::
Home » Verbatim » Verbatim -- Third Term 2014 » Tuesday 23rd September, 2014

Tuesday 23rd September, 2014

NATIONAL ASSEMBLY OF SEYCHELLES

Tuesday 23rd September

The Assembly met at 9 am

National Anthem

Moment of Reflection

Mr Speaker in the Chair

 

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.  Bonzour tou bann ki pe ekout nou dan lakour.  Ozordi avek nou, nou annan Minis pour Zafer Sosyal, Devlopman Kominoter ek Spor, Minis Vincent Meriton ki’n vin reponn plizyer kestyon konsernan sa Minister.  Nou pou komans avek kestyon 122, Onorab Marc Volcere.

An bon, mon krwar avan nou demann kestyon Onorab Volcere, an vi sa ki nou apel inter-connectiveness, kestyon 122, 123 ek 128 Minis in dakor ki i ava pran tou le 3 kestyon ansanm, alor mon pou envit oter sa 3 kestyon pou demann zot kestyon.  Nou a komans avek Onorab Marc Volcere.  Request.  Ki problenm ?  Onorab Samson sey get kot ou enkou.  The whole system i downRequest Onorab Volcere.

 

(Technical Problem)

 

MR SPEAKER

Request Onorab Volcere.

 

HON MARC VOLCERE

Mersi Mr Speaker.  Bonzour Mr Speaker, bonzour Minis ek ou delegasyon, bonzour tou Manm Onorab, bonzour tou dimoun ki a lekout.

Mr Speaker, mon ti a kontan demann Minis, avek bi pou asire ki nou ganny valer pou larzan ki ganny depanse lo bann proze dan distrik, mon ti a kontan demann Minis pour Devlopman Kominoter si son Minister i annan plan pou met en zofisye lo Praslin pou monitor bann proze ?  Mersi.

 

MR SPEAKER

Kestyon 123.

 

Hon Derek samson

Mesrsi Mr Speaker, bonzour tou dimoun.  Mr Speaker eski responsab pour Departman Kominoter i kapab eksplik lepep Seselwa, prosedir lenplimantasyon bann proze distrik ki tonm anba son Minister?  Mersi.

 

MR. SPEAKER

Kestyon 128, Onorab Meggy Marie.

 

HON MEGGY MARIE

Mersi Mr Speaker.  Bonzour tou manm Onorab.  Mr Speaker, anvi ki nou pe promot plis aktivite sportif dan distrik, eski Minis responsab pour Devlopman Kominoter i kapab dir ek nou Lasanble ki pe arive avek reparasyon court Anse Aux Pins? Mersi Mr Speaker.

MR SPEAKER

Bon mon ava envit Minis pou pran tou le 3 kestyon ansanm.

 

MINISTER VINCENT MERITON

Bonzour Mr Speaker, bonzour tou Manm Lasanble, bonzour tou bann oditer ki alekout.  I en plezir ankor enn fwa pou vin devan zot pou reponn kestyon ki tonm anba portfolio mon Minister e mersi pou zot aswaf lenformasyon kot i konsern bann travay ki nou pe fer.

Mr Speaker depi Zanvye 2009 Departman Kominoter pe swiv Procurement Act 2008 pou enplimant son bann pti proze dan distrik.  Prosedir pti proze distrik i konm swivan:  Ki kalite proze?  Lekel ki benefisye i ganny diskite e deside dan distrik menm.  Apre ki distrik in deside i anvoy en lalis kot Departman Devlopman Kominoter.  Tou proze lo lalis i ganny vizite par Zofisye Proze avek Ladministrater Distrik e sak proze i ganny prepare.  En bidze pou sak proze i ganny prepare e totalite bidze proze dan sak distrik i ganny prepare e normalman i lavaler R1 milyon par distrik e ler sa in fini ganny prepare i anvoy anba kot Departman Devlopman Kominoter.

O komansman sak lannen, en Procurement Plan i ganny prepare par Departman pou gid li dan lenplimantasyon bann proze.  Kopi sa plan i ganny soumet avek Procurement Oversight Unit avek Minister Finans.  Apre sa, proze i ganny tender dapre cycle oubyen dapre lo ki lo Procurement PlanTender i ganny pibliye dan Nasyon e lo sit enternet National Tender Board.  Kontrakter ki enterese i aste en kopi tender e i soumet son tender kot National Tender Board zour e ler ki’n endike lo dokiman tenderTender i ganny ouver piblikman dan lasal National Tender Board.  Bann tender ki’n ou ouver i ganny verifye par seksyon proze Departman Devlopman Kominoter pou fer sir ki bann tender i dapre regilasyon ki i ganny met devan.  En rezimen i ganny prepare e proze i ganny evalye.

Evalyasyon bann tender ler i ganny fer par en komite entern ki annan 6 manm lo la.  2 zofisye sorti Minister Finans, 4 zofisye sorti kot Departman Devlopman Kominoter e i osi annan en reprezantan Procurement Oversight Unit ki la pou asiste bann deliberasyon.  Sa komite i parey en pti Tender Board kot zot rekonmann bann Kontrakter dapre son pri e dapre son kapasite.  Si proze i anba R150 mil, se Sekreter Prensipal Departman Devlopman Kominoter ki aprouve.  Si proze i par lao R150 mil, i ganny anvoye kot komite Procurement Civil Works atraver Procurement Oversight Unit pou laprouvasyon.  Apre ki proze in aprouve, tou Kontrakter ki’n partisip dan tender i ganny enformen lekel ki’n gannyen byensir atraver en let.

Bann ki pa’n gannyen i annan drwa anba Lalwa pou demann leksplikasyon oubyen pou fer rapel si i pa satisfe.  Sa ki’n gannyen i ganny 14 zour pou sinny kontra apre ki okenn rapel in ganny fer.  Apre sa Mr Speaker, bann prosedir i kapab komanse, savedir Kontrakter i kapab komans travay.

Pandan konstriksyon i annan en prosesis ki apel contract management ki ganny fer.  Savedir kimannyer proze i ganny swiv, kote ki annan nesesite donn serten direksyon, kote ki annan nesesite aret travay e fer sir ki tou travay i pe ganny fer dan letan e osi fer variasyon e termin kontra si i neseser.  Ler proze i terminen i ganny vizite par Kontrakter, Zofisye Proze e Ladministrater Distrik.  En Completion Form i ganny sinnyen si tou i korek.  Proze alor i ganny remet avek Lotorite Distrik atraver Ladministater Distrik.

Prosedir i ganny fer atraver Minister Finans pour ki sa Kontrakter i ganny peye.  Dapre Procurement Act, ler proze i ganny sertifye par DA e Zofisye Proze, I pran apepre 21 zour pou sa Kontrakter ganny peye.

Pou zer sa kantite proze ki annan Mr Speaker e la mon pe koz an mwayenn apepre 400 proze par an pou detrwa lannen, an se moman nou annan 8 Zofisye Proze ki kouver tou le 25 distrik enkli ki 2 administrasyon lo zil Perseverans.  Sak Zofisye Proze i annan li an mwayenn 3 distrik anba son responsabilite.

Mr Speaker bann distrik i ganny divize dan 4 rezyon, Santral-Les, Nor, Sid Was avek bann zil pros.  Bann zil pros i konpri Grand Anse Praslin, Baie Ste Anne avek La Digue.  Bann zil pros vi zot spesifisite konpare avek Mae kot en zofisye i kouver an mwayenn parey mon’n dir 3 distrik, pour bann zil pros nou annan en zofisye pou sak distrik menm si zot pa baze lo Praslin avek La Digue.  Sa bann zofisye i reponn direkteman avek Direkter seksyon proze ki li osi i zet en koudey spesyal lo sa 2 zil.  Sa 3 zofisye zot osi konn deroulman kanmarad dan sa 3 distrik zil pros.  Savedir ki si 1 pa la, lot i kapab kouver li.

Zofisye Proze i mont tou le 2 semenn Praslin avek La Digue letan nou pe prepar proze e tou le semenn ler proze in komanse.  Ladministrasyon Distrik i donn en koudmen pou ede siperviz louvraz e nou nou osi met transpor a dispozisyon distrik lo Praslin pou ede dan sa demars.

Nou a konsider demann Onorab Volcere pou met en zofisye permanan lo Praslin pou monitor bann proze si nou ganny resours avek Minister Finans pour lannen 2015.

Kot i konsern kestyon Onorab Meggy Marie lo reparasyon court Anse Aux Pins, parey nou’n kapab konstate son sirfas in crack, son sirfas i an beton e i annan en ta felir enpe partou kote.  Mr Speaker, nou’n fini pey SLTA pou met en sirfas koltar lo la e SLTA in konfirmen ki ver lafen Oktob sirfas koltar pou’n fini mete.  Nou’n osi resaman ranplas board ek ring lo sa sirfas basketball.  Mersi Mr Speaker.

 

MR SPEAKER

Ok, bon nou ava pran premye siplemanter.  Onorab Volcere.

 

HON MARC VOLCERE

Mersi Mr Speaker.  Mr Speaker, mon ti ava kontan demann Minis baze lo son larepons, ki rekour ki Minister i annan apre ki bann proze in fini fer kot distrik oubyen bann zofisye i remarke i annan serten defayans avek bann proze ki’n ganny fer?  Ki rekour ki Minister i annan pou kapab rektifye sa bann proze?  Mersi.

 

 

 

 

MINISTER VINCENT MERITON

Mersi Mr Speaker.  Mr Speaker dan kontra ordinerman i annan en clause ki later defect ki nou santi nou kapab toultan take up avek bann Kontrakter.  Me selman Mr Speaker, fodre mon dir, avek lafyerte.  Onorab, ou devret fyer osi, poudir Grand Anse Praslin i sa distrik egzanpler ki tou son bann proze, tou son bann dokimantasyon i pare.  Tou son bann proze i fini byen aler e ziska la ozordi, mon kapab dir ki mon satisfe avek kalite, pou larzan ki ganny depanse.  Mersi Mr Speaker.

 

MR SPEAKER

Onorab Samson.

 

HON DEREK SAMSON

Thank you Mr Speaker.  Mr Speaker, mon ti a kontan demann Minis, sa prosedir ki in eksplik nou, konbyen letan ekzakteman i pran ki finalman en distrik son proze i komanse pandan lannen?  E si i ti kapab dir nou osi konbyen Kontrakter ki’n ganny arase oubyen retire lo proze?  E ki bann rezon akoz ki souvan sa bann Kontrakter i ganny arase proze?  Mersi bokou.

 

MINISTER VINCENT MERITON

Mersi Mr Speaker.  Mr Speaker, nou pe deal an mwayenn parey mon’n dir, anviron 400 proze par an e sa lannen nou estimen, si tou keksoz i al byen, nou pou termin lannen avek 438 proze.

Lamazorite nou bann proze i konplete avek satisfaksyon.  Tou nou bann partner, partikilyerman Lotorite Distrik avek bann dimoun dan Seksyon Proze.  Sak proze parey mon’n dir, i ganny tender dapre bann cycle.  E lo Procurement Plan, se distrik ki deside konbyen proze mon pou met dan premye cycle.  Savedir dan premye lo, dan dezyenm lo e trwazyenm lo.

E i arive parler Mr Speaker ki malgre tou bann travay preliminer ki ganny fer, serten difikilte teknik nou rankontre 1, kot i konsern way leave.  Nou’n trouve dan serten ka ki way leave in ganny sinnyen, me ler nou al fer en verifikasyon, sa dimoun ki’n sinny way leave pa li ki propriyeter sa later e sa i koz serten dele.  Nou osi trouve Mr Speaker ki i annan en nesesite ki nou travay avek bann Kontrakter.  Nou pe koz Kontrakter nimero 3 avek nimero 4, pou kapab asir ogmant zot kapasite, kapab ranpli sa bann form byen, akoz nou’n trouve parler, serten Kontrakter in ganny diskalifye akoz bann problenm teknik ki form pa’n ganny sinnyen, oubyen serten sonm pa’n ganny mete dan kolonn respektiv e once sa i arive, sa tender i ganny diskalifye.

Apre osi ou annan Mr Speaker, ki bann Kontrakter ki quote par lao sonm ki ti’n ganny estimen e once ou’n quote par lao sonm ki ti’n ganny estimen, otomatikman i tonbe.  So, dan en ka parey kot ou annan ou 5 Kontrakter ki’n quote par lao sonm ki sa proze ti’n ganny estimen e ou annan 2 ki’n quote dan sonm ki ti’n ganny estimen, me akoz fot teknik, zot in ganny diskalifye.  Ou bezwen komans prosesis a zero e sa i pran letan.

So, nou pe travay avek Minister Finans, avek Procurement Oversight Unit pou nou kapab ranforsi kapasite nou bann Kontrakter, pou kapab adres sa bann kestyon teknik e osi amelyor kalite leksplikasyon ki nou bann Zofisye Proze i donn bann Kontrakter dan pre-bid meeting kot nou eksplik zot bann kondisyon ki sipoze fer.

Mr Speaker, akoz serten proze i ganny arase avek Kontrakter?  Enn bann rezon annan swivi lo bann proze ki pe ganny fer se zisteman pou asire ki bann travay ki pa pe swiv standar, i pa permet arive.  Nou kosyonn parey mon’n dir taler, bann dimoun, me si nou vvwar zot pa pe vreman mentenir sa standar ki merite, then nou pou bezwen fer le neseser anba Lalwa pou kapab aras zot proze e ler ou fer li, ou bezwen fer en ta leksplikasyon, en ta rapor ki ou bezwen anvoy anba Lalwa kot Tender Board e apre, re-demann permisyon pou rekomans sa tender ki pran enpe letan ankor.

Mon napa bann sif ekzakt Onorab, me sa nou ava rode, kot i konsern bann Kontrakter ki nou’n arase, nou ava fer ou gannyen.  Mersi Mr Speaker.

 

MR SPEAKER

Onorab Marie.

 

HON MEGGY MARIE

Mersi Mr Speaker.  Mr Speaker, eski Minis i kapab dir avek sa Lasanble, konbyen in kout son Minister pou antreprann sa proze resurface e met board e si i dan plan son Minister pou amelyor kondisyon bann lezot fasilite sport dan distrik Anse Aux Pins?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, wi, dan nou plan pou amelyor bann lezot fasilite spor dan distrik Anse Aux Pins, parey dan lezot distrik byensir ofir e anmezir bann resours ki nou annan e ofir e anmezir bann priyorite ki distrik e lezot lazans i etablir.

Pou kot i konsern sa kort Anse Aux Pins, in kout nou R240 mil Mr Speaker.  Mersi.

 

MR SPEAKER

Onorab Bresson.

 

HON GALEN BRESSON

Mersi Mr Speaker.  Mon kestyon i an relasyon kestyon Onorab Meggy Marie.

Eski Minis i kapab eksplik ek sa Lasanble, an vi ki laplipar distrik i annan bann court e bann fasilite sportif tel parey Bel Ombre, lekel ki responsab pou mentenans sa bann fasilite sportif?  Mersi.

 

MINISTER VINCENT MERITON

Mersi Mr Speaker.  Mr Speaker, nou partaz responsabilite kot i konsern konstriksyon bann fasilite dan distrik.  Bann proze rezyonnal NSC, Gouvernman, Minister.  E apre bann proze distrik, nou menm distrik.  Me toultan, kot i annan en serten mankman, Minister nou antre pou donn en sipor.  Nou travay avek lezot lazans.

Me kot i konsern son mentnans, se nou dan distrik ki responsab pou mentenir bann fasilite lo nivo distrik e NSC i responsab pou mentenir bann fasilite rezyonnal e Nasyonal.  Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker.  Bonzour Minis.  Bonzour tou dimoun ki alekout.

Mr Speaker, eski Minis i kapab eksplik nou Lasanble, pou fasilit lenplimantasyon bann pti proze distrik, akoz ki Minister pa swiv sa ki Procurement Oversight Unit i dir, savedir donn 3 kotasyon e pa swiv sa gran prosedir ki in vin eksplik nou Lasanble si sa bann pti proze i par anba en serten sonm, dizon R150 mil e an vi ki pri tou keksoz in monte dan pei, akoz ki sa limit R150 mil pa ganny revvwar imedyatman pou kapab fasilit bann lenplimantasyon bann pti proze distrik?  Mersi.

 

MINISTER VINCENT MERITON

Mersi Mr Speaker.  Mr Speaker, zisteman nou swiv Procurement Act e nou demande.  Nou bezwen demann permisyon parler si nou oule fer derogasyon.  I annan bann ka spesifik ki anba Lalwa nou ganny permisyon parler pou fer selective tender, kot nou swazir bann Kontrakter ki annan good track record, me otreman, nou bezwen kapab swazir 3 parey ou’n dir tender, pou kapab fer sir ki i annan latransparans, pour ki napa bann deal ki pase ant bann dalon dan en move pou fer sir ki napa koripsyon dan depans ki larzan Gouvernman, an prenan kont ki nou annan nou R30 milyon ki nou zere pandan 1an kot i konsern pti proze.

Me nou’n pran konsiderasyon sa ki ou’n dir Onorab.  Nou ava diskite avek Minister Finans dan posibilite revvwar sa ceiling, an vi sirkonstans ekonomik.  Mersi Mr Speaker.

 

 

 

MR SPEAKER

Kestyon 124, Onorab Bernard Arnephy.

 

HON BERNARD ARNEPHY

Mersi Mr Speaker.  Bonzour Mr Speaker.  Bonzour tou dimoun.

Mr Speaker, kestyon se pou demann Minis ki mezir serye ki ganny pran kont bann Carer ki negliz zot kliyan e pa donn en swen alaoter?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, Scheme Home Care i ganny administre par Lazans pou Proteksyon Sosyal.  Lazans i administre 4 konponan prensipal sa servis.  I konpri prosesis bann laplikasyon, anrezistreman Carer, peyman Carer e sirveyans sa servis.  Se dimoun ki kalifye pou ganny sa servis swen kot lakour ki bezwen rod son Carer.  Gouvernman, atraver Lazans i fasilit bann diferan prosedir, pou asire ki dimoun ki kalifye i ganny swen kot lakour.  Lagreman i ganny fer ant kliyan avek Carer e Lazans i entervenir pou ranforsi bann regilasyon e fer sir ki bann prensip travay i ganny respekte dapre en gid.

Parfwa, sa bann Carer ki kliyan i swazir pou travay avek zot pa desarz zot responsabilite parey i fodre, menm si ler zot ti komans travay, zot ti ganny eksplike ki sa ki zot devret fer e ki sa ki zot devret pa fer dan lakour sa bann dimoun.

Dan ka kot Lazans i ganny konplent, ou menm ler bann vizit routin i ganny fer e bann problenm i ganny idantifye, Zofisye Sirveyans pou swa konsey sa Carer, kosyonn li e menm dan serten ka, koup allowance Carer.  I annan ka osi kot par egzanp sa kliyan in demande ki nou retir sa Carer kot son lakour.  Nou’n fer li e nou’n aret pey sa Carer.

Si konportman Carer i sitan grav, Zofisye Home Care pou refize anrezistre li avek en lot kliyan, si dan lefitir i vin fer en laplikasyon.

I enportan pou note Mr Speaker ki tim Monitoring Officers i annan en plan travay ki met zot 2 zour lo teren, dan bann kominote pou vizit bann dimoun, larestan 3 zour i rezerve pou bann travay administratif e vizit irzan kot lakour ki neseserman bezwen ganny fer.

Bann Monitoring Officer i kouver 4 a 5 lakaz par zour, depandan teren, me si zot kapab fer plis, zot fer plis.

Malgre zot prezans lo teren, pa tou lakour ki zot kapab kouver e se pour sa rezon ki nou pe demann bann dirizan distrik, bann fanmiy e kominote pou averti Lazans si zot okouran bann ka kot servis ki pe ganny donnen pa alaoter.  Lanket i ganny fer e kot i merite, aksyon i ganny pran.  Fodre ki bann fanmiy zot konnen ki zot annan en rol enportan pou zwe pou konplemant sa servis ki pe ganny ofer par Lazans.

Pou terminen Mr Speaker, mon ti a kontan fer sorti ki an zeneral, servis Home Care i enn ki pe mars byen, an prenan kont resours ki a nou dispozisyon.  Mazorite bann Carer pe fer en bon louvraz, malgre souvandfwa zot pe fer li dan bann sirkonstans difisil.  E la mon pou profit sa lokazyon pou remersi bann Carer ki pe donn en bon servis malgre bann defi.  Mersi Mr Speaker.

 

MR SPEAKER

Onorab Samson.  Sorry, Onorab Arnephy.

HON BERNARD ARNEPHY

Mersi Mr Speaker.  Mr Speaker, eski Minis i kapab eksplik nou Lasanble si tou resaman in annan okenn sanzman mazer dan lafason ki prosesis laplikasyon pou en Carer i ganny fer.  E osi, ki’n arive avek propozisyon pou donn serten formasyon debaz bann Carer.

E finalman, eski Minis i kapab dir ek nou Lasanble konbyen Carer ki pe ganny anploye aplentan e konbyen sa pe kout Gouvernman par an?  Mersi.

 

MINISTER VINCENT MERITON

Mersi Mr Speaker.  Mr Speaker, prosedir laplikasyon i se ki i annan 2 konponan.  I annan en konponan ki determin depandans sa dimoun, sa kliyan, sa dimoun ki pe rod swen kot lakour e sa i ganny determinen par Bartel Index Assessment ki ganny administre par zofisye Minister Lasante, partikilyerman bann Ners.  E son sistenm i konm tel.  Ou ganny zize ziska en kapasite:- Non.  Mon a rekomanse.  Son sistenm i konm tel.  Si ou ganny, ou sistenm endepandans i ganny zize depi 0 ziska 25 poursan, ou kapab depann lo ou prop lekor, then ou ganny en Carer half day.  Si evalyasyon i montre ki ou bezwen sipor e ou sistenm depandans i ganny rate depi 25 ziska 50 poursan, then ou kapab ganny Carer full day.  Ler sa Bartel Index in fini ganny fer, i ariv kot nou Miniter, then si en dimoun in ganny son assessment, baze lo sa ki mon’n dir, i anvoy kot Lazans Proteksyon Sosyal pou li ganny assess e la, assessment sa fanmiy i ganny fer e si sa fanmiy, son mwayen i trouve ki i pa kapab kontribye, then Gouvernman i pran konpletman ansarz care pou sa Carer ki pe vin travay avek li.  Si non, si dapre evalyasyon nou trouve poudir sa fanmiy i kapab fer en kontribisyon, i fer en kontribisyon.

Dezyenmman, sa prosesis lantrennman i ankor on e nou’n komans li avek bann Lenstitisyon.  I annan en dezyenm batch ki pe ganny training pou donn en koudmen kot Lopital North East Point e ofir e anmezir, nou pe al bouz dan distrik pou tous sa bann Carer ki nou annan.

Antou Mr Speaker, nou annan nou 2,636 Carer.  Laplipar i lo full day, 1,874 e larestan i lo half day.  Mersi Mr Speaker.

 

MR SPEAKER

Onorab Souris.

 

 

HON MIRENA SOURIS

Mersi Mr Speaker.  Mr Speaker, eski Minis i kapab donn detay sa Lasanble statistik lo konbyen Carer ki pa pe donn swen alaoter e si sa problenm pa donn swen alaoter i relye plis avek bann resipyan ki manm fanmiy pe travay avek zot?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, mon ti’n bliye reponn en kestyon Onorab Arnephy.  I kout nou anviron 8 a 9 milyon par mwan, bann depans ki nou fer.

Onorab, mon napa bann statistic an term bann Carer ki pa pe donn servis alaoter.  Nou ava fer en pti letid, apre nou ava donn ou avek bann lenformasyon.  Mersi Mr Speaker.

 

MR SPEAKER

Onorab Payet.

HON DAVID PAYET

Mersi Mr Speaker.  Bonzour tou dimoun.  Mr Speaker, vi ki proporsyon dimoun aze dan nou popilasyon pe ogmante e lensidans maladi asosye avek laz pe ogmante, eski Minis i kapab enform sa Lasanble si son Minister i annan plan pou profesyonnaliz sa travay Home Carer pou akonpanny sa 2 levolisyon ki nou pei pe pas atraver, dan en fason ki bann dimoun aze i ganny en servis de kalite e bann Home Carer osi i pran zot travay koman en profesyon?  Mersi Mr Speaker.

 

MINISTER VINCENT MERITON

Mersi Mr Speaker.  Wi Mr Speaker.  Training ki nou pe komanse i zis en komansman, pou nou kapab donn bann Carer serten skill e abilite pou zot demen si zot santi zot pa anvi travay anba sa Scheme, nou vwar ozordi poudir serten fanmiy zot menm pe fer, pe advertise bann vacancies pou dimoun vin travay koman CarerSo, sa ki nou’n komanse i zis en premye pa pou profesyonnaliz sa servis.  En komansman ki nou, nou’n komanse e ki Sekter Prive li osi i kapab pran pou profesyonnaliz sa, apre permet ki dimoun prive, bann fanmiy i kapab osi pey bann dimoun pou kapab get zot pros.  Mersi Mr Speaker.

 

MR SPEAKER

Onorab Derek Samson, kestyon 125.

 

HON DEREK SAMSON

Mersi Mr Speaker.  Eski Minis responsab pour Zafer Sosyal i kapab donn nou en revi lo travay renovasyon lo Lakour Vye Dimoun Anse Royale?  Mersi.

 

MINISTER VINCENT MERITON

Mersi Mr Speaker.  Mr Speaker, Lakour bann Dimoun Aze Anse Royale i premye Lakour pour bann dimoun aze ki ti ganny konstrir isi Sesel.  E Desanm lannen pase, zot ti selebre zot vennsenkyenm lanniverser.

Renovasyon lo sa batiman i enn ki merite e i en priyorite.  Demann ti ganny fer an preparasyon Bidze 2014 pou ganny finansman pou komans en proze renovasyon boner sa lannen.  Avek kontrent, i pa’n posib pou nou ganny finansman me i annan serten pti travay ki nou’n planifye pou ganny fer.

Mr Speaker, i annan serten Lasosiasyon ki’n montre lentere pou adopte sa Lakour me nanryen pankor finalize.  Par kont, Lazans in eksplor tou opsyon pou realiz sa renovasyon e in fer en nouvo demann avek Minister Finans pandan legzersis revi finansyel ki zisteman i devan Lasanble ozordi.  Si demann i ganny aprouve, travay ava komanse pandan dernyen kar sa lannen.

E permet mwan Mr Speaker pou demann zot pou zenerezman konsider sa plitar ler i vin lo Bidze Siplemanter.

Mr Speaker, i bon note ki serten pti amelyorasyon parey mon ti dir avan, in ganny fer kot Lakour tel ki enstal nouvo basen delo, refer serten bout plafon e tre byento, en pti renovasyon lo lakwizin.

Mon oule Mr Speaker remersye Board of Trusties e Lotorite Distrik pou sa travay e sipor ki zot pe fer dan bann Lakour bann dimoun aze.  Mersi Mr Speaker.

 

MR SPEAKER

Onorab?

 

HON DEREK SAMSON

Mersi Mr Speaker.  Mr Speaker, eski Minis i kapab dir nou si son Minister i annan en progranm konpreansiv pou asire ki mentenans lakour vye dimoun Sesel i ganny enplimante a en moman, oubyen ler rezonnab.  Eski son Minister pe osi ankouraz zanfan bann paran ki kot Lakour Vye Dimoun pou partisip dan renovasyon Lakour Vye Dimoun Sesel?  Mersi.

MINISTER VINCENT MERITON

Wi Mr Speaker.  Nou annan en plan pou fer renovasyon lo bann fwaye kot bann dimoun aze.  Dan nou plan, nou ti’n met Anse Royale koman en priyorite e apre, i Fwaye pour bann dimoun aze dan distrik English River ki li osi a gran demann, apard bann lezot pti renovasyon.  Me parey mon’n dir, resours finansyel nou pa’n gannyen me nou’n repet en demann e nou mazinen ki sa i ava ganny konsidere la.

Mr Speaker, wi.  Nou ankouraz bann lezot dimoun, enkli zanfan, enkli manm kominote e mon ti dir taler, i annan serten diskisyon ki’n komanse avek lezot endividi, lezot lasosiasyon e biznes prive, pou gete kimannyer zot kapab donn en koudmen, fer en kontribisyon anver renovasyon bann lakaz.  Me nou pankor finalize, pankor konkretize.  Annefe i annan 2 group ki’n montre lentere avek bann Fwaye bann Dimoun Aze, be nou pe, nou oule kapab finaliz sa pli vit ki posib me selman nou pe tenir akoz nou’n deza met sa dan Bidze Siplemanter e nou ekspekte dan en fason oubyen en lot, nou kapab trouv en solisyon sa lannen kot i konsern Fwaye pour Anse Royale, apre nou a get pour lannen prosenn, bezwen pour Fwaye ki dan distrik English River ki li, i pou kout nou anviron R2.5 milyon, konpare avek R700 mil ki nou ti’n bidzete pou distrik, pou Fwaye distrik Anse Royale.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Bonzour tou dimoun.  Mr Speaker, eski Minis i kapab eksplik sa Lasanble, lefet ki i napa en konponan dan Bidze Nasyonal pour reparasyon bann Lakaz, bann Fwaye.  Eski Minis i kapab enform sa Lasanble si i dan zot plan pou kapab enkli en konponan pou kapab fer sa bann reparasyon letan i vini, pou evite ki bann Lakaz i deteryore ziska sa kantite, pour ki apre zot bezwen rod en bann gro, gro sonm larzan pou kapab repare?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, demann i ganny fer atraver ASP avek Minister Finans.  I tonm dan Bidze.  Menm Bidze ki vin devan nou me selman i pas en lot, i servi en lot channel.

Sa sonm 2.5 milyon pour Fwaye English River akoz li i annan en problenm avek son soubasman.  I en keksoz ki nou bezwen adrese.  Me selman Mr Speaker, mon ti a kontan fer sorti ki nou kontinnyelman fer reparasyon lo bann Fwaye e la sa lannen, nou’n met sistenm sofaz delo lo baz lenerzi soler dan 6 sa bann Fwaye, enkli La Digue.  Landrwa ki nou pankor mete se Anse Royale, English River avek La Retraite.  6 larestan Home, nou’n met solar water heater avek bann pti lezot renovasyon.  Mersi Mr Speaker.

 

MR SPEAKER

Onorab Marc Volcere.  Kestyon 126.

 

HON MARC VOLCERE

Mersi Mr Speaker.  Mr Speaker, mon ti a kontan demann Minis si son Minister i annan plan reviz oubyen revvwar Polisi lo kalite lasistans pour bann fanmiy ki avek bonn fwa pe pran swen avek en zanfan ki pa pou zot?  Mersi.

 

 

 

MINISTER VINCENT MERITON

Mersi Mr Speaker.  Mr Speaker, Polisi ki anplas i permet ki en endividi si i vvwar i dan en sityasyon dfisil finansyelman pou li fer en laplikasyon avek Lazans pou Proteksyon Sosyal pou li ganny lasistans siplemanter.  Sa i ganny byen definir par Lalwa e par bann mezir ki nou term bann rates.

Kot i konsern en endividi ki pran en zanfan an bonn fwa e i bezwen fer menm prosedir pou ganny lasistans.  Sak ka i ganny gete lo son merit.  Pour en fanmiy ki pa kalifye pou ganny lasistans siplemanter, Lazans Proteksyon Sosyal i fer en tavay an etrwat kolaborasyon avek Servis Sosyal kot en lanket i ganny fer pou kapab etablir bezwen e resoumet avek Lazans Proteksyon Sosyal.  Menm benefis ki tonm anba Lalwa Sekirite Sosyal, menm bann benefis ki tonm anba Lalwa Sekirite Sosyal.  Nou pe koz par egzanp Orphans avek Abandoned Child, i pa otomatik, i bezwen annan serten lenvestigasyon ki ganny fer pou determin merit avan ki lasistans i ganny donnen.

Mr Speaker, poulemoman i annan anviron 115 zanfan ki’n ganny plase avek serten endividi ki pe ganny asiste.  Nou pe fer provizyon pou nou kapab asiste en serten nonm fanmiy dan en lannen e sa i akimile lannen apre lannen.  Savedir, si sa lannen i annan 115, nou pe fer provizyon pou en logmantasyon par lao sa 115 pour lannen prosenn.

I enportan pou note ki lakantite ka ki kapab ganny asiste dan sa fason i depan lo Bidze ki Lazans i gannyen.  Se pour sa rezon ki sa lannen, nou’n fer en demann pou en logmantasyon dan Bidze 2015, pou permet asiste bokou plis fanmiy ki dan bezwen.

Mr Speaker, a sa pwen, mon ti oule remersi tou bann dimoun ki pe ede, dan en fason oubyen en lot, pou pran swen avek bann zanfan ki dan bezwen.  Mon konnen i pa fasil me mon oule asir zot, dan bann ka kot i annan en vre bezwen, nou toultan rod meyer fason pou asiste.

Mr Speaker, i annan bokou ki’n pran zanfan, an bonn fwa e ki pa pe demann lasistans.  Nou dir zot en gran mersi.  Me par kont si i annan dimoun ki’n pran zanfan an bonn fwa e ki pe fer fas avek serten difikilte, nou demann zot pou vin devan.  Nou annan en sistenm anplas pou assess bann sityasyon e kot nou vvwar ki sa ka i merite, sa dimoun i ganny asiste.  Sa lasistans i renouvle toulezan.  Mersi Mr Speaker.

 

MR SPEAKER

Onorab Volcere.

 

HON MARC VOLCERE

Mersi Mr Speaker.  Mr Speaker, pou benefis nou Lasanble e piblik ki pe ekoute, mon ti a kontan si Minis i kapab eksplike ki prosedir ki sa dimoun ki santi li i bezwen sa lasistans pou siport sa zanfan, i bezwen fer pour li kapb ganny asiste?  Mersi.

 

MINISTER VINCENT MERITON

Mersi Mr Speaker.  Mr Speaker, sa dimoun i fer en laplikasyon pour lasistans sosyal.  Si i pa kalifye, then i annan en travay ki ganny fer ant Servis Sosyal avek Lazans Proteksyon Sosyal pou nou kapab pli al o profon sa sityasyon, apre i ganny met devan Lazans Proteksyon Sosyal e dan mazorite bann ka, nou’n sorti avek en sipor pour bann fanmiy ki’n pran en zanfan an bonn fwa.  Mersi Mr Speaker.

 

 

MR SPEAKER

Onorab Vidot.

 

HON KEVIN VIDOT

Mersi.  Bonzour Mr Speaker.  Bonzour tou dimoun ki alekout.

Mr Speaker, eski Minis i kapab dir nou konbyen fanmiy Fwaye la ozordi ki pe ganny en lasistans avek Minister?  E si i kapab dir nou osi si i annan en posibilite kot i annan bann paran par rezon medikal i pa kapab fer okenn zanfan, me kekfwa finansyerman i pa pou kapab pran en zanfan pou li sonnyen.  Ki bann prosedir anplas, fondasyon pou sa dimoun vin kot Minister, ganny lasistans, pran en zanfan, met kot li, donn lanmour.  Ki annan anplas?  Mersi.

 

MINISTER VINCENT MERITON

Mr Speaker, poulemoman bann fanmiy ki pe pran bann zanfan an bonn fwa, ki nou pe donn serten soutyen, i annan 115.  I annan en bon nonm ki’n pran zanfan an bonn fwa ankor, me selman ki pa pe demann okenn soutyen.

Ou’n dir si en fanmiy i santi zot pa kapab fer zanfan.  Si zot oule pran zanfan an bonn fwa, zot kapab komans fer li.  Annefe, sa i form parti sa progranm foster ki nou pe promouvvwar, kot en fanmiy i santi i annan sa abilite sosyal e finansyel pou kapab fer grandir en zanfan, kot zot napa zanfan oubyen kot zot zanfan in fini gran me zot santi zot bezwen sa zanfan la pou met plis lasaler dan zot fwaye.  Nou welcome bann fanmiy ki fer sa e i annan toultan en diskisyon ki pran plas ant Sosyal avek sa fanmiy e parmi bann konsiderasyon i si zot bezwen serten sipor siplemanter.  Parey mon’n dir, prosedir i ganny aplike e apre nou donn soutyen kot nou santi i neseser, kot i merite.  Mersi Mr Speaker.

 

MR SPEAKER

Onorab Vel.

 

HON JENIFFER VEL

Mersi Mr Speaker.  Mr Speaker, mon ti a kontan demann Minis.  An vi ki sa prosedir laplikasyon pour Welfare pou bann paran, bann foster parents ki enterese i servi koman en dekourazman akoz souvandfwa bann paran i santi ki zot, ki pa kalifye, zot pa anvi konpromiz byennet zot prop zanfan.  Eski Minis i kapab dir nou si zot annan lentansyon pou revvwar bann Polisi ki anplas?  E akoz ki ler en zanfan i ganny plase par egzanp Vilaz Prezidan, otomatikman sa Lenstitisyon i ganny en benefis pour mentenans sa zanfan?  Mersi.

 

MINISTER VINCENT MERITON

Mersi Mr Speaker.  Si en fanmiy i santi li an bezwen, i annan en sistenm nou’n met anplas.  Nou bezwen en sistenm anplas pou kapab elimin labi e dan bann ka ki otantik, ki genuine, kot i vreman annan en bezwen, toultan nou sorti pou donn en soutyen.

Pou bann zanfan ki ganny plase dan bann Lenstitisyon, wi, i annan en soutyen ki nou donnen me nou pa pe refiz soutyen kot i annan en bezwen dan bann fwaye prive, dan bann fanmiy kot i annan en bezwen.

Kot i annan en bezwen Mr Speaker, toultan nou antre, nou sorti, nou donn en koudmen.  Mersi Mr Speaker.

 

MR SPEAKER

Kestyon 127, Onorab Derek Samson.

 

HON DEREK SAMSON

Mersi Mr Speaker.  Mr Speaker, eski Minis resonsab pour Spor i kapab donn nou en revi lo progranm Anti-Dopaz ki tonm anba Departman Spor?  Mersi.

 

MINISTER VINCENT MERITON

Mr Speaker, Komisyon Nasyonal Anti-Dopaz ti ganny lanse an 2005.  Rol sa Komisyon se pou fer tes lo bann atlet ki afilye ek bann Federasyon.

Pandan sa bann dernyen lannen, bann travay neseser in ganny fer pou form nou bann Zofisye e met en progranm an mars.  Antou, nou’n form 10 Zofiye e 5 i ganny akredite par WADA.  Bi sa progranm se pou edik e sansibiliz bann atlet dan Sesel kont servi drog e dopaz dan spor.  Kontrol, savedir fer bann tes pou detekte sibstans ilegal dan bann atlet e sanksyonn, savedir pran bann aksyon disipliner kont bann atlet ki’n teste pozitiv e met anmars en progranm reabilitasyon pour bann atlet ki’n teste pozitiv.

Mr Speaker, nou rikord i montre ki ant 2006 ek 2013, en total 2,215 tes ti ganny fer e ladan, 1,820 tes ti pou bann msye e 386 pour bann madanm.  Dan sa 2,215 tes, ti annan 1,982 tes ki ti negativ e 233 tes ki ti pozitiv.  Ladan, 222 ti pour bann msye e 11 ti pou bann madanm.  Savedir, 233 atlet ti ganny trouve avek sibstans ilegal dan zot lirin e zot ti ganny sanksyonnen.  Bann tes i ganny fer dan bann spor mazer parey Football, Volleyball, Basketball, Naze, Atletik, Judo, Laboks, Lev Pwa ek Handball.  Zot a rapel ki an 2011 pandan Zwe de Zil, tes ti ganny fer lo bann atlet, enkli lo bann etranze e sa i anlinny avek Komisyon Enternasyonal Zwe de Zil.  I 3 tes par lekip.

Mr Speaker, i enportan pou note ki bann Federasyon i annan en rol tre enportan pou zwe dan sa progranm ozordi.  Apre tou sa bann lannen sansibilizasyon, nou vwar bann Federasyon, i annan serten bann Federasyon ki pe komans pran zot responsabilite o serye.  Ozordi serten Federasyon pe fer tes lo zot bann atlet avan ki al konpetisyon enternasyonal.  Serten klib pe demande ki nou fer tes lo zot atlet avan ki sezon i komanse e menm avan ki zot aksepte bann nouvo zwer dan zot lekip.

A sa pwen, mon ti a kontan fer resorti ki nou pe sansibiliz tou bann Federasyon, sirtou sa 14 ki pe al partisip dan Zwe de Zil lannen prosenn, pou ki boner lannen prosenn, avanler nou al partisip dan zwe, nou pe al fer bann tes lo tou bann atlet.

Mr Speaker, lager kont drog e sibstans ilegal dan spor i enn ki bezwen lasistans tou dimoun.  Nou pe demann bann lezot partner pou donn nou osi en koudmen.  Nou bezwen lager antoure si nou anvi ki spor i reste prop.  Mon alor lans en lapel avek kominote sportif pou reste vizilan e pran tou aksyon neseser, pou asire ki nou spor i reste prop e onnet.

Lo son kote Mr Speaker, NSC pe al donn sipor bann atlet ki teste pozitiv, atraver en progranm reabilitasyon ki bokou pou enkli counseling e osi nou pou kapab refer zot avek bann Lazans spesyalize.  Mersi Mr Speaker.

 

MR SPEAKER

Onorab Samson.

 

HON DEREK SAMSON

Mersi Mr Speaker.  Mr Speaker, eski Minis i kapab dir nou si i annan okenn nou bann atlet ki’n ganny trouve pozitiv letan e pandan ki zot ti lo konpetisyon aletranze?

E eski sa progranm Anti-Dopaz i osi ganny aplike pour bann Officials oubyen bann Refferees?  E ki son Minister pe fer pou dekouraz bann Officials oubyen bann Refferees pou vin swiv bann match anba lenfliyans lalkol oubyen lezot sibstans danzere?  Mersi.

 

MR SPEAKER

Request Minister.

MINISTER VINCENT MERITON

Mersi Mr Speaker.  Mr Speaker, dapre nou rikord, non, mon napa atlet ki’n al partisip dan bann zwe deor ki’n teste pozitiv.

Me selman mon pran ou konsern Onorab kot i konsern bann Zofisye ki parey ou pe dir, in vin dan bann match anba lenfliyans lalkol.  Annefe i pa devret arive e mon a demann CEO NSC ki la, pou kapab travay ek bann Federasyon pour ki pa zis atlet ki fer sir nou ankadre zot, me osi bann lezot Zofisye, sirtou bann Refri ki pe asir ki en match i pas dan en fason fair e zis, pou fer sir ki napa bann desizyon ki pa dapre lareg.  Mersi pou komanter.  Nou ava fer en swivi lo la.  Mersi Mr Speaker.

 

MR SPEAKER

Onorab Ghislain.

 

 

HON CHANTAL GHISLAIN

Mersi Mr Spaeker.  Mr Speaker, eski Minis i kapab eksplik sa Lasanble, dan sa sif ki in donnen pou bann ki’n teste pozitiv depi tou sa bann lannen, ki depi ler zot pe fer tes Anti-Dopaz lo bann atlet.  Eski i annan bann repeated offenders e ki arive avek sa bann atlet ki ganny trouve pe repete pou servi?

E an sa ki konsern lo kalite sibstans ki sa bann atlet pe servi, eski i annan ki pe servi bann sibstans parey bann steroid pou amelyor zot performans, ouswa i annan pli bokou i plis bann sibstans ki zot pe servi, ki zot depan lo la toulezour, parey Eroin?  Mersi.

 

MINISTER VINCENT MERITON

Mersi Mr Speaker.  Mr Speaker, bann sibstans i plito bann – mon pa konnen kimannyer nou pou term sa.  Bann recreational drugs. Be mon napa rikord lo bann drog parey Kokain oubyen Eroin.

Mr Speaker, bann repeated offenders Onorab in demande.  Lareg i koumsa.  Si ou ganny detekte pozitiv 1 fwa, ou ganny ban pour 6 mwan.  Ankor en fwa, ou ganny ban pour 1an.  Apre sa ou ganny ban pour lavi.  So, mon krwar i annan en move deor pou nou kapab dekouraz zenn ki antre dan spor, pou nou konpran poudir spor avek drog, spor ek dopaz, pa ale avek kanmarad.  Nou bi se retir zenn, kot i annan zenn dan drog, nou konnen i en defi ki nou annan ozordi.  Yer nou fek pe diskite avek en serten klib, kimannyer zot kapab donn en koudmen tir bann zenn ki dan serten kan drog.  Tir zot dan en sityasyon kot zot pe detri zot lekor e met zot dan spor pou zot kapab retrouv fason pou zot kapab viv zot lavi byen.

E en progranm ki nou pe al lanse, NSC avek SBC.  Pa pou name and shame, me pou nou kapab donn en rapor gradyel lo pandan 2 dernyen mwan, pandan dernyen mwan oubyen pandan 2 dernyen semenn, dapre bann tes ki Komisyon Anti-Dopaz Nasyonal in fer.  I annan 2 oubyen 3 atlet ki’n teste pozitiv, pou les dimoun konnen ki sa ki pe ganny fer e byensir, pa zis pou sanksyonn dimoun me osi pou kapab donn zot serten soutyen e reabilitasyon kot zot bezwen pou zot kapab retourn dan zot spor e trouv en fason lavi sen.  Mersi Mr Speaker.

 

MR SPEAKER

Kestyon 129, Onorab Arnephy.

HON BERNARD ARNEPHY

Mersi Mr Speaker.  Mr Speaker, kestyon se pou demann Minis si Gouvernman i annan plan konstrir serten fasilite debaz tel ki en Shelter, twalet e store pou konvenyans travayer Simityer Anse Boileau e lezot Simityer dan pei, kot bann tel fasilite pa ekziste?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, antou nou annan nou 17 Simityer Piblik lo Mahe, Praslin avek La Digue.  16 ladan i ganny okipe par Servis Simityer, a leksepsyon Simityer La Digue ki tonm anba direksyon Board La Digue.  Louvraz prensipal servis Simityer se pou netway nou bann Simityer e fer Lanterman.

Mr Speaker, sel Simityer ki ansemoman i annan fasilite twalet, shelter e store i sa 1 Mont Fleuri kot mazorite travayer i baze.  I annan 55 travayer antou.  I osi annan en pti shelter dan Simityer Anse Boudin, Praslin.  Dan ka Simityer Anse Boileau e larestan Simityer distrik, poulemoman, napa sa bann fasilite pou detrwa rezon.  Rezon prensipal se ki later pou nou anter dimoun mor pe limite zot.  I annan 6 Simityer.  5 lo Mahe, 1 lo Praslin kot napa trou ditou pou nou fouye.  Nou pe bezwen zis re-fouye.  Poulemoman alors, sa pti bout later ki reste, nou pe sey tir bann ros pou nou kapab anter nou bann dimoun mor.

Dezyenmman Mr Speaker, tou nou bann travayer ki travay dan bann Simityer distrik i rezidan sa bann distrik kot zot travay.  Savedir, zot pa reste tro lwen avek Simityer kot zot travay.  Anka nesesite, zot kapab swa al kot Biro Ladministrasyon Distrik, oubyen kot Kordgard, oubyen kot zot lakour.

Trwazyenmman Mr Speaker, bann travayer Simityer zot travay latas.  Savedir, 7er zot vini, 11er zot fini zot latas e zot al se zot.

Kot i konsern landrwa pou gard bann lekipman parey balye, gran kouto, serten laranzman i ganny fer avek bann lakour prive ki baliz ek Simityer.

Mr Speaker selman, fodre dir e mon ti a kontan servi sa loportinite pou felisit nou bann travayer Simityer.  Nou bann Simityer i prop, konpare avek Simityer lezot pei e nou bann Onorab ki’n vizit lezot pei Lafrik i vvwar kimannyer nou kapab.  Pa fyer nou lanmor me selman, i fyer lapropte ki nou Simityer i ete.  Pa vedir ki nou pa kontan nou bann travayer Simityer, me poulemoman, resours ek lespas pa permet nou Mr Speaker.  Silvouple, konpran nou.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker, an vi ki Simityer Anse Boileau i annan ase lespas pou fer konstrir sa tel fasilite.  Mon’n fer en pti resers, i annan.  E pour rezon lizyenn e proteksyon sa bann travayer pandan movetan, eski Minis pe mazin a prosen lavenir pou konsilte avek par egzanp bann Kontrakter ki ganny proze o nivo distrik, koman parti zot CSR Tax, si zot kapab ede dan sa demars pou konstrir sa pti fasilite debaz ki pa pou kout en kantite larzan?  Mersi.

 

MINISTER VINCENT MERITON

Mersi Mr Speaker.  Mr Speaker, avek gre, avek laval, avek lagreman bann Leader dan distrik.  Avek bann Kontrakter, zis pou nou pa ganny dir i annan bann deal gous ki pe pase, mon krvwar sa en fason nou ti kapab adres sa size.  Mersi Mr Speaker.

 

MR SPEAKER

Kestyon 130, Onorab Arnephy.

HON BERNARD ARNEPHY

Mersi Mr Speaker.  Mr Speaker, kestyon se pou demann Minis pou donn detay nou Lasanble lo konbyen in koute pour lekip Sesel partisip dan Zwe Commonweallth 2014 e ki ti kontribisyon Sekter Prive anver sa depans?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, premyerman mon ti a kontan eksplik enpe ki responsabilite partisipasyon Team Seychelles dan Zwe Commonwealth i tonm anba Komite Olenpik e Zwe Commonwealth Sesel, SOGCA.  Parey en parti son non i dir, se SOGCA ki form lasosiasyon Zwe Commonwealth Sesel e se li ki manm lasosiasyon Zwe Commonwealth enternasyonal.  Alor, se SOGCA ek bann Federasyon ki afilye avek li, ki desid lo partisipasyon bann atlet Seselwa dan Zwe Commonwealth, baze lo quota ki nou gannyen e baze lo kriter ki’n ganny etablir, ki enkli performans, disiplin eksetera.  Bann lezot gran Zwe enternasyonal ki dan menm kategori ki Zwe Commonwealth, par egzanp Zwe Olenpik, Zwe Olenpik Junior, Zwe Anuka e a serten nivo, i osi Zwe de Zil.

Mr Speaker, kontrerman a bann lezot Zwe ki mon’n nonmen, kot i konsern Zwe de Zil, menm si i tonm anba SOGCA, se Gouvernman ki donn tou finansman.  E si zot rapel byen, letan sa Zwe ti fer isi Sesel an 2011, se lepep Seselwa an grann parti ki ti finans li.  Pour Zwe Commonwealth ki kestyon pe adrese la, menm si partisipasyon Team Seychelles ti responsabilite SOGCA, Gouvernman, byensir akoz son lanmour pour lazenes Seselwa, in kontribye atraver Konsey Nasyonal pou Spor, sirtou pou ede prepar bann atlet.  Se NSC ki donn bann Federasyon en sibvansyon sak lannen, ki zot servi enpe pou zot preparasyon.  I annan serten Federasyon ki osi rod enpe sponsorship lo zot menm.  Apard donn Federasyon sibvansyon, NSC i osi finans bann progranm spesifik parey kan lantrennman an preparasyon Zwe Commonwealth e osi Mr Speaker, fodre dir ki an preparasyon Zwe Commonwealth sa lannen, pli gran kan lantrennman ki NSC ti finanse ti pour bann atlet weightlifting.  Si zot rapel byen, sa group weightlifters ti al dan kan lantrennman 3 mwan Sid Afrik, defreye de tou.  Se NSC ki ti finans sa dan son totalite.

Mr Speaker, Zwe Commonwealth sa lannen ti enn spesyal pour nou akoz i ti pran plas lannen zis avan Zwe de Zil, ki pou fer lannen prosenn La Reunion.  Vi ki i petet pli gran konpetisyon enternasyonal ki nou bann atlet pou partisip ladan avan Zwe de Zil, NSC ti fer en zefor spesyal pou ed SOGCA anvoy en pli gran delegasyon posib kot sa Zwe.  Sa ti pou donn nou bann atlet en konpetisyon enternasyonal, koman parti zot preparasyon pour Zwe lannen prosenn.  NSC ti osi fasilit partisipasyon nouvo Lasosiasyon Paralenpik Sesel ki ti partisip dan sa Zwe pou premye fwa.

Mr Speaker, kontribisyon finansyel direk ki NSC ti fer pou Team Seychelles dan Zwe Commonwealth ti ariv R461 mil 441.  Dapre bann sif ki SOGCA in donn nou, partisipasyon Team Seychelles dan Zwe Commonwealth sa lannen in kout anviron R1.8 milyon.  Sa i enkli kontribisyon sorti kot NSC ki mon fek mansyonnen, kontribisyon sorti Sekter Prive, R530 mil e bann detay i konm swivan.

Kontribisyon ki SOGCA ti fer atraver Komite Lorganizasyon Zwe Lacos, i R764 mil 881.60.  NSC li parey mon’n dir, in kontribye R461 mil 441.  Serten Federasyon in fer serten kontribisyon ki ti ariv R42 mil 802 e Sekter Prive in kontribye R530 mil.  I fer an total, R1 milyon 799mil 124.60.  Savedir, pros R1.8 milyon.  NSC in osi depans pros R1 milyon apard ki sa ki mon’n nonmen la dan bann kan lantrennman ki mon’n nonmen pli boner.  Mersi Mr Speaker.

 

MR SPEAKER

Onorab?

 

HON BERNARD ARNEPHY

Mersi Mr Speaker.  Mr Speaker, baze lo larepons Minis, eski Minis i kapab dir nou Lasanble si Gouvernman i annan plan pou etablir en Dedicated Account permanan pou sports, kot endividi, Sekter Prive ki swa lokal ouswa enternasyonal i kapab kontribye lo en baz permanan dan sa Fon, pou pli mye prepar nou bann atlet pou bann gran levennman manifestasyon sportive tel ki Commonwealth, Zwe de Zil eksetera, alavenir?  Mersi.

 

(Technical Problem)

 

MR SPEAKER

Onorab, ou kapab re-demann ou kestyon.  Minis ou ti’n fini ?  Yes Onorab Arnephy, wi.

HON BERNARD ARNEPHY

Minis ou ti’n kopi mwan?  Ou ti’n fini kopi.  Ok, thanks.  Mersi Mr. Speaker.

 

MINISTER VINCENT MERITON

Mersi Mr Speaker.  mersi Onorab pour sa kestyon ki ou’n demande.  Annefe i permet nou pou zis fer sorti ki nou ti etabli, mon mazinen an 2008 National Major Games Trust Fund ki en fon ki Gouvernman ti etabli pou kapab ganny resours pou nou kapab parey son non i dir finans, preparasyon e lorganizayon bann major games.  E enn bann premye rezon det etabli Corporate Social Responsibility Tax, sete pou ganny larzan pou kapab siport bann spor ki pe pran plas dan pei.  E en kontribisyon ki kapab al dan Major Games Trust Fund. Mon krwar ou kestyon i permet nou komans kalkile la kimannyer nou kapab fer en link ant Corporate Social Responsibility Tax avek Major Games Trust Fund pou nou gete kimannyer nou kapab servi resours ki nou gannyen dan spor akoz nou konnen difikilte ki nou rankontre, ki nou fer fas avek pou nou kapab zener resours e nou inabilite fer spor marse lo en nivo komersyal akoz baz nou popilasyon.  So, mersi Mr Speaker.  Nou ava pran sa an konsiderasyon e travay lo la.  Mersi.

 

MR SPEAKER

Kestyon 131, Onorab Samson.

HON Derek Samson

Mersi Mr Speaker.  Mr Speaker, eski Minis responsab pou spor i kapab dir nou Lasanble ki plan son Minister i annan pou ankouraz e ogmant popilarite watersport dan bann distrik ki baliz avek bann lakot?  Mersi bokou.

 

MINISTER VINCENT MERITON

Mersi Mr Speaker.  Mr Speaker dabor mon ti a kontan donn en pti revi lo spor lo delo dan pei.  Sel training scheme Mae.  Li i ti konmanse an 1977 par Yacht Club Victoria e aprezan i sitiye Roche Caiman depi 2005.  Sel training scheme Praslin ti ganny etabli an 1999 par Gouvernman.  Basen Naze Nasyonal Mae I annan en basen 25 met pou bann apranti avek en basen 50 met pou konpetisyon avek 8 koulwar.  Sa konpleks ti ganny konstri an 1992 e ti ganny renouvle an 2011 par Gouvernman Sinwan.  Basen naze lo Praslin ekskiz mwan, pou konplete sa lannen e i pou annan en basen konpetisyon 25 met avek 8 koulwar avek en basen pou apranti 13.5 met larzer.

Mr Speaker, i pe ganny finanse par Gouvernman Sesel ek lakonpannyen Vijay Construction.  Sel training scheme lo Mae i annan son progranm learn to sail, learn to surf, learn to canoe ki pe fer apre lekol pandan 3 term.  Tou sa bann progranm i pou bann zanfan 7an an montan avek bann adilt.

Basen naze nasyonnal i annan en progranm aprann naze apre lekol pou zanfan avek adilt.  Pandan vakans lekol sa bann program i zis pour zanfan.

Lo Praslin, progranm aprann naze ti pe ganny fer dan lanmer e selman letan ti napa bokou letan pandan vannswet e pandan vann nor ti ok.  Nou pe plan pou komans progranm learn to canoe lo La Digue e nou annan en servi mobile to learn to canoe lo Mae ki pou komanse lannen prosenn pou bann distrik kot kondisyon delo i bon.  Nou pe get dan posibilite pou komans progranm learn to sail osi si kondisyon delo sale i permet nou bann distrik ki board avek lakot.  Pou lenplimantasyon NSC pe aste en pick-up ek en trailer pou sa progranm lo Mae.

Pour La Digue Mr Speaker, nou annan bann canoes e nou pe rekonmans sa progranm ki ti arete 2an pase.  I annan en bezwen pou nou anmenn sa bann progranm kot nou bann zanfan pou nou kapab ogmant labaz si nou oule mentenir nou dominasyon dan losean endyen dan spor lo delo.  Nou travay an etwat kolaborasyon avek Minister ledikasyon pou ekspoz plis zanfan avek naze depi P3 ek P4.  Naze se labaz pou kapab fer tou watersport, i enportan ki nou kapab otan ki posib permet ki sa bann manrmay i aprann naze.

Plan se pou premyerman komans avek lekol ki pli pros avek basen naze e apre al pli lwen.  Avek louvertir basen naze lo zil Eve, plis zanfan ek adilt lo Praslin avek La Digue pou kapab zwenn sa progranm aprann naze.

Mendev Mr Speaker.  Pour le moman, NSC pe anploy 3 lantrener lo Mae kot Sails Training Scheme pou montre sailing, windsurfing avek canoing.  Lo Praslin i annan 3 lantrener ki pe montre sailing, canoing avek naze.  Kot basen naze i annan 2 lantrener ki pe montre naze avek 1 lifeguard pou asir sekirite nou bann dimoun ki servi basen.  Nou annan osi 4 asistan ki pou asire ki basen i ganny garde lo nivo lizyenn parey Minister lasante i demande.  Nou ganny lasitans en lantrener lo en baz part-time pou fer progranm aprann naze apre lekol.  Nou bezwen anploy plis staff letan sa fasilite basen naze lo Praslin i konplete.

Mr Speaker, spor lo delo parey nou tou nou konnen i koute, i tre ser.  Me i ti kapab vin pli bon marse si bann partner konsernen ti zwenn ansanm avek NSC pou donn en koudmen fer li vin pli onovativ dan sa domenn.  Mersi Mr Speaker.

 

 

 

 

MR SPEAKER

Onorab Samson.  Oken siplemanter ?

 

(Technical Problem)

 

MR SPEAKER

Bon Onorab Samson.

HON Derek Samson

Mersi Mr Speaker.  Mr Speaker mon ti a kontan demann Minis si i kapab dir nou konbyen Private Watersport Centers ki nou annan Sesel?  E si son Minister i annan lentansyon pou kolabor avek bann lenstitisyon konsernen pou fasilit prosedir bann commercial sport parey watersport dan nou distrik.  E lekel sa bann lorganizasyon enternasyonnal ki Sails Training Scheme i annan lyen avek pou garanti ki sa spor i ganny epanouir byen dan nou pei.  Mersi.

 

MINISTER VINCENT MERITON

Mersi Mr Speaker.  Mr Speaker mon napa statistik lo bann watersports prive me selman mon kapab fer ou ganny sa.  Me selman mon krwar i annan en nesesite ki sekter prive i agrandi pou kapab servi sa loportinite ki egziste e la partikilyerman nou pe koz sports tourism ki nou delo i kapab ganny servi koman en atou pou anmenn pa zis viziter me i kapab vin en sours reveni pou sekter prive.  Me toudfwa i annan en travay ki bezwen ganny fer avek Lotorite pou nou fasilit bann license pourki bann dimoun i kapab operate pourki sa sports tourism vreman i vin en keksoz ki Seselwa i kapab benefisye avek.

Ordinerman Mr Speaker, tou bann federasyon i annan son counterpart lo nivo enternasyonnal swa ki naze, swa ki windsurfing, swa ki sailing anba lekel i annan bann guidelines e bann gidans e bann standar ki permet ki tou bann konpetisyon ki bann large i anlinny avek sa ki pe  pratike enternasyonnal pou kil ler nou fer li isi Sesel, nou pe swiv sa bann lareg e nou pa pe fer li dan en lot fason ki kot nou.  Me selman Mr Speaker, parey mon’n dir Onorab mon ava ganny plis lenformasyon lo sa bann scheme prive ki annan e mon ava les ou gannyen.  Mersi Mr Speaker.

 

MR SPEAKER

Bon nou pou adjourn, nou’n ariv alafen Question Time.  Nou pou rezwenn ziska 11er kot nou pou pran Bills.

(BREAK)