::
Home » Verbatim » Verbatim - Second Term 2007 » Tuesday 12th June, 2007

Tuesday 12th June, 2007

NATIONAL ASSEMBLY OF SEYCHELLES

Tuesday 12th June 2007

The Assembly met at 9 am

National Anthem

Mr Speaker in the Chair

MR SPEAKER

Bonzour tou dimoun.  Kominikasyon, mon ti oule pas 2 lenformasyon avek zot.

Premye i konsern laranzman sekirite.  Apre ki mon’n fer meeting avek le 2 Dirizan e Komisyonner-d-Polis, mon santi ki i neseser pour nou mentenir laranzman sekirite parey in leka dan lepase.  Laranzman sekirite i annan prensipalman 2 konponan pour deal ek okenn problenm eksteryer ouswa problenm ki leve dan Lasanble limenm.

Parey nou konnen, natir sa sekirite i reste en sekre e sa i a diskresyon Lapolis akoz se zot ki expert ladan, me i bezwen satisfe Speaker Lasanble Nasyonal ki i pa reprezant okenn menas pou okenn Manm dan Lasanble Nasyonal.

Nou’n osi deside pou entrodwir nouvo mezir sekirite.  Depi ozordi, Lapolis pou annan drwa search nenport dimoun ki vin dan sa Lasanble Nasyonal, eksepte bann Manm avek bann Staff Sekretaryat Lasanble Nasyonal.  Savedir, nenport ki lezot dimoun pou kapab ganny search e sa search i osi kapab enkli en search avek metal detector. Nou osi tonm dakor ki depi ozordi, personn pa pou annan drwa al dan lobby kot bann Manm i bwar dite e servi zot pti gadyak dan 10er, eksepte bann Manm zot menm e bann Staff Lasanble Nasyonal.  I enterdi pou okenn lezot dimoun, savedir bann dimoun ki vin la, Zournalis eksetera pou zot al laba.

Dezyenm pwen, mon ti oule fer en komanter lo travay devan Lasanble Nasyonal.  Parey zot vwar, Order Paper i annan apepre 3 Mosyon.  Sitiasyon i koumsa, ki poulemoman ouswa moman ki nou ti fer Order Paper dan mon Lofis, ti annan zis travay ki sorti kot Gouvernman e apre kot Parti mazoriter.  Mon ava dir la ki Parti Lopozisyon by Friday ler mon ti’n konklir tou keksoz pa ti ankor met okenn travay devan mon Lofis.  Mon krwar ki bann Manm i realize, pour nou kapab travay parey nou dir, fodre ki zot menm zot, zot partisip plis an sa ki konsern kontribisyon vizavi bann travay ki zot ti a voudre vwar ganny fer dan Lasanble Nasyonal.  Mon mazinen ki avek lakantite travay ki annan dan mon Lofis poulemoman, sirtou sorti lo kote Gouvernman, apartir semenn prosenn nou ava annan nou ase travay pou ranpli nou zournen.

Avek sa mon ava kontinnyen avek nou Order Paper.

HON WAVEL RAMKALAWAN

Zis pou kapab konfirmen ki ou’n resevwar en kantite travay sorti kot Lopozisyon depi Vandredi pase.

 

MR SPEAKER

Yer.  Mon’n resevwar, Lendi.

 

HON WAVEL RAMKALAWAN

Lendi?

 

MR SPEAKER

Wi Lendi.

HON WAVEL RAMKALAWAN

Pa Vandredi?

 

MR SPEAKER

Vandredi mon ti ganny enformen ki zot in withdraw zot bann Mosyon ek Kestyon.  Anyway, mon pa pou al ladan me yer ki mon’n ganny enformen.  Ok? In napa okenn challenge pou okenn papye.  Napa okenn Mosyon ki’n ariv kot mon Lofis so, mon mazinen ki tou sa bann papye i annord.  Mon ava demann Clerk pou fer bann First Readings lo plizyer Bills devan nou.

 

MADAM DEPUTY CLERK

This Act may be cited as the Public Sector Special Pension (Amendment) Act 2007.

This Act may be cited as Criminal Procedure Code (Amendment) Act 2007.

This Act may be cited as Non-Financial Services. This Act maybe cited as Non-Bank Financial Services Authority Act 2007.

This Act may be cited as The Seychelles Pension Fund (Amendment) Act 2007.

 

MR SPEAKER

Bon.  Anlinny avek Konstitisyon, Lartik 104, nou oule aprezan apwent le 2 Komite ki form bann Standing Committees dan Lasanble Nasyonal e sa se the Finance and Public Accounts Committee apre Standing Orders Committee.

Parey nou Standing Orders i require, i bezwen annan 7 Manm lo sa Komite.  E normalman, parey Konstitisyon i dir, sa Komite i bezwen reflekte lafors bann Parti dan Lasanble Nasyonal.  Donk alors, mon pou envit Leader of Government Business pou nomin 5 dimoun e Leader Lopoziyon pou nomin 2 dimoun.

Premyerman, lo Standing Orders Committee. Standing Orders Committee 5 dimoun apre Leader Lopozisyon 2.

 

HON MARIE-LOUISE POTTER

Bonzour tou Onorab.  Mr Speaker, anlinny avek Order 79 Standing Order, mon ti a kontan propoz sa bann Manm swivan koman bann Manm Komite Finance and Public Accounts Committee.   Standing Order avan?

 

MR SPEAKER

Standing Orders Committee premye.

HON MARIE-LOUISE POTTER

Anlinny avek Order 78, mon ti a kontan propoz sa bann Manm swivan pou vin Manm Komite Standing Orders:-

Onorab Wilby Lucas, Onorab Mitcy Larue, Onorab Terence Francoise, Onorab Jeovana Charles e Onorab Marc Naiken.  Mersi.

 

MR SPEAKER

Leader Lopozisyon

 

HON WAVEL RAMKALAWAN

Pou Public Finance Accounts Committee?

 

MR SPEAKER

Non, Standing Orders.

HON WAVEL RAMKALAWAN

Standing Orders Committee, Onorab Bernard Georges, Onorab Frank Elizabeth

 

MR SPEAKER

Ok, Mersi.  Bon mon a felisit tou bann Manm ki’n ganny apwente lo sa Komite.  E la mon ti ava dir ki premye meeting sa Komite i pou ganny call by Clerk Lasanble Nasyonal.

Par lepase, sa Komite pa’n zwenn pour la senp rezon ki zanmen in annan en premye meeting. E persepsyon sete Mr Jolicoeur ti dwatet call sa premye meeting. Poulemoman, sa Komite napa Chairman.  En meeting i bezwen ganny fer kot en Chairman i ava ganny elekte e alor mon pe demann Madanm Clerk Lasanble Nasyonal pou call the first meeting pou kapab elekte en Chairman and thereon the Chairman and bann lezot office bearers zot ava organiz bann meeting regilye.

Aprezan nou ava pran dezyenm, Standing Committee e sa se Finance and Public Accounts Committee. Mon envit Leader of Government Business pou nomin 5 dimoun.

 

HON MARIE-LOUISE POTTER

Anlinny avek Order 79, mon ti a kontan propoz sa bann Manm swivan vin Manm Finance and Public Accounts Committee.

Onorab Terence Mondon, Onorab Andre Pool, Onorab Marc Volcere, Onorab Vicky Theresine e Onorab Bernard Adonis.  Mersi

 

MR SPEAKER

Leader Lopozisyon.

 

MR RAMKALAWAN

Onorab David Pierre, Onorab Jean-Francois Ferrari.  Mersi bokou.

 

MR SPEAKER

Felisitasyon tou bann Manm.  E la osi ankor ennfwa premye meeting i ava ganny call par Clerk Lasanble Nasyonal kot zot ava elekte zot Chairman e lezot office bearers.

Bon nou ava al direkteman lo Mosyon.  Nou ava pran premye Mosyon e sa se par Onorab Waven William.  Onorab William.

 

HON WAVEN WILLIAM

Mr Speaker, avan komanse mon ti a kontan remersi tou zabitan Grande Anse Mahe ki’n vot pour mwan, ki’n anvoy mwan ankor dan Lasanble asyonal.  Mersi zot tou.

Mr Speaker, lo Mosyon; Sa Mosyon i lir koumsa:-

An akordans avek Lartik 81 e an akordans avek Lartik Konstitisyon 104, sa Lasanble i aprouve pou etablir Komite Zafer Etranzer.  Mr Speaker, Komite Zafer Etranzer ouswa IAC, International Affairs Committee i neseser e enportan pour ki Lasanble i reste azour e enformen lo bann size e relasyon enternasyonal ki konsern e dan lentere Lasanble Nasyonal Sesel.

Dan sa laliny Mr Speaker, permet mwan pou koz enpe lo son fonksyon.  Enn se pou travay pros avek Minister Zafer Etranzer pou reste enformen lo bann size ki konsern Lasanble, par egzanp deal ek bann Trete, eksetera.

Dezyenmman, asire ki bann MNA’s ki al overseas mission zot donn en rapor zot misyon ki annan pou fer avek Lasanble.

Twazyenmman, se resevwar e host bann dimoun enportan ki lo vizit sorti alatranze, sirtou bann Speakers e Manm Parlman.

Katriyenmman asiste serten meeting kot Minister Zafer Etranzer pou partisipe e rankontre reprezantan ek Lazans Aletranze.

Senkyenmman, organiz serten meeting e lesanz diskisyon avek bann Anbasader rezidan, pou agrandi sa relasyon bilateral.

Sizyenmman, fer lyezon avek serten bann lorganizasyon enternasyonal par egzanp Lasosyasyon Parlmanter pei Commonwealth, Lasosyasyon Parlmanter Pays de la Francophonie, ACP EU, Joint Parliamentary Assembly e lezot, pou agrandir e mentenir sa bon relasyon milti-lateral.

Setyenmman, reste angaze pou kreasyon APCOI, Association Parlementaire de la Commission de L’océan Indien, apre ki IAC ti sinny Memorandum of Understanding an Oktob 2005 avek Parlman Maurice.

E wityenmman, envit Minis Zafer Etranzer e lezot reprezantan relevan diferan Lorganizasyon pou vin eksplik serten spesifik size e topik lo size enternasyonal.  Tou sa i serten fonksyon sa Komite Zafer Entranzer Mr Speaker.

Mr Speaker pour lenformasyon sa Lasanble e piblik, mon pou sit enn de legzanp bann size ki IAC in enplike ladan.  Premyerman, nevyenm fon devlopman Linyon Eropeen, sa i konsern finansman diferan proze ki Sesel in benefisye e pou benefisye avek.  ACP EU negosiasyon anba Lakor e Lagreman Cotonou.  Rapor lo Drwa Imen Sesel.  Lanket fer atraver let Prezidan Parlman Linyon Eropeen lo Drwa Imen Sesel.  Reprezantasyon lo NEF, Forum Nasyonal pou Lekonomi e rankont diferan Lanbasader Sesel e partisip dan serten vizit travay aletranze dan diferan pei.

Mr Speaker, sa Lasanble i rekonnet travay ki sa Komite Zafer Etranzer in fer dilon son bann manda lepase, ki sa nouvo Komite mon panse a servi koman bann baz pou kontinnyen sa bon travay.  In sel Komite Lasanble osi ki’n kapab negosye pour en alokasyon dan Bidze Lasanble pour li fonksyonnen.  Mon ti a kontan koman en temwen travay lepase sa Komite felisit son Ekselans Anbasader Barry Faure ki ti en pilye sa Komite a bann Manm ki’n travay akote li tel parey ki Onorab Mitcy Larue, Onorab Ginette Gamatis, ex-Onorab Walter Confait, Onorab Nicholas Prea e Onorab Hardy Lucas.

Mr Speaker mon osi sezi sa lokazyon pour osi remersye ex-Speaker Mr Francis MacGregor, Clerk Lasanble Nasyonal Madanm Sheila Banks, tou Staff Lasanble e Deputy Clerk, ki ti osi sekreter IAC pour son travay e son konpetans.

Mr Speaker I beg to move. Mersi.

 

MR SPEAKER

Okenn ki segonn Mosyon.

 

HON MITCY LARUE

Mon segonn sa Mosyon Mr Speaker.

 

MR SPEAKER

Deba i ouver.  Okenn ki ti a voudre entervenir?  Onorab Prea.

 

HON NICHOLAS  PREA.

Mr Speaker, mon pou vreman kourt.  Mon a  fer zis enn de pti remark lo sa Mosyon.

Mr Speaker, anmenmtan ki mon akey sa lespri pour nou set up en nouvo IAC, mon ti a kontan ki sa nouvo Komite i kontinnyen dan lepa, dan travay ki sa ansyen Komite in set e parey loter Mosyon in dir, sa ansyen Komite i enn ki’n travay.  I enn bann Komite Lasanble ki’n vreman travay.  In kit son mark dan listwar nou Lasanble e mon ti a swete ki bann nouvo Manm lo sa Komite ti a osi pran en tel responsabilite pour ki at the end of the day, nou Lasanble e nou pei ki retir sa ki meyer dan sa travay ki sa Komite i fer.

Mwan osi mon ti a kontan profit lokazyon pour remersi sa ansyen Komite, tou bann Manm e nou’n travay ansanm, nou’n travay dan en lespri bi-partizan e avek sipor Sekretaryat Lasanble e ansyen Mr Speaker, Mr MacGregor, nou’n vinabou kapab achieve preski tou nou bann objectives.

Mr Speaker, petet la osi tou, mon a dir ki i enportan pour nou fer atansyon osi ki:- pa pran mwan dan en fason negativ.  Ki nou pa les serten keksoz ki arive, serten deroulman ki arive petet met nou Komite, ki ti vreman en Komite ki ti vreman dinamik pe travay dan en serten fason otaz.

Mon pran legzanp kot nou ansyen Chairman a en moman kot i ti’n ganny nominen koman Anbasader pou Brussels, kot nou ti vwar travay Komite ti tonm enpe.  E nou bann Manm nou ti dan en nespes limbo, nou pa ti konnen kan pou arive, nou ti bezwen esper a sak moman ki dan sa pti moman ki Mr Faure ti dan pei ki nou kapab press pou nou kapab ganny en meeting pour nou kapab sey revwar ki zistans nou ete pour nou kapab organiz nou.

E dan sa bann prosesis konmsa e petet mon kapab menm mansyonnen, i ti annan sa moman osi tou kot ti annan ensertitid lo eleksyon.  Nou’n pas dan 2 Eleksyon.  Eleksyon Prezidansyel lannen pase e Eleksyon Lasanble kot ankor nou’n les petet bann desizyon Gouvernman afekte enpe travay sa Komite ki mon krwar petet i pa ti’n devret leka.  E sa Mr Speaker, in  kit nou en pti pe an aryer e petet la i responsabilite nouvo Komite pou vreman demare akoz nou ti’n set nou serten goal ki nou ti’n devret fini menm komansman 2007 me nou pa’n kapab.  Me esperon avan lafen 2007 nou kapab achieve sa bann goal e i enportan pou mansyonnen ladan pour pas lo sa ki loter Mosyon in fer sorti, nou annan relansman l’APCOI ki nou’n fini dir avek tou bann Manm Losean Endyen ki Sesel ki pe pran sa pourvwar dan son lanmen pou kapab relans l’APCOI. E a plizyer repriz nou’n bezwen postpone sa meeting me mon hope ki avan lafen 2007 nou a kapab vreman fer sa meeting e relans sa Lasosyasyon.

En lot pti keksoz petet Onorab William in oubliye mansyonnen, avek Bidze ki IAC ti’n gannyen nou ti’n menm deside pour nou lans en website pour Lasanble.  E ankor sa i a vin en benefis pour sa Lasanble, pour tou Manm e mon hope dan sa nouvo lespri, travay and all that nou a kapab fer sa osi before the end of the year ki ankor manm piblik e petet lezot dimoun osi tou i kapab menm aletranze, i kapab antre en pti pe dan website e find out ki bann travay ki Lasanble pe fer e la ankor parey Onorab William in dir, a sak moman ki en delegasyon i fer en vizit aletranze, nou ganny en rapor e nou kapab update nou site osi tou.

Mr Speaker me mon ti a kontan dir osi tou ki petet nou site i pa pou zis en website lo vizit ki nou fer aletranze, me petet nou ti a kontan vwar ki, mon pa konnen si dan Sekretaryat nou ti a kapab ganny en dimoun ki ti a kapab fer en travay konstan lo sa site pou update, travay nou Lasanble li menm, kot bann pwen for i sorti.  Nou kapab met dan nou website e ankor, pou benefis nou popilasyon, akoz mon pa konnen so far ki kantite coverage nou pe gannyen atraver medya.  Me sa ankor i ava ed nou.

Ok, Mr Speaker mon pa pou al plis ki sa me ankor mon ti a kontan swete ki sa nouvo Komite i a pran son travay serye e tou Manm i ava pouse ki sa Komite ankor i a etablir en non pour limenm e pour nou Lasanble.  Mersi Mr Speaker.

 

MR SPEAKER

Onorab Andre.

HON CLIFFORD ANDRE

Bonzour tou Manm Onorab. Avan mon koz lo sa Mosyon ki devan nou ozordi, Mr Speaker, permet mwan pour remersye tou siporter SPPF pou konfyans ki zot in met dan lekip Jj. Egalman mon ti a kontan remersye Parti SPPF pou konfyans ki zot in met dan mwan personnelman pou form par sa lekip Jj dan sa Lasanble serye.  Sa i demontre konfyans ki SPPF i annan dan son bann zenn pour zot “Be what you want to be”, ler ou tenir e ou pa large.

Aprezan Mr Speaker, mon oule anmenn mon soutyen pour sa Mosyon akoz senserman mon krwar ki dan en Lasanble serye nou pa pou kapab fer san en Komite lo Zafer Enternasyonal.  Mon dir sa Mr Speaker akoz ozordi, Sesel menm son grander i pti, i pa pe ganny eparnye kont bann fleo mondyal.  Ozordi nou kapab akse lenformasyon lo kimannyer serten keksoz pe ganny fer dan lezot pei atraver enternet.

Sesel ozordi i annan reprezantan dan diferan pei.  Mon pa pou al dan tou sa bann pei ki nou ganny reprezante.   Avek en Komite Relasyon Enternasyonal, sa pou donn ranforsisman sa bann reprezantan dan sa bann pei kot nou ganny reprezante.  Mon ti a kontan

Mr Speaker prezan remersye tou bann Manm ki’n deservi sa Komite dan lepase e byento letan sa Mosyon i ganny pase, serten antre nou pou ganny apele pou travay lo sa Komite ki nou donn rezilta ki nou ganny demande pou travay lo la.

Permet mwan Mr Speaker pou swet tou sa ki pou ganny apele pou deservi lo sa Komite tou de bon dan bann challenge ki devan zot.

Pou al en pti pe lo konsern Onorab Prea, mon krwar ki sa Komite i merit osi vwar kimannyer i apwent en Vice Chairman pou kontinnyen travay dan labsans Chairman oubyen si Chairman i ganny apele pou fer serten travay ki andeor Lasanble.  Sesel ozordi, Mr Speaker, i form par en gran nonm Lorganizasyon Enternasyonal e i annan serten nonm lobligasyon enternasyonal ki rezilta sinyatir diferan Konvansyon Enternasyonal.

A ler aktyel ki mon’n fer mon resers, mon’n vwar ki Sesel in sinny 272 Konvansyon Enternasyonal.  En Komite lo Zafer Etranzer pou fer sir ki non selman ki Sesel i gard tou son bann komitman, me i pou osi kapab fer sir ki dan son bann rankont, i revwar serten fason ki nou kapab amelyor lo fason ki nou fer serten keksoz.  Alor Mr Speaker, i pou dan lentere Sesel e sa Lasanble pou donn son sipor pour Mosyon akoz i pou raforsi nou stati lo platform enternasyonal.

Sesel i dan lizye bokou envestiser ozordi, gras a bon travay Gouvernman Jj.  E se dan sa Jj spirit ki mon pou demann tou bann Manm Lasanble, enkli bann Onorab Lopozisyon pou vot anfaver sa Mosyon.  Mersi Mr Speaker.

 

MR SPEAKER

Onorab De Commarmond.

HON CHARLES DE COMMARMOND

Mr Speaker, Sir, thank you very much. Mr Speaker, avan ki mon komanse, mon osi profite osi pou remersye tou mon bann siporter Cascade ki’n vot pou mwan dan dernyen Eleksyon.  Zot in donn mwan sa rezilta ekselan pou re-reprezant zot dan nou Lasanble Nasyonal.  Mon promet zot ki mon pou sey fer mon mye pou carry on en bon travay ki mon’n toultan pe sey fer dann sa Lasanble, pou fer nou pep avans pli devan dan son demokrasi.

Mr Speaker, lo nou Mosyon ki devan nou, mon annan detrwa pti pwen pou avanse.

Premyerman, sa Komite, sa Mosyon kimannyer i ete la, ou a krwar ki i pe demande pou aprouv en senp Komite.  Mon pe get li diferaman.  Mon pe krwar mwan ki sa Komite mannyer lenportans  i ganny mete, i devret en permanent Standing Committee dan nou Lasanble, akoz son rol.  Mon’n ekout bann dimoun koze la.  Rol mon krwar i en rol enportan ki pour relasyon nou Lasanble avek pour lezot Lasanble dan lemonn, ki nou annan relasyon avek e osi kot i konsern bann diferan misyon ki nou Lasanble i al fer aletranze.  E dan sa sans, si nou dakor ki alor i vin en permanent Standing Committee ki mon krwar i devret ete.  Savedir ki dan lepase si ou kalkile nou ti annan diferan pti kalite isi laba dan nou Lasanble, osi ki petet pa neseserman ki tou ki’n fer en travay formidab.  Mon ti ava demande alor si nou donn sa Komite sa totalite stati ki anglob tou lezot travay, savedir lezot relasyon ki nou annan aletranze, lezot misyon, i a tonm anba lospis sa Komite.

Prezan sa Komite si i a vwar nesesite plitar fer serten sub committees pou adres serten issue spesifik, dizon la nou pe mazin lo, mon pa konnen mwan, lo relasyon avek CPA, relasyon avek sepa en lot Brans, oubyen menm lo issue bann madanm, menm lo issue gender, vedir menm lo issue lape, sekirite, you name it konmsi i ava annan, si i vwar neseser.  Si non, i ava pran sa responsabilite li menm otherwise olye ki nou vini a sak fwa elekte en Komite, i ava annan sa bann sou-Komite anba sa Komite permanan, ki a permet a mon avi lefe ki in ganny mansyonnen par Onorab Prea, Onorab mover Mosyon limenm Mr William ki pe dir ki i devret, sak moman ki en misyon Lasanble i al deor, zot devret annan en rapor ki zot donn sa Komite.  Savedir i montre ou lanpler travay sa Komite.

E anmenmtan, letan ou’n nonmen ki i devret annan en dimoun permanant ki pe travay aplentan petet avek Lasanble, spesifikman avek sa Komite, mon toutafe dakor e mon krwar ki i en bon pwen e ki zisteman i a permet sa kalite travay ki mon pe dir ganny fer diran nou Lasanble.

Mon pa konnen si ou sezi mwan byen Mr Speaker, Sir. Me mon krwar ki koumsa i a kapab petet donn en nouvo:- annou sey li koumsa.  Nou ava ganny en nouvo dimansyon, nou a vwar how serious sa Komite i a ete, en fason ki travay nou Lasanble i ava petet avans en pti pe lo en lot nivo.

Vwala sa bann parol ki mon’n dir la i zis montre ki mon pou siport sa Komite e mon ti a kontan ki sa ki mon’n dir i ganny pran an konsiderasyon letan Komite i ganny formen.

 

MR SPEAKER

Onorab Ferrari.

 

HON JEAN-FRANCOIS FERRARI

Mr Speaker mwan osi mon ti a kontan welcome sa formasyon sa Komite.  I paret ki Eleksyon pa ankor fini akoz mon’n vwar ki poudir bann Manm ki’n pran laparol i pe kontinnyen fer enpe kanpanny.  Kekfwa zot enpe dezapwente ki zot pa’n ganny ase vot, sirtou la dan sa dernyen Eleksyon. Alors..,  (Interruption)

 

MR SPEAKER

Onorab Ferrari, pa fors mwan pou komans pran marto boner.  Move on lo Komite.  Remersye dimoun Mont Fleuri me pa koz lo..  (Interruption)

 

HON JEAN-FRANCOIS FERRARI

Non, non.  Be  zisteman mon ti pe al dir avek bann Manm ki mwan, kontrerman ler mon’n al rod en vot, mon’n al pas devan laport dimoun e ler mon’n al remersye zot, mon’n al pas devan zot laport pou remersye zot.  So, mon krwar i en fason enpe konvenab konmsi pou fer sa travay.

Mr Speaker, Onorab William in eksplik travay sa Komite ki son formasyon i anba konsiderasyon ozordi dan Lasanble e in donn en long lalis bann domenn travay ki i konsidere ki sa Komite i devret pe fer e ki in fer dan lepase.  Mon krwar i en scope vreman enteresan, me mon ti a kontan soulev en pwen.

Mon krwar ki okenn Komite Lasanble Nasyonal i osi en Komite ki kapab annan en rol pou pran pozisyon lo serten size dan son domenn konpetans e osi non selman reste enformen parey Mr William in dir me enform Gouvernman lo santiman e lopinyon bann Manm Lasanble Nasyonal lo bann size ki i pe konsidere.

Sa ki mon oule dir se ki i pa devret senpleman en Komite ki reste enformen, me i devret en Komite ki osi pran li koman son responsabilite pou li enform Gouvernman lo bann pwennvi, lo bann size enpe sansib ki sa Komite i krwar ki Gouvernman ti ava bon pou Gouvernman ganny lopinyon Lasanble Nasyonal.

Mon dir sa akoz dan lepase in annan plizyer lokazyon kot mwan personnelman, mon pe koz osi kekfwa lo konsernan bann Manm isi dan Lopozisyon, nou’n santi ki Gouvernman o nivo enternasyonal, o nivo son relasyon, o nivo son repitasyon enternasyonal, Gouvernman parler i pran bann desizyon ki mwan mon ava apel bann desizyon mal enformen, bann desizyon ki riske, bann desizyon ki counter productive, e bann desizyon ki zisteman kapab e in deza dan lepase anmenn serten reaksyon oubyen lefe negativ lo repitasyon Sesel.

So mon krwar ki Gouvernman i devret sezi loportinite ki i annan en Komite tre aktif dan Lasanble ki pe konsider tou bann eleman ki annan pou fer avek nou relasyon eksteryer, nou bann relasyon enternasyonal, pou profite ki i annan sa Komite pou pran advice e pou pran lenformasyon sorti kot sa Komite, pour ki Gouvernman pa pran bann desizyon enpe mal enformen ki andomaz repitasyon Sesel.

Mon krwar sa i en pwen vreman enportan akoz si sa Komite i kapab act koman en early warning pou kapab dir la, kot i vwar poudir keksoz pe al mal, mon krwar i ti ava vreman en zouti enportan pou nou pei e en lasistans pou Gouvernman.

Donk mon ti a kontan ankouraz bann Manm ki pou travay lo sa Komite.  Mon konnen ki dan lepase bann Manm Lopozisyon lo sa Komite in vreman fer en travay ase formidab menm si zot an minorite.

Mon salye sa lespri bi-partizan ki kapab egziste lo en tel Komite koumsa.  Mon salye sa lespri akoz mon krwar ki se dan sa lespri ki nou kapab avanse.  Mon ti a swete vi ki mon annan laparol la pou dir sa menm lespri ki Onorab William pe propoz sa Mosyon e lezot Manm ki’n pran laparol lo sa Mosyon in fer resorti sa lespri bi-partizan.  I en lespri ki demontre ki i marse ler nou kapab travay ansanm menm lo bann size difisil.

Lo relasyon enternasyonnal, souvan i bann size ase pa telman kontroversyel, bann size kot nou kapab gannyen en agreement. Lo Standing Orders, mon mazinen i enpe andemik lo Public Accounts Committee. Mon mazinen nou devret osi kapab annan sa lespri ki sa Komite i kapab regard avek en bon pe lobzektivite.  Travay Gouvernman e fer bann propozisyon ki Gouvernman pa pran li koman on latak politik lo zot me koman en kontribisyon pozitiv.

So, mon swete ki sa travay i ganny fer dan sa lespri e mwan mon pou donn mon sipor pou kreasyon sa Komite.

 

MR SPEAKER

Bon okenn lezot entervenan?  Onorab Leader Lopozisyon.

HON WAVEL RAMKALAWAN

Mr Speaker, mon krwar ki definitivman sa Komite i enn ki enportan en kantite e dan lepase nou’n trouv son lenportans dan lafason ki zot in fer zot travay e mwan personnelman mon konnen ki poudir si in annan en Komite dan Lasanble ki’n vreman travay se sa Komite.  E sa Komite in menm kapab ganny son prop Bidze pou li fer serten depans e fer serten propozisyon.

Malgre ki pa tou sa bann kekoz ki zot in propoze in ganny realize, mon krwar ki sa Komite si mon ti ava kapab sey donn enn de konsey.  Mon krwar ki i bezwen pran son travay e anmenn li lo en nouvo nivo e nou lo nou kote, se pour sa rezon ki nou’n met sa menm 2 Manm ki ti la avan, Onorab Prea avek Onorab Lucas pour ki i annan en serten kontinite dan sa travay ki zot in komanse.

Me la aprezan, mon ti ava petet demann bann Manm pou al lo en lot nivo.  E ki mon oule esey dir par en lot nivo?  Annou pran par egzanp nou relasyon avek bann Lorganizasyon Parlmanter e nou tou nou konnen e ou Mr Speaker mon konnen ki ou’n ganny sans parey mwan menm asiste serten bann Konferans ki ganny organize par Commoneealth Parliamentary Association e nou konnen ki poudir CPA i enn bann Lorganizasyon Parlmanter pour bann pei ki dan Commonwealth ki enportan en kantite.  In fact, Lorganizasyon ki pli enportan.  E malerezman nou ti en Manm me apre sa nou pa’n kontinnyen pey nou membership. E letan nou ti en Manm, ti annan parmi nou ki ti ganny sans, e mwan mon ti enn sa bann dimoun ki ti ganny sa loportinite pou baze avek CPA Brans House of Commons, kot pandan en semenn nou’n la pou regard deliberasyon House of Commons partaz sa bann deba avek sa bann Manm Parlmanter sorti dan diferan pei.  E sa dan limenm i ed bann Manm pou zot ganny nouvo konesans.

E letan mon pe regard nou Lasanble, en nouvo Lasanble e nou kapab dir trwa kar bann Manm se bann nouvo Manm.  Nou krwar ki sa bann kalite exposure i kapab ede.

I annan Speaker’s Conference ki CPA i organize e ki ankor enn fwa, koman en nouvo Speaker, i pou ede parski nou konnen ki poudir  Onorab Francis MacGregor koman Speaker in gannyen serten exposure atraver sa bann Konferans ki ganny organize par CPA. E la mon ti ava demande ki sa Komite i pran li koman enn son devwar, enn son responsabilite pou regarde kimannyer Sesel nou Parlman i kapab zwenn ankor CPA, pey bann membership Fees. Mon pa konnen si bezwen al negosye.

Mon rapel en fwa nou ti Mozambique, Onorab Pool avek mwan menm e zisteman ti en Konferans organize par CPA e Onorab Pool i rapel byen kimannyer bannla ti pe plede, konmsi pe dir avek Sesel retourn ankor dan sa Lorganizasyon.  Nou ti ava kontan si zot dan sa Lorganizasyon parski i osi annan sa eleman bann small island states e kot nou ti ava kapab fer en kontribisyon.  Spesyalman ki Sesel ozordi son Parlman, parey nou konnen i en Parlman ki son poursantaz madanm ki dan Parlman i meet plizoumen sa demann SADC e alors nou kontribisyon lo sa nivo ti a kapab enportan.  Donk sey fer en demars pour nou kapab re-antre dan CPA e parey mon pe dir, i bezwen  annan negosyasyon.

E la mon kapab asire ki poudir lo nou kote osi tou dan Lopozisyon, nou ava kapab whatever way ki nou kapab ede, nou ava kapab anmenn nou kontribisyon pour ki nou kapab antre dan sa Lorganizasyon.

En dezyenm nivo ki mon ti ava kontan si nou Komite Zafer Etranzer ti ava kapab antre ladan se pour li regarde kimannyer nou kapab donn formasyon, kimannyer nou kapab pous Gouvernman pou donn formasyon nou bann zenn, afen ki zot kapab vin bann Anbasader, parski ozordi i malere pou vwar ki Sesel apre 30an Lendepandans, 31an Lendepandans byento, 30an parey zot apel li.  30an Liberasyon, la nou trouve ki Sesel tou dernyenman bann Anbasader ki nou’n apwente se bann etranze ki’n ganny nasyonalite Seselwa.  Nou’n ganny enn la ki’n al an Chine, lot in al Rome, e konmsi dan en serten sans, mwan spesyalman sa enn ki Rome, konmsi letan mon mazinen en pei Katolik, konmsi nou napa en Seselwa ki kapab reprezant li laba Rome koman son Anbasader.  Konmsi pour en Seselwa letan in ariv ler pou li al Vatikan pour li al fer demars vizavi Vatikan konmsi en Seselwa katolik pou kapab al laba pou koz avek Lepap, pou koz avek son Sekretaryat, ensidswit.

Donk, mon ti ava demande ki zot kapab osi pous Gouvernman pou al dan sa direksyon pou donn sa formasyon bann zenn Seselwa pour ki letan in ariv ler pou pran larelev i ava annan bann Seselwa kalifye dan ladiplomasi ki ava kapab pran sa responsabilite.  Dan en serten sans nou sanse pou  ganny Onorab Faure ki son formasyon ti dan bann zafer Foreign Affairs me zis enn i pa sifizan.  Oubyen petet si i annan bann zenn isi pou kapab, si i mank zot keksoz, donn zot sa keksoz ki manke pou zot ariv lo sa nivo.

Mon ti ava kontan osi lo en trwazyenm nivo Mr Speaker, demande ki letan nou aprouv bann Trete Enternasyonnal ki sa Foreign Affairs Committee zot regard bann demann ki sa bann Treaties i enpoze lo Sesel limenm.  Parske souvandfwa letan nou sinny en Trete Enternasyonal e letan Lasanble i pas li, i annan serten Lalwa lokal ki bezwen ganny sanze pou li vin anliny.

Par egzanp lot zour nou’n adopte Trete Enternasyonal lo Koripsyon, me sa Trete limenm li i demande ki i annan serten Lalwa ki pase dan sa Lasanble lokal pour li kapab donn lafors sa Trete Eternasyonal.  Dan le sans ki si ou pe aksepte son gro prensip, aprezan kimannyer lo nivo ou pei ou kapab fer sa travay vin reel.  Donk pou regard byen sa bann trete enternasyonal afen ki par konsekan isi lokalman nou kapab met nou bann lalwa anliny avek sa bann trete.

Petet letan mon pe nonm sa trwa pwen e la mon pe regard pwen ki Onorab De Commarmond in monsyonnen konsernan pou ouver plis sa travay. Malerezman lafason ki i pe rod ouver li i kapab annan en serten danze paske finalman Lasanble i ava annan li zis en Komite zafer enternasyonal avek bann sub-committees. Mon krwar ki i pa pou vreman apropriye e petet bann Manm zot ava annan tro bokou keksoz osi pour zot fer.

Me selman, ou konnen parey letan nou set up bann Komite i enportan pour nou donn zot en manda, i enportan pour nou donn zot bann terms of reference e mon krwar sa i enn bann keksoz e la Mr Speaker ou ava donn sa Lasanble sa direksyon pou regarde kimannyer nou pou etablir sa bann terms of reference pour sa Komite, parski, ok i annan propozisyon ki sa Komite i meet pou Lasanble antye, pour sa present session me anmenmtan osi nou kapab etabli  en Komite Foreign Affairs e dir avek li, ou ava travay pour trwa mwan e pandan sa trwa mwan nou ekspekte ganny tel rapor ensidswit.

Donk nou bezwen regard son Terms Of Reference pou nou regarde ki kalite lavi ki nou donn li sa Komite, ki bann latas ki nou donn li e kimannyer nou eksepte li pou osi raport avek nou.  Mon krwar ki sa osi tou i pou enportan.

En keksoz ki mon ti ava kontan osi e la mon pou apiye pou ki sa Komite, parey sa Komite avan i resevwar en Bidze e avek Onorab Speaker e Onorab Leader Of Government Business sa set enn bann size osi ki nou’n koz lo la.  Sa zafer Bidze pou Lasanble, sipoze pou bann diferan group, bann diferan Komite dan Lasanble.  E mon krwar ki sa osi tou i pou enportan me nou pou kapab selman regard Bidze ki sa Komite pou gannyen atraver responsabilite e latas ki nou donn zot.  E mon pa konnen at what stage ki nou pou fer sa.  Parey mon’n dir ou Mr Speaker ou ava regard sa.

En dernyen pwen ki mon ti ava kontan e petet mon pa konnen si mover sa Mosyon i ava kapab donn mwan en leklersisman, se pou li enform sa Lasanble si Anbasader ki Sesel in nonmen an Rome, Anbasader Triboldi ki nou isi nou Lasanble ti aprouv li, enform nou si in fini ganny akredite an Rome, parske i annan plis ki:- konbyen, depi lannen pase sa.  Depi Out ki in ganny apwente apre Eleksyon Zilyet e parski i annan serten dout la si in vreman ganny akredite e prezant son bann let, Lettre de Créance avek  Gouvernman.  (Interruption)

 

MR SPEAKER

Onorab mon krwar  sa ti a pli bon …(Technical Problem)

MR RAMKALAWAN

Mon kapab demann li parske li ki’n prezant sa Mosyon.  Mon pe demann li si i annan sa lenformasyon i ava donnen parski in bezwen fer resers lo bann zafer Foreign Affairs si i pe prezant en Mosyon parey.

E lefe ki dan dernyen Komite Foreign Affairs sete li ki ti Chairman sa Komite.

Donk si i annan sa lenformasyon, silvouple fer nou konnen, parski anmenmtan osi sa pou enpe bann keksoz ki nou pou ekspekte avek sa Komite parski pou annan serten keksoz ki olye pou fer travay Lasanble al enpe pli normal, olye tanzantan nek zis anmenn kestyon, si i annan en Komite lo Foreign Affairs ki kapab fer sa, I don’t see why lo toulede kote i ganny reprezante ki Members i kapab demann sa.

E petet dan sa menm konteks osi, si Onorab ti ava kapab enform nou lekel Zofisye Gouvernman Italian ki ti prezan letan sa Lanbasad ti ganny ouver an Rome?

Avek sa Mr Speaker, mon pou swet sa nouvo Komite letan i ave ganny formen.  Mon pou swet zot tou bonn sans e mon espere, parey ki Onorab Ferrari in dir ki i ava osi non selman en group ki fer travay ki i ganny demande, me ki i ava osi enform Gouvernman, espesyalman dan sa monn kot nou pe viv, kot i annan en kantite keksoz ki kapab kas kontour bann zafer fo paspor, bann zafer dimoun ki wanted, ou konnen tou sa bann zafer ki kapab vreman konplike e ki kapab met en move tas lo nou pei.  Alors sa nouvo Komite, mon pou dir ek zot bonn sans e mon pe look forward pou resevwar zot premye rapor.  Mersi bokou

 

MR SPEAKER

Onorab Potter.

HON MARIE-LOUISE POTTER

Mr Speaker, lo mon kote mon ti a senpleman kontan eksprim mon swe pou sa nouvo Komite.  Mon swe pou sa nouvo Komite se i vin sa Komite ki travay osi byen e menm pli byen ki Komite presedan e mon siport rekonnesans Lasanble lo travay merveye ki ansyen Komite in fer e sa in montre ki sa Komite in kantmenm akimil serten leksperyans e in kantmenm rikord serten sikse dan sa deryen 15an ki in egziste.

Mon lot swe pou sa komite, se ki sa Komite i kontinnyen ganny sipor finansyel e kot Lasanble Nasyonal pou permet li attend bann lobzektif e bann defi ki mover Mosyon in met a latansyon nou Lasanble.  Mon swe pou sa nouvo Komite se ki i vin en Komite ki vin pli accountable avek Lasanble lo travay ki i fer e lo sa nivo, mon ti a kontan propoze ki sa Komite i soumet en rapor trimestel alafen sak trimes oubyen o komansman sak trimes avek nou Lasanble, pou enform nou ki in fer pandan sa trimes, ki bann defi, ki bann konsern, oubyen ki bann lobstak ki annan devan zot e petet mon ti a menm propoze ki sa rapor e bann rekomandasyon ki ganny soumet ek Lasanble i par laswit ganny met a latansyon Gouvernman.

Mr Speaker, mon swe se ki sa nouvo Komite i pran son responsabilite e ki i vin en Komite ki realis dan son bann demann e dan son bann demars.  Realis lo size resours ki pei e ki nou Lasanble i kapab donn zot pou zot akonplir serten lobzektif e realis lo kestyon zot manda koman en Komite Relasyon Eksteryer.

Realis lo kestyon resours Mr Speaker i vedir ki sa Komite i bezwen fer sir ki avanler zot al pran okenn komitman pou organiz oubyen pou fer okenn keksoz ki pou annan en lenplikasyon finansyel e menm probableman parey nou konnen, bann komitman ki pou annan en lenplikasyon foreign exchange ki sa Komite i fer bann demann, bann demars neseser avanler zot al pran sa responsabilite.

Wi i nou swe ki nou ti a kontan reste, ki nou ti an reste dan CPA. I nou swe e nou ti a kontan ki nou retourn dan CPA o pli vit posib me nou bezwen osi realize ki nou annan en problenm deviz e nou pei i annan lezot priyorite an sa ki konsern alokasyon deviz.

Me nou a reste kantmenm optimist ki byento, prosennman avek Gouvernman i ava dan en pozisyon pou kapab avans Komite, sa lasosyasyon deviz ki i bezwen pou li kapab re-antre dan sa CPA dan en pros avenir.

Mr Speaker, i enportan ki mon dir sa akoz mon krwar persepsyon ki konmkwa Gouvernman parfwa i azir koman en baryer oubyen lobstak pou travay ki Komite i oule fer, i pa neseserman korek.  Sel lobstak ki petet Gouvernman i mete parfwa si i en lobstak dan travay serten Komite se pirman lobstak kot i konsern nou posibilite finansyel e nou resours finansyel.

Mr Speaker, mon swete ki sa Komite i reste dan confine son manda  Ki sa Komite i la pou propoze, pou etablir relasyon, pou enformen, pou rekomande me sa Komite pa kapab oule ranplas, zwe rol, zwe manda Minister Zafer Etranzer.  Sa Komite pa pou kapab menm si i a propoze, i a enformen, i a rekomande me i pa pou kapab dikte lo ki poziyon, ki desizyon Gouvernman i pran lo sa ki konsern nou relasyon enternasyonal.  Sa Komite pa kapab dikte lo lekel ki pou vin Anbasader, oubyen ki kalite Lagreman ki nou pou sinnyen.  Sa i reste manda Gouvernman dizour e i reste manda Gouvernman avek sipor mazorite Gouvernman ki dan sa Lasanble.

An konklizyon Mr Speaker, mon swet sa nouvo Komite bonn sans e bon travay dan demars ki annan devan zot.

 

MR SPEAKER

Onorab Lucas.

 

MR HARDY LUCAS

Mr Speaker, mon pwen in fini ganny fer resorti par Leader Lopozisyon.  Zis mon ti a kontan met lo rikord ki bann Lorganizasyon ki nou annan kontak avek se i annan l’APF, Lasosyasyon Parlmanter Franse.

 

MR SPEAKER

Ok, alright. Mersi.  Bon mon napa okenn lezot entervenan lo mon lalis, donk mon ava demann loter Mosyon pou reply.

 

MR WAVEN WILLIAM

Mr Speaker, premyerman mon ti a kontan remersye tou bann Manm ki’n aport kontribisyon an sipor pou kreasyon sa Komite.  I annan bokou largiman ki’n ganny avans devan.  Bokou sizesyon e letan mon pe ekout plizyer bann Manm ki’n koze lo sa bann size ki zot in avans devan, letan Komite ti an egzistans, serten sa bann diskisyon ti ganny pran par e mon kontan ki in ganny souleve ankor enn fwa e mon konstate ki sa Komite letan i ganny formen, i pou annan en gro latas devan li e mon asire ki sa bann sizesyon i ava ganny pran.  E mwan ankor enn fwa, mon ti a kontan ki letan sa Komite i ganny formen, ki zot ganny sipor ou Lofis, sirtou lo kote pou rezwenn CPA avek l’APF akoz mon santi ki sa i en demars ki devret kontinnyen e ki Lasanble i kapab rezwenn sa bann Lorganizasyon akoz i tre enportan e mon’n aprann osi ki Sesel byento pou pran laprezidans lo Commission de L’océan Indien e mon panse ki i ava en bon loportinite pou sa Komite letan i ganny formen pou pouse ki sa Lasosyasyon APCOI i ganny formen.

E lo kestyon ki Onorab Ramkalawan in demann mwan.  Mon krwar ki ou’n fini donn en ruling lo la.  Mon pa oule perdi plis letan.

Ankor enn fwa, mon ti a kontan remersye tou bann Manm ki’n koze e mon demande ki nou aprouv sa Mosyon.

 

MR SPEAKER

Bon mersi bokou.  In ler pou nou vote.  Tou bann ki anfaver Mosyon lev zot lanmen silvouple?  Okenn ki kont?  Bon, Mosyon in pase.

HON BERNARD GEORGES

Point of order.  Mon ti a kontan premyerman dir ou 2 mo an faver fason mon krwar ki ou pe sanz en pti pe avek fason fer ou predeseser lo sa ki konsern kriy bann Manm ki pou koze.  Par egzanp, olye zis montre zot ledrwa.  I en devlopman. E mon ti pe ekspekte ki kekfwa la ou ti pou al en pti pe pli lwen e fer sa ki.  (Interruption)

 

MR SPEAKER

Which Order?

HON BERNARD GEORGES

45.  E al en pti pe pli lwen e kekfwa fer sa ki nou Deputy Speaker Onorab Jolicoeur ti fer.  Ler i annan en Mosyon and actually put the Motion to the House an relir li avan ki nou vot lo la.  I ti ava:– Anfen i en detay me i en detay ki ti ava mon krwar en zoli break avek the past. En fason pou antre dan lefitir.  Si ou permet mwan tap on en pti pwen lo sa ki mon ti pou souleve koman en point of clarification in any event, me konm mon annan laparol, si ou a permet mwan.  Mon vwar ki dan sa 2 Mosyon:– anfen sa 2 lapwentman ki’n ganny fer presedaman, ou’n swete ki sa 2 Komite Lasanble i ava apwent sa ki ou apel en Chairman e mon demann mwan si kekfwa in …….. ki nou annan dan sa Lasanble en bon proporsyon madanm.  Nou Leader of the House li menm li i en madanm, ki si nou ti ava adopte koman en prosedir langaz ki gender neutral e olye dir Chairman nou ti ava dir Chairperson ou Chair parey dan bann lezot sirkonstans i ganny fer.

Mon met sa pwen devan ou Mr Speaker pou ou determinasyon.

 

MR SPEAKER

Bon, mon kwar sa dezyenm pwen mon ava les avek nouvo Standing Order Committee pou deal avek lafason nou adrese, gender neutrality parey ou’n koz lo la e lezot keksoz ankor. E mon krwar ou Manm Standing Order non? Yes.  Nou Standing Order i annan 15an now e sertennman i demann review e sertennman bann propozisyon ki ou pe mete mon mazinen pou ganny tre byen welcome.

So mon krwar bann travay nou pou les dan lanmen Komite Standing Order limenm olye ruling from the Speaker’s Chair.

Bon, nou ava move lo nou dezyenm Mosyon.  Nou dezyenm Mosyon i par Onorab David Payet.

 

HON MARIE-LOUISE POTTER

Mr Speaker, bann Manm sa Komite, nou pa ankor propoze.

MR SPEAKER

Oh, yes. Wi, avan nou ale.  Mersi bokou pou remind mwan.  Nou bezwen aprezan nomin bann Manm lo sa Komite.  Mon ava envit prezan Leader of Government Business Onorab pou li nomin son 5 dimoun.

 

HON MARIE-LOUISE POTTER

Mr Speaker, mon ti a kontan propoz Onorab William, Onorab Gamatis, Onorab Francois, Onorab Vel, Onorab Andre pou vin Manm sa nouvo Komite Zafer Etranzer.  Mersi.

 

HON WAVEL RAMKALAWAN

Anfen, lo nou kote parey mon’n mansyonnen i Onorab Prea e Onorab Lucas.

 

MR SPEAKER

Mersi bokou e felisitasyon pou tou bann ki’n ganny nominen.  Ankor enn fwa, mon mazinen ki nou swiv menm prosedir.  Madanm Clerk a call premye meeting e Komite ava elekte zot Chairperson e zot menm zot a deside si zot pou elekte en Deputy.

 

HON WAVEL RAMKALAWAN

Mr Speaker, if I may.  Terms of Reference of the Committee.

MR SPEAKER

I deza egziste Terms of Reference of the Committee

HON WAVEL RAMKALAWAN

Let them out, and confirm them.  What are the terms? Mon pa konnen.  Se pour sa rezon ki nou annan.

MR SPEAKER

Onorab, mon annan laparol.  Bon, nou a les Komite zwenn, elekte zot Chairperson e mon krwar i lespri sa Lasanble Nasyonal ki nou ganny rapor kot zot, sorti kot sa Komite every three months or every semester parey Madanm Potter in dir e la zot ava prezant ek nou zot Terms of Reference for the approval of the Assembly.

 

HON WAVEL RAMKALAWAN

Mr Speaker, si ou rapel letan nou ti form premye Komite Foreign Affairs, it was to investigate specifically serten deklarasyon ki ti ganny fer Brussels par Onorab Ferrari.  This is what gave birth to the Foreign Affairs Committee. E zot ti annan specific Terms of Reference e apre ki zot ti’n zwenn sete la ki apre Lasanble ti redonn zot en manda apre ki zot ti’n prezant zot rapor pou zot fer lezot keksoz.  So I think the Terms of Reference i enportan.

 

MR SPEAKER

So, mwan mon ruling se ki dan nouvo Komite i ava propose bann Terms of Reference to the Assembly as soon as is practicable e Lasanble ava aprouve e desid lo la.

Bon nou move on. Onorab David Payet.

HON DAVID PAYET

Mersi Mr Speaker. Bonzour tou Manm Onorab.  Mon ti a profit sa lokazyon pou remersi tou zabitan Glacis ki’n donn mwan sa sipor, bann ki’n vot pou mwan, bann ki’n met konfyans dan mwan e zot in konfye mwan direksyon nou distrik.  Ansanm, nou pou travay pou fer en diferans dan Glacis.

Mr Speaker mon premye Mosyon devan Lasanble ozordi i demande ki sa Lasanble i aprouve ki Gouvernman i fer le neseser pour ki i annan en Day Care Centre dan Glacis, pou permet bann paran ki travay kit zot zanfan pandan lazournen.

Mr Speaker, i enn mon langazman pou amelyor kalite servis ki nou donn nou popilasyon o nivo nou distrik a tou group laz.  Swivan vizit dan mon kominote, mon’n dekouver ki i annan en kantite manman ki fer konplent ek mwan lo difikilte ki zot gannyen pou met zot zanfan veye pandan lazournen e ki zot bezwen anmenn diferan landrwa e sa i kree bokou lenkonvenyans.

Zisteman, mon premye Mosyon i tous sa group ki pli vilnerab, prenon an kont nou zanfan, nou tezor nou lavenir.

Polisi Gouvernman se pran swen avek tou son sitwayen, depi konsepsyon ziska lanmor.  I polisi Gouvernman pou envestir dan zenn pou ganny konesans e kontribye dan devlopman lekonomi e sosyete.

Mr Speaker letablisman Day Care Centres i enn anlinny avek polisi Gouvernman pou ankouraz developman Day Care kot bann Manman i kapab kit zot zanfan pou en pri.

Day Care i permet nou bann zanfan devlop zot kapasite edikasyonnel a en tre zenn az.  Lenportans sa letap pre skoler pou komans ganny serten leksperyans lo en baz emosyonnel e devlopman sosyal ki ganny rekonnet enternasyonnalman.  Sa bann eleman i bezwen promouvwar ki swa dan lakour oubyen avek lasistans lezot lorganizasyon.  Day Care in ganny konsidere koman en lorganizasyon valab e neseser, pou promot sa bon devlopman.

En zenn ki’n servi byen sistenm ledikasyon e ki’n ganny en zanfan pa devret perdi sa sans kontribye dan devlopman pei atraver ouver en pti biznes oubyen travay.

Mon Mosyon pe tous paran e osi zot bann pti antreprener.

Mr Speaker, Glacis i en distrik ki sitie lo lakot Nor Mahe e i ganny eparnye par plizyer sou distrik avek en popilasyon 3676 zabitan, dapre dernyen resansman 2002.  In osi annan 225 nesans depi Zanvye 2003 ziska Desanm 2006.  En gran mazorite nou bann zabitan i form parti nou lafors travay e avek lakantite devlopman ki pe arive, nou bezwen vwar tou bann mwayen pou mobiliz nou lafors travay pour ki pei i zouir plis benefis an sa ki konsern resours imen.

Mr Speaker, avek sa bann diferan devlopman i annan en logmantasyon pou plis loportinite pou lanplwa e kot nou bezwen ankouraz nou bann dimoun pou partisip pou enplik nou bann madanm.  Souvandfwa, bokou sa bann dimoun in fer fas avek difikilte pou kapab ariv travay aler.  I annan menm dimoun ki ezite pou al rod en lanplwa akoz zot pa kapab trouv en landrwa apropriye pou zot kit zot zanfan.

Mr Speaker, parey mon’n dir, sa size Day Care in touzour en pwen diskisyon pandan sa bann dernyen lannen.  Dan plizyer deba e meeting o nivo nou kominote zefor in ganny fer par endividi pou met sa kalite fasilite an plas, me pou plizyer rezon sa proze in bezwen diskontini.

Sa lannen, Lakres Glacis ti anrezistre 28 zanfan a laz 4an e lannen pase i ti anrezistre 40.  Sa i demontre ki i annan ankor en kantite zanfan ki bezwen latansyon okour lazournen, prenan kont lakantite nesans depi Zanvye 2003 ziska Desanm 2006.  Nou bezwen en tel fasilite Day Care dan Glacis e dan North East Point.

Dan rezyon Nor Mahe, i annan zis en Day Care Centre Beau-Vallon e i pa konvenab pou nou paran servi sa fasilite.  Dan mon resers ki mon’n fer, i annan 24 Day Care Centres ki’n anrezistre lo Mahe, Praslin, La Digue e Silhouette.

Mr Speaker, si ou permet mwan, mon ti a kapab donn zot sa lalis.  Sa lalis i enportan ki nou bann dimoun i konnen, bann Onorab.  Nou annan ABC Nursery Union Vale, Anse Royale Day Care Centre, Bambi’s Baby Sitting St Joseph Street, Beau Vallon, Beezy Bees Les Cannelles, ButterFly St Elizabeth Convent, Cascade, Chilren’s World Olivier Maradan Street, First Step Baie St Anne Praslin, Home Day Care Louis De Fere Marus, Kids Paradise La Digue, La Rosière, La Digue, Little Bears Anse Royale, Little Mermaid Takamaka, Mont Fleuri, My Early Years Anse Boileau, Sea Angels Baie Lazare, Sea View Port Glaud, Silhouette lo zil Silhouette, Sheilla’s Bel Air, St Joseph Pre-School St Joseph Street, Squigglies Les Rocher, Sun Flower Plaisance e the Children’s House Bel Air.

Mr Speaker, ler ou regard pri ki sa bann Day Care i sarze, i varye.  En group i sarz 800 a R900, en lot group i sarz 600 a R700 e en lot group i sarz R500.

Mr Speaker, sa i tro ser, akoz pri fodre i abordab pou bann dimoun ki pe ganny R2025 par mwan.  Alor Mr Speaker, mon pe demann Gouvernman pou revwar son bann pri ki i lwe son Day Care Centre pour ki pri Day Care i kapab vin 300 a R400 par mwan.

Avek en tel proze, nou pou permet bann dimoun pou pran en par pli aktiv dan devlopman lekonomi pei atraver lanplwa e osi lavi zot kominote.  Sa proze pou osi donn loportinite en pti antreprener en Sekter ki nou distrik i atas bokou lanportans avek.

Mr Speaker, Gouvernman son rol fasilitater lo en plan sosyal i ava kontribye pou rann lavi bann zabitan enpe pli fasil.  Mon demande ki lotorite konsernen dan Gouvernman i komans en legzersi pou kapab idantifye 2 teren apropriye pour sa proze.  Enn Glacis e enn North East Point.

Mr Speaker, an vi ki sa gran demann, mon osi profit sa lokazyon pou lans lapel avek Sekter Prive ki enterse pou antre an kontak avek Lotorite Distrik pour ki nou a kapab vwar ansanm kimannyer nou pou realiz sa proze an partenarya.  Sekter prive i osi kapab envestir dan en tel fasilite e met a dispozisyon bann zenn ki ava anvi antre dan sa biznes.

Mr Speaker, bann ki enterese, zot ganny demande pou vin devan e ansanm nou a rod en teren ek Gouvernman pou enplimant en tel aktivite.  Nou kapab e nou devret devlop an partenarya direk ant Gouvernman ek Sekter Prive dan sa domenn.

Mr Speaker, mon krwar ki Sekter Prive ek Gouvernman i kapab fer en diferans dan nou distrik.  Mon pe osi fer lapel avek bann zenn ek bann fanmiy ki annan bann fasilite apropriye e konvenab kot zot lakour pou osi vin devan kot lotorite e konplet bann formalite pou ofer en servis Child Minding anba Cottage Industry. Mon osi propoze ki Gouvernman i kontinnyen avek son progranm lantrennman pou bann Operator Day Care, pou kapab asire ki i annan en pli bon standar lapropte, lizyenn, sekirite pou nou zanfan e osi fer sir ki lenspeksyon i ganny fer regilyerman.

Mwan koman en Dokter par profesyon, mon pou demande ki Gouvernman i fer sir ki lizyenn ek lapropte i ganny respekte e manze ki ganny servi i annan en valer nitrisyonnel.  Sa i ava ede pou redwir propaz serten maladi, par egzanp bann maladi ki ganny propaze dan ler, bann maladi viral, bann maladi kontazyez e ki nou zanfan i grandi an bonn sante.  Sa i pou neseser, pou fer sir ki nou zanfan apard dan lakour zot grandir dan en bon lanvironnman e kot zot a kapab komans devlop zot sa bon konportman pou byennet lasosyete.

Bann ler ki Day Care i operate i devret posib ki paran i anmenn e vin sers zot zanfan akoz i annan ki landrwa travay paran i lwen avek bann Day Care Centres.

Mr Speaker, resers i devret ganny fer pou posibilite ki Day Care i reste ouver ziska pli tar, pou bann paran ki travay afternoon shift and evening shift. Legzanp se travayer IOT, Lopital, e Lotel eksetera.

Mon demann tou mon bann koleg pou siport sa Mosyon.

 

MR SPEAKER

Okenn dimoun ki segonn Mosyon.  Oken Manm.  Onorab Waven William.

 

HON WAVEN WILLIAM.

Mr Speaker, mon segonn sa Mosyon e mon ava dir 2 pti mo an sipor.

Mr Speaker, pou rezon ki Onorab Payet in donnen, wi.  Mon a dir ki sa demann i fer sans lo Mosyon ki pe lir ki Gouvernman i fer le neseser pour ki i annan Day Care Centre dan distrik Glacis, pou permet bann paran ki travay kit zot zanfan pandan lazournen.

Mr Speaker, sa Mosyon i valab e mon krwar kot i posib, kot i neseser ki Gouvernman i devret fasilit sa bann proze.  E la mon ti ava profit lokazyon pou demann Minister Ledikasyon pou komans sa enn Grand Anse, parey i ti’n ganny dir e osi gard lotorite enformen, koumsa ki letan sa proze i komanse, i ava en keksoz ki bon e i ava baze lo demann e lekspektasyon zabitan distrik Grand Anse Mahe.

Mersi bokou.  Mon pou donn mon sipor sa Mosyon.

 

MR SPEAKER

Onorab Prea i reste 15 minit.  Eski ou lentervansyon pou mwens ki 15 minit?

 

HON NICHOLAS PREA

Wi, wi, Mr Speaker.  Kourt.

Mr Speaker, anmenmtan ki nou rekonnet problenm ki paran pe fer fas avek ozordi vizavi kote zot pou kit zot zanfan and all that, akoz ozordi nou pe viv dan en monn kot bokou, bokou lakour, bokou fwaye, nou pe vwar ki manman ek papa i bezwen al rod lavi e annan sa pti trezor parler i en problenm kote nou pou kit li, kote nou pou depoz li, e rod sa landrwa ki konvenyan e ki safe.  Me i osi annan sa lot laspe osi kot i annan single parents, ok. Ozordi nou pa vwar zis manman ki single parent me nou vwar osi tou bokou papa ki’n ganny custody zanfan ki either way zot pe travay, zot pe rod lavi pou kapab sonny sa zanfan e zot osi zot bezwen en landrwa konvenab pou kit sa zanfan.

Mr Speaker, anmenmtan ki mon krwar lespri sa Mosyon i fantastik, i bon e lefet ki loter Mosyon, Onorab Payet in fer sorti ki, in donn nou en lalis bann distrik ki annan en Day Care Centre e bann landrwa ki napa, petet la e ki Onorab William in osi fer sorti ki Grand Anse pa ankor ganny enn, mwan osi mon ti a kontan ki Belombre i ganny enn.  Petet mon zis propoz en pti lamannman ki petet Onorab mover Mosyon i a kapab konsidere ki sa Lasanble i approve. Ki Mosyon i lir koumsa:- Ki sa Lasanble i aprouve ki Gouvernman i fer le neseser pour ki i annan Day Care Centres dan distrik Glacis e lezot distrik ki poulemoman ki napa.  I mean, nou a gard son wording. Pou permet bann paran ki travay kit zot zanfan pandan lazournen.  Petet la i ava kouver Grand Anse Mahe e osi bezwen pou Bel Ombre.

Mr Speaker, parey mon’n dir nou bezwen fasilit bann paran e fasilit bann dimoun ki kontribye dan devlopman nou pei e ler nou konnen ki nou zanfan i dan en landrwa ki sen e sof nou lespri i anpe e nou kapab travay pou ede dan prodiksyon nou pei.

Mr Speaker, me anmenmtan osi tou, mon kontan ki mover Mosyon in fer lapel ki Sekter Prive, ki bann dimoun endividyel, ki Gouvernman pa zis, pa vini fer tou i donn ou.  Me si i annan endividi, si i annan Sekter Prive ki pare pou vin devan ek en serten plan and all that me ankor la nou bezwen regard standar e petet la ataver sa Mosyon, nou demande ki en serten standar Nasyonal i ganny set, ok.  Akoz ankor nou vwar bokou landrwa konmela ki pe vey zanfan ki vreman napa en standar e lizyenn i zwe en gran rol ladan, kot sa zanfan li ki tipti, ki son lekor pe devlope, son iminite kont bann maladi pe devlop prezan ki i pe pran rezistans, i vreman siseptib pou li kapab anmas en viris or whatever ki petet i kapab okazyonnen dan sa landrwa.  Alor, mon demande ki bann lotorite konsernen ki avan en licence i ganny donnen, i zwenn ansanm, kot sa landrwa i ganny fer byen.  Tou bann kondisyon i ganny aplike.  Pa en serten kondisyon i mars pou li, en lot, lot kondisyon, me nou annan nou en standar Nasyonal avan ki finalman sa dimoun i ganny en licence pou li run, operate en Day Care Centre.

Mr Speaker, mon pou osi monsyonnen ki ti annan en demars Bel Ombre an 2005 kot en retired Teacher e la mon pe dir en dimoun ki’n annan en bagaz leksperyans, years of experience, kot in sey son mye.  La nou pe koz Sekter Prive, pou li kapab etablir en tel fasilite akoz ti annan bezwen dan distrik Bel Ombre.  Me in depanse apre ki plizyer Minister in demann li diferan keksoz. Kote kot Planning in demann li pou fer serten safeguard otour son lakour, ki in build en miray ki aparaman in kout li par lao R100 mil, Land Transport in demann li pou fer serten driving and turning ankor in kout li apepre en pti R30 mil a R40 mil.  Lasante mon krwar ti napa okenn lobzeksyon ler zot ti vizit landrwa, me i zis ki finalman apre tou sa bann depans, ziska ozordi pou serten rezon, mon pa pou al dan keksoz politik, me mon apel sa birokrasi ki ankor egziste dan nou pei, ki sa madanm pa’n gannyen licence.

Mon ti anmenn kestyon dan Lasanble isi pou Minis Ledikasyon an 2005 me mon ti sirprann ki Minis ti dir mwan i pa okouran en tel keksoz kan sa madanm ti’n deza fer plizyer appeal avek Minis Ledikasyon, Minis Faure sa letan e mwan apre ki i ti demann mwan pou met li okouran sa size, mon ti delivre en let par lanmen kot son Minister me to date, nou pa’n ganny okenn lenformasyon.

Mon pe zis sit sa legzanp akoz loter Mosyon ankor i demande ankor ki annou angaz Sekter Prive ladan, annou angaz sa lezot dimoun ki pare pou fer. Gouvernman i a vin la koman en fasilitater.  Gouvernman parler i pa bezwen al depanse, al fer en batiman me si i annan dimoun dan distrik kot in ganny li i en landrwa konvenab and all that, Gouverman act koman sa moter par deryer, plus les sa dimoun debrouye.  Met kondisyon, met standar e les sa dimoun debrouye.

E sa, sa rezon ki mon pe fer sa sorti e petet ankor la apre ki mon panse ki sa Mosyon pou ganny aprouve ki, anyway mwan mon ava pas kot sa madanm Bel Ombre mon pa konnen si i ankor enterese avek akoz mon’n vwar li in al en pti pe dan en lot lalinny pou dir sey ankor, sey ankor son laplikasyon and parey mon’n dir dan sa ka la, sa landrwa in fini pare.  Gouvernman pa pou bezwen fer gran zafer me zis lotorite i ava antre re vizit li e son licence i ava kapab ganny aprouve.

Mr Speaker avek sa enn de mo mon pou siport sa Mosyon e lide deryer sa Mosyon.  Me parey mon pe dir si zis petet loter Mosyon si i a konsider azout en pti bout zis ki i a enkorpor lezot distrik osi ki napa en tel fasilite.

MR SPEAKER

Non be sa i vin en formal lamannman.  Pou lenformasyon House, i annan en lamannman devan nou pou azout:- ‘E lezot distrik kot napa’.  Okenn ki segonn sa lamannman ?  Onorab De commarmond.

 

HON CHARLES DE COMMARMOND.

Mon segonn sa lamannman.

 

MR SPEAKER

Ki nou azout:- ‘Lezot distrik kot napa’.

HON CHARLES DE COMMARMOND.

Wi

 

MR SPEAKER

Ki fer ki Mosyon i ava lir koumsa: ‘Ki sa Lasanble i aprouve ki Gouvernman i fer le neseser pour ki i annan Day Care Centres dan distrik Glacis e lezot distrik kot napa pou permet bann paran..

 

HON CHARLES DE COMMARMOND

Vwala, si mover pa..,

 

MR SPEAKER

Non be Mosyon in nepli propriye mover, Mosyon i propriyete the House. Bon lekel bann ki anfaver sa amannman?  Si tou dimoun i anfaver donk Mosyon in amande pou en anmandman ase senp i pa enn ki konplike.  Mon ava pas laparol avek Onorab..,

 

MR DE COMMARMOND

Mr Speaker mon oule dir en mo mwan, mon’n segonn sa amannman.  Mon oule vin vreman bref.

MR SPEAKER

Non, non hold on Onorab De Commarmond, Onorab nou annan en list. Amannman nou’n fini vot lo la right? E motion as amended Onorab Marc Volcere si ou pou koz mwens ki 10 minit.

 

HON MARC VOLCERE

Mr Speaker, avan mon koz lo Mosyon Onorab Payet, mon ti a kontan remersye zabitan Grand Anse Praslin ki’n donn mwan sa sipor.  In met zot konfyans dan mwan, koman sa dimoun ki pou reprezant zot dan Lasanble.  Mon krwar i enportan pou konn dir mersi dimoun e mon sezi sa lokazyon ozordi pou mwan dir zot mon senser remersiman.

Mr Speaker, Mosyon devan nou pe demande ki Gouvernman.  Well, Mosyon in amande pou konsidere met Day Care dan bann distrik kot napa.

Mr Speaker, parey Mosyon i dir, distrik Grand Anse Praslin osi i mank nou en Day Care e mon pe demande ki Gouvernman i pran kont nou bezwen.  Dan lepase, oubyen tradisyonnelman, zis papa ki ti travay, e manman ti bezwen reste kot lakour pou okip zanfan.  Me sa nou tou nou konnen ki ozordi in sanze.

Konmela Mr Speaker, mazorite si pa tou bann madanm Sesel i vwar zot dan en lanplwa oubyen pe fer serten aktivite ekonomik pou ede amelyor Bidze lafanmiy.  Sa i fer ki souvandfwa, zot vwar zot dan difikilte pou vwar sa landrwa apropriye pou kit zot zanfan letan ki zot al travay.  Problenm ki lezot distrik pe fer fas avek Grand Anse osi i pa en leksepsyon.

Mr Speaker, dan Praslin aktyelman i annan zis en Day Care e sa i baze Baie St Anne.  Alors, ou kapab mazinen ki konplikasyon bann paran Grand Anse i fer fas avek pou zot monte desann Baie St Anne bomaten ek aswar, pou kapab anmenn zot zanfan e anmas zot zanfan, sirtou bann paran ki travay dan distrik Grand Anse menm.

Anlinny avek sa, mon ti a kontan demann Gouvernman pou fer li posib ki Grand Anse Praslin osi i ganny en Day Care e ki a fer, i a tir sa presyon lo bann paran, sirtou bann ki bezwen dan sa long traze.

Mr Speaker mon pou siport Mosyon Onorab Mr Payet e mon pou donn tou mon sipor.  Mersi.

 

MR SPEAKER

Ok.  Onorab De Commarmond, ou’n dir mwan 2 minit akoz nou pe adjoun dan 5 minit.

 

HON CHARLES DE COMMARMOND

Wi Mr Speaker, nou a ganny letan pou mover fer son konklizyon tou.

Mr Speaker, lo sa Mosyon ki devan nou, ki pe demann pou fer Day Care Centre dan bann distrik kot napa.  Mwan mon pe al en pti pe anmenmtan pli lwen ki sa.  Brefman, ki mon pe sey dir mwan se ki Gouvernman mon pa krwar i devret at this stage al dan biznes dan Day Care Centre.

Apre zis letan pou’n ariv en keksoz la pour nou kritik li.  Zour pe tarde pou vin maintain e maintenance pou bokou, ensidswit.

So, mwan mon dir annou larg sa ek bann dimoun dan distrik, bann pti enterprener zisteman parey fek ganny dir.  Gouvernman, mon pe ensiste Mr Speaker, dernyen Lasanble letan mon ti la, mon’n koz en kantite lo la.  Mon refer mon tapaz si ou oule dir,  Refer Gouvernman ekout ankor pou dir pa bezwen.  Pa bezwen anpay nou dimoun.  Mon servi sa mo.  Konmsi vin koman en fasilitater.  Ed nou dimoun laba dan distrik vwar pti bout later ki la, donn li en koudmen par egzanp bann Loan. Revwar sa sistenm Loan ki pe ed bann dimoun.  Loan ek lentere sepa konbyen.  Prezan tou sa bann konmsi i pran en bann letan, alafen dizour parey Onorab Prea taler fek dir, dimoun i dekouraze pou envestir pou al devan dan sa pei.

Ok, mon krwar mwan e problenm i pa Prezidan li.  Prezidan i ok li.  Bann dimoun laba anba ki i mete, bezwen revwar.  Mwan mon dir fodre revwar e sa bann dimoun i bezwen, par egzanp Planning. Senp pti keksoz zot drag. La Onorab Prea fek dir nou, Land Transport i vini i dir pou li.  Konmsi annou arete sa bann zafer.  Annou fer en fason ed nou dimoun pou kapab realiz tou sa.  E Gouvernman i devret in the forefront la pou li kapab.  La son rol la ki i devret zwe pou fer sa bouze.  Pou fer Glacis laba kot Mr Payet laba ki’n fek ganny elekte, fer en fason ki Day Care Centre, si fodre 2 napa problenm.  I bon menm e sa Mr Speaker, i pou ede pou nou ganny pou kree lanplwa.

Letan Day Care Centre in ganny fer dan distrik, i donn enn de nou bann dimoun la, sirtou bann single mothers, enn de travay i a kapab ede e anmenmtan, i bon pou nou bann dimoun ki dan distrik, zot piti ava la dan bon lanmen, ensidswit.

Sa bann kestyon birokrasi ensidswit, sa ki nou bezwen tire.  E i annan dimoun dan Gouvernman i fer ekspre sa fer ekspre..,

(Interruption)

 

HON CHARLES DE COMMARMOND

Wi sirtou zot.  Sa bann green bangles Mr Speaker. Green bangles, zot fer ekspre pou ki..,

 

MR SPEAKER

Bon, annou retourn lo Mosyon.

 

HON CHARLES DE COMMARMOND

So, lo Mosyon parey mon pe dir.  Mon pe dir ki vwala, se dan sa direksyon ki mon krwar nou bezwen avans devan e nou Lasanble mon demande ki nou swiv sa bann keksoz.  Nou swiv e nou vin dir la pour ki nou fer fason nou, ki nou bann dimoun i kapab debrouye dan distrik lo sa bann nivo pour ki sa bann pti proze parey.  Pa gran, gran zafer sa, me selman Gouvernman i devret la pe siporte, pe rod en fason pou fer sa avanse, pou fer ki dimoun dan nou distrik i vin pli konfortab e pli kapab kontribye dan en lespri stab dan lekonomi nou pei letan ki i konnen poudir son piti laba deryer dan Day Care i byen.  So, i kapab vin pli pozitiv.

Mersi bokou Mr Speaker.  Mon pou siport sa Mosyon.

 

MR SPEAKER

Bon 10.30 nou ava adjourn pou break e nou a rezwenn 11er bomaten.  Mersi.

(BREAK)

MR SPEAKER

Nou a repran nou travay.  Mon oule enform bann Manm ki i ankor annan 5 entervenan lo mon lalis e fodre pa ki nou al dan bokou repetisyon.  Mon espere ki zot a vin avek nouvo largiman.  Mon mazinen ki en Mosyon parey, son scope i ase limite.

Mon envit Onorab Vel pou fer son lentervansyon.

 

HON JENIFFER VEL

Mr Speaker, mon pou komanse premyerman par remersi bann zabitan Pointe Larue ki’n met zot konfyans dan mwan e ki’n elekte mwan koman zot Manm Lasanble Nasyonal.  Mon osi sezi lokazyon pou mwan felisit tou Manm dan sa Lasanble pour zot eleksyon.

Mr Speaker, Mosyon Onorab Payet i al odela zis met en servis Day Care Centre dan bann distrik, pour konvenyans bann paran.  Ozordi dan Sesel, ler in arive pou nou move dan en nouvo direksyon.  Konfyans ki pep Seselwa in met dan nou bann Manm Lasanble Nasyonal, pe egzize ki nou pa zis kontante avek lasante pou narnyen, ledikasyon pou narnyen eksetera, me ki nou vin osi pli konsyan lo bann servis debaz ki pou ed bann paran, ki pou tenir nou zanfan. Nou bezwen en sosyete ki osi konsantre lo lazwa e lakontman son pep. Nou osi bezwen konsantre lo plis  servis ki nou ofer nou pep e anmenmtan ki Victoria  i sanz son figir pou vin sa Lavil modern e konpetitiv.  Nou bann distrik osi i devret pe gear up avek nouvo devlopman, nouvo fasilite e nouvo fason fer.

Si ozordi nou pe koz lo servis desantralizasyon tou sa ki nou fer, alors nou bezwen pran kont sa zabitan Pointe Larue ki reste Matata  e nou bezwen fer sir ki li osi i annan son plas lezitim dan sa kouran devlopman ki pe pas dan nou pei.

Ozordi, bann nouvo fason fer lemonn, sirtou bann pei ki pe devlope pe koz lo sa ki nou apel happiness index. Dan larezyon, Maurice nouvo konsern se stress e isi Sesel, dan serk, bokou de nou pe rod sa ki angle i apel self-actualisation, tou senpleman sa ki SPPF i apel ‘Be what you want to be.’

Tousala Mr Speaker i annan en lyen tre pros avek sa Mosyon ki devan nou ozordi.  Dimoun dan zot prop fason pe rode kimannyer pou amelyor zot kalite lavi.  Seselwa pe rode kimannyer pou devlop plis zot karyer, kimannyer pou pas plis letan avek lafanmiy, kimannyer pou nou fer sir ki ant sa dezir pou tenir en louvraz e tenir en fanmiy.  Sak paran i santi ki zot pe viv dan en sosyete ki konsyan, zot nouvo bezwen e nouvo laspirasyon.

Ozordi, Seselwa pe koz tou senpleman anvi plis, e sa ki pli bon e sa i nou realite politik, ekonomik e sosyal.  En servis Day Care dan en distrik i vedir bokou keksoz.  I vedir ki Sesel, tre pti ki i ete li osi i bezwen  desantraliz son bann servis e fer sir ki sak zabitan i vwar a son dispozisyon fasilite ki rann son lavi pli ere, pli konfortab e pli konvenyan.  En servis Day Care dan Pointe Larue, sa pou ed sa paran pli byen organiz son lavi dan en fason ki i ganny sans devlop son karyer ler i konnen dan son prop distrik i annan en fasilite ki permet li gard son zanfan pandan ki i al debrouye.  Fasilite met en servis Day care dan en distrik i a ed sa paran fer en pli bon swa e planifye son karyer e devlopman sosyal dan en fason enpe pli ekilibre.  En servis Day Care dan en distrik pou ede devlop sa distrik, ede ogmant sa happiness index ki nou tou nou a la resers.  Se selman en sosyete ki lo nivo devlope, ki kapab ofer son zabitan bann tel fasilite.

Me Mr Speaker.  Sa Mosyon ozordi i osi tre pros avek mon distrik.  Dan Pointe Larue, i osi annan bokou paran, sirtou manman tousel ki, avek en servis Day Care, pou kapab efektivman gard zot zanfan dan en landrwa ki sen e sof e konvenyan, pandan ki li sa manman tousel i kapab al debrouye pandan lazournen.

Dan Pointe Larue, nou osi annan konsern kot i annan sa zenn paran ki vwar zot avek en zanfan avan ler.  Parey Onorab Prea in fer resorti, nou osi annan sitiasyon kot swa manman ouswa papa i vwar zot tousel avek en zanfan e etan ki en servis Day care i ase elwannye avek distrik, sa i fer ki i ase difisil pou zot trouv en landrwa pou gard zot zanfan pandan ki zot al travay.

Pandan mon eleksyon, mon ti koz bokou lo sor bann paran tousel e osi bann zenn fiy ki trouv zot ansent avanler.  En servis Day Care dan Pointe Larue i premye pa dan sa direksyo., en servis day care dan Pointe Larue pour osi sertennman  dan lavantaz bann paran sirtou bann ki napa zot prop mwayen transport e ki bezwen voyaz parfwa long zistans dan bis pou anmenn zot zanfan dan en Day Care Centre.

Nou osi bezwen get pli lwen ki sa.  Bann Seselwa i devret ganny ankouraze pou vin bann antreprener, zis parey dan ka Cottage Industry, parey bann lezot entervenan in fer resorti.  Dan sa ka, i a petet kot bann dimoun i fer Child Minding e zot ava ganny ankouraze pou vey zot zanfan zot menm e i ava osi permet fleksibilite kot olye i annan zis en Day Care Centre, i ava annan dan en distrik ant 5 a 6 lakaz ki petet fer Child Minding e sa bann dimoun zot ava annan en quota lo lakantite zanfan ki zot kapab veye.  An partenarya avek lezot Lazans, i ava garanti ki tou keksoz i an konformite.

Minister Lasante, pli spesifikman Sanniter i ava rann sa bann landrwa bann  vizit regilye.  Sa i ava en garanti pou bann paran ki zot zanfan i dan bon lanmen e an sekirite avek sa Child Minde ki pou en dimoun ki zot deza konnen.  Osi, bann paran ki santi zot pli alez avek sa bann dimoun dan zot kominote.

Mr Speaker, sa Mosyon i fer tou sans e i dan lentere bokou bann paran.

Mon donn sipor sa Mosyon e mon osi espere ki demars pou en tel servis i ganny akselere pour ki nou osi dan Pointe Larue nou ava vwar devan nou laport en tel servis, konfor, konvenyans e osi plis fasilite pou zabitan Pointe Larue, akoz i mon louvraz.

Parey mon promet mon zabitan Pointe Larue avan tou, i alor fer tou sans pou mwan siport okenn Mosyon ki pou dan lavantaz pei e osi mon zabitan.  Mersi.

 

HON REGINA ALCINDOR

Mr Speaker demann pou en Day Care Centre pou distrik Glacis e lezot distrik pa en nouvo size pou sa Lasanble akoz a plizyer repriz, kan bann Manm ti ganny lokazyon zot ti poz Minis kestyon lo sa size pour diferan distrik.

Dan mon Diskour lo Leta Lanasyon an 2004, sa size ti osi ganny adrese.  Menm lo nivo DCC pou distrik Glacis, mon ti met sa konsern devan e sa ti en size ki ti ganny diskite dan plizyer meeting. Parey Onorab in rekonnet limenm e diferan propozisyon ti ganny met devan sak fwa ki Komite ti zwenn.

Dernyen propozisyon pou Glacis sete pou fer en Day Care dan nouvo Community Centre, ki ti dan plan konstriksyon kot son premye pyer ti’n depoze, me konstriksyon pankor komanse e sa i reste en propozisyon, ziska ki Komite DCC ti aret zwenn boner an 2006.

Mr Speaker, parey ou menm ou konnen, kantite fwa keksoz i ganny demande dan sa Lasanble.  Size enportan i ganny adrese me kan sa demann i sorti dan labous Lopozisyon, se zorey SPPF ki pa oule tande.  Kekfwa la ki ozordi demann pe sorti dan labous enn zot Manm, esperon ki i tonm direk dan zorey Minis pou en aksyon vitman.  Lo mon kote, mon napa okenn problenm pou siport en demann ki pou benefisye lepep Seselwa akoz apre tou Mr Speaker, kan mon ti pe rod Day Care, mon pa ti pe rod li pour mwan me pour zabitan Glacis.  Me anmenmtan, nou bezwen pran kont ki Glacis ti deza egziste en Day Care prive ki ti sitie dan batiman ki apartyen a Legliz Anglikan.          Ler ti fek komanse, sa ti mars tre byen.  Mr Speaker, mon konn sa akoz sa lepok, mon 2 zanfan ti ganny veye laba.  Nou ti pey R600 par mwan e parfwa ti annan menm ziska 12 zanfan e sa ti an 1996.  Me apre en serten letan, son operater ti komans rankontre problenm.  Ti fer li pa kapab pey son lokasyon aller.  Son det ti toultan an aryeraz.  Finalman, i ti anbandonn sa proze e i ti kit pei.  Menm si son ser ti sey repran, narnyen pa ti marse.  Sa lot dimoun ki ti pran biznes ti rankontre menm problenm e finalman, sa ki ti komans koman en Day Care Centre ti fini koman en Faktori Lollipop.

Pourtan Mr Speaker, son rent ti zis R1000 par mwan e son kapasite ti pou anviron 25 zanfan.

Mon konpran ler Onorab i dir ki parfwa i tro ser.  Sa i depan lo ki kalite servis sa Day Care pe ofer e i depan ki saler sa dimoun ki met son piti dan Day Care i gannyen.

Anmenmtan ki nou pe vin rod Day Care pou zabitan Glacis, nou osi rod bann kondisyon e etablir standar ki ava fer li favorab pour ki sa endividi ki deside angaz li dan sa demars pa ava vwar li pe fer fas avek tou sord kalite difikilte ki pou anpes li fonksyonnen, oubyen, annou pa zis refiz licence en dimoun ki kalifye pou fer sa travay byen, pou donn plas en lot koman en faver politik oubyen akoz i nou dalon e apre keksoz pa marse.  Mon dakor ler Onorab Prea i dir ki i annan tro bokou birokrasi dan sa bann demars.

Mr Speaker, souvandfwa sa bann keksoz i arive e plitar nou vwar son rezilta ler nou ganny bann Mosyon ki vin devan Lasanble pou dir reviz tel Lalwa oubyen revwar tel kondisyon oubyen akseler sa lot.

Mr Speaker, mon pou fer sa resorti akoz mon santi i neseser pou nou osi regard bann fakter ki afekte bann pti biznes e anpes zot avans devan.  Anmenmtan ki nou pe rod Day Care Centre lo en baz komersyal, annou pa kree en bann sirkonstans ki pou anpes sa Child Minder ki ozordi pe vey 2 ou 3 zanfan kot li kapab kontinnyen, me mon pou dakor ki nivo lizyenn fodre i a en oter pou anpes sa bann  zanfan atrap maladi.

Mr Speaker, mon pou osi met lo rikord ki si Gouvernman pou facilitate sa Day Car, tou bann prosedir tender i devret ganny swiv, ki a permet nenport ki dimoun ki enterese ou ki santi i kapab run sa biznes, pas atraver prosedir tender e non pa fini parey sa batiman kot Bazar Glacis ki’n fini depi 2003, apre in vin zis en nik lera, akoz ozordi nou donn priyorite nou bann dalon e prosedir tender pa’n aplike.

Alors, si nou vreman serye avek sa size Day Care, annou fer li byen pou benefisye lepep Seselwa.

 

MR SPEAKER

Avan mon pas laparol avek Onorab Georges.  Onorab Arrisol, ou ki ti’n lev lanmen?  Ok.  Mon’n konfiz zot 2.

 

HON BERNARD  GEORGES

Mr Speaker, i kler ki lapant ki sa deba in pran pou anmenn nou aprouv sa Mosyon parey nou tou mon krwar nou swete, akoz sa problenm Day Care i en problenm ki ou menm ou, ou konnen Mr Speaker e bokou nou la, nou konnen.  I en problenm ki’n preokip sa Lasanble e in preokip nou ki’n ganny elekte dan en distrik pou plizyer lannen deza.

Mr Speaker, la Onorab Leader Lopozisyon in montre mwan ki sa ti komans an 1995 kot Onorab Florence Benstrong, ki mon ti annan loner ek lazwa asiz obor dan mon premye zour ki mon ti vin Lasanble e pou en peryod 2an, apre sa ti anmenn en Mosyon ki Gouvernman i konsidere asiste avek setting up bann Day Care Centres dan bann landrwa travay ki ti en gloss lo sa Mosyon.  Me ki ti kantmenm en linisyativ ase enteresan.

Mr Speaker, sa Mosyon tel ki in ganny amande i osi permet mwan boner koz lo enn mon bann electoral pledge. Enn bann promes ki mon ti fer avek bann dimoun ki ti vot pou mwan ek zabitan Les Mamelles an antye, ki nou pou kontinnyen travay e met otan presyon ki posib lo Gouvernman, pou fer sir ki nou distrik osi i ganny son Day Care Centre e mon ava zis fer en pti krose la pou remind Lasanble e enform bann nouvo Manm ki annefe, sa size ti ase so an 2004.

Minis Ledikasyon sa lepok, Minis Danny Faure ti vin isi e ti reponn en kestyon efektivman ki Onorab Waven William ti demann li lo proze Day Care dan distrik Grand Anse e mon’n fer en note akoz mwan osi mon’n sot ladan e mon’n demann li enn pour Les Mamelles e sa ti an Septanm Mr Speaker.  Wi, ti le 28 Septanm 2004.  Mon annan li la lo enn mon focus ki mon ti fer sorti e kot in fact, Minis ti promet Onorab William ki Grand Anse Mahe, Gouvernman pe al fer en Day Care.

Mon regrete ki Gouvernman pa’n tenir son langazman e i fer mwan rapel ki ou menm ou Onorab, ou ti fer resorti avek Gouvernman ki lo nivo ou Sports Complex osi zot an retar, ler mon ti swiv ou PPB.

Mr Speaker, sa se pwen ki mon anvi fer sorti akoz en langazman kler in ganny donnen par Gouvernman a en Onorab.  Menm langazman in ganny donnen pou Les Mamelles e pour lezot distrik ki napa en Day Care. Annefe, 1an plitar, Minis ti retourn dan sa Lasanble e ankor enn fwa kestyon ti leve e mwan mon ti swiv sa an Me 2005 avek en kestyon ki Onorab Nicholas Prea ti’n mete. Sitting le 24 Me 2005 e mon ti fer Minis rapel ki swivan son premye repons an Septanm 2004, mon ti’n ekrir li pou demann li pou fer le neseser, me ki malerezman, parey nou lo sa kote latab nou abitye gannyen, mon let pa ti ganny ni reponn, ni acknowledge. E mon ti sey ankor le 24 Me 2005, me sa enn let osi mon mazinen in fini dan sa pti filing cabinet ki ron e ki anba biro Minis.

Mr Speaker, Day Care i tro enportan en size pour ki i pa ganny trete avek sa  lanpler e avek sa lenportans ki i merite.  I annan en nesesite ozordi.  I nepli en liks pou paran annan en posibilite, en landrwa apropriye pou zot les zot zanfan ler zot travay.  In vin en nesesite toulezour e mon krwar tou bann Manm, tou bann entervenan bomaten in fer sa pwen sorti.  I annan manman ki travay kot i annan en koup dan lakour, kot toulede i travay.  Zot, zot annan nesesite.  I annan bokou parey nou konnen e dan mon distrik, en nonm ase eleve single parent, ki zot, zot al travay e zot bezwen en landrwa apropriye pou kit zot zanfan.  Bann ki sanse e ki annan en granmanman kot lakaz i sanse, akoz zot annan en dimoun pour ki zot kapab kit zot zanfan avek, me bann lezot ki zot, zot fer?

Mr Speaker, sa ki kapab afford i kit zot zanfan kot en Child Minder e fodre nou rekonnet ki sa bann dimoun osi, zot pe debrouye.  Zot pe fer en pti biznes e ki fodre zot ganny proteze.  Bann ki kapab afford enpe plis i anmenn zot zanfan dan en Day Care apropriye.  Zot annan en swa.  Mwan, mon konn dimoun par egzanp ki reste La Louise, me ki pa kit zot zanfan dan en Day Care dan zalantour, me ki al anmenn zot zanfan par egzanp Union Vale. That’s the choice ki nou sosyete i bezwen donnen.  Dimoun i bezwen annan posibilite swivan zot mwayen e swivan zot swa pou fer sa ki pli bon pour zot zanfan, tel parey zot fer avek zot lasante, avek lekol eksetera.

Me ki pou arive avek sa pti dimoun, sa single parent, sa madanm litousel ki son msye ki annan son 3 zanfan.  Ki son msye pa toultan prevwar larzan lafendimwan.  Ki bezwen al travay e ki dizon par egzanp, i travay dan Lanbelir.  Ki li i fer avek son bann zanfan?  I pa kapab afford sa, dizon R300, a R400, a R500 pou kit son zanfan kot en Child Minder?  Worse si i annan 2 zanfan.  Ki li i pou fer?  E mon krwar se la Mr Speaker kot en Day Care ki annan en input Gouvernman i neseser.

Mwan, mon pou al pli lwen.  Mon pa pou dir ki i absoliman esansyel ki i annan en partenarya neseser ant Gouvernman avek Sekter Prive.  Ki Gouvernman li i ava met en landrwa, i ava konstrir en landrwa i a met a dispozisyon e se bann dimoun ki pou travay ladan e pou fer en pti biznes eksetera.  I posib ki dan serten rezyon, i posib ki dan serten distrik, i posib ki dan serten landrwa sa i ava en kestyon apropriye.  En fason fer apropriye.  Me i annan osi serten distrik e mwan mon pe koz lo en parti mon distrik. Mon pe koz lo the centre Les Mamelles, son sant limenm.  En tel Day Care, Mr Speaker, mon pa krwar pou reponn a tou bann egzizans, a tou bann nesesite, a tou bann realite ki bann dimoun i fer fas e mon krwar ki i annan en landrwa.  Ekskiz mwan si sa propozisyon i sorti lo sa kote latab e non pa lo sa lot kote latab, me i annan mon krwar en nesesite dan serten ka pour ki i annan en lasistans ki ganny donnen, swa en Day care ki ganny fer par Gouvernman e ki ganny run par Gouvernman pou bann dimoun ki pa kapab afford anvoy zot dimoun en lot landrwa oubyen en lasistan moneter ki ganny donnen avek Gouvernman, pour ki sa paran i kapab anmenn son zanfan dan en Day Care ki peye.  I annan tou sa bann formil, me sa ki mon pe fer se mon pe fer en cry of help pou serten morso nou teritwar, an partikilye sa enn ki mwan mon annan manda pou responsab pou sa 5an ki pe vini, ki bezwen en Day Care ki is just that. En landrwa kot manman ki pa kapab afford swa en Child Minder, swa en Day Care prive ki kapab al anmenn zot zanfan.  E se pour sa rezon ki mon’n swazir koman avek en pti not veksasyon ki depi 2004, at least so far, mwan mon konsernen e Onorab William ki sa zafer pe trennen.  I fer deza 3an, byento pe al lo 4 ki en keksoz ki ti neseser pa’n ganny fer.

Ler Prezidan ti fer son meeting konsiltatif dan distrik Les Mamelles an 2005, i ti osi koz lo sa size.  I ti promet ki nou pou al pli lwen ankor.  Nou pou ganny en landrwa, en lekol primer avek son bann fasilite Crèche ek Day Care Le Rocher.  Once again, zoli parol.  En plan kek par, probableman dan en file kek par, dan en biro me larealite se ki tou le bomaten, i annan manman ki pa kapab anmenn zot zanfan dan en landrwa apropriye Day Care e mon konnen ki i vin en fleo sosyal akoz tanzantan, ankor enn fwa koman en Avoka, mon bezwen fer fas avek sa.  I annan, Sosyal i montre ki poudir zanfan i ganny kit tousel dan lakaz e zot pe sibir tou sord lenfliyans negative. What is the alternative, pour  sa manman ki bezwen al trimouse?

Mon pa vwar li en gro problenm pou Gouvernman ki konn kree landrwa ler i neseser.  E annou pa bliye ki lekip Lanbelir dan bann distrik se en job creation team. Annou pa bliye ki Home Carer i en job creation team. I neseser i fer dimoun travay, i pe reponn a en bezwen sosyal me sa osi ti a kapab parey, kot olye anploy 12 dimoun dan lekip Lanbelir, zot a kapab anploy 6 osi pou run en Day Care dan en kominote e tousala ti ava en direct input ki Gouvernman ti kapab mete, ki ti ava ed sa dimoun ki en pti pe pli vilnerab.

Mr Speaker, ou pa a bliye me bann Manm ki ti la dernyen 5an pa pou bliye ki linisyativ i annan 2 fwa i ganny pran e mwan, en group madanm dan mon distrik ti pran en linisyativ 3an pase, 4an pase menm e nou ti demann avek Gouvernman pret nou en bout sa vye lakres ki ti egziste.  Onorab Pierre i konn tre byen.  I ti al lekol la obor kot sa vye lakres ti egziste Les Mamelle.  Ti ankor en vye batiman.  En bout ti’n dekouver e nou ti dir nou ava rekouver sa bout a nou prop fre.  Nou ava provide en fasilite, an atandan ki sa landrwa i ganny redevlope akoz nou ti konnen i pou ganny redevlope.  Mon repons ti non akoz i annan en proze redevlopman.  4an plitar, sel keksoz ki’n arive se ki zot in kraz sa landrwa net e narnyen pankor ganny redevlope.  Another mis-opportunity ki mon krwar ki si zot konpran mwan byen, set en keksoz ki nou devret pran pli an konsiderasyon.

Mon ava re-iter e echo sa ki Onorab Alcindor in dir ki fotespere, although avek sa ki’n pase avek Onorab William, mon en pti pe doute me fotespere sa fwasi  Mosyon i sorti kot en Onorab lo kote mazoriter, Gouvernman ava pran sa en pti pe plis o serye.  E mon osi swete ki la ki La Pentecote fek pase, ki si Lespri Sen pa bouz nou bann Dirizan, kekfwa sa Jj Spirit ava soufle en pti pe lo sa bann ki bezwen pran sa desizyon e ki nou tou ki bezwen enn, Onorab William an partikilye akoz i ti enn bann premye ki ti komans sa lager e avek mwan menm, nou a kapab ganny sa ki distrik Glacis pe  demande ozordi.

 

MR SPEAKER

Onorab Marie.

 

HON MICHEL MARIE

Bonzour tou Onorab.  Mr Speaker, mon pe siport sa Mosyon ki devan nou, table par Onorab Payet akoz lenplikasyon sa Mosyon i osi reflekte en bezwen reel e en demann rezonnab dan distrik Mont Buxton.  I kler ki Onorab Payet e Onorab Vel in etablir merit sa Mosyon e ki tou Manm ki’n koze, zot osi zot rekonnet merit sa Mosyon.  E ler sa Mosyon in ganny amande, i kler ki sa Mosyon i rekonnet ki Gouvernman in deza fer Day Care dan serten distrik e ki nou pe demande pou fer kot napa.  I domaz ki Les Mamelles pankor fer, parey Mont Buxton pankor fer, parey Grand Anse pankor fer.

Day Care alors i en nesesite modern pou nou dan Sesel.  Mwan, mon pe demande ki Gouvernman i seryezman konsider demann Mont Buxton ki mon’n deza fer, akoz Mont Buxton i annan en popilasyon plis ki 2700 e demann pou en Day Care i reel.  E mon konnen ki i annan dimoun ki kalifye e motive e ki pare pou manage en tel servis.

Mwan, mon oule salye zefor Gouvernman ki depi 2004 in zwe sa rol fasilitater pou annan Day Care dan bannn distrik e ki mon swete ki sa bann relasyon ant sa bann partner prive i kontinnyen, pour ki ankor dan 1an, dan 2an nou a kapab annan Day Care ase rezonnab dan tou nou bann distrik.  Akote Day Care osi, nou bezwen siport bann dimoun ki anba Cottage Industry ki’n fer servis Child Minding. Sa in annan son lefe pozitiv lo serten paran ki pa kapab pey R700 a R900 pou met son zanfan Day Care e anmenmtan ki nou demann devlopman Day Care, annou osi ankouraz bann paran, bann zenn ki anvi anba sa servis Cottage Industry.

Pou terminen Mr Speaker, i en moman apropriye e i en landrwa apropriye.  Apard ki mon’n ekrir let remersiman, mon’n fer vizit pou remersi bann dimoun Mont Buxton, mon ti a kontan remersi zabitan Mont Buxton ki’n ase brav pou fer mwan konfyans.  Zot konnen ki mwan mon enn zot menm e mwan mon pou travay pou tou zabitan Mont Buxton.  Mersi.

MR SPEAKER

Onorab Arissol.

HON SANDY ARISSOL

Ozordi Mosyon Mr Speaker, pe demann Gouvernman pou fer le neseser pour ki i annan Day Care dan bann distrik e mon mazinen ki si i pe dir fer le neseser, i annan landrwa ki napa sa fasilite, oubyen i annan landrwa ki napa teren, oubyen i annan landrwa ki napa sa lozman oubyen sa building pou akomod en Day Care. E ler par egzanp mon’n tann tou dimoun koz dan zot distrik, St. Louis osi pa en leksepsyon.  Ler mon get St. Louis, nou annan teren.  St Louis nou annan en lasal ki nou kapab dir i kapab akomod en Day Care pou deservi bann zabitan St. Louis.

Kwa ki mon pe koz lo la?  St Louis nou annan nou 2 gran Lasal deryer DA’s. Office. Nou annan 1 anba ase gran.  I annan tou son fasilite.  Lakwizin, twalet e mon krwar i en landrwa ideal pou en Day Care pou distrik St Louis, me ler nou get sa 2 Sant ki’n reste fermen, ki’n ganny fer i annan plis ki 100an pase.  I pa ouver preski ditou.  I pa ouver dan le sans ki mon mazinen SPPF pa gannyen St Louis.  E SPPF pa pou gannyen St Louis.  Be le bi se nou servi, nou met sa bann fasilite anmars.

Par egzanp, mon’n tann koz enpe lo bann paran par egzanp ki dan Lanbelir.  St Louis osi nou annan en group Lanbelir e bann paran parfwa zot bezwen pran bis, al Anvil pou kit zot zanfan, epi retourn dan distrik pou vin travay.  E mon mazinen si nou ti servi enn sa Sant, par egzanp pou akomod bann zanfan bann paran ki dan Lanbelir, par egzanp anmenmtan deservi enpe bann lezot paran instead of ganny sa tourman anbark dan bis, bis i plen.  Debout ek zanfan.  Desann avek apye.  Ariv dan louvraz tar.

Mon mazinen sa osi ti a desantraliz enpe sa bann problenm e nou zanfan ti a reste dan nou distrik e anmenmtan, vi ki St Louis nou annan en lekol segonder Belonie, bann zanfan sorti lekol zot ti kapab zis pase senpleman pran pti frer oubyen pti ser, retourn avek dan lakour, olye ki ler paran i sorti travay, i al tap laport Day Care Mont Fleuri oubyen English River pou al sers zot zanfan.

Me ler nou’n tann koz lo Day Car, i annan plizyer lezot pwen ki’n ganny monte.  Par egzanp nou’n tann koz Day Care i ser.  R600 a R700 pou bann  paran ki ganny R2025.  Me mwan mon pa krwar ki nou devret demann bann Day Care pou fer desann zot pri, me nou devret demann Gouvernman pou ogmant saler bann ki ganny R2025 par egzanp, en fason ki ava ed zot dan en fason pou zot kapab pey zot Day Care.

Nou’n tann koze enpe lo bann fasilite ki pou bezwen si pou fer Day Care. Par egzanp, Licensing, Lasante.  Tousala i enkli ladan.  E ozordi dan Lasanble, nou bezwen admet ki pa zis birokrasi ki ede pou anpes sa bann demars arive, me politik osi i zwe en rol.  Me mon ti a swete ozordi, ki avek sa nouvo Lasanble, nou koman en Manm elekte, nou ti a enplor Gouvernman pou pa met politik dan tou keksoz.  Si en dimoun i annan son kalifikasyon, i annan tou son motiv, ed li avans pli devan.  Kot nou santi i fail, nou lev li enpe anler.  Kot nou santi i pa kapab, nou donn sans en lot dimoun.

E mwan Mr Speaker, lo sa bout mon pou apiy sa Mosyon Onorab Payet e mon swete ki demars a ganny materyalize, vi ki ou, ou annan zorey Minis e ou annan sipor sa Gouvernman.  E parey mon’n promet zabitan St Louis, mwan mon pou la pou fer sir, pou apir tou bann Mosyon ki pou benefis nou zabitan e avek tou Seselwa an zeneral.

 

MR SPEAKER

Onorab Pierre.

HON DAVID PIERRE

Mr Speaker, ler mon get Mosyon ki devan nou, i fer mwan realize ki nou devret pran sa Mosyon koman enn ki serye.  Sey fer Gouvernman vwar kote ki i devret aranze, pour ki an realite, sa Mosyon ki Onorab Payet in met devan ozordi i vin en realite.  Pa zis pour  Glacis, me pour bann lezot distrik parey Grand Anse, parey Bel Ombre, kot bann lezot Onorab in demann sa fasilite pou zot distrik.

Mon anvi vwar 2 rezon lo akoz ki ozordi nou vwar en gran kantite distrik dan Sesel kot napa sa fasilite ki tre enportan.  Mon pou get kondisyon premyerman pou set up en Day Care Centre. Annou get sityasyon ekonomik pei.  Annou get kantite larzan ki en dimoun i bezwen ozordi envestir pou li kapab fer en Day Care Centre ki apropriye, ki annan tou son bann fasilite.  Kou konstriksyon in sky-rocketted. In monte.  Sityasyon ekonomik bann paran in desann e ler ou met sa 2 keksoz ansanm, i fer ki sanmenm sa rezon akoz ki ozordi en gran kantite paran i vwar li preski enposib pou li pey pri pour en Day Care.

Pri lavi in ogmante.  Parey mon dir, pri konstriksyon in monte me saler debaz in plizoumwen reste parey dan sa bann dernyen lannen e ler in ogmante, i pa’n mont an proporsyon avek pri lavi. So, the spending power of sa bann paran in ganny redwir konsiderableman e lozikman, zot pou bezwen rod en landrwa kot pou koup lo zot depans e malerezman parfwa, zot vwar poudir pou pran sa bout pou al pey en Day Care in vin en pti pe tro bokou.

Alors, bann paran i vwar li difisil pou fer sa lenvestisman.  Zot anvi zot:- i enportan pou zot me i difisil pou fer sa lenvestisman dan sa direksyon.  Me lot kote, bann biznesmenn prive osi i vwar li difisil pou zot fer sa lenvestisman akoz i vin risky.

Onorab Alcindor in refer sorti taler legzanp Glacis kot ti annan enn, me apre nou vwar li in fermen pour bann rezon ki in donnen. So, lo en kote bann paran i ganny difikilte.  Lo lot kote, bann envestiser osi i vwar sa koman en biznes ki risky e rightly so. Parey Onorab Arissol in dir, i pou difisil pou bann owners sa bann Day Care Centre fer monte zot pri pour la senp rezon ki paran pa kapab peye.  Zot pa anmenn zot zanfan and finalman, Day Care Centre i faid.

Dezyenm keksoz ki mon anvi nou analize, se sa kestyon politik.  Mr Speaker, le 24 Me 2005 en kestyon ti ganny anmennen dan sa Lasanble par Onorab Prea pou Minis pour Ledikasyon sa lepok ki ti Mr Danny Faure e Mr Prea ti refer sorti klerman poudir dan son distrik, in dir ankor taler, i annan en envestiser ki anvi al dan sa biznes me pour bann rezon ki limenm li i pa konnen, i zis pa’n ganny sa posibilite.

Mr Speaker, i senp.  Kot sa pei pe ale ozordi, nou bezwen tou Seselwa.  Nou bezwen kontribisyon tou Seselwa e Sesel koman en pei i pou senpleman kapab ariv sa oter ki son potansyel i permet li, provided ki sak endividi i ganny sa posibilite pou li reach son potansyel e pour nou kapab fer sa, fodre Gouvernman i vin sa kalite fasilitater ki i devret vini, dan en pei kot son trend of thinking i devret demokratik, akoz nou dan en demokrasi.  Si en dimoun in apply pou en Day Care, ou santi poudir baze lo son sityasyon i pa pe meet bann standard ki Minister Ledikasyon i met devan, fine. Ou dir li me ou pa zis dir li.  Ou fer bann rekomandasyon e li sa dimoun i vwar si  son mwayen i permet li pou improve, i improve.

Mr Danny Faure ki Minis Finans ozordi e ki trwazyenm dan Gouvernman Sesel ozordi.  An 2005 i ti vini e i ti dir ek sa Lasanble tre klerman poudir zot in fer letid e byento Gouvernman pou vin avek en seri incentives lo sa size Day Care Centre. Nou 2007 e sa bann incentives– letid ti’n fini ganny fer e sa bann incentives pankor ganny met devan.

Nou pe demande lo sa kote latab Mr Speaker, ki parey Mr Michel in dir nou ki i anvi en Lasanble ki serye, nou, nou vin travay nou.  Gouvernman osi fodre ki i serye.  Se la ki Sesel pou al devan.

De lot kote Mr Speaker, napa okenn dout ki en Day Care Centre dan nenport ki distrik i annan en rol enportan.  Dan laplipar distrik, nou annan bann single parents. Nou annan bann manman ki annan  lanplwa me zot en single parent. Zot ganny difikilte pou zot vwar en landrwa pou kit zot bann zanfan e sa i ava definitivman ede.

Nou konnen  poudir ozordi i annan presyon lavi lo sa bann mere-de-famille. I annan presyon fanmiy lo sa manman e i devret kapab annan sa opsyon ki pou permet li omwen lo sa nivo, planifye lo lafason ki i pou deal avek son zanfan pandan sa moman ki li i al travay.

Tou dimoun i bezwen travay Mr Speaker e konbyen fwa nou’n tann en endividi, en dimoun vini, donn nou en lekskiz.  I dir ou konmsa, mon pa kapab al travay akoz mon napa en landrwa pou mwan kit mon zanfan.  Si sa landrwa ti egziste dan sa distrik, i ti ava kit son zanfan.  I ti ava rod lanplwa e Mr Speaker, souvandfwa ki nou vwar?  Nou vwar sa bann dimoun i fall back lo Gouvernman e i al rod en lasistans Sosyal ki ankor met presyon lo resours finansyel Gouvernman.

Mr Speaker, de lot kote, en Day Care Centre, son louvraz ki i fer?  Son responsabilite bann dimoun ki deal avek en Day Care Centre in evolye depi laparisyon premye Day Care Centre an France an 1840.  Si ou oule osi, depi ki Lanmerik ti ouver son premye Day Care Centre an New York an 1854.

Dan sa konteks Mr Speaker, mon ti a kontan vwar ki sa demann Onorab Payet i ganny realize e sa Day Care Centre i vin en landrwa kot i annan sa kalite lanvironnman ki pou permet bann zanfan epanouir.  En landrwa kot sa bann zanfan i kapab zwe, zot kapab sosyalize an plenn sekirite.  Kot zot devlopman emosyonnel, zot devlopman lasante mantal i kapab ganny sirveye e swiv dan en fason konsistan.  En landrwa ki an konformite ek bann standar WHO.

Se pour sa rezon Mr Speaker ki mon pa pou tro dakor avek en pti keksoz ki Onorab Georges ti dir taler, ki olye anploy 6 a 12 dimoun dan Lanbelisman ou anploy 6 e ou pran 6 ou met dan en Day Care Centre. Gouvernman i bezwen provide proper training pou bann dimoun ki travay dan Day Care Centre. En Day Care Centre i bezwen provide sa kalite swen ki pou permet sa zanfan  grandir an bonn sante e an sekirite.

E alors, nou devret pe ankouraze ki sa Day Care Centre, parey bann lezot Day Care Centre dan pei ki bann lezot Onorab pe demande i ganny run par bann profesyonnel, kot bann travayer i ganny proper training lo ki fason pou best deal ek bann zanfan ki tonm dan sa kategori laz, kot ou pa zis pran en dimoun e met li la.  Petet i a form parti responsabilite dan konteks Mosyon Onorab Payet limenm, pou li vwar ki bann regleman Minister Ledikasyon, an relasyon avek Day Care dan bann distrik i ganny respekte pou byennet zanfan Glacis.

Enn de pti legzanp senp avan ki mon terminen Mr Speaker, par egzanp, regroupman zanfan dan en Day Care, 0 a18 mwan, kot i devret ganny separe avek bann zanfan 19 mwan a 36 mwan.  3an, ratio adilt pou bann zanfan kot 0 a 3 mwan i pa devret depas 1 pour 3.  En adilt pour 3 zanfan, 4 a 9 mwan.  En adilt pour 5an, 10 a 18.  En adilt pou 10 e pareyman 19 a 36.  En adilt pour 15.  Sa bann regleman i annan en bann rezon akoz i la e resers in montre ki poudir se koumsa ki i devret ete, pour ki sa bann zanfan i ganny sa maximum swen.

Fodre ki Onorab, otan ki li ki’n anmenn sa Mosyon, i ensiste ki i annan en o standar pou Lasante ek Sekirite sa bann zanfan.  Fodre nou realize Mr Speaker ki ozordi en Day Care i kapab pran en striktir pli formel, ki enkli progranm pou devlopman sa zanfan, disiplin, lafason ki i pou behave an relasyon avek bann zanfan around li.  E menm, i annan bann Day Care ki donn bann ledikasyon pre-skoler.  E sertennman en Day Care i kapab provide ou zanfan ek en diferan kalite leksperyans ki sa parental care i provide li.  An dot mo, en bon Day Care i kapab konplemant good parenting.

I annan en kantite keksoz ki kapab ganny dir, me mon panse ki lesansyel in fini ganny aborde, alors mon pou terminen e mwan, mon pou donn mon full sipor sa Mosyon.  Mon pou donn mon full sipor Onorab Payet.  Mersi.

 

MR SPEAKER

Parey ou’n dir nou, lesansyel in fini ganny aborde.  Mon pou permet ankor en speaker. Onorab Naiken, entervenir avan mon donn laparol Onorab Payet.

 

HON MARC NAIKEN

Mr Speaker, mwan osi mon pa pou kapab komanse san remersi bann zabitan Au Cap pou donn mwan konfyans pou reprezant zot dan Lasanble Nasyonal.

Mr Speaker, mon pou anmenn mon sipor pou sa Mosyon, prezante par Onorab Payet pou plizyer rezon.  Premyerman, koman en paran ki viv dan en distrik, napa en tel servis.  Ozordi zabitan Au Cap si i anvi anmenn son zanfan dan en Day Care Centre, i bezwen anmenn Anse Royale akoz ni Anse Aux Pins, ni Pointe Larue napa enn.  E sa i met bokou presyon lo bann paran akoz zot bezwen al Anse Royale.  Sorti Au Cap al Anse Royale apre retournen al Anvil.  Bokou fwa, zot ariv an retar travay e zot ganny problenm avek zot siperyer.

E dan distrik Au Cap, mon krwar nou annan fasilite ki nou kapab envit bann prive pou mont en tel biznes e fer ki nou bann dimoun i kapab ganny en landrwa kot zot kapab kit zot zanfan.  Pa zis kit zot zanfan, me osi en landrwa kot zot zanfan i kapab ganny sa devlopman.  Lepanwisman plen ki kapab fer zot devlop koman bann sitwayen byen an form.

Nou annan en kestyon lo pri Day Care Centre. Mon toutafe dakor ki si pri i tro for, parfwa zabitan pa kapab afford e nou vwar ki sa biznes evantyelman i fermen.  Me letan nou koz fer monte lapey travayer, Gouvernman i kapab fer monte lapey travayer me fodre prive osi i kapab fer monte lapey travayer, pou fer li at par en mannyer ki tou dimoun i benefisye en tel zes lo lapar Gouvernman.

Mr Speaker, bokou in ganny dir.  Mon krwar ki ler avek standar ki bokou Onorab in fer resorti lizyenn i enportan e i en fason kot nou bann zafan, si ou oule, i ganny sa premye devlopman enportan pou li viv koman en bon sitwayen.  Alor, mon pou donn mon full sipor sa Mosyon pour sa bann rezon swivan.

Plis dimoun i kapab antre direkteman dan lanplwa, apre ki zot fini zot konze maternite, akoz bokou fwa ou vwar poudir bann paran i bezwen extend zot konze akoz zot pa kapab ganny en dimoun ki kapab donn sa servis a en laz tre zenn.  Mwens presyon lo lezot manm lafanmiy ki bezwen monte desann ensidswit.  Plis prodiktivite sorti kot bann paran, espesyalman bann single parents e plis lekonomi dan pos bann fanmiy, letan zot annan en landrwa pou zot kapab fye kot sa zanfan i an sekirite.  Mwens depans lo sistenm Welfare akoz  ki nou vwar parfwa, se ki bann single parent..

(Technical problem)..

 

HON MARC NAIKEN

………. pou zot kapab okip zot zanfan.  Alors Mr Speaker, mon pa pou ezite pou mwan donn sa Mosyon mon full sipor akoz mon krwar poudir dan mon distrik Au Cap osi, i pou benefisye enormeman si en tel servis i vin a nou laporte.  Mersi.

 

MR SPEAKER

Right of Reply, Onorab Payet.

 

HON DAVID PAYET

Mr Speaker, mon a remersi tou mon bann koleg ki’n koz anfaver sa Mosyon.  Mon krwar sa Mosyon in tous tou distrik, akoz in sorti Glacis pou vin lezot distrik.  E dan bann lentervansyon ki’n arive parey Onorab Prea e Onorab Pierre in dir, ki mon toutafe dakor avek, sa nivo standar lasante e lizyenn e laspe edikasyonnel i ganny garde.  Parey mon’n dir, koman mon en Dokter par profesyon, sa i ava ede pou redwir enpe bann maladi ki ganny propaze.

Lo kote Onorab Alcindor, in dir ki sa size i pa nouvo.  Wi.  Nou konnen sa size i pa nouvo me pandan sa 5an, mon’n vwar li zanmen anmenn sa size devan Lasanble.

(Interruption)

 

HON DAVID PAYET

Kot mon’n pase dan kanpanny, premye keksoz ki i dir se, Dokter ler ou al dan Lasanble, fer nou ganny en Day Care. E ozordi mon’n fer mon promes e mon premye Mosyon se anmenn sa Mosyon devan Lasanble e mon ti a remersye Madanm Alcindor pou siport sa Mosyon akoz sa Mosyon i tous tou paran ek Sekter Prive dan nou distrik.

Parey Onorab Arissol in dir, mon dakor ek li.  In siport mon Mosyon me i pa fair pou demann Gouvernman pou ogmant saler si ou pa demann Sekter Prive pou fer parey.  Mon Mosyon in tous tou nou zanfan e bann pti antreprener.  Sa bezwen in ganny resanti dan Glacis e dan lezot distrik.  Mon pe demande ki Gouvernman i fer sa proze e fer  batiman apropriye, apre lwe avek Sekter Prive.  Sekter Prive osi i kapab osi konstrir en batiman, epi lwe avek en endividi pou manage e, ki pri Day Care i reste abordab.

Mon pou osi demann ek Gouvernman pou kontinnyen swiv son  lizyenn e lapropte e akse edikasyonnel dan son bann Day Care Centres e mon ti a demann tou mon bann koleg pou vot anfaver sa Mosyon.  Mersi Mr Speaker.

 

MR SPEAKER

Deba in terminen. That the question be now put. Tou bann ki anfaver lev zot lanmen silvouple?  I paret inanim.  Alors Mosyon in pase.

Onorab Payet, ou dezyenm Mosyon mon pe averti ou ki ou annan zis 6 minit.  Mon pa konnen si ou ti a voudre komans pran li lo apremidi.  Si sa i leka nou ava adjourn ziska 2er apremidi.

 

(BREAK)

 

MR SPEAKER

Nou ava kontinnyen nou travay pou ozordi.  Lo Order Paper i reste nou en Mosyon par Onorab David Payet e Onorab ti’n anvoy en lamannman ki mon krwar in ganny sirkile bomaten avek tou bann Manm.

Mon ava alors envit Onorab pou prezant son Mosyon as amended.

HON DAVID PAYET

Mon dezyenm Mosyon devan Lasanble ozordi i lir koumsa:-

Ki sa Lasanble i aprouve ki Gouvernman i akseler privatizasyon servis bis lo bann larout segonder, avek bi pou konplemant e amelyor kalite servis ki SPTC i ofer e donn en lot loportinite biznes bann pti antreprener.

Dan son Ladres Bidze 2005, Prezidan Michel ti anonse ki Gouvernman i annan lentansyon pou fer letid lo privatizasyon transpor piblik dan bann semen segonder.

Mr Speaker, savedir Prezidan Michel ti vwar i annan nesesite pou fasilit mobilite nou bann dimoun ki servi transpor piblik. Dan son Ladres lo Leta Lanasyon le 20 Mars 2007, ler i ti pe koz lo transportasyon, Prezidan Michel ti dir ki sistenm transpor piblik pe ofer en servis ki abordab pour tou Seselwa, me ki sa servis i bezwen agrandi dan plis destinasyon e pli regilye.

I ti dir, avek bi pou kontinnyen amelyor sa servis e annan posibilite dan lavenir pou les bann operater endividi pou osi konplimant sa servis.  Se sa rezon Mr Speaker ki mon pe demann Gouvernman pou akseler privatiz sa servis.  In ariv ler pou fer aksyon e fasilit mouvman.

Mr Speaker, avek bann diferan devlopman lakaz ki’n ganny antreprann dan mon distrik tel ki Vilaz North East Point, Carana, La Gogue, Glacis e byensir i aplik osi pou lezot distrik, ki fer ki i annan plis presyon lo SPTC pou agrandi zot servis akoz zot sel Lakonpannyen ki fer transportasyon servis piblik.

Mr Speaker, sitiyasyon aktyel, i fer ki avek sa nouvo proze lakaz i fer ki i annan en gran mouvman dimoun dan sa bann lokalite ki SPTC pa pe vwar li  kapab dan limedya pou kapab ogmant zot servis e osi dan bokou ka bann bis ki SPTC i annan pa kapab deservi sa bann larout segonder.

Avan Eleksyon, detrwa fwa bis ti tonbe dan rigol dan leo La Gogue.  Mon ti a demann Minister konsernen pou akseler lenplimantasyon sa demann ki’n ganny resanti enpe letan.

Mr Speaker, dan lepase in annan plizyer refleksyon lo kimannyer Sekter Prive i partisipe e donn servis e an vi demann ki ganny demande avek Lotorite Distrik.

Isi dan sa Lasanble, in annan Mosyon pou demann Gouvernman pou konsider liberalizasyon servis transpor piblik e deba lo rol Sekter Prive vizavi sa servis.

Dan mon resers, mon’n konstate ki SPTC i ofer servis lo 30 larout segonder.  Ladan i annan 3 ki tonm dan mon distrik.  Glacis/La Gogue, Glacis/Sorento e North East Point/Seaview Estate.

Mr Speaker, mon ti a voudre enform Lasanble ki sa 30 larout ki SPTC i deservi poulemoman se Victoria/Les Mamelles, Victoria/La Bati, Victoria Belvedere, Victoria/Plaisance School, Victoria/Copolia, Victoria/Foret Noire, Victoria/Union Vale, Victoria/Roche Caiman, Victoria/MaJoie, Victoria/Quincy, Victoria/Waterloo Road, Victoria/Bodamier via Anse Aux Pins, Victoria/Mont Buxton, Victora/Mt Signal, Victoria/Nageon, Victoria/Glacis La Gogue, Victoria/Gaza Housing, Victoria/Le Niol, Victoria/North East Point Seaview Estate, Victoria/Curio Road, Victoria/Sans Souci, Victoria/Intendance, Victoria/North East Point Rehab, Victoria/Mont Plaisir, Victoria/Baie Lazare/Val D’Endorre, Victoria/Mont Plaisir/Victoria, Victoria/Maldive/La Gogue, Victoria/Glacis/Sorento, Victoria/Anse Soleil/Les Canelles et  Victoria/Roche Bois.

Mr Speaker, prezan annou get bann Schedule bis ki SPTC i donnen.  Nou dan nou distrik e ou vwar ki i annan en gran diferans.  Avek mwan la, mon annan en schedule ki SPTC in donnen dan larout Victoria/North East Point i sipoze annan 12 vwayaz me dan mon resers mon’n vwar ki i annan zis 7.  Victoria/La Gogue i sipoze annan 10 parey SPTC in mete e dan mon resers mon’n vwar i annan zis 4.

Mr Speaker, atraver sa leksplikasyon lo bann larout segonder dan mon distrik, i demande ki i ankor annan nesesite pou bezwen transpor piblik pou nou popilasyon dan distrik, san ki nou oubliy nou zabitan ki tonm dan vilaz Carana kot napa servis bis ditou.  Plizyer fwa nou’n demande me nou pa’n zanmen gannyen.

Mr Speaker, pwen for sa ki nou pe dir se pou rod en solisyon, pou reponn bezwen sa gran nonm popilasyon an sa ki konsern transpor piblik.  Malgre plizyer demann in ganny met devan par Lotorite Distrik, byen ki nou konpran ki Gouvernman atraver SPTC i annan responsabilite pou mentenir e asir ki servis bis i a disponib pour tou popilasyon e permet nou bann dimoun pou byen kapab deplase.  I fer ki sa servis i bezwen regilye, aler, kouver otan larout posib ki popilasyon i kapab depan lo la a en pri ki sak sitwayen i kapab peye.

Mr Speaker, ki nou vwar dan bokou sa servis, parler pa regilye e pa kouver otan larout segonder akoz mank bis e resours imen ki SPTC i fer fas avek e bis ki zot annan i pa konvenab pou serten larout segonder.  An vi sa mank demann, mon pou osi:- pour sa servis transpor piblik, mon pe propoze ki Gouvernman i konsider liberaliz servis lo bann larout segonder ki a permet Sekter Prive, pou osi ofer en servis akote SPTC e ki i ava responsabilite SPTC pou determin lekel ki pou kontinnyen ziska Anvil e bann ki pou ariv ziska semen primer.  Nou pe osi propoze ki pri pasaz i reste R3 pandan lazournen e ki bann operater a kapab fer serten azisteman apre ler aswar.

Mr Speaker, prenan an kont bann difikilte pou antreprann en tel aktivite nou pe osi propoze ki Gouvernman i ofer serten konsesyon tax lo lenportasyon bis, fuel ek pyes.  Nou konnen ki i annan en kantite biznes ki benefisye avek sa diferan konsesyon ki Gouvernman i ofer, avek bi pou ed zot demar zot lantrepriz e sa ki pli enportan se pou kontribye pou redwir kou lavi dan pei e mon ti a swete ki bann antreprener ava annan en konsyans sosyal vizavi sa bann konsesyon.

Mr Speaker, nou konnen ki dan tou sa prosesis, forex i reste touzour en pwen santral e la osi nou pe demande ki Gouvernman i negosye avek Labank Komersyal pou kapab etablir en prosedir ki pou fasilit sa bann antreprener.  Nou ekspekte ki sa servis i vin en sikse e SPTC i ava osi rekonsider liberalizasyon lezot servis tel ki servis kontra.

Mr Speaker, parmi bann benefis ki sa Mosyon pe anvizaze, i fer ki pou annan plis servis bis lo en pli gran nivo lo bann larout segonder, tel ki parey vilaz North East Point, Vilaz Carana, kot napa ditou servis bis e Glacis/La Gogue kot i annan nouvo proze lakaz.  I pou ankouraz Sekter Prive pou partisip dan sa Sekter transportasyon, kot nou a kapab alavenir devlop en pli bon model lo lafason ki Sekter Prive i a travay avek Gouvernman lo en plan long term, pou rann sa servis ankor pli efikas.

Mr Speaker, prenan kont sa lespri an partenarya ki nou pe devlope dan nou sosyete, sa i pou byensir en lot loportinite pou pti biznes ki pe kontinnyen fer zot prezans konte dan devlopman nou pei.

Mr Speaker, Gouvernman lo son kote i a kapab redwir kantite sibvansyon ki i remet avek SPTC koman en Konpannyen parastatal.  Sa larzan i kapab ganny met dan lezot devlopman, pou byennet nou pei.

Mon ti a demann mon bann koleg pou siport sa Mosyon.  Mersi.

 

MR SPEAKER

Okenn ki segonn sa Mosyon.

 

HON CHARLES DE COMMARMOND

Mr Speaker, mon segonn sa Mosyon.

 

MR SPEAKER

Mon oule fer bann Manm rapel ki par leksperyans, nou konnen ler apre midi pe fer, i annan tandans pou vin pli nwizans.  Mon ava port zot latansyon a Order 37(3) pou pa enteronp bann Manm ki pe koze.

Mon ava pas laparol avek Onorab Charles De Commarmond.  Ou’n demande pour ou koze?

HON CHARLES DE COMMARMOND

Non.

MR SPEAKER

Ok.  Okenn ki oule koze?  Onorab Mondon.

 

HON TERENCE MONDON

Mr Speaker, avan mon komanse, byensir mon oule salye sa 60 poursan voter Takamaka ki’n fer mwan konfyans pou reprezant zot dan Lasanble Nasyonal.  Enn mon bann langazman sete pou travay pli for ankor, pou fer sir ki bann bezwen e konsern zabitan Takamaka i ganny adrese.

Mr Speaker, en servis transpor piblik lo semen segonder dan nou bann distrik i en size ki’n ganny diskite, debat a plizyer repriz isi dan sa Lasanble.  En size pertinan e ki’n ganny sipor tou ansyen Manm nou Lasanble Nasyonal.  Mr Speaker  i en plezir pour mwan vwar nou pe komans nou premye sesyon travay avek en size ki tous en gran mazorite popilasyon Seselwa.  En size ki tous sa fanmir ordiner ki pe pey en sonm konsiderab sak fwa ki i bezwen fer en deplasman lo bann larout ki napa servis bis SPTC.

Wi parey in deza ganny dir dan sa Lasanble en servis transpor piblik lo semen segonder i en vye konba e ozordi sa nouvo Lasanble lo nou kapasite koman reprezantan  lepep nou pe demann Gouvernman pou donn nou son pozisyon final lo sa size.  Lo sa not Mr Speaker permet mwan retras brevman deba ki’n annan dan lepase lo sa size.

Sete dan premye Lasanble, apre milti parti ki sa size ti ganny diskite ler Onorab Leader Lopozisyon ti anmenn en Mosyon kot i ti demann Gouvernman pou privatiz serten semen segonder.  An Oktob 2003 mon ti anmenn en lot Mosyon lo sa size e mon Mosyon ti lir koumsa:-

An vi devlopman bann semen segonder e konsekaman logmantasyon demann pour transport piblik, sa Lasanble i demann Gouvernman pou fasilit lentrodiksyon en servis transpor apropriye pou deservi sa bann semen.

Tou Manm ti vot anfaver sa Mosyon.  Zis 1an apre an Novanm 2004 dan son Diskour Bidze pou lannen 2005 Prezidan Michel ti dir nou ki i pe al komisyonn en letid profon, pou vwar koman pou kapab anmenn partisipasyon prive dan nou sistenm transpor piblik lo bann semen segonder.  7 mwan plitar, an Zen 2005, ansyen Manm sa Lasanble Mr Alain St Ange ti re-anmenn en Mosyon lo menm size e son Mosyon ti lir koumsa:-

Sa Lasanble i aprouve, pou demande ki Gouvernman i konsider akseler pou licence bann bis prive pou deservi semen segonder dan pei.  A sa moman dan son lentervansyon, Onorab Andre Pool ti dir nou ki en letid pe deza ganny fer ki plitar pou ganny prezante devan Cabinet pour zot aprouvasyon. Ankor enn fwa tou Manm ti vot anfaver en tel Mosyon.

I kler ki nou Lasanble Nasyonal in fer son devwar e met devan Gouvernman bann largiman lo nesesite annan en servis transpor piblik lo semen segonder dan nou bann distrik.  Mon osi apresye ki Gouvernman in deza fer en premye pa dan sa direksyon.  Atraver sa letid ki Prezidan Michel ti koz lo la dan son diskour Bidze 2005.  Me ozordi atraver Mosyon Onorab Payet nou tou ansanm nou pe demann avek Gouvernman pou fer lepep konn rezilta sa letid e fer lepep konn zot desizyon final lo ki kalite servis nou pou annan lo semen segonder dan nou bann distrik.  Mon oule fer en lapel avek Gouvernman pou fer tou le neseser pour ki sa servis i ariv dan nou bann distrik o pli vit posib.

Mr Speaker mon konnen ki en tel servis pour san dout anmenn avek li serten defi pour sa operater prive, nouvo defi pour SPTC e byensir pour Gouvernman.  Premye defi se pri tiket lo semen segonder.  Nou konnen ki pri tiket pour semen segonder pou depan lo plizyer fakter, parmi se demann lo sa bann larout, partisipasyon SPTC dan en tel servis, komitman Gouvernman, an dot mo konbyen Gouvernman i pare pou envestir dan sa servis nivo lotonomi ki  sa operater prive pou annan.

Mr Speaker nou bezwen note ki ziska ozordi, Gouvernman in gard son promes avek lepep Seselwa par mentenir en servis transpor piblik ki tre rezonnab.  En pri R3 lo tou larout ki SPTC i deservi e parey nou tou nou konnen, tou nou bann pansyonner, sa servis i osi pou narnyen.

Malgre sa bann defi, mon lekspektasyon se ki nou Gouvernman i pran tou konsiderasyon posib pou bann fanmiy ki napa gran mwayen finansyel.  La mon pe mazin sirtou sa fanmiy avek 3, 4 zanfan ki pe viv avek mwens ki R3000 par mwan.  Wi.  Nou pou bezwen fer li posib pou sa group dimoun pey en pri pli ba posib.  Mon sizere ki nou servi petet en sistenm Means Test, kot sa group dimoun dezavantaze oubyen pli vilnerab i kapab ganny asiste avek en Pass spesyal e pourkwa pa Gouvernman i subsidize sa bann Pass spesyal.

Dezyenmman, defi.  Kalite transpor pou deservi sa bann semen.  En lot defi sa servis se kalite transpor ki nou pou bezwen pou deservi bann semen segonder.  I kler ki nou devret servi transpor ki apropriye pou sak distrik.  Setadir, ki nou bezwen pran an konsiderasyon kalite semen e topografi sak distrik.

Trwazyenm defi.  Amelyorasyon lo serten semen segonder.  I enportan ki serten travay i osi ganny fer pou amelyor e met serten semen segonder lo sa standar neseser pou deservi piblik.  Dan mon distrik an partikilye, i pou neseser ki Lotorite konsernen i fer serten travay lo nou bann semen segonder e sa i enkli met siding, met baraz sekirite dan bann landrwa kot i neseser.

Mr Speaker, en servis transpor piblik lo semen  segonder dan nou bann distrik pou definitivman en lot pa enportan ki Gouvernman i ava pe pran pou amelyor lavi son pep.  Dan mon distrik Takamaka, sa pe vin koman en soulaze pour en gran mazorite nou popilasyon.

Mr Speaker, i pou neseser ki Gouvernman i vin fer en deklarasyon lo sa size dan sa bann prosen semenn, sirtou la ki sa letid in konplete.  Si nou annan serten defi ki nou pou bezwen ganny adrese avan ki nou enplimant sa servis, mon ava sizere ki sa osi i ganny met devan a latansyon nou Lasanble, afen ki nou tou ansanm nou kapab aport nou kontribisyon.

Finalman, mon oule remersi Onorab Payet pou re-anmenn en tel Mosyon devan nou Lasanble.  Mon pou donn tou mon sipor sa Mosyon.  Mersi.

 

HON MITCY LARUE

Mr Speaker, apre mon katriyenm viktwar dan Lasanble, mon oule dir mersi sa 75 poursan zabitan Baie Ste Anne ki’n fer mwan konfyans, ki’n apresye mon fason travay, ki’n senser avek mwan ek mon Parti SPPF.  Nou’n tenir nou pa’n large.  Mon distrik in fer listwar avek 75 poursan.  Sa rikord zanmen personn pou kapab kase.  Pou pas port an port pou dir mersi, wi.  Nou touzour fer sa e Lopozisyon i kopye nou.  Alor, pa sey fer nou krwar ki sete zot ki ti inisye vizit port an port.  Mon senserman dir mon 75 poursan ki mon pou travay dir.  Pli dir, pou asir plis devlopman dan nou distrik e osi pou zwenn zot laspirasyon.  Tou Seselwa ki’n vot SPPF, mersi pou tenir nou mazorite avek en logmantasyon 3 poursan e nou tou nou pou travay dir pou get dan zot lentere.

(Interruption)

 

MR SPEAKER

Onorab Larue, lo sa bann remersiman depi bomaten.  Zot tou zot pe remersi e mon’n lenient lo la e desizyon mon’n pran se pou les zot kontinnyen remersi, osi lontan ki zot pa al dan kontrovers.

Pour li son remersi i en pti pe pli gran akoz son poursantaz i pli gran mon mazinen.  Me mon a demann li pou move on to motion now.

HON MITCY LARUE

Mr Speaker, ozordi nou pe koz lo privatizasyon servis bis dan bann larout segonder.  Parey Prezidan Michel ti propoze, pour ki en letid i ganny fer e ozordi sa letid in ariv lo son staz final e Mosyon i devan nou pou nou donn nou laprouvasyon.

Dan mon distrik, mon annan 2 semen segonder kot SPTC i kouver.  Nou pe rankontre bokou difikilte, par egzanp i annan 2 semen Zimbabwe avek Anse La Blague, menm ki SPTC pe kouver, nou rankontre difikilte kot ler lapli i tonbe, bis pa kapab monte e sa i kree lenkonvenyans pou nou bann dimoun kapab deplase e osi bann ler bis i mwen regilye letan zot dan bann larout segonder e souvandfwa, sa osi i dan dezavantaz nou bann zabitan.

Parey nou konnen, privatizasyon i annan son lavantaz e osi son dezavantaz.  Mwan mon ti a kontan met sa bann pwen konsern devan, avan ki Gouvernman i finaliz tou pou privatiz servis bis dan larout segonder.  Parey nou konnen, ozordi dimoun i pey selman R3.  Bann vye dimoun pa pey bis.  Dimoun avek dezabilite osi pa pey bis.  Eski ler Sekter Prive pou deservi sa bann larout segonder, ki pou arive?  Eski pou annan sanzman dan pri?  Eski sa bann dimoun ki mon’n mansyonnen pli boner pou bezwen pey bis?  Bann zanfan lekol ki reste dan sa bann landrwa, eski Minister Ledikasyon pou kouver zot peyman bis oubyen i pou annan en lot fason fer?  Ki mon pe sizere, se ki avan ki Gouvernman i finaliz son desizyon.  I enportan ki nou get dan sa bann pwen ki mon’n mansyonnen e enn de pwen pou konsiderasyon, se ki Gouvernman i donn lasirans ki sa bann antreprener prive i anmenn bis ki pou kapab deservi sa bann larout segonder, vedir bann bis konvenab, ki ler lapli i tonbe, sa bann bis i kapab monte.  E osi Land Transport i amelyor sa bann semen, pour ki bis osi i kapab deservi sa bann larout.

Dezyenmman, bann antreprenner Gouvernman i donn zot konsesyon lo transpor, lo pyes e menm fuel, pour ki zot osi zot a kapab pran an konsiderasyon ki logmantasyon pri dan servis pa arive, pa monte.  Answit, ki bann antreprener i serye e annan en sans disiplin e respekte bann schedule e osi touzour aler e met zot bann kliyan avan tou.

Si sa bann pwen i ganny pran an konsiderasyon, mon sir ki sa prosesis privatizasyon i a kapab ganny met anplas e pa pou afekte vreman nou bann dimoun ki pou reste dan bann larout segonder.  E si sa i leka, mwan mon pou napa okenn problenm pou mwan vot anfaver sa Mosyon.

MR SPEAKER

Onorab Francois.

HON JOSEPH FRANCOIS

Bonn apre midi tou bann Onorab.  Mwan osi mon krwar i pa en sirpriz pou mwan remersi bann zabitan Anse Aux Pins ki’n fer mwan zot konfyans e ki’n anmenn mwan dan Lasanble pou mwan reprezant zot.

Mr Speaker, i kler ki demann pe kontinnyen ogmante pou servis bis piblik lo semen segonder dan Sesel, prensipalman logmantasyon dan popilasyon an zeneral.  Logmantasyon dan devlopman lakaz dan bann landrwa ki trouve en pe pli lwen avek lanmer, oubyen dan bann topografi anpant ki tre difisil pou mont apye, oubyen kot bokou semen segonder in ganny konstrir partou dan bann rezyon montanny, tel ki dan Caryole, dan Bodamier ek dan Capucin, dan Anse Aux Pins.  E tousala Mr Speaker, i fer ki i annan en logmantasyon travayer ek etidyan lekol ki bezwen servis bis dan sa bann rezyon.

Mr  Speaker, tousala in azout presyon lo SPTC pou donn plis bis e SPTC ki annan responsabilite e monopoli pou delivre servis bis piblik anba Seychelles Public Transport Corporation Decree 1977, pe vwar li dan plizyer kontrent resours, prensipalman resours finansyel, oubyen kondisyon serten semen segonder pa’n kapab reazir efektivman avek bann demann e bokou dimoun ki reste lwen avek larout prensipal in vwar zot kwense e annwiye san en tel servis, par egzanp ankor enn fwa dan Caryole e dan Capucin dan Anse Aux Pins.

Mr Speaker, leta sitiyasyon aktyel parey in ganny dir ki SPTC pe aktyelman operate lo selman 30 larout segonder dan Sesel, me demann in ganny dir ki i annan plis ki 60 larout segonder ki bezwen sa servis.  Kot sa bann servis i egziste, la sa bann larout i sitiye tre lwen avek Victoria.  Nou vwar ki frekans bis laba i rar akoz laplipar sa bann bis i sorti lo larout segonder tel ki ankor enn fwa dan Bodamier/Capucins, Anse Aux Pins. Zot al direkteman Victoria e answit zot retournen atraver sa menm fason.

Sa i fer Mr Speaker, ki souvandfwa, sa bann bis i tre ankonbre dan bomaten e dan aswar i kit bokou dimoun deryer.

Dan lazournen letan sa bann bis i rar e i annan en kantite dimoun, sirtou bann madanm e bann dimoun aze, par egzanp dan Anse Aux Pins ki bezwen al dan leba swa pou zot al klinik oubyen pou al laboutik, bazar, ou menm al lanmes dan Sanmdi ek Dimans, i napa en tel fasilite pou zot.  Sa i enn bann rezon akoz nou vwar en gran logmantasyon dan taksi pirat.

Mr Speaker, i annan defwa, malgre demann lo serten larout segonder, kondisyon sa bann semen tel ki i tro anpant, napa ase sidings oubyen i annan tro bokou trou, i fer ki servis bis SPTC pa kapab arive laba e menm dan serten ka, bann bis ki SPTC i annan i senpleman tro gro pour sa bann larout.  Tousala i fer ki i annan en nesesite irzan pou Gouvernman adres sa size bis lo larout segonder.  Parey mon’n dir, dan 60 demann, zis 30 dan sa bann larout segonder ki pe ganny sa servis bis.

Mr Speaker, annou regard bann opsyon posib ki egziste.  En premye opsyon se ki Gouvernman i fund SPTC pou agrandi son fleet e donn plis pti bis lo larout segonder, avek posibilite operate serten shuttle service selman lo network segonder, par egzanp dan Capucin, Berlin, Caryole, Bodamier dan Anse Aux Pins, oubyen Gouvernman i konsider liberaliz serten semen segonder ki SPTC pa kapab deservi ditou, oubyen deservi byen me posibilite i reste ki pour SPTC, i kontinnyen lo sa bann semen ansanm avek Sekter Prive, sirtou bann landrwa kot demann i tre o.  La, kot sa servis i ava ganny byen kontrole e regle, par egzanp pri bis oubyen bann diferan konsesyon.

En lot opsyon Mr Speaker, se oubyen liberaliz serten bis, serten servis, privatiz konpletman serten larout segonder, la kot petet pa pou neseser pou met ni pri kontrol lo pri oubyen ni redwir konsesyon.  Me sa opsyon i annan en kantite lenplikasyon.  Dapre lenformasyon ofisyel, Gouvernman i subsidize SPTC apepre R30 milyon par  an.  Sa i enkli aste bis, egzanpsyon lo tax lenportasyon, konsesyon lo fuel, lo larou e menm parfwa, kouver serten loss dan loperasyon.

Alor Mr Speaker, si Sekter Prive i pou operate lo serten larout sirtou larout segonder kot load factor i ganny konsidere, bokou mwens ki lo semen primer, sirtou lo bann larout ki anba 2 kilomet e kot kou loperasyon i konsiderableman o, i pou tre difisil pou Sekter Prive mentenir en pri bis R3 par kliyan par vwayaz.  Reveni anmase pa pou ase pou kouver kou loperasyon, san menm konsider fer profi oubyen ranplas vye bis, oubyen bann bis ki’n kase.

Alor Mr Speaker, dan sa lenstans, Gouvernman pou bezwen konsider subsidize sa bann tel Konpannyen prive atraver diferan egzanpsyon tax, konsesyon fuels, parts, larou eksetera e menm konsider subsidize an cash, depandan serten larout.

Mr Speaker, dapre en letid ki Komite ki’n ganny met anplas pou fer sa tel letid zot in dir ki subsidy par Gouvernman pou bezwen pa pli ba ki R2.3 milyon par lannen pou kouver bann semen segonder.  Sa i enkli kalkilasyon ki’n fer par  en sibvansyon Gouvernman R4.2 milyon par lannen.  Sa i enkli tax egzanpsyon lo lenportasyon bis, fuel, tiles e bann parts.  Gouvernman i osi konsider subsidize par kilomet en loperasyon R3.5 milyon e en subsidy par pasaze.  R2.3 milyon par lannen si i pou oule mentenir pri bis lo R3 par pasaze, par voyaz.  E si Gouvernman i konsider donn en cash subsidy, i pou bezwen donn apepre R1.8 milyon, kalkile lo en R1.5 milyon par kilomet.  Loperasyon pour ki alafen, Sekter Prive zot a kapab fer en profi R0.7 milyon par lannen.  Si Gouvernman pou fer en tel servis limenm, i pou plito fer en deficit R2.7 milyon lo premye lannen e tou le 5an ki i pou bezwen ranplas son fleet, son servis bis, kantite bis lo sa bann semen.

Letan Mr Speaker a monnavi, se apre ki bann operater prive in byen etablir e satisfer demann lo semen segonder, la ki Gouvernman i a kapab tir servis SPTC lo sa bann tel larout, san afekte konsomater.

Mr Speaker, leksperyans dan plizyer parti lemonn tel ki Kenya, Tanzania, Zimbabwe, Chile, India, Malta, i montre ki en tel liberalizasyon lo serten larout dan sa bann servis bis in bezwen mars avek bokou kontrol e regilasyon strikt par Gouvernman oubyen sa Lotorite konpetans ki Gouvernman in swazir pour egzekit en tel servis.  Bonn kontrol ek regilasyon pou bezwen fer sir ki pri bis pou bezwen byen ganny kontrole, pour ki bann zabitan pa pou ganny met a en lenkonvenyans finansyel. Road Safety e konfor pasaze pou bezwen ganny mentenir lo en nivo akseptab, enplimant bann quality controls pou limit kalite e kantite bis ek drayver ki ganny aksepte pou operate lo serten larout, pou evit tro sarze avek pasaze oubyen zis lo serten larout kot demann i plis.

Quality licensing Mr Speaker pour tre enportan, menm dan en lanvironnman liberalize, pou fer sir ki pasaze i ganny plis proteksyon posib kont aksidan, pou fer sir ki bann transpor i dan bann bon kondisyon mekanik pou anmenn pasaze e annan ase lasirans pou protez pasaze.

Mr Speaker, se pour sela ki bokou bann pti pei, sirtou bann pti zil, zot in mentenir en servis bis ki ganny operate par Gouvernman.  Dan serten pei kot kontrol ek regilasyon ti limite letan zot in komans zot liberalizasyon tel ki  Lenn, Chile, Malta ek Kenya, in annan bokou problenm aksidan, konzesyon trafik, polisyon eksetera, ki petet isi Sesel pour en pti pe mwens, vi ki nou popilasyon i pli pti.  Bann pei kot regilasyon in tre strikt parey Tanzania, Zimbabwe, Langleter ek Irlann, sa prosesis privatizasyon in mars tre byen.  Serten lezot pei tel ki Lafrans, zot plito ezite lo en tel lapros.

Alors Mr Speaker, mon donn mon sipor pour en pli bon servis bis ki operate lo semen segonder.  Opsyon pou realiz en tel servis bis pou byensir depan lo letid byen reserse, pou fer sir ki nou bann zabitan i ganny en servis bis ki regilye, reliable e affordable. Si SPTC, par tou lendikatif pe montre ki i pa pou kapab delivre en tel servis, alors Sekter Prive pou bezwen ganny envite pou partisipe pou benefis  devlopman nou pti pei.

 

MR SPEAKER

Which Order. Ki ou oule klarifye?

 

HON JEAN-FRANCOIS FERRARI

Mr Francois in sit en rapor.  Mwan mon ti a zis kontan konnen lekel sa rapor, pou mwan kapab rod en kopi mwan osi akoz kekfwa i kapab dir nou lekel sa rapor kot mon kapab ganny en kopi pou nou kapab fer en kontribisyon meaningful osi dan deba.

 

HON JOSEPH FRANCOIS

Mon krwar resers.  Si Onorab lot kote i fer resers, i ava kapab vwar sa bann rapor.  I available pour nenport ki.

 

MR SPEAKER

I vedir ki sa bann rapor i dan domenn piblik e ki ou senpleman bezwen al rode bann landrwa apropriye.  Bon nou ava move on lo lot speaker. Onorab Hardy Lucas.

 

HON HARDY LUCAS

Mr Speaker, mon pou entervenir lo sa Mosyon pou mwan fer serten komanter spesifik ki pou ed nou vwar kote parfwa nou ganny retar pou atak problenm relye avek bann konsern ek Mosyon ki ganny anmennen dan Lasanble Nasyonal.

Mr Speaker, konteni Mosyon prezante par Onorab Payet, ozordi Mardi 12 Zen 2007, in lo latab Gouvernman byen lontan, parey in ganny dir avan mwan.  An dot mo, sa Mosyon i kapab ganny konsidere koman en repetisyon en Mosyon similer prezante le 28 Mars 1995, spesifikman 12an pase par Onorab Ramkalawan ki ti sel Lopozisyon dan Lasanble  sa letan, Lopozisyon Ini.  Sa Mosyon an partikilye ti ganny debat lo la tre longman e ti ganny sipor bann Manm lo kote latab SPPF, Parti ki mover Mosyon ozordi pe reprezante.  Parey in ganny dir, sa Mosyon ti ganny aprouve inanim, avek 24 vot ki ti reprezant lavwa 24 Manm, ekskli Speaker ki ti pe travay dan Lasanble serye sa lepok, kot zis 9 Manm ki ti absan.  Mosyon ti menm ganny segonde par Onorab Barry Faure ki ti donn en komanter pozitiv e ki ti dir ki SPTC pa pou kapab rezourd problenm transpor piblik ki ti deza en problenm sa lepok.  Se la kot sizesyon pou privatiz serten larout ti ganny propoze.

Leader Biznes Gouvernman sa letan ti Onorab Danny Faure ki ozordi i Minis Finans e Minis Dezinnyen, ti osi donn son sipor sa Mosyon e i ti dir ki Gouvernman ti deza sa lepok 95, okouran sitiasyon e i pe deza travay e fer bann demars pou gete si pou privatiz bis piblik.  Se sa fraz ki i ti servi.  Mon’n zis sit sa enn de komanter e remark Mr Speaker, selman pou ed nou konsider siport bann Mosyon ki bon pour pei ozordi ek demen.  Si nou pa fer sa, nek dan 5 a 10an plitar ki nou pou rod solisyon ki nou ti a’n kapab trouve byen boner.

Mr Speaker, i enportan pou pas dan listwar pou rafresi memwar kan nou bliy keksoz, ouswa nou pa okouran sa ki’n pase.  Se pour sa rezon ki an pasan, mon pe lev en pe sa ki’n ganny dir lepase zisteman pou benefis dimoun ki’n bliye oubyen ki pa okouran.

Mardi le 21 Me 2002, 7an pase, ankor enn fwa size problenm bis ti remonte.  Onorab De Commarmond ti anmenn en Mosyon ki annan relevans avek.  Sa Mosyon ti lo SPTC me selman i annan relevans avek sa enn privatize akoz bokou keksoz ti ganny fer resorti.  Bann entervenan parey Onorab William, ti dir ki problenm bis se pa son schedule. I dir ki napa ase bis.  Remark ti ganny fer ki ant 5er bomaten zisk 9er e 2.30 ziska 6.30 diswar, i neseser annan anviron 145 bis ki pe sirkile lo larout.

SPTC ki sel Konpannyen transpor piblik ti annan sa lepok zis 175 bis ki mon doute si i ankor annan sa kantite konmela.  Ladan, 17 bis ti lo Praslin.  I reste 158.  28 ti avek Kontra.  I reste 130, pandan ki ant 5 a 10 bis i breakdown e nou reste zis avek anviron 120 bis ki fer omwen 25 mwens.  Mon sit sa zis pou dir ki sa problenm lontan i la.  Sa ti  2002.  Avek devlopman parey nou kontan dir, en logmantasyon popilasyon pandan sa 7 lannen plitar, i pou vreman neseser ki nou get dan sa sitiyasyon bis vreman serye.

Onorab Dick li i ti vwar zot lozik e i dir ki ti’n plis ki ler pou shape Gouvernman ek bann Konpannyen paraytatik pour satisfaksyon piblik e se sa ki nou pe fer ozordi.  Si nou fer Seselwa travay par limenm, Onorab ti dir pou napa en bis anndan.  An dot mo, Mr Esparon ti dir larg lanmen Seselwa e donn zot loportinite fer biznes bis.

Mr Speaker, ou menm ki ti en Manm sa letan, ou ti propoz en Komite kelkonk e ou ti dir ki ou pa ganny en konpran akoz Mr Gappy pa kapab vwar son sans dan problenm bis e sizer solisyon ki a ede rezourd li enn fwa pour tou.  Nou dan problenm bis Mr Speaker.

L’Echos Des Iles li, ki en zournal Legliz, ti’n sizere depi le 1 Novanm 1977 ki Gouvernman pa devret vin propriyeter ou monopoliz bann lantrepriz parey transpor piblik.  I pe donn biznes Nasyon Seselwa.  Dan son lopinnyon, i ti krwar ki Gouvernman i devret ranforsi Lalwa ki favoriz prodiktivite e vin gardyen bann prensip, aksyon e progre.

Mr Speaker depi ki sa bann zafer problenm bis ti leve isi e sa size privatiz bis ti ganny diskite, mon pa ti la.  I annan Manm ki ti a’n kontan vwar en solisyon dan son distrik e zot osi zot manda in fini.  Ozordi piblik pe ziz zot ek nou lo lafason ki nou’n zer zot problenm.

Mon annan zis en keksoz pou mwan dir sa bann dimoun. Si piblik in swiv byen bann Mosyon ek bann deba ki’n pase dan Lasanble yer ek ozordi, zot a dekouver ki se Gouvernman ki’n tarde tann zot konsern.  Mon repete, en tel Mosyon ti ganny aprouve depi le 28 Mars 1995 e plis lanfaz lo sa zafer bis ti ganny mete an 2001/2002 e plizyer lezot lenstans.  Se Gouvernman ki pa ti ankor vwar li enportan pou konsider demann bann Manm Lasanble.  Fotespere Mr Speaker, la ki sa size in mont ankor, Gouvernman a pran li o serye e enplimant demann bann reprezantan lepep.  Savedir fer en move pou privatiz bis lo serten larout segonder.  Mon pou siport sa demars.  Mersi.

 

MR SPEAKER

Mersi.  Ou osi ou fer nou rapel listwar osi.  Onorab Nibourette.

 

HON ROY NIBOURETTE

Mr Speaker, mwan letan mon asize mon ekout sa bann largiman ki pe monte lo sa Mosyon ki devan nou, pour mwan i senpleman sa Mosyon pe demann avek Gouvernman dizour pou akseler privatizasyon.  Pour mwan, sa i pa vedir ki sa Mosyon i pa’n zanmen deza ganny aborde dan nenport ki sirkonstans, me sa ki i pe demann nou, se vwar bann posibilite pou akseler sa demann ki’n ganny mete dan Lasanble, kot mwan mon pa ti la sa bann letan, selman mon pe aprann en kantite keksoz.

Pour mwan Mr Speaker, en tel Mosyon i anlinny avek reform ki Gouvernman pe fer si ou oule, pou kontinnyen donn lankourazman bann sosyete sivil, pou partisip e kontribye dan devlopman  e progre nou pei.

Servis bis Mr Speaker i en mwayen transpor piblik kot i fasilit deplasman en dimoun a en pwen pour en lot.  Sa Mr Speaker, i pa en privilez.  I osi en nesesite ki kontribye dan devlopman e prodiksyon nou pei.  Ler mon’n fer analiz lo sa Mosyon Mr Speaker, mon’n remarke ki i annan, si ou oule en gran nesesite pou Gouvernman akseler lo sa Mosyon.  Mon pe dir sa akoz privatizasyon bis dan semen segonder i enn bann keksoz ki’n ganny demande e mon krwar ki i pou osi en keksoz pozitiv pou nou pei e pou nou zabitan.

Mr Speaker, parmi bann benefis ki devret anmennen par sa servis se pou redwir kou Bidze transpor Nasyonal ki SPTC e sibvansyon ki Gouvernman i donn sa menm Konpannyen, i devret ede ki bann dimoun ki ganny deservi par sa servis i kapab depan lo sa servis dan en fason organize e asire.  Mr Speaker, i pou osi en loportinite pou kree plis lanplwa e sa i kapab redwir poursantaz bann dimoun ki pa anploye dan pei.

Mr Speaker, i osi donn bann dimoun prive loportinite pou antre dan biznes kot larzan piblik pa ganny servi e larzan bann dimoun prive i kapab kontribye pou sa proze.  Alor Mr Speaker, mwan ki mon pe sey demande mwan osi pou konsolid avek sa proze ki devan nou, se pou demande ki i annan en letid osi ki ganny fer a profon, pou asire ki bann demann e  bezwen piblik i ganny adrese…..

(Technical problem)

 

HON ROY NIBOURETTE

…………. avek bann serten konstrent ki kapab arive dan tel proze.

Mr Speaker, mon pa pou al pli lwen ki sa.  Mwan mon pou donn sipor sa Mosyon e mon ti a sizere ki sa bann pwen i ganny konsidere e mon pou donn mon sipor pour sa Mosyon.  Mersi.

 

MR SPEAKER

Onorab Francoise.

 

MR TERENCE FRANCOISE

Mr Speaker, mwan osi mon ti a kontan profit sa lokazyon pou remersye bann zabitan Anse Royale pou fer mwan konfyans e dayer tou bann dimoun ki’n fer konfyans SPPF.

Mr Speaker, parey nou konnen, SPTC depi 1977 i fonksyonnen e mwan koman en zenn, mon’n ganny sans vwar e temwanny devlopman ki’n arive avek sa Lakonpannyen.  Mon pa pou al an detay sa bann devlopman, me mon kapab dir ki sa Lorganizasyon in desarz son responsabilite tre byen, prenan kont bann konstrent ki i annan e bann demann, bann presyon ki dimoun pe met lo sa Lakonpannyen.  Nou swete nou ti a vwar li pe fonksyonn pli byen, me parey mon’n dir, i annan serten demann, serten konstrent tel parey aksidan, mank bis and so on, ki  fer ki sa Lakonpannyen pa kapab meet demann dimoun ozordi.  E si ou oule Mr Speaker, i fer ki i kontinnyelman annan demann pou SPPF amelyor son servis bis an zeneral, me i annan en demann pli prensipalman pou ogmant servis lo bann larout segonder, kot sa servis i deza egziste e pou etablir servis lo bann larout ki pankor ganny sa servis ditou e i osi annan presyon lo Gouvernman pou retir lo sa monopoli lo bis piblik e pou ankouraz Sekter Prive pou donn en koudmen.

Si mon pran legzanp lo mon distrik Anse Royale, sa servis i deza egziste lo 2 larout segonder, prensipalman lo semen Mont Plaisir pou al Anse Louis e dezyenmman lo sa semen Bougainville pou al Val D’Endorre.  Sa servis in la pou plizyer lannen e i annan bann fakter ki fer ki zabitan dan sa rezyon pe kontinnyen demann plis servis lo sa 2 larout e en rezon mazer se ki devlopman lakaz dan rezyon montanny e logmantasyon dan popilasyon ki pe servi sa servis in ogmante.

Vi ki distrik Anse Royale i gran dan term popilasyon e pli presizeman an term sirfas grander, mazorite zabitan pa reste obor semen prensipal kot bis i debark dimoun.  I annan pli bokou dimoun ki reste dan sa bann rezyon montanny ki servi sa servis bis lo sa bann semen segonder e mon krwar sa Mosyon ozordi i tous enpe bann Anse Royale.  I vreman enportan pour bann dimoun Anse Royale akoz nou konnen i annan bann lezot larout osi ki annan bann demann pou bann servis bis e poulemoman, SPTC pa pe kapab meet sa demann pour sa bann rezyon.

Mr Speaker, si ankor ennfwa mon refer lo mon distrik Anse Royale, set akoz ler mon’n pas atraver bann lakaz kot bann dimoun, mon’n ganny sans rankontre zot.  Sa demann bis si ou oule i la pour plizyer lannen, tel koman legzanp lo semen Cap Bonm Jean e menm Les Cannelles Estate osi i annan demann pou annan en nouvo servis bis.

Mwan mon pou donn mon full sipor sa Mosyon.  Mon konnen privatizasyon i en keksoz en pti pe kontroversyal dan limenm.  Dapre resers ki mon’n fer dan serten pei kot nou’n vwar privatizasyon, servis transpor in fail me mon krwar, si nou etablir li byen, Gouvernman i pran nesesite, i regard byen bann kote pozitiv, bann kote negativ nou popilasyon i en pe pti, mon krwar sa i pou mars tre byen dan nou pei.

Mr Speaker, ler mon analiz sitiyasyon dan distrik Anse Royale, i fer mwan realize ki i enportan ki Gouvernman i les Sekter Prive pou fonksyonn lo bann larout segonder e mwan mon ti a swete ki bann larout segonder ki SPTC pe deza fonksyonnen, SPTC i kontinnyen fonksyonn lo la me nou pran sa koman en pilot study ki bann lezot larout ki pankor ganny sa servis, les Sekter Prive antre dan sa bann larout avan.  Sa i enpe mwan ki mon ti ava swete Gouvernman i komans fer an premye.

Privatizasyon parey mon’n dir pou annan son lavantaz ek son dezavantaz.  Me sa bann dimoun ki eksperyanse ladan i ava vwar sa, parey in ganny dir, i annan en letid ki’n deza fini ganny fer e mon krwar ki Gouvernman byento a pare pou les nou konnen ki outcome sa letid e parey Onorab Mondon in dir pli boner, Gouvernman byensir pou bezwen etablir son laspe ki kalite servis ki Sekter Prive pou kapab ofer, verifye kalite bis ek grander ki pou ganny servi, lekel ki pou etablir zot schedule. Mon krwar i enportan ki Gouvernman i etablir pou get sa schedule bis, akoz mon pa ti a kontan vwar ki nou annan Sekter Prive ki pe fonksyonnen dan bann distrik ki pa reliable. Nou pa vwar ler in ler pou zot vini, nou pa vwar zot.  Zot pa on time and so on. Mon krwar i bezwen annan en keksoz ki ganny kree si ou oule pou mentenir sa, pou monitor sa bann Sekter Prive.  Nou pa kapab les zot ale koumsanmenm san okenn monitoring akoz mon krwar pour mwan, i pou vin en chaos si ou oule.

Alors Mr Speaker, mwan personnelman ek dimoun Anse Royale osi, pou donn zot sipor sa Mosyon akoz nou anvi vwar ki servis bis dan semen segonder i ogmante kot napa, kot i annan i deza annan.  Mon krwar nou devret vwar plis sa bann servis, kot napa i bezwen ganny mete.  Mon pou donn mon full sipor e mon krwar ki parey mon’n dir, Gouvernman i devret vini, les nou konn sa letid ki’n ganny fer, donn nou rezilta sa letid pour ki ansanm nou a vwar si i krwar i pa bon pou privatize.  I a les nou konnen pour ki rezon zot pe retarde akoz mon konnen i annan bokou konstrent ki vin avek e annan problenm finansman ki vini.  Nou bezwen set up kan i the right time pou fer li e mon krwar tousala Gouvernman li, ler i a pare i a les nou konnen.  E mwan parey mon’n dir, mon pou full siport sa Mosyon.  San okenn dout, mon konnen sa i pou marse e Onorab Payet i kapab kont lo mon sipor pour sa Mosyon.

 

MR SPEAKER

Onorab Pierre.

 

HON DAVID PIERRE

Mr Speaker, Mosyon ki devan nou i en Mosyon ki tre enportan e Onorab Payet in anmenn en Mosyon ki’n ganny diskite dan sa Lasanble pour 12an.  Sa eleman transpor piblik i esansyel Mr Speaker, akoz i permet tou Seselwa pou zot mouvmante e partisip dan devlopman ekonomik zot pei e dan lavi sosyal zot pei.  Nou vwar sa tre klerman par egzanp letan i annan en aktivite Anvil aswar, SPTC i met tou son resours a dispozisyon piblik e nou vwar partisipasyon tou Seselwa, laplipar Seselwa dan sa bann aktivite.

Mr Speaker, i osi enportan pou nou realize poudir i annan en ko-relasyon o ant en bon servis piblik, enn ki efikas e prodiktivite dan travay.  So, alors baze lo sa, i enportan ki Gouvernman i esey rezourd sa problenm ki pou 12an, bann Manm Lasanble pe met devan li e i pankor kapab anmenn en solisyon efikas pour sa problenm.  Parfwa, mon asize mon mazinen.  Mon dir kekfwa vre solisyon i en konbinezon 2 keksoz.  I pa zis privatiz bann larout segonder, me i osi annan pou fer avek SPTC limenm.  In ler pou nou pran SPTC, met li anba en microscope, get son bann problenm ki i pe fer fas avek, get son difikilte ki i pe pas ladan, get bann kalite kondisyon ki i pe donn son bann travayer, get kalite resours ki i pe travay avek e apre, baze lo la, rod solisyon.  Me i enportan pour mwan dir ki solisyon fodre i enn ki efikas  e solisyon fodre ki i lonterm.  Fodre pa ki i en solisyon kour term, kot 2an, ou 3an parey frequency sa Mosyon dan Lasanble, i montre tou le 3an on average nou pe diskit lo en menm problenm.

Mr Speaker, in ler pour nou get sa problenm dan en fason efikas e rezourd li enn fwa pour tou.  Ler ou get Sesel, ler ou drive around, ou vwar poudir nou annan en problenm trafik.  Dan bomaten ou vwar en kantite transpor.  Ou spend 15 minutes pour ou sorti point A to point B ki lanmenm la 2 pa avek kanmarad.  Sesel pa kapab fye.  Si ti annan en sistenm transpor piblik ki ti efikas, nou ti kapab dir, be alright. Mon kapab desann, pran bis pou al travay e kit loto dan lakour.  Be lefe ki problenm transpor i sitan en gro problenm, bann dimoun ki annan en transpor i prefere pran zot loto e desann pou al travay.  So, si ti annan en sistenm transpor piblik ki ti efikas, i ti ava ede soulaz en pti gin sa problenm trafik ki nou vwar toulezour dan bann semen isi Sesel.

Tou distrik Mr Speaker, i pas atraver sa problenm.  Malerezman, bann distrik ki enpe lwen avek Lavil parey Port Glaud li, i sibir sa bann problenm enpe plis.  Larout Morne Blanc initil nou mansyonnen.  Douler lo bann dimoun Mr Speaker.

Si ozordi ou reste Port Glaud, ou vin pran en bis ki sipoze sorti annou dir 12.20 e sa bis pa sorti pour bann rezon ki’n ganny eksplike, napa bis eksetera, Mr Speaker ou spend ou 1 erdtan lo bus stop e apre sa erdtan, ou pran ou another erdtan pou ou ariv kot ou, akoz i lwen.  So pour bann dimoun dan distrik Port Glaud, sa Mosyon i enn ki enportan.  I esansyel ki pour zo,t nou rezourd sa problenm o pli vit posib.

Dezyenm keksoz Mr Speaker, parey bokou bann Onorab ki’n koze avan mwan in refer sorti, sa Mosyon in vin devan Lasanble omwen a 4 repriz e en senkyenm repriz parey Onorab Lucas in dir nou ler Onorab De Commarmond ti anmenn en Mosyon enpe dan sa lalinny, me selman pa direkteman parey sa enn ki la.  I enportan pour nou refer sorti enn de keksoz.  Ansyen Onorab, Minis Danny Faure, ki ozordi i Minis Finans e parey mon’n dir bomaten, i trwazyenm dan Gouvernman Sesel, ti menm dir nou letan i ti koz lo Mosyon Onorab Wavel Ramkalawan an 1995.  I ti menm dir avek nou konmsa poudir tou sa ki Onorab Ramkalawan ti prezante dan sa Mosyon an 1995, tousala ti anba scrutiny. I ti dir nou ki tousala i anba mikroskop cabinet.  That was 12 years ago. Onorab Potter ki li osi sa letan i ti dan sa Lasanble, i ti dir ki sa problenm i en problenm ki reel e ki li i swete ki Gouvernman i akseler parey Onorab Payet pe demann nou ozordi.  Gouvernman i akseler sa ki i deza pe antreprann.  Savedir depi 1992, Gouvernman ti pe antreprann serten travay pou amelyor sa sitiasyon, pour ki zot adres sa problenm e finalman vin prezant sa Lasanble, vin prezant avek lepep Seselwa en solisyon, oubyen plizyer opsyon lo bann diferan solisyon ki i kapab anmennen dan en tel sitiasyon.  Problenm in reste.  An 2003, Mosyon i re-aparet ankor.  Onorab Mondon i vin avek sa ki pour li e mon pa pou al ladan.  Mosyon i re-aparet ankor 2004 e ankor an 2005.

Mr Speaker, tousala, parey Mosyon an 2005 ti pe demande ki Gouvernman i akseler sa prosesis, i akseler lo sa travay ki i a pe fer.  Ozordi mon demann mon lekor en sel kestyon, akoz Mr Speaker ki malgre ki sa problenm in ganny diskite a plizyer repriz dan sa Lasanble, Gouvernman pa kapab, pa ankor kapab come up ek en propozisyon oubyen en solisyon konkret, ki a fer ki sa problenm i ganny rezourd enn fwa pour tou.  Amonnavi, mon krwar Gouvernman i fer fas avek bann problenm ki pli gro ki sa.  I lager avek kimannyer i kapab.  Mon panse poudir si i annan sa volonte politik.  Sa ki manke Mr Speaker.  Si i annan sa volonte politik pou Gouvernman fer en travay solid e come up avek en solisyon, i ti’n devret dan  sa 12an kapab come up avek en solisyon.

Mr Michel parey mon’n dir ce matin in demann Lasanble pou vin serye e pou nou montre nou lefikasite, nou lenportans e nou signifikans dan kontribisyon ki nou kapab fer dan lavi tou Seselwa.  Apre tou, bann dimoun in elekte nou pour nou zisteman fer sa travay, me fodre ki lo bout sa travay ki nou fer, ler nou, nou’n fini nou morso, nou met li dan lanmen en Gouvernman ki pare pou pran konsiderasyon pour sa travay ki nou’n fer.  Si en Mosyon in vin dan Lasanble sa kantite fwa, i vedir ki lepep Seselwa pe demande ki i annan en solisyon e i honest. I lo Gouvernman dizour, i lo Gouvernman SPPF pour li vin avek en solisyon konkret e efikas.  Ankor enn fwa Mr Speaker, sa Mosyon pou aprouve.  Mwan mon pou donn mon sipor e mon swete ki sa enn safwasi, Gouvernman i a montre son responsabilite e i a act efektivman lo demann en pep anmennen par zot reprezantan dan sa Lasanble Nasyonal, sirtou sa voyaz ki la sa in ganny anmennen par en Onorab ki li, parey i ti dir i annan zorey Minis.

En demann kler Mr Speaker in ganny fer par lepep e ki’n ganny rezonnen an unison dan sa Lasanble pou 12an e in plis ki ler pou Gouvernman fer sa deklarasyon.  Mon pe espere, Onorab Francois in koz lo en study, lo en letid ki’n ganny fer parey Onorab Ferrari.  Mon ti ava kontan ganny en pti pe plis lo la.

So, Mr Speaker, mon pa pou pli long.  Mon pou siport sa Mosyon e demande ki parey Mr Michel in dir, nou vin serye.  Demande ki an retour zot travay ek lefikasite e reponn a laspirasyon sa pep tre byento.

E avek sa 2 pti mo Mr Speaker, mon pou termin la e mon pou donn mon full sipor sa Mosyon.  Mersi.

 

MR SPEAKER

Onorab Ferrari.

 

HON JEAN-FRANCOIS FERRARI

Mr Speaker, mon ti a kontan komans mon lentervansyon apremidi pou remersi e felisit Onorab Ramkalawan, Leader Lopozisyon pou son vizyon ki in annan 12an pase, pou li vwar ki sa i en keksoz enportan.  I en size enportan e i en problenm ki pe koz bokou difikilte pour Seselwa e deza depi 12an pase, in rekonnet ki i en problenm ki merit ganny adrese dan en fason irzan.  Lefet ki in lev sa pwen dan sa Lasanble 12an pase, i vedir ki si pou bann dimoun ki annan problenm bis pou ariv kot zot dan bann semen segonder, si zot ti annan Wavel Ramkalawan koman zot Prezidan, zot problenm ti ava’n rezourd 12an pase.  Me malerezman, i annan serten Gouvernman ki pran plis letan.  I annan serten Gouvernman ki pran bokou letan pou zot rezourd en problenm senp.

Sa Mosyon ki devan nou ozordi, i montre nou enn de keksoz.  Premyerman, lo lespri sa Mosyon, kekfwa nou devret pran sa lokazyon pou nou, sirtou pou bann Manm dan Parti mazoriter pou zot reflekte lo lefet ki finalman zot prop Gouvernman pa ekout zot.  Zot prop Gouvernman, kantmenm zot fer bann propozisyon, kantmenm zot, zot annan zorey lepep, zot ki ater lo teren, parey nou ki tande, douler lepep ki santi zot problenm.  Pou bann ki servi transpor piblik ki vid, sa bann problenm avek zot, kantmenm nou ale nou al kot nou Gouvernman nou dir zot, Gouvernman pa ekoute e sa i premye leson.

Parey mon ti pe dir bomaten ler mon ti fer mon lentervansyon lo size International Affairs Committee, mon ti demande ki alavenir sa Lasanble i osi en Lorganizasyon, en group expert dan en sans, ki konsey Gouvernman, ki annan sa kapasite pou zot dir avek Gouvernman, la i la larealite lavi lo teren, akoz lavi i koumsa.  Parey mon’n dir, si i annan parmi nou ki pran bis, mwan mon annan en transpor so, pa tre souvan ki mon pran bis.  Menm tre rar.  Me si i annan parmi nou isi ki pran bis, nou konnen vre realite problenm bis.  E ler nou ti pe pran bis ler nou ti pli zenn, ler nou ti al lekol, nou ti konnen, nou ki konn li pli byen.  Ler nou’n ganny en loto, nou pa’n tro, tro konpran ki savedir ler en dimoun pe plenny problenm bis.  E ler pli lwen ki en loto nou’n ganny en drayver avek en loto ofisyel, la nou’n vin ankor pli lwen avek realite e lefet i reste ki finalman nou retrouv nou dan en sitiyasyon kot nou Gouvernman i ase lwen avek realite lepep e i pa vreman toultan annan son zorey ki ouver pou tann problenm lepep, akoz 12an, R30 milyon par an ki Onorab Joseph Francois in dir nou taler, i koute subsidy dan sa fame rapor ki obviously i ankor en rapor ase sekre akoz i pa oule dir nou kote nou kapab vwar sa rapor.  Me 12an apr, an realite 30an apre, R30 milyon par an pandan sa dernyen 12an.  R360 milyon apre, la prezan ki nou pe vin dan sa Lasanble pou nou vwar ki nou still napa en solisyon.  Nou still napa en solisyon akoz finalman Mr Francois ki annan sa fame rapor ki nou, nou napa.  In donn nou tou bann opsyon ladan, me li i pa’n dir nou ki opsyon li i anfaver.  In donn nou en seri opsyon me an realite li i napa en opsyon.  I napa en preferans parmi sa bann opsyon.  Nou dan Lopozisyon, nou annan preferans akoz nou’n fer sa bann propozisyon pandan en kantite letan.

Mr Ramkalawan in fer li 12an pase.  Onorab St Ange ti fer li pou distrik Bel Air pandan en long entervansyon an 2005.  Tou dimoun in dakor, me still nou pa’n annan sa lafors, sa kredibilite pou nou convince nou Gouvernman pou li ekout nou e pran li o serye.  Ozordi, i enteresan ki set en nouvo Manm Lasanble, Onorab Payet ki ganny – mon pa konnen si i ganny demande, ankouraze pou prezant sa Mosyon akoz i normal ki i vin avek en nouvo Manm, akoz i en ansyen Manm, ti pou santi li anbarase pou en senkyenm fwa oubyen sizyenm fwa pou vin devan sa Lasanble e sipliy sa Gouvernman pou silvouple, ekout nou.

Lot keksoz ki i montre nou sa Mosyon se ki finalman, nou bezwen demann sa kestyon.  Si vreman Gouvernman, nou Gouvernman ki nou annan la i vreman krwar dan lespri  antreprener, dan liberalizasyon, dan les dimoun debrouye, dan larg lanmen dimoun, ale debrouye, fer keksoz, travay, pa depan lo Gouvernman.  Ale, al fer keksoz.  Pourtan, zot tou bann Manm ki’n koze ozordi, zot tou zot in anfaver en prensip liberalizasyon omwen dan sa Sekter.  Mon krwar Onorab Payet li a en moman, in mank en kou, in dir liberasyon.  E mwan mon kontan in servi sa mo akoz liberasyon savedir larg lanmen sa bann drayver bis, sa bann propriyeter bis, sa bann travayer ki lontan ti pe fer sa servis.  Ti pe ale ziska dan kwen pon Les Mamelles anler dan kwen pon Foret Noire, Rochon partou ti pe anmennen.  Ti pe taye kot bazar, ti pe pran pwason dimoun, ti pe met dan kivet deryer dan bis.  Annou ale madanm, annou ale msye.  Degaze, mon esper ou, aret devan ou laport, ornen, anvoy ou piti tou le bomaten.  Mon konnen mon pou pran li.  Tousala ti annan sa servis.  Pou en rezon politik in ganny anbandonnen e la nou pe koz lo en lespri antreprenner e fodre nou krwar dan sa lespri.  Fodre nou krwar ki sa dimoun, sa Seselwa ki nou pou permet li antre dan sa servis transpor lo larout segonder, i pou fer li e i pou fer li byen akoz si nou pa krwar ladan sa ki nou pou fer, nou pou vey li, nou pou madre, nou pou maske.  Zour i mal sote, zour enn son larou lo son bis i lapo bannann, Licensing i vini i pran son licence akoz nou pe veye kot i fer en fot pournou kapab dir, vwar SPTC ti fer byen.  La bann prive zot napa bann respe pour sekirite eksetera, eksetera. So, nou bezwen krwar dan sa keksoz, ok.

E mon swete ki ler Gouvernman i ava tann sa deba ki enportan akoz i al bokou pli lwen ki transpor piblik.  I en deba ki mwan mon krwar i bann prensip ki zot e nou, nou pe met devan, ki kapab aplike dan kantite Sekter lasosyete e mwan, kontrerman avek Onorab Francois ki li i annan en fame rapor.  Nou, nou pa vwar, nou pa konnen kote i ete.  Be kekfwa apre sa deba, nou ava ganny en lide kot i ete sa rapor, sa letid.

Nou, nou annan, Onorab St Ange ti fer en mansyon e lezot entervenan ki ti entervenir otour sa deba ti deza lev sa size ki i annan en sistenm ase senp e ase pratik pou ankouraz devlopman transpor prive lo larout segonder.  Ti en sistenm tender. Ou tender out bann larout. Tender pa vedir ki sa propriyete bis ou bezwen peye neseserman pou li servi sa larout, me si i pe fer larout ki profitab, i rann enpe Gouvernman.  Si i pe fer larout ki pa profitab e ki nou konnen poudir i pa profitab, Gouvernman  i rann li enpe.  I donn li enpe.  Savedir en kote i ed lot kote.  Akoz lontan, bann dimoun ki ti fer Mont Fleuri, ki ti fer Victoria/Les Mamelles, Victoria/Belvedere ti gannyen larzan.  I annan dimoun ki ti fer Victoria/Le Niole kekfwa zot pa ti gannyen. So, i en kestyon tender out. Lo serten larout, ou gannyen en subsidy. Serten larout akoz ou pe benefisye la.  Ou rann Gouvernman pour ki Gouvernman i kapab asir transpor lo network antye dan Sesel.  E sa se en sistenm ki’n deza ganny propoze e ki mwan mon krwar  ki si Gouvernman i serye, se dan sa direksyon ki i devret ale.  Se dan sa direksyon kot ou fer konfyans sa bann antreprener.  Se dan sa direksyon kot ou larg lanmen sa bann dimoun e ou les zot fer bann keksoz.  Swazir en bis ki zot oule, par egzanp sa i en kestyon tre enportan.  Lekel sa dimoun ki pli kapab konnen lekel bis ki pli bon pou li?  Tou sa bann dimoun ki ti annan bis lontan ti bann dimoun parey Flake, parey Pti Claude, Mark Ah-Time.  Tou sa bann dimoun, zot ti dir ou, mwan si mon ganny en pti Toyota Hiace, oubyen lot ti dir ou si mon ganny en pti Toyota Coaster. Sa bann bis konmsa fantastik.  Sa mon kapab travay avek.  Se bann keksoz ki nou bezwen les osi bann dimoun kapab swazir e deside kwa ki pli apropriye.  Nou pa kapab zis al dan Lenn, al dan en lot pei e pran en mark swa Tata oubyen Leyland e nou dir, parey dan tou pei kominis i fer.  La i la ki nou pou servi e nou pou servi sa.  Sa ki pa kontan, zot konnen kimannyer sa fraz i terminen, akoz fek dir lo laplenn le 3 Zen.  Sa ki pa kontan ale, al dan lot pei.  Non.  Nou bezwen fer konfyans bann dimoun e ankouraz zot dan sa direksyon.

Mr Speaker, mon ti a kontan terminen an dizan ki sa ki vin avek sa Mosyon lo transpor piblik dan bann semen segonder, sa Mosyon i bezwen swiv par en lide ki’n ganny leve par Onorab Terrence Mondon.  Ki nou get enpe sa bann semen segonder pou nou met zot dan en kondisyon kot zot kapab akeir sa servis akoz i annan bokou sa bann semen segonder, enormeman sa bann semen segonder, pa zis dan Takamaka, dan Mont Fleuri.  Dan plizyer landrwa ki vreman nesesit en serten travay maintenance, lagrandisman lo la e sa i bezwen vin an paralel.

So, mwan mon annan en Mosyon lo sa size.  Mon pa konnen si i annan parmi zot ki’n fini met en Mosyon lo sa size, me i pa enportan akoz pou mwan, i pa enportan lekel ki’n pas premye, lekel ki pas dernyen.  Si i annan en Mosyon lo sa size, mwan mon pou siport sa Mosyon e mwan antouka, mon pe anmenn en Mosyon lo sa size pou demande ki an paralel avek devlopman, en meyer servis transpor lo semen segonder, nou fer bann lenvestisman neseser pou nou bann lenfrastriktir semen segonder lo en nivo akseptab.  Alors, mon ankor enn fwa e mon dezole mon pa kapab remersi Onorab Payet pou son Mosyon akoz i pa son Mosyon.  E menm bokou bann dimoun in dir la poudir i en bout pou Mr De Commarmond, en bout pou Mr St Ange e sirtou i Mosyon Onorab Ramkalawan ki’n annan sa vizyon 12an pase, alors avek respe mon ti ava remersye…

(Interruption)

 

MR SPEAKER

Mosyon devan nou i pou Onorab Payet.

 

HON JEAN-FRANCOIS FERRARI

Mon ti a kontan remersye Onorab Ramkalawan pou son vizyon, pou li anmenn sa lide devan Lasanble e ki ozordi Mr Payet in anmas sa lide e in vin avek devan e  Onorab, i en pratik Onorab e mwan mon pou vot anfaver sa Mosyon.  Mersi.

 

MR SPEAKER

Onorab Adonis ou pou pli long ki 15 minit?. So, ou annan laparol.

 

HON BERNARD ADONIS

Mersi Mr Speaker.  Bonn apre midi tou bann Onorab.  Egalman, parey mon bann koleg in fer resorti, mwan osi mon ti a kontan profit sa lokazyon pou mwan remersi tou bann zabitan Plaisance ki’n met konfyans dan mwan e osi dan Parti SPPF.

Mr Speaker, mon krwar sa Mosyon devan nou i enn ki tre, tre enportan parey in ganny fer resorti.  En keksoz ki petet mon ti a kontan dir i se ki Parti SPPF in toultan en Parti ki’n ekout son pep.  Parti SPPF in toultan en Parti ki’n fer sir ki i met lentere son pep avan tou.  E lenpresyon ki mon pe gannyen la, sirtou lo kote Lopozisyon, lo kote sa ki Onorab Ferrari in dir, i pe donn nou lenpresyon ki Parti SPPF in toultan let down son pep e ki Parti SPPF zanmen in ekout narnyen ki sa Lasanble in deza dir, oubyen narnyen ki pep Seselwa in dir.  Zis pou reasir Onorab Ferrari, mon krwar mon ti a kontan fer li realize ki si Parti SPPF ti en Parti ki’n toultan pa ekout lepep, pa anbandonn son pep, i vreman drol ki lepep Seselwa mon krwar pandan plis ki 3 manda konsekitiv in donn Parti SPPF sa mazorite.

Mr Speaker, mon ti a kontan aprezan abord sa size.  Mon krwar ki sa Mosyon si ou oule in vin a en moman oportinen parski parey in ganny fer resorti, ozordi nou annan en kantite devlopman ki pe arive partou. Mon krwar si nou onnet avek nou lekor, nou pou vwar sa.  Kot kekfwa 5an, 10an pase, kot devlopman lakaz pa ti arive, devlopman semen pa ti arive, ozordi in arive e dan mon distrik Plaisance, mon krwar sa i leka.

Aktyelman nou annan en semen segonder ki Copolia ki pe ganny deservi par SPTC e nou osi nou annan serten problenm ki nou pe gannyen avek sa servis parski nou krwar ki i en servis ki ti devret en pti pe plis frekaman e petet servis osi i devret pe kapab deservi bokou plis dimoun, ariv bokou pli lwen kot i ti devret arive.  Byento, nou pe koz lagrandisman semen Rochon e petet ankor, i pou annan sa nesesite pour ki i annan sa servis bis segonder osi ki ganny mete dan sa rezyon.  Alor, mon krwar ki sa servis dan semen segonder i pou definitvman en pwen enportan pou distrik Plaisance parski i pou deservi en kantite nou bann dimoun.  E pou mwan, mon pou siport sa Mosyon definitivman e anmenmtan, mon ti ava kontan fer sorti en keksoz.

Mon krwar ki avanler ki nou koz privatizasyon, i enportan osi ki nou realize poudir i annan en kantite problenm ki ale avek privatizasyon.  Mon krwar dan lepase, nou’n vwar en kantite kot petet Lopozisyon menm in kritike, kot ler nou fer privatizasyon vitman, oubyen ler nou fer privatizasyon ki pa’n plan ase byen, mon krwar zot menm zot ki kritik bokou e mon krwar i enportan osi ki avanler nou sot, annou dir anbark lo bato privatizasyon, mon krwar i enportan ki nou fer sir nou analize, nou get son 2 kote.  Nou gete kwa ki pou byen, kwa ki pou mal, pour ki nou pa repet bann menm problenm ki’n arive dan lepase.

E en keksoz ki mon krwar i enportan osi note i se ki i annan progre ki’n ganny fer.  I vre ki sa Mosyon i en Mosyon ki lontan.  In deza ganny mete avan, me selman mon krwar nou devret etre realis.  Mon krwar i annan letid ki’n ganny fer e in ganny mansyonnen oparavan par mover Mosyon ki i annan en keksoz ki’n ganny fer lo lapar Gouvernman e ki byento, i annan en rapor ki pe ganny sorti.  Mon krwar petet avanler nou tro kritike, ti ava byen ki nou esper sa rapor ganny met devan, pour ki nou kapab fer bokou plis analiz lo la.

Mon krwar Mr Speaker, ki sa problenm ki parey mon’n dir, sa problenm transpor piblik sirtou dan larout segonder i enn ki mwan osi mon krwar i devret ganny adrese e enn ki mon krwar i pou dan lavantaz tou bann dimoun, tou pep Seselwa.  E mon krwar ki sa Mosyon limenm si i ganny aprouve, i pa pou neseserman amelyor servis bis piblik dan distrik, me i pou osi annan plizyer lezot lenplimantasyon ki mon krwar i pou dan lavantaz pep Seselwa an zeneral.

Mon krwar sa Mosyon i pou osi parey in ganny mansyonnen oparavan.  Mon krwar i pou anmenn en kantite loportinite lanplwa dan distrik, dan pei an zeneral.  I pou osi si ou oule demontre, mon krwar sa partenarya ki Gouvernman in toultan koz lo la e sa partenarya ki Gouvernman i anvi si ou oule, fer sir ki Sekter Prive i osi kontribye son par dan devlopman pei.  E mon krwar ki Gouvernman in montre ki i serye dan sa domenn parski in annan plizyer privatizasyon ki’n ganny fer dan pei pandan sa dernyen 5an, ki mon krwar nou tou nou konnen.  E ankor sa pou mwan i en laprev ki Gouvernman i serye e i en laprev ki Gouvernman i non selman anvi fer privatizasyon me i anvi fer en privatizasyon ki byen e en privatizasyon ki demen pa pou anmenn lezot reperkisyon pou nou prop dimoun.

Mon ti ava kontan finalman remersye mover sa Mosyon Dokter Payet e asir li ki i pou ganny mon sipor pou sa Mosyon.

 

MR SPEAKER

Ou oule entervenir?  I reste zis 5 minit avanler nou break. Nou ava adjourn ziska 4er.

 

(BREAK)

 

MR SPEAKER

Mon oule averti zot ki i annan en bon pe Manm lo lalis devan mwan ki pankor koze. So, mon’n diskit kimannyer nou pou kontinnyen avek sa deba avek le 2 Dirizan e mon krwar nou’n tonm dakor ki nou bezwen egzers time limit. 10 minit maksimonm pou bann entervan ki reste.

Mon ava komans avek Onorab Bernard Georges.

 

HON BERNARD GEORGES

Mr Speaker, mon konsyan letan pa dan nou faver me  mon ava sey fer mon Lentervansyon pli vit posib.  Mon pa pou koz pandan letan.

Mr Speaker, anmezir ki mon’n ekout lentervansyon apre midi lo sa Mosyon, i paret ki Lasanble i koz kler e se Gouvernman ki pa tande.  I tris pou dir ki se pa Lasanble ki pa serye.  Lasanble in montre par son travay lo sa Mosyon ki i serye.  Se Gouvernman ki tris pou dir ki pa serye akoz in kapab kit en Mosyon avek tel lenportans pou telman dimoun ki bezwen sa servis toulezour pandan sitan lontan.  I pa en lekskiz Mr Speaker pou Onorab vin dir parey Onorab Adonis, Gouvernman i bezwen pran son letan, pa rush dan sa bann keksoz, oubyen parey Onorab Francoise in dir, Gouvernman ava fer li ler i santi li bon.  Kontre dir anefe sa Mosyon limenm ki pe demann Gouvernman akselere.  I pe dir  Gouvernman, be bouze, nou’n ase espere, nou’n fatige espere, montre nou en serten kalite keksoz.  I pa en lekskiz pou dir Gouvernman ava fer li ler i santi li bon.

Mon krwar ki nou tou nou’n aksepte ki Gouvernman i overdue en solisyon konkret dan sa size e mwan Mr  Speaker, mon ti ava kontan al kekfwa en pti pe lwen ki sa Mosyon. Mon konpran Mosyon akoz in ganny praise dan sa fason.  In ganny limite a bann semen segonder akoz anefe semen segonder se en  problenm e semen segonder se en lour.  I en lour lo SPTC kimannyer i pou desarz sa servis, kimannyer i pou anmenn sifizaman bis e alor sa ki paret mwan Gouvernman i anvi fer se shunt sa lo en Lakonpannyen Prive ou plizyer Lakonpannyen Prive, an dizan la la, nou’n privatize.

Mr Speaker, i annan defwa se pa koumsa ki nou devret travay e Gouvernman in montre li byen e bokou pli vit, in azir ler in fer open skies policy. Napa 12an ki nou pe koz lo open skies policy. En sel kou voup, voup, in fact nou tou nou pa ti menm konnen i pe vini.  Zis nou aprann en zour ki Gouvernman in sanz son polisi, open skies. Emirates pou antre, Qatar pou antre, sepa lekel ankor pou antre e Air Seychelles i ava bezwen compete.  Air Seychelles in compete byen normalman.  Lesyel pa’n tonbe.  Kekfwa menm keksoz i devret arive dan sa sirkonstans.  Olye regard zis semen segonder, nou devret kekfwa regard  SPTC as a whole. E la mon pa pe re-envant larou.  Ler mon dir ki servis kontra, akoz nou pa privatiz sa?  Servis lanterman, akoz nou pa privatiz sa?  Akoz limenm li i vin en lour.  Tou bis SPTC i ganny bezwen ler en lanterman i ganny fer 3er a 4er apremidi e sa bann bis i ganny sorti, i ganny tire dan en servis ki neseser pou transport dimoun ki’n travay en zournen ki pe al kot zot.  La i annan en konfli e  mwan mon ti ava sizere ki nou devret demann avek Gouvernman dan konteks sa Mosyon.  Mon pa pe al demann okenn lamannman, be demann Gouvernman dan konteks sa Mosyon, si i ankor pe fer sa letid e Onorab Francois i ava dir nou si sa letid in fini oubyen si i ankor on-going. Dan konteks sa letid, met tou sa bann pwen devan.

Enn bann keksoz ki’n resorti la apremidi e ki nou tou nou konnen i en problenm se eski en dimoun pou pran en bis Anvil ki pe al Intendance, ki pou pran en bis Anvil ki pou sorti Kordgard Quatre Bornes e apre i pou pran en pti bis segonder pour li al laba Bazarkar, whatever? Mon pa vwar i fer okenn sans.  In any event i pou fer li vin day fare. Akoz nou devret enpoz sa problenm?  Mwan mon krwar nou devret regard semen segonder, ou at least bann expert akoz mwan mon pa pretann mon expert dan sa domenn.  Bann expert ava regard servis segonder koman en lenstans servis primer e ou ava konnen ki lo Stenn bis, bann dimoun ki reste depi Quatre Bornes.  Pou pran en legzanp.  Depi Kordgard Quatre Bornes ziska Grand Police, zot ava konnen ki i annan en pti bis la ki zot kapab hop in ladan e sa bis pa pou aret ditou dan semen akoz i pou plen avek zot bann dimoun ki pe al laba e ou pa pou bezwen sanze.  Ou pou al ziska kot ou dan sa menm bis ki ou komans avek.

Mon ti ava krwar ki i ava sensible pou regard li dan sa konteks, instead ou regard privatizasyon zis semen segonder as an item, me regard li as an extension of the whole. E kekfwa akoz aret ek semen segonder, annou al pli lwen e annou al osi lwen ki posib pou nou fer sir ki ler nou privatiz en Sekter parey nou’n fer avek open skies policy, nou privatiz li dan en fason pli global, pli larz ki nou pe regarde dan sa Mosyon.  Mon krwar si nou reste lo size semen segonder san regard bann lezot posibilite dan son zalantour, nou pa pe fer lazistis ni a nou Lasanble, ni a sa Mosyon, ni a Gouvernman ki pou ganny demande pou li antreprann sa travay e ni finalman a nou sosyete.

Avek sa detrwa pti parol Mr Speaker e konsyan letan ki ou’n limit lo nou apre midi, mon ti ava kontan termin mon lentervansyon e donn mon sipor sa Mosyon.

 

MR SPEAKER

Onorab De Commarmond.

 

HON CHARLES DE COMMARMOND

Mr Speaker, pou al en pti an vites.  Mosyon ki devan nou, mon’n antann la bann speakers ki’n koze tre enteresan lo sa Mosyon e  anmenmtan, mon’n note Onorab Ferrari koman i dir ki si nou ti’n ekout Leader Lopozisyon fer vizyon sa letan ensidswit, problenm ti’n rezourd.

Mon pa pourtro dakor avek li la.  Mwan mon zis pe wonder en pti pe sa zafer issue transpor piblik.  An 1977 letan mon krwar bann nou menm la ti donn lanmen fer sanzman, ti prive bann bis la.  En zour mon krwar zot dir mwan Jean-Francois ti ladan, osi monte ek en gran fizi komans pran bann…

(Interruption)

 

MR SPEAKER

Onorab, retourn lo Mosyon.

 

HON CHARLES DE COMMARMOND

Mon pe eksplike kimannyer SPTC ti ganny kree konmsi.  Mon pe wonder si sa bann dimoun then ti napa vizyon, oubyen zot ki ti la, ou papa ensidswit, avek respe mon pe dir sa, me selman eski zot pa’n konsey Gouvernman sa letan pou dir nou pa fer sa?  Konmsi mon zis pe larg sa pou nou think enpe, pou dir i pa en kestyon vizyon Onorab Ramkalawan, me mon krwar ti byen ki ti fer sa letan, pou fer SPTC.  Ti byen li e sa letan dan Sesel – konmela bokou pei devlope i annan servis transpor piblik akote.  Sa i mars lo bout osi.  I  la, zisteman nou pe demande.  I annan enpe letan nou pe demande ki pou annan sa.

E osi Mr Speaker, i ……

(Technical problem)

HON CHARLES DE COMMARMOND

Sesel Mr Speaker, nou bezwen admet pandan sa 30an/31an in devlop en kantite e prezan semen nou’n fer dan sa pei in tro bokou pou nou prezan e SPTC, – I fe sa.  SPTC prezan pa kapab met bis parey nou nou pe demande partou dan tou sa bann semen.  Ou konpran?  I zis en kestyon mwan mon krwar ki nou devlopman semen in al bokou pli vit ki devlopman SPTC e ki nou pei i tipti, resours i limite.  Pa kapab annan tou sa bis pou deservi tou sa piblik parey nou ti ava anvi.

Zisteman i nou dan Lasanble ki byen ekout nou pep, nou’n anmenn a diferan moman sa bann Mosyon, pou sey dir annou revwar en pti pe.  E la si nou pe dir Gouvernman tou sa letan pa’n ekoute, pa isi, pa laba.  Mon pe wonder Mr Speaker, si pa bann green bangles dan Gouvernman ki pe tard sa zafer akoz seryezman, akoz Mr Prezidan Michel in dir dan plizyer son lentervansyon ki nou bezwen al dan sa direksyon.  Be i annan bann dimoun ki sipoze prezan pou met an pratik sa ki dir sa, sa le problenm ennler nou gannyen.

Any way. Lot issue se ki nou bezwen vwar SPTC.  Eski petet pa en moman la?  Mon krwar se sa en pti pe, osi Gouvernman osi i annan sa tarde en pti pe amonnavi, i bezwen pa zis konmsi ale privatize serten larout koman nou pe dir li, me kekfwa i annan serten keksoz toultour, ki bezwen gete par egzanp SPTC, eski pa nou devret pe kree en Public Transport Authority petet?  Mon pa konnen mwan.  Bann pwen parey Onorab Georges pe dir, i bann konsern ki nou pe mete, ki whoever ki pe deal ek sa i bezwen komans pran an konsiderasyon kestyon pri bis.  Taler in annan enn in mansyonnen, kestyon serten larout.  Zisteman, letan nou pe koz larout segonder la, eski prezan nou pou al kree sitiyasyon pou en boug pran 2 bis?  Cascade anler dan leo, nou’n fer semen.  Ti napa lontan bann zafer.  Nou’n fer.  Prezan dimoun pe komans demann bis.  E mwan mon’n vwar mwan, SPTC pa pou kapab anmenn bis laba.  Si pou anmenn gro bis, semen bezwen al rekase, refer.  I annan bout ki sere.  Ou bezwen anmenn  pti bis, zisteman.  Alor, si ou pou fer sa boug pran 2 bis, prezan mon pa krwar i zistifye.

Selman nou pe dir la anmenmtan ki nou pe pas sa Mosyon.  Nou tou mon krwar nou’n tonm dakor ki sa Mosyon i bon.  Nou bezwen pas li.  I konplemant tou sa bann lezot Mosyon ki’n vini e la zisteman, mwan mon fer en lapel avek nou Gouvernman.  Ou’n dir nou’n fer en Lasanble serye wi.  Mon dir la sa Lasanble mon vwar kimannyer i pe demare, korvet, serye. On a serious note, laverite.  E nou pe demann osi Gouvernman pou serye.  Bann bout ki zot pe tarde avek, si i annan retar, nou pe dir, annou al en pti pe pli vit akoz nou dimoun osi laba i pe soufer.  I pe esper en pli bon servis bis an bonn fwa akoz sa pli bon servis bis i pou permet ouswa i enportan permet logmantasyon prodiksyon.  Prodiktivite i lie direkteman.  Plen dimoun dan Cascade k’in apros mwan depi dan bomaten mon desann.  Parfwa mon gete, 8er mwen dis, 8er mwen 5 ankor lo bus stop. Mon dir sa pou al ganny retar avek lanbouteyaz ki annan dan semen letan n’ariv ver Lavil.  Mon fini vwar bann dimoun pe ariv tar dan travay ouswa Teachers, ki swa menm parfwa manrmay lekol e lezot travayer mon konnen zot pou al ganny, avek letan serten warning. E mon demande pour ki sa bann keksoz vreman i ganny akselere, pou nou vwar solisyon.  Sa ki nou anvi vwar, nou koman en Lasanble serye, se ki nou oule vwar solisyon pou sa bann problenm Mr Speaker.  E ki nou demande ki Gouvernman i la, sirtou ki Prezidan ki’n anonse, in dir.  Nou Prezidan i en Prezidan serye e alor nou dir ki sa bann keksoz, annou ale vitman, annou fer.  Si  fodre letan nou’n fer serten propozisyon revin en pti pe dan Lasanble, revin eksplik nou, fer en sesyon avek nou pou vwar si nou annan keksoz pou input pou fer ankor.  Annou fer li avek en bon lespri.  Mon krwar mwan ki nou devret al  devan dan sa fason.  E pour mwan mon vwar ki alor sa ki nou pe koze, en fason ki SPTC li or whoever Lotorite i a konsantre bokou lo semen primer, dan en fason ki enn a konplemant lot e parey mon’n dir, ki swa sa piblik Seselwa ouswa menm sa touris, menm sa viziter i kapab vreman enjoy parey nou letan nou al dan serten pei kot transpor i mars byen.  Alor ou anvi ki isi osi letan zot vini, zot vwar ki Sesel pratikman son sistenm transpor i mars byen e sistenm transpor ki vreman sa dinamo si ou oule dir, pou fer avanse sa pep.  Pou fer li bouz pli byen.  Travay, ensidswit e dan son letan lwazir anmenmtan.

Dimans letan pour li al lanmes, sa dimoun i pa esper bokou letan Cascade lo bus stop pou li ganny son sans pou li al priy son Bondye, pour ki i anmenn prosperite pou nou tou alafen dizour.

Mr Speaker, avek sa mon terminen e mon dir kareman ki mon pou donn mon full sipor sa Mosyon.  Mosyon i en Mosyon merite e sirtou ki nou komans sa Lasanble avek en Mosyon parey.  Mon krwar mwan ki nou pe al byen.  I en Mosyon ki tous nou pep, i tous bokou dimoun e tou nou dimoun ki neseser e koumsa i konplemant sa gran devlopman ki sa Gouvernman SPPF in anmennen dan sa pei.  In ofer nou ki nou avans ankor anba Gouvernman SPPF. Nou al bokou pli lwen, ek letan ki nou vwar ki bann Lotorite i a met an pratik sa ki nou pe dir dan sa Lasanble.

 

MR SPEAKER

Onorab Potter.

 

HON MARIE-LOUISE POTTER

Mr Speaker, mon pou sey bref mwan osi.  Mon krwar bokou in ganny dir lo sa size me mon pou difere lo serten lopinnyon ki konsern sa size ki Gouvernman pa ekoute, pa’n ekout nou e mon sertennman krwar ki lo sa size e size sa Mosyon ki devan nou, nou Lasanble in koze.  In koz an plizyer repriz e Gouvernman in sertennman ekoute.

Gouvernman in ekoute akoz dan Bidze 2005 parey Onorab prezantater Mosyon in fer nou rapel, Prezidan Michel ti anons lentansyon Gouvernman pou privatiz servis bis lo bann larout segonder e swit a sa, Gouvernman ti komisyonn en group letid pou etidye sa propozisyon.  Pou etidye sa size ki’n preokip nou Lasanbe pour en bon pe letan e an Me 2005, sa Komite ti prezant en rapor preliminer avek Gouvernman lo serten rekomandasyon ki pe ganny avanse.

Mr Speaker, sa lannen menm dan Diskour Prezidan lo Leta Lanasyon an Mars 2007, Prezidan ti deklare ki Gouvernman pe al reviz polisi lo size permet privatizasyon bis lo larout segonder e pou mwan sa i laprev ki Gouvernman in ekoute e Gouvernman pou kontinnyen ekout bann sizesyon ki pozitiv sorti kot Lasanble.

Mr Speaker, dan dokiman stratezi 2007/2017 osi i annan en komitman ki osi enskrir lo sa size.  Ki montre klerman ki direksyon e ki pozisyon Gouvernman in pran lo sa size e mon krwar i kler pou nou isi dan sa kote ki Gouvernman pe bouz dan sa direksyon.  Me i enportan  kan nou analiz sa size, nou get li dan tou son konteksite, dan tou son profonder akoz i pa en size osi senp ki parey petet serten Manm i parfwa esey enterprete.

Mr Speaker, ler nou get realite SPTC ozordi, i kler ki landscape transpor piblik in sanze.  I kler ki teren sa domenn in sanze.  I kler ki lekspektasyon lepep in sanze.  I kler ki i annan plizyer devlopman ki’n met plizyer presyon, plizyer demann.  Ler ou konpar sa servis ozordi par rapor avek lannen ki ti komanse, ou pou vwar ki ozordi SPTC in evolye e pe deservi bokou plis larout ki oparavan.  SPTC i annan bokou plis bis lo semen.  Aktyelman mon krwar zot annan anviron 225 bis e zot pe servi 49 larout konpare avek detrwa bis ek detrwa larout ki ler zot ti komanse.  SPTC i anploy anviron 500 travayer e Gouvernman in kontinnyelman subsidize servis ki sa Konpannyen i ofer e aktyelman, Gouvernman pe subsidize sak tiket bis pou en to R2.43 sou.

Mr Speaker, pri bis in enn ki’n reste stab parey pri diri dan sa dernyen 30an e in en pri ki pli ba dan larezyon e pli ba dan plizyer pei ki bokou nou, nou ganny sans voyaze.  Ozordi, bann etidyan pos segonder pa pe peye pour servis bis e bann pansyonner pe ganny bis gratwit.  Tousala i bann devlopman, i bann sikse, i bann progre ki sa Konpannyen in fer sa dernyen 30an e sa dernyen 12an depi ki sa size ti ganny entrodwir dan Lasanble.

E sa ki pli enportan Mr Speaker malgre tou, SPTC in kantmenm ofer en servis regilye e en servis afordab pou tou kous nou popilasyon.

Mr Speaker, ozordi larealite i ensi ki i annan bokou plis lentere par Sekter Prive pou antre dan sa domenn e i osi anlinny avek polisi Gouvernman pou ouver enpe serten Sekter Lekonomi e servis pou permet partisipasyon Sekter Prive.

Prezantasyon fer par Onorab Mondon e par Onorab Francois in donn nou lide konpleksite sa size servis bis e privatizasyon ki asosye avek.  I sertennman  pa en size osi senp ki parey Onorab Lucas, Pierre e Ferrari in esey avanse dan sa Lasanble.  E se pour sa rezon, se pour sa konpleksite sa problenm  ki Gouvernman in konsyan, in pran letan pou li kapab fer en letid e ki en letid ki’n satisfer son lekor avan i pran en desizyon final lo sa size.  E se pour sa  rezon ki Gouvernman pou senpleman, pou selman pran en desizyon dan sa direksyon a kondisyon ki Gouvernman i gard son lobligasyon sosyal vizavi transpor piblik dan Sesel.

Dezyenmman, Gouvernman pou selman pran sa opsyon, a kondisyon ki i fer sir ki pri bis i reste stab e ki i reste fikse par SPTC, oubyen sa Lotorite ki ava oversee sa tranzaksyon.  Gouvernman pou selman les antre dan privatiz pwen en pozisyon dan sa direksyon, a kondisyon ki tou semen  segonder, primer ou feeder road i annan en servis ki regilye e ki reliable.

Mr Speaker, byensir Gouvernman pou pran en pozisyon lo sa size selman si i kapab garanti ki bann lavantaz ki bann etidyan e bann pansyonner pe gannyen konmela i reste parey.

Mr Speaker, ler mon ekout lentervansyon ki Lopozisyon in fer lo sa size, i fer mwan realize ki Lopozisyon malerezman, malgre tou sa lannen leksperyans ki zot dan sa Lasanble, zot napa en lide koman ni en pei, ni en Gouvernman oubyen, ni en Konpannyen Transpor i marse.

Mr Speaker, se sanmenm sa lapros, mon pou apel sa quick fix ki Lopozisyon i tant pou pran lo bann size konpleks parey en servis transpor piblik ki’n fer pep Seselwa pandan 4 repriz fix zot dan bann eleksyon ki’n pase.

Mr Speaker, i enportan note ki depi ki Lasanble ti diskit sa size pou premye fwa an 1995, SPTC in ogmant en kantite son servis dan son domenn.  Par egzanp, SPTC in ogmant son servis lo plizyer larout, enkli lo 24 larout segonder ki nou pe koz lo la ozordi.  SPTC in osi fer desann son bann tarif bis sorti R5 pou vin R3 across the board e SPTC in osi ogmant subsidy ki i donnen pou bann zanfan lekol e redwir pri, fer li gratwit pour bann  zanfan post segonder.  Alors, pou dir ki depi 95 ziska ozordi SPTC in reste static e nanryen pa’n amelyore, narnyen pa’n bouze, mon krwar i en pti pe iresponsab.

Mr Speaker, mon vwar li difisil pou nou pa kapab evit polemik lo en size kot nou tou nou agree lo la.  Mon en pe regrete kantmenm pozisyon ki Lopozisyon in avanse lo sa size, menm si zot pe dir ki zot pou siport li.  Mon krwar si en keksoz i bon pour Sesel parey zot dir, i bon pour Seselwa.  Mon pa vwar akoz zot bezwen fer sa ta polemik parey zot in fer lo sa enn Mosyon apre midi.

Mr Speaker, avan mon terminen mon ti ava kontan felisit bann Manm ki dan nou kote ki’n koze, sirtou bann nouvo Manm ki’n pran laparol.  Nou vwar avek en divan ki i annan en lot nivo deba ki pe ganny devlope dan sa Lasanble.  Nou vwar en resers bokou pli aprofondi ki pe ganny fer lo bann size parey e sertennman, nou pe vwar en nouvo zenerasyon e mon konvenki ki sa Lasanble pou enn ki pou travay serye e enn ki pou responsab. E avek sa mon ti a kontan asir Onorab Dr Payet ki mon pou donn mon sipor total sa Mosyon.

 

MR SPEAKER

Onorab Ramkalawan.

 

HON WAVEL RAMKALAWAN

Mr Speaker, mon pou komans avek en mo ki apel polemik ki’n ganny servi.  Mon pa vwar okenn polemik dan sa deba mwan.  Mon pa’n trouv okenn sepa gran diferans.  Sel keksoz se ki bann Manm, – tou Manm dan sa Lasanble, komansan par mover Mosyon in demande ki Gouvernman i akselere.  Se sa, mo akselere parey Onorab Nibourette in servi e letan nou pe demann pou akselere savedir ki tou Manm dan sa Lasanble in rekonnet ki poudir i annan en problenm.  Ki poudir zot pe al tro dousman e alors si Lopozisyon i dir Mosyon i annan 12an, si Lopozisyon i dir ki keksoz fodre ganny fer dan en fason pli vit, si Lopozisyon i dir Gouvernman in trenn son lipye, napa narnyen polemik ladan.  Polemik mon pa trouve ekzakteman kote Onorab i trouv sa, parski finalman sa Lasanble an antye pe dir enough is enough  and get on with it. Parski i annan 12an depi ki nou pe koz lo sa size.

E taler, letan Onorab Nibourette limenm li in dir, in dir li pour li le sel mo ki i vwar enportan ladan se sa mo akselere.  Me sa ki Onorab Nibourette pa’n realize se ki sa mo akselere ti deza dan Mosyon Onorab St Ange le 28 Zen, letan Onorab St Ange ti demande ki Gouvernman i konsider akseler sa bann prosesis pou licence piblik.  Savedir konmsi zot ti pe fer 50.  Onorab St Ange i dir akselere.  In ariv 75 e ozordi Onorab Payet i dir akseler ankor.  Savedir i fer li vin 100.  Setou ki nou pe demande.  Pou keksoz bouze e akoz nou pe demande pou keksoz bouze parski parey nou tou nou konsern se sa pep.  Setou rezon ki nou pe demande.  Sakenn pe dir li dan en fason.  Napa personn ki pe fer diskisyon, ki pe fer kankan, ki pe rod met en tournavis dan masin, met delo dan bennzin, non.  Okontrer, tou dimoun dan  sa Lasanble.  Lasanble i ini lo sa pwen.  Se annou zwenn ansanm e demande ki once and for all en desizyon i ganny pran e sa bann larout segonder, privatizasyon i ganny fer.  E petet sa ki Onorab Potter pe sey dir avek nou se la kot ankor enn fwa i pa tro ekzakt sa ki i pe dir nou parski Prezidan Michel letan i ti vin dan Lasanble le 20 Mars, regard son parol ekzakt ki Onorab Payet in site.  I ti dir, pou amelyor nou rezo transpor, nou pe konsider posibilite, konsidere limenm li i en mo ki i napa ni wi, ni non ladan.  Posibilite i al pli lwen ankor, kot ou pe regard sa posibilite.  Ankor enn fwa in servi 2 mo ki i pa tro sir ladan parski sa 2 mo i pa donn en direksyon kler.  I vag e i pe konsider posibilite permet operater endividyel ki enterese pou ofer en servis ki pou konplemant servis fer par SPTC.  E la ankor enn fwa, sa ki pe ganny demande, in ganny demande pandan sa dernyen 12an.  Nou’n met lanfaz lo sa servis pou bann larout segonder me parey nou pe dir, i annan bokou bann lezot servis ki kapab antre osi ladan e sa bann diferan servis se tousala pou konplemant sa servis SPTC e mwan parey mon pe dir Mr Speaker, mon pa vwar okenn diskord dan lafason ki sa Lasanble apre midi in anmenn son deba parski son deba i kler.  I annan en lobzektiv e sa se donn lepep Seselwa en servis bis ki pou pran li Jerusalem, ki pou pran li Hangar, ki pou pran li dan en landrwa kot i ete, pou anmenn li dan son landrwa travay, parey Onorab in mansyonnen avan, pou li kapab prodwir, pou li kapab vin pli efikas.  Pou li nobou ariv boner dan son travay.  Pou li kapab resevwar en soulazman.

Setou ki sa Lasanble pe rode e sa Lasanble pe rod sa depi 12an e letan mon ekoute ankor Mr Speaker, mwan.  Serye.  Sa bann zafer rapor in konfiz mwan.  Akoz in konfiz mwan?  Onorab Joseph Francois li in dir avek nou, rapor in fini konplete e letan Onorab Ferrari in demann kestyon pou kote kapab ganny sa rapor, Mr Speaker ou menm ou, ou’n dir sa i dan domenn piblik.

Lo lot kote, Onorab Nibourette in dir fer en letid.  Onorab Francoise in dir en lot keksoz ankor vizavi sa letid.  Onorab Adonis in dir rapor byento pou pare, konmsi sa letid byento pou pare.  Onorab Potter in dir avek nou an Me 2005 sa rapor ti ganny prezante.  En premye draft ti ganny prezante, me selman letan Onorab St Ange ti prezant son Mosyon le 28 Zen 2005, sa bann keksoz pa ti ganny dir ladan, ki finalman sa bann zafer rapor in vin en nespes konfizyon, absoliman parey letan Onorab Payet, letan i lo teren, letan i al kot SPTC, SPTC i dir avek li La Gogue i sipoze annan 12 trips per day. Letan i al lo teren, i dekouver poudir i annan zis 6.

En lot bout semen ankor letan i ale zot dir avek li be la i annan 15.  Letan i al lo teren i remarke poudir i annan zis 6.  I annan konfizyon e keksoz pa sa degre kler.  E nou ler nou pe koze, nou pa pe dir SPTC i statik.  Se pa sa mo statik ki nou met lenportans lo la.  Se sa mo efikasite. By now, SPTC ti’n devret en Lorganizasyon ki ti’n devret pe grandir, anmezir ki i annan plis semen segonder.  Eski parey Onorab De Commarmond pe dir:- ‘Ar, semen in vin enpe tro vit.’  Be si semen pe bouz vit li osi, tou i bezwen bouz vit.  Dan sa ka, i vin menm parey.  Kekfwa nou ava koman annan, well anler La Gogue Khandahar, i annan kot bann dimoun i ankor pe servi delo larivyer.  Eski nou pou dir taye?  Nou fer lakaz me selman letan pou al rod delo, letan pou al rod elektrisite, nou pou dir non, non.  Ou konnen poudir elektrisite i enpe tro dousman.  Devlopman lakaz in al enpe tro vit.  Non.  Fodre ki son …

(Interruption)

MR SPEAKER

Kontinnyen Onorab.

 

HON WAVEL RAMKALAWAN

Fodre ki bann keksoz i bouz anmenmtan e SPTC koman en Lorganizasyon, se la ki nou pe kestyonn son lefikasite pou li kapab, anmezir ki pei pe devlope.  Si nou pe koz lo devlopman pei, fodre ki delo li osi tou i pe devlope.  Elektrisite pe devlope.  Servis bis pe devlope.  Tou sa bann keksoz pe devlop ansanm e nou pa kapab dir semen in fer tro vit e SPTC li in reste anaryer.  Sa i montre nou i napa sa lefikasite e nou tou nou konnen.  Regard sa bann pti bis.  Sa bann pti bis spesyal ki ti sipoze anmennen pou bann semen segonder.  Ozordi, konbyen sa bann pti bis i reste?  E se parski nou’n dekouver ki poudir sa bann pti bis sorry.  Zot pa efikas.  Zot pa sa kalite transpor ki nou bezwen pou nou bann semen.

Donk Mr Speaker, mwan lo mon kote, mon pa vwar okenn problenm avek sa Mosyon.  Sa Mosyon ki  Onorab Payet in anmenn dan sa Lasanble i en Mosyon ki afen petet mon kapab dir avek li ki mwan paren sa Mosyon.  Depi 12an pase, mon’n batiz li sa Mosyon.  E ozordi, dir dan en serten sans, mon kontan vwar ki pou nou ankor pe diskit lo la, me lo en lot kote mon tris lo la parski mwan mon krwar ki 12an plitar petet nou ti devret pe regarde kimannyer pour nou fer nou sistenm bis primer ek segonder vin pli efikas.  Kimannyer konmsi nou ti kapab, konmsi fer en lot pa?  Me selman, letan nou pe retourn ankor lo sa bann menm size, menm bann pwen ki’n fer resorti, malerezman mon pou dir ki se bann vye pwen.  E petet, en lot keksoz ki nou bezwen mazinen, ki fer keksoz pa kler, dan bann deba lo laspirasyon 2013, enn bann keksoz ki Mr Michel limenm ti dir.  I ti dir ki i ava enportan petet pou nou devlop en lot sistenm transpor e ki i ti propoz en sistenm parey bann tren lo rail, ki ava kouver east coast E ofet, ki sa konblaz Anse Aux Pins, enn bann keksoz ki ti ganny mansyonnen lo la se pou nou annan en rail service petet ki sorti Anse Royale, ki ti ava en Express Service. Wi.  Tousala se bann lide ki kapab ede pou soulaz transpor me selman tousala se bann keksoz ki pa’n zanmen vin kler.

E mwan Mr Speaker, seryezman konmsi mon ti ava swete ki la ki i fer sizyenm fwa ki Lasanble Nasyonal i diskit lo sa size e ozordi nou’n pran en apremidi preski 3erdtan lo sa size, mon espere ki en keksoz i ganny fer avek sa, ki lannen prosenn nou pa ganny en lot ki dir akseler plis.  Ki apre sa nou pou ganny en lot ankor ki pou vin dir be la rapor prezan pe sorti, la aprezan keksoz pe al arive.  Me ki enn fwa pour, tou sa zafer bis nou ava kapab ganny en solisyon, parski antretan, parey mon’n mansyonnen Hangard, antretan bann zabitan Hangard dan mon distrik, zot pe rod en bis parski zot reste dan latet montanny e parey bann dimoun dan bann lezot distrik.

La Mr Speaker, mon ava termin lo sa pwen.  Mwan mon ankor rapel byen letan Onorab De Commarmond ti fer son entervansyon lo sa bann zafer bis.  Onorab De Commarmond ti nerve e Onorab De Commarmond ou konnen ki i ti dir?  I ti dir ki; ‘Sa zafer bis fodre fer deswit e mwan si i annan okenn dimoun ki annan son bis, vin kot mwan e mwan mon a fer zot ganny zot licence.’

 

(Laughter)

 

HON WAVEL RAMKALAWAN

E parey nou pe dir, ou ankor rapel kimannyer i ti dir sa, nou ti dir yes, me ziska prezan napa narnyen ki’n ganny fer.  Onorab De Commarmond in eksite, in de-eksite ozordi i asize i refer lo 77.

Mr Speaker, lo sa Mosyon, napa okenn polemik lo sa Mosyon.  Napa okenn diferans.  Sa 34 Manm, enkli ou Mr Speaker.  Sa 34 Manm Lasanble Nasyonal Sesel ki la dan sa Lasanble akoz lepep in met nou, nou dir akselere.  Met keksoz pli vit, fer lepep Seselwa ganny en sistenm transpor ki ava efikas e donn Seselwa sa ki meyer e mwan mon zis espere ki avek sa Lasanble ki Prezidan Michel limenm li i anvi.  Sa 11 lo sa kote, sa 23 lo lot kote, i ava prezan, parski parey mwan, nou ti pe dir, ‘Lasanble serye’ you want, ‘Lasanble serye’ you get. E la ozordi sa ‘Lasanble serye’ pe dir akselere tonton.  Privatiz sa sistenm bis e donn Seselwa sa ki meyer.  Mersi.

 

MR SPEAKER

Avan mon pas laparol.  Sa mo tonton ou pa’n servi li pou fer referans avek Prezidan?  Sa mo tonton ou’n zis servi li an vag?

 

HON WAVEL RAMKALAWAN

Mr Speaker, mon ti krwar ou en Seselwa.

 

MR SPEAKER

Be mwan, mon en Seselwa.

 

HON WAVEL RAMKALAWAN

Be ou en Seselwa, ou pa konpran sa lekspresyon?

 

MR SPEAKER

Non, non ou’n koz lo Prezidan Michel.

 

HON WAVEL RAMKALAWAN

Mr Speaker, mon pa pou al antre dan en polemik.

MR SPEAKER

Non, non napa polemik.  Mon pe klarifye en pwen.  Ou’n servi li an zeneral.

 

HON WAVEL RAMKALAWAN

Wi mon’n zis demann ou si ou pa en Seselwa parski Seselwa, dan nenport, sa lekspresyon tonton nou pa bezwen diskit sa.  Mon krwar pa si mon bezwen esplik sa lekspresyon.

 

MR SPEAKER

Mon’n demann ou en kestyon direk.  Eski sa mo tonton ou’n fer referans avek Prezidan?  Larepons i wi ouswa non.

HON WAVEL RAMKALAWAN

Wi.

MR SPEAKER

Ou’n fer referans avek Prezidan?

 

HON WAVEL RAMKALAWAN

Wi.  Mon’n dir avek li.  Napa naryen mal ladan.

 

MR SPEAKER

Be mwan mon krwar Onorab, ou merit retir sa mo.

 

HON WAVEL RAMKALAWAN

Ok.  Mon retir sa mo tonton.

 

MR SPEAKER

Nou pa pou tolere okenn mank respe pou okenn pos konstitisyonnel dan Lasanble Nasyonal.  Mon krwar sa i bezwen sorti kler lo debi.

Mon ava envit Onorab Rose pou fer en dernyen entervansyon avan nou demann Dokter pou wrap up.

HON MARIE-ANTOINETTE ROSE

Mr Speaker, mon krwar i annan en konsansis inanim lo sa Mosyon ki devan nou.  Mon krwar ki tou Manm ki’n koze avan mwan i dakor ki nou bezwen en servis bis prive lo bann larout segonder. Sepandan Mr Speaker, mon krwar nou bezwen point out ki i annan en diferans fondamantal dan lafason ki le 2 kote i vwar kimannyer nou ofer sa servis.

Mon dir sa Mr Speaker akoz mon krwar si 12an pase Onorab Ramkalawan, ti Prezidan, ozordi petet dan sa Lasanble, nou ti pe demande ki nou bann servis piblik, espesyalman servis transpor piblik i ganny nasyonalize.  Mon krwar i annan alekar Ukraine, Latin America, ki ozordi bann gran pei pe demande ki bann servis ki zot ti’n privatize 12an pase, zot pe nasyonalize e si zot fer sa, i annan bon rezon akoz.

Mon dir sa Mr Speaker, akoz selman bomaten mon ti pe ekout bann koleg, sirtou dan Lopozisyon ki ti  demande e la mon quote. Onorab Pierre, zot ti demande ki Gouvernman i step in e ed bann Day Care ki ganny set up partou dan pei.  Largiman bomaten sete ki servis Day Care lo lalis Onorab Payet.  24 servis Day Care Centres dan pei.  Tou prive i tro ser.

Mon tann Onorab Ferrari koz lo liberalizasyon.  In koz lo liberal, liberasyon.  I fer mwan demande Mr Speaker, si bomaten ti sosyalis akoz nou ti demande ki Gouvernman i step in e ede e apremidi nou liberal e nou demande ki nou larg lanmen.

Non, ser Onorab Ferrari, sa Mosyon ki devan nou i pa senp.  I konpleks par lefe ki bokou pei in seye, in fail. E si Gouvernman in pran son letan pou tenir bis R3 malgre son defayans, i anpes ki Seselwa ordiner i soufer.  Si 12an pase nou ti’n aprouv en tel demann, eski ozordi nou pa ti pou vwar nou dan sa Lasanble pe demann Gouvernman pou ogmant lapey travayer akoz servis bis i tro ser?  Menm largiman ki mon bann koleg dan Lopozisyon ti avanse bomaten lo servis Day Care.

Mr Speaker, annou realis.  Langleter, Lafrans, bann gran pei ki pe devlope e mon bann koleg dan Lopozisyon pou dakor, i pran zot letan lo serten dosye ki zot vwar i konpleks, i sansib e i afekte son pep.  Legzanp, Lanmerik in pran son letan lo dosye global warming. Ozordi i pe revwar son polisi.  I prerogative sa Gouvernman pou fer li.  Fodre pa ki ozordi Onorab Ferrari i oule, oubyen i esey fer nou krwar ki Gouvernman SPPF pa ekout son MNA.

Mr Speaker, sa kalite propagann i pas lo nou parey delo lo fey sonz akoz deza, en letid in ganny fer lo sa size ki devan nou e bann fe ki devan nou i koumsa.  Bezwen en tel demann ozordi, plis ki 12an pase, i tou senpleman akoz 12an pase Gouvernman SPPF ti busy pe ekout son bann MNA pe demann li plis lakaz.  Nou Gouvernman 12an pase ti pe fer lakaz dan bann nouvo Housing Estates ki ozordi pe demann servis bis.  12an pase sete sa son priyorite pour sa lepok.  Ler i ti fini fer lakaz, nou Gouvernman ti busy pe ekout son bann MNA SPPF pe dir li ki nou bezwen plis semen dan sa bann nouvo Housing Estates.

(Interruption)

 

MR SPEAKER

Se Onorab Rose ki annan laparol.

 

HON MARIE-ANTOINETTE ROSE

Sa Gouvernman ti busy pe fer semen, sa menm semen ki ozordi nou bezwen bis pou pas lo la, avan ler i ti deside pou al rod bis pou met lo larout segonder.  Sete sa son priyorite.

Mr Speaker, si nou realize ki nou realite dizour i egzize ki nou revwar polisi servis bis i pa vedir ki desizyon ki nou Gouvernman ti pran 12an pase ti san vizyon.  Sete dan sa menm vizyon ki Gouvernman ti deside malgre tou demann okontrer pou fer lakaz, pou fer semen, pou fer konblaz, pou pa ferm SMB, larg lanmen Sekter Prive.  Akoz ki sa i leka Mr Speaker.  Mon krwar nou konnen ki problenm nou ti pou ladan.

I pa normal Onorab Georges ki nou konpar open skies policy avek en servis debaz parey servis SPTC ki afekte Seselwa ordiner.  E sa mantalite senplifye tou keksoz ki fatig mwan Mr Speaker avek serten pozisyon ki serten Manm i tant pou pran.  Kimannyer nou kapab konpar servis bis aeryen ki en tiket avyon ki bokou Seselwa i peye kekfwa enn fwa letan avek en tiket bis ki afekte nou Seselwa lo en baz toulezour, 2 fwa par zour petet e ki afekte per sak fanmiy Seselwa.

Mr Speaker, otan ki nou koz lo bann dimoun ki’n elekte nou, annou pa oubliye ki sa Mosyon ki devan nou pou annan en lenpakt direk lo sak dimoun ki’n vot pour nou.  Ki nou dakor ki servis bis lo larout segonder i bezwen ganny  privatize.  Mon krwar sa i konsansis tou dimoun.  Mr Speaker, mon krwar nou bezwen kantmenm koman bann dimoun responsab oubyen bann dimoun swa responsab, nou bezwen vin responsab lafason ki en tel demann i ganny enplimante e mon krwar ki si Gouvernman in pran son letan lo:- i annan in dir in trenn lipye.  Mon pa krwar in trenn li.  In pran son letan lo la.  Se zisteman pou etidye lafason ki en tel demann i ganny enplimante. I pa ganny enplimante parey open sky. Pa fer sans annan servis bis prive ki pa efikas, ki pa aler, ki pa an sekirite, ki napa lasirans e pli enportan en servis ki la me enn ki pour tro ser pou mazorite Seselwa kapab afford.

Si nou pou ofer en tel servis bis, nou drwa nou pep omwen en servis ki ganny fer byen e enn ki mars dan lavantaz nou pep.  Si Gouvernman i pran son letan lo sa dosye Mr Speaker, petet sete zisteman pou protez nou dimoun ordiner kont bann fleo negative ki liberalizasyon in anmennen, enkli pri tro ser ki nou’n tann koz bokou lo la bomaten.

Mr Speaker, mon pou siport sa Mosyon me mon krwar i enportan ki nou zistifye akoz 12an pase Gouvernman pa ti pran en tel desizyon.

 

MR SPEAKER

Mon a demann loter Mosyon Onorab Payet pou donn son Reply. Onorab Payet.

 

HON DAVID PAYET

Mon a remersye tou bann Onorab ki’n koz anfaver sa Mosyon e sa Mosyon mon krwar in tous preski tou distrik.  Dan bann  entervansyon, bann Onorab in annan bann bon pwen ki’n ganny sorti.  I annan menm kritik.  I annan ki’n dir bann lavantaz e bann dezavantaz me la, ler i limite.  Me pli bon keksoz se ki tou sa bann Onorab ki’n koze in koz anfaver sa Mosyon.  Sa i vreman enportan.

Mr Speaker, pwen for mon Mosyon se pou rod en solisyon pou reponn bezwen sa gran nonm popilasyon.  E Mr Speaker, mon ti a demande ki en servis SPTC ki donnen i demann re-anforsi e reponn bezwen popilasyon ki kontinnyelman agrandi.  E mon ti a demann Gouvernman pou akseler sa  privatizasyon bis larout  segonder o pli vit posib.

E la mon ti a demann tou mon bann koleg pou vot anfaver sa Mosyon.  Mersi Mr Speaker.

 

MR SPEAKER

Nou’n termin deba.  Nou ava pran en vot. That the question be now put. Bann anfaver?  Okenn ki kont?  Mosyon in ganny aprouve unanimously.

Nou ava adjourn pou ozordi e nou ava zwenn Mardi le 19 Zen, 2007.

 

(ADJOURNMENT)