::
Home » Verbatim » Verbatim - Second Term 2015 » tuesday-26th-may-2015

tuesday-26th-may-2015

NATIONAL ASSEMBLY OF SEYCHELLES

Tuesday 26th May 2015

The Assembly met at 9am

National Anthem

Mr Speaker in the Chair

MR SPEAKER

Bonzour tou bann Manm Onorab.  Bonzour Minis ek son delegasyon.  Tou bann ki pe ekout nou dan lakour, bonzour.

Ozordi nou pou komanse par en Personal Explanation par Leader of the Opposition, Onorab David Pierre.

Onorab Pierre, ou Personal Explanation, parey ou’n soumet avek mwan.

HON DAVID PIERRE

Ou oule mor lir li an Angle or Kreol?

MR SPEAKER

Strikteman, si ou’n fer li an Angle i ti dwatet an Angle, me mon a les ou an Kreol.  Ok.

HON DAVID PIERRE

Pour konsonmasyon piblik.

Thank you Mr Speaker. Mr Speaker, mon oule fer en Personal Explanation, anba Order 35 e mon Personal Explanation i konm swivan.

An rezilta kouvertir lo travay Lasanble Nasyonal lo SBC pour Mardi le 19 Me, SBC ti proklanmen ki mon ti absante dan Lasanble san donn en rezon, san en leksplikasyon.

Mon oule klarifye ki mon ti absante akoz mon ti lo Misyon Ofisyel aletranze, koman parti mon travay koman en Manm Parlman.

Mersi Mr Speaker.

MR SPEAKER

Ok.  Bon, nou ava komans pran bann Kestyon.

Ozordi avek nou dan Lasanble, i annan Minis pour Zafer Entern, Mr Charles Bastienne e nou ava komans avek Kestyon 64, Onorab Marc Volcere.

HON MARC VOLCERE

Mersi Mr Speaker.  Bonzour Mr Speaker, bonzour Minis, bonzour tou koleg Manm.  Bonzour tou dimoun ki a lekout.

An vi ki konstriksyon lo Stasyon Tenny Dife lo Praslin in komanse, mon ti a kontan demann Minis responsab Zafer Entern, si son Minister pe fer bann travay neseser, ansanm avek lezot Lazans, pou asire ki ler sa Stasyon i vin an operasyonnel, i kapab reponn byen a bann lapel?

Mersi Mr Speaker.

Toulezour

MINISTER CHARLES BASTIENNE

Bonzour Mr Speaker, tou Manm Onorab e tou bann ki a lekout.

Mr Speaker, Stasyon Servis Tenny Dife lo Praslin in prensidir konplete e ekspekte vin an operasyonnel ver milye sa lannen.  Enn parmi bann lobzektif prensipal Lazans Tenny Dife ek Sovtaz, se pou asire ki letan Stasyon Tenny Dife i vin operasyonnel lo Praslin i kapab ofer lasistans ek en servis ki efikas letan i annan bann lensidan dife, aksidan e lezot kalamite parey dezas.  Parey i leka lo Mahe e La Digue, sa Lazans i osi bezwen travay an etrwat partenarya avek lezot Lazans e partner konsernen.

Lo kote Praslin par egzanp, Lazans Servis Tenny Dife ek Sovtaz i travay de pre avek PUC, Lazans Transpor lo Later, SLTA, Ladministrasyon Distrik e Kominote Pralinwaz an zeneral.

Depi konsepsyon sa Stasyon lo Praslin, Lazans Tenny Dife ek Sovtaz in fer rankont avek Ladministrasyon le 2 distrik lo Praslin e osi avek lezot partner.  Apard sa bann rankont, in annan vizit ki’n ganny fer ansanm avek Seksyon Delo kot PUC e osi SLTA.  Tousala i permet ki sa Lazans i vwar bann lenfrastriktir ki deza an plas, parey sistenm delo, bann semen e osi akse semen pour bann transpor tenny dife.  Sa bann vizit ek rankont i permet sa Lazans konn vre sityasyon lo teren lo sa zil e vwar kwa ki merit ganny adrese, pou fasilit travay bann Zofisye Tenny Dife, enn fwa ki zot komans zot loperasyon.  Lazans Tenny Dife ek Sovtaz pou kontinyen travay an etrwat partenarya avek tou bann partner, pou asire ki i kontinyen ofer meyer servis e enn ki efikas dan kominote.  Enn fwa operasyonnel, sa Lazans pou entansifye bann Kozri e Sesyon avek bann Lotel e biznes lo Praslin, pou zot konn plis lo servis ki sa Lazans i ofer e bann metod prevansyon e keksoz ki zot kapab fer dan bann ka evantyalite.  Sa i osi kapab agrandir ziska lo nivo bann Lekol.

Mersi Mr Speaker.

MR SPEAKER

Onorab Volcere.

HON MARC VOLCERE

Mersi Mr Speaker.  Mr Speaker, mon ti a kontan demann Minis, an lir avek bann diskisyon ki’n ganny fer avek bann Lazans konsernen, eski son Minister i satisfe avek bann travay ki pe ganny fer pou rektifye bann problenm ki’n kapab ganny idantifye pandan bann rankont.  Eski zot annan en Zofisye ki annan sa responsabilite pou li asire ki sa bann travay i ganny fer dan en fason, oubyen dan en dele letan ase kourt?

Mersi.

MINISTER CHARLES BASTIENNE

Mr Speaker, mon kapab dir poudir Lazans i ase satisfe avek travay ki’n ganny fer ziska maintenant, an konsiltasyon avek tou bann Lazans konsernen.  I annan serten keksoz ki nou ti’n demande, ki PUC i fer avek SLTA.  Mon kapab dir ki nou vreman satisfe ek korperasyon ki nou’n gannyen avek PUC, sirtou pou nou ganny bann akse avek bann Fire Hidrant ki annan en tant-enn an tou lo Praslin, pou nou kapab ganny akse, si an ka i annan bann evantyalite dife.  E osi, mon kapab dir poudir i annan vizit regilye ki ganny fer lo Praslin, depi ler sa Stasyon in komanse, pou nou fer sir poudir travay in al byen.  E vwala parey mon’n dir, se ki travay i dan staz konplet.  Mon’n vizite 2 semenn pase e Stasyon parey mon’n dir, i sipoze konplete ver milye sa lannen.

Mersi Mr Speaeker.

MR SPEAKER

Onorab Esther.

HON NATASHA ESTHER

Mersi Mr Speaker.  Bonzour tou dimoun.

Mr Speaker, Praslin in fer fas avek plizyer dife lafore tou dernyen man.  Eski Minis i kapab enform sa Lasanble si son Minister pe travay avek Lazans konsernen, pou osi asire ki bann lobstak i ganny retire, pou fer ki ler i annan en lensidan dife, sa i ava osi fasilit zot travay?

Mersi.

MINISTER CHARLES BASTIENNE

Mr Speaker, parey mon’n dir, se ki depi lontan, Lazans Tenny Dife i travay an etrwat kolaborasyon avek tou son bann partner lo Praslin.

Konsernan dife lafore, wi.  In annan plizyer meeting ki’n ganny fer ant Lazans avek Zofisye Lafore lo Praslin, pour ki en fason pou zot kapab pli byen kordin zot zefor dan  bann ka kot i annan bann dife lafore.

Mersi Mr Speaker.

MR SPEAKER

Kestyon 65, Onorab Meggy Marie.

HON MEGGY MARIE

Mersi Mr Speaker.  Bonzour Minis ek ou delegasyon.

Mr Speaker, eski Minis i kapab ……….

(Technical Problem)

HON MEGGY MARIE

Hello.

Mon kapab kontinyen, ok.  Bonzour Minis ek ou delegasyon.

Mr Speaker, eski Minis i kapab enform nou Lasanble ki pe arive avek reparasyon oubyen konstriksyon Sant Lapolis Anse Aux Pins, ki pe deservi plis ki en distrik?

Mersi Mr Speaker.

MINISTER CHARLES BASTIENNE

Mr Speaker, Kordgard Anse Aux Pins i date plizyer lannen.  Dan lepase, in annan serten pti travay renovasyon ki’n ganny fer, pou asire ki Zofisye Lapolis i kapab travay dan lanvironnman ki akseptab e konfortab.  Resaman, Lapolis in fer Enzenyer Divizyon Planning fer evalyasyon lo sa fasilite, pou vwar si i posib pou fer travay renovasyon mazer lo sa Kordgard.  Rezilta sa evalyasyon i montre ki striktir sa batiman pa ase for e solid pou fer bann travay reparasyon neseser ki ti’n planifye.  Alor, Lapolis in konstate ki pou pli rantab pou demolir sa Kordgard e rekonstrir en lot.  Swivan sa, mon Minister in fer demars pou rekonstriksyon sa Kordgard.  Apre diskisyon avek Minister konsernen, mon annan plezir pou anonse ki en nouvo Kordgard modern pou ganny konstrir akote sa enn aktyel.  Sa proze pou komanse sa lannen menm.

Mersi Mr Speaker.

MR SPEAKER

Okenn siplemanter Onorab?

HON MEGGY MARIE

Wi Mr Speaker.

Mr Speaker, eski Minis i kapab dir sa Lasanble si i dan plan son Minister osi pou repar sa bann lakaz ki ganny servi par Polisye, an vi ki a limedya, pli ale i pe deteryore e pe vin en konsern pour sa bann dimoun ki pe servi li?

Mersi Mr Speaker.

MINISTER CHARLES BASTIENNE

Mr Speaker, nou pa ankor fer okenn evalyasyon lo bann lakaz ki bann Zofisye pe reste ladan, me selman mon konstate poudir pa neseserman zis bann Zofisye prezan me osi bann ex-Officers ki pe reste ladan.  Mon krwar nou ava fer serten evalyasyon e mon krwar evantyelman i annan en posibilite osi ki bann ex-Officers, zot pou bezwen sed sa lakaz avek bann Zofisye aktiv dan Lapolis, a lavenir.

Mersi Mr Speaker.

MR SPEAKER

Onorab Vangadasamy.

HON SHERYL VANGADASAMY

Mersi Mr Speaker.  Bonzour Mr Speaker.  bonzour Minis ek ou delegasyon e tou dimoun a lekout.

Mr Speaker, an vi larepons Minis, eski Minis i kapab

enform sa Lasanble si son Minister i annan okenn plan reparasyon e konstriksyon, parey i annan pour Sant Lapolis Anse Aux Pins, me pour bann lezot Stasyon ki pe deservi plis ki en distrik lo Mahe e Praslin?

Mersi Mr Speaker.

MINISTER CHARLES BASTIENNE

Mr Speaker, pou lemoman, travay renovasyon osi in komanse lo Kordgard Mont Fleuri e sa in komanse depi mwan pase.  Nou ekspekte kapab konplete ver lafen Zen sanmenm sa lannen.  E sa nou pe fer zis son bout devan Kordgard Mont Fleuri, plizoumwen kot nou pe resevwar piblik.

Dezyenmman Mr Speaker, nou osi annan plan, parey mon pou dir taler.  Nou osi annan plan pou fer travay renovasyon en pe lo bout devan Kordgard Santral.  Ankor, pou improve lanvironnman travay nou bann Zofisye Lapolis.

E trwazyenmman Mr Speaker, nou osi annan plan pou nou rekonstrir Kordgard Grand Anse Praslin.

Mersi Mr Speaker.

MR SPEAKER

Onorab Murielle Marie.

HON MURIELLE MARIE

Mersi Mr Speaker.  Bonzour a tous.

Mr Speaker, baze lo repons Minis, eski Minis i kapab enform sa Lasanble konbyen pou koute sa Sant Lapolis Anse Aux Pins e konbyen letan pou pran pou son konstriksyon terminen, an vi ki i annan diferan kontrent e ki pou arive avek sa bann dimoun ki pa Zofisye Lapolis?

Mersi.

MINISTER CHARLES BASTIENNE

Mersi Mr Speaker.

Mr Speaker, parey mon’n dir, travay lo nouvo Kordgard Anse Aux Pins i sipoze komanse sa lannen menm.  Nou ekspekte i pou pran 6 a 9 mwan pou konplete e nou ekspekte i pou kout R5 a 6 milyon.

E konsernan dezyenm bout kestyon.  Mr Speaker, nou pou antre an negosyasyon avek MLUH with regards to reallocation sa bann dimoun ki pa neseserman Zofisye Lapolis ki pe reste dan bann Lakaz Gard parey nou dir, Anse Aux Pins.

Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.

Mr Speaker, eski Minis i kapab dir avek sa Lasanble, si paralelman avek sa plan pou fer en nouvo Kordgard, zot osi annan en plan lo nouvo kalite travay ki sa Kordgard pou fer, konbyen Zofisye Lapolis pou annan dan sa Kordgard at any one time e donn nou bann lezot detay, travay ki pou atase ek sa Kordgard?

Mersi Mr Speaker.

MINISTER CHARLES BASTIENNE

Mr Speaker, avek ou permisyon, vi ki i annan kestyon lo sa laliny, mon krwar ti ava pli apropriye.  Mon ava reponn sa letan mon pe reponn kestyon ki anliny avek sa ki Onorab in demande, en pti pe taler.

Mersi Mr Speaker.

MR SPEAKER

Ok.  Bon, an vi inter-connectedness, Kestyon 66, 67 e 71, nou pou pran le 3 Kestyon ansanm e Minis ava donn en sel larepons.

E nou ava komans ek Kestyon 66, Onorab Jeannevole.

HON BEGUITTA JEANNEVOLE

Mersi Mr Speaker.  Bonzour.  Bonzour Minis e tou dimoun a lekout.

Eski Minis i kapab enform sa Lasanble ki zefor an plis ki pe ganny fer pour bann Zofisye Lapolis fer patrol apye, afen ki zot a pli byen kapab tous tou sa pti santye kot problenm i pli grav dan kominote?

Mersi.

MR SPEAKER

Kestyon 67, Onorab Pierre.

HON DAVID PIERRE

Mersi Mr Speaker.

Mr Speaker, eski Minis i kapab enform sa Lasanble si Departman Lapolis i kapab irzan, met prezans Lapolis dan bann sou-distrik English River, vi ki bokou zabitan pe eksplik zot konsern vizavi bann vol ki pe arive pandan lazournen?

Mersi Mr Speaker.

MR SPEAKER

E Onorab Edmond, Kestyon 71.

HON ROMA EDMOND

Mersi Mr Speaker.

Etan donnen vag vol ki pe rekomanse otour serten distrik, eski Minis i kapab eksplik sa Lasanble ki plan son Minister lo sa progranm Community Policing ki ti ganny koz lo la dan serten meeting konsiltasyon piblik lepase, ouswa dan sa menm laliny, ki son Minister pe fer pou entansifye sirveyans?

Mersi Mr Speaker.

MR SPEAKER

Minister.

MINISTER CHARLES BASTIENNE

Mr Speaker, mon pou dabor pran Kestyon 66 ek 71, akoz foot patrol e Community Policing i konekte parey ou’n dir.

Depi Mars sa lannen, Lapolis in adopte en nouvo lapros.  Sa se vin pli pros avek kominote.  Lapolis in entansifye lakantite Gard dan bann Kordgard, pou asire ki i annan ase mendev pou fer patrol apye dan kominote.  Patrol pe ganny fer apye pandan lazournen, apartir 8.30 bomaten e pe tous tou bann kanton, santye ek bann black spots.

Pou donn en legzanp, Mont Fleuri, Zofisye pe fer patrol Belvedere, Corgate Estate, Rochon, Copolia, Kan Frichot e osi dan distrik Les Mamelles.  Sa i permet zot enterakte e vin pli pros avek kominote.  I osi en metod prevansyon kont krim e loportinite pou kolekte lenformasyon lo bann krim e sispe.  Sa bann patrol apye i ganny ranforsi avek patrol dan transpor e resaman, nou’n osi komans fer patrol lo bisiklet.  Lobzektif sa bann patrol se zisteman pou redwir lakantite vol ek lezot krim dan kominote.  Statistik i montre ki i annan en pti logmantasyon dan lakantite krim ki’n ganny raporte pandan premye kar sa lannen 2015, konpare avek dernyen kar lannen 2014.

Sa 3 dernyen mwan lannen pase, ti annan 1521 ka krim ki’n raporte, tandis ki pour sa premye kar 2015, in annan 1567 ka krim ki’n raporte.  Sa i reprezant en logmantasyon 3 poursan.

Plizyer fakter in  kontribye pour sa logmantasyon.  Parmi, i bann nouvo prosedir ki’n ganny met an plas depi Mars, pou asire ki tou ka krim i ganny anrezistre.

Dan kad nouvo lapros, Lapolis i rikord tou statement, bann konpleman oubyen viktim, sirplas e non pa lannmen oubyen detrwa zour apre.  Sa bann ka i ganny refer avek bann Zofisye CID.  Zot in ganny desantralize zot osi CID e ganny de plwaye dan bann Stasyon.  Tousala i an lir avek sa konsep Community Policing, kot tou i ganny fer lo nivo Stasyon Kominote, pou akseler prosedir, eksepte dan bann ka krim mazer.  Lapolis pe konsantre bokou lo kas lakaz e vole.  Sa ki nou apel Burglaries avek House Breaking.  Se la kot Community Policing i zwe en rol kle, akoz zot fer prevansyon atraver zot patrol ki frekan dan kominote e zot osi detekte bann sispe pli vit.

Touzour an lir avek Community Policing, Lapolis i entansifye son patrol dan bann landrwa kot i remarke ki vol pe ogmante.  Sa loperasyon i ganny fer konzwentman avek Zofisye Response Team ki avan ti apel PSSW e osi, Zofisye Lentelizans i osi entervenir si fodre.  Anba sa loperasyon, Lapolis dan bann Stasyon i rod lenformasyon lo bann sispe ki zot krwar i responsab.  Parfwa, serten ti deza lo wanted list e la travay i entansifye pou rode e aret sa dimoun.  I kler ki i pou difisil pou konpletman elimin krim dan pei, me Lapolis pe fer tou son posib pou redwir bann ka vol, pour ki piblik i kapab santi zot an sekirite.  Malgre ki pandan sa premye kar lannen in annan en pti logmantasyon dan lakantite krim, konpare avek dernyen ka lannen pase, Lapolis pe vwar rediksyon dan ka kas lakaz ek vole.

Mont Fleuri, enn bann distrik avek bokou problenm ek konpleksite, pe vwar en rediksyon remarkab dan lakantite ka kas lakaz e vole.  Par egzanp, semenn le 20 a le 26 Mars, Stasyon Mont Fleuri ti anrezistre 21 ka kas lakaz ek vole.  Pandan bann semenn ki’n swiv, sa in gradyelman desann pou vin 19 e 18 ka kas lakaz ek vole, dan bann premye semenn Avril.

Dernyen semenn Avril, Stasyon Mont Fleuri ti anrezistre selman 6 ka kas lakaz e vole e sa pe prensidir stabilize, lefe ki ant le 8 ek le 14 Me, Stasyon Mont Fleuri in anrezistre selman 5 ka kas lakaz ek vole.  Tousala i rezilta sa bon travay Community Policing, ki aprezan pe ganny fer dan en fason pli kordinen, pli koeran, avek lasistans lezot Departman dan Lafors Lapolis.  Sa rediksyon dan bann ka kas lakaz e vole pa zis lo nivo Mont Fleuri, me osi dan lezot distrik.  An zeneral, in annan en rediksyon konsiderab dan lakantite ka kas lakaz e vole dan pei.

Semenn le 20 Mars sa lannen, ti annan 47 ka kas lakaz e vole dan pei antye, pour sa semenn le 20 Mars.  E sa in gradyelman desann e semenn le 14 Me sa lannen, sa in redwir pou vin 24 ka.  Sa i reprezant preski 50 poursan rediksyon.

Kestyon konsernan Onorab Pierre, English River osi pe benefisye atraver sa bann patrol, ki swa apye, dan transpor oubyen bisiklet.  English River i ganny kouver par Zofisye Kordgard Santral e osi bann Zofisye dan Police Post, ki baze Ile Perseverance.

I annan patrol regilye dan bann transpor.  Sa i ganny fer lizour koman aswar e i osi annan foot patrol ki kouver bann pti santye e landrwa izole.  E sa i ganny fer lizour selman.  E parey mon’n eksplike pour Kestyon presedan, resaman, Lapolis in komans fer patrol lo bisiklet, pou asire ki zot enterakte pli byen avek piblik.  E osi parey mon’n dir, sa bann patrol pe ede pou Lapolis vin pli vizib e vizilan dan kominote.  Enterakte avek kominote e osi azir koman en deterrent kont krim.

Plis prezans Lapolis lo teren pou ede redwir lakantite krim dan pei e statistik sa bann semenn parey mon’n dir, pe montre rezilta pozitiv.  Lapolis pe evalye sityasyon pou vwar kote fodre fer sanzman e o fiy e anmezir travay i progrese, sanzman neseser pou ganny fer.  Mont Fleuri, dimoun pe santi zot pli an sekirite.  Bann group o bor semen dan serten landrwa pe komans diminyen.  Dimoun ki ti lo lalis wanted pe ganny arete e kestyonnen e ganny anmennen Ankour.  Kominote pe byen korpere avek Lapolis.  Response time Lapolis i pli vit e Lapolis pe dousman, dousman reganny konfyans manm piblik.

Mersi Mr Speaker.

MR SPEAKER

Onorab Jeannevole, okenn siplemanter?

HON BEGUITTA JEANNEVOLE

Wi Mr Speaker.  Mersi.

An vi repons Minis, eski Minis i kapab dir avek nou ki son statistik i montre an term ler ki plis sa bann vol i arive e eski patrol pe osi ganny fer dan gran ma-ten, sa i ver 3er, 4er bomaten, kot laplipar sa bann vol i arive e kwa ki pe ganny fer pou ariv lo bann scene o pli vit posib, an vi ki sa bann pti kominote pa lo grand rout?

Mersi.

MINISTER CHARLES BASTIENNE

Mr Speaker, nou ankor pe fini analiz nou bann statistics, me tou lendikasyon pe montre nou poudir letan nou ti annan bann ka kas lakaz ek vole, ti varye.  I annan ki ti ariv pandan lazournen e osi i annan ki ti ariv pandan lannwit.

Dezyenmman Mr Speaker, konsernan patrol dan lannwit.  Wi.  Parey mon’n dir se ki Lafors Lapolis i dinamik.

Mon a donn en legzanp.  Mon rapel poudir letan krim ti’n hit the roof parey nou dir dan rezyon Mont Fleuri, nou ti de-plway nou Response Team e zot ti travay tou lannwit pandan en semenn, pou zot kapab vwar dan bann ler ant 10er diswar ziska 5er bomaten, okenn dimoun ki lo semen, ki pa devret lo semen.  Ki annan potansyel pou zot kapab al komet bann tel akt.  E Lapolis ti fer zot travay accordingly.  E sa i kontinyen, depandan lo pattern krim ki nou obzerve pa zis Mont Fleuri, me dan Sesel an zeneral.

Trwazyenmman Mr Speaker, konsernan pou ariv lo scene a ler.  Parey mon pou eksplike taler se ki wi.  Nou’n sanz lafason ki nou operate.  Nou’n donn plis resours sak Stasyon, pou en fason ki tou Stasyon i kapab response within en dele letan apropriye.

Mersi Mr Speaker.

MR SPEAKER

Onorab David Pierre.

HON DAVID PIERRE

Mersi Mr Speaker.

Mr Speaker, eski Minis i kapab dir sa Lasanble donk, si sa ki in eksplik nou i form parti en plan kour term pou reponn a bezwen ki annan ozordi, oubyen eski zot annan en plan long term dan sa direksyon, pou zot kontinyen fer sir ki zot kit nou bann kominote safe at all times e eski:- i pe dir avek sa Lasanble ki zot annan ase transpor e ase Zofisye pou zot respond on time, ler i annan en lapel dan tou bann distrik?

Mersi Mr Speaker.

MINISTER CHARLES BASTIENNE

Mr Speaker, sa plan ki nou’n met an aplikasyon la, pou le moman i en plan short term pou nou atak problenm akoz an vi ki ti annan konsern.  E mon krwar zot rekonnet poudir i fer en pti pe plis ki 100 zour depi mon’n ganny apwente Minis e deswit nou’n fer, nou’n pran ansanm avek Lapolis, nou’n rod bann mezir pou nou kapab imedyatman arrest sa sityasyon.  E mon krwar poudir nou’n succeed ziska maintenant.

Plan long term, nou pou devlop li evidaman, an mezir ki nou, nou ale.

With regards to transpor, Zofisye.  Wi Mr Speaker.  Konsernan transpor, pou le moman, lakantite transpor ki nou annan i sifizan pou nou kapab fer nou loperasyon.

E dezyenmman, konsernan Zofisye.  An mezir nou pe ale, nou pe vwar nesesite pou nou recruit Zofisye an plis e mon krwar ki letan nou annan en cohort e graduate an Out Lakademi, sa ava ede.  En group 30 ki pou graduate.  Sa ava ede pou nou boost nou Lafors en pe plis, an term lakantite Zofisye.

Mersi Mr Speaker.

MR SPEAKER

Onorab Edmond.

HON ROMA EDMOND

Mersi Mr Speaker.

An vi ki i annan swe par enn de zabitan dan lakominote pour ki zot ti a kontan donn en koudmen Lotorite Lapolis, eski Minis pa pe mazin entrodwir en progranm neighborhood watch ki ava enkli lantrennman apropriye pour sa serten group volonter, pou ede sirvey zot kanton e osi etablir en mekanizm ki pou permet ganny korperasyon e reasir konfyans dan nou piblik?

Mersi.

MINISTER CHARLES BASTIENNE

Mr Speaker, sa issue neighborhood watch, sa i en keksoz ki nou pe diskite, ki pou form parti dayer nou plan long term.  Sa nou’n komans fer bann diskisyon lo la me selman mon pans pa si nou’n pare pou nou komans enplimant li.

Dezyenmman Mr Speaker, anmezir nou ale parey mon’n dir se ki dabor, nou bezwen fer sir ki nou met bann sistenm an plas, pou nou fer sir poudir nou fer tou posib pou nou fer nou sitwayen feel safe e secure.  E mon krwar se sa rol Lapolis e an menm tan maintain Law and Order.

So, mon krwar poudir, Lapolis parey mon’n dir boner, mon krwar nou pe al dan bon direksyon dan sa laliny e anmezir nou ale parey mon’n dir, keksoz i dinamik.  Si fodre sanze i sanze, nou ava amelyore an mezir nou ale, pou nou fer sir poudir nou kapab ganny plis konfyans piblik.

Mersi Mr Speaker.

MR SPEAKER

Onorab Houareau.

HON HERBERT HOUAREAU

Bonzour Mr Speaker.  Mersi Mr Speaker.  Bonzour Minis ek ou lekip.

Eski Minis i kapab dir ek sa Lasanble si Departman Lapolis i annan lentansyon kree en Unit pli spesyalize pou fer crime prevention lo bann semen santye kot teren i tre difisil e kot bann veikil spesyalize off roan, tel ki bann moter spesyalize i kapab ganny servi pou penetre sa bann zone pli vit, pou kapab deal ek bann sityasyon ki nou pe fer fas avek ozordi?

Mersi.

MINISTER CHARLES BASTIENNE

Mr Sepaker, sa i en keksoz ki nou pa’n mazin lo la me nou a konsidere as part of nou plan lon term.

Mersi Mr Speaker.

MR SPEAKER

Onorab Barbe.

HON NICHOLE BARBE

Mersi Mr Speaker.  Mr Speaker, tou dimoun, bonzour.

Mr Speaker, an lir avek larepons Minis, eski Minis i kapab eksplik sa Lasanble kwa ki pe ganny fer pou ranforsi relasyon travay ant Lotorite Distrik e lezot partner kle, dan zefor pou vin pli vizib e efektiv dan kominote?

Mersi Mr Speaker.

MINISTER CHARLES BASTIENNE

Mr Speaker, Lapolis i form parti District Team dan tou distrik e mon krwar ki avek nouvo fason travay, nou pe fer sir ki lo District Team, nou annan Zofisye pli senior ki asiz lo District Team, ki en fason ki i a kapab ede pou kapab ganny plis dabor, pou travay plis an kolaborasyon avek Lotorite Distrik, atraver District Team e osi pou kapab ede avek bann decision making si i annan pou fer e osi kapab akseler, pou anmenn pli devan, okenn bann problenm pertinan.  Ki nou’n vwar dan lepase avek lafason ki Lapolis pe travay atraver District Team, pa neseserman tou sa ki ganny diskite lo District Team ki ariv devan ziska kot Komisyoner Lapolis.  Me nou, nou pe fer sir ki dezormen, nou pe met Zofisye ase Senior lo District Team, egzakteman pou nou kapab ogmant sa langazman ant distrik avek Lapolis.

Mersi Mr Speaker.

MR SPEAKER

Onorab Marie.  Maria Marie-Payet.

HON MARIA PAYET-MARIE

Mersi Mr Speaker.

Mr Speaker, menm ki i enportan note ki i annan bokou zefor ki Minis ek son tim pe fer pou redwir bann krim dan pei, mon ti a kontan demann Minis si i annan en progranm spesifik an plas pour sa bann Zofisye ki pou fer sa kalite travay, sirtou patrol apye, an pre-n-an an kont ki zot bezwen dan en bon leta fizik, avek le bi pou rann zot travay pli efektiv?

Mersi Mr Speaker.

MINISTER CHARLES BASTIENNE

Mr Speaker, taler mon pou koz lo konsernan progranm ki nou pe met an plas with regards to bann Zofisye Lapolis, pou fer sir ki zot annan bann refresher course kontinyel, pou kapab ed zot avek zot devlopman, an term lapros towards manm piblik, lafason ki zot devret pe deal avek manm piblik e osi evidaman, dan kourt term osi, nou pe mazin ki apartir Zilyet/Out sa lannen, nou pe al komans en progranm kot nou bann Zofisye Lapolis dabor i ava fer zot Medical Examination e swivan sa, nou ekspekte ki zot pou komans engage plis fizikman e osi, a lavenir, nou ekspekte ki Lapolis pou kapab fer bann fitness assessment ki nou pou met an plas dapre serten norm.

Mersi Mr Speaker.

MR SPEAKER

Mersi Mr Speaker.  Mr Speaker, eski Minis i kapab dir nou ki’n arive avek sa Unit Community Policing ki ti ganny entrodwir e osi ki arive par egzanp, dan bann distrik parey English River ki ganny deservi par Kordgard Santral ki dan en shift i annan 12 zonm.  Parey Minis in dir, in met plis mendev e letan en Zofisye ki ansarz sa shift i fer bann deplwayman, par egzanp OB Writer sentri e minim dan sa 12 zonm ki zot annan, pa reste zot ase pou zot fer sa patrol parey ki vreman neseser, dan bann distrik parey English River e bann distrik santral.  Ki arive si i annan en legzersis pou zot revwar en pti pe bann mendev ki ganny donnen dan bann shift pou fer sa legzersis?

Mersi Mr Speaker.

MNISTER CHARLES BASTIENNE

Mr Speaker, sa unit Community Policing parey mon’n eksplike boner, i nepli egziste li menm li lo en baz santral.  Community Policing in ganny desantralize e i baze dan tou Stasyon.  E tou Stasyon, tou Zofisye ki baze dan tou Stasyon, zot tonm anba zot Station Commander e dapre progranm:- pour lenformasyon sa Lasanble, nou annan en progranm pour sa ki nou apel Foot Patrol.  Nou annan en progranm ki ganny fer lo en baz tou le semenn e nou pe fer sir poudir tou bann sou-distrik dan Kominote i ganny touse atraver sa progranm ki nou’n met an plas pour bann Foot Patrol espesyalman.

With regards to lakantite Zofisye Lapolis sifizaman pou fer Community Policing.  Mr Speaker, a tou moman, nou annan nou omwen 3 transpor dan sak rezyon, ki pe fer patrol.  Sa i patrol dan transpor e parfwa osi, dan bann landrwa ki en pe izole, zot arete e zot ale e zot fer Foot Patrol pour en serten kantite letan.  Konpare avek sa tim ki nou annan, ki tou le bomaten apartir 8.30 dan tou bann mother Station:- dayer nou annan nou 6 mother Station avek 2 ki nou apel bann mini Station, ki ganny de-plwaye on a daily basis pou zot al dan kominote, pou al fer Community Policing, pou enterakte avek zabitan e osi pou zot kapab, parey mon’n dir boner, pou rod as much lenformasyon ki zot kapab gannyen lo kwa ki pe afekte en kominote.

Me selman, wi.  Nou annan 12 a 15 dimoun dan sak shift.  Wi.  I pa sifizan pou nou kapab fer en Foot Patrol pli efektiv me selman, avek sa ki nou annan, mon krwar poudir, parey mon’n eksplike boner, pour Mont Fleuri, nou pe vwar rezilta avek lapros ki nou, nou pe servi.

Lo kote English River, wi.  Mon konnen poudir i tonm anba Kordgard Santral.  Kordgard Santral i vast me nou ava vwar.  An mezir ki nou, nou ale, parey mon’n dir, si fodre e depandan lo kantite zonm ki nou gannyen avek nouvo recruit ki pe sorti Lakademi an Out, nou a regarde kot fodre boost up nou pou fer li, pou nou kapab fer li vin pli efektiv.

Mersi Mr Speaker.

MR SPEAKER

Bon, an vi ankor inter-connectedness, Kestyon 68 ek 69, nou pou pran sa 2 Kestyon ansanm.

Onorab Pierre.

HON DAVID PIERRE

Mersi Mr Speaker.

Mr Speaker, eski Minis i kapab enform sa Lasanble si Departman Lapolis i annan en Polisi an plas, pou enform manm piblik pozisyon lo en case ki zot in anrezistre?

E lot Kestyon Mr Speaker.  Vi ki i en konsern Nasyonal, eski Minis i kapab donn sa Lasanble detay lo lakantite cases ki CID in anrezistre, konbyen ki’n al Ankour, konbyen ki ankor anba lenvestigasyon, konbyen ki’n ganny met akote akoz en mank levidans e konbyen ka ki’n fayle, ki pe ganny deal avek lo nivo distrik oubyen santral e non pa avek CID?

Mersi Mr Speaker.

MINISTER CHARLES BASTIENNE

Mersi Mr Speaker.  Mersi Onorab pour Kestyon.

Mr Speaker, ankor enn fwa mersi pour ou permisyon pou pran sa 2 Kestyon ansanm, vi ki zot konekte.

Wi, i annan en Polisi pou enform piblik lo pozisyon en case ki’n raporte.  Ler en case i ganny raporte, i ganny rikorde dan Lokirans e osi dan Crime Book.  Apre sa, case i ganny allocate avek en Zofisye CID ki fer lanket, pour ki lanket i komanse.

Depi Avril, Lapolis in desantraliz servis CID, ki mon pou koz lo la en pti pe pli tar.  Sa Zofisye CID i responsab pou travay lo sa case depi komansman depi sa case i konplete e pare pou al Ankour.  Par kont si napa ase levidans oubyen kon-ple-nan ek akize i tonm lo kek agreman, la sa Zofisye i kapab ferm sa case.  Pandan lanket, i responsabilite sa Zofisye CID pou reste an kontak avek kon-ple-nan, pou eksplik li deroulman e pozisyon son case.

Sa pa’n touzour le ka dan lepase, me Lapolis pe met lanfaz pour ki sa Zofisye i reste konekte ek son kliyan oubyen sa kon-ple-nan.  Lapolis pe etablir prosedir, pour ki enn fwa case i konplete, sa Zofisye CID i anvoy en let pou enform sa kon-ple-nan ki’n arive avek son case.  Fodre note ki tou case i kapab reouver si i annan nouvo levidans.

Mr Speaker, konsernan lot Kestyon Onorab Pierre, mon pou pas lo enn de statistik.

Depi 1 Zanvye lannen pase, setadir 2014 ziska le 31 Mars sa lannen, in annan en total 4659 ka ki’n anrezistre kot CID.  Parmi, 369 in al kot Lakour.  3196 pa ankor ganny finalize.  Savedir, i pending investigation.  Depi Mars sa lannen, Lapolis in vwar li i neseser pou adopte en nouvo lapros pou rezourd sa.  Sa, se parey mon’n dir boner, desantraliz CID pou asir lefikasite sa servis.  Aktyelman, dan sak Kordgard, i annan an mwayenn 3 Zofisye CID. Sak Zofisye i ganny en serten kantite ka pou travay lo la, depi letan sa case parey mon’n dir in ouver, ziska ki i konplete.  Sa bann Zofisye i kolekte levidans e idantifye okenn sispe e esey rezourd sa bann ka dan en dele letan rezonnab.  Sa nouvo lapros in ed dimoun dan kominote pou konnen lekel Zofisye CID i pran kontak avek pou konn okenn nouvo devlopman lo son case.

Ant Zanvye 2014 ziska Mars 2015 parey mon’n dir taler, selman 8 poursan bann cases kot lanket in konplete e case in al devan Lakour.

Mr Speaker, i en plezir pou mwan anonse ki poursantaz bann ka ki’n al devan Lakour in ogmante konsiderableman pour mwan Avril, sorti 8 poursan pou vin 45.7 poursan.  Sa i reprezant en logmantasyon 500 poursan.  Antretan, Lapolis in osi met an plas en lekip ki travay lo bann ka mazer parey vyol, mert oubyen bann lezot ka vyolans.  Sa ki nou apel bann crime priyoriter oubyen priority crime.  Sa lekip i an operasyonnel depi le 1 Avril sa lannen e zot in ganny 13 ka pou travay lo la e tou le 13 ka in reisi detekte e in al Ankour.  Sa lekip i osi ede dan bann case pou donn gidans, ofer formasyon e on the job training.

Kant a bann ka ki’n ganny anrezistre dan bann lannen avan, Zofisye senior CID pe pas dan tou Stasyon pou revwar sa bann dokiman e pou vwar si i annan posibilite kontinyen fer lanket dan sa bann ka, oubyen pou ferm zot akoz bann ka kot napa levidans.  Fodre note ki Lapolis pa zanmen ferm en case san ki in eksplwat tou posibilite e mwayen pou rezourd bann ka ki’n raporte.  Antretan, Lapolis i annan lentansyon met an plas en sistenm modern pou rikord bann ka elektronik-man.  Sa nouvo sistenm i ekspekte ganny enstale sa lannen, si tou keksoz i al dapre plan.

Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.

Mr Speaker, eski Minis i kapab enform sa Lasanble si zot annan okenn plan pou boost sa Scientific Support Unit pou Lapolis e si zot annan okenn plan pou envestir dan en Forensic Laboratory ki modern?

E dezyenmman, eski Minis i kapab enform sa Lasanble si zot annan okenn plan pou amelyor kalite training ki Zofisye Lapolis i gannyen dan tou bann diferan fields ki Minis in koz lo la e eski sa rate ki Minis in mansyonnen, from 8 percent to 45 percent aktyelman la, eski Minis i konsider sa rate koman en rate ki akseptab?

Mersi Mr Speaker.

MINISTER CHARLES BASTIENNE

Mr Speaker.  Mr Speaker, wi.  Nou annan plan pou nou boost nou Scientific Support Unit.  Pour lenformasyon sa Lasanble, Lapolis lannen pase, 1an edmi pase, in met an plas sa AFI System.  Sa i en sistenm ki ed nou otomatikman detekte bann fingerprint e sa pe ed nou enormeman dan nou bann deteksyon bann krim.

Dezyenmman Mr Speaker, osi pou boost nou Forensic Laboratory, Lapolis an se moman la pe fer diskisyon:- parey mon pou dir dan en lot Kestyon taler, with regards to DNA facilities pou nou kapab gannyen Sesel a lavenir.

Konsernan training Mr Speaker, lo en baz regilye Lapolis i ganny bann training swa atraver Gouvernman Lenn, Gouvernman Larisi, enn de bann pei Linyon Eropenn.  E lapolis in maksimiz sa bann training en mannyer pou dan devlopman kapasite sa bann Zofisye.

Konsernan rate detection, si sa i aksepte.  Mon pou dir ou, sa rate detection ki’n ariv 45.7 poursan i vreman, vreman alaoter, me sel pei ki nou’n kapab konpar avek, akoz lezot pei pa neseserman disclose zot detection rate, se ki nou’n kapab konpar sa avek pour Sid Afrik ki 23 poursan e nou nou’n achieve 45.7 poursan.  E tou zefor pe ganny fer pou nou kapab fer li mont pli o.

Zis pou donn ou en legzanp.  En Kordgard apre ki nou’n desantraliz nou servis, ki’n anrezistre very good result i Anse Aux Pins ki’n rikord 65.7 poursan detection rate e Mont Fleuri li in rikord:-  Me malgre kantite krim ki ganny anrezistre dan rezyon Mont Fleuri, in anrezistre li preski 50 poursan en detection rate.

Mersi Mr Speaker.

MR SPEAKER

Onorab Pierre, Kestyon 70.

Oh.  En moman en.  Onorab Houareau, ou ti annan en siplemanter.  Bon nou a les ……

HON HERBERT HOUAREAU

Mersi Mr Speaker.

Mr Speaker, an vi larepons Minis konsernen sa 3mil case ki pending, eski Minis i kapab dir ek sa Lasanble si Departman Lapolis i annan ase Zofisye CID pou investigate tou bann case kriminel dan letan neseser, ki a kapab deal ek bann kriminel dan en dele kourt term, ki a evite ki bann menm kriminel i kontinyelman komet bann lofans enn deryer lot?

Mersi.

MINISTER CHARLES BASTIENNE

Mr Speaker, mon krwar ki avek nouvo lapros ki nou’n servi avek CID pe marse.  Nou a donn li ankor en pe letan, nou ava vwar ki mannyer nou pou boost li en pe plis.

Me Zofisye CID mon pou fran avek zot, se ki nou ti kapab ganny en pe plis Zofisye CID konpetan, sa ti pou ed nou en pti pe pli, pou nou kapab detekte cases en pti pe pli vit.  E evidaman ler nou deal avek case pli vit, evidaman kriminel pa kapab kontinyen komet krim dan kominote.

So Mr Speaker, pou lemoman, mon krwar ki nou’n achieve en rate ki akseptab, nou ava maintain li.  Antretan si nou kapab ganny plis Detective konpetan pou vin dan Lapolis e by the way, nou pe sey fer mannyer pou nou ogmant konpetans nou bann existing Officers atraver training ki nou, nou pe ofer zot.  Nou annan en trantenn zot e nou pe donn zot on the job training, pou nou kapab fer sir poudir zot vin bokou pli efikas.

Mersi Mr Speaker.

MR SPEAKER

Onorab Pierre, Kestyon 70.

HON DAVID PIERRE

Mersi Mr Speaker.

Mr Speaker, eski Minis i kapab dir avek sa Lasanble si sa nouvo Scheme of Service pour Lapolis ki ti sipoze ganny enplimante sa lannen, pou pran an konsiderasyon asiste fanmir bann Polisye ki reste Mahe e ki pe travay lo Praslin e La Digue?

Mersi Mr Speaker.

MINISTER CHARLES BASTIENNE

Mr Speaker, nouvo Scheme of Service Lapolis pa ankor vin anfors dan son totalite.  Lapolis in enplimant selman en nouvo eleman dan sa Scheme e sa i Night Shift Allowance ki pa ti egziste avan.  Depi lafen lannen pase, tou Zofisye ki pe fer Night Shift pe benefisye R700 par mwan Allowance.  En lot konponan ki pou ganny enplimante dan nouvo scheme i Inducement Allowance ki sorti R700 par mwan pou vin R2400 an montan, depandan lo ran.  Inducement Allowance pou pran lefe le 1 Zilyet sa lannen.

Mr Speaker, anba nouvo Scheme, provizyon in ganny fer pour ki tou bann Zofisye ki ganny de-plwaye lo nenport zil pour plis 3 mwan, i benefisye avek en serten Allowance.  Me lefe ki nouvo Scheme pa ankor vin an fors dan son totalite, mon pa pou kapab donn detay lo bann Allowance ki sa Scheme pe propoze.  Selman, mon kapab dir anba Scheme aktyel, Zofisye ki ganny anvoye lo nenport ki zil pe benefisye avek en one off Disturbance Allowance R800.  E si zot al pour 3 mwan e plis, zot osi ganny en Posting Allowance.  Sa i varye ant R500 a R900, depandan lo zot ran.

Lapolis i osi fer provizyon landrwa reste pour sa Zofisye letan i deplase e en manm fanmir i osi ganny en tiket par mwan pou vizit li.  Zot, zot osi, zot ganny en tiket par mwan pou vizit zot fanmir.

Mersi Mr Speaker.

MR SPEAKER

Onorab?

HON DAVID PIERRE

Mersi Mr Speaker.

Mr Speaker, eski Minis i kapab dir avek sa Lasanble kan ki i ekspekte ki sa Scheme of Service pou vin an fors dan son totalite e eski Minis i kapab osi dir nou si zot in vreman fer en legzersis konsiltasyon o profon avek bann Zofisye Lapolis, avan ki zot finaliz sa Scheme of Service parey in dan son totalite e eski zot pe pran an konsiderasyon pou increase lakantite fwa ki zot donn tiket manm fanmir ki reste lo Mahe pou al Praslin ou La Digue, petet pou sorti 1 fwa pou vin 2 fwa par mwan?  Mersi Mr Speaker.

MINISTER CHARLES BASTIENNE

Mr Speaker, premye bout Kestyon konsernan Scheme kan i pou ganny enplimante dan son totalite, sa i pou tou depan lo resours.  I pou depan lo Gouvernman, anmezir ki mwayen i permet, parey nou’n vwar poudir lannen pase en parti sa Scheme in ganny enplimante.  E sa lannen osi nou’n vwar poudir sa Inducement Allowance in ganny enplimante.  Anmezir ki mwayen i permet e resours i permet, then Gouvernman i ava asiste Lapolis pou li enplimant son Scheme gradyelman.

Si konsiltasyon in ganny fer, mon’n ganny enformen avek Lapolis ki wi, konsiltasyon ti ganny fer avek Zofisye Lapolis, avek tou bann manm Lafors ler sa Scheme ti pe ganny drafte.

Konsernan pou ogmant tiket Mr Speaker, mon pa dan en pozisyon la pou kapab dir, evidaman akoz i pou annan en lefe Bidzeter e mon pa dan en pozisyon pou dir si lakantite tiket ki pou donn manm fanmir pou vizit zot pros letan i al travay lo zil, an se moman, mon pa kapab donn en desizyon lo la.

Mersi Mr Speaker.

MR SPEAKER

Onorab Rose.

HON MARIE-ANTOINETTE ROSE

Mersi Mr Speaker.  Bonzour Mr Minis, bonzour tou dimoun ki a lekout.

Mr Speaker, mon ti a kontan demann Minis si i kapab pran en pti pe letan la ki i dan Lasanble, pou donn nou detay lo saler bann Zofisye Lapolis anba current Scheme of Service. Sa ki pli pti gin ziska sa ki pli o.  Si i posib, bann ran e osi si i kapab dan son kapasite koman Minis, donn nou en lide ki kantite logmantasyon pou annan ler nouvo Scheme of Service i ganny enplimante, ler zot deside enplimant li.

Mersi.

MINISTER CHARLES BASTIENNE

Mr Speaker, sel keksoz ki mon annan avek mwan se starting salary Lapolis.  Pou lemoman en Trainee Constable i komans li avek R4702 e anba nouvo Scheme, i sipoze komans lo R5600.  Sa mon kapab dir, me larestan i pou depan lo zot ran.  Mon napa sa lenformasyon avek mwan Onorab, Mr Speaker.

Konsernan dezyenm parti Kestyon with regards to ler nouvo Scheme i vin an aplikasyon, konbyen zot espekte gannyen an tou.  Parey mon’n dir, se ki mon pa kapab devwal en Scheme, kan en Scheme pa ankor fini ganny aprouve dan son totalite.

Mersi Mr Speaker.

MR SPEAKER

Bon, dan labsans Onorab Arnephy, Kestyon 72 pou ganny demande par Onorab Pool.

HON ANDRE POOL

Mr Speaker, mersi.

Mr Speaker, Kestyon Onorab Arnephy i swivan:-

Swivan vizit ki Minis in fer kot Departman Lapolis tou resaman, eski Minis i kapab donn detay nou Lasanble lo bann areas enportan ki demann latansyon imedyat, pou amelyor kalite servis sorti kot sa Departman?

Mersi.

MINISTER CHARLES BASTIENNE

Mr Speaker, mon bann vizit e rankont dan bann Departman Lapolis pe kontinyen.  Mon’n fer li mon priyorite pou zwenn Zofisye Senior dan Lafors enn fwa par semenn, pou revwar plan travay, depandan lo devlopman e konsern, ki swa dan Lafors oubyen parmi popilasyon, pou nou vin pli azour avek realite.

Mon’n osi vizit e rankontre lezot Zofisye dan Lafors e sa pou kontinyen akoz i meyer fason pou konpran vre travay Lapolis.  I annan plizyer sanzman ki’n ganny fer.  Permet mwan donn detrwa legzanp.

Premyerman nou’n ogmant Zofisye dan bann Stasyon.  Avan, ti annan 15 a 16 Zofisye e la in vin 40 Zofisye, partaze dan 3 shift.  Nou’n ogmant transpor ki ti 1 a 2 pou vin 4 a 5 kot sak Stasyon prensipal.  Nou’n ranforsi patrol.  Konmela i annan patrol lo en baz 24erdtan, kot i annan omwen 3 transpor ki pe patrol dan laplipar rezyon an menm tan parey mon’n dir taler.

Rebranding bann transpor Lapolis pou asir plis vizibilite e pou osi redwir labi.  Desantraliz CID parey mon’n dir boner.  Ozordi CID i baze dan tou bann Stasyon.  Sa i permet ki every case has a face parey nou dir.  Sa bann Zofisye CID zot ganny assign avek en case depi konsepsyon, ziska case in al Ankour oubyen fermen.  Sa i permet annan kontinite, pli bon follow up e asire ki dimoun dan kominote i reste konekte e an kontak e enformen avek son case.

Dan Lapolis nou’n osi etablir en maksimum response time of 15 minit ki Lapolis pe deza achieve dan mazorite ka.  Lapolis in met an plas, parey mon’n dir boner, en Automatic Fingerprint Identification System e sa pe ede avek deteksyon, ki avan ti pe ganny fer lo en baz mannyel.

En computer software pou detekte bann cyber crime i deza an plas.  Nou’n entansifye kanpanny arive alive, kot plis dimoun ki pa respekte regilasyon trafik i ganny fix penalty’s e i en deterrent, e i en deteran kont aksidan lo semen i konsernen.

Konstriksyon en Dog Unit lo Praslin, pou asire ki bann piblik lo bann zil i osi ganny bann servis neseser ki Lapolis i ofer.  E Lapolis i swete ki sa unit a asiste e ed lekip lo Praslin pou rezourd krim lo sa zil dan en dele letan pli kourt.

Nou pe fer Marine Police Unit vin operasyonnel.  Travay pou ofer en Servis Lapolis ki efikas e profesyonnel pa fini la.  I annan enn de keksoz ki merit ganny adrese.

Premyerman, lo kote bann Kordgard zot menm, zot demann latansyon, parey mon’n koz lo la boner.  Travay renovasyon in deza komanse lo Kordgard Mont Fleuri, demars i ankour pou rekonstriksyon Kordgard Grand Anse Praslin e osi rekonstriksyon Kordgard Anse Aux Pins.  Diskisyon i ankour osi pou fer renovasyon lo en morso Kordgard Santral.  I osi annan en mank lekipman modern pour Lapolis, pou li kapab fer son travay pli byen.  Parey mon’n dir boner, demars in komanse pou annan bann lekipman e fasilite DNA Sesel.  Lapolis i an kontak avek Interpole e son Zofisye i ekspekte vin dan pei tre byento, pou fer evalyasyon lo bezwen Lapolis konsernan sa fasilite.

Avan lafen lannen, Lapolis pou ekipe avek son prop transpor atraver en India grant.  Letan bann nouvo recruit ki pe pourswiv zot progranm formasyon kot Lakademi zwenn Lafors, Lapolis i annan lentansyon reviz lakantite erdtan par shift. Sa i ava ed bann Zofisye ganny plis repo akoz nouvo fason travay i egzize ki zot lo zot lipye toultan.

Entansifye formasyon pour bann lo nivo middle management, pou zot ganny ase bagaz pou kapab deservi zot fonksyon byen a lavenir.  Parey mon’n anonse pli boner, i pou mandatwar ki tou Zofisye Lapolis i fer en Refresher Course 2 semenn par an, pou zot reste azour avek devlopman.

Nou pou osi ofer formasyon a tou nivo, sirtou lo visible policing ek CID.  Nou met lanfaz lo Customer Care pou amelyor lapros serten Zofisye anver piblik e osi nou pou biff up nou Command Center pou li vin pli efektiv.  Osi, nou annan plan lentrodiksyon en case management system, pou ede rikord tou case elektronik-man depi lo komansman ziska case i al Ankour.  Sa i a permet piblik konnen kote son case i ete a tou moman.

Mr Speaker, Lapolis i en Lafors ki bezwen reste dinamik.  Se pour sa ki nou adapte e fer sanzman fiy e anmezir ki i kontinyen avek son travay.

Mersi Mr Speaker.

MR SPEAKER

Onorab Pool.

HON ANDRE POOL

Mersi Mr Speaker.  Bokou keksoz in ganny dir.

Mr Speaker, mon ti a kontan demann Minis, dan sa bann areas ki in mansyonnen, si i annan en Polisi oubyen bann mezir an plas, pou asire ki i annan en balans ant bann vye Zofisye Lapolis ki annan bokou leksperyans e bann nouvo ki fek antre, ki annan bon ledikasyon, me napa sa leksperyans, pou asire ki an term resours imen, i annan sa balans ki permet en bon fonksyonnman travay dan son Lafors?

E dezyenmman, eski Minis i kapab donn nou en pe plis detay lo plan ki i annan pou Marine Police, kote i ete ozordi e kote i pe ale?

Mersi.

MINISTER CHARLES BASTIENNE

Mr Speaker, evidaman, nou bezwen bann vye Zofisye Lapolis ki’n la avek kantite lannen leksperyans, pou zot kapab kontinyen mentor e donn gidans bann zenn Zofisye Lapolis.  Otan ki posib, nou fer sir ki dan bann Stasyon, i annan en melanz ant bann vye Zofisye Lapolis avek bann nouvo.  E evidaman parey mon’n dir, se ki ler nou bann Zofisye Lapolis i fini Graduate kot Lakademi Lapolis, zot vini, zot tonm anba responsabilite bann Zofisye Lapolis ki annan plizyer lannen leksperyans.

With regards to Marine Police Mr Speaker.  Marine Police Unit in fini pare an term Zofisye.  Zot in fini ganny tou training neseser, me ki nou pe atann nou, se ki nou ekspekte by Out sa lannen, nou pe atann larive 2 bato ki nou’n gannyen atraver donasyon avek UNODC, pou nou kapab komans met Marine Police an operasyonnel.  Me pou lenformasyon sa Lasanble, Marine Police an se moman la, pe travay konzwentman avek Marine Park Authority, with regards to bann serten lensidan ki pe arive Praslin, vizavi bann touris eksetera.

So, pou lemoman, Marine Police i la.  I annan 9 zot an tou.  Zot in fini ganny training neseser e enn fwa ki nou ganny nou resours, setadir nou bato an Out sa lannen, then zot, zot pou vin bokou pli vizib.

Mersi Mr Speaker.

MR SPEAKER

Onorab Payet.

HON DAVID PAYET

Mersi Mr Speaker.  Bonzour tou dimoun.

Mr Speaker, eski Minis i kapab enform sa Lasanble, swivan son vizit dan bann fasilite lapolis, si i dan plan devlopman Lapolis pou kree en Unit Lapolis Zidisyer konpoze par bann Zofisye Lapolis konpetan e avek tre bon konpetans Lalwa e teknik lenvestigasyon, ki pou fer lanket Lapolis dan en fason profesyonnel, ki a envit sityasyon kot Prosekisyon i perdi bann case lo bann tek-ni-kalite e banalite Ankour?

Mersi Mr Speaker.

MINISTER CHALES BASTIENNE

Mr Speaker, mon krwar ki sa i en bon pwen e mon krwar ki nou ava take li on board dan bann deliberasyon, letan nou pe revwar Lapolis dan mwayen e long term.

Mersi Mr Speaker.

MR SPEAKER

Onorab Fideria.

HON EMANNUEL FIDERIA

Mersi Mr Speaker.

Mr Speaker, eski Minis i kapab dir nou, dan sa prosen 3an devan nou, konbyen pou kout Gouvernman an kad pour peyman saler pou bann nouvo recruit, bann lekipman ki pou servi kominikasyon ek lezot e osi si Departman Lapolis, ek sa servis ki lepep i ekspekte, si zot annan lentansyon recruit bann zofisye etranze e si osi, Departman Lapolis pe travay lo nouvo mekanizm pou donn promosyon dan sa Departman?

Mersi.

MINISTER CHARLES BASTIENNE

Mr Speaker, mon napa full detay lo konbyen i pou koute, i koute pour bann lekipman eksetera.  Me mon kapab dir ou se ki, baze lo en Kestyon pli boner, se ki si nou pou entrodwi sa Scheme of Service Lapolis, parey Lapolis ti’n propoze, i sipoze kout nou anviron R60 milyon.  Sa mon kapab dir.

With regards to recruit Foreign Police Officers, i pa dan nou plan imedya pou nou recruit okenn additional Foreign Police Officers pou lemoman.

Mersi Mr Speaker.

MR SPEAKER

Bon, avek sa nou’n ariv a lafen Question Time.  Nou ava ekskiz Minis ek son delegasyon e remersye li pou pas bomaten la avek nou.  E nou, nou ava kontinyen avek nou biznes.

(MINISTRER AND HIS DELEGATION WAS EXCUSED FROM THE HOUSE)

MR SPEAKER

I reste nou ankor prosen 25 Minit.  Onorab Samson, ou annan ou Mosyon.  Ou pou kapab fer li dan mwens ki 25 minit?

Ok, mon ava envit ou alors pou prezant ou Mosyon.

HON DEREK SAMSON

Mersi Mr Speaker.  Bonzour.  Bonzour tou dimoun.

Mr Speaker, Mosyon devan nou bomaten se:-

Sa Lasanble pe demande ki Gouvernman i etablir e swiv en plan bidzeter, pou annan en progranm mentenans pour tou bann batiman e fasilite servis piblik dan Sesel.

Akoz en tel Mosyon Mr Speaker?  Eski pa nou Lavil, kot laplipar nou bann zoli batiman e fasilite servis piblik i ete, tou i paret byen ganny okipe e annord byen prop? Akoz fodre annan en Bidze partikilye, zis pou mentenans batiman e fasilite servis piblik, e tan ki Bidze anyel i fer provizyon pou reparasyon e mentenans sa bann striktir?

Dan lot mo Mr Speaker, i paret pa annan gran problenm lo en tel size.  Wi e non Mr Speaker.

Alor, tou Minister i ganny en Bidze pou travay avek o komansman sak lannen.  E nou konn tre byen Mr Speaker, ki letan Bidze i ganny prezante, i vin koman en plan lo ki mannyer pei pou kapab finans e zer son bann bezwen enportan.  Dan lanvlop larzan sak bann Minister e Sekter Piblik, i annan ordinerman sifizaman Roupi pou kouver tou depans, dapre bann demann e servis ki zot ofer.  I annan finansman pou kouver osi reparasyon e mentenans dan sa bann diferan Minister e Sekter respektif.

I ase enteresan Mr Speaker, ki ler ou get alokasyon detaye sa bann diferan Minister, ou pou remarke ki sak sa bann diferan deskripsyon pou partikilyerman annan zot prop alokasyon, pour reparasyon e mentenans.  En legzanp se Minister Ledikasyon.  Anba son Bidze, sak son bann Seksyon i annan son prop alokasyon pou reparasyon e mentenans.  Par egzanp pour sa lannen ki nou ladan, progranm 4, savedir Ledikasyon Primer i sipoze resevwar R1 milyon 173 pour reparasyon e mentenans.  Tandis ki progranm 5, vedir Ledikasyon Segonder, li i pou resevwar R927 mil.  Ki fer remarke alor ki pour sa lannen, bann Lekol Primer i annan en pli gran alokasyon ki Lekol Segonder, pour reparasyon e mentenans.

Kestyon la Mr Speaker, se eski bann alokasyon i mezirab e byen ganny kalkile?  Eski i ganny fer dapre grander bann batiman, dapre laz bann batiman, dapre leta bann batiman, dapre lakantite dimoun ki vizit sa bann batiman, oubyen dapre en sistenm evalyasyon ki enkorpor tou sa bann mezir ki mon’n fek mansyonnen?

Nou bezwen met tou sa an konsiderasyon letan nou pe mazin etablir e swiv en plan bidzeter, pou annan en progranm mentenans pour tou bann batiman e fasilite servis piblik dan Sesel.  Ki i kapab vedir pour en batiman, letan son lakantite viziter i anviron 50 a 100 dimoun par zour?

Tre enportan Mr Speaker.  E sa i kapab diferan pour bann landrwa parey Klinik, Lopital, Kordgard e menm pour serten batiman ki pe abrit serten Minister an partikilye.

Nou bezwen pran an kont ki demann pour mentenans i bokou fwa ganny determinen par lafason ki nou menm nou bann dimoun nou servi sa bann batiman e fasilite piblik.  Se bann travayer e kliyan sa landrwa ki parfwa kree domaz ek bann batiman e sa fodre arete Mr Speaker.  Kot nou menm nou ki met lanmen sal lo bann miray, kas toilet e son bann lezot fasilite ki vin avek, vol serten pyes avek nou bann batiman e plizyer lezot vilen labitid Mr Speaker.

Wi Mr Speaker.  Si nou regard pli profon, sa bann batiman e fasilite servis piblik, nou pou vwar ki serten sa bann letablisman pa pe neseserman ganny byen mentenir comme il faut.  E sa malerezman, i konpri tou le de, Gouvernman e prive.  Menm dan Sekter Prive, nou kapab vwar en kantite lenstans kot bann batiman e fasilite pa pe tro byen ganny antretenir.

Sa Mosyon ki pe demande ki Gouvernman i etablir e swiv en plan bidzeter, pou annan en plan mentenans pou tou bann batiman en fasilite servis piblik dan Sesel, pe osi dan en fason adres nou Sekter Prive.  Nou nepli kapab Mr Speaker, resevwar servis dan en batiman kot aircon i la me i pa pe marse akoz in andomaze.  Kot i annan lalimyer, me glob ladan in brile e pa ankor ganny aranze.  Kot ler ou antre, ou vwar en seo ou plis ater, pe anpar gout lapli sorti lo tol.  Ki si ou pou sey antre dan en building, ou pou bezwen lager avek son laport avan ki ou pou kapab antre akoz lock in andomaze.  Oubyen letan ou ganny ofer en plas asize, ou pou vwar ou pe asiz lo en sez ouswa en ban ki brannen e pe riske kase.

Mr Speaker, Sesel in ariv tro lwen pou nou kontinyen vwar en tel sityasyon parey.  Gouvernman o pouvwar in depans tro bokou milyon dan sa bann dernyen lannen ki’n koule, lo konstriksyon serten nou bann batiman.  Me par kont, mon pa oule ki nou ganny lenpresyon ki sa Mosyon pe egzazere Mr Speaker.

Nou annan bann batiman ki date depi plizyer lannen dan nou pei.  Bann depi lepok kolonyal e menm bann ki nou Gouvernman, nou Parti, in arive batir tou dernyerman.  Sa bann building i kapab tre avanse an az, me zot ankor zoli e pe akomod diferan kalite servis e kliyan.

Annou get dizon Indepandance House, batiman Queau de Quincy, Liberty House, Labank Santral, batiman Libreri Nasyonal e lezot.  Sa bann building pa zis zoli, me zot bann legzanp koman bann batiman ki pe ganny ase byen mentenir.  Si nou get isi menm kot nou ete ozordi Mr Speaker, nou Lasanble Nasyonal, serten nou bann Lekol.  Tou sa bann landrwa pe ganny bann latansyon ase enportan kot i konsern son reparasyon e mentenans.  Me eski sa bann landrwa i annan en plan oubyen en progranm konpreansiv pour reparasyon oubyen mentenans batiman?  Oubyen zis i ganny fer koumsanmenm?

Dan lot kote, san ki mon bezwen mansyonn zot non, i annan enn de batiman ki zot mentenans pe ganny ase neglize.  Nou bezwen pran an kont ki en bon servis i mars avek konfor, lapropte e labote lanvironnman zeneral, kot sa servis pe ganny ofer.  Ou kapab annan ou sa pli zoli sourir si ou oule, me si ler ou pe akeyir en kliyan, ou lakey pe vin avek dizon en loder sewage system ki’n andomaze depi plizyer mwan.  Vedir alor la i preski pa vo lapenn Mr Speaker.

Pli mal ankor pour en kliyan, se pou tonbe dan peron en batiman akoz tiles in kase oubyen in manke, malgre ki dan sa building i kapab annan bann zoli loder air freshener.

Mr Speaker, sa problenm pour maintenance lo serten nou bann batiman e fasilite servis piblik, i kapab kout nou pei tro bokou.  Pou planifye e met dan Bidze en finansman ekspreseman pour reparasyon e mentenans bann batiman e fasilite piblik i en keksoz primordyal dan peryod ki nou ladan ozordi.  Bon planifikasyon e bon progranm bidzeter i kapab a port bokou benefis pour lekonomi nou pei.  Bann pei byen devlope parey Sengapour, i annan bann legzanp e pratik pou demontre, kot i konsern mentenans bann batiman e fasilite piblik.

Mr speaker, petet Sesel nou pa pou bezwen al tou sa zistans pou fer tousala.  Me nou bezwen kapab demann Gouvernman pou etablir e swiv en plan bidzeter pou annan en progranm mentenans pour tou bann batiman e fasilite servis piblik.  Ki tou Minister e Sekter Piblik, ava san leksepsyon annan en plan serye e mezire lo reparasyon oubyen mentenans zot bann batiman e fasilite piblik.  Ki sa ava ganny fer par evalye bann bezwen e merit, an referans avek reparasyon e mentenans batiman dan sa Minister oubyen Sekter Piblik, avan oubyen pandan prosedir preparasyon Bidze ki zot bezwen fer pou finaliz gran Bidze pei.

Mr Speaker, i vre ki tou bann plan e progranm parey sa enn ki mon pe prezante atraver sa Mosyon, sirtou ler i vedir refer oubyen re aranz nou bann batiman, i kapab kout nou bokou larzan.  Me, en bon progranm reparasyon e mentenans ki’n ganny byen kalkile e mezire, i kapab vedir osi mwens depans lo en nivo lonterm pour nou pei.  I annan bokou lespri inovativ ki kapab ganny adopte pou evit depans dan en plan bidzeter, pour en bon plan e progranm reparasyon e mentenans nou bann batiman oubyen fasilite piblik.

Detrwa legzanp bann Minister oubyen Sekter Spesifik i kapab aranze avek bann staff, ki en zour apropriye i ganny dedye pour tou staff desann e vin fer serten travay reparasyon e mentenans lo zot batiman.

Konmela nou koz bokou lo PPB e CSR.  Ozordi i annan sans pou kapab demann en Lakonpannyen Prive pou ede oubyen sponsor bann resours neseser pou reparasyon oubyen mentenans bann tel batiman ki merit latansyon.

Mr Speaker, mon menm konn Lekol, kot bann paran i ganny envite pou vin ede ansanm avek zot zanfan pou vin penn laklas pandan vakans ki zot zanfan menm i okipe pandan letan skoler.  Nou tou isi prezan nou osi konn plizyer Lorganizasyon non gouvernmantal ki’n adopte plizyer letablisman Gouvernman, pou gard zot an bonn eta, an reparasyon e mentenans.  I annan menm Fondasyon Leritaz Sesel, ki li i annan kapasite pou rod finansman pou ede mentenir bann batiman Gouvernman e menm Prive, dan lobzektif gard bann tel batiman dan bonn eta pour latraksyon tourizm.

Mr Speaker, tou sa i kapab ganny entegre dan en plan Bidzeter, oubyen en progranm mentenans batiman oubyen fasilite piblik.  Dernyen keksoz ki nou pei ti ava oule Mr Speaker, se pou depans larzan dan nanryen ditou e sa i en keksoz inevitab.  Me pou annan en plan Bidzeter e en progranm mentenans pour tou bann batiman e fasilite servis piblik dan Sesel, i pou vedir en kantite savings pour lekonomi nou pei.

Vwala akoz sa Mosyon i ozordi relevan e pe ganny table pour konsiderasyon Mr Speaker.

Mon ti ava remersi ou e remersi mon bann koleg Onorab Mr Speaker, pou siport sa Mosyon.

Mersi bokou.

MR SPEAKER

Bon, okenn ki segonn Mosyon?

HON MARIE-ANTOINETTE ROSE

Mr Speaker, mon ti a kontan segonn sa Mosyon.

MR SPEAKER

Ou ti le entervenir?

HON MARIE-ANTOINETTE ROSE

Wi, mon ti a kontan entervenir.

MR SPEAKER

Ou krwar ou lentervansyon pou mwens ki 10 minit?

HON MARIE-ANTOINETTE ROSE

Mon krwar i pou en pti pe plis ki 10 minit Mr Speaker.

MR SPEAKER

But si sa i leka, then nou ava adjourn ziska 11er.

BREAK

MR SPEAKER

Bon nou ava kontinyen avek deba.  Onorab Rose.

HON MARIE-ANTOINETTE ROSE

Mersi Mr Speaker e bonzour tou dimoun.

Mr Speaker mon’n deside pou siport sa Mosyon ki Onorab Samson in met devan nou Lasanble, akoz mon krwar i en Mosyon enportan e i en Mosyon ki very forward looking. I en Mosyon ki focus lo bann plan pour lavenir Sesel e bann keksoz ki nou pou reelman bezwen asize, met lanmen lo la e regarde ki mannyer nou kapab fer li mars pli byen ki i pe marse ozordi.

I deza egziste Mr Speaker, en progranm mentenans dan bann Departman Gouvernman.  I deza egziste e nou, Bidze i pas kot nou.  Alors, ler mon’n regard dan Bidze, i annan plizyer milyon ki Gouvernman i mete tou le lannen pour mentenans bann public buildings.  E tou le lannen osi, bann Minister i fer en evalyasyon ki progranm mentenans zot pou annan.  Mentenans zot bann transpor, mentenans zot bann batiman eksetera, eksetera.  Me i reste kantmenm dir, ki napa en progranm santral pou priyoritiz bann mentenans, me osi pou fer sir ki menm si en batiman i demann pa en gran sonm, en sonm rezonnab, i gannyen, pou li kapab mentenir son batiman koman en public building.

Nou dir sa Mr Speaker, akoz en lafas en batiman piblik, i lafason ki piblik i vwar li.  Si i en zoli batiman, i prop i annord, i ganny byen mentenir.  Legzanp, nou batiman Lasanble Nasyonal.  Dimoun i vwar ki i en landrwa kot sa dimoun ki ansarz li e bann dimoun ki servi li i annan respe pour sa Lenstitisyon, i annan respe pour sa ki i reprezante.  E i bezwen annord, i bezwen byen.  E malgre sa, nou konnen ki toultan, tou le lannen, i annan en batay pou kontinyen ganny finansman pou maintain sa bann building.

E nou, nou konnen Mr Speaker akoz Bidze i pas kot nou, i pa kout pti gin larzan.  Ozordi zour, i pa kont pti gin larzan pou gard en batiman piblik an bonn eta.  Me nou osi konnen ki si tou le lannen dan Recurrent Expenditure, i annan en larzan fix ki ganny set aside pou fer sir ki nou repas en kous lapentir, ki nou mentenir bann peron ki nou mentenir tou bann fasilite piblik, sa i pou redwir kou long term pou repenn en building an antye, pou refer son tiles, pou refer son flooring, pou refer son ceiling eksetera, eksetera.  E se zisteman sa ki sa Mosyon pe sey demande, pouR ki nou asiz ansanm e mon krwar ler Budget Cycle i vin devan nou Lasanble, nou pou met sa devan Minister Finans, pour ki nou asiz ansanm e nou annan en progranm byen detaye e nou kapab dir, be bon, tel batiman sa lannen pa pou ganny sa sipor akoz i nef, i fek ganny refer eksetera, me nou a focus plito lo tel ou tel batiman.

Akoz i enportan ki nou annan bann fasilite piblik ki ganny byen mentenir e mon bezwen dir kantmenm ki i annan ozordi en gran dezir par bokou Minister, pou fer sir ki serten fasilite piblik i ganny byen mentenir.  Mon a note par egzanp ki batiman MLUH ki ganny servi en kantite par piblik, in ganny refer.  E ler ou get lafason ki in ganny refer, in ganny refer dan en fason ki piblik i pli byen kapab antre e ganny en meyer servis, i pli byen kapab servi bann fasilite e son maintenance i long term.

Mon a donn ou en legzanp Mr Speaker.  Avan, ti annan serten landrwa dan MLUH ki son miray ti blan, ti’n ganny penn blan e an blok.  E nou konnen ler piblik i pas lanmen lo la, tanzantan si piblik pe monte, sa i fer ki the maintenance cost i very high. E ki zot in fer?  Zot in fer li an dibwa.  E menm si i annan, i annan sa wear and tear over the years, son fasad i pli ganny byen maintain. E se sa bann fason mazinen ki nou devret pe mazinen.

Me ozordi si ou antre dan batiman MLUH, ou pou reelman krwar ki ou pe antre dan en landrwa ki pe ofer en servis prive, akoz son batiman i byen, i byen zoli i byen annord e sa i premye lenpresyon ki ou annan lo en landrwa kot ou vin rod en servis.  I akey ou byen e mon bezwen vreman felisit sa bann madanm Sekirite ki travay laba akoz zot fer en bon travay pou akey piblik.  En landrwa kot i annan bokou piblik.

Ozordi si ou antre dan Minister Lasante, ou pou vwar en kantite zefor ki pe ganny mete, pou fer sir ki bann biro piblik, bann batiman eksetera i ganny byen antretenir.  Par egzanp, in annan renovasyon:- gran renovasyon lo Sant Dyaliz, Mr Speaker.  Sant Dyaliz in annan en kantite travay ki’n ganny fer pou remet li alaoter.  Ozordi i annan dimoun ki kestyonn konbyen Gouvernman Sesel i pare pou tret en pasyan Dyaliz.  Ok?  Zot pa kestyonn konbyen milyon sa Gouvernman in mete pou fer sir ki sa Sant Dyaliz i vin en Sant ki alaoter.  E Mr Speaker, reparasyon sa Sant Dyaliz ti en demann dan Question Time ki Lasanble Nasyonal ti met devan Minis, Minister Lasante, 2an pase e sa ti en demann ki ti ganny ensiste dan Bidze.  E ozordi nou pe kestyonnen, si Tretman en pasyan Dyaliz i pli bon marse Sesel oubyen dan lezot pei.  E mon krwar zot in ganny zot larepons.  I annan travay serye ki’n ganny fer pou tret en pasyan Dyaliz e nou, nou krwar ki nou bezwen cut cost.  Me nou osi krwar ki anba Gouvernman Parti Lepep, en pasyan Dyaliz i bezwen ganny meyer tretman posib.

E mon fer sa Mr Speaker, akoz nou pa vwar ki ti dan plan sa Gouvernman tou sa letan pou refer kot bann dimoun i resevwar tretman Dyaliz.  E sa fodre nou pep i note.

In annan en kantite travay ki’n ganny fer, kot i fer Loperasyon dan Minister Lasante.  Savedir, Minister Lasante i annan en progranm pou refer bann Sant.  Ward bann Zanfan, Ward bann Madanm, Ward bann Msye.  Ozordi ler ou antre, i byen prop, i byen annord e pe ganny byen mentenir.  I annan landrwa ki bezwen ganny improve e i dan Bidze sa lannen.  Pour Ante-Natal Care par egzanp, ganny en nouvo landrwa.  E mon krwar i fantastik ki Ante-Natal i ganny sa latansyon sa lannen dan Bidze.  Nou annan Sant Diagnostic ki’n ganny refer e pe ganny byen mentenir.  Nou’n annan Sant Lasante Anse Royale ki’n annan en kantite difikilte avek mentenans e i annan en progranm mentenans ki pe ganny fer.

Nou konnen par egzanp ki nou batiman Lasanble Nasyonal i enn bann landrwa ki ganny byen mentenir.  I annan en progranm tou dilon lannen pou mentenir nou batiman.  Me par kont, i annan serten landrwa, ki vreman nou bezwen revwar lafason ki i akey piblik.  E sa alors, nou pe demann tou Minister pou revwar.

En lot landrwa Mr Speaker ki’n ganny en nouvo fasad, malgre ki sa batiman i en vye batiman se Liberty House.  E ozordi ler ou antre kot Lapos, Lapos i nef.  En vye batiman me en zoli Lapos nef.  E mon ti a kontan felisit bann dimoun laba ki’n fer en travay fantastik.  Ler ou antre dan Liberty House, i en vye batiman me nou’n kapab revwar ki mannyer sa i kapab ganny re amelyore.  I annan bokou lezot travay ki pe ganny fer.

Me sa pa tonm dan kad en progranm.  I tonm dan kad sak Minister.  E nou, nou pe demande ki la ki nou pe viz ver lavenir Sesel, nou pe koz lo sa ‘Nouvo Sesel’ ki nou pe kree ansanm, ki reelman nou asize e nou fer sir ki bann batiman piblik i ganny sa tretman byen, mentenans e en bon zimaz.  En bon zimaz pour servis piblik dan nou pei.

Mr Speaker, sa i osi vedir ki nou bezwen port latansyon avek bann batiman prive ki servi piblik.  Mon krwar i enportan osi ki bann batiman prive i osi akote Gouvernman, annan en progranm mentenans.  Nou’n deza met Mosyon dan nou Lasanble, ki i annan the cost, rental cost keeps going up dan Lavil Victoria, pou rent en pti landrwa, pou rent en magazen, pou rent en pti fasilite pour piblik.  Me i annan landrwa ki ou antre, ki aircon pe koule.  Ou vwar gomon i komans pouse dan kwen.  I annan landrwa ki ou antre, ki Onorab Samson in dir, tiles pe kase.  So, Sekter Prive osi i bezwen ki rent an office space oubyen en public service, dan le sans ki I en servis pour manm piblik, i bezwen osi annan en progranm mentenans.  E mon krwar sa osi i vin kot a kot, ki i bezwen annan kek Lotorite ki koz avek zot, ki dir zot, be mon mazinen petet Planning or whatever ki dir zot, be ou batiman i bezwen annan en standar ki akseptab.

E ler nou pe koz lo tou sa la Mr Speaker, i osi enportan ki batiman piblik e prive i vwar tou meyer fason pou fer sir ki I annan fasilite pour bann dimoun ki annan serten dezabilite.  Ok?  Kekfwa en lift. Nou pe koz lo ‘Nouvo Sesel’, nou pe koz lo kreasyon ‘Nouvo Sesel’, nou bezwen mazinen ki i annan bann dimoun ki annan dezabilite and they have their rights. Nou bezwen vwar tou fason posib, pou fer zot ganny akse avek sa bann fasilite.

Fasilite Mr Speaker, i osi enkli fasilite piblik ki pa batiman.  Parks and Gardens, ki enkli public toilets e la nou very happy ki finalman, osi apre en Kestyon ki ti vin dan nou Lasanble isi, MLUH pe finaliz:- in preski finaliz a public toilet in Town. E i annan en bon travay ki pe ganny fer, pou fer sir ki i annan fasilite twalet piblik dan plizyer distrik ki ganny frekante.

Mr Speaker, sa Mosyon i enportan akoz nou, lo kote Parti Lepep, nou:- e Prezidan in fer li tre kler ki i pa get, i pa pe get the next Election. I pe get the next generation. I pe regard sa zenerasyon ki pe monte, sa zenerasyon ki anvi vwar nouvo keksoz, sa zenerasyon ki anvi vwar en Lavil ki ganny byen antretenir, en Lavil ki ganny byen mentenir.  Sa zenerasyon ki anvi vwar ki son servis piblik i reponn son lapel.  Sa zenerasyon ki anvi vwar en Gouvernman ki o pouvwar ki serye, en Gouvernman ki o pouvwar ki kree stabilite, en Gouvernman ki o pouvwar ki pa vin bat latet dimoun, en Gouvernman ki o pouvwar ki fer sa ki i kapab fer, en Gouvernman ki o pouvwar ki annan en plan e i pou dir ou, be mon kapab fer sa la, nou a fer sa lannen prosenn, nou a fer sa lannen apre.  Me nou annan en plan finansyel, lo ki mannyer pou zer sa pei.

E avek sa Mr Speaker, nou demann Lasanble pou siport sa Mosyon e nou demande ki at Budget time, ki Minister Finans i zwenn nou, pou nou regarde ki mannyer nou kapab met sa Mosyon an aplikasyon.

Mersi Mr Speaker.

MR SPEAKER

Onorab Bristol.

HON ALDERIC BRISTOL

Bonzour Mr Speaker e tou koleg Onorab.

Mr Speaker mon oule entervenir lo Mosyon Onorab Samson akoz i en size ki mon krwar i tre enportan dan konteks Sesel, lo pwennvi lekonomi nou pei denozour.

Mr Speaker, dan term konstriksyon, i ganny dir ki the best form of maintenance is to properly design and properly build the structure in the first place. Savedir, pou koup depans lo maintenance lo en batiman a kour e a long term, i esansyelman enportan ki an premye lye, sa batiman i ganny byen design e ganny byen konstrir.  Sa i tre enportan akoz lafason ki en batiman i ganny design pou deservi son fonksyonnman e zefor ki ganny mete pou asire ki konstriksyon i byen ganny egzekite, i annan en kantite lenpak lo ki kantite e kalite maintenance pou bezwen ganny fer dan lavi, savedir dan life span sa batiman.  E ki kantite larzan sa bann maintenance pou kout propriyeter e dan laplipar ka ki nou pe koze la, propriyeter sa bann gro batiman mostly piblik, se Leta li menm.

Mr Speaker avan ki mon eksplwat sa size anba sa Mosyon mon krwar i tre enportan ki pour Lepep rekonnet ki anba sa Gouvernman SPUP/SPPF Parti Lepep, en kantite batiman ou striktir in ganny konstrir pou servi sa pep Seselwa.  E sa se bann fasilite ki ganny mete a servis piblik, pou asire ki ou pa ganny mouye, ou ganny koud soley letan ou pe esper bis, pou asire ki i annan fasilite konvenab ler ou antre dan en Biro Gouvernman, be it sa pti bus shelter ziska sa gran Bus Terminal, be it sa pti kyosk pour Artizan ziska sa gro Independence House, be it depi sa pti Klinik Takamaka ziska sa gro Lopital Sesel.

Sa Gouvernman in konstrir e i ankor pe konstrir, pou fer sir ki sa pep i ganny le meyer e pou asire ki personn pa vin demolir pou rekonstrir sa ki sa pep pe zwir avek fyerte.

Mr Speaker, parey mon’n fek mansyonnen i annan diferan kalite batiman avek striktir ki Leta in konstrir, or ki Leta pe zere.  Sakenn ti ganny konstrir dan son lepok avek son bi spesifik e parey en et imen, en batiman osi i annan en life span parey nou dir.  E parey en imen ki tanzantan i bezwen en keksoz pou asire ki i reste an bonn sante e for, en batiman osi i bezwen serten maintenance, pou asire ki i reste byen prop e pli enportan ankor, ki i reste touzour fonksyonnel pou deservi son fonksyon avek ki in ganny fer.

Mr Speaker, i annan 4 main kalite maintenance kot building i konsernen.  Permet mwan pou al en pti pe teknik lo sa size, pou apre kot nou pou kapab konpran ki bearing finansyel ekonomik sa i kapab annan lo nou Bidze Nasyonal.

Nou annan premye sa ki nou apel preventive maintenance e li i plito focus lo prezerv lentegrite fizik e valer sa propriyete, ou batiman.  E li se pou vwar problenm ki kapab arive e pou adres zot avan ki zot vin en problenm ki kapab denigre leta sa propriyete.

Dezyenm se routine maintenance e li i aktivite maintenance ki pli frekan atraver mentenans routin e progranmen pour sa batiman or propriyete.  Bann tel legzanp e netway Lofis e deor, netway dalo eksetera.

Trwazyenm kalite se corrective maintenance. Sa i bann maintenance ki permet sa batiman pou kontinyen fonksyonn normal e ki kan i arive, i devret ganny adrese o plito posib.  Bann tel legzanp ki tonm anba sa kategori se pou ranplas en aircon, kase pou ranplas en twalet andomaze, pou debous en rigol ou en dalo.

E katriyenm se deferred maintenance. E li i arive letan lezot form maintenance pa’n ganny fer e esansyelman, i ganny vwar plito koman en reparasyon ou ranplasman.  Or improvement an rezilta mankman aplikasyon sa 3 lezot form maintenance ki mon’n mansyonnen oparavan.

En legzanp tipik i dan lenstans kot en twalet kase pa’n ganny sanze deswit e delo koule in end up afekte tiles.  La prezan, dan plas sanz zis en twalet ou pou bezwen sanz sa bann tiles afekte osi e vwala kot cost i triple.

Mr Speaker, tou sa bann form maintenance i anmenn son kou bidzeter.  Plis ki keksoz pa ganny adrese boner, plis kou mentenans ki parfwa i vin plito en kou reparasyon i vin pli o e i kout pei plis.  Parey loter Mosyon in mansyonnen e sizere, i alors enportan pou annan en bon plan mentenans.  Se atraver en bon plan mentenans ki pou determin konbyen apepre i kapab kout Gouvernman pou adres mentenans lo bann striktir e batiman fasilite piblik.

Mr Speaker, Sesel nou annan dekwa dimoun avek ekspertiz e kalifikasyon neseser, ki sa sistenm ki’n prodwir pou fer bann tel travay.  I annan bokou plis avek mentenans en propriyete ou batiman, ki zis fikse ou repar keksoz ki’n kase.  I ariv lenstans kot kou mentenans i telman o, ki i nesesit reparasyon e adaptasyon mazer, pour ki dan long run, kou reparasyon i desann konsiderableman e sa i tir bokou presyon bidzeter.  En legzanp tipik se Independence House.  Tou dimoun ki’n al dan sa batiman ti kapab vwar vizyelman leta enteryer sa  batiman.  Malgre ki son striktir i ankor an bonn eta e stab, me kou mentenans entern ti pe vin tre egzorbitan.  Koman en teknisyen, mon konpran e apresye desizyon pou enn fwa pour tou fer reparasyon e adapte batiman pou fit bann sanzman e moderniz lanvironnman, pou reste azour avek devlopman ek teknolozi.  E la tou dimoun i kapab apresye en nouvo Independence House, avek en latous konfortab e modern .  E mon plis ki asire ki kou mentenans i preski 0 la an se moman.  Se la kot bann diferan form mentenans i antre, sirtou mentenans prevantif e mentenans routin.  E se la kot nou kapab redwir kou bidzeter e sa larzan i a kapab ganny mete dan bann lot landrwa ki pli esansyel, tel ki Lasante Ledikasyon e Servis Sosyal pour nou pep.

Now Mr Speaker, i osi annan sa lot laspe lo ki mannyer occupance travayer or piblik an zeneral i osi zwe en rol, pou asire ki bann striktir i reste an bonn eta e pou redwir kou mentenans in the process.  Ler nou kas mwens, nou andomaz mwens, nou fer mwens vandaliz, sa i ede pou annan mwens kou mentenans.  Apre tou, nou bezwen realize ki larzan pou fer mentenans sa bann propriyete piblik i sorti dan Bidze Nasyonal e i osi tax payers’ money.  Mon pou alor profite pou enplor e demann nou dimoun pou pran zot responsabilite e respe propriyete piblik.

Mr Speaker, Sesel pe kontinyen bouze.  Sesel pe kontinyen devlope.  Seselwa pe kontinyelman zwir inovasyon.  Sa i en travay lekip.  En partnership ant en Gouvernman serye, anba gidans en Prezidan avek en vizyon ki ferm e realistik e son pep e osi bann partner prive.  Nou pa bezwen esper 100an pou vwar progre.  Nou pa bezwen demolir pou rekonstrir.  Larealite i la pou nou vwar e apresye.  Lebra i ouver pou nou tou, san eksepsyon, donn lanmen kontiny batir sa pti pei.  Pou nou tou donn lanmen maintain sa pti pei parey nou’n maintain nou Independence House. Napa letan pour politik bon marse e politik cow boy/cow girl, akoz sa pou kout nou tou Seselwa bokou plis ki zis pou mentenir nou bann building e nou pti Sesel osi an zeneral.

Mr Speaker, avek sa 2 mo, mon anmenn mon sipor pour sa Mosyon.

Mersi.

MR SPEAKER

Onorab Vangadasamy.

HON SHERYL

VANGADASAMY

Mersi Mr Speaker.

Mr Speaker, Manm koleg Onorab, bonzour.

Pandan sa 37an ki nou Gouvernman in o pouvwar, nou bezwen admet ki’n annan bokou devlopman, bokou sanzman, bokou lenfrastriktir.  Kot en moman, dan nou Sesel kot nou vye paran ti viv dan pti payot, foutaleza e lakaz foumba.  Kot nou parkour lazournen, ti komans desann apye dan bann pti santye.  Servi pous-pous koman enn bann moman, kot bann sel servis pous-pous koman en mwayen transpor.  Kot en moman, kot bann sel gro batiman, oubyen zoli batiman, sa lepok ti bann grand kaz pour bann gran blan.  Ozordi, plis ki 37an apre, nou koman en zenn demokrasi, koman en pti leta zil avek defi fizik nou teritwar e vilnerabilite nou lanvironnman, koman en pti Nasyon avek limitasyon resours, dan sa domenn kot tou sa ki konsern lenfrastriktir, nou bezwen admet.  Nou bezwen onnet.

Wi.  Bokou in ganny fer.  Bokou progre in ganny fer.  Semen partou.  Gro, gro e zoli batiman prive e piblik e bokou zoli lakaz atraver nou bann zil.  Sa devlopman i demontre nou progre nou bann lakonplisman, koman en pti pei, en pti leta zil.  Nou pa’n mal debrouye.  E ozordi, avek bokou progre e rekonesans nou parkour e an admeton ki bokou in fer e in byen fer e tou konsyan ki nou’n ariv sa letap pou amelyor kot nou’n arive e revwar a lonterm, ki mannyer nou pou anmenn plis progre e mentenir tou sa bann lenfrastriktir ki nou’n met an plas.  E osi, bann nouvo ki nou pou met an plas.  E se dan sa loptik ki loter Mosyon pe anmenn sa Mosyon.  Nou’n ariv dan sa letap pou devlop en bon progranm reparasyon e mentenans pour nou bann batiman e fasilite servis piblik.  Nou bezwen realis ki i en konsern, a sak prezantasyon Bidze, ou vwar oubyen ou pa pe vwar alokasyon Bidze pou  mentenir bann tel batiman.  Ozordi, se Departman Piblik Administrasyon ki propoz e sarz alokasyon bann lespas dan bann batiman piblik.  E mon pe propoze, ki atraver sa Departman, ki annan en plan e progranm santral either atraver sa menm Departman, oubyen en Minister konsernen, pou oversee mentenans bann tel batiman e lenfrastriktir.  Kot resours adisyonnel i ganny donnen e met akote.  Ki okenn nouvo batiman ki ganny fer, tel parey sa enn nouvo deryer Independence House, ki annan en progranm byen detaye e en plan mentenans a lonterm.

Mr Speaker.  Dan sa letap nou progre, i bann sizesyon e i bann moman kot nou antreprann en mekanizm dirab e a lonterm, pour mentenans sa bann tel lenfrastriktir.  Mon osi pe rekomande ki i annan en Maintenance Contract ki ganny ofer ek Sekter Prive oubyen lezot ki enterese pou ofer zot servis oubyen sa Kontra, pou oversee mentenans tou bann batiman Gouvernman, oubyen bann batiman piblik, ki ava koman enkli dan sa progranm lonterm, ki pou kontinyel pou asir bon mentenans e reparasyon nou bann lenfrastriktir piblik.

Mr Speaker, dan sa progre, ek bokou devlopman ki’n arive, in osi annan en sanzman dan konportman e latitid serten nou pep.  Ozordi, nou modern, teknolozi avanse, nou lifestyle in sanze e se dan sa loptik, ki nou osi bezwen renouvle nou sans lapartenans a nou bann lenfrastriktir piblik e bann batiman.  Se dan sa lespri ownership ki landrwa batiman kot nou travay i parey e i merit parey i kot nou e i pou nou.  E ki nou, koman sitwayen ki pe servi sa bann servis e batiman, ozordi pou nou bann ki pe travay osi dan sa menm batiman, nou bezwen santi nou sa sans responsabilite, sa sans lapartenans, lanmour prop, pou kit sa bann landrwa prop.  Pou nou pa kase, pou nou pa fer vandaliz e asire ki lo en oter kot i fer nou Lorganizasyon, nou Departman e nou piblik fyer.

Mr Speaker, ozordi nou bezwen regard bokou pli devan.  Nou’n ariv lwen dan sa pei.  Nou pe byen bouze koman en pei.  Nou’n fer bokou e i annan ankor bokou pou fer e nou bezwen kontinyen lo sa larout progre.  E nou bezwen donn sa sipor, met bann propozisyon e diskit bann mekanizm pozitiv, dirab, amelyor sa ki nou’n fer e aranze.  Dan sa loptik e tou konsyan kontribisyon tou sitwayen atraver zot kontribisyon tax, zot servis, ki nou pe debat lo sa Mosyon e ki nou pou siport sa Mosyon.

Pou ou sa zenn ki pe rezouir ledikasyon gratwit dan sa Lekol, pou ou sa madanm ki tanzantan al rann en vizit ou Zofisye Lakaz Independence House, pou ou sa pasyan dan Lopital Victoria, pou ou sa madanm ki pe al kolekte ou parsel kot Lapos.  Sa Mosyon i garanti ki sa bann tel servis bann tel batiman, i ganny garde lo serten nivo pou ou, pour en meyer servis, pou nou mentenir li.  Annou mentenir nou progre kot nou’n arive.

Mon pou siport sa Mosyon.  Mersi

MR SPEAKER

Onorab Leader Lopozisyon.

HON DAVID PIERRE

Mersi Mr Speaker.

Mr Speaker, Mosyon ki devan nou pe demande ki Gouvernman i etablir e swiv en plan bidzeter, pou annan en progranm mentenans pour tou bann batiman e fasilite servis piblik dan Sesel.

Mr Speaker, si ou fer en batiman, ou bezwen osi annan en plan mentenans.  E si ou fer en batiman e ou napa en plan mentenans, then ou pou ganny gete koman totalman iresponsab.

Premyerman, okenn batiman piblik ki ganny fer, i ganny fer avek larzan piblik.  I hard earned tax payers’ money ki ganny depanse pou fer sa bann batiman.  E laplipar, si pa tou bann batiman piblik ki ganny fer, i bann batiman ki atraver ki en servis i ganny donnen.

So, i annan 2 laspe ki mon anvi vwar la.  I annan sa laspe lenpak lo kalite servis ki ganny donnen letan napa mentenans, apre i annan sa laspe finansyel ki vin en:- ki kapab ganny gete koman:- si napa mentenans, i kapab ganny gete koman en inefficient use of public funds.

Les mwan donn legzanp.  Now, lo nivo servis, annou get 2 Sekter.  Annou get Ledikasyon e annou get Lasante pou mwan ilistre mon pwen.  Si ou pe konstrir Lekol, ki enportan pou ou donn ledikasyon ou pep, ou bezwen fer sir ki ou konstrir bann laklas, bann lekol kot i annan en lanvironnman ki conducive to learning. Bann zanfan ki al lekol pou zot kapab aprann pli byen, zot bezwen pe antre dan bann laklas ki prop, zot bezwen pe antre dan bann laklas ki fer zot santi zot konfortab, fer zot santi zot safe pou zot asize pou zot ekout zot Mis e pou zot aprann.  E letan zot aprann pli byen, then sa i annan en lavantaz pour pei.  Ou pa kapab, nou pa kapab dan sa lepok ki nou’n arive ozordi, vwar en laklas ki napa en lafnet, oubyen en laklas ki son sez in kase, oubyen en laklas ki son difil kouran pe anpandan e pe koz en problenm safety pour nou bann zanfan.  Nou bezwen vwar bann laklas ki lo standar, ki prop ki alaoter.  E pou sa kapab arive over the long term, nou bezwen annan en progranm mentenans ki fer sans, en progranm mentenans ki kapab respond a bann bezwen a bann bezwen mentenans sa bann lenfrastriktir. Sa i en legzanp.

Dezyenm legzanp i annou pran Sekter Lasante dan en Lopital.  Seselwa i ekspekte koman en legzanp, ki nou antre, ler nou al dan en Lopital oubyen dan en Klinik, nou pe antre dan en Lopital ki prop, nou pe antre dan en Lopital ki ganny byen mentenir.  Oubyen nou pe antre dan en Klinik ki prop e nou pe antre dan en Klinik ki ganny byen mentenir.  Si sa i pa leka, then otomatikman, kalite servis ki sa kliyan i dir ou in gannyen dan sa Lopital oubyen dan sa Klinik, i ganny afekte par lefe ki dizon sa Klinik i pa prop, oubyen bann ban lo ki ou pe asize pou esper Dokter in kase, oubyen napa sez eksetera, eksetera.

So, premye morso mon lentervansyon i se ki nou bezwen en bon standar mentenans, pou nou garanti sa kalite nivo servis ki nou kapab donn Lepep Seselwa.

Now dezyenm morso, i sa laspe finans li menm.  Mon krwar ler ou fer, ou konstrir en lenfrastriktir, en building.  Right?  Premyerman, ou bezwen annan en plan lo ki fason ou pou servi sa building.  Right? E dezyenmman, ou bezwen fer sir ki ou annan en plan pou mentenir sa building.  Mon krwar si sa pa ganny fer, then i pou ganny gete konmkwa nou’n mal envestir larzan piblik.  Case in point oubyen legzanp ki nou kapab servi lo enn bann batiman ki’n ganny konstrir not too long ago, ki ti annan en gran outcry piblik an relasyon avek sa.  E sa sete batiman la Le Chantier.  Nou rapel tre byen sa batiman ti komans fer e ti kout plizyer milyon Roupi tax payers’ money. E sa batiman pa’n ganny terminen, pa’n ganny fini for a long time e dimoun in vwar poudir nou larzan in mal ganny envestir e nou larzan pa’n byen ganny servi.  Sa i en legzanp.  Akoz?  Akoz a mon avi, ti napa bon planifikasyon usage and of course, i ti ganny enterprete koman en inefficient use of public funds.

Now, dezyenm bout i se ki ler en batiman i pa ganny mentenir, in the long run, sa batiman pou tonm an rin bokou pli vit ki si sa batiman i ganny mentenir.  E si ou pe envestir en kantite larzan piblik dan en batiman kot ou pe les li tonm an rin akoz ou pa’n fer en progranm maintenance, again i pou ganny vwar koman en gaspiyaz larzan piblik.  So, ou pa kapab win si ou pe konstrir me ou napa en plan pou maintainTherefore, i mon lopinyon senser ki i enportan ki nou annan en plan maintenance pour tou lenfrastriktir ki ganny konstrir lo non Lepep Seselwa e an ser van larzan lepep Seselwa.  So dan mon avi, sa Mosyon i en Mosyon ki enportan, me mon pa ti pe ekspekte ki after 37 years in power, nou ti pou vwar en tel Mosyon aparet devan nou, akoz leksperyans en Gouvernman ki’n o pouvwar for 37 years, i devret egzize ki sa i vin en fe e non pa en keksoz ki ozordi nou pe demande ki arive.

Avek sa 2 pti mo Mr Speaker, mon ava dir poudir mon pou les bann Manm lo lot kote latab pou zot siport zot Mosyon.

Mersi Mr Speaker.

MR SPEAKER

Onorab Ghislain.  Bon, Right of Reply.

HON DEREK SAMSON

Mr Speaker, mersi.  Mon ti a kontan remersi bann entervenan lo sa Mosyon.

Mr Speaker, apre tou bann deba, Mosyon i fer nou reflesir ki nou pei e sa Gouvernman o pouvwar in batir Sesel.  Ki apre 38an, i annan keksoz tanzib pou nou vwar, pou nou konsyan lo kantite ki nou pei in kapab fer pou batir bann batiman, bann servis, bann fasilite ki ozordi nou pe rezouir.  E parey mon ti dir dan lentrodiksyon Mosyon Mr Speaker, ki i annan bann batiman ki date depi plizyer lannen e ki’n ganny batir byensir dan diferan peryod.  E nou ankor pe servi zot.  Nou ankor pe mentenir zot.  E an konklizyon, ki mon pe prezante Mr Speaker, Mosyon pe demande ki nou kapab annan en plan serye, atraver en lapros bidzeter, pou garanti ki nou batiman i reste touzour zoli, an bonn eta e pe ofer bann bon servis.

Mr Speaker, nou pe vwar atraver sa Mosyon, ki i en Mosyon ki pe get byensir lepase e byensir lavenir Sesel.  Nou pa ankor fini.  Sa Gouvernman pa ankor fini batir sa pei, nou pei.  E vedir, nou pa ankor fini batir sifizaman batiman, pour ki nou kontinyelman kapab deservi nou pep.

Parey in ganny refer sorti dan deba, sa ki nou pe demande atraver sa Mosyon i bezwen pran an kont ki letan nou pe mazin etablir en plan bidzeter pou annan en progranm mentenans e reparasyon pour nou bann building, sa i bezwen komans lo planifikasyon bann lezot batiman ki nou pou konstrir pour lavenir.  Me Mr Speaker, i pa antyerman responsabilite Gouvernman, parey in ganny dir ki pou mentenir nou bann batiman.  Si nou pe kontinyelman kase, si etidyan pe kontinyelman kas sez, kas lafnet, sali laklas, i pou preski pa vo lapenn.  Gouvernman pou kontinyelman vwar li pe bezwen a tou lannen, met plis resours, depans plis larzan, pou garanti ki nou bann batiman nou bann fasilite i reste aksesib e an bonn eta pou nou servi.  So, pou kontinyen pou dir i devwar e responsabilite nou tou pou ed Gouvernman dan sa plan, dan sa misyon pou annan en plan bidzeter e en progranm mentenans pour nou batiman.

E Mr Speaker, pou dir ki Gouvernman pa’n responsab dan son responsabilite pou gard nou bann batiman dan bonn eta, i pa antyerman korek akoz nou pe demande la atraver sa Mosyon, ki Gouvernman i kontinyen fer son progranm garanti ki bann building i reste an bonn eta, me ki nou fer li lo en nivo en pti pe pli disiplinen, pour ki parey in ganny dir, letan peryod Bidze in arive, pou nou balans bann priyorite, ki nou fer li byen.  Ki bann batiman ki’n batir resaman i ganny dele pou serten travay mazer renovasyon.  E bann ki nou konnen i pli vye parey nou’n koz lo la Independence House e plizyer lezot, i bann ki pli avanse.  Nou kapab donn li en nouvo laparans, en nouvo regar dan lizye nou piblik.

Alors Mr Speaker, mon krwar ki Mosyon devan nou i kler enough pou nou kapab konpran lenportans e lobzektif, pour ki Gouvernman vreman i etablir e swiv en plan bidzeter pou annan en progranm mentenans e reparasyon pour nou bann batiman e fasilite piblik.  E mon krwar nou Gouvernman i merit ganny felisite pour tou sa ki in fer e ki i pe fer, pou kontinyelman garanti ki nou Nasyon, nou dimoun i kontinyelman viv dan en pei kot bann servis, bann fasilite i aksesib e annord, dan bonn eta pou nou servi.

So mon ti a demann tou koleg pou vreman siport sa Mosyon.

Mersi bokou.

MR SPEAKER

Bon, in ariv ler pou nou pran en vot.  Tou bann ki an faver?  Okenn ki kont?

Bon, Mosyon in ganny aprouve.  E nou pou donk alor adjourn ziska Mardi prosen, 9er bomaten.

(ADJOURNMENT)