::
Home » Verbatim » Verbatim - Second Term 2015 » tuesday-4th-august-2015

tuesday-4th-august-2015

NATIONAL ASSEMBLY OF SEYCHELLES

Tuesday 4th August 2015

The Assembly met at 9 am

National Anthem

Moment of Refflection

Mr Speaker in the Chair

MR SPEAKER

Bonzour tou bann Manm Lasanble Nasyonal. Bonzour Minis ek son delegasyon. Dan Galeri nou osi annan dezyenm group sorti kot NATCOF. Mon dir zot bonzour e byenveni.

I would also like to welcome a delegation from the Parliament of Namibia. Rather, from the Secretariat of the Parliament of Namibia. The delegation will be on attachment with our own Secretariat for the coming week. I wish them all the best and welcome to the National Assembly of Seychelles.

Avek sa, ozordi nou annan parmi nou, Minis Wallace Cosgrow, ki Minis pour Lapes e Lagrikiltir. E Minis pe vin reponn plizyer Kestyon konsernan son Minister. Nou a komans avek Kestyon 132, Onorab Maria Payet-Marie.

HON MARIA PAYET-MARIE

Mersi Mr Speaker. Bonzour Mr Speaker. Minis ek ou delegasyon, tou dimoun dan Galeri, Manm Lasanble National, tou dimoun a lekout, bonzour.

Eski Minis i kapab enform nou Lasanble, si son Minister i annan plan pou revwar fasilite kredi ki bann Fermye pe gannyen, pou asire ki sa bann tel fasilite i ase pou zot kapab konplet bann proze ki zot in komanse? Mersi.

MINISTER WALLACE COSGROW

Mersi Mr Speaker. Bonzour Mr Speaker. Bonzour tou Onorab. Bonzour tou dimoun ki dan Galeri. Bonzour bann oditer lo Radyo e osi bann dimoun ki pe get nou an direk lo Televizyon.

Mr Speaker, mon Minister i konsyan difikilte ki Fermye pe fer fas avek pou kapab ganny kredi abordab pour zot bann proze agrikol, sirtou avek bann serten Lenstitisyon Finansyel Komersyal.

Ozordi par kont Mr Speaker, nou annan en fasilite kredi spesifik ki vize ver Sekter Agrikol e sa se Fon Devlopman Lagrikiltir ouswa ADF parey nou dir an angle.

ADF ti komanse avek sipor Labank Devlopman Afriken plis ki 20an pase e ki aprezan pe ganny sipor Gouvernman Sesel, sipor finansman avek Gouvernman Sesel e i ganny zere par Labank Devlopman Sesel, DBS.

Ziska tou resaman Mr Speaker, ADF ti ofer loan pa plis ki R250. Avek kou devlopman ki’n ogmante dan Lagrikiltir, nou ti ogmant sa pou vin R750 mil tou resaman. Fermye avek proze ki kout plis ki R750 mil, zot kapab pret anba SME Scheme. Sa i en Scheme pour bann tip ti e mwayen antrepriz ki ganny administre osi par DBS. La zot kapab ganny ziska R3 milyon a en to lentere 5 poursan. So, SME Scheme i osi en fasilite ki Fermye i kapab akse pou zot ganny larzan anba la. Mon oule fer resorti ki Fermye i osi kapab apros lezot Labank pour finansman, me zot pou bezwen kapab konvenk sa Labank lo rantabilite, vyabilite sa bann proze ki sa Labank pou finanse.

Avek bi pou relans Sekter Agrikol Mr Speaker, prensipalman Sekter Prodiksyon Zannimo, nou pe ansanm ek Labank Devlopman fer serten travay vize ver plis kredi e osi fasilite adisyonnel. Nou pou fer en lanons piblik tre byento ler tou in fini finalize e mon pe ekspekte ki i tre byento, Mr Speaker. Mersi.

MR SPEAKER

Okenn siplemanter, Onorab?

HON MARIA PAYET-MARIE

Wi Mr Speaker. Mr Speaker, mon ti a kontan demann Minis ki bann kontrent oubyen bann problenm ki son Minister pe fer fas avek e osi bann pti Fermye ki anvi konplet zot proze, vizavi fasilite avek kredi. E si Minis i annan statistik ki i kapab petet met devan nou Lasanble, lo konbyen Fermye ki pe benefisye avek fasilite kredi ki annan aktyelman la? Mersi Mr Speaker.

MINISTER WALLACE COSGROW

Mersi Onorab. Mersi Mr Speaker. Parey mon’n dir, nou rekonnet petet to lentere avek bann sirtou serten Lenstitisyon Finansyel, Komersyal, Prive i en pti pe o pou petet pou Lagrikiltir, pou Fermye kapab lans dan Lagrikiltir. Me selman par kont, parey mon’n dir, nou annan sa ADF ki li i a en to 2.5 poursan, ki mon krwar i en lentere ki bokou pli ba e si i pa pli ba ki tou lentere loan ki pe donnen isi pou lemoman. So, pou lemoman nou pe travay for avek DBS pou gete ki mannyer nou kapab vwar e revwar ADF e pou donn akse plis kredi avek Fermye e pou inject en pe plis larzan dan ADF pou kapab asiste plis Fermye, sirtou bann Fermye ki oule relans dan Livestock, pou kapab remet sa Sekter anler.

Pour lemoman Onorab, mon napa statistik lo ki kantite ki pe benefisye, me selman sa i kapab ganny donn avek Lasanble, avek ou Onorab tre byento. Mersi.

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker. Bonzour Mr Speaker. Bonzour tou dimoun; tou dimoun ki a lekout e tou bann envite dan Galeri.

Mr Speaker, mon ti a kontan demann Minis:- Minis Kestyon in koz lo fasilite ki bann Fermye i gannyen pou konplet zot proze. Mon ti a kontan demann Minis ki arive ler serten Fermye pa konplet zot proze, alor zot lease ouswa vann zot lease avek en lot dimoun e sa i deny lezot Fermye sa fasilite pou zot osi agrandi zot bann prodwi? Mersi.

MINISTER WALLACE COSGROW

Bon. Mersi Onorab. Mersi Mr Speaker.

Lideal Onorab, se ki tou Fermye ki ganny loan avek nenport ki Fon kredi, ki DBS ki ADF, lideal se ki zot konplet zot proze e ki zot kapab fer sa proze vin en proze vyab e ki zot kapab lev Lagrikiltir an zeneral.

Me ler ki en Fermye petet i vwar li dan difikilte e i pa pe kapab konplet sa proze, nou annan tout en swivi ki ganny fer par Lazans Lagrikiltir avek sa Fermye. Me selman, i annan letan ki petet sa Fermye li menm, in mal kalkil serten keksoz ouswa i annan serten keksoz an deor son kontrol ki afekte li. Me selman nou travay ek zot. DBS osi i travay ek zot pou gete ki mannyer zot kapab petet reschedule sa bann loan ki zot in pran e gete ki mannyer, nou kapab fer ki sa proze petet i tourn vyab. Si fodre re enzekte en pti pe larzan pou gete, pou aranz serten landrwa kot pa pe marse. Tousala bann opsyon ki nou fer, nou pran, nou gete avek DBS e osi avek Lazans Lagrikiltir.

MR SPEAKER

Onorab Marie. Meggy Marie.

HON MEGGY MARIE

Mersi Mr Speaker. Bonzour Minis ek ou delegasyon. Bonzour tou Manm Onorab. Bonzour dimoun ki a lekout.

Mr Speaker, eski Minis i kapab dir nou Lasanble, ki mekanizm son Minister i annan an plas, pou ankouraz bann zenn graduate dan, Lagrikiltir pou ganny akse avek sa kredi pou zot kapab komans zot prop pti biznes? Mersi Mr Speaker.

MINISTER WALLACE COSGROW

Mersi Mr Speaker. Mersi Onorab. Pou lemoman tou bann dimoun ki:- tou bann zenn ki anvi antre dan Lagrikiltir, loportinite i la e zot kapab ganny asiste avek Lazans Lagrikiltir. Zot kapab apply pour en en bout later. Zot bezwen soumet en proze ki zot annan avek Lazans Lagrikiltir e sa proze osi i bezwen ganny soumet avek sa Fon ki pou fund zot proze e de la, bann Teknisyen Lasans Lagrikiltir i kapab asiste sa graduate, sa zenn pou li kapab met son proze an mars.

I komans avek en laplikasyon. Laplikasyon pour later, zot vin avek zot proze e Lazans Lagrikiltir i asiste zot depi komansman ziska ler ki zot proze in vin an operasyonnel. E osi swivi par bann Extension Officers ler ki zot pe aplik zot proze. Mersi.

MR SPEAKER

Onorab Arnephy.

HON BERNARD ARNEPHY

Mersi Mr Speaker. Bonzour tou dimoun.

Mr Speaker, eski Minis i kapab dir ek nou Lasanble, ki demars ou Minister pe fer avek Gouvernman, sirtou Finans, pou ogmant sa alokasyon bidzeter ki ou Minister i gannyen, kot an retour ou kapab siport pli byen bann pti Fermye atraver bann pti sipor finansyel? Mersi.

MINISTER WALLACE COSGROW

Mersi Mr Speaker. Mersi Onorab. Tou le lannen letan ki nou revwar Bidze, nou an negosyasyon avek Minister Finans e nou fer sir ki nou met nou bann proze ki nou annan devan Minister Finans. Bann proze Kapital, bann pti proze miner e nou met nou bann request devan Minister Finans e nou montre akoz ki nou bezwen sa larzan pou fer bann proze, pou nou asiste plis Fermye. Me sa i tou depan lo kantite Bidze ki Gouvernman i annan. I tou depan kantite Bidze ki Minister Finans i kapab donn nou. Me selman, nou kapab asir Lasanble ki tou le lannen letan nou fer prosesis pour Bidze, nou fer sir ki nou met devan Minister Finans tou nou bann proze, tou nou bann swe ki nou ti a kontan gannyen. Me selman nou konnen poudir larzan i bezwen ganny partaze avek tou bann Minister, tou bann lezot Departman. So, nou tenir avek sa ki nou gannyen e nou sey fer marse avek sa ki nou gannyen.

Me nou osi annan bann lezot led ki nou ganny avek bann Lorganizasyon eksteryer. Par egzanp, nou pe travay ek IFAD, nou pe travay ek ADB. So, nou sey fer marse avek sa ki nou annan. Me selman nou mete nou bann demann tou le lannen e la prosesis Bidze pe vini e nou pe osi fer lezot demann pour lot lannen ki pe vini.

MR SPEAKER

Onorab Valmont.

HON SYLVIANNE VALMONT

Mersi Mr Speaker. Bonzour Mr Speaker, Minis e tou dimoun a lekout.

An lir avek larepons inisyal Minis e avek son dernyen larepons, eski Minis i kapab dir nou Lasanble si i annan konsiltasyon ki pe ganny fer avek bann Fermye lo sa size fasilite kredi e ki mekanizm son Minster i annan an plas dan sa konteks, pou ed sa bann Fermye? Mersi Mr Speaker.

MINISTER WALLACE COSGROW

Mersi Mr Speaker. Mersi Onorab. Parey mon’n dir, i annan en serten konsiltasyon ki pe ganny fer sirtou par DBS la avek SAA, ki nou pe revwar en pe sirtou bann Fermye ki an difikilte avek zot loan ADF an prensipal, pou nou gete ki bann difikilte ki zot annan e ki mannyer nou kapab asiste zot, ki mannyer nou kapab ed zot pou petet reschedule sa loan. Ouswa si i annan en nesesite bann ki’n sorti dan Lagrikiltir me ki ankor annan en loan, ki petet zot annan en proze ki zot kapab antre avek. Nou pe gete ki mannyer nou kapab asiste zot pou zot antre ek zot proze, petet en pti loan adisyonnel, pou zot kapab relans zot bann proze, sirtou dan bann domenn Livestock. E sa i bann negosyasyon ki nou pe fer ansanm avek Labank Devlopman Sesel. Mersi Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker. Mr Speaker, mon ti a kontan demann Minis, eski zot pe osi revwar en pe zot kriter oubyen zot bann prosedir ki bann Fermye i kapab ganny akse avek sa larzan, kot bokou konplent:- zot pa pe ganny sa larzan cash dan zot lanmen. Petet en poursantaz zot kredi, zot pa pe ganny li cash, kot bann Pro-forma Invoice pe ganny peye direkteman avek bann suppliers. Kot i pa donn zot sa opsyon pou zot petet marsande parey nou pe dir, kot zot kapab pas partou, target keksoz ki pli bon marse dan bann magazen? Mersi.

MINISTER WALLACE COSGROW

Mersi Mr Speaker. Mersi Onorab. Onorab, mon konpran tre byen sa laliny ki ou pe vin lo la. Dan lepase loan ADF malerezman bann dimoun, serten Fermye ki’n pran li, petet zot pa’n zer li byen e petet mannyer larzan in ganny disburse, i pa’n ganny servi petet pour sa bi ki i sipoze ganny servi. Pour sela rezon ki DBS i zer sa loan. DBS i en Labank ki abitye zer loan, zer loan devlopman. So, DBS pe zer sa bann loan pou lemoman e bokou sa bann kontrol se Labank i mete pou anpese ki letan larzan i ganny disburse, i ganny disburse dan en fason kot dimoun i pa servi sa larzan pour sa ki i sipoze fer.

So, nou bezwen met serten kontrol akoz nou anvi ki sa larzan i al anver devlopman Lagrikiltir e non pa anver devlopman lezot keksoz.

So i annan serten kontrol me selman mon konnen ki Labank i ase fleksib e si i annan nesesite pou disburse serten kantite larzan, par egzanp pou working Capital pou lot, Labank i fer, me selman i get proze sa dimoun e i assess proze sa dimoun e i gete ki mannyer i kapab disburse sa bann larzan.

Me selman, i annan en bon konponan sa bann larzan ki ganny disburse, sirtou par egzanp si i annan lenfrastriktir, i ganny disburse avek sa Kontrakter ki pou fer sa lenfrastriktir ouswa sa laboutik ki pou pey sa bann materyo, dan en mannyer ki nou fer sir sa larzan i al ver sa proze ki lentansyon sa promoter. Mersi Mr Speaker.

MR SPEAKER

Onorab Maria Payet-Marie, Kestyon 133.

HON MARIA PAYET-MARIE

Mersi Mr Speaker. Eski Minis i kapab enform nou Lasanble ki rol mazer en Extension Officer e si Minister i annan ase Extension Officers aktyelman, pou kapab donn en servis pli efikas bann Fermye? Mersi.

MINISTER WALLACE COSGROW

Mersi Mr Speaker. Servis Ekstansyon i annan en lekip 7 Zofisye ki responsab pou asiste en total 650 Fermye anrezistre e bann demann ki sorti kot manm piblik ki annan bann pti zarden kot lakour.

Parmi sa 7 Zofisye, i annan enn ki kordin tou progranm anba servis e sa 6 lo teren, sa 6 zot touzour lo teren pou asiste bann Fermye.

Rol prensipal bann Zofisye Ekstansyon se vizit Fermye toulezour, pou konsey zot lo bann teknik prodiksyon, organiz formasyon pour bann Fermye, anrezistre bann dimoun ki annan pti zarden kot lakour, organiz bann vizit lesanz ant bann group Fermye, organiz e fer plizyer resers lo Laferm, baze lo bann rezilta ki sorti kot Stasyon Resers, renouvle lanrezistreman Fermye, asiste e evalye proze bann Fermye ki fer laplikasyon pour kredi, kolekte lenformasyon lo prodiksyon sak Laferm ki zot vizite, asiste dan evalyasyon bann Laferm pandan okenn evantyalite dezas, sirvey bann sistenm irigasyon, partisip dan evalyasyon bann later ki ganny idantifye pou devlopman proze Lagrikiltir, konsey Fermye lo bann meyer pratik pou fer fas ek diferan defi, sirvey bann risk ou lentrodiksyon pest ek maladi pou kapab adres zot pli vit posib.

Dezyenm morso Kestyon Onorab Mr Speake. En Zofisye Ekstansyon i bezwen travay avek plis ki 100 Fermye an mwayenn. So, ou kapab vwar la ki kantite workload ki en Zofisye Ekstansyon i annan. Kantite dimoun ki zot bezwen vizite. Si pou nou donn en servis pli efikas bann Fermye, nou pou bezwen plis formasyon. Zot deza ganny formasyon, me selman nou bezwen plis formasyon pour bann Zofisye ki deza dan sistenm. Anmenn lezot Zofisye ki annan kalifikasyon en pe pli o, petet menm a nivo Liniversiter e revwar bann benefis ki Zofisye pe gannyen, pou fer li pli atiran pou zot zwenn Servis Ekstansyon.

Mon ti a kontan profit sa lokazyon pou osi fer lapel ek bann Fermye pou servi o maksimonm bann resours fasilite, servis ki ganny mete a zot dispozisyon, tel parey: later, delo, bann antran e osi pou partisip aktivman dan bann aktivite ki ganny organize pour zot e pratik konsey ki Zofisye Ekstansyon i donn zot. Sa i vreman enportan Mr Speaker. Mersi bokou.

MR SPEAKER

Onorab?

HON MARIA PAYET-MARIE

Mersi Mr Speaker. Mr Speaker, Minis in donn nou en lalis responsabilite bann Extension Officers e Minis osi in dir i annan 7 Extension Officers pour 650 Fermye. Mon mazinen i Mahe, Praslin e La Digue osi. Ki Minis pe fer pou recruit bann nouvo Extension Officers? Eski son Minister pe liaise avek Lekol Lagrikiltir pou ganny plis Extension Officers? Si Minis i kapab enform nou silvouple. Mersi.

MINISTER WALLACE COSGROW

Ok. Mersi Mr Speaker. Mersi Onorab.

Nou annan mazorite nou bann Zofisye Ekstansyon ki pe travay avek nou, se bann graduate sorti Lekol Lagrikiltir e zot fer en serten AP lo nivo Sertifika dan Advance Certificate dan Lagrikiltir, General Culture. E zot osi ganny bann training on the job, parey nou dir. Bokou Training lokal e bann ptipti Training aletranze ki souvandfwa, atraver bann Korperasyon ki nou annan, nou ganny asiste. Me an term bann Kour en pe pli avanse, nou’n osi pandan komansman sa lannen e mon krwar komansman bann lannen pase osi, nou’n liaise ek NHRDC pou gete si nou kapab ofer bann Scholarship lo nivo Degre pour serten nou bann etidyan. Petet pa zis dan Extension Service, me selman osi an zeneral. Par egzanp pour Veteriner, pour Livestock, pour Lagrikiltir an zeneral, enkli Extension Service, kot zot kapab apre vin pran bann pozisyon kot zot a kapab annan plis bagaz pou kapab asiste nou bann Fermye.

So, nou travay avek Lekol. Parey mon dir, bokou nou bann Zofisye ki travay ek nou pou lemoman se bann etidyan ki’n pas dan Lekol Lagrikiltir e zot fer en bon louvraz. Zot fer en bon louvraz pour sa kantite resours e bagaz ki zot annan e zot travay byen ek Fermye. Mon krwar zot annan en bon rapor:- mazorite zot i annan en bon rapor avek Fermye.

So, nou kontinyen travay avek Lekol Lagrikiltir e nou kontinyen travay avek Minister Ledikasyon, pou rod bann fason ki mannyer nou kapab ganny bann pli bon Zofisye. Me par kont nou bezwen note ki poudir nou menm annan serten kontrent resours, par egzanp an term post pour bann Zofisye. Idealman ti ava bon si nou ti annan plis Zofisye par rezyon. Me pou lemoman nou annan nou zis 1 Zofisye par rezyon ki nou sey manage parey nou kapab, avek sa ki nou annan.

Me selman idealman, dan le fitir nou ti ava kontan annan plis Zofisye e Zofisye ki Train bokou plis e menm Train sa bann ki deza la, ki annan nivo pou kapab pran Training Liniversiter. Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker. Bonzour tou dimoun a lekout. Bonzour bann Onorab.

Mr Speaker, eski Minis i kapab eksplik sa Lasanble, si son Minister i annan en plan kourt, mwayen e lonterm pou fer sir ki a lavenir nou annan tou nou bann Extension Officers ki nou bezwen e si dan plan Bidze Minister Lagrikiltir pour sa 2/3an, i pe recruit, i pe rod larzan pou recruit plis Extension Officers? Mersi.

MINISTER WALLACE COSGROW

Mersi Mr Speaker. Onorab, i dan nou plan parey mon’n dir, pou nou ogmant lakantite Extension Officers ki nou annan e dan nou demars pou revwar ki mannyer Lazans i fonksyonnen, nou’n fer demann pour plis post dan Lazans Lagrikiltir. E sa i enkli Extension Officers. Demars pour plis post Veteriner, demars pour plis post Zofisye Ekstansyon, demars pour plis post Zofisye Resers.

So, i dan nou plan, i dan nou plan pour Lazans Lagrikiltir. Me parey mon’n dir, i pou depan lo resours ki Gouvernman i kapab afford pou donn nou e si tou i permet, nou pou kapab annan nou bann Zofisye Extension pandan sa bann lannen ki vini. Nou kapab rekrit plis e nou kapab fer en pli bon servis lo teren avek nou bann Fermye. Mersi Mr Speaker.

MR SPEAKER

Onorab De Commarmond.

HON CHARLES DE COMMARMOND

Mersi Mr Speaker. Bonzour Mr Speaker. Bonzour Minis. Bonzour tou dimoun li a lekout e nou bann envite osi.

Mr Speaker, eski Minis i kapab kalifye en Fermye anrezistre avek nou Lasanble e eksplik nou Lasanble akoz ki bann Zofisye Ekstansyon pe aktyelman ferm bann pti Laferm bann pti Fermye, espesyalman lo Mahe e Praslin? Mersi bokou.

MINISTER WALLACE COSGROW

Mr Speaker mersi. Pou premye larepons Kestyon Onorab. En Fermye anrezistre i ganny definir:- ti ganny definir anba Agriculture and Fishieries Incentive Act, koman en dimoun ki meet serten kriter. Par egzanp, i bezwen pe kiltiv li omwen 1000 met kare anba intensive prodiksyon e i bezwen meet kriter. Par egzanp, si i pe fer livestock en serten kantite heads of Livestock pou li kapab vin en Fermye anrezistre.

So, sa i kriter pou kalifye en dimoun pou li vin Fermye anrezistre. E avek sa, i benefisye tou bann serten benefis ki Gouvernman in met an plas. {Par egzanp, serten konsesyon lo tax lenportasyon, serten konsesyon lo travayer, serten konsesyon lo:- sa letan ti Sekirite Sosyal, konmela nepli. So, sa i benefis osi en Fermye anrezistre.

Lo kote dezyenm Kestyon Mr Speaker, mon pa okouran ki Zofisye Ekstansyon pe ferm Laferm bann pti Fermye. Petet sa ki mon ava dir se ki bann Zofisye Ekstansyon, zot annan serten prensip, serten lord ki zot bezwen travay avek e vi ki mazorite bann dimoun i lo Later Lagrikiltir ki Gouvernman i pe lease sa bann dimoun a en to vreman, vreman konsesyonnel. Si sa bann dimoun pa pe meet kriter, par egzanp koman pou anrezistre, ou bezwen annan ou 80 poursan of ou later anba prodiksyon, intensive prodiksyon. Sa Zofisye Ekstansyon pou bezwen fer serten rapor, pou bezwen met devan e Minister pou bezwen:- sorry Lazans Lagrikiltir avek Minister, pou bezwen pran serten desizyon, akoz sa Later in ganny mete primordyalman pou fer prodiksyon agrikol. Me si sa pti Laferm, malgre ou travay ek li, malgre ou ed li, malgre Zofisye Ekstansyon i anmenn li a en serten nivo, i still pa pe perform. Nou pou bezwen:- si i annan, nou pou bezwen pran sa later e nou pou bezwen pran sa later donn avek en Fermye ki serye, ki anvi plante, ou ki kapab fer sa later vin prodwi o maksimonm ki i sipoze prodwi.

So, mon pa krwar i annan Zofisye Ekstansyon ki zis pran later, me selman si i annan nesesite pou pran later nou bezwen pran later akoz i annan en problenm avek sa Laferm. E sa later i en later Gouvernman ki’n ganny dedye pour Lagrikiltir. Mersi Mr Speaker.

MR SPEAKER

Kestyon 134, Onorab Arnephy.

HON BERNARD ARNEPHY

Mersi Mr Speaker. Mr Speaker, eski Minis i kapab dir nou ki demars e sipor ki Minister pe antreprann e donnen, pou ankouraz plis Fermye, sirtou pti Fermye, pou antre dan aktivite Organic Farming? Mersi Mr Speaker.

MINISTER WALLACE COSGROW

Mersi Mr Speaker. Mr Speaker, i bon pou note ki okenn pratik spesifik dan Lagrikiltir i kapab ganny en label organic, selman apre ki in ganny sertifye par en Lorganizm Akredite dan sa domenn.

So, mon pou profite Mr Speaker, zis pou eksplik en pti pe diferans organik avek Lagrikiltir natirel. I annan souvan en konfizyon en pti pe parmi popilasyon, parmi piblik.

Pratik Lagrikiltir ki respekte bann lareg ek kriter san en sertifikasyon par en Lorganizm Akredite, i ganny apele Lagrikiltir Natirel ouswa ekolozik. Ok. Alors Mr Speaker, Lagrikiltir Organik se prodiksyon agrikol ki itiliz prodwi natirel e ki osi ganny sertifye par en Lorganizm swa enternasyonal swa Nasyonal. Dan ka Sesel, nou napa en Lorganizm Nasyonal ki pou sertifye.

Atraver Servis Ekstansyon Lagrikiltir, mon Minister in o kour bann resan deseni, ankouraz otan ki posib Lagrikiltir Natirel ou ekolozik an servan gwano, gomon, konpos, pestisid biolozik tel ki: bann plant lokal, prodwi e pestisid biolozik ki ganny enporte.

Dan sa laliny, o kour sa dernyen 5 lannen, nou stok prodwi Pestisid Biolozik in ganny mete a dispozisyon bann Fermye Komersyal, osi byen ki bann dimoun ki pe plant pour konsonmasyon domestik. Nou’n fasilit bann Fermye avek lenportasyon anba Agriculture and Fisheries Incentive Act 2005. Bann prodwi Pestisid ouswa teknolozi ek konesans a leksteryer dan itilizasyon, par egzanp may, tanmi ki protez bann plant pou anpes zot ganny atake par Zensek. E an fezan sa, i kree en lanvironnman ki pa nesesit itilizasyon Pestisid. Lide Mr Speaker, se pou minimiz itilizasyon bann sibstans danzere, partikilyerman bann Pestisid tradisyonnel, Kemikal ki ti ganny itilize dan Lagrikiltir.

Prodiksyon lo sa bann Laferm ki itiliz sa kalite metod i ganny rekonnet koman bann prodwi natirel ou ekolozik. Mon Minister pe promot labaz, sa i labaz ver Lagrikiltir Organik. E zisteman an Mars sa lannen Mr Speaker, nou’n ganny korperasyon e led ek en eksper sorti Tunisie, enn bann pei ki ganny rekonnet pour son Lagrikiltir Organik. Sa eksper in antreprann en letid pandan 10 zour dan Sekter Lagrikiltir, avek en ensistans partikilye lo bann pti Fermye. In osi regard potansyel dan domenn, sa ki nou apel Agro Tourism. Sa eksper in sirprann avek potansyel ki egziste pou Lagrikiltir Organik e in fer serten rekomandasyon tre for pour lenplimantasyon bann letap ki pou ede ganny sa rekonesans isi Sesel, pou nou kapab dir ki nou bann Laferm i Organik or serten Laferm ki deside pran sa larout, i organik.

An konbinan Lagrikiltir Organik ek Agro Tourizm, sa eksper in vwar loportinite pou diversifye nou lekonomi avek bann prodwi ek en valer azoute pour Sekter Tourizm. In note ki lo 45 kriter ki neseser pou resevwar en Sertifika pour Lagrikiltir Organik, deza 25 Kriter i prezan dan Sesel. Sa eksper in menm propoz en proze pilot, avek partisipasyon Gouvernman, en Lorganizasyon Non- gouvernmantal e Minister Tinizyen pour Lagrikiltir.

Ti osi annan en Sesyon lantrennman pour bann Travay Lazans Lagrikiltir ek Fermye par eksper sorti SIRAD. SIRAD i en Lorganizasyon La Renyon. En Sant Resers La Renyon, lo ki mannyer pou travay lo en Organic Label pour Sesel.

Vi ki bann prodwi Organik i pli bon pour lasante imen e Lanvironnman, mon Minister i siport bann proze, tou bann proze ki annan pou fer avek Lagrikiltir Natirel e evantyelman Lagrikiltir Organik. Mersi Mr Speaker.

MR SPEAKER

Onorab?

HON BERNARD ARNEPHY

Mersi Mr Speaker. Mr Speaker, eski lo sa letid ki sa eksper in vin fer Sesel, eski zot in dekouver ki i annan okenn dimoun ki pe swadizan dir ek dimoun poudir i pe pratik Organic Farming, me ki an menm tan, zot pe servi bann eleman zenetikman modifye dan zot prodiksyon?

E eski Organic Farming Sesel pe ogmante e si wi, eski ou Minister pe travay ansanm avek SHTC, pou asire ki i annan serten Modil spesifik ki bann etidyan ki pe swiv sa Kour dan sa Lekol, pou zot kapab lans zot dan sa domenn? Mersi.

MINISTER WALLACE GOSGROW

Mersi Mr Speaker. Onorab, si eksper in dekouver konmkwa ki i annan Laferm ki pe pratik Lagrikiltir ki pa Organik me solman ki pe dir, mon pa pou met li koumsa. Sa ki mon pou dir se ki pou lemoman, an vi ki nou napa okenn lorganizm ki sertifye konmkwa en pratik i Organik ou non, then nou pa pou kapab dir ki poudir nou bann Laferm Sesel i Organik.

Me selman, nou kapab dir ki i annan serten Laferm Sesel ki pe pratik Lagrikiltir Natirel. Savedir an servan bann prodwi natirel, an servan bann prodwi ki ekolozikman bon. Ziska ki nou kapab travay lo en label pour Sesel, ziska ki nou kapab sertifye, i tout en prosedir sa.

I annan bokou Laferm ki’n komanse, i annan bokou Laferm ki pe pratik Lagrikiltir Natirel, me selman i pou annan bokou letap ki zot bezwen pas ladan avan ki zot kapab sertifye koman en Laferm ki pe prodwi bann prodwi Organik.

So, i pe ogmante en kantite. I pe ogmante. I annan en kantite dimoun ki pe sa, akoz piblik i konsyan ozordi. Piblik i konsyan. I anvi manz en Legim, en Fri, ouswa en Lavyann ki lo en nivo napa Pestisid, napa Kemikal ladan.

So, sa awareness li menm li atraver kwa ki dimoun i manze, i deza la e sanmenm sa mon krwar ki pe fer nou bann Fermye, ki pe fer nou bann dimoun ki anvi antre dan Lagrikiltir, al ver sa Lagrikiltir Ekolozik.

E nou Minister nou, nou ava travay, pou nou fer, ki nou kapab, Sesel i kapab ganny sa label e serten Laferm i kapab vin en Laferm ki ganny konsidere koman en Laferm Biolozik. Ok.

Pou lemoman, avek Lekol Lagrikiltir, napa en:- mon pa okouran si i annan okenn Syllabus ouswa konteni dan zot Kour ki annan pou fer avek Lagrikiltir Ekolozik ou Lagrikiltir Organik. Me selman, nou deza annan 2 Zofisye Lazans avek Minister ki’n ganny apwente Lo Board Gouvernans Lekol e zot ava petet dan zot manda, pouse pour ki Lekol osi i a met sa dan son sistenm aprantisaz, petet dan bann mwan e lannen ki pe vini. Mersi Mr Speaker.

MR SPEAKER

Onorab Lebon.

HON LENNY LEBON

Mersi Mr Speaker. Bonzour Mr Speaker e tou dimoun.

Mr Speaker, an vi repons Minis. Minis in koz en pti pe lo sa 45 kriter e ki i dir deza 25 i an plas e i mank 20 kriter. Eski son Minister pe vwar sa koman en defi, ouswa i en keksoz ki nou bann dimoun ki pou pratik Organic Farming i kapab adrese e an menm tan, ou’n koz en pti pe lo Lorganizm ki pou sertifye. Eski i pouR Minister ouswa i pou bezwen en keksoz ki ou Minister i fer avek en Lorganizasyon etranze? Mersi.

MINISTER WALLACE GOSGROW

Mersi Mr Speaker. Bann kriter petet ki nou pa pe zwenn Sesel i kapab ganny adrese. E i pa enposib akoz nou deza parey mon pe dir, pe pratik serten sa bann kriter ki enportan e definitivman i pou bezwen ki:- akoz Sesel nou napa en Lorganizm ki kapab sertifye nou bann Fermye ouswa nou bann Laferm koman Laferm Organik. Definitivman nou pou bezwen travay avek en Lorganizm etranze, pou kapab. Nou bezwen travay avek en Lorganizm etranze parey mon’n dir, pou kapab sertifye. Me parey in deza dir avan, i annan bann Protokol ek bann operating procedures ki pou bezwen ganny swiv, ki sa bann Lorganizm i vreman, vreman serye lo la. E avan zot donn zot label, avan zot donn zot non, zot sticker, ou pou bezwen kapab meet sa bann Protokol e ki petet en pe i enkli dan sa bann kriter ki sa eksper Tinizyen in fer.

So, nou pou bezwen neseserman travay ek en Lorganizm enternasyonal akoz Nasyonalman nou napa pou lemoman, sa kapasite pou kapab fer li. Mersi.

MR SPEAKER

Onorab Vangadasamy.

HON SHERYL VANGADASAMY

Mersi Mr Speaker. Mr Speaker, prenan an kont larepons Minis, prenan an kont osi ki premye koz lanmor isi Sesel i bann lifestyle diseases e ki i annan en persepsyon deor par nou bann manm piblik, se ki i relye avek sa ki nou manze, eski Minis i kapab dir nou kan ki sa proze pilot ki in koz lo la i pou demarke avek sa etranze e osi kwa ki pe ganny fer ansanm ek bann Minister konsernen, pou fer en letid aprofondi lo si vreman sa ki nou pe konsonmen, i relye direkteman osi an menm tan avek sa bann Maladi enkli nou bann Fermye, bann Pestisid ki ganny servi: e osi prenan an kont Organic Farming i vin avek en kou sibstansyel pou komans ladan e osi menm pou vann li lo marse i en pti pe pli ser ki bann prodwi zenetik modifye par egzanp. Ki son Minister pe fer pou adrese pou ankouraz bann Fermye osi, pou met en incentive plis pou zot kapab antreprann bann tel proze? Mersi Mr Speaker.

MINISTER WALLACE COSGROW

Mersi Mr Speaker. Onorab, konsernan ou premye part Kestyon, sa proze ki sa eksper dan Lagrikiltir Organik in travay lo la, i pou ganny soumet avek FAO, pou nou kapab ganny finansman, pou nou kapab antreprann sa proze pilot avek Gouvernman, avek sa lot partner ki sipoze ansanm avek nou. E an term si i annan relasyon mon krwar ou’n demann mwan, avek petet sa ki pe ganny prodwi avek bann lensidan bann Maladi, par egzanp Kanser ki pe ogmante. Mon pa pou kapab klarifye sa la mwan, akoz petet i bezwen serten dimoun eksper, serten dimoun ki’n fer resers ladan. Me selman parey nou tande, i annan koze konmkwa sa bann keksoz i link avek keksoz ki nou prodwi. Petet nou bezwen fer serten resers pli aprofondi pou nou konnen. Nou deza annan serten demars, par egzanp nou pe set up en Livestock Lab, en Lab Veteriner, pou nou kapab detekte en pe plis bann keksoz. Ansanm avek Minister Lasante, nou bezwen travay ansanm pou gete ki mannyer nou kapab idantifye plis sa bann keksoz.

Me selman pou lemoman, mon pa kapab dir sa ki sorti lo Laferm dan serten kalite prodiksyon, i relye direkteman avek bann lensidan bann maladi ki nou pe vwar ozordi.

Onorab, si ou kapab repet sa dernyen bout Kestyon ki mon’n:- Kestyon ti en pti pe long ki mon pa’n anmas li. Ouswa si mon’n fini reponn tou? Mersi.

HON SHERYL VANGADASAMY

Mon ti pe demann ou, ki bann incentives:- Mr Speaker, mon ti pe zis demann li, mon dernyen parti Kestyon. Vi ki i annan en kou sibstansyel ki vini pour dimoun ki pou lans dan sa bann tel domenn e osi son pri lo marse osi i tant pour en pti pe plis ki bann lezot prodwi, ki son Minister pe fer petet pou met en pti pe incentives pou ankouraz nou bann Fermye antreprann bann tel proze? Mersi.

MINISTER WALLACE COSGROW

Mersi Mr Speaker. Wi Onorab, pou lemoman, napa gran inventive pou lemoman ki nou’n mete, me selman parey mon’n dir boner, nou annan nou en Fon Lagrikiltir ki vreman, vreman konsesyonnel a 2.5 poursan.

So, nenport ki Fermye ki anvi lans dan sa bann fason pratik agrikol, i kapab pret anba Fon Devlopman pour Lagrikiltir, ki selman 2.5 poursan.

Me par kont, nou osi fer vini, petet si nou pou get li koman incentive, nou osi enport bann Langre avek bann Pestisid, avek serten lezot prodwi. Nou vann li a en to tre, tre konsesyonnel, tre bon marse pour bann Fermye ki anvi pratik bann Lagrikiltir Ekolozik, Natirel e evantyelman organik.

So, nou annan serten, nou kapab dir, serten pti incentive, me selman petet nou kapab fer plis ankor. Me selman an term pret avek Labank, an term serten prodwi ki nou fer vini, nou kapab met a dispozisyon bann Fermye pou zot kapab pratik sa kalite Lagrikiltir. Mersi Mr Speaker.

MR SPEAKER

Nou a pran Kestyon 135, Onorab Arnephy.

HON BERNARD ARNEPHY

Mersi Mr Speaker. Mr Speaker, eski Minister mazin revwar lafason ki Livestock Trust Fund i ganny zere pou pli byen benefisye e asiste bann prodikter agrikol? Mersi.

MINISTER WALLACE COSGROW

Mersi Mr Speaker. Dapre notis Legal ki’n ganny etablir Livestock Trust Fund, sa Fon i kapab servi pour bann lobzektif swivan:-

Siport resers devlopman e devlop kapasite dan Sekter Agrikol.

Finans devlopman semen, sistenm irigasyon, enkli baraz delo e drenaz pour bann Fermye.

Asiste finansyerman sistenm Lasirans pour Fermye.

Sibvansyonn kour Labatwar.

Siport finansyerman Fon Devlopman Agrikol.

Finans lezot proze ki vize ver devlopman e promosyon Sekter Agrikol.

Sa i son lobzektif letan i ti ganny set up sa Legal Notice.

Dan sa loptik e an lir avek bann lobzektif, mon’n demann Board Livestock Trust Fund pou prepar en plan lenvestisman 5an pour sa Fon. Sa plan lenvestisman pe ganny finalize, pou ganny prezante pour konsiltasyon e diskisyon avek bann parti prenan, pou finalman annan en plan kler lo ki mannyer Livestock Trust Fund pou ganny servi pandan sa prosen 5an.

Dan sa fason, tou dimoun enplike i a konnen ki pou ekspekte e nou ava aprezan kapab met an plas en sistenm pou raport lo performans sa Fon. Mersi Mr Speaker.

MR SPEAKER

Onorab, yes.

HON BERNARD ARNEPHY

Mersi Mr Speaker. Mr Speaker, eski Minis i kapab enform nou Lasanble, an mwayenn par lannen, konbyen larzan sa Fon i anrezistre e baze lo sa bann lobzektif ki Minis in koz lo la, an vi ki i annan en kantite konsern, sirtou bann Fermye ki dan prodiksyon zannimo, an sa ki konsern manze zannimo, sistenm servis Labatwar, ensidswit, eski Minis i kapab dir ek nou Lasanble, ki kriter priyoriter zot servi pou repartisyonn sa Fon, pou asire ki tou sa bann areas i benefisye? Mersi.

MINISTER WALLACE COSGROW

Mersi Mr Speaker. An se moman dan sa Fon, i annan li apepre R25 milyon e on average si mon konpran byen, sa Fon i anmas li apepre en R18 milyon par mwan. Sorry, par an, ekskiz mwan. E parey mon’n dir dapre son Legal Notice, in dir kote sa Fon i kapab depans larzan e sa Fon i annan li sa Board. I annan reprezantan Minister, reprezantan Lazans Lagrikiltir, reprezantan Fermye, reprezantan Minister Finans ki lo sa Board. Ok. E tou desizyon ki ganny pran lo ki mannyer pou depans sa larzan, i ganny pran lo Board, avek konsiltasyon avek konsansis tou dimoun ki lo Board.

E zisteman akoz nou’n demann pou fer en Plan Devlopman, set akoz nou anvi vwar klerman kote sa bann larzan pou apartisyonnen e nou plan devlopman in preski pare. Mon’n vwar Plan Devlopman. Me selman mon pe zis finaliz en pti pe avek tou bann lezot partner, pou nou ganny Lagreman. I pou enkli tel ki semen, i pou enkli devlopman irigasyon, i pou enkli menm serten konponan ki pou al dan Fon ADF.

So, sa Plan Devlopman i la e i ganny agree avek tou bann partner ki lo sa Board Livestock Trust Fund. Sa i enportan akoz pou fer sir ki ler nou depanse, nou depans li dan lentere Fermye, dan lentere Sekter Lagrikiltir e ki pli enportan ankor, i annan reprezantan Fermye lo la ki li osi i vwar, i konnen, i dakor kote nou pe channel sa bann larzan.

Mersi bokou Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker. Mr Speaker, mon ti a kontan demann Minis petet dan sa plan ki zot pe travay lo la, si zot pe mazin entegre lasistans pour bann Fermye Praslin, sirtou bann ki involve dan prodiksyon Poul akoz zot annan bann kou ki vreman eleve par egzanp, zot bezwen transport Poul sorti Mahe, ki fer zot prodwi a lafen dizour, bokou pli ser ki bann prodwi ki lo Mahe. Zot pa kapab compete osi, petet avek bann keksoz ki ganny enporte. Petet pou kouver en pti pe zot bann kou transportasyon. Mersi.

MINISTER WALLACE COSGROW

Mersi Mr Speaker. Onorab, petet pa pou koup kou transportasyon, me selman, nou annan serten lentervansyon ki nou fer, ki nou’n deza fer avek Fermye Praslin ki fer Livestock. Napa bokou, me selman i annan serten lentervansyon ki nou’n deza fer. I annan lentervansyon ki nou oule fer lo Labatwar, ki deza en komitman ki nou’n fer devan Lasanble, ki nou oule fer kot Labatwar, pou kapab zisteman ed bann Fermye Livestock. Me dan sa Plan Devlopman definitivman, i pou al osi pou Fermye. Pou tou Fermye. I pou al osi pou Fermye Praslin avek La Digue, ki zot osi zot kapab vwar benefis Livestock Trust Fund dan le fitir zot osi.

E parey mon’n dir, nou’n deza ede pou sey soutenir serten Lenstitisyon Livestock, akoz zisteman lenportans serten Lenstitisyon Livestock lo Praslin, pou fer sir ki zot reste operasyonnel e zot kapab prodwi lavyann pour popilasyon Praslin, popilasyon Touris Praslin e osi popilasyon petet La Digue osi. Mersi Bokou.

MR SPEAKER

Kestyon 136, Onorab Sultane Jaqueline.

HON SULTANE JAQUELINE

Mersi Mr Speaker. Mr Speaker, eski Minis i kapab enform sa Lasanble kan ki proze reanmenazman basen stokaz delo e sistenm irigasyon pour Fermye Des Arpents i sipoze konplete e vin operasyonnel? Mersi.

MINISTER WALLACE COSGROW

Mersi Mr Speaker. Mr Speaker, Kontra pour sa proze reanmenazman basen stokaz delo e sistenm irigasyon pour Fermye Des Arpents, ti ganny sinyen le 21 Mars 2015 e travay ti sipoze konplete le 25 Zilyet 2015. Me aprezan, proze pou ganny konplete lafen Out.

Rezon pour sa dekalaz dan letan i akoz serten travay an plis ki pa ti’n prevwar dan progranm, in bezwen ganny fer. Travay dan Kontra i enkli lo baraz delo; sa tank sedimantasyon, rezervwar e laliny distribisyon ki anmenn delo kot Fermye.

Travay ki’n konplete lo baraz se ki gravye in ganny tire pou ogmant kapasite anmas delo, lenfrastriktir manhole in konstrir pou kouver valve ki anmas delo, en tanmi galvanize in ganny mete pour ki salte e debri pa antre dan sistenm irigasyon ankor, rezervwar in ganny kouver pour ki salte pa tonm ladan e en leskalye in ganny mete pou fasilit akse dan basen pour netwayaz.

Travay ki aktyelman pe ganny fer se netwayaz dan bann vezetasyon otour baraz delo e rezervwar. Travay Onorab, ki reste pou fer, i prensipalman pou met an plas nouvo laliny distribisyon pour ki bann laferm ki pli o i a kapab ganny delo a gravite.

Me selman nou bezwen note Mr Speaker, ki sa bann travay i en travay:- par egzanp nou pe fer en travay restorasyon la, i pou bezwen annan bann travay ki nou kontinyelman fer, pou fer sir ki letan nou fer en travay restorasyon, i pa avarye e ki nou pa vwar nou dan en sityasyon apre nou bezwen al depans en kantite larzan.

So, i annan tout en travay maintenance ki bezwen kontinyelman ganny fer. Mersi Mr Speaker.

MR SPEAKER

Okenn siplemanter, Onorab?

HON SULTANE JAQUELINE

Mersi Mr Speaker. Mr Speaker, mon ti a kontan demann Minis si son Minister pe anvizaze antre an negosyasyon avek PUC, ki osi annan en baraz e basen delo zis par lao sa baraz ki anmas delo pour sa bann Fermye, pou asire ki sa proze i vin enn ki soutenab diran lannen, menm pandan letan lasesres? Mersi Mr Speaker.

MINISTER WALLACE COSGROW

Mersi Mr Speaker. Mr Speaker, nou’n deza annan serten negosyasyon ek PUC lo sa size, me selman sa landrwa i en landrwa kot petet ki napa sa sitan kantite delo e PUC osi i bezwen servi sa resours delo ki la pou distribye avek bann lezot lakour. Me selman, ansanm avek PUC, nou kapab asize, konsilte, revwar ki mannyer nou kapab ganny maksimonm benefis pour bann lakour, me osi pou nou bann Fermye, ki zot osi zot vreman bezwen delo, akoz definitivman si nou pe envestir, nou pe met lenfrastriktir, nou pou bezwen annan delo ki pou servi sa lenfrastriktir. Petet nou bezwen vwar ki mannyer meyer fason nou kapab zer sa stok delo ansanm ek PUC, me at the same time increase nou kapasite ki nou kapab deservi nou bann Fermye ki dan sa rezyon pli byen.

Me selman in deza an negosyasyon e i pa anpes nou kontiny nou negosyasyon e al pli devan avek PUC, pou gete ki mannyer nou kapab zer sa stok delo ki dan sa rezyon. Mersi Mr Speaker.

MR SPEAKER

Onorab Dugasse.

HON MELVAL DUGASSE

Mersi Mr Speaker. Minis, eski apard ki proze Des Arpents ki pe ganny sistenm irigasyon, eski i annan okenn lezot proze dan lezot rezyon ki ou Minister i annan lentansyon re travay lo la e konbyen sa i ekspekte koute? Mersi Mr Speaker.

MINISTER WALLACE COSGROW

Mersi Mr Speaker. Mr Speaker, proze Des Arpents i enn. Nou osi annan proze ki pe fer La Gogue. Nou osi annan proze ki pe fer Cap Samy Praslin. Nou osi annan proze ki pe fer Barbarons. Nou osi annan proze Montagne Posee, Val D’an Dor e osi Au Cap Mr Speaker.

So, sa i bann proze ki nou annan. Nou proze ki nou pe fer petet ki pou enteres Onorab en pti pe plis, nou proze ki nou pe fer La Gogue, i a en kou R316 mil e in preski konplete. I annan serten louvraz ki ankor pe ganny fer e in preski konplete. E nou pe hope ki pandan sa bann detrwa mwan ki pe vini, i ava’n fini konplete e ki bann Fermye dan sa rezyon i a kapab benefisye.

I annan bann lezot proze osi ki an mars. Par egzanp Cap Sammy ki osi nou ekspekte ki i ava kapab konplete tre byento. Mersi Mr Speaker.

MR SPEAKER

Bon, avek sa nou ariv a lafen Question Time. E mon ti a voudre remersye e ekskiz Minis parmi nou, osi byen ki son delegasyon.

Mon’n aktyelman krwar ou ki pe asiz la tou sa letan.

(Laughter)

MR SPEAKER

Mersi.

(THE MINISTER AND HIS DELEGATION WAS EXCUSED FROM THE HOUSE)

MR SPEAKER

Nou, nou a kontinyen ek nou travay. Nou annan 2 First Reading. Madanm Clerk, lir sa sa 2 First Reading.

THE CLERK

This Act may be cited as Meteorology Act, 2015.

This Act may be cited as The Public Health Act, 2015.

MR SPEAKER

Bon nou annan en Statement par Minis Mondon lo Disiplin dan Lekol. Nou a fer antre Minis Mondon.

Bon Minis Mondon ek son delegasyon. Nou a swet zot labyenveni. Minis ou’n enform Lasanble ki ou ti oule fer en Statement lo problenm Disiplin dan Lekol. Proceed.

MINISTER MACSUZY MONDON

Bonzour Mr Speaker e bonzour tou bann Manm Onorab.

Mr Speaker, en Lekol i kapab annan en meyer progranm Edikasyonnel avek tou resours disponib, me si napa lord ek disiplin dan son lanvironnman, lansennyman avek laprantisaz pa pou efektiv.

Disiplin i efektiv ler nou montre e donn gidans zanfan e pa zis fors zot pou obeir. Lenportans disiplin se pou enkilke dan bann zanfan, bann bon valer e konportman, pou zot kapab pli tar vin bann adilt ki matir e byen balanse emosyonnel-man.

L’objectif fondamantal e sistenm disiplin dan Lekol, se pou mentenir bon Konportman, Lord ek Lape e kree sa lanvironnman konvenab ki favoriz lansennyman e laprantisaz. Problenm disiplin dan Lekol i definitivman en konsern pour profesyon lansennyman. Me asire ki i annan disiplin dan Lekol, i konsern nou tou. I enportan pou nou tou konpran e aksepte ki disiplin i pa zis responsabilite Ansennyan, Lekol oubyen Minister Ledikasyon, me ki i en responsabilite partaze. Problenm disiplin i ganny rezourd pli fasilman ler i annan sa bon korperasyon ant paran avek Lekol e sipor tou bann Lazans, lezot Lazans ki travay avek zanfan.

Akoz nou bezwen annan en bon Sistenm Disiplin dan Lekol? Premyerman, i kler ki zanfan byen disiplinen i konport zot pli byen e fer pli byen dan zot letid, akoz zeneralman, zot pli obeisan, zot respekte regilasyon Lekol, zot annan bon pratik letid e zot pa antre dan bann move frekantasyon. Lenvers se ki laplipar-di-tan, zanfan ki endisiplinen, sirtou bann ki annan problenm disiplin serye, i mal fer dan zot letid. Pli tar serten antre zot i vin bann delenkan, zot vin bann viktim fleo sosyal e antre dan konfli avek Lalwa.

Rezilta diferan letid i montre ki etidyan ki mal konport zot dan Lekol, i donn diferan rezon akoz tel ki: bann adilt pa enterese avek zot, serten pa enterese avek Lekol, zot pa anvi vin Lekol ditou, zot nepli konsider sikse dan zot letid enportan e les zot ganny enfliyans-e negativman par zot kanmarad.

Mr Speaker, nou rekonnet ki i annan osi serten fakter a lenteryer Lekol, ki kontribye parfwa anver mank disiplin, tel ki: labsans Ansennyan, mank konsistans dan lenplimantasyon Behavior Policy e Kod Kondwit, en mankman dan relasyon ant Staff avek etidyan; enteraksyon, konfli ant bann etidyan zot menm; parfwa osi, lafason ki disiplin i ganny adrese. Me i osi annan lezot fakter ki kontribye pou ogmant problenm disiplin dan Lekol. Paran ki pa atas gran lenportans avek ledikasyon zot zanfan e zot pa donn zanfan sa sipor neseser avek zot letid kot lakour. Se sa bann menm paran ki pa korpere avek Lekol. Souvandfwa, se zot menm zot ki pa disiplin zot zanfan kot lakour. Zot napa kontrol lo zot zanfan e zot pare pou blanm lezot ler zot zanfan i fer keksoz mal.

Enstabilite dan fanmir, separasyon, problenm vyolans domestik, neglizans, labi zanfan dan tou form.

Devlopman rapid dan teknolozi, akse avek bann lenformasyon ou materyel ki pa apropriye pour zot laz, oubyen ki endesan.

Lenfliyans Medya par egzanp vyolans lo Televizyon enkli Cartoon ki bann zanfan i regarde.

Bann keksoz mal, imoral e denigran ki ekrir dan bann papye, bann kritik ki zanfan i trouve oubyen tande atraver Medya, ki fer zot mank respe pour bann Lenstitisyon dan pei, enkli zot Lekol.

Problenm sosyal ki enkli sibstans lalkol, drog, ki kontribye pou ogmant lezot fleo sosyal dan kominote, parey labi zanfan e etidyan ki ankor pe lekol e ki pe reste avek zot boyfriend oubyen girlfriend dan lakaz zot paran.

Mr Speaker, lalis i long e kestyon ki nou bezwen demande. Eski solisyon pour tou sa problenm i dan Lekol?

Parey nou’n tann dir plizyer fwa, Lekol i en mirwar lasosyete. Sa bann keksoz ki nou trouve dan Lekol, sa bann konportman ki etidyan i manifeste dan lakour Lekol, i souvan reflekte sa ki pe pase dan nou bann lakour, dan nou bann kominote, kot sa zanfan i grandi.

Konbyen fwa nou’n vwar paran kot pe demann zot zanfan pou konport zot byen, me selman, sa bann paran zot menm pe demontre en mank respe oubyen pe konport zot dan en fason ki pa akseptab. Mon osi rekonnet Mr Speaker, ki nou annan paran egzanpler, ki elve byen son zanfan e lezot osi ki parfwa malgre tou, i bezwen serten lasistans.

Mr Speaker, en paran i bezwen en model pour son zanfan. Napa nanryen e personn ki kapab ranplas en paran egzanpler, en lakour kot i annan lanmour ek disiplin e kot en zanfan i santi li an sekirite. Bann adilt osi e lezot dimoun dan kominote, i merit pe promouvwar en ledikasyon moral e sosyal, atraver bann bon valer ki nou bezwen enkilke dan nou zanfan depi en tre zenn az. Sa i en devwar fondamantal e nou merit fer li pour benefis e lavenir nou zanfan, pou nou kominote pou nou sosyete e pour nou pei.

Dan Lekol, Management, Ansennyan e tou Staff, i bezwen ensiste e asire ki i annan disiplin dan laklas, pour ki zanfan i kapab aprann dan lape. Nou bezwen konsistan dan lapros e lafason ki nou enplimant nou Behavior Policy e nou Kod Kondwit. Minister i bezwen pe kontinyelman revwar bann prosedir pou fasilit lenplimantasyon Polisi kot i neseser e kot i neseser, donn plis pouvwar Lotorite Lekol.

Mr Speaker, permet mwan koz en pe lo problenm disiplin ki nou fer fas avek dan nou bann Lekol. Agresivite ki enkli agresivite anver Staff, lezot zanfan; bullying, lager, vandalizm, dezobeisans e lensolans, servi langaz vilger; zanfan ki disturb laklas; ki pa konplet zot leson, ki ariv an retar pour lekol avek laklas e ki sov laklas avek lekol. Dress Code. Lafason met zot liniform, ki pa anliny avek Kod Kondwit, konportman seksyel, konportman endesan, bann zes seksyel anver lezot e byensir, labi sibstans parey mon’n dir pli boner. Bwar lalkol e servi drog ek sigaret.

Byensir, serten sa bann lofans i ariv pli frekan ki lezot e konsekans i determinen dan Kod Kondwit.

Mr Speaker, ki Minister Ledikasyon pe fer? Minister, atraver Lekol, i met plizyer striktir an plas pou adres sa bann problem. Nou annan en Polisi, en sistenm Pastoral ki adres problenm konportman kot Lekol. I etablir bann lekspektasyon lo ki fason nou bann etidyan i merit konport zot e striktir sipor ki lakominote Lekol i met a zot dispozisyon, pou ed zot e devlop zot koman en sitwayen responsab.

Sipor anba sistenm Pastoral i enkli sa bann striktir swivan:-

Whole School Behavior Policy, ki donn direksyon avek stratezi lo fason pou zer konportman etidyan an zeneral.

Special Needs Support Team, ki donn loportinite Ansennyan pour evalye bezwen endividyel bann etidyan e devlop entervansyon apropriye.

Komite Disipliner, ki evalye bann lofans e pran bann desizyon lo konsekans ki pou ganny aplike.

School Counselling Service, ki soutenir zanfan avek zot paran dan bann sityasyon difisil e refer zot avek lezot Servis e Lazans kan i neseser.

Kod Kondwit, i etablir bann standar pour konportman e osi met lanfaz lo responsabilite bann zanfan anver zot ledikasyon, responsabilite paran e responsabilite Ansennyan.

Dan progranm PSE o nivo Primer, zanfan i abord bann topik tel ki lafanmir, respe pour son lekor e pour lezot, relasyon avek lezot, rezolisyon problenm, eksetera.

Ledikasyon Sitwayennte, i osi ed zot devlop bann valer ek latitid pou vin en bon sitwayen.

Curriculum i osi fer provizyon pou devlop life skills atraver tou lezot size.

Laprantisaz o nivo Pti An fans pe ganny organize dan en fason kot zanfan a devlop bann life skills tel ki Savwar viv ek Savwar Et.

Mr Speaker, Minister Ledikasyon in osi met an plas plizyer progranm, ki annan pour bi, ed bann etidyan ki endisiplinen pou amelyor zot konportman, devlop disiplin personnel e re angaz zot dan zot lavi skoler. Bann progranm i comme swivan:-

Youth Engagement Program ki ede siport bann etidyan atraver bann aktivite, pour retir zot dan bann konportman anti sosyal e redonn zot nouvo loportinite pou devlop bann life skills esansyel. 4 Lekol Segonder in deza partisip dan sa progranm e nou pe anvizaze kouver tou Lekol Segonder avan lafen 2015.

Youth Integration Support Program i en progranm lentervansyon ki baze fortman lo disiplin, respe e travay an ekip. Sa progranm i deroul lo en baz rezidansyel, kot etidyan i ganny retire dan zot lakour pour en peryod 2 semenn. A lafen sa progranm, zanfan i ekspekte retourn dan lakour avek en sanzman pozitif dan zot konportman.

Alternative Education Program i en progranm ki ganny ofer an deor Lekol e i viz ver etidyan ki pa pe adapte dan en lanvironnman Lekol normal. Sa bann zanfan i ganny loportinite pou swiv zot progranm letid, devlop bann life skills e angaz zot dan bann aktivite vokasyonnel pandan en peryod 6 semenn. Tou sa bann progranm i enkli lankadreman paran sa bann zanfan, pou ed zot asiste e siport zot zanfan.

Mr Speaker, sa i bann progranm Entervansyon ki Minister Ledikasyon in met an plas, pou tir presyon lo Lekol e siport zot avek bann ka en disipliner, oubyen bann problenm disiplin ki zot pa kapab adrese o nivo Lekol.

Ki lenpak sa bann Progranm in annan? Parmi sa 80 etidyan ki’n pas atraver Youth Engagement Program an 2014, 70 etidyan in reentegre dan zot letid e 10 lezot in bezwen swiv progranm adisyonnel. 44 etidyan in pas atraver sa progranm Rezidansyel, Youth Integrated Support Program. 39 in reentegre dan zot letid, 1 in al dan lemonn travay e 4 lezot in bezwen swiv program adisyonnel. 22 etidyan in pas atraver Alternative Education Program. 18 etidyan in reentegre dan Lekol lo en baz probasyon, 4 pa ankor kapab ganny entegre. Zot pou bezwen swiv en lot novo Progranm Lentervansyon ki pe al ganny organize dan Vakans Out.

En lenpak ki ganny obzerve avek lenplimantasyon sa bann Progranm Entervansyon, se ki in met plis Lord e Disiplin dan sa bann zanfan. Ansennyan i montre plis lentere anver sa bann etidyan, latmosfer Lekol i pli kordyal e paran i montre plis lentere dan ledikasyon zot zanfan.

An plis ki sa Mr Speaker, nou osi annan bann progranm Prevansyon tel ki Kanpanny kont labi sibstans parmi etidyan o nivo Nasyonal ki nou ti fer an 2013. Kanpanny ti target paran e 3400 paran ti ganny sansibilize lo danze konsonmasyon sibstans par bann zanfan e lefe negatif ki i annan lo zot lasante e zot letid.

Diversifikasyon dan progranm Letid in ede pou pli byen reponn bezwen divers etidyan e ogmant lentere dan zot letid. En legzanp spesifik i premye faz TIVET. Progranm in anmenn en rediksyon remarkab lo drop out lo nivo S4 avek S5, sa 2 dernyen lannen. Depi 2011 ziska 2014, 623 etidyan in konplet sa progranm avek sikse e zot in kapab kontiny zot letid dan Post Segonder, ouswa zwenn lemonn travay.

Lentrodiksyon Attendance Officer lo komansman sa lannen pe ede redwir la kantite zanfan ki mank lekol bokou.

Ki plan Minister Ledikasyon a lonterm?

Nou plan a lonterm Mr Speaker, i enkli ranforsi eleman Psikolozi ek Sosyolozi dan progranm formasyon Ansennyan. Pou nou kapab reponn pli byen bezwen nou bann zanfan ki annan difikilte laprantisaz, ki relye avek problenm konportman e ofer en servis Deteksyon e Prevansyon pli efikas, Minister pou bezwen en Psikolog Skoler pou travay avek sak Lekol Segonder e son bann feeder School. Sa i vedir ki nou pou bezwen anploy anviron 10 Psikolog. Plan Minister Ledikasyon, se pou kree en Sant kot nou kapab ofer nou bann progranm ledikasyon alternatif. Sa i en proze ki bezwen partisipasyon diferan partner e Lazans ki travay avek zanfan, osi byen ki resours imen spesyalize, resours fizik e finansyel.

Mr Speaker, avek bann progranm ki nou pe enplimante, nou pe vwar en amelyorasyon dan konportman bann zanfan, ki kree problenm disiplin dan nou bann Lekol.

An realite, mazorite nou bann etidyan i konport zot byen. I vreman unfair lo nou bann etidyan, pou pran en lensidan izole ki arive parfwa dan 1 ou 2 Lekol e zeneralize pou donn lenpresyon ki napa disiplin dan nou Lekol.

Mr Speaker, i pou toultan annan problenm konportman parmi serten zanfan. Me si nou anvi amelyor performans nou bann etidyan, si nou anvi ganny pli bon rezilta dan nou bann Lekol e si nou anvi amelyor nou kalite Ledikasyon, sa i pou nesesit en zefor konzwent de la par nou tou, an komansan par tou paran, ki bezwen angaze dan ledikasyon zot zanfan. Resers in montre ki ler en paran i angaze dan ledikasyon son zanfan, zanfan i aprann pli byen, i pa mank Lekol souvan, i annan en latitid pli pozitif anver son letid e i ganny pli bon rezilta.

Ledikasyon Mr Speaker. Ledikasyon nou zanfan i en responsabilite partaze. Leta i fer son bout e tou lezot akter ek partner dan lasosyete i bezwen zot osi zwe zot rol. Mersi Mr Speaker.

MR SPEAKER

Bon. Mon pou servi mon diskresyon pou permet enn de kestyon lo sa Statement. Nou komans par Onorab Vel.

HON JENIFFER JASMIN

Mersi Mr Speaker. Bonzour tou dimoun.

Mr Speaker, mon ti ava kontan demann Minis, vi ki in koz lo plan lonterm, eski son Minister pe anvizaze dan lenplimantasyon sa plan lonterm, pou enkli lezot partner par egzanp: Servis Sosyal e Lotorite Distrik e osi, eski Minis i kapab eksplik nou Lasanble ki zot pe fer pou kapab donn en pti pe plis pouvwar Lotorite Lekol, pou kapab adres problenm disiplin there and there ler i arive, ki nou pa les li zis en sityasyon izole, ki i pran en lanpler Nasyonal ki donn persepsyon, ki i annan en gran problenm disiplin dan sa Lekol kot lensidan i arive? Mersi.

MINISTER MACSUZY MONDON

Mersi Onorab. Mr Speaker, Wi, Minister Ledikasyon dan tou son plan, i travay avek tou bann Lazans konsernen dan pei, kot i konsern pou travay avek bann zanfan ki annan problenm konportman. Parey mon’n dir, i pa en travay ki nou kapab fer li nou tousel. Donk, i enportan ki nou ganny sipor tou lezot Lazans.

E kot i konsern donn plis pouvwar Lotorite Lekol. Wi, se pour sa rezon ki nou ti revwar nou Whole School Behavior Policy, pou nou vwar zisteman ki bann kontrent ki Lekol i fer fas avek, letan zot bezwen pran serten aksyon o nivo Lekol e vwar dan ki fason ki nou kapab donn plis pouvwar o nivo Lekol, pour zot adres osi bann problenm disiplin. Mersi Mr Speaker.

MR SPEAKER

Ofet pour rikord, ti Onorab Jasmin e non pa Onorab Vel. Onorab Arnephy.

HON BERNARD ARNEPHY

Mersi Mr Speaker. Mr Speaker, eski Minis i kapab dir ek nou, si son Minister pe mazin konsider flexy working hours pour serten Staff, kot sa bann Staff i kapab angaz zot en pe plis apre ler lekol, dan bann Extra Curricular Program ki fonksyonnel e ki i kapab deservi en pe lobzektif sirtou bann manrmay ki annan serten problenm. E eski Minis i kapab dir osi avek nou, ki’n arive avek sa propozisyon pour en Reform School, ki ti annan propozisyon pou fer en Lekol La Misere? So, donn nou detay please.

MINISTER MACSUZY MONDON

Mr Speaker, i pa fasil dan en Lekol pou annan flexy hours pou lemoman, zisteman avek serten kontrent ki nou annan. Me selman, nou realize e nou konnen poudir i annan Lekol zisteman ki partisip dan bann Extra Curricular Activities e nou sey rod lezot fason pou nou kapab zisteman, fer letan dan Lekol pour sa.

Par egzanp, letan ou regard par egzanp an sa ki konsern Professional Development Ansenyan, nou donn en peryod lo Timetable Lekol pou zot kapab 1 fwa par semenn, fer zot Professional Development. E byensir, si i ariv en letan kot nou santi nou kapab konsider annan flexy hours pour serten manm Staff, ki ava permet zot fer en pe plis kot i konsern Extra Curricular Activities, mon krwar Minister i ava konsidere e i ava fer li.

Ler mon pe koz lo sa Sant Mr Speaker, ki Minister i bezwen kree, se zisteman en pti pe sa ki Onorab pe apel sa Reform School. Wi, nou ti pe sey regarde si nou kapab annan en Lekol, kot nou santi lakantite zanfan in diminyen, pou nou kapab servi sa Lekol pour nou fer li ladan. Me negosyasyon ki nou’n annan avek bann Lotorite konsernen, sa i pa’n marse. Me Gouvernman pe regarde lezot landrwa si i annan posibilite pou zot kapab donn nou, pou nou kapab zisteman, kree sa Sant pour nou bann zanfan. E i en Sant ki nou bezwen e si nou kapab ganny en lenfrastriktir ki nou santi i pou permet nou fer li ladan, dan letan ki nou pe espere en nouvo Sant i ganny konstrir nou pou fer li. Se pour sa rezon, antretan nou pa kapab zis asize pa fer nanryen. Se pour sa rezon ki nou’n al rod led, par egzanp avek Lakademi Lapolis, avek Lakademi Ladefans, pou nou kapab zisteman, antretan fer, organiz sa bann progranm ladan e mon ti a kontan profit sa lokazyon pou remersye zot akoz zot in byen korpore e byen donn nou sipor avek sa bann progranm ki nou pe fer dan zot bann landrwa konsernen. Mersi Mr Speaker.

MR SPEAKER

Onorab Vangadasamy.

HON SHERYL VANGADASAMY

Mersi Mr Speaker. Lo sa menm laliny Minis, eski Minis i kapab dir sa Lasanble, ki son Minister pe fer o menm moman avek Minister Sosyal, an kordinasyon, prenan an kont anba plan Renesans Sosyal ki ti annan sa progranm. Ou ou’n koz lo Reform School, li i ti annan en propozisyon en Juvenile Detention Centre, kot ou santi i annan sa gap in between letan nou annan en zanfan ki annan en problenm disiplin, nou napa sa landrwa spesifik pou nou kapab met li. Ki kordinasyon i annan anba sa progranm ek ou Minister ek sa Minister e ki priyorite nou pe met sa Reform School e sa Juvenile Detention Centre, koman en azanda neseser pou adres enn sa bann issue disiplin? Mersi.

MINISTER MACSUZY MONDON

Mr Speaker, nou travay tre pros avek Minster Sosyal zisteman, Minister Ledikasyon i osi i annan son progranm a lenteryer, Progranm Renesans Sosyal, kot nou osi enplimant nou bann progranm. E tou sa bann progranm ki nou pe enplimante an deor Lekol zisteman, Minister Sosyal i osi i annan son rol pou li zwe ladan.

Kot i konsern Juvenile Detention Centre. Juvenile Detention Centre li i pour bann zanfan ki fer bann lofans ki zot al Ankour e ki zot ganny kondannen. E mon krwar poudir sa proze i ankor dan plan e si mon pa tronpe, i annan travay ki’n deza komans ganny fer lo la. E mon krwar poudir wi, Gouvernman i konsider li koman en priyorite.

E nou byensir nou pou kontinyen avek nou proze pour nou Sant parey nou dir e sa proze, nou pe fer li enn nou gran partner dan sa proze i zisteman Minister ki responsab pour Zafer Sosyal. Mersi Mr Speaker.

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker. Mr Speaker, mon ti a kontan demann Minis ki etan donnen ki i annan en nouvo defi dan bann Lekol e sa i bann zanfan ki pe ne e zot paran in servi Drog ouswa Lalkol, alors zot ne avek serten Disorder parey, Attention Deficit Disorder e zot donn en kantite problenm kot Lekol. Ki mannyer Minister Ledikasyon, ansanm avek bann lezot partner, pe prepar zot pour sa gran defi ki’n deza ariv dan bann Lekol?

E ki arive ler en paran i refize korpere avek Lekol menm, si son zanfan i kontinyelman donn problenm kot Lekol? Mersi Mr Speaker.

MINISTER MACSUZY MONDON

Mr Speaker, kot i konsern bann nouvo defi wi, oubyen bann ki pe antre dan nou bann Lekol. Pou lemoman, kot nou napa sa servis spesyalize, nou rod led avek lezot servis ki egziste dan pei. Par egzanp, Minister i travay tre pros avek Early Childhood Intervention Centre ki dan distrik La Riviere Anglaise.

I annan osi kot nou annan bann Spesyalis ki deza dan Lekol Eksepsyonnel oubyen dan Student Welfare Unit dan Minister Ledikasyon. Sa bann Spesyalis ki nou annan, i ed Lekol pou travay avek sa bann zanfan. Me selman, definitivman nou bezwen, nou bezwen invest dan plis formasyon pour sa bann Spesyalis ki nou bezwen deplizanpli, pou zot kapab ed nou avek bann nouvo problenm ki nou pe fer fas avek o nivo Lekol.

E nou pran:- kot i konsern bann paran ki pa korpere. Mr Speaker, i annan serten aksyon ki nou pran. Normalman dabor, Counsellor i fer demars pou travay avek sa bann paran. I rod led Social Worker pou nou kapab rod sa bann paran e pou anmenn zot kot Lekol, pou nou kapab travay ek zot. Me parey nou konnen, i toultan annan serten paran ki pe met nou o defi. E dan Review Education Act, nou pe fer provizyon pou nou kapab pran serten sanksyon avek sa bann paran.

Si mon donn en legzanp Mr Speaker. Letan mon ti dan Commonwealth Meeting Bahamas dernyerman, mon ti tann bann Management Lekol pe eksplike kot ler en paran ki pa korpere, paran ki pa vin Lekol, zot zis expel son zanfan Lekol. E ler son zanfan in ganny expel Lekol, sa i vin son problenm. Li apre ki bezwen marse fer letour partou dan tou Lekol, pou ale, pou al beg, pou al demann en pti plas pour li kapab met son zanfan Lekol. Nou pa anvi annan bann stratezi koumsa e nou pa ti a kontan ariv sa staz Mr Speaker. Me mon krwar letan in arive pour ki paran i bezwen konpran ki i bezwen korpere avek Lekol akoz dan sa monn ki nou pe viv ozordi, nou pa pe kapab edik son zanfan nou tousel san son led e san son korperasyon. E sa lapel ki mon ti a kontan fer avek nou bann paran bomaten. Mersi Mr Speaker.

MR SPEAKER

Onorab Pool.

HON ANDRE POOL

Mr Speaker, mersi. Mr Speaker, mon ti a kontan demann Minis si son Minister i pare pou konsider fer retournen bann mezir prevantif e koreksyon, ki ti pratike par egzanp, dan nou lepok e ki ti tre efektif, tel ki: servi plis roten pou remet sa o standar disiplin dan Lekol, parey ti egziste oparavan? Mersi.

MINISTER MACSUZY MONDON

Mr Speaker, non. Minister pa pare pou konsider sa akoz Gouvernman in siny Konvansyon lo Drwa Zanfan e mon krwar si nou lir byen sa Konvansyon, nou ava vwar bann keksoz ladan ki nou pa sipoze fer koman en Gouvernman.

Me sa ki Minister pe fer, se ki nou pe ekip Lekol e nou pe sey ekip paran avek bann alternatif ki zot kapab servi avek zot bann zanfan, olye ki servi roten.

Selman mon ti a kontan dir osi Mr Speaker, mon krwar larealite ozordi nou tou nou konnen poudir paran i ankor pe kontinyen koriz son zanfan, si i anvi. I annan paran ki ankor pe koriz son zanfan. E mon krwar letan paran i dir poudir i servi Drwa Zanfan, oubyen i dir akoz i pa kapab servi roten pou koriz son zanfan, sanmenm sa i pa kapab disiplin son zanfan, sa i en fo konsep. I pe zis pran son responsabilite, i pe rod en keksoz pou li blanmen e i blanm Konvansyon Zanfan. E mon krwar dan sa monn ki nou pe viv ladan ozordi, parey nou’n dir nou pe fer fas avek bann nouvo challenge, avek bann nouvo defi. Nou pe vwar poudir enn bann challenge i Vyolans Domestik e nou, nou pa sipoze pe enkilke vyolans dan nou zanfan. Mersi Mr Speaker.

MR SPEAKER

Bon. Minis a konsider servi roten lo paran alors.

Onorab De Commarmond.

HON CHARLES DE COMMARMOND

Mersi Mr Speaker. Mr Speaker, mwan mon roten i ankor anpandan ….

(Laughter)

HON CHARLES DE COMMARMOND

…. pour mon bann zanfan e mon bann pti zanfan.

Mr Speaker, apard ki bann lapel ki Minis in fer bomaten pour bann paran, eski Minis i kapab enform nou Lasanble, kwa ki son Minister in fer konkretman, pou fer Minister Sosyal ek Lapolis, sirtou Family Squad, pran bann aksyon ki Lalwa i demande, kont bann paran ek zanfan ki vreman anpes:- akoz zot bann problenm disiplin, anpes lamazorite zanfan pourswiv zot ledikasyon korekteman dan bann Lekol, parey Lalwa, nou bann Lalwa i demande? Mersi Bokou.

MINISTER MACSUZY MONDON

Mr Speaker, wi. I annan bann ka. Parey mon pe dir, i annan landrwa ki Ansennyan pa kapab arive. I annan landrwa ki Counsellor pa kapab arive. I annan keksoz ki nou bezwen deal avek, ki Servis Sosyal ki bezwen deal avek. I annan aksyon ki Servis Sosyal ki annan Lotorite pou zot pran serten aksyon e nou bezwen toultan pe annan rekour avek Servis Sosyal.

Kot i annan ka kot nou bezwen led Lapolis, par egzanp kot i annan bann zanfan ki ganny atrape zisteman avek Drog dan Lekol. Wi, la nou bezwen apel Lapolis e bann ka koumsa i ganny mete dan lanmen Lapolis.

Ki arive apre, kote zafer i ganny anmennen, si i al devan Juvenile Court, Mr Speaker, sa byensir i depan antyerman lo Prosekisyon, lo Lapolis, ki mannyer zot deal avek sa case.

Me dan tou bann ka kot nou santi o nivo Lekol, nou napa Lotorite pou nou kapab deal avek sa bann case parey e ki Lotorite i avek en lot Minister, oubyen avek en lot Lazans, nou fer sir ki nou refer avek sa bann Lazans konsernen.

E mon’n mansyonnen en pe pli boner, letan nou review. Nou pe review, nou preski terminen Review and Education Act, i annan sanksyon ki nou pou mete ladan, pou nou kapab o nivo Minister Ledikasyon, deal avek serten sa bann lofans ki bann paran i komet o nivo Minister nou osi. Mersi Mr Speaker.

MR SPEAKER

Onorab Ghislain.

HON CHANTAL GHISLAIN

Mersi Mr Speaker. Mr Speaker, an prenan an kont premye repons Minis, eski:- si mon pe konpran byen, Minis pe dir nou ki aktyelman dan tou Lekol antye, i napa vreman sa gro problenm disiplin. Si sa i leka, eski Minis i kapab dir ek sa Lasanble, si tou Lekol i raport tou bann problenm disiplin avek Minister, pe enport si i mal, parey konsernen Bullying, ouswa pli agresiv, ouswa sa bann Lekol zot kit rikord tou bann problenm disiplin ki bann zanfan i pran par avek?

E an plis ki sa Minis, eski Minis i kapab dir nou, si pa in plis ki ler pou fer tou nou bann paran isi Sesel, pe enport si swa en manman ouswa papa, vin responsab pour son zanfan, akoz letan nou pe regarde, sa manman letan sa zanfan i dan son vant, pour 9 mwan, i oblize e menm forse pou li okip son zanfan, akoz sa i ant lavi ek lanmor. E letan sa zanfan i ne osi ….

(Interruption)

MR SPEAKER

Kestyon, kestyon. Onorab, ou pe …. ou pe …. Kestyon.

HON CHANTAL GHISLAIN

Ok. Mr Speaker, eski i pa’n ler osi pou nou kapab entrodwir bann Lalwa, pou kapab fors sa bann paran vin responsab zot zanfan, letan sa zanfan osi i pli gran, pour ki zot osi zot kapab pe responsab:- swa i pou al Prizon, ouswa i pour son laliberte? Mersi Mr Speaker.

MINISTER MACSUZY MONDON

Mr Speaker wi. Tou Lekol i gard rikord bann lofans ki bann zanfan i komet e zot anvoy Rapor kot Divizyon Lekol tou le Trimes.

Kot i konsern bann paran pou fer zot vin pli responsab. Be mwan mon ti a dir avek bann paran, si ou pa ankor pare pou elve en zanfan, pa bezwen fer en zanfan. Prepar ou avan pou, ou kapab ler ou’n fer ou zanfan, pou ou kapab elve ou zanfan byen.

Mon pa konnen ziska ki nivo ki nou pou bezwen arive pou nou fer paran vin responsab, parski si ou’n pare pou ou vin en paran, ou bezwen pran responsabilite pour ou zanfan. Ok.

E pou annan Lalwa pou fors paran pou fer zot vin responsab, ziska ki degre ki nou kapab fer sa? E nou konnen poudir an menm tan ki nou pe balans Lalwa avek bann keksoz ki nou pe fer, nou bezwen osi regard en pe pli lwen. Regard en pe bann konsekans ki bann sanksyon ki nou pe pran i pou anmennen. Parski nou, byensir nou bezwen mazinen tou sa ki nou fer, nou toultan annan sa zanfan o sant. Nou toultan annan lentere sa zanfan. E nou bezwen fer sir, tou bann desizyon, tou bann sanksyon, tou bann keksoz ki nou fer, nou fer li pour byennet zanfan dan nou sistenm. Mersi Mr Speaker.

MR SPEAKER

Bon, avek sa nou’n ariv alafen Question Time. Nou ava adjourn ziska 11er, kot nou pou pran en Second Reading.

(BREAK)

MR SPEAKER

Bon, nou ava:- nou a kontinyen avek nou travay. Nou annan nou en Second Reading, Local Government Bill, 2015 e mon a ganny en Motion for Second Reading.

HON MARIE-ANTOINETTE ROSE

Mr Speaker, anba Order 64(2,) mon move ki nou lir sa Bill en Dezyenm fwa.

MR SPEAKER

Okenn ki segonde?

HON CHARLES DECOMMARMOND

Mr Speaker, mon segonn sa Mosyon.

MR SPEAKER

Bon. Minis mon ava envit ou pou entrodwir ou Bill.

MINISTER VINCENT MERITON

Mersi Mr Speaker. Bonzour Mr Speaker. Bonzour tou Manm Lasanble.

Mon’n desann yer swar sorti La Reunion kot nou pe bataye pou nou kapab defann nou pozisyon dan Zwe Des Iles, pou vin prezant en Prozedlwa devan Lasanble. En Prozedlwa ki enportan Mr Speaker.

Mr Speaker, swivan rezolisyon, 29enm Kongre Parti Lepep, le 5 Zen sa lannen e Diskour Prezidan Larepiblik a lokazyon Lazournen Lendepandans, le 29 Zen, Gouvernman in travay e aprouv bann prensip e granliny, pou etablir en sistenm gouvernans lokal atraver Eleksyon. Sa Lasanble in osi zwe son rol, me en rol konstriktiv e pozitiv dan sa deba, dan sa prosesis. En Mosyon, prezante par Onorab Charles De Commarmond, in permet zot bann Manm Onorab, kontribye dan en fason fran, lo ki mannyer nou pou elimin bann birokrasi dan servis, bann servis ki nou delivre dan distrik e lev nou nivo standar e amelyor nou performans dan distrik. Nou’n travay an etrwat kolaborasyon avek Biro Prokirer Zeneral e apre en kantite diskisyon e Miting, lo mon kote, dirize par mon Konseye Spesyal Mr Dan Frichaud ki la avek mwan, nou pe prezant avek sa Lasanble, en Prozedlwa ki reponn legzizans gouvernans lokal modern.

Mr Speaker, sa Prozedlwa ki devan nou, en fwa i aprouve, i pou deklans komansman en prosesis reform dan nou sistenm gouvernans lokal.

Mr Speaker, sistenm Gouvernman Lokal i tre enportan dan devlopman en pei.

Mr Speaker, Gouvernman Lepep in toultan met dimoun avan tou. Sesel in reisir dan bokou domenn, senpleman akoz nou kominote in solid e in pare pou fer fas avek diferan sirkonstans. Sesel i annan en listwar avek kiltir ris. Se linite ki egziste parmi nou ki lakle sa sikse. Tou devlopman ki’n arive pandan sa preski 40an, in vize ver en sel lobzektif. E sa se amelyorasyon kondisyon lavi nou dimoun, kondisyon nou kominote e nou pei an zeneral. Dimoun in reste toultan o sant devlopman.

Mr Speaker, Prezidan Michel in kontinyelman met bokou lanfaz lo legzistans lapros gouvernans lokal, kot i annan en partisipasyon pro-aktiv bann rezidan, pou adres bann defi o nivo lokal. Donn zot pouvwar, empower zot, Prezidan i kontan dir. E in osi a plizyer repriz, fer sorti ki Gouvernman, atraver son bann Minister, Departman avek Lazans, i bezwen reste konekte avek lepep e donn lepep en bon servis e en servis de kalite.

Mr Speaker, lemonn pe evolye e avek li i annan bokou loportinite avek defi. Sesel koman en pti leta zil, i vilnerab e pa ganny eparnye. Devlopman Teknolozi, osi byen ki sanzman klima, pe poz bokou menas, bokou defi pour nou. Nou pe ganny ekspoze avek bokou risk.

Mr Speaker, enn bann fason pou sirmont sa bann defi, se pou ranforsi nou striktir de baz, ranforsi nou striktir lo nivo distrik, nou kominote atraver kreasyon en vre sans lapartenans.

Mr Speaker, i enportan ki lakominote i zwenn ansanm avek Gouvernman pou adres bann defi lokal. Lakominote i bezwen montre sa vre sans langazman e volonte pou fer sa diferans. Zot bezwen pro-aktiv e se bann manm Kominote ki bezwen fer zot partisipasyon konte. A sa moman, i enportan pou rekonnet ki bokou in ganny fer pandan sa bann lannen, o nivo distrik, atraver sistenm Administrasyon Distrik, lentrodiksyon bann progranm Sosyal, lenplimantasyon bann pti proze, konstriksyon lenfrastriktir, ensi ki bann servis ki’n ganny delivre. I evidan ki travay ki’n ganny fer, in ganny fer dan en lespri konstriktiv, kolaborasyon e avek en lespri travay lekip. Nou osi rekonnet ki malgre tou bann volonte pou donn en meyer servis, i osi annan lespas pour amelyorasyon. Depi Trwazyenm Repiblik, bokou zefor in ganny fer par Gouvernman, pou anmenn bann servis ek progranm lo nivo kominote, la kot nou bezwen fer en diferans avek bann zabitan.

Mr Speaker, nou santi ki letan in arive pou donn plis loportinite bann rezidan pou partisip dan labi kominoter e pou pran ownership lapartenans zot distrik. Si sa Lalwa i arive fer sa, nou koman Sesel nou pou lwen.

Mr Speaker, lemonn pe sanze e nou osi nou bezwen adapte avek sanzman. Tandans dan lemonn ozordi, se ki bokou deba e diskisyon i vize ver lepanouisman dimoun lo nivo labaz. Bokou size lo azanda diskisyon lo lasenn enternasyonal, i lo nivo labaz, lo size desantralizasyon e bon gouvernans lokal. Donn plis pouvwar distrik e ozordi atraver sa Prozedlwa ki pe ganny propoze, Sesel pe dir ki in are pou avans devan e fer en diferans. Sa Prozedlwa pe propoz letablisman bann Konsey Distrik, atraver Eleksyon.

Bann Konsey Distrik. Konsey Distrik pou reprezant laspirasyon popilasyon bann distrik e bann manm sa Konsey pou ganny elekte par zabitan zot menm.

Mr Speaker, ki lobzektif sa Prozedlwa? Ki benefis i pou anmennen?

Mr Speaker, premyerman sa Prozedlwa i anliny avek Lartik 167 ki dir ki Gouvernman dizour i a deside ki mannyer i pou etablir en sistenm gouvernans lokal, baze lo nesesite.

Dezyenmman Mr Speaker, i pou permet en pli gran reprezantasyon demokratik lo nivo lokal e permet accountability, rann kont:- en sistenm rann kont e latransparans. I pou osi permet partisipasyon aktiv bann rezidan dan lavi distrik, permet en amelyorasyon dan servis ki ganny ofer lo nivo lokal e permet bann rezidan pou pran sa vre ownership zot kominote.

Mr Speaker, nou sistenm gouvernans lokal in egziste dan diferan staz devlopman nou listwar e dan diferan konteks politik nou pei. I pa fer premye fwa ki Konsey Distrik i etablir dan Sesel. Dan bann lannen 1950 anba sistenm Kolonyal, ti annan Victoria District Council, ki ti donn serten servis dan Lavil Victoria.

An 1979, se bann Komite Brans dan distrik ki ti zwe rol konsiltasyon ant Gouvernman santral avek kominote.

An 1991, Gouvernman ti etablir Konsey Distrik atraver en Lalwa, kot bann manm ti ganny elekte e sa Chairman ti an menm tan Chairman Konsey Distrik, avek en Manm Lasanble Nasyonal. Dan sa Prozedlwa, Manm Lasanble Nasyonal i pa Manm Konsey Distrik.

An 1993 Mr Speaker, nou ti bezwen retir sa Lalwa akoz kontrovers ki ti annan lo size gouvernans lokal dan nou Konstitisyon. Se la kot nou trouv nesans Lartik 167 ki mon’n koz lo la taler, ki dir ki Gouvernman dizour i etablir ladministrasyon kot i konsern Gouvernans lokal, baze lo nesesite.

Departman Gouvernman lokal ti donn loryantasyon e siperviz travay bann Ladministrasyon Distrik, avek bi pou kontinyelman desantraliz bann servis e aktivite pour benefis nou bann kominote lokal.

Mr Speaker, ozordi nou pe antre dan en nouvo faz devlopman sistenm gouvernans lokal. Sa Lalwa, sa Prozedlwa ki devan nou, pou anmenn bokou benefis akoz i pou ranforsi nou sistenm demokrasi. I pou kree en platform, kot zabitan pou kapab vin devan, partisipe e form parti desizyon ki ganny pran. I pou osi ranforsi relasyon ant Gouvernman santral avek labaz distrik e osi finalman, i pou permet annan en sistenm Service Delivery lo nivo distrik ki pli efektiv, alaoter, lekspektasyon e satisfaksyon bann zabitan. Enn son bann fonksyon osi enportan, se pou zer lekspektasyon nou bann piblik e fer zot partisip plennman dan kreasyon en meyer kominote ki nou bezwen viv ladan pou nou prospere.

Mr Speaker, permet mwan prezan, pas lo bann pwen enportan ki konteni dan sa Lalwa.

Seksyon 1 ek 2 i koz lo enterpretasyon. Savedir ki mannyer nou definir bann term ki servi dan Lalwa.

Seksyon 3, 4 ek 5 i koz lo Konsey Distrik. I dir ki bann distrik i koresponn avek bann Electoral Areas parey i ganny dir dan Lartik 112 Konstitisyon. Savedir menm balizaz e menm non ki bann Electoral Areas. I osi fer referans avek Konsey ki annan en Chairman avek 4 Manm Elekte.

Osi Mr Speaker, referans i ganny fer avek lefe ki Konsey, i pou annan Eleksyon Chairman avek konseye separe e ki zot pou travay lo en baz part-time e ki Eleksyon pou fer tou le 5an. Referans in ganny fer ki Konsey Distrik, de tanzantan, i kapab zwenn avek Manm Lasanble Nasyonal, pou diskit bann size devlopman sa distrik.

Mr Speaker, i osi annan provizyon pour ki Konsey i devlop plan stratezik sak distrik, anliny avek Polisi Gouvernman, ki sirvey zesyon bann zafer sa distrik. Ki Konsey i formil devlopman plan sa distrik, an kolaborasyon avek bann Minister, bann Lazans ek bann Departman e sirvey lenplimantasyon bann plan devlopman ki pran plas dan sa distrik. I osi enportan pou vwar ki Konsey in ganny sa manda:- i pou ganny sa manda pou asiste Gouvernman pou anmas larzan, dan lenplimantasyon bann Scheme ek bann progranm dan distrik, an kolaborasyon avek bann Minister.

Mr Speaker, Konsey i reprezant laspirasyon zabitan. Zot pou angaz e mobiliz bann zabitan pou pran par dan fer marse kominote e devlop sa sans lapartenans e sa vre lespri kominoter. Seksyon 6 ziska 11 i koz lo konseye. E pwen enportan la, se ki Biro Komisyon Eleksyon ki pou siperviz Eleksyon Konsey. Savedir Eleksyon Chairman, avek bann konseye. I annan osi provizyon lo ki mannyer pou ranpli bann plas ki vin vid, dan peryod avan 3an e dan peryod apre 3an, apre ki Eleksyon in ganny fer.

Mr Speaker, Seksyon 12 e 13 i koz lo Meeting Konsey e la in koz lo son frekans, ki 1 fwa tou le 2 semenn e ki corrum i 3 dimoun. Seksyon14 avek 16 i koz lo Staff Konsey Distrik e la mon oule met lanfaz lo lefe ki Administrater Distrik pou ganny apwente par Konsey Distrik e i pou annan responsabilite pour enplimant bann desizyon Konsey, an kolaborasyon avek Minister ki pou responsab pour Gouvernman Lokal e osi bann lezot Minister Gouvernman. I pou osi prepar Bidze anyel e prepar Rapor lo lenplimantasyon bann plan e progranm ki’n ganny fer pandan lannen kouran.

Mr Speaker, Seksyon 17 a 20 i koz lo finansman e i fer sorti ki Konsey pou ganny son larzan atraver Bidze ki ganny konsidere, aprouve par Lasanble Nasyonal isi e ki i kapab ganny larzan atraver bann Don e osi en lenvestisman e osi okenn keksoz ki Legal, ki kapab ganny servi pou fer marse sa kominote.

Mr Speaker, sa Lalwa i osi demande ki Konsey i mentenir zot kont annord e ki kont Konsey i ganny odite par Biro Oditer Zeneral, anba Lartik 158 nou Konstitisyon.

Mr Speaker, ozordi i en moman tre enportan dan devlopman nou pei. Atraver sa Lalwa ki mon pe soumet avek zot dan Lasanble, nou pe donn plis pouvwar nou bann kominote. Nou pe larg lanmen distrik. Nou pe donn plis pouvwar distrik pou annan en pli gran lenfliyans dan bann desizyon ki ganny pran. Sa i ganny vwar koman en letap tre enportan, anver devlopman la demokrasi dan nou pei. I pou osi kree loportinite, en lespas, pour plis partisipasyon direk bann zabitan, dan devlopman zot distrik. Dan en fason, i pou fer Gouvernman santral vin pli efektiv e responsab anver servis ki i ofer.

Mr Speaker, sa model Konsey Distrik ki pe ganny propoze, i enn ki home grown. Nou’n etidye lezot legzanp dan lezot pei, nou’n pran konsiderasyon bann grander e bann spesifisite bann pei e sa ki nou’n vin avek, nou’n santi i meyer pour Sesel.

Mr Speaker, bann Konsey Distrik pou ganny gide par bann Standing Orders e bann regilasyon ki pou ganny fer anba bann Lalwa, pou fer sir ki tou bann keksoz i ganny fer annord e pou asir bon fonksyonnman e transparans bann Konsey. Dan sa menm lespri, anver sa nouvo devlopman, nou pe bezwen en nouvo fason panse an zeneral dan Gouvernman e dan pei, vizavi bann Konsey distrik. I bezwen en sanzman dan mindset. I bezwen parey angle i dir, en par dime shift, pou nou aksepte ki Konsey Distrik i pe vin en lenstans enportan dan devlopman nou pei.

Mr Speaker, pou terminen, Sesel pe bouz dan en nouvo letap. En nouvo lorizon. Sesel pe bouz dan en bon direksyon. En direksyon ki pou anmenn plis prosperite pour nou tou. Devan nou lo lorizon, pou annan bokou loportinite pour tou Seselwa, pou zot partisipe e benefisye. I en nouvo langazman. I en new beginning parey angle i dir e ansanm, annou fer sa premye pa korek.

Mr Speaker, mon pe demann zot tou, tou bann Manm Lasanble, pou donn mwan sipor dan sa Prozedlwa.

Mr Speaker, mon soumet sa Prozedlwa pour konsiderasyon Lasanble. Mersi.

MR SPEAKER

Bon, deba i ouver. Onorab De Commarmond.

HON CHARLES DE COMMARMOND

Mersi Mr Speaker. Mr Speaker, sa Prozedlwa ki devan nou i konteni bann keksoz ki a 2 fwa mon’n koz lo la dan nou Lasanble isi e dernyerman ou ti koz lo la sete dan sa Mosyon ki mon ti anmennen en mwan, pa tro lontan pase. Savedir, ki mon pa bezwen al fer gran, gran leloz lo la e koz bokou. Me i enportan par kont pou fer resorti poudir i en bon Lalwa. I en bon lepa. En bon step devan ki nou pei pe pran e avek sazes nou Prezidan, nou’n vwar nesesite pou elarzi e-moderniz nou la demokrasi ankor bokou plis.

Ou vwar, sa ki nou pe sey fer la ozordi, i en keksoz ki nou krwar ladan. Nou pa zis pe fer li konmsi koumsa, me nou krwar ladan. Mwan mon krwar ladan. Mon konnen Prezidan i krwar ladan e se sa ki nou pe pouse pour sa arive. I annan zis lavantaz ki mon pe regarde i pou anmennen pour nou pep e nou pei. An menm tan, lemonn antye. Rezyonal, enternasyonal, dan diferan Forum ki nou ale, nou ape koz sa. Tou bann Lorganizasyon, enternasyonal e rezyonal, zot pe ensiste ki la demokrasi i grandi, i elarzir, i modernize e ki bann striktir relasyonnen avek sa, i ganny fer pour ki lepep i ganny plis pouvwar, plis rezon partisipasyon, plis sans pou partisipe dan lavi son kominote e son bann aktivite ki otour li.

An menm tan osi, i permet ki bann group ki vilnerab oubyen bann dimoun ki vilnerab dan sosyete, i ganny touse pli byen avek en tel sistenm. Letan ou pe desantralize, ou pe anmenn pouvwar e osi aksyon o nivo labaz, i fer ki i bezwen annan rezilta pozitiv e ki ou bann dimoun ki vreman bezwen sa bann needs, sa bann service ensidswit, i ganny touse pli korekteman, pli zis:- ou ganny ou en sistenm ki pli zis, pli fair dan tou sa ki ou fer.

Par egzanp, nou osi remarke ki avek en tel sistenm, en tel desantralizasyon e sa Lalwa i anmenn sa byen, i pou permet dimoun vin pli angaze dan sa ki arive dan son kominote. E avek langazman, letan dimoun i vin pli angaze, otomatikman i bezwen annan plis responsabilite. Ou pa kapab angaze, epi napa responsabilite. So, mon vwar li i mars ansanm sa 2. So, i savedir ki nou ava annan osi en kominote, bann kominote ki pli serye, bann kominote ki pran plis responsabilite, bann kominote ki ava viv bokou pli byen.

Bomaten si ou kalkile, dan Question Time, letan Minis Ledikasyon ti vin fer Statement, ou vwar nesesite kote i annan mankman lo nivo kominote, an relasyon avek Ledikasyon ek son Lekol par egzanp. So, ou vwar avek en tel Prozedlwa, avek Council. Council i bezwen li osi. I pa kapab reste lwen ek son Lekol li. Lekol i dan son distrik, Council i bezwen annan en relasyon, pe gete ki pe pase dan Lekol. Ki pe arive kot Lekol. Si paran dan sa kominote:- i annan serten paran ki pe, si ou oule dir, pa serye li, pa konsern li e i pe kas tou kalite Lord e Lalwa, kominote pou deal ek li. Ozordi la ou pa pe gannyen sa kalite sipor. Ou pe fye lo:-parey Minis in eksplik nou bomaten. Ou pe fye lo Minister ledikasyon. Li prezan letan i vwar i annan serten case, i anvoy avek Sosyal, avek Lapolis. Prezan ki bannla i fer laba, ou napa kontrol, ou pa konnen ou. Be Council li, i pou bezwen angaze. I bezwen konnen son Lekol e i anvi son Lekol i sorti byen li. Alor, i annan sa kalite relasyon ki sa Lalwa i pou permet.

Ou annan ou, letan mon gete, anba Miscellaneous, part 7 sa Lalwa, sa Prozedlwa, i koz lo bann regilasyon e bann Standing Orders. ki Council i pou annan dwa fer, avek laprouvasyon e sanz avek Minis. Avek laprouvasyon e diskisyon avek Minister ki oversee sa Council. Be i pou permet ki en distrik, en kominote, i kapab fer serten desizyon, pa neseserman tou lezot kominote i swiv. Dizon Cascade i anvi par egzanp segregate nou bann salte. Nou rod nou permisyon, nou fer. Nou konmans fer. Lezot distrik si i pa oule fer, i ok. Dump site i kot nou. Nou, nou deside pou bouz dan en tel direksyon e si nou krwar sa i pozitiv, i anmenn en rannman, be nou komans fer li. Petet lezot ava swiv apre. Be la ozordi la, ou bezwen fye lo en Minister. Si li i deside pa fer, naryen pa ganny fer. Ouswa lo serten Lazans e nou reste an aryer. Mon’n vwar alor ki en tel Lalwa, i pou anmenn bokou benefis pour bann kominote e i ava empower dimoun bokou pli byen.

I annan en lot keksoz ki sa Council i pou fer. I pou fer ki par egzanp, dan bann proze, proze distrik: yer swar. Yer swar Mr Speaker, mon’n bezwen al gete kot dimoun pe kriye laba, en proze distrik ki’n ganny fer, ki pe ganny fer, in deza arete, akoz dimoun pa’n ganny konsilte. Nek Minister Gouvernman Lokal in vini, fer serten proze. Prezan dimoun i dir tyonbo. La nou, nou pa’n dir fer koumsa nou. I annan en gro delo ki pas la. I dir apel ou MNA i ava dir ou. Nou bezwen dir stop. Letan i vin koumsa avek sa tel Lalwa, sa bann keksoz pa pou arive. I pa pou arive akoz ou pou annan en konsiltasyon ki pou’n ganny fer dan en fason byen. Tou dimoun pou konnen, lala nou pe al fer tel proze dan tel border. Tel soz i pas tel mannyer e nou pou konnen poudir la i annan en gro delo ki pase, la i isi, la i laba e keksoz i bezwen ganny fer dan en fason pli byen. An plis, depans ki ganny fer pour sa bann proze, i ava ganny fer korekteman. E nou ava annan plis oversight lo sa ki pe pase at community level.

Mr Speaker, sa kestyon ownership. Savedir dimoun i pou pran ownership lapartenans son distrik, mon krwar sa i tre, tre, tre byen. Ou vwar. Si nou vwar poudir dan nou kominote, Lapolis kantmenm nou kriye, pa vini. Napa ditou Lapolis. Kantmenm dan Bidze nou depans en kantite. En legzanp. Be nou a bezwen:-Council i bezwen dir tyonbo en kou. Nou annan en tel problenm, nou bezwen pran en desizyon. I ava annan plis presyon lo Gouvernman santral, pou anmenn sa bann keksoz lo nivo la baz.

Nou vwar par egzanp:- zis mon pe donn enn de legzanp koumsa. Ou vwar poudir dan en distrik, dan en kominote, i annan en ta lisyen eran. En ta lera. En ta lera. Be ou bezwen rod en fason pou deal avek. Petet dan en lot distrik, i napa li. Be petet dan enn i annan. Be prezan:- ouswa en ta Ibou.

(Laughter)

HON CHARLES DE COMMARMOND

Ou konpran. Alor, i a permet sa Lotorite, sa Council pou li adres sa issue la. I a dir tyonbo en kou. Nou bezwen rod en mekanizm, en fason, pou nou met sa anba kontrol kot nou. So, i a provok plizyer keksoz. Ou vwar. I a fer ki bann dimoun dan sa Council la, bann dimoun dan sa kominote osi. Ou al plis ki sa. Ou annan:- i annan bann lapel. Dimoun ki annan bann relasyon, bann koneksyon, bann konneksyon deor. Avek bann:- I annan bann NGOs a ganny kree plis. Konmsi, en kantite keksoz i ava ganny tyonbo, kot ozordi i pa permet Gouvernman arive. I pa permet. Konmsi i pa kestyon Gouvernman pa anvi li, be sityasyon ki mannyer i ete, Lalwa, Lordinans, i pa permet. So, ek Council li, ou pou kapab li. Ou pou kapab fer serten kalite proze ki pou tous ou kominote e pou anmenn benefis. I pou anmenn benefis. E i annan plis transparans e plis oversight. Oversight direk konmsi ki:- ou konpran?

Se sa Mr Speaker, mon pa pou al tro bokou lo la. Alor mwan mon kontan ki sa Lalwa i pe ganny pase e i pe ganny pase ase vit. E i bon, nou bezwen bouz vit. Mon kontan aksyon e sa ou’n dir o komansman. Nou tenm dan Lasanble, nou ti dir aksyon. Sa voyaz aksyon. E Prezidan pe ekoute. Prezidan pe ekoute, dir aksyon.

En kestyon ki mon annan Mr Speaker, ki Minis i kapab petet eklersi nou. Si en Manm, letan ou’n vin en Manm Council, ou sipoze part-time. Ok. En Konseye. Ou’n ganny elekte en Konseye. Prezan sa dimoun, si i pe travay deza avek Ladministrasyon Distrik or si letan in vin en Konseye, eski i kapab travay avek Ladministrasyon Distrik dan sa set up la, dan sa distrik la? Ou konpran. Sa pour mwan i pa tro kler akoz kekfwa, ki mon pe sey dir sa, akoz mon poz sa kestyon. Akoz ou kapab annan dimoun ozordi, i dan Ladministrasyon Distrik li. I bann potential candidate pou:-akoz la, ek sa Lalwa la, en kantite dimoun pe vin devan, i oule vin:- i deza enterese. I oule vin Councilor. Prezan zot ti krwar poudir i apwente, la zot konnen poudir pe elekte sa zafer. E i annan still kantite ki oule vini. Be i annan menm dimoun ki travay dan Ladministrasyon Distrik la, in fini konpran the set up, ensidswit, i oule partisip pli byen. I kapab debout koman en Councilor, i ganny elekte. Eski i kontinyen son travay la dan Ladministrasyon Distrik ouswa i bezwen arete, ki deal. Petet si ou ti kapab eklersi nou en pti gin lo la.

Epi, mon kontan i dir, zwenn:- sa Council i bezwen zwenn ek son Manm Lasanble de tanzantan. Well, ou les en laport ouver. Mon pe per ou ganny en Council:- sa osi ti a bon ou pronons en pti gin lo la Minis. Mon per nou ganny en Council ki li i dir nou pa bezwen konsilte okenn naryen, pa bezwen zwenn avek sa Manm Lasanble. Konmsi, mon pe dir sa purposely mwan, akoz mwan anvi ki sa 2 lenstans i marse pour benefis sa kominote. Ou kapab ganny ou en Council, li i vwar en fason, apre ou ganny ou en Manm Lasanble, i dan en Parti Politik left, right and centre. Mon pa konnen. Pe enport, pe enport. Me, i bezwen pe travay ansanm. Mwan mon lespri pou mwan, i dir mwan bezwen pe travay ansanm. Konmsi, mon anvi ki Minis, ou met en presyon lo la. Ou donn nou ou klervwayans lo la, pour ki sa keksoz la, i bezwen arive. No matter si Council li i sepa ki kalite, sa Manm Lasanble i sorti dan ki Parti, pa enportan. Pour mwan, se sa kominote ki konsern mwan. Se sa bann dimoun la ki konsernen e nou bezwen fer viv sa kalite spirit.

Avek sa mon ava fini la Mr Speaker e mon a demann tou dimoun pou siport sa Prozedlwa. I en bon Prozedlwa e o fiy e an mezir ki nou devlope, parey mon ti dir dan mon Mosyon, si i annan bann sanzman, bann azisteman letan nou menm nou bann Seselwa nou al deor partou, nou gete ki mannyer i ete laba. Nou vin adapte keksoz. Pa zis kopye, nou pa vin copy cat, me nou adapte e nou, nou menm nou, nou get sa ki nou pe fer. Si fodre nou amelyore, let us do it. Annou pa per akoz tousala i dan zentere nou pep e nou pei. Mersi bokou

MR SPEAKER

Onorab Vidot.

HON KEVIN VIDOT

Mersi e bonzour Mr Speaker. Bonzour Minis e tou Manm Onorab.

Mr Speaker, ‘Mon plan pour ou.’ Manifesto Parti Lepep dan Eleksyon 2011, ki nou kandida Prezidansyel sa letan, Prezidan James Michel ti prezant avek lepep Seselwa, ler i ti pe koz lo en nouvo sapit, en nouvo Sesel e kot Mr Speaker, i ti dir ladan, ki mon pou redwir bann prosesis, fer desizyon e met sa bann prosesis dan lanmen Seselwa. Lo nivo kominoter, tou devlopman ki ganny fer dan distrik i bezwen ganny konsilte par distrik. I ti kontinyen pou dir. Mon pou etablir en nouvo fonksyon pour Ladministrasyon Distrik, pou pli byen reponn laspirasyon mon kominote.

Mr Speaker, sa Lalwa pa kapab vin en pli bon opportune time ki pe vini la ozordi akoz nou pe al ferm laport lo en vye sapit e nou pe al ouver laport pour en nouvo sapit, kot Prezidan Michel pou al ankor enn fwa, al devan lepep Seselwa, pou anmenn son plan travay pour sa bann prosen 5an. Me sa ki enportan pou note se atraver sa Manifesto Parti Lepep, ki Prezidan Michel ti prezant avek lepep Seselwa, ozordi i ape vin en realite. I demontre nou Mr Speaker, ki Prezidan Michel i en zonm parol e i en zonm ki pas a laksyon. Son parol ki i ti dir avek lepep Seselwa, i pa ti bann fo promes vid, me i ti bann promes ki ti garanti pou ganny met dan laksyon, akoz i ti vreman anvi met pouvwar, desizyon dan lanmen son kominote, dan lanmen lepep ki ti elekte li an 2011.

Mr Speaker, sa Manifesto i fer nou vwar ki nou annan en Dirizan ki krwar ki se kominote ki bezwen pran desizyon pour zot prop lekor. I nepli sa ler, ouswa nou pe ferm laport lo sa ler kot en Gouvernman santral i pran tou desizyon lo lapar lakominote. Me la nou pe dir ki pou annan bann Konseye ki pou ganny elekte, enkli son Chairman, ki pou pran desizyon lo lapar son bann dimoun dan son distrik, ki’n elekte zot e ki’n met zot la.

Sa i en keksoz ki vreman enportan Mr Speaker. I en keksoz ki mon swete, parey Manifesto i dir, ki a ede redwir sa bann prosesis pran desizyon, kot i bezwen al kot Gouvernman santral, i bezwen al kot lot Minister, i bezwen al laba pou kapab pran en desizyon lo la. Me mon swete, an pratik, sa Konseye ler pou’n pran en desizyon, ki sa ki vreman nou vreman anvi vwar dan nou distrik. Ki sa bann keksoz a ganny speed up e finansman a ganny mete adekwa la, ki sa bann proze ouswa sa bann travay i ganny fer, fason ki Konsey, ansanm avek zot bann dimoun dan distrik in pran desizyon lo la.

Tou devlopman Mr Speaker. In dir tou devlopman. Savedir, mon pe tant pou krwar ki atraver sa Lalwa, atraver bann Konsey Distrik, menm bann Proze Kapital ki pou arive dan bann distrik, mon ti a kontan Minis i pronons son lekor lo la. Menm bann Proze Kapital ki arive dan bann distrik, Konsey pou annan en gran say osi lo la. Kwa ki priyorite koman en Proze Kapital dan son distrik, kwa ki devret ganny fer avan e kwa ki pou ganny fer pli tar. E si vreman zot krwar serten proze pou benefisyel pour zot distrik, ouswa pou vin zis met en fardo an plis lo sa distrik.

Mr Speaker, mon pa anvi pran en legzanp a sa moman, me en senp pti legzanp ki nou kapab koz lo la. En issue ki mon krwar i ankor la lo latab, se rezon Laplenn Larivyer Anglez par egzanp. Ozordi en desizyon i ganny pran a nivo santral, ki Laplenn Larivyer Anglez, Laplenn Foutbol i kapab ganny turn into a Music Stadium. Me kekfwa, dan sa lepok kot sa Konsey Distrik ti’n ganny etablir, sa ti a bezwen ganny mete lo nivo Konsey Distrik e Konsey Distrik ti ava pran en desizyon ferm lo la. Si vreman sa i dan best interest of son kominote, ouswa i dan best interest of pei an zeneral. E si en keksoz koumsa pou neseserman afekte son kominote, ouswa pou anmenn en benefis pour son kominote. E mon swete ki sa bann Konsey Distrik i ganny etablir, i kapab vreman vin sa lavwa pli for. La i pa pou zis en dimoun Mr Speaker. Kekfwa i pa pou zis en MNA ki pe koze. I ava en Konsey 5 dimoun ki ava asize ansanm ek zot MNA, ansanm ek Administrater Distrik, i a kapab koze e koz ek en lavwa tre for, ki serten keksoz pa bon pou zot me serten lezot keksoz i ava meyer pou zot lagrandisman e pou zot lavansman koman en kominote, koman en distrik.

Mr Speaker, i pe demontre nou ozordi ki atraver sa Lalwa, ki pou annan bann nouvo fason fonksyonnen ki Ladministrasyon Distrik i bezwen fonksyonnen prezan. Nou konnen Konsey pou la pou zot manage, pou zot diriz loperasyon Ladministrasyon Distrik. Savedir an prensip, zot sipoze pe diriz travay Administrater Distrik. Savedir mon swete ki sa equation la Mr Speaker, ant Konsey Distrik avek Administrater Distrik e osi enkli MNA, ki nou ganny sa equation byen. Ki i mars san okenn hiccup. Keksoz i mars byen an paralel, i mars byen anliny, ki sa ki nou pe rode Mr Speaker, se benefis distrik. Se benefis zabitan distrik. Mon krwar i pou ariv en moman kot nou bezwen met akote nou sapo politik. Mon swete sa i arive lo sa Konsey Distrik. Ki nou met akote nou sapo politik, me nou pran en sapo kominoter, nou pran en sapo distrik, ki parey en dimoun i kontan dir, sa ki bon pour distrik i bon pour nou tou.

So, mon swete ki tou dimoun i kapab vwar li dan sa loptik, kot la nou pe travay pour nou kominote. Nou napa okenn azanda politik par deryer. Nou napa okenn lezot azanda kasyet, me nou pe vin travay pour the betterment of nou distrik, nou kominote, nou zabitan.

Mr Speaker, en lot keksoz ki enportan pou mansyonnen ladan se fonksyon Konsey Distrik li menm li. 2 parmi zot fonksyon ki mon anvi touse se 1, se pou devlop en plan stratezik anliny avek Polisi Gouvernman. Sa ki kler se konsey pa pou operate dan en lespas li tousel li, kot i pou zis kapab fer desizyon dapre sa ki li i anvi fer. Non. I bezwen pran bann desizyon stratezik ki anliny avek Polisi Gouvernman an zeneral. Savedir, nou pa ekspekte i annan en nouvo keksoz ki vini, ki pa dan plan Gouvernman. Ouswa ki kontrer ek nou Konstitisyon, ouswa ki kontrer ek nou plan Gouvernman, me mon seye bann Konseye i ganny sa tre kler. E Minis, mon swete sa i en keksoz ki ganny koz for lo la. Ki plan stratezik ki zot pou annan dan zot distrik, zot pa pou kapab zis vin fors nenport kwa pou arive, non. Me i bezwen anliny avek Polisi Gouvernman, akoz en Gouvernman i ganny elekte li osi e i normal son Manifesto ki i vin avek dan Eleksyon, i fer antre dan bann Policies, ki diriz bann fonksyon bann Minister e fonksyonn mon pei an zeneral. E Konsey i bezwen atas son lekor avek sa li, Mr Speaker. Kot i mars anliny avek sa, i devlop son plan avek sa. Nou pa pe re-envant larou la nou. Nou pe zis fer larou roul en pti pe pli byen. Si ti annan en pti pe kos avek ki ti pe anpes li roul byen, ouswa si larou ti’n komans flak, nou pe met en pe divan ladan, pou nou fer sa larou roul byen. Fer sa prosesis demokrasi la, fer li roul pli byen ankor.

Dezyenm keksoz ki mon oule koz lo la Mr Speaker, se pou devlop plan distrik avek bann Minister konsernen. Sa i ki mon anvi met en pe latansyon osi lo la. Devlop plan distrik avek bann Minister konsernen. Savedir mon pe mazinen, si mon pran en legzanp. Si distrik Larivyer Anglez savedir i annan en plan li. I anvi fer en Kord Gard. I annan en Onorab toultan i dir mwan Larivyer Anglez napa Kord Gard. I annan Kord Gard Santral ki ed nou. Me fer konmsi distrik Larivyer Anglez i anvi annan en Kord Gard, pour son grander distrik, i bezwen kapab al kot Minister Zafer Entern, asize:- Konsey i asize avek Minis zafer Entern e dir ki nou vwar ler nou’n deside, swa nou’n fer resansman, swa nou’n fer konsiltasyon. Ki distrik Larivyer Anglez, an vi son popilasyon, i devret annan en Kord Gard.

Sa en legzanp sa Mr Speaker e mon swete ki sa Minister, ouswa sa Minis konsernen pa dir:- i pa zis right off sa ki distrik ouswa Konsey Distrik pou anmenn devan li koman en plan. Kot i dir, non, sa i pa nou plan. Non, ki mannyer nou kapab fer bann plan marye? Ki mannyer nou kapab annan sa mayon kot plan distrik i enkorpor dan plan santral e nou fer sa vin en realite?

Annefe Mr Speaker, pei i egziste akoz bann kominote. Akoz bann diferan distrik. E sa bann kominote i fer en pep, fer en Nasyon, i fer en pei marse. So, mon swete ki ler keksoz pe ganny fer, i pe ganny fer pour distrik, pour kominote, pour bann zabitan. Savedir nou bezwen rod en fason ki mannyer nou pe go en pti pe pli ba, nou pe trickle down to bann diferan distrik, dan son profon. Pa zis vwar keksoz dan son anler an zeneral, me vwar keksoz en pti pe pli profon. Once ki nou’n kapab fer bann keksoz marse dan nivo distrik, a strong community, en kominote ki for, i annan tou son bann lenfrastriktir, i annan tou son keksoz pe marse byen, i fer vin en pei ki for. E en Gouvernman ki for.

Mr Speaker, en lot pwen ki mon oule koz lo la, ankor enn fwa ki vreman enportan e ki mon’n komans koz lo la osi e ki mon anvi fini lo la, se met pouvwar dan lanmen distrik pou desid zot lavenir. Lavenir:- personn pa anvi en lot dimoun desid son lavenir pou li.

Mr Speaker, mwan mon pa anvi en dimoun desid mon lavenir pour mwan mon. Mon anvi annan lotorite, mon anvi annan pouvwar pou desid mon prop lavenir. Malgre parfwa keksoz i mars dan lot fason ki kekfwa ki kapab pous ou dan en lot avenue, en lot desten, me selman dimoun i anvi vwar zot kot zot annan en say. Kot sa lapartenans i antre la. Zot annan en say lo zot lavenir. Zot annan en say lo zot devlopman. Zot annan en say lo ki direksyon distrik i bouze. Si nou bezwen plis lakaz, ouswa si plis lakaz pou vin zis en lot problenm, ouswa si nou bezwen plis lakaz, si nou bezwen plis later komersyal, si nou bezwen plis later lagrikiltir, ki nou bezwen en commercial complex, si nou bezwen en Ladministrasyon Distrik, en Sant Kominoter ki pe operasyonnel 24 lo 24, whatsoever. Me ki bezwen sak distrik? So, pouvwar i ganny mete la dan sa lanmen sa bann zabitan, dan lanmen sa bann Konseye, kot a dir nou, Minis, Gouvernman, nou, nou krwar ozordi, sa ki nou bezwen nou, se en semen ki pli gran Ma Joie en legzanp. Sa ki nou, nou bezwen, se en bis SPTC ki fer letour Ma Joie, i al tonm Mont-Buxton. Sa ki nou, nou bezwen, se en laboutik ki ouver 24 lo 24. Sa ki nou, nou bezwen, kekfwa en Stasyon Petrol. So, pouvwar i ava dan zot lanmen pou kapab desid sa bann keksoz ki pou vreman tous zot personnelman. Parfwa bann keksoz ki ganny pran Nasyonalman, i pa neseserman tous sa bann zabitan personnelman ouswa pli pros posib. Me atraver sa Konsey, atraver sa bann desizyon ki pou ganny pran, i en fason kot sa bann desizyon a ganny pran, i ava tous zot. I ava tous zot pli pros e zot ava santi ki wi, la nou pe ganny touse. Parfwa in toultan en konsern, dimoun in toultan konplent ki ar desizyon, keksoz ki pe ganny fer Nasyonalman pa pe neseserman afekte zot, pa neseserman enpakte pozitivman lo zot lavi. Kan endirekteman vre i pe ed zot menm, i pe enpakte lo zot pozitivman. Me zot pa vwar sa. Kekfwa ler zot vwar zot annan sa lapartenans, zot pe pran desizyon, zot pe ede anmenn tel keksoz, zot pe ede anmenn tel reform. Tel desizyon pe ganny pran atraver zot lide, zot a dir yes. Nou annan en par ladan.

Mr Speaker, mon oule konklir ki Manifesto Parti Lepep i enn ki bon. I enn ki ti bon e nou pe vwar ki parol ki’n ganny ekrir an nwanr ek blan:-nwanr lo papye blan, pe vin en realite. Mon annan zis en sel keksoz pou mwan dir. Prezidan Michel, Minis, Minister konsernen, chapeau. Mersi ki sa Lalwa pe vini a sa moman e mon swete ki lepep Seselwa i vwar sa. Ki zot in annan en Prezidan ki pe met pouvwar dan zot lanmen e annan en Prezidan ki krwar dan zot. E mon swete nou krwar dan sa Prezidan e nou ‘Donn li son donn li.’

Mersi Mr Speaker.

MR SPEAKER

Onorab Arnephy.

HON BERNARD ARNEPHY

Mersi Mr Speaker. Mr Speaker, mwan osi mon ti a kontan dir de trwa mo an faver sa Prozedlwa, akoz dan nou demars pou anmenn sanzman ki enpakte pozitivman lo lavi bann dimoun, nou toultan pe anmenn devan nou Lasanble isi, bann nouvo morso Lezislasyon ki pou fer sa arive, akoz nou’n toultan krwar dan en sosyete demokratik ki ouver, ki modern, ki fleksib e ki responsabilite sak sitwayen i ganny byen definir. E la ankor, nou pe bouz dan sa letap kot nou pe anmenn sa responsabilite plis a labaz. A labaz distrik, a labaz nou kominote. E sa in toultan vizyon nou Gouvernman, in toultan vizyon nou Prezidan. Prezidan Rene in fer son bout. Prezidan Michel in pran e i pe kontinyen anmenn sa demars, pou asire ki lepep Seselwa dan son mazorite, i zwir sa nivo konfor, sa nivo lavi, kot bann defi ki nou fer fas avek, nou kapab adres zot dan en fason sistematik, dan en fason byen.

Mon kontan Minis taler li menm in servi en mo lanpayaz. Tir en pe sa bann lanpayaz. E ozordi, sa i en keksoz ki nou dimoun, lepep Seselwa, pe koz en kantite lo la.

Mr Speaker, ler ou annan en sistenm ki santralize, ki annan serten dimoun, serten responsab dan Lotorite, Egzekitif ki krwar poudir sa bann Departman i son baby e ki si i let go then, i perdi sa pti baba, lala kot nou problenm i ete. Nou, nou pe dir ki avek en sistenm gouvernans lokal, nou pou retire sa bann tel lanpayaz.

Ozordi Mr Speaker, lekel ki pli byen plase pou li konpran ki vre bezwen son kominote? Se byensir zabitan, rezidan ki viv dan sa kominote toulezour. E se zot ki vwar kwa ki zot vreman, vreman bezwen. Me i malere, ki malgre sa i leka, i annan serten dimoun ki ler i annan serten desizyon enportan ki pou ganny pran, parey mon koleg fek dir, ki enpakte direkteman lo lavi rezidan, malerezman li i pa konpran sa. E la ki ou vwar reprezantan distrik, MNA, i ganny blanmen. I pa’n delivre, ouswa MNA pe fer nou tourn an ron. Me nou konn tre byen poudir dan lamazorite ka:- mon pe koz bann Manm Elekte, nou sey nou mye. Me sa lanmaraz, sa lanpayaz li, i en lot bor. E si ou pa deryer dimoun tou lazournen, keksoz pa bouze. E nou, nou pe dir poudir avek sa sistenm gouvernans lokal, sa enn fwa pour tou fodre i arete. Distrik ava annan sa pouvwar, of course dan en fason well managed, pou li fer sir ki sa ki i anvi vwar pour son zabitan, pe ganny fer.

Mr Speaker, mon krwar sa Prozedlwa pe fer provizyon tre kler poudir tou keksoz ki pou ganny fer, i pou ganny fer dan la transparans e i pou ganny fer avek sa lespri demokratik. Ki sa Prozedlwa pe demande?

1, sak distrik tou le-z-an i submit en plan avek bann diferan Minister, lo kwa ki i ti a kontan vwar dan son distrik. E sa i ganny anmenn a latansyon diferan Minister. Me malerezman, souvandfwa sa ki distrik i konsider koman son priyorite parey bann koleg ki’n koz avan in dir, i pa neseserman ganny konsidere par serten dimoun, koman sa priyorite. E nou, nou pe dir ki avek Konsey Distrik, distrik pou submit son plan e nou ti a kontan ki Gouvernman santral i azir lo sa plan ki distrik i submit devan li e i fer provizyon neseser pour ki sa plan i ganny materyalize. Distrik i annan son bezwen spesifik. Distrik i bezwen delivre servis avek son popilasyon, me si distrik pa pe ganny sa soutyen, pa pe ganny sa sipor neseser, then sa plan ki distrik i annan souvandfwa i tonm dan delo. E la mon ti a kontan met lanfaz lo Gouvernman, Minister Finans, nou bezwen revwar en pti pe lafason ki resours finansyel i ganny allocate avek distrik. Nou pa pou kapab annan en sistenm kot one size fits all. Non. Nou pou bezwen annan en sistenm kot distrik i vini avek son plan, bezwen son distrik, ok. Nou annan en ta koze nou pe koze ozordi lo Program Performance Based Budgeting. E mon krwar sa i pou antre tre byen dan sa zafer Konsey Distrik la, akoz si distrik li i annan son tim ki’n ganny elekte e ki bann dimoun, bann rezidan in krwar dan zot, akoz bann rezidan i konn zot konpetans, i konn zot abilite pour zot deliver pour zot kominote, then napa okenn dout ki sa bann dimoun pa pou ganny elekte. E ler sa bann dimoun i vin avek zot plan, en plan ki pou baze lo performans, then, mon mazinen ki Minister responsab, Minister Finans, i pou bezwen met sa resours a dispozisyon distrik, pou li kapab fer marse son plan. Ok. Of course distrik li i pou bezwen fer sa dan en fason rezonnab. I pa pou kapab annan ekstravagans, kot nou konnen poudir Gouvernman pa pou kapab siporte, pa pou kapab sustain. Me la nou pe koz lo bann plan ki rezonnab, bann plan ki konkret e bann plan ki Minister i merit vwar son rezon det.

Mr Speaker, mon a donn ou en legzanp. Petet la ozordi Minis, vi ki Lasanble, Minis pou sir pou sa msye ganny son larzan. Anse Boileau. Mon a donn en legzanp. Last year, ti annan 4 pye dibwa. 4 pye Friyapen. Tre danzere pour en kominote. 3 lakour, enkli Home for the Elderly. Gro divan, rode lekel ki pou koupe, pa konnen. Ok. Finalman, MLUH i donn permisyon pou koupe e en Kontrakter avek tou son bann fwa, in ale, in fer sa koman en emergency. E vre i ti en gro danze. Ziska ozordi Mr Speaker, sa msye pe ganny tourn an ron pou li kapab ganny son peyman. MLUH i dir pa li ki responsab, kan Kontra ti siny avek li. Zofisye MLUH, sa msye ti al devan li, ti siny son Kontra devan li e ozordi i dir pa li ki responsab akoz sa later, sa pye dibwa ti tonm lo en later Home e Home ozordi i tonm anba Devlopman Sosyal. So, vwar ki nou pe koz lo la, la. E si distrik li, i ti annan son Bidze, akoz i annan son lalis li. Tou le-z-an Mr Speaker, zot fer nou submit en lalis pye dibwa ki danzere, ki lo propriyete Gouvernman, ki bezwen ganny koupe. Me apre ki ou vwar, DA, menm parfwa MNA menm, i bezwen pe call tou lazournen. Pou koupe, pa pou koupe? Pa pou koupe akoz, PUC ki responsab sa enn. Lanvironnman ki responsab sa enn. MLUH ki responsab sa enn. E la si i lo propriyete Lekol par egzanp, i a dir ou Minister Ledikasyon ki responsab pou fer koupe. So, mon krwar sa bann keksoz, in ler pou arete, kot nou annan nou en one stop shop. Sa one stop shop li i annan son Bidze. Pou annan son Komite li. Mon krwar Minis petet taler i a donn en pti pe kalifikasyon lo la. I pou annan son Komite Procurement li, ki pou fer sir poudir tou keksoz pe ganny fer an konformite avek Lalwa. Me distrik ava dan en pozisyon there and then pou li pran en desizyon pou dir sa louvraz i merit ganny fer e sa louvraz fodre fer. Ok.

So, vwala en pti pe akoz ki mon panse ki sa Prozedlwa i vin at the right timing e i pou annan bokou, bokou lavantaz.

Mr Speaker, mon ti a kontan petet, vi ki dan Prozedlwa li menm, i pa neseserman koz lo la, me ozordi, nou pe koz en pti pe lo diplomasi aktiv e nou osi dan distrik, nou fer nou pti bout. Par egzanp, Anse Boileau sa lannen nou’n selebre nou 10an progranm lesanz Twinning avek distrik Riviere Noire, Moris. Me ankor i en progranm ki nou struggle en kantite avek. Akoz Minis parey ou konn tre byen, poudir nou pa ganny okenn finansman pou sa nou. Me nou dan distrik Anse Boileau nou sanse. Ok. En pti pe parey District Council pe fonksyonnen. Nou annan en group ki very committed e zot, zot fer sir ki tou le-z-an zot fer tou zot mwayen, rod zot sponsor, pou fer sir ki progranm i pran plas.

Petet avek desantralizasyon, avek gouvernans lokal, la i en area kot si en distrik i serye e i annan son progranm, then mon mazinen poudir Gouvernman i pou bezwen vwar li son priyorite pou met finansman, pou fer ki sa bann progranm i marse.

So, petet Minis dan ou Summing Up, mon ti a kontan si ou koz en pti pe lo provizyon ki’n ganny fer ouswa dan bann regulations ki pou vini apre, ok, lo sa zafer International Relationship avek bann lezot pei vizavi bann progranm distrik.

Mr Speaker, parey in ganny dir, mon krwar pou tousala kapab arive, nou pou bezwen annan sa sanzman mindset. Sa sanzman mindset, kot pouvwar pou bezwen gradyelman:- serten pouvwar rezonnab gradyelman ganny donnen avek sa Konsey, pou li kapab fer son travay. E la a sa pwen, Minis, mon ti a kontan si ou donn nou en pti pe leksplikasyon lo ki pou rol District Team. Eski District Team pou kontinyen egziste ouswa Konsey i pou pran sa rol District Team dan son lanpler total?

Mr Speaker, mon ti a kontan terminen par dir ki en tel Prozedlwa, ler i vin an aplikasyon, sa i pou pous dimoun, i pou ankouraz bokou plis dimoun:- mon krwar ler Onorab De Commarmond ti prezant son Mosyon, mon ti koz en pti pe lo la. I pou ankouraz plis dimoun pou li koste, pou li vin donn en koudmen, fer marse son kominote. Ozordi dan distrik, lekspertiz nou annan en kantite. Dan en kantite areas me petet i napa sa platform neseser, sa platform Legal, pour bann dimoun kapab vini pou zot fer zot kontribisyon. E mon mazinen ki avek en tel Prozedlwa, sa pou leka. Sa pou osi ede pou anmenn sa ki nou apel sa feel good atmosphere dan distrik. Kot distrik, zabitan, rezidan distrik, dan tou bann pti sou kominote, i pou santi li prepare pou li vin devan, pou li donn plis. I deza pe egziste, i deza pe ganny fer, me mon mazinen poudir nou pou kapab fer li en pti pe pli byen. E mon napa okenn dout ki bann dirizan, ok, o nivo distrik, pa merit santi zot pe ganny threaten avek en tel morso Lezislasyon akoz si dimoun pe vin travay pour byennet son kominote, son distrik, i en keksoz ki nou merit pe welcome e nou merit fer li avek en lespri ouver, pou asire ki nou kominote i kontinyen bouze, fer plis progre e kontinyen prospere.

So, avek sa enn de mo Mr Speaker, mon pou raport mon sipor total pour sa Prozedlwa. Mersi.

MR SPEAKER

Onorab Pillay.

HON SEBASTIEN PILALY

Mersi Mr Speaker. Mr Speaker, sa Prozedlwa ki devan nou ozordi i enn ki trez enportan, par lefe ki i anmenn en nouvo fason fer dan lafason ki nou manage oubyen zer nou bann distrik lo en nivo lokal e osi rol ki nou tou, sak Seselwa, nou bezwen zwe e responsabilite ki nou bezwen pran anver nou prop kominote.

Mr Speaker, mon dir sa koumsa set akoz avek en tel Prozedlwa, nou pou nepli kapab pe asize dan en kwen e konplent e dir en keksoz pa pe marse, akoz safwasi nou’n ganny loportinite pou nou, si nou anvi fer keksoz mars pli byen, vin devan e aport nou kontribisyon.

Mon dir sa Mr Speaker, set akoz nou vwar dan bokou sirkonstans, en kantite konplent ki ganny dirize anver bann lenfrastriktir oubyen anver bann servis ki ganny provided o nivo distrik par bann zabitan distrik, ki an retour pa pe neseserman fer en kontribisyon. Me la, avek sa Prozedlwa, i pe kree en platform pour sa bann dimoun vin devan e fer sa kontribisyon.

Par egzanp Mr Speaker, si par egzanp distrik i antreprann li en proze kot i involve konstriksyon. Ou annan ou dan distrik, bokou dimoun ki swa Arsitek ouswa ki Draftsman oubyen ki Enzenyer, ki’n travay dan sa domenn ki kapab vin devan akoz sa Prozedlwa i fer provizyon pour sa Konsey Distrik form bann sou-Komite, anmenn ansanm bann dimoun ki annan ekspertiz pou donn zot lide, donn bann pwennvi lo lafason ki en keksoz i devret ganny fer.

So, la prezan, mon pa pe vwar rezon akoz en dimoun i pou bezwen al devan oubyen al lo Rezo Sosyal e dir poudir Gouvernman pa’n fer sa, pa’n fer isi, pa’n fer laba, kan ou osi prezan ou vin parti prenan sa prosesis fer sa keksoz marse. I met ball in your courts so to speak, pou ou vin devan e kontribye. E mon krwar se sa where all this lies. Sa i fer kler ki ozordi dezormen, ou pa pou kapab antre se ou, swa ferm ou laport, swa ferm ou baro e pa mazinen ki ou pou mars lo menm semen piblik ki ou vwazen, pa mazinen ki ou pou pas obor menm laboutik ki ou vwazen, san prenan an kont ki rol ou bezwen zwe e ki aksyon ou kapab pran pou fer sir ki lavi nou tou, i en lavi ki konvenab e ki lavi i amelyore dan nou bann distrik, dan nou bann kominote respektif. Se sa ki sa bann Prozedlwa pe set the scene pou nou kapab fer. E se dan lafason ki mon krwar tou dimoun i devret vwar sa Prozedlwa. Dan en fason kot nou tou nou vin parti prenan dan sa ki pe pase dan nou distrik, pa selman bann dimoun ki ganny anploye swa par Minister, swa par bann Lazans, me osi nou koman bann sitwayen endividi, kwa ki nou fer pou improve lavi dan nou kominote. E konkretman, partisipe pou nou fer keksoz vin pli byen. Se sa rol ki nou bezwen zwe e se dan sa fason ki nou bezwen vwar sa Prozedlwa.

I annan en lot laspe enportan en tel Prozedlwa Mr Speaker, e sa i konsern par egzanp en filozofi so to speak, kot ou dir ou bezwen desantraliz solisyon e pa desantraliz problenm.

Mon dir sa dan sa fason Mr Speaker, akoz bann tel Prozedlwa i kapab act koman en katalis pou sanz bann performans oubyen bann fonksyonnalite bann lezot Lazans, ki relye ozordi avek sa fonksyon an sa ki konsern manage distrik, an sa ki konsern fer marse bann prosedir dan distrik. Ler ou annan en tel Prozedlwa, i pou fer ki pou annan plis engagement e plis lavwa piblik an sa ki konsern en tel keksoz, en tel proze, oubyen en tel servis ki ganny provided.

I annan bann Onorab ki’n koz avan mwan, in koz lo par egzanp lo bann servis an sa ki konsern koup bann pye dibwa. Ozordi nou vwar poudir fonksyonnalite sa bann servis an sa ki konsern bann Lazans konsernen, i en pti pe cumbersome. I difisil pour sa distrik kapab negosye sa. Me ler ou annan en Prozedlwa ki fer ki from the bottom up, keksoz i bezwen sanze, then i kapab anmenn plis sanzman akoz parfwa ler ou anmenn en sanzman from the top down, i pa neseserman permeate tou bann levels of burocracy, pou li kapab ariv anba lo nivo sa dimoun ki li i bezwen ganny sa servis, oubyen li i bezwen vin en resipyan benefis sa servis. So, ler nou vwar sa, se sa mon krwar kot sa Prozedlwa i bezwen ganny gid e se mon krwar ki dan inisyal, bokou zefor i bezwen ganny mete, pou asire ki bann Lazans konsernen, bann lezot satellite Agencies ki pou konekte avek sa Prozedlwa, i konpran benefis anmenn serten sanzman dan zot fonksyon oubyen serten lamannman dan zot bann Polisi, pou asire ki tousala i kapab ganny asimile, i kapab gel byen ansanm, pou fer fonksyonnen sa Council, parey nou ti a kontan vwar li pe fonksyonnen. E se sa ki en pwen fondamantal ki nou bezwen souleve.

Mr Speaker, en lot laspe enportan e mon krwar sa i en laspe ki gide ver sa zefor ki nou’n annan anver sa Renesans Moral e sa Renesans Sosyal ki nou’n annan e osi tie in en pti pe avek sa ki Minis Ledikasyon ti pe dir nou, ki mannyer en kominote i vin ansanm pou nou ede fer grandi nou zanfan, fer grandi nou zenerasyon fitir. Ler ou annan en District Council, ou kapab osi Produce a new generation of Leaders. E mon krwar se sa ki laspirasyon nou bann zenn i devret pe tourn ver. Ki mannyer zot kapab vin bann Leaders zot kominote. Start as koman vin koman en Community Leader and you move on eventually to become a Leader at the National Level. Ou konpran. E se sa ki mon krwar nou bezwen pran lapresyasyon e se la avangard ki annan dan sa tel Prozedlwa.

E mwan la, mon pe lans en lapel. Mon krwar lepep Seselwa i bezwen tre fran e vwar lekel Parti, lekel Parti Politik ki pare pou anmenn the real change ki zot oule vwar. E sa se sa Parti ki o pouvwar akoz sa Parti in vwar poudir i pa pe kapab konpromet lo rol ki nou tou sak Seselwa, nou annan pou nou zwe dan Gouvernans nou pei. E i pe donn nou sa loportinite. E se sa ki nou bezwen sezi ozordi koman en loportinite. Annou pa rod fot avek sa Lalwa dan le sans administratif, dan le sans serten konpleksite ki kapab egziste, me plito rod ki mannyer sa Lalwa li menm li i kapab improve lavi dan bann distrik e fer nou tou ganny en lavi pli konvenab. Fer nou tou vin parti prenan bann desizyon ki pe ganny pran lo nivo nou bann distrik. E se sa fondamantalman kote nou bezwen pe regard keksoz ozordi Mr Speaker.

E pou konklir Mr Speaker, mon’n ganny sans koz avek bokou dimoun an sa ki konsern sa Lalwa, pou ganny en pti pe zot pwennvi e mon vwar poudir en kantite dimoun i very positive. En kantite dimoun pe espere en tel langazman, pe espere en tel nivo partisipasyon so to speak, kot ou kapab apel sa Participative Governance System. E mon krwar ki aprezan ler nou pe vin dan sa direksyon, mon krwar Sesel pe move dan en direksyon tre pozitiv. Me tousala i arive akoz ou annan en serten stabilite Mr Speaker. Ou annan en serten stabilite lo nivo ekonomik, ou annan en stabilite politik dan ou pei, ki permet fer pran bann desizyon avangard, parey sa enn ki nou’n pran avek sa Lalwa.

E avek sa pti lentervansyon Mr Speaker, mon pou donn mon sipor sa Prozedlwa. Mersi.

MR SPEAKER

Bon. Onorab Rose. Onorab Rose, ou’n osi table 2 set lamannman. Premye tipografi e dezyenm pou fer sa Bill vin Gender Neutral. Partou kot i annan he/him ou’n met she/her. Ou ava pran sa ansanm ek ou lentervansyon wi.

HON MARIE-ANTOINETTE ROSE

Mersi Mr Speaker. Mr Speaker, permet mwan brefman avan mon komans lo mon lentervansyon, pou raport sipor Parti Mazoriter pour nou bann Atlet ki pe partisip Zwe De Zil. Minis, nou ti a kontan ler ou retournen, dir avek nou bann Atlet ki bann Manm Lasanble Nasyonal dan tou distrik i siport zot e nou pe swiv de tre pres deroulman Zwe De Zil isi Mae.

Mr Speaker, ler mon regard sa Bill, mon’n regard li, mon’n reflesir lo la, mon’n regard li bout pou bout. Ler mon’n fini regard li, konklizyon ki mon tonm lo la se ki Lepep, Parti Lepep, Gouvernman Parti Lepep pe fer sanzman. E i pe fer sanzman ki lepep li menm in demande. Sa Prozedlwa devan nou i en long listwar. Mon krwar Onorab Vidot in not en pe son listwar. Be i ti komans en pe avan sa. I ti komans avek demann sorti kot bann dimoun zot menm atraver bann Meeting Konsiltativ ki Prezidan Michel ti fer. I pa en Prozedlwa ki zis nou Gouvernman in deside dizour a lannmen ki nou bezwen fer li, me i en demann reel sorti kot nou pep e it’s an idea whose time has come. E mon krwar si Gouvernman, Prezidan in met sa koman son azanda politik, i akoz Prezidan i toultan fer sir ki son azanda politik i reflekte demann reel e laspirasyon nou pep. E si nou Gouvernman Parti Lepep pe fer sir ki sa i vin en realite, atraver nou Parti, atraver Kongre nou Parti, sa i akoz nou respekte swa e demann ki bann dimoun in fer e ki nou dimoun i bezwen realize, en Prozedlwa sitan enportan ki sa, in demann bokou panse, bokou resers e Minis in dir, in annan en kantite resers. Nou annan en Home Grown Bill, be selman nou’n vwar bokou model. In annan refleksyon, in annan diskisyon ki’n ganny fer back and forth e mon krwar nou kapab bouz devan avek sa Prozedlwa finalman, zisteman akoz in annan en prose ki in pas atraver.

Mr Speaker, sa i vedir ki sanzman pe ganny fer, par Lepep, pour Lepep e par Gouvernman Lepep. E ler nou fer sanzman, nou pa per fer sanzman Mr Speaker, me nou fer sanzman ki anmenn en transformasyon reel dan lafason ki keksoz i ganny fer. Sanzman nou pa zis fer akoz i en mo ki trendy, i en mo ki politisyen i servi pou zot ganny elekte. Me i ganny fer akoz i annan en bezwen, in annan en demann e i pou transform lafason ki nou fonksyonnen. E nou dan Parti Lepep, ler nou koz lo sanzman, nou al odela sanzman. Nou koz lo transformasyon. E sa Prozedlwa, si ou vwar Minis in sorti La Reunion in desann pou li vin prezant sa Prozedlwa devan nou Lasanble, i montre commitment langazman Parti Lepep pou fer sir ki we carry through. Nou fini sa travay ki nou’n ganny demande pou fer, dan sa peryod ki nou’n ganny demande pou fer. Travay i bezwen annan konplesyon. I bezwen annan finalite e ozordi nou pe vwar finalite en travay serye ki’n ganny fer.

Mr Speaker, prezan ler:-sa kalite sanzman ki nou pe anmennen, i pe anmennen ki pouvwar pe ganny difize. Pouvwar Gouvernman pe ganny partaze avek bann kominote. E sa i reflekte en Gouvernman, enn ki pa zis pa per sanzman, me i pa per pou partaz pouvwar. I donn son pouvwar a bann kominote. It is sharing, i pe difiz son pouvwar. E la nou pou annan nou en lot, en nouvo fason fer. Nou pou annan nou sa ki nou apel Gouvernman santral

(Interruption)

MR SPEAKER

Desantralize is the right word.

HON MARIE-ANTOINETTE ROSE

Desantralize. Mersi Mr Speaker. Desantraliz son pouvwar e nou pa per:- mon vwar Mr Speaker, i anvi partisip dan sa deba. E nou pa per ….

(Laughter)

HON MARIE-ANTOINETTE ROSE

Nou pa per desantraliz sa pouvwar kot nou pou annan:- e i pou bon rezon ki sa Lalwa i apel Local Government Bill, i pa apel District Council Bill. Nou pou annan nou gouvernans lokal lo nivo distrik e nou ava annan nou gouvernans santral lo nivo bann Minister.

Sa desantralizasyon Mr Speaker, i pou fer ki distrik li menm, i ava angaz li dan rod solisyon a son problenm. E mon kontan Onorab Arnephy in koz lo sanzman mindset akoz ozordi i annan serten dimoun e i annan serten politisyen iresponsab, ki krwar ki tou keksoz ki merit arive, i bezwen ganny fer par Gouvernman. I bezwen ganny fer par Lotorite e ler zot dir Lotorite, i bezwen Lotorite Elekte oubyen en Fonksyonner Piblik. Me solisyon in ganny prouve, proven and tested ki solisyon a bann problem kominote i trouve dan kominote e i trouve par kominote. Se ler en dimoun li menm i vin ansanm i dir be la nou annan en problenm dan sa zone, nou annan en problenm Pye Dibwa, nou annan en problenm Senir Plim, nou annan en problenm Ibou, nou annan en problenm Lera, nou bezwen deal avek lo nivo kominote. Nou antre nou deal avek. E nou detri sa ki pe fer nou ditor.

Mr Speaker, mon vwar fonksyonnman District Council koman en Lotorite Lokal, ki konpran problenm lokal e ki annan sa lanvi akoz in avans devan li, i dir, mon ti a kontan partisip dan mon kominote. I annan sa lanvi pou li rod solisyon lo nivo lokal.

Mon kontan referans in ganny fer bomaten avek problenm disiplin dan Lekol. En kantite nou, nou krwar sa solisyon i zis Minister Ledikasyon. Me la, nou annan en Konsey ki kapab vin devan, ansanm avek Lekol e rode ki mannyer kominote i kapab angaz li.

Mr Speaker, avek sa, travay en Manm Parlman i vin bokou pli enteresan e en Manm Parlman ozordi, si ou oule, i fer en kantite travay lo nivo kominote akoz par natir ki in ganny elekte, tou dimoun i vin kot li. Tou dimoun koman i annan en pye dibwa pou koupe, i vin kot son Manm Parlman, i dir mon’n elekte ou, alors ale al rod sa solisyon pou mwan. Mon’n elekte ou, alors rode akoz PUC pa pe anmenn sewage devan mon laport. Mon’n elekte ou, ale al:- mon bezwen sa peron, mon bezwen sa bus stop, mon bezwen sa isi e i normal lafason ki nou pe fonksyonnen. Me avek sa Lotorite Distrik, sa responsabilite alors i a ganny byen definir e mon vwar en Parlman bokou pli for ankor, kot travay Lezislatif, kot travay Oversight i a vin bokou pli sere, i a vin bokou pli for e i a vin bokou pli byen definir.

Mr Speaker, nou’n koz lo tir lanpayaz dan Service Delivery. Mon kontan ki nou pou annan sa Performance Based Budgeting. Sa prose kot dimoun pou bezwen prouve ki travay zot in fer. E sa i enportan sa akoz osi ozordi, en kantite dimoun ki pa fer zot louvraz e zot dir al kot ou MNA oubyen al kot ou DA, oubyen mon asire Mr Speaker i gannyen. Al kot Mr Speaker, akoz mon krwar zot krwar solisyon i trouve isi dan Parlman. Oubyen al kot Minis. Me non. Avek sa sistenm e sa seri reform ki’n arive depi 2008 ziska ozordi, sa i pozisyonn Local Governance tre byen pou lo li menm delivre. E si i pa delivre, lepep i a ziz li. Si i pa kapab delivre, lepep i a dir be bon, mon ti elekte ou mwan. Mon ti elekte ou pou fer sir ki travay i marse.

Me avek sa responsabilite, mon krwar i pou bezwen annan serten travay ki central Government i pou bezwen fer. Central Government pou annan en responsabilite pou definir byen bann Polisi, revwar bann Regilasyon ek bann Lalwa, me osi empower Local Government. I pou bezwen ed sa bann dimoun lo nivo lokal pou konpran tre byen zot fonksyon, pou konpran en pe Lalwa, pou konpran en pe fonksyonnman Gouvernman, pou konnen par egzanp ki savedir Egzekitiv, Lezislatif, Zidisyer. Kote zot powers i ale. I pou annan en prosesis re edikasyon:- mon apel li re edikasyon lo nivo lokal, pou dimoun konpran byen. E dan sa prosesis, mon krwar kominote li menm i bezwen ganny re edike lo ki savedir Local Government. Lo ki savedir en Gouvernman santral, lo ki savedir rol en Manm Parlman, lo ki rol Egzekitif pou annan. Ki rol Prezidan i annan, eksetera. Sa i bon pour nou Mr Speaker, akoz mon krwar ti’n plis ki ler pour en kantite dimoun konpran ki mannyer gouvernans e la ler mon servi sa mo gouvernans, mon servi li dan son sans bokou pli larz. Gouvernans en pei i fonksyonnen.

Avek sa Mr Speaker, nou pou annan bokou dimoun ki olye zis asize kritike, pou konpran tre byen ki mannyer en Gouvernman i marse. Ozordi i annan en kantite dimoun i anvi vin Prezidan, pa ni konpran mannyer Gouvernman i marse. Demann zot 4, 5 kestyon, zot pa konpran ki mannyer en Gouvernman i marse. Zot pa konpran ki savedir Cheques and Balances. Zot pa konpran ki rol Parlman. Zot pa konpran ki i annan bann oversight bodies ki egzi…. Oubyen si zot konpran, zot krwar lezot dimoun an deor pa konpran, alors zot vin anbet Seselwa.

Mr Speaker, avek tousala, mwan mon vwar en benefis an plis ki nou pou gannyen e sa se responsabilite sitwayen. Ozordi enn nou bann gro defi se responsabilite sitwayen. Nou annan sitwayen ki pa oule pran son responsabilite pour son lavi, pour son lasante. Pour son lavi, pour son travay, pour son welfare, pour son lakaz, pour son prop byennet, pour son zanfan. I pa oule pran son responsabilite e i krwar ki sak fwa i annan en problenm, i pou al kot Lotorite Distrik e Lotorite Distrik i oblize, oblize ofer li en solisyon. Me nou pe dir nou en pei modern. Nou pe dir nou en pei devlope. Me dan bann pei devlope, napa sa sistenm. I pa koumsa. Dimoun i pran son responsabilite. Dimoun i pran responsabilite pour son fot ki in fer. Dimoun i pran son responsabilite pour son bezwen e i ganny sipor neseser. Sipor neseser. It is not God given ki ler ou al kot Lotorite Distrik fodre mon ganny sa Welfare, fodre mon ganny en Serkey akoz lanmor in arive dan mon distrik, fodre mon ganny sa. In ler pou nou rekalibre nou dan sa ‘Nouvo Sesel.’ E mon krwar i enportan, i en letap tre, tre enportan.

Mr Speaker, dernyen pwen mon anvi fer, se ki sa Lalwa, anmenn li:- annou anmenn li o pli vit posib akoz sa kalite reform mon krwar Sesel in pare. Nou’n ariv lo en peak devlopman la kot nou’n arive Mr Speaker. Sa nivo devlopman kot nou’n arive e sa nivo devlopman kot nou anvi ale, nou bezwen anmenn sa reform neseser lo nivo distrik. Nou bezwen anmenn sa sanzman neseser lo nivo distrik. Nou bezwen anmenn sa desantralizasyon e sa empowerment neseser lo nivo distrik. Nou bezwen annan en lemerzans, en nouvo group Dirizan lo nivo distrik, ki pare pou ed kominote bouz devan.

Nou bezwen sa right now Mr Speaker e sa i en request ki nou soumet devan Lasanble Nasyonal, pou nou bouz dan sa nouvo letap politik, ekonomik e devlopman sosyal nou pei. Nou pe bouz dan en nouvo letap. Nou pe bouz dan en ‘Nouvo Sesel’, dezyenm faz ‘Nouvo Sesel’ Mr Speaker. Apre re eleksyon Parti Lepep, mon krwar nou bezwen bouz a lavans e anmenn Sesel lo en pli o nivo posib.

Avek sa Mr Speaker, Gouvernman i annan sipor Lasanble Nasyonal lo sa Prozedlwa e parey ou’n endik avek Lasanble, mon’n soumet de twa:- en bon pe sanzman, me i plito bann sanzman tipo. Mon’n soumet devan Lasanble pour konsiderasyon. Mersi Mr Speaker.

MR SPEAKER

Ok. Bann lamannman a mon avi zot tre senp e a kapab ganny aksepte e Clerk i a note, i ava fer li form parti Bill final.

Right of Reply, Minister.

MINISTER VINCENT MERITON

Mersi Mr Speaker. Mr Speaker, napa en derogasyon par la ki dir ki Speaker i kapab li osi partisip dan deba, avan ler nou fermen Sir?

(Laughter)

MR SPEAKER

Napa en derogasyon ki anpes Speaker partisip dan deba.

(Laughter)

MINISTER VINCENT MERITON

Mersi Mr Speaker. Sous vos ordre. Mon ti a kontan remersi tou bann Manm Onorab ki’n partisip aktivman dan deba lo en morso Lezislasyon ki ekstrememan enportan. Mon pran tou kritik ki’n ganny fer dan lespri konstriktiv e mon pran li an 2 bout. E mon bezwen deal avek.

Rol Minister ki ozordi i responsab pour gouvernans lokal i pou sanze. Nou rol se pou asire ki i annan bann standar, asire ki nou pe siperviz bann standar e asire ki nou pe train bann Konseye pou kapab fer sir ki nou travay byen. Nou’n dir taler i en keksoz ki home grown. Nou bezwen fer li byen e nou bezwen fer li paz a pa. E mon kontan ki tou bann Manm Onorab i dakor avek mwan, ki nou bezwen ler ou desantraliz bann responsabilite, ou pa pe zis dir al fer. Ou bezwen donn mwan larzan. Ou bezwen dimoun e ou bezwen donn mwan sipor teknik pou mwan kapab reisir. Sa 3 fodre i mars ansanm. Si ou donn mwan zis enn, nou pou dir nou pa oule. Fodre i mars ansanm akoz sankwa, depi lo komansman, deza ou konnen poudir pa pou marse. So, mon krwar sa en langazman, en prensip ki nou pe al avek ler nou pe al dan sa Lalwa.

Mr Speaker, Onorab De Commarmond in koz, wi en kantite fwa lo gouvernans lokal, lo Minister. In toultan highlight bann defi ki mon Minister partikilyerman i annan. Me selman an menm tan, anmezir ki nou pick out sa bann difikilte, nou sey amelyore pou fer li pli byen. Toultan mon’n dir taler, i annan lespas pour amelyorasyon e nou pran li ki nou bezwen amelyore, fer li pli byen akoz nou konnen nou dimoun i annan en kantite lekspektasyon e nou bezwen debrouye pou nou alaoter lekspektasyon. Me de lot kote sa kalen, i ki mannyer nou zer sa lekspektasyon pou li osi parey Onorab in dir, fer sitwayennte vin en keksoz ki enportan, ki sak sitwayen i osi responsab son kominote. Me pli enportan, son prop lavi e son fanmir.

Mr Speaker, Onorab in demann mwan:- non in demande ki mannyer ki Sekter Prive avek NGO i kapab zwe en rol. Wi. Sekter Prive pou annan en rol enportan e kle ansanm avek bann Lorganizasyon non gouvernmantal akoz zot osi zot kapab form parti sa bann sou-Komite, sa bann Komite ki ava annan en responsabilite spesifik. Si Cascade in deside pou li triy salte, i ava en sou-Komite ki Cascade in met devan e petet Baie Lazare ki li i dir i pli prop, i pa neseser fer sa. So, tou pou depan lo spesifisite sa distrik, tout an gardan bann norm de baz e bann standar ki nou kapab aplike.

Eski en anplwaye ozordi, Biro Ladministrasyon Distrik i kapab debout koman en Eleksyon? Wi. Nou ti ganny gide par Prokirer Zeneral, ki le moman ou reponn bann kriter ki’n ganny mete anba mon krwar premye schedule, ou kapab debout Eleksyon. Me si ou santi i annan okenn kontradiksyon ki annan, nou kapab diskit lo la ler nou pe travay lo bann Standing Orders. Mon krwar i enportan ki i kler, me selman osi dan Lalwa, annou pa bliye ki i annan en provizyon ki si mwan mon en Manm Konsey Distrik e mon osi annan en Konpannyen e ki sa konpannyen i pe al bid dan en servis ki pe al ganny tender, mon bezwen deklare ki mon annan lentere e ki i swetab ki ler sa diskisyon pe ganny, mon pa la. Konmsi pou asir sa transparans e Lalwa in al byen kler lo la ki si mon’n kas sa lareg, i kapab rann sa desizyon nul and void. So, mon krwar i enportan. Wi, bann Manm i kapab.

Epi Onorab in koz lo, eski en Manm Lasanble nou pa devret fer li vin en Manm Konsey. Mon krwar nou pe anmenn nou prosesis demokratik lo en lot letap, lo en lot letap ki kalitativ-man pli ris. E nou en demokrasi matir nou’n koz lo la. Nou aksepte prensip Prezidansyel, gouvernans Prezidansyel dan lekel i annan prensip separasyon pouvwar. Me nou santi ki Sesel, ptipti parey i ete, nou bezwen koz menm langaz. I annan sa 3 Brans Leta. Nou bezwen kapab gete ki mannyer nou pou mentenir nou lendepandans e nou lotonomi. Me an menm tan koze, diskite akoz nou pe fer li dan lentere kominote pou gard dimoun o sant devlopman e fer sir ki dimoun o sant devlopman i pa zis benefisye, me osi i kontribye pou li reste o sant devlopman, atraver sa ki i fer, travay, donn en koudmen dan son kominote pou fer li marse. So, mon krwar i en prosesis demokratik ki nou pe al lo en nivo ki pli o ki nou bezwen gete ki mannyer nou pou fer.

Sak bann Manm dan sa prosesis, i enterese ki a lafen lazournen i rann kont, apre son 5an, Manm Parlman isi e osi bann Manm Konsey Distrik. Mon krwar sikse dan travay, dan kominote pou depan lo nou abilite kapab koz e travay ek kanmarad, pou byennet, for the common good of kominote ki nou pe travay pou li.

Onorab Vidot in koz lo eski Konsey Distrik pou annan en vreman, annan en pouvwar lo devlopman bann proze Kapital dan distrik. Wi Onorab, pou annan. Annefe nou’n dir ki napa en Departman Gouvernman ki pou kapab annan en proze oubyen en progranm dan en distrik, si i pa’n diskite avek Konsey Distrik. E Konsey Distrik pou annan en rol, pou annan en responsabilite pou li devlop plan stratezik. Mon pa konnen mwan, 5an, 10an, sa distrik dan lekel si i rezonnab, si i lozik pou annan en Klinik oubyen en Kordgard. Mon krwar nou abilite, nou sikse pou depan ki mannyer nou kapab koz ek kanmarad, ki mannyer nou konnen poudir sa larzan ki nou annan a lafen lannen la, i pa en kantite, me ki nou devret partaze. Nou bezwen servi nou bann resours dan en fason optimum, pour ki nou reponn bann bezwen kominote kot i konsern devlopman. So, wi Onorab i annan e ou pa’n mank loportinite pou fer sorti sa pwen, ki nou’n deza koz lo la e ki mon pran avek tou imilite, pou gete ki dan lavenir, nou travay an pli bon kolaborasyon avek bann dimoun ki’n ganny elekte.

Bann plan stratezik wi. Nou dakor ki nou tou nou pe travay dan en sel lanvironnman. Se Sesel. E Gouvernman i annan son Polisi ki Lasanble nou adere avek e ki Konsey Distrik, nou tonm dakor avek e tou sa ki nou fer, fodre i tonm dan lankadreman sa pli gran plan. Me an menm tan parey in ganny dir, sa ki bon pour nou kominote, i bon pour Nasyonal e vis versa, ki nou kapab enpakte lo kanmarad dan en fason mityel, ki nou vwar nou pa pe lager.

Finalman nou pa oule kree en monstre avek Konsey Distrik me kree en zouti ki parey in ganny dir, Onorab De Commarmond i dir, i oriyante i ganny gide ver aksyon. Si Lasanble in dir nou pou fer aksyon, sa lekip li osi pou ganny gide par aksyon akoz i osi annan son 5an ki i pou bezwen al rann kont devan son dimoun.

So, nou pe fer tou dimoun vin responsab e taler Onorab Anse Boileau in dir ki nou bezwen kree en platform pou nou kapab angaz dimoun. Se egzakteman atraver bann sou-Komite e atraver Konsey, ki nou kapab angaz depi ou graduates, depi ou bann dimoun dan Sekter Prive. Depi bann dimoun deryer son gro baro, depi bann dimoun ki son lakaz i zoli. Nou tou nou form parti sa kominote e si ou angaze ladan, ou osi ou pli kapab konpran sa pli gran lobzektif, sa pli gran vizyon ki kominote i met devan, atraver bann plan spesifik ki Konsey Distrik i vin avek.

E in osi ganny dir ki bann bezwen distrik i bezwen ganny gete dan en fason serye, me depandan kantite larzan ki nou annan. Mon krwar i enportan sa. I pou en balancing act ki Gouvernman pou bezwen regete, refer e fer li pli byen akoz ou pe kree en lot lenstans e napa valer kree en lenstans si ou pa pe donn li sipor, ou pa pe donn li resours pou li kapab travay avek.

Onorab Anse Boileau in koz lo larg lanmen distrik. Nou’n tonm dakor avek sa e in koz fortman kont bann ptipti rwayonm ki kapab kas cool e al kont tou sa travay ki nou pe dir. Si bann dimoun i krwar poudir mon Departman, mon Minister, mon Lazans, mon Lotorite i apel pou mwan. Non i pa pou ou. Ou’n ganny en responsabilite pou fer li marse, ou en servant, ou o servis la popilasyon e mon krwar sa i bezwen reste dan latet dimoun.

Si pli gran servans dan pei i demann nou konekte avek dimoun ki Prezidan Michel e i fer li, nou osi nou bezwen swiv parey e pa krwar poudir nou pa kapab ganny touse.

Mr Speaker, Onorab in dir ki nou bezwen enplimant bann plan distrik e prioritize. E mon dakor avek ou ler ou dir PPBB i tonm kareman normal avek Konsey Distrik. Ennler ou ti anvi demande e fer en DCBB. Konmsi, depandan lo ki bann progranm ki Konsey in konsevwar e baze lo sa nou pou ganny larzan. Mon krwar se sa ki nou pe dir dousman, dousman. I pe pran li lo nivo sektoral. Me nou pe dir anmenn li lo nivo kominote e fer sir tou sa bann PPBB i marse. Zour i pou pas tes PPBB lo nivo lokal, i a pas tes PPBB lo nivo Nasyonal e mon krwar i a tonm dakor ki larzan Gouvernman i a pli ganny byen depanse e ki dimoun i kapab vwar plis valer pour larzan.

E Onorab, ou menm ou, ou konnen sa platform ki nou’n koz lo la taler Anse Boileau pe marse. Ou annan ou en DCC ki en model. I ankor apwente. Me ou osi annan ou lezot mouvman. Par egzanp ou annan Community Guardians ki lo la ou annan dimoun ki annan en ta larzan. I dan Sekter Prive. Ou annan dimoun ki bann NGOs, ou annan dimoun ki profesyonnel, ki vin devan e fer keksoz marse. So, ou en legzanp sa kritik ki ou pe dir, ki ou kapab partaz sa leksperyans avek lezot koleg, ki mannyer keksoz i marse. So, turn the negative into positive, ki nou tou nou kapab emulate sorti ladan. Ki nou kapab sorti avek en win, win. Si Onorab ou a dakor avek mwan lo la.

Onorab Pillay in koz lo lenportans bann Lazans ek bann Departman, ki nou kapab konpran sa nosyon District Council. E wi, i enportan ki tou dimoun i konpran ki nou pe koz en nouvo mindset. En nouvo fason panse. E Prezidan in donn en lord dan Konsey de Minis, ki nou bezwen al travay pou gete kisisa ki nou kapab desantralize la, dan lespri responsabilite pouvwar larzan dimoun avek sipor teknik. E nou, nou’n tonm dakor lo nivo Minister kot mwan. Lasarite i komans dan lakour, ki sa R30 milyon ki nou gannyen, nou a diviz li par kantite distrik ki ava annan e nou pou anvoy li direkteman dan distrik. Larzan byensir a ganny garde kot Minister Finans, me anba Procurement Act, i annan lespas pou annan en Komite Procurement dan sak distrik. Nou kapab servi bann talan dan bann distrik parey ki nou’n dir. Bann dimoun teknik, bann Teknisyen ki kapab ziz bann plan. Ki kapab fer sir ki sa ki’n ganny met devan zot i korek, ki pa en bat latet e osi donn en koudmen pou kapab fer sa bann prosesis mars pli vit. E mon krwar se dan sa sans ki nou pou bouze.

Lezot Minister osi, in ganny demande pou evalye kisisa ki nou kapab desantralize o firamezir ki nou devlope. Nou pa anvi tonm lo nou figir, me nou anvi komans byen. Marse apre taye. Se pour sa rezon ki i enportan ki nou annan tou bann Standing Orders, bann Kod Kondwit, pou ed nou kapab fer en bon parkour lo sa semen ki mon krwar i en portan, kot i donn dimoun pouvwar dan zot lanmen.

Epi nou’n koz lo en finalite. Sa Lalwa wi i anmenn en finalite, en travay ki nou’n fer depi lontan. Me pli enportan, i deklans en komansman, en nouvo fason fer, en nouvo fason viv dan kominote, ki pou demann responsabilite pa zis lo MNA oubyen DA, oubyen sa Zofisye Gouvernman ki lo tim distrik, me osi lo sa responsabilite, lo sa endividi, pou li kapab donn en koudmen ki mannyer i pou viv son lavi, ki mannyer i pou ed son vwazen, ki mannyer i pou kontribye dan devlopman son kominote, ki mannyer i pou ed sa bann fanmir:- taler nou’n koz lo Lekol ler Minis ti dan Statement ti pe koz lo la. Ki mannyer en Lekol i vin Sant Kominote, ki mannyer bann paran ki pli eze, ki pli kapab donn en koudmen sa fanmir ki’n tonbe, i kapab donn en koudmen. Mon krwar nou tou nou ansanm. No man is an island e nou’n tonm dakor ki nou pe dir atraver sa Prozedlwa, nou pe deklans e nou pe tir bann talan, bann potansyel ki’n kasyet, oubyen ban potansyel ki ti retisan par en lapros ouver ki non politik, pou nou avek lobzektif e lespri poudir Sesel i avan tou. Bliy bann diferans politik e gete ki nou kapab fer pour sa imen, sa endividi, sa frer oubyen ser ki devan ou, ki demen parler ou pou depan lo li si ou tonbe ou osi. Mon krwar si nou fer sa then nou pou kapab achieve en kantite keksoz e fer li dan lentere Sesel.

District Team pou kontinyen fonksyonnen akoz li i anba Administrater Distrik o firamezir ki nou kapab. Dizon nou ganny en pe plis larzan, Minister Lanvironnman i dir mwan mon pare pou delegate oubyen lock, stock and barrel. Mon pe donn en serten servis dan bann distrik e sa Zofisye ki ti travay avek mwan, i pou travay anba Konsey Distrik. I ava travay anba Konsey Distrik. Be ziska ler ki nou kapab ganny li byen, bann Zofisye ki’n ganny seconded dan en distrik anba District Team i a kontinyen, me avek plis viger si ou oule, avek plis lanvi pou nou fer en diferans. Si tou dimoun, si tou bann Manm District Team i annan en lanvi, i annan en laraz fer sa diferans dan son domenn, dan son distrik, pour sa Konsey Distrik Mr Speaker, nou pou al lwen. E mon krwar se sa ki nou anvi enstil dan dimoun, dan nou bann Leaders e dan dimoun ki nou bezwen kapab anvi fer en diferans.

Mon pa anvi dir bann lezot alizyon akoz mon a ganny met deor Mr Speaker.

Mr Speaker, sa oversight ….

(Interruption)

MR SPEAKER

An plis laraz Minister, is not Parliamentary. Proceed.

MINISTER VINCENT MERITON

Oversight Lasanble Mr Speaker, mon krwar i tre, tre enportan e pourquoi pas ki Lasanble dan son prop kapasite, son lendepandans, i kapab dir mon rod en sistenm pou konvok bann Konsey Distrik, pou vin rann kont devan Lasanble lo bann keksoz. So, i ava en lot nivo rann kont ki apard ki i annan dan Lalwa, napa naryen ki anpes Lasanble. Be sa ankor, Mr Speaker, mon pa oule ganny met deor avanler mon fini dir mon Right Of Reply.

Re edikasyon. Mr Speaker, si i annan en keksoz ki nou bezwen travay for lo la, se re edikasyon. Repetition c’est la mere d’instruction, i dir nou lekol. Nou bezwen repete, repete, repete. Fodre ki dimoun i apresye ki avanler ou demande, fodre ou donnen. Pou ou donnen, fodre ou annan. Pou ou annan, fodre ou aprann. Pou ou aprann, fodre ou annan en bon leker, en bon konpasyon. I demann en fason ki nou re get fason ki nou viv nou tou, depi mwan menm ziska dezinyen. So, mon krwar i enportan ki nou tou nou fer en legzanmen de konsyans ki mannyer nou pe viv, ki sa ki nou kapab amelyore dan nou lavi, pou nou kapab aziste avek sa. Akoz sa i en revolisyon ki demann en kantite sanzman e sanzman i demande e nou bezwen, parey toultan i dir, fodre nou ki vin sa Lazan sa sanzman ki nou pe rode. Mon krwar si nou tou nou fer sa, nou pou al ovan. Me selman i pli fasil pou dir la dan en Lasanble, ki pou al fer. Se pour sa rezon ki nou tou ansanm, nou bezwen lager antoure ek lebra kase, pou gete ki mannyer nou pou travay ek diferan kous kominote an servan bann Leaders dan kominote parey Onorab Pillay in dir taler. Ou komans lo Komite, ou al lo Konsey, ou vin en Manm Parlman, ou vin en Minis. Konmsi posibilite i la, me be fodre tou dimoun i ganny angaze pou li vwar poudir sikse son kominote i depan lo mon kontribisyon. Stabilite mon kominote i depan ki mannyer mon krwar i pou mwan osi, pa zis pour mon kanmarad. Mon pa kapab dir sa pa kot mwan, i pou vin kot mwan demen finalman.

E mon krwar mon dakor, rol tou bann lenstans i bezwen ganny regete. Gouvernman santral, bann Minister, bann Lazans e fodre pa ki nou per re get nou rol. Konmsi mon repete. Fodre pa ki nou per re get nou rol. Toultan dan bann pei Lafrik, malerezman se en sistenm gouvernans lokal pa marse akoz bann Minis i oule tyonbo sa 2 lanmen pa large. Pa oule larg sa responsabilite. I krwar sa, mwan pou mwan, mon pou mor avek. Non. Ler ou partaz sa responsabilite, i fer keksoz pli fasil. Mon krwar in ganny dir e se sa lapros ki nou oule pran.

DC son rol i bezwen ganny gete, rol MNA i bezwen ganny gete e mon repete, rol sitwayen i bezwen ganny gete, si nou oule sa gran prosesis i marse Mr Speaker.

Mr Speaker, fotespere mon’n reponn bann kestyon ki’n ganny dir e mon krwar bann fot teknik nou’n pas lo la bomaten, i ok. Pou Lalwa vin gender neutral nou ok avek sa. Be i osi annan en lot Lalwa ki dir General Interpretation’s Act osi ki kapab ganny kouver anba sa.

Mr Speaker, mersi.

MR SPEAKER

Ok. Zis pou gidans pour Egzekitif e AG’s Office. Mon krwar nou’n annan en deba lo sa issue depi Katriyenm ouswa Trwazyenm Lasanble. E mon krwar nou’n tonm dakor ki malgre sa lenterpretasyon, drafting i bezwen reflekte sa nitralite dan gender. E sa ti pe ganny byen fer ziska la tou dernyerman. E mon krwar, sirtou koman Minis Dezinyen, ou kapab re advice Gouvernman pou kontinyen avek gender neutrality. This is politically correct konmela e sa ki nou dwatet pe swiv.

Lo merit e prensip sa Bill, nou ava pran en vot. Tou bann ki an faver? Okenn ki kont?

Mon a ganny mwan en Formal Second Reading.

MADAM CLERK

A Bill of an Act, to provide for the establishment of a District Council in each district, in order to enable the citizens to participate in the governance and development of the district, its functions, qualifications of persons who may be elected as Councillors, the manner of Elections thereof, functions of the Chairperson, other Councillors and District Administrator and for matters connected therewith or incidental thereto.

MR SPEAKER

Committee Stage?

HON MARIE-ANTOINETTE ROSE

Mr Speaker, anba Order 91(1), mon move ki nou sot Staz Komite.

MR SPEAKER

Okenn ki segonde?

HON CHARLES DE COMMARMOND

Segonde Mr Speaker.

MR SPEAKER

Pran en vot lo la. Tou bann ki an faver? Okenn ki kont?

Bon, mon a ganny mwan en Motion for Third Reading.

HON MARIE-ANTOINETTE ROSE

Mr Speaker, anba Order 71(1), mon move ki nou li sa Prozedlwa en Trwazyenm Fwa.

MR SPEAKER

Okenn ki segonde?

HON CHARLES DE COMMARMOND

I second Mr Speaker.

MR SPEAKER

Bon, nou pran en vot lo la. Tou bann ki an faver? Okenn ki kont?

Mon a ganny mwan en Third Reading.

MADAM CLERK

This Act may be cited as the Local Government Act, 2015.

MR SPEAKER

Bon. Bill in pase e kant a nou, nou pou stand adjourn. Nou pou rise to recess e nou pou rezwenn le 15 Septanm. Mardi le 15 Septanm, 9er bomaten.

(ADJOURNMENT)