::
Home » Verbatim » Verbatim - Third Term 2015 » tuesday-6th-october-2015

tuesday-6th-october-2015

NATIONAL ASSEMBLY OF SEYCHELLES

Tuesday 6th October 2015

The Assembly met at 9am

National Anthem

Moment of Reflection

Mr Deputy Speaker in the Chair

MR DEPUTY SPEAKER

Bonzour, mon a dir bonzour tou Manm Onorab.  Bonzour Minis avek ou delegasyon e tou manm piblik ki pe ekout nou la bomaten.

Ozordi pou reponn kestyon Lasanble nou annan Minis pou Lanvironnman, Lenerzi e Sanzman Klima, Minis Didier Dogley.  E mon annan plezir pou envit kestyon 154, Onorab David Pierre.

HON DAVID PIERRE

Mersi Mr Deputy Speaker.

Bonzour Minis avek ou delegasyon, bonzour tou Manm Koleg Onorab e tou bann ki a lekout.

Mr Deputy, eski Minis i kapab eksplik sa Lasanble kan eski Gouvernman pou antreprann sa proze konstriksyon bann dren dan vicinity Care Free Guest House, Anse Aux Pins pou rezourd problenm flooding lo Chetty Flat.

Mersi Mr Deputy.

MR DEPUTY SPEAKER

Proceed Minister.

MINISTER DIDIER DOGLEY

Bonzour Mr Deputy Speaker, mersi.  Bonzour bann Onorab e bonzour osi tou bann piblik ki pe ekoute dan lakour.

Mr Deputy, parey mon ti deza fer resorti dan larepons kestyon ki Onorab Meggy Marie an Avril sa lannen ti demande.  Sa proze pou retir later ki’n akimile e osi elarzi sa pasaz delo kot Chetty Flat pou komanse sa lannen menm.  An se moman travay mezirman in fini ganny fer e proze pe al tender demen.

Si tou keksoz i al byen, proze pou komanse avan lafen sa lannen.  Sa proze kot Chetty Flat i espekte kout Gouvernman apepre R5.2 milyon.  Sa proze i osi konekte avek sa nouvo pon kot Care Free Guest House ki pou kout anviron R5 milyon.  Li osi in preski dir dan en staz tre avanse.  Letid in fini ganny fer, desen in fini pare, negosyasyon in fini ganny fer avek bann zabitan konsernen pou way live pou li osi ganny tender ver lafen sa semenn.

Vi ki proze pon Green Estate pou osi ganny enplimante sa lannen, mon Minister in vwar li neseser pou tender sa 2 proze ansanm e osi tender sa proze pou fer en channel ki pou konekte sa lanmar kot old people’s home avek sa lanmar kot Reef Golf Course. Sa i ede redwir kou travay an gro, konpare si nou tender zot endividyelman.

Pou sa enn proze tender in sipoze ouver sa Vandredi kot tender board pou selekte en kontrakter pou fer sa travay.

Mersi Mr Deputy Speaker.

MR DEPUTY SPEAKER

Kestyon siplemanter Onorab Pierre.

Switch off micro Minister.

HON DAVID PIERRE

Mersi Mr Deputy.

Mr Deputy, an vi ki sa proze in an kestyon pou en kantite lannen, kantite letan.  Eski Minis i kapab dir avek sa Lasanble kwa ki’n koz sa retar e ki garanti ki pe donn Lasanble Nasyonal e zabitan Anse Aux Pins dan sa area ki finalman sa proze pou really take place. Mersi Mr Deputy.

MINISTER DIDIER DOGLEY

Mr Deputy, sa proze ti vin lo nou progranm an 2013 apre ki ti annan sa gro problenm avek Siklonn Felleng ek gro lapli.  E annefe bann travay ti komanse an 2014 pou planifye li pou fer sir poudir sa proze i ganny enplimante lannen pase.  Me malerezman avek bann diferan travay ki nou’n bezwen fer e osi demann bann zabitan konsernen pou donn wayleave lo zot later pou kapab agrandi sa drenaz ki enkli pran serten bout zot propriyete.  Epi pou kapab mobiliz lakantite larzan ki nou bezwen akoz ti annan en kantite diferan travay parey zot deza konstate zis dan Au Cap ek Anse Aux Pins nou’n fer en kantite travay pou amelyor bann sistenm drenaz dan sa landrwa e pi ti annan bann lezot priyorite lo La Digue.  Alor sa enn proze in ganny pouse pou sa lannen e parey mon’n dir, poudir tender pe ganny fer e proze i sipoze komanse ankor dan en mwan.  Savedir ver dan Novanm koumsa, nou sipoze vwar bann travay pe komanse lo sit laba Anse Aux Pins.

MR DEPUTY SPEAKER

Onorab Meggy Marie.

HON MEGGY MARIE

Mersi Mr Deputy Speaker, bonzour tou dimoun ki a lekout, bonzour Minis ek ou delegasyon.

Mr Deputy Speaker, eski Minis i kapab dir Lasanble si son Minister in konsider kree en drenaz dan zanviron kot Beach Take Away an vi ki sa larivyer kot Chetty Flat i osi afekte sa bann dimoun ki reste dan sa rezyon.  Mersi Mr Deputy Speaker.

MINISTER DIDIER DOGLEY

Mr Deputy Speaker, eski i kapab eksplik mwan kote sa zafer Beach Take Away i ete.

MR DEPUTY SPEAKER

Proceed.

HON MEGGY MARIE

Nou pe koz sa larivyer ki al kot Chetty Flat, letan i inonde i afekte sa bann dimoun ki reste dan rezyon kot Beach Take Away. Nou pe koz sa bann dimoun ki reste kot bann Monthy anndan la.  Nou pe gete si i dan plan Minister pou adres sa vi ki i antas ansanm.  Sa problenm i cause menm problenm letan i flooding ek sa larivyer Chetty Flat.  Mersi Mr Deputy Speaker.

MINISTER DIDIER DOGLEY

Mr Deputy, konprenezon ki mwan mon annan se bann teknisyen avek bann enzenyer ki’n travay lo sistenm drenaz pou Anse Aux Pins, annefe ler nou pou’n fini fer sa drenaz anndan kot Chetty Flat i pa zis sa bout.  I pou monte ziska pli o, ziska pre kot lekol.  I sipoze konekte antye sa problenm drenaz pou anmenn li anba kot Care Free Guest House kot nou pe tir sa culvert kot nou pou fer en pli gran pon.

Annefe i pou annan en pli gran louvertir e menm ler nou pou’n fini tir later, nou pou’n fini agrandi, fer rock armoring tou dilon la deryer, nou espekte poudir lakantite delo ki pou sorti la deryer i devret ase pou redwir sa problenm pli o.

Prezan si sa i pa vreman donn sa lefe total ki nou bezwen, se la kot nou bann lenspekter pou bezwen remonte e vwar si i annan bann lezot keksoz ki nou bezwen fer.  Me selman pour lemoman nou plan se fer sir poudir nou fer en sistenm drenaz konpreansiv.  Parey mon pe dir i pou kout apepre R5.2 milyon pou kouver antye sa landrwa la deryer pou fer drenaz.

MR DEPUTY SPEAKER

Onorab Murielle Marie.

HON MURIELLE MARIE

Mersi Mr Deputy, bonzour.  Bonzour a tous.  Mr Deputy, eski Minis i kapab enform sa Lasanble, baze lo ou repons, konbyen pou koute sa 2 proze.  Sa pon Green Estate e sa channel ki pou konekte sa lanmar kot lakaz vye dimoun e Reef Golf Club.  E eski Minis i kapab eksplik sa Lasanble ki mekanizm i annan an plas pou asir pyeton e trafik an vi ki kot Chetty Flat ek Care Free ek Green Estate i en landrwa ki ganny byen frekante e osi ki parey Minis in mansyonnen ki avan lannen fini sa bann proze, Chetty Flat, Care Free e sa pon Green Estate pou ganny enplimante e sa landrwa i en landrwa ki byen ganny frekante.  Ki garanti ki Minis pe donn sa Lasanble ki pou napa disturbance trafik e osi asir sekirite piblik.  Mersi.

MINISTER DIDIER DOGLEY

Mersi Deputy Speaker.  Deputy Speaker, proze kot Green Estate pou fer sa pon nou estimen poudir i pou kout anviron R2.2 milyon.  Apre kot Ex Hydroponics Chanel pou nou fer rock armoring e distil sa landrwa Au Cap nou espekte li kout apepre ankor R500 mil.

Pou kestyon kot sa Care Free Guest House, son outlet avek son pon.  Nou pe regard 2 opsyon.  Enn eighter nou fer direkteman akote en by pass, en double carriage, pa en double carriage me en 2 way by pass pou fer sir poudir avan ler ki nou komans okenn travay lo pon li menm, ki i annan semen pou trafik pase.  Ki savedir ki dimoun pa pou ganny afekte avek bann travay ouswa pa pou ganny enpakte dan en fason ki pou anpes trafik flow pandan letan ki travay pe ganny fer.

Me lo lot kote osi i annan lot opsyon ki nou pe regarde se ki si travay i fini ase boner lo Ile Soley ki kekfwa nou kapab servi Ile Soley koman sa main by pass ki si fwa kree en lot obor.  E sa nou ankor dan diskisyon avek sa Lakonpannyen ki pe manage Ile Soley.  Si i pa posib definitivman nou pou fer sa by pass lanmenm la obor pou fer sir poudir trafik pa ganny afekte.  Mersi Mr Deputy.

MR DEPUTY SPEAKER

Kestyon 155, Onorab Pierre.

HON DAVID PIERRE

Mersi Mr Deputy.  Mr Deputy eski Minis i kapab enform sa Lasanble, kan son Minister pou pare avek en Drainage Master Plan pour Sesel?  Mersi Mr Deputy.

MINISTER DIDIER DOGLEY

Mr Deputy Speaker, nou’n deza annan en lalis konpreansiv bann proze priyorite ki’n ganny devlope pou rezourd problenm drenaz lo Mahe, Praslin e La Digue.  Sa lalis i form en plan 7an e son enplimantasyon ti konmanse depi lannen 2014 e i pou ale ziska 2019.  Son kou total pou enplimant li in ganny estimen R143.7 milyon.  Sa plan ti vin an viger apre gro lapli ki ti afekte bann distrik dan Les Mahe e La Digue an Zanvye 2013 koze par Siklonn Felleng.  En nouvo drainage task force ti ganny formen pou fer letid dan bann distrik lo sistenm drenaz e vin avek bann rekomandasyon.  Sa bann rekomandasyon apre nou’n devlop zot pou sak distrik ki’n vin sa plan ki nou pe enplimante.

Sa menm task force in osi ganny manda pou enplimant sa bann proze pou amelyor sistenm drenaz lo Mahe, Praslin e La Digue.  An plis nou Minister pe devlop en proze avek UNDP pou ganny finansman anba green climate fund pou fer en plan drenaz ek costal master plan pou Mahe, Praslin e La Digue.  Mersi Mr Deputy Speaker.

MR DEPUTY SPEAKER

Kestyon siplemanter Onorab Pierre.

HON DAVID PIERRE

Mersi Mr Deputy.

Mr Deputy eski Minis i kapab dir avek sa Lasanble ki difikilte ki Gouvernman pe rankontre pou vini avek en real master plan, an relasyon drenaz lo Mahe, Praslin e La Digue, enn ki konpreansiv e ki pou kouver Sesel for a period of 20 years or more

Thank you Mr Deputy Speaker.

MINISTER DIDIER DOGLEY

Mr Deputy Speaker, parey mon’n dir sa lalis ki nou’n devlope ki avek bann priyorite i en lalis proze ki’n pas atraver en prosesis konsiltativ avek tou bann dimoun, tou bann Lazans konsernen, bann Minister konsernen e in pas osi atraver bann diskisyon avek tou bann Lotorite Distrik.  E nou fer sir poudir nou pa’n mank okenn distrik e ki tou bann landrwa kot nou konnen i annan en problenm drenaz nou pe fer li.

Now, nou krwar poudir i annan en nesesite pou nou al rod odela akoz nou’n vwar pandan bann dernyen tan poudir i annan bann lapli ki par egzanp kot nou’n ganny bann ka kot nou ganny bann peryod lapli kot ou ganny akout 300 milimet lapli dan zis 24 erdtan.  Kot i donn ou bann ka eksepsyonnel kot menm si ou annan bann sistenm drenaz ki nou pe devlope, ki ase bon, ki kapab adres bann problenm inondasyon pandan bann letan normal.  Be ler i annan sa bann letan eksepsyonnel nou vwar poudir i depas sa bann fasilite ki nou pe met an plas.  E pou sa nou pe tap laport kot green climate fund ki en fon ki fek ganny kree anba Konvansyon climate change e kot nou pou al rod finansman pou nou fer plan konpreansiv.  Pa zis pou regard lo kote linondasyon me pou regard osi sa problenm lerozyon kous lakot ki tou lede an zeneral i plis ou mwen i marye ansanm.

E sa parey monn deza mansyonnen i en travay ki nou’n komanse, nou pe deza pe diskite avek UNDP ki enn nou partner e pou nou kapab devlop en full scale proze pou nou anvoy kot green climate fund pou zot finans en letid konpreansiv pou regard bann problenm lakot e inondasyon pou menm letan ki zot kapab anvoy bann expert sorti deor pou travay avek nou bann expert isi ki apre nou ava annan nou en plan totalman konpreansiv pou Mahe, Praslin e La Digue.

Mersi Mr Deputy.

MINISTER DEPUTY SPEAKER

Onorab Arnephy.

HON BERNARD ARNEPHY

Mersi Mr Deputy Speaker.

Bonzour tou dimoun.  Mr Deputy, eski Minis i kapab dir avek nou Lasanble konbyen larzan eski Gouvernman Lepep in envestir dan amelyorasyon bann sistenm drenaz atraver pei pandan sa dernyen 4an a 5an.  E ki sistenm nou annan pou asire ki sa bann lenvestisman i ganny byen mentenir.

Mersi.

MINISTER DIDIER DOGLEY

Mersi Mr Deputy Speaker.  Sa ki mon kapab donn ou la pour lemoman se bann figures par egzanp pou sa lannen.  Pou sa lannen zis anba recurrent budget nou pe depans nou plis ki R5 milyon pou amenaz bann lanmar avek bann larivyer.  E anba nou capital budget nou espekte disi a lafen lannen nou pou’n fini envestir apepre R17.2 milyon dan zis pou adres bann problenm drenaz dan Sesel.  E lannen prosenn osi nou espekte pe depans apepre menm kantite larzan pou nou kapab fini adres sa.  Pa pou fini me pou at least kapab fini fer en progre avek adres bann problenm drenaz.

Nou osi pe regard dan posibilite pou itiliz larzan anba bann proze enternasyonal, par egzanp ek UNDP lo La Digue nou annan en proze $500 mil pou adres bann problenm delo e linondasyon lo La Digue e sa osi pou ganny servi pou adres bann problenm inondasyon e nou annan osi en lot proze ki apel GCCA, Global Climate Change Adaptation ki anba Linyon Eropeen e la osi nou pe regard bann posibilite pou nou kapab itiliz sa finansman pou adres bann problenm delo.

So an tou ou kapab dir nou pe depans bokou plis ki sa 22 ekek milyon ki Gouvernman i deza pe depanse limenm dan bann problenm delo avek linondasyon dan Sesel.  Mersi Mr Deputy.

MR DEPUTY SPEAKER

Onorab Vidot.

HON KEVIN VIDOT

Mersi.  Bonzour Mr Deputy Speaker, bonzour Minis e tou dimoun ki a lekout.

Mr Deputy Speaker, mon ti a kontan demann Minis si konsiderasyon in ganny pran pou bann high flow ouswa bann high volume delo ki sorti dan bann sou distrik e kapab afekte kalite kapasite bann drenaz aktyel, bann main drenaz i annan pou abzorbe.  E si zot pe pran konsiderasyon osi pou netwayaz sa bann drenaz ki nou pa kontinyen ganny parey ozordi bann drenaz ki plen, ki bouse ki pa pe fer zot louvraz.

Mersi.

MINISTER DIDIER DOGLEY

Mersi Mr Deputy Speaker.

Mr Deputy, normalman ler bann enzenyer i fer bann kalkilasyon pou zot amelyor bann drenaz, zot pran an konsiderasyon plizyer fakter.  E definitivman lakantite delo ki sorti dan ki nou apel sa catchment area ouswa sa landrwa, sa basen versan kot sa delo i sorti i desann.  Tousala i ganny kalkile e menm zot kalkil par egzanp lakantite twatir.  Par egzanp lakaz ki’n ganny fer dan sa bann landrwa ki anpes delo al dan later, ki tou delo i ganny konsantre e ki desann dan larivyer pou al anba.  Tousala i ganny pran an konsiderasyon e menm zot pran konsiderasyon bann evantyalite par egzanp tou le 10an ou annan en gro lapli eksepsyonnel, par egzanp sa bann kalite lapli ki mon pe koz lo la ki annan plis ki 300 milimet lapli dan zis 24 erdtan ki eksepsyonnel.  Sa osi i pran konsiderasyon pou zot kalkil lakantite delo ki pou pas dan sa bann drenaz ler zot design li.

Alor i annan tout en travay ki ganny fer, en letid ki ganny fer avan ler sa design i ganny met an plas.  Me selman avek devlopman nou’n vwar poudir enn bann keksoz ki lanvironnman in toultan koz lo la se sa bann zafer kas lateras, dimoun zet salte dan larivyer, anpes delo pase normalman.  Sa malerezman in kontinyen vin en problenm pou nou, ki nou bezwen konbat kont akoz nou vwar poudir bokou fwa nou vwar poudir menm si nou’n pase.  Apre enn de lannen nou vwar poudir menm larivyer ki nou’n fek tir bann gravye ek later ladan, nou’n vwar li poudir in re plen ouswa bann larivyer ki nou’n anvoy dimoun pou netwaye, kontrakter pou netwaye.  Tou le mwan, avan sa mwan, son peryod in arive nou vwar poudir salte in fini akimile dan larivyer.  I enn bann keksoz ki Minister pe travay tre for lo la e mwan mon ti a voudre lans en lapel ankor pou demann dimoun pou silvouple pa servi larivyer koman dust bin me met salte dan bin ki Gouvernman i met obor semen pou zot met ladan.

Mersi Mr Deputy.

MR DEPUTY SPEAKER

Onorab Murielle Marie.

HON MURIELLE MARIE

Mersi Mr Deputy.

Mr Deputy, eski Minis i kapab donn nou en detay lo bann proze ki’n ganny konplete, bann ki on going e bann status lo sa bann distrik ki ti ganny afekte pandan dezas 2013.

Mersi.

MINISTER DIDIER DOGLEY

Mersi Mr Deputy, lalis i tre long, si mon pou bezwen lir sa kantite ki annan i bokou. Me si Onorab i kontan mon kapab fer li ganny en full list.  Me selman parey mon pe dir i annan en kantite travay ki pe ganny fer.   Au Cap i annan sa bann gro proze ki nou pe fer, me selman i annan bann pti proze osi.  Epi i annan nou travay netwayaz ki pe ganny fer tou le mwan.  Menm parey nou pe fer li Anse Aux Pins, Point Larue nou annan en letid ki’n fini ganny fer par GIBS ki nou pou al etidye pou nou gete ki mannyer ki nou kapab enplimant li.

La Digue i annan tout en list proze ki nou’n fer.  Par egzanp nou’n fini konplet sa desarz laba La Pass e kot nou’n fer en pon.  Nou’n tir en culvert ki soz.  Kot lapolis laba La Digue, La Pass la osi nou pe fer drenaz kot district administration La Digue, laba osi nou’n fer bann drenaz.  Dan Goulo nou’n fer drenaz, la nou fek komans en nouvo gro pon ki nou pe al fer laba Linyon Estate, La Digue kot nou pou agrandir sa dezyenm pli gran desarz delo lo La Digue.  Epi par annan kot Basen Kannar, tou dilon nou pou al amelyor antye son sistenm drenaz avek son bann sistenm lanmar pou fer sir poudir i kapab pran lakantite lapli ki tonbe dan sa bann landrwa.

E lo Praslin osi nou annan en lalis proze ki nou pe enplimante tou dilon par deryer kot distrik Grand Anse limenm epi annal an bor kot lot landfill partou i annan en kantite travay ki pe ganny fer e menm lo kote ki kot Marie Janne Estate laba osi nou annan en gro proze ki sipoze komanse tre byento.

So lalis i vreman long ki mon pa pou kapab pas lo tou sa keksoz ki nou pe fer la konmela, me selman mon a kapab donn Onorab antye sa lalis proze ki nou pe fer.  Ki nou’n fini fer e bann ki nou pe fer pandan sa lannen.

Mersi Mr Deputy.

MR DEPUTY SPEAKER

Minis ou kapab touzour anvoy sa lalis kot sekretarya e nou ava sirkile pou tou Manm ganny en kopi.  Onorab Pillay.

HON SEBASTIEN PILLAY

Mersi Mr Deputy Speaker.

Mr Deputy Speaker, prenan an kont ki Minis in dir i annan serten kou ki asosye avek sa bann proze.  Eski son Minister in fer okenn travay lo nivo angaz bann akter dan Sekter Prive oubyen bann kominote lo en baz Public Private Partnership pou osi ede dan travay lo sa bann proze an se ki konsern mitigate bann aksyon oubyen bann lenpak lerozyon oubyen parey lo sa size ki nou pe diskite.  Mersi Mr Deputy Speaker.

MINISTER DIDIER DOGLEY

Mr Deputy Speaker, i enn bann travay ki mon krwar ki nou bezwen fer.  I en keksoz ki mon krwar nou pa ankor fer ase.  I annan bann travay volonter ki nou fer, par egzanp pandan letan clean up the world ouswa lo bann pti proze lo labaz distrik kot nou korpore.  I vre poudir sa i en area kot kekfwa nou pa ankor met ase lanfaz lo la e definitivman i en keksoz ki nou pou regard sa o pli pre pou regarde ki mannyer nou kapab travay pli pre avek bann lezot partner isi Sesel.

Mersi Mr Deputy Speaker.

MR DEPUTY SPEAKER

Kestyon 156, Onorab Esther.

HON NATASHA ESTHER

Mersi Mr Deputy.

Mr Deputy Speaker, Minis ek ou delegasyon, tou dimoun a lekout bonzour.  Eski Minis pour Lanvironnman Lenerzi ek Sanzman Klima i kapab enform sa Lasanble si son Minister pe konsider fer en letid lo sa apepre 31 larivyer ki annan lo Praslin, pou vwar lekel larivyer ki annan potansyel pou anmas delo pour stokaz?

MINISTER DIDIER DOGLEY

Mersi Mr Deputy Speaker. 

PUC in fini fer en letid an 2011 pou konsider bann larivyer potansyel pou anmas delo lo Mahe, Praslin e La Digue.  E sa lenformasyon in ganny mete dan water master plan 2008 ziska 2030.  PUC ek konsiltan pou sa letid ti revwar bann larivyer lo Praslin e La Digue avek en bi pou regard ki mannyer nou kapab anmas plis delo larivyer.  Sa letid ti osi konsider bann posibilite pou stok plis delo.  Sa bann larivyer swivan ti ganny konfirmen koman bann kontribiter mazer dan sistenm delo Praslin.  Enn se larivyer Nouvelle Découvert, dezyenm larivyer Fond Beau Feu.  Trwazyenm larivyer Mont Plaisir.  Katriyenm larivyer Salazie.  Senkyenm larivyer Vilaz Joseph.

Sa letid master plan in osi montre ki annan 8 lezot larivyer ki PUC i kapab konsider pou anmas delo pou kontribye anver demann lo Praslin.  Sa 8 larivyer i enkli larivyer Laplenn Olandez, larivyer Duran, Grand Anse.  Larivyer Lanmisyon Catholic Amitie, larivyer Fon D’iris Amitieux.  Larivyer Anse Citron kot UCPS Corry.  Larivyer Anse Marie Louise, larivyer Fon Ferdinand e larivyer Anse Boudins.

Zot tou ansanm i kapab kontribye apepre 350 met kib delo par zour.  I enportan pou fer resorti ki demann pou delo lo Praslin i apepre 10 fwa plis ki sa.  Savedir 3500 met kib par zour.

Lefe ki kontribisyon sa bann larivyer pandan lasesres i pa ase PUC in prefere adres bann lezot proze delo lo Praslin ki pli efektiv pou donn piblik lakantite delo ki zot bezwen.  Par egzanp PUC in envestir dan en nouvo rezervwar kot Fond Beau Feu.  PUC in met nouvo tiyo sorti kot stasyon desalinasyon ziska Fond Beau Feu.  PUC in met nouvo tiyo sorti Fond Beau Feu pou al Nouvelle Découvert e PUC in osi ogmant kapasite delo desalinasyon pou fer sir ki i annan sifizaman delo lo Praslin pandan letan lasesres ler bann larivyer i kwaziman sek.

Mersi Mr Deputy.

MR DEPUTY SPEAKER

Kestyon siplemanter Onorab Esther.

HON NATASHA ESTHER

Mersi Mr Deputy.

Mr Deputy, Minis in fer referans lo larivyer Laplenn Olandez e ki i konsern plizyer zabitan Bais Ste Anne kot zot pe demande si ti annan sa potansyel anmas delo.  Eski Minis i kapab enform nou si zot pe mazin tret sa landrwa koman en priyorite pou stokaz delo.  E en lot larivyer ki Minis in fer referans lo la se larivyer Vilaz Joseph, eski Mini si kapab dir nou si son Minister pe osi mazin enplimant en bon sistenm tretman delo pou sa landrwa e konsider met baraz apropriye.

Mersi.

MINISTER DIDIER DOGLEY

Mersi Mr Deputy.

Mr Deputy, PUC i deza annan plizyer plan pou sa landrwa kot Laplenn Olandez.  Sirtou sa larivyer i menm annan en plan pou regard posibilite dan le fitir pou annan en danm la anler.  Me son kou i apepre R100 milyon e i ase eleve pou 10 mil dimoun pou depan R100 milyon.  Alor i en keksoz ki Gouvernman pe regard ladan me si i posib ki nou ganny sa bann finansman dan le fitir nou kapab regarde si i pou kapab fer li.

Kestyon larivyer St. Joseph mon napa bann detay lo la, mon kapab fer tyeke epi mon kapab fer donn ou sa bann lenformasyon.  Me an zeneral kot PUC i konsernen, tan ki i annan delo dan larivyer i pli preferab pou kolekte sa delo, trete e donn sa bann dimoun ki ouswa pran delo desalinasyon pou donn dimoun.  Akoz pou nou sistenm desalinasyon i toultan koman en back up ki plis ki koman nou main supply delo ki normalman PUC i devret itilize.

Mersi Mr Deputy Speaker.

MR DEPUTY SPEAKER

Onorab Valmont.

HON SYLVIANNE VALMONT

Mersi Mr Deputy Speaker, bonzour.  Bonzour Minis e tou dimoun ki a lekout.

Mr Deputy, mon ti a kontan demann Minis si son Minister in osi travay lo en plan bidzeter pou devlopman sa bann larivyer me an menm tan konsider en proze dan konteks public private partnership etan donnen ki Praslin i annan bokou devlopman prive tel ki bann Lotel, guest houses eksetera.

Mersi Mr Deputy Speaker.

MINISTER DIDIER DOGLEY

Mr Deputy Speaker, dan sa water master plan ki ti ganny devlope an 2008 i annan tou bann detay bann diferan proze ki’n ganny met devan pou anmas delo lo Mahe, Praslin e La Digue.  I en plan ki tre detaye, i annan en kantite lenformasyon ladan enkli bann kou konbyen ki pou koute pou sa bann diferan travay ki neseser pou ganny fer pou fer sir poudir dimoun i ganny ase delo e ki annan sa garanti pou dimoun ganny delo ler zot bezwen.

Me lo kote.  Sorry mon krwar mon’n obliy sa dezyenm bout kestyon silvouple.  Si ou kapab repete.

MR DEPUTY SPEAKER

Proceed Onorab.

HON SYLVIANNE VALMONT

Wi Minis, sa dezyenm bout i konsern en travay avek bann public private partnership si ou le pou kapab redwir kou ki Gouvernman i depanse etan donnen ki nou konnen Praslin i annan bokou devlopman prive e tel ki bann Lotel, bann guest houses eksetera kot nou konnen zot a kapab travay ansanm, met en si oule, en rezervwar pou delo.

MR DEPUTY SPEAKER

Kestyon in ganny demande Onorab.

HON SYLVIANNE VALMONT

Mersi.

MR DEPUTY SPEAKER

Les Minis a reponn prezan.

MINISTER DIDIER DOGLEY

Ok, mersi Mr Deputy. 

PPP ouswa private public partnership i en sistenm ki aprezan Gouvernman in devlope e aprezan Minister Finans in met son striktir an plas.  Ki vedir dan lepase ti vreman napa en striktir pou Gouvernman swa PUC itiliz li.  Akoz ou bezwen fer sir poudir ou bezwen annan tou ou bann sistenm an plas ki dan en fason ki ler ou komans itiliz li i mars byen.  E mon konnen poudir Minister Finans avek World Bank in travay lo en dokiman ki aprezan in ganny adopte par Gouvernman e definitivman nou pe regard sirtou lo kote lenerzi, PUC i deza pe fer li e mon pa vwar akoz nou pa kapab itiliz menm sistenm pou kestyon supply delo sirtou avek bann Lotel ek bann lezot biznes dan lefitir.

Mersi Mr Deputy Speaker.

MR DEPUTY SPEAKER

Onorab Payet-Marie.

HON MARIA PAYET-MARIE

Mersi Mr Deputy Speaker.

Mr Deputy Speaker, anliny ek larepons Minis e osi petet mon ti a kontan demann Minis si zot pe mazin revwar oubyen ranforsi Lalwa pou fer ki lakominote i respekte en pti pe plis larivyer e pou fer ki nou annan plis potansyel pou anmas delo pou stokaz Praslin e osi Mahe e La Digue.

Mersi.

MR DEPUTY SPEAKER

Non, kestyon i lo larivyer Praslin.  Proceed Minister.  Tir Mahe ladan.

MINISTER DIDIER DOGLEY

Mr Deputy, definitivman nou pou kontinyen travay pou fer sir poudir nou anmas maksimonm delo dan larivyer.  Epi osi nou pou regard bann lezot opsyon menm i annan travay ki PUC pe al komans fer pou regarde parey dan ka La Digue kot nou kapab menm retir delo anba later.  Ki pe ganny fer deza La Digue, me pa pe ganny fer lo Praslin e lo Mahe osi pa pe ganny fer.

Alor nou pe regard tou bann opsyon pou fer sir poudir nou garanti delo ki nou donn dimoun menm pandan letan lasesres ki dimoun i fer sir i annan delo pe koule dan tiyo.  So nou pou kontinyen avek nou progranm travay konsernan pou stokaz delo, kolekte delo, stoke, trete e fer sir distribye dan bann diferan lakour dimoun.

Dezyenm kestyon konsernen salte dan larivyer, sa i en travay ki nou pe kontinyen fer, nou pe donn en kantite lanfaz lo sa size e nou pe vwar ki mannyer ki nou kapab fer nou bann, pa zis nou bann Lalwa me selman nou fer tou lede kote, nou kontinyen edik dimoun fer zot konpran poudir sa zafer zet salte pa zis dan larivyer me partou i pa en keksoz ki dan zot prop lentere, i pa dan lentere pei, me i pa dan lentere menm sa bann dimoun.  Akoz a lafen ler ou’n zet dan larivyer ou menm ou pe polye larivyer, ou pa pe ganny delo ouswa ou frer ki reste pli ba i ganny problenm inondasyon pli tar akoz delo pa kapab koul parey i devret koule pou li al dan lanmer.

So nou pou bezwen kontinyen fer louvraz lo kote ledikasyon e an menm tan fer sir pou dir bann ki p aswiv bann lareg ouswa bann konformite e lafason ki keksoz i devret ganny fer.  Si fodre ganny pini nou pou bezwen itiliz Lalwa kont zot e ler zot in ganny atrape.  E nou deza pe fer li konmela.  Sanmenm sa ki nou’n kree sa fast track Court pou bann zafer lanvironnman avek bann lofans trafik e osi nou annan en dimoun ki travay full time dan Minister Lanvironnman ki en Avoka ki travay lo sak nou bann case pou fer sir poudir nou bann ka osi i al bokou pli vit ki avan i ti pe ale pou fer sir poudir bann dimoun ki kree bann lofans zot case i pas pli vit Ankour.  Mersi Mr Deputy Speaker.

MR DEPUTY SPEAKER

Onorab Volcere.

HON MARC VOLCERE

Mersi Deputy Speaker.

Deputy, mon ti a kontan demann Minis apard ki son Minister ki pe anmas bann delo, i osi annan Minister Lagrikiltir oubyen bann fermye ki pe anmas delo dan bann larivyer.  Eski i annan travay konzwent ki zot pe fer ki a kapab ede dan lavenir ler nou annan sa lasesres, lasesres mazer ki petet ansanm zot kapab vwar ki mannyer piblik i kapab ganny asiste ek sa bann delo ki fermye i anmase.

Mersi.

MINISTER DIDIER DOGLEY

Mersi Mr Deputy.

Mr Deputy, Minister in komans travay lo en progranm pou met an plas en komisyon pou delo.  Akoz pour lemoman nou annan enn pou elektrisite, pour lenerzi, me selman nou napa enn pou delo.  Akoz pou lemoman ki arive, nenport dimoun ki le ganny delo i annan en board ki ti egziste, en rivers board ki ti egziste ki normalman i donn ou permisyon.  E okenn dimoun ler i ganny permisyon i kapab al pran delo larivyer epi i annan PUC ki ti pe pran delo.  Epi i annan lagrikiltir osi ki ti pe pran delo.  Me selman pli ale nou vwar poudir i annan bokou plis bann lezot aktivite komersyal ki pe vini, ki pe retir delo dan larivyer.  Nou krwar in ler pou annan en Komisyon pou kapab regle en pe plis ki mannyer delo dan larivyer i ganny tire epi i ganny trete, epi i ganny donn ek bann dimoun pou fer sir osi poudir i annan en pli bon kordinasyon dan lafason ki lekel ki ganny premye akse avek delo e lekel larivyer ki nou kapab permet lezot dimoun ganny akse avek.

Alors i en travay ki nou’n komans fer e nou espekte disi a lannen prosenn probableman nou pou annan en komisyon an plas pou komans regle litilizasyon e akse avek bann larivyer ek bann sours delo.

Mersi Mr Deputy Speaker.

MR DEPUTY SPEAKER

Kestyon 157, Onorab Arnephy.

HON BERNARD ARNEPHY.

Mersi Mr Deputy Speaker.  Mr Deputy, eski Minis i kapab donn nou Lasanble detay lo plan pou ranforsi mezir sekirite lo landfill atraver pei?  Mersi.

MINISTER DIDIER DOGLEY

Mersi Mr Deputy Speaker.  Dan Sesel ozordi i annan 5 landfill ofisyel.  I annan enn Amitye, Praslin.  Enn Linyon Estate, La Digue.  I annan enn Anse Royal, Mahe, kot nou met bann salte ki pa pouri parey bann boutey kase.  Epi i annan 2 Providance, i annan Providance 1 and Providance 2 ki is Mahe.

Zesyon landfill lo La Digue, Praaslin ek Anse Royal i tonm direkteman anba Lazans pou zesyon salte ek lanbelisman.  Anba son direksyon Lazans i trouv li pli efikas pou rod 3 pti kontrakter pou manage sa bann landfill anba gidans ek direksyon Lazans.  Sa travay ki sa bann kontrakter i fer i enkli sa laspe sekirite, kontrol mouvman dimoun ek transpor lo sak sa bann landfill.

Lo sa bann landfill nou napa okenn gran problenm mazer kot dimoun i fer aktivite ilegal.  Sa detrwa lensidan ki’n annan.  Bann staff ki travay kot sa bann landfill in kapab met li anba kontrol.  Dan ka Praslin Lazans i pran bann mezir pli an plis par lenstalasyon plizyer camera sirveyans pou anpes dimoun akse landfill san lotorizasyon.  I osi annan bann patrol routin ki ganny fer menm pandan lannwit ki ede pou gard sa sityasyon anba kontrol.

Landfill 1 ek 2 Providance lo Mahe i ganny zere par STAR SeychellesSTAR i annan en kontra avek Lazans LWMA pou manage sa 2 landfill.  Sa i enkli met an plas bann mezir sekirite pou konbat kont okenn aktivite ilegal.  Malerezman i annan en pe letan nou’n konstate ki serten dimoun asosye avek drog i vin rod boutey pet avek bann lezot keksoz pou vann.  E pour konbat sa problenm LWMA ek lapolis in asiste STAR ler i neseser.  Me sa pa’n toultan mars parey nou ti a voudre.  Pou redwir e anpes sa bann aktivite lo landfill.

Alors depi resaman mon Minister avek Lazans LWMA in vwar li neseser pou ki STAR i pey a plen tan en Lazans Sekirite pou fer sir ki bann ki pa devret lo landfill i ganny tire o pli vit posib.  Sa Lazans sekirite i prezan avek 3 zonm lo landfill 7 zour par semenn depi 7er bomaten ziska 5er apre midi.  Depi sa nou’n vwar gran amelyorasyon vizavi sekirite landfill laba Providance.  E nou pe kontinyen swiv sityasyon pou vwar si i annan nesesite pou ranforsi mezir ki nou’n deza pran.  Mersi Mr Deputy.

MR DEPUTY SPEAKER

Kestyon siplemanter Onorab Arnephy.

HON BERNARD ARNEPHY

Mersi Mr Deputy Speaker.

Mr Deputy, baze lo larepons Minis mon mazinen poudir i annan serten dimoun ki kapab ganny akse avek landfill.  Serten non.  So ki prosedir pou en endividi, eksplik nou Minis ki prosedir pou en endividi ganny akse avek landfill e dezyenmman ki arive avek bann dimoun ki kontinyelman antre lo landfill ilegalman.  Ok, anmas bann prodwi ki’n ganny rezete, ki’n ganny zete e answit re anmenn sa bann prodwi lo market pou re vann.

Mersi.

MINISTER DIDIER DOGLEY

Mersi Mr Deputy Speaker.

Mr Deputy, pou ou ganny access avek landfill, sirtou Praslin, Mahe e menm La Digue.  Normalman ou bezwen pe vin dan transpor pou ou anmenn ou bann salte pou ou al zete.  E i annan kot sak sa bann landfill i annan en larantre e normalman i annan en gate ki fermen e pou ou ganny akse ou bezwen annan sa salte ki ou p e vin zetet.  E la tou landfill i annan son bann ler ouver e pi i annan son bann ler ki fermen.  Me sa bann dimoun ki vin anler lo landfill Providance zot pa vin atraver main larantre kot i annan sipervizyon, kot i annan kontrol.  Laplipar bann dimoun ki nou, nou’n ganny problenm avek i bann dimoun ki vin anler lo landfill Providance atraver bann tro ki zot in fouye dan fance ki Gouvernman in mete pou zot ganny akse anler lo landfill. E zot ganny akse nenport ki ler.  Zot kapab vin ler pandan letan ki pe travay.  Me selman si zot vin pandan letan ki pe travay, la konmela i annan 3 gard sekirite an plas e sa bann gard definitivman zot rol se fer sir, si ou napa naryen pou fer lo landfill, pou fer sir poudir ou pa la.  E si zot bezwen lasistans lapolis nou fer le neseser pou call lapolis pou aret sa bann dimoun.

E parey mon pe dir, depi ler nou’n met sekirite an plen tan, nou pa vwar sa kantite problenm parey ti ete avan kot bann dimoun ti vini pou fer sa.  E nou, nou pe kontinyen pou fer sir poudir si okenn dimoun i ganny atrape pe fer okenn aktivite ilegal lo landfill poudir sa bann dimoun i ganny mete dan lanmen lapolis e ki aksyon i ganny pran avek zot sirtou si zot pe fer en keksoz ki mal. E si i annan okenn dimoun ki annan okenn lenformasyon poudir i annan dimoun ki’n vin pran keksoz lo landfill pou al vann, then zot kapab nenport ler enform nou les nou konnen e nou definitivman nou pou pran bann aksyon neseser pou fer sir poudir aksyon i ganny pran kont sa bann dimoun.  Akoz nou definitivman nou pa toler okenn dimoun pou vin lo landfill pou kolekte okenn keksoz ki’n ganny kondannen e ki normalman i devret pe ganny kouver ek bury ki dan en fason i ganny depoze dan en fason ki pa afekte ni lanvironnman e ni imen.

Mersi Mr Deputy Speaker.

MR DEPUTY SPEAKER

Siplemanter Onorab De Commarmond.

HON CHARLES DE COMMARMOND

Mersi Mr Deputy Speaker.  bonzour Mr Deputy Speaker, bonzour Minis, bonzour tou dimoun ki a lekout.

Mr Deputy Speaker, lefe ki landfill Providance 2, landfill 2 lo Providance i bord ek lanmer e i annan dimoun ki’n ganny kraz lipye laba lo sa landfill e i pe ganny operate menm ki i pa ankor pare.  Eski Minis i kapab eksplik nou Lasanble ki mezir sekirite ki annan kot sa landfill, spesifikman kot sa ….. plant la ki atase avek sa landfill pou anpese ki i annan bann vandalizm ankor ki arive parey in deza arive tou dernyerman.  E akoz ki GIBS pa oule sertifye ki kontrakter in fini travay lo sa proze ….. plant la.  Depi tou sa letan ki sa proze in fini ganny fer, pou fer li antre dan sistenm sekirite landfill Providance.  Mersi bokou.

MINISTER DIDER DOGLEY

Mr Deputy Speaker, ler mon koz lo sekirite landfill pou mwan sa …… plant i form par landfill.  Parey mon dir, nou’n met nou 3 sekirite, dimoun, sekirite ki la prezan full time depi bomaten ziska tar le aswar pou fer sir poudir bann dimoun ki napa naryen pou fer lo landfill pa antre lo landfill.

Malerezman bann ka kot ti annan vandalizm, in annan vol, i bann ka ki’n arive dan le pase avan ki ti annan bann sekirite on sight. E menm ki ti annan sekirite nou konn byen sekirite i kapab anpes vol ziska en serten poursantaz me i pa anpes li 100 poursan pou annan dimoun pou antre, pou vole si li in deside in fer son plan pou li vin vole.  Me selman sa ki nou bezwen fer, se ki si menm nou pa atrap sa dimoun avan, me menm apre nou devret annan en swivi pou fer sir poudir sa bann aktivite i ganny arete.

Now, konsernan sertifikasyon pou GIBS. Travay lo landfill i pa kapab ganny sertifye sak fwa ki louvraz i pa’n kapab ganny 100 poursan ganny hand over avek Gouvernman.  E pour lemoman i ankor annan, parey ou’n nonmen i annan bann kab ki’n ganny retire, i annan bann lekipman ki malerezman in ganny afekte e ki nou, nou pe fer nou mye pou enporte.  Nou espekte disi ver lafen lannen sa bann lekipman i an fini arive e ki travay i an konplete e ki sa …. plant i ava fully operational lemoman ki sa bann zafer in arive.  Nou’n fini fer laranzman, i annan en Lakonpannyen ki pe travay lo sa proze pou fer sir poudir i ganny konplete.  E lemoman ki sa i ganny fer mon asire poudir GIBS i ava release son completion certificate. Mersi Mr Deputy Speaker.

MINISTER DIDIER DOGLEY

Onorab Fideria.

HON EMMANUEL FIDERIA

Mersi Deputy Speaker.  bonzour Minis, bonzour tou Koleg MNA.

Mr Deputy, eski Minis i kapab enform nou Lasanble si son Minister atraver sa konpannyen ki zot in mete pou zer landfill zot pe ganny bon korporasyon, par egzanp avek public health.  Nou tou nou konnen ler en lavyann ouswa poul in ganny kondannen public health i bezwen la pou fer sir ki i ganny antre.  Parey custom i annan bann marsandiz ki ler i sorti dan warehouse, ki’n expire.  Lapolis e lezot Lorganizasyon.  Si zot pe ganny sa bon korporasyon pou permet bon zesyon lo landfill e konbyen i kout Gouvernman par lannen pou permet ouswa manage sa landfill.

Mersi.

MINISTER DIDIER DOGLEY

Mersi Mr Deputy Speaker. 

Management an zeneral Gouvernman pe pey STAR 40 milyon par lannen  pou li kolekte salte e manage landfill an menm tan.  E mon panse, mon napa sa exact figure dan mon latet i apepre R2 milyon par mwan zis pou manage landfill limenm e sa pou fer sir osi ki i annan sekirite lo landfill.

E normalman si en dimoun i anmenn bann.  Okenn salte ki en dimoun i anmennen STAR i sipoze annan en compactor fulltime laba lo landfill pou fer sir poudir le moman ki salte i ganny zete sa compactor i pas lo sa bann salte, i plati li e i compact li pou fer sir poudir i soz.  Epi apre lazournen ler in fini compact tou salte ki’n ater i sipoze met en kours later lo la pou fer sir poudir sa salte i ganny kouver e ki i pa anvoy loder e ki bann zwazo, bann vermin pa ganny akse avek bann keksoz ki parey ou kapab dir bann lavyann ki’n kontaminen ouswa bann soz ki zot kapab oule vin pran.  E menm dimoun osi si zot oule vin kolekte.

So, normalman si STAR i fer son louvraz byen, ouswa Lakonpannyen ki responsab pou landfill i fer son louvraz byen, i pa devret posib pou dimoun vin kolekte keksoz apre ler travay.  Akoz salte pou’n fini compact, i pou’n fini kouver avek en kours later ki pou’n fini pas lo la.  Alors an zeneral nou, enn bann travay ki landscape and land waste agency i bezwen fer se ki i bezwen fer sir ki toulezour zot anvoy zot bann zofisye pou fer sir poudir sa bann travay i ganny fer korekteman ki dan en fason ki menm si en dimoun i antre i pa pou ganny akse avek sa bann keksoz.  Akoz landfill i en landrwa ki danzere pou ete akoz i annan sa bann gro, gro masin parey mon pe dir.  I annan bann konminyon pe zet salte epi ou annan sa gro compactor ki son louvraz se compact salte, fer sir poudir i pran i pran minimonm lespas lo landfill. E avek nou sistenm sekirite nou’n vwar parey mon’n deza koz lo la poudir nou napa sa kalite problenm ki nou ti annan avan ler ti napa sekirite an plas lo landfill.

Mersi Mr Deputy Speaker.

MR DEPUTY SPEAKER

Onorab Samson.

HON DEREK SAMSON

Thank you Mr Deputy Speaker.  Bonzour tou dimoun.

Mr Deputy, mon ti a kontan demann Minis kwa ki diferan avek mezir sekirite ki annan lo landfill Anse Royal avek sa enn Providance e kapasite ki’n ganny itilize dan landfill Anse Royal pou date ozordi la.

Mersi.

MINISTER DIDIER DOGLEY

Meersi Mr Deputy.

Mr Deputy, Anse Royal nou annan en pti kontrakter ki manage landfill Anse Royal e landfill Anse Royal pa gannyen vreman en gran kantite salte.  Sel salte ki al Anse Royal se bann keksoz ki nou apel in earth waste. Savedir bann keksoz ki pa pouri e normalman i annan pou fer avek bann boutey kase, bann keksoz koumsa.  E napa en demann pou sa bann keksoz pour lemoman.  E alor ou pa vreman gannyen problenm sekirite.  Ou kapab ganny en dimoun ki a oule vin la, me selman pou vini pou pran en keksoz dan landfill li menm i pa en issue, akoz napa en demann pou sa bann salte ki’n ganny mete laba.

Tandis ki lo landfill Providence i annan tout sort kalite salte ki vini enkli bann prodwi sorti dan bann laboutik ouswa sorti dan bann store ki malerezman in expire ouswa in kondannen ki sa bann dimoun pa kapab itilize, alors zot dispose sa lo landfill.  Me malerezman i annan bann dimoun ki krwar i kapab fer en pe larzan vitman avek bann keksoz kontaminen pou al re vann avek dimoun.  E se la kot sa problenm i vini.  E si parey mon pe dir, poudir sa compaction i ganny fer deswit, then i pa devret en problenm akoz sa salte pou’n fini ganny compact avek bann lezot salte e i pou difisil pou okenn dimoun al triye e pou kapab tir sa bann keksoz.

Mersi Mr Deputy Speaker.

MR DEPUTY SPEAKER

Onorab Volcere.

HON MARC VOLCERE

Mersi Deputy Speaker.

Deputy Speaker, mon kestyon i vize ver landfill Amitie.  Letan zot pe secure landfill Amitie Minister, ki prekosyon osi zot pe pran pou asire ki sa bann fanmir ki reste dan sa zanmirant, zot osi zot annan an term sekirite zot lasante sirtou.  Zot pa vwar en risk pou zot lasante letan ki zot osi pe sekiriz landfill.

Mersi.

MINISTER DIDIER DOGLEY

Mr Deputy, pou nou okenn landfill i ganny manage byen i pa devret koz en problenm menm pou bann dimoun ki reste dan sa zanmirant, akoz normalman lafason ki ou design landfill, landrwa ki ou met son salte, apre si ou pe fer son compaction ou fer sir poudir i annan kouvertir ki ganny fer dan en fason toulezour i pa devret koz en gran problenm pou bann dimoun ki reste dan zanmirant.

Mon konnen poudir lo Praslin, Amitie ler ti annan sa gro lapli ankor, ki ti annan sa plis ki 300 milimet lapli ki’n tonbe la malerezman in annan salte ki’n ganny lave atraver gro lapli ki’n ganny anmennen kot bann landrwa, kot bann dimoun dan zanmirant.  E nou, depi sa in arive nou pe fer bann travay, nou’n anvoy en tim lo Praslin, enkli landscape and waste management agency pou regarde ki mannyer ki nou kapab anpes sa arive dan le fitir.  E menm an menm tan nou annan nou bann ki travay avek task force ek bann zafer drenaz, zot osi zot pe regarde ki mannyer ki nou kapab met en network drainage system pou fer sir poudir sa bann delo ki sorti laba i pa al kot bann dimoun me i ganny contained plis ou mwen dan sa bann landrwa e epi i ganny channel dan en landrwa kot i pa pou al afekte bann zabitan ki reste dan zanmirant.  E travay i ase byen avanse, mon konpran poudir kontra i sipoze ganny donnen dan bann zour ki pe vini pou fer bann travay pou fer bann drenaz e menm re ouver sa channel ki ti’n bloke anba erport laba Praslin kot Amitie ki ti’n bloke, ki ti pe form, ki par sa problenm pou fer delo monte e inond antye sa landrwa obor kot landfill i ete.

Mersi Mr Deputy.

MR DEPUTY SPEAKER

Onorab Vel.

HON JENNIFER JASMIN

Mersi Mr Deputy.  Bonzour tou dimoun.

Mr Deputy, mon ti a kontan demann Minis an vi son repons from en pwennvi lasante piblik, eski pou ranforsi sekirite, eski son Minister pe mazinen ansanm avek Lakonpannyen ki zer bann landfills petet pou envestir dan en incinerator kot bann prodwi ki kapab annan lenpak lo lasante piblik i ganny detrir right there and there.  Ki i vin en deterrent pou bann dimoun ki vin lo landfill spesifikman pou sa bann prodwi e ki retourn lo marse pou konsonmasyon piblik.

Mersi.

MR DEPUTY SPEAKER

Eskize mon ti devret dir Onorab Jasmin.  My apologies.  Proceed Minister.

MINISER DIDIER DOGLEY

Mersi Mr Deputy Speaker.

Mr Deputy, nou’n regard dan litilizasyon incinerator, par egzanp i annan enn ki mon konnen ti ganny mete lo por, i annan enn ki ti ganny mete lo erport, i annan ki’n ganny mete kot lopital kot i annan bann des ki sorti dan lopital ki normalman pa devret al lo landfill, ki ganny brile, i ganny detri.

Me pou servi incineration an zeneral i en keksoz ki tre koute.  Bann kalkilasyon ki nou nou’n fer i pou plis ki double lakantite larzan ki Gouvernman ozordi pe servi pou li retir salte pou al met lo landfill.  Akoz pou ou servi en incineration ou bezwen pe enport fuel, ou bezwen pe bril dyezel ouswa bennzin pou ou kapab fer li pou li ariv sa 800 ouswa 1000 degre celsius ki ou bezwen pou ou kapab detri sa bann lafimen avek sa bann dioxin ki prezan dan sa bann materyo ki ou pe brile.  E menm lo lot kote si ou pe bril an gran kantite i annan en lot problenm ki asosye avek loder.  E si i annan bann lakaz dan zalantour, bann dimoun pou pli ganny afekte avek loder pandan letan ki ou pe brile ki si ou annan en landfill ki pe byen manage.

Parey mon pe dir, poudir si en dimoun in amenn en karkas, mon pa konnen, koson ouswa bann soz ki’n kontaminen e sa Lakonpannyen ki pe manage sa landfill i pe fer en bon louvraz.  Lemoman ki sa i arive, i fouy en trou i met sa ladan i rekouver li en bann lezot salte epi i fer sir i met en kours later lo la, i pa devret en problenm pou dimoun ganny akse anler lo la.  Menm si i annan sekirite ki pe anpes dimoun vin lo landfill ki napa naryen pou fer lo landfill i pa devret en problenm.  I senpleman i en kestyon bon zesyon sa landrwa landfill li menm.

Mersi Mr Deputy Speaker.

MR DEPUTY SPEAKER

Onorab Bresson.

HON GALEN BRESSON

Mersi Mr Deputy Speaker, bonzour tou dimoun.

Eski Minis i kapab dir ek sa Lasanble Mr Deputy Speaker, avek bokou lentere mon’n ekout li.  Eski i annan en plan konkret akoz ozordi i annan en working model Anse Royal kot ou dir napa bokou sekirite ki bezwen ganny servi akoz insegmantize salte e nou pa bezwen sekirite akoz personn pa fatig zot avek sa.  Be eski nou annan en plan konkret devan nou kot nou pran nou bann salte nou komans segmantize li depi dan lakour.  i ganny anmase e bann keksoz ki nou kapab met sa ki tanzib parey plastik i al en sel landrwa e la dimoun pa pou bezwen vin lager e donn nou en problenm sekirite.  Eski nou annan en plan konkret pou nou kapab fer en proze ki pou redwir tou sa bann problenm ki nou pe gannyen akoz apre tou nou annan en working model dan Anse Royal ozordi.

Mersi Minis.  Mersi Mr Deputy.

MINISTER DIDIER DOGLEY

Mr Deputy Speaker, wi nou annan en plan, nou annan en waste management plan ki ti ganny drafte lannen e ki nou pe itilize menm si ou regard dan bann dokiman, menm nou sustainable development plan ou pou vwar poudir i annan bann gidans, bann policies ek stratezi ek sa action plan ki’n ganny devlope ki mannyer pou deal avek problenm salte.  E triyaz salte pou nou, pou tou pei annefe i lakle pou deal avek problenm salte.  Me selman triyaz i pa neseserman retir sa problenm sekirite.  Kontrer triyaz i kapab kree plis problenm lo kote ki ou fer serten salte ganny en valer.  Par egzanp si ou pran sa kestyon boutey pet avek bann can aluminum ki ganny servi pou labwason.  Nou’n donn li en valer, le moman ki ou donn li en valer otomatikman i vin en komodite e ler i vin en komodite definitivman sa lentere i ogmante dan sa keksoz.  E menm keksoz i kapab arive avek vye feray, avek bann lezot keksoz ki ozordi nou koman Gouvernman nou pe donn valer.

Alor, definitivman nou annan en plan pou fer sir poudir i annan plis triyaz, triyaz i kapab ganny fer parey ou pe dir kot lakaz.  Sa i en keksoz ki nou ankouraze.  Me selman nou rekonnet pou fer triyaz kot lakaz i bokou pli konplike ki pou fer li lo en baz ki kot nou donn en valer serten komodite ouswa travay ek bann Lakonpannyen, bann gran Lakonpannyen par egzanp parey Lotel i en pe pli fasil pou travay ek zot akoz diferan kalite salte i bokou mwens ki kot sorti kot en lakaz.  Ou napa sa kantite divers kalite salte ki sorti kot sa soz.  Epi kot lakaz i demann bokou plis disiplin.  Me selman an dizan sa i pa vedir poudir nou pa oule fer li.  Nou rekonnet poudir i annan serten challenges poudir i annan serten kontrent.  Me nou plan se al dan sa direksyon dan le fitir e nou, nou pe plan par egzanp pou nou fer sa waste to energy kot nou’n fini deside kot nou pou al fer sa ki aple anaerobic digestion kot 50 poursan ki laplipar nou bann salte i bann salte organic e sa pou ganny anvoye dan sa bann landrwa dan sa lizin kot pou ganny itilize pou fer compost apre prodwi lenerzi avek.  E bann travay pe ganny fer la ki dan en fason disi a lafen lannen nou pou kapab tender out pou en Lakonpannyen, bi pou bann Lakonpannyen bid pou en tel proze isi Sesel.

Menm keksoz pe ganny fer pou Praslin, sa osi nou pe travay lo la e pli tar osi nou annan nide fer menm keksoz pou La Digue.  Tandis ki pou bann ki pou isi nou pe deza, bann lezot salte ki pa organik, sa lezot 50 poursan parey ou konnen bann vye feray i deza nnan bann Lakonpannyen, i annan apepre 5 diferan Lakonpannyen ki pe kolekte vye feray.  I annan bann Lakonpannyen ki pe deza kolekte vye batri.  Nou pe travay ek SEYPEC pou fer SEYPEC kolekte tou bann delwil irze ki sorti dan bann masin pou trete epi pou re eksporte.  Nou pe regard osi lo kestyon larou.  Nou pe regard lo bann kestyon sa ki apel electronic waste e menm bann boutey ki’n kraze e disi mon espekte lafen lannen prosen nou pou annan en bann aktivite tre konpreansiv, akoz nou plan i deza egziste.  Nou a komans roll out bann diferan striktir ouswa mezir ki neseser pou fer sir poudir enn par enn nou met sa bann keksoz anmars, ki pa ankor an plas la konmela.

Mersi Mr Deputy Speaker.

MR DEPUTY SPEAKER

Kestyon 158, Onorab Volcere.

HON MARC VOLCERE

Mersi Deputy Speaker.

Sir, mon ti a kontan demann Minis si son Minister i annan okenn progranm pou ranplas bann vye tiyo dan Distrik Grand Anse Praslin?

Mersi.

MINISTER DIDIER DOGLEY

Mersi Mr Deputy.

Parey dan lezot distrik kot i annan en nesesite PUC i annan plan pou ranplas bann vye tiyo dan distrik Grand Anse Praslin.  Bonner lannen prosen PUC pou komans ranplas en seksyon vye tiyo dan distrik Grand Anse Praslin sorti kot Nouvelle Dekouvert ziska kot Lotel Indian Ocean Loge avek nouvo tiyo.

Sa proze pou kout PUC apepre R2.5 milyon.  Dapre lenformasyon ki mon annan napa okenn lezot landrwa dan Grand Anse Praslin kot PUC i bezwen ranplas bann vye tiyo.  Bann lezot landrwa lo Praslin par egzanp Bais Ste Anne Praslin, PUC i deza ranplas serten bann vye tiyo e i annan plan pou ranplas bann lezot vye tiyo dan sa distrik.

Mersi Mr Deputy.

MR DEPUTY SPEAKER

Kestyon siplemanter Onorab.

HON MARC VOLCERE

Mersi Deputy Speaker.  Deputy Speaker, mon ti a kontan demann Minis eski sa proze pou ranplas bann vye tiyo pou ganny outsource oubyen i pou fer par bann travayer PUC zot menm.  E dezyenmman nou tou nou konnen ler nou mank delo kot lakour i en lenkonvenyans pou lafanmir.  Eski son Minister oubyen PUC i satisfe avek lakantite letan ki i pran pou repar bann tiyo ler i annan en morso tiyo ki kase dan distrik.  Mersi.

MINISTER DIDIER DOGLEY

Mr Deputy, PUC in enform mwan poudir i pou outsource definitivman sa travay lo Praslin, savedir i pou donn en kontrakter pou tir sa bann vye tiyo pou remet nouvo tiyo.  PUC mon konnen pe fer en kantite travay pou fer sir poudir la kalite servis ki zot donn piblik i amelyore.  Zot annan serten limitasyon parey tou bann Lorganizasyon, me selman mon konnen poudir an zeneral enn bann keksoz ki zot pe travay tre dir lo la se pou fer sir poudir i annan disiplin, i annan pli bon zesyon bann resours ki zot annan pou fer sir poudir servis ki zot delivre i servis ki Seselwa an zeneral i espekte.  E an zeneral si nou vwar, nou konstate Sesel ozordi i nepli annan koupir kouran an bonnavini, delo sa lannen in en lannen ki ase byen, mon krwar kekfwa akoz nou’n annan en bon pe lapli osi.  Me PUC pe sey fer son mye pou fer sir poudir kalite servis i toultan vin pli byen opred ki i ti ete dan lepase.  E avek bann envestisman ki pe ganny fer mon konnen poudir i annan en kantite proze ki PUC pe fer.  Nou espekte poudir dan sa 5an ki pe vini poudir ankor kalite servis ki PUC pe donnen i pou vin bokou pli mye ki i ete menm ozordi.

Mersi Mr Deputy Speaker.

MR DEPUTRY SPEAKER

Onorab Esther.

HON NATASHA ESTHER

Mersi Mr Deputy.  Mr Deputy, eski Minis i kapab enform sa Lasanble konbyen i pou koute an tou pou ranplas tou bann tiyo ki bezwen ganny sanze lo Praslin e ki dele letan son Minister pe mazin enplimant sa bann proze.  Mersi.

MINISTER DIDIER DOGLEY

Mr Deputy, mon’n ganny enformen par PUC ki poudir i pou kout anviron R10 milyon pou ranplas tou bann vye tiyo.  Definitivman i dan lentere PUC pou sey fer li o pli vit posib, pou fer sir poudir tou bann vye tiyo i ganny ranplase.  Me PUC pa kapab fer, baze lo son bann resours ki i annan i pa pou kapab fer tou proze an menm letan.  Nou espekte depandan kante resours ki ava annan dan bann lannen ki pe vini i an fer sir poudir tou sa bann vye tiyo ki annan lo Praslin i an fini ganny retire e Praslin i ava annan zis bann tiyo ki ase resan, ki ase nef pou deservi popilasyon Praslin avek delo trete.

Mersi Mr Deputy Speaker.

MR DEPUTY SPEAKER

Kestyon 159, Onorab Volcere.

HON MARC VOLCERE

Mersi Deputy Speaker.  Deputy Speaker, mon ti a kontan demann Minis si son Minister pe konsider netway e deblok tou bann lanmar dan distrik?  Mersi.

MINISTER DIDIER DOGLEY

Mersi Deputy Speaker.

Wi Minister Lanvironnman, Lenerzi ek Sanzman Klima i annan en plan pou netway e deblok tou lanmar lo Mahe, Praslin e La Digue.  Minister ti komans donn kontra pou lamenazman bann lanmar ek larivyer an 2009.  Ler sa progranm ti komanse i ti kouver selman 60 sit lo Mahe, 13 sit lo Praslin e 7 sit lo La Digue.  Plan Minister se pou kouver o maksimonm bann larivyer ek lanmar prensipal dan bann distrik anba sa progranm lamenazman bann lanmar ek larivyer dan Sesel.

Dan sa 13 lanmar ek larivyer lo Praslin, selman 5 lanmar ek larivyer ki tonm dan distrik Grand Anse Praslin.  Me ozordi an 2015 i annan plis ki 12 larivyer ek lanmar ki pe ganny amenaze dan Grand Anse Praslin tousel e 18 dan distrik Bais Ste Anneki fer an tou 30 sit ki pe ganny amenaze anba sa progranm netwayaz lanmar ek larivyer lo Praslin.  Sa i vedir ki nou’n plis ki double lakantite sit ki nou bezwen amenaze zis lo Praslin.

Mon Minister pou kontinyen ogmant lakantite larivyer ek lanmar anba sa progranm tan ki i annan resours pou fer li.  An tou 11 nouvo lanmar ek larivyer pou ganny enkli lo lalis sa lannen dan distrik Grand Anse Praslin ki pou fer an tou 22 sit ki pou ganny netwaye pandan peryod 2015 a 2017.  I pou osi annan logmantasyon bann sit dan distrik Bais Ste Anne ki pou sorti 18 sit pou vin 22 sit pou menm peryod letan parey distrik Grand Anse Praslin.

Minister pou depans en sonm anviron R700 mil lo Praslin an tye par an avek sa adisyon 11 sit dan Grand Anse Praslin e 4 sit dan distrik Bais Ste Anne ki pou fer en total 44 larivyer ek lanmar ki pou ganny amenaze anba sa progranm.  Minister i osi donn kontra pou deblok bann lanbousir ek lanmar dan ka i annan en bezwen e osi dan letan gro lapli pou evite ki annan inondasyon.

Mersi Mr Deputy Speakler.

MR DEPUTY SPEAKER

Kestyon siplemanter Onorab Volcere.

HON MARC VOLCERE.

Mr Deputy Speaker, mon ti a kontan demann Minis pour lemoman i annan bann kontrakter i annan kontra pou netway lanmar tou le mwan.  Eski i annan en posibilite pou enkli disilting dan zot kontra ki ava ede, pete Minister i ava benefisye lo lakantite larzan ki ti pey sa bann dimoun tou le mwan.  Part of sa larzan a ganny servi dan sa kontra pou zot disilt bann lanmar.  E dezyenmman eski son Minister pe travay an konsiltasyon avek Lotorite Distrik pou vwar bann lanmar ki koz serten danze, ki koz linondasyon pou ki sa bann lanmar a kapab ganny priyorite pou fer bann travay lo la.

Mersi.

MINISTER DIDER DOGLEY

Mr Deputy, an zeneral disilting nou fer li pour lemoman mon krwar tou le 3an, tou le 5an depandan nesesite epi depandan larzan ki nou annan.  Akoz disilting i quite, i en loperasyon ki ase gran.  Akoz dan bokou leta nou bezwen servi bann masin ki ase gro pou kapab tir sa bann later.

Nou kapab sey regarde si dan bann pli pti lanmar ouswa bann pli pti larivyer kot en dimoun i kapab fer li petet mannualy ouswa dan fason koumsa.  Si nou kapab fer li dan le fitir.  Se en keksoz ki nou kapab regard ladan.  Fer en pti letid, gete si i posib pou fer li.

E sa dezyenm bout kestyon.  Sorry.

HON MARC VOLCERE

Minister si zot pe travay an konsiltasyon avek lotorite distrik pou idantifye bann lanmar ki koz plis danze ler lapli i tonbe.

MINISTER DIDIER DOGLEY

Ya, parey mon’n deza dir Mr Deputy Speaker, tou travay ki ganny fer lo kote lanmar avek drenaz isi Sesel nou fer li an konsiltasyon avek distrik, avek bann lezot Lazans ek lezot Minister.  I pa en travay ki en dimoun i kapab fer kot ou asize dan en biro ou zis fer kalkilasyon.  Alor sen kantite sa bann konsiltasyon i ganny fer.  Annefe sa task force ki fer sa bann louvraz i apepre 7 diferan dimoun ki sorti dan diferan Minister e zot travay se fer sir poudir nou konsilte avek bann diferan distrik.  E sak fwa i annan bann nouvo gro lapli nou sey aprann e sey amelyor plan ki nou deza annan pou fer sir poudir nou azour avek bann demann, avek nesesite bann diferan sit ki annan lo Mahe, Praslin ek La Digue.

Mersi Mr Deputy Speaker.

MR DEPUTY SPEAKER

Onorab Fideria.

HON EMMANUEL FIDERIA

Mersi Mr Deputy.

Mr Deputy, eski Minis i kapab enform sa Lasanble vi ki rol Kapital ki lanmar i zwe dan nou eco-system, eski Minis i kapab dir nou Lasanble si i annan en resers ki’n ganny fer dan nou bann lanmar e ki lasante nou bann lanmar i ete dan Sesel.

Mersi.

MINISTER DIDIER DOGLEY

Mr Deputy Speaker, nou napa en letid konpreansiv ki’n ganny fer lo tou lanmar dan Sesel.  Me selman okenn travay ki nou fer ler nou pe amelyor bann sirkilasyon delo pou redwir inondasyon nou bezwen toultan konsider poudir lefe lenportans lanmar rol ki i zwe parey Onorab Fideria in dir, par egzanp pou filtre delo ek bann salte ki desann pou fer sir poudir sa pa al dan lanmer, i pa al asiz lo bann koray, i pa al detri sa lot laspe lakot ki tre enportan pou Sesel.

Pou premyerman pou lapes, fer sir poudir nou ganny nou bouyon epi lo lot kot epou fer sir poudir touris ki vin Sesel i ganny en lans ki prop, i ganny en bon koray ki i kapab ale al koule, al snuggle e vwar bann pwason e vwar bann koray ki ankor vivan.  E lot kote osi nou konnen poudir lanmar i zwe en gran rol pou bann pti pwason, menm bann ki dan delo sale i annan ki ponn dan bann landrwa ki apre i redwir, i vin pli gro i desann i al dan delo sale.  E ki sa 2 landrwa i annan en kantite lesanz between zot.

So tou bann louvraz ki nou fer, nou toultan gard sa an konsiderasyon.  Nou fer sir poudir nou pa zanmen fer okenn travay ki totalman fer lanmar vin sek.  Nou fer sir poudir toultan i annan en serten minimonm delo dan lanmar dan en fason ki i kapab kontinyen operate, i kapab kontinyen fer sa bann fonksyon fondamantal ki enportan pou nou kapab annan bann eco-system ki fonksyonnen, ki an bann sante e ki i kapab donn nou sa bann servis ki nou bezwen.  E an zeneral Sesel in deza ganny vwar parmi enn bann pei dan lemonn kot son sistenm maren i ankor tre entak.  E sa i akoz lakantite polisyon ki sorti lo later pou al dan delo sale nou ankor kapab pe manage li ziska aprezan.  Me selman i en lalit ki nou bezwen kontinyen pou fer sir poudir nou gard nou bann lanmar dan bann pli bon kondisyon posib.

Epi avek Nairobi Convension, ki enn bann Konvansyon ki nou travay avek i annan en proze kot nou’n travay dan lepase e nou pe kontinyen pou fer poudir i annan en Protokol an plas pou minimiz lakantite polisyon ki sorti lo later ki desann par larivyer, dan lanmar pou al dan delo sale.  E an enplimant sa proze, an menm tan avek nou bann progranm netwayaz e mentenir bann lanmar nou vwar poudir an zeneral nou kapab dir nou bann lanmar i ankor dan ase bon kondisyon.

Mersi Mr Deputy Speaker.

MR DEPUTY SPEAKER

Onorab Souris.

HON MIRENA SOURIS

Mersi Mr Deputy.

Mr Deputy, an vi ki biro meteorolozi sa lannen in dir poudir nu pou ganny bokou plis lapli ki souvandfwa i okazyonn linondasyon dan plato Beau Vallon e sirtou dan sa lanmar.  Eski Minis i kapab dir ek sa Lasanble ki plan son Minister i annan pou minimiz sa risk e osi i pe konsider pou travay avek Sekter Prive dan zalantour pou ede deblok sa lanmar.

Mersi Mr Deputy.

MINISTER DIDIER DOGLEY

Mr Deputy, nou’n fini travay lo plan pou Beau Vallon.  Mon konnen ki depi 2013 ti annan bann travay ki nou ti ganny fer e menm borde Lotel Savoy ti pe build, nou ti fer serten travay pou fer sir poudir nou amelyor sistenm drenaz sorti pou depi kot lapolis, kot stasyon lapolis ziska bor lanmer kot sa pizzeria Baobab e i annan serten bout travay ki’n ganny fer la kot Lotel Savoy e pli ba apre pon, par deryer i annan bann travay ki’n ganny fer pou amelyor sa drenaz.  Me malerezman i annan ankor bann bout tou ankor ki nou bezwen fer e mon krwar sa kestyon pou travay avek bann Private Sector i en keksoz ki ava donn nou en pe plis resours pou nou kapab adres sa bann problenm drenaz dan bann distrik parey Beau Vallon, kot vreman i annan en kantite bann aktivite prive, touristik ki ase byen etablir laba.  E mon krwar i en keksoz ki nou pou bezwen regard li dan plis detay.

E nou’n deza fer sa, mon konnen avek Lotel Bel Ombre par egzanp, ki pa Beau Vallon me i lo kote Bel Ombre, ki en kantite travay in ganny fer pou amelyor sa sistenm drenaz atraver ler sa Lotel ti ganny devlope.  Ki ozordi sa landrwa nou vwar poudir sistenm drenaz in plis ou mwen ganny pran par Lotel e prezan Lotel ki pe zer sa lanmar li menm lo sa kote.  Me alor nou pou bezwen regarde, nou a travay ek distrik pou gete ki mannyer ki nou kapab travay avek bann devloper dan sa landrwa pou nou kapab met en public private partnership ansanm pou kapab adres sa problenm drenaz dan Beau Vallon.

Mersi Mr Deputy Speaker.

MR DEPUTY SPEAKER

Onorab De Commarmond.

HON CHARLES DE COMMARMOND

Mersi Mr Deputy Speaker.

Mr Deputy Speaker, eski Minis i kapab enform nou Lasanble, ki kantite efektiv metod deblok lanmar ki’n ganny servi dan distrik Anse Aux Pins avek Au Cap in ete e lefe ki la i live lo radio, eski Minis i a pare pou donn piblik en nimero telefonn ki piblik i kapab telefonn en ler lanmar ek letan i annan problenm drenaz oubyen lanmar i ganny bloke e inonde dan distrik ouswa en nenport landrwa.

Mersi bokou.

MINISTER DIDER DOGLEY

Mersi Mr Deputy Speaker, bann travay ki nou’n fer Au Cap avek Anse Aux Pins i form par en proze ki pa ankor fini ganny konplete.  Parey kestyon ki’n ganny demande bomaten par Leader Lopozisyon e lezot osi.  i annan ankor bann travay ki nou bezwen fer Anse Aux Pins kot Chetty Flat, i annan bann travay ki nou bezwen fer kot ex hydroponic, i annan bann travay ki nou bezwen fer kot bann old’s people home. Kot pon Green Estate, par deryer, kot Madrin Estate. I annan tout en sistenm ki nou bezwen kontinyen travay ziska ler ki nou kapab fini konple antye proze pou adres problenm drenaz dan rezyon Anse Aux Pins e Au Cap.

Nou konnen poudir pou lemoman bann ki nou ganny fer bann dernyen lapli ki’n tonbe an zeneral in mar ase byen, nou konnen poudir nou’n ganny gro lapli an 2013, 2014 e bann bon in ganny fer pandan 2014.  E boner 2015 nou ti ganny sa pli gro lapli e an zeneral in mars ase byen, me selman bann landrwa kot nou pa ankor fini fer travay ti annan ankor linondasyon.  E nou, nou panse poudir zour nou an fini konplet tou sa, antye sa network drenaz ki annan Anse Aux Pins avek Au Cap, nou pou kapab met anba kontrol sa problenm inondasyon.  Me sa i pa vedir ki si ou ganny en gro lapli, annou dir plis ki 300 milimet dan en pti gin letan ki ou pa pou ganny problenm inondasyon.  Sirtou si lanmer i plen e delo napa landrwa pou ale.  Nou espekte poudir dan laplipar letan normal, si ou ganny lapli, pa devret annan.  Me si ou annan bann ka eksepsyonnel, kekfwa ou ava annan inondasyon pou detrwa erdtan, pou en zour.  Me selman nou pa pou vwar sa bann sityasyon parey nou ti vwar avek Siklonn Felleng an 2013.  Mersi Mr Deputy Speaker.

MR DEPUTY SPEAKER

En nimero telefonn Minis.

MINISTER DIDIER DOGLEY

Limero telefonn, an zeneral nou ankouraz dimoun pou pran kontak ek zot DA dan distrik.

HON CHARLES DE COMMARMOND

Nimero telefonn kot zot.

MINISTER DIDIER DOGLEY

Si ou le en nimero kot nou, lanvironnman i annan en green line ki tou dimoun i kapab telefonnen e sa i 2722111.

MR DEPUTY SPEAKER

2722111.  Onorab Pierre.

HON DAVID PIERRE

Mersi Mr Deputy Speaker.

Mr Deputy Speaker, eski Mini si kapab enform sa Lasanble si zot annan en Polisi kler lo ki fason zot pou antreprann bann travay deblok lanmar dan bann areas, dan bann landrwa kot i annan bann Sekter Prive, legzanp se Port Glaud kot Ephelia.  Ki sa Lotel Ephelia i antour en lanmar.  Ki fason ki zot antreprann sa bann travay dan bann sityasyon parey e eski zot annan en Polisi kler lo sa size.  Mersi Mr Deputy.

MINISTER DIDIER DOGLEY

Mr Deputy, nou Minister in toultan ankouraz bann Private Sector ek distrik e osi bann NGO’s e Private Sector pou travay ansanm.  I nou policy pou sey mobiliz tou bann partners, sirtou ler nou pe koz sa lanmar par egzanp Port Glaud, kot i annan diferan partner ki annan lentere ladan.  E s enn Port Glaud an zeneral nou vwar li in mars tre byen.  Par egzanp nou konnen poudir distrik i pe travay ansanm avek Ephelia e avek sustainability for Seychelles pou amenaz sa lanmar e an menm tan servi li koman en landrwa rekreasyonnel pou sa Lotel li menm.  E sa i en proze ki’n mars tre byen e ki nou’n ankouraze e nou’n menm atraver larzan ki nou’n gannyen avek global environmental facility, GEF.  Nou’n finans serten aktivite pour ki sa partnership ant sa bann diferan akter in mars tre byen.

Now, lo kestyon PPP parey mon pe dir, Gouvernman i fek met an plas en frame work, en sistenm pou ki mannyer Gouvernman pou travay ansanm avek bann akter prive e nou, nou pou definitivman enform nou lekor ki mannyer sa i sipoze fonksyonnen e nou ava servi sa koman nou baz pou nou kapab enterakte avek Sekter Prive pou finans amenazman bann lanmar dan bann landrwa kot nou krwar Sekter Prive i kapab zwe en rol.  E Ephelia mon krwar i enn bann legzanp ki vreman in mars tre byen menm an deor en sistenm PPP, kot zot menm zot, zot in servi zot staff pou travay ansanm avek en NGO avek nou Gouvernman Lokal pou amenaz e menm itiliz sa landrwa koman en landrwa rekreasyonnel si fo ki en landrwa ki dimoun i zet salte ouswa zot vwar li koman en problenm.

Mersi Mr Deputy Speaker.

MR DEPUTY SPEAKER

Kestyon 160, Onorab Volcere.

HON MARC VOLCERE

Mersi Deputy Speaker.

Mon ti a kontan demann Minis si son Minister pe konsider demann par en group zabitan ki reste Amitie, me ki pa planter, pou ganny akse ek delo trete?

Mersi.

MINISTER DIDIER DOGLEY

Mersi Mr Deputy, depi ki sa apepre 30 konsonmater ki pa planter oubyen planter ki pe zwir delo ki zot pe gannyen atraver lagrikiltir ti fer demann avek PUC pou delo trete, PUC in komans travay Amitie pou donn zot delo trete.  PUC in ganny serten retar avek sa louvraz resaman akoz gro lapli ki ti annan dan larezyon Amitie.  Me Mr Deputy Speaker, si tou keksoz i al byen, PUC pou kapab fini sa proze dan ankor 6 semenn kot PUC ava kapab donn delo trete tou sa bann lakaz dan sa rezyon.

Plan PUC se pou evantyelman kouver plato Amitie an antye avek delo trete pou konsonmasyon domestik.  Vites ki PUC pou kapab kouver bann lezot landrwa dan Amitie ki napa delo trete i depan lo disponibilite resours ki PUC pou kapab gannyen pou fer sa bann tel proze.

Mersi Mr Deputy.

MR DEPUTY SPEAKER

Kestyon siplemanter Onorab.

HON MARC VOLCERE

Mersi Deputy Speaker.

Deputy Speaker, premyerman mon ti a kontan remersye Minister pou kapab enplimant sa proze e dezyenmman mon ti a kontan Minis i enform bann zabitan ki prosedir zot annan pou fer as from now on pou zot kapab ganny koneksyon avek delo.

Mersi.

MINISTER DIDIER DOGLEY

Mr Deputy, bann dimoun i kapab deza komans ranpli zot form, fer bann aplikasyon kot PUC e lemoman ki tiyo, nou ava ariv kot zot PUC ava fer le nesesite neseser pou konekte zot avek sistenm PUC.  PUC i annan en sistenm tre senp kot ou demann, ou ranpli ou form, ou fer ou laplikasyon pou delo.  I menm sistenm ki ganny itilize partou, menm sistenm pou aplike osi pou sa bann dimoun.

Mersi Mr Deputy Speaker.

MR DEPUTY SPEAKER

Kestyon 161, Onorab Volcere.

HON MARC VOLCERE

Mersi Deputy Speaker.  Deputy Speaker, mon ti a kontan demann Minis, si son Minister i annan en progranm pou elimin bann leti lanmar ki’n anvair bann lanmar lo Praslin?  Mersi.

MINISTER DIDIER DOGLEY

Mersi Mr Deputy Speaker.

Mr Deputy, parey tou bann plan anvaisan, leti lanmar in ganny anmennen isi Sesel atraver bann dimoun ki’n vwar li koman en zoli keksoz pou met dan zot basen ouswa dan zot aquarium, ki apre zot in vwar li koman en problenm, zot in pran zot in zete.  E probableman zet dan kek lanmar ki apre in komans lo Mahe, sorti Mahe in ariv Praslin, in ariv La Digue.  E sa pa zis en problenm zis Sesel, i en problenm dan tou bann pei tropikal kot ou vwar leti lanmar dan bann gran lak, dan bann basen, dan bann ponds partou kot dimoun in zete.

E i annan 3 fason pou ou kapab kontrol li e laplipar bann pes vezetal i sa 3 fason prensipal ki ganny itilize.  Enn se an servan kemikal, kot ou spray avek bann diferan erbisid.  Dezyenm ou kapab tir li mannyelman, kot ou servi masin ouswa si napa bokou ou kapab tir li ek lanmen.  Trwazyenmman ou kapab servi en kontrol biolozik kot ou kapab entrodwir en zensek par egzanp ki manz sa plan, sorti dan sa landrwa oriziner, lorizin kot sa plan li menm i sorti.  Normalman i annan son bann pest ki viv lo li.

Me pour lemoman nou vwar sa metod kemikal avek biolozik i pa vreman 2 fason ki nou kapab itilize isi Sesel akoz i annan en kantite risk ki asosye avek.  Si ou pe servi kemikal, ou ganny kemikal ki al dan delo ki kapab afekte dimoun si pe servi delo, ouswa i afekte menm bann bio diversite ki dan sa lanmar li menm.  E si ou pe servi kontrol biolozik ki annan en kantite ki’n mal, mal.  Ler ou entrodwi par egzanp ibou pou manz lera, ou vwar poudir i ale i al manz zwazo.  So i annan en kantite bann risk ki asosye avek entrodwir bann kontrol biolozik.

So, nou nou’n plizoumwen konsantre lo tir li fizikman, mekanik atraver nou progranm kot nou netway lanmar regilyerman.  Nou fer sir poudir par progranm pou netway lanmar se osi pou tir sa bann soz.  E bann landrwa kot lanmar i ganny netwaye souvan ou pou vwar poudir napa problenm leti lanmar.  Be dan bann landrwa kot pa pe ganny netwaye, definitivman ou pou vwar poudir lanmar in etable li.  E mon krwar kekfwa dan le fitir nou pou bezwen vwar si nou kapab fer sa ki nou apel ban one off kot nou ale nou netway en landrwa, apre si nou vwar i pe komans re vin kekfwa nou servi en pti morso kemikal zis pou kontrol li, pou anpes li re prodwir e pou li re pran sa kontrol sa landrwa ankor.  Nou ava asize e pans lo la e diskit lo la pou gete ki mannyer ki dan en fason pli efektiv nou kapab elimin li lo Praslin, La Digue eisi Mahe.

Mersi Mr Deputy Speaker.

MR DEPUTY SPEAKER

Kestyon siplemanter Onorab.

HON MARC VOLCERE

Mr Deputy Speaker, mon ti a kontan demann Minis, eski ou Minister i vwar sa koman en problenm pou labita lanmar e dezyenmman i annan bann moman dan lannen, kot sirtou letan lasesres kot nivo delo i desann vreman ba, i annan menm bann lanmar ki vreman sek.  Eski petet ou Minister pe mazin rod finansman a sa moman pou zot kapab pete deal avek sa nespes en pe pli byen, ou kapab dir.

Mersi.

MINISTER DIDIER DOGLEY

Mr Deputy, leti lanmar definitivman i en problenm pou lanmar akoz le moman ki in pran kontrol okenn keksoz ki vin an gran kantite dan en landrwa ki i pa sipoze ete i pran bann nitrisyon, bann keksoz ki annan dan sa delo.  Epi definitivman i pran plas ki bann lezot lespes ti kapab la, epi menm etouf sa lanmer.  Par egzanp si i annan bann grenwir, i annan bann pwason, bann kwamye, bann lezot ki ti pe viv dan lanmar, lemoman ki sa soz in blok lalimyer, in blok sirkilasyon delo, definitivman i pou etouf sa bann lezot lespes ki sipoze, zot osi sipoze la dan sa lanmar.

Sanmenm sa ki mon pe dir poudir dan lezot landrwa, nou konnen poudir sirtou dan bann gran lack zot in servi en kantite kemikal epi zot in servi bann kontrol biolozik kot in entrodwir bann zensek.  Pou nou, mon krwar ki nou kapab vwar, se mon krwar sel keksoz ki nou kapab sanz en pe dan lafason ki nou pe fer li la konmela, se ki borde nou retir dan en landrwa.  Si nou vwar li pe revini, avan ler ki i vin en gran kantite, nou kapab servi en pti morso kemikal pou kontrol sa popilasyon pou anpes li re vin dan menm fason ki i ti ete avan.  Ki si fo ki ler i annan en kantite dan en lanmar, nou ale nou zis spray kemikal an bonna bonnan ki apre i annan bann lezot lefe advers lo la bio diversite e osi lo imen osi.  Mersi Mr Depurty Speaker.

MR DEPUTY SPEAKER

Bon avek sa nou’n ariv a lafen Question Time.  Nou ava remersye Minis e son delegasyon e eskiz zot parmi nou.  Lasanble a pran en break e re zwenn 11.05.

Break

MR DEPUTY SPEAKER

Bon nou a kontinyen nou travay as per Order Paper.  E avek nou bomaten nou annan Minis Mitcy Larue, Minis pour Lasante ki pou vin prezant Public Health Bill, 2015.  E mon ti a kontan swet Minis ek son delegasyon labyenveni parmi nou.  E mon a ganny en Motion for Second Reading.

HON MARIE-ANTOINETTE ROSE

Mr Deputy mon move ki sa Bill i ganny lir en dezyenm fwa.  Mersi.

MR DEPUTY SPEAKER

Okenn Manm ki segonde?

HON CHARLES DE COMMARMOND

Mon segonde Mr Deputy Speaker.

MR DEPUTY SPEAKER

Bon mon envit Minister pou prezant son Bill.

MINISTER MITCY LARUE

Mersi Mr Deputy.

Mr Deputy, tou Manm Onorab e tou dimoun a lekout, bonzour.  I ozordi mon gran plezir pou prezant zot avek revizyon Public Health Bill, 2015, pou zot konsiderasyon.  Letan nou regard sityasyon otour nou e dan lemonn ozordi, nou vwar ki i annan en logmantasyon dan bann maladi.  Serten i nouvo e lezot ki Lorganizasyon Mondyal Lasante ti’n deklar koman eliminen, ou menm bann lezot ki pe pran bann laform diferan avek gravite bokou pli sever.

Sistenm Lasante Piblik, in ganny met an plas par Gouvernman, pou asire ki bann tel sityasyon ou menas i ganny byen kontrole e ki bann maladi ki annan potansyel pou vin en lepidemi e afekte son popilasyon, i ganny byen kordinen.

Nou’n rekonnet ki lontan, maladi ti vin dan bato e ti pran detrwa semenn e menm mwan pou ariv Sesel, oubyen dan en lot pei.  E dan serten ka menm sa dimoun ti’n fini mor, ler in ariv dan son destinasyon.  Ozordi sa in bokou sanze e ozordi nou kapab vwar ki dan detrwa erdtan, en maladi in fini sorti dan en pei e in ariv dan en lot menm avan ki sa dimoun li menm, ki pe anmennen i konnen.  I reste en fe alor, ki bann sistenm prevansyon ki efektif, i lakle pli enportan pou anpes sa arive.

Alor revizyon lo sa Bill, ti komanse depi byen lontan e ti ganny fer avek sa bann bi swivan.  Pou ranplas sa Public Health Act Cap 189 date depi lannen 1960, avek enn ki’n ganny revize pou vin enn pli modern e azour avek devlopman dan nou pei ozordi.  Annan en Public Health Act ki pou pli konpreansiv, ki kapab adres bann sityasyon e konsern lasante piblik e bann nouvo maladi, ensi ki bann maladi ki pe ganny re aparet, avek potansyel pou vin e kree en lepidemi enportan.

I osi adres bann sityasyon prevansyon kont sa bann tel maladi.  Etabli en platform byen striktire, pou fer sir ki popilasyon Sesel, i viv dan en lanvironnman sen, ki pou kontrol e anpes maladi propaze.  Mr Deputy, mon ti a kontan enform sa Lasanble, ki sa vye Public Health Act, ki’n ganny revize, i date apepre 55an pase e en gran parti son konteni menm, si zot ankor bon, me pa pe adres sityasyon aktyel dan son totalite.

An prenon an kont bann laspe devlopman e bann sanzman dan Sesel.  Par egzanp bann penalti, oubyen santans pour bann lofans ki annan pou fer avek nwizans e propagasyon maladi, ki annan potansyel pou vin en lepidemi sever pour pei, pa ti pe ganny byen kouver.  Malgre sa Lalwa, Public Health Act, ek son bann regilasyon i rezonableman konpreansiv, avek letan en serten bann febles in vin pli evidan.  In alor ariv ler pou prodwir en lezislasyon ki pli modern, baze lo lapros prevantif, san oubliy bann laspe investigative ki kapab sifizaman protez lasante piblik.

Nou rekonnet ki sa Public Health Act 1960, ti osi adres bann laspe nwizans e prevansyon maladi.  Me nou asir sa Lasanble, ki sa revizyon ki’n ganny fer e ki pe ganny propoze avek zot ozordi, i enn pli modern e i pou en zouti esansyel, pou asire ki lasante piblik an zeneral, i ganny amelyore e pli enportan i ganny proteze.

Sa Bill devan nou ozordi, i enn ki komans avek apepre 60 definisyon, ki’n ganny byen reserse e detaye.  E sa i enkli bann nouvo definisyon, ki pa ti pe ganny kouver par sa vye Lalwa.  Dezyenm parti dan sa Bill, i souliny ladministrasyon, fonksyon e pouvwar en Public Health Commissioner avek son bann zofisye ki i apwente.

Si nou regard en pe laspe lasante piblik Sesel, Mr Deputy, nou pou vwar ki bokou keksoz in sanze e pe ganny fer diferaman.  I enportan alor pou note, ki en nouvo Lalwa ti’n plis ki neseser.  Nou’n vwar e temway bokou maladi dan sa bann dernyen lannen, tel ki SARS, Chikoungounya, Dengue e tou dernyerman Ebola.  Tou sa bann maladi i annan potansyel pou propaze e vin en lepidemi sibstansyel pour nou pei, avek rezilta grav e menm mortel.

Nou isi Sesel, nou’n reisi fer tou sa ki ti neseser pou fer gras a nou Public Health Act.  Me nou ti osi vwar nou annan serten limitasyon, ki prezan avek sa enn nouvo Lalwa, sa bann limitasyon in ganny adrese antyerman, anba provizyon dan part 4 parti (7) ek parti (8).  Sa i pou ede ki Lotorite Lasante Piblik, i kapab met bann mezir an plas, pou anpes maladi rantre dan pei e osi anpes maladi propaze dan popilasyon.  Sanmenm sa ki nou dir ki sa pou en zouti tre esansyel e enportan pou proteksyon lasante piblik.

I osi enportan pou fer resorti, ki dan sa bann lepidemi ki Sesel avek Chikoungounya ek Dengue, tou bann premye ka ki’n antre Sesel, in antre Sesel par en dimoun enfekte, ki’n voyaz dan en lot pei, apre in rantre Sesel.  Swa par nou prop sitwayen, oubyen en viziter.  Alor i enportan ki Lalwa i fer provizyon pour sa bann tel sirkonstans avek bi protez nou popilasyon.

Sa Bill i osi kouver bann sityasyon nwizans anba parti 6 kot nou pou vwar, ki plis ki en ven tenn diferan form nwizans, in ganny kouver.  Sa i bann aksyon ki souvandfwa arive dan kominote, kot i kapab kree en kondisyon advers, lo nou lasante oubyen lo nou lanvironnman.  Sa i kapab an rezilta bann pratik sanitasyon e lizyenn ki pa akseptab akoz son bann lefe advers lo lasante lezot dan kominote.

Mr Deputy, moustik e pest in vin en fleo dan nou pei, kot nou’n konstate ki zot porter bann maladi ki tre danzere, parey Leptospiroz, Dengue, lafyev Zonn, Malaria, zis pou nonm enn de.  E bann move pratik dan nou lanvironnman, i ede ki sa bann pest e vermin i sirviv e ler loportinite i donnen, zot kapab propaz sa bann tel maladi.  Alor parti 4 sa Lalwa, i fer provizyon pour bann tel sityasyon.

Dan sa Bill alor, nou pou remarke ki i annan bann diferan parti ki pou adres tou laspe lasante piblik e i annan 12 an tou.  An plis zot bann diferan seksyon, pou adres tou problenm ki kapab an rezilta bann move aksyon, ou aktivite dan popilasyon.  E parmi i enkli par egzanp, enn, proteksyon sours delo, eliminasyon pest ki kapab transmet maladi, pouvwar pou Komisyoner Lasante Piblik pou deklar en lakaz, oubyen en lenfrastriktir koman en danze pou lasante piblik, nwizans pou lasante piblik, notifikasyon maladi notifyab, prevansyon e kontrol maladi enfekt ez, transmisyon maladi seksyel, ladministrasyon bann simityer, krematwar e lezot landrwa pou repoz lekor, kontrol lo aktivite ki kapab annan en lefe advers lo lasante piblik.

Mr Deputy, Manm Onorab, sa Public Health Bill 2015 ki’n ganny prepare, in fer provizyon avek bann responsabilite kler pou asir lapropte, lizyenn, sanitasyon e prevansyon maladi, avek bi primordyal amelyor lasante nou piblik an zeneral.  Sa Lalwa in osi fer sir, ki bann santans i reflekte severite bann lofans, depandan lo son aksyon.  E gravite ki kapab annan potansyel grav, lo nou popilasyon.  E sa in ganny fer pou osi anpes dimoun fer sa bann aksyon grav.  I enn modern, ki’n ganny devlope avek bokou swen pou reponn bezwen ozordi e osi plis bezwen pei pour lefitir.

Mon ti a kontan konklir alor an envit an tou bann Manm pou donn zot sipor sa Public Health Bill.

Mersi Mr Deputy.

MR DEPUTY SPEAKER

Bon lo sa Bill deba i ouver.  Onorab Samson.  Proceed.

(interruption)

HON DEREK SAMSON

Thank you Mr Deputy.

Mr Deputy, mon ti a kontan komanse pou dir mersi Minister Lasante pour sa Bill.  Mon mazinen pou laz ki’n arive depi dernyen Bill, sa dernyen Lalwa 1960.  Mon mazinen ki detrwa dimoun ki’n deryer konsepsyon sa Lalwa.  Mon ti a kontan felisit Minister Lasante pour sa e dir mersi sa bann dimoun ki’n travay deryer sa Prozedlwa devan nou.

Mr Deputy, en Bill, Prozedlwa ki pe zisteman ankouraz, protez bon lasante piblik nou nasyon, nasyon Seselwa, en Prozedlwa ki pe reprezant parey Minis in dir, modernite, modernite Sesel, modernite dan lasante nou pei.  Mr Deputy, modernite nou sistenm lasante i pa zis dan bann lekipman medikal ki nou servi ozordi dan nou bann klinik e lopital: modernite nou sistenm lasante i osi tourn otour nou bann zouti legal, bann mezir e Polisi legal ki ozordi egziste, pou byennet nou nasyon.

E vwala ki nou pe vwar dan sa Prozedlwa devan nou ozordi bomaten.  Ki nou sistenm lasante malgre son bann defi, i enn ki reste azour avek modernizasyon e evolisyon, ki pe pran plas dan bann lezot domenn devlopman nou pei, sirtou dan nou bann domenn devlopman ekonomik: ki devlopman lasante nou pei, nou nasyon e pep Seselwa li menm, i reste premye dan prensip e azanda devlopman nou pei anba direksyon Prezidan Michel.

Zisteman Mr Deputy, Prezidan Michel dan son bann seri vizit ki i abitye fer, in vizit bokou pti biznes atraver Sesel.  E bokou parmi sa bann pti lantrepriz, zot direkteman oubyen endirekteman, relasyon avek sa Prozedlwa ki devan nou, nou pe debat lo la ozordi.

Bokou fwa bann biznes an zeneral, i vwar zot fer fas avek bann norm oubyen plito Lalwa ou regilasyon ase enpozan, sorti anba Lalwa lasante piblik, oubyen lezot Lalwa.

Mr Deputy, parfwa nou santi ki petet sa bann Lalwa i en pti pe tro egzizan.  Ki pou asire ki tou sa bann demann ki Minister Lasante i demande, avan ki en biznes i komanse, i en pti pe tro for.  Me, nou konn tre byen Mr Deputy, ki si en biznes pe tous vant oubyen lasante en dimoun, letan i pe delivre en servis anver piblik, i vedir ki otomatikman a en pwen ou en lot, lavi sa dimoun, koman en kliyan i a kapab an risk.

Akse a bann fasilite sanitasyon, i en legzanp ase primordyal ki sa Prozedlwa i koz lo la.  Vedir bann fasilite ki konsern lizyenn, sanitasyon i bezwen egziste, sirtou dan bann landrwa kot manze i konsernen, kot i annan kontak direk avek imen, menm kot lopital, dan klinik, bann landrwa kot dimoun i souvandfwa ale pou rod plis lasante.

I en legzanp ki ase enteresan, akoz si bann biznes oubyen bann lantrepriz parey i manke pou zwenn sa, parey Minis in dir dan son lentrodiksyon, i kapab ankouraz, annan legzistans oubyen sans pour bann maladi kapab penetre e afekte nou bann dimoun.  E vwala akoz Minister Lasante, Lotorite Lasante Piblik li menm, i souvandfwa deryer en biznesmenn ki pe komanse, oubyen kontiny en biznes.  Pou anpese ki demen bomaten sa biznesmenn pa end up devan lazistis akoz dizon en legzanp, en zanfan in mor avek food poisoning.

Mr Deputy, sa Prozedlwa i la zisteman pou protez, parey mon’n dir, bon lasante piblik nou nasyon.  E i dan plan Prezidan Michel, pour nou pei, ki nou nasyon i reste enn ki, an bonn sante, ki tou dimoun i kapab ganny akse avek en servis lasante ki modern, enn ki personnel e lo en nivo standar ki zwenn enn larestan bann pei devlope.

Mr Deputy, si nou al en pti pe pli lwen WHO, Lorganizasyon Mondyal pou Lasante, pe tou dernyerman travay e revwar regilasyon lasante mondyal e come up avek en model ideal pou Lalwa lasante piblik.  En travay ki zot pe mazinen, ava kapab zwenn bann Millennium Development Goals ki resaman nou ti pe koz lo la.  What about nou isi Sesel, Mr Deputy?  Sa Prozedlwa ki devan nou i pa neseserman sifizan.  Akoz Mr Deputy?  Byensir i toultan annan plis ki nou kapab fer.  Nou pa ankor fini sa travay ki devan nou.

Travay ki devan nou, i egzize ki nou al bokou pli lwen ki sa.  Rezon akoz ki Prezidan Michel pe demande, ki nou kapab donn li ankor en sans pour kontinyelman diriz nou pei, pour ki i a kapab fini latas devan li, latas ki devan nou pei.

Wi Mr Deputy, nou annan plizyer lezot Lalwa pou revwar dan nou pei.  E enn parmi se Lalwa ki kontrol pestisid par egzanp, ki mon krwar Minister Lasante in deza komans fer serten revi, serten travay lo la.  Mr Deputy, sa zafer pestisid ki serten nou bann laferm pe kontinyelman servi, malgre modernite dan sa field, i enn ki serye.  Letan ki nou vwar dizon Jacques Matonbe, enn parmi bann sel fermye ki pe pratik organic farming dan Sesel, vedir ki i pe ouver bann fri ek legim ki pli siperyer.  Nou osi ankor pe vwar, bann lezot fermye ki pa pe neseserman fer ase zefor, pou ede protez lasante piblik dan ofer en bon prodiksyon nou nasyon.

Malerezman nou kontinyen vwar bann legim oubyen fri, ki vin delo dan fridge zis 3 zour apre ki ou’n aste e bokou fwa akoz bann move pratik otour lafason ki pestisid pe ganny servi lo laferm, oubyen bann lezot eleman lagrikiltir.  E sa i dir pour li menm Mr Deputy, ki lasante nou nasyon i pa zis baze lo sa Prozedlwa, ki devan nou ozordi.

Me nou bezwen kontinyen revwar plizyer lezot Lalwa, ki konsern lasante e lavi Lepep Seselwa.  Nou bezwen entrodwir lezot regilasyon, ki pou kapab protez bon lasante piblik, nou nasyon.  An konklizyon Mr Deputy, nasyon Seselwa i bezwen kontinyen prospere, an bonn sante.  Nasyon Seselwa i merit le meyer sistenm lasante posib.  Enn ki modern, pour ki Sesel i kontinyelman fleri.  Pour ki Sesel i reste sa pei egzanpler koman en pti Leta zil ki pe ofer le meyer sistenm lasante, sirtou en servis lasante ki gratwit pour son nasyon.  Pour ki nasyon Seselwa i reste sa pep egzanpler, kot i konsern lasante son lanvironnman, later e losean.

Mr Deputy, Sesel i bezwen finalman en sel keksoz pour li kontinyelman fleri e sa se Prezidan Michel li menm.

Mersi bokou.

MR DEPUTY SPEAKER

Onorab Payet-Marie.

HON MARIA PAYET-MARIE

Mersi Mr Deputy Speaker.

Mr Deputy Speaker, prevention is better than cure. Sa i en saying ki mon toultan krwar ladan, senpleman akoz mon krwar, ki i pli enportan pou en dimoun pran swen avek son lasante, dan plas viv mannyer i anvi.  E ler in realize ki gravite son leta lasante, i kapab tro tar.

Mr Deputy Speaker, lasante en nasyon, i ganny mezire par kantite lenvestisman dan sa Sekter enportan.  E sa i kapab determinen, si en dimoun i malad ou non.  Mr Deputy Speaker, mon komans mon lentervansyon dan sa fason akoz mon krwar senserman, ki prevansyon i enportan e neseser, akoz i annan en benefis long term e benefis a tou nivo.

An se moman, Sesel pe fer fas avek plizyer sityasyon, ou problenm relye avek lasante, ki swa maladi kardyovaskiler ki relye avek lobezite, problenm lasante bann dimoun ki servi drog dan sereng, tel ki HIV e Hepatitis C parmi lezot maladi.  Mr Deputy Speaker, pour en pti pei ki ankor pe devlope parey Sesel, menm si travay ki Prezidan Michel e Gouvernman pe fer i remarkab, defi i reste toudmenm pou kapab sirmont sa kantite ka dan bann maladi, ki egziste e ki pe kontinyen ogmante e ki ti kapab ganny prevwar, si sakenn de nou ti pran byen swen avek nou lasante.

Mr Deputy Speaker, se lo seksyon 8 ki tous lo prevansyon e kontrol bann maladi enfekt ez ki mon pou alor konsantre mon lentervansyon, menm si i annan 2 lezot seksyon dan sa Prozedlwa, ki mon pou tou brefman lo la.  Sa i seksyon 5, presizeman pwen ki koz lo twalet piblik e osi seksyon 11 presizeman pwen (56) ki koz lo lobligasyon pou raport en zannimo ki malad.

Mon pou pran koman premye legzanp, Mr Deputy Speaker anba seksyon 8 sa Prozedlwa, ki tous lo bann maladi enfekt ez.  Maladi enfekt ez i annan potansyel pou devlop lezot kalite maladi, koz lanmor e osi afekte nou lekonomi.

Dapre lenformasyon ki mon’n resevwar, nouvo maladi enfekt ez e bann nouvo ka lenfeksyon, koze par sa bann menm maladi, in kout anviron $10 bilyon domaz globalman, pandan sa 20 e sa bann sif, Mr Deputy Speaker, pe kontinyelman ogmante.  Sa bann kalite lenfeksyon i kapab ganny koze par bann maladi tel ki, HIV ou lezot lenfeksyon, ki pe vin pli komen e ki pe propaz ase vit, par egzanp lafyev Dengue e Tikougouya.

Mr Deputy Speaker, lenportans Seksyon 8 sa Bill, ki i seksyon pli long dan sa Bill, i alors fer provizyon, pou asire ki dan bann ka maladi enfekt ez ki ganny raporte, ki ganny deal avek a tan, an menm tan anpese e prevwar ki sa bann maladi e lenfeksyon pa propaze.

Mr Deputy Speaker, i neseser alors, ki tou sa i ganny fer dan en lapros byen striktire, kot i annan protokol e prosedir an plas, pou fer ki Lotorite Lasante Piblik i a pli byen kapab manage bann maladi enfekt ez san ekspoz zot avek manm piblik, ki kapab en menaz pou nou pti popilasyon anviron 90 mil dimoun.

Mr Deputy Speaker, anba Seksyon 11 pwen (56) ki tous lo sa size, lobligasyon pou raport en zannimo ki malad e osi anba first schedule sa Bill ki konpri en lalis bann maladi enfekt ez, i annan osi bann maladi ki nou apel an angle zoonotic diseases ki bann maladi tel ki: anthrax, rabies eksetera ki kapab afekte lasante imen atraver kontak avek en zannimo ki malad.

Mr Deputy Speaker, ou a dakor avek mwan ki lisyen eran, in vin en gro problenm isi Sesel.  Ou vwar zot partou, dan lakour lekol, lo lans piblik, lo semen, zot zet bin, zwe dan salte, fer zot bezwen partou kote, zot tay ek dimoun, parfwa menm mord dimoun.  Zot vreman en nwizans.  En ler nou demande kote, tou sa bann lisyen i sorti?  Oli zot met?  Me parkont Mr Deputy Speaker, i annan plizyer dimoun ki sonnyen e okip zot zannimo, zot pet dan zot lakour e zot fer li tre byen.  E ou pa ganny okenn problenm avek zot.

Mr Deputy Speaker, lefe i reste toudmenm, ki menm si isi Sesel, nou annan en kiltir kit zannimo tel ki lisyen ou sat dan lakour, ki swa ou pe okip li byen ou non, i toudmenm annan son risk, akoz zannimo i porter bokou maladi tel ki leptospiroz, ki kapab fatal pou imen.

Mr Deputy Speaker, nou konnen ki problenm zannimo malad, i sipoze ganny deal avek par servis veteriner.  Me mon konsern i, e i osi en kestyon ki mon ti poze dan Lasanble lannen pase: Se kan ki re batiman servis veteriner pou komanse?  Kan ki plis fasilite enportan e neseser, tel ki en landrwa apropriye pou met zannimo an karantenn, pou pare?

Mr Deputy Speaker, menm si mon a felisit travayer servis veteriner, ki pe travay tre byen, pe donn en bon servis avek resours ek fasilite ki egziste, mon konvenki ki avek en veteriner modern, avek tou son fasilite esansyel, nou a vwar en servis pli alaoter e pli enportan, pou anpes kontrol propagasyon bann maladi koze par zannimo.

Mr Deputy Speaker, defi i reste sepandan, ki menm si i annan nouvo mezir an plas ki’n ganny entrodwir pou proteksyon lasante piblik, i bezwen annan sa bon konprenezon e korperasyon manm piblik ki a risk.

Nou tou nou a risk finalman e nou tou nou devret annan en serten respe pour sa zofisye lasante piblik, ler i pe sirveye, pour ki viris Ebola par egzanp pa antre Sesel.  I pa akseptab pou serten nou, mank respe sa travay lasante piblik ki pe senpleman fer son travay.  Apre tou sa bann zofisye ki swa zot pe travay lo erport, lo por, dan lakominote, zot pe fer louvraz ki riske e danzere e zot pe pran sa bann risk senpleman, pour byennet nou pep.

Mr Deputy Speaker, mon dernyen pwen, se size twalet piblik.  Sa i en defi Lotorite Lasante Piblik.  Lotorite Lasante Piblik, sa ki mon’n aprann, in esey tou son mye pou travay avek bann Komite ki organiz bann aktivite, pour ki zot enkli twalet piblik koman en priyorite e pou zot pran kont son lenportans.  Me malerezman, sa pa pe tro byen marse.

Mr Deputy Speaker, i byen nou organiz aktivite.  Nou Seselwa, nou kontan anmize, me i byen e enportan ki nou fer li byen pou benefis lasante lezot.  Mr Deputy Speaker, konmela organizater bann aktivite ou levennman i annan en swa, en swa pou met an plas fasilite twalet ki mobil, me osi annan sa opsyon pou annan sa fasilite twalet ki permanan, dan en landrwa pou deservi manm piblik pandan aktivite ou levennman.

Sa Lalwa Mr Deputy Speaker, pou alors aprezan fer provizyon e osi plas responsabilite lo sa organizater, pou asire ki bann fasilite ki mon’n mansyonnen, i disponib e adekwat e ki zot dan en landrwa ki konvenab.  Byensir sa organizater i a lib pou fer ki sa fasilite, i a enn ki i bezwen peye.  Sa ki mon krwar i byen.

Mr Deputy Speaker, pour konklir, mon krwar ki pou nou annan en progranm en lasante piblik, ki pli efikas e ki pli modern, an prenon kont tou devlopman ki pe kontinyen ogmante isi Sesel, i devret annan alors, plis lenvestisman dan sa sekter, plis training, plis formasyon, plis sansibilizasyon, plis progranm lo sa laspe prevansyon, depi dan lekol ziska dan lakominote.

Amelyor oubyen met an plas plis lenfrastriktir, pou annan an plas en pli bon kontrol lo propagasyon bann diferan maladi, i neseser pou annan plis kolaborasyon travay e plis konprenezon de la par tou dimoun.  Menm si nou konnen ki pou kapab byen enplimant tou sa ki’n ganny fer resorti lo sa Prozedlwa, pou kout Gouvernman, Minister Lasante e Lotorite Lasante Piblik en kantite larzan pou komanse, mon konvenki, ki son rezilta pou enn ki pou annan en benefis lon term pour Sesel.

Mon a profite la Mr Deputy Speaker, pou swet lekip Minister Lasante e Lotorite Lasante Piblik bonn sans e bon lenplimantasyon sa Prozedlwa: ki mon swete zot a fer li avek tou sipor neseser de la par tou partner konsernen.

Mr Deputy Speaker, mon pou vot an faver sa Prozedlwa, akoz mon krwar ki nou devret annan en Lalwa ki modern, baze lo bann prensip prevantif e akoz mon krwar ki in plis ki ler, pou Lotorite Lasante Piblik, ganny plis pouvwar e annan en zouti enportan anver lasante piblik.  Mr Deputy Speaker, a lafen dizour tou Seselwa, nou tou nou annan en rol pou zwe, pou amelyor nou lasante, lasante nou pei.  Apre tou i nou responsabilite.

Mersi Mr Deputy Speaker.

MR DEPUTY SPEAKER

Onorab Arnephy.

HON BERNARD ARNEPHY

Mersi Mr Deputy Speaker.  Bonzour Minis avek ou delegasyon.

Mr Deputy Speaker, si i annan en asset pli enportan ki endividi i kapab posede, se byensir son lasante.  E i en asset ki nou bezwen donn li valer, fer li miltipliye e se sa ki pou asir nou, en pli long lavi.  Mr Deputy Speaker, sa Bill ki devan nou i enn ki tre modern.  Parey in ganny dir, i ranplas en Bill, ki egziste 55an pase e i an konformite avek sa Nouvo Sesel.  The New Seychelles ki nou parti Parti Lepep pe batir.  E sa nouvo Sesel pou byensir anmenn nou plis progre e plis larises.

Mr Deputy Speaker, koman en Gouvernman, dan sa bann dernyen lannen, nou’n fer en kantite progre, en kantite achievement dan nou sistenm lasante, malgre nou konstate i reste nou en kantite defi pou nou sirmonte.  Par egzanp Mr Deputy Speaker, nou’n asire ki nou’n annan en bon progranm vaksinasyon e ozordi i annan en kantite maladi ki worldwide.  Nou pe koz lo la, ki Sesel in disparet.

Nou annan nou en lasante primer ki gratwit e ki a laporte tou Seselwa, malgre ankor ki nou santi, i annan dimoun ki abiz lo sa sistenm e pa pe servi li comme il faut. Nou annan nou en sistenm spesyalize avanse, ki swa lokal, ki swa aletranze ki permet nou Seselwa ki bezwen serten soutyen spesyalize an term son lasante, pour li kapab ganny sa servis.  E tou sa atraver sa Gouvernman dizour.

Mr Deputy Speaker, ozordi Sesel, nou annan en bon progranm screening pour bann zanfan, pour bann madanm e menm resaman nou tann bokou koze, kot nou pe ankouraz plis bann msye pou vin fer zot screening, zisteman pou nou kapab detekte serten maladi tel ki, kanser a en staz boner e si bezwen lentervansyon , kot sa i kapab ganny fer.

Mr Deputy Speaker, nou’n travay en kantite pou nou met anba kontrol bann maladi kontazyez, malgre ozordi bann maladi ki transmisib, i reste enn ankor nou defi.  Par egzanp bann maladi ki transmet seksyelman.

Mr Deputy Speaker, nou’n fer en gran achievement dan nou sistenm lasante e se pour sa rezon ki ozordi, nou ganny klase parmi bann pei tre devlope, in terms of life expectancy.  Kot pour bann zonm, i apepre 69an.  Pour bann madanm up to 77-78 years and on average, zonm-madanm, sa i 74 years.

Me malgre tou sa bann achievements, mon panse ki sa Prozedlwa ki devan nou ozordi, i pou ed nou adres serten bann konsern mazer, ki koman en pep, nou fer fas avek.  E sa byensir, nou annan lener zans bann nouvo maladi ki pe tap lemonn e ki Sesel pa ganny eparnye.  Parey Minis in dir dan son lentervansyon, lontan petet en maladi ti pran mwan pou ariv Sesel.  Konmela within hours i arive akoz evolisyon transportasyon ensidswit.

Kou pou mentenir en bon lasante, i enn ki nou pa kapab atas en tag avek.  Me si sakenn de nou, i kapab pran nou responsabilite endividyel e kolektif, sa pou ede ki nou kontinyelman amelyor nou servis lasante e an menm tan garanti ki sak endividi i viv pli an bonn sante.

So, sa responsabilite endividyel e kolektiv i tre, tre enportan e se sa ki mon panse Minister Lasante, dezormen avek tou son bann partner, malgre nou pe vin avek sa morso Lalwa, nou bezwen annan plis progranm ledikasyon e re ledikasyon pou nou pep, pour ki nou tou, kolektivman, endividyelman, nou kapab pran responsabilite pou nou lasante.

Mr Deputy Speaker, an relasyon avek sa Bill, mon krwar i annan en group dimoun, en group travayer dan lasante ki pou annan en responsabilite kle, pou asire ki bann Policies, bann regulations ki pou al avek en tel Bill, i enn ki fonksyonnel.  E sa se byensir bann public health officers. E la mon ti kontan demande Minister, ki nou regard en pti pe pli byen dan kondisyon sa bann travayer.  Nou konnen poudir i annan en mankman, malgre i annan en zefor pou asire ki sak kominote i annan en public health officer.  Me petet nou bezwen revwar en pti pe osi zot kondisyon travay.  Regard en pti pe osi, lafason ki zot ganny train, pou fer zot pli azour avek bann nouvo legzizans, bann nouvo limer zans dan lasante, dan maladi, eksetera.

Kontrol kalite servis ki piblik i gannyen i osi enportan.  Ozordi nou pe dir avek lespri, ‘Leve Debourye’ en kantite nou bann dimoun, pe venture dan bann pti biznes, me malgre sa nou osi okipe avek sa issue ‘lizyenn. E la mon kontan ki i annan provizyon spesifik ki’n ganny fer dan Bill, pou asire ki okenn dimoun ki venture, dan bann pti biznes, bann vendors ki annan pou fer spesifikman avek manze, bann prodwi alimantasyon, ki nou asire ki a tou pri, lizyenn i ganny byen obzerve.

Mr Deputy Speaker, mon osi kontan note ki deplizanpli, sa konsep PPP pe byen ganny entegre dan nou sosyete, dan diferan domenn.  Ledikasyon e Lasante pa en leksepsyon.  Zisteman Sanmdi pase, nou’n witness temwayaz en lot partnership kot Indian Association Seychelles, in deside pour li adopte sant lasante Anse Boileau, ki deservi distrik Anse Boileau, Grand Anse e Port Glaud.

E sa mon mazinen, i en keksoz ki nou merit ankouraze e nou fer sir ki lakominote i benefisye o maksimonm.  E sa an retour i fer ki i anmenn, meyer servis ki nou dimoun i gannyen e asire ki nou annan resours adekwat a tou moman, pou nou kapab adres bezwen nou kominote.

Me an menm tan, nou osi bezwen kontinyelman, nou konnen poudir ledikasyon e lasante i 2 areas kot i volatile, in terms of mouvman bann staff.  So, nou bezwen kontinyelman asire, ki nou annan bann sistenm an plas, kot nou retenir nou bann staff lasante, pou asire nou bann nurses, pou asire nou bann dokter, pou asire ki nou sistenm i kontinyelman reste enn ki tre fonksyonnel e ki vin pli fonksyonnel ankor.

Annou pa bliye ki ozordi Minister Lasante, i sa Minister ki ganny pli gro chunk dan Bidze Gouvernman.  Alor nou bezwen asire ki sa lenvestisman i de-koul dan sak endividi e ki sak endividi, i benefisye o maksimonm.

E pou konklir Mr Deputy Speaker, mon mazinen ki koman en Gouvernman, nou bezwen kontinyelman reste pli proactive vizavi bann sityasyon lokal e enternasyonal.  Nou bezwen asire, ki nou devlop sa sinerzi ant tou bann, Minister Lasante lo li menm, ok, i pa pou kapab asire ki tou keksoz i mars comme il faut. Nou annan bann lezot lenstans, ki zot osi zot pou bezwen rantre pou donn en koudmen.

Bomaten dan Question Time, nou’n demann en kantite kestyon Minis Lanvironnman an sa ki konsern lizyenn, lasante.  So, mon mazinen poudir lanvironnman, i annan en rol kle pour li zwe dan sa demars.  Lagrikiltir, Departman Lagrikiltir.  Mon koleg oparavan in koz lo seksyon Veteriner.  Mon krwar nou tou nou annan en rol pou nou zwe dan sa demars.  Lapolis, i sipoze annan en rol kle pour li zwe dan sa demars.  E si tou sa bann partner i travay ansanm, mon garanti ki konteni sa Bill, dan son lenplimantasyon i enn ki pou tre, tre efektiv.

E finalman, mon ti a kontan, lans en lapel avek Minister Lasante pou nou asire ki sa HIS, Health Information System, nou, nou akseler-e.  I enn ki vin operasyonnel o pli vit posib e tousala pou asir pli bon kordinasyon, pli bon zesyon tou lenformasyon ki annan pou fer avek sistenm lasante, lasante nou dimoun, lasante nou piblik e asire ki koman en Gouvernman, nou kontinyelman donn en meyer servis sa pep ki nou’n ganny mandate pou nou deservi.  Avek sa detrwa mo Mr Deputy Speaker, mon pou donn mon siport total sa Prozedlwa ki devan nou ozordi.

Mersi.

MR DEPUTY SPEAKER

Onorab Barbe.

HON NLCHOLE BARBE

Mersi Mr Deputy.  Tou dimoun bonzour.

Mr Deputy, Public Health Bill, 2015, pe viz pou fer bann sanzman direk dan Public Health Act egzistan, ki an retour pou servi pou moderniz sa Lalwa, dan son antyerte e pour mye prepar Sesel pou fer fas avek bann defi lemonn modern.

Mr Deputy bann lamannman dan sa Lalwa, i pran an kont listwar resan Sesel e tou bann defi ki nou pei in bezwen fer fas avek.  I egalman pran kont listwar resan lo lasenn mondyal e pe fer provizyon, pou adres defi ki lemonn antye in pas atraver resaman.  Mon krwar tou dimoun ki swiv medya, i okouran bann menas ki bann diferan maladi e lenfeksyon i poze pour lasante imen.  E nou Sesel, nou bezwen pli byen ekipe pou fer fas avek tou bann evantyalite.

Nou servis lasante isi Sesel, i dan en ongoing process reform, pou konplemant e refer e reform en sistenm egzistan e sirtou enn ki sitan konpleks, parey nou sistenm lasante.  I pou pran en serten nonm letan.  I pou pran letan senpleman, akoz ou pe bezwen konstaman rekalkile e re asiste pou fer fas avek larealite, ki an fas avek nou.  Nou pei pa pou kapab adopte en latitid kot nou vini, nou fer en reform, apre nou dir, ‘lala reform in fer, in fini.  E nou move along.

Sa i pa li.  I pa en bon fason fer e i pa meyer pratik ki nou’n adopte.  Nou isi Sesel, sa ki nou pe fer set en reform gradyel e kontinyel avek sipor bann partner miltilateral, tel ki labank Mondyal.  Se pour sa rezon, ki ou vwar lezislasyon ki adres sa size ‘reform dan Sekter Lasante, pe kontinyelman vin devan nou Lasanble e ki sa bann lezislasyon i pe ganny trete koman enn o priyorite, par Lasanble Nasyonal Sesel.  Apre tou, lasante nou pep i devret pli enportan ki tou.

Servis swen e soutyen lasante en pep, pa depann zis sa ki deroule dan klinik, ant pasyan avek ners, ouswa pasyan avek dokter.  Tro souvan, bann fakter ki enpakte negativman lo lasante nou pep, i deor dan lanvironnman natirel ouswa bann fakter ki’n ganny kree par zonm.  I tonm anba lofis Komisyoner Lasante, pou adres tou sa bann fakter ki enpakte lasante nou pep.  Se la alors, kot Komisyoner Lasante i bezwen en lezislasyon ki kler, ki for e ki tre konpreansiv.

Lalwa lasante piblik, i adres en kantite fakter ki vize anver prevansyon maladi, lenfeksyon ou menm lenfestasyon vermin, ki kapab transmet maladi.  Sa Lalwa i enn ase gro e varye e ladan, i bezwen kapab adres bann divers sityasyon, ki pou ede dan sa travay proteksyon lasante nou pep.  I annan en kantite keksoz, ki pa ti pe ganny kouver avan, ki’n aprezan ganny enkli e i annan ki ti deza la, ki’n ganny met, swa dan en fason pli kler e detaye ouswa in ganny senpleman ranforsi.

Bann fakter, tel koman proteksyon sours delo prop e pouvwar pour bann konsonmasyon delo polye, Lalwa i osi adres kestyon do misil sen e i donn pouvwar Komisyoner Lasante, pou entervenir e rektifye sityasyon dan ka kot sa do misil i pa sen e fit pour abrit imen.

Lalwa i etabli Komisyoner Lasante, klerman koman sa Lotorite, ki pou resevwar tou rapor e kordin zefor dan ka okenn kriz medikal.  Egalman tou nou bann aktivite post mortem, ouswa letopsi parey nou dir, in ganny defini klerman anba Lotorite lasante piblik.

Lalwa i fer provizyon pour ki bann simityer, krematwar e okenn lot fasilite, i annan pou fer avek repo ouswa dispozisyon kadav, i ganny regle e re zimante par Lotorite piblik.

Mr Deputy Speaker, tou sa ki mon’n fek nonmen, i bann nouvo provizyon ki’n fek ganny enkli dan sa lezislasyon.  Lalwa ki pe aprezan ganny administre par Lotorite Lasante Piblik, i ganny ranforsi, modernize, dan en zefor pou ogmant kapasite e lefikasite.  Komisyoner Lasante Piblik, i tre etik sekretarya konpare avek Minister dan son antyerte.  Sa dan li menm i kontribye anver en amelyorasyon dan kominikasyon e ladministrasyon bann diferan konponan sa Lalwa.  E mon oule a sa pwen, profite pou remersi sa bann public health officers ki pe fer en travay formidab, pou ede amelyor e protez lasante piblik.

Mr Deputy, sa ki nou pe reserse atraver tou sa bann legzersis, se proteksyon lasante nou pep, prolongasyon lavi tou Seselwa, prevansyon maladi e o tan ki posib, fer an sort ki Sesel, in napa okenn ka lanmor initil e ki tou lavi ki kapab ganny sove, i ganny sove.

Parti Lepep, i en parti ki mazin byennet son pep.  Lepep Seselwa i bezwen viv en lavi ki sen e an bonn sante e sa ki egzakteman ki sa Prozedlwa pe anmennen pou reponn bezwen ozordi e bezwen lefitir.

Mersi Mr Deputy.

MR DEPUTY SPEAKER

Onorab De Commarmond.

HON CHARLES DE COMMARMOND

Mersi Mr Deputy Speaker.

Mr Deputy Speaker, devan nou, nou annan en Prozedlwa lo Public Health Bill. Sa Prozedlwa ki devan nou, mon krwar i en Prozedlwa vreman enportan pou nou, pour nou pep.  Ou konnen mon pe mazin lontan.  Lontan si i annan 2 dimoun, ki dimoun dan kominote i per, se sanniter ek gard.  Ozordi sa 2 dimoun, piblik i maltret zot mannyer zot anvi, i zour zot mannyer zot anvi.  Nepli annan respe.  Pourtan in deza annan en Lalwa e mon krwar ki sa Lalwa, petet vre in outdated dan serten konteks e i pa ganny ranforsisman.

Ozordi Lalwa ki egziste, dan plizyer lenstans, i pa zwe son rol prop man.  E prezan nou letan nou gete dan nou pei, malgre nou en pep ki kontan kritike, malgre nou en pep ki kontan konplent, parfwa tou keksoz pa bon pou nou, me nou bezwen rekonnet letan i annan progre ki ganny fer.

Par egzanp sa Lalwa ki devan nou, i en Lalwa date lontan.  Me nou sistenm lasante ozordi, i en sistenm lasante modern, i en sistenm lasante ki’n amelyore, ki’n ganny aranze, in ganny sanze, in ganny avanse dan en kantite sirkonstans.  I vre mon pa pe dir ki napa area pou konplent.   Mon pa pe dir ki nou pa merit amelyor ankor nou sistenm lasante.  Mwan mon krwar, i devret amelyor en kantite ankor mwan, son management sirtou.

Me selman nou bezwen rekonnet, poudir nou annan en bon sistenm lasante.  Si zis i ganny manage en pe pli byen, i attend en kantite lobzektif, ki nou menm nou ti ava kontan, ki nou, nou…Lemonn deor, i vwar nou sistenm lasante i bon li.  I vwar i fantastik, i dir tou dimoun, tou bann pei tyermonn la, devret swiv legzanp Sesel.  Selman pou nou, nou bezwen aranz li ankor.

E dan nou pei ozordi, en kantite devlopman.  Devlopman ki ou annan, i en mezirab.  Tou dimoun pe dir ou, Sesel in devlop tro vit.  In devlop telman en kantite.  Tousala i anmenn en bann challenge, en bann defi.  Ki vedir ki prezan, nou bann Lalwa ki egziste, i bezwen osi modern, i bezwen osi ganny met azour parey sa bann devlopman ki pe arive.  Ozordi nou pe fer vini, tou sord kalite keksoz, enormeman keksoz.

Nou annan tou bann gran lotel ki zanmen nou’n vwar, bann dimoun sofistike ki vin dan sa bann lotel.  Nou annan nou en bann konpannyen ki’n ganny formen, milyon konpannyen ki i fer vin tou sa ki ou krwar i kapab vini.  Nou annan nou avyon ozordi, en kantite ki vini, konpare lontan ti annan BOAC, an ‘71’, apre sa Lalwa.  La en kantite kalite avyon.  I annan la ankor ki pe al vini.

Be travayer etranze, lontan enn de nou dimoun ti al Beirut pou al travay, la ozordi dimoun deor i vin travay kot nou.  En siny devlopman sa.  Be sa bann dimoun i vin ek tou zot zartifay, ek zot maladi tou parfwa.  Si nou pa careful.  Ki vedir i met en ta challenge lo nou, en ta checks and balances ki nou bezwen mete.  Nou bezwen en pe pli azour.  Se sa rezon sa Prozedlwa.  Nou bann aktivite ki nou fer koman en pep, dan nou parkour lavi toulezour, in sanze konpletman.

Lontan letan sa Lalwa ti komanse an ‘60’, 1960 ti napa SIDA. La ozordi HIV, Hepatitis in ogmante.  La dan Prizon fek dir la semenn pase, mind you, mon pe nonm Prizon, in annan en moman letan, Lasante li i pa arive dan Prizon li, pou al tyek son HIV. Laba Prizon i dir ou, ‘non, non.  Sa mwan ki ansarz.  Ou Lasante ou, laba anvil ou.’  I annan tou sa bann kalite keksoz ki arive e se sa ki mon pe dir ki sa Lalwa, i byen ki i ganny e i byen ki i vin devan nou la, pour li vin o gou modern, pour li kapab penetre kot fodre penetre.  E li i devret pli siprenm ki en lot entity.  Par egzanp si Prizon i dir ou pa vini, ou Lalwa la i devret par lao Prizon, dir ‘non mon pe vini, mon pe antre la, akoz ou annan problenm la.  Ou sezi?  So nou bezwen al dan sa direksyon.

Par egzanp la ozordi, ou pou al la lo bor erport, sa ta etranze ki pe..travayer etranze ki pe reste, bomaten nou’n koz lo landfill. Sa keksoz ki nou vwar poudir i mank kontrol, i mank sekirite.  I poz nou kestyon.  Nou poz nou lekor kestyon.  Eski sa delo otour sa bann landfill, otour sa bann travayer ki pe reste, lakantite zot ki annan, pa pe kontamin kot nou pe pran delo pour desalinasyon?  Eski i pa pe kontamin delo anndan lagon, par egzanp Cascade?  Bann pwason ki dan sa zanmirant, nou tranp kazye partou, eski sa bann pwason i bon pou nou manze?  Tousala i bann kestyon.  Bann manrmay i bennyen dan bann delo la, dan lagon, i annan plizyer aktivite ki ganny fer, eski i korek ki zot benny la?

So, en kantite kestyon e kestyon e kestyon.  E prezan ladan, eski Lasante i arive la, pour li teste sa bann delo?  Eski Lasante i ase transparan, dan son bann rezilta ki i vwar?  Eski i fer lepep konnen?  Sa osi i en drwa.  Nou annan drwa pou nou konnen ki pe arive.

Bann maladi, la lot zour i dir Dengue in komanse, lo bor erport menm, la kot mon pe koze.  Mon nonm sa koman en legzanp.  Me i partou, Praslin.  Challenge i Praslin.  Challenge i La Digue osi. So i bann kestyon ki pli ale nou konsernen e ki Lalwa i bezwen ganny met dan en fason pou permet tous tou sa bann areas, kot nou pa pe arive.

Nou’n kontan, nou’n devlop en area ki apel Providence Industrial Estate. Kantite dimoun la i kontan, in ganny gro biznes la.  Kantite dimoun i annan 4-5-6 biznes la.  Fantastik.  Me la nou’n vwar popilasyon lera i ogmante, popilasyon lisyen i ogmante.  Nou annan en Lorganizasyon ki dir ou li, fodre ou protez lisyen, fodre ou les li lib.  I fer mannyer i anvi.  Me nou konnen i en nwizans, i en problenm tou an menm tan.  Ki nou fer?  Eski nou dir…ou konpran?  Eski nou bezwen kree en sityasyon…nou pa kapab konsonm lisyen nou isi Sesel.  Me selman, konpran?  I vin en problenm.  Me nou bezwen deal avek li, sa problenm.  I la devan nou e mwan mon dir Lotorite, pa pe deal avek sa bann problenm sifizaman e dan en fason serye, ase serye pou permet lepep annan en satisfaksyon.

Mon annan en lot challenge e mon kontan mwan sa Lalwa i pe adres serten nouvo area, nouvo keksoz i pe adrese.  Par egzanp ‘nwizans’.  I pe prevwar sa laspe ‘nwizans.  I en keksoz ki sa Lalwa enteresan, ki pe anmennen, i pe dir par egzanp, i pe get dan, unhealthy dwelling parts. Savedir i pe dir i a pe get dan problenm, sa ki nou apel over crowdedness. Enteresan, akoz nou Sesel nou annan en Polisi lakaz ki byen, nou pe donn en ta lakaz nou pep.

Lontan dimoun ti reste laba dan bann pti hut, bann pti zafer, koule partou, fer ek makouti.  La ozordi zoli lakaz, Perseverance lo bor nou la.  Dimoun i dir Lang leter i annan bann lakaz, konmsi bann gran, gran dimoun i reste ladan.  Nou senp dimoun pe reste.  Nou’n avanse dan nou Polisi lakaz.

Me selman semenn pase, 2 wikenn pase, dan bann flat par egzanp Cascade, en boug i deside li fer barbecue, dan koman apele, dan koulwar dan stairs la, dan staircase la, i fer barbecue la.  Akote li dan enn sa bann flat, la lo bor kot i pe fer barbecue, i annan en madanm i ganny asma.  Ou telefonn PMC, i pa fer nanryen.  Ou telefonn Lapolis, i pa fer nanryen.  Ki deal, Mr Deputy Speaker?  Nou problenm i la.

Mon swete sa Lalwa i a kapab fer keksoz akoz li i bezwen fors PMC, fer son travay.  I bezwen fors Lapolis, fer son travay.  I annan en rol ledikasyon ki nou bezwen zwe e mon pe lans en lapel avek Minis e Komisyoner Lasante, ki sa Lalwa pou tonm anba li, Lalwa pou nepli tonm avek Minister Lasante parey lontan.  I pou tonm anba en Komisyoner Lasante Piblik, ki mon kontan ki pou lemoman la i Dokter Gedeon ki la avek nou.  Dokter it’s a challenge.  Ou bezwen fer plis en pe ledikasyon, pa zis avek nou piblik, nou dimoun ek bann Lenstitisyon ki zot, zot annan en rol pou zwe dan sa Lalwa, dan lenplimantasyon sa Lalwa.

Akoz nou problenm nou Sesel nou’n fer en kantite zoli keksoz, Lalwa en ponnyen byen zoli.  Me lenplimantasyon, en gro problenm.  En gro problenm.  Enn ler ou pros pou dir ‘pa bezwen fer ankor, enplimant sa ki nou annan avan, apre nou a fer ankor, nou a moderniz ankor.  Nou a rod…  Ou konpran?  Sa i bann challenge.

So, mon pe lans sa lapel pour ki nou vreman letan nou pe aprouv sa Lalwa, nou pou donn sipor sa, akoz mon vwar i annan nouvo keksoz, nouvo definisyon i annan ladan, nouvo lapros.  Parey mon pe dir, i pe adres over crowdedness.  Over crowdedness. Minister MLUH i bezwen revwar son Polisi lakaz.  I pa kapab kontinyen fer en ta lakaz one bedroom.  Ou fer two, three, four si fodre, pour ou adres sa problenm.  Sansan ou donn one bedroom, taler pou tro bokou dan sa one bedroom. I vin over crowded. Mon panse la Komisyoner Lasante pou met en ta presyon lo plizyer Minister e Departman.  Byen.

Nou koz lo HIV, VIH SIDA avek Hepatitis. En boug i konnen i annan HIV, i ale i sorti ek en lot dimoun, san proteksyon e i pa dir sa dimoun nanryen.  E Lalwa ozordi i les li ale.  Pa fer nanryen.  I ok. Be kot nou pe ale dan sa pei?  Nou annan en problenm.  Mon swete sa Lalwa i adres tousala.  Alor, mwan mon al for lo lenplimantasyon.  Nou bezwen annan respe pour Lotorite, nou bezwen annan respe pour legzekisyon e lenplimantasyon bann bon keksoz ki nou fer.

Me alor problenm se ki ler i arive nou kas li, ouswa nou oule fer mannyer nou, nou anvi, parey mon pe dir e bann Lotorite i annan ki pa zwe son rol.  La osi mwan mon demann Prezidan, la nou pe al elekte li ankor, koman i ganny eleksyon la, la, koman nou reelekte li, al get en kou dan sa bann zafer.  Bann landrwa kot dimoun pa pe zwe zot rol byen, pa pe perform byen, i bezwen anmenn sanzman neseser.  Lepep Seselwa, tou sa devlope ki nou’n devlope, tou sa avanse ki nou’n avanse i oule en pli bon deal, i oule en pli bon rannman, i oule vwar bann bon keksoz pour li prezerv li e son lavenir.

Customs menm zafer.  I annan bout kot sa Lalwa i pou tous li, laba lo por partou.  So, i annan tou sa bann keksoz, alor nou swet tou de bon Minis, Komisyoner Lasante Piblik avek sa Lalwa.  En bon Prozedlwa.  Enplimant li byen.  Sa ki nou pe dir e fer lepep satisfe.  Planning, laba osi ou bezwen dir zot, konmsi, Licensing.  Prezidan in dir bann pti biznes i bezwen bouze.  Nou bezwen revwar serten keksoz dan lenplimantasyon.  Dyalog plis ek dimoun pou nou enplimant en keksoz pli byen.

Nou bann granmoun ti dir nou, mon defen papa toultan ti dir mwan sa mwan, i dir: ou fer byen koze i fer byen konpran.  E annou koze.  En bann i al koz dan en….. bann tube. Annou koze byen.  Nou annan nou radyo, nou televizyon, tou nou zafer nou met la pou nou koze.  Annou koze, nou a konpran, nou a enplimante, nou ava bouze byen positively and correctly dan sa pei.

Mersi bokou Mr Deputy Speaker.  Mon krwar nou devret siport sa Prozedlwa e al anmenn li pli byen pou fer nou pep pli happy dan sa pei.

Mersi.

MR DEPUTY SPEAKER

Onorab Pierre, ou pou long?

HON DAVID PIERRE

15 minutes.  15 minit.

MR DEPUTY SPEAKER

15 minit.  Ok. Mon swete ou gard ou parol. Proceed.

HON DAVID PIERRE

Mersi Mr Deputy.

Mr Deputy sa Bill ki devan nou, i annan en kantite pou fer ek proteksyon lasante imen, proteksyon lasante piblik Seselwa.  E sa Bill i fer provizyon pour en Komisyoner Lasante Piblik ki annan en rol vreman enportan e powerful an relasyon avek sa Bill ki sirpase e pou vin en Lalwa.  E sa Bill ler i pase, i pou ranplas en Act ki’n la pou plis ki 50an.  Mr Deputy, sa Bill i koz lo plizyer size ki annan pou fer ek proteksyon nou lasante.

E enn bann size, enportan ki sa Bill i koz lo la i se proteksyon kont polisyon delo.  Kestyon ki mon pou demande i se ki, ki kapasite ki nou annan an se moman, pou nou met bann mekanizm an plas pou efektivman protez nou bann sours delo, partou lo Mahe, Praslin e La Digue.  Ki garanti ki nou kapab donn Lepep Seselwa, ki tou pe ganny fer pou protez e ki kalite delo ki nou konsonmen lo en standar, kot letan nou konsonm li, nou pa pou ganny afekte, oubyen nou lasante pa pou ganny afekte.

Mr Deputy, en kantite in ganny dir isi dan sa pei, lo kalite delo ki menm koule dan nou bann tiyo partou dan nou bann lakour.  In annan kestyon, in annan konsern lo kalite tretman ki nou fer avek sa bann delo, avan ki i ariv dan lakour.  Nivo klorin ki nou met ladan.  Kalite klorin ki nou met ladan.  I annan parfwa menm dimoun ki dir klorin ki’n ekspire, in ganny mete dan delo pou trete e sa menm delo i koul dan nou bann tiyo, kot nou bann zanfan e nou bann paran i servi.

Mr Speaker, nou pe koz ankor lo delo e nou pe koz lo delo desalinasyon.  Eski sa delo ki nou apel delo desalinasyon pe ganny trete lo sa nivo, ki i pa pou afekte lasante imen e ki kalite proteksyon ki nou pou donn nou pep sitwayen, vizavi sa

size delo desalinasyon?  Tousala i bann konsern ki mon pe met devan, ki Lepep Seselwa i santi zot anvi ganny en garanti lo la.

Mr Deputy Speaker, nou sot en kou lo La Digue.  Ki kalite delo ki dimoun La Digue pe konsonmen?  I osi an kestyon.  E ki proteksyon ki nou pe donn bann Digwa vizavi delo, ki zot konsonmen sirtou, avek letan lapli kot i annan flooding? Bokou dimoun i koz lo biznes, i koz lo delo ki ganny mete dan boutey, sa ki nou apel delo mineral, bann delo ki ganny vann partou dan bann laboutik, ki nou aste e nou konsonmen.  E ki kapasite ki nou annan ozordi, pou nou vizit sa bann lizin e fer sir ki sa bann delo pe ganny prodwir, a en nivo ki i vreman safe pour nou pep bwar?  Ki kapasite ki nou annan pou nou vizite, pou nou vwar ki sa bann lizin, ki kot sa bann lizin, i annan lizyenn e ki delo ki nou pe gannyen i really value for money?

Mr Deputy Speaker, nou bezwen, e sa i pour rol, enn parmi bann rol Komisyoner Lasante Piblik, nou bezwen fer sir ki nou annan en Polisi kler, vizavi teste sa bann delo ki Lepep Seselwa pe konsonmen.  Ki se swa delo mineral, oubyen menm delo ki PUC i prodwir pour konsonmasyon piblik.

Mr Deputy Speaker, nou bezwen osi fer sir, ki nou kapab sansibiliz piblik lo sa bann size, lo sa bann issues ki sa Lasanble Nasyonal pe fer sorti ozordi.  Mr Deputy sa Bill i osi koz lo proteksyon lasante imen, kont bann vermin, kont bann moustik, kont bann vectors kot bann zannimo ki kapab propaz serten maladi, sirtou bann maladi ki kapab koz lanmor, dizon parey leptospiroz.

Mr Deputy Speaker, mon kontan ki part 4 seksyon (8) i koz lo sa size.  E mon kontan bann pouvwar, mon repete, mon kontan bann pouvwar ki Komisyoner Lasante i gannyen vizavi sa size.  Kot par egzanp, i kapab donn notice pou netway e eliminasyon vermin dan en landrwa prive, ki’n ganny enfekte e i kapab pran aksyon dan sityasyon kot owner pa kapab ganny located, oubyen kot en landrwa i vacant. Komisyoner i a rantre e i ava donn en lord pou fer sir ki sa landrwa i ganny netwaye, oubyen si i annan sa nesesite, sa landrwa i ganny met ater.

Mr Deputy, part 4 i egalman enportan akoz i koz, e sa i size ki mon krwar Minis i bezwen donn en pli gran leksplikasyon lo la, i koz lo bann lakaz, lo bann dwellings ki pa fit pour labitasyon.  Kot ankor Komisyoner i kapab donn notice pou rektifye. Si i annan defo, sa bann defo e menm i annan pouvwar pou serve notice pour bann dimoun dan sa landrwa, pou evakye si i annan sa nesesite.

Mr Deputy Speaker, se la kot i enportan pou nou fer en bon balans, ant pouvwar ki Komisyoner pou annan e ant proteksyon drwa imen.  Fodre ki Komisyoner Lasante Piblik i egzers son bann pouvwar, san labi, avek profesyonnalizm avek enparsyalite, kot napa konsiderasyon politik e i travay dan lentere tou dimoun, avek bi pou protez lentere piblik e avek bi pou protez lentere tou Seselwa.

Mr Deputy, seksyon 12 i demann en deba lo li menm.  I demann leksplikasyon e si mon lir en pti bout dan seksyon 12, i dir ki ’a person shall not permit a dwelling to be overcrowded where in the opinion of a Commissioner, it is injurious or dangerous to the health of the residence. Seksyon 12 (2) i al pli lwen e i dir ‘any person who contravenes sub section (1) commits an offence and shall on conviction be liable to a fine not exceeding R75 thousand or to imprisonment, for a term not exceeding 3 years or both such fine and imprisonment. Sa i very powerful. Pinisyon i for e sa i donn en pouvwar enkrwayab Komisyoner.

Mr Deputy Speaker, ler nou get definisyon dwelling, definisyon dwelling i enkli lakaz, shed, hut, tent, veikil, bato, en building kot bann dimoun pe reste ladan.  Okenn landrwa kot dimoun i kapab reside, oubyen dimoun i kapab dormi, i en dwelling according to sa Lalwa.

Now, isi Sesel en dimoun ki ansarz en lakaz kot dan lopinyon Komisyoner, i overcrowded e i kapab koz danze pou safety e lasante imen, sa dimoun si i pa pran bann steps neseser, pou koriz sa sityasyon, sa dimoun i kapab vwar li pe al dan prizon e i kapab vwar li pe pey en fine, oubyen i kapab vwar li pe pey en fine an menm tan pe al dan prizon.

Mr Deputy Speaker, entervenan avan mwan in fer sorti en pwen enportan.  En kantite lakaz Sesel, i overcrowded e nou konnen poudir demann pou lakaz Sesel, avek supply, pa balanse.  Nou konnen osi poudir the private sector, rental i very high e tre pe Seselwa i kapab afford pou zot pey en rent lafen di mwan.  Sa i koz en konsern.  Nou annan en Lalwa ki dir poudir si Komisyoner, i vwar poudir i annan over crowdedness e Komisyoner dan son lopinyon i krwar poudir, nou bezwen koriz sa over crowdedness e sa dimoun napa sa mwayen pou fer li e Gouvernman pa dan en pozisyon pou ed sa dimoun, then sa dimoun i kapab vwar li dan prizon oubyen pe pey en fine.

Mon krwar nou bezwen fer sir lo la e mon krwar nou bezwen fer sir ki Gouvernman i step up, i step up son social housing program e fer sir ki nou kapab, ki supply avek demand i kapab balanse.  Oubyen nou kapab fer sir ki rental, ki rental i vin a en pri ki rezonnab pour ki bann dimoun i kapab ganny akse avek lakaz ki konvenab, a en pri ki reasonable.  Pour mwan sa i en pwen konsern.

Seksyon 14 i adres Public Sanitary.  Mr Deputy Speaker, en lot problenm, en lot issue. Lontan ti’n ler pou nou deal avek sa size.  Sesel i en landrwa touristik e bokou landrwa kot touris i frekante isi Sesel, enkli bann lans, i mank public toilets e mon krwar poudir Komisyoner i bezwen pran sa koman en issue priyoriter.  E deal avek sa size and the onus i lo li pou fer sir ki nou efektivman, deal avek sa e pran li koman en priyorite.

Mr Deputy Speaker, dan menm laliny, seksyon 15 i adres sa menm size.  Annefe isi Sesel, i annan bokou public buildings kot napa toilets.  I annan en kantite landrwa kot piblik i frekante e nou ekspekte i annan fasilite sanniter, me i napa.  Nou bezwen adres sa size osi.

Mr Deputy Speaker, lo non la demokrasi e respe pou drwa, mon kontan ki seksyon 19 i donn okenn dimoun ki ganny afekte unfairly avek en desizyon Komisyoner, i donn li sa pouvwar, i donn li sa posibilite pour li ganny rekour devan Lakour Siprenm.  Mon krwar sa i fantastik.  Mon krwar anybody ki santi poudir i ganny aggrieved par en sityasyon, o mwen i annan rekour devan Lakour Siprenm e i kapab al deal son case.

Lalwa i osi, sa Lalwa, i osi fer provizyon pou pre vant e kontrol maladi enfekt ez e bann mezir e nivo vizilans ki sa Bill pe propoze a mon avi i tre rezonnab.  I responsabilite Gouvernman pou protez e responsabilite leta, pou protez lasante piblik.  Legzanp se seksyon 28 i fer provizyon, pour en dimoun ki ganny en maladi enfekt ez pour li ganny necessary medical attention, kontan oubyen pa kontan.

En dimoun i annan en maladi ki enfekt ez, kontan pa kontan, i bezwen ganny trete.  E pour mwan, sa i enn bann mezir ki ekstrememan enportan, akoz nou annan en kantite dimoun malerezman ki pa pran zot lasante o serye e menm si zot pou annan en maladi ki pou afekte lezot, zot pa pou desann pou zot al lopital e pou al rod tretman.

Mr Deputy, anba sa Lalwa seksyon 33, lo bann building ki kapab retenir en sours maladi enfekt ez e ki bezwen ganny detrir, seksyon 32 i fer kler ki Komisyoner, i annan ankor en pouvwar pour li demande ki en building i ganny zet ater, oubyen i partially ganny detri, si dan son lopinyon, i santi poudir i pe poz en problenm pour lasante piblik.  And again i byen ki i ganny sa pouvwar, i neseser pour li ganny sa pouvwar, me a mon avi i pou osi esansyel, ki i pratik son pouvwar dan en fason kot i pa abize e i fer li tout an respektan tou bann drwa ki bann endividi i kapab annan.

Mr Deputy, seksyon 63, en seksyon enportan.  Mr Deputy, sa seksyon parey i ete, i anmenn en posibilite bribe, i anmenn en posibilite koripsyon e mon kontan, mon kontan pou vwar ki en lamannman in ganny propoze e mon swete ki sa lamannman i ava pase, akoz si non, then the issue of bribery and the issue of corruption, i kapab vin an ze.

Mr Deputy Speaker, mon krwar poudir an gro, letan nou get sa Bill, mon krwar i en Bill ki vreman rezonnab parey mon’n dir, i en Bill ki donn en kantite pouvwar Komisyoner e bann pouvwar ki neseser, me mon santi poudir Komisyoner i bezwen egzers son bann drwa e fer son travay dan en fason, kot i pa impede lo drwa bann dimoun.  E mon pou lans en lapel, avek Gouvernman pou fer sir ki Komisyoner e bann dimoun ki travay anba sa Lotorite, i ganny tou bann resours neseser pou zot kapab fer zot travay lo sa nivo ki Lepep Seselwa i ekspekte zot pe fer zot travay.  Avek sa de pti mo, mon a dir ki mon pou siport sa Bill.

Mersi Mr Deputy.

MR DEPUTY SPEAKER

Onorab Rose.

HON MARIE-ANTOINETTE ROSE

Mr Deputy Speaker, good afternoon.  Mon pa pou long.  Mon konnen time is of essence. Zis mon ti a kontan avan mon prezant serten lamannman pou konsiderasyon Lasanble, zis kosyonn serten Manm, ki ler nou fer serten lentervansyon, mon krwar nou bezwen responsab dan kalite lentervansyon ki nou fer.  Mon konnen nou Prezidan, in anonse ki nou dan en eleksyon, me nou pa kapab politicize tou.., tou keksoz.

This piece of legislation is a good piece of legislation. E mon krwar serten statement ki nou fer dan Lasanble, nou bezwen responsab, sansan i lev gran konsern piblik.  Mon ti a zis kontan eksprim sa konsern, Mr Deputy, akoz mon’n ekout Leader Lopozisyon e mon antann an partikilye 2 statement ki in fer ki mon ase konsernen avek.  So, zis mon ti a kontan fer sir ki nou egziz responsabilite.

Avek sa Mr Deputy Speaker, mon ti a kontan soumet devan Lasanble, serten lamannman pou konsiderasyon Lasanble.

MR DEPUTY SPEAKER

Bon, mon lofis in resevwar sa bann lamannman.  E nou konsider li koman bann senp lamannman. E i pou ganny aprouve anba lord 67 (1) nou Standing Orders. Bon, avek sa mon a envit Minis fer son Right of Reply.

MINISTER MITCY LARUE

Mersi Mr Deputy.

Mon ekout bann Manm tre atantivman e tre enteresan e mon vwar poudir nou tou isi, nou’n pare pou donn en koudmen, pou fer sir ki sa nouvo Lalwa ki nou’n anmenn devan zot ozordi, i dan son lenplimantasyon, nou kapab vwar en progre remarkab vizavi nou sistenm lasante piblik.

Mr Deputy, vizyon nou Prezidan, i toultan ki nou regarde ki mannyer nou kapab amelyor nou sistenm lasante.  Tou dernyerman Prezidan ti anonse, ki dan sistenm lasante nou bezwen fer plizyer sanzman e sa ti enkli restriktirasyon nou sistenm an antye, kot parey zot konnen, i annan en reform ki ongoing dan Minister Lasante, pou kapab donn en servis de kalite la popilasyon Seselwa.

In koz bokou lo training nou bann travayer lasante e desantralizasyon bann servis o nivo rezyonal dan Sesel an antye.  Alor sa se vizyon nou Prezidan e nou kot Minister Lasante, nou bezwen,..Vizyon en Prezidan pei se, se sa ki nou Minister nou travay lo la, pou fer sir ki nou kapab achieve sa vizyon, pour sa Sesel ki nou bezwen dan lavenir.

E sa Lalwa i an konformite avek sa, akoz sa Lalwa i enn modern.  Nou’n anmenn bokou diferan parti dan sa Lalwa, ki pou kapab adres bann sityasyon aktyel ki nou annan dan pei e kot sa Lalwa avan nou pa ti kapab fer li, parey nou’n dir.  I pa ti morde e nou pa ti kapab fer bokou keksoz.

Se sa ki nou’n anmenn plizyer parti e sa plizyer parti pou kapab fer nou fer serten travay, ki pou amelyor lasante piblik nou nasyon.

Serten Onorab in koz lo par egzanp, diferan keksoz si nou pe fer ozordi: kwa ki nou pe fer dapre zot.  E mon ti a kontan petet donn enn de diferan keksoz ki nou pe fer.  Par egzanp le pwen delo trete.  Kwa ki pe ganny fer ozordi pou nou kapab vwar si sa delo i bon pou bwar, i bon pou konsonmen.

Mon ava garanti zot ki wi, tou bann delo ki nou servi pou konsonmen, i ganny teste regilyerman.  Preski nou pou dir, tou le 6 a 8 semenn, nou get zot nivo e standar, zot nivo klorin, bakteri, eksetera dan nou laboratwar kot Public Health. E sa i en laboratwar ki annan nivo enternasyonal.  Enternasyonal.  I ISO Certified.

So, sa i ganny teste.

Lo kestyon bann delo, par egzanp, Onorab in mansyonn delo Cascade, en pti pe dan bann landrwa, dan bann delo sale ki pre avek bann landrwa a labita.  Menm petet nou poudir bann swimming pool. Tousala i annan bann tes ki pe ganny fer.

Me petet problenm ki annan ozordi se ki nou pa donn lenformasyon sa piblik, kot Onorab in fer byen resorti, ki in ler pou nou en pe pli transparan.  E sa mon krwar i ava antre tre byen e nou a kapab donn bann lenformasyon piblik, lo si sa delo i bon pou servi, si sa delo i bon pou nou naze ladan oubyen non: ki nivo diferan bakteri si i annan.  So, tousala i ava ganny dir e i ava annan en pe plis latransparans, ki mon krwar i ava enportan.

Lo kestyon par egzanp, Food Act, i enn ki nou ti anmenn isi menm kot Lasanble.  Sa i pou konplemant osi sa Public Health Bill.  Letan nou’n koz lo bann diferan aktivite ki nou fer, kot bann dimoun i prepar manze, nou ganny pa mal problem lo la, akoz ler nou pe prepar manze pour en kantite dimoun dan en gran, par egzanp nou dir, en gran manifestasyon, kot dimoun pe prepar manze diferan landrwa, i enportan, i pli enportan ki zanmen, pou nou verifye e fer sir, ki nivo lizyenn i la.  Akoz si demen i ariv en food poisoning, en dimoun i mor, nou kot Minister Lasante dan Public Health, nou pou responsab.

Nou pou responsab akoz nou pa pe vreman regarde e fer sir nou enplimant Lalwa.  Me an menm tan, nou bezwen fleksib.  Nou bezwen fleksib, nou bezwen diskit, nou bann dimoun i bezwen diskit ek sa bann dimoun, fer sir ki vwala ki nou ti a kontan, ki norm nou ti a kontan zot respekte e ki mannyer nou kapab travay ansanm.  Me pa pour nou vini, zis ‘pa vann, pa fer,’ akoz sa osi i annan en lenpak negativ.  Akoz dimoun i bezwen, parey nou Prezidan toultan i dir ‘dimoun i bezwen leve, debourye.’  Nou bezwen donn zot en sans pou leve, debourye.

Me osi, tout an prenon kont ki nou pa kapab konpromi lasante sa pep deor.

E sa Lalwa parey in dir, i enportan ki swiv sa bann regilasyon, me sa konsiltasyon osi, i pou enn tre enportan pou nou kapab fer.  E sa i pou aplik partou.  Even letan nou pe koz lo…letan nou dir Onorab in dir, over crowded house. I pa vedir ki si en lakaz i annan 10 dimoun ladan, nou apel li en over crowded house. I pou tou depan.  Si i over crowded ki afekte lasante.  Pa neseserman nou pou pase, nou pou al kot Minister, kot MLUH nou pou dir ek li, tou sa bann lakaz kot i annan 5-6 dimoun, nou bezwen fermen, nou pa kapab koumsa.  Non.  I pa pou mars koumsa li.  Nou bezwen nou kot Minister Lasante avek Public Health Authority, bezwen travay ek tou sa bann Lazans ki konsernen.  Minister, nou pou dir kot Finans, kot Lagrikiltir, Lanvironnman, Minister Lakaz, Lapolis, tousala en bann Lazans ki nou bezwen travay ansanm, asiz ansanm, regarde ki mannyer nou bann Poli,,: Ki nou bann Polisi i dir e si bezwen nesesit bann lamannman avek nou Polisi, pou nou kapab fer sir ki sa Lalwa i marse.  Alor ansanm nou ava asize.  I pa vedir ki nou pou al met en presyon lo Minister pou dir li, tou sa bann lakaz tro bokou dimoun.

Nou konnen poudir Gouvernman, in fer en kantite pou donn dimoun lakaz e pe kontinyelman fer pou donn dimoun lakaz.  E sa i pou pran nou ankor plizyer lannen.  E mon pou dir, nou pa pou fini donn lakaz dimoun.  Me Minister, Gouvernman pe fer en kantite.  Alor nou, nou bezwen vwar si sa over crowdedness, i annan en lenpak lo lasante sa bann dimoun.  La, la nou ava diskite e vwar ki mannyer pou aranz sa.

So, i pou tout en travay, mon pou dir en travay ansanm, en travay avek lakominote, en travay avek bann Lazans, pou fer sir ki sa Lalwa ler nou met li la an aplikasyon, i morde e nou vwar en lenpak, nou vwar en sanzman pozitiv ki pou anmennen pou nou, pour nou nasyon Seselwa.

Mr Deputy Speaker, Onorab in koz osi lo pouvwar, pouvwar Komisyoner.  Komisyoner i annan pouvwar, wi.  Me Komisyoner mon donn ou garanti, i pa pou annan pouvwar pour li abize.  I pa pou annan pouvwar pour li get afilyasyon politik, akoz sa i pa’n zanmen le ka dan Public Health, kot nou get afilyasyon politik, pou nou abiz lo serten dimoun.  Parey mon’n dir ankor Komisyoner, i pou sa dimoun, la ozordi i Dr Gedeon.  Sa i en post, ki i kapab nenport ki dimoun, be selman ozordi i li.

Me i pa vedir ki i pou abiz son pouvwar, akoz i pou bezwen travay avek tou dimoun, me asire, pa vo lapenn, nou met en Lalwa osi parey Onorab Charles ti dir taler.  Nou met en Lalwa apre nou pa kapab enplimant sa Lalwa.  Nou tou nou anmar lanmen kanmarad.  Non.  Me nou bezwen enplimant li.  Me ansanm.  Ansanm.  Koze.  Kominikasyon i enportan.  Lenformasyon i enportan.

E mon sorti lo la e mon donn ou garanti Onorab, ki sa nou pa pou fer akoz si Komisyoner in abize, oubyen in fer keksoz mal, sa dimoun i pou annan drwa Ankour pou dir poudir be Komisyoner pa’n fer byen son…  Savedir i annan en bout ladan ki kapab retourn lo la.

Lo kot i konsern, lakominote.  Ozordi nou pe pas sa Lalwa.  Nou pe diskite dan Lasanble.  Byensir nou bezwen anmenn li o nivo kominote prezan.  Kominote i bezwen konnen ki nou pe diskite: Ki sa pou anmennen pou zot?  Ki plis benefis pou annan dan lakominote?  So, apre sa osi i pou bezwen annan travay pli entansif pour ki sa bann lenformasyon, i al o nivo tou lakominote, lapopilasyon Seselwa, pou zot konnen, tel ki biznes ki pou ganny involve, dan lakour kot bann dimoun pou bezwen zot lanvironnman gard li sen, tre izyenik.  Tousala nou bezwen anmenn a laporte.  E nou bann sanniter, nou bann travayer lasante, sanniter, zot pa krwar poudir, Onorab in koze i dir fodre nou get dan zot welfare. Mwan osi mon dakor.

Nou bezwen get en pe plis dan zot welfare. Akoz zot fer en kantite travay e ozordi, lontan nou ti dir sanniter i vizit zis bann lakour.  Ozordi i pa se tou ki zot fer.  Sanniter i fer bokou plis travay.  I vizit bann lakour, i al vizit bann magazen, i al vizit bann lakour.  Konmsi tou lezot Lorganizasyon, kantite bann lotel, letablisman touristik, bann sanniter i vizite.  Delo.  Bann sours delo.  Larivyer partou.  I annan bokou, bokou plis travay ki byensir bann sanniter, zot ganny osi bann training neseser.  As and when ki i neseser.  Par egzanp en maladi, ler ti Ebola.  Ti annan Ebola dan west countries. Deswit ti annan en training ki ti ganny organize pour tou bann travayer pou met zot a zour, ki mannyer nou pou prepar nou pou sa, pour ki Ebola pa zanmen rantre Sesel.

E mon fyer pou dir ozordi i en maladi ki’n afekte bann pei, me Sesel in reste sen.  Sesel pa’n gannyen, menm ti annan en lafreyer, me nou bann dimoun in travay dir, nou bann dimoun in travay byen pou kontrole ki sa maladi pa ariv dan nou pei.  E mon dir sa, mon bann dimoun en gro mersi, akoz zot in travay dir.

So, nou pou bezwen regarde e byensir nou dimoun osi dan lakominote, Onorab De Commarmond in fer resorti en pwen tre for ki mon ti kontan ler i dir, lontan nou ti annan respe ler en sanniter i pase.  Koman en sanniter i pase, ou tann …. ‘sanniter pe vini.’  Mon rapel byen.  Sanniter pe vini, fer sir kot ou i prop, partou i prop’.  Dimoun ti veye sa.  Ozordi nou bann sanniter tanzantan i vini zot fer konplent.  ‘Nou ganny saboule.  Nou ganny maltrete.’  Si kekfwa i kit en pti note pou dir, ‘konmsi fodre amelyor en pti pe.  La nou’n vwar salte ki pa ti devret kit la, nou bezwen amelyore.’  Zot ganny en kantite, en kantite difikilte.

Avek sa Lalwa nou a kapab pran en pe plis aksyon.  Me ankor parey mon’n dir, an konsiltasyon ek bann dimoun. Alor mon a demande, mon a lans en lapel pour ki bann dimoun dan lakominote: Annou pa pran en sanniter koman enn nou lennmi, me annou pran en sanniter koman enn nou zanmi, ki pe vin travay avek nou, pou ed nou pou amelyor nou sityasyon kot lakour.

Bon, an zeneral mon pou dir, mon’n apresye vreman tou zot bann komanter e nou prezan i reste pou nou, pour mwan demann zot pou donn zot laprouvasyon final e ki nou de nou kote, nou pou al met tou keksoz an lenplimantasyon, pou kapab ganny en meyer, donn en meyer servis lapopilasyon e reasir zot ki nou pou toultan la, pou protez lasante sa popilasyon.

Mersi Mr Deputy.

MR DEPUTY SPEAKER

Bon lo prensip e merit zeneral Public Health Bill, 2015, nou pran en vot.  Tou bann ki an faver?  Inanim.  Mon a ganny en formal Second Reading?

ASSISTANT CLERK MS LUISA WAYE HIVE

A Bill of an Act to repeal and replace the Public Health Act, Cap 189.

MR DEPUTY SPEAKER

Bon mon a ganny en Mosyon pour sot staz Komite?

HON MARIE-ANTOINETTE ROSE

Mr Deputy Speaker, mon move ki nou sot staz Komite.  Mersi.

MR DEPUTY SPEAKER

Okenn Manm ki segonde?

HON CHARLES DE COMMARMOND

Segonde Mr Deputy Speaker.

MR DEPUTY SPEAKER

Avek sa mon a ganny en Mosyon pour Third Reading.

HON MARIE-ANTOINETTE ROSE

Mr Deputy Speaker, mon move ki nou lir sa Bill en Trwazyenm fwa.

MR DEPUTY SPEAKER

Okenn Manm ki oule segonde?

HON CHARLES DE COMMARMOND

Motion is seconded Mr Deputy Speaker.

MR DEPUTY SPEAKER

Bon moman in arive pou nou pran en vot lo sa Bill. Tou Manm ki an faver lev zot lanmen?  Inanim.  Mon a ganny en Third Reading.

ASSISTANT CLERK MS LUISA WAYE HIVE

This Act may be cited as a Public Health Act, 2015.

MR DEPUTY SPEAKER

Bon avek sa, sa Bill in ganny aprouve e mon a remersi Minis ek son delegasyon, eskiz zot parmi nou.  Le 2 Leaders nou a zwenn 1er edmi e Lasanble i a repran 2er apre midi pou nou konsider Mosyon lo sanzman dan balizaz eleksyon.

(LUNCH)

MR DEPUTY SPEAKER

Bon, mon a dir bonn apre midi e nou a kontinyen nou travay lo Order Paper e next item se mosyon table par Onorab Rose, Leader zafer Gouvernman ki pe demande pou nou approve Draft Order, Boundaries elektoral pou Mahe ek Praslin.  E mon annan gran plezir pou envit Onorab Rose pou prezant son mosyon.

HON MARIE-ANTOINETTE ROSE

Mersi Mr Deputy.

Mr Deputy, ozordi i en zour istorik.  Travay ki nou pe ganny demande pou fer i kilmin travay, en vizyon kler e solid ki Gouvernman parti Lepep in trase pou sa pep ek sa nasyon.  Prezidan Michel atraver son pouvwar anba Konstitisyon, pe demann nou Lasanble nou sipor pou reetablir bann nouvo frontyer ki separ nou distrik, bann demarkasyon ki deklare kote en distrik i komanse e kote i fini.

An realite, nouvo demarkaz boundary i enn ki senp me an menm tan istorik akoz depi kreasyon Roche Caiman, Aux Cap ek Les Mamelles, plis ki 20an pase sa i premye fwa ki nou zenerasyon pe proklanm nou lekor lo en tel size.  Mon dir i senp akoz sa Draft Order pe tou senpleman demann nou pou enkli L’Ile Perseverance koman 26enm distrik nou pei.  Sa proze lord pa pe deranz okenn lezot demarkasyon pou okenn lezot distrik.  Savedir, napa okenn sanzman boundary dan okenn distrik:-san:-dan okenn lezot distrik.  Me ki L’Ile Perseverance i vin en nouvo sirkonskipsyon elektoral.  Nou pe tou senpleman tonm dakor alors ki L’Ile Perseverance i ganny deklare e rekonnet koman en nouvo distrik.

Mr Deputy, Gouvernman parti Lepep in konstri 1012 lakaz lo en zil ki nou apel li L’Ile Perseverance.  Proze konblaz pou kree sa nouvo zil ki’n kout nou plizyer milyon roupi ti vin a en lepok kot nou pei ti pe pas atraver difikilte serye an sa ki konsern nou lekonomi.  Nou forex pa ti ase, nou ti pe komans vwar bann siny ase enkyetan konsernan krwasans nou lekonomi.  An vi sa sityasyon, parti Lepep ti annan de swa.  Rezourd son problenm imedyat e negliz son vizyon lonterm pou kree lenfrastriktir neseser pou siport lagrandisman nou lekonomi.  Si ti fer sa, i ti pou en parti avek en vizyon kourt e en parti ki napa en plan serye pou devlopman e progre nou pei e nou pep.  Nou parti ti deside alors pou fer en keksoz e sa se rezourd nou problenm lekonomi ki nou ti fer an 2008 e osi pa zanmen perdi nou vizyon lonterm pou kontinyen envestir dan lenfrastriktir pou devlopman fitir.

Mr Deputy, tou le de lakonplisman i lakonplisman Prezidan Michel, i ti son vizyon, i ti son lakonplisman.  Parti Lepep in kree L’Ile Perseverance akoz malgre reform e malgre presyon politik sorti kot lezot parti pou pa siport sa proze, nou parti in gard son lizye fikse lo plis loportinite pou pep Seselwa.  Alors, kot enn fwa ti delo sale nou’n konble e in emerze en zoli zil ki lakour pou 1012 fanmir Seselwa avek potansyel pou 800 lakaz ankor pou plis Seselwa.

Lakaz sosyal Mr Deputy, i nepli lakaz sosyal.  I bann zoli lakaz, pa pou okenn etranze, pa pou okenn personn, me pou Seselwa.  Proze pou condominium pour bann graduates ki anvi gard zot fanmir i touzour la e posibilite pou annan nouvo stil lakaz anba Self Financing pe ganny realize.

Mr Deputy, semenn pase mon ti fer en pti vizit lo L’Ile Perseverance, apartir naryen, parti Lepep in literalman batir en nouvo distrik.  Son prop Super Market, son prop lekol, enn bann pli zoli lekol dan pei, son prop Kord Gard e byento lezot fasilite ki en distrik i merit annan.  Sa i normal alors ki nou vwar nesans L’Ile Perseverance e donn li son stati byen merite koman non selman en distrik, me osi en sirkonskipsyon elektoral.

Mr Deputy, nou pe fer listwar.  Ankor enn fwa parti Lepep pe fer listwar, ler i ti proklanm lanons eleksyon semenn pase, Prezidan Michel ti anonse ki rezon akoz in deside call sa eleksyon, set akoz plizyer propozisyon lo devlopman nou pei ti pe ganny flote e sa ti pe kree konfizyon parmi lapopilasyon.

Mr Deputy, kreasyon L’Ile Perseverance i karakteriz lafors e viger dan ki Gouvernman parti Lepep i travay, i demontre ki bokou travay in nabou ganny fer anba direksyon Prezidan Michel, sa personn pa kapab demanti.  Me travay i travay serye ki anmenn vre devlopman e lepanouisman nou pep, sa kalite travay serye pa ankor fini.  L’Ile Perseverance i legzanp kalite travay ki parti Lepep i antreprann lanpler travay ki nou pare pou fransir.  Kalite travay ki nou anvi e kapab fer pou sa pei.  Avek mankman teren, en logmantasyon dan demann pou later swa pou lozman e devlopman lantrepriz, nou reste focus lo travay ki nou annan pou fer pou sa pep e sa pei.

Se alors Mr Deputy, ozordi le 6 Oktob 2015, ki nou Lasanble i annan plezir pou welcome Perseverance koman 26enm distrik nou pei.  Perseverance, se zanfan parti Lepep, se nou ki’n konsevwar son nesans, se nou ki’n bers li e se nou ki pe fer li grandi e se nou ki pou kontinyen okip li.  Zabitan Perseverance, bann fanmir ki ozordi pe zouir en lavi pli konfortab, kot zot rev pou annan en twa par lao zot lakaz, pa pou zanmen oubliye lekel ki’n fer zot rev vin vre e bann fanmir ki pe esper en lakaz a lavenir, Perseverance i reprezant lespwar pou lavenir.  Lespwar pour ki Perseverance li menm, sa non li menm, i senboliz travay dir ki parti Lepep i fer lo en baz kotidyen.  Kot a sak zour nou azout en blok, nou simante, nou kontinyen batir sa nasyon e sa pei modern.  Nou fer li malgre difikilte, nou fer li malgre ki serten dimoun i kontinyen sey met bar dan nou larou, nou fer li akoz nou persevere.

Alors Mr Deputy Speaker, napa en non pli apropriye pou dekrir sa nouvo distrik dan nou pei.  Perseverance i osi donn nou lespwar pou lavenir akoz sa distrik i pa dernyen distrik ki pou ganny azoute lo teritwar Sesel.  Nou dan parti Lepep nou kontinyen serse, kontinyen trase, kontinyen rode ki mannyer pou fer agrandi sa gato ki nou tou nou oule en par ladan.  Lavenir anba parti Lepep i promet plis devlopman e evidaman dan lavenir, en prosenn zenerasyon pou vwar kreasyon plis zil, plis distrik, plis devlopman, plis lakaz, plis lozman, plis loportinite anba Gouvernman parti Lepep.  Se selman parti Lepep ki annan en vizyon kler e net pou lavenir.  Sa i rezon akoz zabitan Perseverans, parey zabitan lezot distrik pou kontinyen vot pou stabilite e progre sa nasyon.  Wi, the new Seychelles we want i komans ozordi, in fini komanse.  Ti komanse ler nou Prezidan ti reve ki en zour nou ti pou annan en pei avek sitan progre parey i annan.  Zour i ti reve kree plis biznes, plis lanplwa, plis loportinite.  Zour i ti reve ki nou bezwen en nouvo zil, en lot nouvo zil e plizyer nouvo teritwar ki pe apel nou pou devlope, pou progrese, pou al an avan.

Mr Deputy, ler mon pronons mon lekor lo sa mosyon, mon santi mon fyer.  Fyer ki ankor enn fwa nou Lasanble Nasyonal pe met son mark dan liv listwar.  Pe met son mark lo sapit nou listwar ki pe a nouvo redefinir nou teritwar e ki pe azout en nouvo paz lo sa lalis sikse ki Prezidan Michel ek parti Lepep in akonplir.  Avek sa enn de mon Mr Deputy, mon salye zefor alors tou dimoun, premyerman nou arsitek e dirizan Prezidan Michel e tou dimoun otour li ki’n persevere pou kreasyon sa nouvo zil loportinite ki ozordi nou apel li L’Ile Perseverance.  Nou mersi pou al direk dan sa bwat vote kot avek san okenn dout, nou pou donn li tou nou sipor e mon demann lepep Seselwa pou fer parey.

Mersi.

MR DEPUTY SPEAKER

Bon, mosyon in ganny prezante, okenn Manm ki pou segonde.  Onorab Arnephy.  Mon vwar de lanmen anler.  Onorab Arnephy ou segonde.  Yes, Onorab Arnephy, proceed.

HON BERNARD ARNEPHY

Mersi Mr Deputy Speaker, bonn apre midi Mr Deputy Speaker.

Mr Deputy Speaker, mon pou kontiny kot prezantater mosyon in kite.  Mon osi koman en zenn Seselwa, en zenn profesyonnel, mon fyer monn ganny sans grandi e epanouir dan en pei kot i annan de milye e de milye loportinite.  Tousala in ariv gras a en Gouvernman vizyoner dirize par en Gouvernman vizyoner e sa se byensir Prezidan Michel.

Mr Deputy Speaker, 20an pase e menm bann lannen avan, koman en pep nou ti’n vwar ki devlopman dan sa pei pou annan, devlopman dan sa pei pou kontinyen e pou sa kapab vin posib pou nesesit kreasyon nouvo teren.  E zisteman ler Gouvernman SPPF sa letan ti pran desizyon pou konble plis teren pou nou fer devlopman, i ti en vizyon byen kalkile.  Ozordi Mr Deputy Speaker, nou pe koz lo Providence Industrial Estate, pa ti egziste.  Ozordi nou pe koz lo Roche Caiman District Housing Estate, teren pa ti egziste.  Ozordi nou pe koz lo Perseverance ki nou pou proklanmen pou li vin en distrik, nou’n koz lo Ile Solei, Ile wor, Ile Du Por, Eve Island Praslin e lezot ankor.  Bann teren ki pa ti egziste e ozordi se bann teren ki nou koman en parti nou’n kree, nou’n form bann zil ki nou vwar devlopman endistriyel e devlopman rezidansyel.

Mr Deputy Speaker, avek popilasyon ki pe ogmante e teren limite ki pei pe fer fas avek pou kapab batir lo la, Gouvernman lepep ti vwar li neseser pou kree teren pou fer devlopman.  Zis sa bann ki ti annan lespri detournen sa letan ki ti trouve ki sa pa ti byen.  Zot ti ensilte par egzanp zabitan Roche Caiman ti ganny ensilte e nou ti ganny dir:-zot ti ganny dir poudir zot pe al reste dan lakaz lapen, bann ki rapel byen.  Ozordi bokou sa bann swadizan lakaz ki ti ganny konsidere koman lakaz lapen, in vin bann lakaz avek bann valer enkrwayab e bann zabitan i tre fyer ki ozordi zot in kapab vin propriyeter zot prop lakaz.  Dimoun sorti dan kat kwen Mahe in zwenn ansanm e in kree sa kominote ki ozordi i apel Roche Caiman e legzanp in swiv, ozordi nou pe kree en kominote ki nou pe apel Perseverance District.  Premye group zabitan Mr Deputy Speaker, ki ti antre Perseverance ti an 2011 e sa ti anviron 539 fanmir.  E ozordi sa popilasyon in ariv anviron 3mil dimoun.  Dezyenm group zabitan ti rantre Perseverance de an 2012, ti anviron 475 fanmir e ozordi, i annan anviron 4mil dimoun ki pe reste Perseverance de.  Sa bann zabitan in swiv en semen long, difisil, bokou latant, me finalman zot rev in vin vre pou zot ganny zot prop lakaz.

Alors Mr Deputy Speaker, in plis ki ler ki Perseverance i ganny proklanmen koman en distrik elektoral.  Gouvernman parti Lepep ler i konstri bann lozman i pa zis konstri en twa lo ou latet me lozman konfortab ki adapte avek Sesel.  Nou Nou Gouvernman i krwar ki en lakaz konvenab e konfortab i neseser si nou fanmir i anvi zouir en nivo lavi ki lo standar, en lanvironnman ki konvenab e konfortab, bon lasante, kiltiv bann valer lafanmir e vin pli responsab e vin pli prodiktiv pou devlopman nou pei.

Mr Deputy Speaker, parey nou tou nou konnen, Sesel in deza en sanpyon dan devlopman soutenab ki azout plis valer ek kalite lavi nou pep.  Lafason ki nou pei i pran kont nou stil lavi e lafason ki nou servi nou resours natirel, i devret reste sansib avek nou bio diversite inik.  Nou bezwen a tou pri prezerv tou nou bann aki.  Tou lenfrastriktir i an plas ki sa vilaz i vin enn ki fonksyonnel, pour ki sa vilaz i vin osi en partenarya ant sekter prive e Gouvernman.  Gouvernman in met a dispozisyon sekter prive 7 kare later ant 745 met kare e 847 met kare pour ki zot kapab partisip dan devlopman biznes komersyal e osi rezidansyel.  Sa bann proze pou blend byen avek proze lakaz egzistan akoz nou pou annan bann proze komersyal premye:-lo premye floor e bann biro lo lezot trwa floor avek sa bann flat ki Gouvernman pe met later avek prive pou batir.  Lannen pase osi MLUH ti met plizyer morso later Ile Perseverance a dispozisyon bann pti biznes.  Sa proze condominium anviron 154 unit ki pou ganny donnen avek bann dimoun ki pou ganny zot premye lakaz, pli presizeman bann graduates Liniversite e bann profesyonnel i ankor an mars e byento pou vin realite.

Mr Deputy Speaker, Perseverance:-Ile Perseverance i senboliz lespwar.  I senboliz labote vre devlopman.  Ile Perseverance i fer zalou bokou viziter, bokou delegasyon etranze ki vizit sa distrik:-sa vilaz.  Kestyon ki bokou i demande, eski sa i vreman Social Housing?  Wi, Mr Deputy Speaker, sa se Social Housing ganny konstri, ganny konsevwar anba vizyon Gouvernman parti Lepep.  Demann lepep Seselwa pou montre plis lapresyasyon avek tou sa ki Gouvernman pe met a nou dispozisyon.  Nou demann pep Seselwa, sirtou bann zabitan Perseverance pou adopte en lifestyle ki an konformite avek labote sa distrik.  Dan tou lenstans, nou pe montre lemonn ki nou en legzanp dan devlopman.  Dan tou laspe ki swa spirityel, ki swa lavi kominoter, ki swa edikasyonnel, Perseverans pe byensir kit son mark.

Mr Deputy Speaker, avek lakantite devlopman ki’n arive lo Ile Perseverance, lakantite dimoun ki pe viv laba, mon senserman krwar ki sa vilaz in ler pou ganny proklanmen koman en distrik elektoral.

Mr Deputy Speaker, an siportan sa mosyon, mon anvi dir sa bann zabitan Perseverance.  Mazin byen, 5an pase zot ti napa en lakaz ki zot ti konsider koman zot propriyete.  Ozordi zot pe reste dan en lakaz ki Gouvernman parti Lepep in batir, alor zot bezwen konnen o fon zot leker zot osi ki zot in pare pou marye avek zot desten.  Sel lalyans ki pou asir plis progre e plis dibyen pour nou, nou desten se lalyans avek parti Lepep, se lalyans avek Gouvernman Mr James Michel.  Alor san dout, nou pe lans en lapel avek tou Seselwa, pli partikilyerman tou zabitan Roche Caiman pou donn Prezidan Michel ankor 5 dan sa eleksyon ki pe vini.

Mon remersi ou Mr Deputy Speaker.

MR DEPUTY SPEAKER

Onorab Vidot.

HON KEVIN VIDOT

Mersi Mr Deputy Speaker, bonn apre midi e bonn apre midi tou dimoun ki a lekout.  Zil Perseverans, en vizyon, en parti ek son dirizan Prezidan James Michel.  En vizyon kler ki’n vin en realite ozordi.  Ler Lopozisyon, san en vizyon pa ti konpran sa vizyon parti Lepep e Prezidan Michel, ti kler ki vre vreman Sesel e lepep Seselwa ti dan bon lanmen leadership Prezidan Michel e ozordi an 2015, naryen pa’n sanze.  Prezidan Michel i ankor en dirizan avek en bon vizyon ek bann bon plan pou Sesel e osi pou zil Perseverans.  A mon avi, bann dirizan dan bann parti Lopozisyon i devret onte e kanmi pou menm met zot lipye lo sa zil pou al dir ki zot devret tir Prezidan Michel koman dirizan Sesel.  Sa bann dimoun i devret demann zot lekel ki ti rev sa zil e fer li vin en realite.  Lekel sa dirizan ki ti pe mazin en lakaz pou met son dimoun ladan?  Lekel:-lekol lo zil Perseverans Mr Deputy Speaker, i enn parmi bann pli zoli Sesel ozordi.  Konsep lenerzi renouvlab in osi ganny inisye dan sa Housing Estate.  Plan pou son prop Klinik in fini ganny konsevwar e byento pou al fer vin en realite.

Mr Deputy Speaker, dimoun Perseverance i devret fyer ozordi akoz zot lo en zil, zot lo en Housing Estate ki enn ki pli modern Sesel, i enn ki bokou pei lemonn ki ler zot bann dirizan politik i vin Sesel, i santi zot fyer e menm zot kestyonn zot prop polisi, zot prop plan, zot prop parti dan zot prop pei pou en tel plan e en tel vizyon lozman pou son dimoun koumsa.  I fer mwan mazin en delegasyon parlmanter ki ti vini lannen pase, ki nou koman komite lasirans, nou ti annan plezir pou al anmenn zot fer bann pti vizit e nou ti al anmenn zot vizit Perseverans, la kot ou vwar menm sa ki ti pe reprezant Lopozisyon dan sa delegasyon ti menm ankoler e lager ek son prop koleg dan parlman laba sa pei e dir vwala en bon Gouvernman ki mannyer i travay, ki mannyer i delivre pou son pep e pou se son pei.

Mr Deputy Speaker, ler mon get zil Perseverance, akoz zot bezwen pas La Riviere Anglaise pou zot al lo zot zil i fer mwan fyer akoz lanmenm akote distrik La Riviere Anglaise, nou annan nou en distrik, nou annan nou bann lakaz ki asiz byen lo sa pti zil e ler bann dimoun i sorti travay 4er-5er i antre kot zot lakour ou zot kapab dir mon fyer ki mon kot mwan.  Me mon kot mwan, pa nenport ki ki’n kapab fer sa vin en realite pou zot.  Pa nenport ki parti ki’n fer sa vin en realite pou zot, me se en vizyon parti Lepep, se en vizyon Prezidan Michel ki zot antre se zot dan zot zoli pti lakaz e zot dir mon kot mwan.

Mr Deputy Speaker, ler i annan dimoun ki asiz lo sa zil e i komans konplent, i komans koz negativ, mon kestyonn mon lekor si vreman i konnen lekel ki ti fer sa vizyon vin en realite.  Ler sa Lopozisyon ti dir zot pa konpran e zot pa krwar dan en tel proze parey zil Perseverance, ozordi pou zot lev zot lanmen e selebre ek sa bann dimoun, i zis:-mon pa kapab servi en mo la anndan Mr Deputy Speaker.

Mr Deputy Speaker, depi le 31 Out 2015, 1012 lakaz in ganny delivre avek pep Seselwa lo zil Perseverance.  En ta lakaz sa, en gro lenvestisman sa.  Se vreman kler ki mannyer nou adres Bidze Nasyonal dan nou pei, se nou mazin lozman, nou mazin lasante e nou mazin byennet pep Seselwa.  Osi akote zil Perseverance Housing Estate, nou vwar ki i annan 150 unit bann condominium ki pe al ganny batir.  Ankor enn fwa i vizyon kler Prezidan Michel pour nou bann graduates, pour nou bann profesyonnel, ki zot osi zot ava ganny en lozman adekwa e apropriye, ki ler zot pe donn zot kontribisyon osi lo nou later Sesel, zot a kapab mon kot zot e dir mon kot mwan.

Mr Deputy Speaker, ozordi pou sa zenn profesyonnel ki 150 unit condominium pe ganny fer pou zot, i devret asize e kestyonn son lekor.  Eski en lot parti ti pou fer sa?  Eski en lot dirizan ti pou inifye sa?  Eski en lot Gouvernman responsab ti pou mete sa kantite larzan pou envesti dan sa proze e pou inisye PPP ki nou dir Public Prive Partnership ouswa zot ti pou zis pa montre okenn lentere e dir ek sa bann graduates, sa bann zenn profesyonnel, al fer ou deboury lo marse prive.  Me nou Gouvernman, Gouvernman parti Lepep, vizyon i kler, plan i kler, lobzektif i kler ki nou la pou nou ed nou dimoun nenport ki kote kot ou ete, nenport ki nivo kot ou ete.  Nou la pou fasilit ou lavi, nou la pou fer ou viv byen dan ou pei e nou la pou ed ou pou kontribye plis ankor dan ou pei.  E ler ou sorti travay ou mont dan lakour, ou dir mon kot mwan.  Parti Lopozisyon ozordi mon pa konnen si zot annan en plan pou fer en lakaz pou met nou bann dimoun ladan, ki sa bann dimoun i kapab dir mon kot mwan.  Me parti Lepep son plan i kler e ankor enn fwa pou lannen 2015, pou lannen 2016, 17, sa prosen 5an ler Prezidan Michel i ganny elekte ankor, pou annan ankor lakaz pou ganny fer pou kontinyen met nou bann dimoun ladan, nou bann zenn profesyonnel ek tou nou bann travayer kot ava apel kot zot, kot mwan.

Mr Deputy Speaker, ozordi ler mon asize dan sa Lasanble, mon fyer pour mwan adres en tel mosyon e i en mosyon ki mon swete i pou fer dibyen pou sa bann dimoun laba akoz ozordi nou vwar zot, zot pe servi bann fasilite a zot dispozisyon kekfwa dan lezot distrik.  Kekfwa i annan keksoz zot bezwen bouze pou al fer dan lezot distrik, me ler nou’n pas osi sa mosyon la, nou’n deklare ki Perseverance i en distrik elektoral enn, ki Mr Deputy Speaker, parey i annan lekol in ganny fer, Klinik pou ganny fer, nou konnen i annan Administrasyon Distrik laba, zot a byento kekfwa apre ki nou’n fer sa i bezwen vin en realite, zot ava annan osi en reprezantan ki pou reprezant zot osi dan parlman.  E mon dir ek bann dimoun Perseverance, pa bliye vot parti Lepep, vot Prezidan Michel akoz se nou ki’n fer zot rev vin en realite.

Mersi bokou Mr Deputy Speaker.

MR DEPUTY SPEAKER

Onorab Pillay.

HON SEBASTIEN PILLAY

Mersi Mr Deputy Speaker.

Mr Deputy Speaker, ler mon’n ekout bann entervenan avan mwan e mon:-e partikilyerman mover mosyon, in servi en term istorik.  Istorik dan le sans ki sa 5enm Lasanble pe ozordi kree en nouvo distrik e sa i fer ou mazin sa terminolozi transformasyon ki nou servi isi dan parti Lepep kot nou pe koz:-ler nou pe koz transformasyon, nou pa pe koz transformasyon dizon en term literal, me i pe koz transformasyon osi dan le term fizik.  Ou kapab mazinen nou en parti ki’n transform landscape nou pei fizikman:-kree fizikman nouvo loportinite dan nou pei.  Napa lot parti politik ki’n fer sa.  Napa lot leader ki’n diriz en Gouvernman ki’n fer sa.  Ou pa pou kapab montre mwan en lot leader ozordi out their ki pou annan ase leksperyans e kapasite pou kapab fer sa.  E se pour sa rezon ki ozordi sa ki nou pe fer i pa zis istorik dan le sans ki nou pe kree en nouvo distrik, me i istorik ki nou pe osi ozordi sanz landscape nou pei.  Both litererman, me osi dan en tenm:-dan en lot fason kot nou pe vwar ozordi sa Lasanble pe dir dezormen sa bann dimoun ki reste Perseverance pe ganny zot prop distrik.  E sa i pa’n en parkour ki’n fasil, in pa’n en parkour ki’n zis en sel kou in arive, in ariv avek diferan sirkonstans kot nou’n bezwen re-kalkile, re aranze, me selman sa ki enportan e sa ki ou sa Seselwa ki pe ekout mwan ozordi, ou devret pran konsyans.  Se le fe ki malgre tou sa bann difikilte, parti Lepep in reste ferm dan son konviksyon pou li konplet travay ki nou’n komanse.  E la nou plan se al o de la de sa e fer plis ankor.  So, pour mwan ler mon vwar ozordi sa ki nou pe fer, mon vwar li dan sa loptik e i fer mwan en tre gran loner Mr Deputy Speaker, par lefe ki ler nou ti pe kree Roche Caiman, ler nou ti pe kree Les Mamelles, mon ti ankor tre zenn.  Petet mon ti napa sa konnesans ki mon annan ozordi, sa konpreansyon ki mon annan ozordi, me ozordi mon santi poudir demen listwar mon pei pou rikorde ki mon ti form par sa Lasanble, ozordi pou kree distrik Perseverance.  E sa i enportan sa pour tou Seselwa realize sa, kot nou’n sorti e kot nou’n arive.  Ozordi nou’n vwar nou pe koz lo en bann kantite nouvo plan ki en kantite dimoun pe vin avek ki a lafen dizour ou demann ou lekor, ki mannyer sa bann dimoun pou kapab annan en plan, kan ant zot menm zot, zot pa kapab tonm dakor, kan zot menm zot, zot pa kapab annan en vizyon.  So, ler ou, ou pe asize kot ou ozordi swa ou Perseverans swa ou elsewhere, ou bezwen mazinen, ou bezwen analize.  Loportinite ki’n ganny kree atraver sa Gouvernman e pou kontinyen ganny kree atraver sa Gouvernman e pou kontinyen ganny kree atraver sa Gouvernman in baze lo sa stabilite ki sa Gouvernman in mentenir dan sa pei.  In baze lo abilite sa Gouvernman, lo abilite sa leader vizyoner Mr James Alix Michel malgre tou defayans pou kontinyen travay davantaz pou son pei.  E se sa ki devret reste konviksyon pli enportan pou retire ler ou pe ekout nou ozordi e ler ou analiz sa sityasyon an antye.

Mr Deputy Speaker, dan:-pandan letan ki Perseverance ti pe ganny devlope, mon oule zis tras en pti pe sa parkour dan lafason ki mon’n vwar li, dan lafason ki mon’n vwar li ganny enterprete.  Mon krwar nou tou nou rapel tre byen ki ti annan en serten moman, ti annan en kantite kritik negativ sorti kot sa bann menm dimoun ozordi ki pe al Perseverance pou al rod sa bann menm vot, pou al rod sa bann menm sipor kot sa bann dimoun ki zot menm zot, zot pa ti anvi sa bann dimoun ganny sa landrwa pou zot reste ozordi.  Fodre nou dir sa, akoz si Gouvernman ti’n ekout sa bann kritik, nou pa ti pou’n fer Perseverance.  E parey entervenan avan mwan in dir, i kler ki ou bezwen mazinen poudir sa dimoun ki pe vin devan ou ozordi pe dir ou poudir parti Lepep pa’n travay pou sa pei.  Mazin byen poudir si pa pati Lepep ki ti’n travay e nou ti’n ekout sa lot ki’n dir ou nou pa’n travay, nou pa ti pou la ozordi.  E sa i en realite ki ou bezwen fer fas avek.  E nou rapel tre byen ki mannyer zot ti kritik bann konstriksyon ler i pe ganny fer, ti napa keksoz ki pa ti ganny dir e menm avan menm ler ti pe fer konblaz ti annan lakantite kritik ki ti ganny avanse anver konblaz kot ozordi bokou sa bann menm dimoun ki ti kritike pe rod loportinite biznes ki pou annan Perseverance. So, i fer ou fer en analiz profon lo ki kalite politisyen ki nou annan ozordi dan nou pei?  Lekel en politisyen ki pare?  Lekel en leader, plis ki politisyen me en leader ki pare pou stay the course e fer avanse son pei e lekel ki la zis pou vwar problenm dan tou keksoz ki pe arive?  I bezwen ganny dir sa Mr Deputy Speaker, akoz le moman ki Perseverance ti pe ganny konsevwar e devlope, bokou ti kont sa zafer.  E la ozordi ki nou’n vwar, nou’n vwar, nou’n abouti, nou’n nobou akonpli en rev ki nou ti annan se kree en distrik e provide loportinite lozman pou ankor dimoun e ankor dimoun.

E sa i pa setou Mr Deputy Speaker.  Byento nou pou annan devlopman lo Ile Wor ki ankor pou donn loportinite pa zis biznes, me loportinite pou Seselwa kapab ganny son prop lozman.  Le bi se asire ki ou kapab ganny ou prop lakaz.  E tousala i kapab arive Mr Deputy Speaker, akoz nou kapab mentenir stabilite ki nou pei i ladan ozordi e napa lot fason pou fer li.  Si ou pei pa stab, si pou pei i an ger, si napa konsansis, si ou pa kapab fer en plan e reste avek sa plan, ou pa pou kapab akonpli tou sa keksoz.  E ler mon:-e ler nou pe koz lo rezon pou nou vot pour Prezidan Michel, si i annan en rezon fondamantal ki nou bezwen pe mazin lo la.  Se lefe ki sa zonm in nobou mentenir ki sa pei i reste stab e in persevere pou asire ki nou kapab delivre lo bann goal, lo bann lobzektif ki nou’n planifye pou sa pei.  Se sa ki reste le pwen fondamantal Mr Deputy Speaker.

Mr Deputy Speaker, non sa nouvo distrik i dir pour li menm, Perseverance.  En mo Kreol, en tre zoli mo ki montre rezilyans, ki montre determinasyon, ki montre kapasite sa pep, nou pep Seselwa e sa krwayans ki nou dan parti Lepep, sa krwayans ki nou leader, nou Prezidan Mr James Alix Michel i annan pour ki nou pei, nou nasyon i kapab akonpli plis ankor.

Mr Deputy Speaker, mon pou konklir par dir ki demen ler mon’n vye, mon pe asize dan mon fotey e mon pe regard bann liv zistwar, bann liv listwar mon pei, mon pou regarde i pou montre pou lir poudir be 5enm Lasanble ti aprouv proklamasyon pou fer Perseverans vin en distrik.  Malgre petet mon non i ava an pti print, mon ava servi en loop pou mwan gete, mon pou vwar mon non la mwan.  E mon pou konnen poudir mon’n kontribye mwan osi pou fer mon pei.  Mon pa’n kontribye pou fer mon pei, me mon’n kontribye pou fer mon pei avanse.

Mersi Mr Deputy Speaker.

MR DEPUTY SPEAKER

Onorab Pierre.

HON DAVID PIERRE

Mersi Mr Deputy Speaker.

Mr Deputy Speaker, mosyon ki devan nou, i pou nou basically approve sa Draft Order 2015, dan ki Perseverans pe ganny proklanmen koman en distrik.  Mon napa ek problenm ek sa akoz wi, definitivman Perseverance i devret vin en distrik e Perseverance annefe pou enn bann pli gran sip, pli gran distrik dan Sesel.  Me selman sa ki mon ti ava:-sa ki mon ti a kontan dir apre midi i de pti mo pou reponn en pe bann keksoz ki’n ganny dir dan sa Lasanble an relasyon avek sa size la apre midi.  Pli presizeman lo sa size lakaz.  Pour mwan Mr Deputy, koman en zenn dirizan, en parti politik e en parti politik ki ganny reprezante dan Lasanble Nasyonal e en dirizan ki pou met son kandidatir dan eleksyon Prezidansyel ki pe al ganny fer tre byento, mon annan sa pou dir.  Konstitisyon Sesel i donn tou Seselwa en drwa pou annan en lakour, pou annan en lakaz e pour mwan baze lo sa, tou Seselwa, ki se swa ou kouler politik, ki se swa kote ou sorti, ki se swa lekel ou fanmir, ou annan en right pou ou own en lakaz.  E mon konnen poudir i dan lentere pou mwan, i dan lentere, nenport Gouvernman pou provide shelter oubyen pou fasilit provizyon shelter pou son pep, si sa Gouvernman i anvi vwar son pei devlope e bouze.  Akoz mon dir sa Mr Speaker:-Mr Deputy Speaker.  Mon dir sa akoz i lozik, ou pa ni bezwen en eignstin pou ou realize poudir ler ou fasilit provide en shelter, ou pe kontribye pou anmenn stabilite dan ou pei.  Ou pe kontribye pou promot lavi lafanmir.  Ou pe fer sir poudir ou sitwayen i stab enough pou li kapab fer en kontribisyon ver devlopman ekonomik son pei e ver devlopman son fanmir.  Alors koman en Prezidan oubyen koman en dirizan, pour mwan mon vwar li i lozik e i normal pou ou, letan antan ki ou Prezidan, vin avek bann progranm ki pou garanti fasilit en shelter pou ou dimoun.  Mon pa vwar naryen ekstraordiner avek sa e mwan mon konnen poudir sa i en keksoz ki nou dan PDM nou gard li vreman close e aker.

Mr Deputy Speaker, sa size kot bann dirizan Lopozisyon pa devret pe met zot lipye lo Perseverance oubyen devret kanmi pou met zot lipye lo Perseverance, mon krwar ki sa i en Statement ki lepep i a ziz son merit.  Me mwan, mon krwar ki napa okenn restriksyon dan Sesel lo kote en dimoun i kapab ale e kote en dimoun pa kapab ale.  Donk, tou dimoun si i anvi, i annan as a matter of right pou li mont lo Perseverance a any moman ki i anvi, si li i anvi.  Mr Speaker, si i annan okenn Seselwa, okenn Leader parti politik dan sa pei ki’n fer en Statement, o kontrer to devlopman LIle Perseverance, mon santi poudir lepep i ava annan en loportinite pou ziz sa bann dimoun dan eleksyon ki pe vini.

Mr Deputy Speaker, tan ka mwan koman leader PDM e mon repete koman en kandida, koman en dimoun ki pou pronons son lekor koman en kandida dan eleksyon Prezidansyel ki pe vini, mon krwar ki Gouvernman, okenn Gouvernman i reste koman en fasilitater.  En fasilitater ki pou ede garanti ki sak son sitwayen i kapab viv son drwa, son drwa ki Konstitisyon e non pa en parti politik ki donn li.

Mr Speaker, mwan mon believe dan lagrandisman ekonomik, dan lagrandisman lekonomi Sesel.  Mon believe ki sa i kapab arive selman si nou annan en Gouvernman ki konpran, ki pli gran asset ki sa pei i annan, se son pep.  E ki i devret a tou repriz e a toultan pe garanti ki i donn sak son sitwayen sa loportinite pou li devlop son potansyel o maksimonm.  E letan en sitwayen, letan en Seselwa in ganny vre loportinite pou li devlop son kapasite, son potansyel o maksimonm, se la ki i pou dan en pozisyon pou li fer maksimonm kontribisyon ver devlopman ekonomik son pei.  E ler sak sitwayen i kapab fer en kontribisyon maksimonm dan devlopman ekonomik son pei, se la ki son pei pou full fill son potansyel.  Alors pou mwan, i enportan ki sak Seselwa ki se swa ou ete, ki ou parti Lepep, ki ou dan Lopozisyon, ki ou SNP, ki ou PDM, ki ou Lalyans eksetera, ou ganny en posibilite pou viv ou dwa to the full dan nou pei Sesel.

Mr Deputy Speaker, mon krwar poudir the issue of rights i en issue enportan dan nou pei e i en issue ki nou dan PDM nou pou met li koman enn nou priyorite akoz nou anvi ki sak Seselwa i ganny loportinite pou bouze dan tou konteks e anba:-an relasyon ek nou Konstitisyon, an relasyon ek tou bann drwa ki zot gannyen, mon santi poudir nou devret donn Seselwa loportinite e donk mon pou dir ki wi, Ile Perseverance i devret vin koman en distrik, me mon pou egalman dir wi, ki tou Seselwa i devret a toultan a mon’n avi ganny en loportinite pou viv son drwa ganny en lakaz e fer son fanmir dan sa pei Sesel.

Mersi Mr Deputy.

MR DEPUTY SPEAKER

Right of reply Onorab Rose.

HON MARIE-ANTOINETTE ROSE

Mersi Mr Deputy.

Mr Deputy, mon ti a kontan remersi tou bann entervenan apre midi, mon krwar nou’n fer le pwen ki i nesesit:-i neseser ki Perseverance i ganny kree koman en nouvo distrik.  Wi, i pou annan en kantite dimoun ki pou al dan sa distrik.

Mr Deputy, mon ti a kontan servi sa loportinite pou enn fwa pour tou:-mon krwar deba in fer nouvo tournir avek lentervansyon leader Lopozisyon e mon krwar in prezant nou avek en bon loportinite pou adres sa kestyon right, the right to shelter.  Pour:-enn fwa pour tou e mon ti kontan ler Prezidan in dir i annan en kantite dimoun pe kree konfizyon parmi lapopilasyon.  Pour nou enn fwa pour tou met o kler sa bann zafer right anba nou Konstitisyon e separ li avek bann polisi e bann desizyon politik ki en Gouvernman i deside fer.  Mon ti a kontan lir sa lartik Konstitisyon ki koz lo the right to shelter.  Annefe lartik 34 nou konstitisyon i dir The State recognizes:-the State recognizes a right of every citizen to adequate in decent shelter conducive to health and well being and undertakes either directly or through or with the corporation of public or private organization to facilitate the effective realization of this right.  Ok, mon krwar i enportan ki nou rekonnet koman pep Seselwa ki leta Sesel i rekonnet ki en sitwayen i annan drwa pou li al fer son deboury pou li al rod en lakaz either atraver bann fasilite ki Gouvernman i met a dispozisyon ok, oubyen atraver sekter prive.  Me pou sa bann fasilite ganny met an plas Mr Deputy, it’s a choice and it is a political will of the party in power. Sa fodre nou ganny li kler dan latet pep Seselwa Mr Deputy

(Applause)

HON MARIE-ANTOINETTE ROSE

Nou kapab marse avek sa Konstitisyon otour lemonn e bokou pei i annan menm drwa dan zot Konstitisyon otour lemonn.  Me sa drwa pa vo rien si nou sot obor nou, nou al dan bann pei kot dimoun i ankor pe reste obor semen e ki zot osi zot annan en Gouvernman o pouvwar ki rekonnet that same right ki leader Lopozisyon in koz lo la.  Nou pa zis rekonnet sa right Mr Deputy e nou pa zis fasilit sa right.  Nou kree every possible opportunity ki available atraver tou mekanizm posib dan sa pei pou fer sir ki sa right i vin en realite pou otan Seselwa ki posib Mr Deputy.

(Applause)

HON MARIE-ANTOINETTE ROSE

An retour nou pa demann bokou avek sa pep nou, nou demann li pou li osi pran son responsabilite.  Mr Deputy, mon koz pationatly about this subject akoz i pe ariv en lepok ozordi serten parti dan Lopozisyon e taler mon pou demontre ki mannyer zot in fail pep Seselwa, zot pe fer dimoun krwar ki sa Gouvernman i devret donn zot tou e sa pou mon it is call irresponsible politics.  Nou pe vin:-serten dan Lopozisyon pe vin en bann politisyen iresponsab pou fer dimoun krwar ki Gouvernman i drwa zot en lakaz.  San ki zot, zot pran zot responsabilite, san ki zot fer zefor e i annan pei ki ler en zanfan i ne son paran premye keksoz ki i fer i ouver en kont savings dan labank pou fer sir ki ler sa zanfan i ganny 22-23an i annan en lakaz, en twa par lao son latet.  Ok, si i annan pei ki annan homelessness ozordi se akoz zisteman sa parti ki o pouvwar pa’n deside fer sa swa e sa desizyon politik ki parti Lepep in fer depi ler nou’n vin o pouvwar Mr Speaker:-Mr Deputy.

Mr Deputy, leader Lopozisyon i dir nou ki okenn parti o pouvwar i merit fer sa ki nou nou’n fer.  Be ki zot in dir nou e nou i annan:-ou konnen mwan pase i fer 9an mon asiz dan Lasanble.  9 years, almost a decade mon isi dan sa Lasanble e mon’n tann en kantite zistwar ki’n ganny dir konsernan nenport ki parti ki ti pou vin o pouvwar ti pou fer.

Mr Deputy, nou rapel ler Perseverance ti pe ganny kree annou pa bliye i annan dimoun ki ti dir it’s a waste of money, we have economic problem in this country.  Annou al pran sa larzan annou al met dan labank Santral pou nou ganny rezerv.  Ler Perseverance ti pe ganny kree, dimoun isi ti dir it’s a waste of money.  Pep Seselwa note, ler nou ti fer University of Seychelles, i annan dimoun isi dan sa Lasanble ki ti dir Sesel zanmen pou kapab kree en Liniversite, it’s a waste of money, nou dan reform ekonomik, nou pa kapab kree en Liniversite Sesel.  Ler nou ti pe fer Roche Caiman, i annan dimoun ki ti dir be ki kalite lakaz ki nou pe fer si i garenn lapen.  Menm Perseverance ler lakaz ti pe fer, i annan dimoun ki ti dir si nou pou met dimoun lo zil pwason sale.  Nou’n bliye?  Eski nou, nou’n bliye.  Nou, nou pa’n bliye eski pep Seselwa i’n bliye.  Ler Providence ti pe ganny fer, i annan bann dimoun ki ti dir akfer ankor en proze konblaz.  Ler L’Ile Solei ti pe ganny fer, ok, i annan dimoun ki ti dir akfer en proze devlopman L’Ile Solei Anse Aux Pins. Ler konblaz Bel Ombre ti pe ganny fer Mr Deputy, i annan dimoun ki ti dir akfer proze konblaz Bel Ombre.

Mr Depty, ler progranm Young Leaders ti pe ganny fer, i annan dimoun ki ti pe asiz lot kote latab ki ti dir akfer invest dan sa bann Young Leaders, ki nou pou gannyen avek sa bann Young Leaders?  Ozordi plis ki 300 zot in ganny training.

Mr Deputy, nou’n tann en kantite zistwar e ozordi mon pa pou aksepte ki serten dimoun i dir nou nenport ki parti politik pou fer, zot pa ti pou fer akoz zot in deza pronons zot lekor lo la, zot pa’n zanmen krwar ladan.  Ozordi wi, i drwa nenport ki parti politik pou fer son politik kot i anvi.  Me i osi drwa en parti politik pou remind pep Seselwa lo record, lo track record sa bann parti oportinis ki anvi vin o pouvwar e i osi nou drwa koman en parti pou remind dimoun PerseveranceThey have their rights, we have ours.  Zot drwa i fini kot pou nou i komanse e nou pou reklanm sa drwa koman en parti politik pou remind pep Seselwa ki travay ki’n ganny fer par sa Gouvernman ki o pouvwar.  E ozordi legzanp se Perseverance e parey Onorab Pillay in dir, nou pou kontinyen persevere Mr Deputy, nou pou tenir, nou pa large sanmenm sa pou nou Perseverance, this is what it means for us. Nou pou tenir, nou pa pou large e Mr Deputy sa deba ki’n leve apre midi i montre en diferans fondamantal ant parti ki o pouvwar e nenport ki lezot parti ki anvi vin o pouvwar.  I montre en gran diferans ant en parti ki kontinyen travay ver stabilite e progre e devlopman en nasyon e en parti ki asize ki rod tou defo, tou fot, tou keksoz ki al mal, me i pa kapab ozordi prezant en plan serye avek pep Seselwa.

Mr Deputy, sa eleksyon it’s about the well being of the Seychellois nation e sak Seselwa i devret fer en refleksyon.  Sa eleksyon it’s about us. Nou pa la pou fer plezir personn nou, sa eleksyon it’s about nou devlopman personnel e lekel parti ki la ki’n kapab e ki’n prouve ki kapab:-ki’n anmenn nou kot nou ete e ki kapab anmenn nou pli lwen ankor Mr Deputy.  This is a choice that we have to make e mwan mon dir sa avek konviksyon akoz mon annan gran konfyans ki parti Lepep pou ranport laviktwar e en kantite dimoun pou soke dan sa prosen eleksyon

(Applause)

HON MARIE ANTOINETTE ROSE

Avek sa Mr Deputy, mon remersye tou bann entervenan enkli leader Lopozisyon pou fer sa deba bokou pli enteresan ki i ti’n prevwar pou ete e mon swete ganny son sipor lo bann prensip e merit sa mosyon ki devan nou.

Mersi.

MR DEPUTY SPEAKER

Bon, lo sa mosyon nou pran en vot.  Tou Manm ki an faver lev lanmen.  In anim mosyon in ganny aprouve e avek sa Lasanble i ava adjourned, nou pou rezwenn Mardi le 13 Oktob.

(ADJOURNMENT)