::
Home » Verbatim » Verbatim - Third Term 2015 » tuesday-15th-september-2015

tuesday-15th-september-2015

NATIONAL ASSEMBLY OF SEYCHELLES

Tuesday 15th September 2015

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bon.  Bonzour tou bann Manm Onorab.  Bonzour Minis e son delegasyon.  Bonzour tou bann dimoun ki pe ekout nou dan lakour.

Ozordi avek nou, nou annan Minis pour Zafer Sosyal, Devlopman Kominoter, Mr Vincent Meriton, ki vin reponn plizyer Kestyon konsernan son Minister.

Nou ava komanse toudswit avek Kestyon 137 par Onorab Emmanuel Fideria.

HON EMMANUEL FIDERIA

Mersi Mr Speaker.  Bonzour Minis ek ou delegasyon.  Bonzour tou Manm Onorab.  Bonzour tou manm piblik ki a lekout dan lakour, spesyalman zabitan Les Mamelles.

Mr Speaker, eski Minis i kapab enform sa Lasanble, si dan lefitir, zot annan lentansyon atas en Zofisye Sport o nivo rezyon, pou ede dan devlopman sport e osi organiz bann aktivite sportif o nivo distrik, osi rezyonal parey dan bann lannen 90 an montan?  Mersi Mr Speaker.

MINISTER VINCENT MERITON

Mersi Mr Speaker.  Bonzour Mr Speaker.  Bonzour tou Manm Onorab e tou bann dimoun dan lakour ki a lekout.

Mr Speaker, parey mon ti anonse ler mon ti vin Lasanble an Avril 2014 pou reponn en Kestyon lo konsernan devlopman spor dan distrik.  Devlopman spor dan kominote, i enn sa bann pwen santral nou Polisi e Stratezi 2013/2017 ki nou pe met an aplikasyon.  Met en Zofisye Spor o nivo rezyon, i byensir form parti sa Stratezi.  Konsey Nasyonal Pour Spor ki responsab pour enplimant sa stratezi in deza travay lo en plan rezyonal pour devlopman spor e ki nou pe komans enplimante.  Lentansyon se pou annan 9 rezyon.  7 lo Mahe, 1 lo Praslin avek 1 lo La Digue, kot en Zofisye Spor pou baze, pou travay avek bann distrik ki tonm dan sa rezyon respektif.  Sa bann Sant Rezyonal pou Beau Vallon, Ile Perseverance, English River,  Mont Fleuri, Pointe Larue, Anse Royale, Grand Anse Mahe, Praslin avek La Digue.

Mr Speaker, pou lemoman, defi prensipal ki NSC pe fer fas avek se ganny bann Post neseser pou anploy bann Regional Sports Officer ki pro-aktiv, ki kritik pou fer marse sa proze.  Sa bann Regional Sports Officers pou travay avek bann Komite Distrik ki dan zot rezyon.  Mon oule fer kler ki se pa sa Zofisye ki pou vin organiz spor dan bann distrik.  Sa se responsabilite Komite Spor dan distrik.  Sa Zofisye i ava ofer training, ede fer bann plan, ede etablir e sirvey bann standar e fer sir ki devlopman spor pe arive dan bann distrik respektif.  En travay mazer sa Regional Sports Officer se responsab bann Regional Youth Team. Savedir, bann lekip zenn sorti dan bann rezyon.  Sa set en nouvo devlopman ki pou permet annan ase zenn:- bann zenn zwer dan bann diferan disiplin, pou a-limant bann Federasyon lo nivo Nasyonal e fer li fasil pou annan ranplasman e relev kot i neseser dan tou bann Federasyon ek bann Sports.

Mr Speaker, nou ti a apresye, avek ou gidans e sipor tou bann Manm Lasanble Nasyonal, ki dan Bidze 2016, donn nou en sipor pou nou kapab ganny sa bann pozisyon pou nou kapab met sa proze an aplikasyon.  Pou lemoman, nou annan zis en Zofisye Rezyonal Spor ki baze Anse Royale.  Keksoz pe finalize pou annan enn lo La Digue prosennman.  Mersi Mr Speaker.

MR SPEAKER

Okenn siplemanter, Onorab Fideria?

HON EMMANUEL FIDERIA

Wi Mr Speaker.  Mr Speaker, an tan repons Minis, an tan bann rekomandasyon ki progranm Renesans Sosyal ti mete kot i konsern aktivite sportif i en mankman o nivo distrik, eski Minis i kapab dir sa Lasanble, ki dan limedya ki zot pou fer sa Scheme komans marse, met li an aplikasyon e konbyen i ekspekte kout Gouvernman?  Mersi.

MINISTER VINCENT MERITON

Mersi Mr Speaker.

Mr Speaker, parey mon’n nonmen, nou annan en Zofisye ki baze Anse Royale e deza, i pe travay avek bann distrik dan sid, pou kapab form zot, ed zot kapab train bann Coaches zot menm, organiz bann Konpetisyon, bann keksoz de baz, ki pou permet zot kapab annan en platform ki i ava permet depi lekol, depi kominote, kapab idantifye bann talan, anmenn zot dan bann nivo Konpetisyon ki parey mon’n dir, i pou alimant nou bann Federasyon dan bann nivo Nasyonal.

Mr Speaker, mon krwar nou’n swiv lo Televizyon, bann Konpetisyon ki’n ganny fer e deza, fodre dir ki dan Volleyball avek Basketball, nou annan nou 2 lekip zenn.  Enn fiy, enn madanm.  Enn fiy, enn madanm Volleyball, enn fiy, enn madanm Basketball, ki lannen prosenn pou al zwe dan Dezyenm Divizyon e deza, sa i a komans en si ou oule, en prosesis dan Succession Planning si ou kapab dir li dan sport, me sa prosesis relev e ranplasman bann zwer ki aze. I pou kout Gouvernman en pe larzan.  Nou pe prepar nou Bidze pou kapab soumet avek Minister Finans, pou kapab fer sir ki nou kouver saler sa Zofisye, bann depans ki annan pou fer avek bann Lantrennman, bann depans ki annan pou fer avek bann Latelye e serten depans ki annan pou fer avek serten Konpetisyon, an kolaborasyon avek lezot partner ki nou pou bezwen travay avek, si nou oule sa progranm marse.

Mersi Mr Speaker.

MR SPEAKER

Onorab Samson.

HON DEREK SAMSON

Mersi Mr Speaker. Bonzour tou dimoun.

Mr Speaker, mon ti a kontan demann Minis, par lefe ki Anse Royale pe rezouir privilez pou annan en tel Zofisye, eski sa Zofisye i osi annan responsabilite pou gard en serten nivo sirveyans oubyen garanti ki bann fasilite sportif i ganny byen mentenir, i ganny sirveye, pour ki i reste dan bann bon kondisyon e ki zot revi anver performans en tel Zofisye dan distrik Anse Royale?  Mersi bokou.

MINISTER VINCENT MERITON

Mersi Mr Speaker.  Onorab, mersi.

Wi.  Sa Zofisye i annan en serten nivo responsabilite pou sirvey bann lenfrastriktir.  Nou partaz serten responsabilite avek lezot Lazans.  Par egzanp, avek Liniversite Sesel.  Annefe, fodre dir ki nou pe travay an etrwat kolaborasyon.  I annan bann Kort Tenis, i annan sa laplenn, i annan track ki nou oule fer, i annan Kort Volleyball ek Basketball. Tousala, i annan plan pou nou kapab elev son nivo.  Me parey ou Kestyon pe endike ki once ki nou’n fer serten lenvestisman, i pou bezwen serten nivo mentenans me:-plis ki mentenans, serten sekirite.

Ozordi nou atriste vwar malerezman ki lemoman ou fer en lenvestisman, 6 mwan pli tar, ou bezwen retournen pou al repat sa ki ou’n ganny fer.  Sa menm fasilite ki devret servi koman en platform pou anmenn dimoun ansanm, pou nou depans nou lenerzi dan en bon fason, pou pas en mesaz la tolerans, konvivyalite, fraternite e an bonn sante, i vin en refleksyon ki mannyer serten dimoun i deside viv son lavi dan en fason negativ e enplike dan en kantite bandisite e vandalizm ki malerezman i kout nou en kantite.  So, wi.  Nou pou travay an kolaborasyon avek lezot Lazans, avek lezot partner, me mon pe anvoy en mesaz pour piblik ki annou pran konsyans ki sa lenvestisman ki nou fer dan bann fasilite sportif, sa bann lenvestisman ki nou fer pou nou repar bann fasilite sportif, pou met a dispozisyon popilasyon, i en lenvestisman ki nou pa oule krwar i zis en depans initil, ki sa larzan ti’n kapab servi pour Lasante oubyen pour Ledikasyon, ki zis nou pe zete.  Nou pe demann dimoun an zeneral, pou apresye, proteze zot menm e servi byen sa bann fasilite.  Si ou oule, devlop sa sans apartenans lo nivo piblik, pou fer sir ki ler mon’n depans R100 mil dizon Anse Royale, mon pa bezwen retournen dan pti proze, me ki nou kapab depans sa larzan en lot landrwa.  Takamaka, Beau Vallon oubyen La Digue.

E i raport avek NSC, me osi nou travay an etrwat kolaborasyon avek Lotorite Distrik, akoz i en partenarya soutenab ki nou bezwen asire akoz tou dimoun i enplike ladan.

Mersi Mr Speaker.

MR SPEAKER

Onorab Pillay.

HON SEBASTIEN PILLAY

Mersi Mr Speaker.  Bonzour Mr Speaker, bonzour Minis e bonzour tou dimoun a lekout.

Mr Speaker, mon ti a kontan demann Minis, ki rol bann Federasyon Spor respektif pou zwe an relasyon avek anmenn sport lo nivo distrik? E ki mannyer son Minister pe ankouraz  bann Federasyon, oubyen National Sports Council pou travay an partenarya avek Minister Ledikasyon, pou efektivman travay lo en progranm idantifikasyon bann sportsmen tre zenn, letan zot lo nivo lekol?

Mersi.

MINISTER VINCENT MERITON

Mersi Mr Speaker.

Efektivman, Federasyon li son rol, nou pou konekte avek li ler i annan bann lansennyman teknik, ler i annan bann formasyon teknik ki bezwen ganny fer, dizon dan Basketball, lo kestyon refri, lo kestyon organiz serten aktivite.  I pou atraver tou bann Federasyon.  E annefe, i annan 5 Federasyon ki nou pe prioritize lo nivo Nasyonal, me sa Zofisye ki baze lo nivo rezyon pou diskite avek sa rezyon, pou zot idantifye lekel spor ki zot oule pran e an konsekan de sa, etablir bann kolaborasyon avek bann Federasyon, ki ava ed nou.  Zot annan sa konpetans teknik pou ed nou dan bann domenn ki mon’n dir.  Me osi, nou travay an etrwat kolaborasyon avek Minister Ledikasyon, pou gete ki mannyer nou kapab os nivo konpetans nou bann PETeacher’s.  Mon fek sorti La Reunion e nou’n tonm dakor.  Mon’n deza diskit avek Minis Ledikasyon, avek CEO NSC, avek mon PS ki la, lo en serten lankadreman ki nou pou annan avek La Reunion, pou nou kapab fer en etat de lieu nou bann PE Teacher’s akoz zot kle.  Zot rol dan lavi.  Pa zis dan spor, zot rol dan lavi e devlopman en zenn, en zanfan, i enportan akoz se zot ki devlop serten sikomotrisite, serten valer spor dan lavi e gete e devlop dan zot serten posibilite pou zot ganny zot talan e idantifye ki apre bann lezot progranm, i kapab pran sa, bers li e alimant nou bann Federasyon parey mon’n dir e fer bann talan briye pour Sesel me pa zis sa, permet ki dimoun i viv an bonn sante.  Viv an bonn sante i enportan e spor i en veikil, en platform ki kapab permet nou fer li akoz mazinen, 60 poursan nou popilasyon i swa overweight oubyen i obese, so nou oule komans dan lekol kot i tre enportan ki nou bann manrmay i annan labitid fer spor, pran letan pou zot kapab depanse dan bann aktivite fizik e lwazir.  I annan en bon kolaborasyon depi ant Minister Ledikasyon, mon Minister, NSC, avek bann Federasyon, pou fer sa arive.

Mersi Mr Speaker.

MR SPEAKER

Kestyon 138, Onorab David Pierre.

HON DAVID PIERRE

Mersi Mr Speaker.  Bonzour Minis avek ou delegasyon.  Bonzour tou Manm koleg Onorab e bonzour tou bann ki a lekout.

Mr Speaker, eski Minis i kapab dir avek sa Lasanble si son Minister i annan plan irzan pou rekonstrir Laplenn Foutbol Union Vale e get posibilite konstrir en Kort Basketball/Volleyball dan sa rezyon?  Mersi Mr Speaker.

MINISTER VINCENT MERITON

Mr Speaker, mersi.  Mr Speaker, koman enn son priyorite pour lannen 2015, Lotorite Distrik English River ti idantifye travay renovasyon lo sa pti Laplenn e sa Kort, koman enn son bann proze, dan son pti proze 2015.  Mon ti a kontan enform saLasanble ki Kontrakter in deza mont lo teren, in deza fer serten travay clearing e nou pe al fence sa Laplenn, nou pe al fence sa Kort e pe al met en lot sirfas lo

Kort.

Mersi Mr Speaker.

MR SPEAKER

Okenn siplemanter?

HON DAVID PIERRE

Mersi Mr Speaker.  Mr Speaker, eski Minis i kapab eksplik sa Lasanble si zot annan en sistenm efikas an plas, kot zot kapab ekoute e reponn a bezwen e demann bann zenn dan sa rezyon e dan English River an zeneral, dan en fason vitman e efikas?  Mersi Mr Speaker.

MINISTER VINCENT MERITON

Mr Speaker, si nou la ozordi se akoz nou kapasite apresye, idantifye e reponn bezwen zenn, zanfan, dimoun pli aze, nou bann dimoun ek dezabilite ek nou popilasyon an zeneral.  Si ozordi nou’n kapab ariv sa nivo devlopman Onorab, se akoz nou kapasite i kapab pran sa, tradwir li envestir nou Bidze ki nou ti kapab depans otreman, me nou depans dan dimoun i fer marse e nou reste ankor fidel 38an apre.  Nou reste fidel avek nou Polisi ‘Met zonm o sant devlopman.’  Mersi Mr Speaker.

(Applause)

MR SPEAKER

Onorab Vidot.

HON KEVIN VIDOT

Mersi e bonzour Mr Speaker. Bonzour tou dimoun ki a lekout.

Mr Speaker, eski Minis i kapab dir sa Lasanble e zabitan English River, sirtou nou bann zenn English River, ki nou Gouvernman pe fer ase pou zot, sa extend Parcel H7893 ki ti’n sipoze earmark pou fer nou Multi Purpose Court, ki plan Gouvernman dan sa fitir 4an ou 5an, pou kapab met en Kort Basketball/Volleyball e anpese ki kekfwa MLUH i pran pou allocate kekfwa pour Residential Area? Mersi bokou.

MR SPEAKER

Sa Kestyon pe lev en nouvo size, ek en Plot.  Non, be oli sa Plot Number ki:- Minis ou okouran sa Plot Number?

MINISTER VINCENT MERITON

Mr Speaker, mon pa okouran sa Plot Number spesifik, me selman mon kapab donn larepons dan lankadreman plan devlopman an zeneral.  Si ou permet Mr Speaker.

MR SPEAKER

Ok.

MINISTER VINCENT MERITON

Mr Speaker, parey mon’n dir, Manm Onorab isi e Lasanble, in zwe en rol enportan dan devlopman 2 keksoz.  2 gran plan Nasyonal.  Nou plan stratezik avek nou plan pour devlopman Greater Victoria Master Plan.  E ladan, tou bann partner, tou bann stake holders in ganny sans kontribye.  Ti annan bann charette ki ti ganny fer lo nivo Nasyonal, kot popilasyon in ganny sans vwar sa bann plan an egzibit MLUH avek Orion Mall e kot tou bann bezwen, bann demann, i ganny mete dan en plan konpreansiv ki pou permet ki nou kapab fer bann fasilite otour bann pwen santral kot dimoun i rankontre, kot dimoun i converge, pou permet ki nou pe servi resours byen.  Mazinen nou resours i pti gin.  Fodre nou gete ki mannyer nou depans li pli byen.

E Onorab, plan ki ou pe dir i ava ganny pran an konsiderasyon lo bann:- e kot nou oule fer, parey mon’n nonm sa 7 sant taler la dan lot Kestyon, se nou oule kapab optimis bann sit kot fasilite sportif i annan, me pa negliz bann pti kwen kot nou kapab met en Basketball ring, kot nou kapab met en pti Laplenn, en pti Kort, pou fer sir ki dan proksimite vwazinaz, i annan en platform pou manrmay kapab fer sa.

So, dan sa loptik, nou ava pran sa osi Onorab e nou ava fer bann travay neseser lo la.

Mersi Mr Speaker.

MR SPEAKER

Kestyon nimero 139, Onorab David Pierre.

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble si son Minister i annan okenn plan pou konstrir en Halfway Home pour bann zenn dan Vilaz Prezidan, ki’n ganny 18an?  Mersi Mr Speaker.

MINISTER VINCENT MERITON

Mersi Mr Speaker.  Mr Speaker, pou lemoman, mon Minister pa santi ki i annan en tel demann.  Nou priyorite se pou adres bezwen bann zenn ek bann zanfan, ki pe fer fas ek bann sityasyon difisil, tel ki konportman endezirab anti-sosyal.  Pandan sa 6 dernyen lannen, depi 2009 ziska 2014, in annan 5 ka kot zanfan in dan Lenstitisyon ziska laz 18an.  Sa ti senpleman akoz fanmir ki zot ti pou ganny entegre avek, pa ti ankor fini organiz lozman, pou kapab repran zot.  Nou’n napa ka kot en zanfan in reste dan Lenstitisyon, apre ki in ganny 18an, akoz in napa landrwa pou li ale.

Plan re-entegrasyon Mr Speaker.  Plan re-entegrasyon en zanfan i komans le moman ki i ganny plase dan sa Lenstitisyon e sa, en prosesis kontinyel.  I annan bokou travay ki ganny fer avek tou manm fanmir, si sa paran biolozik pa kapab repran son zanfan.  Kantite zanfan ki reste dan Lenstitisyon i varye e sak ka i diferan.  I annan ki a kourt term, i annan ki a long term.  Pou lemoman, nou annan 71 zanfan dan Lenstitisyon.  Foyer de Nazareth i annan 9, Ste Elizabeth i annan 12 e Vilaz Prezidan i annan 71.

Mr Speaker, o fir e anmezir:- Pardon.  Vilaz Prezidan i annan 50.  Ekskiz mwan.  Vilaz Prezidan i annan 50 e total i 71.  Pe tro taye.

O fir e anmezir ki sityasyon lakour i amelyore ou en manm fanmir i ganny idantifye e i pare pou pran sa zanfan, zanfan i ganny prepare pou li ganny entegre avek sa fanmir.  I annan plizyer rankont, vizit pou fer, adaptasyon, avan ki finalman Servis Sosyal i aprouve ki sa zanfan i kit Lenstitisyon.

Permet mwan donn en pe bann statistik lo ki kantite zanfan ki’n viv en pe letan dan Lenstitisyon e ki’n ganny re entegre dan lafanmir.

Depi 2009 ziska 2015, bann Fwaye in eberge 127 zanfan.  127 zanfan depi 2009 ziska 2015.  E zot in ganny re entegre dan zot fanmir avek led Servis Sosyal e lezot partner.

2015 ziska 27 Out, 21 zanfan in ganny re entegre.  12 ladan sorti Vilaz Prezidan, 4 sorti Foyer de Nazareth e 5 sorti Ste Elizabeth.

2014, ankor ti annan 21.  Vilaz Prezidan ti annan 13, Foyer de Nazareth ti annan 1 e Kouvan Ste Elizabeth ti annan 7.

2013, ti annan 20 zanfan ki ti ganny re entegre.  Vilaz Prezidan ti annan 10, Foyer de Nazareth ti annan 6, Kouvan Ste Elizabeth ti annan 4.

2012, ti annan 10 ki ti ganny re entegre. 4 sorti Vilaz Prezidan, 2 sorti Foyer de Nazareth e 4 sorti Kouvan Ste Elizabeth.

2011 ti annan 16.  Vilaz Prezidan ti annan 12, ti napa sorti Foyer de Nazareth e Ste Elizabeth ti annan 4.

2010 ti annan 18.  Vilaz Prezidan ti annan 14, Foyer de Nazareth ti annan 2 e Kouvan Ste Elizabeth ti annan 2.

E 2009, 21.  Vilaz Prezidan ti annan 11, Foyer de Nazareth ti annan 7 e Kouvan Ste Elizabeth ti annan 3, ki fer en total 127.

Mersi Mr Speaker.

MR SPEAKER

Onorab?

HON DAVID PIERRE

Mersi Mr Speaker. Mr Speaker, eski Minis i kapab dir avek sa Lasanble si an prensip, zot annan en progranm followup an plas e si wi, eski Minis i kapab donn nou detay e donn nou bann statistics spesifik an relasyon ek sa size e an relasyon avek plasman lanplwa, apre ki sa bann dimoun in kit Vilaz Prezidan?

Mersi Mr Speaker.

MINISTER VINCENT MERITON

Mr Speaker, mon napa lenformasyon lo plasman lanplwa be mon kapab reasir ou ki i annan ki pe byen fer.  I annan ki travay dan Lapolis, Lafors Disipliner, ki pe travay dan lezot landrwa, ki’n komans form zot fanmir e zot pe zwe en rol enportan dan sosyete.  I annan en zenn garson ki’n fer nou fyer.  In anmenn Meday pour spor e sa i rezilta sikse travay ki nou bann Lazans in fer avek sa bann manrmay.  Mon’n dir taler.  Depi ler zot antre dan Vilaz, depi ler zot antre dan Fwaye, travay re entegrasyon i komanse atraver vizit, atraver letid zot konportman, atraver vizit lekol, vizit ek zot paran, zot fanmir kot zot sorti e osi avek lezot manm fanmir ki enplike, ki nou kapab ede par ler, ler i annan serten difikilte.

Kot i annan difikilte, kot i annan serten difikilte, nou travay osi avek sistenm Fostering.  Bann fanmir ki’n anrezistre pou pran bann zanfan sorti dan bann Fwaye. Me i pran bann prosesis vizit, adaptasyon, gete ki mannyer fanmir i aksepte sa manrmay.  Ki mannyer sa zanfan i aksepte sa fanmir, gete ki mannyer paran, reaksyon anver sa.  So, en bann diskisyon ki pran plas, ki petet nou pa vwar li lo sirfas, be en ta travay pe ganny fer, pou asire ki sa zanfan i viv. I viv en lavi normal, ki nou pa viv pou li.  Me ki i viv en lavi normal e nou annan en swivi de 3 a 12 mwan apre ki sa zanfan i kit Fwaye.

Mersi Mr Speaker.

(Technical Problem)

HON SULTANE JACQUELINE

Mersi Mr Speaker.  Mr Speaker, eski Minis i kapab eksplik sa Lasanble, ki plan Gouvernman i annan pour bann zanfan 18an ki kit Fwaye, ki ankor pe etidye, ki depi en tre zenn az, zot lanfans, pti baba in lo Vilaz, Vilaz in zot lakour vreman, ki pe vwar li an difikilte pou adapte zot dan sa landrwa kot zot in al reste, kot fanmir oubyen Fwaye.  Ki sipor swivi ki Gouvernman pe anvizaze met an plas pou donn lankourazman sa bann zanfan pou kontinyen dan zot devlopman?

Mersi Mr Speaker.

MINISTER VINCENT MERITON

Mersi Mr Speaker.  Mr Speaker, laplipar bann zanfan ki mon’n nonmen taler, i re entegre dan fanmir, la kot zot ganny ankadre, antoure par swen, lanmour e proteksyon parey i leka dan bann fanmir, me si i annan ka, nou’n deza travay avek lezot lenstans Gouvernman.  Par egzanp Minister Ledikasyon, dan Youth Hostel.  Nou’n deza annan en ka ki nou’n ed en zanfan pou kapab kontiny son letid.

So, Mr Speaker e i form parti sa plan re entegrasyon dan fanmir e si bann ka kot parey Onorab in dir, nou entervenir atraver bann lezot partner, lezot Lazans.

Mersi Mr Speaker.

MR SPEAKER

Kestyon 140, Onorab Melval Dugasse.

HON MELVAL DUGASSE

Mersi Mr Speaker.  Eski Minis i kapab dir nou si in annan en logmantasyon lo kantite larzan ki’n dedye pour bann Federasyon e devlopman sport dan distrik pour sa lannen?

Mersi Mr Speaker.

MINISTER VINCENT MERITON

Mersi Mr Speaker.

Mr Speaker, Bidze Sport pour progranm lokal i reste plizoumwen stab pour sa 2 dernyen 3an.  Me selman, pa anpese ki plizyer milyon an plis in ganny depanse sak lannen, pour bann progranm ki ede amelyor performans nou bann atlet, pou zot al mezir zot lafors lo nivo enternasyonal.

Lo nivo lokal, R3.1 milyon ti ganny depanse an 2014 e R3.2 milyon ti ganny depanse an 2015.

Lo nivo distrik.  Sa ki mon dir lo nivo lokal se bann Federasyon.  E lo nivo distrik.  Lo nivo distrik, i an 2014 i R1.3 milyon e 2015, R1.5 milyon.

Mr Speaker parey zot okouran, plis ki R30 milyon in ganny depanse an plis ki larzan normal, ki bann Federasyon i gannyen pour preparasyon e partisipasyon atlet dan Zwe de Zil e rekonpans bann atlet.  Plizyer milyon Roupi pe osi ganny depanse pour Zwe Lafrik, kot nou bann atlet in fer en pli bon rezilta ki nou’n zanmen konnen dan sa Zwe.

Mr Speaker, avek ou permisyon, zis mon ti a pas lo la en pti kou.

Nou’n ganny nou an tou 4 Meday Lor.  2 dan Weightlifting, 1 dan Badminton e katriyenm dan Atletik. Dernyen yer swar nou ti gannyen dan pti 10er diswar ler Sesel.

Bann atlet i Ruby Malvina, i ti ganny 2 Meday Lor.  E dan Badminton, Juliette Ah-Wan avek Alisen Camille dan Ladies Double Badminton. Lissa Labiche parey mon’n dir, in ganny son Meday Lor, avek en oter 1.91 santimet e 1 met 91 santimet dan sot an oter.

Mr Speaker, nou’n ganny nou 3 Meday Larzan.  2 dan Weight Lifting, avek 1 dan Bokse.  Atlet i Ruby Malvina -1, Clementina Agricole – 1, avek Keddy Agnes ki’n vreman debrouye, be selman sa boug in tay li, pa’n ganny sans tap li bon koudpwen.  E Keddy Agnes in ganny son Larzan.  E tou sa bann Meday, bannla in debrouye, in bataye.  Nou pa ti ankor dir nou dernyen parol apre Zwe de Zil, bannla ti krwar nou’n tonbe.  E la ozordi lo klasman latab Zwe, nou par devan Moris.  Nou ava gete ziska a lafen Zwe, nou a gete ki mannyer nou ete.

(Applause)

MINISTER VINCENT MERITON

Nou pa ankor fini Mr Speaker.  Dan Bronz, nou’n ganny nou 5 Meday.  2 dan Badminton, 2 dan Weightlifting avek 1 dan Naze.  E bann atlet i Clementina Agricole in ganny li 2, Juliette Ah-Wan avek Georgie Cupidon in ganny 1 dan Mix Double Badminton e en lot Meday Bronz pour lekip Badminton ki formen ek bann atlet swivan.  Alisen Camille, Juliette Ah-Wan, Cynthia Course, Steve Malcouzane, Georgie Cupidon avek Kevin Ghislain.  E Alexis Laird in ganny li son Bronz li osi dan 50 met BackstrockSo, an total i fer nou 4 Lor, 3 Larzan avek 5 Bronz.  Imeyer rezilta ki zanmen nou’n gannyen dan Zwe Lafrik.  Donn zot ankor en gro lanmen silvouple.  Mon bat lanmen mwan osi ansanm.

(Applause)

MINISTER VINCENT MERITON

Mr Speaker, Gouvernman i bezwen met larzan avek sa gro lo ki bannla in gannyen e ozordi apre midi, mwan ek mon lekip PS, nou pe al zwenn premye group medaye ki pe arive 4.05 lo Kenya Airways.

Mr Speaker, Bidze pour 2016.  NSC pe fer provizyon pou ogmant sipor finansyel ki nou donn bann Federasyon.  Nou realize i pa ase, me selman, nou pe gete ki mannyer nou kapab donn zot en pti keksoz an plis.  Fodre dir ki malgre Bidze pour progranm lokal i pa bokou, i annan en zefor spesyal ki pe ganny fer par NSC, pou li kapab ed Federasyon dan fason ki i kapab, atraver sipor pour serten konpetisyon ki pa ti’n prevwar, atraver sipor dan en serten proze ki Federasyon, en Federasyon sirtou ki’n fer byen, i vin devan e apros li.

NSC i travay osi avek bann Federasyon, pou kapab ed zot debout lo zot prop lipye, rod bann grant oubyen bann sponsorship dan sport e nou konnen kot zot osi bann Manm Lasanble, zot ed zot bann lekip lokal en kantite e nou demande ki zot osi rod serten sipor atraver lankadreman CSR.

Mersi Mr Speaker.

MR SPEAKER

Uhhhm.  Bon nou annan enn de lanmen la.  Onorab David Payet.

Me selman, ou ti oule en siplemanter, Onorab Dugasse?  Ok.  Onorab Dugasse.

HON MELVAL DUGASSE

Mersi  Mr Speaker.  Minis, baze lo sa bann bon rezilta e avek bi kontinyen re oriyant devlopman sport, sirtou pour bann zenn, eski ou Minister i annan lentansyon travay an partenarya ek Sekter Prive, pou kapab ganny plis resours finansyel pour bann Klib Sportif e Federasyon?

Eski Minis i kapab dir nou osi, konbyen Lekip ou Klib ki pe deza resevwar larzan avek ou Minister?

MINISTER VINCENT MERITON

Mersi Mr Speaker.  Mr Speaker, dan nou plan devlopman spor 2013-2017, finansman i en pwen enportan e Sekter Prive, en partner endispansab e en partner fidel ki nou travay an etrwat kolaborasyon avek.  Ou a remarke, an 2011 nou ti ganny sipor san kondisyon sorti dan Sekter Prive e sa lannen osi pour Zwe de Zil, i annan Sekter Prive ki’n vin devan pou kontribye, pou fer sir ki tou keksoz i al byen.  E nou pe devlop:- nou pe ansanm avek zot, gete ki mannyer nou kapab etablir en meyer fason pou nou kapab ganny finansman avek Sekter Prive.  En nouvo fason dan le sans ki Sekter Prive i kapab vwar son lenvestisman, swiv sa bann dimoun ki i travay avek e vwar rezilta.  E osi, gete ki mannyer nou kapab anbelir nou baz sportif lo nivo distrik, ki i pou permet ki plis dimoun i vin dan spor, i pli konpran, i kapab anmenn plis valer dan nou kominote, dan son fanmir e ou annan mwens malez sosyal ki pou afekte devlopman biznes, ki pou afekte kapasite sa dimoun dan Sekter Prive, pou li kontribye dan spor.

So, nou oule servi spor koman en leavrage.  En lot fason ki mannyer nou kapab anmenn plis stabilite dan kominote e dan en serten sans, i ava en partenarya ganyan, ganyan.  Byensir, nou travay ek bann Federasyon e nou’n donn sipor 31 Federasyon si mon pa tronpe.  31 Federasyon, akoz i annan 31 zot ki egziste, ki’n anrezistre avek NSC.

Mersi Mr Speaker.

MR SPEAKER

Onorab Payet.

HON DAVID PAYET

Mersi Mr Speaker.  Bonzour tou dimoun.

Mr Speaker, vi ki konmela nou swiv prensip Performance Budgeting, eski Minis i kapab enform sa Lasanble si logmantasyon larzan pour bann Federasyon Sportif i osi baze lo menm prensip e si wi, si son Minister in met an plas bann kriter, pou mezir performans en disiplin sportif, oubyen en Federasyon Sportif?  Mersi Mr Speaker.

MINISTER VINCENT MERITON

Mersi Mr Speaker.  Annefe, CEO NSC i pe travay lo en progranm, en lankadreman, en framework ki pou permet apard en pti larzan de baz ki nou ava donn bann Federasyon, ki nou a donn en lot prim baze lo performans sa bann Federasyon.  Sa nou pe fer li, avek lobzektif pou pous bann Federasyon, pou pous zot bann Klib, pou pous zot bann atlet, pou kapab donn pli bon rezilta, pou nou fer bokou pli byen dan lavenir.  Mazinen, yer swar nou bann ki pa ti ankor dormi dan 10er ekek diswar, ti pe gete ki mannyer Lissa ti pe bat en Nigerian.  Pli gran pei Lafrik, avek 178 milyon.  Nou pa ni en santyenm sa pei e pourtan nou pe bat zot.  E nou bat zot byen.

So, i montre ou ki nou annan abilite pou nou kapab fer bokou pli byen ki sa.  Zis nou bezwen fit nou bann fason fer keksoz.  Re-tool, re-skill fason ki mannyer nou travay ek nou bann atlet, depi paran, Federasyon, Gouvernman, Sekter Prive ek bann lantouraz sportif.  Annou tir le meyer dan nou zenn e fer sir ki nou mark i pa zis reste lo Kontinan Lafrik, me nou al odela sa.

So, wi.  I annan en travay spesifik tre teknik ki pe ganny fer lo nivo NSC pou kapab get sa.  Me Onorab, pou nou kapab arive fer sa, nou pe bezwen reget fason ki mannyer nou pe get lasyans sportif.  Nou bezwen bann Sikolog ki pou get leta mantal, leta sikolozik nou bann sportif.  Ou pa kapab ler ou pe al compete, pe mazinen ki mannyer ou piti i reste deryer.  Nou donn en pti larzan par kote sa.  Nou pa kapab ler ou pe al compete, ou pe gete ki pe arive avek ou partner deryer.  Nou bezwen fer sir tou keksoz i annord.  Ou pa kapab ler ou pe al compete, i mank ou en soulye.  Oubyen i mank ou ponm, oubyen juice, oubyen delo.  Tou sa bann pti detay i fer diferans ant Bronz ek Larzan, oubyen ek Larzan ek Lor.  Nou bezwen get tou sa bann pti detay e i pe kout nou resours pou nou kapab envestir ladan, so i ava ed nou osi kapab amelyor sa PPBB, ki i kapab aplike osi dan spor.

Mersi Mr Speaker.

MR SPEAKER

E fodre dir Minis, nou osi pli pti pei dan Lafrik, kont pli gro pei Lafrik, en.  Mon krwar sa enn nou bezwen en lanmen pour Minis, pour en tel.

(Applause)

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker.  Mr Speaker, si ou permet mwan, mon ti a kontan lo kote mazorite dan Lasanble, kote Parti Lepep, pou felisit nou bann atlet e eksprim nou lapresyasyon e sipor pour sa bann bon performans ki zot pe fer e nou kontan ki tou-le-z-an nou kontinyelman vot pour Bidze, pou soutenir bann proze devlopman sportif lo nivo Nasyonal.

(Interruption)

MR SPEAKER

Kestyon aprezan, Kestyon.

HON MARIE-ANTOINETTE ROSE

Mr Speaker, mon Kestyon i de-koul lo sa dernyen larepons ki Minis in donnen, ki nou kontinyelman fer pou soutenir bann highlevel, en bann highperforming athletes, ki zot pa selman reste lo nivo Losean Endyen e lo nivo Lafrik, me ki prezan Sesel nou al lo nivo Olenpik e lo nivo mondyal?

Mersi Mr Speaker

MINISTER VINCENT MERITON

Mr Speaker, mersi.  Pou fasilit training nou bann zenn, i annan diferan mwayen ki nou servi.  Bann zenn ki nou santi i annan talan pou kapab ariv lo nivo pli o, NSC i pran zot dan lankadreman en progranm Lakademi Sports ki nou pe fer.  Nou donn zot en pti larzan pou zot kapab fer 2 bout zwenn, nou donn zot lespas e loportinite pou zot kapab train.  An menm tan, nou santi ki si nou oule fer en perse lo nivo enternasyonal.  I enportan ki nou donn plis nou bann atlet exposure.  Konpetisyon enternasyonal.  Pa zis dan larezyon me osi odela.

Tar lannen pase, nou ti anvoy nou 2 zenn atlet Seselwa fer en tes ASPAI Academy, Qatar.  E toulede in sorti byen, avek zot bann statistik dan spor.  So, i montre ou ki si ou donn zot bann potansyel, nou kapab devlope.  E enn ant sa zenn ki’n tournen apre, in sot li 2 met 10.  En zenn Praslin, in sot li 2 met 10.  Zis 15an, i pe al ganny 16an la.  Savedir potansyel i annan e nou pe get bann loportinite kot nou ti kapab plas li deor lo en plan pli long term pou li kapab etidye e fer son sport, pou li kapab benny dan sa lespri konpetisyon ki vreman, vreman for, ki vreman dir, pou zot konpran ki ler ou sorti, ou sorti pou zis gannyen e ki disiplin i enportan.

So, i annan lezot laspe.  Get dan Volleyball.  Nou’n kapab plas serten nou bann zwer aletranze e malgre nou lekip Volleyball madanm in sorti katriyenm Zwe Lafrik, zot in lager, zot in lager lebra kase kont kouran koupe e kont bann zean Lafrik, me ki malerezman ler ou annan bann zwer ki pli gran ki ou Mr Speaker.  Ler ou annan bann zwer konmsi ki, ou annan ou tou le 12 zwer ki vreman profesyonnel, nou vreman, nou bezwen kapab lager pou nou kapab fer plis forse lo nivo Kontinan e lo nivo enternasyonal.

Mersi Mr Speaker.

MR SPEAKER

Bon, nou a pran Kestyon ……  Ou ti oule senpleman felisit bann sportsmen, lo lapar Lopozisyon?

Non, non.  Zis felisite, setou en.

HON DAVID PIERRE

Napa Kestyon?

MR SPEAKER

Non, non, non, non.  Zis felisite.

HON DAVID PIERRE

Then, mersi Mr Speaker.  Mr Speaker, definitivman mon oule azout mon lavwa e felisit tou bann atlet ki’n al pran par lo non Sesel dan Konpetisyon enternasyonal.  Pour Zwe de Zil e pour Lafrik, sirtou bann Medaye, osi byen ki bann Coach. Felisitasyon pour zot.  Mersi Mr Speaker.

MR SPEAKER

Bon, tre byen.  Kestyon 141, Onorab Maria Payet-Marie.

HON MARIA PAYET-MARIE

Mersi Mr Speaker.  Avek bi pou ankouraz plis dimoun pou fer plis legzersis, eski Minis responsab pour Spor i kapab enform nou Lasanble, si i dan plan son Minister pou konsider elev nivo oubyen upgradeFitness Trail Roche Caiman e si i dan plan son Minister pou met an plas en lot Fitness Trail lo Mahe?  Mersi Mr Speaker.

MINISTER VINCENT MERITON

Mersi Mr Speaker.

Mr Speaker, tou le-z-an, i lo plan NSC pou fer renovasyon lo FitnessTrail.  I annan letan ki travay i konsantre lo tir bann rasin e bous bann trou lo Trail.  I annan letan ki travay i konsantre lo ranplas bann Bord Lenstriksyon, bann siny ki ganny vandalize malerezman bokou e souvan.

Mr Speaker, fodre note ki pa tou travay lo Fitness Trail ki tonm anba NSC.  LWMA i en partner ki nou travay avek ek zot responsab pou asire ki FitnessTrail i reste prop e ki bann pye dibwa e fler i ganny byen mentenir.

Mr Speaker, NSC pe planifye pou fer travay renovasyon mazer lo FitnessTrail e sa pou enkli lenstalasyon nouvo stasyon ki pou kapab kontinyen atir dimoun lo la.  Nou pou travay an kolaborasyon avek bann partner prive, pou kapab ganny sipor finansyel pou fer sa bann renovasyon.  Nou kontan pou note ki deza annan bokou ki pe montre lentere.

Mr Speaker, enn parmi bann nouvo eleman ki NSC avek Minister Lasante pe travay lo la, se pou annan en laranzman ki bann dimoun ki pe vin lo Fitness Trail e lezot dimoun ankor, kapab vwar en Zofisye Medikal, pou fer bann Tes e ganny bann konsey lo zot lasante, dan sa zoli lakaz obor NSC Hall.  Sa pou osi form parti en nouvo eleman lo Fitness Trail.

Mr Speaker, NSC i annan plan pou demark lezot Fitness Trail kot i posib, dan tou bann rezyon, letan mwayen i permet, pou anmenn servis pli pre avek la popilasyon.

Mr Speaker, NSC pou osi travay avek lezot progranm, pou met an valer, lezot landrwa ki kapab ganny servi san bezwen fer gran amelyorasyon lo teren. Legzanp Mr Speaker, se Vallee de Mai, Praslin, ki enn bann parmi pli zoli Trail dan pei, ki nou kapab met an valer.  Nou pou, an kolaborasyon avek Lotorite Vallee de Mai, Ladministrasyon Distrik sa 2 distrik, bann Lotel, met bann siny lo bann parkour, met bann pwen kot nou kapab ganny en zoli view e osi bann landrwa kot zot kapab fer bann yoga e osi konn ou kilometraz, konbyen ki ou’n marse, afen ki dimoun i kapab an menm tan fer en pe spor, an menm tan apresye sa Zarden Inik o monn ki nou annan.

Mr Speaker, mon ti a kontan dir sa Lasanble ki NSC in fini zwenn ek tou bann partner parey mon’n dir e tre byento nou pe al met sa proze an aplikasyon.

Me Mr Speaker, fodre dir ki pa zis Fitness Trail ki ankouraz dimoun reste dan bann progranm dan distrik ki vize ver bann zenn, bann Trwazyenm Az, bann Disable e osi bann randonne.  Ler ou marse dan bwa, ou mont bann

hike, bann Trail e tou dernyen-man ti fer enn sorti Intendance pou al Basen Diri.  Nou ti fer dan 2 semenn pase e sa, tou le mwan i annan en Trail ki nou swazir lo Mahe, Praslin oubyen La Digue e apre, tou le 3 mwan, i annan en randonne ki pli entansif lo nivo fizik.  Nou apel sa en Challenge.  E dernyen ki nou ti fer i Cascade, ou pas anler dan bwa.  Pa dan semen.  Cascade, ou tonm Anse Boileau.

So, Mr Speaker, i annan osi spor bann Lorganizasyon.  Anmezir ki nou pe koze la dan Lasanble, bann Zofisye NSC pe diskite, pe ed Lotel Lemuria organiz son Sports Day.  E an plis ki sa, tou le Vandredi i annan bann Lorganizasyon spor ki partisip dan bann konpetisyon antre Lorganizasyon kot Mont Fleuri SportsComplex e nou pe al osi travay avek Baie Ste avek grand Anse e La Digue, pou nou kapab anmenn spor plis lo nivo landrwa travay e kominote.

Mr Speaker, nou oule osi demark bann Fitness Trail, par egzanp Ile Perseverance, en landrwa ideal.  Nou’n an diskisyon avek Minister MLUH, pou nou annan en lespas ki dimoun i kapab marse, kapab taye.  Ankor la, pou anmenn sa lespri viv an bonn sante avek lanatir, avek nou vwazinaz.

Mersi Mr Speaker.

MR SPEAKER

Onorab Marie, okenn siplemanter?

HON MARIA PAYET-MARIE

Wi Mr Speaker, mersi.  Mr Speaker, Minis in koz lo sipor ki i sipoze gannyen avek bann diferan Sekter, Sekter Prive par egzanp.  E Minis in koz osi lo sa laspe vandalism.  Petet Minis, eski ou pe ganny sipor pou annan plis sirveyans pour benefis nou bann dimoun ki servi Fitness Trail, lo kote sekirite?Mersi Mr Speaker.

MINISTER VINCENT MERITON

Mersi Mr Speaker.  Mr Speaker, wi. Envestir dan en Fitness Trail i enn, me sa laspe sirveyans malerezman i bezwen osi ganny pran an konsiderasyon.  Mon pa oule fer en lasirans devan Lasanble, me selman nou pe travay lo en proze pou nou kapab met lalimyer parkour sa enn Roche Caiman e gete.  Nou pe gete ankor di nou kapab enstal bann camera ki pou kapab sirveye, pou permet ki bann dimoun i vin servi sa fasilite pli an sekirite.

Mersi Mr Speaker.

MR SPEAKER

Onorab Bresson.

HON GALEN BRESSON

Mersi Mr Speaker.  Bonzour tou dimoun.  Mr Speaker, mon ti a kontan konnen.  Eski Minis i kapab eksplik ek sa Lasanble, dan sa progranm desantralizasyon ki ou’n koze lo Fitness Trail, eski zot in deza mazin osi pou:- dan en konsep ki lo nou bann semen kot nou kapab, nou azout en lane, ki nou apel sa:- dan bann bokou pei i annan.  Kot it’s a bicycle lane, osi en lane kot bann dimoun i kapab fer legzersis, prenan an kont ki bokou dimoun i servi nou bann semen ozordi pou keep fit, pou jog, pou marse osi?  Mersi Mr Speaker.

MINISTER VINCENT MERITON

Mersi Mr Speaker.  Annefe, Onorab, mersi.  I en bon lide.  Annefe, i annan bann lezot lide ki’n ganny flote, par egzanp sorti Airport ziska Anvil, an pasan par Highway Cascade.  Ansanm avek SLTA, nou pou bezwen vwar kot bann semen, kot i annan ase lespas, oubyen kot i annan ase bataz pou nou kapab kree en lane pou permet ki bann dimoun i kapab marse, jog, tout an sekirite.  So, nou a get bann lide ki pe ganny flote, nou bezwen etidye li an konsiltasyon avek SLTA e lezot Lazans enplike ladan.

Mersi.

MR SPEAKER

142, Onorab Marc Volcere.

HON MARC VOLCERE

Mersi Mr Speaker.  Bonzour Minis ek ou delegasyon.  Bonzour tou dimoun a lekout.

Mersi Mr Speaker.  Mr Speaker, mon ti a kontan demann Minis, si son Minister i annan okenn progranm oubyen Scheme pou travay avek bann zenn talan sportif ki ganny dekouver lo Praslin, La Digue e osi lo Mahe?  Mersi.

MINISTER VINCENT MERITON

Mersi Mr Speaker.  Mr Speaker, mon krwar ki nou tou nou okouran ki NSC i regard tou talan dan Sesel.  Pou Zwe de Zil, nou ti annan atlet sorti Mahe, Praslin avek La Digue.  E la pou All Africa Games, nou fek koz lo la, i osi annan bann atlet sorti Praslin avek La Digue.  Dek ki en zenn i ganny dekouver, atraver bann Konpetisyon Lekol oubyen otreman, NSC i fer son mye pou ankadre sa zenn.  Legzanp, parey sa zenn garson sorti Praslin ki mon’n nonmen taler, Norris Brioche, ti ganny sans pou li fer en lesey Qatar.  E sa bann zenn, bann zenn talan, i ganny asiste par NSC pou vin Mahe, pou fer training e amwen ki i annan dimoun lo sa zil ki kapab ankadre zot e donn zot training parey dan Judo.

Mr Speaker, fodre osi fer sorti ki ler nou bann zenn:- fodre fer sorti ki ler zot annan talan, zot pa les zot ganny move lenfliyans, oubyen tonm dan bann pratik negativ.  Fodre ki tou dimoun i ede ankouraz sa bann zenn, pran zot training o serye e gid zot dan zot lavi.  Malerezman i annan serten bann atlet ki ganny move lenfliyans.  Avan en serten Konpetisyon Enternasyonal, mon ti koz avek en serten dimoun pou les son partner vin partisip dan Zwe.  Bann problenm sosyal parler petet parler, i permet ou perdi detrwa Meday Lor, en legzanp.  Nou osi aprann ki avan en Konpetisyon, i annan en dimoun ti ganny take dan lakaz, pou anpes li kit pei.  Nou pa kapab mazin sa, pa vre?  Ki mannyer en talan pour Sesel, ti a fer Sesel fyer. En dimoun pour en kestyon personnel, i kapab fer sa.

So, i annan en kantite keksoz ki nou bezwen kapab gete ki mannyer nou kapab bers nou bann atlet, ankadre zot.  Fodre pa ki nou bann atlet i ganny abize.  Tousala bann keksoz ki malerezman i arive e ou bezwen pe tou lazournen pe tay avek NSC, Federasyon, Sosyal, pou gete ki mannyer nou kapab donn sa zenn ki pe donn son letan pour son pei, fer sir ki i fer son spor an sekirite.

Mr Speaker, pou kapab fer bokou plis ler sa bann Regional Sports Centres i vin an plas, ki mon’n koz lo la pli boner, nou a kapab fer sir ki sa bann keksoz i devlope.  Nou kapab idantifye bann talan e anmenn zot lo pli o nivo ki posib.

Mersi Mr Speaker.

MR SPEAKER

Onorab Volcere, okenn siplemanter?

HON MARC VOLCERE

Wi Mr Speaker.  Mr Speaker premyerman mon ti a kontan demann Minis, a ki laz zot komans pran sa bann zenn ki ganny dekouver poudir i annan serten talan, pou zot anplifye zot en pti pe e eski i annan en posibilite pou negosye ek bann Lakonpannyen Prive, pou zot kapab adopte an term:- adopte mon pe koz an term sponsor sa endividi ki ganny dekouver, petet atraver son bann lekipman.  Par egzanp pour Praslin/La Digue, pou pey son bann depans ler i annan pou vin Mahe.

E osi nou konnen Praslin, pour bann zenn deplase pou zot vin Mahe.  Praslin ek La Digue.  Souvandfwa zot ganny dekouver, me apre zot ganny les akote.  Eski Minister petet pe met serten lasistans spesyal an term resours finansyel, pou sa bann zenn kapab ariv Mahe, pou kontiny zot karyer dan sa sport, pou zot perform vreman byen?  Mersi.

MINISTER VINCENT MERTON

Mersi Mr Speaker.  Sak laz i annan son kalite lantrennman ki akonpanny li.  Sak grad.  Sak kous laz.  Me nou pe konsantre plis lo Segonder ek Post Segonder, kot nou santi nou kapab bers sa talan e anmenn li pli o.  E wi.  NSC konmela i pey tou voyaz, okenn depans ki annan pou fer, si en atlet sorti Praslin oubyen La Digue pou vin Mahe.  Tou depans ki annan pou fer avek son deplasman, i ganny pran an sarz.  E wi.  CEO NSC in komans serten diskisyon avek Sekter Prive, parey mon’n dir taler.  Ki nou kapab swiv sa lenvestisman ki nou fer dan sa zenn.  Konmsi, atraver li, son bann lenz ki i mete, son bann soulye.  Me an menm tan pou vwar, pou swiv son rezilta tou le mwan ki mannyer i ale, pour ki sa dimoun i santi la i pe donn en pe plis.  Malgre mon’n siny en Kontra dizon pour R100 mil, mon kapab met en pti prim lo la ankor akoz i pe fer ekstrememan byen, ki nou bezwen kapab formaliz sa e pou nou kapab tonm dakor ki bann disiplin e ki bann Lakonpannyen, pour ki nou konnen ki larzan i ganny depanse dan en fason striktire e byen organize.

Mersi Mr Speaker.

MR SPEAKER

Onorab Esther.

HON NATASHA ESTHER

Mersi Mr Speaker.  Mr Speaker, mon ti a kontan demann Minis si i kapab enform sa Lasanble si zot in fer okenn letid, pou regarde si i pli fezab pou atas sa zenn ki’n ganny swazir parey lo Praslin/La Digue, avek en Zofisye lo Praslin menm olye deplas li e ki kriter ki son Minister i servi pou atas sa zenn talante avek training profesyonnel ou enternasyonal?  Mersi.

MINISTER VINCENT MERITON

Mersi Mr Speaker. Mersi Onorab pour ou Kestyon.

Tou pou depan spor.  Si Mahe i annan bann talan ki pli devlope ki Praslin e an konsiltasyon avek Federasyon, nou pran en desizyon.  Me si ou pran Judo.  Nou konnen poudir lakrenm Judo i Praslin e ladan sa ka, bann akonpanyater i bann dimoun sorti Praslin.  I depan lo ki mannyer keksoz i ete.

E kot i konsern bann training, mon krwar i annan, parey mon pe eksplike la, ki mannyer nou kapab plas sa zenn atlet aletranze lo en lesey, oubyen gete si nou kapab ganny en Scholarship pli long term.  Oubyen rod en fason ankadreman Mahe, ki pou fer ki pou permet devlop son talan dan en fason pli apropriye e adekwa.

Mersi Mr Speaker.

MR SPEAKER

Onorab Leader Lopozisyon.

HON DAVID PIERRE

Mersi Mr Speaker.  Mr Speaker, dan en fason kler, eski Minis i kapab dir nou si zot annan okenn plan vizavi en ScholarshipScheme pour bann gran talan sportif ki nou dekouver isi Sesel?

Mersi Mr Speaker.

MINISTER VINCENT MERITON

Mersi Mr Speaker.  Mr Speaker, sa 2 zenn ki nou ti anvoy ASPAI Academy pour en trial, ti 2 zenn ki ti:- nou ti bezwen ranpli bann fiche teknik.  Bann form e krwar mwan, i annan en kantite form akoz taler nou ti pe koz lo lasyans devlopman spor.  I pa zis 3 paz.  I en kantite detay lo sa dimoun, tou son bann zafer lasante, son bann abilite.  Ou bezwen swiv li dan en peryod letan.  Nou anvoy sa deor e bannla i gete, dir ok.  Baze lo sa ki mon’n vwar la, mon a sey pran li, apre nou gete ki mannyer i ete.  I annan en sistenm Scholarship, me selman nou, nou bezwen travay pour ki:- dan 2 kote. Nou pe koz bann zenn la. Lo kote fizik ek spor, be osi lo kote Akademik.  Si nou zwenn tousala, then i pou pli fasil pou kapab gannyen.  I annan bann pei ki’n pare.  Mon’n dir ou Qatar.  I annan Itali e lezot pei ankor ki nou pe travay avek, pou fer sir nou donn en louvertir nou bann zenn Seselwa.

Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.  Mr Speaker, mon ti oule demann Minis ki sipor zot gannyen avek Komite Olenpik Nasyonal, vizavi devlopman sa bann zenn talan ki ganny dekouver?  Mersi.

MINISTER VINCENT MERITON

Mersi Mr Speaker.  Mr Speaker, nou travay an etrwat kolaborasyon avek Komite Olenpik.  Fodre dir ki enn dan bann pei kot Komite Olenpik ek Gouvernman pa lager.  Ou’n vwar mwan pe lager avek Chairman Komite Olenpik ou?  Zanmen.  Nou travay byen ansanm akoz nou konnen spor i pour zenn, spor i pour lavenir en pei e spor se en zouti ki kapab kontinyelman met Sesel lo map.  Nou travay an etrwat kolaborasyon avek Komite Olenpik, pa parey bann lezot pei ki bannla pe lager larzan, ki bannla pe lager pozisyon, ki bannla pe lager kote ou pou al asize dan Stadium.  Sesel nou fer sa byen.  Nou diskite e keksoz i mars byen.  I annan en bon lantant ant mwan menm, PS avek CEO NSC ki nou koz byen avek Mr Gopal, avek Mr Alcindor ki son Sekreter Zeneral e lezot Manm Komite, ensi ki bann Federasyon akoz nou respekte gouvernans spor.

Mon ava donn zot en pti gin detay.  Ou pa kapab mel dan sports, ou pa kapab pyetin dan zot lotorite, lo zot lotonomi ek zot lendepandans akoz si ou fer sa:- i annan bann pei ki’n sey fer sa, sirtou bann pei Lafrik e ki pei i ganny ban.  Togo ti enn kot Gouvernman ti sey enterfer dan fason ki mannyer serten Konpetisyon Foutbol ti marse e pei ti ganny ban par FIFASo, nou travay byen isi e sipor ki nou gannyen avek Komite Olenpik se atraver zot bann Federasyon Enternasyonal avek lekel bann Federasyon i en manm e osi, atraver bann Scholarship Komite Olenpik ki plas bann atlet, pou zot kapab ganny serten soutyen finansyel, pou kapab al partisip dan bann Zwe deor, al partisip dan bann Zwe lokal e osi ganny serten soutyen finansyel dan zot lantrennman.

Mersi Mr Speaker.

MR SPEAKER

Onorab Bresson.

HON GALEN BRESSON

Mersi Mr Speaker.  Eski Minis i kapab dir nou dan sa Lasanble, avek tou bann statistik e trend ki nou pe vwar dan domenn sport, vizavi bann Scheme, eski Minis ek son lekip pa’n vwar ki i ler ki Sesel i etablir en Sant Ekselans kot i met spor avek son laspe Lakademi ansanm pour bann atlet.  Non pa ki nou anvoy li deor, me nou kree en Sant isi menm, ki pou devlop nou bann sportsmen akoz nou en pti pei, tel parey bann pei parey Zamaik in fer ozordi e ki pe ganny rezilta a vreman o nivo enternasyonal?  Mersi Mr Speaker.

MINISTER VINCENT MERITON

Mersi Mr Speaker.  Mr Speaker, nou annan en Spor Academy.  Nou annan bann gran plan.  Nou annan dan Polisi pathway ki mannyer pou idantifye anmenn zot.  Me malgre nou pe vantar, nou pe bat Nigeria, nou bezwen envestir en kantite ankor, pou nou kapab toultan pe sorti, pe bat tou bann gran, gran zean dan domenn sport, lo nivo Lafrik e ayer.  I demann en kantite resours, i demann en kantite larzan, i demann en kantite spesyalis dan spor, ki malerezman nou napa.  I demann Administrater dan spor.  I demann Dokter dan sport.  I demann Sikolog dan sport.  I demann bann dimoun ki’n vreman ganny train dan bann ptipti detay en mouvman avek ou lipye, avek ou lipye gos, lipye drwat.  Pa ki nou pe aprann ki mannyer pou marse, me ki mannyer nou kapab fer sir dan bann kontour ki mannyer nou fer, ki mannyer nou leve sorti lo block ler nou pe taye.  Ki mannyer ou naz byen.  Etidye ki mannyer, akoz serten group dimoun i naz pli byen ki en lot, pou fer sir ki nou kapab tous sa bon balans, pou nou kapab sorti pli byen.

Ou’n nonm La Zamaik.  La Zamaik i annan en bon sistenm deteksyon.  Epi kote zot al train?  lot kote, Lanmerik.  So, nou bezwen kapab nou osi, detekte nou bann dimoun, train zot e kot nou santi i annan talan, anvoy li deor.  E bokou pei pe espere akoz zot vwar poudir nou annan talan, nou kapab fer keksoz.

So, i en gran prosesis ki nou pe travay lo la.  I demann en kantite lespri met ansanm.  I demann en kantite resours e i devret ganny byen kordonen, kot nou vwar kot nou pe ale, avan-ler menm nou komanse.

Mersi Mr Speaker.

MR SPEAKER

Kestyon 143, Onorab Sultane Jacqueline.

HON SULTANE JACQUELINE

Mersi Mr Speaker.  Mr Speaker, eski Minis i kapab eksplik sa Lasanble, ki plan son Minister i annan pou konstrir en Day Care dan distrik Port Glaud?  Mersi Mr Speaker.

MINISTER VINCENT MERITON

Mr Speaker, Gouvernman i annan plan konstrir en Day Care dan sak distrik e mon apresye Kestyon Onorab Jacqueline akoz atraver ou Kestyon Onorab, mon santi ki ou tre konsernen avek bezwen ou distrik e sirtou, latansyon anver bann pti zanfan.

Mr Speaker, dapre en legzersis ki’n ganny fer par Lotorite Distrik Port Glaud, i annan en gran demann pou servis Day Care dan sa distrik.  An tou, i annan 7 ChildMinders ki pe donn sa servis vey zanfan.  An lir avek travay pou kree partenarya avek Sekter Prive, pou devlopman serten lenfrastriktir dan distrik, Lotorite Distrik Port Glaud in etablir kontak avek serten Lakonpannyen Prive e diskisyon i an mars pou rod finansman pour sa proze.  En demann in deza ganny fer avek Minister MLUH, pou ganny en morso later pou enplimant sa proze.  Nou’n tonm dakor dernyen fwa mon ti vin Lasanble, poudir bann tel proze dan distrik i kapab ganny finanse par Gouvernman, oubyen i kapab ganny finanse anba Public Private Partnership, ki la deza, nou’n vwar ki serten distrik pe pran li pe tay avek e mon ti a kontan remersi Onorab, ansanm avek lezot Manm Lotorite Distrik, pou kapab pous sa, anmenn li lo en nivo realizasyon tre konkret.

Mr Speaker, nou’n tann koz bokou resaman lo size Petite Enfance.  Nou pe ganny felisite par bann Lorganizasyon Enternasyonal, pou progre e latansyon e sipor ki nou donn bann zanfan, sirtou, sirtou bann pti zanfan.  Gouvernman pe kontinyen met larzan dan Bidze pou konstriksyon e renovasyon Day Care Centre.  Sa lannen, nou’n resevwar R4.8 milyon pou konstriksyon e renovasyon bann Day Care Centres. Lannen prosenn, nou pe fer provizyon, ankor dan Bidze, pou konstriksyon ankor bann nouvo Day Care Centre.  Takamaka, Grand Anse e Ile Perseverance.  Nou tou nou konsernen avek devlopman Petite Enfance me plis lanfaz i bezwen ganny mete dan en meyer partenarya avek Sekter Prive, dan sa demars parey mon fek dir.  An lir avek sa, mon ti a kontan lans en lapel avek Sekter Prive pou zwenn Gouvernman dan sa demars, pou donn nou bann zanfan en bon komansman dan lavi, atraver konstriksyon bann fasilite pou asir zot bon devlopman.

Mr Speaker, nou pe konplet konstriksyon Day Care Centre Anse Etoile. Au Cap in fini.  Sans Souci, renovasyon pe al komanse e byento nou pe al konstrir enn Grand Anse Praslin.

Mr Speaker, byento nou pou temwanny louvertir sa Day Care Centre Anse Etoile, ki en nouvo model, kot nou’n fer provizyon pou bokou plis lespas anndan e deor batiman pou zanfan zwe e osi in ganny design pou fasilit pli bon sipervizyon lo bann zanfan, pandan bann aktivite dan lazournen.  Mon ti a kontan remersi bann Onorab pour zefor kontinyel ki zot fer, pou kapab donn sipor dan Bidze e osi pou devlop sa sans lapartenans dan kominote, pou fer sir ki sa i vin an lir avek Polisi Gouvernman.

Mersi Mr Speaker.

MR SPEAKER

Okenn siplemanter, Onorab?

HON SULTANE JACQUELINE

Mersi Mr Speaker.  Mr Speaker, eski Minis i kapab enform nou Lasanble, ki Polisi nou Gouvernman i annan vizavi Day Care dan distrik, an relasyon avek nouvo Polisi IECD e ki plan long term nou Gouvernman pour bann distrik ki napa Day Care, pou asire ki nou reste an lir avek sa Polisi ‘Leave no child behind,’ spesyalman dan son devlopman edikasyonnel, pou nou promouvwar e fer sir ki i vin en realite ki dan sak fanmir, i annan en Graduate, parey i vizyon nou Prezidan?

Mersi Mr Speaker.

MINISTER VINCENT MERITON

Mersi Mr Speaker.  Mr Speaker, wi.  Dapre nouvo Polisi ECCE ki pe ganny enplimante par IECD, sak bann Day Care, dan staz konsepsyon, dan staz enplimantasyon e ler i fini, nou bezwen asire ki bann standar ki’n ganny met ater an sa ki konsern lespas, sipervizyon, lasante, lizyenn, i ganny respekte, pour ki nou donn sa zanfan sa bon komansman dan lavi, ensi ki kantite Ansennyan, oubyen bann dimoun ki pe vey bann zanfan, an konparezon par nonm zanfan,  Tousala i ganny pran an konsiderasyon, ler sa proze pe ganny antreprann.  E parey mon’n dir taler, i nou plan pou annan en Day Care dan sak distrik, me nou bezwen pran li dousman, dousman e nou envit Sekter Prive, antre an partenarya avek nou, avek distrik, pou kapab enplimant sa.  E wi.  I en keksoz ki mon krwar dan bokou distrik, i en realite pou nou ganny sa.  En bon komansman dan lavi.  En winningstart, me nou bezwen kapab amelyor bann fasilite, ogmant kantite fasilite dan distrik, pou kapab reponn sa bezwen e fer sa Polisi vin vivan partou kote.

Mersi Mr Speaker.

MR SPEKAER

Onorab Valmont.

HON SYLVIANNE VALMONT

Mersi Mr Speaker.  Bonzour.  Bonzour Minis ek son lekip e tou dimoun a lekout.

An lir avek larepons Minis e vi ki Day Care i deplizanpli vin en bezwen enportan pour nou bann fanmir e osi vin en biznes ki annan potansyel kree lanplwa, eski Minis i kapab dir nou, parey dan son larepons previously in mansyonnen ki i annan sa Public Private Partnership. Eski i osi pou konsider ouver sa loportinite avek Sekter Piblik only, pou zot kapab konstrir Day Care, pou kapab tir sa kou lo Gouvernman an zeneral?

Mersi Mr Speaker.

MR SPEAKER

Sekter Prive mon krwar ou mean.

MINISTER VINCENT MERITON

Sekter Prive ki ou ti pe dir Onorab?

MR SPEAKER

Wi, mon krwar i vin Sekter Prive Minis, yes.

MINISTER VINCENT MERITON

Annefe Mr Speaker, en bon lide ki Onorab pe flote e nou aksepte sa lide ek lebra ouver, pour ki Sekter Prive i pran sa labar si ou oule, pou kapab osi zwe en rol enportan dan devlopman sa lenfrastriktir e osi kontribye, donn nou zanfan en bon komansman dan lavi.  Byensir, IECD ansanm avek bann lezot partner ki form parti ECCFramework, pou travay an kolaborasyon avek sa dimoun, atraver Planning e lezot lenstans, pou asire ki bann standar i ganny respekte tou dilon sa proze.

So, en bon lide.  Mersi Onorab.  Wi, nou aksepte sa.  Nou welcome li.

Mersi.

MR SPEAKER

Onorab Meggy Marie.

HON MEGGY MARIE.

Mersi Mr Speaker.  Bonzour tou Manm Onorab.

An vi repons Minis e mon tann Minis nonm tou distrik.  Mon pa’n tann li nonm Anse Aux Pins.  Eski Minis i kapab enform sa Lasanble, ki mekanizm son Minister in etablir, pou donn priyorite konstriksyon Day Care dan Sesel, parey dan ka Port Glaud ek Anse Aux Pins?  Mersi Mr Speaker.

MINISTER VINCENT MERITON

Mr Speaker, pardon.  Onorab, pardon.  Ekskize en.  Redir mwan silvouple ou Kestyon.

MR SPEAKER

Proceed, repet ou Kestyon Onorab.

HON MEGGY MARIE

Mersi Mr Speaker.  Eski Minis i kapab enform sa Lasanble, ki mekanizm son Minister in etablir, pou donn priyorite, oubyen priyoritiz konstriksyon Day Care dan Sesel, parey dan ka Port Glaud e Anse Aux Pins?  Mersi Mr Speaker.

MINISTER VINCENT MERITON

Mersi Mr Speaker.  Mr Speaker, mekanizm ki an plas pou baze lo popilasyon, cachment e legzistans serten fasilite ki egziste, byensir ki pou reflekte a serten demann ki i annan par la popilasyon dan sa distrik.  Demann fer par Lotorite Distrik, bann letid ki’n ganny fer lo nivo popilasyon an zeneral.  Bann forecast ki kapab ganny fer.

E kot i konsern Anse Aux Pins Onorab, nou pe esper en larepons sorti kot MLUH, vizavi sa size ki ti An Kour, konsernan sa landrwa ki ti pou Day Care.  Le moman nou ganny sa, mon annan R1 milyon nou kapab komans depanse e nou oule fer en seri meeting avek tou bann dimoun ki enplike, bann partner lo nivo lokal ki enplike.  Le moman ki nou ganny sa, donn mwan en sipor pou nou kapab fer keksoz bouze.  Nou bezwen komanse vitman, vitman sansan Finans pou repran son larzan si nou pa komans depanse e depans li vitman.

Mersi Mr Speaker.

MR SPEAKER

Kestyon 144, Onorab David Pierre.

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble, kan eski bann Field Technicians anploye ek son Minister, ki’n fini zot Kontra, pou ganny peye zot bann Konpansasyon?

Mersi Mr Speaker.

MINISTER VINCENT MERITON

Mersi Mr Speaker.  Mr Speaker, mon ti a kontan enform sa Lasanble ki tou bann Field Technicians ki ti pe donn en servis anba en laranzman spesyal ek Gouvernman, in fini ganny zot larzan, a leksepsyon 2 ki ti annan serten anomaly dan zot dokiman, ki pe ganny rektifye.

Mersi Mr Speaker.

MR SPEAKER

Okenn siplemanter, Onorab?

HON DAVID PIERRE

Mersi Mr Speaker.  Mr Speaker, eski Minis i kapab dir nou si zot annan bann provizyon an plas, ki garanti ki ler en Kontra in terminen, sa anplwaye i vitman ganny tou bann detay bann benefis ki i sipoze gannyen, enkli kan ki son Konpansasyon pou ganny peye, pou evit lensertitid?

Mersi Mr Speaker.

MINISTER VINCENT MERITON

Wi, Mr Speaker.

MR SPEAKER

Bon, nou’n ariv a lafen Question Time.  E mon ava remersye Minis ek son delegasyon e ekskiz zot parmi nou ozordi bomaten.

(MINISTER AND HIS DELEGATION WERE EXCUSED FROM THE HOUSE)

MR SPEAKER

Nou ava kontinyen avek nou Order Paper, travay ki nou annan.  Nou annan nou 3 First Reading.

ASSISTANT CLERK LEGISLATIVE SERVICES, HR AND ADMINISTRATION – MS LUISA WAYE-HIVE

This Act may be cited as the Secured Transactions Act, 2015.

This Act may be cited as the Elections (Amendment) Act, 2015.

This Act may be cited as the Political Parties (Registration and Regulation) (Amendment) Act, 2015.

MR SPEAKER

Ok, mersi.  Mosyon lo Supplementary Estimate.  Eski ou pou pran plis ki 10 minit?

Eski deba lo la pou al plis ki 10 minit?

HON MARIE-ANTOINETTE ROSE

Non Mr Speaker, nou pe propoze ki i en Mosyon without debate e ki nou ava pran deba ler Bill i vin dan Lasanble.

MR SPEAKER

Anr, zot pran deba ler Bill itself?

HON MARIE-ANTOINETTE ROSE

Yes.

MR SPEAKER

Ok, tre byen.  So, nou ava pran Mosyon lo Supplementary Estimate.

HON MARIE-ANTOINETTE ROSE

Mr Speaker, an a-kor avek Lartik 154(6) nou Konstitisyon, mon pe demande ki nou Lasanble i aprouv Bidze Siplemanter pour 2015, pou en sonm R146 milyon, 83 mil 65. E sa i depans an ekse pour lannen 2015.  Mersi Mr Speaker.

MR SPEAKER

Okenn ki segonn Mosyon?

HON CHARLES DE COMMARMOND

The Motion is seconded Mr Speaker.

MR SPEAKER

Onorab, vi ki ou dir mwan a sa staz i pirman procedural, nou ava pran en vot lo la.  Tou bann ki an faver?  Okenn ki kont?

Bon.  Deba li menm li donk alor pou lo the Bill, ki nou ekspekte arive dan en semenn devan Lasanble.

Ok, mersi bokou e nou ava adjourn ziska 11er.

(BREAK)

MR DEPUTY SPEAKER

Bon, nou a dir bonzour tou Manm Onorab e piblik ki pe ekout nou.  E nou a kontinyen nou travay lo Order Paper.  Prosen travay se Mosyon ki pou ganny table par Onorab Rose, Leader of Government Business.  E mon envit Rose pou prezant son Mosyon.

HON MARIE-ANTOINETTE ROSE

Mersi Mr Deputy.  Mr Deputy, i fer mwan en gran plezir pou table sa Mosyon, pou demann nou Lasanble pou siport en Dokiman ki apel The Small Islands States, The Climate Change partnership ki apel SIDS DOCK. Mon ava eksplike ki savedir SIDS DOCK dan mon lentervansyon.  Me i en Dokiman ki fondamantal at this point in time dan staz devlopman kot nou pei pe ale.

Parey nou tou nou konnen, i annan en gran deba lo nivo en enternasyonal, an sa ki konsern climate change emisyon bann carbon, dyoksid karbonn dan ler e ki mannyer bann pti pei ensiler, bann Small Islands States i kapab:- i bezwen pran benefis e re pozisyon li pou fer fas avek bann lefe advers ki sanzman klima i anmennen.  An rezilta prensipalman par devlopman bann gran pei.  In prouve ki devlopman ki arive dan bann gran pei, emisyon bann gaz toksik dan ler, i kontribye en kantite avek climate change.

Bann pti pei ensiler, bann pti pei, nou kontribisyon ladan i selman 1 poursan, me se nou ki ganny plis afekte par climate change akoz nou vilnerabilite.  Nou annan bann pti popilasyon, en kantite bann pti pei, bann pti pei zil.  I pa bann pti pei landlocked, i bann pti pei zil e sa rezon i en SIDS DOCK.  I bann Small Islands Developing States. E ler ou en pti pei zil parey Sesel parey Maldiv, parey Moris parey bann zil Pasifik, parey bann zil serten dan Atlantik, bann zil Karaib, ou ganny en kantite lefe advers sanzman klima.  E ou santi li bokou plis.  Nou lo lakot.  Nou annan lakot toultour nou.  Ler i annan sea level rise, nou ki ganny afekte.  Ler i annan global warming, nou ki ganny afekte.

Mr Deputy, ozordi dan Lasanble mon ti a kontan fer 2 deklarasyon:  Sustainable Development, Devlopman Soutenab, it’s no longer a foreign concept. Mon krwar in ler pou nou dan Lasanble, bann Politisyen, bann dimoun ki pran desizyon, bann dimoun ki enplimant desizyon e bann dimoun lo ki desizyon i enpakte lo zot, ansanm, nou bezwen rann nou lekor kont e realize ki Sustainable Development i en keksoz reel.  It’s no longer an international agenda.  I en azanda lokal e i en azanda ki nou bezwen translate li dan bann aksyon desiziv, bann aksyon konkret e bann aksyon ki bezwen ganny enplimante e ki bezwen annan en lenpak on the ground.  Sa i en deklarasyon ki mon anvi fer, akoz souvandfwa ler nou dir ek dimoun, be nou bezwen annan devlopman soutenab, i vwar sa koman en keksoz ki nou pa kapab reisi akonplir.  I vwar sa koman en term ki’n ganny adopte dan koridor bann gran negosyasyon enternasyonal.  I vwar sa selman konsern bann Politisyen oubyen langaz ki nou’n evante pou annan en pwen diskisyon.  Me devlopman soutenab, it’s the next step, it’s the next frontier e i pe arive aktyelman dan nou pei e dan plizyer lezot pei.  Sa i enn.

E dezyenmman, climate change is not a myth.  Ou konnen, in annan en gran deba lo sanzman klima, si i vre si i real.  If it’s not realIt is real for us.  It is real pour bann dimoun ki reste dan plato La Passe, La Digue ler delo i ogmante, napa landrwa pou delo ganny sirkile.  I en realite pour bann dimoun Praslin ler lapli i tonbe e zot vwar lateras pe grennen dan Valle De Mai.  I en realite pour bann dimoun dan plato Beau Vallon, ler lapli i tonbe e i annan logmantasyon delo.  Zot ganny flood.  E i en realite pour bann dimoun ki reste Bel Ombre parey mwan, kot enn bann distrik kot lapli i tonm plis.  I en realite ler tou le swar nou regard Meteo e nou regarde si nou annan ase delo pou soutenir bann aktivite ki nou fer tou le zour.

So, dan sa dernyen detrwa semenn Mr Deputy, nou’n pas atraver leksperyans gro lapli e i annan letan nou pas dan leksperyans en kantite lasesres.  So, pour nou Sesel, nou pozisyon Geographic, nou eksperyans climate change. E pour nou bann Politisyen, rezilta sa sanzman klima i anmenn en kantite travay an plis ki nou bezwen fer.

Nou bezwen fer 2 travay Mr Deputy, koman bann Politisyen ki konekte avek nou pep.  Nou bezwen anmenn sa soutyen direkteman dan lakour sak pep afekte.  Me nou bezwen osi asize isi dan Lasanble e revwar e regarde, ki bann desizyon ki nou bezwen pran, ansanm avek nou Gouvernman, pour ki bann pep afekte i ganny soutenir, me pour ki nou kapab annan bann Polisi ki anpese oubyen ki negate en pe sa lefe advers ki sanzman klima i anmennen.

I en doub travay.  Nou vwar larealite lo teren.  Nou konnen ki i annan flood e ler nou vin isi dan Lasanble, nou bezwen pa zis koz lo la, me lev lanmen an faver bann aksyon desizif, pou fer ki nou pep i viv dan en fason pli soutenab.

Sa SIDS DOCK alors i en Fund etablir par bann pti pei, bann pti zil e ki pe ganny sipor bokou gran pei, pour ki nou kapab benefisye atraver bann proze devlopman soutenab.  Bann proze ki ed nou servi mwens bann fasilite ki annan lefe advers lo lanvironnman.  E Sesel, being Sesel, nou tre proaktiv pou siport sa dokiman e nou bezwen siport demars Gouvernman pou nou akse sa bann finansman, sa bann Fon, pour ki nou kapab etablir diferan progranm isi Sesel, ki pou annan en lefe pozitiv lo sanzman klima, me ki pou benefisye direkteman bann nou pep.  Ki pou benefisye direkteman bann proze e ki pou al pli lwen Mr Deputy.  I pou sanz lifestyle Seselwa.  Nou bezwen annan en laspe edikatif, kot i sanz lifestyle Seselwa.  Sa i rezon akoz mon dir ki Sustainable Development is not a foreign concept. Sustainable Development se ler nou annan en proze ki ed Seselwa annan pano soler lo son lakaz, pou li servi mwens, pou nou servi mwens elektrisite.  I anmenn plis larzan dan pos, me i osi ed nou bril mwens fossil fuel.

So, i ganny translate.  Sustainable Development i ganny translate from a concept into real projects, ki annan lefe pozitiv lo Seselwa.

Mr Deputy Speaker, Sesel in deza soumet en kantite proze pou nou kapab akse finansman dan sa Fon, en sonm 56 milyon Dolar e Sesel, being Sesel, nou annan kapasite ozordi pou soumet bann proze ki pou ganny aksepte e pou soumet bann proze ki pou annan en lefe direk lo nou bann popilasyon.

SIDS DOCK alor, set en Docking Station set en pwen komen, en pwen santral, ki pou ed nou bann pti pei pou ganny akse avek finansman pou konbat sanzman klima e parey mon’n dir, Sustainable Development i labaz the prensip sa SIDS DOCK. E ladan nou annan par egzanp, bann konsep par egzanp ki apel Sustainable Energy. Pou nou komans vwar ki mannyer nou devlop bann lenerzi soutenab.  Sesel nou en pei tropik.  Nou annan 3 kalite lenerzi soutenab ki nou toultan kapab servi.  Nou annan lenerzi divan, nou annan lenerzi soler e nou annan lenerzi laroul ki nou toultan kapab pe servi e i soutenab e i toultan la ki nou bezwen vwar bann fason inovativ, ki mannyer nou kapab tap dan lenerzi soutenab.

I osi annan sa concept ki apel energy efficiency. Menm si nou pe vwar lenerzi soutenab, nou bezwen regarde kalite lenerzi ki nou pe servi ozordi e servi li dan en fason efikas.  Nou pa gate.  Nou pa gat sa lenerzi ki nou annan.  Apre en konsep ki mon kontan, i ganny trouve dan sa dokiman se Universal access to renewable energy.

Mr Deputy, i pa fer sans annan lenerzi soutenab, annan energy efficiency, si i pa ariv kot ou pep.  Si dimoun ki reste Perseverance, kot i annan en kantite soley, pa pe ganny sa sans pou servi bann teknolozi pou li menm li benefisye.

So, universal access to renewable energy i enportan, pou dimoun santi ki Renewable Energy and Sustainable Development i ariv devan son laport e li osi i pe donn koudmen, dan sa bann progranm e i pe donn koudmen protez nou pei.

Mr Deputy, i nepli tan pou nou zis depan lo bann proze Gouvernman, oubyen bann proze ki annan bann Fon enternasyonal, pou nou rezourd problenm ki nou annan kot nou lakour, dan nou lakaz.  I demann en travay ansanm.  I demann en travay kominote, i demann en travay endividi ki pran konsyans son rol dan protez nou pei, dan annan en progranm devlopman ki nou kapab soutenir, ki pa depas nou, ki pa depas nou ekonomikman, ki pa depas nou sosyalman, ki pa depas nou finansyerman.  Nou annan en progranm ki nou kapab soutenir e ki nou annan en progranm kot dimoun a labaz isi Sesel, i form parti e i santi li konsyantize pou form parti sa bann progranm.

Mr Deputy, sa i rezon akoz mon pe demann nou Lasanble pou met nou stanp politik lo sa Dokiman.  Fer nou deklarasyon politik e donn political support to en Dokiman.  E en bann progranm ki nou Gouvernman i anvi enplimante, i pou annan lefe direk e pozitif lo lavi, lavi Seselwa e i al zisteman byen.  Byen men an men avek konsep ‘Nouvo Sesel,’ kot nou bezwen trouv nouvo fason fer e annan en popilasyon de nouvo, ki vwar li pe partisip dan devlopman pei.

Avek sa Mr Deputy, mon soumet sa Rapor devan Lasanble, sa Dokiman si ou oule, devan Lasanble pour laprouvasyon.

Mersi.

MR DEPUTY SPEAKER

Bon, Mosyon in ganny prezante.  Okenn Manm ki oule segonde?  Onorab De Commarmond.

HON CHARLES DE COMMARMOND

Mr Deputy Speaker, mon oule segonn sa Mosyon e mon oule fer en lentervansyon.

MR DEPUTY SPEAKER

Proceed.

HON CHARLES DE COMMARMOND

Mersi bokou Mr Deputy Speaker.

Mr Deputy Speaker, sa Mosyon ki devan nou pou ratifye sa Konvansyon si ou oule, i enportan en.  I enportan akoz 1, Sesel i en pti leta zil e prezan ki mannyer sa roulman in vini, in vin akoz problenm zisteman sa bann pti leta, sirtou bann pti leta zil.  Sa bann pti leta dan lemonn antye zot vilnerab zot.  So, vilnerabilite sa bann leta in pouse pou dir, sakenn prezan pe esey koze, sakenn pe lev zot problenm akoz lefe ki zot vilnerab, zot sibir lefe negativ, lefe zonm lo lanvironnman.  E lefe negativ lefe zonm lo lanvironnman, aksyon zonm lo lanvironnman, imen, aksyon imen, i fer ki prezan nou’n vwar plizyer keksoz.

Par egzanp, avek lemisyon carbon dioxide dan ler, akoz bann gro Lendistri, in fer ki i pe afekte kous ozone sa i afekte ice cap e ice pe fonn dan North Pole ek South Pole e prezan, i ogmant nivo lanmer.  Sa i afekte sa bann pti leta zil.  Si ou pli plat parey nou, nou annan 2 kalite zil, granitik avek koray.  Sa zil koray i plat e i pou ganny inonde.  Annan de zour i pou perdi.  I fini disparet.

Prezan, nou annan dan lemonn en kantite sa bann zil, i ganny afekte koumsa e lontan, dimoun ti annan persepsyon.  Dimoun ti dir.  Ozordi son problenm se ki i arive, nou vwar.  Trouve?  I kler, Maldiv pe ale lo zot Marshall Island, pe ale.  I la devan nou pe arive, avek sa lefe.  Ou annan ou bann lezot lefe prezan, ki i pa zis lanvironnman.  I annan bann lefe prezan ki vin lo lekonomi.

Par egzanp, pou lenerzi koman baz lenerzi bann pti leta zil i servi ozordi delwil.  Petrol.  Oil. Parey nou Sesel e i ser.  I annan de zour i monte.  La i pe desann en kou, in desann en kou.  Nou tann SEYPEC pe dir i desann.  Nou kontan.  Me i annan de moman i monte sa e prezan ptipti pei parey nou ki napa resours, i tough pour nou.  I annan lefe, i afekte nou.  Prezan letan sa i ou baz lenerzi, i annan en kantite lefe.  Letan ou’n servi li pou fer PUC alimen, donn nou kouran, apre letan in fini sa residue la, ou pa konnen ki ou pou fer avek.  I annan de pei, i pa konnen kot pou zete sa.

Lot i fer lavi, kout lavi ser pour sa bann dimoun dan sa bann pei e i afekte ou e prezan zour i desann, i still pa fer lavi desann li.  I pa fer pri lavi e kout lavi desann.  Parey ozordi, dan Sesel ozordi.  Yer ou dir mwan fuel, lenerzi ti ser, laba SEYPEC ti pe vann PUC son delwil ser, prezan kouran in vin ser, prezan ou bann manze, nou bann prodwi ki servi baz lenerzi in monte.  La ozordi i desann, sa bann prodwi pa desann li.  Ou konpran.  Apre nou blanm Gouvernman.  Me i pa desann.  Me nou ki nou pe dir.  Sa Mosyon zisteman prezan sa bann pti pei prezan, sakenn in koze, lagorz in fatige lo nivo enternasyonal.  Dan tou pti Forum kot zot in ale.  Avan bann pei ti lwen ek kanmarad.  Lontan ti napa sa kantite avyon.  Nou menm nou nou’n ganny avyon kan?  71.  Lontan menm avan sa, napa avyon.  Bann bato i pas isi enn fwa letan.  Parey nou, nou listwar in ete la, sa bann pti leta zil osi menm zafer.  Prezan ki i fer?  Ozordi ki nou pe moderniz en pti pe ki dan devlopman, sa ki’n ganny Erport in gannyen.  Konmsi kominikasyon, relasyon antre sa bann pti leta in devlope.  Prezan olye sakenn pe koz dan son pti kwen, ek son dimoun ki i konnen, ek son pei ki i konnen, ek son Lorganizasyon ki i konnen, in ariv en moman, serten sa bann pti leta in zwenn ansanm, i dir tyonbo en kou.  Annou fer nou lavwa tande lo nivo lemonn.  Zot in al anmenn sa dan Nasyon Ini.  Nasyon Ini in dir wi, i vre ki zot pe dir, nou a tann zot.  I dir, be selman pou tande, pa kapab tann enn ozordi, lot demen.  Sey organiz zot pou nou tann zot pli byen.

Avek sa, serten sa bann pei, bann pei fondater, sa SIDS la e ki Sesel i trouv ladan.  Sesel, i annan bann pei ki dan Atlantik, dan Pasifik, dan Karaib, Losean Endyen.  So, sa bann pei in zwenn ansanm, akoz deza dan zot, ti annan zot diferan Lorganizasyon dan sa bann diferan rezyon.  IOC par egzanp pour Losean Endyen.  Be alor, letan zot in zwenn ansanm, Sesel in la koman bann pei fondater.  Prezan pour sa bann keksoz ki zot pe dir marse, i bezwen ki zot siny e ratifye sa Lagreman la, Konvansyon.  Sa ki la devan nou.  Sa ki devan nou.  Sansan si zot pa dakor pou sinyen, zot lavwa pa pou vin ansanm, i pa pou for.  Sa platform pa pou egziste.

Alor prezan, Sesel li, i oblize siny sa li.  I oblize tonm dakor avek li akoz in la letan ti formile, letan ti konmanse, in dan fondasyon, i bann pei fondater.  Ou konpran?  I pa kapab li prezan li taye.  I bezwen vini li osi vin ratifye, vin sinyen.  Pou sa marse, i bezwen annan serten kantite pei ki dakor, ek sa Lagreman ek sa Konvansyon, pou sa Konvansyon vin e an egzistan, pou li kapab performen.  Sa alor, i rezon akoz i bezwen pas dan nou Lasanble e nou, nou, pou’n tonm dakor e nou dir Sesel :- akoz Sesel in deza sinyen li.  In dakor ki sa i ganny fer.  Prezan i bezwen ratifye.  I annan diferan moman dan letan pratik en Konvansyon.  Alor, in deza sinyen, ti dakor, i ti agree.  Prezidan Michel ti sinyen.  E la Prezidan Michel i al lo son parol, lo son sinyatir e i anmenn sa dan Lasanble pou nou osi ratifye e prezan Sesel ki i a vin en part and parcel of sa Konvansyon, pou li kapab met keksoz an pratik.

Prezan ki arive?  I annan en lot problenm, en lot issue. Se ki sa bann pei la, i annan bann larzan ki vin an zwe la.  Akoz pou nou protez nou sa bann pti pei, pou li protez li kont sa bann danze, i bezwen prezan annan bann progranm annan bann legzersis, annan bann proze pou li protez li, pour li eparnye li kont sa bann danze lefe zonm, lefe negativ zonm lo lanvironnman ki afekte zot.  So, prezan pou sa arive, i bezwen annan sa bann proze.  Sa bann proze prezan i koute, i kout larzan.  Prezan sa bann pti pei, zot menm zot ki napa larzan.  Zot mizer.  Zot dan developing Countries. Zot pe sey debrouye dan lemonn.  Zot ankor an retar.  Prezan, i annan ki annan lenfliyans, sa bann pti pei.  I annan i koz lwen.  I annan i koz byen osi.  Sesel i koz byen lo nivo enternasyonal.  Prezan, i annan dan son koze, i ganny resours, i ganny serten finansman.  I annan pa ganny ditou.  I annan kantmenm pou koze, petet personn pa pou tann li.  Prezan, Nasyon Ini i dir gete, al organiz zot akoz ler prezan pou donn larzan serten bann gran pei, Finland, Denmark, bann pti pei La Swede laba, Scandinavia, i kontan ede sa bann pei.  Biann pti pei vilnerab.  E letan pou donnen kot ou  pou donnen prezan?

Prezan si ou al donn kot Nasyon Ini laba, laba sa birokrasi, avan sa larzan i ariv kot sa pti pei la en bann larzan in perdi.  Pa perdi dimoun i vole li.  Son birokrasi.  Serten poursantaz i al la.  Serten lot dan Ladministrasyon isi.  Serten bout larzan dan Ladministrasyon laba, ensidswit.  Letan sa larzan i ariv kot sa pti pei, in fini, en bout ladan in mwens konmsi.  Prezan bann pti pei i dir, tyonbo en kou.  Si nou annan sa Forum, sa platform la, nou a kapab servi sa.  Olye pou donn atraver Nasyon Ini laba i vin direk kot nou la.  Savedir nou’n organize.  E Nasyon Ini i dir dakor, fantastik, al fer.  Prezan zot larzan a vin direk kot zot.  Zot a pli kapab mannye li byen.  Zot a kapab pli depans li byen.  I ava al direk.  Napa bout 15 poursan ki ava perdi la, 5 poursan ki ava soz laba.  I ava vin pli direk kot ou.  Ou pep e ou pei i kapab benefisye.  Zot a kapab pli byen partaz larzan antre zot.

Prezan, vwala bann pei prezan, in komans met bann proze devan pou zot al dan sa direksyon, pou ranplas sa sours lenerzi a baz delwil/petrol ki afekte lanvironnman, pou vin lo baz lenerzi renouvlab.  Akoz sa ki zot in tonm dakor lo la.  Bann pti pei i dir, annou servi prezan posibilite bann lenerzi renouvlab.  Lenerzi ki pa pou afekte lanvironnman, pou nou baz lo la.  I dir nou antoure.  En bann i dir nou antoure avek lanmer.  Nou lanmer i kapab ganny eksplwate.  Lot i dir i annan soley, lot divan, ensidswit.  Tou sa bann sours lenerzi, annou get posibilite, servi zot to the maximum, pou nou kapab amelyor lavi nou pep e eparnye nou kont sa bann danze klimatik, negativ ki afekte nou.

E prezan alor sa bann larzan i ava vin la.   Zot in met devan bann proze.  Bann proze prezan i koute.  Be prezan pou ou benefisye, be ou bezwen form par sa Konvansyon.  Me si ou pa’n ratifye, ou pa’n form par, ou proze pa pou kapab ganny konte.  Savedir ou pa pou kapab benefisye anba bann resours ki ava vini, bann larzan ki ava vini pour sa Fon la, SIDS DOCK.

Alor, vwala rezon ki nou bezwen ratifye sa, akoz nou osi nou annan proze devan dan sa Lorganizasyon.  Nou’n met proze pou ed nou dan nou lenerzi renouvlab e ki sa bann proze alor i bezwen ganny finansman.  E nou pe esper sa finansman.  E si nou pa sinyen, nou pa pou gannyen.  Moris pou gannyen, li in sinyen.  Lot pou gannyen, in sinyen.  Maldiv laba a gannyen.  Be nou prezan sanmenm sa nou pe ratifye.  Nou pep i bezwen konpran, nou ratifye sa, pou nou kapab nou osi ganny sa larzan pou nou kapab benefisye ek bann proze ki annan devan pour sa.

Mon krwar mon’n dir ase Mr Deputy Speaker e nou konpran sa e i bon ki nou pe fer sa.  So, si i bon, nou menm ki pou benefisye e alor sa i vin en platform osi pou nou koze, pou nou voice nou lopinyon dan en fason ini, en fason inifye.  I fer ki lavwa bann pti leta zil i a ganny tande pli byen, dan en fason organize, lo nivo enternasyonal.

I enn bann filozofi osi ki Prezidan Michel in lager en kantite e i byen.  Konmsi i gou ozordi nou koz sa akoz Prezidan Michel, parmi bann diferan keksoz ki:- concept ki in anmennen, lo nivo enternasyonal en, in ganny aksepte e in ganny devlope e lemonn i pe mars lo la.  Ptipti pei.  Taler, bomaten nou’n koz lo ptipti pei ki’n fight against bann gro pei dan Lafrik pou Sports.  La osi lo pwennvi politik, filozofik lemonn, i montre ou osi kote Sesel, atraver good Leadership, in fer son perse.

Avek sa, nou a siport sa Mosyon ki devan nou, pou nou kapab bouz devan.

Mersi bokou Mr Deputy.

MR DEPUTY SPEAKER

Onorab Payet-Marie.

HON MARIA PAYET-MARIE

Mersi Mr Deputy Speaker.

Lavi san lenerzi.  Annou zis mazin nou pe viv san elektrisite, san gas, san en transpor, san en fridge, pe reste dan fernwanr, dan lafreser.   Annou mazinen ki napa Vaksen ou Tretman pou tret nou zanfan, akoz napa elektrisite pou kapab prezerv Latizann.

Wi Mr Deputy Speaker.  San lenerzi, lenerzi modern, lasante en imen i kapab ganny severman afekte.  Dan sa monn ozordi san lenerzi, abilite pou imen kapab ganny lavi, i osi kapab ganny severman afekte.  San lenerzi, pou napa akse avek Radyo, Computer, Internet ki nou depann bokou lo la.  Savedir, pou ganny bann lenformasyon enportan tel ki: bann teknik plant e modern ki enportan avek sanzman klima e osi lenformasyon lo warning movetan tel ki Siklonn, Sounami eksetera, san lenerzi sa pa pou posib.

San lenerzi Mr Deputy Speaker, abilite en dimoun pou ganny en ledikasyon desan i ganny afekte.  Ledikasyon i ganny rekonnet koman en fakter kle, pou ed en dimoun eparny lapovrete.  San lenerzi, en zanfan pa pou kapab agrandi son konesans e fer son resers, akoz akse avek teknolozi pa pou aksesib.  An gro, elektrisite i zwe en gran rol pou agrandi ledikasyon en zanfan e i enportan ki nou servi li byen.

E nou isi Sesel Mr Deputy Speaker, ler nou pe koz lenerzi soutenab, i annan pa mal ki pe ganny fer deza.  Par egzanp par nou bann zenn, lo bann pti proze ki annan pour fer avek zisteman, lenerzi li menm ek sanzman klima.  E koman en Manm SIDS DOCK, Sesel a benefisye atraver mekanizm pou asiste nou, pou transform nou Sekter Lekonomi Nasyonal anver enn ki soutenab, anver nou devlopman ekonomik e osi lasistans pou nou kapab zener resours finansyel, pour kapab adres size adaptasyon avek sanzman klima.

Wi Mr Deputy Speaker.  I enportan pou note a sa pwen, ki bokou in ganny fer pou edik nou zanfan lo sanzman klima, ki annan en lyen direk avek lenerzi, ki swa lenerzi modern, lenerzi renouvlab, lefikasite lenerzi.  Konmela zanfan i konn bokou, lo kwa ki koz sanzman klima e ki bann lefe i annan lo bann pti leta zil.  I enportan a sa pwen, pou felisit e remersi tou bann akter ki fer tou pou edik nou bann zanfan lo sa size parey.

Nou’n vwar resaman kot bann Lekol in esey rod zot prop fason pou adapte ek sanzman klima.  Zot in pran aksyon lo nivo Lekol e zot proze anmas delo lapli ki sorti lo twa Lekol.  Zot in osi edik la popilasyon lo sa proze ki’n vitman ganny propaze dan bann kominote e zot in osi menm fer zot bann pti resers syantifik lo sa proze.

Sa in ganny bokou rekonnet pa zis selman Sesel, me dan lemonn antye e menm ganny bann pri rezyonal e enternasyonal.  I enportan pou fer resorti ki tou bann Lekol ki’n partisipe dan sa pti proze, zot in reisi kapab fer en saving.  Par egzanp, Lekol Grand Anse Mahe in kapab fer en saving anviron R15 mil lo zot bil delo.  Sa i en gran achievement.

Proze anmas delo lapli in prouve ki nou pa merit under estimate kapasite nou bann zanfan lo nivo Ledikasyon Lanvironnman.  In montre nou ki nou bann zanfan i swaf pour sa bann kalite challenge.  E par lefe ki nou pou ratifye SIDS DOCK ki pou permet nou akse avek sa Docking Station, pou sirman ogmant nou akse avek finansman enternasyonal, teknolozi e osi byen ki devlop e enplimant bann mezir  adaptasyon long term e osi siport teknik ki nou a kapab pas avek nou bann zanfan.

An se moman Mr Deputy Speaker, Minister Ledikasyon pe revwar Curriculum anba Primary and Secondary pour Zeografi e pe entegre sanzman klima e sa i tre byen.  Annou donn nou bann zanfan sans pou devlop zot kapasite e skill lo fer resers a en tre zenn az.

E la Mr Deputy Speaker, mon demande ki tou le neseser i ganny fer, pour ki tou sa i materyalize, akoz i enportan e neseser ki nou zenn i konpran tre byen zot responsabilite anver lenerzi renouvlab e lenportans lefikasite lenerzi.

Mr Deputy Speaker, menm si nou isi Sesel nou pe fer pa mal pou transform nou Sekter Lenerzi ki enportan pou devlopman en lekonomi ki soutenab, lefe i reste ki anviron 2.5 milyon dimoun, dan lemonn napa akse avek decent fuels pou kwi manze.  Anviron 1.5 bilyon dimoun napa akse avek elektrisite.  E dan Lafrik tousel, anviron 85 poursan dimoun napa elektrisite.  I enportan pou fer resorti sepandan, ki anviron 60 poursan lenerzi pe ganny konsonmen par anviron 20 poursan popilasyon lemonn.  Annou pa bliye ki sa pa reprezant ni menm en tyer bann pei ki pe devlope e bann pti leta zil parey nou.  Me sa i reprezant plito bann pli gran pei devlope.  E tou sa i annan en lenpak direk lo bann pti leta zil ki reste vilnerab, akoz nou pe ganny afekte par sanzman klima relye avek polisyon e devlopman sorti dan sa bann pei devlope, bann pei pli endistriyalize.

E alors Mr Deputy Speaker, i enportan ki nou osi koman en pti leta zil, nou vin pli pro-aktiv e determinen, pou rod plis sipor ek plis lekspertiz ankor, pour ki nou a kapab nou osi, annan an plas lenerzi soutenab e efikas pour ankor plizyer lannen.

Prezidan Michel, Prezidan en pti leta zil ki pe devlope, Sesel, pa zanmen mank sa loportinite pou fer son lavwa tande a sak fwa ki i ganny sa sans pou koz lo lenerzi, sanzman klima e lanvironnman an zeneral.  Prezidan Michel ti profit sa 4 minit ki i ti gannyen pou adres bann lezot Dirizan lemonn, pandan UN Climate Summit ki ti fer New York an Septanm lannen pase, par lans en lapel, pour ki bann Dirizan lemonn i pran aksyon desiziv pou tonm lo en lagreman e met en lafen lo sa size sanzman klima, ki pe afekte bann pti leta zil.  I ti demann zot pou pa inyor larealite lo sa size sanzman klima e i ti warn zot ki in plis ki ler pou aksyon, me non pa zis fer speech.  Mr Deputy Speaker li menm, resaman pandan en Konferans ki i ti partisip ladan New York, i ti osi met lanfaz lo sa size sanzman klima e son lenpak lo bann pti leta zil ki pe devlope, kot i ti osi welcome nouvo azanda lo devlopman e sipor finansyel sorti kot bann pei ris, bann pei endistriyalize e osi byen ki konmitman politik pou servi devlopman soutenab, koman en la kadreman lo bann azanda Nasyonal politik e osi progranm pour sa prosen 15an.

E nou Mr Deputy Speaker, ozordi nou osi nou zwenn ansanm avek Mr Speaker e Prezidan Michel, pour osi raport nou sipor pour plis aksyon, plis sipor finansyel e teknik, pou nou osi kapab transform nou Sekter Lenerzi Nasyonal anver en devlopman ekonomik ki soutenab, osi byen ki zer plis resours, pou kapab adres sa size sanzman klima.  Lamazorite pti leta zil i annan loportinite pou redwir konsonmasyon fossil fuel e an menmtan, promouvwar en krwasans ekonomik pli an bonn sante e redwir depans lo petroleum fuels ki ser me, an menm tan, ki pa bon pour nou lasante.  Bann pti leta zil i depan lo fossil fuels e lamazorite zot depans i plis ki 30 poursan zot reveni par an.

Koman en Manm SIDS DOCK Mr Deputy Speaker, Sesel pou inikman plase pou travay avek bann diferan Konpannyen dan Sekter Prive, Liniversite e osi Gouvernman, pou fasilit plis resers, ki swa lo lanvironnman, relye avek sanzman klima, ganny plis akse avek teknolozi e pli bon pratik.

Avan konklir Mr Deputy Speaker, ler nou pe koz bon pratik, mon krwar ki i enportan ki nou get nou sityasyon aktyel.  I byen pou note ki nou nepli servi ni lalanp petrol, ni stov petrol ki annan en move lefe pour nou lasante.  Me par kont nou isi Sesel, koman en pti leta zil, nou pe servi plis lenerzi, plis elektrisite ki nou devret pe servi.  Nou’n vin 100 percent electrified.  An dot mo, nou’n vin en lesklav elektrisite.  Isi Sesel koman en pti pei, en pti leta zil an devlopman, en lakour pe servi an mwayenn 300 a 350 inite elektrisite, ki bokou konpare avek sa anviron sa 200 a 250 inite elektrisite ki nou merit pe servi.  Mr Deputy Speaker, larealite se ki nou pe servi tro bokou lenerzi elektrisite pour en pti pei parey Sesel.

Mr Deputy Speaker, mon krwar ki a sa staz dan nou devlopman, i bezwen annan plis progranm, plis ledikasyon, plis sansibilizasyon anver nou popilasyon, pou zot konsyan tre byen lenportans lenerzi renouvlab, lenerzi modern, lefikasite lenerzi.  Akoz menm si nou pou ratifye sa Dokiman, SIDS DOCK ozordi, menm si nou pou kapab benefisye ki swa finansyerman, ou teknikman, i pa pou fer sans si nou kontinyen met presyon ki pa neseser lo nou sistenm elektrisite ou lenerzi.  Dan sa staz devlopman ki nou ladan, in ler pou nou tou pran nou responsabilite e servi lenerzi kan i neseser e pa kan nou zis anvi servi.

Par egzanp Mr Deputy Speaker.  Akoz ki i annan serten lakour ki annan plis ki 3 ou 4 fridge, 3 a 4 televizyon eksetera.  Menm ki mon konnen ki sakenn i annan son swa, i enportan ki nou pran nou responsabilite e fer sa bon swa.  Eski nou ti konnen ki par egzanp ki ler kouran ou elektrisite sorti kot PUC, pou ariv kot nou lakour pou alim en glob filaman, ki son lefikasite i redwir e ki apepre 97 poursan lenerzi i gaspiye ler sa glob pe zis sofe.  Tandis ki ler ou aste ou en glob energy saver ki kout en pti pe pli ser, i servi zis 3 poursan lenerzi, pou li sofe e i osi pli dirab e pli efikas.  Menm si nou pli gran defi i reste pour konsyantiz dimoun lo zot responsabilite anver lenerzi renouvlab e lefikasite lenerzi, mon toudmenm krwar ki plis resers i devret ganny fer, pour ki i annan an plas finansman soutenab, sirtou pour bann ki pli vilnerab, pour ki zot osi zot a benefisye, pour ki i annan marse ideal pou kapab annan supply e zwenn bann demann, kree en lanvironnman apropriye pour tou dimoun benefisye, fer en proze resers lo lefikasite nou resours lenerzi, kot plis progranm ledikasyon, sansibilizasyon i ganny fer pour nou bann dimoun, lo lenportans pou pran zot responsabilite.  E osi annan ase capacity building, pou kapab pli byen marse e met an pratik, tou sa ki konsern lenerzi renouvlab e lefikasite lenerzi.

Mon pou vot an faver sa Dokiman SIDS DOCK,Mr Deputy Speaker, pour ki Sesel i vin en Manm SIDS DOCK, akoz mon krwar ki koman en pti leta zil byen vilnerab, nou bezwen plis sipor, pou nou kapab kontinyen kit nou pei enn ki low in carbon e lezot benefis tel ki: plis sipor finansyel e teknik, ki nou bezwen ler nou pe koz en lekonomi e devlopman soutenab.

Devlopman soutenab i konsern nou tou, ki swa en pei devlope oubyen ou en pti leta zil parey Sesel.  Mon pou siport Leader, LGB e met sa stanp politik lo sa dokiman SIDS DOCK. Annou pa bliye.  Lenerzi i enportan ki nou servi li byen.

Mersi Mr Deputy Speaker.

MR DEPUTY SPEAKER

Onorab Bresson.

HON GALEN BRESSON

Mersi Mr Deputy Speaker.

Mr Deputy Speaker, ozordi Prezidan Michel in fer letour lemonn lokalman.  I pe sanpyonn:- i en sanpyon pour en terminolozi ki nou apel The Blue Economy.  E in fer konpran lemonn ler i pe dir The Blue Economy ki savedir.

Annou mete, ankor dan 2an de cela, sa konsep i ganny pran lemonn antye e zot devlop li ki i ganny son body separe, ki i pou regard zis lo Blue Economy e nou get dan Nasyon Ini, World Bank si par kont zot devlop sa konsep, i vin en body dan li menm e i pou ganny zere letour lemonn.

Me oli plas Sesel?  Akoz Sesel pa merit ladan ler konsep i sorti Sesel, par Prezidan Michel li menm ki’n sanpyonn sa?  Se sa ki ozordi nou pe debat lo SIDS DOCK, Statute for Establishing the Small Island Developing States Document.

Mr Deputy Speaker, Sesel ti la depi o debi.  In en sanpyon lo la depi o debi.  Ozordi ler in fini kwi, tou keksoz pe met legal, akoz ziska la tou keksoz ti pe ganny dirize anba World Bank e en seksyon UNDP.  I ti napa lotonomi.  Me la, i pe vin debout lo son prop lipye.  I oule resevwar son prop larzan, zer son prop larzan avek son bann Member State.  Sesel pa pou ratifye? Me Sesel i merit ratifye.  I merit la.  I merit zer tou sa ki in travay pou etablir.  E se sa ki ozordi dan sa Lasanble, set avek plezir ki mon krwar mon koz lo la, pou mwan kapab vwar ki Sesel i ganny son pozisyon, son pozisyon merit dan sa Komite ki byento i a ganny etablir e nou ozordi nou pe ratifye sa Dokiman.

Mr Deputy Speaker, ler nou koz lo soutenab, devlopman soutenab, i fer mwan mazin en pwen ki mon’n bokou lager lo la depi ler mon MNA Bel Ombre.  E sa se: The plight of Artisanal Fishing, ouswa Lapes Artizanal.  Akoz?  Mon distrik i en distrik Bel Ombre.  I en distrik ki annan bokou Peser, bokou aktivite lapes.  E Lapes Artizanal ozordi i kontribye tou pwason ki nou manze kot nou.  E nou konnen ki Sesel, nou en pei ki pwason in form labaz nou manze toulezour.  Se pourquoi ti enportan pou vwar ki sa laspe lapes pa perdi dan en distrik.  E pour mwan mon krwar mon’n lager sa ase for, ki ozordi, menm mon pe koze, mon kontan ki nou pe koz lo sa Statute ozordi akoz ansanm avek Lasosyasyon Peser Bel Ombre ek bann partners, nou’n devlop en progranm pou antre soustenabilite e akoz nou oule sa kontinyen.  E sa progranm baze lo lenerzi renouvlab, lenerzi soler ki li par kont, ki nou’n ekrir sa progranm anba en proze UNDP.  Met bann pano soler lo bann bato pou fer bann lenerzi ki zot servi an mer, osi byen ki bann pano soler lo Ice Plant, ki nou konnen ozordi, Peser pe al pli lwen e zot bezwen ice pou zot kapab al lapes, pou mentenir sa pwason ki zot in atrape.

Me sa in ganny pran an kont akoz?  Ozordi, nou bezwen realistik.  Fuel cost i ti o e son lenpak lo pwason, lo son pri pwason, i ti toultan la.  Menm si Gouvernman ti pe donn fuel subsidy. Menm si Gouvernman ti pe donn fuel subsidy. Alor bann resours ki a nou dispozisyon, parey lenerzi soler, i merit zwe en rol enportan dan sa equation, pou sey fer ki ozordi pri pwason ki nou tou nou manze, nou tou nou viv lo la isi Sesel, i en komodite ki nou bezwen.  I en parti nou natir koman en Seselwa pou manz pwason e kontinyen manz pwason.  Fitir zenerasyon kontinyelman manz pwason, ki nou sey servi bann resours lenerzi ki li i vin en lenpak, ki nou kontinyen kapab abord atrap sa pwason wi, me osi byen aste sa pwason.

E ozordi fuel cost i zwe en gran, gran rol akoz se fuel ki run en Ice Plan, ki fer li en pri, menm ankor si Gouvernman i met subsidy pour Peser ladan, pou ganny pli bon marse, me pou mentenir sa Ice Plant, pou fer sir ki ice i kontinyelman.

So an gro li menm Mr Deputy Speaker, i enportan ki nou kontinyelman isi Sesel pou fitir zenerasyon, siport tel ki ozordi nou pe koz lo la, lo Small Islands State e Sustainable Development a lon term ki’n ganny koz lo la, akoz en pti leta zil, nou annan bokou keksoz ki nou kapab fer.  Me akoz nou ptipti enn ler, nou pa krwar nou kapab fer.  E mon kontan ki bomaten, Minis in koz lo tou atlet in fer byen, i devlope, i travay e i ganny son reveni, dan term son Meday.  Me in dir nou plight, Lissa Labiche yer swar, atlet lokal ki’n fer byen lo nivo Lafrik.  Nou en pti leta zil nou.  Nou en pti leta zil.  E ozordi, regard nou bann atlet ki pe fer.  E nou, nou pa merit asize, me nou merit kontinyen dan tou sa bann plight ki nou pe fer, lo sa zafer lo pti islands states e kwa ki nou krwar i merit pour nou fitir, ki regard e kit nou konsistans koman en pei ek nou legzistans koman en pei.

Mr Deputy, i fer mwan osi mazinen pa tro lontan mon ti dan en Konferans lokal.  Ti fer son parkour, ti vin lokal en kou, lo Human Rights. Mon ti asiste avek bann koleg MNA Ephelia e pandan dezennen, mon pe asize avek bann delege sorti bann pei:- lot pei Lafrik. Zot dir mwan, ou en pei Sesel, en zoli pei.  Mon dir wi, mersi bokou.  I dir me selman zot osi ris dan lenerzi.  Mon dir me wi, soley.  Mon’n otomatikman al lo sa bann.  I dir mwan non, be ki zot servi pour fuel isi?  Mon dir, be nou servi petroleum, gas.  I dir, ar.  Be zot isi zot ris.  Zot annan fuel partou e zot merit servi sa e pa aste sa bann sorti an deor.  Mon dir, what do you mean? I dir be get laverdir partou.  Zis koup tou sa pye dibwa e servi sa sarbon, manman ou pou sof sepa konbyen zenerater.  Ou pou fer isi, pye dibwa isi.  Me mon get li mon’n dir be non.  Be ….

Mr Deputy Speaker, nou kapab mazinen, si sa pei pa ti pe ganny byen zere par nou Prezidan, nou Parti e pe sofgard nou lanvironnman.  Get ki mannyer serten dimoun i deside fer, zis pour cut fuel cost. I dir be komans koup pye dibwa partou, i la li, i pou repouse.  Be ki garanti i donn ou sa pou repouse?  Konbyen lannen sa bann pye dibwa ki nou pe regarde, konbyen nou ki nou’n bezwen, nou kapab asize analize.  Nou dir, be sa pye dibwa ler mon’n grandir, ti la li?  Konbyen lannen sa pye dibwa in la, ki ozordi avek teknolozi, mon kapab pran en chain saw koup sa pye dibwa dan en minit, met li ater, bril li e nepli annan pye dibwa.  Konbyen lannen?  Sa verdir ki nou, nou proteze akoz zot lekonomi i baze lo Tourizm.  E baze lo Tourizm, ozordi se sa ki pe fer nou en sanpyon dan bann lemonn e i disteng nou bokou fwa ek nou bann konpetiter dan larezyon ki enkli zil Moris, Maldiv, akoz bann dimoun i dir ou sa laverdir ki nou annan isi i fantastik.  Sa lanatir ki nou annan i fantastik.

E ozordi nou pe koz lo sa Dokiman SIDS DOCK, akoz nou anvi vwar zenerasyon ki vin apre nou.  Nou dan sa Lasanble, nou oule vwar zenerasyon ki vin apre nou, rezouir.  Kontinyen vwar sa ki nou nou’n vwar.  I annan keksoz ki vreman nou, nou pa’n ganny sans vwar, me konbyen nou kapab konserve dan nou lanmer, konbyen nou kapab konserve lo nou later e la se nou dan sa Lasanble ki pe sanpyonn pour sa zenerasyon. E sa lavwa pour bann dimoun dan nou distrik ki anvi kontinyelman viv byen ek nou lanatir e osi byen ek sa ki zot in grandi avek.

Avek sa Mr Deputy Speaker, mon pou donn mon sipor pour sa dokiman.

Mersi.

MR DEPUTY SPEAKER

Onorab Fideria.

HON EMMANUEL FIDERIA

Mr Deputy Speaker, mersi.

Mr Deputy Speaker, o profon mon leker e imans lafyerte, ki mon koz lo ratifikasyon sa Protokol SIDS DOCK, ki son lobzektif prensipal se par bann pei ki form parti sa blok, zot etablir bann plan lo ki mannyer zot kapab redwir zot lendepandans lo fossil fuel.

Mr Deputy Speaker, menm parfwa serten nou bann Politisyen, serten nou sitwayen, i santi zot anmer ler nou koz lo bann lakonplisman, lo nou bann sikse ki Sesel dan plizyer domenn e ozordi, nou pe adres sanzman klima.

Wi Mr Deputy Speaker.  Sa size i konsern nou tou, me sirkonstans 38an pase, ozordi i diferan.  In annan en transformasyon enkontestab, ki’n transform sa pei akoz bann Leaders Parti Politik, Parti Lepep, i annan en vizyon pour Sesel.  Atraver bann konteni diferan Lartik dan sa Protokol, mon reste konvenki e optimis ki lavenir Sesel, sirtou bann desizyon e mekanizm ki’n ganny met an plas ler nou abord sa size sanzman klima.  Mr Deputy Speaker, mon konfirmen ki nou lo bon semen.

Mr Deputy Speaker, Sesel nou form parti sa lemonn ek en popilasyon plis ki 7 bilyon zabitan.  Ek en popilasyon mwens ki 100 mil zabitan, me nou kontribisyon ler nou adres sa size sanzman klima, nou bann lakonplisman dan sa domenn lanvironnman i en model pour nou rezyon e pour lemonn an zeneral.

Mr Deputy Speaker, atraver nou bann prensip met ‘Zonm o sant devlopman,’ kot plizyer lannen dan nou pei, kot en pti minorite dimoun, ki ti konnen ki savedir elektrisite, ki savedir servi petrol pou kwi manze.  Lamazorite fwaye Seselwa ti pe servi dibwa, koman sours lenerzi pou met manze dan vant zot zanfan.  Plizyer zanfan apre lekol, ti sikonbe monte desann, bezwen mont dan bwa pou al rod dibwa.

Mr Deputy Speaker, toulezour de santenn pye dibwa ti pe ganny detrir.  Plizyer lafore ti pe ganny menase.  Plizyer lespes ti pe ganny disparet akoz zot labita ti pe ganny menase.

Mr Deputy Speaker, avek en vizyon ki sa Parti ki mon reprezante isi dan sa Lasanble, ki’n diriz desten e desten Seselwa, kwi manze avek dibwa in disparet dan Sesel.  Sa ki sa Protokol pe adrese e pe demande ki bann Gouvernman i pran bann mezir pou redwir lefe green house effect.

Mr Deputy Speaker, sa ki dir nou Parti i koronpi, Gouvernman i koronpi, ozordi dibwa ti pou ankor partou dan lakwizin Seselwa.

Mr Deputy Speaker, sa Gouvernman Parti Lepep i merit ganny en Meday Lor dan domenn Lanvironnman.  Sa ki pa kontan, pa kontan me levidans i la pour bann desizyon e zesyon e lenvestisman ki Sesel in fer dan sa domenn i enkrwayab.

Mr Deputy Speaker, i enportan note ki nou zenerasyon ozordi, i konnen ki dan serten lepok, Gouvernman ti met en progranm pou elimin bann stov petrol e lesanz pour en stov ki servi gas.  Bokou nou sitwayen pa ti konpran me avek letan dousman, dousman tou nou sitwayen ti aksepte.

Mr Deputy Speaker, dan menm lannen ki’n pase, Gouvernman ti pran desizyon pou fer aret vin loto dezyenm men dan nou pei.  I pa ti en desizyon ki ti popiler.  Bokou dimoun ti ankoler.  Me ozordi nou sitwayen in konpran akoz ki Gouvernman ti pran en tel desizyon.  Ozordi, ler ki nou respire dan Sesel, i pli siperyer ki standar enternasyonal in etablir.

Mr Deputy Speaker, Sesel i form parti sa group zil ki ti fondater, ki ti kree SIDS DOCK, sa Lorganizasyon ki ti vin an egzistans an 2009, an Cancun, Mexico.  Ozordi sa Lorganizasyon i annan 31 Manm, kot son lobzektif se pou mobiliz Fon pou ed bann pei enplimant bann proze ki ed bann pei evit bann danze ki sanzman klima i kapab koze.

Wi Mr Deputy Speaker.  Sesel in al bokou pli lwen.  In enplik bann sosyete sivil pou zwe en rol tre enportan dan enplimant bokou bann proze, sirtou ki annan pou fer avek sanzman klima.  Se sa ki isi Sesel nou apel enklisivite.

Mr Deputy Speaker, rikord Sesel i koz pou li menm.  Koman en pei ki pe devlope, i koz pour li menm.  Wi, lespas pou fer pli byen i touzour egziste.  Ozordi plizyer Lorganizasyon pe ofer bann lasistans finansyel ou teknik, pou nou enplimant plizyer proze pou fer avek sanzman klima.  Sanmenm ki nou Lasanble i pa pe trenn lipye, pe fer le neseser pou nou kapab ratifye sa Protokol.

Wi Mr Deputy Speaker.  Prezidan Michel i smart. I en zonm ki pran bann desizyon smart.  Ler i koze, aksyon i swiv.  Konsesyon lo bann lekipman ki servi lenerzi renouvlab, akseler lenvestisman dan prodiksyon elektrisite ki pa servi fossil fuel. Se sa ki sa Protokol pe adrese.  Ki Gouvernman i deza annan plizyer progranm pou enplimante kot i konsern sa size.  I osi pe ankouraz bokou lenvestisman ki pou redwir nou lendepandans lo fossil fuel.

Mr Deputy Speaker, Sesel ozordi, nou annan plis ki 20 mil lakour.  Plizyer mil pti biznes, santenn Lotel e en kantite transpor.  I enportan a sa pwen Mr Deputy Speaker, an 2012 nou ti enport 1709 loto.  2013, 2600 e 2014, 3493.  E i enportan osi, lakantite fuel.  Sa nou pe koz zis mo gas, ouswa sa ki nou apel bennzin ki nou ti konsonmen dan nou pti pei Sesel.  An 2012, 20.3 milyon.  2013, 21.2 milyon.  2014, 24.2 milyon.

Mr Deputy Speaker, ler nou pe koz lo sa Protokol, si nou envestir dan lenerzi renouvlab, en pti pei parey Sesel, nou pou kapab fer en saving plizyer milyon Dolar.  E sa larzan ki reste, nou kapab envestir dan nou progranm sosyal, ou dan bann lezot lenfrastriktir ki nou pei i bezwen.

Mr Deputy Speaker, i enportan osi pou note, ki o komansman, SIDS DOCK ti bezwen servi bann Lorganizasyon parey World Bank, UNDP, pou manage bann Fon ki sa Lorganizasyon i mobilize.        Sa i pa mars dan lavantaz sa bann pei.  Osi dan sa bann Protokol, tou demars pe ganny fer, ki sa Lorganizasyon in annan son prop Sekretarya ki pou manage sa larzan, pou fer sir ki tou bann proze ki ganny laprouvasyon, i ganny enplimante e osi ganny realize.

Mr Deputy Speaker, Sesel fek benefisye ek en don 250 mil Dolar, an form Technical Assistant, pou fer en letid lo green absorption lo rezo PUC.

Mr Deputy Speaker, pandan sa ratifikasyon sa Protokol, Sesel pou benefisye en kantite.  I enportan ki tou akter ki enplike e i aport tou sipor neseser pour nou National coordinator pour SIDS DOCK.

Mr Deputy Speake,r se Prezidan Michel ki ti pran desizyon pou apwent en Anbasader pour Climate Change.  E ozordi, i annan en Minister Lanvironnman, i en Departman ki deal ek sanzman klima.

Wi Mr Deputy Speaker, Prezidan Michel i en zonm ki mon vwar i merit ankor 5, 5, 5.  E mon pe demann tou mon bann koleg pou zwenn avek mwan, pou fer sir e asire ki i ganny 5 ankor.

Mr Deputy Speaker, defi lemonn e defi Sese i diferan.  Ki tou bann zenerasyon avan nou in eksperyanse.  Egalman, nou posibilite pou sirviv dan sa lemonn ozordi, i depann antyerman lo kapasite lemonn pou sirmont bann gran defi.  Ki sak sosyete dan sa vilaz global pe fer fas avek.  Ozordi dan sa lemonn, i nepli en zafer sakenn vey son pangar.  Ozordi i en kestyon vwar ki mannyer legzistans kanmarad, ki an retour sa ki kree kondisyon pour sak sosyete garanti son prop legzistans e sirvivans son pep.

Wi Mr Deputy Speaker, konteni sa Protokol i koz lo rediksyon konsonmasyon fuel.  I annan pei ki’n fer li.  Sesel nou kapab fer li.  Dapre mon resers ki mon’n fer, plizyer Konpannyen in montre bokou lentere dan prodiksyon elektrik, par servi lenerzi renouvlab.  Pou annan bokou benefis pour Sesel.  Fer pri biznes desann, plis Foreign Exchange a reste dan nou pei, evantyelman fer pri lavi desann.

Mr Deputy Speaker, ler mon get lo lorizon, mon vwar tou rezon pou mwan kontinyen, pou nou gard lape ek stabilite dan nou pei Sesel.  E konsekaman, garanti en lavenir pli prometan pour zenerasyon apre nou.

Mr Deputy Speaker, mon pou vot an faver sa Protokol.  I annan en saying ki dir:- ‘Zonm ki bezwen lanatir.  Lanatir pa bezwen nou.’

Mersi.

MR DEPUTY SPEAKER

Onorab Pillay.

HON SEBASTIEN PILLAY

Mersi Mr Deputy Speaker.

Mr Deputy Speaker, nou’n ariv dan en konzonktir ozordi dan devlopman nou pei, kot nou pe esansyelman konsolid bann zefor ki nou’n fer, pour asire ki nou kontinyen maintain nou konviksyon pou protez lanvironnman e pou asire ki demen zenerasyon fitir i kapab zwir bann menm loportinite ki nou ozordi zenerasyon nou pe gannyen.  E menm plis ankor.

Mr Deputy Speaker, sa i pa ariv zis koumsanmenm sa.  I ariv akoz nou en pei ki stab.  Ekonomikman nou tre stab.  Politikman nou stab.  Koman en demokrasi nou stab.  E sa i permet nou pou annan en focus, en vizyon ler nou pe analiz tou bann diferan issues ki nou bezwen deal avek.

E enn sa bann issues ki nou bezwen deal avek koman en pei se sa issue sanzman klima.  E mon krwar en keksoz ki Lepep Seselwa i bezwen mazinen ki a tou moman ki in ganny sa loportinite, Prezidan Michel in koz lo sa issue sanzman klima, menm kan bokou lezot bann ki ti lo rezo sosyal, dan zot bann Zournal, in kritik par egzanp: inisyasyon The Blue Economy, inisyasyon nou sipor pour sanzman klima bann pti leta zil.  Ozordi ki nou pe vwar.  Partou dan lemonn ozordi, nou pe komans koz lo Blue Economy.  Partou dan lemonn nou pe koz lo proteksyon klima, sirtou vilnerabilite bann pti leta zil.  E se pour sa ki fer, ki montre ou poudir, la ou annan ou en Leader ki li i annan en vizyon.  I annan en konviksyon, en commitment kote i anvi anmenn son pei e i pare pou li pran bann desizyon konkret pou li kapab anmenn son pei dan sa direksyon, as opposed to bann lezot Leaders ki pas zot letan denigre, menm kritik Seselwa, menm kritik tou zefor ki ganny fer, san ki zot mazinen ki i bezwen anmenn en konsansis pou keksoz avans pli devan.  E se sa i en pwen fondamantal ki nou bezwen tire, en leson enportan ki nou bezwen tire, dan sa diskisyon ki nou pe fer ozordi.

Mr Deputy Speaker, si nou regard track record Gouvernman, nou Gouvernman, sa Gouvernman Parti Lepep, sa Gouvernman SPPF e par lepase, en Gouvernman anmennen par SPUP, nou vwar poudir son track record i well proven. I parey en etidyan ki annan li en Repord Card ki flawless, an sa ki konsern proteksyon nou lanvironnman.  Well, nou’n fer serten fot, me ou sa Seselwa ki pa asize ozordi dan lakour, ou get otour ou, ou vwar ou pei i ver.  Ou sa Peser ki al lapes me ki still kapab ankor tyonbo pwason, ou bezwen remain thankful, par lefe ki ou annan ou en Gouvernman ki pare pou protez ou lentere.  En Gouvernman ki pare pou met ou premye.  Gouvernman i donn ou fuel incentive.  Gouvernman i rod fason pou fer sir ki Linyon Eropeen i envestir dan bann progranm Sektoryel, pou kapab devlop lenfrastriktir pour Lapes Artizanal.  Gouvernman i asire ki ou annan proteksyon lafore, ki i annan proteksyon laverdir, par met laplipar nou teritwar dan rezerv.  Tousala i bann zefor konkret ki arive akoz en Gouvernman ki annan en commitment, en Leadership.  En Prezidan ki vwar vizyon, kote son pei i devret ete ankor dan 20an, vizyon kote son pei i devret kapab reste endem.  Plitar, malgre ki tou keksoz otour nou pe kontinyen boulverse, pe kontinyen sanze.  Se sa karakter Leadership nou pei ozordi e se pour sa rezon ki ozordi dan nou Lasanble, nou pe koz lo SIDS DOCK. Akoz si zot a mazin tre byen, se gras a zefor Sesel, gras a zefor ki Sesel in mete atraver son bann reprezantan:- nou annan Anbasader pour Climate Change. Atraver son bann reprezantan, pou asire ki nou annan en platform pour bann pti leta zil, kot zot kapab fer premyerman pase zot bann lopinyon, me manage, manage bann Fon ki pou vini atraver proteksyon klima, akoz bokou bann gran pei in realize poudir, lekel ki pou gard lemonn, lekel ki pour bann gate keepers par egzanp, proteksyon lanvironnman e sa se bann pti leta zil.  Bann pti leta zil in vin koman bann baromet, ki pou endik lemonn ki mannyer sanzman klima pe vreman afekte li.

Par egzanp zour Maldiv pou koule, zour Maldiv pour pran:- pa pou koule, me nivo lanmer pou monte e pou afekte Maldiv.  Sa i pou endik nou ki lenpak sa pe annan.  Zour en lespes maritim pou perdi, sa i pou endik nou ki lenpak sa pou annan.  Set alor ki mon oule fer konpran nou pep ki nou pa fer bann desizyon dan nean.  Nou fer bann desizyon baze lo bann levidans.  Nou fer bann desizyon baze lo lentere, lo ou lentere sa Seselwa, lentere sak Seselwa, pe enport kote ou reste, pe enport ki ou pe fer, pe enport menm ou konviksyon politik, pou asire ki demen nou pei i kontinyen egziste.  Nou pei i kontinyen avans pli devan e nou pei i kontinyen reste proteze.

Mr Deputy Speaker, zis pour sit detrwa legzanp.  Par egzanp, dan son Ladres a lokazyon Lazournen Nasyonal, nou Prezidan ti koz lo Solarpanel Subsidy.  Nou Prezidan in koz lo aboli tax lo bann veikil elektrik.  Menm si nou konnen poudir si nou ti pe fer vini sa bann veikil, nou ti pe pran tax lo la, Gouvernman ti pou ganny en reveni.  Gouvernman in analize, in dir en pert reveni i pli bon, ki perdi sa lanvironnman sen, sa lanvironnman ki ede ki nou ganny en:- nou annan en Lendistri Touris ki vyab.  En lanvironnman ki nou kapab, ki reste soutenab.  Dan plas ki nou kontinyen met tax e kontinyen detrir li avek carbon.  I montre ou poudir sa i en Gouvernman ki serye Mr Deputy Speaker.

Nou osi vwar par egzanp ki Cabinet in aprouv Memorandum pou extend bann boundaries Aldabra avek Aride.  Ankor enn fwa, i montre ou konviksyon ki sa Gouvernman i annan pou li kontinyen protez nou lanvironnman.  Me sa, Lepep Seselwa i arive, akoz nou annan nou en Gouvernman ki stab.  Nou annan nou en lekonomi ki stab.  And this is the fundamental, ki anmenn nou ozordi pou nou koz lo SIDS DOCK.  E li SIDS DOCK li, son rol li se prezan act koman sa spring board, ki ava permet nou pei al sa lot step ki nou oule ale.

Par egzanp Mr Deputy Speaker.  Nou’n vwar bokou dimoun kritik sa bann linisyativ Gouvernman ki i pe pran, me par kont, nou’n osi vwar dimoun ki’n pozitiv anver li.  Bann Antreprener, bann Biznesmenn ki’n pozitiv.  E sa mon felisit zot.  Zot in vin devan, zot in pare pou antre dan dyalog, pare pou partisipe, pou zot par egzanp: anmenn en lepanouisman an sa ki konsern sa lenerzi renouvlab.  E ler nou pou vwar ki sa Sekter i take off, sa bann Antreprener ki ti la, ki’n pare pou act positively pe ganny bann akse avek swa kredi, pe ganny akse avek sa loportinite, nou pou vwar sa bann ki ti kritike pe tay devan pou zot vin par devan sa bann ki la, parey zot abitye fer, parey zot ti fer ler nou ti fer konblaz, parey zot ti fer ler nou ti konble landrwa, pou zot vin dir ki zot osi zot oule partisipe.  E la ler zot pa partisipe ki zot pou dir?  Zot pou dir koumsa zot ganny viktimize.  Ou konnen, nou devret realis prezan.  Nou devret regarde ki mannyer e kote nou stand.  Annou arete zwe sa bann kalite rol kot tou keksoz pa bon, pa bon, pa bon, pa bon.

Nou’n ganny bokou delege ki’n vin isi Mr Deputy Speaker, pour en Konferans ki nou’n fek fer e sa bann dimoun i reste amazed ki avek en pti popilasyon ki nou annan, nou nobou fer sa kantite keksoz ki nou pe fer.  E si nou Seselwa nou pa ankor vwar sa, zanmen nou pou vwar li.

Mr Deputy Speaker, mon krwar ki lenportans la i lo what is the next step prezan.  E SIDS DOCK li, i permet nou annan sa next step. Se li ki pou donn nou sa next step.

Entervenan avan mwan in koz lo sa grid absorption capacity. Definitivman i pou bezwen en area ki nou pou al ladan, an vi ki Gouvernman i oule entrodwir en sityasyon kot i vin compulsory par egzanp, si ou annan ou en Lotel ki pe ganny konstrir.  Ok.  Ki’n konstrir, sa Lotel i kapab vid, petet 50 poursan i kapab prodwir son prop lenerzi, san ki i bezwen rely lo grid Nasyonal.  But at the same time, ou bezwen osi annan kapasite teknik.  Ou bezwen annan osi bann eleman teknik, ki ava permet ou abzorb sa lenerzi once sa landrwa i prodwi li.  E sa ki fer mwan very happy about this se ki nou menm annan en moratorium on large Hotels, pour ki rezon?  Me akoz sa i a donn Gouvernman en loportinite, i a donn li en breathing space, pou li konsider bann mezir ki i bezwen mete dan lenterim, pou deal avek sa sityasyon ki egziste aktyelman.

So, ankor i montre ou en koneksyon between the Policy design e avek en commitmentAnd this is what is important that we see. E ozordi avek SIDS DOCK, nou pe met ankor en klou ladan, pou asire ki nou ranforsi sa bann zefor ki nou’n fer.

Mr Deputy Speaker, avek sa bref lentervansyon, mon oule dir ki mon pou napa okenn rezervasyon pou mwan siport laprouvasyon sa Statute, establishing the Small Islands Developing States DOCK.

Mersi Mr Deputy Speaker.

MR DEPUTY SPEAKER

Onorab Pierre.

HON DAVID PIERRE

Mersi Mr Deputy Speaker.

Mr Deputy Speaker, Mosyon pe demande ki Lasanble Nasyonal i aprouv sa Statute, ki etablir the Small Islands Development States DOCK.

Mr Deputy Speaker, nou kapab get sa koman en Dokiman ki pe koz lo en size, ki pa zis enportan pour bann ptipti leta zil, menm si nou pe koz lo pti leta zil, me en size ki enportan pour lemonn an antye.  Nou pe koz lo Sustainable Development, nou pe koz lo teknolozi vizavi lenerzi renouvlab.  Sa Dokiman pe koz lo sa size sanzman klima, kisisa ki pe koz sa sanzman klima e kwa ki nou bezwen fer pou nou deal avek sa sityasyon, ki en sityasyon serye.

Mr Deputy, nou konnen poudir bann ptipti leta zil i at risk, an relasyon ek sa size sanzman klima.  Nou konnen poudir nou bezwen:- bann pti leta zil nou napa souvandfwa, sa kapasite pou nou devlop bann teknolozi, ki annan pou fer avek sa size lenerzi renouvlab.  I enportan nou koman bann pti leta zil, pou nou zwenn ansanm, met nou konesans ansanm, partaz leksperyans, partaz konesans, pou nou kapab mye fer fas avek bann danze ki asosye avek sanzman klima e pou nou kapab met an plas bann bon keksoz ki annan pou fer avek the use of lenerzi renouvlab.

Mr Deputy, nou konnen poudir sa size konservasyon lanvironnman, i en size ki enportan pour nou.  Nou konnen poudir sa size sanzman klima, devlopman soutenab, konservasyon lenerzi, tousala i bann konsep ki enportan pour Sesel e pour bann ptipti leta zil.  Alors, i pou enportan pour Sesel ratifye sa Dokiman, akoz bann benefis ki i kapab anmennen pour nou.  Mwan lo sa kote latab, mon konsernen.  Mon konsernen avek sa size sanzman klima, akoz mon rekonnet sa challenge ki nou annan, an relasyon avek dimal ki sanzman klima i kapab fer nou koman en pei.  Si nou go back pa bokou letan, nou go back 10 years, nou vwar sa sanzman ki’n arive Sesel, an relasyon dizon avek lafason ki lapli i tonbe dan sa pei.  Nou vwar son lefe e son lenpak advers ki i annan lo Sesel.  Annou zis get 1 ou 2 semenn pase.  Gro lapli i tonbe e nou vwar sa lenpak ki in annan, sirtou lo lakot rezyon Les avek rezyon Sid.  Nou vwar degradasyon semen, nou vwar bann miray ki tonbe e nou vwar bann konsekans ki i annan lo bann dimoun ordiner.  Nou vwar bann konsekans ki i annan lo pyeton.  Nou vwar bann konsekans ki i annan lo bann dimoun ki pe servi bann veikil koman mwayen transportasyon.

Mr Deputy Speaker, over the last 50 years, dan lemonn, nou vwar poudir lafason ki zonm in behave, lafason ki zonm in devlop lemonn, sa in annan en konsekans lo klima e ozordi nou pe pey sa konsekans.  E nou konnen poudir si nou pa reazir ozordi, son konsekans ki i pou annan, son konsekans kontinyel ki i pou annan lo laras imen, ki i pou annan lo lemonn, ki i pou annan lo bann pti leta zil, ki i pou annan lo Sesel koman en pei, i pou en konsekans ki nou pa pou kapab deal avek.

Alors, i enportan pou nou komans pran bann mezir.  Pou nou kapab pran bann mezir ki efektiv, nou bezwen konnen dan en fason tre profon, kwa egzakteman ki pe koz sa bann sityasyon.  E ozordi lemonn in rekonnet poudir enn bann fakter pli enportan, se sa size green house gasses.  Bann gaz ki ganny large dan nou lanvironnman e ki koz e ki ede pou koz resofman later e resofman lanmer.  Letan i annan resofman later, nou konnen ki arive.  Letan i annan resofman lanmer nou konnen ki arive.  Nou konnen ki mannyer nou perdi nou bann eco system.  Nou konnen ki mannyer sa i koz bann ice dan North Pole pou fonn.  I koz en logmantasyon dan lakantite volim delo ki i annan.  I koz linondasyon eksetera, eksetera.  Nou konnen poudir sa i en catalyst pour sa ki pe arive.  Alor, nou bezwen deal avek e Sesel i pa en leksepsyon.  I pa en leksepsyon, sirtou akoz nou konnen poudir Sesel i en pei touristik.  E nou lanvironnman i enportan pour nou.  Nou klima i enportan pour nou.  Touris zisteman i vin Sesel, akoz zot apresye nou lanvironnman.  Zot apresye nou klima e si nou perdi sa, then nou konnen ki lenpak i pou annan lo en Sekter nou lekonomi ki sa Sekter pli enportan isi Sesel.  Alors, i enportan pou nou reazir e pou nou reazir vitman e efikasman.

E enn bann fason pou nou reazir vitman e efikasman, se pou zisteman form parti bann Protokol, parey sa enn ki devan nou Lasanble Nasyonal ozordi.

Mr Deputy Speaker, nou konnen poudir:- parey mon’n dir nou Lendistri Touris i enportan.  E nou konnen poudir letan nou Lendistri Touris i ganny afekte, tou dimoun dan sa Lasanble i konnen e tou Seselwa i konnen poudir dimoun ki ganny afekte plis e pli vitman, se bann dimoun dezavantaze dan sosyete.  E mon krwar poudir si parey zot pe dir ki Parti Lepep i en Gouvernman ki responsab, i bezwen:- si i responsab, i bezwen rekonnet ki sa i leka e i bezwen pran bann mezir dan en fason efektiv e dan en fason vitman.  E mon’n tann entervenan avan mwan pe koz lo bann mezir ki Gouvernman in pran.  Petet enn bann keksoz ki mon ti ava lanse ozordi dan mon lentervansyon, i se en size ki senp.  Annou vwar sa size energy. Bann glob energy saver. Right? Mwan mon krwar poudir i fasil pou nou ankouraz tou Seselwa dan tou lakour Sesel, pou servi bann glob energy saver.

1, nou koup tou taxes ki annan lo sa bann glob.  Nou fer sir ki napa taxes e nou mont avek en Scheme kot par egzanp nou kapab dir avek Seselwa, tou dimoun ki annan bann glob ki pa energy saver, ki zot pe servi dan lakour, parey nou ti fer avek bann stov, nou kapab demann zot pou vin anmenn sa bann glob e nou e Gouvernman i donn zot bann glob energy saver for free, to start with.  E letan ou donn zot sa for free, 1, zot pou realiz bann benefis ki zot pou gannyen atraver byensir en rediksyon dan lakantite kouran ki zot servi e donk lo zot bill elektrisite.

E dezyenm benefis, zot pou vwar the length of time, pour ki zot in servi sa glob, konpare avek dirabilite en glob ki ordinerman nou ti pe servi.

So, in the long run, sa pou donn zot sa kapasite e sa posibilite pour zot kapab apre ranplas sa bann glob energy saver once ki in fini, buy new ones. So, sa i en proze ki vreman senp.  Si nou’n kapab fer li avek bann stov, then obviously nou kapab fer li avek bann glob energy saver.

Mr Deputy Speaker, nou bezwen reazir dan en fason konkret e nou bezwen fer sir ki bann mezir apropriye i ganny pran, pou nou redwir nou depandans lo servi fuel pou nou prodwir elektrisite.  Ozordi, Sesel i servi plis sa Foreign Exchange ki nou gannyen from the Tourism Industry, oubyen from lezot aktivite ekonomik ki nou fer.  Lamazorite sa Foreign Exchange ki nou gannyen, i go back into purchasing fuel, pou nou brile, pou nou prodwir elektrisite.  Right? Se pourtan, Sesel i en pei kot nou annan en kantite soley e Sesel i en pei kot nou annan en kantite lanmer.  Mon krwar poudir moman in arive pour Gouvernman, dan en fason vreman serye, vwar ki mannyer nou kapab servi lenerzi soler pou nou kapab prodwi en pli gran poursantaz sa kantite elektrisite ki nou servi on an annual basis e vwar ki mannyer nou kapab servi nou lanmer, pou nou osi prodwir elektrisite, avek bi pou nou kapab koup lo nou depandans lo fuel pou nou prodwir elektrisite.  E letan nou koup nou depandans lo fuel, i osi redwir lakantite gas ki sa i anvoye dan latmosfer e donk, nou kontribye dan en fason pli pozitiv ankor, vizavi sa size resofman later, vizavi sa size green house gases.

Mr Deputy, i enportan pou nou look at the big picture, pou nou get sa size dan son totalite.  Lo en kote, nou bezwen prezerv nou lanvironnman.  Lo lot kote, nou bezwen prezerv nou Sekter Ekonomik enportan, ki nou Sekter Touris e dan milye tousala, nou bezwen fer sir poudir nou kapab kontinyelman anmenn touris Sesel, soutenir zot an term sa ki zot bezwen, elektrisite, delo eksetera, san ki nou ogmant lakantite ki nou depanse lo fuel, oubyen lakantite fuel ki nou servi pour nou prodwir bann keksoz de baz ki the Tourism Industry e ki Seselwa an zeneral i bezwen.

So, donk pour mwan, lefe ki sa Protokol pe koz lo sa size devlopman teknolozi vizavi lenerzi renouvlab, lefe ki sa Protokol pe koz lo:- sa SIDS DOCK pe act koman en catalyst, koman en fasilitater, ki pou ede devlop kapasite, ki pou ede partaz leksperyans, ki pou ede devlop Polisi lo bann size ki vir towards konservasyon lanvironnman.  o bann size ki vir towards sanzman klima, devlopman soutenab, konservasyon lenerzi, mon krwar i pou enportan pou nou pa zis ratifye sa Protokol, me pou nou zwe sa rol lo sa nivo e lo sa standar kot Sesel i ava vreman benefisye avek letablisman SIDS DOCK.  Mon krwar poudir i pou enportan pou nou e mon krwar poudir i enportan ki sa Lasanble i ratifye sa, akoz i kapab annan en kantite benefis pozitiv ki Sesel i kapab retire ladan.

Avek sa mon a dir mon pou siporte e mon krwar ki i enportan ki nou zwe sa rol lo sa nivo ki mon’n dir Mr Deputy.  Mersi.

MR DEPUTY SPEAKER

Right of reply, Onorab Rose.

HON MARIE-ANTOINETTE ROSE

Mr Deputy, mersi.  Mon pa pou long akoz mon krwar nou’n abord sa size a fon e nou’n met devan tou bann rezon akoz i enportan ki nou Lasanble, nou siport sa Protocol.  Zis avan mon komanse, mon ti a kontan ki nou met lo rikord ki napa tax lo bann glob energy saving. Gouvernman in deza fer sa e i deza egziste en Scheme kot bann dimoun i pa ganny pou nanryen, me selman i ganny a en pri redwir, bann glob energy saving. Mon krwar nou bezwen zis prezan konsyantiz dimoun pou zot ale, al tir benefis avek en tel proze.

Mr Deputy, SIDS in vin en power block.  Mon krwar sa i enportan pou nou rekonnet ki ozordi i pa zis bann gran pei, i pa zis Linyon Eropeen, i pa zis Linyon Afriken, i pa zis World Bank, i pa zis IMF ki en power blockSIDS is a power block.  And who’s leading this power block?  It is Seychelles.  Sesel i enn bann pei ki pe lead sa power block. Sesel i deza en Leader e linisyativ SIDS DOCK e bann travay ki’n ganny fer, Sesel is at the fore front.

Mon ti a kontan brefman, mon pa pou pran bokou letan.  Mon ti a kontan brefman, fer nou Lasanble e piblik Seselwa realize ki ler mon’n ekout bann entervenan, i annan en pattern tre kler lo ler par egzanp, Onorab Fideria i koz lo Seychelles we were. Sa Sesel kot nou sorti.  E fodre pa nou bliye Sesel, lalanp petrol.  Fodre pa nou bliye, si ozordi nou pe koz lo bann glob, tou bann kalite glob, energy saving enkli.  Fodre pa nou bliy kot nou ti ete, kot nou’n arive.  E mon krwar bokou entervenan in koz lo kot nou’n arive e The new Seychelles we want.

Mr Deputy, dan tousala, i annan one common denominator e sa se gouvernans Parti Lepep.  Personn pa pou kapab kestyonn gouvernans Parti Lepep an sa ki konsern tir nou dan lepok lalanp petrol, anmenn nou koman en pei modern e fer ki Sesel i lead en power block ki apel SIDS e ki nou kontinyen ozordi, refleksyon ki pe ganny fer dan nou pei, se where do we want to go. Wi.  The new Seychelles we want.  Sa ‘Nouvo Sesel’ ki nou, nou anvi.  E depi bomaten mon’n tann en kantite bon parol, bon linisyativ lo ki kalite Sesel ki nou, nou anvi.

E sa konversasyon Mr Deputy, otour sa kalite Sesel ki nou, nou anvi, set en konversasyon ki Gouvernman Parti Lepep ki pe fer, ki pe lead, ki pe dirize e ki pe angaz nou pep.  Sa i demontre Mr Deputy, en Gouvernman e en Parti o pouvwar ki serye.  Nou pa zis vini, met Policies ater, oubyen nou pa zis vini, pas en Mosyon akoz nou krwar i bon, me akoz nou pep osi pe dir nou i bon.  I sa ki nou, nou anvi: lenerzi renouvlab, nouvo linisyativ, protez nou lanvironnman, protez nou pei, annan devlopman soutenab, annan bann mekanizm ki redwir kou lavi e ki protez nou lanvironnman at the same time. Sa i bann Polisi stab, kler.  I annan en Onorab ki’n koz lo political e economic stability, me i montre ou en Parti ki lev boner e ki dormi tar, pou fer sir ki sa pep i dan bon lanmen.  E mon krwar ki i enportan ki nou pep i vwar ki nou above the rest, ki nou pe travay lo bann Policy kler e ki nou la.  Parti Lepep i la depi depi yer.  The Seychelles we were to the Seychelles we are.  To the new Seychelles we want in the future.

Mr Deputy, avek sa lentervansyon mon krwar, nou annan sipor Lasanble lo sa Protokol.  Mon remersi Lasanble pou konpran tre byen lenportans pou siport sa Protokol.  Mersi.

MR DEPUTY SPEAKER

Bon, avek sa nou pran en vot lo sa Mosyon.  Tou bann ki anfaver, lev zot lanmen?  Inanim.  Mosyon in ganny aprouve e Lasanble pou Break, pou repran 2er apre midi.

(BREAK)

MR DEPUTY SPEAKER

Bon.  Bonn apre midi tou bann Manm Onorab.  E nou ava kontinyen avek nou travay lo Order Paper. E i reste nou pou pran Mosyon table par Onorab Bernard Arnephy, Manm elekte pour Anse Boileau.  E mon a envit Onorab Arnephy pou prezant son Mosyon.

HON BERNARD ARNEPHY

Mersi Mr Deputy Speaker.

Mr Deputy Speaker, koman en pti pei, nou’n sorti lwen.  Pandan sa dernyen 38an, nou’n fer en ta progre dan diferan domenn e ledikasyon i pa en leksepsyon.  Pandan bokou lannen, annefe depi 1981, nou bann zanfan, bann zenn Seselwa e Seselwa an zeneral in zwir en sistenm ledikasyon ki’n gratwit e en sistenm ledikasyon ki’n prodwir en kantite profesyonnel dan diferan domenn.  Bann profesyonnel ki’n an retour zot osi, kontribye pou anmenn sa pei kot i ete ozordi.  Sa i en lenvestisman ki nou Gouvernman in fer dan nou pep, akoz nou’n toultan krwar, pour en pep kapab progrese, pour en pep kapab devlope, fodre i en pep edike.

Mr Deputy Speaker, dan son vent nevyenm Kongre le 5 Zen sa lannen, Parti Lepep ti vin avek en rekomandasyon enportan, parmi bann lezot rekomandasyon ki ti sorti dan sa Kongre, se ki apartir lannen 2016, ledikasyon gratwit obligatwar pou sorti 10an pou vin 11an dan tou Lekol leta.  E sa, depi laz 6an ziska 17an.

Mr Deputy Speaker, Lartik 33 nou Konstitisyon, i fer provizyon pou akse avek ledikasyon gratwit.  E sa menm Lartik dan nou Konstitisyon, i fer provizyon avek bann lezot Policies, bann lezot Lalwa, bann lezot Regilasyon ki swiv, ki nou bezwen donn en ledikasyon de kalite.  E sa ki nou’n toultan strive koman en Gouvernman, pou fer arive.  Me eski nou’n akonplir sa lanvi, sa bi, sa goal 100 poursan?  Mon larepons i non, akoz mon krwar nou annan ankor en kantite ki nou kapab fer.

Mr Deputy Speaker, le 29 Zen sa lannen, Prezidan Michel dan son Diskour pour Lafet Nasyonal, i ti fer sa lanons swivan e mon quote:- ‘Apre bokou refleksyon, mon Gouvernman in deside prolonz la dire ledikasyon obligatwar sorti 10an pou vin 11an.  Setadir ziska S5.  Sa i ava mye prepar nou zenn pou antreprann ledikasyon Pos Segonder, ekip zot mye pour lemonn travay e ed zot pou vin bann meyer sitwayen’.

Mr Deputy Speaker, sa i an relasyon avek vizyon nou Gouvernman pour sa nouvo Sesel ki nou anvi.  Sa nouvo Sesel ki nou pe kree.  Nou vizyon se pou nou annan en knowledge based society, pou nou kapab kontinyen fer plis progre ekonomik, progre sosyal, progre politik, kiltirel ensidswit.

Nou sistenm ledikasyon i enn ki permet tou nou zenn pou devlop son bann aki, son bann konesans, son bann savwar fer, savwar viv, eksetera.  E an mwayenn, sak lannen nou annan nou anviron 1300 a 1400 zanfan ki konplet zot letid nivo Segonder.  Setadir, S4, S5.  Par egzanp, an 2014, dan en total 1374 etidyan S4 atraver 10 Lekol segonder lo Mahe, Praslin e La Digue, 124 ti deside pa pourswiv zot letid lo nivo S5.  E ladan, en bon poursantaz sa bann etidyan, zot ti doue dan domenn vokasyonnel e teknik, me eski zot ti vreman pare pou pran lanplwa?  Pa neseserman.  Ozordi nou tann en kantite koze lo mank leksperyans.  Bokou anplwayer pa oule pran bann zenn pou travay akoz nou pe koz lo mank leksperyans.

En tel desizyon par Gouvernman Mr Deputy Speaker, mon mazinen i pou permet nou bann zenn atenn sa kalifikasyon akademik ziska nivo S5 e la answit, zot a deside dan ki channel vokasyonnel zot anvi ale, dan ki professional centres zot anvi ale.

Mr Deputy Speaker, mon mazinen en tel desizyon par Gouvernman, ki nou Lasanble pe siporte e mon mazinen ler Prozedlwa i a vini, nou a ganny plis leksplikasyon lo la, pou anmenn plizyer benefis pour nou pei.  Enn, mon mazinen i pou anmenn lenpak pozitiv lo zefor Sesel pou nou promot sa konsep envestir dan resours imen.  Ozordi, nou annan en kantite travayer etranze.  Mon’n deza dir dan sa Lasanble, mon repete.  Nou annan en lekonomi ki pe kontinyen agrandir, nou pou kontinyen bezwen travayer etranze.  Me nou osi bezwen kontinyen reste angaze koman en Gouvernman, pou asire ki otan ki posib, otan ki nou mwayen i permet nou, pou nou envestir dan devlopman nou bann profesyonnel dan diferan nivo.  E sa in ganny prouve enternasyonal, koman en endikater ki pou kapab devlop bann skills, bann konpetans e asire ki ou annan en marse lanplwa ki efikas, then ou bezwen pe envestir dan ledikasyon ou pep.

Mr Deputy Speaker, dan en Rapor pibliye lannen pase par United Nations Educational Scientific and Cultural Organization, UNESCO, in fer resorti ki Sesel i sel pei dan Lafrik ki’n atenn lobzektif ledikasyon pour tou, anliny avek 6 gol ki ti’n ganny set pour bann pei atenn par lannen 2015.  E sa i fer nou bokou fyer.  Bomaten nou’n tann koze dan sports.  En pti pei pe fer nou fyer.  Nou bann atlet.  Pli tar dan Mosyon ki’n ganny prezante, nou’n tande koman en pti pei, nou pe sanpyonn lakoz lanvironnman, lenerzi renouvlab e ankor, en Lorganizasyon repitab parey UNSCO i sanpyonn Sesel, pou kapab atenn bann lobzektif ledikasyon ki ti’n ganny set pou nou atenn by lannen 2015.

E sa bann goals Mr Deputy Speaker, se expanding and improving comprehensive early childhood care and education.

Dezyenm. Ensuring that by 2015, all children have access to and complete free and compulsory Primary and Secondary education of quality.

Goal number 3.  Ensuring that the learning needs of all young people and adults are met through equitable access to appropriate learning and live skills program.

Goal number 4.  Achieving a 50 percent improvement in level of adult literacy by 2015 and equitable access to basic and continuing education for adults.

E pour sa enn goal Mr Deputy Speaker, semenn pase dan prezantasyon Sertifika avek bann adilt ki’n swiv Laklas Alfabetizasyon, nou’n ganny dir poudir to date, Sesel we stand at 98 percent literacy rate dan sa pei.  E sa i en gro achievement ki go beyond sa target ki UNESCO in set.

Goal number 5.  Eliminating gender disparities in Primary and Secondary education by 2015 and achieving gender equality in education by 2015.  By ensuring full and equal access to and achievement for both gender, at Primary and Secondary level.  Education reform plan 2009/2010.

Goal number 6.  Improving all aspect of the quality of education and ensuring excellence of all, so that recognized and measurable learning outcomes are achieved by all, especially in literacy, numeracy and essential live skills.

Mr Deputy Speaker, parey mon’n dir, dan nou sistenm ledikasyon nou’n fer en kantite pou nou kapab ariv kot nou ete ozordi.  E dan sa nouvo Sesel ki nou pe kree, nou anvi anmenn plis loportinite pou nou fer bokou pli byen e pou nou adres serten bann defi ki nou pe fer fas avek e ki pli tar dan mon lentervansyon, mon pou koz en pti pe lo la.

En lot benefis en tel desizyon par Gouvernman pou prolonz ledikasyon obligatwar sorti 10an pou vin 11an, i pou anmenn plis loportinite lanplwa pour nou lazenes.  Me sa, avek nesesite ki nou asire ki sa progranm lekol ki nou pe ekspoz nou bann zenn avek, i enn ki donn maksimonm loportinite nou bann etidyan, pou zot devlop zot konpetans total.  E ankor taler mon a koz en pti pe lo la.

Trwazyenm lenpak pozitiv ki sa pou anmennen lo nou sistenm, se ki i pou ed nou atenn 100 poursan vizyon pou nou kree sa knowledge based society ki nou anvi kree.  Ledikasyon e training i en pilye fondamantal pou ed nou atenn en tel vizyon.  Ekspoze avek bann form teknolozi inovativ, pou kapab ed nou adres sa.  Bann metod lansennyman efektiv, inovativ pou kapab ed nou atenn sa.

Ozordi Mr Deputy Speaker, nou fer fas bokou avek mankman Ansenyan e mon mazinen ki Sesel it’s high time ki nou move dan sa ki nou apel virtual classroom.  Kot nou invest dan teknolozi, kot an retour, malgre par egzanp nou annan nou en sel Teacher a nivo S4, me avek teknolozi, en sel Teacherr i kapab an menm tan pe teach 4 laklas.  E mon mazinen, en move dan tel direksyon, nou pou bezwen pe venture dan sa area, akoz nou problenm mank Teachers pa enn ki nou pou kapab rezourd ozordi pour demen.

Mr Deputy Speaker, en lot lenpak pozitiv ki en tel desizyon pou anmennen, se lenpak pozitiv lo bann zanfan ki sorti dan bann lakour vilnerab.  En kantite dan 124 etidyan par egzanp ki ti deside pa pourswiv zot letid o nivo S5 lannen pase, en pti resers in ganny fer pou sivre zot.  In vwar poudir i annan bokou ki’n al on Training Scheme, me i annan bokou ki zis la pa pe fer nanryen.  E ler zot in fer pti resers, zot in vwar poudir en kantite sa bann zenn i sorti dan bann fanmir en pe vilnerab, kot napa sa serten soutyen, sa serten sipor pou ankouraz zot pou zot fer keksoz ki prodiktiv.  E mon mazinen, Sesel ankor enn fwa, nou’n desote sa staz nou.  Ler nou pe koz vilnerabilite, nou napa sa kantite zanfan ki pa oule al lekol akoz petet serten mankman o nivo lafanmir.  Non.  Nou napa sa.  Me ki nou anvi nou, nou anvi ki tou zenn ki deside pou li aret lekol a parti S5 ler sa nouvo Lalwa pou vin an plas, at least i ganny channel dan en Professional Centre, sa ki nou apel en Pos Segonder Lenstitisyon, kot i kapab pourswiv son letid, devlop son bann skills, devlop son bann konesans, eksetera.

Mr Deputy Speaker, eski en tel desizyon pou annan en lenpak negativ lo Bidze Gouvernman, Bidze Ledikasyon?  Mon mazinen wi.  I pou annan en reperkisyon me i something ki avek bon planifikasyon, nou kapab manage. E pou nou kapab fer sa, nou bezwen fer sir ki nou annan nou en bon sistenm tranzisyon ki prepar manrmay from Primary to Secondary.  Nou bezwen fer sir ki nou Curriculum lekol i catter pour bezwen tou bann manrmay.  E sa i en defi ki nou pe fer fas avek ozordi.

So, ki mon mazinen Minister Ledikasyon, ansanm avek son bann partner pou bezwen komans fer de aujourd’hui e the good news ankor se ki UNESCO in deza la, annan serten expert ki pe travay avek Minister Ledikasyon, pou prepar bann Zofisye Minister, ansanm avek bann lekol, pou kapab anbark dan sa tranzisyon lannen prosenn 2016.  Nou bezwen kontinyelman vwar e revwar konteni bann zouti kle lansennyman e laprantisaz.  E sa i byensir nou Curriculum ki bezwen pe a tou pri zwenn bezwen spesifik sak etidyan dan sak lekol.  Nou pou bezwen pe kontinyelman get dan welfare bann Teachers, pran zot konsern o serye e kontinyelman trouv meyer fason pou adres konsern bann Teachers.

Mr Deputy Speaker, ler ou koz avek en kantite Teachers dan lekol, zot eksprim zot bann konsern e en kantite sa bann konsern i bann konsern ki genuine, ki reel.  Ozordi, nou annan en mank Ansenyan dan lekol.  I annan laklas ki pa pe ganny kouver.  Be it Primer, be it Segonder.  Me nou vwar ki nou annan en Sekretarya dan Minister Ledikasyon, ki li i annan en kantite Teachers konpetan, ki ti kapab dan lekol pe donn koudmen pou enplimant sa Curriculum dan lekol.

Mr Deputy Speaker, dan bann lannen 80 ler mon ti pe lekol Anse Boileau Primer, lekol ti Primer ansanm avek Segonder.  Ti napa sa kantite sef dan lekol.  Mon rapel ti annan en Head Teacher, ti annan en Studies Coordinator.  Enn pour Primer, enn pour Segonder.  Ti annan zis 3 Sef.  E larestan ti bann dimoun ki ti dan laklas pe teach. Ozordi dan lekol ki nou vwar se ki, Teachers i fristre akoz i annan son koleg ki abiz lo li, ki kontinyelman pe mank travay e li i bezwen al kouver.  Me de lot kote ki nou vwar.  Nou annan bokou bann Subject Coordinators, bann lezot dimoun ki li i asize dan en Biro.  Laklas pa ganny kouver, manrmay i ganny kite tousel e progranm lekol pa mars comme il fautSo, sa sityasyon la, i osi egziste dan Minister Ledikasyon.  So, mon mazinen Minister Ledikasyon koman Sekretarya, i pou bezwen down size son lekor, servi nou bann Teachers konpetan, kalifye ki pe asize kot Minister Ledikasyon e al dan lekol, donn en koudmen pou fer marse progranm lekol.  Sa pou ed nou achieve nou lobzektif, kree sa knowledge based society, ki nou oule kree.

Mr Deputy Speaker, nou bezwen fer zanfan pran responsabilite pou bann loportinite ki zot pe gannyen.  Pran plis responsabilite pou zot prop laprantisaz e fer fas avek konsekans zot bann aksyon.  Akoz?  La nou pe koz nou’n fini achieve zafer education for all. La nou pe koz lo quality education. E pou nou kapab achieve quality education, fodre ki etidyan dan lekol, i permet son lezot kanmarad ki anvi aprann, pou aprann.  E nou bezwen asire pou sa arive within the school setting itself, the school Curriculum i bezwen a tou pri rod meyer fason pou li adres bezwen sak etidyan a sak nivo, dan sak cycle nou sistenm.

Nou bezwen revwar alokasyon finansyel e zesyon sa bann finans ki lekol i gannyen.  E ozordi, it’s high time. Ler nou anbark lo sa tel desizyon, nou bezwen pe kapab don lekol plis lotonomi pou li kapab zer son prop zafer.  Ozordi tro bokou keksoz i ganny dikte from the Central Ministry, Central Headquarters.  Ok. Sak lekol i annan son bezwen spesifik.  Sak lekol, son konteks sosyal i diferan.  Sak lekol, son lokasyon zeografik petet i annan serten lefe ki swa pozitiv, ki swa advers lo lafason ki zanfan i kapab aprann.  So, nou bezwen kapab donn lekol sa lotonomi pou li zer son zafer en pti pe plis li menm.

Mr Deputy Speaker, nou’n koz en kantite lo sa zafer authomatic promotion, ki ankor en size ki bann profesyonnel pe diskit lo la.  So, mon mazinen sa i ankor en lot area ki nou bezwen regard ladan.  Eski nou pou annan serten alternativ pour bann manrmay ki pe struggle pou li perform, me ki tou le-z-an i otomatikman monte dan next level.  Nou bezwen re vizit nou bann Progranm Teknikal e Vvokasyonnel.  Training, sa ki nou apel TVET. Ozordi parmi bokou dimoun, ki swa bann profesyonnel ledikasyon, nou annan en move konsep vizavi progranm TVET. Nou krwar poudir progranm TVET i la zis pour bann manrmay dan lekol ki donn hard time, ki pa anvi aprann.  TVET Progranm i merit pran en lot lanpler.  TVET i mert pe siport akoz en kantite:- en pti resers ki mwan mon’n fer personally, mon’n koz ek serten manrmay ki dan progranm TVET.  Sa bann manrmay zot pa neseserman akademikman move zot.  Me zot, zot lentere i plis dan bann keksoz teknik, e vokasyonnel.  So, within the school setting itself, nou pou bezwen fer sir ki nou met resours adekwat dan nou progranm Technical lekol, S4, S5 sirtou, pou asire ki nou meet bezwen sa bann manrmay.  E ler sa bann manrmay i al out there dan Lendistri, nou bezwen osi asire ki i annan bann bon sistenm sipor e formasyon ki siport zot, pou enteres zot, pou motiv zot, pou zot attain zot maksimonm in terms of bann skills ki zot pe resevwar.

Nou bezwen revwar en pti pe sa rol private partnership, ok, avek piblik, Minister Ledikasyon.  Ozordi en kantite sipor lekol i kapab vini atraver Public Private Partnership. E sa i en keksoz ki nou bezwen ankouraze si nou anvi kontinyelman siport nou bann zenn, siport nou bann etidyan pou zot achieve zot maximum.  Nou bezwen revwar fonksyonnman bann Professional Centres e en sizesyon se donn zot en pti pe plis lotonomi.

In prouve, par egzanp Mr Deputy Speaker, ki STA ki tonm anba son Mother Ministry ki Minister Tourizm, i pe fer en kantite sikse.  Ki swa lo nivo lokal, ki swa lo nivo rezyonal e menm enternasyonal, akoz sa sipor ki i pe gannyen avek son Parent Ministry. E mon mazinen, bann lezot Professional Centres, it’s high time ki nou deside whether i pli fezab pou nou met zot anba zot Mother Ministry respektif, kot zot ava ganny plis sa sipor pou zot kapab run zot bann progranm.  E Minister Ledikasyon li i a la koman regilater, in terms of bann policies and so on.

E nou bezwen osi ranforsi kapasite Liniversite Sesel, nou konnen i ankor nouvo, pour ki nou ankouraz plis zenn pou zot zwenn Liniversite, apre zot training.  Sa i ava vin en form motivasyon.  Mon konnen i annan en demars ki pe ganny fer pou nou ankouraz bann international students pou vin pran training dan nou Liniversite.  E sa dan li menm, i pou en motivasyon pour nou bann manrmay lokal, pou zot enterese pou zot join nou Liniversite.

So, Mr Deputy Speaker, bann lezot koleg ki pou koze pou koz en pti pe plis lo bann lezot benefis ki en tel demars pou annan.  Mon mazinen ki sa desizyon i enn ki vizyoner e ki pou prepar tou nou bann zenn pou zot achieve zot potansyel o maximum.

So, mon pou les laparol avek bann lezot koleg, pou zot koz lo sa desizyon e pou nou siport Gouvernman when the time comes pou nou pas sa Lalwa.

Mersi Mr Deputy Speaker.

MR DEPUTY SPEAKER

Bon okenn Manm ki segonn sa Mosyon?  Onorab Pillay.

MR DEPUTY SPEAKER

Bon, okenn Manm ki segonn sa Mosyon.  Onorab Pillay.

HON SEBASTIEN PILLAY

Mr Deputy Speaker, mon pou segonn sa Mosyon e mon ti a kontan dir 2 pti mo lo la.

MR DEPUTY SPEAKER

Ou pou dir 2 pti mo?

HON SEBASTIEN PILLAY

Yes.

MR DEPUTY SPEAKER

Mon swete i 2 pti mo.  Proceed.

HON SEBASTIEN PILLAY

Enn de.  Mersi Mr Deputy Speaker.

Mr Deputy Speaker, pandan mon karyer, mon’n fer en ase long parkour dan Ledikasyon, kot mon’n travay a plizyer nivo dan sistenm Ledikasyon.  Premyerman, mon’n komans koman en Ansennyan, en Teacher Matematik dan Lekol Segonder, kot apre mon’n vin sa dimoun ki ti basically supervise lansennyman Matematik dan Lekol Segonder e pli tar apre ki mon’n ganny sans al Liniversite, aprofondir mon konesans, mon ti menm en Deputy Head Teacher pouR Curriculum dan en gran Lekol Segonder, kot esansyelman sa fwa si, mon ti oversee:- mon ti supervise lenstriksyon e enplimantasyon Curriculum dan tou size dan lekol.  E sa in donn mwan en perspektiv ase inik an sa ki konsern lafason ki mon vwar sistenm Ledikasyon, an sa ki lafason ki mon vwar devlopman nou sistenm Ledikasyon, me pli enportan, in donn mwan en perspektiv inik an sa ki konsern nou etidyan Seselwa e bann konpleksite e bann keksoz ki fer nou diferan konman en pep, vizavi lezot pei kot i annan bann sistenm Ledikasyon ki parfwa i menm similer oubyen annan bann paramet ki parey pour nou.

Pandan mon karyer Mr Deputy Speaker, mon’n osi travay koman en Education Officer e mon’n menm train Teachers. E ler mon dir ou mon’n ganny en perspektiv inik, mon’n ganny li from tou son fasset.  Dan le sans kot mon’n menm donn lenstriksyon dan laklas e mon’n menm train sa dimoun ki pe al dan sa laklas pou donn lenstriksyon.

E ki mon’n analize pou mon vwar Mr Deputy Speaker, se ki sa desizyon ki nou’n pran pou lengthen sa letan ki zanfan i pase compulsorilly dan lekol, i un, ki tre enportan sirtou si nou le al ver enriching human resource base dan nou pei.  Nou napa swa akoz ler nou regard resours ki pli enportan ki nou pei i annan, si ou pou dir mwan ozordi ki resours pli enportan ki nou pei i annan, mon pou dir ou se nou dimoun, akoz en lenvestisman ki nou’n konmans fer dan nou dimoun, ki sa Parti li menm li atraver son Polisi, son prensip, ‘Met zonm o sant devlopman’, in komans fer bokou lannen de la e ki ozordi nou pe kontinyen konsolid lo la.  I enn ki tre enportan, par lefe ki se sa ki pou asire ki nou pou annan en zenerasyon fitir ki pou kapab pran la relev e pou kontinyen anmenn nou pei pli devan.  E la mon krwar nou bezwen fer en deba pa zis teknik, me en deba osi baze lo en nivo afektif, kot nou regarde ki pe arive ozordi avek nou bann zenn dan sa konzonktir aksyel ki nou trouv nou lekor ladan.  Kot pei in avanse, kot nou bann zenn pe ganny akse avek diferan keksoz pli boner, pli vit e ki mannyer prezan nou deal avek sa sityasyon, pou asire ki en zenn pa drop out lekol tro boner.  Kot apre ou vwar li ler in fini drop out, i tourn ver delenkans, i tourn ver bann problem ki come back to her, to society.

Mr Deputy Speaker, mon dir sa akoz pe enport kote ou reste deryer ou baro oubyen si ou napa en baro oubyen ou reste dan en flat oubyen wherever ou reste, nou tou nou pou bezwen frekant menm landrwa, nou tou nou bezwen mars menm landrwa.  E sa zenn ki li in drop out dan lekol kot apre i pou end up pe fer bann aktivite ki negativ, i pou end up antre dan ou lakaz e pran keksoz.  Akoz esansyelman, sistenm Ledikasyon pa’n permet, pa’n arive, pa’n abouti kapab fer sa zenn konpran lenportans laprantisaz, lenportans annan en knowledge pou li al ganny en louvraz pli tar.  E se sa mon krwar ki nou bezwen met an perspektiv ozordi e se sa ki enn bann eleman kle sa lanons ki ti ganny fer e akoz nou pe siport sa demars.

Mr Deputy Speaker, pandan mon karyer, mon’n vwar lenstans kot par egzanp, ou pe teach en laklas S1 Matematik e ou vwar poudir menm lo nivo S1, en zanfan pa pare pou li asize dan laklas, pou li swiv laklas.  Ee mon pa pe pran okenn:- mon pa pou pran okenn konparezon avek en Lekol Prive, me mon pou konsider en Lekol Leta e ki mannyer sa zanfan li menm li i tret son laprantisaz, ler i vini i asiz lo sa ban lekol.

Mon’n annan sirkonstans kot en zanfan i vini premye zour Mr Deputy Speaker e mon en keksoz ki mon ti kontan se premye zour Larantre toultan.  E premye zour Larantre ou kontan li akoz ou santi sa loder plastik partou la.  Pencil case i nef, liv i nef, sak i nef, kaye i nef.  E manman in trimouse pou donn li tou sa keksoz.  Ler i dir ou i ariv dernyen zour, Vandredi premye semenn lekol, sa menm zanfan ki’n prezant son lekor kot lekol avek tou son bolpenn, tou son kaye, menm calculator nef, i napa ni son calculator, i napa ni son bolpenn e son kaye, ou bezwen al donn li en kaye.  E sa i pa en refleksyon lo sa paran me i plito en refleksyon lo sa zanfan.  Ki lenportans sa zanfan ki pe pran grandi i atase avek son laprantisaz.  E si sa menm zanfan i progrese atraver nou sistenm Ledikasyon demen i vin en paran, ou kapab konpran prezan ki kalite moral li i pou donn son zanfan ler in ariv son tour.

Mon’n vwar sirkonstans Mr Deputy Speaker, kot dan mon karyer, kot mon’n vwar zenn ki mon’n ansenny zot dan lekol, mon rapel mannyer zot ti ete e ler ou al kot zot, i zis parey ou pe vwar, ou pe get dan en time capsule konmsi.  Menm trait behavior ki li i ti annan, i sa, i annan dan son zanfan ozordi.  And this is where prezan ou bezwen take stop e dir ekout en kou, tyonbo en kou la.  What are we going to doAnd that’s what we are doing now akoz si nou pa pran sa desizyon ki la, pou nou fer sir ki en zanfan nou kontinyen rod tou fason posib pou ankadre li pandan en peryod laz kot i tre vilnerab e tre siseptib avek lenfliyans, ou riske perdi ou en whole generation.  E pou mwan sa i en keksoz tre serye, vi ki mon tenir Ledikasyon aker.  E se pour sa rezon ki mwan krwar nou tou nou devret siport en tel linisyativ.

Sertennman Mr Deputy Speaker, ler ou get li lo en nivo teknik, i pou annan serten konponan ki bezwen ganny aziste.  Me sa bann azisteman i vin natirel akoz ou annan en sanzman dan Polisi.  E sa Polisi ki pou drive bann sanzman dan stratezi ek bann plan.  Tou i bezwen konekte.  E en keksoz ki mon krwar ki tre pozitiv e ki piblik Seselwa i bezwen konpran se ki la ki Minister Ledikasyon in angaz li towards Program Performance Base Budgeting, dan le sans ki son progranm i bezwen ganny bidzete e i bezwen ganny coasted according to son performans e ou annan bann clear, bann edikater ki pou montre ou ki mannyer sa progranm i performen, i pou pli fasil pou ou analize e regarde ki bann konponan neseser ou bezwen met an plas, pou asire ki ou kapab vinabou sa demars gard en zanfan dan lekol, ziska en serten nivo, me osi ankadre li dan lafason ki i devret ganny ankadre.  E se sa ki tre, trez enportan.

En pti anekdot Mr Deputy Speaker.  Zanmen mon a bliye sa.  Mon’n deza annan en laklas S5.  Mon vini, nou annan:- mannyer nou’n fer Time Table kot lekol, nou ti annan 2 peryod.  En peryod bomaten, en peryod apre midi.  Ler i dir ou i annan sa peryod bomaten Mr Deputy Speaker, tou dimoun i la.  Ler i dir ou sa peryod apre midi, mon bezwen fer letour lekol rod mon bann etidyan.  Zot S5.  S5.  E sa i montre ou ki si nou pa komans target nou bann zanfan a en tre zenn az, i pou ariv en moman kot pou annan en dekli kot zot pa pou konpran larealite ki zot bezwen pe fer.  E sa ki i fer, i kree en sityasyon kot en Teacher li dan en laklas, malgre ki sa Teacher in vin fer tou son preparasyon e dan en laklas ou annan ou lanmwatye zanfan ki anvi aprann, lanmwatye zanfan ki zot, zot in santi poudir ozordi zot vin pran en break. Ou bezwen pas ou letan pe deal ek sa lanmwatye zanfan ki pe pran en break. Ou annan en difikilte pou ou kapab fer sa bann ki anvi aprann, aprann.  Me par kont, the most positive thing about this se ki nou sistenm Ledikasyon zanmen i give up lo zot.  Zanmen ou tande ki en Ansenyan i dir ok I give up. Tou Ansenyan i dir nou give up, nou arete.  E se sa keksoz ki nou bezwen bill lo la, an relasyon avek en tel lanons.  Ki mannyer prezan nou marye le 2 ansanm, pou asire ki nou kontinyen provide sa servis ki bann etidyan i bezwen, pour ki zot konpran nesesite ki ler zot fini lekol, zot pe vin en eleman prodiktiv dan sosyete.

Mr Deputy Speaker, en keksoz ki nou bezwen mazinen e sa i fondamantal.  Drwa Ledikasyon, bokou pei in mete dan son Konstitisyon.  Zis parey bokou pei in met Drwa Lasante.  Me selman, i depan lo konviksyon sa Gouvernman dizour pou fer sa Drwa vin en realite.  Bokou pei otour nou dan larezyon, I mean nou Kontinan sirtou, i annan sa bann Drwa ki’n ganny enshrine dan Konstitisyon.  Ler ou lir ou pou vwar byen zoli, byen ekrir.  Me ler ou al get larealite, i pa la ditou.  Tandis ki nou Sesel, malgre whatever difikilte ki nou pei in pas ladan, Gouvernman pa’n zanmen go back lo son commitment pou li provide an education of quality pour son pep.  I pa’n zanmen go back lo son commitment pou li onor sa ki Konstitisyon, Lalwa Siprenm nou pei, i demann li pou fer.  E se sa ki nou koman Seselwa, nou devret apresye ek going forward.  Se sa ki en Gouvernman serye i fer.  I kontinyen rod fason e meyer fason pou li kapab fer son pep epanouir, avans pli devan.

Mr Deputy Speaker, nou vwar nou dan en moman Sesel ozordi, kot nou’n avans en kantite.  E nou’n avans en kantite akoz nou en pei, nou stab.  Ekonomikman nou pare pour nou avanse.  Me prezan nou bezwen annan nou en zenerasyon ki pou kapab sezi sa bann aki ki nou’n gannyen e anmenn li pli devan.  E sak zenerasyon in fer son kontribisyon, zis parey mon zenerasyon pou fer e zenerasyon ki swiv mwan i bezwen fer.  Me pou nou kapab fer sa, nou bezwen rod tou fason.  Menm si en zenn pa pou kontan pou li reste dan lekol pour sa kantite letan, ou bezwen fer li konpran akoz li i ankor pe aprann li.  I pa ankor kapab fer en desizyon pour li menm li.  Malgre ki Lalwa i donn li serten pouvwar pou menm pou li emansipe, i still pa ankor pare pou li fer serten desizyon.  E i form par en kominote, i form par en Nasyon ki bezwen bouz devan.  I pa en endividi dan li menm.  E se pour sa rezon ki mon krwar poudir sa lanons i vin a en tre bon moman dan nou pei e si nou tou, tou Seselwa.  Parey nou dir Mr Deputy Speaker.  I pran en kominote pou fer grandi en zanfan.  Si nou tou Seselwa, nou tou dimoun ki dan sa pei, nou’n ralye deryer sa.  Nou met nou zefor, nou pare pou nou commit nou lekor.  Pa zis antre se ou ferm ou baro fini, ou pa pe kontribye, ou napa naryen pou fer ankor ek ou kominote.  Me kontribye ansanm pou nou kapab fer keksoz al pli devan, then nou pou succeed Mr Deputy Speaker.

E set avek sa ki mon oule termin mon lentervansyon Mersi.

MR DEPUTY SPEAKER

Onorab Rose.

HON MARIE ANTOINETTE ROSE

Mersi Mr Deputy.

Mr Deputy, mon’n anvi vreman partisip dan sa deba akoz sa propozisyon ki Prezidan Michel in fer e sipor ki i pe gannyen atraver nou Lasanble apre midi, ti vwar son nesans atraver en rezolisyon Kongre Parti Lepep.  I enn bann rezolisyon ki nou Parti, {Parti o pouvwar, Parti ki’n gouvern sa pei ver progre, in deside fer dan prosen letap devlopman.  Over the next 5 years, sa i enn son bann manda, pou fer ki ledikasyon obligatwar i vin 11an.  E mon kontan vwar adisyon avek sa Mosyon, ki nou osi focus lo Ledikasyon de kalite.

Mon krwar letap devlopman nou pei Mr Deputy, i egzize, i demande ki nou revwar nou sistenm Ledikasyon an zeneral.  Lafason ki nou zer sa ki nou apel an angle, knowledge management.  Nou pe vin en knowledged society. Nou literacy rate mon’n aprann lo Televizyon lot fwa, in ariv pros 99 poursan.  Napa pei o monn ki annan sa rate, me nou bezwen prezan fokaliz nou latansyon on the education system e fer sir ki sak zanfan ki antre dan sa sistenm skoler, whether it’s Private or Government, i sorti apre 11an kot i konn lir, i konn ekrir, i konn konte, me pli enportan ankor Mr Deputy, i annan serten skill ki nouvo Sesel pe demann li pou annan.  Lontan ler ou fini P9, i garde si ou konn lir, ou konn ekrir, ou konn konte, apre la ou al Pos Segonder oubyen ou al travay.  Ou fer en Tes P9, i donn ou, ou certificate.  I dir be bon, sa dimoun i kapab antre dan lemonn travay e akoz i annan sa 3 skills.

Ozordi dan sa monn kot nou pe ale, i annan a new set of skills ki tou Seselwa i bezwen.  E enn bann skill ki nou bezwen, se IT literacy.  Se pe konn mannye en Computer. Tou Seselwa ki sorti dan sistenm skoler ozordi, i bezwen konnen ki mannyer:- lontan ti en privilez.  Mon rapel ler mon ti al Liniversite, ti en dekouvert pou mwan komans servi en Computer akoz mon ti sorti dan en sistenm skoler kot IT literacy pa ti ankor vin en keksoz.  Ou ti aprann de trwa bann sistenm, me pou ou konpran en:- servi en Computer, me pli enportan, servi Internet e servi bann lezot tools ki en Computer i annan.  IT literacy, i en nesesite de baz irrespective.  Kot ou pou ale dan lavi, mon krwar ler nou pe koz lo qualityof education, nou bezwen pe koz lo la.  Ler nou pe koz lo quality of education Mr Deputy, mon krwar ou pou dakor avek mwan, ki social skills i enn bann keksoz ki nou bezwen re-etablir dan bann lekol dan sistenm Ledikasyon.  Ozordi nou annan dimoun ki fini lekol avek bon grad, bon Ledikasyon, me zot social intelligence, zot social and emotional intelligence i very low. E sa i pa fer zot vin achievers. Sa emotional and social intelligence i vin en baryer, en problenm dan zot lavi e anpes zot vin bann sitwayen prodiktiv.  E mon krwar en kantite problenm ozordi dan lekol, en kantite problenm endisiplin, en kantite problenm avek bann Teachers, en kantite problenm avek bann Teachers themselves, i annan pou fer zisteman avek social intelligence, avek emotional intelligence, kot nou bezwen vin en pep ki annan en kapasite dan nou pou nou rezet sa ki mal, me pou nou vwar keksoz byen.  Pou vin bann bon etre imen.

So, mon krwar dan sa 11 years of quality education, i bezwen annan bann laspe kot nou kouver sa.

Sa ki mon kontan avek sa 11an sistenm Ledikasyon, i pou fer ki nou pou napa school dropout Mr Deputy akoz i 11an Ledikasyon compulsory.  Ou pou napa en school dropout.  Si en zanfan:- akoz en zanfan ler i dropout lekol, i annan en gran likely hood, i pa al dan en metye veritab.  Ki i fer, dan sa 1an S4, kot i ale li?  Eski nou’n fer letid pou regarde, ler i S4, i pa anvi al S5, kote i ale?  Souvandfwa sa bann zanfan, zot pas zot letan anba laboutik, dan bann black spots, dan bann landrwa endezirab e zot end up dan bann aktivite ki endezirab.  So, the school system i bezwen kapab anmas sa bann zenn e met zot dan lankadreman.  Petet pa en lankadreman akademik e la mon kontan ki en bon pe lanfaz pe ganny mete lo Academic and Vocational Training. I annan zanfan ki konn ekrir, ki konpran lir, ki konpran konte, ki konpran servi en pti pe Computer, me i pa pou vin en Astronot, i pa pou vin en Einstein, i pa pou vin en Accountant, i pa pou vin en Dokter akoz son don, son gift pa sa.  Me i pou vin en bon Peser, i pou vin en bon Planter, i pou vin en bon Mechanic, i pou vin en bon sitwayen dan en domenn ki li i kontan e kapab fer.  E mon krwar sa 11an Ledikasyon compulsory i bezwen aksepte ki Vocational Training:- e deza i annan ki pe ganny fer.  Me aksepte ki Vocational Training is as important as Academic Training e i bezwen ganny menm sans.  Vocational Training pa devret ganny vwar pour bann zanfan rezete oubyen bann zanfan ki nou nepli konnen ki pou fer avek.

Mon krwar avek sa sistenm, i bezwen annan en laspe kot bann zenn delenkan, bann zenn ki annan potansyel delenkans, i reste dan sistenm Ledikasyon, me zot osi zot ganny serten training discipline.  Dan sa 11an Ledikasyon, i bezwen annan en laspe kot olye en zenn i fatig sistenm skoler, i lager, i fer en pake problenm dan lekol, nou met li an deor lekol oubyen i ganny sispann, i a reste dan lekol li.  I a kontinyen son lekol, me i ava al dan en progranm ki reform li.  En progranm disiplin.

Mr Deputy, mon’n anvi koz lo la akoz i enportan.  Mon swiv, mon ekout en kantite deba lo lazenes.  I annan en gran group lazenes ozordi ki pe pran zot loportinite.  I annan en gran group zenn ozordi ki dir ou, be mwan mon anvi al Liniversite, mwan mon anvi al dan domenn tourizm.  Mwan mon anvi al Pos Segonder, mwan mon en Artis, mon anvi devlop mwan dan Danse, dan Sante, dan Poenm, dan Lar.  Mwan, mon anvi vin en Pret, mon kontan Lapriyer, mon zwenn bann group Lapriyer.  I annan en kantite zenn ki pozitiv dan nou pei ozordi e ki anvi donn en koudmen fer sa pei marse.  Me nou annan dan Parti Lepep, en politik ki apel no one left behind. ‘Zonm o sant devlopman.’  So, sa pti group zenn ki nou santi pe ganny kit deryer, nou bezwen annan en sistenm pou anmas zot e pou remet zot dan lankadreman, kot zot osi zot ganny en premye sans e en dezyenm sans pou zot vin en sitwayen dezirab dan sosyete.

Mr Deputy, ler nou koz lo bann Polisi e politik Parti Lepep, i enportan pour lazenes akoz sa Mosyon i annan pou fer avek lazenes konpran ki ler en pake dimoun pe fer en pake tapaz laba deor, akoz zot, zot bezwen diriz nou pei, Parti Lepep pe reflesir lo ki mannyer pou diriz nou pei.  Lo ki nou pou fer pou fer Sesel pli byen.  Lo ki nou pou fer dan sa prosen 5,10 a 15an.  Lo bann Polisi, lo ki mannyer nou pou enpakte:- bomaten nou’n koz lo Sustainable Development.  Ki mannyer nou pou fer sir ki sa ki nou’n achieve, nou kontinyen tenir li e nou kontinyen soutenir nou pep.

Ozordi apre midi nou pe koz lo en devlopman e en reform dan sistenm Ledikasyon, pou konsolid nou bann gen, pou revwar nou bann defayans, me pou fer sir ki tou nou zenn i ganny tou son sans e tou son loportinite dan lavi.  Sa politik Parti Lepep i en politik serye.  Nou koz lo devlopman imen.  Nou pa asize dan en lasal e dir tou sord keksoz, oubyen nou pa viv lo fristrasyon en pep, oubyen nou pa viv lo serten defayans ki kapab egziste dan en sistenm.  Nou en Parti solisyon.  Nou en Parti devlopman.  Nou en Parti ki viz ver progre.  Nou en Parti ki viz ver lavenir.  Nou en Parti ki viz ver stabilite e nou ankor enn fwa, bomaten mon’n koz lo The new Seychelles we want. Sa Mosyon ki devan nou, i pe koz lo The new Seychelles we’re chartingThe new Seychelles we want.  Sa Nouvo Sesel kot nou anvi nou pep, nou zanfan i ale.

E dan sa prose reform dan Ledikasyon, i annan en eleman ki tre enportan e ki fodre pa nou bliye.  E sa se bann Teachers.  Dan sa prose, dan sa Mosyon la, nou Lasanble, nou pe siport professional development of Teachers.  Nou Lasanble nou pe siport tou keksoz ki bann Teachers pe fer pou zot al an avan.  Ozordi dan lekol la ater pa fasil.  En kantite Teachers ki ou koz avek, i dir ou, be en monetory incentive i pa neseserman the real incentive ki nou anvi.  Nou anvi en support system for Teaches in the Schools. Pa anba kot Minister Ledikasyon, in the Schools.  Nou anvi en sistenm ki konpran ki mannyer nou fer fas avek bann zenn ki difisil.  Ki mannyer nou fer fas avek an increasing demand from parents. Paran ozordi i egzizan.  Zanfan ozordi i egzizan.  Sosyete ozordi i egzizan.  E lekel ki anpar tousala depi 8er ziska 2.30, Lendi ziska Vandredi, se Teachers.  E dan sa reform:- e mon konnen Minister Ledikasyon i fer en kantite pour bann Teachers, me the Education System is not the concern of the Ministry of Education aloneIt’s a concern of tou sitwayen, tou politisyen, tou dimoun ki pas Bidze.  Nou tou la e tou dimoun ki enterese avek Ledikasyon e Ledikasyon nou zanfan.  Nou bezwen asize vwar ki mannyer nou bezwen siport The Ministry of Education, pou li akonplir sa ki nou anvi akonplir.  In other words, The new Seychelles we want.

Mr Deputy, mon pou aret la me mon krwar le pwen i enportan pou dimoun rekonnet poudir sa set en rezolisyon Kongre Parti Lepep.  I en demann fer par nou Parti e i en pa dan en bon direksyon.  Napa byen, byen pei o monn ki kapab etablir 11an Ledikasyon obligatwar.  I en rikord e i en:-nou pe si ou oule, etablir en model, pour lemonn.

A note, nou pe koz lo kwa ki nou kapab improve lo la.  Mon krwar a note i enportan pou nou koz lo ki nou’n akonplir dan sistenm Ledikasyon ozordi.  Ki nou’n akonplir dan sistenm Ledikasyon ozordi, statistik lo konbyen milyon ki’n ganny depanse lo zanfan, lo devlopman Teachers, lo materyo.  Statistik lo konbyen lanfaz, lo ki poursantaz Bidze ki nou allocate a Ledikasyon dan sa pei e statistik lo konbyen progranm ki’n ganny met an plas, pou fer sir ki nou sistenm Ledikasyon i vreman reponn lapel a en Sesel modern.

Mr Deputy, mon pou aret la e definitely, mon pou siport sa Mosyon e mon ti a kontan felisit Onorab Arnephy, li menm en dimoun ki’n travay en kantite letan dan Ledikasyon, pou anmenn sa Mosyon devan.

Mersi.

MR DEPUTY SPEAKER

Right of Reply, Onorab Arnephy.

HON BERNARD ARNEPHY

Mersi Mr Deputy Speaker.

Mr Deputy Speaker, mon ti a kontan remersi Manm ki’n koz lo sa Mosyon, an faver.  E parey nou’n dir, lobzektif prensipal en tel Mosyon se it’s the right time now ki nou komans koz lo met lanfaz lo quality educationOk. Nou’n koz en kantite lannen lo education for all, ki nou’n achieve e nou’n menm sirpas lekspektasyon.  So, la nou pe koz lo quality education.

Me pour sa kapab arive Mr Deputy Speaker, parey in ganny dir se ki nou bezwen fer sir ki sa lanvironnman lekol i enn ki conducive. Ki permet sa arive.  E dan sa demars, i nesesit partisipasyon, i nesesit komitman tou dimoun.  Tou dimoun, depi etidyan, depi paran, depi Minister Ledikasyon e la kominote an zeneral.

Nou envestir, parey Onorab Rose fek dir, nou envestir en kantite resours dan nou sistenm Ledikasyon.  Annefe, for the past years, Minister Ledikasyon in sa Minister ki resevwar dezyenm pli gro porsyon nou Bidze Nasyonal. e nou, nou bezwen fer sir ki sa lenvestisman i tous tou nou etidyan, i tous tou nou zenn pou zot kapab devlop to zot maksimonm.

Dan en tel demars osi, mon mazinen Minister i bezwen, parey mon’n dir pli boner.  E mon krwar Onorab Rose in koz en pti pe lo la.  Minister Ledikasyon i bezwen revwar en pti pe lafason ki sirtou Lekol Segonder i ganny striktire.  The issues i la dan lekol e donn lekol sa lotonomi pou li kapab zer son bann issues.  Pou li kapab zer bann defi ki i fer fars avek e li menm li koman en lekol, koman en kominote, an partnership avek lezot son bann bodies. School Councils, PTAs, rod meyer fason pou adres bann issues.

Mr Deputy Speaker, The new Seychelles we want, i nesesit sa lanfaz, sa focus, lo asir touzour en meyer sistenm Ledikasyon, kot nou kontinyelman prodwir bann meyer sitwayen e kot an retour, sa bann sitwayen zot kapab pran, zwe en rol pli proaktiv dan devlopman, dan progre zot pei.  Parey that saying i dir, the sky is the limit, nou Gouvernman, Gouvernman Parti Lepep in open the sky pour nou lazenes, pour nou Seselwa, so nou kont lo zot pou zot kapab reach zot limit e make the most of tou sa bann loportinite ki sistenm, ki Gouvernman pe met a zot dispozisyon, pou zot kapab vin sa ki zot anvi vini e pou zot kapab donn koudmen pou mentenir tou sa lannen progre ki koman en pei nou’n fer e ki nou bezwen mentenir li pour sa next 50 years or so.

So, avek sa de trwa mo Mr Deputy Speaker, mon ti a kontan demann tou bann Manm pou siport sa Mosyon.

Mersi.

MR DEPUTY SPEAKER

Bon, lo sa Mosyon nou pran en vot.  Tou Manm ki an faver?  Inanim.  Mosyon in ganny aprouve.  Avek sa Lasanble i ava adjourn e nou ava rezwenn Mardi le 22 Septanm.

ADJOURNMENT