::
Home » Verbatim » Verbatim - Second Term 2007 » Tuesday 10th July, 2007

Tuesday 10th July, 2007

NATIONAL ASSEMBLY OF SEYCHELLES

Tuesday 10th July 2007

The Assembly met at 9 am

National Anthem

Mr Speaker in the Chair

MR SPEAKER

Nou a komans ek nou travay pour ozordi. Avan ki nou komans nou travay dapre Order Paper the Chair pe ekspekte en apology from Onorab Georges.

 

HON BERNARD GEORGES

Mr Speaker Mardi pase ou ti demann mwan sorti dan Lasanble e dir mwan ki mon ti bezwen apologize avan re-rantre. Permet mwan silvouple dir ou e sa Lasanble ki mardi pase, ler mon ti pran laparol i pa ti dan mon lentansyon pou challenge..

MR SPEAKER

Mon fini pran en ruling lo lefe ki ou’n challenge mon ruling. I want an apology. I don’t want a statement from you; I want a simple apology to the Chair please.

 

MR GEORGES

Mr Speaker I will..

 

MR SPEAKER

I want a simple apology to the Chair and I’m calling you to order. En ruling ti’n ganny donnen, ti challenge de fwa, I want an apology now.

HON BERNARD GEORGES

You have it Mr Speaker.

 

MR SPEAKER

I have what?

 

HON BERNARD GEORGES

You have an apology.

 

MR SPEAKER

Nou ava kontinnyen avek nou travay. Nou ava komans avek bann questions for oral answers. Kestyon nimero 12.

 

MR TERENCE FRANCOISE

Msye  Speaker mon ti a kontan demann Minis pour devlopman kominoter, lazenes, sport e kiltir pou enform nou Lasanble kan travay lo beach park pour konplete e ki bann fasilite ki pou a dispozisyon piblik.

 

MINISTER VINCENT MERITON

Bonzour Mr Speaker e tou manm Onorab. I fer mwan en gran plezir pour vin parmi zot pou kapab reponn bann kestyon e kontinnyen bann diskisyon ki nou’n annan dan le pase dan sa nouvo sesyon Lasanble.

 

Msye Speaker Anse Royale Beach park i en proze inisye par komite eco-tourism Anse Royale ki enkli ladministrater distrik koman Chairman, reprezantan sorti departman lanvironnman, reprezantan sorti STB e bann dimoun dan kapasite prive ki travay lo sa komite. Sa komite i travay etwatman avek ladministrasyon distrik e zot ti vwar li neseser pou anmenn sa lide beach park koman en fasilite ki anmenmtan kree en landrwa piknik en fasilite rekreasyonnel pou zabitan Anse Royale, lezot manm piblik osi byen ki nou bann viziter. Sa proze ki form parti plan devlopman Anse Royale i sitiye pros avek lofis PUC obor Legliz Anglikan Anse Royale e i donn en longer 300 met e en larzer mwayenn 40 met.

 

Sa proze i ganny konsidere koman en proze delika e se pour sa rezon plizyer lazans tel ki lanvironnman, minister devlopman nasyonal, sanniter e lezot ki’n bezwen kontinnyelman reste an konsiltasyon pou vwar meyer fason realiz sa proze san andomaz lanvironnman. Travay netwayaz, demarkasyon obor semen, e bann pti santye ti komanse an Oktob lannen pase.  Tou bann travay netwayaz in fini e bann santye in osi konplete.  Manm piblik in deza komans servi sa landrwa. Sa proze ki pou enkli bann fasilite barbecue, ban pou asize, twalet, lalimyer e bann santye pou kout anviron R600,000 e pe ganny finanse antyerman par gouvernman Sesel. Mon Mnister pe al tender larestan travay par diferan lo e sa proze in planifye pou konplete an Oktob sa lannen. Mersi Msye Speaker.

 

MR TERENCE FRANCOISE

Mon ti a kontan demann Minis, bann fasilite ki pou ganny met a dispozisyon parey sa barbecue grill ki ou’n mansyonnen, bann fasilite talet eski piblik pou peye sa bann fasilite oubyen i pou ganny servi konmsa menm.

 

MINISTER MERITON

Msye Speaeker ladministrater distrik ansanm avek Eco-Tourism Committee Anse Royale pe diskit bann lozistik kimannyer pou kapab fer marse sa beach park an tenan kont ki nou oule, i swetab ki i marse 24 lo 24 depi lizour, depi aswar e i pou bezwen annan bann fasilite dimoun ki pou ganny anploye la pour fer sir pou man sa landrwa  e pour kapab fer sir ki sa landrwa i ganny byen servi,  protez lanvironnman e anmenmtan  reponn bann bezwen bann dimoun ki vin servi..

 

MR HARDY LUCAS

Mon kestyon se pou demann Minis ki’n arrive avek sa plan pou bouz legliz Anglikann Anse Royale dan sa landrwa aktyel kot pe fer beach park e an retour ki gouvernman ti pou ganny sa later kot legliz Anglikann i ete. Ki pe arive ek sa plan. E si sa proze pe kontinnyen, beach park, eski provizyon in ganny fer pou annan lifeguard dan sa landrwa anvi ki i annan en lapas lanmenm anfas e i tre danzere akoz i annan kouran ki trenn deor e dimoun in deza noye la.

 

MINISTER MERITON

Msye Speaker dapre lenformasyon ki mon annan e dapre bann deroulman e diskisyon e travay sa eco-tourism committee, mon pa okouran plan pour tir Legliz Anglikann kot i ete.  Mon repet sa ki mon’n dir. Proze i komans apre sa biro PUC ziska propriyete, mon krwar pour en Msye Mancienne e tou le lon sa beach front, la ki mon’n dir i en loger 300 met e en mwayenn 40 met larzer.

 

Dezyenm kestyon, wi nou an diskisyon avek en operater ki pe fer en watersports centre pou kapab adres sa kestyon lifeguard pou protez bann zanfan e lezot dimoun ki vin servi sa landrwa.

 

MR ANDRE POOL

Msye Speaker mon ti a kontan demann Minis pou eksplik  nou ki bann mezit ki zot pe pran oubyen ki zot pou pran pou fer sir kik sa beach park i ganny proteze kont vandalism ki en problenm ase serye dan nou pei ozordi.

 

MINISTER MERITON

Msye Speaker deza biro ladministrasyon distrik Anse Royale i pe travay an kolaborasyon avek departman lapolis pou asire ki sa landrwa ki ganny mete e dispozisyon piblik, i ganny respekte e ki napa vandalism ki pran plas. I malere ki mon bezwen raport avek lasanble bomaten ki deza nou’n met bann pti poto tou dilon – bann ki’n mont Anse Royale i vwar – me kote larante kot nou ti anpes veikil antre deza in ganny tire e veikil i ganny akse lo lans.  So deza vandredi mon ti lo en site visit e nou’n alert lapolis e deza bann dimoun in ganny demande pou sorti lo la akoz i en landrwa ki bezwen ganny proteze pour fer sir ki mwan ek ou ler nou servi nou an tou sekirite e ki sa landrwa i ganny respekte pour tou dimoun servi.

 

MR TERENCE MONDON

Mon ti oule demann Minis anvi ki lotorite distrik Takamaka osi in fek ganny laprouvasyon MLUH pou annan en landrwa Anse Marie-Louise similar ek Anse Royale, eski son Minister i annan sa kapasite resours an se moman la  pour kapab nou osi bouz nou proze, ouswa nou pou bezwen esper lannen prosenn.

 

MINISTER MERITON

Parey i leka Mr Speaker ladministrater distrik avek son lekip dan distrik, son district team i ava met sa lo azanda travay e met demann avek Minister Finans ki ava ganny konsidere pou gete kan ki sa proze i kapab ganny enplimante.

 

MS MARIE – ANTOINETTE ROSE

Anvi devlopman rapid ki pe arive dan bann distrik, mon ti a kontan demann Minis si son minister pe earmark serten landrwa dezinyen pour bann park pour kapab annan sa balans ant devlopman e osi bann landrwa lwazir dan bann distrik. Mersi.

 

MINISTER MERITON

Msye Speaker enn bann travay enportan biro ladministrasyon distrik se pa zis get dan kestyon lakaz, semen, fasilite sportif me osi asire ki sak distrik i annan bann fasilite rekreasyonnel, lwazir adekwat pour son zabitan. E sa kestyon bann beach park i osi enn ki enportan e sak ladministrater distrik depandan lo son zeografik, son distrik kot i ete i devret kapab pe vwar e diskit avek departman gouvernman konsernen atraver son reprezantan lo district team pou gete kimannyer nou pou kapab trouv bann teren apropriye e devlop bann proze pou kapab  reponn sa bann bezwen.

 

 

 

MR SANDY ARISSOL

Anvi ki bann proze parey beach park Minis i anmenn bann aktivite lwazir, sa i anmenn bokou dimoun, eski ou koman Minis ek ou Minister zot in mazin fasilite parking paregzanp kot parfwa i vin en problenm pour sa beach park, Anse Royale.

 

MINISTER MERITON

Mr Speaker fasilite parking i dan planifikasyon – si nou pe koz lo beach park Anse Royale, landrwa opposite sa beach front la vizavi sa fence la, i annan en distans ape pre 2 met ki’n ganny dedye zis pour parking bann loto pour ki napa konzesyon e anbaras trafik.

 

MR RAMKALAWAN

Eski Minis i kapab dir nou, dan sa bann konsiltasyon, letan pe konsilte lo nivo distrik si MNA distrik li osi tou in involved dan sa bann diskisyon. E anmenmtan osi parski MNA li i  konn son distrik enpe plis ki bokou bann dimoun dan distrik.  E dezyenmman ki rol DCC dan sa bann negosiasyon.

 

MINISTER MERITON

Msye Speaker ler prezantasyon lo beach park ti ganny fer lannen pase, pour piblik, pou zabitan Anse Royale, former MNA ti la, i ti ganny sans partisipe e nou oule ki otan ki posib, bann proze mazer dan distrik ki nou met li a la porte piblik pour dimoun i ganny sansibilize, i ganny met okouran bann diferan devlopman ki pou pran par pour zot kapab donn zot input kote kot nou santi nou bezwen sa input e pou fer sir ki gouvernman dan lenplimantasyon son progranm lo lekel – paregzanp lannen pase Prezidan Michel ti ganny elekte, nou pe enplimant sa progranm ki bann lezot azans paregzanp MNA i okouran ki pe pase. E mon ti apresye prezans Onorab Faure dan bann tel konsiltasyon e otan ki posib nou pou met sa a laporte zabitan distrik e nou swete ki bann MNA i kapab vini vin ekoute zot osi e partisip ladan.

Ki rol DCC dan sa konsiltasyon, DCC i en forum demokrasi lokal dan distrik kot tou bann lazans, enkli bann MNA i kapab vini met zot pwennvi, met zot konsern devan e la ladministrater distrik ki Chair DCC li i pran sa i anmenn li lo en lot nivo kot aksyon i pran plas ler sa bann keksoz i ganny adrese.

 

MR CHARLES DE COMMARMOND

Msye Speaker eski Minis i kapab petet eklersi nou en pti pe relasyon sa beach park avek zafer dezyenm lavil pou al Anse Royale, i sipoze annan en lavil pou fer, pa pou afekte li?  Ki relasyon i annan ek sa beach park.

 

 

 

MINISTER MERITON

Parey mon’n dir Msye Speaker, beach park project i form parti   devlopman Anse Royale.

 

MR SPEAKER

Bon nou a pran lot kestyon nimero 13. Onorab Vel.

 

 

MS JENIFFER VEL

Mersi Mr Speaker. Bonzour Msye Minis, bonzour tou manm Onorab. Mr Speaker mon ti ava kontan demann Minis si i kapab enform lasanble si son minister i annan plan pou fer renovasyon lo bann fasilite sportif  dan distrik Pointe Larue e si i annan plan pou met fasilite ekleraz lo lapenn foutbol e lo kort.

 

MINISTER MERITON

Msye Speaker dapre plan ki ladministrasyon distrik La Pointe Larue in soumet avek mon minister, renovasyon fasilite sportif ki konpri fasilite laplenn foutbol, osi byen ki multi purpose court pour ganny fer lannen prosenn depandan lo alokasyon bidze minister finans. Apard ki renovasyon sa bann fasilite, konsiderasyon pour osi ganny donnen pou met lalimyer lo laplenn ek court. Sa proze in estimen pou  kout R75,000.

Msye Speaker pou lenformasyon lasanble mon minister in depans en sonm R150,000 an 2005 pou fenced laplenn foutbol ek kort.  I malere pour kestyon vandalism ankor ki sa fence in sibir bokou domaz. Mon oule alors servi sa loportinite pou lans en lapel ek tou sportsmen, e zabitan pou fer en zefor spesyal pou gard sa bann fasilite ki gouvernman i met a zot dispozisyon an bonn eta.

 

MR SPEAKER

Okenn siplemanter.

 

MS VEL

Eski Minis  i kapab enform sa lasanble si dan sa plan pour lannen prosenn i enkli bann fasilite paregzanp changing room.

 

MINISTER MERITON

Msye Speaker nou pa ti’n prevwar met changing room me anvi ki la i annan demann pour en tel fasilite nou ava enkli sa e met li devan Minister Finans pou ganny konsiderasyon.

 

MR SANDY ARISSOL

Mon ti anvi zis demann Minis si sa bann fasilite paregzanp, mon tann Onorab Vel pe demande, si eski li osi aplik pour lezot distrik, en legzanp St Louis. E osi dezyenm kestyon si ou minister ti’n mazin met sistenm ekleraz lo laplenn St Louis basen on top ki ganny administre par ladministrasyon distrik.

 

MR SPEAKER

Dezyenm parti kestyon si Minis napa sa lenformasyon a son dispozisyon, then i kapab toultan reponn in writing.

 

MINISTER MERITON

Msye Speaker otan ki posib depandan lo resours nou ekip bann distrik avek parey mon’n dir taler bann fasilite ki pou permet bann zenn epanouir dan diferan domenn ki zot deside antre ladan. E bann fasilite sportif e rekreasyonnel i enn parmi. Parey nou ava vwar dan laplipar bann distrik i annan  swa en pti kort, en pti laplenn foutbol oubyen en multi purpose court kot otan i posib nou amelyore parey mon’n dir depandan  lo resours me selman i depan lo dimoun, i depan lo nou isi pour kapab sansibiliz parey Lider Lopozisyon in dir ki nou pli pre ek nou dimoun, annou pli pre ek nou dimoun poudir zot konmsi respekte sa akoz i kout larzan sa bann fasilite ki nou met dan distrik.

 

MR RAMKALAWAN

Eski Minis i kapab donn nou enpe detay lo – parski in koz lo vandalism, ensidswit, ki degre afekte sa bann fasilite sportif Pointe Larue in ganny afekte, konmsi donn nou enpe bann detay, konmsi ki pou zistifye sa larzan ki ou pe mazin rode oubyen si sa larzan ki ou pe mazin rode finalman i pa pour sifizan, alors i pou zis en travay lanmwatye e ki finalman sitiasyon pou reste parey.

 

MINISTER MERITON

Msye Speaker mon a dir ou, parey ti montre lo televizyon avan-t-yer swar kot bird sanctuary la, in tir tout en distans. La Pointe Larue mon’n gete – yer swar mon’n pase mon’n al gete i annan de gro blok, de kare, de segment in ganny tire. Apre tou dilon i annan bann trou dan fence. I paret mwan serten dimoun ler i sorti lo kort, nou pa fer letour dan baro me deswit nou pas atraver pour kot legim i ganny vann la. So la la i annan de segment kot fil napa ditou apre i annan bann trou, trou partou kote.

 

MR ANDRE POOL

Msye Speaker ans ki konsern renovasyon lo bann kort, kort Pointe Larue e lezot byensir, eski Minis i kapab eksplik nou sa relasyon travay ki annan avek bann lezot lazans paregzanp LTD ans ki konsern met sirfas lo bann kort.  Kimannyer sa i marse, eski i satisfe oubyen eski i annan plan pour sanz sa alavenir akoz  mon leksperyans mon santi i annan problenm dan sa direksyon.

 

MINISTER MERITON

Msye Speaker  parey mon’n dir taler ler mon ti pe reponn sa kestyon se ki bann problenm ki ganny souleve dan distrik, solisyon i bezwen ganny trouve dan distrik. E statement ki mon pe al fer i a montre nou ki si dizon i annan   serten mal antandi ant de zofisye, de lazans dan gouvernman e mon krwar landrwa kot nou trouv solisyon se dan district team kot dizon sa ladministrater distrik avek reprezantan LTD nou kapab trouve kimannyer pour kapab adres solisyon. Me an zeneral mon satisfe avek kolaborasyon ki egziste ant nou minister avek LTD dan lenplimantasyon bokou bann proze ki tonm anba portfolio LTD. La ankor nou bezwen kapab kontinnyen amelyor sa relasyon pou benefis bann dimoun ki servi nou bann fasilite dan distrik.

 

MR DE COMMARMOND

Msye Speaker zis pour Minis eklersi. Taler in dir sa proze pou fer lannen prosenn, i pou kout R75,000. Etan donnen ogmantasyon dan pri materyo e dan pri labour, e sa pou fer lannen prosenn. Eski pa ti a en pli bon lide zot revwar sa kotasyon avan met li devan Minister Finans.

 

MINISTER MERITON

Nou a konsidere Mr Speaker. Mersi.

 

 

 

 

MR SPEAKER

Nou ava al lo statement. Minister for Community Development, Youth Sports and Culture. Minis.

MINISTER MERITON

Msye Speaker in toultan polisi nou gouvernman pou met dimoun osant devlopman. Avek formasyon Minister Devlopman Kominoter, Lazenes, Kiltir ek Sport, nou’n reafirm nou langazman dan prosesis devlopman kominoter dan distrik.  Sa i anlinny avek nou bann gran lobzektiv pou kontinnyen amelyor nivo lavi nou sitwayen. Bokou lanfaz pe ganny mete pou ogmant kalite servis e partisipasyon tou sekter e group konsernen dan prosesis pou reponn bezwen e aspirasyon dimoun dan kominote. Mon Minister i fermeman krwar dan en lapros entegre ans ki konsern devlopman kominoter. Zefor e travay gouvernman i ganny met ansanm avek zefor e travay zabitan distrik pou alimant en kominote e fer li vin pli vibran. Nou determinen pou devlop e ranforsi sa partenarya avek tou nou bann partner afen ki zot servis, progranm e resours i ariv dan distrik pou benefis lakominote. Dan sa konteks departman Devlopman kominoter lannen pase ti organiz en seri travay depi Septanm ki ti annan pou bi rod bann mekanism pou devlop sa lespri partenarya pou antreprann travay devlopman distrik koman en lekip.

Sa prosesi mobilizasyon e sansibilizasyon ti pran anviron 7 mwan kot departman devlopman kominoter ansanm avek tou lezot partner in devlop en stratezi dan lafason kimannyer pou ogmant kapasite ladministrasyon distrik pou donn en pli bon servis e redinamiz bann striktir e progranm e pou solisit partisipasyon lakominote.

Sa i anlinny avek direksyon ki Prezidan Michel ti trase dan son diskour inogirasyon le 9 Out kan i ti dir ki travay gouvernman i bezwen ariv a en nivo ki pou garanti en bon servis pour nou sitwayen.  Nou bezwen rankontre dimoun dan zot landrwa travay e kot zot pe viv. Kan nou pre avek dimoun, i pli fasil pour nou konpran e efektivman adres zot bezwen.   Sa i en sitasyon.

Mon minister an kolaborasyon avek bann partner in arive met anplas en makanism dan tou distrik ki’n adopte en lapros travay  a’n ekip apele district team. Sa i konpri bann minister e lorganizasyon swivan.  Minister Devlopman Nasyonal, Land Transport, Lasante, Lanplwa, Zafer Sosyal, Lazenes, Kiltir, Sport, lanvironnman, Ledikasyon Lapolis, PMC, HFC, PUC e lezot lazans ki nou kapab ko-opte ler i neseser.

District team i sa nouvo striktir apard ki DCC, district social committee e tou lezot striktir e progranm ki an egzistans. I sa pwen fokal kot tou bann size an relasyon avek tou servis esansyel e progranm dan distrik i ganny antreprann. Bann reprezantan sak Minister e departman e lazans i fer sir ki liyezon e aksyon apropriye i ganny pran. Bann district team in ganny organize dan tou distrik depi fevriye sa lannen.  Msye Speaker prezans e aksyon bann team in fer en diferans dan bann distrik. Paregzanp Anse Boileau ler ti annan premye miting minister lasante ti met devan sa konsern leptospiroz dan distrik e tou-d-swit, bann manm district team ti met zot ansanm pou prepar en kanpanny anti-leptospiroz. Travay ti demare an Avril e i ti enkli bann aksyon swivan; progranm sansibilizasyon pour zabitan lo danze leptospiroz, netwayaz otour sant lasante e travay volonter dan tou sou-distrik, e kanpanny pou sansibiliz zabitan pou protez zot lakour, e zot lekor kont lera.

Mr Speaker travay pe kontinnyen dan distrik. La aktyelman district team pe travay lo en lot progranm, sa voyaz ansanm avek departman lapolis pou adres problenm drog dan distrik.

Dan distrik Grand-Anse Mahe Msye Speaker apre ki bann manm district team ti ganny alerte lo nivo problenm bandisite dan distrik, departman lapolis ti vin avek en progranm pou ranforsi plis patrol. Bomaten dan lazournen e aswar, relasyon ant lapolis avek lotorite distrik i a’n bonn sante.  E ozordi sitiasyon dan distrik in sanze, touris pa pe ganny vole e zabitan i pli an sekirite. Sa partenarya i kontinnyen.  Dan sou distrik Pti Barbarons Land Transport avek departman lanvironnman in anbark dan en proze netwayaz ki enkli retir bann plan anvaisant, deblokaz bann drenaz e koup bann pye dibwa ki danzere.

Atraver diskisyon dan district team nou’n osi annan en formasyon organize par departman zafer sosyal e travayer health centre pour bann home carers pour ki zot donn en pli bon servis bann dimoun aze dan kominote. Distrik Grand Anse Mahe avek sikse pe enplimant en proze reabilitasyon laplaz  e sansibilizasyon zabitan lo lanvironnman.  Sa proze i enkli partisipasyon minister ledikasyon, departman lanvironnman, minister lasante e departman devlopman kominoter.

Dan distrik St Louis Msye Speaker dan meeting district team diskisyon ti ganny fer otour problenm salte dan ex-Geers flat. Apre diskisyon minister lanvironnman, land transport, avek ladministrasyon distrik ti anbark lo en proze met en sistenm railing avek bann dustbin pou amelyor sitiasyon.  Msye Speaker dan sa nouvo metod travay, bann size pertinan dan distrik i ganny adrese pli vit dan lesans ki la kantite biro krasi i ganny koupe e desizyon e aksyon i ganny pran deswit par bann ki konsernen, bann best practices i osi ganny partaze.  Parey Prezidan ti fer sorti dan son diskour leta lanasyon le 20 mars sa lannen, otan ki posib, bann servis enportan pour ganny desantralize pou ariv dan distrik. Tou minister pou bezwen travay avek kominote pou delivre en servis pli efikas pour bann zabitan distrik. Fer en sitasyon.

Msye Speaker pou asir bon deroulman district team mon minister lo nivo sekretaryat an kolaborasyon avek bann lezot minister e lazans in met de komite enter ministeryel anplas ki appel inter agency consultative committee ki la pour siperviz, evalye e donn sipor enplimantasyon, bann aksyon district team lo nivo distrik.  Enn i pou bann progranm kominoter e lot i pou service delivery. Tou demars konsiltasyon ek bann partner zefor, gouvernman e zefor dimoun dan kominote i annan en sel bi, prodwi e travay lo en azanda komen. Lapros district team se enn ki permet sa dyalog kontinnyel pran plas dan distrik pou kapab adres lekspektasyon bann zabitan. I osi permet bann partner pour pli sible zot entervansyon e aksyon  anterm resours e planifikasyon zot travay e zot bidze.

I enportan pou note ki ladminstrasyon distrik i sa laport kot aksyon kominoter i ganny kanalize dan en fason armonyez, efikas e realis.  Nou bezwen alors ranforsi kapasite nou ladministrasyon distrik dan tou son sans.  Bann biro i bezwen annan plis lespas pour bann travayer kle tel ki zofisye lakaz, zofisye sosyal, travayer lazenes e lezot kapab travay dan en lanvironnman apropriye.  Demars pe ganny fer pou ki tou biro ladministrasyon i ganny ekipe avek bann fasilite neseser e resours apropriye.

Striktir ladministrasyon distrik i osi bezwen enn ki solid ki kapab fer fas avek nouvo lapros travay e defi prosesis devlopman kominoter. Apard ki DA i enportan ki i annan ankor travayer kle pou asiste travay ladministratif bann progranm e proze kominoter lo nivo distrik. Bann formasyon neseser pe ganny kontinnyelman organize pou diferan travayer dan sa bann domenn swivan. Computer skills, GIS, training pour sekirite, office management, people’s management, supervisory skills, leadership e customer care. Demen menm an kolaborasyon avek SIM nou pe komans en job analysis workshop pou idantifye dan en fason profon nou bann bezwen anterm kapasite resours imen e adres bann defayans pour kapab amelyor nou servis.

Msye Speaker dan tou sa travay nou bezwen kolaborasyon parey in ganny demande taler, tou bann lazans  ki nou tou dan distrik nou travay koman en tim, koman en lekip e nou met lanfaz lo sa azanda komen. E mon oule servi sa loportinite pour mwan kapab remersi tou bann partner ki pe travay lo nivo distrik, lo nivo nasyonal pou donn nou sa sipor pou bann ki’n angaz zot dan sa travay pou fer en diferans dan travay gouvernman dan distrik. Ansanm nou pou kontinnyen travay pou devlop nou distrik e devlop nou pei. Napa lot fason pour fer li. Mersi Msye Speaker.

 

MR SPEAKER

Nou ava permet bann kestyon pou rod leksplikasyon anlinny avek order 26. Onorab Mondon.

 

MR TERENCE MONDON

Minis in mansyonn bann azans ki pe travay ansanm dan sa lekip.  Mon pa’n tann nonm bann lazans non-gouvernmantal. Ki zot rol dan sa travay ki pe al ganny fer.

 

MINISTER MERITON

Msye Speaker bann NGOs, bann mouvman asosyativ e bann lezot group i annan en rol enportan pou zwe dan travay distrik. Lo district team nou kapab call lezot lazans NGO ler i neseser.  Me prensipalman bann NGOs, bann mouvman asosyativ e lezot agencies ki mon pa’n nonmen i fortman konsantre lo travay district social committee ki annan en rol pou sanz serten konportman, diferan group laz, diferan group lentere dan distrik.  Pour nou ki’n swiv nouvel lo medya sa dernyen 4 zour, nou trouve poudir sa kestyon drog i preokip tou kous nou sosyete. Departman lazenes in fer serten travay, bann group zenn an kolaborasyon avek district team in fer serten travay dan rezyon sid was e sa i montre ou kimannyer nou kapab travay an etwat kolaborasyon avek bann NGOs, DAC, Care e lezot ankor in zwenn nou, in angaz nou dan sa travay pou pran sa ekspertiz, sa konesans e anmenn li dan distrik kot nou kapab fer en diferans pou kapab lit kont sa bann fleo.  So vwala kimannyer nou travay avek bann lazans e nou nou pe kree sa bataz, sa lespas pour ki bann NGOs ki operate lo nivo nasyonal kapab anmenn zot servis e zot progranm dan distrik kot parey Angle i dir, it matters most, kot nou kapab fer en diferans, kot i annan plis lenpakt.

 

MR BERNARD ADONIS

Msye Speaker Minis in mansyonn sa inter agency consultative committee, mon ti ava kontan demann Minis si i kapab donn nou en pti pe plis lenformasyon paregzanp lo konpozisyon sa komite e osi en pti pe ki son rol an detay.

 

MINISTER MERITON

Mr Speaker parey mon’n dir i annan de inter-agency consultative committee. Ler nou ti komans sa prosesis 7 mwan pase, an Septanm nou ti komans prezant nou bann progranm ki nou fer dan departman avek tou bann larestan azans gouvernman e NGOs, lo ki nou fer dan distrik, ki posibilite i annan pour zot kapab zwenn nou, anmenn zot servis dan distrik.  Apre sa nou’n fer bann diferan konsiltasyon kot zot osi zot in vini, zot in dir nou ki servis zot kapab anmenn dan distrik. Apre nou’n vwar, nou’n fer bann sesyon kot nou’n pran tou bann reprezantan lo nivo distrik avek zot DA, ICCS kot nou kapab fer en progranm ki ava pran servis ki en departman i donnen lo nivo nasyonal, anmenn li dan distrik e nespes met li dan en plan travay.  Anmezir sa in fonksyonnen nou’n trouve poudir i annan en nesesite ki nou  tat pou. Nou etidye lasante sa bann district team atraver bann lazans ki involve onivo distrik. Se pour sa rezon ki in anmenn nou 2 sa inter-agency consultative committee. Enn ki direkteman deal ek bann servis e enn ki deal ek bann progranm.  Pa pour nou kontrole me pour nou evalye, pour nou kapab gete kimannyer nou kapab gete, eski sa prosesis pe mars byen, eski i annan en nesesite aziste akoz gete i en prosesis sa e dan en prosesis ou bezwen kapab pare pou aziste, pou aranze pou kapab fer li mars byen. La la rol sa 2 inter-agency consultative committee, pou evalye, pour monitor, pou pran serten size ki nou santi si i annan serten blokaz, lo sa nivo e anmenn li lo nivo sa lazans si nou santi ki leadership i bezwen ganny met okouran e apre deblok li.  Be selman fodre  dir ki district team limenm avek bann reprezantan aktiv ki pasyonnen ki pran son travay serye pa devret annan sa bann blokaz dan bann minister konsernen. Me an tout fwa sa bann inter-agencies i la pou kapab parey mon’n dir tat pou e swiv lasante kimannyer sa bann striktir pe marse dan distrik akoz i nouvo i bezwen, there is bound parey angle i dir, pou annan bann problenm e nou nou la ou asire ki sa bann keksoz i marse, i fonksyonnen. E sa inter-agency consultative committee i enkli bann lazans ki egziste osi lo nivo distrik. So i en replica ki arive lo nivo distrik e lo nivo nasyonal.

MRS GAMATIS

Msye Speaker eski Minis i kapab konfirmen ki avek aparisyon sa tim distrik, aprezan bann zabitan distrik ava arête monte, desann pou al rod en solisyon pour zot problenm oubyen zis pou ranpli en form. E ki aprezan tou sala ava ganny rezourd onivo distrik menm. E ki birokrasi dan son totalite ava ganny eliminen.

 

 

 

MINISTER MERITON

Mersi madanm Gamatis, ou’n konpran finalite sa prosesis ki nou pe anmennen, solisyon problenm dan distrik i bezwen ganny trouve dan distrik, napa lot fason.  Si i annan en problenm ki ariv dan distrik, sa reprezantan sa lazans i devret pran deal avek parey nou’n dir taler, koup sa birokrasi. Elimin li, i pou pran nou enpe letan i en prosesi parey mon’n dir. Nou oule redwir sa ki bann Minister i ava ganny plis letan pou kapab kalkile, planifye, fer en stratezi kimannyer pou kapab amelyor servis an prenan an konsiderasyon sa bann evantyalite ki travay dan distrik, me les bannla dan distrik travay, rod en solisyon ki sorti dan distrik.

 

MR B. GEORGES

Mr Speaker avek bi demann Minis konfirm avek sa lasanble, ki sa nouvo lapros ki gouvernman i oule adopte dan distrik i pou byennet distrik e non pa zis en fason pou ogmant kontrol parti ki opouvwar onivo distrik. Mon ti a kontan demann Minis sa 2 kestyon silvouple. Premyerman eski Minis i siport  pozisyon son predeseser ki tou ladministrater distrik i devret siporter parti ki o pouvwar, namely SPPF e dezyenmman ki rol MNA ki’n ganny elekte sirtou bann ki pa sorti dan parti opouvwar dan sa nouvo striktir ki gouvernman in adopte.

 

MINISTER MERITON

I pa bi gouvernman pou rod plis kontrol lo fonksyonnman bann keksoz dan distrik. I bi gouvernman, premye statement se pou met dimoun osant devlopman, pou permet ki dimoun i kapab debout lo zot lipye e pran kontrol, pran sarz son lavi. Gouvernman i la i pou met serten fasilite ki dimoun i kapab servi pou kapab adres son bann bezwen, realiz son bann aspirasyon e kontribye dan devlopman nou kominote  spesifikman  atraver sistenm ladministrasyon distrik ki gouvernman in met anplas.

Ladministrater distrik i en dimoun ki i en pozisyon kle, en pozisyon enportan e nou bezwen asire ki tou sa bann dimoun ki pe travay dan en pozisyon kle dan distrik ki asire ki nou pe promouvwar polisi gouvernman mon ti a kontan konfirm sa pozisyon ki gouvernman i annan vizavi sa kestyon.  Dezyenmman  rol MNA parey in ganny fer sorti taler, MNA son rol i ganny tre byen defini dan konteks district community council kot i kapab vini e fer son lavwa ganny tande ansanm avek lezot agencies. Depi lekol lapolis, travayer sosyal lo sa nivo konsiltativ, lo sa nivo advisory lo sa nivo en foronm pou demokrasi lokal ki permet parey nou’n dir dimoun ganny sans koze pou permet ki apre sa lot lebra ki action oriented i pran sa bann keksoz e azir lo la.

 

MR POOL

Msye Speaker mon premye kestyon se pou demann Minis pou eksplik nou lasanble ki lenplikasyon bidzeter sa bann lanons ki in fek fer, devan nou lasanble e dezyenmman ki demars son minister pe fer pou prepar bann resours imen e lenfrastriktir neseser pou kapab enplimant sa bann nouvo lapros travay dan nou distrik.

 

MINISTER MERITON

Msye Speaker mon’n dir dan statement ki nou pou bezwen donn lespas pou permet ki reprezantan bann lazans i kapab travay dan en lanvironnman konfortab, sa vedir nou bezwen kapab – i en legzersis ki’n ganny fer, e ki byento nou ava soumet avek Minister Finans pou azout dan bann biro ladministrasyon distrik ki napa fasilite pour bann lezot reprezantan kapab annan sa. Me i pa zis lenfrastriktir me i bann lezot depans ki konekte avek sa depi telefonn, ziska elektrisite e lezot ankor.  Ans ki konsern resours imen, i annan formasyon konstinnyen ki pe ganny fer. I annan osi sa human resource needs, sa job analysis workshop ki nou pe fer avek SIM demen menm ki mon’n dir tout an preparasyon pou asire ki sa bann dimoun ki la i kalib ki pou fer sir ki ler en dimoun ki pa neseserman siport polisi gouvernman i vin kot biro ladministrasyon distik ki i pa ganny trete, ki pa ganny diskrimine me tou dimoun i ganny trete egal ki nou fer sir ki nou kapab donn en bon servis nou bann dimoun, sa i pe pran plas, formasyon pou kontinnyen pran plas lo tou nivo pou asire ki sa ki nou’n dir i en keksoz ki arive e ki ert dan distrik.

 

MRS M_LOUISE POTTER

Msye Speaker, Minis i kapab eksplik nou en pti pe plis ki kalite line of authority pou annan lo nivo distrik, ant DA limenm ek bann manm district team. Oubyen pli presizeman avek ki sa bann manm district team pou answer avek DA oubyen avek zot bann minister respektiv. E dezyenmman ki pouvwar e resours sa bann zofisye pou annan lo nivo distrik a zot dispozisyon pour zot nobou reponn a bann demann, ekspektasyon nou popilasyon, sa ki konsern bann problenm ek bezwen.

 

MINISTER MERITON

Msye Speaker dan district team taler mon’n sit bann lalis agencies ki zot reprezantan pou asiz dan distrik, line of authority i reste ki sa bann zofisye i pou reponn avek son lazans, dizon kot lanvironnman, en reprezantan lo district team Anse Royale i reponn avek son departman lanvironnman me i ganny coopted, i ganny seconded si oule dan biro ladministrasyon distrik pou asire ki travay ki konsern departman lanvironnman i ganny byen sible taler, nou pran konsiderasyon ki defi dan lanvironnman, dan distrik Anse Royale i annan. Once sa in ganny fer, sa zofisye, li koman en teknisyen i  planifye son travay dan sa lalinny, pa neseserman ki DA i okouran sa akoz i pa’n ganny formen dan sa domenn lanvironnman. Me sa kestyon sipervizyon, e kolaborasyon, e planifikasyon, i enportan ki i pran plas lo nivo distrik pour ki si nou bezwen fer bann lenspeksyon konzwent nou fer li byen ki nou pa pe mars lo lipye kanmarad, ki nou pe koz menm langaz, nou kapab optimiz resours kot i neseser. So i reste sa line authority avek son departman teknik me osi i travay an kolaborasyon etwat avek DA pou fer sir ki son bann travay i reflekte priyorite dan sa distrik. Me osi pa anpese ki ladministrasyon distrik i vwar si i pe dereye, i call him to order dan lesans ki nou pa pe vin bouldoz dimoun me nou pe travay pou kapab gid en dimoun. Akoz en DA i parey en manman en distrik, en papa en distrik me sa sarz distrik ki i annan sa responsabilite pou fer sir ki tou keksoz, ki tou bann deroulman dan tou domenn i pe fonksyonn byen pou reponn bezwen laspirasyon dimoun.

Power avek resours; resours i ganny donnen dan son departman ki’n ganny allocate, ki’n ganny dedye pour distrik Cascade paregzanp ki ganny servi parey in ganny allocate pour kapab fer marse bann progranm.  Nou mon krwar Mr Speaker nou an diskisyon kontinnyel akoz mon’n dir i en prosesis me i annan keksoz nou bezwen gete, aziste, aranze pour li kapab vreman reponn bann bezwen me pour minimize birokrasi, optimiz resours e reponn bann bezwen kominote.

 

MR PIERRE

Mr Speaker eski Minis i kapab dir nou si zot in fer en estimasyon lo sa average yearly budget ki sa district team pour bezwen pour ki zot fer marse sa team dan en fason efektiv.

 

MINISTER MERITON

Msye Speaker en legzersis pe ganny fer pou fer sir ki tou bann konponan i pran konsiderasyon pou permet ki fonksyonnman i vreman vin reel.

 

MRS MARC NAIKEN

Mr Speaker eski Minis i kapab eksplike  ki relasyon travay pou annan ant DCC avek district team. Mon dezyenm kestyon Lonorab Potter in fini demande.

 

MINISTER MERITON

DCC Msye Speaker i advisory ki permet, pour trwazyenm fwa mon a dir, sa demokrasi lokal pran plas. I permet ki bann dimoun i bezwen (..) nou bezwen ranforsi li. Annefe mon ava enform zot ki mon annan lentansyon revwar konpozisyon district community council pour permet en pli gran levantay lide, pou permet ki sa prosesis konsiltasyon, advisory e osi pou permet ki nou ganny plis pwennvi, pou permet district team i a ganny plis bagaz dan son travay dan distrik.

 

MR FRANK  ELIZABETH

Eski Minis i kapab dir avek lasanble si sa lide district team i lenplimantasyon sa konsep ki Prezidan Michel ti anonse le 18 Zen pou desantraliz servis e anmenn li plis lo nivo distrik. E osi si Minis i kapab eksplike kimannyer district team i fer son travay dan distrik, eski dimoun i vin kot ladminstrasyon distrik pou zwenn district team oubyen district team li i al dan lakour bann dimoun, pou regarde ki zot bezwen ki ki zot bann problenm dan distrik.

 

MINISTER MERITON

Wi Msye Speaker, sa lapros konsep district team i en prosesis ki’n komanse depi byen lontan. Anmezir fonksyonnman biro ladminstrasyon distrik, i annan en nesesite in ganny trouve pour ki distrik i idantifye son bann bezwen, distrik osi i kapab adres bann size pli vit ki posib. Si oule sa lapros ki nou pe pran i reponn en bezwen ki ganny resanti dan distrik e osi montre kimannyer Prezidan i a lekout devlopman ki pe arive, pa zis lo nivo nasyonal me osi onivo distrik e ki i anmenn gouvernman pli pre avek popilasyon dan distrik atraver sa set up ki’n ganny met anplas la.   District team, i en konsep, i en lapros. Zour Msye Elizabeth i al kot son distrik, i annan en serten konsern pa bezwen ou bann district team i anlinyen la. I annan en zofisye spesifik ki sa konsern pou ganny pran an konsiderasyon, li apre i deal avek, li. Pa bezwen ou al kot sa pov DA akoz i pa en superman li. I pran sa size konsernen i pas avek sa zofisye konsernen, li i deal avek. Pa bezwen i esper en lot meeting, i pa bezwen esper DA al vizit li. Nou oule fast track solisyon kimannyer pou trouv solisyon bann problenm.

 

MR RAMKALAWAN

Lo sa size DCC an relasyon avek community district team, eski Minis i kapab konfirm avek nou ki dan sa reorganizasyon ki i pe koz lo la bann manm lopozisyon ki pa’n ranport eleksyon dan zot distrik e bann manm lopozisyon ki asiz dan lasanble lo baz proporsyonnel zot osi zot ava ganny konsidere pour zot asiz lo sa DCC etan donnen ki dan lepase tou bann manm SPPF ki’n perdi eleksyon e ki’n osi zis ganny propoze koman kandida dan zot distrik zot osi zot in form parti DCC. E eski i kapab osi dir avek nou enn de bann nouvo keksoz ki i pe vwar dan sa devlopman, dan sa nouvo vizyon.

 

MINISTER MERITON

Premye parti kestyon, wi Lonorab Ramkalawan mon ava konsidere. Dezyenm bout mon pa tro kler lekel nouvo vizyon. Ou’n koz lo DCC dan ou lentrodiksyon ou, ou pe reste lo DCC.

 

MR RAMKALAWAN

Wi, wi.

 

MINISTER MERITON

Lo DCC parey mon’n dir mon annan lentansyon revwar konpozisyon DCC  pou permet ki – young blood keksoz bouze, dimoun a met plis lide ki apre nou a kapab pran sa e met li an aplikasyon lo lot nivo gouvernman dan distrik ki district team.

 

MR  JOSEPH FRANCOIS

Bonzour Minis, bonzour bann Onorab. Mr Speaker parey nou konnen dan bann distrik tou le lannen oubyen tou le peryod letan zot prodwi bann plan daksyon sirtou letan nou’n tande ki bidze distrik i annan en propozisyon ki kapab desantralize avek gouvernman nasyonal, Mr Speaker eski Minis i kapab dir nou ki fason petet bann Minister pou entegre sa bann bidze, rekomandasyon distrik  anba zot prop bidze, oubyen petet zis sa bann dimoun pou reste koman bann dimoun servis regilye dan bann distrik me non pa lenplimantasyon proze kapital.

 

MINISTER MERITON

Msye Speaker mon pa’n fer statement bomaten lo lefe ki bidze pe vin dan distrik. Ki nou’n dir bomaten, nou’n etablir nou bann priyorite dan distrik, tou bann agencies, e soumet sa avek gouvernman santral pour apre gete kimannyer alokasyon pou ganny fer pou kapab adres bann bezwen. Now lo ki nivo i ete, gouvernman i ava deside ape i a pran en desizyon me i reste kle e enportan ki bann travayer lo district team zot irespektiv kote bidze i ete, ki once en proze in ganny earmark e bidze, resours finansyel in ganny donnen pou lenplimantasyon sa proze, ki sa district team dan sa distrik respektiv i reste a lekout e i fer sir  i pouse pour ki sa proze i ganny enplimante. Mon pa konnen si mon’n konpran ou kestyon byen.

 

MR MICHEL MARIE

Bonzour Msye Speaker, bonzour tou Onorab. Eski Minis i kapab enform sa lasanble, eski son minister i annan lentansyon ranforsi kapasite travay e kondisyon travay osi bann DA dan distrik.

 

MINISTER MERITON

Msye Speaker parey mon’n dir, nou pe fer sa job analysis workshop, anplis ki sa nou pe fer letour dan tou bann distrik pou assess zot bann bezwen anterm kantite, kalite resours imen e osi fer dan sa prosesis vwar kimannyer nou kapab amelyor kondisyon travay tou bann travayer dan biro ladministrasyon distrik.

 

MR TERENCE FRANCOISE

Msye Speaker mon ti a kontan demann Minis en leklersisman konsernan sa bann – letan nou koz desantralizasyon, sa bann dimoun sorti diferan minister and so on pou baze dan distrik, si zot annan okenn plan kote konsernan lespas si oule dan distrik – si i annan okenn plan. Landrwa parey Anse Royale i enpe sere, mon pa konnen si zot annan sa lo zot progranm.

 

MINISTER MERITON

Msye Speaker parey mon’n dir nou’n fer en legzersis e dan bann distrik kot nou napa fasilite nou demann Finans resours finansyel pour nou kapab fer sa bann biro pou permet ki reprezantan sa bann lazans i la dan distrik e i travay dan en lanvironnman konfortab.

 

 

MR DE COMMARMOND

Msye Speaker mwan mon welcome sa move ki pe ganny fer konmsi akoz dan nou pei, e nou dan SPPF nou dir ki dimoun i sant nou devlopman.  So si nou pe fer keksoz ki pou tous a labaz nou dimoun, mwan mon welcome. Etan donnen sa ki mon pe dir la, e ki letan mon get minister Community Development avek Youth i ti ete avan, e sa responsabilite ki nou pe sey donn sa minister, i en gran manman responsabilite, si nou oule fer li byen. Mon’n vwar ki avek bann sanzman ki’n arive..

 

MR SPEAKER

Onorab kestyon.

 

MR DE COMMARMOND

Mon pe vin lo la Msye Speaker, Sir. Ek bann sanzman ki’n arive, sa minister in agrandi. Mon pe panse, mon pe demann Minis alors, kestyon ki son lopinyon lo si pa ti a pli bon etan donnen sa larz responsabilite ki i annan, si pa ti a pli bon si sa minister Community Development ti a’n en minister lo litousel pou donn tou sa latansyon posib. Dezyenm kestyon Msye Speaker, Sir se letan ek sa move ki zot pe fer la, pou anmenn devlopman lo nivo labaz, ki garanti Cascade pou annan aparti sa lannen ki larzan paregzanp ki ganny mete dan bidze gouvernman pou proze pavement Cascade i pa pou perdi ankor.  Letan mon pe dir sa mon a eksplik mon lekor pangar zot a krwar mon pe dir i annan dimoun ki pe vol larzan. Mon pa pe dir sa mwan.

 

MR SPEAKER

Onorab ou kestyon i kler.

 

MR DE COMMARMOND

I kler? Mersi bokou Msye Speaker.

 

MINISTER MERITON

Msye Speaker mon pa konnen si mon la pou kapab get sa preogativ Prezidan, sa li ki form bann minister. Me selman mon get sa formasyon sa nouvo minister koman sinerzi ki pou permet aksyon pran plas lo kote distrik. E dan sa kreasyon mon trouv en kantite loportinite, en kantite posibilite ki nou kapab servi pour fer sir ki ou annan garanti ki larzan ki dan bidze 2008, si ladministrasyon distrik Cascade in met son trotwar koman en priyorite, i pa perdi.

Sa lapros ki nou pe pran i en lapros reel mon’n dir, i en lapros konkret ki permet tou nou bann zofisye kapab travay. Sa lapros i en lapros ki permet gouvernman enplimant son progranm lo lekel ki Prezidan Michel ti ganny elekte lannen pase. I en lapros ki pran gouvernman i met li dan distrik kot bann nesesite i ganny resanti, kot bann bezwen i ganny note, kot dimoun ki ti a kontan met son kontribisyon lo kimannyer keksoz i marse. Sa lapros i en keksoz reel, en keksoz ki pe marse, mon’n met detrwa legzanp me i annan bokou legzanp ki si nou menm nou koz ek nou bann DA, nou aprann en pti git kimannyer pe fonksyonnen dan distrik nou a vwar kimannyer i tir en kantite presyon lo zot menm koman politisyen, lo bann minister e anfenn kont lo biro Prezidan.  Mon repete ankor sa lapros i anmenn solisyon problenm dan distrik dan distrik.

 

MR DYER

Mon ti a kontan demann Minis pou donn nou en lide kan restriktirasyon DCC pou konplete ki tou distrik pou annan sa organizasyon lo menm nivo e ki pou life span DCC.

 

MINISTER

Son term i 2 an. Be mon pe komans bann prosesis avek bann DA pou demann zot, dann mwan serten rekomandasyon apre mon a deside. I pa devret tarde. Sirman avan lafen lannen.

 

MR SPEAKER

Nou ava remersye Minis pour son statement e nou ava ekskiz li parmi nou. Nou ava al lo lot item lo nou order paper. E sa i annan 2 Bills pou fer first Reading. Formal first reading.

AG. CLERK

This Act may be cited as the National Assembly Members’ Emoluments (Amendment) Act 2007.

This Act may be cited as the Maintenance Orders (Reciprocal Enforcement) Act 2007.

 

MR SPEAKER

Nou ava bouz lo bann mosyon. Nou annan nou 2 apwentman konstitisyonnel pou fer presizeman 2 anbasader. Mon ava envit Leader of Government Business ki’n prezant 2 mosyon pou prezant son premye mosyon, pou apwentman Msye Jumeau koman Anbasader

 

MRS POTTER

Msye Speaker mon mosyon i demande ki lasanble i aprouv lapwent Msye Ronald, Jean Jumeau koman Anbasader, sa apwentman ki ti ganny fer par Prezidan Larepiblik a’n akor avek lartik 64(1) nou konstitisyon.

Msye Speaker lo sa mosyon mon ti a kontan dir ki politik etranzer en pei i plis ki en senp prolongasyon son politik enteryer lo lasenn enternasyonal. Politik etranzer en pei se osi en show case lo lasenn enternasyonal sa ki sa pei i reprezante e sa ki sa pei pe fer.  Sa zimaz i selman kapab ganny proteze e prozekte par en lavwa ki fer sorti bann parol dan en fason entelizan e konvankan.  Avek Msye Jumeau, Sesel pou annan en tel lavwa pour li kapab fer lemonn konn pozisyon Sesel pli byen.  Msye Speaker Msye Jumeau i enn bann rar Seselwa ki annan sa ki Angle i appel the gift of the gab e osi kapab ekrir dan en fason entelizan e enteresan.

Atraver son parkour tre ris konman en zournalis, Msye Jumeau in devlop sa bann kalite ki plitar lepep Seselwa in ganny sans apesye kan i ti desarz fonksyon Minis Lagrikiltir, Lenformasyon, kiltir e plitar Lanvironnman. Lapwentman Msye Jumeau i reprezant en ranforsman ladiplomasi Sesel. Me osi i tradwir swe Prezidan Michel pou fer Sesel zwe en pli gran rol dan kominote enternasyonal. Msye Speaker ozordi lazanda enternasyonal i ganny dominen par size lanvironnman. Nou nepli annan cold war, me nou plito annan en hot war, avek size resofman later ki pe afekte tou size.

Resofman later pe menas legzistans bann pei ki plat e bann rezyon lakot atraver lemonn. Bann ekspert pe predir ki byento pou annan sa ki nou apel bann refizye lanvironnman e bann konfli otour size lanvironnman parey delo.

Lanvironnman in telman vin en lirzans lo nivo global ki serten  political heavy weight parey Al Gore in deside vin Sanpyon lanvironnman. Zisteman pandan weekend nou’n kapab vwar pli gran konsern lanmizik enternasyonal, live earth organize par pli gran artis dan tou bann gran lavil dan lemonn pou konsyantiz lemonn lo size lanvironnman.  Se dan sa konteks Msye Speaker kot lanvironnman i preokip limanite ki lapwentman Msye Jumeau i pran tou son lenportans. Timing son lapwentman, pa ti kapab pli bon ki sa.

Lapwentman Msye Jumeau koman en Seselwa doue avek talan kominikasyon e ris a’n eksperyans lo size lanvironnman i vedir ki Sesel pe anvoy en mesaz for dan lemonn. Sesel pe dir avek lemonn ki i pran size lanvironnman tre oserye.  Annefe kot Nasyon Zini, kot Msye Jumeau pour baze, i pou bokou plis ki en senp diplomat. Laba Msye Jumeau pou vin en porter paviyon lanvironnman Sesel.  Laba Msye Jumeau pour osi eksplor bann nouvo sours finansman parey bann NGO enternasyonal pou siport nou zefor dan domenn lanvironnman isi Sesel.  Msye Speaker lapwentman ansyen Minis Jumeau koman anbasader Sesel kot Nasyon Zini i pa zis en mesaz for ki Sesel pe anvoy avek lemonn dan en moman apropriye me i osi demontre langazman Prezidan Michel ki limenm li i ti en ansyen Minis Lanvironnman.

Par apwent Msye Jumeau Anbasader, avek en misyon pou fer lev paviyon lanvironnman Sesel o pli o lo nivo enternasyonal, Prezidan Michel pe osi dir avek kominote enternsyonal ki Sesel i pare pou donn lemonn enn son gran talan pou ede fer avanse en size global ki pe afekte lavenir limanite an antye.   Prezidan Michel in ranforsi sa mesaz letan ki in apwent ansyen Sekreter Prensipal pou lanvironnman Msye Rolf Payet koman son konseye lo size lanvironnman.

Msye Speaker lavi i parfwa fer bann gran letour pou ariv lo en manm destinasyon.  Letan i ti pe antre dan lemonn travay, Msye Jumeau ti anvi zwenn Minister Zafer etranzer akoz i ti toultan annan gran pasyon pour size relasyon enternasyonal e bann azar lavi in fer ki in plito vwar li al dan direksyon medya e plitar dan politik.  Ozordi Msye Jumeau pe vwar li pe retrouv sa ki nou appel son first love. Pour Msye Jumeau i sirman en gran lazwa pour li retrouv relasyon enternasyonal apre en gran detour par medya e politik.

Msye Speaker mon demann tou manm lasanble pou aprouv son nominasyon e pour montre avek lemonn ki lo size lanvironnman Sesel i koz avek en sel lavwa. Msye Speaker I beg to move.

MR SPEAKER

Okenn ki segonn mosyon.

 

 

 

MR ANDRE POOL

Msye Speaker mon oule segonde e mon oule dir de pti mo lo sa mosyon.

Msye Speaker mosyon devan nou lasanble pe demande ki nou aprouv Msye Ronald Jean Jumeau koman en anbasader pour Sesel.  Msye Speaker personnelman mon’n konn Ronny parey i kontan nou apel li koman son non prefere pour en bon pe lannen. In touzour en dimoun ki tre serye dan son travay e fer son mye pou desarz okenn responsabilite ki in ganny donnen. Koman en zournalis dan bann lannen ‘80 i ti ekri bokou lartik sirtou fer bann analiz lo diferan topik ki ti enteres nou pep.  E i pa drol ki i ti ganny apwente sef editer Seychelles Nation ek Seychelles Agence Presse sa lepok.

Msye Speaker son devouman e son travay dir dan lezot diferan responsabilite ki answit i ti ganny donnen ti fer ki an 1998 parey in ganny dir par mon koleg ki’n koz avan mwan i ti ganny apwente en Minis dan gouvernman nou trwazyenm repiblik.  E ziska detrwa zour pase i ti Minis responsab pour lanvironnman e resours natirel. Pandan ki in desarz portfolyo sa  minister mon’n ganny sans travay tre pros avek li sirtou kot i konsern bann diferan laspe oubyen proze pour mon distrik.

Pour ert fran e onnet i pa’n toultan fer mwan kontan me sa ki mon’n pli apresye ek li se ki son laport in reste toultan ouver pou resevwar mwan e fer kler son pozisyon e son sitiasyon.  Pour sa Msye Speaker mon ti’n devlop en gran respe pour Ronny. Prezidan Ozordi in deside pou anvoy li reprezant nou pei kot Nasyon Zini ek lezot pei dan sa rezyon Lanmerik e Caraïbe.

Si Prezidan i pran en tel desizyon set akoz in santi ki dan sa zonm i annan en potansyel enorm e ki Sesel i kapab kont lo li spesyalman dan son leksperyans tre vas dan domenn lanvironnman, en domenn ki deplizanpli i sanble mwan ti pe vin son spesyalite prefere.  Alors Msye Speaker, mon napa okenn dout ki sa zonm Seselwa pou fer nou tre fyer dan sa latas nob koman nou anbasader.

I reste mwan pou swet li bonn sans e demann li pou touzour tenir paviyon Sesel pli o ki posib partou kot i ale. Avek sa detrwa mo Mr Speaker mon pou siport sa mosyon e demann tou lezot manm dan nou lasanble pou fer parey.  Mersi.

 

MR RAMKALAWAN

Pour mwan toultan i enteresan letan nou annan mosyon pou aprouv bann dimoun koman anbasader parski i donn nou en sans pour nou regard polisi gouvernman an relasyon avek nou reprezantasyon deor anmenmtan osi donn nou en sans pour nou regarde ki direksyon nou pe pran. E bomaten mon kapab dir ki mon vreman happy ki omwen nou pe apwent – nou pe ratifye nominasyon 2 Seselwa. E zot tou isi dan sa lasanble zot konn tre byen ki poudir sa i enn bann pwen ki mon’n fer depi lannen pase ki malerezman 2 etranze, en Italyen avek en Franse pou kek rezon in ganny nasyonnalite Seselwa ki’n ganny post anbasader. Donk pou mwan ozordi mon kontan vwar ki set en seselwa sa premye lapwentman lo Msye Ronny Jumeau e plitar Msye Dick Esparon, se de Seselwa ki pe ganny apwente.

Me anmenmtan letan nou pe regard sa de lapwentman, mon krwar ki nou bezwen regard en kou ki polisi gouvernman e ki travay ofet sa bann dimoun pou al fer.  E dan sa ka la ki nou pe koz Msye Jumeau parski sa statement ki mon pe fer i pou aplik osi pour Msye Esparon, ki travay zot pe al fer, parski nou ava rapel ki 3 an pase, gouvernman ti deside ferm tou bann lanbasad eksepte 2. Nou ti gard zis New York e La France. Sete sa de ki ti ganny garde e tou bann lezot ti ganny fermen, enkli Langleter, Sid Afrik ensidswit, Malaysie. E rezon ki ti ganny donnen sete pour rezon finans, gouvernman i bezwen ferm tou sa bann lanbasad. Pourtan nou pa pe vwar gran improvement dan sa nivo finans parski nou kontinnyen tann menm sitiasyon e ofet letan nou regard nou sitiasyon ekonomik, nou vwar ki ozordi black market pe thrive dan en fason ekstraordiner e alors desizyon in ganny pran pour nou souden, ouver bann lanbasad enpe partou. Sid Afrik kot ti’n fermen nou’n ganny anbasader, Belgique kot ti’n fermen nou’n ganny en anbasader,e la nou’n osi ouver la Chine, e mon pa konnen, Italie Rome,   e la, lefe i annan de, enn pe ranplas enn e i annan en dezyenm nou pankor konnen egzakteman kote i pe ale.

Personnelman mon krwar lo sa nivo lanbasad e la kantite anbasader Sesel limenm li mon krwar nou tou nou ava aksepte, i pou trouv li difisil pour li annan bann reprezantasyon diplomatik dan tou kwen lemonn e dan sa ka i pou bezwen selektiv. Ou bezwen swazir bann pozisyon stratezik kot pou plas bann anbasad. E se la kot paregzanp letan nou pe regard sa gro plan, mon pa pe tro trouv lozik paregzanp. Pou annan en anbasader Belgique ki reprezant Linyon Eropeen, e apre sa pou annan en anbasader an Rome kot vreman lentere sesel i limite e la kantite Seselwa i limite konpare avek langleter kot ou annan ou plis ki 20,000 Seselwa ki reste. E kot anmenmtan osi ou annan ou langleter ki the home of the Commonwealth en lorganizasyon ki enportan en kantite pour nou e kot ziska ozordi nou reste san en reprezantasyon.  Petet plitar, mon pa oule antisipe, mon espere ki Onorab Esparon i ava zisteman pe al UK. Mon espere ki sa i ava form parti plan gouvernman parski ler la mon ava kapab pli byen konpran enpe sa lozik.

Me anmenmtan osi mon krwar ki letan nou pe apwent anbasader, letan nou pe mazin bann lanbasad fodre ki toultan nou fer atansyon – atansyon ki letan nou apwent en anbasader, letan nou ouver en anbasad nou pa met pozisyon sesel dan en fason difisil. Paregzanp ziska ozordi i ankor annan kestyon ki pankor ganny reponn e ki mon espere ki at some stage foreign affairs committee i ava nobou ganny serten larepons, i ava donn nou serten larepons menm si parey kimannyer mon konpran zot premye rankont avek foreign affairs konmsi ou a krwar in annan enpe – keksoz pa’n mars parey ti devret ale kot letan zot pe demann enpe kestyon, laba pe dir zot pe demann tro bokou kestyon.

Paregzanp ziska ozordi i annan sa soupsyon ki lanbasad Sesel an Chine pe ganny finanse par gouvernman Sinwanr. Mon demann kestyon, eski pa ler pou fer en statement ler, parski si nou annan en anbasader ki pe travay dan en lanbasad e ki sa lanbasad pe ganny finanse par sa pei kot i ete, mon krwar otomatikman i vin en kestyon parski ler la kimannyer ou kapab dir La Chine i mal kan i pe refiz laliberte relizye dan sa pei.

Ou pou annan ou toultan serten restriksyon lo kwa ki ou kapab dir li e alors sa dan li menm li i kapab afekte ou travay diplomasi e ou vin feb.

En lot pwen ki mon krwar i enportan letan nou pe regard sa travay ki ganny fer, se pour nou regarde kimannyer sa bann lanbasad, e sela kot mon’n dir ki fodre ki nou selektiv e pour nou kapab donn sa dimoun sa sekretaryat ki i pou kapab fer sa travay e la pour le moman malerezman tou nou bann lanbasad deor i annan en anbasader, i annan en sekreter e apre i annan en sofer. E ki vedir efektivman i met bokou presyon lo sa anbasader pour li desarz son bann responsabilite. E mwan personnelman tanzantan i fer mwan mazin Onorab Faure laba Belgique kot nou konnen i annan en kantite domenn ki i bezwen adrese vizavi linyon eropeen lo tou nivo, mon krwar lakantite seve blan ki i pou gannyen i pou ogmante parski presyon travay i vin vreman bokou. E dan sa bann lenstans vreman ou bezwen en dimoun ki annan tou kalite talan pour li kapab sey desarz tou sala me sela osi kot parfwa i vin problenm, kot letan en dimoun pe sey desarz tou sala, tou sa bann responsabilite, i pa ganny sans pour li fer en travay vreman byen parski ou a pe git en pti bout isi, ou pe al laba, ou a pe isi, ou a pe laba ki finalman sa travay ki ou sipoze fer i pa vreman vin sa degre efektiv.

Ozordi parey nou’n dir nou’n trouv serten dimoun ganny apwente, se la ankor ennfwa kot mon poz kestyon. Paregzanp letan   Minis Bonnelame ti ganny apwente anbasader, i ti gard son tit Minis. Sa i ti al avek koman en anbasader Minis, nou rapel byen sa. Me la nou ganny nou en Minis e mon kontan bann leloz ki zot in proklanmen lo non Msye Jumeau kimannyer i efektiv, kimannyer i pe al basically vin en dezyenm Al Gore laba kot Nasyon Zini, konmsi en kantite bann leloz ki vedir ki son travay ki i pe al fer laba, i en travay spesifik e i en travay ki pour vreman fer Sesel monte lo sa nivo lanvironnman. E Onorab Potter in fer sa sorti dan en fason tre kler. Me alors konmsi si nou pe dir tou sala eski  pa devret, e petet la ankor ennfwa mon ti ava demann en klarifikasyon parski Onorab Potter in aktyelman servi sa tit ansyen Minis. Sa vedir i nepli Minis e i pe al laba zis koman en anbasader, sinon i ti ava’n servi son tit Minis.

Eski pour sa travay ki i pe al fer, eski i pa ti devret osi annan li sa tit Minis kot konmsi donn li enpe plis lelan. E parski si non nou bezwen fer atansyon osi avek sa bann zafer anbasader parski dan en serten sans i vin koman en egzile glorifye ki mon krwar fodre nou fer atansyon oubyen i vin zis en fason pou rekonpans serten dimoun pou travay ki in fer pou service rendu parey nou dir oubyen pou retir sa dimoun enpti kou pou al repoz latet. E sa souvan bann kandida zot menm zot zot servi sa lekspresyon, zot dir konmsi dan en serten sans pe dir ek nou al kasyet en pti kou, repoz latet e apre nou ava regarde ki lot pozisyon.

E dan sa menm konteks letan mon pe regard bann lapwentman anbasader, nou pe regarde e nou ekout byen, enn bann rezon ki Prezidan Michel limenm li i ti donnen pou koup la kantite Minis sete lo depans e letan nou regard bann bidze ki nou depanse lo bann lanbasad deor parski tou sala i ganny peye an foreign exchange, mon krwar ki i pa vreman en rezon zistifye parski letan ou pe regard la kantite anbasader ki  ou’n apwente amwen ki pei kot zot ete i pey serten keksoz, mon krwar ki sa largiman i pa vreman stand,

Me mon krwar osi i enportan pour nou dan sa lespri stratezi gouvernman oubyen letan nou pe regard lapwentman sa bann dimoun, pour nou fer distenksyon ant en karyer politik koman en diplomat oubyen bann diplomat ki bann career diplomats parey nou apele ki pran sa koman zot metye. E ozordi i enportan pour nou note ki dan sa 6 lapwentman nou vwar zis Msye Claude Morel ki’n ganny anonse ki poudir i pe al Paris. Se zis li ki nou kapab swiv li koman en diplomat ki’n pran sa koman en karyer e non pa koman en politisyen parski li Msye Morel in la, in fer son letid dan ladiplomasi apre sa in travay Maison Queau de Quinssy e la aprezan i pe ganny apwente. Tandis ki tou sa bann lezot lapwentman nou’n prensipalman trouv bann politisyen vin  diplomat, vin bann anbasader.  E alors kestyon ki beg itself ki nou bezwen poze se ki kalite mesaz eski sa i anvoye pour bann Seselwa ki pe travay vreman dir dan Maison Queau de Quinssy e ki’n pran la diplomasi koman zot karyer, ki lespwar eski zot annan pour zot ganny en posting overseas koman en karyer pou rekonpans zot pour zot leksperyans.  Mon krwar ki, anyway mwan mon pa dan gouvernman me selman mon poz sa kestyon parski mesaz ki ganny anvoye ozordi avek sa de mosyon ki devan lasanble se ki prensipalman se bann politisyen ki pou ganny bann posting dezorme koman anbasader. E mwan  mon ti ava kontan ki nou ganny en serten klarifikasyon lo sa kote.

Letan zisteman nou lo sa size e letan nou pe koz lo bann benefis ki sa pou anmennen pour sesel, letan nou pe koz lo bann demars ki pou al ganny fer lo sa nivo, lanvironnman, e tou parfwa – Letan mon pe regard sa ki nou pe dir ozordi e mon mazinen ki poudir paregzanp letan Minis Jeremie Bonnelame  ti ganny apwente, sete pour li al koz lo sa foreign economic policy ki ti pou sipoze konmsi vin lakle dan nou bann demars alavenir me ziska aprezan nou pa’n trouv narnyen egzakteman kwa ki’n arive.

Ozordi parey mon pe dir sa lapwentman Msye Jumeau koman en Seselwa mon krwar ki i nou devwar pour nou donn li sipor. Napa okenn dout ki Msye Jumeau i annan son talan, i annan son abilite, i en Seselwa entelizan e alors i normal pour nou donn li sa full sipor. E anmenmtan osi mwan mon ti a kontan dir ki wi,  lo nou kote nou’n vwar ki dan bokou lenstans, enpe parey dan sa menm lalinny ki Onorab Pool in mansyonnen, i vre ki Lonorab Jumeau in osi defann son teritwar dan en fason for letan i ti ek lanvironnman e ki sa i posib ki in upset bokou dimoun. Annou pa tir sa dan nou lespri.  E Minister prensipalman ki in upset en kantite ki mon trouv i enteresan se Minister Housing, MLUH ki i vin lo nivo sa bann EIA ki bezwen ganny fer, ki i vin lo nivo pran later lagrikiltir pou konverti li pou fer lakaz, partou kote se sa minister ki’n prensipalman upset letan i pe defann lanmar, letan en minister i donn permisyon pou konble en lanmar, li Msye Jumeau tanzantan in debout i dir non pa kapab konble lanmar, nou tou nou ava rapel Msye Jumeau koman en dimoun ki’n sey defann lanmar dan Sesel. Mon krwar sa nou bezwen apel li en sanpyon lanmar parski partou kot in sey fer konblaz lo lanmar, in debout in stand in lager.

E pour mwan ankor ennfwa mon trouv li enteresan ki sa Minis si ou anvi ki pe pran son pozisyon se sa Minister ki in lager plis avek.  E mon espere ki poudir sa i ava en leson dan limenm e ki sa nouvo Minis ki’n pran son plas i ava li osi prezan vin avek sa nouvo lespri pour li defann lanmar, protez later lagrikiltir ki kontinnyen vin pli pti pti tou lezour, ki kontinnyen vin pli difisil.

Mwan mon pou swet Msye Jumeau bonn sans e mon krwar dan en serten sans Msye Jumeau i ava pran son nouvo responsabilite avek bokou soulazman akoz dan sa moman kot nou pei pe pas ladan, mon krwar i annan bokou bann Seselwa ki ti ava kontan pour li ganny en plas diplomat. Mon swet li tou bonn sans. Me anmenmtan osi mon swete ki poudir tou sa bann parol ki’n ganny dir ki i pou al laba, i pou debout, i pou koze, i pour isi, i pour laba ki i ava kapab fer li – e la ankor ennfwa mon ti a kontan ganny leklersisman parski dernyen lenformasyon ki nou’n gannyen Sesel pankor up to date avek son bann peyman avek nasyon zini e pour le moman i anba sanksyon. Sesel anbasader pa kapab koze laba kot nasyon zini. Alors mon swete ki gouvernman Sesel letan zot pe anvoy en zenn onm solid, kalifye laba pour li al defann nou lentere, gouvernman Sesel i ava osi pran sa desizyon pour zot pey tou sa ki nou drwa ek nasyon zini pour ki lavwa Sesel i ava vreman ganny tande. Alors mon espere ki Onorab Potter i ava pas sa mesaz dan en fason kler e mon konnen ki poudir Msye Jumeau li osi tou i ava sey debat lo sa kote. Me nou lo nou kote, nou swet Msye Jumeau bonn sans dan son lapwentman. E nou espere ki apre son karyer laba i ava ankor ennfwa retourn Sesel pour li kapab kontinnyen fer en kontribisyon dan devlopman nou pei.

 

MR SPEAKER

Nou ava adjourn ziska 11 er.

 

(Break)

MR SPEAKER

Nou ava kontinnyen avek nou deba. Onorab Elizabeth.

 

MR ELIZABETH

Msye Speaker premyerman mon ti a kontan felisit Msye Ronny Jumeau parey nou tou nou konn li lo son lapwentman koman lanbasader e reprezantan Sesel viz-a-vi nasyon zini New York, Lanmerik. Pour mwan i kler ki Ronny Jumeau in fer en louvraz egzanpler koman Minis lanvironnman. E si sa lapwentman i rekonpans pour sa travay ekselan ki in fer koman Minis, mon krwar i byen merite. Fodre pa nou bliye ki sete Minis Jumeau ki’n met Sesel lo map lemonn lo size lanvironnman. E i pa’n zanmen mank okenn loportinite pou fer sorti vilnerabilite Sesel e lezot pti leta zil, SID ki pe kontinnyelman ganny afekte avek sanzman klima. Msye Speaker mon konvenki ki Msye Jumeau pou kontinnyen avek sa bon travay ki in deza komanse me la i ava ganny loportinite pour li fer li lo en pli gran lanpler.

Mon krwar ki i fer premye fwa ki gouvernman i apwent en dimoun dan en tel pos avek en misyon tre spesifik.  Prezidan Michel in dir, ki in donn en direktif Msye Jumeau pour li kontinnyen soulev bann konsern lanvironnman, bann lakonplisman ki Sesel in fer lo nivo lanvironnman e bann bezwen ki Sesel pou kontinnyen soutenir son progranm lanvironnman.

Mr Speaker mon krwar sa i en bon linisyativ e i merit kontinnyen. En dimoun ki ganny apwente anbasader, fodre i kapab fer en louvraz ki pou anmenn benefis pour Sesel dan en fason ou en lot.  Gouvernman fodre i kapab evalye travay sa dimoun de tanzaot pou vwar si Sesel pe vreman ganny valer pour son larzan.  Msye Speaker nou’n aprann ki i pou kout Sesel anviron R7 milyon pou run sa biro New York. E i osi pou kout Sesel anviron R5 milyon pou run en biro Paris. E mwan mon krwar ler Sesel i depans sa kalite larzan avek bann lanbasad dan bann pei etranze, fodre Sesel i nobou tir serten benefis atraver travay ki sa bann lanbasader i fer a letranze.

Msye Speaker, Sesel i en legzanp sikse pour lemonn dan domenn lanvironnman e Msye Jumeau in zwe en gran rol pou ed Sesel akonplir sa defi.  Mwan mon siport okenn lapwentman ki pou kontinnyen devlop sa sikse e anmenn ankor plis sikse pour nou pei. Mon krwar ki Ronny Jumeau i en zonm ki’n prouve ki i annan abilite, i annan konpetans e i annan konesans pour li fer sa travay. Finalman Msye Speaker mon pran sa lokazyon pou swet Ronny Jumeau tou sikse dan son nouvo post e mon swete ki ler i a pe travay pour Sesel Lanmerik, i a toultan met Sesel premye dan tou sa ki i fer e dan tou sa ki i dir New York.  Sa i a fer Sesel fyer lo lasenn enternasyonnal.

 

MR JOSEPH FRANCOIS

Mr Speaker mwan osi mon oule donn mon siport,  annefe felisit nominasyon Msye Ronny Jumeau pour post anbasader permanan Sesel pour nasyon zini. Parey nou konnen Msye Speaker i en post tre, tre enportan, en post tre respektab e byensir en post kot bokou diplomat i reve akonplir dan zot karyer relasyon enternasyonal.

Lasanble zeneral nasyon zini parey nou konnen, i en forum kot bann pli gran desizyon lemonn i ganny pran, i en landrwa kot ou ganny sans frot zepol etwatman avek bokou dirizan swa dan politik, swa dan ekonomik oubyen dan lemonn syantifik. I en landrwa kot tou pei, gran ou pti i ganny menm sans parey lopozisyon i dir, fer tande son lavwa. Me kontrerman avek lopozisyon Sesel zot osi fer konte zot vot. Sa post i telman enportan ki pa nenport ki ki kapab fer sa travay.  Sa post i bezwen en dimoun entelizan, eksperyanse, pasyonnen pour son pei e en karakter karismatik ki parey lopozisyon i mansyonnen dan son bann zournal. E sirtou Mr Speaker parey Angle i dir sa dimoun i bezwen en very articulate speaker.

Mr Speaker lasanble zeneral nasyon zini i en rasanbleman kot en pti pei parey Sesel i kapab pers lemonn politik, ekonomik, sosyal atraver en lavwa for, konvenkyab e i kapab rod sipor dan preski tou laspe devlopman nou pei. Tou sa diverzans eksperyans e kalifikasyon i donn Msye Ronny Jumeau en CV milti disipliner e remarkab pou komans en karyer dan domenn la diplomasi. Malgre la diplomasi i pa’n son domenn par ekselans, Msye Ronny Jumeau atraver son long parkour dan gouvernman kot in deservi son lavi e son karyer profesyonnel in erit e devlop en karakter eksepsyonnel.  In toultan en dimoun tre senp e amikal parey nou konnen li. I en dimoun tre karismatik, i en speaker tre, tre pasyonnen e en karakter kot bokou non i dir tre sociable.

Mr Ronny Jumeau apre ki in fer plis ki 7 an koman Minis responsab pour lanvironnman in devlop en ekspertiz ek pasyon admirab e remarkab pour lanvironnman nou pti pei.  Apre son predeseser defen Madanm De St Jorre, e answit Prezidan Michel ki sa lepok ti Vis Prezidan, i ti fikse target minister lanvironnman tre, tre o e fer proteksyon lanvironnman vin en par nou lavi tou lezour. I ti en leader ki ti toultan lead by example. I pa ti zanmen en problenm pour li kit son lofis e partisip dan bann progranm anmas salte e plant pye dibwa oubyen lanbelisman nou zil.  Sa in donn li bokou respe e  atraver bann lezot langazman dan distrik in devlop son personnalite koman en people’s person.

Msye Speaker lenpak pouvwar Msye Ronny Jumeau, pa’n zis reste Sesel, me in osi shine lo nivo enternasyonal kot sak fwa in fer son laparisyon dan bann rankont tre, tre onivo lenpak son bann diskour pasyonan e ardyesan in toultan fer en lefe remarkab e  anmenn bokou loner  pour nou pti pei. Enn de legzanp Mr Speaker an 2002 apre ki Msye Ronny Jumeau ti’n partisip dan travay preparatwar ministeryel pour world summit on sustainable development an Johannesburg i ti osi ganny demande pou lead delegasyon Sesel dan labsans Prezidan Rene sa lepok. Sesel dan dan rankont ti ganny sans fer son diskour pour lemonn dan menm zour ki dirizan tel ki Collin Powell ti fer sa lepok.  E alors i ti ganny sa latansyon lemonn menm parey. An 2004 Msye Speaker apre ki Msye Ronny Jumeau ti’n pibliy en lartik dan magazin dan magazin UNEP lo relevans bann laglas dan bann rezyon poler, e son lefe lo sea level rise e lefe lo bann pti pei leta zil i ti ganny en lenvitasyon spesyal sorti kot lewa La Swed pou attend en colloquim parmi bann syantis pli renonmen  dan lemonn e sirtou dan pei was pou diskit lefe ice cap ki pe fonn dan rezyon poler e kimannyer bann pti pei parey Sesel ki trouve tre lwen dan tropik zot pe ganny menase. I ti premye fwa kot en pti pei leta zil ti ganny reprezante lo en tel forum. E i ti ganny reprezante byensir par sa Minis pasyonnen. I ti fer bann pei, vwar, santi konsekans zot aksyon lo bann pti pei leta zil.

An 2004 Minis ti fer Sesel lonor organiz en side event ansanm avek UK kot konferans Barbados Plus 10 ki ti fer Moris pour bann pti leta zil e la i ti mont en legzibisyon ek en side event lo Coral Reef. E sa side event parmi en kantite side event ki ti ganny organize, ti atir latansyon sekreter zeneral nasyon zini sa lepok Msye Kofi Anan pou asiste sa side event kot bokou pei ti pe rode akoz Sesel. E an 2006 Mr Speaker – i pa dernyen me an 2006 Sesel ti ganny en lenvitasyon spesyal dan konferans bio-diversite lo korperasyon devlopman linyon eropeen ki ti fer Paris.  Dan sa konferan nou ti revwar bann plizyer mezir, e plizyer fason kot korperasyon i kapab ed bann pei pou devlop e servi en lapros proteksyon lanvironnman. Msye Ronny Jumeau ti ganny loner pou  co-chair konklizyon sa rankont, i ti sel reprezantan sorti dan en gouvernman pou chair en tel rankont. Larestan bann chair zot ti bann sekreter lorganizasyon nasyon zini. E la i ti fer bann konsern pti leta zil kot bokou partisipan sa konferans ti dekri koman tre emouvant e senser.

Alor Mr Speaker tou sala i anbelir CV Msye  Ronny Jumeau koman the perfect man to champion lakoz lanvironnman, laba kot i tre enportan pou fer lavwa Sesel tande. Apwentman Msye Ronny Jumeau koman reprezantan permanan Sesel kot Nasyon Zini, i pa zis en lot job pour li Mr Speaker, me en lopotinite pour li anmenn son leksperyans, karisma ek pasyon lo en nivo pli o ki lemonn i permet li e frot zepol avek bann personnalite pli distenge e enfliyansyel dan lemonn. Me sa i pa en louvraz san ekspektasyon Msye Speaker. Lekspektasyon lo Msye Ronny Jumeau se fer dan lasanble zeneral nasyon zini pa get bann pti pei leta zil koman zis en vot, me koman en vre lavwa e konsern sa lemonn.

Msye Ronny Jumeau avek tou son bagaz ki i posede pe ganny ekspekte pou servi kredibilite Sesel koman en pei ki’n marye prezervasyon lanvironnman ek devlopman dirab pou atir latansyon lemonn lo frazilite en tel pei e son pep e servi sa lyen pou rod plis sipor e resours finansyel pou kontinnyen devlop dan en fason soutenab.  Msye Ronny Jumeau avek son networking skills, latitid tolerans ek solidarite e lobbying skills pe ganny ekspekte pou servi bann bon track record Sesel dan devlopman sosyal, lanvironnman ek sekirite pou atir lenvestiser NGOs dan bann gran pei tel ki Lanmerik, Canada ek Sid Lanmerik pou kontinnyen fasilit devlopman nou pei dan bann domenn tel ki capacity building eksplorasyon lenerzi, devlopman tourism, lapes lendistri ek komers. Parey nou tou nou konnen, proteksyon lanvironnman in vin enn bann responsabilite pli enportan dan kominote enternasyonal e pe enfliyans relasyon enternasyonal ek polisi a letranze.   Sa maryaz ant lanvironnman lekonomi ek sosyal i fer en bon model devlopman soutenab ki ganny agree par kominote enternsyonal an Rio an 1992. An 1992 lemonn ti agree lo en plan pou ed bann pti pei leta zil pour fer progre ekonmik tout an prezervasyon zot lanvironnman.  En kantite aksyon ti ganny formile pou ganny enplimante tel ki lefe e adaptasyon sanzman klima, waste management, energy resources, bio- diversite, devlopman kapasite imen e plizyer lezot. Tou sala malgre prometan e realis sa lepok, bann pti pei leta zil parey Sesel pa’n kapab enplimant sa bann progranm akoz nou pti, nou lwen e bann gran pei i lwen avek nou e i fer ki nou mank bokou kapasite. Kominote enternasyonal pa’n konsistan e pa’n donn ase led bann pti pei leta zil malgre bann zil i committed pour sa action plan. Progre ekonomik nou bann zil in ganny retarde avek pri komodite ki’n fluctuate, mankman marse tradisyonnel, koupman dan led pou devlopman avek kominote enternasyonal e mank foreign direct investment.

Apard sa fas avek plizyer problenm ki bann pei tyermonn pe rankontre, bann pti leta zil parey Sesel, i fer fas avek bann defi adisyonnel. Nou ganny trouve dan en parti lemonn tre lwen avek bann major trading centres, major centres of activities of the world. Msye Ronny Jumeau pe ganny ekspekte pou servi labote Natirel nou pei pou fer lemonn realize ki kantite frazil nou lekonomi e leko sistenm i ete e ki kantite vilnerab zot ete dan bann dezas natirel. Msye Jumeau pe ganny ekspekte pou fer lemonn laba, dan leker lemonn konnen ki Sesel i en viktim sanzman klima, resofman later e logmantasyon nivo delo sale. Tou sala pe menas pou detri nou pti Sesel e tou sa bann akonplisman ki nou’n fer.  E tou sa bann dezas pa ni menm nou ki’n kontribye.  Menm si tou bann zil i zwenn ansanm, pou redwir bann gaz ki andomaz kous ozone, sa pa pou fer okenn diferans lo lefe global.

Alors Mr Speaker Msye Ronnye Jumeau dan sa lepok kot latasyon lemonn pe prêt zorey lo konsern lanvironnman e lenpak global sanzman klima, i nou sans apropriye pou montre lemonn ledwa e dir zot arete. Akoz zot pe detri nou? Dir zot montre enpe plis lanmour pour sa destinasyon kot bokou zot zot vin pas vakans. La nou ava pe koz en vre sanpyon lanvironnman. En tel responsabilite pa kapab ganny pli byen egzekite ki pa lot ki en minis ki’n sorti dan lanvironnman, en politisyen ki annan bagaz lanvironnman e lekspertiz en zournalis e ki pli bon fason sa se pou fer nou lavwa tande.

Msye Ronny Jumeau sa lasanble  i swet ou bonn sans dan ou nouvo responsabilite e  nou siport ou ek ou fanmiy dan sa nouvo langazman.  Mersi Mr Speaker.

 

MRS POTTER

Msye Speaker pour mwan i touzour en gran plezir ler sa lasanble i kapab inanim lo bann size sirtou bann ki annan bann lenportans nasyonal tel ki lapwentman bann anbasader parey nou konnen i pou al reprezant nou tou koman en pei, a letranze.

Msye Speaker bokou in ganny dir lo Msye Jumeau avek bokou pasyon e bokou senserite e mon panse ki sa lapwentman ki nou pe fer ozordi i ava enn ki pou pran en plas privilezye parmi listwar lapwentman bann anbasader.

Pou tous brefman lo bann konsern ki Lider lopozisyon in souleve Msye Speaker, bann kestyon konsernan landrwa ki petet Sese i devret defini lo kote nou met bann lanbasad, kestyon resours pour bann lanbasad e kestyon finansman, lekel ki pe finans lekel lanbasad e menm lo size aryeraz, bann peyman Sesel vizavi bann lorganizasyon enternasyonal. Mon krwar tou sala i bann size enteresan me mon sizere ki petet Lider Lopozisyon i kapab petet met son bann konsern atraver en kestyon pou Minis responsab pour sa bann size.

Me parey mon’n deza dir oparavan, sa bann kestyon lapwentman etc. i reste preogativ legzekitiv. Msye Speaker konsern osi in ganny souleve lo sa kestyon diplomat de karyer. Mon krwar nou tou nou konnen ki i annan en tradisyon, annefe lamazorite bann anbasader ki ganny apwente onivo enternasyonal se bann ansyen Minis, oubyen menm bann ansyen zofisye militer. Mon krwar tou resaman nou’n vwar vizit Anbasader Zambie pour Sesel ki ti vin Sesel resaman e limenm li i pe retenir en ran militer.

An sa ki konsern si Msye Jumeau pou gard son tit Minis, si i pour en Minis anbasader oubyen en anbasader Minis, mon panse ki parey in touzour tradisyon ki bann ansyen Minis ki mwan mon okouran in ganny apwente anbasader zot in gard zot tit Minis. Mon panse e mon swete ki sa i ava leka pour Minis Jumeau.

Msye Speaker mon ti a kontan remersye tou bann entervenan e parey mon’n dir mon kontan ki nou pou linanim lo sa size. Mersi.

 

MR SPEAKER

In ler pour nou pran en vot.  That the question be now put. Bann ki anfaver lev zot lanmen. Inanim. Nou ava proceed lo dezyenm mosyon ki osi en apwentman anbasader. Setfwasi se Msye Dick Esparon.  Onorab Potter.

 

MRS POTTER

Mosyon i ankor ennfwa demande ki nou lasanble i aprouv lapwentman Msye Dick, Patrick Esparon par Prezidan Larepiblik koman Anbasader pour Sesel a’n akor avek lartik 64(1) nou konstitisyon.

Msye Speaker pouvwar ki nou lasanble i annan pou aprouv lapwentman Anbasader i vin en loner sakfwa ki nou ganny demande pou aprouv nominasyon en ansyen manm nou lasanble.  Msye Dick Esparon in en manm Lasanble Nasyonal Sesel pour 14 an. I ti en manm elekte pour distrik Pointe Larue, dan premye, dezyenm e trwazyenm lasanble nasyonal nou trwazyenm repiblik.  Annefe Msye Esparon ti en manm aktif nou lasanble nasyonal. I ti en manm lo komite Standing Orders, i ti Chairman Komite Touris e plitar in servi nou lasanble koman Deputy Speaker.

Msye Speaker parkour Msye Esparon dan lasanble i limenm sifizan pou konvenk nou ki Msye Esparon i en man of high standing. I annan sa kapasite pou deservi nou pei dan son nouvo fonksyon koman anbasader.  Msye Esparon in osi devlop lezot kalite e ranmas bokou leksperyans atraver son parkour profesyonnel e atraver bann divers formasyon ki in akonplir dapre son CV.

Dan Lasanble Nasyonal nou tou nou pou rapel lafason ki Onorab Esparan in defann bann prensip ki in krwar ladan avek pasyon me osi avek lentelizans.  Apre son lapwentman alors mon napa okenn dout ki i pou deservi Sesel avek sa bann menm kalite e sa i ava an retourn anmenn benefis pour Seselwa. Msye Esparon i en zenn onm dinamik, travay dir me ki avan tou patriotik. Mon senserman krwar, ki Prezidan Michel in fer en bon swa kan in nonm li anbasader. Son lapwentman pou sirman en lekstansyon son karyer politik ki in komanse 14 an pase.

Msye Speaker nou napa dout ki son pasyon pou Sesel pou gid li pou promot e defann lentere sesel a letranze.  Msye Esparon pa en career diplomat oubyen en dimoun ki’n fer son karyer koman en diplomat parey nou’n aprann pli boner. Me sa pa andikap – akoz annefe i kapab menm vin en lavantaz. Parey mon’n dir taler koman en dimoun ki ziska prezan in batir son leksperyans dan politik e dan servis piblik, Msye Esparon i ekipe pour li aprezan deservi son pei dan domenn la diplomasi.

Msye Speaker mon demann tou manm Onorab dan sa lasanble pou aprouv nominasyon Msye Dick Esparon koman anbasader Sesel.  E nou kote i swet Msye Esparon bonn sans dan son nouvo lavenir. Mersi e Msye Speaker I beg to move.

 

MR SPEAKER

Okenn ki segonn mosyon ?

 

MR ANDRE POOL

Mon Speaker mon pou segonde e mon oule dir de pti mo lo sa mosyon.

Msye Speaker mosyon pe demande ki nou aprouv Msye Dick Patrick Esparon koman en anbasader pour Sesel. Dick parey nou’n abitye dir li i enn nou menm, i en zanfan ki sorti isi dan nou lakour. Akoz parey  zot tou zot konnen, Dick in en manm nou lasanble nasyonal pandan 3 manda, depi ler i ti ganny elekte pour premye fwa, an 1993. E si mon pa tronpe sa lepok i ti pli zenn parlmanter ki ti ganny elekte dan sa lasanble.  Msye Speaker mwan personnelman mon’n tre pros ek sa zenn onm depi ler i ti komans son karyer politik boner dan bann lannen ‘90. Pour li i ti’n sorti dan en fanmiy Seselwa tre ordiner ki sistenm politik opouvwar ti’n donn li loportinite pou avanse dan lavi. E i pa ti mank sa loportinite.

Koman en manm nou parlman Dick ti toultan mean business e  pran son travay tre serye ek tou senserite. Mwan ki’n ganny sa loportinite pou asiz obor li pandan plizyer lannen, mon ti toultan apresye li koman en dimoun ki fer bann bon analiz, bann analiz profon lo diferan size ki’n pas devan nou lasanble.  Mon rapel Msye Speaker dan plizyer lokazyon kan i ti dir mwan ki i pe al koz detrwa minit. Me apre finalman Dick ti koz pour plis ki en demi erdtan akoz anmezir i entervenir bann nouvo lide i vin dan li. E i demann li pou eksprim sa bann lide deswit.

Atraver son bann lentervansyon, devan nou lasanble, Dick in fer bokou seselwa apresye li. Me nou annan osi ki’n vwar Dick koman zot lennmi. Senserman mon konnen ki zanmen in son lentansyon pou vin lennmi personn. Tou le kontrer in toultan anvi vwar dibyen pour tou pep Seselwa. Msye Speaker mon konn sa tre byen akoz Dick dan plizyer lokazyon mon’n ganny sans asize e partaz pwennvi lo plizyer size ki konsern devlopman nou pei ek nou pep. Malgre son laz, in matir e son matirite e son lanvi pou travay dir pour nou pei, ti ganny demontre klerman sirtou ler i ti Chairman komite nou lasanble lo tourism. En responsabilite ki i ti desarze avek bokou devosyon. E mwan mon napa okenn dout ki ansanm avek son lekip sa lepok zot in anmenn en kontribisyon tre valab dan devlopman lendistri touris dan Sesel.

Answit nou ava osi rapel son letan tre kourt koman Deputy Speaker nou lasanble kot i ti ankor ennfwa demontre son kapasite pou ranplas Mr Speaker ler ti neseser.

Ozordi Prezidan pe demann nou pou donn Dick en nouvo Challenge e apwent li koman lanbasader pour Sesel. Prezidan in vwar ki i annan sa kapasite pour fer li.  Alors mwan Msye Speaker si mon annan en mesaz spesyal pour Dick ozordi,  i sa enn swivan; Dick ou pou ganny tou nou sipor, nou demann ou pou reste touzour solid dan ou krwayans pour nou kree sa nouvo Sesel.  Ou’n konn botan me ou’n osi pas dan move tan dan ou karyer politik. Ou’n pas atraver bann moman difisil, me ou’n tenir ou pa’n large.

Ozordi koman enn nou frer nou pou siport ou nominasyon pour ou vin en anbasader Sesel e nou pou demann ou, tou nou bann koleg pou fer parey e nou pou donn ou tou sa sipor neseser.  Me anmenmtan nou pou demann ou pou tenir sa bann prensip ki senserman ou’n toultan krwar ladan. E dan nenport ki landrwa  ou pou ete demen anmenn nou paviyon pli o ki ou kapab akoz i nou sel Sesel sa. Tenir li Dick, pa large. Mersi.

 

MS JENIFER VEL

Mr Speaker mwan mon pou donn mon sipor sa lapwentman. Msye Esparon i en zonm humble e senp. Ne Baie Lazare e grandi Pointe Larue, sa zenn onm ti komans son karyer politik a en tre zenn az. Aze selman 25 an, in deservi son distrik Pointe Larue pour 15 an.  Msye Speaker, wi sa zenn onm in dedye tou son lavi lazenes pour son zabitan e fer sa distrik ki i ete ozordi. Pour sa pti gin letan ki mon’n ganny sans travay pre avek li Pointe Larue, mon ganny sans pour konn li enpe pli byen. E mon sir ki bann lezot manm Onorab ki’n travay avek li pandan sa dernyen 15 an zot in konn son kalite travay e se sa ki’n fer li vin sa ki i ete ozordi. Msye Esparon i en zonm prensip e ki toultan gard son parol e anplis i sa zenn onm ki’n kontribye konstriktivman pour son distrik osi byen ki son pei an zeneral.

Msye Speaker pandan sa dernyen 15 an Msye Esparon in demontre son lwayote e   determinasyon alors mon senserman krwar ki i pou desarz son nouvo responsabilite avek lonnekte e efikasite. E san okenn krentif i pour en bon reprezantan pour Sesel. Alors i pou bezwen tou nou sipor. E avek sa Msye Speaker mon pou swet li bonn sans e bon kouraz dan son nouvo responsabilite. Mersi.

 

MR RAMKALAWAN

Ankor ennfwa mon pou dir ki, parey mon’n dir bomaten, lapwentman en Seselwa i merit ganny laplodisman tou Seselwa. E nou lasanble i la pour nou donn sipor sa bann Seselwa. E pour mwan lapwentman, parski nou’n abitye apel li Onorab Esparon, mon pa pour sanz sa – lapwentman Onorab Esparon i kant menm mark en nouvo letap dan listwar nou pei ki mon krwar nou bezwen sezi pour nou regarde kimannyer i pe ale. E sa letap se sa nouvo zenerasyon ki pe take over, from bann ki vye. E letan nou regard son dat nesans, ‘65 parey nou vwar se sa bann dimoun ozordi ki pe ranplas bann ki ti la avan. E nou’n vwar sa dan gouvernman limenm, 2 Minis ki’n ne dan bann lannen ‘60 e isi dan lasanble osi e nou vwar ki se sa zenerasyon ki pe take over.

Donk pour mwan i ankourazan pou vwar ki en zenn onm i ganny apwente koman anbasader. Selman ti ava bon si dan sa lespri transparans, paregzanp letan Msye Jumeau, nou’n apir son nomisyon, nou’n deza konnen deza kote i pe al reprezante e se la kot nou’n kapab koz enpe spesifikman lo sa travay ki i pe al fer. Nou’n kapab koz spesifikman lo son misyon ki i annan.  Me parkont la pour le moman nou pa konnen egzakteman kote Onorab Esparon i sipoze pe al deserve. Mon konnen ki poudir konstitisyon pa demande pour ou nonmen kote sa dimoun pe ale, tou sa bann zafer nou konnen parski nou’n pas ladan me selman i toultan bon letan ou kapab pli byen regarde ki bann  kalite ki sa dimoun i annan e kimannyer sa bann kalite i kapab pli byen permet li pour li fer son travay.

En lot rezon akoz mon krwar i en dimoun ki pou definitivman fer en bon travay se parski in ne an Mars. E bann dimoun ki’n ne an Mars se bann dimoun ki so e alors sa mon sir i pour en keksoz – bann boug le 15 le 17 sa bann boug ki mesan alors i pou fer son travay.  Me mon ti ava kontan anmenmtan osi petet koriz en keksoz ki Onorab Pool in dir ki pa ti neseser.  I pa ti neseser pour Onorab Pool rantre avek sa zafer – sa sistenm politik ki ti opouvwar in permet li soz son ledikasyon. Akoz mon dir sa? Mon pe dir sa pour mwan donn Onorab Esparon what is due to him as a man. Onorab Esparon menm dan sistenm avan i ti’n fini pass son entrance, i ti pe lekol Kolez letan kou-deta ti fer. Ofet in lekol form one ziska form 3 pour senp rezon ki apre form 3 ti annan bann zafer NYS. Parkont ki Onorab Pool, ou menm ou Onorab Herminie, Onorab de Commarmond, tou sa bann boug, nou nou ti’n ganny sans – e bann lo nou kote nou ti’n ganny sans fini pas sa bann zafer NYS. Alors annou pa tro zis met sistenm politik pour nou fer krwar ki poudir sistenm politik ki met lespri dan ou latet.  Dan ou latet ou lespri ou ki gannyen atraver ou bann genes, atraver ou bann demars ki ou fer, atraver ou konsantrasyon ki ou mete dan ou letid parski ozordi nou trouv en kantite dimoun ki pe fini obor semen menm si i annan sistenm politik. Sa i premye keksoz.

Dezyenm keksoz ki fer mwan sourir letan mon’n tann Onorab Pool koze se poudir ki Onorab Esparon ti tre aktiv lo bann komite lasanble ki i ti sit lo la. E mon mazinen ki atraver sa Onorab Pool pe dir ki i ti tre aktiv lo komite Standing Orders ki pa’n zwenn ditou. E la mon krwar konmsi nou bezwen osi fer atansyon.

E wi, Onorab Esparon in desarz son responsabilite dan sa lasanble i pa’n en lavwar ekstremist menm si dapre li Hugo Chavez i son model, sa son zafer politik pour li me i pa’n en lavwa ekstremist, okontrer in en lavwa rezon e se pour sa rezon ki a en serten moman i ti pe ganny regarde dan en serten fason. I ti fall out avek group parlmanter e menm nou ti pe koz lo son trwa fwa koman kandida. Nou tou ki la politisyen nou konnen ki sa trwazyenm fwa ki i ti debout i ti vwar li koman en fot ki in ti’n fer parski i pa ti’n devret debout.  E limenm li in eksprimen lo plizyer repriz kimannyer in drol finalman in aksepte pour li debout.

Me wi, i en lavwa rezonnab e mon espere ki i gard sa aspe rezonnab dan son travay ki i pou fer. Mon napa okenn dout ki Onorab Esparon pou defann lentere Sesel e i pa pou zanmen al lo bann lalinny ekstrenm. Me selman anmenmtan osi toultan i bon donn serten avertisman parski nou konnen ki poudir frer Onorab Esparon se pa lot ki Msye Sylvestre Radegonde, Anbasader Radegonde ki dan bokou sans limenm li Onorab Esparon in pran koman en model.  E Anbasader Radegonde in deservi Sesel dan bann fason vreman egzanpler in en dimoun ki’n debout e menm bann ki dan premye lasanble nou ava rapel, menm letan serten desizyon ti ganny pran pou met li avek Msye Marengo deor, sa lasanble ti sit koman en komite pou demande ki gouvernman i remet sa 2 dimoun koman anbasader. E sa sete akoz zot abilite tou le 2 me la mon pe koz enpe lo Sylvestre, mon zanmi ki mon’n fek zwenn de semenn pase, kot mwan mon zis swete ki Onorab Esparon letan i pe fer son travay, apre sa i pa ganny trete parey son frer.  Sa i enn premye.

Dezyenm, mwan personnelman mon ti krwar ki avek sa plan pou elekte li an 2006 koman Deputy Speaker lasanble, ti annan en plan pour li vin Speaker Lasanble parski i ti sipoze pe komans ranmas sa leksperyans. E sa i mon lopinyon personnel. Mon krwar ki ofet dan sa lasanble se li ki ti devret vin Speaker e petet Onorab Speaker vin anbasader parski konmsi i ti ava swiv enpe dan sa lalinny..

 

MR SPEAKER

..Onorab move on.

 

MR RAMKALAWAN

Wi be mon pe koze.

MR SPEAKER

Depi bomaten nou pe byen ale. Ou pe fer en bann statement lo bann apwentman konstitisyonnel. Ou pe fer bann derogatory remark anmenmtan.  Mon pe demande ek ou Onorab proceed avek en deba rezonnab, e sivilize.

 

MR RAMKALAWAN

Mon ava kontinnyen avek en deba rezonnab e sivilize akoz mon krwar set egzakteman sa ki mon pe fer. Mon pe met mon bann pwen ki mwan mon krwar ladan e keksoz ki mon krwar ladan as long as ki mon pa pe ensilte personn mon krwar ki anba konstitisyon, there shall be freedom of expression in this House. E mwan mon eksprim mon lopinyon e mon lopinyon personn pa pour anpes mwan eksprimen.

Mwan mon ti ava kontan swet Onorab Esparon bonn sans dan son misyon koman en  anbasader e ankor ennfwa mon pou dir avek li ‘frer mon espere ou pa fini parey ou frer’.  Mersi bokou.

 

MR ANSLEY CONSTANCE

Msye Speaker mon konn Msye Esparon koman en koleg etidyan depi NYS. Nou’n etidye ansanm, nou’n fer sports, e bokou bann aktivite ansanm. E plitar si oule sakenn in fer en direksyon.  An 2001 si mon pa tronpe nou ti rankontre kanmarad dan en vizit ki i ti fer Silhouette e son lannen answit nou ti travay kot a kot dan sa menm lasanble.  Mon’n ganny sans travay avek Msye Esparon, byen koni ‘Dick’, pli pre kan nou ti form parti komite tourism e la mon’n aprann bokou avek li. Pour mwan Dick ti en zonm mobil dan son panse e dan son aksyon. Ou ti santi par son fason fer ki i ti oule anmenn en pli gran kontribisyon pour son pei.  E ozordi i oule prouv avek lepep Seselwa sa.

Msye Speaker mon krwar ki tou manm sa lasanble i devret santi li alez pou aprouv nominasyon Msye Dick Esparon koman enn nou anbasader. Sa set akoz laplipar nou nou’n ganny sans pou travay avek Msye Esparon koman manm sa lasanble e nou’n ganny sans apresye bann kalite ki Dick i annan. Msye Esparon in servi lasanble nasyonal pandan 3 term e in deservi distrik Pointe Larue me anmenmtan pour mwan in defann zentere tou Seselwa dan sa lasanble.

Pandan son bann lentervansyon koman en manm sa lasanble Msye Esparon in koz avek konviksyon me dan tout la fransism me zanmen Msye Esparon in montre serten larogans.

Dan bann deba  dan sa lasanble Msye Esparon in parfwa koz avek pasyon, me touzour in montre tolerans pour son bann adverser. Letan i ti vin Deputy Speaker, pa bokou letan, Msye Esparon in servi sa lasanble si oule avek serten dignite e limilite.

Msye Speaker nou pa devret annan okenn problenm alors pour nou aprouv nominasyon Msye Esparon akoz parey in deservi son distrik Pointe Larue e lepep Seselwa dan sa lasanble mon napa okenn dout ki i pou montre menm determinasyon e aplik byen son lentelizans ek leksperyans pou deservi son pei Sesel, son patri parey toultan i dir.

Msye Speaker en pei ki fer progre letan son bann leaders i ganny sans sirkile, sa vedir letan en lider i anmas leksperyans ek konpetans dan en pozisyon oubyen dan kek domenn i merit kapab bouz pli o oubyen bouz dan en lot sekter. Sa i fer ki sa dimoun i kapab aplik son talan avek plis lantousyasm dan en nouvo domenn.  E sa i osi vedir ki bann nouvo talan i ranplas sa dimoun, ki’n bouz pli o, i ganny sans devlope.

Msye Speaker dan ka Msye Esparon i kler ki poudir  i ankor relativman zenn, sa si i ti kontinnyen dan servis piblik oubyen dan politik i ti kapab fer ankor omwen 5 manda oubyen anviron 25 an koman MNA Pointe Larue. Me parkont letan in deside bouz dan en lot domenn, Msye Esparon in les laplas pour nouvo talan parey Onorab Jennifer Vel ki akote mwan. Enn pli zenn koleg e i repete ankor, konmsi en pli zenn koleg sorti Pointe Larue menm dan sa lasanble.

Msye Speaker permet mwan profit sa lokazyon  onon pep Seselwa pou felisit Msye Esparon, Dick lo son nominasyon.  Ki avek Benediksyon nou Kreater i ava servi son lenerzi e lentelizans pou deservi son patri e fer flote paviyon Sesel avek tout lafyerte. Avek sa de mo, mon demann tou mon bann koleg pou siport laprouvasyon Msye Dick Esparon koman anbasader pour Sesel. Fotespere mon pa’n fer tro gran orloz lo Msye Esparon. I beg to move Msye Speaker.

 

MR BERNARD GEORGES

Mr Speaker mon kontan lafason don Lonorab Constance in fini son lentervansyon bomaten akoz mwan mon ti pe al dir ki i en zour ozordi kot nou devret in fact dan en lazwa, lorloz i en lot keksoz – en zour kot nou devret dan en lazwa akoz nou tou nou inanim pe siport de dimoun valab. Enn ladan nou ex –koleg pou pran en rol enportan o servis zot pei.  Me sa ki mon’n tande se – mon pa a servi sa mo lorloz, mon’n tann en kantite temwanyaz konmsi  ti a fer dan en lanterman pour sa de zenn onm. E mwan mon ti a kontan sey kas en pti pe sa lalinny. Zot tou le de zot byen valab me zot zenn, zot dinamik, zot vivan e zot pe al pran en lot karyer devan.

E ler mon regard Lonorab Dick Esparon mon lazwa i ankor pli gran akoz Lonorab Esparon parey tou dimoun ki’n koze in dir, i ti en koleg vreman Onorab dan sa lasanble. Mr Speaker ou ava rapel ki zour ki i ti ganny nonmen premye fwa koman en ad-hoc Deputy Speaker e ki i ti pran son plas la pou chair en komite, mwan mon ti dir ki mwan si lokazyon ti permet mon ti pou vot pour li pou al enpe pli lwen. Mon pa pou al antre dan okenn polemik. Ou pa ti ankor aspir a sa pozisyon a sa moman la akoz mon ti krwar e mon ankor touzour krwar ki Lonorab Dick Esparon malgre ki i ti asiz lo lot kote latab i ti en dimoun ki ti annan sa grander lespri ki bokou parmi nou nou napa pour li kapab i annan defwa koz konmsi i ti asiz lo sa kote. E sa set en kalite ki li i ti annan e ki mon krwar ki i ava servi li bokou dan sa karyer ki i pe al pran, bokou plis ki serten lezot dimoun.

E se pour sa rezon ki mon enpti pe atriste bomaten pa pour rezon ki Lonorab Ramkalawan in donnen, avek parol Lonorab Pool, ki’n santi li bon malgre ki mon pa krwar i ti neseser pou anmenn en slogan politik ki in tenir i pa’n large dan en domenn ki pa ti devret politik. Of course Onorab Esparon ti annan son krwayans politik e nou ti respekte son krwayans politik. Dimoun dan son distrik ti byen kontan li. E zot ti vot pour li pour 3 fwa e nou respekte e nou acknowlege sa. E se sa en pti pe tenm mon lentervansyon bomaten. Mon krwar ki tanzantan malgre ki nou en lasanble politk, i anann serten zour kot nou devret rise above politik e sey regard en dimoun pour sa ki i ete rather than sa ki in fer. E mwan ler mon’n regard CV Lonorab Esparon mon vwar ki sa CV dan fason in fer i dekri sa dimoun dan tou son lanpler. I en garson ki koz 4 lalang, e nou vwar sa tre byen dan sa heading workshops and seminars kot in eple li seminares, mon sipoze i espanyol pour seminars. Mon vwar Mr Speaker ki i en garson parey nou tou nou konnen ki annan bokou pasyans me son pasyans i al ziska en serten lobzektif, ler nou vwar lalis bann pei ki in vizite, nou vwar ki ler in ariv Maldives in fatige, in aret in met etc. akoz i annan ankor lezot me i pa kapab – i pa en boug ki pou al donn nou tou sa bann non. Me nou vwar osi ki i annan en gran kouraz, akoz in swazir e la mon siport li konpletman pour li sanz non son parti politik ki li in deside lo premye paz apel li Seychelles People Progressive Font ki mon krwar i en non tre apropriye.

Mr Speaker mon ti anvi dir sa detrwa mo pou mwan kas enpe sa persepsyon ki latristes ki dan sa lasanble ozordi e remet en pti pe sa tren lo son ray. Nou dan lazwa e nou dan lazwa akoz enn nou koleg ki nou tou le de kote latab ti admire e ti kontan pe ganny en zoli promosyon.

Me permet mwan an konklizyon regret kantmenm en keksoz ki nou vwar dan sa let 2 lapwentman bomaten. Mon pa pe koz lo sa de dimoun personnelman, nou tou nou’n dir ki zot de dimoun, valab, zot de dimoun ki pou fer en bon travay la kot zot pe al ganny anvoye.  Me mon latristes se ki sirtou dan en lannen ki’n ganny deklare koman en lannen kot nou pou travay ansanm pour lanmour Sesel, mon vwar 2 lapwentman, 2 dimoun politik, 2 manm SPPF pou al travay pour nou pei koman en loportinite manke ankor tel parey, e mon pa pour al ladan, tel parey resaman lapwentman ou predesesan, in ankor ennfwa montre nou ki en mesaz ki pe ganny anvoye se pa en mesaz linite, se pa en mesaz ansanm set en mesaz pour ou get on in life si ou anvi aspire a en fason pour ou travay e servi ou pei, apard ganny elekte dan en distrik fodre ou en manm SPPF akoz sansan sa bann loportinite pa available pour ou. Ou pa kapab aspire paregzanp pour ou servi lo en board, oubyen pour ou vin en Ziz, oubyen pour ou vin en anbasader si ou pa en manm parti ki opouvwar, si ou dan lopozisyon.

E mwan mon fer en lapel ozordi e konpran mwan byen Mr Speaker avek bann dirizan sa pei ki 30 an apre sa levennman ki ti diviz nou e 31 an apre nou lendepandans in ler pou sey regard en pti pe nou popilasyon antye olye regard zis en kote. I annan dimoun valab dan SPPF, pa les mwan ganny dir ki napa, nou tou nou konnen. Me i annan osi dimoun valab ki pa dan SPPF e ki devret zot osi annan en loportinite pour zot aspire, tel parey zot bann konfrer ki dan SPPF pour zot osi  kapab en zour si lokazyon i permet servi zot pei. E mon ti a kontan Mr Speaker fini avek sa. Annou pour larestan sa lannen ki’n ganny dedye a  linite, annou fer en pti lapel avek tou nou popilasyon pou regard tou popilasyon e non pa zis enpe.

Avek sa de mo Mr Speaker mon ti a kontan anmenn mon sipor e mon swe pou Lonorab Esparon ki mwan osi mon pou kontinnyen apel li Onorab Esparon dan son karyer ki pe vini. Mon remersye ou.

 

 

 

MR TERENCE MONDON

Mon pou tre bref. Mon oule zwenn mon bann koleg pou eksprim satisfaksyon lo nominasyon nou ansyen koleg, ansyen manm nou lasanble. Sa apwentman byensir i anmenn serten lafyerte pour nou lenstitisyon.

Msye Esparon in defann lepep Seselwa e in osi promouvwar le meyer pour nou pei, in fer sa dan lasanble nasyonal e in fer li osi onivo distrik. Msye Speaker nou pe koz lo en dimoun ki nou konn tre byen e konn tre byen bezwen nou pei.  Anplis en dimoun ki pandan sa dernyen 14 an atraver sa lasanble nasyonal in ganny sans aprann e vin azour ek bann lalwa e bann polisi Sesel dan diferan domenn.

Mr Speaker lannen pase nou ti ganny sans apwent en lot ansyen koleg, Msye Faure koman lanbasader Brussels  ki mon’n aprann ki Msye Faure pe fer en bon travay, i pe debourye pour Sesel alors mon ekspekte ki Msye Esparon pou al dan menm lalinny. Alors Msye Speaker nou’n ki’n ase pros avek Msye Esparon nou konn tre byen son kapasite parey in ganny dir par tou bann lezot manm ki’n koze. Nou kapab ekspekte ki i pou fer en tre bon travay.

Msye Speaker parey in note pli boner, nou konnen ki sak dolar ki nou depanse lo en anbasader i bezwen annan en retour bokou plis.

Ozordi mon kontan pou aprann ki Onorab Faure paregzanp i pe kit nou lasanble azour ek bann travay ki i pe fer ek bann mouvman. E lo sa not mon swete ki nou bann lanbasader, Msye Esparon osi e lezot i gard nou lasanble, swa atraver, Foreign Affairs, azour ek bann travay ki pe pase si oule pou reponn en pti pe bann pwen ki ti fer sorti kote lopozisyon pli boner.

Finalman Msye Speaker mon oule note ki en anbasader i pa al enterfer dan direksyon, dan politik en pei parey Lonorab lider Lopozisyon in dir nou bomaten, kote La Chine. Mon krwar nou lanbasader i al travay pour sesel e se sa ki nou ekspekte de li. E se sa ki mon krwar Msye Esparon a osi fer ler i fini ganny apwente.

 

MR SPEAKER

I reste ankor de dimoun lo lalis.  Nou annan…

 

(Interruption)

..ou pe sede. Oke. Alors i reste Onorab De Commarmond ek Onorab Potter pou annan right of reply. Onorab very brief sa vedir mon pe donn ou 3 minit.

 

MR DE COMMARMOND

Mr Speaker, pa pran letan ankor dan sa 3 minit. Mr Speaker, Sir mersi bokou. Etan donnen Lonorab Dick enn mon koleg, nou’n la ansanm, mwan mon Cascade, li i Pointe Larue e anmenmtan Onorab Dick, i enportan fer sorti ki in pas enpe son lanfans Cascade.  Se la enfan kont  ki son entrance dan sizyenm Cascade ki in gannyen pour li vin kolez. Mon’n toultan vwar li koman en garson entelizan, en garson byen kapab, fran e responsab. Mwan mon vreman fyer de li, mon vreman fyer ki omwen nou gouvernman in vwar sa potansyel dan sa zenn onm pou apwent li koman anbasader.  E mwan mon annan tout konfyans, tou konviksyon Msye Speaker ki Lonorab Esparon i sa dimoun ki parey nou’n dir, i rise above politics souvannfwa, e i en boug de prensip. Sa ki mon kontan se ki si sa keksoz ki byen, i pou dir la la sa i byen e prezan ki i pou defann sa anmor. E mwan set en boug en pti pe,  si oule dir parey mwan, sa kalite keksoz ki mwan mon kontan, se kestyon drwat, en kestyon ki nou anmenn nou pei, dan en fason, dan en direksyon ki byen e mon napa dout ki lonorab Esparon alors pou anmenn nou pei bokou devan.

Msye Speaker anmenmtan i enportan fer sorti, enn de pti pwen. Souvannfwa nou apwent nou bann anbasader, zot al deor laba epi nou nou pa konnen enn ler ki zot pe fer. Nou pa konnen akoz ou pa tann narnyen. Ennler ou demande si zot ankor anbasader oubyen non. Mon pa pe ensilte personn me selman mon pe dir laverite e mwan monti ava kontan ki nou osi, nou minister zafer etranzer, nou medya i fer en zefor konmsi.  Letan paregzanp zot desann enpti kou vin Mahe, omwen  interview zot, demann zot enn de kestyon, nou pep a vwar konmsi bann desizyon ki nou pe pran nou, sirtou ki ganny aprouve par sa lasanble, i bann desizyon ki bon e nou vwar benefis ki sa bann dimoun pe anmennen pour nou pei. Akoz la nou pe met en ta konfyans, nou pe dir i korek, i bon, i isi i laba me apre nou bezwen osi vwar sa rezilta.

Anmenmtan mon pe dir ki,   nou’n nonmen taler bann zafer forex i pou depanse ek zot akoz laba ou pou bezwen pey an forex, pa pou aksepte  roupi, so far ziska konmela kimannyer i ete. Be nou bezwen osi vwar – it’s an investment anmenmtan. Ou vwar, nou bezwen annan en benefis ki nou tire. Oke i sa benefis lo pwennvi diplomasi ki ou pei i ganny prozekte dan lemonn. Me anmenmtan mon demande ki nou bann anbasader sirtou ki sa de la, ki fer mwan pli kontan avek zot se 2 dimoun ki’n sorti dan roots, dan labaz. Two people based person ou kapab met li konmsa ki mon demann zot pou mazin nou letan zot laba, rod fason dan bann diferan progranm enternasyonal ki annan dan diferan fason dan sa bann pei kot zot vwar ki nou kapab benefisye, dan bann don, bann lasistans isi laba ki anfen kont sa larzan ki nou pe depans ek zot i re-antre dan en lot fason pou benefisye nou pep e nou pei.

E dernyen, Msye Speaker Sir, se mon demande mwan ki nou bann lanbasad i ganny beefup enpe akoz  si nou pe ekspekte that much avek nou bann anbasader nou bezwen osi kree sa lanvironnman ki pou fer ki zot kapab fonksyonn to the best of their ability so pour nou kapab ganny sa maximise turn-over lo zot si nou met li dan sa fason konmsa.

E an finisyon i enportan ki nou dir ki nou bann anbasader sirtou sa de ki nou pe apwente la,  nou demann zot ki osi e mwan mon krwar, avek Onorab Dick e Mr Jumeau, mon krwar mwan ki letan en Seselwa i al dan sa bann pei kot zot ava ete, mon pa tro, tro konnen kot pou ete, me letan en Seselwa i al dan sa bann pei, difikilte ki zot ava gannyen en konparezon, pour en rezon enportan ki nou Seselwa i anvi apros lanbasad, mwan mon garanti ki la i pour de anbasader ki pou very approachable. Mon konnen e en fason si en Seselwa i dan en problenm, i a kapab ganny regarde, son case parey Lonorab Dick in abitye get dan case bann dimoun Pointe Larue, dan problenm bann dimoun an zeneral, osi i  pou vedir letan nou pou a leksteryer Sesel sa osi  a ganny regard ladan.

Mon swet zot tou-de-bon tou le de. Mon demann zot pou fer sa travay dan en fason fervent, en fason byen, en fason ki pou anmenn sesel devan ankor en fason ki lepep Seselwa osi i vwar dan zot konmsi sa bon desizyon ki nou pe pran, nou lasanble serye i pe pran ozordi. Mersi bokou Msye Speaker, mon pou donn tou mon sipor sa apwentman ki devan mwan.

 

MR SPEAKER

Onroab lider of Government Business, right of reply.

 

MRS POTTER

Mon pour tre bref.  Mon remersye tou bann manm ki’n siport sa lapwentman.  Parey mon’n dir pli boner i en plezir ki sak fwa ki nou lasanble i siport bann size parey a linanimite. Kestyon in ganny demande lo kote anbasader Esparon pe ale. Mon’n ganny enformen ki i pou ganny poste koman okomiser Sesel an Lenn e akoz Lenn? Lenn parey nou konnen i pe vin enn bann pouvwar ekonomik pwisan apre La Chine an azi. E mon difere avek Lider Lopozisyon lo sa kestyon konpetans en dimoun si i ne avek oubyen si i gannyen. Mon krwar konpetans en dimoun otan ki i ne avek me si i pa ganny loportinite pou devlop li i pa pou kapab ariv kot i oule ale.  Tanka bann referans ki’n ganny fer lo size si i devret vin Speaker, si i pa devret swiv son frer, oubyen swiv son frer, Msye Speaker mon krwar sa i vreman regretab.

Lo kestyon si li i ti devret vin Speaker mon ti a kontan reafirmen ki nou lo nou kote nou respekte ou eleksyon ki’n en  lekspresyon lavwa lamazorite. Nou rekonnen sirman pour ou konpetans e nou siport lafason firm but fair ki ou pe diriz nou katriyenm lasanble.

Si i annan en mesaz deryer lapwentman Msye Dick Esparon ki Msye Georges pe rode se ki lazenes pou lavenir i ek SPPF. Avek sa mon demann tou manm  pour vot an faver sa mosyon.

 

MR SPEAKER

That the question be now put. Tou bann ki anfaver. Oke. I reste zis mwan prezan pou felisit le de anbasader sirtou Onorab Dick ki ti en zanmi tre pros.  E mon felisit le de zonm sirtou akoz zot in konnen kan dan avi in ler pou move on. Adjourn ziska 2 er.

(Break)

 

MR SPEAKER

Bon apre midi tou-l-monn. Nou ava repran nou travay e nou ava bouz lo lot mosyon par Onorab Jeovana Charles.

 

 

 

10 July 2007

MRS JEOVANA CHARLES

Mr Speaker Sesel i en pti pei, i parmi bann pei  kot bann madanm in arive ganny menm sans pour devlope ki bann zonm.  Letan kot bann madanm ti kapab selman reve annan en pos sekreter oubyen en ansenyan oubyen  a la limit travay koman en ners in pase depi byen lontan.

Fini letan kot nou manman ti kas zong lo ros larivyer ek gro balon lenz madanm entel, fini letan ganny mal-o-ren dan tarmak, e fini sa letan kot bann madanm ti bezwen sibir vyolans domestik  kont zonm akoz zot ti napa en lanplwa e alors zot ti bezwen fye lo zot mari.

Mr Speaker mon krwar ki tou Onorab pour dakor ek mwan ler mon pou dir ki Sesel in touzour en sosyete maternel. E pli gran lazwa en madanm i kan son zanfan i reisi e pou arive i bezwen annan bann bon kondisyon lavi pour son zanfan kapab etidye evolye e grandi.  En manman i santi ki li ek son fanmiy i an sekirite kan zot annan en bon twa lo zot latet.  Avek tou sa bann sikse ki bann madanm Seselwa pe fer ozordi, nou bezwen osi admet ki bann madanm i ankor pe fer fas avek bokou defi.  I ankor annan bokou madanm ki pa ganny en lanplwa akoz zot napa bann aki neseser.  Sa i petet akoz zot in ansent tro zenn, e ki zot in bezwen kit lekol avan ki zot ti ganny okenn kalifikasyon oubyen pou kek lot rezon.

Se touzour bann madanm ki bezwen fer fas avek bann problenm sosyal tel ki vyolans domestik, bann adolesan ki annan difikilte ki’n tonm dan labi sibstans danzere e i osi annan manman ki pa kapab al travay akoz zot annan enn oubyen de zanfan anba laz ki fer ki i kout tro ser pou met zot dan day-care. Se pour sa rezon akoz en tel mosyon ozordi, set akoz  problenm lavi lafanmiy oubyen en manman tousel in sanz laform konpare avek yer.

Mr Speaker mon mosyon devan nou ozordi alors pe demann gouvernman pou etidye fason pour kapab mye siport bann fanmiy ki pli vilnerab an partikilye bann manman tou sel.   Mr Speaker dan son ladres le 18 Zen 2007 parmi bann nouvo mezir ki Prezidan Michel in anonse i konstriksyon 10 day care centres dan diferan distrik e anplis gouvernman pou met anplas en sibvansyon pou redwir kou day-care. Sa i en bon pa ankor pour permet en meyer lavi lafanmiy e ed sa bann manman tousel ki travay.  E sa i osi demontre ki nou gouvernman i konsyan tou sa bann defi ki   bann madanm pe fer fas avek. E atraver Minister servis sosyal, in met diferan progranm anplas pou ed sa bann madanm. Atraver bann scheme tel koman pti biznes, bokou madanm pe kapab ozordi reste kot lakour e okip zot zanfan anmenmtan ki zot fer zot pti biznes kot lakour menm ki ed zot ganny en reveni pour zot fanmiy.

I osi annan bann lezot scheme parey full employment scheme ki ed zot ganny en reveni dan en fason tanporer ziska ki zot ganny en lot lanplwa e pour bann ki pli zenn oubyen ki anvi fer li, i annan en bann progranm ki ed zot devlop serten skills pou kapab  antreprann en travay.  Means Testing i reste sa safety net ki bann madanm ki mwen fortinen i annan pou asire ki omwen bann bezwen debaz zot fanmiy i ganny zwenn. Me ki nou vwar ozordi Mr Speaker? Nou vwar ki i annan bokou madanm ki ankor dan problenm menm si gouvernman in esey met bann scheme ki mon’n fek nonmen, i ankor annan ki sa safety net pa kouver zot ase. Sa set akoz Mr Speaker, sa bann madanm ki mon pe koz lo la i pa neseser ki nou vwar zot andikape oubyen zot problenm avek de lizye ki nou gete. Nou pou vwar zot andikape ek zot problenm selman avek 2 lizye ek en leker.  Mon dir sa akoz board lasante i vwar ki sa bann madanm i kapab travay. Board Means Testing i vwar ki sa bann madanm napa en case, i kapab travay me anplwayer i vwar ki sa bann madanm pa kapab travay kot zot.

Mr Speaker ler mon ti aksepte pou debout ankor pour distrik Roche Caiman, mon ti promet ki mon pou pouse pour sa bann madanm ki ozordi pe fer fas avek sa bann difikilte pou trouv en solisyon pour zot problenm. Mr Speaker sa bann problenm i varye depi problenm lasante, problenm tribinal lafanmiy, lasistans finansyel etc.  Mr Speaker ler ou pou ekout bann konsern e legzanp ki mon pou al donnen, ou pou santi ki mon pa pe met okenn lenplikasyon lo bidzeter me sa ki mon pe montre se ki nou annan problenm avek swa nou kriter, swa nou bann zofisye, swa nou striktir e nou bezwen re-egzamin petet lezislasyon an antye.

Mr Speaker prezan les mwan donn enn de legzanp. Sa enn fek ariv mwan yer. En zenn manman ki annan li 4 zanfan, papa in kit li e papa pa pe kontribye, sa zenn manman malgre i ti devret pran son responsabilite, in fini annan 4 zanfan. Son case devan tribinal pou pas lafen dimwan Zilyet. I fer en laplikasyon Means Testing i ganny R400. Dir mwan, mwan mon pa krwar dan dimoun ki abiz sistenm welfare, sa mon kont totalman, be dir mwan Mr Speaker, eski nou pa krwar ki i annan en problenm. Mwan mon’n mansyonn zis sa 4 zanfan me lezot problenm ki sa madanm i annan mon pa pe pas lo la.

Mr Speaker mon a prezan servi en lot fe. En madanm ki ti an bonn sante e pe travay byen. Apre enpe letan i trouv li dan en sitiasyon ki kapab ariv  avek nenport ki. I trouv li avek en kanser. Bondye i pitye li apre enpe letan e i reganny son lasante. Letan i ti malad i ti ganny asiste avek sekirite sosyal atraver board medikal.  Sa madanm finalman i ganny deklare fit to work. Apre 2 an prezan i bezwen retourn dan lemonn travay ki li osi i ti a swete.  Me ki arive, i ganny li en sertifika light duty. Sa madanm i vin vwar mwan prezan mwan mon komans fer lasas light duty. I fer lapenn, sa madanm i monte desann e parey mon’n dir taler Means Testing i donn li R400. I annan son bann komitman finansyel parey mwan ek ou, parey sa bann dimoun lo board medikal, parey sa bann dimoun lo board Means Testing, pa zanmen krwar ki sa madanm, sa bann dimoun parey pa anvi travay.  Me sa travay apropriye pour donn zot napa.

Anplwayerozordi zot dir nou zot napa light duty. Petet nou kapab dir light duty resepsyonnis, clerk oubyen lezot travay lofis. E a en laz avanse sa bann madanm pa kalifye, sa bann madanm i soufer akoz parfwa zot menm zonm, zot menm fanm kot lakour.  Mr Speaker mon a donn ankor en lot legzanp; en madanm i travay IOT pour en bon pe lannen e apre i tonm malad. Sa madanm atraver board medikal i ganny asiste par fon sekirite pour enpe letan. Apre board i trouv li byen pou al retrouv son travay. Me anmenmtan i pa sipoze retourn kot IOT akoz ler travay i tro long e i debout tro lontan.  Sa madanm pankor kalifye pour li ganny son pansyon. Li osi i kontinnyen monte desann pour ganny en travay apropriye me anven.  Mr Speaker bann ka parey ou pa zis kapab baz li lo bann prosedir ek bann kriter etablir ou bezwen kapab get zot avek de lizye ek en leker. Mr Speaker enpe letan pase nou ti annan sa ki nou ti apel medical social worker e sa dimoun an kolaborasyon avek ners ek dokter zot ti kapab fer en assessment sa pasyan lopital.

Si sa pasyan ti pou bezwen lasistans, sosyal oubyen en carer, ozordi ler en pasyan i sorti lopital, si i bezwen en carer, sa zanfan i bezwen pran son konze si i napa en dimoun pou kit son manman avek pour li kapab al lasas en carer mon apel li.  Konze i fini, i bezwen pran leave without pay pour kapab ed son manman. Be nou pa kapab kontinyen konmsa, sa bann sitiasyon parey i kapab menm ariv avek en zenn manman.  E sa problenm prosedir i kapab tonm lo son vye manman.

Mr Speaker mon sir ki lezot Onorab pou annan bokou lezot ka ki zot pou koz lo la taler. Me avan mon termin mon prezantasyon, mon anvi dir ki mwan mon pa pe ankouraz okenn dimoun pou vin depandan lo sistenm welfare. Ki mon pe dir se ki bann fanmiy ki pli vilnerab sirtou bann  manman tousel zot bezwen ganny asiste.

Mr Speaker i terib ler en madanm ki nou annan detrwa ozordi  pour en rezon swa lasante ki souvan i le ka, oubyen annan zanfan ki pa totalman andikape me pa kapab kit dan day-care oubyen avek en lot dimoun. Sa dimoun in kontinyen monte desann pour li kapab ganny en lasistans pour li ed son zanfan e limenm li.  Tris dan bann ka parey Mr Speaker.

Koman en manman avek travay ki mon fer, mon zwenn sa bann sitasyon tou lezour e ler mon ti aksepte pou redebout koman kandida Roche Caiman, mon ti promet ki mon pou pouse pour sa bann madanm oubyen manman tousel pou trouv en soulazman pour sa bann difikilte lavi ki zot pe pas atraver ozordi.

Mr Speaker parey mon’n dir, mon konnen ki pou annan lezot legzanp ki pou ganny aborde par lezot entervenan taler. Alors se mon swe parey Prezidan Michel in dir le 18 Zen, ki i pe ogmant konze maternite dan kad promosyon lavi lafanmiy koman nwayo nou kominote. Mwan osi mon ti a kontan dir si nou bezwen en fon pour bann manman tousel ki pli vilnerab, annou gete. Si nou krwar ki Means Testing i kapab fer li annou get sa bann prosedir, annou reget so lalwa, annou reget son bann zofisye, annou reget son board. Mwan mon ankor santi ozordi ki nou bann madanm, nou santi ki nou pilye nou sosyete e se nou sa pivo ki ed en kantite pou fer marse sa pei pou anmenn en meyer lavi, pour tou dimoun e se pour sa rezon ki ler nou vwar, ki i annan manman ki pe fer fas avek bann difikilte parey, nou osi pare pour nou met devan sa bann difikilte e esey trouv bann solisyon.

Mr Speaker ozordi nou’n osi ganny loportinite pour tann Minis Meriton ki’n vin fer statement lo lafason ki distrik in komans fonksyonnen. Mwan mon pou donn mon sipor total distrik avek bi ki sa nouvo lapros travay i ede pour donn en servi efikas. Redwir birokrasi e vwar solisyon pour problenm sa bann dimoun ki mon’n ek koz lo la.  Mwan osi swete ki sa district team Mr Speaker i osi kapab ede retourn sa kalite lavi distrik ki bann dimoun ti enjoy lontan kot vwazen ti ed bann fanmiy ki ozordi nou vwar pe komans disparet. Sa osi Mr Speaker ti en fason ede. Mon a les avek distrik pou vwar ki pli bon fason pour fer sa.

Alors Mr Speaker, mon demann tou Onorab dan lasanble pou donn sipor mon mosyon ki pe demann gouvernman pou etidye fason pou kapab ed bann fanmiy pli vilnerab sirtou bann manman tou sel.

 

MR SPEAKER

Okenn ki segonn sa mosyon ?

 

MR DE COMMARMOND

Mr Speaker mon segonn sa mosyon.

 

MR SPEAKER

Ou ti oule entervenbir Onorab.

 

MR DE COMMARMOND

Non petet en pti pe plitar Msye Speaker.

 

MR SPEAKER

Deba i ouver. Madanm Gamatis.

 

MRS GAMATIS

Msye Speaker mon oule entervenir lo sa mosyon prezante par Onorab Jeovana Charles akoz sa mosyon i tous bann fanmiy ki pli vilnerab e an partikilye bann manman tousel. Msye Speaker bann legzanp ki’n ganny met devan parey Lonorab Charles i fer bokou sans e i montre ou kimannyer nou koman bann madanm parlmanter isi dan sa lasanble, problenm lafanmiy e bann manman i tous nou en kantite.

Msye Speaker ozordi letan nou pe koz lo sa mosyon dapre mon pwennvi pour mwan mon pe vwar en manman tousel ki napa sa lot konponan zonm pou donn sa sipor lafanmiy. Malgre tre rar ou pour osi zwenn en zonm tousel avek son zanfan, ou pour osi vwar en madanm ki pankor atenn son laz retret, me i annan kek problenm ki anpes li prodwir finansyelman.  E tradisyonnelman dan Sesel, mon kapab dir laplipar sa bann problenm i plizoumwen repoz lo bann madanm e dan fanmiy i toultan bann madanm ki tant deboury bokou ki swa lo nivo sosyo ekonomik, e politik.

Msye Speaker malgre ki dan Sesel i pa egziste en povrete absoli, me nou konsyan ki i egziste bann pti lespas lapovrete ki tous bann madanm. E son lakoz i sa bann legzanp ki’n ganny mansyonnen pli boner.  E pour sa rezon ki bann madanm in toultan vin devan e lite politikman pour ki sa bann problenm i a la longer ditan ganny rezourd. Msye speaker anvi ki bann madanm i paret predominan parmi bann scheme sekirite sosyal, tel ki means Testing e lanplwa parey URS lanbelisman ki’n ganny entrodwir pou asire ki bann ki pli vilnerab paregzanp dan en fanmiy kot i annan en fanm tousel, en dimoun aze, dezabilite oubyen orfelen pa tonm, anba sa sours lapovrete. Me malgre sa nou bezwen kontinnyen rode kote sa bann trou i ete pou kontinnyen anmenn sa sipor pour sa bann ki tonm anba sa kategori ki Lonorab Charles in mansyonnen pli boner.

Si ou gete nou bann madanm i trimouse dan IOT me i pankor egziste pour zot en sistenm parey tou lezot travayer.  I annan madanm e menm msye osi ki kontinnyelman malad leren, latet, kanser e toultan pe mank travay  e lafen dimwan pa anmenn preski narnyen dan lakour. Lo liv i en travayer e i pa ganny narnyen anplis. E se sa ki nou apel bann fanmiy ki pli vilnerab. E  pour sa i bezwen egziste en makanism ki get seryezman dan sa bann kalite problenm pou fer sir ki personn pa ganny les deryer.

Nou pa la pour soutiy parese me pour bann ki vreman pa kapab i devwar bann ki dan sa servis pou get byen dan ka sa bann dimoun si nou vreman anvi asir en fanmiy stab dan nou pei.  Nou ki dan distrik tel ki bann MNA, DA, group lazenes  lekol, legliz, nou vwar tou sa bann soufrans.  E nou temwannaz sa bann sitiasyon. E mwan Msye Speaker mon’n apresye bokou ler mon ti tann Prezidan Michel dan son diskour le 18 Zen pou mark nou zournen nasyonal rekonnet en sistenm desantralizasyon kot i pour neseser anmenn serten servis dan distrik e bomaten ankor Minis in konfirm sa.  Akoz i atraver ou distrik, ou kominote ki bann problenm i ganny dekouver e rezourd bokou pli vit. Si en manman i lafen, i napa narnyen pou donn son piti pou al lekol, e i pa’n fer li par ekstre, i pa pour kapab esper 3 semenn pou ganny en lasistans. Petet i a kapab egziste en makanism onivo distrik ki pou kapab egzamin sa sitiasyon. E asiste oplivit posib e menm deswit. Petet sa district team i ava en fason pou fer li si i mars byen. Nou sistenm welfare i bon me parey mon’n dir oparavan, nou bezwen kontinnyelman amelyor li atraver sipor ki nou bann parlmanter nou donn nou bann elektora ki pli vilnerab dan nou sosyete.

E mwan Msye Speaker mon pou donn mon sipor sa mosyon e mon swete ki lezot manm  Onorab pour osi siporte pour byennet nou bann madanm dan nou sosyete. Mersi.

 

MR HARDY LUCAS

Mr Speaker mwan mon en dimoun ki senserman krwar ki bann dimoun ki pli vilnerab e mwen fortinen i devret ganny plis sipor posib a tou nivo. Swa lo nivo gouvernman oubyen lo nivo kominote pour ed zot viv en lavi ase konfortab posib koman bann imen.  I vre ki sak endividi ki fizikman annan lafors e an bonn sante i devret osi pe fer zot zefor e zot kontribisyon dan lavi ki an retour i ava permet zot ganny en reveni pou soutenir zot lekor e sa ki pour zot fanmiy ki ankor anba zot responsabilite sirtou zot zanfan ou okenn manm fanmiy ki annan serten andikap. Me malerezman sirkonstans lavi i ensi ki fer ki pa toultan ki sitiasyon i permet ouswa loportinite i donnen pour sak endividi, benefisye zot osi en pti pe sa ki sa monn i ofer pandan ki nou ankor vivan. Se dan sa lalinny ki bann lezot endividi ki annan bann responsabilite administrativ, i bezwen a zot tour ede rod sa ki meyer pour tou, enkli bann dimoun ki pli vilnerab.

Anvi ki se gouvernman dizour ki annan sa pouvwar pou partaz sa responsabilite e  ki manye finans pei i normal pour bann sizesyon e rekomandasyon ganny avanse zisteman avek lide soulaz bann ki tonm dan sa kategori ki sa mosyon pe koz lola ozordi. Si en lendividi i santi ki sirkonstans pa permet li pou ganny ase pou soutenir son lekor ou son fanmiy, i pou esansyel ki i esey rod bann lezot mwayen pou ganny lasistans sosyal ou finansyel. Parfwa zot esey tap laport legliz, politisyen ou businessmen pou esey sers en pti lasarite ki si lasans i porte e zot gannyen, i permet zot ganny soulaze zis pour enn ou de zour apre zot retourn dan menm sitiasyon ankor. I dan lespri konpasyon pour en ert imen  ki dimoun sa kategori ki mon’n mansyonnen plito i parfwa donn serten sipor en endividi ou fanmiy ki dan bezwen lasistans sosyal ou finansyel. Responsabilite normalman i devret tonm lo sa dimoun limenm an premye lye.  E ler i pa kapab dan ka ki sa mosyon pe defini ki gouvernman atraver Minister konsernen i devret garanti ki bann drwa imen fondamantal stipile dan nou konstitisyon i ganny son proteksyon.  Se la kot lenportans annan en lasistans i revizab ou permanan i neseser e sa dimoun i annan en garanti pou omwen serten letan son lavi i a kapab diriz son mazinasyon lo lavi pli pozitivman e petet menm ganny sa letan pou vwar laport sorti an relasyon avek son problenm. Se la kot rol gouvernman atraver minister konsernen i vin dan zwe. E gouvernman parey mon’n eksplike pli o i annan sa manda pou evalye e trouv solisyon ki remedye sitiasyon sa fanmiy ou endividi.

Konbyen dimoun ki tonm dan sa kategori ki rod sa kalite sipor, mon napa statistik. Mon mazinen ki Onorab mover mosyon koman enn bann direkter dan lepase, ki in donn lanmen evalye bann aplikasyon i dan en pli bon pozisyon pou konn statistik egzakt lo kantite laplikasyon ki ariv kot sa minister e konbyen ladan ki ganny refize ou aprouve.

Lo mon kote a plizyer repriz kot biro Arpent Vert paregzanp, mon’n ganny vizit en bon nonm reprezantan bann fanmiy ki pli vilnerab an partikilye bann manman tousel  ki’n vreman dan bann sitiasyon kot zot bezwen sipor finansyel. Dapre zot, zot in fer serten demann pou lasistans kot biro servis sosyal e ki’n ganny refize.  Menm si zot in fer rapel ek biro sekreter prensipal ou Minis zot ka pa’n ganny rekonsidere.  Mon okouran ki sa minister i annan bann zofisye ki entervi bann aplikan lo nivo distrik e apre soumet sa bann dokiman santral pou konsiderasyon. Me i paret ki pa toultan ki sa bann evaliasyon i ganny fer koman fodre e aplikan ki vreman dan bezwen i vin viktim defayans dan lenvestigasyon.

Nou koman bann politisyen nou bezwen onnet ek nou lekor ki laverite se ki preski tou lezour nou ganny en kantite visit ou  rankontre en kantite dimoun ki avoue avek nou ki zot dan en tel sitiasyon. I annan ki nou kapab konsider koman vreman dan bezwen. Mon sizere ki tou ka i ganny seryezman latansyon apropriye e ki zot ganny revizite si fodre zisteman pou rann lavi sa kategori dimoun enpe pli leze. Resers in prouve ki dimoun ki ganny neglize spesyalman zot zanfan se bann ki pli vilnerab pou tonm dan tou sord kalite fleo.  I osi enportan menm si nou pe koz lo partikilyerman bann manman tousel, nou pa pou kapab tir nou latansyon lo bann papa ki zot osi parfwa zot dan menm sitiasyon ki sa bann manman.

Ler nou koz lo letid i esansyel ki sa letid i ganny fer dan lentere tou kote, ki gouvernman ki zer lekonomi, ki bann ki pli vilnerab an partikilye, bann manman ou bann papa tousel.  En mosyon parey i devret ganny sipor sa lasanble akoz apre tou pour nou ganny sa job se nou dimoun, enkli bokou sa bann ki sa mosyon pe fer referans avek ki pa rod okenn lekskiz me zot fer zot devwar sivik pou met nou la. Mon sipor i dan ta konte.

 

MR MICHEL MARIE

Mon oule premyerman remersi Onorab Charles pou table sa mosyon devan nou lasanble apre midi. Mon konsider Madanm Charles en lotorite dan sa size. Lespri e lesansyel sa mosyon, Msye Speaker, pe demann nou pou revizit nou sistenm aktyel. Ozordi malgre nou sistenm in ed bokou dimoun, son pli gran kritik se dimoun  ki vreman bezwen lasistans pa pe gannyen. Alors si sa i leka eski metod e kriter ki mezir bezwen nou bann dimoun i realis e zwenn realite ozordi.

Msye Speaker eski household income i sel kriter ki merit ganny servi pou mezir bezwen bann ki pli vilnerab.  Eski pa i neseser konsider lezot fakter ekonomik tel ki nivo det assets kapasite travay nou bann dimoun.  Baze lo sa sitiasyon aktyel e lafors argiman mosyon prezante par Madanm Charles i kler ki nou bezwen revwar nou striktir. Nou bezwen protez dignite nou bann dimoun ki pli vilnerab ki nou akoz i kler ki sa bann dimoun zot napa kapasite pou ed zot lekor, pou ed zot fanmiy.

E souvannfwa sa bann dimoun in fini give up lo lavi limenm.  Mon pe siport sa mosyon akoz mon santi sa dan lesans nou sosyete pou kontinnyen ranforsi nou lazistis sosyal dan en tan modern. Nou pa krwar ozordi – nou oule ki dimoun i kontinnyen reste lo lasistans sosyal. Nou bezwen ed dimoun pou repran kontrol zot lavi.  Koman en gouvernman nou bezwen kontinyen protez sa financial safety net me nou bezwen fer li dan en fason ki zis, ki drwat e ki fair.

Msye Speaker ozordi i kler ki nou bezwen sorti dan sa mantalite welfare state pour nou al dan sistenm welfare society. Welfare society i la ki annan lanmour, ki annan care, ki annan konpasyon, ki annan en leker  pour tou bann ki pli vilnerab. Welfare society Msye Speaker, i nou fanmiy, i nou legliz, i nou vwazen, i nou kominote.  E se dan sa lespri Msye Speaker ki mon pou siport sa mosyon.

 

MR  FRANK ELIZABETH

Msye Speaker lalwa ki fer provizyon pou ed bann dimoun ki pli vilnerab dan nou sosyete se Social Security Act e sa ti ganny pase an 1987.  E gouvernman apre in pas en seri regilasyon anba sa lalwa pou ankor sey ed bann dimoun ki pli vilnerab dan sosyete e met a zot dispozisyon bann benefis finansyel baze enpe lo prensip en welfare state ki ti ganny entrodwir Langleter par Gouvernman Labour dan bann 1960. An 1987, Prezidan Michel dan son kapasite koman Minis Finans ti entrodwir regilasyon Social Security Benefits (Amendment)Regulations 1993 dan ki i ti anons sa bann benefis swivan par mwan.

  • Benefis pour bann dimoun malad, R775 par mwan.
  • Benefis maternite, R775 par mwan
  • Benefis pour bann dimoun ki ganny aksidan dan travay e ki pa kapab kontinnyen travay, R775 par mwan.
  • Benefis envalidite, R950 par mwan.
  • Benefis dezabilite, R775 par mwan.
  • Benefis pour bann dimoun ki zot msye oubyen madanm in mor e kit zot deryer R775 par mwan.
  • Benefis fineray kot en dimoun ki travay in mor dan lafanmiy R1500 par mwan.
  • Pansyon retret R1000.
  • Dependence benefits R350 pour adilt, R325 pour sak zanfan.
  • Benefis pou zanfan abandonnen e orfelen, R475 par mwan. Sa an gro Msye Speaker se bann benefis ki ti ganny ofer par lalwa Social Security Act an 1987.

Depi 1987 gouvernman in entrodwir ankor en seri regilasyon pou regard enpe bann sonm ki ti pe ganny donnen pour sa bann kategori dimoun avek bi pou ogmant sa bann benefis an relasyon avek logmantasyon pri lavi. E an 2004 Msye Speaker, 7 an plitar gouvernman ti anons logmantasyon par mwayenn R400 dan tou bann benefis. Paregzanp Msye Speaker;

 

  • Benefis pour bann dimoun malad i sorti R775 pou ariv R1250 an 2004.
  • Benefis maternite osi ti sorti R775 pou vin R1250 an 2004.
  • Benefis pour bann dimoun ki ganny aksidan dan travay e ki pa kapab kontinnyen travay i sorti R775 an 1987 pou ariv R1250 an 2004.
  • Benefis envalidite li osi i ti ogmante sorti R950 par mwan pou arive R1500 par mwan an 2004.
  • Benefis dezabilite R775 an 1987 pou ariv R1250 an 2004.
  • Benefis pour bann dimoun ki zot Msye oubyen madanm in mor sorti R775 pou ariv R1250.
  • Benefis fineray kot en dimoun ki travay in mor dan fanmiy ti reste R1500 par mwan Msye Speaker.
  • E pansyon retret ti sorti R1000 pou ariv R1550.
  • Dependence Benefits sorti R350 pour adilt pou ariv R625 an 2004 e pour zanfan R325 an 1987 pou ariv R575 an 2004.
  • Benefis pou zanfan abandonnen e orfelen sorti R475 an 1987 pou ariv R750 an 2004.

Sa an gro Msye Speaker se bann logmantasyon ki’n ganny donnen par gouvernman anba lalwa Social Security Act.

Msye Speaker mon krwar ki kestyon ki mosyon pe demande se eski sa lalwa i fer provizyon pou ed bann dimoun pli vilnerab dan sosyete espesyalman bann madanm tousel. Eski sa bann benefis dan lalwa sekirite sosyal i apropriye. Eski sa bann benefis pe ariv kot bann dimoun ki pli bezwen li. Si wi, eski sa bann benefis pe ariv kot sa bann dimoun atan e vitman. Esk prosedir ki anplas an se moman i senp, fasil e efektiv, e finalman Msye Speaker eski tou dimoun i okouran prosedir pou ganny ede anba lalwa sekirite sosyal.

Msye Speaker lalwa i anplas, e fon sekirite sosyal in ganny entrodwir, i a pe ganny enplimante par gouvernman e bann dimoun ki pli vilnerab ki bezwen led dan sosyete i merit nobou ganny ede. Me kestyon i reste, eski sa bann dimoun ki bezwen led zot menm zot konnen egzakteman kwa ki fodre zot fer e koman pou fer li pour zot ganny lasistans anba sa lalwa.

Msye Speaker ler mon regard lalwa sekirite sosyal, en keksoz ki mon pa vwar ladan se Means Testing. En lot keksoz ki mon pa vwar dan lalwa Sekirite sosyal, se provizyon pou ed bann manman ki tousel.  Mon okouran ki i annan en sistenm anplas ki apel Means Testing ki globalman regard konbyen larzan en fanmiy i anmenn kot lakour e si sa i anba en serten nivo sa fanmiy i kapab ganny ede avek en sonm larzan adisyonnel pou permet zot viv par lao lalinny lapovrete.

Msye Speaker lalinny lapovrete ti ganny mete lo en sonm R900 par mwan e sa ti ganny mete an 1992 menm si saler  minimonm sa lepok ti R1600 par mwan.  Lalinny lapovrete absoli, li i ti ganny mete lo en sonm R500 par mwan. Sa vedir en lakour ki anmenn selman en sonm R500 par mwan i ganny konsidere koman enn ki pe viv dan lamizer nwanr. Sa i ekivalan avek dolar ameriken, 150 par mwan pou lapovrete e  90 dolar ameriken par mwan pou lapovrete obsoli. Sa bann sonm ki mon’n fek mansyonnen Msye Speaker, ti ganny entrodwir an 1984 e sa ti an rezilta en survey ki ti ganny pibliye.

Msye Speaker le 24 Zen 1994 en rapor pibliye par Population and Human Resources Department, Africa Region avek tit Republic of Seychelles poverty in paradise ti tras evolisyon lapovrete Sesel depi 1984 ziska 1993.  Sa rapor ti dir ki an 1984 30.7% nou popilasyon ti pe viv dan lapovrete. E 11.6% nou popilasyon ti pe viv dan lapovrete absoli. An 1993, Msye Speaker 18.5% nou popilasyon ti pe viv dan lapovrete e 6% nou popilasyon ti pe viv dan lapovrete absoli. Sa rapor ti konklir ki sa bann sif i relativman o pou en pei parey Sesel  kot nivo lapey i ase rezonnab.

I kler ki dan sa rapor ki in annan en rediksyon dan nivo poursantaz dimoun Sesel ki viv dan lapovrete ant 1984 avek 1993.  Prezidan Michel limenm ler i ti mont dan leo Copolia resaman i ti dir lo televizyon ki ti annan ankor dimoun Sesel ki pe viv dan lapovrete. Kestyon ki nou merit pe demann nou lekor se akoz, kwa ki fer dimoun Sesel anglouti dan sa serk vizye ki nou apel lapovrete. E kwa ki gouvernman i kapab fer pour elimin lapovrete konpletman dan nou sosyete.

Msye Speaker fon sekirite sosyal i anmas li par mwayenn 400 milyon roupi par an. Sa larzan i ganny peye par bann anplwayer, bann anplwaye e gouvernman limenm koman en anplwayer, bann dimoun ki travay dan sekter piblik.  Gouvernman ti kontribye 143 milyon roupi dan fon sekirite sosyal an 2006.  ladan 125 milyon roupi ti apre ganny transfer sorti dan fon sekirite sosyal pou al dan fon gouvernman. Msye Speaker vwala kot larzan sekirite sosyal pe ale.  Sa larzan i sipoze pe al kot bann dimoun ki pli vilnerab dan sosyete e non pa dan pos gouvernman. Anmenmtan 16% bann lakour ti pe anmenn par mwayenn R841 par mwan kot zot lakour.

Sa ki mon’n fek ilistre Msye Speaker i montre klerman ki lalwa sekirite sosyal i merit ganny amande pour fer provizyon pour donn benefis bann manman tousel e osi bann lakour ki anmenn mwens ki 2000 roupi par mwan. Bann kriter byen kler e senp i merit ganny etablir pour tou dimoun konnen si zot kalifye pou ganny lasistans sekirite sosyal ou non. En form senp pou ranpli i merit osi ganny met kot tou ladministrasyon distrik e osi lo internet si posib pou ed sa bann dimoun pou anpli sa form e apre anvoy li par e-mail menm zour kot  Minister konsernen.

Ladministrasyon distrik i ava la ek son staff pou ed sa bann dimoun ranpli sa form e anvoy li toudeswit kot dimoun konsernen dan minister. Dimoun ki bezwen led Msye Speaker i merit ganny ede toudeswit. I neseser alor pou gouvernman toultan donn bann dimoun ki apply pour ganny sa bann lasistans e benefis sa bénéfice du doute. La petet gouvernman ti a kapab donn sa bann dimoun en lasistans minimonm osito ki zot fer zot laplikasyon pour zot ganny lasistans. E apre gouvernman ti kapab fer en swivi pour vwar si sa dimoun i bezwen kontinnyen ganny sa lasistans oubyen i merit ganny arete. Sa sistenm i ganny aplike dan plizyer pei Msye Speaker me anmenman i merit annan osi en pinisyon pour bann dimoun ki abiz sistenm sekirite sosyal.

Msye Speaker lotrozour menm en madanm ki ti annan 6 zanfan, ki son msye ti’n ganny arête e met dan kaso, ti vwar li pe fer fas avek birokrasi gouvernman   pour li ganny lasistans e finalman i ti bezwen al tap laport detrwa dimoun pour li ganny ede akoz i ti  realize ki ler ou dan bezwen ou pa kapab toultan depan lo gouvernman. Sa madanm, Msye Speaker, ki ti’n al kot Minister e apre ki i ti’n pas en lazournen laba i ti ganny dir fodre i al dan distrik pou fer son laplikasyon.  Dan distrik Msye Speaker nou pa konnen konbyen letan DA i pran  pour li anvoy file anvil kot Minister.  Kot Minis ankor nou pa konnen konbyen letan i pran pou aprouv en laplikasyon akoz souvannfwa i annan en lenvestigasyon ki ganny fer pou determinen si sa dimoun pou ganny lasistans oubyen non.

E sa dan limenm i kapab pran plizyer semenn Msye Speaker. I kler alors ki gouvernman i bezwen kree en klima kot i annan en krwasans ekonomik pou kapab ranmas larzan pour fon sekirite sosyal pour li vin soutenab. Gouvernman pour osi bezwen senplifye prosedir pour en dimoun kapab fer son laplikasyon vitman e ganny en desizyon sorti kot gouvernman lo son laplikasyon vitman.  Gouvernman osi pou bezwen  aret retir larzan dan sa fon e anmenmtan fer reform dan lalwa sekirite sosyal pour permet plis dimoun kalifye pou resevwar lasistans tel ki bann manman tousel, bann dimoun ki pe viv dan lapovrete e bann dimoun ki pe viv dan lapovrete absoli.

Sa bann mezir mon krwar Msye Speaker i ava en pa dan bon direksyon. Alors mon pour remersi Onorab Charles pou anmenn sa mosyon devan lasanble e mon swete ki gouvernman a pran li o serye e apre ki i a’n pase devan lasanble i ava ganny enplimante e bann lalwa parey mon’n fek mansyonnen, lalwa sekirite sosyal i a ganny amande pour fer li pli ekitab pour tou dimoun.  Alors mon siport sa mosyon Msye Speaker.

 

MS THERESINE

Msye Speaker ozordi apre midi mosyon ki devan nou i kler. Enn de fwa kan mon koz ek bann dimoun swa dan mon kominote, ouswa bann dimoun ki mon rankontre lo en baz tou lezour, mon fer konesans avek serten dimoun ki mon kapab dir zot bezwen sa kalite lasistans ki mosyon pe demande.

Mr Speaker serten nou bann dimoun i rann lapel pou al travay tou lezour e i fer li akoz avek bokou douler akoz zot annan det pou peye e pli enportan zot annan en fanmiy pour zot mentenir. Ki i fer  sa madanm i bezwen vwar li pe kontinnyelman debout lo son lipye.  Mr Speaker sa mosyon ozordi apre midi i fer mwan mazin sa madanm ki reste dan leo Majoie, ki annan problenm zenou e ki travay kot IOT, malgre son difikilte pour li debarke dan en bis e osi anbarke, pour li marse sa madanm i bezwen travay.

Mr Speaker sa bann ka parey mon senserman krwar ki i merit ganny konsidere. Me de lot kote mon pour osi tir mon sapo avek bann dimoun ki trouv zot dan bann menm sitiasyon ki sa madanm pour persiste afen arive soutenir zot fanmiy. Sa bann ka parey kan i ariv devan lotorite konsernen, sa bann dimoun i bezwen regard zot avek en leker e non pa zis de lizye parey loter mosyon in dir.

Mosyon prezante par Onorab Charles pa kont zefor nasyonal pou  devlop en sosyete travayant e ogmant en prodiktivite dan travay.  Sa mosyon pe demande ki nou konpasyon pour bann ki annan volonte me pa kapab met zefor neseser. Sa mosyon i tous bann dimoun pli vilnerab, sa vedir pa zis bann ki dan difikilte me osi bann ki kapab trouv zot dan en tel sitiasyon. A sa pwen mon pou felisit Madanm Charles pou anmenn en tel mosyon devan sa lasanble e mon pour osi siport sa mosyon. Mersi.

 

MRS ALCINDOR

Sa mosyon ki devan nou pe demande ki gouvernman i etidye fason pou mye kapab siport bann fanmiy ki pli vilnerab an partikilyerman bann madanm tousel.  Wi Mr Speaker nou koman politisyen  nou fer nou devwar pou demann sa ki meyer pour lepep e ozordi sa mosyon pe demann get dan problenm sa bann madanm tousel.  Mon dakor ki i devwar sosyete pou ede, pou ed sa ki pli vilnerab.  Letid i kapab ganny fer, me si legzektiv pa vwar sa demann enn zot priyorite, keksoz pa pour bouze.

Sa demann Mr Speaker ki nou konnen i en mosyon ki pou soulaz douler sa bann madanm ki vwar zot dan difikilte pou elve en fanmiy, pou fer grandi zot zanfan zot tousel i enn ki si i ganny enplimante pou kapab fer en sanzman dan lavi sa bann mer-d-fanmiy. Me fotespere sa mosyon pa zwenn bann lezot mosyon ki’n deza ganny aprouve par sa lasanble me ziska ozordi  ankor pe repoz dan fon pannyen pe esper zot lenplimantasyon.

Ti pou enteresan sirtou pour nou lo sa kot latab ki pa fasil ganny akse ek lenformasyon, ennler pou konnen ki kantite mosyon ki’n deza ganny aprouve me ziska prezan pankor ganny enplimante. Ennler nou oubliye e se zis ler nou vwar bann lezot mosyon ki swiv  pou demande pou akselere, pou rekonsidere, tel ou tel keksoz ki revey ou memwar ki sa ti enn ki ti’n deza pase e ganny aprouve me son lenplimantasyon i ankor on hold.

Wi Mr Speaker madanm ek zanfan i sa group dan sosyete ki pli vilnerab. Kot en lakour bann madanm a dakor ek mwan kot i annan koudmen en papa byensir sa i soulaz sa fardo lo zot ledo e sa responsabilite i ganny partaze.  Me kan sa manman i tousel tou lour i tonm lo li, parey kreol i dir, limenm li zonm, limenm li fanm e i vwar li dan bann sitiasyon difikilte. Nou pou kapab fer letid, me si letid i ganny met dan tirwar e rezilta pa ganny analize e narnyen pa ganny fer sa pa pour ede, sa madanm son sitiasyon pou reste parey, e son problenm pou reste dan tirwar.

Nou osi kapab fer letid be si apre nou pa met an aplikasyon en sistenm relief ki pour  marse, dan lentere sa ki pli vilnerab, parey mosyon pe demande, sa osi pa vo lapenn Mr Speaker. Me si nou serye parey loter mosyon pe demande,   in ler pou nou aret fer bann sistenm quick fixed i pour mars zis lavey en eleksyon, e kan eleksyon i fini, sa pov fanm i bezwen monte desann, ozordi dan biro PS, demen dan biro Minis, e plitar i rann lapel kot biro State House, i al la kot i vwar Onorab Pool e lezot ki laba pour li kapab ganny en soulazman pour zot problenm.

Mr Speaker parfwa mon demande si sa bann dimoun o plase dan gouvernman ki pran desizyon parey oter mosyon in demande si i vreman konpran soufrans sa bann madanm ler zot prezant zot problenm devan. Sa i fer mwan mazin paregzanp kot Family Tribunal kot bokou madanm tousel i anmenn zot soufrans.  Paregzanp si en manman i vin devan tribinal pou anrezistre en ka kot sa papa pa pe kontribye pu sonny sa zanfan, e sa manman osi pa pe travay, ki soulazman sa madanm ek son zafan i gannyen ler sa papa i ganny anvoy dan prizon. Eski i annan okenn reveni ki rantre kot lakour sa manman par anvoy sa papa dan prizon?  Oubyen nou bezwen rod lezot solisyon ki pou fer sa papa kontribye pou ki sa manman pa bezwen vwar li pe anmenn sa fardo li tousel.

Mon pa tro konnen kimannyer sistenm i marse kot sosyal, petet taler oter mosyon dan son summing up i ava dir nou kimannyer sa bann ka i ganny trete.  Ankor Mr Speaker annou demann nou lekor eski sa fardo i devret tonm lo ledo gouvernman?  Bokou ka i varye e fotespere ki letid a kapab prouve e analize sak ka pour son merit. Parfwa sa papa i pa dan en lanplwa stab kot ou kapab retir en kontribisyon direkteman  lo son saler.  I osi annan lezot ki zis pa pran zot responsabilite.  I annan ki pe deza kontribye pour lezot zanfan akoz in fer piti partou kote, i okip en bann e lezot i ganny neglize. I annan ka ki papa parfwa pa pe kontribye sifizaman akoz i annan lezot responsabilite.

Sa bann sitiasyon i malere Mr Speaker akoz alafen dizour se zanfan ki soufer.  Annou pa bliy bann manman ki pa konn zot priyorite, bann ki kantmenm sa papa pe kontribye sa alimoni zot depans sa larzan dan lezot ekstravakans  san depans li pou rbyennet sa zanfan. Sa i fer nou mazin bann manman soular ki zot priyorite se sa sopin lapire bomaten avan get dan kastrol si sa zanfan i annan manze. Sa osi nou bezwen pran kont Mr Speaker dan sa letid lo rod ki kalite striktir ou sistenm fodre met anplas pou kapab ed sa bann manman parey ganny zot dignite imen e vwar en fason pou zot kapab kontribye pozitivman pou fer sosyete marse olye depan lo sosyete pour fer zot viiv.

Avan mon al pli lwen, mon les sa de pti kestyon avek loter mosyon. Eski sistenm lasistans sosyal pe marse?  Eski bann ki vilnerab ki bezwen lasistans anba sa sistenm aktyel pe gannyen oubyen tro bokou politik ek demokrasi ki’n fors loter mosyon  vin rod en lot laport pour soulaz sa bann tel problenm. Eski anba sistenm welfare sosyal aktyelman sa ki i vreman bezwen pe gannyen? Oubyen nou pe fer sistenm lasistans sosyal vin parey en faver politik parey nou’n vwar pandan dernyen eleksyon kot politisyen i vin devan ou laport, kot politisyen i vin dir ou vot pour mwan pou ou ganny en carer, oubeyn means testing. Vot pour mwan pour lasistans pa ganny koupe.

Kan an realite sa pa devret leka sa madanm ki vilnerab pa devret esper politisyen aprouve si li i pou ganny en lasistans oubyen non. Mr Speaker lasyet manze sa zanfan pa devret depan lo bann politisyen sirtou bann ki pe tous de lapey. Sak ka i devret kler. Ki i siport sistenm SPPF ou non i devret pe ganny ede lo merit e bezwen e non pa lo faver okenn politisyen pour en vot.

Tro souvan nou atas en lanpler politik avek demann sa bann ki pli vilnerab akoz nou konnen ki i dan bezwen e sa lasistans i en priyorite pour li e nou’n toultan fer sa lasistans pas parey en faver. Mr Speaker fotespere ki letid i kapab prouve ki sa bann dimoun vilnerab pa devret vin lo okenn (?) politik a sak eleksyon me zot problenm i al pli lwen ki sa pti larzan kanpanny ki ganny donnen, ki ganny servi dan letan eleksyon.

Avek sa de mo Mr Speaker mon pou donn mon sipor pour sa mosyon. Mersi.

 

MR MARC VOLCERE

Mr Speaker in ganny dir pli boner ki gouvernman in met plizyer scheme anplas pour ede get dan problenm nou sitwayen, bann ki mwen fortinen. Nou souvannfwa sa bann scheme in la e i pa’n reponn a bezwen parey lepep pe ekspekte. E souvannfwa sa bann fanmiy Mr Speaker zot krwar ki zot napa okenn zepol pou apir lo la alor zot vwar zot tousle, dezespere pour ganny serten lasistans pour kapab ed zot pou viv en lavi enpe pli meyer. En bon pe sa ban paran oubyen sa manman Msye Spaeker souvannfwa pa travay oubyen menm si zot travay zot pa prodiktiv akoz zot pa’n pran en von repa  aswar, zot pa’n kapab fer en bon refleksyon e zot pa’n dormi byen touzour pe mazin demen bomaten ki pou arive. E souvannfwa zot lazournen i zis fini konmsa menm san akonplir narnyen.  Souvannfwa sa bann dimoun i krwar ki lasosyete in rezet zot, zot annan tandans krwar ki tou in fini pour zot.

Ki lasosyete i fer pour sa bann dimoun. Msye Speaker parey mon’n dir okomansman sa gouvernman in met bokou progranm e scheme pou ede rezourd enpe sa bann problenm. Em ki nou’n vwar dan son laplikasyon i annan keksoz ki’n mars mal e ki’n fer ki sa volonte ki gouvernman ti annan pou ed sa sitwayen i ganny maske par plizyer febles imen.  Bann febles  in fer ki sa bann scheme oubyen progranm pa’n atenn zot bi.  Mr Speaker mon krwar ki la i le moman apropriye kot gouvernman i devret reget enkou son bann  progranm sosyal. Regete bann scheme, board ek bann lotorite pour ki a kapab reponn lapel pour bezwen nou dimoun.  Fer sir ki sa bann zofisye ki travay dan sa bann lofis i konn egzakteman ki zot rol e kwa ki zot devret pe fer.  Me pli enportan Msye Speaker gouvernman i bezwen fer sir ki sa bann zofisye i bezwen annan sa volonte.  Sa volonte pou konnen e konpran problenm dimoun. Sa volonte pour lo santi problenm dimoun akoz si i napa sa volonte Msye Speaker, problenm nou dimoun zanmen pour rezourd e nou pou kontinnyen vwar nouvo scheme parti scheme dan lavi nou bann dimoun dan sosyete pa pour zanmen sanze oubyen amelyore.

Msye Speaker anlinny avek sa ki mon’n dir mon ti krwar ki gouvernman i bezwen zwenn ansanm avek lezot lorganizasyon pou angaz zot dan en lot lager. Sa dezyenm lager Msye Speaker se pour nou pep ganny edike lo nou valer moral. Msye Speaker mon senserman krwar ki avek plis ledikasyon lo nou valer moral, nou sitiasyon sosyal ava amelyore en kantite. Sak sitwayen i bezwen komans mazin lo zot priyorite. Nou bezwen komans edik nou bann zenn lo bon konportman. Seselwa in bezwen komans pran son responsabilite, Seselwa in ler pour nou aret lese fer. Nou bezwen pran kont nou aksyon. Nou  ki ankor zenn nou bezwen mazin nou demen, mazin nou lavenir, mazin nou zanfan, e mazin nou fanmiy.  Mazinen ki kalite sosyete nou ti a kontan trouv nou pe viv ladan.   Nou bezwen ankouraz nou dimoun pou kapab travay, pou rod en lanplwa, ankouraz zot pou rod en saler lafen dimwan.

Msye Speaker pou repon lapel a bezwen sa bann dimoun ki vin rod serten lasistans, zot souvannfwa ganny asiste avek larzan e a plizyer repriz mon santi kisa larzan pa ganny servi  pour sa vre bezwen. Mon ti a sizere dan serten ka ki olye ki gouvernman i donn larzan direkteman avek sa bann dimoun, i fer serten kontribisyon direkteman. Paregzanp aste liniform, aste pas bis, aste serten komodite, pey day care si i neseser. E sa garanti ki okenn lasistans ki gouvernman i donnen a ganny servi byen.  Avek sa enn de legzanp ki mon’n donnen Msye Speaker mon pou donn tou mon sipor mosyon madanm Charles akoz sa i en moyon ki ava ed gouvernman, fer serten refleksyon lo ki fason i a kapab ede pou amelyor lavi nou bann sitwayen dan distrik e dan pei sirtou bann madanm ki ou vwar zot tousel avek zanfan pou sonnyen. Mersi.

 

MR SANDY ARISSOL

Mwan parey tou lezot manm in fer resorti mwan osi mon pou donn mon sipor mosyon Onorab Charles. Me parey mosyon pe dir, siport bann fanmiy ki pli vilnerab an partikilye bann manman tousel. Me anmenmtan Msye Speaker mon anvi fer resorti annou pa bliye osi bann papa ki pli vilnerab dan lasosyete.  E nou annan bokou papa ki tousel e nou annan bokou papa ki pe pran zot responsabilite konmela. Lontan nou ti asosye tou keksoz avek manman, lekol lapwentman, konmela osi nou annan plizyer papa ki pe pran zot responsabilite dan sosyete. Nou annan menm papa ki pe rod custody zot zanfan konmela. Me vi ki mosyon pe koz an partikilye bann manman tousel, sa i enteres mwan en kantite Msye Speaker. Mwan mon annan enm pti kestyon senp mon ti a kontan demande se kwa ki fer sa bann dimoun pa ganny sa lasistans.

Me ler mon get bann manman tousel, i fer mazin en ka St Louis kot mon annan en zenn manman kot i annan li en pti fiy avek dezabilite, papa in mor e manman i vwar li pe tourn an ron senpleman pour li ganny en pti lasistans sosyal pou asiste son zanfan.  Taler mon’n tann Onorab Elizabeth pe koz enpe sif ki sipoze ganny partaze, ganny donnen egalman dapre bann Act pou ed en pti pe bann fanmiy ki vreman dan bezwen. E ler mon get sa fiy anler St Louis, sa zenn manman i vwar li pe tourn an ron. Prezan mon problenm, mon kestyon se kwa ki anpes li ganny sa pti lasistans ki neseser e ler ou annan en zanfan avek dezabilite kot lakour i pa parey en zanfan normal kot parfwa ou bezwen donn li en pti  lasistans enpe pli spesyal, i servi bann lezot keksoz ki bann zanfan normal  pa servi, ki kree en depans paregzanp pampers, si ti annan son apwentman i pa kapab servi bis akoz keksoz bann dimoun i distrak li, i tro bokou letan dan bis, i bezwen pey en taksi e sa i vin en depans lo sa paran e sa manman li son demars, sa monte desann parey Onorab Charles in dir se zis senpleman pou ganny sa pti lasistans pour li kapab soutenir son pti fiy avek en dezabilite.

Mon annan en lot legzanp Msye Speaker kot mon annan en madanm osi iannan en zanfan dezabilite Belonie kot li senpleman ki i pe rode, li i carer son pti fiy li, i carer avek son zanfan dezabilite.  Prezan senpleman zot annan en problenm avek zot twatir lakaz kot li i santi li neseser koman sa manman tousel pou apros distrik pou rod en pti loan pou senpleman aranz enpe son twatir parey Minis ti fer resorti kot i annan bann pti loan ki pou ed bann fanmiy anba proze pti payot e sa manman li i ganny vwar son lanman anmare ler i ganny dir poudir i pa pour kapab ganny en loan parski li i en carer e larzan ki pe antre kot lakour pa ase pour pey son loan. Prezan mon kestyon se eski sa manman, avek son zanfan dezabilite delo pou koul dan zot zorey akoz senpleman larzan  ki antre kot lakour pa ase.

Msye Speaker taler mon’n koz en pe lo bann papa ki vilnerab. Anmenmtan ler papa i vilnerab i ed so zanfan osi vin vilnerab, oubeyn si i en madanm.  Mon annan en msye St Louis ki’n travay tou son letan e ozordi i nepli menm kapab marse, son lasistans Msye Speaker ki i gannyen i senpleman R400 tou le mwan e nou konnen, pa bezwen fer gran deba lo la ki en dimoun pa pour kapab viv avek en lasistans R400 ler ou annan loan, elektrik, delo lakaz e menm manze pour ou kapab soutenir ou fanmiy.

Be mon’n tann koz enpe lo tribinal lafanmiy kot paregzanp taler mon’n dir  i annan papa ki pe rod custody zot zanfan konmela, kot papa pe pran tou zot responsabilite e anmenmtan ler nou get bann manman paregzanp ki pe rod en lasistans, ki papa pa’n peye, ler mon get lalwa i pran sa papa i kondannen, i met li dan prison parey nou dir zanfan i pli soufer akoz papa still pa pe pey sa kontribisyon pou donn sa zanfan kot mon ti mazinen kekfwa ti ava annan en lalwa ki ti a’n etablir ki sa papa i ganny mete dan en lanplwa, mon a donn en legzanp IOT kot sa msye X i ganny mete IOT, i ganny dir ou pou bezwen travay, la mon donn ou en lanplwa kot tou le mwan ou pou bezwen donn serten sonm larzan pou donn sa zanfan kot senpleman letan ou’n fer li monte, parey nou dir, sa zanfan i vwar li dan en pli gro tourman, premyerman i pa vwar son papa, dezyenmman i pa pe ganny okenn lasistans.

Ler nou koz vilnerabilite Msye Speaker i annan pou fer avek ledikasyon osi kot mwan mon’n travay dan ledikasyon preski 10 an kot ozordi nou annan zanfan ki ankor pe vin lekol san narnyen dan son bwat akoz senpleman manman oubyen papa napa pour donn li oubyen manman i tousel, manman pe travay de mare parey nou dir, 8 er 4 er. 4 er minwit i fer en lot pti bout kot zanfan pa ganny sans vwar paran e paran pa ganny sans vwar zanfan e i annan defwa paran napa sa pti roupi oubyen sa bout dipen oubyen sa pti gin juice pou met dan sak sa zanfan pour li vin avek kot lekol.

E ler mon koz ledikasyon i annan bann lansentman kot bann zenn fiy konmela i gannyen boner dan ledikasyon kot lontan paregzanp bann ki en pti pe pli vye ki mwan zot konnen. Lontan ler ou ansent lekol premye keksoz ou pe mazin lola se al rod en travay pou al debourye pour sonny sa zanfan ki ou’n met omonn. Ozordi ki nou vwar zanfan i ganny konseye, ou al fini ou S5, ou ava al fini ou ‘O’ levels, ou ava al fini ou ‘A’ levels. Sa zanfan ki ou’n met la lekel ki pou sonnyen. Eski apre nou pou vwar nou pe bezwen ed sa fanmiy ed sa manman, ed sa zanfan kan senpleman nou ti kapab ed sa zenn fiy ki’n fer zanfan boner , olye vin en manman vilnarabilite plitar pou rod lasistans, i kapab komans boner e rod en lanplwa pou kapab soutenir son fanmiy.

E Msye Speaker lo sa mosyon mon napa gran, gran keksoz ankor ki mon ti a kontan dir, senpleman mon ti a kontan felisit Onorab Charles pou anmenn en tel mosyon e mon santi sirtou dan mon distrik St Louis nou annan plizyer manman ki pe ganny afekte dan plizyer fason e ki pa pe ganny ede. E anmenmtan mon ti a kontan fer resorti annou ed bann fanmiy ki vreman dan bezwen. Annou asiste bann fanmiy ki vreman bezwen sa means testing parey nou dir, sa lasistans sosyal. Annefe ler nou gete i annan de lot kote i annan dimoun ki pe ganny asiste avek lasistans sosyal ki pa bezwen paregzanp. Oubyen kot en dimoun i ganny asiste avek en carer kan i pa bezwen i kapab fer tou son keksoz limenm. Nou vwar li desann anvil i al amusement, i al tou night fair selman lizour i ganny asiste ek en carer pou fer tou son keksoz. Mwan sa ki mon pe demande Mr Speaker se ki annou ed bann dimoun ki vreman vilnerab, annou ed bann dimoun ki vreman dan bezwen. E annou pa zis koze osi la dan lasanble, nou to sakenn nou donn enpti version, me ler sa mosyon i sorti la bann dimoun i kapab konnen kote pou ale, ki pou fer si zot bezwen lasistans.  Akoz mon dir sa i senpleman letan nou pe koz lo vilnerabilite dan pour fer avek means testing, lasistans sosyal.  E paregzanp lasistans sosyal, ler nou tann lo televizyon lasistans sosyal, nou vin isi dan lasanble nou diskit lo lasistans sosyal me ler bann dimoun i al kot biro sosyal i bokou diferan avek keksoz ki nou tande dan lasanble, lo televizyon oubyen keksoz ki nou nou diskit lo la kot senpleman sa dimoun i bezwen tap laport, nimero enn, mont letaz nimero 2, vwar madanm entel, tourn lannmen, i pa fasil. I bokou difisil. Parey mon’n tann madanm Charles pe demande ki avek sa bann monte desann, sanmenm sa ki fer dimoun fristre, senpleman ler pou koz sosyal i bezwen annan en sel biro, en sel dimoun. Si mwan mon anann problenm sosyal mon konnen kote mon pou ale. Be instead of zis koze, nou vin dan lasanble nou fer zoli parol, SBC i filmen nou, bann dimoun i dir wi nou pe debat pour zot be ler zot  bann dimoun endividyelman zot al deor zot al lo teren, zot al sa bann biro i pa leka Mr Speaker.

Anmenmtan mon ti a kontan swet bann papa tousel, bann papa ki pli vilnerab dan lasosyete ki pe sey debourye pou elve zot zanfan, zot rod en travay, mon swet zot bokou sipor me selman ozordi mosyon in koz lo fanmiy, me spesifikman pour bann manman tousel dan sosyete. Mersi Msye Speaker.

 

MR FERRARI

Msye Speaker si ou permet lo sa propozisyon bann papa tousel..

 

MR SPEAKER

Ki ou pe fer, point of order?

MR FERRARI

Wi konmsi mon..

 

MR SPEAKER

Which order?

MR FERRARI

Non point of clarification.

 

MR SPEAKER

We are seeking clarification from whom?

 

MR FERRARI

En keksoz ki’n ganny dir lo bann papa tousel. Mon pe zis sizere an bonn fwa ki Madanm Charles i pare pour li enkli sa provizyon manman ek papa tousel dan son mosyon. Zis en propozisyon. Vwala se sa. Mersi.

 

MR SPEAKER

Onorab si oule fer en amannman you make a formal amendment. Ou konpran mwan ou met en amannman formel.  Mazinen sa mosyon i lo order paper i annan plis ki 14 zour, ou ti kapab met en written amendment 48 hours e en lamannman konmsa ki mon mazinen i pa sitan sibstansyel –

 

MR FERRARI

I pa sibstansyel.

 

MR SPEAKER

Wi be then you propose it as an amendment.

 

MR FERRARI

Mon a les Msye De Commarmond fer son entervansyon apre mon a propoz li koman en amannman senp.

 

MR DE COMMARMOND

Msye Speaker lo sa mosyon ki devan nou ki lir ki sa lasanble i demann gouvernman pou rektifye fason pou kapab mye siport bann fanmiy ki pli vilnerab, mon panse la fanmiy i vedir manman ek papa, ek zanfan an partikilye bann manman tousel. Mon pa konnen si i oule azout ankor an partikilye bann manman ek papa tousel be selman i dir tousel. Mwan mon vwar li konmsa i dir tousel, bann papa tousel enkli, manman tousel me selman akoz i annan plis nou tou nou’n dakor i annan bokou plis so stress in ganny mete en pti pe lo manman tousel.

Mwan mon konpran konteni sa mosyon byen, napa problenm lo la. Msye Speaker mwan mon pou siport sa mosyon, mon ekout bann entervenan ki’n koze, mon’n apresye kontribisyon me mwan ki mon oule dir lo sa zafer, Msye Speaker, lo sa mosyon ki devan nou, Onorab Elizabeth in tous lo lalwa egziste, lalwa social security la.  Me selman nou vwar anmenmtan ki sa lalwa i pa mord tou sa ki fodre morde. Li i deal ek enpe sitiasyon.  Bann mon krwar ki dan lanplwa ki pey social security. Nou dan nou pei la i annan en bann dimoun ki pa pey social security, en bann dimoun ki dan sa lot kalite problenm ki nou sirtou dan lasanble, nou ki lo teren laba nou rankontre souvannfwa.  E i vre, sa bann dimoun i kapab dan pli gro problenm, lafason donk ki sistenm i ete, i pa permet reach them, i pa ariv kot zot, i pa tous zot atan. Se sa rezon ki ou vwar Lonorab Jeovanna Charles in met sa mosyon devan nou.

Msye Speaker mwan mon rekonnet kantite zefor ki nou gouvernman in fer pou amelyor sitiasyon sosyal nou dimoun dan nou pei. Lalit depi lontan pe lite, ou vwar Lonorab i dir depi an 1987 sa lalwa social security i ganny met anplas avan, ki parey mwan ti napa. Sistenm sosyal avan, mon krwar in ganny fer resorti, Madanm Charles dan son lentrodiksyon, ki kalite sistiasyon ki ti egziste dan nou pei lontan. Mon pa oule al konmsi laba deryer pou fer kwa ke se swa e pou montre poudir i pa’n vin fasil sa zafer. Nou’n bezwen kontinnyelman pe rod fason pou amelyor sitiasyon backward ki egziste dan nou pei.

E la nou ariv en lot lepa kot nou pe vwar i sipoze annan en safety net pour kapab tyonbo sa bann dimoun  ki tonm ladan me selman parey nou tou nou pe aksepte, nou tou nou pe remarke, i paret i pa pe marse. I annan bout ki pa pe zwenn la.  Ou vwar.  Letan ou vwar sitiasyon egzistan dan ou distrik limenm or sitiasyon ki vin devan ou, i kapab en lot distrik, e mwan osi plen dimoun dan lezot distrik i vin vwar mwan pour bann problenm parey me deswit ou fer ou pti resers ou vwar konmsi kimannyer sa dimoun i merit en lasistans.  Parfwa si ou annan ek ou ou ede, wi, mon pa pe refize fer sa me selman i sipoze annan en sistenm la ki gete sa.  Kimannyer nou nou trouve ki laba kot i annan sa biro neseser li i pa trouve. Sa ki mwan mon problenm i la mwan.

Ou pran en dimoun Cascade paregzanp, ki danen problenm sosyal li i bezwen, mon krwar serten distrik i ranpli direk dan distrik, li i bezwen redesann anvil li.  I napa larzan dan lanmen i bezwen pey pasaz desann anvil.   Mwan mon pe dir ek gouvernman, sa mon sans ki mon kapab koze, pou fer dimoun tande, la dan sa lasanble Msye Speaker e mwan mon pou servi li. Mon konnen i annan dimoun pa pour kontan  me mon’n ganny vote, elekte pour mwan fer sorti zisteman sa bann dimoun, vilnerab in vot pour mwan, lamazorite zot Cascade zot in siport mwan en corps et en âme e mwan osi mon bezwen lager pour zot. Mon pe demann ek en lotorite, silvouple, bomaten Minis Meriton in vin dir nou i annan bann sanzman ki pe arive lo nivo distrik, mon demann Minister sosyal with all due respect silvouple aranz en sistenm ki marse pour nou kapab ed sa bann dimoun sansan – konmsi sistenm i egziste li, nou gouvernman an zeneral i cater pour sa bann dimoun li e sa bann dimoun ki fer marse ki pa pe fer li byen.  Zisteman la Onorab Ferrari i tous lo la. Ou vwar taler ou konfrer la in dir lot fason, Madanm Alcindor mon krwar, both side, ou kapab met li konmsa, ou vwar i bann karya Lonorab Ferrari i aksepte e mon pa oule vin lo sa zafer politik. Mwan mon oule dir dimoun,  mwan sa zafer politik si i SPPF, si SNP ki fer sa mon dir i zis mal. Me nou bezwen annan en sistenm ki marse, sa gouvernman in rekonnet i bezwen get sa bann dimoun e bann dimoun ki annan responsabilite pour fer li. Mon pe enplor avek zot silvouple fer li si non letan aksyon pour ganny pran, avek zot menm apre la pour komans dir isi laba, i annan viktimizasyon isi, lot, lot laba, avoid sa. Annou fer keksoz ki byen pour nou pep.

Msye Speaker kimannyer sa madanm ki  travay IOT oubyen SMB, oubyen PUC, oubyen lot landrwa prive,  kimannyer i komans  malad dan travay letan i lo duty, i komans al lopital detrwa fwa.. (Technical problem)

Nou’n vwar poudir ou ti en bon travayer, ou’n travay byen dan nou konpannyen, dan nou landrwa, la e nou rekmarke, ou konze i vin anplis, la ou’n fini depas 60 zour, ou komans ganny social security, la i antre la, Onorab Elizabeth. Ou ganny li, la social security pou aplike la. Fini ganny son 60 zour, prezan sa boug i ganny ankouraze – i annan ki mars normal apre in fini vin envalid, i tonm dan ka envalid la i ganny son bann roulman dapre lalwa.  I annan lot li i ganny dir, gete si pou konmsa mon krwar plito ou kite.

Enn de nou ki en pti pe pli konpran, pli for nou tenir pa large, nou dir non mon pa pour kite, mon la ek ou mon’n donn ou mon kouraz, mon ava ale, mon al rod en advice parla. Me i annan nou dimoun zisteman bann ki pli vilnerab, Mr Speaker sir, bann ki enpe bet, bet met li konmsa, mon pa kontan servi sa mo. Me i annan dan nou sosyete, dimoun ki li i pa tro, tro konpran lalwa travay kimannyer i ete, kantmenm i la kekfwa i annan mank ledikasyon lo la me nou pa pe ganny li byen. E i ganny ankouraze, i ganny dir, kite plito resign. E ou a ganny ou larzan si ou resign ou. Nou a donn ou tou ou zafer, pa pou tir narnyen.

Dan lenbesilite konmsa menm i annan serten nou ki kite.  Ouswa ou telman pe soufer, ou anplwayer pa pe remarke, pa pe aksepte, pa pe acknowledge poudir ou osi ou’n kontribye e ou nepli kapab tenir, ou menm ou ou rod fason. Ou konnen si ou pou absant plis ki 3 zour, ou pou pe zis perdi ou soz be ou resign. E la deswit ape – mon annan case Cascade la, in hand la. La zis apre sa mwan la ou vwar ou san en travay, san en income, ou annan loan isi, ou annan det laba, ou annan zanfan anba laz, zisteman zonm parla in kite depi lontan oubyen in mor, oubyen malad, oubyen prizon thatever. So i en sitiasyon. Prezan kimannyer sa dimoun i ganny asiste. I apply means testing, i pou ganny li parey nou ti pe dir taler, R400.  I mal, i pa byen so mon pe dir, mwan ki nou bezwen revwar sa bann case. E prezan ou a krwar depi kot sosyal laba, kanmenm ou pou eksplik zot e zot trouve zot poudir sa keksoz in ganny fer la. Oke mon pa dir ou al met san anplwayer ankour sepa kwa.  Me annou sey rektifye. Si nou tou nou trouve ki i annan en lenzistis la e nou tou annou rektifye li. I fini enn fwa. Me non Msye Speaker i paret ki dan nou pei, i fonksyonn parfwa dan en lot fason. I ganny anmennen isi, anmenn laba ouswa i annan serten dimoun ki pa anvi tande, i pa anvi korpere, i pa anvi fer keksoz, so alafen dizour se zisteman sa dimoun ki vilnerab, sa fanmiy ki pli vilnerab la e ki soufer,  e sa zanfan ou vwar headteacher pou kontakte ou, ouswa ou menm ou pou ganny en lenformasyon kot sa zanfan i pe soufer laba lekol ensidswit. E sa i annan tou son bann lasenn atase, tou son bann lakord atase avek.

Msye Speaker family tribunal, i byen nou’n etablir, lontan mon krwar ti napa, whatever ki ti annan be zisteman i vedir si en boug i pa oule kontribye, en madanm oubyen, in nonm zis zonm taler, la osi i annan de madanm ki pa oule kontribye, mon krwar mwan solisyon se pa prizon. Prizon li i dernyen keksoz konmsi pur mwan. Annou rod en louvraz donn sa dimoun.  E mon krwar mwan latransparans i mank ankor dan pei. Parfwa nou bezwen dir, Msye Entel in donn li louvraz pou fer pa’n oule fer pour li sonny son piti e se sa rezon ki i pe met ou dan prizon la apre akoz lafen dizour ler napa okenn solisyon mon krwar laba kekfwa ou a reflesir enpe.  Me selman nou bezwen soz tou bann posibilite avan.

Nou annan lezot keksoz Msye Speaker.  Nou annan nou en problenm la dan nou pei, nou’n fek diskite lo televizyon nou’n trouve pandan sa semenn la, kestyon problenm drog, nou bann zenn pe tonm ladan. Drog lalkol ensidswit. Now kot ou arive, sa osi parfwa i annan pou fer avek sa problenm sosyal ki nou koze, i vir otour tou sala. Now kimannyer, eski nou konmsi larg responsabilite. Eski nou dir, oke demerd ou, si gard i tyonbo ou, anndan. Mwan mon kont souvannfwa, mon dir klerman letan gard i vini i pik en boug konmsi, en per-d-fanmiy, swa en mer-d-fanmiy, pou en pti bout zafer ki taler i al prizon, apre deryer fanmiy i soufer. Nou tou nou aksepte mon krwar dan sa pei. Nou pe dir si nou anvi fer en lager annou lager byen. Nou krwar poudir nou bezwen konnen, lotorite i bezwen konnen. Kimannyer i konn tou bann keksoz pa kapab konn sa bann la. Annou dakor ennfwa pour tou e rezourd sa bann problenm akoz si nou pa rezourd li i annan son reperkisyon lo nou sistenm e nou fabrik sosyete e mwan mon dir fransman nou bezwen deal avek sa dan son fason korek. Tro bokou komite petet  parfwa – mon pa konnen. Ki fer be nou bezwen vwar en fason annou nou tou dakor, nou tou nou bezwen dakor. Pa kapab zis detrwa nou ki dakor. Mon krwar nou si i vreman sosyete i anvi, selman si pa anvi, napa problenm osi. Me selman si nou pe dir nou tou nou anvi, nou tou nou bezwen pran nou responsabilite. Mwan mon krwar konmsa ki en keksoz i bezwen marse pour nou kapab rezourd nou bann problenm ki nou annan sansan nou pou ale, lannen vini, lannen ale, kapab sanz parti politik mannyer ou anvi konmsi semiz be still problenm pou reste ek nou si nou pa pe pran en responsabilite serye nou tou ansanm.

Msye Speaker kestyon travay.  Nou pe diskite, mon vwar yer menm lo televizyon in montre  la diskite ta travay konmsi ki i annan. Prezan ou pe gete, ou tann dir en ta dimoun ki pa travay. Me la i annan en problenm la. Paregzanp ti annan en progranm yer swar lo zafer devlopman dan pei, konstriksyon ensidswit. Me zanmen in demande, sa dimoun ki pe fer sa progranm, be demann ek sa boug ki nou pe dir pa travay, i pa oule vin travay dan konstriksyon whatever. Demann li enkou akoz.  Pa’n demande, annou sey gete, problenm i saler, problenm i kondisyon, demann osi ek sa etranze ki pe travay isi. Akoz ou krwar ou ou pe travay me ou krwar Seselwa pa oule fer sa travay. Sey demann li enkou son lopinyon osi. Annou gete ki i dir. Nou a vwar i annan kantite keksoz petet ki nou bezwen davantaz, eksplwate dan nou sosyete pour nou kapab esey vin avek solisyon pour nou bann problenm ki egziste dan nou pei.

Mon krwar mwan mon pa bezwen dir tro bokou ankor me Msye Speaker nou kapab ale ziska tanto, menm demen bomaten. Nou vrwar poudir alors dan nou sosyete i annan tou sa bann keksoz ki nou pe dir la. Kestyon lapovrete – mwan letan ou gete an zeneral konbyen nou nou fyer konmsi nou ti a dir  sesel ki mizer i devret annan non?  Me selman wi, letan sa lalwa pa aplike, letan nou pa pe fer keksoz fonksyonn byen, la la rezilta ou pou gannyen.  Mon pa konnen si nou pou appel li mizer normal, mizer artifisyel, mizer kwa me selman mizer. Be wi.  Be se sa mon pe dir ki nou bezwen – apre i annan sa problenm lozman. Problenm lozman i vir otour sa Msye Speaker.

Ozordi zoli lakaz pe ganny fer dan sa pei, e en ta lakaz. Yer nou’n gete lo progranm lo televizyon. En ta lakaz e mon dir be Senyer be sa mon krwar i rezourd tou nou problenm.  Be non, ou donn en paran, en manman, en papa ek son bann zanfan en lakaz, ozordi, tou le de pe travay, zanfan i annan enn petet lannen prosenn i a travay ou ekspekte konmsi a pran byen responsabilite, a reste dan lakaz detrwa lannen avan konmsi a ganny lot lakaz, i a permet sistenm fer en lot lakaz pour li. Be demen bomaten in fini kite. In kite in ale, papa in ale whatever, manman i litousel prezan ek piti, ek loan lakaz ek li. Be pa in fini vin vilnerab la? Ek vant tou enn.

Nou pe koz lo sa bann issue avek serten – konmsi nou pa bezwen plere anmenmtan me selman nou pe dir ki i annan sa bann problenm Msye Speaker nou demann avek lotorite dan nou pei sirtou lo kote legzekitiv la, lo kote lenstitisyon ki responsab, nou pe dir silvouple ekout nou lasanble serye, nou pe met bann problenm ki serye, ki aplike la ki tous nou dimoun. E letan problenm i tous nou dimoun, to that extent Msye Speaker i serye en kantite e nou pe dir zot osi zot bezwen vin serye parey nou, zot bezwen vin serye avek sa bann problenm serye e nou pe dir ki dan en fason serye osi i zot bezwen ekout nou e rezourd sa bann problenm.

Nou tou nou bezwen vin ansanm e mon toutafe dakor, sa mosyon, se sa rezon ki mon’n segonn li, Lonorab Charles e mwan mon dir ki nou tou ansanm nou bezwen met lanmen pour nou kapab arive tous sa bann dimoun ki pli vilnerab, sa bann fanmiy sirtou bann fanmiy tousel pour kapab evantyelman, avanse. E nou demann osi bann dimoun pli vilnerab osi parfwa, i annan kekfwa ki zot osi bezwen konmsi fer enpe zefor. Konmsi i vin de keksoz sa, nou osi nou bezwen ede, sistenm i la nou bezwen fer marse. Me zot osi konmsi nou demann zot pour zot osi o pli vit posib ki zot santi zot ganny en sans pou sorti dan sa sitiasyon zot bezwen ganny sa souf pou kapab sorti. E nou demande osi ki Bondye i get dan – letan nou pe koz lo la la akoz letan mon nonm sa, i tousan sa alors mon demande ki Bondye i kler nou tou ki pe reflesir e debat lo sa issue e  bann ki enplimant li zisteman pour zot kapab annan sa leker ki Madanm Charles pe dir letan pe rezourd sa bann problenm.

Mersi bokou Msye Speaker mon garanti mon sipor, Madanm Charles lo sa mosyon.

 

MR SPEAKER

Bon nou pran en break e nou zwenn, ziska 4 er.

 

(Break)

MR FERRARI

Msye Speaker mon ti pe gete si i annan posibilite pour move sa simple amendment anba order 32.

 

MR SPEAKER

As a simple amendment.

 

 

 

MR FERRRARI

Simple amendment zis pou azout de mo obviously si Madanm Charles i santi – akoz bokou dimoun in koz lo la. Zis pou azoute; Sa lasanble i demann gouvernman pou etidye fason pou kapab mye siport bann fanmiy ki pli vilnerab an partikilye bann manman e bann papa tousel.  So mon vwar deba in fini ganny fer lo la. Mon pa pe sizere ki i annan deba ankor lo la. So si Madanm Charles i aksepte nou pran en vot.

 

MR SPEAKER

Strikteman i pa en kestyon si Madanm Charles i aksepte me mwan mon vwar li koman en simple amendment unless i annan okenn lopozisyon from the floor nou kapab aksepte sa amannman. Napa okenn opozisyon?  Bon alors nou pran li koman en senp amannman. Avan mon pas laparol mon ti oule zis fer remark en keksoz. Se ki lo kestyon lev lanmen pou koze, souvannfwa mon vire pou get bann manm e la i loportinite pour nou lev nou lanmen pou dir, pou endik lentansyon ki nou anvi koze. Se sa ki dan term parlmanter zot appel catching the Speaker’s eyes. I pa letan nou pe al demann en dimoun the right of reply ki i pa prop, annou fer li dan en fason prop. Onorab Pierre.

 

 

MR DAVID PIERRE

Mr Speaker definitivman mon pou donn mon full sipor sa mosyon.  E mon rekonnet ki avek sa mosyon, i annan plizyer keksoz ki mon santi nou pou bezwen aborde.  Mon konnen ki i deza annan en servis ki available pour bann dimoun ki annan serten dezavantaz me i kler ki nou bezwen fer li vin pli efikas e pli ekitab.  Me kestyon ki mwan osi poz mon lekor i se ki enn bann keksoz ki nou bezwen konsider fer se rod fason pou redwir lakantite dimoun ki oubyen la kantite fanmiy ki vilnerab dan nou sosyete. E sa i kapab vin atraver kalite  ledikasyon ki nou donn sa bann dimoun. Sa i en konponan ki a mon’n avi ki tre, tre enportan. Mon rappel lepok ki mon ti pe fer lekol NYS e rafal ki NYS ti pe al fermen, nou ti fer serten propozisyon dan lafason ki lekol  segonder i devret si oule fonksyonnen pou accommodate en pti gin sa ki ti pe arive dan NYS e baze lo leksperyans ki nou ti annan. Mon dir sa Mr Speaker se akoz ler ou dan lekol ou trouv la kantite marmay ki ganny difikilte pou fer fas avek kalite curriculum oubyen kalite progranm ki zot bezwen swiv e ou vwar ki sa bann marmay pou sorti dan sa bann laklas san ki zot in kapab atrap sa ki ou a pe sey donn zot akoz i pa lo zot nivo and therefore, ler zot sorti dan en labaz, sa i fer zot pli fasil pour zot tonm dan kategori sa bann dimoun ki plitar i vin vilnerab dan sosyete zisteman akoz zot labaz i vreman, vreman feb.

Dezyenm keksoz ki mon ti ava kontan dir Msye Speaker, mon pe mazinen poudir ed en dimoun napa narnyen pou fer avek zis donn li larzan, donn li larzan.  Mwan mon santi poudir lasosyete i bezwen esey fer sir ki i kapab idantifye dan sa endividi oubyen dan sa fanmiy potansyel ki sa dimoun i annan, ed li servi son potansyel, ed li devlop son potansyel pour li ganny en travay e pour li debout lo son de lipye pour ki i pa ava depan lo lasistans ki gouvernman i donn li.  E mwan mon dir poudir sipor finansyel, lasistans finansyel i ava vin pour bann dimoun ki vreman, vreman pa kapab.  Bann dimoun ki annan dezabilite, bann dimoun ki napa sa kalite skills oubyen sa potansyel ki ou kapab devlope pou fer li ganny sa skills pour li fer fas avek lemonn travay, therefore la ou ava donn zot sa kalite lasistans ki neseser. I enportan Msye Speaker pour nou fer sir ki lasistans i ganny donnen a sa dimoun ki vreman, vreman bezwen. Sa i en soz debaz sa. Ler dimoun i dan sa kategori kot i bezwen gannen nou bezwen donn i sa sipor Msye Speaker.

Ler nou pe donn sa sipor,  nou bezwen anmenn fairness, nou bezwen anmenn latransparans e nou bezwen osi anmenn accountability dan lafason ki nou donn sa servis e dan la fason ki sa servis i ganny zere.   Nou bezwen donn sa kalite servis ki pou permet nou garanti ki lasistans i ganny donnen pour sa bann dimoun ki bezwen pour ki Mr Speaker napa labi. Fodre pa ki i annan labi. Alors sa ki mwan mon pe propoze se ki i bezwen annan en restriktirasyon dan lafason ki sa servis i ganny mete a dispozisyon bann zabitan Seselwa. Bann seselwa.

Parey nou ava ekspekte lasistans finansyel i ganny donnen a bann dimoun ki napa, mannyer sistenm i ete la, ki napa sa kalite income ki permet li meet son bann bezwen debaz tel ki manze, lenz ek lakaz. Ozordi Sesel nou annan servis sosyal ki deal avek sa bann problenm anmenman ki nou annan sekirite sosyal, servis sosyal i tonm anba minister zafer sosyal e nou osi annan sekirite sosyal ki li i tonm anba minister Finans. Se sa de minister ki plizoumwen take care of sa bann problenm.

A mon’n avi la i en area ki nou kapab improve lo la pou fer sa sistenm vin en pti pe pli efikas as compared to lafason ki i ete la.  Pli boner  Onorab  Elizabeth e Onorab Charles osi in osi koz lo lezislasyon e mon krwar poudir nou bezwen revwar lezislasyon pour ki provizyon anba lalwa i vin kler lo lafason ki lasistans pou ganny donnen, i vin kler lo lafason ki appeal i ganny fer ler dimoun  i fer en aplikasyon e son laplikasyon i ganny rezete, i vin kler lo ki arive ler dimoun i komet en lofans. En lofans i vedir ki sa dimoun i va apply dan bann sitiasyon, i ava apply i a gannyen dan bann sitaisyon kot i pa deserve e letan sa i ganny dekouver aksyon i bezwen ganny pran. Sa pou kontrol enpe labi.

Apre sa Mr Speaker a mon’n avi nou devret annan en departman ki deal avek tou sa bann issues pou fer sir ki keksoz i ganny vreman byen kordinen.  Sa departman li a son tour i ava bezwen premyerman annan en policy manual ki kler e ki azour avek larealite ozordi. Anmenmtan ki zot ava annan bann kriter ki kler e ki a ganny mete a dispozisyon tou dimoun. Zot pou bezwen annan en workforce ki well trained e ki profesyonnel e ki fer zot travay baze lo lafason ki sa travay i devret ganny fer. Zot ava fer sir ki bann dimoun i ganny edike oubyen i ganny sansibilize lo kwa ki zot bezwen ganny fer ler zot vwar zot dan en sitiasyon kot zot bezwen lasistans.  Sa bann dimoun   ava konnen kote zot pou ale, e kimannyer zot pou apply e zot ava ganny assess, pou vwar si zot eligible oubyen non baze Mr Speaker lo bann kriter ki kler e kantite lasistans ki zot devret gannyen i ava determinen selman an relasyon ek zot sitiasyon e dapre regilasyon oubyen dapre sistenm, oubyen dapre bann kriter ki anplas.

Mon panse ki lakantite larzan ki en dimoun pou gannyen i a depan lo son sitiasyon e pareyman la kantite larzan ki en fanmiy pou gannyen i a osi depan lo sitiasyon son fanmiy.  Gouvernman li i pou bezwen fer letid serye pou etablir sa minimum income ki sa endividi i bezwen pour li viv lo la dan en mwan pou garanti ki i viv ek dignite e lasistans finansyel i a ganny donnen, kalkile e baze lo la.  E lo sa income ki sa endividi oubyen sa fanmiy i a pe gannyen. Si i napa i a ganny sa minimum ki i devret gannyen. Si i annan serten income ki pe rantre dan fanmiy, sa  morso ki manke pour li kapab viv dapre sa resers ki gouvernman i a fer – pour li kapab viv avek dignite i ava ganny donnen a sa fanmiy.

Mon dir sa Msye Speaker avek lendi pase mon ganny en ka kot en endividi ki’n travay pour 18 an koman en mason ki annan en licence e ki’n touzour pey son tax parey lalwa i demande e li sa endividi in ganny en aksidan e in kas on lipye an 3 plas. In ale in fer demars, in al rod lasistans e zot ofer li R280 par mwan. E li sa endividi ki in bezwen fer in dir, alright gard zot R280 akoz mon’n fer en kantite kontribisyon pandan moman ki mon’n kapab travay, mon’n travay, mon devoue e ozordi letan mon santi mon bezwen lasistans zot pe donn mwan R280 e i kler ki R280 mon pa pou kapab viv lo la and therefore i dir alright gard zot R280.

Sesel antye mon krwar Mr Speaker i konn ka Msye William Serret Port Glaud.   Sa msye Ozordi i annan en dezabilite, in koup en kote son lazanm e li i pe viv lo R400 par mwan.  Mr Speaker mon dir Sesel antye in konn son ka akoz in pase lo televizyon e sertennman Prezidan Michel i osi konn son ka akoz mwan personnelman mon’n anmenn li State House pour ki i al diskit son ka li personnelman pour zot vwar li e konpran son sitiasyon. Sa i fer mwan realize pourdir souvannfwa letan nou tande ki isi Sesel Msye Michel li tou keksoz ki mal dan sa pei i pa konnen. Tanzantan Onorab Charles de Commarmond i dir nou, Prezidan pa konnen sa li.  E tou keksoz ki byen, in mars normal dan sa pei i konnen. Me la i en ka ki mal e ki mon dir ou poudir Msye Michel i konnen e mwan mon demande ki en keksoz i ganny fer an relasyon avek sa msye imedyatman.  Non pa zis sa msye tou sa Seselwa ki pe viv lo R400 en mwan e ki devret baze lo bann kriter ki devret ganny lasistans sosyal, zot bezwen ganny en lasistans ki pli eleve ki sa pou permet zot viv avek dignite.

Msye Speaker lafason parfwa ki nou fer keksoz, lafason ki sa gouvernman i fer keksoz i fer li vin difisil. Konbyen fwa dan sa lasanble nou’n koz lo sitiasyon bann doker. Nou’n koz labous plen, ou menm Mr Speaker pandan lepok ki tou ti  Leader of Government Business ou’n refer sorti sa issue kantite larzan ki zot gannyen par tonaz fodre i monte akoz parler napa bato etc. Sa bann dimoun osi, sa bann dimoun ler napa bato, zot tonm dan en sitiasyon kot zot vwar zot zot napa en travay, zot napa en saler pour zot viv lo la, zisteman akoz lakantite larzan ki zot pe gannyen i kler ki  i pa ase pour zot met enpe en kote pour ler zot napa travay e sa ti ganny refer sorti klerman par ou menm Mr Speaker me selman nou pa fer narnyen, nou pa fer sa ki nou dir pou amelyor sitiasyon sa bann dimoun pour ki zot pa retourn kot gouvernman e demann gouvernman sa kalite lasistans sosyal.

Se pour sa rezon ki mon’n propoz en departman ki deal avek tou sa bann issues. E paralel avek sa sa departman an kolaborasyon avek minister ledikasyon i ava osi angaz li dan ede improve kalite ledikasyon ki sa endividi ki i annan pou permet li ganny en travay akoz tou dimoun i bezwen get son responsabilite travay dan sa pei koman en responsabilite ki tre serye.  E i bezwen as much as possible ganny ankouraze pour li pran sa responsabilite. So sa departman i ava osi kapab dan en fason efektiv deal avek sa morso ki la.

Sa departman an kolaborasyon avek departman lanplwa, oubyen minister lanplwa i a osi angaz li lo ede pou rod en travay e ed sa bann endividi, i ava annan en file pour zot, i ava ed zot rode en travay. Oubyen pour manm sa bann fanmiy ki dan sa sitiasyon.  An dizan sa Mr Speaker i osi bezwen annan en bon balans ki nou a garde. Lo en kote nou bezwen fer sir ki en dimoun ki dan bezwen fodre i ganny asiste e lo lot kote napa labI. So sa departman being one department i ava dan en pozisyon pli fasil pour li kapab garanti ki sa pa arive.  Akoz si en dimoun i dan bezwen e gouvernman pa respekte son langazman pou ed li, sa i pour en lenzistis.

Mr Speaker mon pe koz lo bann dimoun ki vreman, vreman bezwen parey dan ka Msye William Serret Port Glaud.  E okenn lezistis ki ganny komet kont okenn Seselwa pour mwan sa i pa akseptab e i bezwen ganny korize.  Pou ede anpes sa arive, mon osi sizer en lot keksoz Mr Speaker. Mon sizere ki i osi bezwen annan en appeal board ki pou kapab fer en independent review lo en desizyon ki sa departman ki mon’n koz lo la i kapab fer kont en klizyan oubyen kont en laplikasyon e ki li sa board dan en fason endepandan i a regard sa desizyon e i ava pran en desizyon lo ki pou fer dan sa ka. Si sa board i vreman santi ki sa dimoun i devret ganny sa lasistans, sa board li i ava fer en rekomandasyon, e i ava overrule desizyon ki’n ganny pran par sa departman. E parey Onorab De Commarmond in dir pli boner, in dir nou klerman poudir li i pase i get sitiasyon en dimoun e i vwar poudir sa dimoun i bezwen ganny lasistans. Be ler sa dimoun i fer laplikasyon sa dimoun pa gannyen lasistans.

E sa ki fer li enteresan ankor, lafason ki sistenm i ete ozordi, sa dimoun ki sa aplikasyon in ganny rezete i bezwen fer en appeal avek sanmenm sa minister ki’n rezet son laplikasyon. Mwan mon pe dir poudir sa i mal e se pour sa rezon ki mon pe propoze ki i annan en board ki endepandan ki ava fer sa travay.

En kliyan paregzanp i a kapab appeal si son laplikasyon i ganny rezete me li i santi poudir i annan merit dan sa laplikasyon.  Sa kliyan i  a kapab fer appeal menm si son lasistans, si i santi poudir lasistans ki in gannyen i pa sifizan.  I a osi kapab fer en appeal si i santi poudir son lasistans ki i ti pe gannyen in ganny koupe pandan en moman kot sa lasistans a son avi pa ti devret ganny koupe.  Se la kot sa board i rantre e a mon’n avi i a kapab fer en travay pli profesyonnel e pli apropriye.

Sa board i ava act koman en independent tribunal parey mon’n dir, i ava annan li son Chairperson, i ava annan li son Vice Chairperson e i ava osi annan bann lezot manm e la Msye Speaker i enportan lo ki kalite manm nou annan lo sa board. A mon’n avi nou bezwen annan bann civic minded endividi ki kapab think independently of zot kouler politik pour ki dan zot konsiderasyon i ava napa okenn konsiderasyon politik. E kekfwa zot ava meet, sa i bann propozisyon, 2 ou 3 fwa par mwan depandan lo sitiasyon.

Sa i mon kontribisyon e mon swete ki in the short term sa bann propozisyon ki mon’n ganny fer a ganny pran oserye me in the long run mon swete ki nou ava osi reget sa problenm dan son an antye e vwar kimannyer sa konponan ledikasyon i kapab zwe en rol pou redwir lakantite dimoun ki vin vilnerab e ki depan lo lasistans sosyal alavenir.

 

MR SPEAKER

Mon krwar zis en gidans pour bann manm nou bezwen kapab fer en distenksyon ant lasistans anba means testing avek invalidity benefits. I de prosedir konpletman diferan, fodre nou apresye sa dan nou deba. Onorab Potter.

 

MRS POTTER

Msye Speaker lo en size sitan enportan, mon pa kapab pa dir ennde mo an sipor mon koleg Madanm Charles ki mon konn egzakteman kote i pe vini avek sa mosyon. Mon konnen ki i pe reflekte en realite ki li in pas atraver dan son karyer e dan son pozisyon koman en manm lasanble pour distrik Roche Caiman. En distrik ki parey nou konnen i annan pli o popilasyon madanm e se pour sa rezon ki Roche Caiman i enn bann distrik kot ou vwar mazorite bann manman tousel ki vwar zot dan bann kategori ki nou apel bann ka vilnerab.

An dizan sa Msye Speaker mon ti a kontan azoute ki mon krwar si i annan en pei ki’n vreman fer en kantite ki parey Mandela in dir, in walk the extra mile pou adres sa size problenm sosyal e etablir sa ki nou’n appel en safety net, pou anpese ki okenn nou sitwayen, okenn zanfan, okenn manman, okenn fanmiy i tonm dan sa bracket ki nou appel below poverty oubyen absolute poverty se zisteman Sesel.

Mon krwar Lonorab Elizabeth dan son prezantasyon in fer en resers merveye. Mon krwar in ede  klersi en pti pe kote vreman nou sorti an sa ki konsern bann lasistans sosyal atraver lalwa ki ti ganny entrodwir pour premye fwa an 1987.  Msye Speaker sepandan mon krwar nou tou la ki’n koze nou admet ki nou ankor annan en kantite difikilte pour nou kapab achieve sa ki nou ti a kontan vwar pour nou popilasyon.  Mwan personnelman ler mon’n ekout bann deba la mon’n kapab si oule  idantifye sa ki mon ava dir 3 gran defi ki nou sistenm welfare aktyel pe fer fas avek. Premye defi se sa ki mon pou apel en kestyon prosedir. Mon santi ki bann prosedir pour en dimoun vilnerab kapab ganny asiste i ankor enpe tro lour, i ankor enpe tro long, i ankor enpe tro konplike.

Msye Speaker plizyer legzanp in ganny donnen. Paregzanp si mon pran en senp ka parey en ka alimoni, mon krwar ki tro bokou manman ki sertennman pa’n fer sa zanfan tousel i vwar li tousel pe monte desann pour tro bokou letan pou ale pou al tay deryer en R200, en R300 ki sa papa i refize donn son zanfan menm si sa papa i rekonnet ki sa zanfan i pour li e probableman rezon akoz i pa oule donn sa madanm oubyen sa zanfan sa larzan set akoz sa madanm petet pe reste ek en lot msye, i annan en lot piti oubyen en lot fanmiy ki i pa pe viv avek li. Alors dan son lespri pour li i krwar ki sa R300 sa madanm petet pou al donn sa msye oubyen sa zanfan ki pa pour li me pour sa lot Msye.

Mwan mon krwar dan sa bann sirkonstans parey nou bezwen dir enough is enough e nou bezwen revwar sa bann prosedir ki fer ki leta dan sa bann sirkonstans i antre, leta i pey sa madanm son alimoni e leta prezan atraver Family Tribunal li i recover sa sonm avek sa zonm avek lentere. Si sa i pran enn an, 2 an e i drag parey nou konnen, avoka i vini i zwe sa ki pour li, lot file perdi, ziz i anvoy case, sa i a fer ki sa zanfan i pa pour vin victim bann keksoz ki pa li ki responsab.

Msye Speaker egalman dan bann ka kot paregzanp en fanmiy ki pa neseserman dan en ka vilnerab i vwar li dizour olannmen in fer fas ek en aksidan, en misfortune, e i vwar li petet (casttrap??) pour enpe letan, 2 mwan, 3 mwan probableman sa reveni ki ti pe rantre dan fanmiy  pa antre pour en rezon aksidan. Si en papa i en drayver taksi oubyen i annan en pick-up me pick-up i kase e i napa savings pou aranz spare pick-up, pick-up napa spare whatever, mon krwar dan sa bann sirkonstans osi devlopman sosyal, servis welfare i bezwen kapab antre pou negosye probableman avek bann krediter ki sa papa oubyen sa fanmiy i annan pou renegosye paregzanp postponement loan ki sa paran i a kapab annan e donn li en – sa ki mon ava apel en bridging assistance ziska ler i a kapab retrouv li dan en sitiasyon kot son pick-up in aranze, son taksi i lo semen oubyen whatever aktivite ki i ti pe fer ki ti pe earn li en larzan ki i pa ti pe depan lo leta retourn a’n ord.

Msye Speaker dezyenm defi ki mon konstate avek nou sistenm welfare ozordi se sa servis san konpasyon. Mon krwar sa nou tou ki la dan sa lasanble ki’n travay lo teren, ki’n fer fas avek kantite sa bann ka, nou’n pase ladan e nou’n vwar kimannyer bann dimoun  ki sipoze pe attend to sa ki zot appel kliyan, mwan pour mwan mon pa pou dir sa dimoun ki vin devan en biro sosyal i en kliyan, pour mwan i en imen dan en bezwen. E son ka i bezwen ganny trete avek konpasyon. Mon krwar Prezidan Michel in deza fer sa referans dan enn bann meeting konsiltatif ki i ti fer dan bann distrik 2 an pase. Mon krwar sa bann zofisye i bezwen pli kapab met zot dan soulye sa madanm oubyen sa msye ki vwar li dan sa pozisyon vilnerab ki’n ariv devan li vin demann li en lasistans.  La osi probableman avan ler prosedir i ganny fer, file i ganny pase e form in ganny ranpli, zafer i ganny anvoy dan distrik mon krwar en lasistans enpe limedyat i merit kapab vini dan limedya pour sa ka. E ler prosedir i a’n fini, sa ki’n fini dormi lo file sa ki pe peze parey Onorab Charlie  taler pe dir, ler li in fatige fer tou son tralala, la sa dimoun pa pou’n vin viktim ankor bann lensifizans, oubyen bann limitasyon, oubyen letarzi, oubyen bann mank konpasyon ki souvannfwa sa bann ka, sa bann imen i fer fas avek.

Msye Speaker trwazyenm defi e malerezman i enn probableman pli gran defi nou sistenm welfare ozordi se labi. Mon krwar nou tou la nou’n sey abord sa size, nou’n fer fer li letour me nou pa’n oule tro al dan milye akoz mon konpran tre byen, koman bann politisyen petet ennler i difisil pour ou admet me trwakar petet sa bann dimoun ki souvannfwa i oule by-pass the system, servi bann loophole, al sey en sans. E menm si nou nou konnen deep down zot pa merite akoz zot pa neseserman meet kriter, nou nou konnen ki zot annan serten reveni aryer. Parfwa nou vwar li difisil pour nou kapab dir ek sa dimoun, Msye, Madanm ou pa merite pour tel, tel rezon.

Nou dir li al vwar laba, al vwar DA, al vwar sepa mwan lekel, anvoy laba. Nou konnen egzakteman ki laba pou dir li. Prezan ler i retourn kot nou i dir nou i pa’n gannyen, la nou fer krwar nou pe follow up, nou pe ekrir let. Mon krwar i demann en pti pe plis kouraz ek lonnekte lo nou par pour nou kapab ede adres sa sitiasyon labi si vreman nou anvi anmenn sa ki nou pe rode dan nou sistenm welfare pour nou bann dimoun vilnerab.

Msye Speaker pour mwan solisyon ki mon krwar tou manm i partaze lo sa size nou sistenm welfare ozordi se en reform profon dan nou model sosyal. Mon krwar nou annan en kantite pou aprann dan bann pei progresis ki’n fer sa an erop, ki zot in apel sa efektivman model sosyal. E lannen pase dan eleksyon Prezidansyel dan son progranm ki i ti al avek dan eleksyon, Prezidan Michel in dedye en sapit lo sa size reform model sosyal.  E in koz lo en sistenm en model sosyal modern kot nou ava kapab adres sa bann defi ki mon’n koz lo la pli boner.

Me ozordi dan lemonn i annan 2 lapros lo ler nou koz reform. Probableman ler nou pe koz reform pa nou tou ki kler ki kalite reform nou an faver. I annan de tandans si oule lo nivo enternasyonal. I annan en tandans liberal oubyen neoliberal ki krwar ki reform se koup depans pou kapab koup labi. Msye Speaker i annan en tandans progresis e sa ki’n ganny champion par bann parti progresis an erop e menm parti demokrat an  Lanmerik. Mon konnen paregzanp ki Hilary Clinton dan lepok ki son mari ti prezidan in champion en kantite sa cause e in ekri en kantite lo sa size.  Mon krwar si nou al lo internet nou pou vwar en pti pe enpe pli ofon sa panse ki mwan mon krwar ladan e mon krwar nou parti osi i krwar ladan etan donnen ki nou en parti progresis.

Sa reform pour li se pa koup depans pour ou koup labi. Sa reform i demande ki okontrer nou ogmant lasistans ki nou donn bann dimoun vilnerab me nou fer sir ki sa lasistans i ganny byen targete. Zot apel sa en targeted approached. Sa vedir sa lasistans i al kot sa dimoun ki vreman merite me i pa al kot sa enn ki i vini i pe sey abiz the system, i pa merite.

Mon krwar parey mon’n dir pli boner nou konnen i annan sa bann ka me nou pa kapab vreman fer bokou koman politisyen akoz parey nou tou nou’n dir trwakar sa bann dimoun i nou bann siporter.  E se la ki mwan mon krwar pli gran defi reform en sistenm welfare. Probableman nou devret tir li net dan lanmen tou politisyen. E sa i pa aplik pour  zis en kote me pour tou kote.  Msye Speaker bann tandans progresis osi ler zot koz lo reform e model sosyal zot osi koz anterm sa ki zot in apel social conversion, oubyen konversyon sosyal, sa vedir bann ka paregzanp ki loter mosyon in fer resorti dan son prezantasyon kot ou annan ou bann madanm sirtou ki in ariv en serten laz kot i tro zenn pour li ganny pansyon me i tro vye pour li ganny re-anploye, i malad, malad, tanzantan i ganny tansyon, i ganny dyabet, i pa kapab debout lontan, son lipye i anfle, son leren i fermal, I mean nou konn en kantite sa bann ka e la ankor mon a dir mazorite bann madanm, se sa bann dimoun ki pe deplizanpli vin en group reel dan sosyete ki nou bezwen adrese, nou bezwen rod en solisyon. Sa met zot lo means testing pour R400, R600 pa marse. Ordinerman nous devret pe reflesir dan sa scheme konversyon kot leta i meet zot half way avek en lasistans, la mon dir bann ka reel me leta i osi fasilitet zot atraver en don, en grant oubyen en inducement kelkont kot zot kapab rekonvertir zot lanplwa. Vedir zot kapab paregzanp fer en pti aktivite ekonomik swa dan lakour, swa anba cottage industry, ki dayer nou annan Sesel, petet nou pa pe link sa de keksoz ansanm. E sa madanm prezan oubyen sa msye vilnerab a vwar li, anmenmtan ki leta pe asiste li mid-semen, i ava pe osi pe ganny en lot income atraver sa grant, sa don oubyen sa fasilite, inducement finansyel ki a permet li fer en pti zafer dan lakour, swa al koud en pti keksoz, oubyen fer en snack shop oubyen fer en pti landrwa kot i kapab ase, revann legim. I annan en kantite keksoz ki bann madanm ozordi i kapab antreprann.

Donk sa pour mwan i ava ede pour nou atak sa problenm osours e donn li en solisyon lonterm. E mon krwar se dan sa lespri ki loter mosyon i ti oule nou get son mosyon. E Msye Speaker lo sa baz byensir mon pou donn li tou mon sipor.

Me avan mon terminen zis an pasan mon ti a kontan dir ki mon konpletman dezagree avek lapros ki Lonorab Arissol in pran lo sa size student mother. Mon krwar ki mazorite bann madanm isi pour siport mwan ki nou devret afford en proteksyon, annefe en proteksyon ekstra a bann zenn fiy ki vwar zot dan bann sitiasyon parey kot zot in tonm ansent san ki zot ti planifye oubyen ekspekte. Menm si nou pa pe ankouraz zot al ansent dan lekol oubyen whatever me selman nou santi ki en zenn fiy ki pe pourswiv son letid e in vwar li in tonm ansent swa par aksidan, swa par volonte, i pa merit litousel soufer akoz sa aksidan in ariv avek li.

Byensir pour mwan pandan tro bokou letan, nou’n vwar tro bokou lenzistis ganny fer zis avek bann fiy ki ler zot tonm ansent, alors zot bezwen kite lekol parey Lonorab Arissol i dir, ale al rod en travay pour sonny sa piti. Me kar nou tou nou konnen sa fiy pa’n fer sa piti litousel.  Sa responsabilite  i bezwen shared responsabilite. Si sa garson ki probableman i osi kapab en etidyan ki’n fer li ansent, li i kapab kontinnyen pourswiv son letid, so mon krwar ki sa fiy osi i merit annan sa posibilite pour li opt out ganny son zanfan, re-etablir li e pour li retourn dan son letid pour li kapab pourswiv son karyer. Annefe mon krwar ki desizyon ki gouvernman ti pran enpe letan pase i pa amount to en soutiy fiy al fer zanfan. Annefe i pe rekonnet drwa en zenn manman, drwa en madanm, drwa en fiy ki pour mwan i en human right, e nou pa devret pe discriminate against sa bann sitiasyon.

Msye Speaker avek sa de mo mon ti a kontan dir Madanm Charles mon pou donn li tou mon sipor e mon swete ki dan bann reform ki i ava annan dan sekirite sosyal, dan nou welfare sistenm zot ava pran konsiderasyon the spirit of the debate ki nou’n annan dan sa lasanble ozordi ler zot pran bann desizyon lo sa size.

 

MR SPEAKER

I reste nou 20 minit ape pre pou 5 er e i reste 2 speakers enkli the mover of the motion. Nou kapab annan en fleksibilite. Eski Onorab, konbyen letan ape pre ou krwar ou pou pran?  15 minit apre ou ava ganny right of reply Onorab.

 

MR RAMKALAWAN

I annan en statement ki Onorab Potter in fer  ki mon ti a kontan komans avek. Onorab Potter in dir pandan sa deba, in fer letour e nou pa’n al dan milye. Mon krwar ki sa i statement pli vre ki’n ganny dir apre midi. Zisteman mwan mon ti ava kontan al enpe dan milye e dir keksoz parey i ete akoz si nou pa al dan milye, nou pa pour zanmen adres sa size parey i devret ganny adrese e nou pa pou zanmen avans devan.

Tou sa bann legzanp ki’n ganny donnen apre midi, tou sa bann entervansyon i montre nou en keksoz, ladekadans dan nou sosyete. Se ladekadans ki sa i montre, safety net i ede pou sey ranmas enpe sa dekadans. E mwan mon krwar ki sa dekadans in komans avek sa prensip, nou pou pran swen avek ou, depi konsepsyon ziska lanmor.   E anplis ki sa ennler mon ganny lenpresyon si nou ti kapab menm dir nou pou pran swen avek ou depi konsepsyon ziska larezireksyon nou ti pour menm dir sa.

Mwan pour mwan mon pa anvi vin koman en politisyen apre midi ki pandan 15 minit pe sey rod vot. Mon anvi vin koman en politisyen ki adres en size sosyete parey i ete. I pa vo lapenn pour nou vin dir ki sa ki pli vilnerab isi, vilnerab laba, vilnerab partou kote. Mwan ofet mon ti ava kontan si apre midi nou ti ava pe koz lo en mosyon ki ti a pe rode kimannyer gouvernman i kapab ede pou annan bann pli bon kondisyon travay pou fer sir ki tou dimoun i travay akoz mwan mon krwar enn bann rezon akoz i annan en kantite sa bann ki nou apel vilnerab se akoz i osi annan bokou pares dan nou sosyete. Annou apel en keksoz parey i devret ganny apele se la pares.

Pour mwan ozordi mon demande, i annan serten dimoun ou donn li en plas travay, ou donn li en travay, i en mason li, ou donn li tou materyo, i vin travay en zour, lannmen ou pa vwar li, apre-d-men i vin rod en davans e apre sa i disparet plitar i vini i dir avek ou i dan sitiasyon vilnerab. Sa i apel lapares.  E akoz ozordi i annan bokou – e demann tou dimoun ki pe konstrir lakaz,  e annou fran avek nou lekor, e mon sir ki Onorab De Commarmond la pour dakor avek mwan akoz li osi tou in bezwen rod travayer etranze.  Akoz ki i annan bokou dimoun ki ozordi i dir avek ou, pour li fer en travay konplete swa kot son lakaz ensidswit fodre i ganny li 2 travayer etranze parski sa boug, sa travayer endyen i vin kot li zour i dir li i pou vini, oubyen i vin zwenn li, i travay ziska in fini sa travay.  Lo lot kote i dir avek ou si mon ti pou depann lo en Seselwa mon travay kekfwa zanmen i ti pou fini.  Pourtan se bann dimoun ki zot lebra i pli gro ki pour ou ek pour mwan, se bann dimoun ki for, se bann dimoun ki solid me selman letan i ariv ler pour zot vin travay, zot pa pare pour zot travay selman letan in ariv ler pour zot vin rod en keksoz chief fer keksoz, get marmay ensidswit, sa zot pare pour zot fer li. Mwan parey mon pe dir, mwan mon vin koz keksoz parey i ete dan nou sosyete. Etan ki nou pa koz keksoz parey i ete dan nou sosyete nou pou kontinnyen parey Onorab Potter in dir nou pou kontinnyen fer letour, nou pa pour desann dan son milye.

Sa zenn madanm ki ou donn li en plas travay kot ou, parski zisteman ou pe dir i annan en zanfan, me letan ou’n fer li rantre dan ou lakaz, letan i ariv aswar ou vin kot ou, ou sennon pa la, ou zanno pa la, ou lalyans pa la, lot keksoz pa la. Kimannyer eski sa i apele? Eski sa pa i apel en malonnekte. Eski sa pa i apel en problenm ki nou bezwen adrese koman en sosyete.  E se pour sa rezon ki mon’n dir malerezman sa ki nou pe eksperyanse ozordi se ladekadans e se sa ki Lonorab De Commarmond i dir, finalman i pran pitye.  I pran pitye pour sa per-d-fanmiy ki ganny tyonbo ek drog parski i pe mazin sa zanfan. Tou sala i form parti sa dekadans. Wi, sa per-d-fanmiy ozordi ou pran pitye pour li me selman statistik in dir avek ou ki ant bann zanfan, an 10 a 14 an, in annan 25 ki’n raport Mont Royale.

Sorry, mwan pour mwan letan mon mazin en per-d-fanmiy ki azir konmsa, in ganny tyonbo avek drog, mon pe mazin sa zanfan ki sitiasyon sa lot zanfan pou deroule, kimannyer mon zanfan pou pase. E wi nou bezwen anmenn en lalit konplet e sa ki nou pe koz lo la ozordi, sa bann ki pli vilnerab – sa ki pli vilnerab li osi tou i bezwen bouze.  Pa bezwen met ou dan en pozisyon vilnerab, sey fer en fason debourye. E letan ou debourye, sosyete  i kapab donn ou lankourazman.  Sosyete i kapab ed ou pour ou avans devan.  Sosyete fodre i met li dan en pozisyon, pour li kree bann lanplwa apropriye, kree  bann sipor apropriye, pour kapab anmenn sa dimoun dan en sitiasyon kot i kapab travay pour li santi en serten pride, en serten loner.

Akoz nou tou ki la nou travay? Akoz tou sa bann dimoun ki dan sa lasanble nou tou nou enterese pour nou travay? Nou frer ki la ki en polisye, i bezwen parfwa travay 2 erd bomaten letan tou dimoun pe dormi. Akoz ki li i kapab travay pour li nobou ganny larzan pour nouri son fanmiy tandi ki sa boug ki travay lasose li letan i ganny son lapey i prefere depans en kantite son larzan  lo  lalkol. E nou tou nou konnen sa.  Mwan mon pa pe dir narnyen nouvo la mwan. Nou tou nou konnen ki poudir sa boug ki travay lo lasose, zour bato ton in vini, in donnen menm, i ganny son lapey e apre sa regarde ki i fer. Mont partou dan bann distrik kot i annan e nou tou nou konnen sa boug zour i ganny son larzan dan son lanmen, i pa ni konnen si i annan en fanmiy, son dernyen konsern se son fanmiy.  Me selman letan i vin kot ou, apre ki in bwar tou son bwar, apre ki in fim tou son drog, la aprezan ki i konnen poudir i annan fanmiy, la aprezan ki i konnen poudir son piti i servi dile, la aprezan i konnen poudir son piti i servi pampers. Zot se sa larealite.  E tou sala i form sa dekadans ki nou sosyete pe pas ladan akoz ozordi dimoun i krwar ki poudir i kapab li viv son lavi kimannyer li i anvi e sosyete toultan pou la pare pou pran swen pour li, pare pou anmas son zanfan.  Sa madanm ki’n vin kot nou letan i ti annan en zanfan, ou’n koz avek li, ou’n donn li en led, letan i retournen i retourn avek en lot. Letan ou zwenn li ankor i annan en lot dan son vant. Eski pa ler pour nou sosyete komans adres sa bann sitiasyon dan en fason reel pour nou kapab bouze.

Politisyen tan ki nou kontinnyen parey son lekspresyon franse ki mon kontan – parski son lekspresyon franse i dir avek ou, ou pe pisse autour du pot. Sa lekspresyon franse i spot on. Tan ki nou politisyen nou kontinnyen koz parey nou’n koze dan en fason diplomatik parski sa dimoun laba i annan 4 vot kot li, parski sa dimoun laba nou kapab fer li ganny en pti R100 pour nou ganny 2 vot, sosyete pou pouri anba nou, sosyete pou grennen anba nou.  E nou nou pou kontinnyen vini, nou pou kontinnyen fer bann diskour, e sosyete pa pou avanse.

In ler pour nou remet sa kiltir, travay dan nou pep. In ler pour nou fer nou pep konpran ki poudir sekirite sosyal ek sa bann lasistans – wi nou bezwen ed serten dimoun. La mon a konpran letan en dimoun, parey Lonorab Arissol in mansyonnen, en dimoun ki annan en zanfan andikape, i pa kapab vreman al debourye, i a pe trimouse, sosyete i ava rantre, i ava ed sa dimoun, sosyete i ava ed sa mer-d-fanmiy ki parey nou dir i a pe fer de shift pour li fer sa 2 bout zwenn. Lasosyete i devret ede.  Se sa bann dimoun ki nou bezwen regarde. E mwan mon krwar malerezman tro bokou fwa sosyete pa pe touse bann dimoun ki vreman vilnerab. Sosyete pe tous bann dimoun ki deza kapab fer en keksoz avek zot lekor.

Oule dir mwan en mason, en dimoun ki pran en pti kontra, i bezwen vin kot ou en zour, lannmen i ale, ou donn li davans, i vole i ale e sosyete i konsider sa dimoun koman vilnerab? Sorry, mwan mon pa krwar poudir sa dimoun i vilnerab, mon krwar poudir sa dimoun i malonnet. En zonm ki fer en zanfan – zonm limenm li parfwa i dir avek bann fiy, ‘en in ler pour nou fer en zanfan’. Be pran ou responsabilite apre. Pran ou responsabilite e la kot mon dakor ankor ennfwa, bann pwen ki mon’n fer sorti dan lezot lentervansyon. Sa ki Onorab Arissol  avek Onorab De Commarmond in dir, sosyete pa devret met li dan prizon. Ou’n tir en warant, ou’n aret li, in aparet devan tribinal deswit i pa pou mont dan Baladya, well, konmela nepli annan Baladya, i annan – mon pa konnen kimannyer si konmela sa bis ki apel Baladya, i nepli non en bato, i non en bis prezan – mwan mon krwar sa dimoun pa devret monte Montagne Posée, oubyen si i mont Montagne Posée koman son landrwa dormi.  Bomaten ou ava leve ou ava al travay e sa larzan ki ou gannyen nou ava fer sir ki sa piti ki ou’n dir ek sa madanm annou fer ansanm la sa piti i ava ganny nouri.  I pa pou monte Port Glaud li sa piti, i pa pou ale Anse Etoile, i ava reste la ek son manman e tan ki ou pankor fini pey sa bann soz, ou ladres i ava Montagne Posée. Sa ki mwan mon krwar ladan parski mon krwar ki in ler pour nou fer bann dimoun sekwe zot, reveye, parski si non nou a pe koz en sosyete modern, nou a pe koz en Sesel. Eski sanmenm sa Sesel ki nou anvi nou viv ladan? Nou anvi nou bann zanfan viv ladan?  En sosyete kot nou pou pase byento,  e la statistik i ava monte i ava dir avek nou i annan plis zanfan ankor ki pe viv lo drog. Nou ava tann bann paran parey nou ti antann Madanm Balette  mon krwar dan distrik La Riviere Anglaise letan ti fer sa meeting poudir i per aprezan pour li kit son lakour akoz son zanfan. I vin en lesklav, pou ou demen koman en paran ou antre dan ou  lakaz ou televizyon pa la apre ou tande ki poudir ou garson 14 an in vann ou televizyon zis pour li nobou ganny en heat, whatever it is.

Mwan mon dir in ler pour nou bouze e fodre ki sa stratezi politik, in vre sa ki Onorab De Commarmond in osi dir, Onorab De Commarmond in dir li i bezwen vin defann sa bann ki pli vilnerab akoz zot vot pour li. Me sa osi tou i form parti en stratezi politik, malerezman.  E lapovreman li i en bon stratezi politik, kit dimoun en serten nivo e apre sa vini, donn li R5000, donn li R10,000 parski  i napa lentansyon save – e sa i en keksoz mon anvi dir, tou le bomaten letan nou kit kot nou pour nou al dan nou landrwa travay zis en zour annou fer refleksyon lo konbyen dimoun ki nou pou bat avek ki larzan ki i annan, swa i zis larzan ki dan son pos, parski i napa okenn savings li labank li. E kimannyer en dimoun ki dan en sitiasyon parey i kapab, nou politisyen, met li dan en pozisyon vilnerab senpleman akoz nou regard li koman en dimoun ki annan en vot e letan i ariv kanpanny nou donn li en larzan e apre sa i marse, i vot pour nou.

Sa ki mon pe sey dir, in ler pour nou pran responsabilite. Ozordi 8 dan 10 zanfan dan nou sosyete i ne an deor en relasyon ki serye. Eski sa pa devret fer nou enkyet? 8 dan 10 zanfan i ne an deor  en relasyon ki serye. Mon ser annou fer en zanfan, mon’n kontan ou. Kan eski nou pou arete sa sitiasyon kot letan ou annan selebrasyon festival kreol dan 9 mwan, se bann zanfan festival kreol ki ne maternite.  Letan i annan lakadans, apre sa dekadans lopital. Mon krwar ki mwan mon anvi koz dan sa fason akoz mon krwar ki nou sosyete nou bezwen regard nou sosyete a’n antye.

Mon konpran Onorab Charles son mosyon me ankor ennfwa mwan pour mwan toultan mon pou dir mon konsider li koman en loner pour en zanfan, letan son papa, letan son manman i mor, letan en manm son fanmiy i mor pour li kapab dir mersi. Pour mwan ti en loner, pour mwan kapab, letan mon papa ti mor pour mwan dir papa ou’n donn mwan nesans, ou’n donn mwan lavi, mwan aprezan ozordi dernyen servis ki mon pou rann ou mon pou fer sir ki ou ganny en landrwa repo. Me i annan serten dimoun dan nou sosyete ki pran lanmor koman en aktivite sponsorship.

E ankor ennfwa nou bezwen dir avek dimoun sa ou pa kapab pas partou kote. Letan ou fanmiy i mor ou bezwen prepare pour lanmor. Lontan nou bann gran paran i prepare pou lanmor, ti annan serkey anba lili, ti annan serkey anba langar, dimoun ti dir la i la e la mon pti larzan mon met lo kote pour ki letan mon mor, la mon larzan.

Be ozordi akoz nou sosyete – en dimoun lotrozour i vin kot mwan i dir avek mwan in ganny sponsor pour fler, in ganny sponsor pour bis, la aprezan i pe rod en pti sponsor pour serkey. Be zot, be annou serye dan nou sosyete.  Annou serye dan nou sosyete, e mwan mon krwar ki nou koman politisyen sa katriyenm lasanble nou nou bezwen donn en nouvo direksyon e pour nou zis dir, met R200 anplis, met R400 anplis i pa pou ede. Onorab Volcere in dir donn koupon, pa pour ede. I annan dimoun ki letan in vin kot ou, ou fer en cheque, ou met pay PUC, i ale i vann ou cheque. I vann ziska ou cheque. Oubyen ou ganny en phone call ki dir avek ou, zot i annan en dimoun la pe sey rod cash sa cheque. Nou tou nou konnen sa bann keksoz akoz nou tou nou pas ladan.  Nou tou nou pas ladan koman politisyen e mwan mon dir si nou tou nou pe pas ladan koman politisyen,  in ler pour nou adres sa bann size dan en fason serye, dan en fason direk e mwan mon dir let us take the bull by the horns se sa ki pou sov nou pei, se sa ki pou fer nou avans devan.

 

MR SPEAKER

Onorab Charles, right of reply.

MRS J. CHARLES

Mr Speaker mon ti a kontan premyerman remersi tou bann onorab ki’n koz lo sa mosyon ki pe demann gouvernman pou etidye fason pour kapab ed bann fanmiy pli vilnerab sirtou bann manman e nou’n azout,  e papa tousel.

Mr Speaker i malere pou vwar ki menm si i annan bokou mezir ki’n met anplas pour ed sa bann kalite dimoun, nou vwar kimannyer bann lasistans pa ariv kot zot. Pares dan nou sosyete Onorab Ramkalawan ou annan rezon. Wi, mon napa okenn dout me sa ki mon pe demande Mr Speaker se lasistans pour bann dimoun ki pa kapab travay. Dir mwan dan lekel pei ki napa dekadans ozordi?  Si i annan dekadans nou pa a ed bann dimoun ki bezwen?

Mr Speaker mon dakor avek Onorab Ramkalawan ki dimoun i bezwen travay me mon pa dakor ditou ki nou tret bann manman sirtou ki annan zanfan e ki zot dan problenm, ki napa narnyen pou met dan zot bwat pour al lekol bomaten, no way. Se sa ki mon pe demande ozordi, se ed bann dimoun ki pli vilnerab. Mon mosyon se bann ki vilnerab non pa bann ki Onorab Ramkalawan pe dir.  Mr Speaker wi, nou tou nou annan nou lopinyon, e bann rikord parey mon ti a kontan nou zwe letan nou dan kanpanny eleksyon.

Mr Speaker mon ti a kontan koriz Onorab Lucas, mon pa’n zanmen en direkter dan servis sosyal e pour sa rezon mon pou napa okenn statistik pour mwan donn li.  Mon ti a kontan dir Onorab Alcindor ki wi a en moman donnen tribinal lafanmiy ti refer zot bann kliyan kot departman lanplwa e bann kliyan ti ganny mete lo URS oubyen ti ganny refer kot IOT.  E dediksyon ti ganny fer otomatikman anfaver swa sa manman e zanfan oubyen an faver papa e zanfan me sa in arete pour en rezon ou en lot, mon pa konnen akoz. Si nou krwar sa i en bon sistenm, nou kapab demann gouvernman pou regete.

Si i annan en sistenm welfare anplas, Onorab Alcindor, wi. I annan en sistenm welfare ki pe marse e pa’n zanmen arete e re-entrodwir me sa ki’n arive Mr Speaker, set egzakteman en bann dimoun avek en bann latitid negativ ki pa pe fer zot travay byen. Isi Sesel nou’n napa eleksyon tou le zan oubyen tou le 2 an ki montre ki nou asiste bann dimoun zis avan eleksyon. Sa mosyon ki devan nou, pa pe ditou soutir okenn dimoun pou reste oubyen abiz nou sistenm welfare. Tou dimoun i bezwen pran son responsabilite koman en manman oubyen en papa me bann dimoun ki dan bezwen, mon repete nou bezwen asiste zot. Se sa ki nou pe demande ozordi, se en pti pe plis tolerans e pasyans par bann zofisye ki travay avek sa bann dimoun. Sa ki nou pe demande se esey enplik en pti pe plis sa term pour lanmour Sesel dan zot travay tou lezour. Fer en pti pe plis refleksyon, lo zot latitid e zot konportman anver sa bann dimoun ki pli vilnerab, met zot dan sa soulye. Mon repete, bann dimoun ki pli vilnerab. Donn zot bann bon konsey, gid zot byen me pli enportan donn zot sa bon lenformasyon pou anpes sa bann traze initil ki kout ser pour en dimoun ki pa travay. Si nou anvi investigate, fer investigation Mr Speaker mon napa problenm ek zot. Me selman sa ki mon pe dir ozordi se sa bann dimoun ki vilnerab, nou get zot avek 2 lizye ek en leker e nou asiste zot.

Finalman mon pou demann tou Onorab pour siport mon mosyon.

 

MR SPEAKER

In ariv ler pour nou vote, that the question be now put. Bann ki an faver.  Okenn ki kont?

Avan nou terminen, nou’n koz lo dekadans, mon oule port latasyon bann manm sirtou bann nouvo manm Standing Order 38 i egzize ki letan nou sorti e antre dan nou lasanble, nou montre respe pour nou lasanble par salye nou lasanble atraver the Chair. Mersi bokou, nou ava ede komans konbat dekadans dan nou prop lasanble. Adjourn ziska mardi.