::
Home » Verbatim » Verbatim - Second Term 2015 » tuesday-9th-june-2015

tuesday-9th-june-2015

NATIONAL ASSEMBLY OF SEYCHELLES

Tuesday 9th June 2015

The Assembly met at 9 am

National Anthem

Mr Speaker in the Chair

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.  Bonzour tou bann dimoun ki pe ekout nou dan lakour.

Ozordi avek nou, nou annan Minis pou Litilizasyon Later e Lakaz, Mr Christian Lionnet, ki vin reponn plizyer Kestyon konsernan son Minister.

Nou ava komans avek Kestyon 79 par Onorab Pierre.  Onorab?

HON DAVID PIERRE

Mersi Mr Speaker.  Bonzour Minis ek ou delegasyon.  Bonzour tou Manm koleg Onorab e tou bann dimoun ki a lekout.  Mr Speaker, mon ti a kontan demann Minis, eski Minis i kapab enform sa Lasanble kan eski bann zabitan Vilaz Lespwar, Union Vale English River, ki’n fini pey zot lakaz ek later pou ganny zot dokiman lavant later?  Mersi Mr Speaker.

MR SPEAKER

Request Minister.

MINISTER CHRISTIAN LIONNET

Mr Speaker, bonzour.  Bonzour Manm Lasanble.  Bonzour tou dimoun ki a lekout osi.  Mr Speaker, Vilaz Lespwar i en pti Estate English River, ki sitye par lao Stasyon Radyo SBC.  Sa Estate i konpri 8 Unit lakaz e parmi 7 sa bann fanmir in fini pey zot lakaz e status bann transfer pour sa 7 lakaz i comme swivan:-

2 ka kot transfer later sorti lo Gouvernman pou vin lo PMC pe ganny fer.  Koman sa i a fini, bann kliyan ava kapab siny zot lavant avek PMC.

3 ka kot later ki’n survey pe ganny anrezistre kot Biro Lanrezistreman, avan transfer i kapab ganny sinyen.

2 ka kot dokiman transfer in fini al kot Biro Prokirer Zeneral, pou fer dokiman pou kliyan vin sinyen.  PMC i ekspekte konplet tou sa bann transfer avan lafen Zen 2015.  Mon a pran sa loportinite pou remersye bann zabitan sa Estate pou zot konprenezon ek pasyans.  Mersi Mr Speaker.

MR SPEAKER

Onorab, okenn siplemanter?

HON DAVID PIERRE

Mersi Mr Speaker.  Mr Speaker, eski Minis i kapab osi dir sa Lasanble, an vi ki i annan en pe letan depi ler sa bann dimoun in fini pey zot later, ki bann difikilte ki son Minister i rankontre, an relasyon avek donn lavant later a tan?  E si i annan, eski i annan bann lezot landrwa apard Union Vale, Vilaz Lespwar ki bann Seselwa pe rankontre bann tel problenm?  Mersi Mr Speaker.

MINISTER CHRISTIAN LIONNET

Mr Speaker, lannen pase mon ti vin dan sa Lasanble, mon ti tal en plandaksyon pou nou kapab rezourd sa bann issue kot dimoun in fini pey zot lakaz me pa ankor ganny zot lavant later.  Pour bann lakaz endividyel, mon kapab raport ek sa Lasanble ki an 2014 nou ti annan 183 case ki pending.

Dan sa 183 case, 87 in fini ganny zot lavant, 63 in fini siny zot lavant e lavant i kot Biro Lanrezistreman pou anrezistre.  25 ka i kot Biro Attorney Zeneral e 8 ka i ankor pe esper bann demars survey.

So, mon krwar Minister in fer en gran zefor pou nou kapab eklersi sa bann k e mon mazinen ki ver lafen Zen lafen Zilyet, tou bann dimoun ki’n fini pey zot lakaz, i ava annan zot transfer dan zot lanmen.  Mersi Mr Speaker.

MR SPEAKER

Onorab Vangadasamy.

HON SHERYL VANGADASAMY

Mersi Mr Speaker.  Bonzour Mr Speaker.  Bonzour Minis ek ou delegasyon.  Bonzour tou dimoun a lekout.

Mr Speaker, an pre-nan an kont larepons Minis, eski Minis i kapab dir sa Lasanble si i pou annan en sistenm fast track, espesyalman pou bann dimoun ki en pti pe pli aze, ki ankor pe esper zot lavant later avek son Minister?  Mersi Mr Speaker.

MINISTER CHRISTIAN LIONNET

Mr Speaker, mon Minister i toultan a lekout.  Si i annan dimoun pou okenn rezon ki bezwen ganny zot lavant lo en baz priyorite, nou kapab met zefor ansanm pou nou kapab fer sa arive.  I pa zis bann dimoun ki pli aze, i bann dimoun osi ki pe esper zot lavant pou zot kapab pran en loanSo, an konsiltasyon avek Lotorite Distrik, les nou konnen e nou a fer neseser pou nou kapab met sa bann ka azour o pli vit posib.  Mersi Mr Speaker.

MR SPEAKER

Onorab Rose.

HON MARIE-ANTOINETTE ROSE

Mr Speaker bonzour.  Bonzour tou dimoun.  Mr Speaker, mon ti a kontan ki Minis i pran en pti pe letan pou eksplik bann dimoun ki prosedir ki zot fer vreman, an ka ki zot pa ankor ganny zot lavant later, me zot vreman bezwen zot lavant later pour plizyer rezon ki zot bezwen fer devlopman lo zot later.  Mersi.

MINISTER CHRISTIAN LIONNET

Mr Speaker, parey mon’n eksplike, tre byento nou pou kapab finaliz tou bann case ki’n ganny paid off.  Mon mazinen di-si lafen Zilyet, tou pou’n fini annord.  So, i annan apepre 2 mwan devan nou.  Me dan en lenstans ki i annan en dimoun ki bezwen en keksoz en pe pli irzan, pa e-zite kontakte PMC ou kontakte Minister.  E nou a vwar avek bann Lazans konsernen akoz i pa involve zis mon Minister, i involve Biro Prokirer Zeneral, Biro Lanrezistreman.  Nou ava vwar ki mannyer nou kapab pouse pou fer sa bann dimoun ganny zot lavant.

Bann dimoun ki oule en pti loan pou aranz zot lakaz, nou toultan annan bann Scheme an plas ki pa vreman neseser annan lavant.  Par egzanp en HIL, kot en dimoun i kapab pran en loan e fer bann renovasyon neseser, san bezwen angaz son propriyete avek sa Labank.  Mersi Mr Speaker.

MR SPEAKER

Kestyon 80, Onorab Pierre.

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble si son Minister i annan en Polisi kler e transparan an plas konsernan minimum letan ki en dimoun ki’n fer laplikasyon pour lakaz i devret espere, avan ki i ganny en lakaz?  Mersi Mr Speaker.

MINISTER CHRISTIAN LIONNET

Mr Speaker, wi mon Minister i annan en Polisi kler konsernan minimonm letan ki en dimoun ki’n fer laplikasyon pour lakaz i devret espere, avan i ganny en lakaz.  E sa i ganny kouver anba Polisi alokasyon lakaz.  E sa se en minimonm 12 mwan.  Sa i vedir Mr Speaker, en aplikan avan i kalifye pou ganny konsidere dan en lokasyon, apre ki in fer en minimonm 12 mwan kontribisyon san manke lo Home Saving Scheme.  Mersi Mr Speaker.

MR SPEAKER

Onorab?

HON DAVID PIERRE

Mersi Mr Speaker.  Mr Speaker, eski Minis i kapab donn nou bann statistik si i annan, lo letan:- an relasyon ek bann laplikasyon ki’n ganny fer nasyonalman.  Lakantite letan ki dimoun pe espere nasyonalman.  E eski Minis i osi kapab dir nou, ki kantite ka ki annan, kot 12 mwan in pase e dimoun i ankor still pe espere, kontrerman avek Polisi?  Mersi Mr Speaker.

MINISTER CHRISTIAN LIONNET

Mr Speaker, pou le moman nou napa en letan definir lo maximum letan ki en dimoun ki annan en laplikasyon aktiv, savedir i annan en kont Home Savings Scheme e i pe kontribye regilyerman san manke, i bezwen espere avan ganny asiste.

Ozordi nou annan 3569 kont Home Savings Scheme ki’n ouver, me selman 1312 ka ki meet kriter kalifikasyon pou ganny asiste.  Savedir, zis 312 ka ki pour sa dernyen 12 mwan ou plis, pe kontribye regilyerman.

Pour sa dernyen 5an, Gouvernman i met an mwayen 300 nouvo unit lakaz a dispozisyon nou sitwayen atraver bann proze Social Housing.  Alokasyon sa bann unit in ganny fer lo en baz priyorite ki ganny definir par Minister Litilizasyon Later ek Lakaz, an konsiltasyon avek Lotorite Distrik.

Pou gid Minister ek Lotorite Distrik ansanm ek nou bann partner kle, nou’n etabli en sistenm pwen ki permet nou annan en baz sistematik pou etabli priyorite nou bann kliyan.  Sa i avek bi pou nou fer bann desizyon pli enformen dan loptik pou ed bann ki pli dan bezwen e ki pe pran zot responsabilite an premye.

Mr Speaker, Gouvernman Lepep, Gouvernman ki o pouvwar in toultan met zentere son pep o sant son devlopman e domenn lozman in touzour enn nou priyorite.  Nou’n konstrir lakaz dan sa pei e ozordi, personn pa kapab dir otreman.  Nou pe kontinyelman rod fason pou akse-ler nou progranm lakaz, avek bi ki sak sitwayen ki annan en bezwen en lozman konvenab e desan i a kapab realiz sa Drwa dan en dele letan akseptab.

Resaman, nou’n lans nou progranm Self Financing Scheme, kot nou bann aplikan ek en saler en pe pli e-le-ve e ki kapab raise finansman pou konstrir zot prop lakaz, i kapab servi sa Scheme pou akonplir zot lobzektif.

Plizyer dimoun ki’n ganny sa loportinite ozordi, i santi zot zwaye e eksprim gratitid anver Gouvernman, pou met en tel Scheme an plas.  Gouvernman, atraver HFC in gradyelman ogmant kantite larzan ki ganny donnen anba bann diferan Loan Scheme, pou fer li pli posib pour en aplikan ki annan en posibilite en morso teren, pou kapab konstrir e konplet en lakaz.

An plis ki sa, si ou en first time home owner, savedir en dimoun ki pe konstrir son premye lakaz e ki son reveni le mwan kot lakour, i ant R6 mil a R20 mil, Gouvernman anba son Scheme Smart Subsidy, i donn sa dimoun ant R200 mil a R50 mil kado pou li kapab realiz son proze.  Ki pli bon ki sa?  Eski sa pa en Gouvernman ki annan son pep a ker?  Kote dan lemonn ou pou ale e ou pou vwar en keksoz parey?  Sa i vreman en Gouvernman Lepep, pour Lepep, e par Lepep.  Mersi Mr Speaker.

Applause

MR SPEAKER

Onorab Rose?

HON MARIE-ANTOINETTE ROSE

Mersi Mr Speaker.  Mr Speaker, e tan donnen ki Gouvernman pe fer son mye, pou fer sir ki tou dimoun i ganny son prop lakaz, eski Minis i kapab dir nou ki Lotorite Planning pe fer, pou fer sir ki bann dimoun ki pa pou ganny en flat me ki annan en pti bout later o bor kot li e ki anvi konstrir, li osi i ganny son sans konstri e i ganny son sans ganny son prop lakaz  kot li e tir sa presyon later ek lakaz lo Gouvernman?  Mersi Mr Speaker.

MINISTER CHRISTIAN LIONNET

Mr Speaker, mon krwar i annan en Kestyon ki tous en pti pe lo la me an bref, Lotorite Planning i toultan la pou rod fason pou fer en dimoun kapab annan en posibilite pou realiz son proze.  Byensir, within limit.  Mon’n deza dir dan sa Lasanble, Lotorite Planning i konsyan ki sak lakaz, ki ganny konstrir Sesel, i en lakaz an plis dan stok lakaz Sesel.  Mersi Mr Speaker.

MR SPEAKER

Kestyon 82, Onorab Pierre.

HON DAVID PIERRE

Mr Speaker, Kestyon 81.

MR SPEAKER

Wi, wi, ok.  81 la yes, akoz mon annan 2 papye. Ok, Kestyon 81.  Onorab Pierre.

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble, ki bann kriter ki ganny servi pou donn en zabitan lakaz, apre ki in pey son 10 poursan kontribisyon anba Housing Scheme? Mersi Mr Speaker.

MINISTER CHRISTIAN LIONNET

Mr Speaker, Kestyon Onorab Leader Lopozisyon i fer mwan realize ki i pa ankor sezi byen bann prensip fondamantal sa Gouvernman Parti Lepep.  Si en aplikan ti bezwen kontribye 10 poursan kontribisyon anver en lozman avan i ganny asiste parey kestyon Onorab pe sizere, sa i vedir ki sa ki annan plis larzan ti pou ganny asiste an premye.

Anba sa Gouvernman, annan plis larzan ou mwens, pa en kriter pour en lozman.

Applause

MINISTER CHRISTIAN LIONNET

Gouvernman Parti Lepep in toultan kont okenn prensip ki sa ki annan plis oubyen sa ki kapab pey pli vit i benefisye an premye.  Plito, en Gouvernman Parti Lepep in toultan krwar ki en sistenm zis e egal i pa zanmen depan lo kantite larzan ki ou annan, me plito lo ou bezwen, ou langazman e ou responsabilite.

Mon repete Mr Speaker, anba Polisi Gouvernman Parti Lepep, en dimoun ki son income i ba, i annan menm sans ganny en lakaz dan nou pei parey en dimoun ki son income i pli o.  Sa i baze lo prensip fondamantal nou Parti, Egalite pour tou, pe enport ou sityasyon sosyal.

Nou Polisi alokasyon lakaz i kler.  Ou bezwen en Seselwa e dan en lanplwa stab.  Ou bezwen annan 18an ou plis.  Ou bezwen annan en laplikasyon e pe kontribye aktivman, san manke tou le mwan, dan en kont Home Savings Scheme.  Alokasyon i ganny fer lo en sistenm priyorite, ki ganny etablir par Minister Lakaz, an kolaborasyon avek Lotorite Distrik e an ser-van en sistenm pwen alokasyon ki gid priyorite.  Alor, kriter pou aplikan kapab ganny en lakaz, i depan lo son langazman pou kontribye anver son lakaz, pour en minimum 12 mwan konsekitiv si i dan en lanplwa stab e lo son bezwen a sa moman.  Savedir son priyorite.        Pou gid mon Minister lo pran desizyon lo priyorite bann dimoun ki pe esper en lakaz, mon Minister in devlop en sistenm pwen ki nou apel en Housing Point System.  Sa sistenm pwen pou edik Komite Alokasyon lo ki lord priyorite, pour alokasyon par distrik, baze lo plizyer kriter obzektif, tel ki kriter over crowdedness, kantite letan pe peye, kondisyon lakaz kot sa dimoun pe reste, risk labi dan fanmir e dan son kominote, kantite letan sa dimoun pe lwe lakaz eksetera, parmi lezot kriter sosyal.  Mersi Mr Speaker.

MR SPEAKER

Onorab?

HON DAVID PIERRE

Mersi Mr Speaker.  Mr Speaker, eski Minis i kapab dir nou alors, si son Minister i santi ki i annan en fason kler pou li enform tou aplikan isi Sesel lo zot sityasyon e lo zot status e akoz ki apre zot in fer zot kontribisyon, parey li in anonse dan sa Lasanble Nasyonal, zot pa pe vwar en leklersisman an relasyon avek zot size lakaz?  Mersi Mr Speaker.

MINISTER CHRISTIAN LIONNET

Mr Speaker tou aplikan lakaz i an close kontak avek son Housing Officer.  Zot dyaloge lo en baz tou le semenn, tou le mwan.  Zot ganny update lo bann proze lakaz ki pe vini dan pei.  Zot ganny update en pti pe lo zot priyorite.  Me selman priyori-tizasyon i ganny fer letan en proze i materyalize, lokasyon i pre akoz sityasyon i sanze toulezour.  Ozordi ou kapab priyorite nimero 1, demen ou sanze.  I annan en ka ki vin par devan ou pou plizyer rezon.  So, dimoun i kapab kontinyelman vwar son Housing Officer, vwar son Lotorite Distrik e mentenir sa dyalog.  I enportan annan sa dyalog dan sa prosesis pou en dimoun ganny en lakaz.  Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.  Mr Speaker, eski Minis, baze lo kantite aplikan ki annan ozordi, ki seryezman pe pey zot Housing Scheme ek prozeksyon ki Minister, son rate kantite lakaz ki i pe fer par an, dan konbyen letan, dele letan minimum, ki en aplikan pou espere pou li ganny en lakaz?  E osi si Minis i kapab dir nou, kriter ki egziste ozordi, si en dimoun i li tousel, Minister pe konsider li ganny en lakaz 1 lasanm?  Petet demen sa dimoun i anvi adopte zanfan, eski Minister i annan posibilite reviz sa kriter?  Mersi.

MINISTER CHRISTIAN LIONNET

Mr Speaker, parey mon’n dir lo kestyon oparavan, nou annan 3569 kont Home Savings Scheme ki’n ouver.  I annan zis 1312 ki meet kalifikasyon akoz bann dimoun ki’n pey 12 mwan san manke ou plis.

Baze lo bann alokasyon ki nou’n fer dan lepase par egzanp, dernyen alokasyon Perseverance, mwayen kontribisyon lo HSS ti apepre 32 mwan.  E nou ekspekte ki ver 5an, 6an, apre ki en dimoun in kontribye, pa neseserman an mwayenn.  Mon krwar ki Gouvernman i kapab son lobzektif pou ofer sa dimoun en lozman.

Me annou pa bliye poudir ki annan dimoun ki annan 18an ozordi, ki’n ekout lapel Gouvernman, i pe komans kontribye.  I pa neseserman ki i pou bezwen en lakaz dan 3an dan 4an li, me i pe komans kontribye.  E nou, nou ankouraze, nou ankouraze ki dimoun i komans kontribye boner, akoz finalman sa larzan i son larzan, ki dan en kont savings ki secured.  E ki demen letan son bezwen lozman i vin en priyorite, i annan en komansman.  I pa pe komans from zero.

Lo kote ou dezyenm kestyon.  Polisi Gouvernman aktyel se ki ou ganny allocate baze lo ou bezwen prezan.  Si ou, ou tousel, ou ganny allocate a 1 bedroom ouswa en bedsitter.. Si ou sityasyon i sanze demen, Gouvernman i antre avek ou, i ofer ou en lesanz pou kapab meet bezwen ou fanmir a sa moman aktyel.

Demann lakaz dan pei i sitan gran, ki i pa pou zis pou donn en lakaz en dimoun ki tousel, en lakaz 2 ou 3 lasanm, kan nou annan bann gran fanmir ki pe esper bann loportinite parey.  Mersi Mr Speaker.

MR SPEAKER

Onorab Houareau.

HON HERBERT HOUAREAU

Bonzour Mr Speaker.  Bonzour Minis ek ou lekip.  Bonzour tou dimoun ki a lekout.

Eski Minis i kapab enform sa Lasanble, anba sa Scheme lakaz ki’n ganny fer, depi ler in komanse, konbyen dimoun parey ou’n dir in fer laplikasyon, konbyen ki’n kalifye, ki’n fini pey zot Scheme, e ki kantite i reste ki pa ankor ganny allocate sa lakaz aktyelman?  Mersi.

MINISTER CHRISTIAN LIONNET

Mr Speaker, mon repet statistics ki mon’n deza donnen.  I annan 3569 case ki annan en kont Home Savings Scheme e ladan i annan 1312 ki’n meet kriter e ki pa ankor ganny asiste.  Mersi Mr Speaker.

MR SPEAKER

Ou konnen, Minister mon krwar next time zis refer loter Kestyon to larepons ki ou’n donnen avan.  Akoz sansan Minis pou vin repet menm keksoz 10, 15 fwa dan Lasanble.  Fodre nou ekoute osi ler Minis i reponn.

KesTyon 82.  Onorab David Pierre.

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble, si Gouvernman i annan okenn plan pour sa 9 fanmir ki pe reste dan bedsitter lower Ma Joie, vi ki annan fanmir ki’n reste plis ki 30an la e sa bann bedsitters pa pe ganny vann avek zot?  Mersi Mr Speaker.

MINISTER CHRISTIAN LIONNET

M Speaker, Polisi aktyel lo sa ki konsern stok lakaz 1 lasanm oubyen bedsitter i se ki PMC pa vann sa bann unit me plito gard zot koman bann lakaz ki ganny lwe ek son bann lokater.

Rezon pou sa se ki dan lamazorite lenstans bezwen sa bann fanmir a longer di tan i sirpas fasilite ki sa bann unit i kapab ofer.  An lot mo Minister, PMC i vwar ki sa bann tel unit i devret ganny servi koman bann lakaz tranzitwar.

Mr Speaker, a sa pwen i fodre fer resorti ki Polisi aktyel lo term grander lakaz, savedir 1, 2 ou 3 lasanm i baze pirman lo bezwen sa fanmir pandan alokasyon.  Zot ava dakor avek mwan ki pre-nan an kont demann lakaz dan nou pei, i pa pou zis allocate en lakaz 2 ou 3 lasanm avek en dimoun ki son bezwen i en lasanm.

Lo size transfer, premyerman i depan lo grander fanmir ki pe okip sa unit, si sa unit pa pe ofer grander fanmir bann fasilite neseser.  E osi enportan, si sa lokater in pran byen son responsabilite anver son repeyman lozman.

Mr Speaker, pour sa 9 fanmir ki pe reste dan bedsitter lower Ma joie, dapre lenformasyon Housing e PMC, 6 bedsitter i ganny okipe par bann dimoun tousel.  Dan sa lot 3 bedsitter nou annan bann koup ki pe reste avek en zanfan.  Pour sa 6 lokater ki napa zanfan ki pe reste avek zot, baze lo zot bezwen, napa nesesite transfer zot dan en nouvo lakaz pli gran.

Pour sa 3 lokater ki annan zanfan, mon Minister in enkli zot lo lalis transfer potansyel dan lefitir, me pou le moman, 2 lokater ladan pa konsistan dan zot peyman lakaz e zot annan aryeraz.  Alor sa in fer, zot pa kalifye otomatikman pou en transfer, ziska ler bann aryeraz i ganny eklersi oubyen reschedule, baze lo en laranzman avek PMC.

Mon ava sezi sa loportinite Mr Speaker, pou demann tou lokater PMC, swa ou ki pe lwe, ou sa enn ki pe aste son lozman, pou reste senser ek ou lobligasyon pou ou fwaye.  En twa i enn nou priyorite.  Annou mazin sa enn ki ankor pe espere e pe kontribye pou li ganny en loportinite.  Annou konsyansye ser ek frer Seselwa.  Ansanm mon konvenki ki nou a kapab ak-se-ler nou Progranm Lozman.  Mersi Mr Speaker.

MR SPEAKER

Onorab?

HON DAVID PIERRE

Mersi Mr Speaker.  Mr Speaker, vi ki Minis in dir nou poudir i annan bann fanmir kot napa nesesite pou transfer zot, eski Minis i kapab therefore dir avek sa Lasanble, ki plan Minister vizavi maintenance kot sa bann units, vi ki sa bann dimoun i annan plizyer problenm, tel ki problenm delo ki kontinyelman kase tou lazournen?  Mersi Mr Speaker.

MINISTER CHRISTIAN LIONNET

Mr Speaker, Polisi Gouvernman lo bann lakaz ki lwe, an vi ki son lwaye i pa sibstansyel, se ki sa dimoun normalman i okip bann pti maintenance li menm.  Me bann maintenance mazer i ganny fer par PMC.  Si i annan bann issue ki pe repete laba Onorab, PMC ava pran kontak ek sa bann dimoun e ava adrese.  I ava vwar fason pou adres sa bann problenm an avan.  Mersi.

MR SPEAKER

Onorab Valmont.

HON SYLVIANNE VALMONT

Mersi Mr Speaker, bonzour.  Bonzour tou dimoun a lekout.

Mr Speaker, eski Minis i kapab dir nou si son Minister i annan mekanizm an plas pou reste azour e a lekout sa bann fanmir ki reste dan bedsitters?

E dezyenmman, eski Minis i kapab donn nou konklizyon lo sa survey ki son Minister ti fer konsernan bedsitters?  E si pandan sa 30an, i annan mouvman dan sa bann bedsitters?  Mersi Mr Speaker.

MINISTER CHRISTIAN LIONNET

Mr Speaker wi.  Nou annan mekanizm an plas pou nou kapab kontinyen reste a lekout nou bann lokater.  En lokater avek en dimoun, avek PMC toultan an kontak.  Nou an kontak avek Lotorite Distrik pou nou kapab kontinyen koze.  Dyalog i rezourd tou problenm dan lavi.  So, i enportan ki nou mentenir sa dyalog pou nou kapab rezourd bann pti problenm.

Minister ti fer en legzersis wi Onorab, pou etablir nou bann stok bedsitter dan pei.  Nou bann one bedroom. Mon napa statistik avek mwan.  Me sa ki mon kapab dir sa Lasanble se ki bann dernyen lannen, nou pe fer bokou mouvman ek bann dimoun ki annord ek zot repeyman.  Zot in bann bon kliyan e zot bezwen ozordi i pli gran ki sa bedsitter ou sa one-bedroom i kapab fer.

Pou lenformasyon, 9 poursan alokasyon Perseverance ki ti ganny fer lannen pase ti bann transfer.  Sa i 27 unit lakaz, ki ti enkli bann transfer dan diferan distrik.  Mersi Mr Speaker.

MR SPEAKER

Kestyon 83, Onorab Marc Volcere.

HON MARC VOLCERE

Mersi Mr Speaker.  Bonzour Minis ek ou delegasyon.  Bonzour tou dimoun a lekout.

Mr Speaker mon ti a kontan demann Minis si son Minister pe revwar sa issue density, an relasyon Second Housing Scheme?  Mersi.

MINISTER CHRISTIAN LIONNET

Mr Speaker, wi.  Lannen pase mon ti vin dan Lasanble, apre en Kestyon from Onorab Kevin Vidot, ki ti demann mwan en Kestyon spesifik lo sa issue dansite.  E mon ti dir ki Lotorite Plan ti pe fer neseser pou revwar bann dansite ki ti’n ganny preskrir pour bann diferan landrwa lo Mahe, La Digue.  Fodre note ki Praslin as nou pe koze, Praslin son Land Use plan i deza Lalwa.  Revizyon ki’n ganny fer avan, nou ti klasifye bann later koman very low density, low density, medium density avek high density.

Letan mon ti dan Lasanble, very low density ti 15 poursan.  Nou’n reviz li pou fer li vin 20 poursan.  E landrwa kot i annan koneksyon avek sewage, nou dir 25 poursan.

Pour low density, avan i ti 25 poursan.  Nou’n revize pou fer li vin 30 poursan.  E landrwa kot i annan koneksyon sewage, nou pe dir 35 poursan.

Medium density ti 30 poursan.  Nou’n revize pou vin 35 poursan.  E si ou konekte ek sewage, 40 poursan.

High density avan ti 45 poursan.  Nou’n mentenir sa plot coverage 45 poursan.  E si ou konekte avek sewage, Planning pe dir ou kapab konstrir, ou kapab seal bann areas up to 50 poursan.

Mr Speaker, sa i avek bi pou nou kapab maksimiz en pe plis nou later limite ki nou annan.  Me selman nou bezwen, parey mon ti dir lannen pase, nou bezwen adres sa sistematikman.  Nou bezwen fer sir ki letan nou increase density, nou kapab annan bann mezir, bann fakter, bann lenfrastriktir ki kapab cater pour en dansite pli o.  Annou pa bliye, bann kalamite ki’n arive dan pei pa tro lontan pase, kot nou’n vwar bokou inondasyon, kot nou’n vwar bokou landslide e dansite.  Kantite landrwa ki’n ganny build lo la i en fakter direk ki kontribye anver sa bann kalamite parey.  Plis ou kouver sirfas later, plis ou minimiz posibilite pou later abzorb delo.  E sa delo i bezwen rod son semen pou li ale, pou li al dan lanmer.

So Planning Authority i bezwen rod sa balans optimum, pou nou kapab annan bann devlopman soutenab.  I enportan ki tou devlopman ki nou fer dan pei, i bann devlopman soutenab.

Lo sa ki konsern Second Housing.  Sa Scheme ti ganny entrodwir pou asiste bann fanmir kot propriyete i ase larz pou accommodate en dezyenm lakaz dan zanviron 70 met kare, san ki Divizyon Later i bezwen ganny fer.

Gouvernman pandan sa dernyen lannen in raise Capping Loan Second Housing pou sorti R200 mil, R250 mil e ozordi i ariv R400 mil.  Sa i avek bi pou kapab fer li posib, pou en dimoun ki pe konstrir en lakaz anba sa Scheme Second Housing, pou li kapab met son proze ater.

Dan konteks Second Housing, Divizyon Later i selman ganny permet letan sa dezyenm lakaz ek  son bann fasilite neseser i meet tou bann kriter devlopman ki’n ganny etablir, tel ki zistans ek balizaz e lezot striktir egziste.  Sistenm desarz e lezot.  Mersi Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker.  Mr Speaker, an vi scarcity later ki nou pe rankontre dan bann distrik, eski Minister pe kapab konsidere pou revwar, an relasyon avek Second Housing Scheme petet pou fer bann:- avek sistenm desarz plizoumwen, pou kapab petet merge bann desarz kot dan plas fer diferan septik tank pou dan ka Second Housing pou fer en dezyenm lakaz, zot kapab petet merge.  Akoz sa fanmir trwa kar di-tan ti la zot.  Zot ti pe reste ek kanmarad.  So, zis en dezyenm lakaz, petet en posibilite pou zot fer sa?  Eski dan son Minister, i annan bann Zofisye kekfwa i kapab advice, advice bann fanmir oubyen bann aplikan ki deside pou konstrir en dezyenm lakaz lo propriyete zot paran?  Mersi.

MINISTER CHRISTIAN LIONNET

Mr Speaker wi.  Lotorite Planning i la pou donn gidans tou bann dimoun ki fer laplikasyon avek li.  Avan Lotorite Planning i refiz en plan, i neseser ki i eksplor tou posibilite avan ki i refize.  Kot Second Housing pa posib akote en lakaz, Planning i kapab advice ou pou petet mont anler.

Kot i annan posibilite pou servi menm sistenm desarz avek lakaz orizinal, avek serten amelyorasyon byensir, akoz ou pou annan plis delo, ou pou annan en lot fanmir an partikilye.  Lotorite Planning avek Lotorite Public Health i kapab travay ek sa dimoun e vwar ki mannyer nou kapab met bann fasilite pou kapab deservi sa nouvo lakaz.

Gouvernman osi pe kontinyelman envestir dan bann sistenm sewage santralize.  E ler sa i arive, i ava permet nou osi pou nou kapab kontinyen ogmant ogmant dansite lo bann landrwa ki annan posibilite pou fer Second Housing.  Mersi Mr Speaker.

MR SPEAKER

Onorab Vangadasamy.

HON SHERYL VANGADASAMY

Mersi Mr Speaker.  Mr Speaker an vi larepons, Minis pou evit bann kalamite e pou asir bezwen devlopman soutenab, pre-n-an an kont bezwen lakaz  bann dimoun, espesyalman dan bann distrik ek to-po-grafi e-leve e limitasyon lakaz, eski Minis i kapab dir si son Minister i annan en prosedir an plas, oubyen parey nou kapab apel sa, en pre-planning assessment ki kapab ganny fer par Lotorite Planning, pou ed sa bann aplikan ouswa pou advice zot, avan menm ki zot demars dan fer en plan, pou evite annan sa kou ki vin avek, pour sa bann kliyan ki bezwen sa servis?  Mersi Mr Speaker.

MINISTER CHRISTIAN LIONNET

Wi Mr Speaker.  Pre-planning advice i en servis ki nou ofer.  Avan en dimoun i al rod en Arsitek, i al rod en Agent pou li kapab soumet en plan, i kapab apros Lotorite Planning, ganny serten gidans lo bann kriter devlopman lo en port partikilye.  Nou ankouraze sa akoz finalman letan sa dimoun i soumet son plan, nou annan en keksoz ki’n deza komans ganny konsilte e fer sa prosedir bokou pli fasil.  Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.  Mr Speaker, an vi repons Minis lo Second Housing Scheme, eski Minis i kapab enform sa Lasanble, dan ka kot en sitwayen, i pa kapab konstrir en lakaz akote, i oule konstrir par lao e ozordi, baze lo kriter  ki R400 mil e ler nou pou konstrir par lao, son kou otomatikman pou leve, eski zot pe konsidere revwar sa R400 mil pou ogmante dan bann ka parey?  Mersi.

MINISTER CHRISTIAN LIONNET

Mr Speaker, HFC in sorti R250 mil in vin R400 mil.  E mon krwar dan le fitir, i annan scope osi pou li kapab ogmant sa kantite larzan.

Annou pa bliye Onorab, ki Gouvernman in fer ou en grant, en kado en larzan ki top up sa R400 mil, baze lo ou saler en.

Si ou ganny R6 mil, Gouvernman i donn ou R200 mil kado, pou ede fer ou lakaz.  So, mon krwar tit-a-pti, an-a-l-an, keksoz pe amelyore pou en dimoun ki pe fer en lakaz anba Second Housing Scheme, pou li kapab konplet en proze parey.  Gouvernman i ankouraze sa.  Minister Later i konnen difikilte later dan pei.  E kot i annan en posibilite pou konstrir en dezyenm lakaz ki pa pou afekte son zalantour, ki pa pou met presyon lo lenfrastriktir, nou bezwen fer tou posib pou kapab fer sa arive.  Mersi Mr Speaker.

MR SPEAKER

Onorab De Commarmond.

HON CHARLES DE COMMARMOND

Mersi Mr Speaker.  Bonzour Minis.  Bonzour Mr Speaker.  Bonzour tou dimoun.

Mr Speaker, eski Minis i kapab enform nou Lasanble si Gouvernman ouswa son Minister i annan okenn plan pou fer desann pri kou pou fer en lakaz, rather than fer monte sa bann loan?  Mersi bokou.

MINISTER CHRISTIAN LIONNET

Mr Speaker wi definitivman.  Fer monte loan, fer lakaz pli ser pa en sa.  Nou bezwen rod fason pou nou kapab osi redwir pri konstriksyon.  E mon krwar nou’n fer bokou pandan sa bann dernyen lannen, apre ki nou annan reform ekonomik kot nou annan en evalyasyon nou larzan.  Mon krwar nou’n fer bokou pou nou kapab re-stabiliz pri konstriksyon en pti pe.  Par egzanp, en keksoz ki nou’n fer.  Gouvernman in pran desizyon ki STC i antre dan marse kot i provide materyo konstriksyon.  Nou’n seye atraver marse lib me i paret mwan lespri konpetisyon pa marse isi.  E dimoun i fer bann cartel.  Zot sarz dimoun ledo kase pou materyo e ki pou mwan mon konsider li koman en komodite de baz.  En dimoun son lakaz i enn son priyorite lavi.  I bezwen en twa pou li kapab anmenn son zanfan dan en lanvironnman sen e sof.  E Gouvernman se pour sa rezon ti pran desizyon pou fer STC re-antre dan marse konstriksyon.  Malgre Sekter Prive in kriy lasasen, ozordi nou pe vwar benefis STC dan Sekter Prive.  Avan STC i antre dan marse, 1 met tol ti pe vann R150.  STC i antre, ozordi 1 met tol pe kout R80 par met.  En?  Preski double.

So, mon krwar i annan plizyer fakter ki Gouvernman pe fer.  Sa i enn.  I annan lezot ki nou bezwen eksplore.  Nou pe eksplor posibilite pou servi bann materyo ki nou’n tire dan fon lanmer pou nou kapab servi dan konstriksyon.  Nou pe fer bann tes.  E i annan en kantite ki nou oule fer pou nou kapab redwir kou konstriksyon.  I vre ozordi, mon pa krwar poudir kou pou konstrir lakaz i rezonnab.  Mersi Mr Speaker.

MR SPEAKER

Kestyon 84.  Dan labsans Onorab Ghislain, Onorab Esther.

HON NATASHA ESTHER

Mersi Mr Speaker.  Bonzour Mr Speaker, Minis ek ou delegasyon.

Kestyon par Onorab Chantal Ghislain, Manm pour distrik La Digue e Zil Pros i lir koumsa.  La Digue i deza kon-zeste avek lakaz e Letablisman Touristik.  Eski Minis responsab pour Later i kapab enform zabitan sa zil, si i dan plan son Minister pou demark en landrwa spesyal dan zar en Industrial Zone pour bann travayer parey Sarpantye e lezot travay ki pe fer bokou tapaz e polisyon dan kominote?  Mersi.

MINISTER CHRISTIAN LIONNET

Mr Speaker, mon Minister i reste toultan a lekout nou bann partner pou nobou dedye later a bann bezwen en kominote.  Nou reakte e planifye baze lo demann en kominote an partikilye.  Lo La Digue, tradisyonnelman an vi grander La Digue, i en popilasyon ase ba, bann aktivite endistriyel, manufacturing, in ganny antreprann koman bann cottage industry kot lakour lo en lesel ase pti, ki fer ki ziska prezan, sa bann tel aktivite in kapab co-egziste avek bann lezot aktivite, tel ki rezidansyel ek tourizm.  Nou konstate ki pandan sa bann lannen, avek en leksplozyon devlopman lo La Digue, serten sa bann aktivite, prensipalman par bann Kontrakter, in koz serten lenkonvenyans pour bann lezot aktivite.

Mr Speaker, pou lenformasyon sa Lasanble, mon okouran ki Minister Lenvestisman, Devlopman Lantreprenarya ek Inovasyon Biznes pe finaliz en proze pou laprouvasyon Gouvernman, anba tit Seychelles One District, One Project. Lobzektiv sa proze se pou Gouvernman dedye later dan sak distrik dan pei, pou devlop bann lenfrastriktir neseser pou deservi bann bezwen pou bann pti e mwayen antrepriz.  La Digue pa en leksepsyon.  Mersi Mr Speaker.

MR SPEAKER

Okenn siplemanter Onorab?

HON NATASHA ESTHER

Mersi Mr Speaker.  Mr Speaker, eski Minis i kapab dir avek sa Lasanble kan ki bann travayer La Digue petet ki pe esper enn sa bann bout later parey, a kapab ganny en pti pe plis lenformasyon e detay lo sa proze.

E petet si Minis la dan son pozisyon i kapab dir nou si i annan okenn konsiltasyon avek Bord L’union Estate, petet pou kapab bouz sa proze laba?  Mersi.

MINISTER CHRISTIAN LIONNET

Mr Speaker, parey  mon’n dir, sa i en proze ki pe ganny drive par mon koleg Minis, Minis Benstrong son Seksyon Minister.  Me mon napa detay plis ki kantite letan.  Me mon asire ki pou annan son konsiltasyon neseser avek bann partner kle.

Gouvernman pa fer proze san konsiltasyon akoz finalman proze i benefis dimoun dan en kominote.  I enportan ki dimoun sa kominote, ki annan local knowledge ase enportan en.  Ou kapab en Enzenyer kalifye me ou pa kapab fer en proze si ou pa konsilte avek dimoun kominote lokal.

So, mon prezimen wi, pou annan serten konsiltasyon me mon pa kapab donn en time frame lo la.  Sa en kestyon ou kapab poz avek Minis Benstrong.  Mersi Mr Speaker.

MR SPEAKER

Onorab De Commarmond.

HON CHARLES DE COMMARMOND.

Mersi Mr Speaker.  Mr Speaker, eski Minis i kapab enform nou Lasanble ki mannyer son Minister pe evalye Land Use Plan La Digue, an relasyon avek sa kestyon e ki fason ki sa landrwa, si i ganny dedye  pou kapab ganny zere, an tenir kont bann lenstans ki annan La Digue, par egzanp La Digue Development Board, Boarding Estate, Ladministrasyon Distrik, Biro MNA e la pou annan ankor Konsey Distrik tre byento?  Mersi.

MINISTER CHRISTIAN LIONNET

Mr Speaker, mon krwar Minister Lenvestisman e Devlopman Lantreprenarya e Inovasyon Biznes i ava an konsiderasyon spesifisite La Digue, letan i pe enplimant son proze La Digue.  Mwan senpleman se mon kapab dir se ki nou annan en demann pour en tel proze lo La Digue.  e mon Minister pe fer neseser pou nou kapab annan en teren.  Nou’n deza idantifye en teren dan L’union ki kapab servi pou sa.  E nou an dyalog avek Minister Lenvestisman, en mannyer ki letan Gouvernman i aprouv sa proze, ki mon asire i pou aprouve avek tou bann mekanizm an plas, nou annan later pou nou kapab met a dispozisyon pour sa proze ganny materyalize.  Mersi Mr Speaker.

MR SPEAKER

K

kestyon 85, Onorab Mirena Souris.

HON MIRENA SOURIS.

Mersi Mr Speaker.  Bonzour Mr Speaker.  Bonzour Minis ek ou delegasyon.

Mr Speaker, Kestyon i lir koumsa:-  Eski Minis i kpab enform sa Lasanble si son Minister in komans negosyasyon ek Lanmisyon konsernan sa bann lakaz Societe Du Logement ki sitye Pascal Vilaz?  Mersi Mr Speaker.

MINISTER CHRISTIAN LIONNET

Mr Speaker, wi.  Societe Du Logement ti apros mon Minister pou ofer posibilite avek Gouvernman, pou aste bann propriyete ki konpri lakaz ek later dan kominote Paskal Vilaz, Beau Vallon.  Minister apre evalyasyon, in deza fini fer en lof avek Societe Du Logement e nou ekspekte ki dan sa bann mwan devan nou, nou ava kapab tonm lo en lagreman pou Gouvernman aste sa propriyete.

Mr Speaker, rezon prensipal ki Gouvernman in deside pou aste sa propriyete, apre ki Societe Du Logement ti endik nou ki ti son lentansyon pou vann, set akoz Gouvernman, parey Societe Du Logement, i annan tou bon lentansyon pou ofer sekirite lozman bann lokater aktyel.  Mersi Mr Speaker.

MR SPEAKER

Okenn siplemanter?

HON MIRENA SOURIS

Mersi Mr Speaker.  Mr Speaker, an vi kondisyon e leta sa bann lakaz, eski Minis i kapab enform sa Lasanble si son Minister pe konsider ki sa bann zabitan i aret pey sa bann lakaz apre ki Minister in pran ownership sa propriyete e osi ki garanti ou lespwar ou donn zabitan Paskal Vilaz, ki ou Minister pou kontinyen fer amelyorasyon lo sa bann lakaz?  Mersi Mr Speaker.

MINISTER CHRISTIAN LIONNET

Mr Speaker, nou’n deza acquire en propriyete parey avek Societe Du Logement e sa se Belvedere, en pe letan pase.  E laranzman ki nou’n annan ek sa bann dimoun se ki dore-n-avan, dek ki Gouvernman ti vin propriyeter sa bann propriyete, zot pa pe pey okenn rent lo sa bann lakaz.  So, i en posibilite ki nou kapab extend sa avek bann dimoun Paskal Vilaz.  Mon pa vwar rezon akoz nou pa kapab fer li.         Me dan konteks Belvedere, se bann pti maintenance i ganny fer par zot menm e PMC li plito i okip bann maintenance mazer tel parey sewage.  Bann issues ki annan pou fer ek sewage eksetera, eksetera.

So, mon krwar napa en pli bon lokater ki Gouvernman en?  So, dimoun Paskal Vilaz i dan bon lanmen.  Mersi Mr Speaker

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker.  Bonzour tou dimoun.

Mr Speaker, e-tan donnen ki Gouvernman in dakor pou aste sa later, sa propriyete, sa i bon nouvel pour zabitan Beau Vallon.  Eski Minis i kapab dir nou ki plan re devlopman sa propriyete, e-tan donnen ki sa bann lakaz i an move kondisyon?  E dan zot plan devlopman, eski Minis i kapab donn en langazman zabitan Beau Vallon, ki zot pou fer plis flat ki egziste deza lo sa propriyete, pour ki bann zabitan Beau Vallon osi i benefisye, bann lezot an deor Societe Du Logement i benefisye avek en flat?  Mersi.

MINISTER CHRISTIAN LIONNET

Mr Speaker, wi nou’n fer en letid preliminer, en assessment preliminer e nou santi pou dir sa propriyete i annan scope. I annan potansyel pou nou kapab devlop li a en pli o dansite.  E sa lentansyon Gouvernman.  I en propriyete ki ase relativman fasil pou konstrir lo la.  E once ki nou’n fini aste, nou konnen poudir i pou nou, nou ava etal en plan, parey nou ti fer pour Belvedere.  Belvedere nou ti etal en plan 5an pou devlopman.  Nou ava re-etal en plan avek bann dimoun, en mannyer ki nou dan sa prosesis ansanm.  I enportan ki nou enkli tou dimoun dan sa prosesis.  E dimoun Paskal Vilaz i kapab reste asire ki Gouvernman pou fer son mye pou annan en redevlopman, en mannyer ki zot kapab annan en lakaz ki zot kapab peye, sekirite pour zot zanfan demen.

So, mon krwar once ki nou’n fini aste, nou a kapab annan en meeting.  Nou’n deza fer premye meeting parey Lotorite Distrik i konnen.  Zot ti prezan.  Nou a fer en lot meeting pou nou etal ki mannyer nou pou bouz a lavan ek sa bann dimoun.  Mersi Mr Speaker.

MR SPEAKER

Onorab Edmond.

HON ROMA EDMOND

Mersi Mr Speaker.  An vi repons Minis, eski Minis i kapab sa Lasanble si son Minister in komans konsilte e aviz sa bann rezidan pou komans kontribye anver zot Home Savings Scheme ki pou benefisye avek en nouvo lakaz demen e eski Minis i kapab dir nou osi, konbyen sa bann lakaz Societe Du Logement i annan dan pei?  Mersi.

MINISTER CHRISTIAN LIONNET

Mr Speaker, pou dezyenm parti kestyon, mon okouran sa 2 propriyete.  Belvedere avek Paskal Vilaz.  Mon kapab mal.  Mon pa okouran si i annan lezot propriyete.  Mon stand to be corrected.

Lo lot kestyon, wi.  Byensir nou pou ankouraz sa bann dimoun pou zot komans kontribye anver zot lakaz fitir akoz finalman parey mon’n dir oparavan, i zot larzan.  I larzan ki dan en kont Savings.  Ki mannyer ki letan ou ganny ou lakaz, ou annan mwens det.

Dan en faz redevlopman, i en pti pe difisil si en dimoun pa kontribye pou:- akoz ou bezwen li bouze pou ou kapab fer en devlopman.  Me selman i dan lentere en dimoun.  Home Savings Scheme i pa en pinisyon li.  I pa en keksoz ki go against en dimoun.  I en larzan ki ou met de kote pou ou en priyorite fitir.  So, i dan ou lavantaz pou ou save.  Ozordi HFC i donn ou en lentere ki pli o ki Labank Komersyal i donn ou.  So, i meyer ki ou larzan i kot HFC dan kont Home Savings Scheme ki i dan en Labank Komersyal.  So, annou pran nou responsabilite.  Annou kontribye kan nou ankor kapab kontribye, kan nou kapab travay, kan nou ankor zenn.  E annou save nou larzan, en mannyer ki letan nou ganny nou lakaz, nou det i pa sitan o.  Mersi Mr Speaker.

MR SPEAKER

Onorab  Pierre.

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble kan ki zot pe ekspekte apepre zot pou finaliz aste sa propriyete avek Societe Du Logement e dapre zot plan, konbyen letan apre ki zot in aste sa propriyete, ki zot pe komans redevlopman sa landrwa?  Mersi Mr Speaker.

MINISTER CHRISTIAN LIONNET

Mr Speaker, kan nou pou kapab fini an negosyasyon i pa depan zis lo Gouvernman.  I depan lo Gouvernman ek Societe Du Logement.  Nou pe pous tou ki dan sa prosen 2 mwan devan nou, nou kapab konklir sa.  The sooner the better, ok. Nou anvi met latet sa bann dimoun dan sa bann lakaz an pe.  E Gouvernman pe esey fer son mye.  Nou’n fini fer en lof.  Nou pe esper Societe Du Logement son Bord zwenn pou zot kapab come back avek en counter offer oubyen aksepte nou lof.  E koman sa i ganny fer, nou, nou ava akte vitman  pou nou kapab sey konklir sa bann sa.

Lo plan devlopman, mon pa oule fer en promes dan vid.  Mon krwar i enportan ki nou asize ansanm avek bann zabitan Paskal Vilaz, nou regard Bidze Gouvernman anba PSIP e nou dir dimoun en plan realis ki mannyer pou fer sa redevlopman.

Sa ki enportan.  Se ki nou koz en plan realis avek dimoun, pre-nan an kont tou sirkonstans.  Pre-nan an kont laz sa bann lakaz, si sityasyon i ankor ok pou zot kapab fer ankor 1, 2, 3 lannen ladan ou kwa.  Me sa Gouvernman i ava fer ansanm ek Lotorite Distrik e sa bann zabitan Paskal Vilaz ki dan sa bann lakaz.  Mersi Mr Speaker.

MR SPEAKER

Kestyon 86, Onorab Souris.

HON MIRENA SOURIS

Mersi Mr Speaker.  Mr Speaker, eski Minis i kapab enform sa Lasanble si i dan plan son Minister pou a lavenir met bann kondisyon atase ek bann devloper pou zot envesti dan kominote koman Corporate Social Responsibility? Mersi Mr Speaker.

MINISTER CHRISTIAN LIONNET

Mr Speaker, Gouvernman atraver Lotorite Plan, par bann kondisyon ki ganny enpoze par laprouvasyon en proze, ouswa atraver Minister Later ou Finans dan bann Commercial Agreement ki ganny sinyen avek bann devloper, i deza pe met bann kondisyon atase pou zot envestir dan kominote.  Nouvo Promenad Beau Vallon, akse ek parking piblik pou fasilit akse ek lans Beau Vallon devan Diskotek Tequilla Boom, Pavement Bus Stop e Street Light ant sa parking ki mon fek mansyonnen ek Lotel Beau Vallon Bay, Lekol ek Lopital Silhouette.  Dan Sid Mahe, prensipalman dan distrik Takamaka en devloper ki pe ankor pe finaliz detay son proze in deza komet son lekor pou anmenn en serten devlopman e fasilite kominoter dan form en Beach Park. Sa proze kominote in deza ganny diskite avek Lotorite Distrik e osi dan bann rankont piblik.

Sa i zis enn de legzanp kot Gouvernman in servi sa bann mekanizm pou ganny envestiser pou envestir dan kominote.

Mr Speaker, i fodre refer sorti ki i annan bokou bann lezot benefis ki en proze ase mazer i anmennen endirekteman dan en kominote.  En legzanp, dan ka Savoy Beau Vallon, pou PUC kapab supply li kouran, ti annan en nesesite pou upgrade kapasite elektrisite dan rezyon Nor.  Dan sa ka, Savoy in bezwen kontribye sibstansyel-man pou realiz sa upgrade.  An fezan sa, kominote Nor i benefisye.  Sa Seselwa ki pe al ouver son Letablisman Tourizm, son biznes, ou menm antre dan son nouvo lakaz, i benefisye.  Pei i benefisye.

Mon dakor antyerman avek Onorab, ki devlopman i devret resiprokal, kot devloper i benefisye e zabitan e kominote i vwar en lenpak pozitiv.  Malgre lentrodiksyon Corporate Social Responsibility tax lo bann biznes, Gouvernman i santi ki fodre i annan en framework adisyonnel, pou fer sir ki bann devloper oubyen envestiser i egzers sa responsabilite byen e i accountable pour sa kominote.

Dan sa loptik, Gouvernman i santi ki posibilite pou enkli dan lavenir, en Letid lo Lenpak sosyal oubyen Social Impact Assessment koman en nesesite, avan ki en gran devlopman i ganny aprouve.

Sa Social Impact Assessment ki a pran en form en pti pe parey Environmental Impact Assessment EIA, i ava plito konsantre bann lenpak advers Sosyal ki en devlopman i kapab anmennen lo en kominote e ki bann mezir sa devloper ou envestiser i bezwen pran pou minimiz sa bann lenpak.

Gouvernman, atraver Minister Sosyal Devlopman kominoter ek Spor, ek Minister Finance in deza fini demann e ganny lekspertiz e finansman sorti kot labank Devlopman Afriken, pou finans formilasyon en kad pour sa Letid Lenpak Sosyal.

Dapre lenformasyon sorti kot Minister Sosyal, Devlopman Kominoter ek Spor, tender pou sorti byento pou apwent en Konsiltan pour sa proze.

Mr Speaker, Gouvernman i krwar senserman ki en devlopman ki ganny antreprann dan pei i devret anmenn en lenpak pozitiv dan tou son lanpler.  Lo lekonomi, lakominote e egalman enportan lo son lanvironnman.

Se pour sa rezon ki an plas deza, nou annan bann mekanizm e prosedir demokratik e vi-goure, avan ki en devlopman mazer i ganny aprouve.  Mon swete ki mon’n nobou reponn kestyon Onorab.  Mersi Mr Speaker.

MR SPEAKER

Onorab?

HON MIRENA SOURIS

Mersi Mr Speaker.  Mr Speaker, an vi larepons, eski Minis i kapab enform sa Lasanble si Minister i annan okenn statistik e kou lo sa bann kantite proze ki Minister fek mansyonnen?  Mersi.

MINISTER CHRISTIAN LIONNET

Mr Speaker, malerezman mon napa en sif lo kantite larzan ki al ek sa bann proze.  Be i ase en sonm sibstansyel.  Nou konnen konstriksyon dan pei i pa bon marse, me selman mon kapab provide sa figure avek Onorab.  Mersi Mr Speaker.

MR SPEAKER

Onorab Jacqueline.

HON SULTANNE JACQUELINE

Mersi Mr Speaker.  Mr Speaker, eski Minis i kapab enform sa Lasanble si son Minister i annan rikord bann devloper potansyel dan sak distrik, ki kapab envestir dan lakominote koman CSR e osi ki son Minister pe fer an se moman, pou ankouraz e promouvwar bann tel envestisman, pou ki an retour lakominote i santi zot pe benefisye avek sa bann envestisman, ki bann envestiser ki pe zer bann gro profi lo depan dimoun e osi fasilite dan bann kominote?  Mersi Mr Speaker.

MINISTER CHRISTIAN LIONNET

Mr Speaker, mon krwar Minister Finans i kapab provide premye lenformasyon in regards to bann biznesmenn dan distrik ki pe pey CSRSIB i kapab donn lenformasyon bann proze ki annan dan pipeline.  Bann potansyel devlopman ki pa ankor neseserman ganny aprouve me ki dan pipeline.  E tou fason sa i ganny fer an konsiltasyon avek Lotorite Distrik ek bann lezot partner ki an plas.

Mon oule repete Mr Speaker, ki Gouvernman letan nou annan en FDI dan pei, Gouvernman i aprouv sa bann FDI, bann Foreign Direct Investment pou nou dir, pour la senp rezon pou benefis pei.  E si mon pran par egzanp en ka Beau Vallon.  Beau Vallon nou konnen poudir i sa landrwa touristik.  Sa landrwa ki nou asosye plis ek touristik.  E mwan pou mwan ler mon vwar Beau Vallon, avek sa bann devlopman touris ki pe vini, mon krwar nou bezwen fer sir ki sa bann envestiser i envestir, en mannyer ki Beau Vallon i vin vreman sa bizou pour touris.  Ou konpran?  I bezwen envestir dan pavement, pli bon lalimyer, pli bon fasilite, en mannyer ki son touris wi, i enjoy, me Seselwa osi i santi poudir ar wi, Beau Vallon vreman i sa bizou touristik.  E mon santi mwan dan en landrwa kot lavi, kalite lavi i gou.  Bann fasilite i meyer.  E se sa ki mon vwar Beau Vallon, ki mannyer Beau Vallon pou bouz a lavan.  Pa zis Beau Vallon, lezot distrik osi.  Ler ou annan en lenvestisman kot bann devloper i antre, i met lenfrastriktir pou kapab amelyor lavi sa kominote.  Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble si i annan okenn plan, koman parti sa size CSR, pou demann bann biznes tir lanmin dan zalantour Anse Faure Pointe Larue, pou zot fer kontribisyon an relasyon ek reparasyon ou konpansasyon pour bann met lakaz ki pe ganny afekte ek aktivite tir lanmin dan sa rezyon?  Mersi Mr Speaker.

MINISTER CHRISTIAN LIONNET

Mr Speaker, CSR i tonm anba pervi Minister Finans.  I en kestyon ki Onorab i kapab poz avek Minister Finans.  Mersi Mr Speaker.

MR SPEAKER

Onorab Pillay.

HON SEBASTIEN PILLAY

Mersi Mr Speaker.  Bonzour Minis avek ou delegasyon.

Mr Speaker eski Minis i kapab dir nou si an relasyon avek sa ki nou pe dir lo CSR, si son Minister an partenarya avek Minister Finans, SIB e lezot bann partner kle ki involve dan FDI.  Si son Minister i annan plan etablir en information package pour bann envestiser ki vin envestir.  Dan ki bann domenn spesifik par egzanp, kot zot pe al envestir, ki Sesel oubyen sa kominote ti ava bezwen serten lasistans an sa ki konsern bann proze oubyen bann progranm?  Mersi Mr Speaker.

MINISTER CHRISTIAN LIONNET

Mr Speaker, mon krwar sizesyon Onorab i en bon sizesyon.  E mon ava demann mon Minister, ansanm ek SIB ek Minister Finans pou vwar ki mannyer nou kapab formil en keksoz, mannyer letan envestiser i vin Sesel, nou konnen kwa ki nou bezwen e negosyasyon i kapab konmanse from day 1.  Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.  Mr Speaker, eski Minis i kapab enform nou, dan sirkonstans kot i annan bann distrik kot petet napa gran devlopman lo sa nivo, eski i annan okenn negosyasyon ki pe ganny fer avek bann envestiser, pou met zot okouran lo bann posibilite ki egziste, pou envestir lo baz Corporate Responsibility dan sa bann distrik?  Mersi.

MINISTER CHRISTIAN LIONNET

Mr Speaker, mon konnen Les Mamelles i en distrik ki napa bokou potansyel pou devlopman, me selman Gouvernman i annan mekanizm an plas pou kapab kontinyen ed Les Mamelles.  Nou’n envestir en kantite dan Les Mamelles dan sa dernyen 5an, dan sa dernyen 10an.  E nou kontinyen envestir.  CSR tax i ganny kolekte par Minister Finans.  Letan i kolekte avek en biznes dan Beau Vallon, Minister Finans pa neseserman pran sa larzan met dan Beau Vallon.  I regarde kote pei i bezwen lenfrastriktir.  Nou bann Bidze Kapital ki nou envestir ladan, ki nou depans sepa konbyen milyon Roupi par lannen, pou benefis nou pep, pou amelyor lavi nou dimoun.  Ou vwar?  Sa i kapab ganny mete dan bann distrik parey Les Mamelles.  Mont Fleuri par kont kot napa bokou potansyel devlopman.

So, mon krwar nou bezwen kontinyen travay, rod bann mekanizm inovativ pou nou kapab kontinyen anmenn bann fasilite pou improve lavi nou bann kominote.  Mersi Mr Speaker.

MR SPEAKER

Bon, avek sa nou’n ariv a lafen Question Time.  Mon ava remersye Minis e ekskiz li parmi nou, pou pas sa bomaten avek nou.

(THE MINISTER AND HIS DELEGATION WERE EXCUSED FROM THE HOUSE)

MR SPEAKER

Bon.  Nou a kontinyen avek nou travay pou ozordi.  Nou annan  nou 2 Mosyon devan nou.  Premye Mosyon se par Onorab Sylvianne Valmont lo transformasyon SADCPF dan en Parlman Rezyonal.  Onorab.

HON SYLVIANNE VALMONT

Mersi Mr Speaker.  Mr Speaker, Mosyon ki mon pe table pour laprouvasyon Lasanble Nasyonal Sesel i lir comme swivan:-

Sa Mosyon pe demande ki nou Lasanble i siport tou demars ki pe ganny fer, pour ki SADCPF i transform koman en Parlman Rezyonal, pour bann pei sa rezyon.

Pou komanse Mr Speaker, mon ti a kontan dir ki i en loner e lafyerte pou mwan, pou met sa Mosyon devan sa Lasanble.  Dabor koman en madanm, Manm Parti o pouvwar e koman en Manm Lasanble ki’n ganny loportinite pou reprezant Parlman mon pei Sesel pour 2an, lo Komite Egzekitiv Southern Development Community Parliamentary  Forum ki nou dir SADCPF an 2013 e 2014.  I osi avek fyerte pou dir ki Cabinet in deza aprouv sa dokiman ki an sirkilasyon pou transformasyon SADC Parliamentary Forum tre resaman.  En dokiman kot mon’n osi partisipe pou prepare pandan rankont Egzekitif an Mars 2015.  Pou note, sa i en levidans kler kot nou pei e Dirizan i demontre political will e konsernen lo bann size enportan pour larezyon nou kominote.

Mr Speaker, SADCPF i en Lenstitisyon Parlmanter Rezyonal ki regroup Manm Parlman 14 pei an se moman, ki enkli Angola, Botswana, DRC, Lesotho, Malawi, Moris, Mozanbique, Namibia, Sesel, Sid Afrik, Swaziland, Tanzanie, Zambia e Zimbabwe.  Madagascar i ava byento finaliz son partisipasyon, pou fer an tou 15 pei larezyon.

I mandatwar, parey tou lezot Lorganizasyon, ki tou sa bann pei i kontribye finansyel-man, pour ki sa Lenstitisyon i reste operasyonnel.  E pou dir, Sekretarya permanan SADCPF i trouve an Windoc, Namibia, kot i osi ganny sipor Parlman e Gouvernman Namibia.

Mr Speaker, Secretariat SADCPF in ganny zere par en Komite Egzekitif, prezide par en Speaker ki ganny elekte a tour de rol tou le 2an par bann pei manm.  Pou le moman, se Speaker La Tanzanie, Onorab Anamakinda ki Prezidan.  Parlman nou pei Sesel i antisipe prezid sa Lorganizasyon an 2017.  En rezon pou nou rol aktiv pou osi advocate pour sa transformasyon.  Kot Secretariat i konsernen, i annan en Sekreter Zeneral permanan, avek bann staff neseser pou fonksyonnman sa Lenstitisyon.

SADCPF i osi depann bokou lo bann sponsors e Lorganizasyon Enternasyonal, pou kapab enplimant son bann progranm, ki vize ver Parlmanter e staff Parlman dan rezyon SADC.

Mr Speaker, sete an 1997 ki SADC Summit bann Head of State e Gouvernman ti aprouv Letablisman SADC Parliamentary Forum koman en Lenstitisyon, an a-kor avek Lartik 9/2 sa Trete.  E lobzektif prensipal ti comme swivan.  Mon a lir sa an angle.

‘Constitute a Parliamentary Consultative Assembly the ultimate goal, being the establishment of a Regional Parliamentary Framework for dialogue on issues of Regional interest and concern.’

Par kont Mr Speaker, transformasyon SADCPF koman en Parlman Rezyonal pandan tou sa letan, pa ti materyalize akoz i pa ti ganny laprouvasyon Summit Heads of State and Government ni an 2004, ni an 2011 akoz sa 4 rezon swivan e permet mwan ankor, quote parey dan dokiman ki an sirkilasyon i dir.

‘Member State should first aim for the consolidation of the Pan-African Parliament.

Member State should finalize the process of rationalization of the African Union, AU, Regional Economic Communities, RECS.

Member State should also endeavour to define the relationship between the RECS and the African Union more broadly, as this may help to better understand both the role and the scope of the proposed Regional Parliament.

And lastly, the idea of establishing a SADC Regional Parliament may be considered in the future.’

Mr Speaker, bokou demars e travay in seryezman ganny fer pandan sa dernyen 10 a 12an, pou asire ki sa bann pre-kondisyon parey mansyonnen avan, i ganny akonplir.  Prensipalman, Pan- African Parliament, byen koni koman PAP, in byen ganny   kon-so-li-de-re e i operasyonnel.  E nouvo protokol Constitutive Act, African Union, anliny avek PAP, ti ganny adopte an Zen 2014.  Pan-African Parliament ti ganny etablir an Mars 2004, anliny avek Lartik 17, African Union Constitutive Act koman 1 parmi 9 organ dan trete pou etablir Kominote Ekonomik Afriken, ki ti ganny sinyen an Abuja, Nigeria an 1991.

Mr Speaker, letablisman PAP i baze lo en vizyon pou arive donn pep Afriken e zot bann Lorganizasyon grass roots, en platform komen, pour ki zot pli angaze dan bann desizyon e partisip pli byen dan bann diskisyon, bann problenm e bann defi ki zot fer fas avek lo Kontinan Lafrik.  Sa nouvo Protokol PAP i endike ki bann Parlman Rezyonal i bann blocks lo ki PAP i antre.

I evidan, ki prosedir pou rasyonaliz relasyon ant African Union AU e Regional Economic Communities koni koman RECS, in fer bokou progre.  Sa i fer e ki i aprezan moman apropriye e anliny avek Lartik 9(2) sa Trete pou etablir SADCPF koman en Parlman Rezyonal.

Mr Speaker, dokiman konsernan transformasyon SADCPF in fer resorti klerman ki enn bann rezon prensipal pou annan en Parlman rezyonal dan SADC, se zisteman akoz i annan en mank sa lebra Lezislatif parmi sa 3.  Setadir Egzekitif, Zidisyer ek Lezislatif.

An plis ki sa, nou osi konnen ki sel rezyon Lafrik ki napa en Parlman, se rezyon SADC.

Mr Speaker, i kler ki pou arive efektivman enplimant SADC common agenda e osi kapab ratifye e Nasyonalman adopte bann Protokol, avek bi akseler lentegrasyon and growth, i neseser annan sa Brans Lezislatif SADC ki pou efektivman zwe sa rol lo nivo Nasyonal e rezyonal.  An plis ki sa, i evidan ki lemonn ozordi, avek globalizasyon, i fer ki bann Polisi Nasyonal i anliny ou de-koul dan bann Polisi rezyonal, kontinantal oubyen menm enternasyonal.  Par egzanp ler nou koz lo size tel ki Climate Change, oubyen menm Lekonomi Ble or Ocean Economy, pou mansyonn enn, de.  Bann tel size e lezot ankor i bann laspe ou fakter enportan ki ava ganny anmennen pou diskite par bann Parlmanter dan Parlman Rezyonal SADC lo en nivo advisory e oversight.

Mr Speaker, SADCPF i deza en Lenstitisyon ki annan plizyer lannen leksperyans koman en platform rezyonal.  E in deza komans organiz e ogmant son kapasite pou operate koman en vre Parlman Rezyonal.  Bann meeting Egzekitif e bann Sesyon Plenyer sa detrwa lannen presedan, in kontinyelman diskite e prepar bann dokiman enportan e apropriye pour transformasyon sa Lenstitisyon, tel ki Rules of Procedure, Konstitisyon pour Parlman, 2 dokiman primordyal ki’n osi ganny sirkile kot bann Parlman Nasyonal pou zot input e komanter.

Tou sa bann dokiman Mr Speaker, in osi ganny soumet dan bann Plenary Session ki fer normalman 2 fwa par an e ki regroup delegasyon Parlmanter tou bann pei Manm, enkli bann Speakers presizeman.  A sa pwen, i enportan pou mansyonnen ki malgre ki sa transformasyon pa ankor ofisyelman ganny laprouvasyon par Some bann Sef Deta e Gouvernman comme fodre SADCPF, pe deza fonksyonn parey en Parlman, pou evalye e determin son kapasite e resours neseser pour sa platform.  Sa ti komans an Zen 2014 Moris, anba tenm SADC Regional Parliament.  The Future Is Now.

Mr Speaker, en lot demars enportan ki SADCPF in osi akonplir sa lannen, se arive siny en Memorandum enportan avek SADC Secretariat, pou etablir en relasyon pli etrwat ant sa 2 Lorganizasyon.  Kan sa transformasyon i ava finalman materyalize, SADC Regional Parliament pou vin en Lenstitisyon SADC, avek relasyon formel e Legal anver lezot Lenstitisyon relevan SADC.  I osi enportan pou fer resorti ki SADC Regional Parliament, tout an konformite avek bann norms, pou osi respekte Souverennte bann  Parlman Nasyonal.

Mr Speaker, pou arive pli byen simant e armoniz son relasyon formel avek SADC, SADECPF in fer sir ki son bann Komite i azour e anliny avek bann progranm SADC.  Sa bann Komite ki mon a nonmen:- Democratization Governance and Human Rights, Human and Social Development and Special Programs, Gender Equality Women Advancement and Youth Development, Trade Industry, Finance and Integration, Food, Agriculture, Natural Resources and Infrastructure.

I osi enportan pou note ki SADC Regional Women’s Parliamentary Cocus, RWPC, i osi en enn bann Komite ki zwenn e aktivman partisip dan bann sesyon plenyer ki pe fer par SADCPF.  Pou note, sa bann diferan Komite i zwenn anviron 3 ou 4 fwa pandan lannen, avan bann Sesyon Plenyer kot bann delege pei reprezantan, i diskit lo bann konsern ou problenm pertinan dan larezyon, ki zot rapor i enkli bann rezolisyon, i ganny table dan bann Sesyon Plenyer pour laprouvasyon.  Byen evidan, apre sa bann Sesyon, rapor i ganny soumet dan bann pei respektif, pou lenformasyon e aksyon neseser kan fodre.

I osi tre enportan pou note Mr Speaker, ki en Parlman rezyonal pour SADC, parey dan lezot rezyon, tel ki East African Legislative Assembly, EALA, Economic Community of Western African State Parliamentary Assembly ECOWAS, Economic and Monetary Community of Central Africa Parliament, IMCCA, i deza bann lenstans oubyen bann Parlman ki pe vreman fonksyonnen lo Kontinan, pou dir sa Parlman ki pou ganny formen, pou anmenn plizyer benefis pour sa rezyon, kot i ava permet bann Manm Parlman deliber lo bann size, diskit bann Polisi, agree lo bann rezolisyon e menm diskit bann Lalwa ki annan lenpak lo nivo pei, larezyon e zot Kominote.

An konklizyon Mr Speaker, en Parlman rezyonal pou non selman en platform apropriye pour bann Parlmanter SADC ki pou ede anmenn plis partisipasyon dan larezyon, me osi en veikil ki pou permet bann pei Manm mye konpran bann konsern, problenm oubyen defi sa bann pei larezyon, kot ansanm zot ava kapab met lanfaz lo bann Polisi ki primordyal dan bann pei respektif .  E osi enplimant bann progranm e aktivite SADC.  E koman bann Parlmanter, sa Lenstitisyon Lezislatif rezyonal pou san dout osi ede devlop konesans, konpetans e leksperyans bann Manm Parlman dan larezyon.

Mon pou demann tou Manm Parlman pou siport sa Mosyon.  Mersi Mr Speaker.

MR SPEAKER

Okenn ki segonde?  Ok.  Ou ti oule entervenir Onorab?

HON CHARLES DECOMMARMOND

Mr Speaker, mon segonn sa Mosyon.  Mon oule dir 2 pti mo.

Mersi Mr Speaker.  Mr Speaker, sa Mosyon ki devan nou, en  Mosyon enportan pou siport demars pou fer ki SADCPF i vin en Parlman rezyonal pour sa rezyon SADC la.

Si ou kalkile Mr Speaker, en bon pe pwen in ganny dir par mover Mosyon me enn:- sel rezyon plito.  Sel rezyon Lafrik ki napa en Parlman, se rezyon SADC.  Lezot bann rezyon ki deza egziste i deza annan son Parlman.

E prezan en lot pwen ou bezwen mazinen se ki SADC letan in formen la, li i annan son kote Egzekitif i egziste.  I deza formalize.  Kote Zidisyer.  Lof fwa nou fek tande la, i annan menm serten Seselwa ki’n mont koman Ziz laba dan SADC.  Zidisyer, son kote Zidisyer i organize.  COMESA, SADC, whatever.  Be li osi lo kote Zidisyer i deza organize, SADC.  Sel bout ki pa ankor  organize se son Parlman.  Se la kot nou pe demann pou formaliz e legaliz li.

Lobzektif prensipal etablir en tel foronm Parlmanter konmsi, en tel Parlman rezyonal se pou kree en body, en organ, avek partisipasyon, sipor e lenfliyans sa bann Manm Parlman e bann Parlman, plito bann Parlman sa rezyon SADC la, ki konpri sa 15 pei ki’n mansyonnen, pour zot kapab konsilte e etablir en framework pou kapab annan dyalog e lenfliyans lo bann size, bann lide, bann problenm.  Bann zafer ki annan, ki enfliyans nou rezyon.  Sa rezyon SADC e bann konsern ki annan ki enflyans sa rezyon dan Lafrik la, ki apel rezyon SADC.

I enportan fer sorti osi ki sa konsep la, sa lide, in deza avans en gran zistans, preske son pwen final.  Bann pei Manm in dakor avek konsep lo zot Komite, lo zot Gouvernman dan zot diferan Gouvernman, in aprouve lide.  Tou sa bann demars in ganny fer.  Prezan, i reste lenstans pli o dan SADC li menm, savedir SADC Summit of Head of States and Government, pou zot kapab pran sa desizyon final pou etablir sa.  E zot pe al zwenn byento la e i enportan ki sa i ganny met devan e i pe ganny met devan par SADCPF dan sa Summit Head of States. E prezan, i pa pou kapab ganny met devan, si Parlman li menm pa’n ratifye sa.  Pa’n diskite, dakor lo la.  Sa rezon sa Mosyon in vin devan nou Parlman, nou dir nou osi nou dakor pou sa keksoz ganny fer.

Mr Speaker, sa demars i en demars enportan.  Konmsi ou poz ou lekor kestyon, ki rol konmsi.  Akfer i annan en tel zafer la.  En tel Parlman pour nou rezyon SADC.  Eski i vo lapenn, i byen.  Pa zis en zafer pou fer koumsanmenm.  konmsi napa okenn valer.  Mon krwar ki i enportan fer resorti ki nou pep, nou dimoun i konpran.  Nou pei i konpran poudir i annan en kantite valer avek en tel Parlman.  En kantite rol sa Parlman i kapab zwe.  I annan rol advisory .  I kapab advise Gouvernman advise bann diferan lobby group.  I kapab monitor. Dan son rol over sight, i kapab osi pe monitor bann diferan e evalye osi.  Evalye e raporte bann diferan Protokol oubyen Trete rezyonal, menm  enternasyonal, ki ganny aksepte dan larezyon.  I annan en rol pou kordinen, pou fasilit sa bann keksoz la.  I annan en rol enportan, en rol advocacy.  Pous lo bann konsern, lo bann konsep, bann lide, lo bann konsern nou rezyon.  E sa en rol tre, tre enportan akoz en kantite keksoz pe ganny fer dan larezyon e ki si konmsi personn pa enterese avek, i mor lanmenm.

Mon a donn en legzanp konkret.  Par egzanp kestyon ‘Zonm o Sant Devlopman.’  Sa concept, menm ki i komanse par Sesel, i enn ki’n komans sa, me ozordi i aksepte larezyon, pour ki tou devlopman ki ganny fer, Zonm i devret ganny mete o sant devlopman.  E en tel forum, en tel Parlman i ede pou pouse pou fer sir ki larezyon i adopte en tel bon keksoz.

En lot konsern se relasyon or zer-ans, zer-ans resours natirel dan en pei, pou fer ki resours natirel en pei i ganny eksplwate pour benefis  pep sa pei.  E zenerasyon a venir dan son fitir zenerasyon.

Par egzanp si nou dekouver delwil demen, si konmsi par 4, 5 dimoun i pran sa delwil i tay avek, personn pa vwar, me ki leksplwatasyon sa delwil la, i vin pour zenerasyon.  Pour sa pep e son zenerasyon a lavenir.  Sa i konsern serye ki zot in menm devlop en dokiman ki apel barometer.  Byento Sesel nou pou bezwen fer training ladan, pou fer sir ki konmsi dan larezyon an antye la, i annan en sel fason, en sel konsep zer sa bann resours natirel.   E zot pe devlop en dokiman ki konmsi permet en zer-ans pli ekitab, pli byen, sa kestyon resours natirel parey mon pe dir.  Akoz ki nou pe remarke la?  Ozordi i annan en kantite keksoz ki pase dan larezyon ki pa neseserman dan benefis lepep.  I annan kantite dimoun en kantite resours natirel par egzanp, ou vwar 2, 3 dimoun ki benefisye.  En senp pti group ki benefisye.  Lepep i reste mizer, dan bann pei SADC la.  Zot ris, ris.  En kantite ris, selman pep i mizer.  Savedir, pa pou kapab kontinyen koumsa.

Se sa rezon ki ou vwar poudir en tel Parlman la i kapab pouse pou sa bann keksoz ganny fer korekteman.  Savedir ki i advocate sa bann keksoz e an menm tan, i zwe en rol oversight lo lenplimantasyon bann protokol SADC, bann Trete rezyonal e enternasyonal ki pase dan nou rezyon, osi i en kestyon lobby.  I annan en rol pou lobby.  Lobby pou fer sir ki i annan lape dan larezyon.  Pou rezourd bann konfli, bann problenm.

Mon a donn ou en legzanp konkret.  Si sa Parlman ti deza egziste.  Par egzanp sa konfli, sa problenm Madagascar, ti’n kapab ganny tackle dan en lot fason.  Ti’n kapab en rol sa Parlman pou zwe ladan.  Vwar?  So, i annan en benefis enportan letan nou legaliz, nou formaliz e legaliz sa Parlman, o pwendvi SADC.  Sa rol i deza pe preski zwe la dan SADCPF.  Selman ou bezwen legaliz li e formaliz li, pour ki son rol i vin pli pertinan, pli for, pli performan e pli vre nou kapab dir.

An menm tan, en lot son rol en tel Parlman, se pou ede pou fasilit ratifikasyon e domestikasyon, lenplimantasyon si ou oule, bann Protokol parey mon ti pe dir SADC e bann Trete rezyonal e enternasyonal.  Nou annan nou bann trete ki nou fer parfwa, ouswa bann Protokol SADC dan relasyon lekonomi ou entegrasyon rezyonal e tou.

Serten pei zis i vini i ratifye, apre nanryen pa ganny fer.  Lenplimantasyon sa konteni sa bann Protokol la, pa ganny fer ditou.  En tel Parlman i pou pouse, pou kapab fer sir ki sa ki ou ratifye la, ou enplimante.  Sa ki ou tonm dakor pou fer la, ou fer.  Ou pa kapab ou tonm dakor wi, ou’n sinyen, me apre nanryen pa ganny fer.  Nou vwar tro bokou sa dan larezyon e dan serten pei.

So, en tel Parlman i kapab pouse pour ki keksoz i ganny fer pli byen.  Akoz letan nu pe dir sa la tou sa ki ganny fer korekteman dan en pei i benefisye Lepep, ‘Zonm o sant Devlopman.’  Sa konsern.

Osi, en tel Parlman i pou angaz, savedir en lot son rol i angaz plis sa bann Parlman Nasyonal dann sa demars ki mon pe eksplike la.  Dan tou sa bann Komite ki taler in ganny mansyonnen sa.  Se Komite, zot rol i enportan.  E sa Parlman i pouse pou fer sir ki sa bann Komite i marse.  E sa ki zot deside dan bann Komite, i al ganny enplimante dan Lakour, dan Parlman, dan pei sa rezyon respektif.  Dan sak sa bann pei.

Par egzanp, nou annan konsern avek bann group vilnerab.  SADC ozordi pe dir ki dan bann Manm SADC, bann group vilnerab pa pe ganny gete byen dan serten sa bann pei.  Sesel i sanse li, akoz li in al gran zistans dan lakonplisman bann Millennium  Development Goals. Ou vwar poudir dan rezyon SADC, pa tou pei ki pe attend sa bann lobzektif.  Pourtan in dir, nou bezwen fer travay dan sa direksyon.  En tel Parlman i pouse pou sa bann keksoz ganny realize, en fason ki lepep a lafen dizour i benefisye.  So, pouse pour sa bann pei SADC, si ou oule, partisip plis dan sa bann aktivite e progranm ki SADC i fer.  En kantite progranm, en kantite aktivite ki ganny fer me selman pa toultan bann pei i partisipe ouswa i travay dan sa bann direksyon.

En tel Parlman en lot son rol ankor ki i kapab fer se mobiliz lavwa kolektiv larezyon lo bann size komen, lo bann size enportan, lo bann size, lo bann keksoz, bann konsern, bann problenm, bann issues ki konsern larezyon.  E sa nou vwar.  Plizyer rezyon lemonn i fer sa.  Plizyer rezyon dan Lafrik ki pe deza fer sa.  So, nou pe dir ki rezyon SADC osi i bezwen al dan sa direksyon.

En lot se obzerv bann Eleksyon.  En tel Parlman i ava annan en rol pli pertinan dan obzervasyon bann Eleksyon ki ganny fer dan sa bann pei Manm SADC, pou fer sir ki zot promot, protez bann Lenstitisyon Demokratik e bon ze-rans, bon Gouvernans dan bann pei respektif.  Savedir, i bezwen promot la demokrasi e si ou oule Human Rights e tou sa bann zafer ki asosye avek la, ki konsern bokou, nou tou.  E nou vwar poudir i annan plizyer pei li i pa pe tro obzerve, i pa pe tro fer.  Be en tel Parlman i pouse e i partisipe atraver bann progranm SADC, pou realiz sa bann keksoz.

En lot issue ki sa Parlman i pou pouse pou realize se sa problenm HIV/AIDS.  Sa osi i en gro konsern ki afekte nou manpower.  I afekte lafors travay rezyon SADC.  Ou vwar.  E letan lafors travay i ganny afekte en kantite, i afekte lekonomi.  I afekte rannman e i afekte osi larises, devlopman larises sa bann pei.  Alors, sa osi i en konsern ki en tel Parlman i kapab pouse pou fer sir ki sa issue i ganny gete korekteman e ki nou travay ver rediksyon sa problenm HIV/SIDA.

E vwala, mon krwar ki mon’n tous en kantite pwen Mr Speaker.  Sa bann keksoz ki nou pe dir, i bann keksoz  ki bon e ki nou krwar poudir ki si sa konsep, sa lide Parlman rezyonal ki nou pe koze la, nou aprouve nou dan nou Parlman.  Sa Mosyon nou aprouv li.  I vedir ki SADC i ava kapab al pli devan

Ou vwar, i annan bann dernyen keksoz mon kapab petet osi mansyonnen.  I annan bann Lalwa ki tonm dakor pou fer dan larezyon pou enhance, pou fer avanse sa bann diferan issues ki nou pe koze.  Be sa bann Lalwa, pa tou pei enn ler ki ale pou al fer kot li.  Nou’n tonm dakor pou fer.  Pa fer.  En tel Parlman i kapab pouse e met en pe presyon dan sa bann diferan pei, pou dir be ou bezwen koz ek ou Parlman.  Ou pa kapab vin dan meeting sa voyaz la, ou pa’n fer sa zafer.  Ou bezwen al fer ou osi laba kot ou.  So, i ava pouse ki nou rezyon i ava en pti pe parey dan tou bann pei.  Konmsi i ava annan:- I pa ava copy cat me selman bann pwen enportan, bann keksoz demars enportan pou konsern nou rezyon, sirtou ki konsern zentere, benefis nou pep, i ava ganny fer korekteman.  Savedir bann Regional Modern Laws parey nou dir .

Vwala, avek sa mon krwar ki nou’n dir ase e ki sa Mosyon i en bon Mosyon.  Lezot dimoun i ava dir ankor lezot keksoz .  E ki nou devret ale dan sa direksyon e nou bezwen aprouv sa avan ki Summit la i zwenn tre byento.

Mersi bokou Mr Speaker.  Mon demann tou dimoun pou siport sa Mosyon.  Mersi.

MR SPEAKER

Ok.  zis en leklersisman Onorab.  Kwa sa zerans?

HON CHARLES DE COMMARMOND

Zerans, zesyon .…

(Interruption)

MR SPEAKER

Anr, zesyon.  Zesyon.  Non be akoz ou pe entrodwir en mo nou bezwen ….

(Interruption)

HON CHARLES DECOMMARMOND

Management.  Management .…

MR SPEAKER

Ou pe entrodwir en nou vo mo, nou bezwen get si i Parliamentary.  Zesyon.

(Laughter)

HON CHARLES DECOMMARMOND

Mr Speaker, i Parliamentary sa.

MR SPEAKER

Zerans.

HON CHARLES DECOMMARMOND

Wi i Parliamentary.

MR SPEAKER

Ok.

HON CHARLES DE COMMARMOND

Napa nanryen kontradiktwar ouswa mal.

MR SPEAKER

Petet nou a demann Onorab Jeannevole si sa i bon.  Li i en Teacher.

(Laughter)

HON BEGGITA JEANNEVOLE

An Franse wi, me pa an Creole.

MR SPEAKER

Pa an Kreol. Ok.  Mersi.  Bye.  Nou adjourn ziska 11er 05.

BREAK

MR SPEAKER

Lespri pe ale.  Presyon partou.

Ok. Nou ava kontinyen avek deba pou ozordi.  Lot lo lalis ki mon annan se Onorab Souris.

HON MIRENA SOURIS

Mersi Mr Speaker.  Mr Speaker, Mosyon table par  Onorab Sylvianne Valmont, pe demande ki nou Lasanble po siport tou demars ki pe ganny fer pour ki SADCPF i transform koman en Parlman pour bann pei dan sa rezyon.

Sa Lorganizasyon formen an 1997 i reprezant plis ki  3500 Manm Parlmanter elekte dan rezyon SADC.  E ozordi, nou dan sa Lasanble, pe zwenn avek larestan 13 pei Manm SADC, pou siport tou demars pour ki sa Lorganizasyon i transform koman en Parlman.

Mr Speaker, koman en Lorganizasyon ki’n egziste pandan 18an, i ti pe mentenir en rol konsiltativ e konsey dan rezyon SADC, ek bi pou promouvwar dyalog ant Parman rezyonal e enternasyonal, korporasyon e osi lentegrasyon.

Mr Speaker, Mosyon pe demande ki SADC i vin en Parlman Rezyonal, pour rezon akoz ki sa Lorganizasyon pe fonksyonn avek zis 2 lebra Gouvernman.  Setadir, Egzekitif ki baze an Gaberon e SADC Tribinal ki baze an Namibi, ki an se moman i an sispansyon.

Sa trwazyenm lebra Lezislatif i manke.  E se pour sa ki pou fer SADC Parlman Rezyonal vin konplet.

Mr Speaker, alor ki rol Parlman SADCPF pou zwe letan i vin en Parlman Rezyonal?  Wi, son rol se pou ede fasilit ratifikasyon e domestikasyon dan bann lenplimantasyon dan bann Protokol SADC.  I byen pou note ki ozordi, ki parmi sa 33 Protokol, apepre zis en tyer ki pe ganny enplimante.  Merit sa Mosyon alor i kler akoz se sa ki pou ede enplimant sa bann Protokol dan son totalite dan rezyon.

Mr Speaker, Parlman Rezyonal SADCPF pou a port bokou an term benefis, akoz i pou ede promouvwar kapasite SADC, pou enplimant bann polisi e progranm.  Koman en Parlman rezyonal, SADCPF pou osi ede pou met Lalwa rezyonal ki annan pou fer avek bann size, tel parey lanvironnman, mouvman dimoun, trade, egalite de zanr e transpor eksetera.

Sesel koman en Manm SADCPF nou’n osi fyer akoz Sesel ti osi siport kreasyon Parlman rezyonal SADCPF par ou menm Mr Speaker, atraver sa meeting ki ou ti asiste ant 12 o 13 Avril 2012, Moris.

SADC pandan son legzistans, in met a son dispozisyon, lantrennman pour staff e menm Manm Parlman nou Lenstitisyon.

Mr Speaker, en tel Parlman Rezyonal pou fer ki bann Parlmanter Rezyonal pou annan en platform pou diskit bann problenm pertinan ki afekte bann pei SADC.

Dezyenmman, i pou ede ranforsi Bon Gouvernans dan bann pei SADC.  Sa pou osi ede ki bann Manm pou egzers sa rol oversight dan Gouvernman, sirtou dan bann pei SADC.  Sa i a fer ki zot Gouvernman pou vin plis responsab e accountable.

Mr Speaker, Parlman PAN African PAP, pandan son 11an legzistans, in demontre son lenpak dan bann pei Linyon Afriken.  E mon napa okenn dout ki Parlman rezyonal pou osi fer menm lenpak pozitiv dan bann pei rezyon SADC.

Mr Speaker, avek sa 2 pti mo, mon pou siport sa Mosyon e mon pou demann mon bann koleg pou fer parey .  Mersi.

MR SPEAKER

Onorab Pillay.

HON SEBASTIEN PILLAY

Mersi Mr Speaker.  Mr Speaker, si nou regard sa ki pe arive ozordi otour nou lo novo Lafrik, nou kapab konpran ki i annan en push pour ki i annan plis lentegrasyon rezyonal.  E rol ki sa bann blok rezyonal i zwe, sirtou dan asir stabilite, sekirite e lepanouisman ekonomik.

Mr Speaker, mon dir sa akoz si nou tir leson lo lezot groupman rezyonal oubyen enter-rezyonal ki egziste dan lemonn, nou kapab konpran ki benefis ki sa in anmennen pour sa bann pei ki’n form sa bann groupman rezyonal.  Mon pe koz primordyal-man par egzanp ler nou regard dan Northern Hemiphere, sirtou bann group ki enkorpor bann pei Azyann, bann group ki enkorpor bann pei Eropeen.  Nou vwar poudir sa lentegrasyon in anmenn en kantite retonbe pozitif.  E sirtou retonbe an sa ki konsern devlopman, inovasyon lepanouisman ekonomik.

Mr Speaker, formasyon en Parlman rezyonal SADC i al dan sa menm laliny e mon krwar i osi siport misyon ki Sesel in met devan li, pour ki nou zwe en rol pli enportan, en rol pli avangard dan sa ki pe pase dan larezyon.

Mr Speaker, si nou regard listwar nou pei, the recent history nou pei, nou kapab apresye zefor ki’n ganny mete, annan en Polisi diplomasi aktif ki’n anmenn en kantite retonbe pozitif pou nou pei.  E sa ki osi fer mwan tre, tre kontan se ki mon’n vwar osi ki Parlman pandan sa bann dernyen lannen, in osi zwe en rol tre aktiv an tou sa ki nou kapab apel en Parliamentary Democracy, pou asire ki Parlman, nou Parlman Sesel i pa zis en Parlman ki relate avek bann issues Lezislasyon ki zwe son rol scrutiny isi Sesel, me osi involve dan bann proze, dan bann progranm ki arive lo nivo enternasyonal.  E sa i fer ki i raise profil pa zis nou Parlman me i raise profil nou pei.

Esansyelman, nou bi avek tu sa bann demars, se pou asire ki nou pei i ganny regarde dan en fason pozitiv par kominote enternasyonal.  E sa i donn nou en sans pli fyer dan lafason ki nou pei pe avanse e i osi ed zenerasyon fitir pou konpran ki lenportans ki nou pei i annan, pa zis koman en Nasyon ensiler isi Sesel, me osi koman en Nasyon e rol ki nou zwe avek lezot pei dan larezyon.

Mr Speaker, nou’n kapab apresye zefor ki Sesel in fer, sirtou dan medye sa kriz ki’n arive an Madagascar.  Nou’n kapab apresye zefor ki Sesel in fer dan promouvwar e zwe en rol tre avan gardance an sa ki konsern sanzman klimatik.  Dayer, Lasanble pou ozordi dan son Sesyon, pe konsider ratifikasyon enn son Protokol kle dan sa laliny.

Alors, mon vwar si nou form par en group lentegrasyon rezyonal e si nou annan en Parlman rezyonal, i pou posib pou nou Parlman zwe sa rol from en pwennvi Parlmanter.  E sa i ava ed nou pou pli apresye lenportans annan sa enteraksyon ant diferan Parlman lo nivo Lafrik.  E sa i pou osi anmenn li lo en nivo pli gran, lo nivo enternasyonal.

Mr Speaker, dezormen par egzanp ozordi ler nou regard bann international best practices, ou kapab apresye ki bann Lalwa ki en pei i pase i souvandfwa ganny enflianse par bann Lalwa ki lezot pei in pase, oubyen serten leson i ganny tire par bann Lalwa ki lezot pei in pase.

Lavantaz annan en Parlman rezyonal sirtou an se ki konsern rezyon SADC, i pou fer nou vin pli pre avek bann pei ki form par rezyon n.  I pou fer nou konpran pli byen bann diferan sirkonstans ki egziste dan sa bann pei.  E pou nou osi tir serten leson tre enportan dan lafason ki nou pou fer lenplimantasyon bann diferan kad Legal oubyen bann diferan Protokol ki nou bezwen osi ratifye, pou asire ki pei i kontinyen bouz de lavan.

E se dan sa loptik, se dan sa laliny ki mon vwar lenportans annan en Parlman rezyonal pour SADC.

E en lot pwen ki mou oule fer sorti mon krwar sa nou pep i bezwen apresye.  Si nou regard ozordi lo lasenn enternasyonal, a nenport ki moman ki en pei i regard Sesel, i kapab asosye nou avek en azanda ki nou pei in ede pouse.  E mon krwar sa i tre, tre trez enportan pou nou koman en pei.  Parey nou tou nou konnen, nou en pti pei, nou napa en gran popilasyon.  Nou napa sa gran kantite dimoun ki kapab fer nou zwe plis lenpak.  Me esansyelman, dan lafason ki nou’n apros sa size lentegrasyon rezyonal, dan lafason ki nou’n apros sa size diplomasi, in fer nou, si nou kapab servi sa term angle, punch way above nou weight an sa ki konsern sa ki pe pase dan larezyon, lo nivo Kontinan e lo nivo enternasyonal.

Mr Speaker, mon krwar i enportan osi pou felisit rol ki nou Parlman in zwe pandan sa bann dernyen lannen, pou asire ki nou kontinyen konplemant zefor ki Egzekitif pe fer dan son polisi diplomasi aktiv, pou osi annan sa sipor, sa kad sipor Lezislatif so to speak, pour ki tou keksoz i mars an tan derm e non pa enn in kit lot sitan deryer, ki apre nou bezwen play catching up.

E se dan sa lanvergir ki nou vwar ozordi nou Parlman pe konsider en tel Mosyon, kot nou pe koz lo annan en Parlman rezyonal pour rezyon SADC.

Mr Speaker, koman en Manm Parlman PAN Afriken, mon kapab dir ki bokou fwa nou pa apresye landrwa kot nou pei ozordi i sitye and w’ere on the ………. of something which is extremely good pou nou pei e ki nou bezwen fer tou zefor posib pou nou kontinyen siport sa demars, pou nou kontinyen avans nou pei pli devan.  E sa mon krwar i pou donn loportinite nou bann  profesyonnel par egzanp, pou zot al eksperyans oubyen ganny akse avek bann loportinite dan bann pei larezyon, ki petet nou pa ti pe vwar i egziste.  E sa i en pwen tre trez enportan Mr Speaker, dan le sans ki sa bann profesyonnel pou pli tar osi ede avek growth ki nou pei i kapab annan.

Se pour sa rezon Mr Speaker, ki mwan mon pou donn mon sipor pour en tel Mosyon e mon pou demann tou lezot Manm pou fer parey osi.  Mersi.

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker.  Mr Speaker mon pa pou long me mon ti a kontan a port mon sipor a sa Mosyon e fer Lasanble Nasyonal konnen ki Gouvernman Sesel, Egzekitiv i vreman an faver letablisman en Parlman pour rezyon SADC.

Mr Speaker, nou pe koz lo Parlman.  Sa Mosyon i lo Parlman.  I konsern nou, i konsern Lasanble Nasyonal Sesel e i konsern travay ki bann Parlmanter i fer, non selman dan Sesel, me osi dan larezyon e osi dan lemonn.

Mon lentervansyon Mr Speaker, i vize plito lo rekonesans travay Parlman atraver dan lemonn, dan tou bann group ki’n ganny formen atraver lemonn.  I pe vin bokou plis ozordi ki zanmen.  E mon krwar Onorab De Commarmond in fer sorti sa pwen ki tou Foronm ki ou ale, tou bann gran blok enternasyonal, tou bann diskisyon ki ganny fer ozordi, focus i vreman vize lo be ki ou Parlman pe fer?  Ki Parlman i kapab fer?  Eski Parlman in ganny konsilte?  Eski ou Parlman in annan en say ladan?  Eski ou Parlman in ratifye?  Eski ou Parlman in vote?

Sa i alors tandans enternasyonal.  E mon krwar i en bon tandans akoz Parlman se en reprezantan Lepep.  Se nou ki reprezant tou nou bann dimoun dan  nou bann constituencies.  E nou bezwen alors annan lavwa nou pep ler nou pran en desizyon lokal e ler nou pran en desizyon enternasyonal.

Ler nou al en Konferans deor oubyen ler nou al reprezant nou Parlman dan en Konferans deor, nou pe efektivman reprezant nou pep.  Nou Nasyon Seselwa.  Nou pei, dan sa bann groupman ki ganny fer atraver lemonn.

Alors, mon krwar i enportan ki nou vwar letablisman sa Lasanble, sa Parlman dan rezyon SADC koman nou travay.  Koman travay Lasanble Nasyonal.  E nou bezwen donn en koudmen pou fer sir i ganny etablir.

I vreman sad, Mr Speaker ler mon’n ekout mover Mosyon, pou realize The Parliamentary Forum ki ozordi i zis en Forum, i dernyen brans dan Gouvernans pou ganny etablir anba SADC.  E si ou oule, en kantite fwa i leka kot Zidisyer i ed en kantite pei.  Mon pa pe koz zis lo Sesel.  Zidisyer i ganny etablir and then Egzekitif .  E apre zot dir, be ki arive avek Parlman?

E sa i leka lo kote SADCPF.  Se pour tan Parlmanter se bann dimoun ki reprezant lavwa lepep.  Ki reprezant direkteman bann constinuants dan bann distrik.

Alors Mr Speaker, i fer nou tre fyer pou nou Lasanble Nasyonal vot lo sa Mosyon.  I fer nou tre fyer ki nou Gouvernman pe siport letablisman Parlman dan SADCPF.  I montre ki nou Gouvernman, sa Gouvernman ki o pouvwar, Gouvernman Parti Lepep i atas en kantite lenportans lo partisipasyon aktif bann Parlmanter Seselwa, pa zis dan nou Lasanble, pa zis dan rezyon me lo nivo enternasyonal.

Mr Speaker, mon dir sa akoz ler nou regard travay ki senkyenm Lasanble in fer dan devlopman nou pei e i enkrwayab kantite rekonesans ki nou Parlman i gannyen atraver pa zis SADCPF, me atraver bokou foronm enternasyonal.  Ozordi tou bann gran, gran blok WTO, IPU, Commonwealth. Tou sa bann gran blok i rod Sesel e rod pwendvi Sesel ler i annan en Konferans.  E nou tou ki la ki’n al en Konferans deor, nou konnen sa i leka.  Sesel i toultan ganny demande pou dir be bon, dir 2 pti mo.

Sa Mr Speaker, i travay ki anba ou direksyon, senkyenm Lasanble Nasyonal in fer e i bezwen ganny met lo rikord.  Nou pep i bezwen konnen ki travay ki sa Lasanble i fer, i pa zis isi dan sa Lasanble.  I pa zis dan Question Time.  I pa zis ler nou press a Minister for action oubyen for an answer dan Lasanble.  I pa zis ler nou lager.  Nou  kontinyen lalit, nou kontinyen lager pou benefis pep Seselwa isi Sesel.  Me nou kontinyen fer li pou benefis pep Seselwa, pou benefis Sesel dan larezyon, dan lemonn antye.

Mr Speaker, nou Lasanble Nasyonal nou annan en kantite pou ofer lemonn.  I kler sa.  Ler par egzanp nou get reprezantasyon bann Madanm dan Parlman Sesel, sa i en legzanp pour SADC e i en legzanp pour lemonn antye.  E nou bezwen kontinyelman sak fwa nou ale, nou repet nou success story.  Nou dir, be sa reprezantasyon Madanm dan Lasanble Nasyonal i krwayans Gouvernman Parti Lepep dan Leadership fanm.  I krwayans Gouvernman Parti Lepep ki tou le Eleksyon:- e la zot in vwar nou bann kandida.  Tou le Eleksyon, i field fanm.  Ok. Dan son bann distrik partou lo Mahe.  Sesel napa sa zistwar met en madanm dan en distrik kot i pou gannyen, kot i pa pou gannyen, eksetera.  Sesel napa sa zistwar affirmative action.  Sesel napa sa zistwar minority groups an sa ki konsern madanm, oubyen disadvantaged groups. Sesel i annan en success story kot fanm i ale, i al debout dan Eleksyon.  Fanm Lepep i al bataye dan Eleksyon.  I debout akote en zonm e i bat sa zonm.  E i vin dan Lasanble Nasyonal e reprezant son distrik.  E sa i en zistwar ki nou bezwen dir avek SADC.  E sa i en zistwar ki nou bezwen dir avek Kontinan Lafrik.  Sa i en zistwar ki Commonwealth i realize.

So, nou partisipasyon letablisman en Parlman dan rezyon, i pou ed nou anmenn propagate nou success story avek e partaz nou leksperyans, e partaz leksperyans politik Parti Lepep avek Larezyon, en politik ki baze lo ‘Zonm O Sant Devlopman’, ki nou’n fer en  kantite deba lo la semenn pase Mr Speaker.  Mon pa pou repete.  Me sa osi i en rikord.  Mon krwar Onorab De Commarmond in koz  lo la.  Sa osi i en record of achievement ki nou bezwen partaz avek larezyon.  Ler nou get nou bann Millennium Development Goals, nou’n fini pase.  Nou’n al beyond.  Nou’n al MDG plusOk.  Nou pe koz lo devlopman soutenab.  Nou pe koz lo transformasyon en pep ozordi.  Nou pa koze lo sanzman, Mr Speaker dan nou Parti.  Nou koz lo transformasyon en pep.  Transformasyon en Nasyon.  E ki mannyer sa i fer ki ozordi nou annan en Nasyon ki nou kapab ale, al dan en Foronm e koz lo nou pei latet anler, Mr Speaker.

So, nou annan en record on Lanvironnman.  Taler nou pou koz lo la ler nou vin lo sa Protokol.  Mon pa pe antisip deba.  Me nou annan en rikord lo Lanvironnman.  Ki mannyer nou protez nou Lanvironnman.  Nou annan en rikord lo Economic and Political Stability and Political Leadership dan larezyon.

So, Mr Speaker, mon’n anvi dir sa 2 pti mo akoz letablisman en Parlman dan SADC ki nou pe siporte ozordi, i pa pou zis partisipasyon Sesel dan sa Parlman, me i pou Leadership Sesel dan sa Parlman.  Nou pou nepli koz lo nou pe ale pou nou ganny leksperyans, nou pe ale pou nou partisipe.  Sesel nepli tan pou nou zis ale e ganny leksperyans e partisipe.  Nou pe ale pou lead e pou montre lezot ki mannyer bon keksoz i ganny fer.

Mr Speaker avek sa, san okenn dout, mon pou siport sa Mosyon.  Mersi.

MR SPEAKER

Onorab Pierre.

HON DAVID  PIERRE

Mersi Mr Speaker.  Mr Speaker, Mosyon ki devan nou pe demann Lasanble ki i siport tou demars ki pe ganny fer, pou ki SADCPF i transform koman en Parlman rezyonal pour bann pei sa rezyon.

Mr Speaker, nou tou nou konnen poudir Sesel i form parti sa blok ki nou apel SADC e Sesel i trade tre fortman avek blok SADC.  Now, SADCPF ki pirman pou lemoman en Parliamentary Forum, pe ganny pouse dan en direksyon kot olye vin en forum, i pou ganny full Legislative power.

Lozikman, i fer sans pou dir ki sa pou donn sa bann pei within sa blok, en platform pli egal e pli powerful, pou zot kapab diskit bann issues ki enportan pou zot.  Savedir, i pe osi egalman donn Sesel en platform lo ki i pou diskit bann issues ki enportan pou li.  E sa bann issues i pou range depi from issues ekonomik, lanvironnman, i kapab ledikasyon.  E sertennman, mon mazinen poudir knowing ki sa blok i konpri of 14 pei, ki petet byento i ava vin 15, avek Madagascar.  Then i pou donn nou akse avek en kantite lide, en kantite lenformasyon ki pou ganny met devan atraver bann diskisyon ki ganny fer dan sa Parlman.

So, i kapab anmenn en kantite benefis pour Sesel.  Me nou osi konnen poudir:- e sa mon ti ava kontan rod leklersisman loter Mosyon lo sa size.  Nou osi konnen poudir Sesel i form parti PAN African Parliament ki li osi pou 10 years now, i pe lager pou li ganny full Legislative power.  Now, dan bann tel Parlman, nou konnen poudir en kantite keksoz i ganny diskite.  Bann keksoz ki kapab enpakte fortman lo bann diferan pei ki form parti, dizon si nou pe koz lo PAN African Parliament. Donk, ki form parti PAN African Parliament. E letan nou pe koz lo SADC ki form parti SADC.

Now, kestyon ki  mon anvi leklersisman lo la i se ki eski, being en lebra Lezislatif avek tou pouvwar, eski bann keksoz ki pou ganny diskite within sa Parlman, pou binding lo bann pei ki form parti sa Parlman?  Right? Now, si sa i leka, ki mannyer sa i kapab enpakte pozitivman premyerman lo Sesel e osi negativman lo Sesel?  Mon krwar nou bezwen get keksoz dan 2 direksyon e mwan mon ti ava kontan si loter Mosyon i eksplik nou e dir nou ki mannyer sa pou vreman marse.  Eski i pou binding par egzanp, si i annan en Lalwa, lefe ki i pou en Parlman avek full Legislative power. Si en Lalwa i ganny pase e adopte within sa Legislative Body, eski sa pou annan en lenpak ki binding lo Sesel?  Eske se koumsa ki i pou fonksyonnen?  Eski i pou annan lenpak lo bann Polisi Nasyonal?  Eski i pou annan lenpak lo bann Polisi par egzanp, vizavi lafason ki nou trade, vizavi lekonomi, bizavi climate change, vizavi ledikasyon. So, pour mwan, sa i enn bann laspe enportan ki nou bezwen mazin lo la.

Dezyenm keksoz ki konsern mwan i se ki pandan ki Onorab De Commarmond in fer son lentervansyon, in fer resor ti enn de pwen ki enportan me selman ki ase sansib.  Now in koz en kantite lo oversight.  In koz par egzanp in donn legzanp kler e in dir avek nou koumsa poudir an relasyon avek resours natirel, sa  Parlman i kapab annan en rol oversightOk.  In koz ek nou lo zesyon nou bann resours natirel, lo ki fason sa i kapab fer atraver sa Forum e in anmenn ankor sa lide oversight, in anmenn ankor sa lide domestikasyon bann issues oubyen bann Lalwa ki ganny diskite within sa Parliament.  Right?  Again, sa i lev en lot pwen konsern pou mwan.  Mon pa pe dir ki i pa pou bon me selman mon pe sey dir ki mannyer sa pou ganny gete within sa Parlman, knowing full well poudir i pe enpakte lo bann lezot:- sa bann Lalwa ki ganny pase pe enpakte lo bann pei endividyel.

Now, prezan, sa i anmenn mwan lo en lot nivo.  I anmenn mwan lo PAN African Parliament.  Now, PAN African Parliament li osi i pe rod full Legislative Power.  Right? Ler i ganny full Legislative power, pou annan en kantite issues ki pou ganny diskite within PAN African Parliament, ki li i bokou pli gran e bokou pli for ki  brans Parlman SADC.

Now, ki mannyer sa 2 pou zwe avek kanmarad?  Ki mannyer sa ki’n pase dan SADC, eski i kapab ganny overrule par sa ki pase dan PAN African Parliament? Mon krwar poudir lide i bon.  Lide i pa move.  As far as I’m concern mon krwar i bon.  Zis par lefe ki i donn nou en platform ki egal e ki powerful. I fer li en bon lide.  Me selman dan son pratikalite, ki mannyer i pou fonksyonnen, i reste ankor pou mwan en keksoz ki en pti pe pa kler.  E alors, mon ti ava kontan si loter Mosyon i kapab a sa pwen, si i santi i kapab a sa pwen, zet en pe leklersisman, an relasyon avek sa bann size ki mon’n koz lo la, vizavi sa brans Parlmanter SADC.

Now, lot keksoz se ki letan ki nou get PAN African Parliament.  Lefe ki PAN African Parliament i anvi full Legislative power, i pe osi mazin dan direksyon kot pou annan bann Manm Parlman ki pou ganny elekte spesifikman pour PAN African Parliament. A lavenir lide se ki pou nepli annan Manm Parlman ki pou dan zot Parlman Nasyonal, me ki pou osi dan PAN African Parliament.

Lide se eleksyon i take place spesifikman pou elekte bann dimoun, bann Parlmanter pou al dan PAN African Parliament and therefore deservi zot bann responsabilite vizavi PAN African Parliament en non pa neseserman vizavi zot Parlman.  Sa i enn bann lobzektif, bann gran lobzektif PAN African Parliament.  Mon ti ava kontan si loter Mosyon i eklersi nou Lasanble Nasyonal e byensir Lepep Seselwa lo sa size.  Eski i lobzektif sa Brans Parlman SADC, pou li al osi dan sa direksyon?

So, sa i bann lide ki mon’n zet ater e mon ti ava kontan ki loter Mosyon i eksplik nou, oubyen i eklersi nou lo sa bann size.

Avek sa mon ava aret lanmenm e mon ava esper loter Mosyon.  Mersi Mr Speaker.

MR SPEAKER

Onorab Valmont, Right of Reply.

HON SYLVIANNE VALMONT

Mersi Mr Speaker.  Mr Speaker, pou komanse mon ti a kontan dir Leader Lopozisyon, e-tan donnen ki mon’n fer resers lo PAP pou fer konparezon detaye lo son konstitisyon pou kapab konpar li avek konstitisyon SADCPF ki dan demars si ou oule vin koman en Parlman.  Mon ti a kontan petet i fer referans avek sa 2 Konstitisyon ki available online lo sa 2 Lorganizasyon Lezislatif.

Mr Speaker, pou terminen mon ti a kontan remersye tou bann Manm Onorab osi ki’n fer lentervansyon e in koz lo rol e benefis ki sa Parlman Rezyonal SADC i kapab efektivman anmennen.  E bokou bann pwen for in ganny soulinyen, sirtou kot i konsern travay bann Parlmanter.

I reste pou mwan remersye tou bann entervenan e pou demann tou Manm Lasanble pou siport sa Mosyon.

Mersi Mr Speaker.

MR SPEAKER

Bon, in ariv ler pou nou pran en vot.  Tou bann ki an faver?  Okenn ki kont?  Mosyon in pase.  E mon a felisit loter Mosyon akoz sa i en demars tre enportan pour Sesel e nou swete ki byento nou ava ganny nou, nou nouvo Parlman Rezyonal SADC.

Nou a kontinyen ek nou travay, nou ava pran dezyenm Mosyon, en ratifikasyon en Lagreman.  E dezyenm Mosyon ki lo Kyoto Protocol pou ganny pran par Leader of Government Business.  Onorab Rose.

HON MARIE-ANTOINETTE ROSE

Mersi Mr Speaker.  Mr Speaker, sa Protokol i apel the Kyoto Protocol on Climate Change e ozordi nou Lasanble pe ganny demande pou ratifye sa Protokol.  Kyoto Protocol on Climate Change e ki en Protokol Nasyon Ini, set en Lakor bann pei manm pou redwir emisyon gas danzere dan ler par up to 10 percent e Sesel i deza en sinyatir sa Protokol.

Ozordi nou Lasanble Nasyonal pe ganny demande pou ratifye sa Protokol nou dan nou listwar proteksyon lanvironnman, sa Protokol i tre, tre, tre enportan pour ki

Lasanble i ratifye.  Alors donk, depi an 1994, bann pei lemonn Mr Speaker, ti komans diskisyon pou annan en Lagreman mondyal lo ki mannyer pou redwir sa ki nou apel green house gas emmissions dan ler.

Mr Speaker, depi sa lepok, 10 an pase in ganny prouve ki emisyon gas i kontribye direkteman anver climate change.  E mon ti a kontan ozordi dir ki climate change it’s not a myth.  I pa en hoax. I pa en lenvansyon.  Climate change i en realite pour nou Sesel.  I en realite pour bokou pei e Sesel mon krwar nou tou nou bezwen admet ki i annan plizyer lannen ozordi, ki nou pe santi lefe sanzman klima.

Mr Speaker, mon pou pran detrwa legzanp pou nou pep Seselwa konpran ki bann Protokol, bann travay ki nou fer isi dan Lasanble i annan en lenpak direk lo zot lavi toulezour.  I pa zis annan pou fer ek kot Nasyon Ini laba, en keksoz ki remote, ki napa nanryen pou fer ek zot lavi.

Dimans pase rezyon Nor, Bel Ombre, mon krwar pei an antye.  Me dan rezyon Nor nou’n eksperyans gro, gro lapli.  E ler mon’n fini Lanmes mon’n ganny sans koz avek en dimoun ki travay kot Biro Meteolozi.  Mon dir be zot gro lapli pe tonbe.  I dir mwan wi.  I dir mwan sa se Vann Swet.  E mon dir be i annan en kantite lannen la ki in annan sanzman dan mannyer letan i ete.  I dir mwan wi.  Zot osi zot kot Biro Meteolozi, zot pe vwar poudir i annan en sanzman dan patern letan.  Pli tar dan lazournen, nou distrik in eksperyans en kantite dezas.  In annan delo monte, inondasyon dan plato beau Vallon, in annan lateras grennen dan leo Beau Vallon.

Ler en lateras i grennen dan en rezyon akoz gro lapli.  Gro lapli ki pa ti abitye tonbe.  Pli gro lapli ki yer swar Biro Meteolozi i dir, i pa normal.  This is the result of climate change.  I grenn deryer ou lakaz, i kraz ou lakaz, i blok ou semen, i afekte ou lavi, i afekte ou savings, i afekte ou plan direkteman lo ou.

Now, ki sa Protokol i annan pou fer avek nou e avek sa lateras ki’n grennen deryer lakaz dimoun Beau Vallon?  Isi Sesel, nou rikord lo lanvironnman i fantastik.  Plis ki 50 poursan nou teritwar i ganny proteze.  Prezidan Rene in fer sir ki depi o komansman nou annan en politik proteksyon lanvironnman ki’n vin nou legacy koman en Parti o pouvwar.  Ki’n vin nou legacy koman en Nasyon Seselwa.  Nou annan en rikord proteksyon lanvironnman ki fer nou fyer, ki fer lemonn fyer.  Nou zanfan i tre, tre konsyan proteksyon lanvironnman e sa se gras a en travay ki’n ganny fer lo ledikasyon lanvironnman parmi nou pep.

Si nou regard lo Televizyon tou le swar, i kontinyelman annan bann spot ki fer dimoun konsyan en nouvo fason viv.  Ki mannyer nou pa zet salte partou, ki mannyer nou plant fler, ki mannyer nou protez nou lanvironnman.

Alors Mr Speaker, Sesel nou’n fer nou bout.  Nou annan en kiltir proteksyon lanvironnman.  Me emisyon gas dan ler pa ariv zis Sesel. Emisyon gas dan ler i ganny fer par bokou pei.  Bann gran pei endistriyalize.  E se zot ki’n an pli gran parti, fer ki nou annan sa problenm ozordi ki apel climate change.  Nou nou’n fer nou bout nou.  Nou’n protez nou pti teritwar isi, me sa lemonn i ganny partaze par tou dimoun.

Sa Protokol Mr Speaker, i pe fors tou pei pou pran zot responsabilite pou redwir emisyon gas dan ler, par en serten poursantaz.  E sa ki mon kontan avek sa Protokol, pe dir avek bann pli gran pei ki met plis gaz dan ler atraver polisyon pou zot redwir plis sa emisyon gas dan ler.  E i annan rezistans.  I annan en kantite rezistans akoz i en desizyon politik ki bann Gouvernman i bezwen pran.  I en desizyon politik ki bann Gouvernman i bezwen dir avek bann gran Lendistri, be ou bezwen redwir ou prodiksyon.  Nou bezwen redwir lenportasyon veikil.  Nou bezwen redwir prodiksyon tel, ou tel kalite prodwi par up to 10 percentOk.  E Sesel, nou’n pare.  Akoz nou’n pare?  Akoz nou deza pe fer li.  Nou deza annan en rikord dan proteksyon lanvironnman e i annan apepre en 5, 10an ozordi ki i annan serten prodwi ki ban ganny antre dan pei.  Serten fridge, serten aircon, serten prodwi ki deza ti pe ganny ban pou antre dan pei.

Si ou, oule, nou’n pare nou pou met an pratik sa Protokol akoz 1, nou ti deza pe fer li par nou konsyans moral anver sa later ki Bondye in donn nou.  E dezyenm, nou ti’n deza met an plas bann mechanism, knowing ki nou Lasanble en zour sa ratifikasyon ti pou vin dan Lasanble.  Nou’n deza met an plas tou sa bann mechanism.

Alors Mr Speaker, premye ki mon kontan avek sa Protokol e mon pe demann Lasanble pou siport li, se bann binding targets ki i annan lo bann pei pou fer sir ki zot osi zot pran zot responsabilite, pour ki nou pa ganny plis gro lapli.  Nou pa ganny Felleng ki afekte nou rezyon Les Mahe.  Ler nou, nou pe fer devlopman, Minis Lakaz i vin dan Lasanble i dir nou bezwen fer tel kantite lakaz.  Nou vwar nou, nou fer en pa an aryer akoz detrwa lakaz i ganny detri dan dezas, dan linondasyon.  Ler nou, nou vwar nou pe protez nou pei en Tsunami i vini i tap nou lakot e i met nou e nou Bidze ki nou ti’n planifye pour devlopman detrwa pa an aryer.

Ler nou:- mon pa konnen si nou’n remarke ozordi.  Bomaten mon’n telefonn en dimoun, mon dir be ki arive ek ou telefonn?  I dir mwan zekler.  E ozordi i annan bokou plis zekler ki pe tap nou dan aswar.  E ler nou, nou pe fer tou sa devlopman ki nou anvi fer tou sa devlopman ki nou anvi pour nou pep, nou bezwen vwar nou tou le lannen annan en larzan dan Bidze ki pas devan nou Lasanble, an ka i annan gro lapli, i annan dezas ki afekte nou bann popilasyon.

Mr Speaker, avek sa Protokol, i annan en eleman ki dan lavantaz Sesel 100 poursan.  E sa se bann sipor ki Sesel i gannyen pou lenplimantasyon sa Protokol.  Par egzanp, lenplimantasyon redwir bann gas danzere, bann progranm Lanvironnman, capacity building pour nou bann Seselwa.  I annan en seri progranm ki vin avek.  Menm bann progranm, par egzanp bann Lagreman Enternasyonal ki napa naryen pou fer avek Kyoto Protocol me ki annan pou fer avek trade.  Par egzanp the Marrakesh Accords.  In fer ki bann pti pei ki pe devlope, anba serten Lakor i bind sa Protokol avek bann Trade Facilitation Agreement par egzanp, oubyen bann sipor ki ou gannyen for trade.  Oubyen bann sipor ki ou gannyen for depth swop.  E sa i enportan dan sa Protokol.

Par egzanp i annan bann clean development mechanism programs.  Ou redwir ou det pour bann progranm devlopman soutenab.  E sa i bon nouvel pour Sesel akoz an menm tan ki nou pe devlop nou lekonomi e nou redwir nou det eksteryer, nou pe osi ganny sipor pour proteksyon lanvironnman.

So Mr Speaker, se avek san okenn rezervasyon ki mon demann nou Lasanble Nasyonal pou vreman siport sa Protokol.  I pa zis lo nou bann issues domestic me i annan en kantite pou fer avek nou bann domestic policies.  I annan en kantite pou siport nou bann progranm lanvironnman.  En kantite pou siport nou bann progranm devlopman ekonomik.  I annan en kantite pou fer avek devlopman soutenab e i annan en kantite pou fer avek nou azanda devlopman the blue economy ki nou pe pouse e ki lemonn pe rekonnet.

Avek sa Mr Speaker, mon ti a demann Lasanble pou siport sa Protocol.  Mersi.

MR SPEAKER

Okenn ki segonde?  Onorab ou oule entervenir?

HON LENNY LEBON

Wi Mr Speaker.  mon ti a kontan segonn sa Mosyon e an menm tan dir 2 pti mo lo sa Mosyon.

Mr Speaker, ratifikasyon sa Protokol, sa Kyoto Protocol i enn ki pe get lo lavenir.  En lavenir ki safe pou nou zanfan e an menm tan parey Leader Government Business in dir, ki Sesel in deza ratifye sa Kyoto Protokol an Zilyet 2002.  E ozordi nou pe koz lo lamannman sa enn Doha.  Bokou nou pou demande kwa sa Protokol Kyoto.  Sa Protokol li i en Lagreman Enternasyonal anba sa ki nou apel United Framework Convention on Climate Change, ki ko-mit bann pei devlope akoz zot ki fer bokou bann emisyon gaz avek zot bann Lendistri Endistriyel e sa i permet ansanm, pou zot kapab redwir sa bann lemisyon ki nou apel green house gas.

Mr Speaker, nou vwar poudir ti annan en premye bout sa Protokol son ko-mit-man ti an 2008 ziska 2012.  E son dezyenm bout se ki i komans Zanvye 2013 e li i fini an 2020.  Ler nou get lobzektif sa Konvansyon, se ki, parey Leader of Government Business in dir, pou nou redwir by 10 poursan e an menm tan stabiliz konsantrasyon sa bann gaz ki nou apel bann green house gas a en nivo ki anpes enterferans danzere pou dimoun.  I koz en pti pe bann lefe klimatik.

I osi endike ki sa nivo i devret ganny akonplir dan en peryod letan spesifik, pou permet Lekosistenm pou adapte natirelman avek sanzman klima.  E kot nou bann resours natirel pa ganny afekte.

Mr Speaker, Sesel i annan en rikord dan lanvironnman e nou vwar poudir bokou in ganny fer.  E Sesel, enn ki’n ganny fer resorti se ki lenportasyon bann fridge, ki ti annan sa ki nou apel bann CFC gas ti ganny aboli e kot ti les bann fridge ki ozone friendly. Akoz si nou les annan green house effect, sa bann emisyon sa bann gas i afekte e bokou bann etidyan dan lekol pou konnen poudir ler ou annan trou dan ou ozone layer, sa i permet ki bann ice berg i melt, i fonn e sa i koz bann pti pei, bann letan zil pou zot ganny afekte avek sanzman klima.

Mr Speaker, ler nou pe ratifye sa Protokol, nou vwar poudir Sesel in fer bokou e i ankor pe fer bokou.  Legzanp i la devan nou e ozordi Sesel, nou annan sa bann windmill turbine ki lo zil Romenvil e Sesel osi pe bouz dan direksyon kot nou pe annan bann PVC solar panel ki pe ede osi dan konservasyon lenerzi.

E si nou al en pti pe pli lwen Mr Speaker, nou pou vwar poudir nou progranm lanvironnman i entegre byen dan lekol e ozordi, size lanvironnman i ganny montre e i ganny amalgate avek tou bann size kot i tou en pti pe lo lekonomi ble, sanzman klima e proteksyon lanvironnman.  E sa i ganny enkilke dan nou zenn a en tre zenn az, ki i permet zot, zot osi konsyan lo proteksyon lanvironnman e konsyan lo sanzman klima.

Nou’n vwar osi Mr Speaker, ki Sesel i pe lead bann:- sa ki nou apel small island devlopment state, SIDS.  E kote osi bann zenn in annan en lavwa lo nivo enternasyonal, kot zot in aktiv pou donn zot kontribisyon lo sanzman klima.  E sa lannen le 30 Me, sa group zenn ki ti pe partisip dan SIDS, zot in selebre 1an.  E sa i montre poudir nou zenn osi, apard Sesel, ki li i pe lead, i pe montre legzanp poudir nou en model, nou zenn osi pe kontribye dan kontribisyon sanzman klima lo nivo enternasyonal.

E Mr Speaker, koman en pti leta zil, nou bezwen fer konnen poudir nou at risk anver sanzman klima e akoz si nou pa fer keksoz, nou vwar poudir nivo lanmer i kapab ogmante par 5 mililit.  So, ler nou pe ratifye sa Konvansyon, i pe montre ko-mit-man nou Gouvernman e nou Gouvernman in fer bokou e i pe montre lemonn poudir nou en sanpyon dan lanvironnman.

Avek sa 2 pti mo Mr Speaker, mon pou donn mon sipor total a sa Mosyon.  Mersi.

MR SPEAKER

Bon nou ava adjourn ziska 2er apre midi.

Lunch

MR SPEAKER

Mon ti pe esper National Anthem. Ya, travay ki la.

Nou a kontinyen avek nou deba.  Onorab Pillay.

HON SEBASTIEN PILLAY

Mersi Mr Speaker, bonn apre midi.

Mr Speaker, mon pou komans mon lentervansyon lo sa Mosyon, par sit Lartik 29 nou Konstitisyon ki dir ki the State recognizes the right of every citizen to protection of health and an environment of the attainable standard of physical and mental health.  And with the view to ensuring effective exercise of this Right this State undertakes to take steps provide for fee health care.  Ok.  Take appropriate measures to prevent ……… epidemic and other diseases ect…

Mr Speaker, rezon akoz mon’n sit sa Lartik nou Konstitisyon, set akoz ler ou analize e ou regarde nou viv dan en pei tropik.  Nou pep i viv an bonn sante zisteman akoz proteksyon ki nou afford avek nou lanvironnman e lafason ki nou maintain standar an sa ki konsern proteksyon nou lanvironnman.  E sa i arive par lefe ki nou’n en pei ki toultan met bokou lanfaz lo la e sa lanfaz in ganny materyalize par en commitment dan en kantite bann morso lezislasyon e Lalwa ki efektivman al ver proteksyon nou lanvironnman.

Mr Speaker, sa i arive osi akoz nou en pei ki stab.  E sa stabilite ki nou annan, i gras en Gouvernman ki’n toultan krwar ki pou nou kapab kontinyen avans pli devan, pou nou kapab anmenn sa lepanouisman ki nou pep i anvi, fodre nou fer sir ki nou met lenvestisman dan nou dimoun e asire ki nou dimoun i reste toultan o sant devlopman.

Mr Speaker, ratifikasyon sa Protokol i tre konekte avek sa.  I konekte avek sa akoz si nou analiz byen, keksoz ti’n kapab al diferaman parey dan bokou lezot pei o bor nou.  Nou ti kapab vwar, parey i annan dan lezot pei, en mank respe total pou lanvironnman e kot lanvironnman sa bann pei i deteryore de zour an zour.

Mr Speaker, nou zwir en klima, nou zwir en lanvironnman sen, zisteman akoz leta i met bokou lanfaz lo proteksyon sa lanvironnman.

Mr Speaker, si nou tras parkour dan lafason ki nou’n antreprann proteksyon lanvironnman, nou kapab apresye tou bann zefor ki’n ganny mete depi byen avan, kot i komans dan Lekol Primer ziska ler en dimoun i vin adilt.  E si i annan en keksoz ki nou kapab remarke ek nou pep, se ki nou pep i en pep tre, tre konsyan.  We are very environmentally conscious e ou kapab remark sa ler ou al dan bann diferan Forum enternasyonal kot ou vwar knowledge e konesans ki nou dimoun i annan lo nou lanvironnman, bokou lezot pei pa zwir sa menm sans kot dimoun i konpran e apresye zot lanvironnman parey.

Mr Speaker, lanvironnman i depan lo klima.  E an vi ki i annan sanzman klima ki pe arive, ki nou komans eksperyanse, parey mover Mosyon in fer resorti dan son prezantasyon.  Nou bezwen osi step up our game pou nou kapab kontinyen protez nou lanvironnman.

Permet mwan Mr Speaker, pou dwell en pti pe lo sa pwen sanzman klima.

Mr Speaker, mon krwar nou tou an gran disan nou’n kapab remarke poudir sa ki nou ti pe espekte, par egzanp kan lapli i tonbe oubyen lafason ki lapli i tonbe, i pe deplizanpli sanze, i pa pe parey.  E sa i fer, i pe anmenn avek li additional cost.  Additional cost akoz nou bezwen fer bann mitigation exercises pou deal avek lenpak ki sa i annan.  Par egzanp, lenpak lerozyon kot-yer.  Mon sorti dan en distrik par egzanp kot si ou regard lakot North East Point, in annan bokou lanfaz ki bezwen ganny mete lo proteksyon sa lakot.  E sa i koute.

Dan lezot landrwa par egzanp Mr Speaker, dan lakot les.  In our very recent history nou ti vwar ki mannyer i ti ganny afekte par Siklonn Felleng e konbyen larzan nou’n bezwen depanse, nou’n bezwen mete pou nou kapab fer fas avek bann dega, avek bann domaz koze par zisteman en fenomenn natirel ki’n arive posibleman lie avek sanzman klimatik.

So, i pa en size ki abstract Mr Speaker, nou kapab dir.  Bokou dimoun i kapab demande ki mannyer sa Protokol i konekte avek li personnelman.  I konekte akoz sak lensidan kot i ariv en dezas natirel gras a en keksoz ki arive dan nou lanvironnman, i kout pei larzan.  I kout pei resours ki nou ti kapab met aryer.  E se pour sa rezon ki nou koman en pei ki efektivman ganny afekte par sanzman klimatik plis petet ki en lot pei ki pli gran swa pli endistriyalize, nou bezwen fer sir ki nou met lanfaz lo proteksyon nou lanvironnman e se zisteman avek sa an tet, par lefe ki nou, nou serye koman en pep, koman en Gouvernman, pou kontinyen mentenir e protez nou lanvironnman, ki nou pe ratifye sa Protokol ki devan nou pou ozordi.

Mr Speaker, si nou regard ozordi otour nou dan bann pei endistriyalize, i annan bokou keksoz ki pe arive, bokou sanzman ki pe arive e zot pe komans apresye zefor ki bann pti pei parey Sesel in mete, pou zisteman protez e koz lo sanzman klimatik.  E mon krwar i annan en keksoz ki nou bezwen soulinyen la.  Ler Sesel ti pe koz lo sanzman klimatik.  An-e-fe Sesel in vin en sanpyon the cause for climate change, bokou lezot pei ti pe fo-ka-li-z lo lezot issues.  E mon krwar Prezidan Michel in fer sa tre kler dan tou bann Forum enternasyonal ki in ale, kot in koz zisteman lo sa sanzman klimatik.  E ki nou’n vwar?  Nou’n vwar ki bokou fwa, sa ki in dir, in ariv an realite akoz bokou pei prezan pe konpran nesesite annan proteksyon pour lanvironnman e nesesite konpran e konsyan sanzman klimatik.

E zisteman Mr Speaker, ler nou regard par egzanp lapros ki Paris Club in pran an relasyon avek sa debt by back ki nou’n gannyen.  I zisteman lye avek zefor ki nou pe mete, an relasyon avek proteksyon nou lanvironnman.  E se sa lanfaz ki en Gouvernman serye, ki mazin le fitir i fokaliz lo la.  Nou pa en Gouvernman ki zis la pe fer diferan keksoz, pe tay dan diferan direksyon.  Nou en Gouvernman ki annan en clear direction kote nou pe ale e nou konnen kote nou oule anmenn sa Nasyon pli devan.  Nou konnen ki mannyer pou konsolid lo bann baz ki nou’n komanse.  E mon pa vwar lezot ki pou kapab fer parey sa ki nou’n fer akoz sa ki nou’n fer in montre nou, in donn nou leksperyans.  E sa leksperyans ki nou’n gannyen se sa ki nou anmenn devan.

Mr Speaker, bomaten letan nou ti pe koz lo ratifikasyon:- pa ratifikasyon me nou ti pe koz lo esansyelman formasyon SADC Parliament.  In fer mwan mazinen ki mannyer i annan koneksyon tou bann issues ki pe pase ozordi dan lemonn e ki mannyer nou koman en pti pei nou bezwen reste azour avek sa.  E ti annan bann kestyon ki ti ganny demande par egzanp lo ki mannyer bann desizyon ki ganny pran lo nivo sa Parlman, pou afekte pei eksetera.

Me si i annan en keksoz ki nou bezwen realize se ki ler nou pe champion the cause, par egzanp for climate change, nou bezwen like-minded Countries pou siport nou.  Nou bezwen annan en Forum kot nou kapab fer pas sa bann nide, pou nou kapab ganny sipor.  Ou pa kapab fer li lo ou tousel sa akoz i annan diferan azanda enternasyonal ki pase, a diferan moman, ki kapab pran presedans lo azanda pou ou.  E bokou dimoun pou dir be ou Sesel ou napa lager, ou napa lafamin, ou napa bann lezot problenm.  Climate change, be i serye pou nou akoz sak fwa en Siklonn pou tap nou, nou pou bezwen depans tel kantite resours pou nou fer mitigation. Nou pou bezwen depans tel kantite resours pou deal avek sa bann dezas.  So that’s why it’s serious for us. I serye akoz i afekte livelyhood nou bann dimoun.  Nou en pei ki  depan lo lapes, kot sanzman klima i kapab elev tanperatir lanmer, oubyen i kapab sanz serten keksoz, ki arive kot i difisil pou ganny pwason.  So, i serye pou nou.  E se pour sa rezon ki ler en keksoz i serye pou nou, nou bezwen rod tou mezir posib pou nou carry across, kominik seriousness sa issue e fer sir ki tou dimoun i konpran.  E se pour sa ki tou keksoz ki nou fer koman en Gouvernman i konekte.  E se pour sa ki mon’n dir ki nou en Gouvernman ki annan en direksyon, nou annan en vizyon kote nou oule anmenn sa pei.  E se sa ki set nou apart from lezot.

Mr Speaker, mwan mon en gran plezir pou mwan koz an faver en tel Mosyon akoz koman en Ansenyan par profesyon, en keksoz ki mwan mon’n apresye se lanfaz ki Gouvernman in mete dan nou bann Lekol, pou fer nou zanfan konsyan akoz zot bezwen protez lanvironnman.  Depi ti pti dan Lakres, en zanfan i komans aprann lo lanvironnman.  Nou annan bann konpetisyon parey Subios ki ranforsi sa.  Nou annan bann diferan lenstans kot zanfan i ganny sans partisip dan bann aktivite e sa i ganny fer akoz Gouvernman in met an plas en lanvironnman e i annan bann polisi ki permet sa bann aktive arive.  E that’s why ki mon toultan dir poudir we are serious and conscious about environment protection.

E si nou al pli lwen, nou regard lepanouisman bann NGO’s ki deal avek proteksyon lanvironnman, ki deal avek koz lo bann issue lanvironnman, sa bann NGO’s in epanouir.  Sa bann dimoun ki dan bann NGO’s i annefe bokou zot, souvandfwa zot in ganny sans al train gras a Labours oubyen Scholarships ki Gouvernman in donn zot.

So, pou mwan koumsa mon pran li.  Sa issue climate chanage i en issue pour tou Seselwa.  I en issue ki nou tou nou bezwen santi nou tre, tre konsernen avek, akoz si zis nou regard sa ki’n arive over the weekend e mon kontan mover Mosyon in fer sorti sa pwen.  Zis en pti window dan nou lavi, en zour dan en weekend, lakantite lenpak ki sa i annan.  Mazinen poudir si sa ti pe arive over a period of 3 weeks.  Ki plis lenpak sa ti pou annan?  E se pour sa rezon ki nou, nou bezwen kontinyen koz lo la e nou koman en pep, nou bezwen konsyan kwa ki pe arive e ki rezon, ki bann mezir nou bezwen pran pou nou deal avek.  Sertennman i annan keksoz ki nou pa pou kapab kontrole.  Me par asire ki nou konpran, nou a petet pran serten mezir kot nou lakour.  Nou a petet pran serten mezir dan lafason ki nou fer konstriksyon.  So, se pour sa rezon ki tou sa ki nou fer i konekte avek sa ki mon pe diskite ozordi.

Mr Speaker, mon pou san rezervasyon donn mon sipor sa Mosyon e mon pou demann lezot koleg dan Lasanble pou fer parey.  Mersi.

MR SPEAKER

Ok.  Onorab Bresson.

HON GALEN BRESSON

Mersi Mr Speaker.  Bonn apre midi tou dimoun.

Apre midi Mr Speaker, deba i kontinyen lo sa ratifikasyon Doha Amendment to the Kyoto Protocol. Me ki egzakteman, zis de la baz, zis pou pas en pti pe lo la.  Kyoto Protocol ki sa main Protokol, i baze lo 2 prensip de baz.  1, ki global warming i egziste.  Resofman later i egziste.  E 2, sa se zonm ki’n kree sa fenomenn.  E i koz sa fenomenn by bann eleman ki prodwi carbon dioxide.  CO2, met li an short.  Bokou manrmay ozordi i konn li koman CO2. I carbon dioxide e sa i koz sa global warming effect.

Me dan Kyoto Protocol, sa se son baz.  Dan sa lamannman, sa ratifikasyon Doha, li i senpleman bokou, bokou bann figures ki’n ganny amande.  Kyoto Protocol, li an Zapon 97, kot bann pei manm.  Serten pei, i pran lo zot menm ki wi zot dakor, zot sinyen, zot ratifye ki dan peryod 5an de la.  97 to apepre 2005.  5an/6an, zot pou bezwen redwir dan zot pei endividyel, bann emisyon gaz parey CO2 atraver bann diferan eleman.

An 2012 an Doha, ler bann pei manm i rezwenn.  En lot group pei i fer bann lot kon-mit-man lo ki poursantaz ki zot pou redwir.  I annan bann pei ki ti’n deza fer li an 97.  So, an 2012 en bann lot manm i fer sa kon-mit-man.  Osi en bann nouvo manm i zwenn pou fer bann kon-mit-man e se sa, sa ratifikasyon ki arive dan sa Kyoto Protocol ki nou apel li the Doha Amendment.  Kot i sanz sa bann diferan figures ki i donn lekel pei ki la, lekel pei ki’n fer kwa e konbyen ki’n redwir son efficiency dan sak pei.

Ler nou regard sa fenomenn, global warming e mwan mon pou retourn sa Sesel.  E mon mazinen en bon pe letan, dan mon karyer profesyonnel ki Ansenyan, mon ti bezwen ansenny sa.  E pa ozordi zour parey nou dir, nou pe ansenny sa dan Lekol, the global warming effect.  E i en keksoz tre, tre senp.  Pli boner koleg Onorab Lebon in koz lo the green house effect pour bann dimoun ki fer lagrikiltir ouswa bann dimoun ki pas kot en laferm i vwar sa ki nou apel en green house.  I senp, kot nou met bann plan ladan, tanperatir ladan i ganny kontrole.  Me avek CO2, ki li i form ler nou annan excess CO2 dan latmosfer lemonn, li i form en nespes baryer avek lasaler.  E se sa lasaler ki nou apel li sa global warming effect.

Pour nou pei Sesel, lenpak koman en pti zil i vreman, vreman mazer.  Nou pa vwar li imedya.  I annan fenomenn ki nou vwar li deswit.  I annan fenomenn ki nou pou vwar li avek letan.

Annou pran nivo lanmer.  Avek sa lefe, nivo lanmer definitivman i pe monte.  E si nou al kot nou bann zil pa tro lwen avek nou, bann zil frer mon apel sa, bann Maldivyen.  Deza zot, zot pe komans rod bann lot landrwa reste akoz zot bann zil i vreman flat e deza zot pe komans santi bann lefe sa mon-t-man lanmer.  I pou pran de lannen apre lannen.  Kantmenm i a mont par 1 santimet.  Nou pa vwar li deswit.  Me en pti sanzman dan okenn parti lemonn, parey en Tsunami, ou kapab kouver antye ou zil, sirtou parey Maldiv ki vreman, vreman low lying.

Me nou Sesel osi, nou pa lwen.  Nou pa pou ganny eparnye ek sa.  Nou bann zil, Morne Seselwa si mon pa tro, tro, mon zeografi in escape mwan en pe.  I fer mwan en pti pe onte koman en Zeografyen vreman.  Mon krwar i apepre en 900 met par lao nivo lanmer.  Me selman i pa tro, tro o.  Me nou bann low lying areas.  Annou regard sa lakot.  Premyerman, lanmer avek lasaler ki kontinyelman ogmante lo en laspe global, i vin en fenomenn expansion. Lanmer i mont, li menm li, i vin plis dan son lekor akoz i expend e sa i akoz sa nivo lanmer pou monte.

Dezyenm.  Lanmer i ganny resofe e bann lespes ki viv dan lamer.  E la nou pe dir parey koray, bann micro organisms ki viv dan koray nepli kapab viv.  Zot mor.  Nou’n vwar laspe blansisaz koray.  Sa i en lefe.  E ler sa i arive, kwa ki sa i koze apard ki sa lanmer mont ki pe monte, ki pou balye nou bann lakot.  I afekte nou food chain, akoz nou, nou en pei ki manz bokou pwason.  E pwason, wi i annan dimoun pe ekoute a dir be pa tou pwason ki al dan koray, ki servi koray.  Me sa pwason ki pe viv lo sa bann micro organism dan koray, li i osi en manze pour en lot pli gro pwason.  E sa lot pwason i manze pour en lot pli gro pwason.  So, the food chain is affected from the micro organism level.

So, lo sa laspe li menm, i afekte nou koman en zil.  I afekte nou dan laspe manze.  E la akoz ozordi cette apres midi, nou’n vwar li, nou lo Parti mazorite, Parti Lepep, pou nou koz lo sa ratifikasyon, akoz i pou afekte nou koman en zil.

Dezyenmman, nou en zil touristik.  Nou koray i en keksoz ki en mervey pour bokou nou bann touris.  I al anba lanmer pou regarde, i zoli.  Me annou al en pti pe an aryer.  Pa tro lontan ler nou ti ganny sa fenomenn blansisaz koray.  Ti napa naryen pou regarde.  So nou ti perdi en ganny pen.  Si nou al lo lakot Bean Vallon, dan labe Bel Ombre, dan Por Bel Ombre, i annan en kantite bann bato.  Me laplipar zot, zot operate lo lakot Beau Vallon.  Zot fer bann Diving Schools.  Zot anmenn en kantite bann etranze e se zot ganny pen.  Si mon pa tronpe, dan Beau Vallon si i annan apepre en 6 a 10 biznes ki pe fer sa.  Me konbyen dimoun ki pa pou travay?  So, i tou en chain reaction ki arive.  Se pour kwa pour nou apre midi mon krwar i en keksoz ki primordyal, ki nou pe zwe nou rol.  Ki sa pour mwan, i en keksoz vreman, vreman enportan.

Mr Speaker, i osi dan en pe letan dan Nouvel, dan lemonn avi asyon.  I annan en pe letan, i pou fer avek sa fenomenn.  I pa direkteman pou fer avek sa Protokol, me ek sa fenomenn global warming kot ti pe ganny dir ki nou bezwen, bann avyater pe dir ki bann avyon bezwen met en pri lo zot tiket akoz sa fenomenn.  Keeping the air clean.  Be mwan mon krwar Sesel i enn bann pei rar o monn ki pa merit okenn pri monte dan nou latmosfer akoz enn, nou annan en bann polisi tre, tre kler zafer nou bann pye dibwa ki nou kit li.  Nou annan bann rezerv tre, tre enportan pour nou e sa i zwe son rol dan sa portre global.

Osi fantastik ki Onorab Pillay in dir pli boner.  Nou annan bann ledikasyon dan lanvironnman ki nou’n fer pa mal.  Alor nou enn bann pei ki mon personnelman mon krwar ler mon’n vwar sa fenomenn pe ganny diskite, ki nou pa bezwen annan sa increase in okenn air tickets ganny mete akoz sa bann fenomenn.  Akoz nou, nou pran nou rol serye koman en pei e nou zwe nou rol koman en pti leta zil, pou kontinyelman fer nou pep e osi lemonn konnen ki bann pti leta zil i toultan bann ki pou a sezour la, ganny afekte premye par sa bann fenomenn.

E en keksoz ki enteresan osi Mr Speaker, pou vwar ki bokou bann pli gran pei endistriyel ozordi dan lemonn, zot pa’n ratifye sa ki nou pe ratifye.  E sa i senpleman zot napa lentere.  Me selman zot emisyon gaz i bokou, bokou pli o ki tou dimoun.  E zot dir zot a fer zot prop demars.  Me nou tou nou viv e nou respir menm ler dan sa lemonn e sa mon krwar i en keksoz ki ozordi apre midi, i en keksoz ki nou pe zwe nou rol pou ratifye sa Doha Amendment to the Kyoto Protocol.

E mwan personnelman Mr Speaker, mon krwar e mon pou donn mon sipor lo sa Amendment.  Mersi bokou.

MR SPEAKER

Onorab Samson.

HON DEREK SAMSON

Thank you Mr Speaker.  Bonn apre midi tou dimoun.

Mr Speaker, sa Mosyon lo zeneralman emisyon gaz danzere ki ganny zenere, in en konsern:- climate change tousala, in en konsern pour en bon pe letan.  E zisteman Sanmdi pase ti annan en group dimoun, Ansennyan, bann reprezantan distrik ti dan en one day Workshop e size climate change ti prensipalman topik ki zot ti pe diskit lo la e zot ti pe met devan zot bann konsern lo ki zot resanti, ki zot pe panse lo la e ki pozisyon petet zot koman bann reprezantan, bann diferan Lorganizasyon, zot annan anver sa size.

E tanzantan nou tande bann Workshop oubyen bann diferan aktivite ki tourn otour proteksyon lanvironnman Sesel.  E Sesel i ganny renonmen pou sa.  E nou kontinyen reste azour.  Sesel i kontinyelman reste azour koman en pei lo sa bann tel topik e mon krwar i en keksoz ki enportan e nou menm nou koman en Lasanble Nasyonal, nou kontinyelman vwar nou pe vot anver bann tel Protokol, sirtou ler i konsern nou pei kwa, proteksyon nou lanvironnman, proteksyon nou dimoun, lasante nou popilasyon.

E zisteman Mr Speaker, ki nou pe fer vreman letan dizon ozordi nou pe ratifye en tel Protokol?  Nou pe zwenn larestan pei, malgre parey in ganny refer sorti pli boner, i annan en bon pe pei ki zot premye pou responsab pour lakantite gaz danzere ki ganny large dan ler.  Malgre zot menm zot responsab, me nou, nou pe zwenn bokou pei pou ratifye en tel Protokol, pou nou protez nou plannet, nou later, nou Losean, lanvironnman ki nou bezwen pou nou kapab viv ladan.

E anba sa Protokol, Sesel i en ka partikilye.  Akoz Mr Speaker?  Se ki Sesel i reste parmi bann rar pei pou son groser, ki pe trouv son lekor angaze pou proteksyon lanvironnman.  E nou demann nou lekor kestyon bokou fwa petet.  Akoz ki Prezidan Michel sak fwa i vwayaze, petet i en size prensipal ki nou tann li pe  koz lo la oubyen ki nou tande in annan bann Lakor oubyen bann Lagreman ki in tonm dakor avek lezot pei, i tourn otour lanvironnman.  Akoz?  Akoz nou Prezidan, byensir nou Gouvernman Parti Lepep i rekonnet ki par groser pei, par groser zil ki nou annan, i fer ki nou vilnerab.  Parey in ganny dir pli boner dan lezot lentervansyon, nou vwar nou pe ekspoze anver serten risk dezas natirel ki byensir si nou mal zer nou bann polisi oubyen nou bann Lalwa ki diriz nou aktivite otour nou lanvironnman natirel, nou vwar nou bokou ekspoze a risk pou bann dega.

Me pli enportan Mr Speaker dan tousala, ler nou pe  vot an faver sa Protokol ozordi, se lavenir Sesel, lavenir nou pei.  Lavenir zenerasyon demen e ki Sesel koman en prodwi.  Mon dir en prodwi anba size tourizm ki Sesel i reste a tout fwa sa pei oubyen sa group zil ki ler ou aprose ou vwar laverdir.  En keksoz ki bokou touris i enpresyonnen avek letan zot pe apros nou zil dan avyon, ki kwa dan bato, se nivo laverdir ki nou annan.  Plis ki 50 poursan nou teritwar i ganny proteze anba serten kondisyon ki nou pa pou touse serten nou bann bout laverdir.

E vwala Mr Speaker.  I enportan ki nou kontinyelman gard bann pratik oubyen bann prensip enportan.  En legzanp se kot Vehicle Testing Station, emisyon lakantite carbon ki ganny large i enn parmi bann mezir ki nou fer sir nou bann transpor ki pe roule lo semen i pe roul byen, i pa pe larg bann carbon nwar pou ede polye nou lanvironnman.  E ki dimoun i ganny dekouraze pou bril salte ki dekonpoze, pou sey gradyelman tou dimoun a kapab arive separ bann salte, pour ki sa pratik resiklaz i kapab ganny adopte e ki byensir bann salte ki kapab dekonpoze a kapab ganny servi petet koman konpos.

E an plis Mr Speaker, Sesel pe evantyelman bouz ver lenerzi renouvlab ki pou fer nou petet ankouraz plis nou bann dimoun pou adopte sistenm pano soler ki petet finalman Sesel tou lakour oubyen tou bann batiman ava kapab pe servi pano soler koman sours lenerzi.

E nou Gouvernman zisteman, Gouvernman Parti Lepep in toultan deryer bann azanda oubyen bann progranm ki pou ede garanti ki Sesel i reste touzour en pei kot i gou pou viv, kot nou pe respir ler fre.  En zour bomaten kot napa bokou nyaz.  Si ou lev ou lizye ou pou kapab vwar en nyaz byen ble.  Ou pa santi sa nivo polisyon parey dan serten pei.

E Mr Speaker, nou rekonnet ki tou sitwayen:- Gouvernman Parti Lepep pe rekonnet ki tou sitwayen i devret pe partisip dan bann tel kalite azanda.  I pa zis en zafer kot nou Lasanble nou vini nou vot an faver bann tel Protokol, apre Gouvernman, Minister Lanvironnman or which ever i komans aplik bann Lalwa oubyen bann polisi.  Me nou bezwen fer li avek nou dimoun.  Nou bezwen met tou sa bann prensip, sa bann  sistenm proteksyon lanvironnman, ki i zwenn nou bann dimoun.  Parey in dir nou bann etidyan, nou bann zanfan kot lekol i deza pe komans aprann a en tre zenn az.  Me mon krwar problenm i plis avek nou bann adilt, nou bann move pratik e se sa ki sa Protokol pe demann nou pou fer.  Rezon det apre midi ki nou kapab les nou popilasyon vreman rekonnet lenportans nou lanvironnman e evite annan bann polisyon lanvironnman dan bann move pratik ki nou kapab aplike.

Alor vwala Mr Speaker, rezon akoz ki mon menm personnelman mon pou vot an faver sa Mosyon ratifikasyon.  Mersi.

MR SPEAKER

Onorab Rose, Right of Reply.

HON MARIE-ANTOINETTE ROSE

Mr Speaker, mon napa bokou pou dir.  Mon krwar tou bann Manm in fini kouver tou bann pwen esansyel sa Mosyon.  E alors mon remersi kote mazoriter dan Lasanble pou siport sa Mosyon.  Mersi.

MR SPEAKER

Bon, in ariv ler pou nou vote.  Tou bann ki an faver?  Okenn ki kont?  Mosyon in pase.

Avek sa nou termin osi nou travay pou ozordi e mon oule enform Lasanble ki Mardi le 16 nou pa pe zwenn, an vi kantite aktivite ki annan otour Constitution Day.

Donk alor nou pou zwenn ankor Mardi le 23 e mon ti oule remind zot ki le 17 nou annan lansman nou Museum.

Donk, Mardi le 23, 9er bomaten.  Mersi.

(ADJOURNMENT)