::
Home » Verbatim » Verbatim - Third Term 2008 » Tuesday 7th October, 2008

Tuesday 7th October, 2008

NATIONAL ASSEMBLY OF SEYCHELLES

Tuesday 7th October 2008

The Assembly met at 9am

National Anthem

Mr Speaker in the Chair

MR SPEAKER

Bonzour tou bann manm Onorab, bonzour Minis pour Lasante e bonzour tou bann dimoun ki pe ekout nou. Nou a komans ek nou travay pour ozordi, nou a komans ek kestyon pour Minis pou Lasante ek Devlopman Sosyal, Minis Marie Pierre Lloyd. E nou a komans avek kestyon 165.  Onorab Waven William pa dan pei, alors  mon konpran Onorab Pool pou demann kestyon dan son plas.

 

HON ANDRE POOL

Mr Speaker bonzour. Bonzour Minis, bonzour tou dimoun.  Mr Speaker Onorab Waven William, Manm Lasanble pou Grand Anse Mahe e non pa Grand-Anse Praslin parey lo Order Paper i ete, i ti anvi demann Minis responsab pour Devlopman Sosyal kwa ki pe ganny fer pou ganny sipor bann groupman relizye ki’n anrezistre Sesel pou ede konbat bann fleo sosyal  ki nesesit sa lenfliyans moralite.  Mersi.

 

MINISTER MARIE-PIERRE LLOYD

Mersi Mr Speaker.  Mon a dir Onorab William e son reprezantan isi la, Onorab Pool mersi pour sa kestyon.  Mon ti a kapab konfirmen ki mon Minister i annan en bon dyalog e nou kapab dir en bon korperasyon nou partnership avek tou bann groupman relizye.  Si nou rapel an 1999 ti annan en stratezi ki nou ti devlope, sa stratezi ki apel social development, sa vedir nou stratezi devlopman sosyal e en par ladan ti dir ki nou bezwen fer sir ki nou ogmant partisipasyon Sosyete Sivil dan devlopman e sa i enkli tou bann groupman, e bann group relizye.

E ki nou fer se ki parey ou konnen i annan plen aktivite ki nou fer ki nou si ou kapab dir envit partisipasyon Legliz oubyen bann groupman relizye e i annan osi kot zot zot fer zot bann aktivite kot zot envit nou e nou fer sir, si i envit mwan mon ale, si mon pa kapab ale definitivman mon anvoy en reprezantan nou Minister akoz nou realize, nou rekonnetki ler nou pe koz lo moralite sa se sirtou ou kapab dir, lobzektif sa bann groupman relizye.  E i annan bann lo nivo Konsey Nasyonal pour bann Komite ki nou fer ki nou fer sir i annan reprezantasyon bann sorti dan bann groupman relizye.  Lo DAC i annan, lo bann Komite ki nou annan, ki nou fer i annan de ler pou regard en problenm ou en sitiasyon an partikilye nou envit bann larelizyon.  Menm ler nou ti pe fer sa – an 2006, ‘ansanm pou lanmour Sesel’, nou ti annan, mwan mon ti chair, en group action plan, pour sa nou ti fer sir kit i annan reprezantansyon sorti dan sa bann groupman relizyez.

 

HON ANDRE POOL

Mr Speaker etan donnen la kantite groupman relizyez ki annan dan Sesel, mon ti a kontan si Minis i ti kapab eksplik nou eski i satisfe ki zot pe partisip oubyen zot pe enterakte ek tou sa bann groupman oubyen si i annan zis serten ki zot annan sa enteraksyon avek.  Mersi.

 

MINISTER MARIE-PIERRE LLOYD

Mr Speaker dapre ki mon konpran la konmela i annan ape pre 26 lasosiasyon  relizyez ou spirityel ki’n anrezistre isi e ki en manm LUNGOS.  E parey nou konnen LUNGOS se sa Lorganizasyon lo nivo nasyonal, i koman en liyezon pour tou sa bann organizasyon dan Sosyete Sivil, ki nou apel Sosyete Sivil e zot zot annan  already sa regroupman.  Parey nou apresye koman en Minister e koman Gouvernman, nou rol se fasilitater.  Nou fer sir nou kapab donn sa bann lanvironnman, donn sipor me pa neseserman ki nou pou kapab ed tou.  Me selman parey mon dir ziska prezan sa ki mon okouran se ki tou sa bann groupman si zot demann nou en lasistans – i annan deler zot zot pe fer aktivite, zot oule, ou kapab dir, en eksper petet sorti dan nou Minister pou vin koz lo en keksoz partikilye, si pou koz lo drog si pou koz lo lezot keksoz, alors i envit nou e nou, nou ale.

 

HON JEAN-FRANCOIS FERRARI

Mr Speaker, mon ti a kontan demann Minis si i ti kapab eksplik Lasanble, sa Polisi Gouvernman ki ler i annan en lof pou en reprezantan en Sosyete Relizye pour partisip dan en Lorganizasyon oubyen dan en travay ki Gouvernman i fer, akoz eski Gouvernman, li ki deside lekel dan sa legliz oubyen dan sa Lorganizasyon ki li i pou swazir plito ki les sa Lorganizasyon swazir sa dimoun ki pli apropriye pou li kapab kontribye dan sa travay spesifik ki pe ganny fer.

Akoz sa latitid konmsi ki Gouvernman ki bezwen deside lekel e ler ou gete ou vwar menm Pret par egzanp ki ganny mete lo tou sa bann komite.  Akoz konmsi sa i mars koumsa.

 

MINISTER MARIE-PIERRE LLOYD

Mr Speaker, mon pa okouran si Gouvernman i annan en tel Polisi.  Sa ki mon konnen se ki dan mon Minister i annan sa bann komite ki mwan menm mwan, mon’n apwente imoun e mon pa apwent sa dimoun mwan, mon demann sa Lorganizasyon relizye e an zeneral parey nou konnen oparavan nou’n annan sa 2 ki nou kapab dir legliz ki reprezant plis dimoun e nou ti envit zot e zot mon pa konnen kimannyer zot organiz zot, si zot osi zot annan serten Per ki spesyaliz dan serten domenn.  Me selman nou nou pou demann sa legliz pou anvoy en reprezantan.

HON DAVID PAYET

Bonzour Minis, bonzour tou dimoun.  Eski Minis i kapab enform sa Lasanble ki meyer fason son Minister ti a swete ki sa bann groupman relizye i aport zot kontribisyon.

MINISTER MARIE-PIERRE LLOYD

Mr Speaker, mon krwar zot pe fer bokou e konmela parey nou vwar diferan, parey nou dir dan sa 26, mon ganny envite diferan landrwa ki en ler mon pa kapab al partou.  E kontrer mon a pran sa lokazyon pou mwan dir mersi pou tou sa bann organizasyon, sa bann groupman relizye ki pe fer sa zefor akoz parey nou konnen nou dir sa bann ki nou dir fleo sosyal i pa en bann fleo ki okenn zis en dimoun.  Definitivman nou bezwen fer en zefor parey nou dir lo tou kote. Alors tou groupman, zot pe fer, si zot kapab fer plis, sa zot a konnen, selman mwan mon kapab dir onivo Minister nou apresye sa ki zot pe fer.  E parey mon dir si zot kapab fer plis, sa i pa mwan ki pou al dir zot devret fer plis, or zot kapab fer plis, zot, zot konnen ki zot kapab fer.

Me selman parey mon dir, mon krwar nou tou nou okouran pour dir i annan en bon pe aktivite ki pe ganny fer.

 

HON WAVEL RAMKALAWAN

Bonzour Minis, bonzour tou manm e tou dimoun ki pe ekout nou.

Mr Speaker, mon ti a kontan demann Minis, vi ki lakantite group relizye i kontinnyelman miltipliye dan nou pei, mon ti a kontan demann li ki formil ki i pe aktyelman servi pour li envit sa bann diferan groupman ki annan en kontribisyon pou fer sakenn dan son fason, pou asiz lo sa bann board.  Kimannnyer konmsi i pe sey manage tou sa la.

 

MINISTER MARIE-PIERRE LLOYD

Mr Speaker, parey mon’n eksplike oparavan sirtou ti annan parey nou konnen 2 pli gro groupman.  E anvi ki nou pe viv e travay dan en demokrasi nou fer sir ki nou ganny reprezantasyon sorti dan sa bann groupman ki pe reprezant plis dimoun.  Me depi ki nou annan sa bann diferan groupman parey nou konnen knou’n dir la i annan 26 e mon’n fer sorti taler poudir zot tou zot in groupe atraver en lorganizasyon ki zot pe apel en Seychelles Evangelistic Alliance. Prezan la nou nou pou al kot LUNGOS, si nou annan en keksoz, nou pou envit LUNGOS, pou dir nou annan tel aktivite, nou ti a oule en reprezantan dan sa bann groupman relizye.  Prezan zot zot a deside lekel ki zot pou anvoye.  Nou pou bezwen fer li koumsa, sa ki nou pou manage li akoz parey nou konnen nou pa pou kapab al kot dan sa 26 sakenn enn, sakenn son tour or whatever.  Nou pou bezwen al atraver sa bann kritir ki already la kot nou pou kapab dir anvoy nou en reprezantan.

MR SPEAKER

Kestyon 166 Onorab Alcindor.

 

HON REGINA ALCINCOR

Eski Minis i kapab dir nou si son Minister i annan okenn plan reviz Lalwa, pou met anlinny laz ki en zanfan i kapab annan relasyon seksyel ek laz ki i kapab ganny akse ek kontraseptiv.

 

MINISTER MARIE-PIERRE LLOYD

Mr Speaker, ler mon ti regard sa kestyon premye kou mon ti krwar i en kestyon senp.  Ler mon’n al pli profon mon vwar en kestyon ase konplike e konpleks.  Akoz?  Set akoz nou napa en Lalwa ki donn license nenport dimoun ki pou dir i kapab fer sex tel laz, tel laz.  Me nou annan en Lalwa pou protez sa ki nou apel zanfan e sa Lalwa i anba sa kod Penal 130(1)(a). E sa Lalwa ki i fer, i tret koman en lofans, nenport aksyon seksyel avek en zanfan anba 15an.  Sa vedir i pa pe dir manrmay 15an, 16an, i kapab fer sex.  Me i dir si en dimoun i fer relasyon seksyel i pa en lofans si sa zanfan i 15an a montan.  E akoz ti fer sa – e sa i pa zis Sesel – set akoz ki i dir en zanfan 15an ziska 18an i annan ki si in donn son konsantman – si i napa son konsantman li sa zanfan, savedir i pou vin en sexual assault, me si i annan en relasyon avek en dimoun, alor i fer sa relasyon seksyel, i dir i annan sa kapasite pou li kapab konpran ki i pe fer.  E Lalwa i dir, sosyete i dir se ki en zanfan 15an or anba 15an li i napa sa kapasite, sa matirite pou li konpran ki i pe fer.  Savedir nou protez li e okenn dimoun ki annan relasyon seksyel avek en zanfan anba 15an se labi, nou apel labi sa, sexual abuse.  Savedir i kont Penal Code.  Sa i enn sa Lalwa.

Prezan lo kestyon Lalwa donn kontraseptiv, ankor les mwan met li dan konteks.  Kontraseptiv parey nou dir an Kreol i tou sa bann metod ki pou anpes en madanm tonm ansent.  An realite annou met li senpleman, so, dan sa bann metod i annan diferan parey nou konnen.  Nou’n tann nonm lo kapot, nou tann pilil, nou tann piker, sterilize etc.

Now, mon krwar akoz i annan bann diskisyon ki’n deza ganny leve ki Onorab Alcindor pe koz lo sa ki nou pe dir pilil akoz parey nou konnen kapot lakse i lib, ou kapab gannyen partou sa.  Se pilil ki vin, si nou kapab dir en pwen kontrovers.  E akoz – Set akoz dapre tou nou bann Civil Code e bann lezot Lalwa ou pa kapab donn en tretman medikal menm dantis en zanfan anba 18an san konsantman son paran.

So, sa pilil i en tretman, ou bezwen konsantman, i accessible li me pou sa zanfan anba 18an i bezwen ganny konsantman son paran. E parey mon dir sa anba Civil Code e menm anba Children’s Act Seksyon 78, i annan amannman 1998 ki ti donn zirisdiksyon Family Tribunal ki si, fer konmsi mon fiy 17an li i annan relasyon seksyel, in al kot Youth Health Centre wherever laba pou donn li kontraseptiv, laba i dir pa kapab fodre ou dir ou manman, mwan mon dir non, pa donn li, mon pa donn mon konsantman, sa aprezan i kapab fer laplikasyon anba Family Tribunal ki si zot krwar poudir sa i pou en bon lide donn li san mon konsantman, ou kapab dan Family Tribunal determinen. E in arive ka, pa lo kontraseptiv me lo lezot entervansyon medikal kot paran pou le rezon ennler relizye or lot, i pa dakor ki ou kapab fer en court order akoz dokter oubyen sa profesyonnel lo nivo lasante i kapab dir poudir sa i pa dan best interest of the child or i pou son lasante osi swa mantal swa fizik plito ou donn li sa tretman.

So, pou le moman nou Minister nou napa en lentansyon oubyen en plan pou nou dir met anlinny.  Ki nou’n fer toultan se ki i annan en gid ki li ners, oubyen dokter ler i pe ganny en zanfan anba laz e la nou pe koz sirtou sa 15an, 18an la. Akoz anba 15an i apel: No low.  I en lofans.  So, nou pe koz sa manrmay 15an amontan.  Li ler i pe vwar sa zanfan i annan en gid ki donn li pou li kapab – enn, ou bezwen fer counselling. Ou bezwen esplik li konsekans son bann aksyon.  E apre zot konnen zot  ki zot zot kapab fer avek bann Lalwa ki annan ek lezot keksoz.  Me selman mwan, personnelman mon’n deza fer konsiltasyon avek paran e parey ou konnen menm zenn e mon ti dir poudir sa i en pwen kontrovers i pa osi senp, akoz menm zenn, pa tou zenn ki dakor ki manrmay 15an a 18an i devret ganny kontraseptiv.  E pa tou paran osi ki dakor.  E nou konnen poudir i annan paran petet nou apel zot paran responab or whatever me i annan paran ki ler li i konnen ki son fiy 16an or 17an i dan en relasyon seksyel, li menm li i al avek son fiy kot klinik pou donn son konsantman pou son fiy ganny tretman. Ok.

Mon krwar dan sa laspe olye ki nou pou al met sa bann Lalwa anlinny akoz sa Lalwa i pa kouver zis kontraseptiv, nou pa fer en Lalwa kontraseptiv.  E parey mon dir, fer byen kler poudir sa ki nou pe dir pilil i en tretman olye sa ki nou pe dir condom, kapot, nou tande poudir i donn pli bon proteksyon kont tou lezot maladi transmisib par sex osi enkli SIDA e mwan mon krwar ki nou devret ankouraz plis – nou pa pe ankouraz manrmay al fer sex la, me selman nou pou ankouraz plis servi sa akoz li premyerman i donn plis proteksyon e dezyenmman i pa en tretman ki ou pou bezwen pe al donn en zenn manrmay.

 

MR SPEAKER

Siplemanter, Onorab.

 

HON REGINA ALCINDOR

Mr Speaker, eski Minis i kapab dir nou ki arive da ka kot en zenn anba 18an ki deza annan en zanfan e son paran pe refize pou sinny papye pou li ganny kontraseptiv.  Ki fason konmsi ou pou protez li kont en lot lansentman, i deza anba 18an li.

 

MINISTER MARIE-PIERRE LLOYD

Mr Speaker, parey mon’n esplike, premyerman si in already annan en zanfan i kapab al Family Tribunal.

Annou al pli lwen, si nou pe get laz maryaz, en fiy 15an i kapab avek konsantman ankor marye.  Me pou sa lot zafer ki nou’n dir, i ankor en miner li.  Be det, ki i marye in vi’n en emancipated minor.  Savedir i ganny konsidere pou lezot keksoz, koman en adilt prezan.  Si nou konnen en zenn in already annan en zanfan, prezan son paran i still pa pe dakor pou li pran kontraseptiv be sa i en ka parey nou dir, sa gid ki nou dan lasante nou donn tou nou bann travayer e osi sa manrmay i kapab, sosyal i ava ed li pou li al apply Family Tribunal.  Akoz la i dan best interest of the child e en lot child ki pou vini ankor. So, i annan fasilite pou nou fer li.  Parey mon’n esplike, Family Tribual i kapab, ou kapab fer en court order.  E tou sa bann keksoz nou fer sir nou fer li plis ki posib, avek konsantman ou menm laprouvasyon, ou korperasyon paran.

 

HON VICKY THERESINE

Mr Speaker, Minis in koz lo gid ki deza egziste dan Minister lasante, parfwa bann counselling ki zot osi annan one to one avek en paran ki vi’n devan zot me eski Minis i kapab enform nou Lasanble si son Minister pe osi mazin lo nivo nasyonal, sansibiliz bann paran lo fason ki zot, zot pou kapab edik zot zanfan kan eski i pli apropriye pou zot antre dan en relasyon seksyel.

 

MINISTER MARIE-PIERRE LLOYD

Mr Speaker, mon krwar de-tan-za-ot, nou fer, nou’n fer e nou pou kontinnyen fer akoz se sa mesaz ki nou pou bezwen pas avek nou bann zenn ek nou bann paran; se responsabilite i enn, nou bezwen bann paran responsab, nou bezwen bann adilt reponsab akoz annou fer kler ki poudir tou relasyon seksyel i involve 2 dimoun.  Nou koz zenn, zenn me nou osi bezwen fer en lapel, akoz  trwakar  li i zenn me son partner i en adilt, trwakar.  So, nou bezwen fer en lapel avek tou nou dimoun enkli adilt akoz sa zafer fer sex, relasyon seksyel ler ou tro zenn i annan son moralite me apart son moralite i osi annan lo nivo son laspe lasante, ou’n met ou lekor anba en bann risk e sa in ganny prouve.  Pa zis pou seselwa, partou dan lemonn. In ganny prouve si en zenn i komans sex tro zenn i ganny en bann risk, depi kanser tete, kanser kolmatris e lezot problem ankor.  So, nou, nou kapab edike atraver lekol atraver partou kot nou ganny zenn pour dir  pa   bezwen antre dan sa bann relasyon seksyel. E parey mon’n dir paran osi, nou bezwen kapab konpran e tou lezot dimoun ankor.

HON WAVEL RAMKALAWAN

Mr Speaker, vi ki letan nou zanfan i kit kot nou, nou nepli annan kontrol lo li dan bokou sans, nou pa konnen ki i al fer. Eski Minis pa krwar ki moman in arive pou son Minister pran en lapros realis lo sitiasyon nou bann zenn ozordi e fer bann lamannman apropriye dan Lalwa kot i konsern kontraseptiv pou permet en zenn dan sa laz ki seksyelman aktiv pran son responsabilite e al kot Family Planning Clinic e ganny bann kontraseptiv ki neseser pou son prop proteksyon pou li pa tonm ansent si i vreman aktiv – pour li pran son responsabilite.

 

MINISTER MARIE-PIERRE LLOYD

Mr Speaker, mon Minister – e toultan nou’n dir sa : Nou nou pa la, e leta pa la pou li antre dan fanmiy pou ranplas paran. Paran i bezwen pran son responsabilite.  Mon pa konnen ki laz Onorab Ramkalawan ki laz, ler nou dir nou bann zanfan in sorti kot nou.  Letan ou pa sorti kot ou ziska ler ou ou pe al fer ou lakour avek en lot dimoun, konmela i annan ki fer son lakour lanmenm-la.  So, ler nou’n dir in sorti, se ki i nepli anba nou kontrol, petet i pe reste dan menm lakaz selman nou, nou nepli kapab kontrol li.

Me si i anba laz,e sa i en lot zafer akoz si i anba laz nou devret kapab depi boner annan en relasyon ek nou zanfan ki pou nou kapab gid li e pou nou kapab donn li sipor e pou nou kapab eksplik li menm lo sex e lo tou keksoz e demen si li i still annan son relasyon e parey mon dir i annan konmela paran ki pe fer sa – i konnen li ki son fiy 16an i dan en relasyon e i dir ok, alors annou ale, nou ale mon donn mon konsantman, parey nou dir pou ou pa tonm ansent.  Me pou sa Minister, al sanz Lalwa mon pa krwar sa i pou solve nanryen akoz la i annan en Lalwa ki pou sanze anpes dimoun ansent.  Me nou konnen, i pa’n prouve poudir dimoun kantmenm i annan akse avek kontraseptiv i pa anpes li tonm ansent e nou konnen sa.  I annan adilt ki par lao 18an kantmenm i pe vini pe pran son Family Planning, i still annan li 2, 3, 4, 5, zanfan e ennler ou demande: ‘Be eske ou pe pran, ou pa pe pran?’. So, i napa proof pour dir akse i vedir Family Planning. So, mwan parey mon dir e mon pa krwar sa zafer la nou pou kapab al ek li ek Lalwa, nou annan bann mezir kot sa bann ki li i pe aktiv e nou realis nou, nou konnen ki i annan ki pe aktiv, i annan fasilite pour zot kapab ale ek en Court Order, si paran pa oule donn konsantman pour li kapab gannyen.  Nou annan gidans ki nou donnen akoz nou konnen ki poudir larealite, i annan plen zanfan anba laz konmela ki pe gannyen kontraseptiv.

 

HON GERVAIS HENRIE

Mon ti ava kontan demann Minis lefe ki i annan Lalwa ki kler lo laz vote, i annan Lalwa ki kler lo laz kosomasyon e vann lalkol, kwa ki konplike pour Gouvernman enn fwa pour tou met en liniformite dan laz kot en zenn i kapab fer relasyon seksyel avek son prop konsantman e ki anmenmtan ganny akse e pour enn fwa pour tou met en liniformite e en lord e solve bann konfizyon ki annan.

 

MINISTER MARIE-PIERRE LLOYD

Mr Speaker, dan sa bann Lalwa bann miner la, parey nou pe dir, i napa liniformite li. Akoz i dir en zanfan si ou anba 18an ou ankor en zanfan.  Ou vote ler ou 18an, ou pou dray ler ou 18an me ou kapab travay si ou fini lekol 15an ou 16an ou kapab travay me selman i annan de travay ki dir travay aswar ki nou dir zanfan an risk.  Tousala se ki  pe protez zanfan.

I annan lezot keksoz ankor ki zanfan i kapab fer anba 18an.  Akoz ler nou ti fer sa konsiltasyon, zenn ti demande kimannyer zot kapab dir nou – akoz i annan zenn ki dir ou tire sa 15an, protez li ziska sa laz 18an.  E i demann egzakteman sa: Akoz mon pa kapab dray, mon pa kapab al disco san ki mon 18an me selman mon kapab sex 15an? Be parey nou pe dir sex 15an, nou pa pe dir ou ou kapab sex 15an me nou pe dir sa dimoun ki pe fer sex avek ou i pe abiz ou si ou anba 15an.  Sa i pa en license pour dir fer sex.

E si nou al fer en Lalwa, ler nou pou fer Lalwa, Lalwa i kouver tou dimoun.  Olye sa i annan en group e mwan mon pli vomye  nou deal ek sa group, one to one, counselling, one to one, si fodre donn li son kontraseptiv, nou donn li, ler nou’n fini counsel li nou vwar son sitiasyon realis, nou deal ek en endividi.  Nou pa pou al fer en Lalwa lo nivo nasyonal pou mwan dil avek sa bann aspe ki nou pe leve la.

 

HON MARIE-ANTOINETTE ROSE

Eski Minis i annan en plan petet oubyen si i kapab esplik Lasanble si i annan en plan, pou get lot kote sa coin e deal enpe pli severman avek bann zonm, bann zenn adilt ki souvann fwa annan en gran lenfliyans lo sa bann zenn fiy 15an a 18an pou fer Lalwa en pti pe pli sever avek zot.

MINISTER MARIE-PIERRE LLOYD

Mr Speaker, Minister sa se en batay si ou kapab dir, toulezour nou avek sa. I annan Lalwa ki dir, i annan bann ka ki nou pran lo nivo Minister nou anmennen me ennler kot i arive, ler i pou ariv Ankour, la prezan ki nou ganny defayans.  I annan kantite bann ka labi ki parey nou konnen i ankor, kot prosekiter, oubyen i ankor en kour, anvoye parti anvoye.  E sanmenm sa ki mon dir e mon fer en lapel ankor la, pour nou tou, nou tou adilt akoz nou tou nou annan en rol pour zwe, avoka – akoz ler en zanfan in ganny abize  fodre nou donn en mesaz kler e apre parey ou’n fek dir e parey mon’n dir sa ledikasyon nou fer toultan e fodre nou kontinnyen fer li e legliz i fer li, sa bann groupman relizye i fer li e nou osi Minister nou fer li pour dir: Annou pran en responsabilite, annou realize koman adilt kosekans nou aksyon e annou pa abiz sa bann zenn manrmay.  I apel en labi.  E parey mon dir i annan zenn ki santi ki demann sa proteksyon ziska 18an.  Savedir tire sa 15an, met 18an.  So si nou pou met anlinny swa nou pou lev sa 15an nou anmenn li 18an, dir okenn relasyon seksyel avek en dimoun 18an, oubyen nou dir 15an e parey mon pe dir apre nou konnen i annan lezot konsiderasyon i ganny pran ek sa 15an parey mon’n dir sa i pa zis Sesel sa.  I dir ou si ou’n fini lekol, kekfwa ou ale ou travay, ou zwenn en dimoun  ou set up home.  Ou osi oule fer ou fanmiy, so, ou donn sa fasilite si en dimoun ki koumsa, en manrmay i ankor anba 18an me i dan sa sitiasyon koumsa, ou donn li fasilite, i ganny son konsantman, i a ganny son kontraseptiv, si i dan en relasyon seksyel.

Sa i pa zis zafer pou fer sex, i dan en relasyon seksyel.

 

MR SPEAKER

Kestyon 167, Onorab Alcindor.

 

HON REGINA ALCINDOR

Eski Minis  i kapab dir  nou si son Minister pe konsider servi plis medya pou konsyantiz popilasyon lo bann diferan fleo ki pe kontinnyen afekte la fanmiy e sosyete anzeneral.

MINISTER MARIE-PIERRE LLOYD

Mon pa krwar si i annan en Minister ki pas lo medya enpe plis ki mon Minister, mon ti a voudre konnen.  Akoz tou sans ki nou gannyen nou servi medya, nou servi televizyon, nou servi radyo, parey ou konnen sa bann fleo- i annan diferan fleo.  Sa bann diferan fleo nou pe dir onivo lasante i osi sosyal.  Nou annan progranm : ‘Viv byen, viv lontan’, nou annan lo radyo ‘Studio Clinic’, nou annan ‘Family Page’ lo Nasyon, sa bann ki nou kapab dir recta, tou le semenn nou annan.  Apard sa nou annan tou sa bann theme days ki nou dir nou fer, kot nou servi medya, swa mon anvoy en mesaz, swa Prezidan enn-ler i anvoy en mesaz, swa nou donn en press release lo sak sa topik.

Si nou fer okenn levennman, workshop etc…, toultan nou demann medya pou vini. E ankor mon ti a demann bann lezot medya apart Nasyon, bann lezot newspapers, mon krwar zot kapab servi. Vini mon a donn zot enpe lenformasyon si fodre, servi akoz zot osi zot annan zot lodyans pou kapab met sa bann mesaz ladan.  E nou, nou pare pou kontribye lartik e whatever it is ki zot kapab mete akoz i ava reach bokou plis dimoun.  Me selman nou pe servi – si menm medya ti kapab donn nou plis letan, nou annan ase pou nou mete, pour nou anpli, swa lo papye oubyen radyo.  Me parey nou dir i napa zis nou osi, so, zot donn nou nou slot me ler zot donn nou nou slot, mon krwar nou fer sorti ase.

HON REGINA ALCINDOR

Eski Minis i kapab dir nou si zot annan en plan oubyen progranm an konzwent ek SBC lo ki mannyer zot priyoritiz sa bann progranm  ki pase.

 

MINISTER MARIE-PIERRE LLOYD

Nou, Minister i priyoritiz son bann topik, ennler parey nou dir i annan sa bann theme day, parey la Oktob i pou Kanser, so la nou pou koz Kanser plis.  Me apre i annan de ler i annan de keksoz ki arive e nou pou deal avek, adres li. Se pa vreman SBCSBC ler in donn ou ou slot, ou, ou ranpli li mannyer oule. Nou pa priyoritiz avek li me nou priyoritize – dan Minister i annan en komite, nou annan nou Health Promotion, kot sosyal osi nou annan ki regarde ki bann topik ki nou pou atake, ou adrese pour sa mwan or sa semenn.

 

HON TERENCE MONDON

Mon kestyon pour demann Minis, ki mekaniz son Minister i annan pou kapab evalye rezilta sa konsantizasyon, ki zot pe fer atraver medya.

MINISTER MARIE-PIERRE LLOYD

Evaliasyon, sanzman konportman i pran letan, i pa fasil.  Me selman nou annan de tout fason akoz nou annan tou bann, si ou kapab dir, statistik ki ranmase, dir lo nivo lasante, lo nivo lasante nou kapab dir ki dimoun la prezan, pe fer plis sa.  Ou pa pou kapab vreman dir, direkteman poudir si ou vwar en sanzman dan en konportman sa i relye direkteman avek sa lenformasyon ki ou, ou’n donnen.  Sa i pa fasil, me selman nou, nou kapab gete anzeneral si nou pou dir, si la i annan mwens bann zenn ki tonm ansent pli ba e parey nou pe dir ou pa kapab zis dir sa ki nou, nou fer ki li.  Petet i annan lezot keksoz ki pe ganny fer par lezot bor, lezot lorganizasyon ki pe enfliyans, pe sanz sa konportman.  So, i pa vreman konmsi nou pou kapab dir : ‘Wi, nou annan en tim pou fer sir ki sa i direkteman relye ek sa’.

 

HON WAVEL RAMKALAWAN

Eski Minis i kapab dir nou, dan travay Minister Lasante, a ler aktyel si i ti pou grad bann fleo, bann problenm an komansan par son gravite, ki ti pou lord ki Minister Lasante ti ava donn nou.

 

MINISTER MARIE-PIERRE LLOYD

Mr Speaker, ler nou dir gravite, konmsi si nou pe dir gravite,  nou dir SIDA i serye, drog i serye, lalkol i serye e i annan son gravite, ou a mezire lo konbyen i pe kout nou, i annan son gravite, i pa zis lo nivo lasante e al osi dan sosyal ki i pa fasil pou nou, si ou kapab dir met en figure lo la.  Mon pa konnen konbyen i koute.  Me selman nou konnen pour dir ek son konsekans sosyal spirityel e tou, i kout nou en kantite.  So, ler nou pe dir – petet Onorab mon ti a extend olye ki Lasante, mon ti a dir Lasante ek sosyal.  Mon vwar drog, lalkol akoz se sa bann ki enn ler pe fer dimoun, sa bann konportman ki prezan i fer li al tonm dan diferan problenm or ganny bann diferan lezot maladi osi.

 

HON GERVAIS HENRIE

Mon ti  ava kontan demann Minis anvi tou sa bann sanzman ki pe arive dan Sesel an se moman, sirtou lo nivo ekonomik, eski ou Minister pou touzour annan sa volonte politik sirtou, pou ouver zot laport avek medya e koz libreman lo bann size san fer ki bann lenformasyon ki ganny devwale pou anbaras Gouvernman, pou koz libremann avek bann proganm parey radyo i annan en Progranm ki apel ‘Larout ver UNDP 2015’ en keksoz konmsa, ki tous bann size tre sansib pou Gouvernman.  Eski zot annan sa volonte politik pou koz lo la libreman.

MINISTER MARIE-PIERRE LLOYD

Mr Speaker, mon krwar ankor sa Minister Lasante e Devlopman Sosyal, mon krwar ziska prezan nou’n demontre poudir nou ouver lo sa bann topik sosyo ekonomik.  Nou pa kapab koz lo lekonomi akoz sa i pa nou ekspertiz.  Me selman bann konsankans ki nou dir lo sosyal, mon krwar nou’n toultan fer li e nou pou kontinnyen fer li.  Pou nou kapab fer nou bann polisi, fer nou bann stratezi lo nivo devlopman sosyal, nou bezwen kapab koze.

 

HON JEAN-FRANCOIS FERRARI

Mon ti a kontan demann Minis avek reoganizasyon Minister Lasante e kreasyon Lotorite Lasante pli boner sa lannen, eski Minis i satisfe ki i annan ase resours ki pe al dan Health education e Health Prevention. E ki son Minister pe fer pou engage avek bann Lorganizasyon enternasyonal ki bann donors bokou dan sa sekter, pou fer sir ki bann resours i reste available pou bann lannen ki pe vini.

 

MINISTER MARIE-PIERRE LLOYD

Mon krwar i enn pti pe andeor, be selman mon pare reponn. Akoz dan sa bann restriktirasyon i definitivman sa ki nou pe dir promosyon lasante kot i annan Health Education kot pou donn lenformasyon piblik e se sa ki vreman depi ler nou’n restriktire an realite depi ler mon’n al dan Minister, nou’n komanse dir poudir sa Departman Lasante son rol primordyal se lasante piblik, e son rol primordyal se sansibiliz dimoun lo bann fleo, donn dimoun lenformasyon e edik li pour li kapab pran swen ek li menm e fer sir ki son lasante i meyer.

E lot pwen ankor se sanmenm dan sa departman ki nou pe ranforsi lo kestyon korperasyon.  Parey in dir korperasyon akoz i annan bokou sa bann progranm ki already la, nou pa ni bezwen  al re-envante, fer konmsi WHO i annan kantite progranm, Commonwealth ki nou form par ladan e ankor kantite progranm lo nivo lasante, ledikasyon etc… pour diferan group ki nou, nou pe al ranforsi nou unit kooperasyon pour nou kapab – parey Onorab in leve, pou nou kapab ganny  lavantaz, servi sa bann lorganizasyon parey.

 

MR SPEAKER

168, Onorab Prea.

 

HON NICHOLAS PREA

Mr Speaker mon ti a kontan demann Minis si son Minister pe rankontre difikilte pou ganny serten latizann e ki lezot demars son Minister pe fer pour adapte avek sa mankman.

MINISTER MARIE-PIERRE LLOYD

Mr Speaker, mon krwar mon happy, parey nou dir, poudir ki nou napa mankman latizann. Konmela nou napa mankman latizann e sa petet i akoz :

1.  Nou’n pran detrwa mezir pou nou fer sir ki nou pa mank ankor, sirtou bann latizann ki nou konnen bann latizann esansyel.

2.  Nou’n met an plas en stock order level ki 3 mwan avan ki sa keksoz i fini, nou kapab komans order.

3.  Nou’n osi redwir demann e presyon lo nou Bidze.  Akoz parey ou konnen avan, i anann dimoun ti kapab vin aste bann latizann ki nou dir non-essential, bann latizann ki nou  kapab vann parey nou dir atraver konmsi dan en laboutik, panadol, lakrenm, mannyezi eksetera.  Nou ti fer vini sa e apre nou ti vann.  Prezan nou’n tire sa.  Akoz nou’n tire?  Se ki prezan parey zot vwar nou pe donn permisyon bann ki pe vin apply, Sekter Prive pour zot ouver en farmasi, nou donn zot permisyon pou zot ouver en farmasi ki en mannyer dimoun i ava annan akse, i ava annan en pli gran akse avek en pli gran swa lo latizann.  E nou koman Minister nou konsantre lo bann latizann ki nou dir esansyel e osi bann latizann ki nou dir kontrole, ki zis nou ki kapab enporte, sa bann farmasi pa pou kapab enporte.

 

Dan sa zafer ki nou pa vann i osi tou, nou Polisi prezan se ki tou bann preskripsyon ki sorti kot dokter prive, ki konmela si en dimoun i al kot dokter prive, ler i vin ek son preskripsyon nou ti still vann li latizann, be la i pa bezwen vin kot nou, al kot farmasi laba, a mwen ki laba farmasi sa i en drog kontrole, savedir i pou bezwen vin kot nou.  Savedir nou pe tir enpe pou nou pa depans lo sa bann lezot latizann ki lezot farmasi i annan e sa i aplik osi pou bann etranze, bann travayer etranze menm touris si i vini i bezwen latizann, ganny preskripsyon i kapab al aste olye vin kot nou, vin laba.

E osi nou’n met en plas serten mezir kot nou kontrol enpe plis, pli strik, pou nou redwir labi, redwir gaspiyaz enkli sa bann over prescribing ki ennler i annan serten dokter ti pe fer.  E i annan vol osi parey nou konnen ki pase, sa osi nou’n pran mezir neseser.  Me apre osi petet mon a fer sorti poudir en lot rezon ki la, nou pou napa, nou pa ekspekte ziska lannen fini pou annan e menm lannen prosenn se ki akoz nou Bidze – parey nou konnen dan sa Bidze Siplemanter e mon dir granmersi tou bann ki ti vote pou sa Bidze Siplemanter ti annan en porsyon ladan ki ti pou al pou lasante pour sirtou latizann. Ti annan 7 milyon.

 

HON NICHOLA PREA

Mr Speaker, mon ti a zis kontan demann Minis si i a kapab konfirmen ki mankman ki ti arive detrwa mwan pase i pa pou ariv ankor.

E apre si son Minister, …..

 

(interruption)

 

MR SPEAKER

Onorab, address the Chair, demann ou kestyon.

 

HON NICHOLA PREA

..Si son Minister i pe ganny ase sipor atraver deblokman peyman pou kit bann supplies ki sorti kot bann suppliers pou rantre.

 

MINISTER MARIE-PIERRE LLOYD

Mr Speaker, parey mon’n dir komela bann problenm deblokman nou napa e mon pa kapab garanti poudir nou pa pou zanmen ganny en dekalaz.  Mon’n dir nou donn stok me i annan-de-ler i annan bann ki pa lo sa lalis en dimoun i bezwen sa latizann.  Bann defi ki nou annan e mon krwar in deza ganny fer sorti se ki defi koman en pti pei kot nou pe fer bann pti order, nou ganny problenm ennler.  E i annan-de-ler ki nou bezwen  fer vin en emergency, nou pou fer vin par avyon, resaman dapre mon konpran ti annan, enn ki mon krwar bann zafer kardyovaskiler bann latizann ki ti manke, ler ti manke nou ti’n fini order, fini peye tou, supplier pankor anvoye.  Me nou annan fasilite prezan pou nou kapab – nou annan detrwa supplier parey Moris e lezot kot si nou pou ganny sa emergency nou pou kapab fer vini, e nou fer vin par avyon.

 

HON ANDRE POOL

Mr Speaker eski Minis i kapab eksplik nou Lasanble ki makanizm ki Minister i annan anplas pou asire ki i annan sa distribisyon latizann lo nivo bann sant lasante pou fer sir ki a tou moman zot annan sa bann latizann pou ki pa tonm dan en sitiasyon kot i dir ou dan sa enn napa al dan en lot pou ou gannyen.  Ki makanizm.

 

MINISTER MARIE-PIERRE LLOYD

Mr Speaker kimannyer i ete tou latizann i santral apre i anvoy kot tou sa bann sant.  E si enn sa ban sant napa en latizann i demann santral. I annan zis pou fer konnen santral poudir li in run out panadol or in run out siro etc, i annan zis pou demande. So son makanizm se ki i annan kominikasyon toultan e i annan en komite sa, lo procurement, ler i  procure, i procure i annan sa bann ki nou dir i esansyel apre i repartisyonn li lo sak sa bann sant.  E si enn napa i devret demann santral. I pa dir ou al kot lot.  I devret fer konnen santral e sa se bann mezir ki nou pe fer ki zot osi zot kapab – si ou kapab dir pro-active, ou konnen la kimannyer i ete, i pe reste ou kekfwa pou en semenn, ou fini fer konnen santral.  I pa devret pe anvoy ou dan en lot sant pou dir al rod en lot landrwa. Li i devret pe fer son komann.

 

HON DAVID PAYET

Mr Speaker vi ki kestyon i lo mankman latizann, eski Minis i kapab dir avek sa Lasanble si son Minister i annan lentansyon pou revise drugs prescribing akoz i annan bann drugs ki konsiltan i prescribe ki nou dokter dan klinik nou pa kapab prescribe e sa bann drugs nou kapab aste dan farmasi, bokou laplipar e le  problenm se ki ler i pe expire zot anvoy dan klinik e ler i ariv dan klinik in fini expire, nou bezwen zete, e gaspiyaz.

 

(Interruption)

 

MR SPEAKER

Order, order, mon krwar Minis in abord enpe lo kestyon patern preskripsyon bann dokter, petet i a elabor en pti pe ankor lo la – mezir ki zot pe pran pou rezourd problenm preskripsyon.

 

MINISTER MARIE-PIERRE LLOYD.

Mr Speaker parey mon dir, nou konnen, nou’n tande poudir i annan dokter ki pe over-prescribed. E ler nou dir over-prescribed petet zot annan zot rezon akoz  zot pe over-prescribed. Savedir nou nou pou bezwen asiz ek sa bann dokter, set en kestyon training, en kestyon formasyon.  I already annan bann gid ankor, en formiler ki sorti kot farmasi, sa seksyon pou donn dokter egzakteman more or less ki i sipoze fer pou tel maladi.  Nou pa kapab donnen, parey nou dir panadol la si ou vini, nou pe sanze.  E dan sa bann sanzman i annan lezot aktivite la ki nou pe fer, enn ek dokter, enn pour nou edik piblik e si ou vini nou pa pour donn ou panadol pour en mwan.  Nou a donn ou en zour, 2 zour panadol apre ou kapab al aste ou panadol parey nou dir. Sa vedir la dan sa konteks ki nou annan plis farmasi, nou osi nou pe revwar tou sa bann prosedir ek sa bann polisi anndan dan Minister ek Minister avek piblik, Minister avek sekter prive, Minister avek farmasi e prezan Minister ek son prop staff parey mon’n dir pour nou fer sir ki nou tire sa bann legzanp ki Onorab in donnen.

 

HON DAVID PIERRE

Bonzour Minis, bonzour tou dimoun.  Mr Speaker eski Minis i kapab eksplik sa Lasanble klerman ki bann mekanizm ki zot in met anplas pou sirvey shelf life en medikaman pou fer sir ki napa gaspiyaz an relasyon avek bann medikaman ki’n ekspire e ki kantite rediksyon dan la kantite larzan ki zot servi pou fer vini medikaman  in annan tou dernyenman apre ki sa bann mezir ki Minis in koz lo la in ganny pran.

 

MINISTER MARIE-PIERRE LLOYD

Mr Speaker petet mon a pran lo sa dezyenm. Sa bann mezir i annan ki nou pran depi Avril.  E nou’n vwar en redikasyon akoz byen ki  nou’n dir nou ti vin demann en bidze siplemanter, i pa ti vedir akoz nou pa’n planifye byen me i ti vedir akoz ti annan parey nou konnen, apre ki nou nou ti’n fini fer bidze, i ti’n prepar depi an Zen i arive ziska Out, in annan bann logmantasyon, menm lo nivo global ki’n fer ki nou ti bezwen plis larzan.  Sa i enn bann rezon.  Me selman si ou pou vwar sa bann rediksyon, nou kapab dir si bann pri in mont 30% be nou osi nou’n fer sa rediksyon 30% akoz mon krwar nou pa’n bezwen sa kantite plis pour nou kapab order en pli kantite latizann, nou pa’n bezwen plis larzan, nou’n kapab mannye avek sa ki in donn nou, avek sa siplemanter, nou’n kapab mannye. Nou nou pe dir petet en 20%, 30% me selman mon krwar mon a donn en pwen warning – se ki i pa fasil akoz pour latizann parey nou dir, i annan nou dir nou latizann esansyel. I annan dimoun i vini prezan in devlop li en maladi ki i bezwen en latizann, so ou kapab planifye me ou pa pour kapab dir ou pe planifye tou sa  bann detay.  Sa ki nou konnen si nou pou get lo en lannen, akoz la lannen pankor fini, parey mon dir, sa bann mezir i annan nou’n met anplas avril, i annan i ankor pe al anplas so i pa pour fasil pour mwan la dir konbyen sa bann mezir in anmennen lo kestyon rezilta savings. Me selman sa ki nou konnen se ki an 2007 nou Bidze pour latizann ti 24 milyon, an 2008 i 19 milyon e la nou ankor Oktob. E parey mon dir sa bann mezir i tro nou fek fer pour nou kapab al dir rezilta nou’n save tel poursantaz, tel poursantaz.

 

HON WAVEL RAMKALAWAN

Mr Speaker vi ki Minis pe koz bokou lo bann mezir, ek bann nouvo fason fer keksoz, eski i kapab dir Lasanble si dan bann refleksyon ki son Minister pe fer i osi enkli ki a en serten moman dimoun pou pey pour latizann ki zot gannyen.  Mersi.

 

MINISTER MARIE-PIERRE LLOYD

Mr Speaker mon’n donn bann mezir ki nou’n pran la konmela ki anlinny avek nou Polisi.  Ziska prezan nou lo nivo Minister nou pa pe fer okenn plan pou fer dimoun pey latizann ki i vin pran kot nou.

 

HON CLIFFORD ANDRE

Mr Speaker mon ti a kontan demann Minis pou konfirm ek sa Lasanble si menm ki i annan bokou farmasi ki’n ouver ki pe fer vin latizann, Minister pou kontinnyen fer vini bann latizann ki i servi.  E dezyenmman ki makanizm son Minister i annan pou asire ki bann latizann ki pe fer vini par bann farmasi i bann ki konform avek bann regilasyon enternasyonal.

MINISTER MARIE-PIERRE LLOYD

Mr Speaker parey mon’n dir i annan de latizann ki nou dir i kontrole ki zis Minister ki annan drwa fer vini.  E sa parey nou dir nou fer sir e sa i dapre tou sa bann lezot regilasyon enternasyonal e sa lalis enternasyonal.  E nou  nou pou kontinnyen fer vini sa bann latizann e parey mon’n dir sa bann latizann i bann latizann esansyel ki en lalis ki WHO i fer sorti dan lemonn antye, nou pou kontinnyen fer vini.

Ki kontrol nou annan lo bann farmasi pou fer sir ki sa ki zot zot fer vini i parey nenport lezot, e sa vedir nou bann lenspekter i kapab pas dan en farmasi, anmenntan gete, sa bann keksoz ki zot pe vann, si i dapre bann standar WHO ouswa le res, si in expire, so sa mezir i still la, nou still annan sa kontrol e sa rol ki nou zwe nou koman Minister Lasante.  Ler nou dir donn permisyon pou en dimoun, en sekter prive ouver en farmasi, nou still annan nou en rol regulatory, Minister.

 

MR SPEAKER

Kestyon 169.  Onorab Préa.

HON NICHOLA PREA

Mersi Mr Speaker, mon ti a kontan demann Minis si son Minister i annan mwayen pou detekte maladi kanser, boner avek bi redwir la kantite ka lanmor an rezilta sa maladi.

 

MINISTER MARIE-PIERRE LLOYD

Mr Speaker mersi kestyon Onorab Préa.  Nou nou kapab dir nou annan si ou kapab dir sa bann fasilite, pour nou detekte kanser boner, me mon krwar sa ki primordyal se ki fodre sa dimoun i vin kot nou boner.  Alors lapel ki toultan nou’n dir se ki fer sir nou donn ankor bann lendikasyon kimannyer ou kapab kot ou fer sa bann legzaminasyon pou kapab detekte si ou vwar en groser, si ou vwar isi,  si ou vwar laba e fer si ou vini.  E ler ou vini  nou nou annan komela, MRI, CT scan lezot keksoz ki nou kapab detekte, me selman parey nou konnen kanser i en problenm dan lemonn antye ki i annan de ler pa tou ki pou kapab detekte li, me selman lo kestyon prevansyon, pli boner ki ou vini, lamazorite zot, pli boner ki ou vini, pli boner ki i ganny detekte pli boner parey nou dir, anpes en lanmor.  Savedir parey nou konnen pou bann madanm pou bann Mr, nou pe fer lapel e petet i byen sa kestyon in ariv dan sa mwan Oktob la, ki en mwan ki nou pe fer sa lapel onivo nasyonal pou dir kanser i en maladi ki annan bokou, ki nou kapab trete, si ou vwar li atan.  Savedir vini, si ou vwar okenn pti zafer ki pa normal, ki ou krwar i sa e parey nou’n dir nou pe donnen ledikasyon, la sa mwan sirtou nou pe vreman sansibiliz dimoun lo la, diferan  workshop, dimans ti annan lanmes, dokter ti eksplike eksetera.  Partou nou pe fer sa pou dimoun kapab konnen, pa bezwen per, pou dir lala mon vwar sa pti groser ‘mon pa ale’, kontrer ou vini akoz plis ou vin pli boner pli nou kapab   fer en lentervasyon.

 

HON NICHOLA PREA

Mersi Mr Speaker, mon ti a kontan demann minis si par azar i annan bann figures, bann statistik si i ti a kapab donn nou en sif konbyen pasyan par egzanp sa lannen in ganny dyagnoz avek kanser, konbyen ki pe swiv treman, lokal, e konbyen a sa moman la ki  pe swiv en tretman a letranze.

 

MINISTER MARIE-PIERRE LLOYD

Msey Speaker, bann statistik ki mon annan la i montre ki, an 2007, nou pe koz 116 ka, diferan form kanser. Konbyen ki akyelman a letranze konmela  –  e parey nou konnen ler nou dir kanser pou nou Sesel, kanser tete i enn ki pli komen, e apre kanser kolmatris apre pou bann  Mr parey nou konnen prostat.  Pou konmela bann dimoun ki ganny kanser nou anvoy  trete dan Lenn, pou konmela i annan 4 ki laba ankor anba tretman i annan 1 pe tournen, semenn pase ti annan detrwa ti tournen, so i varye.

 

HON DR DAVID PAYET

Vi ki kestyon i lo maladi kanser,eski Minis i kapab dir sa Lasanble si dan son Minister i annan en oncologist e si non, akoz e eski son Minister i annan lentansyon pou recruit enn dan le fitir.

 

MINISTER MARIE-PIERRE LLOYD

En oncologist se spesyalis ki tret bann dimoun kanser.  Dapre ki mon konpran avan ler mon ti join Minister ti annan enn seselwa ki ti pe spesyaliz ladan, me malerezman in vin enn pti kou apre in tournen, savedir i enn sa bann ki nou’n perdi. E nou la konmela nou annan demars pe fer pou nou kapab rekrit enn, e i annan ki nou’n fini ganny sivi nou pe konsidere, pou nou kapab ganny en dimoun, en spesyalis an plas.

 

HON MARIE-ANTOINETTE ROSE

Eski Minis i kapab dir nou si son Minister in obzerv en logmantsyon dan lakantite ka kanser ki  zot pe detekte.

 

MINISTER MARIE-PIERRE LLOYD

Ler mon pou regard sa bann statistik ki la devan mwan, definitivman i annan en logmantasyon e parey mon’n dir sirtou lo sa bann zafer breast e sa i partou dan lemonn osi, breast cancer is on the increase, e parey nou dir, pa per, akoz tou manyer vin  boner, vin apre zot pou vini so pli zot kapab vin boner kekfwa nou pou vwar en kantite dimoun pe vini me selman difinitivman nou vwar sa logmantsyon dan parey mon’n dir kanser tete, kolmantris e prostat. E tou sa la i bann kanser ki si ou vin atan nou kapab donn tretman.

 

HON TERENCE MONDON

Pou demann Minis si son Minister  i pe donn en servis check up konplet ki kapab ede dan deteksyon bann ka  kanser e si wi, lekel sa bann servis vrenman ki son Minister pe donnen.

 

MINISTER MARIE-PIERRE LLOYD

Mr Speaker kanser parey nou dir i en maladi, nou dir kanser, me i annan diferan parey nou konnen par nou lekor ki kapab ganny kanser.  Pou bann madanm parey nou konnen kolmatris i fer sa si ou kapab dir, i ankor lo staz regilye, bann madanm i kapab ale i fer son pap-smear parey monn dir.  Nou pa pe kapab screen tou nou popilasyon pou tou kanser. Menm sa breast cancer nou dir  ki manyer ou kapab kot lakour fer detrwa egazaminasyon e ler ou fini ou vin kot klinik, apre nou fer – apre parey nou dir i annan lezot case dyagnostik ki kapab fer  pou vwar si ou annan, si ou napa,  me selman sa screening pou nou dir, napa en landrwar ki screen – en pei ki kapab afford pou screen tou dimoun pou tou kanser.  Akoz menm sa screening, i annan ki vedir li menm li i en lentervasyon ki ou bezwen fer, ou zis screen par x-ray oubyen si ou pou screen par sa – akoz ou pe donn li radiasyon, ou pa kapab ekspoz dimoun avek tro bokou sa bann screening sa bann test.

So bann kot nou kapab fer parey nou dir san sa bann lezot tes, nou ankouraze e ki nou pe fer, nou pe get sa bann group ki pli at risk, bann madanm en serten laz, zot vini zot fer pap- smear. So nou pou bezwen vreman manage li koumsa, pran bann group oubyen bann kanser ki nou annan ki pli komen, olye ki nou pou dir nou pou screen tou dimoun pou tou kanser.

 

HON WAVEL RAMKALAWAN

Vi ki bann zonm zot tre vilnerab spesyalman avek  kanser prostat ki  zot enpe timid pou koste devan pou vin fer bann egzaminasyon e ki letan zot  dekouver i lo staz tre avanse, eski minis  i kapab dir avek nou si son Minister annan en progranm spesyal pou ledikasyon zonm an sa ki konsern kanser, spesyalman dan bann parti enpe  delika.

 

MINISTER MARIE-PIERRE LLOYD

Mr Speaker parey mon’n dir, ler nou edike, nou edik tou dimoun pou fer sir  fer zot bann test si zot vwar okenn keksoz ki pa normal, dokter Reginald dimans dan sa servis ki i ti fer, i ti eksplike byen, okenn groser ki nou vwar ki pa en groser ki normal, vini. Bann zonm osi, ale fer zot tes si zot vwar okenn keksoz  ale, e nou pe fer en lapel ankor, e la mon pe fer en lapel, silvouple, e nou konnen poudir zonm an zeneral ankor pa tant pou vini kot klinik, ler douler i for ki i vini. E lo sa bann zafer kanser ki nou pe dir prevansyon silvouple, si zot annan okenn pti dout, okenn pti obzervasyon ki zot fer, silvouple vini, e se tou ki nou pou kapab fer, se vreman enplor zot vini pli boner ki posib.

 

MR SPEAKER

Kestyon 170, Onorab Alcindor.

 

HON REGINA ALCINDOR

Eski Minis i kapab eksplik sa Lasanble ki manyer bann diferan agencies i enterakte, viz-a-vi bann ka sosyal premyerman lo nivo nasyonal e dezyenmman lo nivo distrik.

 

MINISTER MARIE-PIERRE LLOYD

Mr Speaker  ankor dan Minister nou annan nou diferan  konsey, bann komite lo nivo nasyonal, lo nivo distrik akoz parey mon’n dir oparavan sa bann problenm ki mon dir sitiasyon, or problenm sosyal i sa menm problenm kot tou sekter pou bezwen mele.  Lo nivo distrik  i annan sa ki nou dir en district team, ki enkli sa sanniter, sa travayer lasante, swa i en ners, swa social worker, i osi i la, lapolis i a la,  diferan sekter i ganny sa reprezantasyon lo nivo distrik e la zot get problenm dan sa distrik e  zot diskite, e sa ki zot bezwen refer zot refer sa Minister konsernen or zot menm zot zot kapab  pran aksyon, zot apel en action team. E mwan mon ganny kopi sa bann minutes, konman zot fini fer zot anvoy  mwan en kopi. Savedir mon kapab vwar okenn pwen ki si mon oule follow -up ankor, nou kapab fer, lo nivo santral.

Lo nivo nasyonal, ankor i annan diferan parey mon’n dir, diferan konsey, i annan en komisyon nasyonal pou zafan sa i sipoze pe donn  konsey lo sirtou polisi ek stratezi lo tou  sa ki konsern zanfan, son proteksyon, son byennet eksetera e sa  i annan reprezantasyon sorti dan diferan lorganizasyon, i annan NCC, i annan sosyal, i annan kot prokirer zeneral i annan dimoun sorti lakour menm, en ziz, i annan lapolis, i annan ledikasyon eksetera.  E parey nou konnen,  parey   nou dir bann lezot konsey, kot ankor nou pe enterakte avek swa i a NCC swa i  a CARE, swa i  DAC, tou sala i annan en reprezantasyon ase larz e tou sa bann dimoun ler nou pe regard en size nou pe regard li tou ansanm nou pe regarde sakenn ki rol  i annan pou zwe, si i en problenm, ki manyer pou solve sa problenm, si en keksoz nou tir latansyon, ki manyer nou pou fer, savedir nou already pe travay lo nivo nasyonal, ek lo nivo distrik osi.

 

HON REGINA ALCINDOR

Eski Minis i kapab dir nou si i satisfe avek prose reabilitasyon ou entervansyon ki ganny fer dan bann diferan ka, e ki manyer kominikasyon ant sa bann diferan azan i marse.

 

MINISTER MARIE-PIERRE LLOYD

Mr Speaker, se la ki nou fer en komite, oubyen en konsey, set akoz la nou’n ganny tou bann lenformasyon ki vin la, sa ki vini i anmenn en papye i ganny diskite desizyon i ganny pran la.

Nou tou nou gannyen e nou retourn dan nou sekter kot nou pe travay, pou nou al enplimant li si i konsern nou lorganizasyon me nou tou nou ganny sa lenformasyon.  Si mon statisfe avek sa bann progranm reabilitasyon e lezot, mon pa satisfe san pour san, mon pa kapab satisfe san pour san akoz si nou pou satisfe san poursan   enpe sa bann problenm nou pa ti pou annan me mon statisfe ki i annan sa kolaborasyon  e ki i annan sa  lentervansyon e nou annan sa korperasyon lo nivo swa distrik swa nasyonal ki pour nou travay ansanm e parey monn dir tou dimoun i rekonnet poudir nou bezwen travay ansanm tou sa bann sekter.

 

HON NICHOLA PRÉA

Mr Speaker Minis in mansyonn ki   dan distrik i annan sa ki nou apel sa district team ki sipoze pe fer travay, parfwa i annan bann ka ki’n ganny serten latansyon apre in retourn dan distrik, eski sa lekip, sa tim i fer bann follow-ups e ki Minister i ganny feedback from the team viz-a-vi sa bann follow-ups.

 

MINISTER MARIE-PIERRE LLOYD

Mr Speaker, parey mon’n dir mon pa konn lezot, lorganizasyon, selman mwan mon ganny  kont randi ler zot zwenn, e si i annan follow-up, nou prezan nou follow-up lo kote, si ou kapab dir santral, e se sa, nou met sa tim ansanm pou nou kapab ganny sa lenformasyon, parey ou dir sorti dan sa bann distrik, pli detay,  zot ki konn sa bann ka byen e si zot pa’n kapab adres sa keksoz lo zot nivo zot pou  fer sorti, e la prezan nou santral nou ava take up.

 

HON VICKY THÉRESINE

Mr Speaker malgre ki i annan sa team ki dan distrik eski Minis i kapab enform nou si son Minister i osi an kontak direk avek bann diferan klib lasante ki osi egziste dan serten distrik pou pli byen konsey, sirtou bann zenn ki lo sa komite, pou pli byen konsey zot e donn zot bann konesans neseser pou zot kapab fer en pli bon travay kan zot come across serten sa bann ka sosyal.  Mersi

 

MINISTER MARIE-PIERRE LLOYD

Mon krwar parey mon’n dir si ou annan ou en group lasante, ou pou vwar en travayer lasante, ki petet li osi i ladan, i dan sa group e  parey nou’n dir taler, i annan menm lo group rezilye eksetera kot zot envit nou, pou vin eksplik  petet  en keksoz pli profon, zot bann dimoun ki lo zot komite, zot annan kontak avek nou e zot konnen zot annan kontak avek nou, e la petet mon pe repete poudir zot kapab si zot bezwen en lekspertiz oubyen en leksplikasyon pli profon, zot kapab demande e se sa ki zot zwenn ansanm pou zot kapab al pli profon e pli profon ou al kot sa ekspert si ou  konnen ou napa sa lekspertiz, ou rod sa lekspertiz e nou lo nivo Minister nou toultan pare, e nou kontan ler nou gannyen sa bann lenvitasyon.

 

MR SPEAKER

Kestyon 171. Onorab Loizeau.

 

HON NORBERT LOIZEAU

Bonzour Minis. Mr Speaker eski Minis pou lasante i kapab enform sa Lasanble ki son Minister i anvizaze fer  pou ed sa bann pasyan ki zot loperasyon lizye pa’n en sikse, ler spesyalis sorti Kenya ti vin antreprann sa bann loperasyon tou deryenmman.

 

MINISTER MARIE-PIERRE LLOYD

Mr Speaker, letan bann spesyalis lize sorti Kenya ti vin Sesel an Fevriye sa lannen zot  ti oper 240 pasyan avek problenm katarak, e sa ankor mon pran lokazyon la anvi ki petet i annan pe ekoute pou nou dir mersi sa tim ki ti vini e parey nou konnen i ti ganny sponser par Freemasons avek Lions Club, zot ti organize zot ti vini, zot in travay pou nanryen – 240  pasyans zot in vwar. Dan sa 240 pasyan ti annan 26, ki zot loperasyon ou kapab dir pa ti en sikse  total. I annan plizyer rezon ki sa bann loperasyon pa ti en sikse total, e tou sa bann rezon i bann rezon medikal, ki mon pa neseserman oule tro donn detay lo la akoz ler nou koz 26 dimoun, dan nou pti sosyete nou tou nou konn sa bann dimoun, e petet nou pou konnen so mon pa pou al an detay.  Mon ti a kontan dir sepandan ki dan sa 26 pasyan, ki zot loperasyon sa lepok pa ti en sikse, la mazorite ti bann pasyan diabetik e letan ou diabetik e ou annan katarak anmenmtan i pa posib pou dokter get byen dan fon ou lizye, akoz sa katarak i bare e se aler ler in fini tir sa katarak ki i pou vwar ki par anba ti annan en lot problenm. Alors bokou sa lannen, sa bann pasyan e zot problenm i pa ti zis katarak,   sa 26 la.

Dan sa 26 i annan 8 ki nou konsidere koman bann konplikasyon e sak pasyan ki annan konplikasyon, oubyen ki sa loperasyon pa’n en sikse in resevwar swivi neseser  par Minister  akoz si nou rapel byen apre sa group kenya, ti vin en lot group sorti Morocco, e nou ti refer sa 8 ki ti annan konplikasyon nou ti refer zot ek sa lot group spesyalis ki ti vini, e sa lot group spesyalis ti donn zot rekomandasyon, nou bezwen pran li from spesyalis, e i annan ki zot in rekonmande i al pli lwen, e nou’n anvoye  dan Lenn, e i annan ki zot in dir sa napa   lentervansyon ki nou pou kapab fer, ki kapab ganny fer.  So nou nou’n baz li lo sa bann konsey si ou kapab dir ki nou’n gannyen avek sa bann spesyalis

So nou’n swiv zot, nou’n fer sa ki nou kapab, sa ki dokter in dir nou kapab fer, e parey mon’n dir nou pa bezwen al an detay, sa bann lezot detay, ki ki ti arive sak, ka par ka, me angro sete sa e sa i arive ler ou pe al get dan 240 ka, 26 – si ou pou get poursantaz ou kapab dir ok, of course kantmenm ti a 1 i pa bon, e si ti a mwan, mwan osi mon ti a voudre mon ti a pe ganny  mon eyes sight back total, me i arive toultan ler ou pe dir ou pe fer surgery.

 

MR SPEAKER

Onorab Loizeau okenn siplemanter.

 

HON NORBERT LOIZEAU

Non  Mr Speaker.

 

HON REGINA ALCINDOR

Eski Minis i kapab dir nou ki problenm son Minister pe fer fas avek ki fer ki dernyenman bann spesyalis kot klinik lizye ki vin travay pa fini zot kontra, tel parey sa Dokter Serbian ki ti vin pour 3 mwan,   i ti fer zis en mwan, e la tou denyenman sa spesyalist Pakistani  ki’n vin pou 2 an, in fer zis 3 semenn. Kote keksoz i mal dan zot kontra Minis? Eksplik nou silvouple, mersi.

 

MINISTER MARIE-PIERRE LLOYD

Mr Speaker,  annou dir premye kou, se ki sa ki nou dir sa bann spesyalis lizye la, zot  rar,  i annan en pti git zot dan lemonn, e pou ou kapab ganny enn fodre ou pe pey lesyel ek later e ki i pa fasil ganny zot. Prezan ler nou’n gannyen  zot vin isi i annan ki ler i vin isi, la i annan sa enn denyen, ki nou’n nonmen, ler in vini i ganny problenm fanmir, dan sans ki son madanm in deside pa vin zwenn li isi, son madanm ek son zanfan, so parey nou’n dir, parey nou’n tande koman in vini, nou byen kontan in vini nek apre in ale, sa i bann defi ki nou fer fas avek.

Sa Serbian li ki nou pe dir sa Serbian i pa ti vin pour 3 mwan, i ti vin pou en mwan. E li i ti vin koman en locum li,  se letan  nou ti pe esper sa lot vini ki nou ti rekrit sa enn koman en locum ki olye 3 mwan i ti vin pou en mwan akoz i pa ti kapab ganny release kot i ti ete pou 3 mwan, e la ler sa Pakistani parey nou’n dir in ale la, nou ankor pe fer bann demars. Nou sipoze, ki avan lafen Oktob nou pou ganny  enn ankor sa ki nou pe dir pou vini pou vin travay pou son 2 an isi, pa en locum. Parey mon’n dir se sa sa defi e ki nou nou pe fer sir e nou pou fer tou sa ki nou kapab pou nou ganny enn spesyalis lizye isi akoz tou sa bann problenm ki parey nou pe dir, sa bann problenm katarak se ki i annan, zot katarak ti’n ek zot  tro lontan, e parey nou dir i diabetik, i tro lontan prezan ler i vini i vin en batch. Nou dir mersi bann ki vini, parey nou’n dir nou pa kapab anvoy 240 dimoun deor, mersi zot in vini, me nou nou pe fer tou sa ki nou  kapab pour nou kapab annan at least en spesyalis lizye isi Mahe.

 

HON NICHOLA PRÉA

Mr Speaker, mon ti a kontan dir Minis ki mwan mon annan enn sa ka diabetik la.  Mr Speaker, mon ti a kontan demann Minis dan sa  sif ki in donn nou dan sa 26, not antyerman successful, konbyen ki annan posibilite ki perdi zot la vue, zot view, zot lizye konpletman e pou le moman si zot annan en dimoun ki pe ed sa bann pasyan  akoz mon konnen i fermal, mon’n swiv en dimoun ki ti lopital tou dernyenman la, douler i for ladan e aparaman i pa paret ki zot pe vreman ganny en bon, servis pou le moman avek departman lizye.

 

MINISTER MARIE-PIERRE LLOYD

Mr Speaker, parey ou konnen mon pa en dokter, mon pa pou kapab vreman dir e mon napa sa bann ka la, pou mwan dir konbyen ladan ki pou perdi zot lizye. Me selman nou, parey nou’n dir nou napa sa spesyalist lizye me selman in terms of sa follow-ups si zis en douler ki nou kapab donn zot, mon krwar nou devret kapab donnen e si nou pa pe donnen nou devret pe donnen. Me si i annan keksoz ki zot bezwen ki nou pa kapab donnen akoz nou napa sa dimoun,  sa i en lot zot zafer, me selman si i zis ou pe dir en douler, whatever nou nou difinitivman nou’n fer swivi tou sa bann ka, e parey nou’n dir pou sa ki zot in donn  konsey poudir sa nou kapab anvoy deor, i ava amelyore,  nou’n anvoye me bann lezot ki’n dir pa anvoye akoz sa vreman, napa, me selman mon pa kapab dir zot pou perdi zot lizye, e parey monn dir mon krwar nou’n vreman annan sa bann detay lo sak sa bann ka la.

 

HON DAVID PIERRE

Eski Minis i kapab dir nou ki kantite pasyan i ankor annan ki pe esper servis en spesyalis dan tretman lizye e kwa vreman ki Minister pe fer pou garanti ki sa bann dimoun i ganny tretman atan.

 

MINISTER MARIE-PIERRE LLOYD

Mr Speaker, parey mon’n dir, nou pe fer tou sa ki nou kapab, pou fer sir ki nou kapab annan en spesyalis isi, i annan dokter lizye la, i annan dokter ki pe travay dan sa klinik lizye, i annan ners ki pe travay dan sa klinik lizye, me sa spesyalist ki pou kapab fer sa loperasyon katarak ek lezot se sa ki nou pe dir nou pe vini, konbyen ki annan konmela ki pe espere pou ganny en tretman, I suppose sa bann ki pe esper spesyalis, i pa pou bokou akoz parey nou’n dir nou ti tir sa back log – nou ti annan sa  240 an fevriye apre bann Moroccain ler ti vini ti tir ankor en lot group, savedir la sa bann group i bann nouvo ka, nou dir apepre en 20tenn, me selman parey mon dir, mwan mon dir en 20’tenn approximate me  selman nou napa  bokou. Nou napa 100, nou napa 200 parey avan akoz sa bann 2 ki nou’n fer la sa lannen, sa bann (..) in tir tou sa bann ki ti pe espere.

 

HON MARIE-ANTOINETTE ROSE

Eski  Minis i kapab dir nou si i satisfe avek sa bann progranm lesanz an sa ki konsern sa bann group loperasyon ki zot fer, e eski Minis i annan petet en lide konbyen sa bann progranm  ti pou kout Gouvernman si i pa ti’n ganny sponsorize.

 

MINISTER MARIE-PIERRE LLOYD

Mr Speaker, nou definitivman apresye sa bann lesanz, sa bann sipor ki nou gannyen e parey nou dir sa group Kenyan, sa bann spesyalis ler ti vini ti fer zot 4enm fwa ki zot in vini Sesel pou fer en tel legzersis, e nou vreman apresye, me selman parey nou dir katarak pli ou kit li pli lontan pli i vin pli epe, pli i pou vin en konplikasyon apre e sanmen sa ki nou dir nou pa pou tro esper en kantite ki apre nou pou fer parey avan. Si nou kapab ganny en spesyalis, menm ki i koute,  nou pou anmenn en spesyalis ki pou kapab get sa bann ka,   pli regilyerman ki oubyen nou pou esper en group vini, me selman sa pa vedir  ki nou pa apresye sa bann group.

Konbyen pou koute – anvi ki tou sa bann ka i ti diferan staz, i pa fasil pou nou dir egzakteman konbyen, selman ler dokter Bonnelame ti la dernyenman i ti dir nou pou sak sa bann trip ki nou pe anvoye la, ki nou’n anvoye dan Lenn nou pe koz – si nou ti  pou anvoy tou sa bann ka sa 240  nou pe koz apepre 150,000 dollar  per trip. Aprezan parey nou konnen,  i diferan akoz sa i son average akoz i annan ler i al laba i annan i dir ou i bezwen  en corneal transplant, i bezwen espere, i pa zis pou katarak.  Me selman sa lizye i pou kout nou en ta larzan. Si zot pa ti vini, si nou ti napa sa led e sa sipor nou bann zanmi, si ou kapab dir i ti pou kout nou en ta larzan.  E petet nou ti pou annan plis ka bann ki son katarak ti pou fer bann konplikasyon lo zot.

 

HON JEAN-FRANCOIS FERRARI

Mr Speaker vi ki Minis i ase resaman ti Minis resours imen kekfwa i kapab dir nou si i okouran si Gouvernman i annan en spesyalis, oubyen en plan pou train en Seselwa, pou fer li vin sa spesyalis ki nou bezwen pou bann lannen  a  venir.

 

MINISTER MARIE-PIERRE LLOYD

Akyelman   annou dir plan Gouvernman.  Plan Gouvernman pou bann spesyalis medikal, plan toultan i la. Sa ki oule vini pou apply pou al dan sa sekter medikal, parey ou konnen somtimes back ti dir sa i donnen scholarship, free scholarship pou medikal avek sosyal e menm konmela la nou annan en zenn Seselwa, ki pe etidye pou li vin en spesyalis lizye, nou annan la e si i annan ki vini  ki dir i oule al ankor dan sa field, napa problenm.

 

HON CLIFFORD ANDRE

Mr Speaker, mon ti a kontan demann Minis si menm ki i pou annan en spesyalis lizye son Minis pou kontinnyen ankourz sa bann lesanz parey zot in annan dernyen fwa avek sa group kenyan.

 

MINISTER MARIE-PIERRE LLOYD

Mr Speaker, si nou bezwen lesanz petet i pa  neseserman pou dan sa ka koumsa pou vin fer en group katarak, i a kapab ki nou pe dir lasante lizye, i kapab  lezot keksoz  i kapab vin fer,  me les mwan dir osi – mon’n monsyonn Dokter Bonnelame se ki, ki nou pe osi fer, nou pe osi, bann seselwa ki nou konnen parey Dokter Bonnelame e lezot ki nou konnen e zot in dir poudir zot pare, pou enn ler anmenn en tim, vin isi pou vin ed nou avek serten lentervansyon or lezot aspe dan sa sekter ki nou pe dir lizye.  So nou pe pran, i kapab Kenyan i kapab en lot group, ou parey nou dir nou ganny nou seselwa menm ki    pare, vini ek en tim sorti dan sa lopital kot li i pe travay vin isi pou vin ed nou.

 

HON WAVEL RAMKALAWAN

Mr Speaker premyer kestyon, eski   Minis i kapab konfrm sa sif 150,000 dollar ki in dir pou, per case per trip pou en dimoun ki al fer tretman overseas, e dezyenm kestyon vi ki Minis pli boner in dir avek nou  ki zot in perdi en  zenn Seselwa oncologist e  in dekrir spesyalist lizye konman en rar spesyalite e zisteman nou’n perdi dokter Bonnelame, eksi Minis i kapab dir avek nou basically, where did we go wrong.

 

MINISTER MARIE-PIERRE LLOYD

Mr Speaker, ok premye kestyon, petet mon ava al lo the cost. Ler mon’n eksplike mon pa’n donn zot byen, ler mon’n dir Dokter Bonnelame parey Dokter Bonnlame in dir si li i  ti pe vini li avek en tim, nou pe diskit ek li, pou li vin ek en tim e petet i vin ek en tim de dimoun, avek zot bann lekipman, sa trip pou li vini i pou kout 150,000 dollar. Savedir si nou pe dir parey sa bann Kenyan nou pa’n demann zot konbyen ti koute, nou pe dir sa roughly – i pa sak pasyan ki ale par trip.

Konmela nou annan manni demann where did we go wrong. Mon krwar pa si i where – Mr Speaker,   oncologist parey nou dir, i en Seselwa in al etidye i spesyalize dan sa field, i vin isi, pou le  rezon personnel zot ale. Dokter Bonnelame ti isi e parey nou’n dir nou pe koz ek li, i annan bon relasyon isi – pou rezon personnel  i ale. Nou annan en zenn la mon’n dir i pe etidye pou   vin sa spesyalis lizye, nou pe espere i a vini i a kontinnyen i a travay  kekfwa.  Ler nou pe regard lo akoz nou bann graduates, bann spesyalis zot ale,    rezon i divers, in deza ganny kouver dan lezot forum, me selman i pa neseserman ki where do we go wrong. En endividi  i vini, i annan en fanmir mon’n  dir taler sa Pakistani osi in vin isi, apre madanm pa’n zwenn li, in ale. So sa i bann zafer endividi lo nivo personnel.  Ou a donn li plis larzan enn ler i pou still ale akoz i annan lezot rezon.   I pa toultan en zafer donn en pli bon package, i pa toultan donn plis larzan, i annan son rezon e nou ler en dimoun pe ale, nou fer le neseser pou nou asiz ek sa  dimoun,  demann li la konmela nou fer en nespes exit interview, ou pe ale, sey dir nou kote nou kapab fer.

I annan parey nou konnen e in ganny leve par lezot poudir, ler li i en spesyalis i vwar isi, i pti i pa ganny ase sa bann ka pou li kapab fer lentervansyon lo la pou li devlop li profesyonnelman. So ki nou nou pe fer la, lo nivo Minister nou pe an konsiltasyon avek sa bann lorganizasyon. Parey lot fwa  ti annan ECSA la Commonwealth, pou vwar ki manyer nou kapab train nou bann spesyalis, san ki zot kit sa pei, e sa pa zis Sesel, Uganda, tou lezot pei pe fer,   san ki i kit son pei natal, son pei pou li la, pou li al 7an 11an dan en lot pei pou li al vin en spesyalis. So nou pou fer en kobinezon i ava al dan en lot pei pou train, e anmenntan atraver e-learning, distance learning i fer dan son pei, ki en manyer i pa sorti sa kantite letan, akoz sa – tou dimoun i vwar dan tou pei, poudir sa ki vin en fakter ki ou kapab dir ki fer sa bann  dimoun i tro bokou letan deor, in fer en fanmir laba, e parey mon’n dir sa fanmir, sa madanm, or sa Mr i kapab kontan vin isi, i kapab  pa kontan or pou rezon ledikasyon whatever, zot zanfan ki larz,   diferan rezon lo baz endividi.

 

MR SPEAKER

Bon nou’n ariv alafen Question Time, nou a remersi Minis pou letan ki in pas ek nou bomaten. Nou  ava eskiz li parmi nou, e nou pou adjourn ziska 11er.

 

(BREAK)

 

(Deputy Speaker in the Chair)

 

DEPUTY SPEAKER

Mon a dir bonzour tou manm Onorab prezan, nou a pran dezyenm parti nou travay, nou a komans avek, nou first Reading Public Bill.

 

THE CLERK

This Acct may be cited as the Protection of Human Rights Act,    2008 and shall come into operation on such day as the President may, by notice published in the Gazette appoint.

This Act will be cited as the Social Welfare Act 2008 and shall come into operation on such date as the Minister may, by notice published in the Gazette appoint.

DEPUTY SPEAKER

Thank you, nou a move to the motion. Motion ki’n ganny table par Leader of Government Business pou ganny prezante par lonorab Andre Pool, I will invite Onorab Pool pou fer son prezantasyon.

 

HON ANDRE POOL

Mr Deputy Speaker, mon annan plezir pou prezant mosyon table par Lonorab Potter, Leader of Government Business. Mosyon pe demann de ki nou Lasanble i ratifye konvansyon Nasyon Zini  lo drwa bann dimoun avek dezabilite.  Mr Deputy Speaker fodre fer remarke ki nou pei ti sinny sa konvansyon, menm zour ki i ti ouver pou sinnyatir New York an Mars 2007, konvansyon limenm ti antre anfors le 3 May 2008, e ozordi i annan 135 sinnyatir pour sa konvansyon.

Mr Deputy Speaker i estimen ki ozordi i annan apepre 650 milyon dimoun dan lemonn ki pe viv avek en dezabilite, e sa i reprezant apepre 10% total popilasyon mondyal.  Isi Sesel dapre statistik i annan apepre 2000 a 2500 dimoun ki pe viv avek en dezabilite. Malgre nou’n fer bokou pou ede soulaz, kondisyon lavi bann dimoun ki pe viv avek dezabilite, an siportan sa konvansyon nou ava pe ranforsi nou commitment aver sa group dimoun spesyal  ki swa isi menm Sesel oubyen atraver lemonn. I ava pe osi pe met nou anlinny avek kominote enternasyonal lo en nivo teknik akoz isi Sesel nou’n deza fer bokou, pou protez e respe drwa  nou bann sitwayen avek dezabilite.

Mr Deputy Speaker, sa konvansyon i annan 5 gran lobzektiv premyerman pou develop e met anplas bann polisi, bann Lalwa e mezir administrativ pou protez bann dimoun avek dezabilite e anmenmtan pou abolir bann ki konstitye diskriminasyon kont zot.  Dezyenmman pou amelyor sitiasyon bann dimoun, avek dezabilite e promot zot bann kapasite.

Twazyenmman, pou garanti ki bann dimoun avek dezabilite, i ganny trete lo menm nivo avek tou lezot, dan lasosyete byensir an tenan kont  zot kondisyon fizik ek  mantal  e osi protez nou bann zanfan ki annan en dezabilite.  Katriyenmman pou protez tou lentegrite, sa bann dimoun avek dezabilite, e senkyenmman pou idantifye e elimin tou lobstak e baryer, pou asire ki dimoun avek dezabilite, i ganny bon akse otour zot tel ki transpor, fasilite piblik, bann servis ek lenformasyon e osi teknolozi kominikasyon.

Nou bezwen aksepte ki nou peir in fer bokou, pou rekonnet drwa bann dimoun avek dezabilite, e sa in touzour en konsern tou nou sitwayen, enkli tou politisyen e mon asire ki nou pou donn nou siport sa konvansyon.  Anba lartik 36 nou konstitisyon i spesifye klerman ki leta i bezwen rekonnet bann drwa bann dimoun avek dezabilite, e demande ki provizyon i ganny fer pou premyerman amelyor zot nivo lavi, e dezyenmman pou promouvwar bann progranm ki permet sa kategori dimoun devlop zot o maximum. Anlinny avek sa, isi Sesel, nou’n deza met a’n aplikasyon en Lalwa ki’n met an plas en konsey pou bann dimoun avek dezabilite, sa konsey i annan pou vwar, pou kordin an kolaborarsyon  avek bann lorganizasyon piblik e prive tou bann aktivite ki neseser e dezirab pou bon byemnet bann dimoun avek dezabilite, fodre note ki dan lartik 9 sa konvansyon, i koz spesifikman lo aksesiblite, i fer resorti ki tou i merit ganny fer pou permet ki bann dimoun avek dezabilite i viv pli endepandan ki posib. Dan lartik 31 li i demann ki pei manm i bezwen kolekte lenformasyon apropriye enkli bann statistik e lenformasyon resers ki pou permet Gouvernman pou formil e enplimant bann polisi ki sa konvansyon pe demande.  Mr Deputy Speaker, lartik 34 li i fer provizyon pou ki i annan en komite Nasyon Zini lo drwa bann dimoun avek dezabilite, sa komite li son rol prensipal  se pou swiv e moniter lenplimantasyon sa konvansyon dan tou bann pei manm, fodre dir ki dan Sesel i anan en kantite devlopman  pou siport bann dimoun avek dezabilite, permet mwan monsyonn serten.

Premyerman plizyer mezir in ganny met anplas pou siporte e protez zot, dezyenmman en zefor kontinnyel pe ganny fer pou retir okenn latitid e persepsyon negativ anver zot, twazyenmman  zefor pe ganny entansifye pou permet zot ganny en meyer ledikasyon posib.  Katriyenmman zefor pe ganny entansifye pou zot ganny bann swen spesyalize, senkyenmman; retir tou diskriminasyon kont bann  dimoun avek dezabilite, sizyenmman letablisman en sant reabilitasyon ki pe ed zot aprann en metye;  Setyenmman bann group sipor pou ed zot dan tou nou bann distrik;  wityenman bann diferan NGO’s ki la pe travay pou ed zot, nevyenmman sipor finansyel i permet zot viv en lavi an dignite, dizyenmman ankouraz plis akse ek bann landwar sirtou bann batiman atraver  annan plis wheelchair ramps; Onzyenmman ankouraz landrwar travay pou anploy bann dimoun avek dezabilite dan bann sekter sirtou ki prodiktiv. Alors Mr Deputy Speaker, menm si bokou in ganny fer e pe ganny fer, Sesel ek bann lezot leta sinyatir sa konvansyon pou bezwen entansifye zefor plis ankor pou promot drwa bann dimoun avek dezabilite, san okenn diskriminasyon e elimin tou bann baryer pou permet zot realiz tou zot potansyel, alors ler nou ratifye sa konvansyon ki mon asire nou tou manm sa Lasanble nou pou fer li pou vedir ki Sesel pou bezwen ranforsi bann mezir ki deza egziste e bann drwa ki deza dan nou konstitisyon e dan lezot trete e konvansyon  ki nou’n deza ratifye. Fodre fer remark Mr Deputy Speaker, ki Sesel pou napa okenn peyman pou fer ler nou’n angaz nou dan sa konvansyon.

Alors mon demann tou manm Lasanble pou nou siport sa mosyon pou ratifye sa konvansyon.  Mersi bokou, Mr Deputy Speaker.

 

DEPUTY SPEAKER

Okenn ki segonn mosyon.

 

HON ROY NIBOURETTE

Mon Segonde Mr Depite e mon ti a kontan fer en senp pti  entervansyon.

 

DEPUTY SPEAKER

Proceed please

HON ROY NIBOURETTE

Mr Depite, ou konnen parfwa mo i ase pou mezir degre progre ki en pei i fer. Lontan nou ti koz lo dimoun andikape, apre nou’n koz lo dimoun avek dezabilite, e ozordi nou pe koz lo dimoun ki kapab me dan en lot fason.

Tou sa bann mo Mr Depite i dekrir menm realite  e zot reflekte en levolisyon dan mantalite lasosyete atraver sa bann dimoun. Mr Depite pli gran dezabilite se pa sa limitasyon fizik oubyen mantal  ki en dimoun i annan me lafason ki bann ki napa dezabilite i regard bann avek dezabilite. Mon ava dir ki pli gran soutyen ki nou kapab donn en dimoun avek dezabilite  se pou nou respekte son dignite akoz koman en imen i egal avek nou. Zisteman sa trete lo Sesel in sinnyen i pronons drwa dimoun avek dezabilite.  Drwa se labaz legalite ki limenm i sours  dignite imen letan nou a ratifye sa konvansyon nou Lasanble pou montre nou solidarite avek nou bann sitwayen ki annan dezabilite e osi avek sa plis ki 5milyon dimoun ki annan dezabilite dan lemonn.

Mr Deputy, i annan diferan rezon akoz ki i enportan ki nou pei i ratifye sa konvansyon. Permet mwan pou sit serten rezon :

  • Swivan sa ratifikasyon, Sesel pou ofisyelman kontribye dan ranforsman laplikasyon sa trete ki’n ganny inisye par Nasyon Zini.

 

  • Dezyenmman Gouvernman pou konn plis lo sa size dezabilite e i pou pli byen ekipe pou asiste zot.

 

  • Trwzyenmman Sesel pou osi devlop korperasyon lo sa size avek lezot pei rezyonnal e enternasyonnal.

 

  • Pli enportan swivan sa ratifikasyon, bann dimoun ki annan dezabilite pou vwar en amelyorasyon dan zot lavi akoz zot drwa pou ganny formelman proteze e promote lo en baz enternasyonal.

Mr Deputy, ler mon’n pas dan sa dokiman, mon’n konstate ki laplipar bann rekomandasyon ladan, Sesel in deza pe enplimante menm avan ki i ti sinny sa Konvansyon an Mars 2007.

Dan nou Konstitisyon, Lartik 36 i fer provizyon ki dimoun avek dezabilite i ganny serten proteksyon spesyal e sa i enkli amelyorasyon zot kalite lavi.

Dan en survey ki ti ganny fer Sesel, en total anviron 2500 dimoun ti ganny anrezistre koman dimoun avek dezabilite. Ladan i enkli 33 dimoun ki sorti dan distrik La Rivière Anglaise. Pour ki bann Seselwa avek dezabilite i vin bann sitwayen aparanter, nou bezwen met lanfaz lo abilite e non pa lo dezabilite. Nou bezwen mazin an term reabilitasyon.

Mr Speaker, bann dimoun avek dezabilite dan Sesel i deza pe ganny bann servis ki’n  ganny met a zot dispozisyon sirtou apre sa serve ti’n ganny fer. En polisi ti’n ganny met an plas lo prensip egalite loportinite. Le bi sete pour ki tou dimoun avek dezabilite i osi partisip aktivman dan devlopman zot pei.

Alor, drwa bann dimoun avek bann dezabilite, i reste en size ki Gouvernman in donn valer depi plizyer lannen. Sepandan i annan ankor pou fer dan sa domenn. Par egzanp napa Lalwa isi ki donn zot akse avek Building piblik, transportasyon piblik e ki  Gouvernman pa ankor met sa bann servis a zot dispozisyon.

Mr Speaker, Sesel i en sosyete de drwa, ki vedir ki sak sitwayen i annan son drwa e leta i merit asire ki son drwa i ganny proteze. Ma menm mansyonnen ki bann Millennium Goals pa pou zanmen kapab ganny atenn si sak sosyete pa pran kont bezwen bann dimoun avek dezabilite. E pour asir sa, Gouvernman avek bann NGO’s zot bezwen met an plas plis mekaniz.

I enportan pou note ki ler nou Lasanble i ratifye e aprouv sa Konvansyon sa i vedir ki i pou annan en kou estra ek li, alor i pou enportan ki Gouvernman i maksimiz son resours pour li kapab akonplir tou sa ban demann ekstra, i pa neseserman dan kours Finans me dan kours resours imen, Mr Deputy.

Gouvernman pou bezwen kontinnyen azir koman en fasilitater koman en service provider e i bezwen kontinnyen kolabor avek bann NGO’s atraver LUNGOS pou antreprann bann reabilitasyon lo baz kominoter. Nenport ki antreprener ki ouswa zot annan bann dimoun dezabilite dan zot landrwa travay, tel ki bann lazans piblik, lofis bann departman non-Gouvernmantal, endividi prive zot bezwen zot osi zwe en rol enportan.

Mr Deputy, pou konklir parmi sa 135 pei ki’n sinny sa Konvansyon selman 38 pei ki’n fini ratifye li. An siportan ratifikasyon sa Konvansyon dan nou Lasanble ozordi, i pou demontre nou langazman, langazman Sesel dan demars pou asire ki bann dimoun avek dezabilite zot drwa Konstitisyonnel e enternasyonnal i ganny proteze e defann. Sa i pou ennfwa pour tou prouve ki zot pa tro ganny gete koman bann lobze lasarite ek mersi, me plito en dimoun ki annan son dignite, drwa, proteksyon e respe.

 

DEPUTY SPEAKER

I annan bann lezot entervenan?

Yes, proceed, Madam.

HON REGINA ALCINDOR

Swivan rekomandasyon e sipor eksprimen par ILO, Nasyon Zini ti devlop en Konvansyon pou proteksyon e promosyon bann dimoun avek dezabilite.

Sa Konvansyon ki devan nou ozordi i enn ki tre itil e merite pou Sesel. Akoz i pou fer ki drwa bann dimoun avek dezabilite a omwen ganny rekonnet e respekte. Sa Konvansyon ti ganny inisye dan bann lannen 1992 apre ki bann delege ki ti pe partisip dan en konferans ILO ti rekonnet ki bann dimoun avek dezabilite, souvan i rankontre difikilte avek bann baryer ki kree lobtak  e anpes zot partisip totalman, egalman e aktivman dan sosyete.

Zot ti rekonnet ki sa bann baryer i met retar ek zot devlopman entelektyel, mantal e lezot devlopman fizik e sa i anmenn en lenpak direk e dezavantaze lo zot lavi.

Dan bokou ka zot fer fas avek imilyasyon akoz zot annan serten limitasyon oubyen defo ki swa zot in ne avek oubyen zot in ganny li atraver aksidan ou maladi. E sa i met zot retar oubyen pa permet zot entegre totalman dan sosyete parey en dimoun normal. Me pti a pti sosyete i rekonnet  ki zot osi zot annan zot drwa malgre ki pa toultan ganny respekte. E ozordi sa Konvansyon i rekonnet lenportans global ki gid sa progranm kot bann prensip, bann polisi, aksyon e standar pou bann dimoun avek dezabilite i ganny rekonnet e respekte.

Mr Deputy, se selman atraver rekonesans, respe e apresyasyon pour sa bann dimoun ki nou a kapab ede fer sa diferans dan zot lavi. E fer ki zot osi zot santi ki zot annan en rol e en plas pou zwe dan sosyete. I osi rekonnet lenportans korperasyon enternasyonal an sa ki konsern aksyon ki pou amleyor lavi bann dimoun avek dezabilite dan zot lavi tou lezour e ler mon koz lo dimoun avek dezabilite mon pe refer aek dimoun nenport ki laz, avek nenport ki dezabilite swa fizik ou mantal, dimoun nenport ki ras, kouler ou relizyon, nenport ki sex e pli enportan pou Sesel, dimoun avek nenport ki kwayans politik. Zot tou zot ganny proteze anba sa Konvansyon.

Mr Deputy, sa Konvansyon i osi met bokou lanfaz lo nesesite promot joie de vivre pour sa bann dimoun malgre zot dezabilite. Nou bezwen rekonnet ki zot osi zot annan sa drwa zouir tou bann drwa ki Nasyon Zini in demarke anba proteksyon drwa imen. E egalman zot annan tou drwa parey nenport ki sitwayen aba Konstitisyon Sesel.

An 1981, ler ki Nasyon Zini ti adopte le 3 Desanm koman zour pou bann dimoun avek dezabilite lo nivo enternasyonal, isi Sesel osi sa bann dimoun ti zwenn pou selebre sa zour.

Depi 1995, avek lansman National Council for the Disable, ki tonm dan mwa-d-Zen, zot osi zot mark sa zour, me akoz parey nou konnen mwa-d-Zen i annan en kantite lafet  alors zot in prefere adopte Le 12 Zilyet koman sa zour pou bann dimoun avek dezabilite, lo nivo nasyonal.

Avek legzistans National Council for Disable tou bann mouvman  ki annan pou fer avek dezabilite, i tonm anba sa menm parasol e ozordi i annan 7 mouvman ki anrezistre koman NGO’s avek LUNGOS ki sipoze form parti sa Council. I annan Lasosyasyon dimoun sourd e parey nou ti ganny sans vwar zot e konn plis lo bann sign languages, 2 semenn pase kan zot ti asiste en sesyon Lasanble, zot ganny dirize par Madanm Anita Gardener. I annan Seychelles Union of the Blind ek Mr Hans Lablache. Nou annan Faith & Light ki pirman en group groupman relizye anba direksyon Madanm Gitanne Gopal. I annan sa ki nou apel District Disable Support Group avek Madanm Celine Fanchette. Nou annan Parents for the Disable Association avek Madanm Monica Juliette. Nou annan Sports Association for the Disable ki sa lorganizasyon ki okip special Olympic avek Mr Colin Quatre. I annan Seychelles Disable People Organization anba direksyon Mr Daniel Savy ki group prensipalman bann dimoun avek dezabilite fizik e mantal.

Lartik 4 sa Konvansyon pe demande ki bann pei ki swazir pou sinnyen e adopte sa Konvansyon i bezwen osi pare pou pran bann mezir neseser pou aboli tou form diskriminasyon ki annan kont bann dimoun avek dezabilite. I osi fer resorti ki apre ki zot in adopte sa Konvansyon i pou neseser pour ki  bann pei i modifye, sanze oubyen abolir bann Lalwa ou lezislasyon ki pa tonm anlinny avek sa Konvansyon. E ki zot pran kont proteksyon promosyon drwa imen dan tou bann polisi e progranm ki drafte. Dan mon ti pe fer mon resers apre ki mon’n ti’n koz ek dimoun dan diferan lorganizasyon avek dezabilite, zot in fer resorti ki i tre enportan pour konsilte e diskit avek zot bann polisi, avek zot  ek zot paran avan ki i ganny enplimante. Zot osi santi ki osi fodre ki Council i drafte en plan daksyon ansanm avek zot e zot paran e osi bann azan ki travay avek bann dimoun avek dezabilite. I osi enportan pour ki Council i revwar zot rol e reponsabilite anver bann dimoun dan sa kategori.

Nou swete ki apre ki sa Konvansyon i ganny adopte, Council i ava enkli dan zot plan daksyon bann mezir ki pou ed enplimant sa Konvansyon. I pou tre enportan pour ki curriculum kot Lekol Eksepsyonnel i ganny revwar pou zwenn demann sa Konvansyon e i neseser ofer bann dimoun ki ti deza dan en lanplwa ki’n ganny en dezabilite ki anpes li fer menm louvraz sa alternativ pou reabilit li dan en lot louvraz dapre son kapasite e kapabilite. Akoz malgre ki sa bann dimoun i annan en serten dezabilite i annan keksoz ki zot kapab fer pou zot ganny zot lavi. E par kont sa bann dimoun pa ganny ase led ek lankourazman  atraver Council pou zot kapab ganny en lot louvraz. E la mon oule fer resorti ki Gouvernman i devret pran kont pou enkli fasilite parey lift, ramp dan bann nouvo konstriksyon ki pou pran plas pou fer ki i a vin pli fasil pou bann dimoun avek dezabilite vin pli endepandan e kapab sirkil pli byen.

Mr Deputy, mon demande ki Planning Authority i adopte en konsep universal design e advise bann nouvo proze lo bann tel fasilite ki pou ed bann dimoun avek dezabilite pli byen deplase. Mon konnen ki parfwa si ti annan sa bann tel fasilite, bokou dimoun avek dezabilite ki kapab ti swazir fer bann deplasman zot menm olye toultan bezwen depan lo en lot dimoun pou fer pou zot. Mon dir sa, Mr Deputy, akoz mon konnen ki parfwa i pa fasil pour sa bann dimoun avek dezabilite deplase, sirotu si landrwa pa apropriye e napa fasilite ramp oubyen lift dan bann landrwa.   Konmela avek problenm lespas kot laplipar batiman pe ganny konstrir avek letaz, sa i fer li pli difisil pou sa bann dimoun. Sa difikilte li menm, e mon’n eksperyans sa ki swa ek en bekir ouswa dan wheelchair i kree en lanbara pou sa dimoun e sa i rann li fistre e anbarase akoz son mouvman i limite.  Ozodir mon fer sa demann pou sa bann dimoun e mon oule met lo rikord  pou re-demann Gouvernman pou fer ki bann fasilite lift i ganny enstale kot Klinik Lizye pou pli byen ed bann pasyan ek dezabilite ki servi sa klinik.

Lo kote lasistans ki sa bann dimoun i resevwar i neseser pou regard dan fason ki bann dimoun avek dezabilite i ganny asiste. Ozordi i annan bann ki lo means testing, lot bann ki lo benefis envalidite, i annan ki ganny carer, i annan ki merite me ki pa pe gannyen. Tou sa bann iregilarite i neseser adrese pou benefis sa bann dimoun.

Mr Deputy, letan ki mon pe diskit lo drwa pou bann dimoun avek dezabilite i enportan pou regard dan kalite tretman ki sa bann dimoun avek dezabilite i resevwar dan sa bann lenstitisyon. Mon’n fer li mon devwar pou vizit enn de dimoun avek dezabilite ki pe viv dan bann lenstitisyon. Laba osi i annan pa mal problenm avek sa bann regilasyon ki ganny enpoze san konsilte sa bann dimoun. Par egzanp pran en dimoun avek dezabilite ki ankor zenn e ki pe viv dan en Lenstitisyon parey Lopital North East Point. Ozordi regilasyon ki egziste i fer ki sekirite sosyal i al direkteman kot sa lenstitisyon. E sa bann dimoun i ganny donnen R100 par semenn, sa i al prensipalman pou fer depans pou zot savon, dantifris, kart telefonn pou sa enn ki annan enn, pou lav zot lenz etc. E sa bann dimoun i rekonnet serten difikilte sirtou si zot napa en manm zot fanmiy ki okip zot. Fodre ki Council i  donn bann dimoun avek dezabilite lankourazman pou devlop zot kapasite dan tou totalite.

Pran par egzanp en dimoun parey, Mr Bourdanne, en boug ki pe viv lopital North East Point, en boug ki ti fer lapentir an servan son penso dan son labous. Ozordi i nepli kapab penn, i dan Kazenn e i resevwar 100 roupi par semenn, lo son sekirite sosyal. I bezwen aste son bann nesesite debaz parey mon’n esplike e ki i reste li? I pa kapab ni menm kapab aste enpe lapentir, ni en penso e Council pa enterese ek son problenm. Oli lankourazman ladan? Alor, i neseser ki Council i revwar son bann regilasyon pou benefis sa bann dimoun ek dezabilite.

Sa Konvansyon, osi, lo Lartik 29 i rekonnet drwa sa bann dimoun pou partisip dan lavi politik e mon krwar ki sa i en drwa ki zot devret annan san ki zot ganny viktimize e maltrete si zot pa partaz menm lopinyon ek sa ki ansarz sa landrwa. E okenn zot pa devret pe ganny met anba presyon oubyen lafreyer pour dir  ki si ou pa siport nou parti ou sekirite sosyal pou ganny koupe. Alor i byen ki ozordi sa Konvansyon i vi’n devan nou Lasanble e mwan mon pou donn tou mon sipor.

 

HON GERVAIS HENRIE

Personnelman e fransman lo sa kote latab, nou pou siport ladopsyon sa Konvansyon akoz nou senserman krwar ki bann dimoun avek dezabilite i merit santi zot ganny rekonnet, apresye dan nou kominote. Me pli enportan nou krwar ki zot merit annan menm swa, kontrol e laliberte lo zot lavi koman en sitwayen. Nou pou dir ki ozordi, nou pou ganny dir parey nou’n antann dan prezantasyon Onorab Pool ki bokou in ganny fer pou bann dimoun avek dezabilite pandan sa dernyen 10an, dizon 30 lannen. Nou pou ganny dir in annan lasistans ek benefis finansyel pour bann dimoun ek dezabilite e zot fanmiy, nou pou ganny dir ki plizyer fasilite in ganny konstrir e met an plas ki’n permet lantrennman spesyalize  par egzanp pour bann dimoun avek dezabilite i bezwen. Nou pou ganny dir nou’n fer progre dan domenn aktivite sportiv kiltirel e sosyal ki konsern bann dimoun avek dezabilite, nou pou ganny dir ki bokou in ganny fer pou sansibiliz nou popilasyon lo sor bann dimoun avek dezabilite e nou pou ganny dir ki i pou annan en sanzman latitid dan konportman nou popilasyon vizavi bann dimoun avek dezabilite ki’n sanze. Alors en zour nou ti sikann zot me aprezan  nou siport zot e nou konpran zot. Tou Gouvernman, nenport Gouvernman ki ti opouvwar ti pou fer menm keksoz, nou tou ki la nou konnen ki i pran plizyer lannen pou akonplir tou potansyel, sosyal e ekonomik en dimoun avek dezabilite, alors napa nanryen drol, si en Gouvernman i envesti dan bann dimoun avek dezabilite.

Mr Deputy, a sa pwen, mon oule koz lo en diferans fondamantal problableman ki ava annan ant fason ki SNP ek SPPF i ti pou vwar tretman bann dimoun avek dezabilite. Dan tout fransizm, mon krwar fason ki bann dimoun avek dezabilite in ganny regarde pandan sa bann dernyen 30 lannen ki mon’n koz lo la, se pou fer sa group dimoun devlop en depandans lo Gouvernman e lo sistenm byennet sosyal.

Kwa ki fer mwan dir sa? Se ki, ki kantite senserman nou vwar lenplikasyon bann dimoun ki annan dezabilite zot menm i enplike dan bann desizyon ki ganny pran ki konsern zot ki afekte zot. Ouswa in annan en lapros kot zot in ganny spoil oubyen gate  avek loportinite, i annan tou sala la pour ou. Nou a donn ou ler nou anvi ouswa letan nou santi ou merite. E i pa ti merit plito annan sa tandans kot nou donn bann fanmiy e kominote sifizaman skills pou donn swen bann dimoun avek dezabilite. Nou ki marse dan distrik par egzanp, nou vwar bann dimoun ki bezwen lasistans, e fransman zot bezwen lasistans  me ki bezwen monte desann kontinyelman konvenk bann dimoun dan diferan biro Gouvernman ki zot bezwen sa lasistans. Mon kontan note ki Onorab Nibourette in mansyonn 34 ka dan distrik La Rivière Anglaise, bann dimoun avek dezabilite baze lo survey ki Gouvernman in fer.

Par egzanp, mon konn en ka dan rezyon Union Vale kot en madanm i bezwen donn lasistans son pti fiy akoz i annan en dezabilite i bezwen full time care me zot oule ki i donn li care zis 3erd-t-an par zour e apre al travay. Letan i al travay lekel ki pou pran swen avek sa pti fiy. Sa pti fiy i bezwen lasistans a plen ta.

Lo en lot ka par egzanp, in annan en lekol avek bann dimoun avek dezabilite ki’n ganny konstrir Praslin ouswa i form parti lekol Primer Baie Ste.Anne e laba in annan en transpor ki’n ganny promet pou fasilit bann zanfan vin lekol – depi an Fevriye sa promes in ganny fer e ziska prezan zot ankor pe espere. E petet le 2 manm elekte sorti lo zil Praslin i ava konn sa ka e posibleman zot ava kapab ede pou met ankor en pti presyon lo bann Minister konsernen pou rod sa sponsor ouswa koz avek sa sponsor ki ti promet pou donn sa transpor, parske konmela paregzanp sa 6 zanfan ki sorti dan distrik Grand Anse parfwa zot sot zour vin lekol. Zot bann zanfan avek dezabilite, i en pti pe en hassle pou zot paran pou anmenn zot Baie Ste. Anne tou lezour e menm parfwa tro ser alors zot sot zour lekol.

Parey nou’n antann dan prezantasyon Onorab Alcindor e osi Onorab Pool, i annan bann lezot pti konplent me ase sibstansyel kantmenm lo bann size akse avek bann batiman piblik, isi anndan i en legzanp, ozordi nou pe koz lo bann size dimoun dezabilite, ti ava byen par egzanp pou zot vin ekoute. Eski zot tou ti pou kapab ganny akse isi anndan? Posibleman dan nouvo building sa i ava ganny pran an konsiderasyon. I osi annan akse ek lanplwa, training vokasyonnel, bann lezot entegrasyon sosyal size drwa imen e sansibilizasyon piblik an zeneral.

Taler mon’n dir i annan en diferans fondamantal e dan SNP nou ava plito dir ki nou krwar e   nou ava oule promot sa ki nou apel: ‘Responsabilite kolektiv kot nou empower bann dimoun avek dezabilite, donn zot en lavwa e koz lo zot prop sitiasyon,  donn lanmen pran bann desizyon ki konsern zot, sa konsep, Mr Deputy, i apel ‘Independent Living’. En konsep tre modern ki plizyer pei Eropeen aktyelman pe adopte. Par definisyon ‘Independent Living’ i vedir ki en dimoun avek dezabilite tou laz i ganny menm liberte, swa, dignite ek kontrol ki lezot sitwayen i gannyen dan lakour dan travay e dan kominote e mon kontan pou vwar ki sa Konvansyon zisteman si i ganny swiv e aplike comme il faut, i ava permet nou bann dimoun avek dezabilite realiz zot potansyel koman bann sitwayen aktiv e annan kontrol lo zot lavi e desizyon. Ozordi menm dan Sesel fodre nou komans angaz nou dimoun ki pe pli ganny afekte sirtou bann disabled person zot menm, dan bann desizyon ki nou zot pran ki afekte zot. En tel lapros i ava permet nou determinen kwa ki nou bezwen fer pour anmenn bann sanzman ki ava anmenn en lefe lonterm me pli enportan, donn bann disable bann loportinite pou fer bann pli bon swa ki mannyer zot viv zot lavi.

 

Mr Deputy, akoz nou bezwen en tel lapros?  La avek mwan i annan en kopi Rapor Zournal Nasyon lo diskour ki Patronn Konsey bann Dimoun avek Dezabilite, ti fer pou mark Lazournen bann dimoun avek dezabilite Le 12 Zilyet an 2004 e dan sa diskour in annan plizyer keksoz ki’n ganny promet. Permet mwan zis pour lir en pti bout ki sa i dir :

‘The setting up of a shop for disability aids of all kind for sale, rent or loan. The construction of a fully equipped room for the blind, plans to construct a Daycare Centres on Praslin and La Digue as well as plans to revamp the Rehabilitation Centre with the aim of making it more effective and progressive’.

Eski tou sa bann plan, 4an plitar in akonplir, eski i akonplir?

Si nou bann dimoun avek dezabilite ti annan sa lavwa, zot ti pou’n sertennman lobby bann lenstitisyon konsernen e rode ki’n arive avek sa ki zot in ganny promet.

Mon lenterpretasyon sa Konvansyon i se ki i pe promot lentegrasyon sosyal bann dimoun avek dezabilite, savedir pou zot partisip dan lavi toulezour nou sosyete parey tou bann lezot dimoun dan sa bann sekter swivan-lanplwa, ledikasyon, dan bann lezot entegrasyon sosyal osi pou zot ganny bann diferan akse. Sa Konvansyon i osi promot zot drwa e rezet tou form diskriminasyon e pli enportan sansibiliz larestan popilasyon lo sor  sa group dimoun.

 

Mon pou konklir, Mr Deputy, par swete ki nou kapab akonplir sa bann vizyon pou nou pei.

1.  Ki nou rekile avek sa persepsyon vwar bann dimoun avek dezabilite koman en lobze pou lasarite e plito promot zot koman en group dimoun avek drwa.

2.  Ki nou rekile avek persepsyon ki zot bann pasyan me plito promot zot koman bann sitwayen endepandan e koman bann konsomater, zisteman.

3.  Trwazyenmman, ki nou rekile avek sa latitid bann profesyonnel ki bezwen desid pou bann dimoun avek dezabilite me plito promot zot koman bann dimoun ki kapab desid pou zot prop lekor e pran responsabilite pou bann size ki konsern zot.

4.  Katriyenmman, ki nou rekile avek persepsyon envalidite e pou nou abandonn tou sa bann baryer ki pe limit zot ozordi e plito reviz nou bann norm sosyal, bann polisi e tandans kiltirel ki restrikte zot lanvironnman.

5.  Senkyenmman ki nou rekile avek kwayans ki zot depandan e ki zot pa kapab travay me plito nou met lanfaz lo zot abilite e ofer bann mezir ek sipor aktiv.

6.  Sizyenmman, ki nou rekile avek tandans kree en lanvironnman sosyal e ekonomik ki enkli zis bann dimoun normal e plito promot en lanvironnman fleksib kot tou dimoun i kapab partisipe.

7.  Setyenmman, ki nou rekile avek bann polisi ki promot segregasyon dan ledikasyon, lanplwa e lezot domenn lavi. Promot lentegrasyon bann dimoun avek dezabilite dan lavi politik, ekonomik e kiltirel Sesel.

8.  Wityenman e dernyenman, dernyen pwen final, ki nou rekile avek bann polisi ki konsern dimoun avek dezabilite, ki konsern  en Minister spesifik. Me ki plito nou promot bann polisi ki pou empower zot atraver Gouvernman, set a dir sak Minister konsernen i bezwen annan polisi ki konsern dimoun avek dezabilite.

Ankor sa i bann norm ki bann pei avek tandans modern i adopte. E   derneyen pwen mon ava dir ankor ki tousala pou depan lo devlopman, promosyon e organizasyon bann dimoun avek dezabilite zot menm pou nou kapab fer sa bann keksoz marse e met sa Konvansyon ki nou pou adopte an mars. Parske se zot ki dan sa soulye, zot ki konn zot sor, zot ki konpran zot sitiasyon e sitiasyon lezot dimoun. Alor i enportan ki nou enkli zot dan bann, sirtou, dan bann nivo desizyon ki ganny pran.

 

HON DAVID PIERRE

Mr Deputy mon’n ekout atantivman Onorab Pool, e bann lezot entervenan lo sa mosyon e mon annan sa pou dir;

Sa ki devan nou ozordi, i enportan, i enportan akoz mon krwar nou tou ki dan sa lasal ozordi nou siport dan nenport ki fason ki nou santi nou kapab bann dimoun ki annan serten dezabilite.

Onorab Pool dan son prezantasyon in mansyonn 5 keksoz ki a son n’avi i form parti sa konvansyon.  In koz lo kalite proteksyon ki nou devret donn nou bann dimoun avek dezabilite, lo ki fason nou pou amelyor zot sitiasyon, lo kalite loportinite ki nou bezwen donn zot, in koz lo dignite, in koz lo lentegrite, e in koz lo fason ki nou devret retir bann baryer ki anpes sa bann dimoun bouze parey koze i dir.

Mr Speaker, kestyon ki mon demann mon lekor se ki a sa moman la, eski sa ki Gouvernman pe fer an realsyon oubyen pou bann dimoun avek dezabilite, eski i ase? Eski zot on the right track ? Oubyen eski lentansyon i pa move, lide i pa move, me selman, nou ti’n devret annan sa volonte, sirtou sa volonte politik pour nou fer en pe plis, akoz nou kapab fer enpe plis, i annan room for improvement. Mon okouran Mr Deputy, bann kalite sipor ki Gouvernman i donn bann dimoun avek dezabilite, e mon annan serten komanter pou fer lo la.

Mr Deputy, ozordi Sesel, en zanfan ki ne avek en dezabilite e ki dokter i sertifye ki, wi, sa dezabilite i pou lavi e i pou anpes li travay eksetera, apre ki in pas lo medical board, son paran i ganny serten lasistans.  E ozordi sa lasistans i tonm lo R1750.  Mon demann mon lekor en kestyon,  eski a sa moman pandan ki nou konnen nou pe pas atraver serten difikilte ekonomik nou tou dan sa lasal nou konnen pou dir devaliasyon in anmenn serten fardo lo lafanmiy Seselwa kestyon at this point in time eski moman pa’n arive pou nou premyerman reviz sa lasonm, e met anlinny avek sa kalite benefis, ki sa zanfan oubyen sa dimoun i bezwen gannyen pour li kapab vreman gard son dignite, parey Onorab Pool, in dir pour li gard son dignite e pou li gard son lentegrite.

Dezyenm keksoz, e Onorab Pool in koz lo diskriminasyon e la mon anvi refer sorti en pwen e mon anvi ki sa Lasanble i reflesir seryezman lo sa pwen;  Parmi bann dimoun avek dezabilite, lafason ki Gouvernman i organiz lasistans ki i pou donn sa bann dimoun i mon pwennvi, i mon lopinyon ki i annan diskriminasyon dan lafason ki sa lasistans i ganny donnen.  E Mr Deputy Speaker permet mwan eksplik mon lekor.

Ler en dimoun i annan dezabilite e letan en dokter in sertifye ki son dezabilite i pou ek li permanan, mon krwar poudir  i responsabilite lasosyete pou tret sa bann dimoun parey en dimoun ki’n annan en dezabilite  depi ler i ti ne.  Akoz mon dir sa?  Si ou en dimoun ki pe travay, ou fit, ou normal, ou pe travay e ou ganny en aksidan e ou ganny en dezabilite ki permanan, ki pa permet ou kontinnyen travay.  Gouvernman i dir oke nou dakor nou donn li sa benefis ki tou bann dezabilite i gannyen konmsi as if sa dezabilite ti avek li depi ler i ti ne.  E la sa dimoun i ganny li R1750.

Si en dimoun in fer en aksidan pandan ki i pa travay la i annan en diskriminasyon e Gouvernman i dir poudir non sa dimoun – e i vin en dimoun avek en dezabilite permanan, Gouvernman i dir tyonbo en kou, la nou pa pou donn ou sa lasistans, nou pou donn ou en means testing e Gouvernman i donn sa dimoun R600.  En dimoun avek dezabilite ki se swa in ganny li atraver en aksidan oubyen atraver nesans, Mr Deputy sa dimoun i bezwen viv dan dignite e i kler napa en dimoun dan sa lasal ozordi ki pou vin la ki pou vin dir avek mwan poudir R600 i permet en dimoun viv avek tou son dignite.  Sa i en diskriminasyon ki a mon’n avi apre ki nou’n fini deal avek sa konvansyon mon krwar poudir nou tou nou bezwen kriye, nou bezwen fer kler pou dir i bezwen arete.

Pli fermal ankor Mr Deputy ozordi nou konnen avek progranm IMF, Gouvernman pe al fer dimoun aret travay.  Annou pran en dimoun ki’n travay 20an, in kontribye pandan sa 20an ki in travay dan sa pei.  E akoz sa progranm IMF, akoz nou difikilte ekonomik Gouvernman i deside pou fer li redundant.  Sa dimoun i perdi son lanplwa e i komans fer demars pour li rod en lot lanplwa.  Pandan ki i pa dan lanplwa e i pe fer demars pour li rod en lot lanplwa, i fer en aksidan e i vin en dimoun avek en dezabilite permanan ki i pa pou kapab travay.  Sistenm ki manyer i ete ozordi i dir akoz sa dimoun i pa dan lanplwa pandan ki in fer sa aksidan, sa dimoun pou al lo means testing si nou pa sanze pou ziska ler SPPF – ziska 2011, ziska ler SPPF i reste opourvwar apre nou nou ava vini nou ava sanz sa ..

 

(Laugther)

…Me sa ki nou pe demande lo sa kote latab Mr Deputy i se ki sa diskriminasyon ki nou tou dan sa lasal nou dakor avek i arete.  Apre tou ….

 

(Interruption)

 

MR DEPUTY SPEAKER

Order.  Proceed.

 

HON DAVID PIERRE

Mersi Mr Deputy.  Apre tou, si nou pran en dimoun ki zanmen in travay dan sa pei.  In la zanmen in travay pou en rezon ou en lot.  I ti kapab travay me i pa’n travay oubyen en dimoun kekfwa ki’n travay 2an, 3an e ki pan kontribye osi pou bokou letan ki sa dimoun ki li in travay pou 20an me in ganny met deor apre in ganny sa aksidan.  Ler sa dimoun i ganny li, – sa enn ki pa’n travay ditou ler i ganny li 63an akoz nou konnen ki poudir a laz 63an e nou dir poudir i pa dan en pozisyon pou li kontinnyen travay, i napa sa lafors eksetera, nou donn li son sekirite sosyal, e sa i byen, sa i fantastik regardless of whether in travay oubyen i pa’n travay.  Alors Mr Deputy mon santi poudir lo sa kote sa dimoun avek sa dezabilite ki’n fer sa aksidan la i annan en diskriminasyon.

En lot pwen ankor Mr Deputy si en dimoun i self-employed i fer en aksidan, si in fer son return i ganny lasistans, si i pa’n fer son return i pa ganny lasistans.  Mon dakor Mr Deputy ki i enportan ki en dimoun ki self-employed i fer son kontribisyon parey Lalwa i demann li pou fer.  Me eski pa i devret annan bann lezot mekanizm ki pou fer sir, ki pou garant ki sa dimoun ki fer son biznes, ki self-employed i fer son kontribisyon.  E non pa servi sa koman enn bann mekanizm ki pou fors sa dimoun fer son kontribisyon.  Sa dimoun ler in fer aksidan i vin en dimoun avek dezabilite permanan i bezwen responsabilite lasosyete pou fer sir ki sa dimoun i viv dan dignite   akoz li, limenm li sa dimoun i pa pou kapab, i pa dan sa pozisyon pour li fer li.

En lot keksoz ki bezwen sanze Mr Deputy se ki ozordi en dimoun paregzanp ki’n koup en kote oubyen de kote lazanm, sa dimoun parey mon’n dir si in fer aksidan letan i pa dan travay i ganny li en means testing e tou le 3 mwan, i annan  6 mwan, i annan mon krwar tou le lannen, sa dimoun i bezwen al lo en board e zot review son case – mon pa konnen si pou vwar si son lipye in pouse oubyen non, zot review son case e apre zot deside si zot pou kontinnyen donn li means testing.  E souvannfwa pandan ki sa prosedir pe ganny fer, pou bokou rezon sa dimoun i perdi en mwan ou menm parfwa 2 mwan pandan ki letan i pa gannyen sa lasistans.  Akoz nou bezwen fer sa avek en dimoun ki annan en dezabilite.  Akoz ki nou dir poudir nou respekte sa bann dimoun.  Nou take care of sa bann dimoun me anmenmtan atraver nou bann aksyon nou fer bann keksoz ki fer li vin ekstrememan difisil pour sa bann dimoun.

Mr Deputy i annan osi sa size ledikasyon.  Eski moman pa’n arive pou Gouvernman revwar ki kalite progranm ledikasyon zot donn bann dimoun avek dezabilite?  Eski moman pa’n arive pou si nou annan bann dimoun avek dezabilite ki kapab entegre dan nou curriculum normal kot i pou ganny sa posibilite pou devlop whatever potansyel ki i annan fully, eski moman pa’n arive pou nou donn sa dimoun sa posibilite?

Alors Mr Deputy mon pe osi demande ki nou bezwen revwar kalite ledikasyon ki nou pe donn nou bann dimoun avek dezabilite.  Nou bezwen osi empower sa bann dimoun ki pe donn zot sa ledikasyon, bann ansennyan ki deal avek bann dimoun avek dezabilite.

Dan  lekol normal, dan nou sistenm ledikasyon normal i osi enportan ki bann ansennyan i ganny sa posibilite pou devlop zot atraver bann kour dan sa area kot zot deal avek bann manrmay ki en pti pe retarde dan lekol.  Mon’n fer en bon pe letan dan sa sistenm ledikasyon e mon konnen poudir pou le moman napa sa sistenm, napa sa posibilite dan nou sistenm lediksyon normal.

En lot pwen ankor Mr Deputy i sports.  Bokou in ganny dir, lo televizyon tanzantan nou’n tande, lo ki fason ki Gouvernman in met zefor, in met resours dan devlopman sportif nou bann dimoun avek dezabilite.  Me Mr Deputy mon krwar poudir nou ti kapab fer plis.  Mon rapel letan ti annan zwe Olympic tou dernyenman la,  Lasin e mon ti pe get atlet kot bann dimoun dan zot wheelchair, bann dimoun avek dezabilite sertennman, dan zot wheelchair zot ti pe compete.  E ti annan en manmay 13an ki ti pas mwan en remark e i dir mwan, akoz ki bann atlet Seselwa i compete dan sa kalite wheelchair pandan ki tou lezot atlet ti pe ganny sa bann wheelchair ki modern, ki permt zot, ki improve zot performans, nou nou bann atlet ti ankor dan sa bann wheelchair ki donn zot en dezavantaz.  So i enportan – e la zot pe dir mwan IMF, mersi bokou e i enportan pou nou konsider bann fasilite modern enzekte enpe cash dan sa area osi.

Lot pwen Mr Deputy i enn leve par Onorab Alcindor ki’n koz en pti gin lo carer.  Mon krwar sa moman in arive Mr Deputy pou nou komans realize poudir nenport ki landrwa ki nou dimoun avek dezabilite i sorti, nenport ki kouler ki sa dimoun i ete, nenport ki larelizyon ki sa dimoun i swiv, nenport ki parti politik ki sa dimoun i swiv, i en Seselwa avek dezabilite.  I annan serten bezwen e nou lasosyete i bezwen dan en fason onnet, dan en fason kler i bezwen deal avek sa bann bezwen.  So lo sa sitiasyon carer, mon annan detrwa kestyon pou mwan demande.  Lekel ki gannyen sa carer? Lekel ki deside lekel ki pou ganny sa carer?  E akoz Mr Deputy zot pa fer bann kriter kler?  E zot pa fer sir ki zot train sa bann dimoun ki zot zot responsabilite i pou vwar,   i pou deal avek sa bann kriter pou garanti ki alavenir tou Seselwa avek en dezabilite ki devret baze lo sa bann kriter ki kler ki devret ganny lasistans en carer i bezwen gannyen e sa Lasanble i demande ki sa i ganny fer imedyatman.

Mr Deputy mwan mon pou siport sa konvansyon 100 poursan me mwan osi oule met lo rikord poudir i enportan ki bokou pwen ki’n ganny diskite dan sa Lasanble ozordi, e mon asire ki i annan ankor bann lezot ki pou leve, i ganny pran an konsiderasyon e kot i annan bann mezir korektiv ki devret ganny pran i ganny pran o pli vit posib.

 

DEPUTY SPEAKER

I reste 3 entervenan lo nou lalis, i midi, nou ava adjourn, nou ava repran 2 er.

 

(BREAK)

 

DEPUTY SPEAKER

Nou a repran nou travay pour sa apremidi. Deba i kontinnyen lo mosyon mon annan mwan 3 dimoun ki’n eksprim lentere pou entervenir.  Onorab François, Joseph.

 

HON JOSEPH FRANÇOIS

Mr Deputy mon oule entervenir lo sa mosyon  ki devan nou  annefe strikteman lo sa mosyon ki devan nou, akoz sa mosyon devan nou i en konvansyon Nasyon Zini lo dwa bann dimoun avek dezabilite.  Sa konvansyon, Mr Deputy, parey nou tou nou konnen  in vin an fors le 3 Me 2008, plis ki 30an apre ki Sesel li in rekonnet drwa Seselwa avek dezabilite.

Sa konvansyon ki la devan nou pe fer sir ki dimoun avek dezabilite zot ganny menm sans  rezouir menm drwa imen ki larestan dimoun nou sosyete.  Sa konvansyon pa pe donn okenn nouvo drwa okenn dimoun an plis, tou drwa sa bann dimoun zot deza annan, me sa konvansyon li i pe zis demann ki bann pei i pran   mezir neseser pou met anplas diferan mezir ek Lalwa pou aret tou form diskriminasyon kont bann dimoun avek dezabilite, amelyor zot kondisyon lavi e donn zot menm drwa ek loportinite  dan en sosyete.

Mr Deputy alor sa largiman ki tou Gouvernman ki ti pou opouvwar ti pou fer parey i fo, i pe ensilte lentelizans nou Seselwa  ki pe reste partou dan nou bann kominote, mon dir sa Mr Deputy akoz levidans i montre ki Sesel 0.03% son popilasyon pe viv avek dezabilite, sa dapre sa survey ki Onorab Pool in koz lo la pli boner bomaten tandis ki an mwayenn popilasyon lemonn 10% an mwanyenn  popilasyon lemonn dan bann pei  ki annan dezabilite. Sesel konpare avek lezot pei kot 30% dimoun avek dezabilite  dan lafrik e dan les lazi pe  mandyan obor semen, Sesel pa ineglizab, e sa mon pe site dan en rapor labank mondyal an 2006 Mr Depite.

Trwakar pei tyermonn napa Lalwa anti-diskriminatwar oubyen Lalwa ki adres bann dimoun avek dezabilite  spesifikman e enn dan sak dimoun dan lemonn  pe viv lo mwens ki en dollar par zour e zot sa bann dimoun zot deza bann dezabilite e zot pe viv dan laprovrete absoli, alor kestyon se ki, ki sa bann Gouvernman dan sa bann pei pe fer alor?  Alor sa tousel i donn ase levidans ki i pa koret ki tou Gouvernman ti pou fer otan pour son dimoun avek dezablite parey Sesel in fer anba Gouvernman SPPF.

Mr Deputy  kestyon in monte, topik in dirize ver lasistans sosyal, napa okenn provizyon anba sa konvansyon ki la devan nou, ki dir pou ki dimoun avek dezabilite  i devret ganny lasistans sosyal.  Napa okenn provizyon dan sa konvansyon ki devan nou ki dir i bezwen donn carer avek lasistans finasyel pou bann dimoun avek dezabilite.  Me se Gouvernman Sesel, se Gouvernman SPPF in fer li son devwar pou li, azir koman en Gouvernman responsab e azir an plis ki sa konvasyon pe demande pou ed son bann dimoun avek dezabilte dan sa pei.  Se sa linisiativ Gouvernman SPPF, i pa ni linisiativ prezidan Bush, ni premye Minis Gordon Brown, ni Prezidan Sarkozi e mon repete sa i linisiativ e en devwar ek langazman Gouvernman SPPF atraver Prezidan Rene e answit i pe ganny soutenir par Prezidan Michel.

Mr Deputy permet mwan ankor elabor lo detrwa pwen ki fer referans avek sitiasyon mondyal. Ansyen Prezidan Bush Senior in vini, in ale, Prezidan Clinton in vin apre li e li osi in ale, lot Prezidan Bush junior in vini e byento li osi i pe ale, me Lanmerik la mazorite dimoun avek dezabilite  pa ankor ganny ni carer, ni sistenm lasante pou nanryen, pou zot pei.

Mr Deputy ankor enn pti legzanp si ou permet mwan lo sa menm lespri pou eklersi sa topik lasistans sosyal –  Langleter li osi premye Minis  John Major in vini in ale, Premye Minis Tony Blair osi in vini in ale e la nou annan premye Minis Gordon Brown e napa en Angle ki ti pe travay Langleter e ki zot zot pa’n kontribye dan fon sekirite sosyal sa pei ki ozordi pe benefisye sekirite sosyal akoz zot dezabilite. Alor Mr Deputy sa konvansyon i en lenstriman drwa imen avek en dimansyon sosyal  ki’n ganny adrese ase eksplisitman ladan, i reafirm ki tou dimoun avek tou kalite dezabilite i devret rezouir tou drwa imen ek liberte lo menm nivo ki lezot dimoun.

I klarifye e kalite tou kategori, drwa ki aplike lo lezot dimoun osi lo bann dimoun avek dezabilite, i idantifye bann landrwar kot adaptasyon i devret ganny fer, pou ki pou bann dimoun avek dezabilite i kapab  aplik zot drwa. I osi koz lo bann provizyon, dan sitiasyon kot serten sa bnann drwa i ganny vyole e i koz lo reanforsman pou proteksyon bann drwa sa bann dimoun avek dezabilite.

Mr Deputy sa konvansyon i pou selman fer en diferans dan lavi en dimoun dan  en wheelchair oubyen en dimoun aveg oubyen en dimoun lo en bekiy, oubyen lo en dimoun soud, selman si sa konvansyon i ganny byen enplimante, i ganny byen swiv.  Sa konvansyon lo limenm i inik Mr Deputy, i inik dan lesans i bann tre rar konvansyon ki demann bann Gouvernman ki sinnyen ou ratifye pou zot designate enn ou plis bann mekanism endepandan ki pou kapab form par kard sa konvansyon pou zot osi promot  protez e swiv lenplimansyon sa konvansyon. E la Mr Deputy mon pou propoze ki council for the disable i osi ganny aprose lo baz isi Sesel pou zot osi kapab form par sa kard, mon asire ki zot pou santi zot onore e antouzias pou form par sa devlopman.  Partisipasyon aktif bann dimoun dezabilite e zot bann lorganizasyon i pou tre enportan  pou realiz sa konvansyon e fer li vin en sikse dan nou pei.

Mr Deputy ki vre valer sa konvansyon pou Sesel e ki diferans sa pou fer pou nou pei?  Petet sa ki mon santi pa’n ganny byen adrese par sa 2 entervenan avan mwan Mr Deputy. Laspes pli enportan sa konvansyon se pou anmenn en shift dan nou bann pratik tradisyonnel ki nou sosyete isi Sesel in pratike, sa mon pe dir nou pratik caring lo en baz etik, sosyal e imaniter pou bann dimoun ki annan dezabilite e pour sanz sa i pou anmenn li lo en nivo kot pou  annan en baz devlopman ek partisipasyon  dan nou sosyete e bann prensip ki pli byen ekitab e responsab nou pei. An dot mon pe dir ki se nou sosyete i oule sorti dan sa lepok kot nou  zis senpatiz avek nou bann frer ek ser avek dezabilite,  e nou donn zot menm drwa, akse e transportasyon e donn zot sans partisip aktivman dan devlopman larises nou pei. Sa konvansyon i oule tir dimoun avek dezabilite lo sa side line e dan izolasyon  e entegre zot dan lavi sosyo-ekonomik pei pou zot anmenn en kontribisyon pli pozitif pou bann pei.

Tou sa bann lorportinite i annan en backing legal par kominote enternasyonnal pou fer sir i konplemant partisipasyon bann dimoun  avek dezabilite dan tou kous sosyo-ekonomik diferan pei dan lemonn, letan Gouvernman in fini ratifye sa konvansyon komite dezabilite nasyonal i devret, mon santi Mr Deputy demann Gouvernman atraver departman sosyal, pou vin avek en plan d’aksyon pou montre ki mannyer sak departman ek sak sekter dan nou pei i annan lentansyon adres bann issues ki dan sa konvansyon.

Mr Deputy sa konvansyon i osi rekonet ki limitasyon bann resours dan serten pei i en problenm, me sa konvansyon i pa pe donn okenn lekskiz ki lefet i annan serten pei ki i annan limit resours, i devret retard lenplimtasyon sa konvansyon oubyen limit scope ki bann benefisyer atraver sa konvasyon i devret rezouir.  Tou dezabilite i devret ganny pran an konsiderasyon letan nou pei i enplimant sa konvasyon, korperasyon enternasyonal pou tre itil pou siport sa proze e resours i devret ganny byen priyoritize dapre kriter obzektif Mr Deputy.  An dizan sa nou bezwen osi rekonnet realite dan nou pei malgre i annan lekol eksepsyonnel Sesel, bokou bann zanfan avek dezabilite pa pe al lekol. Malgre ki i annan Lalwa kont diskriminasyon travayer anba Employmentn Act, en kantite dimoun avek dezabilite Sesel pa pe travay malgre ki zot kapab travay. Plizyer landrwar travay pa ankor oule anploy  bann tel dimoun.

Malgre i annan proteksyon ek sipor  kont vyolans domestik bokou bann zanfan avek dezabilite i sibir serten labi vyolans domestik e labi fizik ek verbal akoz zot mwen kapab pou zot reazir avek menm viger ki en dimoun ki ganny konsidere normal, sa i montre ki i ankor annan bokou pour nou pei fer pou nou kapab arive enplimant tou laspe lartik sa konvansyon me Mr Deputy sa i pa vedir ki nou pei in pran en move semen oubyen nou pei pa’n fer ase pou reazir lo drwa nou bann dimoun ki annan serten dezabilite.

Nou lo sa kote latab,  lo merit sa konvansyon nou pou siporte avek bi pou ki nou Gouvernmann i kapab e i met anplas plis mezir ankor  ki tou nou bann dimoun ki annan dezabilite i kapab rezouir tou sa bann drwa ki ti deza pou zot e i fer provizyon spesifik ki personn pa ava ganny kit deryer. Avek sa mon ti a demann avek tou mon bann koleg  pou siport sa mosyon.

 

DEPUTY SPEAKER

Onorab Lider Lopozisyon

 

HON WAVEL RAMKALAWAN

Mr Deputy obviously sa konvansyon i enn ki san kontrovers i enn ki nou tou nou pou siporte.  Me kantmenm      i pa vreman gou letan ou vwar ki manyer lemonn limenm li in tret sa size. Par egzanp letan ou regarde  ki se an 2007 ki sa konvansyon in ganny sinnyen  selon Nasyon Zini e dan sa 135 pou mwan servi sa ki Onorab Nibourette ti a pe dir, dan sa 135 pei sinyater, i annan selman 27, i annan mwens ki 30 ki ziska prezan in ratifye li.  E pou mwan sa dan en serten sans i tris parski ou ti ava ekspekte ki konmsi  lemonn ti ava pran nou bann dimoun avek dezabilite dan en fason pli serye ki le moman ki sa konvansyon ti’n ganny  sinnyen ti ava, sa bann menm pei ti ava fer bann demars deswit pou zot  ratifye li e ofet Sesel i pa en leksepsyon parske Sesel osi i tonm dan sa group pei e nou’n ganny dir ki Sesel ti parmi bann premye pei  pou sinny sa konvansyon, in fact ti sinny  zour menm ki i ti ouver pou resevwar bann sinyatir. E ozordi i annan mwens ki 30 pei e byensi Sesel i ava azout en lot lavwa dan the cause pour nou bann dimoun avek  dezabilite.

Mon krwar ki dan bokou sans sa konvansyon, anfet tou son bann parol ki i dir,  e ki Onorab Pool in byen eksplik nou, egalite, loportinite tret sa bann dimoun avek respe e tou, mon krwa ki tou sa bann lentansyon se bann lentansyon nob ki nou tou  nou devret siporte parske mon krwar ki nou tou dan en serten fason, dan nou fanmiy oubyen dan bann zanmi nou annan dimoun ki annan serten dezabilite, e ofet bomaten letan, bann entervenan  ti a pe koze, mon ti ferm mon lizye pou enn pti git letan e sa dan limenm konmsi pe dir avek mwan, zis mazinen si sa monn ki mwan mon ti viv ladan sete en  monn ki absoliman parey letetan ou lizye i fermen  ki zis ou tann tou keksoz ki otour ou, me selman ou pa vwar namryen, dimoun  pe dekrir ou keksoz me selman ou en monn ki pa vwar nanryen. Konmsi tou sa bann keksoz ki lemonn i dekrir koman labote en soley leve, labote en  plenn lin, labote bann verdir ensidswit, pou ou i ti ava zis en deskripsyon ki dimoun ti ava donn ou me sa deskripsyon avek en lizye fermen, i pa ti pou vreman accurate parski ou pa ti konnen kimanyer en pye dibwa i ete.

Dan menm fason tou bann lezot dezabilite ki en dimoun i kapab annan konmsi pour nou ki nou’n ganny beni pou nou kapab annan tou sa bann senses, pour nou kapab  aprezan tanzantan sey met nou dan pozisyon en dimoun ki li i pa pou zanmen zouir sa bann senses.  E sa dan limenm li i ed nou  pour nou konpran ki kalite monn ki sa bann dimoun i viv ladan me obviously anmenntan osi sa bann dimoun e nou’n ganny dir sa ki letan ou perdi one of your senses par egzanp sa ki ou’n perdi i ganny ranforsi par lezot. Par egzanp bomaten letan Onorab Alcindor in mansyonn Daniel Boudanne konmsi letan ou mazinen ki in perdi – i en dimoun avek dezabilite ekstrenm paralize depi son likou atraver en aksidan en zonm ki ti ok, me  enkou an gran lavi i sanze, me aprezan, pou li kapab tenir en penso dan son labous e penn sa ki otour li dan en fason, fer en reprezantasyon sitan accurate avek son labous e mon plis ki sir nou tou ki la anndan la, avek tou nou abilite avek tou nou lentelizans nou  pa pou kapab penn en lans, penn en zil parey sa zenn onm i kapab fer li.

Donk zot annan bann lezot talan e nou vwar diferan sa bann dimoun avek sa bann diferan   talan ki zot annan, e sa bann talan i permet ou pou, Mr Deputy parfwa pou ou soke.  Par egzanp dan mon  distrik Anse Etoile, nou  tou nou konn lafanmir Lablache, e dan sa fanmir par maler i annan  3 zanfan ki pa vwar kler me selman sa 3 zanfan i 3 zanfan doue, e letan mon ariv devan laport madanm Lablache, zis mon bezwen dir bonzour Mr madanm e deswit Hans i konnen lekel ki’n koze, e i nonm ou non, ‘Father ou’n arive’  keksoz koumsa, oubyen menm si ou’n call li sa talan ki i annan pou li ranmas sa bann lavwa, e nou tou nou rapel letan i ti operator lasose kot Land Transport e tou ki mannyer i ti ekstraordiner i ki manyer sa ledwa, i kapab eksper, ou vwar li i anvoy mesaz lo son telefonn, tou sa la, e ki manyer in master tou sa la, e la nou pa pe koz braille, ok braille i en lot zafer, me ek en telefonn ordiner, ki manyer i master tou sa la, e byen se bann talan ki sa 3 zanfan zot in annan, zot in fer nou enjoy lanmizik, zot in fer nou vreman egeye.

E akote byensir nou annan nou lot frer ki en gran santer,   Thomas.  Thomas ki en boug avek son talan dan li menm. Donk nou vreman bezwen apresye sa bann dimoun parski atraver zot zot ed nou, nou ki konsider nou lekor koman normal, mon dir konsider, parske ofet parfwa i enportan pou dir ki napa personn ki normal. Ii pa akoz nou nou annan tou nou bann senses, nou mars drwat,   nou krwar nou isi, nou laba ki poudir nou nou normal e tou sa bann dimoun, zot pa.  Donk zot annan zot lenportans dan lasosyete, me zot osi annan zot drwa dan lasosyete.  Alors nou bezwen rekonnet sa drwa e anmenmtan osi, e mon’n deza dir sa dan sa Lasanble, pour nou regarde ki manyer nou sosyete nou rekonnet ki po dir sa bann dimoun avek sa bann dezabilite, zefor  ki zot bezwen fer i bokou plis ki zefor ki nou nou bezwen fer.

Sa dimoun ki annan problenm pour li marse, i bezwen doub zefor pou li sorti lo pwen ‘A’ pou li ariv lo pwen ‘B’  konpare avek dimoun ki son 2 lipye i normal, son 2 lipye i napa nanryen ki la koman en dezabilite, sa dimoun avek serten dezabilite pou li aprann en metye, ankor ennfwa i pran bokou, plis zefor pour li ekoute, pou li konsantre, pou li regarde kimanyer pou li fer sa keksoz e ankor ennfwa, nou’n aprann en kantite keksoz, sa bann zenn marmay soud lotrozour, in montre nou ki mannyer zot in master en lot langaz, dan limenm, zot pe koze nou nou a pe regarde ki zot pe sey dir, me zot zot pe koze normal, pe riye zot in fini   idantifye sakenn ant nou, avek en non, Speaker, sef avek marto, mwan leader lopozisyon, zis mon vwar zot soz i dir konmsi toultan i annan en brasle dan son lebra, alors, zot in fini en lot langaz all together e nou la, ranpli avek ladmirasyon.

Donk Mr Deputy mon pe dir sa akoz, mwan mon enn sa bann dimoun, e san ki nou met politik ladan me nou parti i enn sa parti ki krwar ki sa bann dimoun avek dezabilite malgre ki zot ganny en lanplwa  lasosyete i devret toultan pran en konsiderasyon spesyal pou zot e se sa bann dimoun ki nou nou osi krwar ki zot devret pe ganny en lasistans lo en baz permanan akoz sa zefor ki zot fer, zot bann maladi ki zot gannyen pa toultan ki zot byen, pa toultan ki zot byen parey enn sa bann garson ki soud ti a pe dir mwan, ki pou dir in sey fer karate, in sey fer tou kalite me selman i toultan double zefor, parski tanzantan i ganny en bebelouka, i ganny en lot problenm.  Ki alors ki menm si ou’n vwar zot in debout solid i annan en weakness somewhere e alors letan zot pe debourye fodre pa ki nou dir be la zot pe debourye alors nou ava tir sa lasistans ki nou pe donn zot enswidswit.

E ankor enn fwa en lot pwen ki’n ganny fer resorti par Onorab Pierre bomaten, letan i pe dir ki en dimoun ki’n perdi en lazanm, oubyen ki’n perdi 2 lazanm nek ki apre i ganny demande  pou li desann pou li pas devan medical board apre en serten tan pou   revize, pou regarde si i pou gannyen – sa bann kalite keksoz mon krwar fodre nou bouze. Mon dir sa Mr Deputy par leksperyans, menm mwan osi mon annan en kouzen ki’n perdi en kote lazanm in debourye dan lavi, e in sey debourye dan nenport ki fason, i annan li son fanmir be letan son allowance i ganny koupe, letan i bezwen desann pou li al devan medical board, limenm i dir avek mwan be sa tel soz pa pou zanmen repouse sa. Ki mon bezwen desann pour mwan al gete? Napa nanryen, mon leta i koumsa, sa in fini antere, en lot bout ek mwan in fini antere dan mon lavi e alors mon krwar ki i enportan pou sosyete limenm li regard ankor landan.

Letan nou pe osi koz lo tretman egal, mon krwar ki i enportan. Pran par egzanp lo kote sports e nou tou nou  rapel ki manyer, nou bann atlet spesyal letan zot in al partisip dan bann diferan zwe, zot in retourn avek meday lor,  e zot in fer nou lonner, nou’n koz bokou lo zot, me selman mon konnen ki zot bann atlet spesyal, me selman akoz ki zot zot pa ganny enn pti rekonpans enpe pli spesyal. Akoz ki zis sa atlet ki annan li tou son bann fakilte, li si i retourn avek en meday lor oubyen ek en meday larzan, oubyen en medya bronz li i ganny li  en bon mwenza parfwa, me tandis ki li sa atlet spesyal i pa ganny nanryen. Mon krwar ki i devret annan en keksoz proporsyonnel pou ki konmsi i donn zot osi en lankourazman akoz ankor ennfwa pou enn sa bann atltet par egzanp pou zot pran en sport, pou zot take up sa sport, sa lenerzi – mon annan enn mon zanmi Vincent Cedras ki en coach e nou konn ki poudir sa kantite extra lenerzi, extra zefor ki li limenm li konman en coach i bezwen mete pou fer sa manrmay aprann the rules, pou fer sir ki zot devlope parske zot bann misk osi tou parfwa pa develop parey sa ki pour en dimoun ki inverted commas normal’.  Alors toultan i annan sa zefor anplis e  mon krwar osi ki la i en lot landwa kot nou bezwen regarde ki manyer nou kapab rekonpans lo en nivo proporsyonel e konmsi ki pli apropriye.  E parski mon krwar sa bann dimoun dan sa sitiasyon  pli ou donn zot lankourazman, pli zot montre zefor e si ou pe koz lo lwayote, lwayote sa bann dimoun avek en dezabilite i en lwayote ekstraordiner – e sa la ki mon dir ki parfwa sa bann dimoun zot montre nou en lot aspe natir e karakter imen ki parfwa nou bann dimoun ki sipoze normal nou pa montre parey ki zot zot montre, i vin menm parey parfwa letan ou   annan ou en lisyen ki’n ganny train, son lwayote anver ou i bokou pli gran ki lwayote kekfwa en dimoun ki ou dekrir koman ou bon zanmi. Me li son lwayote i sanpoursan.

Donk Mr Deputy mon krwar ki ankor ennfwa mon poudir ki i  sad ki sa konvansyon malerezman pa tou bann pei ki’n ratifye li ziska prezan me selman mon krwar ki in donn nou sa loportinite ozordi  pou nou reafirm nou siport pou tou nou bann dimoun avek ki swa atraver lanante, atraver nesesans oubyen atraver kek lezot maler, aksidan enswidswit, maler ki’n ariv zot zot trouv zot dan en pozisyon kot zot in perdi kek fakilte – nou konman ne Lasanble mon krwar sa konvansyon in donn nou en sans pou nou reafirm nou sipor pour zot e  letan nou pe reafirm nou siport pour zot, pour nou dir ki nou koman en sosyete nou pou toultan annan en regar spesyal  pour zot e kot nou kapab donn en lankourazman nou ava fer li.

Avek sa Mr Deputy mon krwar ki nou napa  okenn problenm  pour kinou Lasanble Nasyonal, nou tou ansanm nou donn nou sipor sa konvansyon.

 

HON SANDY ARRISOL

Mersi Mr Speaker. Mwan osi mon pou prezant mon sipor a sa konvansyon akoz ler mon ti lir sa konvansyon Mr Speaker, en keksoz ki ti fer mwan mazinen se en progranm ki ti pase lo televizyon SBC  i annan 2 zan ou 3 zan pase, sa sete progranm Autrement.  En program ki  Jules Hoareau mon krwar ki ti fer e sa progranm ti montre ennfwa tou le mwan e sa progranm ti montre nou bann dimoun avek dezabilte ki egziste dan nou pei. E taler in ganny dir dapre statistik i annan nou apepre 2000 a 2500 dimoun avek dezabilite dan nou pei, e ler mon ti get sa proganm ti fer mon realiz en keksoz, ki i annan plen dimoun dan nou pti pei Sesel  ki pe viv avek en dezabilite e letan mwan mon get mwan, mon normal ozordi i donn nou en lenpresyon ki dezabilte ou kapab ne avek me en dimoun ki’n ne byen demen i kapab trou li dan en sitiasyon kot li osi i vwar li dan ta oubyen dan group bann dimoun avek dezabilite.

Se sa ki ti fer mwan anvi koz enn pti pe lo sa konvansyon e anmenntan pas enpe lo la , akoz monn war in aport plizyer keksoz  par egzanp mon’n tann plizyer lezot koleg in koz lo la,  kot i pe koz egalite, diskriminasyon, aksesibilite, nou’n koz lo akse avek lazistis drwa a lavi  enn de keksoz ki annan pou fer avek bann dimoun avek dezabilite.  Me selman anmenmtan de lot kote i annan plizyer pti pwen ki mwan osi mon ti a kontan touse ki mon santi i en pwen konsern. Par egzanp letan nou koz lo dezabilite mwan enn de bann dimoun ki mon toultan mazinen i annan Laura Lavigne ki reste Takamaka, ki li i ti ganny sans pas dan progranm otreman e  i annan en zenn onm ki mon konn li byen ki ti frekante dan spor, ki’n reprezant Sesel a plizyer repriz, enternasyonal, nasyonalman in anmenn meday pou nou, in fer Sesel fyer e sa se pa lot ki Danny Beauchamp ki ozordi ki vwar li pe asize dan en wheelchair kot li, pa pe fer nanryen zis i la dan en fason dezabilite. Mon annan osi Daniel Matombe, en lot legzanp, en Mr ki ti travay parey tou zonm, i ti fer son kontribisyon dan lasosyete e finalman in vwar li end up dan en aksidan kot ozordi i trouv li kot rehab paralize, dan en sans pa pe kapab fer nanryen e preski tou keksoz set en lot endividi oubyen en personnel kot lasante ki pe fer pour li.

Se sa ki ti fer mwan anvi lir sa konvansyon byen e fer sir mon prezan mon sipor poru sa akoz mon santi poudir  ki nou tou ki la ozordi dan Lasanble, nou ki’n ne byen, nou fizikman byen, nou kapab pe sorti dan Lasanble tanto dan nou transpor pe koup semen, pe al kot nou tanto nou pe dormi, la i desann letan lapli, gro lapli tonbe, pye dibwa i tonbe, en ros i roule, e nou kapab vwar nou demen bomaten leve lo lili, lopital, swa nou 2 lipye pa pe bouze, swa nou’n perdi en kote lebra, swa finalaman nou’n paralize e nou pa pe kapab fer nanryen parey nou ti abitye fer avan.

Me de lot kote Mr Speaker,   bomaten mon’n tann koz lo keksoz ki’n ganny fer, keksoz ki pa ankor kapab fer – mwan mon ti a kontan koz lo bann keksoz ki mon krwar nou ti kapab fer pli byen pou ed sa bann dimoun.  Par egzanp bomaten mon’n tann koz enpe lo lasistans ki  sa bann dimoun i gannyen, par egzanp mon’n tann koz lo sa R1600 kekfwa pour en dezabilite R1600, R1650, mon’n tann R1700 bomaten, me ler ou fer enn de kontak sakenn i donn ou en pri. Mon pa konnen si kot sa ki donn lasistans i  annan en tarif me ler mwan mon vin serse, mon  ganny R1600, li i ganny R1650 e kekfwa enn i ganny R1700, mon pa konnen si napa standar, si i annan standar. Sa i en keksoz ki nou bezwen revwar.    Par egzanp  bomaten nou’n tann koz lo pri lavi par egzanp, si mwan  mon’n ganny logmantasyon, mon pe mazinen kekfwa sa dimoun avek dezabilite kekfwa si i en zonm ki ti pe travay in pran en loan parey nenport ki zonm pour li sey konstrir son lakour, pour li anbelir son lakour pou sonny son zanfan, son fanmir, be why not letan in perdi en saler  3000 ekek roupi, ozordi i pe end up avek R1650  kekfwa pou repey son det, aste son bann bezwen e sonny son fanmir.  Mon krwar sa i enn bann keksoz ki nou devret  revwar, sa lasistans ki bann dimoun avek dezabilite i gannyen.

En lot pwen se bann fasilite, sa konvansyon in koz lo bann fasilite, ki met a dispozisyon bann dimoun avek dezabilite, en legzanp ki mon toultan gete se anba kot Savings Bank, i annan sa pti slip ki zot in mete tou le de kote, zis par egzanp si en dimoun i dan son wheelchair kekfwa senpleman i pe al labank, swa i pa kapab monte li menm, en dimoun i kapab senpleman zis vini pous li, parske fasilite i deza anplas e zis met li anler i ouver laport e i al anndan e i ganny servi, sa ki i devret ganny servi.

En lot legzanp mon ti a kontan touse, dan mon distrik St. Louis, mon annan mwan en fiy, ki’n ne avek en dezabilite, e son paran in tap, tap laport enn de fwa pour li ganny serten lasistans, parey nou’n tann bann lezot  koleg in dir, sa fiy finalman son paran letan mon’n apros son paran mon’n demann li, i dir ek mwan poudir i ganny dir son fiy pou ganny sa lasistans ziska laz 15an, apre 15an zot a gete si zot pou kontinnyen donn li oubyen non.  Tou sa la i bann keksoz ki nou bezwen revwar, parey bann lezot koleg in dir, lasistans ki ou pou gannyen – mon mazinen letan ou’n ne konman en zanfan en dimoun avek dezabilite, mon pa krwa i ariv en staz dan ou lavi, kot apre letan ou leve bomaten tou keksoz, si ou ti napa en lipye ou lipye i pouse , si ou ti napa en lebra ou lebra i pouse oubyen sa dezabilite ek ou i sorti. Mon mazinen letan ou’n ne avek serten form dezabilite mon mazinen i la lavi diran, e i permanan e ou bezwen serten lasistans. E sa i anmenm mwan dan en lot legzanp kot tou dernyenman  ti annan bann group zanfan ki ti vin get nou la, bann zaafan  ki sourd, ladan mon ti annan enn mon etidyan mon ti fer lekol Larivyer Anglez, nou ti ganny sans koze dan break, kot parey mon tann lider lopozisyon   koze, sa garson i en garson ki ganny bebelouka li, in toultan reste ek son granmanman, son granmanman in pran li depi zanfan, parske dan en fason ou en lot, son manman in abandonn li, pa’n okip li.  In reste ek son granmanman toultan e ozordi in fini lekol, i en zanfan ki ganny bebelouka. Bebelouka i enn bann maladi mon krwar osi ki letan ou’n gannyen i la, ou viv avek pou leres ou lavi, e anmenmtan i annan en kote zorey ki pa fonksyonnen.  I tann zis lo en kote, lot kote i pa tann nanryen.

Li son problenm i reste ek son granmanman, son granmanman in fer tou, e ozordi li i santi li en zonm i kapab al travay, in leve in al travay in seye a plizyer repriz, par egzanp i ti travay dan en latelye kot sarpantye, zot ti dakor pou anploy li me zis senpleman ler son bebelouka i leve i pa konnen kan i leve, kan i arive ler li i sote i vwar li lopital e in ganny blese avek enn bann blades ki servi  dan carpentry laba e i annan en sikatris lo son lanmen. Prezan i vwar li difisil pou li kapab ganny en lanplwa parske i annan en papye en dokiman ki sertifye konmkwa i en zanfan i en dimoun avek bebelouka, alor pa pou kapab anploy li kot lamarin par egzanp pou al ploze parske ou pa pou konnen kan son bebelouka i leve ou pa pou kapab anvoy li al grenp montanny par egzanp,  pa pou kapab anvoy li kot PUC pou al pas lalinny lo poto par egzanp parske sa dimoun, sa zanfan ki ozordi in vin en zonm i anvi travay i anan sa bout dezabilite.

Prezan li son sel problenm se  i dir avek mwan ki tou le 3 mwan, i bezwen pas lo en board e laba lo sa board ki pou deside si apre sa 3 mwan si pou donn li en pti lasistans oubyen non, la nou  apran, dan sa apremidi la, poudir swa board pe al arete, swa in fini arete, swa i pou la anplas. Mwan mon krwar i pou ennn bann mezir ki pou ed bann dimoun avek dezabilite kot sa zafer board, ki ou bezwen pas lo board, tou le 3 mwan, tou le 2 mwan, tou le 6 mwan pour ou gete si ou pou ganny sa lasistans oubyen non.  Ler en zanfan in ne sourd, i bezwen sourd, mon mazinen i pou reste sourd. La mwan ozordi mon tande, demen mon kapab sourd sa i vin en lot sirkonstans. Mwan mon krwar i enn pti pe lo sa lalinny  Mr Speaker, pou revwar ennpe bann fasilite ki bann dimoun avek dezabilite i gannyen, par egzanp mon’n mansyonnen zafer wheelchair, par egzanp dan Koko St Louis, mon annan 2 madanm ki’n koup lipye, mon annan en manman ki’n koup lipye e son lot fiy la tou dernyenman in koup lipye, be kot zot reste zot reste dan en bafon dan flat e zot bezwen mont peron pou al lo car park pou zot ganny fasilite transpor pour zot al zot bann randevou, pou zot al zot pansman, pou zot al zot al fer lezot keksoz. Par egzanp nou pran kot Savings Bank i annan sa pti slip mon ti mazinen be why not annan en fasilite kot si i annan dimoun kot flat par egzanp ki servi bann sistenm wheelchair kot parey Danny in met mwan okouran, poudir li, zot in dir li, zot pou fer en fasilite, zot pou tir li enpe dan leo kot i reste anmenn li enn pti pe pli ba pou kapab fasilit son bann transportasyon, e osi son bann tretman ki i pe swiv. Mon krwar sa i pou bann keksoz ki pou amelyor enn pti pe Mr Speaker, lavi bann dimoun avek dezabilite.

Parey mon’n dir mwan mon pou siport sa konvansyon parske mon santi poudir dimoun avek dezabilite, zot osi zot merit menm drwa parey mwan ki’n ne fizikman byen, zot osi zot merit sa  menm drwa ki mwan mon merite. E de lot kote, si ozordi mon trouv mwan mon byen ou pa zanmen  konnen ki kapab arive avek mwan ki byen ozordi, ki kapab end up parey sa dimoun, dan sa sirkonstans kot li i trouv li avek en dezabilite. E avek sa de pti mo mon ti a kontan prezant mon siport pou sa konvansyon.  Mr Speaker.

HON BERNARD GEORGES

Mr Deputy i pa ti mon lentansyon pran laparol lo sa enn mosyon akoz parey in ganny fer resorti, i pa en mosyon ki annan okenn kontrovers ladan, si mon’n pran laparol apremidi se pou fer en pwen ki mon panse i pa’n ganny soulinyen ase.  Nou’n koz en kantite  lo sitiasyon bann dimoun avek dezabilite dan nou pei e sa i tou-a-fe normal akoz se sa ki sa konvanyson i koz lo la. E nou’n pas enpe letan pe felisit nou Gouvernman pour sa ki nou fer se vwar koman bann keksoz ki’n fer depi ki i opouvwar pou ed e egey sor bann dimoun avek dezabilite. Anmenmtan  nou’n anmenn enpe kritik, lo lafason ki nou persevwar ki i annan ankor serten semen pou fer pou nou ariv la kot nou ti ava swete ki nou pei i ete dan sa domenn.

Mr Speaker, se lo sa pwen ki mon ti a kontan fer mon lentervansyon apremidi, akoz i annan en keksoz mon krwar dan sa konvansyon ki nou pa’n pas ase letan pe regarde. I kler Mr Speaker e mon pa krwar ki okenn dimoun lo okenn kote latab pou dir le kontrer. I kler ki nou koman en nasyon nou latitid anver bann dimoun ki annan dezabilite, i tre diferan avek latitid serten lezot nasyon. Nou latitid set-enn prevwayans, set enn kot nou kontan, set enn kot nou siport e set enn kot nou angaz avek bann dimoun  ki annan dezabilite.  Sa set en, mon krwar set en lendikater ki nou devret fyer, set en koz lafyerte dan nou nasyon. Si sa i anmenn serten parmi nou pou dir Gouvernman SPPF ki’n la pandan tan kantite letan ki’n fer en tre bon keksoz, so be it si sa i anmenn serten lezot dimoun poudir sa Gouvernman pa’n al ase lwen, pa’n fer sa, so be it me koman en nasyon mon kwar nou devret felisit nou lekor lo la fason ki nou siport e nou angaz avek bann dimoun ki annan dezabilite. Sa konvansyon, i pa telman aim pou Sesel. Sa konvansyon mon krwar son target se sa bann pei kot dimoun ki annan dezabilite i ankor enferyer, e let’s face it, nou mon kwar nou devret konman en nasyon ki angaze enternasyonalman nou devret  fer nou bout me sa konvansyon, i tous serten keksoz ki pa telman konsern nou  akoz nou dan sa domenn nou lwen devan, nou’n devlope, nou’n al en bon distans parey, mon dir par nou menm e par aksyon  bann lazan Gouvernman e ot dan nou sosyete. E se la ki mon ti a kontan tous lo enn de keksoz.

Mr Deputy si nou regard byen sa konvansyon e sa in en pti pe enkyet mwan  ler mon’n lir li, akoz mon ti pe demann ek mon lekor akoz ki tou sa bann keksoz i la, nou ava vwar ki depi lartik 12 ziska lartik 30 i.e the bulk sa konvansyon set en repetisyon tou bann drwa ki annan dan nou konstitisyon, pou nou. Akfer nou bezwen al repet bann keksoz ki deza la.  E son repons mon kwar i ava donn nou en lendikasyon lo ki si sa ki nou devret still pe fer koman en nasyon.

Sa bann lartik i la selon mwan pou en senp rezon akoz anba nou lartik,  27 ki dir ki nou tou nou egal devan Lalwa i annan still en largiman posib ki ou kapab fer en distenksyon menm anba en lartik legalite devan Lalwa.  Parey in ganny argye ou kapab fer en distenksyon ant zonm ek fanm.  Ou kapab, e dan nou pei i annan en tre gran distenksyon ki ganny fer ant dan Lalwa parey ou konnen Mr Speaker si en dimoun i kapab al prizon pou en det sivil oubyen si i pa kapab, zonm i kapab, madanm teorikman pa kapab.

I annan en largiman ki dir ki ou kapab annan menm anba nou lartik 27, en serten diskriminasyon lo nivo, si ou en etranze oubyen si ou en Seselwa. Si ou en Seselwa  ou kapab aste later san permisyon, si ou en etranze ou bezwen demann permisyon i en distenksyon pa tou dimoun ki egal, malgre ki sa lartik i dir ki fodre. Dan sa konvasyon mon mazinen ki letan in ganny pran pou regard  sak lartik enn par enn e pou re pas lo li, pou fer sir ki kot dimoun avek dezabilite i konsernen  anba nou lartik 27 nou nepli kapab annan en largiman pou dir nou kapab fer en diferans ant en dimoun ki annan dezabilite ek en dimoun ki napa. Donk mon krwar selon mwan enn bann pli gran lafors sa konvansyon ki devan nou se sa, se ki personn pa pou kapab al dir e ler mon pe dir sa, mon pe dir sa dan en fason teknik mon a retourn lo la taler.

En dimoun ki pe al fer en batiman pa pou kapab dir si planning i dir li met en ramp la kot pou annan peron, pa pou kapab dir me non nou pou fer en distenksyon, anba Lalwa mon kapab dir dimoun avek dezabilite pa parey bann dimoun ki napa dezabilte alor mon napa okenn lobligasyon pou mwan met en ramp, mon krwar se sa ki tou sa bann lartik ki ganny repete i tire e se lo sa pwen mon ti a kontan fer enn pti lentervasyon apremidi.  Akoz se lo sa pwen mon krwar kot nou bezwen, rekonnet ki sa konvansyon i met bokou plis demann lo nou koman en sosyete.

An sinnyan sa konvansyon, e la ler nou pou ratifye li apremidi nou pe met ankor plis lobligasyon lo nou konman en nasyon pou fer keksoz ki kekfwa nou pa ankor fer.  E  Mr Speaker legzanp i ankor annan en kantite devan nou kot kontour i ganny kase. Wi, i annan en ramp ki’n ganny fer pou al Savings Bank sa i byen, i annan ramp ki’n ganny fer  partou, dan tou kwen pavement, Victoria, pou bann nou ki mars souvannfwa dan lavil, nou aware ki ramp in ganny fer pou fasilit akse bann  dimoun ki lo wheelchair, me i ankor annan bokou, bokou e bokou pou fer. Bokou nou bann building ki napa lift e ki napa ramp i inaksesib pou bann dimoun avek dezabilite, bokou. Mon koz Trinity House kot mon biro i ete, en dimoun avek dezabilite, en dimoun dan en wheelchair pa pou zanmen kapab ariv lo premye floor oubyen lo dezyenm floor i en defayans planning in manke. Nou bann dimoun ki’n fer sa building pa’n prevwar se ziska ler ou marse, se ziska ler ou ganny dezabilite ki ou pa konsyan ki si sa ki bann lobstak. Tan ki ou pa mars dan lavil  Victoria lo pavement, i annan 2 keksoz ki ou pa realize, ou pa realize ki mannyer pavement malgre ki i bon dan serten landrwa, i move dan lezot landrwa kot ou tas ou pous, ou may dan cracks e ou realize ki tanzantan ou bezwen koul bann fey, bann brans dibwa ki pa ankor ganny trim e zot lo pavement. Bann dimoun ki marse i konn sa, bann dimoun ki pa marse pa konsyan.

E se sa mon krwar ki vin sa bann lobligasyon. Tan ki ou napa en dezabilite ou pa konsyan ki bann dimoun ki annan en dezabilite i bezwen fer fas avek tou lezour.  E Mr Deputy i annan en kantite lobligasyon parey mon’n dir taler ki sa konvansyon pou fors lo nou. Mwan mon pran en legzanp, lartik 20, Personal mobility, regard byen sa lartik e nou ava vwar ki i annan en kantite keksoz koman en nasyon ki nou devret fer.

Nou devret fasilit akse, wi nou bezwen fer ramp noiu bezwen met lift me nou bezwen osi fer sir ki en dimoun ki dan en wheelchair i kapab mont dan en bis san lasistans. Dan bann lezot pei, nou pa ankor ariv la nou, pei pa kapab afford li ankor. Bomaten nou’n dir IMF i en rezon me whatever the reason nou napa sa bann bis ki azenou parey dan bann lezot pei ki azenou pou en dimoun ki annan dezabilite antre ladan under his or her own steam. Me anba sa lartik nou pou bezwen prevwar Mr Speaker  walking aids. Nou pou bezwen prevwar parey i mete la mobility aids, devices etc. e ki nou pe koze lo la wheelchairs. Sak eleksyon dan mon distrik wheelchairs i met partou kote. Sak sou seksyon mobilizater SPPF i annan en wheelchair pou anmenn dimoun vote.

Bann dimoun ki yer ti pe al laboutik, ozordi i asiz dan wheelchair i al vote. Nou tou nou konn sa Mr Speaker. Koman eleksyon in fini sa bann eleksyon ki ti bezwen wheelchair yer  i bezwen marse pou al laboutik.  Anba sa lartik 20 lasosyete pou bezwen provide. Si nou kapab rod wheelchair pou anmenn dimoun vote, nou pou bezwen rod wheelchair pou donn dimoun ki napa wheelchair. Nou pou bezwen anba sa lartik fer li. Nou pa pour kapab koman en nasyon krwaz lebrwa e dir IMF, LUGOS, Red Cross or whatever. E se sa sa bann lobligasyon ki mon ti anvi koz lo la en pti pe apremidi. Daniel Boudanne in ganny mansyonnen par 2 dimoun. Les mwan  mansyonn li ankor akoz i sorti dan mon distrik.  I en manrmay Mamelles. I reste obor Lonorab Pierre, in fact Lonorab Pierre in fer mwan mazinen i son vwazen anler lo lateras Mamelles.

Me anba lartik 22 Mr Deputy en garson parey Daniel avek bokou lezot ankor pa pou devret ekspekte ki en sosyete osi modern e osi prevwayan ki nou sosyete i ava met li lo en lili, dan en open ward en lopital parey North East Point. Non. I ava ekspekte akoz i annan sa drwa, i ava ekspekte pour li annan tel parey en bann trwazyenm az i annan, en lasanm avek keksoz enpti fasilite twalet avek en landrwa kot i kapab penn. Akoz the whole idea se non selman pour ki nou vin prevwayan me ki nou donn sa bann dimoun menm keksoz ki zot ti ava annan si zot pa ti disabled.

I byen ki nou donn li en lili dan en geriatric hospital me that’s not the place for him akoz i pa ni geriatric e i pa ni merit dan en lopital.  Alors nou pou bezwen koman en nasyon provide en landrwa rezidans pour bann dimoun avek dezabilite ki pa kapab take care of themselves me ki pa at the same time dan en lopital, dan en ward. Nou pou bezwen prevwar tou sa bann keksoz. Alors nou latas Mr Speaker i gran, koman en nasyon, nou pou fer li ofir e an mezir ki nou mwayen i permet me mon ti ava anvi apremidi sonn sa laklos e dir ki pour tou sa ki nou’n fer ziska prezan nou semen devan nou i ankor long e sa konvansyon apre midi i vin koman en reminder of sa bann keksoz ki still ankor devan nou pou fer.

MR DEPUTY SPEAKER

Last intervener Hon Charles.

 

HON JEOVANA CHARLES

Mr Deputy bomaten ler Onorab Pool ti prezant mosyon pou ratifye sa konvansyon lo drwa bann dimoun avek dezabilite, mon ti ganny lenpresyon ki sa mosyon pou anmenn bann deba ris e entelizan ki pou ed nou vwar kote Sesel in arive, ki nou’n arive akonplir ziska prezan, e ki mannyer an rastifyan sa konvansyon pou ed nou al pli devan e koriz bann fot ou omelyor lavi pli byen bann dimoun avek dezabilite.

Mr Deputy dimoun avek dezabilite i en group dimoun ki form parti nou sosyete, e menm si zot en group minorite zot osi en priyorite Gouvernman pou fer sir ki zot pa reste deryer pandan ki pei i progrese.

Mr Deputy Speaker sa konvansyon devan nou ozordi pe koz egzakteman lo ki bann Gouvernman i bezwen fer pou ki drwa bann dimoun avek dezabilite pa ganny vyole.

Gouvernman Sesel an 1981 pou montre ki manyer i ti konsernen avek respe pou drwa imen ti fer en survey pou konnen konbyen dimoun avek dezabilite e ki kalite dezabilite zot annan.  Mr Deputy, Onorab Pool dan son prezantasyon bomaten in koz lo lartik 4, ki dir nou tou bann lobligasyon zeneral sa konvansyon.  In tradwir li dan en langaz kreol senp ki mon’n byen konpran.  I paret mwan letan in fer sa, swa i annan dimoun ki pa’n ekout byen oubyen zot in ganny sertifika konfiz dimoun e prezan zot bezwen konfize.

Mr Deputy annou get enkou lartik 5.  Lartik 5 Mr Deputy i koz lo egalite e non-diskriminasyon.  Dan plizyer pei atraver lemonn, nou’n vwar atraver televizyon ki mannyer dimoun avek dezabilite i fer fas avek bokou defi an term fasilite e servis ki ganny met a zot dispozisyon.  Serten i menm ganny met a lekar senpleman akoz zot diferans par natir e akoz sa zot problenm pa ganny adrese.  I malere pou vwar zot ganny trete dan en tel fason, me solisyon i reste dan polisi zot Gouvernman.  I tre byen alor ki Nasyon
Zini in vin avek sa trete e demann bann Gouvernman pou aret en moman e vwar kwa ki zot bezwen fer pou kapab ed sa group pli vilnerab sosyete.

Mon kontan pou dir Mr Deputy ki nou isi Sesel nou bann dimoun avek dezabilite i ganny enkli dan tou progranm e servis ki pei i ofer e ki zot annan menm drwa ki lezot pou anmenn en lavi konfortab.

Prensip Gouvernman ozordi i ki tou dimoun dan Sesel i ganny trete egal malgre zot diferans.  En dimoun ki annan en dezabilite fizik ouswa mantal i pa merit ganny regarde koman en dimoun ki pa kapab kontribye dan sosyete.  Mr Deputy i enportan note ki Sesel i osi annan en progranm spesyal ki target bann dimoun ki sord ouswa aveg afen ki zot kapab lir, ekrir e kominike e sa i ganny rekonnet dan lartik 21 sa konvansyon anba liberte lekspresyon e lopinyon e akse avek lenformasyon.

Lartik 24 i rekonnet drwa bann dimoun avek dezabilite a ledikasyon e lartik 27, i rekonnet zot drwa travay e lanplwa.  Mr Deputy dir mwan kan eski bann MNA ki ozordi pe koz lo lekol dezabilite Roche Caiman zot in pase pou donn en pti lakourazman sa bann zanfan e sa bann travayer ki pe travay dan sa landrwa?

Isi Sesel polisi Gouvernman pou donn ledikasyon gratwit tou zanfan Seselwa i drwa tou zanfan pou al lekol.  Zanfan avek dezabilite pa en leksepsyon.  Sa group zanfan i ganny swiv en progranm ledikasyon ase eleve kot sa lekol ki mon’n fek koz lo la.  La zot zwenn lezot zanfan ki dan menm kondisyon ki zot e zot ganny sans devlop zot nivo entelektyel e zot talan.  Sa bann menm zanfan i plitar ganny ekspoze avek bann skills ki ed zot komans en karyer plitar me i malere ki i annan ankor bann paran ki pa anvoy zot zanfan lekol.

Mr Deputy lartik 25 konvansyon i rekonnet ki dimoun avek dezabilite i annan en drwa pou o nivo lasante san okenn diskriminasyon.  Pou sa osi mon kontan, isi Sesel sa osi in vin responsbailite Minister Lasante pou donn servis medikal ki enkli tretman latizan, terapi, fizyo-terapi ek servis sosysal.

Mon sagren ler mon vwar dimoun ki pe aspir e zwe lo lemosyon bann dimoun ki pli vilnerab dan nou sosyete.  La mon anvi fer en pti klarifikasyon fer par Onorab Pierre bomaten.  En dimoun ki’n ganny en dezabilite kan i ti pe travay e i ti pe kontribye dan fon pansyon Sesel zot ganny en pansyon dezabilite baze lo en poursantaz zot lapey ki zot ti pe touse avan ganny sa dezabilite.  Sa napa nanryen pou fer avek ni IMF, ni sekirite sosyal, sa ki in dir bomaten…

(Interruption)

 

MR DEPUTY SPEAKER

Kontinnyen Hon Charles.

 

HON JEOVANA CHARLES

Mr Deputy lartik 26 pe koz lo abilitasyon e re-abilitasyon.  Isi Sesel ozordi nou nepli met lanfaz lo dezabilite me lo abilite.  Tou zefor i ganny mete lo servis re-abilitasyon sa bann dimoun afen ki zot osi zot kapab partisip aktivman dan tou laspe lavi kominoter.

Mon vwar ki ozordi i annan bann lasosyasyon ki’n ganny nonmen bomaten ki travay avek nou bann dimoun avek dezabilite dan bann distrik.  Sa bann lasosyasyon i fonksyonn koman bann fasilitater anpartenarya avek Gouvernman ek son bann Minister pou arive zwenn zot bezwen.  Mr Deputy i osi annan bann group sipor dan sak distrik ki travay avek bann paran e bann volonter pou organiz aktivite onivo distrik.

Nou bann manm parlman nou bezwen donn bann bon lenformasyon, lenformasyon ki korek.  Bann dimoun ki ekout nou i sifi pou pran en pti letan pou rod bann fe.  Avek bi pou amelyor kapasite sa ki bezwen travay avek bann dimoun avek dezabilite en seri progranm ti ganny fer lannen pase pou ansenny bann paran e home carers lo bann teknik pli apropriye pou servi dan zot travay.  Progranm ti komans fer La Digue, apre in al Praslin, apre ti fer Mahe.

Mr Deputy, lartik 29 i koz lo garanti drwa pou en dimoun avek dezabilite pou partisip dan politik e lavi piblik.  En keksoz tre enteresan ki’n ganny sorti bomaten, skoz tro souvan ki swa dizan malen e entelizan pou pas zot letan pou gognard bann dimoun avek dezabilite ki al vote oubyen ki partisip dan lavi politik.  Mon krwar prezan sa bann dimoun normal a konpran ki dan sa konvansyon sa bann dimoun avek dezabilite zot annan zot drwa vote e partisip dan politik.

Mr Deputy lartik 33 pe koz lo enplimantasyon e monitoring.  Nou isi nou deza annan nou bann diferan lazans ki deservi bann dimoun avek dezabilite.  Paregzanp konsey nasyonal pou dimoun avek dezabilite ki konmela son Chairperson i Madanm Helene Maïche e Sekreter Mr Daniel Savy ki okour plizyer lannen in fer en travay dir e eksepsyonnel e ki i pe kontinnyen fer.  Mr Savy mersi bokou e kontinnyen sa bon travay.

Pour mwan sa konvansyon ki devan nou i en bon konvansyon, i ava ed Sesel pou revwar bann lakonplisman ki nou’n fer, ranforsi nou bann febles e met nou azour avek sa konvansyon.  Mr Deputy pou terminen mon ti a kontan osi remersye tou bann lazans dan tou distrik ki ede pou donn en pti koudmen avek bann dimoun ki annan dezabilite.

Avek sa mon pou donn tou mon sipor sa konvansyon.

 

MR DEPUTY SPEAKER

Onorab Pool, right of reply.

 

HON ANDRE POOL

Mr Deputy dabor mon ti a kontan remersye tou bann manm ki’n partisipe dan sa deba lo sa mosyon depi bomaten e si i annan en keksoz ki mon ti koz lo la dan mon prezantasyon e ki mon ti a kontan repete dan mon summing up se ki bokou in ganny fer e i ankor pe ganny fer pou bann dimoun avek dezabilite dan Sesel.  Sa personn e personn pa kapab dir nou otreman.

Me anmenmtan mon’n apresye bokou bann kontribisyon, bann komanter tre pozitiv sorti kot tou le de kote latab e osi bann kritik ki serten bann partisipan in fer resorti e mwan mon pe donn zot sa garanti ki parmi sa bann kritik e komanter ki zot in fer, si pa tou laplipar i deza anba konsiderasyon e revizyon pou kapab permet bann sanzman neseser pour nou kapab soulaz lavi bann dimoun avek dezabilite bokou plis ankor.

So an dizan sa Mr Deputy i paret ki tou manm pou vot anfaver mon mosyon e mon a dir zot Mersi davans.

 

MR DEPUTY SPEAKER

Nou a pran en vot lo konvansyon devan Lasanble.  Tou sa ki anfaver?  Mosyon in pase. Pou de rezon administratif nou pa pou komans mosyon Onorab Constance, nou ava postpone li pou Mardi prosen.  Lasanble i adjourn.

 

(ADJOURNMENT)