::
Home » Verbatim » Verbatim - First Term 2006 » Tuesday 4th April, 2006

Tuesday 4th April, 2006

NATIONAL ASSEMBLY OF SEYCHELLES

Tuesday 4th April 2006

The Assembly met at 9 am

National Anthem

Mr Speaker in the Chair

 

MR SPEAKER

Bonzour tou Onorab, Minis. Nou komanse avek kestyon nimero 31.

 

MR PREA

Mersi Mr Speaker.  Bonzour Minis, bonzour tou manm onorab.  Mr Speaker mon ti a kontan demann Minis pour Lanvironnman ek Resours Natirel si son Minister i annan okenn plan pou rezourd sa problenm  avek larivyer St Louis ki afekte plizyer fanmir sirtou dan son bann staz pli ba.

 

MINISTER RONNY JUMEAU

Bonzour Msye Speaker, bonzour tou bann manm Onorab. Msye Speaker problenm prensipal larivyer St Louis se ki ler nivo larivyer i monte avek gro lapli sa delo i premyerman refoul dan bann dren dan lavil ki desarz dan sa larivyer.

Dezyenmman si nivo larivyer i kontinnyen monte sa delo i menm mont parlao sa pti miray  ki sitiye tou dilon sa larivyer dan Gymnasium Car park. Sa i koz linondasyon dan sa parti Victoria dan zanviron State House Avenue ek lorloz e byensir  ler la i inonde sa delo i refoule e pli o, i afekte lezot dimoun lo ban sa larivyer.  Travayer pou rektifye sa problenm i form parti sa proze R8 milyon ki divizyon transpor lo later pe fer aktyelman pou amelyor  drenaz dan Victoria.  Gouvernman pou depans R900 mil  pou amelyor nou lefikasite e kapasite sa drenaz dan sa parti lavil, pou lev nivo bann miray obor larivyer  e pou osi lev nivo bann pon enkli bann pon pyeton ki traverse sa larivyer parey  deryer kordgard santral.

 

MR PREA

Msye Speaker mon ti a kontan demann Minis si pour le moman  antretan avan ki sa proze i demare si son Minister pe fer serten monitor e sirtou dan sa bout deryer kordgard eskan kot vye simityer Bel Air sirtou la ki i annan  en landrwa kot bann lalyann avaisan i tant pou ranpli dan sa larivyer e ki lezot salte ki sa larivyer i anmennen i atase avek, i pri la e i koz enm pti pe plis domaz dan sa area la.  Si son Minister pe monitor e si zot pe pran aksyon.

 

MINISTER

Msye Speaker mon pa pou kapab donn ou en repons egzakt pour sa sitiasyon egzakt ki ou pe donn mwan la me nou note la e byensir nou pou follow up

MR SPEAKER

32.

 

 

 

MR PREA

Msye Speaker mon ti a kontan demann Minis ki progranm son Minister pe adopte pou konbat problenm  lerozyon lakot sirtou dan Nor Mahe e si bann lakour ki ganny afekte pou ganny okenn konpansasyon oubyen led.

 

MINISTER

Minister  Lanvironnman ek Resours Natirel pe sirvey de pre bann problenm lerozyon lo lakot Nor Mahe atraver son national beach monitoring programme. Sa i en progranm sirveyans ki ti lanse an 2003 kot profil bann lans pli enportan atraver Sesel pe ganny mezire tou le 3 mwan dan sezon vann nor ek vann swet pou detekte si i annan okenn sanzman abnormal ki pe pran plas lo lakot.  Malgre ki lerozyon ki’n arive lo lans Beau Vallon paregzanp, i enkyetan e tre vizyel akoz i dan  la gete piblik.  Bann mezir ki’n pran anba Beach monitoring programme depi kit i lanse 3an pase i montr ki sa i en mouvman sezonal kot disab i ale dan sezon vann nor e i retournen dan sezon vann swet me si i annan bann gran mare ki ko-ensid avek sa mouvman, sa mouvman disab normal byensir laroul i ariv pli o lo lans e i tir disab anba bann pye dibwa e lezot vezetasyon, bann miray e menm semen piblik.  E se sa ki’n arive ant Fevriye e Avril sa lannen.  Nou’n annan en seri gran mare ant 2 met  a 2.1 met oter ant le 27 Fevriye ek le 3 Mars epi ankor ant le 29 Mars ek le 2 Avril okazyonnen par sa ki nou apel en Equinox Tide, ler soley i parlao Sesel e par nouvel lin osi.  Nou espekte ankor en gran mare 2.1 met le 27 Avril, byensir sa i agrav sitiasyon e fer ki i annan plis lerozyon ki labitid e plis disab i ganny tire ki labitid.  Nou osi vwar bann fenomenn koumsa Bel Ombre, Anse Nord-Est, Carana ek lezot lans dan Nor Mahe.  I annan de lezot fenomenn ki kapab kontribye pour sa lerozyon eksesiv me nou pa’n fer bann letid siyantifik pou gete ki kantite i kontribye ladan.  Enn se eski Tsunami ti sans profil fon lanmer ? Akoz parey nou konnen ler in pase in balye disab, in balye koray e  swivan osi gran coral bleaching, blansisman koray ki ti arive an ’98 koray otour lakot in kontinnyen dezentegre.  Eski profil nou fon lanmer osi ki pe sanze.   Sa I demann bann letid aprofondi tre konpleks.  En dezyenm fenomenn ki kapab kontribye ladan se ki Fevriye sa lannen i dezyenm Fevriye pli sek depi ler rikord in komanse 35an.

Sa in fer ki lakantite delo dou ki pe rantre dan bann labe in diminyen e Beau Vallon byensir i annan delo ki antre dan labe kote kot Boat House, kote kot Pizzeria e kote kot Fisherman’s Cove.

Koman labe Beau Vallon ki mannyer i ete i capture sa delo dou I pa’n antre, sa linite delo lo lakot I monte e ler sa linite delo lo lakot I monte I afekte bann kouran, I kapab fer bann kouran vin pli for.  So i kapab en konbinezon tou le 3.  Granmare. Eski  nou profil nou  fon lanmer in sanze. Eski sa mank delo dou osi in kontribye e ko-ensid avek en mouvman ki li i normal li.  E se sa ki nou pe vwar bann lefe eksesiv ki tre alarman.  Pou retourn lo lans Beau Vallon menm dan letan normal, menm si  lapli i tonm parey i devret – parey nou espekte menm si nou pa ganny bann gran mare Beau Vallon i enn bann lans dan Sesel ki eksperyans  bann sanzman konsiderab dan disab.  Li toultan son lefe i enm pti pe pli for ki bann lans.

Msye Speaker fodre fer resorti ki sa progranm  sirveyans bann lans i kouver en karantenn lans lo Mahe, Praslin ek La Digue ek lezot zil koman tou bann zil dan St Anne Marine Park, Bird Island, Aride, Ile Du Nord, Cousin ek lezot zil ankor.  Dan Nor Mahe sa progranm i kouver Beau Vallon, L’Anse Mari-Laure, Bel-Ombre, L’Anse Sunset Beach ek Carana, Anse Nord-Est ek Anse Major.

An-sa-ki konsern lerozyon later prive borlanmer i pa polisi gouvernman  pou finans proteksyon propriyete prive ni pou pey konpansasyon ou domaz koze par lanmer.  En propriyeter prive i responsab pou son prop propriyete.  Minister i pare donn konsey lo ki mannyer pou mye protez zot propriyete.

 

MR RAMKALAWAN

Msye Speaker sa dernyen parti kestyon – letan Minis i dir i pa polisi gouvernman pou aktyelman protez propriyete prive.  Mon ti a kontan demann li en kestyon spesifik lo en travay ki pe fer Anse Kerlans, Praslin.  Minis I’m sure ou konnen sa travay ki pe ganny fer e mon ti ava kontan si ou ti a kapab donn nou detay lo ki laranzman ki annan e  parski i vreman en gro travay ki pe ganny fer e i baze avek propriyete prive ki pe ganny proteze.

 

MINISTER

Msye Speaker sa i permet mwan kalifye larepons.  Mon larepons ti en ka senp kot en dimoun prive I vini I dir ou son lans pe ale.  Nou ale, nou regarde, nou fer en rapor nou donn li e  li i sey rod son fason finansman.  Dan ka Anse Kerlans i bokou pli grav ki sa, sa i destabilizasyon en lakot antye ki kout en kantite larzan, mon’n deza vin reponn kestyon e dan sa bann ka koumsa, sa bann propriyeter prive pe kontribye.  Gouvernman i met en serten sonm, i annan ki pe kontribye larzan, i annan ki kontribye ros paregzanp rock armoury. Si nou pe servi en  soft engineering solution parey nou pe servi kot Paradise – i servi dibwa ki ou antere, i donn ou dibwa, pyes sed lanmenm pou servi.  Alors sa kominote li i pe kontribye parski si nou ti pe esper zot fer li zot pa ti pou kapab.  In annan gran, gran pert later laba.  La se en lot sitiasyon  vreman. Si paregzanp demen en gran lans parey Beau Vallon i komans ale, menm si i annan propriyete prive pou vin ansanm, nou pou dir be sa bout isi lotel a kontribye, sa bout isi lot a kontribye e nou vin ansanm. Mon repons ti plito lo en one and one basis kot ou annan  en lakot e ou lakot pe ale, nou advise ou, nou donn ou konsey, nou kapab  fer ou ganny akse avek materyo pour ou servi paregzanp – konmsi pou nou vin ek en larzan  pou fer li, non.  Me dan bann ka koumsa kot en kominote oubyen en lakot antye pe ganny  destabilize ki si ou pa aret li pli lwen pou ganny destabilize, gouvernman i bezwen step in pour en serten sonm.

 

MR CUPIDON

Msye Speaker mon kapab demann Minis swivan son larepons konbyen gouvernman pou kontribye dan sa proze.

 

MINISTER

Mon pa rapel byen sa sif ki nou ti mete msye Speaker.  Mon rapel ti annan en sif R900 mil – la dan ler mwan in vin plis.  Fransman mon pa rapel byen sa sif.

 

MR SPEAKER

33.

 

MR PREA

Msye Speaker mon  ti a kontan demann Minis si i ti a kapab konfirmen si son Minister pe monitor bann proze konstriksyon kontinnyel lo L’Ile Du Nord, son bann lenpak lo lanvironnman sa zil  e si son Minister i annan okenn lekip ki pe sirvey sa bann devlopman.

 

MINISTER

Msye Speaker i pratik normal pour bann diferan teknisyen dan departman lanvironnman fer bann vizit regilye kot bann proze konstriksyon koumsa.  Nou teknisyen ti vizit L’Ile Du Nord tou le mwan pandan ki konstriksyon ti a pe fer.  An zeneral departman  lanvironnman ti tre satisfe apard enn de problenm avek korperasyon ki lotel ti donn zot sirtou son manager pour lanvironnman.  Menm apre ki lotel ti konplete departman lanvironnman  ti kontinnyen vizit L’Ile Du Nord tou le 3 mwan pou en peryod 1an pou fer sir ki loperasyon sa lotel osi pa pe afekte lanvironnman, menm konmela serten seksyon departman lanvironnman tel ki konservasyon ek nouvo environmental engineering unit ki sirvey bann lans ek lakot pe kontinnyen  vizit L’Ile Du Nord pour lezot travay ki konsern zot, parey  pou sirvey bann lans anba National Beach Monitoring Programmes. E ler zot laba zot kontinnyen zet en kou dey lo lezot devlopman ki pe arive lo sa zil e si i neseser zot averti bann zofisye neseser dan departman ki konsernen.

 

MR PREA

Mersi Msye Speaker, Mersi Minis pour repons.  Minis mon ti a zis petet demande si bann  lezot proze osi ki pe ganny antreprann sirtou lo nou bann zil ki enm pti pe andeor Mahe, si ankor petet avan dan zot faz konstriksyon, avan  zot komanse si ankor lanvironnman ou Minister I annan serten say, I annan serten fason ki kapab rantre pou vwar e kontrol serten  konstriksyon pou napa en lefe advers lo lanvironnman.

 

MINISTER

Dan bann  gro proze parey nou konnen I annan  environmental impact assessment e normalman sa devloper li I kontakte son konsiltan pour li e I fer sa e zanmen nou aksepte a face value. Avan ki nou donn go ahead, nou vizit landrwa e sa konsiltan konsern, sa expert ki’n fer zot plan pour nou  mars sa sit, regarde ki pe dir dan son rapor, eski i vreman sa ki pe arive lo site. E si i annan bann  modifikasyon nou demande, si i annan keksoz ki nou krwar nou  devret over-rule nou fer parski  fodre pa bliye kanmenm si sa dimoun ki’n fer sa assessment i en expert in ganny anploye par en devloper pou ganny en travay e dan serten  ka keksoz ki ganny deplizanpli – akoz i annan serten gro devlopman ki’n ganny problenm ek nou, lezot ki pe vini pe komans vin vwar nou menm avan environmental impact assessment i fer.  Tou dernyenman i annan de ka kot dimoun in zwe ek mwan personelman ek bann teknisyen lo serten devlopman kot zot dir nou vin demann zot lo sa site ki sa ki pou les nou fer, ki sa ki zot pa pou les nou fer, pour nou konnen kote nou konsantre nou bann letid e sa in arive tou dernyenman pou bann devlopman parey Round Island, Port Launay tousala zot pe vin vwar nou.  Nou advise zot vin vwar nou boner pour nou prevwar okenn problenm, pa esper nou depans en ta larzan lo en konsiltasyon, lo en letid apre la ki ou pou vin dir zot sorry kan nou ti’n kapab dir zot sa davans.  Se sa ki nou pe ankouraz bann devloper fer konmela.

 

MR SPEAKER

34

 

MR PREA

Msye Speaker mon ti a kontan demann Minis pou esplik lasanble ki lenpak sa 679 travayer alafwa  i kapab annan pour lanvironnman frazil, zil Silhouette.

 

MINISTER

Msye Speaker ler en environmental impact i ganny fer pou en proze i osi enkli lenpak ki bann travayer sirtou bann travayer ki reste lo site i kapab annan, alors ler lotorite planning e departman lanvironnman i donn en proze zot laprouvasyon i enkli bann mezir ki  devret pran pou evit elimin oubyen minimiz okenn lefe negativ ki sa proze e son bann travayer i kapab annan lo lanvironnman.  Dan ka Silhouette paregzanp rapor lo lenpak ki bann travayer i kapab annan lo lanvironnman i adres lakanite salte domestik ek hazardous waste tel ki batri etc, ki zot prodwir, zot sewerage, delo ki zot bwar e menm  bann emisyon dan ler sorti dan bann zenerater ki prodwir zot avek  elektrisite.  Zofisye lanvironnman in answit vizit site tou le mwan pou tyek lo progre konstriksyon e si i fer okenn domaz lo lanvironnman.  Sa bann vizit in fer ansanm avek zofisye lasante e zofisye minister lamenazman later ek labita.

Dan ka en gro devlopman nou pa vizit site zis ler konstriksyon i komanse me osito ki kontrakter ek son travayer i antre lo site.

MR PREA

Msye Speaker mon ti a kontan demann Minis vi ki avan proze ti demare, Minis ti isi dan sa lasanble, e i ti plizoumwen menm kestyon ki ti monte, lenpakt en tel proze, lakantite travayer lo sit e minis ti donn nou en sif ki son minister ti pe fer serten proposal ki ti pou napa plis ki  200 travayer alafwa plis sa bann dimoun Silhouette.  Eski depi sa keksoz in sanze ki  ozordi ki tou dernyenmman ki Minis Lasante ki ti konfirmen ki i annan 679 at this point in time lo Silhouette e se la kot lenkyetid I leve lo lenpak lo lanvironnman.

 

MINISTER

Msye Speaker bann zot ki’n swiv medya pa konn mon lopinyon lo devloper, ki swa etranze, ki swa seselwa.  Tou dimoun I vin ek en zoli plan e ou bezwen  baz ou letid dapre sa ki I pe dir ou.  I dir ou i bezwen tan kantite travayer, ou ale ou dir be tan kantite travayer kot ou pou mete etc.  Sa i enn sa. Proze i komanse, sa enn ki nou, nou sceptical to. Anler sa bann sanzman ki arive dan zot planning i valab, annan de ler en dimoun i vini i dir mon pou fouy sa fonder, ler i fouye i zwenn ros, i pa ti’n fer son letid byen, i sanz son plan.  Nou problenm se ler zot pa konsilte  nou avan zot sanze.   I annan i zis i go ahead i sanze e i annan gro proze ( ?) I annan lotel in fini, kot nou’n deza issue stop notice e aret  zot travay e natirelman zot dir ou larzan, isi loan etc, nou pe koz dan milyon, nou pe koz dan bilyon etc, zot vin ek sa bann sif, zot sey overwhelm nou.  E sif ki mon’n donnen ti sipoze koumsa ki ti pou marse.  Sitiasyon in sanze e enn fwa  travay in komanse ou bezwen, i annan serten konpromis anler ou  fer, ou bezwen regarde si mon pran sa aksyon ki lefe i annan.  Annou ou pens zot en landrwa pou dir mon kapab pran en lot aksyon pli serye la, e souvann fwa i arive sa bann problenm e ou bezwen adapte e dir be tyonbo en kou, ou dir mwan 200, la mon tann ou nonm 300.  Nou bezwen re-regard ou EIA la, regarde eski sa i  kapab ganny expanded pou kouver akoz nou EIA nou pa les dimoun vary, move away san ki nou fer en letid avan – zot dir be la ou pe fer birokrasi, nide deryer sa se pou dekouraz zot pou zis ( ?) sa ki zot anvi.  Akoz si ou les zot, en zour chalets i la , ler ou vini chalets i laba, li e travayer osi, i dir ou mon’n eksperyans tel problenm, mon bezwen plis travayer ki mon ti krwar, eski i vre, eski in anbet nou.  I mean nou bezwen  donn li benefis dizour, nou pa kapab akiz li keksoz ki nou  pa konnen me mon enn bann dimoun ki tre spesifik.  Ler zot vini ek zot plan, mon regarde mon dir byen zoli apre mon  vire mon get mon bann dimoun, mon dir tyek byen sa bann zafer la.  Vizit sanmenm sa enn  – at least vizit tou le mwan e menm anler pa fer sa  regularl vizit tou le mwan,  si nou zofisye i dan zanviron zis i drop by the site un-announced. I annan i vini nou vwar keksoz, i annan i vwar keksoz ki konsern lezot minister, ki kapab konsern lasante, ki kapab konsern land use. Nou dir zot eski ou okouran tel keksoz pe arive.  Me en keksoz ki mon ti a kontan donn zot en lenformasyon lo la – i enkrwayab kantite lenformasyon nou gannyen atraver greenline. Dimoun i konsernen, dimoun i telefonnen, i annan dimoun dan leo ki oversee serten proze, koman zot vwar en keksoz ki pour zot I abnormal zot telefonnen e rapor greenline i vin kot mwan ek PS tou le Mardi koumsa.  Nou ganny en rapor detaye lekel ki’n call, ki ler, ki sa son problenm, ki aksyon in ganny pran e souvann fwa paregzanp la konmela si en kontrakter I sot son ler travay, I dir li travay ziska 5er ziska 6er, asire nou pe ganny en phone call. Sa ou kapab asire nou pou gannyen e sa i osi ed nou vizilans  piblik i ed nou en kantite.

 

MR RAMKALAWAN

Msye Speaker mon premye kestyon.  Vi ki Minis e Minis rightly so mon swiv byen ou bann lentervansyon lo bann builders, kontrakter ensidswit e nou apresye sa en kantite. Vi ki letan ou ti vin dan lasanble pou dir ki maksimonm ki Silhouette I kapab sustain se 200 e sa  se apre ki ou ti’n fer ou letid ou Minister ensidswit e ki aprezan in annan 3 fold increase. Eski Mr Speaker, Minis i santi koman Minis ki ansarz lanvironnman  I annan sa full lotorite e sa full korperasyon  pou li kontinnyen manage oubyen eski I annan bann pli gro lebra ki met ou pwen for, ou bann desizyon en pe lo kote e pous ou lo bor.

Dezyenmman eski

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 


4 April 2006

MR SPEAKER

Nou a pran motions.

MR HERMINIE

Mr Speaker ozordi nou pe rankontre dan sa lasanble pour nou rod laprouvasyon pour ki enn nou koleg i ganny apwente koman anbasader. Msye Speaker dan en sans nou pe osi fer listwar akoz i premye fwa ki in annan en sitiasyon parey devan nou lasanble.  E pare you konnen Mr Speaker, sa se pa lot ki Onorab Barry Faure, Manm Elekte pou Anse Royale e Chairman komite zafer enternasyonal ki ozodi nou koman en lasanble pe ganny demande pou aprouv son apwentman koman anbasader.

CV Onorab Faure, mon’n sirkile avek tou manm dan lasanble e son CV I montre nou tre kler ki Onorab Faure pa zis annan konpetans me osi leksperyans neseser pou fer travay koman en anbasader.  Onorab Faure i annan en baz akademik solid e parey son CV in montre nou in fer son lekol segonder Seychelles College ler i ti sorti primer Anse Royale. Annefe se apre ki li i ti sorti lekol Anse Royale e vin Seychelles College dan Form I ki mwan personnelman ek Onorab Faure nou ti vin 2 zanmi pros e nou’n kontinnyen lekol ansanm ziska ler nou’n fini nou ‘A’ level kot li apre sa i ti al fer en degre dan lasyans politik ek sosyal Cuba.

Msye Speaker CV Onorab Faure i osi montre nou son leksperyans vas dan domenn zesyon enkli zesyon finansyer.  In okip plizyer pozisyon management lo plizyer board. Parey nou konnen in menm Chairman or Vice Chairman Youth Enterprise Scheme, YES e dan gouvernman in okip bokou pozisyon dan management, in direkter zeneral, e tou dernyenman in konseye teknik dan departman  planifikasyon ekonomik.  Son karyer politik nou ava dir i enn ki’n prepar li pou pran sa post. In Chairman Joint Parliamentary Assembly ACP EU, pandan plis ki 10 an in komite zafer enternasyonal nou lasanble kot son performans in enn ki’n eksepsyonnel.  Anba gidans Onorab Faure, nou ava menm dir ki sa komite in komite pli aktiv nou lasanble nasyonal.

Onorab Faure in osi en manm fondater lasosiasyon parlmanter, bann leta losean endyen e ozordi i reprezant nou dan parlman ACP. Parey mon’n dir leksperyans Onorab Faure i vas, son kontak diplomatik i osi vast e Onorab Faure i konn roulman diplomasi e politik enternasyonal koman son 5 ledrwa.  Onorab i osi mepriz 3 langaz enternasyonal, lavantaz dan diplomasi modern, e sa se Angle, Franse, e Espanyol…  (technical problem)……  Anbasader selman apre ki lasanble in aprouv son nonminasyon par Prezidan.  Anvi ki msye Faure i en manm nou lasanble e konseye teknik dan gouvernman bokou kestyon pe ganny demande konsernan sa nominasyon.  Se pour sa rezon msye Speaker ki avan mon terminen mon oule fer serten klarifikasyon pou met bann rikord drwat

Premyerman sa apwentman i parfetman konstitisyonnel e i pa al an kontrayete ni avek lartik 64(1) nou konstitisyon e ni avek lartik 81(1) ki determinen kan en manm i arete etre en manm lasanble nasyonal.  Savedir vaction of seat parey i ganny apele dan nou konstitisyon.  Dezyenmman lo non gouvernman mon oule konfirmen ki apre sa  nominasyon onorab Faure pou aret travay koman konseye teknik dan departman Planifikasyon Ekonomik, I pou vin en anplwaye Minister Zafer Etranzer savedir kontrerman avek sa ki pe ganny ekrir ou ganny dir onorab Faure pou napa 3 pos e I pa pou ganny 3 saler.

Msye Speaker parey Prezidan Michel ti dir pandan  deba lo leta lanasyon onorab Faure pou ganny poste Brussels, Belgium kot I pou vin nou reprezantan diplomatik vizavi EU. Savedir linyon eropeen.

Katriyenmman msye Speaker o non parti SPPF mon oule osi enform ou msye Speaker e sa lasanble ki onorab Faure pa pe konteste savedir I pa pe debout dan prosen eleksyon lezislativ Anse Royale.  S I fer ki I pou kapab travay  a plentan a Brussel.  I reste mwan alor msye Speaker pou demann  sa lasanble pou siport nominasyon enn nou koleg onorab Faure.  Mersi.

 

MR SPEAKER

Okenn ki segonn sa mosyon.

 

MR POOL

Msye Speaker mon segonn sa mosyon.

 

MR SPEAKER

Deba I ouver.

 

MR RAMKALAWAN

Onorab in mansyonn sa – si I ti a klarifye sa la avan nou deba I ouver.   I mansyonnen ki i pa pe debout.  Be eleksyon lasanble i 2007 ki vedir eski i a pe dir nou ki pandan 1an onorab Faure koman manm elekte Anse Royale pou Belgium e son distrik e ou, ou pou donn li liv pour li laba instead of dan lasanble, parski konstitisyon I osi fer provizyon lo ki kantite letan ki en manm I kapab absante dan lasanble si I ti ava kapab…

 

MR HARDY LUCAS

Msye Speaker I en plezir pour mwan entervenir lo sa mosyon, sa ki pa konn onorab Faure, mon a montre zot son portre, la I la.  Sa pti liv ki la ti apel en manifesto dan Eleksyon 2002.  I ti prezant sa avek bann zabitan Anse Royale.  Mon’n ganny plezir pour mwan pas kot bann dimoun Anse Royale demann zot enn de kestyon – ki mon pou raporte avek lasanble ki zot in dir mwan.  Sa i onorab Faure.

Sa lot pti liv ki la Be what you want to be. Sa osi msye Faure, onorab ti prezante avek bann dimoun Anse Royale, demann zot What time is it. Ke ler I ete. Donn zot lasirans, What’s in it for me? Ki I annan ladan pour li.  Ou MNA, eski I la avek ou, ouswa I pase parey touris ?.  Taler nou a get sa.

Msye Speaker lamazorite apard ki enm pti poursantaz imen in aprann pou travay pou ganny zot lavi e anmenmtan pou ede dan devlopman zot sosyete ki zot viv ladan.  Serten i annan lanbisyon pou ariv lo pli o mars leskalye tandis ki serten i dir ou zot satisfe avek sa pti lakonplisman ki zot in fer.  Lo sa de pwen mon napa kestyon. Dan ka Sesel  si en seselwa i ganny loportinite pou progrese e ganny bann responsabilite pli enportan pou reprezant son pei, pour mwan mon dir bravo.  Me en keksoz ki mon pa vwar li zis se akoz ki toultan se menm dimoun ki ganny gide tandis ki lezot i kaye lanmenm ater.

Depi ki mon’n ganny mon Order Paper e mon’n vwar sa mosyon ki pe demande pou apwent onorab Faure koman lanbasader mon’n esey re-egzamin konpozisyon msye Faure e mon pa’n vwar naryen ki i annan spesyal ki Selby, Peter ou Jeanette.  I annan pa mal kreol seselwa ki’n osi al lekol depi lakres ziska liniversite, ki’n fer pli byen ki onorab, ki swa i pe asize kot lakour akoz i napa clearance oubyen i sitan ganny viktimize ki’n fors li abandonn son lanbisyon.

Dan bann lezot departman parey lasante, ledikasyon i annan seselwa ki’n lekol dan menm laklas ki onorab Faure e ki’n toultan  fer byen me ki ankor lanmenm ater koman en senp travayer.  Pandan ki onorab Faure in ganny plizyer promosyon komansman par ansennyan politik parti inik, zisk konseye teknik dan minister planifikasyon ekonomik ki i ankor pe okipe ziska ozordi.  Onorab in osi chairman komite zafer enternasyonal dan lasanble e i annan plizyer lezot responsabilite politik lo nivo son parti. Parey lezot manm mon’n poz mon lekor bokou kestyon lo ki mannyer onorab Faure pou kapab desarz tou sa responsabilite ki i annan.  Mon konsern i  vin pli spesifikman lo son rol koman manm lasanble elekte pou Anse Royale.

Mon rappel ki pandan kanpanny pour sa de dernyen eleksyon mon ti oponan prensipal msye Faure e i ti demann  zabitan Anse Royale pou vot pour li akoz i sa dimoun ki kapab reprezant zot pli byen, lizour koman aswar.  Pa tro lontan pase zis an 2002 onorab ti prezant zabitan Anse Royale avek 2 manifesto, sa enn ki la pour li personnel e sa lot ki la lo plan nasyonal.

Dan sa enn pour distrik onorab Faure ti ekri ki lanmour pou Anse Royale i dan son disan, i oule kontinnyen travay pour li ek son  zabitan dan sa nouvo staz devlopman Sesel.  I ti azoute ki oule fer Anse Royale vreman vin sa landrwa spesyal.  I ti partaz son bann lanbisyon e i ti mansyonn 10 pwen.  Malerezman tou son lanbisyon ti vize ver progre zabitan Anse Royale tandis ki i pa ti fer okenn mansyon lo son lanbisyon personnel.

Msye Speaker mon’n partaz sa nouvel avek zabitan Anse Royale weekend pase e mesaz ki zot in dir mwan se demann msye Faure pou fer  2 swa.  Enn se pou li vin fini son travay ki’n promet an ’93, 98, 2002 ziska 2007 e 2, si i santi i nepli kapab tenir zot large, demann biro komisyonner eleksyon pou organiz en lot eleksyon kot en lot dimoun ki annan lentere a reprezant zot full time e pa ava les zot tonbe.

Zot dir ki lopital i ankor sa enn vye ki ladministrasyon britanik ti kite, zot dir li ler i al kot Linyon Eropeen anmenn portre sa landrwa zet salte ki i ti donn lanmenm pou met dan milye distrik e anmenn portre batiman lakrenm koko ki Linyon Eropeen ti finanse e ki  zot in kraze.

Dan manifesto nasyonal i  ti prezant zot ek en mont lasirans e avek en kestyon What time is It ? Ke ler I ete?  Zot pe – zabitan Anse Royale a zot tour demande ki lannen nou ladan akoz zot ti donn li 5an e son manda I vini an 2007.  Zot dir ki dan sa dokiman portre i osi annan en kestyon What’s in it for me ? Ki zot, zot in tronpe akoz zot ti krwar  sa ti aplik pour zot me tou le kontrer sa ti aplik pour met limenm akoz I ti annan plan lonterm.  Lo en lot paz sa progranm ti annan en fraz – ou MNA – mon a montre zot – ti mete ou MNA avek pwen eksklamasyon. Sa ti kontinnyen  avek en kestyon, eski i la avek ou ouswa i pase konmsi touris.  Pou fini ti annan en lot paz ki ti ofer zot sa fraz.  We are lucky people. Zot in dekour ki Mr Faure ki lucky akoz I  pa pou la avek zot e koman en anbasader I pou voyaze konmsi touris parey sa ki ladan ti ganny mete.  Alors kestyon ki  zot dir ki sa ki ti ladan  se zis en parabol.

Msye Speaker letan mon’n pas atraver CV Mr Faure 2 seksyon ladan in enteres mwan.  Premyerman onorab Faure in fer resorti ki an 1995 i ti refiz en labours pou fer en Masters Degree dan nenport ki size ki ti enteres li ofer par departman zafer etranzer gouvernman Britanik ek Biro Commonwealth. Son rezon ki ti refiz sa se akoz i ti MNA pour Anse Royale. Dezyenm pwen se ki an 1999 i ti refize en lot labours enportan, MBA ek MIT pou en peryod 14 mwan ofer par en liniversite an Singapore.  Son rezon ki i ti refiz sa se akoz i ti MNA pour Anse Royale. Anvi ki i reste onorab Faure ankor 20 mwan dan son manda koman MNA pour Anse Royale, lozik i reste ki i devret refiz sa pos anbasader pou menm rezon ki i ti donnen dan son CV pli o,  MNA pour Anse Royale.

Anvi ki onorab Faure i en politisyen SPPF i ti debout koman kandida pour SPPF pandan  sa dernyen 3 eleksyon. In servi koman konseye pour SPPF, in fer resorti byen kler dan bracket pandan komisyon konstitisyonnel.  Eski I pou dan en pozisyon pou defann Sesel an antye avek poursantaz dimoun ki siport lopozisyon oubyen zis son parti politik.  Ki kredibilite i pou annan pou fer sa travay.  I posib ki i a kapab fer enm pti bout me le problenm i reste ki i anrasinen dan en parti politik.  Mon demann kestyon akoz laprev dan konportman onorab isi menm dan sa lasanble pandan bidze e leta lanasyon, onorab in touzour donn lenpresyon ki tou keksoz i belle e byen konmdir son minis.

Lanbasader kot EU pa reprezant zis Belgique. I pou  bezwen osi a en serten staz reprezant Luxembourg e Netherlands, i pa zis en dyob avek en tandans parti inik, ki mannyer onorab pou mannye.

Mr Speaker zis Vandredi pase dan en dinen avek lanbasad Franse dan prezans onorab Faure, lanbasader ti pe sizer plizyer dosye enportan avek msye Faure ki i pou bezwen takle dan Brussels limenm si par sans lasanble i aprouv son nominasyon.  I ti fer resorti ki size lagreman lapes avek EU lo baz konstitisyonnel pe al ekspire an 2007.  In deza tar pou komans nouvo negosyasyon pandan ki lezot pei pe rod menm  tretman. I ti sizere ki sa I pou en latas tre enportan ki pou demann bokou letan ek latansyon lanbasader Sesel lo teren  Belgique. Se zisteman bann eleman e realite parey ki fors nou poz kestyon.  Dan sa ka msye Speaker mon krwar ki en tel pozisyon ti devret pe al pou en dimoun dan Minister Zafer Etranzer pli konni koman Diplomat Des Carriere. Ki son louvraz i zis dan diplomasyon full time. I pa normal ki en zenn I kit lekol e I pran en karyer dan diplomasi e ler I ariv son tour pou ganny apwente koman anbasader politisyen I pas devan li.  Ki pou arive avek zot.  Zenn pa pou enterese pou pran diplomasi koman en karyer.  Pos anbasader napa bokou.  Ki i annan pour lezot.

I annan msye Peter Sinon.  En zenn garson ki son karyer koman anbasader ti termin sitan kourt akoz gouvernman ti ferm son lanbasad Sid Afrik.  Akoz ki gouvernman pa vwar li neseser pou reapwent sa zenn diplomat koman anbasader Brussels pandan ki msye onorab Faure i a reprezant zabitan Anse Royale ankor.

En pe letan  pase sa lasanble ti elekte msye Butler-Payette koman lanbasader.  E ziska prezan i pa pe reprezant nou kot okenn pei ou forum enternasyonal.  I annan msye Claude Morel, Msye Marengo ki 2 anbasader matir e ki dan ladiplomasi pou en kantite letan.  Si  vreman sa pozisyon Brussels i sitan enportan parey gouvernman i dir akoz nou pa  anvoy en dimoun dan kalib sa bann ki nou’n mansyonnen.  Paregzanp dan footbol letan i annan en game enportan byensir coach i anvoy son bann zwer pli matir pli eksperyans pour li win sa game. Akoz ki Sesel sa pa leka.

Mr Speaker an terminan zabitan Anse Royale e mwan menm akoz mon reste Anse Royale ki msye Faure ti sipoze reprezant nou koman manm lasanble elekte i donn randevou msye Barry Faure ek son parti politik pa pli tar ki Out 2006.

Msye Faure in dir zot tenir pa large me la in larg zot anplan me pa trakase, mwan mon pour la e mon pa pou les zot tonbe.  Lo sa  mosyon mon  pa pou vote msye Speaker.  Mersi.

 

MR SPEAKER

Onorab vitman ou ti oule koze.

 

MR DE COMMARMOND

Non, msye Speaker, pa konmela mon ti pe demann ou permisyon pou demann en klarifikasyon me selman ou pa’n oule.

 

MR SPEAKER

I pa en kestyon mon pa’n oule. Mon pa’n konnen  ou pe vin avek sa.  Si oule fer li la.  Mon ti krwar ou pe lev ou lanmen pou koze.

 

MR BERNARD GEORGES

Msye Speaker, lonorab Leader of Government Business in dir nou ozordi nou pe fer listwar.  Mon problenm se ki anmezir ki nou pe fer listwar se pa toultan ki ler nou fer li sa zistwar ki I en bon keksoz.  Listwar annan de fwa ler nou fer li son rezilta i pa pozitif.

Mon pran laparol ozordi avek en serten latristes akoz mon krwar ki sa mosyon, ki sa lapwentman personelman i mis-( ?) e i aport nou olye solider avek enn nou bann koleg ti ava bon pour nou lademokrasi e bon pour nou lasanble i aport nou divize lo en size e divize otour en koleg e sa se senpleman lafason ki sa lapwentman in ganny propoze.  Napa lot rezon.

Mr Speaker i annan bokou keksoz ki’n ganny dir bomaten par sa 2 lentervenan. I vre ki lonorab Barry Faure I annan en bon kantite konpetans, I vre ki I en garson ki prezant byen, I vre ki annan en bon  skolarite avek en bon lentelizans. Tousala i normal.  Dayer bokou nou dan sa lasanble nou partaz sa bann menm kriter me eski i en kandida pour en apwentman Anbasader a sa staz ?  Eski i meyer kandida ki nou kapab trouve pou anmenn dan sa lasanble ?  Mr Speaker se la kot mon problenm i ete.

Kriter pour en Lanbasader in ganny mansyonnen. Set en dimoun ki fodre I prezantab, fodre I  reprezant en pei an antye, fodre I bouze, fodre I matir, fodre I kapab rise above petty personal issues, fodre I annan en lenkarnasyon diplomatik dan li.  Si lonorab Faure I annan serten sa bann kriter parey bokou nou dan sa lasanble osi nou kapab annan e otan dimoun deor, bann career diplomats tel parey in ganny mansyonnen i annan, eski lonorab Faure in fer laprev tou sa bann kriter ?  Mon pa krwar msye Speaker ki in fer sa laprev.  Lonorab Faure a sa staz kot nou ete ozordi, kot nou pe ganny demande pou endorse son lapwentman i rest en political animal. I en  zonm politik.

Semenn pase i ti dan sa lasanble, ozordi si i ti’n vin dan lasanble i ti ava la koman en manm en parti politik  partizan e sa msye Speaker si ou permet mwan dir se en lobstak pour en lapwentman.  I pa sifizaman pour nou ganny dir i pa pou stand dan sa prosen eleksyon ki kapab osi tar ki Desanm lannen prosenn 2007.  I pa sifizan pour sa. Sa ki ti ava sifizan se ki lonorab Faure avan ki i ganny nonmen Anbasader ti ava’n kite dan en partisan position e ti ava’n pran en serten dekalaz.  I pa akoz i ti en politisyen en zour ki i pa pou zanmen kapab  Anbasader.  Non. I pa akoz msye Jacques Hodoul ti en manm komite santral SPPF en fwa e ti en Minis SPPF ki sa pa’n permet li ozordi vin en Ziz Lakour Dapel me ki’n arive  ant se ki’n annan en period of rest, en serten  dekalaz, i pa’n zis sorti dan enn pou al dan lot akoz sa ti pou osi mal ki sa lapwentman ki nou pe ganny demande fer ozordi. E le problenm se ki lonorab Faure pa’n zanmen maske son politik partizan.  Zanmen in fer li msye Speaker, menm ler pou score en pwen politik, zanmen in say son responsabilite  koman en politisyen partizan e mwan mon konnen akoz mon’n asiz la dan sa sez.  An 2002, le 16 Zilyet 2002 zis avan eleksyon lasanble koman mwan, lonorab Ferrari, lonorab St Ange nou ti pe stand e nou’n ekout lonorab Faure anmenn en mosyon pirman avek bi politik lo Equator senpleman pou sey nou sans dan sa prosen eleksyon redwir.  It was a simple political agenda. E msye Speaker fodre pa ki nou oubliye sa.  A sa pwen i ti pe fer son travay politik me son travay politik malerezman i donn en serten kouler a son travay anbasader antisipe e sa nou pa kapab bliye.

Fodre nou regarde non selman sa letan parey mon’n dir ki lonorab Faure in anmenn sa mosyon me fodre nou regarde osi ki son langaz ki i pe servi dan sa mosyon.  Lonorab Faure dan sa lasanble in demande ki fodre fer pou deal avek nou – son koleg dan lasanble at least enn in mansyonnen ki mwan ki dan lasanble mon ti pe al stand Les Mamelles e lezot ti pe al stand Mont Fleuri avek Bel Air.  Donk sa ti dan son lide e alafen son lentervansyon i ti dir ki ti ava annan en gran relevans lo nivo enternasyon.  Mon pa tro konpran ki i ti pe sey dir me in sey enternasyonaliz en keksoz isi Sesel. In  akiz nou frod e finalman in demande ki fodre sa zafer i ganny met ankour e ki nou ganny full laplikasyon lalwa pou en keksoz ki li i ti krwar nou ti’n mal fer.

Mr Speaker se-t-en keksoz ki i ti fer lo en nivo politik.  Se pa sa ki anmenn mwan ozordi neseserman koz kont sa lapwentman e mwan mon pa pou fagote, mon pou vot kont akoz mon pa krwar ki dan tou son lansanb sa lasanble pe ganny demande pou fer en keksoz byen.

Msye speaker ki mannyer bann dimoun ki’n  at the receiving end vitriyol lonorab Faure pou santi zot ozordi ler I ganny apwente pou reprezant nou pei an antye san ki in fer en  minit dekalaz ant son politik avek son lapwentman.  I pe ganny apwente Anbasader pandan ki i ankor en politisyen. Msye Speaker sa i non selman mal me i pa akseptab.  Ki mannyer paregzanp – si i annan en sanzman gouvernman dan sa eleksyon ki pe vini byento parey nou lo sa kote latab e la mazorite Seselwa i konnen pou annan, ki mannyer sa gouvernman pou santi li avek lonorab Faure  koman en lanbasader Belgique ler isi menm i fek pe koz kontrer pour sa gouvernman…

 

(Interruption)

 

MR DE COMMARMOND

Zot pou viktimiz li.

 

MR GEORGES

I ti pe koz kler pour leader lopozisyon.  Msye Speaker son pwen ki fodre nou fer ozordi e parey mon dir ki anmenn en latristes konsiderab akoz apard son partisanship politik lonorab Faure I annan bokou kalite me malerezman sa ki gouvernman SPPF pa’n arive konpran e in met lonorab Faure dan sa pyez se ki sa lapwentman I premature. I ti’n devret ganny demande depi byen lontan oubyen  la parey lonorab Lucas pe demann li fer.  I ti’n  devret demisyonnen dan en rol politik, pas en serten letan koman en dimoun neutral e la ganny apwente pou  reprezant en pei e en pep antye Lerop.

Msye Speaker pour sa rezon ozordi mon pa vwar mwan dan en posibilite ni pou abstain lo en mosyon si enportan e avek regre mon bezwen  enform ou ki ler nariv pou vote mon pou bezwen kont sa mosyon.  Mersi.

 

MR SPEAKER

Nou pran en break ziska 11 er.

(BREAK)

MRS POTTER

Msye Speaker sa mosyon ki devan nou ki pe demann lasanble pou apwent Onorab Barry Faure koman anbasader mon a komanse an dizan ki i regretab e i vreman domaz ki nou pa pou ganny sipor lot kote lo sa size akoz nou pa pou reisir fer zot, pou met politik dekote pou en zour pour nou kapab donn sipor enn nou koleg dan en responsabilite ki pei pe konfye li. I domaz osi ki nou pa pou kapab konvenk lonorab Lucas ki pa realize ki i napa manda pou koz lo zabitan Anse Royale e i vreman domaz osi ki nou pa pou kapab fer Lonorab Georges realize ki malerezman pa li ki etablir kriter pou en dimoun vin anbasader e pa li ki deside lekel ki Sesel i apwente koman anbasader.

Msye Speaker pour nou lo sa kote i touzour en sours lafyerte, en loner pou sa lenstitisyon ki nou pe reprezante pour nou kapab apwent enn nou koleg pou pran en lofis enportan tel ki anbasader.  Mr Speaker listwar in montre nou ki tou politisyen ki’n fer sikse dan zot karyer se sertennman bann ki’n vwar zot lavi piblik koman en lekstansyon zot servis pou lakominote. E mon napa dout dan mon lespri ki Lonorab Barry Faure in enn sa dimoun ki’n demontre atraver son travay ki son perseverans okour bann lannen ki i annan sa bann kalite.

Barry Faure in MNA Anse Royale pou 13 an byento e i ti komans sa karyer a en tre zenn az, 27 an. E menm Lonorab Georges in rekonnet ki CV Barry Faure i koz pour limenm.  Msye Speaker Onorab Lucas osi in rekonnet ki an 2 repriz Onorab Barry Faure in turn down loportinite ki ti ganny met devan li pour li al fer letid avanse akoz i ti anvi met son distrik Anse Royale e son elektora an premye.

Msye Speaker 13 an in pase e Lonorab Barry Faure in servi son distrik onorableman. E la ki in deside pour li pa debout pou prosen eleksyon Lasanble nasyonal, ki pli bon fason pour nou e Sesel, servi son konpetans o sevis nou nasyon. Mon konnen ki lapwentman Msye Barry Faure pe met en nouvo traka dan SNP oubyen lopozisyon. Sa traka se ki prezan zot pe demande be kan eleksyon Lasanble Nasyonal. Msye Speaker, si sa dernyen 2 an zot in pas zot letan speculate lo dat eleksyon prezidansyel, mon a les zot prezan ek sa mosyon, komans speculate lo ki dat eleksyon Lasanble nasyonal.

Msye Speaker depi 1996 Lonorab Barry Faure in pran  responsabilite koman Chairman komite lasanble zafer etranzer pou lasanble nasyonal. E menm sa 2 reprezantan lopozisyon ki lo sa komite in rekonnet an prive ki Barry Faure in demontre son konpetans e Barry Faure in achieve en kantite keksoz pou Sesel dan son fonksyon koman Chairman sa komite.   Mon a zis donn detrwa legzanp;  pandan sa detrwa lannen ki in Chairman sa komite, Msye Barry Faure in reste touzour a lavangard bann diskisyon avek komisyon eropeen dan konteks ACP EU e JPA, Lasanble parlmanter konzwent lo plizyer dosye ki konsern Sesel tel ki lendistri lapes, eksportasyon ton e espadron, dezas natirel, e lanvironnman parmi lezot. Barry Faure in diriz plizyer linisyativ pou re-activate lasosiasyon parlmanter losean endyen e en delegasyon bi-partizan ti vizit Moris nou a rappel an  Oktob lannen pase e in ganny manda pou organiz en meeting ekstraordiner isi Sesel sanmenm sa lannen.

Msye Speaker anba gidans Lonorab Barry Faure, komite zafer entranzer in … (technical problem)..

.. pou fasilit bann tournen, bann travay ki delegasyon Sesel i fer a letranze.  Msye Speaker komite zafer etranzer anba gidans Barry Faure in osi antreprann negosiasyons e byento zot pou etablir pou premye fwa website lasanble nasyonal an partenarya avek departman information technology and communication.

Msye Speaker, Barry Faure in promouvwar bokou lyen pli pros avek lezot parlman e nou’n vwar rezilta resaman avek letablisman plizyer lasosiasyon lamitye avek Cuba paregzanp, Lasin, Lenn e byento sa pou swiv avek lezot lasosiasyon lamitye avek lezot parlman.

Msye Speaker alor avek en tel background mon pa vwar rezon pour lopozisyon rezet e menm kestyonn kalifikasyon konpetans e karakter Barry Faure koman en Anbasader pour Sesel.  Mon asire ki Barry Faure pou byen reprezant Sesel, Barry Faure pour byen deserve Sesel dan sa fonksyon e nou isi lo sa kote nou felisit li e swet li bonn sans e bon kouraz dan son nouvo responsabilite.

 

MR  NICHOLAS  PREA

MR Speaker mosyon ki devan nou pe demann lasanble pou aprouve ki Msye Barry Faure i ganny apwente koman Anbasader.

Msye Speaker, Msye Faure i enn nou koleg sa lasanble e pandan sa 3edmi ki mon’n dan sa lasanble, mon’n ganny sans pou travay avek li, mon pa dir zis lo zafer komite enternasyonal  me lo lezot komite ki mon pe ganny mete lo la ki ankor mon revwar Msye Faure dan sa sez koman Chairman. Mwan koman en koleg mon napa narnyen kont Msye Faure.  Me mon krwar parfwa lafason ki sistenm i fer keksoz ki fer nou koman lopozisyon lo nou kote poz serten kestyon.  I ti pou gou ozordi ki koman en koleg sa lasanble nou tou, menm isi lopozisyon nou ti pe felisit Onorab Faure e nou ti pe donn li sa full backing, sa full laprouvasyon me parey nou’n fer sorti e nou pe fer sorti ankor nou pa fer keksoz kler.

Si Onorab Faure i meyer kandida, oke mwan osi ler mon regard sa CV, ler mon regard sa konteks kot sistenm e ler mon dir sistenm parti SPPF ki’n pran tou dizef in met dan en sel pannyen, ozordi zot napa en swa. Si i annan en dimoun, en endivi ki lo lasenn Lerop, i annan plis konesans, i annan plis leksperyans negosiasyon and all that se pa lot ki Onorab Faure me annou  regard lezot keksoz par deryer.  Pou etre en lanbasader ou bezwen al reprezant ou pei e ler ou pe reprezant ou pei ou pa pe reprezant zis en  parti politik. Ou pe reprezant ou gouvernman, ou pe reprezant ou nasyon e nou lo nou kote nou pe demande – vin kler, nou nou donn nou full backing, nou napa problenm ek sa, me ler en onm i ankor – ler ou regard son CV ou get son karyer politik and all that i ankor 100% en politisyen e la nou pe al met li Anbasader, nou kestyon ki nou demande koman Sesel pou ganny reprezante.  Vwala mon konsern.  Koman en koleg mon napa narnyen mal kont li, parey mon napa narnyen mal kont zot lot kote e mwan zanmen mon’n  vin dan sa lasanble pour mwan al lo en baz endividyel pou mwan maltret personn.  Nou rod sa respe mityel.

Ozordi parey nou’n dir pou al Brussels nou pa pe al reprezant zis Belgique oubyen zis  Olann avek Luxemburg. Nou pe al lo sit Lerop, linyon eropeen e nou pe al  reprezant Sesel a Linyon Eropeen e nou tou nou konnen ozordi  kantite komers, kantite lagreman ki an jeux ant Sesel ek Linyon Eropeen.  Vwala nou problenm.

Alor nou regard sitiasyon eski nou pou ganny nou en anbasader ki pe al reprezant Sesel a plentan, savedir 100% oubyen eski i pe al lo en part time basis. Eski ler i pe fatig latet pou fer en serten negosiasyon laba i pe mazin osi sitiasyon politik dan son pei.  Vwala mon konsern.

Ozordi sa ki fer nou diferan la lo sa latab – sa nou diferans.  Pour mwan kapab debout lo en platform politik an 2002 pour mwan ganny elekte par mon distrik pou vin la, mon ti bezwen onor prensip nou parti e prensip nou parti i dir si ou en manm en serten board oubyen ou pe ganny en lapey gouvernman ou pa kapab vini ankor koman en politisyen pou pran en  dezyenm responsabilite, en dezyenm lapey. E se sa osi ki Onorab David Pierre.  I ti kapab tenir koman en teacher e anmenmtan vin fer travay lasanble me tou le de kote ti pou part-time. Sa bann malere zanfan ti pou ganny en teacher part-time e lasanble osi tou ti pou ganny en boug ki pe desarz responsabilite lo en baz part-time me vwala nou sitiasyon.

Parey mon’n dir ozordi si prezantater mosyon – Onorab Herminie ti’n kapab fer kler ek nou dir be oke, mon pa  vwar naryen pour zot per, parey zot dir zot for, zot sa – Onorab Faure i demisyonnen koman en politisyen, provizyon i ganny fer pour en bi-election. I ganny fer and all that, nou vini nou aprouv Onorab Faure, nou felisit li, ale.  Al travay pour nou pei.  Me Mr Speaker mon pou retourn ankor lo semenn pase.  Semenn pase nou’n annan en Bill dan sa lasanble ki’n koz lo resours imen e ankor SPPF i touzour dir ki zot met zonm o sant devlopman.  Me ankor nou fer resorti dan Sesel, zis en serten kantite dimoun ki SPPF i met o sant devlopman e la ler ou pe regarde lalis i komans akoursi, lalis i komans akoursi akoz sa bann kantite zonm ki zot met o sant devlopman i komans diminyen, akoz ki nou pe vwar ler ou pe regard CV Onorab Faure ou regard sa kantite komite ki i lo la up to now, ou demande be eski sa boug i menm kapab dormi ou repoze kot li.  Mon pou vin enm pti pe lo la taler Mr Speaker

Semenn pase nou’n koz lo nou  bann graduates, lo nou bann zenn ki pe aspire pou mont pli devan, al pli devan and all that. Ki pozisyon pour zot? Si nou ki la dan sa lasanble i annan plizyer nou ankor ki annan plizyer sapo dan nou latet me sa  zenn graduates li, ki ler i ale 3an, 4an deor i sakrifye tou avek en bi ki ler i retournen son pei i annan en plas pour li, i annan en sans pour li monte, pou li kontribye dan devlopman son pei e osi ganny en keksoz an retour.

Tou dernyenman mon’n zwenn en zenn ki annan en degre dan Human Resources Management ler i ti retournen i ti al kot Minister Ledikasyon i dir li be sorry nou napa en plas pour ou, ou bezwen fer en lot debouy.  In fer en lot debouy sa zenn, i annan plizyer ki mon zwenn koumsa.  Be ankor i vini akoz nou annan en blokaz somewhere. Nou annan zonm, bann zonm ki o sant devlopman ki pran plizyer sapo, nou’n met dan nou latet e nou pe bar larestan lasosyete pou  bouze, pour devlope. Parfwa mon pa tro tro anvi al dan sa soz politik pour nou dir parfwa I paret ki I annan zis en group dimoun Sesel ki kapab fer keksoz.  Me parey mon’n dir Mr Speaker, mon konsern I santre lo sa pwen, ozordi Sesel byensir nou pe fer listwar, byensir nou pe vwar nou inik dan sa sans ki parmi nou nou pe tir en politisyen – parmi nou anmenmtan ki I tenir son palto koman en politisyen pour li met en palto anbasader. Mr Speaker mon’n koz lo lenportans, lenportans reprezantasyon Sesel Brussels.

Bomaten la devan nou dan sa lasanble, Minis pou lanvironnman in fer sorti en keksoz pou dir ki dan sa prosen EDF, oke sa dizyenm EDF kot i annan zot grant ki nou negosye avek Sesel  pou lanvironnman i annan en sonm tre, tre konsiderab, 14 milyon dolar ki an jeux. E negosiasyon i devret pe komanse la me nou’n vwar, mwan osi mon annan lezot komite ki mon asiz lo la, ki parey mon’n dir mon vwar Msye Faure ki pe Chair. Nevyenm edisyon pe kit nou, nevyenm EDF pe kit nou. E nevyenm EDF nou annan serten gen ki nou pou gannyen anba EU nou pankor fer narnyen e la nou pe komans prepar pou dizyenm e ankor I montre ou poudir ler ou annan en dimoun avek plizyer sapo parler se pei ki fer sakrifis ki nou manke. Nou annan serten sonm ki nou devret gannyen koman grant avek EU anba sa nevyenm EDF e nevyenm EDF pe ekspire unless ki nou bouz devan, nou ale nou met serten proze viab devan ki linyon eropeen I kapb deblok sa larzan. Si nou pa fer li, sa larzan I reste laba e nou pa pou kapab fer li pou okenn lezot keksoz.

Nou lakor lapes; ozordi nou pe vwar 2 sekter dan nou lekonomi ki pe zwe konpetisyon ek kanmarad. Si en lannen tourist i the main revenue ki anmennen dan sa pei – main sekter ki pou revenue dan pei, lannen answit si i ariv en abesman dan touris, nou vwar lapes. E ozordi nou tou nou konnen ki si lapes i ganny sa vre latansyon, lapes will be the main sector dan sa pei  e la ki konsern mon pe met devan, nou lakor lapes avek EU i an jeux. 2007 sa preferential treatment ki  nou gannyen avek EU i pe terminen e nou pa ankor antreprann okenn negosiasyon serye. Nou pa ankor finaliz okenn dokiman pour nou ale al dir ek EU vwala ki nou anvi Sesel.  Mwan mon pe mazin mon lavenir, mon pe mazin lavenir nou tou ki la, mon pe mazin lavenir nou pei se pou sa rezon ki sa bann konsern i sorti.

Demen nou pou vwar nou ki suddenly 2007 i arive, nou lagreman EU i fini, voup, en sel kou, nou dan problenm, kan petet menm ki nou bann pei konpetiter dan lazi pe sey fer fason pou Sesel perdi sa preferential treatment pour zot ganny serten incentives zot osi me ti a gou ki nou, pour nou nou sistenm i ganny phase out paregzanp ki pa souden nou vwar ki Sesel i ganny kite  hanging in the air, nou pankor pare avek bokou enfrastriktir ki depi 20 an pase petet nou ti’n devret komans demare avek, lo por lapes paregzanp pour nou kapab prepar nou ki demen i ariv en tel blokaz. Sa bann keksoz. E ankor sa bann keksoz i demann en dimoun, en reprezantasyon lo en baz 100%. Nou pa kapab dan sa monn kot nou’n arive, dan sa Sesel kot nou anvi vwar, rod second best, nou bezwen al pou le meyer.

Mr Speaker mon pa pou al pli detaye me parey mon ti dir mon pou rtourn en pti pe lo son CV, lo son bann apwentman.  I annan bokou sa bann apwentman ki nou vwar i ankor pe tenir to-date e petet loter mosyon I kapab dir nou dan son konklizyon ki pou arive avek sa bann lapwentman paregzanp networking member Commonwealth Partnership for Technology Management, CPATM – UK i to-date, Technical Advisor Department, sa in fini dir nou i pe sorti lo la. Leader Development Task Force EPA avek EU, Development Expert to the Eastern and Southern African Region, nou annan Seychelles Rep. to the ACPU JPA – nou annan ACP Vice Chairman, nou annan Chairman of the  National Assembly  IAC, – nou annan member of the ACP EU JPA Standing Committee and so on, National Assembly’s Rep. to  the Seychelles NEF – Seychelles Rep. to the ACP Parliamentary Assembly. So sa ankor I en bann pozisyon ki nou bezwen vwar si Onorab Faure letan ki i vin anbasader i pou kontinyen tenir e koman i pou kapab go about it.

En lot pti keksoz ki petet Onorab Loter mosyon I kapab klarifye, dan hobbies Onorab Faure,  in mete reading, Swimming, Community Service, apre adventure, petet I enportan pour nou lasanble pour nou konnen en pti pe an detay kwa sa sa bann adventure ki Onorab Faure I antreprann, napa narnyen mal ladan, petet kapab donn en pti pe bann detay. Me Mr Speaker ankor parey mon’n dir koman en koleg mon anvi ki sa I vin lo rikord, mon napa narnyen kont Onorabg Faure, I en dimoun ki nou’n travay avek e nou fer lo IAC, malgre petet I annan serten pwen ki’n ganny fer sorti lo IAC, nou travay lo IAC, I bipartisan e nou pe travay pou bouz nou lasanble avek nou pei devan.

Nou pa pe travay sakenn I ris son kote mon krwar sa tou lezot manm i kapab konfirm sa. Me parey mon’n dir, i pa pou zoli ki i pou al  prezant son kredansyel kot Linyon Eropeen avek en tas sal lo la ki i pa ganny full sipor sa lasanble.  I pa tro tar, mon krwar nou kapb petet revwar sa, reponn sa bann kestyon, responn sa bann konsern, fer Onorab Faure prezant li clean dan sa lasanble i a ganny full aprouvasyon.  E i ti a ganny felisitasyon nou tou lo sa kote e mon asire ki i ti a ganny sipor nou tou lo sa kote.

MR CHARLES DE COMMARMOND

Msye Speaker ozordi i en zour istorik.  Lo sa mosyon ki annan devan nou lo lapwentman Onorab Faure koman anbasader,  mwan mon oule kontribye en pti pe keksoz.  Ou vwar ozordi la konmsi akoz Onorab Faure, nou a pe fer tou sa bann melimelo, nou a pe dir en bann zafer sirtou lopozisyon, konmsi mon poz mon lekor en kestyon. Konmela ti Ferrari ti pou napa en sou problenm, ou konpran? Konmela ti enn zot zwer laba deor ou ti’n apwent koman anbasader ti pou napa en sou problenm.  Akoz selman Onorab Faure in en boug la ater ek nou, in en boug ki sorti dan grassroot, in  en boug ki’n monte dousman, dousman,  e in akimil tou sa kantite konesans lo tou e zisteman ou vwar li lo en ta komite. I son potansyel. Sa bann komite ki i lo la la pa tou ki nou nou’n apwent li isi lokalman i annan en bann lo nivo rezyonnal. I montre ou parey dernyenfwa nou de Onorab Hardy Lucas ti vwayaze i ti pe eksplik mwan, fantastik. I dir mwan Onorab Faure – akoz nou ti zwenn Onorab Faure ti pe al – non mon pou dir mon frer, kiamnnyer ou’n koze, non senserman mon pou dir mwan akoz kimannyer ou’n koze mon pa dakor. Nou ti zwenn Onorab Faure i ti vwayaz ansanm ek nou.  Konmsi nou konnen son bann potansyel ki i annan. E ou menm ou ti dir mwan fantastik, ou kontan pour li. Ou dir mwan konmsi SPPF napa en pli bon keksoz ki in kapab fer, pran en boug ki’n avek li ater laba, i pa’n zis pran en boug in vini konmsa pou apwen anbasader. Konmsi – ou dir sa prezan la ou dir lot fason, ou pa dakor, se sa rezon..

 

(Interruption)

 

MR LUCAS

Mr Speaker les mwan dir en keksoz, permet mwan..

 

MR DE COMMARMOND

Se sa rezon Msye Speaker – pa fini –

 

MR SPEAKER

Lo en point of order ouswa..

 

MR DE COMMARMOND

Ou’n koze, les mwan koze.

 

MR SPEAKER

Si oule klarifye ou bezwen les li fini.

 

MR LUCAS

Point of Order Mr Speaker.

 

MR SPEAKER

Ki ou point of order?

MR LUCAS

Konsernan sa ki in dir poudir nou ti vwayaze pou al Soudan, wi nou’n ale, nou’n al Soudan ansanm, sa zafer ki in dir poudir mon kontan SPPF in swazir Msye Faure pou Anbasader, mon’n fek ganny  Order Paper semenn pase mwan. Soudan nou ti al an Zanvye. Msye De Commarmond pa pe koz laverite.

 

MR DE COMMARMOND

Msye Speaker mwan mon pa ti ankor konnen zot zot ti’n konnen lot kote.

 

(Interruption)

 

Msye Speaker I pa zis sa, anmenmtan ou ti fer resorti ki la ou annan en sans pou ou kapab debout dan Anse Royale san Onorab Faure la.

 

(Interruption)

 

..prezan ozordi zot a vin dir nou en bann keksoz. Msye Speaker mwan mon krwar mwan poudir si nou pe koz Onorab Faure i annan plizyer sapo, sa vedir i lo plizyer komite ensidswit, i a bon la letan in ganny apwente anbasader. I a kapab larg enpe sa bann sapo.  Lezot dimoun ki kapab met sa bann sapo i a mete. I a bon, lezot dimoun a ganny en sans lo International Affairs Committee, lezot dimoun a monte koman Chairman. I a donn en sans pou lezot dimoun osi, ganny sans pou devlope, pou avanse.

Msye Speaker Onorab Faure letan nou get li, konmsi mwan mon pe sey kalkil enkou, Langleter, pli gran demokrasi zot dir mwan – laba mon krwar son demokrasi i pli lo la, dapre zot dir ennler. Langleter mon krwar Direkter Home Office i osi dan Parlman li. Si ou dan parlman ou politisyen. Langleter sa. Prezan Onorab Faure li akoz son karyer politik li i pa kapab konmsi al koman Lanbasader, parkont ou osi get partou dan lemonn Msye Speaker, plizyer pei dan Lafrik, dan Lazi, dan lerop, konbyen politisyen ki osi diplomat. Konbyen diplomat ki anmentan, koman  en anbasader otreman dir, ki anmenmtan i dan parlman dan zot pei respektiv. Konbyen fwa nou’n al bann konferans sa dimoun ki pe partisipe la i osi en anbasader sepa kote, zarze dafer sepa kote, pourtan, i kapab zwe sa bann rol. Dan lezot pei i kapab zwe, nou isi Sesel pa kapab zwe sa nou.

Anmenmtan Msye Speaker lot keksoz, mon pe fer rezon mwan, lo kote pran larelizyon Anglikann, be pa i menm zafer. Si zot pe konplent lot kote laba ki pa kapab en politisyen anmenmtan anbasader, be kimannyer ou kapab en politisyen anmenmtan prêt dan larelizyon Anglikann, kimannyer ou kapab fer sa?  Onorab Georges kimannyer ou kapab ansarz Larelizyon Anglikann dan Sesel anmenmtan ou en politisyen.  Oke ou en Chancellor lo zot komite ensidswit. Konmsi annou pa fer tou sala akoz Onorab Faure. Donn sa boug son sans, in arive, in devlope, in prouv son lekor.  Annou siport li, i en Seselwa parey nou. Eski akoz son kouler konmsi nou pe dir tou sa?  Non annou gete en boug ki’n prouv son lekor, donn li en sans pou avans Sesel pli devan. Zot menm zot in dir, zot napa problenm lo son konpetans. Onorab Prea in eksplike kimannyer I well verse dan tou sa, dan lakor lapes and what not. Sa bann keksoz pankor ganny fer. La letan I ale,   donn son sans kontrer i ava al vitman, ava al met a’n ord sa bann keksoz laba ki lezot dimoun pa’n mete, si fodre.

Now sa boug konmsi, Onorab Faure Msye Speaker, mwan mon’n konn  li en kantite letan, nou’n travay ansanm plizyer lannen. Mwan mon konn son kapasite. Pep Anse Royale  i devret fyer. Sa dimoun ki zot in elekte dan zot distrik, ki’n reprezant zot all along, ozordi I pe raise to a leve higher. Napa narnyen mal.  Sa pti liv Onorab Lucas ki ou’n montre la, I byen sa ki ladan, ou pa kapab, konmsi kimannyer ou’n dir, be kwa tou lepep Anse Royale I vin en sel kou anbasader?  Non I bezwen annan enn.  E mwan mon kontan sa enn in sorti Anse Royale.  E ou koman en dimoun Anse Royale ou devret fyer. It’s from your district ki sa kandida pou anbasader in sorti.  I montre potansyel ki Anse Royale. E byensir zot kapab (?)Lonorab Faure eleksyon I ava vini, la I ava pa la, lot dimoun i a monte, I vin sans pou lezot dimoun Anse Royale, lezot zenn Anse Royale pou swiv dan son lipye. Ou vwar ? E petet ou osi ou a ganny ou sans pou ganny eleksyon Anse Royale, may be. Nou pa konnen.

E prezan Msye Speaker, anmenmtan konmsi en keksoz ki konmsi i fatig mwan bokou se lentervansyon Lonorab Georges, tout respe ki mon annan pour nou, konmsi, mwan mon ti panse ki ou en boug enpe pli entelizan ki sa, Onnetman. Lotrozour Onorab Lider Lopozisyon  in koze a ot vwa, grande bouche, ki zour zot ganny eleksyon, tou dimoun dan civil service, pou reste, pou napa problenm, napa viktimizasyon, everything will be rosy. La ou ou vini ou dir nou poudir zour zot pou ganny eleksyon Onorab Faure konmsi pou out li.  I pou ganny viktimize, li i pou out.

 

MR BERNARD GEORGES

Mr Speaker with all due respect, mon’n dir kimannyer mon pou santi ( ?) li koman anbasader. Sa vedir I pou reste koman anbasader.

 

MR DE COMMARMOND

I pa pou reste ou’n dir. Si ou’n dir sa vot pou son kandidatir taler. Vote pour sa si vreman, senserman ou’n dir sa kekfwa mwan mon pa’n tande, kekfwa mon’n mal tande, vot pour li therefore. Ou annan tou rezon pou vot pour li.

 

 

 

MR B. GEORGES

Mon ti krwar Onorab ti pli entelizan ki sa Mr Speaker.

 

MR DE COMMARMOND

Msye Speaker konmsi nou bezwen be careful. Lepep Seselwa ki pe ekout nou nou bann deliberasyon dan lasanble I bezwen vreman be careful letan zot vote.  Mon ekspekte, mon ti ava kontan mwan SBC I fer pli tande, si nou pa tann ase, on this point I will agree with you be selman Msye Speaker se ki pep I bezwen vreman konnen kimannyer I fer son swa letan I balans bann keksoz ki pe ganny dir lo latab e ki ganny mete apre dan la pratik or ki pou ganny mete dan la pratik. Nou pa kapab dir en keksoz en kote,  I pa kapa mwan mon dir en keksoz konmsa, apre Lonorab Larue dan menm kote ek mwan  I dir menm keksoz en lot fason konmsi zis pou kontraye kanmarad. Lo nou prensip pa posib sa. Savedir si nou pe fer sa, lo kote paregzanp Lonorab Georges, i annan en keksoz ki fondamantalman mal dan zot parti. Sa vedir la – e mwan mon konpran en pti pe – mon konpran sa bout mal kot i vini. Anyway, Msye Speaker zot in osi donn legzanp serten lezot dimoun kekfwa ki ti kapab vin anbasader.  Taler letan Lonorab Lucas in koze, in nonmen in dir I annan en ta career diplomat dan Sesel, in nonm Selby, in nonm mon krwar Nichol, ou’n nonm lot, lot. Oke korek sa. Be la paregzanp pran en legzanp, pran Nichol Gabriel, fantastic, wi, career diplomat dakor, be la kimannyer pou vini parey Onorab Faure la si ou pou dir akoz in fini vin politisyen la li. Ou vwar ou pa pou kapab servi li. Mon pa krwar mwan nou devret pe get konmsa.  Demen i kapab annan en dimoun from lopoziyson e i posib i annan serten nou bann anbasader ki lopozisyon dan ki SNP, I don’t know posib, mon pa ni konnen mwan. I posib i annan be mwan mon pa pe get li konmsa mwan. Mwan mon pe get  potansyel sa boug I  annan pou fer tande lavwa Sesel laba lo nivo enternaysonal. Mon krwar se sa e Lonorab Faure i pa kestyon osi i pa pou al defann lopozisyon laba.  Letan i laba napa narnyen kestyon pou al defann lopozisyon, pou al defann SPPF sepa.. i lo en misyon li Lonorab Faure letan i ganny apwente anbasader, no matter kote i pou ale. Mon pa konnen si Brussels, pankor dir kote dan sa mosyon in zis dir pou apwent li koman anbasader.

Now letan ou ganny apwente anbasader ou kapab ganny poste anywhere. Si I met li Brussels napa problenm osi pour mwan mwan. Selman le boug letan i laba, e sa i aplik pou tou anbasader, i devret fer tande lavwa Sesel. E letan lavwa Sesel i ganny tande sa vedir lavwa gouvernman dizour, si SPPF ki lo pouvwar ozordi la, i bezwen fer tande lavwa sa gouvernman ki opouvwar. E les mwan dir en lot keksoz, listwar in prouve,  nou kapab ale, pran tou liv, gete, al fer tou resers posib, tou anbasader, tou diplomat i bezwen enn bann pli bon politisyen. Ou pa kapab zanmen vin en diplomat si ou pa en politisyen. It’s by nature sa, dan ou study i bezwen konmsa.  Se sa petet sa mo diplomat ki  politisyen in disguise maybe. Me i konmsa ou bezwen Akoz i otomatik sa akoz sa diplomat la i bezwen dir sa ki sa gouvernman dizour i oule i dir. Kontan pa kontan, si in aksepte sa, i bezwen fer sa.   Ennfwa ki ou fer sa, ou vin en politisyen. Ou bezwen fer sa pase.

Anyway se sa ki mon dir konmsi ki Onorab Faure konmsi i ti dan parlman, pa dan parlman, politisyen, konmsi let alone that apard ki i pou a fer en bon travay. Nou nou bezwen swiv ki i fer en bon travay. Si i pa fer en bon travay, la nou a come back nou a dir tyonbo en kou. Dan zot papye pou mete partou, si fodre anmenn dan lasanble anmennen, nou a re diskite. Me selman nou nou konvanki, etan donnen bann kestyon pozitiv ki  Onorab Faure in fer, in prouve ek lepep Seselwa, ek son elektora, ek son lasanble, nou garanti ki i pou fer en tre bon travay. E nou swet li kontrer tou de bon apre ki nou pou’n vot pour li. E nou lo kote latab isi, SPPF,. Wi nou pou siport nou kandida, nou pou siport sa dimoun ki sorti from our party, akoz nou konn son..

.(technical problem)

….se ki i mal ki Onorab Faure i al konman en anbasader anvan i kit sa pei oubyen avan ki i ganny poste neseserman si i posib, mon tia kontan ki lasanble e ou an partikilye Msye Speaker ou pran sa ou pwennvi personnel konmsi ou pran sa dan ou lanmen ou liaise avek CJ, Chief Justice akoz Onorab Faure i annan en ka pending en case assault dan sa lasanble ki ankor pending ki pankor fini deal avek e mon ti ava demann ou pou fer sir ki Sef Ziz mon pa konnen akoz ki i tarde tou sa letan – dismiss I don’t know, mwan si i dismiss pa konnen mwan, me selman mon demann ou pou dir fini sa zafer konmsi avan sa msye i ganny poste dan pei kot i pou ale i pou al reprezant lepep Seselwa. Mon tia kontan sa i ganny fer.

Alor Msye Speaker, mwan mon vreman siport kandidatir lonorab Faure, e lonorab Faure li i pa zis en politisyen li, i en career diplomat li in travay dan Foreign Affairs konman First Secretary pou plizyer lannen e i annan son konesans osi dan sa domen. Konmsi i pa zis en dimoun konmsi ki noun pran akoz son afilyasyon politik.  Prensipalman noun pran li akoz son konpetans, son kapabilite ki i annan e nou nou swet li tou de bon e nou dir li kont lo nou pou sipor e anmenm tan nou dir li fer en travay ekselan pour Sesel.  Fer ki bann lakor ki nou menm nou nou pe sey rode ki pou anmenn dibyen pour nou pei, get byen ladan Onorab Faure letan ou pran ou nouvo post e fer sir ki keksoz i osi bokou dan nou lavantaz dan lavantaz Sesel pou fer ki sa pep i devlope i kontinyen devlope dan bon direksyon e an menm tan kontinyen benefisye pour li epanouir e ki son zanfan demen i a kontinyen devlope.  Msye Speaker, mon pour san pour san vot pour sa mosyon e mon demann tou dimoun dan lasanble pour konmsi annou siport sa kandidatir Onorab Faure pour vin en anbasader. Annou fer li konmsi from the heart annou met politik en kote, annou pa get li konmsi neseserman ki i en SPPF konmsi annou dir it’s a good choice annou siporte.  Thank you very much Mr Speaker, sir.

 

MR DAVID PIERRE

Mersi Mr Speaker.  Mr Speaker mon pour tre bref. Ler mon ti ganny nominen par SNP pou rantre dan lasanble mon ti osi ganny propoze en kontra 5 an avek Independent School pou ansenny matematik dan sa lekol. Mon tin kapab pran sa lof. Mon tin kapab pran sa lof akoz finansyelman, i ti pou anmenn benefis personel pour mwan. Me ler ou asize ou fer refleksyon ou konnen pou dir i pa posib. I pa posib pour ou desarz 2 responsabilite pour ou fer de dyob efektivman parey ou devret fer li anmenm tan.  Mon ti realize paregzanp pou dir pou annan de moman ki mon sipoze dan lekol pe ansennyen, mon pou bezwen at the same time isi dan sa lasanble. I pa posib pou annan de mwan, oubyen i pa posib pou annan en dimoun dan de diferan landrwa anmenm tan.  Alors avek sa mon ti refize, mon ti dir non mon pou konsantre lo mon travay politik e ziska ozordi se sa ki mon pe fer.  Parkont Mr Speaker, nou annan dan Sesel ozordi e pandan sa dernyen 29 an, en gouvernman formen par SPPF ki opouvwar.  Zot ki pran desizyon. Parey le pase in prouve, parey listwar in montre nou, zot in pran bokou desizyon dan lepase ki pann raport sa kalite fri ki zot menm zot zot ti pe ekspekte oubyen ki lepep Seselwa ti pe ekspekte.  Malerezman Mr Speaker, si Msye Faure pou al anbasader anmenm tan ki i sipoze reprezantan dan lasanble pour Anse Royale nou bezwen aksepte, nou  bezwen dakor ki pou annan en kote ki pou ganny neglize.  Alor sa desizyon ki gouvernman SPPF pe pran, i enn ki pou annan konsekans, ki se swa konsekans pour Sesel lo nivo son travay konman en anbasader oubyen pou dimoun Anse Royale ki ti swazir li an Desanm 2002 pou reprezant zot.  Safwasi Mr Speaker, konsekans ki vin avek sa desizyon ki kapab bann konsekans ki grav.  Se pour sa rezon ki i ti devret en desizyon kin ganny very well thought out.  EU i enn nou bann gran, si pa nou pli gran partener komers.  I osi kapab ed nou rezourd bann diferan problenm ekonomik ki nou pe fer fas avek.  I pa en sekre paregzanp ki nou annan gran problenm deviz ki la pandan en kantite letan, pandan bokou plis letan ki nou kapab konsider li konman en peryod ki rezonab e dan sa konteks nou pe get EU konman enn nou partener ki ki kapab ed nou rezourd sa problenm.  Nou bezwen annan lefikasite dan travay ki nou lanbasader pou al fer pour nou pei.  Nou annan sa drwa pour nou kestyonnen, nou annan sa drwa pour nou fer komanter, nou entitle pou annan oubyen pour nou fer en kontribisyon. E nou kontribisyon ki nou pe fer i en kontribisyon ki senser. I senser akoz nou anvi vwar ki Sesel i pran – ki gouvernman Sesel i pran bann desizyon ki pou finalman ed nou rezourd nou bann diferan difikilte ki nou e ki sa pep pe fer fas avek.  Alors i pou sa rezon ki mwan personelman mon ti pe ekspekte parey lezot Seselwa, parey anefe tou Seselwa ki avek sa kalite leksperyans ki gouvernman SPPF i annan opouvwar apretou 29 an, zot ti pou annan osi sa kouraz pou zot premyerman respekte for once desizyon bann zabitan Anse Royale.  Donn zot sa posibilite pou swa swazir en lot reprezantan, oubyen donn zot sa posibilite pou les zot reprezantan finis a manda 5 an ki zot zot ti donn li.

Mr Speaker i anann 20 mwan – i annan 20 mwan ankor en prensip pou Msye Barry Faure ale ziska ki  son manda i terminen.  20 i en tyer son manda.  I lozik alors dan sa konteks pou demande ki swa i kontiny son manda ziskan i fini oubyen nou fer en bye-election dan Anse Royale pour ki bann zabitan Anse Royale i ganny sa posibilite pou zot swazir zot reprezantan. I pa normal pour ki bann dimoun Anse Royale i vwar zot san en reprezantasyon atraver eleksyon mon pe koze dan sa lasanble pou en tyer sa manda pour ki Msye Faure in ganny elekte. I rezonab alors pour zot asize e fer en refleksyon dan sa direksyon.  Dan lentere pei, ti ava moman petet pou zot asize e reflesir pou SPPF asize e reflesir.  In ler pour zot adopte Mr Speaker en prensip ki kler en prensip ki pou rezonn byen dan lespri tou Seselwa. Ki se zot bann SPPF, ki se swa zot bann SNP ou ki se swa zot DP oubyen zot pa konsider zot lekor konman bann dimoun ki apatenir a okenn parti politik. En prensip kler ki ava montre lepep Seselwa pou dir SPPF finalman in konpran e in dakor ki nou pa kapab Msye Speaker, annan en dimoun ki pou pran 2, 3, 4, 5 lapey avek en gouvernman pandan ki lezot pe vwar li difisil pou ganny menm en posibilite pou pran en saler avek sa gouvernman.  Nou konpran Mr Speaker, ki kantite difikilte ki plizyer dimoun kin ganny demande pou swa dan lasanble apre met en lot sapo dan civil service nou konpran deza ki bann difikilte ki zot fer fas avek.

Pour tou respe paregzanp Mr Speaker ki  mon annan pou lonorab Gamatis, i konnen e mon anvi siport li dan sa konteks i konnen ki difikilte paregzanp ki li personelman i pe fer fas avek akoz i pa fasil tou respe mon annan pour li i pa fasil i seye me kanmenm i pe ganny pa mal difikilte avek SOS.  Akoz Mr Speaker, akoz i pa pe ganny sa posibilite pou li fer full time avek bann manmay lo vilaz.  Si mon garanti ou, si lonorab Gamatis ti ganny sa posibilite i ti pou fer li en travay baze lo son kapasite, baze lo son abilite, i ti pou fer li en travay ki formidab.

 

MRS GAMATIS

Mr Speaker,  mon’n ganny en port-parol.  Ki sa i annan pou fer avek lanbasader.

 

MR PIERRE

Mr Speaker, mon pe koz lo lefe ki Msye Faure pou anbasader pandan parey i ete la pandan ki i osi reprezantan bann zabitan Anse Royale oubyen pandan ki i en manm lasanble.

Msye Speaker, dan sa konteks avek sa de pti mo mon ti ava kontan si gouvernman i fer li kler lo ki fason Msye Faure pou desarz sa de responsabilite an menm tan oubyen eski zot prepare pour ki i annan en bye-election pour ki zabitan Anse Royale i ganny sa posibilite pou swazir en reprezantan. Pour ki zabitan Anse Royale pa reste san en reprezantan elekte pour sa en tyer manda ki reste.  Mersi Mr Speaker.

 

MR SPEAKER

Bon nwa pran en break ziska 2 zer apremidi.

 

(Break until 2 p.m)

MR SPEAKER

Nou kontinyen nou deba.

 

 

 

 

MR RAMKALAWAN

Mr Speaker, zis avan nou, konbyen en quorum dan lasanble.

 

MR SPEAKER

Lanmwatye.

 

MR RAMKALAWAN

Lanmwatye.  Ok mon anvi zis avan mon konmanse remind SPPF ki pou dir zot lapwentman konman lonorab Faure konman anbasader si la pour le moman la tou bann manm lopozisyon i sorti zot napa en quorum.  Mersi bokou Mr Speaker.  Alors mon espere ki zot mete dan People ki pou dir granmersi SNP ti reste dan lasanble.

Mr Speaker bomaten, i annan diferan parol kin ganny servi dan sa lasanble ki mwan personelman mon trouv li i malere.  Mosyon ti senpleman ganny lir ki pou aprouv ki Msye Barry Faure konman lanbasader.  E byensir akoz mosyon i spesifikman lo Onorab Faure, lo nou kote nou bann entervenan in fer sorti serten pwen lo li konman en endividi, ki kalite dimoun i ete. Petet i en politisyen dan distrikt Anse Royale, Onorab Lucas in challenge serten keksoz ki onorab Faure kin met devan.  Lo en lot kote, onorab Georges in osi koz lo serten pwen baze lo prensip.  E parey avek onorab Prea e onorab Pierre.  E enn bann keksoz kin enportan se pou montre lo en nivo prensip kimanyer serten keksoz i deroule. Letan en dimoun i dir en parol spesyalman nou politisyen e letan i ganny balanse avek aksyon otomatikman i pou provok serten deba, serten komanter. Msye Speaker e, sa i normal.   Me sa ki pour mwan i regretab se ki dan sa deba bomaten, in rantre eleman kouler lapo, serten konotasyon rasis, in annan konparezan ant onorab Faure konman en dimoun menm kouler avek mwan, e avek onorab Ferrari ki son kouler i diferan avek sa ki pour nou toulede pou rantre dan sa deba.  E kan sa ti napa absoliman okenn plas dan sa landrwa.

Mr Speaker, sa i fer mwan poz mon lekor kestyon, e mon ti ava kontan si Onorab de Commarmond parski li kin lev sa bann pwen ti ava reflesir lo la.  Letan lasanble nasyonal Lopozisyon e SPPF ti aprouv nominasyon Msye Peter Sinon, koman anbasader, eski Msye Peter Sinon ti blan, eski Msye Peter Sinon ti annan en lot kouler lapo, eski Lopozisyon ti a pe fer sa baze lo kouler lapo en dimoun oubyen eski lopozisyon ti ape fer sa, lopozisyon ti vot anfaver baze lo abilite sa msye.  Letan gouvernman SPPF ti deside pour zot pous anbasader Radegonde avek anbasader Marengo e apre sa lopozisyon sa letan dirize par Msye Mancham ti anmenm mosyon pou demande ki en lanket i ganny fer e ki apre sa Mr Speaker mwan mon ti enn sa bann dimoun ki ti asiz lo sa komite lasanble pour demande ki sa de dimoun i ganny retournen dan zot plas.  Eski lopozisyon tia pe defann anbasader Marengo en boug blan, anbasader Radegonde en boug blan oubyen eski sete baze lo prensip.  I enportan sa Mr Speaker. Parski parfwa dan sa lasanble i annan dimoun ki zis koze e zot bliye kwa ki zot pe dir. Paregzanp letan Onorab de Commarmond bomaten i dir i ti vwayaze avek Onorab Lucas letan zot ti pe al Sudan ki pou dir laba Onorab Lucas ti dir avek li kimanyer Onorab Faure i en boug, kimanyer Onorab Faure i en boug kapab ensidswit tou sa bann zafer, Mr Speaker, se sa mon pa konnen ki kalite lalang ou kapab dir i apele sa.  Akoz Mr Speaker, la i la ankor zot tonm dan sa menm pyez. Akoz pou dir sa parol ti en mansonz absoli envante par Onorab de Commarmond se parski Onorab Lucas avek Onorab de Commarmond ti kit Sesel le 29 Zanvye.  Zot ki Sesel le 29 Zanvye, le 2 Fevriye pandan sa letan gouvernman tin fini anonse ki pou dir se Msye Sylvestre Radegonde CEO Boarod Tourizm ki pe al konman anbasader Belgique.  Ti napa okenn dout lo la dan lespri SPPF, Msye Sylvestre Radegonde tip e al Brussels konman anbasader.  E Mr Speaker, sete selman le 2 Fevriye ki Onorab Radegonde ti fer remarke ki li i pe sorti ladan.  Alors Onorab de Commarmond Mr Speaker, in vin koz manti dan sa lasanble.  E parey i kontan dir, parey i kontan akiz son bann prosen, mwan mon krwar sa diskour ki in fer bomaten set en diskour ranpli avek son talan prefere ki apel komedyen.

Mr Speaker, bomaten i annan serten lezot deklarasyon kin ganny fer pou montre ki manyer onorab Faure i bon, e Mr Speaker, mwan mon osi tou mon zwenn tou bann dimoun kin koze bomaten pou dir avek Onorab Faure, kot son kalifikasyon i konsernen mon napa problenm ditou.  Mon napa problenm.  En boug in etidye e mwan mon toultan annan respe pou lentelizans dimoun.  En boug in etidye in al lekol, in al fer further studies, apre sa in asiste plizyer parey son CV i montre nou there’s no doubt ki pou dir he is qualified. Alors lo sa kote mwan mon napa problenm.  Mon kapab annan lezot diferans avek Onorab Faure, me solman kot son latet i konsernen mon napa okenn problenm.  Me annou regarde kimanyer serten parol ki ganny dir dan sa lasanble par serten manm, zot zis koze, san realize ki pou dir letan zot koze, zot pe montre ledwa lo lezot zot bann koleg.  Onorab Potter i dir avek lasanble ki pou dir Onorab Faure i en boug vreman so.  Se zis son komite ki marse dan sa lasanble, se zis komite International Affairs kin kapab ganny en bidze, se zis komite International Affairs ki komite pli aktiv pli dinamik ki annan dan sa lasanble.

Mr Speaker, letan onorab Potter i fer sa bann deklarasyon, sa ki i pa realize se ki tou pos chairman bann komite lasanble set en manm SPPF ki chair.  E ofet efektivman sa ki i pe dir nou dan sa lasanble se ki Onorab Herminie konman chairman komite lo sekirite i en boug pa kapab, parski i pa kapab ganny en bidze pour son komite, son komite pa kapab marse, son komite rubbish.  Efektivman sa ki i pe dir avek lasanble se ki onorab Mondon, koman chairman Public Finance Accounts Committee i zero, pa kapab ganny en bidze pour son komite, pa kapab fer son komite marse, zero. Onorab Jolicoeur konman chairman Standing Orders Committee, ar – i montre nou Mr Speaker ki pou dir efektivman Onorab Potter pe dir sa komite ki annan pou fer avek Standing Orders ki SPPF i form mazorite i inefektiv, pa bon pa kapab marse akoz ni en premye rankont, pankor kapab ganny fer.

 

MR SPEAKER

Ok, mon krwar oun fer le pwen tourn lo

MR RAMKALAWAN

Monn fer le pwen ou aksepte.

 

MR SPEAKER

Non, non, zis pou gid sa deba.

 

MR RAMKALAWAN

Yes Mr Speaker. Efektivman parey monn dir, zot in montre ki dan zot lasazes i annan en kantite keksoz ki manke e zot in montre kimanyer letan zot pe montre en boug ki kapab, lo en lot kote zot montre defayans zot bann lezot manm.  E sa Mr Speaker i gid mwan lo sa kestyon kontradiksyon. Onorab Herminie in dir avek nou ki pou dir Onorab Faure pa pe debout dan prosen eleksyon.  Be ou konnen Mr Speaker i vin kontradiksyon, letan zot zot pe dir ek dimoun tenir pa large, zot zot large zot taye.  Efektivman se sa, limenm, in tenir i pann kapab soz, in large.  I montre lo lespwar.

Mr Speaker, sa ki enn bann komanter kin ganny servi bomaten ankor se ki en diplomat fodre i en politisyen.  Me sa ki nou bliye se ki la diplomasi, ou kapab fer la diplomasi konman en karyer, aprann politik, konn tou bann teori politik, tou bann keksoz politik, pli byen konnen ki sa politisyen san ki ou fer partisan politics.  E efektivman se sa ki noun vwar dan pei avek bokou bann diplomat.  Anbasader Claude Morel, in al reprezant nou UN avek Lanmerik, zanmen monn deza tande ki pou dir in fer partisan politics, se Onorab de Commarmond limenm  bomaten in aksepte ki pou dir ou pa ni konnen kot zot debout.  Zanmenm monn deza tande ki pou dir sa msye in deza debout dan en distrikt oubyen in deza asiz lo en komite egzekitiv dan en parti politik. Anbasader Radegonde, zanmen noun deza tann tousala.  Anbasader Butler Payet, letan i ti gadfeenny apwente anbasader i ti en lot zafer.

Msye Speaker, nou kapab al lo plizyer sa bann dimoun enkli Msye Calixte D’Offay ki nou anbasader an Frans depi plis ki 15 zan prezan, zanmen in asiz lo komite en parti politik.  Zanmen in deza en politisyen direkteman as such.  Me pourtan zot bann anbasader ki vedir nou kapab vin diplomat san ki nou atas nou avek politik partisan e i annan bann diferan pei ki zisteman ankouraz sa kalite keksoz.   E la mon krwar ki letan nou fer distenksyon sistenm Ameriken avek sistenm Angle, sistenm Angle ki Lenn osi tou in adopte kot bann zenn ki ganny ankouraze pour zot etidye la diplomasi e apre sa join foreign affairs e apre letan in ariv zot moman ensidswit la aprezan zot ganny anvwaye dan bann diferan pei koman bann high commissioners oubyen koman bann anbasader. E Mr Speaker, se lo sa pwen ki mwan mon pou dir SPPF avek SNP nou difere.  Nou difere e sa diferans pa ti neseser pour nou anmenn kouler lapo, pa ti neseser pou nou anmenn en ta sa bann remark parey.  Sa ki ti enportan se pour nou regard keksoz kimanyer i ete, aksepte ki pou dir i annan serten diferans e zot zot annan zot mazorite, baze lo la, e nou letan – i pa fer premye fwa nou pe pas en mosyon pour nou vot pour en dimoun vin en anbasader parey nou pe dir, kot noun war i napa okenn problenm noun pare pour nou donn full sipor, kot nou war i annan problenm noun poz kestyon e ozordi i ava fer dezyenm fwa nou poz kestyon.