::
Home » Verbatim » Verbatim - Third Term 2013 » Tuesday 5th November 2013

Tuesday 5th November 2013

NATIONAL ASSEMBLY OF SEYCHELLES

Tuesday 5th November 2013

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal, bonzour Minis ek son delegasyon.  Mon osi oule dir bonzour bann etidyan lekol segonder Belonie ki ozordi avek nou dan Gallery pou obzerv Question Time.  Mon swet zot labyenveni dan Lasanble Nasyonal e tou bann ki pe ekout nou dan lakour, bonzour.  Ozordi avek nou i annan Minis pour Lakaz e Litilizasyon Later.  Minis Christian Lionnet, ki vin reponn plizyer kestyon konsernan son Minister.  Nou ava komans avek kestyon 194, Onorab Marc Volcere.

 

HON MARC VOLCERE

Mersi Mr Speaker, bonzour Minis avek ou lekip, bonzour tou dimoun ki alekout.  Mr Speaker, pou benefis bann zabitan ki reste obor Erport Amitie Praslin e osi pou bann fermye ki plant dan sa zanmerant, eski Minis i kapab enform sa Lasanble ki progranm son Minister ek lezot Lazans lo agrandisman fence kot sa Erport.  Mersi.

 

MINISTER CHRISTIAN LIONNET

Bonzour Mr Speaker, bonzour tou Manm Onorab, bonzour bann etidyan ki avek nou ozordi e bonzour tou bann dimoun ki alekout dan lakour.      Mr Speaker, Erport Amitie Praslin parey lezot Erport komersyal dan Sesel, i ganny administer par SCAA e anretour, SCAA i swiv bann norm e standar pou safety ek sekirite etablir par IKO. Lorganizasyon Enternasyonal pour Laviasyon Sivil pou mentenans son bann Erport pou servi loperasyon laviasyon.  SCAA dan son zefor pou asire ki Erport Amitie Praslin i zwenn bann demann safety ek sekirite, in enform mon Minister ki zot pou bezwen fer bann amannman lo bann fasilite ki an egzistans kot Erport Amitie konm swivan.

1, agrandir sa sirfas kot avyon i park.  2, agrandir fence dan sa kote air strip pour ki sa fence i ava omwen 120met zistans avek center line nou runway.  E 3, etablir en buffer zone 30 met dan tou lede kote fence par andeor.  Letan ou kont zistans safety enkli fence ek buffer, i pou donn 150met zistans avek center line runway pou garanti safety ek sekirite loperasyon bann avyon e pasarze kot sa Erport.

Baze lo sa bann kriter ek spesifikasyon, mon Minister in fer bann travay preliminer ansanm avek SCAA ek bann lezot Lazans pou etablir ki kantite dimoun e propriyete dan sa zanmerant ki pou ganny afekte.  Sa i enkli popriyeter later prive, ensi byen ki later leta ki pe ganny lwe pou bann aktivite lagrikiltir.

SCAA in met mon Minister okouran ki okenn propriyete ki trouve dan Nor avek air strip, savedir dan direksyon Anse Kerlan pa pou ganny afekte avek sa proze lagrandisman.  Dapre sa legzersis preliminer selman 7 later prive ki pou ganny afekte konpletman par sa proze.  Pou larestan propriyeter dan sa zanmerant, selman en porsyon zot later ki pou ganny afekte par sa proze.  Mon Minister pou bezwen dan bann mwan ki devan nou, antre an negosiasyon avek sa bann propriyeter lo fason ki mannyer nou bouz alavan.

Mr Speaker, mon a profit sa lokazyon pou demann bann zabitan Amitie ki zot propriyete pou an kestyon.  An vi sa i en bezwen nasyonal, pou donn mon Minister e SCAA tou zot korporasyon e an retour mon donn zot mon langazman personnel, ki sa prosesis i ava enn ki deroul dan en lespri partenarya avek bi ki tou parti i sorti byen.  En win-win situation konmdi Angle.  Plis detay i ava ganny donnen dan en meeting ki pou ganny fer lo Praslin ver lafen sa mwan.  Mersi Mr Speaker.

 

MR SPEAKER

Onorab Volcere okenn siplemanter?

 

HON MARC VOLCERE

Wi Mr Speaker.  Mr Speaker, mon ti a kontan demann Minis ki pou arive oubyen, ki pe arive ek bann rezidan ki pe anvi devlop zot propriyete, sirtou bann prive, ki oule aranz en pti pe zot lakaz me zot pe ganny demande pou pa fer poulemoman akoz sa devlopman ki pe vini.  Ki pou arive avek zot, eski i annan en travay dan limedya ki pe ganny fer pou zot ganny relocate dan en lot landrwa pou zot kapab bouze e sa osi i aplik pou bann fermye ki oule mont zot lakaz demontab, me osi zot pe ganny demande.  Okenn plan pa pe ganny aprouve pou zot.  Mersi Mr Speaker.

 

MINISTER CHRISTIAN LIONNET

Mr Speaker, dapre lenformasyon ki mon annan sorti kot Lotorite Planning, i annan 2 dimoun ki’n fer aplikasyon pou fer serten devlopman lo zot later e pou rezon ki Onorab in site, zot pa pe ganny laprouvasyon.  Nou pou bezwen priyoritiz sa bann case, bann ki pare pou komans annan devlopman, rod fason pou nou kapab annan bann realokasyon ki ava arive an avan.  So, i ava en kestyon priyoritizasyon pou sa bann dimoun kapab kontinnyen avek zot lavi e annan zot poze ki pe devlope.

Lo kote lagrikiltir, lagrikiltir andeor sa 120 met kot fence pou ete, i kapab ganny kontinnyen.  Me selman pou napa okenn konstriksyon fizik parey en lakaz ouswa en stor ki kapab ganny fer lo samorso later.  Me selman parey mon’n dir, lafendimwan, i annan en tim teknik ki pou mont Praslin, ki kapab si oule, adres tou sa bann sitiasyon ki monte avek bann dimoun.  Bann sitiasyon spesifik pou sak.  Mersi Mr Speaker.

 

MR SPEAKER

Onorab Esther.

 

HON NATASHA ESTHER

Mersi Mr Speaker, bonzour tou dimoun alekout.  Eski Minis i kapab eksplik sa Lasanble, si SCAA in donn okenn time frame ki sa proze i bezwen ganny enplimante e ki priyorite son Minister pe klasifye sa proze.  Mersi.

 

MINISTER CHRISTIAN LIONNET

Mr speaker, non, nou napa en time frame spesifik ki’n ganny mete devan nou par SCAA.Pou lo kote priyorite, i en priyorite nasyonal.  Parey nou konnen, nou bezwen fer sir ki nou Erport Praslin i meet bann standar sekirite e safety ki IKO i enpoze.  I enportan akoz sa i lifeline Praslin, en kantite komers i pase antravaer Erport Praslin e nou pa anvi ki demen, poudir nou pa kapab operate nou Erport.  So, tou bann travay pou ganny fer en mannyer ki nou Erport i reste ouver e bann dimoun osi dan kote i kapab vwar en fason pou bouz devan.  Mersi Mr Speaker.

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker, bonzour Minis ek ou delegasyon, bonzour tou bann Koleg Onorab e bonzour tou bann etidyan ki avek nou ozordi e bann dimoun ki alekout.  Mr Speaker, eski Minis i kapab dir avek sa Lasanble, si in annan en evaliasyon lo okenn pert reveni ekonomik, pou okenn fanmiy ki pe ganny afekte avek sa nouvo devlopman e si wi, si zot pe fer provizyon pou rekonpans, at least temporarily.  Mersi Mr Speaker.

 

MINISTER CHRISTIAN LIONNET

Mr Speaker, dan tou bann ka realokasyon wi, i annan en evaliasyon ki ganny fer pou etablir bann pert ekonomik.  Bann dimoun ki pe fer bann aktivite ekonomik lo sa e tousala i ganny package dan en sel, ansanm si oule, dan negosiasyon.  Nou napa konpansasyon ki ganny fer avan, poulemoman napa fermye ki’n ganny dir aret kiltive, bann fermye i ankor pe kiltive.  Me selman letan keksoz i arive ki zot pou bezwen arete, wi, Gouvernman pou bezwen pey serten konpansasyon.  Sa i kler e i pou arive.  Mersi Mr Speaker.

 

MR SPEAKER

Kestyon 195, Onorab Vangadasamy.

 

HON SHERYL VANGADASAMY

Mersi Mr Speaker, bonzour a tous.  Mr Speaker, eski Minis i kapab dir ek sa Lasanble si son Polisi aktyel konsernan lavant later pou kontinnyen reste parey prenan kont ki bokou dimoun apre 7an i revann later.  Mersi Mr Speaker.

 

MINISTER CHRISTIAN LIONNET

Mr Speaker, sa size kot en dimoun ki’n benefisye avek en morso later atraver Gouvernman pou li nobou realiz son rev annan son prop lakour, me olye fer li, i deside pou fer spekilasyon e fer profi par vann sa morso later a en pri egzorbitan, i enn ki preokip bokou mon Minister.  Se pour sa rezon ki resaman mon Minister ti fer en reprezantasyon devan konsey Minis pou revwar bann mekanizm pou ede Adres enpe sa sitiasyon.

Apre bann diskisyon, Gouvernman in deside ki dorenavan, sa restriksyon 7an ki ti pe ganny aplike lo lavant later Gouvernman, pou ganny ogmante pou vin 15an.  Sa i vedir ki dorenavan, okenn dimoun ki aste en morso later avek Gouvernman pa pou kapab vann sa morso later avan 15an depi ki in sinny son lavant.  E dan ka kot i deside i nepli kapab pey sa later dan sa 15an, i pou bezwen ofer Gouvernman pou re-aste avek li e anretour Gouvernman ofer sa bout later avek en lot dimoun ki dan bezwen.  En tel Polisi i tenir an kont ki later ki Gouvernman i vann avek bann avek bann first time buyer, i a en pri subsidised ou a en pri ki bokou pli ba ki pri marse aktyel.  Mersi Mr Speaker.

 

MR SPEAKER

Okenn siplemanter Onorab Vangadasamy.

 

HON SHERYL VANGADASAMY

Wi Mr Speaker, mersi Mr Speaker.  Baze lo larepons Minis Mr Speaker, eski Minis i kapab dir sa Lasanble si sa revizyon mekanizm i pou osi enkli osi revwar metod, assess e alokasyon later pou bann aplikan pou minimiz ban tel sitiasyon e osi eski Minis i kapab dir sa Lasanble si son Minister i annan en mekanizm anplas pou monitor e asir devlopman lo sa bann later ki a evit sa bann spekilasyon.  Aste later Gouvernman, pa devlope e revann.  Mersi Mr Speaker.

 

MINISTER CHRISTIAN LIONNET

Mr Speaker, wi, i kler poudir nou bezwen revwar en pti pe kimannyer nou fer alokasyon later dan lefitir e en kantite kes ki nou konnen ki’n ganny allocate later ki pa’n devlope se akoz petet napa mwayen pou zot devlope.  So, dan nou bann konsiltasyon, dan nou bann assessment ki nou fer letan nou allocate later dan lefitir, nou bezwen pran plis sa an kont.  I enportan ki nou donn en dimoun en bout later pou li fer son lozman mem selman nou pa donn li en prolenm.  Si sa dimoun napa sa mwayen pou devlope, i enportan ki nou counsel li pou al dan bann lezot scheme ki Gouvernman i ofer.

Lo kote dezyenm kestyon Onorab, mon a dakor ki Minister i bezwen travay pli pre ek bann dimoun ki ganny allocate later.  Pou annan en swivi pou kapab fer sir ki sa bann dimoun i fer zot devlopman parey zot devret pe fer.  Sa i en keksoz ki nou ava met anplas en mannyer ki nou ava kapab ogmant stok lakaz dan pei.  Mersi Mr Speaker.

 

MR SPEAKER

Kestyon 196, Onorab Samson.

 

HON DEREK SAMSON

Mersi Mr Speaker, bonzour.  Bonzour tou dimoun.  Kestyon pou demann Minis Responsab pour Later, ki Polisi son Minister kot i konsern pye dibwa ki trouve lo later Gouvernman e ki en menas pou lakour prive oubyen propriyete en sitwayen.  Mersi.

 

MINISTER CHRISTIAN LIONNET

Mr Speaker, prevansyon i touzour meyer ki gerizon.  Se sa prensip ki gid aksyon Lotorite lo sa size ki loter kestyon.  Onorab Samson.  Pou bann pye dibwa ki lo later Gouvernman, de ki in ganny obzerve e etabli ki en pye dibwa ou en group pye dibwa i koz seren danze pou en propriyete ou lavi, sa danze i ganny eliminen swa par koup sa pye ou bann pye dibwa, ou debrans zot.

Minister Litilizasyon Later ek Lakaz i pran responsabilite pou bann pye dibwa ki lo later Gouvernman ki pa anba ladministrasyon en lot Departman ou Lazans Gouvernman.   Dan ka kot later Gouvernman pe ganny administre par en lot Departman ou Lazans Gouvernman, se sa Departman ou Lazans konsernen ki annan responsabilite pou elimin sa danze.

Legzanp, pye dibwa kidan lakour ou en lekol se responsabilite Minister Ledikasyon pou fer koupe.  Dan ka kot en pye dibwa, ouswa en group pye dibwa i menas lenfrastriktir ki pe ganny administre par en Departman ou Lazans Gouvernman, dan sa bann lenstans.  An vi ki sa Lazans ou Departman konsernen i dan en pli bon pozisyon pou desid lo kwa ki pli kritik pou son loperasyon.  Sa Lazans ou Departman respektiv i pran sa responsabilite pou okip sa bann ka konsernen, par egzanp, PUC i etablir lekel pye dibwa ki danzere pou son lalinny elektrisite e fer koup zot.  Pareyman, Departman Transport i evalye lekel bann pye dibwa ki poz menas pou bann larout piblik e sirkilasyon trafik e pran bann mezir prevantif.  Mersi Mr Speaker.

 

MR SPEAKER

Okenn siplemanter Onorab Samson?

 

HON DEREK SAMSON

Wi Mr Speaker, mersi.  Mr Speaker, mon ti a kontan demann Minis ki prosedir ki egziste pou en sitwayen fer konnen son Minister ki en pye dibwa i vin en menas pou son propriyete, oubyen pou son lakour e konbyen letan i pran son Minister pou aksyonn lo elimin danze ki sa pye dibwa pe poze pour nou sitwayen.  Mersi.

 

MINISTER CHRISTIAN LIONNET

Mr Speaker, nou ankouraze ki pwen kontak pou bann dimoun dan distrik i atraver son Lotorite Distrik.  So, nou annan en lapros kordinen pou deal avek sa sitiasyon.  So, en dimoun ki annan en problenm i kontakte son Administrater Distrik, annefe, tou le lannen mon Minister i anvoy en demann kot tou bann Ladministrasyon Distrik.  Pour en lalis, pou bann pye dibwa ki zot santi i annan en danze.  Normalman i pran 4 a 6 semenn me si i annan bann ka ki irzan, Minister i annan fason ki i fast track sa pou deal avek sa sitiasyon.  Mersi Mr Speaker.

MR SPEAKER

Onorab Jacqueline.

 

HON SULTANNE JACQUELINE

Mersi Mr Speaker.  Mr Speaker, an tenan kont sa gran demann pou kou pye dibwa ki poz gran menas pou propriyete e lavi imen.  Eski Minis i kapab eksplik sa Lasanble, si i pe konsider annan en letid serye avek bann lazans konsernen, PUC, Land Transport, Lanvironnman.  Pou vreman etablir en bon lenformasyon lo lakantite sa bann pye dibwa i annan e lekel ki responab pou koup lekel pye dibwa.  Mersi Mr Speaker.

 

MINISTER CHRISTIAN LIONNET

Mr Speaker, mon pa krwar i neseser pou annan en letid pou kouver li annantye.  Piblik i toultan pe apros son Lotorite Distrik pou raport bann ka.  Toulelannen i sanze, toulelannen i annan nouvo case, so, pou nou annan en letid pou nou idantifye sa mon pa krwar i pou tro abouti dan nanryen.  Nou rely en kantite lo bann Lazans ki fer bann vizit partou ki idantifye danze.          DRDM par egzanp, Departman Transpor, Departman Kominoter.  Tousala, i raport bann case kot nou pou nou adres sa sitiasyon.  Ou dezyenm parti kestyon Onorab, ekskize.

 

HON SULTANNE JACQUELINE

Mr Speaker, si Minis i kapab dir si zot pe montre sa lentere pou vin ansanm an partener pou etablir en bon sistenm lenformasyon pou konnen sa bann pye dibwa kot i ete e lekel ki responsab pou koupe.  Mersi Mr Speaker.

 

MINISTER CHRISTIAN LIONNET

Mr Speaker, pou reponn dezyenm parti kestyon Onorab.  Wi, mon krwar i kler lekel ki responsab pour kwa.  Mon’n dir dan mon lentervansyon, tou pye dibwa ki lo later Gouvernman ki pa tonm dan en responsabilite en Lazans partikilye i reponsab Minister Later ek Lakaz pou deal avek.  Si en propriyete pe ganny administre par en Departman oubyen en Lazans Gouvernman, then, i tonm son responsabilite.  Me tousala i kapab ganny klersi, Lotorite Distrik avek Minister i annan en bon rapor e demann i kapab ganny fer avek nou e nou, nou kapab filter sa kot bann Lazans ki annan sa responsabilite.  Mersi Mr Speaker.

 

MR SPEAKER

Onorab Rose.

 

HON MARIE-ANTOIINETTE ROSE

Mersi Mr Speaker, bonzour Mr Speaker, bonzour Minis, bonzour bann etidyan e tou dimoun ki alekout.  Mr Speaker, eski Mini si kapab dir nou Lasanble si son Minister i annan en progranm mentenans bann later Gouvernman ki tonm anba son Minister pou fer sir ki bann shrubs e bann pti pye dibwa pa grandi evantyelman e ganny lese lo zot menm pou vin bann gran pye dibwa e ki kout Gouvernman en kantite larzan apre pou koupe.  Mersi.

 

MINISTER CHRISTIAN LIONNET

Mr Speaker, i annan en kantite later ki pou leta dan Sesel.  I difisil pou nou tackle tou sitiasyon a moman donnen.  Zis pou lenformasyon Lasanble, an 2011 mon Minister in depans R500mil pou koup, pou deal ek sa sitiasyon.  An 2012, R1.2milyon an 2013 ziska ozordi R800mil.  Nou fer sa ki nou kapab, nou sey adres sitiasyon avan ki zot vin en maler pou le res.  Mersi Mr Speaker.

 

MR SPEAKER

Leader Lopozisyon.

 

HON DAVID PIERRE

Mersi Mr Speaker.  Mr Speaker, an vi bokou konplent sorti kot manm piblik an relasyon ek sa size.  Eski Minis i kapab dir ek sa Lasanble si son Minister i annan en Polisi kler e kordinen an relasyon ek sa size, si wi, eski i kapab fer sa polisi available pou bann Manm Parlman e  ki plan son Minister pou sansibiliz piblik anzeneral an relasyon ek sa size.  Mersi Mr Speaker.

 

MINISTER CHRISTIAN LIONNET

Mr Speaker, Polisi kler mon’n dir, si i en danze nou adrese akoz nou konnen si nou pa adrese, i pou kout nou pli ser.  In arive dan bann ka dan lepase kot maler in arive, nou pa’n apersevwar en pye dibwa i en danze e in tonm lo lakaz en dimoun.  Minister in bezwen antre pou repar lakaz sa dimoun akoz i nou responsabilite si en keksoz lo later akoz later pou Gouvernman, so i responsabilite Gouvernman pou pran aksyon neseser pou retourn lavi sa sitwayen parey i ti ete oparavan.  Mersi Mr Speaker.

 

MR SPEAKER

Kestyon 197, Onorab Volcer.

HON MARC VOLCERE

Mersi Mr Speaker, an vi lakantite dezas koze par dife ki’n frap nou pei dan sa bann dernyen lannen, mon ti a kontan demann Minis pour Litilizasyon Later ek Labita ki responsabilite Gouvernman anver bann lakaz brile dan nou pei.  Mersi.

 

MINISTER CHRISTIAN LIONNET

Mr Speaker, i annan bokou diferan sirkonstans pou konsidere dan ka kot dife i detri en lakaz.  Dan ka kot lakaz i ankor pou Gouvernman ouswa PMC, Minister e PMC i annan responsabilite pou rod ranboursman avek lasirans e pou konsevwar e enplimant rekonstriksyon ler i ganny bann resours neseser.

Dan ka kot lakaz pa pou Gouvernman ouswa PMC, louvraz ek finansman rekonstriksyon, i depan lo propriyeter sa landrwa.

Souvan, apre bann tel dezas Minister i ganny aprose pou lasistans.  Lasistans ki ganny demande i varye depi led pou rekonstrir, led tanporer pou lozman e parfwa lasistans teknik avek enzenyer pou determin kondisyon striktir batiman.  Tou bann ka, i annan zot prop sitiasyon spesifik e Minister i fer son mye pou fasilit bann viktim re-etablir zot lavi normal.  Prenan kont nou Polisi lakaz e ki fasilite ki Minister i annan a son dispozisyon pou ofer a sa moman partikilye.

Sa bann lasistans ki Minister i ofer, i an bonn fwa e anlinny avek prensip nou Gouvernman ki promouvwar byennet sosyal.  Dan ka demann lasistan tanporer pou lozman, lasistans i depan lo si Minister i annan lakaz ki pa ankor fer komitman e i en dernyen rekour si sa bann vikitim napa lot solisyon tanporer.  Setadir, napa fanmiy pou abrit zot oubyen napa landrwa kot zot kapab lwe.       Fodre dir, ki souvandfwa Minister napa lakaz ki’n pare ler sa dezas i arive e alor i pa kapab fer sa lasistans tanporer.  Dan sa bann ka, bann viktim ek zot fanmiy i ganny konseye pou rod solisyon tanporer ayer.  I annan lezot Lazans Gouvernman koman Lotorite Distrik, Lazans Byennet Sosyal, bann NGOs koman Red Cross, ki asiste sa bann fanmiy avek bann keksoz debaz dan limedya apre dezas.

Parey in mansyonnen, lakaz tanporer i senpleman en dernyen rekour e Minister i ensiste ki tou lezot opsyon alternativ in ganny eksplore avan ki i konsider lakaz dan son stok, akoz sa, i afekte lezot dimoun ki lo lalis lasistans lakaz e ki’n esper bokou letan.  Dan ka demann lasistans pou rekonstrir, Minister in osi ofer lasistans teknik gratwit pou bann ka ki malerezman napa mwayen ou konesans pou rekonstri sa ki zot in perdi.  Sa i enkli evaliasyon enzenyer, fer nouvo plan lakaz e soumet avek Lotorite Planning, rod kwotasyon e menm supervise konstriksyon.

An sa ki konsern finansman pou rekonstriksyon, Gouvernman napa lobligasyon pou partisipe.  Se alor pou sa rezon, ki tou dimoun i ganny ankouraze pou pran en lasirans pou zot lakaz anka dezas.  Malgre sa, Gouvernman atraver HFC i pare pou asiste bann viktim sa bann tel dezas atraver en housing loan anlinny avek ban kondsyon HFC e Polisi Minister.  Gouvernman i osi annan en formil kot depandan savings ki annan dan son Bidze Kapital ouswa resours ki annan dan fon dezas, i kapab azout en bout larzan pou asiste bann endividi ki zot afordabilite pa sifizan pou kouver kou total rekonstriksyon en lakaz debaz.  Atraver sa formil kot sa bann viktim i ganny means test, zot bezwen kontribye otan ki zot kapab afford e Minister i donn en led dan ka kot i absoliman neseser.

Dan ka kot sa viktim i kapab afford kou proze.  Minister pa pou partisip dan okenn fason.  Okenn partisipasyon finansyel ki Gouvernman ou fon dezas i fer, i ganny anrezistre koman en charge lo sa later ki si zot oule vann sa propriyete alavenir zot bezwen rann Gouvernman ou fon dezas sa larzan ki in kontribye.  Mersi Mr Speaker.

 

MR SPEAKER

Onorab, Onorab Volcere.

 

HON MARC VOLCERE

Mr Speaker, mon ti a kontan Minis i eksplik sa Lasanble pou benefis nou piblik, lekel ki responsab pou trouv en lozman pou sa bann dimoun ki’n pas dan en tel sitiasyon e ki responsabilite sa bann dimoun zot annan letan en tel dezas in frap zot.  Mersi.

 

MINISTER CHRISTIAN LIONNET

Mr Speaker, premye pwen kontak ki en dimoun i bezwen fer letan i ariv en dezas kot li, se ankor so Lotorite Distrik me i pa responsabilte Lotorite Distrik or responsabilite Minister pou rod en lakaz pou donn zot, ok.  Nou senpleman la pou ede, pou facilitate, pou sey rod en fason pou kapab donn zot en soulazman dan zot maler.  Sa dimoun osi i bezwen pran son responsabilite, son fanmiy a premye osi i bezwen ede pou kapab abrit zot.  Nou bezwen annan sa lespri partenarya, sa lespri familyal ki nou anmas nou dimoun. Seselwa par natir nou koumsa, nou bezwen kontinnyen pou nou anmenn sa kalite prensip devan.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Mr Speaker eski Minis i kapab eksplik sa Lasanble konbyen letan son Minister, dan bann ka kot sa bann dimoun in ganny allocate en lakaz e Minister ki pe ede pou peye.  Konbyen latan zot kontinnyelman pey sa lakaz e dan bann ka kot sa dimoun ki pou al refer sa lakaz i annan problenm avek right of way. Akse pou refer son lakaz, i annan sa bann difikilte parey.  Parey dan mon distrik i annan, ki rekour ki son Minister i annan pou fer, pou kapab ed sa bann dimoun pou kapab rekonstrir zot lakaz.  Mersi.

 

MINISTER CHRISTIAN LIONNET

Mr Speaker, si dan en lenstans ki Minister pe asiste en dimoun avek son rent akoz en dezas, nou pou normalman kontinnyen avek sa rental ziska ler sa dimoun i kapab annan son lozman permanan.  Dan bann ka par egzanp ki nou annan bann konsern, bann kontrent avek sitiasyon later, Minister i touzour travay avek sa dimoun ouswa avek sa third party ki annan bann issues pou nou vwar en solisyon.  Tou ka i annan son spesifisite e i pran plizyer letan, diferan letan pou deal avek.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Mr Speaker, eski Minis i kapab enform nou Lasanble dan ka kot en dimoun son lakaz in brile, ouswa pye dibwa in kraze.  Si Minister atraver HFC i annan en sistenm fast track pou bann dimoun kapab ganny zot loan. Sirtou bann dimoun ki pa lo lasirans e si Minis osi i kapab enform nou Lasanble, sirtou dan bann ansyen blok flat ki’n ganny fer, si zot annan en lentansyon enstal bann fire hydrant. Bann nouvo i annan me bann avan pankor metet.  Mersi Mr Speaker.

 

MINISTER CHRISTIAN LIONNET

Mr Speaker, wi tou bann lakaz ki pas dan en tel kalamite, Minister avek HFC i annan en sistenm fast track, parey zot konnen poudir HFC son Polisi aler aktyel se ki ou bezwen annan en kontribisyon 10 poursan avan ki ou ganny ou loan. Me pou bann ka dezas sa i ganny waive, so i annan en sistenm fast track.

Lo size hydrant. Onorab nou pa’n zanmen annan en panse pou si oule ekip bann vye estate avek bann fasilite parey.  Me selman i en keksoz ki ou’n met devan, nou ava diskite, nou ava regard posibilite, mon krwar i en keksoz ki neseser pou nou kapab anpes bann dezas parey.  Mersi Mr Speaker.

 

MR SPEAKER

Onorab Meggy Marie.

 

HON MEGGY MARIE

Mersi Mr Speaker, bonzour Minis ek ou delegasyon, bonzour tou dimoun ki alekout.  Mr Speaker, mon ti a kontan demann Minis vi ki dife limenm li i pa averti, eski ou Minister pa pe konsider fer bann lakaz emergency, swa rezyonal, swa dan distrik, en fason ki petet i a kout Gouvernman pli bonmarse ki lwe en landrwa ler dimoun i ganny afekte avek dife e petet sa i ava vin enpe pli bonmarse pou Gouvernman.  Mersi Mr Speaker.

 

MINISTER CHRISTIAN LIONNET

Mr Speaker, sa size lakaz emergency nou’n seye oparavan, me toulezour i annan emergency lakaz.  Pa neseserman ki i dife me toulezour i annan en dimoun ki dan bezwen, so, nou asiste baze letan nou annan availability.  Mersi Mr Speaker.

 

MR SPEAKER

Onorab Lider Lopozisyon.

 

HON DAVID PIERRE

Mersi Mr Speaker.  Mr Speaker, an relasyon avek sa sitiasyon fast track eski Minis i kapab enform sa Lasanble ki arive avek en fanmiy ki son lakaz in pran dife, i deza annan en loan avek HFC, i pa lo lasirans e i bezwen en lot loan avek HFC pou li fer son nouvo lakaz.  Mersi Mr Speaker.

 

MINISTER CHRISTIAN LIONNET

Mr Speaker, dan bann ka parey, parey mon’n dir, i annan en legzersi means testing ki ganny arive.  Sa legzersis means testing i regarde dan bann ka ki napa lasirans byensir kontribisyon lasirans pou zero e regarde ki son afordabilite in terms of loan.  Si i deza annan en loan e i pa kapab afford pou pran en lot loan, then Gouvernman i antre i chip in.  Me selman i met en charge lo propriyete sa dimoun ki i kapab rekouver sa larzan si sa dimoun demen i deside vann.  Me parkont, tou dimoun ki annan en loan lakaz i bezwen annan en lasirans.  Akoz napa en labank ki pou donn ou en loan si i pa kouver li avek bann evantyalite parey.  Mersi Mr Speaker.

 

MR SPEAKER

Kestyon 198, Onorab Arnephy.

 

HON BERNARD ARNEPHY

Mersi Mr Speaker, bonzour Mr Speaker, bonzour tou dimoun.  Mr Speaker, mon kestyon pou demann Minis responsab pour Later ek Lakaz ki progranm ki PMC i annan ansanm avek lezot Lazans konsernen pou kontrol bann pest tel ki lera e lisyen eran lo bann gran housing estates parey lo Ile Perseverance.  Mersi.

 

MINISTER CHRISTIAN LIONNET

Mr Speaker, asire ki bann housing estate, pti koman gran, i annan en lanvironnman sen e sof pou bann fanmiy ki reste ladan, i enn bann manda e lobzektig kler PMC. Premyerman, PMC i annan son progranm ground maintenance lo bann estate ki konpri netwayaz, koup zerb, deblok rigol eksetera avek bi pou kit lanvironnman sa estate prop e evite ki bann vermin e pest i vin dan zalantour.  Dezyenman, PMC i osi annan en progranm firmigasyon lo tou bann gran housing estate e fodre note ki lo zil Perseverance PMC pa ankor komans en tel progranm, me mon’n ganny konfirmasyon avek PMC ki lannen prosenn sa pou dan zot plan daksyon.

Osi enn parmi bann kondisyon lagreman standar PMC avek bann dimoun ki’n benefisye avek en lakaz lo bann housing estate o dansite.  Bann zabitan napa drwa sony lisyen ou lezot zannimo domestik.  I enportan ki nou dimoun i konpran en tel Polisi.  I pa lentansyon Gouvernman ouswa PMC pou anpes zot gard bann zanimo domestik, ou bann pets.  Me fodre ki nou realize, ki sa bann zanimo domestik i fasilit propagasyon maladi e sa i kapab vin kritik, sirtou dan en lanvironman kot bokou i reste.  Mon pe demann zot pou konpran rasyonnel sa Polisi e ede ki i ganny mentenir a tou pri pou nou prop lasante e lasante nou kominote.

Mr Speaker, lo kote lisyen eran, wi nou konstate ki tou dernyenman sa problenm pe vin pli gro e pe koz bokou lenkonvenyans pou bann zabitan.  Son solisyon i andeor lekspertiz PMC, ouswa mon Minister e sa i ganny refer avek Departman Lanvironnman pou adres sa sitiasyon.  Mon salye osi zefor bann diferan NGOs, tel ki SPCA ki annan pou fer avek welfare bann zannimo dan sa parkour.

Mr Speaker, mon krwar i neseser pou mwan fer sorti ki problenm lisyen eran pa zis en problenm Gouvernman ouswa bann NGOs pou deal avek.  Nou tou koman en sitwayen responsab koman en imen nou bezwen pran nou responsabilite, si nou konnen nou pa kapab sony lisyen, annou pa angaz nou ladan.  Si nou konnen ki sa lisyen ki nou annan i deza bokou dan nou lanmen, annou pa les li al reprodwir e apre debaras nou avek sa problenm par larg sa bann lisyen lo bann propriyete ki pa pou nou e kre problenm pou lezot.  I kout pei bokou resours pou vwar en solisyon pou sa, nou larzan sa e i ti a kapab ganny servi, envestir dan bann lezot progranm ki nou pli byen bezwen.  Servis pou steriliz lisyen i pou nanryen.  Servi li e annou pran nou responsabilite.  Mersi Mr Speaker.

 

MR SPEAKER

Onorab.

 

HON BERNARD ARNEPHY

Mersi Mr Speaker.  Mr Speaker, an vi ki i annan bann regilasyon kler vizavi sony bann lisyen lo housing estate. Eski Minis i kapab dir nou Lasanble ki bann enforcement mechanism son Minister i annan, pou asire ki bann dimoun pa pe kas sa bann regilasyon e ki kapasite PMC pou kapab enforce bann tel mechanism.  Mersi bokou.

 

MINISTER CHRISTIAN LIONNET

Mr Speaker, PMC i kontinnyelman fer son bann vizit dan tou bann housing estate. Nou osi ganny en kantite korperasyon bann lezot dimoun ki abide by bann regilasyon, ki call ki enform nou ki i annan serten fanmiy ki annan lisyen e mon asir ou ki PMC i fer tou pou li uphold son lagreman e fer sa dimoun retir son lisyen.  Ankor mon oule repete, i pa mon lentansyon pou anpes en dimoun annan son lisyen me nou fer sa pou lasante sa kominote.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Mr Speaker, eski Minis i kapab enform sa Lasanble, konbyen pe kout PMC par an pou flite pou kontrol bann pest parey karya, lera eksetera e si PMC i annan en progranm sansibilizasyon parey pou travay ek sanniter distrik pou edik nou pep lo sa sitiasyon.  Mersi.

 

MINISTER CHRISTIAN LIONNET

Mr Speaker, kou total ki PMC i depanse apepre par lannen pou ground maintenance work ki osi enkli firmigasyon, i anviron, an 2010 2.2, an 2011 2.3 an 2012 3milyon e an 2013 ziska prezan 2.2 milyon.  Wi, i annan en progranm ki PMC i travay avek sanniter pou sansibiliz dimoun me mon krwar i nesesite ki annan plis lanfaz lo en tel progranm en mannyer ki nou a kapab annan en lanvironman pli apropriye pou bann dimoun ki reste dan bann estate. Mersi Mr Speaker.

 

MR SPEAKER

Kestyon 199, Onorab Meggy Marie.

 

HON MEGGY MARIE

Mersi Mr Speaker.  Mr Speaker, eski Minis responsab pour Later ek Lakaz i kapab eksplik zabitan Anse Aux Pins  ki plan son Minister pou fer plis plot later aksesib e konstri plis lakaz dan nou distrik.  Mersi Mr Speaker.

 

MINISTER CHRISTIAN LIONNET

Mr Speaker, dan distrik Anse Aux Pins Minister in idantifye sa bann proze swivan dan Sekter Lakaz ek Later. Ex Onezime, kot bann emergency unit i deza ete nou annan plan pou annan en konstriksyon 6 unit adisyonnel.  Nou osi annan en lot proze ex Onezime. pou annan 9 unit lo en bout later 2 mil met kare.  Nou annan en proze deryer Chetty flat ki nou’n idantifye later me selman nou pa ankor konsevwar groser proze.  Apre nou annan en proze land bank Cayole ki’n ganny idantifye lo morso later S8560 e nou pa ankor osi determinen.

 

MR SPEAKER

Ou konnen, Minister ti a bon ou fini ek kestyon.

 

MINISTER CHRISTIAN LIONNET

Nou pankor determinen kantite nonm later nou kapab gannyen from sa proze.  Poulemoman, Gouvernman i annan konstrent finansyel pou devlop bann proze lakaz, ouswa bann estate land bank avek lenfrastriktir.  Parey Minister in deza eksplike oparavan, son Polisi se pou pa donn later avan ki lenfrastriktir i ganny enstale. Resours finansyel pou devlop bann proze lakaz ek land bank in deza, in ziska prezan atraver Bidze Kapaital Gouvernman.  Avek lezot priyorite ki pei i annan e capping lo depans kapital, Gouvernman pe rod lezot fason pou met bann loportinite lakaz ek later alaporte bann demander.  Dan sa lalinny, i annan proze Ile Soleil osi ki’n fek lanse mwan pase e ki si i annan ase lentere e lenvestisman ladan i pou kapab finans son lekor.

Dan sa proze i annan loportinite pou bann endividi fer aplikasyon pou bann kare rezidansyel pou konstri zot prop lakaz.  I annan 29 loportinite pou bann endividi kapab konstri en simplex, ou douplex. I osi annan 16 loportinite pou dimoun ki anvi envestir pou konstri blok flat ouswa vann, ou lwe.  Sa nou espere i ava ed sekter prive annan en partisipasyon dan sekter lakaz.

Gouvernman in osi gard 3 kare later lo Ile Soleil kot i pou konstri 3 blok flat ki pou kontribye 21 lakaz an total dan son stok social housing.  Bann tel proze ki a satisfer bezwen en group aplikan ki kapab afford sa nivo kou, ava ed Gouvernman kontinnyen avek priyoritiz bann lezot proze pou target bann group ki zot afordabilite i mwens.  Mersi Mr Speaker.

 

MR SPEAKER

Onorab Marie.

 

HON MEGGY MARIE

Mersi Mr Speaker.  Mr Speaker etan donnen ki i annan bokou zabitan, espesyalman bann zenn ki prefere reste dan zot distrik respektiv e zot annan later kot zot fanmiy, tel ki later zeritye.  Ki mechanism Gouvernman i annan anplas pou kapab siport bann zenn, bann zabitan. Espesyalman bann zenn pou kapab ganny en loan pou konstri zot lakaz e sa i a ede pou tir enpe presyon lo Gouvernman.  Mersi Mr Speaker.

 

MINISTER CHRISTIAN LIONNET

Mr Speaker, nou ankouraze en zabitan, en zenn ou neport ki, ki son paran i annan en morso later e ki kapab akomod en dezyenm lakaz.  Nou annan en scheme atraver Gouvernman ki nou ankouraz sa e sa i second housing scheme ki ozordi i R300mil ki en dimoun i kapab benefisye.  Nou konstate ki sa i pa ase pou konstri en lakaz, me sa ki ankourazan se Gouvernman i as from Zanvye 2014, i pou annan sa ki nou apel smart subsidy.  Si ou ganny R6mil a R20mil ou pou kapab benefisye avek en lasistans grant from Gouvernman ki ava ed ou pou kapab konplet ou lakaz, second housing loan. Sa bann zenn ki annan sa lanbisyon, mon advise pou zot MNA, sey komans kontribye dan zot Home Savings Scheme, ganny zot 10 poursan en mannyer zot kapab komans met premye pyer lo later ki zot paran in donn zot.  Mersi Mr Speaker.

 

MR SPEAKER

Onorab Murielle Marie.

 

HON MURIELLE MARIE

Mersi Mr Speaker, bonzour a tous.  Mr Speaker, eski Minis i kapab enform sa Lasanble si i annan okenn statistic lo konbyen, ki kantite laplikasyon land bank i annan dan distrik Anse Aux Pins dan sa dernyen 5an e konbyen ki’n ganny asiste e si i dan plan son Minister pou konsider sa proze land bank dan Cayole estate koman priyorite son Minister. Mersi.

 

MINISTER CHRISTIAN LIONNET

Mr Speaker, mon napa statistics pou dernyen 5an, me statistics total ki nou annan dan Minister depi dan bann lannen 93, depi ler nou pe kolekte statistics. Nou’n deza asiste 206 aplikan from Anse Aux Pins avek en morso later.  I annan 330 ki ankor pe esper en bout later.  Me mon oule refer sorti ki nou data base later i pa neseserman annord.  Pa parey pou statistics lakaz, i annan serten travay ki pe ganny fer pou redres sa sitiasyon.  Mersi Mr Speaker.

 

MR  SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, Minis in eksplik nou land use plan Anse Aux Pins.  Eski Minis i kapab konfirm ek sa Lasanble si sa land use plan i Lalwa e si non, alors eski i kapab ganny sanze e ki degre konsiltasyon nou annan avek zabitan Anse Aux Pins konsernan sa land use plan.  Mersi.

 

MINISTER CHRISTIAN LIONNET

Mr Speaker, sel land use plan ki ozordi i Lalwa, se land use plan pou sa 2 distrik Praslin.  Tou sa bann lezot land use plan pou lezot 23 distrik dan pei i ankor anba konsiltasyon.  Parey zot okouran, Lotorite Planning pe pas dan tou bann distrik pou fer bann konsiltasyon neseser e si i annan en nesesite nou ava retourn dan distrik letan bann amannman in ganny fer avek sa plan ki’n ganny deza prezante.  Mersi Mr Speaker.

 

MR SPEAKER

Kestyon 200, Onorab Pierre.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble ki plan renovasyon son Minister i annan kot i konsern bann lakaz dan leo Cayole estate Anse Aux Pins ki’n crack e ki en menas pou bann lokater.  Mersi Mr Speaker.

 

MINISTER CHRISTIAN LIONNET

Mr Speaker, problenm felir avek estate Cayole, ti komans leve premye fwa an 2004.  An 2004, SHDC ki ti’n konstri sa bann lakaz pandan 97, 98 ti fer en survey pou etablir ki kantite lakaz ki’n ganny afekte.  Dan sa legzersis, 63 lakaz ti ganny survey. Ti annan 20 lakaz ki ti montre sinny felir.  16 lakaz ti ganny repare an 2005, balans 4 lakaz enzenyer ti evalye domaz koman pti e pa telmam grav alor ti napa louvraz reparasyon ki ti ganny fer.  Depi sa, an 2009 a 2012 nou pa’n tann okenn rapor lo case ki lakaz in crack.

An 2013, onorab Meggy Marie in fer reprezantasyon avek mon Minister e ti annan en ka ki ti ganny raporte e sa ka ti ganny adrese sanmen sa lannen.  Resaman Minister in ganny met a son latansyon en nouvo lalis 25 lakaz kot i sanble i annan problenm felir.  Apre konsilte lalis survey ki ti ganny fer an 2004, nou konstate ki 14 parmi sa 25, i bann lakaz ki survey 2004 ti raporte ki zot ti napa problem.  3 parmi i lakaz ki ti’n deza ganny repare an 2005 e i annan 8 nouvo ka ki pa ti ganny kouver dan survey 2004.

Evaliasyon ki ti ganny fer an 2004, ti sizere ki sa bann domaz i akoz differential settlement. Lakoz sa differential settlement, ti atribye plito avek soupsyon ki metod konstriksyon pa ti’n port ase latansyon pou fer sir ki fondasyon i lo en baz ki sifizaman solid, savedir, parti fondasyon ti lo later konble.    Pour sa nouvo lalis ki’n ganny soumet, enzenyer MLUH in komans vizit sa 25 ka e nou ankor pe evalye sitiasyon pou determin.  1, kwa ki pe fer sa domaz e 2, ki rekomandasyon pou repar domaz.

Osito ki Minister i fini travay i ava zwenn ek bann dimoun afekte pou enform zot ki plan daksyon.  Lobzervasyon preliminer apre ki enzener in visit 10 parmi sa 25 ka raporte, in montre zis 3 parmi ki annan problem striktirel pou demann reparasyon.  Sa bann nouvo rapor i montre ki magnitid felir i pa alarman e ki napa danze pou bann zabitan.  I annan 3 ki nou pa’n obzerv okenn sinny felir, 2, kot domaz i dan zot window sill e pa striktirel e 2, kot bann felir nou term selman koman kosmetik.  Minister pou kontinnyen avek son evaliasyon avan i fer nouvo lanons lo sitiasyon sa bann lakaz.  Mersi Mr Speaker.

 

MR SPEAKER

Onorab Meggy Marie.  Non, Onorab Pierre, mon ti krwar ou’n fini.

 

HON DAVID PIERRE

Mersi Mr Speaker.  Mr Speaker, eski Minis i kapab dir sa Lasanble dan bann ka kot zot vwar poudir sitiasyon i grav, eski zot pou fer en cost estimate e fer sa ganny reflekte dan zot Bidze lafen lannen pour lannen prosenn e dezyenmman, dan ka kot sitiasyon pe kontinnyelman agrave parey en ka Anse Aux Pins, kot domaz pe kontinnyen ganny fer akoz sa problenm dan striktir.  Eski Minis i annan okenn plan pou li vwar ki domaz ki sa bann fanmiy pe fer fas avek e rekonpanse oubyen remet sa bann dimoun dan en lakaz tanporer an vi danze ki sa i koze pou sa bann dimoun.  Minis mon a kapab dir ou sa fanmiy apre si oule.  Mersi Mr Speaker.

 

MINISTER CHRISTIAN LIONNET

Mr Speaker, si en lakaz i en danze pou en dimoun, en lakaz ki Gouvernman in ofer en dimoun, wi, mon Minister pou fer tou pou nou kapab bouz sa dimoun akoz nou pa la pou met lavi person an danze.  Nou osi konvenki ki letan nou donn en dimoun en lakaz, nou pe donn li en lenvestisman lonterm.  Pa en envestisman kot i pou envestir son larzan, kot i vwar son larzan pe al dan rigol.  So, Minister pou travay ek sa bann dimoun pou fer sir ki zot lakaz i ganny bann sitiasyon teknik, ki bann defayans teknik i ganny adrese.  Minister pe deza travay lo bann cost estimate. Mon pa kapab garanti ki tou larzan i a ganny metet dan Bidze lannen prosenn.  Me at least i annan en plan daksyon ki pou kapab komanse lannen prosenn e adres sa bann sitiasyon dapre lo priyorite sitiasyon danze ki zot ete.  Mersi Mr Speaker.

 

MR SPEAKER

Onorab Meggy Marie.

 

HON MEGGY MARIE

Mersi Mr Speaker.  Mr Speaker, eski Minis pou Litilizasyon Later ek Lakaz i kapab dir avek sa Lasanble si en letid entansiv in ganny fer pou vwar lekel fanmiy ki pli vilnerab e si son Minister i pe konsider get status repeyman sa bann fanmiy e dan en fason ki i kapab met zot lo en scheme lasirans ki dan lefitir bann lezot fanmiy i kapab ed zot prop lekor e tir sa presyon lo Gouvernman.  Mersi Mr Speaker.

 

MINISTER CHRISTIAN LIONNET

Mr Speaker, letid in ganny fer pou etablir lakoz sa bann felir.  Nou pa krwar poudir i en fenomenn parey in arive Vista Domar.  Nou krwar i bann keksoz lokalize ki annan plis pou fer avek metod konstriksyon pandan ki i ti’n ganny fer.  I deza annan bann scheme avek lasirans ki en dimoun i kapab pran.  subsident sa insurance. I en scheme ki kout bokou pli ser ki en lasirans normal.  Me selman Minister normalman lapros ki i pran se ki letan nou donn en lakaz en dimoun, nou donn en garanti.

Dan lepase bann lakaz parey ki’n ganny crack, ki nou’n swa underpinned pou adres sa sitiasyon.  Minister i donn en garanti ki sa lakaz pa pou annan okenn issue striktirel pou en peryod letan ki rezonnab.  Normalman 25an, 30an parey life span en lakaz i devret ete.  Mers Mr Speaker.

 

MR SPEAKER

Onorab Murielle Marie.

 

HON MURIELLE MARIE

Mersi Mr Speaker.  Mr Speaker, baze lo repons Minis.  Ou’n enformen ki Lotorite Distrik Anse Aux Pins atravaer MNA in enform ou Minister lo sa konsern.  Eski ou Minister in deza fer en meeting konsiltasyon avek zabitan Cayole estate Anse Aux Pins pou met plan ou Minister lo sa konsern vi ki sa bann lakaz krak i en gro menas pou zabitan Cayole estate. Mersi.

 

MINISTER CHRISTIAN LIONNET

Mr Speaker, mon oule repete ki bann premye assessment i montre poudir sa bann felir pa alarman.  So, i pa vreman en gran danze pour sa bann zabitan.  Nou konnen i annan en konsern, zot pe envestir larzan dan en lakaz, zot ekspekte annan en lakaz ki bon.  Sa nou ava adrese, nou’n fek ganny sa lalis 25 dimoun pa tro lontan pase.  Letan nou fini nou fer nou bann assessment detaye, nou ava vin kot lakominote e ganny en dyalog kimannyer nou pou bouz alavan.  Mersi Mr Speaker.

 

MR SPEAKER

Onorab Jaqueline.

 

HON SULTANNE JACQUELINE

Mersi Mr Speaker, eski Minis i kapab eksplik sa Lasanble ki Polisi son Minister letan enzenyer in fini fer evaliasyon dan sitiasyon kot lakaz in krake pou reallocate sa dimoun dan sa lakaz ki vreman i anba en kantite stress akoz i en kou, lakaz par egzanp dan salon in krake, pou li annan en negosiasyon osi ek sa bann dimoun pou en lot opsyon pou sorti dan sa lakaz.  Mersi  Mr Speaker.

 

MINISTER CHRISTIAN LIONNET

Mr Speaker, wi, si en enzenyer in evalye ki lakaz i annan serten defo striktirel e sa dimoun i santi serten presyon sikolozik konmkwa i pa anvi reste dan sa landrwa.  Sa i en keksoz ki Gouvernman i toultan negosye, diskite e si zot anvi en landrwa alternativ.  Gouvernman i regarde within son mwayen kwa ki i kapab ofer sa dimoun.  Mersi Mr Speaker.

 

MR SPEAKER

Onorab Jeannevol, kestyon 201.

 

HON BEGGITA JEANNVOLE

Mersi Mr Speaker, bonzour.  Eski Minis responsab pour later ek lakaz i kapab enform sa Lasanble ki pe arive avek proze eliminasyon lakaz ki annan leternik ladan.  Mersi.

 

MINISTER CHRISTIAN LIONNET

Mr Speaker, poulemoman, Gouvernman napa en proze nasyonal pou elimin lakaz ki annan leternik.  Depi ki Minister ti komans adres nesesite pou retir bann materyo ki kontenir asbestos lo bann lakaz prefab Perseverance, sa lanons ti sansibiliz piblik lo sa size e Minister in tret plizyer demann kot bann endividi in vin devan avek konsern kot zot sispekte zot lakaz i annan leternik.          Dan tou bann ka ziska prezan, Minister in asiste pou fer tes pou etablir si vreman sa bann materyo sispe i annan asbestos ladan.   Depi 2010 Minister in osi antrepann 5 proze pou retir asbestos a en kou total R2.02 milyon.

Fodre met alantansyon piblik, ki materyo ki kontenir asbestos i selman vin danzere ler i komans detoryore e kase.  Donk, pa akoz en batiman i annan asbestos, i neserman ki fodre en proze pou retir sa i ganny fer deswit.  I ler leta sa materyo i tel, ki i komans kase e fer lapousyer, ki i vin irzan pou retir zot dan en fason kontrole.  I alor enportan pou idantife bann landrwa kot materyo i komans deteryore pou priyoritiz lenplimantasyon bann proze.

Gouvernman atraver Departman Lanvironnman i annan en phase out plan pou leternik ki sipoze komanse a parti lannen prosenn.  Sa linisiativ i konpri etablisman en komite nasyonal ki pe target phase out dan en peryod 5an kot bann landrwa kot i etabli ki annan menas.     Poulemoman, i annan en levanter ki pe ganny fer lo tou bann propriyete e batiman Gouvernman pou idantifye tou landrwa kot i annan sa materyo dan bann gran kantite signifikan.  Dapre estimasyon Departman Lanvironnman, anviron 14mil met kib materyo pou bezwen ganny retire e antere e ansanm avek mon Minister en landrwa apropriye pou ganny idantifye pou nobou anter sa bann materyo.

Sa travay ki Departman Lanvironnman pe fer i a donn en levanter lo bann propriyete Gouvernman ki annan leternik.  I pou donk rete sa konponan bann propriyete prive pou ganny en levanter pou nobou fer en plan longterm pou adres sa sitiasyon lo en nivo nasyonal.

Gouvernman pa nakor etabli en stratezi pou ganny sa lenformansyon, me an vi ki prezan asbestos i kapab en menas pou lasante e lanvironnman.  Mon Minister e Departman Lanvironnman in pare pou donn sipor teknik okenn dimoun ki sispekte ki annan leternik lo zot propriyete, pou idantifye si zot soupsyon i valab.  Manm piblik i kapab kontakte neport ant sa de Lenstitisyon pou lenformasyon.

Gouvernman pou osi travay lo bann incentives pou ed manm piblik ki oule antrepann en tel proze.  Bann mezir incentives ki kapab ganny konsidere, i kapab enkli plas dan landfill spesyal pou nanryen, lasistans avek tes pou idantiye materyo, gid lo prosedir pou retir materyo e etablir en lalis kontrakter ki otorize pou fer sa kalite louvraz.

Mr Speaker, mon’n osi ganny met okouran ki Departman Lanvironnman pe regard dan posblite pou rod lasistans avek lorganizasyon enternasyonnal tel ki, UNIDO, ek Gouvernman Ostralien pou ede etablir kapasite dan bann kontrakter lokal pou antrepann sa bann tel louvraz.  Mersi Mr Speaker.

 

MR SPEAKER

Onorab Jeannevol.

 

HON BEGITTA JEANNEVOL

Mersi Mr Speaker.  Mr Speaker, Minis ou’n dir dan ou larepons ki pou bann dimoun ki ankor annan zot lakaz ouswa parti zot lakaz ki avek leternik pou kontakte Lotorite.  Mon oule konnen alors, ki Polisi ou Gouvernman dan sa bann tel ka e eski Gouvernman i oblize refer lakaz sa bann dimoun, ou si non, parti zot lakaz.  E osi ki proteksyon pou sa bann kontrakter ki pe antrepann en tel proze an vi danze dan konstriksyon.  Mersi.

 

MINISTER CHRISTIAN LIONNET

Mr Speaker, non, en lakaz prive Gouvernman napa lobligasyon pou refer lakaz sa dimoun.  Nou kapab travay ek sa dimoun pou vwar en way forward.  Nou kapab aiste li pou fer bann tes neseser akoz i annan en kantite dimoun i vwar en materyo i krwar poudir asbestos.  Me letan ou fer bann tes, ki en bann tes ki pa ganny fer lokalman.  I annan serten limitasyon ek bann tes ki ganny fer lokalman, par fwa i en nesesite ki nou anvoy sa deor pou fer bann tes pli aprofondir pou idantifye egzakteman kalite asbestos ki annan dan sa materyo.

So, Gouvernman i la as a fasilitater, i pou ede pou sa dimoun kapab tir sa danze akoz prevansyon i pli bon ki bann maladi ki kapab devlope ki pou kout pei bokou pli ser alavenir.  Ou dezyenmm kestyon Onorab, ekskiz mwan?

 

HON BEGITTA JEANNEVOL

Dan bann ka kot nou pe asiste sa dimoun, ki proteksyon i annan pou sa kontrakter ki li i pe antrepann sa louvraz?

 

MINISTER CHRISTIAN LIONNET

Mr Speaker, tou bann kontrakter ki’n deza enplimant bann louvrwaz pou retir asbestos dan pei, in en seri mezir ki Departman Lanvironnman i donn zot pou zot swiv.  Sa i enkli met mask, zot bann lenz ki zot servi letan zot sorti, zot santi zot bezwen tire, dispose dan serten ka e tousala.  So, i annan en seri mezir ki Departman Lanvironnman in etablir pou bann dimoun ki oule fer sa louvraz kapab swiv.  Mersi Mr Speaker.

 

MR SPEAKER

Bon kestyon 202, Onorab Jeannevol.

 

HON BEGITTA JEANNEVOL

Mersi Mr Speaker.  Mr Speaker, eski Minis responsab pour Later ek Lakaz i kapab enform sa Lasanble ki arive avek lakaz en dimoun ki’n kondannen e ki napa en dezyenm aplikan lo son aplikasyon.  Mersi.

 

MINISTER CHRISTIAN LIONNET

Mr Speaker, tou lakaz ki Gouvernman i konstrir i ganny donnen ek bann lokater lo en baz swa, house purchase kot i pe aste son lakaz, ouswa lo en baz lwe ki nou apel en tenancy agreement. Letan alokasyon i ganny fer, sa lokater i sinny 1 ant sa 2 lagreman avek PMC. Dan ka kot aplikan i lo en tenancy agreement oubyen i lo en house purchase agreement me i pa ankor fini pey son lakaz e i komet en lofans ou kas okenn kondisyon son lagreman PMC i analiz sirkonstans sa sitasyon, severite sa lofans e lezot fakter sosyal sa lokater avan i konsider reposesyon sa lakaz.         Dan ka kot sa aplikan i ganny kondannen dan en prizon pou en lofans ki in komet, PMC i regars sitiasyon ko-aplikan oubyen bann depandan si sa lokater i annan oken e an kosiltasyon avek Minister e led Lotorite Distrik, desid lo fason pou bouz alavan avek sak ka spesifik.

Dan ka kot lofans i grav ekgzanp omisid, mert ou trafik drog, la PMC i re-posed lakaz imedyatman si i napa depandan oubyen ko-aplikan ki pe viv dan sa lakaz.

Letan sa dimoun i sorti dan prizon si i napa en lakaz i bezwen re fer en aplikasyon lakaz avek Gouvernman e komans son kontribisyon dan Home Savings Scheme.  I ava ganny konsidere pou en lasistans ler i zwenn bann kriter kler, ler i meet bann kriter kler pou kalifikasyon lasistans e son case i ganny priyoritize.  Dan ka kot sa aplikan in fini pey son lakaz e lavant in fini ganny finalize, Gouernman pa kapab re-posed sa lakaz akoz i nepli propriyeter.  Mersi Mr Speaker.

 

MR SPEAKER SPEAKER

Onorab.

 

HON BEGITTA JEANNEVOL

Mersi Mr Speaker.  Minis dan ka kot sa kondannen in kit en lot son fanmiy dan sa lakaz e ki li osi sa adilt ki in gard dan lakaz i annan en laplikasyon lakaz.  Dan ki fason eski sa adilt li e son fanmiy pou ganny asiste, si sa ti pou le ka avan, ou apre ki sa prizonnyen i sorti.  Mersi.

 

MINISTER CHRISTIAN LIONNET

Mr Speaker, si sa kondannen in met en lot dimoun dan son lakaz e sa dimoun i annan en aplikasyon, mon krwar i en kestyon priyoritizasyon sa dimoun ki annan en laplikasyon.  I pa kapab rely lo lakaz ki pa pou li.  I en kestyon ki nou bezwen regarde within kantite lakaz ki nou annan ki nou pe donnen ki son priyorite pou li ganny asiste.

Sa kondannen osi, nou ava regard dan son ka si parey mon’n dir i napa depandan, i napa en bezwen pou sa lakaz la, Gouvernman i ava fer bann nesesite pou re-posed sa lakaz e li i ava ganny konsidere letan i sort dan prizon koman nenport ki sitwayen.  Fodre nou realize, poudir en kondannen, son non pa ganny tarni pou lavi antye.  I fer son santans, i rehabilitate li e re vin dan sosyete e ganny tou drwa parey tou lezot sitwayen i annan.  Mersi Mr Speaker.

 

MR SPEAKER

Onorab Herbert Houareau.

 

HON HERBERT HOUAREAU

Bonzour Mr Speaker, mersi Mr Speaker, bonzour tou dimoun ki alekout e en bozour spesyal pou tou bann etidyan Belonie ki isi dan lasal.  Mr Speaker, eski Minis i kapab enform sa Lasanble ki son Minister pe fer pou repran bann lakaz Gouvernman ki pe lwe oubyen ki’n fini ganny peye e sa dimoun konsernen in ganny kondannen pou trafik drog dan nou zirisdiksyon e dan nou prizon Sesel.  Mersi.

 

MINISTER CHRISTIAN LIONNET

Mr Speaker, mon repete, si en dimoun ki’n ganny kondannen pou trafik drog i pe lwe en lakaz ek Gouvernman, PMC pou antre pou re-posed sa lakaz.   Dan ka kot i annan en fanmiy, i annan son madanm ek son zanfan deryer, konsiderasyon i ava ganny pran pou konsider laspe sosyal sa fanmiy.

Si en dimoun in fini pey son lakaz, son lakaz i pou li, Minister napa pourvwar pou antre pou pran sa lakaz me i annan lezot formil atraver bann lezot Lazans ki kapab pete re-posed lakaz, sezi lakaz avek krwayans ki pete sa dimoun in ganny sa lakaz ek larzan ki pa legal, larzan ki pa prop.  Mersi Mr Speaker.

 

MR SPEAKER

Kestyon 203, Onorab Houareau.

HON HERBERT HOUAREAU

Mersi Mr Speaker.  Mr Speaker, eski Minis responsab pour Later ek Lakaz i kapab eksplik sa Lasanble ki pe arive ek bann proze lakaz ou flat dan distrik St Louis, tel ki proze ex-Morel, ex-Aman, ex-Oliver e flat emergency kot lekol Belonie e kan ki Gouvernman pou komans sa bann proze.  Mersi Mr Speaker.

 

MINISTER CHRISTIAN LIONNET

Mr Speaker, detay sa bann proze lakaz ki’n ganny mansyonnen i konm swivan.  Proze ex-Aman i en proze redevlopman ki ti’n deza komanse enpe letan pase kan Gouvernman ti konstri 3 batiman ki konpri 10 unit. Zis serten porsyon proze ki ti ganny antrepann akoz Gouvernman pa’n nobou ganny tou teren ki ti’n orizinalman planifye pou sa proze.  Annefe, i reste zis en mors, en porsyon ki kapab devlope lo kare later V1917, lo ki en maksimonm 3 unit a kapab ganny konstri.  Ex-Oliver 8i en proze ki’n ganny planifye lo kare later V11562, avek en siperfisi 3598 met kare, propozisyon se konstri 5 blok flat avek 40 unit.

An Novanm lannen pase Minister ti propoz sa proze avek en delegasyon sorti Qatar pou rod partisipasyon finansyel.  Ziska prezan, nou pankor ganny konfirmasyon pou sa proze demare.  An sa ki konsern bann emergency houses ki obor lekol Belonie, ki lo later osi V4921 siperfisi 569met kare, Minister in planifye konstriksyon en blok 6 unit.

Minister i planifye pou retir bann dimoun ki pe okip sa bann lakaz emergency osito posib pou demolir sa landrwa e an vi ki zot kondisyon aktyel i deplorab.  Proze ex-Morel i osi enn ki ti komanse avan reform ekonomik, i sitiye lo kare later V5762 e V3781, dan sa proze devlopman, 5 blok flat ti’n ganny planifye avek en total 32 unit.  An 2008, 1 ant sa bann batiman ki konpri 6 unit 2 lasanm ti konplete.  Minister in osi konstrir semen pou ariv lo sa sit ensi ki serten retaining wall pou prepar teren pou proze ki pou swiv.  Minister in deza depans apepre R5.3 milyon lo sa konponan proze.

Mr Speaker, an vi lezot priyoorite, sa bann proze pa feature lo lasis lenplimantasyon pou sa prosen 3an, me mon oule enform sa Lasanble, ki aler aktyel, i annan serten revi ki pe ganny fer lo plan devlopman e posibilite i la ki sa i a kapab sanze.  Mersi Mr Speaker.

 

MR SPEAKER

Onorab okenn siplemanter?

 

HON HERBERT HOUAREAU

Mersi Mr Speaker.  Mr Speaker, eski Minis i kapab enform sa Lasanble ki son Minister pe fer pou adres sitiasyon bann zabitan St Louis ki defavorab finansyerman, ki annan later me ki bezwen en loan spesyal pou zot kapab konstrir zot lakaz akoz zot pa kapab repey en loan normal e zot osi, en vre sitwayen Seselwa, menm si zot annan sa andikap.  Mersi Mr Speaker.

 

MINISTER CHRISTIAN LIONNET

Mr Speaker, mon krwar Gouvernman i deza pe met a dispozisyon nou dimoun, nou bann mwen fortinen bann kondisyon loan ase favorab.  HFC son lentere ozordi, i 6 poursan ki bokou pli ba ki tou labank komersyal, son term repeyman i 23an.  So mon krwar bann kondisyon i deza la, i ariv serten ka ki i en dimoun pa pou zanmen kapab afford pou met en lakaz an debout.  Sa bann ka sepesifik, Lotorite i anmenn kot Minister, nou dyaloge nou diskite.  Si sa dimoun i enterese pou li fer en lesanz ek Gouvernman, i en posibilite ki Gouvernman i kapab konsidere.  Poulemoman, nou pa pe antrepann okenn proze endividi lo later privive.  Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Mr Speaker, Minis in koz lo en revi lo sa sitiasyon, son plan.  Eski Minis i kapab dir sa Lasanble si pou anann en revizyon parey li i pe anonse dan son plan 5an ki i ti prezante avek sa Lasanble atraver Bidze 2013, pou met plis resours finansyel ouswa pou divert enpe resours finansyel dan bann proze lakaz dan bann distrik tel parey St Louis avek bokou limitasyon e gran demann lakaz.  Mersi Mr Speaker.

 

MINISTER CHRISTIAN LIONNET

Wi Mr Speaker, mon oule re-afirm ek sa Lasanble, ki i annan serten travay ki pe ganny fer pou nou kapab re priyoritiz nou plan devlopman e fer plis kontriksyon lakaz dan bann distrik respektiv.  Mersi Mr Speaker.

 

MR SPEAKER

Kestyon 204, Onorab Vel.

 

HON JENIFFER VEL

Mersi Mr Speaker.  Bonzour Minis, bonzour tou dimoun.  Mr Speaker, eski Minis responsab pour Later ek Lakaz i kapab dir avek nou Lasanble, ki difikilte ki Lotorite Planning, i rankontre pou ranforsi bann non-compliance procedures pou bann dimoun ki pa swiv lord Lotorite Planning dan bann devlopman e konstriksyon.  Mersi.

 

MINISTER CHRISTIAN LIONNET

Mr Speaker, non-compliance lo kote Planning Authority, i vin atraver plizyer form.  1, letan en dimoun i komans kontriksyon san en plan ki’n ganny apouve par Lotorite Panning, 2, letan en dimoun pa obeir tou bann kondisyon ki Lotorite Planning i enpoze letan zot pe konstrir, oubyen enplimant zot plan.

Lotorite Planning i aplik sa 3 mezir swivan an relasyon avek bann dimoun ki komans konstriksyon san en plan ki’n ganny aprouve ou ki i pa comply avek bann kondisyon ki’n ganny enpoze.        Premyerman i annan en warning ek advice verbal ki ganny donnen.  Dezyenman en stop notice e sa dimoun i ganny 7 zour pou li adres sitiasyon e trwazyenmman, si i pa fer li, i annan enforcement notice ki ganny donnen e sa i aplike pou 30 zour.  Oubyen en demolisyon si sa dimoun pa fer en apel oubyen si i pa’n adres sa sitiasyon.

An term statistics, Lotorite Planning in rikord 201 ka non-compliance depi Zanvye sa lannen ziska prezan dan Sesel.  115 ka i ganny rikorde lo Mahe e 86 ka in ganny rikorde lo Praslin ek La Digue.  Apepre 75 poursan dan sa bann ka zot in comply avek planning letan zot in ganny en stop notice. I annan 11 ka kot Lotorite Planning in donn enforcement notice ki enkli kase e restore landrwa e ladan 7 in comply tandis ki 3 pan obeir desizyon Lotorite Planning.  Sa 3 ka Lotorite Planning pe pran aksyon legal avek sa bann devloper.       Lotorite Planing i rankontre plizyer difikilte pou enplimant bann mezir neseser pou regle e kontrol devlopman dan Sesel.

1, bann zofisye i ganny obstruct lo sight letan zot pe enplimant bann mezir enforcement.  2, pa toultan ki nou ganny korporasyon manm piblik pou enform nou bann devlopman ilegal.  3, konstren resours imen pou fer en swivi lo bann tel proze ki Planning i otorize dan en fason regilye e 4, pa toultan ki bann propriyeter dan proze i aksesib pou diskisyon.  E dernyenman, prosedir legal ek Lakour ki pran bokou letan lo kote enforcement. Mersi Mr Speaker.

 

MR SPEAKER

Onorab Vel, okenn siplemanter?

 

HON JENIFFER VEL

Mersi Mr Speaker.  Mr Speaker, eski Minis i kapab dir nou Lasanble si Lalwa aktyel i permet son Minister ase leeway pou azir e si non, eski son Minister pe mazin amann Lalwa pou empower Lotorite Planning pou deal avek sa bann kes non-compliance. Mersi.

 

MINISTER CHRISTIAN LIONNET

Mr Speaker, non, mon pwennvi sa ki Lalwa aktye pa ase pou nou deal ek sa bann sitiasyon, me mon ankouraze note ki i annan enpe letan deza nou pe revwar Lalwa Planning pou nou anmenn devan Lasanble pou ganny son aprouvasyon ki pou donn Planning bokou plis ledan pou deal avek sitiasyon.

I annan sitiasyon ki nou pa kapab esper Lakour pran son letan pou deal avek akoz i en danze pou leres dimoun.  Planning i bezwen annan pourvwar pou deal avek there and then, apre si Lakour i santi poudir nou annan tor, Lakour i ava pran Lotorite Planning i ava pran aksyon avek li.

So, sa i pe ganny fer, i annan en kantite keksoz osi ki nou pe met anplas Onorab pou lenformasyon Lasanble.  Par egzanp, sa mwan menm nou pe lans nou web GIS e dan sa web GIS i annan en konponan ki pou Devlopman ek Planning. Kot en dimoun demen bomaten i kapab leve vwar en devlopman akote li e i kapab al lo web GIS, gete si vreman i anan en devlopman ki’n ganny aprouve.  Si wi, ok.  Si non i kapab vin en lazan Lotorite Planning e enform nou ki poudir i annan en devlopman ilegal ki pe arive dan son kominote e la bann zofisye Planning a kapab vin fer bann aksyon neseser pou vin vizite.      I enportan ki dimoun i respekte bann kondisyon ki Planning i met anplas.  Devlopman avek proteksyon i 2 keksoz, 2 enkstrenm.  Planning i bezwen toultan vwar the middle ground. I konnen dimoun i annan aspirasyon, zot anvi konstrir, me nou osi bezwen protez nou lanvironman, nou bezwen protez nou bann lenfrastriktir ki nou annan.

Annou pa bliye, Zanvye 2013 nou pei ti fer fas avek en gro dezas dan 3 ou 4 distrik e 1 bann rezon sete i ti annan en kantite ka ki bann dimoun pan respekte ou bann dimoun ki’n fer devlopman san permisyon Lotorite Plan.  So, i enportan ki nou respekte sa, nou pa la pou anpes devlopman me nou la pou fer sir ki devlopman i arive dan en fason soutenab.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, eski Minis i kapab dir ek nou Lasanble lekel ki pran desizyon dan Planning pour en dimoun ganny son permisyon, oubyen non.  Eski i en endividi oubyen i en group, oubyen i Board. Pou konsomasyon piblik, mon krwar i enportan ki piblik i konnen lekel ki pran sa desizyon e eski Lotorite Planning i annan en responsabilite pou li advise en dimoun lo ki i merit fer pou li ganny sa permisyon.  Mersi Mr Speaker.

 

MINISTER CHRISTIAN LIONNET

Mr Speaker, Lotorite Planning pa en endividi, Lotorite Planning i ganny gouvernen par en Board. En Planning Board ki konpri plizyer dimoun, enkli sekter prive, ki annan lekspertiz dan plizyer domenn.  Se la ki desizyon i ganny pran lo kwa ki kapab ganny permet ou kwa ki pa kapab ganny permet.  I pa CEO Mr Gerard Hoareau ki pran desizyon.  Me Mr Gerard Hoareau i enplimant desizyon ki board i pran.

Lo kote advice, wi, mon repete Planning i la pou ankouraz devlopman.  Ankouraz devlopman soutenab e enn son manda se pou advise dimoun pou vwar kwa ki kapab ganny fer.  Me selman fodre nou osi realize, i annan serten proze ki senpleman i pa posib pou ganny konstrir.  Mersi Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker, eski Minis i kapab eksplik nou ki travay in ganny fer lo nivo Lotorite Planning pou met anplas en progranm kot bann dimoun ki zot plan pa ganny aksepte, zot ganny eksplike lo ki bann rekour ki zot bezwen fer lo bann diferan kasoz ki zot bewen fer pour ki zot plan i kapab ganny admet e ganny aprouve.  Mersi Mr Speaker.

 

MINISTER CHRISTIAN LIONNET

Mr Speaker, en keksoz ki mon devret fer sorti an reponn kestyon Onorab, se ki letan en dimoun i ganny refize son plan avek Lotorite Planning i toultan annan en dezyenm rekour.  Son dezyenm rekour se pou li fer en appeal.

I annan en prosedi appeal ki i fer appeal avek Minis e Minis i annan en sistenm anplas ki nou apel en Appeals Advisory Committee, ki al vizite pou vwar sa piblik e fer sa rekomandasyon kot Minis pou pran konsiderasyon lo en case.  I anan plizyer case.  Mon ava provide statistic pou bann Onorab.  80 poursan bann case ki vin kot Planning i ganny aprouvasyon e i ganny aprouvasyon dan en dele letan akseptab.  I ganny aprouvasyon dan 6 semenn, ou 8 semenn parey i predir.  I annan en pti gin kes ki pa ganny sa laprouvasyon.  Me selman, mon ensiste avek Lotorite Planing ki en dimoun i bezwen ganny advised properly. Nou bezwen akseler plis travay, met plis lanfaz lo travay ki nou fer avek bann arsitek, bann draftsman akoz parfwa se zot ki kre enpe konfizyon avek nou piblik.

Zot enform piblik bann keksoz ki zot konnen ki Lotorite Planning pou zanmen dir non.  Travay ki nou pe fer osi, par egzanp dan land use plan.  En dimoun pou konn egzakteman kwa ki i pou kapab konstrir lo en bout later ouswa i pa pou kapab konstri dan le fitir.  So, tousala letan i vin ansanm i pou fer ki lavi nou sitwayen, lavi en envestiser i vin bokou pli fasil.  Lotorite Planning i bezwen pli pro aktiv e ed nou Seselwa pou kapab realiz zot rev.  Mersi Mr Speaker.

 

(TECHNICAL PROBLEM)

 

HON CHANTAL GHISLAIN

Mr Speaker, eski Minis i kapab enform sa Lasanble, eski dan bann ka kot bann endividi ki pa’n comply avek Lotorite Planning, eski dan bokou ka zot ganny sa, bann dimoun i ganny demande pou kas sa ki zot in konstrir ouswa, zot bezwen donn en plan as build e konbyen letan si in dir pou kase, konbyen letan zot ganny demande pou zot kas sa ki sa bann kesksoz i ganny kase.  Mersi.

 

MINISTER CHRISTIAN LIONNET

Mr Speaker, wi, i annan serten sirkonstans kot sa bann dimoun i bezwen demolir sa ki zot in konstrir.  Be avan sa i arive Planning i donn zot en sans pou regilariz zot devlopman, savedir zot soumet en plan an retrospect e Lotorite Planning ansanm avek bann Lazans konsernen i vwar sa plan.  I regarde si i annan en posibilite ki sa i kapab egziste dan sa landrwa ki in ganny build.

Si non, dernyen rekour se, Lotorite Planning i donn en demolition notice pou sa dimoun demolir.  Sa dimoun i annan sa dwa pou li abide by sa notice ouswa pa abide. Si i pa abide, rekour Planning Authority se al Ankour kot Lakour i ava donn en desizyon final lo status sa devlopman.  Mersi Mr Speaker.

 

MR SPEAKER

Bon, avek sa nou’n ariv alafen Question Time e mon oule remersye Minis ek son delegasyon e osi ekskiz li parmi nou e kant a nou, nou adjourn ziska 11er.

 

(BREAK)

 

MR SPEAKER

Bon, nou ava kontinnyen avek travay pou lazournen.  Nou pou pran aprezan Bills e Bill ki devan nou se, The Industrial Estate Authority Bill, 2013 ki pe vin ganny prezante par Vis Prezidan, Danny Faure.  Byenveni Vis Prezidan e son delegasyon.  Mon a ganny mwan en Motion for Second Reading.

 

HON MARIE-ANTOINETTE ROSE

Mr Speaker anba Order 64(2) mon move ki nou lir sa Bill en dezyenm fwa.

 

MR SPEAKER

Okenn ki segonde?

 

HON ANDRE POOL

Mr Speaker Mosyon in ganny segonde.

 

MR SPEAKER

Ok Mosyon i ganny segonde…

 

(TECHNICAL PROBLEM)

 

VICE PRESIDENT DANNY FAURE

Mr Speaker, Leader of Government Business e tou bann Manm Onorab nou Lasanble Nasyonal, bonzour.  E i fer mwan en gran plezir e loner pou mwan prezant sa Proze De Lwa ki devan nou Lasanble Nasyonal.

Mr Speaker, 4an pase, Gouvernman ti adopte en Polisi e sa polisi i enn ki tre kle e ki dir ki dezormen, bann size Polisi, bann size stratezi pou reste avek Minister oubyen bann Departman.  E ki bann kestyon loperasyon, egzekisyon, lenplimantasyon sa bann Polisi e osi bann stratezi, i pou tonm kareman, anba bann Lazans e bann size ki annan pou fer avek son lareg Gouvernman i ava kree bann Lotorite oubyen bann Komisyon.  E dan bann sekter stratezik ki enportan pou pei, Gouvernman i ava les fonksyonnman bann konpannyen parastatal.

Ki i verdir.  I vedir ki sa Polisi ki Gouvernman ti etablir 4an pase, in kree dan sa lespas 4an bann Minister, bann Lazans.  E ki tou bann Minister, Departman ek Lazans, zot depan lo Bidze pou zot fonksyonnman.  A distenksyon, bann parastatals pa ganny larzan sorti dan kof leta.  Zot, zot bann konpannyen komersyal.  4mwan pase, Prezidan ti deside pou li kree en nouvo Departman, en nouvo Departman ki annan pour bi fer promosyon dan sa ki nou appel, business innovation e osi entrepreneurship. E enn fwa ki sa nouvo Departman in ganny etablir, premye keksoz ki zot in fer se pou regard sa Polisi ki Gouvernman ti met anmars 4an pase.  E se poursela ki ozordi nou pe prezant sa Proze De Lwa ki eksprim sa bann Polisi.  Ki Polisi endistriyel i ava reste touzour avek Departman.

Son bann laspe stratezik i a reste en fonksyon Departman.  Bann size gouvernans, administrativ i ava reste toultan avek Departman.  Bann size korperasyon enternasyonal i ava reste avek Departman.  Me son size operasyonnel, ladministrasyon, i bezwen tonm dan en lorganizasyon.  Me lefe ki Sesel i telman tipti e i annan son spesifisite.       Departman pa’n vwar li neseser pou etablir 2 Lorganizasyon.  Vedir en Lazans ki ava donn servis e en Lotorite ki ava senpleman annan fonksyon pou regle.  In combine sa 2 fonksyon ansanm pou fer ki sa Lotorite ki pou ganny kree swivan laprouvasyon sa Lalwa, ki pou enn tre spesifik e ki pran an konsiderasyon spesifisite Sesel.

Donk sa Proze De Lwa Mr Speaker, i enn ki pou annan sa bann fonksyon swivan.  Enn fwa ki Gouvernman atraver sa Lotorite, atraver son Board, i deside ki i annan sa ki nou apel en industrial estate e ki sa i bezwen ganny gazete anba Lalwa.  Lotorite i egzers son bann fonksyon.  Ki premye fonksyon.  Dan ka kot in ganny donnen later e ki sa later i annan bi pou met bann lenfrastriktir.  E la mon pran legzanp bann lantrepriz, bann pti lantrepriz.  Lekel ki annan sa fonksyon pou fer sir ki i devlop bann plan?  Sa lotorite pou annan sa manda pou li devlop sa bann plan dapre Polisi ek stratezi ki Departman i annan. Me dan ka kot i annan en estate, e ki i annan bann biznes ki deza lo la e pou ilistre sa legzanp, nou koz lo Providence.  La fonksyon sa Lotorite, se fer sir ki sa estate i ganny byen zere, savedir nou pe koz lo zestyon, lo management sa estate. Me fer sir ki dan sa estate, i annan bann standar neseser.  Nou bezwen fer sir ki lanvironman pa ganny neglize e fonksyon sa Lotorite.

Me dan sa estate ler in devlope, i annan serten servis ki pa la.  Bann lenfrastriktir ki’n komanse me ki este pou fini.  Lekel ki pou annan sa responsabilite? Sa Lotorite ki pou annan sa responsabilite pou fer sir ki bann fasilite ki donn sa servis i la.  Ki annan sa responsabilite pou kontinnyen al kot Minister Finans, pou rod resours neseser avek Departman pou kapab annan sa ki nou appel, capital expenditure, pou fer sir ki bann lenfrastriktir i ganny devlope.  Sa i responsabilite Lotorite.  Me dan ka kot later in ganny donnen, parey nou dir an Kreol, in pas en bay.  La nou pe koz sa ki’n arive yer, me i osi enportan pou nou regarde the way forward. The way forward, se ki dezormen avek kreasyon sa Lotorite, zafer donn later, pou nepli tonm anba Minister ozordi ki pe fer, Land Use and Housing, i pou tonm kareman anba sa Lotorite.  E sa mon krwar i enportan an term Polisi e son Polisi i bezwen reflekte nouvo Polisi ki pe ganny enplimante par sa Departman ki Prezidan ti kree 4mwan pase.  Alokasyon later an vi bezwen e nesesite pou pei kontinnyen devlop son bann aktivite e servis endistriyel.  Donk la lenportans sa Lotorite.

Me dan ka kot nou’n vwar ki Gouvernman in konble later pou li kapab donn later nou dimoun, pour ki nou dimoun i annan son devlopman e fer aktivite, i bezwen annan en devlopman, en devlopman pou sa landrwa.  Me en devlopman ki byen kordinen, se poursela ki nou dir sa Lotorite i ava fer sa travay an kolaborasyon avek lezot Lazans e Minister ki ozordi nou annan dan pei.  Nou swete ki nou Lasanble i reponn a sa nouvo lapel pou nou al devan, me ler nou pe fer sa nou osi bezwen sitiy e nou avek bann konsern e sitiasyon ki nou pe viv ladan ozordi ki nou konnen .  Par egzanp enn bann kesksoz ki nou konnen, nou konnen ki i egziste SENPA e avek sa Lotorite, nou bezwen fer distenksyon ki rol SENPA pa pou annan.

E la mon ti a kontan eksplike ki rol SENPA, se en rol promosyon.  Promosyon, lankourazman pou nou bann dimoun ki pe fer bann aktivite dan craft par egzanp.  Promouvwar sa.

Cottage industry, se en lot dimansyon son travay ki en kantite latansyon i bezwen ganny donnen.  Me o size management bann micro enterprise, sa set en sanzman, sa fonksyon pou tonm anba Lotorite.

Donk Lotorite li i an kontinnyen fer, nouvo manda ki pe ganny donnen, i ava manage bann premises parey nou pe dir dan Lalwa, kot i ava annan bann enterprises.      SENPA son rol anba Polisi Departman, se fer promosyon.  Se osi ankouraz bann dimoun ki’n fer cottage industry pou osi grosi e ki zot ava tonm dan small and medium enterprise anmezir ki zot pe devlope.  I pa kestyon ki enn fwa ki ou’n fer, ou’n anrezistre koman en cottage industry, ou reste parey.  Me si ou anvi, napa problenm.  Me si SENPA i vwar ki ou kapab, ou kapab devlope, nou bezwen pous bann dimoun pou kapab devlope.

Donk sa set en nouvo Lotorite, en nouvo Lotorite definir dan Lalwa pou pran responsabilite bann industrial estates e osi bann landrwa kot pou annan parey nou pe dir, bann micro enterprise. E lefe ki nou kree en Lotorite, sa Lotorite i bezwen annan osi pouvwar e enn bann pouvwar ki sa Proze De Lwa pe donn li, se pourvwar pou pas bay.  Enportan sa.  E dezyenm pourvwar ki osi enportan an konsiltasyon avek Minis Finans, se regarde bann reveni ki bezwen kolekte, bann fees ki bezwen etablir.  Sa i tre, tre enportan.  Trwazyenm pourvwar ki mon vwar, mon krwar i osi tre enportan dan sa nouvo Proze De Lwa, se fer sir ki bann standar i ganny byen swiv.

Enn fwa ki in ganny diskite avek tou bann stake holders, i bezwen ganny byen swiv.  E la nou pas nou lo en striktir ki sa Lotorite i annan.  E la nou krwar dan gouvernans, dan nouvo mod gouvernans ki sa Lotorite i bezwen annan.  Savedir sa Lotorite, son manda pou ganny donnen atraver Lalwa me anmenmtan i pou annan li en Board. Me se sa Board ki pou donn aprouvasyon bann gran lalinny travay ki bezwen pe fer.  E sa CEO e Deputy CEO ki ganny apwente, i ava egzekit bann desizyon ki Board i pronons son lekor lo la.  E lezot laspe Lalwa i pa diferan avek bann model Lalwa e Lotorite ki Gouvernman in deza pronons son lekor lo la e ki nou Lasanble Nasyonal in fini aprove.

Finalman, sa nouvo Proze De Lwa set en bon keksoz pou bann biznes ki tonm dan kategori industrial estates akoz sa i ava permet zot konnen lekel ki reprezant Gouvernman kot sa estate i konsernen.  Akoz zot osi zot annan zot konsern e zot bezwen annan en entity ki zot dyalog avek, sa i reprezant en bon nouvel pou zot.  Me anmenmtan en lot bon nouvel pou zot.  Zot ava konnen ki atraver sa striktir, bann keksoz ki pending, pa akoz ki nou koman Gouvernman nou’n avi i reste pending. Me i pending akoz nou klima ekonomik dan lepase me ki ozordi nou vwar pe amelyore i ava permet ki ofir e anmezir ki Lotorite i sanksyonn son bann plan, nou a kapab rezourd bann problenm lenfrastriktir.

Lot bon nouvel pou bann ki enpe letan pe espere e kote zot devret ale, me lefe ki nou annan en Lotorite ki i konnen ki sa i son responsabilite e ki i annan demann e fer sir ki i pa esper zis later kot nou pe devlope, me sa Lotorite i son manda pou li kapab lwe bann lenfrastriktir ki a permet li apre lwe avek bann pti, bann small businesses.  An sa ki konsern bann micro enterprise. Lot bon nouvel se en bon nouvel pou pei anzeneral, ki nou konnen ki, nou annan en sekter, en sekter ki enportan pou pei.  Devlopman endistriyel, ok. E ki dan dan se devlopman nou annan en Departman ki son rol se pour ankouraz bann zenes ki pe leve, bann zens ki pe monte ki anvi al dan devlopman sa ki nou apel antreprenarya.

I annan en lavenir, i annan en landrwa.  Donk se dan sa spirit ki mon ti a kontan ki nou Lasanble Nasyonal i vwar sa Proze De Lwa e Mr Speaker mon soumet sa Proze De Lwa devan Lasanble Nasyonal pou zot aprouvasyon.  Mersi.

 

MR SPEAKER

(Technical problem) Onorab Bristol.

 

HON ALDERIC BRISTOL

Mr Speaker, Vis Prezidan ek ou delegasyon, Manm Onorab, bonzour.  Mon ankor rapel nesans Providence Industrial Estate e sa letan, mon ti ankor pe travay Land Transport Division. Mon rapel sa tre byen akoz sa letan mon ti project officer ki ti involved avek demarkasyon road alignment e konstriksyon sa morso semen depi kot ansyen junction Roche Caiman ziska dan zanmerant vizavi UCPS lo semen highway. Mon rapel sa tre byen akoz kontrerman avek norm normal, semen ti ganny design e set pou adapte avek bann plot ki ti’n deza fini ganny demarke e menm distribye.  Sa ti komansman revolisyon biznes dan sa area e nesans Industrial EstateProvidance ti form parti sa revolisyon.  Sa menm Industrial Estate ki nou vwar in vin en landrwa tre bizi kot bann pti mwayen e menm bann gro biznes in fleri e pe fer sikse.  Sa menm Industrial Estate ki sitie lo later konble, ki serten ti boycott ler Gouvernman SPPF, Lepep ti pran sa desizyon enportan pou fer, me ki ozordi en bonpe zot in ganny zoli morso lo la e pe fer zoli profi.

Sa menm Industrial Estate kot nou bann pti biznes Seselwa ordiner in etabli zot e zot pa pe mal debourye.  Malgre tousala Mr Speaker, nou osi rekonnet ki pa tou keksoz ki neseserman mars byen parey ti merite e alors se sa ki’n nesesit sa Bill pou zisteman adres e aziste sa bann mankman e lezot keksoz ankor.

Gouvernman Lepep, tre matir e profesyonnel, dan son thinking, in vwar li neseser pou adres sa sitiasyon e sa esansyelman atraver kreasyon en Industrial Estate Authority atraver sa Bill ki la devan nou Lasanble.  Sa Bill i vin a en moman apropriye pou met en lord dan sa detrwa dezord ki annan.  Nou Gouvernman opourvwar in met later e enfrastriktir a dispozisyon nou pep e anretour nou demande ki sa fasilite i ganny servi byen e pli enportan ankor ki i byen ganny zere.

Sa Bill pe zisteman anmenn kreasyon Industrial Estate Authority pou manage, regulate, pa zis PIE, me osi lezot lokasyon kot i annan micro enterprises. Mr Speaker, i annan enpe lannen deza ki Gouvernman pe sey divors li avek management bann propriyeter endistriyel tel ki PIE e bann ki aktyelman tonm anba SENPA tel ki Union Vale.      Sa pou fer ki esansyelman, bann lezot lokasyon ki’n ganny demarke tel ki Persevance North, pou osi tonm anba zirisdiksyon sa nouvo Lotorite.  Mon byen kontan, mon byen apresye zisteman, ki Vis Prezidan in eklersi lo rol SENPA e Industrial Estate Authority ki pou annan en rol ki pou plito konplemant travay kanmarad.   I annan en bon rezon valab akoz sa bann sit micro enterprises pou ganny transfer avek sa nouvo Lotorite, zisteman pou li bear SENPA, pou li konsantre lo son rol promot pti biznes dan Sesel.

Mr Speaker, koman en teknisyen mon’n remarke ki menm avek tou sa bann lentansyon, in annan serten mankman dan serten fason ki PIE ti ganny konsevwar.  Par egzanp, lenfrastriktir tel ki semen, parking e bon servis koridor.  Plasman apropriye kalite design bann batiman in osi pa toultan suit bann desired purposes.

I osi annan sa issue kot tou bann biznes ki fer serten tranzaksyon spesifik ti kapab ganny groupe ansanm pou fasilit enta lenkonvenyans ki piblik i fer fas avek.  Se pour sa rezon Mr Speaker, ki mon vwar parmi bann fonksyon sa Lotorite dan part 2 sa Bill pe zisteman adres sa bann issues ki mon’n mansyonnen.  Mon sit par egzanp, koman fonksyon sa Lotorite anba part 2 4(c), “To prepare plans and programs for the development of the industrial estates and micro enterprise premises”. E osi 4 (d), “To oversee performance of contracts relating to infrastructure development of industrial estates and micro enterprise premises”. Sa 2 morso fonksyon sa Lotorite, i tre enportan se akoz atraver bon planifikasyon ki ou pou ganny en bon rezilta lo sa ki ou ti anvi achieve dan premye lye.

Bon planifikasyon pou ede deside lo ki kalite lendistri ki apropriye pour ki lokasyon e tre enportan sa akoz pa tou kalite biznes ki kapab melanze avek lezot biznes pou bann tre bon rezon valab.

Par egzanp, en take away pa kapab sitie next door avek en latelye sarpantye ki prodwir lapousyer, ki pa ezenik e pa bon pou lasante piblik.  Mr Speaker, i osi en fe ki i annan bokou aplikan lo waiting list pou later endistriyel Providence.

Anmenmtan, i annan later ki’n ganny donnen e serten dimoun depi pli ki 10, ou menm 15an depi lepok SIDEC e sa later pa ankor ganny devlope oubyen serten dimoun in vann pou pri tre o.  I tre enportan alors pou konnen ki pou arive e ki pou fer avek sa bann lessees ki pa ankor devlop zot later oubyen, ki vann ki vann zot leese ek lezot dimoun.  Mon konsider sa koman en sitiasyon tre enportan e byen malonnet ki somehow, i merit ganny adrese, vit e avek efikasite.

Mr Speaker, mon dernyen pwen ki mon anvi touse lo sa Bill, i lo part 4 (e), “To promote sustainable development of industrial estates and micro enterprises”. Sa bout dan sa Bill i tre enportan e i adres e i enteres mwan bokou koman reprezantan mon distrik e les mwan eksplike akoz.         Takamaka, i en distrik ki par son lokasyon zeografik, i enpe retire avek bann lokasyon ki’n zisteman gann dezinyen pou bann aktivite endistriyel, pti e mwayen biznes.  E sa, i en dezavantaz pou sa bann bon skills ki egziste dan mon distrik.  So, ensasyelman, morso sa Bill ki mon pe fer referans avek pou tous sa Scheme ki nou apel SODOC, one district, one project.

En proze siporte par SADEC, SODOC pou permet desantralizasyon lokasyon pti biznes pou ariv dan distrik e benefisye nou bann pti e mwayen biznes.  Sa i en proze ki mon antas bokou lenportans avek.  Sa Scheme pou anmenn en katite lavantaz, tel ki ankouraz biznes, redwir gran deplasman pou biznes e kliyan, promote cultural tourism. Fer distrik vin pli vivan e pli vibran, ogmant lekonomi pei e kree en lidantite pou sak distrik.  I mon rev pou vwar sa Scheme ariv dan mon distrik.  Mon pa pe koz manti Mr Speaker, mwan menm mon’n deza komans serten demars negosiasyon lo serten mors later prive dan distrik e la mon pe zis esper sa Bill pase pou mwan ganny lasistans sa Lotorite pou ed nou distrik dan sa demars pou nou kapab ganny nou prop, small business premise.

Mon konnen ki sa i en Scheme ki sa Lotorite pou atas bokou lenportans avek e ki koman reprezan distrik monn fini gear up pou travay tre pros avek sa nouvo Lotorite.  Mr Speaker, i reste mwan pou swet sikse sa nouvo Lotorite e mon konnen travay pa pou fasil okomansman.  Me parey mon kontan dir, where there a will, there’s a way. Mon konnen ki nou Prezidan in apwent en madanm ki for e dinamik koman PS e mon konvenki ki nou pou bouz dan en nouvo direksyon pou benefis biznes dan Sesel sirtou bann pti e mwayen biznes.     Biznesmenn bann ki pe leve ou bann ki oule leve pou debourye, sa i en loportinite ki pe vin devan zot laport, ki pe vin a zot dispozisyon, en Lotorite ki for e kredib.  En Lotorite ki pou adres e redres bann issues, en Lotorite ki pou planifye e zer nou bann premis endistriyel pou fer tou posib pour sa ki anvi leve debourye i a omwen ganny en sans fer li.  En Lotorite ki pou deal avek bann labi e bann keksoz ki malonnet dan sa sekter, en Lotorite ki pou tir lapay dan nou lelis, en Lotorite ki pou ede anmenn Sesel pli devan.

Mon kontan senplisite sa Bill, i pa difisil pou lir, i pa difisil pou enterprete e i pa difisil pou konpran.  I adres tou bann key issues lo topik Industrial Estates e micro industrial premises dan konteks nou pei Sesel.  Avek sa 2 mon Mr Speaker, mon termin la e mon aport mon sipor pou sa Bill. Mersi.

 

MR SPEAKER

Onorab Bresson.

 

HON GALEN BRESSON

Mersi Mr Speaker, bonzour Vis Prezidan avek ou delegasyon.  Mr Speaker, ozordi dan Sesel bokou in ganny fer pou ankouraz biznes prive akoz apre tou, se zot ki enzekte bokou atraver tax, se zot ki anploy plis ki 65 poursan nou workforce Seselwa.  Lo nou kote, Gouvernman Sesel in toultan dedye bou e promot bann lantrepriz prive.  Enn parey nou pe koz lo la, se endistriyel, ki limenm i bezwen serten landrwa pou li operate e sa bann landrwa ler zot operate i annan serten Lalwa, regilasyon ki bezwen ganny swiv.

Ozordi sa Bill, zisteman si mon zis lir premye fraz ki ganny dir, “Seeks to create an Industrial Estates Authority for the management and regulation of industrial estates and micro enterprise premises and amend the Small Enterprise Promotion Agency Act 2004”.

Mr Speaker enpe letan pase, nou Gouvernman atraver SIDEC sa letan, ti’n vwar bann micro enterprise ti bezwen landrwa en pti pe retire ek lavil, ki ti pe ganny bokou konzeste sa letan MCBD, e la, nou ti vwar bann tipti micro industrial estate parey Union Vale ki’n ganny create.  Apard sa, nou ti vwar kreasyon ler nou ti vwar devlopman reclaimed land kot ti ganny bokou opoze sa letan.  Gouvernman ti still bouz devan avek son pla e laba, en landrwa spesifik ti ganny kree pou devlopman bann lendistri.  E anba sa Bill ki pe ganny pase ozordi, i annan en Lotorite ki pou ganny met anplas e mon krwar Gouvernman osi in vwar azour ki apre tou sa devlopman, mentenan se ler pou fer sir ki i annan sa Lotorite anplas ki li i la pou asire ki bann devlopman ki pe ganny met anplas lo sa bann sit endistriyel e bann devlopman ki pou vini dan bann nouvo sit endistriyel, pou azour ek sa ki pe arive dan Sesel e devlopman dan Sesel.

Mr Speaker, avek bann legzanp konkret, mon ti a kontan siporte akoz mon vwar sa Lotorite i merit ansemoman, ganny met anplas.  Annou regard PIE or Providence Industrial Estate en landrwa ki’n deza etablir.  Sirkilasyon trafik laba, nou regard semen kot i annan volim trafik vreman gro e la i toultan konzeste.  E sa, i pa neseserman byen pou bann biznes laba akoz sirtou zot the heart of the business industry e se zot ki bezwen kontinnyelman pe devlope.  Parking fasilite, sa i pa ansemoman, le meyer lo sa PIE.

Trotwar ouswa pavement, i kapab dan vi bokou dimoun, i pa en problenm me i kapab en problenm si trotwar in ganny mal kalkile, son lespas i ganny mal kalkile.  Pa bliye bann dimoun ki al dan industrial estates, sirtou i annan en sirkilasyon ase vit apye ki nou pe fer akoz nou vin fer en biznes, ou retire vitman.  Alor pavement i bezwen conducive e napa bann spacing or bann gaping ki pou demen kapab andomaz lipyen dimoun.

Nou osi bezwen mazinen ki dan Sesel, nou bezwen komans fer bann akse par egzanp, pou wheelchair, pou dan bann landrwa industrial estate akoz i annan bann dimoun ozordi ki dan zot wheelchair zot kapab drive, zot kapab debarke al dan bann landrwa industrial estate pou fer sa ki zot bezwen fer.  Alors bann akse koumsa i bezwen ganny met anplas.

Lo dezyenm pwen, lanbelisman e lanvironnman.  Ozordi PIE nou’n vwar en devlopman fantastik me bann pye dibwa par egzanp ki’n ganny mete i pa neseserman byen akoz se zot menm, zot rasin ki pe kas tou pavement, pe kas tou semen e pe menm andomaz serten batiman dan son striktir e sa dan limenm, i bann keksoz ki nou bezwen regard ladan akoz i konsern nou lanvironnman.  Nou bezwen annan sa green area ki promouvwar isi Sesel, i en keksoz ki byen pou nou.  Bann bin sites lo kote lanvironnman par egzanp.  I bezwen en keksoz akoz i en industrial estate, i annan en heavy flow of traffic pandan lazournen e bokou bann dimoun pe servi sa bann bin dan tou sort fason.  E bokou fwa menm la si nou pase nou pou vwar bann over flow bins ki pa ganny tire regilyerman e la sa i koz enpe dan lanvironnman bann pes.  Nou annan bann lisyen ki vin la ki vin fouy dan bann bwat manze par egzanp e sa tousala i pa very conducive dan en industrial area.

Bann service ducts, en lot pwen ki ase enportan.  Ozordi lendistri i devlope.  E dan lendistri ki devlope, toulezour i bezwen en keksoz nouvo, dan bann plan devlopman ozordi nou vwar le problenm, bann service ducts ki bezwen tanzantan.  En semen i ganny kase pou pas en lalinny telefonn, pas en lalinny internet e tousala nou bezwen kalkile egzakteman sa Lotorite se li ki pou mentenan parey Vis Prezidan in enformen dan son prezantasyon, ki ler i vin bann nouvo i pou gide tousala.  E sa i vreman, vreman enportan akoz in tir en serten retar ki bokou lendistri ki ler i vini pou met son lekor lo later pou devlope, i bezwen al espere ki la bann lenfrastriktir i ganny rekase, remet anplas pou li kapab devlope e komans son loperasyon.

Nou osi annan laspe itilite piblik par egzanp delo.  Ozordi serten landrwa PIE kot delo i annan en problenm, probableman ek Planning ki zot pa’n dir bann building ki bezwen annan sufficient water storage pou tou.  Akoz apre tou, its an industrial area, nou bezwen fer sir ki sa i ganny sirkilasyon byen.  Ki delo i annan ase presyon ki ariv dan tou landrwa akoz en landrwa lendistri delo i vreman, vreman enportan dan tou sord fason akoz ou pe servi serten kliyan, serten materyo, zouti and so on and so forth.

Bann regilasyon, eski pe ganny swiv, eski pe ganny, bann dimoun ki’n ganny bann landrwa PIE en legzanp.  Bann dimoun ki pe fer bann batiman.  I annan regilasyon ki dir ou pou bezwen kit apepre en 50 poursan pou bann tipti biznes e sa pou les zot rezourir zot osi.  Akoz bann pti biznes napa en fason pou zot fer zot building, ouswa pou annan tro bokou building ki pou ganny fer.  E eski sa pe ganny swiv, eski pa tou building pou menm dimoun, pa li ki pe ofer tro bokou, eski bann pti biznes pe ganny sans pou li antre.  Eski bann regilasyon pe ganny swiv. Eski lo kote devlopman, still anba rules and regulation napa spekilasyon.  Nou pran later nou met la e apre nou speculate anmezir ki bann lot building i vin anplas e la valer later i monte apre nou vann.          Sa Lotorite i la pou al regard an egzistan e pou fer sir ki nouvo ki vini, tousala pa pe ganny met an zwe.  E osi bann tipti keksoz dan regilasyon, par egzanp, dan en landrwa lendistri eski we should make it into en landrwa ki annan bann flats.  Ozordi dan landrwa lendistri i annan flats.Eski en keksoz ki nou bezwen re-regarde.  Eski i izenik ouswa eski i byen ki sa i arive.

Mr Speaker, avek sa detrwa legzanp mon ti anvi repas en pti pe en rezimen lo akoz ki sa Lotorite ki ganny proumouvwar anba sa Industrial Estate Authority Bill i merit vini.  Akoz lendistri pe devlop vreman rapidman Sesel apre tou sa ki Gouvernman i met anplas pou private industry pou rezouir e se la kot nou, nou pe expand lo kote Gouvernman.  Gouvernman pe met azour bann nouvo landrwa pou fer lendistri devlope e avek lepase, nou Gouvernman i en keksoz ki byen.  Nou’n met lepase anplas e li i a gid nou dan lefitir pou gidans pou en landrwa ki pli productive pou bann lendistri.  Avek sa Mr Speaker, mon ti pou aport mon sipor pou sa Industrial Estate Authority Bill, 2013.  Mersi.

 

MR SPEAKER

Onorab Houareau.

 

HON HERBERT HOUAREAU

Mersi Mr Speaker.  Bonzour Vis Prezidan ek ou delegasyon e en bonzour pou tou dimoun ki alekout.  Mr Speaker, Industrial Estate Bill, 2013 i koz lo en Lotorite pou manage e fer bann regilasyon kot tou bann industrial estate parey Providence Industrial Estate e bann landrwa kot bann pti biznes i baze andeor zone, enpe partou dan bann distrik.  Sa Bill i ganny divize an 6 parti e mon ti a kontan pas lo la an bref pou bann dimoun kot lakour.

Parti 1, i donn bann leksplikasyon, bann enterpretasyon Lotorite, Board eksetera.  Parti 2, i koz lo etabli en Lotorite pou industrial estate fonksyon  sa Lotorite, pourvwar sa Lotorite e pourvwar Minis lo sa Lotorite.  Parti 3, i koz lo Board sa Lotorite, setadir etablir en konpozisyon Board, fonksyon Board, reminerasyon eksetera.    Parti 4, i koz lo ladministrasyon sa Lotorite.  Setadir Sef Egzekitiv, son Depite e son bann dimoun ki travay lo sa Board.  Parti 5, i koz lo fon e kont sa Lotorite, setadir, fon sa Lotorite se larzan ki ganny aprouve par en Approbation Act, son bidze anyel ki enkli son depans e Bidze Kapital pou en lannen.

Sa Lotorite, i merit gard son kont annord e sa pou ganny odite.  Parti 6, i koz lo laplikasyon Penal Kod ki aplik pou bann travayer servis piblik.  Seksyon 91 a 96 penal Kod ki koz lo koripsyon e labi letan en travayer Gouvernman ki dan servis piblik i fer.

Nou al rod sa pti seksyon 91 a 96 Penal Kod Mr Speaker.  I koz lo koripsyon e labi dan servis piblik e pou bokou ki pa konnen, mon ti a kontan dir zot ki seksyon 91 Penal Kod, i fer provizyon pou en lanprizonnman, 3an prizon.  92, 7an prizon, 93, 5an prizon, 94, 5an prizon, 95, 3an prizon 96, 5an prizon pou bann dimoun ki fer koripsyon dan servis piblik.  Proteksyon sa Act, i ganny fer an bonn fwa e kontrol ki sa Lotorite pou annan lo bann lezot assets ki bann lezot Lazans i annan.  Setadir, bann propriyete parey later e building.

Mr Speaker, lo tou Bill nou kapab balans pour e kont.  Letan industrial estate ti ganny konble, pa bokou ki ti krwar ladan.  Me se zot ki pe byen gannyen ozordi.  Mwan, mon krwar ki in ler pou met en lord dan bann industrial estates e bann landrwa ki napa delo, ki napa semen, ki napa rigol i kapab ganny fer anba sa Lotorite pli vit, pli zis san anvoy dimoun a gos e a drwat.  Sa Lotorite, i annan manda pou met lord, balye son lakour limenm, netway son zafer limenm e fer son semen limenm.  Sa Lotorite pa pou kapab dir e blanm person aprezan.  Si i pa marse, se li ki bezwen blanm son lekor.

Alor, i la e annou fer li marse e fer li byen.  Annou krwar dan nou Sesel.  Annou krwar dan nou Seselwa ki anvi progrese.  Lendistri i neseser, i aport plis tax pou nou pei e i kapab fer nou pei bouz bokou pli vit.  Letan en zanfan i ne, nou donn li sans pou grandi e letan i grandi, nou donn li tou sa ki i bezwen e nou espere ki i vin en bon adilt en zour e son lavi i fleri.  Sa Lotorite, pou mwan i parey, alor annou donn li en sans e annou donn Sesel e Seselwa en sans pou devlope e al an avan.  Mon krwar dan sa Lotorite, dir konm fer, pou donn zot sa sans travay dir pou Sesel e ki Bondye i a beni zot e ed nou pei Sesel progrese.  Mersi Mr Speaker.

 

MR SPEAKER

Onorab Pillay.  Request Onorab.  Request.  Ok, bon i paret Onorab Pillay, sistenm pa oule ou koze ozordi.  Onorab Arnephy.

HON BERNARD ARNEPHY

Mersi Mr Speaker, bonzour Minis avek ou delegasyon.  Mr Speaker, permet mwan dir detrwa pti mo lo sa Proze De Lwa ki mon panse in vin a bon moman.  Ozordi nou pe koz bokou lo inovasyon e devlopman biznes dan Sesel.  E parey in ganny fer resorti, koman en Gouvernman nou’n met sa koman enn nou bann top priorities pou donn sans biznes dan nou pei pou epanouir.

Ozordi parey nou konnen bann biznes pe fer fas avek en kantite defi.  Defi in terms of lenfrastriktir apropriye pou zot kapab run zot bann biznes.  Nou fer fas bokou avek problenm cost of rent ki bann biznesmenn i fer fas avek e souvandfwa, petet akoz dan serten lenstans, i annan en pti pe sa mis-management dan lafason ki sa bann landrwa ki pe operate, donn sa servis pe ganny zere.

So, parey nou’n ganny dir, sa Lotorite i pou annan manda prensipal pou devlop e manage bann industrial estates e sa anretour, i ava donn bann biznes en pli bon servis.  Sa anretour, ava ede pou adres bann konsern partikilye ki bann biznes.  Bann SMEs i fer fas avek e anretou, rann zot servis pli viab, pli rantab e donn manm piblik bann pli bon servis.

Mr Speaker, 2 semenn pase Minister for Tourism ti vin dan nou Lasanble e ti koz lo Cultural Tourism Policies e dan sa prezantasyon nou’n vwar ki ankor ozordi en kalite par egzanp nou bann pti artizan ki anvi bouze, ki anvi fer pli byen me souvandfwa zot vwar zot dan serten difikilte akoz zot mank fasilite adekwat pou zot kapab prodwir zot bann servis ei anretour display e promouvwar zot bann servis.  So mon mazinnen ki ler Lotorite i vin anfors, sa i ava bann pwen konsern ki nou bezwen tackle ansanm avek bann Minister e Departman konsernen pou nou fer sir ki nou adres sa bann issuesAgain, last week nou ti attend en Seminar kot nou ti pe koz lo The 5 Years of Economic Reform and Challenges Ahead.  E pandan louvertir sa Konferans, Prezidan Michel, Prezidan Repiblik ti koz lo economic growth nou pei.  Wealth, distribution e ler i ti dir nou fer, letan i annan krwasans ekonomik, ler nou kre larises pou nou pei nou bezwen fer sir ki sa larises i ganny partaze avek tou dimoun e mon panse dan lespri sa Lotorite, se sa ki nou pou fer.  Akoz nou pou kree bann kondisyon kot bann businesses i kapab devlope, epanouir e anretour, se bann konsomater, bann kliyan ki pou benefisye avek bann pli bon servis, bann pli bon prodwi e a bann pri ki bokou, bokou pli abordab.  Ankor ozordi, nou pe koz lo konpetisyon dan lanvironnman biznes.  E pou nou kapab annan konpetisyon ankor, i nesesit ki nou annan bann bon servis a dispozisyon bann konpetiter.  E sa i a ede ankor anmenn sa larises kot bann konsomater ki pe servi bann prodwi.

Ankor dan bann nouvo delopman ki nou’n tande resaman se ki PUC, ok, in anons rebalansman bann tarif.  e ozordi nou vwar poudir en kantite businesses zot dir ou poudir zot pli gro defi se the cost of energy.  Ok, elektrisite, delo.  E mon panse petet ler Lotorite i pran sarz bann estates, sa bann fasilite, then, nou ava invests dan bann lekipman ki pli energy friendly, ki pli energy cost effective e ankor la sa i ava ede pou redwir bann cost ki bann operater i fer fas avek pou zot kapab run zot bann businesses.

Ozordi en dimoun ki deside pou antre dan en biznes, i vwar li fer fas avek bokou difikilte in terms of birokrasi.  So, la parey nou’n ganny dir, SENPA petet pou annan sa rol promosyon e Lotorite li, i pou annan sa rol fasilitater in terms of managing sa bann estates kot bann businesses i take place.  So, mon panse sa i ava ede osi at the same time, pou ease enpe sa issue birokrasi ki bann dimoun ki deside pou li lans dan en biznes, etablir li dan son biznes e komans son biznes i fer fas avek.  E sa anzeneral, i pou ede dan the ease of doing biznes dan Sesel.

Mr Speaker, nou dan sa Lasanble nou siport tou sa ki bon pou Gouvernman.  Nou siport tou sa ki bon pou ede pou anmenn plis larises pou pei.  E resaman nou’n vwar poudir nou’n vot lo en katite Bill e sa bann Bill i reprezant laspirasyon nou bann dimoun.  Bann dimoun ler i koz ek nou, zot dir nou zot ti a kontan vwar keksoz.  Gouvernman pe fer en kantite, me nou ti a kontan vwar keksoz al lo en nivo, en nouvo lelan.  E mon panse se sa ki nou pe fer egzakteman.  Nou ti a kontan.  Nou vizyon se ki nou vwar bann pti e mwayen antrepriz Sesel kontinnyen fleri, kontinnyen fer plis progre.  Gouvernman in met bann mekanizm, bann pti loan. Me sa bann loan pa pou abouti dan gran soz si napa bann lezot kondisyon favorab adispozisyon sa bann pti biznesmenn ki zot kapab fer zot biznes.

Nou pe kontinnyelman empower nou bann lantrepriz pour ki nou anmenn Sesel sa brand made in Seychelles.  E mon krwar ozordi, ler nou koz lo tourism nou dir nou ganny en kantite touris me eski par egzanp bann touris pe vreman depans zot larzan as i fodre.  Petet non, this is where the made in Seychelles i antre.  Ok, kot nou ava annan bann prodwi pli byen anbale, bann prodwi pli byen fini kot sa i ava ankouraz nou bann viziter e osi byen ki nou bann lokal, pou aste nou bann prodwi.

Mr Speaker, recently nou ti ganny sans nou 2 Onorab Jacqueline partisip dan en Seminar in China, zisteman an relasyon avek promotion of SMEs e nou vwar poudir sa ki nou, nou pe fer ozordi en kantite emerging economies parey Lasin, zot pe deza fer.  E mon panse poudir sa pou anmenn en plus pou nou.  Kot Gouvernman atraver bann Lotorite, bann mekanizm neseser, i met bann kondisyon e sa i fer ki ozordi, plizanpli, bokou plis dimoun i deside pou li venture dan bann diferan field e sa i anmenn larises pou son pei.

Sekter prive ozordi, se li ki pe zwe sa rol pivotal dan nou lekonomi e mon krwar Gouvernman i vwar sa, i ankouraz sa e se pour sa rezon ki en tel Lotorite ozordi ki pe ganny set up, i pe ganny set up avek bi pou kontinnyen promouvwar e ankouraz bann pti biznes pou zot epanouir.  E parey mon’n dir, sa i pou osi permet nou bann dimoun pou zot kapab desantraliz enn pti pe bann aktivite.

Ozordi par egzanp nou pe koz lo PIE. Me nou, nou ti a kontan parey Onorab Bristol in dir vwar ki plis lenfrastriktir i ganny mete a dispozisyon bann distrik par egzanp.  Ozordi nou annan en kantite nou bann pti dimoun dan distrik ki pe debourye.  Me petet zot fer li kot lakour e kot lakour i pa neseserman sa landrwa conducive pou zot kapab market zot bann prodwi.  So then, la mon panse poudir sa Lotorite ler i ava vin anmars i ava idantife dan sak distrik landrwa potansyel kot sa bann businesses i kapab erect e from their on, mon krwar bann dimoun ava en pwen fokal pou zot fer zot marketing, zot promosyon e vann zot bann prodwir.

So all in all Mr Speaker, mon krwar mon pou siport sa Proze De Lwa akoz parey mon’n dir, i en Proze De Lwa, it’s a step in the right direction pou nou kontinnyen fer sir ki nou bann SMEs, nou bann pti businesses i kontinnyen devlope e ki antretour, sa i anmenn benefis pa zis pou bann etranze, me osi pou nou bann Seselwa ki konsim tou nou bann prodwi lokal.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker pou mwan i marse. Mr Speaker, Industrial Estates Authority Bill, 2013 ki nou’n ganny prezante ozordi, pe demann laprouvasyon nou Lasanble.  Mon napa okenn dout ki sa Proze De Lwa in vin dan en letap tre enportan dan prosesis transformasyon devlopman e dezertifikasyon baz lekonomi nou pei Sesel.  Sa Bill ki Vis Prezidan Faure in anmennen, i rezilta en seri deba ki nou koman politisyen nou’n fer avek nou sitwayen.  Ki’n en size bann dyalog ek demann ki nou’n deza ganny soumet avek Minister konsernen.  Plizyer kestyon in deza size deba, anplis Mosyon in deza ganny prezante e debat lo la dan sa Lasanble.  Konteni bann aktivite ki ozordi pe deroule dan zone endistriyel Providence, ek lezot zone in touzour en konsern serye nou Lasanble.  Nou senserman konvenki ki i annan en gran nesesite pou revwar e redonn oriantasyon dan konteni bann regilasyon oubyen Lalwa ki definir zone endistriyel Sesel.

Mr Speaker, i en soulazman.  En nouvo lespwar pe ganny batir aparti sa Proze De Lwa ki fer provizyon pou annan en Lotorite sarze avek plizyer responsabilite.  Ki ava asire ki nou annan en vre zone endistriyel Sesel ki fer lafyerte Sesel e lafyerte tou Seselwa.        Mr Speaker, bann gran savan i dir, si ou pa konpran e apresye ou pase, i tre difisil pou ou konpran e apresye ou prezan e definir klerman ki direksyon ou devret pran pou amelyor non selman ou pase, me osi ou lavenir.

Mr Speaker, sa i diferans esansyel ki egziste ant bann gran vizyonner.  Arsitek ki’n deside, ki’n resolve ki pou non selman satisfer nou pase ek nou prezan, me ki’n paran bann desizyon kouraze, brav pou kre labaz pou transform pa zis son legzistans, me desten en nasyon, desten en pep.

Mr Speaker, i kwayans dan kapasite Seselwa ki’n fer Gouvernman sa parti ki mon reprezante isi dan sa Lasanble, ozordi pou kre en sirfas konblaz lo lekel Sesel in kree zone endistriyel.  Malgre ki a serten moman dan nou listwar, serten politisyen in esey konvenk lemonn e Seselwa, ki konmsi nou’n komet en krim kont limanite.  Sa pa zanmen dekouraz nou, in fer nou vin pli konvenki e konfidan ki nou ti lo bon semen.

San dout desizyon pou kre Lotorite pou rekalibre zefor devlopman endistriyel Sesel, i reprezant en lot pa dan bon direksyon. Ozordi personn pa bezwen demande, lekel ki’n benefisye plis dan bann zone endistriyel.  Lekel ki pe lager plis later pou agrandi zot biznes.  Se menm bann dimoun ki’n donn lanmen kritik negativman tou nou demars pou batir sa zone endistriyel.  Mr Speaker, listwar a ziz pou limenm.

Mr Speaker, labaz ki fondamantal ki pli enportan, se ki nou annan en Gouvernman ki serye, ki vwar lwen, ki sel kondisyon pou nou 1, eksperyans krwasans ekonomik reel, 2 anmas plis reveni, 3, kontinnyen finans son progranm sosyal, 4, kontinyen garant en ledikasyon gratwit, 5, donn en sistenm servis lasante gratwit ek bokou lezot keksoz.  Se pou agrandi nou baz aktivite ekonomik e kontinnyen kree bann loportinite pou biznes fer sikse.

Mr Speaker, si nou pans diferaman dan sa letap aktyel, napa personn ki pou kapab akonpli son rev ek rev son fanmiy.  I pa sa ki nou oule.  Nou swete ki vwar en pep ki viv byen, en pep ki mars lo semen progre e prosperite.  Sa i vizyon nouvo leadership, nouvo Sesel.  Sa i vizyon leadership parti lepep.

Mr Speaker, parey nou’n vwar dan sa Proze De Lwa ki devan nou Lasanble, plizyer lazans ti responsab pou fer plizyer keksoz dan zone endistriyel.  SENPA ti annan serten responsabilite, Lotorite Lanvironnman, Planning, Minister Later e dan plizyer sirkonstans, ler sitwayen ordiner oubyen biznesmenn i annan serten konsern lezitim, i ganny fer troun an ron.  Personn pa responsab.  Me sa ki kler se ki, enn i bezwen pran responsabilite.  Dezormen, ler sa Proze De Lwa i vin anfors e ler i dir pou annan en Sef Egzekitiv ki form par en Board 9 manm, mon swete ki sa Lotorite i fonksyonn a la oter kot nou ava annan leksperyans pli efikas konsekaman ede tir bokou bann blokaz dan semen ki pa prodiktif pou lepanouisman favorab aktivite biznes dan zone endistriyel.

Mr Speaker, en konponan tre enportan ki pou annan anba fonksyon sa Lotorite, se lwe ouswa lease bann later Gouvernman avek bann sitwayen pou fer marse lenvestisman.  Souvandfwa, ou tann plizyer kalite keksoz tel ki, si mon pa donn gous, mon pa gannyen.  Lozikman avek kreasyon sa Lotorite, Seselwa i senpleman demande ki fairness, lazistis, legalite dan loportinite i ganny adopte koman en lareg kardinal ki ava regle tou deroulman dan prosesis pran desizyon pou lwe swa lease en bout later avek en sitwayen ki seryezman annan gran dezir pou envestir dan son pei Sesel.

Mr Speaker, mon’n ganny les konpran ki dan striktir Lotorite i pou annan en seksyon ki pou donn konsey.  Mon vwar sa koman en keksoz tre fantastik, alor ler en sitwayen ki anvi fer biznes parfwa i vwar li litousel anfas avek plizyer defi ek difikilte.  E la ki sa Lotorite pe ganny kree, mon swete ki i a vin parey en one-stop-shop kot sa sitwayen a ganny sans pou ganny lasistans neseser pou ed li fer son biznes debout e progrese.          Mr Speaker, dan plizyer lokazyon Prezidan Michel in koz lo lepanouisman nou pep.  Donn sans nou pep pou kre larises pou limenm e pou nou pei.  In koz lo nesesite met larzan dan pos Seselwa.  Mon reste konvenki ki sa Proze De Lwa in vin en moman apropriye kot Sesel a sezi sa loportinite pou kalibre son pozisyon e par laswit, kontinnyen kree sa lanvironnman kot nou pep ava fer biznes byen, kot nou’n fini avek tou bann lanpayaz.  Sesel nou annan en rikord fer byen dan tou domenn.  Koman en nasyon nou’n montre nou konpetans e martirite ek nou rezilyans.

Mr Speaker, si 34an pase nou ti ganny konsidere e ganny grade koman en pei 3Ds Disease, Despair and Death. Ozordi nou nepli zwe dan sa lig, nou dan lig bann pei kot nou devret fyer pou ne, viv e anplis grandi be what you want to be.

Mr Speaker, i lo rikord ki pandan sa dernyen 5an Sesel in pran en nouvo lelan.  Sesel i pli determinen ki zanmen pou repozisyonn li lo lasenn biznes rezyonnal.  Konsolid e ranforsi bann lyen ki’n deza etabli e ouver nouvo frontyer dan son biznes lo nivo enternasyonal.  Konsekaman ranking nou pei in ganny amelyore, san dout nou Lasanble in debout e aprouv plizyer Proze De Lwa.  Semenn pase en Bill tre enportan ti ganny aprouve, sete the Leasing Bill. En nouvo loportinite biznes pou nou pep pou envestir ladan.

Tou sa bann demars i tonm byen dan kadreman nou vizyon reform ekonomik, i tonm byen dan kadreman Industrial Authority Bill ki la devan nou Lasanble.  Sezi sa bann loportinite, leve pran desizyon pou ou, pa zis rode kote ki mal me rode ki sakenn de nou i kapab entervenir pou pran sarz nou desten ekonomik pou kre plis krwasans ekonomik anfen vwar nou pli pre avek larive nou nouvo Sesel.  Sa Sesel modern, Mr Speaker, mon remersi ou e mon pou vot anfaver sa Bill. Mersi.

 

MR SPEAKER

Bon Onorab Pillay nou a sey ankor en kou.

 

HON SEBASTIEN PILLAY

I bon Mr Speaker, mersi.  I ti oule Onorab Arnephy ek Onorab koz avan mwan.  Thank you Mr Speaker.  Mr Speaker, mon krwar lepwen ki Onorab Fideria in fer avan mwan, i en pwen tre enportan ki nou bezwen soulinnyen kot i annan en koneksyon ant sa Industrial Estates Authority Bill ki nou pe pase ozordi e sa Financial Leasing Bill ki nou’n pase.   Mon krwar ki i annan en keksoz ki nou bezwen osi eksplike e sa i nou devwar koman Lasanble.

Ler Katriyenm Lasanble ti pran desizyon pou nou anbark nou dan reform ekonomik ti en desizyon grav, ti en desizyon difisil e bokou andeor ti kritik sa desizyon. Bann Manm ti ganny verifye atraver bann diferan fason, zournal, lo medya eksetera.  Me ozordi nou pe vwar rezilta tanzib sa reform.  Nou pe vwar ki resaman lo Summit Tv par egzanp, enn ban televizyon ki deal avek bann zafer finans Sid Afrik, in anonse ki Sesel pou fer en en krwasans pozitiv 3.5 poursan son lekonomi.  E sa krwasans i bezwen ganny soutenir par bann mezir kler, bann mezir ki anmenn bann regilasyon e bann frame work kler ki permet nou kontinnyen devlope e batir lo la.

Nou’n pas Financial Leasing Bill dan sa direksyon e ozordi nou pe pas, nou pe regard Industrial Estates Authority Bill anver menm direksyon.  Si Financial Leasing Bill pou donn loportinite sa dimoun pou li ganny akse avek lekipman pou li kapab fer son biznes, sa dimoun i bezwen osi ganny akse avek en lokasyon kot pou plas son biznes.  So, i konekte sa e nou vwar klerman poudir Gouvernman pa pe fer keksoz dan en fason dezorganize, me plito, nou pe organiz sa bann framework ki gid lafason ki nou enplimant nou bann proze devlopman e se sa ki fondamantal.  Me mwan parfwa sa ki agas mwan se ki ou vwar bokou bann swadizan bann ekonomis andeor ki bann failed businessman par egzanp ki zot, zot pare pou donn bann largiman ki parfwa pa fonde lo lafason ki Gouvernman pe antrepann sa bann proze.

E mon krwar lepep Seselwa i a zize pou limenm si noun’n nobou depi 2008, fer sa progre ki nou’n fer, i kler ki Gouvernman i annan en plan pou lefitir e fondamantalman, sak zenerasyon i bezwen fer sa ki pli byen pou zenerasyon ki swiv li.  E se sa ki sa Gouvernman ki la pe fer ozordi.

Mr Speaker ler mwan, mon regard dan sa Industrial Estates Authority Bill, mon vwar ki i annan serten mezir ki lontan ti’n ler pou nou enplimante.  Lontan ti’n ler pou nou annan en lord dan lafason ki nou devlop sa bann estates. Dan en fason soutenab.  The key word se sustainability Mr Speaker.  Akoz par lepase non vwar poudir, lafason ki nou devlop sa bann estates, i pa’n neseserman benefisye biznes dan lafason ki nou ti pe ekspekte.  But, that is not a mistake on our part, i en keksoz ki nou pa’n prevwar ki ozordi nou pe prevwar e parey tou pei ki pas atraver sa bann moman tranzisyon, ou improve avek bann leksperyans ki ou gannyen.

Si nou al regard listwar Sengapour par egzanp. Kan Sengapour ti pran serten mezir anver son lekonomi, bokou bann pei, bann lezot bann pei Was, ti kritik Sengapour.  Me ozordi, nou tou nou pran Sengapour koman en model devlopman soutenab.  I kler ki nou osi Sesel, nou pe al dan sa direksyon kot nou tipti, nou konnen nou annan en limit resours kot nou bezwen maksimiz lo sa bann resours ki nou annan e lafason ki nou servi sa bann resours.  E vwala rezon det akoz nou annan bann Proze De Lwa ozordi devan nou dan Lasanble.

En lot pwen fondamantal e mon krwar sa ti ganny soulever par Onorab Bristol se ki, i en Proze De Lwa ki kler e pou mwan, toultan en Proze De Lwa i bezwen kapab ganny enterprete par sa dimoun ki pou bezwen servi sa Proze De Lwa.  Sa dimoun ki pou antre dan en biznes i bezwen konnen ki rol sa Lotorite pou zwe anver son biznes.  Ki pou arive si i bezwen en bezwen lezitim kot i bezwen al anmenn en, mon pa konnen, i annan en largiman ki’n avanse kot keksoz pa’n ganny fer dan en fason korek.  Kote i pou ale?  I bezwen kler.  E sa, i swiv parol ki nou Prezidan ti anonse, ti dir, pou elimin sa bann red tapes e fer pli fasil etabli bann filyer pli kler pou dimoun kapab rod solisyon pou zot problem e se sa ki nou Gouvernman pe rode.

Ti difisil pou fer li an 2008, i pa pou fasil pou nou kontinnyen soutenir li, be nou bezwen stick by it. Mwan, mon krwar poudir i annan lezot mezir ki nou kapab met ankor, konsolid further sa ki nou’n fer kontinnyen move pli devan avek sa ki nou pe avanse.

Me selman Mr Speaker, nou bezwen osi soulinyen ki dan lenplimantasyon, i annan bann eleman kle ki nou bezwen konsidere.  Nou bezwen konsidere ki pou annan ase staff e kapasite neseser pour ki sa Lotorite i kapab fer son louvraz.  Mon vwar demars ki Gouvernman in fer pou re-organiz lafason ki nou prezant bann Proze De Lwa, pou donn sa bann Lotorite sa scope, sa freedom, sa lotonomi pou kapab annan sa resours neseser e sa pou mwan, i en pwen pozitiv.

Kot par lepase petet bann frame work ti en pti pe pli rizid, ozordi i pli ouver e i allow sa bann Lotorite serten abilite pou zer zot prop fonksyon san ki zot bezwen al rod rekour devan Lalwa eksetera.  E sa i enportan sa, i elimin sa endesizyon ki egziste avek nou bann Lazans.  I permet zot pou fer bann desizyon alamoman ki sa problem, sa issue, i ganny amennen devan zot.

So, anfen kont Mr Speaker, i kler.  Me pwen fondamantal ki nou bezwen fer se ki nou annan nou ozordi bokou bann estates ki’n ganny devlope, me ki osi pou ganny devlope dan lefitir.

Nou pou bezwen regard lo sa ki nou’n fer mal dan lepase avek PIE, avek lezot landrwa e analize ki sa ki nou pou bezwen fer pli byen.  E mon krwa loptik sa Proze De Lwa, se al dan sa direksyon.  Se regarde kimannyer nou kapab ozordi pran sa ki nou’n aprann par lepase e met li dan sa ki nou pe fer ozordi pou nou improve lo keksoz,  se asire ki nou Seselwa ordiner, i kapab ganny li son latelye konstriksyon.

Se asire ki nou Seselwa ordiner ki ozordi pe bezwen fer mekannisyen otour son lakour e pe ganny en pake problem akoz pe fer dan landrwa rezidansyel, i kapab ganny en landrwa pou li fer li.  Se asire ki nou annan en epanouisman biznes, en epanouisman kreasyon wealth pou tou nou dimoun.  E se sa fondamantlman ki nou parti i stand for.

The smaller guy. Se sa lentere sa dimoun ki nou defann e fondamantalman, toultan se sa dimoun ki reste a priyori dan nou latet.  Nou’n pas Financial Leasing pou donn the smaller guy loportinite pou li ganny son lekipman pou fer son biznes.  Akoz li ler i al kot labank i napa sekirite pou donn labank, li, i napa isi laba pou donn labank li.  Me ler nou dir li al rod son lekipman kote i pou mete.  E se pour sa rezon ki nou dir vwala, nou fer en Industrial Estates Authority.  Nou kree sa Lotorite pou dir, be ekout en kou la, la nou kapab manage sa bann estates koumsa.  Ou wa vini, la la ou a ganny en plas la, subject to bann kriter ki a ganny etabli.       Se sa ki nou pe rode e se sa ki nou pou toultan rode pou asire ki nou pti dimoun i ganny akse avek loportinite pou kreasyon larises dan nou pei.  Akoz se zot ki pou end up anploy 2 a 3 dimoun ki anretour, pou siport 3 fanmiy.  Se sa ki nou pe rode, e parey Onorab Arnephy i dir, se sa ki pou dinamiz sekter prive e permet nou pou kontinnyen lo sa reform e meet nou bann targets ki nou’n plan pou nou meet atraver reform.  Avek sa Mr Speaker, mon dir ki mon pou donn mon sipor sa Proze De Lwa.  Mersi bokou.

 

MR SPEAKER

Onorab Rose.  Onorab Rose avan mon pou donn ou laparol i annan osi 4 minor amannman ki ou’n fer, ou ava pran dan ou lentervansyon.  Ok.

 

HON MARIE ANTOINETTE ROSE

Mersi Mr Speaker.  Mr Speaker, mon krwar en kantite keksoz in ganny dir lo sa Bill, bann Manm in fer resorti le pwen e lentansyon Lasanble an siportan sa Bill. Detrwa semenn pase, nou ti donn nou langazaman ki tou bann Proze De Lwa ki vin devan nou Lasanble e ki byen, ki kler, ki ganny byen ekrir e ki siport Gouvernman Parti Lepep, Lasanble san okenn ezitsyon nou pou siporte e sa Proze De Lwa ki devan nou i kler, i pe al dan en direksyon kot nou konnen kot i pe ale, i alors kler ki kote parti mazoriter pou siport sa Proze De Lwa.

Mr Speaker, Zedi pase nou tou dan sa Lasanble nou ti zwenn koman en pei, koman bann sitwayen, koman bann decision makers pou non reflesir lo 5an reform e kot nou anvi ale dan 5an, 10an, 15an disi e mon rapel Vis Prezidan ti dir en parol ki tre enportan.  Very fundamental e i enportan pou nou toultan mazinen e mon anvi remet sa parol devan Parlman akoz mon krwar i enportan sak fwa nou annan en Proze De Lwa, sakfwa nou annan en desizyon pou nou fer, i enportan nou mazin sa.  I ti dir if you want to be fit for the future, we have to be healthy today. Mon’n kontinnyen re-mazin lo sa parol ankor akoz the more i think about it, plis ki mon krwar i tre enportan pou Sesel e pou bann desizyon ki nou fer.

Basically, mon’n enterpret li koumsa, tou desizyon ki nou fer ozordi, i bezwen very good sound decision, i bezwen annan bon lenplimantasyon, i bezwen byen fair pour ki dan 5, 10 a 15an, nou ankor healthy, nou ankor la, nou ankor egziste.  Nou lekonomi pe kontinnyen grandi, nou pe kontinnyen devlope koman en pei.  Nou ankor en nasyon ki vibran, nou ankor reste esansyelman, en bon nasyon, en bon lekonomi, en bon pep.  Sa i retourn nou lo nou bann desizyon kotidyen ki nou fer.  I retourn nou lo nou bann fundamentals, bann valer fondamantal e ozordi, nou pe koz e mon kontan ki Onorab Arnephy, Onorab Fideria ek Onorab Pillay in remet sa pwen ki nou la pou fer sir ki sa Seselwa ki anvi devlope ozordi, pa mank sa loportinite, akoz plis sa a Seselwa i an bonn sante plis ki nou.  Nou fer sir i fit ozordi, nou fer sir ki bann zenerasyon alavenir i an bonn sante.

Alors Mr Speaker, bann Proze De Lwa ki pe vin devan nou ozordi, konpare avek bann Proze De Lwa ki vin devan nou zis apre 2008.  I bann Proze De Lwa ki pe get, ki pe sorti dan Gouvernman a mon avi.  Zis pare 2008, ti annan en kantite Proze De Lwa e sa bann Proze De Lwa ti lo kimannyer Gouvernman pou aranz son prop lekor.  Kimannyer Gouvernman i bezwen vin pli pti, kimannyer Gouvernman i bezwen elimin koripsyon, kimannyer Gouvernman i bezwen re-aranz isi, re aranz laba, eksetera.

E mon krwar dezyenm zenerasyon reform ki sa sekyenm Lasanble pe ganny demande pou kontinnyelman siporte, i osi pe zet en koudey lo sekter prive e kimannyer Gouvernman i kapab kontinnyelman vin sa fasilitater.  Me les sekter prive pran son responsabilite.  E ti enteresan dan sa deba kot ti annan sekter prive, limenm ti dir, nou bezwen pran pli gran responsabilite.  Pa neseserman pli gran rol me pli gran responsabilite.

E sa i enportan pou fer sir ki ler Gouvernman pe fer sir that we are fit for the future, the private sector i on board e li i pa pe, si oule, dan en kote pe donn bal oubyen pe fer serten desizyon ki pa anlinny avek lafason ki nou’n set nou lekor e lafason ki nou vwar nou dan 5, 10an 15an.

E dan tousala Mr Speaker, sa lannen antye nou’n koz lo en sel parol tou bann Financial Bills, tou bann Bill ki sorti swa Minister Finans, oubyen swa Central Bank oubyen swa Lofis Vis Prezidan, i bann Proze De Lwa ki pe koz lo growth, ki pe rode kimannyer sa nasyon, sa pei, sa lekonomi i kontinnyen grandi.

E growth nou konnen i lakle pou plis prosperite.  Nou pa pou kapab repey nou det, nou pa pou kapab servis Gouvernman, nou pa pou kapab servis sa pep.  Nou pa pou kapab kontinnyen avek nou bann Polisi sosyal e nou bann Polisi lakaz ek lasante, si nou napa growth i kler sa, e growth pa vin lo limenm.  Growth i bezwen vin avek en baz plis resours e ozordi nou pe koz lo resours later ki pou labaz economic growth. Ki pou donn sa pti biznes, sa mwayen biznes, sa gran biznes loprtinite pou li grandi e ler li i grandi, nou ganny economic growth.

Alors a mon avi Mr Speaker, i en Proze De Lwa tre, tre enportan.  I lev e i met devan nou plizyer konsern ki nou bann dimoun in met devan nou, ki bann dimoun in met devan Gouvernman oubyen plizyer Lazans, lo kimannyer nou zer propriyete endistriyel Gouvernman e kimanyer ladan alors en dimoun ki anvi devlope ki annan kapasite, ki annan lanvi, ki annan lonnekte, ki annan entegrite, i vwar sa lavenir, i vwar en landrwa kot i kapab ale pou li vwar en semen ouver.  vVwar en semen pase pou li kapab kontinnyen devlope.  E i enportan ki ozordi dan sa lekonomi, dan sa lemonn kot nou pe viv, ou pa ganny dimoun ki al 3, 4, 5 landrwa.

I al kot son MNA, i ekrir Vis Prezidan, i ekrir Minis, i ekrir lot, i ekrir lot, i retourn ankor kot MNA.  Konmsi, i enportan kot nou bann dimoun i santi, la mon kapab ale, la mon a ganny en solisyon.  Si mon pa ganny en solisyon mon a ganny en leksplikasyon.  I kler ki nou bezwen guidline tre kler dan sa bann zafer.  Gidans, A, B, C, D, E, vwala ki ou merit fer.

I kler ki nou merit fasilit the entry of small, mon dakor avek Onorab Pillay, small and new businesses. Me i osi kler pou nou annan growth. Nou bezwen fasilit devlopman small businesses pou vin medium businesses, devlopman medium businesses pou vin big businesses.  Me nou pe siport en kantite devlopman biznes Seselwa, biznes lokal.  E i kler ki nou bezwen fasilit the entry of innovative businesses.  Biznes ki pa pe ganny fer ozordi Sesel, nouvo nide, nouvo lespri, nouvo fason fer.  Mon krwar plis ou annan nouvo nide, nouvo keksoz, i bon e i donn plis konpetisyon alafendizour, se Seselwa menm ki benefisye.

Alors i kler ki nou bezwen annan the proper management of tou bann industrial zones. E sa i en lot lakonplisman kreasyon nouvo Sesel.  Mon krwar nou pa devret bliye.  I ti en pledge, i ti en pledge eleksyon e nou Lasanble, nou annan rol oversight pou fer sir ki bann pledge eleksyon i gannny akonplir e ozordi nou pa pou ezite pou lev nou lanmen akoz sa pledge nouvo Sesel, nou vwar kot pe ganny kree e mon krwar pep Seselwa i devret vwar kote Nouvo Sesel pe ale, kote mon vwar mon dan sa Nouvo Sesel.  Kote mon vwar loportinite dan sa Nouvo Sesel.  Kote mon vwar laklerte dan sa Nouvo Sesel.  Kote mon vwar mon kapab debourye dan sa Nouvo Sesel e kote mon vwar mwan, pran mon resposabilite bokou plis dan sa Nouvo Sesel.

Mr Speaker, sa Proze De Lwa i en bon Proze De Lwa i bon pou Seselwa, i bon pou bann dimoun ki nou, nou reprezante, bann dimoun ki koz ek nou.  Me selman mon ti a kontan ozordi, san pran bokou letan, dir avek pep Seselwa ki ler nou ganny en loportinite devlope, nou pran li, nou devlop li byen.  Nou pa bliye lekel ki’n tenir nou.

Ler nou sorti en pti biznes nou vin en biznes mwayenn, nou pa bliye lekel ki ti tyanbo nou lanmen pou anmenn nou sorti en pti biznes pou vin enn mwayenn.  Ler nou sorti mwayen nou vin gro, lepep menm ki tenir nou, napa en lot ki’n tenir nou, e napa en lot ki’n krwar ki nou ti pou kapab sort mwayen pou vin gro.  E ler nou pe komanse, nou pe anmas sou par sou, kas par kas pou nou rantre dan biznes, lepep menm ki’n tenir nou.  E ler mon dir lepep, mon mean Parti Lepep ki’n kontinnyen tenir nou.

(Applause)

 

HON MARIE-ANTOINETTE ROSE

Mon krwar i enportan akoz loportinite i la, en kantite dimoun i ganny en kantite loportinite dan nou pei, me fodre pa ki nou fer krwar ki nou obliye kot nou sorti koman en pep.

Mr Speaker, avek sa enn de mon, mon krwar ki tou bann Manm in fer sorti kimanyer sa Proze De Lwa pou ganny enplimante, nou pou donn nou sipor.  I annan enn de amannman parey ou’n dir.  Mr Speaker i annan 5, zis mon a port ou lentamsyon Mr Speaker, lo lamannman nimero 5.  Mon ganny advise ki section 2, sub clause 2 should be 4(c) and (d), instead of 4(a) and (b).  Tipti sanzman, me mon’n fek ganny advise ki instead of (a) and (b) it should be (c) and (d).

 

MR SPEAKER

Ok, mon krwar Clerk in sirkil tou bann amannman e si napa okenn lobzeksyon mon vwar sa bann lamannman tre senp.  Then, mon ava envit Minis pou fer son reply.

VICE PRESIDENT DANNY FAURE

Mr Speaker, mon pou tre bref.  Premyerman, mon ti a kontan remersye tou bann entervenan lo sa Proze De Lwa.  Lo non Gouvernman, mon remersye zot pou sipor ki nou pou gannyen avek nou Lasanble Nasyonal avek bi ki, nou met an viger e nou enplimant sa Lalwa e nou kree sa nouvo Lotorite.

Mon remersye zot osi pou zot lafransiz.  Nou welcome bann bon nide ki’n sorti, bann bon refleksyon.  Nou dir zot mersi pou bann bon parol, pou kritik konstriktiv ki zot in fer.  Tousala pou ed Departman.  Nou annan prezans, parmi nou la, Sekreter Prensipal, Mrs Berlouis.  En kantite bann nide pou kontribye dan devlopman Polisi ek stratezi ki Departman i annan pou zwe.

Me sa ki mon ti a kontan tou brefman, Mr Speaker avan mon terminen, se ki travay pankor fini.  Travay i la.  E Lotorite i annan en gro travay devan li ki fodre pa nou underestimate travay ki annan pou sa Lotorite.  I annan gran ekspektasyon me nou bezwen realis ki Lotorite pou bezwen navige.  Me selman, sa ki fer nou byen, kontan, se ki i annan sipor Lasanble Nasyonal pour ki enn fwa ki Lotorite i ganny kree, i bezwen deal avek plizyer bann size ki’n la, me ki nou bezwen deal avek.

2 problenm ki annan devan nou, pou nou devlope.  Si nou anvi vwar businesses grow, i annan 2 problenm.  Akse avek kredi, ki kapab ganny larzan, likid pou li devlope e dezyenm se, akse avek later.  2 problenm.  Me sa Lotorite la, i la pou li atak enn sa bann problenm, pa i vre?  Sa se akse avek lespas, akse avek later e fer sir ki enn fwa ki dimoun i annan later, i optimiz sa later.  I devlope, i pa asiz lo sa later.  I pa speculate parey Onorab Bristol in remind nou, pa fer sa.  Me, Lotorite enn fwa i la, i bezwen fer sir ki dimoun ki’n ganny later, i devlop sa later.  E proze ki i dir pou annan pou fer lo sa later, sa proze i ganny enplimante akoz i form parti sa nouvo Lalwa pour ki i annan en monitoring lo bann performans sa bann entities.  E mon krwar tousala pe ganny fer avek bi ki nou parey zot in servi, zot in servi langaz ki nou met lord.  Me, nou etablir en proper framework e ki bann keksoz i ganny fer byen parey Polisi ki Gouvernman i deside enplimante.

E finalman Mr Speaker, mon krwar ki sa i en welcoming news pou pei e ki mon krwar i annan en kantite bann strong advocacy ki’n sorti dan Lasanble ozordi e mon konnen tou bann Manm Onorab pou fer promosyon pou sa Lotorite parmi lepep e dan distrik e defi Departman se fer sir ki nou annan bann dimoun ki kapab e nou annan en Board ki strong pou fer sir ki nou gard direksyon e ki nou pa perdi vizyon kot nou pe ale.  Mersi Mr Speaker.

 

MR SPEAKER

Bon, in ariv ler pou nou pran en vot lo merit, lo deba zeneral e merit sa Bill.  Tou bann ki anfaver?  Okenn ki kont?  Mon a ganny mwan en Formal Second Reading?

THE CLERK

A bill of an Act to establish the Industrial Estates Authority and to provide for matters connected therewith and incidental thereto.

MR SPEAKER

Bon, mon pa krwar i nou lentansyon to commit the Bill to Committee StageSo, mon ava ganny mwan en Mosyon pou nou sot Committee Stage.

 

HON MARIE-ANTOINETTE ROSE

Mr Speaker, anba Order 91(1), mon move ki nou sispans Orders 65 to 70, pou nou sot Committee Stage.

MR SPEAKER

Okenn ki segonde?

 

HON ANDRE POOL

Mr Speaker, mon pou segonn sa Mosyon.

 

MR SPEAKER

Nou ava pran en vot lo sa Mosyon.  Tou bann ki anfaver?  Okenn ki kont?  Mon a ganny mwan en Motion for Third Reading?

HON MARIE-ANTOINETTE ROSE

Mr Speaker, anba Order 71(1), mon move ki nou lir sa Bill en trwazyenm fwa.

 

MR SPEAKER

Okenn ki segonde?

 

HON ANDRE POOL

Motion segonded Mr Speaker.

MR SPEAKER

Bon, nou ava pran en vot lo la. Tou bann ki anfaver?  Okenn ki kont?  Mon a ganny mwan en Third Reading.

THE CLERK

This Act may be cited as the Industrial Estates Authority Act, 2013.

MR SPEAKER

Bon, Bill in pase e aprezan i reste mwan pou ekskiz Minis ek son delegasyon parmi nou e nou, nou pou zwenn 2er apre midi.

 

(LUNCH)

 

MR SPEAKER

Bon, nou ava kontinnyen ek nou travay pou apre midi.  Apre midi avek nou se Minis Larue, ki pe vin prezant son Health Care Agency Bill. Nou swet labyenveni Minis Larue e son delegasyon.  Osi dan Gallery avek nou ozordi apre midi, i annan en dezyenm group manrmay sorti Lekol Belonie.  Nou oule swet zot osi byenveni.  E san dir plis ki sa, mon ava ganny mwan en Motion for Second Reading lo Health Care Agency.

 

HON MARIE-ANTOINETTE ROSE

Mr Speaker, anba Order 64(2), mon move ki nou lir sa Bill en dezyenm fwa.

 

MR SPEAKER

Okenn ki segonde?

 

HON ANDRE POOL

Mr Speaker, mon pou segonde.

 

MR SPEAKER

Bon.  Mon envit Minis alor pou entrodwir son Bill.

 

MINISTER MITCY LARUE

Mersi Mr Speaker.  Bonn apre midi Mr Speaker, tou Manm Lasanble, tou bann etidyan e tou dimoun dan lakour.

Mr Speaker, pandan sa dernyen enn, de mwan ki’n fek pase, mon’n vin 2 fwa isi dan Lasanble pou eksplik konteks e rezon det bann transformasyon ki mon Minister pe enplimante dan sekter Lasante Nasyonal.  Premye fwa, sete ler mon ti vin fer deklarasyon zeneral lo bann sanzman.  Sa ti le 24 Septanm.  Dezyenm fwa, ti ler mon ti prezant Proze De Lwa pou kree Lotorite Lasante Piblik.  Sa sete, komansman Oktob.  Ozordi, i mon plezir pou vin dan Lasanble ankor enn fwa, pou prezant Proze De Lwa lo kreasyon Lazans Swen Lasante.

Avek prezantasyon ozordi, mon oule ranforsi mon langazman Mr Speaker, ki bi tou sa bann transformasyon se pou anmenn en meyer gouvernans dan servis lasante piblik lo kote stratezik.  Lo kote operasyonnel, nou bi se pou anmenn plis satisfaksyon pou sak manm piblik ki vin an kontak avek Minister Lasante.  Lo toulede kote, nou kapab fer bokou pli byen ki nou pe fer ozordi.  E mon Minister ek tou son bann staff devoue, nou determinen pou met bann meyer striktir anplas, pou kree kondisyon ideal pou nou fer ankor pli byen.  E byensir, fer li nou tou ansanm.

Nou Gouvernman, anba direksyon Prezidan Michel i determinen pou vwar en sistenm lasante pli modern, pli efikas e enn de kalite, ki vreman reponn a laspirasyon e bezwen nou sitwayen.  Donk, i annan sa komitman politik pou siport sa modernizasyon nou sistenm ki nou pe met anplas.

Alor Mr Speaker, sa Proze De Lwa ki devan nou ozordi, i al ankor en pa an avan e dan en bon direksyon pou realiz sa bann transformasyon e modernizasyon ki mon ti anonse e eksplike le 24 Septanm.  Proze De Lwa ozordi, pe propoz kreasyon en nouvo antite legal.  Parey nou dir an Angle, en body corporate ki pou apel, Health Care AgencyHCA, oubyen Lazans Swen Lasante.

Responsabilite sa Lazans se pou planifye, delivre e evalye lasante primer, segonder e tersyer, dapre bann Polisi ki mon Minister pou etablir e osi dapre bann Lalwa ek regilasyon ki Lotorite Lasante Piblik pou sipervize.  Sa Proze De Lwa i osi prevwar lorganizasyon Lopital Sesel ek Servis Lasante Kominoter koman 2 unit semi-endepandan me ki pou tonm anba Lazans Swen Lasante.

Proze De Lwa i divize an 6 parti.  Premye parti i konsern bann size preliminer tel ki enterpretasyon bann terminolozi ki servi dan sa Proze De Lwa.

Dezyenm parti, i konsern kreasyon sa Lazans.  Son bann lobzektif ek fonksyon.  I annan 14 fonksyon antou ki’n enimere dan sa dokiman.  Dezyenm parti, i osi koz lo pouvwar ki Minis pou Lasante i annan pou donn direktiv sa Lazans lo bann size Polisi.  Les mon ava elabor en pti pe plis.

Lobzektiv prensipal sa Lazans Swen Lasante, se pour promot, protez e restor lasante piblik.  Lazans Swen Lasante letan i pe delivre son bann lobzektif, i bezwen pran mezir neseser pou fer prevansyon, tretman e kontrol maladi, pou anpes dezabilite e lanmor an rezilta bann maladi, oubyen lezot lakoz.  Fonksyon Lazans se planifye, delivre e evalye lasante primer, segonder ek tersyer avek piblik, an akor avek Polisi e progranm Gouvernman dizour.  Zwenn bann standar ek regilasyon anba provizyon ek service delivery. Met a dispozisyon e delivre swen lasante dan scope nou Bidze, anmenmtan zwenn bann bezwen priyoriter nou popilasyon.  Etablir prosedir e asire ki piblik i ganny akse avek latizann esansyel e de kalite, ensi ki lezot medical supplies kan i neseser.  Etablir e evalye striktir ek bann proze, pou amelyorasyon dan kalite servis.  Promouvwar resers pou amelyorasyon dan swen lasante.  Partisip dan devlopman bann Polisi e plan Gouvernman.  Donn Minis rapor konpreansiv e accurate dan en dele letan lo service delivery dan bann servis lasante.

Devlop plan anyel pou lenfrastriktir, lekipman, resours imen e osi finansyel.  Garanti devlopman kontinnyel bann profesyonnel lasante.  Edik pasyan lo zot drwa ek responsabilite anver zot lasante.  Antreprann lezot fonksyon ki Minis i kapab preskrir.  E Minis i kapab osi donn Lazans direktiv an ekrir, lo bann matyer Polisi e Ladministrasyon zeneral.

Trazyenm parti, i koz lo kreasyon sa Board ki pou diriz loperasyon sa Lazans.  I koz osi lo bann fonksyon ek prosedir sa Board e i fer provizyon pou apwent bann pti komite lo sa Board, avek bann manda spesifik.

Katriyenm parti, i donn detay lo lapwentman Sef Ekzekitif, Direkter Lopital Sesel ek Direkter Servis Lasante Kominoter e osi rekritman bann staff.

Senkyenm parti, i konsern bann fon sa Lazans e tou bann size finansyer ki pou zeneralman aplikab pou sa antite legal.

Sizyenm parti, i tous bann size divers nonm.  Parmi sa bann size divers, Proze De Lwa i donn pourvwar Minis Pou Lasante pou fer bann regleman anba sa Lalwa.  Osi, Proze De Lwa i koz lo proteksyon anba Lalwa ki tou bann dimoun ki pou pe travay pour sa Lazans an bonn fwa pou gannyen ler zot pe fer bann travay.

Mr Speaker, sa Proze De Lwa i annan 2 annex, oubyen 2 parti.  Premye parti, i liste bann fasilite lasante ki pe fonksyonnen ozordi dan Sesel tel ki Lopital Sesel, Wellness Centre, bann Health Centres dan bann distrik.  En travay pou ganny antreprann pou revwar tou bann Health Centres ek bann servis ki pe ganny delivre.  E bann regilasyon neseser a ganny travay lo la e prezante avek Gouvernman pou rod laprouvasyon, answit ganny table devan Lasanble Nasyonal.

Dezyenm parti, i en lalis bann prosedir zeneral Board ki pou adopte.  I annan 8 prosedir zeneral ki ganny liste dan sa sipleman.

Spesifikman Mr Speaker, Lazans Swen Lasante, pou ganny gouvernen par en Board e lo sa Board, pou annan 13 manm antou.  9 parmi sa bann manm, pou sorti andeor sa Lazans e andeor Minister Lasante.  Zot bezwen annan serten kalite tel ki, leksperyans dan Field Lasante, Management, Gouvernans Klinikal, Financial Management, Business Administration, Human Resources Development ek Lalwa.

4 parmi sa bann manm pou asiz lo sa Board dapre pozisyon ki zot tenir dan Ladministrasyon sa Lazans.  Sa 4 manm se, Sef Ekzekitif ki ganny apwente par Prezidan, Depite Sef Ekzekitif i osi ganny apwente par Prezidan, Direkter Lopital Sesel ek Direkter Lasante Kominoter ki ganny apwente par Minis Lasante, an konsiltasyon avek Board.

An dot mo, lo Board pou annan 9 manm endepandan e 4 manm ex-officioChairman ek bann manm sa Board, pou ganny apwente par Prezidan Larepiblik e zot pou servi pou en peryod 3an.

Parey i normal pou tou bann Board, bann manm endepandan pou kapab ganny en renimerasyon pou zot servis, dapre bann regilasyon ki anplas dan sekter piblik.  Board sa Lazans, pou kapab etablir plizyer pti komite.  Zot pou etidye pli o fon bann dosye ki devan Board, pou kapab ed Board pou fer pli byen son travay.  Pou annan regilasyon apre ki mon Minister pou pibliye an konsiltasyon avek Board, apre ki Board in ganny apwente, pou donn leksplikasyon an detay tou sa bann sou-komite plitar.  Ki zot rol e kimannyer zot pou fonksyonnen.  En legzanp, nou kapab annan nou en komite audit e byensir manm ki pou lo sa komite, zot bezwen annan serten lekspertiz osi dan sa domenn.

Mr Speaker, Lazans Swen Lasante, pou dirize par en Sef Egzekitif, apwente par Prezidan.  Prezidan pou osi kapab apwent en Depite Sef Egzekitif si i vwar sa neseser.

Anba Lazans Swen Lasante, Lopital Sesel ek Servis Lasante Kominoter pou ganny konsidere koman 2 unit semi-endepandan, avek zot prop idantite sakenn.  Sakenn sa 2 unit pou annan en Direkter ki Minis pou apwente an konsiltasyon avek Board.

A sa pwen Mr Speaker, mon oule met lanfaz lo definisyon ki nou’n mete dan sa Proze de Lwa pou Lopital Sesel.  Pou rezon operasyonnel, Lopital North East Point ek Wellness Centre, zot toulede pou ganny konsidere koman parti entegral Lopital Sesel akoz se plizoumwen menm resours ki fer marse touletrwa sa bann Lenstitisyon.

Mr Speaker, sa laranzman administratif avek en Direkter pou Lopital Sesel e en lot Direkter pou Servis Lasante Kominoter ki fonksyonn avek en manda legal, i tre neseser e i osi tre enportan pou fer ki lorganizasyon bann servis lasante, i vin ankor pli modern e pli efikas avek en dimoun kle ki tou pasyan e tou kliyan dan bann servis lasante, zot kapab klerman idantifye zot koman responsab tou bann loperasyon toulezour sa 2 unit. Sak Direkter i tonm anba responsabilite sa Sef Egzekitif.  Lezot detay administratif sa bann size entern, i pou ganny deside par Ladministrasyon sa Lazans, dapre en striktir organizasyonnel ki Board a aprouve apre konsiltasyon entern.

Mr Speaker, bann laranzman finansyel sa Lazans pou plizoumwen parey zot ete pou lezot antite legal ki egziste nasyonalman.  Detay sa bann laranzman i trouve dan Seksyon 16 ziska Seksyon 20 sa Proze De Lwa.  Mon oule sepandan, met lanfaz a sa pwen ki lasante primer i reste gratwit e i en drwa Konstitisyonnel e en aki sosyal non negosyab.  Sa i prensip fondamantal nou Parti, Parti Lepep, anba direksyon nou Prezidan, Mr Michel.  Sa Proze De Lwa i pou konserv sa aki a 100 poursan, me koman Seksyon 17 i fer mansyon ki Lazans i kapab sarz fees for Health Care Services, pou evit okenn konfizyon, mon ava eksplike.

Sa i ganny mete akoz i deza annan bann fees ki ganny sarze pou serten servis ki ganny donnen, par egzanp touris ki vin rod swen lasante, bann konpannyen prive, mortuary e osi private room, me non pa pou nou Seselwa ki servi nou servis.

Mon oule fer kler ankor enn fwa Mr Speaker, ki Minister Lasante zis nou tousel, nou pa pou kapab anmenn amelyorasyon dan servis lasante.  I absoliman neseser ki tou dimoun ki servi sa bann servis, nou travay ansanm, nou pran responsabilite nou lasante o serye e nou donn en koudmen.  Tou Travayer Lasante i devret pran ownership zot Minister e travay avek dedikasyon e konpasyon.  Ansanm, nou a fer sa vre diferans.  Annou aret kritik negativ.  Kritik i bon, me nou bezwen fer li pozitivman e osi anmenn propozisyon.  Sa i le sel fason ki nou pou arive donn zot sa servis de kalite.  Osi, mon ti a kontan met lanfaz.  Annou aprann apresye e montre nou gratitid, ler servis ki nou’n resevwar, ti bon.  Sa osi a kapab lev moral nou bann staff ki pe travay tre dir, souvandfwa dan bann sitiasyon tre difisil pou kapab sov lavi.

Parey tou manm piblik ki zot lekspektasyon i tre o e ki anvi vwar amelyorasyon nou bann staff Servis Lasante e osi ladministrasyon, nou osi nou anvi vwar en diferans konsiderab dan kalite tou servis ki piblik i gannyen ler zot antre an kontak avek nou Minister.

Mr Speaker, nivo satisfaksyon piblik dan nou Servis Lasante, pou selman amelyore.  Mon repete.  Si selman nou tou ansanm, savedir Ladministrasyon Lasante, Travayer Lasante, pasyan, bann Zournalis, bann Politisyen.  Savedir tou Seselwa.  Nou pran nou responsabilite o serye e nou kontribye konstriktivman, aktivman, pozitivman, nou pou kapab fer servis amelyore.          Ankor mon repete, nou lasante i depan lo nou e i nou responsabilite.  Pran li an men.  Annou angaz nou pou en meyer lasante.  Mon Minister lo son kote, pe esey met serten striktir modern anplas, me nou, nou bezwen kontinnyelman travay ansanm.  Nou tou, san ses e san relaks.      Napa personn ki annan tou larepons, oubyen ki konn tou solisyon pou tou problenm lasante isi Sesel.  Nou tou endividyelman e kolektivman, nou bezwen kontribye nou bout pou fer nou servis lasante monte.  I en zefor konzwent.  I en responsabilite partaze.  Ler nou travay ansanm, nou al bokou pli vit e nou al bokou pli lwen koman en pep.  E fri ki nou rekolte ler nou travay ansanm i vreman vo lapenn.

Mr Speaker, avek sa detrwa mo, mon santi ki mon’n donn en leksplikasyon ase detaye lo sa Proze De Lwa.  Alors, mon kont lo zot tou bann Manm Onorab pou siport sa Proze de Lwa e ansanm, nou pou kapab fer sa diferans dan sistenm lasante dan nou pei.  Mersi Mr Speaker.

 

MR SPEAKER

Bon.  Deba i ouver.  Onorab Samson.

 

HON DEREK SAMSON

Mersi Mr Speaker.  Bonn apre midi.  Bonn apre midi Minis e ou delegasyon.  Tou dimoun alekout.

Mr Speaker, en Proze De Lwa pour etablir Lazans Swen Lasante.  Ki sa Lazans i a responsab pou delivre en servis swen lasante dan son totalite, vedir en meyer lasante primer, en meyer lasante segonder e en meyer lasante tersyer.  Mon pou plitar koz enpe lo sa 3 brans servis lasante mazer.

Mr Speaker, dan sa Proze de Lwa, i osi annan provizyon pou zesyon Lopital e servis lasante kominoter.  Sa ki pli enteres mwan e osi enteres bokou dimoun ki pe ekoute, se kwa de nouvo ki en nouvo Lalwa Lasante i kapab anmennen, ki nou dimoun ava kapab finalman satisfe.  Pou ou ki vwar ou lo ban Klinik apre ki ou’n santi en pti latet fermal, oubyen en pti malad dan vant dan bomaten, oubyen en problenm pli grav, ki sa Proze De Lwa pe anmennen pou ou?  Ki sa Proze De Lwa i prezante pou ou ki pou bezwen fer 2 semenn dan Ward Lopital Sesel?  E pou ou ki pou bezwen al fer en tretman overseas, ki sa Proze De Lwa i prezante pou ou finalman?

Avan tou sa bann kestyon Mr Speaker, annou rapel nou lekor ki swen lasante, parey Minis in dir, i vedir prevansyon maladi, diagnose en problenm lasante e osi tretman en maladi, oubyen en problenm lasante.  Avan tou sa bann kestyon Mr Speaker, annou rapel nou lekor ki premye dimoun responsab pou nou lasante, se nou menm nou.  Vedir ou menm.  Ou prop lekor i responsab ou prop lasante.

Sa Proze De Lwa i annan bi kontinnyen akonplir egzakteman sa Mr Speaker.  kontinnyen ed nou sitwayen sonny son problenm lasante, depi latet ziska lipye.  Depi ou konsepsyon ziska ou dernyen souf.  Letan ozordi nou pe debat lo sa Proze De Lwa, nou bezwen realize lekel ki pratikman pe garanti ki tou nou bann servis swen lasante i ariv ziska kot nou.  Byensir, se bann ki delivre swen lasante.  Bann nurse, bann dokter, bann dantis, bann dispanser latizann.  Annefe tou bann ki fonksyonn anba Lazans Swen Lasante.  Menm bann ki promot lasante.

Prezan pou sa 3 brans servis lasante ki ofer swen lasante.  Ler nou al dan Seksyon lenterpretasyon sa Proze de Lwa, nou vwar ki, swen lasante primer i ganny refer koman bann servis swen lasante ki zeneralman ganny ofer lo baz kominoter dan distrik.  Nou tou nou konn sa bann servis Mr Speaker.  Annefe, nou kapab dir ki lasante primer ki nou Gouvernman oubyen klinik prive i ofer koman servis, i servis ki pli ganny frekante an term servis swen lasante.

Se la ki tou i sipoze komanse oubyen fini.  Kot en kliyan medikal i fer premye kontak avek bann servis swen lasante.  Me malerezman, se osi la ki bokou dimoun i annan plis konsern lo servis ki ganny ofer, me erezman, sa Proze De Lwa pe fer ki nou a resanti en diferans dan nou bann klinik, diferans dan kalite servis, ki dimoun i a finalman apresye.

Lasante segonder li dan sa Proze de Lwa, se servis swen lasante ki ganny ofer lo nivo spesyalize, pou geri oubyen re-etablir lasante en pasyan medikal par en spesyalis oubyen en profesyonnel medikal oubyen lasante.  Bann tretman kourt me pou bann swen tre sansib oubyen grav.  Legzanp se bann pti loperasyon.

Ankor dan sa Proze De Lwa, nou vwar en definisyon pou lasante tersyer.  Li se bann konsiltasyon tre spesyalize e teknik, kot en pasyan i ganny admit pou bann lenvestigasyon profon lo son maladi, dan mezir pou tretman son maladi.  Souvan sa bann tel servis swen lasante tersyer, i ganny resevwar oubyen fer aletranze.

Mr Speaker, i enportan ki nou bann dimoun i konpran sa bann nivo servis swen lasante, ki zot byen ganny distenge akoz souvandfwa, nou oule melanz disel avek disik.

Mr Speaker, lekspektasyon nou bann dimoun i gran kot i konsern nou servis swen lasante.  Pli boner nou ti vwar ki se kot nou bann klinik ki dimoun i annan plis konsern lo servis ki ganny ofer.  Dimoun i fasilman konpar servis swen lasante ki Gouvernman i ofer avek sa enn ki nou pe vwar dan sekter prive.  Me sa i tro fasil Mr Speaker.  Nou bezwen realize ki Gouvernman i pa neseserman dan biznes konpetisyon avek lezot servis swen lasante prive.  Gouvernman i plito, in toultan enterese avek bann leta lasante son pep.  Rezon akoz Minis in prezant nou sa Proze De Lwa ozordi apre midi.  E nou ekspekte ki, wi.  Sa Proze De Lwa i evantyelman anmenn lespwar pou en meyer servis swen lasante.  Pa zis en lespwar resanti, me enn ki nou kapab pratikman touse e resevwar dan nou bann letablisman lasante.

Mr Speaker, ki savedir en meyer servis swen lasante?  Parfwa ler en nouvo Lalwa i ganny entrodwir, serten dimoun i anvi krwar ki prezan ki Gouvernman pe al komans travay.  Ki prezan ki nou bezwen al konsantre lo nou servis swen lasante.  Me non Mr Speaker.  Letan nou pe dekrir ki savedir en meyer servis swen lasante, nou pe bezwen vwar e admet ki Gouvernman Lepep in toultan met lentere son pep premye.  I alor primordyal ki en Lazans Swen Lasante i annan li en lorgan zesyon ki tre dinamik.  Enn ki kapab pratikman promot, protez e mentenir lasante nou bann dimoun.  En keksoz ki Minister Lasante in toultan pran koman son lobzektif prensipal.  E san dout, nou ekspekte ki bann profesyonnel apropriye i ganny mandate pou form par Board Lazans Swen Lasante, parey sa Proze De Lwa in prezante.

Mr Speaker, mon krwar i enportan ki nou note ki anba parti 3 dan sa Proze De Lwa, i ganny fer konpran ki konpozisyon sa Board, Board Lazans Swen Lasante ki pou napa zis bann manm ki annan bann gran, gran leksperyans, oubyen kalifikasyon dan zesyon servis lasante, me osi bann ki annan konesans dan zesyon finans, dan ladministrasyon biznes e osi manm ki kapab metriz Lalwa, oubyen lezot domenn relevan pou sa Board.

Mr Speaker, pou nou kontinnyelman dekrir ki savedir en meyer servis swen lasante, nou pou bezwen osi regard lobzektif e fonksyon Lazans Swen Lasante dan sa Proze De Lwa.  Dan sa Proze De Lwa i annan en lalis, en lalis tre long ki demontre tou sa bann fonksyon e lobzektif anba parti 2.  E ler nou idantifye sa bann lobzektif e fonksyon, nou vitman rekonnet zot.  Non pa akoz nou background lasante me akoz nou somehow reste isi Sesel, nou vwar e nou viv servis lasante dekalite.  Enn ki parmi bann premye dan larezyon.

Mr Speaker, si nou seryezman angaz nou nasyon e evantyelman, Lazans Swen Lasante dan tou bann responsabilite pou en meyer lasante nou pei, oubyen en meyer servis swen lasante pou nou, alors nou pou vwar mwens konplent lo servis lasante.  Mon’n mansyonn angaz nou Nasyon akoz mon krwar ki Lazans Swen Lasante i pa pou kapab fonksyonn li tousel.  Se nou ki responsab nou prop lasante.  Se nou koman en pei ki pou kapab soutenir nou lasante.

A sa pwen Mr Speaker, mon santi nou bezwen kontinnyen rekonnet travay ki tou bann travayer Lasante pe fer.  Annou dir zot mersi.  Annou swet zot bon kouraz.  Akote travay ki Minister Lasante pe fer, i annan Lorganizasyon Mondyal pou Lasante.

Mr Speaker, travay ki sa Lorganizasyon pe fer atraver enn son Biro isi menm, i vreman enportan pou sa Proze De Lwa.  Mon asire ki serten kontribisyon in ganny resevwar sorti kot zot anfaver sa Proze de Lwa e pou son lenplimantasyon, nou pou bezwen kontinnyen kolabor ansanm, pour ki bann gidans e konsey i reste en eleman for dan servis ki ganny ofer.

Pou terminen, i annan en pwen ki mon santi mon pa kapab manke pou fer resorti kot i konsern servis swen lasante.

Mr Speaker, standar nou bann servis swen lasante, i lakle.  Personn pa kapab envant larou letan nou koz lo servis swen lasante.  Sa servis i enn parmi bann servis ki’n egziste plis ki de milye lannen pase.  Ki vedir alor, ki ozordi nou bezwen annan bann norm e standar tre repite.  Ki kliyan e travayer Lasante i swiv byen bann direksyon medikal.  Alors, sans pou fot i tre limite.          Mon konnen ki Minister Lasante pe pran sa size an kont dan bann transformasyon ki pe aktyelman pran plas e la kot Lotorite Lasante Piblik i devret zwe son rol.  I alor prensipal ki Lotorite Lasante Piblik i reste atantiv anver Lazans Swen Lasante e byensir, vis versa.

Mr Speaker, ozordi mon mazinen ki tou nou bann Manm Koleg Onorab, zot pou siport sa Proze De Lwa me finalman, ler i vin Lalwa, nou pou bezwen Nasyon Seselwa an antye, pou fer ki Lazans Swen Lasante i marse e fonksyonnen.

Avek sa an tet Mr Speaker, mon pou vot an faver sa Proze de Lwa.  Mersi bokou.

 

MR SPEAKER

Onorab Souris.

 

HON MIRENA SOURIS

Mersi Mr Speaker.  Bonn apre midi Minis ek ou delegasyon e tou bann zanfan, etidyan anler dan Gallery.

Mr Speaker, sa Health Care Agency Bill i vin devan nou Lasanble a en moman tre apropriye akoz ansemoman, bokou Seselwa pe demann meyer swen e servis lasante.  Anmenmtan ki nou fyer lakonplisman nou Servis Lasante Piblik, i pa fer okenn dout pou personn, ki sitiasyon i merit amelyore.  Sa ki enteresan se ki, sanzman i neseser pou anmenn en meyer amelyorasyon dan nou lasante piblik.  Se bann pti laranzman.  Swe lepep Seselwa se ki kreasyon sa Health Care Agency a permet sa pti laranzman pou delivre sa gran amelyorasyon ki Seselwa pe ekspekte vwar dan nou servis lasante piblik.

Mr Speaker, sistenm lasante dan nou pei, in sanz bokou an term kalite swen ki nou pep in ganny akse avek.  I annan en konsansis dan Sesel ki lasante Seselwa in bokou amelyore, menm si bann nouvo defi i relye avek sanzman konportman.  En bann fakter ki eksplik sa amelyorasyon dan swen lasante se konesans e konpetans teknik bann Health Care Providers e Care Givers, ki’n ogmante enormeman.  Akote konpetans e konesans bann Profesyonnel Lasante, lenfrastriktir an term e fasilite, in osi vin pli performan e ofer pasyan e Care Givers pli bon lanvironnman.  Par egzanp, ozordi sa Sant Sheikh Khalifa la kot Minister Lasante, pe dyagnoz bokou kondisyon a en staz kot i mwen avanse, ki ogmant sans gerizon en pasyan, kot tretman i ganny inisye pli boner.

Mr Speaker, sepandan ozordi, i annan en risk ki sa amelyorasyon dan swen lasante an term parey konesans e konpetans bann Profesyonnel Lasante, i osi an term pli bon lenfrastriktir.  I pa vin vizib.  Sa i aparan atraver komanter e bokou Seselwa pe dir ki maladi pe vin pli grav ki avan.  Savedir lo en lot kote, kapasite servis lasante pou delivre en pli bon swen in ogmante, me de lot kote, kalite maladi ki zot bezwen fer fas avek, in osi vin pli konplike.  Sa sitiasyon i prezant nou sistenm lasante piblik avek en gran defi akoz i pou bezwen fer sa amelyorasyon dan konpetans lenfrastriktir reflekte lavi Seselwa, atraver en lenpak pozitiv lo bann nouvo kalite maladi.

Mr Speaker, se dan sa konteks ki sa Proze De Lwa ki vin devan nou i pran son lenportans.  Sa Health Care Agency, i pou promouvwar aksyon atraver mentenir bann striktir e bann standar dan kalite servis ki i ofer.  Tandi ki Minister Lasante pou responsab pou met Polisi anplas, avek bi pou donn meyer swen lasante nou pep.

Mr Speaker, lenportans sa Bill, se ki i reprezant sa volonte Gouvernman Sesel pou redinamiz sistenm lasante piblik isi Sesel.  Sa Proze De Lwa i reprezant volonte Gouvernman pou fer servis lasante piblik vin enn ki pli performan.  Sa Health Care Agency ki pe al ganny formen, i reprezant larepons Gouvernman pou bann nouvo defi dan lasante Sesel.

Mr Speaker, letan nou koz lo nou sistenm lasante Sesel, nou koz bokou lo son bann akonplisman an term bann endikater parey to mortalite enfantil.  Avek kreasyon sa Health Care Agency, nou pou bouz pli devan e al ver bann nouvo target.  Byensir Health Care Agency pa pou reisir fer tou lo limenm.  Lepep Seselwa pou fasilit travay sa Lazans, si nou pran plis swen avek nou lasante e osi nou adopte bann stil healthy living.

Pa akoz nou annan bon Profesyonnel konpetan e bann fasilite modern, ki nou bezwen pa pran ka avek nou lasante e fer tou pou nou tonm malad, konmsi nou pe teste kapasite nou bann profesyonnel e performans sa bann fasilite.

Mr Speaker, striktir sa Health Care Agency, i reflekte volonte Gouvernman pou kontinnyen met lanfaz lo lasante primer.  Sa i vin atraver lotonomi ki sa nouvo Lalwa pou donn sekter lasante kominoter.  La mon ti a demann Gouvernman pou entansifye son progranm lasante kominoter par met anplas bann pli bon plan, pou devlop sa ki nou apel home-based care, ouswa swen a domisil.

Mr Speaker, ozordi avek logmantasyon dan diferan kalite maladi, bann fanmiy i ganny ankouraze pou pran swen avek zot pros.  Sepandan Mr Speaker, bokou i mank leksperyans e sipor o nivo Sant Lasante.  Sa i rann lavi sa fanmiy ek endividi enposib.  Alor, mon swe ki Minister Lasante i vin vitman met sa servis an mars.

Mr Speaker, en lot eleman ki Minister Lasante i merit revwar se lasante reprodiktiv.  Ozordi dan Sesel, nou pe vwar logmantasyon dan kanser kol matris.  En koud lorizon lo statistik i demontre ki pandan sa dernyen 5an, 2008 nou ti annan 7 ka ki ti ganny dyagnoz e 5 lanmor.  Tandis ki 2009, 2 ka ki ti ganny detekte e 7 lanmor.  2010, 6 ka i ganny detekte, 6 lanmor.  2011, 16 ka detekte, 9 lanmor.  2012, 7 ka i ganny detekte e 8 lanmor.  Mr Speaker, i malere pou vwar ki sa statistik, an vi ki sa servis in ganny desantralize boner dan lannen 80.

Mr Speaker, pilye nou sistenm lasante piblik se annan bann Family Doctors dan bann Sant Lasante akoz se zot ki swiv bann pasyan akoz zot zwe en gran rol dan promosyon e prevansyon lasante, osi byen ki kontrol e manage bann maladi kronik.  Mon swete ki Health Care Agency i met bokou lanfaz lo lenportans Family Doctors o nivo Unit Lasante Kominoter.

Mr Speaker, avek sa 2 pti mo, mon pou vot anfaver sa Bill.  Mersi.

 

MR SPEAKER

Onorab Dokter Payet.

 

HON DAVID PAYET

Mersi Mr Speaker.  Bonn apre midi tou dimoun.  Mr Speaker, letablisman Health Care Agency oubyen Lazans Swen Lasante ki pou vin posib atraver sa nouvo Lalwa, i reprezant kreasyon trwazyenm e dernyen pilye nouvo model lasante piblik ki Sesel pe adopte.  Lezot 2 pilye se Public Health Authority ki pou byento vin an egzistans swivan laprouvasyon Lalwa relevan par Lasanble Nasyonal detrwa semenn pase.  E lot pilye se Minister Lasante ki deza egziste.

Mr Speaker, ansanm sa Lazans, Lotorite e Minister pou konstitie nou nouvo sistenm lasante piblik e lefe ki sa 3 Lenstiti pou permet nou pei fer fas avek bann defi lasante piblik, zot ganny vwar koman sa nouvo laranzman ki pou moderniz nou sistenm lasante piblik.  Sa nouvo model i fer distenksyon ant en Lazans, Health Care Agency e Lotorite, Public Health Authority e en Minister, Minister Lasante.  i tre enportan ki nou sezi lenportans respektiv sa 3 Lenstitisyon akoz sa pou permet nou etablir kriter performans pou sakenn de zot e pou etablir zot responsabilite.         En Lazans i angaze dan loperasyon e lenplimantasyon desizyon, tandi ki en Lotorite i angaze dan monitoring e fer sir ki bann Lalwa relevan e Polisi respektiv pe ganny respekte e enplimante dapre bann lareg e norm e Minister i angaze dan formilasyon bann Polisi e progranm lasante piblik.  Savedir, dan nou nouvo model lasante piblik, Health Care Agency, pou egzekit sa ki Minister Lasante i deside e son travay pou ganny sirveye par Public Health Authority ki pou ganny fer parey avek sekter prive.

Mr Speaker, performans nou sistenm lasante piblik pou depan lo performans sakenn sa 3 Lenstitisyon e relasyon ant zot.  Sa nouvo model lasante piblik pou perform si Health Care Agency i efektiv e i efikas.  Anmenmtan ki Minister Lasante i prodwir bann Polisi e progranm relevan e Public Health Authority i endepandan e i enparsyel.  I kler ki manm piblik pou ziz sa model lasante piblik lo son delivery. Savedir dan bann klinik e lopital, ki swa dan sekter prive- oubyen sekter piblik.  Dan sekter piblik, sa bann klinik e lopital pou ganny manage par Health Care Agency.  Sa Lazans pou annan en gro responsabilite akoz lizye piblik se zot ki delivre lasante avek Seselwa.          Zisteman, sa Proze De Lwa ki vin devan nou, i fer provizyon pou striktir sa Health Care Agency ki pou ganny dirize par en Sef Egzekitiv.  Sa nouvo Lazans pou annan 2 divizyon an term loperasyon lasante e se sa, se Divizyon Lopital Sesel e Divizyon Lasante Kominoter ki sakenn pou ganny dirize par en Direkter ki pou okip pozisyon Deputy Sef Ekzekitiv Health Care Agency.

Mr Speaker, sa 2 Divizyon dan Servis Lasante Piblik i 2 striktir enportan dan performans sa nouvo Lazans e relasyon ant sa 2 Divizyon i lakle sa performans.  Mon pou ilistre pwen ki mon’n fer an servan 2 legzanp konkret.

Mr Speaker, se family doctors dan bann Sant Lasante Kominoter ki detekte e tret pasyan.  Divizyon Lasante Kominoter i refer pasyan avek SOPD dan Lopital Sesel, selman kan zot kondisyon lasante i vin konplike.  SOPD se Specialised Out Patient Department. E la nou obzerv en sitiasyon ki devret sanze si nou anvi nou Health Care Agency i vin efektiv e efikas.     Parfwa, sa bann pasyan ki ganny ofer avek SOPD, i bezwen esper lontan avan zot ganny en apwentman avek Spesyalis.  Parfwa zot esper 4 a 5 mwan ki tro lontan.  Pandan sa letan, kondisyon lasante sa pasyan in kapab vin pli deteryorab.  Sa ki pli entolerab se parfwa serten pasyan i ganny dir lo dernyen moman ki zot apwentman in ganny anvoye akoz dokter napa, oubyen dokter pa dan pei.

En lot sitiasyon entolerab se ki parfwa pasyan i ganny randevou 8er bomaten me zot vwar Dokter 3er apre midi.  I enportan ki Health Care Agency i adres sa sitiasyon, si nou oule ki bann zoli Polisi e progranm lasante ki Minister i formile, i vin efektiv e efikas lo teren e pasyan i konstat sa dan kalite swen lasante ki zot ganny resevwar.

Dezyenm legzanp i konsern relasyon Dokter avek pasyan.  Mr Speaker, lasante se swen ki en pasyan i resevwar e sa swen i ganny delivre pa zis atraver latizann ki dokter i donnen, me osi lenformasyon ki i kominik avek son pasyan.  I malere pou dir ki tro souvan i napa ditou kominikasyon ant dokter e pasyan.  Dokter i zis preskrir preskripsyon, san eksplik pasyan nanryen.  Sa i fer ki pasyan pa konn son natir problenm lasante e serten pasyan i zis sanz dokter.  Mon enplor avek sa nouvo Lazans pou met anplas bann prosedir ki asire ki dokter i kominik avek pasyan.

Mr Speaker, sa nouvo Lazans pou responsab servis lasante piblik i ganny delivre dan bann Sant Lasante Kominoter ek Lopital Sesel.  Servis lasante piblik i pare pou elev sa bann defi pou ofer Seselwa swen lasante de kalite, me i enportan ki Public Health Authority i vin vreman endepandan e enparsyal, pou asire ki servis lasante piblik pa resevwar bann blanm kan zot pa fodre gannyen.

Mr Speaker, la mon pou vin lo en legzanp.  I annan dokter ki zanmen in fer en training dan Ultra Sound. Ni menm tous en masin Ultra Sound me kan i ouver en klinik, i vin pli gran Spesyalis dan Ultra Sound.  La napa kalite maladi ki pa ganny dekouver.  Pyer partou kote.  Me zanmen sa bann dimoun in ganny refer avek en spesyalis.  La dokter i dir ek sa pasyan, i pou tret li limenm.  La sa pasyan i komans sa tretman pou 3 a 4 semenn ziska ler larzan i fini e la zot retourn kot klinik dan kominote.

Mr Speaker, mon pou donn en legzanp konkret.  En madanm ti al kot en dokter prive avek douler dan leren.  Sa dokter ti fer Ultra Sound, ti dir li i annan pyer dan ronnyon.  Sa Dokter ti ofer li en tretman ki ti pou ale pou 3 semenn.  Premye semenn, pyer ti pou sorti dan ronnyon pou desann dan ureter.  Sa tib ki konekte ronnyon avek blad.  Dezyenm semenn, pyer ti pou desann dan blad.  Sa pasyan ti retournen me sak fwa Dokter ti fer Ultra Sound, apre pa ti kapab peye.  Bill ti vin egzorbitan.

Dapre sa pasyan, i ti ganny kontak avek mwan atraver en dimoun ki travay ek li.  Ler i ti vin kot nou, nou ti fer Ultra Sound dan Lopital Sesel me ti napa pyer okenn.  Pasyan pa ti satisfe.  Nou ti fer Ultra Sound ti napa nanryen.  Me rezilta CT Scan ti montre ki sa pasyan ti annan en problenm gyne e ti ganny refer avek Gyne e la i lo tretman.

Dezyenm ka ki mon’n rankontre Mr Speaker, se en pasyan ki ti al kot menm klinik prive avek en douler lestoman e dokter ti dir li i annan pyer dan fyel.  Ler i ti fer tretman 2 semenn san okenn rezilta pozitiv, la sa pasyan ti retournen kot klinik Glacis e nou ti fer Ultra Sound, ti napa okenn pyer.  Dapre sa pasyan, ler i ti dir mwan son bann sentonm, mon ti dekouver ki i ti ganny gastrik, ziska ler i ti al fer Gastroscopy.  La i ti konfirmen i ti ganny gastrik.  Mr Speaker, en ta ka ankor i annan.

Mr Speaker, si nou anvi ganny en servis lasante piblik ki mars byen, i enportan ki Lotorite Lasante Piblik i get byen dan kalifikasyon e konpetans bann dokter prive.

Avek sa 2 mo Mr Speaker, mon pou donn mon full sipor sa Bill.  Mersi.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker, mon pou aport mon sipor pou sa Proze De Lwa, an fer en tour lorizon sa ki mon krwar sa Proze De Lwa i sipoze anmennen e swiv en pti pe babnn lentervansyon entervenan avan mwan, lo serten keksoz ki nou bezwen aranze e amelyore, pou nou kapab improve lafason ki nou sistenm lasante i marse.

Mr Speaker pou mwan, nou sistenm lasante i rezim petet dan 3 area.  I annan sa provision of care limenm ki involve bann Profesyonnel Lasante.  bann dokter, bann ners, bann dimoun ki’n train dan sa domenn.  I annan son ladministrasyon lasante limenm ki konsern administre son bann building, son bann lekipman, bann resours neseser e trwazyenm i konsern Policy making.

Par lepase Mr Speaker, ou’n vwar kantite overlap, lafason ki keksoz i fer.  Savedir, ti annan keksoz ki sipoze ganny fer dan en kote e dan sa bann overlaps, ti annan parfwa serten konfizyon ki ganny kree dan lafason ki keksoz i devret ganny fer.  E sa i fer ki keksoz pa ti ganny byen managed e parfwa, nou’n vwar serten komanter pase lo whether or not nou sistenm lasante pe delivre alaoter.  Me sa i normal akoz nou tou nou bezwen pas atraver bann faz kot nou bezwen aprann par bann fot ki nou fer, me osi aprann atraver bann diferan fason ki nou enplimant bann diferan Polisi e prosedir ki nou annan.  Pour mwan, sa Lalwa ki devan nou i al tipikman towards the administration of the health system.

Mon pou vin lo serten provizyon sa Lalwa ki mon krwar, swivan lentervansyon entervenan avan mwan, ki mon krwar Minister Lasante i bezwen port bokou latansyon lo la.

Mr Speaker, ozordi nou pe vwar nou pe fer en reform lasante, kot nou pe konekte tou bann eleman neseser.  Par egzanp, nou fek pas Public Health Authority Bill. Sa Lalwa nou pa kapab fer li zis vin en Lalwa.  En zoli Lalwa ki la, ki annan tou sa bann provizyon.  Ou bezwen annan ou zofisye ki pare pou al dan bann klinik prive parey entervenan avan mwan in koz lo lo e regarde dan bann kalifikasyon.  Regard dan provizyon swen lasante dan sa bann klinik e vwar si sa pe ganny fer alaoter akoz souvandfwa, parey entervenan avan mwan in fer resorti, ler sa pasyan i retourn kot Lopital Gouvernman, la ki nou vwar poudir petet sa sitiasyon ki ti’n ganny vwar pa parey, oubyen sitiasyon in vin sitan pir, ki prezan la nou bezwen koz lo al fer overseas treatment pou sa pasyan.

So, i enportan ki la, nou met an pratik tou sa bann eleman enportan dan sa Lalwa.  E ler kot nou pou vwar kot sa Health Care Agency pou antre e li i pou antre kot administrasyon nou sistenm lasante piblik i konsernen.  I pou konplemant sa ki Public Health Authority pe fer.  E ankor enn fwa, se dan son lenplimantasyon ki lakle lafason sa Lalwa pou marse.

Mr Speaker, mon annan gran respe pou nou bann Profesyonnel Lasante me parey mon’n dir, sa eleman provision of care i en area spesifik.  Mon pa pou koz lo sa area akoz mon napa konpetans pou mwan koz lo sa area.  Me selman parkont, mon annan konpetans pou koz dan en area ki konsern training.

Mon dir sa Mr Speaker akoz mon vwar 2 provizyon dan sa Lalwa ki pou mwan i tre, tre enportan.  Mon annan bokou koleg lekol, mon annan menm zanmi ki’n al train koman dokter, me ler zot retournen ou vwar zot, zot stagnant.  Zot reste la.  Zot pa ganny sans al fer bann letid aprofondi.  Zot pa ganny sans al spesyalize.  E ler mon regard dan sa Lalwa, mon vwar en provizyon ki dir ensure the well being and continuous professional development of Health Care Professionals.

Petet nou’n fer li.  Me eski nou’n fer ase pou nou annan sa kantite nivo profesyonnel ki nou bezwen annan pou siport nou sistenm lasante?  E ler mon vwar en tel provizyon koumsa in antre dan ladministrasyon nou sistenm lasante, i enportan pou nou note e prezan fer sir ki nou enplimant li dan lafason ki benefisye nou bann Profesyonnel Lasante.  Akoz pou mwan, napa okenn dout ki nou bann dokter Seselwa i parmi bann pli bon dokter ki nou kapab annan isi.

Parkont, nou osi annan Dokter, nou’n bezwen osi annan Profesyonnel Lasante ki bezwen shape up.  Ki bezwen improve lafason ki zot donn servis.  E ankor enn fwa, set atraver sa proper administration of sa Act, ki nou pou kapab dekouver sa bann lapses dan sistenm e improve lo zot.

En lot eleman enportan Mr Speaker, ki mon krwar nou devret fer resorti an sa ki konsern ladministrasyon nou sistenm lasante, an sa ki konsern lekipman e lenfrastriktir.  I pou enportan osi pou asire ki nou bann lenfrastriktir i continuously ganny maintained.  Annou pa esper zot ariv towards the end of their life span, kot zot in fini avarye, apre pou nou al deside pou al fer repairs and maintenance lo zot.

Sa Lalwa i fer kler ki bann provizyon, ki bann prosedir ki nou bezwen swiv pou administre e monitor sa ki pe pase.  So alors, nou bezwen met li an pratik.  Nou bezwen asire ki nou pe monitor consistently nou bann Sant Lasante, asire ki dan lafason ki nou definir ki kalite Sant Lasante i annan dan en particular area, dan en particular kominote.  Si sa i match avek demografik sa kominote.  Tousala i bann eleman enportan.

Me sa ki pli enportan pou mwan Mr Speaker, se ki mon vwar poudir, nou enn bann rar pei ki ler nou annan en provizyon dan nou Konstitisyon ki nou’n rekonnet lenportans provizyon en nivo health care ki lo en standar ase o, nou’n sey nou mye pou nou delivre lo la.  E nou pep i bezwen apresye sa.  Napa byen, byen pei omonn kot ou pou al dan en klinik, ou pou ganny panse pou nanryen.          Souvandfwa ou vwar bann dimoun ki sorti trete aletranze zot vin avek bann bill e lo la, lo sa bill i mete koton konbyen i koute.  Gauze konbyen i koute.  Boutey delo konbyen i koute.  Difil konbyen i koute.  E tou sa bann bill i add up.  Me parkont, dan nou sistenm lasante, ler nou dimoun i al dan nou Lopital, i pa sorti ek sa bill ki annan tou sa bann keksoz lo la.  E mon krwar sa, nou devret apresye koman en pep.

E en lot eleman enportan dan tousala Mr Speaker, se sa mank lapresiasyon parfwa pou travay ki nou bann Profesyonnel Lasante i fer.  Wi.  I normal mwan koman en endividi ler mon al anba klinik, mon ekspekte mon pa esper plis ki 1erdtan.  Mon pa ekspekte esper sa kantite letan pou al kot en dokter.  Mon pa ekspekte sa dokter pran sa kantite letan pou dir mwan ki mon gannyen.  Mon pa ekspekte pa ganny sa latizann.  Me parkont, lo en lot kote, koman ou pa esper sa kantite letan, koman ou ganny sans vwar sa dokter, koman ou ganny sans ganny sa latizann neseser ki fer mon byen, mon pa pare pou mwan dir mersi.  E sa i depan lo en sanzman latitid ki nou annan anver nou bann dimoun ki travay pou donn nou en servis.  E souvandfwa, mon krwar se sa ki met nou alaryer.

Mr Speaker, mon ti fortunate pou mwan attend en sesyon ki mon krwar World Bank ti pe fer avek Minister Lasante e enn bann eleman kle ki zot ti idantifye se lafason ki nou bann profesyonnel parfwa i view zot prop fonksyon.  Se sa ki determin lopinnyon menm piblik lo nou sistenm lasante.

I pa mank resours, i pa mank larzan, i pa mank lezot keksoz, me sa latitid.  Sa fason ki nou choose pou nou vwar sa servis ki nou pe donnen.  E i zis demann nou pou nou al en pti kou akote, regard dan lezot pei kimannyer sa bann menm servis i ganny donnen.  Kot en klinik i deservi sepa konbyen milyon dimoun.  Kot i annan en dokter pou sepa konbyen milyon dimoun.

Pou nou kapab apresye, zefor ki nou dan sa pei, zefor ki nou Gouvernman in fer, pou donn nou en sistenm lasante ki alaoter.  Pou nou kapab apresye zefor ki nou Gouvernman pe kontinnyen fer, atraver anmenn bann Lalwa kler e spesifik, dan lafason pou nou kontinnyen improve nou sistenm lasante.  Se sa pour mwan ki bann pwen fondamantal otour sa bann Lalwa.  E se sa pour mwan sa konplemantarite ki annan dan sa reform ki nou pe fer, be it dan Finans kot nou konekte tou bann diferan eleman.  Nou annan en sinerzi atraver bann Lalwa ki nou anmennen.  Nou armoniz tou bann eleman enportan e dan Lasante kot ankor enn fwa ankor i montre ki nou pa’n fer keksoz zis an foupanmal me nou pe konsidere ki bann diferan eleman kle ki nou bezwen met ansanm pou fer keksoz marse.

E avek sa Mr Speaker, mon pou demann tou mon bann Koleg pou donn zot sipor sa Bill. Mersi.

 

MR SPEAKER

Onorab Barbe.

 

HON NICHOLE BARBE

Mersi Mr Speaker.  Mr Speaker, Minis ek ou delegasyon, Koleg Onorab, bonn apre midi.

Mr Speaker, i fer deza 35an depi dernyen fwa ki nou pei ti fer en reform konpreansiv dan nou sistenm servis e swen lasante.  Sa travay ki nou ti komanse an 1978 in ozordi ariv a en pwen, kot nou pei i bezwen re-envestir lenerzi, lide e resours, dan en zefor pou delivre en Health Care Service ki reponn a bann bezwen nou pep, pou sa syek ki nou pe viv ladan.  Stil lavi in sanze.  Danze e defi in sanze.  Maladi e lenfeksyon in zot menm evolye.  Me pli enportan ki sa, se ki bann zouti, skills e teknik in sanze e evolye.  E sa i natirelman anmenn avek li en sanzman dan zesyon health care delivery.

Lafason ki en sistenm swen lasante i ganny administre ozordi, i bokou diferan avek lafason ki i ti ete zis en dizenn lannen pase.  Enn bann pli gro defi ki nou pei i annan devan li, se ki Sesel i en pei lavi vit.  Nou posed en tre zenn popilasyon ki plen avek kouraz ek lenerzi.  Nou osi annan en tandans konportman a o risk ki prevalan dan en kantite nou bann zenn.

Nou osi en destinasyon touristik ki ouver e ekspoze avek lemonn.  Sa, malgre nou izolasyon zeografik, egalman Seselwa i en Nasyon ki vwayaz bokou.  Seselwa i en Nasyon ki vreman westernized.  Nou tandans konsomasyon i imit bann pei devlope ki a zot tour, i sa bann menm pei ki viktim bann pli o prevalans bann maladi kardyovaskiler.  Azout avek sa, tou bann defi ki vin avek dan kad en lekonomi modern, avek tou son presyon e stress i vin avek.  E finalman, i annan tou sa litani fleo sosyal ki nou pei pe lager avek pandan sa dernyen dizenn lannen e zot lefe detrimantal lo lasante fizik, mantal e spirityel en imen.

Pandan sa dernyen 35an, sa sistenm swen e servis lasante ki nou pei in posede in servi nou byen.  Detanzaot, in annan bann adaptasyon e reazisteman ki’n arive, tel ki re-entrodiksyon servis swen lasante prive, me zeneralman, sa sistenm ki nou’n annan anplas in deservi nou pei dan en fason ase satisfezan.  Me ozordi, an lannen 2013, nou bezwen aksepte ki nou sistenm aktyel in ganny depase par realite.  E avek sa realizasyon i vin motivasyon pou bouz delavan.  Pou met anplas bann striktir e sistenm ki nou mye plase pou fer fas avek bann defi pou sa prosen 10an.

Mr Speaker, permet mwan pou met lanfaz lo en pwen kle.  Servis e swen lasante i vize ver en sel bi.  Sa se pou protez e prezerv lavi.  Tou sistenm lasante partou atraver lemonn i posed sa pwen an komen akoz sa i core business en servis lasante e mon ladres lo Health Care Agency Bill 2013 in ganny konstrir otour en krwayans ferm dan sa senp prensip.  Si nou annan en sistenm lasante, son bi prensipal se pour protez, prezerv e prolonz lavi.  Se gide par sa baz ki Minister Lasante in anbark lo sa proze reform konpreansiv ki i pe konpletman revwar fonksyonnman sa Minister e tou son bann Departman.  Se sa nesesite pou prezerv lavi nou pep ki fer li neseser pou kontinnyelman sers fason pou delivre en meyer swen lasante.  defi pa reste statik.  Maladi pa reste statik.  Egalman, nou bezwen servi swen lasante ki kapab adapte avek realite aktyel e evolye pou relev bann defi.  Me egalman enportan, nou bezwen en sistenm lasante ki proaktiv e modern dan son lapros e panse, antisip danze, prepare e protez sa pep presye ki apel Seselwa.

Mr Speaker, devan nou Lasanble ozordi, nou vwar Health Care Agency Bill 2013.  Sa morso Lezislasyon i dezyenm ki vin devan Lasanble Nasyonal Sesel dan en lespas mwens ki 2 mwan e sa dan kad reform nou Sistenm Lasante.  Bill devan Lasanble i annan pou bi etablir en Lazans ki pou delivre servis swen lasante avek nou pep.      Fonksyon operasyonnel primer sa Lazans, se ki zot pou responsab pou zesyon Lopital Sesel dan son antyerte me egalman, pou zesyon tou bann servis lasante kominoter.

Mr Speaker, byen lo komansman, nou komans vwar depar avek lepase e nouvo direksyon ki pe ganny trase.  Provizyon pe ganny fer pour ki toulede Lopital Sesel e Servis Lasante Kominoter, i fonksyonn koman bann antite semi- otononm.  Sa lendepandans pou pran bann desizyon operasyonnel kle i ava permet Lopital Sesel pou enplimant en striktir ki modern e an konformite avek bann norm e pratik enternasyonal.  En striktir ki ava favoriz en sistenm zesyon swen lasante dan Lopital, ki bann Profesyonnel Lasante i ava zot menm konfortab pou travay avek.  Bann fonksyon sa Lazans in ganny definir koman pou planifye, delivre e evalye servis lasante primer, segonder e tersyer.

Sa an akordans avek bann Polisi Gouvernman e bann bezwen e standar pou sa servis ki pe ganny delivre.  Lalwa pe osi fer provizyon ki sa Lazans i delivre lo bann bezwen swen lasante, san desot sa Bidze ki’n ganny apropriye, me i egalman bezwen delivre lo bann bezwen priyoriter nou popilasyon.

Mr Speaker, mon krwar i enportan sa morso kot i konsern propriasyon Bidze pou Lasante.  Kontrerman avek lezot pei, Sesel i priyoritiz lasante e ledikasyon son pep avek alokasyon en pli gran poursantaz Bidze pou sa 2 sekter.

Mon oule sezi sa loportinite, avek kreasyon Health Care Agency, pou senpleman dir, ki avek en nouvo sistenm zesyon, lepep Seselwa pe ekspekte en zesyon responsab.  Seselwa pe ekspekte valer an term servis ki ganny delivre, an relasyon avek lakantite larzan ki pe ganny envestir.  I annan en lanvi e en lekspektasyon senser parmi nou pep, pou vwar en amelyorasyon signifikan dan servis ki zot pe resevwar dan sistenm lasante.  e la mon oule fer tre kler.  Si Bidze ki an kestyon, si i annan kestyon renimerasyon, resours, lekipman ouswa mendev, la i lemoman pou avans zot bann propozisyon pou konsiderasyon Minister Finans e laprouvasyon Lasanble.

Avek sa nouvo lelan ki nou sistenm lasante pe pran, sa ki demande se aksyon e non pa lekskiz.  Mon fermeman krwar dan en zesyon responsab resours ki ganny apropriye pou dann Departman ki depandan lo Bidze.  I pour sa rezon ki mon’n fer mansyon sa provizyon dan Lalwa.

Mr Speaker, mon vwar ki Lalwa in osi adres sa size latizann.  Ki piblik i ganny akse avek latizann esansyel e lezot medical supplies kan e letan ki zot dan bezwen.  Lalwa i osi ensiste ki latizann i devret an konformite avek okenn lezot Lalwa e regilasyon.  A sa pwen, mon oule propoz avek Minis ki son Departman i devlop en stratezi kominikasyon kot i konsern aprovizyonnman e litilizasyon latizann dan pei.    Ozordi dan pei, Minister Lasante i swiv en lalis latizann esansyel, rekomande par Lorganizasyon Mondyal pou Lasante, letan ki i konsider laprovizyonnman latizann pou Sesel.  E menm mon’n aprann, ki laboratwar i osi teste latizann pou kapab asire ki i lo standar.  Sa lenformasyon, i devret ganny kominike e eksplike dan en fason tre kler avek nou pep.  Sirtou bann pasyan ki’n al swiv tretman medikal aletranze.  Mon rekomandasyon, se ki Minister i travay lo en Polisi kominikasyon konpreansiv, ki reflekte bann vre konsern nou pep.

Mon pa krwar ki i ed lasante en dimoun, si i pe refiz en latizann ki Minister in ofer, malgre ki sa i menm latizann, me anba en non zenerik ki diferan.  Nou koman bann Profesyonnel Lasante, nou deza konnen.  Nou abitye e i tre normal pou nou aksepte ki menm latizann avek menm zengredyen aktiv i kapab ganny fabrike par plizyer diferan lakonpannyen e ganny vann anba diferan non zenerik.         Me i pa sifi ki sa i reste koumsa, koman parti sa nouvo direksyon ki nou pe trase.  Annou sorti e edik nou pep lo bann tel realite, ziska zour ki sa i ava vin en keksoz ki nou tou nou rekonnet e aksepte.

Mr Speaker, mon vwar en pti Clause ki fer mansyon ki sa Lazans i devret promot resers.  Promot resers pou amelyorasyon servis lasante.  Si ou permet mwan Mr Speaker, mon ava dir ki resers i enn nou pwen feb dan sa pei.  Pourtan, nou annan bann profesyonnel kalifye ki’n atenn sa nivo spesyalizasyon, kot zot devret pe komans antreprann e pibliy zot prop resers.  E letan ki ou diskit avek nou bann dokter Seselwa, ou vitman realize ki zot in deza komans mazin dan sa direksyon.  I menm annan serten size konsern tre alarman de fwa, ki zot koman bann Profesyonnel Lasante, ti a voudre konn lakoz.

Nou konnen ki Lopital Sesel i pa en Lopital resers.  Son fonksyon i enn ki’n toultan primer.  Pirman, swen curative.  Me ozordi dan Sesel, nou annan en Liniversite.  Nou annan bann profesyonnel kalifye e nou annan bann fasilite.  Alors, dan kad sa nouvo direksyon ki nou pe trase, mon pou fortman sizere ki Health Care Agency i kolabor ansanm avek Liniversite Sesel dan en zefor konzwent pou ankouraz home grown resers dan Sesel.  Donn sans nou bann Profesyonnel Seselwa pou prouv zot lekor dan sa domenn e mon plis ki garanti ki zot pa pou dezapwent nou.

Mr Speaker, en lot pwen ki’n enteres mwan se sa enn ki dir, “ensure the well being and continuous professional development of Health Care Professionals”.  Lemoman ki nou pe antann sa, mon asire ki lamazorite nou, pou natirelman mazin renimerasyon, mazin larzan.  Renimerasyon set en size ki tre sansib partou kot ou pase denozour.  Me Gouvernman in asir nou ki leneseser pou ganny fer e ki lanons ava ganny fer o moman apropriye.  Me kot i konsern nou bann Profesyonnel Lasante, mon anvi avanse ki konsiderasyon ekstra i ganny pran, kot zot byennet zeneral i konsernen.  Sa i devret en priyorite pou sa nouvo Lazans.  Annou rekonnet e aksepte ki bann Profesyonnel Lasante in vin viktim en sitiasyon ki konpletman andeor zot kontrol.

Pandan sa dernyen 20 ekek lannen, nou servis lasante e son bann travayer in sistematikman ganny denigre par serten akter dan nou sosyete ki ti alaresers pou bann keksoz ki ti napa nanryen pou fer avek Servis Lasante, ouswa son bann Travayer.

Servis Lasante e son bann Travayer in senpleman ganny elekte koman en pon pou sot larivyer.  Plis ki 20an maltrete i annan en lefe negativ lo moral e Lenstitisyon e son bann manm.  Letan ki mon’n vwar en dokter lo televizyon pe eksplike ki son Departman i la pou sov lavi e ki i pa krwar ki i annan bann ka neglizans dan son Departman, sa in fer mwan realize ki nou pep in perdi tro bokou respe e konfyans dan nou sistenm lasante.  In plis ki ler pou re-etablir respe dan nou bann Lenstitisyon.  In plis ki ler pou re-etablir respe pou bann ki sakrifye pou delivre en servis esansyel anba kondisyon difisil.  Ki swa nou bann Profesyonnel Lasante, teachers, ouswa polisye, annou tret zot avek sa respe ki zot lofis e fonksyon i demande.  In plis ki tan, pou nou ini koman en Nasyon e respe kanmarad.

Me kot i konsern sa Bill devan nou, mon swete ki sa Clause lo staff well-being i ganny enterprete dan en konteks pli larz e ki nou aret reste silans, letan ki bann Profesyonnel Lasante i ganny krisifye san zizman, san laprev, san rezon.

Mr Speaker, en lot Clause ki’n atir mon latansyon se sa enn ki dir edik pasyan lo zot bann Drwa e Responsabilite vizavi swen lasante.  Isi Sesel, kontrerman avek Lanmerik, nou deza posed lasante iniversel.  An dot mo, i fer deza 35an depi ki nou pei in demokratiz akse avek servis swen lasante.  Sa ki nou pankor fer parkont, se pou demokratiz zesyon e planifikasyon.

Wi.  Nou rekonnet ki pasyan i annan en drwa koman pasyan me sa ki nou panse pa’n zanmen permet nou rekonnet, se zot drwa kontribisyon.  Nou pa kapab rekonnet drwa pasyan si nou pa rekonnet zot drwa partisipasyon e kontribisyon dan mekanizm desizyon.  La, nou lannen 2013.  Alor, in plis ki ler pou nou demokratiz akse avek decision making apparatus sistenm lasante.  Mon propoze ki Minister Lasante i pran legzanp avek bann lezot Lenstitisyon kot sa in deza pe marse, tel ki zesyon distrik avek lekol.

Mr Speaker, mon’n pas bokou letan avek sa Bill.  Apre tou, i pe ganny met anplas pou administre en Lenstitisyon kot mon’n pas mon karyer profesyonnel an antye.  Mon kapab dir, ki mon personnelman konfortab avek sa Bill dan lafason ki in ganny avanse.

Servis Lasante i enn ki mon tre familye avek e bann Provizyon ki mon’n vwar dan sa Bill i donn mwan konfidans dan fitir nou sistenm lasante dan Sesel.  Me la ankor, i pou demann bokou travay, konportman profesyonnel, devosyon e sakrifis delapar tou nou bann Profesyonnel Lasante.  Me nou egalman bezwen en pep ki reseptiv, angaze, responsab e ki apresye swen e servis ki i resevwar.

Mr Speaker, avek sa, lo non distrik Bel Air, mon pou ofer tou mon sipor pou sa Bill. Mersi Mr Speaker.

 

MR SPEAKER

Onorab Rose.  Onorab Rose, avan ou fer ou lentervansyon parey labitid, mon’n vwar ou’n sirkil en dizenn amannman miner ki nou’n sirkile.  Clerk in sirkile e ki ou ava pran dan ou lentervansyon.  Mersi.

 

HON MARIE-ANTOINETTE ROSE

Wi Mr Speaker.  Mr Speaker, ozordi dan nou Lasanble nou’n vwar 2 group zenn ki’n partisip ansanm avek nou depi bomaten.  Bomaten ti annan en gran group zenn sorti lekol Belonie e apre midi i annan en lot group zenn e mon krwar in en sesyon spesyal pou bann zenn vwar kimannyer nou Parlman i fonksyonnen, me osi pou zot vwar kimannyer nou Gouvernman i fonksyonnen e i kontinnyen travay pou zot.

Bann zenn ki avek nou ozordi Mr Speaker, si ou permet mwan, bezwen realize ki zot pe swiv en moman enportan dan listwar nou pei.  Sa Proze De Lwa ki devan nou wi.  Lalwa i en zafer ase difisil, i konplike.  I pa keksoz tou dimoun me Lalwa se labaz lasosyete.  I gid nou e souvandfwa, i gid nou pou fer sa ki byen e sa Health Care Agency Bill, i en Bill akoz i pankor ganny pase par Lasanble.  Sa Proze De Lwa parey nou dir an Kreol i en sapit enportan dan listwar lasante Sesel.

Parey Onorab ki’n koz avan mwan, Onorab Barbe i dir, dernyen fwa ti annan en gran revolisyon dan sistenm lasante, ti an 1978 zis apre 1977 kot ti annan en nouvo Gouvernman opouvwar e kot ti annan en Gouvernman ki ti determinen pou retir nou pep dan lapovrete.  Pou retir nou zenn dan lapovrete, kot parey Onorab Souris in fer resorti apre midi, kot ti annan bann maladi bann pei, sa ki nou apel bann maladi bann pei pov.  Bann maladi ki ti pe atak nou bann zanfan.

Ti annan infant mortality, savedir bann zanfan ki ne, ki mor e ki pa vwar zot premye lanniverser.  Infant mortality to tre, tre o.  I annan en kantite manman ki ler ti al donn zanfan, zot osi zot ti perdi zot lavi e ti annan en kantite ka mal nitrisyon.  Souvandfwa parmi nou, nou koz lo latizann lever, latizann bann parasite ki ti annan.  E sa ti bann maladi lapovrete ki ozordi nou bann zenn pa konnen ti egziste akoz zot pa ti viv dan sa lepok.  E ozordi sa nouvo lepok ki nou bann zenn pe viv ladan, i bann nouvo kalite maladi.  I bann maladi afliyan.  I bann maladi bann pei devlope.  Bann pei ki’n ariv en nivo kot ou ganny problenm leker, ou ganny problenm obesite, ou ganny problenm mank legzersis, ou ganny problenm dyabet.  Bann manze ki nou manze.  Bann zenn mon krwar zot konnen ki bann manze, bann draze dou, bann manze en pti pe gra ki nou kontan.

Nou lifestyle koman en pep in sanze.  E ler nou lifestyle koman en pep i sanze, i en defi pou Minister Lasante.  i en defi pou sosyete me nou vin viktim nou prop sikse e nou vin viktim nou prop progre e i en sinny progre dan limenm.  E mon krwar nou bann zenn ozordi i bezwen apresye ki en kantite zefor in ganny mete pour ki nou pep, nou pei i vin lo sa nivo ki i ete ozordi.

E Mr Speaker, atraver ou, mon lans en lapel avek bann zenn pou pran zot lavi o serye.  Nou pe koz avek prosen zenerasyon Leaders.  Nou pe koz avek bann dimoun ki pou kapab etablir.  Nou’n koz en kantite.  Onorab Barbe in fer en diskour fantastik kot in koz lo mindset.  Latitid, sanzman.  I pa pou ariv ozordi e mon plis ki sir ki i riske pa ariv avek nou zenerasyon me i devret ariv avek prosen zenerasyon.  Si nou mank sa bato Mr Speaker, kot nou ganny nouvo latitid anver nou prop lekor, anver nou prop lasante, anver nou prop byennet, anver nou prop ledikasyon.  Anver annan disiplin e mon krwar Onorab Barbe in koz lo annan respe pou Lenstitisyon.  In koz en kantite.  In plis ki ler pou nou re-etablir respe dan nou bann Lenstitisyon.  Mon krwar i en parol for.  I en mesaz for.  Nou bann Lenstitisyon i enkli lasante.  I enkli Minister Lasante dan son entirety e i enkli bann nouvo Departman ki pe ganny kree.

So, ozordi zot pe vwar listwar e tanto ler zot retourn dan lakour, mon krwar zot bezwen dir avek zot paran, be in annan sanzman pozitiv ki pe arive dan sa pei.  I pe al annan sanzman dan Minister Lasante e nou, ki nou kapab fer koman en fanmiy pou donn koudmen e aport sipor a sa sanzman.  Si ozordi e nou tou ki la nou’n annan moman desatisfaksyon avek Minister Lasante.  Nou’n annan kritik pou fer lo Minister Lasante.  Me si ozordi nou kapab fer sa e Minis i la, se akoz nou annan en Gouvernman ki’n ekout nou bann kritik, ki atantiv.  I pa zis dir ar, sa bann dimoun pa konnen ki zot pe dir.  Se akoz nou’n annan bann Manm Lasanble ki’n met devan Gouvernman nou bann konsern e bann Manm Lasanble i bann dimoun ki reprezant zot dan distrik.  Alors Mr Speaker, si ozordi nou pe e ki nou pou siport sa Proze de Lwa ki devan nou, nou annan en Health Care Agency Bill avek sanzman radikal dan lafason ki Minister Lasante pou fonksyonnen, se akoz enn, Gouvernman in ekoute e dezyenm, in pran letan pou etidye e met anplas en sistenm that works.  Nou pou toultan annan imen ki pou fer fot akoz imen i pa en et parfe.  Me si nou annan en sistenm ki marse, alors nou a kapab kont lo sa sistenm pou fer keksoz marse.

E Minis e lezot ki’n pran laparol in fer resorti ki i annan bann drwa fondamantal dan Konstitisyon e Primary Health Care. Mon krwar i enn bann drwa fondamantal ki pa pou ganny touse.  I dan nou Konstitisyon.  Me pa akoz ou annan en Drwa ki dan ou Konstitisyon ki alors ou krwar ou pou kapab abiz lo la.  Mon krwar nou bezwen ozordi plis ki kontinnyelman koz avek bann Profesyonnel Lasante, plis ki kontinnyelman koz avek Minister Lasante.  Nou bezwen koz avek nou pep, pep Seselwa, pou fer sir ki nou drive lasante.  Nou nepli kapab asize e dir nou pa satisfe avek Minister Lasante.  Nou bezwen kapab dir be mwan ki mon pe fer pou gard mon lasante?  Ki mon pe fer pou fer sir ki mon pa vin en statistik?  Mon pa vin en pasyan dan Minister Lasante.

E si par maler i arive, alors la, nou bezwen annan en sistenm ki drwat, ki marse e ki rann nou en bon servis.  E mon krwar bann Manm in koz ase byen lo la.  Nou bezwen osi konnen e zenerasyon ki pli zenn ki nou i bezwen konnen, ki i annan en kou a Minister Lasante.  I annan en kou plizyer milyon Roupi ki ganny mete dan vaksinasyon ler ou en pti baba, ki anpes ou ganny bann maladi.

Si nou pa ganny serten maladi isi parey Polyo, i pa akoz konmsi nou’n ne dan paradi.  I akoz ler nou ti tipti, nou ti ganny en vaksen ki anpes nou ganny sa maladi.  E vaksinasyon Sesel in elimin en kantite maladi ki nou zenn, nou bann zanfan e la dan Bidze Siplemanter, nou’n pas plis larzan pou bann zenn fiy ganny nouvo vaksen pou anpes zot ganny kanser kol matris ler zot vin pli gran.

Mon krwar i enportan pou nou bann zenn realize ki i annan en kantite milyon.  Nou pa vwar sa byen, byen Minis.  Mon krwar in ler pou nou, ler en dimoun i vin kot Minister Lasante, in fini ganny tou son bann tretman, tou son bann zafer, ou donn li en pti tiket ou dir li, this is how much it costs. Sa i kantite ki i kout nou Gouvernman pou sonn ou.  Pou donn ou sa bann, pou donn ou sa Panadol pou fer CT Scan, pou fer MRI eksetera.  En kantite nou, nou pou soke akoz nou konnen nou pa pou kapab.

Me i pa zis the cost Mr Speaker, i waste.  I waste ki kapab egziste akoz nou pa pe apresye sa kou.  E i pa zis waste.  En kantite zenn konmela zot dir ou, en kantite adilt i dir ou me sa i larzan mon manman ek mon papa, oubyen mon frer ki pe pey tax.  Byen.  I bon.  Mon krwar i ok sa.  I larzan tax. Me i desizyon Gouvernman Parti Lepep pou deside pran sa larzan tax e met dan lasante.  Ti kapab met dan rezerv.  Ti kapab pran sa larzan met dan rezerv, met Labank Santral.  Parey Lanmerik i fer.  En kantite rezerv.  I dir ou park sa larzan la, nou annan rezerv, nou bezwen anmas pou letan dir.  Me si ou anmas larzan pou letan dir, ou pep pa ganny vaksen.  I pa ganny swen lasante.  Ou annan en pep ki malad.  E ou bezwen still pran larzan rezerv e resonny li.  Mon krwar i enportan pou ou realize poudir i en swa e i en desizyon ki Gouvernman opouvwar i fer.         Prezan nou kapab dir be nenport ki Gouvernman ti pou fer li.  Non.  Annou al Madagascar en pti gin nou a regarde.  Annou al Lanmerik, annou al Langleter.  Annou al diferan pei e nou kapab gete poudir me i annan en lot Gouvernman dan sa pei.  Eski zot pe fer li?  Non.  Larepons i non.  So, mon krwar i enportan pou nou edik nou lekor la ki i annan en kantite sanzman ki pe ganny fer dan Minister Lasante pou nou apresye.

I pa vedir ki nou pa kapab kritike.  Mon krwar enn bann gran kritik Minister Lasante se bann Manm Parlman.  Me nou fer li pozitivman.  Nou fer li byen e nou fer li pou donn koudmen amelyor nou servis lasante.  So, mon sezi sa loportinite pou tou dimoun ki ozordi avek nou e tou dimoun ki pou ekout nou lo sa deba pou nou vin bann agents of change.  Nou bezwen nou personnelman vin bann agents of change.  Nou bezwen sanz nou mindset, sanz nou latitid.

E Mr Speaker, zis avan mon terminen, in annan komanter ki ganny fer lo Health Professionals e mon bezwen asir Minis ki nou Lasanble, nou siport bann Profesyonnel Lasante.  Nou krwar zot bann dimoun ki travay tre, tre dir.  I bann louvraz ki bokou nou isi nou pa ni ti pou anvi fer.  2er, 3er bomaten ler nou lo nou lili, zot pe sov lavi.  I en profesyon tre nob e mon krwar Onorab Pillay in koz lo lavansman bann dokter.  Mon koz bokou pli for e 2 fwa pli for pou lavansman bann ners.  ]

Mon krwar in ariv en staz Minister Lasante kot ners devret pran bokou plis responsabilite.  Nou annan bokou ners ki madanm me nou annan bokou ners ki annan kapasite e konpetans enkrwayab e parfwa zot fer bokou plis ki en dokter, me souvandfwa, en ners i annan en pasyon e en lanmour profon pou sa travay ki i fer e mon krwar sa i bokou plis enportan ki zis en kalifikasyon.  Mon krwar the right attitude e annan sa lanmour pou vreman donn en dimoun son lasante i tre enportan.  E alafen dizour, lasante se labaz devlopman nou sosyete.  Se labaz legzistans imen e si nou napa en bon swen lasante, nou kapab dir goodbye tou bann lezot aki ki nou’n arive fer.

Mr Speaker, sa i bezwen ganny dir e nou bezwen sezi sa loportinite pou dir li la akoz mon krwar Gouvernman in deside met son lipye ater e dir look, nou napa en swa me reform.  Mon met sa bann reform ki pe arive dan Minister Lasante, enpe parey reform ki ti arive an 2008, kot nou ti deside koman en pei an antye pou fer reform.  No looking back. Nou move forward e nou aranz nou sistenm lasante.

E Minis avek PS ki ek ou e tou bann Profesyonnel Lasante zot annan tou nou sipor.  Mr Speaker, parey ou’n dir ou’n fini sirkil bann lamannman dan sa Proze De Lwa.  Nou annan 12 pti lamannman e avek ou permisyon mon ti a kontan soumet pou konsiderasyon.  Mersi.

 

MR SPEAKER

Ok. Sa bann lamannman in pas tes admisibilite.  Prezan mon ava envit Minis pou son reply.  Pardon?  Minis.  Well, be nou ava break ziska 4er.

 

(BREAK)

MR SPEAKER

Bon, nou ava kontinnyen avek deba lo Bills.  Minister, Right of Reply.

 

MINISTER MITCY LARUE

Mersi Mr Speaker.  Mr Speaker, ankor enn fwa mon pou dir ki mon Minister pe sey fer son mye pou kapab aranz e moderniz nou sistenm lasante.  e mon ti a kontan premyerman remersye tou bann Manm ki’n pran laparol e byensir zot in koz anfaver sa Bill e zot in donn bokou bokou sizesyon e zot in anmenn devan bokou serten konsern ki definitivman zot bann constituency in met devan zot e ki zot okouran e mon tre apresye tousala.     Donk, mon ti a osi kontan pou remersye Onorab Leader Zafer Gouvernman dan Lasanble, kot in fer resorti en pwen tre, tre enportan, kot in dir Lasante i labaz en sosyete.  I labaz tou devlopman imen.  Sa in tous vreman lo sa pwen kle.

Souvandfwa, dimoun pa tro konpran ler nou koz lo sistenm lasante.  Souvandfwa, dimoun i krwar lasante i konsern Minister Lasante.  Mon krwar i enportan pour ki tou Seselwa i konpran ki lasante i son responsabilite.  Lasante i enportan pou li akoz san lasante, nou pa kapab arive fer nanryen.  E se sa osi rezon pourkwa Gouvernman i met bokou lanfaz.      Gouvernman i donn nou pli gro Bidze Nasyonal akoz i anvi vwar en Sistenm Lasante.  I anvi vwar son pep viv an bonn sante.  Sa i laspirasyon sa Gouvernman.  E ankor, Onorab ti fer resorti en pwen tre enportan ankor, kot in dir, souvandfwa dimoun i pran lasante dan en fason, mon pou dir tre konplesan.

Pou zot, zot vini, nou ganny lasante, nou ganny latizann ek dokter, nou ale si nou anvi pran nou pran, si nou pa anvi pran, nou pa pran.  E ler zot koze zot dir, wi.  Nou pe pey tax.  I byen sa.  Nou pey tax. Ankor, Onorab in fer resorti sa pwen tre enportan.  Nou pey tax, wi.  Nou kapab pey pli gro tax.  Me si sa Gouvernman ki opouvwar pa met sa larzan back dan Lasante, nou papou ganny en Lasante gratwit parey nou pe gannyen.  E si nou fer en pti letour dan larezyon, nou pou osi vwar koman bann lezot pei, kimannyer zot bann dimoun i ganny swen lasante.  E isi Sesel, nou vwar li tro fasil.  Souvandfwa, nou vwar li en pti pe tro fasil kot nou pa montre vreman sa lapresiasyon e mon oule fer resorti ki avek nouvo striktir, nou pou osi komans edik sa pep lo konbyen i koute pou ganny lasante.  I annan en Manm Onorab ki’n fer resorti sa pwen tre kler ki mon krwar i enportan e nou osi dan Minister, dan nou bann Komite kot nou pe diskite, nou’n vwar lenportans pou nou komans fer nou dimoun konpran poudir ler ou vin Lopital, konsiltasyon i tan.  Tan pou medikaman.  Si ou admit, i tan pou tan zour.  Tousala, nou pou komans fer dimoun konpran, atraver donn zot en bill.  Me en bill ki zot pa peye.  En bill kot si in ariv zot R2000, zot pou konnen poudir zot konsiltasyon ti tan, ou medikaman ti tan e vwala ou bill.  Me sa bill pa pou peye akoz nou Gouvernman i donn nou sa pou nanryen.  Me selman sa i ava komans konsyantiz nou bann dimoun e fer zot realize e petet osi avoid serten wastage ki nou fer dan Lasante.

Mr Speaker, ankor, lasante i sa pli gro kado ki nou tou nou bezwen.  Donk, i neseser ankor enn fwa pou nou pran sa vre responsabilite nou lasante dan nou prop lanmen, sakenn de nou.  I osi neseser ki kan nou lasante pou nenport ki rezon i ganny afekte, ki nou annan en servis lasante de o kalite ki permet nou reganny nou lasante o pli vit posib.  Se sa egzakteman ki sa Lazans pou fer pou nou popilasyon.  Sa gran lobzektiv prensipal sa Lazans se pou promot, protez e restor lasante piblik.  E dan bann lentervansyon, bann Onorab zot in donn nou diferan, parey mon’n dir, propozisyon lo koman e kwa ki sa Lazans, dan son loperasyon pou bezwen adrese.  E tousala, nou’n pran an kont pou anmenn devan pou kapab met an pratik.

Nou konnen ki nou toultan adres bezwen lasante lanasyon dan en fason pli efikas, an devlopan bann standar apropriye pou nou servis.  E sa osi, Lazans pou son manda pou prepar tousala.  E Minister li, i pou prepar son Policy bann standar ki Lazans li i pou bezwen donn sa servis dapre Policy e standar.

Zot in koz bokou lo kominikasyon ant Profesyonnel e pasyan.  Nou konnen poudir sa i en konsern e mon donn zot ankor garanti ki pou annan sistenm anplas pou kapab adres sa sitiasyon.

Ledikasyon piblik, lo zot drwa e responsabilite i osi en pwen ki zot in aborde e nesesite pou nou fer bann sanzman dan Servis Lasante ki pou adres bezwen popilasyon e anmenmtan, nivo devlopman pei.  Fonksyon Proze De Lwa ki mon’n prezant zot parey mon’n fer resorti, i pou adres tou bann konsern ki zot in fer resorti.

Enn bann lobzektif tre enportan se devlopman nou bann Travayer Lasante.  Zot in fer resorti ki sa i bezwen ganny enterprete dan en sans bokou pli larz ki nou’n fer dan lepase, pou fer sir ki zot well being i ganny adrese akoz sa osi nou’n vwar in en problenm ki nou bezwen rektifye.

Souvandfwa, nou bann profesyonnel pa ganny sa lankadreman neseser, kot pou zot kapab ankor amelyor zot fason travay, zot fason fer keksoz, akoz nou pa kapab reste en sel fason fer keksoz.  Nou bezwen toultan pe revwar kimannyer nou fer keksoz e kimannyer nou fer keksoz pli byen.

Dan lentervansyon, zot in osi fer resorti bann gran sanzman ki sa Proze modernizasyon pe anmennen.  Zot in koz lo armonizasyon sa 3 brans.  Minister, Health Care Agency avek Public Health Authority.  Definitivman, sa 3 brans i bezwen kordin tre byen.  Minister i pou prepar Policy standar, i pou monitor, i pou evalye.  Health Care Agency li, i bezwen donn sa servis kalite.  Minister i bezwen monitor, evalye, fer sir ki bann Policy ki’n ganny donnen pe ganny enplimante.  E Public Health Authority li, i bezwen fer sir ki i regilariz tousala e fer sir.

Zot in koz osi bokou lo dokter ek bann klinik prive.  Serten keksoz pe ganny fer petet, ki pa lo sa standar koman bann pasyan i bezwen.  E sa, zot ganny get away with it. Me avek Public Health Authority, zot pou kapab regilariz osi sekter prive.  Pa selman sekter piblik.

Zot in koz ankor lo en pwen lapresiasyon.  Lo travay ki nou bann travayer Lasante i fer.  Souvandfwa, parey mon ti dir dan komansman Proze De Lwa, mon ti fer resorti ki nou bann travayer Lasante i donn bokou.  Bokou e Onorab Rose in fer resorti ankor kot in menm mansyonnen ki menm nou bann ners, zot fer bokou e sa mon pou dir, wi.  Zot fer en kantite.  Annan de fwa, zot annan plis.  Definitivman zot kontak avek pasyan i bokou pli pros ki bann dokter parske zot la whole day, annan de fwa, whole night avek zot pasyan.  I demann en pti pe plis lapresiasyon lo lapar tou dimoun.  I byen letan zot fer mal nou kritike.  Me souvandfwa, i annan fason ki nou devret kritike.

I annan de fwa ler nou kritik negativman, sa i demoraliz nou bann travayer Lasante.  Mwan, kantite fwa mon’n santi kot nou bann travayer zot down. Zot down akoz sa demoralizasyon.  Sa fason koze.  Annan de fwa, i annan pasyan ki lo Ward, i pa’n satisfe avek en keksoz, i pa pou vini zantirman.  Son fanmiy.  Pa sa pasyan, me son fanmiy.  I pa pou vini zantirman pou li diskit sa problenm me i pou plito sorti e al fer plis kankan, plis problenm e sa i demoraliz nou bann travayer Lasante.

Zot bezwen sipor.  Zot bezwen en kantite sipor.  Zot osi zot imen.  Zot kapab fer fot parey nou tou nou kapab fer fot, me nou bezwen osi, ler zot fer byen, montre, dir mersi.  Montre sa gratitid.  Dir zot mersi.  E sa i pou lev zot moral e byensir ler zot moral i o, zot kapab osi donn en meyer servis.  Me ler zot moral i ba, zot osi kapab zis pran keksoz alalezer ki nou Minister nou pa tolere.

Alor, mon demann tou dimoun dan en fason ou en lot, annou kritike me annou kritik dan en fason pozitiv, pou nou anmenn sa amelyorasyon ki nou tou nou anvi vwar.  Ki nou tou nou ti a kontan vwar dan nou Minister Lasante akoz i nou Minister.  I pou nou tou sa.  Akoz dan en fason ou en lot, en zour oubyen en lot, nou kapab ariv dan Minister Lasante.  Nou kapab ganny admit lo en Ward, nou kapab annan en keksoz pou fer avek en dokter.  Nou bezwen sa bann dimoun.  E ler nou bezwen sa bann dimoun, nou bezwen osi montre lapresiasyon.

Ler zot fer mal, zot ava ganny dir zot fer mal e zot ava aranz zot osi akoz la osi, nou annan serten travayer osi ki bezwen aranz en pti pe latitid, me i pa bokou.  Me mon sir, avek re-organizasyon, zot pou bezwen shape in or shape out.  Sa osi i enportan akoz i enportan pou nou tou.  Nou tou, anba sa nouvo striktir, anba sa nouvo modernizasyon, nou bezwen pran nou responsabilite seryezman ansanm, pou nou kapab fer sa diferans ki nou tou nou bezwen.

Mr Speaker, pou terminen mon ti a kontan ankor remersye tou Manm Onorab e mon ti a kontan, letan mon pe terminen redir ankor menm keksoz ki mon’n dir bomaten.  Ler nou travay ansanm, nou al bokou pli vit e nou al bokou pli lwen koman en pep.  E fri ki nou rekolte ler nou travay ansanm i vreman vo lapenn.  Alor, mon demann tou dimoun pou met lanmen ansanm, met latet ansanm e annou fer sa vre sanzman ki nou anvi vwar avek sa Lazans Health Care Agency.  Mersi Mr Speaker.

 

MR SPEAKER

Bon, in ariv ler pou nou pran en vot.  Tou bann ki anfaver lo merit e deba zeneral?  Okenn ki kont?  Mon ava ganny mwan en Formal Second Reading.

 

THE CLERK

A Bill of an Act to establish a Health Care Agency…

(interruption)

 

MR SPEAKER

Hold on. Pardon?  Pardon?  Personn pa kont.  Ok. Mon krwar nou komans fatige.  5er pe al sonnen.  Mon a ganny en Formal Second Reading, Madam Clerk.

 

MADAM CLERK

A Bill of an Act to establish a Health Care Agency and to provide for matters connected therewith or incidental thereto.

 

MR SPEAKER

Ok.  Nou a ganny en Mosyon pou sot Committee Stage.

 

HON MARIE-ANTOINETTE ROSE

Mr Speaker, anba Order 91(1), mon move ki nou sispann Orders 65 to 70 pou nou sot Committee Stage.

 

MR SPEAKER

Okenn ki segonn sa Mosyon?

 

HON ANDRE POOL

Mr Speaker, Mosyon pou ganny segonde.

 

MR SPEAKER

Bon, nou pran en vot lo la.  Tou bann ki anfaver?  Okenn ki kont?  Mon a ganny en Motion for Third Reading.

HON MARIE-ANTOINETTE ROSE

Mr Speaker, anba Order 71(1), mon move ki nou lir sa Bill en Trwazyenm fwa.

 

MR SPEAKER

Okenn ki segonde?

 

HON ANDRE POOL

Mr Speaker, Mosyon i ganny segonde.

 

MR SPEAKER

Nou pran en vot lo la.  Tou bann ki anfaver?  Okenn ki kont?  Mon a ganny mwan en Third Reading.

 

MADAM CLERK

This Act may be cited as the Health Care Agency Act, 2013.

 

MR SPEAKER

Ok, Bill in pase.  Nou ava ekskiz Minis ek son delegasyon parmi nou.  Mersi Minis.  Nou, nou ankor annan en pti louvraz pou nou fer.  Nou annan 2 First Reading.  2 Public Bills, First ReadingMadam Clerk.

 

MADAM CLERK

This Act may be cited as the Citizenship Amendment Act, 2013.  This Act may be cited as the Immigration Amendment Act, 2013.

MR SPEAKER

Bon, nou ava adjourn ziska Mardi prosen, 9er bomaten.

 

(ADJOURNMENT)