::
Home » Verbatim » Verbatim - Third Term 2013 » Tuesday 22nd October 2013

Tuesday 22nd October 2013

NATIONAL ASSEMBLY OF SEYCHELLES

Tuesday 22nd October, 2013

The Assembly met at 9 am

National Anthem

Moment of Reflection

Mr Speaker in the Chair

 

 

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.  Bonzour bann etidyan UniSey dan Gallery.  Tou bann ki pe ekout nou dan lakour.

Avan ki nou komans avek premye pwen lo nou Order Paper ozordi e sa se kestyon par Minis Meriton, Minis pour Zafer Sosyal, Devlopman Kominoter e Sport.

Mon ti oule senpleman dir, alokazyon sa mwan ki en mwan pou Kanser, mwan Oktob e mon vwar ki bokou zot ozordi zot in sanz an Oranz e i tre byen.  Mon oule osi o non Lasanble Nasyonal,…pink.  Pink mannyer ou dir pink an kreol?  Roz.  Roz, oranz, ok.  Roz.  Mon oule eksprim mon sipor pou Minister Lasante e Cancer Concern, sa NGO ki pe travay ansanm ek Minister Lasante pou sansibiliz popilasyon e ogmant zot konesans zeneral lo sa maladi ki apel Kanser e ki zot pe fer zot mye pou elimin plizyer bann fo konsepsyon ki egziste vizavi sa maladi.

Parey nou konnen, Kanser i kapab afliz nenport ki.  I pa zis en issue lasante, me i annan bann ramifikasyon sosyal e ekonomik pli gran.  I pa en maladi bann dimoun ris, aze, ouswa bann dimoun dan pei devlope.  Tou dimoun i kapab ganny kanser.  I pa en santans lanmor ouswa nou desten.  Nou kapab fer en kantite pou nou pa ganny Kanser dan nou lavi.  Donk alor, o non Lasanble Nasyonal, mon oule eksprim nou sipor pou sa kanpanny ki pe arive pandan mwan Oktob, pour ki alafendefen, nou kapab redwir lensidans sa maladi dan nou pei.

Avek sa mon ava envit Onorab Melval Dugasse pou demann son kestyon.

 

HON MELVAL DUGASSE

Mersi Mr Speaker.  Bonzour Minis.  Bonzour tou Manm Onorab.  Bonzour tou bann zenn anler.

Minis, mon kestyon i lir koumsa.  An vi ki Minis pou Later ek Lakaz ti pronons dan Lasable le 5 Mars sa lannen ki laplenn La Retraite pou form parti devlopman pti biznes pou Anse Etoile, eski Minis i kapab enform sa Lasanble lo pozisyon son Minister lo sa size?  Mersi.

 

MINISTER VINCENT MERITON

Mersi Mr Speaker.  Bonzour Mr Speaker.  Bonzour tou Manm Onorab.  Bonzour tou bann zenn etidyan Liniversite Sesel e tou bann oditer kot lakour.

Mr Speaker, Gouvernman in toultan reste angaze anver devlopman pti biznes dan distrik, partikilyerman la nou pe koz distrik Anse Etoile.  E landrwa kot pou fer sa devlopman i ankor an staz negosiasyon.  Poulemoman Mr Speaker, laplenn La Retraite pou reste kot i ete.  Mersi Mr Speaker.

 

MR SPEAKER

Okenn siplemanter Onorab?

 

HON MELVAL DUGASSE

Minis, baze lo ou larepons ek lasirans, eski ou Minister i annan lentansyon dan lefitir pou met bann nouvo lenfrastriktir tel ki changing room ek lalimyer lo sa laplenn?  Mersi Mr Speaker.

 

MINISTER VINCENT MERITON

Mersi Mr Speaker.  Wi Manm Onorab.  Ofir e anmezir ki resours i permet nou, nou oule kapab os nivo nou bann fasilite sportif, pou fer sir ki nou bann zenn ki servi li, zot servi li dan konfor avek tou bann keksoz ki neseser.  Mersi Mr Speaker.

 

MR SPEAKER

Onorab Bristol.  Kestyon 179.

 

HON ALDERIC BRISTOL

Mersi Mr Speaker.  Bonzour Mr Speaker.  Bonzour Minis ek ou delegasyon e bonzour tou bann zenn dan Galeri.

Mr Speaker, etan donnen ki distrik Takamaka i annan logmantasyon demann pou lakaz dimoun aze, eski Minis i kapab dir sa Lasanble si son Minister pe konsider agrandir Lakaz Rezyonnal Dimoun Aze Anse Boileau, ki ava osi benefisye bann dimoun aze distrik Takamaka?  Mersi.

 

MINISTER VINCENT MERITON

Mersi Mr Speaker.  Mr Speaker, nou’n toultan ankouraz bann fanmiy otan ki posib, pou zot pran ka avek zot bann vye paran.  En dimoun i ganny admet dan Lakaz Bann Dimoun Aze, selman ler napa en lot alternativ e ler vreman nou’n sey tou bann posibilite, an servan lezot Polisi e progranm ki Gouvernman i annan a nou dispozisyon.

I annan 9 Lakaz Dimoun Aze lo Mahe, Praslin avek La Digue, avek en kapasite pou pran 118 dimoun ki’n ariv laz 63an, ki ankor mobil e ki kapab fer mazorite zot tripo, zot menm.

Ansemoman i annan 13 lasanm vid enpe eparpiye dan tou sa bann Lakaz.  Mon Minister in osi realize ki demann pou en lasanm kot sa bann Lakaz Dimoun Aze pe ogmante, alor i annan propozisyon pou konstrir ankor detrwa Lakaz.  Sa 9 Lakaz Dimoun aze in ganny konstrir enpe letan pase lo bann teren kot i pa neseserman posib pou fer extension.  Demann in ganny fer alors dan Bidze 2014 pou nou fer ankor 3 lakaz.  Nou pe esper Bidze aprouve pou nou gete kimannyer nou pou proceed. Mersi Mr Speaker.

 

MR SPEAKER

Okenn siplemanter Onorab?

 

HON ALDERIC BRISTOL

Mersi Mr Speaker.  Baze lo larepons Minis, Mr Speaker, eski Minis i kapab dir nou si Takamaka i pou feature lo sa lalis 3 ki in fek mansyonnen pou 2014 e si in annan okenn demars ki’n deza ganny fer pou idantifye en morso later dan distrik pou fer sa proze, etan donnen ki sa demann i pe ogmante e zistans Takamaka avek lezot landrwa?  Mersi bokou.

 

MINISTER VINCENT MERITON

Mersi Mr Speaker.  Mr Speaker, nou konsyan ki i annan serten distrik ki later in fini ganny idantifye e ki plan in fini desinen.  E mon konnen osi ki, in annan negosiasyon ant Lotorite Distrik Takamaka avek MLUH, pou idantifye en morso later.  Nou bezwen konnen konbyen ki Minister Finans pou donn nou, sa pti larzan pou lannen prosenn e depandan lo konbyen ki nou gannyen, then nou ava diskite avek bann Lotorite Distrik, pou nou gete lekel priyorite pou nou kapab enplimant sa proze.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Bonzour Minis ek ou delegasyon.  Bonzour tou bann Koleg Onorab e tou bann ki alekout.

Mr Speaker, eski Minis i kapab dir sa Lasanble si zot annan bann kriter e bann Polisi ekri ki kler e ki readily available pou Seselwa konstate, ki a ede anmenn latransparans dan lafason ki bann lakaz Anse Boileau i ganny allocated pou bann vyeyar?  Mersi Mr Speaker.

 

MINISTER VINCENT MERITON

Mersi Mr Speaker.  Wi Mr Speaker.  I annan bann Polisi kler ki egziste, kot i konsern admisyon bann dimoun kot Lakaz bann Dimoun Aze.  Nou ava fer ou ganny en kopi, me selman an prensip, en bezwen i ganny santi par sa fanmiy, par kominote e apre ki tou bann mwayen, tou bann lezot alternativ in ganny konsidere e premye alternativ se swen dan lafanmiy.  Pa i vre?  Nou tou nou trimouse pou nou zanfan.        Nou ankor en laz byen zenn, byen for.  Nou pe travay, nou pe koze dan Parlman.  I annan zanfan nou pe fer grandi.  E ler nou vye, fodre pa ki bannla i get nou koman en bout meb anplis dan lakour akoz avek en trwazyenm az, en gran manman, en gran papa kot lakour, i anmenn en ler lanmour.  En ler lasazes ki nou kapab partaz en kantite fason viv.  So, premye e pli enportan se ki nou tenir nou gran manman, nou gran papa ki alafen lazournen i kapab mor kot nou epi nou anter li.  Nou konnen in viv en lavi dan lantouraz son fanmiy, antoure ek lanmour, avek swen ki nou bezwen.

Now, si nou pa kapab, i annan sirkonstans ki pa permet nou, Gouvernman i antre pou donn serten soutyen, atraver premyerman i annan Home Care ki ozordi, en bon pe nou bann dimoun trwazyenm az pe benefisye avek, atraver sistenm ki nou’n met anplas.  Me apre i annan bann Home dan distrik.  I annan 9 ladan.  E sa i ganny soumet kot Ladministrasyon Distrik, an kolaborasyon avek Lazans avek Lasante, pou nou kapab assess sa bann dimoun.  Pa bliye taler mon’n dir, sa bann dimoun fodre zot kapab fer mazorite zot tripo zot menm, akoz ler nou met zot dan Home, zot bezwen kapab endepandan pou zot kapab fer zot keksoz.

Si en dimoun i depandan, then i annan en lot staz ki ganny konsidere pou anmenn li kot bann Maison, kot i pou ganny plis swen, preski 24 lo 24, ki nou apel sa bann Regional Home ki annan North East Point.

So, Mr Speaker, i annan bann prosedir e mon a fer Onorab gannyen pou son lenformasyon.  Transparans i annan.  Nou fer li dapre bezwen.  Mersi Mr Speaker.

 

MR SPEAKER

Onorab Pool.

 

HON ANDRE POOL

Mr Speaker, mersi.  Mr Speaker, eski Minis i kapab donn nou en commitment pour ki son Minister i vin pli angaze, pou kapab permet bann fanmiy azout en lasanm kot zot pou zot kapab gard zot dimoun aze se zot, sirtou bann konplikasyon ek bann lanpayaz ki bann fanmiy i rankontre avek bann Lotorite konsernen ler zot anvi fer en tel laranzman se zot?  Mersi.

 

MINISTER VINCENT MERITON

Mersi Mr Speaker.  Mr Speaker, mon kapab donn langazman ki Gouvernman, partikilyerman mon Minister avek Minister Later avek Lakaz, pou kontinnyen fasilit bann demars ki ganny fer par bann fanmiy pou kapab azout en lasanm pou en manm fanmiy, enkli bann dimoun aze.  Pa les sa vin en lasirans ki apre mon pou bezwen reponn kestyon me en keksoz ki nou pe dir ki Gouvernman pou kontinnyen donn sa sipor, pou fer sir ki sa i arive.  Mersi Mr Speaker.

 

MR SPEAKER

Kestyon 180, Onorab Barbe.

 

HON NICHOLE BARBE

Mersi Mr Speaker.  Mr Speaker, tou dimoun, bonzour.  Mr Speaker, eski Minis i kapab eksplik sa Lasanble si son Minister i annan plan pou revwar allowance ki bann Brigad Dirzans dan distrik i gannyen?  Mersi Mr Speaker.

 

MINISTER VINCENT MERITON

Mr Speaker, Brigad Dirzans i en groupman volonter lo nivo distrik ki entervenir, sirtou dan letan dezas, oubyen dan lezot kalamite.  Distrik i servi zot sipor dan lezot letan, kot i annan en nesesite.  Manm Onorab i a rapel sa travay egzanpler e ekselan ki bann manm Brigad Dirzans ti fer pandan dezas Zanvye sa lannen.

Mon Minister i kont en kantite lo volonter pou son bann progranm a tou nivo.  San volonter, nou fouti.  Volonter Mr Speaker, pa ganny peye me sepandan, depandan lo mwayen, parfwa nou donn zot en pti incentive dan laform en pti get together, en pti rankont sosyal, en pti piknik lafen lannen, sak lannen.  Sa incentive Mr Speaker, i an rekonesans zot zefor.  En mwayen pou montre nou lapresiasyon pou zot zefor, zot letan, zot lankourazman e zot bonn volonte e pou demann zot pou kontinnyen.

In arive dan lepase kot nou pa’n kapab organiz en pti aktivite lafen lannen pou zot e nou’n fer en pti kontribisyon finansyel lo nivo endividi, pou zot organiz en aktivite zot menm.  An dot mo, nou napa en fixed allowance ki nou donn bann Brigad koman lapey pou zot partisipasyon e kontribisyon ki nou bezwen revwar parey kestyon pe demande.

Kontribisyon ki nou fer pou sa pti rankont lafen lannen i depan byensir lo nou mwayen.  Fodre fer resorti Mr Speaker, ki nou rod serten resours pou aste lekipman pou zot proteksyon.  Legan, boot, gran kouto, bouret e lezot keksoz ki nesesit pou fasilit zot travay.  Nou osi finans training ki nou fer detanzantan, diran lannen e sa lannen nou’n fer bokou training, sirtou apre dezas Felleng an Zanvye, kot nou’n kapab konble bann lack in ki nou’n kapab obzerve pandan letan dezas.

Nou pe al organiz en Seremoni mwan prosen, kot nou pe al donn plis ki 450 manm Brigad bann sertifika ler zot ti partisip dan training sa lannen e osi, pou rekonnet travay ki zot in fer lafen lannen.  Mersi Mr Speaker.

 

MR SPEAKER

Onorab Vidot.  Oh, Onorab Barbe.  Siplemanter.  Onorab Barbe.

 

HON NICHOLE BARBE

Mersi Mr Speaker.  Mr Speaker, anlinny avek larepons Minis, eski Minis i kapab eksplik sa Lasanble si i annan en lasirans ki kouver sa bann Brigad, si anka, i annan problenm pandan ki zot pe fer zot travay e ki laranzman pe ganny fer pou kouver bann Brigad ki travay dan sekter prive?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, sa lannen nou’n depans R437 mil pou bann Brigad e sa i enkli transportasyon, sa bann laranzman repa e osi lasirans.  I enportan ki apard aste bann lekipman ki zot bezwen servi dan zot travay, ki nou annan en serten proteksyon lasirans, anka i annan en keksoz i arive.  E nou pe an diskisyon.  I annan sa Lalwa ki Gouvernman pe al konsidere.  Nou pe gete kimannyer nou kapab fer en laranzman ki bann dimoun ki travay dan sekter prive zot osi zot ganny kouver e ki zot pa perdi.  Zot pa vin worse off ler zot pe donn en koudmen dan bann aktivite ki zot enplike ladan.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Mersi Mr Speaker.  Bonzour e bonzour tou dimoun alekout.  Mr Speaker, eski Minis i kapab dir nou si son Minister, ansanm ek lezot Minister konsernen pe mazin travay lo incentive, kantmenm pa an term larzan, pou zot kapab donn sa bann dimoun koman en rekonpans pou donn sa bann dimoun pou kontinnyen ankouraz zot pou kontinnyen vin volonter e ki mesaz i oule pas ek sa bann dimoun ki ler i ganny touse avek en dezas i kriy lo Brigad e pou li osi an retour, pou vini pou donn en koudmen volonterman?  Mersi Mr Speaker.

 

MINISTER VINCENT MERITON

Mersi Mr Speaker.  Mon a komans ek dernyen bout avan.  Mesaz ki nou ti a kontan pase se ki tou dimoun i donn en koudmen e efektivman, ler danze ti arive, ler dezas ti arive an Zanvye, ti annan en kantite dimoun, apard bann ki dan striktir formel Brigad Dirzans ki ti vin devan, ki ti donn en koudmen.

Nou mesaz se ki bann dimoun ki ganny afekte, zot toultan kapab tap laport Biro Ladministrasyon Distrik e lezot volonter e zot pou ganny en soutyen.  Zot pou ganny asiste.  Me byensir, zot pou ganny zot menm pou kapab montre ki zot osi zot enplike ladan.  Bokou fwa e dayer ti annan bann dimoun ki ti, dapre ki mon ti demann zot vin donn nou en koudmen Anse Aux Pins an Zanvye, zot ti pas kot serten lakaz kot zot ti pe tir labou deor kot serten dimoun anndan ti pe get televizyon, ti pe bwar zot pti labyer, ki bann dimoun pa ti tournen lannmen.

So, mesaz se ki annou ed nou lekor, apre lesyel i ava ed nou.  Mon krwar sanmenm lapros ki nou pe pran vizavi nou bann Brigad.  San travay volonter, san volonter, fouti akoz tou sa ki annan pou fer ozordi dan kominote, dan sosyete, Gouvernman i ariv en pa.  Lot pa i ganny pran par bann lorganizasyon Sosyete Sivil ki an gran mazorite i bann volonter e mon pou pe touy sa lespri volontarya, lemoman ki mon al fer en scheme incentive Onorab.

Nou donn en serten soutyen, serten sipor atraver parey mon’n dir bann training, en pti rankont sosyal.  Atraver bann sertifika.  Atraver bann let e sa i antre dan CV sa dimoun ki demen i pa zis en kestyon ganny larzan me i plis an term en imen e demen i kapab ouver son laport pou li kapab ganny en travay dan son lavi profesyonnel e sosyal.

So, scheme incentive Mr Speaker, i en keksoz ki nou pa pe tro travay lo la.  Nou a plito travay lo en scheme kimannyer pou kapab rekonpans bann dimoun ot ki moneter.  Sa en keksoz ki nou bezwen kontinnyen travay lo la pou nou gete kimannyer nou kapab gard zot avek nou e kontinnyen donn nou sa sipor ler i neseser.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Bonzour Mr Speaker.  Bonzour Minis.  Bonzour tou dimoun ki alekout, enkli bann etidyan ki avek nou.

Mr Speaker, eski Minis i kapab dir nou si i annan en progranm, etan donnen travay ki sa bann Brigad i fer, i high risk. Si i annan en progranm medikal par egzanp vaksinasyon e lezot proteksyon, pou fer sir ki sa bann dimoun ki donn zot letan volonter, zot pe osi ganny proteze kont maladi, in the course of bann travay volonter ki zot fer?  Mersi.

 

MINISTER VINCENT MERITON

Wi Mr Speaker, apard lasirans, i annan en travay kolaborasyon ki nou annan avek lezot Lazans, enkli Minister Lasante, pou asire ki nou bann dimoun i ganny proteze.  E dayer, pou bann dimoun ki ti ganny kontak avek labou ler ti annan dezas an Zanvye, nou ti’n fer sir ki tou bann dimoun, dan manm Brigad e osi lezot volonter, ti bezwen raport kot bann klinik pli pre, baze lo advice ki Minister Lasante ti’n donnen, pou fer sir ki nou protez nou lekor ler nou pe protez lezot.  Mersi Mr Speaker.

 

MR SPEAKER

Kestyon 181.  Dan labsans Onorab De Commarmond se Onorab Meggy Marie ki pou demann sa kestyon.  Onorab.

 

HON MEGGY MARIE

Mersi Mr Speaker.  Bonzour Minis ek ou delegasyon.  Bonzour tou sa ki alekout.  Mr Speaker, kestyon Onorab De Commarmond i lir koumsa.  Eski Minis i kapab enform nou Lasanble kisisa konkretman, ki son Minister in fer pou ed bann prizonnyen ki zot letan in fini dan Prizon e ki napa en komansman dan lavi e ki zot pe rod en travay irzan?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, Servis Probasyon i travay etrwatman avek lezot Lazans e Minister atraver en Komite after-care.  Sa Komite i la pou ed bann ansyen prizonnyen re-entegre dan zot fanmiy, dan travay, dan Kominote e dan lasosyete.  Sa Komite ti ganny formen an 2009 e i annan reprezantasyon sorti Prizon, Departman Lanplwa, Minister Ledikasyon, Lazans Proteksyon Sosyal, Lapolis, Care, Departman Devlopman Kominoter, Konsey Nasyonal Lazenes, SENPA, IDC, MLUH, Sant Mont Royale, Friends of Prison, Reprezantan bann Legliz tel ki Caritas, Legliz Anglikan e Kominote Mizilman.

1 mwan avan ki en kondannen i sorti, bann Zofisye Probasyon i interview li pou fasilit bann demars lanplwa e kot i neseser, pran bann kontak avek fanmiy pou akomodasyon, sirtou si en dimoun napa lakaz.  Sa Zofisye i osi demann sa dimoun pou raport kot Lofis Probasyon, osito ki i sorti Prizon pou kontinnyen avek bann demars kot i konsern travay, avek lasistans finansyer kot i neseser.

Servis Probasyon i sa lyen avek Minister Lanplwa e lezot servis, pou fasilit kontak pou bann ansyen prizonnyen, pou kapab ganny servis e sirtou en lanplwa, pli vit ki posib.  Servis Probasyon i ed ansyen prizonnyen fer zot CV, si sa i ganny demande par sa landrwa travay ki pe ofer lanplwa.

Lotorite Prizon i osi ede e lezot partner fer bann CV. Dan ka kot i neseser, zot ganny refer kot Minister Lanplwa ki osi asiste zot.

Mr Speaker, couselling Bokou couselling i ganny fer par diferan Lazans avek banny ansyen prizonnyen, pou fer zot kapab aksepte realite ki zot in pas ladan, pou kapab fer zot konpran difikilte ki zot kapab gannyen pou ganny en travay, me pli enportan, pou ed zot, pou akonpanny zot pou kapab reentegre dan travay e dan zot fanmiy e repran zot lavi anmen.

Mon oule soulinnyen ki Lotorite Prizon, atraver Prison Welfare Officer, li osi i ede dan preparasyon bann prizonnyen, pou zot sorti.

Bann dimoun ki sorti Prizon i kapab tap laport diferan Lazans ki mon’n nonmen pli boner pou rod led Sosyal, travay e finansyer, ouswa lezot sipor.  Mekanizm i anplas pou ed sa ansyen prizonnyen me i depan lo bann endividi zot menm pou ganny akse avek sa bann servis e pou servi tou sa ki anplas, a zot dispozisyon.

IDC par egzanp i en landrwa ki pare abzorb bann ansyen prizonnyen si zot anvi.        Depi Zanvye 2013 ziska Septanm, Zofisye Probasyon in interview 90 dimoun.  E ladan, follow up pe ganny fer avek 63.  Rezon deryer sa se ki sa servis after care i en servis ki volonter.  Bann ansyen prizonnyen kan zot sorti Prizon, zot kapab detas avek bann servis ki nou ofer e zot kapab sey debrouye zot menm.  An ka zot fer fas avek difikilte, zot kapab toultan vin akse sa servis dan bann diferan pwen kontak, ki partikilyerman i komans avek Servis Probasyon.

Mr Speaker, pa tou prizonnyen ki annan menm bezwen, me nou konsyan ki serten zot i fer fas avek serten difikilte pou ganny lanplwa akoz sa Sertifika Karakter ki ganny donnen par Lapolis.  Ler kondannasyon in arive, Lapolis pa kapab kasyet e se la kot nou travay an etrwat kolaborasyon avek anplwayer, atraver Special Employment Officer, pour ki sa dimoun i ganny en dezyenm sans.  Me i enportan ki sa dimoun i travay onnet ler in ganny sa travay, pou fer sir ki i pa abiz e trair sa konfyans son anplwayer.  Mersi Mr Speaker.

 

MR SPEAKER

Onorab, okenn siplemanter?

 

HON MEGGY MARIE

Mersi Mr Speaker.  Eski Minis i kapab enform sa Lasanble konbyen pe kout Gouvernman pou asiste bann ex-convicts poulemoman, e ki arive letan zot aret ganny sa sipor finansyer, sirtou bann ki annan zanfan pou soutenir?  Mersi Mr Speaker.

 

MINISTER VINCENT MERITON

Mr Speaker, nou’n travay avek Lazans Proteksyon Sosyal e pou 3 mwan, apre ki sa dimoun in sorti Prizon, i kapab ganny ziska en maximum R1500 pou ed li kapab entegre dan travay, antretan ki i ganny en travay aplentan.  Son zanfan i toultan responsabilite en paran, menm msye oubyen en madanm, pou li kapab rod zournen, oubyen rod en travay aplentan, pou pran swen avek son zanfan.  Mersi Mr Speaker.

 

MR SPEAKER

Onorab Maria Payet.

 

HON MARIA PAYET-MARIE

Mersi Mr Speaker.  Mr Speaker, Minis in mansyonn IDC ki pe ede pou donn travay bann prizonnyen ki’n fini zot santans.  Eski Minis i kapab donn nou legzanp lezot Lorganizasyon ki pe ede pou ofer travay nou bann prizonnyen ki’n fini zot santans?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, nou tap laport en kantite gran Lorganizasyon.  IOT en lot legzanp par egzanp ki nou travay avek.  Me mon oule met lanfaz lo ki sa dimoun li osi i fer sa pa, pou zwenn nou pou kapab ferm sa laport ki deryer nou e get devan.

I annan en kantite success story ki nou’n gannyen.  Resaman i annan en zenn onm ki’n sorti dan Prizon, nou’n kapab fer li ganny en travay dan en laferm Sekirite e in kapab ganny en bedsitter osi.

I bezwen annan sa lanvi pou nou kapab fer sa premye pa pou nou re-entegre dan sosyete.  I annan en kantite bann bon zistwar ki nou devret partaze e servis, bann Lazans i ankor la a dispozisyon bann ansyen prizonnyen ki bezwen servi li.  Mersi Mr Speaker.

 

MR SPEAKER

Onorab Charles.

 

HON JEOVANA CHARLES

Mersi Mr Speaker.  Bonzour Mr Speaker.  Bonzour Minis.  Bonzour tou dimoun alekout.  Baze lo repons Minis, eski Minis i kapab dir sa Lasanble si son Minister, an kolaborasyon avek Minister Lanplwa i kapab konsider met anplas en proze spesyal pou bann madanm ki sorti dan Prizon, ki pe fer fas avek bokou difikilte pou kapab re-entegre zot e pou zot kapab osi pran swen avek zot zanfan?  Mersi Mr Speaker.

 

MINISTER VINCENT MERITON

Mersi Mr Speaker.  Onorab mersi pou ou kestyon.  Mon krwar semenn pase nou fek sorti Genève kot nou’n al defann sa kestyon Konvansyon lo eliminasyon tou bann diskriminasyon kont madanm.  E mon vwar ozordi, parmi bann etidyan Liniversite Sesel, lamazorite i bann fiy.  E Onorab ou’n poz kestyon lo sor bann madanm ki sorti Prizon.

Bann madanm fodre toultan nou travay byen avek zot.  Mon repete ki mon’n dir yer swar.  Bann madanm fodre nou valorize, nou berse.  Ki madanm pa tambour.  Si in arive nou’n fer en fo pa, sosyete i la pou donn en sipor e en koudmen pou nou kapab debout lo nou lipye.

Wi.  Ansanm ek Minister Lanplwa, nou ava get tou bann posibilite pou nou kapab met bann progranm ki pou ed sa zenn fiy, zenn manman kapab repran son rol koman manman e repran son rol ki i annan dan sosyete e rann li dignite ki i bezwen.  Me selman fodre i anvi fer.  Mon kapab anmenn tou fasilite devan li me si i pa anvi, mon pou ganny difikilte.  Menm parey tou sa bann servis ki nou met alaporte nou bann ansyen prizonnyen, fodre zot anvi servi.  Fodre zot anvi sorti dan sa demagozi ki zot in antre ladan e bouze dan zot lavi.

So, Onorab pou dir reponn ou kestyon.  Wi.  Nou ava travay avek Minister Lanplwa pou gete kimannyer nou kapab adres sa size.  Mersi.

 

MR SPEAKER

Minis i vreman obzervan.  Sa pti moman in vwar lamazorite i bann fiy.  Mon pa ti’n realize ki lamazorite sa bann etidyan i fiy.  Onorab Fideria.

 

HON EMMANUEL FIDERIA

Mersi Mr Speaker.  Bonzour tou dimoun alekout.  Mr Speaker, an vi larepons Minis, eski Minis i kapab enform sa Lasanble konbyen ki bann Lazans in nobou pozisyonn bann ansyen kondannen dan lanplwa, dan kad pou fer zot redebout lo zot lipye?  Mersi.

 

MINISTER VINCENT MERITON

Mersi Mr Speaker.  Mr Speaker, lenformasyon ki mon’n gannyen se ki depi komansman sa lannen, 24 in ganny plase.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble si zot annan en progranm kler, en progranm swivi pou bann prizonnyen ki’n fini zot santans dan Prizon, avek bi pou ed zot e si zot annan statistik e ki demontre konbyen prizonnyen ki’n fini dan Prizon pandan sa dernyen 2an e ki dan lanplwa, oubyen konbyen sa bann prizonnyen ki pa dan lanplwa e ki ankor bezwen lasistans son Minister?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, premye keksoz.  Lemoman ki en dimoun i fini son santans, i lib.  Servis ki nou ofer i en servis volonter e i lib pou li swazir servi sa servis oubyen debrouye lo limenm.  Byensir, nou ti ava anvi ki i debrouye lo limenm, apre ki in pas atraver nou, atraver bann servis ki nou’n ofer ler i ti dan Prizon, avan i sorti.

Mon napa statistik pou sa dernyen 2an me nou ava rod statistik, nou ava anvoy kot ou.  Bann Zofisye i la pe pran not pou nou kapab fer sir nou donn ou sa lenformasyon.  Me nou kontinnyen travay avek sa dimoun, toultan ki li i vin devan e i aksepte pou servi nou servis.  Mersi Mr Speaker.

 

MR SPEAKER

Kestyon 182, Onorab Arnephy.

 

HON BERNARD ARNEPHY

Mersi Mr Speaker.  Bonzour tou dimoun.  Mr Speaker, mon kestyon se pou demann Minis si Gouvernman, atraver Minister responsab pou Devlopman Sosyal, pe mazin revwar sa Bidze ki bann Homes for the Elderly i gannyen, pou kapab donn en pli bon servis e konfor bann rezidan?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, an 2010, avek reform ekonomik, Ladministrasyon bann lakaz ti ganny transfer avek Fon Sekirite Sosyal.  Avek restriktirasyon sa Fon e kreasyon Lazans Proteksyon Sosyal, zesyon e responsabilite pou sa bann lakaz ti pas avek Lazans.

Lazans i zer Ladministrasyon bann lakaz, i resevwar en Bidze avek Minister Finans pou saler bann Ladministrater, pey bann pti maintenance e pou antretenir landrwa kot bann lakaz i sitie.  Bidze i osi ganny donnen pou kouver parsyelman, dan serten ka, kot larzan ki’n ganny anmase pou pey bann bill pa ase, then, sa Bidze i ganny servi pou konplemant sa.

Lamazorite larzan ki ganny servi pou peyman bill se bann larzan ki ganny anmase avek bann rezidan zot menm.  En rezidan ki pa servi fasilite kwi manze dan lakwizin, lakwizin santral, i pey R400.  En rezidan ki servi fasilite kwi manze dan lakwizin santral i pey R1000.  Sa lannen Mr Speaker, Lazans in servi larzan ki ti akimile dan lepase, pou li fer serten pti proze amelyorasyon lanvironnman fasilite e sekirite kot detrwa bann lakaz.  Travay in ganny antreprann lo bann lakaz La Digue, Praslin e Plaisance kot bann pano soler in ganny enstale pou fourni delo so.

I dan plan Lazans dan sa bann mwan ki pe vini pou fer serten renovasyon lo Lakaz Anse Royale.  Lazans pe osi enkorpor dan Bidze 2014, demann pou plis larzan pou asiste avek peyman bill, pou revwar saler bann Administrater e osi kapab fer plis bann pti renovasyon e amelyorasyon lo batiman e zalantour bann lakaz.  Mersi Mr Speaker.

 

MR SPEAKER

Onorab Arnephy.  Okenn siplemanter?

 

HON BERNARD ARNEPHY

Mersi Mr Speaker.  Mr Speaker, an vi ki bann Homes i anploy zis en Administrater e i annan 2 Carer ki pe travay ek bann Homes, eski Minis pe mazin osi vwar lakantite travayer ki asiste sa bann rezidan pou anretour, donn zot sa pli bon swen e pli bon konfor, parey nou pe koz lo la?  Mersi.

 

MINISTER VINCENT MERITON

Mersi Mr Sepaker.  Mr Speaker, mon ti a kontan felisit Kominote Anse Boileau pou vin avek en tel linisyativ parey, Friends of the Home.  Se zot ki ranpli sa vid, oubyen se zot ki pran kot bann Carer, zot travay fini, pou egey sa bann dimoun ki kot Home. I annan serten bann rezidan kot Home, ki resevwar vizit sorti kot manm zot fanmiy, i annan, non.  E Friends of the Home i ede en kantite, pou donn sa zwa de viv nou bann rezidan kot Home e nou pe demande ki dan lezot distrik e an zeneral, bann tel linisyativ i ganny miltipliye.  Progranm ladopsyon i kapab ganny ranforsi kot bann Klib Trwazyenm Az zot menm zot kapab vin devan e gete kimannyer nou kapab fer bann aktivite pou bann dimoun aze.

Dimans mon ti fyer ler mon sorti Val D’en Dor kot i annan gou manze kreol.  Nou ti al Dezer.  Dezer Distrik Baie Lazare, kot en kantite trwazyenm Az ti’n reinir zot menm.  Zot pe partaz en pti repa.  Se sa bann kalite linisyativ ki donn gou viv.  Zot pe kas dibwa.  Zot pe rakont bann zistwar lontan.  Kas dibwa konmsi pe crack bann jokes mon pe dir en.  Konmsi, nou ti a kontan ki sa osi i pran plas kot bann Homes, ki zot bann vye zanmi i anmenn en aktivite kot zot e mon krwar pou zot, 1erdtan, 2erdtan pase avek zot bann per, zot bann zanmi lontan i en keksoz ki vreman i vo lor.

So, Onorab mersi pou sa linisyativ ki ou pe siporte dan distrik Anse Boileau.  Mon asire ou konnen ki Gouvernman, sa pti larzan ki i gannyen i bezwen balans li byen e ki nou donn en serten minimum servis ki apre kominote i kapab pran limenm.  Mersi Mr Speaker.

 

MR SPEAKER

Kestyon 183, Onorab Fideria.

 

HON EMMANUEL FIDERIA

Mersi Mr Speaker.  Mr Speaker, eski Minis responsab pou Zafer Sosyal, Devlopman Kominoter ek Sport i kapab eksplik sa Lasanble, ki son Minister i annan lentansyon fer ek bann sitwayen ki kontinnyen pa oule pey kontribisyon maintenance zot zanfan, apre ki Tribinal in fini donn zizman?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, Tribinal Lafanmiy i sa Lakour ki anba Lalwa i fer Lord konsernan maintenance.  Dan ka kot dimoun pa respekte sa Lord, se Tribinal ki pran aksyon apropriye.  Sa i kapab dan form en Lord pou dediksyon direk lo son saler kan sa dimoun i anploye e Tribinal i osi kapab fer sorti warant pou anvoy sa dimoun Prizon.

Parey avek lezot Lakour, Minister pa kapab enterfer dan direksyon e dan desizyon ki Tribinal i pran.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Mr Speaker, an vi larepons Minis, eski Minis i kapab enform sa Lasanble si Tribinal in fer en letid lo en fason pli inovatif apard Prizon, ki fer bann sitwayen ki pa pey zot maintenance, pou zot partisip dan en Scheme, dan kad pou zot soutenir zot zanfan?  Mersi.

 

MINISTER VINCENT MERITON

Mersi Mr Speaker.  Mr Speaker, sa lannen Tribinal pou fet son kenzyenm lanniverser.  I annan en seri aktivite ki’n ganny progranmen pou al komans enplimante boner mwan prosen e ladan i en evalyasyon lo servis ki in donnen e kimannyer in fer en diferans dan lavi bann dimoun ki vin servi son servis.

Fer en lot Scheme, i pou en lot depans ankor lo Gouvernman.  En dimoun an premye plas, i annan en responsabilite vizavi son zanfan.  En zanfan i pa aparet koumsa parey nou konnen.  I annan serten responsabilite ki ale avek sa e senpleman ki nou pe demande ki sak zonm, sak fanm i asim son responsabilite vizavi son zanfan e zwe son rol ki i bezwen zwe.

Si i refize fer li, la kot Lalwa i antre, kot Tribinal i egzers pouvwar ki in ganny donnen anba Lalwa.  E en dimoun dizon i ganny demande pou pey en maintenance R500 par mwan.  Ou refize fer sa, Tribinal i apel ou.  I annan bann sistenm ki met anplas pou donn ou serten warning e si ou refize, then Tribinal i anvoy ou Prizon.  Nou lobzektiv se pa anvoy dimoun Prizon me fer sir ki sa dimoun i desarz son responsabilite.

Si Gard in aret ou apre ki en warant in sorti e ou dir ou kapab peye la.  Dizon ou ti drwa 3 mwan, ou peye, ou fini, ou lib.  Si Gard in aret ou, ou’n monte.  Dan bokou ka nou trouve, i annan serten dimoun ki vin pey lo ou depan, lo ou behalf, ou lib ou sorti.  So, nou lobzektif se fer sir ki sa bann dimoun i desarz zot responsabilite e kontinnyen viv zot lavi.  Mersi Mr Speaker.

 

MR SPEAKER

Onorab Sultane Jacqueline.

 

HON SULTANE JACQUELINE

Mersi Mr Speaker.  Mr Speaker, dapre enn, de dimoun ki mon’n koz avek, i donn mwan lenpresyon ki i annan en retar letan larzan in fini depoze pou zot ganny zot larzan.  Eski Minis i kapab enform sa Lasanble ki plan son Minister i annan pou amelyor sa sitiasyon?  Mersi Mr Speaker.

 

MINISTER VINCENT MERITON

Mr Speaker, si i annan retar, nou ava adres sa imedyatman.  I pa nou lentansyon fer lentere, ganny lentere lo larzan ki en dimoun in peye pou son zanfan.  Nou ava gete kimannyer nou kapab perfeksyonn nou sistenm pou donn zot, zot pti larzan.  Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Mr Speaker, eski Minis i kapab dir sa Lasanble, prenan kont ki in koz lo Tribinal Lafanmiy, ki son Minister pe fer pou beef up sa Tribinal, pou amelyor son servis an zeneral e osi dan bann Lalwa osi ki i ganny aplike, pou fer li en pti pe pli azour ek realite ozordi?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, poulemoman nou annan nou en Chairman Tribinal, 2 Vis Chairman, apre 3 manm permanan avek 3 manm part time. Nou santi.  Nou asiz 3 fwa par semenn.  Nou santi i annan en nesesite pou nou kapab vin pli permanan.  I annan diskisyon ki pe pran plas dan Gouvernman pou nou kapab annan Tribinal koman en Lakour permanan parey lezot Lakour, pou nou kapab adres plis bann size akoz i annan en bon pe ki vin devan.  Dimoun i dir ki nou pran en lapros kase roule.

Bann case ki straight forward parey Angle i dir, nou pa pran en kantite letan, me nou santi parler ki bann dimoun i oule ganny sans koze ler zot vin devan e nou mazinen ki ler nou’n ganny nou en sistenm pli permanan, i a pli fasil pou nou kapab separ bann ki pli straight forward, ki pli fasil, nou deal avek e pran bann ki pli afon e anmenmtan, revwar bann Lalwa ki fer sir ki i permet nou kapab donn en servis pli adekwat.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, eski Minis i kapab dir nou si i annan statistics lo konbyen mer ou per-d-fanmiy ki’n ganny mete dan Prizon akoz zot pa’n pey maintenance pandan sa dernyen 2an e konbyen sa i pe kout Gouvernman pou take care of sa bann dimoun letan zot dan Prizon?  Mersi Mr Speaker.

 

MINISTER VINCENT MERITON

Mersi Mr Speaker.  Mr Speaker, depi Zanvye mon annan statistik.  27 in monte.  Sa ki mon annan la.  E dan en total 132, depi Zanvye, kot warant in sorti, i annan 45 ki’n peye, apre i annan 60 ki pending, ki Lotorite pe rod zot pou kapab met zot devan Tribinal pou zot kapab reponn pou zot responsabilite.  Mersi Mr Speaker.

MR SPEAKER

Kestyon 184, Onorab Murielle Marie.

 

HON MURIELLE MARIE

Mersi Mr Speaker.  Bonzour Mr Speaker.  Bonzour a tous.  Mr Speaker, an vi ki bann zabitan Au Cap napa okenn fasilite pou detann, spesyalman bann zenn, eski Minis i kapab enform sa Lasanble, si i dan plan son Minister pou konstrir en Sant Kominoter dan distrik?  Mersi.

 

MR SPEAKER

Request Minister.

MINISTER VINCENT MERITON

Wi Mr Speaker, i plan Gouvernman pou konstrir Sant Kominoter dan sak distrik kot napa.  Au Cap i enn parmi sa distrik.  Sant Kominoter i ganny fer, i ganny batir dapre Bidze ki nou gannyen.  Depi ki nouvo progranm konstriksyon Sant Kominoter ti komanse an 2006, nou’n fer Sant Les Mamelles, Roche Caiman, Anse Etoile, Glacis avek Takamaka.  Au Cap ti lo lalis pou li ganny en Sant, me reform ekonomik pa’n fer li posib pou Gouvernman kontinnyen avek sa progranm.  Depi ki nouvo Sant Glacis ti terminen an 2011, nou pa’n ganny larzan dan Bidze pou kontinny konstriksyon.

Au Cap i en priyorite lo nou lalis e i pou parmi bann premye pou ganny fer letan ki nou rekomans ganny finansman anba sa vot.  Antretan, nou pe fer serten renovasyon, serten reparasyon lo batiman vye Lakres, obor Lasapel Au Cap, pou fer li vin en Mini Hall kot ou a kapab fer serten aktivite.  Mersi Mr Speaker.

 

MR SPEAKER

Onorab, okenn siplemanter?

 

HON MURIELLE MARIE

Mersi Mr Speaker.  Baze lo repons Minis Mr Speaker, eski Minis i kapab, an vi ki nou dan lannen Renesans Moral, eski Minis i kapab enform sa Lasanble si son Minister in fer en letid aprofondi pou vwar ki lenpakt ki pou servi sa Hall ansyen Lakres Pointe Aux Sel i kapab anmennen lo lakominote, an vi ki i baze dan en landrwa rezidansyel, osi baze avek en Lasapel?  Mersi.

 

MINISTER VINCENT MERITON

Mersi Mr Speaker.  Mr Speaker, nou dan staz enplimantasyon progranm Renesans Sosyal.  I larz.  I annan son konponan ekonomik, travay, sosyal, spirityel, moral.  Si nou dir li progranm Renesans Moral, dimoun pou krwar ki zis en bann dimoun ki pa fer pese, ki annan drwa koze.  Konmsi i Renesans Sosyal e nou tou kot nou ganny demande pou reget sa ki nou fer pli byen e fer li byen.

Kot fanmiy i reste santral dan nou sosyete e kot sitwayen i reste partisipan dan devlopman pei, i pa zis benefisye e kot nou promouvwar bann valer pozitiv.  Kot nou bann lakour, kot nou bann kominote i ganny prezerve.  Kot nou pa antre dan bann aktivite a risk pou nou lasante e kot nou viv en standar lavi pli o.  I progranm Renesans Sosyal.

Prezan Onorab, pou ou kestyon.  Nou konnen i dan en vilaz, me selman still, malgre i dan en vilaz, nou bezwen en Mini Hall pou nou kapab permet ki dimoun i egeye.  Pa vedir ki ler en keksoz i dan en vilaz, nou pa kapab anmize ansanm.  Akoz Langleter avek Lanmerik, Laswis i fer, ki nou, nou pa kapab fer.  Ki nou, nou ete nou?  Ou ek mwan?  So, i annan en fason ki nou bezwen kapab viv dan lankadreman, respe.  Ki sa bann dimoun zot kapab zouir zot trankilite, me ki osi nou bann zenn zot kapab vini anmize a en serten ler.  Pa tou aktivite ki fer dan bann Mini Hall ek bann Sant Kominoter ki annan boum, boum ek bann gro welele.  Pa i vre?

Nou servi li pou bann rankont, pou bann diskisyon, pou bann koze, pou bann lenformasyon ki nou pase.  La tou dernyenman, i annan bann diskisyon, bann konsiltasyon lo Land Use Plan sak distrik.  I permet.  So, en tel Hall ti ava ede.  So, Onorab dan sa lepri e nou, nou bezwen zere pou fer sir ki toulede kote i ganny sans viv byen avek kanmarad.  Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Mr Speaker, eski Minis i kapab dir ek sa Lasanble, vi ki lendikasyon lekonomi pli pozitiv ozordi dan pei, kan ki Gouvernman pe antreprann rekomans konstriksyon bann Sant Kominoter, espesyalman pou bann distrik ki vreman napa okenn Sant?  Mersi.

 

MR SPEAKER

Anyway.  Ok.  Me sa nou a get, gete.  I depan Minister…

 

MINISTER VINCENT MERITON

Mersi Mr Speaker.  Mr Speaker, Minister Finans pe prepar li pou Bidze 2014 e i pe gete kimannyer prognos pou ete e kimannyer i kapab, kot mwayen i permet, nou kapab larg serten Capital Projects lo nivo swa nasyonal oubyen lo nivo distrik, me nou reste angaze pou kapab met bann fasilite a dispozisyon bann kominote, ofir e anmezir ki bann mwayen i permet nou.         Gouvernman, mon koleg Minis Finans a vin isi dan Lasanble, a ganny sans donn en analiz lannen 2013 e en forecast 2014, baze lo nou performans ekonomik.  Baze lo bann kouran mondyal enternasyal ki annan, pou gete kimannyer nou kapab sitie nou pou nou kapab tir plis dan sa ki lemonn pe ofer e gete kimannyer nou kapab fer sa, dan lentere nou pep, atraver travay, atraver bann servis e osi atraver bann fasilite kominoter ki nou mete.

Me anmezir ki nou pe koz bann fasilite kominoter ki nou mete, avek sak fasilite ki nou mete, i annan en serten responsabilite ki vin avek.  Pa i vre?  Zot pe lager pou fer sir ki Gouvernman i met en fasilite dan distrik.  Donn mwan en koudmen zot, pou nou kapab osi lager ek kominote e servi sa byen.  Ki byensir nou bezwen en pti larzan pou fer mentnans.  Me ki nou osi nou annan sa larme volonter ki nou’n koz lo la taler la, ki pou ed nou kapab fer sir i servi li byen akoz sankrwa, sa pti larzan ki mon pou bezwen pou fer en Sant Kominoter Au Cap, Mont Buxton avek lezot distrik ki napa, mon pou bezwen pe kontinnyen retourn dan menm distrik, repar keksoz ki’n kase.  Zot avek mwan?

So, byen koze i fer byen konpran.  Nou pe sey gete kimannyer alavenir pou nou kapab ko-egziste byen pour ki nou byen servi larzan e nou konnen nou napa bokou.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Mersi Mr Speaker.  Mr Speaker, an vi avek ki Minis pe dir, eski Minis i kapab dir nou si zot pe konsider bann nouvo plan, en pti pe fason pli smart pou fer bann Sant Kominoter, dan en fason ki vin pli ekonomikman viab?  Mersi bokou Mr Speaker.

MR SPEAKER

Request Minister.

MINISTER VINCENT MERITON

Mersi Mr Speaker.  Mr Speaker, mon dakor avek Onorab.  Wi.  Nou bezwen fer li pli smart.  Fer li kot nou lalimyer i bann lalimyer LED. Kot nou kapab met aircon.  Kot nou kapab fer li vin multi-purpose. Nou konnen konmela, ou servi pou bann Internet Café.  Kot bann dimoun i kapab vini, fer en pti Library. Kot bann Trwazyenm Az i kapab vini, mentenir zot bann meeting, zot bann rankont.  Kot nou kapab fer maryaz dan gran lasal.  Kot nou kapab fer bann rankont dan gran lasal.

E ozordi, en Sant Kominoter, apard ki en resours kot dimoun i kapab vini e servi, sosyalize, pas lenformasyon, i osi en fason kimannyer distrik i kapab ganny en larzan pou kapab adres sa kestyon mentnans e osi soutenir bann progranm ki annan.  E nou konnen nou bezwen en kantite progranm dan kominote, dan distrik.  E sa i en mwayen finansman.

So, Onorab mersi.  Nou pou pran sa konsiderasyon.

 

MR SPEAKER

Onorab Charles.

 

HON JEOVANA CHARLES

Mersi Mr Speaker.  Baze lo repons Minis alor, eski Minis i kapab dir sa Lasanble si son Minister pou re-get fonksyonnman tou sa bann Sant Kominoter dan distrik ozordi?

 

MINISTER VINCENT MERITON

Wi Mr Speaker.  Ansanm avek Lotorite Distrik, nou ava diskit, get fonksyonnman e bann rates ki nou etablir pou dimoun servi.  Lekel ki servi e ki bann dimoun ki nou’n met lo black list pa ganny sans servi ankor akoz serten dimoun ou lwe li Lasal, demen ou toilet in kase.  I annan dimoun ou lwe li lasal, ou vwazen i dir pa kapab dormi akoz dimoun pe tro kriye.  Mon krwar nou bezwen etablir standar ki fer sir ki nou tou nou pe koz en sel langaz.  Wi Onorab.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, mon kestyon i al dan menm lalinny avek Onorab Charles.  Eski Minis i kapab konsider ouver en dyalog avek bann diferan groupman ki annan dan distrik e ki servi sa fasilite, pour ki otan donnen ki zot annan the right to association e fer zot bann aktivite, zot bezwen respekte osi drwa bann endividi ki reste otour bann Sant Kominoter, sirtou dan weekend kot i annan serten endividi ki bezwen poze e Dimans bomaten eksetera, ki nou annan en dyalog avek sa bann groupman pour ki zot konpran osi e respekte bann kominote?  Mersi.

 

MINISTER VINCENT MERITON

Mr Speaker, mon krwar anmezir kestyon pe fini, diskisyon i vin pli enteresan.  Lala bann diskisyon afon, bann diskisyon de kalite ki si oule anmenn nou dan kominote pou nou kapab gete kimannyer nou viv pli byen.  Nou kapab devlop sa laspe imen.

Nou annan en Sant Kominoter, pran enn Bel Ombre par egzanp.  I dan milye sant, dan en kominote e nou ganny ase difikilte avek bann dimoun ki servi li akoz toultan i annan serten difikilte.  Ou bezwen apel Gard, vwazen, dimoun i vin deor e mon kapab konpran sor sa bann dimoun ki pe viv toultour.

E nou’n travay avek Lotorite Distrik pou koz avek bann dimoun ki servi sa Sant Kominoter, pour ki i respekte drwa sa bann dimoun annan zot trankilite.  Nou konpran dan Vandredi, dan Sanmdi nou kapab ale ziska en serten ler.  Me menm si nou ale ziska en serten ler, nou bezwen kapab tenir nivo lanmizik akoz ziska ler ki nou PS i al lager kot Finans pou ganny larzan pou nou anboufte tou nou Sant Kominoter, fer li vin sound proof parey disco, nou pou bezwen kapab pe manage sa, pe zer sa akoz vre i en lanfer pou bann dimoun ki viv obor en Sant Kominoter.

Lo en kote ou pe donn en fasilite distrik, lo lot kote, ou pe kree en sitiasyon ki vin enposib pou ou bann dimoun ki viv.  Nou pa anvi annan sa tel sitiasyon.  Se pour sa rezon mon dakor avek ou.  I annan en nesesite ki nou koz avek bann groupman, avek bann Lasosiasyon, bann diferan endividi ki vin servi nou Sant pou servi li byen.  Mersi Onorab.

 

MR SPEAKER

Onorab Samson, kestyon 185.

 

HON DEREK SAMSON

Mersi Mr Speaker.  bonzour tou dimoun.  Eski Minis responsab pour Spor i kapab donn zabitan Anse Royale en leksplikasyon lo plan son Minister pou devlop bann fasilite ki trouve Anse Royale, avek bi pou transform li koman en Sant Rezyonnal pou Spor?  Mersi.

 

MINISTER VINCENT MERITON

Mersi Mr Speaker.  Mr Speaker, dernyen fwa ki mon ti koz lo fasilite Sportiv Anse Royale ti an 2011.  Depi sa, Olymp Africa House in fini konplete e i pe ganny servi toulezour.  I osi annan en gym prive o nivo avek lekipman nef.  Sa gym fek ouver avek 240 manm.  200 manm regilye ki’n ouver e ki pe fonksyonnen tre byen.

Mr Speaker, avek reorganizasyon NSC, nou’n ganny nou en nouvo CEO. Enn bann keksoz ki nou pe me lanfaz lo la, se pou devlop spor o nivo rezyon.  Premye rezyon ki NSC i pe konsantre lo la sa lannen menm, se rezyon sid.  Savedir Sant Rezyonnal Anse Royale.  En Zofisye Spor Rezyonnal in fini ganny idantifye e byento i pou ganny anploye.  Sa dimoun pou baze a plen tan Anse Royale menm.          CEO pou konsilte avek Ladministrasyon Distrik, Liniversite Sesel e lezot partener, pou vwar ansanm kimannyer pou devlop sa landrwa, pou fer li parey ou’n dir Onorab, vin en vre Sant Rezyonnal Sportif.  Travay ki annan pou fer i ava depan lo bann diskisyon ki zot pou gannyen, me selman sa ki nou konnen la, baze lo bann fasilite ki deza egziste, i annan nou 2 kort tennis ki nou bezwen refer, met sa track atletik dan bon leta, aranz lalimyer ki kler laplenn foutbol e amelyor nou kort volleyball avek basketball.

Mr Speaker, letan ki NSC, ansanm avek bann lezot partner pe met zefor ansanm pou nou devlop sa Konpleks, i enportan ki sa fasilite i ganny byen servi.  Mon demann sportif e piblik an zeneral pou respekte nou bann fasilite e pou fer sir ki nou servi li byen.  Mersi Mr Speaker.

 

MR SPEAKER

Okenn siplemanter Onorab?

 

HON DEREK SAMSON

Wi Mr Speaker.  Mr Speaker, mon ti a kontan demann Minis ki progranm son Minister vizavi mentenans fasilite sport dan distrik Anse Royale.  Eski zot annan en progranm e pou osi demann Minis si sekirizasyon bann fasilite sportif i form parti progranm transform Anse Royale koman en Sant Sportif?  Mersi.

 

MINISTER VINCENT MERITON

Mersi Mr Speaker.  Mr Speaker, wi.  Nou santi i annan en nesesite ki nou amelyor nou progranm mentenans lo bann fasilite sportif.  Nou annan nou en pti lakonpannyen ki travay avek nou pou kapab donn sa servis e nou’n fer en demann anplis avek Finans pou lannen prosenn pou nou kapab fer sir ki nou bann fasilite i ganny byen mentenir.

Anmenmtan, kot i konsern Konpleks Sportif Anse Royale, nou realize ki serten dimoun dan weekend, oubyen apre ler, oubyen pandan ler travay menm i vin lo track Atletik.  Zot dir mwan ki dimoun i vin montre dray e lezot dimoun i vin la.  Nou pe fer laranzman pou blok sa 2 akse pou nou kapab fer sir ki sa track i ganny servi par zenn e zanfan lekol e non pa pou bann dimoun ki pe montre dray.

I annan lakin pou nou fer e nou pe travay avek Konsey Nasyonal pou Spor pou nou kapab atenn sa nivo.  Mersi Mr Speaker.

 

MR SPEAKER

Bon, nou’n ariv alafen Question Time.  Mon ava remersye Minis ek son delegasyon e nou ava osi ekskiz zot parmi nou.

 

MR SPEAKER

Bon, nou lot item lo Order Paper se en Statement par Minis St Ange lo Polisi Kiltirel Tourizm, Cultural Tourism Policies.  Nou ava fer leneseser pou fer Mr St Ange antre.  Bon, nou annan Minis St Ange parmi nou.  Nou ava envit li pou fer son Statement.  Minister.

 

MINISTER ALAIN ST ANGE

Mersi Mr Speaker.  Mr Speaker, Manm Lasanble Nasyonal, bonzour.  Sesel in toultan promouvwar nou Lendistri Touris atraver lanmer, atraver la plage, atraver nou soley.  Koman en pep e koman en pei.  E sa i enkli tou nou bann reprezantan promosyon ki fer promosyon nou pei dan le 4 kwen lemonn.

Nou’n toultan konnen ki Sesel i annan probableman, le meyer pou en vakans balneer e sa i akoz nou soley i reste en atou ki la toudilon lannen.  Nou lanmer ble turquoise ki kler e ki prop e nou zoli la plage ki blan e ki prop touzour.  Sa bann atou nou pei, nou servi e nou’n reservi dan nou bann promosyon pou nou Lendistri Touris.  Sekter prive in servi.  Bord Touris Sesel in osi servi sa bann menm pwen for.  In marse Mr Speaker, wi.  Me pei in ozordi aksepte ki sa atou in komans ganny depase.

Mr Speaker, mon ti a kontan sitie bann Manm nou Lasanble lo sitiasyon ki nou pei pe fer fas avek ozordi.  Konpetisyon dan lemonn Lendistri Touris in vin dir e in vin entans.  Tou zil dan le 4 kwen lemonn ki annan en lans, pe fer menm marketing.  E sa set en promosyon baze lo soley, lo la plage e lo lanmer.

I annan bokou pei ki annan plis mwayen ki kanmarad pou met paz ek paz piblisite, pou met alavan sa bann atou natirel ki zot osi zot annan e sa bann menm atou ki nou, nou osi pe met alavan koman nou atou ki nou, nou annan isi.  Me sa konpetisyon in anmenn refleksyon e pou nou pei reste relevan dan lendistri touris dan lemonn, nou’n vwar nesesite bouze e vin bokou plis inovatif.  Se sa kot Sesel in for e ki son plan daksyon in marse e pe kontinnyen marse.  Sesel in relans son lendistri touris depi sa dernyen 4an.  Writing on the wall ti’n kler.  Bouze e met dan pannyen marketing plis, ki zis sa lanmer, sa la plage ek soley ki nou annan.  Sa nesesite ti’n vin plis ki evidan.

Sesel ti’n alor pran desizyon pou anmenn kiltir e pep Seselwa koman bann atou for ki nou pei i annan e pou alor reoriyant nou baz marketing pou reflekte sa.  Sa ti pe arive, menm letan ki bann pei emeter primer ti pe antre dan difikilte ekonomik.  Sa bann pei ki provide Sesel avek mazorite nou viziter.

Prezidan Larepiblik Mr James Michel, ki ti pe tenir portfey touris dan Gouvernman Sesel, ti pran desizyon pou anmenn kiltir e an fezan sa, popilasyon Seselwa, koman baz marketing nou pei.  En desizyon ki’n anmenn rezilta pozitif pou nou pei.  Sa desizyon ti vin avek nesesite pou anmenn Sesel dan lemonn levennman.  Zwe kiltir, enplik pep Seselwa, bann artis, creative and performing artist e reouver laport pou fer Sesel vin pli vizib dan lemonn touris e alor relevan koman en destinasyon touristik.

Desizyon Prezidan Larepiblik ti ganny konsolide avek desizyon pou kree en Minister ki anmas touris e kiltir ansanm e lans en nouvo lapros pou touris Seselwa, apele The Seychelles Brand of Tourism, ki pe e ki pou kontinnyen ankouraz Seselwa pou zwenn sa lendistri e ed nou pei claim back son lendistri touris.  Prensip ti’n ganny adopte, ki letan ti’n arive pou nou aksepte ki touris ti pe rod plis ki zis lanmer, laplaz ek soley.  I ti’n ganny aksepte ki touris ti pe rod apresye kiltir nou zil e sa diversite ki egziste dan sa pep ki apel pep kreol Seselwa.

Sesel ti pe dir klerman dan sa relaunch son lendistri touris, ki i krwar ki levennman i en moter ki kapab ede anmenn plis viziter dan nou pei, akoz se levennman ki ankor enteres lapres pou vin isi pou dekouver nou e an fezan sa, dir lemonn an antye ki nou la, sa zoli pti pei ki pe viv an armoni avek lanatir e ki pe demontre en zwa de viv ki kler e ki entans.  Me pa zis nou isi Sesel ki krwar sa.

En letid par UK Music, en Lorganizasyon vizit Britain, in demontre resaman ki lentere kler otour bann aksyon ki tonm dan kategori levennman, i the way forward.  Pandan Lete, Premye Minis Grann Bretanny Mr David Cameron, son Creative Minister Mr Ed Vaizey e son Shadow Minis responsab pou Kiltir, Mr Dan Jarvis, ti fer referans lo potansyel bann levennman Langleter, pou atrakte viziter sorti aletranze.  Minis Ed Vaizey, MP ti dir.  E la Mr Speaker, avek ou permisyon, mon quote li;-

“Music is without question, an essential element of Britain’s tourism appeal and it is this ability of the UK’s Music Industry, to attract tourists from near and far.  To our shores that is celebrated in this report.  The huge financial contributions to the UK economy, by the millions of music tourist to the UK annually, makes it very clear that when combined, the music and Tourism Industries are powerful drivers for growth”.

I dan sa menm konteks e dan sa menm loptik ki nou pei in ralye nou zefor pou pran lavantaz sa loportinite e asire ki sa nouvo lespri marketing, anba prensip cultural tourism, i pran son plas e zwe son plas, pou ede vizavi nou lekonomi.  Sesel, son karakteristik ki baze lo son kiltir, son pep e son levolisyon son kiltir, i reste inik an limenm.  En zistwar ki lemonn i kapab dekouver, atraver bann akt promosyonnel, pou ankouraz lentere pou viziter potansyel vin dekouver nou pei e vin apresye nou zil.

Mr Speaker, Sesel zanmen in annan en Cultural Policy an limenm e ki debout par limenm.  Nou annan 3 guiding documents ki lo latab, ki ganny servi e sa ki premyerman ozordi, pe vin baz sa Cultural Tourism Policy ki nou pe met alavan.

Nou annan en Cultural Policy, nou annan en creative industry e nou annan en Tourism Master Plan.  Menm ki toudilon nou lavi, depi letan Erod, nou ti pe organiz fennsifer dan nou bann distrik e menm dan Victoria e met burger an vant e hoopla pou ganny en boutey, nou pa’n zanmen vwar sa koman Cultural Tourism dan son vre sans.  Pourtan, nou zanset ti’n deza pe fer sa ki nou, nou pe koz lo la ozordi.  Bann pti Festival dan nou bann kanton e vilaz, ti anmenn Domestic Tourism alavan.  Ozordi, nou’n met en show dan sa levennman e nou’n donn li plis lanpler.

Tourism ek kiltir Mr Speaker, i tonm ansanm, depi ler Prezidan Michel ti met sa 2 Departman, Touris ek Kiltir ansanm dan en Minister.  Si nou la ozordi pe koz Cultural Tourism, set akoz sa nouvo depar ki swiv sa desizyon.    Cultural Policy, i fer provizyon kler pou proteksyon e pou prezervasyon e pou devlopman kiltir e valer kreol Seselwa.  Se dan sa konteks ki Cultural Policy Sesel, i elabor nesesite pou prezerv bann diferan laspe, still lavi Seselwa e promouvwar e devlop nou bann atou kiltirel, nou labote e nou leritaz natirel koman assets pou nou Cultural Tourism.

The Tourism Master Plan dan son kote, li i rekonnet lenportans valer kiltirel pou Lendistri Touris e bann latraksyon kiltirel ki Sesel i annan.  Menm ki nou bezwen note ki lo Mahe par egzanp, vizit organize, ki enkli en antre dan Mize i mwens ki 1 poursan nou bann ekskirsyon ki ganny vann dan pei.

An 2010, mwens ki 4200 viziter ti vizit nou bann mize dan nou pei.  Sa i paret alarman, wi.  Me sa pti gin viziter kot Mize e bann sit istorik, i demontre limitasyon vizibilite, limitasyon aksyon promosyonnel e aksyon pou met zot an valer e osi laspe met an valer nou bann assets kiltirel, ki reste bann senbol fondamantal, bann senbol inik e sa lafyerte lidantite Seselwa.        Challenge pou Sesel e pou Seselwa, se protez sa ki nou annan, anmenmtan ouver sa bann cultural assets nasyonal pou viziter, an asiran ki zot suitably e sustainably marketed, managed e developed.

I enportan lo sa pwen pou soulinnyen, ki Creative Industries Policy, ki nou pei in met anplas resaman i kouver sa bann lapros oriantasyon lo kimannyer nou merit pe promouvwar, pe diriz e pe devlop bann cultural assets dan en fason soutenab.

Nou’n ganny gide par bann Trete enternasyonal ki Sesel in souskrir, ki annan en relevans direk ou endirek lo leritaz natirel e lo leritaz kiltirel nou pei.  Sa i enkli UNESCO Convention on Cultural Diversity, UNESCO Convention for Protection of the World Cultural and Natural Heritage, the UN Convention to Combat Desertification, The UN Framework Convention on Climate Change, the UN Convention Biological Diversity, The Convention on Wetlands, The UNESCO Convention on the Means of Prohibiting and Preserving the Elicit Import-Export and Transfer of Ownership of Cultural Properties, The UNESCO Convention for Safeguarding of the Intangible Cultural Heritage, UNESCO Convention on the Protection and Promotion of the Diversity of Cultural Expressions.

Bokou sa bann deklarasyon i gid nou Mr Speaker e pe gid nou ozordi.  Ozordi Sesel pe met alavan bokou levennman kiltirel e bann ki tonm anba konsept echo tourism.  Sa i demontre volonte par nou pei pou benefisye de sa potansyel Cultural Tourism ki nou annan.  Sa ki nou pe fer, se repran lespri deryer bann Fennsifer ki nou’n toultan fer dan nou pei pou en sours fund raising e met laganm ladan pou fer zot grosi e vin osi en levennman detant pou nou popilasyon, me ki osi annan en potansyel pou atir lapres enternasyonal.

Bann legzanp kler sa bann levennman ki ozordi i ganny apresye par nou popilasyon, se Festival Kreol, Carnavale International de Victoria, Lafet La Digue, Subios, nou Festival Lanmer, Fet Afrik, Seychelles India Day Celebrations, Journée de la Francophonie, Commonwealth Day Celebrations, Bazar Labrin, Bazar Ovan, Heritage Week, Echo Friendly Marathon, bann Fishing Tournaments, Regatta, National Agricultural e Horticultural Show, National Windsurfing Competition, SENPA Trade Fares, bann lafet Legliz e Larelizyon dan bann parwas, eksetera.

An relasyon avek sa, nou annan bokou bann aksyon ki anplas pou ed nou isi Sesel asire ki nou arive benefisye avek bann atou kiltirel tourizm ki egziste.  Bann devlopman konsolidasyon pe ozordi pran plas lo nou bann sit istorik parey Misyon, Domaine de Val De Prés, La Buse Treasure Site, eksetera.

Nou pe devlop bann Cultural Heritage roots e nou’n deza konplet sa enn isi Victoria e enn lo Praslin.  Nou pe met bokou zefor pou redevlopman e pou fer nou bann Mize vin pli enteresan e pli konplet.  Nou pe espere ki dan mwan Zen 2014, nou Mize Listwar a antre dan son nouvo Batiman dan Victoria, kot Lakour Siprenm ti ete avan.

Resaman, nou National Choir e nou Latroup Nasyonal Kiltirel, in fer bokou travay pou prezerv sa ki nou annan istorikman e byento avek reouvertir Teat Des Palmes Mont Fleuri, zot a ganny en landrwa pou perform pou Sesel e pou nou Lendistri Touris.

Mr Speaker, koman nou kontribisyon anver sa kanpanny nasyonal, “Travay dir pou nou Sesel”, nou pe enplimant en plan pou ankouraz distrik pou apresye e pou zot valoriz zot bann bann assets kiltirel.  Nou’n osi antre dan diskisyon avek SEMAS, Lasosiasyon Lanmizik Sesel, pou vwar kimannyer nou kapab pli byen get bann laranzman e lanvironnman pou nou bann artis perform dan bann Lotel.  E sa, bann diskisyon i ongoing.

Finalman Mr Speaker, i enportan pou note ki Minister Touris ek Kiltir, pe propoz plan restrikstirasyon mazer son Minister, pou reponn a larealite ki nou pe fer fas avek ozordi.  Sa ava anmenn en nouvo lelan e a donn nou en zefor pou devlop Cultural Tourism dan Sesel, anmenmtan, ki nou konsolid nou Lendistri Touris, sa Lendistri ki reste pilye nou lekonomi.

Nou kiltir inik i kapab e nou kiltir i annan potansyel pou stimil promosyon Lendistri Touris.  Sa nou konnen e sa i kapab an retour benefisye avek diversifikasyon nou bann prodwi touristik.  Pou nou arive a sa pwen, nou bezwen koman koman en pei aksepte pou valoriz e pou donn plis latansyon a nou bann assets kiltirel.  Pour sa Mr Speaker, nou bezwen tou Seselwa pou travay avek nou.  Pou tou Seselwa pou mars avek nou e ouver laport pou plis Seselwa ganny loportinite benefisye ekonomikman avek zot Lendistri Touris.  Sa lapel i osi reste en loportinite pou tou nou distrik pou sorti e debout deryer sa drive par nou pei.

Mr Speaker, koman Lansman Festival Kreol, i zis dan 2 zour, mon profite pou fer remarke ki prensip Cultural Tourism i reste en lapros ki pep Seselwa dan en mazorite i oule e i apresye.  Vey dimoun dan Victoria sa wikenn e nou a vwar ki aksyon i koz pli for ki parol.

Dan dernyen Karnaval, plis ki lanmwatye popilasyon, wi Mr Speaker, plis ki lanmwatye popilasyon Sesel, ti desann dan Victoria.  Napa okenn lot aksyon.  Napa okenn lot levennman dan sa pei Sesel ki anmenn otan nou popilasyon dan semen.  Sa ki nou bezwen prezan, se asire ki Seselwa i ganny loportinite devlop zot komers ki zot swazir dan sa bann levennman e fer larzan avek sa drive ki nou pei pe fer pou devlop Cultural Tourism par Minister Touris e Kiltir e par Gouvernman Sesel.  Mersi Mr Speaker.

 

MR SPEAKER

Bon, nou’n ariv alafen Statement e parey i tradisyon e Konvansyon, nou pou pran enn de kestyon.  Nou a komans avek Onorab Vidot.

HON KEVIN VIDOT

Thank you Mr Speaker.  Mr Speaker, an vi ki Minis in dir ki bann pei osi in vwar ki zot bezwen annan levennman pou osi atrakte touris dan zot pei, eski Minis i kapab dir ek sa Lasanble, si son Minister in fer en resers pou dekouver e ascertain nou comparative advantage ki nou annan lo sa bann lezot pei, ki osi pe bouz dan menm direksyon ki Sesel, pou nou atrakte plis touris Sesel?  Mersi.

 

MINISTER ALAIN ST ANGE

Mersi Mr Speaker.  comparative advantage i en travay ki Minister Touris, e maintenant Minister Touris e Kiltir, i fer toultan.  Nou bezwen toultan rode kote nou annan edge e kote ki nou pou ganny sa edge.

Kan nou regard bann lezot pei ki’n antre dan levennman, nou bezwen sitie nou dan rezyon kot nou ete e get kisisa ki obor nou, ki annan en lefe.  E se sa ki ler Gouvernman Sesel ti pran desizyon, ler Prezidan Michel ti tenir Portfey Lendistri Touris, sete form lans en levennman ki apel en Carnavale Internationale de Victoria, pou anmenn lemonn Sesel.  Nou ti annan zis nou ki’n kree en levennman enternasyonal ki ozordi in ganny konotasyon Carnavale de CarnavalesSo, nou’n rode kimannyer nou annan, L’ile Maurice in sey antre zis apre e fer en Carnavale Maurice e pa’n marse akoz i fer 2, enn lo kanmarad.

Nou swiv lezot pei ki organize.  Nou travay avek lezot pei pou asire ki toultan nou annan bann delegasyon e nou bezwen sible nou bann levennman pou zot pa overlap kanmarad.  Se sa ki sa lannen dan relansman Festival Kreol, nou’n met zefor, tou zefor lo kreolite e anmenn bann zil kreol lemonn Sesel akoz nou tou nou annan en keksoz an komen se kreolite e demann dimoun vin vwar diversite dan kreolite.  Menm ki nou tou nou partisip ansanm, nou tou nou selebre ansanm, nou annan diferans koze, nou annan diferans kiltir, menm ki nou ini avek sa mo Kreol.  Tandi Karnaval li, nou envit tou Karnaval lemonn parad ansanm dan Sesel.  Met tou nou levennman.  Si nou’n fer en Seychelles India Day resaman, i annan son kote tourism akoz nou vwar loportinite pou nou antre, avek larive byento Sri Lankan Airlines, pou nou prezan pre pou antre dan Lenn.  Si nou oule antre dan Lenn, nou pa kapab pa antre par nou menm.  Nou napa ase mwayen koman en pti pei.  Alors, i anmenn Kominote Endyen avek nou e pran bann Endyen Bollywood ki koni dan Lenn e fer zot vin nou bann advocates.

Nou’n fer li dan en fason, avek mon panse, Minister Tourism Board, avek bokou lentelizans e ozordi, avek larive Sri Lankan Airlines an Novanm, nou’n pre pou nou al dan Lenn.  Byento nou po fer parey avek La Chine, pou soutenir travay ki Air Seychelles pe fer lo Lasin, avek lezot konpanni avyon ki al laba.

Nou toultan tenir nou informed e se sa ki nou lir bann rapor, parey mon’n quote sa enn ki’n pase Langleter, pou nou toultan konnen kot nou ete, me nou bezwen kit nou lizye ouver lo larezyon akoz se la ki nou competitive edge i vini e se sa ki nou travay avek bann partners.  Se sa ki ou vwar Board Touris in antre dan history root kot i anmenn Kontinan Lafrik avek nou.  Nou antre dan Zil Vaniy ki anmenn bann zil ek nou e nou reste ladan koman en vre Leader. Mersi Mr Speaker.

 

MR SPEAKER

Onorab Maria Payet.

 

HON MARIA PAYET-MARIE

Mersi Mr Speaker.  Mr Speaker, Minis in koz lo sa 3 guiding documents ki’n ede pou formaliz sa Cultural Tourism Policy. Eski Minis ou kapab enform nou Lasanble lekel bann partners kle ki ou’n travay avek pou come up avek sa polisi e ki zot rol, par egzanp ki rol prensipal bann Tour Operators pou anmenn plis Cultural Tourists Sesel?  Mersi Mr Speaker.

 

MINISTER ALAIN ST ANGE

Mersi Mr Speaker.  Mr Speaker, bann partner kle i 2 vole.  I annan bann ki anvoy nou touris e se sa ki nou al dan tou bann Trade Fairs Enternasyonal.  Semenn prosenn, Sesel en gro delegasyon, en senkantenn dimoun pou sorti pou al Lonn akoz i World Travel Market ki enn bann pli gro Travel Trade Fairs ki egziste, apard sa enn ki fer Lalmanny.  E la se se sekter prive ki pran leadership akoz se zot ki al dan bann gran nonm.  Sa i al rod bann kontra avek bann Tour Operators akoz Sesel i reste.  E mon repete i reste en long-haul destination.  E en longhaul destination nou toultan atrape par vizibilite ki bann Tour Operators i donn ou.  Si ou pa paret dan bann progranm, ou kapab annan pli bon destinasyon, ou pou mor en natural death akoz ou pa pou zanmen vin vizib.

Lot kote ki nou bezwen toultan gete ler nou pe regard cultural tourism,, se pou nou travay ek bann organizm ki donn nou relevans e sa se parey UNESCO, parey lezot gro body lemonn, UNWTO, ki kontinnyen gid nou.  Zot pa donn nou direktif me zot gid nou.  Zot travay avek nou e zot ed nou met sa ki nou, nou annan alavan.  Isi lokalman, se ki nou bezwen kontinnyen travay.  Depi Chamber of Commerce e Lasosiasyon Lendistri Touris.

Nou travay ansanm pou annan en consulted effort.  Nou pa kapab, zanmen kit sa pei e al dan okenn reprezantasyon aletranze, avek en divizyon ant nou.  Nou bezwen paret dan tou sa bann Fairs, dan tou Workshops koman en pei ki ini, en pei ki pe fer en keksoz, promouvwar son pei pou atrakte dimoun isi.  Nou Minister kot Natural Cultural Centre, i depan bokou lo partnership e se sa ki dan mon Statement taler, mon pe envit bann distrik prezan, pou antre avek nou dan sa kote devlop Cultural Tourism a baz vwazinaz, a bann pti kominote pou nou vwar tou assets e mon konnen Onorab De Commarmond ki pa la, in toultan koze.  I annan enn Cascade.  Nou bezwen prezan pe travay avek bann Ladministrasyon Distrik, pou nou kapab pe met an valer sak sa bann pti atou ki nou annan e vreman fer li desann at grass root level pou pep Seselwa an antye ganny sans benefisye avek Lendistri Touris.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Bonzour Minis ek ou delegasyon.  Mr Speaker, Minis in koz lo claim back nou Lendistri Touris, eski Minis i kapab donn detay sa Lasanble lo ki fason vreman sa pti Seselwa pou kapab ganny loportinite atraver sa nouvo drive sorti kot ou Minister e eski zot annan okenn plan pou promot sa konsept Chez L’habitant, dan plan devlopman Cultural Tourism Sesel e ki fason osi zot pe planifye pou anmenn Praslin ek La Digue dan sa nouvo relansman?  Mersi Mr Speaker.

MINISTER ALAIN ST ANGE

Mersi Mr Speaker.  Mersi Onorab Leader Lopozisyon.  Claim back Lendistri Touris, i en deklarasyon ki ti ganny fer par Prezidan Larepiblik, ler nou ti relans Lendistri Touris.  Prezidan Michel ti fer tre kler, The Seychelles Brand of Tourism, i en stil touris ki bezwen vwar ki sa Seselwa i vwar li ladan.

Nou pa kapab e nou ti napa okenn lentansyon les Sesel al dan en fason kot Seselwa pa benefisye direkteman.  E sa Seychelles Brand of Tourism, ti vin avek en amnesty pour tou bann pti Lotel dan nou pei ki ti pe travay pandan bann lannen, me dan en fason enpe ilegal.  Zot ti enpe al fresco e dela, zot ti ganny sans bypass tou formalite Gouvernman e license zot lekor e antre dan sa fanmiy Lendistri Touris.

Sa ti anmenn nou plis ki 250 pti lotel owned par Seselwa e managed par Seselwa ki ti al ganny en license imedyatman.  In kree enpe ensertitid avek bokou bann ki ti annan license deza, me nou ti bezwen fer antre bann Seselwa ki ti’n met zot larzan dan en letablisman e les zot antre dan sa fanmiy e kapab market zot lekor.  Sa i premye keksoz ki lefe sa claim back nou Lendistri in annan imedyatman.

Lo pwen ki Onorab Pierre in leve lo Chez L’habitant, sa bann lotel ki nou’n, nou kapab apel, tanzantan mon dir, pou plim en sat i annan en ta fason fer.  Ou kapab pran en tweezer, tir en plim par plim, me ou kapab osi trouv mil lot fason fer li.  Chez L’habitant, avek anrezistre bann pti lotel ki nou’n donn zot en license, i egzakteman menm zafer.  Se sa Seselwa ozordi, ki annan 2, 4, 6 lasanm, ki’n arive anrezistre son pti linite e ozordi i pe travay, i ganny liste e i paret lo website Lendistri Tourris.

Kote Praslin ek La Digue i vwar zot ladan e la, avek bokou lafyerte, mon panse akoz mon en Diguois, La Digue i landrwa kot annan plis pti Lotel ki owned e managed par sa pti Seselwa.  Ou vwar zot enpe partou, ki nou’n bezwen reget dan Land Use Plan La Digue pou sey regarde ozordi kote ki nou ale avek, sinon i vin, nou pou annan plis touris ki nou pou annan zabitan La Digue, si nou pa regard en fason pou nou kapab manage li avek en pe long term vision.

La Digue, nou’n osi zwe Cultural Tourism.  Lafet La Digue ozordi, in toultan en lafet enportan, ozordi in vin en lafet ki paret dan bann Tour Operator Programs, koman en Lafet ki touris i ganny envite pou al vwar kimannyer nou annan en al fresco mask dan distrik, kot an rout pou al Anse Reunion, an rout pou al Grand Anse, kot Lagrot e dela desann dan en laprosesyon ki klasik e ki vreman met alavan sa kote kiltirel avek son kote larelizyon ki nou pei i annan.  Me sa osi in vin en lafet vreman, kot La Passe ozordi pandan peryod 15 Out, ou vwar tou kalite animasyon ki Board Touris i siport Ladministrasyon La Digue, enkli sa Komite 15 Out, pou zot met alavan en Lafet pou La Digue e en Lafet ki anmenn larzan dan pos Digwa.

Praslin, nou pe kontinnyen travay avek nou 2 MNA Praslin e nou’n ganny diskisyon enpe pou lans lespri, pou nou annan en Lafet Praslin.  I esansyel ki nou annan enn, akoz plen dimoun Praslin i demande pou nou kapab annan en Lafet Praslin ki pou anmenn dimoun parey i desann La Digue, pou anmenn Praslin.  Mon’n envit toulede MNA pou nou zwenn, ek zot DA anmenmtan e i enportan ki nou fer sa sous peu, pou nou kapab annan enn lannen prosenn ki nou a kapab anonse.

Lafet i met larzan dan pos dimoun, menm letan ki dimoun i anmize e depans larzan.  I fer roule en degre larzan, me i enportan ki nou kontinnyen organiz li dan en fason soutenab e dan en fason organize e nou pa double lo kanmarad, en fason ki dan en lannen, ou annan li ki stagger right through the year.  Mersi Mr Speaker.

 

MR SPEAKER

Minister i pli fasil pou kros en sat ki plim en sat.  Onorab Barbe.

 

HON NICHOLE BARBE

Mersi Mr Speaker.  Mr Speaker, eski Minis i kapab eksplik sa Lasanble si pou annan en gran logmantasyon dan Bidze 2014 pou kapab asire ki sa Polisi Cultural Tourism i ganny enplimante dan son totalite?  Mersi Mr Speaker.

 

MINISTER ALAIN ST ANGE

Mersi Mr Speaker.  Mr Speaker, en bon kestyon.  Eski nou pou annan en logmantasyon Bidze?  I pou depan lo zot.  Lasanble ki aprouv sa Bidze e nou, nou kapab zis fer bann soumisyon lo ki Bidze nou ti a kontan vwar.  Nou’n deza zwenn koman Minister avek Minister Finans e la Board Touris e Minister kote Departman Kiltir, NAC, tou bann bout ki tonm avek nou, nou’n fini soumet nou Bidze.

Dernyen fwa mon ti Lasanble isi, mon ti ofer ki nou pou vin avek Lasanble e PS kot Kiltir pe organize byento pou nou kapab vin soumet nou Bidze ki nou’n fer propozisyon avek Minis Finans kot zot.  Pou zot vwar e pou zot apresye ki nou’n demande e mon espere pou zot vwar zot prop distrik ladan, sirtou dan bann kote Cultural Tourism.  I enportan ki zot, zot vwar ki nou pe sey rode e pou zot kapab travay avek nou, asire ki zot annan ase ladan, dan zot distrik, pou zot kapab partisip afon.

Mon dir sa Mr Speaker akoz sak fwa nou annan en gran Lafet dan pei, nou ganny diskisyon avek sak distrik ki santi li enplike.  Pou Festival Kreol, nou pe travay avek distrik Au Cap.  Me nou annan osi distrik Praslin ek La Digue ki oule partisip dan sa Festival.  1, ti annan en Delegasyon ki desann isi, me annan en reprezantasyon osi dan zot zil.  Me se sa bann bout levennman ki ler nou soumet nou’n toultan met li an blok.  Sa kou Departman in kas li an seksyon pou sakenn ant zot kapab vwar li ladan ler nou vin kot zot e pou zot asire ki zot ed nou pous sa bouret, pou nou arive annan ase larzan pou Cultural Tourism lannen prosenn.  Mersi Mr Speaker.

 

MR SPEAKER

Onorab Bristol.

 

HON ALDERIC BRISTOL

Mersi Mr Speaker.  Mr Speaker, mon panse Minis a dakor avek mwan ki pou atrakte touris ver nou kiltir, se premyerman pou fer sa etranze tann e apresye sa ki nou annan pou ofer tel ki nou lanmizik, nou sega, nou moutya, depi lot kote frontyer laba kot i ete.  Eski Minis i kapab dir nou si sa in osi ganny adrese klerman dan sa Polisi?  Mersi bokou.

 

MINISTER ALAIN ST ANGE

Yes. Mr Speaker, mon antyerman dakor ek Onorab Bristol.  Mon panse ki i enportan ki nou zwe kiltir.  E sete sa lide ki Prezidan Larepiblik in marye kiltir ek touris ansanm.  I ti enportan ki kiltir i vin nou baz, pou nou annan en baz solid dan promosyon nou Lendistri Touris.  Ler nou zis promouvwar lanatir, nou pe fer konpetisyon avek direk, tou lezot dimoun ki annan menm baz natirel, ekolozi eksetera.  Me kiltir pou nou i nou.  I en keksoz ki pou nou.  I en keksoz ki nou, nou kapab servi.  I annan diversite dan nou pep, i annan diversite dan sa ki nou manze, i annan diversite dan nou lanmizik.

Nou’n fer lapel avek bann Lotel.  Nou’n kontinnyen fer lapel pou zot met plis kreolite dan zot bann repa e osi dan bann animasyon ki nou fer kot Lotel.  Nou pa kapab fors zot.  I en konsept ozordi ki marse, kot ou ankouraz dimoun me napa Lalwa ki fors dimoun pou fer en keksoz ki li i pa santi li anvi.

Alor, sa ki nou, nou pe fer koman Minister, nou pe ouver dan peryod Festival Kreol Teat De Palmes Mont Fleuri, kot la nou espere pou annan en show touleswar ofir e anmezir e nou travay se pou nou al dir bann touris vin dan en show ki egziste.  Nou pou fer parey kot Domaine de Val De Prés, osito ki son relansman ki’n fini fer, bann tender in donnen e dela nou pou annan son dezyenm proze ki atase avek, deryer Ladministrasyon Distrik, enpe obor sa Creche ki ti ganny fer.  La osi nou pou fer parey.

Nou pou tir touris dan Lotel e anmenn zot dan bann landrwa kot zot pou kapab apresye sa show kiltirel ki nou pei i annan e sa lidantite, kreolite ki nou met alavan atraver bann manifestasyon lanmizik, manze, ladans eksetera.

Nou sir ki apre ki nou’n fer sa enpe letan, lotel pou bezwen antre dan sa jeux akoz zot pou vwar ki zot perdi sales lannwit.  Bann dimoun pe sorti pou manze e bann dimoun pe al dan bann bar ki deor, olye reste kot zot.  Nou bezwen trouv en fason pou entice zot pou zwe sa zwe avek nou me mon antyerman dakor avek Onorab Bristol.  I en keksoz ki nou bezwen kontinnyen travay lo la e Minister i konsyan e pe fer li.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Bonzour Minis e bonzour tou dimoun.  Mr Speaker, 3 Karnaval, i annan disi 3an ki depi Minister pe pran Lafet La Digue anba son parasol.  29 Festival Kreol.  Eski Minis i kapab enform sa Lasanble, lefet ki tou sa bann aktivite i annan pou fer avek tourizm.  Eski zot in fer en evalyasyon ouswa kek resers pou konnen, dan sa bann moman, ki kantite touris ki vini pou vin asiste sa bann levennman e ki kantite zot depanse isi Sesel e apre osi, eski Minis i kapab dir, enn fwa pour tou, kan ki son Minister pou enn fwa pour tou, pran Lafet La Digue inikman anba son parasol, pou kapab rod sirtou bann sponsorship parey i fer avek Karnaval e Festival Kreol?  Mersi.

 

MINISTER ALAIN ST ANGE

Mersi Mr Speaker.  En bon kestyon.  3 Karnaval, 28 Festival Kreol e la nou pe al dan ventwityenm dan 2 zour.  Sa ki kler se regard statistik nou pei.  Pou Festival Kreol nou pankor kapab.  Se prezan ki nou pe lans li lo en baz enternasyonal e sa lannen, pou premye fwa, i annan en gro Delegasyon Lapres Enternasyonal ki debark Sesel.  I annan in arive yer swar.  I annan in ariv bomaten e i annan ki ariv Zedi.  Ki ariv Sesel pou kouver sa Festival Kreol akoz zot in vwar son konotasyon, ki i annan en keksoz ki merit ganny kouvertir lapres akoz i annan kantmenm en nonm zil ki partisip ansanm dan diversite.  I annan Sesel, Moris, Rodrig, Larenyon, Martinik e Haiti dan sa Festival Kreol ki pe vini.     Alor sa i annan en lentere pou lapres kouver.

Ler ou oule vwar nonm dimoun ki debark Sesel akoz nou annan en levennman, mon ti a envit Onorab pou pran statistik ki Statistical Bureau i donn nou e get sak fwa i annan Karnaval ou vwar i peak, apre i re-desann.  Menm zafer, mon’n koz sa avek Minis Finans.  Menm zafer lo lekonomi pei.  Get larantre deviz etranzer dan nou pei.  Ou vwar li i fer sa, apre i re-desann.  I en keksoz ki la.  Mon napa son bann sif avek mwan, me i en keksoz ki kler e i en keksoz ki available avek bann Manm Lasanble e mon ankouraz ou pou al vwar.

Lot bout ki ou’n leve se Lafet La Digue vin anba parasol Minister.  Si i annan en demann ofisyel avek Komite Lorganizasyon Lafet La Digue ki’n la pandan tou bann lannen e ou koman MNA ek DA, i en keksoz ki Minister a konsidere favorableman e pran sa.  Akoz nou panse ki i enportan.  Lot zour mon’n La Digue pandan Lafet.  Menm ki mon’n salye zot avek nouvote zot in fer.  Legzibisyon Portre, bann vye portre.  I annan plen nouvote sa lannen, ki mon panse Komite in fer en zefor kler.  I annan bout osi ki nou kapab kestyonnen, ki bann pti laboutik pa pe vann otan keksoz La Digue ki nou ti devret pe vwar.  Sa lannen pou Festival Kreol, ou pa pou vwar burger stall dan Victoria akoz mon krwar nou’n vwar sa pandan tou lannen.  Nou pou vwar plito bann keksoz ki plis touse, lo kreolite e kiltir.

I en keksoz ki nou reste a ou dispozisyon MNA e nou ti a swete ki nou zwenn vit avek ou e ou DA e zot Komite La Digue, pou asire ki se sa ki zot demann nou pou fer, apre sa nou a pran li koman en levennman ki tonm avek nou an plen.  Mersi bokou Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Bonzour Mr Speaker.  Mon ti a kontan demann Minis si an relasyon avek sa oriantasyon dan baz marketing touris Sesel, si sa pou anmenn en logmantasyon dan sipor bidzeter ki son Minister pou bezwen e si zot annan lentansyon pou angaz sekter prive enpe plis, vi ki zot benefisye enpe plis avek sa marketing e si osi sa travay ki pe ganny fer avek sa nouvo Polisi marketing pa pou konpromiz serten progranm ki Departman Kiltir i annan deza, me pou plito konsolid zot?  Mersi Mr Speaker.

 

MINISTER ALAIN ST ANGE

Mersi Mr Speaker.  Bidze, nou’n re-regard nou Bidze ki nou annan koman en Minister e nou’n regard Bidze Board Touris.  Eski i ogmantan an kantite akoz sa bann Levennman?  Non.  Sa ki nou’n fer se pran nou bann aksyon promosyonnel lo Culture Tourism e nou’n fer li vin en aksyon ki nou servi pou fer marketing. Akoz i ouver nou sa ki nou apel, ler nou voyaze pou fer marketing bann niche, kot ou annan bann niche kot dimoun i swiv bann lafet kot i annan en pe animasyon.  E sa nou’n al rode, pou nou kapab pozisyonn nou lekor.  I annan bann lorganizasyon dan lemonn antye ozordi ki swiv e ki donn nou coverage.

Sa ki Sesel ti pe vreman rode ler Prezidan Larepiblik ti’n vin antre dan, break nou dan sa world of events, sete pou nou rod vizibilite pou nou pei.  E i ti kler ki nou bezwen rod en mannev pour ki Sesel i paret dan bann zournal e lo bann televizyon aletranze.

Mon kapab Mr Speaker, avek ou permisyon dir bann Manm Lasanble, envit en manm lapres pou vin kouver Sesel e dir be vini, ekrir en rapor lo nou labote, lo sa ki nou ete.  E son premye repons i toultan dir, mon’n fer sa omwen 20 fwa.  Nou pa kapab ekrir menm zafer.  Ou lans in reste ou lans.  Si ti sal, ti annan delwil lo la petet i ti a enterese vin kouver akoz lans prop, lanmer tirkwaz ble ki so, in ekrir en ta fwa.

Nou’n toultan rod en lang pou nou kapab atrakte lapres vin Sesel.  E se sa ki, avek levennman, in ouver bann laport pou nou.  Se sa ki ou vwar Karnaval in akout 120, 130.  Si nou pran tou ki demann nou pou vini, pou annan 150 a 200.  Me nou pa kapab anmenn tou dimoun isi.  Alor nou swazir bann ki tonm par segman dan nou bann market enportan.

So, kote Bidze, non.  Me avek restriktirasyon ki pe pran plas dan Minister.  Restriktirasyon ki nou’n soumet e pou zot lenformasyon, i devan Cabinet of Ministers demen, kot nou pe regard pou re-amenaz nou Minister, pou fer ki bann levennman ki nou anmase.  Ozordi i annan enpe kot Tourism Board, i annan enpe kot Minister ki pran plas anba en sel parasol, pou nou kapab konsolid en pe nou bann zefor e ganny economy of scale.  Nou pa bezwen menm dimoun.  2 dimoun pe fer menm zafer.  Alor nou annan en dimoun ki a vin pli gro e disimil enpe sa travay.  Nou panse ki i a pozitif alavan.

Sa ki mon kapab asir Onorab se ki, lespri konsolidasyon nou bann levennman ki nou kree e bann levennman ki annan son latous kiltirel ki nou anvi proteze.  Minister ti’n lans lide pou kouver nou 5 Brans ki fer sa ki nou ete ozordi.  Pandan bokou lannen, nou’n selebre anba peryod Festival La Francophonie.  Peryod ki nou ti atas nou avek Lafrans.  E la nou’n fer Fet Afrik ki atas nou ek Lafrik.  Nou’n fer Commonwealth ki atas nou avek Langleter.

Nou ti’n sot Lenn e nou ti’n sot Lasin.  Me pourtan, i sa 5 Brans ki fer sa ki nou ete ozordi, sa pep Kreol Seselwa e nou ti’n sot sa 2, nou ti’n selebre Festival Kreol.  Prezan nou’n kouver Lenn par Seychelles India Day e depi Zanvye lannen prosenn, nou pou kouver Seychelles China Day.

Me mon oule asir Lasanble se Komite Lorganizasyon Seychelles India Day, ki’n pran tou zot depans pou anmenn sa lafet ki nou ti fer.  Zot in rod sipor sekter prive e zot annan en sipor akoz Kominote Endyen i for.  Zot in anmenn zot sipor e zot Bidze ler zot in eksplik mwan avantyer swar dan zot dir mersi, i 2 fwa Bidze Festival Kreol.  I montre ou dan lespas 5 mwan, zot in anmas 2 fwa nou Bidze Festival Kreol e zot in met alavan en levennman ki ti lo en lepanouisman enternasyonal dan stil, dan dekor, dan bann dimoun ki ti vin perform avek zot.

La Chine, nou’n fer menm lapel avek Kominote Chinois.  E nou pou kontinnyen fer lapel avek Kominote Business, pou siport nou akoz ler i annan levennman, larzan i roule e dimoun i ganny sans fer larzan out of it e i enportan ki Kominote Biznes i siport travay ki Departman Kiltir i fer pou anmenn sa bann levennman alavan.

Mr Speaker, sa ki reste toultan enportan osi se ki nou rod son lavantaz pou pei e pou sa pep.  Annan businessmen ki zwe ladan wi, me nou bezwen kontinnyen e se la travay ki koman Minister nou fer, se asire ki sa pti Seselwa i vwar li ladan e i vwar li kapab fer larzan avek.  Sa lannen pou Festival Kreol, bokou in vini avek triko, sapo, bann nouvo keksoz zot in fer vini zot menm.  E nou kontinnyen ankouraz dimoun fer sa akoz aktivite i la pou Seselwa kapab fer larzan avek, ofir e anmezir, me mon konpran ou kestyon e mon siport sa ki ou pe dir.         Nou pe kontinnyen travay avek Kominote Biznes pou zot adopte sa bann levennman.  Bann ki’n vin alavan pou siport Festival Kreol, i kler bann ki annan en latasman e zot santi zot fyer ki zot en Kreol.  Pa tou ki’n vini akoz bokou pa santi zot Kreol.  Alor zot pa’n vin ditou.  Me nou kontinnyen envit dimoun pou zwe sa kart avek nou, pou mars avek nou dan nou progresyon, pou met ki sa bann levennman i vin vreman bann atou ki nou pei i annan dan son promosyon e dan met an valer sa ki nou ete nou, koman en pep divers e en pep Kreol, ki annan tou sa bann melanz ladan.  Mersi Mr Speaker.

 

MR SPEAKER

Onorab Volcere.

 

HON MARC VOLCERE

Mersi Mr Speaker.  Mr Speaker, mon ti a kontan demann Minis, prenan kont difikilte, oubyen konstrent pou bann zabitan Praslin vin partisip dan bann gran aktivite ki ganny organize lo Mahe, ki annefe zot ti a kontan vin partisipe, ki sipor ki son Minister i donn Praslin, ki pou son zabitan osi i kapab defoule ansanm avek bann viziter ki lo zil ler zot pe defoule osi dan Lavil Victoria?  Mersi.

 

MINISTER ALAIN ST ANGE

Mersi Mr Speaker.  Sak Ladministrasyon Distrik in ganny en sonm larzan ki’n ganny allocate avek sakenn e PS in reasir mwan poudir sakenn, apre zot in fer demann ki nou’n diskit avek Minister Finans e sakenn in ganny en sonm ki pa eksesif.  Sa sonm i devret kapab grosi, ki ler Bidze i ariv devan zot e zot, zot met en kopo ladan pou fer li vin enpe pli gro.

Me mon panse i enportan ki nou dir ki nou’n travay pou donn en sans sakenn distrik kapab vin dan Victoria avek en delegasyon.

Si nou oule ki nou Festival Kreol i vin vreman reprezantatif, sa ki pei i ekspekte ek en Festival Kreol, akoz sa se nou Lafet sa enn.  Ti enportan ki nou, nou sey anmenn tou distrik, tou le 25 distrik pou ariv isi Mahe.  Bann distrik Mahe mon pa pou dir sonm, amwen ki zot oule mon dir me, tou bann Praslin ek La Digue in ganny en sonm ki enpe pli bel ki sa bann Mahe akoz zot annan kote bato pou peye pou vin Mahe.  Me sak, le 25 distrik in ganny en sonm larzan pou ed zot ariv isi Mahe avek zot delegasyon pou parade dan Victoria dan laserenad ek pipili omwen.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker, eski Minis i kapab dir avek sa Lasanble, ki son Minister, ansanm avek lezot Minister pe fer, pou anpese ki bann lakonpannyen etranze oubyen serten etranze, i komans prodwir bann prodwi artizanal aletranze e met lo market, pour ki Lendistri Tourizm e Kiltir Kreol i ganny mentenir e soutenir par bann Seselwa e par bann artizan Seselwa?  Mersi.

MINISTER ALAIN ST ANGE

Mersi Mr Speaker.  Leader of Government Business in anmenn en pwen ki tre sansib pour Minister Touris e Kiltir e sirtou pou Departman Kiltir.  Nou lanvi re-zwe e kapab re-zwe sa Made in Seychelles Label e donn sa bokou lafors ler nou fer marketing. Me nou pou bezwen kontinnyen travay avek Minister Finans akoz se zot ki kontrol Lendistri, pou zot dir personn pa kapab met en label lo la si sa lartik pa’n ganny fer isi.

Dan louvertir Festival Kreol, finalman lavey louvertir, bann Renyonnen pe vin avek bann prodwi artizanal e la mon pran loportinite, mon envit tou Manm Lasanble.  Zot in ganny en kart ki envit zot.  Vin vwar lepanouisman ki L’ile Larenyon in fer dan kote lartizana.  Zot pe vin avek 2 vole sa kou.  Lartizana limenm e sa i pou ouver Jeudi apre midi 3er dan Car Park kot Minister.

Zot pou vwar son kote lartizana e zot pre.  Larenyon i pre, travay avek nou pou anvoy dimoun isi pou ed nou devlop nou lekor.  Pou ed nou devlop nou lekor osi dan packaging, pou asire poudir sa ki nou pe met alavan i kapab then ganny vann e ganny eksporte.

Son lot kote ki zot pe anmennen, se bann prodwi Reyonnen ki fer dan en zil Kreol ki akote nou.  Zot pe rod bann entermedyer Sesel, zot pe rod bann businessmen Seselwa.  sa dimoun ki oule reprezant zot isi, pou met zot prodwi lo market.  Pou Minister Touris i annan en lavantaz, ki nou devlop en trade ek Larenyon akote nou.  I a ede ler nou kapab repozisyonn Air Austral pou vin isi, ki nou annan keksoz dan cargo avyon akoz pandan bann lannen ki Air Austral in vini dan lepase, nou pa’n ase ede pou asire ki i annan sa bann palet ki sorti avek bann prodwi.

Pourtan nou fer vin keksoz sorti dan North Pole, me akote nou, nou pa vwar nesesite travay avek en lot zil Kreol.  E sa set en nouvo dimansyon ki Minister Touris e Kiltir in mete dan Festival Kreol sa lannen.  I annan son kote komersyal e nou espere ki dan Lafet Larenyon an Desanm pou kote zot Journeé Métisse ki zot Festival, ki nou osi nou a kapab pran enpe prodwi Seselwa e anmennen pou ouver bann laport.  Ki swa nou bann cd bann Artis.  Bann keksoz ki nou fer isi.  Nou devret kapab koman sa bann Zil Losean Endyen, sa bann Zil Vaniy, travay bokou plis e anmenn bokou plis sipor pou kanmarad.

Me pou pran pwen ki Onorab Rose in anmenn alavan, nou bezwen sansibiliz nou dimoun, fer vwar poudir nou kapab fer nou Seselwa travay e nou ganny kekfwa value added ler nou met en label Made in Seychelles lo la.  Selman nou bezwen reste genuine akoz sinon nou pe vann anba faulse pretence e sa limenm i en akt ki pa ganny tolere.  Ou napa drwa fer en deklarasyon ki pa vre e dir sa prodwi pa sorti isi.

Nou pou bezwen travay avek Minister Lendistri pou nou kapab pli strikt, kimannyer sa label ki devre en stanp Sesel ki nou sertifye i annan en Factory ki fer sa.  I annan en group dimoun ki dan Lartizana ki pe fer sa.  I annan en group dimoun ki pe devlop en trade Seselwa, ki met alavan keksoz ki nou tou nou’n annan tou nou lavi.  Ki swa sapo, pannyen, bann lezot keksoz ki nou annan.

Me i enportan ki kekfwa menm nou ganny sipor Lasanble avek Departman Lendistri pou nou kapab travay anba sa Creative Industry Policy ki’n ganny adopte, pou nou fer sa vin bokou pli rizid.

Nou vwar dan tou Lafwar ki egziste ozordi.  I annan bokou pti prodwi, i dir ou sa in fer isi me pa sorti isi.  Ou vwar menm prodwi partou kot ou voyaze.  Nou bezwen sey ankouraz nou bann dimoun ki antre dan sa trade, siport zot, met zot alavan e nou koman Minister nou kapab fer zot ganny bann reviews lo zot, ki a fer ki bann touris ki vini i al rod zot pou kapab fer zot vann zot bann prodwi.

Me nou konpran ou kestyon Onorab Leader of Government Business e nou travay avek ou pou asire poudir nou kapab fer sa vin en realite.  Mersi.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker, dan son Polisi, Minister in koz en pti pe lo tous bann distrik.  Mon ti a kontan demann Minister ki lasirans ki i pe donn sa Lasanble ki ler distrik pou travay avek son Minister avek bann proposal ki bann distrik pou ganny full back up bann proposal, in terms par egzanp, sirtou ler nou pe koz lo siport nou bann pti artizan dan bann distrik ki poulemoman petet zot vwar zot avek difikilte pou zot ekspoz zot bann prodwi, vann zot bann prodwi avek zot bann kliyantel, so, ki sipor nou pou gannyen sorti kot ou Sekretaryat in terms of ekspertiz e lezot sipor osi?  Mersi.

 

MINISTER ALAIN ST ANGE

Mr Speaker, mon kapab asir Onorab e Lasanble ki Minister e la se Departman Kiltir, i a travay avek sak Manm Lasanble e sak Ladministrasyon Distrik.

Nou pa pou bezwen en Departman Kiltir, si napa kiltir ki pe ganny ankouraze dan sak distrik.  Kiltir se pa kot Minister i ete, kot National Cultural Centre, me i dan distrik.  I dan vwazinaz, i dan popilasyon.  Nou bezwen travay avek zot e nou pre travay avek zot.  Mon ti a kontan ki i annan detrwa zot ki vin alavan pou nou fer bann test case ansanm, pou nou kapab, koman zot sesyon i komanse lannen prosenn, vin donn en kont randi sa detrwa, kimannyer i pe marse.

Mon ti a envit Onorab Arnephy pou enn bann premye ki nou kapab travay avek e vreman demontre nesesite fer travay Seselwa e fer epanouir sa ki nou’n toultan gard li koman Cottage Industry, donn li son next step e son next step se package li, fer li aksesib pou dimoun vann.

I annan bokou keksoz ki Minister i kapab fer ek zot.  Nou kapab annan bann retail areas kot Minister limenm.  Nou kapab annan bann landrwa ki tonm ek nou parey kot Domaine De Val De Prés e nou pe travay osi, mon krwar avek bokou lafyerte nou kapab dir avek MNA Au Cap, kot nou antre, zot in form parti avek nou.  Zot in vin rode lekel ki pe antre dan bann tender ki nou pe donnen.  Zot in swiv tender process.  Zot in vwar zot menm e la nou pe ankouraz dimoun Au Cap pou zwenn avek Ladministrasyon Au Cap e MNA, pou zot prezan fer fleri sa konsept Domaine De Val De Prés e fer li vin en realite.  Tou bann tender ozordi in donnen e prezan nou pou vwar ki sa Vilaz i a vin enpe sa ki ou, ou pe rode, pou kapab les bann Seselwa ki antre dan creative industry, annan en landrwa pou zot vann zot keksoz.

Me nou siport sa ki ou pe dir an plen e nou vreman pre travay avek ou e nou donn sa lasirans avek Lasanble.  Mersi bokou.

 

MR SPEAKER

Onorab Esther.

 

HON NATASHA ESTHER

Mersi Mr Speaker.  Mr Speaker, mon kestyon ti al en pti pe anlinny avek pour Onorab Arnephy, selman mon ti a swete demann Minis.  Etan donnen ki Praslin i en zil touristik e ranpli avek en kiltir ris e baze lo larepons Minis pou travay pli pre avek kominote Praslin pou etablir son prop aktivite touristik, eski Minis i kapab enform sa Lasanble si son Minister i anvizaze konekte son lofis lo Mahe avek Praslin, avek en lespri travay pli pre ansanm e aport sipor, pou ede akonplir son plan nasyonal pou sa zil?  Mersi.

 

MINISTER ALAIN ST ANGE

Mersi Mr Speaker.  Mon aksepte pwen ki Onorab Esther i fer.  Wi, nou ti a kontan vwar bokou plis proaktivite sorti kot nou biro Praslin e nou bezwen kontinnyen travay avek sa 2 Zofisye ki laba, pou fer zot pran menm lelan ki nou, nou annan isi.  E kekfwa avek PS dan Kiltir, nou devret kekfwa pran enn ki a fer en double act Praslin, ki osi reprezant Departman Kiltir, olye annan zis Departman Touris ki regarde e fer vin Information Office, olye proaktivman ale, rode bann atou ki nou annan Praslin e fer li vin alavan.

Mon ti a profit sa lokazyon pou dir toulede MNA Praslin ek La Digue, touletrwa zot, annou zwenn sous peu.  Annou regarde, La Digue i annan Lafet ki pe regarde ki Minister i take over.  Zot, nou’n zwe avek lide ki nou devret Praslin annan e Food Fiesta ki annan lanmizik avek, akoz i a diferan ek La Digue e i a diferan avek sa ki nou fer Mahe.

Les bokou plis dimoun desann e les tou bann pti Komersan Praslin, tou bann ki annan sans fer lakwizin, vin vreman 3 zour kot dimoun i dekouver tou kalite manze posib e la se zot ki pou gid nou.  Nou pa anvi koman Minister sorti in desann Praslin dir lala ki nou pe al fer.  Me mon krwar i enportan ki Ladministrasyon Praslin e MNA Praslin i zwenn avek nou, ansanm nou a travay.  I annan bann mwan, detrwa mwan ki napa okenn aktivite ki egziste, ki lanmer pa osi move, en fason ki nou kapab vreman promouvwar sa lannen prosenn si nou zwenn ase vit.  E mon ti a envit zot 2, avek Leader Government Business pou nou zwenn vit, pou nou etablir, eski se sa ki nou oule?  eski se sa ki nou oule dan sa devlopman Creative Industry Praslin e anmenmtan, konsolid Lendistri Touris Praslin e apre i a met zot lo kart avek en levennman ki diferan.  E si nou zwe kote manze, i en levennman ki deza reserse koman bann levennman dan marketing Lendistri Touris.  Mersi Mr Speaker.

MR SPEAKER

Bon, nou’n ariv alafen Statement e bann kestyon.  Nou pou adjourn ziska 2er.  E mon oule enform le 2 Leaders ki nou annan ABC 11.30.

 

(LUNCH)

 

MR DEPUTY SPEAKER

Bon, bonn apremidi tou Manm Onorab e tou lezot dimoun ki la dan Chamber avek nou.  Nou a kontinnyen nou travay pou apremidi e pou komanse nou annan 2 Bills ki nou bezwen fer First Reading.  Sa se, Financial Leasing Bill, 2013 e Industrial Estates Authority Bill, 2013 e mon ava envit Clerk pou fer First Reading.

 

THE CLERK

This Act may be cited as the Financial Leasing Act, 2013.

This Act may be cited as the Industrial Estates Authority Act, 2013.

 

MR DEPUTY SPEAKER

Ok, nou a pran nou lot Mosyon lo Order Paper e sa se pou nou aprouv en Konvansyon e sa pou ganny prezante par Onorab Marie-Antoinette Rose, Lider Zafer Gouvernman.  E mon a envit Onorab Rose pou fer son prezantasyon.

 

HON MARIE-ANTOINETTE ROSE

Mersi Mr Deputy.  Mr Deputy, apremidi nou biznes se pou nou ansanm tonm dakor si nou pou aprouv The Maritime Convention 2006, ki en Konvansyon dan ki Sesel i parti prenan.  I en fairly resent Convention, me enn ki’n vin resaman tre, tre enportan pou Sesel an vi partisipasyon Sesel e bann bato ki anvol paviyon Sesel e bann maren Seselwa an gran nonm lo bann larout enternasyonal.

Parey ou konnen Mr Deputy, dan sa bann dernyen mwan ki’n pase, Sesel pe koz en kantite lo Blue Economy, Sesel i en leader dan sa demars pou nou eksplwat nou resours lanmer, soumaren me osi lo lanmer.  E sa i enkli, ler nou koz lo Blue Economy, i enkli larout, bann larout maritime e bann larout enportan dan ki Sesel i form parti.  E parey nou tou nou konnen, isi nou annan ansemoman, en kantite maren Seselwa ki pe travay lo plizyer bato etranze.  Me osi lo nou bann tankers ki fer larout toultour lemonn.  Nou osi pe regard dan eksplor anba konsept Blue Economy, nou pe eksplor nenport kwa, nenport ki posibilite pou nou eksplwat nou lanmer e annan bann zouti neseser tel parey bann bato e bann maren Seselwa pou eksplwat Blue Economy.

Alors dan sa moman kot Sesel pe lead the concept of Blue Economy, the Maritime Labour Convention, i enn ki Sesel e mon pe demann Lasanble pou siporte, akoz i ed nou pou etablir bann standar e bann norm enternasyonal ki allow Sesel pou partisip pli aktivman e annan en legitimate drwa pou navig bann lanmer e donn bann maren Seselwa rekonesans pou kapab navig bann lanmer.  E sa i rezon akoz ozordi, plis ki yer, i enportan pou Sesel vin parti prenan sa Konvansyon.

Mr Deputy, sa Konvansyon i annan bann Regulations and Codes e anba sa bann Regulations and Codes, ki tou bann dimoun ki parti prenan sa Konvansyon bezwen swiv, i annan ki apel minimum requirements for seafarers to work on a ship. Parey ou konnen, ler ou travay lo en bato, i pa parey ler ou travay ater.  I bann kondisyon tre strik, tre spesifik.  En bato i en lespas tre limite, alors en lot nouvo kalite disiplin i antre ler ou travay lo en bato.

Alors i bezwen annan bann minimum requirements ler ou ater par egzanp, si ou en travayer ou swaf, ou bezwen enpe delo ou kapab osi konnen kot ou pou ganny delo si pou landrwa travay pa donn ou delo.  Me ler ou en maren par egzanp ou lo lanmer, ou anplwayer i bezwen fer sir ki i annan bann keksoz minim ki i pe provide ou avek koman en maren.  En landrwa reste konvenab, par egzanp.  Sifizaman repa e repa nitritif, i pa kapab pe donn ou dipen ek delo toulezour.  I bezwen annan ase delo, i bezwen annan lezot fasilite ki fer sir ki ou pe viv akoz ou landrwa travay i osi ou landrwa viv ler ou lo en bato, alors i bezwen annan minimum requirements.    Sa i osi enkli bann minimum requirements ki sa seafarer li menm i bezwen annan, serten kalifikasyon, serten leksperyans, serten kod kondwit ki i bezwen annan enn fwa ki i dakor pou antre, mont lo en bato e komans travay lo en bato.  Travay lo bato parfwa pour mwan, plizyer mwan lo lanmer, sa ki ou zwenn later, alors i annan en kod kondwit tre strik e sa i trouve anba Title 1 anba sa Konvansyon.

Mr Deputy, anba Title 2, i annan bann Conditions of Employment, zot lanplwa i tre, tre spesifik parey in ganny dir, alors Title 2 i strikteman koz lo bann Conditions of Employment pou bann maren e la lanfaz i bezwen ganny mete lo bann maren Seselwa.  Mon krwar i enportan ki nou koz en kantite lo bann maren Seselwa ki souvandfwa zot dir ki zot pa ganny menm tretman avek bann maren, avek menm kalifikasyon ki etranze.  Mon krwar sa Konvansyon i ava en premye pa pou fer sir ki nou bann maren, oubyen bann maren aspiran, bann ki anvi vin maren, i vwar en larout oubyen en laport ouver pou zot kapab zwenn en lanplwa, me osi zwenn en lanplwa ki conducive, ki konvenab.

Ler ou en maren ou kit ou fanmiy pou plizyer mwan, parfwa zot dir menm zot napa en fanmiy akoz zot ale e zot pa konnen ki arive Mahe deryer, so, i annan en kantite kondisyon ki restrik en lavi, sa ki nou apel en lavi normal avek en maren.  Alors Title 2 i fer sir ki bann Conditions of Employment i soutenab e i an lakor avek bann Conditions of Employment of ILO.

Mr Deputy, Title 3 i koz lo accommodation, recreational facilities, food and catering, ki mon’n koz en pti git lo la.  Title 4 i koz lo health protection, medical care, Welfare and Social Security protection.  Nou konnen par egzanp, dan nou lanmer, dan bann lannen ki’n pase in annan en kantite problenm an sa ki konsern security, security protection, the threat of piracy, me parfwa osi zot navig bann lanmer ki annan bann war zone, bann conflict areas, zot navig bann lanmer kot the threat of security i high.  Parfwa security i osi vedir security from, proteksyon kot okenn maladi ki kapab antre lo bato.  Zot kapab pe navig dan en landrwa oubyen al dan en landrwa kot i annan the threat of contagious diseases. Zot kapab antre dan bann landrwa kot i bann, very stormy area, zot pas atraver en storm eksetera.  E nou isi Mahe nou konenn ler vannswet i soufle, nou antre dan nou lakaz.  Me pou sa bann maren i ase difisil e they are exposed to the threats of the world basically. Zot lavi i ganny ekspoz avek nenport ki mesas mondyal, zot ganny ekspoze akoz zot al dan neport ki por, zot voyaz por a por e sa i rezon akoz Title 4 i fer bann kondisyon tre spesifik an sa ki konsern zot lasante.

Mon ti a kontan koz en pti gin lo recreational facilities Mr Deputy, akoz lo en bato ou selman kapab bouz from A to Z e en kantite maren i dir be, zot pa ganny sans bouze, ou konnen si nou anvi fer legzersis, nou konnen kote, me la mon ti a kontan met en kantite lanfaz pou met fasilite abor bann bato pou nou bann maren pou fer sir ki zot kapab bouze, zot annan enough exercise akoz en mwan lo lanmer si ou pe sorti from A to Z lo en bato, i so long i bezwen annan fasilite gym, en pti fasilite legzersis pou bouze, zisteman pou proteksyon zot lasante.

Apre Title 4 me Deputy i koz en kantite lo compliance and enforcement. Nou kapab annan nou en bon Konvansyon ki fantastik, me compliance i enportan.  Isi Sesel mon’n aprann ki tou demars pe ganny fer pour ki nou bann Lalwa Sesel e bann enforcement officers e bann enforcement facilities i anplas pou kapab fer sir ki bann bato ki flag Seychelles flag, me bann bato ki registered Sesel e bann bato ki pou Sesel, ki pou Gouvernman Sesel parey nou bann tankers, i anlinny avek sa Konvansyon e pe comply avek sa Konvansyon.  Enn fwa ki zot fer sa, zot larout, zot pasaz antravaer lemonn i vin bokou, bokou pli fasil.  Depans mwens larzan koman en pei, nou depans mwens larzan koman lasirans pou asir the capital e the human capital lo sa bann bato.

Mr Deputy, me osi sa i fer ki Sesel e osi por Victoria i annan li, i devret annan li kapasite pou fer sir ki lezot bato ki parti prenan sa Konvansyon, ki for parti sa Konvansyon, ler zot pe antre dan nou por zot pe comply avek enforcement, zot pe comply avek bann regulations ki sa Konvansyon i demande.          Mon krwar nou pa pe mal fer, me sirtou an sa ki konsern health protection, medical care mon krwar i enportan ki nou kontinnyelman travay pou protez nou por, bann point of entry, i tre, tre sansib.  Mon krwar security of the points of entry i tre enportan pou e n pei parey Sesel alors menm si nou pe koz lo Maritime Labour Convention e ki protez an gran parti bann travayer lo bann bato.  E la nou pe koz maren, nou pa pe koz peser Mr Deputy, nou pe koz maren ki fer bann larout enternasyonal, nou osi Sesel enn fwa ki sa Konvansyon i ganny ratifye, nou bezwen met nou azour pou kapab resevwar e kapab annan sa kapasite pou inspect bann lezot bato ki travers nou lanmer e ki vin repoz isi Sesel.

I en bon Lalwa pour nou bann maren Seselwa, me i osi bann bon regilasyon pou nou isi Sesel fer sir e dir avek lemonn be bon Sesel in form parti sa Konvansyon, in ratifye sa Konvansyon e nou pare nou osi to become, to increase compliance and enforcement. Avek sa Mr Deputy, sa Konvansyon in deza ganny sirkile avek tou bann Manm, tou bann detay, bann pli pti detay.  I en dokiman ase detaye, byen elarzi, tre sere an sa ki konsern bann Regulations. I fer sa akoz i desot zirisdiksyon, parey nou konnen ler en bato i bouze from A to Z, i desot direstriksyon e parfwa dan bann landrwa kot sa ki nou apel no man’s land, bann high seas e napa direstriksyon alors UN Conventions, bann International Conventions i bezwen kick in pou fer sir menm si zot pa tonm dan en zirisdiksyon, en landrwa ziridik.  Zot tonm kantmenm anba en Konvansyon e zot tonm anba kantmenm Lalwa ki Gouvern lafason ki sa bann bato e son bann maren i ganny antretenir.  Avek sa Mr Deputy, mon pou demann Lasanble pou siport sa Mosyon ki devan nou.  Mersi.

 

MR DEPUTY SPEAKER

Bon, Mosyon in ganny prezante, okenn Manm ki le segonde?  Onorab Fideria.

 

HON EMMANUEL FIDERIA

Mr Deputy, mon oule segonn sa Mosyon e mon oule dir de pti mo.

MR DEPUTY SPEAKER

Proceed.

HON EMMANUEL FIDERIA

Mersi Mr Deputy.  Mr Deputy, Mosyon devan nou Lasanble, i lo size Maritime Labour Convention, en Konvansyon donnen son lenportans e dimansyon enternasyonal in deza fini ganny ratifye par plizyer pei.

Mon santi mwan tre privilizye pou form parti sa Lasanble dan Repiblik Sesel ki pe al aport son sipor total, enkondisyonnel lo konteni bann provizyon sa Konvansyon.  Tout an gardan nou lentegrite teritoryal ek lendepandans koman en leta souvren.

Egalman Mr Deputy, dan konzanti aktyel, mon napa okenn dout ki i annan lenportans kapital pou Sesel, lemonn, ler nou bann Manm Parlman Seselwa, i pran linisyativ e sezi loportinite pou enterveni lo en Mosyon ki son konteni i annan pou fer avek kondisyon travay oubyen tretman bann maren lo nenport ki kalite bato ki travers bann losean.  Avek bi pou konekte bann pei, konekte bann pep, diferan nasyonalite e pli enportan, asiste oubyen partisipe, malgre lo baz komersyal me anfen, satisfer bezwen plizyer pei, donnen zot pozisyon zeografik.

Dan ka spesifik Sesel, i enportan note ki anviron 90 poursan marsandiz oubyen komodite ki nou konsonmen, i ganny transporte par bato ki navig pli gran zistans dan losean avan ariv dan por Victoria.  Parey in le ka pandan plizyer syek e ziska ozordi, mon konvenki ki lemonn pou kontinnyen depan lo transportasyon kargo dan bato pou satisfer garanti legzistans oubyen sirvivans osi byen ki siport zefor devlopman plizyer sivilizasyon.

Mr Deputy, efektivman pa bezwen ou en gran koneser lo kestyon navigasyon pou kapab konpran idealman apresye, ki zafer travay lo bato pe navige pou plizyer zour lo lanmer, i pa neseserman en metye ki fasil.  Alor, pa nenport ki zonm, fanm ki kontan pran en metye pou li vin en maren oubyen bann seafarers parey dan Konvansyon i definir.

Lo mon kot mon satisfe, ki nou tou ki isi dan sa Lasanble nou apresye ki travay en seafarer, i pa en metye fasil.  Egalman plizyer lezot metye isi lo later i pa fasil.  Me ler ou lo lanmer i totalman en diferan lanvironman, alors sirkonstans oubyen kondisyon i diferan.         Anfen sak zonm, fanm i lib pou swazir kalite travay ki li i anvi fer, me nou ava tonm dakor ki travay en maren i neseserman envok en kantite sakrifis lo nivo endividyel oubyen lo nivo fanmiy.

Ozordi Mr Deputy, dan venteentyenm syek, lo lanmer i ranpli avek plizyer fenomenn ou defi,parey fenomenn natirel, ki dan plizyer sirkonstans i met lavi bann maren ekspoze avek plizyer danze e alafwa dan gran risk.  Ozordi plis ki zanmen, i annan sa fenomenn pirat, plizyer nou bann maren zot in bezwen vwar zot pe viv an kaptivite.  I osi dan serten sirkonstans kot serten sa bann maren oubyen seafarers, i vwar zot kot zot napa swa, me zis satisfer zot lekor pou fer en karyer travay lo bann bato ki pa satisfer bann standar enternasyonal.

Mr Deputy, Mosyon devan nou Lasanble pe demande ki nou aprouv sa Konvansyon, Maritime Labour Convention 2006, swa nou apel MLC 2006. Mr Deputy Speaker, Sesel ti vin en Manm Lorganizasyon Enternasyonal Travay, koni koman ILO an 1978.  Sa Lorganizasyon in ankomansyon misyon zeneral pou protez drwa bann travayer partou dan lemonn.

Avek tou lasazes nou leadership, atraver bann lannen ki’n pase, depi 64 ziska ozordi, sa parti ki mon reprezante isi dan sa Lasanble, in toultan met byennet zonm o sant tou bann desizyon ki bezwen ganny pran dan prosesis devlopman e konstriksyon en nouvo Sesel.  Mr Deputy Speaker, bann isorien, bann realis me pa bann distoryonnis, byensir fodre zanmen obliye e ekrir, note, ki dan listwar lalit travayer Seselwa se sa parti ki mon reprezante isi ozordi ki ti fer le 1 Me ganny deklare koman en konze piblik pou tou travayer Seselwa.

 

(Applause)

 

HON EMMANUEL FIDERIA

Akoz depi byen lontan mon rekonnet e atas en lenportans kapital e zordi plis ki zanmen, nou apresye e aport nou konensans enkontestab, vizavi rol ki travayer Seselwa pe zwe pou batir en nouvo Sesel.

Mr Deputy, i lo rikord ki ziska ozordi Sesel in ratifye 31 Konvansyon ILO e tou sa bann Konvansyon, i annan pou fer avek amelyorasyon kondisyon bann travayer Seselwa.  Mr Deputy, ozordi sa Konvansyon ki devan nou Lasanble, pe tous en group travayer enportan.  Sa, se bann maren swa bann seafarers, en group dimoun tre enportan.  Mr Deputy, sa Konvansyon dapre ILO, pe tous 1.5 milyon sa kategori travayer ki permet bann bato tenir stab lo lanmer dan bann sitiasyon difisil e ki fer lavi bann maren pa an sekirite.

Sa Konvansyon devan nou Lasanble pe demann nou pou ratifye, pe adres plizyer defi relye avek difikilte ek problenm lo bann maren e mon kontan pou vwar sa Konvansyon pe adres bann problenm e nou koman politisyen isi lo rikord, ki atraver bann lannen ki’n pase, plizyer bann maren dan nou distrik respektiv in sinyal nou latansyon lo plizyer zot bann konsern.

Mr Deputy, konteni Konvansyon i adres bann problenm lo kestyon kontra.  Klerman, kondisyon sa bann seafarers kot i konsern lakantite letan ki zot travay.  Mon kontan pou vwar ladan kot i spesifye ki en maren dan 24erdtan, i pa devret travay plis ki 8erdtan.  Konteni Konvansyon i fer, kler ki si i travay plis ki sa i devret ganny konte koman overtime. Kantite letan ki sa maren i devret gannyen pou li repoze, osi byen ki letan lwazir, osi byen ki letan rekreasyonnel, i byen vizib dan konteni sa Konvansyon.

Mr Deputy, konteni Konvansyon i adres kalite bato, kondisyon fizik ki fer konpran ki si apre en seri lenspeksyon in ganny egzekite e bann dimoun konsernen i satisfer zot lekor ki bato pa dan en bon kondisyon, napa sertifika ki pou ganny donnen pou otoriz oken bato pou navige.

Konteni Konvansyon osi i adres en lot size fondamantal, sa se swen lasante ki sa maren i devret gannyen ler i lo lanmer.  I fer tre kler ki fodre sa maren i ganny en sertifika sorti kote en dokter ki sertifye ki i an bonn sante, avan i ganny en kontra pou li komans travay lo bato.

Mr Deputy, anplis konteni Konvansyon i osi koz lo kalite e standar manze ki sa bann maren i devret gannyen.  Dan plizyer lesanz avek bann maren, mon’n ganny les konpran, ki lo serten bato kantite fwa, bokou maren i soufer avek mankman manze oubyen mankman swen medikal.  E dan plizyer sirkonstans zot fer fas avek problenm serye ler pou ganny zot lapey.

Mr Deputy Speaker, Sesel nou en pei kot en gran poursantaz nou resours i sorti da lanmer.  Ozordi Sesel pe sanpyonn konsept Lor Ble, egalman i annan bokou leko deskisyon e deba isi, ki Sesel pa devret envestir dan son prob bato lapes, me sa i en lot deba dan limenm.

Mr Deputy, dan le moman ki nou pe koz lo kestyon bato avek maren, anpasan, mon note ki Sesel anfas avek bann defi devlopman, anfas avek bann defi pou diversifye nou lekonomi, egalman avek nesesite pou nou ogmant nou sours reveni an deviz etranzer, anfas avek defi pou kontinnyen satisfer nou pep e anfen anfas avek nesesite absoli pou kre en lekonomi solid pou Sesel, in ouver loportinite pou tou bann zenn pou travay koman maren lo nou bann tanker.  Sesel in envestir plizyer milyon Dolar dan bann tanker.

Mon note an pasan ki lekonomi mondyal i pa statik, lekonomi mondyal i ranpli avek defi malgre tou Sesel pe kontinnyen serse, touzour rode bann meyer fason pou soutenir nou lenvestisman ki nou’n fer.  Sepandan ozordi, ki nou pe koz lo kestyon maren, bato, mon panse ki en lot loportinite pou demande, konbyen nou bann zenn ki pe sezi e ganny loprtinite pou travay lo nou bann tanker.  Egalman pou bann ki’n sezi ek en loportinite, mon panse i egalman enportan pou demande ki zot bann kondisyon ki kapab ganny fer pou kontinnyen donn nou bann zenn Seselwa meyer tretman e kondisyon posib lo nou bann tanker, ki a motiv plis zenn Seselwa pou deside pran en karyer lo lanmer par lefe, ki zot a satifer zot lekor ki kondisyon i favorab.

Mr Deputy, apre tou sa lenvestisman ki nou’n fer koman en pei, dan tanker, mon santi ki moman in arive pou nou revwar nou plan progranm lantrennman pou Kaptenn e lezot zofisye lo tou nivo pou nou administre tou nou bann tanker. Dapre resers, mon’n ariv lo konklizyon ki nou napa bokou Seselwa lo bann tanker, mon lapel ozordi pou tou lazenes Seselwa.

Lazenes Seselwa loportinite i la, sakenn devan nou laport, lazenes study, study, don’t study hard, but study smart.  Leve, debout lazenes Seselwa, loportinite i la, sezi bann loportinite.  Pran nou letid serye, reste fokalize pou aprann smart pou en karyer ki ava ede liber depandans Sesel lo lakantite travayer etranze.

Sesel i bezwen ou, Sesel i apel ou, Sesel pou kontinnyen apel ou.  Annou pa koz zis lo etranze, annou pa koz zis lo repran nou pei, note e apresye ki nou pou selman kapab repran kontrol total lo nou pei ler nou devlop nou kapasite e potansyel lo tou nivo ki elimin depandans Sesel dan tou son dimansyon e tou nivo.

 

(Applause)

 

HON EMMANUEL FIDERIA

Etan ki konsern devlopman e konstriksyon en nasyon lib e fyer.  Mon reve viv e vwar sa zour arive tout an tenan kont e zanmen vwar ki Sesel i kapab viv an izolasyon avek larestan pei e nasyon.  Dan sa lemonn ki’n fini vin en vilaz global kot  i konkretize atraver en prensip fondamantal dan devlopman, ki envok nesesite korporasyon avek kolaborasyon an tou pei, pe enport, si ou apel ou lekor gran, ou pti.

Mr Deputy Speaker, ozordi i enportan note, ki dapre sa Konvansyon nou devret met nou annord e mon kontan pou aprann ki tou nou bann tanker i satisfer tou bann rekizit oubyen kondisyon, ki demande anba sa Konvansyon.  Mon reste konvenki ki nou kapab e devret al pli lwen, etidye bann lezot fakter seryezman ki ava anmenn plis lefikasite, prodiktivite e efektivite dan loperasyon zeneral nou bann tanker.

Mr Deputy, i dan sa konteks mon oule sezi sa loportinite pou rekomande ki Lazans ki ansarz pou enplimant sa Konvansyon, SMSA, i fer sir ki nou bann Seselwa ki maren lo nou bann bato sirtou bann bato tonnye, bann tanker ki zot byen ganny gete.  Zot kondisyon lapey ek allowance ler zot pe vin konze oubyen ler zot pe retourn travay.

2, menm si ler zot kontra in terminen, zot annan swa pou retour lo sa bato ou non, mon rekomande ki nou bann maren Seselwa ki kalifye, i ganny plis priyorite pou travay lo nou bann tanker. 3, mon rekomande ki dan pli kourt letan posib, nou fer demars neseser pou asire ki tou nou bann maren ki lo bato, zot ganny kouver anba bann Konvansyon Enternasyonal e par laswit, zot kondisyon zeneral i ganny amelyore.

Pou terminen Mr Deputy, bann Lenstitisyon ki egziste avek bi, pou kontinnyen asire ki tou travayer, pe enport nasyonalite oubyen pozisyon ekonomik, ki bann provizyon sa Konvansyon i kontinnyen ganny amelyore pou kre en lanvironnman pli favorab pou tou bann zonm, fanm ki deside pourswiv en karyer lo lanmer.

Ki tou bann zonm, fanm i kontinnyen ganny bon proteksyon ler zot in deside fer sa louvraz nob.  Lemonn i depan en kantite lo zot volonte, kouraz e determinasyon pou garanti son legzistans e kontinite.  E nou lo kote mazorite dan sa Lasanble nou dir avek bann maren, nou la pou zot, ki Bondye i kontinnyen donn zot tou proteksyon posib.  Mr Deputy, mon remersi ou, mon pou aport tou mon spor pou sa Mosyon.  Mersi.

 

(Applause)

 

MR DEPUTY SPEAKER

Bon, mon oule zis met an gard bann Manm ki annou pa sot balizaz ek sa zafer repran nou pei.  Onorab Arnephy.

 

HON BERNARD ARNEPHY

Mersi Mr Deputy, bonn apremidi tou bann Manm.  Mr Deputy, lobzektif sa Mosyon pou mwan i enn ki kler, se ki i pe permet nou debat lo sa Konvansyon pou son ratifikasyon avek bi amelyor kondisyon travay bann seafarers. Konsolid tou bann standar lanplwa maritim e devlop en sistenm pli konpreansiv pou amelyor standar atraver training apropriye pou nou bann seafarers.

Mr Deputy, vi ki nou pa ankor ratifye sa Konvansyon, i kapab ki dan serten lenstans nou bann bato e la mon pe koz prensipalman lo nou bann tankers, zot vwar zot dan serten difikilte an term konformite avek bann norm IMO.

Mr Deputy, enn bann benefis prensipal sa MLC, se ki i pe ede pou uphold rights bann seafarers pour ki zot ganny bann pli bon kondisyon an term tretman dan travay e an term lanplwa, an zeneral.  I kouver 5 gran lalinny parey in ganny fer resorti, me mwan mon lentervanyon pou focus enn pti pe lo traning avek recruitment ki an gran parti i annan pou fer avek sa title ki koz lo compliance.

Mon pou osi adres sa issue skills development e loportinite lanplwa sirtou pou nou bann Seselwa abor nou bann prop tankers. An dizan sa Mr Deputy, permet mwan koz en pti pe lo krwa ki Maritime Training Centre, MTC, pe fer pou rann son bann course pli relevan avek legzizans sekter maritim ozordi e kot sa i a evantyelman permet nou Seselwa sirtou nou bann zenn ganny loportinite pli ouver dan sa sekter.

MTC pe devlop bann courses lo standar IMO e pe osi travay an etrwat kolaborasyon avek Seychelles Maritime Safety Authority, SMSA, pou fer sir ki nou bann maren e lezot seafarers ki zot aktivite toulezour i relye avek lanmer, i meet bann norm e bann standar enternasyonal.

Sesel pe fer tou demars e pe target vin lo IMO white list, bann tel demars pou permet plis Seselwa join nou bann tankers e bann lezot vessels ki fer bann larout enternasyonal.  Sa pou byensir anmenn plis debousman pou nou bann zenn ki anvi venture dan lemonn maritim, ki anmenn avek li bokou loportinite sirtou la ki nou pe koz lo devlopman nou Lekonomi Ble.

Ozordi par egzanp, SeyPec i vwar li kwense pou anploy nou Seselwa lo son bann tankers, akoz zot mank serten requirements ki standar enternasyonal i rekomande.  Aktyelman, nou bann maren pe al fer serten training debaz Sid Afrik ki mon panse nou annan kapasite pou ofer bann tel training isi lokalman.  Avek abnn kour ki MTC in komans ofer e pe mazin ofer lannen prosenn, nou bann zenn pou kapab sorti direk dan Lenstitisyon e al direk lo nou bann tankers e bann lezot pli gro vessels ki fer bann larout enternasyonal.

Mr Deputy, sitiasyon ozordi i fer ki nou napa bokou Seselwa ki Kaptenn sirtou lo bann tankers, menm bann Chief Officers, menm bann Sef Enzenyer e tousala nou ankor tre limite avek.  Par ratifye sa Konvansyon, sa pou en pwen depar pou ouver laport pou nou bann zenn kapab benefisye atraver training apropriye e sertifikasyon apropriye ki ganny rekonnet lo nivo enternasyonal.

Sa pou osi permet nou vin on par avek International Standards for Organization Certification, ISO Certification pou garanti bon quality management system dan loperasyon maritim.  SMSA, i osi bezwen met li azour avek tou bann lezot Lezislasyon tel ki son Shipping Act, pou li osi meet IMO white list standards. Tou sa demars ki monn mansyonnen i avek bi donn training apropriye ki a anretour donn plis loportinite nou Seselwa, sirtou bann zenn ki anvi pran navigasyon koman en karyer pou travay lo nou bann tankers e bann lezot vessels.

Training ki MTC pe donnen aktyelman, i selman permet en endividi pran en pozisyon sa ki nou apel rating obor en tanker par egzanp e sa i premye kategori travay avan ki i ganny sertifye koman en able seaman.  I bon note i bann training lokal ki MTC pe provide, i vreman alaoter, me i demann sa international certification, savedir ganny rekonnet par IMO.

Zis pou donn legzanp, courses dan fire prevention and fire fighting, first aid, personal survival techniques e personal safety and social responsibility i bann courses mandatwar ki tou maren i bezwen swiv si zot anvi navig dan delo enternasyonal.  Nou bann Seselwa ki lo tankers, i bezwen al fer zot courses swa, Ireland ouswa Sid Afrik pou konplimant sa ki zot gannyen lokalman, zisteman pou kapab fer bann larout enternasyonal.

Mr Deputy, i enteresan pou note ki as of Febuary next year, MTC pou komans ofer course cadet ki pou en course 4an e sa pou en full time course. Sa pou permet bann graduates ganny anploye direkteman koman bann second mate, lo nou bann tankers pou sa ki vreman motive e enterese.

MTC pe osi travay an etrwat kolaborasyon avek Colombo International Nautical and Engineering Collage, CINEC, ki en private kolez an Sri Lanka e ki’n osi ganny University Status Recognition. Aktyelman, i annan en profeser ki ed MTC pou kapab run serten courses next year pou ganny accreditated par sa kolez.  Pandan ki nou finaliz tou sa bann demars pou vin lo IMO white list, serten new courses ki pou ganny ofer par MTC, pou ganny akreditasyon CINEC.

So far i annan en gran lenter parmi bann zenn MTC pou swiv sa bann courses. Avek tou sa devlopman ki pou arive dan progranm training MTC, plis etidyan avek A levels pou ganny ankouraze pou zwenn training cadet, kot evantyelman apre 3an zot kapab vin en Second Mate, plitar en Chief Mate e evantyelman vin en kaptenn.  Akyelman, i annan serten past MTC students ki pe travay lo nou bann tankers, en bon nonm zot pe fer zot attachment lo nou pli pti tanker, MT Seychelles Paradies.  Nou bann zenn i anan en kantite abilite, nou bezwen asire ki nou annan training ki meet zot lekspektasyon.

Mr Deputy, ozordi i bon note ki nou annan en past MTC student e sa se Ms Corney Anthony ki pe study dan en kolez naval pli prestizye Langleter, sir tou i al dapre plan ler i pou termin son letid, i pou premye fanm Seselwa ki pou travay koman en leading figure dan domenn navigasyon avek Sesychelles cost guard e pou nou, sa i en gro achievements.

Deplizanpli, i annan bann incentives an term loportinite ki pe atrakte plis zenn fiy pou zwenn domenn maritim.  En move dan bon direksyon pou asir plis gender equity dan sa field. Mr Deputy, mon konvenki ki par ratifye sa Konvansyon, nou pou pe definitivman set sa platform pou nou bann zenn vwar plis posibilite, progresyon ler zot deisde fer en karyer dan domenn maritim.

Nou Gouvernman, mon asire i pare pou aport tou son sipor pou nou bann lenstitisyon ki annan pou fer avek training maritim.

Mr Deputy, Gouvernman Parti Lepep in envestir en kantite dan formasyon spesyalize, sirtou pou nou bann zenn.  Ozordi nou annan en kantite zenn profesyonnel ki pe okip bann pozisyon klre dan nou pei.  Ki swa dan Gouvernman, ou dan sekter prive.  Nou bezwen alors kontinnyen envestir ankor bokou plis resours dan bann progranm edikasyonnel e enstitisyonnel, parey MTC e donn tou sa sipor neseser pou annan bann formater e ankadrer ki fully qualified e kot an retour, zot pli byen plase pou form nou bann zenn ki seryezman anvi pran en karyer dan domenn maritim.

La byensir, mon pe koz lo capacity building pou bann lecturers, pou met zot pli azour avek modernite dan domenn maritim.  Devlopman Blue Economy Mr Deputy, i depan lo kontribisyon bann bon ankadrer pou fer bann zennn vwar sa kantiTe prospect ki annan dan en tel field.

Mr Deputy, mon panse ki lobzektif prensipal bann tel demars, se ki nou kapab devlop worthy and productive men and women, atraver quality training. Sekter prive i osi annan en rol primordyal pou zwe dan sa demars, sirtou an sa ki konsern leksperyans pratik ki bann etidyan i bezwen pas atraver diran zot formasyon.  Par ratifye sa Konvansyon, sa pe donn nou en golden opportunity to make things happened. Mr Deputy, mon pou aport mon sipor pou sa Mosyon, mon remersi ou.

 

MR DEPUTY SPEAKER

Onorab Vel.  Switch off.

 

HON JENIFFER VEL

Mersi Mr Deputy.  Mr Deputy, i en koensidans ki ozordi nou Lasanble Nasyonal nou pe debat lo size travay bann maren anmenmtan ki devlopman nou pei pe pran en nouvo lelan avek lanfaz ki nou pe mete lo Lekonomi Ble.  Alor se dan sa konteks, sa nouvo azanda Lekonomi Ble ki nou devret sitye deba lo sa Mosyon ki devan nou e ki port lo ratifikasyon Maritime Labour Convention, 2006, oubyen Konvansyon Travay Maritim.

Mr Deputy, pou nou sezi lenportans sa Konvansyon nou bezwen realiz lenportans losean dan lemonn e konsept Lekonomi Ble e i donn nou mwayen fer sa.  Pli gran parti planet later i ganny konstitiye par losean.  Losean i form trwakar sipersifi nou planet, tandis ki later i form selman enkar.

Menm si dimoun i viv lo later e pa dan lanmer, en gran poursantaz limanite i reste dan bann landrwa lakot e bann zil ki zot lekonomi i depan lo losean.  Losean i osi posed bokou larises parey bann resours mineral e delwil e bann seafood enkli pwason ki nou apel lor ble.  Lezot larises ki lie avek losean, se lendistri tourizm ki depan lo latraksyon lans ek lanmer.

Annefe tou pei lemonn i konekte avek losean, menm bann pei land-locked ki antyerman ganny antoure par lezot pei, i konekte avek losean atraver bann larivyer e osi bann por, bann pei zalantour ki zot depan lo la pou zot komers enternasyonal.  Losean i ranpli avek bann sea roots, ki ganny servi par bann bato ki vwayaz antre bann pei e transport marsandiz e imen.  Transpor maritim i en sekter kle nou lekonomi mandyal e lanplwa ki asosye avek sa sekter, i konstitye lanplwa maritim ki size sa Konvansyon ki devan nou.

Mr Deputy, lanplwa maritim, i annan son partikilyarite.  Bann dimoun ki travay lo lanmer, i premyerman annan sa ki nou apel sea legs, ki vedir kapasite pou tenir e manevre pou tenir dan sa lanvironman diferan e souvan difisil.  Osi lefe ki zot pa avek zot fanmiy e zanmi e parfwa lwen menm avek zot pei, bann maren i santi zot tousel e sa i fer zot lanvironman travay ki deza difisil, vin ankor pli difisil.  Sa Konvansyon lo Maritime Labour, i en dokiman International Labour Organization, ILO, sa Lorganizasyon Nasyon Ini ki travay pou promot dignite e lenter travayer, in resaman vin avek en konsept decent work ki vedir ki travayer i ganny ofer tou kondisyon travay enkli saler ki respekte zot dignite.

Mr Deputy, atraver sa politik diplomasi aktiv, Sesel pe promot konsep Lekonomi Ble.  Annefe, nou byen plase pou fer sa akoz nou en letan maritim.  Vi ki nou lespas lanmer i bokou pli vast ki nou sipersifi later.  Koman enn sa pei lemonn ki pe promot konsept Lekonomi Ble e koman en pei ki’n batir son prosperite otour konsep human centred development, i toutafe lozik ki Sesel i ratifye Konvansyon lo Maritime Labour, vi ki sa Konvansyon i lie sa 2 konsenp Lekonomi Ble e devlopman imen.

Mr Deputy, konsept lekonomi ble i baze lo prensip ki losean i sours larises e pou nou eksplwat sa larises nou bezwen mendev e sa mendev i Maritime Labour ki esansyelman kouver anba sa Konvansyon ki nou pe koz lo la.  Seselwa i en nasyon ki kontan lanmer, lanmer i form parti nou idantite.

Serten Seselwa parey bann Pralinwa e bann Digwa zot menm fyer pou dir ki zot sot kannal pou vin Mahe.  Lenfliyans lanmer lo nou lidantite, i ganny reflekte par plizyer fakter.  Par egzanp, nou en nasyon ki konsonm plis pwason per capita dan lemonn.  Sa lenportans losean dan nou lekonomi e son lenfliyans dan nou idantite, i fer ki bokou Seselwa i swazir travay lo lanmer koman en karyer.  Par ratifye sa Konvansyon, nou ava pe anvoy en measaz kler pou bann Seselwa ki deside fae sa swa.  Nou ava pe dir zot ki nou rekonnet sakrifis ki zot fer e nou montre nou rekonesans par ofer sekirite e bann kondisyon ki pou amelyor zot kondisyon travay e ensi ki zot kondisyon lavi.

Mr Deputy, lo sa pwen mon ti a kontan koz lo laflot tenk Seypec.  Tou Seselwa i fyer ki nou annan en laflot tenk ki pe navig dan bann losean atraver lemonn e sa bann Seselwa ki travay lo sa bann tenk e zot fanmiy ankor i pli fyer.

Zisteman, dan lespri sa Konvansyon ki devan nou, Lotorite konsernen i merit get dan kondisyon sa bann Seselwa obor sa bann tenk Seypec e fer zot osi fyer kondisyon dan ki zot pe travay.  Enn bann fakter ki merit ganny get ladan se saler, sirtou disparite ant saler bann Seselwa e bann etranze.  Dapre konpran, en Seselwa ki annan menm kalifikasyon e tenir menm post ki en etranze i tous en saler ki ziska 25 poursan mwens ki sa etranze.  Sa pa kapab kontinnyen anba sa Konvansyon ki nou pe al ratifye.

Mon swete e dan menm loptik Mr Deputy, mon swete ki lekol maritim ki aprezan annan en partenarya avek en sant sertife Sri Lanka, i sezi loportinite ki ratifikasyon sa Konvansyon i ofer par ogmant nivo konpetans son bann graduates anfen ki zot kapab ganny en pli bon saler.

Mr Deputy, dan sa menm lespri ki nou pe defann lentere e promot byennet bann maren atraver ratifikasyon sa Konvansyon, lo Maritime Labour e osi anlinny avek zefor ki nou pe fer pou promot konsept Lekonomi Ble, i enportan ki nou osi fer keksoz pou bann land base sea related activites. Ki vedir bann aktivite ki baze lo later me ki annan pou fer avek lanmer.  Enn sa bann aktivite se stevedoring, mon swete ki Lotorite konsernen i eksplor tou mwanyen pou amelyor kondisyon bann stevedores, ki fer ki travay dir, ki fer en travay dir e konstitiye en mayon esansyel dan Lekonomi Ble.

Mr Deputy, mon pou aret lo sa not e mon dir ki mon pou vot anfaver sa Mosyon e mon demann tou mon bann Koleg Onorab pou fer parey.  Mersi.

 

MR DEPUTY SPEAKER

Onorab Lebon.

 

HON LENNY LEBON

Mersi Deputy Speaker.  Mr Deputy Speaker, sa Konvansyon travay maritim ki devan nou Lasanble ozordi, i enn ki mon pou siporte, akoz en pti pei parey Sesel dan sa vilaz global, li osi i bezwen tir maksimonm benefis.  Ozordizour, si Sesel pe sanpyonn sa konsept Lekonomi Ble, i enportan ki nou, nou Seselwa ki pe travay lo bann bato i ganny bann benefis parey lezot etranze.  Pou mwan, konsept Lekonomi Ble, i montre ki nou pei i annan en ta loportinite pou devlop nou resours lanmer.  Mr Deputy Speaker, Sesel i annan bokou bato tanker ki bokou nou bann zenn pe travay abor.  Alors sa Konvansyon i sipoze fer sir ki zot ganny en bon deal anterm benefis.

Mon largiman lo sa Mosyon Mr Deputy, i santre lo benefis nou bann travayer ki travay obor bato, spesifikman bann tanker Seypec e osi ki benefis pei an zeneral e si nou pe ganny bon deal, ki bann bon deal nou pe gannyen atraver sa Konvansyon.  Parey tou lezot Konvansyon lanplwa, Konvansyon Travay Maritim, i annan bi prensipal pou protez travayer.

Bann lezot benefis pou travayer i enkli, sa Konvansyon i etablir bann prensip debaz e drwa fondamantal travay pou sekter maritim.  I fer kler lo bann drwa travayer abor bato e okenn rekour anka ki i annan en problenm konsernan kondisyon travay i arive.  I amelyor lafason ki bann pei i devret aplik Lalwa konsernan kondisyon travay e akomodasyon pou travay maritim e sa, i en must ki bezwen ganny anforsi.

Mr Deputy Speaker, sa Konvansyon i donn travayer dwa, savedir, nou zenn Seselwa pou kapab fer konplent abor bato e sa konplent a ganny anrezistre kot bann Lotorite konsernen ler i retour ater.  La, lanplwayer i ava oblize pou met anplas en sistenm pour ki bann travayer i kapab met sa bann konsern devan.  I osi etablir byen responsabilite met bato, anplwayer osi anba sa Konvansyon.

I egziz met bato pou ofer travayer avek akse bann fasilite medikal abor bato e osi ler zot ater parey mon bann lezot Koleg in fer resorti.  E osi i obliz met bato pou fer bann laranzman, e parey LGB in dir, akoz bato i bouz from en pwen pou en lot, so, nou bezwen annan bann fasilite rekreasyonnel pou nou bann travayer, sirtou nou bann zenn ki pe travay lo sa bato.  I osi fer provizyon pour ki bann manm lekipaz i annan drwa avek konpansasyon, an ka en aksidan travay e osi, si bato i arive i perdi ouswa i kase.

Mr Deputy Speaker, i enportan ki Sesel koman en pei ki antoure avek lanmer i osi benefisye omaksimonm dan sa bann Konvansyon ki nou pe sinnyen e nou konnen ki nou sekter maritime, atraver bann tanker Seypec, i kontribye anver nou lekonomi.

Sa Konvansyon i alors byen plase pou asiste nou pei pou agrandi nou lekonomi anprenan kont lentere bann travayer lo tanker e pou fasilit akse e biznes bann tanker dan bann por ou pei manm.  I osi anmenn bann lezot benefis pou nou pei ki enkli, sa Konvansyon i obliz bann tanker Seypec pou amelyor son bann standar minimonm lo bato e amelyor kondisyon travay pou son bann travayer.  An fezan sa, i en fason pou ankouraz e atir nou bann zenn Seselwa pou zwenn sa sekter e osi, ede dan devlopman sa lendistri.

Mr Deputy, ler Sesel i ratifye sa Konvansyon, i pe anvoy en mesaz avek lemonn pou montre kimannyer Sesel i atas lenportans avek lekonomi Ble e son bann dimoun.  Nou Seselwa ki travay dan sa sekter, i pou osi pe siport bann prensip e vizyon Lorganizasyon Enternasyonal pou Travay, setadir, asire ki tou travayer i zouir en lanplwa desan.  I pou osi fasilit rapor avek ILO akoz pou annan zis en Konvansyon pou raport lo la, olye plizyer Konvansyon Maritim.

Mr Deputy, sa Konvansyon pou asir mwens kou finansyel pou nou bann bato Seypec ler zot al dan bann por en pei manm.  Sa bann tanker pa pou ganny targete konmkwa zot sou standar.  Sa, i a fasilit zot biznes e mouvman dan por.

Mr Deputy, sa Konvansyon dan limenm pou ede devlop striktir resours imen e fasilit Lotorite SMSA, ki pou byen bezwen fer lenspeksyon abor bann bato ki vin dan por Sesel e ki ganny kouver anba sa Konvansyon.          Par ratifye sa Konvansyon Mr Deputy, nou vwar ki i anmenn benefis pou nou pei e nou bann Seselwa ki travay parey mon’n dir, obor sa tanker e petet dan lefitir, bann lezot gro bato ki nou pei i annan posibilite envestir ladan, akoz nou konnen ki par maksimiz nou resours lanmer e osi nou bann resours ki trouve anba sirfas later dan nou lanmer.  Avek sa de pti mo Mr Deputy Speaker, mon pou aport mon sipor a sa Mosyon.  Mersi.

 

MR DEPUTY SPEAKER

Dernyen lo mon lalis, Onorab Pillay.

HON SEBASTIEN PILLAY

Mersi Mr Deputy Speaker.  Mr Deputy Speaker, ou konnen istorikman i pa premye fwa ki nou pe koz lo Seselwa travay lo tankers.  Annefe, dan le pase in annan Seselwa ki’n travay lo bann tankers e mon krwar i fer nou apresye kimannyer listwar i evolye kot ozordi mon krwar sa bann dimoun ki travay lo tanker pandan sa letan, ti vwar serten sa bann provizyon ki annan dan sa Konvansyon ki nou pe debat ozordi.  Mon ti a kapab apresye kimannyer keksoz in sanze e kimannyer ozordi nou valoriz travay ki en dimoun i bezwen fer.  Mr Deputy Speaker, pou mwan sa Konvansyon i enn ki tre enportan akoz i trouv li alankan a 2 Lazans Enternasyonal vreman enportan.

Premye i IMO, International Maritime Organization, ki Sesel ti vin en manm an 1978 e lot i ILO, which is International Labour Organization, e sa i fer sa Konvansyon tre enportan akoz i sitie son lekor dwat dan milye lo sa ki pe pase lo lanmer kot souvandfwa, i pa’n fasil pou kapab kontrole e menm maintain serten kondisyon travay pou bann dimoun ki trouve lo bato.

Ler mon’n fer enpe resers Mr Deputy Speaker, mon’n kapab osi apresye ki i annan bokou travay ki’n ganny fer par lepase pou asire ki Sesel i an konformite avek sa bann Konvansyon Enternasyonal.  Dapre en dokiman ki apel sa Status of Conventions ki IMO i pibliye lo son Website, lo son sit web.  Sesel in fer aksesyon a 19 Konvansyon IMO e sa i montre mon krwar travay ki bann profesyonnel, bann dimoun ki travay dan sa sekter i fer menm si nou pa remarke, pou asire ki nou pei i azour avek sa bann Konvansyon Enternasyonal.

Ler mon vin limenm lo sa Konvansyon i annan serten eleman sa Konvansyon ki fer lentervansyon Onorab Fideria tre, tre pertinan.  Mon krwar ozordi dan sa lemonn global ki nou pe viv ladan, tou keksoz i armonize e gann senkronize dan en fason ki prezan ou bezwen fer sir ki ou alaoter avek tou sa ki pe pase.

Par egzanp, i annan bann provizyon an sa ki konsern dwa imen ki ou bezwen fer sir ou maintain.  Mon konnen poudir resaman in annan bokou rapor lo nou pei ki’n kre serten lensertitid dan lafason ki nou pei pe enplimant serten keksoz ki konsern drwa imen.  E parfwa sa bann rapor in mal fonde e la mon ti ava kontan demann bann dimoun ki parfwa i fre bann alegasyon pou regarde.  La ozordi nou pei pe montre klerman ki nou commited towards adezyon, towards enplimant bann Lalwa enternasyonal ki protez drwa bann dimoun.  Ki anpese ki annan child labour, ki anpese ki annan leksplwatasyon dimoun e sa Konvansyon i enn ki pou donn nou sa scope tre klerman.

Akoz Mr Deputy Speaker, mon krwar bokou in ganny dir lo sa Konvansyon, me selman, ler nou regarde limenm i met anplas bann minimum requirements ki tou dimoun isi lo later i benefisye avek.  Ou laz minimum ki ou bezwen travay, medical certification, ou kalifikasyon ki ou bezwen annan, bann agreement of employment, ou bezwen annan ou hours of work, hours to rest.  Manning levels, akomodasyon, recreational facilities on board, food and Catering, Health and Safety, onboard medical care, onboard complaint procedure, payment of wages, tousala i fer ki ou pe protez sa endividi ki pe travay lo sa bato.

Mr Deputy Speaker, ozordi nou pe met bokou lanfaz lo devlop nou lendistri maritim, nou sekter maritim e demen nou pou napa Seselwa pe travay zis lo bann tankers Seypec, me nou pou annan Seselwa ki pe travay lo bann container ships, nou pou annan Seselwa ki pe travay lo bann cargo ships, i pa enposib.  20an pase mon krwar ti napa en Seselwa ki ti mazinen poudir en zour Sesel ti pou annan Seychelles Pride, ti pou annan Seychelles Pioneer ki ti pe sail dan tou bann por e pe anmenn nou pei pli devan, pe act koman en Anbasader pou nou pei partou dann bann por enternasyonal.  Personn pa ti pou reve, pou krwar ki en zour en tanker avek Seselwa abor, crewman Seselwa pe antre dan en por Lanmerik.  Me ozordi, lefe i la ki nou’n fer bokou progre dan sa pei e ki ozordi nou bezwen fer sir ki nou azour avek bann norm enternasyonal.

Mr Deputy Speaker, en lot laspe sa Konvansyon se ki, i kouver enpe sa ki mon krwar pou mwan i tre enportan an sa ki konsern bann pti leta zil.  Bokou bann resortisan dan bann pti leta zil i al travay abor bann bato e prezan apre i annan serten issue ki arive par egzanp avek repatriasyon.  I annan serten eleman dan sa Konvansyon ki mon krwar i tre enportan e koz lo repatriation of seafarers e i annan serten lobligasyon.

Me selman Mr Deputy Speaker, mon krwar i annan en issue ki apel abandonment ki bezwen ganny regarde e mon krwar la byento mon krwar i annen en meeting ILO an 2014 ki pou regard sa size.  Akoz souvandfwa, si ou bezwen repatri en crew member, petet dan lepase i pa ti kler kimannyer sa pou arive.  Petet abor nou bato, nou bann bato Seypec nou kapab garanti sa me abor lezot bato ki Seselwa pe travay lo la, nou pou napa serten garanti lo la.  So, i enportan ki nou annan en framework legal kler, en seplimanter regilyer kler ki permet nou kapab met anplas bann regilasyon ki permet nou tap in dan sa bann regilasyon ler i annan en lensidan parey sa enn i arive.

En lot laspe enportan sa Konvansyon Mr Deputy Speaker, se son lafason ki i pou ganny operate, i annan 2 keksoz enportan.  I annan sa ki nou pou apel bann flag states inspection ki nou, nou pou fer lo bann bato ki pou nou ki anrezistre Sesel, me osi sa pouvwar ki nou pou annan pou nou fer lenspeksyon lo bann bato sorti aletranze e sa pouvwar pou nou anpes en bato sorti a letranze  pou li sail si i pa pe abide avek serten kondisyon sa Konvansyon.  E sa i a fer pou klarifye en kantite dout parfwa kot ou annan pou dir par egzanp, lo serten bato kot bann maren i ganny maltrete, i vin dan ou por, si i kit dan ou por, plitar devan ou tande en maren in mor e i ti dan por Sesel, Sesel pa’n fer son due diligence e sa i pou afekte nou rikord.

E mon krwar ler nou regarde nou’n annan nou vreman en pti git aksidan bato, en pti git lensidan kot bann maren in perdi lavi abor bann bato e sa i montre klerman travay ki nou bann profesyonnel pe fer.  Me sa osi i montre lenportan capacity building par egzanp, pou SMSA, pou asire ki i annan tou resours neseser pou li kapab fer en lenplimantasyon konkret sa Konvansyon.

Sa i en bann pwen fondamantal Mr Deputy Speaker, ki nou bezwen soulinnyen.  Me Selman i annan en lot pwen tre enportan e sa i konsern la fason prezan ki nou pou institutionalize bann regilasyon ki dan sa Konvansyon atraver nou bann Lalwa.  E sa mon krwar i travay ki bezwen ganny fer dan en kour dele letan pou permet nou, akoz mon krwar i donn nou 12 months apre ki nou’n fer nou bann travay preliminer pou nou aksir dan sa Konvansyon.

Fodre note ki Langleter, mon krwar i fek resaman aksir dan sa Konvansyon.  Alors i pa en pti zafer, pa enportan i en keksoz ki tre, tre enportan pou bokou bann pei e mon krwar lefe ki nou, nou pe montre sa prevwayans, pou asire ki nou azour avek sa bann Konvansyon, i montre klerman progre, me i osi montre klerman profesyonnalizm ki nou pe devlope isi dan nou pei e sa i devret gann soulinnyen Mr Deputy Speaker.

An konklizyon Mr Deputy Speaker mon le remersi bann dimoun ki’n travay lo sa prosesis pou anmenn sa Konvansyon kot i ete ozordi ki Lasanble pe debat lo la.  Mon krwar souvandfwa isi dan nou pei nou oubliye dir mersi travay ki nou dimoun i fer ziska ler nou perdi zot e apre la nou regrete nou dir plito nou ti’n kapab dir mersi.  Mon kwar nou annan bokou Seselwa ki fer travay tre enportan dan sa sekter e nou bezwen toultan mazinen poudir i pa en travay fasil.  I en travay ase difisil e zot travay dan en sekter ki parfwa i kapab danzere osi e pour mwan, mon krwar nou devret remersi zot.  Mersi Mr Deputy Speaker.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy Speaker.  Mr Deputy Speaker dan komansman mon lentervansyon mon anvi refer sorti klerman, ki i enportan e ki i dan lentere nou bann maren pour ki Sesel i ratifye sa Konvansyon.

Sa Konvansyon pe donn nou bann maren, serten drwa e anmenmtan, i pe met bann mekanizm anplas pou garanti proteksyon sa bann menm drwa.  E nou tou dan Lasanble Nasyonal nou a dakor ki akoz natir travay en maren, nou bezwen donn zot bann proteksyon spesyal, nou bezwen donn zot bann kondisyon spesyal akoz ou pa bezwen en Einstein pou konpran ki travay bann maren pa parey travay en travayer ki li i a pe travay ater.

En maren lo lanmer i bezwen lo alert preski 24 lo 24.  Alor mon pou donn sipor sa Konvansyon akoz sa ki enteresan ek sa Konvansyon pou mwan, i se ki i pe donn nou bann maren sa ki mwan mon apel en new Bill of rights. Sa Konvansyon i osi donn nou bann maren sa bann proteksyon ki zot merite ler zot pe travay lo lanmer.  Nou, nou la pou defann e protez lentere nou bann maren Seselwa.  Alors, i esansyel ki nou tonm dakor pou nou ratifye sa Konvansyon.

Dan sa konteks Mr Deputy i annan 2 lartik, lartik 3 ek lartik 4 ki koz lo sa bann drwa e mon ti a kontan elabor lo la.  Lartik 3 i donn nou bann maren bann prensip e bann drwa fondamantal ki Gouvernman i bezwen garanti zot e i bezwen respekte de ki nou ratifye sa Konvansyon.  Par egzanp, atraver sa Konvansyon, ozordi nou bezwen aksepte e respekte lefe ki nou bann maren i annan drwa pou li kapab zwenn ou form parti en lasosiasyon ki i santi i kapab defann son lentere san okenn problenm, san okenn harassement.

Sa drwa pou en maren zwenn en Trade Union libreman, i bezwen ganny respekte e proteze par egzanp.  E ozordi, mon pou tir mon sapo ek sa group dimoun ki pe travay dir pou donn en koudmen sofgard bann drwa ki en maren i annan e mon satisfe ki omwen zot in nobou met ansanm en lasosiasyon ki apel the Seychelles Seafarers and Transport Association, en lasosiasyon ki mon ankouraz bann maren pou zwenn, en lasosiasyon ki’n montre son determinasyon pou travay pou ede defann bann dwa ki sa Konvansyon i egzize, ki okenn Gouvernman ki ratifye li, i konform avek e i respekte.

Sa lasosiasyon i donn en koudmen monitor e fer sir ki apre ki sa Konvansyon in ganny ratifye, Gouvernman i a met anplas bann lenstriman, bann mekaniz, bann proses, bann Lalwa, bann Polisi pou fer sir ki sa bann demann sa Konvansyon, i ganny pratike e ganny respekte.  Sa lasosiasyon ansanm ek bann lezot partner, i a fer sir ki sa dokiman, sa Konvansyon i reste en dokiman vivan e pa enn ki pou zis ganny shelved.

Mr Deputy, dezyenm drwa anba lartik 3, i donn bann maren sa dwa pou zot atraver zot lasosiasyon oubyen zot Union, pou negosye sa ki nou appel, collective bargaining agreements. Pou fer sir ki en maren i ganny en fair deal an relasyon ek son kondisyon travay oubyen an relasyon avek bann lezot drwa, tel ki zot drwa pou ganny lasistans medikal, Welfare eksetera.

Sa i a ede garanti ki ler en maren i lo en bato, i konnen e i asire ki son bann kondisyon travay in ganny byen negosye e ki son bann kondisyon travay pou ganny byen respekte e ki son bann drwa pou ganny byen defann.  Sa lasosiasyon, i a kapab ede negosye kontra son bann manm pou gard par egzanp ki zot ganny sa kalite saler ki zot merite pou fer sir ki zot bann benefis ki zot kapab potansyelman negosye, i aktyelman ganny byen negosye.  Tel parey, rekonpans apre servis, oubyen en pansyon lasirans, social security eksetera.  Koman en legzanp e dan konteks Sesel, sa i a ede anmenn konsistans dan lafason ki nou bann maren ki travay lo nou bann bato ton i ganny peye.

Ozordi, lo en bato Franse nou bann maren pe ganny R10 par tonn, lo en bato Espanyol zot pe ganny R3.50 par tonn.  I annan serten kondisyon ki zot gannyen lo en bato Espanyol e non pa lo enn Franse.  Dan sa konteks alors, i ava enportan ki bann maren atraver zot lasosiasyon oubyen zot bann lazans, zot a kapab fer meyer negosiasyon e anmenn plis konsistans across the board pou meyer kondisyon ki enkli meyer saler.

Mr Deputy, a sa staz labsans kapasite, bon negosiasyon lo en nivo, lo en o nivo pou meyer kondisyon travay pou nou bann maren, i fer mon mazin ka enn nou frer Seselwa ki apre ki i ti’n travay koman en maren lo en bato, lo en bato ton pou plis ki 25an, i ti rankontre en aksidan dan son travay kot i ti preski perdi en kote son lizye, ki ti fors li alors, aret travay.  Me apre sa, i ti dekouver ki i pa ti ganny okenn benefis apre son aksidan.

Sa msye i ankor vivan ozordi koman en temwen limenm.  Ni domaz, ni konpansasyon, ni en pansyon, ni en pti tannservis, absoliman nanryen.  Sa, i en lenzistis e nou pa kapab Mr Deputy les sa ariv ankor avek okenn maren Seselwa.  Mr Deputy sa i pous mwan ankor poudir ki, wi, Lasanble Nasyonal ozordi i bezwen ratifye sa Konvansyon akoz nou, nou la pou defann lentere e drwa nou bann maren Seselwa.

Trwazyenm drwa, anba Lartik 3 i sa drwa ki en maren i annan pou li pa ganny forse pou li travay.  Dan sa konteks Mr Deputy, mon pe koz, i devret travay at son own free will baze lo son kondisyon travay e baze lo son kontra travay e non pa andeor son kondisyon, e pou li ganny rekonpanse e peye apropriyeman, pou sa travay ki i fer.  Sa i en drwa enportan akoz i protez nou bann maren Seselwa lo bann bato etranze e fer sir ki zot ganny peye apropriyeman pou bann travay ki zot fer.  Sa i a garandi alavenir, ki nou bann maren i a ganny en fair deal.  Mr Deputy Speaker, nou pe dir ki nou bann maren Seselwa i deserve no less, bann kondisyon parey bann lezot maren i gannyen.

Mr Deputy Speaker, sa size Child Labour, i osi ganny aborde e mon kontan pou vwar ki de ki nou’n ratifye sa Konvansyon, nou pe efektivman dakor pou nou respekte le fe ki napa okenn zanfan anba laz, anba 16an ki travay lo bann bato ki bear paviyon nou pei.  Nou pe efektivman deklare ki nou kont child labour.

Annefe, Nasyon Ini fek fer sorti en rapor lo child labour ki demontre ki atraver lemonn, i annan plizyer milyon Mr Deputy, la nou pe koz lo milyon zanfan anba laz ki ganny forse travay.  Sesel, nou bezwen kontinnyen lalit kont sa e reste lo nou gard pou fer sir ki sa pa vin en norm dan nou pei.  Annefe, nou bewen elimin sa zafer child labour totalman dan nou pei Sesel.  E la, nou a ganny en lot zouti ki fors nou pou pran bann mezir pou fer sir ki sa pa ariv dan konteks travay maritim lo nou later Sesel, dan nou lanmer.

Mr Deputy, atraver sa Konvansyon nou pe osi deklare, ki nou pou fer sir ki napa okenn diskriminasyon kot okenn nou bann maren Seselwa.  Nou pe deklare ki nou pe donn nou bann maren proteksyon kont okenn diskriminasyon dan zot travay.  Kiseswa lo baz ras, lo baz larelizyon oubyen lo baz lorizin zot nasyonalite, ou sex, oubyen ou krwayans politik.

Lasanble Nasyonal pe anvoy en mesaz kler, ki nou pa oule ki nou sitwayen maren i ganny discriminated against dan okenn fason.  Nou pe dir ki maren Seselwa, i annan sa dwa pou li ganny trete dan sa menm fason ki lezot maren i ganny trete partou kote dan tou por, dan tou kwen lemonn kot zot al travay, napa diskriminasyon kont nou bann maren Seselwa, pwen, fini.

Mr Deputy, Lartik 4, i donn nou bann maren proteksyon lanplwa e proteksyon sosyal.  Par ratifye sa Konvansyon, nou pe dir ki nou bezwen garanti ki nou bann maren i travay anba bann kondisyon ki safe pou zot.  Dan bann lanvironnman ki secure, kot bann standar safety e sekirite dan zot landrwa travay i ganny respekte, pour ki nou pa met lavi okenn nou bann marenn Seselwa at risk.

Ler nou ratifye sa Konvansyon, nou pe dir ki nou bann maren dezormen, fodre zot ganny bann kondisyon travay ki fair e anmenmtan nou pe dir, ki nou bann maren i efektivman ganny bann proteksyon e drwa sosyal, tel ki zot drwa pou zot ganny akse ek tretman medikal, fer sir ki zot lasante i ganny proteze e fer sir ki zot bann diferan laform lasistans e sipor Welfare i ganny proteze.  Nou bezwen garanti ki ban kondisyon travay ek bann kondisyon reste abor okenn bato, i bann kondisyon ki desan e i bann kondisyon ki apropriye.

Ozordi, mon anvi dir ki nou pa kapab toler okenn laform leksplwatasyon lo nou bann maren oubyen kont nou bann maren Seselwa.

Mon kontan sa Konvansyon Mr Deputy, akoz enn bann laspe pli enportan sa Konvansyon, i se ki i demande ki Gouvernman i bezwen fer sir ki nou bann Lalwa lokal, nou bann Lalwa domestik ek nou bann regilasyon, i ganny drafte dan en fason ki i respekte serten drwa fondamantal ki relye ek bann travay ki bann maren i fer.

Domestikasyon nou bann Lalwa, i bezwen reflekte respe pou sa Konvansyon, si nou ratifye sa Konvansyon, nou bezwen fer sir ki nou bann Lalwa domestik i anlinny ek bann Lartik dan sa Konvansyon.

Ozordi, lemonn maritim e maren Seselwa, pe demande akoz ki nou napa en nouvo Shipping Act ki pli an konformite avek Konvansyon STCW 95? Akoz ki nou pa ankor kapab anmenn en tel nouvo Bill devan Parlman pou li ganny debat e pou li ganny aprouve?  E la nou a fer sir ki enn parmi sa bann Lalwa enportan, ki relye avek IMO, i an konformite avek STCW 95 e IMO limenm.

Mr Deputy Speaker, mon demande ki Gouvernman i take note of sa gran nesesite e defayans e fer sir ki tou i ganny fer pour ki sa Bill i vin devan Parlman pou laprouvasyon o pli vit posib.  Anplis Mr Deputy nou bezwen revwar ki fason nou, koman en pei, nou pou fer nou Seychelles Maritime Safety Administration, vin enn pli efikas akoz li, i annan sa rol pou sirveye  e fer sir ki nou bann Lalwa e nou Lekol Maritim e kalite training ki i ofer, i an konformite ek bann demann IMO, The Initernational Maritime Organization. Nou pe demande Mr Deputy e mon krwar sa Lasanble i a dakor ek mwan, ki nou demande ki The Seychelles Maritime Safety Administration i vin enn ki pli o nivo e i vin enn ki pli efikas, e i fer son travay dan en fason pli for e pli profesyonnel.

En lot laspe sa Konvansyon ki enportan, i se ki i ganny byen enplimante e respekte e i pou garanti nou bann maren, pour ki i garanti nou bann maren plis loportinite travay lo en pli o standar e pou fer ki nou bann maren i ganny loportinite pou zot ganny bon lantrennman, oubyen bon training e se la kot Lekol Maritim i vin anze.

E se zisteman la ki i enportan ki nou annan en Lekol Maritim ki o standar, sa donk, i fer mwan poz mon lekor detrwa kestyon.  Akoz ki sa lekol pankor set sa standar ki meet bann demann Konvansyon STCW 95, ki koz lo standards of training, certification and watch keeping for seafarers. Akoz ki Lekol Maritim pa ansenny bann modules ki STCW 95 i demande?  Ozordi, maren Seselwa pa kapab acquire bann minimum standard, STCW e akoz sa zot ganny tre pe loportinite enternasyonalman.  Devlopman zot potansyel i ganny limite par sa mankman dan nou Lekol Maritim e sa i en lot pwen ki Gouvernman i bezwen take notice lo la e fer leneseser pou amelyor e lev standar sa lekol.

Annefe Mr Deputy, training ki sa lekol i donnen i pa an konformite ek sa ki IMO i demande atraver STCW 95.  I demande e alor, nou reste an deor sa konsept the white list, savedir ozordi Mr Deputy, Sesel, nou Sesel nou pa vwar nou aparet lo sa white list ki en lalis bann pei ki zot nivo training i an konformite ek standar STCW 95 e sa, i devret en konsern nasyonal e i bezwen ganny adrese imedyatman.  An dot mo…

 

MR DEPUTY SPEAKER

Order.

 

HON DAVID PIERRE

An dot mo, nou Lekol Maritim pa pe donn training pou meet bann minimum competency requirements pou nou bann seafarers, maren e sa i kontribye nou fer Sesel pa ganny admit lo sa list.  E konsekaman sa i koz en difikilte enorm pou nou bann maren.

Legzanp, enn parmi plizyer difikilte ki nou bann maren i rankontre akoz sa problenm, i se ki en pei ki lo sa white list, i pa pou aksepte en sertifika en maren ki’n ganny issued par en pei ki pa lo sa white list, tel parey Sesel.  E donk, sa maren, en Seselwa, i pa kapab ganny sa loportinite pou li ganny lanplwa bato en pei ki li i lo sa white list e sa i mars koman en gran dezavantaz pou nou bann maren ki pe aktivman sers lanplwa lo bann bato etranze.

Mr Deputy pou konklir, sa bann size ki mon’n fer resorti i konsern nou bann maren e zot pe demande ki sa bann konsern i ganny adrese vitman.  Sa Konvansyon pe donn nou sa sans pou nou rektifye sa bann issues e Gouvernman i bezwen montre sa political will pou li fer sir ki i met anplas bann mezir pou adre sa bann issues de le moman ki sa Konvansyon i ganny ratifye ozordi dan nou Lasanble Nasyonal.

Mr Deputy, avek sa mon a dir ki mon apresye le fe ki tou bann Manm Parlman ki’n koze ozordi, in koz an defans nou bann maren e avek sa mon krwar Lotorite konsernen, Gouvernman, Legzekitiv i a ekoute e i a pran bann mezir pou ensure ki bann defayans ki egziste ozordi, i pa pou vin bann defayans ki ankor egziste demen.  Avek sa Mr Deputy, mon a dir ou mersi.

 

MR DEPUTY SPEAKER

Right of Reply, Onorab Rose.

 

HON MARIE-ANTOINETTE ROSE

Mersi Mr Deputy.  Mr Deputy, mon remersye tou bann Manm ki’n koz anfaver sa Konvansyon e ki apresye lenportans met nou stamp of approval lo sa Konvansyon pou son ratifikasyon.  I tre, tre enportan e mon espere ki nou bann maren i note vreman lekel ki pe travay, pe pouse pou fer sir ki zot bann kondisyon travay lo lanmer i la, i ganny mentenir sa Konvansyon.

Mon ti a zis kontan Mr Deputy eklersi serten pwen ki Leader Lopozisyon in met devan ki deza dan en gro dokiman, i deza la Msye Leader Lopozisyon, Onorab Leader Lopozisyon.  Me selman ler nou koz lo political will, mon krwar i enportan nou remarke ki sa Konvansyon i sorti kot Gouvernman e in ganny met devan Lasanble par The Leader of Gouvernment Business e in pran selman detrwa mwan pou sa arive, so the political will is there, i annan en political will.

An sa ki konsern Sesel annan kapasite pou Lekol Maritim kapab abzorb e prodwir sa kour neseser pou nou bann maren kapab mont lo zot tanker. Mon krwar i enportan Mr Deputy nou’n note ki Lekol Mritim ti bezwen ganny fer avan ler i ti kapab annan sa kapasite e Lekol Maritim in ouver selman 2an, ti bezwen ganny fer avan.  Lekipman ti bezwen rode avan e sa i rezon akoz ler ti ouver nou ti vwar sa bann gro, gro lekipman ki ti vini.  So, annou apresye le fe ki pa ti kapab ganny fer avan akoz ti napa en building, ti napa en batiman, ti napa capacity building, ti napa lekipman pou fer sa and the political will in preparation for this Convention, in annan en kantite travay years before sa i vin devan nou Lasanble.

Nou pa ti pou kapab ratifye, donn nou stamp of approval lo en Konvansyon san ki nou annan en Lekol Maritim avan, ki la ki pe fonksyonnel, ki nou annan etidyan.  Mon krwar i enportan ki nou note sa e in bezwen pran sa lekol enpe letan pou li etablir son bann course ki i deza annan avan ler, parey Onorab Arnephy in dir la, pe al ganny fer.

Me in the meantime napa nanryen ki pa’n ganny fer pou sa bann etidyan.  Mon krwar i enportan note ki zot in al lekol South Africa and Ireland, loportinite in la menm dan labsans Lekol Maritim, loportinite in la e i annan en kantite etidyan ki’n all South Africa oubyen Ireland.  Annefe tou Seselwa ki bezwen mont lo tanker, i bezwen forseman al fer en course aletranze pou zot kapab mont lo sa tanker.

So, in the mean time in annan en travay ki’n ganny fer pou fer sir ki nou bann maren i annan sa kapasite.  Mon krwar nou bezwen fer sir, mesaz out there se ki nou bann maren, oubyen nou bann dimoun ki’n aspire vin maren, pa’n mank sa loportinite.  Annefe, mon a fer rapel Leader Lopozisyon ler premye tanker Sesel, Seychellles Pride ti lanse, parol Prezidan Michel se ki sa i en nouvo loportinite pou bann maren Seselwa.  That was the vison then, so many years ago and that was the political will then so many years ago.  Me parey tou keksoz, ou bezwen annan letap e se la kot ti vwar nesesite pou fer Lekol Maritim.  Me menm ozordi avek Lekol Maritim ou bezen annan teachers kalifye.  Inovasyon dan domenn maritim, mon’n ganny dir i al vit li, i al vit.  Nouvo lekipman, nouvo fasilite, nouvo Convention.  Annefe papye i devan mwan la, 19 different Conventions ki Sesel  in parti prenan.  19, tou sa letan in ariv devan nou Lasanble, nou’n ratifye e sa Konvansyon ki devan nou i pou an global tousala.  So, i enportan mon krwar nou note ki in annan political will, i kontinnyen annan political will. E mon zwenn parol Onorab Fideria apremidi, ki in fer nou rapel lekel dan sa pei ki’n lager pou travayer e lekel dan sa pei ki kontinnyelman lager pou nou bann zenn e lekel dan sa pei ki kontinnyelman fer sir malge defi, malgre nou ti napa en Lekol Maritim ki nou bann zenn ki ti anvi swiv en karyer ti kapab al aletranze e al pourswiv zot letid.

Avek sa Mr Deputy, mon krwar ti enportan mon klarifye sa pou konsonmasyon bann dimoun ki pou ekout nou.  Avek sa Mr Deputy, mon remersye tou bann Manm, mon remersye Lider Lopozisyon pou son sipor lo sa Konvansyon e pou rekonnet koman en Lasanble ki, sa Konvansyon i dan lentere Sesel e i dan lentere nou bann zenn Seselwa ki pe travay abor nou bato.  Mersi.

 

MR DEPUTY SPEAKER

Bon. in ariv ler pou pran en vot lo sa Mosyon.  Tou bann ki anfaver lev zot lanmen?  Inanim.  Mosyon in ganny aprouve.  Nou ava adjourn e nou ava rezwenn Mardi prosen.

 

(ADJOURNMENT)