::
Home » Verbatim » Verbatim - First Term 2015 » Tuesday 7th April, 2015

Tuesday 7th April, 2015

NATIONAL ASSEMBLY OF SEYCHELLES

Tuesday 7th April, 2015

The Assembly met at 9 am

National Anthem

Moment of Reflection

Mr Speaker in the Chair

 

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.  Tou bann ki pe ekout nou.

Ozordi, mon’n ganny advise par le 2 Leaders ki i annan en konsantman ki nou pou fini en pe pli boner akoz apre midi i annan Lanterman Pret, Per Charles Walimba ki ti mor par en aksidan Praslin e bokou Manm Parlman pe atenn sa Lanterman ki pe ganny fer 1er apre midi.  So, sa i vedir otomatikman ki Mosyon ki lo Order Paper e sa se Mosyon par Onorab Samson:- Onorab Samson, ou Mosyon nou ava defer li pour next Tuesday.

Bon, nou ava komans avek bann Kestyon.  Ozordi avek nou, i annan Minis pour Lasante, Minis Larue ki vin reponn plizyer Kestyon konsernan son Minister.  I pou pli tar osi donn en Statement lo leta lasante nou Nasyon.  Me ant sa, pou annan en Kestyon Dirzans par Onorab Leader of Government business, pou Minis pour Resours Natirel, lo Senir Plim.  Mon krwar sa term kreol ki zot servi, Senir Plim.

Bon, nou ava komans avek Kestyon 39.  Onorab David Pierre.

 

HON DAVID PIERRE

Mersi Mr Speaker.  Bonzour Minis avek ou delegasyon.  Bonzour tou Manm koleg Onorab e bonzour tou bann ki a lekout.

Mr Speaker, eski Minis i kapab enform sa Lasanble si son Minister i annan en polisi pour waiting time, pou vwar Dokter dan bann Klinik atraver pei?  Mersi Mr Speaker.

 

MINISTER MITCY LARUE

Mersi Mr Speaker.  Bonzour Mr Speaker.  Bonzour tou Manm Onorab e tou dimoun a lekout.

Mr Speaker, Minister Lasante pou lemoman, napa polisi konsernan waiting time pou vwar Dokter dan bann Klinik atraver pei.  Waiting time pou esper servis Dokter dan Klinik i depan lo plizyer fakter, tel ki servis Dokter ki sa pasyan pou gannyen.  Par egzanp servis Dokter dan Twa Zonn kot Lopital Sesel i baze lo apwentman e bann dan bann Sant Lasante dan kominote i baze lo apwentman e walk in.

Lakantite dimoun ki anrezistre sa zour pou vwar Dokter lo baz walk in, bann ka irzans, zanfan ek vye dimoun malad, lakantite Dokter ki pe travay, konpetans sa Dokter, konpleksite bann ka ki Dokter pe vwar, pasyan ki vin osi pli boner ki son apwentman, pasyan ki sorti dan lezot distrik, ki vin rod servis e tretman, par egzanp dan Sant Lasante English River.  E pasyan osi souvandfwa ki annan preferans pou vwar en Dokter spesifik.

I annan en pe letan ki mon Minister pe swiv sa tre pros.  Nou’n deza fer en travay lo la deza.  Mon ava fer mansyon serten lapros ki’n ganny adopte avek sikse.  Par egzanp, bann pasyan i ganny ler spesifik pour zot apwentman, pasyan i ganny enformen ler waiting time par egzanp pe prolonze, triyaz osi i ganny fer ler i annan mwayen.  Par egzanp, ler i annan ase staff available, ledikasyon piblik ki zot bezwen gard zot apwentman dapre zot ler e osi pou raport dan zot Klinik osi tan ki posib.  E osi, serten servis spesyalize ki’n ganny desantralize pour redwir lo lakantite pasyan ki vin dan Twa Zonn.

Mersi Mr Speaker.

 

MR SPEAKER

Bon, okenn Siplemanter Onorab Pierre?

 

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble si zot annan okenn plan pou drafte en polisi a lavenir, vizavi sa size e antretan, eski Minis i kapab dir nou si zot annan okenn mekanizm konkret ki zot pe met an plas, oubyen anvizaze met an plas tre byento, pou ede further redwir lakantite letan ki pasyan i bezwen espere pou vwar en Dokter dan pei, isi Sesel?

Mersi Mr Speaker.

 

MINISTER MITCY LARUE

Mersi Mr Speaker.  Mr Speaker, wi.  Nou pe travay, parey mon’n dir, avek tou sa bann diferan rezon akoz pasyan i al dan Klinik.  Nou pe travay lo en polisi, sirtou ler nou pou’n ganny nou HIS.  I pou pli fasil pou nou travay lo en polisi pou met an plas, pou redwir waiting time o nivo tou bann Klinik dan pei.  Osi, nou pe mazin met plis Dokter dan bann Klinik, letan nou ganny osi sa bann Dokter.  Nou pou osi train e met plis Dokter Seselwa dan bann Klinik, parske zot, zot pou pli fasil pou annan sa pli bon kominikasyon avek nou bann pasyan seselwa.  E nou pe osi la an se moman, nou pe rekrit bann family Doctor ki pou ganny mete dan bann Klinik rezyonnal.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Bonzour Minis.  Mr Speaker, eski Minis i kapab enform sa Lasanble si i annan en logmantasyon dan lakantite pasyan ki vizit Klinik e ki par konsekans, i agrandi letan espere kot bann Klinik atraver Mahe e si Minis osi i kapab enform sa Lasanble si Minister dan lefitir pe konsider donn apwentman apre ler travay ou dan Sanmdi, pou tir presyon lo waiting time? Mersi.

 

MINISTER MITCY LARUE

Mersi Mr Speaker.  Mon krwar sa i en tre bon Kestyon.  Nou’n deza reflesir lo la e i annan serten travay ki pe ganny prepare lo sa size akoz nou’n santi poudir souvandfwa, nou annan travayer ki tre prodiktiv me zot pas en bon pe letan pou esper en Dokter, anba Klinik.  Me si nou kapab organiz apwentman apre ler travay, ou menm dan Sanmdi, i pou ede pou redwir sa kantite letan ki zot espere e sa bann dimoun a vin en pe plis prodiktiv.

So, parey mon’n dir, ankor, resours i tre limite.  Se sa ki pe anpes nou:- devret komanse sa me resours i vreman limite.  Le moman ki nou ganny bann Dokter apropriye, sa size apwentman dan Sanmdi ek apre ler travay, pou komanse.  Mersi Mr Speaker.

 

MR SPEAKER

Onorab Houareau.

 

HON HERBERT HOUAREAU

Mersi Mr Speaker.  Bonzour tou dimoun.

Kestyon:- Eski Minis i kapab enform sa Lasanble si son Minister i annan an plas en protokol pou enform bann Travayer Lasante a tou moman, lekel Dokter ou Spesyalis ki pe travay e kel er zot available, pou evite ki manm piblik i reste asize pour lontan?  Mersi.

 

MINISTER MITCY LARUE

Mersi Mr Speaker.  Mersi Onorab.  Mr Speaker, dan Sant:- mon pou pran legzanp dan Twa Zonn, kot nou annan diferan Spesyalis an menm tan.  Par egzanp, nou kapab annan ENT ki pe travay.  I annan son consultation room.  Nou annan nou Ortho ki la.  Nou annan nou petet Gynechologist.  Konmsi tou sa bann dimoun, zot la e bann pasyan i ganny mete dan diferan plas, kot zot konnen.  Bann pasyan, zot konnen poudir nou, nou pe al vwar en Gynechologist.  Nou, nou pe al vwar en ENT.  Zot annan sa bann lenformasyon.  Me ki petet kwa ki manke se ki souvandfwa, pasyan:- zot tou sa bann pasyan i ganny en ler pou zot vini.  Zot ganny ant:- i annan pasyan i ganny 9er a 10er.  Akoz 9er a 10er, ou pe ekspekte:- ou kapab dir ou pe ekspekte Dokter i kapab vwar 2 pasyan.  Me i arive kot Dokter i vwar only en pasyan.  I depandan lo sityasyon sa pasyan.  Oubyen sa Dokter i kapab vwar omwen 3 pasyan.  Tousala i pou depan lo kondisyon sa pasyan.

E mon pou redir ankor.  I annan bokou pasyan ki vin tre boner.  7er bomaten.  Menm ki zot apwentman annan de fwa i 11er, i annan pasyan 7er bomaten zot la zot.  Akoz mon’n deza koz avek zot, zot dir mwan zot sey vin boner pou tat zot lasans, si zot kapab pas avan.  Ou konpran.  Me i pa fasil pou ou.  Menm ki ou’n ariv 7er, si ou apwentman i 11er, ou pou asize ou pou espere ziska 11er.  Unless bann dimoun pa’n turn up e i annan plas pou ou antre.  So, i annan en pti pe, i en pti pe sa bann keksoz kot pasyan i annan labitid vin boner e zot tant pou zot sey zot sans.  Me i pa fasil.

Me an menm tan, nou osi nou annan serten defayans.  Mon pou dir ou fran.  Nou annan serten defayans kot nou bann Travayer Lasante, zot pa sorti ase pou donn leksplikasyon e kominik avek zot bann pasyan, pou dir zot, be la ou letan ti’n arive wi.  Me i annan en pasyan petet, en ka emergency osi i kapab antre e ou letan i tarde.  Zot devret pe raport plis.  Zot devret pe kominik plis avek bann pasyan, pou donn zot lenformasyon aktyel ki pe pase.  Mon dakor sa i en defayans me nou pe travay lo la a toultan, a tou pri, nou bezwen sanze sa bann mantalite.  Mersi Mr Speaker.

 

MR SPEAKER

Kestyon 40.  Onorab David Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab donn detay sa Lasanble lo bann depans ki son Minister in fer, an relasyon avek sa R15 milyon ki’n ganny depanse pou prepar Sesel kont Ebola?  Mersi Mr Speaker.

 

MINISTER MITCY LARUE

Mersi Mr Speaker.  Mersi Onorab.  Mr Speaker, depi boner 2014 ler lepidemi Ebola ti ganny deklare dan sa 3 pei Afriken, Ginea, Sierra Leone ek Liberia, Minister Lasante ti komans fer son preparasyon.  Tou bann dimoun konsernen dan lasante in met en gran zefor pou anpes Ebola vin Sesel e anpes propagasyon.  Nou koman en pti pei vilnerab, avek en Lekonomi tre frazil e an plenn devlopman, nou ti vwar sa lepidemi koman en menas.  Nou ti pare pou fer tou sa ki neseser, pou nou kapab protez nou popilasyon.  Alors, i pa fasil met en valer moneter lo lakantite zefor ki’n mete anver preparasyon kont sa maladi, 24 lo 24, 67 lo 7.

Preparasyon ti vize ver premyerman, ogmant sirveyans lo Por, Airport e dan tou Sant Lasante Piblik, oubyen Prive.

Donn lenformasyon piblik atraver rankont konsiltativ e osi lo Medya.  Fer deteksyon rapid si en ka sispe Ebola i antre dan pei.  Fer contact tracing imedyat.  Swen pasyan Ebola dan servis izolasyon.  Proteksyon tou travayer ki pou travay avek pasyan Ebola.

Dan bann preparasyon, i ti ganny mansyonnen ki kou total ti kapab ariv ziska R15 milyon.  En Bidze ti ganny prepare, ki ti pran an kont tou depans e total ti pou ariv R17 milyon, 195 mil, 617.  Fodre fer kler ki Minister Lasante pa’n resevwar R15 milyon pou depanse.  En kantite depans in ganny abzorbe ou entegre dan nou Bidze.  Par egzanp, serten overtime, reagents, materyo travay, training, stationary, fuel, transportasyon e lekipman Laboratwar.  Tousala ti atraver nou Bidze.  Nou’n osi resevwar lasistans avek WHO ek SCAA, ki’n aste temperature scanners pour Airport e osi bann walk through scanner, ki pe enstale lo Airport e Por.  DRDM in siport en pe bann kou formasyon.  Biro Imigrasyon in enprim de milye health checks forms e zot ankor pe fer li konmela.  Par kont, bann peyman direk ki nou’n fer, in ariv anviron R5 milyon.  E pour sa, nou annan sa breakdown ki’n ganny garde par Seksyon Finans dan Minister Lasante.

Pou konklir Mr Speaker, mon ti a kontan fer remarke ki lepidemi Ebola pa ankor fini e nou pe kontinyen fer sirveyans e reste lo alert.  Be mon profite pou mwan remersye tou staff Minister Lasante ki’n travay e pe kontinyen travay pou protez nou kont sa fleo.  I annan bokou ki zot pe fer.  Bokou travay ekstra, san demann nanryen an plis akoz zot kontan Sesel.  Mersi Mr Speaker.

 

MR SPEAKER

Onorab Pierre, okenn Siplemanter?  Minister, ……..

 

HON DAVID PIERRE

Mersi Mr Speaker.  Mr Speaker, an vi ki Ebola i ankor la, eski Minis i kapab dir sa Lasanble ki pozisyon Sesel vizavi Ebola ozordi.  Ki nivo menas ki i annan pour Sesel e eski Sesel i annan en Treatment Unit e en Contact Tracing Team an plas, an relasyon ek sa size Ebola?  Mersi Mr Speaker.

 

MINISTER MITCY LARUE

Mersi Mr Speaker e mersi Onorab.

Parey mon’n fek dir, pozisyon Sesel pou reste touzour lo alert akoz Ebola i ankor la e i still reste en menas.  E nou, nou pou reste lo alert ziska ki WHO i dir ki lepidemi in fini.  Nou kontinyen gard nou stok consumable.  Nou kontinyen gard nou bann dimoun lo alert.  Nou kontinyen fer tou nou bann stratezi ki’n ganny met an plas i la.  Nou annan en Public Health Contact Tracing Team ki deza la an plas avek tou bann stratezi an plas ki’n ganny deza devlope.  Savedir tou sa ki nou’n fer i ankor la e nou kontinyen kit nou vizilan, pour okenn sityasyon ki arive.

An sa ki konsern en landrwa pou isolate dimoun.  Parey zot konnen, nou deza Anse Royale, Lopital Anse Royale i deza sa landrwa ki nou’n kite.  Nou pa pe pran in-patient pou lemoman akoz sa landrwa i ganny rezerve, an ka nou annan okenn ka Ebola ki ariv Sesel.

Praslin osi, dan Lopital Baie Ste Anne, i annan en bout anndan ki nou’n reorganize pour si an ka nou annan en ka e La digue osi, menm zafer.  Me, nou pe osi:- parey mon ti donn mon komitman Anse Royale ler nou ti fer Meeting, mon ti dir ki byensir, pour lavenir, nou pou bezwen annan en Isolation Centre, spesyalman pour bann Lepidemi.  Pa selman Ebola, akoz nou kapab annan lezot Lepidemi ki tap nou pei, parey nou pe vwar tanzantan.  So, i enportan ki nou annan en Isolation Centre, oubyen Unit nou apel li.  Sa nou ankor an diskisyon kote e kan i pou ganny fer.  Me i tre enportan ki i ganny met an plas.  Lemoman i arive, kan nou kapab fer li.  Mersi Mr Speaker.

 

MR SPEAKER

Onorab Samson.

 

HON DEREK SAMSON

Bonzour Mr Speaker, Minis, tou dimoun.  Mr Speaker, mon ti a kontan demann Minis konbyen in kout son Minister pou transform Community Centre Anse Royale koman the alternate Clinic an ka Ebola.  E si zot pe estimen, apepre konbyen i pou arive nouvo Isolation Centre ki pou ganny konstrir e ki dele letan zot in planifye pou diskite, deside, kote, kan pou fer, ki Anse Royale i kapab retourn Lopital ki fonksyonn normal?  Thank you.

 

MINISTER MITCY LARUE

Mersi Mr Speaker.  Mersi Onorab.  Akoz Anse Royale nou’n repar son Community Centre, nou’n fer serten travay reparasyon lo la pour ki nou servis i ganny fer laba, an ka i annan Ebola.  Apre nou’n fer serten travay osi avek Lopital li menm, according to flow.  Avek lezot sityasyon an plas, par egzanp lezot keksoz.

Pour Anse Royale nou annan.  Lopital Anse Royale nou annan en kou R249 mil, 560.  So, me pour Community Centre, mon napa ladan me mon ava fer ou gannyen.

Pou dir ou vreman kan oubyen kou sa Isolation Unit, nou pa kapab dir ozordi akoz premyerman nou pe rode kote nou pou met li.  Kote nou pou met li, kote ki pou pli apropriye akoz ozordi ler ou fer letour dan lemonn, ou pou vwar poudir Isolation Unit i pa bezwen neseserman met lo en zil, me i kapab lanmenm la dan visinite Lopital avek tou son bann fasilite neseser.  So, nou pe regard dan tousala.  Nou pe ganny en pe lide avek lezot landrwa, pou nou vwar kote akoz parey nou’n dir, nou annan sa Master Plan Lopital ki an mouvman.  Pe travay lo la pou finalize.  Once ki tousala, la nou pou konnen kote i pou ete, la costing a ganny fer according to kote i pou ete, ki grander i pou ete, eksetera.  Mersi Mr Speaker.

 

MR SPEAKER

Kestyon 41, Onorab Melval Dugasse.

 

HON MELVAL DUGASSE

Mersi Mr Speaker.  Eski Minis i kapab dir nou ki kantite pasyan ki ankor esper servis en Spesyalis dan tretman lizye e kwa vreman ki Minister pe fer pou garanti ki sa bann dimoun i ganny tretman atan?  Mersi Mr Speaker.

 

MINISTER MITCY LARUE

Mersi Mr Speaker.  Mersi Onorab.  Pasyan ki pe esper en servis spesyalize dan tretman lizye, i normalman bann dimoun ki annan en referral, savedir zot in ganny rekomande par zot Dokter dan distrik e zot pa ankor ganny en apwentman pou vwar Spesyalis Lizye.  Nou annan, depi Zanvye ziska la, 141 dimoun ki pe espere.  Nou bezwen fer remarke ki Eye Clinic i resevwar an mwayenn 1000 a 1200 demann dan 1an, pour apwentman, sorti dan bann distrik dan Sesel.  Priyorite i ganny donnen dan bann ka pli irzan me tou dimoun a lafen i ganny en randevou.

Lazans Servis Swen Lasante pe kontinyelman revwar sistenm apwentman pou fer li vin pli efikas.  Pou le moman, Eye Clinic i annan selman 2 Spesyalis an permanans.  Enn ki Seselwa e en lot i en korperan Kiben.  Sa 2 Spesyalis pa sifi pour lakantite demann ki nou annan dan pei.  Alor, demars pe ganny fer pou nou kapab rekrit ankor 2 Optamologist.

An 2014, ti annan 360 pasyan pe esper loperasyon Katarak.  Ti osi annan 285 nouvo adisyon pour sa lannen.  Sa i fer en total 645 dimoun ki ti bezwen loperasyon.  An tou, 365 loperasyon Katarak ti ganny fer an 2014.  An vi ki nou Lasal Loperasyon a sa letan ti anba renovasyon, i pa ti posib pou nou kapab fer plis loperasyon pandan lannen 2014.  Pou arive oper sa kantite, lekip Eye Clinic ti bezwen travay weekend osi.  Sa sif in osi enkli pasyan ki ti ganny opere dan 2 Eye Camp. Zen, 88 loperasyon ti ganny fer, Desanm, 39 loperasyon e sa ti ganny fer avek lasistans lekip sorti Moris.

Ti osi annan bann lezot prosedir ki ti ganny fer an 2014.  Loperasyon Terigium, 85, loperasyon pou koud lizye apre bann blesir 35, lenvestigasyon vizyel, field pou detekte domaz Glucoma 174, dokimantasyon fotografik bann kondisyon dan fon lizye 351, tretman avek laser pour bann pasyan Dyabetik.  Parmi sa bann ki pe esper loperasyon, i annan 20 pasyan ki reste Praslin e 13 lo La Digue.  Ki Minister pe fer pour ki sa bann dimoun i garanti tretman a tan?  Lazans Servis Swen Lasante i reste an kontak avek bann partner aletranze, parey Lions Club e Freemasons ki anmenn zot bann Spesyalis Lizye pou fer bann Eye Camp isi.

Premye an 2015, 3 Eye Camp pe ganny organize e in konfirmen e tou sa, avek lespwar ogmant lakantite loperasyon Katarak ki nou fer.

Premye Eye Camp in fini fer an Fevriye, kot lekip Morisyen ti oper 42 pasyan.  Dezyenm pou fer ant le 13 a 16 Avril e nou pe swete oper anviron 100 pasyan.  Sa pou fer par lekip Lions Club ki pou sorti Kenya.  Trwazyenm in planifye pour Zen e la pou fer ankor 100 a 150 loperasyon par lekip, sa voyaz sorti Lenn.  E en katriyenm pou fer avan lannen terminen.  Spesyalis Lizye dan Eye Clinic i kontinyen oper tou lazournen Mardi e tou le dezyenm Vandredi.  Tousala, avek bi pou redwir letan ki en dimoun i espere pou ganny opere.

I osi annan Klinik fer par sa 2 Spesyalis Lizye, toulezour dan Twa Zonn.  Spesyalis i vizit Praslin, La Digue tou le mwan.  Sa lannen, ler staff pou’n ogmante, sa i ava dan nou plan pou ogmant frekans zot vizit Praslin/La Digue pou vin 2 fwa par mwan.  I osi annan en Spesyalis on call, toulezour kot Lopital Sesel, pour bann sityasyon irzan parey aksidan ou bann blesir.  Parey mon’n dir pli boner, i annan plan pou ogmant lakantite Spesyalis dan sa Unit.  Demars in fini komanse e nou pe rekrit 2 nouvo Spesyalis Lizye apre Zen sa lannen.  Ankor, avek bi pou redwir lakantite dimoun ki pe esper loperasyon.  Mersi Mr Speaker.

 

MR SPEAKER

Onorab?

 

HON MELVAL DUGASSE

Mersi Mr Speaker.  Eski Minis i kapab dir nou konbyen Spesyalis Lizye ki nou aktyelman bezwen Sesel, pou nou kapab clear sa backlog e Minis, an vi ki Klinik Lizye i ganny trouve dan premye letaz Twa Zonn, eski Minis pe mazin relocate sa a lavenir, sirtou pour bann dimoun aze?  Mersi Mr Speaker.

 

MINISTER MITCY LARUE

Mersi Mr Speaker.  Mersi Onorab.  Parey mon’n dir Onorab, si:- parey nou pe espere ganny:- annan de fwa, recruitment i pa fasil parey nou krwar, me selman si nou pe ganny nou 2 Spesyalis ki pou vini la an Zen, definitivman, travay a ganny fer.  Olye ek 2, i ava annan 4.  Savedir double kot nou a kapab retir sa backlog byensir.  E avek sa bann camp ki pe vini, otomatikman, bann dimoun avek Katarak i ganny fer loperasyon.

Kot i konsern kot nou Eye Clinic i ete, i vre.  I vre i en problenm akoz bann dimoun aze i trouv zot difisil pou zot monte e desann.  Sa, nou’n tenir an kont dan nou plan, Master Plan pour Lopital kot definitivman, sa landrwa i pou bezwen ganny bouze pour ki i vin dan bassement olye i al anler dan letaz parske pou fasilit en pti pe nou bann dimoun aze.  Ok.  E sa, letan tou keksoz a’n pare, byensir nou pou bezwen rod finansman pou fer landrwa pou aranze e i a kapab ganny fer.  Me an menm tan, nou pe mazin osi.  I annan serten Klinik ki nou pou bezwen desantralize pou al Anse Royale, pou al Praslin.  Serten loperasyon.  Katarak par egzanp i kapab ganny fer Anse Royale, ki kapab ganny fer me pou le moman, nou pa kapab touse akoz nou pa oule fer li.  I annan serten mankman dan nou Lasal Loperasyon Anse Royale e menm lo Praslin i annan serten mankman ki nou bezwen adrese avan nou kapab akoz lizye i en keksoz ki sansib.  Nou bezwen vey lenfeksyon.  Alor, i enportan ki sa bann landrwa i ganny met azour, a la oter, pour ki nou kapab fer sa bann loperasyon.  Mersi Mr Speaker.

 

MR SPEAKER

Onorab Barbe.

 

HON NICHOLE BARBE

Mersi Mr Speaker.  Bonzour tou dimoun.  Mr Speaker, eski Minis i kapab enform sa Lasanble ki polisi son Minister vizavi refund pour bann pasyan ki dan bann ka ki kot i annan bann ka ekstrememan irzan, i bezwen vwar zot pe al rod tretman aletranze, dan ka kot napa en tel servis lokalman?  Mersi Mr Speaker.

 

MR SPEAKER

Onorab, sa kestyon i vreman vast.  E a mon avi, ti dwatet en kestyon orizinal.  Mon pa pou aksepte li koman en siplemanter lo tretman lizye, although i en pti pe aplikab me nou konnen refund pour Overseas Treatment i en gro zafer.  So, nou pou move on.  Nou a pran Kestyon 42 ek 44 ansanm, an vi son inter-connectedness e Minis in dir mwan i pare pou pran tou le de e reponn tou le de an menm tan.  So, mon a demann Onorab Dugasse pou demann son Kestyon lo Klinik English River e apre Onorab Vidot i ava demann son Kestyon, osi lo Klinik English River.

HON MELVAL DUGASSE

Mersi Mr Speaker.  an vi lakantite e grander popilasyon ki Klinik English River pe deservi, eski ou Minister i annan lentansyon revwar e amelyor kalite servis ki zot pe ofer?  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Mersi.  Bonzour Mr Speaker.  bonzour tou dimoun ki a lekout.

Mr Speaker, eski Minis i kapab eksplik sa Lasanble ki kalite amelyorasyon son Minister in planifye pour Klinik English River?  Mersi bokou.

 

MR SPEAKER

Minister.

 

MINISTER MITCY LARUE

Mersi Mr Speaker.  Mersi le 2 Onorab.

Sant Lasante English River parey zot konnen, i deservi en popilasyon 22 mil pasyan, ki enkli distrik St Louis, Mont Buxton, Bel Air, English River, Anse Etoile e nouvo distrik Perseverance.  Deza, i pli gran Sant nou pei, an term lakantite popilasyon ki ganny deservi.  Sant English River, i osi deservi en bon nonm dimoun ki sorti dan tou distrik lo Mahe e ziska prezan, nou pe welcome zot akoz nou pa kapab refiz personn tretman oubyen servis.  Fodre nou realize ki pozisyon santral sa Sant e lefe ki kantite dimoun i vin travay dan Victoria, i fer ki dimoun i raport English River, olye al dan zot distrik respektiv.  I annan serten dimoun osi ki zis kontan pou vin rod servis dan sa Sant, olye al dan zot distrik.  En tim 85 Travayer Lasante i travay pros avek lakominote, pou ofer en varyete servis lasante primer e ziska prezan, travay sa lekip i ganny byen apresye par popilasyon.  E nou, nou tre fyer de sa.  Me, i kantmenm annan en pti group ki bezwen aranz zot latitid e travay avek plis konpasyon, pou evit fristrasyon ki pa neseser.

Sant English River i ofer en varyete servis swen lasante primer ki konpreansiv ant 8er bomaten ziska 8er diswar, toulezour.  Servis dan Sant English River pe ganny amelyore de tanzantan, baze lo bezwen la popilasyon.  Par egzanp, servis Spesyalis ki ti fer zis dan Twa Zonn, i prezan desantralize dan plizyer distrik, enkli English River.  E i annan omwen 2an depi ki Sant English River pe ofer servis, par egzanp Dermathologist, Endocrimotologist, Vascular Surgeon, Psychologist e Spesyalis Family Clinic.

Fodre rekonnet ki sa bann servis in vin pli pre avek la popilasyon.  E byento, servis en Spesyalis Zanfan ki nou apel en Pedeatrician pou ganny azoute lo sa lalis.  Lazans Swen Lasante i an diskisyon osi avek MLUH ek Ladministrasyon Distrik, pou ganny en fasilite dan distrik Perseverance, pou etablir en Health Post.  Sa Sant, pou ofer servis de baz tel ki konsiltasyon Dokter, Planning Familyal, pez baba, pansman e donn konsey lo lasante.  Sa byensir ava ede aport swen e servis pli pre ankor avek sa popilasyon e byensir, tir presyon lo Klinik English River.

Nou ti a swete ki plis servis i ganny ofer me lespas e design sa building pa pe permet nou fer li.  Nou bezwen osi amelyor stokaz latizann, pou fer fas ek plis demann.  Serten travay entern i lo progranm pou amelyor servis e kondisyon nou bann travayer.

An term lekipman, sa Sant i byen ekipe e lanfaz pe ganny mete pou annan plis kontrol e preventive maintenance lo lekipman e zouti travay, pour ki tou bann lekipman, zot pe fonksyonnen byen a tou moman.  Fodre osi realize ki nou fer fas ek bann defi, kot Klinik parfwa i deborde ek dimoun.  Sa i rann nou en pe kwense pou nou kapab deservi nou kliyan dan en lespas minimum letan.  Me nou touzour demann dimoun pou pasyant en pe plis, pou nou kapab akonplir zot lekspektasyon.

Pou ganny akse ase Travayer Lasante, i osi en gran defi ki nou bezwen fer fas avek.  I dan plan pou ogmant Home Visit, kot nou bann Ners, Dokter e Zofisye Lasante Piblik i fer plis bann vizit kot bann lakour, vwar bann vye dimoun, pou anmenn plis soutyen, entervansyon e ledikasyon kot lakour.  Nou pou bezwen plis kolaborasyon avek lezot Sekter parey Servis Sosyal, Housing, Devlopman Kominoter, eksetera.  Me toudmenm, nou pe met lanfaz pou ogmant ledikasyon la popilasyon e fer dimoun vin pli responsab pour zot lasante.  Sa i an koneksyon direk avek kanpanny ‘Mon lasante, mon responsabilite, komans dan lakour.’

Parey mon’n dir, Minister i konsyan ki design Klinik English River i nesesit serten amelyorasyon, pour ki kliyan i annan plis lespas pou sirkile e i resevwar en pli bon servis.  En fasilite pli konvenab pou travay ladan e osi elev moral bann staff.  Depi en serten letan, Komite ki diskit proze lenfrastriktir dan Minister Lasante pe diskit lo ki meyer fason pou kree plis lespas e reorganiz servis dan sa Sant.  Avek demann ki kontinyen ogmante, sirtou an sa ki konsern anmenn plis servis spesyalize kot sa Sant, son planifikasyon i vreman enportan.  Me fodre fer remarke ki i annan serten limitasyon an sa ki konsern agrandi sa Sant.

En kab elektrik, par egzanp, deryer i annan delo sale, devan i annan serten lenfrastriktir PUC, par egzanp en kab elektrik underground.  Dan kote, an montan English River i annan en fasilite drenaz ki nou pa kapab konstrir lo la e lo lot kote, i annan en parking space ki deza limite pour menm nou bann kliyan.

Lazans Servis Lasante pe konsider ki servis ki pou kapab transfer dan en lot fasilite, par egzanp lo Perseverance.  Ler sa Health Post i vin an operasyon.  Oubyen menm dan en lot fasilite, a ede pou reorganiz lezot servis dan Sant English River.  Annefe, plan pou reorganiz servis i pou fer li neseser pou revwar sa landrwa kot pasyan i servi koman Waiting Area.

Nou annan en propozisyon pou retir par egzanp, sa leskalye e reorganiz sa waiting area.  Savedir, nou pe travay lo keksoz, le moman ki tou sa bann servis mon’n mansyonnen before, i a laba kot sa Health Post, nou a kapab reorganiz nou e annan lezot servis ki nou kapab met dan bann landrwa kot nou ti pe fer Maternal Health, kot nou ti pe fer bann lezot keksoz.  E Minister in deza annan R2 milyon dan Bidze pou kapab fer sa bann travay reorganizasyon.

An menm tan, mon fyer pou enform nou Lasanble ek lepep Seselwa ki Gouvernman in fini planifye en nouvo Sant Lasante modern lo zil Perseverance.  Plan i lo drawing board e finansman pour sa proze i deza dan en staz tre avanse.  Sa nouvo Sant i ava deservi distrik Anse Etoile, Perseverance ek osi parti English River e sa i ava retir presyon ki annan lo sa Sant English River an se moman.

So, pou konklir, mon swet pep Seselwa bonn sante e annou fer ‘Mon Lasante, mon responsabilite’ vin zot moto toulezour, pour en meyer lasante.  Mersi Mr Speaker.

 

MR SPEAKER

Onorab Dugasse.

 

HON MELVAL DUGASSE

Mersi Mr Speaker.  Minis, dan faz reorganizasyon ki ou’n koz lo la e an vi lakantite zanfan ki servi sa fasilite, eski ou Minister pe mazin dan lefitir pou annan seksyon dan sa Klinik ki pou deal selman avek zanfan, okipe avek bann fasilite tel ki Farmasi?  Mersi Mr Speaker.

 

MINISTER MITCY LARUE

Mersi Mr Speaker.  parey mon’n fini dir, letan nou’n move en pe sa bann servis laba dan Health Post, i pou annan nou ase lespas kot nou kapab reorganize akoz nou santi:- par egzanp ler nou pou annan nou Peadiatrician, kot Peadiatrician li i pou deal direkteman avek zanfan.  Alor, i pou enportan ki i annan en lespas kot sa Peadiatrician i kapab vwar bann zanfan e bann zanfan a ganny sa swen neseser atraver son Peadiatrician e dan en landrwa spesifik kot i pa bezwen melanz avek lezot pasyan.  Sa i enn nou swe e nou lanvi pou fer, pou annan sa:- konmsi pou donn sa meyer servis nou bann zanfan Sesel.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Thank you Mr Speaker.  Mr Speaker, eski Minis i kapab dir nou, sa R2 milyon ki’n ganny mete pour English River pou amelyorasyon, i form par sa 8 milyon ki ti ganny bidzete pour bann amelyorasyon bann Klinik dan Sesel e eski Minis i kapab dir nou osi si napa posibilite pou konble deryer kot Klinik English River pou agrandi, pou met bann fasilite neseser parey in dir, pou stor latizann, eksetera?  Mersi bokou.

 

MINISTER MITCY LARUE

Mersi Mr Speaker.  Mr Speaker, pou le moman, nou pa krwar.  Lefe ki nou pou al fer en Sant dan Perseverance, en Klinik Perseverance ki pou osi gran, ki pou pran tou sa bann dimoun dan sa bann diferan landrwa ki mon’n mansyonnen, mon pa krwar i pou tir vreman presyon lo English River.  E mon pa krwar i pou nesesit pou nou al konble, ki pou kout Gouvernman en kantite larzan pou nou al konble, apre azoute.  Me tou sa bann keksoz, nou pe analize, nou pe vwar.  Avek demann ki pe ogmante.  Me si parey nou’n dir laba, ler Perseverance in fini pare.  Tou sa bann dimoun pou al laba e i pou tir en kantite presyon e nou pou annan plis lespas pou nou kapab vreman accommodate nou bann dimoun dan sa bann area.  Me tousala i bann keksoz ki nou pe etidye fir e anmezir akoz konble i pou anmenn extra cost, apre i pou annan azoute, i pou annan en kantite:- nou pe menm mazin petet si nou ti kapab met ankor en letaz.  Tousala i bann keksoz ki nou tim dan proze pe regard ladan, posibilite kwa ki nou kapab fer, ki pou meyer pour nou popilasyon.  An menm tan, balans en pe nou Bidze lo kwa ki nou kapab fer e kwa ki nou pa kapab fer.

Sa larzan ki ladan, sa definitivman nou pou servi li lo English River, pou nou amelyore, ki mannyer nou kapab amelyore.  Anndan, nou pe:- en tim Lasante pe travay lo la pou vwar ki mannyer nou pou amelyor nou sityasyon.  Emergency par egzanp, eski i pou reste la?  Eski nou pou bezwen bouz li?  Pansman kote nou fer?  Konmsi i annan tout en travay ki nou pe fer, pou nou kapab aranz sa landrwa e met li dan en nivo pli o.  Mersi Mr Speaker.

 

MR SPEAKER

Onorab Vidot, Kestyon 43.

 

HON KEVIN VIDOT

Mersi Mr Speaker.  Mr Speaker, eski Minis i kapab dir avek sa Lasanble, ki bann protokol ki egziste pour bann Dokter e Ners an sa ki konsern lapros anver bann pasyan e pli spesyalman, bann pasyan zanfan?  Mersi.

 

MINISTER MITCY LARUE

Mersi Mr Speaker.  Mr Speaker, tou polisi, protokol oubyen guidelines ki reglemant enteraksyon ant profesyonnel Lasante ek pasyan oubyen kliyan, i baze lo 5 gran prensip etik bio-medikal.

Enn i respe pour lotonomi sak endividi.

Dezyenmman, tou aksyon i bezwen pour benefis sa endividi.

Trwazyenmman, evite fer ditor kliyan oubyen pasyan.

Katriyenm, lazistis dan repartisyon resours.

E senkyenm, konfidansyalite.

Mon ava elabor en pti gin lo sak, pou nou konpran en pti pe pli byen.  Par egzanp.  Respe pour lotonomi.  En profesyonnel Lasante i bezwen respe desizyon ki en adilt konpetan i pran, par rapor a son prop lasante.  Savedir, en dimoun ki’n ganny eksplike benefis en tel prosedir oubyen son konsekans, i ganny drwa refiz sa propozisyon.  E bann profesyonnel Lasante i bezwen respekte sa desizyon.  Menm si i kler ki en tel desizyon i pa dan lentere sa dimoun.  Devwar bann profesyonnel Lasante i alor pou esey travay avek sa pasyan e posibleman, son fanmir, pou tonm dakor lo en propozisyon ki pli favorab pour sa pasyan.  Prensip lotonomi i eksplik bezwen konsantman par pasyan, pour bann tretman oubyen tes ki pou ganny fer.  Sa konsantman i kapab verbal oubyen an ekrir.  Ou alor, i kapab ganny eksplike par aksyon ou konportman sa pasyan.

Zis mon a donn en legzanp.  Par egzanp, si en dimoun par egzanp i fer monte son lanmans semiz oubyen son lanmans rob e i prezant son lebra ek en Ners, savedir i eksplike ki i dakor pou sa Ners tir son disan.  Redi, tir son disan.  Menm si i pa’n dir wi, son aksyon ki in fer in montre ou poudir wi, i dakor pou tir son disan.  Lanfaz dan sa bann ka, se kapasite mantal sa pasyan, o moman ki desizyon pe ganny fer.  Dan ka bann zanfan, se zot paran oubyen gardyen ki pran bann desizyon.  Si Dokter i santi ki paran oubyen gardyen pe pran desizyon ki pa dan lentere sa zanfan, alor, zot kapab rod lentervansyon Lakour pou ede rezourd sa lenpak.  So, sa prensip lotonomi e bezwen pour konsantman, i fer selman dan bann ka ki pa emergency.  En zanfan anba laz, i bezwen ganny akonpannyen par son paran oubyen gardyen, kan i vin kot Sant Lasante.  I osi rezon akoz Farmasi pa donn latizann bann zanfan anba laz akoz zot napa kapasite pou konpran byen tou lenstriksyon ki Dispanser pe donnen.  I osi eksplike akoz en zanfan ki ganny refer kot en Spesyalis lo en baz apwentman i bezwen vin avek en paran oubyen gardyen ki pou kapab pran desizyon pour sa zanfan e non pa avek nenport ki adilt.  Annan de fwa, ou vwar tantin, gran manman, gran frer, gran ser.  I bezwen paran oubyen gardyen ki’n ganny spesifye.

Dan ka kot pasyan i napa sa kapasite mantal, par egzanp i annan en dezabilite mantal oubyen i san konesans, alor se paran pli pros ki bezwen pran desizyon.  E Lazans Swen Lasante i rekonnet ki larealite ozordi i anmenn en kantite konfizyon lo lekel ki next of kin, oubyen fanmir pli pros.  I alor annan en gran travay ledikasyon pou nou fer lo sa size, kot tou sitwayen i devret ganny ankouraze pou nonm en dimoun pou pran desizyon dan zot plas, letan zot ariv dan en sityasyon kot zot menm zot pa kapab fer li.

Benefis pour pasyan.  Tou profesyonnel Lasante i bezwen fer tou sa ki posib pou toultan fer sa ki byen pour en pasyan.  Me sa ki anmenn benefis pour en pasyan, i osi kapab anmenn lefe negativ lo en lot.  Mon ava eksplike.  Par egzanp, si ou deza lontan pe asize kot Casualty, in ariv ou tour e en dimoun i vini avek en kondisyon ki bezwen ganny latansyon toudswit.  Natirelman, ou lentere pou ganny met akote, pou okip sa enn ki pli bezwen swen.  Souvandfwa, pasyan i arive e gravite son sityasyon i pa neseserman aparan pour lezot ki pe espere.  E zot pa konpran.  Desizyon pou donn li priyorite i paret pa normal pour sa enn ki pe espere.  E pour rezon konfidansyalite, i pa permet profesyonnel Lasante pou eksplike akoz sa ti en priyorite.  Se la kot konfizyon e lakoler i vini.  Pa fer ditor.  Sa i en nosyon ki egziste depi komansman menm profesyon medikal.  I pa zanmen dan lentansyon en profesyonnel lasante pou fer ditor en pasyan.  Sa prensip i oule atir latansyon bann profesyonnel, ki zot bezwen toultan balans benefis en tretman ou prosedir, avek son bann dezavantaz.  Menm prosedir i kapab anmenn bokou plis benefis pour en pasyan, me pour en lot, prenan an kont son bann kondisyon medikal spesifik, i kapab bokou tro lour e difisil e pasyan i ganny dekonseye pou aksepte sa prosedir.

Ler nou koz lo lazistis e konfidansyalite.  Nou tou nou konnen ki resours i limite parfwa.  Ki nou pa touzour kapab trete oubyen geri tou pasyan.  Resours i bezwen ganny byen distribye ekitableman.  Desizyon i bezwen pran kont kestyon.  Eski sa ki sa enn pe demande i zis?  Ki lenpak pou annan lo lezot sitwayen, si desizyon i ganny pran pou akord li sa ki i demande?  Bon.  Dan lenteraksyon ant profesyonnel Lasante ek en pasyan oubyen kliyan, sa profesyonnel i resevwar en kantite lenformasyon lo en pasyan.  E souvan, se bann lenformasyon personnel e entim.  Menm bann profesyonnel ek lezot Travayer Lasante ki pa an kontak direk avek pasyan, par egzanp Travayer Laboratwar, bann Clerk ki pe tip rezilta, eksetera, i osi annan akse avek lenformasyon lo en pasyan.  Tou sa bann Travayer Lasante i bezwen gard byen sa prensip konfidansyalite.  Savedir, i pa sipoze devwal sa lenformasyon ki in gannyen, o kour son travay, avek okenn dimoun, san lotorizasyon sa pasyan.  I annan en ka kot en profesyonnel Lasante i bezwen devwal serten lenformasyon avek bann Lotorite.  Par egzanp, dan serten ka maladi enfektye, kot Lotorite Lasante Piblik i bezwen ganny notifye.  Sa i rezon akoz en profesyonnel Lasante pa kapab donn lenformasyon osi avek fanmir, souvandfwa lo telefonn, akoz nou napa garanti lekel ki lo lot kote telefonn.  Eski vre i Pierre?  I pe dir ou li Pierre.  Eski se Pierre ki laba dan lot bout kote difil?  Non.  Alor, nou pa kapab donn lenformasyon lo telefonn.  Profesyonnel Lasante i osi bezwen veye ki bann dokiman avek lenformasyon konfidansyel lo en pasyan, pa reste dan bann landrwa kot en lot kliyan i kapab vwar oubyen tir sa lenformasyon.  Mersi Mr Speaker.

 

MR SPEAKER

Onorab Vidot.  Larepons ti konpreansiv.  Napa okenn Supplementary?

 

HON KEVIN VIDOT

Thank you Mr Speaker.  Mr Speaker, as specifically.  Spesifikman, eski Minis i kapab dir nou ki dernyen fwa sa bann protokol in ganny brief avek tou sa bann profesyonnel e mon ti pe koz spesifik lo bann zanfan dan bann Klinik.  Ki lapros bann Nurse Managers ek bann profesyonnel ki la i annan pou fer, ki fer sir ki bann zanfan i kapab vwar Dokter e ganny deal avek dan en fason pli vit?  Mersi.

 

MINISTER MITCY LARUE

Mr Speaker, i deza annan protokol me parey mon’n dir, nou pe reviz protokol akoz souvandfwa, nou annan konplent kot paran i dir ou, zot vini ek zanfan, zot esper en kantite letan.  Sirtou dan Casualty e menm dan bann Klinik.  E sa protokol:- i annan en protokol me nou pe reviz sa protokol, pou nou kapab revwar, akoz mwan osi personnelman, koman en endividi, mon vwar poudir bann zanfan ti bezwen ganny latansyon spesyal.  Ler zot vini, zot ganny deal avek, zot fini.  Me si par egzanp nou annan en Peadiatrician dan sa bann landrwa, i pou fer li fasil.  Peadiatrician i deal ek tou zanfan.  Tandi ki la, nou napa vreman sa Peadiatrician la dan sa bann Klinik, kot zanfan i vwar bann Dokter ki la.  Alor la ki fer ki bann dimoun i walk ins.  Mon dir mwan mon’n pran nimero 1, nimero 2, nimero 3.  Zanfan i nimero 5.  Se sa ki nou pa pe vreman port atansyon me nou pe revwar sa pou nou kapab port en pe plis latansyon lo bann zanfan.  Mersi Mr Speaker.

 

MR SPEAKER

Kestyon 45, Onorab Maria Payet-Marie.

 

HON MARIA PAYET-MARIE

Mersi Mr Speaker.  An vi logmantasyon dan bann maladi tel ki SIDA ek Hepatitis C e lezot maladi ki ganny transmet par sex ou lesanz sereng, eski Minis i kapab enform nou Lasanble si in fer okenn evalyasyon ou analiz lo progranm Harm Reduction? Mersi.

 

MINISTER MITCY LARUE

Mersi Mr Speaker.  Mersi Onorab.

Progranm Harm Reduction ki nou annan egzakteman la, in ganny evalye par Doctor Micheal Rath, en Alman ki en Spesyalis dan adiksyon.  Dokter Rath ti fer son analiz e evalyasyon, apre ki i ti’n interview e obzerv pasyan ki pe servi servis detox, ek staff osi ki pe travay laba.  In fer serten rekomandasyon.  Mon ava mansyonn zot.

In dir met plis bann Eroin Addicts lo tretman Metadonn.  Mazin azout lezot medikaman.  Etablir en out patient pli pre avek Victoria, pour bann adikt, pou kapab pran zot latizann, olye zot vin zis selman dan Detox Centre.  Train staff lo Praslin ek La Digue, pou zot kapab tret bann adikt lo sa 2 zil.  Mazin azout tretman pour Hepatitis C.  etablir en sheltered workshop pou ed pasyan avek adiksyon.  E mazin komans en sheltered housing pour en letan limite, koman en sipor pour pasyan avek fanmir.

Sa, set en pe bann rekomandasyon ki zot in donn nou.  E petet, nou ava dir dan ki mezir Minister pe enplimant sa bann rekomandasyon.

Minister i annan plan sa lannen pou enplimant lezot progranm rediksyon risk, pour benefis la kominote an zeneral.  Par egzanp, nou pou donn tretman pour HIV/Sida dan Sant Metadonn e desantraliz aktivite sa Sant.  Byento, sa pou posib dan en nouvo lokasyon dan Twa Ver e osi, kot Sant Mont Royale, baze North East Point ki la pou le moman.

Dezyenmman, nou pou etablir en pli bon sistenm kontrol lenfeksyon dan Prizon.  Konsernan progranm lesanz sereng ek zegwir, Minister Lasante in set up en Komite ki pe devlop en Plan D’aksyon ki pou byento ganny prezante avek Cabinet, pour konsiderasyon.  Bann dimoun ki servi drog, zot pou vin kot en Sant Lasante pou zot kapab benefisye avek lezot progranm ki Minister in met an plas.  Staff Praslin/La Digue in deza swiv en lantrennman preliminer.  I enportan pou annan en prezans en profesyonnel ki kalifye dan swen Lasante Mantal, pou siport pasyan avek lezot staff.  Alor, in deza annan en staff ki’n eksprim son lentere pou li transfer e sa demars pe ganny fer pou li kapab move Praslin.

Nou kontiny negosyasyon avek Farmasi Prive, pou zot enport en medikaman alternativ ki pou kontrol sa lanvi pou servi drog.  Deza, en Farmasi in reponn pozitivman e pasyan ava pey zot tretman zot menm.  Nou bezwen osi adopte lezot mezir efikas ki pe ganny pratike dan bann lezot pei ki pe fer fas avek menm problenm ki nou.  Resers in montre dan plizyer pei, ki sa bann mezir i marse e i pe ganny byen aplike.  E an a doptan sa bann progranm/mezir, nou pe target en rediksyon dan nouvo ka maladi par 60 poursan par an, parmi bann dimoun ki pe enzekte drog.  Mersi Mr Speaker.

 

MR SPEAKER

Okenn Siplemanter, Onorab?

 

HON MARIA PAYET-MARIE

Mersi Mr Speaker.  Mr Speaker, petet Minis, si i kapab enform nou lo:- dir nou lo bann difikilte ki son Minister pe fer fas avek, an vi sa bann progranm ki egziste la e petet, si Minis i kapab donn nou en statistik par egzanp, pandan sa dernyen 2an, lo bann zenn ki pe ganny afekte avek Sida ek Hepatitis C? Mersi Mr Speaker.

 

MINISTER MITCY LARUE

Mersi Mr Speaker.  An term par lannen, nou annan bann dimoun ki nou’n teste, bann ki Hepatitis C par egzanp.  2012, 2013, 2014, HIV/Hepatitis C.  Par egzanp an – mon a pran 2014.  Nou ti annan nou 53 zonm ki ti ganny teste e dan sa 53, ti annan 21 ki ti positive e 32 ki ti negativ.  E bann fanm, ti annan 8 ki ti teste e ladan ti annan 5 pozitiv, 3 negativ.

E ler nou regard:- sorry, 2013 ki mon’n donn zot.  2014, nou annan nou 309 zonm ki ti teste e ladan nou annan nou 144 pozitiv e 165 negativ.

Savedir, i montre nou ki nou annan vreman en logmantasyon e menm nou kantite dimoun ki lo Metadonn osi in ogmante.  In ogmante akoz nou annan bann ki vini, ki antre.  Detox in, detox out. Nou annan en bon pe nou akoz ler nou pe regarde la, nou annan 16,531 ki’n antre.  Epi nou annan nou sa ki sorti ankor la, i annan ki vini akoz nou annan nou vreman en kantite ki vini, ki vin kot Sant.  I vin pran zot Metadonn apre zot sorti.  E i annan ki admit pour en serten letan, 6 semenn, menm 3 mwan.  I annan de fwa menm 6 mwan.  Depandan lo ki zot sityasyon.

Mon pou dir ki nou’n annan en total, an tou, 70 bann ki’n desarze wi.  7,762.  Mon sif pa tro kler pour mwan.  Ok, sa bann dosage.  Bann ki’n pran tretman Metadonn.  E ok, wi.  Ler nou’n dir dosage, savedir 70,762.  Sa dosage of Metadonn.  I pa vedir kantite pasyan akoz pasyan:- kantite dosage of Metadonn ki zot pe pran, ok.  I 70,762 ki nou’n donnen sa.  I pa vedir 70 pasyan akoz en pasyan i pran en kantite, diferan doz ki zot pran.  So, sa i lakantite e ki mon krwar ler nou pe regarde, nou pe vreman depans en kantite larzan e menm, lafanmir osi pe kontribye parske nou demande pou zot kontribye an se moman.  Zot osi kapab kontribye akoz Minister li menm pa pou kapab.  E nou annan osi bokou pasyan parey nou dir, ki zot al rod avek Farmasi Prive, alternativ pou zot aret ganny lanvi servi drog.

Ki bann konstrent?  nou annan en kantite konstrent.  Nou annan en kantite konstrent.  Premyerman, nou pli gro konstrent se resours imen.  Resours imen i enn nou pli gro konstrent akoz nou napa ase.  Nou napa ase Dokter pou travay avek sa bann kalite pasyan.  Nou napa ase Psychologist pou ed nou avek nou bann pasyan akoz sa se bann pasyan ki bezwen bokou led.  Led, counselling en kantite e nou napa ase.  Menm nou lespas.  Wellness Centre i en nouvo Sant me nou lespas, lakantite pasyan ki nou kapab pran i pa sifi.  I pa sifi pour kantite demann ki nou annan.  Se sa ki Mont Royale i pe siplemant en pe e nou annan osi Coetivy kot bann lezot pasyan i ale.  I pe siplemant en pe e byento nou pou annan osi sa Sant Praslin ki pou ouver, ki pou kapab osi siplemant en pe.

So, mon krwar i annan en kantite travay ki nou bezwen fer e tou dimoun i bezwen met lanmen ansanm pou nou kapab fer sa travay.  Sekter Piblik, Sekter Prive e menm bann NGO’s.  nou tou nou bezwen met lanmen ansanm.  Nou tou nou bezwen rode ki meyer fason akoz ler nou krwar i pe diminyen, i pa diminyen.  Ozordi, bokou plis zenn i dan drog.  Letan ou get la Wellness Centre letan nou get bann zenn ki la, nou annan zenn ziska 14an ki vin rod lasistans.  12an ki vin rod lasistans.  E ler ou koz avek pou regarde ki mannyer in komanse e toultan i dir ou in komans kot lakaz.  In komans ganny anvoye pou li al fer en pti trafik e la in komanse pou li servi li osi.  I annan en kantite, en kantite problenm ki nou bezwen atake.  E parey mon’n dir, nou nonmen en pe bann keksoz ki nou pou fer e nou pe kontinyelman avek nou bann ledikasyon piblik lo sa maladi, pou nou fer dimoun en pe plis konsyan.  Dan lekol, i annan bokou ledikasyon ki pe ganny fer dan lekol, dan lakominote, pou nou kapab edik nou pep.  Se ledikasyon ki lakle an menm tan.  Mersi Mr Speaker.

 

MR SPEAKER

Mon vwar en kantite lanmen pe leve lo sa Kestyon.  Si mon pou permet enn de Supplementary, then nou pou bezwen pran Statement 11er.  I pa pou posib otherwise.  Minister, i ok ek ou?  Mon krwar ou ti’n dir nou ……….

 

(Interruption )

 

MINISTER MITCY LARUE

Wi, akoz 11er mon pou bezwen fini.  Mersi.

 

MR SPEAKER

But then, annou break osi dan kestyon e larepons.  So, mon pou bezwen move lo Kestyon 46.  Onorab Maria Payet-Marie.  Me avan mon fer li, petet Minister Lasante i a okouran ki bon nouvel se Hepatitis C ozordi Lerop pe ganny trete avek en drug tre bon marse.  Fek ganny entrodwir.  Petet i bon zot bann Spesyalis i resers lo la e sa mon krwar pou ed Lasante en kantite.

Kestyon 46.

 

HON MARIA PAYET-MARIE

Mersi Mr Speaker.  Avek le bi pou asir plis efikasite e en servis pli efektiv, eski Minis i kapab enform nou Lasanble ki zistans sa Health Information System i ete?  Mersi.

 

MINISTER MITCY LARUE

Mersi Mr Speaker.  Mersi Onorab.

Depi 2012, i annan plizyer demars ki Minister, pou ganny en sistenm enformatik.  Apre serten prezantasyon, en premye sistenm ti ganny idantifye, me apre Minister ti realize ki bann progranm ki sa sistenm i ofer, pa ti pou apropriye dan son totalite.  Alors demars ti kontinyen ankor.

Swivan en lot prezantasyon par en lot provider, en nouvo software ki pou kapab reponn bezwen nou sistenm lasante, in ganny idantifye.  Sa sistenm pou kouver tou servis ki nou ofer.  Tou bann spesifikasyon in ganny donnen pou prodiksyon sa sistenm.  I osi annan staff Minister ki’n ale lo en vizit, pou vwar sa sistenm an mars, dan en Lopital Dubaii.  Minister i annan en Lagreman avek Gouvernman Endyen e sa sistenm pou ganny peye atraver en grant par Gouvernman Lenn.  A ler aktyel, Minister pe esper konfirmasyon avek Gouvernman Lenn, kan sa larzan pou ganny met a nou dispozisyon e sa kominikasyon i normalman ganny fer atraver Minister Zafer Etranzer.  Antretan, bann prosesis neseser pou siport sa sistenm, pe deza ganny fer.  En profesyonnel IT in fini ganny idantifye pou ranpli sa post Direkter lo Pay Roll DICT e prosesis pour son rekritman i preski konplete.  Parey avek tou progranm, son responsabilite pou enkli kordin fonksyonnman sa unit, asire ki tou i mars byen, pran aksyon korektif neseser si i idantifye en problenm e sizer fason pou amelyor sistenm.

I osi annan en Komite ki pe etidye lezislasyon apropriye, parmi sa ki deza egziste, pou vwar kwa ki siport sa sistenm enformatik, ou si neseser, fer okenn lamannman.

Landrwa kot server pou ganny plase in fini ganny idantifye.  I annan deza en server room kot Diagnostic Centre.  Sa pou ganny lasistans en back up kot DICT.

Mersi Mr Speaker.

 

MR SPEAKER

Okenn Siplemanter, Onorab Marie?

 

HON MARIA PAYET-MARIE

Mersi Mr Speaker.  mr Speaker, mon ti a kontan demann Minis si i annan en mekanizm oubyen seksyon an plas, oubyen ase resours, ou kapab kontinyen monitor pour ki sa sistenm i reste enn ki efektiv?  Mersi Mr Speaker.

 

MINISTER MITCY LARUE

Mersi Onorab.  Se sa ki mon’n dir, nou pou anploy sa Direkter ki li i pou asire ki li ki pou monitor sistenm once ki i vin an plas, pou fer sir ki tou keksoz i mars byen.  Ok.  E zot pou travay avek DICT.  Mersi.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Bonzour tou dimoun.

Mr Speaker, pandan ki nou pou esper sa sistenm operate, eski Minis i kapab dir nou ki protokol, mekanizm i annan an plas, pour ki bann Lopital Santral, Lopital Victoria, i liaise avek bann Sant Lasante dan distrik, pou asire ki bann pasyan ki ganny discharge e ki bezwen bann swen spesifik kot lakour, ki pa kapab deplase.  Sa bann pasyan pe resevwar zot swen baze lo direktiv ki Lopital Santral i donnen?  Mersi.

 

MINISTER MITCY LARUE

Mersi Mr Speaker.  Mersi Onorab.

Mr Speaker, i domaz ki souvandfwa i annan en problenm la lo sa issue.  Me selman, protokol i deza la.  Ler en pasyan i discharge Lopital Sesel par egzanp, son Discharge Note, tou son keksoz i al dan son Klinik e follow up i bezwen ganny fer.  I la li.  I an plas.  I domaz ki souvandfwa i pa pe ganny fer.  E se sa mon krwar ki Lazans Swen Lasante i pou bezwen met en sistenm an plas, pou monitor ki sa i ganny fer.  E pasyan i ganny son swivi parey i neseser.  Akoz nou santi i annan en mank la.  Zot in deza ganny met okouran e zot pe regarde ki mannyer zot pou kapab amelyor sa sityasyon vizavi sa distrik, sa Klinik kot sa pasyan i ete.  Akoz souvandfwa, i annan de fwa, i annan osi ki kapab pa ale laba.  E ler pasyan i retourn dan son Klinik, i pa konnen oli son kart.  I annan sa.  Letan nou pou annan HIS, sa pou rezourd sa problenm.  Sa problenm pou nepli egziste.

Me pou le moman nou bezwen vwar, ziska ler nou ganny sa an plas.  Nou bezwen vwar ki mannyer nou pou amelyor sa sistenm ki aktyelman la, pa pe tro mars byen.  Mersi Mr Speaker.

 

MR SPEAKER

Onorab Volcere.

 

HON MARC VOLCERE

Mersi Mr Speaker.  Mr Speaker, mon ti a kontan demann Minis si sa progranm pou ganny fer an faz?  Si wi, eski zot pe konsider Praslin/La Digue koman bann priyorite dan sa faz akoz nou zistans avek bann servis spesyalize Mahe e bann mankman Spesyalis ki travay lo Praslin/La Digue?  Mersi.

 

MINISTER MITCY LARUE

Ok. Mersi Onorab.

Definitivman, nou pa pou bliy Praslin en La Digue.  Mazin byen ki sa i ladan me selman i pou annan son diferan faz.  Ok.  Pa vedir koman i komanse, ki Praslin osi pou deswit, me selman i pou annan son diferan faz me tou pou konekte.  Nou bezwen konekte tou nou bann distrik, tou nou bann Sant Lasante Praslin, La Digue, lo Mahe antye, avek sistenm ki pou an plas.  Pa bezwen trakas lo la.  Ok, akoz zistans li, i pa pou vin en problenm.  Mersi Mr Speaker.

 

MR SPEAKER

Bon, nou’n ariv a lafen Kestyon pour Minis Lasante.  Nou pou tanporerman remersye li e ekskiz li tanporerman akoz nou annan nou en Urgent Question.

Mon a demann Parliamentary Reporter pou fer antre Minis Cosgrow.  E Minis ava esper nou dan Minister’s Room, pour son Statement.

Bon nou ava pran Urgent Question pou Minis pour Lapes e Lanvironnman, Minis Cosgrow byenveni parmi nou.  Onorab Marie-Antoinette Rose demann ou kestyon silvouple.

HON MARIE–ANTOINETTE ROSE

Mersi Mr Speaker.  Bonzour Mr Speaker, bonzour Minis, bonzour, tou dimoun ki a lekout.  Mr Speaker mon kestyon i lir koumsa; eski Minis responsab pour Lapes ek Lagrikiltir i kapab enform sa Lasanble ki zefor kordinen ki son Minister pe fer pou elimin sa pest ki apel Hairy Caterpillar? Mersi Mr Speaker.

 

MINISTER WALLACE COSGROW

Bonzour Mr Speaker.  Bonzour tou Manm Onorab, bonzour tou bann dimoun ki pe ekoute lo radyo.

Mr Speaker parey in ganny obzerve sa pest i en gran konsern pou nou tou dan Sesel.  I pe koz domaz prensipalman dan nou lanvironnman, dan lakominote e lasante imen.  Enn bann lapros enportan ki’n ganny inisye e devlope se letablisman en Komite Nasyonal anba direktiv Departman Risk ek Dezas avek osi kontribisyon Minister Lagrikiltir atraver Lazans Lagrikiltir kot bann Sekter konsernen pe zwenn e travay ansanm koman en lekip avek bokou kordinasyon, korperasyon ek kontribisyon dan en fason tre konstriktiv e tre efikas avek bi pou redwir lenfestasyon e evantyelman elimin sa pest dan nou pei.

Pou arive akonpli sa misyon i annan en plan stratezik ki’n ganny devlope avek rekonmandasyon en bidze adisyonnel pou materyaliz devlopman en Progranm kontrol pou efektivman kontrol sa lenfestasyon dan Sesel.  Plan stratezik in ganny devlope par Komite.  I rekonmande ki tou Sekter konsernen swa endividi, Gouvernman oubyen biznes prive zot ganny ankouraze pou kontribye e pran zot responsabilite pou ede konbat sa sityasyon an itilizan tou bann resours posib.  A sa staz nou’n fer en kalkilasyon e fer rekonmandasyon pou en bidze R3 milyon pour sa lannen, pou sa lannen depi la ziska lafen lannen Mr Speaker. Nou’n ganny komitman an se moman R250 mil avek promes ki nou pou ganny ankor depandan lo bezwen ki nou annan, e baze lo plan ki nou pe met devan Gouvernman.

I enportan pou note Mr Speaker ki lenfestasyon sa pest pa pe tro tous an se moman Sekter Lagrikiltir.  I en bon nouvel akoz si i tous Sekter Lagrikiltir i kapab andomaz nou sekirite alimanter.  Me i en problenm osi dan lanvironnman, dan lakominte parey mon’n dir avek lasante imen.  Alor Sekter Lagrikiltir pe lans en lapel e pe osi rekomande ki nou tou nou zwe nou rol dan en fason ou en lot pou ede kontribye pou kontrol sa pest dan nou pei e Mr Speaker i enportan ki a sa pwen ki mon stress lo lefe ki nou tou nou bezwen donn en koudmen.  Lazans Lagrikiltir atraver mon Minister osi nou la, nou pou devan dan sa lalit e nou pou ede pou fer sir ki nou redwir lenfestasyon sa pest e ki nou seye elimin sa pest dan Sesel.  Nou la pou nou donn gidans, pou nou donn sipor pep, endividi avek bann biznes e Gouvernman an zeneral.

Bann travay prensipal en pti pe ki nou’n fer pandan ki nou’n dekouver sa pest isi Sesel.  Mr Speaker nou’n vizit bann sit enfeste.  Lazans Lagrikiltir atraver Plant Protection Office in vizit bann sit enfeste ansanm avek DRDM e lezot partner sirtou bann sit ki’n ganny raporte avek nou e lezot sit osi ankor petet ki dan nou vizit nou vwar poudir in ganny enfekte.  Nou’n entansifye travay resers pou kolekte maksimonn lenformasyon akoz i enportan ki travay resers i ganny inisye okomansman pou nou kapab determinen lekel sa pest, dan ki fanmir i sorti e ki mannyer nou evantyelman deal avek sa pest.  Ok?  Nou’n etabli kontak avek bann eksper a letranze. Nou annan dimoun Sesel ki annan kapasite pou ede me selman i enportan ki nou etabli kontak ek bann dimoun ki vreman, vreman eksperyanse, bann Antomologist, Actsonomist ki kapab ed nou idantifye e ed nou devlop en metod lonterm ki mannyer nou pou deal avek sa pest.

Nou’n anvoy lesantiyon a letranze.  Labitid nou anvoy li La Reunion me selman nou annan en kontak avek en laboratwar La Reunion me pou en rezon ou en lot nou pan’n kapab anvoye sa voyaz akoz serten kontrent lo zot kote.  Nou’n anvoy Ostrali e sa pest in ganny plizoumwen idantifye. Nou’n fer bann travay eksperimantasyon pou evalye serten lefe ki serten prodwi i annan.  Nou’n travay an partenarya avek bann lezot Sekter tel ki Minister Ledikasyon kot mezir kontrol in entansivman ganny fer kot bann lekol avek bi pou anpese ki progranm skoler i ganny afekte.  Nou’n fer progranm sansibilizasyon lo medya, zot ava rapel ki nou’n al lo News Extra, nou’n menm fer interview piblik e nou pe entansifye nou zefor lo medya, nou pe devlop bann progranm pou entansifye nou zefor lo medya.  Nou’n plas komann osi pou serten prodwi ki ler nou’n fer resers serten prowdi ki nou krwar poudir i pou efektif kont sa pest e sa se plizoumwen bann prodwi Biolozik ki kapab ganny vann lo stor lagrikiltir.  E Lazans Lagrikiltir parey mon dir oparavan nou partisip aktivman lo Komite.  Sa Komite i konpri Lazans Lagrikiltir limenm, Departman Risk ek Dezas, Minister Ledikasyon, Minister Lasante, Minister Lanvironnman, i tout en team ki kordin en travay pou fer sir ki nou fer en travay byen e ki nou finalman elimin sa pest isi.  Ok?.

Nou’n osi mont en travay letid pilotaz ansanm avek bann lezot Sekter konsernen kot en evalyasyon in ganny fer pou determin lefe sa bann prodwi parey mon’n dir boner, lekipman, laplikasyon teknik kontrol ek ler ki laplikasyon i kapab ganny fer pou kontrol sa pest e apre rezilta pou ganny pase avek tou Sekter konsernen, manm piblik e prensipalman bann lakonpannyen flitaz pou adopte menm stratezi ki nou, nou pe dir ki fodre ganny adopte.  Mersi Mr Speaker.

 

MR SPEAKER

Onorab Rose okenn siplimanter?

 

HON MARIE-ANTOINETTE ROSE

Mersi Mr Speaker.  Mr Speaker mon ti a kontan demann Minis ki travay ki pe fer pou li ganny sa finansman adisyonnel pou kapab vreman met sa sityasyon anba kontrol etan donnen set en konsern Nasyonal.  Eski Minis, son Minister, sa Komite in fer en analiz profon lo vre sityasyon ki lanpler sa sitysyon, si nou ekspekte plis domaz oubyen si i anba kontrol, oubyen si i pou ganny met anba kontrol.  E fas a sityasyon eski Minis i kapab donn en garanti sa Lasanble ki son Minister in reisi etabli en sel pwen kontak anka ki manm piblik i bezwen en lenformasyon ouswa led dan en fason ki manm piblik pa vwar zot pe telefonn plizyer Lazans san okenn larepons ouswa solisyon konkret.  Mersi Mr Speaker.

 

MINISTER WALLACE COSGROW

Mersi Mr Speaker.  An term bidze, nou bidze inisyal ki nou’n demande se en bidze R3 milyon.  Sa bidze R3 milyon i en bidze ki pou pran kont tou sa ki nou anvi fer pandan sa lannen 2015 pou nou kapab tackle sa problenm.  Sa i enkli rod resours pou pey bann Lakonpannyen Prive ki pou efektye bann spraying lo Mahe Praslin ek La Digue e osi pou kapab ganny en Eksper a letranze en Antomologist ki kapab vini evalye sityasyon avek nou, donn nou serten gidans e donn nou petet en nide, en plan ki mannyer nou pou travay pandan sa lannen.

Parey mon dir nou annan dimoun Sesel ki annan serten knowledge dan sa bann domenn, me selman nou bezwen dimoun bokou, bokou pli teknik, bokou pli avanse ki nou pou nou kapab ganny en lavans lo sa pest limenm.  E nou annan dimoun ki’n deza – nou pe idantifye dimoun ki’n deza travay dan sa domenn e dimoun ki annan lekperyans avek sa pest dan bann lezot pei par ekzanp similar pest ki ti arive Maldive, similar lenfestasyon ki ti arive Maldive.

E an term domaz Mr Speaker, nou’n evalye e nou konnen poudir sa pest i lo Mahe, i lo Praslin e i lo La Digue e sezon sek, i paret mwan ki sezon sek i riske agrav sityasyon.  Si nou letan i kontinyen reste sek i riske agrav sityasyon e riske fer ki sa pest i propaz en pe plis partou lo nou bann pye dibwa, partou lo nou bann plan.  Ok.  So se pou sa rezon ki nou pe demann finansman adisyonnel.  E finansman adisyonnel ankor, nou’n fer demann avek Minister Finans, nou’n ganny meeting avek Minister Finans e Minister Finans in dir nou baze lo nou plan, baze lo ki mannyer nou pe ale si i annan nesesite an plis pou donn finansman adisyonnel, keksoz i ava ganny fer pou nou kapab ganny sa finansman pou nou kapab fer sir ki nou met sa pest anba kontrol akoz nou konnen poudir i pe afekte nou lanvironnman, i pe afekte lasante imen.

Zis pou note Mr Speaker, Zedi swar pandan lannwit Zofisye Lazans Lagrikiltir MPPO avek Zofisye Lasante avek Zofisye Botanical Garden ti fer en sesyon flite lo lakot Beau Vallon, sa i from laboutik Mike, ziska kot Fisherman’s Cove.  E zot in fer sa ki nou apel en Knock Down Spraying avek en pestisid ase for zisteman akoz zot in fer li dan milye lannwit from 11er diswar ziska 3er bomaten, e dapre lanaliz zot in fer, en bon pe sa bann senir in tonbe e nou vwar ki sa pestisid i efektiv me prezan i annan en swivi ki pou ganny fer avek bann pestisid biolozik ki kapab ganny spray petet menm ler ou petet en pti pe pli boner ki napa gran lefe lo lasante imen well pou napa, plizoumwen napa lefe lo lasante imen e pou napa lefe osi lo bann lezot zensek ki dan bann pye dibwa  dan nou lanatir otour ki dan en mannyer ki nou pa vwar nou dan en lot problenm apre.  Ok.

So trwazyenm pwen Mr Speaker, wi Minister avek DRDM in etabli en pwen kontak e pwen kontak se Departman Risk ek Dezas e zot nimero i 4672200 e DRDM i byen plase, i pli mye plase ki nou, pou spread bann lenformasyon zisteman akoz sa rezo ki zot annan.  E DRDM once in ganny sa lenformasyon, manm piblik, biznes ou nenport ki i call zot, zot annan teknolozi pou tir sa lenformasyon kot zot e donn bann diferan parti konsernen ki enkli, Lazans Lagrikiltir, ki enkli Minister Lasante, ki enkli Minister Lanvironnman.  Mersi Mr Speaker

 

MR SPEAKER

Onorab Houareau

 

HON HUBERT HOUAREAU

Mersi Mr Speaker.  Bonzour Minis ek ou lekip.  Kestyon, eski Minis i kapab enform sa Lasanble dan leka kot sa kalite senir in anvair en pye dibwa proteze tel ki en pye Bodanmyen, ki akyelman i leka, si sa propriyeter pou ganny drwa koup sa pye dibwa e ki prosedir i bezwen swiv pou fer li.  E si osi zot annan okenn statistik ki dir ki kantite rapor in ganny fer, kantite in ganny deal avek kwa ki zot pa pe deal avek?  Mersi.

 

MINISTER WALLACE COSGROW

Mersi Mr Speaker.  I enportan ki note a sa staz ki nou pa al koup nenport ki pye dibwa ki nou vwar dan lanvironnman ouswa ki kot nou e ki nou swiv prosedir pou koup pye dibwa dan lanvironnman sirtou bann pye dibwa ki’n ganny proteze.  E prosedir se ki nou rod permisyon avek Minister Lanvironnman.  Ok.  Me dan leka kot in annan petet serten lenfestasyon kot bann lakour prive ou menm petet kot bann biznes, nou kapab donn advice ki mannyer pou deal avek.  Si i en bann plant ki ba ki kapab – ki pa ganny proteze ki kapab ganny koupe par egzanp pye tantan nou ankouraz dimoun pou netwaye, trete avan, koupe netwaye e evalye sityasyon.

Dan bann pye dibwa par egzanp pye bodannmyen ki en pti pe pli o nou pe ankouraz dimoun pou trete, pou spray, pou flite, evalye sityasyon, si petet i annan nesesite pou trim pye dibwa nou trim pye dibwa rezonnableman.  Me si i annan nesesite pou koup pye dibwa i enportan ki Minister konsernen, Minister Lanvironnman i evalye sityasyon e i donn permisyon. Nou pa pe ankouraz dimoun pou zis koup pye dibwa anbrit anbann partou dan mannyer ki afekte nou lanvironnman.

I annan 222 ka ki’n ganny raporte kot Lazans Lagrikiltir e sa bann ka in ganny vizite in ganny deal avek dan en fason apropriye.  Petet nou’n donn advice, petet in annan landrwa kot nou’n touse petet avek en pti spray.  Me selman dan sa 222 ka nou’n vizite e nou’n deal avek.  Mersi Mr Speaker.

MR SPEAKER

Onorab Pierre.

HON DAVID PIERRE

Mersi Mr Speaker.  Mr Speaker eski Minis i kapab dir avek sa Lasanble si zot in kapab idantifye ki fason senir plim in rantre dan pei avek bi pou pran pli gran mezir prevantiv alavenir?

E eski Minis i osi kapab dir nou si son Minister in fer le pwen avek Gouvernman pou fer available tou bann funds neseser imedyatman pou deal avek sa pest efektivman an vi konsern Lepep e an vi lepak negativ ki sa pe annan lo lasosyete Seselwa.  Mersi Mr Speaker.

 

MINISTER WALLACE COSGROW

Ok mersi Mr Speaker.  Onorab ki mannyer sa pest in antre Sesel, nou pa vreman konnen me solman parey nou konnen Sesel nou annan 2 – plizoumwen 2 por port of entry, nou annan por Victoria e nou osi annan Areoport.  I tre posib ki sa pest in antre atraver por i tre posib ki sa pest in antre atraver petet en bato lwazir, nou pa ankor vreman idantifye ki mannyer in antre akoz nou annan diferan point of entry ki en dimoun i kapab antre Sesel. Me selman nou pe mazinen petet in antre atraver en lenportasyon legal ou ilegal atraver nou bann por nou bann por prensipal ki Erport avek por komersyal, Por Lapes. Be selman nou ankor pe sey idantifye, nou ankor pe fer sa ki nou apel Pest Risk Analysis pou nou idantifye apepre ki mannyer sa pest in antre Sesel.

An term sa ki konsern funds parey mon’n dir oparavan nou an kontak direk avek Minister Finans.  Yer menm mon ti dan en meeting avek Minister Finans e in ganny met a nou dispozisyon R250 mil pou inisyalman deal avek sa sityasyon.  Me nou’n ganny konfirmasyon ki an mezir ki nou bezwen plis fon, plis larzan, an mezir ki demann i vini e baze lo nou plan ki nou’n fer, larzan i ava ganny met a nou dispozisyon zisteman pou fer sir ki nou deal avek sa sityasyon e ki i pa vin en pli gro konsern piblik ki i deza ete pou lemoman.  Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND.

Mersi Mr Speaker.  Bonzour Minis, bonzour Mr Speaker, bonzour tou dimoun.  Mr Speaker, eski Minis i kapab eksplik nou Lasanble, enform Lasanble plito, depi kan bann Lotorite dan Sesel i konnen ki sa nespes senir i dan pei e akoz pa’n fer nanryen tou sa letan oubyen konbyen letan in pran pou zot azir?

E an menm tan ki mezir prekosyon pou anpes bann tel sityasyon kontinyen afekte nou dan lefitir.  Savedir ki sistenm kontrol zot pe enplimante lo bann Port of Entry legal e Port of Entry ilegal dan pei.  Mersi bokou.

 

MINISTER WALLACE COSGROW

Mersi Mr Speaker.  Mr Speaker parey mon’n dir taler, non pardon mon a rekonmans sa kestyon. Nou ti dekouver sa lenfestasyon senir an Fevriye sa lannen ok, nou’n dekouver an Fevriye e ti dan en landrwa lokalize.  Me apre en serten letan, apre 1 semenn, 2 semenn nou komans ganny rapor ki’n annan diferan, diferan landrwa lo Mahe e apre nou’n ganny rapor ki’n annan lo Praslin ek La Digue.  So letan nou’n ganny rapor parey mon’n dir i annan diferan faz pou deal avek sa bann sityasyon. Enn bann faz enportan e primordial se faz letid.  Nou bezwen konnen kwa ki nou pe deal avek akoz si ou pa konnen kwa ki ou pe deal avek ou pa pou kapab annan en bon metod efektiv pou kontrol li.  Nou bezwen anvoy idantifye sa senir, akoz si nou servi nenport ki kemikal Mr Speaker, nou annan risk par egzanp nou servi en kemikal ki for nou annan risk tap li la, petet son bann offspring i vin rezistan avek sa kemikal ki for apre nou vwar nou en problenm ler nou pou al tret sa dezyenm zenerasyon i pa pe konpran sa kemikal for e prezan nou vwar nou dan en sityasyon nou pa pe kapab kontrole.  So nou bezwen idantifye lekel sa pest ?  Lekel sa best, sa pli bon metod kontrol ki annan ?  E nou pa bezwen obliye pou dir i annan kontrol biolozik osi ki kapab ganny fer, kontrol natirel.  I annan dan lanvironnman bann predater ki kapab atak sa senir e si nou ale zis nou spray nou touy tou bebet, tou zannimo ki annan dan lanvironnman, nou pou detrir petet sa predater osi ki kapab ed nou dan lefitir pou kapab detrir sa pest.  So resers ki’n ganny fer par Lazans Lagrikiltir i montre ki poudir i annan serten pestisid ki nou kapab servi, serten pestisid bann landrwa par egzanp lekol kot i enportan ki manrmay pa mank zot lekol over en weekend nou’n knock down, nou tir zot, apre nou repet avek en pestisid biolozik, enn ki safe pou lanvironnman imen avek bann pest. Nou lapros se servi bann pestisid biolozik ki osi efikas.  Si nou vwar nou dan problenm nou ava al avek sa ki pli for.  Me selman pou lemoman parey mon’n dir nou’n reserse, nou’n fer Komite e i annan en kantite ki’n ganny fer depi ki nou’n dekouver sa pest isi e i annan en kantite ki pou kontinyen ganny fer dapre nou plan pou fer sir ki nou kontrol sa pest, evantyelman nou anvi elimin sa pest isi Sesel.  Me selman i pa pou en latas fasil e nou bezwen kordinasyon tou dimoun, tou endividi, tou biznes, Gouvernman, Prive, Parastatal, tou dimoun i bezwen donn en koudmen.  Si nou bezwen donn en koudmen pou spray dan nou compound kot nou travay, biznes prive bann lotel, Gouvernman i ava take care of bann landrwa piblik e petet osi bann dimoun ki vilnerab ki pa kapab neseserman afford en Pest Control. Me selman sa nou bezwen evalye byen e fer sir ki resours piblik i ganny donnen dan bann landrwa kot vreman, vreman i annan bezwen.  Mersi Mr Speaker.

 

HON CHARLES DE COMMARMOND

Ki mezir prekosyon pou lefitir?

MINISTER WALLACE COSGROW

Ok sorry ekskiz mwan mon’n mank sa enn.  Pou lefitir Mr Speaker nou deza annan nou lo Por avek L’areoport Zofisye Fitosanniter.  Zot la tou lezour sak avyon ki apoze i annan en Zofisye ki verifye bann deklarasyon ki ganny fer lo Erport, pasaze avek kargo.  Sak bato ki antre, sak container ki ganny tire ki annan bann komodite lagrikiltir or bann prodwi lagrikiltir i ganny verifye, i ganny evalye.  E parey mon dir i annan serten lenstans par egzanp dimoun i pa deklar tou zot keksoz, dimoun i pa onnet me mon pe lans en lapel avek tou biznes, tou bann endividi ki travel ki antre avek bann lespes plant, zannimo ou bann prodwi plan, prodwi zannimo pou fer sir ki nou deklare avek Zofisye Fitosanniter lo Erport ouswa lo Por akoz i enportan ki sa i ganny fer.  Nou vwar ki sityasyon nou ete ozordi ek senir, nou vwar ki’n arive avek white fly, nou vwar bann diferan keksoz dan lepase e souvandfwa i bann akt pa responsab lo nou kote nou menm e nou bezwen mon krwar nou bezwen sever, nou deza sever, nou bezwen mon krwar vin pli sever avek nou Bio Security Act pou fer sir ki sa bann dimoun ki komet sa bann lofans zot ganny pini to the fullest extent of Lalwa.  Mersi Mr Speaker.

 

MR SPEAKER

Bon nou’n avek lafen kestyon lo Kestyon Irzans.  Mon ava remersye e ekskiz Minis ek son delegasyon parmi nou.

 

(MINISTER WAS EXCUSED FROM THE HOUSE)

 

MR SPEAKER

Bon mon ava envit Minis pou prezant son Statement.

MINISTER MITCY LARUE

Mersi Mr Speaker.  Mr Speaker, mon ti a kontan remersye ou salerezman e osi remersye Lasanble an antye pou donn mwan loportinite pou fer sa deklarasyon ozordi.  Ozordi i le 7 Avril.  Le 7 Avril i Lazournen Mondyal Lasante.  Depi 1950 sa zour i mark komemorasyon sa moman gloriye dan listwar kot lemonn ti vin ansanm pou esey rezourd bann gran problenm mondyal o size lasante an krean Lorganizasyon Mondyal pour Lasante an 1948.

Ozordi i osi sa zour ki nou bann Travayer Lasante isi Sesel nou’n adopte depi byen lontan pou nou reflesir lo nou travay.  Nou reflesir pa zis lo nou bann akonplisman ek bann febles personnel e kolektiv, me osi lo sa bann gran defi ek loportinite ki devan nou.

Lannen 2015 i annan en gran randevou istorik.  Randevou kot tou bann pei atraver lemonn, gran koman pti nou sipoze vin rann kont lo kwa ki nou’n reisi akonpli an relasyon avek sa 8 lobzektif milener pou devlopman e sa 23 target ki atase avek zot.  Depandan lo lafason ki ou’n konte i annan 15 a 25an depi ler ki bann diferan pei pe trimouse, pe fer tou pou atenn sa bann lobzektif.

Ozordi a lokazyon sa 3 konzanktir enportan mon ti a kontan rann kont avek pep Seselwa lo leta lasante nou nasyon.  Mon ti a kontan fer nou tou rapel detrwa barenm ki nou’n reisi depase ansanm koman en nasyon.  Nou’n akonplir bokou, me i reste bokou ankor pou nou akonpli ansanm.  Ansanm e touzour ansanm.

Letan mon pe fer referans avek leta lasante nou nasyon, mon pa pe fer referans selman avek leta Minister Lasante oubyen leta nou bann servis lasante.  Mon pe plito koz lo ki degre ki nou pei ek nou pep i an bonn sante.  Mon pe koz osi lo ki degre ki nou pei i an risk pou son lasante e ki si sa ki nou tou Sekter Piblik, Sekter Prive, Sosyete Sivil nou bezwen kontinyen fer ansanm pou nou anmenn sakenn nou bann sitwayen, nou bann fanmir ek nou bann diferan kominote ver en meyer lasante.  En lasante ki osi konplet e osi total ki posib.

Mr Speaker, mon’n deza dir e mon soulinyen ankor ki amelyorasyon lasante nou nasyon i pa en travay ki Minister Lasante i kapab oubyen ki i devret fer li tousel.  Lasante nou nasyon i en misyon e en devwar partaze.  Sakenn de nou, nou bezwen tyonbo nou pti bout la kot nou ete e bose.  Redi ansanm dan menm direksyon.  E la kot zot zot ete zot osi ser Manm Onorab, Manm Lasanble Nasyonal, zot osi zot annan en bout pou zot tyonbo, pou pouse pou fer nou osi avanse.  Se dan sa menm sa loptik lespri devwar partaze ki mon Minister pe kontinyen san ses depi lannen pase avek nou kanpanny ‘Mon lasante, mon responsabilite’.  Mon pou retourn lo sa kanpanny pli tar dan mon diskour.

Mr Speaker, nou Konstitisyon i garanti drwa sak sitwayen pou li ganny akse avek servis lasante.  Se pour sa rezon ki Minister Lasante i met sitan lanfaz lo lasante a tou laz atraver bann diferan servis ki i ofer.  Malgre sa, lasante maternel, reprodiktiv ek zanfan i ganny en latansyon tre spesyal.

Lannen pase, 2014 pou premye dan sa dernyen 25an nou to mortalite anfantil in ariv byen ba.  Par anba 11 lanmor pou sak mil zanfan ki’n ne vivan.  Nou konsider sa sif koman en sif remarkab akoz tou dernyerman in annan en kantite konversasyon negativ ki plizyer dimoun in fer lo kapasite Minister Lasante pou asir byennet nou bann pti baba fek ne.  Dezormen sa sif i en sif ki nou pe veye parey nou 2 lizye.  Nou pou kontinyen fer sir ki nou donn tou swen ki nou kapab tou nou bann manman ek tou nou bann zanfan.

Koman en Polisi global pou asir lasante nou pep pandan tou zot lavi, Sekter Lasante ek tou bann Sekter alye nou angaze pou fer tou sa ki posib e tou sa ki realis pou nou kontinyen amelyor lo sa statistik.  Sa pou demann bokou zefor e bokou lenvestisman lo la par nou pei.  Mon demann tou nou bann partner dan Gouvernman e an deor Gouvernman, ek bann fanmir pou travay avek nou lo sa size.

Mr Speaker, an mwayenn en garson ki ne isi Sesel ozordi i ekspekte viv par lao 67 lannen e en fiy i ekspekte viv par lao 77 lannen.  Seselwa pe viv pli lontan ki zanmen, e nou kalite lavi pandan sa apepre 65 a 80 lannen ki nou vivan i tre o.  To mortalite bann zanfan anba 1an ek lakantite lannen ki en dimoun i ekspekte viv zot 2 endikater tre enportan pou tou pei akoz zot annan en lyen direk avek nivo devlopman zeneralman e osi avek sa 8 lobzektif milener pou devlopman an partikilye.

Dan sa 8 lobzektif milener parey nou konnen, i annan 3 ki konsern Sekter Lasante pli spesifikman.  I mon plezir pou raport avek nou nasyon ozordi ki nou pei in fer tre byen lo tou le 3 sa bann lobzektif ki konsern Sekter Lasante.  Me i annan se pandan serten target ki nou pa’n reisi akonplir, e ozordi mon pou fokaliz pa tro lo bann sikse ki nou’n fer me sirtou lo nou bann defi ki devan nou akoz mon anvi ki nou fer pli byen.  E toultan pli byen.

Lobzektif milener nimero 4 i konsern rediksyon mortalite bann zanfan mwens ki 5an.  Pandan laz 1an ziska 5an i ase rar ki en zanfan i mor isi Sesel.  Bann sistenm ki nou’n met an plas tel ki servis vaksen ek bann lezot servis lasante e servis sosyal zot asir sa.  Nou defi i reste sa peryod anba 1an.  E dan sa peryod anba 1an se dan sa premye 6 semenn apre nesans ki nou bezwen met plis zefor.  Dan sa domenn an partikilye nou vizyon ek nou misyon se ki sa sif mortalite zanfan anba 1an i desann anba 10 e i reste anba 10.  Pou nou kapab fer sa, bokou lenvestisman pou neseser, lenvestisman sirtou dan meyer kalite e kantite resours imen.

Ozordi partou kot nou gete dan Sekter Lasante bon kalite e kantite resours imen i nou pli gran defi.  Ansanm koman en pei nou pou bezwen fer bokou refleksyon depi konmela menm, lo ki kalite e ki kantite resours imen ki nou pou bezwen annan e ki kantite larzan nou pou pare pou peye pou nou kapab ganny resours simen ki nou bezwen.  Pou nou kapab delivre sa onivo servis ki nou pep pe ekspekte e ki pou permet nou atenn tou sa bann o legzizans e sa nivo ekselans ki nou menm nou, nou pe mete pou nou lekor.

Lobzektif milener nimero 5 i konsern amelyorasyon lasante materyel.  Nou pe fer tre byen dan sa domenn, i tre rar ki en manman i perdi son lavi pandan peryod ki zot ansent oubyen zis apre zot lakousman.  Preski 100 poursan bann manman i ganny zot baba avek lasistans en profesyonnel lasante kalifye e konpetan.

Lot target anba sa lobzektif i konsern lasante reprodiktiv bann adolesan.  I reste gro travay ankor pou nou fer avek nou bann adolesan.  Fiy koman garson e lakominote annantye pou asire ki lansentman anba laz i redwir.  An mwayenn i annan byen par lao 325 ka zenn fiy ki tonm ansent sak lannen.  Laz sa bann zenn fiy ki tonm ansent i desann ziska menm 13an parfwa.  Sa fenomenn i pa enn pou Minister Lasante adrese li tousel.  Nou bezwen adres li ansanm, tou bann Sekter konsernen dan lasosyete e osi pli enportan bann paran.

Mr Speaker, nou pei i annan li en servis lasante reprodiktiv dan tou kwen Mahe, Praslin ek La Digue.  Malgre sa, nou’n konstate ki zis apepre 45 poursan bann madanm ki dan laz reprodiktiv ki servi sa bann servis.  Nou pe rode akoz nou bann madanm pa pe servi sa bann servis parey nou ti a swete.  Eski sa bann servis pa ase user friendly ?  Eski zot bann ler fonksyonnen pa konvenab ?  Eski i annan lezot rezon ?  An alan de lavan nou pe bezwen kapab donn repons pou sa bann kestyon enportan e devlop en nouvo lapros dan sa domenn.

Lobzektif milener nimero 6 i konsern rediksyon dan bann statistik VIH SIDA, tiberkiloz ek malaria.  Mon pou konsantre lo VIH SIDA.  Depi byen lontan nou’n reisi atenn sa target ki demande ki tou pasyan ki teste pozitiv pou VIH e ki merit tretman i ganny akse san okenn problenm avek tretman.  Malerezman nou pa ankor kapab redwir lakantite nouvo ka VIH ek lakantite ka lanmor koze par SIDA ki nou pe rikorde.  Nou pa ankor kapab atenn tou bann target sa lobzektif.  E sa malgre ki latizann ki tret VIH i a laporte tou dimoun ki merite depi byen lontan e ki tretman kont VIH i limenm en metod prevansyon ki tre efikas.

An 2014 nou ti rikord pli o kantite nouvo ka VIH dan en sel lannen ki nou’n rikorde dan sa dernyen 27an, ti annan 91 nouvo ka, 94 poursan ka an plis ki lannen 2013.  Pou note ki an Desanm 2014 nou ti komans en kanpanny test and treat.  Ti annan 10 madanm ansent ki ti teste pozitiv pou VIH an 2014, ladan ti annan 4 ka ki ti selman konnen ki zot pozitiv an 2014 menm, pandan zot lansentman.  Sa 10 madanm ki ti pozitiv pandan zot lansentman ti reprezant 43 poursan an plis madanm ansent ki ti teste pozitiv pou VIH konpare ek lannen avan.  Tou bann madanm ti ganny tretman e an 2014 nou ti rikord 19 lanmor parmi bann dimoun ki ti pe viv ek VIH.  Parmi sa 19 lanmor, 43 poursan ti fek teste pozitiv pou VIH an 2014 menm.  Transmisyon VIH parmi bann dimoun ki itiliz drog par lavenn e parmi bann zonm ki annan relasyon avek zonm i tre o.  Ne a mwen transmisyon parmi bann hétéro seksyel i touzour reste metod transmisyon pli enportan isi Sesel.  Ki sa i vedir ?  I vedir ki nou tou nou a risk e nou tou nou bezwen fer en zefor personnel pou nou anpes nou ganny enfekte.  Prevansyon i lakle.  Konsey ki nou bann progranm i donnen pou nou annan en sel partner seksyel ki responsab i ankor valid.  Konsey pou servi condom i ankor valid, me nou bezwen osi fer nou tes, pa zis enn fwa, me plizyer fwa si fodre.  Nou bezwen osi aksepte tretman boner si nou pozitiv.  Nou bezwen osi fer en zefor pou reste lo tretman ki Dokter i rekomande si Dokter in met nou lo tretman pou VIH. Lenfeksyon VIH konmela i bokou diferan avek sityasyon letan pase.  Tretman i efektiv e en dimoun enfekte ozordi i kapab viv en lavi normal avek tretman e sipor.  Fodre nou tir sa lafreyer.  Vin fer tes.  Fodre nou tir tou bann form diskriminasyon ki anpes dimoun vin devan e permet zot viv parey nou tou.  Sa i nou bilan lo sa 3 lobzektif milener ki konsern Sekter Lasante.

An regardan an avan nou pli gran defi lasante i reste bann maladi non transmisib.  Resers ki mon Minister fek fer lannen pase i montre klerman ki nou pe fer bokou progre dan sa direksyon menm si i ankor annan bokou pou fer.  Resers in konstate ki konpare avek 20an pase oubyen 10an pase, konsonmasyon lalkol parmi bann zonm pe tant pou diminyen.  En pti pe.  Sa i tre byen e i devret diminyen ankor bokou plis ki sa.  Se pandan, konsonmasyon lalkol parmi bann madanm pe tant pou ogmante.  Nou pe obzerv sa tandans parmi bann madanm tou laz e dan preski tou bann kous sosyo-ekonomik nou sosyete.  Sa i tre enkyetan.

Gras a zefor remarkab ki Minister Lasante ek son bann partner in fer pandan plizyer lannen, konsonmasyon sigaret ek bann prodwi taba pe kontinyelman desann.  Sa rediksyon dan konsonmasyon sigaret ek bann prodwi taba pe anmenn rediksyon konsiderab dan lakantite dimoun ki ganny latak laservel ek latak leker a bann tre zenn az.  Mon oule ankouraz nou bann zenn pou kontinyen evit sigaret, akoz napa nanryen ki bon dan en sigaret.

Pandan sa dernyen 25an i annan logmantasyon dan lakantite ka maladi tel ki maladi kardyovaskiler ek kanser.  Sa i eksplike par lefe ki nou popilasyon i kontinyelman agrandi e nou pep pe viv pli lontan ki 25an pase.  Nou fason viv osi in vreman sanze.  Me ler nou fer lazistaz avek bann diferan laz, to mortalite koze par bann maladi kardyovaskiler, tel ki latak leker, latak laservel e osi kanser in byen desann.  Sa bann bes i koze prensipalman par bann progranm lasante piblik ki nou’n fer.  Akse avek servis lasante ki ekselan e osi amelyorasyon remarkab dan standar lavi bann Seselwa.  Letan mwens dimoun i mor tre zenn ek sa bann maladi, sa i annan en lyen direk avek lesperans lavi ki parey nou’n dir oparavan in ariv 77 lannen pou bann madanm e 67 lannen apepre pou bann zonm.

Malgre ki sa bann statistik maladi non transmisiv ki nou’n rikorde zot tre ankourazan i osi annan detrwa lezot statistik ki rann nou tre enkyet.  Par egzanp, nou bann resers pe montre ki lakantite dimoun ki ganny dyabet oubyen ki zot lapeze i tro o pe kontinyen ogmante.  An 1989 ti annan 28 poursan bann zonm ek 51 poursan bann madanm ki zot lapeze ti tro o.  An 2013 sa sif ti’n monte pou vin 57 poursan bann zonm sorti 28 poursan e 72 poursan bann madanm sorti 51 poursan.  Ozordi preski 12 poursan bann zonm ek 11 poursan bann madanm isi Sesel zot ganny dyabet.  Par deryer sa bann ki’n konfirmen dyabetik, i annan ankor en gran norm ki pe vini, ki zot disik dan zot disan i deza lo frontyer abnormalite.

Lepidemi dyabet ek lepidemi lapeze tro o, zot annan relasyon direk avek kanmarad.  Nou bezwen adres zot ansanm.  Nou bezwen adres sityasyon nou nitrisyon avek determinasyon e nou sityasyon mank aktivite fizik avek viger.  Mon salye zefor Minister Ledikasyon ek Konsey Nasyonal pou Spor ki pe asire ki tou zanfan Sesel zot konn naze avan 10an.  Mon salye linisyativ Sey X30, en proze Sekter Lazenes Ledikasyon ek Lasante.  Mon salye tou bann klib sportif, lwazir, rekreasyonnel ek kiltirel ki gard nou popilasyon aktiv fizikman.  Nou bezwen fer ankor bokou plis dan sa domenn.  Nou bezwen nou tou leve lo nou sez, les nou computer avek televizyon, kit nou transpor, marse e bouze pou nou lasante.  Mwens disik, mwens disel, mwens delwil dan nou manze, plis fri ek legim e plis aktivite fizik i devret vin nou nouvo fason viv.  Mannyer keksoz pe ale i pa en kestyon ki ti a bon nou adopte sa bann pratik.  I plito en kestyon ki nou bezwen.  Wi, nou bezwen adopte zot si nou anvi reste an bonn sante.  Si nou bann zanfan, nou bann zenn ek nou bann adilt zot angaz zot plis dan bann aktivite fizik, nou pou kapab ranvers sa tandans.  E si nou reisi ranvers sa bann tandans, reperkisyon lo nou lasante, lo Bidze Minister e lo prodiktivite nou pei, lo nou lekonomi pou enorm.

Mr Speaker, nou gran lenkyetid set osi sa bann maladi transmisiv.  Zot osi zot annan lyen direk avek lafason ki nou anmenn nou lavi.  Nou aksyon ek nou omisyon, zot toultan, toultan refoul lo nou menm.  Lanmen mor parey nou dir an kreol i toultan bat son met.  Ler nou lanvironnman pa prop, par egzanp, lera i vin nou zannimo domestik.  E ler lera i viv obor nou leptospiroz pa tro lwen.  Lakantite dimoun ki pe ganny leptospiroz ek lakantite dimoun ki pe mor ek leptospiroz i vreman alarman.

An 2014 ti annan 50 ka leptospiroz konfirmen e 90 poursan sa bann ka ti bann zonm.  Sa sif 50 ka i preski 80 poursan an plis ki sif lannen 2013.  11 dimoun ti mor Sesel avek leptospiroz an 2014, zot tou zot ti bann zonm.  An 2013 ti annan zis 5 tel lanmor.  Mon Minister pe esey rode e esey konpran akoz ki se plis bann zonm ki ganny afekte par sa maladi.  Mon Minister pe osi met bokou mezir an plas pou redwir sa lepidemi.  Me ankor mon repete i pa responsabilite selman mon Minister.  I en responsabilite partaze.  I en devwar kolektiv, nou bezwen nou tou ansanm anpes propagasyon lera ek bann zannimo eran.  Nou bezwen gard nou lanvironnman bokou pli prop ki sa.  Nou bezwen servi proteksyon ler nou travay dan nou zarden, ler nou retir okenn salte.  Nou bezwen lav nou lanmen apre ki nou’n servi twalet, avan manz okenn keksoz.  Ler nou fer vizit Lopital e sorti dan Lopital.  Nou bezwen gard touzour en bon lizyenn kot lakour, dan landrwa travay e gard Sesel touzour prop.  Problenm leptospiroz, problenm SIDA ek problenm Epatit C.  Sa lot gro fleo ki nou tou nou konnen.  E pa donn nou okenn lespas pou nou kale.  Nou bezwen travay pli dir ankor pou nou abes sa bann sif.

An 2014 ti annan preski menm kantite nouvo ka Epatit C ki nouvo ka VIH.  Par kont ti annan 12 ka lanmor avek Epatit C konpare avek sa 19 ka lanmor avek SIDA ki mon ti mansyonnen taler.  Parmi sa 93 nouvo ka Epatit C an 2014, 28 ladan ti osi teste pozitiv pou VIH.  Ti annan 4 ka Epatit C parmi bann madanm ansent.  Sa bann sif i montre nou ki nou bezwen pran Epatit C o serye lo tou nivo, me sirtou lo nivo prevansyon.  E taler Mr Speaker in nonm tretman ki byensir nou ava regard sa posibilite.

Bann ka lezot maladi ki transmit par sex parey Gonore, Sifilis ek lezot ankor, zot osi zot pe dir nou ki nou bezwen adres zot avek bokou plis efikasite avan ki zot detri nou zenn popilasyon.  Nou popilasyon prodiktiv e reprodiktiv.  Sa bann maladi seksyelman transmisiv se zot menm zot laport antre pou VIH.  Zot en lendikasyon lakantite relasyon seksyel a risk e non proteze ki pe kontinyelman arive dan nou sosyete malgre tou zefor ledikasyon prevantif ki bokou nou pe fer.

Ser pep Seselwa, fas a tou sa bann maladi nou bezwen pare pou nou adopte bann mezir ki modern, ki baze lo levidans e ki la pratik enternasyonal in montre klerman ki zot marse.  Nou pa kapab kontinyen avek bann vye pratik, bann vye labitid ek latitid ki pa permet nou fer okenn progre dan sa bann domenn.  Nou bezwen bouz devan, nou bezwen realis, nou bezwen entelizan avek nou bann stratezi.  Annou ouver nou lespri pou nou kapab aksepte e adopte sa bann nouvo stratezi avan ki i tro tar.

Mr Speaker, lasante nou nasyon i lye direkteman avek nou lekonomi ek nou devlopman.  I absoliman enportan ki tou nou bann sitwayen zot reste an bonn sante pou nou nasyon kapab kontinyen progrese.  En pep malad pa en pep prodiktiv.  Ozordi nou annan ase konesans pou nou adres laplipar bann maladi ki pe konfront nou nasyon.  I depan lo sakenn de nou pou nou valorize sa standar lavi ki nou zouir.  Sa lasante gratwit ki nou ankor annan e sa servis lasante ki la a nou dispozisyon.  Pa pran li a la lezer.  I depann lo sakenn de nou pou fer nou par pou gard nou lekor an bonn sante pou anpes nou malad.  Lannen pase Minister Lasante ti lans kanpanny ‘Mon lasante, mon responsabilite’.  Bokou dimoun in servi sa kanpanny pou anmenn sanzman pozitiv dan zot konportman.  E sa lannen nou pe ekspekte ankor plis partisipasyon ek piblik.  Napa 2 fason, nou lasante i nou responsabilite.  I komans avek nou menm e i fini avek nou menm.  Annou prezerv nou lasante, annou komans lanmenm la kot nou ete.  Annou komans dan lakour.  Mersi Mr Speaker.

 

MR SPEAKER

Bon mon a pran enn de kestyon parey i tradisyon.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, eski Minis i kapab – felisit premyerman Minister sa travay ki zot pe fer dan sa direksyon.  Eski Minis i kapab eksplik nou Lasanble ki progranm training, plan training e rekritman Dokter Seselwa dan lekzekisyon e lenplimantasyon sa progranm lasante, nou progranm lasante.  E eski an menm tan Minister Lasante i annan rikord VIH e Epatit C dan prizon?  Eski Minis i kapab donn nou en pe detay lo la.  Thank you, mersi bokou.

 

MINISTER MITCY LARUE

Mersi Mr Speaker.  Progranm training i enportan.  Training pou nou staff i enportan e spesyalman pou nou staff Seselwa.  Aktyelman nou annan 30 zenn Dokter ki la, pare pou al training e nou pe fini eksplor tou bann landrwa kot sa lannen nou pe anvizaze apepre 24 pou kit pei pou zot al komans zot training, ki pou fer ki sa 30 zenn Dokter by lannen prosenn pou’n fini al fer zot training. Pour ki an retour dan 4, 5, 6an pli tar nou kapab ganny nou prop dokter Seselwa pou pran bann pozisyon kle dan Minister Lasante.

Kot i konsern recruitment nou pe fer recruitment aktyelman pou nou ganny enpe bann Spesyalis.  Spesyalis si i annan Seselwa byensir i tonm dan sa kad me i annan serten Seselwa ki New Zealand ki nou pe osi an kontak avek.  Otan ki posib si nou ganny Seselwa byensir Seselwa pou pran presedans lo etranze.  Me si napa byensir nou pou bezwen viz ver etranze me nou pou pran osi sa ki kalifye e sa nivo spesyalis ki nou bezwen.  Akoz sa ki nou santi i annan en problenm ladan.

Lo kestyon VIH nou annan, definitivman nou annan statistik lo kantite dimoun ki HIV positive and so on.  Me dan prizon nou fek, taler mon ti mansyonn en pti git lo nou annan en travay ki nou bezwen fer ek prizon sa lannen tre seryezman.  Pour le moman i annan travay ki ganny fer dan prizon.  Me selman nou menm nou, en tandans pli konsistan nou bezwen ale ver sa lannen.  I annan en Dokter aktyelman ki travay me selman lo kestyon VIH SIDA nou bezwen antre e pou nou kapab komans teste, trete osi dan.

Non, nou pa pe konnen akoz nou bezwen al fer bann test la pou nou konbyen.  Fer teste, trete akoz nou progranm ki nou ti lanse avan lannen se test and treat.  Se sa ki nou pe fer, akoz sanmenm sa ki nou’n ganny sepa konbyen dimoun ki ti raporte avek VIH, akoz pa ti pe fer sa teste.  Dimoun i per pou vin teste.  Alor nou pe menm al dan bann kominote pou nou kapab teste dimoun e ler zot in teste pozitiv nou bezwen tret zot.  Akoz tretman dimoun i kapab viv en lavi normal parey lezot dimoun.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, mon osi mon ti a kontan briyevman felisit Minis pou son kont randi byen prezante.

Mr Speaker, mon ti a kontan demann Minis petet ki travay ki pe ganny fer avek Sekter Prive pou zot osi ofer servis pou bann dimoun ki annan en swa alternativ par egzanp bann logmantasyon bann klinik prive e osi Lopital Prive ki annan en gran bezwen ozordi dan Sesel.

E Mr Speaker, i kler atraver Statement Minis ki en gran parti travay se sansibilizasyon piblik.  Ki travay Minister ansanm avek bann lezot partner pe fer pou fer sir ki sa mesaz ki in lir ozordi dan sa Lasanble i ariv dan tou lakour e i ariv vreman, tou dimoun i konpran li tre byen e i komans pratik li.  Mersi Mr Speaker.

 

MINISTER MITCY LARUE

Mersi Mr Speaker.  Parey Onorab in fer remarke, wi nou bezwen fer en bon pe travay ansanm avek Sekter Prive.  Par egzanp nou annan bann klinik prive kot zot travay vreman an etrwat kolaborasyon avek Minister Lasante e nou annan serten Lorganizasyon ki pe anvi vin fer Lopital Sesel.  Akoz nou pou apresye si i kapab annan en Lopital Prive Sesel byensir pou konplemant en pe sa ki nou nou pe fer e an menm tan donn sa Seselwa en lot sans, en lot opsyon kot mon anvi al prive e mon kapab afford mon al prive.  So mon krwar sa i la akoz Gouvernman in fini donn en bout later en Konpannyen e demars pe ganny fer pou zot komans konstriksyon zot Lopital e ki nou pe vreman apresye sa.  E sa i pou ed nou osi par egzanp si sa Lopital i kapab donn servis ki olye nou pou anvoy li aletranze e sa servis pe ofer Sesel, i pou koup kou lo Minister Lasante.  Nou pa bezwen anvoy li dan sa pei, me nou anvoy li isi menm, i ganny sa menm tretman e isi i annan konfor son fanmir otour li ki pou ed li pou li osi byen pli vit.  Alors sa mon krwar i pou vreman vin en plus pou nou kot Minister.

Sansibilizasyon, definitivman nou annan sa kanpanny ki nou pe fer dan distrik, nou pe zwenn onivo tou distrik.  Nou’n komans enn e ladan nou pou anmenn tou nou kanpanny ki mannyer nou pou sansibiliz dimoun pou pran zot responsabilite.  Akoz ler ou’n ekout mwan letan mon’n donn mon statement i montre ki i annan bokou keksoz ki relye direkteman avek sakenn de nou.  Si sakenn de nou dan sa pei nou pran nou responsabilite vizavi diferan keksoz ki mon’n mansyonnen, nou lekor, ki mannyer nou gard nou lanvironnman, ki mannyer nou – kalite manze ki nou manze.  Kalite legzersis ki nou fer, nou konportman seksyel, nou bann move labitid bwar kantite ziska nou tonbe sek, olye zis bwar an moderasyon.  Servi sigaret konmsi sa i en nespes mon pa konnen, draze, tousala si nou sanz en pe nou konportman nou pou kapab fer en gran diferans dan sa pei.  E nou pou annan bokou plis prodiktivite e kou kot Minister Lasante pou redwir.  Ok, nou annan en sansibilizasyon o nivo tou distrik ki nou pe fer, byensir atraver medya nou pe fer e dan bann lekol nou pe fer.  Mon krwar i annan e Sekter Prive mon pou dir zot deryer nou.  Nou pe anmenn bokou Sekter Prive, bann NGO’s pe travay avek nou pou nou kapab sa – e sa lannen menm nou pou annan en konferans, en kolok parey i fer dan tou pei.  Lannen pase ti fer La Reunion, kot nou’n ale, kolok pou VIH SIDA sa pou ganny fer Sesel sa voyaz.  Tou bann pei pou vin Sesel kot nou pou fer sa kolok lo VIH SIDA e la ankor pou nou gete ki nou’n achieve, kote nou’n arive avek nou bann lobzektif nou osi e ki bann meyer solisyon ki lezot pei pe fer pou nou ansanm kapab fer bann stratezi ki parey mon’n dir lezot pei pe fer ki anmenn benefis.  Fodre ki i pe anmenn benefis akoz nou pa kapab zis pran en stratezi ki demen i vin en katastrof pou nou.  Nou bezwen fer sir avan nou lans nou dan en progranm, sa i byen, i annan en stratezi pozitiv e i pou anmenn benefis pou nou pei.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, mon a remersye Minis pou sa Statement detaye ki in donn nou bomaten.  Me eski Minis i kapab dir sa Lasanble si zot in fer en resers profon pou idantifye kwa ki pe koz sa gran gap ant life expectancy pour zonn e pour fanm?  Kwa ki zot pe fer pou ede redwir sa gap?  E kwa ki zot pe fer pou sansibiliz bann Msye pou make better use of bann fasilite medikal ki egziste isi Sesel ?

E dezyenm kestyon, eski Minister pe travay lo en plan global e byen kordinen dan lafason ki sa Minister pou apros e adres sa bann defi ki Minis in koz lo la efektivman.  E kan ki zot anvizaze ki sa plan pou pare ?  E eski i form parti zot thinking pou senfoniz laz konsantman en fiy pou sex e laz ki zot kapab pran kontraseptiv.  Mersi Mr Speaker.

 

MR SPEAKER

Onorab sa en pake kestyon en, nou ti dir en kestyon par personn.  Time is of essence.

 

MINISTER MITCY LARUE

Mersi Mr Speaker.  Mon krwar Onorab in demann pres 5 kestyon.  Mon ava reponn sa ki mon’n ganny en konpran ladan.  Bon, premyerman Mr Speaker nou osi letan nou get laz bann Msye ek bann Madanm i annan sa gap preski 10an.  E nou’n fer serten analiz me nou pa’n al a fon.  Premyerman enn ki nou’n santi i annan se ki bann Msye pa tro kontan servi servis lasante.  Zot kontan vin bann dernyen moman ler zot santi zot pa byen, petet sa lepok in tar kot zot perdi zot lavi.  Souvandfwa i arive sa.  E tandis ki bann madanm zot en pti pe pli sansib avek zot lasante, konmsi koman zot santi en pti keksoz zot tay kot klinik zot regarde ki pe arive.  Ou konpran, zot servi tou sa.  Apre nou santi ki i annan lezot fakter osi, lezot fakter ki bann msye, la parey petet letan ou al lo drog, lo drog li menm li.  Nou annan bokou plis msye ki lo drog ki madanm.  Sa osi i annan en lefe negativ lo zot lasante.  E 2013 osi, nou ti fer en study lo 2013 ki’n donn nou en pe bann statistik osi ki nou ankor, nou pa ankor fini analize.  Nou pe analize fiy e an mezir kot apre nou kapab fer en plan stratezik.  Akoz nou pe deza travay lo en plan stratezik pou lasante kot tousala pou enkorpor ladan pou nou kapab brige the gap.  Kot nou krwar sa gap i tro gran Mr Speaker.  E lo plan global definitivman nou travay tre pros an kolaborasyon avek Lasante Mondyal pour lasante, WHO, nou travay avek lezot Lorganizasyon e byensir nou kordin tou nou bann aksyon e plan otomatikman i ganny, akoz nou atenn bann World Health Assembly, bann diferan Konferans kot tousala nou met ansanm apre nou annan nou en plan global.

 

MR SPEAKER

Onorab Souris, dernyen kestyon nou ava pran.

 

HON MIRENA SOURIS

Mersi Mr Speaker.  Mr Speaker, baze lo bilan ki Minis in donne lo devlopman milener vizavi HIV AIDS e an vi ki UN AIDS in met en target pou redwir par 50 poursan bann nouvo ka HIV par lannen 2015 e 0 deteksyon par 2030, ki plan konkret ki Minister pe met ater pou fer sir ki nou atenn sa lobzektif?  Mersi.

 

MINISTER MITCY LARUE

Ok, mersi Mr Speaker.  Nou pe deza reviz nou Strategic Plan pou HIV and AIDS la.  Aktyelman i an revi.  Apre nou’n lans sa kanpanny test and treat akoz nou’n set target pou tan, a lafen lannen nou bezwen apepre teste nou ti’n dir 75 poursan popilasyon i bezwen ganny teste.  E ler nou’n fer sa nou kapab konnen ki kantite ka ki nou annan e pou nou trete.  Akoz lemoman ki nou pa konnen, nou pa kapab trete.  E si dimoun pa vini nou pa kapab fer li.  Alor nou pe sorti kot dan esper dimoun vini osi, nou pe sorti pou nou al dan bann landrwa, par egzanp landrwa travay, dan bann kominote pou nou kapab fer bann test apre treat bann dimoun.  E 2020 parey nou dir nou bezwen annan 0 lenfeksyon HIV an 2020.

So epi osi tretman ki pe ganny donnen i vin koman en prevansyon.  Akoz sa i pou redwir risk lenfeksyon, nouvo lenfeksyon avek pou transmet lenfeksyon avek lezot dimoun.  Mersi Mr Speaker.

 

MR SPEAKER

Bon avek sa nou’n ariv a lafen kestyon pou sa Statement.  Mon a remersye Minis pou sa Statement tre detaye, tre enteresan e mon a osi remersye bann manm son delegasyon e mon ava eskiz zot parmi nou.

 

(MINISTER WAS EXCUSED FROM THE HOUSE)

MR SPEAKER

I reste nou ankor en travay pou nou fer.  Nou annan en First Reading.  Revenue Administration (Amendment) Bill, 2015.  First Reading, yes.

 

MADAM AG CLERK

This Act may be cited as the Revenue Administration (Amendment) Act, 2015.

 

MR SPEAKER

Bon avek sa nou’n ariv a lafen travay pou ozordi e ABC nou pe zwenn ozordi 1.15. Ouswa zot pou’n fini al dan – zot pou dan lanterman zot bann ki dan ABC?  Mon annan en meeting ek en Minis la.  Ok, so ABC 1.15.  Nou ava adjourned, Mardi prosen le 14.

 

(ADJOURNEMENT)