::
Home » Verbatim » Verbatim -- Third Term 2014 » Tuesday 4th November, 2014

Tuesday 4th November, 2014

NATIONAL ASSEMBLY OF SEYCHELLES

Tuesday 4th November, 2014

The Assembly met at 9 am

National Anthem

Moment of Reflection

Mr Deputy Speaker in the Chair

 

MR DEPUTY SPEAKER

Bon, mon a dir bonzour tou bann Manm Onorab.  Bonzour tou manm piblik ki pe swiv nou.  Avek nou ozordi, nou annan Minis pour Resours Natirel, Minis Peter Sinon ki pou vin reponn kestyon bann Manm.  Avan sa mon ti a demann en pti lekskiz pou sa retar, an vi nou ti annan en problenm teknik ki nou’n nobou sort out.

Bon Minis, nou ti a kontan swet ou labyenveni avek ou delegasyon parmi nou.  E san tarde, nou a bouz lo kestyon 169.  E mon ava envit Onorab Marc Volcere.

 

HON MARC VOLCERE

Mersi Deputy Speaker.  Bonzour Minis ek ou Delegasyon.  Bonzour koleg Manm.  Bonzour tou dimoun ki alekout.

Mr Deputy Speaker, eski Minis responsab pour Lapes i kapab esplik sa Lasanble ki proze a kour term ki son Minister i annan pou bann Peser Artizanal dan distrik Paslin ek La Digue?  Mersi.

 

MINISTER PETER SINON

Bonzour Mr Deputy Speaker.  Bonzour Onorab, tou oditer ki  pe ekoute.

Mr Deputy Speaker, pou Praslin, nou annan lenstalasyon Ice Plant nef.  En Ice Plant nef 10 tonn ki ti ganny donnen par Oceana dan negosyasyon ki nou’n fer avek Oceana.  In ganny enpe retar pou nou enstal li akoz en problenm teknik, me i paret ki son tender pou enstal li pou ganny fer dan la prosenn mwan, e ki nou kapab enstal sa Ice Plant.  Aktyelman, nou lo prosesis tendering.

Dezyenmman, lo Praslin, Baie Ste Anne, nou bezwen fer en bout konblaz pou nou amelyor landing site pour bann Peser Baie Ste Anne e pou ogmant fasilite lakostaz.  Nou pe al komans fer bann borehole test, pou determin kondisyon fon lanmer, pou kapab konble apre.  Me nou pas sir kan nou pou kapab akonplir sa travay, akoz nou annan sa issue ki zis en serten bann Konpani ki kapab fer sa e sa bann Konpani i bizi avek zot travay.  Me sa i nou plan.  I nou plan ki nou pe mazinen.

Finalman, SFA pe osi diskit avek Lasosyasyon Peser Praslin pou zot bouze.  Konmela zot pe lwe en Lofis.  SFA pe lwe en Lofis pou zot Grand Anse, pou zot bouz lo propriyete SFA Baie Ste Anne, obor bazar e la zot pou kapab annan zot Lofis e osi Lasosyasyon pou take over si ou oule sa laboutik, pou zot kapab manage sa laboutik  pour la Baie Ste Anne, within the compound of the SFA.

Konsernan La Digue, nou annan en proze entegre pour ki plan in fini ganny desinen, pou nou fer en Bazar ek en gear store.  Nou annan osi lide La Digue met en Ice Plant, me sa nou pankor komans travay lo la.  Nou pankor menm annan finansman pou sa lide.  Me selman lo kot i konsern Bazar, gear Store, lokasyon in ganny  swazir e nou annan zis pou met sa plan dan Planning Authority.  Ganny tou bann laprouvasyon e nou komans travay lo sa proze.  Mersi bokou Mr Deputy Speaker.

MR DEPUTY SPEAKER

Onorab Volcere, Kestyon Siplemanter.  Switch off Minister.

 

HON MARC VOLCERE

Mersi Deputy Speaker.  Deputy Speaker, Minis dan son larepons, in mansyonn bann devlopman ki annan ki pou fer Baie Ste Anne.  Mon ti a kontan demann li si napa okenn proze pour bann Peser dan distrik, lo Grand Anse Praslin?

E dezyenman, an vi ki bann Peser i koz bokou lo bann vol ki zot fer fas avek, eski son Minister pe mazinen dan lespas kour term, pou ed zot avek petet konstrir bann store ki zot kapab store zot bann lekipman, zot masin, pou evite en pti pe avek sa bann vol ki zot pas atraver?  Mersi.

 

MINISTER PETER SINON

Mersi Mr Deputy Speaker.  Parey dan tou lezot distrik kot nou annan lide fer annan bann proze, si sa i en issue vreman pertinan pour Grand Anse, nou bezwen al dan tou sa prosesis rod son lokasyon, kote nou pou ganny – kote nou annan later.  Kote nou oule sa bann store ganny mete.  Fer konsiltasyon avek bann peser pou determinen kote e kimannyer nou kapab fer sa.  E mon krwar i annan en konsiltasyon ant DA, MNA avek Peser, pou nou antreprann sa legzerzis parey nou fer dan tou lezot distrik e nou a kapab fer sa osi pou Grand Anse.  Mersi Mr Deputy Speaker.

 

MR DEPUTY SPEAKER

Onorab Esther.

 

HON NATASHA ESTHER

Mersi Mr Deputy Speaker.  Bonzour Minis e tou dimoun alekout.  Kestyon i lir koumsa.  An vi gran bezwen pou ice parmi bann Peser e lakominote Praslin, eski Minis i kapab enform sa Lasanble, si priyorite pa kapab ganny donnen pou akseler sa proze, ki i a vin an fonksyon o pli vit posib.  E eski Minis pe mazin ankouraz prive pou annan en bon laboutik, kot Peser pa bezwen deplase pou al rod bann zot bann bezwen?  Mersi.

 

MINISTER PETER SINON

Mersi Mr Deputy Speaker.  Parey mon’n mansyonen, nou pe al as quickly as possible, pli vit ki nou kapab.  Nou masin ice, – nou nouvo masin ice in fini ariv Praslin.  I Praslin.  I pres kot i pou ganny enstale.  Nou ti annan sa pti problenm teknik.  Nou pou solve sa problenm teknik e nou enstal sa ice 10 tonn.  E parey mon fek esplike, laboutik ki dorenavan ti ganny okipe par en lot operater pou ganny opere par Lasosyasyon Peser Praslin, ki konn tre byen ki zot bezwen e zot problenm ganny bann materyo ki zot bezwen a en pri ki abordab.  Sa in en problenm ki Praslin in fer resorti, ki si nou vann lanmson Mahe a en tel pri, Praslin pri i double parler.  Me nou ti a kontan ki sa i ganny rezourd par sa Lasosyasyon ki kapab take over sa. Mersi Mr Deputy Speaker.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Bonzour Minis ek ou delegasyon.  Bonzour tou bann Manm Onorab e tou bann ki alekout.

Eski Minis i kapab enform sa Lasanble si zot pe fer provizyon pou met dan Bidze finansman neseser pou bann konstriksyon ki Minis in koz ek nou, par egzanp gear store, ki pou ganny fer lo La Digue tre byento.  Eksi zot in fer provizyon dan Bidze pou sa, pour lannen prosenn?  Mersi Mr Deputy.

 

MINISTER PETER SINON

Mr Deputy Speaker, proze pour La Digue, i pou ganny fer provizwar, apre ki nou’n fer nou konsiltasyon avek EU, i pou en proze ki pou ganny finanse par nou grant avek EU ki zot kontribye pou devlopman Lapes Artizanal si ou oule e nou, nou mete.  Nou met dan nou lalis.  Zot, zot vini an Desanm e nou diskite, zot aprouve.  Nou zistifye sa bann proze ki nou pe met devan zot.  Mersi.

 

MR DEPUTY SPEAKER

Kestyon 170, Onorab Dugasse.

 

HON MELVAL DUGASSE

Mersi Mr Deputy.  Bonzour Minis.  Bonzour tou dimoun alekout.  Eski Minis reponsab pour Lagrikiltir ek Resours Natirel i kapab dir avek sa Lasanble, kan eski son Minister i annan lentansyon pou deblok sa 2 lapas ki ganny trouve Anse Etoile?  Mersi Mr Deputy.

 

MINIS PETER SINON

Mersi Mr Deputy Speaker.  Mr Deputy Speaker, lapas Anse Etoile i annan komitman deza pou ganny debloke par Kontrakter ki’n donn son komitman pou debloke e menm fer enpe plis pour ki Peser Anse Etoile i kapab ganny en plas ase fon pou antre e mouy zot bato e sa Lakonpanyen se Vijay.  E sa i dan travay ki li i pe fer pou devlopman Ile du Port.  Sa Por Ile du Port.  Dan sa travay, in donn son komitman pou deblok lapas e fouy enpe anndan, pour ki Peser i kapab antre.  Mersi.

 

MR DEPUTY SPEAKER

Siplemanter Onorab Dugasse.

 

HON MELVAL DUGASSE

Mersi Mr Deputy.  Eski Minis i kapab dir nou si son Minister, atraver SFA, in fer okenn letid profon pou revwar sa bann lapas obor sa bann zil konble, sirtou apre Tsunami 2004?  Mersi Mr Speaker.

 

MINISTER PETER SINON

Mr Deputy Speaker, en tel letid pankor ganny fer, me selman nou annan plan alavenir pou nou fer li, me ziska prezan, nou pankor fer sa kalite letid dan tou sa bann later konble ki Onorab pe eksplike.  Mersi Mr Speaker.

 

MR DEPUTY SPEAKER

Onorab Bristol.

HON ALDERIC BRISTOL

Mersi Mr Deputy.  Mr Deputy, eski Minis i kapab enform sa Lasanble si son Minister i annan progranm monitoring maintenance, enkli bann bwe ki ganny trouve, ki ganny enstale kot sa 2 lapas e lezot lapas ankor?  Mersi.

MINISTER PETER SINON

Mersi Mr Deputy Speaker.  Pour tou bann bwe, dernyen kestyon, se SFA ansemoman la ki mon pe koze, i annan plan pour revwar tou bann bwe e tou bann lalimyer dan tou distrik.  Praslin, La Digue, partou kot nou annan bann bwe e lalimyer.  Nou annan en problenm ki nou fer fas avek selman.  I annan landrwa kot nou met bwe, ler nou vini nou vwar en kantite lakord in anmare avek nou bwe.  Bwe pou kase.  I annan lezot landrwa kot nou pran lalimyer.  Lalimyer i kase.  Sa bann lalimyer i tre ser akoz sa bann lalimyer i bann lalimyer solar ki nou bezwen enporte e letan ou kas enn, pou nou enporte, i pran en bon pe letan.  So, nou annan sa issue – mon apel sa petet en issue delenkans ki nou pa – nou ki servi sa bann lalimyer petet nou pa parler pran an kont ki ler mon pou vini en zour swar, mon pa pou vwar lapas pou mwan antre.  Nou pe krwar poudir kot nou pe annan bann Lasosyasyon Peser, nou pe sey fer mannyer ki sa bann Lasosyasyon li osi i zwe en rol pou konnen e sey donn nou en koudmen pou safeguard sa bann lalimyer ki nou mete akoz nou vwar i annan serten landrwa nou ale nou mete, 2 semenn plitar, nou napa lalimyer.  Me i pran zis en dimoun pou li andomaz ouswa met an risk lavi en kantite peser ki pa fer sa bann delenkans.  Alors, mon pou fer en lapel avek tou partisipan pou nou travay ansanm, pou nou kapab fer li.  Ansemoman, nou dan sa prosesis pe pas partou, met kormor.  I pa fasil pou met sa bann lalimyer akoz nou devret fer sir ki sa bann lalimyer i reste kot i ete e ler i dan lapas, i dan en landrwa kot i annan bokou tirbilans, bokou mouvman, bokou mouvman laroul eksetera.  Fodre i reste la pou ou konnen kot lapas i ete.  Si i bouze, i pa servi son purpose.  I pe anmenn ou lo brizan.  So, pou nou fer en travay byen, i en travay difisil.  I en travay ase osi koute.  Ou bezwen diverse, ou bezwen kormor.  Ou bezwen kormor ki lour.  Ou bezwen bato ki kapab anmenn sa kormor ki tre lour.  Ou bezwen plas li, epi ou bezwen anmare e fer sir poudir son lasenn i ase for pou li kapab tenir sa kouran, eksetera.  Alors, i en travay ki pe ganny fer ansemoman.  Tou bann lalimyer pou ganny sanze e nou pou kapab annan en bon rekomansman e mon ti a kontan ki sa bann lalimyer i last zot lifetime, olye ki nou pou bezwen sanz zot pli to ki posib.  Mersi Mr Speaker.

 

MR DEPUTY SPEAKER

Onorab Vidot.  Request.

 

HON KEVIN VIDOT

Mersi, bonzour Mr Deputy.  Bonzour tou dimoun ki alekout.

Mr Deputy Speaker, eski Minis i kapab dir nou, atraver son Minister ouswa SFA, ki Bidze zot annan pou deblok bann lapas e pou fer sa bann travay ki in koz lo la?  E si i kapab dir nou si i annan negosyasyon kip e ganny fer ek Minister konsernen ler pe konble bann later, ki zot osi deblok bann lapas, fer sir lapas i available pou nou bann peser?  Mersi bokou.

 

MINISTER PETER SINON

Mersi Mr Deputy Speaker.  Letan nou fer bann konblaz, definitivman lapas i enn parmi bann fakter ki ganny gete.  Pa kapab devlop later, apre tou bato pou reste andeor.  Nou fer sir ki lapas i enn parmi bann fakter akoz nou konnen poudir bann bato i bezwen vin ater.  Alors, me ki Bidze ki nou annan pou devlop lapas, bann lapas dan nou bann diferan distrik.  Ansemoman, mon pa kapab dir poudir nou annan en Bidze pou devlop lapas.  Zanmen nou’n deza annan en Bidze spesifik pou devlopman lapas.  Lapas, kot nou fer travay, i en demand driven.  Savedir sa distrik, parey Onorab Melval in demande.  Ler i demande, nou entertain akoz i sorti dan en demann.  I pa en keksoz ki ou met la, apre ou pase toulezour, ou gete kote lapas in bouse pou ou debouse akoz i pa bous vitman, letan ou’n debouse.  So, it’s a demand driven. Kot nou vwar i annan, nou met li lo nou progranm e laplipar nou fon i sorti si ou oule dan sa fon EU pou sa bann travay parey e nou negosye tou le lannen avek EU pou en progranm travay.  Alors, ler nou konnen poudir dan tel landrwa, La Digue i bezwen lapas, tel landrwa i bezwen lapas, nou anmenn li dan en progranm, nou diskite, swa nou pran dan nou Bidze pour nou, oubyen nou met li dan sa progranm ki nou annan avek EU, pou nou kapab ganny fon pou al fer sa bann travay.  Me si ou pe demann mwan si nou annan en Bidze spesifik, non.  I napa en lalinny spesifik dan nou Bidze ki dir sa en Budget line pou debous lapas.  Nou napa sa specific Budget line pour sa me nou entertain kan lapas i devret ganny fouye pou nou fer li.  Mersi Mr Deputy Speaker.

 

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy.  Bonzour tou dimoun.

Mr Deputy, eski Minis i kapab dir nou, etan donnen ki lapas, sirtou pour bann peser Anse Etoile i konsern zot livelihood.  Eski Minis in negosye avek Vijay en dele letan lo kan pou komanse sa proze e kan pou fini ?  E si Minister pankor negosye, eski Minis i kapab donn nou en lasirans ki zot ava antreprann en negosyasyon pour ki bann peser Anse Etoile i konnen kan sa proze i a komanse e kan i a fini?  Mersi.

 

MINISTER PETER SINON

Mersi Mr Deputy Speaker.  Mon kapab donn sa lasirans poudir nou kapab fer sa negosyasyon, pou konnen ekzakteman kan i pou komanse, kan i pou fini e nou a fer sa – ah.  Mon pe ganny dir poudir in fini komanse.  So, deza in komanse e definitivman nou ava konsilte avek Vijay kan i pou fini sa travay.  Mersi.

 

MR DEPUTY SPEAKER

Kestyon 171, Onorab David Pierre.

 

HON DAVID PIERRE

Mersi Mr Deputy.  Mr Deputy, eski Minis i kapab enform sa Lasanble si zot annan okenn plan pou ranplas bann vye masin Ice Plant ki nepli an prodiksyon an Zapon, par bann ki pli modern?  Mersi Mr Deputy.

 

MINISTER PETER SINON

Mersi.  Mr Deputy Speaker, bann vye Ice Plant ki nou pe koz lo la i si ou oule 3 Ice Plant. I Ice Plant Praslin, i Ice Plant Anse Royale, i Ice Plant Anse a la Mouche.  Zot annan an average apepre 19an depi ki zot la e i vre ki poulemoman, nou pe annan problenm parler ganny spares pour sa bann Ice Plant akoz zot make i parey telefonn.  Ou annan sa Samsung 3, apre ou ganny sa Samsung 4 e i Samsung menm.  E an Zapon i annan spares pour sa bann masin, me selman ler in aret fer i dir ou, sa bann nou’n aret prodwir lo sa lanpler ki nou ti prodwir e nou’n fini depase.

Poulemoman, SFA napa okenn plan pou ranplas sa bann masin.  Poulemoman, kan mon pe koze me ki nou pe sey fer avek sa bann masin se ki nou’n anmenn – tou resaman nou’n anmenn en ekspert Zaponnen ki pou retournen lannen prosenn, ki’n fer en overall lo sa bann masin.  Letan ki i sorti dan sa Konpani, ki i konn byen sa Konpani ki’n fer sa bann masin, in nobou ganny pou nou, serten spares ki nou, nou ti pe rode, avek enpe difikilte, lefe ki nou napa personn laba e in nobou met anplas serten sa bann spares ki sa bann masin i mars bokou pli byen ki zot ti pe marse oparavan.

Me definitivman, nou konnen poudir sa kalite loperasyon pa pou kapab ale ziska tro, tro lontan e i en keksoz ki nou pe met lo latab pou nou vwar kimannyer nou pou tackle li dan lefitir.  Mersi Mr Deputy Speaker.

 

MR DEPUTY SPEAKER

Kestyon Siplemanter, Onorab.

 

HON DAVID PIERRE

Mersi Mr Deputy.  Mr Deputy, baze lo larepons Minis, eski Minis i kapab enform sa Lasanble alors, ki plan son Minister i annan pou fer sir ki supply of ice pa vin en problenm mazer alavenir, pour nou bann peser, sirtou parey in dir Anse La Mouche e Anse Royale.  E ki problenm ki zot pe rankontre, ki pe anpes zot envestir imedyatman dan bann Ice Plant partou dan bann landrwa kot i annan sa bann problenm?  Mersi Mr Deputy.

 

MINISTER PETER SINON

Mersi pou sa Kestyon Siplemanter.  Mon a pran sa kestyon dernyen premye.  Ki problenm nou pe face poulemoman pou nou adres sa problenm konpreansivman, se sa problenm normal ki nou apel problenm resours.  En Ice Plant i pa en keksoz tre bon marse.  Fodre vreman nou plan e mobiliz sa resours pou nou met dan en tel lenvestisman tre eleve.

Poulemoman, pour Praslin par egzanp, nou’n deza – mon fek mansyonnen taler.  Nou deza annan en Ice Plant nef, 10 tonn kapasite pou nou ogmant ice prodiksyon lo Praslin, ki nou konnen poudir Praslin in ganny deal avek.  I reste nou Anse Royale avek Anse La Mouche ki annan enpe masin aze.  E pour sa 2, nou krwar poudir nou pou bezwen asiz lo latab pou nou vwar kote nou kapab mobiliz bann fon.  E fon nou bezwen priyoritiz son litilizasyon.  Nou ti a kontan dir demen poudir wi.  Nou pou sanz sa 2 Ice Plant pou 2 Ice Plant modern e nou pa fer lezot keksoz.  Me selman nou bezwen priyoritize.  I annan en kantite demann pou lezot keksoz tre enportan koman lapas, bazar, gear store eksetera dan bann distrik.  E nou oule adres osi sa bann lezot demann.  Poulemoman, kan sa bann Ice Plant i ankor pe marse, nou pe si ou oule pran nou letan pou nou vwar kimannyer nou pou kapab adres sa, sirtou sa 2 lokasyon kot nou’n deza annan batiman e i pa pou difisil sanz zot dan en moment’s notice.

Letan mon krwar ki nou’n fini enstal sa 2 Ice Plant.  I annan 1 ki Praslin, i annan en lot 10 tonn ki nou mete Providence akoz Providence nou pe ekspekte bokou plis aktivite.  Nou pou met sa 1 Providence.  Mon krwar nou pou’n devlop sa lekspertiz lo kimannyer nou manye e enstal sa 2 Ice Plant teknikman e osi nou oule ogmant kapasite nou bann Teknisyen ki si ou oule maintain nou bann Ice Plant e fer ki nou bann Ice Plant i long lasting.  E tousala nou’n met dan progranm pou nou adrese e mon krwar ansanm nou pou kapab fer sir e garanti poudir ice pa vini en problenm mazer dan nou Seksyon Lapes ki pe agrandir limenm.  Mersi.

 

MR DEPUTY SPEAKER

Onorab Arnephy.

 

HON BERNARD ARNEPHY

Mersi Mr Deputy.  Bonzour tou dimoun.

Mr Deputy, an vi ki sa problenm ice i annan reperkisyon lo catch bann peser, eski par egzanp pour Ice Plant Anse a La Mouche, Minis pe konsider flexy time, son louvertir, kot i kapab permet bann peser pou annan ice at intervals.  E dezyenmman, an vi ki lamazorite pwason i ganny aste par bann gran processors, ki bann processors pe fer pou zot fasilit, parey bann gran Lakonpannyen parey Oceana Fisheries, pou zot fasilit bann peser akse avek ice, pou tir sa burden ki Gouvernman ti pe fer fas avek pou fournir ice bann peser?  Mersi.

 

MINISTER PETER SINON

Mersi pour kestyon.  Mr Deputy Speaker, i en keksoz ki nou ti a kontan e nou pou pouse pour ki i annan plis si ou oule involvment sorti kote Sekter Prive pou involve in the supply of ice.  Nou pa pou fer li dan en fason si ou oule tro agresiv akoz nou krwar poudir dan sa bann devlopman ki nou pe promote pou devlop fish processingA fresh fish processor i pou bezwen pwason fre.  I pou bezwen gard son pwason fre.  Dan tousala, savedir li osi i pou bezwen ice.  Swa i annan i pou fer zot prop demars, zot prop prodiksyon, swa i annan i pou vin kot nou menm pou vin rod ice.  E la nou pe vwar poudir ice pe vin en demann tre solisite.  E dan sa demann tre solisite, mon ti a kontan osi ankouraz bann processors pou osi engage dan sa ice.  Se pour sa rezon ki nou pe sey vwar si nou kapab lenghten si ou oule, the life, kestyon ki’n gnany demande avan, pour nou bann Ice Plant ki egzistan akoz nou krwar poudir pou annan en devlopman dan sa bann fish processing plant ki nou pe met anplas e pour lezot ki pe met pou zot anplas, pou devlop osi sa prodiksyon, plis prodiksyon ice.

Oceana parey ou’n mansyonnen, in deza donn nou dan nou negosyasyon – Mwan menm ki ti negosye, 2 Ice Plant siplemanter ki zot in aste, zot in anmenn isi, zot in donn nou.  2 Ice Plant 10 tonn.  1 nou pou met Providence.  1 parey mon’n dir, nou pou met Praslin.  Deza nou pe vwar poudir i annan sa mouvman.  I en mouvman ki mon krwar i pou kontinnyen e pou ed nou fer ki ice i pou en komodite ki pou ganny plis demann me i pou en komodite ki pa pou vin an shortage dan nou seksyon lapes akoz i tre, tre enportan pour ki nou standar, nou kalite pwason ki nou, nou servi nou menm, oubyen ki nou eksporte, i sa standar ki nou’n maintain ziska ozordi.  Mersi.

 

MR DEPUTY SPEAKER

Onorab Samson.

 

HON DEREK SAMSON

Mersi Mr Deputy.  Bonzour.  Bonzour tou dimoun.

Mr Deputy, mon ti a kontan demann Minis si i kapab donn nou en revi lo leta Ice Plant Anse Royale.  Ki laz i annan e si son Minister pe retir okenn profi direkteman anba servis ki pe ganny ofer e si son proksimite avek lanmer i annan okenn lefe lo leta ki sa Ice Plant i ete ozordi?  Mersi.

 

MR DEPUTY SPEAKER

Minis in dir i annan 19an.  Proceed Minister.

 

MINISTER PETER SINON

Mersi Mr Deputy Speaker.  mon’n dir i apepre – son laz i apepre 19an.  Eski nou tir en profi dan ice?  Mon krwar nou pa tir en profi.  Annefe, nou subsidise si ou oule pri ki nou vann sa ice avek bann peser.  Nou ki pey si ou oule enpe sa sirkou akoz ler nou kont son cost of production, kou prodiksyon ice e pri ki nou vann ice, mon kapab asir ou poudir nou pa fer okenn profi.

Eski son lokasyon, proksimite ek lanmer i afekte li?  Poulemoman, bon.  Parey tou keksoz ki obor lanmer, i annan serten si ou oule, serten depresyasyon ki ganny mete ek masin, me sa bann masin si ou oule, zot in fer pou et pres ek lanmer, me selman i annan son maintenance ki ou bezwen fer avek, pou fer sir ki larouy par egzanp, i pa anvair li total e ki i kontinnyen prodwir.  Poulemoman i pe mars ase byen e nou ase satisfe avek son performans.  Mersi.

 

MR DEPUTY SPEAKER

Kestyon 172, Onorab Chantal Ghislain.

 

HON CHANTAL GHISLAIN

Mersi Mr Deputy.  Bonzour tou dimoun.  Eski Minis responsab pour Lagrikiltir i kapab enform sa Lasanble si i dan plan son Minister pou konstrir store pour bann peser La Digue, lefe ki sa bann peser i bezwen transport zot masin e lezot lekipman lapes lo zot likou pou en long zistans?  Mersi.

 

MINISTER PETER SINON

Mersi Mr Deputy Speaker.  Mr Deputy Speaker, parey mon’n eksplike taler, i dan en plan – i annan en plan entegre ki’n fini ganny design e ki pe ganny prepare par Minister Lozman e Labita, kot SFA i angaze pou konstrir sa Bazar e gear store pour La Digue.  Me sa pou kapab fer kan tou sa bann plan in ganny aprouve e nou’n fer provizyon dan nou Bidze pour sa proze dan lannen 2015.

Alors, gear store ek Bazar, plan in ganny desinen.  Plan pe al ganny soumet kot Planning Authority.  Kan sa in fini ganny fer, SFA in bidzete pou konstrir sa Bazar e sa gear store dan lannen 2015.  Mersi.

 

MR DEPUTY SPEAKER

Okenn Siplemanter Onorab?

 

HON CHANTAL GHISLAIN

Mersi Mr Deputy.  Mr Deputy, eski Minis i kapab dir ek sa Lasanble, lefet ki tou sa bann plan in fini, parey ou’n dir, i pou dan Bidze pour 2015, kan ki sa bann proze pou ekspekte fini, pour ki bann peser i kapab servi zot store e tou bann lekipman.  E apard sa store, eski i annan bann lezot keksoz, fasilite ki zot pe azoute anplis pou alonterm avek sa store? Mersi.

 

MINISTER PETER SINON

Mersi.  Parey mon’n eksplike taler Mr Deputy Speaker, alonterm e alonterm, ler nou dir lonterm, savedir nou pa konnen kan.  Nou ti pe mazinen ki pour La Digue, pou bezwen osi son prop Ice Plant.  Me pour sa, nou napa en lokasyon.  Nou napa en plan.  Nou napa en Bidze.

Pou gear store avek Bazar, nou annan en lokasyon.  Nou annan en plan.  Nou annan en Bidze.  E ki nou pou espere la, letan delay ki nou annan se letan ki i al kot Planning Authority, letan ki i ganny aprouve, letan ki nou, nou kapab mont lo sa site e komans travay.  E pour sa mon kapab, si ou vreman oule sa bann letan, mon kapab fer en estimasyon kantite letan i pran pou sa bann prosesis ganny fer, pou nou kapab konnen ekzakteman kan peser pou kapab pe servi sa bann batiman, sa bann lenfrastriktir ki nou pe met anplas.  Me lentansyon i la.  Lokasyon i la.  Bidze i la.  Nou pou bezwen sirmont sa bann prosesis teknik.  Kan ou pe fer en keksoz obor lanmer, i annan bann regilasyon ki nou bezwen fer sir ki nou pa an kontrovansyon sa bann regilasyon.  Nou bezwen ganny nou permisyon e kan nou ganny tousala, nou komans travay.  Mersi.

 

MR DEPUTY SPEAKER

Onorab Dokter Payet.

 

HON DAVID PAYET

Mersi Mr Deputy.  Bonzour tou dimoun.  Mr Deputy, eski Minis i kapab enform sa Lasanble si dan loptik siport Sekter Lapes Artizanal, son Minister i annan plan pou konstrir plis fasilite store peser dan bann lezot distrik, tel parey distrik Glacis?  Mersi Mr Deputy.

 

MINISTER PETER SINON

Mersi pour sa kestyon.  Mr Deputy Speaker, pour Glacis spesifikman, nou annan plan pou fer son gear store pour Glacis.  In en long diskisyon pou ganny permisyon.  E mon ti a kontan remersye tou bann dimoun ki’n aktiv dan securing the ground si ou oule, sa lokasyon kot sa gear store pou ete.  Pou secure permisyon e letan nou’n fini fer tousala ki’n ganny fer, nou dan en pozisyon pou nou met sa gear store debout Glacis, lannen prosenn.

E sa i – mon oule ler mon la partaz sa avek tou Onorab pou mwan dir dan tou distrik i bezwen ler i annan bann demann.  Nou’n sanz enpe kimannyer nou opere.  Nou plito annan konmela bann demand driven.  Demand driven savedir peser i demande.  Distrik i demande.  E nou koze.  I annan konsiltasyon.  Ki nou fer sir lenfrastriktir ki nou met dan en distrik i ganny servi.  Nou’n annan leksperyans kot nou dan Lofis, nou ti deside kote Bazar pou ete, lekel ki ganny Bazar e apre nou’n vwar, i annan serten sa bann Bazar ki nou’n mete, pa’n ganny servi.

Pwason i vann li.  I vann obor Bazar.  I vann ater obor Bazar.  Obor semen.  Me la, nou’n aprann sa leson.  Nou pa pou repet menm mistake ki nou’n fer.  Nou plito annan sa konsiltasyon antre nou, pou nou fer keksoz ki vreman i ganny servi e i ganny veye.  Ki i annan en ownership.  Taler mon’n koz lo lalimyer ki nou perdi.  Ki nou mete, i ale.  Be si mon vini vre, mon met en tors la, ki tou dimoun, personn pa ni konnen ki mon’n mete.  Napa personn ki veye.  Be vre mon pou perdi mon lalimyer.  Me si mon annan en Lasosyasyon Peser dan en distrik ki dir met mon lalimyer la.  Mwan mon a vey mon lalimyer.  Sa lalimyer i pour mwan, mwan ki veye.  Ou, ou’n mete.  Mersi Peter.  La nou kapab travay alonterm kot sa bann keksoz i ganny apresye, i ganny veye e i last son lifetime.  Mersi Mr Speaker.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Mr Deputy, dan konteks larepons Minis, kot in koz lo bann fasilite ki ganny driven par demann.  Eski Minis i annan bann mekanizm anplas ki pou permet son Minister konnen kote ki i annan bann demann e ki kalite konstriksyon zot pou fer, par egzanp la ki i annan en demann pou konstrir fasilite twalet e fasilite bennyen pour bann peser lo Lasose.  Eski sa demann in ariv kot ou e eski zot pe fer keksoz about it? Mersi Mr Deputy.

 

MR DEPUTY SPEAKER

Kestyon i lo stor peser La Digue me Minis, si ou oule dir 2 mo lo la mon a permet.  Sansan mon pa konnen kot nou pou arive.

MINISTER PETER SINON

Mersi Mr Deputy Speaker.  Sa demann pankor ariv kot mon latab.  Demann pour peser bennyen, demann pour twalet dan Victoria, i pankor ariv lo mon latab.  Me mon ti krwar poudir sa bann keksoz i annan, me sa demann i pankor arive me mon a pran sa langazman pou mwan verifye si sa i et e ki nou kapab fer.  Mersi.

 

MR DEPUTY SPEAKER

Onorab Souris.

 

HON MIRENA SOURIS

Mersi Mr Deputy.  Bonzour Mr Deputy.  Bonzour tou dimoun.

Mr Deputy, baze lo larepons ki Minis in dir, pou rekonstrir store e Bazar pour peser La Digue e dan sa menm loptik, eski Minis i kapab enform sa Lasanble ki zistans son Minister in arive pou konstrir en slipway pour bann peser Beau Vallon?  Mersi Mr Deputy.

 

MR DEPUTY SPEAKER

Sa osi mon a permet Minis si i oule dir en pti mo lo la.

 

MINISTER PETER SINON

Mersi pour kestyon.  Mersi Mr Deputy Speaker.  Slipway pour Beau Vallon in ariv – in annan osi, parey pour Glacis.  In annan bann demars.  Demars avek dimoun ki annan son later prive Beau Vallon.  In annan demars avek Lanvironnman, avek Minister Planning Authority.  Nou pe ariv dan son finalite, kot lokasyon in ganny locate, kot propriyeter in agree pou si ou oule, les sa slipway ganny built lo son propriyete e mon krwar ki nou, kote SFA, nou pou pare pou nou kontribye finansyerman pou fer sa slipway.  Me nou ti a kontan, avan nou komanse, ki tou lezot parti prenan in donn tou son bann green light si ou oule fever, pou nou kapab konstrir.  Mon krwar ki lannen prosenn i enn parmi bann proze distrik ki pou definitivman bezwen ganny komanse.  Mersi.

 

MR DEPUTY SPEAKER

Kestyon 173, Onorab Payet-Marie.

HON MARIA PAYET-MARIE

Mersi Mr Deputy Speaker.  eski Minis i kapab enform nou Lasanble ki zistans son Minister in arive avek sa proze pou re-batir Servis Veteriner?  Mersi.

 

MINISTER PETER SINON

Mersi pou sa kestyon.  Mr Deputy Speaker, depi boner 2013, mon Minister ti komans bann diskisyon lo prospe konstrir en nouvo batiman, la Union Vale e sa batiman ti pou abrit Minister Resours Natirel e Lazans Lagrikiltir, me sirtou, sirtou pou nou annan en Servis Veteriner pli modern e pli efikas.  Sa pa ti pou selman redwir nou depans lo rent, savedir lokasyon lo biro ki poulemoman nou pey rent Caravelle House pou Minister e nou pey rent ek Creole House.  Me selman, biro i reste ensifizan pou nou.

An Zen 2013, Enzenyer kot MLUH ti konsey nou, apre ki zot ti’n fer en vizit evalyasyon lo sa batiman Union Vale, ki sa batiman i annan bokou bann crack e i pa bon pou nou kontinnyen servi sa batiman akoz i poz en danze.  I kapab tonbe petet nenport ki ler.  Alors, nou ti evakye sa batiman e nou ti kree bann lezot pti batiman tanporer pou nou kapab kontinnyen annan en Servis Veteriner.  Letan nou’n vwar nou dan sa sityasyon, nou ti bezwen akseler nou demars pou nou esey ganny nou nouvo batiman, me malerezman finansman in reste en defi mazer.  Vedir, nou pa’n kapab secure sa fon pou nou kapab komans konstrir nou batiman.

Dan lenterim, nou’n bezwen konstrir parey mon’n dir, bann batiman tanporer pou abrit Veteriner e kou ki nou’n peye lo la, se ki nou’n perdi Veteriner.  I annan Veteriner ki nou’n train ki’n ale.  Pran 5an, 7an pou train me ozordi in dir i pa kapab kontinnyen e in deside kit nou.

Antretan Gouvernman, nou osi nou ti antre dan demann letan nou ti tande poudir ex-BBC Relay Station pou retourn avek Gouvernman.  Nou osi nou pa ti asize me nou ti met nou demann devan pou nou kapab osi apply pou ganny sa batiman, de ki i Grand Anse, i pros avek nou Laboratwar.  I pros obor nou Sant Zenetik pour Pork e nou’n vwar poudir petet sa ti en landrwa ideal pou nou kapab enstal en Sant Veteriner modern pour nou Sekter Elevaz.  Nou’n nobou reisir, parmi bann diferan demann ki ti annan.  Gouvernman in deside ok, donn sa building Minister Resours Natirel.  Nou krwar poudir sa i pou en kontribisyon sinifikativ pou nou Sekter Veteriner elevaz, me nou pa’n aret nou demann pour nou batiman la Union Vale.  Nou krwar e mon krwar senserman ki sa rent ki nou pe peye ozordi, i apepre R300 mil par mwan pour sa 2 building ki mon pe dir.  Mon krwar, avek sa dan nou pos ki nou pe peye, nou ti kapab annan konsiv e konsevwar en partenarya piblik prive, kot nou annan en Kontrakter ki vini, i fer sa batiman.  Nou annan en negosyasyon antre nou e nou annan en batiman kot nou host Minister, nou host Lazans.  Sa ti pou ed nou pou et pres ek kanmarad, pou nou kapab enterakte pli byen e pou en zour nou aret pey rent akoz sa rent ki nou peye i kapab pey sa building over enpe letan.  Ki sa building i retourn pou nou e enportan lo Seksyon Veteriner.  I annan en bann Veteriner ki’n kit nou, ki’n ale e zot oule al fer zot practice prive.  Zot oule al fer zot practice prive me difikilte ki zot pe gannyen se ganny en lokasyon, lwe en landrwa Anvil, pou zot kapab fer zot travay.

Mon krwar ki nou, dan Minister, nou ti a kontan ankouraze Veteriner prive, sirtou pou pran swen avek bann zannimo domestik.  Bann pets.  Pti lisyen ou pti sat eksetera prive e nou, nou fokaliz lo elevaz zannimo ki nou pe fer lo Laferm.  E sa ki mon ti a kontan nou baze.  Nou Sant ti ava Grand Anse me nou pa ti a mind.  Mon pa ti a mind ditou konsider nou annan si ou oule lo ground floor, lespas ki nou kapab met a dispozisyon bann Veteriner prive e si i annan sa ki pour nou, pou get bann zannimo si ou oule, domestik dan menm landrwa kot dimoun ti abitye vini e osi annan en batiman en zour ki host Minister Resours Natirel.  Mersi Mr Deputy Speaker.

 

MR DEPUTY SPEAKER

Kestyon Siplemanter Onorab.

 

HON MARIA PAYET-MARIE

Mersi Mr Deputy Speaker.  Minis in koz lo Sekter Prive pou travay an partenarya avek son Minister e osi lo kote training, petet si Minis ti kapab dir nou koumsa, si i annan Polisi anplas, oubyen plan anplas avek Minister Ledikasyon petet, pou ankouraz plis Veteriner pou join sa – pou ede anver sa – travay en pti pe plis avek bann problenm Veteriner ki nou pe gannyen.  E petet si Minis ti kapab dir nou kimannyer zot pe manage la aktyelman.  Par egzanp nou konnen i annan bokou lisyen ki annan bann maladi.  Lisyen eran eksetera.  Kimannyer son Minister petet pe manage aktyelman la, Veteriner, pou anpese ki bann maladi i devlope, an prenan kont leta Veteriner aktyelman?  Mersi.

 

MINISTER PETER SINON

Mersi pour sa Kestyon Siplemanter.  Kimannyer nou pe cope?  Nou pa pe cope byen.  Mon ti a kontan ki nou ti pe cope bokou pli byen ki nou pe cope poulemoman.  Parey mon’n dir, ler nou’n ganny retire dan nou buildingBuilding i pa safe.  Nou’n bezwen fer bann pti si ou oule, makeshift pou accommodate bann Veteriner ki ankor avek nou, me travay i annan bokou.  Travay i annan bokou e nou pe preski kapab, en serten letan zis si ou oule, pran bann ka emergency.  E i annan serten bann ka ki nou pa kapab entertain.  E sa in kree bokou si ou oule langwas avek bokou dimoun ki ti ekspekte poudir i ganny sa servis parey avan.  Me i pa kapab parey avan akoz nou lenfrastriktir i pa a sa nivo pou permet nou si ou oule donn sa servis ki nou ti a kontan.  E mon krwar ki nou pe pouse.  Nou pou kontinnyen pouse pour ki nou amelyor sityasyon pa zis pour nou, me pour lakominote si ou oule Veteriner akoz apard en vokasyon pou ki nou annan, en manda ki nou annan pou donn servis Veteriner, nou osi nou annan sa manda pou gard nou bio-security, sa Bio-Security Act ki bann Onorab ti aprouve pa tro lontan.  Me nou’n komanse.  Nou’n komanse, bann Board in ganny apwente, Direkter in ganny apwente e nou pou bezwen devlop sa kapasite e abilite neseser pou fer sir ki nou defann e nou kontinnyen protez nou bio-security.  E san bann fasilite, nou pa pou kapab fer li.  Mersi.

 

MR DEPUTY SPEAKER

Onorab Fideria.

 

HON EMMANUEL FIDERIA

Mersi Mr Deputy Speaker.  Mr Deputy, an vi repons Minis, eski Minis i kapab dir sa Lasanble konbyen Veteriner prive ki pe practice dan nou pei ozordi?  Eski i satisfe ek zot performans?  E si son Minister in fer okenn letid detaye, kot tou bann fakter enportan in ganny evalye e pozisyon in ganny define, ki ava kree labaz e konsider posibilite reel pou privatiz tou servis Veteriner dan nou pei?  Mersi.

 

MINISTER PETER SINON

Mersi pour sa kestyon.  Poulemoman, i annan 2 Veteriner prive ki nou konnen.  Me mon osi konnen poudir i annan lezot dimoun ki annan serten konesans, ki sey ed bann Fermye e sey ed bann lezot dimoun me si ou oule, zot pa neseserman anrezistre koman Bonafide Veteriner ki pe opere.  E pour nou, nou vwar poudir sityasyon poulemoman la i ankor si ou oule pa neseserman anba en kontrol ki nou ti a kontan vwar.  Mon krwar nou annan sa problenm lokasyon.  Menm dan nou Veteriner pou nou, nou ti annan konstrent lespas, par egzanp pou nou annan en bon Theatre kot nou bann Veteriner i kapab fer loperasyon.  Nou ti annan lankonbreman akoz nou ti an partenarya avek en ONJ ki pe travay avek nou.  So, i annan – e zot osi zot annan zot prop surgery kot zot kapab fer zot surgery e zot in ede me selman, i annan sa problenm lespas pou fer li sa Sekter Veteriner en Sekter ki kapab ganny opere byen e byen ganny kontrole.  Mon krwar sa i en defi.  I en defi pou nou overcome e mon krwar ki nou pou kontinnyen persiste pou nou kapab met si ou oule, en lord dan sa Sekter e kree bann fasilite neseser.  Se sa Sekter ki pe vin deplizanpli enportan.  I kapab ganny byen zere.  Pli byen zere pou benefis tou nou bann operater.  Mersi.

 

MR DEPUTY SPEAKER

Bon.  Kestyon 174 e 175, nou pou pran li koman en sel kestyon e mon ava envit Onorab Arnephy pou demann toulede sa 2 kestyon.

 

HON BERNARD ARNEPHY

Mersi Mr Deputy.  Mr Deputy, kestyon se pou demann Minis pou donn leksplikasyon lo benefis direk ki bann Fermye e Peser pou retire anba sa nouvo Scheme Lasirans ki’n ganny entrodwir pou zot?

E lot kestyon.  Eski Minis i kapab donn detay lo konbyen Fermye e Peser ki’n montre lentere pou zwenn sa Scheme Lasirans ki’n ganny porpoze avek zot?  Mersi Mr Deputy.

MINISTER PETER SINON

Mersi pour kestyon.  Mr Deputy Speaker, mon a pran dezyenm kestyon premye.

Poulemoman, depi Fevriye 2014, nou annan 10 bato ki’n asire anba sa Scheme. Lo kote Fermye, i annan 68 Fermye ki’n anrezistre pour sa Scheme.

Benefis direk pour Fermye ek Peser ki kouver anba Insurance Scheme, se pou donn sa bann Fermye e Peser plis sekirite lo bann pert ki lapliparditan zot pa kapab predir.  Labank ki donn loan pour Lagrikiltir e pour Lapes, i osi parfwa ensiste ki zot kliyan i annan en Lasirans, parey i leka dan preski tou lezot biznes dan Sekter nou Lekonomi.  Gouvernman i poulemoman pey 50 poursan premium pou Fermye ek Peser ki deside pran sa Lasirans.  Dan ka Peser, sa Lasirans i kouver bato, masin, lekipman lapes e lekipaz.  Mon fer remarke ki anba Lasirans normal, lekipaz pa ganny kouver.

Pour plant, pour crop, anba sa Scheme, Lasirans Fermye i ganny kouver pour bann pert ki ganny koze par dezas natirel ki Gouvernman in deklare.  Fermye i osi kouver pou aksidan personnel.  I annan en limit R100 mil par personn.  Sa Fermye e son manm fanmiy i ganny kouver pou okenn aksidan ki kapab arive lo Laferm ler zot pe travay.  Bann travayer permanan e bann par sezon i osi ganny kouver.  Me dan ka bann travayer par sezon, fodre zot notifye Minister Lagrikiltir ki zot annan sa bann travayer e kel er sa bann travayer i lo zot Laferm.  Mersi Mr Speaker.

 

MR SPEAKER

Kestyon Siplemanter, Onorab Arnephy.

 

HON BERNARD ARNEPHY

Mersi Mr Deputy.  Mr Deputy, eski Minis i kapab eksplik nou Lasanble si i annan bann Protokol kler an term prosedir ki bann Fermye e Peser i bezwen swiv, ler pou zot fer serten claim, an vi ki bann claim ki relye avek sa 2 Sekter i en pti pe diferan avek lezot claim ki normalman bann Lakonpannyen Lasirans i – dimoun i bezwen pas atraver?

E dezyenmman, konbyen ziska ler, depi ler zot in lans zot Scheme.  Konbyen Fermye ek Peser ki’n deza pe benefisye anba sa Scheme? Mersi.

 

MINISTER PETER SINON

Mersi pour sa kestyon.  Mr Deputy Speaker, bann Protokol i pa tro konplike.  Dan ka Lagrikiltir parey mon’n dir, dezas fodre bann dezas ki’n ganny deklare e in deza ganny deklare e la kot bann meteo i zwe en rol, si nou’n ganny sirman kantite lapli.  Kapab mezire, kapab dir poudir wi.  Dan sa ka, nou’n ganny en kantite sirplis lapli.  Apre fodre sa bann claim, apre 48er.  Ou annan 48er pou ou fer ou deklarasyon.  Dan sa letan, fodre bann staff SAA i pou vin vizite pou fer levalyasyon lo ou Laferm pou vwar bann domaz ki’n ganny fer, kantifye sa bann domaz, cost sa bann domaz pou vwar kantite ou’n perdi.

Epi deza wi.  I annan Fermye ki’n deza benefisye.  Ki’n deza fer claim anba sa Lasirans.  Savedir sa Lasirans nou pa’n zis enstal li.  In ganny tried, in ganny tested e pour serten bann dimoun ki’n pran sa Lasirans, i annan ki’n ganny compensate.  Mon napa en figures avek mwan lo ekzakteman konbyen e konbyen an term larzan in ganny peye me selman i annan ki’n fer claim e nou’n vwar poudir nou’n nobou fer sa prosesis depi claim ziska refund.  Me parey mon’n dir, nou ti fer ki sa Lasirans, olye fer li obligatwar pour tou Fermye, nou pa’n fer li obligatwar.  Par demann bann Fermye zot menm ki pa ti krwar poudir i devret vin obligatwar pour tou Fermye.  Nou ti back down.  Nou ti dir, nou a kit li opsyonnel pou bann ki anvi pran sa Lasirans.  Alors, bann dimoun ki’n pran sa Lasirans se bann dimoun ki anvi pran sa Lasirans.  E nou ti fer li tre kler osi, poudir kan ou pa pran Lasirans, Minister Lagrikiltir nepli annan sa fon parey lontan, ki vini ki donn tou dimoun larzan, oubyen konpansasyon apre ki in ariv en lensidan akoz sa larzan ki nou ti annan pou fer sa, nou’n met dan sa Lasirans.  Mersi.

 

MR DEPUTY SPEAKER

Onorab Samson.

 

HON DEREK SAMSON

Mersi Mr Deputy.  Mr Deputy, mon ti a kontan demann Minis si son Minister in met sifizaman zefor dan konsey sirtou bann Fermye lo lafason pou zot mentenir zot Laferm an proteksyon kont bann dezas natirel, malgre ki sa Scheme i ekziste?  Thank you.

MINISTER PETER SINON

Mersi pour sa kestyon.  Mr Deputy Speaker, nou fer nou mye.  Nou fer nou mye, nou annan en limit lo Extension Officers ki nou annan pou pas lo tou Laferm, me nou fer nou mye pou nou konsey Fermye lo kimannyer zot kapab maintain zot Laferm pou minimiz risk ki zot ganny poze avek.  I annan Fermye i ganny poze pa si ou oule avek zis linondasyon.  I annan avek later degrennen.  I annan diferan kalite risk ki zot annan, me nou sey nou mye pou nou si ou oule advise e sa nou santi li i pa nou job, despite parey ou dir, despite sa Scheme.  Me ler ou deside pran sa Scheme, i annan en evalyasyon enpe pli profon ki ganny fer akoz ler ou pe vin pran sa Scheme, i vreman nou bezwen konnen ki bann risk ki ou ganny poze e nou sey avert sa bann risk avanler ki i vin en dezas, kot ou bezwen fer gran claim e soufer bokou pert.

Me an zeneral, nou fer sa pou tou Fermye kot nou annan nou outreach, pou fer sir ki nou minimiz si ou oule bann ka, akoz pa tou Fermye, parey mon’n dir taler, ki dispoze, oubyen ki menm anvi pran sa Lasirans.  Mersi.

 

MR DEPUTY SPEAKER

Onorab Murielle Marie.

 

HON MURIELLE MARIE

Mersi Mr Deputy e bonzour.  Eski Minis i kapab enform sa Lasanble si anba sa Polisi Lasirans pour bann Fermye, si i annan en provizyon dan Polisi ki cater pour bann low line area, parey Laferm Au Cap?  Mersi.

 

MINISTER PETER SINON

Mersi pour sa kestyon.  Mr Deputy Speaker, sa Scheme ki nou annan i kouver tou landrwa.  I kouver pour tou kalite Laferm.  Dan montanny, dan plato, dan low line area.  Tou i ganny kouver.  E mon pa konnen si mon’n reponn ou kestyon.  Me selman si ou pe dir si nou annan en Polisi spesifik pou low lying area.  Nou napa en Polisi spesifik.  Nou konnen poudir nou annan area ki prone to flooding.  Nou konnen nou annan travay pou nou fer dan sa bann area, me nou konnen poudir nou annan lezot area ki prone to other risks. E nou pran tousala koman bann defi pou nou kapab overcome.  Mersi.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Mr Deputy, Eski Minis i kapab dir sa Lasanble si zot in fer okenn letid pou vwar bann rezon lo akoz ki zis 10 bato e 68 Fermye ki’n anrezistre pour sa Lasirans poulemoman, an vi ki sa Lasirans i enportan pour bann Fermye avek bann Peser?  Mersi.

 

MINISTER PETER SINON

Mersi pou sa kestyon.  Mr Deputy Speaker, Lasirans i si ou oule a son anfans poulemoman.  I fek lanse.  Nou pe donn li letan.  Nou’n pran letan pou nou lans li.  Nou’n fer letour Mahe, Praslin, La Digue pou nou eksplik sa Lasirans, pou nou fer konsiltasyon.  Nou’n ganny reaksyon bann Peser.  Nou’n ganny reaksyon si ou oule bann Fermye.  Nou’n re-alinny nou Polisi ki nou ti vin avek.  Nou’n realinny li pou nou pran an konsiderasyon zot bann konsern.  Me mon krwar ki dan ka lapes.  Dan ka Peser, bann pti bato ki nou ti pe sey kaptire dan sa Lasirans, zot pa’n zanmen annan en Lasirans e mon krwar, avek letan petet zot pou vwar.  La mon’n tande bokou bann Onorab ki’n dir poudir i annan bann risk.  Risk voler pou masin.  Risk eksetera, eksetera.  Bokou bann risk.  E nou vwar osi en kantite bann bato ki deza ti annan zot Lasirans avan akoz pour bann bato ki’n pran loan si ou oule avek Labank DBS, sa bann bato zot pa, si ou oule kondisyon ganny en loan, zot bezwen asir zot bato.  Alors, zot deza annan si ou oule sa Lasirans lo zot bato.

Pou bann Fermye, ankor en nouvo keksoz.  En nouvo keksoz ki bann Fermye mon krwar zot ankor pe pran zot letan pou sey dizere.  E nou, nou kontinnyen fer piblisite pou eksplike bann risk e bann keksoz ki atase avek si ou oule sa Lasirans.  Bann benefis parey kestyon in ganny demande ki i annan avek sa Lasirans.  E lefe ki nou oule anmenn Fermye dan mainstream business, kot en Fermye osi i annan son Lasirans, i annan – i kapab antre dan en Labank, dir poudir be mwan mon annan mon Lasirans, eksetera.  Pran en loan.  Mon krwar i pran enpe letan.  Mon krwar nou pou donn li ankor enpe letan avanler nou lans dan en letid o profon pou nou regarde kimannyer e ki bann koz ki fer ki sa Lasirans swa i pa atraktiv, swa i pa popiler.  Poulemoman nou krwar nou pou bezwen ankor en pti pe letan avanler nou commission en letid lo la.  Mersi.

MR DEPUTY SPEAKER

Kestyon 176, Onorab Murielle Marie.

 

HON MURIELLE MARIE

Mersi Mr Deputy.  Eski Minis i kapab enform sa Lasanble ki plan son Minister, pou ede rezourd sa gro problenm linondasyon pandan letan lapli lo laferm Au Cap, ki sitye deryer Lenstiti Kreol?  Mersi.

 

MINISTER PETER SINON

Mersi pour kestyon.  Mr Deputy Speaker, i annan 4 Fermye ki sitye dan sa rezyon Au Cap.  Mon Minister i okouran ki i annan sa problenm linondasyon dan letan gro lapli.  Plan in fini ganny fer pour en semen, sa semen ki al kot sa 4 Laferm e avek sa semen, nou propoze pou konstrir en sistenm drenaz toudilon semen, avek bi pou retir sirplis delo pandan gro lapli.  E nou pe esper laprouvasyon Planning, pou nou komans konstriksyon.  Mon Minister e Lazans Lagrikiltir pe travay an etrwat kolaborasyon avek Seksyon Drenaz dan Departman Lanvironnman, pou konstrir en drenaz premyer e segonder e sa pou permet sak dan sa bann 4 Fermye desarz delo ki sorti dan zot drenaz lo zot Laferm.  Mon ti a kontan fer resorti ki responsabilite drenaz lo Laferm limenm i responsabilite sak Fermye.  Mon Minister, avek Lazans Lagrikiltir i responsab pou konstrir drenaz premyer e segonder selman.  Tre byento, apre ki plan in ganny aprouve dan Seksyon Drenaz dan Departman Lanvironnman, travay pou komanse lo sa drenaz ki mon’n koze.  Fodre ki nou konpran osi ki problenm drenaz i konsern mon Minister, Gouvernman e osi bann Fermye.  Alor dan sa ka, fodre nou travay an etrwat kolaborasyon, pou fer sir ki lo Laferm, i annan drenaz ki’n ganny fer par Fermye, kot nou, nou antre pou fer sa drenaz premyer e segonder pou tir delo lo Laferm e anmenn delo si ou oule, kot nou sipoze al dispose sa delo.  Mersi.

 

MR DEPUTY SPEAKER

Kestyon Siplemanter, Onorab.

 

HON MURIELLE MARIE

Mersi Mr Deputy.  Mr Deputy, eski Minis i kapab enform sa Lasanble pour ki rezon, depi 2013 en direktiv in ganny donnen pou tret sa drenaz lo Laferm Au Cap koman en priyorite i pa’n ganny fer.  E pour ki rezon ki ou Minister pa pe konsilte avek Lotorite Distrik e osi avek sa 4 Fermye, konsernan sa plan drenaz ki ou’n mansyonnen.  E ki lasirans ou kapab donn sa Lasanble ki ou Minister pe tret sa drenaz koman en priyorite, an vi ki sak fwa lapli i tonbe, sa Laferm i inonde e bann Fermye i perdi preski tou zot bann benefis?  Mersi.

 

MINISTER PETER SINON

Mr Speaker, ler mon dir nou pe fer plan pou fer semen.  Semen pou ariv kot sa 4 Fermye.  Ek sa semen, nou pou met sa drenaz.  Drenaz ki nou pe fer konsiltasyon avek Seksyon Drenaz dan Minister Lanvironnman.  Mon vwar i drol ki Onorab pa konnen sa devlopman.  Mon krwar ki nou annan en problenm konsiltasyon, nou annan en problenm kominikasyon me sa sityasyon ki ou’n met lo latab, kestyon.  Nou okouran tre byen akoz lo sa Laferm, letan delo ti monte, ti mont Prezidan Larepiblik ki’n vin gete.  Direktiv parey ou menm ou’n ganny dir, in ganny donnen e se lo sa direktiv ki nou pe travay.  E vwala lavanse travay ki mon pe kominik ek ou ozordi.  Nou kapab petet rankontre pou met ou azour lo ki zistans nou’n arive e mon a prezant mon lekskiz personnel e pour mon Minister, pour ki ou pa’n ganny met azour lo devlopman ki pe arive dan ou distrik.  Mersi.

MR DEPUTY SPEAKER

Kestyon 177, Onorab Lenny Lebon.

 

HON LENNY LEBON.

Mersi Mr Deputy.  Bonzour a tous.  Kestyon i lir koumsa.  Eski Minis responsab pour Resours Natirel i kapab eksplik nou Lasanble ki stratezi ki pe ganny met anplas pou devlop sa konsept lekonomi ble?  Mersi.

 

MINISTER PETER SINON

Mersi pour sa kestyon.  Mersi.  Mr Deputy Speaker, konsept lekonomi ble i pa en konsept ki konsern zis Minister Resours Natirel.  Konsept lekonomi ble i en konsept ki konsern tou aktivite ekonomik ki ganny fer dan nou Losean.  E mon Minister i annan manda pou enn bann aktivite ki tre enportan pou nou lekonomi ble e sa se lapes.  E la, dan mon kapasite, mon ti a kapab petet donn bann aktivite dan lapes.  Me selman Gouvernman osi pou enplimant sa konsept lekonomi ble ki’n ganny lanse par nou Sef Deta boner lannen pase.  In kree en Komite enter-Ministeryel.  En Komite ki mon Chair ki konpri Minister Zafer Etranzer, Minister Later e Labita, Minister Finans, Komers e Lenvestisman e Minis Lanvironnman e Lenerzi.  Sa Komite i en Komite enter-Ministeryel ki si ou oule pe abord sa konsept dan son totalite e sa Komite pe organiz en Konferans lo lekonomi ble lokalman, le 9 e le 10 Desanm sa lannen, pou nou kapab ekzakteman kominike, definir sa konsept.  Kominike avek tou dimoun ki enterese e tou parti prenan lo ki Gouvernman pe fer e pe deside ganny fer.  Pe met en plan anplas pou si ou oule, enplimant sa konsept dan nou lekonomi.  Mersi.

 

MR DEPUTY SPEAKER

Kestyon Siplemanter Onorab Lebon.

 

HON LENNY LEBON

Mersi Mr Deputy.  Mr Deputy, anlinny avek repons Minis.  Minis in fer resorti ki i annan plizyer aktivite me enn bann aktivite se konponan lapes.  Kestyon, eski Minis i kapab eksplik sa Lasanble ki son Minister, avek Lotorite Lapes pe fer an sa ki konsern lekonomi ble e osi si zot in vwar progre ki’n ganny fer, anlinny avek lapes, baze lo sa konsept?  Mersi.

 

MINISTER PETER SINON

Mersi.  Mr Deputy Speaker, koman Minis Lapes, mon a restrict mon komanter si ou oule pou reponn kestyon lo sa Sekter, koman en konponan lekonomi ble.  Parmi stratezi signifikan ki’n ganny adopte par Gouvernman Mr Deputy Speaker, i enkli laprouvasyon resaman ki’n ganny fer lo sa Revised Fisheries Act 2014 ki sa Lasanble ti aprouve, ki pou etablir bann nouvo pist e paramet pou nou kapab devlop en stratezi devlopman lapes ki pli solid, pli dirab e ki pou garanti nou stok pwason dan en bon kondisyon e pou nou kapab pas avek nou lot zenerasyon en stok ki pou kontinnyen devlop nou Sekter Lapes e nou resours natirel dan lanmer.

Mr Deputy Speaker, an paralel, nou pe ankouraz lenvestiser lokal e etranze.  Bann partenarya piblik prive pou entegre dan devlopman lapes.  Dan lapes, nou konnen poudir nou annan 3 nivo lapes isi Sesel.  Nou annan Lapes Artizanal, nou annan Lape Semi Endistriyel e nou annan Lapes Endistriyel.  Nou’n vwar dan Lapes Artizanal e depi taler nou pe koze lo bann devlopman ki nou’n fer dan bann distrik pour Lapes Artizanal.  Nou’n vwar devlopman Roche Caiman.  Nou’n vwar devlopman Anse Aux Pins.  Nou’n annan konsiltasyon Anse Royale.  Nou’n vwar konsiltasyon e devlopman Bel Ombre ki pe al fer.  Nou’n fek koz lo Baie Ste Anne Praslin.  Nou’n koz lo La Digue, nou’n koz lo Anse Etoile, nou’n koz lo Glacis.  Tou sa pou tous nou Lapes Artizanal e pou nou vwar devlopman dan tou sa bann distrik, nou bezwen definitivman annan serten konsiltasyon antre nou.

Dan Sekter Semi-Endistriyel, nou pe vwar bokou bato ki pe sorti Sri Lanka ki pe arive avek en nouvo zenerasyon peser ki pe komans pran sa karyer e pou zot al debrouye.  Byento, byento nou pe koz lo posibleman lagrandisman Por Lapes Providence.  Si tou keksoz i al byen e nou korperasyon avek Zapon i al byen, nou pou vwar lagrandisman sa Por.  Pou sa Sekter osi, nou pe vwar sa 2 nouvo Ice Plant ki nou pe mete Providence, pou fer li pli viab.  Dan Providence osi, nou’n vwar konstriksyon bann Processing Plants.  Sa 9 units ki deza la.  Sa Sekter, i pe progrese.  Nou pe vwar osi e pou vwar devlopman osi Bel Ombre, kot nou pou met sa bann Lizin kot SFA in deza annan plan e plan, la kan mon pe koze in deza kot Tender Board pou nou lans sa Tender pou komans sa travay.

Oceana Fisheries.  Nou’n vwar en bato ki’n vini, ki ase gran.  Nou pa konnen.  Eski sa i dan semi-industrial ouswa i dan industrial.  Ou a krwar i dan industrial.  Pour la premyer fwa, nou pe vwar en Konpani baze Sesel si ou oule, entegre dan sa Sekter Endistriyel ki doreavan, ziska prezan, in en Sekter si ou oule, dominen par bato etranze.  Dan son plan i annan 15 bato ki in met order, ki pe ganny konstrir.  15 bato nef.  Sa premye bato mon krwar i pe al son premye voyaz lapes tre byento.  E ler nou kalkil miltipliy sa par 15, nou pe koz en perse signifikativ dan sa Sekter Endistriyel par Seselwa.  Si ou oule, en Konpani baze Sesel me ki an joint venture avek etranze.

I annan 2 Seselwa ankor ki annan plan anmenn bann bato sa groser dan, pou join sa lapes.  Sa bann devlopman ki pe arive i si ou oule en pti revolisyon dan limenm.

Lo zone 14 dan Victoria, nou pe vwar bann devlopman lo Ile du Port.  La osi pou annan bann pli gran Lendistri Lizin Pwason pou fer fish processing par envestiser lokal, envestiser etranze e menm bann joint ventures.  Si sa ki nou pe vwar se en ekstansyon mazer nou devlopman dan nou Sekter Lapes Semi-Endistriyel e dan nou Sekter Endistriyel.

Lo kote artizanal, nou pe vwar en improvement dan bann kondisyon ki nou bann pti peser i anbark e debark zot pwason.

Gouvernman in antre an partenarya avek Lakonpanni Sapmer, pou fer plis lakostaz, plis Por Lapes lo Ile du Port.  475 met por pou ganny konstrir lo Ile du Port e deza SFA in konstrir en Por 120 met lo Ile du Port.  Savedir Ile du Port pou annan landrwa koste pou bann gro bato, both devan, kote ki vir avek Mahe e lot kote, kote ki vir avek Ste Anne.  Olye avek sa bann Por, nou pou vwar bann Lizin.  Nou pou vwar bann Processing Plant ki pou devlop nou ton enpe plis ki zis met sa ton dan bwat.  I annan lezot fason devlop sa ton, process li, ki i annan plis valer.  I annan loins, i annan sachimi, i annan bokou lezot ki ti bezwen bann lenfrastriktir ki kapab fer li arive.  Par egzanp, Cold Store minus 60, minus 40.  Bann bato ki annan Cold Store minus 40, minus 60. Be sa nou pe vwar Sesel.  Nou pe vwar bann nouvo bato ki pe vini e ki pe pran si ou oule Paviyon Sesel koman zot stasyon debaz.  E tousala set akoz nou pe annan bann lenfrastriktir ki pou garanti zot en quick turn around letan zot arive pou vin debark zot pwason e pran provizyon pou zot retourn an mer, pou zot al lapes.  Alors, dan nou lekonomi ble pour lapes, nou pe vwar en bann devlopman signifikativ.

Finalman Mr Deputy Speaker, SFA pandan sa detrwa dernyen lannen, avek bann Konsiltan ki dan sa domenn, pe travay dir e pe finaliz si ou oule en Master Plan lo Aqua Kilitr avek MaricultureAqua Kiltir ek Mariculture i en nouvo loportinite.  Nou’n deza vwar Aquaculture lo Coetivy kot nou ti fer prawns.  Me dan sa Master Plan ki SFA pe travay lo la i en Master Plan ki’n annan 5 faz e la nou lo dernyen faz sa Master Plan.  Nou’n deza fer prezantasyon lo kot nou’n arive avek Cabinet, ki’n donn nou green light pou nou kontinny travay e fini sa travay.

Potansyel ki Sesel i annan dan sa 2 domenn, Mariculture, Aqua Culture i enn ki vreman ankouraze me i enn osi ki i port avek li serten risk.  Nou bezwen met nou pare.  Ou bezwen par egzanp annan ou en servis Veteriner ki tre, tre, tre kale pou al dan sa venture.  Si nou – parey ou annan zannimo, ler ou annan pwason osi, pwason osi i malad.  Pwason osi i bezwen annan son Dokter ki get son standar, ki get son kalite, pou fer sir ki ou repitasyon si ou pou pran sa bann pwason pou eksporte, i enn ki pa pou ganny andomaze akoz dek ki ou andomaz ou market, ou market osi i ganny andomaze e ou lenvestisman i pa pou ganny prospere.

Vwala enpe si ou oule bann stratezi ki nou dan kote lapes nou pe travay lo la.  Me i annan lezot e mon krwar dan sa Konferans le 9 avek le 10, le 9 ek 10 Desanm, ki pou ganny fer isi Sesel dan Victoria, dan ICCS, nou pou ganny bokou, bokou plis leksplikasyon kot pou annan tou si ou oule bann akter ki annan pou fer avek lekonomi ble e ki nou kapab ganny tout en si ou oule en konesans e en konesans konpreansiv lo nou konsept lekonomi ble.  Mersi.

MR DEPUTY SPEAKER

Kestyon 178, Onorab Lebon.  Proceed.  Switch off, Minister.

 

HON LENNY LEBON

Mersi Mr Deputy.  Eski Minis responsab pour Resours Natirel i kapab enform nou Lasanble ki plan son Minister i annan pou devlop sa bann basen lo zil Coetivy?  Mersi.

 

MINISTER PETER SINON

Mersi.  Mr Deputy Speaker, Coetivy i en zil ki ganny manage par IDC e son Minister paran se MLUH.  Mon krwar ki MLUH ti kapab donn nou en pli bon leksplikasyon lo vreman ki zot plan, me selman mwan personnelman mon’n vizit zil Coetivy e mon ti a kontan partaz avek ou lo bann posibilite.  Mon fek koz lo sa plan ki Master Plan Mariculture and Aqua Culture.  E lo Coetivy i Aqua Culture.  Sonny sa ki ou pou met dan basen ater.  Dan mon vizit Coetivy, mon’n vwar poudir sa bann basen i ankor la.  Avek en pti pe rektifikasyon sa bann basen i kapab re-ganny met anmars e i enn parmi si ou oule, bann pli lokasyon avanse pou nou komans en Aqua Culture signifikatif.  Ler nou pou unroll sa Master Plan, nou pou unroll nou Master Plan Aqua Culture avek Mariculture avek bann envestiser.  Bann envestiser pou kosidere vin envestir dan sa bann potanstyel ki nou pe montre zot e Coetivy definitivman i enn sa bann potansyel pou nou kapab enroll.

Ler nou dir nou fer Master Plan, avek sa Master Plan, nou osi enkli e enkorpor bann regilasyon ki al avek fer Mariculture ek Aqua Culture. E tousala, letan nou’n fini fer, mon krwar ki IDC pe osi espere pou benefisye lo si ou oule, sa bann regilasyon ki nou met anplas, pou fer sir ki tou i an konformite letan nou komanse.  Enn bann rezon akoz mon’n anpes okenn loperasyon Aqua Culture oubyen Mariculture fer a en gran lanpler, san ki nou annan sa Master Plan se pou anpes en sityasyon adhock e dezord ki apre ou pe tay deryer pou sey rekouver kan ou’n fini les ale e ou ti napa regilasyon, alor sa Operator in fer son prop regilasyon avek konsekans ki nou konnen ki kapab arive.

Bon.  So, lo kote Coetivy, mon krwar i pou form parti sa roll out dan nou plan, avek lankadreman son regilasyon ki nou pou annan, pou nou fer si ou oule, en bon roll out lo sa 2 Aqua Culture and Mariculture. Mersi.

MR DEPUTY SPEAKER

Kestyon Siplemanter, Onorab Lebon.

 

HON LENNY LEBON

Mersi Mr Deputy.  Mr Deputy, Minis in koz en pti pe lo Aqua Culture ki oule ganny fer lo Coetivy an servan bann basen.  Eski i kapab enform sa Lasanble si i annan en demann pour sa Aqua Culture e si i annan en gran lentere par bann envestiser etranze?  Mersi.

 

MINISTER PETER SINON

Mersi Mr Deputy Speaker.  Wi.  I annan demann.  Menm pour Coetivy in deza annan demann.  In deza annan lentere par serten envestiser.  Pa enn me petet 2 ou menm 3 e pour serten rezon, pankor ganny realize e pour Aqua Culture ek Mariculture, i annan demann e i annan bann gran Konpani ki annan lentere ladan me si ou kapab vini avek en plan kot i kler koman ou pe fer ou lenvestisman.  Koman zot entegre.  Ki bann rules ek regilasyon akoz i en aktivite ase delika kot i involve en lasenn si ou oule, depi son pwason, depi son manze, depi son market, depi son Cold Store.  Kimannyer ou transport sa bann pwason ki ou’n prodwir e i annan tout en lasenn ki fodre ou fer sir ki tou i annord.  Taler mon’n koz nesesite Veteriner Aquatic.  Vedir Veteriner Pwason, kot si ou annan sa bann dimoun la on site, oubyen ou bezwen anmennen, ki nou’n vwar avek prezantasyon ki nou’n prezante se si nou servi 5 poursan abilite ki nou kapab prodwir Sesel.  5 poursan abilite ki nou kapab prodwir Sesel, nou pe koz 50 mil tonn pwason.  50 mil tonn pwason i en ta pwason e ou kapab zis mazinen, pou fer sir ki tou sa pwason i an bonn sante.  Pou fer sir ki ou lozistik pou ou kolekte, pou ou gard li fre pou eksporte, transpor eksetera, i en kantite travay.  Me defi pli mazer se kot ou ganny travayer pou fer sa marse ?  E dan estimasyon kantite travayer etranze ki ou pou bezwen pou fer sa kalite – pou achieve sa lobzektiv, ou pou bezwen ou plis ki 1,200, 1,300 travayer etranze.  E vwala ankor, avek tou sa kantite travayer etranze, ou annan en gran lenplikasyon kot ou pou met zot reste eksetera, eksetera.  So, se pourkwa ki in pran des annes e i pou kapab pran ankor enpe letan avanler nou met tou sa lozistik ansanm pour nou realiz sa potansyel ki nou annan dan Aqua Culture e Mariculture.  Mersi.

 

MR DEPUTY SPEAKER

Kestyon 179, Onorab Jeniffer Vel.

 

HON JENIFFER VEL

Mersi Mr Deputy.  Bonzour tou dimoun.  Eski Minis responsab pour Resours Natirel i kapab dir avek sa Lasanble si Lotorite Lapes i konsernen avek nivo pri e levolisyon dan pri pwason e ki mezir zot anvizaze pran pou remedye sa sityasyon?

 

MINISTER PETER SINON

Mersi pour sa kestyon.  Mr Deputy Speaker, parey tou Seselwa, ler nou konsern pri pwason ki tre enportan pou nou ladyet, nou tou nou konsernen.  Alors larepons pour premye kestyon se wi.  Wi nou konsernen.  Nou tre konsernen.

Pour dezyenm kestyon se ki nou pe fer pou remedye sa sityasyon?

Premye, nou demann nou lekor ki nou kapab fer pou remedye sa sityasyon.  En larepons vitman se napa bokou ki nou kapab fer pou remedye sa sityasyon dan limedya.  Ti annan en letan kot nou ti annan pri kontrol.  Nou napa pri kontrol ozordi.  Pri i ganny determinen lo marse.  Pri i ganny determinen lo kantite pwason ki ganny demande e kantite pwason ki peser i anmenn ater.  Me i annan lezot keksoz ki afekte pri.  Si i ti zis sa, nou ti pou napa gran problenm.  I annan lezot keksoz, lezot fakter ki afekte pri.  Tou resaman, nou’n eksperyans en eskalasyon pri dan pwason.  En eskalasyon ki’n fer pri pwason vin en topik tre, tre, tre konsernen.  Medya in koz lo la, in ekrir lo la, dimoun in koz lo la akoz sa pri ti signifikan.  Nou tou nou konnen e nou tou nou’n viv dan letan Vannnor e dan letan Vannswet.  Nou tou nou konnen ki pri i monte dan letan Vannswet akoz i annan pli pti gin pwason, akoz i annan peser ki pa neseserman al lapes sa kantite pwason akoz lanmer i move.  I pa gannyen sa kantite pwason.  Letan i tournen, pri i monte.  Apre dan Vannnor, pri i desann.  Me sa voyaz, nou’n vwar en pri monte enpe vit e letan nou analiz rezon pou sa, nou vwar enn de fakter.  En bann ki pli enportan ki lezot ki si ou oule, apard zis sa demand and supply ki determin pri, nou’n vwar lezot fakter an jeux.

Enn bann fakter en jeux, nou’n vwar ki demann pour pwason, sorti kot bann dimoun ki aste en gran kantite pwason.  Ki supply Lotel, ki process pwason.  Nou’n vwar ki in annan en serten bidding.  En konpetisyon lo Por e dan bann landrwa kot pwason i antre, kot mwan mon vini mon dir mon a donn tan, lot i vini i dir mon a donn tan plis, ankor en pti larzan lo la.  Mon a donn tan, mon bid li up.  E sa bidding pwason eleve, in elev pri.  In elev pri menm si ou oule mon kapab dir en serten lepok, pri in overshoot.  En Bourzwa pe kout, mon’n vwar 1200, mon’n vwar 1500.  I annan dimoun ki’n dir mwan i annan 1800 tou.  E dimoun, avek sa kalite pri, i annan dimoun ki’n reakte.  I annan dimoun ki senpleman in arete aste pwason.  Ozordi nou vwar ki pri pwason in stabilize.  Be sa pik ki i ti’n monte, ozordi in stabilize.  Bon, Vannswet pe fini, Vannnor pe antre i annan enpe plis pwason.  Me nou’n vwar poudir sa panik parmi bann dimoun ki aste bokou pwason, ki zot pa pou ganny pwason.  Sa panik in aleze.  Ler mon ti demann Oceana, son nouvo Management, ki pe arive?  Akoz ou pa pe fer monte pri pwason?  Son larepons sete si mon pa fer monte pri pwason, mon pa pou gannyen pwason.  Akoz i annan lezot dimoun pe compete avek mwan.  Pe pran pwason avek peser ki ti abitye pran pwason kot mwan.  I pe pran pwason akoz i pe pey plis.  Be mwan mon annan dimoun pou peye.  Mon annan en Lizin.  Mon bezwen fer marse, alors mon bezwen peye.

Tou dernyenman mon’n ganny aprose avek serten peser ki’n montre mwan pri Oceana pou mwan Novanm.  Pri in desann.  Pri in desann, dan serten ka in desann signifikaman.  50 poursan, 20 poursan, 25 poursan.  E dan serten ka, 60 poursan.  In desann.  I difisil.  I difisil pour peser akoz li dan lot kote, sa peser ki ti kontan ler pri ti monte e i ti vwar poudir be la – parey mon’n ganny dir avek en peser.  Nou’n ganny en lifeline akoz lontan nou’n lo menm pri me kou pour nou al lapes in ogmante.  Lenflasyon zeneral in monte.  The cost pou mwan sorti.  Cost mon fuel, cost manze pou met abor, cost labwet, cost eksetera, eksetera in monte.  Mon pri li in reste stab, la prezan in monte.  La prezan mon a fer en profi.  E nou pe vwar poudir ler sa pri ti monte, nou vwar ti annan bokou en surge dan lentere pou peser, nouvo peser al lapes.  Pri desann i pa bon pour peser.  I pa bon pou nou osi.  Alors ki nou Minister nou enterese ladan?  Nou, nou enterese avek en pri stab.  En pri stab.  En pri si ou oule ki predikab dan Vannnor, dan Vannswet.  Kot tou dimoun i kapab balans son Bidze e fer son shopping neseser.

Alors, pou reponn Onorab.  Ki nou pe fer pou nou, si nou konsernen avek pri.  Ki nou pe fer pou nou stabiliz keksoz?  Mon bezwen dir stabilize akoz nou lobzektiv se pa pou fer desann pri, non pa pou fer monte pri.  Annefe, nou pa ti a kontan zwe ek pri ditou nou.  Nou ti a kontan dir nou napa nanryen pou fer ek pri akoz pri i ganny determinen par marse.  Me i annan, parey mon’n dir, lezot fakter parey mon’n eksplike, ki afekte sa pri e nou vwar bann booms and depressions, bann blips eksetera e sa i afekte toulede.  I afekte konsomater, ou ek mwan ki aste nou pake pwason e i afekte sa ki anmenn pwason ater akoz li sa peser i bezwen annan en modus operandi, kot i kapab balanse kot i fer en profi, kot i pa fer en profi.  Eski i valer pou mwan al lapes ozordi.  Eski i pa valer pou li al lapes ozordi.  E toulede i konsern nou.  Nou peser i konsern nou, konsomater i konsern nou.  Alors, nou sa ki nou pe esey fer se pou annan stabilite, nou bann Polisi se pou anmenn stabilite da sa pri, pour ki nou evite annan sa bann vagrancies, sa bann booms and depressions dan pri, pou ki nou kapab annan en marse ki ase stab.  Mersi.

 

MR DEPUTY SPEAKER

Kestyon Siplemanter, Onorab Vel.

 

HON JENIFFER VEL

Mersi Mr Deputy.  Mr Deputy, eski Minis i kapab dir avek nou Lasanble si enn bann fakter ki fer pwason ser se ki bann incentives ki i annan dan sa Sekter pa pe ariv kot konsomater.  E eski son Minister pe regard bann opsyon pou sible ki sa bann incentives i benefisye pep Seselwa, sirtou kous ki sosyalman e ekonomikman pli vilnerab?

E dezyenmman, eski Minis i kapab dir avek nou Lasanble si sa logmantasyon dan pri pwason i reprezant en diminisyon dan stok pwason, ouswa i reprezant en lot fakter an term logmantasyon demann, atraver bann kreasyon bann nouvo marse?  Mersi.

 

MINISTER PETER SINON

Mersi.  Pour sa premye kestyon, Lotorite Lapes pe fer en letid lo bann ensitasyon ki nou donn peser.  Sa bann ensitasyon lo fuel, ensitasyon petet lo ice.  Taler mon fek dir poudir ice nou pa fer en profi.  Nou si ou oule subsidise li.  Kestyon ki ou’n demande, eski sa bann ensitasyon i go all the way pou afekte si ou oule pri final.  Pri final ki peser i vann son pwason lo marse.  Eski sa bann ensitasyon i ganny reflekte ladan?  Sa i en letid ki nou pe fer pou vwar how effective i sa bann ensitasyon.  Nou bezwen met diferan fakter letan nou fer sa letid dan zwe.  Kan sa bann ensitasyon in ganny mete ?  Ki kantite logmantasyon par egzanp fuel in monte depi ler nou ti annan ensitasyon fuel ?  Eski sa lenpakt i ankor la?  Eski i ankor relevan?  Eski sa mannyer ki nou donn sa ensitasyon i byen?  Ou ale, ou al aste.  Apre ou vin claim.  Eski sa i efektiv?  Kote ki annan labi, si i annan labi.  Sa i en letid ki nou pe fer.

Dezyenm kestyon.  Eski demann, pri pwason – eski pri pwason ki pe monte i enn koze par diminisyon dan stok, oubyen logmantasyon dan demann ki’n anmenn bokou plis si ou oule, demander?  Bon.  Nou’n vwar detrwa Lotel re-ouver oubyen in ouver nef, koman sa enn Beau Vallon.  Nou’n vwar processing pwason.  Bann processors, i annan enn de ki’n vin online, ki pa ti pe process avan.  La zot pe process.  Alor, zot pe demann pwason e demann pwason an gran kantite.  Nou’n vwar osi serten bann fish mongers, savedir dimoun ki aste pwason an gran kantite pou eksporte pou kliyan.  Alors, i annan sa lespes, me osi nou’n antann osi serten konsern ki i annan serten lespes pwason ki peser limenm i dir ou, lakantite in diminnyen.  Ozordi, lakantite bourzwa ki nou anmennen, ki nou ti anmennen ek lakantite bourzwa ki nou anmennen i petet pa menm zafer.  Alors, scarecity, lararite sa bann pwason i fer ki son pri i pou ogmante, sirtou si demann pour sa bann pwason i la.  E i pe ogmante.  Sa osi i en letid ki nou’n devret fer.  Ki definitivman pe ganny fer lo diferan nivo e sa Revised Fisheries Act ki sa Lasanble ti aprouve pou donn nou osi abilite enkorpor sa bann sou Sekter Lapes ki dorenavan nou pa ti okip nou avek.  Par egzanp lwazir.  Pwason ki ganny tyonbo dan bato lwazir.  Bann bato lezot kalite ki al lapes.  Ki anmenn pwason ater e ki nou vwar poudir sa bann kalite bato pe vin deplizanplis, avek bokou plis lekipman.  Zot kapab pe lapes menm pli kantite pwason ki peser.  Si pa menm kantite, menm plis.  E pour nou kapab annan en bon management control, fodre ki nou annan tou sa devan nou e nou monitor tousala pou nou komans kapab ganny bann endikasyon lo kote ki nou – si fodre met quota nou met quota, lo kote ki nou – si fodre aret leksportasyon serten lespes nou arete.  E si nou pou dir pa tyonbo serten pwason, serten grander.  E i annan bokou mezir ki’n ganny pran dan lezot pei, ki nou isi nou pankor menm aborde.  Me konsern lo serten lespes, konsern lo kimannyer nou pe zer nou stok i la.  I la, i devan nou, i kler e SFA definitivman nou pe gear nou lekor pou en nouvo letap.  En nouvo letap kot nou krwar nou apel sa the echo systems approach, kot nou baz sa lo en co-management kot nou konsilte bokou avek tou stakeholders.  Peser, lezot dimoun ki – tou dimoun ki lapes.  E nou oule ki tou dimoun ki lapes i anrezistre son bato, ki nou konnen ekzakteman konbyen ki pe pran dan nou lanmer akoz sa i en stok ki finite.  Nou kapab fini pwason.  I annan serten landrwa dan lemonn ki’n fini serten lespes pwason.  E sa si ou oule, nou pa ti a kontan ki sa i arive isi.  E i vre, Onorab.  Ou annan rezon.  Sa i zwe lo pri.  Lakantite ki ou annan, lakantite ki ou anmenn ater.  It’s about demand and supply e pri i ganny enfliyanse par sa.  Mersi.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mersi Mr Deputy Speaker.  Bonzour tou dimoun ki alekout.  An pasan, eski Minis i okouran ki liquidation Prawns Farm Coetivy pankor fini?

Mr Deputy Speaker, mon kestyon i swivan.  eski tou sa devlopman signifikatif dan lendistri Lapes ki pe arive, ki Minis in eksplik nou pa ti devret fer ki pri pwason i desann akoz larealite i montre nou otreman e Minis, Minister Lapes li pa’n fer nanryen konkretman pou met par egzanp en quota lo eksportasyon pwason ki kapab, sirtou pwason-d-fon, ki kapab ede pou stabiliz sa pri konmsi, pou fer li swa desann, swa pa mont plis ki sa?  Mersi bokou.

 

MINISTER PETER SINON

Mersi Mr Speaker.  Mr Speaker, dan nou analiz ki nou’n fer, poulemoman nou pa krwar ki eksportasyon pwason.  Lakantite pwason ki ganny eksporte, at least ki lo nou rikord i en major fakter ki determin pri pwason.  Zour ki nou vwar poudir sa i leka, nou pou reakte apropriyeman.  E sa letid nou pe ganny fer.  E se pourkwa ki taler mon pe dir poudir prezan nou bezwen met tou dan pannyen.  Bann bato peser normal ki nou monitor.  Nou annan en bann bato ki al lapes ki nou pa monitor.  E taler mon’n menm dir ki sa bann bato i kapab pe lapes bokou plis pwason ki nou peser i anmennen.  E i annan nou pa pe vwar kote sa bann pwason i ale.  Nou pou bezwen hold them to account e anmenn zot on board e konnen ki kantite pwason pe anmenn ater e kimannyer zot aktivite pe afekte stok Vyey, stok Bourzwa, stok eksetersa, eksetera.

Lo kote – nou zanmen nou’n vwar nou rol koman enn ki deside ki pri pwason pou vann.  Parey mon’n dir taler, nou sey fer mannyer eparnye nou e les marse deside.  Me bann lezot fakter ki nou vwar endirekteman i afekte pri e i form parti nou manda kot nou kapab fer Polisi pou afekte sa bann aktivite pou zot pa vin bann aktivite tro negativ, la nou sey zwe nou rol pou nou.

So, i annan tou sa bann travay pou nou fer e nou fek ganny nou nouvo Lalwa.  Nou annan en kantite kapasite pour nou devlope.  I annan serten keksoz dan sa pei ki zanmen nou’n deza fer avan.  Nou zanmen nou’n deza met en quota par egzanp pou dir annou met en quota.  Kimannyer ou fer sa?  Nou dir annou met en quota lo Bourzwa.  Nou pa pou lapes tan kantite Bourzwa.  Ouswa nou pou lapes tan kantite.  Zis tan kantite.  Ouswa nou pou donn peser en quota ki i kapab lapes e andeor son quota, i pa pou kapab lapes ankor.  Tousala nou bezwen devlop sa bann skills e kapasite pou nou mete e kominike kan nou pe devlope avek sa peser.  E i osi annan en lide pou li donn nou lo kimannyer nou kapab pli byen fer, pou pa afekte totalman son soz pour li.

Alors, i bann keksoz ki definitivman pe vini e ankor enn fwa mon kapab remersye zot pou donn nou sa loportinite pou nou komans sa nouvo pist avek sa nouvo Act ki zot in aprouve pour nou.  Mersi.

 

MR DEPUTY SPEAKER

Kestyon 180, Onorab Fideria.

 

HON EMMANUEL FIDERIA

Mersi Mr Deputy Speaker.  Mr Deputy, eski Minis i kapab enform sa Lasanble si apre 30an ki nou eksplwat e devlop nou Lendistri Ton, eski nou stok i ankor soutenab, ki fitir zenerasyon i kapab benefisye?  Mersi.

 

MINISTER PETER SINON

Mersi pour kestyon.  Mr Deputy Speaker, bann lapes Ton ki enkli Ton Tropikal koman Ton Zonn, Yellowfin, Ton Reye, Skip Jack, Albacore, Ton Gro Lizye, Big Eye ki ganny trouve dan nou lanmer i ganny klasifye mondyalman koman bann lapes migratwar, oubyen highly migratory species an Angle.  Sa bann tel lespes i ganny zere atraver en Lagreman Enternasyonal ki apel The UN Fish Stock Agreement, oubyen UNFSA.  Sa Lagreman ti ganny adopte par Lasanble Zeneral Nasyon Ini an 1995.  UNFSA i etablir bann Drwa e lobligasyon pou bann manm ki’n ratifye sa Lagreman pou ansanm zer stok sa kalite pwason.  Sa Lagreman in osi etablir bann mekanizm pou kolaborasyon enternasyonal ant bann manm e osi pou bann manm kapab deservi zot bann lobligasyon atraver bann Lorganizasyon Rezyonnal.  An Angle nou dir zot Regional Fisheries Management BodyRFMOs oubyen Regional Fisheries Management Organisations.  Set atraver sa bann RFMOs ki stok bann lespes migratwar parey Ton i ganny zere dan nou rezyon an partikilye.

Rezon det par deryer bann RFMO se ki bann lapes migratwar pa kapab ganny zere o nivo Nasyonal par en sel pei.  Sa bann lespes i pas zis serten parti zot lavi dan nou Zone Eksklisiv e dan Zone Eksklisiv en pei e lezot letan zot ganny trouve swa a ot mer, high seas, ouvbyen dan Zone Eksklisiv en lot pei.  Mon repete.  En pei tousel pa kapab kontrole ki arive avek sa lespes ler i lo high seas, oubyen i dan Zone Eksklisiv en lot pei.  Sel fason pou efektivman zer bann tel stok se par kolaborasyon bann pei atraver bann Regional Organisations.

Dan kad Ton dan Losean Endyen, se Indian Ocean Tuna Commission oubyen IOTC, ki sa Lorganizasyon ki zer stok Ton e bann lapres asosye.  Se Seselwa, Mr Randolph Payet ki a latet sa Lorganizasyon e sa Lorganizasyon i baze dan Victoria, isi Mahe, Sesel.

IOTC i annan 32 manm e Sesel ti vin en manm sa Lorganizasyon an Zilyet 1995.  Sa se tou pei ki lapes dan Losean Endyen, savedir manm ki form parti manm IOTC se tou pei ki bord Losean Endyen e tou lezot pei ki lapes dan Losean Endyen.  Dan nou Losean, i annan 3 kalite Ton prensipal.  I annan Albakor, i annan Ton Gro Lizye, Big Eye, i annan Ton Zonn, Yellowfin.  E leta sa bann stok poulemoman i konm swivan.  Pour Albakor.  Albakor i en lespes konsidere, tanpere.  I ganny trouve prensipalman dan sid Losean Endyen e ki ganny targete prensipalman par bann long line an 86 poursan, konpare avek bann lezot lespes Ton Tropikal, sa lespes tanpere pa tro an abondans dan nou lanmer.  Letid lo leta stok ki ti ganny fer an 2011 avek 2012 ti donn rezilta swivan.  Zot ti konsider stok sa lespes koman enn ki pe ganny si eksplwate.  Lakantite sa lespes ki ti ganny kaptire an 2012 ti 33 mil 960 tonn ki ti en pti pe par lao son kaptir optimal ki maximum sustainable yield ki li i 33 mil 300 tonn.  Alor, i ti ganny rekomande ki lefor i ganny fer pour ki lapes ki pe target sa lespes Albakor i redwir.

Piratri dan nor Losean Endyen pandan sa bann dernyen lannen, ti fer ki bann bato long liners, palangriye ti deplase pou al dan sid e dan bann zone kot i annan Albakor.  Sa in fer ki lakantite sa lespes ki ti ganny kaptire ti ogmante.  Avek aktivite piratri ki’n redwir bann long liners i ekspekte retourn dan zot zone tradisyonnel e fotespere ki sa i kapab redwir presyon lo sa lespes.

An sa ki konsern Big Eye, Ton Gro Lizye.  Li i ganny konsidere koman en lespes Ton Tropikal e i alabondans dan nou lanmer.  Sa lespes i prensipalman ganny targete par long line, palangriye a 70 poursan an 2012 e osi par persener, 19 poursan an 2012.  Analiz lo leta stok Ton Gro Lizye ki ti fer an 2013 i donn rezilta swivan.  Similer avek bann rezilta ki’n gannyen 2010 a 2011, stok sa Ton pa pe ganny sir eksplwate e nivo lapes ansemoman i montre ki sa nivo eksplwatasyon i soutenab.  Lakantite kaptir an 2012 ti 115 mil 800 tonn ki par anba nivo ki konsidere koman soutenab.  Son maximum sustainable yield li i 132 mil tonn.  Lakantite mwayenn sa lapes ki ti ganny kaptire pandan sa 5 lannen presedan, 2008 a 2012 ti 107 mil 600 tonn.  I osi par anba nivo ki sistenab.  Rediksyon dan aktivite bann long line Zaponnen, Taiwan, Repiblik Sid Koreen depi 2007, ensi ki en rediksyon dan aktivite bann sener, in redwir presyon lapes lo sa lapes.  Si presyon lapes i reste a sa nivo ki i ete konmela, i pa pou redwir stok Ton Gro Lizye e son nivo soutenab pou ganny mentenir.

E finalman, SkipjackSkipjack i en lespes ki ganny konsidere kilman cosmo politan akoz i ganny trouve dan delo tropikal e dan delo sib-tropikal.  Sa lespes i abondans dan nou delo.  I ganny konsidere koman en lespes ki tre rezilyan akoz i reprodwir byen vit.  E zot fekondite i tre o.  E zot pa viv tro lontan.  Ton Reye oubyen Skipjack i lespe Ton pli enportan komersyalman dan Losean Endyen e ganny targete prensipalman par persener, lasenn mayon e polan line.  Dan bann lannen resaman, apre 90 poursan bann kaptir par persener pe ganny tyonbon an asosyasyon avek bann lobze flotan.  Dapre lanaliz stok ki ti ganny fer an 2012, stok Ton Reye dan Losean Endyen pa pe ganny sir eksplwate.  E nivo lapes ansemoman i a en nivo ki soutenab e pa pou fer sir eksplwatasyon sa stok en posibilite.  Lakantite Ton Reye an 2012 ki’n ganny tyonbo sete 314 mil 537 tonn.  I par anba nivo ki’n ganny konsidere sistenab ki 478 mil tonn Ton.  Fodre note osi ki an moman, lakantite Ton Reye ki’n ganny kaptire an 2008 a 2012 se 400 mil 980 tonn.  I osi par anba sa nivo ki ganny konsidere koman soustenab.  Mersi bokou.

 

MR DEPUTY SPEAKER

Kestyon Siplemanter, Onorab Fideria.  Request.  Switch off micro.

 

HON EMMANUEL FIDERIA

Mersi Mr Deputy Speaker.  Mr Deputy, an vi repons Minis, eski Minis i kapab enform sa Lasanble si SFA pe travay an kolaborasyon avek IOTC, ki pou fer sir ki kalite lapes, pou fer sir ki nou stok i reste soutenab, ki kalite lapes ki nou pe fe ozordi par egzanp avek lasenn, ozordi dan lemonn se eksplor bann nouvo kalite ki pou fer sir ki nou stok Ton i reste soutenab pou kantite lannen ki vini e ki nou, nou kapab ganny pli bon reveni baze lo kalite Ton ki nou lapes?

Eski Minis osi i kapab dir nou Lasanble ki Sesel, apre tou sa leksperyans ki i pe fer, ki in fer dan Lendistri Ton, apre 30an, ki i pe fer pou li share son bann best practices ki ini akimile?  Mersi.

 

MINISTER PETER SINON

Mersi Mr Speaker.  Mr Deputy Speaker, ler Sesel ti deside mont en kanpanny tre dir.  Mon krwar nou konpetiter ti Sri Lanka.  Pou anmenn baz IOTC, Indian Ocean Tuna Commission dan Por Victoria.  I ti en lalit ki nou ti committed avek, pa zis pou annan sa Lofis isi pou laglwar.  Sesel ti lager for pou anmenn IOTC isi, an konesans son potansyel dan sa Sekter Ton.

Mr Deputy Speaker, 90 poursan Ton ki ganny tyonbo dan sid was Losean Endyen i ganny anmenn dan Por Victoria.  I ganny landed dan Por Victoria.  Enpe i ganny transformen dan Por Victoria e lamazorite i ganny re-eksportre dan bann lezot landrwa kot i annan bann Lizin.  Nou defi pou gard sa Lendistri Ton dan en fason dirab e soutenab i en defi ki’n konsern nou depi ler nou’n komans fer Ton dan Por Victoria.  E nou’n determinen pour ki sa Lendistri i en Lendistri ki ganny byen regarde.  E vwala ozordi, pou ou kestyon nimero 1.  Nou bezwen neseserman travay an etrwat kolaborasyon e partisip aktivman dan tou aktivite ki IOTC i fer.  Sesel in enn parmi bann manm IOTC ki’n tre, tre aktiv, menm met lo latab serten propozisyon pou ganny konsidere, par egzanp ki tou pwason ki ganny tyonbo by catch i nepli ganny zete dan delo, me ganny anmenn ater.  Sa i enn parmi propozisyon ki Sesel ti met lo latab, ki’n ganny aprouve.  I annan lezot.  I annan lezot ki Sesel in co-sponsor avek Langleter si ou oule, koman bann aksyon, mon kapab dir Sesel i annan sa repitasyon koman bann aksyon ki pou protez sa Lendistri, ki pou fer sir poudir i dirab akoz sa i nou gannypen.  Si demen nou fini tou Ton dan Losean Endyen se Lendistri ki nou perdi.  Si demen nou les pwason ilegal, lapes ilegal dan nou Losean, ki nou napa kontrol avek, si nou ki pe perdi.  E nou konnen, e nou konsyan.  Se pourkwa Sesel i premye pei Lafrik ki’n sinny sa Protokol FAO, pou fer sir ki sa konba ki i annan, ki Nasyon Ini i deklar si ou oule portstate measures koman enn bann main key fight pou IUU, Ilegal Fishing.  Sesel i travay etrwatman e dan larezyon avek tou nou defi ki nou annan, Sesel i ganny konsidere koman enn parmi bann meyer.  Mon repete.  Dan nou rezyon, Sesel, avek tou son defi ki nou’n annan, ki nou’n diskite ozordi, i ganny konsidere koman enn parmi bann meyer dan zesyon Lendistri Pwason.

Nou’n ganny Tanzanyen ki’n vin kot nou pou aprann kimannyer nou pe fer.  Nou’n ganny Mozanbiken ki’n vin kot nou pou aprann kimannyer nou pe fer.  Nou’n ganny bann Lenstitisyon koman FAO ki’n demann nou pou nou esey empart konesans ki nou annan avek par egzanp Somali, ki nepli annan nanryen.  Apre zot lager, zot in totalman detrir lenfrastriktir ki zot ti annan pou zer zot stok.  E se Sesel ki’n ganny swazir koman sa model pou ganny si ou oule swazir pou esey impart e sey partaz konesans avek La Somali e zis 2 semenn pase, nou Depite CEO Msye Roy Clarisse ti an Somali, pe diskite e pe sey vwar kimannyer nou kapab ed zot, me nou pe fer li atraver FAO ki en Lorganizasyon Nasyon Ini.

Alors, dan nou 30an ki nou’n gather sa pti morso leksperyans ki nou annan, definitivman nou santi nou, parey mon’n dir taler, sa pwason, ou pa pou kapab zer li ou tousel.  Pwason pa reste kot ou.  I fer letour partou e si partou pa pe donn en koudmen pou zer sa pwason, sa School of Fish ki fer letour dan Losean Endyen.  Si ler i al laba zot pran tou, be i pa vin kot ou.  Pou napa pou vin kot ou akoz ler i al laba, zot napa okenn zesyon.  Tou sa ki antre i antre, tou sa ki oule vin pran i vin pran.  Tou kalite groser.  Me selman, nou bezwen annan kolaborasyon avek tou sa bann pei dan larezyon e servi tou lenfliyans ki nou annan, avek lenfliyans ki IOTC i kapab mete li osi, pou fer sir ki nou pa pe zer zis pwason ki dan nou lanmer, me nou zer en stok pwason ki parwaze dan larezyon e ki tou larezyon i annan sa sans responsabilite, pou ki nou tou nou kapab benefisye.  Mersi.

 

MR DEPUTY SPEAKER

Bon, avek sa nou’n ariv alafen Question Time e nou ava remersye Minis ek son delegasyon e ekskiz li parmi nou.

Lasanble a pran en break, i a rezwenn 11.55.

 

(BREAK)

MR DEPUTY SPEAKER

Bon nou kontinnyen avek nou lezot item lo Order Paper e mon ava envit Onorab Lenny Lebon pou prezant son Mosyon.

 

HON LENNY LEBON

Mersi Mr Deputy.  Mr Deputy mon Mosyon ki’n ganny table i lir koumsa.  Ki Gouvernman i adopte en Polisi nasyonal pou asir aksesibilite dan landrwa piblik pou tou dimoun avek dezabilite.

An 2009 Sesel ti zwenn Konvansyon Nasyon Ini lo drwa bann dimoun avek dezabilite.  Desizyon Sesel in progresivman kontribye bokou pou fer vin en realite bann dezir ek aspirasyon tou sitwayen Seselwa ki annan serten degre dezabilite.  Anplis dan konteni Konstitisyon trwazyenm Repiblik, Lartik 36.  Leta Seselwa i rekonnet drwa bann dimoun avek dezabilite pou ganny Proteksyon Sosyal e Leta i fer en komitman pou fer sir ki bann drwa i ganny ranforsi.

Dapre lenformasyon, konteni dan dokiman census 2010, dimoun ek dezabilite i reprezant 3 poursan nou popilasyon.  Malgre in annan bokou progre parkour lavi.  Sa anviron 2200 nou sitwayen ki annan dezabilite pa’n touzour fasil e pa fasil, dan zot zefor e perseverans pou ganny zot lespas lezitim dan lasosyete.  Nou bezwen sirmont plizyer difikilte tel, premyerman.  Diskriminasyon dan landrwa travay, defi lo kestyon prodiktivite.  Akse a en ledikasyon de kalite, definisyon a lapros enklizyon.  Sirkilasyon dan transpor piblik, deplasman anzeneral.  Partisipasyon dan bann aktivite ki ganny organize lo nivo distrik oubyen nasyonal.  Akse oubyen posibilite pou devlop lendepandans socio-economic.

Dan sa konteks mon panse ki demann pou prepar en Polisi Nasyonal lo dezabilite ava san dout kree sa mouvman, sa sinerzi neseser vize ver donn solisyon dirab e soutenab bann difikilte ki nou sitwayen avek dezabilite i oblize fer fas avek.  E ki pe azir koman bann baryer ki anpes zot avans devan pou demaske zot potansyel e fer kontribisyon pozitiv oubyen prodiktif spesyalman dan sosyete Seselwa.  San obliy potansyel pou kontinnyen ogmant zot perse lo lasenn rezyonnal e enternasyonal.

Dan nou demars pou elabor en Polisi nou bezwen pran an kosiderasyon kimannyer nou moderniz oubyen anbeli nou lavil, nou bann distrik.  An gro nou lanvironnman e fasilit limenm atraver lekel lavi tou nou bann sitwayen i trounen.  Bann fasilite trotwar dan nou lavil, distrik dan plizyer sirkonstans zot pa disable friendly. Akse i enn bann pli gro baryer ki bann dimoun avek dezabilite i fer fas avek.  Ou pa vwar provizyon pou sa dimoun avek dezabilite servi sa bann fasilite.

Dezyenmman dan Victoria, presizeman ler ou fer letour ou vwar bann gro pofler ki’n ganny mete partou dan semen.  I pran tou plas.  I vre ki nou pe anbelir nou lavil, i pe rann li pli zoli.  Me nou bezwen realize ki nou pe negiliz e rann lavi bann dimoun avek dezabilite fizik e osi ki pa vwar kler pli difisil.  Akse avek serten bann fasilite e servis ki pou tou piblik pa posib pou serten kategori dimoun avek dezabilite.  Laplipar biro dan Gouvernman napa bann fasilite toilet ki bann dimoun avek serten kategori dezabilite i sipoze servi.  Parfwa ni menm en wheelchair pa fasil pou pas par sa bann laport.

Mr Deputy Speaker, en Polisi lo dezabilite i kree labaz pou vann Sesel koman en destinasyon ki disable friendly.  Mon panse ki en tel sirkonstans ava kapab atir plis touris, sirtou bann ki aze oubyen annan serten problenm mobilite, me ki annan sa larzan pou depanse.  Pou sa arive nou bezwen mazin anterm nou Erport ki pa disable friendly.  Fason pou debarke e anbarke dan avyon i konplike.  Nou bann servis transportasyon piblik ki pa reponn bezwen bann dimoun avek dezabilite, eksetera.

Mr Deputy, mon tre konsernen ler mon vwar ki menm si tousala i dan Konvansyon ki Sesel in raktifye e adopte, nou vwar ki laplipar sa bann landrwa pa pe neseserman ganny aplike dan sa ki nou pe fer.  Nou bezwen pe fer tou dan en fason sistematik.  Promot e ranforsi drwa tou sitwayen avek dezabilite.  Definisyon e adopsyon en Polisi Nasyonal lo dezabilite ava en lapel senser pou aksyon a tou nivo dan sosyete Seselwa.  Byensir lo nivo Gouvernman nou ava apresye kontinite vizavi sipor e proteksyon tou dimoun avek dezabilite parey Konstitisyon i demande.  Lo nivo kominote nou ava apresye ki nou’n kre sa lanvironnman kot dimoun avek dezabilite ava kapab partisip parey nenport ki sitwayen.  Lo nivo lafanmiy nou ava pe adopte en latitid kot nou ankouraz en sanzman dan persepsyon ki rekonnet abilite dan plas dezabilite e promouvwar respe dan plas pitye.

Mr Deputy, tou sa ki nou pe dir oubyen pou kontinnyen koz lo la, lo sa size dezabilite.  Pou tourn lo nesesite aksyon.  En aksyon ek en dezir senser pou promouvwar legzistans en sosyete ki enkliziv, en lapros devlopman ki enkliziv.  Sa i egal avek en prosesis devlopman dan sosyete ki ideal.  Sak sitwayen avek dezabilite i annan en drwa egal vizavi tou lezot sitwayen.  Pou partisipe e zouir bann lezot benefis ki sosyete i kapab ofer.  Egalman posibilite ek loportinite i la.  Osi lontan ki si nou tou ki konsernen nou zwe nou rol.  Pran nou responsabilite e sa i komans avek sak sitwayen avek dezabilite zot menm.  Tou bann paran, Lazans ki travay avek dimoun dezabilite.

Mr Deputy, Sesel i bezwen ozordi plis ki zanmen en Polisi nasyonal pou dezabilite, ki donn direksyon, ki kre e donn lespwar, ki angaz tou sa ki konsernen.  E ki donn Lasirans ki dimoun avek dezabilite i ganny pran an kont dan tou Polisi ki ganny deside lo la, lo nivo nasyonal.

Mr Deputy, bann konsern otour sa size i byen konplenks.  Me mon senserman panse ki nou annan kapasite pou sirmont sa bann defi.  E dan sa konteks ki mon sezi sa loportinite pou met serten propozisyon devan pou konsiderasyon.  Premyerman i tre enportan ki plis sirveyans i ganny fer dan bann nouvo konstriksyon ki ganny fer pou asire ki i anlinny avek Polisi Planning e osi Polisi Nasyonal konsernan dezabilite.  Evantyelman tou bann fitir lenfrastriktir ki ganny konstri, fodre ki sa lespri universal design i vin en lobligasyon sirtou lenfrastriktir piblik.  I konpri lekol, lofis, toilet piblik, trotwar e ramp.  Mon osi propoze ki bann Minister konsernen i revwar bann landrwa ki’n ganny modifye e serten ki dan staz egzekisyon.  Pou asire ki zot zwenn bann standar minimonm e ki byensir zot disable friendly.

Dezyenmman, lo kestyon transportasyon oubyen dimoun avek dezabilite.  Mon note dan moman ki mon ti pe prepar mon Mosyon ki plizyer lannen SPTC in dir ki dan son plan pou fer vini bann transpor ki aksesib pou bann dimoun avek dezabilite.  I evidan ki pa bokou letan in annan enn de bis ki’n vini e ki’n ede lo kote oter bann bis.  E sa pa’n zis benefisye bann dimoun dezabilite me egalman bann madanm ki pe al ganny zanfan, osi byen ki dimoun aze.  Me kestyon ki souvan ganny demande, se kan vreman ki SPTC i anvizaze entrodwi en servis bis piblik ki aksesib, enkliziv e iniversel ?  Polisi SPTC i bezwen kler e realis avek sa.  E kot bann sitwayen ki servi wheelchair e ki swete vin endepandan e anvi servi transpor piblik i kapab fer li.  Mon panse ki moman in arive pou etidye posibilite met anmars en proze pilot.

Trwazyenmman, lo kestyon lakaz.  I vre ki dan plizyer laspe bann dimoun dezbilite i ganny konsidere koman en priyorite lakaz.  La ankor mon panse i neseser annan en Polisi kler konsernan akse lakaz pou nou sitwayen avek dezabilite.  Si nou anvi vwar realizasyon enkliziv nou bezwen donn sans bann dimoun avek dezabilite ki annan sa kapabilite pou realiz en tel linisyativ vizavi lakaz.  Tro bokou fwa dezabilite in vin zis en mansyon dan Polisi.  En ler nou fer fas avek en tel bezwen, nou vwar Gouvernman ouswa fanmiy ou menm sa dimoun avek dezabilite i bezwen neseserman fer depans ekstra.  Mon senserman krwar ki ler in arive pou nou anvizyonn bokou pli lwen ki sa.  E dan sa fason asire ki dan sa moman design nou fer tou sa ki posib pou fer li vin en universal design.  Mon konnen sa i pa en latas ki enposib.

Mr Deputy, i annan ankor lezot propozisyon mon panse ki byen, kit lespas pou mon bann lezot koleg ki pou enterveni lo sa Mosyon pou fer zot soumisyon.  Mon senserman konvenki ki ler nou fini diskite e adopte en Polisi lo dezabilite nou ava pe montre nou langazman anver bann dimoun avek dezabilite.  Mon egalman ava fer sir ki bann landrwa pe ganny ranforsi e ganny respekte.  Kot nou ava pe asir zot proteksyon e pe ganny angaz dan zesyon zot sosyete.  E dan sa konteks zot ava pe osi egzekit aktivman zot responsabilite e reste koman en sitwayen plennman angaze.  En tel Polisi pou anmenn tou partner ansanm pou rekonnet rol ki zot sipoze zwe e defini klerman kimannyer bann lazans pou kapab travay pli byen pou promouvwar drwa bann dimoun avek dezabilite.

Mr Deputy, avek sa soumisyon mon pou demann nou Lasanble pou aprouv sa Mosyon.  Mersi.

 

MR DEPUTY SPEAKER

Okenn Manm ki oule segonn sa Mosyon?

 

HON EMMANUEL FIDERIA

Mr Deputy, mon pe segonde.

 

MR DEPUTY SPEAKER

Yes.  Ou oule koze tou ?

 

HON EMMANUEL FIDERIA

Mon oule dir de pti mo.

 

MR DEPUTY SPEAKER

Proceed.

 

HON EMMANUEL FIDERIA

Thank you.  Mr Deputy Speaker, Mosyon Onorab Lebon ki pe demann ki Gouvernman i adopte en Polisi Nasyonal pou asir aksesibilite dan landrwa piblik pou tou dimoun ave dezabilite.

Mr Deputy Speaker, Mosyon Onorab Lebon in vin dan en moman kot mon kapab dir en bon timing.  Kot Sesel pe reget son bann nouvo target.  Sa ki sa Mosyon pe dir, Sesel nou’n fer bokou pou nou sitwayen ki annan serten dezabilite.  E mon kapab dir nou tou nou annan serten dezabilite, menm serten i pli aparan ki lezot.

Mr Deputy Speaker, mon kapab dir ki enn bann drwa fondamantal se ki akse avek lasante, Sesel Gouvernman son Polisi Lasante i gratwit.  E tou bann sitwayen, pe enport kondisyon fizik ou mantal, sa ou ou drwa e tou dimoun i ganny akse avek en swen lasante.

Mr Deputy Spekaer, pa tou pei dan lemonn ki tou son sitwayen ki enkli bann dezabilite i ganny sa lopotinite, en swen oubyen tretman lasante gratwit.  Dan ka Sesel, nou’n fer bokou plis ki sa.  Mr Deputy Speaker, nou ankor annan en kantite pou nou fer.  Nou kapab dir ki Gouvernman in fer pou bann dimoun avek dezabilite.  Me Mosyon ozordi pe dir avek nou annou bouz devan.  Nou travay pa ankor fini.  I reste bokou pou nou fer, pou nou kontinnyen avans lakoz tou bann avek dezabilite.

Mr Deputy Speaker, ler nou pous refleksyon lo en lot nivo e pran aksesibilite pou nou bann dezabilite dan landrwa piblik, ozordi Mr Deputy, i devret en norm ki tou batiman piblik ki ganny permisyon pou komans kontriksyon i devret kapab satisfer Lotorite Plan ki’n fer bann provizyon pou garanti akse pou tou bann dimoun avek dezabilite.

Mr Deputy Speaker, koman en legzanp parmi plizyer batiman parey Independence House kot i annan bann servis tre enportan.  Demen bomaten si en dimoun avek dezabilite fizik sever i anvi al fer en demars, par egzanp pou en passport i pou napa akse pou li ariv laba.  E menm i napa en provizyon ki’n ganny fer kot zot kapab ganny sa servis.  Mr Deputy Speaker, lot legzanp.  Pran Lopital, kot klinik lizye i ete, kimannnyer en dimoun avek dezabilite i kapab ganny akse avek sa servis?  Kot mazorite sa bann batiman napa en servis lift ni menm en ramp, zis peron.  Nou annan menm sityasyon kot koneksyon kot CDCU, si en dimoun avek dezbilite i annan bezwen pou al pran serten vaksen, zot lavi i difisil.

Mr Deputy Speaker, ankor legzanp.  Pran bann servis banker, kot serten in met anplas en sistenm kot en dimoun aze ou en madanm ansent i ganny favorize avek en sistenm fast track.  Kot serten bann dimoun avek dezabilite i donnen priyorite.  Zot ganny servis vitman.  Me ler nou aprofondir dan lezot sirkonstans, dan sa bann batiman zot tou zot plan pa’n ganny fer avek lide deservi sitwayen avek dezabilite.  Par egzanp si en sitwayen avek dezabilite i ganny bezwen pou al servi en toilet, i pou en latas pratikman enposip pou bokou nou bann dimoun avek dezabilite.  Dan sa ka spesifik parey loter Mosyon in dir, Lotorite konsernen i bezwen asire ki dan tou nouvo batiman piblik ki konsiderasyon i ganny pran pou asire ki fasilite adekwat i ganny met avek bi pou deservi nou bann dimoun avek dezabilite.  Dan sa ka bann batiman in ganny fini konstri, mon sizere ki nou konmisyonn en letid serye pou vwar posibilite reel e ki bann propriyeter i ganny donnen serten dele letan rezonnab pou fer bann transformasyon neseser avek zot batiman, touzour avek bi donn posibilite nou bann dezabilite.  Dan menm lobtik nou pe koz lo bann servis PUC, bis, bato lwazir, klinik, Erport, Biro Housing (HFC), PMC eksetera.

Mr Deputy Speaker, malgre nou’n fer bokou, i reste ankor pou nou fer.  Dan menm domenn ledikasyon, en dimoun avek serten dezabilite i ganny tou son sans pou li devlop tou son potansyel dan en fason entegral.

Mr Deputy Speaker, atraver resers ki’n ganny fer, mon’n ganny fer konpran ki ti annan en fiy ki ti tre entelizan, ti annan gran lespwar dan son kapasite entelekyel.  Me malerezman sa zenn fiy ti oblize aret lekol akoz serten laklas kot i ti’n arive ti napa akse pou li monte.  Vwala en sans gate, en loportinite toufe, ganny fistre zis akoz mankman bann fasilite aksesibilite.

Mr Deputy Speaker, annou get enkou North East Point, kot nou bann sitwayen i fer laprantisaz vokasyonnel.  Landrwa i limite.  I annan sa gran batiman ki Gouvernman Libyen ti fer kado Gouvernman Sesel.  Sa ki nou apel Sant Reabilitasyon.  Zis en kar ki pe servi, larestan pa servi.  Zanfan pe servi en pti landrwa, Minister i bezwen get ladan.  Nou bezwen annan bann progranm training spesyal, pou tou nou bann dimoun ki travay avek nou sitwayen ki annan dezabilite ki servi sa bann landrwa avek bann fasilite ki pe ofer.

Mr Deputy Speaker, lo kote laspe sosyal, ozordi pei pe fer fas avek en sityasyon kot nou pe vin pli difisil pou ganny career pou travay avek nou bann dimoun ki dan bezwen.  Mon bezwen fer kler kot Gouvernman pou peye napa problenm.  Me pou ganny dimoun pou travay ki problenm.  Eski i pa’n ler pou nou reget nou Lalwa.  Ban madanm etranze ki’n marye ek Seselwa ki ava kapab donn sa servis.  Me kimannyer nou Lalwa i ete konmela zot pa kapab fer sa.  Nou Lalwa i permet fer vin bann met etranze.  Mon napa problebnm ek sa, mon panse byento Gouvernman a kapab pran en desizyon.

Mr Deputy Speaker, lo kote lasistans, en dimoun avek dezabilite nou bezwen met en Lalwa annord pou fasilit zot lasistans finansyel.  I annan ki ganny pou 3 mwan, 6 mwan, 1an.  Ni lebra, ni lipye pa pou re pouse.  Problenm i pa avek Welfare, problenm i avek Lalwa e mon panse ki moman i apopriye pou nou demann Minister konsernen pou anmenn Lalwa kot nou Lasanble pou nou amande e dan sa fason asire ki keksoz i mars pli byen.

Mr Deputy Speaker, dan moman ki nou pe debat lo Mosyon i enportan ki nou edik nou dimoun lo zot life style. Kimannyer nou viv nou lavi.  Nou bezwen pa abiz lalkol, labi sibstans, konsomasyon lalkol an ekse i tre souvan kre kondisyon pou nou soufer avek serten dezabilite.

Mr Deputy Speaker, mon’n fer letour pou al vizit Lopital North East Point.  Mental Health Hospital, laba mon’n vwar dimoun pa ti tro bokou letan ou’n vwar li lo semen pe byen marse, la ou vwar li ek en dezabilite.  Mon panse ki i neseser ki Minister konsernen avek medya i annan en progranm sansibilizasyon pou kontinnyen edik nou pep.  Akoz si nou kontinnyen parey keksoz pe ale, mon senserman krwar ki Sesel pou ganny en gran difikilte pou soutenir en progranm konpreansiv pou reabilitasyon nou bann dezabilite lo kote resours imen e osi kote resours finansyel.

Mr Deputy Speaker, lot laspe ki tre enportan pou nou edik nou pep se kot i konsern safety.  Boukou konpannyen i met bann lekipman safety, serten travayer i deside pa servi li, ler maler i arive ou vwar serten sitwayen i vin andikape.  Dan sa konteks bann konpanyen i bezwen annan en Protokol an sa ki konsern safety e anpes bann sityasyon grav kot nou sitwayen i kapab andikape.

Mr Deputy Speaker, pou terminen i enportan ki nou tou sitwayen ki annan en dezabilite kot li, pran konsyan ki i pa en krim.  Non pa, nou pa bezwen onte.  Nou bezwen retir sa taboo ki egziste, en sitwayen avek dezabilite i reste en imen.  Sosyete i devret tret zot avek tou respe, dignite e konpasyon.

Mr Deputy Speaker, i annan serten nou sitwayen ki zot dezabilite i sever, kot zot bezwen lasistans 24 lo 24.  Serten sitwayen i kapab peye, me pa tou.  Mon demande ki Gouvernman i ofer plis lasistans pou sa kategori dimoun ki pa kapab peye, ek lot form lasistans parey wheelchair ki mars avek batri.

Mr Deputy Speaker, i tre enportan ki i annan en progranm training pou nou bann career ki travay avek bann dimoun ki annan dezabilite.  Par egzanp montre zot kimannyer pou fer masaz, kimannyer pou mannye zot bann dimoun avek diferan degre dezabilite eksetera.  Ki nou osi asire nou kontinnyen vwar nou bann Lezislasyon pou asire proteksyon nou bann dezabilite kont tou form labi.  Par egzanp finansyel, fizik, seksyel, emosyonnel eksetera.

 

Pou termien mon oule remersye tou sa bann volonter.  I annan 200 zot ki pe travay avek bann dimoun disable.  Sepesyalman mon Komite Disable, Les Mamelles, son Chairman Iren Rosalie.  Ki lemonn i kontinnyen evolye dan laspe teknolozi modern.  Ki bann siyantis i kontinnyen remerse, evante, deblok diferan kalite mwayen pou rann lavi tou bann dimoun ek dezabilite, pa zis Sesel me dan lemonn bokou pli meyer ki i ete ozordi.

Mr Deputy Speaker, avek sa 2 pti mo, mon pou vot anfaver sa Mosyon.  Mersi.

 

MR DEPUTY SPEAKER

Bon nou pou aret la e nou pou kontinnyen 2er apremidi.

 

(LUNCH)

 

MR DEPUTY SPEAKER

Bon, nou kontinnyen nou deba lo Mosyon prezante par Onorab Lenny Lebon.  E mon ava envit Onorab Samson.

 

HON DEREK SAMSON

Bonn apre midi Mr Deputy, Mersi.

Mr Deputy, nou Konstitisyon i fer referans avek bann dimoun ki pe viv avek en dezabilite.  E i annan plizyer kalite Drwa e servis ki en dimoun avek dezabilite i merit ganny kapab ganny akse avek, oubyen sipor pou ganny akse avek, pou zwenn son bezwen koman en sitwayen e anplis koman en imen.  Nou bezwen realize ki dimoun avek dezabilite i parey mwan ek ou, zot sirkil dan bann menm lanvironnman ki mwan ek ou nou rezouir e zot annan dezir e aspirasyon parey mwan ek ou.

Zot sorti dan en fanmiy.  Wi zot merit bokou plis latansyon e lafeksyon e se bann dimoun ki otour zot ki premye pou demontre zot lanmour avek swen.

Mr Deputy, nou bezwen ozordi salye paran, sirtou sa bann zanfan avek dezabilite, ki malgre i zot devwar maternel e paternal pou pran ka avek zot zanfan avek dezabilite, nou rekonnet ki zot responsabilite i gran e i merit nou rekognisyon.

Mr Deputy Speaker, isi Sesel, Lalwa prensipal ki nou annan pour bann dimoun avek dezabilite, se en Lalwa pou fer ki en Konsey Nasyonal pour bann dimoun avek dezabilite i ekziste isi Sesel.  Fonksyon sa Konsey Nasyonal ki nou bezwen i rekonnet pe fer en bon travay, i varye dan lentere bann dimoun avek dezabilite.  Tanzantan nou tande oubyen nou vwar zot pe organiz aktivite pour nou bann dimoun ki pe viv avek en dezabilite.  An gro koman son lobzektif prensipal, sa Konsey Nasyonal i ekziste pou ede e asiste bann dimoun ki pe viv avek en dezabilitie

Mr Deputy Speaker, Mosyon devan nou ozordi pe prouv ek nou ki sa i pa ase.  Nou bezwen al bokou pli lwen ki sa.  Zisteman, Nasyon Ini in ankouraz son bann manm depi 2008, pou sinny e ratifye en Konvansyon ki annan pou fer avek proteksyon Drwa bann dimoun avek dezabilite.  Nou Sesel, nou ti ratifye sa Konvansyon an 2009, preski 5an pase.  Ki nou ti sipoze fer apre ki nou ti’n ratifye sa Konvansyon, Mr Deputy?

Nou ti sipoze garanti ki bann Drwa ki dan sa Konvansyon i ganny entrodwir anba nou bann prop Lalwa.  Se sa ki nou pe demande ozordi.  Koman en pei, apre ki nou ti’n ratifye sa Konvansyon pou protez Drwa bann dimoun ki pe viv avek dezabilite, nou ti sipoze pe vwar bann Minister konsernen pe travay ansanm, pou asire ki, dimoun avek dezabilite i kapab servi transpor piblik e ganny akse avek building piblik.  Se sa ki nou pe demande ozordi apre midi.  Prodwir e delivre lenformasyon ki dimoun avek dezabilite i kapab relye zot lekor avek.  Vedir servi e konpran sa bann lenformasyon.  Se sa ki nou pe demande ozordi apremidi.  Ki dimoun avek dezabilite i rezouir menm Drwa, menm drwa travay parey lezot travayer ordiner.  Se sa ki nou pe demande ozordi apre midi.  Ki malgre zot dezabilite, ki zot kapab annan en Drwa pou fer zot desizyon lo kote zot ti ava kontan viv e reste.  Ankor se sa ki nou pe damande apre midi, Mr Deputy.

Mr Deputy Speaker, letan ki nou pe mazin amelyor lavi e lavenir bann dimoun avek dezabilite, nou Gouvernman pa devret tarde pou pran sa Mosyon ki nou pe prezante apre midi e sa Konvansyon lo proteksyon Drwa bann dimoun avek dezabilite an konsiderasyon.  Mon osi krwar Konsey Nasyonal pour bann dimoun avek dezabilite i devret sa Lorganizasyon ki devret pe

pran bann rekomandasyon anba sa Mosyon, enterpret zot byen e met li an valer.  Pou garanti ki Drwa bann dimoun avek dezabilite i ganny byen proteze.

Mr Deputy, avek lenportans sa Mosyon devan nou apre midi, si mon la, mon pou vot anfaver sa Mosyon.  Mersi.

 

MR DEPUTY SPEAKER

Onorab Sheryl Vangadasamy

 

HON SHERYL VANGADASAMY

Mr Deputy Speaker, Manm koleg Onorab, bonn apre midi.

Lartik 1 of the Universal Declaration of Human Rights i dir, ki ‘All human beings are born free and equal in dignity and rights.’  Nou’n ratifye Konvansyon, the Convention on the rights of persons with disabilities par Nasyon Ini.  Sa nou ti sinnyen le 30 Mars 2007 e nou ti ratifye li le 2 Oktob 2009.  Ki asir full enjoyment of human rights par bann dimoun ek dezabilite ek egalite anba Lalwa.  Dan preanbil nou Konstitisyon, nou deklare ki nou rekonnet the inherent indignity and the equal and inhalable Rights of all member of the human family.  As the foundation  for freedom, justice, welfare, paternity, peace and unity. Ki nou reafirm that these Rights include the rights of the individual to life, liberty and the pursuit of happiness, free form all types of discrimination. Latik 36 nou Konstitisyon i evok Drwa, the age and the disable to special protection, pou fer provizyon rezonnab pou amelyor kalite lavi, welfare e mentenans nou bann aze e dimoun ek dezabilite.  Pou fer proganm spesifikman avek bi pou atenir the greatest possible development of the disabled.

Mr Deputy Speaker, rezondet mon lentervansyon lo sa Mosyon e bi nou deba dan Lasanble ozordi.

Mr Deputy Speaker, dan en monn ozordi kot i annan plis ki 500 milyon dimoun avek dezabilite dapre en Rapor Nasyon Ini e plis sa bann dimoun i dan bann pei mwen devlope.  En estimasyon kot plis ki 60 a 80 milyon dimoun pe viv ek dezabilite an Afrik ozordi.  Dimoun ek dezabilite i estimen i plis ki 10 poursan popilasyon zeneral.  E plis ki 20 poursan popilasyon pli pov.  Toulezour en Afrik, bokou dimoun i ganny dezabilite akoz malnitrisyon, maladi, environmental hazards, dezas natirel, aksidan trafik, oubyen aksidan dan travay, larger e konfli.  Dapre Rapor Rehabilitation International, i estimen ki pli ki 350 a 500 dimoun atraver lemonn i ganny anpite toulezour.  Dapre Rapor Census ki ti fer an 2010, i raporte ki 2.6 poursan nou popilasyon ase 5an anmontan, i raporte pou annan en dezabilite oubyen en impairment.  Ladan, 51 poursan i madanm e 41 poursan i bann Msye.  73 poursan dimoun ek dezabilite i dan zot prime working ages e 11 poursan dimoun ek dezabilite ki parlao laz 60an.

Mr Deputy Speaker.  Dapre sa menm Rapor, 73 poursan nou dimoun ek dezabilite i ekonomikman aktiv.  Avek 75 poursan ki ganny anploye e 16 poursan i self employed. Plis ki 30 poursan bann dimoun ek dezabilite i ganny anploye dan Sekter Prive.

Mr Deputy Speaker.  Governman i asir plis ki R3 milyon par mwan, savedir plis ki R36 milyon par lannen, an form peyman Benefis Sosyal anba Envalidite.  Sa i ekskli okenn lezot lasistans tel ki Carer oubyen Dependent Benefit. Dapre Servis Sosyal e Lasosyasyon Dimoun ek Dezabilite, i Board Medikal ki definir oubyen deklar en dimoun envalid oubyen disable.  Sa sif i ekskli Bidze bann lezot Minister oubyen Lazans, tel ki Minister Lasante, pour bann swen, tretman, lekipman spesyalize pour nou dimoun ek dezabilite.

Mr Deputy Speaker.  Parey loter Mosyon pe demande, pou annan en polisi Nasyonal pour asir akse, aksesibilite dan landrwa piblik pour tou dimoun avek dezabilite, i en demann reel e en demann ki nou pei Sesel pe devlope i merit met alaporte.  Ki nou pe modernize e nou pe avanse.  Me osi, i demontre osi langazman nou Gouvernman.  Nou Parti pandan sa deryen 37an, i fer prev nou ideolozi.  Zonm o sant tou devlopman.  E osi dapre Konstitisyon nou Parti, pou kree en sosyete modern kot tou nou sitwayen i merit ganny loportinite egal.  I annan bokou ki pe ganny fer e komans ganny fer.  Ozordi Lekol Perseverans e Baie Ste Anne Praslin i ekipe avek fasilite pour en zanfan avek dezabilite  Bann dimoun ki pe ganny asiste ek lakaz Perseverans, espesyalman bann ki aze oubyen avek en dezabilite, i ganny priyorite bann lakaz lo ground floor e osi in annan de sirkonstans kot serten modifikasyon in ganny fer a lenteryer sa bann lakaz, pour fasilit nou dimoun ek dezabilite.  Bann lenfrastriktir Perseverans tel ki trotwar in ganny fer avek tel bi.  Nou nouvo Playgroung Paradis Des Enfants in osi ganny konstrir dan sa tel loptik, pou fer li disable friendly.  I bann steps dan en bon direksyon.

Mr Deputy Speaker.  Prenan sn kont tousala e avek bi amelyor kalite lavi, welfare e mentenans nou dimoun ek dezabilite, ki sa Lasanble pe demann en Polisi Nasyonal pour asir aksesibilite dan bann landrwa piblik.  Servis piblik tel ki bis SPTC, nou trotwar pour tou dimoun ek dezabilite.  Tout an prenan kont ki Konstitisyon i asir Drwa nou dimoun ek dezabilite e ki Lotorite Planning ki annan manda tou devlopman dan pei, dapre the existing Town and Country Planning Act e regilasyon, i annan zis en morso sa Lalwa ki kategoriz serten batiman dan pei pou serten nou dimoun aze oubyen ek dezabilite.  Alors sa Lasanble pe demann sa Minister konsernen pou reviz sa Lalwa, pou asir aksesibilite dan bann landrwa piblik e serten gran batiman komersyal.  Nou pe osi lans en lapel ek Minister Litilizasyon Later ek Lakaz ki pe antreprann konsept Greater Victoria, pou met bann lenfrastriktir e mezir anplas, ki neseser pour nou dimoun ek different needs.  E nou osi bezwen et realis e konsyan ki mondernizasyon nou bann akse ki neseser i vin avek en kou.  E alors kot nou tou, individyelman, kot nou kapab ede e kontribye.  Kot nou envit Sekter Prive pou angaz li pou ed e siport Governman.  Kot nou bann Lorganizasyon Non-Gouvernmantal i vin pli proaktiv pou ede osi dan sa demars.  Kot i en polisi Nasyonal pour nou Kominote e nou Pep.  Kot nou tou nou santi nou angaze pou annan en Sesel pli disable friendly.

Mr Deputy Speaker, dan en rezyon Lafrik, kot i annan bokou pou fer e adrese lo sa size, kot dapre en Rapor World Bank lo Sub-Saharan Africa, ki’n ganny dir ki i the most important development challenge of the 21st Century. Kot dimoun ek dezabilite i envizib an term development initiatives.  Kot plis ki milye dimoun ek dezabilite ki vwar zot lekor koman bann potential and willing contributors dan zot fanmiy, oubyen dan aktivite ekonomik dan zot pei, zot ganny met dekote e marzinalize dan lasosyete.  E parey mon’n komanse e Sesel koman en zenn demokrasi, nou lo bon semen.  Nou’n byen komanse e pou atraver sa Mosyon, nou pe damande ki keksoz i amelyore.  Kot nou fyerman krwar ki all human beings are born free and equal indignity and rights.

Mr Speaker, mon sipor pour sa Mosyon.  Mersi.

 

MR DEPUTY SPEAKER

Onorab Jeannevol.

 

HON BEGUITTA JEANNEVOL

Mersi Mr Deputy.  Mr Deputy antretyen ek Madanm Colette Juleau Zedi swar lo Televizyon SBC, letan i ti pe koz lo son liv ‘En lot pei anba lanmer,’ ti anmenn mwan ver  en refleksyon lo bann dimoun avek dezabilite.  An eksplikan moral par deryer son liv, Madanm Juleau ti dir ki ti annan en pwason ki ti napa lizye.  Vedir i pa ti vwar kler.  En lot, son sans pou tande ti zero.  E alors, zot ti ed kanmarad pou zot kapab viv dan sa pei anba lanmer.  Ki montre ki malgre ki zot ti annan en dezabilite, i annan en lot parti ki fonksyonnen e zot ti alors servi sa pou zot kapab viv pli byen

Mr Deputy, alors mon ti demann mon lekor sa kestyon.  Me nou bann Manm Lasanble, ki nou pe fer pou nou ed nou bann dimoun ek dezabilite viv pli byen dan sa pei isi lo later?

Mr Deputy.  An reafirman karakter inversel endivizib, enter-depandans e enter-ralasyon tou bann Drwa Imen, e tou bann laliberte fondamantal ek nesesite pou dimoun avek dezabilite ganny garanti en lanplwa  san diskriminasyon.  An rekonesan ki dezabilite i en konsept ki pe evolye e ki dezabilite i en rezilta enteraksyon ant dimoun avek serten difikilte e bann baryer dan lanvironnman ek latitid dimoun, ki anpes zot partisip efektivman dan lasosyete lo en baz egal avek lezot.  Sa i ektre preanbil Konvansyon lo Drwa bann dimoun avek dezabilite, ki Sesel in osi sinnyen.  E ozordi, en Mosyon devan nou Lasanble ki koz pou nou bann dimoun ek dezabilite.  Parey Loter Mosyon in spesifye, dan nou sosyete ozordi, en dimoun ek dezabilite pa ganny sans pour li depan antyerman lo limenm, ni menm pou en lazournen.

Premyerman, pou li ariv en landrwa, i pou bezwen pran Taxi e si i dan en wheel chair, la i pou bezwen led en lot dimoun ankor pour ed li tir li dan wheel chair, met dan sa transpor e an arivan dan sa landrwa, retir li ankor dan transpor, met dan wheel chair. Bokou batiman kot i pou anvi ale, napa en lift.  Napa en toilet spesyal pou li.  Pavement napa ramp pou ed li desann tousel, amwen serten ki nou pe modifye ozordi.  E si i pa vwar kler, i pa pou ni kapab travers larout, menm si pou annan traffic light akoz sa osi in fer pour zis bann ki vwar kler.

Sa i zis legzanp ki montre ki malgre nou’n sinny sa Konvansyon, i reste nou ankor bokou pou fer, pour asir en respe total anver Drwa Imen bann dimoun ek dezabilite.  Kimannyer nou kapab fer alor pou amelyor sa?

Mr Deputy, permet mwan ilistre legzanp.  An Frans, anlinny ek Lartik 20 sa Konvansyon, Larepiblik Franse i asir mobilite person, ek dezabilite par sa fason.  En dimoun ki dan en wheel Chair, malgre i reste lo premye ouswa li senkyenm letaz, i kapab arive anba lo trotwar litousel san led personn.  Ariv anba lo pavement, i annan akse ek son wheel chair, pou li ariv ziska lo bus stop litousel.  E letan ki bis i arive, i annan en landrwa spesifik kot li i pou antre, swa par laport akote, ouswa par deryer, kot i pez en bouton andeor bis e la i annan en bout ki sorti parey en pon, ki permet li roul son wheel chair lo la e antre dan bis.  Ankor dan bis ki tre disable friendly, i annan gran lespas ki ganny garde pour li plas son sez e i met li lo fren e la i an sekirite dan bis.  En kalite bis ki petet pou kout SPTC en kantite larzan.  Me en lenvestisman anver dimoun ek dezabilite ki pou vo lapenn.  I osi enportan get sa lenvestisman a lon term.  En senp legzanp.  En dimoun ki zis pa kapab marse, i bezwen en wheel chair e en dimoun ki pou al ek li partou.  Ek en tel kalite servis ki fasilman aksesib pou li, sa dimoun pou kapab petet al travay, ganny en reveni pou li e son fanmiy e donk kontribye dan larises pei,  e osi kou ki ti pou bezwen pou pey en Carer pou reste ek li lazournen antye, ou si non son paran ki pou bezwen kit travay pou reste ek li.  Anmenn li Anvil, anmenn li kot Dokter, kot petet la osi i ti pou bezwen pey en Taxi ki kout pli ser ki en bis.  Tou sa pou nepli annan.  Alors, en rediksyon dan lakantite larzan pou okip zot e zot osi zot pou a pe prodwir dan pei.

Mr Deputy.  Mon asire ki sa pou ogmant lazwa de viv sa bann dimoun, letan ki zot pou santi zot, zot osi endepandan parey lezot.

Mr Deputy.  Si nou pou koz lo ledikasyon ek formasyon nou bann dimoun ek dezabilite, lo sa kote, Sesel in akonplir bokou.  Me parey Mosyon in ganny lir, nou ankor annan bokou pou fer, pour asir aksesibilite dan bann landrwa piblik pour sa bann dimoun, akoz i menm annan ki  pa kapab al dan en lekol parey tou lezot, zis akoz i pa kapab mont peron pour ariv kot son laklas.

Pou konklir Mr Deputy, nou bezwen aksepte ki lefe ki wi nou annan en group dimoun ki viv ek en dezabilite, ki fer zot enpe diferan ek lezot.  Me personn pa ti demande.  I kapab mwan demen par en aksidan.  I kapab ou zanfan demen.  I kapab li osi par en malad, ki rann li enkapab pou fer sa ki i pe kapab ozordi.  Alors, nou bezwen fer en keksoz pou amelyor zot lavi.

Se pour sa rezon ki mon pou donn tou mon sipor pou sa Mosyon e mon pe demann tou Manm Lasanble osi pou siporte. Mersi.

 

MR DEPUTY SPEAKER

Onorab Ghislain.

 

HON CHANTAL GHISLAIN

Mersi Mr Deputy.  Mr Deputy Speaker, parey tou dimoun lavi i anvoy bokou defi e bann ki pe viv avek en dezabilite sa bann defi i pli gran, lefet ki zot bezwen fer fas avek en kantite keksoz tel ki mal-konprenezon, lakseptans lapresyasyon e menm rekonesans.  En pti regar lo Konvansyon Nasyon Ini lo Drwa Imen e menm nou prop Konstitisyon, bann Drwa tel ki Drwa Lavi, Drwa Lasante, Drwa Ledikasyon e bokou lezot Drwa ki en imen i annan, i pa fer distenksyon ras, kalite, abilite ouswa kouler.  Donk, i kler ki i pa osi fer distenksyon ant abilite e dezabilite, ki fer en dimoun dezabilite i annan menm Drwa ki tou lezot dimoun.  Mosyon pe demande ki Gouvernman i adopte en Polisi Nasyonal, pou asir aksesibilite dan landrwa piblik, pour tou dimoun avek dezabilite.  Me i byen note, osi ki nou pa kapab koz lo sa Mosyon san fer referans a sa pattern devlopman ki’n la pour plis ki 2 deseni.  En pattern devlopman tre dousman me defini ki’n evolye dan domenn dezabilite ek reabilitasyon, ki konmela i byen koni atraver lemonn koman Community Based Rehabilitation ouswa (CBR).  E isi an kreol nou pou dir sa Reabilitasyon a Baz Kominoter.  Sa prosesis reabilitasyon i annan 5 konponan mazer ladan.  Sa i lasante, ledikasyon, mwayen pour viv, abilite e byensir sosyal.  Byensir sa Mosyon ozordi devan Lasanble, i pe koz lo en sa  konponan, e sa se sosyal.  E zeneralman, se ki  bann dimoun avek dezabilite i devret viv en meyer lavi.  Nou pa kapab kontinnyen devlope me bliy enpe bann laspe Drwa Imen nou Konstitison.  Avan tou, i byen note ki definisyon en dimoun dezabilite i vedir en dimoun ki pe viv avek en dezabilite fizik ouswa mantal, ki in ganny swa par en aksidan, blesir, maladi ouswa en diformite ki in ne avek.  Donk, zis sa definisyon i sifi pou fer nou tou reflesir bokou.  Pe enport ki pozisyon nou ete ozordi, en zour, nou kapab nou osi trouv nou dan sa sityasyon, kot nou bezwen viv avek en dezabilite kelkonk.

Pour bokou dimoun dan lemonn ozordi, i ankor en gro problenm pou zot resevwar led pour zot dezabilite.  Me sa pa telman leka isi Sesel, parey swen lasante primer, dimoun avek dezabilite pe resevwar menm latansyon e tretman.  Bokou in fer pou entegre dimoun avek dezabilite dan sosyete.  Reabilitasyon lo baz kominoter i annan pour bi amelyor kalite lavi bann dimoun avek dezabilite e zot fanmiy, satisfer bann bezwen debaz e asire ki zot partisipe e ganny enkli dan kominote e sosyete.  Lide deryer sa reabilitasyon debaz kominoter, i ki dimoun avek dezabilite i devret ganny drwa viv byen.  Zot devret ganny Drwa a ledikasyon, parey nenport ki.  Zot devret ganny en travay e zot devret ganny sans partisip aktivman dan aktivite zot kominote.  Donk, i alors tre enportan, apropriye, ki nou fer tou pou asire ki tou dimoun i ganny akse avek bann landrwa piblik e servis.  Bann Manm ki’n koz avan mwan, zot in fer en tour dorizyon lo bann diferan fasilite ki nou bann dimoun avek dezabilite pou bezwen, ki fer mon pa pou bezwen repet tousala.

Me mon pou partaz leksperyans en zenn Kenyan ki ozordi, i pe viv avek en dezabilite ki in gannyen swivan en maladi.   Mon ti zwenn sa zenn garson okour en Seminar  pour bann Zournalis Sport, Lagres.  Sa garson i rakonte  ki en zour i ti pe esey antre dan magazen.  I ti anvi mont leskalye pou ariv dan en magazen, alors i ti demann en Msye ki travay la pou ed li fer monte son wheel chair.  Me en lot zonm ki ti pe debout obor sa asistan probableman, i pe rakont mwan ki ti met sa magazen, ti retir en Shilling dan son pos e dir avek sa asistan, donn sa garson dan wheel chair.  Anthony i apele sa garson, i rakonte ki i ti sitan blese, lefet ki pa ti en mandyan e i ti pe zis demande ki pou fer avek en Shilling, kan dan son pos ti annan plis ki 3 mil Shilling e menm avek sa larzan, i pa ti kapab ganny sa ki i bezwen.

Sa lensidan i montre ki persepsyon dimoun ki zot annan lo bann dimoun avek dezabilite, se ki bann dimoun avek dezabilite i bann lobze lasarite.  Si en dimoun avek en dezabilite i demann en led, nou devret rode ki kalite led i bezwen, olye zis prezimen i bezwen ou lasarite.  Isi Sesel, nou kontan ki sa pa arive avek nou.  Mon leker ti byensir oule desire sa zour, ler mon mazin mon’n pti pei Sesel, akoz konmela, nenport ki dimoun avek dezabilite, nou regard li parey nenport ki dimoun ki akonte nou.

E mon ti bezwen zis riye, ler i ti rakont mwan en lot lensidan dan en Supermarket, kot i ti abitye ale.  E zis en Sekirite en zour i dir ek li  koumsa, ozordi ou pou bezwen kit ou wheel chair deor e pran wheel chair ki Supermarket i donnen.  Problenm, se pa sa lord ki ti’n sorti, me sa difikilte pou sanz sa wheel chair ki ti son problenm.  I ti alors dir ek sa Sekirite, si i pou bezwen ozordi sanz son wheel chair e servi sa ki Supermarket i donnen, i demande ki tou dimoun osi ki antre dan sa Supermarket zot alors kit zot lipye deor e servi lipye ki sa Supermarket i donnen.

An konklizyon, mon dir menm si en dimoun avek dezabilite i bouz dousman ouswa annan problenm pou vwar e tande, oubyen trouve li difisil pou sikile, zot devret ganny menm sans pou zot ganny respekte, akoz zot bann zonm e fanm, fiy e garson.  Personn pa devret ganny mal regarde ouswa resevwar move tretman, zis akoz zot annan en dezabilite.

Bann lakaz, laboutik, lekol, semen, i devret ganny konstrir, dan en fason ki tou dimoun i kapab fasilman antre e sorti e servi sa bann fasilite.  Mersi Mr Deputy.

 

MR DEPUTY SPEAKER

Onorab Pierre

 

HON DAVID PIERRE

Mersi Mr Deputy.  Mr Deputy dan Sesel, dimoun ek dezabilite pe viv dan en monn ki’n ganny design pou bann dimoun ki kapab.  Se pour sa rezon amonavi, ki sa Mosyon in ariv la devan nou ozordi. Dan en kantite ka, menm si bann dimoun isi Sesel zot anvi viv en lavi ki pa diferan ek sa kalite lavi ki nou, nou pe viv, zot pa kapab.  Zot pa kapab akoz bann fasilite ki pou permet zot kapab viv zot lavi as close to normal as possible i senpleman pa egziste.

Bann dimoun avek dezabilite i annan bann bezwen, i annan bann needs parey nou.  Souvandfwa letan ou koz avek zot, zot pou dir avek ou, mwan osi mon anvi al en pti kou lo lans.  Oubyen mon osi mon ti avar kontan al get en film. Oubyen, mwan osi mon ti ava kontan al fer mon ti shopping.  Me selman malerzman, lafason ki sosyete i ete ozordi, nou pa’n cater pou the needs of sa bann dimoun, ki pou ed zot pou zot kapab viv sa kalite lavi ki zot dezire pou zot viv.

Mr Deputy, sa i rann lavi sa bann dimoun souvandfwa tre malere.  E sa, letan ou koz avek zot, i menm fer zot reject lefe ki zot annan en dezabilite.  E souvandfwa, pou aksepte dezabilite e pour zot redefinir.  Pou zot sey redefinir zot lavi within sa limitasyon enpoze par zot dezabilite, i enn bann pli gro hurdles ki bann dimoun avek dezabilite i fer fas avek.

Souvandfwa Mr Deputy, zot zis vwar zot dan bann sityasyon kot zot perdi lespwar.  Isi Sesel bann senp lekipman ki nou ti kapab asiste bann dimoun avek dezabilite avek, i zis pa la.  I zis pa ekziste.

Letan ou al bann Konferans aletranze, ou souvandfwa vwar bann dimoun avek dizabilite tre mobil.  Par egzanp, ou pou vwar dimoun pe pase dan bann semen ki spesifikman ganny konstrir pou zot, lo bann mobility scouters, par egzanp.  Ou vwar bann adapted vans, bann bis, bann transpor ki spesifik, oubyen ki spesifikman annan bann fasilite pour bann dimoun avek dezabilite, ki fasilit zot tansportasyon.  Ou vwar sa bann transpor i ekziste.  Be isi Sesel, nou pa vwar gran zefor ki’n ganny fer pou nou kapab ariv lo sa nivo.  Mon krwar moman in arive e loter sa Mosyon in fer sorti bann pwen enportan, ki fer nou realize poudir moman in arive pou nou al dan sa direksyon.

Ozordi, nou pe ariv ver lafen bann – ver lafen sa bann MDG’s.  Nou pe al review kote nou’n arive, an relasyon avek bann MDG’s ki’n ganny etablir 15 years ago. Right.  E yer nou fek annan en sort of en workshop lo la.  Sa Mosyon i fer mwan realize poudir menm si nou’n attain laplipar bann lobzektif sa MDG, lobzektif ki pou retir bann dimoun avek dezabilite lo sa nivo lavi ki zot pe viv, sa enn nou pa’n meet. E mon krwar poudir nou bezwen koman en pei, fer en refleksyon profon lo sa sityasyon.

Mr Deputy, bokou bann assistive equipments ki en dimoun avek dezabilite i bezwen pou li servi pou rann son lavi pli ere, i pa ekziste isi.  E menm si i vini, i vin a en pri ki vreman egzorbitan.  So, alor in ler pou Gouverman vwar kimannyer i kapab par egzanp, asiste sa bann dimoun, par fer sir ki bann taxes ki ganny mete lo sa bann lekipman, petet i ganny retire kot i annan, pou fer li pli aksesib an term pri pour sa bann dimoun ki pe rod bann tel lekipman.

En lot keksoz ki ekziste isi me ki mon santi i pa ganny fer dan lafason ki i devret, se lafason ki lasistans i ganny donnen a nou bann dimoun avek dezabilite.  Ozordi, nou tou nou konnen poudir lavi i vin pli ser e nou konnen poudir kapasite pou en dimoun ek dezabilite pou li travay, i touzour diminnyen.  Zot ganny – dan sa ka, sa i donn zot en lensekirite finansyel.  E lefe ki zot annan en lensekirite finansyel e donk en fitir ki pa sekir, i normal ki Gouvernman i antre e donn zot serten lasistans.  Me ler ou koz avek bann dimoun ki ganny sa bann lasistans, sa realite ki sorti i se ki souvandfwa sa lasistans i pa ase, oubyen sa lasistans i ganny donnen dan en fason ki i pa efektiv.  E la mon pou pran 2 legzanp.

1, legzanp lasistans en Carer pour en vyeyar avek dezabilite.  Mon fek dan lunch time pe koz avek en pti zanfan ki annan en vyeyar avek dezabilite.  Sa pti zanfan i travay e i pe eksplik mwan kimannyer i ti ava kontan si sa lasistans – akoz sa dimoun i annan en dezabilite, si sa lasistans ti kapab vin 24 lo 24 e 7 lo 7.

Mr Deputy, malerezman i dir mwan sa lasistans pa vin dan sa fason.  Ler ou koz avek en dimoun lo sa larzan ki i gannyen, souvandfwa i pou dir ou poudir sa lasistans finansyel i happy ki i gannyen.  I greatful ki i gannyen, me i ti ava voudre ki sa lasistans i ogmante, pou li kapab fer fas avek sa lavi ki dezour an zour i vin pli ser.  So, mon krwar poudir moman in arive pou nou koman en pei, met nou lanmen lo la, reviz sa e fer li dan en fason ki i anmenn plis konfor pour sa dimoun ki annan sa dezabilite, akoz viv avek en dezabilite i fermal.  E parey entervenan avan mwan in dir, sa i kapab ariv avek nenport nou ki la dan sa Lasanble Nasyonal.  Demen ou pe drive, oubyen ou en landrwa ou ganny en aksidan e ou vwar ou end up avek en dezabilite permanan.

Mr Deputy, letan mon’n vwar sa Mosyon lo Order Paper, in fer mwan koz – in fer mwan ale e koz avek bokou dimoun ki annan dezabilite akoz mon’n anvi refer sorti dan Lasanble ozordi, bann realite ki sa bann dimoun i fer fas avek.  En dimoun avek dezabilite pou dir ou, son dezabilite i vin pli fermal e i vin pli konsyan parfwa lafason – parfwa atraver lafason ki nou, bann dimoun ki napa en dezabilite fizik, nou tret sa bann dimoun.  Nou vwar poudir par egzanp, enn sa bann dimoun ki’n koz ek mwan, in refer sorti avek mwan.  I dir mwan, i annan bokou dimoun ki ankor insensitive, an relasyon oubyen vizavi avek en dimoun ki annan dezabilite.  I dir mwan, i annan bokou dimoun ki ankor rude avek zot.  I annan bokou dimoun ki ankor very inconsiderate. I annan dimoun ki vreman pesimistik e i annan dimoun ki very, very unhelpful.

Mr Speaker, en dimoun ek dezabilite i dir mwan, en zour i Anvil e en sel keksoz ti kas son koul e fer li anvi retourn se li.  Ti zis lafason ki en dimoun ti stare at li.  As if sa dimoun premye fwa ti vwar en dimoun ek en dezabilite.  As if ti vwar li drol.  As if pour li, sa dimoun avek sa dezabilite konmsi, ki ou pe fer Anvil?  E pour sa dimoun avek sa dezabilite, i dir mwan poudir sa ti fer li imedyatman santi li enkonfortab e i ti anvi retourn dan lakour.

En lot i dir mwan, en fwa i ti pe fer en keksoz e letan i ti pe fer sa, i ti pe senpleman bar en dimoun ki ti par deryer li.  E i dir mwan sa dimoun i vini, i vin ed li pou li fini, me i vin ed li dan en fason ki ou konnen, ou pe bar mwan.  Degaze sorti dan mon semen.  Ou pe bar mwan, pou mwan kapab fer sa ki mwan, mon anvi fer.  Pou mwan kapab fer sa ki mwan, mon annan pou mwan fer.  E mon krwar Lasanble Nasyonal i devret lans en lapel avek dimoun.  Nou devret vin pli pozitiv.  Nou devret pli pare pou rann sa bann dimoun en servis.

Mr Deputy, i menm annan dimoun ki al dan serten landrwa e i annan bann parkings ki’n rezerve spesifikman pour bann dimoun avek dezabilite e nou antre nou park nou tranpor la.  Mon kwar Lasanble Nasyon i dan en pozisyon ozordi, pou li anvoy en mesaz avek tou Seselwa e dir zot, sa bann dimoun i annan bann bezwen spesyal e se nou Lepep Seselwa ki napa sa dezabilite, ki devret pe fer tou sa ki nou kapab pou donn sa bann dimoun sa bann kalite lasistans ki kot bezwen, pou ed zot pou zot kapab fer fas avek lavi dan en fason pli normal posib ki zot kapab.  En senp pti task ki nou, nou take it for granted.  Ki fasil pou nou, i kapab en burden pour en dimoun avek en dezabilite.  E souvandfwa en lasistans dan en fason pozitiv sorti kot nou, i rann lavi sa dimoun bokou pli aimable e bokou pli fasil.

Mr Deputy, nou’n koz lo bann Drwa ki bann dimoun avek dezabilite i annan.  E nou’n koz lo nou Konstitisyon.  Drwa Travay i en bann Drwa fondamantal ki en dimoun avek dezabilite i annan.  Me selman, nou konnen poudir lamazorite bann landrwa travay isi Sesel pa’n ganny fer pou accommodate bann dimoun avek dezabilite.  So, menm si en dimoun pou al rod en travay, aksesibilite avek son landrwa travay i deza vin en problenm.  E la mon dakor ki nou bezwen sanz Lalwa pou fer li posib pou bann owners of bann diferan Letablisman, ki se swa i Gouvernman oubyen i Prive.  Nou fer bann sanzman adekwa e neseser ki pou permet bann dimoun avek dezabilite kapab antre dan sa bann building. E si zanmen zot pou ganny en travay, i fasilit zot akse avek sa bann landrwa travay.

Mon krwar moman in arive pou nou kapab get sa dan en fason profon, dan en fason realistik e adopte bann  sanzman neseser pou fer lavi, pou rann lavi nou bann dimoun avek dezabilite bokou pli ere ki i ete ozordi.

Mr Speaker, lapovrete avek dezabilite.  Atraver lemonn, laplipar, la grann mazorite dimoun ki annan dezabilite, zot osi pov.  Zot osi pov akoz zot pa kapab ganny akse avek bann bezwen debaz ki zot annan e zot pa kapab travay akoz zot pa kapab ganny akse avek bann landrwa travay.  Oubyen, zot pa kapab ganny bann skills, ganny bann training, pou zot devlop bann skills ki neseser, pou zot kapab antreprann en travay.  E tou sa bann keksoz i bann keksoz ki devret konsern nou.

Dimoun ki annan dezabilite, parey en entervenan avan mwan, Onorab – si mon pa tronpe, Onoran Vangadasamy in refer sorti, sa bann dimoun dan bokou pei zot ganny marzinalize.  Zot ganny met en kote.  Annou, nou Sesel koman en pei, reverse sa trend.  Annou olye marzinaliz sa bann dimoun, annou ed zot.  Sa bann dimoun souvandfwa, zot annan en overall health ki pli pov ki bann dimoun ki napa dezabilite.  Zot annan en lower educational achievement and therefore, zot annan fewer employment possibilitiesSo, enkor sa i fer ki bann dimoun avek dezabilite i annan en higher rate of poverty. So, si nou pa anvi ki nou bann dimoun avek dezabilite i viv en lavi ki pov, nou bezwen vwar kimannyer nou kapab ed zo,t par egzanp achieve en pli o standar ledikasyon.  Nou bezwen ed zot achieve – nou bezwen ed zot e donn zot pli gran loportinite lanplwa, kot zot kapab earn en saler e viv parey en dimoun ki napa dezabilite.

E Mr Deputy, parey mon pe dir, enn bann pli gran kontribiter pou fer ki bann dimoun avek dezabilite pa kapab achieve sa bann keksoz ki mon’n fek koz lo la, i pa sa dezabilite li menm li, i sa lack of access to bann servis ek bann fasilite.  E se sa ki mon ti ava kontan sa Mosyon i fer sorti.  E se sa mesaz ki mon ti a kontan ozordi nou anvoy avek Lotorite.  Annou vwar kimannyer nou kapab donn sa bann dimoun akse ek sa bann servis, ek sa bann fasilite pou zot debrouye.  Mon krwar sa i enn bann keksoz ki vreman enportan.

Mr Deputy, mon ti pe lir en Lartik lo Internet, an relasyon avek bann dimoun ki annan dezabilite.  E sa Lartik in fer mwan mwan reflesir en kantite.  E i dir poudir enn bann key challenges ki bann dimoun avek dezabiliti i fer fas  avek, i the lack of access to basic sanitation Ler ou get Sesel, si ou dir sa en dimoun, i pou dir ou be Sesel tou bann dimoun, nou annan bon akse avek bon sanitasyon.  Me selman letan ou al pli profonnman ou reflesir, ou realize poudir be bokou dimoun avek dezabilite Sesel, zot pa ganny akse avek bon sanitasyon, pa akoz sa fasilite  par ekziste, me akoz zot menm zot, zot pa kapab ganny akse avek akoz zot annan en dezabilite.  The facilities i la pou li al dan en toilet.  I annan toilet dan lakaz.  Be sa dimoun li menm li souvandfwa i vwar li difisil pou li al ganny akse avek sa toilet, unless i annan en dimoun ki la, ki pe ed li 24 lo 24.

Parfwa ou vwar en sityasyon kot en dimoun pe al dan en toilet, i pe mars ater.  I pe met son lanmen ater, i pe servi son lanmen akoz i pa kapab mars lo son 2 lipye.  I me pe servi son lanmen pou ed li pou li kapab vin mobil e pou li ganny akse avek sa toilet.  E nou pa kapab aksepte ki sa bann keksoz i ankor ekziste.  Alors mon krwar i normal pou nou fer sir ki dan lakour oubyen dan bann landrwa pilik, nou annan bann fasilite sanitasyon ki allow en dimoun avek dezabilite pou easily ganny access avek sa servis.  Pour easily ganny access avek sa fasilite.  Mon krwar i enn bann keksoz ki nou devret vwar e nou fer sir ki nou amann nou bann Lalwa, pou garanti ki sa bann fasilite i vinn en must.  Ler bann buildings i ganny konstrir.  Bann nouvo buildings i ganny konstrir, nou bezwen pran an konsiderasyon lefe ki i annan dimoun avek dezabilite  ki pou vin servi sa bann buildings. E nou fer nou konstriksyon dapre sa.  Dapre sa bann bezwen.

Mr Deputy, en lot keksoz ki enportan, se nou pe koz lekol.  I annan 2 keksoz ki enportan pou nou fer sorti an relasyon avek fasilite edikasyonel.

1, se ki bann fasilite ki annan dan sa Lekol, tel parey bann teknolozi, ki ed en dimoun avek serten dezabilite pou li aprann e apre nou bezwen fer sir ki i ganny konstrir dan en fason ki bann dimoun avek dezabilite i kapab ganny aske avek laklas, i kapab ganny akse avek building.  Si nou anvi ki bann dimoun ki annan dezabilite i sorti parmi bann dimoun ki viv dan lapovrete, nou bezwen kapab ed zot devlop zot kapasite.  Par egzanp, en dimoun ki annan en abilite, fizik, i pa neseserman annan en dezabilite entelektyel, therefore nou devret kapab donn sa dimoun sa posibilite pou li devlop son kapasite entelektyel, pou ki pli tar i kapab ganny en travay e travay pou li kapab sonny son lekor e sonny son fanmiy, rather than having to depend lo bann lasarite obyen lo bann lasistans ki Governman i donnen.

Mon krwar sa Mosyon in vin a en bon moman.  Mon krwar i en Mosyon ki enportan e mon krwar poudir by voting for the Motion, nou ava pe anvoy en mesaz for out there avek kominote Seselwa, avek lotorite, avek Sekter Prive, pou zot fer bann sanzman ki neseser pou fer sir ki nou  koman en Nasyon, koman en Sosyete, nou pe fer tou sa ki nou kapab pou ed bann dimoun avek dezabilite pou rann zot lavi enpe pli meyer, pour ki zot osi zot viv en lavi ki as close to normal as possible.

Avek sa mon a dir ki mon pou siport sa Mosyon.  Mersi Mr Deputy.

 

MR DEPUTY SPEAKER

Onorab Lebon, Right Of Reply.

 

HON LENNY LEBON

Mersi Mr Deputy.  Premyerman Mr Deputy, mon ti a kontan remersi tou bann Manm ki’n entervenir lo mon Mosyon, kot Onorab Fideria in tous enpe kot annou bouz devan, travay pankor fini.  In realize poudir Sesel ozordi nou’n fer en kantite pour dezabilite e ozordi, konzantir ekonomik i montre poudir nou kapab fer plis ankor.

Onorab Samson in koz en pti pe lo Lalwa prensipal ki anlinny avek Konsey Nasyonal avek dezabilite.  In osi fer referans avek Konvansyon Nasyon Ini lo Drwa bann dimoun avek dezabilite.

Onorab Vangadasamy li in kouver enpe lo Lalwa – fer referans avek sa Town and Country Planning Act.  E kot regilasyon ki Gouvern Devlopman dan pei, i rekomann revizyion sa Lalwa pou al pli detay, pou asir akse dan landrwa piblik pou bann dimoun avek dezabilite.

Onorab Jeannevol in met lanfaz lo en lenvestisman dan lenfrastriktir e transpor piblik, pou akomod bann dezabilite e sa i pou otomatikman ogmant zot prodiktivite pei, akoz sa bann dimoun petet pe kapab trouv en lanplwa.  Alors, in fer resorti ki i en lenvestisman a lon term, kot pei pou benefisye.

Onorab Ghislain li in koz en pti pe lo pattern devlopman.  E in tous sa ki nou apel sa CBR, kot in met lanfaz en pti pe lo Reabilitasyon a baz Kominoter.

E osi Leader Lopozisyon, kot in fer resorti ki bann dimoun avek dezabilite i annan bezwen e needs.

Mr Deputy Speaker, Mosyon ki la ozordi, i pe demann Gouvernman pou adopte en Polisi Nasyonal, pou asir aksesibilite dan landrwa piblik pou tou dimoun avek  dezabilite.

Parey mon’n fer resorti ki definisyon e adopsyon en Polisi Nasyonal lo dezabilite ava en lapel senser pou aksyon a tou nivo dan sosyete.  Avek sa 2 pti mo, mersi.

 

MR DEPUTY SPEAKER

Bon, lo sa Mosyon nou pran en vot.  Tou Manm ki anfaver lev zot lanmen?  Inanim.  Mosyon in ganny aprouve.

Nou pou aret la pou ozordi e nou pou rezwenn Mardi prosen, le 11 Novanm.

(ADJOURNMENT)