::
Home » Verbatim » Verbatim- Tuesday 8 August, 2006 (Special Sitting) » Verbatim- Tuesday 8 August, 2006 (Special Sitting)

Verbatim- Tuesday 8 August, 2006 (Special Sitting)

NATIONAL ASSEMBLY OF SEYCHELLES

Tuesday 8th August 2006

The Assembly met at 9 am

National Anthem

Mr Speaker in the Chair

 

MR SPEAKER

Bonzour tou Onorab. Mon akey zot pour sa sesyon spesyal ki en konsekans eleksyon prezidansyel ki’n fini.  Premye item lo nou azanda pour bomaten konsekan en ranplasman enn nou manm elekte proporsyonnel. En lot personn in ganny apwente e premye item se sermantasyon sa personn, se Marie Antoinette Rose ki pou ranplas Msye Jolicoeur. Alors mon demann zot debout letan nou pe fer sermantasyon.

 

HON MARIE ANTOINETTE ROSE

I, Marie Antoinette, Rose do swear that I will be faithful and bear  true allegiance to the Constitution of Seychelles and that I will preserve, protect and  defend the Constitution of Seychelles.  So help me God.

MR SPEAKER

Avek sa nou akey sa nouvo manm e nou kapab asiz.

(Applause)

 

MR SPEAKER

Konsekans ranplasman Msye Jolicoeur i fer ki nou post Deputy Speaker i vacant, alors nou bezwen elekte en Deputy Speaker e mon’n pare si i annan okenn propozisyon.

 

MR PATRICK HERMINIE

Msye Speaker anba lord 3 nou ti oule propoz Msye Dick Esparon koman kandida pou post Deputy Speaker. Mr Speaker i pou neseser ki anba lord 88 mon pou demann ou pou sispann lord 3(1)(ii) avek (3)(3)(ii) pour ki sa eleksyon i kapab ganny fer ozordi bomaten.  Mersi.

 

HON ANDRE POOL

Motion seconded Mr Speaker.

MR SPEAKER

I annan okenn lot propozisyon pour Deputy Speaker. Si napa mon deklar Msye Esparon koman Deputy Speaker.

Avan mon ale mon oule dir en mo rekonesans kontribisyon travay ki nou ansyen Deputy Speaker in fer pour sa lasanble dan 13an. Alors mon oule met lo rikord mon rekonesans son travay e son kontribisyon.

Nou vin lo lot item konsernan aprouvasyon bann minis e si nou kapab pran premye.

 

MR HERMINIE

Msye Speaker swivan eleksyon Msye James Michel koman Prezidan Larepiblik i swiv natirelman ki i bezwen form gouvernman e ozordi in prezant avek nou atraver mon lofis sa 10 personn ki pou form parti son Cabinet pour sa prosen 5an.

Msye Speaker mon ava komans par premye nominasyon e mon ava demann sa lasanble pou aprouv apwentman Msye Danny FAURE koman Minis dan gouvernman Prezidan Michel.

Msye Speaker C.V. Msye FAURE in ganny sirkile avek tou manm dan sa lasanble nasyonal. Msye FAURE pa nouvo lo lasenn politik. Msye FAURE ti menm okip sa post ki ozordi mon pe desarze; Leader of Government Business pandan lannen ’93 ziska ’98. Apre sa Msye FAURE in ganny responsabilite ministeryel e  depi ’98 in Minis pour Ledikasyon.  An Avril 2004 Minis FAURE ti ganny fer Minis dezinnyen par Prezidan Michel. Ozordi mon pe demann sa lasanble pou donn zot siport apwentman Msye Danny FAURE.

 

MR SPEAKER

Okenn ki segonn sa?

MR POOL

Mon segonde Msye Speaker.

 

MR SPEAKER

Okenn ki oule dir en keksoz lo sa propozisyon.  Si napa nou pran en vot. Tou sa ki an faver lev zot lanmen.  Okenn ki kont? Sa mosyon in ganny aprouve. Dezyenm mosyon.

 

MR HERMINIE

Msye Speaker dezyenm apwentman i konsern apwentman Madanm Sylvett POOL koman Minis.  Madanm Sylvette POOL i osi pa nouvo lo lasenn politik, in en Minis depi 1989 e mon ava dir ki i enn bann Minis avek plis leksperyans dan gouvernman, in Minis pour Lenformasyon, Kiltir ek Sport e in osi Minis pour Local Government. Me laplipar nou, nou mazin son performans ekselant ki’n fer dan domenn sports.  Madanm POOL i en madanm seselwa devoue, patriotik ki travay tre dir e mon asire ki sa lasanble nasyonal pa pou ganny okenn  difikilte pou aprouv son nominasyon koman en Minis.

 

MR DICK ESPARON

Motion seconded Mr Speaker.

MR SPEAKER

Okenn dimoun ki oule dir keksoz lo la.  Si napa tou sa ki an faver lev zot lanmen. Okenn ki kont.  Mosyon in ganny aprouve.  Trwazyenm mosyon.

 

MR HERMINIE

Trwazyenm mosyon Msye Speaker i konsern Mr Patrick PILLAY koman Minis dan nouvo Cabinet Prezidan Michel.  Msye PILLAY parey nou konn tre byen in deza Minis pour bann zafer etranzer e Msye PILLAY osi i pa nouvo lo lasenn politik. An ’89 ziska ’93 i ti Sekreter Prensipal pour Minister Ledikasyon kot i ti fer en mark e si oule apre en tel performans i ti ganny demande an ’93 pour li vin Minis pour Ledikasyon ek Kiltir.  In Minis dan plizyer Minister, i enkli Lendistri  e Biznes Enternasyonal osi byen ki lasante.

Parey nou konn tre byen Msye Speaker ziska yer Msye PILLAY in si oule sef ladiplomasi Sesel lo lasenn enternasyonal kot parey nou konn tre byen i pe fer en tre bon travay.  Donk alors mon ava demann sa lasanble pou aprouv son nominasyon koman Minis.

 

MR SPEAKER

Okenn ki segonn sa.

 

MR POOL

Motion seconde Msye Speaker.

 

 

 

 

MR SPEAKER

Okenn komanter. Si napa, tou sa ki an faver lev zot lanmen.  Okenn ki kont.  Mosyon in ganny aprouve.  Katriyenm mosyon.

 

MR HERMINIE

Katriyenm mosyon Msye Speaker se pou demann lasanble pou aprouv apwentman Msye Jacquelin, Patrick DUGASSE koman en Minis.  Msye Dugasse osi i pa nouvo lo lasenn politik, petet i Minis ki’n pas plis letan ek nou dan lasanble nasyonal antan son responsabilite koman personn ki si oule i vin prezant e defann bidze lo par gouvernman.

Minis Dugasse in en Minis depi lannen 1993 kot i ti ganny fer Minis pour Lagrikiltir apre in Minis Lasante pandan plizyer lannen e apre sa in vin Minis pour Economic Planning. E tou dernyenmman Msye Dugasse in tenir port folio pour Economic Planning  and Employment. I en Accountant par profesyon e son  rikord sirtou kot Air Seychelles koman en  General Manager ti enn ki ti tre formidab e donk alors mon krwar ki avek en personn koman Msye Jacquelin DUGASSE  dan Cabinet i ava senpleman ede pou fer sa nouvo Cabinet travay pli byen.  Mon pou demann lasanble ankor enn fwa pou aprouv  son nominasyon.

 

 

MR SPEAKER

Okenn ki segonde.  Tou sa ki an faver lev zot lanmen.  Okenn ki kont.  Mosyon in ganny aprouve.

 

MR HERMINIE

Msye Speaker mon pou demann lasanble pou aprouv apwentman Msye Ronny JUMEAU koman Minis dan nouvo Cabinet Prezidan Michel.  Msye Jumeau osi i pa nouvo lo lasenn politik.  I ti komans son karyer an 1993 kot i ti ganny fer Secretary to the Cabinet dan lofis Prezidan Rene e  apre en travay formidab ki in fer dan sa lofis Msye Ronny JUMEAU ti ganny apwente Minis pour Lagrikiltire ek Resours Maren an 1998.  An lannen 2000 ziska 2001 Msye JUMEAU ti ganny fer Minis pour Kiltir ek Lenformasyon e 2001 ziska 2003 Minis pour Lanvironnman.  Ziska yer Mr JUMEAU  ti Minis pour Lanvironnman ek Resours Natirel.  I en zonm tre konpetan, tre aktiv e tre dinamik e mon ava demann lasanble alor pour siport son nominasyon.

 

MR SPEAKER

Okenn ki segonn sa.

 

MR POOL

Motion seconded Mr Speaker.

 

MR SPEAKER

Tou sa ki an faver lev zot lanmen.

Okenn ki kont.  Mosyon in ganny aprouve.  Lot.

 

MR HERMINIE

Msye Speaker mon pou demann lasanble pou aprouv nominasyon Msye Vincent MERITON koman en Minis dan nouvo  Cabinet Prezidan Michel.  Msye MERITON nou konn li tre byen akoz in enn nou koleg dan sa lasanble nasyonal pandan en 5an, in la, in partisip dan bann deba e apre sa in al fer en karyer dan servis sivil kot i ti Direkter Zeneral dan Local Government e apre i ti ganny fer Sekreter Prensipal dan Local Government. Se laba  mon krwar ki Msye MERITON in vreman fer son mark, in prouv son lekor koman en travayer. E an 2004 Msye MERITON ti ganny fer en Minis e i ti vin Minis pour Zafer Sosyal ek Lanplwa e tou dernyenman ziska yer Msye MERITON in Minis pour Lasante ek Servis Sosyal.  Mon ava demann Lasanble Nasyonal alors pou aprouv nominasyon Msye MERITON.

 

MR SPEAKER

Okenn ki segonn sa.

Tou sa ki an faver lev zot lanmen.  Okenn ki kont. Mosyon in ganny aprouve.

 

 

 

MR HERMINIE

Msye Speaker mon pou demann lasanble pou aprouv apwentman  Msye Joel MORGAN koman en Minis.  Msye Joel MORGAN osi parey nou konn tre byen i pa nouvo lo lasenn politik.

An  lannen 2003 i ti ganny    apwente koman Minis pour Litilizasyon Later e Labita e Msye MORGAN ki en enzenyer elektronik e computer, in prouv son lekor dan sa Minister e dayer parey nou konn tre byen i pa en Minister ki fasil, bokou demann, me in arive fer en travay formidab e alor mon pou demann lasanble nasyonal pou aprouv son lapwentman koman Minis.

 

MR SPEAKER

Okenn ki segonn sa.

 

MR POOL

Mon segonde Msye Speaker.

 

MR SPEAKER

Tou sa ki an faver lev zot lanmen.

Okenn ki kont.  Mosyon in ganny aprouve.  Lot.

 

MR HERMINIE

Msye Speaker mon pou demann lasanble nasyonal pou aprouv nominasyon  Msye Bernard SHAM-LAYE koman en Minis.  Malgre ki Msye SHAM-LAYE dan en sans I pa’n devan dan bann sitiasyon politik si oule, nou konn tre byen ki msye SHAM-LAYE in toultan aktiv lo lasenn politik dan son prop fason. Bokou nou ki la, nou konn li i ti  nou ansennyan.  I ti mon ansennyan history e Msye SHAM-LAYE se en Msye ki tre, tre kalifye – anefe i annan li 2 degre, i annan en degree dan listwar e en masters dan ledikasyon e in travay dan plizyer post pandan sa bann dernyen 10an.  In direkter National Youth Service ler  ti ankor an egzistans, NYS parey nou konn sa, apre in direkter zeneral pour zesyon ledikasyon dan Minister Ledikasyon.  An 1993 ziska 1998 i ti vin konseye spesyal pour Minis Ledikasyon e Kiltir  e an 1998 Msye Sham-Laye ti ganny fer – ziska yer in fer sa travay Secretary to the Cabinet dan President’s Office. Msye SHAME-LAYE parey nou konn tre byen i en Msye ekstrememan entelizan e en travayer ki travay tre dir e mon asire ki i pou fer en  travay tre formidab dan sa nouvo cabinet. Donk alor mon pou demann lasanble nasyonal pou donn nou sa sipor pour li ganny sa loportinite pou travay  en pe plis ankor pour nou pei.  Mersi.

 

MR SPEAKER

Okenn ki segonn sa.

 

 

MR POOL

Mon segonde.

 

MR SPEAKER

Okenn komanter.  Tou sa ki an faver, lev zot lanmen.  Okenn ki kont.  Mosyon in ganny aprouve.

 

MR HERMINIE

Msye Speaker mon pou demande ki Madanm MacSuzy MONDON  – ki lasanble i aprouv son nominasyon koman en Minis.  Madanm MacSuzy MONDON i osi byen formen dan domenn ledikasyon e nou konnen ki avek liniversite Quebec i annan li en Masters dan sa domenn e pandan plizyer lannen mon ava dir tou son lavi in travay dan Minister Ledikasyon.  In en direkter zeneral dan sa minister, in sekreter prensipal ziska yer e Madanm Mondon parey nou konn tre byen i osi en dimoun ki’n zwe en rol enportan dan aspe zanfan. In en manm lo komite egzekitiv konsey nasyonal pour bann zanfan e in kordin plizyer aktivite pou amelyor sitiasyon nou bann zanfan dan Sesel.  In osi zwe en rol  enportan dan training bann teachers, sirtou bann school teachers e tou dimoun ki konn li de pros i konnen ki i annan en kapasite zesyon fantastik e mwan personnelman mon konn li e mon konvenki ki dan nenport ki Minister, Madanm MacSuzy MONDON pou kapab servi son kalite, son kapasite, son konesans zesyon pou fer tre bon travay koman en Minis. Donk alors mon ava demann lasanble nasyonal pou aprouv nominasyon  Madanm MacSuzy MONDON koman en Minis.

 

MR SPEAKER

Okenn ki segonn sa.

 

MR ESPARON

Mon segonde Msye Speaker.

 

MR SPEAKER

Okenn komanter. Tou sa ki an faver  lev zot lanmen.  Okenn ki kont.  Mosyon in ganny aprouve.

 

MR HERMINIE

Msye Speaker mon demann lasanble nasyonal pou aprouv lapwentman Madanm Marie-Pierre LLOYD koman en Minis.  Madanm  LLOYD se osi en madanm ki ekstrememan kalifye.  I posed li 2 degre, enn dan sociology, I en  sosyolog e osi dan devlopman  resours imen.  Sa ki enteresan se ki Madanm LLOYD a mon konesans i premye dimoun ki ganny apwente dan Cabinet me ki  sorti dan sekter prive.  I en  Managing Director ek en Principal Consultant dan en lakonpannyen  prive e a se moman i pa pe tenir okenn pos dan civil service parey ou konn tre byen.  Sa i en bon sinny dan limenm…

 

(Laughter)

 

MR HERMINIE

.. i montre enpe plis entegrasyon korperasyon ant sekter piblik e sekter prive pour nou kapab anmenn the best brain, nou meyer laservel, lakrenm de lakrenm pou kapab devlop nou pei.  Madanm Marie-Pierre LLOYD sepandan i annan li leksperyans entansiv dan civil service akoz a en laz tre zenn, an 1984 i ti sekreter prensipal pour Minister Lasante e apre sa i ti menm Secretary of State lepok ki Secretary of State ti egziste dan Minister Ledikasyon.  I kler ki Civil Service limenm i pa en keksoz etranz pour Madanm LLOYD e mon krwar sa leksperyans servis piblik e sekter prive I met li dan en pozisyon inik pour si oule anmenn bann nouvo lelan dan devlopman nou pei. E osi koman en sosyolog e en konsiltan dan sa konpannyen prive ki li i annan, Madanm LLOYD in zwen en kantite rol pou revwar bann diferan aspe nou servis sosyal.

I annan plizyer papye ki nou konnen in ekrir paregzanp lenpak tourizm, son lenpak sosyo-kiltir lo Sesel, social development plan Madanm LLOYD in zwe en rol enportan pour devlop sa plan. Msye Speaker nou osi konnen ki i konseye pour bann lorganizasyon parey NCC, National Council for Children e mon persiade e mon konvenki ki i pou arive fer en bon travay koman en Minis. Donk alors mon pou demann lasanble nasyonal pou aprouv nominasyon Madanm Marie Pierre LLOYD koman en Minis.

 

MR SPEAKER

Okenn ki segonn sa.

MR SPEAKER

Tou sa ki an faver lev zot lanmen.  Lot.

 

MR HERMINIE

Fini. Cabinet in konplet Msye Speaker.  Mon a remersye tou  manm lasanble nasyonal ….

 

MR SPEAKER

I reste en mosyon koman Designated Minister.

MR HERMINIE

Oh yes. Msye Speaker Cabinet in konplet.  Se  sa ki mon ti pe al dir e i neseser aprezan anlinny  avek nou konstitisyon pour nou apwent en  Minis dezinnyen e Prezidan Michel i annan lentansyon kit Msye Danny FAURE koman son Minis dezinnyen.  Mon’n deza koz lo C.V. Msye Faure e Msye FAURE i pe fer sa travay koman Minis dezinnyen e alor mon pou demann lasanble nasyonal pou aprouv nominasyon Msye Danny FAURE koman Minis dezinnyen.

 

MR SPEAKER

Okenn ki segonn sa.  Okenn komanter.

 

MR RAMKALAWAN

Msye Speaker vi ki sa i dernyen nominasyon ki pe fer bomaten lo lapar lopozisyon mon ti ava kontan felisit tou bann dimoun ki’n ganny nomen koman Minis, mon swete ki zot ava fer en bon travay dan bann Minister respektiv ki zot pou gannyen e mon ti ava demande ki dan zot travay zot vreman regard byennet pei e ki parey pandan sa kanpanny politik ki’n ganny mansyonnen e lannwit eleksyon kot Msye Michel in koz an term pou vin travay pour tou seselwa.  Mon vreman swete ki la avek  en nouvo komansman, en nouvo manda, ki sa nouvo Cabinet, nouvo gouvernman i ava vreman retir bann konsiderasyon politik otan ki posib dan civil service pour ki nou ava kapab vreman fer en lot pa devan dan nou devlopman e ki sa i ava vreman donn en nouvo latmosfer dan pei.

Annou sey fer en fason pour otan ki posib met politik kot i devret ete e non pa partou kot nou pase zis nou bat avek li.   Alors ankor enn fwa lo non sa 46% ki pe siport lopozisyon, mon ti ava kontan swet sa nouvo  gouvernman kouraz dan zot travay, dan zot responsabilite ki zot annan  e mon swete ki atraver sa nou ava kapab fer nou pei avans pli devan.

 

MR SPEAKER

Okenn lot komanter? Si napa tou sa ki an faver lev zot lanmen.

 

MR HERMINIE

Msye Speaker mon ava dir ki mon apresye deklarasyon fer par lider lopozisyon kot in ganny sans aksepte pou donn nouvo Cabinet loportinite pou travay e travay pour Sesel.  Prezidan Michel zour i ti ganny eleksyon i ti promet tou seselwa, e i ti dir ek tou Seselwa ki i annan en leker pour tou Seselwa e i pou travay pour tou Seselwa an antye.

Nou pei i enm pti pei, i napa plas pour bann gran, gran divizyon, i napa plas pour laenn, i napa plas pour bann konfli antre nou.  Lepep parey lider lopozisyon ti dir, lepep in koze e ler lepep i koze nou bezwen ekoute, nou bezwen respekte swa lepep.  En nouvo  komansman, lider lopozisyon in dir wi, i en nouvo komansman, nouvo  dimoun me fodre zot ganny sa sans pour zot kapab enplimant bann polisi ki lepep atraver Prezidan Michel pe demann zot pou enplimante. So i neseser osi parey lider lopozisyon in dir ki letan nou koz lo tir politik dan civil service, i bezwen annan osi bann civil servant ki konpran e apresye e respekte desizyon lepep.  Politisyen i la pou formil polisi e civil servants I la pou enplimant sa bann polisi e sa  bann zafer kas anba fodre i fini dan nou pei.  Fodre letan nou ganny bann direktiv pou fer bann travay, nou bezwen travay, nou pa kapab pran lord dan bann lezot landrwa.  Nou pa kapab fer bann manboulouk avek bi, si oule pou retard en progranm.  Sa nou bezwen konpran tre byen e letan nou koz lo en nouvo komansman, nou pa koz lo en nouvo komansman zis pour en nouvo gouvernman me ki tou dimoun dan civil service i bezwen fer en nouvo komansman.

En ners i la pou donn swen dan lopital me i pa la pou fer politik.  En cabin crew i la pou servi touris, en taksi driver – menm si zot pa tonm dan  civil service me sa pep an antye i bezwen konnen ki nou bezwen  travay pou anmenn sa pei pli devan akoz lepep in koze – 54% lepep in koze e nou bezwen ekoute.  E mon krwar  si nou al dan sa kalite latmosfer ki mon  vwar sa kalite – mon perdi laparol me lafason la ki lider lopozisyon in komanse, mon krwar nou pou al tre lwen akoz i dan lavantaz nou pei. E pou terminen i montre nou ki vreman nou bezwen toultan fini lo en  fars ki sa Jj Spirit pe pas partou e pe ranport sa viktwar ki i neseser. Sanzman mantalite.  Mersi bokou.

 

MR SPEAKER

Tou sa ki an faver lev zot lanmen.  Okenn ki kont. Mosyon in ganny aprouve.  Lot mosyon.

 

 

 

 

 

 

 

 

 

 

 

 

 

 

 

 

MR HERMINIE

Msye Speaker mosyon devan nou se demann lasanble pou aprouv lapwentman Msye Gerard WAYE-HIVE koman komisyonner lapolis.

Msye Speaker..

 

MR RAMKALAWAN

Msye Speaker point of order. Mon ti a kontan raise en point of order. Mon konnen ki poudir lasanble pou kontinny son travay me selman letan nou ganny nou – konmsi nou pe koz nouvo komansman, oke nou’n dakor lo nouvo komansman, me anmenmtan osi pou nou lasanble tou, i enportan pour montre respe pou manm.   Nou ti konnen ki poudir i bezwen apwent en Cabinet. Sa nou ti konnen ki poudir this is the first step apre en gouvernman. Alors nou ti ekspekte ki petet ti ankor annan bann refleksyon pe fer, pou zot finaliz zot Cabinet e se pour sa rezon ki letan Order Paper ti  donnen ti napa lalis bann dimoun ki ti pou ganny nonmen. So we took that byen.   Me selman pour nou bomaten ariv dan lasanble e ou ganny prezante avek en seri lezot lapwentman ki enkli anbasader,  komisyonner lapolis, mon krwar ki it’s not fair specially – ou ganny en bundle, ou ganny ou en gro bundle ki ou pa’n ni’n ganny sans pou ou fer okenn refleksyon, pou ou fer okenn resers e all of a sudden zis nou pe ganny sa bann mosyon e nou bezwedn aprouve.

Mon krwar ki si dan sa nouvo spirit, Jj spirit ki Onorab Herminie pe koz lo la, mon krwar ki keksoz i devret diferan.  Nou pa devret pe ganny sa kalite keksoz. Nou pe al apwent komisyonner lapolis ki en pozisyon enportan, nou pe al apwent anbasader pou reprezant Sesel, konmsi ou pe al apwent bann reprezantan Msye Michel partou kote. Mon krwar ki ava bokou pli normal pour nou ganny sa bann papye pli boner. Oubyen menm ki dan en lot sitting sa bann keksoz i ganny fer. Parski sinon, efektivman sa ki pe arive la nou tou nekzis – anfen lafason ki i ete mwan mon kapab dir ou deza ki poudir nou  nou pou abstain lo tou sa bann vot. Me selman efektivman zis sa bann keksoz pe al ganny rubber stamped. E letan mon servi sa lekspresyon kekfwa serten i ava ankole  but effectively se sa ki nou pe  ganny demande bomaten. Lasanble Nasyonal, Onorab Herminie pou dir de parol, amwen ki bann lezot in ganny prepare avan, e apre sa pou napa vreman en analiz ki pou ganny fer. Alors konmsi mon trouv li i mal ki bomaten la zis nou pe ganny tou sa bann mosyon e si noiu ti ganny yer kekfwa kekfwa noui ti ava annan omwen  en zour. Me selman mon pa kapab krwar ki poudir sa bann desizyon in ganny pran 8 er bomaten la e se pour sa rezon ki 9 er nou’n ganny nou bann papye. Mon krwar ki dan sa nouvo lespri Mr Speaker mon krwar i enportan – i enportan pour ki egzekitiv ki lasanble in fek aprouve – ki egzekitiv dezorme i montre respe pou lezislativ e ki zot pa krwar ki poudir zot kapab anvoy nenport keksoz isi kot lezislativ nenport ki ler, zis lezislativ pou bezwen anval tou sala.   Se dan sa lespri ki mon koze Mr Speaker.  Mersi bokou.

 

MR SPEAKER

Bon mon pran note sa ki’n dir. Mon konpran, mon respe sa ki ou’n dir eksepte sa mo rubber stamp. Mon reflesir bokou lo sa ki ou’n dir. Mwan osi mon ti a’n voudre ou’n ti’n kapab ganny enpe sa bann keksoz pli boner. Me mon’n osi konsidere ki dan sirkonstans ler en eleksyon Prezidansyel in fek fer, i annan bokou sirkonstans kot tranzisyon i pou bezwen kourt e irzan. Pa tou dimoun ki pou dakor avek sa.  I en realite, e mon’n reflesir lo sa ki ou’n dir e mon aksepte prensip ki egzekitiv i osi bezwen respekte lezislativ e pou annan defwa, kot mwan osi mon pou petet, anmenn serten pwennvi pou dir egzekitiv, ou annan ou plas, mwan mon annan mon plas.

Bon, lo lespri ki ou’n lev sa mon zwenn ou me apard sa i annan serten realite ki tou parlman i bezwen pas ladan.  So mon kontinnyen avek sa mosyon.

 

MR HERMINIE

Mersi bokou Msye Speaker. Parey ou’n koz lo la i annan en kestyon lirzans anvi ki nou pe pas atraver..(technical problem)

…En parti politik i  toultan bezwen pare, sirtou letan oule form gouvernman.

Msye Speaker, Msye Gerard WAYE-HIVE parey nou konn tre byen i ozordi en Mazor dan lafors Defans Pep Sesel. I komandan kot Seychelles Defence Academy e Msye Gerard Waye-Hive i en legzanp tipik bann Seselwa ordiner ki sorti dan bann fanmiy ordiner ki’n ganny sa loportinite pou monte.  Mon konn li tre, tre byen akoz nou’n grandi ansanm. Annefe petet nou konn kanmarad menm letan nou ti napa konesans akoz son papa ek mon papa ti 2 polisye e nou ti reste ape pre zistans kot Onorab Julie i ete e kot mwan mon ete ek kanmarad. So nou de Msye WAYE-HIVE nou annan en keksoz an komen, nou’n grandi dan en fanmiy polisye e dan en lanvironnman ki zot apel kan gard kot tou bann gard ti reste la anler Mont Fleuri.

In en garson tre disiplinen, en garson serye e se sa ki’n permet li si oule pou devlope. Kot evantyelman an ‘83, ’86 i ti ganny sans al fer en degre dan lasyans sosyal an Cuba, Havana.

Msye Speaker lo plan militer Msye WAYE-HIVE in komans par fer bann Junior Command Course an l’Inde kot in prouv son lekor tre byen e a plizyer repriz gouvernman l’Inde in donn li bann diferans course pour li kapab promot son prop lekor, self made dan en sans. In sorti en Junior Command Officer, i fer son young Officer’s Course, apre in fer Officer Cadet Course, e finalman in fer Advance Officer Cadet Course. So nou vwar ki i en msye ki serye, determinen, travay dir e ki’n promote an rezilta sa kalite travay.

Malgre ki i en zonm militer Msye Speaker mon krwar i enportan pour dir ki bokou son bann formasyon e training in liye de tre pros avek lavi sivilyen. In fer plizyer kour dan drwa imen, dan peace keeping, lo lalwa enternasonal lo lape ek sekirite e tou dernyenman parey nou konn tre byen Msye WAYE-HIVE in menm fer en course an Irlande lo zesyon lapolis.

Msye Speaker mon krwar kritik ki kapab monte se ki eski i byen pour en zonm militer pran sarz nou lapolis? Mon’n fer bokou resers lo sa size e en keksoz ki evidan se ki dan bokou pei omonn, komisyonner lapolis i pa neseserman en professional Police Officer e ki dan bann sirkonstans parey i toultan annan sa ki zot appel en chief of police ki ansarz day to day loperasyon.  So mon pa vwar okenn  problenm pour nou annan en komisyonner-d-polis ki si oule son karyer i pa’n neseserman dan lapolis. Mon krwar i annan kalite neseser, i annan konpetans neseser, i annan, sa disiplin neseser e i osi en zonm ki krwar dan training. Mon pa konnen si bokou zot ti ankor la, ler nou ti al vizit lakademi militer, nou ti vwar li an aksyon pe train bann solda Seselwa dan sa Cadet course, e ti annan menm en solda, Msye Fonseka ki ti fek fini koman en solda dan Special Air Service ki en group elit an Angleter,  in vini koman en sou-lyetnan, limenm li i ti tre enpresyonnen par sa kalite disiplin e sa kalite training ki ti pe ganny fer anler laba kot military Academy. E zonm ki ti responsab pour sa ti Msye Gerard Waye-Hive.

Msye Speaker mon krwar lefe ki Msye Waye Hive in konplet successfully son course an Irlande  dan Police Management si oule, i donn li sa lotorite pour li kapab fer en travay avek nou lapolis. Nou konn tre byen ki i annan bokou kritik lo lapolis Sesel. En kantite in ganny fer pou amelyor zimaz e performans nou lapolis me i pa en travay ki fasil akoz i annan plizyer lezot fakter, kalite dimoun ou pe travay avek etc. ki afekte performans nou lapolis. E mwan mon konvenki ki Msye Waye Hive, antan son laz tre zenn, i menm laz avek mwan, sa dinamiz ki i ankor annan, sa konesan loperasyon koman en zonm militer ki i annan, e sa konesans zesyon ki in fer dan lapolis e pou permet li fer en tre bon travay, e si oule fer vin pli drwat nou lafors lapolis regilye.

Avek sa ennde mo Msye Speaker, mon pou demann lasanble nasyonal pou siport sa mosyon, pou donn sa zenn Seselwa ki sorti dan en fanmiy senp, humble parey bokou nou la anndan sa loportinite pour li prouv son lekor.

 

MR SPEAKER

Okenn ki segonn sa?

 

MR ANDRE POOL

Motion seconded Mr Speaker.

MR SPEAKER

Okenn komanter.

 

MR RAMKALAWAN

Mr Speaker mon napa problenm avek bann komanter tel ki Msye Waye-Hive i sorti dan en fanmiy ordiner, humble, Seselwa. Mon napa problenm avek sa, mon kontan ki i sorti dan en fanmiy humble e Seselwa.  Mon kontan ki i en Seselwa e mon espere ki plitar Onorab Herminie i ava kapab osi dir avek nou ki Msye TRIBOLDI i sorti dan en fanmiy humble Seselwa, letan pou apwent li koman Anbasader.

Mr Speaker mwan pour mwan mon annan serten komanter ki mon anvi fer e sa i vin prensipalman lo lafors lapolis limenm. Le 5 Zen 1977, premye lapwentman ki Msye Rene ti fer, sete pou apwent Msye James Pillay koman Komisyonner lapolis. E sa ti remarkab parski – oke, i ti’n met tou bann etranze dekote, e i ti met en Seselwa. E karyer Msye Pillay sete dan lapolis e alors letan i ti’n monte dan lapolis e alors ti normal pour  li ganny apwente koman komisyonner.

Me sa ki mwan mon pa kapab aksepte 30 an plitar se ki pour nonm en komisyonner lapolis ou bezwen pran en dimoun ki son karyer i pa’n dan lapolis me son karyer in en karyer militer.  Tou son bann course ki in ale,  in bann course militer. Zis la ant Me avek Zen an preparasyon pour li vin pran sa post kot zot ti’n fini earmark li, alors zot in anvoy li Irlande pour li fer en course dan management.

Pour mwan mon krwar ki sa mesaz ki ganny anvoye ozordi se ki pandan tou sa bann lannen lapolis vreman in ganny neglize parski bann zofisye nou bann zenn dimoun pa’n ganny sans pour zot devlope pour zot ariv lo sa nivo.  E mon demann mwan, eski  vreman napa okenn dimoun dan lafors lapolis ki’n annan sa kalifikasyon pour li al fer bann course pour ki i kapab aspire pour li vin komisyonner lapolis. E si larepons i wi, mon krwar ki i vreman trist.  Mesaz ki bann zenn Seselwa ki sorti dan bann fanmiy humble pe resevwar ozordi e bann ki dan lapolis se ki ou pa kapab vreman annan en laspirasyon dan ou karyer parski otomatikman si ou antre dan en lafors lapolis, ou devret kapab aspire ki en zour, atraver ou profesyonnalism, atraver lafason ki ou fer ou travay ou ava kapab ganny promosyon apre promosyon, apre promosyon e en zour ou ava kapab vin komisyonner lapolis.   Me la mesaz ki ganny anvoye se non, ou pa kapab konnen kote ou ete e mwan mon krwar ki sa mesaz i pa en bon mesaz. E akoz ki mon dir i pa en bon mesaz? Se parski osi, oke ti annan en moman  zot ti pe dir Komisyonner ki ganny apwente – serten komisyonner letan ti ganny apwente, ti ganny apwente koman en caretaker pour ki apre i pas avek en lot dimoun pli zenn pou kontinnyen sa travay.

Me la ozordi nou pe apwent en zenn onm 44 an koman komisyonner lapolis e li son karyer in antyerman en karyer militer. E mon mazinen tou sa bann parol ki Onorab Herminie in dir lo li anterm son karyer militer, mwan mon ti ava ekspekte ki se dan sa lalinny ki i ti ava kontinnyen devlope. Ozordi i komandan  laba kot i pe train bann solda e Onorab Herminie limenm li in mansyonn son bann performans ki i vreman fantastik.  E alors mon demann mwan  konmsi  ou pa ti ava trouv li plito pe al dan direksyon  pour li en zour vin Chief of Staff, pour li pran plas Msye David Savy ki osi CEO Air Seychelles koman Deputy Chief of Staff. Mon ti ava mazinen ki i ti ava annan en karyer enpe dan sa direksyon me non pa konmsi pou sorti laba pour vin dan lapolis. E tandis ki lapolis, i ti ava pe donn posibilite nou bann zofisye ki pli zenn, bann zofisye ki tou dernyenman parey zot konnen kot pe ankouraz bann zofisye kot pour annan ‘A’ Levels ensidswit pour zot al fer bann course pli avanse ki konmsi nou a mazinen ki konmsi ti ava annan en lot aspe devlopman karyer  dan sa lalinny.

E parey mon pe dir, mon krwar ki mesaz malerezman ki ganny anvoye avek nou bann zofisye ki ankor zenn, nou bann zofisye ki pe fer byen,  mon krwar i en move mesaz akoz mon osi krwar, e tou dimoun i ava dir avek ou karyer lapolis avek karyer militer i 2 diferan keksoz. The thinking is different, son sikolozi i diferan. En polisye i mazin dan en fason, en solda i mazin dan en lot fason. E mon krwar sa osi tou i tre enportan.

Mr Speaker mon krwar ki definitivman dan nou lapolis ozordi i annan travay pour fer, i annan en kantite travay pour fer. Nou’n vwar pandan weekend paregzanp, kot en laferm sekirite, dirize par Msye Cliff Loizeau SPSS i pase dan son bis i met son bann loud speakers on, i aret devan lakour dimoun, i zour dimoun, i envit dimoun vin lager e lapolis i reste lanmen anmare. Lapolis pa kapab fer narnyen. Mwan mon’n trouv sa parski la anba Biznak tou mon’n vwar kot zot arête, anler kot mwan mon reste, zot aret la anba, zot kriy bann lafanmiy Hertel vin lo semen, vini nou ava pet ou latet ensidswit apre zot osi anvoy mesaz pour mwan anler; Ramkalawan taler nou pou mont anler kot ou. Mon ti pe esper zot mont anler kot mwan. Kan ou vwar mon’n bezwen menm met konplent lapolis – kot definitivman i bezwen annan keksoz. Kot laboutik Bas, e yer sa in fer, Msye Speaker efektivman ekri mon premye let Prezidan Michel pou eksplik li ki poudir sa kalite latitid pa kapab kontinnyen kot zis Msye Cliff Loizeau, mon pa konnen lekel ki’n donn li drwa divin, manda divin lo Sesel pour li zis arête kot laboutik Bas, debarke, tyonbo en boug, bate e apre fer son bann kard bat sa dimoun, ki ozordi sa zenn onm – mon’n anvoy en portre tou pour Msye Michel, sa zenn onm latet i 2 fwa son groser.

Kot sa menm lorganizasyon, i aret Plaisance ek bann lisyen, zot larg lisyen lo dimoun.  Definitivman Mr Speaker i annan en problenm e sa problenm i vin lo law and order dan nou pei. E annou pa tro krwar ki law and order pour le moman son problenm  se prensipalman bann sivilyen e parski  parey nou’n vwar pandan weekend se parfwa bann lorganizasyon ki sipoze ansarz sekirite, ki sipoze annan manda. Paregzanp, kot Harrison Street kot bann flats kot zot pe ganny peye R32,000 tou le mwan pour zot vey en apartman housing me kot zot rantre ladan e zot bat bann dimoun.  Zot menm al tir dimoun dan lakaz.  Zot pouvwar i vin pli for ki lafors lapolis.  E mwan mon krwar ki wi, lafors lapolis i bezwen reganny son pouvwar pour li met lord dan nou pei kot bann sivilyen i kapab viv anpe e kot non pa nou annan nou bann lords army parey Msye Cliff i a pe dirize.

Donk i bezwen annan en reform dan nou lapolis. Me ankor ennfwa mwan kestyon ki mon demann mwan se eski par met en dimoun militer nou vreman ganny sa.

Nou’n trouve dan le pase lafason ki lapolis in santi son lanmen  anmare apre zot in kriy militer pour vin ed zot. Sete en bann loperasyon ki’n finalman in fer ki in annan en kantite case an kour e ozordi en kantite dimoun pe ganny peye konpansasyon parski zot in vin dan en fason heavy handed e olye met lalwa a’n aplikasyon zot in plito servi lafors a’n ekse.

Alors Mr Speaker, Msye Waye-Hive mon mazinen  ki i pou annan li en kantite responsabilite pour li pran. Mon mazinen ki i pou bezwen al pas dan en reform – reform pour sa lafors lapolis. Me mwan mon ti ava swete ki sa bann diferan lafors lapolis e ki lapolis limenm i reganny en serten disiplin.

Ki mon’n oule sey dir par sa Mr Speaker?  Premyerman ki lafors lapolis i realize ki bann polisye zot pa bann politisyen, pa bezwen melanz zot non polisye avek politisyen, zot polisye, civil servants. E letan pandan sa dernyen kanpanny nou’n trouv polisye pe marse avek zot rivolver, avek zot zarm, koman body guard bann politisyen, mon krwar nou dan en premye problenm la. Letan nou trouv polisye pe marse dan t-shirt politik, pe akonpanny politisyen letan pe fer kanpanny avek en zarm ki apartenir pour leta e ki sipoze letan zot on duty ki zot servi, mon krwar Mr Speaker nou pe go over board. E mon’n trouv sa St Louis, mon’n trouv sa Bel Ombre, mon’n trouv sa dan diferan landrwa.

E letan nou trouv polisye pe mars dan transpor lwe, ki nou pa ni konnen lekel zot me ki zis ou trouv dimoun i debarke avek AK47 dan nenport ki sitiasyon, mon krwar ankor ennfwa i annan problenm.   Letan Mr Speaker en polisye ki pe mont en moter lapolis ki on duty, ki ape diriz en motorcade ki servi sa pti PA system ki lo son moter, dan sa loud speaker pour li dir avek dimoun, kil  pake Jj ki pe vini la, nou nou Jj nou.  Mon krwar Mr Speaker ankor ennfwa nou efektivman annan en problenm avek sa lorganizasyon.

E la mon demann Onorab Herminie si se sanmenm sa kalite lespri ki pli boner i ti a pe dir fodre deal avek  ki letan politisyen i set son policy, civil servants zot egzekit sa polisi me ki zot zot pa vin bann politisyen.  Parski i byen kimannyer ou’n fer, ou’n fer byen sa distenksyon ant politisyen avek civil servants me ki letan civil servants i deside vin politisyen la mon krwar i annan en melanz ki pa bon.

Donk wi, sa lafors lapolis i bezwen kapab pran serten aksyon. Letan  paregzanp en dimoun i telefonn lapolis – yer swar in fek arive, i telefonn lapolis pou dir ki i annan en vwazen pe zwe bann lanmizik for, premye kestyon ki sa polisye i demann li, ki kalite  lanmizik i pe zwe?  Be ki kalite lanmizik pe zwe i annan en keksoz pou fer avek ou lalwa? Konmsi ou lalwa i dir avek ou si i pe zwe en serten kalite lanmizik ou pran aksyon, si i pe zwe en lot kalite ou pa pran aksyon?

Sa ki mon pe efektivman demande Mr Speaker e se pour sa rezon mon pou swet Msye Waye Hive bonn sans pour ki sa lafors lapolis – wi i pou fini ganny apwente alors menm si i militer, menm si i pa (soz) i pou ganny apwente – e mon pe demande ki nou regard sa lafors lapolis pou fer li vreman vin en lafors ki regard tou sitwayen parey. E en lafors lapolis ki pa rod zis vin abiz lo bann sitwayen.  La i en lot area ki mon krwar i pou bezwen regard tre pre se SSU.

SSU i en lafors ki pou bezwen ganny met anba microscope pou fer sir ki zot travay ki zot fer i vin en travay ki drwat.  Onorab Herminie mon sir  i ava dakor avek mwan ki  apre lanons rezilta eleksyon, letan mon ti demann tou mon bann siporter pou reste se zot, nou bann siporter ti ekoute. Nou bann siporter in ekoute e mon kapab dir avek zot ki sa mon’n ganny konfirmasyon avek Msye Kilindo, outgoing Police Commissioner.

(Interruption)

..be efektivman, sanmenm, sa ki mon pe vin lo la Onorab. Mon pe vin lo la se parski letan en jeep SSU i aret dan en landrwa kot napa okenn paviyon pe ganny anvole dan figir dimoun, napa tou sa bann zafer me ki zis zot deside pour zot atak sivilyen, senpleman akoz sivilyen, zot konnen poudir sa bann dimoun i siport lopozisyon, mon krwar ki poudir i annan en problenm. E in napa okenn rapor, okenn lensidan kot sepa siporter SPPF in ganny bate apre ki zot in sorti zot rally ensidswit, zot in ganny anvoy ros ensidswit.

Msye Speaker mwan mon krwar ki wi, sa lafors SSU, i bezwen reganny vizite e travay lapolis an zeneral i bezwen reganny vizite e se sa ki pou fer nou avans pli devan. E la mon ti ava osi demande ki ennfwa pour tou nou lafors lapolis i ganny li en serten disiplin me osi en serten fason kot zot transpor i vin bann transpor ki vizib. Kot nou ganny transpor ki lo la i mete lapolis e kot nou sorti dan sa moman kot nou lafors lapolis i en lafors cowboy ki tou bann pti boug zis sakenn ek en AK47, ou pa ni konnen lekel ki gard, lekel ki pa gard, i rantre kot ou, dan en moman kot zot pe dir sepa voler, ensidswit, zis ou ganny bann dimoun ki rantre kot ou, ki napa okenn idantite ki montre ki poudir li lapolis. Mon krwar i enportan pour nou regard tou sala e mwan mon ti ava demande ki sa lasanble en zour nou appel nouvo komisyonner e nou fer li dan en committee stage, fer li met devan nou son plan pour li reform sa lafors e kot nou osi tou nou ava kapab dan sa lespri enteraksyon, dan sa lespri pou regarde kimannyer lapolis i kapab pli byen fer son travay pour nou kapab regard son plan e kot nou osi tou nou kapab met serten propozisyon devan li.

Mon konnen ki poudir i annan en komite sekirite ki Onorab Herminie i chair, in zwenn en fwa apre sa mon krwar in mor, petet mon ti ava kontan  ki si ou dir Jj spirit, petet Jj spirit i a kapab resisit sa komite pour li kapab zwenn e la ti ava en premye landrwa kot nou ti ava kapab komans koz avek sa nouvo komisyonner pour nou regarde kwa ki i annan lentansyon pour li fer.

Mr Speaker nou’n toultan lo nou kote tre kritik lo travay ki lapolis in fer. E ozordi nou ankor tre kritik e parski ziska aprezan lapolis pankor vreman ariv lo sa nivo ki nou krwar i devret arive e kot i ti’n devret fini arive.  Nou tou nou konnen dan ki direksyon nou lapolis i devret ale me ziska aprezan i pankor kapab ariv lo sa nivo.

E alors nou lo nou kote, zot zot in deside apwent zot nouvo Komisyonner Lapolis, nou nou pou regard son travay, nou pou regarde kimannyer sa bann reform ki i propoze oubyen si i kontinnyen konmsa kimannyer i ale e plitar nou pou fer nou komanter lo lafason ki nou santi lafors lapolis pe fer son travay. Me byensir lefe ki i en fe akonpli, in fini pran son pozisyon dan son nouvo post.

Mon pou swete ki enn son bann premye keksoz – e mwan mon ti ava kontan pay a courtesy  call lo li, mon swete ki i ava apros keksoz dan sa direksyon e kot i ava annan en bon korperasyon avek tou bann manm piblik e tou bann diferan lorganizasyon.

Mon swet li bonn sans e nou lo nou kote nou espere ki nou kapab ganny en lafors lapolis ki profesyonnel, en lafors lapolis ki efektiv, en lafors lapolis ki servi tou dimoun e ki en lafors lapolis kot napa plas pour politisyen me zis pou polisye, silvouple. Mersi bokou.

 

MR HERMINIE

Msye Speaker nou’n note bokou bann keksoz e remark ki’n ganny fer par Lider Lopozisyon. Lo debi mon oule fer li realize ki en gouvernman ler i ganny pouvwar, i ganny en manda, i annan en responsabilite e en devwar pour met the right man in the right job.

Msye Speaker nou konsyan ki nou lapolis i annan serten problenm pa toultan ki i zot fot me politisyen i kontan si oule esey servi lapolis parfwa pour zot fer enpe politik. I annan bann lenstans kot zot ti kapab fer en lapros pli profesyonnel me i osi annan lenstans kot in annan bann aksyon e bann konportman konpletman anti-sosyal e pa akseptab ki’n fors lapolis pran serten aksyon ki, si oule, i ti’n kapab ganny evite.

Paregzanp ler Onorab i dir nou apre eleksyon tou son bann manm, tou son bann siporter ti dan lakour anpe, i konpletman fo akoz mwan ler i ariv problenm Anse Aux Pins, ler tear gas ti ganny tire, mon ti pe al Anse Boileau, mon  kapab menm dekri ou bann dimoun SNP. Enn ki ti pli prominan set en zenn fiy lizye ver, seve blan, blan – well i pa konpletman blan en nespes ant, ant e li i ti lead en group ki ti pe provok tou dimoun dan en triko SNP e tou kalite obor sa semen, i pe bare. E ti neseser pou antre e met en serten lord akoz sa sitiasyon ti pe detoryore. Menm Msye Joseph ki nou reprezantan laba Anse Aux Pins ti’n ganny takinen e bare par li, kot sa sitiasyon ti pe detoryore, ki ti pou annan en gro lager ant le 2 group siporter. I ti’n dwatet reste se li, mon konpran i sorti dan Gaza, anler menm amontan. So mon pa krwar in vin la obor semen pou vin fer konmisyon. In vin la obor semen pou sorti tou sa distans zis pour li vin rod problenm.

E i domaz ki parfwa Onorab Ramkalawan i servi tou sa bann keksoz san ert realite. Annou pran sa bann – menm avek SPSS – i annan bann enstan ki sa ki li i pe dir mon okouran e mwan menm mwan mon’n annan en serten konversasyon avek Msye Loizeau lo la.  Me in osi annan bann enstan sirtou dan bann housing estate kot bann dimoun ki tay kot Father, se bann droger, se bann boug ki lapolis pe rode, se the worst elements of our society. E sa bann boug i bezwen ganny deal avek e malerezman letan zot komans ganny deal avek, zot met en tag SNP apre zot tay Arpent Vert zot dir zot pe ganny viktimize. En boug konmsa napa okenn pwa politik dan Sesel. Sel keksoz ki li i fer se vann drog, bandisite e vyol marmay. E letan aksyon i ganny pran kont li deza i en gran politisyen ki pe ganny viktimize.

 

MR RAMKALAWAN

Parey Payna.

 

MR HERMINIE

Aprezan ou demann ou lekor, be en boug konmsa pour ki rezon ou bezwen viktimiz li  politikman kan i napa okenn pwa politik. E mon krwar politisyen nou bezwen fer atansyon sa bann kalite trik, riz ki ganny fer par serten eleman dan nou sosyete.

Msye Speaker Onorab i dir ki i annan en diferans fondamantal ant en solda avek en polisye. Mon’n eksplike okomansman ki Msye Waye-Hive i annan sa lespri sivil dan en sans e avek sa training ki in fer laba Irlande, mon krwar sa i met li dan en pozisyon pour si oule fer en bon travay koman en zonm avek en lespri polisye. Me annou pa oubliye ki dan bokou pei omonn parey mon’n refer sorti ou pa bezwen en polisye pou vin Komisyonner Lapolis, paregzanp si ou pran Lanmerik, bann sheriffs, bokou fwa nou koz lo sheriffs, sheriffs se efektivman bann komisyonner lapolis dan plizyer leta e sa bann boug zot pa ni menm ganny apwente en eleksyon i take place, zot ganny elekte e ou pou debout pou sa eleksyon ou pa bezwen en gard, i annan solda ki’n vin sheriffs, i annan cowboy ki’n vin sheriff. I annan tou sord kalite dimoun ki’n vin sheriff e bokou zot in fer en tre bon travay.  Nou, nou  konvenki, nou napa okenn dout ki Msye WAYE-HIVE i annan tou sa bann karakter, sa bann nesesite pour li kapab desarz son   responsabilite tre byen.

Msye Speaker ankor ennfwa nou’n vwar enpe lipokrizi lo lapar Onorab bomaten letan in koz lo bann zofisye, bann zenn zofisye dan lafors lapolis. Bann zenn zofisye pe kontinnyen ganny training, i malere ki nou lafors lapolis avan sa in ganny afekte bokou par politik. Nou konn en kantite keksoz ki’n arive dan sa lafors e tou dernyen  i ti annan bann ka ankour, i annan  bann zofisye lapolis ki’n ganny met deor. Mwan mon konnen, bann zofisye lapolis ki ozordi nepli dan lapolis ki paregzanp vol tear gas pou donn lopozisyon.  Mwan mon konn sekirite SNP ki’n  vin avek  tear gas – mon dir be kote ou ganny sa, i dir mwan tel zofisye lapolis  ler  ti ankor dan gard. Oke i ti en lafors politize.  Nou kapab dakor, nou kapab pa dakor, nou kapab balans latet, zot konnen i vre e mwan mon’n vwar levidans ki i vre e konsekaman  nou lafors lapolis in ganny afekte.

I retourn lo sa ki mon’n dir ou pli boner se politisyen ki formil polisi e civil  service i enplimante.  Sa keksoz i bezwen  ganny respekte dan Sesel sa, akoz ler i pa ganny respekte, lanmenm ler ou tann lakizasyon, viktimizasyon. En boug li i la anba, li i krwar li ki minis.  Mwan mon konn en ka avan eleksyon kot Minis i pran en desizyon pou redwir pri later pour 4 fanmir anler Beau Vallon.  Minis i ekrir let, donn zot tou, Msye i pran desizyon lo limenm over rule desizyon Minis e fer sir ki sa 4 fanmir – premye fwa mon vwar sa Minister i fonksyonn sitan vit koumsa, dan 2 zour in  ekrir sa 4 fanmir pou dir zot, pou napa okenn rediksyon.  Son lentansyon ti kler, fistre zot avan eleksyon.  Oke.  Sa bann kalite keksoz i bezwen fini enn fwa pour tou dan Sesel, akoz si i pa fini, toultan ou pou ganny ou bann lakizasyon viktimizasyon.  Politisyen i formil polisi, politisyen i ganny elekte par lepep e politisyen i la pou fer marse en progranm  ki lepep in dir ek li ki mon oule ou fer marse. Civil servants napa sa responsabilitie.  Civil servants i ganny peye par lepep pou fer sa ki politisyen i dir li fer e sa i bezwen  ganny respekte enn fwa pour tou Msye Speaker.

E ler nou koz lo bann zenn zofisye polisye, ozordi onorab i dir akoz pa pran zot, fer zot  vin komisyonner me pourtan nou konn tre byen ki li i ti annan en lentansyon fer en boug sorti dan en sekirite prive ki  pli danzere ki SPSS, ki li in larg lisyen lo enn mon neve.  Mon kapab anmenn mon neve, ganny morde la, oke Bruno, desire e se Msye Beaufond, en  boug fou sorti Sid Afrik, ki ti ti larg en alzasyen lo li.  E li Msye Beaufond ti pou vin komisyonner dan zot gouvernman.

 

(Interruption)

 

MR HERMINIE

Oli  tou sa bann  zenn polisye?  La napa okenn zenn polisye la, se lipokrizi.  Msye Speaker Msye WAYE-HIVE i en zonm konpetan, kapab e mon demann sa lasanble nasyonal pou silvouple donn li sa loportinite pour li prouv son lekor e apre 1 an si i neseser nou ava demann li kwa ki in fer e kote i pe ale.

 

MR SPEAKER

Tou sa ki an faver lev zot lanmen. Okenn ki kont.  Mosyon in ganny aprouve.  Nou pran lot.

 

MR HERMINIE

Msye Speaker mon pe demann sa lasanble nasyonal pou aprouv nominasyon Madmwazel Noellie ALEXANDER  koman en anbasader.

Madanm ALEXANDER i pa nouvo pour nou.  Nou konn li tre byen, koman en Minis. I ti en Minis pour Administrasyon e Devlopman Imen.

Madanm ALEXANDER in osi en sekreter zeneral pou Minister Lasante pandan 5an e tou dernyenmman i ti sef egzekitiv kot Seychelles Institute of Management. Madanm ALEXANDER parey nou konn tre byen pandan lepok ki in okip pozisyon Minis ek Sekreter Prensipal se en madanm ki’n etablir en kantite kontak, ki’n vwayaz bokou sirtou dan rezyon Lafrik e nou ava rapel tre byen ki sa letan nou ti en manm SADEC e mon konn tre byen ki koman Sekreter Prensipal Minister Lasante in, si oule etablir plizyer koneksyon dan sa lorganizasyon.  Mon krwar ki avek kontak, avek son lentelizans avek son kapasite travay, Madanm ALEXANDER i ava fer en tre bon anbasader sirtou si i evantyelman i ganny poste dan larezyon.  Nou konn son lyen avek Lafrik, Sid Afrik,  si mon pa tronpe, in menm viv Lafrik pandan plizyer lannen e in fer training an Sid Afrik, an Kenya, an Tanzania, so mon krwar i le meyer kandida pour li vin nou Anbasader Msye Speaker.  Mon ava demann lasanble nasyonal pou siport nominasyon Madmwazel Noellie ALEXANDER koman en anbasader.  Mersi.

 

MR SPEAKER

Okenn ki segonn sa.  Okenn remark.

Si napa tou sa ki an faver lev zot lanmen.  Okenn ki kont.  Mosyon in ganny aprouve.  Lot.

 

MR HERMINIE

Msye Speaker mon pe demann lasanble nasyonal pou aprouv nominasyon Msye Phillip LE GALL koman en anbasader. Msye LE GALL i en seselwa ki’n naturalize e i travay  e reste isi Sesel depi 1992. I ti komanse koman konseye teknik obor direkter zeneral pour Kiltir e apre sa in konseye teknik pour Minis dan Gouvernman Lokal, Lazenes ek  Sport.  Nou tou nou konn tre byen kontribisyon ki Msye LE GALL  in fer sirtou dan domenn kiltir e tou dernyenman depi Novanm 2001 Msye LE GALL in konseye spesyal pour Minis Zafer Etranzer.

Msye LE  GALL i en spesyalis dan  lasyans politik e lalwa e zot in les mwan konpran set en zonm ki travay tre  dir ki annan en konesans enkrwayab e formidab lo diplomasi enternasyonal e se pour sa rezon ki ozordi mon pou demann lasanble nasyonal pou aprouv  nominasyon Msye LE GALL koman en Anbasader.  Son leksperyans i ava kapab servi pour si oule promot nou pei a letranze e sirtou La France laba kot i sorti.  Mersi.

 

MR SPEAKER

Okenn ki segonn sa?  Okenn remark.

 

MR RAMKALAWAN

Msye Speaker mon pou dir klerman ki mon obzekte, mon kont sa lapwentman parski mwan mon krwar ki dan staz kot nou ete mwan mon ti ava prefere vwar en seselwa humble parey Onorab Herminie i kontan dir.  Mon ti  a kontan vwar en dimoun ki’n ne Sesel pran en plas Anbasader.  Napa nanryen spesyal ki sa boug i annan ki en seselwa natif nou pei ti ava kapab fer.  Sa boug in en konseye teknik, i annan BAC A4. Ki sa BAC  A4 ki i annan?

 

(Interruption)

 

MR RAMKALAWAN

I ansarz papye A4? Oke.  I annan en Bake A4.  In fer ledikasyon dan Law and Political Studies e apre sa in zis konseye teknik, in Sekreter Zeneral  Paris Boys Choir. In en raporter.  Kisisa ki spesyal avek sa boug ki en seselwa ki’n ne Sesel, ki’n al etidye deor i napa, ki nou bezwen  met en boug ki’n ne deor, ki’n natiralize pour li vin Anbasader.  Letan mon regarde, mon regard nou bann zenn seselwa ki la kot Foreign Affairs, mon demande bann boug parey Selby Pillay, tousala bann zenn seselwa ki kapab e sa dan en serten sans – oke letan Onorab Faure ti ganny  nonmen koman Anbasader, nou sel kritik vizavi  Onorab sete ki i ti osi en manm lasanble. Sa ti nou kritik ki  nou ti fer, ki i pa ti kapab koman en manm lasanble ganny apwente Anbasader.  Me apard sa parey nou ti dir wi,  Onorab Faure ti annan tou bann soz, i ti’n deza travay dan sa Minister Foreign Affairs, i ti deza pe reprezant Sesel vizavi Linyon Eropeen ensidswit.  Alors i ti annan en keksoz ki ti fer li al dan sa direksyon. Me I’m sorry sa i en lapwentman ki montre nou nou pe fer en pa an aryer.  Kimannyer paregzanp ou konpar Msye Phillip LE GALL avek bann Anbasader parey Claude Morel, parey Sylvestre Radegonde, parey Betrand Rassool. Definitivman mon krwar zot pou aksepte poudir bann soulye ki sa bann dimoun i mete, letan ou pou regard zot CV ensidswit bann soulye i gran pour sa boug vin antre ladan.

Alors Msye Speaker ankor enn fwa dan sa lespri Sesel pour Seselwa, mwan mon pa kapab aksepte ki poudir en boug apre ki in ganny nasyonalite an 1999 zis 7an plitar sa boug i ganny plas anbasader tandis ki nou annan nou, nou bann seselwa ki’n travay, ki’n al  course, ki’n al spesyalize dan foreign affairs, zot, zot pa kapab ganny sa sans pour zot vin anbasader, pour zot reprezant zot pei lo sa nivo. E Mr Speaker – I’m sorry, sennla mon krwar i enpe too much to swallow e sa enn la efektivman nou tou nou pou vot kont. Nou pou vot kont akoz nou  krwar ki poudir an 2006 apre tou sa bann keksoz ki nou’n koz lo la, lo bon ledikasyon, tou sa bann zafer, ti devret annan en seselwa ki pe pran sa pozisyon.

Lo kestyon langaz, i koz angle, franse, kreol.  Angle, franse ek kreol, I mean tou domenn seselwa i koz angle, franse, kreol.  Spanish, read – mon krwar i annan en kantite nou ki pa ni zis read me ki speaker. Onorab Simon Gill i pli kalifye ki sa boug.  Political Science, Onorab Simon Gill ti sorti avek A star. Pa ni en BAC 4 e li i ti fer sa Cuba  menm e Onorab Gill zanmen i en boug ki ti pou  ansarz en Boys Choir.

(Interruption)

…Mwan mon menm Mr Speaker enm pti git per letan mon vwar sa bann boug ki Sekreter Zeneral Boys Choir ki single. E mon konnen zot tou zot pe riye akoz zot konnen ki mon pe dir.

Mr Speaker this one is too much. Mon pa kapab krwar ki apre 30an sa ki zot in apel liberasyon, ki zot in apel bon ledikasyon, ki zot in apel donn seselwa tou sa ki i kapab, be what you want to be, apre 30an zot pa kapab swazir en seselwa pou nonm koman Anbasader, me zot pou al nonm en boug ki an 1988 ek 1987 ti Sekreter Zeneral Paris Boys Choir. Come on, annou serye e mon konnen ki poudir onorab Herminie dan fon son leker zot konnen ki mon pe dir e ki zot menm zot, zot pe dir i pa akseptab.  Be zot annou montre kouraz, annou dir senn la non.  Nou kapab dir wi, pour en ta keksoz be  senla, la nou pa kapab dir wi, zot.  Sa mon vwar – I mean ankor enn fwa letan  ou regard bann seselwa, letan mon trouv – oke –parey ansyen Minis Noellie ALEXANDER in vin anbasader.  Mon sir ki ansyen Minis Simone TESTA ti a kapab fer sa travay.  Mon sir ki ansyen Minis frer Onorab HERMINIE ti a kapab fer sa travay.  Oule dir mwan napa lot seselwa pou fer eksepte Msye Phillip LE GALL.

Mr Speaker nou pou dir non, nou pou vot  kont e nou pou eksprim nou dan fason pli for posib.  Nou napa problenm personnel avek  Msye LE GALL me selman  pour li vin anbasader Sesel, sa senn la la, nou pou dir sorry non.  Mersi bokou.

 

MR HERMINIE

Msye Speaker mon krwar ki i enportann ki lasanble i apresye en fe ki letan nou koz lo anbasader ou annan ou diferan kalite anbasader, kot sa distenksyon i pa ganny fer avan pandan sa lapwentman.  I neseser parfwa ki ou annan  bann anbasader – zot apel sa mon krwar pleni-potansyer whatever.  Ki  pa neseserman i akredite avek en pei me selman  i annan enstan kot en sitiasyon i leve, kot  ou bezwen en dimoun avek  pourvwar e stati anbasader pou al sey rezourd en serten problenm.  Mon krwar Onorab Faure i dakor avek mwan.

Aprezan lo kestyon zenn profesyonnel seselwa  – parey Onorab Ramkalawan pou konnen tanto, bokou nou bann  zenn profesyonnel ozordi pe pran bann responsabilite serye.  Sa nouvo gouvernman Prezidan Michel i donn responsabilite lazenes profesyonnel seselwa e byento dan lespas en 12 erdtan i ava antann konpozisyon pour gouvernman e limenm li i ava apresye ki bokou dimoun ki nou ti swete i vin anbasader dezorme nou bezwen servi zot pou desarz bann lezot responsabilite.  I koz lo bann ex-ministers. Pa neseserman ki tou ex-ministers i enterese avek en post parey.  Paregzanp mon kapab dir ou ki Minis Herminie pa pou enterese avek en pos parey.  So nou pa zis dir akoz pa donn sa msye sa pos.  Ou  bezwen rode osi eski i enterese pou fer sa travay.  So mon krwar nou bezwen get li enpe dan sa loptik.  Apre tou Msye Speaker, Msye Phillip LE GALL i en seselwa natiralize avek menm drwa ki nou tou.  I ti kapab sekreter zeneral Boys Choir petet Father i annan en problenm avek sa me selman i reste en seselwa. Father osi in sant dan en Boys Choir li  Legliz Portestan.

 

(interruption)

 

MR HERMINIE

Zanmen ou’n fer ou li.

 

MR RAMKALWAN

Non.  Espesyalman pa dan Legliz Portestan.  Kekfwa i ti ava dan Legliz Anglikann.

 

MR HERMINIE

Mon pa krwar rezon ki’n avanse i sifi pour nou si oule zet sa nominasyon ater. Mon krwar ki premyerman i en seselwa.  Dezyenmman pa neseserman ki pe pran plas bann seselwa ki’n ne Sesel, akoz nou konnen ki bokou zenn seselwa ozordi pe pran bokou nouvo  responsabilite e dan bann  lenstans kot nou’n santi nou apwent en zenn seselwa, nou’n fer li paregzanp Onorab Faure ki byento  pe al Linyon Eropeen, lezot zenn  seselwa, in mansyonn enn de ankor ki’n fer bann travay formidab pour nou pei a letranze, nou pa’n zanmen ezite pou fer li.  Donk i pa en kestyon nou prefer etranze ki seselwa, akoz pour nou Msye LE GALL i pa en etranze, me i en seselwa.

Avek sa Msye Speaker mon ti a demann lasanble nasyonal pou siport sa nominasyon.

MR SPEAKER

Tou sa ki an faver lev zot lanmen.

Okenn ki kont. An verite nou’n aprouve.  Lot mosyon.

MR HERMINIE

Dernyen mosyon se pou demann  lasanble nasyonal pou  aprouv nominasyon Msye Graziano, Luigi, TRIBOLDI koman Anbasader.

 

MR BERNARD GEORGES

Point of Order Mr Speaker. Avan ki lonorab i kontinnyen, eski i ti ava swa sanz non sa msye lo son C.V. oubyen lo mosyon akoz lo mosyon nou pe apwent en dimoun ki diferan avek sa enn lo C.V.  Nou pa konnen lekel ki i ete.  I swa PRIBODI ouswa TRIBOLDI.  I pa kapab tou le 2, nou pa krwar.

 

MR SPEAKER

Point taken.

MR HERMINIE

Msye Speaker Italyen pa en langaz ofisyel isi Sesel, ni dan lasanble nasyonal.  Mon krwar son vre non se Grazianno, Luigi, TRIBOLDI.  Wi, wi, en fot tipografik Msye Speaker ki mon krwar nou kapab korize la.

Msye TRIBOLDI i osi en seselwa ki’n natiralize me ki’n ne an Italie e msye TRIBOLDI i sorti plis dan sekter prive kot i annan son konpannyen prive parey son CV i montre bann aspe endistriyel ki son konpannyen i deal avek.  Pour lenformasyon lasanble nasyonal Msye Speaker, TRIBOLDI i ozordi konsil Sesel an Rome e  nou konn tre byen ki sa msye  pe fer en bon travay pour Sesel laba an Rome san ki i pe met en gran presyon sirtou  presyon finansyer lo gouvernman Sesel. Se en dimoun devoue ki kontan Sesel ki’n vin en seselwa e petet i neseser a sa staz pour li kapab fer pli byen son travay an Rome e sirtou vizavi Vatican e Italie limenm ki parey nou konn tre byen pe devlope – i  annan en mirak ekonomik ki pe arive dan sa pei kot i neseser si oule nou annan en reprezantasyon bokou pli for e mwan osi mon persiade ki petet en konsil i pa sifi e ki nou upgrade sa konsil e fer li vin en anbasad.

Se pour sa rezon msye Speaker ki mon ava enplor lasanble nasyonal pou konpran nesesite pour nou annan en lanbasad avek en lanbasader a’n Italie ki direkteman ou endirekteman i a donn bokou sipor nou anbasader pour Linyon Eropeen, Msye Barry Faure a lavenir e ki zot ava fer en gran travay pou anmenn plis touris, plis komers, plis lenvestisman dan nou pti pei  Sesel.  En anbasader parey nou konnen i annan plis clout ki en  konsil.

Avek  sa Msye Speaker mon a demann tou dimoun pou siport sa mosyon.  Mersi.

 

MR WALTER CONFAIT

Segonde.

MR SPEAKER

Remark.

 

MR RAMKALAWAN

Ankor ennfwa mon anvi met lo rikord ki nou kont sa lapwentman – tou sa ki Onorab Herminie in dir nou, nou konnen.  Mon konn byen sa boug mwan.  Mon konn li byen sa TRIBOLDI e mwan sa ki mon kapab dir avek zot se ki si i annan enn bann oportinis ki mon’n deza rankontre se byen sa Msye TRIBOLDI e sa boug mon konnen ki in donn gouvernman SPPF, kekfwa ou, ou pa konnen, mwan mon konnen.

Mon konnen ki in donnen e mon konnen  son frekantasyon, mon konnen son lakaz, kekfwa ou pa konnen.  Son lakaz ki laba North East Point obor kot bann travayer Malgas i reste.  Son lakaz ki la anler. E  in annan en kantite keksoz ki’n pase e mwan senpleman mon pou dir ki sa lapwentman i napa nanryen pou fer avek sa bann keksoz ki Onorab Herminie in dir. Sa lapwentman se en rekonpans for services rendered. E bann services ki’n ganny rendered, pour  lenformasyon Onorab Herminie i osi enkli bugging equipment pour sa pei.  In osi enkli spying on the Opposition. En  zour ou ava konn plis bann detay letan zot koze.  Sa ki mon pe dir la zis met li laba e mwan mon konnen ki pou dir sa boug enn son lentansyon  sete pour li ganny en  paspor diplomatik parski sete sa enn son premye keksoz ki letan mon ti rankontre li i ti demande, en paspor diplomatik.  E apre sa  in zwe rol isi, in zwe rol laba, in tay lo kote e mwan I’m sorry.

Nou bezwen fer atansyon osi tou enpe sa bann dimoun ki nou pe nonmen, ki pe donn nou isi, ki pe donn nou laba parski finalman apre pa toultan ki nou konnen ki zot bann zafer.  Kekfwa Msye Alain Butler-Payette i a kapab koz enpe plis lo ou lo sa boug e bann kado ki i kontan zis donnen pour li nobou fer son semen pour li ganny sa ki i bezwen.  I annan  serten keksoz ki i pa’n mete dan son C.V –  En kantite keksoz i pa’n mete dan son C.V.  Mon pa vwar nanryen lo bann zafer petrol. Son C.V. i enkonplet.  I pa mansyonn son bann kontak avek Sid Lanmerik, i  enkonplet son C.V. e mwan mon pe dir ki nou annan tou rezon pou kont son nominasyon koman en Anbasader.

E anplis ki sa, Mr Speaker mwan ankor ennfwa  mon retourn lo sa pwen konmsi pour en landrwa koman Italie, nou menm nou konnen ki poudir i annan en kantite nou bann seselwa,  nou bann seselwaz ki’n marye avek Italyen. Nou konnen ki poudir si i annan en landrwa kot – si i annan enn bann langaz tou ki kantite seselwa i koze se Italyen e nou konnen ki poudir i annan en kantite seselwa ki’n etablir laba e ki sirman i annan bann seselwa ki annan en serten nivo. E mwan mon pa vwar ankor ennfwa akoz ki nou bezwen  rod en etranze ki’n ganny nasyonalite baze lo konvenyans zisteman letan i ti ganny nonmen koman konsil, pa an Ronm, i ti ganny nonmen koman konsil an Genoa e mon pa vwar akoz ki ozordi nou bezwen taye pour nou donn li pozisyon anbasader. E pour mwan vreman sa 2 lapwentman i tris.  I tris sa 2 lapwentman, sa 2 etranze koman anbasader Sesel.

Nou kapab koz lo sa bann zafer in ganny natiralize, i en seselwa, i annan menm drwa, tou sa bann zafer.  Sa nou konnen, anba lalwa i koumsa, selman anmenmtan osi i pa mwan ki enfwa ti dir, letan ti pe koz lo Madanm Gilles Lionnet ki ti’n vin en Seselwa –  letan  ti a pe dir zot bezwen en dimoun pou travay laba L’Espagne, ti a pe dir, zot bezwen en vre seselwa e sa parol ti sorti dan labous Minis Simone De Commarmond ki sa letan ti Minis pour Tourizm, ki ti dir ki i pa kapab ganny en lot dimoun me i bezwen en vre seselwa, en dimoun ki’n ne Sesel pou reprezant Sesel lo sa nivo. E ozordi mon pa vwar akoz ki nou bezwen etranze e pour mwan ankor enn fwa i montre ki parfwa nou koz en kantite keksoz me larealite i totalman diferan. Letan nou regard bann seselwa ki bann debrouiyer e letan prezan nou regarde  ki  sa bann seselwa i ganny met dekote e etranze ki pe vin anbasader nou pei konmsi ou a krwar i retourn enpe sa bann keksoz ki parfwa nou menm nou, nou kontan koz lo la.  Zot menm zot, zot kontan koz lo la, letan  zot dir konmsi nou pe retourn dan sa bann neo-colonialism. Eski  nou pa pe retourn en pe ladan kot konmsi sa bann dimoun konmsi ki pe repran kontrol ?

Mr Speaker mon napa okenn swa, nou parti  napa okenn swa me nou krwar ki Sesel i pou seselwa e nou osi krwar ki pou dir seselwa i devret ganny tou loportinite dan son pei lo pli o nivo e mon pa kapab aksepte ki en etranze ki’n rod nasyonalite seselwa pour rezon oportinis ki ozordi i pe ganny  nonmen koman anbasader.  Mon pa kapab aksepte sa e pour mwan lo en lot nivo konmsi enn ler mon vwar ki konmsi ou a krwar i annan en nespes – konmsi lo nivo politik – parski en Anbasader i osi annan en koneksyon politik parey zot menm zot in deza dir par son lapwentman.  Mon vwar ki i annan bokou – e la mon koz enpe lo zot menm bann SPPF ki’n travay isi dan sa lasanble, ki nou’n la ansanm, ki konmsi ennler ou a krwar zot in pri e lezot ki kontinnyen monte. E paregzanp – tou dimoun ti pe espekte Onorab Potter vin Minis.  Tou dimoun ti pe espekte parski parol ti’n fini – lafason ki dimoun ti a pe dir wi,  i ti a kapab vin Minis, i ti a kapab vin en Minis koman en madanm ki’n la lo front line and everything. Me selman somehow apre sa i annan en keksoz ki arive.

Mr Speaker nou lo nou kote ankor enn fwa nou pou dir kareman e klerman ki nou kont lapwentman Msye  Grazianno, Luigi TRIBOLDI koman anbasader Sesel nenport ki landrwa kot zot met li.  Mersi.

 

MR CONFAIT

Msye Speaker mwan osi mon konn Msye TRIBOLDI tre byen…

 

MR SPEAKER

En pti moman. Oule koze oubyen ou annan en pwen. Napa problenm mon ti krwar ou pe obzekte lo en remark ki in fer. Selman mon a donn zot sans koze.

 

MR CONFAIT

Msye Speaker mon konn Msye TRIBOLDI tre byen, mwan mon a dekri li koman en vre Seselwa, en onm ki’n kit sot biznes Italie, son fanmiy pour vin Sesel omwen ennfwa par mwan. Enn onm ki toultan i rod son mye pou fer maksimonm pour ed Seselwa. In fer en kantite pour sa pei. Mon a servi zis en legzanp.  2 an pase lo limenm i ti deside pou pran 2 zenn, 2 foutboler, pey zot tiket avyon, lotel e donn zot en formasyon foutbol tre onivo dezyenm divizyon Italie. E sa 2 zenn ozordi, enn i sorti La Passe, enn i sorti Red Star zot pe met an pratik sa ki zot in aprann. E foutbol Sesel an zeneral in benefisye.

Mon kapab dir ki Msye TRIBOLDI sak fwa i vin Sesel i touzour annan en lasistans en keksoz pour li kapab fer pou ed lavi en Seselwa vin pli byen.  Mon konvenki Msye Speaker ki sa lapwentman ki nou pe konsidere i ava donn li ankor bokou plis loportinite pou ed nou tou e mwan mon pou donn li touzour mon sipor.

 

MR SPEAKER

Onorab Potter oule koze?

 

MRS MARIE-LOUISE POTTER

Premyerman mon ti a kontan dir ki mon pa en dimoun ki kontan ganny flate, e anplis par lopozisyon, sertennman..

 

MR RAMKALAWAN

Zanmen mon pour flat ou mwan. Mwan zanmen mon pour flat ou.

 

MRS POTTER

Mon pa pran son komanter oserye e mon konnen  mon swete ki i pa pe dir sa ofon son leker akoz mon konnen i pa pe mean sa ki i pe dir.

 

MR RAMKALAWAN

Mr Speaker mwan zanmen mon pou flat li. Si in tann, dir li detann.

 

MR SPEAKER

Annou retourn lo mosyon..

 

MRS POTTER

Lo mosyon, mon retourn lo mosyon. Dezyenmman Msye Speaker pour sa bann rezon ki mon’n mansyonnen pli devan ki mon santi ki lo size  lapwentman sa 2 etranze ki’n vin Seselwa mon santi ki i annan en gro lipokrizi lo lapar lopozisyon.

Mon krwar tou resaman Seselwa in ganny sans vwar pour zot menm kantite lestim ki lopozisyon i donn etranze. Tou Seselwa i konnen ki se etranze ki ti ganny hire pour vin diriz kanpanny lopozisyon pour sa eleksyon Prezidansyel. E tou Seselwa ti vwar e ti tann pour zot menm, 3 etranze eropeen ki ti ganny servi pou vin dir nou Seselwa lekel gouvernman ki pli bon pour nou.  So tou sa kestyon – e anplis i 3 parlmanter eropeen ki zanmen zot parti respektiv in reisi dan okenn eleksyon dan zot pei.

So mon santi alors ki tou sa bann keksoz ki’n ganny dir lo lapwentman sa 2 etranze i pir lipokrizi e mon kontan ki pep Seselwa, 53% pa’n met en gouvernman ipokrit opouvwar e mon kontan ki Prezidan Michel in ganny son manda kler pour li apwent dimoun ki i krwar i annan konpetans e i annan lentere, e vre lentere Sesel aker.

Pli boner osi nou’n koz lo karyer ki en komisyonner lapolis i annan. La osi mon santi en loder lipokrizi. Mon pa vwar enn lo kote lopozisyon ki’n swiv karyer ki zot ti komans ladan. Limenm li lider lopozisyon in komans koman en gard, in al en Per, epi la i dan politik. So sa kestyon ki pour ou vin en komisyonner fodre ou’n annan en karyer drwat, ou’n monte dan lesel lapolis, oubyen ou’n monte dan lesel militer..

 

MR COLLIN DYER

I kapab koz lo apwentman Komisyonner pour sa mosyon.

 

MRS POTTER..

I mean i pa hold water. Mwan mon krwar Msye Speaker, mon annan tou konfyans ki sa bann lapwentman ki reprezantan mazorite pep Seselwa pe fer dan sa lasanble, i pou reponn a bann premye promes Prezidan Michel pour li met en gouvernman dinamik, zenn profesyonnel, – en ladministrasyon zenn opouvwar pour li kapab delivre lo son progranm en leker pour tou Seselwa, mon napa okenn dout ki Prezidan Michel pou fer tre byen, mon napa okenn dout ki lopozisyon SNP pou reste touzour dan lopozisyon pour sa bann menm rezon ki nou’n vwar bomaten.

 

MR SPEAKER

Bon nou pou pran en break ziska 11.15.

(Break)

 

MR SPEAKER

Lo deba kot nou’n arrive, mon krwar le pwen in ganny fer lo prensip Seselwa/etranze, Seselwa natiralize, Seselwa/Seselwa.  Si i annan okenn nouvo pwen lo sa dimoun ki’n ganny propoze koman anbasader e relevan avek sa propozisyon, mon  ava ekoute. Mon a pran sa 2 la ki’n lev lanmen, apre nou a wrap-up.

 

MR ALAIN  ST ANGE

Mr Speaker mwan mon annan plito zis en pti pwen klarifikasyon ki mon a ekspekte Onorab Herminie a kapab donn nou dan son wrap-up. Bokou bann anbasader ki Sesel in gannyen dan lepase, sete bann dimoun ki’n al travay full time koman anbasader Sesel, pou reprezant Sesel. Sete sa zot premye preokipasyon, sete anbasader pou reprezant Sesel dan en pei respektif. E ler zot ti fer sa zot ti dedye zot letan travay koman reprezantan Sesel. Sa Mr TRIBOLDI ki nou’n gannyen li nou vwar i Managing Director en seri konpanni e anplis i Prezidan Italian Wax Factories. Mon pe demann mon lekor e mon ti a kontan Onorab Herminie i klarifye sa pour nou, eski biro Sesel pour dan Wax Factories swa li koman Wax Factories pour dan biro Sesel. Mon pa tro tro konpran kimannyer sa apwentman – nou pa’n ganny dir si i pe sorti – Madanm Charles i dir mwan i pour dan Wax Factory alors nou konpran.  Si nou pour annan sa paviyon Sesel dan Wax Factory mon krwar i enportan ki nou ganny en undertaking ki sa Msye TRIBOLDI, sa zonm humble ki sorti Italie si vreman i pe vin reprezant Sesel, ouswa si i pe pran sa pozisyon koman en pozisyon de convenance pour li kapab ganny en paspor diplomatik pou pey li enpe pour sa ki in fer.  I enportan mon krwar Mr Speaker si en dimoun i al reprezant nou pei koman anbasader ki  nou annan en undertaking ki se, se sa ki pou vin – i pa en konsil la, se sa pou vin son travay tou lezour se reprezant Sesel. Mersi Mr Speaker.

 

MR DYER

Mr Speaker apard ki lapwentman nominasyon bann Minis, nou’n vwar nominasyon e lapwentman Komisyonner lapolis, bann nouvo anbasader e parmi sa 2, nou’n vwar 2 etranze. E mon pou fer remarke – mon ti kontan ler mon’n antann Onorab Potter in servi sa mo ipokrizi. In asosye lopozisyon avek sa mo ipokrizi.

 

MR SPEAKER

Non vin lo TRIBOLDI.

 

MR DYER

Wi, TRIBOLDI mon lo la – mon lo TRIBOLDI la.

 

MR SPEAKER

Oke.

 

MR DYER

Spesifikman ler ou get TRIBOLDI, aparaman osi son dokiman, i manke, nou pa konnen parski i mete missing pages from Mr TRIBOLDI’s CV, so nou pa konnen ki i annan ankor lo la. E nou realize ler nou get tou lentere sa boug dan biznes i en multi-nationals. E ki nou’n tande polisi SPPF se kont presizeman, multi-nationals, kont privatizasyon sovaz, kapitalis sovaz, liberalis sovaz..

 

MR SPEAKER

TRIBOLDI..

 

MR DYER

..e ozordi, TRIBOLDI, Mr Speaker, SPPF, gouvernman, nouvo Jj spirit in apwent en multi-nationals koman anbasader Sesel, Italie. Nou’n kont multi-nationals, bann boug ki vol dimoun, ki abiz lo ledo malere e nou’n apwent enn sa boug koman anbasader Sesel Italie. Mr Speaker i sipoze dan en lofis permanant e nou vwar ozordi, i labitid gouvernman Sesel, zot servi Judas pour zot pep ki’n elekte zot.

Mr Speaker e nou vwar, nou vwar parmi tou bann lapwentman ozordi poudir SPPF napa vreman  lentere Seselwa dan zot leker. Nou vwar i pa en leker pour tou Seselwa.

 

MR SPEAKER

TRIBOLDI.

 

(Laughter)

 

MR DYER

TRIBOLDI Mr Speaker..

 

MR SPEAKER

Ou pe al dan polisi lot, lot.

 

MR DYER

Egzakteman se sa Mr Speaker e nou vwar ki dan sa menm lespri Sesel ozordi nou pe al travers nou dan nouvo Jj spirit avek en leta militer.

 

MR SPEAKER

Bon ou napa okenn nouvo pwen pou fer.

 

 

MR DYER

Mr Speaker, Lonorab Potter in koze taler, in koz lo komisyonner, letan i ti pe koz lo TRIBOLDI. Akoz ou pa les mwan koz lo TRIBOLDI dan sa konteks.

 

MR SPEAKER

Ekoute, Onorab Dyer, mon pe deal avek ou, en foul pa zistifye en lot foul. Mon fini dir ou. La paramet ki ou kapab koze.

 

MR DYER

Wi nou’n kont liberalizasyon sovaz, nou’n kont kapitalis sovaz e ozordi nou apwent en kapitalis sovaz.

 

MR SPEAKER

Out ou pe fer repetisyon la.  Okenn  nouvo pwen?

 

MR DYER

Be sanmenm Mr Speaker ou les mwan koze.  E TRIBOLDI..

 

(Laughter)

 

..TRIBOLDI Mr Speaker i pa pe fer dibyen Sesel lo lasenn diplomatik. Se sa en faver ki Msye Confait in dir akoz in pran 2 foutboler in anmenn Italie alors nou bezwen donn li en paspor diplomatik, ki in donn SPPF an retour, pour nou donn li en paspor diplomatik e ou ou konn byen Mr Speaker ki en boug i kapab fer ek en paspor diplomatik. In montre nou son bann lentere ki i annan dan bann lezot landrwa dan bann pei kot demokrasi, pa renye, pa egziste. I montre ou. E i ape montre nou ozordi ki nou pe anmennen Sesel presizeman. E sa ki mon pe fer referans, Sesel ozordi Air Seychelles i ganny ansarz par militer, Port Office i ganny ansarz par militer, lapolis i gany ansarz par militer, prizon i ganny ansarz par militer.

 

MR SPEAKER

Out, I’m calling you to order. Si ou kontinnyen konmsa mon pou bezwen aret ou. Ou pe sorti lo size.  Mon’n fek  dir ou ki’n arive, ler in koz lo komisyonner, wi, selman..

 

(interruption)

 

..non nou pa kapab fer rewind nou.

 

(interruption)

 

Non. Onorab Georges I’m calling you to order. I’ve made my ruling.

 

MR DYER

Mr Speaker you’ve made your ruling – take your ruling. Right mon arête.

 

MR HERMINIE

Msye Speaker bokou keksoz enteresan in sorti lo sa Mosyon, lo Msye TRIBOLDI.  I annan ki’n ariv dan salon Msye TRIBOLDI, zot in fer diskisyon lo spying equipment, zot in fer diskisyon lo bugging equipment, zot in fer diskisyon lo paspor diplomatik. E letan keksoz pa’n deroul byen e zot pa tonm dakor, ozordi zot vin dan lasanble zot vin maltret Msye TRIBOLDI. Sa i enpe parey sa bann kritik ki ti ganny fer lo paspor Msye Radovan Krejcir. Apre ki nou tande, sete menm dimoun ti al laba kot sa Msye Krejcir pour al rod sipor finansyel. Lipokrizi.

 

(Interruption)

 

MR RAMKALAWAN

Mr Speaker en lakizasyon serye in ganny fer. Mon ti ava kontan challenge Onorab Herminie, substantiate sa ki in dir parski sa ki i pe dir, i a pe zis fer parey son labitid. Menm si in koz Jj spirit sepa ki soz, same rubbish.

 

MR SPEAKER

Oke annou…

 

MR HERMINIE

Mon pe kontinnyen.  Msye Speaker lipokrizi..

 

MR RAMKALAWAN

Mr Speaker sa i oke pour li koze?

 

MR SPEAKER

Zanmen mon’n dir ou i oke mwan.

 

(Interruption)

 

..hold on. Zanmen mon’n dir ou i oke mwan.

 

(interruption)

 

MR RAMKALAWAN

Be mwan mon pe senpleman..

 

(Interruption)

 

MR SPEAKER

This is what I’ve told him.

(interruption)

MR FRANCIS CUPIDON

…Be ou ti ava aret li avanler i ti entervenir..

 

(Interruption)

 

MR CUPIDON

Ou ti devret aret li – aret mwan, aret li osi parey.

 

 

MR SPEAKER

Onorab Cupidon I’m calling you to order.

MR HERMINIE

Oke nou kontinnyen..

 

MR SPEAKER

Now ou ou’n challenge li, prezan i a join ou challenge.

 

MR HERMINIE

Substantiate, nou ava substantiate, zot a soke. Liberal in mont lo nou televizyon, bann etranze..

 

MR RAMKALAWAN

Be Mr Speaker ki arive..

 

(Interruption)

 

Oli TRIBOLDI?  Oli TRIBOLDI, dan Liberal.

 

(Interruption)

 

MR HERMINIE

I’m addressing the issue of etranze Seselwa ki’n ganny raise.

 

MR SPEAKER

Ekoute. Li i son drwa pou wrap-up. Ou’n lev serten pwen.

 

MR HERMINIE

Wi, ou ki’n lev sa bann pwen etranze.

 

MR RAMKALAWAN

Be i pa pe reponn.

 

MR HERMINIE

Be mon pe reponn. Koman koz lo liberal ou sote.

 

(Interruption)

 

MR RAMKALAWAN

In zis fer en lakizasyon unfounded e apre i get on with it.

 

(Interruption)

 

MR CUPIDON

..Pour zot ti oke, pour nou pa oke.

 

MR SPEAKER

Onorab Cupidon mon pe demann ou pou sorti.

 

MR RAMKALAWAN

I ava sorti, les li.

 

MR HERMINIE

Sa bann zafer etranze Seselwa se pirman..

 

MR SPEAKER

..He’s answering it.

MR RAMKALAWAN

Sorry?

MR SPEAKER

Ou’ ki’n lev..

 

MR RAMKALAWAN

He is not answering it Mr Speaker, the point is..

(Interruption)

MR HERMINIE

How do you know I’m not answering it.

MR SPEAKER

Onorab Ramkalawan I’m calling you to order.

 

MR RAMKALAWAN

Oke sa i ou zouti ki ou’n servi, fine. Pa zis call mwan to order, let’s look at the logic. Onorab Herminie in fer en lakizasyon konsernan nou, dan SNP nou’n al rod larzan avek Krejcir, nou dir avek li sa i en fo lakizasyon, i pe zis abuse son, soz. Sutstantiate. Li letan i dir nenport ki rubbish ki i anvi, i oke? Nou letan nou koze, out ensidswit, call to order, zot zot ganny drwa dir sa ki zot oule.

 

MR HERMINIE

Be mon a substantiate, mon’n dir li mon a substantiate.

 

MRS ANNETTE GEORGES

Substantiate, now.

MR RAMKALAWAN

Substantiate now, ou’n fer ou lakizasyon.

 

MR HERMINIE

I’ll bring the evidence. I konnen li Onorab Georges, i konnen. Onorab Bernard Georges..

 

(interruption)

 

MR BERNARD GEORGES

Now it’s me.

(Laughter/interruption)

..la prezan i mwan. Mwan mon pa’n koze lo sa deba mwan, selman now it’s me. Now the accusation is…

Interruption)

MR HERMINIE

En bann ipokrit.

 

MR BERNARD GEORGES

Alors ki ou pe fer? You call me to order Mr Speaker, will you call him to order?  Mr Speaker you call me to order, la in fer en lakizasyon lo mwan, I never even spoke in this debate, are you going to call him to order or are you going to give him the privilege like you always do.

 

MR HERMINIE

In demann mwan pou substantiate.

 

MR SPEAKER

Ekoute, annou pran de segonn pou kalme.

 

(Interruption)

 

MR RAMKALAWAN

Mr Speaker pou mal fini sa. Akoz ou pa pran..

 

MR SPEAKER

Mon’n dir ou annou pran 2 segonn pou nou  kalme apre nou ava koze.

 

MR RAMKALAWAN

Pran sa vot nou fini avek sa Mr Speaker.

 

MR HERMINIE

Non be right of reply.

 

MR RAMKALAWAN

Ou pa vwar direksyon ki sa pe ale?  Taler ou pou pous enn par enn ant nou.

 

MR SPEAKER

Onorab mon’n dir ou, si ou pa oule kontinnyen mon pou demann ou pou sorti.

 

MR RAMKALAWAN

Mon konnen ou annan drwa pous mwan.

 

MR SPEAKER

That’s not the issue.

 

MR RAMKALAWAN

But it is the issue because this is the threat ki ou’n fer avek mwan ki poudir ou pou anvoy mwan deor.

 

MR SPEAKER

Then I’m asking you to leave the…

MR RAMKALAWAN

I’ll leave your room.

 

MR HERMINIE

In anvi sorti. Kile lopozisyon.

 

(Interruption)

 

MR DE COMMARMOND

Kile les SPPF travay.

 

MRS MITCY LARUE

Kile les nou travay.

 

MR DE COMMARMOND

Laverite i ofans son met.

 

MR HERMINIE

Mon ti pou dir bann ki’n pran nasyonalite etranze, si fodre adres sa issue.

 

MR DE COMMARMOND

Non be li i pa swiv zot li.

 

MR HERMINIE

Oke mon kapab kontinnyen Msye Speaker.

 

MR SPEAKER

Ekoute. Ou ou’n fer en akizasyon lo li. Li in challenge ou.

 

MR HERMINIE

Non mon pa’n fer akizasyon  mwan.

 

 

 

MR SPEAKER

Non, lo Onorab Ramkalawan.  Li in challenge ou pou substantiate. Zafer substantiate si oule fer li la, oubyen en lot lokazyon.

 

 

MR HERMINIE

En lot lokazyon, I will do it lot lokazyon.

 

MR SPEAKER

Nou’n fini ek sa issue.

 

MR HERMINIE

Nou’n fini ek sa issue.

MR SPEAKER

Prezan ki ou problenm avek Onorab Georges?

 

MR HERMINIE

Lekel sa?

 

MR SPEAKER

Avek Onorab Georges, i krwar ou annan en problenm avek li.

 

MR HERMINIE

Non narnyen me selman mon krwar antan dan leadership SNP i konnen mon kapab substantiate.

 

MR BERNARD GEORGES

Mr Speaker it’s very simple. Mwan mon pa’n partisip dan sa deba ditou bomaten.

 

MR SPEAKER

But that’s not the issue.

 

MR GEORGES

No but I’m coming to the issue, give  me a chance.

 

 

MR SPEAKER

Ok what’s the issue?

MR GEORGES

Li in trouv bon pour li servi mon non, pa koman en lakizasyon, let’s be very frank, Onorab annan ou kouraz – atraver ou mon pou demann Onorab annan kouraz ler i fer en lakizasyon to stand by it. Pa fer en lakizasyon apre vire e dir lo leadership SNP.  That wasn’t what he was saying. What he was saying was directed at me. In dir Lonorab Georges i byen konnen.

 

MR SPEAKER

Is that the case?

MR GEORGES

I pa’n dir leadership lopozisyon i byen konnen.. Let me finish Mr Speaker. Mon pankor fini – Lonorab Georges i byen konnen and I know what he is meaning. Mon konnen ki i oule dir mwan.

 

MR HERMINIE

Ki mon oule dir?

 

MR GEORGES

Akoz Mr Radovan Krejcir i vini kot mwan, that’s what he means. I pa konnen ki sa msye in vin dir kot mwan.  E mon ava fer li konnen in the fullness of time. Wi, sa Msye in vin kot mwan. This man came to me for a number of reasons ki pa konsern sa lasanble me ki napa narnyen pou fer avek parti politik. He came to me and saw me in my capacity as a lawyer. Si Lonorab Herminie ozordi i oule fer en lakizasyon ki sa Msye in vin kot mwan pour bann rezon politik, which is what he has done in this case e bann rezon ki limenm li in dir i byen konnen, I want him to substantiate it and to say it now, otherwise I want him to withdraw it Mr Speaker. E si i pa oule, mon pe demann ou silvouple fors li pou fer, parey ou’n fors nou pou fer bomaten.

 

MR SPEAKER

But he just said, i pa’n akiz ou sa.

 

MR BERNARD GEORGES

..i kapab dir sa ki i anvi, I’m asking him to have the courage. (Interruption) I pa kapab dir i pa’n akiz mwan, in servi mon non.

 

MR HERMINIE

Substantiate konmkwa zot in al rod led finansyel? Then I will do.

 

MR BERNARD GEORGES

Do it now.

 

MR SPEAKER

You can’t force him to do it..

MR GEORGES

In that case withdraw it, I’m enforcing through you, and I can ask..

MR HERMINIE

Be li ki’n dir nou i konn sa boug, i vizit sa boug.

 

MR GEORGES

I have asked you Mr Speaker to do something.

 

MR SPEAKER

Listen ou pa pou kapab donn mwan lord.

 

MR GEORGES

Non non mon pa pe komann ou, mon pe demann ou.

 

(Interruption)

 

MR SPEAKER

He’s agreed to substantiate.

 

MR HERMINIE

As a lawyer you know that I need evidence and things like that.

 

MR SPEAKER

Annou fini lo TRIBOLDI.

 

MR HERMINIE

Tape conversations for instance, these are evidences that you need to bring to substantiate. I don’t have these materials with me. Don’t you know that, as a lawyer? So you give me time, next time round I’ll bring these evidences. So ki ou pe fer tapaz?

 

MR SPEAKER

Onorab Herminie, I have to call you to order. Fini lo TRIBOLDI.

 

MR HERMINIE

Les mwan fini, mon pankor ganny sans fini..

 

MR SPEAKER

Akoz ou fer lezot akizasyon. Zot pou oule reponn, zot pou oule defann.

 

MR BERNARD GEORGES

Mr Speaker tape conversation in dir..

MR HERMINIE

Sa bann zafer TRIBOLDI, sa bann zafer ki Msye TRIBOLDI i en etranze alors i ganny diskalifye pou vin en anbasader Seselwa..

 

MR BERNARD GEORGES

Mr Speaker please, mon pankor fini..

 

MR SPEAKER

Onorab Georges..

 

 

 

MR GEORGES

Non, but he raised it. He raised it – he said, mon pou anmenn tape conversations. In fek dir la devan ou.

 

MR SPEAKER

Be in dakor pour fer.

 

MR GEORGES

In dakor pou fer sa?

 

MR HERMINIE

Wi be mon a substantiate.

MR BERNARD GEORGES

Let the record show ki i pou anmenn tape conversations.

MR HERMINIE

Wi let the record show, yes.

MR GEORGES

Alright

MR SPEAKER

TRIBOLDI.

 

MR HERMINIE

Oke. Tou sala se pirman bann lipokrizi. Nou konn tre byen lekel ki’n run campaign SNP se bann Liberal Angle, zot bodyguard – oke zot koz lo kontan Seselwa, me selman zot al rod en nasyonal Angle, training SAS pou vin zot prop bodyguard.

MR SPEAKER

Onorab Herminie, sa in fini ganny dir laba.

 

MR HERMINIE

Tou sa i pirman bann lipokrizi.  Msye Speaker partou dan lemonn in annan bann legzanp kot bann dimoun ki pa neseserman in ne dan sa pei me ki’n vin dan sa pei, pran nasyonalite in fer bann gran kontribisyon eksepsyonnel. Nou annan Colin Powell l’Angleterre,, Marlene Albright ki en desandan Czech, Arnold Schwarzenegger en Austrian ki ozordi i gouverner California. Sa bann keksoz i arive. E lefe ki Msye TRIBOLDI in ne an Italie i pa vedir ki i pa kapab fer narnyen pou Sesel. Son kontribisyon i gran.

Ozordi zot ankoler ek Msye TRIBOLDI petet akoz i pa’n fer – in dekri sa boug koman en gran opportunist. Be akoz ou dekri en boug koman en opportunist? Kwa ki pou fer ou dekri en boug koman en opportunist? Zot in bezwen annan en tranzaksyon antre zot e zafer pa’n deroul lafason ki i ti sipoze deroule ouswa zot ti a kontan i deroule.

I dir eski sa Msye pou travay full-time, si i pou kite dan biznes. Be sa msye i kapab kontinnyen dan son biznes anmenmtan fer sa travay anbasader.  Si li i ti vin Minis, i ti pou vann tou son bann biznes.  Onorab Georges sa 39 konpannyen ki i annan eski i ti pou aret travay ladan?  Mon krwar pa.  So sa i bann largiman banal avek bi pou sey shoot down en nominasyon.

Msye Speaker an sa ki konsern Msye Colin Dyer, i kler ki Jj spirit i fini atak son sistenm aprezan i pe ganny li Jj fever ki’n atak son laservel..

 

MR SPEAKER

TRIBOLDI, oli TRIBOLDI?

 

MR HERMINIE

E Msye Dyer i ganny li Jj deloryonm. E i bezwen al kot Msye TRIBOLDI pou ganny enpe latizann Italyen pou tret sa.  Msye Speaker mersi bokou. Mon a demann tou manm la dan sa lasanble pou siport sa mosyon. Mersi.

 

MR SPEAKER

Tou sa ki an faver lev zot lanmen.  Okenn ki kont. Alors mosyon in ganny aprouve, e nou fini ozordi e nou rezwenn an Septanm.

 

(ADJOURNEMENT)