::
Home » Verbatim » Verbatim - First Term 2006 » Tuesday 27th June, 2006

Tuesday 27th June, 2006

NATIONAL ASSEMBLY OF SEYCHELLES

Tuesday 27th June 2006

The Assembly met at 9 am

National Anthem

Mr Speaker in the Chair

 

MR SPEAKER

Bonzour tou Onorab.  Nou komanse avek premye mosyon.

 

MR PATRICK HERMINIE

Msye Speaker, mon mosyon i lir koumsa: Ki sa lasanble i demande ki bann anplwayer konsernen i antre imedyatman an negosyasyon avek bann stevedores ou bann doker parey nou konn zot an kreol avek bi pou ogmant zot peyman pou sorti R2 pou vin R3 par tonaz.

Msye Speaker mon’n deside anmenn sa mosyon pour plizyer rezon.  Premyerman mon krwar nou dan sa lasanble nou realize e apresye lenportans bann doker dan lekonomi nou pei. Nou konn tre byen rol ki zot zwe pour nou lendistri lapes, en lendistri ki ozordi i pe anmenn en reveni preski R300 milyon dan pei.

Msye Speaker i annan diferan kalite doker, i annan bann ki responsab zis pou desarz pwason, sirtou ton parey nou  konn zot e sa spesifikman zot atas avek en konpannyen ki appel Hunt Deltel apre nou annan lezot doker avek Land Marine ki zot anplis ki tir pwason zot osi deal dan bann zafer container ek lezot keksoz parey ki ou bezwen desarze lo por.  Sa parey mon’n dir ou i montre nou lenportans sa group travayer  dan nou pei.

Mon pa bezwen repet la dan sa lasanble ki sa travay i en travay ki dir, en travay ki demann en kantite kouraz e en travay ki pa tou dimoun ki pare pou fer.  Msye Speaker ou ava rapel ki dan mon state of the nation address lannen pase, mon ti fer en demann dan kad sa logmantasyon saler ki tou bann travayer ti’n gannyen dan Sesel ki bann anplwayer konsernen i get seryezman dan posibilite pou fer pri tonaz sorti R2 pou vin R3.   An se moman kimannyer i marse, sak tonn ki en stevedores i tire i ganny li R2 e mon demann lannen pase se ki i sorti R2 pou vin R3.

Depi sa Msye Speaker mon’n vwar en kantite doker, ou menm  ou ava konstate e mon mazinen bann dimoun osi dan sekretaryat i  a konstate se ki kot mon lofis in vin plizyer fwa plizyer group doker, maksimonm ti vin 15  2 semenn pase e ankor enn fwa zot in sipliy ek mwan ki i enportan ki omwen i annan en deba lo sa size.  Mon santi ki dan zot demann i annan en kantite senserite   pour la senp rezon ki bokou nou lo sa kote nou konnen ki par lepase doker in en group ki ti kantmenm ase ostil  vizavi nou – ler mon dir vizavi nou, mon ava dir fransman, vizavi bokou bann dirizan SPPF pour kalite endoktrinasyon ki zot in gannyen me ozordi ou vwar ki en keksoz – i annan en sanzman parmi zot, zot konpran pli byen  ki pe arive dan Sesel.  Zot konpran pli byen ki pe arive dan por e sa bann politik bwat zalimet ki mon ava vin lo la plitar – akoz zot in ganny anbete avek i nepli marse e sa bann dimoun pe dir avek nou ozordi, in dir ek mwan e plizyer lezot manm lo nou kote silvouple anmenn nou pwen devan, annan en deba, ede sey met presyon pour ki, Msye Speaker, sa tonaz a sorti R2 pou vin R3.

Msye Speaker bann doker i osi eksperyans bokou lezot difikilte.  Zot in vini la avek en lalis konplent e la mon ava dir sirtou bann dokter ki travay avek Hunt Deltel pa osi bann doker avek Land Marine, me plis doker ki avek Hunt Deltel, zot in konplent parey zot boots ki napa feray ladan, zot dir mwan sa i bann boots ki ganny servi dan zarden, zot in konplent lefe ki zot napa legan, zot napa overall, zot napa sapo, zot napa goggles e zot in dir mwan ki a sak fwa ki zot demande zot in senpleman ganny dir si zot pa kontan ale.   Msye Speaker mon krwar ki sa set en latitid gro lebra, en latitid dominer ki napa plas dan en sekter nou lekonomi sitan enportan parey lapes kot doker i zwe en rol.

Msye Speaker mon krwar ou osi konnen ki tou dernyenmman in annan en lesey par gouvernman pou get en pe dan welfare bann doker.  Mon krwar problenm prensipal bann doker parey nou tou nou konnen se ki i annan en peryod letan dan lannen kot napa bato e konsekaman akoz zot casual zot pa ganny en saler.  Mon pa pou koz manti, mon pa pou dir ki sitiasyon doker i konpletman enn dezespere.  Letan mon get bann reveni i annan doker ki kapab fer ziska R11,000 dan en shift, i annan ki fer mwens, i annan ki fer bokou plis, i annan ki fer bokou mwens.  Me lefe i reste ki sa scheme ti ganny entrodwir par Prezidan Michel avek bi pou sey ed zot dan sa peryod letan kot napa bato.  Sa scheme bann doker in dir mwan i pa enn ki’n mars 100% parey tou bann akter ti a voudre i ti a’n marse e pour mwan  letan mon asize, mon koz ek bann doker, mon pe ekout zot bann konplent, mon vwar ki petet problenm fondamantal se sikolozi en doker limenm ki enpe parey en peser.  I en zonm ki esansyelman i annan bidze ki travay casual e sa  disiplin 8er,  4er pa neseserman en keksoz ki zot annan dan zot.  I annan bokou travayer konmsa dan distrik, i annan bann boug ki vini i dir ou donn mwan en zournen kot ou, si ou pou anploy li lendi ziska vandredi i pa tro anvi  – i dir mon a vin mardi, merkredi apre i pran zedi, vandredi pour li, en zournalye parey mon dir sa. E mwan mon krwar personnelman ki i rezon prensipal petet akoz parske R1400 pa’n neseserman mars parey nou ti a’n swete.

E sa dan limenm i plis rezon akoz nou bezwen siport demann bann doker pou revwar zot tonaz. I annan zot ki sitan dezespere – (annefe ti 3enm Port Glaud)  ki ti dir avek mwan be ou konnen Dokter kantmenm 25 sou, 50 sou par tonaz, oke, pa kapab R1 petet wi i annan bann rezon ekonomik, zot dir nou laba zot bezwen pey gouvernman en ta larzan, en keksoz ki konpletman fo akoz nou konnen konpannyen ki ganny pli afekte Hunt Deltel i pa pey sa kantite, mon’n fer reser total lo son bann depans e reveni, i pa fer sa kantite kontribisyon. Annefe i pa pey okenn royalty lo por e i fonksyonn anba sa ki pour Land Marine.

Msye Speaker mon krwar ki en negosyasyon i kapab komanse e parey sa bann msye in dir  nou pa pe pete ensiste lo en roupi  kantmenm en 25 sou, kantmenm en 50 sou  sey gete e mwan mon’n anmenn  en mosyon dan son senplisite ou ava vwar  ki mon pa’n al dan bann detay, bann statistics pou esey si oule koz lavwa ouswa fer tande lavwa sa bann doker dan lafason ki zot menm zot zot met li, dan en fason  senp, get dan nou welfare e mon mazinen ki sa mosyon i pa pou enn ki kontroversyel e mon mazinen ki tou dimoun dan sa lasanble i realiz lenportans sa group travayer e ki nou menm nou, nou komans met sa presyon, nou fer sa kontribisyon pour ki en tel negosyasyon i pran plas o pli vit posib e ki nou eksplor dan bann posibilite pour si oule fer lavi sa  travayer, sa doker vin pli meyer.  Enn lo kestyon son saler e dezyenmman lo son bann  safety equipment ki zot gannyen pour zot travay avek.

Avek  sa Msye Speaker mon ava demann lasanble an antye pou donn sipor sa mosyon akoz dan tou distrik i annan en group doker. Dan mon distrik, Bel Air, Mont Buxton, Beau Vallon, Anse Royale, partou i annan doker e ozordi ki nou an kontak ek zot, nou koz ek zot, mon krwar i enportan,  annou osi ekout zot e gete kimannyer nou kapab ed zot.  Mersi.

 

MR SPEAKER

Okenn ki segonn sa mosyon.

 

MR RAMKALAWAN

Mon segonn sa mosyon e mon anvi dir de parol.

Mr Speaker mosyon i demande ki bann anplwayer konsernen i rantre imedyatman an negosyasyon avek bann stevedores avek bi pou ogmant zot peyman sorti R2 pou vin R3 par tonaz.  Petet o komansman menm mon ti ava kontan propoze; mon pa’n anvoy okenn notice of amendment me selman si petet loter mosyon I ti ava aksepte, mon ti ava kontan propoz en simple amendment ki ti ava lir ki: sa lasanble i demande ki bann anplwayer konsernen, gouvernman ek linyon i rantre imedyatman an negosyasyon avek bann stevedores. Mon pa konnen whether – parski son rezondet i pa pou sanz naryen.  Rezondet mosyon se pou fer peyman sorti R2 pou ariv R3 par tonaz. Alor sel keksoz given ki poudir parey onorab in prezante i en lendistri enportan, in fact i enn bann lendistri prensipal dan nou pei parski i konsern por e bann stevedores zot    involve dan tou departman dan por lo en kote containers, lo lot kote ton, ton direkteman.  Alors mon mazinen ki ti ava bon pour ki gouvernman avek bann linyon zot osi tou zot enkli dan sa negosyasyon.  Mon ti ava kontan  regarde si nou ti ava kapab – si ou konsider sa koman en simple amendment mon ti ava…

 

MR HERMINIE

Non, Msye Speaker i pa en amannman senp e dan mon summing up mon ava eksplike akoz sa bout ki pe propoze – a sa staz mon pa kapab aksepte.  Mon ava eksplike dan mon wrapping up.

 

MR SPEAKER

Kontinnyen avek ou prezantasyon.

 

MR RAMKALAWAN

Mon trouv i tris ki onorab pa’n aksepte sa amannman parski sa ti ava montre ki poudir vreman nou serye. Sa ti ava montre ki poudir sa mosyon i enn ki pa zis pe zwe politik me ki nou anvi koman en pei, koman en lasanble pran en desizyon ki serye e nou ti ava pare osi pou regard son full laspe.  E rezon ki mon dir sa Msye Speaker i senp, gouvernman pa tro bokou letan pase in prezant en plan pour por, kimannyer pou devlop lendistri lapes e mon trouv li i en pe drol ki gouvernman dan son lasazes, call it that – zot pa’n trouve nesesite pour zot osi abord sa size.  E si nou aprezan koman en lasanble nou pe demande ki zis anplwayer avek stevedores i rantre ladan – mon krwar ki nou pe mank en partner enportan e sa partner enportan se byen gouvernman avek bann linyon parski ozordi nou tou nou pe koz tri-partite negotiations. Nou a pe koz tou sa bann zafer e alor akoz nou pa enkli gouvernman ladan, akoz nou pa enkli bann linyon parski ……

 

MR SPEAKER

San antre dan deba, sa pa anpese ki sa laspe tri-partite i enterese avek sa menm si amannman  pa ganny fer akoz  i pou enteres zot tou mannyer. Si ou kapab tourn lo mosyon limenm.

 

MR RAMKALAWAN

Msye Speaker petet zis mon ava – dan mon kontinnyasyon mon pou dir ki enn bann keksoz ki mon trouv osi enteresan avek lafason ki mosyon in ganny prezante se pou mwan regard en pe bann kontradiksyon paregzanp i byen ki Onorab Herminie junior i prezant sa mosyon e letan mon mazin son frer senior – parski sete son frer senior letan i ti minis ki ti dir lo televizyon ki poudir bann stevedores i ganny en ta larzan, larzan  ki zot gannyen i bokou e ki gouvernman pa enterese pou asiste bann stevedores parski sa bann dimoun i ganny ziska R5000 par mwan e alors zot en group travayer ki byen ganny peye e akoz zot bezwen ganny en lasistans?

E ozordi la nou tann Onorab Herminie pe kontredir sa ki son frer pe dir parski li i pe dir, i pe rekonnet ki poudir sa bann dimoun se bann dimoun ki travay bokou ensidswit alors zot bezwen ganny enpe plis larzan. E pour mwan anmenmtan osi i fer mwan sourir parski detrwa lannen pase letan stevedores ti deside pour zot fer en strike mwan mon ti ganny akize ki konmkwa mwan ki ti deryer sa strike e rezondet sa strike sete bann stevedores zisteman ti a pe rod en logmantasyon. Zot ti pe rod sorti R2 pour zot ganny enm pti larzan anplis e People,  People Plus tou bann zournal ti pil lo  Ramkalawan.  Ramkalawan pe fer dezord,    Ramkalawan pe demann stevedores pou fer strikes, Ramkalawan isi, Ramkalawan laba e pourtan Mr Speaker ozordi Onorab Herminie i vin dir avek nou ki menm enm pti 25 sou anplis sa zenn garson stevedores i dir li, menm enm pti 25 sou anplis mete e ki Ramkalawan ti ganny akize – stevedores ti organiz son strike e apre sa Ramkalawan ki ti ganny akize e SPPF ti pil lo bann stevedores.

Alors Mr Speaker ankor ennfwa i fer nou demann nou lekor kestyon lo senserite deryer sa mosyon. Me en keksoz ki enteresan  se ki letan tou sa bann mosyon ti pe pase en lot pwen ki ti ganny leve parski i pa fer premye fwa nou koz lo stevedores dan sa lasanble, nou’n koz en kantite fwa o stevedores e in menm deza annan statement la dan sa lasanble ki’n dir  si stevedores i ganny logmantasyon, dokter  pou oule al lo por pou li al fer travay stevedores parski sa package ki zot pou gannyen i pou sitan atiran, zot pou ganny plis ki zot pe gannyen la konmela dan zot travay koman dokter.

Mr Speaker mon pe dir tousala e mwan mon pa bezwen vin plennyen lo lapar bann stevedores akoz bann stevedores i konn tre byen nou pozisyon lo sa kote.  Zot konn tre byen ki sete Onorab St Ange ki ti demande ki zot ganny en keksoz pandan letan napa bato e ankor ennfwa  ti ganny pil, pil lo la, zot konn byen ki poudir sete Onorab Regina Alcindor ki ti apiye ankor ennfwa pour zot ganny keksoz, ankor enn fwa nou ti ganny pil lo la.

Seselwa ki travay stevedores prensipalman dan distrik St Louis,  Mont Buxton, Bel Air, Mont Fleuri, Mamelles, Plaisance, English River i konn tre byen ki pozisyon SNP i tenir lo la. E  nou lo nou kote – e se pour sa rezon ankor ennfwa ki mon’n anvi anmenn gouvernman ladan se parski Mr Speaker letan nou pe regard son aspe serye; son aspe serye i bezwen pous nou pour nou pa zis vin anmenn mosyon kot nou pe fer li la lavey en eleksyon zis pour nou pas koman bann bon boug, pour nou kapab ale dir ek bann stevedores la i la, nou ki’n anmenn mosyon me nou bezwen regard ankor ennfwa son laspe long term. Akoz  ki lavey en eleksyon i bon ogmant sorti R2 pou vin R3  me selman  5an pase, 7an pase i pa ti bon letan nou ti anmenn mosyon.

E anplis ki sa Mr Speaker kestyon ki nou bezwen osi demande se akoz ki sa mosyon an partikilye i ganny fast track, akoz ki sa mosyon ki lo Order Paper ozordi li i depas bann lezot mosyon ki’n ganny anmennen, ki’n ganny prezante, ki’n ganny ekrir pour sekretaryat.  Mon demann en kestyon parski parey ki avek mosyon lo liv, tousala se bann keksoz ki  ganny fast track, mosyon i ganny prezante, i ganny ekri pour le 30 Me, deswit  mosyon i vin lo Order Paper parkont bann lezot mosyon ki bann manm SNP in anmennen  depi – i annan mosyon ki annan plis 6 mwan, i annan mosyon ki annan 1an ziska aprezan zot in priy dan pipeline napa narnyen ki bouze, egzakteman parey sa pipeline.

Mosyon lo GST paregzanp tousala, parski la nou pe koz lo pri lavi e se sa ki Onorab in fer resorti dan son mosyon, pri lavi, kimannyer sa bann dimoun avek plis larzan zot ava kapab pli byen okip zot fanmiy. Be alors Mr Speaker mon demann kestyon be akoz ki mosyon lo GST 3an pa zanmen ganny prezante, li in pri dan en pipeline, mon ganny lenpresyon e la mon pou dir avek tou respe for your chairmanship Mr Speaker mon a demande ki i resanble ki i annan en problenm par la dan lafason ki keksoz i deroule dan sa lasanble e parey  SPPF i kontan akize me selman mwan mon pa pou al fer okenn lakizasyon personnel lo personn me selman mon anvi ki lepep Seselwa i osi konpran ki poudir i annan fast tract avek ordinary track dan lafason ki mosyon i pase. Oke mon ti a kontan tou donn mwan larepons.

 

MR SPEAKER

Ou pa’n lev en pwen spesifik, point of order me mwan osi mon a dir pep Seselwa i annan en rezon pour sa e mon  pran li koman en point of order e mon pou reponn pandan sa deba parski deba la i lo sa mosyon. Paregzanp ou osi ou ti lev en mosyon lo dissolution. I ti ganny serten priorite lo nivo …

 

(Interruption)

 

MR RAMKALAWAN

La….  konstitisyon i dir ou sa.

 

(Interruption)

 

MR SPEAKER

Order. Non, nou pe lev en lot deba, konstitisyon i dir ou a fer sitting zis pour sa mosyon, i pa dir ou  fast track, selman ou ti ganny en priorite pour sa, en legzanp e i annan lezot mosyon osi, mon pou reponn zot. Mon konnen i konsern zot, i trakas zot me la deba i lo sa mosyon pour stevedores.

MR RAMKALAWAN

Msye Speaker mon kontan sa ki ou’n dir, e mon kontan deswit sa distenksyon ki ou’n fer ant sa ki konstitisyon  i dir ki there will be a specific sitting to consider that avek fast track, alors ou’n fini montre ki poudir sa mosyon ki mwan mon’n anmennen pour dissolution i napa narnyen ki ganny fast track me i ava en lot soz…

 

MR SPEAKER

Non, non i a vin en lot deba.

 

MR RAMKALAWAN

Mr Speaker enn bann keksoz osi ki enteresan se letan ozordi nou pe koz lo kimannyer nou pou rantre dan sa bann negosyasyon e kimannyer nou pou donn sa logmantasyon parey mon pe dir Mr Speaker e bann stevedores i bezwen sezi sa tre kler se ki i annan lipokrizi e se sa ki nou bezwen fer atansyon e la mon ava challenge Onorab Herminie pour nou demande ki si li i krwar ki poudir sa i kapab ganny fer e si i senser, nou demande ki apartir le 1 Zilyet tou stevedores i ganny sa logmantasyon.  Nou demande ki  deswit sa i ganny fer pour ki le 1 Zilyet  tou stevedores i ganny R3 olye R2 pour zot tonaz e rezon ki mon dir sa Mr Speaker se parski i annan 2 lakonpannyen – efektivman i annan Hunt Deltel apre sa i  annan Land Marine. Dan Land Marine, gouvernman i annan shares. Nou tou nou konnen ki poudir gouvernman i enn bann major share holders dan Land Marine e ankor ennfwa nou demande be akoz ki Land Marine pa ti lead by example lefe ki gouvernman i annan shares ladan? Akoz ki deswit Land Marine pa ti (soz).  Me mon konnen akoz se parski bomaten zis avan mon vin isi – mwan mon’n koz avek Msye Hugh Adam ki pe ansarz Land Marine la pour le moman e son premye remark ki i dir avek mwan, i dir avek mwan be sa mosyon i ankor lo order paper. Mon dir li wi, i dir avek mwan, be sa bann la i fou.  Mon’n dir zot ki poudir sa pa realistik.  Sa pa mwan ki dir sa.  Mwan mon pa konn demars sa bann lakonpanny.  Mon pa konnen kimannyer zot marse mwan me sa se Msye Hugh Adam ki la pour le moman, li i ansarz en lakonpannyen ki gouvernman i annan par ladan ki ansarz stevedores. E anplis ki sa in azoute e mwan Mr Speaker se pour sa rezon ki mon santi ki i enportan pou enkli gouvernman dan en tel negosyasyon parski in al pli lwen  ankor.  In al pli lwen pou li dir avek mwan ki si sa i en keksoz ki ganny ensiste lo la i posib ki Sesel pou perdi sa biznes.

Mwan ankor ennfwa mon pe repet sa ki Msye Adam – li ki konnen, li ki en expert, li ki asize tou lezour pour li regard  son bann liv, pour li regarde kimannyer keksoz i deroule, i dir avek mwan ki  Sesel i riske perdi sa biznes. Lo lot kote Msye Edmond Hoarau osi tou ki ansarz Hunt Deltel, li osi tou i koz dan sa direksyon parski bann lakonpanyen ki zot fer biznes avek, zot osi zot in asize zot in  konsidere tousala espesyalman letan ti annan sa strike e i pran en kantite, i pa zis en keksoz senp, pour nou vin dan  sa lasanble e pour nou nek zis vini dir sorti R2 pou vin R3.

Mr Speaker mwan mon anvi dir ki lo nou kote dan SNP nou, nou siport tou lenstans kot en travayer i ganny en logmantasyon e parey ou’n remarke dan sa lasanble sak fwa ki’n annan logmantasyon lapey ki’n ganny anonse, nou’n siporte.  Napa problenm lo la.  Sa i oke.  Me selman at the same time parey ki mon’n deza osi ganny demande par Onorab Herminie limenm letan i dir SNP  nek zis i vini i dir fer sa, fer sa, kot nou pou ganny larzan ?  Dir nou kot nou pou ganny larzan ensidswit e dan menm fason mwan mon anvi ki nou pran keksoz serye, nou pa zis vin fer politik bonmarse lo stevedores akoz nou konnen ki poudir stevedores i en gran group dan nou pei.

Mr Speaker mon ti ava kontan osi azoute ki apre ki Onorab St Ange paregzanp ti anmenn sa mosyon, apre sa zot in taye, zot in sey fer en scheme R1400 me lenpresyon ki ti donnen sete ki tou stevedores pandan moman kot napa bato zot pou kapab al travay lo por pour zot ganny sa R1400 me i zis apre dan son laplikasyon ki nou’n dekouver e ki bann stevedores avek gran dezapwentman zot in dekouver ki se pa sa leka parski  premye keksoz ki gouvernman ti fer se pou demann tou le de lakonpannyen zot bann papye e pou balanse  lo average konbyen  bann stevedores in gannyen par mwan baze lo zot kantite ki zot in gannyen dan en lannen. E apre sa zot in dir ki tou stevedores ki letan  zot fer sa bann kalkil in ganny R3500 ou plis par mwan zot pa kalifye pour zot al antre dan sa scheme. E ozordi mon kapab dir ki se pour sa rezon ki napa  lakantite dimoun ki pe travay laba o por dan sa scheme. Mon krwar dernyen fwa lo televizyon ti dir i annan zis 2 se parski bann stevedores zot santi ki poudir sa i pa apropriye e ki ti devret annan  bann lezot fason pou regard zot pandan bann moman kot napa bato parski zot kontribisyon ki zot fer atraver sekirite sosyal – parski Mr Speaker nou bezwen balanse osi e sa en lot pwen ankor akoz ki gouvernman  li osi tou i annan en rol pou zwe ladan parski letan sa stevedores pandan bann moman kot i annan bato i pe  travay, plis ki i travay, plis ki i pey sekirite sosyal e petet i annan bokou lentans kot sa boug ki pe travay lo por sa pti dalon ki’n vin apros Onorab Herminie dapre li byensir, sa pti dalon kekfwa i pe kontribye plis sekirite sosyal ki ou Onorab koman en manm lasanble, koman leader of government business, plis ki mwan koman lider lopozisyon.

Kekfwa lakantite sekirite sosyal ki i pe peye i bokou plis parski plis ki i travay, plis ki i peye e alor pe dir be get sa lafason ki i ete, i pe kontribye plis e son kontribisyon dan lasosyete pou fer sir ki sistenm lasante, ledikasyon ensidswit i kontinnyen  i bokou, alors ed li letan napa bato pour li kapab debourye, pour li kapab nouri son fanmiy.   Parey nou’n vwar pandan sa bann dernyen 2 mwan kot napa la kantite bato e bann stevedores in bezwen rod lezot fason pour zot nobou survive.

Donk Mr Speaker ankor ennfwa mon pou dir, mwan mon pa enterese met politik dan sa mosyon, mon pa enterese pour nou zis vini, vin fer isi, vin fer laba, …. pa trakase Onorab Faure, sorry Anbasader.  Mon pa enterese pour mwan vin met politik ladan, mwan mon krwar ki en mosyon sitan enportan ki konsern en group travayer ki fer en gran kontribisyon fodre pa ki nou zis donn zot false hopes. E la Mr Speaker akoz mon appel li false hopes se parski i annan issues ki pankor ganny rezourd lo por an relasyon avek stevedores. Si Onorab Herminie koman Leader of Government Business ti vreman senser, i ti ava osi demande ki avan ki nou al rod logmantasyon zis pour rezon politik, nou ti ava ensiste ki larzan sanmdi i ganny peye.  Larzan sanmdi i enkli bann stevedores, bann stevedores ki’n travay e ki ziska aprezan zot pankor ganny peye.

E Mr Speaker pour lenformasyon Onorab enn bann rezon ki ganny donnen, i dir avek zot, zot in travay tro bokou erdtan overtime. Pourtan sa bann boug in travay, parey Onorab in dir, zot tir pwason, zot desarz containers napa kalite keksoz ki zot pa fer.  E sa se stevedores e zot larzan sanmdi, zot pankor gannyen.

Alors akoz ki lo kote SPPF ki gouvernman ki opouvwar dan sa moman spesifik, zot pli enterese pour zot vin anmenn en mosyon, en mosyon ki demann en logmantasyon san ki zot enkli gouvernman dan zot negosiasyon pou fer li vin pli serye, me selman zot pa pare pour zot pey travayer stevedores zot larzan sanmdi kan sa bann dimoun ti pe travay avek ULC ki ti 100% gouvernman. Akoz? ULC sa bann boug ti pe travay letan ULC pa ti ankor dissolve pour li vin Land Marine ensidswit. E sa sete antyerman responsabilite gouvernman. Akoz gouvernman pa pey zot me selman la sa menm gouvernman SPPF i vin demande ki bann anplwayer prive, parski i 2 lakonpannyen prive menm si gouvernman i annan shares ladan, ki sa 2 lakonpannyen prive zot zot donn logmantasyon.  Lead by example. Pey sa bann boug avan e apre sa vini demann soz, parski la aprezan ou pour lo en moral ground ki bokou pli o parski ou pou’n lead by example.

Me nou vwar demann anplwayer e sa mosyon parey nou pe dir i lav lanmen gouvernman antyerman ladan e sa bann dimoun laba deor zot zot pe ganny pran koman en  boulko. Annou pa fer sa avek bann travayer, i mal letan nou fer sa avek bann travayer kot nou zwe lo zot non ki poudir, pa trakase mon frer mon pou anmenn en mosyon dan lasanble mon pou demande e apre sa nou pou deal lo sa deal. Wrong spirit e Mr Speekr ankor ennfwa mwan mon pou fer mon pwen kler.

Tou logmantasyon lapey mwan mon anfaver me dan sa ka spesifik, e se pour sa rezon ki mon’n segonn sa mosyon. Mon’n segonn sa mosyon pour ki gouvernman i osi montre li serye e letan i montre li serye i ava kapab negosye parski Mr Speaker ankor ennfwa, parey Regar ti ekrir parski tou sala nou annan –  Stevedores get nothing from strike. Le 17 Zanvye 2003, letan bann  stevedores ti fer strike e apre sa nou tou nou konnen ki ti arive, union ki ganny dirize par SPPF ti rantre ladan e zot zot ti dir zot zot pe al negosye e zot zot pe al fer sir ki bann stevedores i ganny logmantasyon lo tonaz. Me ki’n arive? Nou’n ariv 2006 la, 3 an, napa narnyen.

Mr Speaker avek sa 2 parol nou pou dir, meyer fason pour nou bouz devan se ki gouvernman, linyon, travayer, bann stevedores avek bann lakonpannyen prive, zot asiz ansanm, zot diskit sa size. Si in ariv  ler pou met new standards pour proteksyon bann stevedores, met bann new standards parey Onorab pe dir, pa donn zot bann  boots ki ou travay dan zarden avek, fer sir ki  health and safety i ariv lo en nivo e la ankor ennfwa mon trouv i drol ki Onorab i vin dir sa parski i annan serten lalwa, i annan minister ki sipoze pe regard sa bann keksoz pou fer sir ki bann travayer dan zot landrwa zot pe ganny bann proper equipment e alors si Onorab ankor ennfwa pe vin dir nou ki bann stevedores pe travay dan boots ki ou fer gardening ladan i montre ou ankor ennfwa ki poudir son gouvernman pa pe fer zot travay byen parski zot devret take Hunt Deltel to task pou dir avek li, la i la standar ki nou ekspekte parski sa soulye ki zot pe travay ladan i pa soulye apropriye e alor la i la. E Onorab ki ti ansarz,  en moman sa bann zafer dan minister i konn byen li sa bann regilasyon ki enkli pour bann landrwa travay, ki kalite lekipman ki ou bezwen pour sak travayer ensidswit e ki kalite travayer ki pa ganny drwa fer serten travay akoz i annan serten bakteri ensidswit. Li ki ti ansarz sa departman dan minister lasante.. (Interruption).. mon nepli konnen ki mon pou dir.

Mr Speaker tou sala ankor ennfwa i montre nou ki i fasil lavey en eleksyon, parey Onorab Herminie in fer, vin lager kont en liv, al anmenn en kour, la an kour la fek arive, in anvoy zafer la, i nepli konnen ki i pou fer parski in anvoy pour Septanm, pour lenformasyon, in taye. In anvoy pour Septanm la aprezan sey vin soz bann stevedores.

Avek sa Mr Speaker mon pou dir, wi stevedores i merit en meyer deal me sa meyer deal fodre ki i ganny byen negosye pour ki bann boug i konnen ki poudir zot bann kondisyon i bann kondisyon ki sir, bann kondisyon ki pou permet zot nouri zot fanmiy toultan, fer fas avek pri lavi ki pe kontinyen ogmante, zot pa ni kapab vin kot si ou pa save, parski sa i apel si ou pa save sa.  Si ou pa save, pa vini la, super queue, zot bezwen bann bon kondisyon.

Alors avek sa Mr Speaker mon demande ki nou pran en lapros rezonnab e nou pa  zis vin fer politik bon marse.

 

(Interruption)

 

MR SPEAKER

Non si in segonn mosyon, sa vedir i pou siport mosyon.

 

(Interruption)

 

Non, non pour mwan i kler. Si in segonn mosyon, sa vedir i pe siport mosyon.

 

MR HERMINIE

..ou pe siporte mosyon, oubyen ou pa siporte ?

 

(Interruption)

 

MR SPEAKER

Order, order. Zis konm en gidans, en mo mazer dan sa mosyon se le mo negosiasyon. Pa pe dir fodre absoliman keksoz i konmsa, konmsa.

 

MR HERMINIE

Mersi bokou Msye Speaker. Si ti annan en konsey mon ti ava donn Onorab Ramkalawan se ki in ler pour li aret waffle..

 

MR RAMKALAWAN

Kimannyer sa?  Ki son konsey?

 

MR HERMINIE

Si i annan en konsey..

 

(Interruption)

 

MR POOL

Demann li si i ti pe dormi ?

 

MR HERMINIE

Ou ti pe dormi ?

 

 

MR RAMKALAWAN

Non mon pa’n tann ou parski ou labous i tro plen. Mon pa’n konpran ki ou’n dir, si ou dir waffle, si ou’n dir kwa.. ki ou’n dir. Ki ou’n dir ?

 

MR HERMINIE

Onorab Georges i a eksplike apre.

 

MR RAMKALAWAN

Personn pa’n konpran ki ou’n dir. Zis ou vant ki’n tande.

 

MR HERMINIE

Msye Speaker sa amannman ki Onorab pe propoze i pirman en lesey pou konfiz sa lasanble ler i dir met gouvernman ladan, tripartite,  strike, in anmenn en bann largiman ki kontradwir kanmarad. En moman i dira partir le premye zanvye donn en logmantasyon, lot moman in dir in koz ek Msye Adam, in koz ek Msye Edmond in dir sa logmantasyon pour en katastrof. E ler in fini fer son diskour,  mwan koman loter mosyon i pa kler pour mwan, si Onorab i siport  mosyon, si i kont mosyon, si i kwa lo mosyon.  I waffle, e son lavi an antye i fer zis sa e a sak fwa i koze i anpay son lekor plis. E si mon ti en zanmi, si mon ti en manm dan ou parti, en konsey mon ti pou donn ou, se aret waffle.

Msye Speaker, Onorab in koz lo..

 

MR RAMKALAWAN

Kontinnyen waffle, ou, waffle.

 

MR HERMINIE

..oule dir mwan pou donn 25 sou stevedores ou bezwen ozordi anmenn Herminie senior ki 5 an pase i ti pe fer sa travay. Ou ou pa’n vwar interview ki’n pas lo SBC 5 an pase kot sa msye i ti pe reponn kestyon dan son letan ki li i ti pe viv avek letan ozordi. Depi okomansman mon’n dir, mon dir dan kad sa logmantasyon ki ti annann lannen pase e mon ti sit mon diskour ki mon ti fer.  Annou konsider sa bann boug ozordi, – oule dir mwan pou konsider R1, pou konsider 50 sou, pou konsider donn zot en soulye en overall, nou bezwen anmennen Herminie Senior ladan?

Msye Speaker ankor ennfwa pour lanmour de Dye, sa stevedore ki sorti Mont Buxton, ki sorti Plaisance, Bel-Air, sa Msye pa enterese dan bann gran, gran largiman lo tripartite ouswa si dokter pou ganny mwens ouswa plis ki li. Sa Msye pe dir donn li en 25 sou, en 50 sou. Sa i difisil pour zot konpran? Pour lanmour de Dye i difisil pour zot konpran ?

(Interruption)

MR RAMKALAWAN

Donn li, nou napa problenm nou, donn li.

 

MR SPEAKER

Order.

 

MR HERMINIE

Msye Speaker pour lenformasyon lasanble SNP zanmen in anmenn en mosyon pou ogmant tonaz dan sa lasanble. Ankor ennfwa dan zot konfizyon, dan pe esey anbet tou dimoun, maximize, extension bann portre ki zot fer lo televizyon..

 

(Interruption/laughter)

 

MR RAMKALAWAN

I fatig ou sa.

 

MR SPEAKER

Order.

(Interruption)

MR RAMKALAWAN

Sanmenm sa ki fer ou waffle.

 

MR HERMINIE

Msye Speaker lo manze Sesel napa GST, sa stevedore i dir donn li 25 sou, 50 sou anplis ou vin koz GST lo manze esansyel?  Lo manze esansyel napa GST pour lanmour de Dye. Aret envante. I koz lo GST lo manze ek bann lezot keksoz…

 

MR RAMKALAWAN

Alors SBC i fer portre vin pli gran li..

 

MR HERMINIE

..ler ou tir trades tax, ler ou tir GST, pour lanmour de Dye SNP dir avek nou kimannyer zot pou finans sa bon ledikasyon, sa bon lasante…

(Interruption)

..be li ki’n koz lo la, li ki’n koz lo GST mon pe reponn li lo zot. Ou pa ekout ou sef ou ?

 

MR RAMKALAWAN

Mr Speaker..

 

MR SPEAKER

Order.

 

MR RAMKALAWAN

Mr Speaker alors SBC  i fer portre vin pli gran li.

 

MR HERMINIE

Ler stevedores i demann 25 sou..

 

MR SPEAKER

Onorab Dyer I’m calling you to order. Non non, ou pe komans vin lo lalinny.

 

 

 

MR HERMINIE

Ler stevedores i demann 25 sou, 50 sou zot dir ki bann ipokrit. Zot bann ipokrit e oule sey konfiz nou avek land marine, avek Hunt Deltel..

 

MR RAMKALAWAN

Be donn zot zot larzan.

 

MR HERMINIE

..be les mwan fini.  Onorab ou pe panik..

 

MR RAMKALAWAN

Be non be donn zot, nou pe dir donn zot Mr Speaker nou napa problenm lo la nou.

 

MR RAMKALAWAN

Be mon ava dir kimannyer zot pou gannyen.

 

MR RAMKALAWAN

Donn zot, wi donn zot, deswit donn zot.

 

MR HERMINIE

Onorab pe panic. Mwan si mon ti dan son plas mon ti pour panik pour sa pwen lapenn sanmdi.

 

(Laughter)

 

Msye Speaker i dir nou lipokrizi, i anmenn Msye Adam, i anmenn Msye Edmond, tou sala la se pirman en bann bat latet parey sa meeting ki Msye Chetty ti fer avek stevedores la i ti vin ek en bwat zalimet, i ti tir en bwat zalimet pour pwason, en bwat zaliment pour tax en baton zalimet pour lot apre i ti kas sa dernyen baton zalimet, i ti dir, ou vwar ki reste mwan, se tou.  Sa pirman bann bwat latet.. (interruption)ki stevedores nepli krwar ladan. Sa bann zafer Msye Edmond, Msye Adam, lo por, lo pon pou faid pei etc, ozordi zot enterese ek pei faid? Lekel ki ti al kot European Union ki ti dir fodre bato zanmen i vin isi Sesel, eski pa Jean-Francois Ferrari ki nimero de dan zot parti. Ozordi zot enterese ek stevedores, avek por, avek lapes, kan yer se zot ki ti devan European Union pou dir hit Seychelles where it hurts most. Pour Lanmour de Dye aret sa bann lipokrizi.

 

(Interruption)

 

MR RAMKALAWAN

Lekel ki ti met bonm?

 

MR HERMINIE

SNP, SNP i vini i dir avek nou – bonm? Demann Onorab St Ange i ava dir ou. SNP i vini i dir ek nou..

 

(Interruption)

 

..ou vin demann mwan bonm? Kan ti arive bonm? dir mwan kan?

 

MR RAMKALAWAN

Ou pa konnen ou?

 

MR HERMINIE

Be dir mwan oke, ‘79, ‘76, kan ti arive bonm ‘64, ‘70.

 

MR RAMKALAWAN

I pa konnen, ou ti ankor marmay ou.

 

MR HERMINIE

Mon ti annan 5 an.  Demann Onorab St Ange li ki ti aktivist.

 

MR ST ANGE

Mr Speaker mon krwar William Herminie i responsab li.

 

 

MR HERMINIE

Msye Speaker SNP en parti ipokrit e mwan mon pou montre akoz i en parti ipokrit dan 2 segonn. Tou sa bann manboulouk ki Lonorab Lider Lopozisyon in fer, se pirman pou kasyet en realite pou kontinnyelman anbet stevedores dan sa pei. Right? Se sa ki in dir tou sa ki in dir, se sa ki in fer tou sa bann kontradiksyon, en moman i dir fodre ganny logmantasyon, lot moman i dir nou Msye Adam i dir ek li si  annan logmantasyon, tou keksoz pou fouti dan pei, in koz ek Msye Edmond tou keksoz pa bon.

Msye Speaker larealite se ki SNP pa an faver en tel logmantasyon. E mwan mon ava dir kimannyer stevedores i kapab ganny logmantasyon sirtou stevedores Hunt Deltel, oke san ki i bezwen annan okenn kou anplis lo pei.

Msye Speaker ki SNP pa krwar dan logmantasyon i kler, a sak fwa in annan en logmantasyon atraver bidze dan sa lasanble nasyonal zot in vot kont. Kimannyer apre zot kapab vin dir nou, zot siport logmantasyon kan lo rikord, Madanm Banks pa la, i ti ava donn nou enn sa let, lo rikord i montre ki zot vot kont tou bidze kot i annan logmantasyon.  Onorab Julie i dir mwan mon fou.  Akoz ou dir mwan mon fou Onorab? Akoz?

 

(Interruption)

 

MR SPEAKER

Order.

MR RAMKALAWAN

Retourn lo ou mosyon man, stop waffling. Koz lo ou mosyon, waffling sa Mr Speaker.

 

 

MR HERMINIE

Msye Speaker SNP pa konnen ki i pou fer. I enteresan ki ozordi Onorab Ramkalawan i vin dir avek nou, sa bann boug, i kontribye social security, plis ki lider lopozisyon ek lider government business, be sa mosyon dan lasanble nasyonal, sa ki ti anmennen?  Be Onorab Georges. E ki Onorab Georges ti dir dan son summing up? Wi mon vwar konpleksite, mwan mon a sizere ki en sistenm lasirans i ganny set up. Sa ti son konklizyon.

 

MR RAMKALAWAN

Be ki ou problenm alors.

 

MR HERMINIE

Problenm se ki ou pa’n ekoute ki Onorab Georges in dir.  Sa bann zafer ou bezwen tir isi..

 

MR RAMKALAWAN

..be ki mosyon?  Ou pe waffle man.

 

MR HERMINIE

..I ti anmennen konsenan larzan pour bann endividi.

 

(Laughter)

 

..larzan pour bann stevedores. Msye Speaker vre realite..

 

(Interruption)

 

MR RAMKALAWAN

Mr Speaker in fek dir zanmen nou’n deza anmenn mosyon, la i dir Onorab Georges ti anmenn mosyon.

MR SPEAKER

Order.

 

 

 

MR HERMINIE

Mosyon Msye Speaker, ti demande ki ler Stevedores pa travay zot ganny en larzan.

 

MR RAMKALAWAN

Be pa ou’n fek dir pa’n zanmen anmennen.

(Interruption)

 

 

MR HERMINIE

..logmantasyon R2 pou vin R3 ki zanmen zot in anmennen.

 

(Interruption)

 

MR BERNARD GEORGES

Zot ti vot kont mon mosyon, zot pa ti anvi donn stevedores larzan.

 

MR HERMINIE

Lopozisyon i en group ki per, zot pa kapab ekout en zonm koze. SPPF si i koze pou 30 minit…

 

MR RAMKALAWAN

Si i en zonm. Oli li sa zonm ?

 

(Interruption)

 

MR HERMINIE

…oule konnen si mon en zonm Madanm Alcindor ?

 

MR RAMKALAWAN

Oli sa zonm ki pe koze?

 

MR HERMINIE

Oule konnen si mon en zonm ?

 

MRS ALCINDOR

Mwan non mwan, mon’n demande oli sa zonm?

 

 

MR HERMINIE

Be ki ou pe dir oli sa zonm ?

 

(Interruption)

 

MR SPEAKER

Order.

(interruption)

 

MR DE COMMARMOND

Speaker what is this?

 

(Interruption)

MR RAMKALAWAN

Kote sa materyo i ete..

 

MR HERMINIE

Mr Speaker la realite – e mon ti a voudre ou kapab met silans pour mwan dir la realite akoz SNP in waffle bomaten.

 

(Interruption)

 

MR RAMKALAWAN

Sa materyo i kot pti John

 

MR HERMINIE

Mon kapab ganny en minit silans?

 

MR SPEAKER

Wi be si ou kontinnyelman..

..

 

MR RAMKALAWAN

Si ou kontinnyelman waffle

(Interruption)

MR HERMINIE

La realite, ser, frer manm lasanble nasyonal, e ozordi mon oule adres direkteman bann stevedores. Rezon ki ozordi lopozisyon pe pran sa pozisyon, napa narnyen pou fer ek land marine. Land Marine i en konpannyen ki’n donnen logmantasyon son travayer R300. E la devan mwan tout en dokiman, bann incentives ki en stevedores land marine i gannyen. Vwala rezon akoz ou pa vwar stevedores sorti Land Marine vin la ouswa vin kot nou – i plis stevedores Hunt Deltel e Hunt Deltel pa oule donnen akoz? Akoz Hunt Deltel i en..

 

 

MR RAMKALAWAN

…en parti politik? I vwar zis parti politik.

 

MR HERMINIE

..konpannyen ki afilye avek SNP. Nou konn tre byen ozordi rezon ki Father pe sot lafason ki i sote, set akoz Hunt Deltel, la gran parti ladan i apartyen a Msye Chetty, e Hunt Deltel i donn SNP tou le zan 5 milyon roupi ..

 

(Interruption)

 

MR RAMKALAWAN

Mr Speaker point of order.

 

MR HERMINIE

Mr Speaker ki nou nou pe dir Msye Speaker..

 

MR RAMKALAWAN

Matter of privilege Mr Speaker. Mr Speaker it’s a matter of  privilege.

 

(Interruption)

 

MR SPEAKER

Order.

 

MR HERMINIE

..Nou nou pe dir, tir dan sa ta larzan ki zot donn SNP, redonn enpe doker..

 

(Interruption)

 

MR RAMKALAWAN

Matter of privilege Mr Speaker.

 

MR HERMINIE

Vwala bomaten rezon akoz in waffle, i pa konnen ki i pou dir akoz i konn tre byen Mr Speaker ki stevedores i kapab ganny sa 25 sou, stevedores i kapab gannyen sa 50 sou..

MR RAMKALAWAN

Matter of privilege Mr Speaker, please..

MR HERMINIE

..me selman i pou bezwen alors..

 

(Interruption)

 

 

MR SPEAKER

Order.

 

MR RAMKALAWAN

Mr Speaker matter of privilege please..

 

MR SPEAKER

Order.

MR HERMINIE

..i tir enpe dan sa ta milyon ki i donn SNP..

 

(Interruption)

 

MR RAMKALAWAN

Matter of privilege Mr Speaker.

 

MR SPEAKER

Order, Onorab Herminie aret en pti kou pour le moman.  Ki ou point of order?

 

MR RAMKALAWAN

Mr Speaker mon pe raise en matter of privilege. Onorab Herminie in dir ki Hunt Deltel i en lakonpannyen ki SNP – ki laplipar bann manm i dan SNP. Mon anvi prezant avek ou registration papers Hunt Deltel ki montre ki poudir Hunt Deltel son bann direkter sa Michael King-Harman ki en etranze, Joanna Van-Oswald ki reste Austria, Mohock Associates ki en lakonpannyen ki’n anrezistre sepa ki lot landrwa e ki napa okenn manm anrezistre SNP ki ladan. E anplis ki sa mon ti ava kontan challenge Onorab Herminie, si ou pe dir ki Hunt Deltel i donn SNP 5 milyon tou lezan, mon ti ava kontan vin devan montre laprev, montre ou laprev, dir sa an piblik, pa bezwen kasyet deryer ou immunity dan sa lasanble nasyonal.

 

MR SPEAKER

Ekoute, tyonbo en kou. Lafason ki deba pe ale..

 

(Interruption)

 

MR RAMKALAWAN

Si ou en zonm parey ou dir, montre.  Si i en zonm Mr Speaker, montre.

 

(Interruption)

 

MR HERMINIE

Msye Speaker laverite i ofans son met.

 

MR SPEAKER

Now I’m calling you to order. Annou fini sa deba..

 

MR HERMINIE

..i vin mansyonn nou Van Don, Don, mansyonn nou Chetty.

 

MR RAMKALAWAN

Ki Chetty?  Be gete ladan…

 

 

MR HERMINIE

E dir ek nou kantite i donn zot.  Stevedores i konnen sa. Pa vin dir ek stevedores Van Don Don..

 

(Laughter)

 

..dir ek stevedores Chetty, ki kantite milyon i donn zot, pour lanmour De Dye – ou a vin dir nou Van Don, Don dan lasanble? Come on.

(Interruption/laughter)

Msye Speaker avek sa mon oule demann sa lasanble pour siport sa mosyon e si vreman zot enterese ek welfare stevedores, lev zot lanmen anler, ler..

(Interruption)

 

.. Vot an faver sa mosyon – e rekonnet ki zot lider in vin waffle dan sa lasanble.

 

MR RAMKALAWAN

La, la nou’n leve. Pare pou vote.

 

MR SPEAKER

Non, non mon pankor..

 

MR RAMKALAWAN

Mr Speaker pankor pare, nou nou’n pare.

 

MR HERMINIE

Sa Jj spirit ki ek zot, zot in pare.

 

(Laughter)

 

MR RAMKALAWAN

Jj spirit nou’n fini exorcise. In fini mor.

 

MR HERMINIE

Be la Jj fever aprezan.

 

(Interruption)

 

MR RAMKALAWAN

Laplenn fever ki lo zot.

 

MR SPEAKER

Bon eski nou oule fini sa deba anpe?

 

MR RAMKALAWAN

Be nou’n fini. Nou’n pare pou vote.

 

MR SPEAKER

Tou sa ki an faver mosyon lev zot lanmen. Inanim. Nou’n fini avek sa mosyon.

 

MR RAMKALAWAN

Yes we can.

MR HERMINIE

Zot napa swa.  Letan zot met triko yes, zot in vin yes men.

 

MR SPEAKER

Dezyenm mosyon.

 

MR RAMKALAWAN

Mr Speaker be selman sa zonm la i ti a kapab al dir sa deor?

 

MR SPEAKER

Non, non, non.

 

MR RAMKALAWAN

Nou konnen parski son materyo i kot pti John.

 

(Interruption)

MR NICHOLAS  PREA

Mr Speaker mosyon ki mon pe prezant avek sa lasanble bomaten i lir konmsa. Avek piblisite ki gouvernman pe donn Sesel koman en destinasyon enportan an sa ki konsern lanvironnman e lavi soumaren, sa lasanble i demann gouvernman pou revwar seryezman kondisyon Decompression Chamber e nesesite envestir dan enn nouvo.

Mr Speaker zis pour fasilit keksoz pour lezot manm an prezantan mon mosyon, en decompression chamber i deal avek decompression sickness soufer mainly par bann plonzer.

Mr Speaker a sa moman menm ki mon pe prezant sa mosyon, nou pei Sesel napa sa ki mon pe esey demande. Sa vedir nou napa en decompression chamber akoz i nepli la e sa lekipman antye i lerop kot i ti pe antreprann serten travay maintenance. Me i paret ki i kapab menm annan risk reste laba. Taler mon pou dir akoz Mr Speaker.

Sa i fer ki demann ki mon pe fer i vin pli for e mon mosyon i devret ganny plis merit. Wi, ler mon ti fayle sa mosyon an fevriye, nou ti annan enn me ki i pa ti pe marse. Me la ozordi nou napa ditou. Me kanmenm sa lavi i kontinnyen e plonzer i kontinnyen plonze, swa pou plezir, ouswa pour zot travay. Sesel i kontinnyen viv lo risk e bann sans ki petet bann tel aksidan pa pou arive.  Me aksidan i arive san ki nou kapab evite parfwa.

Mr Speaker pour plizyer lannen Sesel in ganny vann koman en destinasyon plonze e sa detrwa dernyen lannen avek lanfaz ki lotorite in mete, lo festival soumaren sa in pran en dimansyon pli gran ankor. Lanfaz i ganny mete atraver minister tourism, e osi atraver minister lanvironnman lo devlopman, labote nou monn soumaren, e alors kot pei i kapab atir plis touris ki kontan fer sa sport parey parfwa zot dekri li ki appel plonze. Mwan osi koman kelken ki kontan lanmer mon pa pou demanti ki nou annan en tel bote. Mon vwar sa Mr Speaker selman atraver lakot me   mon asire ki plonze avek boutey dan bann profonder ki pli fon ankor, mon asire Mr Speaker labote i ankor pli emerveye e pli etonan. Me sela ki nou ki amater, nou pa kapab ale me nou pli bezwen  bann ki annan leksperyans e bann ki pli profesyonnel e se la osi Msye Speaker ki plis prekosyon i bezwen ganny pran si non en aksidan i kapab arive, ki kapab swa kout en lavi oubyen andikap ou pour lavi.

Mr Speaker sa kalite tourism in sitan popiler dan bann small islands state e ozordi dan Sesel, dan Sesel menm i annan apepre 15 sant plonze avek 6 lo Mahe, 5 Praslin, 1 La Digue e osi lo lezot bann zil ki annan letablisman touristik. Nou osi annan en market touris ki lwe zot prop yot avek en dive master pou fer zot prop plonze, nou annan bann private charters ki anmenn touris e ki tanzantan zot osi zot antre dan sa sport plonze. E la Mr Speaker pandan sa dernyen detrwa lannen nou annan bann plonzer lokal ki zot, zot ganny zot lavi atraver sa metye me avek tou sa nou napa en tel fasilite pou tret en plonzer anka en aksidan.

Mr Speaker mon’n met sa mosyon a latansyon sa lasanble akoz mon krwar ki Sesel ozordi i merit a tou pri annan en fasilite ki fonksyonnen a plen tan pour non selman servi pour bann plonzer ki’n ganny sa ki nou apel decompression sickness me osi sa fasilite pe ganny servi deplizanpli dan  lemonn medikal pou tret bann maladi tel ki dyabet, kanser etc.

Ozordi nou annan viziter plonzer parey mon’n dir ki pas atraver bann diving centres, atraver bann private charters, bann ki lwe zot yot, bann ki zot travay i konsern avek diving tel  ki bann zofisye gard lakot e osi parey mon’n dir bann seselwa ki’n rantre dan sa nouvo lendistri lapes apele diving pour banbara.  Nou tou nou konnen ki anmenmtan ki nou pa swet en aksidan, risk i vreman. E kestyon se eski Sesel i vreman pare pou fer fas avek en tel aksidan e si non ki konsekans ki nou pou bezwen fer fas avek – en lavi perdi, en plonzer ki vin andikape pour lavi oubyen en lenpak negative lo nou lendistri tourizm.  Mon pe senpleman dir sa akoz mon anvi vwar sa ki byen pour mon pei.  Kot nou napa, mon pe dir fodre nou rode.  E kot nou manke mon pe dir annou ranforsi.  Se dan sa konteks ki atraver mon travay pou byennet mon pep e mon pei ki mon’n ganny pouse pou table sa mosyon e sa i fer mwan marye plizyer konsern ansanm.

Mr Speaker an Fevriye mon ti rankontre en madanm avek de pti trezor e pandan konversasyon mon ti dekouver ki zot ti pe atann nouvel en papa ki ti’n pas atraver en tel aksidan plonze e akoz ki Sesel ti napa en tel servi pou ed sa zenm onm risk ti’n deza pran pou transpor li, pou fly li Moris pour  li resevwar tretman neseser.  Se pourtan parey Dokter Herminie i kapab konn tre byen, voyaz avyon ti kapab agrav son lasante plis ankor.  Mon’n fek al vizit sa fanmir Vandredi pase – lefet ki mon mosyon in monte, in appear lo Order Paper pou fer zot konnen ki mon mosyon pe pase ozordi pou aport en pe lankourazman e  pou vwar ki sitiasyon sa papa.

Mr Speaker i malere pou vwar ki leta en zenn onm ki ti deza for ki souden i vwar li ladan.  I ti pas 1 mwan tretman Moris e la preski 3 mwan apre son retour, 4 mwan apre son aksidan, son recovery i vreman dousman e parey in dir mwan i fermal.  Sa lefe sa voyaz 2 zour apre son aksidan in osi agrav son sitiasyon akoz parey mon’n dir apre en tel aksidan ou pa sipoze servi avyon pou deplase akoz bann konplikasyon ekstra ki presyon kabin i kapab anmennen.

Mr Speaker mon pa pou al pli an detay pour mwan dekri sa dimoun akoz in dir mwan sey gard enpe son dignite. Me sa i en ka, dapre resers ki mon’n fer, in deza annan plizyer ka e in menm annan lanmor ki’n deza arive.  Dapre lenformasyon ki mon annan ler en tel aksidan plonze i arive se selman en helicopter ki kapab transport en viktim ant en pwen ou en lot pwen akoz lareg set par bann medics se ki ou pa kapab anvol parlao 300 met above sea level. Okenn lezot mwayen parey mon’n dir i plito agrav sitiasyon sa viktim.

Pour bokou lannen mon’n okouran ki bann akter dan biznes sant plonze in fer sa demann avek lotorite ki annan en tel fasilite, ki  fonksyonnel me ziska ozordi napa gran keksoz ki’n ganny fer.  Lotorite touris STB in osi pran sa demann e zot in fer serten koze e demars dan sa direksyon me ziska ozordi napa gran rezilta.

Nouvo lotel Silhouette in anons posibilite ki zot pou enstal en tel fasilite lo sa zil me eski sa pou kouver bann plonzer lo Mahe, Praslin e lezot zil, eski sa pou kouver no bann plonzer ki al rod zot lavi dan lanmer, eski sa pou kouver lezot touris ki lwe zot prop yot.  Si i ariv en aksidan avek en viziter ki nou pou fer.  Nou konnen osi ki si en pei parfwa napa bann tel fasilite, sa viziter parfwa pa ganny kouver par son lasirans, alor eski sa i pa agrav nou sitiasyon oubyen eski i pa plito swazir en lot destinasyon dan larezyon paregzanp tel ki Maldives oubyen Maurice pour li pas son konze pour li al fer son konze plonze.  E bann sant plonze in osi fer resorti Mr Speaker ki zot pa kapab a se moman la tap sa ki nou apel sa asian market akoz zot lasirans i ensiste ki pou bann tel vizit, bann tel vakans zot pran en lasirans ki kouver zot anba la e zot bezwen al dan en pei ki annan bann tel fasilite.

Mr Speaker i osi enportan pou vwar konbyen ki nou pei i gannyen atraver bann  sant plonze.  I pa selman ofer loportinite travay me i osi anmenn lezot benefis pour pei.  En sant i ganny li, la nou pe koz en average 8 kliyan par zour me i annan sant ki kapab dan en bon zour al ziska 20 par zour. Si nou pran sa sif 8 avek dizon mon bring down sa kantite nonm sant plonze sorit 15 pou vin 10 ki pe run avek  efikasite e a en kou minimonm 40 ero par plonze e nou kalkile konbyen nou gannyen par mwan selman – e la nou pran 8 par 10 sant plonze par 40 ero par 30 zour dan en mwan, Mr Speaker i fer 96 mil ero ki i vin apepre 672 mil roupi par mwan atraver sa lendistri e nou konnen si ou miltipliy li pa par 365 zour, met li on average 300 zour dan en lannen, konbyen sa pou fer e ki kantite reveni sa lendistri i anmennen pour pei.  Sa i en sonm sibstansyel ki ankor prouve ki nou bezwen envestir dan en fasilite ki pou deservi sa lendistri.  E mon asire atraver sa bann sif ki mon’n fer sorti,  mon’n travay lo en average ki sa sekter i kapab generate bokou plis ankor.

Mr Speaker ozordi mon krwar ki nou kapab combine zefor ant bann minister, vi ki benefis ki en tel lekipman e teknolozi i aporte, i pli gran ankor.  Ozordi partou atraver lemonn bann tel fasilite pe ganny servi pou serten problenm medikal parey mon’n dir dyabet e kanser.  La mon annan en lartik anba tit ‘Deco Chamber Medical Centre’ ki dekri li koman en klinik under palm trees an Maldives. Sa lartik i dir ‘Kandalhu has a small medical centre with it’s own Decompression Chamber.. The medical centre is operated by European doctors from Kuramati Islands.  The Decompression Chamber opened in 2004 and is currently one of the most modern chambers in Maldives”. I ale pli lwen ankor i dir; anmenmtan ki zot pe cater pour bann aksidan decompression sickness i kontinnyen  ganny servi dan bann lezot problenm medikal.

Mr Speaker mon osi annan en lartik la devan mwan kot resers in dekouver ki pasyan avek kanser sen savedir plito bann madanm e ki pe soufer avek lefe lymphodema ki en kondisyon irreversible ki fermal e ki karakterize par lanflir lebra, swivan radiotherapy. Respir loksizenn pir dan en chamber anba kondisyon kontrole i ede redwir sa kondisyon savedir i redwir sa lanflir, i redwir sa douler, sa soufrans ki sa pasyan i pas ladan e i kapab ogmant sirkilasyon son disan.  Sa i en fason ki lemonn medikal pe evolye e la mon asire ki avek nou kantite ka dyabet e kanser isi Sesel mon sir ki en tel fasilite i a en benefis ki i a en plus pour nou pei.

Mr Speaker sa ki enteresan e ki donn mon mosyon plis lenportans ozordi e ki take the government  to task se ki the decompression chamber pa zis pa marse parey mon’n dir me pour le moman i osi pa dan pei.  Wi, pour lenformasyon sa lasanble sa lekipman pour le moman la i an Allemagne.  Les mwan donn zot enm pti listwar sa masin ki nou ti annan once upon a time. Sa masin ti ganny konstrir an 1984 e ti ganny donnen a nou lopital an 1988 me i ti selman ganny enstale 2an plitar apre ki i ti’n ganny stored pour apepre 2an.  En lakonpannyen  apel COMEX ti ganny en kontra pou fer servicing e akoz i en hyper-barick chamber, i annan diferan kalite sa bann chamber parey ti’n ganny dekri, i demann en servis zeneral tou le 20an.  Sa alors ti due an 2004 me eski sa service ti ganny fer? I annan en gro question mark la.

An 2005 en lagreman ti ganny konstrir ant gouvernman ek HANS Company pou antreprann  servis lo sa chamber e la  rezon ki mon dir i en gro kestyon in leve lo whether COMEX ti mentenir son laranzman.  Sa lakonpannyen HANS Company ti agree pou train serten dokter e teknisyen pour en sonm  anviron 22,000 ero.  18,000 ero ti ganny donnen par lakes korperasyon franse e  gouvernman ti sipoze pey son balans an Avril 2006.  Sa chamber ti ganny anvoye kot HANS Company an Allemagne an Mars 2006. Savedir 1 mwan apre ki mon ti’n  fayle sa mosyon.

Avan ganny anvoye an Allemagne en teknisyen HANS ti fer serten travay lo la e zot ti deklar li fonksyonnel me dapre zot ti bezwen en overall total, malgre ki zot te deklar li fonksyonnel, bann dokter ti refize servi sa akoz en mank practice e osi ki personn pa’n trouve si vreman i marse.  Alor parey mon’n dir sa chamber i Lerop e posibleman ki i reste laba i ankor la akoz dapre mon lenformasyon ki mon’n gannyen, sa lakonpannyen i ankor pe esper larestan peyman.

Mr Speaker pour lenformasyon sa lasanble malgre sa lendistri plonze i kontinnyen i selman avek led divers alert  network pour le moman.  Tou sa bann sant plonze ki annan sa sertifika PADI pour le moman i link avek sa ki nou appel Divers Alert Network e mainly nou bann links i avek Sid Afrik e apre Lerop.  Sa i fer, Mr Speaker ki Divers Alert Network i la, i an constant communication avek nou bann diving centres isi, pou donn serten  lenformasyon lo bann nouvo lareg plonze e anmenmtan lo bann nouvo problenm ki kapab arive atraver en plonze.  Sa ki enportan Mr Speaker se Divers Alert Network i osi provide diving medical advise. I antreprann resers into diving safety e la sa ki  enportan msye Speaker se ki zot provide financial and technical assistance pour bann treatment centres in developing countries e la ankor mon vwar kote nou Sesel nou kapab rantre e tir serten  benefis.  Alor ki pozisyon Sesel ozordi? Apre ki mon’n eksprim sa bann problenm ek konsern mon anvi retourn lo merit mon mosyon pou demann gouvernman pou revwar kondisyon nou decompression chamber e nesesite envestir dan enn nouvo.

Mon ti a kontan ki nou lasanble ti a  pran sa mosyon pozitiv e ansanm annou demann gouvernman pou fer en desizyon ki byen e ki a ede pou bouz nou pei pli devan.  Nou koz bokou lo teknolozi e la nou annan en sans pou aplik en nouvo teknolozi pa selman pour bann ki fer plonze me osi pour bann pasyan avek lezot problenm medikal ki avek led sa lekipman zot soufrans a kapab ganny soulaze.

Avek sa Mr Speaker mon demann sa lasanble pou donn sipor sa mosyon.  Mersi.

 

MR SPEAKER

Okenn ki segonn sa mosyon.

 

 

MRS ALCINDOR

Mon segonde msye Speaker.

 

MR SPEAKER

Deba i ouver.

 

27 June 2006

 

MR HERMINIE

Msye Speaker mosyon  devan nou i enn ki ase senp e mon krwar i enportan ki mon entervenir pou, si oule, fer serten koreksyon dan sa ki’n ganny prezante par Onorab Prea.  Mon mazinen ki i pa en mosyon kontrovers e sertennman i en mosyon – konteni mosyon e demann mosyon i enn ki a se moman menm gouvernman pe fer tou le neseser pou fer sir ki sa kestyon hyperbaric  chamber, decompression chamber i ganny rezourd enn fwa pour tou.

Mr Speaker en decompression chamber parey Onorab in dir i ganny servi pou decompression illness ouswa parey bann dokter i apel li bends e basically ki arive se ki en plonze – i enportan ki nou eksplik sa byen akoz ozordi sa problenm i nepli  en problenm bann divers touris me plis bann boug ki al tir banbara. E bann divers pa respekte speed ki zot sipoze mont avek letan zot in fini koule.  E si zot mont tro vit i ariv serten sanzman dan zot konpozisyon loksizenn ek nitrozenn ki fer ki nitrozenn i antre dan lavenn disan e sa nitrozenn obviously i kapab blok nenport ki landrwa.  Son bann sentonm prensipal se douler akoz i kapab blok en lavenn oubyen en artery parey zot dir sa an angle e konsekaman napa loksizenn, napa nanryen e son rezilta se  en nikroz e avek nikroz toultan i annan bann douler terib.

Dan ki Onorab in mansyonnen, sa ka ki’n site i en ka ki mon konn tre tre byen avan e apre menm apre, mon pa konnen si petet sa msye in dir avek li – mon’n fek vwar li sanmdi. I ti en ka ki kantmenm eksepsyonnel e dan sa lenstan kot sa nitrozenn ti’n blok, ti’n blok  son arter e ti  fer li paraliz konpletman, lebra, lipye partou, konpletman e erezman ti annan enn mon zanmi ki ti isi sorti La Reunion e vitman – akoz mon konn tre byen nou ti sipoze zwenn  vitman i dir mwan pran pasyan, in retoun avek La Reunion e vwala rezon akoz ti bezwen anmenn li dan avyon, ti napa en lot fason.  I vre ki parfwa dan medicine toultan ou bezwen balanse.  Eski ou kit li la ek son konplikasyon, kot son sitiasyon i deteryore ouswa ou pran en desizyon avek serten risk ki alafen dizour i ava ganny son lasante. E parey nou’n vwar son lasante in improve drastically malgre ki i ankor annan enpe bann lefe residual parey nou dir, si oule en serten risk assessment.

Msye Speaker sa decompression chamber i osi ganny servi pour lezot kondisyon paregzanp anpwasonnman avek carbon monoxide, gas ki sorti sirtou dan silencer loto me osi pou bann problenm dyabetik, nekroz parey nou dir sa, bann dimoun ki’n fini fer radiology. Onorab in mansyonn lymphoedema. I tou sa bann ka kot i kapab ganny servi e rezon ki mwan mon’n dir sa akoz sa dan limenm li i reprezant en  problenm an sa ki konsern nou decompression chamber ki mon pou vin lo la plitar.

Msye Speaker si nou oule promote diving koman en aspe enportan nou tourism, wi  fodre ki nou annan en  decompression chamber ki fonksyonnen e ki marse e parey mon ti dir pli boner ozordi i pa bann divers ki’n ganny train dan bann diving centres ki pe ganny afekte me i plis – mon mazinen akoz sa bann dimoun zot ganny en pli bon formasyon, zot konnen ki speed zot pou retourn avek eksetera, i plis sa problenm ozordi parmi bann peser banbara, ki ale, souvannfwa napa lekipman apropriye, souvann  fwa napa training neseser e souvann fwa zis zot fer en travay vitman, vitman pou ganny en larzan.  E dan bann enstans tou dernyenman mon’n al lo ward pou pratik detrwa fwa par semenn e tou bann ka bends i bann ka bann peser banbara enkli sa enn ki mon fek mansyonnen.

Msye Speaker Onorab in mansyonn enpe listwar sa decompression chamber. Son listwar i enn ki mon  asosye tre pros avek.  I en  listwar enteresan, en chamber ki ti lo en bato ( ?), i annan ki dir ti pou en prens Arab me at the end of the day chamber ti al fini dan en stor kot Coastguard e mon rapel tre byen apre mon ti’n retournen fer en letid dan aviation medicine ki ase pros avek diving medicine, nou ti’n  deside pou nou entrodwir decompression chamber dan Sesel.

E mwan personnelman mon ti al fer vizit e ansanm avek mon zanmi Reunionais pou gete si i kapab ganny servi.  E sa msye ki en zonm tre, tre kapab i dir mwan napa problenm i krwar ki nou kapab re-entrodwir li dan minister lasante me i pour neseser ki serten azisteman i ganny fer lo sa chamber e anmenmtan ki nou train dokter  ek ners e nou ti fer li.  Nou ti fer  li – mon ti direkter zeneral parey onorab  in fek koz lo la pli boner pour prevansyon e kontrol maladi. Nou ti rod nou en  container, oke, nou ti aranz sa container nou ti met air condition ladan  e nou ti met sa chamber ladan, aranze e nou ti  donn plizyer ners ek dokter training e teknisyen osi lo ki fason pou servi sa chamber. Me problenm avek sa chamber limenm e se sa kot son problenm i vini, se ki sa decompression illness ki onorab Prea in koz lo la i pa en keksoz ki ariv tou lezour ouswa  i pa en keksoz ki ariv tou le mwan.  I en kondisyon ki ariv rar e normalman dan medicine si ou napa pratik apre en serten letan ou komans perdi ou skills e ou konesans e sa ki ti pe arive avek bann dokter, bann teknisyen avek bann ners se ki ti napa pratik e nou, nou ti pran en desizyon pour nou si oule komans tret bann lezot maladi parey dyabet.  Sa ti poz en problenm avek diving association, ti poz en problenm akoz zot dir ek ou si nou annan en ka urgent aprezan   ou pe anmenn bann lenfeksyon ladan – mon krwar i ti bann largiman ki pa ti valab e rezon prensipal a mon’n avi ki zot ti pe anmenn sa bann largiman se akoz sa kou pou fer marse sa decompression chamber lo en baz toulezour i kout en kantite larzan.  En kantite larzan an term loksizenn, aircondition, bann ners ek bann dokter ki pe rod risk allowance akoz i en gro risk travay ladan, si oule ti pe kout Minis en kantite larzan si oule nou pa ti kapab soutenir. E lanmenm la ki mwan personnelman mon ti dir i bezwen  delegasyon pou antre dan  negosyasyon avek reprezantan diving association e  zot pa’n zanmen  aksepte.  Zot largiman se ki si zot pou kontribye petet i ganny servi zis pou diving incidence. E parey nou’n dir avek li i ariv en kantite konsekans, ou annan konsekans, konpetans, konesans, parmi teknisyen, ners ek dokter e se sa ki ti arive. Se ki ners, dokter apre serten letan  zot menm zot pa ti santi zot konfidan, teknisyen pa ti pe fer bann maintenance parey ti pe fer, La Reunion ti’n komans perdi lentere dan en masin ki preski pa ganny servi ditou e 2004, gro aksidan.  Anmeriken ki pran pitye avek sa masin – ti en masin Alman, in antre komans zwe, zwe ek bouton, bap, erezman personn pa’n mor, erezman osi ti napa en seselwa la anndan me gro aksidan ki sa masin pa ti kapab ganny servi ditou.

E boner sa lannen ankor mon zanmi Reunionais ti dir mwan, i ti’n kit Minister me i ti vin kot mwan en kou avek bi pou remet sa anmars. E pour lenformasyon Lonorab Prea sa container avek sa decompression chamber ti kit Sesel le 22 Mars 2006 e ti ariv an Germany le 15  Me 2006. Gouvernman Sesel ek Minister Lasante in fini peye pou reparasyon sa chamber ki’n ariv 22,837 ero e dapre sa manufacturer ki reste dan en landrwa ki apel – i en pe disifil, mon krwar lonorab Ramkalawan pou kapab pronons sa pli byen ki mwan ( ??) whatever. Non, Alman menm sa. Dapre zot tou bann reparasyon in fini ganny fer lo sa chamber e zot pe esper pou repatriy li, pou re-anmenn li  isi Sesel.  Sanmdi mon ti pe koz avek Direkter Zeneral Servis Lopital e problenm  ki nou ti rankontre inisyalman kot pou met chamber i paret problenm ki zot pe fer fas avek e petet alafen dizour zot pour napa okenn swa me retourn dan sa container ki pa neseserman landrwa pli ideal akoz i fermen e bokou dokter i claustrophobic e mwan personnelman  mon pa’n zanmen anvi travay ladan, mon groser sirtou, son sez la, la.  Mon konpran zot bann reaksyon.

Donk demann ki Onorab Prea pe fer i en keksoz ki minister i konsyan, i konsyan nesesite pou annan en decompression chamber. La avek sa bann devlopman dan tourizm e sirtou letan nou pe koz an term medical tourism ki Prezidan Michel ti koz lo la le 18 Zen, mon konn plizyer konpannyen ki pe vin envestir ladan isi dan Sesel, en decompression chamber i vin en sine qua non, i en must, ou bezwen annan akoz  si ou napa li bann konpannyen ki promote medical tourism pa pou anvoye  zot bann kliyan isi akoz zot dir ek ou my friend ou annan problenm lasirans, I mean mon leksperyans koman DG mon konn en kantite konplikasyon ki arive.  En avyon bezwen sorti Sid Afrik, vini, the amount of money i koute e napa konpannyen ki pour oule pran sa risk.

Mon mazinen ki nou napa okenn problenm ek sa mosyon Msye Speaker e  lo sa not mon ava dir Onorab pa bezwen ki i trakase, tou pe ganny fer pou reponn son demann, mwan mon’n deza fer li en 6, 7an pase, i annan bann – dokter Gedeon pe pran sa an men e mon mazinen ki nou pou napa byento  zis en decompression chamber me plizyer – i en landrwa pour bann boug ki oule envestir dan prive, en landrwa pou envestir bann private investors dan Sesel, dan en sant decompression avanse e mon asire ou annan ou en kantite matlo anmeriken dan larezyon, anyway laplipar bann bato anmeriken – in any case i annan en decompression chamber obor ouswa the mother ship pou annan enn tre avanse. Me avek bann aktivite ki pe arive senpleman mon mazine i annan en keksoz – Msye Speaker mon ava demann tou dimoun pou…

 

MR B. GEORGES

Mon ti anvi demann en pwen klarifikasyon ek ou permisyon ek lonorab Herminie koman en dokter.  Eski lonorab ti kapab – akoz mon trouv sa en size enteresan.  Ler en dimoun i ganny bends e i antre dan en decompression chamber, apepre konbyen letan i bezwen reste ladan? Enn. Nimero 2 ler napa en decompression chamber en dimoun i  ganny bends ki son tretman, conservative tretman i gannyen e ki son prognosis, eski i kapab geri konpletman?

 

MR HERMINIE

Basically parey mon’n dir, dan decompression chamber i pure oxygen, the whole idea se pou bonbard pasyan avek loksizenn, pou ranvers sa presyon osmotik ant loksizenn e nitrozenn.  Be si ou napa en chamber then ou servi – (interruption) – i tou depan lo severite ou kondisyon e lo ou rezilta. Me sertennman i annan bann protokol – non, non ou kapab al enn erdtan dezerdtan me selman i annan established protocol – mon pa mazin tou sa protokol la parker me selman si ou napa en chamber then ou servi pure oxygen e ou kontinnyelman donnen. Me sertennman son kapasite abzorbsyon i mwens ki letan ou dan chamber. Vwala lavantaz en chamber.

 

MR SPEAKER

Oule konklir si napa lot dimoun.

 

MR PREA

Mon pour brief Mr Speaker.

Mr Speaker mon kontan ki nou’n pran sa mosyon byen e mon apresye – mon ti krwar Onorab Dokter in rouye me mon apresye ki son konesans i ankor bon, mon apresye sa e mon apresye sa bann pti leklersisman ki in donn nou.  E Mr Speaker pour mwan mon kontan, si gouvernman in vin nobou kapab fer sa peyman in full akoz parfwa sanmenm sa ki problenm ki arive, e ki sa  chamber i ariv Sesel byento, mon krwar i pou soulaz nou kominote knowing ki nou annan en lekipman ki la e parey nou tou le de nou’n fer sorti, i pa selman pour nou esper sa aksidan plonze me i annan lezot ka medikal ki kapab ganny…. – me esperon ki bann dokter, bann teknisyen ek bann nurses i kapab repran petet en refresher course ki zot kapab reantre zot ladan.

Mr zis en pti keksoz Mr Speaker lo sa kestyon medical tourism. Mon kontan Prezidan Michel in mansyonn sa. It’s not new. Mon pa kontan mansyonn non dimoun dan sa lasanble me mon kapab mansyonn sa enn akoz sa i en Seselwa ki en pionye, Dokter Souyave. I ti fer en prezantasyon an 1996, akoz mon ti travay avek li, mon ti travay en pti  pe lo son resers avek gouvernman e gouvernman SPPF lo annan en sant Sesel pour viz ver medical tourism me  unfortunately pou lenformasyon sa lasanble san okenn gran, gran, regard son prezantasyon and so on, sa lide ti ganny zete. E la mon anvi dir Onorab Herminie ki ape pre 5 an pase, Maurice in rantre ladan e zot in bouze. I mean plito tard que jamais me something very good kot ou kapab vwar en dimoun – annou pran en foutboler paregzanp apre sa stres world cup paregzanp la kot i santi i kapab vini, combine en vakans medikal e anmenmtan nou annan pour nou ofer li en vakans, plezir relax.

Mr Speaker so mon pa pou al pli lwen ki sa, mon kontan ki nou’n konpran merit deryer mon mosyon e mon a demande ki nou pran en vot lo la. Mersi Mr Speaker.

 

 

 

MR SPEAKER

Tou sa ki an faver lev zot lanmen. Inanim. Alors mosyon in aprouve. Mon annan en pti lanons pou dir zot. Avek konsiltasyon avek tou le de lider mon vwar i annan konsansis pou pran recess pli boner e sa vedir nou fini ozordi ziska nouvo lanons.

 

The Assembly was adjourned until further notice.