dan larout trafik zarm, Sesel i tonm ladan e nou bezwen fer sir ki nou, nou form parti sa bann Lalwa enternasyonal.

Akfer Mr Speaker, en tel trete e kisisa sa zarm?  Sa trete zarm la?  Trete trafik zarm: Arms Trade Treaty.

Mr Speaker, i enportan sa akoz i regulate.  Konmela dan lemonn i annan en dezord konpletman, kot i konsern sa bann zafer trafik zarm.  I en biznes, enkrwayab.  Milyon e de bilyon e de bilyon larzan i ganny fer ladan e si napa kontrol, i anmenn a risk lavi en kantite imen.  Lavi:-anmenn a risk lavi kominote e lavi si oule dir, menm serten pei i vin a risk.  Toulezour nou tande lo televizyon, problenm laba dan Nigeria, dan sant Lafrik partou.  Nenport landrwa dan lemonn dan Sid Lanmerik, dan Lazi.

An plis ki sa, nou vwar bann lezot risk ki bann zarm ki napa kontrol in anmennen.  Kot ou vwar par egzanp bann min.  Plizyer dimoun ozordi dan lemonn i pa antye, i annan bann bout ki manke ek zot: lipye, lazanm, lebra, ensidswit.  E i annan ki’n mor.  I annan ki pou andikape pour lavi akoz problenm zarm: zarm ki napa kontrol.  E zisteman sa Trete i la pou anmenn en serten regilasyon enternasyonal vizavi tranzaksyon zarm.  An menm tan etabli bann norm e standar enternasyonal, pou fer sir ki sa bann zafer zarm i pa ganny fer an bonnavini.  E i ganny fer avek serten respe si i ganny fer, ek serten kontrol.

An menm tan sa trete i anmenn oversight.  I anmenn oversight lo:-e transparans lo tranzaksyon zarm dan lemonn antye, atraver nou rezyon, lezot rezyon e dan lemonn.

E katriyenmman an menm tan i anmenn accountability.  I enportan ki bann pei enternasyonal, bann gran, gran groupman enternasyonal, zot konnen alor kote zarm i ete plizoumwen.  Kantmenm ou pa konn son kantite, me ou a konnen poudir, i annan en ta zarm ki kontrole sepa dan tel, tel pei ouswa tel, tel rezyon.  Sa i ava ede pou evit e contain bann konfli.  Bann konfli ki souvandfwa parey mon’n dir taler, i anmenn bann problenm dezas-tre pour bann pep.

An menm tan Mr Speaker, ki stati sa Trete ozordi?  Sa Trete ozordi, nou’n vwar poudir enn, in ganny open for signature dan:-an 2013 le 3 Zen e an menm tan nou vwar poudir, i deza in ganny ratifye par 50 pei e la nou, nou pe al osi ratifye.  E i enportan fer sorti ki 130 pei in siny sa en, la prezan 73 parti to the convention: savedir to the treaty. Savedir 73 ki li in ratifye, i vin par en Manm Parlman-tyer avek sa Trete.  Konmsi ki tou sa ki sa Trete i dir, ou bezwen aplike, ou bezwen fonksyonn dapre sa.  I vin konmsi en Lalwa enternasyonal.

Me selman, menm ki nou Sesel nou pa ti ankor pe ratifye, konteni sa Trete nou deza pe met an pratik.  Nou pe met an pratik akoz Sesel i form par lezot bodies, lezot konvansyon, lezot trete.  Par egzanp Nairobi Protocol ensidswit.  Taler mon a tous lo la, ki:-so, nou deza pe met an pratik konteni sa Trete.  E i enportan fer resorti osi, ki letan nou pe ratifye sa, i fer ki Sesel koman en pei ilegalman devan lemonn enternasyonal, nou fer ki nou a bezwen met an pratik konteni sa ki sa trete pe dir, son bann regleman e son konteni ofisyel.

I enportan fer sorti a se pwen Mr Speaker, Sesel i pou bon pour nou sa, akoz aktyelman nou’n tyonbo en kantite pirat.  Pirat letan nou ti tyonbo, ti annan zarm ek zot.  Ki’n arive avek sa bann zarm?  Nou pa ankor dir nanryen.  Nou pa’n tann dir nanryen.  E i annan bann Lalwa, bann norm ki nou bezwen respekte anba sa Trete: par egzanp pou vwar ki sa bann markings lo sa bann fizi, lo sa bann zarm ki nou’n tyonbo ek pirat i dir- pou konn lorizin sa bann zarm.  Kote i sorti sa?  Lekel ki’n anvoye?  Ensidswit.

Sa i enn, akoz nou Sesel, tou bann fizi ki nou sipoze annan dan nou bann lafors normal, dan nou larme ek nou lezot bout lafors, i fer ki i bezwen annan markings.  I bezwen annan kontrol lo la.  I annan rikord, registry ki’n ganny fer.  Levanter ki’n ganny fer.  Alors sa bann ki pa ladan, ki deal?  E i enportan dan bann norm enternasyonal, i bezwen dir ou e rezyonal: par egzanp Nairobi Protocol i dir ou sa bann zarm ki napa markings, ou bezwen rann avek sa lorganizasyon ki ou pe form par avek sa Trete.

Par egzanp la, ou bezwen al donn devan avek par egzanp SADC, si ou form par SADC. E ou bezwen montre ki mannyer ou’n detri.  Sa osi i bann keksoz ki enportan e anba sa Trete, tousala i pou bezwen ganny:-annan transparans lo la.  Ou vwar ou ti tyonbo 10 i pa:-pa konnen kot sorti.  La, la ou’n detri sa 10.  E Medya i la, i filmen letan ou pe fer sa.

E nou, nou a risk.  Nou a risk en kantite, sanmenm sa ou vwar rezon i enportan ki nou join sa Protocol.  Nou a risk.  Nou en ta zil nou.  Ki dir ou, ki enn bann pei ki an dezord laba, i servi nou bann zil pou fer tranzaksyon zarm?  Pa konnen.  Lot zour parey nou dir, piratri, pirat in ariv pros ek nou bann zil.  Nou bann zil en bann i lwen ek nou, lwen ek Mahe, so i fasil.  E en bann ki en pe:-pa zis i zoli, napa dimoun lo la.  I fasil pour zot fer en kantite zafer e ki vin danze pour nou menm.  So, i enportan ki nou form par sa Protocol. Akoz osi i annan en bezwen ki nou form par en tel trete.

Nou, Sesel nou annan osi sa ki nou apel en responsabilite enternasyonal.  Nou pa zis fonksyonn lo nou menm.  Si lezot pei, lezot organ enternasyonal i form serten keksoz, nou osi nou bezwen zwe nou rol enternasyonal.  Nou bezwen donn koudmen pour nou anpes sa bann problenm kot bann zanfan, bann madanm, bann dimoun i ganny perdi zot lavi dan sa fason enkontrolab, lo tranzaksyon zarm.  Savedir i a fer nou redwir sa soufrans sa de milyon e de milyon dimoun, pour lo nivo enternasyonal.  Ok?

An menm tan nou dir ki bann kriter  transfer e eksportasyon sa zarm?  Parey nou dir, nou Sesel nou form par osi bann diferan Protocol. E an menm tan lo sa kestyon transfer enternasyonal la, nou vwar poudir, si zarm pe pas kot ou ouswa si zarm pe ganny vann, pe ganny transfer, pe ganny whatever, i annan en fason fer.  E nou Sesel, nou a vin pli alert pour nou vey sa letan en keksoz i ariv devan nou lizye, sirtou si nou konnen sa zarm pe al pou detri en lot group dimoun: pe al pou detri limanite, pe al pou detri en serten seksyon popilasyon mondyal, oubyen en serten group etnik oubyen whatever.  Sa i enportan pour nou osi vin lo alert de sa.

Epi sa Trete li osi i annan en sistenm reporting.  Raporte.  Tou le-z-an nou bezwen dir- ki’n arive ek Sesel, ou ki’n arive ek zarm ki’n pas kot ou?  Si ti annan ki ti pase, ki ou’n fer avek?  Si i annan ki ou’n tyonbo ek pirat, ki ou’n fer avek?  Tousala nou bezwen dir avek the body ki pe responsab pour sa Trete.  E nou, nou bezwen dir tou sa.  Sa i savedir i fer ki nou pep, i a vin plis an sekirite e tou dimoun i a konnen how transparent nou, nou ete e ki mannyer bann keksoz i pas kot nou byen.

An menm tan, i permet nou osi lokalman pour nou amann nou Lalwa, si i neseser pou amande pour nou vin azour avek konteni sa Trete.  Ziska konmela ki nou pe koze la, ki sa Trete i devan nou Lasanble, nou vwar poudir nou bann Lalwa, napa nanryen pou al sanze: gran zafer pou al sanze ladan.  Nou deza azour.  Savedir nou, akoz nou form par sa bann lezot entities par egzanp Nairobi Protocol, nou annan SADC Protocol on control of fire arms, ammunition and other related materials: apre konvansyon on the prohibition and use of stock piling production transfer of anti personal mines and on their destruction.

Sa bann bodies, sa bann Protocol ki nou’n deza from par ladan la, in fer ki nou’n deza amann e aranz nou, nou Lalwa pou zarm dan Sesel.  I fer ki alor nou deza plizoumwen azour avek tou sa, ki en tre bon siny dan nou kote.

Mr Speaker, i reste pour nou vwar alor ki benefis ki:-e komitman Sesel, vizavi sa Trete.  E an gro nou vwar poudir Sesel i annan en komikman vizavi Lalwa Human Rights e bann Lalwa enternasyonal ki nou apel Humanitarian Law, avek Lalwa imen, dwa imen.  Chart dwa imen nou’n sinyen.

E lot zour la, zot pe veye pangar i annan bann zafer ki arive dan Sesel.  Tou sa i form par.  E letan nou pe siny sa, savedir i fer nou vin pli alert.  Nou pou vey pli byen, pour ki sa bann keksoz pa ganny fer an mal.

Nou vwar Mr Speaker, poudir latransparans e:-kot i konsern latransparans e accountability.  Nou vwar osi poudir dan Lafrik, apepre $18 bilyon: Lafrik koman en kontinan, i perdi tou le-z-an akoz bann zafer zarm ilegal.  Vwar larzan, ti’n kapab redwir lapovrete dan Lafrik en kantite e en kantite.

Nou vwar alor poudir letan nou pou zwe nou rol enternasyonal, form par sa Protocol i enportan.  E sa mon krwar nou pep i devret fyer, ki nou form par sa e nou tou nou a vin pli alert, pli:-vey pli byen ki pe arive around us. E an menm tan i fer ki nou:-otan ki posib, nou kit nou pep dan lape.  I byen ziska konmela, nou vreman anpe.  Napa nanryen ki pe deranz nou tro bokou e nou bezwen kit li sa lape. Sa stabilite ki nou annan la, sa ki nou kapab fye lo la for the future.  Si i annan enstabilite: parey nou vwar, enstabilite i ganny koze par sa bann zarm ki ilegal, ki ganny vat e vyen dan lemonn an bonnavini i kree enstabilite e enstabilite.  Enstabilite i pou anmenn la povrete, i pou anmenn de-nyans pour nou e nou tou nou pou:-pa pli byen ki nou ete.  Annou kit sa stabilite Sesel, sa lapel ki nou Lasanble pe fer.  E nou dir i byen, nou form par sa Protocol.  Mon krwar nou Lasanble i devret siport sa Protocol.

Mersi bokou.

MR SPEAKER

Onorab Marc Volcere.

HON MARC VOLCERE

Mersi Mr Speaker.

Mr Speaker, devan nou Lasanble nou pe diskit lo en trete ki vreman enportan pou limanite.  Trete lo komers zarm oubyen The Arms Trade Treaty.  Nou Lasanble pe ganny demande pou ratifye sa Trete, pour nou osi anmenn nou sipor, pou kapab ede redwir bann atrosite ki lemonn pe pas ladan, akoz zarm ki tonm dan bann move lanmen.  Petet kestyon ki bokou ava pe demande, eski nou isi Sesel nou pe eksperyans bann tel atrosite koze par zarm ki tonm dan move lanmen?  Akoz nou bezwen ratifye sa Trete?

Mr Speaker, pour mwan larepons i kler.  Diran mon lentervansyon, mon a fer sorti bann pwen.  Fodre pa ki nou bliye koman en pti pei, nou form par sa vilaz global e nou osi annan nou responsabilite pou zwe sa rol ki vreman enportan, pou sofgard e protez limanite.  Nou annan sa devwar pou protez premyerman, nou prop frer ek ser Seselwa e an plis ki sa, lezot nou bann co frer dan lezot pei e kontinan.  Apre tou Mr Speaker, koman bann imen nou annan sa devwar e responsabilite o pre lezot imen.  Se nou ki bezwen protez kanmarad.

Mr Speaker, i kler e nou tou nou konnen ki lavant zarm dan lemonn ozordi, i ganny vwar koman en gro biznes: en biznes ki involve plizyer bilyon dolar.  I alor normal pour sa bann pei ki pe fabrik zarm, pour zot kontinyen rod fason pour zot fer plis zarm.  E par fer plis zarm, zot bezwen osi rod fason pou vann sa bann zarm pou zot ganny plis larzan.  Ankor, vwala nesesite pour nou ratifye en tel trete.

Mr Speaker, me bann analiz, oubyen letid i dir ki prodiksyon zarm li menm, i ganny fer dapre bann regilasyon.  Savedir an dot mo, i ganny byen kontrole.  Me son problenm i avek son litilizasyon: savedir par lao tousala, menm si prodiksyon zarm i ganny byen kontrole, son distribisyon i ganny vwar kot i annan bokou defayans.  Avek sa Trete, bann pei ki ratifye li, pe ganny demande pou met an plas plizyer mezir, pou kapab kontrole dan lafason ki par egzanp, leksportasyon zarm i ganny fer.  Bann rezis ki bezwen ganny met an plas, pou rikord mouvman sa bann zarm.

Mr Speaker, parey loter Mosyon in fer resorti dan son prezantasyon, ki mwan osi mon ti a kontan tous lo la, The Arms Trade Treaty pe ede etabli bann norm pou kapab fer tranzaksyon dan lavant zarm.  Sirtou latransparans ,pou ede konbat bann tranzaksyon ilegal, pou kontribye e ede pou redwir soufrans imen.  I en trete ki’n ganny inisye pou kapab ede dan lafason ki zarm i ganny itilize globalman.  I en trete ki pe pran plas diferan laspe, e ki sak nasyon ek bann lorganizasyon, a kapab servi pou anpese ki zarm i kontinyelman ganny servi pou pran lavi imen.

Mr Speaker, alors, The Arms Trade Treaty pe amenn plis accountability dan lafason ki biznes zarm i ganny fer.  Si mon pe koz lo sa Trete ozordi, i ki byensir, mon pou donn mon sipor an gran parti, se sa laspe ki annan pou fer avek soufrans imen.

Mr Speaker, in estimen ki konfli zarm an Lafrik parey mon koleg in dir avan mwan, i kout sa kontinan $18 bilyon dolar tou le-z-an.  Statistik i osi montre-pou servi en legzanp: ki an 1990 a 2005, lager ki’n annan dan 23 pei Afriken, in kout anviron $300 bilyon.

Mr Speaker, sa bann sif i montre nou konbyen larzan Lafrik in perdi dan bann konfli.  Sa larzan ti a’n kapab ganny servi, pou anmenn plis devlopman pour benefis sa menm pep.  Plizyer lenfrastriktir tel ki semen: lekol, lopital, ti a’n kapab ganny fer.

Mr Speaker, lager ki’n annan partou dan bann pei, in osi zwe en rol, pou anpese ki serten sa bann pei in kapab arive zwen zot Millennium Development Goals, sirtou dan Lasante ek Ledikasyon.  I fer li difisil pour bann led imaniter, ariv dan bann landrwa kot i annan lager.  Bann lorganizasyon ki distribye led tel parey Red Cross e Nasyon Ini li menm, i vwar li difisil e zot pran bokou risk pou ariv dan sa bann landrwa, kot i annan konfli pour zot kapab ed sa bann pov inosan.

Mr Speaker, mank lanplwa i osi ganny vwar koman enn bann rezon prensipal, pour sa bann atrosite ki ganny koze par zarm, ki tonm dan move lanmen.  Souvandfwa ou vwar bann zenn, bann zanfan ki ganny ankouraze pou atrap en fizi: bann zenn ki napa travay ki nanryen fer.  Zot vwar sa koman en fason pour zot ganny larzan.  Pour zot ganny en bouse manze.  San petet zot mazinen ki risk zot pe met zot lekor ladan.

Mr Speaker, sa Trete i kapab fer serten keksoz.  An dot mo, sa trete is the minimum.  Me sak pei i kapab annan son prop Lalwa dan lafason ki sa zafer zarm i ganny deal avek.

Mr Speaker, en pei oubyen en leta i vin full party to the Treaty, 90 zour apre ki in depoz son lenstriman ratifikasyon.  Pour le moman parey in ganny dir,  i annan sa 3 pei, me zis 103 sinyatir.  Me zis 73 leta ki’n ratifye li.  I paret ki Sesel i kapab vin sa sanswasannkatorzyenm pei ki ratifye sa konvansyon.  Me dan sa 73 pei ki’n ratifye, mazorite sa bann pei se bann pei eropeen.  E parmi i annan 5.  I annan 5 parmi sa 10 pli gran prodikter zarm.  Sa i Langleter, La France, Lalmanny, Italy ek Lespanny.  Me nou osi vwar bann gran prodikter zarm ki pa ankor ratifye sa Trete.  La nou vwar Lanmerik ki’n zis sinyen e Lasin menm Larisi pa ankor sinyen.

Mr Speaker, bann pei Afriken, pe ganny ankouraze pou ratifye pour ki Lalwa:-pou ki lavwa kontinan Lafrik a kapab ganny ekoute dan bann gran konferans, oubyen bann gran meeting kot bann desizyon i ganny pran: akoz parey nou konnen, bann pei Lafrik, i bann pei ki pli ganny afekte avek sa bann zafer zarm ilegal.  Oubyen ankor ler zarm i tonm dan move lanmen.

Mr Speaker, listwar in prouve ki deplizanpli, sa size zarm pe vin en menas pour nou sirvivan.  Plizyer milye dimoun atraver lemonn pe soufer, plizyer mil pe mor par zour, akoz bann konsekans iresponsab dan lavant zarm.  Sa ki pli soufer dan tou sa demars, se souvandfwa bann zanfan ek bann madanm.

Mr Speaker, Sesel i annan son rol pour li osi zwe dan sa demars, pour nou kapab redwir lakantite zarm ki tonm dan lanmen bann ki napa responsabilite.  Menm koman en pti pei, nou annan nou rol ki nou kapab zwe.  Nou bezwen partisip ansanm avek bann lezot Lazans e Lorganizasyon enternasyonal, pour nou gard sa trankilite ki nou’n abitye zouir koman sa nasyon Seselwa.  Fodre pa ki nou o bliye ki nou antoure ek lanmer.  I vreman fasil pou tranzaksyon zarm ganny fer dan nou delo e la zot san menm konnen, ki en tel tranzaksyon pe ganny fer, nou kapab vin responsab.  Alor nou bezwen fer tou sa ki nou kapab, pou nou prezerv e protez nou lanmer ki nou depan lo la.

Mr Speaker, parey nou tou nou konnen, nou en pei ki depan bokou lo touris e pour nou ganny dimoun pou vin vizit nou, nou bezwen en pei ki stab: en pei kot i annan lape.  Alor i vreman enportan pour nou, menm si nou en pti pei, anmenn nou kontribisyon dan okenn zefor, ki vize ver rediksyon dan litilizasyon zarm.  E pli enportan dan bann demars, ki pou ede annan kontrol dan lafason ki zarm i ganny servi.

Mr Speaker, kan i ti atenn some Linyon Afriken, an Zanvye sa lannen, Vis Prezidan Danny Faure ti dir, ki Sesel i angaze dan sekirite nasyonal malgre nou en pti grander.  I ti dir, I quote, ‘’Why we are not a country that have battalions to commit, we commit ourselves without reservation, to the ideal of collective security.’’ I ti kontinyen an dizan ki, ‘’nou krwar ki legzistans trankilite nou nasyon, i annan bokou pou kontribye dan lape ek stabilite dan Lafrik.

Mr Speaker, i annan tro bokou enstabilite dan bokou pei.  Se kan sa i arive, ki nou trouv tou sord kalamite.  Bokou sa bann atrosite nou fatige trouve, kan nou asiz devan nou televizyon pe regard Nouvel.  Zanfan, Madanm, pe ganny rape.  Dimoun pe ganny pran otaz.  Sivilyen ki bezwen kit zot pei pou al rod labri dan en lot pei akoz lager.  Disan bann inosan i ganny verse pour san rezon, akoz lager pouvwar.

Mr Speaker, isi Sesel nou’n pas atraver leksperyans, ler zarm i tonm dan move lanmen bann ki pa devret.  Fodre pa ki nou bliy sa zafer piratri, kot nou bann frer, ser Seselwa ti ganny pran otaz par bann Somalyen an servan fizi: kot zot ti vwar zot bezwen sikonbe, anba dominasyon bann ki bezwen ganny dekrir koman iresponsab, pour plizyer zour.

Mr Speaker, i annan bann lensidan osi ki’n arive Sesel.  Fodre pa nou bliy lagresyon Mersener.  Rebelyon.  Tousala in arive, se gras akoz zarm ki tonm dan move lanmen.  Menm si ozordi nou pei pa pe eksperyans sa kalite kondisyon ki nou bann frer ek ser pe pas ladan, me la soufrans imen i fer ki nou konsernen.  Alors nou annan en devwar koman en pei responsab, pour nou ratifye sa Trete, pour nou osi zwe nou rol, pou asire ki annan bann norm akseptab dan lafason ki zarm i ganny deal avek.

Mr Speaker, vwala ki bann ki Ban ki-moon Sekreter Zeneral Nasyon Ini, i annan pou dir lo sa Trete, I quote:This is a victory for the Worlds’ People.  The ATT, will be a powerful new tool in our thoughts, to prevent grave human rights abuses or violations of International Humanitarian Law.  And it will provide much needed momentum for other global disarmament and non- proliferation efforts.’’ Vwala rezon akoz nou bezwen anmenn nou sipor, pour ratifikasyon sa trete.

Mr Speaker, avek sa detrwa mo, mon pou vot pour ratifikasyon sa Trete, akoz mon santi ki enplimantasyon i ava ede pou soulaz soufrans bokou nou bann frer ek ser dan sa monn.  Sirtou nou bann frer ek ser Afriken, ki par vorasite pouvwar e lager etnik, zot vwar zot pe pas atraver tou sord atrosite e kalamite.

Mr Speaker, avek sa detrwa mo mon remersye ou.

MR SPEAKER

Onorab Fideria.

HON EMMANUEL FIDERIA

Mersi Mr Speaker.

Mr Speaker, sa mosyon i annan en gran relevans.  Mr Speaker, pandan sa dernyen 10an:-10 a 15an, listwar devlopman lemonn, listwar zonm dan diferan sosyete in temway e viv enn parmi son bann letan pli tris.  Divizyon, tansyon, konfli, lager, masak, destriksyon ek deplasman masif bann diferan group etnik: divizyon parmi bann diferan krwayans, bann konesans ki zot in anmennen e pe kontinyen anmennen pou vreman sok lemonn modern- pe vreman sok sa monn ki nou apel en monn sivilize.

Mr Speaker, ki nou vwar dan sa menm realite, nou vwar nou an fas avek serten rezyon dan lemonn, ki tre boulverse, ki pe ranpli avek lafreyer dan plizyer sosyete imen dan plizyer sivilizasyon.  Olye senp lespwar pou de milye zonm, fanm, zanfan, nou vwar zot pe leve dan dezespwar.  E pour serten, si zot sanse reste vivan, kan lannwit i fer, zot al dormi avek plis dezespwar.  E si zanmen zot reisi leve demen bomaten, zot santi zot lazournen i ranpli avek dezespwar.  Zot viv dan en lagoni perpetyel.

Mr Speaker, bann zonm san pitye, barbaric, kriyel: bann ekstremis, bann spesyalis dan laterer, i konble lavi sak sa bann zanfan, zonm, fanm avek en lafreyer pou viv.  E zot perdi gou pou viv zot lavi.  Serten i abandonn tou keksoz e finalman deside pou esper zot lanmor, olye ganny sa loportinite pou viv en lavi dan dinyite.

Mr Speaker, dan pri-an-bil sa Protocol, se sa bann mesaz ki pe ganny pase avek tou bann dirizan atraver lemonn: ki sak Gouvernman, i bezwen annan en striktir ferm an plas e pran responsabilite ki bann zarm konvansyonnel, pa tonm dan nenport ki lanmen.  Listwar in montre nou realite, ki kantite soufrans i kapab anmennen lo en pep.

Mr Speaker, Sesel nou’n fer fas avek sa fenomenn piratri.  Nou lendistri lapes artizanal ek endistriyel, in soufer bokou.  Nou’n perdi en kantite larzan.  Avek leadership Prezidan Michel, ki i ti nobou mobiliz kominote enternasyonal ki ozordi nou kapab debout fyer e dir piratri dan nou rezyon i anba kontrol.

Mr Speaker, lartik 2 sa Protocol, i koz kler lo sa size, kot bann zarm tel ki: tenk, avyon lager, elikopter, lartilri, fizi, rivolver, pa tonm dan lanmen nenport ki group.

Mr Speaker, sa Trete son bi prensipal, se pou anmenn en bon sistenm an plas ki kontrol transfer, ou komers lavant zarm.  Pa bokou letan pase, senkyenm Lasanble ti travay tre dir, pas tou bann Lalwa, pour nou aksed lorganizasyon Komers Enternasyonal, ki sak pei i ganny en fair deal.  Me sa enn Trete i osi annan en lenportans kapital, kot tou pei i pran son responsabilite, ler i annan transfer ouswa lavant zarm.

Mr Speaker, ozordi ler mon pe koz lo sa Trete, levidans i montre ki komers zarm, napa bann Lalwa byen morde ki anpese ki sa bann zarm pa tonm dan lanmen nenport ki endividi e ki group.

Mr Speaker, i enportan pou nonmen ki Sesel, ti parmi enn bann premye pei ki ti vote e met son sinyatir kot headquarters Nasyon Ini New York, an Avril 2013.

Mr Speaker, ler mon get konteni sa Protocol, son lobzektif prensipal, se ki sak pei i bezwen annan en bon sistenm kontrol, kot i konsern lavant zarm.  Ozordi dan sa lemonn i annan plizyer kalite groupman, ki ler zot santi zot pa kapab realiz zot azanda, zot sel solisyon se servi zarm.

Mr Speaker, me sityasyon ozordi dan konteks ki nou pe koze, mon pe vwar plizyer group ekstremis e plizyer kalite panse ekstrenm, kot napa respe pour lavi e dinyite imen.  Enpoz serten fason fer ki anpes bann zenn fiy ganny en ledikasyon: napa drwa al lekol.  Se sa ki konteni sa Protocol pe dir nou, ki nou bezwen annan bann regilasyon ferm an plas.  Ki nou Lasanble pe zwen avek lezot pei, swa lezot lorganizasyon enternasyonal, pou azout nou lavwa, pou donn tou sipor par ratifye sa Protocol konsernan komers zarm.

Mr Speaker, sa ki pli danzere, se ki sa bann groupman zour apre zour pe grandi.  Plizyer bann pti selil ekstremis, pe ganny entrodwir dan lezot pei e sa bann groupman, zot osi zot pe ganny enplike dan plizyer kalite aktivite ilegal parey: drog, lavant zarm, trafik imen kidnapping, ekstorsyon, kot i permet zot ganny larzan e ofer serten servis de baz popilasyon kot Gouvernman pa pe ofer.  Konstriksyon serten lenfrastriktir, donn servis lasante kot pa egziste, donn lasistans manze pour zot aste konfyans bann dimoun dan zot rezyon, ki zot kontrole.  Sityasyon i tre konpleks.

Mr Speaker, le 26 Novanm 2013, nou Lasanble ti ratifye en protocol Konsey Sekirite ek Lape lorganizasyon Linyon Afriken, akoz statistik ki mon’n reserse i sokan.  Ozordi i annan 239 milyon zonm, fanm, zanfan, zis lo kontinan Afriken ki pe soufer avek malnitrisyon.  Sa i reprezant pre en tyer total lemonn.  Rezon prensipal pou sa bann lapovrete oubyen malnitrisyon ekstrenm, i akoz konfli arme, mank lord ek respe bann konfli etnik.

Mr Speaker, ozordi bann maladi parey malarya, lemoni, pe touy bokou zanfan lo kontinan.  Set akoz mank stabilite.  Plizyer milyon zanfan ek madanm, pa pe ganny ledikasyon akoz konfli pe ravaz sa kontinan.  Isi Sesel nou annan stabilite, akoz nou annan en Prezidan ki annan en bon leadership.

Mr Speaker, isi Sesel Gouvernman pe kontinyen travay, pou asir sa bon stabilite politik, pou asire ki larises pei i ganny partaze, dan en fason kot tou sitwayen i benefisye.  I pe kontinyen travay pou armoniz sosyete e asire ki nou sosyete i fonksyonn normal.  E kot tou dimoun i ganny sans epanouir.

Mr Speaker, konsanti aktyel i sinyal lenportans, ki nou bezwen kontinyen envesti dan formasyon nou bann zonm ek fanm ki dan liniform, ki pe travay pou mentenir sekirite nou nasyon.  Akoz sa bann group pe pran laform e rantre dan staz parey bann viris, ki tre danzere.  Nou pa pou konnen kan ki zot kapab fer zot laparisyon isi Sesel.  Tou aksyon e prekosyon i neseser: bezwen ganny pran, pou fer sir ki nou sekirite ek stabilite, pa ganny menase oubyen ganny met an kestyon.  Mr Speaker, mon pou vot an faver sa Mosyon.

Mersi.

MR SPEAKER

Onorab Pierre.

HON DAVID PIERE

Mersi Mr Speaker.

Mr Speaker, bann Seselwa, bann voter Seselwa ki’n elekte nou e ki pou tann nou pe koz lo sa size kontrol zarm, pou konpran akoz nou pe fer li.  E mon konnen zot pou siport sa demars ki nou pe fer, pou ratifye sa treaty ki devan nou ozordi.  Akoz size kontrol zarm i enportan, akoz potential destruction ki zarm i kapab anmennen lo en pep, oubyen dan lemonn an zeneral.

Mr Speaker, nou tou isi Sesel, nou’n vwar douler e soufrans ki en fizi i kapab anmennen lo en endividi, lo en fanmir oubyen lo en nasyon.  Nou’n vwar destriksyon ki zarm i kapab anmennen dan en pei.  E nou’n vwar kot lager i anmenn lapovrete e anmenn dekadans sosyal e i rin en pei, oubyen i rin en kontinan.

Mr Speaker, i osi enportan pour note, ki lape ek sekirite i enportan akoz i annan en lyen direk ek devlopman, sirtou devlopman ekonomik.  Me egalman annan en lyen direk avek respe pou bann dwa imen, bann gran prensip ki nou dan PDM nou krwar ladan.  Zarm i kapab ganny servi koman en zouti ki kapab fors en endividi, oubyen en group endividi pour zot reazir, pour zot act kont zot volonte.  Zarm i ganny servi pou touye.  Zarm i ganny servi pou vole.  Zarm i ganny servi pou vyole Mr Speaker.  Se pour sa rezon ki ozordi dan Lasanble Nasyonal, mon pou a port mon sipor pou ratifikasyon sa Trete.

Mr Speaker, mon krwar dan lape avek sekirite, akoz lape ek sekirite, i osi annan en lyen ek devlopman sosyal e devlopman kapasite imen.  Tousala i bann size ki konsern Seselwa e ki konsern nou tou koman en pep.

Mr Speaker, sa Trete, enn son bi se pou pre vant e eradicate the illicit trade in conventional arms e prevent son diversion.  Mr Speaker, nou konnen ki arive letan dan en pei i annan zarm partou kote, ki pa pe ganny kontrole.  Nou konnen, akoz nou konpran sa lensertitid, sa lenkyetid ki once upon a time ti egziste Sesel, letan ti annan sa size zarm Malo.

So, nou konpran donk, sa lenportans pour nou pei, kapab fer sir ki i kapab kontrol kalite zarm ki rantre dan pei.  E ler zarm in rantre dan pei, i kapab kontrole lekel ki ganny akse avek sa zarm, pou garanti ki a tou moman i annan sekirite e napa lensertitid vizavi sekirite nou pei.

Mr Speaker, sa Trete i osi fors tou pei enkli Sesel, pou egzers kontrol strik lo zarm ki rantre dan pei, oubyen lo zarm ki pas atraver teritwar nou pei.  Si zanmen, i annan zarm ki ilegalman pas atraver teritwar Sesel, i responsabilite Sesel pou fer sir ki i annan sa mekanizm an plas, pour li konfiske e kontrol sa bann zarm.  Akoz si zanmen ankor, zarm i pas atraver nou teritwar ilegalman, san ki nou kapab dekouver, san ki nou kapab kontrole, on its way pou al detri en lot pei, oubyen en lot group pei, then nou pou endirekteman santi nou responsab e konplis pour sa destriksyon dan sa lot pei.

Alors Mr Speaker, atraver ladoptasyon, atraver ratifikasyon sa Trete, sa i pou pous Sesel, pou vin plis alert ankor e pou met an plas plis mekanizm, pou garanti ki nou kapab egzers pli gran kontrol.  So, avek sa de pti mo, avek lenportans sa Trete Mr Speaker, mon pou dir ki definitivman, mon pou donn sipor sa Trete.

Mersi.

MR SPEAKER

Onorab Rose, Right of Reply.

HON MARIE-ANTOINETTE ROSE

Mersi Mr Speaker.

Mr Speaker, mon pa pou long.  I kler ki nou annan sipor tou le de kote latab lo sa Trete e mon remersi tou Manm pour zot sipor.

Thank you.

MR SPEAKER

Bon, in ariv ler pour nou pran en vot.  Tou bann ki an faver?  Okenn ki kont?  Mosyon in pase.  E ofisyelman nou’n fini ratifye sa Trete.  Mersi bokou.  Nou pou adjourn.

Mon konpran i annan plizyer zot pe al en lanterman apre midi: e le de Leaders in koz ek mwan lo la.  So, nou pou adjourn ziska Mardi prosen 9er bomaten.  E le 2 Leaders ek Deputy, nou annan ABC 1.15pm.

(ADJOURNMENT)