::
Home » Verbatim » Verbatim - Second Term 2015 » tuesday-2nd-june-2015

tuesday-2nd-june-2015

NATIONAL ASSEMBLY OF SEYCHELLES

Tuesday 2nd June 2015

The Assembly met at 9 am

National Anthem

Mr Speaker in the Chair

MR SPEAKER

Bonzour tou bann Manm Onorab.  Bonzour Minis ek son delegasyon.  Bonzour tou bann ki pe ekout nou dan lakour.  Ozordi avek nou, nou annan Minis pour Lanvironnman, Sanzman Klima e Lenerzi, Mr Didier Dogley ki vin reponn plizyer Kestyon konsernan son Minister.

E nou a komans avek premye Kestyon, Kestyon 73, Onorab Chantal Ghislain.

HON CHANTAL GHISLAIN

Mersi Mr Speaker.  Bonzour tou dimoun.

Mr Speaker, eski Minis pour Lanvironnman e Lenerzi, i kapab enform sa Lasanble, ki son Minister pe fer pou rezourd sa problem ranplas bann meter delo PUC lo La Digue e lezot distrik, pou evite ki konsonmater i aste de santenn met rakor, pou zot kapab ganny konekte avek zot meter? mersi.

MINISTER DIDIER DOGLEY

Mersi Mr Speaker.  Bonzour Mr Speaker.  Bonzour bann Onorab e tou bann dimoun ki pe ekoute dan lakour.

Mr Speaker, i enportan pou fer resorti ki Gouvernman, atraver PUC, i pe fer son mye pou fer sir ki tou lakour ek biznes Sesel i ganny konekte avek sistenm delo trete.  PUC pe fer son mye pou fasilit prosesis pou donn dimoun delo 24 lo 24 e 7 zour par semenn e 365 zour par lannen.  Sa ki konsern longer tiyo ki dimoun i bezwen aste pou konekte avek tiyo PUC, i ganny determinen par zistans ant lakaz ou biznes sa dimoun e main tiyo PUC e non pa pozisyon meter PUC.

Laplipar di tan, PUC i bezwen swiv semen piblik pou li met son bann tiyo.  I tre difisil pou PUC ganny permisyon pou pas son bann tiyo lo later bann dimoun prive.  Ler en dimoun i fer son laplikasyon pou ganny delo trete, PUC i ofer zot 10 met tiyo pou konekte avek son sistenm distribisyon delo.  Savedir, si sa lakaz sa aplikan i pa plis ki 10 met, i pa pou bezwen aste tiyo pou konekte avek tiyo PUC.  Me si i pli lwen, i pou bezwen aste ladiferans longer tiyo ki neseser.

Sa ki konsern konter delo PUC.  PUC in bezwen adopte en Polisi serye lo pozisyonnman son konter pour plizyer rezon.

Premyerman, i neseser ki PUC i a tou le tan annan kontrol lo son meter ouswa konter.

Dezyenmman, ler konter i o bor semen e main tiyo PUC, i fasilit travay son bann travayer ki lir konter.  Dan lepase, bann travayer PUC ki lir konter, zot in ganny en kantite difikilte pou rod konter pou zot lir.  Dan bokou ka, zot in bezwen retournen san ki zot in trouv sa bann konter.  Dan serten ka, zot in ganny atake avek lisyen kot lakour dimoun e zot pa’n kapab fer zot louvraz.  Alor, zot in bezwen estim apepre konbyen unit sa kliyan in servi e sa in kree en kantite difikilte ant PUC avek son kliyan, sirtou ler estimasyon ti bokou pli o ki unit ki sa dimoun in servi.

Trwazyenman, PUC pe travay tre dir pou redwir la kantite delo ki kontinyen perdi dan son sistenm distribisyon delo.  Ziska lannen pase, PUC ti pe perdi ziska 53 poursan delo dan sistenm e in arive fer li desann pou vin 45 poursan.  E son target se pou redwir li ankor, pou vin 30 poursan, dan enn de lannen.  Sa ki nou’n konstate, se ki bokou delo i perdi osi ant main tiyo PUC e bann lakaz ou biznes.  Ler tiyo i ganny andomaze, personn pa fer zefor pou repar sa bann tiyo e delo i kontinyen koule e perdi dan sistenm..

Katriyenmman, an plis i malere pou dir ki i ankor annan serten dimoun ki pe manipil konter PUC e menm konekte anba later en lot tiyo avan konter PUC, sirtou ler meter i obor lakaz.  Dan sa fason, zot servi delo kantite ki zot oule san ki zot bezwen pey PUC pour sa delo ki zot in servi.

Pour sa bann rezon, PUC i bezwen retenir sa Polisi ki dan lentere pei e tou dimoun an zeneral.

Mersi Mr Speaker.

MR SPEAKER

Bon, okenn siplimanter Onorab Ghislain?

HON CHANTAL GHISLAIN

Mersi Mr Speaker.  Mr Speaker, eski Minis i kapab dir ek sa Lasanble an se ki konsern La Digue, lefet ki 3 kar bann semen dan plato La Digue i napa beton lo la, ouswa menm i pa’n ganny vreman trase byen menm, ki kriter ki PUC i servi pou kapab plas sa bann meter delo ki 3 kar letan i lo main semen piblik?

Mersi Mr Speaker.

MINISTER DIDIER DOGLEY

Mersi Mr Speaker.  Mr Speaker, mon konpran poudir La Digue i en ka en pe spesyal.  PUC parey mon pe dir, i pe fer son mye pou fer sir poudir bann main tiyo PUC ki li i annan, i anmenn pli pros kot bann lakour ki bezwen sa delo.  E petet dan ka La Digue, i pa’n tou le tan posib pou anmenn bann main tiyo PUC pli pros.  Me selman, i dan progranm PUC pou fer sir poudir bann tiyo ki pe mete dan le fitir, i pou ganny pase lo bann lezot semen, pou fer sir poudir sa problenm ki dimoun i bezwen met rakor sa bann zistans i ava en keksoz ki ava dan lepase.

Mersi Mr Speaker.

MR SPEAKER

Onorab Jaqueline.  Onorab, yes.

HON SULTANNE JACQUELINE

Mersi Mr Speaker.  Mr Speaker, an tenan an kont larepons Minis, an vi sa kantite rapor par konsonmater lo vandalizm zot rakor letan i lwen ek zot lakaz e sa i fer zot bill delo monte e zot napa kontrol, eski Minis pe mazin pou tenir an kont demann bann konsonmater, pour ki zot meter delo i vin pli pre avek zot lakour?

Mersi Mr Speaker.

MINISTER DIDIER DOGLEY

Mersi Mr Speaker.  Mr Speaker, PUC i okouran sa bann difikilte ki egziste, sirtou ler i annan bann problenm ant bann diferan vwazen, kot tiyo i ganny koupe par malis, ouswa bann lezot aktivite.  I difisil pou PUC kapab egzakteman konnen pour sak landrwa, kote sa bann problenm i arive.  Ler i arive e sa dimoun i kapab montre PUC poudir vreman in annan en problenm ek rakor ki’n ganny koupe, PUC i pare pou pran sa an konsiderasyon e pran sa bill ki an ekse, pou li travay ek sa dimoun, pou fer sir poudir sa dimoun i pey dapre ki i sipoze peye.  Akoz i pou vwar dan lepase, kantite delo ki sa dimoun in servi par mwan.  Alor, si in annan en problenm lo son rakor, PUC ava pran sa an konsiderasyon.

Me pou PUC sanz son pozisyon, i pou ranvers en lot problenm lo PUC, sirtou pandan sa bann peryod ki nou vwar poudir nou pe antre avek bann problenm sanzman klima, kot nou pou vwar nou avek bann peryod kot lasesres pou bokou pli long.  E PUC li i bezwen zer son sistenm delo bokou pli byen ki i ti pe fer dan lepase.

Sa zafer delo perdi dan sistenm PUC parey mon’n dir, ti apepre 53 poursan.  E bokou sa bann delo osi, i pa zis bann tiyo ki kase dan semen, me osi bann rakor ki ganny koupe, ki ganny andomaze, ki personn pa pran bann mezir neseser pou fer sir poudir sa bann delo i aret koule.

Alor, si en dimoun i klerman i annan en problenm ki’n arive avek son tiyo, PUC ava regard dan posibilite pou fer sir poudir sa dimoun pa pey an plis ki i devret peye.  Me selman, i neseser ki Gouvernman atraver PUC, i pran kontrol lo sa zafer perdi delo dan bann sistenm distribisyon.

Mersi Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker.  Mr Speaker, mon ti a kontan demann Minis, dan ka kot i annan plizyer lakaz ki ganny trouve ase lwen avek main tiyo PUC, eski Minister i kapab konsidere anmenn en lot main en pe pli pros ek sa bann lakaz, pou anpese ki sak sa bann endividi oubyen sa bann household, zot bezwen aste 2 santenn met tiyo pou zot kapab ganny delo trete kot zot?  Mersi.

MINISTER DIDIER DOGLEY

Mersi Mr Speaker.  Mr Speaker wi, sa i en keksoz ki PUC pe konsidere e i deza pe konsidere.  Alor, si i annan bann dimoun, bann group lakaz ouswa bann vilaz ki napa en main ki vin pre kot zot, zot ete, zot kapab fer PUC konnen e PUC ava met sa dan son progranm, pou fer sir poudir i annan tiyo ki vin pli pre kot sa bann group lakaz.

Mersi Mr Speaker.

MR SPEAKER

Kestyon 74, Onorab Melval Dugasse.

HON MELVAL DUGASSE

Mersi Mr Speaker.  Bonzour tou dimoun a lekout.

Eski Minis i kapab dir ek zabitan Anse Etoile si i dan plan son Minister pou adres sa problenm inondasyon depi dan krwaze Maldives ziska kot larantre semen Hangard?  Mersi Mr Speaker.

MINISTER DIDIER DOGLEY

Mersi Mr Speaker.  Wi i dan plan mon Minister pou adres sa problenm inondasyon ki Onorab Dugasse pe demann lo lapar zabitan Anse Etoile.  Sa sityasyon inondasyon i prensipalman koze par lefe akimilasyon delo sirfas lo semen pandan letan gro lapli.  Sa sityasyon in arive avek sa 2 semen prensipal ki Onorab in mansyonnen.  Sa se semen Maldives avek semen Hangard.  Sa 2 semen, zot zeneralman apik e zot konekte direkteman avek semen prensipal Glacis via Anse Etoile.

Alor pandan letan gro lapli, delo sirfas lo sa 2 semen i desann avek lavites e debord bann fasilite ek lenfrastriktir drenaz ki Gouvernman in fini met an plas.  I annan deza serten zefor ki’n ganny fer pou amelyor drenaz pou retir delo sirfas dan sa landrwa, me malerezman i pa’n ase.  Zofisye mon Minister in deza rekomann sa bann solisyon swivan pou amelyor sa problenm.

Premyerman, pou konekte desarz semen Maldives direkteman dan lanbousir ki pas par deryer lekol Anse Etoile, atraver en sistenm drenaz.  Lobzektif prensipal sa rekomandasyon se pou elimin tou posibilite delo sirfas lo semen Maldives, ki pou anpes li akimil dan drenaz lo semen prensipal Anse Etoile.  Lenplimantasyon pour sa proze i ekspekte fer lannen prosen, depandan lo Bidze ki Minister i gannyen.

Dezyenmman, nou pe rekomande ki i ogmant kapasite culvert anba semen e amelyor kapasite sa stor Motor Channel ki pas kot garaz Mekanisyen Mr Simon e lot kote semen, vizavi laboutik Endyen, Anse Etoile Shopping Centre.  Sa i annan pour bi evakye lakantite delo dan dren prensipal avek semen Anse Etoile, dan en pli kourt dele letan.

Trwazyenmman, fer travay mentenans lo sa dren ki pas akote laboutik Madanm Marianne Quan, vizavi krwaze semen pou mont Maldives.  Pour rekomandasyon 2 ek 3, nou ankor pe diskit avek bann lezot Lazans Gouvernman, ki osi enplike dan fer serten travay lo sa bann drenaz dan sa landrwa.

Mersi Mr Speaker.

MR SPEAKER

Onorab Dugasse.

HON MELVAL DUGASSE

Mersi Mr Speaker.  Baze lo larepons Minis, eski Minis i kapab dir nou konbyen i ekspekte koute sa proze e si i annan okenn negosyasyon pour bann way leave ki pe ganny fer.?  Mersi Mr Speaker.

MINISTER DIDIER DOGLEY

Mr Speaker, nou pa akor arive ganny en kou final.  I annan serten travay ki ti pe ganny fer par MLUH ki nou ankor pe esper bann rezilta ki travay ki zot, zot in fer.  Epi nou bann Zofisye osi ki travay lo drenaz, zot ti deza en pe deborde avek sa bann problenm ki’n arive an 2013/2014 e sa lannen, kot nou pe travay lo bann diferan problenm ki annan Au Cap, Anse Aux Pins e La Digue.  Me le moman ki nou ava soulaze, nou ekspekte poudir lo dezyenm trimes sa lannen, nou a kapab komans travay lo bann plan detay e met en kou egzakt konbyen sa proze pou koute, ki dan en fason ki nou kapab met li dan Bidze lannen prosen.

Mersi Mr Speaker.

MR SPEAKER

Onorab Payet.  Dr Payet.

HON DAVID PAYET

Mersi Mr Speaker.  Bonzour tou dimoun.  Mr Speaker, eski Minis i kapab enform sa Lasanble si sa proze Konbat Linondasyon par amelyor drenaz dan sa parti distrik Anse Etoile i form par en pli gran stratezi pou amelyor drenaz dan rezyon Nor, ki an antye, ki enkli distrik Glacis?  Mersi Mr Speaker.

MINISTER DIDIER DOGLEY

Mersi Mr Speaker.  Mr Speaker, wi.  Gouvernman in kree sa Task Force depi an 2004, ki tre aktiv.  E annefe, nou pe regard li spesifikman dan bann landrwa kot nou konnen i annan bann problenm drenaz ki ase serye.  Nou’n deza fer serten travay dan distrik Glacis e nou pou kontinyen fer bann travay dan bann diferan landrwa kot nou konnen i annan sa problenm drenaz ki afekte bann dimoun pandan peryod gro lapli.

Mersi Mr Speaker.

MR SPEAKER

Onorab Payet-Marie.

HON MARIA PAYET-MARIE

Mersi Mr Speaker.  Mr Speaker, petet mon a demann Minis, ki bann partner prensipal ki son Minister pe travay avek, pou ede rezourd sa bann problenm inondasyon ki nou pe koz lo la?

Mersi Mr Speaker.

MINISTER DIDIER DOGLEY

Mersi Mr Speaker.  Mr Speaker, nou bann partner prensipal se SLTA ki Lazans ki responsab pour semen akoz sa problenm ki Onorab Dugasse pe koz lo la i annan pou fer avek semen.  Alor, i annan serten drenaz ki nou, nou bezwen travay tre pros avek sa Lazans ki responsab pour semen lo later.

Apre, nou pe travay ek MLUH parey mon’n deza dir, ki zot osi zot in deza fer serten travay lo semen Hangard e zot pe re regard sa proze ankor, pou regarde ki mannyer ki nou kapab amelyor sa problenm en pe plis, akoz i en pe konplike akoz landrwa ki mannyer i ete, i ase etrwat e i pa lwen avek delo sale. Alor, ler lanmer i mont, i difisil pou tir delo ase vitman.  Alor, nou ankor pe travay lo bann detay avek sa bann diferan Lazans Mr Speaker.

MR SPEAKER

Bon, nou ava pran Kestyon 75.  Onorab Maria Payet-Marie.

HON MARIA PAYET-MARIE

Mersi Mr Speaker.  Eski Minis i kapab enform nou Lasanble, ki aksyon ki pe ganny pran ou pou ganny pran, anver bann dimoun ki kontinyelman zet salte e polye bann larivyer?

MINISTER DIDIER DOGLEY

Mersi Mr Speaker.  Sa problenm zet salte partou in vin tre grav, malgre Departman Lanvironnman e Minister Lasante pe kontinyelman pas bann progranm pou eksplik dimoun danze zet salte partou.  I kler ki laplipar dimoun pe antann sa bann mesaz ki pe pase dan sa bann progranm e zot pe kit zot bann landrwa prop, pou anpes polisyon e bann problenm maladi koze par lera moustik e lezot vermin.  Nou konnen ki i annan bokou dimoun ki pe fer zot mye pou kit zot pei prop, me malerezman, i annan tro bokou nou ki zis pa enterese.  Menm si zot frer ek zot ser pe mor avek Leptospiroz e lezot maladi ki lie avek sa problenm salte.

Ler dimoun i zet salte dan larivyer, zot pa zis pe polye nou sours delo me osi nou lanmer ki laplipar nou i depann lo la pou ganny nou bouyon pwason.  Syantis in vwar ki deplizanpli, pwason pe ganny kontaminen par bann salte ki dimoun i zet dan lanmer me osi dan larivyer.  Akoz ler i zet dan larivyer, otomatikman en bo zour i ariv dan lanmer.  Sa i vedir ki si nou pa aret sa mantalite zet salte partou, en bo zour, isi Sesel osi, nou pwason pou kontaminen.

Seksyon ki ranforsi Lalwa Lanvironnman dan mon Minister ouswa Environmental Police, i deal direkteman avek bann ka kot bann endividi oubyen Lorganizasyon i zet salte e polye bann sours delo.

I osi annan Seksyon Wetlands ki responsab pou netway e mentenir bann larivyer ek lanmar dan Sesel.  Sa Seksyon i osi travay konzwentman avek Seksyon ki ranforsi Lalwa Lanvironnman, pou pran aksyon ek bann loter polisyon koze par salte dan bann sours delo.  Nou osi pe travay tre pros ek Lapolis, Minister Lasante e Ladministrasyon Distrik, pou fer sir ki sa problenm zet salte partou i arete isi Sesel.

Ler nou dekouver bann ka polisyon e dan ka kot i pa grav sa endividi ou Lorganizasyon i ganny averti an ekrir e ganny demande pou rektifye netway sa sours delo ki in polye.  I posib ki i osi bezwen pey en lanmann R500.  Si sa lofans i grav oubyen ganny repete, sa endividi ou Lorganizasyon i ganny sanksyonnen anba Lalwa Proteksyon Lanvironnman 1994.  Si zot ganny trouve koupab, sa bann dimoun pou kapab pey en lanmann ziska R250 mil, ou kondann ziskan 6an Prizon.  Resaman, nou’n lans lapros spesyal pour Lanvironnman ek Trafik, pou akseler prosedir deal avek bann krim kont lanvironnman.  Nou annan lasirans ki bann ka polisyon i ava ganny prosekite dan en dele letan bokou pli kourt e ava ed nou dan nou lalit pou redwir polisyon atraver pei.

Byento, mon Minister pou osi rekonpans bann manm piblik ki denons bann dimoun ki fer polisyon partou.  Annefe tou resaman, nou’n annan en ka kot dimoun in zet salte Dame Le Roi kot mon Minister pe ofer R5 mil avek okenn manm piblik ki pare pou donn lenformasyon pou aret sa dimoun, ou group dimoun ki’n zet salte laba.  Mon Minister i reste angaze pou aplik bann sanksyon ferm lo bann endividi ou Lorganizasyon ki kontinyen fer bann tel lofans kont Lanvironnman.

Mersi Mr Speaker.

MR SPEAKER

Onorab?

HON MARIA PAYET-MARIE

Mersi Mr Speaker.  Mr Speaker, petet mon ti a demann Minis si i dan plan son Minister pou re pozisyonn bann bin ki ganny trouve o bor bann larivyer, akoz souvandfwa nou vwar bann dimoun i zet salte, bin i ranpli e sa bann ler la letan lapli i tonbe, sa bann delo sal i desann dan larivyer.  E si i annan lentansyon petet met en pti pe plis bin petet pou ede amelyor sa:- aranz sa problenm ki nou pe diskit lo la ozordi?

Mersi Mr Speaker.

MINISTER DIDIER DOGLEY

Mr Speaker, okenn sizesyon ki pou ed nou pou amelyor lafason ki nou kolekte salte ouswa pou anpes salte ariv dan larivyer i en keksoz ki nou pou tou letan welcome ki dimoun i met sa dan nou latansyon.  E kot zot, zot konnen poudir i annan sa problenm, silvouple les nou konnen e nou, nou ava pran ka avek sa problenm kot i ete e kot i egziste..

Kestyon pou met plis bin, nou toultan anvi fer sir poudir nou annan ase bin pou dimoun servi.  Akoz nou konnen poudir si napa ase bin,   demen nou pa kapab dir avek dimoun pou dir zot pa pe met salte dan bin.  Alor, pou nou i tre enportan.  Si i annan okenn landrwa ki zot konnen poudir i mank bin, silvouple les nou konnen e nou, nou a fer le neseser pou ogmant lakantite bin ki annan dan sa bann landrwa.

Mersi bokou Mr Speaker.

MR SPEAKER

Onorab Jeannevol.

HON BEGUITTA JEANNEVOL

Mersi Mr Speaker.  bonzour.  Minis, dan bann ka kot napa laprev kot sa endividi ouswa ki an a-tan-dan desizyon Lakour lo en zizman, ki rol Kontrakter Netwayaz pou anpese ki sa polisyon i kontinyen dan sa larivyer?  E dan bann bokou fwa, sa bann polisyon i ganny fer pandan ki larivyer i ranpli, dimoun i zet salte e salte i al fini anba dan lanmar.  E ouswa i bous larivyer pli ba, ki fer ki delo i mont dan bann lakaz.  Ki aksyon ki zot pran kont sa endividi ki’n andomaz propriyete sa dimoun?  E osi ki fason eski ou bann Zofisye i fer pou ranforsi sa Lalwa, par egzanp eski zot pase pou fer bann lobzervasyon dan larivyer e ki mannyer eski zot fer zot bann lenvestigasyon?  Mersi.

MINISTER DIDIER DOGLEY

Mr Speaker, sa i plizyer kestyon.  Mon a esey reponn sa bann kestyon pli mye posib.

Ler napa okenn levidans, definitivman i difisil pou nou annan en ka pou nou anmenn Ankour akoz Lakour ou bezwen annan ase levidans pou ou kapab fer en ka pou Ziz kapab zize.  Alor, dan sa bann ka parey, sel remed ki reste nou se pou pey Kontrakter e fer netway sa bann landrwa ki’n ganny polye.  Me si par kont i kler poudir nou annan levidans, nou annan lenformasyon e se la ki nou pe lans sa lapel ek dimoun ki vwar, ki annan lenformasyon, pou les nou konnen.  E se sa rezon osi akoz ki nou pe al pli devan e menm pare pou pey en reward bann dimoun ki vin devan ki siport nou, ki donn sa bann lenformasyon neseser, pou nou fer sir nou annan bann lenformasyon ki ase konkret pou nou anmenn devan Lakour, ki fer sir poudir ki ler nou anmenn en case devan Lakour nou case i solid.

Lo kestyon si salte i akimile dan lanmar i fer flooding epi i koz linondasyon dan lakaz e menm ranpli lakaz dimoun avek delo sal.  Definitivman nou, nou annan en sistenm, en tim dimoun ki travay avek bann lanmar ek larivyer e zot rol se pase e tyeke tou bann lanmar, pou fer sir poudir nou bann lanmar i ganny mentenir pli prop posib.  E menm nou’n donn kontra parey ou’n mansyonnen, bann diferan Kontrakter, pou fer sir poudir regilyerman zot pase zot netway larivyer, zot netway bann lanmar pou fer sir poudir sa problenm blokaz larivyer e blokaz lanmar pa arive.  Me selman i pa toultan leka e nou pa kouver tou larivyer.  I annan ki:- akoz nou Bidze i ase limite nou kapab fer serten kantite.  I annan ki nou pa kapab fer.  Me son remed i pa pou zis netway lanmar.  Son remed se ki dimoun i aret zet salte dan larivyer e lezot bann landrwa kot a lafen salte i al dan larivyer.

Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker.  Mr Speaker, an vi repons Minis, eski Minis i kapab enform sa Lasanble konbyen pe kout Gouvernman atraver son Minister pou netway bann larivyer par an?

Eski Minis osi i kapab enform nou Lasanble konbyen aksyon legal ki Departman respektif  dan son Minister in reisir avek sikse pou met Ankour, avek bi pou ogmant standar konportman piblik anver nou bann resours delo?  Mersi.

MINISTER DIDIER DOGLEY

Mr Speaker, mon napa sa bann figures, sa bann nimero spesifik la avek mwan.  Si i neseser, mon ava fer Onorab Fideria gannyen egzakteman akoz sa bann figures pa detaye egzakteman konbyen ki nou depanse lo sa bann keksoz.  Me selman mon kapab fer nou bann staff konte e donn li sa bann nimero spesifik.

Mersi Mr Speaker.

MR SPEAKER

Onorab Samson.

HON DEREK SAMSON

Mersi Mr Speaker.  Bonzour tou dimoun.  Mr Speaker, mon ti a kontan demann Minis ki pozisyon son Minister anver sityasyon kot nou vwar souvandfwa later rouz ki’n ganny dizon kase dan montanny, i ganny ariv dan larivyer dan sours e dan en fason pe polye delo.  Ki pozisyon son Minister anver bann sityasyon parey?  Mersi.

MINISTER DIDIER DOGLEY

Mersi Mr Speaker.  An zeneral pour okenn devlopman ki ganny fer dan Sesel, mon Minister i enplike pou fer sir poudir lafason ki i ganny fer, i pa kree bann problenm polisyon ouswa kree okenn danze pour bann lezot dimoun ki reste dan sa landrwa.  E nou, nou toultan demann dimoun pou fer sa bann travay ki nou apel earth work ouswa bann koupir later, ki zot fer sa pandan en peryod ki sek.  E zot fer le maximum posib pou fer sir zot fer miray ouswa zot re stabiliz sa landrwa o pli vit posib.  E sa i direkteman link avek sanmenm sa zafer ki ou pe dir, ki later rouz i desann, i ale i al dan larivyer.  E menm akimil dan bann lanmar e menm al touy bann koray ek bann lezot landrwa sansib ki nou, nou annan isi Sesel.

Alor, Gouvernman in met an plas en sistenm atraver Planning ki aprezan en dimoun i pou bezwen fer en laplikasyon spesifik pou li koup later pou li fer bann devlopman ouswa lagrikiltir ouswa bann lezot aktivite.  E ler zot fer sa, sa i ganny trete anba Lalwa Planning. An menm tan zot travay tre pros avek Minister Lanvironnman pou fer sir poudir sa bann problenm pa arive e ki sa bann dimoun i ganny donnen serten peryod letan pou zot fer sa travay e pou zot re stabiliz landrwa o pli vit posib.

Alor i en problenm ki nou okouran.  I en problenm ki ase grav e ki nou pe fer nou mye pou fer sir poudir nou met li anba kontrol.

Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.  Bonzour Minis ek ou delegasyon.  Bonzour tou Manm koleg Onorab.  Bonzour tou bann dimoun dan Galeri e tou bann ki a lekout.

Mr Speaker, an vi bann defi an relasyon ek polisyon larivyer e lanmar, eski Minis i kapab dir sa Lasanble si zot annan okenn plan pou met an plas en sistenm monitoring ki pli konsistan e pli efikas, avek bi pou enn fwa pour tou rezourd sa bann problenm?  Mersi Mr Speaker.

MINISTER DIDIER DOGLEY

Mersi Mr Speaker.  Mr Speaker parey mon’n mansyonnen dan mon larepons bomaten, Minister i deza pe travay tre pros avek Minister Lasante, avek Lapolis, pou nou amelyor nou sistenm swivi monitoring.  E fer sir poudir i annan ase dimoun on the ground pou fer sir poudir nou monitor kondisyon tou nou bann larivyer, nou monitor lanmar e menm kalite delo ki pe koule ladan.

E lo lot kote osi pou fer sir poudir nou fer ki nou sistenm ki egziste i vin bokou pli for, pou fer sir pou dir nou detekte problenm polisyon ase boner.  Avan nou ti annan nou apepre 8 dimoun ki ti travay dan Polisyon dan Minister Lanvironnman, ki i pa ase pou kouver Mahe antye.  Alor fason ki pou fer li bouz en pli vit pou nou kapab ranforsi nou bann travay, nou’n vwar li neseser pou travay ek Minister Lasante ki annan bann dimoun ki avan nou ti apel Sanniter ouswa bann Health Officers ki baze dan bann distrik zot menm.

E ler nou met sa kantite dimoun ki Lasante i annan, ki nou, nou annan avek bann Zofisye Lasante, apre avek DA, son bann dimoun dan distrik, i fer poudir ki nou annan en lafors ki bokou pli for pou fer ki nou kapab fer en pli bon monitoring, en pli bon swivi e osi atak sa problenm bokou pli for ki nou ti pe fer avan.

Mersi Mr Speaker.

MR SPEAKER

Onorab Lebon.  Request Onorab.

HON LENNY LEBON

Mersi Mr Speaker.  Mr Speaker, anliny avek repons Minis.  Minis pe met lanfaz lo kot nou pa zet salte dan larivyer.  Eski son Minister pe travay avek lekol pou edik bann manrmay ki zot menm zot sorti kot bann lakour, annan en proze triyaz, sa ki nou apel triyaz dechets ou salte, pour ki sa bann salte pa retonm dan larivyer?  Mersi.

MINISTER DIDIER DOGLEY

Mersi Mr Speaker.  Mr Speaker, Minister Lanvironnman depi:- ou kapab dir depi dan bann 1994/1995 in deza komans en progranm dan tou lekol avek bann manrmay pou fer sir pou dir sa zenerasyon ki pe vini i en zenerasyon ki’n byen ganny edike lo bann kestyon lanvironnman.

E menm Minister Ledikasyon, zot in met en progranm dan curriculum bann manrmay lekol ki annan pou fer ek lanvironnman, ki osi adres en pe sa bann kestyon.  E nou, nou pe kontinyen travay ek bann manrmay, menm atraver bann sa ki nou apel NGO. Par egzanp, dan preski tou lekol nou annan sa ki nou apel Wild Life Club, kot bann manrmay zot menm i fer diferan aktivite.  Zot menm fer bann tes dan larivyer.  Zot al fer bann pti letid dan larivyer pou zot konpran ki mannyer sa bann diferan aktivite i afekte larivyer.  E menm i annan ki’n enplike dan netwayaz larivyer ler nou fer Clean up the World.  Annefe, nou pa krwar poudir i en problenm ki manrmay pa konnen ki pou fer.  I plizoumwen ki i en kestyon sanz mantalite, sanz behavior lafason fer keksoz.

E nou, nou pou kontinyen travay ek zot e osi ler nou bann sistenm triyaz i vin bokou pli avanse, nou ava travay ek zot pou fer sir osi poudir ler zot in fer sa triyaz, sa koleksyon osi i mars ansanm ek sa triyaz.

Annefe triyaz i deza pe komanse akoz ler ou regarde laplipar bann, sa ki nou apel pet, bann boutey pet bann can bann manrmay i deza pe met par kote akoz sa i annan larzan avek.  E nou pe sey fer osi ki bann lezot keksoz parey papye bann keksoz ki organik e ki sa i ganny mete de kote e ki i komans ganny separe e i pa ganny met ansanm avek tou lezot salte ki al dan bin pou al zet lo konblaz.

Mersi Mr Speaker.

MR SPEAKER

Onorab Esther.

HON NATASHA ESTHER

Mersi Mr Speaker.  Bonzour tous.  Dapre repons Minis, eski Minis i kapab enform sa Lasanble dan konteks ede prezerv nou larivyer e lezot parti nou Lanvironnman, eski Minis i kapab dir nou si i dan plan son Minister pou annan en Environmental Police Officer pou deservi Praslin?  Mersi.

MINISTER DIDIER DOGLEY

Mr Speaker, nou ti a byen kontan annan Environmental Officers ki deservi tou distrik, enkli Baie Ste Anne ek Grand Anse Praslin.  Malerezman ziska prezan parey mon pe dir, nou annan apepre 8 dimoun ki fer sa bann travay dan Minister Lanvironnman.  E nou annan enn spesifikman ki mont Praslin preski tou le semenn, pou fer sir poudir bann problenm polisyon i ganny adrese.

Me selman nou annan en tim deza lo Praslin, baze Fond Boffay ki siport bann travay ki Environmental Police i fer akoz Minister Lanvironnman, tou son bann Zofisye annefe i empowered parey tou Zofisye Environmental Police, pou zot kapab pran ka avek okenn problenm polisyon ki zot trouve.

Wi, si ti posib mon ti a byen kontan e mon ti a kontan ek zot sipor ki nou a ganny sa larzan, pou nou kapab recruit en pe plis Zofisye pou ed nou fer en louvraz bokou pli for ki nou pe fer ozordi.

Mersi Mr Speaker.

MR SPEAKER

Kestyon 76, Onorab Volcere.

HON MARC VOLCERE

Mersi Mr Speaker.  Mr Speaker, eski Minis i kapab eksplik sa Lasanble lo bann prosedir pou en dimoun koup pye dibwa danzere lo son propriyete?  Mersi.

MINISTER DIDIER DOGLEY

Mersi Mr Speaker.  En dimoun ki anvi koup pye dibwa ki ganny proteze anba Lalwa, i annan pou li al kot Minister Lanvironnman, Seksyon Lafore, ki baze dan Aarti Building lo Mahe, biro Fond Boffay lo Praslin e kot batiman Veuve lo La Digue.  Laba, sa aplikan a ganny eksplike nou prosedir e Zofisye a donn li en form laplikasyon ki ladan i pou bezwen sit rezon pour kwa i anvizaze koup sa pye dibwa.  I pou bezwen pey en processing fee R100.  E normalman, nou anba Lalwa Breadfruit and Other Trees Act 1917, Minister i kapab donn permisyon pou koup en pye dibwa pour 3 rezon selman.

Premye rezon se si sa pye dibwa i danzere.

Dezyenm rezon, si sa dimoun pe al fer en devlopman, en konstriksyon kelkonk e sa pye dibwa ouswa plizyer pye dibwa pe koz en problenm pour son devlopman.

Trwazyenmman, si sa dimoun pe al fer lagrikiltir e sa pye dibwa ouswa sa bann pye dibwa ankor pe koz en problenm pour son aktivite ki li i pe al fer.

Nou osi donn permisyon pou koup serten pye dibwa ki annan en valer dibwa, sirtou pou bann travay Sarpantye.  Sa i enkli par egzanp Bwa Nwanr, Kalis di Pap, Bodanmyen e lezot.  Me sa ankor i ganny trete diferaman.

Mr Speaker, fodre note ki menm si rezon pou koup pye dibwa i valid, sa endividi ou Lorganizasyon i bezwen prodwir dokiman pou prouve ki sa pye dibwa i vreman lo son propriyete, tel koman son lavant later ou plan later.  Ler Minister i satisfe avek tou dokiman sa aplikan, Zofisye i fer lenspeksyon lo sit pou determinen si sa pye dibwa i pou annan nesesite taye ouswa koup an antye.  Se selman ler nou bann Zofisye i satisfe ki zot donn en permi.

Souvandfwa, nou osi donn serten kondisyon e apre nou bann Zofisye i repase pou fer levalyasyon lo sit pou fer sir poudir sa bann dimoun ouswa sa aplikan in swiv bann kondisyon ki nou nou’n donnen.

Mersi Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker.  Mr Speaker, mon ti a kontan demann Minis, apre ki sa bann prosedir in fini ganny fer, eski son Minister i osi asiste avek resours finansyel pou a lafen, pou sa dimoun kapab tir sa dibwa ki danzere lo son propriyete?  Mersi.

MINISTER DIDIER DOGLEY

Mersi Mr Speaker.  Mr Speaker, Minster Lanvironnman, Lenerzi e Sanzman Klima i pa gannyen en Bidze pou li ed dimoun pou koup pye dibwa lo zot propriyete.  Bidze ki Minister i annan se pou li fer le neseser lo bann landrwa, lo bann propriyete ki tonm anba son responsabilite spesifik, parey bann lezot Minister parey MLUH i fer, ouswa Land Transport i fer lo bann pye dibwa ki o bor semen, ouswa PUC lo son bann laliny ki pe afekte son laliny.  I a senpleman nou napa sa Bidze pou ed dimoun si zot fer okenn laplikasyon avek Minister, pou donn finansman pou zot koup zot bann pye dibwa.

Mersi Mr Speaker.

MR SPEAKER

Onorab Esther.

HON NATASHA ESTHER

Mersi Mr Speaker.  Mr Speaker, eski Minis i kapab enform sa Lasanble ki arive dan ka kot propriyeter i re fize koup en pye dibwa ki danzere e ki a plizyer repriz, in ganny advice pou koupe.  Mersi.

MINISTER DIDIER DOGLEY

Mr Speaker, si i annan en pye dibwa ki danzere lo propriyete en dimoun, ki pe menas propriyete en lot dimoun, ouswa sa dimoun li menm, sa dimoun i kapab vin kot Minister Lanvironnman pou demann Minister Lanvironnman pou fer evalyasyon.  E Minister Lanvironnman i ava anvoy son Zofisye pou vin vini pou vin evalye, regarde si vre sa pye dibwa i poz en serten danze pour sa dimoun.  E si i kler poudir wi i annan en danze, Minister Lanvironnman i a kapab donn li en dokiman ki siport lefe ki konmkwa sa pye dibwa i danzere pou li.

E li i kapab pran sa dokiman, pran en Avoka anmenn Ankour akoz se zis Lakour ki kapab donn en Lord pou koup en pye dibwa.  Minister Lanvironnman napa pouvwar pou donn lord pou fer koup pye dibwa.  Alor sa dimoun i kapab pran en Ziz i kapab pran en Avoka, anmenn son case Ankour e rod sa ki apel en Court Order pou sa dimoun koup sa pye dibwa.

Alor nou, nou kapab donn sa sipor me selman nou pa kapab donn lord pou fer koup pye dibwa.

Mersi Mr Speaker.

MR SPEAKER

Onorab Pillay.

HON SEBASTIAN PILLAY

Mersi Mr Speaker.  Mr Speaker, mon ti a kontan demann Minis si dan sirkonstans kot sa propriyeter ki own sa later kot sa pye dibwa i trouve, i pa dan pei oubyen i pa available, ki rekour sa dimoun ki sa pye dibwa pe poz en danze pou li, pou son propriyete, oubyen si sa pye dibwa i poz en danze pou piblik an zeneral, ki rekour Lotorite oubyen sa dimoun pou annan pou li kapab fer koup sa pye dibwa kot la nou pou vwar ki, malgre si pou pran en Avoka prosedir pou tre long.  E sa pye dibwa i ganny drwa efektivman tonbe e andomaz lakaz sa dimoun.

E dezyenmman, se eski son Minister pa pe konsidere, an konsiltasyon avek Biro Atorni Zeneral, pou met an plas en regilasyon ki a kapab permet annefe deal avek sa bann sityasyon kot i annan sa pye dibwa danzere ki ganny trouve lo propriyete en lot dimoun, ki petet sa propriyeter pa la, oubyen sa propriyete in ganny abandonnen pour en bon pe letan.  Mersi Mr Speaker.

MINISTER DIDIER DOGLEY

Mr Speaker, mon pa en Avoka me konprenezon ki mon konpran ki mannyer sa sistenm i marse, se ki, ki mannyer nou sistenm Lalwa i fonksyonnen Sesel, Minister Lanvironnman pa pou kapab fer en Lalwa li menm pou li donn lord pou fer koup pye dibwa lo later dimoun.  Tou ka, menm bann lezot ka, menm ek polisyon ek lezot si nou oule pran aksyon ek dimoun, nou bezwen pas atraver Lakour.  Se zis Lakour Sesel ki:- en Ziz Sesel ki kapab pran desizyon pou donn en dimoun en lord pou fer en serten keksoz.

Menm si sa dimoun i prezan dan pei ouswa i pa prezan dan pei, prosedir i parey.  Sa dimoun i kapab vin kot Minister Lanvironnman, i demann nou sipor pou ganny li en evalyasyon endepandan par en Lotorite konpetan, pou montre pou dir vre i annan en problenm.  E si i kler pou dir sa problenm i la, sa danze i la, nou Minister ava donn li sa dokiman ki li i kapab avek en Avoka, al kot en Ziz kot Lakour e demann Lakour permisyon pou fer koup sa pye dibwa.  Alor, se zis Ziz ki kapab donn sa Lord pou fer koup pye dibwa.  Minister napa sa Lotorite pou li donn permisyon ouswa lotorite pou fer koup pye dibwa lo okenn later dimoun.

Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.  Mr Speaker, eski Minis ki kapab dir sa Lasanble ki kalite lasistans son Minister i donn bann dimoun aze e bann ki lo Lasistans Sosyal Welfare, ler en pye dibwa danzere i ganny idantifye lo propriyete bann tel dimoun?  Mersi Mr Speaker.

MINISTER DIDIER DOGLEY

Mr Speaker, mersi.  Avan 2008, Minister ti annan en tim dimoun ki ti pase, ti ed bann group dimoun pou koup pye dibwa lo zot propriyete.  E apre 2008, Gouvernman ti vwar poudir petet ti’n ler pou fer sa servis ganny donnen par bann lakonpannyen prive.  E Gouvernman ti met an plas atraver HFC, Housing Finance Company en sistenm loan ki nou apel Home Improvement Loan, ki en dimoun i kapab pran ziskan R50 mil pou li fer bann travay kot lakour pou amelyor son lakour.  E menm si i annan bann keksoz danzere parey ros pou kase ouswa pye dibwa pou koupe, sa dimoun i kapab pran sa loan.

Now, si sa dimoun parey ou pe dir i en dimoun aze, i kler ki i pa pou kapab pran okenn loan, i pa pou kapab re peye menm si i pran.  Then Gouvernman, i en Gouvernman ki normalman pran ka avek son bann vye dimoun, i ava fer le neseser pou trouv en fason pou ed sa dimoun pou tir sa danze obor son lakaz.

Mersi Mr Speaker.

MR SPEAKER

Onorab Arnephy.

HON BERNARD ARNEPHY

Mersi Mr Speaker.  Bonzour tou dimoun.  Mr Speaker, eski Minis i kapab dir nou, apre ki tou sa bann evalyasyon assessment in ganny fer e ki Zofisye in vin vizit teren, konbyen letan eski son Minister i pran avan ler i donn en dimoun approval pou kapab koup sa pye dibwa?

E eski Minister pa pe mazin en formil pli senp par egzanp, kot tou sa bann assessment in ganny fer e kot i annan en form standar kot sa Zofisye i ganny sa pouvwar pou li donn sa dimoun permisyon here and there pou li kapab koup sa pye dibwa?  Mersi.

MINISTER DIDIER DOGLEY

Mr Speaker, normalman i devret pran en semenn a 2 semenn maximum pou en dimoun ganny permisyon pou li koup pye dibwa.  I pa devret pran plis ki sa kantite letan.  Si i pran plis letan, zot devret les nou konnen e nou, nou a fer le neseser pou fer sir poudir sa problenm i ganny rektifye.

Annefe, nou pe regard dan bann posibilite pou dimoun fer sa bann aplikasyon online.  Parey zot konnen, Gouvernman pe travay lo e-Gouvernment. E nou osi nou pe regarde ki mannyer nou kapab servi sa bann sistenm pou nou met nou bann form online, pou bann dimoun kapab download, print e ranpli kot zot.  E sel keksoz ki zot pou bezwen fer se pey sa R100.  Either zot bezwen vin kot biro ouswa ek sa sistenm ki Gouvernman pe met an plas, ki ou kapab pey atraver online, ki ou osi ou kapab pey online.

E apre ki ou’n fer sa, ki nou bann Zofisye i ava konnen e i kapab vin kot ou e fer le neseser pou ou soz.  Ki ou pa bezwen ni deplase pou ou vin kot biro pou fer sa bann zafer.  I wi.  Nou, nou anvi amelyor sistenm e fer li pli fasil pou donn servis dimoun.  E nou pare pou regard dan okenn fason pou akoursi sa peryod ki dimoun i bezwen atann pou ganny permisyon.  E sirtou pandan peryod ki nou konnen i annan gro lapli bann keksoz koumsa, normalman nou fasilit prosesis pou tay ouswa koup pye dibwa pou tir danze devan laport dimoun.

Mersi Mr Speaker.

MR SPEAKER

Kestyon 77, Onorab Decommarmond.

HON CHARLES DECOMMARMOND

Mersi Mr Speaker.  Bonzour Mr Speaker.  Bonzour Minis.  Bonzour tou bann Manm e tou dimoun ki a lekout.

Mr Speaker, mon kestyon i le swivan.  Lefe ki Sesel i en Sanpyon dan lanvironnman lo nivo mondyal, eski Minis i kapab eksplik nou Lasanble kwa ki son Minister pe fer konkretman an kolaborasyon avek SBC, pou pas omwen en item lo size lanvironnman tou le zour lo Televizyon Nasyonal, pou edik e konsyantiz nou pep plis lo sa size?  Mersi.

MINISTER DIDIER DOGLEY

Mersi Mr Speaker.  Mon Minister i met en kantite lenportans lo nesesite pou pas plis lenformasyon posib avek piblik.  Nou konnen ki sel fason pou sanz konportman piblik anver nou Lanvironnman se par ledikasyon e lenformasyon.  Nou deza pe travay tre pros avek SBC e lezot form Medya pou transmet maksimonm lenformasyon avek piblik pou edik zot e menm pou ed zot apresye nou lanvironnman bokou pli byen.

Tou le lannen, nou ganny sipor avek SBC atraver serten letan air time, free air time, pou nou kapab pas bann spots edikatif.  Me par kont, nou bezwen peye pour prodiksyon sa bann spot e progranm ki kout ase ser.  Bann Lakonpannyen Prive pe sarz minimum R4mil pour en spot e plis ki R25 mil pour en progranm 30 minit.  Lakantite spot e progranm ki nou kapab prodwir e pas lo Televizyon, i baze lo lakantite larzan ki nou, nou annan dan nou fon e osi ki kantite sipor nou gannyen, atraver bann sponsor.

Sa ki osi enportan se kalite progranm ki nou pase.  Ozordi, nou pe fer konpetisyon avek bann Cable TV ki si nou bann progranm pa bon kalite, i pa enteresan, personn pa pou enterese pou al swiv li.  Alor, nou bezwen pran ase letan pou prodwir bann bon progranm ki annan sa kalite pou dimoun devlop sa lentere ladan.

Pour sa lannen, nou pe konsantre plis lo bann size ki ganny konsidere pli problematik parey Sanzman Klima, Konservasyon Delo ek Lenerzi, Kontrol Dife dan Lafore, Zesyon Salte, Bann bon fason fer pou viv dan en fason soutenab kot lakour, eksetera.

Sa lannen, i annan 2 progranm dokimanter anviron 30 minit ki pe pase tou le 2 semenn lo Televizyon SBC.

Premye se ‘Sesel Nou Planet.’  I en magazin lanvironnman ki pase tou le 2 Zedi 9er diswar.  Sak progranm i eksplor en size an detay.

Dezyenm i en lot progranm ‘Splander Lanatir’ i osi 30 minit.  I pase tou le 2 Lendi, apre Nouvel 7er.  Sa enn progranm i konsantre plis lo bann kestyon Bio Diversite.

En lot progranm anviron 30 minit.  Enn ki’n ganny bokou apresye lannen pase, se ‘Santye Nou Zil.’  Li i pou komans pase tou le mwan, komansman Zilyet sa lannen.  Sa i konsantre bokou lo dekouver Bio diversite, bann Nature Trails kot nou dekouver nou pei e son bann lespas parey Zwazo Zensek e Plant, sirtou bann ki andemik.

Nou annan en varyete spots tre kourt ki ganny pase sirtou avan ou apre Nouvel tou le zour, lo problenm salte parey bann salte ki dimoun i kit lo lans apre zot bann piknik, konservasyon delo ek elektrik kot lakour e lezot ankor.  Minister ek bann Lorganizasyon konsernen i an se moman pe prodwi nouvo spot ek progranm ki pou ganny montre pli tar dan lannen.  Bokou sa bann spot pe ganny prodwir, avek bann pti prodikter prive lokal e non pa selman avek SBC akoz SBC osi i annan son bann limitasyon.

Me nou pa pe zis servi Televizyon akoz bokou dimoun i osi ekout Radyo .  E tou le mwan, nou annan en progranm Radyo 30 minit, apele ‘Lanatir Ann Abondans.’

I osi annan bann spot lo Radyo AM ek FM tou le zour.  E nou’n komans en Facebook page ki nou servi, sirtou pour bann zenn akoz bann zenn nou konnen dapre bann dernyen letid ki’n fer, zot pa vreman get televizyon zot plis al lo Internet.  Alor, nou osi nou bezwen bouz lafason ki nou pas mesaz e osi pas lenformasyon avek sa group dimoun.

Mersi Mr Speaker.

MR SPEAKER

Onorab De Commarmond, okenn siplemanter?

HON CHARLES DE COMMARMOND

Mersi Mr Speaker, wi mon annan.  Mr Speaker eski Minis i kapab enform nou Lasanble konbyen i koute sa bann progranm ki in dir zot annan tou le semenn i fer lo Televizyon.  Konbyen i koute.  E eski osi  i kapab enform nou Lasanble si zot peye Nouvel e osi dir nou, akoz sa kestyon:- mon pa pe koz spot mwan, mon pe koz en item, en lenformasyon dan Nouvel, en keksoz koumsa tou le zour.  Akoz zot pa kapab fer li tou le zour ansanm ek SBC, pou konsyantiz nou dimoun lo son lanvironnman?  Mersi.

MINISTER DIDIER DOGLEY

Mr Speaker, Minister Lanvironnman napa kontrol lo Nouvel SBC.  Nou, nou menm si ou donn nou sa pouvwar, tou le zour nou a pase en keksoz lo Televizyon dan Nouvel.  Me malerezman sa desizyon kwa pou pase lo Televizyon SBC i pa reste avek nou.  Nou annan en kantite aktivite ki nou fer, ki mwan personnelman mon ti a voudre vwar li lo Televizyon, lo Radyo, Me malerezman nou ankor pe compete avek lezot Minister.  E nou napa en monopol lo Televizyon SBC.  Kekfwa ti a bon anmenn en progranm spesifik pour Minister Lanvironnman e nou, nou ti ava fer nou mye pou fer sir ki nou donn sa bann lenformasyon neseser tou le zour.

Mersi Mr Speaker.

MR SPEAKER

Onorab Samson.

HON DEREK SAMSON

Mersi Mr Speaker.  Mr Speaker, mon ti a kontan demann Minis, an vi ki:- an relasyon avek larepons ki in fek reponn an vi ki kou prodiksyon sa bann tel spot i ase leve, eski son Minster pe mandate oubyen pe korpor avek lezot Lorganizasyon ki annan pou fer avek lanvironnman, pou partisip ansanm avek zot pou prodwir bann tel spot lo Televizyon lo Radyo e menm lo Social Media?  Mersi bokou.

MINISTER DIDIER DOGLEY

Mr Speaker, Minister Lanvironnman i en Minister ki travay maaximum posib avek tou bann Lorganizasyon akoz bokou bann travay ki nou, nou fer i annan pou fer avek bann kestyon soutenab.  E bokou sa bann kestyon, i parey an angle nou dir, i cut across laplipar bann lezot Sekter.  I pa zis pou fer direkteman avek Minister Lanvironnman.

E nou, nou annan en kantite travay ki nou fer avek par egzanp bann NGO’s. Nou servi tou loportinite ki nou ganny donnen.  Parey mon pe dir nou pa zis al lo Televizyon.  Nou osi servi Radyo, nou osi servi bann aktivite ki ganny organize.  Par egzanp la avek National Show, Minister Lanvironnman pe set up en gran landrwa kot i pou envit tou bann NGO’s, tou bann lezot Lorganizasyon ki enplike ek bann kestyon lanvironnman, pou vin montre e ganny sans dyaloge ek bann dimoun ki vin vizit nou stall.  Akoz keksoz ki ou pase lo Televizyon i en pe pasiv e par ler ou bezwen annan en fasilite kot ou kapab aktivman diskit e dyaloge e annan en sistenm enteraktif kot ou kapab pas lenformasyon e kot dimoun i kapab demann kestyon.

E nou, nou tant pou servi tou sord kalite fason.  Nou asize, nou rod bann stratezi pou fer sir poudir nou mesaz, nou lenformasyon i ariv kot bann diferan group piblik ki egziste isi Sesel.

Alor, pou nou travay ek bann lezot Lorganizasyon i en keksoz ki nou pe fer.  Nou ti a voudre fer plis.  Me i annan serten limitasyon., me nou pou kontinyen esey rod fason pou nou fer bokou plis ki nou pe fer ozordi.

Mersi Mr Speaker.

MR SPEAKER

Onorab Bresson.

HON GALEN BRESSON

Mersi Mr Speaker.  Bonzour tou dimoun.  Bonzour tou dimoun ki a lekout.  Baze lo larepons Minis Mr Speaker, eski Minis i kapab dir ek sa Lasanble pou lefitir, ou’n mansyonn SBC, ou napa kontrol lo SBC me SBC pe al lo en digital platform kot i pou annan plis kapasite, i pou kapab ofer plis channel. Eski zot pe mazinen dan ou Minister pou en pti pe plis pro-aktiv met zot pare, prepar bann progranm, ki zot annan zot prop lasenn demann SBC, negosye ek SBC pou ganny prop lasenn kot zot kapab annan en dekouvert.  Nou annan plis ki 100 zil.  Regard tou nou bann laspe lanvironnman dan sa nivo, me dan le fitir?  Mersi Mr Speaker.

MINISTER DIDIER DOGLEY

Mr Speaker, wi mon krwar sa i en bon devlopman ki ava ed nou dan Minister pou nou kapab fer bokou pli mye ki nou pe fer, pou fer sir poudir lenformasyon i ariv kot piblik.  E mwan definitivman mon ava regard avek CEO SBC pou vwar ki mannyer ki nou Minister i kapab benefisye avek sa bann nouvo devlopman ki pe arive.  Mersi Mr Speaker.

MR SPEAKER

Onorab De Commarmond, kestyon 78.

HON CHARLES DECOMMARMOND

Mersi Mr Speaker.  Mr Speaker, eski Minis i kapab eksplik nou Lasanble status bann diferan Proze ou Scheme Proteksyon Lanvironnman ki Gouvernman in sibvansyonnen, par egzanp Proze:-

Kraz boutey plastik

Anmas bann vye batri

Anmas bann feray

Anmas bann lezot plastik ek bann bwat plastik yogurt eksetera

E osi enform nou Lasanble lo plan lezot proze ki zot annan an tet.

Mersi bokou.

MINISTER DIDIER DOGLEY

Mr Speaker, nou Solid Waste Policy 2014 i demande ki maksimonm salte prodwi dan Sesel i ganny resikle ouswa eksporte.  Son bi se pou redwir lakantite salte ki al lo Landfill isi Mahe laba Providence, lo Praslin Lanmitye e L’Union Estate lo La Digue.  Sistenm ki’n ganny mete an plas pou anmas bann pet e aluminum cans par Minister Lanvironnman, Lenerzi e Sanzman Klima, pe mars ase byen ziska konmela.

Lakantite boutey pet ki’n ganny anmase e kraze pour 2014 i preski 13 milyon boutey.  E sa i ekivalan apepre R9 milyon ki nou’n depanse pou kolekte sa bann boutey.  Dan ka aluminum beverage can, nou’n anmas e eksport apepre 12 milyon can an 2014, ki ekivalan apepre R8.5 milyon ki nou’n depanse pou anmas sa bann bwat beverage can.

Sa bann Redeem Centres ki nou’n kre lo Mahe, Praslin e La Digue pou le moman i ankor pe fonksyonn san okenn gran problenm.  Toudmenm, mon Minister ek Minister responsab pou Finans pe rod fason ki koleksyon levy i vin pli efikas ki ete ozordi.

Mr Speaker, dan sa domenn eksportasyon vye feray, i annan plizyer biznes ki enplike dan sa aktivite.  An 2014, nou ti annan 5 a 6 biznes ki’n  aktivman kolekte vye feray e eksporte.  Minister Lanvironnman in rikord 2269.2 tonn vye feray ki’n ganny eksporte an 2013 e 986 .4 tonn an 2014.  Sa rediksyon dan eksportasyon an 2014 i akoz SAMLO ki pli gro Lakonpannyen ki kolekte bann vye feray pa ti aktiv an 2014.

Minister Landscape and Waste Management Agency pe travay avek manm piblik pou asire ki bann vye feray dan lanvironnman i ganny kolekte e osi bann feray ki antre ek salte lo Landfill i ganny separe e eksporte.  Dan le pase, Gouvernman in asiste plizyer sa bann Lakonpannyen pou fer zot aktivite.  Minister pe kontinyelman rod fason pou asire ki sa bann Lakonpannyen i kapab reste an operasyon dan sa Sekter.  Ler nou evalye, nou vwar ki sa aktivite i vyab e ki i annan en lavenir dan leksportasyon vye feray.

Zefor ki Minister pe osi fer, se ki nou finans transportasyon vye feray ki ganny zete lo Praslin e La Digue e fer sir ki zot ariv lo Mahe kot bann eksportater, apre zot pran pou eksporte.

An sa ki konsern vye batri, an tou 500 tonn ti ganny eksporte pandan lannen 2014.  Minister i an diskisyon avek bann operater pou vin avek bann lezot mezir pou redwir lakantite vye batri dan lanvironnman.  Par egzanp, nou pe ankouraz bann operater pou aste bann vye batri loto avek manm piblik.

Pour salte plastik, Minister i ankor pe konsider plizyer opsyon pou redwir e tret sa kalite salte.  Pet, boutey pet parey nou konnen, i en kalite plastik ki nou deza pe trete, me plastik i annan plizyer kalite plastik.  Ou bezwen sort out bann diferan plastik avan ki nou pou annan en solisyon total pour bann diferan group plastik ki egziste.  Me sa ki nou’n deza fer isi Sesel se nou pe regle lepeser sak plastik ki ganny enporte isi Sesel.  Tou bann sak plastik ki par anba 30 micron, i pa ganny drwa ganny enporte dan Sesel.

An plis, Minister pe aktyelman ganny asiste par Clinton Foundation pou idantifye bann opsyon transformasyon salte pou kree lenerzi ouswa Waste Energy e sa bann solisyon ki zot pou vin avek i kapab enkli solisyon pou destriksyon plastik.

STAR pe osi eksport delwil ize e i annan en lot Lakonpannyen ki pe osi resikle e eksport kartron ek vye papye.

Tre nouvo i osi en Lakonpannyen ki pe eksport sa ki pou apel Electronic Waste, ki vedir bann vye bord computer ek bann lezot waste ki sorti dan bann soz elektronik.  Appliances.  An sa ki konsern bann lezot proze ki form parti Solid Waste Policy ki vize lo resiklaz ek rediksyon diferan kategori salte, par egzanp salte elektronik, Minister pe anvizaz lezot proze tel ki posibilite eksport sa bann salte Sid Afrik ek Kore.  E osi trouv fason pou ganny resours pou fer koleksyon separe.

Mersi Mr Speaker.

MR SPEAKER

Onorab De Commarmond, okenn siplemanter?

HON CHARLES DE COMMARMOND

Mersi Mr Speaker.  Mr Speaker, eski Minis i kapab enform nou Lasanble lo eski sa bann biznes ki in mansyonnen pour sa bann proze, eski i kapab enform nou Lasanble konmsi ki bann spesifik sibvansyon e lasistans sa bann biznes i gannyen.  Eski par egzanp zot ganny en priyorite pou ganny en bout later lo konblaz par egzanp pou zot operate akoz sa i konsern lanvironnman?  Akoz par egzanp ki dimoun, menm ki dir i annan proze zet salte, zet papye transform papye.  Akoz ki dimoun i kontinyen zis zet papye e bril bann papye?  Konmsi napa landrwa ki i ale, ki i pou kapab mete sa bann zafer?  Eski nouvo konblaz par egzanp lo Providence ki pe fer ek loperasyon nouvo konblaz, an relasyon avek sa ki ou’n eksplik nou ozordi dan Lasanble?  Mersi.

MINISTER DIDIER DOGLEY

Mr Speaker i annan diferan fason ki Minister i ed bann Lakonpannyen.  Parey Onorab in dir, dan le pase e osi nou pe kontinyen kot i posib, nou travay tre pros avek Minister ki zer later isi Sesel.  E kot i posib, nou fer laranzman pour sa Lakonpannyen si vreman i annan en plan ki nou vwar i serye, ki i en lenvestisman ki serye ki pe vin par deryer, nou ed li pou li kapab ganny en morso later pa lwen avek Landfill, ki dan en fason i kapab tret sa bann salte akoz i pa dan tou sa prosesis pou nou kapab tret salte.  E eksportasyon salte pou nou.  I form par dan sa prosesis tret bann salte ki nou gannyen isi Sesel.  Alor si sa dimoun ouswa sa Lakonpannyen ki nou vwar i serye, i annan finansman, nou ed li pou trouv later.

Dan lezot fason parey pet ek can parey mon’n deza dir, i annan en sistenm levy ki egziste.  E ki Gouvernman i fer, sa i ganny fer osi pa zis Sesel i ganny fer atraver lemonn, se ki ou met en pti tax ler sa keksoz i antre dan pei ki dan en fason ki ler dimoun in fini itiliz sa keksoz, ou kapab re peye pou tir sa problenm, sa salte dan ou sistenm pou ou fer li ganny resikle.  Akoz ou bezwen kapab finanse pou ou kapab soutenir sa aktivite pou li marse.

Dan ka parey batri kot sa diplon, i annan en gran demann pour diplon enternasyonalman.  I pa neseser pou Gouvernman soutenir sa aktivite.  E la sa Lakonpannyen li menm i finans son bann aktivite akoz reveni ki i gannyen sorti deor i kouver tou son bann kou e menm fer en profi.

E se sa ki i fer poudir pour sak diferan kalite salte, Minister i bezwen asize pran letan, etidye e fer sir poudir nou konpran pa zis son bout teknik, me son bout finansyel osi e ekonomik avan ki nou pran en desizyon lo ki mannyer ki nou donn sipor.

E kot nou’n vwar poudir i neseser pou Minister donn sipor nou fer li.  Kot nou vwar poudir nou bezwen regle, nou regle.  Kot nou vwar poudir nou bezwen anmenn bann Teknisyen pli sofistike ki nou, nou annan akoz nou napa tou kalite expert isi Sesel.  Nou anmennen e nou ede pou fer sir poudir sa bann aktivite i mars byen.  Mersi Mr Speaker.

MR SPEAKER

Onorab Ghislain.

HON CHANTAL GHISLAIN

Mersi Mr Speaker.  Mr Speaker eski Minis pour Lanvironnman ek Lenerzi i kapab dir ek sa Lasanble ki pe arive avek sa proze triyaz salte depi dan lakour, dan lekol, dan bann landrwa piblik e ki plan son Minister osi pou evite ki menm si triyaz i ganny fer, ki tou sa bann salte finalman pa ganny dump dan en menm landrwa ankor, ki fer sa triyaz pan worthwhile.

E apre eski Minis osi i kapab dir ek sa Lasanble ki zot sipor an plis ki son Minister i donn sa Lakonpannyen ki fer resiklaz bann papye aktyelman?  Mersi.

MINISTER DIDIER DOGLEY

Mr Speaker nou deza in komans prosesis triyaz parey mon’n eksplike.  Kekfwa mon pa’n donn li ase an detay.  Atraver ki’n annan sa bann progranm ek bann Lkonpannyen ki pe anmas vye feray, i deza en form triyaz.  Savedir ou vye feray pa pe ale lo Landfill. I pe ganny retire pou li al ganny zete.  Atraver ki ‘n annan bann progranm pour pet, boutey pet, i en form triyaz dan li menm depi sours.  Atraver ki’n annan bann progranm pour sa bann can, aluminum can, i form par sa prosesis.  Sa bann vye delwil ki pe ganny eksporte, i en sistenm osi kot ou pe tire, ou pe deza pe triye.

I vre poudir ziska prezan nou pa ankor kapab met en sistenm an plas kot i annan bann bin egzakteman ki soz, me solman i annan diferan fason fer li.  Nou nou’n komans koumsa.  Apre nou pe travay tre pros.  Annefe nou pe demann World Bank pou vini pou ed nou, pou vwar ki mannyer ki nou kapab premyerman komans travay avek bann Lakonpannyen akoz bann Lakonpannyen i pli fasil pou fer triyaz ek zot ek bann gran Lotel eksetera.

Apre pli tar pou nou travay avek bann lakour ki bokou pli konplike akoz kot lakour i annan en kantite bann pti kantite diferan salte ki ganny prodwir dan lakour.  Tandis ki bann Lakonpannyen i annan bann gran kantite, spesifikman serten salte.

Alor nou deza in komanse.  Nou pa’n fer li kot ou met bann diferan bin me selman an kre-an bann diferan aktivite spesifik kot salte i ganny kolekte par serten klasman salte pou eksport, ou deza pe kree sa sistenm triyaz salte, pou fer sir poudir salte pa al lo Landfill.

Mersi Mr Speaker.

MR SPEAKER

Bon, si napa okenn lezot dimoun ki oule demann Kestyon, nou’n ariv a lafen Question Time e nou a remersye e ekskiz Minis parmi nou.

(THE MINISTER AND HIS DELEGATION WERE EXCUSED FROM THE HOUSE)

MR SPEAKER

Nou a pran lot item lo Order Paper e sa set en Mosyon par Leader of Government Business.  I reste nou 14 minit.  Eski ou krwar pou sifi letan pou ou fer ou prezantasyon?

HON MARIE-ANTOINETTE ROSE

Bonzour Mr Speaker.  Non Mr Speaker, mon annan lentansyon koz en pti pe plis ki 15 minit.

MR SPEAKER

Donk nou ava adjourn ziska 10.45.

(BREAK)

MR DEPUTY SPEAKER

Bon, nou a dir bonzour tou bann Manm Onorab e tou dimoun ki a lekout.

Nou a kontinyen avek Order Paper e lot item se Mosyon ki pou ganny prezante par Onorab Marie-Antoinette Rose, Leader Zafer Gouvernman.  E mon ava envit Onorab Rose pou prezant son Mosyon.

HON MARIE-ANTOINETTE ROSE

Mersi Mr Deputy.  Mr Deputy, mon Mosyon i lir konm swivan:-

Ki Lasanble i siport demars Gouvernman Parti Lepep, pou fer sir ki nou kontinyen trouv fason inovativ pou mentenir nou polisi ‘Zonm o sant devlopman.’

Mr Deputy, premyerman, les mwan swet tou zanmi e siporter Parti Lepep, en bonn fet 51an.  51an pase, le 2 Zen 1964, nou Fondater Mr France Albert Rene, ti form sa Parti ki ti SPUP e SPPF, ozordi i apel Parti Lepep.  Mon Mosyon alors Mr Deputy, set en vot de konfyans dan travay nou Parti e vizyon ki zot ti annan sa lepok, pou tir sa Seselwa dan fernwanr e anmenn nou lo semen progre e prosperite.  ‘Zonm o sant devlopman’ i prensip Kardinal Parti Lepep.  Depi ler in vin o pouvwar an 1977 ziska ozordi, 38an ver vre progre devlopman e lepanouisman Kreol Seselwa.

Mr Deputy, dimoun ki ozordi pe dir ki nou’n pas 38an martir anba sa Gouvernman, pe selman esey anbet en pti group dimoun ki lavaris e legoizm in anglouti zot lespri.  Dimoun ki ozordi pe dir ki sa Gouvernman pe fer nou pep mizer, set en pti group dimoun ki anvi pouvwar zis pou zot anbelir zot lekor plis e plis ankor akoz zot in tro byen pase.  Dimoun ki ozordi i anvi vin diviz nou avek tou kalite promes dan vag, i senpleman akoz lafous in mir, lekonomi pe marse, pei pe marse e la in bon pour zot.

Mr Deputy, ‘Zonm o sant devlopman’ set en prensip ki deside, ki irespektiv ki kote ou’n komanse dan lavi, nwanr, blan ou zonn, zonm ou fanm, Kretyen ou pa, ris ou non.  En zanfan ki’n ne dan Lopital Sesel, i ganny menm loportinite.  Zot ne lo menm lili, dan lanmen menm Ners, ganny menm swen.  38an progre i fer ki ozordi, infant mortality rate in ariv mwens ki 10 poursan.  Swen ANC i asir en bon komansman pour zanfan Seselwa.  ‘Zonm o sant devlopman’ i vedir ki paran en nouvo ne pa bezwen pey en sou en kas pour swen lasante dan Lopital Sesel, anba Gouvernman Parti Lepep.  O kontrer, senserman, i donn sak zanfan ki ne R1000 pou ouver son kont Labank.  Son manman i ganny 3 mwan Konze Maternite, son papa i ganny 5 zour Maternite, i ganny tou son Vaksen neseser pou li grandir an bonn sante.  Dan bann pei kot swen lasante i peye, sa zonm ou fanm ki ne, en Lopital, i pou bezwen pey plizyer mil Dolar pour sa menm swen.  Nou challenge ozordi se trouv nouvo fason pou anpese ki bann zanfan ki ne anba labi drog ek lalkol, menm avan ler zot ne, i vin bann veritab sitwayen.

Mr Deputy, ler sa zanfan i fini ne, i komans fasilite Day Care, ki permet son paran al travay apre 3 mwan Konze Maternite.  Sa fasilite Day Care i en realite dan bokou distrik ozordi dan nou pei, ki’n kout nou Gouvernman plizyer milyon Roupi e ki’n fasilit plizyer pti biznes pou epanouir.  Gouvernman pe kontinyelman trouv solisyon pou permet ki sa fasilite Day Care i ariv dan tou distrik.  Sa lannen menm, fasilite Day Care pe ganny konstrir dan distrik Anse Etoile, Grand Anse Praslin e osi Anse Aux Pins.  E sa i enkli nouvo fason ki Gouvernman pe vwar pou regarde si peyman Day Care dan weight system dan sistenm Welfare i kapab ganny fer, pou permet paran tousel met zot zanfan dan Day Care e ganny plis sipor pour bann Day Care operators. Lostrali, servis Day Care i en mwayenn R18 mil par mwan.  Langleter, R10 mil par mwan.  Lafrans, R9 mil par mwan.

Mr Deputy, ler en zanfan i fini Day Care, i komans al Lakres.  Lekol formel.  Ledikasyon Early Childhood pe kout Gouvernman plizyer milyon Roupi.  E laba dan Lakres, sa zanfan i komans aprann ki mannyer pou ekri, ki mannyer pou konte, ki mannyer pou koze.  Special programs i deza etablir pour bann zanfan avek special needs.  Bann zanfan ki annan bann learning difficulties.  I annan progranm ozordi pour bann physically e mentally challenged kids.  Sa progranm ki pa ti egziste avan 1977.  Bann zanfan ki ti annan bann defi mantal oubyen fizik ti reste dan lakour e ganny veye par gran manman.  Home Care facilities i egziste ozordi pour bann zanfan ki pa kapab ariv lekol akoz sa bann dezabilite.  I annan ozordi en review dan nou sistenm ledikasyon, pou revwar nou sistenm ledikasyon an antye, pou revwar bann challenge ki nou pe fer fas avek e pou fer sir ki nou sistenm ledikasyon i ganny perfeksyonnen.  Nou annan en nouvo Scheme pour bann Teachers dan Lekol ozordi ki egziste.

Mr Deputy, akote tousala, i annan sipor pour Child Minding dan distrik.  I annan sipor devlopman sport dan Lekol, devlopman Lar dan Lekol e devlopman Ledikasyon Lanvironnman dan Lekol, pour bann zanfan a lentere.  Lo nivo pli avanse, savedir lo nivo Segonder, i egziste ozordi progranm IGCSE pour tou bann zanfan ki annan kapasite fer zot IGCSE.  E bann ki annan mwens kapasite, oubyen bann ki pli enterese dan bann progranm ki pa akademik, ozordi i egziste en progranm TVET, kot zot kapab devlop zot.

Mr Deputy, mon’n fer en parkour lo sistenm ledikasyon, pou nou pep konpran ki savedir 38an progre, oubyen ki savedir 38an martir.  I annan en diferans ant 38an vre progre dan sa pei, avek en dimoun ki mont lo Televizyon e dekrir tou sa ki mon’n dekrir koman 38an martir dan sa pei.

Mr Deputy, akote sa progranm ki annan dan Minister Ledikasyon, Minister Lasante i annan en progranm Lasante Danter pour tou zanfan dan Lekol.  I annan en progranm vaksinasyon pour tou zanfan ki al dan son Lekol.  I annan en progranm Medical Check Up 3 fwa, pour tou zanfan ki al dan Lekol.  I annan en progranm ozordi ki’n ganny entrodwir, pou siport bann paran, pou ed zot detekte bann zanfan ki pe komans abiz drog boner.  E i annan ozordi, en sistenm Counseling dan Lekol, pou siport bann paran, ki bann zanfan i bezwen counseling.  Kestyon ki mon demande ozordi.  Eski tou sa bann progranm i vedir 38an progre, ouswa 38an martir?

Mr Deputy, ler sa zanfan i al Post Segonder, si i pa ganny en Lekol Post Segonder, i kapab swazir pou li al dan en re-skilling program.  Sa progranm i egziste ozordi e i en swa pour bann zanfan ki pa anvi, oubyen napa sa kapasite pou al dan en Lenstitisyon Post Segonder.  I annan en Work Placement Program ki egziste ozordi pour sa zanfan, si i anvi kontinyen son letid.

Mr Deputy, i annan plizyer mil zanfan ozordi, zenn, ki pe swiv zot letid dan bann Lenstitisyon Post Segonder, dan plizyer domenn.  Swa A Levels, swa Lar, swa Biznes, swa lezot lentere.

Mr Deputy, akote sa, i annan plizyer Lenstitisyon ki ofer bann progranm letid avanse.  I annan UNISey ki pe ozordi ofer Degre letid avanse isi Sesel.  Akote sa Mr Deputy, sa zenn i annan li en Allowance ki i gannyen tou le mwan.  Sa Allowance i permet sa zenn ganny sipor neseser pou li kapab etidye san ki i bezwen enkyet ki mannyer i pou kapab ed son lekor pandan ki i pe etidye.  Akote sa, i annan en Laptop Scheme ki’n ganny entrodwir pour sa bann zenn, akote sa, i annan internet facilities ki’n ganny entrodwir pour sa bann zenn.  Akote sa, i annan sipor pour bann teenage mothers ki vwar zot ansent, pandan ki zot pe etidye.

Mr Deputy, i osi annan en progranm ki pe ganny met an plas pour bann zanfan ki nou apel bann ki annan potansyel pou vin bann delinquents dan nou pei.  Sa bann zenn pa’n ganny oubliye.  Bokou Mosyon in ganny pase isi dan sa Lasanble e deza, i annan en Sant Reabilitasyon ki pe ganny met an mars pour sa bann zenn e i annan plizyer progranm spesyal ki’n ganny etablir pou zot.

Mr Deputy, kestyon ki mon demann Lasanble, se ler nou get tou sa bann progranm ki’n ganny etablir e ki pe marse e ki pe tous lavi nou zenn Seselwa.  Kestyon ki mon demann sa dimoun ki’n koz lo 38an martir, se si sa i 38an martir, oubyen si sa i 38an progre dan sa pei Sesel.

(Applause)

HON MARIE-ANTOINETTE ROSE

Mr Deputy, ler en zenn i fini lekol, i bezwen komans travay.  Travay, travay dir set en desizyon ki en zenn i bezwen fer si i anvi epanouir, si i anvi devlope, si i anvi larzan dan pos e si i anvi form parti sa nouvo Sesel ki Parti Lepep pe promet li.

Mr Deputy, si en zenn pa travay, i pa ekspekte personn siport li.  Si en zenn in vin en viktim drog, i ekspekte antre dan en progranm reabilitasyon.  I ekspekte ganny sipor.  Si en zenn i vin en kriminel akoz drog, pa ekspekte ki sa Gouvernman Parti Lepep pou soutir son move mantalite.

Mr Deputy, lanplwa alors i en fasilite ki la pour nou bann zenn.  I annan work placement ozordi ki pe ganny etablir pour bann zenn ler zot fini lekol, pou zot kapab ganny plase dan en landrwa travay.  Menm ler zot napa leksperyans.

Mr Deputy, ozordi i annan continuous training programs pour bann zenn ki’n fini lekol, pou zot kapab kontinyen dan en lot lekol, si zot deside ki ler zot in fini sa letid Post Segonder, se pa sa, sa swa ki zot ti’n swazir an premye lye.

Mr Deputy, ozordi i egziste, en zenn ki’n fer 3, 4, 5 Lekol Post Segonder, avan ler i deside ki vreman karyer i anvi.  I annan zenn ozordi ki dir ou, mon pa pare pou mwan al travay deswit.  Mon annan kapasite pou al pli lwen.  Sa zenn ozordi i al fer en Degre Mr Deputy, si i annan kapasite, Gouvernman i donn li en full Scholarship.  I annan ki annan bokou kapasite, i ganny en Scholarship aletranze, de-fre-ye de tou.  I annan ki fer serten kontribisyon.  I annan ki ler i fini Mr Deputy, i kapab al fer son Masters.  I annan ozordi ki ler i fini, i dir ou en Masters pa ase, the sky is the limit.  I kontinyen pou li al fer en Doctora e al pli lwen ki i kapab.

Pandan sa dernyen 5an Mr Deputy, pa mwens ki 15 dimoun isi Sesel in ariv lo nivo Doctora dan sa pei Sesel.  Alors, kestyon ki mon demann sa zonm ki’n dir ki nou pe pas 38an martir se, eski sa i 38an martir, oubyen 38an vre progre dan sa pei Sesel?

Mr Deputy, ler en dimoun i fini travay, oubyen ler en dimoun i komans travay, i annan plizyer lanbisyon e enn bann lanbisyon Seselwa se annan zot prop lakaz.  Gouvernman Parti Lepep, se nou ki’n met an plas en Housing Scheme.  Se nou ki’n met an plas Land Bank Scheme, malgre tou kritik ki nou ti pe pran later serten gran dimoun dan sa pei e pou re devlop li e pou re donn Seselwa en twa lo zot latet.  Se nou ki’n etablir Loan Scheme pour renovasyon bann lakaz.  Se nou ki’n etablir Loan Scheme pour bann dimoun ki anvi build zot lakaz e se nou ki’n etablir en Special Scheme pour bann dimoun ki kapab al kot Labank e pran en loan avek Labank.  Se nou Parti Lepep ki’n etablir e deside ki en graduate i kapab apply pour en Condominium.

Mr Deputy, demann pour lakaz i sitan akoz sa progranm ki an plas i en bon progranm.  Eski nou’n kapab donn tou dimoun lakaz?  Non.  Eski nou pou kapab donn tou dimoun lakaz?  Non.  Eski Parti Lepep i annan en progranm an plas pou accommodate e fer sir ki o fiy e an mezir, lepep Seselwa ki anvi en lakaz, ki anvi, ki kapab peye pour en lakaz e ki bann ki pa kapab peye i ganny sipor neseser.  Se nou Parti Lepep ki’n met an plas en Housing Scheme dan sa pei e se nou ki’n fer Seselwa aspire ganny son prop lakaz.  Alors, kestyon ki mon anvi demande.  Si sa i 38an progre, oubyen si sa i 38an martir?

Mr Deputy, ‘Zonm o sant Devlopman’ i anvi al pli lwen ki zis annan en lakaz e annan en lanplwa.  ‘Zonm o sant devlopman’ i anvi en biznes.  I anvi al kot DBS e konnen ki avek DBS, i kapab pran en loan pou fer son biznes.

Mr Deputy, bokou Seselewa ozordi in devlope atraver en loan e atraver letablisman DBS ki sete kreasyon Gouvernman Parti Lepep.

Mr Deputy, a Special Business Loans avek Labank i en progranm ki Parti Lepep in reisir.  Gouvernman Parti Lepep elekte, in reisir negosye avek bann Labank pou fasilit bann dimoun ki anvi fer biznes.

Mr Deputy, Small Business Finance Authority ozordi i egziste, in ganny revwar son manda pour ki zisteman, i reponn lapel bann dimoun ki anvi en pti loan, pou li kapab komans son pti biznes.  Me ler i en pti biznes, i anvi vin gro biznes e la kot land allocation pour bann biznes i enportan.  Se la kot proze konblaz i enportan.  Se la kot revwar lafason ki nou allocate later pour bann biznes i enportan.  Se la kot nou bezwen vreman siport bann biznes dan sa pei, siport Seselwa ki pe devlope dan sa pei.

Mr Deputy, eski i annan challenge avek tou sa bann fasilite ki’n ganny met an plas?  Wi i annan.  Eski Parti Lepep pa enterese adres sa bann challenge? Non.  Tou sa ki’n ganny ekrir, tou sa ki’n ganny met an plas, se zisteman pou fer sir ki nou adres sa bann challenge, pou fer sir ki nou zwenn laspirasyon nou pep dan sa nouvo Sesel?  Sa Mr Deputy, se pa 38an martir sa.  Se 38an vre progre dan sa pei.

Mr Deputy, ler nou regard human development, nou pe koz lo ‘Zonm o sant devlopman.’  Nou bezwen regard nou pei an antye, dan son entirety.  Nou bezwen regard otour nou.  Nou bezwen regarde ler nou leve bomaten, ki kalite pei nou vwar.  Nou bezwen regarde ler nou desann dan semen, ki kalite zanfan nou vwar lo semen, pe al lekol.  Nou bezwen regarde ler nou koz avek nou gran paran, ki kalite zenerasyon nou vwar ki pe vyei, avek en kalite lavi ki tre o nivo.  Nou bezwen regarde ki kalite sistenm, bann Lenstitisyon nou annan dan sa pei e nou bezwen demann nou lekor.  Eski in annan vre progre e devlopman atraver sa bann Lenstitisyon?  Nou vwar ozordi, i annan en lepanouisman bann Lorganizasyon non gouvernmantal.  Sa i growth of NGO’s dan sa pei.

Mr Deputy, ozordi nou vwar en leksplozyon political activism dan nou pei.  Si ti napa demokrasi, ti pou napa en leksplozyon activism, political activism dan nou pei.  Nou vwar en pei kot son demokrasi pe kontinyelman agrandir e en pei kot bann Lenstitisyon Enternasyonal pe kontinyelman felisit Sesel, pour travay ki pe ganny fer anver lepanouisman e devlopman nou demokrasi.  Nou vwar ki i annan more checks and balance dan sa pei, an sa ki konsern koripsyon.

Mr Deputy, mon a note par egzanp, ki menm Leader Lopozisyon dan sa Lasanble Nasyonal in dir ki dan son Rapor FPAC, i pa’n vwar gran, gran sityasyon koripsyon, me in vwar plito serten Lenstitisyon ki pa pe byen zer bann larzan ki in gannyen.

Mr Deputy, eski nou annan pli bon legal frameworks dan sa pei?  Nou’n pas e nou’n revwar depi 2008, 300 morso Proze de Lwa dan sa Lasanble Nasyonal.  Plis ki 300morso Proze de Lwa dan sa Lasanble Nasyonal.  Lamannman dan nou Lalwa, sanzman Lalwa, pou fer sir ki bann lenstriman legal ki egziste dan sa pei, i ede zisteman, pou fer sir ki nou annan en pei kot son human development, kot son devlopman imen, kot son dignite imen, kot respe pour imen i ganny respekte e i ganny ankouraze.

Mr Deputy, social justice.  Lazistis sosyal i sa prensip ki’n fer nou Parti ne, grandir e epanouir.  En dimoun ki SPUP i en dimoun ki SPPF, i en dimoun ki Parti Lepep.  Napa diferans ant SPUP, SPPF e Parti Lepep.  Parti Lepep i prodwir travay ki bann dimoun ki ti la avan nou e ozordi ler nou Parti pe selebre 51an son Lanniverser, mwan mon ti a kontan ki Parti mazorite dan sa Lasanble i aklanm tre for bann per e mer fondater nou Parti.

(Applause)

HON MARIE-ANTOINETTE ROSE

Travay ki zot in fer, ki’n anmenn nou la, nou, nou bezwen kontinyen sa travay.  Me nou bezwen kontiny fer li avek nouvo fason.  Nouvo fason vwar laspirasyon nou pep.  Sa pep ki ti la an 64 ti annan en laspirasyon pou liber nou.  Sa pep ki la ozordi i annan en laspirasyon pou transform nou, pou fer nou al pli lwen ankor.

Mr Deputy, ler nou koz lo lazistis sosyal, annou koz lo en progranm Welfare ki’n ganny byen etablir dan nou pei.  Eski i annan lenzistis?  Wi.  Eski i annan serten dimoun ki merit Welfare, ki pa pe gannyen?  Wi.  Eski nou bezwen amelyor nou sistenm Welfare? Wi.  Me eski se Parti lepep ki’n etablir en sistenm Welfare pour bann zonm, fanm e zanfan Seselwa ki bezwen?  Wi.  Se nou ki’n etablir.  Eski nou annan benefis Pansyon e sipor pour nou bann dimoun aze?  Nou annan.  Ozordi:- Sanmdi Mr Deputy, mon’n pas kot en lakour, kot i annan 2 dimoun aze.  E mon’n fer zot konpran e zot in dakor avek mwan ki zot ganny plis ki R6 mil par mwan, ant zot 2.  E avek zot Carer, Gouvernman tou le mwan i depans R10 mil dan en lakour, pou fer sir ki nou bann dimoun aze i viv dan konfor e dan sekirite.

Mr Deputy, nou annan progranm Home Care ozordi ki pa zis ed nou bann dimoun aze ganny en sipor dan lakour, me i ed plizyer fanmir ki zot, zot bann Home Carers, ganny en income ki zot pa ti pou gannyen dan en lot lanplwa.

Mr Deputy, anba nou progranm Lazistis Sosyal, nou annan specialised treatment.  Nou Konstitisyon i fer provizyon pour servis lasante de baz.  I pa fer provizyon pour servis lasante spesyalize.  Me ozordi, anba sa sistenm ki nou’n etablir, i merite annan e i merite ganny vwar, en progranm pour servis spesyalize, kot Gouvernman i depans plizyer milyon Roupi par lannen, pou fer sir ki si en zanfan i dekouver Timer dan son latet, i pa pou mor isi Sesel akoz son Gouvernman pa kapab ed li.

Mr Deputy, ozordi nou annan en HIV/AIDS Program ki’n ganny byen etablir e si en dimoun isi Sesel i ganny dyagnoz avek HIV oubyen AIDS, i annan en progranm ki pa diskrimin li.  I annan en progranm ki fer li viv dan dignite.  Ozordi, nou annan plizyer progranm lasante an plas, ki ede e ed bann fanmir Seselwa fer sir ki zot retrouv zot lasante.

Mr Deputy, ler nou koz lo social justice, nou bezwen koz lo sa injustice ki parfwa nou menm nou Seselwa nou met lo nou menm.  Injustice akoz nou pa responsabiliz nou zanfan, nou pa responsabiliz nou lekor e nou pa fer sir ki nou menm nou, nou pran ka avek nou prop lasante.  Social justice i en krwayans ki ou ganny tou swen neseser, anba en Gouvernman.  Me social justice i bezwen en krwayans dan nou lekor, ki nou osi nou bezwen fer tou sa ki nou kapab, pou pran ka avek nou lekor, pou pran ka avek nou vwazen, pou pran ka avek nou prop fanmir, pou pran ka avek nou zanfan, pou pran ka avek nou vyeyar e pou pran ka avek nou Sesel, ler nou dir e ler nou mont lo en podyonm e nou dir, ‘Nou kontan Sesel.’

Mr Deputy, human developement pa arive.  ‘Zonm o sant devlopman’ pa ganny akonplir si nou napa stabilite politik e stabilite ekonomik dan sa pei.  Ler nou regard dan larezyon.  Ler nou regard otour nou.  Ler nou regard serten pei ki’n kriy sanzman e ler nou regard serten pei ki’n vot pour sanzman, ozordi sa bann pei pe rode oli stabilite politik e avek stabilite politik, i vin stabilite ekonomik.  Dan en pei, si napa stabilite politik, investors i anmas son sak, i ale.  I al avek larzan ki ti pou envestir dan sa pei.  Ler i anmas son sak i ale, avek li, i al avek plizyer lanplwa.  Avek li, i al avek plizyer loportinite ki sa dimoun ki annan biznes isi Sesel, ti kapab gannyen.  Avek li, i al avek plizyer milyon Forex ki ti kapab antre dan nou sistenm e avek li, i al avek plizyer milyon larzan ki ti kapab antre dan nou kont isi Sesel, pou nou kapab kontinyen devlop sa pei.  Sa formil i senp Mr Deputy e sa formil fodre ki pep Seselwa i konpran tre byen.  Si napa stabilite politik, napa stabilite ekonomik e napa ‘Zonm o sant devlopman.’  Napa progre, i annan lapovrete, i annan soufrans.  Sa menm soufrans ki zot pe koz lo la ozordi Mr Deputy.

Mr Deputy, ozordi Sesel in vin en pei kot Seselwa pe bouz o dela bann millennium development goals.  La nou pa pe koz lo sanzman.  Nou pe koz lo transformasyon.  Transformasyon en pep pou sorti 38an pase, anba lapovrete, pou vin en high income development country. Pou vin en high human developement index. Kote 38an martir i tonbe ladan, Mr Deputy?

Transformasyon pou fer ki Seselwa i vin met son prop lakaz.  Pour ki sak fanmir Seselwa i annan dan son lakaz, en graduate.  Pour ki nivo lavi nou pep i kontinyelman ogmante.  Pour ki fanmir Seselwa i kontinyen progrese.  Progranm devlopman Parti Lepep i al odela sanzman.  I al ver transformasyon ekonomik, politik e sosyal, pou nou kapab kree sa ‘Nouvo Sesel.’

Mr Deputy, nou pa pou retourn dan lepok napa.  Nou pa pou retourn dan lepok klas.  Nou pa pou retourn dan lepok divizyon rasyal.  Nou pa pou retourn dan lepok martir.  Martir savedir sou devlopman.  Martir savedir mal nitrisyon.  Martir savedir mank akse avek serten servis lasante.  Martir savedir pa al lekol akoz ou pa kapab pey lekol.  Martir savedir mank loportinite pou devlope e epanouir.  Martir Mr Deputy, savedir 3 pye lo reso i ankor egziste dan serten pei larezyon.  Martir savedir pa manze aswar, bomaten e sa i ankor egziste dan serten pei larezyon.  Martir savedir dormi o bor semen e mandyan, pa akoz ou dan drog, me akoz napa en sistenm pou anmas ou.

Mr Deputy, mon retourn kot mon ti komanse.  Les mwan felisit tou bann manm e siporter Parti Lepep, a lokazyon senkanteen-tyenm laniverser Parti Lepep.  Mon dir felisit zot e mon felisit tou Seselwa ki’n donn koudmen anmenn sa pei kot i ete.  Sa se bann vre patriyot.  Sa se bann vre Seselwa.  Sa se bann vre zonm ek fanm ek zanfan, ki krwar dan Sesel e ki ler zot dir, ‘Mon kontan Sesel’, zot pa fer nanryen pou detri sa pei akoz zot lanbisyon personnel, me zot leve bomaten, zot met zot sak lo zot zepol e zot desann pou al travay pour Sesel, pour lavenir Sesel.  E nou Parti, Parti Lepep ozordi, i dir si nou’n arive akonplir ‘Zonm o sant devlopman’, sa i akoz 2 keksoz.  Sa i akoz nou’n krwar ki ‘Zonm o sant devlopman’ i prensip pli nob ki en Gouvernman i kapab ofer son pep.  Me sa i akoz deryer sa prensip, in annan zonm e fanm Seselwa ki krwar dan sa Parti e ki krwar osi dan sa prensip.  E ozordi, moman i la pou nou dir zot mersi e moman i la pou nou demann zot pou nou asize e reflesir dan ki fason pli inovativ nou kapab kontinyen avek sa transformasyon ki nou’n anmennen dan lavi nou pep 38an pase e ki nou pou kontinyen anmennen.  Ki nou ti anmennen 51an pase e ki nou Parti Lepep, nou pa pe al okenn par.  Nou pou kontinyen anmennen dan sa prosen 51an ki pou swiv.

Mr Deputy, avek sa, mon demann Lasanble Nasyonal pou siport mon Mosyon.  Mersi.

(Applause)

MR DEPUTY SPEAKER

Bon, Mosyon in ganny prezante.  Okenn Manm ki oule segonde?  Onorab De Commarmond.

HON CHARLES DE COMMARMOND

Mr Deputy Speaker, mon oule segonn sa Mosyon e mon oule dir 2 mo.

MR DEPUTY SPEAKER

Proceed.

HON CHARLED DE COMMARMOND

Mersi Mr Deputy Speaker.  Mr Deputy Speaker, sa Mosyon i en Mosyon enportan.  I en tre bon Mosyon e i vin a en lokazyon istorik.  Istorik akoz ozordi, nou dan Lasanble, Mardi le 2 Zen e sa se laniverser nou Parti.  Laniverser nesans nou Parti, Parti SPUP ki’n desann, SPPF e la, nou Parti Lepep.  Akoz sa non i Parti Lepep?  Parti Lepep akoz nou pep ki bann zonm.  Bann dimoun.  Fanm ek zonm.  Dimoun serye.  E nou, nou Parti i pran sa koman en keksoz enportan.  I krwar ki zonm i o sant devlopman.

Ou vwar Mr Deputy Speaker.  Sa i pa en zafer konmsi ki’n vin zis koumsa, sa.  I en keksoz ki nou dan nou Parti, nou krwar ladan.  Nou krwar senserman akoz nou’n met li nou.  Dan prensip nou Parti, dan filozofi nou Parti, i ladan sa.  E prezan, ou konnen ki arive.  Ozordi dan lemonn, lemonn pe komans koz sa.  Lemonn ozordi pe koz ‘Zonm o sant devlopman.’  Plizyer pei pe komans koz dan sa direksyon.  Plizyer:- pa zis Parti Politik.  Plizyer Lorganizasyon Enternasyonal e Rezyonal.  Nasyon Ini pe koz sa ozordi.  Commonwealth pe koz sa ozordi.  Dan rezyon, la ou vwar SADC pe koz sa ozordi.  Fek al en Workshop semenn pase, pe koz sanmenm sa.  bann Millenium Developement Goals pe vir lo kwa?  ‘Zonm o sant devlopman.’  Pe dir fer sir tou dimoun i ok.  Fer sir tou dimoun i epanouir.  I devlope.  I dan byen.  Akoz?  I annan bokou lenzistis dan lemonn ozordi.  Nou pe dir ki ‘Zonm o sant devlopman’ i bezwen fer sir ki ledikasyon bann dimoun i vin primordyal e ki bann dimoun i bezwen pa kapab reste dan kwen semen partou.  I pa kapab annan dimoun ki vilnerab, ensidswit.  Pa kapab annan dimoun ki pa pe travay.  Pa kapab annan dimoun ki pe mor lafen.  Sa bann keksoz, i bezwen tire dan sosyete.  E nou, nou Parti, in vwar sa depi byen lontan.  E nou pe met tou sa bann keksoz an pratik.  Sanzman in ganny fer.  En kantite keksoz inovativ ki nou’n mete nou.  Ok.  Ki lontan ti napa.  E Leader Government Business in met devan bann plizyer pwen.  Mon pa bezwen repet lo sa bann keksoz.  Me i kler.  I kler ki ozordi, sa lapant.  E sa lapant ki nou, nou Parti nou’n vwar sa, konmsi sanmenm sa nou dir ou, nou annan en Parti ki annan en bon vizyon.  Nou vwar lwen e pep Seselwa i bezwen gete sa.  I bezwen evalye.  I bezwen vwar li byen sa.  Ou pa kapab zis konmsi akoz en keksoz pa pe marse, nek ou vini, ou kas tou keksoz.  Ou konpran?  La ater la, bezwen get byen.  Mwan semenn pase mon pa’n la, me selman, mon tann en bann zafer ki’n pase dan pei.  Ok.  En bann zafer ki en bann dimoun, zot fristrasyon, zot vini zot ouver en Parti.  Koumsa i ete dan Sesel ozordi.  En bann dimoun i fristre, i dir ok, nou desann.  Fer en Parti, fristrasyon.  Prezan dan ou Parti fristrasyon ou vini:- e prezan i annan dimoun, bann zenn la, I pa konnen ki mannyer ti ete lontan.  Prezan i annan dimoun ki annan en serten kapasite, zot vini kapab dir ou, yer zot ti dir ou bann keksoz.  Zot dir ou tou zafer i fantastik.  Fodre ou reste ek sa Parti.  Sanmenm sa Parti, Parti lepep la ki en bon Parti.  Parti solid.  Lannmen i vini, i dir ou, sa Parti pa’n fer nanryen.  Menm dimoun en.  Menm dimoun.  Sa Parti, Parti pa bon, Parti ou bezwen sanze, ou bezwen isi, ou bezwen laba.  Mwan mon pa ganny en konpran dan nou pei.

Be prezan, bann mwan, ou pa pou al fatig, konmsi ou pa pou al vir mwan ou.  Ou pa pou al konmsi anbet mwan ou.  Be Mr Deputy Speaker, i annan en bann zenn zot, kekfwa zot pa ti la komansman.  Zot ti krwar tou keksoz ti roz parey zot vwar ozordi.  Krwar tou keksoz ti ok parey zot vwar ozordi.  Be zot in fini bliye, zot pa konnen, zot pa ti ankor ne en bann.  Prezan sa bann dimoun i vini, i kapab anbet zot.  Sa mon dir, mon pe koz fran la.  Mon pe koz sa ki mon feel e mon pe dir sa pour ki dimoun i pran konsyans sa bann keksoz.

Me ‘Zonm o sant devlopman’ Mr Deputy Speaker, nou Parti, i pou kontinyen krwar ladan.  I pou kontinyen krwar ladan akoz nou krwar i byen sa.  Nou krwar i byen e nou bezwen fer ki dan Sesel la, tou dimoun.  Tou zonm, human beings i bezwen benefisye ek sa ki nou pe fer.  Ozordi sa prensip i en-korpere dan progranm nou Parti.  Dan son Konstitisyon, dan son bann lenstriman ki i annan.  Mwan mon pe demande ki sa i al pli lwen ki sa.  Nou koman en pei, dan nou Konstitisyon ki la, sa i devret enshrine ladan osi.  Nou devret al pli lwen nou.  Konmsi met li dan Konstitisyon, ki personn demen pa vin sanze.

(Applause)

HON CHARLES DE COMMARMOND

Akoz dan en pei, i annan plizyer Parti Politik.  Sa bann Parti Politik, sakenn i annan son kalite filozofi.  I annan ki zot filozofi i profi.  I annan ki zot filozofi i zot gen personnel.  I annan ki zot filozofi i liberal.  I annan zot filozofi, kapitalis sepa ki kalite.  I annan ki PDM.  I annan diferan, son filozofi i zis demokratik li.  Ou konpran?  Apre ou annan bann parey nou, nou Parti ki li dan son filozofi, i entegral.  I annan plis keksoz e ladan i enkli osi ‘Zonm o sant devlopman.’

E se sa ki mon pe dir ki nou pa oule demen en keksoz i arive, nou, nou’n ferm lizye nou.  Prezan bann dimoun i vini, sa zafer ‘Zonm o sant devlopman’ la, in fini perdi.  Nou a retourn back parey nou ti ete avan 77.  Nou pa oule sa i arive dan Sesel.  Se sa ki mon pe dir, ki sa kestyon ‘Zonm o sant devlopman’ la, letan ki mon ti tann Bernard Georges lot zour i pe dir i pe al, konmsi zot pe:- i annan en group zot ki’n fer.  Zot pe al reget Konstitisyon la, nou pe dir met sa ladan.  Met sa ladan, pou li pa sorti ditou.  Akoz nou Konstitisyon la, i koz plizyer keksoz dan menm direksyon.  I koz par egzanp lo bann zafer Drwa Fondamantal, lo bann kestyon shelter, lo kestyon ledikasyon, lasante.  You name it. E ki lontan, ti napa.  Lontan mwan mon rapel, mon dir ou.  Plizyer fwa mon rakonte, letan Lopital ou ale, ou ti malad Lopital, ou reste anba lavarang.  Ou napa larzan pou peye pou ou antre anndan.  Tousala, nou’n kase sa bann baryer nou.  Gras a sa filozofi ki nou, nou krwar ladan.

Prezan Mr Deputy Speaker.  That is not all.  Pa krwar nou satisfe kot keksoz i ete la.  Still nou pa satisfe.  Mwan mon enn, mon krwar nou devret pe fer pli byen e nou devret kapab fer pli byen.  Se sa rezondet sa Mosyon.  Sa Mosyon i ganny mete la pou dir, look.  La kot nou’n arive, nou evalye i bon.  Nou take stok en kou, nou gete kwa ki nou’n fer e kote ki annan mankman pou nou fer pli byen.  Sa prensip ‘Zonm o sant devlopman’ i bezwen pli performan sa.  I bezwen pli reel sa.  I bezwen mars pli byen sa.  Mwan letan mon balanse ozordi mon pe gete, i annan en bann dimoun ki sey vini pou met bar dan larou sa devlopman ‘Zonm o sant devlopman’ la, ki vin met bar ladan.

Mon a donn legzanp ki mon pe dir.  Konmsi ki mon pe sey dir la, se ki i annan en bann challenge ki devan nou, se sa rezon nou pe dir, annou trouv bann fason inovativ pou nou mentenir sa polisi.  Sa ki Mosyon pe dir.  E nou, nou devret trouve bann fason inovativ.  Mon a donn detrwa legzanp bann keksoz konmsi, ki mon pe gete la devan mwan, Mr Deputy Speaker.

Mon get nou sistenm pti biznes.  Mon a vin lo la premye.  Diferan kalite biznes.  Tou bann dimoun nou pe koz lo la.  I annan bann manman biznes, bann medium biznes, apre pti biznes.  Pti dimoun li, li i pa kapab al dan gran biznes li.  I napa larzan pou li al dan gran biznes.  I napa larzan Kapital, pou li al ni dan medium biznes.  I komans li ti pti, ti pti.  Ti pti, ti pti, ‘Zonm o sant devlopman’, i pe komanse.  Prezan nou, nou Parti ki o pouvwar ozordi, in met dan sistenm, bann diferan lenstans.  Bann Labank, ensidswit, pour sa pti dimoun kapab desann.  Bomaten la, nou’n tann Minis Lanvironnman:- mwan mon riye letan in dir sa.  I dir poudir dan Minister Lanvironnman laba, Gouvernman in fer.  I annan loan la ki zot donnen, R50 mil, pou aranz lanvironnman kot lakour.  Mwan premye fwa mon tann sa la avek li ozordi.  Mon pe rode kote sa zonm dan sant devlopman Sesel la, kote zonm i tande sa, kote ki ti pe fer.  Konmsi, nou pa kapab, nou sistenm in met sa bann keksoz, i kree sa bann loportinite, prezan nou vini, pran en gran tapi, nou kouver tou sa bann loportinite nou.  Pour leres dimoun.  Be konmsi, pour ki rezon sa?  Sa nou challenge sa.  Sa nou dir, sa kalite mantalite arete.  Annou arete, annou fer fason letan i annan en keksoz pou benefisye dimoun dan sa pei la, fer tou dimoun konnen.  Fer tou dimoun konnen, fasilit bann fason pou sa dimoun kapab epanouir, avanse e benefisye dan sa zonm la, dan sant devlopman la, pou li feel benefisye li osi.

Savedir, nou bezwen ed li, ed sa pti dimoun pou li ganny son pti loan.  Ed li pou li ganny son loan pour son biznes, son pti biznes, pou li kapab komanse.  Kote i pou avanse si ou pa ed li komanse?  Sa bann challenge.  Sa nou bezwen rod fason:- lot zour mon’n dir mwan.  Pa premye fwa mon pe koz sa bann zafer la.  Mon pe dir ankor la.  Lot zour mon’n dir.  I annan bann Labank.  Gouvernman li, i en share holder dan bann Labank.  Selman still, Labank pe donn hard time dimoun.  Prezidan menm in vin dir lot zour la.  Prezidan menm in vin dir, son bann Minis in vin dir poudir i annan problenm ek Labank, pa pe donn soz dimoun.  Kantmenm ou vini, ou dir lala mon bout later la.  Mon met sa an gaz, still i dir ou, al rod 50 soz.  Ki mannyer i apele?  Dimoun pou vin:- Guarantor pou ganny sa loan la.  Come on.  Nou bezwen pli inovativ ki sa e nou bezwen fer keksoz vin pli pragmatik.  Aksyon.  Pa fer premye fwa mon dir lo zafer aksyon dan nou pei la.  Nou bezwen komans pas a laksyon.  Nou bezwen konmsi met keksoz fasil pou dimoun.  That’s one thing.

Dezyenm keksoz, i annan en lot zafer ankor ki mon tann koz lo la tanzantan.  I annan en zafer ki apel Pansyon.  Pansyon Mr Deputy Speaker.  ‘Zonm o sant devlopman’ ek zafer Pansyon.  Lontan mon rapel, bann dimoun, en bann ki ti ganny Pansyon.  Zis en bann dimoun.  Dan Sesel en.  En bann dimoun ti ganny Pansyon.  En bann pa ti gannyen.  Nou, letan nou’n fer:- nou’n vin o pouvwar, nou’n dir ‘Zonm o sant devlopman’, nou’n dir tou dimoun pou reganny Pansyon.  Menm bann dimoun ki pa travay.  La mon vwar i mal mwan.  Mon dir konmsi fodre nou regete.  En boug pa travay, i ganny Pansyon?  Koumsa i ete dan nou pei ozordi.  Koumsa i ete, dan nou pei ozordi, en boug ki pa travay, i ganny Pansyon R3100.  Letan i ganny 63an, travay pa travay, kot ou ete, nenport ki trou, ou vini, desann Anvil, R3100 ou gannyen.  Mon manti, mon vre?  Korek?  La, en bann dimoun i sote i dir, fer vin R5 mil.  Ou pa travay, zis pou donn ou en Pansyon R5 mil?  I annan en lot group dimoun, en bann Minis mon tande, li osi i dir Pansyon ki nou pe donnen pa ase pou zot.  Tousala en bann demagozi, Mr Deputy Speaker.  Mwan mon pe lans en lapel la.  Mwan mon dir Prezidan, la ozordi ki nou pe koze, met dan nou pei, en Komite.  En group.  Enkli bann Manm Lasanble lo la.  Akoz detrwa semenn pase, Minis Finans in vin dan nou Lasanble, i dir i annan en Komite, pe etidye bann zafer saler, bann zafer Pansyon, bann zafer laba kot Ladministrasyon la.  E i dir pou pran 5an.  5an Mr Deputy Speaker?  5an pou donn en rezilta.  Be 5an tro bokou letan.  Mwan mon krwar tro bokou letan.  5an ou fer Eleksyon la, dan 5an, prezan ki pou ganny larepons.  Pa lo la.  Mwan mon krwar poudir sa Komite i devret ganny fer vitman la e zot pa ni pran bokou letan akoz sa pa demann bokou letan pou get ladan sa.  Pa ni difisil.  Ou pa ni bezwen met legan, parey nou dir dan Kreol.  Ganny en Komite, 2, 3, 4 dimoun, enkli Manm Parlman lo la, pou nou get sa kestyon Pansyon dan son totalite.  E nou vin rekomandasyon e nou dir, lala.  Pansyon depi komansman ziska finisyon.  E mon krwar fodre ogmante mwan, Pansyon.  Sirtou bann pti dimoun.  Bann senp travayer, bezwen ogmante.  En boug ki travay dan sa pei, i bezwen ganny li saler korek, bon saler.  La i annan saler ater pa bon, mon krwar devret ganny gete.  Pansyon i bezwen ganny regarde.  I annan dimoun i bezwen ganny son Pansyon korekteman.  En dimoun ki’n trimouse, ki’n travay, si nou pe koz ‘Zonm o sant devlopman’.  En zonm ki’n travay i bezwen ganny li en saler, pli tar en Pansyon ki permet li viv byen.  Viv korek.  Viv normal.  Pa kapab en bann i ok, en bann pa ok.  Mon krwar i devret annan en pe lazistis la e nou devret pe get li en pti pe pli byen sa.

Nou annan lezot keksoz ankor, ‘Zonm o sant devlopman’, mon get lo later.  Lontan, en bann dimoun ti napa en sou later.  En sou propriyete.  Ozordi i annan.  Ozordi preski tou dimoun, la zot oule ankor i annan.  I annan in gannyen, i oule ankor.  Mon dir, annou balanse, annou get byen.  Annou revwar serten keksoz si fodre revwar, pour ki permet tou dimoun dan pei benefisye.

Travay Mr Deputy Speaker.  Travay pa kapab.  Si nou pe dir ‘Zonm o sant devlopman,’ e prezan nou dir i annan en ta louvraz dan pei, selman ou still annan dimoun ki pa travay.  Cascade mon annan.  Mon annan madanm i annan son ledikasyon, tou normal.  Son Degre.  Ti travay Custom, la zis akoz in kite in al petet Moris in al marye.  I retournen, letan i retournen, i pran li 1an i pa ankor ganny travay.  Sa nou dir ‘Zonm o sant devlopman’, prezan nou aksepte sa koumsa?  Be i annan en problenm la ek Minister Lanplwa.  I annan en problenm ek Minister Lanplwa.  I bezwen kapab.  En dimoun parey, i pa ni en voler sa madanm.  I pa’n ni fer Prizon.  Ki mannyer i pa kapab ganny en travay?  Sa bann challenge.  Sa bann keksoz nou bezwen aranze.  Sa bann keksoz pa kapab pran letan.  Prezan an menm tan, i pou al rod en help laba kot Welfare.  Sa madanm ki li i pe ranpli form, so, in ganny peye pou ranpli form li.  Pa pou deside.  Li i dir non, pa pou kapab ganny Welfare.  Li ki deside.  La bann keksoz nou bezwen aranze sa.  Sa pa bon.  Letan nou dir ‘Zonm o sant devlopman’, pa kapab tret zonm koumsa.  Human beings pa kapab ganny trete koumsa.  Dan nou pei, mwan mon believe, anba sa Mosyon la, dan konteni sa Mosyon ki we have to do better. Pa devret annan:- en dimoun dan pei Sesel la, si i pa travay la, li ki pa anvi travay.  I devret koumsa.  Pa kapab en dimoun ki pe rod travay, menm si in sorti Prizon.  Menm si in sorti Prizon.  Mon annan manrmay Cascade la ater, in sorti Prizon, pe rod travay la, pa pe gannyen.  I annan ki anvi travay lo zil.  Difisil.  That should not happen. The challenge is there.  Mwan mon krwar la nou bezwen rod en fason, o pli vit posib, dan fason inovativ ki sa Mosyon pe koze, pou nou kapab rezourd sa bann problenm.  I pa devret pran bokou letan.  I devret annan en volonte.  Letan Parti, nou Parti ki la i ankor o pouvwar, i dir sa keksoz pou fer li koumsa la, Gouvernman i bezwen listen and do it. Mwan mon believe koumsa mwan.  Si ou pa kapab delivre, outOut.  Ale, les en lot dimoun vin fer.  Savedir sa dimoun dan sa Minister mon pe koze la, si ou pa pe kapab ede pou ed bann dimoun ganny travay.  Si sa dimoun dan en Lorganizasyon, sepa dan i CEO.  E prezan CEO, mon vin lo la apre, en pti kou.

La mon annan en papye ek mwan Mr Deputy Speaker.  En Hebdo.  La in dir lo la mon pe gete.  Nou pe koz saler taler, ‘Zonm o sant devlopman.’  Be:- Hebdo Le Seychellois.  Le Seychellois Hebdo wi, li menm.  La en bann zafer ki in dir.  Mwan mon napa problenm mwan.  CEO, sa kantite, i ok.  Ou kapab donn plis, mon napa problenm.  Get lezot osi.  Get lezot osi.  Pa kapab annan konmsi en bann ki ganny tou, apre zot dir Politisyen menm ki ganny tou plis keksoz.  Non konmsi i annan en bann demagozi dan nou pei ki mon krwar i bezwen met en lord lo la, i bezwen annan transparans e tou lo la.  Nou bezwen adrese tou sa bann keksoz.  Pa kapab adres zis en parti keksoz, en bann lot parti nou pa fer.  Non.  Mon krwar nou devret kapab, dan nou pei nou, avek ledikasyon ki nou’n gannyen, nou devret kapab fer keksoz bokou, bokou pli byen.

Mr Deputy Speaker, lo sa not, mon anvi tous en lot keksoz.  ‘Zonm o sant devlopman’ i dir nou tou nou devret pe travay, pe donn koudmen pou nou pei avanse.  E prezan i dir ou koripsyon, nou’n dir non.  Nou pa dakor, nou pa oule.  Semenn pase mon tande i annan dimoun:- mon ti pe lir dan en papye osi, in sorti Weekly.  In mete lo la, be sa kantite koripsyon ki mon tande, konmsi lo sa papye in mete, mon dir be tyonbo en kou.  Something wrong somewhere.  Yes, i annan en problenm la.  E mon kontan ki ozordi dan Lasanble, Chairperson FPAC i la.  Mwan mon osi mon Vice-Chair mon la, ou pou bezwen ekrir en dimoun.  Mwan mon dir FPAC i bezwen zwenn, dir tyonbo en kou.  Ekrir en dimoun, apel li, gete.  Donn levidans nou, nou a bezwen investigate.  Si koripsyon i to that level dan sa pei, i annan dimoun ki annan lenformasyon, i gard ek li pa pe dir nanryen?  Non.  Vini.  Vin donnen.  Vin donnen, nou bezwen ekrir dan FPAC.  Fer vin donnen pou nou kapab investigate, pou gete si i vre.  Si i vre, sa ki konsernen i pou bezwen ganny deal avek.  That is mwan mon dan sa pei, mon dan sa Parti, mon believe koumsa mwan.  Koumsa ki mon krwar keksoz pou marse dan nou pei.  I pa kapab mars sepa ki kalite lot fason ki en bann pe dir.  Konpran?  Mon krwar the challenge i la dan sa bann direksyon koumsa e se sa rezon ki mwan mon kontan.  Ou vwar taler mon ti pe dir poudir pa zis nou Sesel ki pe koz sa, ‘Zonm o sant devlopman’.  Why, Africa must invest heavily in its people. Lafrik.  Bann pei Lafrik menm pe dir.  Ou bezwen envestir dan ou imen, dan ou dimoun.  Dan ou dimoun, ou vwar.  Dan bann landrwa travay la, bann Human Resource Manager la, konmsi nou bezwen fer keksoz ki ed nou dimoun.  Pa fer zot martir.  Sa bann keksoz ki nou pe dir e ki sa Mosyon:- sanmenm sa ki fer mwan dakor ek sa Mosyon, se ki a en moman istorik alor, nou, nou bezwen get bann nouvo fason, ki mannyer nou pou fer pour ki sa issue ‘Zonm o sant devlopman’ i anmenn nou pei pli devan.  I anmenn bann dimoun ki dan nou pei pli byen, en fason ki tou dimoun i feel better, i feel happier, i feel normal dan nou pei, ki koumsa nou kapab vwar en lavenir, avek plis prosperite, plis entegrite e plis respe pour tou keksoz.

Avek sa Mr Deputy Speaker, mon a remersi ou e mon pou vot an faver sa Mosyon.  Mon demann tou dimoun pou siport sa Mosyon.  Menm Leader Lopozisyon ou la, ou konpran sa bann keksoz ou osi, ou vwar poudir i byen.  Si ou vwar i byen, siport sa Mosyon.  Personn pa pou ankoler ek ou.  Nou kontan ki ou osi ler i byen, ou dir i byen.

Mersi bokou Mr Deputy Speaker.

MR DEPUTY SPEAKER

Onorab Dokter Payet.

HON DAVID PAYET

Mersi Mr Deputy.  Mr Deputy, sa filozofi met ‘Zonm o sant devlopman’ in ganny mezire par 2 kriter.  Premyerman, se ki bann stratezi ki ganny enplimante anba sa filozofi, i anmenn benefis pour tou sitwayen.

Dezyenmman, se ki sa bann stratezi i permet sa menm sitwayen pou partisip plennman dan prosesis devlopman son pei.  Letan nou konsider sa 2 kriter, i kler ki lasante i lakle sa filozofi, met ‘Zonm o sant devlopman’, akoz pou bann sitwayen kapab partisip dan devlopman, fodre ki zot an bonn sante.  E pou zot kapab an bonn sante, fodre ki zot benefisye avek en lasante de kalite.

Mr Deputy, i pa fer okenn dout ki sistenm lasante piblik ki’n ganny met an plas dan Sesel, par Parti Lepep, dan sa dernyen 38an, i enn ki’n zwenn kriter ki mon’n fek site pli o.  Detrwa semenn pase, Stasyon Televizyon Enternasyonal, ki repite koman Medya pli obzektif dan lemonn BBC, ti fer resorti dan en Reportaz, ki Sesel i le sel pei Lafrik ki’n reisir zwenn tou le 8 lobzektif ki nou apel Millenium Development Goals, oubyen MDG’s dan letan ki’n ganny spesifye, savedir Desanm 2015.  Parmi sa bann lobzektif ki form sa bann MGD’s, i annan bann ki konsern lasante, parey akse avek swen lasante pour tou dimoun.

Mr Deputy, lefe ki Sesel in reisir atenn sa bann MGD’s, i laprev ki nou sistenm lasante piblik i pa zis bon pour Seselwa, me ki i osi zwenn standar enternasyonal.

Mr Deputy, se Parti Lepep ki’n batir sistenm lasante piblik, ki pa zis donn Seselwa akse avek swen lasante, me akse avek swen lasante de kalite.  Sistenm lasante piblik Sesel, ki en lafyerte Nasyonal nou Nasyon, ti ganny met an plas par Parti Lepep.  Sa sistenm lasante ki baze lo prensip aksesibilite, i apiy lo plizyer progranm.  Sa bann progranm i la lo tou nivo swen lasante.  Savedir, lasante primer, segonder e ter syer.  Letan pou tro kourt isi, pou mwan sit tou sa bann progranm lo tou le 3 nivo swen lasante, me tou endikater i montre ki nou sistenm lasante piblik i parmi bann pli gran lakonplisman Parti Lepep.  An term aksesibilite fizik avek swen lasante, sa i posib akoz Gouvernman Parti Lepep in konstrir en network Klinik e Lopital dan tou distrik, lo bann zil prensipal nou Larsipel.  An term aksesibilite ekonomik avek swen lasante, sa i posib akoz nou sistenm lasante piblik i gratwit.  Sa prensip aksesibilite i osi etann an deor Sesel, akoz anba sa sistenm ki Gouvernman Parti Lepep in met an plas, en sitwayen Seselwa i menm kapab ganny akse avek swen aletranze, si Lopital Sesel pa kapab ofer nivo swen neseser.

Mr Deputy, mon pa pe koz dan vid akoz tou Seselwa i rekonnet ki sistenm lasante piblik ki’n ganny met an plas par Gouvernman Parti Lepep, i enn ki bon.  Sa sistenm lasante piblik i delivre bon swen, atraver Seselwa, atraver modernizasyon sistenm swen lasante, profesyon-na-li-zasyon sa sistenm e lokalizasyon profesyon lasante.  Seselwa in ganny akse avek en swen de kalite akoz Gouvernman Parti Lepep in envestir bokou dan lasante piblik.  Tou le an, pli gro morso dan Bidze i al pour lasante.  En gran parti sa larzan i ganny depanse pou aste lekipman pli modern e osi medikaman.  Lenvestisman dan lasante i osi al dan devlopman imen.  Bokou larzan in ganny depanse pou anploy bann Spesyalis.  Anba nou polisi lokalizasyon, en gran kantite Seselwa in ganny sans etidye pou vin Dokter e en gran kantite zot osi, in swiv formasyon pou vin bann Spesyalis.

Mr Deputy, depi 1977 ziska ozordi, Gouvernman Parti Lepep in train 190 Dokter.  An se moman, i annan ankor 43 ki lo training.  Gouvernman osi in train 22 Spesyalis.  3 i ankor lo training.  In kout Gouvernman Parti Lepep, sa bann pri swivan pou train en Dokter.

An Slovaki, i kout R2 milyon.  Dan Lenn, R3 milyon.  Progranm Lenn/Malezi i 1.7 milyon, Cuba i 2.1 milyon, New Zealand i 2.5 milyon.  Pou train en Spesyalis, in kout Gouvernman, an Sid Afrik R770 mil, dan Lenn, R872 mil.

Mr Deputy, ler ou miltipliy sa bann pri e lakantite Dokter ek Spesyalis ki’n ganny train, ou ava vwar lakantite larzan ki Gouvernman Parti Lepep in envestir dan sa bann Dokter.  E se sa filozofi Parti Lepep, met ‘Zonm o sant devlopman.’

Mr Deputy, si tou nou bann Dokter ti retourn travay dan nou sistenm lasante piblik, nou pa ti pou bezwen sa kantite Dokter etranze dan nou sistenm Lasante.

Mr Deputy, ozordi, pou premye fwa dan listwar Sesel, i annan sa kantite Dokter Seselwa dan nou sistenm lasante piblik.  Nou sistenm lasante piblik pa parfe e Gouvernman Parti Lepep in met an plas en stratezi pou amelyor nou sistenm lasante.  Me napa en lot Parti Politik ki pou kapab met an plas en sistenm lasante piblik ki osi performan ki enn ki Parti Lepep in etablir.  E napa en lot Parti Politik dan Sesel, apard Parti Lepep, ki pou kapab amelyor sa sistenm lasante piblik.  Sikse nou sistenm lasante piblik i montre klerman ki Parti Lepep i annan lasante son pep a ker.  Sistenm lasante piblik i en aki nou sosyete e nou bezwen prezerv li pou amelyor li.

Mr Deputy, Gouvernman Parti Lepep in met Seselwa o sant devlopman e alor, meyer mezir sa devlopman se byennet son pep Seselwa.  Gras a en sistenm lasante piblik ki Gouvernman Parti Lepep in donn pep Seselwa, Seselwa i viv pli lontan e an pli bonn sante ki dan lepase.  Gras a en sistenm lasante, plis zanfan in sirviv zot nesans.  Gras a sistenm lasante, plizyer Seselwa in sap lanmor.

Mr Deputy, koman en Seselwa ki’n kontribye dan delivery sa sistenm lasante piblik, mon fyer pou dir ki sa sistenm Parti Lepep in met an plas, i fer en gran diferans dan lavi Seselwa.  Sa nouvo Klinik ki deservi zabitan Glacis i lafyerte nou distrik e laprev ki Gouvernman Parti Lepep in pran lasante zabitan Glacis tre serye.

Mr Deputy, ler ou pas dan distrik Glacis ki mon fyer pou reprezante isi dan sa Lasanble, ou ava vwar pli zoli Lekol Primer dan Sesel e byento, sa Lekol pou ouver son laport avek zanfan Glacis.  Ler ou pas L’ilot, ou ava vwar sa semen ki zabitan sa sou-distrik, ki plizyer lannen pe demande, in fini demare.  E byento. Stor Peser dan Glacis santral pou komanse.  Si ou fer letour Carana, ou ava trouve nou zoli Housing Estate. Ou desann bor lanmer North East Point, ou ava vwar nou 4 unit 2 lasanm ki’n fini ganny allocate avek zabitan Glacis.

Mr Deputy, se sa sa filozofi Parti Lepep, ‘Met zonm o sant devlopman.’

Mr Deputy,, mon pou siport sa Mosyon.  Mersi.

MR DEPUTY SPEAKER

Onorab Dugasse.

HON MELVAL DUGASSE

Mersi Mr Deputy.  Mosyon prezante ozordi, le 2 Zen 2015 i tre enportan e enteresan, akoz i fer egzakteman 51an kreasyon SPUP/SPPF/Parti Lepep.  E dan detrwa zour, nou pou fer 38an gouvernans nou pei, par sa menm filozofi politik.  Sa, atraver nou kon-mit-man ki nou Parti in plase lo met ‘Zonm o sant devlopman.’  Nou bezwen mentenir e prezerv nou ideolozi nob, ki’n fer nou sirviv bann difikilte ekonomik sosyal e politik.  Pour en gran mazorite Seselwa, sa i vedir 38an devlopman e progre.

Mosyon devan nou, i san dout tous sa size e rezon det deryer kreasyon Parti an 64.  Enn bann prensip fondamantal Parti SPUP se dignite travayer Seselwa.  Sa lalit pour anmenn status travayer e kondisyon travay dan nou pei, in komans avek nou Parti.  Ziska ozordi, nou Leadership pe kontinyen fer tou sa ki posib, pou met lanmen lo sa size.  Lalit SPUP i esansyelman en lalit, pou fer ki bann travayer i ganny zot Drwa, ki enkli Drwa byen ganny trete, resevwar en saler konvenab, ganny konze, laliberte pou zwenn en Linyon pou reprezant zot.

Mr Deputy Speaker, i enportan pou note ki se SPUP/SPPF e ozordi Parti Lepep ki’n toultan e pou kontinyen lite pour Drwa Travayer dan Sesel.  Ozordi, nou en pei ki annan bann Lezislasyon travayer pli progresiv dan larezyon e menm lo nivo Lafrik.  Enn bann Drwa ki ganny garanti anba Lartik 35 nou Konstitisyon ki koz lo Drwa Sitwayen pou kondisyon travay zis e favorab.  Pou al pli lwen, Sesel in menm ratifye Konvansyon 111 ILO, ki demande ki Sesel i deklar e swiv en polisi Nasyonal ki promot legalite, loportinite e tretman, an sa ki konsern lanplwa, avek bi pou elimin tou form diskriminasyon.  An rezilta sa lalit, ozordi isi Sesel, bokou in ganny fer e ankor pe ganny fer, par rapor avek Drwa e kondisyon travayer.  Saler diskriminasyon par rapor ant zonm ek fanm.  E osi lanfaz lo lantrennman apropriye, avek bi pou ogmant prodiktivite.

Mr Deputy Speaker, nou pei, sa Gouvernman e nou Parti, nou’n donn tou loportinite Seselwa.  Nou’n train bokou Seselwa.  Konbyen Seselwa ozordi ki annan Sertifika dan diferan field? konbyen ozordi ki annan en Degre?  Konbyen ozordi ki annan en Masters, ki annan Doctora, PHD? Me keksoz ki nou kapab demande se lekel ki ankor la dan nou pei pe travay e konbyen ki ankor la pe donn nou en koudmen dan sa lalit?  Gouvernman in progresivman etablir bann kondisyon favorab pour travayer Seselwa.  Bokou lezislasyon in ganny met an plas, pou permet bann diferan Lorganizasyon ki konsernen avek travay e travayer, pou dyaloge e kontribye, avek bi amelyor kondisyon travay dan nou pei.

Mr Deputy Speaker, Sesel in fer bokou progre dan sa bann dernyen lannen e ozordi, nou pe rekolte sa zefor e fri nou travay dir.  Nou pep i devret pe kontinyen adopte sa sans responsabilite.  Nou pei i pour nou e si nou pa fer, nou sosyete pou ganny afekte.

Mr Deputy Speaker, nenport ki travay ki ou pe fer, i ede dan devlopman ekonomik nou pei.  I pa fini la.  Ou pe osi ed ou frer e ou ser Seselwa, pou kapab amelyor zot kondisyon lavi e osi ede kree en baz solid nou fitir nou bann zanfan.

Mr Deputy Speaker, Gouvernman pe kontinyen rod fason pou relev sa defi.  Prezidan Michel in fer sa vin enn son priyorite lo son azanda e in met plizyer mezir dan sa direksyon.  Zisteman, dan son vizyon pou transform Sesel pou fer vin en knowledge based society, Prezidan Michel in lans Liniversite Sesel.  Sa Lenstitisyon i en gran pa dan nou demars pou annan mendev kalifye, pou soutenir nou devlopman.  La ki nou annan nou prop Liniversite, bokou nou bann zenn pe ganny sans fer zot Degre, pou pli tar okip bann pozisyon kle dan nou pei.  Menm bann dimoun ki deza dan lanplwa pe mazin avans pli devan, oubyen pran en lot karyer.  Ozordi, zot kapab realiz zot rev.  Liniversite Sesel i la pou donn sa bann dimoun loportinite ganny bann training e kalifikasyon neseser pou avanse dan lavi.  Liniversite Sesel in osi ofer nou pei bann sans, pou nou relev sa bann defi ranplas travayer etranze par Seselwa.  Se sa ki nou apel met zonm o sant nou devlopman.

Mr Deputy Speaker, pou ilistre sa pli byen, Gouvernman, atraver Minister Lanplwa, in osi kree plizyer kalite progranm travay dan nou pei.  Ozordi, nou annan Re-skilling Program, Youth Training Program, localisation program, from Welfare to Well Program, Vocational Training Program e Young Leaders Program. Lobzektif prensipal sa bann progranm se pour zisteman donn plis loportinite bagaz nou bann dimoun.

Mr Deputy Speaker, an 64, SPUP

ti etablir premye pa lalit pour nou Seselwa.  Nou premye pa ver laliberte, fraternite e egalite.  Nou premye pa kot Seselwa ti ganny son dignite.  Nou premye pa ver menm sans, menm loportinite e menm Drwa.

Mr Deputy Speaker, sa lalit pa’n an ven.  Ozordi nou pe rezouir e vwar vre rezilta fri nou lalit.  Laliberte, Fraternite e Egalite.  SPUP, SPPF, Parti Lepep.  Sa se vre masin deryer transformasyon nou bann travayer Seselwa.  Depi bat kannel, anmas koko e ozordi pour nou bann profesyonnel zenn Post Segonder, avek bann nouvo teknolozi tel ki ipad, laptop, email, facebook.

Mr Deputy Speaker, ozordi avek sa transformasyon ekonomik ek sosyal, nou’n vwar bokou sanzman dan nou Labour Force.  Avek lemonn modern, lavansman teknolozi, profesyon pli spesyalize, nou’n osi konstate nesesite annan en Labour Force kontinyen sanze, progrese e adapte.

Mr Deputy Speaker, i tre enportan pou note ki Sesel koman en pti leta zil, avek limitasyon resours natirel, i primordyal pou alor met bokou lanfaz lo devlopman resours imen dan tou nou devlopman, stratezi.  Alors, ozordi i kler ki nou annan en mankman mendev dan diferan lokipasyon sa i rezilta kontinyel e sanzman dan nou lekonomi.  Ozordi, nou Gouvernman pe kontinyelman rod fason re-oriyant nou sistenm ledikasyon, an lir ek nou devlopman plan resours imen nou pei.

Mr Deputy Speaker, touzour avek bi met dimoun o sant devlopman e avek nou sistenm ledikasyon aktyel e kreasyon nou prop Liniversite, nou pou kontinyen met lanfaz lo preparasyon bann pli meyer mendev, pou antre dan lemonn travay, avek plis skill, konpetans, konesans e pli bon latitid.

Mr Deputy Speaker, tousala, avek bi pou protez, prezerv e met nou devlopman resours imen o sant nou devlopman sosyo ekonomik nou pei.

Mr Deputy Speaker, dan nou demars devlopman e diversifikasyon ekonomik, Sesel, parey plizyer bann pti leta zil, in fer fas avek en mankman mendev.  Sa i ganny trouve dan diferan Sekter.  Swa dan Sekter Medikal, kot nou mank Dokter, Ners.  Konstriksyon, kot nou mank Enzenyer.  Ledikasyon, Ansennyan e plizyer lezot ankor.  Menm si Gouvernman in met an plas en politik lokalizasyon pou ranplas mendev etranze par Seselwa e kot bokou resours i ganny mete dan training nou bann sitwayen, sa mankman resours imen i kontinyen persiste.  Ozordi, enn pli gran challenge i reste sa size ranplas travayer etranze par Seselwa.  Fodre nou pep pa zanmen oubliye se ki SPUP, SPPF, ozordi Parti Lepep ki’n touzour sanpyon bann travayer.  Si ozordi nou pe koz lo met ‘Zonm o sant devlopman’, se akoz nou menm ki’n anmenn sa devlopman.  Par kont, in ariv en letan kot nou bezwen osi asize, reflesir, vwar si tou sa keksoz ki nou’n fer i byen.  Si napa amelyorasyon ki nou bezwen fer.  Legzanp se ki in plis ki ler pou nou revwar nou Lalwa Lanplwa, pou met li azour avek nou devlopman ekonomik.

Mr Deputy Speaker, sa Mosyon i permet nou kapab revwar kote nou’n arive ozordi e kote nou kapab fer pli byen ankor, pour nou bann travayer.  Savedir, sa lalit pour sa amelyorasyon kondisyon travayer i en lalit san ses.  I en lalit ki al pli lwen ankor e nou bezwen kontinyen ek sa lalit.

An ter-mi-n-an Mr Deputy Speaker, laverite se ki nou tou nou konnen ki malgre defi, Parti Lepep ek son bann Dirizan i la e pou touzour la pour nou pep Seselwa.  Malgre serten in kit nou, menm ler serten ti krwar ki nou pa ti pou reisir, nou Parti Lepep, nou’n toultan la.  Botan koman movetan, se nou menm ki’n touzour gard lespwar Seselwa vivan.  Se nou ki’n touzour rod meyer fason pou amelyor lavi nou pep.  Se nou ki’n tonbe leve.  Nou’n touzour la e touzour pou la pour lepep Seselwa.

Mersi Mr Deputy Speaker.

MR DEPUTY SPEAKER

Onorab Barbe.

HON NICHOLE BARBE

Mersi Mr Deputy.  Mr Deputy, koleg Onorab, bonzour.

Mr Deputy, mon deliberasyon lo sa Mosyon pou konsantre lo bann lakonplisman, an sa ki konsern lazenes.

Mr Deputy, distrik Bel Air i annan li en tre zenn popilasyon e parey partou, sa i sinifye bokou lenerzi, kreativite, me egalman en nivo lekspektasyon ki tre o.  Nou bann zenn Seselwa i pe toultan sers le meyer e vi ki zot annan akse lib avek lenformasyon, zot touzour ofe avek bann dernyen devlopman ki pe arive dan lemonn.

Mr Deputy, depi byen lo komansman, nou Gouvernman ti set son bann priyorite e lazenes Seselwa ti enn bann priyorite pli enportan ki nou Gouvernman ti annan.  Investment konsiderab dan lasante zanfan, ledikasyon nou bann zenn e devlopman zot bann potansyel an zeneral, in mark parkour nou Parti, depi ler ki in o pouvwar.  I avek en ferm konviksyon ki nou devret pe permet nou zenn ganny tou loportinite posib depi en tre zenn laz, ki nou Gouvernman in met an plas son bann polisi.  Sesel i en pei kot lazenes i ganny konsidere an premye e non pa koman en keksoz segonder ki vin apre ki tou bann lezot kalkil in fini ganny fer.  Letan ki nou pe koz en polisi kot nou met ‘Zonm o sant devlopman,’ i mon krwayans ki sa polisi in aplik vreman byen pour nou lazenes, akoz Sesel i en pei ki’n depi lo komansman, krwar dan met son lazenes o sant tou devlopman.

Mr Deputy, ou pa kapab annan bann bon polisi, si ou napa en Leadership ki krwar dan sa bann polisi ki pe ganny met an plas.  E en keksoz ki mon kapab dir se ki lazenes Seselwa nou sanse.  Nou sanse ki nou annan en Dirizan ki krwar a 100 poursan dan lazenes Seselwa.  Dan zot devlopman e dan sa kontribisyon enorm ki nou zenn i kapab fer dan nou pei.  Depi ki in vin o pouvwar an lannen 2004, Prezidan Michel in montre klerman pou dimoun vwar, sa latasman for ki i annan anver lazenes Seselwa.  Ki swa dan Gouvernman, dan Sekter Prive, ouswa senpleman dan lakominote.  I annan plizyer nouvo progranm inovativ ki favoriz devlopman nou bann zenn, ki vwar zot nesans anba direksyon Prezidan Michel.  E sa bann polisi in servi pou ranforsi nou politik ‘Zonm o sant devlopman.’  Prezidan in komans par enplimant en progranm mentoring dan Servis Piblik, kot bann zenn in gradyelman ganny prepare pou asim bann pozisyon responsabilite o servis nou pei e nou pep.  E depi 2004, sa in tre vizib par bann lapwentman ki’n ganny fer.  Tou dimoun i kapab vwar ki depi an 2004, letan ki Prezidan Michel in asim prezidans Sesel ziska ozordi, i annan en kantite zenn Seselwa ki’n ganny loportinite pou avanse, devlope e pou pran bann pozisyon responsabilite.  Sa progranm mentoring in pli tar ganny formalize pou vin progranm Zenn Dirizan.  En progranm letid avanse lo nivo Masters, ki pe permet bokou nou bann zenn pou ekip zot lekor avek bann labaz neseser, atraver letid avanse, pou pran plis responsabilite dan gouvernans pei.

Mr Deputy, an lannen 2006, Prezidan Michel ti debout pour premye fwa, dan en Eleksyon direk koman en Kandida Prezidansyel.  E i ti raporte.  Mwens ki 1an pli tar, en lannen 2007, i ti lans demars pour Sesel, pou ganny son premye Liniversite.  E pa nenport ki Liniversite, me enn ki ganny rekonnet e respekte lo nivo enternasyonal.  Sa pour mwan, i en legzanp kler ki lenportans lazenes Seselwa i annan pour Prezidan Michel e Parti Lepep.  Mwens ki 1an dan son premye manda direkteman elekte, Prezidan in inisye pli gro inovasyon ki sistenm ledikasyon Sesel ti’n vwar, depi 1978.  En konpletman nouvo direksyon avek letid avanse, enn ki pou permet plis fanmir Seselwa pou benefisye.

Mr Deputy, i pa zis dan sport ouswa dan gouvernans pei ki Sesel i oule met lazenes o sant devlopman.  Lazenes Seselwa i egalman bezwen sipor e akse avek bann servis.  Souvan dan mon travay koman MNA, ou rankontre bann kritik ki tel ou tel dimoun i tro zenn pou ganny akse avek lakaz, ouswa avek later, oubyen bann lezot servis.  Me letan ki ou asiz avek bann zenn, zot menm, ou realize ki zot krwar ki napa ase ki pe ganny fer pour zot.  Sirtou, i annan nou bann graduates de fwa ki santi zot konpletman abandonnen.  Tou in ganny fer pou zot lo nivo letid me letan ki zot retourn Sesel, i napa personn ki enterese avek zot devlopman sosyal koman en imen.  Me la, avek resours ki’n ganny met an plas, i annan plizyer proze lozman ki pe ganny met an plas, spesifikman pour zot.  Lannen pase, nou ti kapab vwar Prezidan li menm, kot i ti al vizit bann sit kot sa bann proze pou ganny konstrir.  I egalman enteresan pou vwar lakantite zenn fanmir ki annan pe reste Perseverance.  E dan bann lezot nouvo devlopman lozman, Sesel i en pei kot nou bokou konfyans nou lazenes e kot nou Gouvernman i sey akord zot tou loportinite posib.

Mr Deputy, malgre tou sa kantite kritik ki bann devlopman touristik in gannyen Sesel, i vreman en plezir pou vwar lakantite zenn Seselwa ki pe al travay dan sa bann letablisman.  Lazenes Seselwa i anvi sezi loportinite pou travay, i kapab ganny akse dan en fason rezonnab avek lanplwa.  Dan tou Job Fairs ki pe pran plas, ou vwar bann Lorganizasyon pe rod zenn travayer.  E dan zefor pou akord plis loportinite nou bann zenn ankor, Gouvernman avek STA, in met an plas en progranm letid lo nivo Degre pour Hotel Management.  Vi ki i annan sa Lendistri Tourizm Senk Zetwal dan nou pei, Gouvernman pe envestir pour ki nou bann zenn i ava kapab ganny formasyon neseser, devlop bann konpetans neseser e akimil ase leksperyans pou zot evantyelman pran kontrol zesyon sa Lendistri.  Me an di-z-an sa, i enportan ki sa bann zenn Seselwa i ganny byen resevwar par bann Letablisman Touristik e ki zot ganny ofer bann bon kondisyon rezonnab ki konparab avek zot bann koleg etranze.

Mr Deputy, Gouvernman Parti Lepep i egalman santi li enportan ki nou pei i annan en group zenn enerzetik ki pran ownership lekonomi Sesel.  Ozordi, i annan en lanfaz enorm ki pe ganny mete lo kreasyon pti e mwayen biznes, par bann zenn antreprener Seselwa.  Bann zenn Seselwa pe ganny pouse pou demontre kreativite e inovasyon zot bann lide ki zot pe avanse.  Gouvernman i annan bann diferan progranm an plas ki annan pour bi ede, gide e mentor sa bann zenn ki anvi antre dan sa bann pti biznes.  Pandan sa 2 dernyen lannen, nou’n egalman vwar ki i annan en kantite lanfaz ki’n ganny mete lo sa size akse avek Kapital.  E i annan en kantite nouvo lenstriman finansyel ki’n ganny met an plas resaman, ki pou permet bann pti antreprener pou li byen ganny akse avek Kapital.  Prezidan Michel in li menm a plizyer repriz, lans lapel, pour ki nou zenn i devlop sa lespri antre-pre-na-ya e pou antre dan lekonomi Sesel koman bann propriyeter zot prop biznes.  E la ankor, Gouvernman Parti Lepep i pare pou siport zot.  Konmitman Prezidan Michel in ganny demontre klerman par bann vizit ki i pe fer lo teren.  Kot i pe pas kot bokou bann zenn antre-pre-n-er, pou ofer son sipor.

Mr Deputy, mon sipor pour sa Mosyon i vin akoz mon konsyan lakantite ki pe ganny fer.  Lakantite loportinite ki pe ganny mete a la porte nou lazenes.  I vre ki i annan bann fleo ki pe afekte nou pei, me nou pa kapab depans tou nou letan pe diskit zis lo problenm, kan nou pe inyor solisyon ki drwat devan nou.  Sesel, pandan 38an, nou’n met ‘Zonm o sant devlopman.’  E sirtou, sa polisi lazenes o sant devlopman, in prouve ki i kapab vin en sikse enorm, otan ki nou annan en zenes ki pare pou sezi loportinite ki devan li.  Sesel i annan en bonanza loportinite pour okenn zenn Seselwa ki pare pou travay dir dan en fason organize e disiplinen.  E nou rekonnet e sezi tou loportinite ki prezante devan li.

Mersi Mr Deputy.

MR DEPUTY SPEIAKER

Bon.  Avek sa nou a pran en break e nou a repran 2er apre midi.

(LUNCH)

MR DEPUTY SPEAKER

Bon, nou a dir bonn apre midi e nou a kontinyen avek nou Mosyon lo Order Paper e mon ava envit Onorab Souris pou fer son lentervansyon.  Onorab Souris pa ankor antre.  Onorab Murielle Marie.  Be kot zot ete?  Onorab Pillay.

HON SEBASTIEN PILLAY

Mersi Mr Deputy Speaker.  Mr Deputy Speaker, sa Mosyon devan nou i enn ki tre, tre enportan, sirtou dan sa kon-zon-k-tir devlopman ki nou pei i trouv li ladan.  E mon krwar i osi servi koman en tre bon loportinite pou nou kapab osi koz sirtou annan faver sa prosesis devlopman ki’n arive dan nou pei pandan sa bann dernyen lannen.  Mon krwar si i annan en keksoz ki nou bezwen realistik-man regarde, se ki nou pei in transformen koman en pep e vreman Seselwa in vin en Nasyon ki fyer son lidantite.  E mon krwar si nou kontinyen fokaliz lo sa pwen ‘Zonm o sant devlopman,’ nou kapab konpran ki nou en Nasyon ki pe regard nou fitir avek bokou lantouzyazm e ki mannyer nou kapab davantaz anmenn plis devlopman e plis lepanouisman pour nou pei.

Pli boner dan son prezantasyon sa Mosyon, mover ti koz lo sa size lazistis sosyal, ki mon krwar i en konponan tre trez enportan ler nou koz lo ‘Zonm o sant devlopman.’  E en veikil mazer oubyen ki zwe pli gran rol dan asire ki nou annan lazistis sosyal, se en bon sistenm ledikasyon pou efektivman garanti ki tou Seselwa i ganny loportinite pou li sezi bann diferan loportinite ki kapab ganny kree, pandan ki son pei pe devlope.

Mr Deputy Speaker, nou sistenm ledikasyon in pas atraver en transformasyon enkrwayab pou li sorti dan en sistenm ledikasyon kot ti favoriz bann ki ti pli elit, pou vin en sistenm ki esansyelman i donn loportinite egal sak sitwayen Seselwa.

Ozordi dezormen sak zanfan Seselwa ki ne dan en lakour, i konnen poudir i pou kapab al lekol, kontinyen son letid e si i serye, al pli devan ki sa.  E se sa pour mwan ki karakteriz sa fraz ‘Zonm o sant devlopman’ kot nou pe koz lo lanfaz ki’n ganny mete lo asire ki nou kapab garanti, esansyelman ki nou met ‘Zonm o sant devlopman.’  E nou sistenm ledikasyon li i annan en rol primordyal pou li zwe.

Ou konnen Mr Deputy Speaker, bokou in ganny dir lo nou sistenm ledikasyon dan lepase e mon krwar sa ki nou’n bliye fer se ki nou’n bliye met an perspektiv tou bann eleman ki’n esansyelman sanze oubyen transformen dan nou sistenm ledikasyon pou fer li vin sa ki i ete ozordi.

Ler mon koz lo sistenm ledikasyon Mr Deputy Speaker, mon pa pe zis koz nou sistenm ledikasyon dan son sans Lekol Leta e Lekol Prive.  Me mon pe koz ledikasyon an zeneral dan nou pei e lafason ki sa transform in anmenn meyer fason fer e inovasyon dan ledikasyon, pou davantaz asire ki bann zenn Seselwa i ganny tou loportinite neseser pou zot avanse.  E se sa mon krwar ki en pwen fondamantal ki nou bezwen fokaliz lo la.

Mr Deputy Speaker, si nou fer en tour dorizon e nou regard ki mannyer nou sistenm i ganny klasifye, nou kapab konpran atraver diferan lenstans nou sistenm ledikasyon ki mannyer Gouvernman in kontinyen e pe kontinyen met lanfaz lo devlopman e lenvestisman, pou asire ki nou sistenm ledikasyon i vin enn ki pli meyer dan lefitir.

Zis pran par egzanp Mr Deputy Speaker, ledikasyon primer.  Mon krwar bokou nou paran i a rapel dan lepase, ki mannyer ti difisil pou zot ler zot, zot ti pe al lekol pou zot ganny sa bann loportinite ki nou vwar nou bann zenn pe gannyen ozordi.

Me sa ki pli enportan ankor, se ki nou bezwen vwar osi sakrifis ki nou bann profesyonnel ki pe travay dan ledikasyon primer, sirtou bann Teachers, zefor ki zot mete, lanfaz ki zot mete lo asire ki zot donn en ledikasyon de kalite bann zanfan.  Me parfwa sa ki sagrin mwan Mr Deputy Speaker, se lafason ki nou avans kritik anver sa bann menm Ansenyan ki annan care nou zanfan pour laplipar mazorite nou lazournen.  San realize zefor ki sa bann dimoun i mete dan zot travay.

Ler nou osi move towards ledikasyon segonder Mr Deputy Speaker, nou kapab ankor vwar davantaz lenvestisman ki Gouvernman in fer, pou asire ki zanfan ler zot devlope zot antre dan lekol segonder, zot ankor ganny loportinite.  E sa in ganny fer par en Gouvernman ki konsyan lenportans ki ledikasyon i annan dan devlopman son pei.  En dimoun i kapab argimante me dir me nenport Gouvernman ti pou fer parey.  Me ler nou regard otour nou dan larezyon e dan lezot pei, nou vwar poudir kantite Gouvernman pa’n fer parey malgre zot ti annan loportinite pou fer li.  E se sa ki fer mwan krwar ki senserman, en Gouvernman Lepep in fer li pa zis akoz i krwar i devret fer li, in konpran ki i bezwen fer li, me akoz son lesansyel se ki i believe dan son pep e i oule provide maksimonm loportinite pour son pep.  E se sa ki reste pou mwan en pwen enkontournab dan tousala.  I pa vedir poudir tou keksoz i parfe but we must also aksepte poudir zistans, parkour ki nou’n fer, kot nou ti komanse avek kot nou’n arive ozordi, nou’n ariv tre lwen.  Mon krwar sa nou bezwen aprann aksepte.

Si nou regard pli devan Mr Deputy Speaker, ozordi nou’n vwar lepanouisman bann sant Post Segonder, bann lekol Post Segonder e loportinite ki sa pe osi ofer bann zenn.  E i kler poudir atraver sa bann loportinite, bokou zenn pe resevwar en sans pou zot avans pli devan e esansyelman pran en karyer ki kapab ed zot demen vin zot prop boss, komans zot prop biznes.  E sa i vin atraver lenvestisman ankor enn fwa ki Gouvernman in fer dan domenn ledikasyon e atraver latansyon ki Gouvernman in donnen anver nou sistenm ledikasyon.

Si nou pran par egzanp Marintime Training Centre Mr Deputy Speaker.  Dan lepase, ti napa loportinite pour bann zenn ki dan Maritime Training Centre al fer training avanse dan bann Lenstitisyon aletranze.  Me avek en inovasyon mon kapab dir sa, avek en nouvo fason apros keksoz ozordi bann zenn ki fini Maritime Training Centre, pe vwar loportinite pou zot kapab al fer letid avanse aletranze.  Si sa pa progre, mon pa konnen ki sa ki reprezant progre.

Nou al pli devan, nou regard par egzanp bann etidyan ki al Lekol Tourizm, ki mannyer zot osi atraver bann inovasyon, atraver bann nouvo fason fer ki’n ganny anmennen dan sa Sekter, zot pe ganny loportinite pou osi avans pli devan.  I pa vedir ki tout in fini akonpli, non.  Akoz devlopman i pa en finisyon keksoz, me devlopman i plito en countinuum kot ou bezwen kontinyelman annan bann inputs pou kontinyen fer keksoz avanse.  E se sa ki mon ti a kontan ki lepep Seselwa i konpran.

Mr Deputy Speaker, si nou bouz pli devan nou regard lanfaz ki’n mete lo bann Adult Learning Centres.  Par egzanp nou konnen poudir pa tou zenn ki pou fini Lekol Segonder, ki pou fini lo menm nivo.  E nou’n vwar ozordi Gouvernman in met an plas bann Adult Learning Centres ki pe esansyelman provide en loportinite pour bann dimoun ki pa’n kapab, bann zenn ki pa’n kapab make it ler zot ti dan Lekol Segonder, pou zot kapab ganny en grade dan en Legzanmen, ki ava permet zot akse avek en Lenstitisyon training.

Sa osi i en form devlopman.  Sa osi i en form lanfaz ki Gouvernman pe mete pou asire ki nou sistenm ledikasyon i kontinyen al de lavan.

Mr Deputy Speaker, e sa i anmenn mwan lo en lot pwen ki Liniversite Sesel.  Ler Liniversite Sesel ti lanse Mr Deputy Speaker, mon ti enn parmi bann premye Lecturers pou al travay avek Liniversite Sesel.  E mon rapel a sa letan ti annan bokou kritik.  Kantite kritik ki ti ganny vize ver Liniversite Sesel, par lefe ki ti dekrir sa koman en vizyon fou ki pa ti pou zanmen realize.  Me ki nou pe vwar ozordi, Liniversite Sesel pe devlope e pe avanse e pe vin dan li menm en Lenstitisyon recognize dan larezyon.  E sa i enportan pou nou note sa.  In arive gras a lenportans ki Gouvernman i atase avek ledikasyon son pep.  E sa i en pwen parey mon dir Mr Deputy Speaker, ki enkontournab.  E se sa en keksoz ki nou bezwen mazinen.

E ki ou vwar pandan tou sa letan ki Gouvernman in fer sa bann lenvestisman.  A plizyer repriz bokou dimoun in pas par deryer, in dir sa pa bon, pa devret fer koumsa, me apre pou vwar sa bann menm dimoun vini dir ar sa ti zot nide, Gouvernman in pran zot nide.  E pou mwan se sa ki mon vwar poudir i annan en serten lipokrizi dan lafason ki serten dimoun i apros sa deba an sa ki konsern nou sistenm ledikasyon.

I fasil pou kritike, i fasil pou ou dir tou keksoz pa bon, but at the same time ou napa en solisyon konkret e net pou ou kapab improve keksoz.

Mr Deputy Speaker, mon’n fer sa pti tour lorizon lo bann diferan etap nou sistenm ledikasyon pou met lanfaz lo en pwen fondamantal.  Ozordi nou annan bokou zenn ki’n sorti Liniversite e zot in ganny sans atraver zot letid pou zot enterakte avek en kiltir diferan.  Zot in ganny sans atraver zot letid pou zot konn lezot domenn.  E mon krwar sa bann zenn i devret vwar zot prezan koman bann Anbasader pour nou pei.  Me osi koman sa nouvo zenerasyon, sa nouvo souf ki pou anmenn nou Sistenm Ledikasyon ankor pli devan.  Me zot pa devret vwar zot koman en dimoun ki zis la pe asize pe kritike without providing an alternative solution.

E se pour sa rezon ki mwan mon krwar poudir si nou Parti e Gouvernman i kontinyen mentenir son prensip lazistis sosyal, son prensip met ‘Zonm o sant devlopman,’ nou kapab enkorpor vizyon tou sa bann zenn e asire e garanti ki nou kontinyen fer avanse nou sistenm ledikasyon, ki pour en benefis entegral pou nou pei.  E sa pou mwan i en pwen fondamantal Mr Deputy Speaker.

Mr Deputy Speaker, i annan en kantite mon kapab dir ankor lo sistenm ledikasyon.  I en size ki pasyonn mwan en kantite.  Mon’n fer 12an mon karyer dan sistenm Ledikasyon.  Mon’n komans koman en Supply Teacher, mon’n al training, mon’n vin en Qualified Teacher, mon’n travay koman en Deputy Head Teacher.  Mon’n travay koman en Researcher dan ledikasyon, mon’n travay koman en Lecturer. E sa in donn mwan en perspektiv tre enteresan lo diferan nivo dan nou sistenm ledikasyon.  Mon kapab petet relate avek sa ki en Teacher pe santi.  Mon osi kapab relate avek sa ki en dimoun ki pe travay lo nivo Polisi Ledikasyon pe santi.

E souvandfwa parfwa en keksoz ki sagrin mwan i se ki en kantite dimoun i fer komanter lo nou sistenm ledikasyon, san ki zot konpran bann diferan eleman ki bezwen ganny met ansanm pou fer sa sistenm kontinyen fonksyonnen e kontinyen marse.  Parfwa nou annan en lekspektasyon ki nou sistenm ledikasyon i bezwen delivre tou vitman.  E sa i pa en keksoz ki pou zanmen posib.  E se pour sa rezon ki mwan mon enplor lamazorite Seselwa.  I annan serten dimoun pa pou zanmen konpran Mr Deputy Speaker, me mon krwar lamazorite Seselwa i konpran ki nou tou, nou parti pre-nan dan asire ki nou sistenm Ledikasyon i kontinyen avanse dan en fason pozitiv.

Mon’n fer sa pti largiman Mr Deputy Speaker, akoz mon oule koz lo en keksoz ki mon krwar ozordi i pe afekte en pti pe lafason ki nou valoriz nou sistenm ledikasyon.  Ou pe vwar ozordi par egzanp Mr Deputy Speaker, kot paran ki en keksoz in arive ek zot zanfan kot lekol, i vwar li normal pou al lo Face Book e zour sa Teacher, oubyen ensilte sa lekol, oubyen fer bann komanter derogatwar.  E mon krwar sa i counterproductive dan devlopman zot zanfan akoz the best way to deal ek sa se al kot lekol, vwar sa bann Ansenyan e regarde ki sa ki pe arive.

Ou vwar par egzanp resaman, mon pe regarde lo Medya Sosyal kot i annan lekol ti’n demann zanfan pou anmenn kontribisyon pou parti zanfan.  I annan paran ki’n byen mekontan which is their right to so, be at the end of the day mon krwar i annan en dimoun ki ti fer en largiman se ki sa zanfan i pa zis pour sa lekol me i pour sa paran.  E sa paran osi i annan en rol pou li zwe dan devlopman son zanfan.  E nou bezwen avoid sa bashing ki nou donn tou keksoz a en moman ki en keksoz pa al dan nou faver.

E mon krwar mover Mosyon bomaten ti fer sa kler lo sa responsabilite ki nou menm nou bezwen annan e lafason ki nou bezwen responsabiliz nou zanfan pou apresye bann keksoz ki’n ganny met la pou pli kapab avan pli devan.  E se koumsa ki mon vwar nou sistenm ledikasyon pe travay.  Nou sistenm ledikasyon i oule garanti ki sak Seselwa i vin o sant devlopman sa pei, as long ki ou sa Seselwa, ou santi ou parti prenan sa prosesis.  Personn pa pou kapab fors ou antre, vin parti prenan sa prosesis, si ou natirelman ou pe reziste sa loportinite ki ganny provided for youThat is important Mr Deputy Speaker.  E enportan pou nou konpran.

Mr Deputy Speaker, mon pou retourn kot mon ti komanse.  Nou’n nobou transform nou pei akoz nou en pei ki stab.  Nou en pei ki annan stabilite e sa stabilite in permet nou pou devlope ekonomikman.

Mr Deputy Speaker, mon sirpri par fwa ler ou pe lir, ou pe regarde, ou pe fer resers e ou vwar konbyen pei ki swadizan pli avanse ki nou, ki pe fer fas avek bann sityasyon tre, tre konplike an se ki konsern zot sistenm ledikasyon.  Bann sityasyon ki nou Sesel nou’n nobou surmount, ki nou’n nobou over come akoz zisteman nou annan en Gouvernman ki krwar dan stabilite, ki krwar dan krwasans e devlopman ekonomik e ki servi sa retonbe from sa devlopman ekonomik pou li envestir dan son pep.

Mr Deputy Speaker, mon pou servi detrwa legzanp.  Par egzanp Nigeria, lezot pei kot i annan bokou resours, i annan delwil, i annan dyanman, bokou lezot pei Lafrik.  Nou vwar poudir sa bann menm retonbe pa arive e ki arive, nou vwar poudir laba zonm pa o sant devlopman.  Alors kestyon fondamantal ki nou bezwen demann ek lepep Seselwa se ki kwa ki nou oule?  Eski nou oule enstabilite, nou oule en krwasans ki kontinyen arive.  Eski nou oule en sistenm ki kontinyen provide loportinite pour nou.  This is what we need to be striving for.  E se sa mon krwar ki en Gouvernman Lepep in donnen.  Malgre i pou annan defayans dan tou sistenm ki annan, ki bezwen ganny aziste, a-man-de, aranze, the fact remains ki the amount of goods ki sa pei in resevwar atraver en sistenm kree par, komanse par en Gouvernman SPUP, kontinyen par en Gouvernman SPPF e konsolide par en Gouvernman Lepep.  E sa mon krwar i en ledikasyon dan li menm ki nou bezwen donn nou pep e asire ki nou zanfan demen i konpran.

Mr Deputy Speaker, mon krwar mon’n koz ase, mon a donn lezot entervenan loportinite pou entervenir lo sa Mosyon.  E mon oule dir ki mon pou donn mon sipor sa Mosyon.  Mersi Mr Deputy Speaker.

MR DEPUTY SPEAKER

Onorab Volcere.

HON MARC VOLCERE

Mersi Mr Deputy Speaker.  Mr Deputy Speaker, sa Mosyon ki devan nou Lasanble ozordi anmennen par Onorab Rose, i fer mwan fer bokou refleksyon.

Refleksyon lo kote nou sorti koman en Nasyon, kote nou’n arive ozordi e kote nou anvi ale.  Sa bann refleksyon in enportan pou mwan koman sa dimoun ki ganny elekte pou reprezant en distrik dan sa Lasanble.  Mon analiz in fer mon vwar bokou keksoz.  Bann diferan traze oubyen letap ki nou sosyete in pas ladan, pou nou kapab ariv kot nou’n arive ozordi.

Mr Deputy Speaker, tou sa ki nou’n arive akonplir dan sa pei e sa i osi konpri Praslin, i pa’n ariv zis koumsa parey bokou i le fer nou krwar.  Tou sa progre ki nou’n kapab temwannyen ozordi in arive gras a vizyon e determinasyon nou bann dirizan.  Nou bann Dirizan ki ti annan en vizyon kler e konnen ki zot ti oule pou sa pep.  E tout o-l-on zot in travay kot a kot avek sa pep Seselwa.

Mr Deputy Speaker, laprev i la devan nou.  Sa ki vreman enportan pou mwan se ki dan vizyon ki nou Dirizan ti annan pou sa pep ek sa pei, personn pa’n ganny kit deryer.

Tou nou dimoun in ganny pran an konsiderasyon e ansanm nou’n fransir sa bann letap.  Ozordi ler mon get Praslin, i kler ki nou pa’n ganny kit deryer, i nepli sa lepok kot apre nou a get zot.  Ozordi nou ganny gete ansanm avek tou nou zabitan koman en sel fanmir.  Ozordi zabitan Praslin i osi benefisye e ganny menm loportinite pou li osi kapab avanse, anmenn son kontribisyon dan devlopman nou zil ek nou pei ki apel Sesel an zeneral.

Mr Deputy Speaker, met zonm o sant nou devlopman i sa prensip ki sa Gouvernman in toultan met lanfaz lo la e sa in byen ganny resevwar e aksepte par mazorite nou pep.

Sa prensip i pa nouvo pou nou.  Depi son kreasyon Parti SPUP, Parti SPPF e ozordi Parti Lepep, pe kontinyelman koz lo la.  Nou rikord i kler lo sa size.  Nou Parti in koz lo la akoz nou krwar dan devlopman e lepanouisman nou dimoun.  Nou konsyan ki zonm i devret debout devan e reste for e fikse lo sa ki i pe fer, lo sa ki i krwar e lo sa ki i anvi fer dan lavenir.

Sa Gouvernman i krwar ki lepep Seselwa i devret kontinyen ganny tou loportinite e pa devret annan okenn baryer ki devret anpes li avanse.

Mr Deputy Speaker, si mon pou pran Praslin ek Pralinwa lo sa size met zonm o sant devlopman, kestyon mon ti a kontan demande.  Eski nou annan en zil ki konparab ozordi?  Eski nou kapab konpar Praslin sa ki i ete ozordi avek sa ki i ti ete detrwa lannen pase?

Wi Mr Deputy Speaker.  San leksepsyon, sa i kapab ganny fer.  Ozordi Praslin i ganny rekonnet pou kontribisyon ki i pe anmennen dan lekonomi Sesel.  Praslin in vreman devlope e in vin koman en must visit place pou nou bann viziter e osi pou nou bann frer ek ser Seselwa.  Mazorite viziter ki vin Sesel i oule pas enn de zour lo nou zil.

Nou bann frer ek ser sorti Mahe ki vin vizit Praslin i soke pou vwar devlopman ki’n arive lo nou zil.  Ozordi nou annan kapasite e konesans pou nou akey nenport ki kalite viziter.  Nou Lendistri Touris in vreman devlope.

Pralinwa in sezi bann loportinite ki’n vin a zot dispozisyon, pou zot travay avek san ses pou devlop zot zil.  Pralinwa in debout for a kote sa Gouvernman, pou asire ki nou pa ganny kit deryer.  E ozordi avek fyerte, mon kapab dir ki nou pa’n ganny kit deryer.  Pralinwa in achieve bokou.  Nou zil i ranpli avek tou sort kalite devlopman.  Kalite lavi nou dimoun in amelyore e nou’n vwar en transformasyon dan lafason ki keksoz i ganny fer.

Mr Deputy Speaker, i annan en kantite legzanp ki mon kapab koz lo la.  Ozordi i annan plizyer servis.  Bann servis ki Gouvernman ti pe ofer zis lo Mahe, ki’n ariv  lo nou zil.  Gouvernman in konsyan pour ki nou kapab kontinyen devlope e progrese.  Sa bann servis i bezwen ariv pli pros ek nou.  Bann legzanp, bann servis sofer par sa bann diferan Lotorite, par egzanp Licensing, Departman Imigrasyon, HFC, PMC, Welfare Agency.  Byento nou pou vwar louvertir en nouvo Stasyon Tenny Dife.  Bann dimoun ki pe aprann dray par egzanp, ozordi pa bezwen deplase pou desann Mahe pou zot kapab pas zot tes.  Tousala Mr Deputy Speaker, i bann servis ki nou Gouvernman in anmenn a nou laporte pou kapab ed nou kontinyen devlope.

Ansanm, avek Sekter Prive, nou’n vwar ki nou bann mwayen transpor in amelyore dan tou son laspe.  Depi transpor lo later, dan lezer e osi lo lanmer.  Ki fer li pli fasil e pli konfortab pou nou dimoun vwayaze.  Ozordi nou nepli vwar payot lo nou zil, me nou pe plito vwar bann zoli proze lakaz, bann flat ki sa Gouvernman pe kontinyen envestir ladan.  Pou kapab kontinyen met ‘Zonm o sant devlopman’ e pou donn plis loportinite nou bann biznes, nou’n vwar nou Gouvernman envestir dan proze konblaz.  Se la kot nou’n vwar kreasyon Zil Eve, sa zil konble ki ozordi in komans ed nou bann biznesmenn lo Praslin, ganny akse avek en morso later pou kapab devlop zot biznes.  Devlop sa lespri ki zot annan pou kapab anmenn larises pou zot fanmir, pou zot zil e pou pei an zeneral.

Mr Deputy Speaker, lo kote lasante nou’n osi vwar plizyer diferan servis ki pa ti ganny ofer lo nou zil.  Ozordi sa i a nou dispozisyon e nou pep pe benefisye.  Pou donn enn de legzanp ankor.  0zordi nou annan bann spesyalis ki desann de tanzantan pou vin get pli pre problenm ek bezwen lasante nou bann dimoun.  Bann pasyan ki pe swiv tretman dyaliz, pa bezwen fer sa traze monte, desann Mahe pou zot kapab ganny zot tretman.  Nou osi annan nou prop masin x-ray ki ede pou redwir lakantite dimoun ki ti bezwen desann Mahe pour en tel servis.

Mr Deputy Speaker, nou bezwen en pep an bonn sante pou nou kapab kontinyen vwar devlopman e kot sak zonm, fanm ek zanfan a kapab benefisye.  Alor mon remersye Gouvernman pou sa bann servis lasante ki in anmenn lo Praslin e mon ti a kontan demande ki zefor i kontinyen ganny fer pou plis servis kontinyen ariv devan nou laport.

Mr Deputy Speaker, Praslin i kontinyen temwanny sikse son bann zenn dan diferan domenn sport.  Nou bann sportmen pe vreman fer nou fyer.  Zot pe kontinnyen frot zepol ek bann zenn lo Mahe, me osi byen ki lo lasenn enternasyonal.  E la mon mazin nou zenn atlet Norris Brioche e san dout Lisa Labiche, ki’n vreman fer nou fyer.  Nou bann lekip Foutbol, Volleyball, Basketball, Judo, Bokse, pa per pou desann Mahe pou vin afront bann lekip lo Mahe.  Me ler zot desann Praslin, nou dir zot fer atansyon.  Nou pare pou defann nou zil.

Mr Deputy Speaker, tou sa bann sikse e progre dan sport in vin akoz sa Gouvernman in krwar dan nou zenn e i pa’n per pou envestir dan bann lenfrastriktir pou ed zot devlope.

Tou dernyerman Gouvernman in envestir dan nouvo Stad avek en Swimming Pool.  Sa Gouvernman, sa Parti in toultan krwar dan son lazenes e in toultan fer sa ki i kapab pou asire ki zot kontinyen progrese e epanouir dan lavi.

Mr Deputy Speaker, i annan en kantite legzanp ki mon kapab donnen pou montre kote nou sorti e kote nou’n arive ozordi, pou nou kapab vwar lekel ki’n vreman sanpyon sa prensip ‘Zonm o sant devlopman.’  Me letan pa pou permet mwan.

Mr Deputy Speaker, me sa ki enportan, nou rikord i la, laprev i la e personn pa pou kapab deny sa.  Sel group ki kapab dir lotreman se sa bann, menm si zot in ganny konseye par Okilis pou met linet pou zot kapab vwar pli byen, zot met zot linet me zot ferm zot lizye ler zot gete.

Mr Deputy Speaker, mon lapel pou tou zabitan Praslin, pou lazenes Pralinwa, pou nou bann dimoun aze, si nou oule kontinyen tenir sa prensip ki for e nou oule kontinyen vwar progre kot nou pei i kontinyen devlope, ou sipor i bezwen al pour sa Parti ki’n prouv son lekor e travay pour sa pep.  E sa i p a lot ki Parti Lepep.  Wi, nou pa ankor fini arive fer tou.  Nou konnen e konsyan ki i annan bokou pou nou fer, me nou pou selman kapab fer li ansanm avek Parti Lepep.  Alor, mon kont lo zot sipor.

Avek sa detrwa mo Mr Deputy Speaker, mon pou san dout donn sipor sa Mosyon, pou asire ki nou pep i reste o sant nou devlopman.

Mr Deputy Speaker, mon remersye ou.

MR DEPUTY SPEAKER

Onorab Bresson.

HON GALEN BRESSON

Mersi Mr Deputy Speaker.  Bonn apre midi tou dimoun e koleg dan Lasanble.

Mr Deputy Speaker, ozordi se Parti Lepep ki o pouvwar dan nou pei.  Ler en Parti i vin o pouvwar dan nenport ki pei, i ganny dirize par lobzektif, par bann Polisi ki sa Parti in met devan, i kanpanny lo la e i vin o pouvwar.  Tel parey ce matin ler loter Mosyon, Leader Zafer Gouvernman in dir ki ozordi Polisi sa Gouvernman, Lakaz, Ledikasyon, se sa Parti.  Wi, i dan Polisi sa Parti ki ozordi Seselwa, en Seselwa, zonm, fanm i kapab benefisye avek ledikasyon pou naryen.  I kapab al nenport ki zistans i reve vini, tel parey ce matin bann statistik tre kler ki Dokter Payet in met devan, konbyen i kout Gouvernman pou fer training en Dokter.  Me tou retonbe i komans lo Polisi sa Parti.

Ozordi Mr Deputy Speaker, Polisi Parti ki gid bokou Polisi dan Gouvernman Sesel, in fer bokou e in met bokou a dispozisyon nou pep Seselwa.  En tel, se devlopman dan Sekter Teknolozi.  Ozordi lemonn antye i dir ou san teknolozi i en laspe enportan pour inovasyon.  Akoz inovasyon par nenport ki sitwayen en pei, i vedir en retonbe ekonomik pou sa pei kot sa sitwayen ki’n fer sa inovasyon i ganny son lavi e son byennet tax, i vin kot Gouvernman sa pei.  Egalman, Sesel in met tou bann lenfrastriktir baze lo Polisi en parti.  E les mwan demontre sa Mr Deputy Speaker.

Ozordi dan nou pei, tre resaman, en Lakonpannyen Telefonn in lans en peyman an ser-van teknolozi telefonik, kot si ozordi mon anvi mwan Onorab Bresson, mon anvi transfer en larzan lo telefonn en lot dimoun pou fer en peyman dan en laboutik, mon transfer par telefonn sa larzan e sa dimoun laba kot sa laboutik i transfer sa sale ki i fer kot sa laboutik.  Tousala, an ser-van platform teknolozi.

Me kwa ki’n kapab fer ki sa lenfrastriktir koumsa in kapab ariv Sesel ozordi?  Kwa ki’n les sa arive, ki ozordi en kantite dimoun i al lo Face Book.  Dimoun i mars ek bann mobil.  Statistik i montre ki dan sak, sak Seselwa, par 2 telefonn ozordi.  Sak lakaz 3 televizyon ozordi.  Me kwa ki fer tousala?  E la Mr Deputy Speaker, nou retourn ankor lo sa bann laspe teknolozi.

Ozordi, dan teknolozi Sesel, avek tou sa bann statistik ki mon pe dir, annou retourn en pe an aryer.  An 95 ler internet i ganny entrodwir Sesel.  Sa letan pou bann ki mazinen, ou ti bezwen annan en laliny telefonn kot ou, en fix line.  Kot laba zot met sa ki nou apel en modem avek e si ou annan en konpiter, selman si ou annan en konpiter, ou kapab konekte avek.  Ou konpiter i dial, ou tann li kot i dial, i konekte avek sa laliny enternet e la ou al lo internet ou browse. Teknolozi ti ase kou-tan, 95 e sa letan, Polisi Gouvernman ti annan zis en Lakonpannyen enternet ki ti egziste Sesel.  E Polisi Gouvernman sa letan, i dir ki si ou en provider enternet, ou pa kapab provide telefonn ouswa okenn lot servis.  Sa ti Polisi Gouvernman an 95.  Enternet ti ankor ase nouvo osi pou lemonn.  O fiy e anmezir ki devlopman sosyo ekonomik Sesel, lekonomi Sesel i sanze, nou pep i devlope dan ledikasyon, teknolozi i devlope.  Polisi, dinamik ki egziste dan nou Parti ki o pouvwar, i sanz Polisi Gouvernman, i donn sa bataz dan Polisi Gouvernman, ki li i adapte ek letan.  95 nou fer en modem ek en Lakonpannyen enternet. An 2000 dezyenm Lakonpannyen enternet i ouver e li i anmenn en lot teknolozi ki apel wireless, ki ou pa bezwen telefonn dan lakaz pou ou konekte avek.  Ki son speed enternet i vin pli vit.  Finalman, Polisi i sanze apepre 5an apre 2000, 2005, 2006 an montan, kot bann Lakonpannyen Telefonn prezan i kapab vann enternet.  E ki nou’n vwar ozordi?  Lakonpannyen telefonn i vann enternet, i vann telefonn, i vann menm Lasenn Televizyon.

Mr Deputy Speaker.  Gouvernman Parti Lepep i o pouvwar.  Son Polisi i ‘Zonm o sant son devlopman.’  I sanz Polisi avek Polisi ki ganny devlope dan teknolozi lemonn antye e nou vwar ki Sesel ozordi, dimoun i konekte smart phones, ipad.  Koze, tou sa ki nou annan dan teknolozi nou pe kapab konekte e nou kapab fer call, regard televizyon ek en Lakonpannyen, kot avan nou ti pe al plizyer landrwa.  Nou kapab pey tou.

Me oli vreman problenm dan sa?  Oli?  Kot ozordi nou’n vwar en Gouvernman ki reste azour, ki asire ki son Polisi de baz i la e i shift ek letan.  I montre ki i dinamik, i sanze, i adapte, tou an pre-n-an an kont son pep, zonm o sant sa devlopman son pei.

Mr Deputy Speaker, mon’n servi teknolozi pou ilistre ki zonm, sa Gouvernman i met son dimoun devan, i mazinen ki mannyer pou asire ki nou pep nou menm, nou reste azour ek teknolozi.  Nou pa parey lemonn antye kot bokou fwa la bann keksoz i ase pli bon marse ki nou.  Me Gouvernman son Polisi i fer bokou.  Youth Laptop Scheme.  Polisi i la.  Zero poursan tax lo bann goods, electronic goods.  Tousala i bann Polisi ki kontinyelman ede ki teknolozi i reste a laporte.

E pa tro lontan, Prezidan Michel i anons Minister Lenvestisman, Entrepreneurship, Development and Business Inovation, ki vedir i kit nou azour menm avek tou sa inovasyon teknolozi ki pase.

Mr Deputy Speaker, mon kontribisyon cet apre midi, ‘Zonm o sant devlopman,’ dan teknolozi i montre ki Parti pandan tou sa letan, in asire ki zon pep i reste azour, i reste konekte e i get le fitir tre, tre briyan.

Avek sa mon remersi ou Mr Deputy Speaker e mon donn mon sipor pour sa Mosyon.  Mersi.

MR DEPUTY SPEAKER

Onorab Ghislain.

HON CHANTAL GHISLAIN

Mersi Mr Deputy.  ‘It is not a small challeng.  Small is beautiful, yes.  But at the same time it has many challenges.  I think it is the political will and the emphasis that you put to ensure that you give what is necessary and what is needed to your people which now in turn make it possible.’  Parol Prezidan Michel avek lemonn.

Mr Deputy Speaker, apre ki tou sanson pou’n fini sante, tou diskour pou’n fini lir, mwan, ou, li, zot ek nou tou pou’n kit sa monn.  En sel keksoz pou reste.  Sa se berso nou nesans.  Later ki nou zanset ti kit ek nou.  Sesel.  Sa Sesel kot nou koman Kreol, ki dir e ki deside ki pou fer.  Byen lo komansman depi Lendepandans, Sesel in touzour met son pep lo sant son devlopman.  Laprev i la devan nou.  Pe enport ou ras, ou kouler lapo, ou sinyatir i annan dimoun byen edike ziska menm avek degre Doktora, Masters. Byen eksperyanse e annan talan dan en kantite domenn.  Tou dilon nou devlopman, nou Gouvernman in touzour krwar dan nou dimoun.  Ozordi tou nou zanfan i dan lekol.  9an ledikasyon obligatwar.  I pou fer sir personn pa ganny kit deryer.

Ozordi en zenn fiy ki’n trouv li ansent lo ban lekol, zot touzour kapab retournen pou kontiny son letid apre nesans son zanfan.  Donk kote i fermal e oli problenm si en ansyen Ansenyan Lakres i monte e vin Sekreter Zeneral dan Biro Prezidan.  Tou dimoun i lib pou sanz lanplwa.  Tou dimoun i annan menm sans pou kontiny son letid pli avanse dan nenport ki domenn, pou li kapab ganny promosyon.  Se sa ki nou dir ler Sesel i met son pep o sant son devlopman.

Mr Deputy Speaker, si i annan en keksoz ki ler lemonn i bezwen fer pour nou pei se respekte dignite nou Seselwa koman en Nasyon.  Respe nou langaz, respe nou abilite pou melanze pe enport nou kouler lapo, nou krwayans politik e relizye.  E ou ki anvi vin en Seselwa, ou bezwen merit Sesel.  Ou bezwen konpran e apresye Sesel.  Konpran e apre ek son Konstitisyon, son dimoun, son listwar, son kiltir, son aspirasyon ek son leritaz.  E pli enportan, ou bezwen lwayal e senser avek Sesel.  Respekte nou dignite e respekte nou laliberte koman en Nasyon.

Parey en pti baba, sa Sesel in bers ou, nouri ou e donn ou lezel pou anvole.  Pran swen avek li.  In donn ou son pti ledwa pou soulaz ou avek e prezan ou oule lanmen antye.  Si pa donn ou, ou oule kraz sa lanmen ki’n fer ou dibyen.

Mr Deputy Speaker, se sa labote nou idantite koman en Kreol.  Se sa mon labote.  Ki swa an poezi, an san-tan, ouswa an vers, nou annan dekwa pou nou dir ou ozordi.  Kan i arive, nou Sesel nou vant, e vant nou zanfan, Seselwa pou lager avek tou lafors.  An kor e an am, pou defann nou patri.  Pa ti en fars kan le 29 Zen 1976, sa zonm saz, per fondater nou pei, fondater nou Parti Mr France Albert Rene ti lager, fer lamars pour Lendepandans ek son pep, Lamars Travayer, Lamars Diri, Lamars pou tou Seselwa Vote e tou lezot Lamars dan listwar pou donn nou, nou dignite koman en pep.

Pa ti en fars kan sa menm zonm asize lo sa tron ko-ko La Digue, ti fer en plan pou desid lavenir sa pep.  Pa ti en fars ler i ti fer lamars pou liber nou pei ek son pep dan lamizer nwanr.  E pa ti en fars sirman, ler i ti deside ki sa pep pa pou viv parey bef dan disab kot sakenn pou bezwen vey son lizye.  E finalman pa ti en fars ler nou Parti SPUP, SPPF e ozordi Parti Lepep ti swazir en sistenm ki garanti en o degre byennet e konfor son bann zanfan e dimoun aze, ensi ki bann ki vreman dan bezwen, konpare avek en sistenm ki les sakenn de nou debrouy li ki mannyer i kapab.

Wi, 38an nou’n la.  38an akoz sa pep, dan tou son mazorite ki’n desid koumsa.  Me annou aret manti avek nou lekor, ki 38an sa pei ek son pep pa’n bouze.  Konbyen nou ki esey asize e esey fer sa refleksyon lo kote nou ti pou ete koman en endividi, si nou pa tin deside pran nou desten dan nou lanmen.  Kan ki nou pou azir fran e dir mersi Sesel pour son lakonplisman.  Konbyen nou ki’n esey fer sa refleksyon lo lefe ki nou viv dan en pei kot kouler ou lapo ouswa ou sinyatir pa deside si ou pou vin Minis, Anbasader, en Onorab dan sa Lasanble Nasyonal, si ou pou al Liniversite ouswa non.  Kot ou lib pou koze, lib pou swazir ki Larelizyon ou Parti Politik ou ladan.

En pei kot nepli annan class. Kot si ou pli vilnerab ki lezot ou pa ganny akse avek ledikasyon, lasante ouswa menm pou ganny akse avek bis piblik parey dan bokou lezot pei.  Kan ki nou pou azir fran avek nou lekor e dir mersi Sesel ki pandan 38an, ou zanfan in al dan menm Lekol, menm Sant Lasante ki mon zanfan ek son zanfan.

Mr Deputy Speaker, kan ki nou pou azir fran ek nou lekor e dir mersi Sesel ki tou sa in posib akoz sa Gouvernman in fer sir ki in met son pep o sant son devlopman?

Mr Deputy Speaker, Sesel in ganny beni avek en lanvironnman natirel, eksepsyonnel e en listwar konservasyon ris.  E sa in fer ki ozordi nou pep pe zwir en o standar lavi e byennet sosyal e ekonomik.  Malgre problenm tel ki presyon lo litilizasyon later pour konstriksyon, polisyon e sanzman klima an rezilta devlopman imen, nou bann Polisi konservasyon in fer ki Sesel i annan li 2 sit leritaz mondyal, anviron 50 poursan later ki proteze anba Park Nasyonal teres e ankor en douzenn Park Maren.

Mersi nou bann Dirizan pou kontinyen sanpyonn lanvironnman Sesel dan tou Forum enternasyonal ki zot ale e pou fer sir ki nou zanfan e aryer pti zanfan i kontinyen kapab al La Digue e regard Vev vivan e non pa dan en Mize Listwar.  Kapab al Aldabra e menm pli pros, Curieuse pou vwar torti zean vivan.  Mont Mont Sebert, Morne Seychellois, Silhoutte, Copolia e bokou lezot landrwa rezerv pou vwar nou bann plant andemik vivan, tel ki Fler Payanke, Fler Potao e lezot.  Al dan Vale De Mai lo Praslin pou vwar nou Coco de Mer vivan.  Al dan Park Maren Ste Anne pou vwar nou bann zannimo maren vivan.  Al dan Park Maren Cap Ternay e Port Launay pou kontinyen admir sa lanvironnman maren vivan.  Mont Ni………… pou vwar bann dernyen koloni nik Irondel.  E finalman, mont Port Launay pou vwar sa dernyen koloni nik Sousouri Bannann vivan Sesel.

Mr Deputy Speaker, 38an nou’n la i vedir 38an devlopman.  Mon pou fer referans sa mesaz enn nou dirizan ozordi, sa i Vis Prezidan Faure.  ‘Mon frer e ser pep Seselwa.’  I ti dir.  ‘Lekel sa Seselwa ozordi ki’n travay, kas lateras, defrise, met lakaz debout, trimouse pour son fanmir e pou les en boug ki li in misouk dan feyaz tou son lavi, regard ou an mouvman e ler tou in bon, i antre lo ou later ou les li.  Antre dan ou lavarang san dir bonzour, asiz dan ou sez.  Ou les li.  Antre dan ou salon, ou les li menm. Dekouver ou kastrol, pran ou manze, ou les li menm.  Vant byen plen, antre dan ou lasanm.  Ou les li menm.  Dormi lo ou lili, ou les li menm.  E finalman pran ou madanm, ou fridge, ou cooker, ou set sofa, ou lili met dan pick up e ale.  Ou pou les li menm?

Pandan 38an swazir boycott tou keksoz.  Shoot down tou sa ki otour ou.  Kontinyen ranpli ou pos lo depan lasyer lezot Seselwa.  Deside pandan 4an reste dan bwa e koman ou santi loder Eleksyon e loder larzan, ou desann byen vantar pou vin claim sa ki dapre ou, i ti pou ou.  An batan latet sa pti gin Seselwa ki pandan 4an, pou li tou pa ti bon.

Mr Deputy Speaker, 38an devlopman nou pei e ozordi lekel ki zot oule bat latet pou fer krwar ki nou pa lib dan sa pei?  Dir nou pep ki kalite laliberte ki vreman ou anvi.

Mr Deputy Speaker, mon sit parol en zonm saz, pou mwan kapab termin mon lentervansyon lo sa Mosyon.  Sa parol i par Mahatma Gandhi e i dir.  ‘The world have enough for everyone’s need, but not enough for everyone’s greed.’

Mon pou esey tradwir sa dan konteks Sesel, mon pei.  Sesel ozordi i annan dekwa pou bezwen tou son pep, me i pa ase pou vorasite tou dimoun.  Tan ki i annan en pti group dimoun ki annan azanda personnel olye azanda fer Sesel fleri.  Tan ki i annan ki travay zis pou son pos olye pou Sesel.  Vorasite, laenn, egois e mansonz pou touzour sinonim a zot non ek zot lentansyon.  Sesel anba direksyon SPUP, SPPF, Parti Lepep, pa’n anmenn en lalit devlopman pou satisfer vorasite en pti group dimoun e pa pou selman en pti group dan sant nou devlopman.  Me en lalit pour ki tou dimoun san leksepsyon i vwar son plas o sant sa devlopman, pou li kapab viv dan dinyite e fyer pou être en Seselwa.

Mersi.

MR DEPUTY SPEAKER

Onorab Jeovana Charles.

HON JEOVANA CHARLES

Bonn apre midi Mr Deputy Speaker.  Bonn apre midi tou Manm Onorab.

Mr Deputy Speaker, i fer mwan en gran plezir pou retrouv zot tou byen an form, pare pou kontinyen sa larout ki ti ganny trase par nou bann gran paran e vizyoner Mr France Albert Rene, an 1964 atraver parti SPUP.  An 1978, SPPF ti ne pou vin en Parti pour tou Seselwa, akoz SPUP ti’n fini zwe son rol.  Nou ti’n ganny nou Lendepandans.  En keksoz ki zot pa devret zanmen bliye ki SPUP ki ti demann Lendepandans Sesel.

Rezon det SPPF sete pou kree en Parti pour ki tou Seselwa i kapab santi zot form par ladan.  Avek sa sanzman non, tou bann Polisi ti sanze.  Later, lakaz, ledikasyon, lasante, devlopman kominoter e renouvelman nou valer kiltirel osi ti sanze.

Mr Deputy Speaker, pandan sa lepok, Sesel ek Seselwa ti pas atraver en faz renouvelman kot Seselwa ti retrouv son lidantite, son lafyerte ek son dinyite.

Mr Deputy, zonm ti’n vin plase o sant devlopman, en Seselwa diny e fyer ti ne.  Bravo tou bann ki’n anmenn sa lalit.

Mr Deputy, ozordi nou pe pran en nouvo direksyon.  Nou pe tras en nouvo larout.  Nou’n fer li tout an gar-dan nou bann valer pli senser e krwayans fondamantal de baz.  Koman en pep, nou pare pou pey nenport pri, anmenn pli gro fardo, fer fas avek nenport ki difikilte, dan en fason pou asir nou sirvi, nou sikse e nou laliberte.

Mr Deputy e Mosyon devan nou ozordi, set egzakteman sa ki i pe dir.  Ki nou siport demars ki nou Gouvernman e sa se Parti Lepep, pou fer sir ki nou kontinyen trouv fason inovativ pou mentenir nou Polisi ‘Zonm o sant devlopman.’

Mr Deputy, mon komans mon lentervansyon koumsa akoz mon konnen ki mon bezwen pe kontinyelman pe repete ki’n arive dan sa pei, kote nou ti ete, kote nou ete ozordi e kote nou pe ale demen.

Mr Deputy, prezan permet mwan koz lo madanm o sant devlopman.

Mr Deputy, nou Gouvernman, Gouvernman Parti Lepep i kontinyen reste angaze a legar bann madanm o sant devlopman.

Mr Deputy, enn bann priyorite Gouvernman Lepep se reste committed pou ogmant konpetans e skills tou bann madanm.  Gouvernman Parti Lepep pe toultan empower bann madanm pou kapab fer fas avek bann defi devan zot e zwenn lekspektasyon zot landrwa travay, zot biznes oubyen zot lakour.

Gouvernman Parti Lepep pe kontinyen envestir bokou dan training e re-training bann travayer, ki enkli bann madanm osi.

Mr Deputy Speaker, mwan mon enn bann madanm ki’n benefisye atraver Polisi Gouvernman Parti Lepep, ki’n met ‘Zonm o sant devlopman’ e mon fyer mon lakonplisman.  Ki ozordi mon en Manm Parlman Pan-Afriken e mon asiz lo Komite gender, family, youth and people with disability.  E plezir pou mwan ler mon fer prezantasyon lo lakonplisman bann madanm Seselwa dan diferan pozisyon.

Mr Deputy Speaker, Sesel i annan en bann madanm dinamik e for dan diferan pozisyon, ki pe fer byen.  Ozordi tou bann Lorganizasyon Enternasyonal pe demande ki bann fanm i ganny plase o sant devlopman e ki nou Sesel lontan nou pe fer li.

Mr Deputy Speaker, ozordi Sekreter Prensipal, madanm.  CEO, madanm.  Direkter Zeneral, madanm menm.  Administrater Distrik, madanm.  Manm Parlman, get zot, vire ou a trouve en ponnyen zot.  Mazistra, madanm menm.  Anbasader nou annan.  Madanm dan Sesel pe osi okip bann pozisyon tre enportan.

Get la devan nou, nou vwar nou Leader of Gouvernement Business, madanm menm.  Gouvernman Labank Santral, madanm.  Serten Sekreter Zeneral, Sekreter Zeneral dan Biro Prezidan, en madanm menm.  Mayor Victoria, en madanm menm.  Mr Deputy Speaker, bann madanm Sesel in fer en kantite.

Me Mr Deputy Speaker, i pa vedir ki napa ankor pou nou fer pour bann madanm, pou zot pran konsyans bann defi ki anpes zot realiz zot potansyel e anpes zot pran loportinite.

Mr Deputy Speaker, gras a nou Polisi ‘Zonm o sant devlopman,’ dan tou distrik nou trouv en klib Trwazyenm Az e sa bann dimoun zot vreman aktiv.  Zot toultan on the move.  Me regard byen konbyen bann msye ki partisipe, ou trouv mazorite se bann madanm ki partisip dan bann aktivite.  San sa Polisi ki sa bann Trwazyenm Az in pas atraver, dir mwan ki mannyer zot ti pou ete ozordi?  Ki zot ti pou pe fer?  Kontinyen mandyan parey ti ete dan lepok nou bann gran paran?

Mr Deputy Speaker, i enportan alor ki zenes i konpran ki dan letan mon gran paran, ti napa Pansyon Sekirite Sosyal e nou bann vye ti bezwen travay ziska zot ti nepli kapab.  Kourbe anba en bal ko-ko oubyen anba en bal kannel, dan sa larivyer ek en karo apre midi.  En zournen antye, pou kapab ganny lavi.

Mr Deputy Speaker, mon anvi dir sa bann Trwazyenm Az ozordi.  Zot konnen kote zot sorti.  Zot konnen kote zot ete ozordi, me zot pa konnen kote zot pe ale demen.  I neseser alor ki ler zot aret les dimoun konfiz zot.

Mr Deputy Speaker, ozordi bokou nou bann madanm Seselwa pe kontinyen pran bann loportinite ki a zot dispozisyon pou zot kontinyen fer byen dan lavi.  An menm tan ki zot onor osi komikman zot fanmir.

Mr Deputy Speaker, la i moman pou nou konsantre lo sa ki ini nou e non pa pou op-sed avek sa ki pe esey diviz nou.  Divizyon pa pou anmenn nou an avan, me plito 38an an aryer.

Letan ki mon pe ekout bann lentervansyon nouvo Parti Politik, mon realiz ki annan serten ki ankor obsede e ki pa kapab larg lepase.  Letan nou pep pe rod en meyer demen, zot, zot oule diriz nou dimoun ver direksyon yer.

Mr Deputy Speaker, si yer nou ti divize, si diran bann lannen pase nou demokrasi nou ti pe san marye, sa ti yer.  Ozordi i pa pardonab pou nou kontinyen lo sa menm ton.  Nou dimoun pa pou aksepte ki son Dirizan i anmenn zot an aryer e pa azir dan en fason kretyen.

An konklizyon Mr Deputy Speaker e an sipor-tan sa Mosyon mon anvi dir sa.  Si nou anvi ki Gouvernman Parti Lepep i kontinyen trouv fason inovativ pou mentenir nou Polisi ‘Zonm o sant devlopman,’ nou bann fanm Seselwa, nou kapab transform sa pei.  Nou kapab transform nou fanmir.  Annou aret siport bann Parti Politik ki pa siport nou, ki pa siport nou zanfan, ki pa siport bann madanm.  Ki pa konnen ki mannyer nou ti viv dan Sesel yer.

Mr Deputy Speaker, annou les zot kontinyen fer meeting, akoz ozordi, meeting in vin en biznes.  Annou les zot deside si zot pou al-y-anse ou nou akoz sa osi in vin en biznes.  Mwan avek zabitan Roche Caiman, mon garanti lwayote e senserite Gouvernman Prezidan Michel.  Ansanm napa okenn keksoz ki nou pa pou kapab fer.  E nou fanm Seselwa, nou dir Bondye beni nou Sesel ki nou kontan e pa les naryen bar nou.

Mon swet tou sa gran fanmir Lepep Bonn Fet senkantyenm laniverser nou Parti.

Mersi Mr Deputy.

MR DEPUTY SPEAKER

Onorab Pierre.

HON DAVID PIERRE

Mersi Mr Deputy Speaker.  Mr Deputy Speaker, resours pli enportan en pei se son pep.  E en pei pa pou zanmen kapab ariv lo son potansyel, si son pep pa ganny loportinite pou zot endividyelman kapab meet zot potansyel.  Ler ou get Sesel ozordi e si ou fer en sondaz, ou pou kontinyen tande ki bokou dimoun, bokou Seselwa, nou frer, nou ser zot ava dir ou poudir i annan zot ki ankor pe kontinyen ganny marzinalize.  I annan zot ki pou dir ou zot ankor pe kontinyen ganny viktimize.  I annan zot ki ava dir ou poudir zot pe kontinyen ganny discriminated against.  Ki zot Drwa pa pe ganny respekte eksetera.

Mr Deputy, sa bann kondisyon parey pa kapab bann kondisyon anba en swadizan filozofi lepep o sant devlopman.  Ler ou koz lo met ‘Zonm o sant devlopman,’ i devret annan levidans kler ki ou krwar ladan.  I devret annan volonte politik pou aret sa bann kalite pratik ki mon’n fek koz lo la.  I devret annan volonte politik pou fer sir ki nou viv sa kalite realite ki demontre klerman ki wi, nou pe viv en realite kot zonm i o sant devlopman.  E pli enportan ankor, ou devret met li an pratik pour tou dimoun.  I pa devret a selected few.

Mr Deputy, enn bann pli gran size politik Sesel ozordi i sa size respe pou bann Drwa ki nou Konstitisyon i donn nou.  Konstitisyon Sesel i donn Seselwa bann Drwa.  Drwa lakaz, Drwa akse avek ledikasyon.  E la mon anvi krwar ki se kalite ledikasyon ki nou pe koz lo la.  Drwa akse avek lasante e ankor, la mon anvi krwar se kalite lasante ki nou pe koz lo la.  Drwa pou en endividi swazir.  Swazir kalite Parti Politik ki i oule swiv, swazir kalite Larelizyon ki i oule swiv, eksetera.

Nou Konstitisyon i osi donn nou drwa akse ek lenformasyon eksetera, eksetera.  Dan en pei demokratik, i pa devret annan personn ki par lao nou Konstitisyon e napa personn ki annan drwa pou pran bann Drwa lezot dimoun ki sa menm Konstitisyon i donn li.  the rule of law i devret aplike pou tou Seselwa.  Me se pourtan, Seselwa i ankor pe koz lo zot bann Drwa ki pe ganny vyole.

Loter Mosyon in koz lo par egzanp Drwa Ledikasyon dan en sistenm kot zonm i ganny mete o sant devlopman.  Me eski Mr Deputy, atraver nou sistenm ledikasyon, nou pe donn tou nou bann zanfan Seselwa sa kalite ledikasyon ki pou ed zot tou zwenn zot potansyel?  Eski i annan sa diversifikasyon dan nou sistenm, ki pou permet tou zanfan Seselwa kapab arive zwenn son potansyel?  Eski nou pe empower nou bann zanfan, nou lazenes, pou zot kapab partisip pli tar dan devlopman ekonomik nou pei, koman dizon en antreprener?  Eski nou pe empower zot pou zot kapab vin owners bann biznes en zour dan nou pei Sesel?

Mr Deputy, ler nou koz met ‘Zonm o sant nou devlopman,’ paralelman avek kalite ledikasyon ki nou annan, nou bezwen fer sir ki nou donn lepep Seselwa sa kalite Curriculum ki pou pran an konsiderasyon sa bann pwen ki mon’n refer sorti.  Ozordi dan nou pei Mr Deputy, mon pa krwar ki nou’n ariv lo sa oter.

Mr Deputy, letan nou koz lo lasante.  Kalite lasante.  Eski vreman ozordi dan sa pei nou’n nobou donn Seselwa sa kalite, sa nivo kalite lasante kot nou kapab dir pou dir wi, sa in vin atraver lefe ki nou’n met ‘Zonm o sant devlopman’ nou sistenm lasante.  Ozordi i en fe e sa in ganny mansyonnen avan mon’n pran laparol par plizyer entervenan, ki nou annan en kantite Seselwa, en kantite profesyonnel Seselwa dan Lasante, ki ozordi in deside al swiv oubyen al practice zot profesyon aletranze.  Nou konnen poudir nou bann Travayer Lasante, nou bann zonm, nou bann fanm, ki sipoze o sant devlopman, zot konnen ozordi poudir zot pa pe ganny sa posibilite pou zot practice an ser-van tou bann zouti, bann teknolozi ki an prensip ti kapab vin a zot laporte.

Mr Deputy, nou konnen poudir zot pa pe kontinyelman ganny sa training, pou fer sir ki sa zonm ek sa fanm i vreman e neseserman o sant devlopman.  Mr Speaker, kalite tretman, kalite kondisyon travay ki nou donn sa bann travayer lasante.  Nou bann Ners, nou bann Dokter, nou bann Cleaner, eski vreman i reflekte en sityasyon kot zonm i vreman ganny mete o sant devlopman?

Mr Deputy, letan nou koz lo lakaz e letan nou koz li dan konteks ‘Zonm o sant devlopman,’ eski vreman ozordi nou annan bann kriter pour en lakaz ki kler?  Bann kriter ki ganny mete a dispozisyon tou Seselwa.  Eski bann Seselwa i vreman bann zonm e fanm Seselwa ki sipoze o sant devlopman?  Eski zot vreman ganny akse avek bann kalite lenformasyon ki zot devret gannyen, an relasyon avek sa size lakaz.

Eski Mr Deputy, nou annan bann kriter ki donn bann real possibility sa bann menm zonm ek fanm ki nou pe dir nou met zot o sant devlopman?

Mr Deputy, lo nivo lenformasyon, eski zonm i o sant devlopman o nivo lenformasyon isi dan Sesel?  Eski vreman nou vwar nou pe annan en SBC ki totalman endepandan e enparsyal ki kapab pas lenformasyon avek sa bann zonm ek fanm ki sipoze o sant devlopman lo sa nivo e sa standar ki lo sa nivo ki pou anmenn sa standar la transparans ki sa bann menm zonm ek fanm pe rode.  Lo sa nivo e sa standar ki pou anmenn sa nivo accountability ki sa bann menm zonm e fanm pe rode.

Mr Deputy, letan nou get dan Public Sector. I annan en entervenan ki’n koze en bon pe letan pase, enn bann premye ki’n pran laparol, ki’n refer sorti sa size striktir saler, sa size striktir pansyon pou nou bann dimoun ki dan Sekter Piblik.  Eski vreman letan nou get sa e nou analiz li nou pe vreman dir poudir nou pe met ‘Zonm o sant devlopman?’

Mr Deputy, letan nou koz lo nivo koripsyon, eski vreman ozordi nou annan bann sistenm an plas?  Eski nou annan bann Lalwa spesifik anti koripsyon?  Eski nou annan Anti-corruption Commission ki pou donn sa bann menm zonm ek fanm konfyans ki wi, nou pe met zot o sant devlopman ?  Eski nou annan sa Anti-corruption Commission avek bann dimoun ki annan o entegrite, ki endepandan an term partisipasyon politik, pou nou dir poudir wi, nou pe met zonm e fanm Seselwa o sant devlopman.

Mr Deputy, letan nou koz about the youth, eski vreman nou pe anglob zot dan devlopman ekonomik nou pei, eski vreman nou pe prepar zot pou zot vin sa bann zonm ek fanm ki pou pran labar demen, ki pou diriz sa kalite revolisyon ekonomik ki Seselwa pe espere.  Oubyen eski pa i korek e i pa vre ki ozordi malerezman nou vwar bokou nou bann zenn zonm ek fanm ki’n tonm dan bann degolas sosyal.  Ki’n tonm dan drog, ki’n tonm dan prostitisyon, ki’n tonm dan vol, krim.  Eski sa i pa en siny ki nou devret revwar, re diriz nou konpa, re evalye sityasyon e pran an konsiderasyon lefe ki nou bezwen revwar lafason ki sa pei pe ganny dirize?

Mr Deputy, letan nou koz lo lasistans Welfare, i korek ki i annan en sistenm Welfare ki an prensip i devret enn ki azir koman sa safety net pour bann dimoun ki santi zot a en vre dezavantaz.  Bann dimoun ki vreman pa kapab cater for son bann needs personnel oubyen pou bann needs zot fanmir.  Bann dimoun ki vreman pa kapab.  Me eski ozordi nou sistenm welfare i vreman cater pou sa.  Oubyen eski nou annan en sistenm welfare ki pa atrap tou bann dimoun ki an prensip zot devret pe atrape.  Eski nou pa i annan en sistenmW ki menm si i la, nou ankor annan dimoun ki pe dir poudir mon dan bezwen me mon pa pe ganny asiste?

Mr Deputy, ozordi Sesel, eski vreman nou’n ariv lo sa oter an term devlopman ekonomik, kot nou pe ganny maksimonm partisipasyon lamas?  Eski loportinite an premye an term devlopman oubyen partisipasyon dan devlopman ekonomik pei i pou Seselwa.  I pou sa zonm e pou sa fanm Seselwa.  Eski nou devlopman ekonomik in reach sa potansyel kot i pe ganny devlope par Seselwa e pour Seselwa e non pa par etranze e pour etranze?

Mr Deputy, nou annan en kantite pou nou revize.  Koman en pei, nou annan en kantite zistans pou nou vreman ale ler nou koz lo nou pe fer dan tou devlopman ki nou pe fer nou pe met zonm ek fanm Seselwa o sant sa bann devlopman.

Ler nou get Mr Deputy, lo nivo bann gran, gran proze Nasyonal, eski vreman nou kapab dir poudir nou pe met ‘Zonm o sant devlopman’ dan sa konteks ler nou pa pe kapab pas bann gran proze Nasyonal ki nou annan, devan Lasanble Nasyonal pou la probasyon par lepep Seselwa akoz se nou ki bann vre reprezantan lepep.  Sa bann menm zonm ek fanm Seselwa ki nou pe dir nou pe met zot o sant devlopman.

Mr Deputy, ler nou koz lo zesyon resours piblik.  Ler nou koz lo oversight an relasyon avek zesyon resours piblik, eski nou pe vreman dir poudir nou pe met zonm ek fanm Seselwa o sant devlopman ler par egzanp nou ankor dan en sityasyon kot nou pe vwar en rapor Oditer Zeneral ki sorti, dizon par egzanp pour 2014, ki sorti apre ki nou pou’n fini diskit Bidze 2016.

Mr Deputy, lalis i long.  Nou kapab go on and on and on.  Me selman sa ki mon pe dir i se ki nou annan en kantite.  As a Country, nou annan vreman en kantite pou nou adrese.  Nou annan vreman en kantite pou nou korize avan nou kapab vreman dir poudir wi, for the past 30 years, nou’n met ‘Zonm o sant devlopman.’

Mersi Mr Deputy.

MR DEPUTY SPEAKER

Onorab Fideria.

HON EMMANUEL FIDERIA

Mersi Mr Deputy Speaker.  Mr Deputy Speaker, dan mon preparasyon pou entervenir lo kontenir sa Mosyon ozordi, mon’n les mwan ganny gide par kontinyen trouv fason inovativ pou mentenir nou Polisi ‘Zonm o sant devlopman.’

Wi Mr Deputy Speaker.  Mon a komanse ler mon dir ki konteni lalit travayer atraver bann diferan staz listwar evolisyon zonm dan bann diferan staz devlopman sosyete, in touzour en batay pou zisteman asire ki li sa zonm ki i enn bann fakter tre enportan pour devlopman.  Ki i vreman ganny mete o sant, non selman tou devlopman me osi byen, o sant tou sikse devlopman.  Sepandan listwar legzistans sosyete imen in donn nou bann diferan episode. De la, in touzour en batay ant zonm avek son prop sistenm sosyete.

Sesel en pei kolonize plis ki 200an par Franse ek Angle, in ekrir plizyer episode dan demars Seselwa pou rod son vre plas dan sosyete, pou egzize ki i ganny mete o sant tou prosesis devlopman.  In bezwen plizyer zonm pou debout ferm, in demann legzizans en vizyon kler.  In bezwen en Leadership ki enpekab e malgre tou lenperfeksyon zonm, malgre tou lopozisyon, bann ki enkapab vwar pli lwen ki zot bout nennen.  Sistenm kolonizasyon ti krake.  Seselwa dan son gran mazorite, ti komans respir lespwar.  Vre liberte, respire listwar lavenir prosperite reel pou tou Seselwa ganny mete o tou devlopman.

Mr Deputy Speaker, ki kwensidans istorik 2 Zen 64?  Ozordi 2 Zen 2015.  Mon pa pou al dan detay bann levennman istorik, me nou tou ki senser, ki’n pas dan lekol K O U Y O N, in apresye ki i pa’n zanmen en batay ki’n fasil.  I pa’n zanmen en batay ki san lerer, me ki sa determinasyon, konviksyon senser dan Leadership ankre e simante dan sipor en gran mazorite travayer ki ti pe rod zot vre plas o sant tou devlopman, ti ganny kouronnen par laviktwar.

Mr Deputy Speaker, mon konesans nou listwar, lavi mon prop fanmir depi mon laz konesans ziska ozordi in kit bann sikatris anmer dan mon lavi.  Sikatris anmer dan lavi plizyer fanmir, akoz in vreman enn bann batay ki pa’n fasil.  Pa pou zanmen en batay ki pou fasil.  Akoz sa batay pa fasil?  Larepons i senp.

Mr Deputy Speaker, in en batay e pou kontinyen en batay a legois zonm, legois bann zonm opportunist, legois bann leader politik po-pi-lis, atraver listwar plizyer sosyete.  Lipokrizi e mankman senserite politik, kanmoufle anba bann lapo santiman zenofobi ekstrenm, ki’n preski trouv eksterminasyon plizyer pep e zot kiltir atraver listwar.  Manifeste dan en fason ekstrenm atraver 2 Lager Mondyal.  Sa i pa zis koze.  I bann fe istorik.  Listwar i ranpli avek milye legzanp ki nou ganny plezir etidye koman etidyan dan Primer, Segonder e Liniversite.  Ozordi nou pa pou bezwen en trwazyenm Lager Mondyal.  Ozordi nou trouv nou bann aksyon pli barbaric.  Pli orib, enkrwayab ki zanmen nou ti’n kapab panse pou kapab arive dan plizyer kwen lemonn.

Mr Deputy Speaker, lekel ki responsab pou tou sa bann kantite dezord ensiportab dan lemonn ozordi?  Larepons i senp.  Se sa bann nouvo leader politik, se sa bann fanatik politik.  Se sa bann ekstremis politik ek zot bann zenofobi politik.  Plizyer dan lemonn, osi byen ki isi dan Sesel pe kriye ki zot Polisi se met zonm o sant tou devlopman, ki pe kanmoufle zot anba progranm lalit kont koripsyon.  Ki pe kanmoufle zot anba kouvertir sanzman akoz nou’n la pou tro bokou letan.

Mr Deputy Speaker, listwar pe demaske zot vre lentansyon.  Listwar resan pe montre nou eliminasyon fizik de milye sa bann menm zonm ki zot pretann pou defann e pe lager pour tou bann ki zot in met o sant devlopman dan plizyer pei, plizyer sosyete.  Zot fason ek metod inovativ se atraver lager, kosyonnen pou provok plizyer konfli ant bann diferan group etnik oubyen lo preteks baz Larelizyon.

Mr Deputy Speaker, i enkyetan, i sagrinan, i ras leker, kantite bagar dan sa lemonn ozordi.  Tro bokou eliminasyon ek destriksyon plizyer sivilizasyon ki’n egziste pou plizyer zenerasyon.

Mr Deputy Speaker, Sesel i potansyel kapab antre dan en staz parey ki lezot pei pe eksperyanse.  Mon panse i byen lwen avek senm lafreyer.  Mon panse i byen lwen avek demars pou anpes Seselwa koze.  Me mesaz se ki nou ki pe tra-vers lo larout danze, ki si nou pa fer atansyon personn pa pou kapab bare.

Mr Deputy Speaker, ozordi dan lemonn, plizyer fanatik politik, plizyer oportinis politik pe fer en kantite dega.  Pe kree kondisyon pou donn nesans en kantite konfli sosyal.  Nou vwar sa traver bann diferan deklarasyon ki zot fer anba kouvertir demokrasi, anba kouvertir koripsyon, anba kouvertir laliberte lekspresyon, anba kouvertir respe nou Drwa Imen, anba kouvertir the Rule of Law.

Tousala nou’n tande e nou pou kontinyen tande partou dan plizyer sosyete dan lemonn.  Pa ki nou pa krwar ki nou bezwen lit kont koripsyon, respe pou Drwa Imen, eksetera.

Mr Deputy Speaker, dir mwan lekel ki’n ganny mandate dan sa pei pou donn Parti Lepep lektir lo tousala.  Ozordi, apre ki nou’n ekout tou sa bann leokri, mon vin pli konvenki ki zanmen, ki napa personn.

Mr Deputy Speaker, ler tou bann kritik in ganny fini fer e evapore e malgre tou defayans ki kapab ganny dir, Parti Lepep i reste sa meyer opsyon pou zonm.  Tou Seselwa kontinyen ganny mete o sant tou devlopman.

Nou annan en rikord sikse e deborde avek sikse.  Mr Deputy Speaker, statistik nou bann lakonplisman i la.  Malgre tou nou lenperfeksyon, mon lapel ozordi se tou bann ki pa’n al dan Lekol K O U Y O N, reserse, lir e apresye tou sa bann sikse.

Mr Deputy Speaker, listwar sosyete imen i en listwar tre ris.  In touzour manifeste li atraver en prosesis kot sak zonm i aprann e konpran e apresye sa ki mannyer son sosyete e atraver li, son lanvi pou rod e serse touzour sa ki meyer.  Par konsekans, sak endividi i kre sa loportinite kolektiv pour sakenn de nou benefisye, avanse e fer progre dan lavi.  De la, i kree son lespas pou pa zis asize e espere me ki nou deside zwe en rol aktif dan demars ki nou sosyete antye i fer, pou nou reisi met nou tou o sant devlopman.  Leve, asire ki nou dan lanmen, dan sa zefor Nasyonal.  A lafwa sakenn de nou, nou sezi nou lespas kot nou konfortab e anfen zwir atraver prensip e filozofi legalite dan loportinite.

Mr Deputy Speaker, lalit tras travayer atraver listwar plizyer sosyete pa’n fasil.  I pa pou zanmen fasil.  Tro souvan atraver listwar diferan sosyete bann Leaders politik ki aparet avek bann zoli proklamasyon ki zot dan kote sa menm zonm ki zot prozekte pou defann, sa menm bann Leader i ganny anvair e ganny noye dan zot prop lanbisyon absoli pou pouvwar.

Mr Deputy Speaker, isi Sesel lasezon lasas pouvwar in arive, me i regretab ki plizyer sa ki’n anbark lo sa lasas pe zot menm kre diskord anba preteks nou lim.  Se zot menm ki potansyel-man kapab met Sesel lo son zenou.  Anba kouvertir mon pa per, alafwa fwa proklanmen ki zot oule met zonm lo vre sant devlopman.

Konsyan-man ou enkonsyanman, listwar sa pti Sesel i ranpli avek milye legzanp ki labsans en vizyon kler i touzour ganny tradwir dan en loubli absoli sa vre zonm ki zot bezwen met li lo sant tou sa ki zot anvizaze fer dan sosyete.

Mr Deputy Speaker, avan tou e apre tou, se byennet sa zonm ki konte dan nenport ki sosyete, avek divers kalite sistenm politik, filozofi lavi, oubyen Polisi ekonomik, oubyen Polisi sos-yo kiltirel.

Mr Deputy Speaker, ler en Leader politik atraver son Parti oubyen mouvman politik i pa’n zis proklanmen be montre levidans konkret ki son filozofi lavi se met zonm o sant tou devlopman pour plis ki 50an.  Rikord aksyon sa plis ki 50an legzistans i pli gran levidans, i pli gran laverite ki’n ganny konkretize e demontre atraver plizyer desizyon.  Atraver e mannyer fer inovativ ki’n fer Sesel ganny aklanmen pou tou son sikse remarkab par plizyer Lorganizasyon Enternasyonal.  Par plizyer bann Dirizan dan lemonn.  San okenn dout, nou sikse i reprezant profonder senserite dan en filozofi lavi enkontestab.  Nou sikse met ‘Zonm o sant devlopman’ i reflekte profonder e determinasyon.  Profonder en lespri kon-ba-tif eksepsyonnel e i sa karakteristik tou bann Leaders ki nou’n annan.  I ankor annan dan Parti SPUP, SPPF e Lepep.  Nou tou nou premye pou rekonnet ki zot pa bann zonm parfe.  Avan tou, Zezi Kri pa ti’n kree zonm parfe lo later.  Personn pa parfe.

Mr Deputy Speaker, dan nou parkour pou touzour met ‘Zonm o sant devlopman.’ nou pa’n zanmen kanmi pou dir ki in annan lerer ki’n ganny komet, ki i annan serten fo pa ki’n ganny fer.  Malgre tou, nou pa’n zanmen les nou brannen.  Nou pa’n zanmen les nou perdi nou rezon det vre lakoz nou legzistans.  Nou’n egziste, nou pou kontinyen egziste pou batir ‘En nouvo Sesel.’  En Sesel modern kot mwan, nou tou vwar nou ganny mete o sant sa nouvo Sesel.

Mr Deputy Speaker, vre sans Leadership i dikte nesesite pou pa zanmen abandonn en lalit, malgre tou difikilte, malgre tou defi.

Mr Deputy, i sa egzakteman ki bann vre Leaders Parti SPUP, SPPF, Lepep, in fer atraver plis ki 50an son legzistans.  Nou tou in reklanmen ki bann vre patriyot Nasyon Seselwa nou devret fyer.  Nou tou nou bezwen fyer.  Nou devret salye sa kouraz, zefor, determinasyon e perseverans tou sa ki’n la avan nou, ki’n donn zot kouraz ek lavi pou fer nou vin sa ki nou ete ozordi.  Nou pa’n sorti anler, bat ater e viv.  Non.  In annan en sosyete ki’n kree sa kondisyon de baz ki’n asir ou legzistans e sirvivans, malgre tou defi.

Mr Deputy Speaker, dan maske oubyen dan laklerte Sesel beni, sa lanvironnman eksepsyonnel, sa trankilite lavi.  Malgre tou difikilte, i sa ki nou ete ozordi, i akoz nou annan bann zonm for, bann zonm ki Kapab, Konpetan e Kosto, ki’n tras sa larout ki anpes bato ofraze.  Ki annan lodasite e pran bann desizyon brav e kouraze.  Ki’n kapab adapte dan bann moman difisil e garanti nou Sesel e tou Seselwa e viv dan dinyite.

Dan tou lenperfeksyon e defi ki tou sosyete imen i prezante ozordi dan tou kwen lemonn.  Wi, nou Sesel sa.  I sa sel Sesel.  Sa Sesel ki nou kontan.  Sa Sesel ki mon kontan.  Wi, nou devret kontan Sesel.

Mr Deputy Speaker, mon reste konvenki ki anmezir ki nou avanse koman en pep ini, ki nou avanse e kontinyen serse pou prouv bann fason inovativ pou fer lavi sa zonm meyer nou ava akonpli nou vre rezon ki nou isi ba lo sa later.  Dan profonder nou leker senser, nou reste touzour angaze pou donn sa pep sa ki meyer.  Parti Lepep i ozordi plis ki zanmen reste sel opsyon.  Plis ki 50an dan Sesel pa pou fer nou ganny diskalifye dan Lig Premye Divizyon.

Non.  Sa plis ki 50an in fer nou vin pli matir, pli konpran bann danze ki nou pep i kapab fer fas avek.  Si zot fer okenn fo pa dan zot desizyon ler moman in arive, lekel ki zot pou met konfyans ladan pou kontinyen diriz desten Seselwa?

Mr Deputy Speaker, Parti Lepep i reste Parti meyer.  Swa pour pep Seselwa i reste e pou kontyen reste ou meyer opsyon.  Ansanm annou kontinyen batir e met tou Seselwa o sant tou sa ki nou fer pour Sesel.

Viv Parti Lepep.  Mersi Mr Deputy.  Mon pou siport sa Mosyon.

MR DEPUTY SPEAKER

Bon, Right Of Reply.  Onorab Rose.

HON MARIE-ANTOINETTE ROSE

Mr Deputy, mon pa pou long me mon ti a kontan kantmenm entervenir lo detrwa pwen ki Leader Lopozisyon in fer resorti ozordi apre midi dan sa Lasanble, swivan lentervansyon ki mon’n fer lo sa Mosyon e lentervansyon ki plizyer Manm in fer lo sa Mosyon.  E Mr Deputy, Leader Lopozisyon in dir ki kantmenm, i reste dimoun dan sa pei ki santi ki zot pe ganny marzinalize.

Mr Deputy, napa en pei kot napa en pti group dimoun ki toultan dir zot pe ganny marzinalize.  Pa egziste sa pei e mon anvi dir avek pep Seselwa, sa pei kot napa personn ki pa konplent, ki pa dir ki zot pe ganny marzinalize pa egziste e nenport ki Parti Politik ki pou fer zot krwar ki sa pou vin en realite si en zour zot vin o pouvwar, sa Parti Politik pe koz mansonz avek zot, akoz sa pa egziste.

Mr Deputy, sa ki enportan ki egziste dan en pei se annan bann Lenstitisyon ki kapab reponn lapel sa bann dimoun.  Se annan Lalwa ki nou pase isi dan sa Lasanble ki kapab reponn lapel sa bann dimoun.  Se annan en Lasanble ki reponn laspirasyon nou pep.  Se annan en Zidisyer ki reponn e donn rekour nou pep.  E se annan bann bon Lalwa kot nou pep i kapab ale pou ganny rekour si zot santi zot pe ganny marzinalize.

Sa i travay ki Parti Lepep in fer, travay ki nou’n travay kantite lo la pandan premye, dezyenm, trwazyenm, katriyenm e senkyenm Lasanble e travay ki nou pou kontinyen dan sizyenm Lasanble ler nou retournen Mr Deputy.  Sa i travay ki nou bezwen kontinyen fer pour pep Seselwa.

Applauses

HON MARIE-ANTOINETTE ROSE

Sa i apel transformasyon.  Sa i apel progre e i pou toultan annan travay pou nou kontinyen fer, pou nou kontinyen ekout sa pti group dimoun.

Mr Deputy, Leader Lopozisyon in koz lo a selected few ki pe benefisye dan sa pei, anba ‘Nouvo Sesel,’ anba 38 an progre anba 51 an vizyon Parti Lepep pou vre devlopman dan sa pei.  Lekel sa selected few ki nou pe koz lo la?  Eski nou pe koz lo 1000 zanfan ki ne Sesel e ki pas dan Lopital Sesel e ki grandi e viv an bonn sante?  Eski sa i apel a selected few?  Eski nou pe koz lo 5 mil lozman dan sa dernyen 5an?  Eski nou pe koz lo tou sa dimoun ki’n ganny en lakaz Perseverance zis akote nou?  Eski sa i apel a selected few dimoun ki’n benefisye dan sa pei?  Eski nou pe koz lo 40 mil siporter Lopozisyon dan dernyen Eleksyon ki’n lib, ki’n vote, ki’n desann e ki’n lib pou swazir 40 poursan?  Eski nou pe koz lo 40 poursan siporter Lopozisyon dan sa pei, ki’n lib pou swazir ki Parti ki zot anvi swazir?  Eski sa i en a selected few?  Eski nou pe koz lo 2500 Home Carers ki benefisye avek en lanplwa e ki benefisye avek en Home Care dan zot lakour?  Eski sa i en selected few?

Eski nou pe koz lo 3 mil graduates ki’n benefisye atraver en Degre Liniversite?  Bokou nou isi dan sa Lasanble e plizyer zot dan Lopozisyon.  Eski nou pe koz lo 13 mil zenn dan nou sistenm ledikasyon, ki toulezour zot leve e zot al lekol e zot annan loportinite pou aprann keksoz dan laklas ?  Eski sa i en selected few?  Eski nou pe koz lo 3mil 500 pti biznes ki’n ganny loan atraver DBS ek SBFA pandan sa dernyen 5an depi ler nou’n fer reform ekonomik dan sa pei?

Eski nou pe koz lo 8 mil travayer dan Servis Piblik.  Pe enport zot apartenans politik, eski sa bann dimoun zot ganny konsidere koman a selected few?  Eski nou pe koz lo 9700 Pansyoner ki tou le mwan zot desann e zot kolekte zot Pansyon, san retar, san problenm Mr Deputy?  Eski sa i en selected few ki nou pe travay?

Eski nou pe koz lo 17 Scheme of Service ki pe ganny revwar, kot saler in ganny revwar dan sa pei pandan sa dernyen 3an Mr Deputy.  Sa pa en selected few.  Sa se mazorite pep Seselwa ki pe kontinyen benefisye.

Mr Deputy, Dirizan Lopozisyon in osi koz lo corruption. Eski nou pe dir ki li koman Dirizan FPAC, i pa krwar ki the Finance and Public Accounts Committee i annan sa lentegrite e i annan sa kapasite pou fer sa travay valab pou lager kont koripsyon?

Mr Deputy, ler nou koz lo ‘Zonm o sant devlopman’ i pa en myth, i pa en krwayans sa.  ‘Zonm o sant devlopman’ i en realite.  I en realite ki ganny trouve dan statistik raporte par bann Lorganizasyon Enternasyonal e ki rate Sesel koman en pei high e kot i annan high human development index.  Sa pa nou ki dir.  Sa se pa en lenvansyon Parti Lepep.  Sa se rezilta travay dir e sa set en statistik reel.  Kote sa statistik reprezantasyon fanm, senkyenm dan Lasanble Nasyonal dan lemonn i sorti?  Sa se realite e travay dir Parti Lepep e krwayans Parti Lepep dan kapasite fanm pou dirize.

Kote sa statistik berating pour nou lekonomi i sorti?  Eski sa i en lenvansyon Parti Lepep oubyen i bann statistik reel ki egziste?  E kote sa statistik low un-employment e low infant mortality rate i sorti?  Kote, ki level ki nou pe dir sa ‘Nouvo Sesel’ i ete?  Tousala Mr Deputy, se bann endikater devlopman vize ver plis devlopman, vize ver progre.

Dernyen pwen mon anvi refer resorti ozordi dan sa Lasanble se kote nou oule ale.  I annan en manm ki’n dir apre midi, nou pep Seselwa, nou bezwen deside ki nou anvi.  Nou bezwen deside kote nou anvi ale.  Eski nou anvi en lavenir enserten, ouswa en lavenir ki kontinyelman garanti stabilite dan sa pei?  Stabilite Mr Deputy, viv dan en pei kot lekonomi i stab.  Viv dan en pei kot son politik i stab.  Vin dan en pei kot dimoun diferan ras i viv ansanm an armoni.  Viv dan en pei kot dimoun diferan krwayans relizye i viv ansan an armoni.  viv dan en pei kot dimoun ki annan en pe plis ek sa ki annan mwens i viv ansanm an armoni.  Viv dan en pei kot nou lib pou fer e viv lafason ki nou swazir, pour vi ki sa swa pa anpes en lot viv parey nou.  Viv dan en pei kot nou rekolte rezilta swa ki nou fer.

Mr Deputy, dernyen pwen mon anvi fer resorti se ki in le pou nou asim nou responsabilite nou tou.  Annou ralye ansanm e annou travay pour sa ‘Nouvo Sesel’ ki nou anvi.

Mr Deputy, annan angle nou dir annou travay for the new Seychelles we want.  Mersi Mr Deputy.

Applause

MR DEPUTY SPEAKER

Bon avek sa nou pran en vot lo sa Mosyon.  Tou Manm ki an faver, lev zot lanmen?  Okenn Manm ki kont?  Mosyon in ganny aprouve par en gran mazorite.

Avek sa, nou ava adjourn e nou a rezwenn Mardi le 9 Zen, 9er bomaten.

(ADJOURNEMENT)