::
Home » Verbatim » Verbatim - Second Term 2013 » Tuesday 16th July, 2013

Tuesday 16th July, 2013

NATIONAL ASSEMBLY OF SEYCHELLES

Tuesday 16th July 2013

The Assembly met at 9:00am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal, bonzour Minis ek son delegasyon, bonzour tou bann ki dan lakour pe ekout nou.  Ozordi avek nou dan Lasanble Nasyonal nou annan Minis pour Zafer Etranzer, Mr Jean-Paul Adam ki pe vin reponn plizyer kestyon konsernan son Minister, me avan ki mon konmans ek Question Time mon ti oule senpleman profit sa loportinite pou felisit enn nou manm Onorab, Roma Aglae ki bomaten in deliver en pti fiy e ler LGB i al vwar li taler i ava pas mon felisitasyon avek li.

Bon nou ava konmans avek kestyon 107, Onorab Lenny Lebon.

 

 

 

HON LENNY LEBON

Mersi Mr Speaker.  Bonzour Mr Speaker, bonzour Minis ek ou delegasyon, tou koleg Manm MNA e tou dimoun ki alekout.  Mr Speaker eski Minis pour Zafer Etranzer i kapab enform sa Lasanble ki nou pei pe fer pou asire ki nou lentrigite ouswa nou leadership pa ganny kestyonnen sirtou lo compliance lo bann diferan pozisyon drwa imen Sesel.  Mersi

 

MINISTER JEAN-PAUL ADAM

Mersi bokou, bonzour Mr Speaker, bonzour tou bann Manm Onorab, Lider Zafer Gouvernman, Lider Lopozisyon e tou bann dimoun ki alekout.  Premyerman mon ti a remersye Manm pou son kestyon.  Mon krwar ki en premye pwen ki enportan pou nou fer se ki nou lentrigrite konman Sesel an se ki konsern drwa imen i pa an kestyon.  Nou enn bann pei far, enn bann pei ki pe vreman fer bokou zefor lo sa size e si nou regard tou bann lendeks ki regard devlopman e drwa en sitwayen dan en pei, Sesel i reponn tou bann nesesite e menm lo sa 9 Konvansyon kle ki kouver drwa imen, Sesel in raktifye 8 dan 9 e sa nevyenm nou dan sa prosesis pou nou fer li neseser.

Alor Sesel nou en pei ki pran nou bann responsabilite vizavi bann diferan Konvansyon drwa imen tre oserye e mon krwar ki nou pozisyon i ganny rekonnet.  Anmenmtan, mon ava dir si i annan en endividi ouswa en lorganizasyon ki anvi kestyonn nou rikord, sa i en bon keksoz, akoz nou viv dan en demokrasi e tou dimoun ki annan okenn kestyon lo ki pe arive Sesel nou napa okenn lezitasyon pou nou reponn sa bann kestyon e pou nou dir avek lafyerte, menm avek bann pei etranze vin Sesel, vin vwar sa ki nou pe fer isi.  Nou tre konfyan ki nou rikord i montre keksoz pozitif ki pe arive Sesel e Sesel i enn bann rar pei anba en mekanizm ki apel Universal Periodic Review, kot Sesel ti defann son ka an 2011 kot nou ti menm fer sa ki apel en standing invitation kot nenport ki pei i kapab dir mon anvi vin Sesel e mon anvi regard zot rikord lo drwa imen.  E sa i en keksoz ki tou Leta i konnen, ki tou partner dan Nasyon Ini i konnen, alor mon annan bokou konfyans dan nou leadership lo sa kesyon e ki nou rikord i koz pour limenm.  Mon krwar tou pei i kapab ziz nou par nou aksyon.  Mersi.

 

MR SPEAKER

Okenn siplemanter.

 

HON LENNY LEBON

Mersi Mr Speaker.  Mon annan 2 kestyon siplemanter pour Minis.  Minis eski demars Sesel pou antre lo konsey sekirite i kapab ganny konpromet par konteni bann piblikasyon negative, spesifikman lo trafik e drwa imen.

Dezyenm kestyon, eski Minis i kapab eksplik sa Lasanble ki stratezi ki son Minister e Gouvernman Sesel i annan pou konbat tou bann lese pou met akoz rol leadership Sesel dan larezyon e dan lemonn.  Mersi.

 

MINISTER JEAN-PAUL ADAM

Mersi bokou Manm Onorab.  Premyerman in annan parey tou pei, i annan en kantite rapor ki ganny fer lo nou pei, i annan diferan kalite rapor, i annan bann rapor Nasyon Ini e sa i bann rapor ki ganny fer baze lo lenformasyon ofisyel ki swa Nasyon Ini limenm li i fer resers oubyen i an lyezyon avek bann lotorite dan sa pei pou li ranmas sa bann lenformasyon.  Me mon ti a dir i pa zis lenformasyon ki nou, nou donn Nasyon Ini.  O kontrer dan plizyer ka, se lenformasyon ki Nasyon Ini limenm li i vin fer serten resers lo nou lenvitasyon, eksetera.

Apre i annan serten rapor ki bann pei endividyel i kapab fer oubyen en lorganizasyon non-Gouvernmantal i kapab fer.  Dan konteks Sesel mon krwar tou deba, nou vwar li, zot vwar tou deba dan en laspe pozitiv akoz nou annan konfyans dan sa ki nou pe fer e nou pe dir i pa en problenm pour nou si okenn pei i fer rapor, me nou pou touzour reazir baze lo fe, baze lo larealite e baze lo statistik ki kredib.

E resaman ou’n mansyonn enn bann rapor, se rapor lo trafik imen ki par egzanp Leta Ini in fer, nou’n rezet sa rapor, pa akoz nou krwar ki napa keksoz ki Sesel i bezwen fer.  Nou’n fini dir ki i annan en plan daksyon ki nou Minister pe travay lo la ansanm avek Minister Zafer Sosyal anlyen avek nou bann responsabilite avek bann Konvansyon ki nou’n fini sinyen.  Alor i annan aksyon ki nou pe pran lo kote pou moderniz nou kad legal dan sa bann size.  Me sa rapor spesifik ki sorti kot Leta Ini i pa baze lo okenn resers aprofondi ki’n ganny fer.  I baze lo spekilasyon, sirtou ki zot in ranmase dan medya zot menm.

Alor nou, nou pe dir ki i enportan e menm si nou pou vreman defann drwa imen, nou bezwen baz li lo en realite e si nou pe baz li lo spekilasyon, sa limenm li i pou anmenn problenm dan defans drwa imen akoz i enportan ki nou baz tou nou bann desizyon lo fe ki lo realite e pa lo spekilasyon.  Alor bann diferan rapor ki sorti, nou’n annan toutafe konfyans ki bann rapor Nasyon Ini i reflekte bann diferan pozisyon ki Sesel in met devan, i reflekte resers ki’n ganny fer.  Bann rapor ki diferan pei oubyen lorganizasyon non-Gouvernmantal i kapab fer.  Zot lib pou zot fer sa bann rapor, i pa en problenm.  Nou pou reazir lo bann rapor ki nou santi kot nou bezwen reazir.

Apre nou pa santi ki sa pou nwir nou demars pou en syez lo konsey sekirite akoz nou rikord i for, nou rikord i pozitif e nou konfyan ki letan nou met nou rikord pou ganny zize, ziz nou par nou aksyon, nou napa okenn konsern.  Sesel i en pei ki napa okenn konsern lo sa size.  Zisteman lot kestyon ki nou pe konbat, se nou, nou krwar meyer keksoz pou en pei parey Sesel se lenformasyon.  Nou, nou krwar lenformasyon lo Sesel, me lenformasyon ki kredib e ki reel i nou meyer defans.  Akoz kot i annan problenm Sesel, Gouvernman in touzour dir nou pou adrese i annan problenm.  Me nou bezwen baz li lo en realite e baze lo lenformasyon ki kredib e korek.Mersi.

MR SPEAKER

Onorab Pool.

 

HON ANDRE POOL

Mr Speaker mersi.  Mr Speaker baze lo repons Minis, eski Minis i kapab enform nou Lasanble si son Minister oubyen menm Gouvernman i annan en plan, en progranm, pou ozordi e pou le fitir an sa ki konsern kapasite building pou nou kapab fer lemonn konn plis nou realite e ranforsi lopozisyon vizavi sa size drwa imen.  Mersi.

 

MINISTER JEAN-PAUL ADAM

Mersi bokou.  Gouvernman i deza annan en proze capacity building ki kouver plizyer size gouvernans sivil, me enkli drwa imen e sa proze pe ganny fer konzwentman avek Linyon Eropeen.  Akoz sa enn finansman, zistemen Linyon Eropeen ki permet sa proze ganny fer e sa i enkli fer bann proze capacity building dan sekter non-Gouvernmantal, dan lasosyete sivil parmi bann lorganizasyon non-Gouvernmantal.  Alor toutafe lentansyon Gouvernman se donn plis kapasite bann sitwayen Seselwa menm pou zot annan sa konprenezon, sa konpreansyon bann diferan Konvansyon ki egziste e kimannyer nou konman en pei – akoz letan nou pe koz konman en pei, konman en Leta, se pa zis Gouvernman, se tou bann partener kimannyer nou kontribye pou reponn a sa bann responsabilite dan sa bann Konvansyon.  Akoz bokou bann Konvansyon i pe koz vreman lo lideal ki nou tou nou anvi vize, apre nou annan nou bann Lalwa Nasyonal ki sa defans ki nou tou nou bezwen fer sir ki sa bann Lalwa Nasyonal i ganny respekte.

Sesel nou annan toutafe sa konfyans, Gouvernman i annan sa konfyans ki bann mekanizm ki an plas deza i tre for e nou touzour pare pou fer li pli for.  Se pour sa ki nou, nou fer en travay aprofondi pou nou idantifye meyer pratik.  Nou adapte li pou nou sitiasyon e nou met li anplas e sa i enkli travay avek lasosyete sivil avek bann lorganizasyon non-Gouvernmantal pou zot pli byen kapab travay ansanm avek Gouvernman pou asire ki drwa imen i ganny respekte e nou napa okenn lafreyer kot i annan okenn problenm, annou koz lo la e nou tou nou ava azir.  Mersi.

 

MR SPEAKER

Onorab Lider Lopozisyon.

 

(Technical Problenm)

HON DAVID PIERRE

Mersi Mr Speaker.  Bonzour Minis ek son delegasyon, bonzour tou Manm Koleg Onorab e bonzour tou bann ki alekout.  Mr Speaker, Minis in koz lo 8 dan 9 Konvansyon ki’n ganny raktifye.  Mon ti a kontan demann Minis ki bann difikilte vizavi sa nevyenm Konvansyon lo size drwa imen ki pe koz sa retar dan raktifikayson sa Konvansyon.

E mon dezyenm siplemanter I, eski Sesel i annan en Polisi kler vizavi trafik imen e eski zot annan okenn plan pou fer sa Polisi vin piblik e ki mekanizm zot annan an plas pou met sa polisi an pratik.  Mersi Mr Speaker.

 

 

MINISTER JEAN-PAUL ADAM

Mersi Manm Onorab Lider Lopozisyon.  Lo kote premye kestyon, lo si i annan difikilte lo sa nevyenm Konvansyon.  Napa okenn difikilte, mon krwar i enportan pou note ki tou Konvansyon i depan lo en serten travay ki ganny fer ansanm avek diferan lazans ansanm avek biro Atorni Zeneral pou nou kapab enplimant li dan en fason ki an akor avek nou bann Lalwa nou menm.  Sa nevyenm Konvansyon ki parmi sa 9 Konvansyon ki nou apel bann Konvansyon kle kot i konsern drwa imen se Konvansyon lo, an Angle nou dir enforce disappearances e mon’n deza aparet devan sa Lasanble kot mon’n dir ki Gouvernman i deza pe fer sa travay neseser pou met sa Konvansyon an fors e pou anmenn li devan Lasanble evantyelman pou raktifikasyon.  Me parey mon’n dir sa prosesis i enn kot nou bezwen tou dabor analiz sa bann Konvansyon par rapor a nou bann Lalwa egzistan, fer sir ki i an akor epi swiv sa prosesi ki normal.

I annan plizyer Konvansyon, i annan Konvansyon par egzanp ki Sesel in deza fini sinnyen me i pa ankor vini pou raktifikasyon e i annan plizyer rezon.  I annan serten rezon ki biro Atorni Zeneral par egzanp zot annan bokou keksoz ki zot pe travay lo la e souvan i en kestyon kot ou annan en lalis travay e gradyelman ou pas dan sa bann Konvansyon e gradyelman osi zot vin devan Lasanble e parey nou konnen Lasanble i annan bokou travay osi.  Se pa toultan ki nou kapab met sa imedyatman.  Mon ti a dir ki napa okenn difikilte avek sa Konvansyon, i plito zis sa prosedir normal kot nou pe kontinnyen avek bann konsiltasyon pou travay lo adopsyon, lo sinnyatir adopsyon sa Konvansyon e evantyelman raktifikasyon devan sa Lasanble menm ozordi.

Lo kote trafik imen mon krwar i enportan ki sa i en kestyon ki nou konsider li osi an partenaya avek Minister Zafer Sosyal akoz i pa zis en kestyon ki mon Minister i kapab reponn konpletman, me mon ti a kontan dir ki Gouvernman dan konteks renesans sosyal, nou’n fer bokou deklarayon tre for kot i konsern trafik imen an zeneral akoz trafik imen i en konsept ki lafason ki Nasyon Ini i definir li, mon ti a dir ki Sesel nou pa en pei a risk tre for.  Me mon spesifye lafason ki Nasyon Ini i definir li akoz i annan diferan endividi oubyen diferan, menm Avoka zot kapab annan diferan lenterpretasyon lo ki savedir trafik imen.  Sa ki nou kapab konstate se Sesel nou en pei ki form par lemonn globaliz e definitivman dan sa lemonn modern i annan bokou plis presyon ki anmenn bann difikilte kot i konsern respe drwa imen e osi drwa bann dimoun ki par egzanp vin travay Sesel oubyen bann zenn Seselwa par egzanp ki kapab al travay dan lezot pei e nou, nou bezwen ranforsi nou Lalwa pou nou kapab fer sir ki nou annan plis mwayen pou nou adres sa bann menas.  Me mon ti a dir selon definisyon trafik imen ki Nasyon Ini i servi, Sesel nou en pei ki sa ki, sa bann lezislasyon ki nou deza annan i bann lezislasyon for.  Me nou’n deza dir e nou rekonnet ki i annan serten lezislasyon ki nou pou ranforse e travay i an kour pou nou fer li, alor nou pou anmenn sa pli devan prosennmen.  Me nou Polisi lo sa size mon krwar i ganny defini tre klerman dan bann diferan statement ki Gouvernman in fer dan konteks renesans sosyal e mon krwar nou kapab dir ki Gouvernman i pran sa risk tre oserye sansan nou pa ti pou osi fer sa zefor pou nou al pli lwen dan nou zefor kot i konsern lezislasyon.  Mersi.

 

MR SPEAKER

Kestyon 108.  Onorab Lebon.

 

HON LENNY LEBON

Mersi Mr Speaker.  Mr Speaker eski Minis pour Zafer Etranzer i kapab eksplik sa Lasanble vi ki i UNSC i adres bokou bann size ki relye avek peace keeping, conflict resolution e medyasyon, eski Sesel pe montre ase solidarite avek lemonn dan nou bann Konvansyon enternasyonal lo bann trete humanitarian pou ki lemonn i pran nou konman en model pou diriz li?  Mersi.

 

MINISTER JEAN-PAUL ADAM

Mersi bokou Onorab.  Mon ti a kontan dir ki Sesel avek en popilasyon 90 mil nou pa en pei ki mon krwar nou kapab dan en pozisyon pou nou anvoy lafors militer pou kapab travay dan bann zone konfli akoz nou napa sa mwayen.  Nou Lafors Defans i fer en travay fantastik an se ki konsern defans nou teritwar maren, nou teritwar souvren e malerezman nou napa sa kantite dimoun ki permet nou partisip dan sa fason klasik ki bokou lezot pei i fer.  Me sa pa vedir ki Sesel pa kontribye dan bann demars mentyen lape, peace keeping oubyen rezolisyon konfli.  Parey kestyon in ganny demande.

Nou annan, mon ti a dir menm en partisipasyon ki tre for e ki tre pozitif akoz Sesel atraver nou membership dan bann lorganizasyon tel ki Linyon Afriken.  Linyon Afriken i en lorganizasyon ki angaze dan plizyer misyon lape e Sesel konman en manm ki kontribye dan Linyon Afiken nou deza pe kontribye dan sa bann misyon, endirekteman atraver nou langazman dan sa linyon.  E annefe Sesel resaman nou’n regle tou nou bann aryeraz avek Linyon Afriken e nou kontribisyon anver Linyon Afriken si ou regard li par tet zabitan.  Akoz souvan nou koz lo kestyon GDP par tet zabitan kot Sesel i tre o, me osi letan nou fer nou kontribisyon a en lorganizasyon enternasyonal parey Linyon Afriken i pa fo pou nou dir ki Sesel par tet zabitan sak Seselwa i kontribye anver mentyen lape dan kontinan Afriken e dan lemonn atraver nou kontribisyon ki nou fer avek Linyon Afriken.

Resaman par egzanp Linyon Afriken in partisip dan misyon AFISMA Mali e zisteman kontribisyon Sesel ki fer atraver Linyon Afriken i kontribyen anver sa.  Osi Sesel nou’n zwe en rol kle dan medyasyon par egzanp lo Madagascar kot Sesel nou’n kontribye dan nou fason, osi lo kestyon re-anmenn stabilite an Somali, Sesel i enn bann pei ki atraver nou lekspertiz e nou leksperyans nou kapab kontribye.  Minis Joel Morgan resaman letan i ti pe reprezant Prezidan dan miting enternasyonal lo Lasomali ki ti fer Lonn, ti eksplike ki Sesel i pare pou partaz son leksperyans dan domenn sekirite maritim, dan domenn lapes ki kapab fasilit Somali.  E bokou nou bann partener i vwar sa dan konteks en pti pei avek pa bokou resours, sa ki nou’n kapab fer i kapab vin en legzanp ki ganny adopte lezot landrwa.

Osi mon ti a kontan dir ki dan konteks lezot lorganizasyon par egzanp SADC ek COMESA, Sesel nou partisipe konman bann lobzervater.  Mon konnen ki i annan en delegasyon ki pou partisipe enkli serten Manm Lasanble dan eleksyon ki pou fer Zimbabwe, alors sa i bann legzanp lo kimannyer Sesel menm konman en pti pei, menm ki nou kontribisyon letan ou pou get li an term dolar i tre modest i pa tre larz, me letan ou regard li konman en pti pei 90 mil nou pe fer en kantite e mwan personnelman mon fyer sa kontribisyon ki nou konman Seselwa nou fer anver lape ek stabilite dan Lafrik ek dan lemonn. Mersi boukou.

 

MR SPEAKER

Onorab Lebon.

 

HON LENNY LEBON

Mersi Mr Speaker.  Mr Speaker eski Minis i kapab enform nou Lasanble ki bann posibilite reel ki egziste, donnen kapasite potansyel Sesel pou vreman desarz son bann lobligasyon konteni dan bann Konvansyon enternasyonal ki nou’n raktifye.  Mersi.

 

MINISTER JEAN-PAUL ADAM

Mersi bokou.  Premye keksoz mon ti a kontan dir se ki si ou annan 90 mil dimoun oubyen ou annan 90 milyon dimoun, responsabilite i parey.  Se sa Nasyon Ini.  Nasyon Ini savedir ki menm si ou en pti leta ou bezwen kontribye, ou bezwen kontribye larzan.  Byensir larzan i depan lo, i annan en rating ki ganny fer selon diferan kriter.  Me mon pou touzour dir par tet zabitan Sesel i enn bann pei ki kontribye plis.

Apre lo kot i konsern bann diferan Konvansyon, sa bann diferan Konvansyon i egzize, par egzanp serten rapor ki bezwen ganny fer, serten remiz a zour ki bezwen ganny fer dan bann diferan Lezislasyon e Sesel i vre lo serten sa bann Konvansyon nou pa toutafe azour avek bann rapor par egzanp.  Me sa i en sitiasyon ki ganny rekonnet dan lakominote enternasyonal konman en defi.  En defi ki konsern bokou bann pti let zil akoz nou kapasite resours imen i en pe pli limite, me i bann kontrent ki osi konsern bann pli gran Leta.  Akoz si zot pou reponn tou sa bann kestyon dan sa bann Konvansyon, i nesesit bokou travay, boukou travay ki koute an term dimoun.  Alor laplipar pei, annefe napa en pei dan lemonn aktyelman ki azour a 100 poursan avek son bann diferan rapor ki bezwen ganny fer avek son bann diferan Konvansyon.

Me Sesel ki nou’n fer, nou’n etabli, depi ler mon Minis nou’n etabli en Komite ki pe regard e pe priyoritiz bann diferan Konvansyon ki nou bezwen fer soumet rapor, nou pe travay avek bann diferan lorganizasyon ki enplike Sesel akoz i pa zis Minister Zafer Etranzer, i annan rapor par egzanp lo drwa zanfan, i annan rapor lo drwa bann madanm.  I annan bokou ki ganny fer, e bokou kot Sesel letan nou fer sa bann rapor nou vwar ki nou pratik i menm en legzanp e en model ki bokou lezot pei pe servi.  Alor malgre nou kontrent, nou pe bouze e nou pe bouz dan sa bon direksyon e tou lenformasyon ki nou annan avek nou bann partener se ki zot satisfe avek progre ki Sesel pe fer lo sa size.  Mersi.

 

MR SPEAKER

Kestyon 109.  Onorab Lebon.

HON LENNY LEBON

Mersi Mr Speaker.  Mr Speaker eski Minis responsab pour Zafer Etranzer i kapab dir nou Lasanble ki Polisi son Minister pou promot lekonomi ble atraver bann progranm parey COI i annan pou bann pti Leta zil parey Sesel.  Mersi.

 

MINISTER JEAN-PAUL ADAM

Mersi bokou Onorab, sa konsept lekonomi ble i enn ki Prezidan Michel limenm li in dir ki i enn ki en lakle pou devlopman pa zis Sesel me devlopman tou bann pti Leta zil.  Sa konsept lekonomi ble ti sirtou ganny kosidere konman en kestyon enportan dan bann diferan negosyasyon enternasyonal swivan konferans Rio Plus 20 ki ti fer Rio lannen pase, e dan sa konferans enn bann kestyon kle se stati bann pti Leta zil e ki bann mekanizm devlopman ki pli byen kapab siport bann pti Leta zil.  E ti annan bokou koze lo kestyon sa ki apel the green economy, lekonomi ver, setadir devlopman en lekonomi ki dirab, ki soutenab e ki regard bokou bann kestyon lenerzi e ki permet regard a lon term devlopman en pei dan en fason soutenab.

Bann pti Leta zil ki ti partisipe Rio ti ti dir ki nou pa kapab koz lo en lekonomi ver, en lekonomi soutenab san osi adres kestyon lekonomi ble.  Lekonomi ble savedir lansanm nou lespas maritim.  Akoz sa i en keksoz ki tro souvan ganny inyore dan bann diferan Konvansyon enternasyonal.  Par egzanp napa en definisyon kler lo kimannyer pou eksplwat bann resours lo lanmer dan en fason ki vreman benefisye bann Leta ki bann leta maritim nou apel sa.  Sa i enkli bann leta zil me ozi bann leta kotye.  Alor Prezidan Michel in met li en priyorite konman nou Polisi zafer etranzer pou nou devlop sa konsept dan konteks Nasyon Ini, dan konteks bann mekanizm devlopman enternasyonal pou ki sa i ganny plis latansyon.  Sa i enkli bann zefor dan komisyon Losean Endyen ki ou’n mansyonnen dan ou kestyon akoz sa i nou premye lorganizasyon e i en lorganizasyon bann leta zil.  Tou bann manm i bann zil e komisyon Losean Endyen letan i ti zwenn an Zanvye sa lannen.  An Zanvye 2013 letan meeting ti fer Sesel, nou ti koz lo proze, en proze ki apel ‘Islands’ e sa i en proze sipor pou devlopman bann pti leta zil e sa i enkli rod bann mekanizm devlopman ki pli spesifik pou bann pti leta zil e sa i enkli sa kestyon lekonomi ble.  E mon ti ava kontan dir ki demen nou pe ouver en konferans isi Sesel ki prepar konferans enternasyonal lo pti leta zil ki pou fer Samoa an 2014, kot zisteman lekonomi ble i enn bann size kle.  Sa konferans i enkli partisipasyon bann lorganizasyon rezyonnal parey COI me i baze lo sa kad devlopman Nasyon Ini e nou bi se fer sir ki lekonomi ble i ganny latansyon dan konteks devlopman enternasyonal e pou vreman kre bann konsept ki permet nou vreman servi tou sa potansyel ki nou annan dan nou losean.  Nou en pti leta zil me nou en gran leta letan ou get nou losean e nou anvi mobiliz tou sa potansyel e se sa ki nou fer atraver lekonomi ble.  Mersi.

 

MR SPEAKER

Onorab Lebon.

 

HON LENNY LEBON

Mersi Mr Speaker.  Mr Speaker anlinny avek repons Minis, eski Minis i kapab eksplik nou Lasanble ki konteni stratezi ki’n ganny defini par ou Minister pou ki konsept nou lekonomi ble i ganny adopte par Nasyon Ini dan son lenstitisyon relye avek devlopman ekonomik soutenab bann pei ki pe devlope.  Mersi.

 

MINISTER JEAN-PAUL ADAM

Mersi bokou Onorab, dan sa konferans ki pou konmanse demen, se konferans rezyonnal ki kouver la rezyon Losean Endyen, Atlantik ek Sid Lazi, setadir tou bann zil ki dan sa rezyon pe vin ansanm pou zot koz zisteman lo stratezi devlopman bann pti leta zil.  Sesel konman pei ot nou pe fer en sesyon spesyal lo lekonomi ble akoz nou rekonnet ki sa i enn bann lakle devlopman pour bann pti let zil.  Nou bi dan sa konferans nou pe prezant en stratezi ki kouver plizyer eleman lekonomi ble, sa i enkli lenerzi, i enkli byensir lapes, i enkli konba kont sanzman klimatik, i enkli bann mineral ki kapab annan dan lanmer, i enkli komers lo lanmer akoz bokou bann pti leta zil nou pey tro bokou, nou pri lavi i tre o souvan akoz kou lenportasyon i o.  Alor tou sa bann size i form parti bann kestyon kle ki nou pe soumet dan sa konferans ki pou fer dan bann prosen 3 zour aparti demen e nou bi se an 2014 ki sa bann kestyon i ganny prezante dan konferans lo bann pti leta zil ki pou fer Samoa e pli lwen ki sa nou tou nou’n tann nom millennium development goals ki son bi se an 2015.  E apre 2015 Nasyon Ini pe dir ki nou pou koz lo sustainable development goal, lo bann lobzektif lo bann devlopman dirab e nou lentansyon se asire ki lekonomi ble e bann kestyon konsernan devlopman losean, e letan nou pe koz devlopman losean nou pe koz osi devlopman bann pei parey Sesel i ganny regarde pli byen e avek plis detay dan sa bann sustainable development goals apre 2015.  Mersi.

 

MR SPEAKER

Onorab Fideria.

 

(Technical Problem)

 

HON EMMANUEL FIDERIA

Eski Minis i kapab dir ek sa Lasanble ki bann preparasyon nou bann reprezantan diplomatik pe pas atraver pou ki konteni e stratezi konsenpt lekonomi ble i vin en konponan priyoriter dan zot latas konman bann reprezantan Sesel partou kot zot ete.

E osi si Minis i kapab dir nou si Minister pe mazin lo bann fason inovatif ki COI pe servi pou promot sa konsenpt lekonomi ble vi ki Sesel i annan en rol leadership lo sa size e se nou ki pe pran linisyativ pou met sa konsenpt lo azanda enternasyonal.  Mersi Mr Speaker.

 

MINISTER JEAN-PAUL ADAM

Mersi bokou Onorab, i annan mon krwar en kestyon ki ou’n tous lo la, se i annan bokou deba lo lekonomi ble akoz i en nouvo konsept e sa konsept i ganny enpe defini dan konteks Rio plus 20, me Sesel ki nou pe dir se ki sa konsept i bezwen ganny defini dan en konteks vreman pli etrwat Nasyon Ini e nou, nou anvi zwe en rol kle pou definir sa konsept.  Nou lapros se ki lekonomi Sesel an antye dan en fason i lye avek lekonomi ble, tou eleman nou devlopman i lye a en fason ou en lot avek lekonomi ble.  Si ou regard lapes, sa i byensir evidan.  Me osi tourizm, nou touris i baze lo en prodwi ki lye avek lanatir, ki lye avek lanmer, alor i annan bokou eleman lo sa lalinny e konman Gouvernman, Prezidan Michel pe demann tou departman dan Gouvernman pou anmenn sa refleksyon lo kimannyer nou pozisyonn nou lekor dan sa konteks lekonomi ble e kimannyer nou kapab osi demann lakominote enternasyonal pou striktir bann mekanizm ki rekonnet diferans letan ou pe devlope avek en lespas osianik ki letan ou pe devlope avek en lespas teres, akoz tou dimoun ki annan en bout later, bann gran pei ki annan bann gro bout later zot kapab al kot en labank en zot dir mon annan sepa konbyen milyon kilomet kare e sa i donn en gaz pou zot kapab pran en pre avek labank, Sesel pa kapab pran en bout lanmer pou li al demann en pre avek labank.  Alor i annan en kestyon konteks devlopman, konteks ki bann pei parey Sesel, ki bann pti pei ki napa bokou later kimannyer nou kapab finans nou devlopman e kimannyer nou kapab asire ki i annan lenvestisman ki dirab alavenir.  Sa i en refleksyon ki tou bann Minister pe fer, nou konman Minister Zafer Etranzer nou pe aprofondi sa refleksyon dan konteks bann konferans parey sa enn ki nou pe fer dan sa 3 zour ki pe vini, me si mon pou fer en pti pe ensentez mon ti a dir ki lekonomi ble se lekonomi Sesel e alor letan nou pe defann lekonomi ble nou pe defann lekonomi Sesel e nou anvi fer sir ki mekanizm ki egziste eternasyonalman i rekonnet sa bann spesifiste nou lekonomi.  Mersi.

 

MR SPEAKER

Onorab en kestyon, nou pe running, nou pe soz……

 

HON DAVID PIERRE

Mersi Mr Speaker.  Mr Speaker an vi ki lekonomi Sesel i depan pa mal lo lapes, eski Minis i kapab dir avek sa Lasanble si Gouvernman i annan okenn plan dan konteks devlopman lekonomi ble, si Gouvernman i annan okenn plan pou annan son prop flit bato ton oubyen pou fasilit sa pour ki Seselwa i antre dan sa biznes.  Mersi Mr Speaker.

 

MINISTER JEAN-PAUL ADAM

Mersi bokou Onorab, mon ti a kontan dir premyerman ki partisipasyon Seselwa dan lendistri lapes ki en parti lekonomi ble i pa zis en kestyon, ou pa kapab ziz li lo si ou annan en bato ton oubyen non, mon krwar nou bezwen ziz li lo lakantite larises ki Seselwa i kapab kree atraver devlopman resours maren.  Mon krwar i enportan ki nou ziz nou sikse pa lo si nou annan en gro bato ton akoz en bato ton parey sa ki apel en purse seiner, me plito lo ki kantite larises e devlopman nou kapab kree atraver bann resours maren.

Lo bann stratezi spesifik kot i konsern sekter lapes, mon asire a en serten moman Minis Resours Natirel i ava vin devan Lasanble pou donn bann detay en pti pe pli aprofondi lo bann stratezi, me anzeneral mon ti a dir ki Gouvernman i deza, sirtou par rapor bokou lezot pei an devlopman, nou’n fer bokou pou nou devlop en lendistri lapes artizanal e osi semi endristriyel e ki Seselwa i deza enplike a tou nivo sa lendistri.  Nou annan peser, nou tou nou konn nou bann peser e mon salye zot zefor akoz avek problenm piratri nou tou nou konnen ki bann peser in sibir en kantite e zot in fer en kantite osi pou kontinnyen kontribye anver nou devlopman nou pei, me osi nou bezwen regard tou sa bann businessman Sesel ki enplike dan sekter lapes e sa i enkli bann dimoun par egzanp ki aranz lasenn, i enkli tou bann eleman e sa mon krwar Sesel nou menm en model pou bokou pei an devlopman.

Sa kestyon bato ton i en kestyon, mon ti a dir purse seiners akoz dan bato ton i annan plizyer kalite, mon krwar nou letan nou pe dir bato ton nou pe dir purse seiners e sa i en kestyon kot dan lemonn ozordi i annan zis 5, 6 pei oubyen groupman ki annan purse seiners akoz i en kalite, enn sa bann bato i kout 25 milyon dolar apepre.  I en gran lenvestisman e tou sa bann pei ki pratik sa kalite lapes, sa kalite lapes i apel purse seinening, zot fer li, sa bann bato i baze lo en serten kalite subsidy ki sa bann diferan lorganizasyon i ofer zot.  Alor Sesel enn bann mesaz ki nou’n pase e nou pou kontinnyen pase se ki i pa normal ki serten pei i servi zot serten lavantaz atraver subsidies pou zot annan bann bato ki teknolozikman avanse e ki bann pei parey Sesel kot resours i baze nou napa akse avek sa bann menm teknolozi akoz nou napa akse avek sa bann menm subsidy.  Me anmenmtan ki nou pe dir sa e nou dir sa i en kestyon ki bezwen ganny adrese, nou dir ki i enportan ki nou regard lendistri lapes dan son globalite.  Alor ki loportinite nou pe kree pou antreprener Seselwa e sa mon krwar nouvo loportinite pe vini toulezour e stratezi ki Minister pe met anplas i kre ankor plis loportinite pou diferan nivo businessman Seselwa e osi polisi ki Prezidan in anonse resaman lo pti biznes pou kapab ankor kre ankor loportinite pou nou bann peser, pou zot enplike par egzanp plis lo kote processing e sa pou anmenn ankor plis larises.

Mon krwar i meyer ki nou ziz sikse dan sa sekter lo ki nou kree dan lekonomi e pa zis lo senbol en bato ton oubyen purse seiner. Me parey mon’n dir sa kestyon purse seiner i pa zis en kestyon ou aste en bato oubyen non, i en kestyon kimannyer ou kre sa loportinite pou nou bann businessman.  E deza i enportan pou nou nonmen, bokou Seselwa in envestir dan sa ki nou apel long liners e sa i bann bato semi-endistriyel e mon salye sa bann enterprener ki souvandfwa in pran bokou risk me zot kre lanplwa, zot kre bokou benefis pou nou lekonomi e mon krwar nou bezwen regard nou lendistri dan son globalite.  Alor mon ti a dir annou ziz li lo larises ki nou kapab kree pou tou nou sitwayen.  Mersi.

 

MR SPEAKER

Kestyon 110.  Onorab Bresson.

 

HON GALEN BRESSON

Mersi Mr Speaker.  Bonzour a tous.   Eski Minis pour Zafer Etranzer i kapab eksplik sa Lasanble ki zefor son Minister pe fer pou lobby ouswa enfliyans kominote Afriken pou zot siport kandidatir Sesel konman enn zot kandida pou sa pos UNSC.  Mersi.

 

MINISTER JEAN-PAUL ADAM

Mersi Onorab, premyerman Sesel pe prezant son kandidatir zisteman konman en leta Afriken, nou en Manm Linyon Afriken e nou’n prezant nou kandidatir pou lannen 2017 akoz zisteman se an lannen 2017 ki anba rotasyon a lenteryer Linyon Afriken ki sans i revin kot rezyon Afrique de Les, Les Lafrik dan Linyon Afriken, alor se poursa ki nou’n met nou kandidatir pou 2017 me pa lannen prosenn par egzanp e nou pe travay avek nou bann partener dan Linyon Afriken pou zot siport nou kandidatir, nou’n fer en zefor aprofondir atraver nou bann Lanbasader ki baze New York, Osen Nasyon Ini e osi atraver nou Lanbasader ki baze Addis Ababa, Letyopi pou nou eksplik nou bann partener ki rezon det nou kandidatir.  Premye keksoz ki mon ti a mansyonnen ki Linyon Afriken zot annan sa prensip rotasyon kot i konsern partisipasyon dan travay konsey sekirite.

Dan Les Lafrik nou rezyon, se sa rezyon dan Linyon Afriken ki’n tonm ladan, i annan zis 4 pei ki pa’n deza servi lo konsey sekirite e sa 4 pei se Sesel, Komor, Sid Soudan ek Leritre.  E Sesel parmi sa 4 pei ki pa’n deza servi pou le moman nou sel pei ki’n met son kandidatir devan.  I annan 2 lezot pei ki’n eksprim zot lentere pou servi anmenmtan ki nou e sa i Letyopi ek Kenya.  Nou byensir respekte sa 2 pei ki le fe ki zot in met zot kandidatir devan, me largiman ki Sesel pe fer i a plizyer nivo.  Premyerman dan konteks prensip Linyon Afriken, sa prensip rotasyon nou sel pei ki pa’n deza servi, Letyopi, Kenya, toulede in deza servi oparavan.  Apre dezyenmman konman en pti pei nou pa enplike dan okenn konfli avek nou vwazen, okontrer nou en pei ki pe sey fasilit lape dan nou rezyon e nou zefor lo Madagascar ek lo Somali in ganny byen note parmi nou bann vwazen e spesifikman nou pe osi fer nou bann Lanbasader fer en travay aprofondi avek zot bann partener pou zot konpran byen rikord ki Sesel i annan lo sa bann size e nou annan bokou konfyans ki nou lavwa pe ganny ekoute lo sa size.

Nou pe osi anvoy bann Lanbasader avek bann mesaz spesyal sorti kot Prezidan Michel pou demann sipor sa bann pei Afriken dan Les Lafrik e nou annan tou konfyans ki nou mesaz pe ganny tande akoz konman en pti pei nou krwar ki letan nou koze nou pe koz konman en konsyans, en konsyans ki pa baze lo en lentere spesifik, i baze nou lentere, i otomatikman en lentere en group en pe pli larz, i otomatikman nou kapab koz fasilman lo en baz lentere global.  Mersi.

 

MR SPEAKER

Onorab Bresson.

HON GALEN BRESSON

Mersi Mr Speaker.  Vizavi ou larepons Minis, eski ou pou kapab dir ek sa Lasanble si i posib, mon konnen i ankor 2013, pou donn en pozisyon Sesel an semoman an relasyon avek sa kandidatir ozordi vizavi tou bann lot pei Lafrik, zot sipor.  E osi si i annan okenn progranm ki ou Minister pe fer pou met azour tou bann diferan body lokal par egzanp Lasanble Nasyonal ki li osi i annan bann kontak e bann seminar konferans ki i ale lo kontinan Lafrik pou met zot azour ki i siport sa kandidatir ki Sesel ozordi pe met devan.  Mersi.

 

MINISTER JEAN-PAUL ADAM

Mersi bokou, premye keksoz ki mon a dir se ki sa kandidatir i pou tou Seselwa e mon tre ankouraze par mesaz ki nou’n gannyen par en kantite dimoun dan la popilasyon ki pe siport sa kandidatir.  Nou Minister, nou’n etabli en task force ki pe travay lo size.  Sa size aktyelman mon ti a dir akoz son eleman diplomatik pour le moman kanpany i vreman baze lo negosiasyon a baz rezyon Afrique de Les e i vreman lo en baz diplomatik, alor i en pti pe entansifye lo sa nivo.  Me mon ti a kontan felisit ozordi e remersye tou bann Manm Lasanble akoz mon konnen plizyer zot dan plizyer miting ki zot partisipe zot in koz lo Sesel, zot in eksplike ki Sesel pe fer dan plizyer domenn e sa i ed nou akoz i enportan ki dimoun i vrwar ki sa i en keksoz ki tou lasosyete Seselwa pe partisipe.

Nou’n osi zwenn avek lasosyete sivil, nou’n fer en premye miting, me nou ankor boner dan sa kanpany, nou ankor lo staz kot nou pe eksplik dimoun akoz Sesel pe met son kandidatir, nou ankor lwen avek sa moman kot desizyon pou ganny pran e zefor ki nou pe fer se vreman plis pou eksplik dimoun ki Sesel i kapab anmennen.  Akoz konman en pti pei nou napa en kantite larzan pou nou depanse dan sa kanpany, i pa nou lentansyon, nou pe fer en kanpany vreman baze lo prensip, e nou bann prensip i senp, nou annan en kandidatir ki baze lo bon vwazinaz, nou annan bon relasyon avek bokou nou bann vwazen e nou ensiste ki sa i enportan ki nou annan sa lapros ki pa baze lo konfli, me ki baze lo korperasyon, nou annan en politik etranzer ki baze lo defans lanvironnman ki defan lo bann lespas partaze parey losean e toutsala i bann kestyon ki nou pe ganny en kantite larepons pozitiv.  Alor nou lo bon semen pou nou kandidatir.  Nou osi pe travay avek bokou laprofondisman avek nou bann partener COI, akoz bann pei COI in fini pronons zot lekor ouvertman anfaver nou kandidatir e nou annan bokou konfyans ki nou pe al lo sa bon semen.

Lo kote Lasanble Nasyonal, parey zot konnen mon’n fini fer, mon ti fer en premye Statement devan zot e nou ti annan en premye deba lo sa size e nou pou kontinnyen met zot azour lo bann devlopman kot i konsern sa size e nou apresye en kantite sa zefor ki sak Manm pe fer pou defann nou kandidatir.  Mersi.

 

 

 

MR SPEAKER

Onorab Kevin Vidot, kestyon 111.

 

HON KEVIN VIDOT

Mersi.  Bonzour Mr Speaker, bonzour tou dimoun alekout.  Mr Speaker eski Minis responsab pour Zafer Etranzer i kapab eksplik sa Lasanble ki mekanizm ki egziste dan COI pour ki Sesel i entegre en konponan lazenes dan kad COI parey Prezidan Michel ti dir dan son diskour Leta Lanasyon.  Mersi.

 

MINISTER JEAN-PAUL ADAM

Mersi Onorab, parey Prezidan in dir dan diskour lo Leta Lanasyon, lavenir Sesel i lye avek osi sa ki pou arive dan lemonn.  Sa i en realite ki nou pa kapab inyore. Tou loportinite ki nou pou kree pou nou devlopman i pa pou bann loportinite ki pou forseman definir par bann frontyer.  E Prezidan Michel in dir ki pou nou kapab donn loportinite nou lazenes nou bezwen osi kre loporinite pa zis dan nou pei, nou bezwen osi regard an deor nou pei.  Pou nou fer sa, nou pe travay avek COI pou nou annan en progranm pli aprofondi pou siport bann zenn sirtou an se ki konsern devlopman ekonomik.

An Fevriye sa lannen komisyon Losean Endyen ti organiz en latelye rezyonnal ki ti fer Sesel, zisteman avek bi kre en platform rezyonnal pou regroup e apros bann zenn entreprener dan Losean Endyen.  Sa linisyativ limenm i lye direk avek sa ki Prezidan Michel in dir.  Sa ki i ti dir dan ventwityenm konsey Minis COI an Zanvye e osi sa ki in dir dan son diskour Leta Lanasyon.  Atraver sa platform COI i anvi fer sir ki bann zenn i pli ganny konekte antre zot e alor pli byen kapab idantifye bann loportinite ki egziste.

Lo nivo nasyonal, bann diferan loganizasyon nasyonal Sesel pe fer en travay pou osi propoz bann diferan eleman ki nou kapab fer an partenarya dan larezyon.  En kestyon par egzanp ki kontinnyen monte se kimannyer pou pli byen finans bann zenn antreprener pa selman dan konteks nasyonal me osi dan konteks enternasyonal.  Si nou regard en pti biznes Sesel ki pe fek konmanse, nou konen nou en pei ki enport bokou keksoz, bokou matyer primer i bann keksoz enporte.  Alor pour kwa pa nou pli byen konekte nou bann zenn antreprener osi avek direkteman avek prodikter serten sa bann matyer primer dan lezot pei.  Sa i en pti pe bann eleman ki nou pe devlope atraver COI swivan lapel ki Prezidan Michel in fer.

Prosen konsey Minis ki pou fer Komor an 2014 i pou lokazyon osi kot nou pou kapab reprezant en nouvo stratezi lazenes pou larezyon anba leadership Sesel, e sa i batir lo sa bann linisyativ ki mon’n deza site e ki deza an kour dan kad COI.  Mersi.

 

MR SPEAKER

Onorab Vidot.

 

HON KEVIN VIDOT

Mersi Mr Speaker.  Mr Speaker anvi avek larepons Minis, eski Minis i kapab dir nou anlinny pou kontinnyen devlop nou lekonomi e kontinnyen bouz bann zenn ver antreprenarya, ki bann mekanizm i pe travay ansanm avek bann body lazenes Sesel par egzanp SNYC pou empower nou bann zenn pou met zot pare e pou prepar bann proze ki azour e bann proze inovativ ki pou fer zot kontinnyen annan sa leadership role e pli fasil pou zot ganny sa finansman posib pou zot bouz ver lavenir.  Mersi.

 

MINISTER JEAN-PAUL ADAM

Mersi bokou, mon krwar ki i annan bokou eleman dan ou kestyon ki mon krwar lezot Minis letan zot vin devan Lasanble zot ava aprofondir.  Me mon krwar lanons ki Prezidan Michel in fer resaman in anons bokou sipor ki pou anmennen pour pti biznes.  Bokou sa bann nouvo sipor pou regard espesyalman bann zenn ki pe etablir en biznes pete pou la premye fwa.  Alor mon annan sa konfyans ki bann lorganizasyon lazenes i kapab travay an etrwat kolaborasyon avek bann loganizasyon pou pti biznes tel ki SENPA pou fer sir ki zot proze i alaoter ki nou kapab fasilman ganny finansman dan bann labank isi Sesel me pourkwa pa osi bann finansman avek bann mekanizm eksteryer e se sa en pti pe bi ki nou pe travay dan konteks rezyonnal, me osi an bilateral avek bokou lezot pei.

Mon ti a kontan dir osi ki i annan bokou zenn ki deza annan bokou nide, i annan bokou ki ekrir mwan, ki’n anvoy proze kot nou e mon felisit zot akoz sa i en keksoz ki Sesel nou kapab fyer, nou zenn i annan bokou nide e zisteman se sa bann nide ki enspir Gouvernman pou anmenn bann linisyativ parey dan en kad rezyonnal e mon krwar ki zenn Seselwa i kapab osi enspir larezyon e bokou lezot pei pou fer bann proze parey.  Mersi.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Bonzour tou dimoun.  Mr Speaker etan ki Sesel nou’n fer bokou dan domenn lazenes pou promouvwar lazenes, eski Minis i kapab dir nou si annan okenn plan alavenir pou entegre enpe anterm formasyon par egzanp avek Liniversite Sesel, avek bann sant parey Maritime Training Center kot COI i kapab donn serten finansman kot bann zenn dan larezyon i kapab vin partisipe e anmenmtan promouvwar nou bann lenstitisyon isi Sesel, kot nou a vin en hub dan larezyon pou tel promosyon lazenes.  Mersi.

 

MINISTER JEAN-PAUL ADAM

Mersi bokou.  Formasyon i en eleman kle dan sa proze rezyonal ki nou koze dan konteks COI.  Dan sa premye latelye ki ti fer isi lo kote lantreprenarya i kler ki nou bezwen osi ranforsi sa eleman formasyon.  Alors sa i en eleman ki pou vini dan sa proze rezyonnal.  Me mon ti a kontan dir ki en pwen kle dan nou diplomasi enternasyonal se nou met formasyon sirtou pou bann zenn dan nou relasyon avek bokou pei.

Nou ava rapel ki vizit Prezidan Sir Lanka resaman nou pe ranforsi sa partenarya pou Maritime Training Center ki ou’n site, me nou pran sa pwen e sirtou pete dan konteks lekonomi ble ki enportan ki nou regard ranforsman formasyon Maritime Training Center osi dan en kad rezyonnal avek bann lezot pei COI e mon vwar sa konman en keksoz ki toutafe fezab e ki toutafe pozitif.  Mersi.

 

MR SPEAKER

Kestyon 112, Onorab Mirena Souris.

 

HON MIRENA SOURIS

Mersi Mr Speaker, Bonzour Mr Speaker e tou dimoun.  Eski Minis pour Zafer Etranzer i kapab enform nou Lasanble, la ki i annan en Lanbasader Etyopi, ki rol Sesel pou en pli bon entregasyon dan Lafrik vi ki souvandfwa nou dir nou spesifisite i diferan avek issue lo kontinan.  Mersi Mr Speaker.

 

MINISTER JEAN-PAUL ADAM

Mersi bokou Onorab.  Sesel i tre fyer ki i en Manm Linyon Ariken, nou enn bann pei ki letan nou ti pe demann nou lendepandans, zefor atraver sa letan OAUOrganization for African Unity ki prezan in vin African Union in zwe en rol kle pou sansibiliz lemonn, ki menm bann pti pei parey Sesel i enportan ki son bann sitwayen i annan sa sans pou zot definir zot prop desten.  E alor nou tre fyer ki nou en Manm Linyon Afriken.  Sa i donn nou sa loportinite avek nou bann vwazen pou nou devlop boukou plis perspektiv pou nou devlopman konzwent.

Me enn bann konstrent e enn bann mesaz ki Prezidan Michel in pas tre klerman dan plizyer some kot in partisipe dan Linyon Afriken, me osi o nivo COMESA ek SADC, se ki i enportan letan nou regard lentregasyon, ki nou pa bliye ki i annan bokou leta maritim ki form parti Lafrik e ki pou nou pli byen kapab servi sa potansyel sa bann leta, i enportan ki nou regard lentegrasyon avek sa bann eleman an tet.  Akoz bann premye proze entregasyon ki’n ganny fer in met lanfaz sirtou par egzanp lo konekte bann semen ant bann Leta.  Sa i tre byen, me nou tou nou konnen ki sa bann semen pa arive ziska kot nou.  Zot in fer zefor pou ranforsi bann rezo elektrisite ant bann pei kontinantal, ankor sa i tre byen me i pa ariv kot nou.

Alor en mesaz kle ki Prezidan Michel in fer se ki nou bezwen annan bann eleman progranm rezyonnal ki spesifik e ki mobiliz sa posibilite, sa potansyel bann leta maritim, bann leta zil e sa in ganny bokou sipor.  Mon ti a kontan dir ki Prezidan ki Chairman komisyon Linyon Afriken, Madam Nkosazana Dlamini-Zuma letan in vin Sesel, limenm li in koz lo lenportans lekonomi ble, in koz lo lenportans sa devlopman bann lespas maritim e Linyon Afriken deplizanpli pe met en kantite lanfaz lo la e sa i gras a laktivis Sesel e bann mesaz ki Sesel in pase.  Dan konteks SADC ek COMESASADC limenm li in adopte en plan spesifik pou lenfrastriktir pou bann maritime statese e sa pe ganny finalize aktyelman e nou espere pou donn nou loportinite pou nou amelyor par egzanp nou bann servi portyer.  COMESA in osi devlop en progranm maritime corridors e sa ankor i rekonnet ki en kantite komers i ganny fer par vwar maritim e ki sa i touzour en kontrent.

Nou tou, nou konnen ki isi Sesel ki pou nou enport keksoz nou napa bokou opsyon e souvandfwa nou bann marsandiz i bezwen fer en letour par plizyer Erport avan i ariv kot nou e sa i azout lo kou, i azout lo letan e i fer nou sitiasyon kou lavi pli konplike.  Sa i bann mesaz ki Sesel nou’n pase regilyerman, lefet ki nou annan nou Lanbasader Letyopi aktyelman, i permet nou pas sa bann mesaz avek legilarite.  Osi gras a leadership Sesel nou’n etabli en group bann Lanbasader bann zil e zot zwenn regilyerman – anmarz Linyon Afriken e nou pe pas bann mesaz konzwent e mon fyer ki pti-a-pti nou mesaz pe ganny tande e nou annan bokou konfyans ki sa vizyon entregasyon alavenir pou pran kont zisteman sa konsept lekonomi ble ki Sesel pe met devan.  Mersi.

 

MR SPEAKER

Onorab Souris.

 

 

 

HON MIRENA SOURIS

Mersi Mr Speaker.  Mr Speaker eski Minis i kapab dir ek sa Lasanble si i satisfer avek rol ki Sesel in zwe ouswa pe zwe pou sansibiliz bann pei manm Linyon Afriken lo spesifisite e vilnerabilite bann pti leta zil parey Sesel e lo litilite pou pran an kont sa de fakter dan prosesis lentegrasyon ekonomik.  Mersi.

 

MINISTER JEAN-PAUL ADAM

Mersi bokou.  Mon krwar parey mon’n dir dan mon larepons presedan, nou’n fer bokou progre a en serten sans, i annan bokou pei aprezan ki rekonnet ki zot menm zot, zot pou benefisye plis si i anann plis regar ki ganny fer lo sa eleman devlopman sa lespas maritime.  Alor nou kapab dir ki bokou bann zefor ki Sesel in fer in deza pe ganny rekonnet me i touzour annan serten konsern.

Nou ava rapel ki an 2003 Sesel ti bezwen sorti dan SADC, nou ti bezwen sorti dan SADC akoz sa letan nou kontribisyon ti tro o konman en pti leta zil, gras a sipor Sid Lafrik me osi bann lezot pei nou’n kapab re-antre akoz zot ti aksepte pou zot reviz nou kontribisyon lo en baz ki ti pli soutenab pou nou.  Me sa kestyon kontribisyon a sak fwa i en kestyon ki nou bezwen adrese akoz nou en pti pei, nou annan zis 90 mil dimoun e nou annan en serten limit lo sa ki nou kapab fer e nou, nou pa ezite pou nou fer kler ki nou kontribye, nou kontan pou nou kontribye me nou kontribye dapre nou mwayen e sa ki mon krwar i pozitif se ki nou vwar ki bokou sa bann pei i rekonnet ki zot bezwen bann zil parey Sesel pou anmenn en keksoz anplis avek plan devloman dan sa rezyon.

Linyon Afiken i konsyan ki petet plis ki avan ki bann frontyer pa fini lo lans.  I annan sa gran lespas maritim ki nou bezwen kapab devlope, e pou nou kapab vreman servi son potansyel nou pa kapab get zis en pei pe fer keksoz li tousel, i bezwen vin en partenarya.  Sesel par egzanp nou anvi ganny ankor diferan marse pou nou leksportasyon pwason e i kler ki konsomasyon dan Lafrik pe ogmante.  I annan bann marse potansyel.  Visversa i pou kout nou, si nou kapab devlop en lyen ki regilye avek Les Lafrik i annan bokou prodwir ki nou kapab enporte ki pou vin pli bon marse pou vin Sesel, se pour sa nou annan sa zefor diplomatik tre for dan nou rezyon.  Se pour sa pa zis avek Lafrik osi, nou’n vwar resaman Sir Lanka, nou’n vwar nou pe fer bokou zefor avek nou bann vwazinaz pros pou nou devlop bann partenarya ki aprofondi pou rekonnet zisteman sa bann spesifisite zil ki ou’n mansyonnen.  Mersi.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker dan konteks lentegrasyon dan Lafrik, eski Minis i kapab dir ek sa Lasanble ki pozisyon Sesel vizavi Parlman Linyon Afriken.  Mersi Mr Speaker.

 

MINISTER JEAN-PAUL ADAM

Nou toutafe siport sa prensip Parlman, annefe Sesel in ganny envite pou deziny Parlimanter ki pou kapab partisip regilyerman dan sa bann miting Parlman Afriken e mon krwar sa i en keksoz pozitif, mon krwar nou deza aktif dan plizyer lezot groupman parlimanter, Commonwealth, SADC, COMESA e i menm parey pou Linyon Afriken.  Nou ava pete zis note ki nou ti annan bokou aryeraz avek Linyon Afriken ki’n pran en bon pe letan pou nou kapab regle, me a sa moman ozordi nou’n kapab regle tou nou aryeraz e sa i ouver laport pou en konporasyon aprofondi menm lo nivo parlmanter e mon Minister e Gouvernman nou swete ki sa korporasyon kot i konsern Linyon Parlimanter Afriken i ganny aprofondi.  Mersi.

 

MR SPEAKER

Onorab Murielle Marie. En kestyon silvouple.

 

HON MURIELLE MARIE.

Mersi Mr Speaker.  Bonzour Mr Speaker, bonzour a tous.  Mr Speaker eski Minis i kapab dir avek sa Lasanble si dapre analiz ki son Minister in fer an sa ki konsern prosesis entregasyon ekonomik Sesel dan Lafrik pou ganny fasilite si Lasanble Nasyonal i zwenn Parlman Pan Afriken e anmenmtan annan en rol leadership. Mersi.

 

MR SPEAKER

Sa i plizoumwen menm kestyon, non, ki’n ganny demande.  Non Minis?

 

MINISTER JEAN-PAUL ADAM

Byen mon ti ava dir ki……

 

(Microphone problenm)

 

MR SPEAKER

Request, Minister request.  Minister.

MINISTER JEAN-PAUL ADAM

Wi, mersi, mon krwar sa kestyon i similer me zis pou azoute ki mon krwar i enportan ki nou siport zefor bann Parlmanter pou an relasyon avek bann diferan lorganizasyon rezyonnal akoz i zisteman permet nou partaz leksperyans, partaz meyer pratik e i en keksoz ki mon Minister pou kontinnyen siporte.  Mersi.

 

MR SPEAKER

Onorab Alderic Bristol.  Kestyon 113.

 

HON ALDERIC BRISTOL

Mersi Mr Speaker.  Bonzour Mr Speaker, bonzour a tous.  Eski Minis responsab pour Zafer Etranzer i kapab dir nou Lasanble si Sesel pe servi byen son pozisyon e lenfliyans dan bann kominote tel parey SADC, COI, IOTC pou donn loportinite lezot Seselwa pou ekspoz zot enternasyonalman par okip bann pos oubyen vann lekspertiz avek larezyon sirtou dan bann domenn tel ki tourizm, lanvironnman, sekter finansyer eksetera.  Mersi bokou.

MINISTER JEAN-PAUL ADAM

Mersi bokou.  Sesel nou en pti pei, me mon krwar nou kapab fyer bann Seselwa ki pe deza pe kontribye dan bokou bann lorganizasyon enternasyonal.  Nou Minister nou’n adopte en polisi kot nou aktivman esey ankouraz Seselwa pou met zot lekor devan pou fer bann aplikasyon dan bann diferan loganizasyon enternasyonal.

Mon ti ava kontan mansyonnen ki diferan lorganizasyon i annan diferan fason rekritman.  Nasyon Ini zot annan en sistenm kot zot donn priyorite pou bann pei ki nou kapab dir i ganny sou reprezante.  Menm si Sesel nou deza annan plizyer dimoun ki travay dan Nasyon Ini, nou kantmenm sa ganny konsidere konman en pei ki sou-reprezante akoz sak pei i en vot e nou en pti pei menm si nou annan de, trwa dimoun menm ki travay dan Nasyon Ini.  Nou touzour annan perspektiv pou annan plis.

I annan osi serten pos ki ganny fer lo en baz eleksyon.  Resaman nou ava note ki en Seselwa ti ganny elekte konman Direkter Egzekitif Komisyon ton Losean Endyen e sa i baze Sesel e sa se Msye Randolph Payet.  Alor i annan ki baze lo eleksyon, i annan lezot kot i baze lo en prosesi konpetitiv e ankor diferan loganizasyon – i annan ki annan, parey SADC ki annan en sistenm kota kot ankor Sesel nou sou-reprezante e mon servi sa lokazyon pou mwan dir si i annan okenn dimoun ki enterese fodre zot pa ezite pou zot konsilte bann sit web sa bann diferan loganizasyon kot tou sa bann diferan pos ki disponib i ganny liste, e si i annan okenn Seselwa ki anvi fre zot laplikasyon.  Akoz si i pa en pos pou eleksyon then laplikasyon i bezwen ganny fer direkteman.  Me nou Minister Zafer Etranzer nou donn en sipor administrativ pou tou dimoun ki anvi fer laplikasyon dan bann diferan loganizasyon enternasyonal akoz nou trouv sa en fason ki siport loportinite pou nou bann sitwayen.  E osi parey in ganny dir dan kestyon ki permet nou kre plis konprenezon e servi bann pratik, bann meyer pratik ki menm Sesel nou’n adopte dan plizyer sekter kot nou annan en lavantaz tel ki touris, lanvironnamn eksetera.  Mersi.

 

MR SPEAKER

Onorab Bristol.

 

HON ALDERIC BRISTOL

Mersi Mr Speaker.  Mr Speaker baze lo repons Minis, eksi Minis i kapab donn nou en bilan lo bann benefis direk e konkret ki Sesel in reisir realize e benefisye atraver son membership dan sa bann lorganizasyon rezyonnal ki nou pe koz lo la.  Mersi Mr Speaker.

 

MINISTER JEAN-PAUL ADAM

Bon dan bann diferan loganizasyon, an zeneral nou benefisye en kantite avek serten lorganizasyon parey COMESA nou pe finaliz la par egzanp en proze sipor bidzeter ki en pe pli ki 700 mil Ero e sa pou permet sipor dan diferan seketer.  Alor sa i en legzanp spesifik ki mon site.  Me lefe ki nou annan nou bann sitwayen ki dan sa bann diferan lorganizasyon, parey mon’n deza dir i permet plizyer eleman, i permet partaz leksperyans ki Sesel i annan dan sa bann lorganizasyon, i permet partaz bann meyer pratik ki Sesel in adopte, me i osi permet nou akoz parfwa konman en pti pei nou pa neseserman konsyan tou bann diferan mekanizm e loportinite ki la e letan nou annan ban sitwayen zot toultan konsyan nou konstrent par egzanp kot i konsern letan nou en pti leta zil e zot fer sa zefor pou asire ki kot i neseser Sesel i benefisye osi atraver bann diferan mekanizm.

Me tou Seselwa letan zot travay dan en lorganizasyon enternasyonal zot fer li lo la baz ki zot pe kontribye dan sa lorganizasyon.  Enn fwa ki zot antre dan sa lorganizasyon zot konsider zot lekor konman en lanplwaye sa loraganizasyon, me nou tou nou konnen ki en Seselwa i touzour reste en Seselwa e i touzour fyer son pei.  I annan bokou legzanp, nou anann dimoun ki travay dan SADC, nou annan dimoun ki travay dan COMESA, nou annan dimoun ki reprezante dan komisyon Losean Endyen , dan labank mondyal, dan UNDP, nou reprezante vreman dan Commonwealth, dan bokou lorganizasyon.  E mon ti a kontan osi fer en mansyon spesyal pou bann dimoun ki’n deza travay dan lepase, dan bann diferan loganizasyon e ki ozordi in retourn Sesel e pe kontribye e pe servi osi zot leksperyans dan sa bann lorganizasyon isi e sa i en lot fason mon krwar ki Sesel i benefisye.  Mersi.

MR SPEAKER

Kestyon 114, Onorab Andre Pool.

 

HON ANDRE POOL

Mr Speaker, mon ti a kontan demann Minis pour Zafer Etranzer pou eksplik nou Lasanble bann detay konsernan sa protokol lapes ki nou’n sinnyen ek Linyon Eropeen le 10 Me, 2013 e ki bann benefis sa protokol pou donn Sesel.  Mersi.

 

MINISTER JEAN-PAUL ADAM

Mersi.  Mon ti a kontan dir ki negosyasyon sa protokol avek Linyon Eropeen i sitiye osi dan konteks ki Prezidan Larepiblik in dir ki i enportan ki nou travay avek nou bann partener pou asire ki bann pei parey Sesel, akoz i pa zis Sesel i ganny plis benefis atraver zot prop resours.  Mon’n deza mansyonnen sa kestyon kot i annan serten pei ki servi subsidies pou devlop serten teknolozi e i enportan ki bann pei larezyon, bann pei kot sa resours i baze i kapab benefisye plis e se dan sa konteks osi ki nou’n antre dan sa bann negosyasyon.

Premye negosyasyon ti fer Sesel le 6 ziska le 8 Mars, dezyenm letap ti fer an Avril le 15 ziska le 17 ki ti fer Briksel e trwazyenm e dernyen ti fer Sesel le 9 ek le 10 Me e sinyatir sa protokol, mon kapab dir i anmenn plizyer benefis pour Sesel, pli gany benefis se i ogmant pri par tonn ki Gouvernamn Sesel i resevwar.  Oparavan total ki ti ganny resevwar par tonn ti 100 Ero par tonn e dan sa 100 Ero par tonn ti en kontribisyon 50 poursan ant Linyon Eropeen ek bann amater, sakenn ti pey 50 Ero ti fer 100 Ero.

Dan nouvo lagreman, dan premye lagreman 2014, nou pou ganny nou 110 Ero, kout 55/55, kot EU pou pey 55 Ero kot bann amater pou pey 55 e sa pou ogmante sak lannen.  Alor an 2015 pou vin 115 Ero par tonn, an 2016 pou 115, an 2017 pou 120, an 2018 pou 120 e an 2019 pou 125 Ero par tonn.  Alor sa i en ogmantasyon ki enportan e mon ti a kontan dir ki nou sel pei dan larezyon ki dan sa bann negosyasyon ki’n kapab ganny en logmantsyon dan pri par tonn.

Osi lot amelyorasyon se sipor sa ki apel sectoral support e sa i bann grants ki ganny donnen spesifikman pou devlopman lenfrastriktir e sirtou Sesel tradisyonnelman nou’n servi sa pou nou devlop nou bann sekter artizanal e semi-endistriyel, sa i enkli lo bann diferan por rezyonnal.  I enkli lo bann lekipman pou peser, i enkli osi finansman ki bann businessman i kapab servi pou envestir dan lapes e i enkli osi lekipman ki fasilit sirveyans par egzanp sistenm VMS eksetera.

Alor bann kontribisyon pour bann lannen ki pou vini se in ogmante sorti 2.2 milyon Ero par lannen pou vin 2.6 milyon Ero par lannen pou 2014 ek 2015 e 2004 milyon Ero pou bann lannen apre sa.  Sa nouvo lagreman i pou 6an dan plas 3an, me sa i permet bann diferan partener annan sa, zot kapab envestir pli a lon term me apre 3an nou annan posibilite en revi si i annan sanzman dan sirkonstans.  Alor menm si son lagreman i en pti pe pli long dan son dire, pratikman nou kapab fer sanzman dan menm fason.

Lot kondisyon kot in anmenn amelyorasyon se meyer kondisyon pou bann peser Seselwa ki kapab travay lo bann bato Eropeen e Sesel lo kote Lotorite Lapes pe fer zefor pou osi fer sir ki monitoring sa bann kondisyon i ganny fer dan en fason pli aprofondi.  I osi annan dan sa lakor klarifikasyon lo bann kestyon par egzanp bann zone kot bann bato i kapab lapes e osi litilizasyon par Sesel, bann obzwevater e ranforsman sirveyans sa bann lapes pou asire ki sa zefor lapes pe ganny fer lo en fason ki soutenab.

Anzeneral mon ti a dir ki sa Lakor, sa nouvo partenarya i permet nou ganny plis larzan par tonn ki ganny lapes dan nou delo.  Sa i en devlopman pozitif an zeneral.  I enportan kantmenm pou dir ki zefor Gouvernman Seseli kontinnyen pou travay avek bann partener pou fer zot konpran ki lafason ki bann mekanizm devlopman i baze lo resours maren i touzour pa satisfezan.  I touzour pa satisfezan dan kad global e sa i en mesaz ki nou pou kontinnyen met devan.

Me sa nouvo protokol ki nou’n met devan i en pa dan bon direksyon, i en rekonesans ki valer sa resours i plis, anmenmtan ki lakantite bato ki pe lapes dan delo Sesel pou redwir akoz aktyelman i annan, aktyelman Protokol i permet 48 purse seiners ek 12 long liners e nouvo Protokol i permet permet 40 purse seiners ek 6long liners.  Savedir zefor lapes i redwir par bann etranze, par bann sa ki apel bann distance fishing nation e dan sa ka bann bato Eropeen, me anmenmtan ki larzan ki ganny anmase i ogmante.  Alors se sa ki mon dir i en pa dan sa bon direksyon.  Nou pou kontinnyen travay pou amelyor bann kondisyon e osi kre plis loportinite pou nou bann peser Seselwa, e sa i enkli servi bann resours ki nou gannyen atraver sa lakor pou permet pli lenvestisman par bann diferan partener Seselwa.  Alor an zeneral Mr Speaker sa i reprezant bann nouvo eleman.

Dernyen pwen ki mon a mansyonnen se ki sa Lagreman pou osi vin devan Lasanble pou zot debat lo la a en moman ki Atorni Zeneral in fini fer son travay neseser ansanm avek Minister konsernen.  Mersi.

 

MR SPEAKER

Onorab Pool.

 

HON ANDRE POOL

Wi Mr Speaker.  Mr Speaker ki granti ki Minis pe donn nou ki atraver sa nouvo Lakor ki in fek eksplik nou ki sa si oule pou donn Sesel e Seselwa sa meyer deal posib kontrerman avek bann lezot tel lakor ki nou’n sinyen dan lepase.  Mersi.

 

 

MINISTER JEAN-PAUL ADAM

Premye pwen mon ti a dir se labaz tou Lakor se sa pri par tonn e sa se sa premye kondisyon ki definir ou benefis oubyen non e nou pri par tonn in ogmante e alors sa i en keksoz pozitif.

Lot keksoz ki mon ti a dir se ki sa nouvo Lagreman i en pa dan sa direksyon akoz dan lepase e mon’n dir dan mon repons lo en lo kestyon lo bato ton ki Sesel i kapab fer.  Linyon Eropeen i fer son Polisi lapes, i osi baz lo en sistenm subsidy anver son bann bato lapes.  Sa nouvo Lakor i anmenn en sanzman se ki kontribisyon gradyelaman par bann amater, par bann met bato Eropeen i ogmante e kontribisyon Linyon Eropeen anver sa pri par tonn i dimiyen, savedir sa subsidy i diminyen gradyelman avek letan e savedir zot pe bouz lo en, dan en direksyon kot mon kapab dir sa lefe subsidy i diminyen.

Kan lefe subsidy i diminyen i kre plis posibilite pou nou menm konman Seselwa kapab envestir dan bann sekter ki kre larises pou nou sitwayen, pou nou bann biznes.  Parey mon’n deza dir lo larepons lo en kestyon oparavan, kestyon osi ki nou bezwen demann nou lekor, se eski, ki bann sekter dan lendistri lapes oubyen dan lekonomi ble kot nou pou kre plis larises?  E eski se par egzanp enn sa bann bato ton ki pou kre plis larises baze lo konesans ki nou deza konnen ki sa bann bato i operate, i servi en sistenm subsidy? E mon konnen refleksyon stratezik ki Minister Resours Natirel pe fer se regard plizyer eleman, se pa zis en sel eleman, se en lenvestisman dan plizyer eleman enkli dan kestyon processing par egzanp, enkli kre plis loportinite pou bann peser envestir dan bann lezot value addition ki pou permet zot pli byen benefisye atraver sa bann loportinite.

Dan sa Lakor, sa ki apl sa sectoral support parey mon’n dir ki’n ogmante i en sipor ki Lotorite Lapes pou kapab servi direkteman pou devlopman nou sekter lapes.  e lot keksoz ki mon a dir se ki Gouvernman Sesel in osi pran linisyativ pou pibliy tou son bann rapor lapes ki i annan avek tou diferan pei.  Nou annan konfyans ki negosiayon ki’n ganny fer par nou bann lekip teknik, mon pran sa loportinite pou mwan felisit zot, zot in fer en resers aprofondi, zot in fer en travay eksepsyonnel pou kapab ganny sa meyer Lakor posib.  Me i pa vedir ki Sesel pa pou aret dir ki nou pa devret ganny plis.   Okontrer nou pou kontinnyen dir akoz sa resours, sa losean i en loportinite pou tou Seselwa e nou bezwen fer plis pou nou kapab mobiliz sa resours.  Mersi.

 

MR SPEAKER

Onorab Vel.

 

HON JENIFFER VEL

Mersi Mr Speaker.  Mr Speaker eski Minis i kapab dir nou si sa Protokol pou garanti en pli bon deal pou bann Seselwa pli spesifikman bann doker Seselwa an vi ki in anonse ki pri tonaz pe ogmante, eski pou annan en lazisteman an term pri tonaz e saler kot i konsern bann maren e osi doker Seselwa.  E eski sa nouvo Protokol i anlinny avek sa nouvo Fisheries Policy ki parlman Linyon Europeen fek adopte e ki pou vin anfors le 1 Zanvye 2014.  Mersi.

 

MINISTER JEAN-PAUL ADAM

Lo kote saler minimonm pou bann peser ki kapab travay lo bann bato sa in kouver dan sa Lagreman ki bann minimonm ILO – International Labour Organization pe ganny adopte osi sa linisyativ ki Sesel in pran se pou ranforsi bann mekanizm verifikasyon ki bann dimoun pe pli byen ganny peye lo bann bato e ki bann norm i ganny respekte e sa i en kestyon kle ki’n ganny adrese dan sa lagreman.

Lo kestyon bann doker si mon pa tronpe sa i tonm an deor sa Lagreman akoz doker si mon pa tronpe i ganny peye par bann konpannyen ki pa tonm aba bann lakor lapes.  Akoz lakor lapes i kouver bann amater, savedir bann bato e Gouvernman Sesel.  I pa kouver debarkman kot sa bann stevedoring and so on e i ganny kouver par bann Lazans alor zot bann benefis, eksetera i pa ganny kouver anba sa Lagreman, i pa en kestyon ki ganny adrese, sa i korek.

Apre lo kestyon Parlman Eropeen e si sa i an akor avek zot stratezi lapes, absoliman sa in ganny konfirmen par delegasyon Eropeen.  Lot keksoz ki mon ti a dir kot i konsern benefis pou Seselwa, sa Lakor pou permet nou envestir plis dan nou prop, dan lenfrastriktir kot i konsern por, sa i pou enkli por prensipal ki baze dan Victoria en si ki bann port rezyonnal.  Sa Lakor osi i fer nou por vin pli konpetitiv.  I osi permet nou en keksoz ki mon pa’n mansyonnen avan, i permet nou envestir plis dan formasyon e i enkli alor bann posibilite pou nou ogmant sipor ki nou donn Maritime Training Center.

Lot eleman se i anmenn plis kontrol lo lakantite pwason ki ganny lapes e mon krwar sa osi i tre enportan e lideal pou tou pei se ki ou kapab annefe lapes mwens e ganny plis larzan.  Lefe ki nou redwir lakantite bato ki pe lapes dan nou delo, lefe ki nou ogmant lakantite larzan ki nou pe gannyen par tonn, parey mon dir sa Lagreman i al dan bon direksyon.

Nou pa ankor satisfe, byensir nou pou kontinnyen travay avek nou bann patener pou nou fer sir ki nou ganny meyer Lagreman posib.  Mersi.

 

MR SPEAKER

Bon nou’n arive alafen Question Time.  Mon remersye Minis ek son delegasyon e osi eskiz zot parmi nou.  Kanta nou, nou adjourn ziska 11.05.

 

(BREAK)

 

(Mr Deputy Speaker in the Chair)

 

 

MR DEPUTY SPEAKER

Bon mon a dir bonzour tou bann Manm Onorab e tou bann staff ki la pe travay avek nou e nou a kontinnyen nou travay ki lo Order Paper e nou lot item se bann Motions.  Premye Mosyon lo nou Order Paper mon envit Onorab Arnephy pou prezant son Mosyon.

 

HON BERNARD ARNEPHY

Mersi Mr Deputy.  Bonzour Mr Deputy, bonzour tou diomoun.

Mr Deputy Mosyon ki mon pou prezant devan Lasanble i lir konm swivan:  Sa Lasanble i rekonmande ki Gouvernman atraver Minister Servis Sosyal Devlopman Kominoter e Spor i met a dispozisyon distrik plis resours finansyel pou donn plis sipor bann diferan regroupman dan distrik ki a anmenmtan ede pou pli mye promot sa kanpanny renesans moral e sosyal atraver aktivite kominoter byen organize e targete.

Mr Deputy, Gouvernman Sesel in kontinyelman met lanfaz pou anmelyor kalite lavi Seselwa e la kalite servis ki i ofer lo nivo lakominote.   Atraver bann Ladministrasyon Distrik Departman Kominoter ek Spor i annan en rol kle pou fer sir ki i annan partisipasyon aktiv lakominote e ki zabitan i ganny empowered atraver zot partisipasyon aktiv dan community life zot distrik respektiv.

Mr Deputy pandan sa dernyen 20an Departman Gouvernman Lokal, depi 1974 ziska 2004 e Departman Devlopman Kominoter ek Spor, depi 2004 ziska ozordi in anmenn bokou e fer bokou pou anmenn sa lenstans ideal lo nivo lakominote pou plis partisipasyon dan zesyon gouvernans lokal.  Atraver bann aksyon konkret ki’n ganny fer Governman Santral in vin pli konsernen avek bezwen e laspirasyon lakominote lokal.  Nou’n vwar bokou lenplimantasyon dan bann pti proze ki’n anmenn bokou benefis pour bann zabitan, bokou bann servis esansyel in ganny desantralize pou benefis bann rezidan e nou’n vwar osi bokou zefor ganny mete par rapor avek partisipasyon aktiv bann rezidan dan lavi distrik osi ki lo nivo nasyonal.  Nou’n osi vwar bokou promosyon par rapor avek lespri kominoter atraver bann groupman sosyal dan distrik, nou’n vwar lentrodiksyon bann striktir lo nivo distrik avek bi anmenn plis partisipasyon ek dialog. Bokou zefor osi in ganny mete dan devlopman kapasite Ladministrasyon Distrik par rapor avek training apropriye e osi promosyon en lanvironnman sen e an bonn sante.

Mr Deputy malgre bokou in ganny fer lo nivo distrik, me nou konstate i reste ankor bokou defi pou sirmonte. Presyon sosyal e ekonomik pe ogmante e fenomenn globalizasyon pe osi anmenn sanzman ek devlopman.

Mr Deputy devlopman i bon lo en kote, i anmenn bokou benefis pour pei, me osi anmenn serten defi kot i anann bokou konsekans lo nou kiltir, nou fason viv e osi byen lo nou bann striktir e fabrik sosyal.  Parey i leka osi dan lezot pei nou Sesel sa pa en leksepsyon.  Bokou nou lazenes pe tre vitman dekoste e dezasosye zot avek bann valer kominoter e osi byen ki bann valer sitwayennte par egzanp.  Sa lespri volontarya ki ennfwa ti propaze atraver tou kwen Sesel in konmans disparet.  Sa i normal akoz ozordi plis dimoun, sirtou bann madanm i pli angaze dan bann aktivite ekonomik zot pei pou plis benefis pour zot fanmiy e petet zot trouv li ase difisil pou zot donn en pti pe zot letan pou plis lepanouisman zot kominote.

Ozordi Mr Deputy nou trouv bokou akt e fleo anti-sosyal ki’n pran plas, tel ki bann problenm trafik e konsomasyon drog, vol, prostitsyon eksetera e sa pe fer bokou fanmiy soufer e an rezilta lakominote e pei an zeneral pe ganny bokou afekte.

Mr Deputy konman en pti leta zil nou vilnerab e sel fason pou minimiz lenpakt ek konsekans ki devlopman i anmennen, se pou ranforsi nou bann striktir debaz.  Setadir lakominote i enportan ki i kontinnyen annan en partisipasyon aktiv lo nivo kominoter e ki bann volonter i kontinnyen ganny ankouraze e ganny angaze dan aktivite lakominote.  Malgre nou pe demann plis dimoun pou angaz zot dan partisipasyon lavi zot kominote, malgre nou pe promot sa konsept Corporate Social Responsibility, lefe i reste ki si ou anvi konsevwar, devlop e enplimant bann progranm ki byen striktire e byen targete enn bann konponan kle pou fer sa arive se byensir sa resours finansyel.

Pou fer plis aktivite mass sport par egzanp dan distrik nou bezwen plis resours finansyel.  Nou bezwen plis resours finansyel pou organiz plis aktivite fizik pou ede konbat problenm obesite.  Plis resours finansyel i neseser pou siport bann lekip sportiv dan distrik, plis resours finansyel i neseser pou enplimant bann progranm prevansyon kont tou sort fleo sosyal, plis resours finansyel i neseser pou fer reviv bann valer kiltirel sirtou parmi nou lazenes.  Mr Deputy lalis i long.

Souvan nou vwar nou dan distrik pe bezwen tap plizyer laport pou sponsorship, pou kapab realiz serten proze an term progranm ki tous diferan group dan distrik.  Me sa Mr Deputy pa touzour fasil.  Souvan nou vwar nou pe tap menm laport malgre response pa touzour enn ki favorab.  La mon oule dir en gran mersi pou bann endividi ou lorganizasyon ki konpran ki direksyon nou pe pran e ki nou anvi fer e ki an retour ofer zot sipor distrik kot sa i posib.  Ankor nou dir zot en gran mersi.

Souvan distrik i fer bann bon plan an term progranm e esey son mye pou enplimant en tel plan, me souvan konstrent bidzeter i met en kantite retar dan lenplimantasyon.  Mon swete ki ler Gouvernman atraver bann departman konsernen e lezot partener konsernen i konpran demann en tel Mosyon e konsider aport plis sipor kot sa an retour ava ankouraz lezot pou zot osi aport zot sipor.

Nou lekonomi pe fer tre byen Mr Deputy, mon panse ki konman en Gouvernman avek en lekonomi tre prometan nou aprezan dan en bon pozisyon pou nou aport plis sipor pou en tel demann ki Mosyon pe adrese. Sa proze renesans sosyal ki Gouvernman in lanse, son reisit i depan bokou lo langazeman bann striktir e groupman dan distrik.  Sa bann groupman lo nivo distrik i annan en rol tre kle e tre enportan pou fer sir ki plan daksyon renesans sosyal i ganny byen enplimante.

Mr Deputy se la ki mon oule ankor refer sorti lenportans mon Mosyon ki demande ki Gouvernman konman sa lenstans prensipal i met plis finans dan bann progranm sosyal dan distrik.  Depi bann lannen 2000 nou’n vwar kreasyon bann diferan groupman dan distrik tel ki klib Trwazyenm Az, Neighborhood Recreational Activities, aktivite pou bann dezabilite e osi groupman lafanmiy ki ganny dirize par Minister ki responsab pou zesyon bann distrik.  Sa bann groupman in anmenn bokou benefis pou zabitan e se zot an realite ki leker distrik.  Gouvernman in toule lannen donn en pti sipor, me nou’n vwar pandan sa dernyen 4an avek reform ekonomik in annan bokou lenpak direk e endirek lo sa bann progranm sirtou an term finansman e osi lentere bann volanter.

Mr Deputy nou vwar sa dernyen 3an en logmantasyon sibstansyel dan larzan ki’n ganny donnen pou lenplimantasyon bann ti proze dan distrik.  Sa i tre, tre byen.  Mon napa oken problenm, me parkont Mr Deputy, larzan ki’n gannny donnen pou siport bann progranm i tre minimal.  I enportan ki Governman i donn plis resours sa bann progranm.  Sa anviron R20 mil a R30 mil par lanen, par distrik pou tou progranm i senpleman pa ase.  Mon pe proze ki Gouvernman i ogmant sa sonm pou vin R150 ouswa R200 mil e anmezir ki lekonomi i kontinnyen prospere pourkrwa pa menm en pe plis.

Mr Deputy ler nou vwar en alokasyon 1.2 milyon par distrik pou proze kominoter e anviron 20 mil pou lenplimantasyon bann progranm i fer ki sa pa tro realis e nou panse ki dan domenn progranm nou kapab fer ankor bokou mye.  A sa pwen i bon note ki sipor finansyel pou demann ki Mosyon pe adrese i souvan la me i tro santralize ou i tro eparpiye enpe partou dan bann diferan Minister ou lorganizasyon.  Mosyon pe demande ki sa sipor i vin dan en fason pli direk kot sak distrik.  Bokou aktivite i ganny organize dan distrik pou tou laz e bokou zefor i ganny mete par bann volonter ek bann paran.  Dan vakans pour bann zanfan dan progranm NRA souvandfwa kantmenm paran i ganny demande pou kontribye pour zot zanfan partisip dan bann progranm me souvandfwa nou vwar sa bann zanfan i vin lanmen vid.  Alor sa i fer ki bokou paran i vin retisan pou zot fer ki zot zanfan i partisip dan bann tel progranm.

Mr Deputy mon oule pran sa loportinite pou salye tou bann volonter ki pa’n zanmen dekouraze e ki ankor pe donn en koudmen pou fer marse serten progranm o nivo kominoter.  Mon oule demann zot pou kontinnyen e nou oule garanti zot ki nou konman Manm Parlman nou pou kontinnyen siport okenn demars ki nou santi i dan zot lentere e ki pou ed zot donn le meyer de zot menm e pour zot distrik.

Mr Deputy Ladministrasyon Distrik i sa lenstan ki annan manda prensipal pou kordin tou progranm kominoter, se la kot leker sak distrik i bate, me pou sa leker kapab kontinnyen bate i bezwen bon sirkilasyon disan e bon loksizenn.  Sa loksizenn ki nou pe koz lo la se byensir resours finansyel adekwat ki alafen dizour tou parti sa lekor a vin fully functional e rann li ankor bokou pli aktiv.  Alor se la dan distrik kot sak leker i bate ki nou pe demann plis resours finansyel pou nou enplimant bann bon progranm.

Gouvernman i merit alors pran en tel demann tre oserye e akt lo la o pli vit posib.  Annou desantraliz resours e anmenn li plis kot distrik sirtou sa resours finansyel ki Mosyon pe adrese.  Distrik lo son kote i bezwen anretour vin pli proaktiv, pli byen striktire e organize e reponn a laspirasyon tou group laz dan kominote atraver bann progranm ki byen planifye e byen targete.

Mr Deputy an konklizyon les mon reitere ki mon konvenki ki si progranm pli byen striktire e targete i vin alaporte diferan group dan distrik, nou pou pli byen kapab sirmont nou bann difikilte e challenges e vwar en bes dan bann defi ki distrik e sosyete anzeneral pe fer fas avek ozordi.

Avek sa detrwa mo mon a demann mon bann koleg pou aport zot kontribisyon anver sa Mosyon ki dan en fason son merit i tous sak distrik direkteman ou endirekteman.  Mon a demann zot pou fer bann bon deliberasyon e mon a dir mersi Mr Deputy.  Mersi.

 

MR DEPUTY SPEAKER

Bon okenn Manm ki oule segonn sa Mosyon.  Onorab Vidot.

 

HON KEVIN VIDOT

Yes Mr Deputy, mon ti a kontan segonn sa Mosyon e mon ti a kontan entervenir.

 

MR DEPUTY SPEAKER

Proceed.

HON KEVIN VIDOT

Mr Deputy Speaker, Koleg Onorab bonzour.  En lavi kominoter vibran e vivan i enn ki nou tou nou ti a swete vwar nou partisip ladan.  Bokou fwa nou tann bann lapel pou fer bann aktivite ouswa diferan progranm dan distrik pou ankouraz e promouvwar lavi kominoter e en distrik vivan.  Mr Deputy sa i en lapel ki mon personnelman mon siporte e swete kapab enplimante espesyalman dan mon distrik Larivyer Anglez.  Me se pandan mon konnen ki mon pa pe viv lo lalin e ki larealite ozordi i konpletman diferan.  Pou anann bann bon vizyon e plan dan lavi i en keksoz ki en endidvidi i bezwen annan enkli en kominote, en distrik, en rezyon e menm en pei osi.  Me parey en endividi ki annan bann bon plan, parey nou dir bann gran plan i bezwen realistik e rekonnet ki byensir pa tou ki i pou arive akonplir dan lavi.  I merit asize e etre fran ek son lekor pou realize ki serten plan i kapab far fetched. I kapab byensir realize pou li kapab akonplir serten plan ki i pou bezwen ogmant petet son nivo akademik, petet rod fason pou obtenir serten kalifikasyon ou leksperyans personnel.  Petet i annan ki pou nesesit serten amelyorasyon ou ogmantasyon sibstansyel dan son finans.  Tou sa Mr Deputy i fason ki en endividi i asize pou priyoritiz ou kategoriz pli byen son rev, lanbisyon ou plan dan lavi.

Dan lavi i annan 3 group dimoun e sa i anlinny avek sa ki Michael Jordan ti dir.  ‘Some people want it to happened, some people wish it would happen, others make it happen’.  E ler mon get sirkonstans lavi an zeneral, mon vwar verite ladan.  I annan en group dimoun ki anvi vwar aktivite dan distrik, en lot group i swete ou reve vwar aktivite, apre i annan sa group ki a mon avi i enportan, se sa group ki aktyelman fer aktivite.

Souvandfwa sa de premye group i inyor ki fason, ki difikilte pou fer en aktivite, zot zis vwar aktivite pe ganny fer.  Me se pour sa group ki fer aktivite ki mon osi tonm ladan, ki mon pe segonn sa Mosyon ozordi.  Nou oule zot fer plis, donn plis zot letan e fer distrik vibran e vivan.  Wi, nou anvi fer sa, me pou kontinnyen fer sa nou bezwen vin pli realistik e realize ki resours ki a dispozisyon bann groupman dan nou diferan distrik i kategorikman pa ase pou enplimant bann zoli plan ou progranm.

Ler nou pe koz lo renesans moral e sosyal i enportan pou note si nou oule vwar rezilta pozitiv, nou pou san okenn dout bezwen organiz aktivite byen organize e target dan bann diferan distrik.  Akoz se dan distrik ki bann fanmiy i ete, kot zot viv e sosyalize.  Si nou oule en tel progranm annan bon rezilta nou bezwen al kot sours mazorite problenm i sitie, nou bezwen desantraliz o maksimonm bann aktivite renesans moral e sosyal.

Pou kal pli byen mon pwen e sipor pou sa Mosyon, Mr Deputy les mwan penn en portre kler lo larealite ozordi.  Dan distrik apart bann groupman sportiv nou annan 4 lezot groupman ki ganny finansman atraver Minister Servis Sosyal, Devlopman Kominoter ek Spor.  Sa se groupman NRA, Senior Citizen, Family Council e Disable.  Apart ki sa bann group ou vwar ki preski tou laz e group dan lakominote i merit kapab ganny touse.  Me sepandan lekspektasyon kalite aktivite ki zot oule vwar ganny organize par sa bann group pa an proporsyon avek finansman ki zot gannyen.

Mr Deputy i pa balanse.  Sa bann group i ganny R1000 per quarter pou fer aktivite.  Kalite e kantite aktivite ou pou fer avek R1000 pou 3mwan?  Sanmenm sa rezon ou vwar sa bann group i vin tap laport MNA sakfwa zot annan en aktivite e nou avek resours sitan limite nou kontan pou ede akoz nou kontan fer bann bon aktivite pour nou zabitan e distrik.  Pou nou osi promouvwar lavi kominoter e bann bon moral.  E menm parey pour bann groupman sportive.  Nou ankouraze pou vwar bann nouvo group ouver pou ede retir nou bann zenn dan bann pratik imoral e ilegal e ankouraz zot pou met zot lenerzi e lentelizans dan bann keksoz pozitiv, me nou realize ki plis groupman i osi vedir plis resours finansyel.

Me nou osi rekonnet ki pa tou progranm ouswa pa tou keksoz ki pou nesesit resours finansyel.  Me toudmenm i pou annan serten laplikasyon.  Nou dan distrik nou reste angaze pou promouvwar renesans moral, sosyal parmi nou zabitan.  Me ozordi nou pe anvoy en lapel ki nou bezwen soutyen.  Soutyen pa zis sorti kot Gouvernman, me mon swete osi vwar soutyen sorti kot bann biznes prive ou endividi.  Pour bann dan lepase ou ki ankor pe asiste bann groupman dan distrik nou dir en gro mersi.  nou swete zot kontinnyen malge nou konnen i pa touzour fasil.

Pou terminen mon anvi partaz leksperyans en zonm ki ti anvi sanz lemonn, i ti mor san menm realiz sa rev.  Me avan i ti mor i ti realiz en keksoz e i ti dir: ‘Si selman mon ti’n sanz mon lekor, mon ti a kapab sanz mon fanmiy.  Si selman mon ti’n kapab sanz mon famiy, mon ti ava kapab sanz mon kominote.  Si selman mon ti’n kapab sov mon kominote, mon ti ava kapab sov mon pei e finalman ler mon ti pou’n sov mon pei, mon ti ava petet kapab sov sa lemonn’

Mr Deputy ki mon pe sey dir, se si nou oule vwar vre sanzman nou bezwen konmans ek nou menm, nou fanmiy e nou kominote.  Se laba dan kominote ki nou kapab e devret met tou resours posib pou enpakte pozitivman lo nou bann fanmiy e zabitan.  Se la ki nou devret konsantre nou lapros e persevere ziska nou vwar rezilta pozitiv.  Tou sa ki mon’n fer resorti anler se pa pou montre ledrwa lo personn me pou soulinny serten defi e fason ki nou devret adres zot pou byennet nou pep.  Ansanm nou a kontinnyen travay dir pour Sesel.  Mersi bokou pou zot latansyon e sipor pou sa Mosyon.

 

MR DEPUTY SPEAKER

Onorab Fideria.

 

HON EMMANUEL FIDERIA

Mersi Mr Deputy.  Mr Deputy Mosyon Onorab Arnephy pe demande ki Gouvernman atraver Minister Zafer Sosyal, Devlopman Konminoter e Spor i met plis resours a dispozisyon distrik pou nou fer bann diferan aktivite an referans avek renesans moral e sosyal.

Wi Mr Deputy Speaker sa Mosyon i devret anmenn nou pou fer en refleksyon serye ler nou koz met plis larzan pou met aktivite o nivo distrik.  Mr Deputy pa bokou letan pase ti annan en kantite presyon lo Gouvernman pou konstri e met plizyer fasilite e lenfrastriktir o nivo nasyonal oubyen o nivo distrik pou permet organiz plizyer aktivite pou lepanouisman nou pep egalman pou diferan kous nou popilasyon.

Mr Deputy pou akonpli sa bann deman nou popilasyon i evidan ki atraver bann lannen ki’n pase plizer milyon roupi in ganny depanse e plizyer striktir in ganny kree o novo distrik.  Ozordi nou koz lo bann striktir ki regroup sa ki nou apel Trwazyenm Az, Family Affair ou Family Council, Disable, Youth e bokou lezot ankor ki enportan e ki pe fer bann travay ekselan dan plizyer nou bann distrik.  Pour sa bann plizyer striktir i reprezant en mouvman ekstraordiner e permet mwan azoute ki lasosiasyon serten sa bann striktir avek plizyer lorganizasyon dan rezyon Losean Endyen e osi lo nivo enternasyonal pou permet nou konman en pep partisipe, partaze e ganny bokou leksperyans ki an retour i anrisi e devlop kapasite tou nou bann dimoun konsernen ki avek bi fer pli byen isi dan Sesel.

Mr Deputy mon napa okenn dout ki tou sa bann lenvestisman in ganny fer pou en bon rezon akoz in ede kre en loportinite reel ki permet tou nou sitwayen enterese, angaze e reste angaze dan devlopman aktivite pozitif.  Konsekaman eparnye nou bann zenn e lezot vilnerab nou sosyete pou pa tonm dan bann sitiasyon kot zot perdi bon direksyon dan lavi.  Wi Mr Deputy, Gouvernman osi avek demann ek defi ki’n vin devan li in desantraliz serten son bann servis kot nou vwar bann youth worker baze dan distrik zot in vin pli pros ek bann dimoun ki zot travay avek.  Ozordi social worker i baze dan sak distrik, zot viv e konpran larealite sak distrik kot zot travay, egalmaan travayer Lazans Proteksyon Sosyal, Housing e lezot i la ankor dan nou kominote.

Mr Deputy dan Sesel ozordi nou pe vwar nou anfas avek en pep ki demann bokou sorti kot Gouvernman, nou egalman obzerv en mankman pou bouze, devlop en sans pou pran linisyativ konsekaman redwir nou depandans lo Gouverman pou fer keksoz pou nou.  Mon anvizaze vwar en sanzman, en sanzman serye, en sanzman kot bann ki konsernen i devlop kapasite bann dimoun dan kominote kot nou empower zot pou pran sarz zot prop aktivite.  Pou rod e sers bann sponsorship pou kontribye dan finansman bann aktivite kominoter, bann proze ki benefisye lakominote.  Mon krwar ki sa i posib, mon reste konvenki ki sak endividi i santi li ganny en satisfaksyon ekstraordiner ler i vwar son prop zefors kot in kontribye avek son lekor.  Kouraz ek determinasyon pou ed son kominote, pou ed enn parey li oubyen plizyer parey li ki dan bezwen.

Mr Deputy mon rev se viv sa moman pou vwar dan tou nou distrik sa nouvo fason panse, wi i en defi, en difi ki mon oule lans avek nou tou bann patriyot Seselwa.  Mr Deputy Speaker ozordi sa ki nou pe dir napa problenm pou nou ganny kontribisyon enn sa bann group dimoun ki apel Trwazyenm Az e menm bann dimoun dezyenm az.  Travay ki nou bezwen fer se ki nou group enpe pli zenn kre dan zot sa sans kontribye.  In ler pou nou pran sa responsabilite partaze e responsabilite kolektif dan en fason transparan.  Sel fason pou nou pran dezyenm letap dan lepanouisman nou zenerasyon dan kreasyon nou “Nouvo Sesel”.  Nou lo larout “Nouvo Sesel” nou bezwen devlop plis lespri inovatif, i pa en pinisyon pou demann en sitwayen pou kontribye dan en aktivite ki i pe pran par ladan.

Mr Deputy Speaker nou bezwen konmans en landrwa.  We have to start somewhere.  Kot sa senp sitwayen ki pa kapab, i pa devret ganny kit deryer.  Sa sistenm i devret anmas li.  Dan en lespri sa Mosyon mon panse ki avan en bon kontribisyon, sizere ki nou osi nou demann bann lorganizasyon parey CARE, Alcohol Council, Youth Council ek lezot ki ganny bidze avek Gouvernman pou desantraliz enpe plis zot bann aktivite, travay pli pros avek Lotorite Distrik ki bann aktivite a vin pli pros avek bann dimoun dan lakominote.  Sa lapros anmenn aktivite pou zwenn dimoun dan zot kominote, mon senserman krwar pou fer mervey si nou fer li byen Mr Deputy Speaker.

Mr Deputy nou pa devret annan en sistenm zis gerizon, nou devret a mon avi annan en progranm prevansyon.  Statistik i montre ki bokou larzan i ganny mete pou gerizon ki pli difisil e kout pli ser, konpare avek fer bokou aktivite.  En progranm entansif pou prevansyon anfas bann defi sosyo-ekonomik dan nou bann distrik, mon persyade pou abouti dan en rediksyon sibstansyel bann problenm ki nou tou nou konnen.  Nou annan bokou e plizyer ekspert Sesel, annou rod zot.  E nou ki konpetan, sorti vin devan.  Anou ralye deryer sa batay, san frontyer ki pou nou e nou bann problenm – alor annou pran ownership nou bann problenm.

Mr Deputy mon reste konvenki e persyade ki malgre tou sa ki’n ganny dir, larzan pa vedir solisyon pou nou defi, me i reste en konponan enportran dan tou nou demars.  Mr Deputy Speaker nou’n fer bokou progre konman en nasyon, nou pep in montre bokou rezilyans vizavi plizyer defi, nou pou rezouir nou bann lakonplisman nou devret annan en sosyete ki son fabrik sosyal i solid.

Pou terminen mon le sezi sa loportinite pour mwan remersi tou bann endividi e konpannyen ki dan en fason ou en lot in siport distrik Les Mamelles dan son demars pou organiz serten aktivite dan nou distrik.  Ansanm nou’n akonplir bokou.  Mon swete ki ava touzour la pou siport mwan dan sa demars pou fer Les Mamelles transformen e vin sa distrik model.

Mr Deputy avek sa mon remersye ou e Msye Arnephy mon pou siport ou Mosyon.  Mersi.

 

MR DEPUTY SPEAKER

Onorab Samson.

 

HON DEREK SAMSON

Mersi Mr Deputy.  Bonzour tou dimoun.  Mr Deputy an regardan Mosyon devan nou mon santi ki tou sa bann motiv ouswa rezon det deryer Mosyon se ki vreman nou bann aktivite i kontinyelman tous tou dimoun dan nou kominote ki efektivite sa bann aktivite i reste entans e ki nou distrik, nou kominote i reste vivan.  Pou serten sirkonstans nou vwar ki petet pa tou fwa ki dan tou distrik sa bann diferan groupman oubyen diferan progranm pe mars efektivman parey nou ti ava swete e parey Mosyon pe dir, Loter Mosyon i santi ki petet finansman i limite, petet lakoz – enn parmi bann lakoz akoz ki serten nou bann aktivite pa pe efektivman marse.

Me eski sa i sel problenm oubyen eski sa i problenm prensipal oubyen problenm mazer deryer sitiasyon ki devan nou oubyen devan nou distrik?  En kestyon, detrwa kestyon rather lo sa size se eski volonte nou bann distrik i osi o, volonte nou bann dimoun, Administrasyon Distrik, zabitan, tou bann dimoun ki partisipe i osi satisfezan ki nou ti ava anvi?  Eski tou sa bann progranm pe byen ganny zere dan tou bann disrtik?  Eski larzan osi pe byen ganny zere dan tou sa bann aktivite dan tou sa bann progranm?  E petet ki kalite konteni aktivite ki pe ganny organize pou atir bann premyerman volonter e partisipan dan sa bann progranm?

Mr Deputy vreman ler nou regarde parmi plizyer rezon, nou vwar vreman ki limitasyon finansyer petet i pa sel problenm oubyen i pa premye problenm.  Malgre ki nou vwar ki serten bann aktivite in bezwen ganny sibir serten kou, par egzanp sport nou santi ki dan distrik ozordi, boukou tim, nou vwar bokou tim in bezwen menm fermen akoz napa ase finansman pou siport fanksyonnman oubyen legzistans en tim, be it football, volleyball, tou sort ki abityelman nou vwar dan distrik.  E mon krwar Mosyon i apiye, i pouse ozordi ki nou demann i ariv ziska kot Minister konsernen pourki vreman i ava annan plis finansman ki ganny mete sirtou dan bann aktivite sportif ki ganny fer dan distrik o nivo bann tim e sa i reponn lo nivo nasyonal kot nou vwar bann zwer i sorti, bann performan i sorti ki nou espere zot vin ek bon rezilta plitar lo nivo nasyonal.

E Mr Deputy nou vrwar ki sponsorship, petet nou ava dir be Gouvernan pa pe kapab toultan li donn larzan bann tim oubyen donn larzan progranm dan distrik me nou vwar ozordi ki i annan en sitiasyon kot bann diferan sponsors dan distrik oubyen andeor distrik ki ti abitye sponsor bann tim oubyen bann aktivite i plito pe tay deryer bann gro, gro aktivite kot marketing zot lorganizasyon oubyen zot biznes i vin lo en nivo pli lamas e zot osi menm dir ki zot pe deza sponsor atraver tax ki zot pe peye anver Gouvernman.

E petet la Mr Deputy nou bezwen petet revwar kimannyer nou kapab ed sa bann diferan groupman oubyen progranm dan distrik pou rod fason pli inovativ, pou rod sipor, pou rod sponsors. En linisyativ ki serten distrik in adopte sete olye sponsored walk pou marse i annan sa progranm sponsored walk kot nou fer en travay dan distrik anver en lorganizasyon oubyen en biznes e sa biznes an retour i donn en serten sponsor sa lorganizasyon, sa progranm.

Mr Deputy Speaker me selman nou bezwen osi rekonnet ki lefe ki ozordi nou Lasanble pe koz for pou ki finansman i kontinyelman egziste dan distrik pou siport sa bann diferan progranm, enn parmi bann rezon se ki nou rekonnet ki bennefis tou sa bann progranm i anmennen dan nou distrik.  Bokou bann Manm Onorab isi anndan si i pa’n pas atraver bann aktivite distrik direkteman bann groupman, bann progranm in endirekteman annan serten parkour ki’n ganny fer pou lepanouisman nou profesyon ozordi.  Mon konnen ki bokou, plizyer nou in sirtou dan bann progranm lazenes dan distrik, ki’n kapab ed nou an deor nou ledikasyon profesyonnel, me lo nivo kordinasyon, progranmasyon bann aktivite in osi ed nou, aktivite distrik, bann progranm ki egziste dan distriki in osi ed nou vreman pou kapab petet ozordi fer ki nou louvraz i vin pli konfortab.  E byensir nou konnen ki ler nou distrik i vivan, bann progranm parey NRA, bann progranm parey District Youth Club i egziste nou bann zenn parey Loter Mosyon in dir, nou bann zenn i ganny enfliyanse pou partisip dan en aktivite pli pozitiv olye ki i tonm dan lezot lenfliyans ki pe menas nou sosyete ozordi.

Mr Deputy en pwen enportan anba sa Mosyon ki mon santi nou bezwen koz lo la, se akoz nou pa pe vwar sitan kantite volonter ozordi ki pe vin devan pou donn en koudmen dan nou distrik?  I montre nou ki ozordi ki byensir letan in sanze.  Nou ti annan nou en letan ki volontarya dan distrik ti sitan fasil akoz dimoun ti annan en santiman, ki i santi ki keksoz i bezwen bouze dan distrik e volonterman dimoun ti bezwen vini, mon mazin bann letan ki ou ti vwar dimoun desann natirelamn pou vin donn kondmen pou fer en semen, pou ede koupaye, netway otour lopital, pou vin donn en koudmen vin penn lekol, pou vin donn en koudmen vin penn legliz, plizyer aktivite volonter dan sa bann letan ti sitan fasil akoz dimoun ti annan en urge, ti anann en lanvi for vreman pou vwar ki distrik i byen ganny okipe.  Me ozordi parey Loter Mosyon in dir, dimoun i plito konsernen avek son gen personnel, pou li partisip dan aktivite ekonomik ki pou annmenn benefis kot son lakour e dimoun i dir ou ki petet letan ki i pou pase dizon anba kot distrik i kapab pas sa letan dan en aktivite kot i ava annan plis sans pou anmenn plis finansman kot son lakour ki lezot landrwa.

So Mr Deputy mon krwar nou bezwen annan en fason pli inovativ pou fer dimoun vreman desann vin partisipe e la mon petet lans en lapel pour tou nou bann zabitan vreman vwar lenportans pou adopte nou distrik, ki nou pa kapab toultan debout en kote dir ki Gouvernman pe fer, oubyen ki MNA, ki DA pe fer pour nou distrik kan nou, nou pa pe fer bokou oubyen nou pa pe fer nanryen pou donn koudmen.  E Mr Deputy mon krwar i enportan ki a sa pwen nou rekonnet tou bann ki pe, toulezour serten oubyen toule weekend pe montre sa sans volontarya, pe montre sa sans vin donn en koudmen dan distrik pou fer ki nou distrik i reste briyan.

E mon krwar osi pou konkli ki kolaborasyon ki egziste dan bann distrik osi i lakle otour size fors viv dan nou distrik.  An deor sa kestyon finansman mon santi ki bann lenstans parey lekol, lopital, tou bann lenstans servis ki egziste dan distrik i bezwen byensir a toutfwa profit sans, profit loportinite pou travay ansanm parey nou pe vwar dan serten distrik pou ki distrik son repitasyon i reste anler.  E byensir nou pa obliy bann lenstans prive, bann lotel, bann lezot businessman ki egziste dan distrik zot osi san okenn dout zot pe servi fasilite, zot pe servi servis ki egziste dan distrik e mon krwar i en devwar oubyen i en merit ki zot osi dan en fason zot kolabor avek Lotorite Distrik pou fer sir ki lanvironnman zot biznes, lanvironnman zot bann aktivite, zot servis prive i osi byen, i mars byen avek kolaborasyon ki egziste dan distrik.

Avek sa Mr Deputy mon ti ava kontan dir ki mon osi mon pou siport sa Mosyon e nou espere ki vreman finansman i ogmante dan distrik pou nou bann aktivite nou bann progranm.  Mersi.

 

MR DEPUTY SPEAKER

Onorab Jacqueline.

 

HON SULTANE JACQUELINE

Mersi Mr Deputy Speaker.  Mr Deputy Speaker Onorab Arnephy pe anmenn devan en Mosyon ki propoz en solisyon baze lo lobzervasyon bann defi, lobstak ek konsern reel ki distrik i fer fas avek.  Tou lendikater i montre ki pe annan nouvo problenm ki devlope dan nou kominote avek deplizanpli lenplikasyon manrmay pli zenn.  Mon pou met lanfaz lo met resours finansyel pou pli byen enplimant aktivite pou sirtou sa group nou popilasyon ki a risk e ki nou devret ede pou minimiz sa risk e anpese ki zot pa vin viktim bann social ills ki lakoz mazer pou degradasyon moral dan nou sosyete.  Sirtou bann aktivite prevantif ki pou ed en zanfan pou devlop son abilite e kapasite entelektyel, spirityel e korporel.

Ozordi dan mon distrik par egzanp Mr Deputy i annan an mwayenn 3 etidayn segonder ki ganny sispann par semen e travayer kot internet bureau avek sipor school counselor i retenir sa bann zanfan e fer pti aktivite e consult zot ziska ler zot retourn lekol.  Parfwa i vwar li avek 5 zanfan par zour pou li responsab.  Rezon prensipal pour sa bann sispann i varye.  Avek presyon zanmi zot vwar zot dan move group e angaz zot dan bann konportman move kot zot mank respe zot ansennyan, zoure, bwar lalkol, partaz materyel porno parmi lezot, vann, anposesyon e abiz drog.  Fodre fer remarke Mr Deputy i pa zis zanfan ki akademikman feb, i pa zis zanfan ki dezavantazye sosyalman, plito i varye.  Sa problenm i tous tou fanmiy, avek bann ki osi pe fer tre byen akademikman.

Distrik i bezwen resours finansyel pou met anplas bann aktivite ki pou ed sa bann zenn avek sipor oubyen partisipasyon zot paran e lakominote pou form son karakter e adopte en latitid pozitiv ki moralman bon olye enterveni letan i annan bann ka alarman.

Mon anvi partaz en lot ka Mr Deputy Speaker dan mon distrik, kot en paran pe viv anba bokou stress e gran lafreyer pou son garson 15an ki ti ganny bate avek en group zanfan segonder e pros pou perdi en kote son lizye.  De sa bann zanfan in ganny pouse lekol e larestan in retourn lekol.  Sa zanfan i reste tromatize, bezwen esper bis kot lekol e letan i mank bis son paran i bezwen al zwenn li akoz i ankor pe ganny menase.  Lekel ki fer swivi travay avek sa viktim ki bezwen fer fas avek son bann abizer kot lekol e son paran ki pa anpe tan ki son zanfan pa ankor ariv kot lakour?  Lekel ki fer swivi pou reabilit sa bann zanfan ki’n ganny pouse lekol e pa pe rekonnet zot krim?  Probasyon? Lapolis?  Oubyen Lotorite Distrik?

Mr Deputy Speaker i evidan ki laplipar aktivite etale dan plan daksyon nasyonal i bezwen ganny enplimante dan distrik pou tous lakominote e etablir bann norm sosyal ki akseptab.  En fe i reste a ler aktyel ki si nou senserman anvi vwar bon lorganizasyon e planifikasyon aktivite regroupman progranm lazenes, lafanmiy e spor dan distrik byen targete i bezwen annan resours finansyel.  Menm si nou bezwen promouvwar volontarya akoz renesans moral i demann en zefor sakenn de nou.  Nou bezwen vin realis ki pou tradwir sa bann plan an aksyon, i demann plis ki zefor e bonn volonte bann ki devoue zot lekor pou byennet e welfair nou sosyete letan ou pe koz regroupman e travay avek zenn.

Sa group zenn ek zot paran ki bann lazans tel ki lekol, sosyal, lasante, lord ek lape, Probasyon, Tribinal Lafanmiy i konn tre byen ki ou bezwen deplase al ver zot pou kapab rezourd enpe zot problenm dan zot lakour, dan lakominote ki fer ki zot dan en tel sitiasyon.  Anlinny avek sa Mr Deputy Speaker aktivite pou li vin efektiv i bezwen ganny fer regilyerman avek bokou tenasite e komitman pou azout dan sanzman sosyal e moral.  Sa i koute an term letan, resours imen e finansyel byensir.  I annan zanfan ki annan en kantite problenm e sa bann problenm i konmans dan lakour e dan lakominote imedya ki zot pe viv ladan.  Pour tou sanzman, pour tou inovasyon ki nou bezwen enplimante nou bezwen annan en plan stratezik.  Asire ki i annan resours apropriye pou fer fas avek bann demann e defi pertinan.  Pou demande ki plis resours finansyel i ganny enzekte dan distrik par Minister konsernen avek bi pou ede promouvwar renesans sosyal e moral, Mosyon Onorab Arnephy i annan son merit e san ezitasyon mon pou donn mon sipor.  Mersi Mr Deputy Speaker.

 

MR DEPUTY SPEAKER

Onorab Lebon

 

HON LENNY LEBON

Mersi Mr Deputy Speaker.  Mr Deputy Speaker sa Mosyon in vin enn dan en moman apropriye, i enportan dan sa letap kot nou pei Sesel i ladan.  Mon dir tre apropriye e enportan Mr Deputy Speaker akoz i reponn bezwen sirtou mon distrik e anlinny avek bann gran devlopman ki pe arive dan Sesel e osi dan kad renesans sosyal.  Pou bann ki onete e senser dan sa travay i kler ki sa Mosyon pe adres en size pertinan vizavi bann gran devlopman ki pe arive dan nou distrik.

Sa Mosyon i enn ki annan son merit e ki osi vin a en moman enportan dan sa transformasyon ekonomik e sosyal nou pei.  Mr Deputy Speaker rezon det deryer Mosyon Onorab Arnephy, se ki i pe demann Gouverman pou met a dispozisyon bann distrik plis resours finansyel avek bi amelyor lavi nou bann zabitan dan nou kominote atraver enplimantasyon bann progranm byen kadre lo nivo lakominote ki pou annan lefe lon term lo nou bann dimoun ensi ki pou amelyor zot bann eleman sosyal e ekonomik dan nou bann pti kominote e osi pou ede retir bann eleman negativ dan nou kominote.

Mr Deputy Speaker mon krwar sa Mosyon parey in ganny dir i annan son merit e ozordi nou vwar poudir moman apopriye in arive.  Nou aksepte ki Gouvernman in fer bokou pou met resours dan distrik me mon krwar letan in arive pou donn plis resours, akoz nou tou bann Manm Onorab ki la i pou agree ki i annan en mankman.  Si nou anvi ankadre nou bann dimoun, ankadre nou bann zenn, nou vwar pou dir nou bann zenn par ler i perse lo nivo nasyonal, zot fer byen dan bann sanpyona atletik, me apre ler zot sorti o nivo nasyonal zot retourn dan kominote nou vwar poudir zot perdi.  Zot perdi akoz dan kominote laba kot sa zenn i grandi i annan en mankman pou ankadre zot pourki zot devlope e se sa ki sa Mosyon pe demande.  I pe demann plis resours.

Mr Deputy Speaker, enn ler, ler ou get dan kominote i annan en group zenn ki toultan nou, nou manke.  Bann zenn 15 a 17an ki zot, zot napa bokou keksoz pou fer.  Se sa lespri sa Mosyon enpe, annou met resours pourki nou fer en bon progranm ki tous zot, e i tous lezot bann zenn.   Nou bann zenn i annan lenerzi e nou bezwen devlop sa lenerzi ki zot annan.  Se sa Mr Deputy Speaker kot sa Mosyon parey Onorab Arnephy in dir, kominote se landrwa kot sa leker i bate.  Nou, nou bezwen donn li resours.  Sa resours se sa loksizenn ki pou fer leker bat pli byen, pourki sa zenn e bann progranm dan kominote i reste an bonn sante.

Mr Deputy Speaker mwan mon en dimoun ki sakfwa mon’n koz dan Bidze mon koz lo met resours dan distrik, mon koz lo donn Konsey Nasyonal Lazenes plis larzan pourki nou tous nou bann zenn.  Se zot ki fitir sa pei demen.  Si sa pei pe devlope, i pa pe anvlope, parey nou’n dir e in ganny dir dan sa Lasanble se sa kot sa merit sa Mosyon i antre.  Mr Deputy Speaker letan in arive pour nou dan sa Lasanble, nou’n dir annou aret koze e annou bouz a laksyon.

Mr Deputy resers ki mon’n fer i annan larzan dan Bidze kot nou kapab redwir e ede ogmant Bidze sport e community life dan nou distrik.  Avek sa mon oule sizer de landrwa kot mon oule fer propozisyon ek Gouvernman kot nou kapab ganny enpe larzan pou ogmant Bidze ki nou donn sport ek community life dan nou distrik.

Mr Deputy Speaker ozordi dan Gouvernman nou depans R40.9 milyon lo telefonn.  Nou kapab redwir sa par 1 poursan a 5 poursan e ganny sa larzan, met dan distrik.  Dezyenm landrwa Mr Deputy, Gouvernman i depans li R27.4 milyon lo printing avek stationary, bann stationary toule lannen.  Petet in ler pou nou annan plis sa ki nou apel bann soft copies, bann dokiman ki nou met online e sa pou fer ki nou vin pli efikas e ede redwir sa bidze.  E la ganny enpe larzan ankor, remet dan kominote pou ede epanouir e fer sir ki nou bann progranm i vin relevans e a bezwen nou bann zabitan.

Mr Deputy Speaker avek sa de pti mo mon pou aport mon sipor a sa Mosyon.  En Mosyon dan mon lopinnyon personnel i annan merit e i enportan.  Si ozordi sa pei nou pe bouze nou.  Mon krwar in ler pou nou gete si vreman parey mon’n dir, annou zis aret koze  e annan bouz a laksyon, annou ankadre, annou fer nou bann progranm vin relevan.  Se nou zenn sa, nou fitir.  Annou met loksizenn kot sa leker, fer li bat pli byen pourki nou vin an bonn sante.  Mersi Mr Deputy Speaker.

 

MR DEPUTY SPEAKER

Onorab Volcere.

 

HON MARC VOLCERE

Mersi Mr Deputy Speaker.  Mr Deputy Speaker premyerman mon ti a kontan remersye Onorab Arnephy pou anmenn sa Mosyon devan nou Lasanble ozordi pou ki nou kapab debat lo la.  Mosyon Onorab Arnephy pe fer referans avek 2 sitiasyon oubyen 2 size ki pe ganny koz lo la lo nivo nasyonal e dan tou distrik ozordi.

Sa Mosyon pe fer referans avek bann diferan regroupman dan distrik, resours finansyel e osi an referans avek renesans moral ki pou enpe letan nou pe tann bokou koze.  Bokou lanfaz pe ganny mete lo sa size akoz i annan bokou pou fer avek fitir nou pei.  Avek sitiasyon moral e sosyal ki nou trouv nou ladan Gouvernman in vwar en nesesite pou angaz nou pep dan en kanpanny pou konsyantiz nou popilasyon, pou kapab redres sa sitiasyon ki nou ladan.  Gouvernman pe demann sakenn de nou pou pran konsyans sitiasyon ki nou ladan e pou sakenn de nou pou zwe nou rol akoz renesans soayal i konsern nou tou.

Mr Deputy Speaker Mosyon pe alor demande ki Gouvernaman i met an dispozisyon distrik ase resours finansyel pou kapab fer marse bann progranm distrik, bann progranm ki pou anmenmtan ede promot sa kanpanny renesans moral.

Mr Deputy Speaker Mosyon pe egalman demande oubyen i pe fer resorti ki sa de size i ganny aborde e enplimante.  Si sa de size i ganny enplimante korekteman, a tou moman san leksepsyon nou pou bezwen ase resours finansyel.  San resours finansyel adekwa pou vreman difisil pou nou kapab fer fonksyonnen sa de size dan en fason ki pou anmenn rannman pour nou pep oubyen nou pei.

Dapre mon resers ki monn fer Gouvernman atraver Ladministrasyon Distrik i annan en pti bidze pour sak sa bann progranm ki egziste.  En bidze selman R4 mil pour en lannen ki tonm R1000 par kar, parey in ganny dir avan.  Mr Deputy Speaker ou kapab mazinen kwa ki ou kapab fer avek sa.  Si nou realis, nou pou realize ki nou pa kapab fer gran keksoz.  En tel bidze i vreman limit lakantite aktivite oubyen travay ki ou ti a kontan fer.  An dot mo, sa bidze i vreman anmar lanmen sa pti group dimoun ki annan lentere e lanvi fer marse sa bann progranm.

Mr Deputy Speaker pou pran en legzanp, si ou pe organiz en aktivite pou groupman NRA pandan vakans sirtou, zis pou ou ganny en DJ pou vin fer en aktivite i pe demann ou akout R1500 a R2000 pour en sel aktivite.  So ou kapab mazinen si ou annan sa bann zanfan ki la, ou bezwen donn zot goute bomaten, dezennen, en pti dite dan 3er, annou zis mazinen konbyen i pou kout sa progranm pou fer li fanksyonnen.

Mr Deputy Speaker apard resours finansyel, ki Mosyon pe demande pou kapab fer marse bann progranm distrik en lot laspe ki vreman enportan, se sa laspe resours imen.  An dot mo ou kapab annan tou ou resours finansyel me si ou napa dimoun pou enplimant vizyon e lobzektif sa bann progranm keksoz pa pou marse.  Se la kot ou pou bezwen annan bann dimoun ki volonter pou vin donn ou en koudmen.  Mr Deputy Speaker mon pou koz enpe plis lo sa size volonter en pti pe plitar dan mon lentervansyon.

Mr Deputy Speaker mon pou retour lo sa size regroupman.  Ozordi dan tou distrik nou annan plizyer regroupman ki sipoze tous tou kous nou popilasyon.  Mazorite, si pa tou distrik i annan omwen 4 sa bann regroupman ki tonm direkteman anba lotorite distrik.  I annan par egzanp group NRA ki tous bann zanfan 3an a 15an, i annan group dezabilite, ki tous tou bann dimoun avek serten dezabilite dan distrik, i annan senior citizen ki tous bann dimoun aze 55an anmontan, i osi annan konsey lafanmiy ki get bezwen bann fanmiy dan distrik, i osi annan lezot regroupman tel ki District Task Force. Mr Deputy Speaker apard sa bann regroupman ki tonm direkteman anba distrik i osi annan lezot ki asosye avek par egzanp lekol, legliz ou bann lezot NGO.  Parfwa ou pou vwar ki i anann enn de bann regroupman avek menm non me ki tonm avek diferan lorganizasyon.  Par egzanp konsey lafanmir, i annan enn ki tonm anba distrik e parfwa sak denominasyon relizye i annan enn ki tonm avek zot.  Si mon pa tronpe i osi annan ISFF ki li osi i deal avek sa size lafanmiy.

Kestyon ki mon santi nou devret pe demande, eski nou pa devret pe revwar sa bann groupman oubyen sa bann progranm ki egziste e revwar zot rezon det?  Vwar si nou ankor bezwen bann tel progranm.  Eski nou devret pe kontinnyen gard zot anba Lotorite Distrik?  Si i annan plizyer sa bann groupman ki osi tonm avek lezot lorganizasyon, eski nou pa devret pe revwar e plas zot avek sa bann lorganizasyon ki petet annan plis resours?

Mr Deputy Speaker mon pe sizere ki nou fer en analiz profon lo sa bann progranm, vwar si zot in attend zot lobzektif debaz, vwar si zot ankor relevan e pe vreman anmenn benefis pour son bann partisipan.  Mr Deputy Speaker si nou pran sa bann progranm ki tonm anba Lotorite Distrik e menm bann ki asosye avek lezot lorganizasyon, nou pou vwar ki zot tou zot depan lo bann dimoun volonter pou fer zot marse.  Par egzanp pou sak sa bann regroupman ou bezwen annan en Komite ki pou diriz zot e pour ou kapab annan ase dimoun ou bezwen annan dimoun volonter, dimoun ki pare pou donn zot letan pou kapab fer fanksyonnen sa bann Komite.

Mr Deputy Speaker sa size volonter ozordi i vreman en problenm, i vreman difisil pou ganny dimoun ki pare pou vin devan pou donnen koudmen pou fer fanksyonnen bann progranm ki egziste dan distrik.  Souvandfwa ou vwar menm group dimoun, sa menm pti group dimoun ou vwar li enpe partou, preski lo tou Komite.

Mr Deputy Speaker en keksoz ki mon ti a kontan fer resorti ozordi.  Bokou dimoun i krwar ki Lotorite Distrik i gannyen en kantite larzan pou organiz aktivite dan distrik.  Me sa i pa le ka.  Mon krwar in ariv en moman pou nou edik en konsyantiz nou pep lo sa size aktivite dan distrik.  I annan ki dir ou DA oubyen MNA pa fer aktivite.  Wi Mr Deputy Speaker, lentere ek lanvi i la pou organiz aktivite, me kestyon ki souvandfwa nou demande, kimannyer ou pou fer li si ou napa resours?  La mon pe fer referans avek resours finansyel e osi byen ki resours imen.  Ozordi mazorite nou dimoun pa vwar sa nesesite oubyen napa sa volonte pou vin devan pou vin donn en koudmen pou fer keksoz pou zot kominote.  I souvandfwa annan bokou leskiz.  Napa letan, mon busy, mon bezwen leve debourye.   Wi Mr Deputy Speaker, mon konpran sa mwan, ou bezwen leve debourye.  Me si nou, nou pa vin devan, nou pa pare pou donn en koudmen, lekel ki pou fer li pou nou?  E souvandfwa sanmen sa pti group dimoun i dir ou ki i annan en kantite problenm dan distrik e sanmenm sa group ki konplent ki napa nanryen dan distrik., napa aktivite.  Bokou i konplent ki lotorite pa organiz nanryen.  Me lekel Lotorite Distrik?  Oubyen ler aktivite i ganny organize zot pou konplent an dizan ki tel, ou tel aktivite pa ti’n devret organiz koumsa, si i tin fer dan tel, ou tel fason i ti pou pli bon.  Souvandfwa se sanmenm group ki annan bann bon lide kimannyer pou fer fanksyonnen oubyen kimannyer pou fer marse keksoz, me ki reste alekar e konplent.

Mr Deputy Speaker nou bezwen retrouv sa lespri volontarya e re-anmenn li dan nou kominote.  Se atraver partisipasyon sak endividi dan son kominote ki en kominote i kapab bouze e prospere.  I annan bokou kesoz ki’n ganny fer dan distrik, dan nou kominote, dan nou pei atraver volontarya.  I annan ankor posibilite pou nou fer ankor bokou.  In ariv en moman dan nou listwar kot nou bezwen aret depan lo lezot pou fer tou pour nou.  Moman in arive kot nou bezwen vin devan e vin donn nou sipor, vin donn nou nide ek en pti morso nou letan pou lavansman nou distrik.  Eski nou pa pare pou partaz nou konesans avek lezot nou frer dan lasosyete?  Eski nou pa pare pou partaz sa meyer fason pou fer avek nou frer ek nou ser dan nou kominote ki pou anmenn benefis pour nou tou?

Mr Deputy Speaker mon santi ki atraver Mosyon Onorab Arnephy nou bezwen konsyantiz e sansibiliz lepep an zeneral lo sa laspe volontarya e fer zot vwar rezon det bann progranm ki Gouvernman avek distrik i met anplas.  Nou pa kapab annan tou sa resours finansyel me si nou napa volonter ek partisipasyon.  Nou bezwen bann dimoun dan distrik pou kapab donn en koudmen pou nou met sa bann progranm an plas e ki i a ede anmenn nou bann dimoun ansanm pou lavansman nou distrik.

Alor an siportan sa Mosyon mon ti a ankor enn fwa lans en lapel avek nou bann dimoun dan distrik pou vin devan, vin donn en koudmen pou lepanouisman nou distrik.

Mr Deputy Speaker mon ti a profite osi a sa moman pou remersye tou bann ki toultan pe vin devan pou donn en koudmen sirtou bann sponsors ki pare a en moman ou en lot pou met zot lanmen dan zot pos pou en pti kontribisyon pou nou kapab vwar plis keksoz pe arive dan nou distrik.  Mr Deputy Speaker mon remersye ou.  Mersi.

 

MR DEPUTY SPEAKER

Bon napa person ankor lo mon… bon be nou ava adjourned e nou a repran 2er.

 

(LUNCH)

MR DEPUTY SPEAKER

Bon, nou a kontinnyen avek nou Order Paper e nou ankor lo Mosyon Onorab Arnephy.  E mon ava envit Onorab Pierre pou pran laparol.

 

HON DAVID PIERRE

Mersi Mr Deputy.  Mr Deputy, parey Mosyon ki devan nou pe demande, Mosyon pe rekomann Gouvernman, atraver Minister Servis Sosyal avek Devlopman Kominoter e Sport, pou petet donn en pti pe plis larzan pour antreprann bann progranm ki annan pou fer avek kanpanny Renesans Moral e Sosyal atraver bann diferan kominote partou dan Sesel.

Mr Deputy, mon konpran tre klerman lide par deryer Mosyon anmennen par Onorab Arnephy.  Mon krwar ki petet Onorab Arnephy i anvi ki pei oubyen Gouvernman i reisir dan son lalit kont bann konportman anti-sosyal ki pe kontinnyelman ogmante dan nou bann kominote e partou atraver pei.  Mon konnen poudir bann tel konportman anti-sosyal i met bann presyon lo nou bann diferan kominote e i met bann presyon lo bann diferan fanmiy, la ki lamazorite fanmiy i deza anba presyon an relasyon avek kou lavi.  Nou konnen napa nanryen ki fasil, tou keksoz i difisil e bann presyon ki annan pou fer avek nivo kriminalite ki pe ogmante, nivo vol dan distrik e dan nou bann kanton ki pe ogmante.  Mon krwar i neseser pou pei fer en zefor nasyonal pou nou deal avek sa bann size.  So, baze lo sa, mon konpran lide par deryer Mosyon Onorab Arnephy.

Mr Speaker wi, i annan sa push dan pei pou nou reisir lo sa nivo me lo lot kote, Seselwa pe egalman egzize ki sak sou ki ganny depanse dan fon piblik, i ganny fer dan en fason ki transparan e i ganny fer dan en fason ki accountable.  E anplis ki sa Mr Deputy, i enportan pou pei bouz dan en direksyon kot letan nou envestir larzan piblik dizon dan en progranm, nou bezwen annan en progranm ki byen definir e en progranm ki annan en gran posibilite, en gran poursantaz success rate.  Son success rate i bezwen o.    So, mon largiman ozordi i pirman baze lo sa.  Lo en kote wi, fodre nou fer sir ki nou reisir, fodre nou kapab konbat e fer desann e redwir sa nivo limoralite ki annan dan pei.  Me lo lot kote, nou bezwen fer sir ki letan nou met larzan dan bann diferan progranm dan bann distrik, nou bezwen osi egalman accountable e fer sir ki piblik i konnen ki fason sa bann larzan in ganny depanse.

Mr Deputy, nou konnen already, tou Manm Parlman dan Lasanble ozordi i konnen poudir, Gouvernman in deza depans plizyer milyon dan sa lalinny.  Right? Me malgre ki nou’n depans sa plizyer milyon, i kler ki nou pankor reisir totalman.  Kestyon alors ki nou pe demande se kote ki nou pa’n reisir?  Kote ki nou’n al mal?  Akoz ki bann progranm ki nou’n met anplas dan lepase i bann progranm ki pa’n marse?  Ki leson ki nou kapab tire, pou fer sir ki sa larzan anplis ki Onorab pe demande i ganny servi dan en fason pli pozitiv, dan en fason pli byen, pour ki finalman nou kapab reisir.

Ozordi, loter Mosyon pe dir ek nou koumsa poudir, bann distrik pe ganny R4000 par kar, si mon’n tann li byen.  Par an.  R4000 par an, ki fer R1000 par kar.  R1000 par kar, definitivman i pa ase pou nou organiz bann progranm ki pou fer en lefe e ki pou ed nou fer sikse.  Alors dan sa konteks wi.  Me, parey mon’n dir, nou bezwen cautious. Nou bezwen fer sir ki anmenmtan, konman en Lasanble responsab, anmenmtan ki nou pe demann larzan lo en kote, nou bezwen egalman egzize ki bann distrik, oubyen bann kominote i bezwen come up avek bann progranm.  Zot bezwen annan bann lobzektiv ki kapab ganny mezire, pour ki ler nou’n donn, ler Gouvernman in met larzan, ler Lasanble in aprouv larzan pou sa bann progranm, nou kapab anmenmtan annan posibilite evalye pou vwar si sa bann progranm pour ki nou’n donn larzan i bann progranm ki pe reisir.

Dan milye semen, si i annan nesesite, si i annan posibilite pou sanz progranm pou aziste, sa i ava ganny fer.  Me selman Lasanble pa pou kapab Mr Deputy, donn larzan oubyen aksepte dan Bidze pou nou met plis larzan dan bann distrik si nou napa bann progranm ki definir.  Si Lasanble pa satisfe ki sa bann progranm ki pe al ganny met anplas, sa bann progranm pour ki sa bann larzan ki pe ganny demande pe al servi, i bann progranm ki tangible.  I bann progranm ki pou ed nou reisir.  I bann progranm ki nou kapab mezire.

Anplis ki sa Mr Deputy, Lasanble i devret osi egzize ki avek sa bann progranm, i annan bann mekanizm ki ganny met anplas pou nou evalye along the way, kimannyer sa bann progranm pe ale.  Apre 3 mwan, apre 6 mwan, apre 9 mwan.  Kimannyer sa bann progranm pe ale?  Eski nou pe vreman reisir?  I bezwen annan en fason pou nou evalye pou nou konnen si nou pe depans larzan piblik dan en fason ki vreman, vreman itil.

Mr Speaker, parey mon’n dir, alors si, nou pou tonm dakor ki nou devret pe donn plis larzan, nou pe bezwen osi egalman:- e taler loter Mosyon atraver son Right of reply, petet i ava donn Lasanble en pti pe plis detay lo la, me nou bezwen osi aksepte ki nou pou annan bann progranm, bann Program-Based Budget pou sa bann progranm ki pe al ganny met an aplikasyon.

Mr Deputy Speaker, mon krwar tou Seselwa, tou Seselwa i anvi ki Lasanble Nasyonal i siport okenn progranm ki Gouvernman i antreprann e ki pou bon pour Sesel.  Me selman mon mazinen poudir tou Seselwa i egalman osi anvi vwar ki ler nou siport sa bann progranm, nou fer sir ki Gouvernman i met sa bann progranm an aplikasyon dan en fason kot i annan accountability e latransparans.

Mr Speaker, i bezwen egalman osi annan bann mekanizm anplas pou en evalyasyon siantifik an relasyon avek sa bann progranm.  Mon krwar bann distrik i bezwen ganny en pti pe plis lotonomi pou zot vwar kwa ki zot kapab met an aplikasyon dan zot bann distrik spesifik ki kapab marse pou zot akoz petet Mr Deputy, sa ki kapab marse Les Mamelles, i pa pou neseserman marse Anse Aux Pins, oubyen i pa pou neseserman marse Mont Buxton.

Les Mamelles i devret annan sa lotonomi pou li kapab met son progranm anplas.  Anse Aux Pins i devret osi kapab annan sa serten degre lotonomi pou li met son progranm anplas dan lafason ki i krwar pou marse dan son distrik e bann lezot distrik osi parey.  Lenportans i se ki metod monitoring, metod evalyasyon i egziste e i annan latransparans e Lasanble Nasyonal i kapab evalye e vwar atraver bann rapor ki ganny mete devan nou, si sa bann progranm pe marse e si sa bann progranm pa pe marse, pour ki dan bann ka kot bann progranm pa pe marse, nou pou bezwen revwar e petet larzan ava ganny diskontinnyen ziska ler nouvo progranm ki pou marse i ava ganny met an aplikasyon e sa distrik a kapab ganny son larzan pou swiv sa bann progranm.

So, an bref, oubyen pou konklir Mr Deputy, sa ki mwan mon pe demande lo mon kote i se ki loter Mosyon i eksplik nou en pti gin kimannyer i vwar, lafason ki sa bann larzan i devret ganny depanse.  Ki i panse lo sa size Program-Based Budgeting e mon anvi trouve ki wi, i annan bann progranm ki marse.  Wi, i annan bann metod monitoring.  Wi, i annan bann metod evalyasyon e wi, i annan bann posibilite kot bann rapor i vin devan Lasanble Nasyonal pou nou kapab evalye, pou nou kapab vwar si nou kapab kontinnyen vote pour ki larzan i kapab kontinnyelman ganny donnen dan sa bann progranm, akoz lesansyel i se ki i annan progranm e progranm i marse e Seselwa i santi ki sak sou ki pe ganny depanse i vin en keksoz ki dan zot lavantaz, i pe anmenn benefis pou kominote e i annan latransparans e i annan accountability.  Mersi Mr Deputy.

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy.  Mr Deputy, sa Mosyon ki devan nou apremidi, ki nou’n koz lo la avek bokou pasyon depi bomaten i a mon avi labaz sa Mosyon se community engagement.  Kimannyer nou fer ki bann kominote i vin ansanm, i zwenn ansanm, i angaz zot e i move forward.  Mon krwar in ler pou nou annan en nouvo retorik an sa ki konsern lafason ki nou vwar nou distrik e lafason ki nou anvi angaz nou distrik.  Leadership distrik akoz i annan plizyer nivo leadership lo nivo distrik ozordi e kimannyer nou fer sir ki distrik i marse.

So, dan community engagement, i annan amonavi 4 pillars ki angaz en kominote e labaz se community activism oubyen voluntarism kot ou annan en gran mas dimoun dan kominote ki anvi angaz zot a plizyer nivo, swa legliz, swa NGOs, swa dan distrik, swa bann family support group eksetera ki anvi angaz zot volonterman, donn zot letan, zot lentelizans, zot resours imen pou fer sir ki zot vwar en diferans dan zot kominote.  I osi annan the aspect of community leadership ki enkli nou isi dan sa Lasanble e bann DA’s e bann lezot community leaders par egzanp bann leaders legliz, bann leaders bann NGOs eksetera.

E mon pou koz en pti pe lo la, lo nivo respe for community leaders ki nou bezwen sanz en pti pe lafason ki nou vwar bann dirizan a nivo kominote, a labaz distrik isi dan Sesel ozordi.  I annan the aspect of community mobilization.  Ler ou annan activism, ler ou annan leadership, ou bezwen kapab mobiliz ou distrik, mobiliz ou kominote pou vin anver sa koz, oubyen pou rezourd en problenm ki ou trouve dan kominote, apre finalman rezilta se community consciousness ki menm si ou napa bann dimoun ki vin devan, ki ganny mobilize, ki partisip dan sa aktivite oubyen dan sa progranm, i annan kantmenm dan ou kominote en rekonesans ki nou annan en problenm e ki mantalman i angaz li ver sa solisyon.

Alors sa bann 4 pillars Mr Deputy, i tre enportan pou nou vwar kimannyer nou regard nou kominote ozordi.  A mon avi, nou pa pe byen regard li, nou vwar li lo en striktir local and central governance e ladministrasyon i mars koumsa.  E loter Mosyon in viz byen lo sa Minister ki ansarz Local Government and central Government as a konsern Ladministrasyon Distrik e nou vwar li koumsa.  Swa i annan en sekretaryat dan en Minister ki ansarz distrik, Ladministrasyon e finansyel distrik e then ou annan DA ki the Local Government Branch ki angaz li avek bann lezot dirizan dan kominote.

I en fason enpe demode pou nou vwar nou distrik a mon avi e mon krwar in ler pou nou revwar kimannyer nou napa zis en central and local governance structure, me nou annan en striktir ki angaz kominote an antye, atraver tou bann diferan group sipor ki i annan.

Mon dir sa Mr Deputy akoz 1, mon siport demann pou nou annan plis larzan dan distrik me nou bezwen annan plis resours imen osi dan distrik e ozordi e parey tou bann dimoun ki’n entervenir, nou dimoun i krwar dan distrik ki tou resours i trouve kot DA e kot MNA. Setou, parfwa kot Per.  Setou resours ki annan dan distrik, swa mon al kot mon Per i ed mwan ek en pti larzan, swa mon al kot mon MNA, swa mon al kot DA. Mon krwar in ler pou nou met kart ater e et fran lo sa size poudir nou annan en kantite resours dan distrik ozordi ki nou kapab servi e wi, nou osi pe demann Gouvernman pou donn en pti pe plis pou nou fer sir ki nou kominote i byen angaze.  Akoz nou anvi sa arive, akoz menm nou Gouvernman in rekonnet ki si tou problenm oubyen si preski tou problenm moral oubyen sosyal, oubyen sosyete i trouve dan kominote, alors nou rekonnet ki solisyon sa bann problenm i osi trouve dan kominote.  I pa trouve on a desk in central Government.  I pa ganny trouve lo desk en dimoun, en PS, oubyen en Minis.  Solisyon pa laba.      Solisyon se community engagement e kimannyer kominote, the community consciousness i vin ansanm pou rezourd sa problenm a labaz kominote.  Alors vwala kot nou, nou vwar solisyon i devret ete.  Alors, si nou striktir i koumsa ozordi, nou, nou pe demande ki i annan en pe plis lotonomi distrik an sa ki konsern Ladministrasyon Finans e Ladministrasyon bann Distrik.

I kapab en fund ki antre direkteman dan distrik, avek tou accountability measures posib ki nou krwar ladan, me sa bann community leaders i vin ansanm e realize poudir donk, dan Beau Vallon nou annan en problenm e nou annan tel prolenm e nou vin ansanm.  Mon servi Beau Vallon akoz i en legzanp fantastik kot kominote tourism pe vin ansanm, pe engage zot pou adres en problenm ki ti trouve lo lakot lans Beau Vallon e in ganny transformen dan en proze fantastik ki apel golden mile.

E this is community engagement.  Tou dimoun i vin ansanm, tou dimoun i dakor e ou ganny sipor politik a nivo santral.  I merit koumsa e mannyer nou pei pe bouze, nou annan the emergence of en kantite NGOs dan nou pei ozordi.  They are community leaders and there’s a greater community activism lo nivo distrik e nou anvi ki dimoun i sorti lo sa depandans Gouvernman e MNA e DA e depan lo limenm oubyen travay avek en lot NGO, alors a mon avi, this is the way forward.

Nou annan avek sa, Mr Deputy detrwa problenm ki nou bezwen met kart ater, fer sir nou kapab rezourd.  Enn se red tape, bureaucracy.  Retar dan devlopman e ki fer ki souvandfwa, sa pti gin larzan ki antre a nivo kominote, i menm fini lanmenm konmsi.  I fini dan ladministrasyon.  I fini dan. Ler ou pe sey organiz en pti aktivite, R1000 nou konnen i pa preski nanryen.  I fini dan phone call, i fini dan en first meeting.  I fini lanmenm in organization of an activity. Prezan e i osi annan en lack of communication mon krwar, lo diferan nivo kot nou bezwen angaz nou bokou plis.  Donk, ki kalite aktivite an term Renesans Sosyal nou anvi tackle?  What is our biggest problem? I pa kapab santral oubyen nou Gouvernman pe angaz li dan serten aktivite o nivo nasyonal e distrik pa pe konekte li, akoz i napa resours pou konekte.  I napa resours imen, i napa engagement kominote.  Kan sa problenm ki nou pe tackle atraver sa program i konsantre dan distrik.  I konsantre dan en sou-distrik.  Ou vwar par egzanp si nou annan problenm, mon pa konnen, truancy, me problenm truancy pa ariv anvil.  Pa ariv in central government.  Problenm truancy e behaviour dan lekol i ariv dan lekol e i bezwen ganny rezourd avek teachers ek paran e kominote e kot sa bann manrmay ler zot sov lekol, kot zot ale.

Vwala kot problenm i ganny rezourd e nou bezwen rekonnet sa.  E alors si nou rekonnet sa, nou bezwen rekonnet ki funds pa zis vin avek kot lekol, oubyen funds pa merit vin zis avek PTA pou rezourd problenm truancy, me i bezwen vin avek bann community leaders ki enterese pou rezourd sa problenm.

I osi petet annan amonavi a bit of lack of respect pou travay oubyen rekonesans travay kominote.  Mon krwar ozordi i letan pou nou met sa ater pou nou dir poudir be bann community leaders i bann front liners. I pilye bann kominote.  I bann dirizan ki fer en kantite travay e nou merit alors en respe a laoter pou zot.  Sa dimoun ki ansarz son legliz, sa dimoun ki’n ganny elekte pou son distrik, sa Head Teacher lo nivo kominote, sa dimoun ki ansarz son kord gard, sa DA i bann dimoun ki bann pilye e ki nou kominote i apir lo la e nou bezwen donn zot sa due respect e alors donk, mon krwar si nou travay ansanm e annan en deba nasyonal lo sa bann issues, nou kapab reelman met lanmen lo serten problenm.

Prezan, avek tou sa bann issues ki mon’n met ater Mr Deputy, mon pa pou long.  Eski, kestyon ki mon anvi se, mon anvi demande.  Eski nou anvi progranm marse?  I pa vo lapenn annan 4, 5 progranm oubyen 5, 10 progranm.  I pa vo lapenn kre nouvo progranm si nou pou donn R1000 en progranm dan en kar.  It really does’nt make sense. E nou Mosyon i al lo la.  Plito nou pa fer.  Plito nou fer en progranm ki apel progranm Renesans Sosyal ou met tou dimoun anba sa umbrella.

Alors nou bezwen efektiv dan progranm si nou anvi i marse.  Now, si nou pa anvi i marse oubyen si i annan progranm ki pa pe marse, annou dir, annou admet ki i annan progranm ki pa pe marse, ki pa vo lapenn.  Mon krwar Onorab Volcere in koz lo la.  I annan progranm ki legliz i kapab pran, i annan progranm ki NGO i kapab pran.  Annou revwar e regarde be kwa donk ki Ladministrasyon Distrik, sa Ladministrater ansanm avek bann sipor ki annan dan distrik i kapab pran, i merit pe pran e lezot, kwa ki bann NGO’s i kapab pran.  I annan legzanp fantastik.  Mon ti pe swiv en progranm lo Bel Ombre resaman kot kominote peser pe tackle zot prop problenm atraver en NGO. Fantastik.  Problenm lanvironnman pe ganny tackle atraver en NGO.  E sa i sorti anba Ladministrasyon Distrik e bann peser i rezourd zot prop problenm ki zot ti annan, ti pe fer fas avek.

Byensir tou pa depan lo Gouvernman.  I pa depan.  Me si ou annan en financial autonomy at district level, me sa i ed ou bokou pli byen pou ou al rod plis resours.  I donn ou sa lotonomi, sa pti pouvwar pou ou ale, al rod plis resours.  NGO i vini, kominote biznes i vini, ou annan en bon rapor avek zot e si ou annan en bon rikord latransparans, lafason ki ou depans ou larzan e ou rann kont dan rankont anyel avek piblik ou distrik, kimannyer sa larzan in ganny depanse, alors i pou pli fasil.

Mr Deputy, dernyen pwen mon anvi fer se an repons lenkyetid Leader Lopozisyon, bann pwen ki in fer resorti ki i annan ki mon dakor avek, me i annan ki mon krwar nou bezwen met lanmen ater.  I normal ki ler nou demann plis larzan e nou, nou en Lasanble ki nou annan serten mezir ki nou bezwen rann kont ki nou fer ek sa larzan.  Sa larzan pa pe al ganny servi dan nenport ki fason me i deza annan dan Lalwa sa bann mezir.  Sel keksoz ki nou bezwen fer se swiv Lalwa.  I deza annan Lalwa e nou’n pas plizyer Lalwa ki fer ki larzan piblik i ganny mezire tou sou, tou kas to the very last, dernyen dimoun ki servi li.

So, mon napa lenkyetid.  E i dir i annan plizyer progranm pa pe marse ki wi, i annan, me i annan plizyer progranm ki pe marse osi.  Nou bezwen rekonnet ki i annan progranm ki pe marse.  I annan plizyer distrik ki annan bann progranm lazenes fantastik ki pe marse.  Mon krwar Onorab Fideria in fer rekonnet ki si i annan en group ki mars pli byen se Trwazyenm Az akoz zot regulate zot lekor, zot rod zot funds eksetera.  I annan progranm ki pe marse.  Me sa ki pa fer li pe marse se pa zis lack of initiative oubyen:- me se mank sipor finansyel akoz R1000 par progranm vreman pa fer nanryen.

Dernyen pwen se the opportunity cost ki mon krwar nou bezwen met lanmen lo la.  Si nou pa fer sa bann progranm, what is the cost of not doing sa bann progranm?  Ki cost nou pei pou koute, pou kout nou si nou pa tackle problenm truancy dan lekol?  Konman en teacher, Leader Lopozisyon i konn tre byen.  Si nou pa tackle problenm zanfan ki sov lekol oubyen behaviour dan lekol, the cost nou pou santi li in the next five years ler sa prosen zenerasyon i kit lekol e i antre dan lemonn travay.  The cost nou pe deza santi li dan bann lakour kot i annan pa mal problenm sosyal kot napa gid lo zanfan.  So, nou bezwen mazin opportunity cost. Finalman, nou napa en swa but to succeed.  Nou napa en swa.  I annan en gran volonte lo nivo distrik ozordi pou fer keksoz marse.  I annan en gran demann lo nivo distrik ozordi par nou bann zabitan.  Zot anvi vwar plis aktivite, plis engagement.  I annan en gran konsyan moral atraver diferan denominasyon ozordi.  I annan en retour ver spirityalite ki bon pou nou bann kominote.  Alors i annan en bon mouvman ozordi pou fer ki nou bann kominote i marse.

Donk sa Mosyon pe demande ki come Budget time, nou bezwen asiz ansanm avek sa Minister konsernen e dan en fason realis dir li donk nou, nou anvi distrik marse, ou osi ou anvi distrik marse me sa Bidze ki ou pe met devan nou, nou pa satisfe avek e nou ti a kontan asize, revwar e vwar kimannyer nou kapab ganny plis kontribisyon Gouvernman me osi nou pare pou nou ale al rod plis kontribisyon sekter prive.

Vwala en pti pe mon kontribisyon Mr Deputy anver sa Mosyon ki mon krwar i tre, tre enportan si nou anvi nou bann distrik marse e si nou anvi ki nou dimoun i konpran akoz parfwa bann leaders, bann MNA bann DA pa kapab, pa finabou kapab fer tou aktivite ki nou ti a voudre fer lo nivo distrik.  Mersi.

 

MR DEPUTY SPEAKER

Right of reply, Onorab Arnephy.

 

HON BERNARD ARNEPHY

Mersi Mr Deputy.  Bonn apre midi tou dimoun.  Mr Deputy, mon krwar dan bann deba ki’n ganny fer in annan en fine balance ant kwa ki Mosyon pe demande e kwa ki nou an retour nou ekspekte avek pa selman distrik me tou sa ki form labaz dan distrik.  E mon krwar en term enteresan ki Onorab Vidot in fer resorti se ki, nou anvi things i happen dan distrik.  E mon krwar se sa ki lide par deryer Mosyon pe adrese.

So, mon krwar mon ti fer kler dan mon prezantasyon poudir dan distrik nou fer en kantite zoli plan, en kantite progranm ok.  Me souvandfwa nou ganny difikilte pou nou enplimant sa bann progranm zisteman akoz nou mank serten sipor.  E enn parmi sa bann sipor ki nou manke se sa sipor finansyel.  E mon krwar si distrik i anvi bouz dan sa direksyon, nou pou bezwen fer sir ki nou, konman Parlman ki vot lo Bidze, nou demann sa sipor akoz nou, nou ti ava anvi ki nou distrik i bouze, nou kominote i bouze.

Pou reponn serten konsern bann Manm, ok.  Parey Leader Lopozisyon in koz lo la, mon krwar mon ti fer kler dan mon lentervansyon poudir ler sa demann ki nou pe fer, Gouvernman i konsidere, nou lo kote distrik nou, nou pou bezwen fer sir ki nou vin pli byen striktire.  Nou bezwen fer sir ki nou vin pli byen organize.  E sa restriktirasyon ouswa sa lorganizasyon i pou baze lo bann progranm ki nou, nou prezant avek Gouvernman.  Ok.

So, sa demann pou Program-Based Budgeting mon krwar i antre byen dan demann ki mon’n fer resorti dan mon Mosyon.  E vwala kot nou konman bann community leaders parey LGB in koz lo la, nou, nou bezwen fer sir aprezan nou annan bann sistenm anplas kot nou monitor.  Nou monitor e nou evalye.  Ok. Nou’n koz lo bann NGO’s.  bann NGOs pou antre wi.  Nou a donn koudmen.  So, i pou form en lansanm kot tou dimoun, Gouvernman, distrik, NGOs, community leaders, nou tou nou zwenn ansanm e nou fer sa bann keksoz arive.

Nou’n koz lo lenfrastriktir distrik.  Onorab Fideria in koz lo la.  Dan distrik ozordi nou annan en kantite lenfrastriktir wi.  Ok. Nou, nou ti a kontan, nou ti a swete vwar ki nou maksimiz use sa bann lenfrastriktir.  Me souvan ankor sa i vin enposib ouswa difisil akoz nou mank enpe sa soutyen finansyel.  Ok. Depandans lo Gouvernman.  Nou koz lo depandans lo Gouvernman.  Wi.  Nou tou nou swete ki nou anvi tir sa depandans lo Gouvernman.  E vwala kot nou lobby pou bann business parties, bann lezot dimoun ki konsernen avek distrik, zot antre zot donn en koudmen.

E mon krwar mon ti fer sorti tre klerman dan mon prezantasyon poudir:- me parfwa nou vwar nou en pti pe anmare akoz nou pe tap laport menm dimoun.  E sa bann dimoun zot annan bonn volonte me at times zot dir nou non akoz zot napa.

So, Onorab Lebon in koz lo, resours i la li.  Resours i tro eparpiye partou.  So, nou, nou anvi anmenn sa resours kot distrik.  Kot leker distrik i bate, se la ki nou anvi sa resours i vini e se la kot nou pou adres tou sa bann problenm ki’n ganny fer resorti.

Me of course, pou kestyon accountability, nou bezwen fer sir poudir nou annan bann bon zesyon sa bann resours ok.  Nou bezwen fer sir nou annan bon kordinasyon dan distrik.  Ok, so dan distrik ozordi i annan diferan group ki operateOk. So, nou bezwen revwar lafason ki sa bann group i operate. Ok, si ou resours pou vini, zot bezwen fer sir nou pa pe step lo lipye kanmarad akoz mon krwar souvandfwa se sa ki arive.  Se, nou tro step lo lipye kanmarad e nou vwar nou, nou pe fer duplication.

So, dan en fason tre striktire, en demann profon avek gouverman, mon krwar sa i pou ekout nou akoz i vwar poudir nou annan en lentansyon serye pou fer keksoz arive.

Ok.  So, bann lezot pwen ki’n ganny fer resorti ok.  So, nou pe koz lo sa transformasyon ekonomik e sosyal.  I koute.  Ok.  Nou annan tou sa bann issues pou nou adrese, nou anvi nou lekonomi fer pli byen, nou anvi angaz plis nou bann zenn dan bann aktivite prodiktiv ok.  So, nou bezwen depans en pti gin me an retour mon asire ki sa pou annan plis rannman pou nou.  Ok.  Akoz nou lazenes pou vwar poudir nou enterese avek zot.  Pa pe koz zis lazenes, tou group me focus ti lo lazenes.  Nou anvi fer keksoz pou zot so, an retour zot santi zot pli motive.

So, all in all, mon krwar Onorab Volcere in koz lo rol sak endividi.  Mon krwar sa i tre, tre enportan.  Ok. Nou bezwen nou sak dimoun dan kominote, demande ki nou osi nou kapab fer pou nou elev nou kominote.  Ok.  So, Gouvernman i ava anmenn sipor me nou tou nou bezwen annan sa rol pou nou donn en koudmen.  Revwar nou bann progranm dan distrik.  Mon konnen bann distrik i asize, bann leaders dan distrik i asize i fer bann progranm.  Petet, ler nou pe fer sa demann, nou bezwen osi revwar lafason ki sa bann progranm i ganny design, i ganny enplimante e i ganny monitor.

So, tousala mon krwar i bann demann ki pe siport lide par deryer Mosyon.  Nou pa zis pe demann larzan, me nou annan bann lide kwa ki pou fer, ki nou demann i ganny ekoute.  So, all in all, mon krwar en kantite keksoz in ganny dir.  Transparency, accountability parey Leader lopozisyon in koz lo la.  Mon krwar sa i ofon nou leker.  Ok.  Ozordi nou Lasanble in pran en rol proaktiv, Komite Finans, pou fer sir ki tou bann resours ki ganny met a dispozisyon distrik, a dispozisyon Gouvernman i ganny byen zere, i ganny byen servi e mon krwar demann ki Leader Lopozisyon pe fer, mon krwar in ganny fer resorti dan Mosyon.

So, sa Mosyon parey mon’n dir i pe fer en demann avek Gouvernman e ler Gouvernman i ekout nou demann, mon asir ou nou pou kapab lobby, mobiliz tou bann lezot lorganizasyon ki operate dan distrik ok. O nivo distrik, o nivo rezyonnal, o nivo nasyonal, pou vwar poudir nou annan en lentansyon serye, nou anvi adres bann issues, nou anvi adres bann social ills, nou anvi kontinnyen promouvwar bann bon keksoz ki pe ganny fer dan distrik.  Kontinnyen promot bann bon linisyativ ki pe ganny fer dan distrik.  So, vwala en pti pe rezon par deryer sa Mosyon e mon swete ki ler sa i arive, lotorite konsernen, bann Minister konsernen i ekout nou e ki finalman nou a vwar poudir distrik son lanmen i ava ganny large en pe plis.  Distrik ava annan plis sa lotonomi e distrik ava fer bann progranm ki pli byen targete e ki tous nou bann dimoun direkteman pou nou fer sa sanzman ki nou anvi vwar vizavi sa progranm.  Pa zis sa progranm Renesans Moral me tou progranm ki distrik i ankadre.  So, mersi tou Manm e mon ti a demann tou Manm pou vot an faver sa Mosyon.  Mersi.

 

MR DEPUTY SPEAKER

Bon, lo sa Mosyon nou pran en vot.  Tou bann ki an faver?  Okenn ki kont?  Mosyon in pase, inanim.  Onorab Pierre ou’n vot kont?  An faver.  Anr, mon’n vwar ou, ou’n lev lanmen ler mon’n dir kont.  Bon, zis pou koriz sa, tou Manm in vot an faver.  Mosyon in ganny aprouve avek linamilite.

Nou a kontinnyen nou a pran dezyenm Mosyon lo nou Order Paper, pou ganny prezante par Onorab Nichole Barbe.  Onorab, ou kapab prezant ou Mosyon.

 

HON NICHOLE BARBE

Mersi Mr Deputy.  Mr Deputy, Koleg Onorab, bonn apremidi.  Mr Deputy, mon Mosyon i lir koumsa; Sa Lasanble i demande ki Gouvernman atraver Minister Ledikasyon i rapidman met an mars The National School Nutrition Policy dan tou lekol, konman enn bann progranm dan kad en stratezi nasyonal pou promot healthy eating e healthy living dan Sesel.

Mr Deputy, sa Mosyon i vwar The National School Nutrition Policy konman enn bann konponan en stratezi nasyonal ki promot healthy eating ek healthy living konman en progranm dan en stratezi global, sa School Nutrition Policy, pa pou kapab ganny enplimante an izolasyon avek lezot progranm.  Stratezi global pou promot en meyer stil lavi atraver healthy eating ek healthy living, i en lenstriman konpreansiv ki enkli plizyer progranm enkli sa School Nutrition Policy.  E tou sa bann progranm i merit ganny enplimante dan en fason ki zot ranforsi kanmarad.

Sa lapros entegre i annan pour bi kre sinerzi ant bann diferan progranm e maksimiz lenpak kolektiv sa stratezi global.

Mr Deputy, sa Mosyon i enn ki senp.  I pa pe demann lotorite pou envant nanryen ki nouvo me senpleman, pou azir lo zot parol.  I pa pe demann lotorite pou vin avek en nouvo linisyativ, me pou senpleman met an mars en bon linisyativ ki in deza pran, me pankor ganny met an mars dan en fason ki pli obzektiv.  Sa Mosyon, pe senpleman demann Gouvernman pou egzekit en desizyon ki in deza pran e pou fer li o pli vit posib.

Mr Deputy, legzistans en National School Nutrition Policy, i dan limenm en ladmisyon ki nou annan en problenm ki merit ganny adrese atraver sa Polisi.  Sa problenm ki sa Polisi i adrese, se problenm zanfan lekol ki zot pwa i plis ki zot pwa normal pou zot laz, ki nou dir overweight e bann ki lapeze i bokou plis ankor ki nou apel obes.

Pwa normal en dimoun i normalman ganny defini atraver en lendis ki nou apel en body mass index oubyen BMIBMI en dimoun i en mezir relasyon ant son pwa ek son grander.  En dimoun i overweight si son pwa i an tro an relasyon avek son grander e i vin obes si son pwa i ogmant ankor plis.

Mr Deputy, lobesite i vin en lepidemi mondyal e en problenm lasante piblik.  Depi 1980, lakantite lobesite in double dan lemonn e 2.8 milyon dimoun i mor toulezour avek bann kondisyon ki asosye avek pwa an ekse.  Dapre FAO lazans Nasyon Ini pou manze, i annan 1.4 bilyon dimoun ki overweight dan lemonn e en tyer parmi zot, i obes.  Annefe, Mardi le 2 Zen sa lannen, AMA, The American Medical Association, ti ofisyelman deklar lobesite konman en maladi kronik.

Mr Deputy, lobesite ki souvan dekri konman en maladi lifestyle, i pa eparnye dan pei ki pe devlope parey Sesel.  Bann fiy ek bann madanm i pli ganny afekte avek sa problenm ki bann garson.  Sesel, sif i montre ki lakantite zanfan ki overweight ek obes dan nou bann lekol, in double dan sa deryen 10an.  Dapre statistik ofisyel, 13 poursan bann fiy e 10 poursan bann garson, i overweight dan Sesel.  E 8 poursan fiy e 6.1 poursan bann garson, i obes.  Sa bann sif i lezerman plis ki sa ki nou vwazen Moris, kot 8 a 10 poursan bann zanfan lekol i overweight e 7 a 9 poursan i obes.

Nou sif lo zanfan lekol ki obes pa tro lwen avek pou Lanmerik kot 10 poursan bann zanfan i annan sa kondisyon.  Me an term zanfan ki overweight, nou to prevalans i lanmwatye pou Lanmerik kot 22 a 25 poursan bann zanfan lekol i annan pwa an ekse.

Mr Deputy, sa bann sif i montre nou ki sitiasyon i grav e ki in ler pou nou azir.  Sa i merit trakas nou akoz letan en zanfan i overweight oubyen obes, i ogmant son risk ganny konplikasyon lasante e statistik ofisyel i montre ki premye lakoz lanmor dan Sesel se maladi kardyovaskiler ki parfwa lye avek problenm lobesite.

Mr Deputy, rezilta en letid ki FAO, Lorganizasyon Nasyon Ini pou manze in fek pibliye, i montre ki i annan en rapor 1 a 13 ant nouritir ek lasante en dimoun.  Sa i vedir, ki si en dimoun i manz byen e konsonm bann prodwi ki annan valer nitrisyonnel e mwens manze ki annan lagres, disik ek bann manze ki annan lenerzi ki rafinen, son benefis an term pa mank travay, pa depans larzan lo latizann e osi an term prodiktivite pou 13 fwa plis.

De lot kote, si en dimoun pa manz en ladyet balanse, sa i vedir i manz bann prodwi ki napa gran valer nitrisyonnel, i pou annan en kou 13 fwa plis an term mank travay, pa perform ase byen lekol, prodiktivite ba e depans lasante.

Mr Deputy, i pa zis en fakter junk food ki ogmant lobesite.  Lobesite, i sirman en enbalans ant sa ki nou manze avek lenerzi ki ou brile.  Sesel, pe deza sibir kou junk food konbinen avek lezot fakter unhealthy living, sanzman dan nou stil lavi nou bann zanfan parey mank legzersis, sa bann junk food pe fer nou pey ser an term logmantasyon bann maladi parey dyabet ek maladi kardyovaskiler.  Nou pe santi li pa zis dan nou sistenm lasante piblik, me osi dan nou lekonomi an term pert prodiktivite.

Mr Deputy sa National School Nutrition Policy ki ti ganny lanse a 2009, i pran an kont tou sa bann fakter ki mon’n koz lo la.  Premyerman, i vwar bann zanfan lekol konman sa target group ki pou kapab kiltiv sa bon labitid healthy eating ek healthy living.  Resers in prouve, ki letan bann zanfan i anmas bann bon labitid, zot pou form sa ki nou apel en critical mass ki pou answit fer Seselwa an zeneral vin en pep ki pa overweight, oubyen obes.

Byensir, bokou bann risk ki asosye avek lobesite pou diminyen e konsekaman, nou pou annan en pep ki pli an bonn sante.  Mr Deputy, sa Polisi i vwar zanfan konman sa group ki pou kapab permet nou pei sov sa time bomb ki nou apel lobesite ek tou bann konplikasyon ki i anmennen pou lasante nou pep e tou son bann kou pou nou lekonomi.

Mr Deputy, Sesel i annan leksperyans dan servi zanfan lekol konman veykil sanzman pozitiv e nou sikse in ganny rekonnet lo nivo mondyal.  Enn bann legzanp nou sikse pou servi zanfan lekol konman veykil sanzman pozitiv, se atraver ledikasyon lanvironnman dan bann lekol ki’n fer nou ganny en zenerasyon Seselwa ki tre konsyan nou lanvironnman.  Atraver lekol e bann Wild Life Clubs, nou’n reisi sanz latitid lazenes Seselwa lo lanvironnman.  Ozordi zour, nou bann zenn i telman konsyan lenportans nou lanvironnman, zot in vin son pli gran gardyen.

Mr Deputy, sa sikse ki Sesel in ranporte dan domenn lanvironnman avek bann zenn, nou devret repet li avek sa National School Nutrition Policy.  Nou kapab fer li e nou devret fer li.  Nou toultan dir ki, zanfan se lavenir nou pei.  Atraver lenplimantasyon sa Polisi, nou ava pe donn zanfan sa sans pou zot vin lavenir nou pei akoz nou anvi en Sesel kot son pep i an bonn sante.

Dezyenmman, sa Polisi i osi konpreansiv akoz i ganny adrese atraver curriculum ki zanfan i aprann.  Answit, atraver bann servis ki fourni manze kot lekol, tel ki bann tuck shops e school meal e lanvironnman sikososyal lekol.  Mr Deputy, parey nou okouran, konteni e mesaz ledikasyon nitrisyon dan curriculum lekol, i baze lo Sechelles dietary guidelines.

Sepandan, mon ti a kontan fer resorti, ki ledikasyon tousel atraver en curriculum formel, i pa sifi pou inisye sanzman dan konportman bann zanfan.  Sa ki nou bezwen se lenfliyans lanvironnman nitrisyon lekol dan son totalite atraver bann servis ki fourni manze pou konplimant lansennyman dan laklas ki ava asir sanzman konportman a lon term.  Alor, pou konplemant sa ledikasyon formel, sa Polisi i fer resorti, ki tou bann tuck shops i vann manze ki annan en valer nitrisyonnel o ou modere selman.  Tandi ki bann manze avek valer nitrisyonnel ki ba, tel ki bann labwason gasyez, draze, gato dou, chips eksetera, i devret bann ban dan lekol.

Sa Polisi, i osi propoz standar pou bann dezennen kot lekol.  Kot i demann provizyon en ladyet balanse, eliminasyon lagres satire ek delwil dan preparasyon dezennen e promosyon bann metod healthy cooking.  Pou kapab annan en lenfliyans pozitiv lo lanvironnman sikososyal lekol, sa Polisi i site ki bann ansennyan e lezot staff administrativ lekol i akt konman bann role models dan zot konportman an se ki konsern zot nitrisyon.

Anlinny avek sa, bann aktivite extra-curricular, i devret anlinny avek sa Polisi limenm e reflekte promosyon healthy eating.

Mr Deputy, mon rekonnet zefor ki pe ganny fer par serten lekol, tuck shops, servis school meal e menm serten paran pou ede konpran e enplimant serten konponan sa Polisi.  Me malgre sa, dapre mon resers, mon santi ki i ankor annan bokou keksoz a fer pou ogmant lefikasite lenplimantasyon sa Polisi.

La Mr Deputy, mon pe koz lo par egzanp en mank konprenezon konteni e rezon det sa Polisi.  Regilasyon health and safety, lizyenn e food handling parmi serten operater tuck shop.  En lot legzanp, se en mankman swa bann prodwi avek en valer nitrisyonnel o dan bann tuck shop.   Mon rekonnet ki sa bann tuck shop operators i pa devret ganny blanmen pou sa me selman nou bezwen regard bann zefor ki lezot sekter i kapab ede pou fer sir, pou asire ki i annan sa bann valer nitrisyonnel dan sa bann tuck shops.

Dapre mon resers, serten lekol napa tuck shop e menm serten tuck shop pa lo standar e zot pe servi dining hall.  En lot legzanp, se en mankman fasilite delo potab fre ki alaporte bann zanfan dan bann lakour lekol.  Sa malgre nou pe ankouraz zanfan pou bwar plis delo, mon okouran ki i osi annan bokou zanfan ki pe anmenn zot pti boutey delo avek zot lekol.

Nou osi vwar en mankman kiltivasyon e konsonmasyon bann prodwi lokal dan lanvironnman lekol.  Mr Deputy, avek sa enn de pti legzanp, ki mon’n fer resorti, i demontre klerman ki i annan en nesesite pou Minister Ledikasyon enplimant sa National School Nutrition Policy dan tou lekol.  Sa National School Nutrition Policy, i en dokiman ki’n ganny formile dan en fason tre serye.  In pran bann responsab Minister Lasante e Minister Ledikasyon ek bann lezot stakeholders anviron 4an pou formil en tel Polisi.

Nou felisit sa 2 Minister pou fer sa bon travay e donn nou en bon Polisi.  Atraver sa Mosyon, mon pe alor demann Gouvernman pou kontinnyen sa ki zot in konmanse e enplimant sa Polisi.  Mr Deputy, mon ti a alor demann mon bann Koleg pou siport sa Mosyon.  Mon swete ki zot anrisir deba lo sa Mosyon atraver bann largiman, refleksyon e referans ki ed pep Seselwa realiz lenportans sa deba e pous Gouvernman pou azir vit lo sa size ki tous lavenir nou pei.  Mersi Mr Deputy.

 

 

 

MR DEPUTY SPEAKER

Bon, okenn Manm ki oule segonn sa Mosyon?  Onorab Vidot.

 

HON KEVIN VIDOT

Mersi Mr Deputy Speaker.  Mon ti a kontan segonn sa Mosyon e entervenir.

 

MR DEPUTY SPEAKER

Ale.

 

HON KEVIN VIDOT

Mr Deputy Speaker, Koleg Onorab, bonn apremidi.  ‘The doctor of the future will give no medication but will entrust its patients in the care of the human frame, diets and in the cause and the prevention of disease’, Thomas Edison ti dir.  ‘One should eat to live not live to eat’, Benjamin Franklin ti osi dir.

Mr Deputy, mon krwar ki i apropriye pou konmans mon lentervansyon lo sa Mosyon par partaz sa 2 quote avek sa Lasanble pou ankor enn fwa, met lanfaz lo lesansyel e merit sa Mosyon.  E kwa ki nou oule akonplir par en tel Mosyon.  A mon avi, lide prensipal sa Mosyon, se pou ankouraz e promouvwar healty eating ki a son tour i a result dan healthy living ki natirelman vedir viv en lavi an bonn sante.  Lib kont bann maladi ki annan gran risk ganny koze par unhealthy eating e unhealthy living.

Mosyon, pe enplor avek Minister Ledikasyon pou rapidman met an mars, National School Nutrition Policy.  Mon panse, ki en tel Policy ti ganny konsevwar avek bann bon lentansyon an tet e ti sipoze adres ou elimin serten pratik ou liberte total an sa ki konsern nitrisyon bann zanfan lekol.

Mr Deputy, souvandfwa, nou annan bann bon linisyativ, plan ou progranm ki annan gran benefis pou en lenstitisyon, groupman ou endividi.  Me ki parfwa, akoz serten defi ki nou rankontre lo semen, pou lenplimantasyon total en tel progranm, nou vwar kot i ganny anbadonnen ouswa pa bokou lanpler ou lafaz ganny atase avek.  Nou zanfan ki fitir nou pei.  I bezwen ganny edike e fasonnen dan en fason ki nou batir en zenerasyon ki for, solid e an bonn sante ki kapab reelman pran responsabilite pou diriz sa nasyon ver son devlopman kontinnyel.

En pep ki an bonn sante, i en pep ki pou travayant e ki pou progrese.  Se sa rezon akoz nou bezwen met lanfaz lo enkilke bann bon valer, fason fer e kiltir dan nou bann zenn a en tre zenn az.  Nou bezwen konmans konmela menm.  Nou pa kapab les zot grandi tord apre pou sey drese.  I pli difisil pou enkilke serten bon prensip lavi dan en adilt, ki dan en zanfan.  Legzanp devan nou i annan Mr Deputy.

Bann zenn zot konsyan lenportans pou proteksyon lanvironnman, proteksyon bann plant andemik e osi san bliy nou torti-d-ter e nou kare.  Mr Deputy, sa Polisi ti sipoze ganny servi pou kordin tou bann laspe nitrisyon lekol ki enkli curriculum, tuck shop, provizyon school meals, lantrennman pou bann personnel ou travayer lekol.  Etablir sa kontak ant bann fanmiy e travayer lekol e osi pou evalyasyon.

Sa Polisi ti sipoze osi ganny servi dan en pli gran lanpler pou target bann ansennyan, travayer lekol, bann fanmiy e lezot manm kominote ki sipoze direkteman ou endirekteman form parti lakominote lekol.  Mon pa kapab sertifye ozordi ki tousala in ganny fer.  Menm si mon apresye zefor ki school meals in, ou pe fer, pou sey donn zanfan en repa balanse.  Me lezot laspe sa Policy mon krwar i bezwen ganny regarde seryezman.

A sa moman Mr Deputy, mon oule koz enpe lo rezilta School Screening Program ki pe regard prevalans overweight e obesite dan zanfan e adolesan Sesel pou 2011.  Sa School Screening Program i enkli pou mezir pwa e grander tou zanfan dan tou lekol, ki enkli lakres, dezyenm lannen, P4, S1 e S4. An 2011, dan 6000 zanfan, ki ti kalifye pou partisip dan sa screening, zis 4, 721 ki ti reponn lapel.  An 2011, prevalans overweight e obesite ti pre 17 poursan dan garson e 18 poursan dan bann fiy.  Konpare avek lannen 1998 a 2006, nou vwar ki prevalans overweight e obesite in ogmante dan bann garson e resanble pou desann lezerman dann bann fiy pou lannen 2011.  Sa trend i ekspekte ganny konfirmen avek lenformasyon ki’n sipoze ganny anmase an 2012.

Mr Deputy, kantite zanfan ki ti eligible pou screening, e poursantaz partisipasyon pou note, Lekol Endepandan, ki nou dir Independence School, ti rikord 100 poursan partisipasyon kot i ti annan 194 manrmay ki eligible pou li fer sa screening e tou son zanfan ti partisipe.  E pli ba pou note lo lenformasyon ki nou annan, se Baie St Anne Praslin ki li Mr Deputy, ti annan 133 zanfan ki ti eligible me zis 35 poursan manrmay ladan ki ti reponn lapel pou sa screening.

Nou bezwen rod fason pou ankouraz nou bann zenn pou partisip dan en tel progranm akoz i pou enportan pou kapab ed zot menm fer lentervansyon si neseser boner.  Me pa ler in tar kot zot vwar zot dan problenm e malad.

Mr Deputy, ler mon get en lot latab ki pe koz lo prevalans overweight, obesite par bann nivo laklas, enportan pou nou note Mr Deputy, se nou vwar ki i annan bann ogmantasyon ki nou bann zenn menm dan P4, P4 parey nou dir, ki annan 20.9 poursan bann zenn ki obese ouswa i overweight.  E ler nou get dan bann fiy osi, nou vwar pli o nivo osi i dan S1 kot i annan 595 zot kot i annan 20.3 poursan nou bann fiy ki obese ouswa i overweight.

Mr Deputy, en lot latab ki fer nou konsyan serten keksoz se prevalans lo overweight enkli obesite dan S1 e S4.  Sa group laz ki enportan pou nou donn zot bagaz, pou prepar zot pou demen pou lemonn travay Mr Deputy.  Ler nou regarde, pli o, Pointe Larue nou vwar avek 23.2 poursan bann zanfan ki overweight ouswa obese.  Pli ba ladan nou vwar La Riviere Anglaise limenm li avek 9.8 poursan ki mon vreman kontan, apre Belonie avek 7.2 poursan.  Savedir nou vwar i annan en trend bann lekot lavil i enpe ba lo obesite avek overweight, kekfwa nou fer enpe plis legzersis.

Dan bann fiy pou note, sa pou bann garson Mr Deputy, pou bann fiy nou note ki Anse Boileau i annan pli o nivo avek 26.6 poursan overweight, obesite.  Pli ba se La Riviere Anglaise ankor enn fwa, ki mon felisit zot avek zis 8.2 poursan bann fiy ki overweight.  E lo lalis total nou vwar, ler nou get son total Mr Deputy, se nou vwar lekol Mon Fleuri lo latet latab avek 24.3 poursan enkli garson e fiy, obesite.  E pli ba se lekol La Riviere Anglaise e Belonie ankor enn fwa, so, mon felisit sa bann landrwa e mon pou swete nou met plis lanfaz lo bann landrwa kot nou’n vwar prevalans i en pti pe pli o pou nou kapab anmenn bann progranm ki ed nou bann zenn pou al ver travay pli dir, fer legzersis e annan en ladyet enpe pli balanse.

Me kantmenm tousala Mr Deputy, i enportan pou note ki serten zanfan ki overweight ou obese in refize partisip dan sa screening e ki osi kapab annan lefe lo estimasyon vre nivo prevalans overweight e obesite an zeneral dan nou bann lekol e dan Sesel.

Mr Deputy, an vi konsekans sever ki obesite i kapab annan lo lasante laspe sosyal e ekonomik, sa o nivo prevalans overweight e obesite dan bann zenn Sesel, i demontre klerman ki nou bezwen annan serten lentervansyon mazer konsernan sa problenm.  Se la kot sa Polisi i sipoze zwe son rol par son lenplimantasyon serye par bann akter kler.  Mon sizere alors ki en desizyon serye i ganny pran pou bann diferan Minister ki konsernen, tel ki Minister Ledikasyon, Minister Lasante e Minister Zafer Sosyal, Devlopman Kominoter e Spor.  I asiz ansanm pou analiz sa sitiasyon an detay e rod fason ki sak Minister i kapab kontribye pou lenplimantasyon sa Polisi dan son totalite.  Ki a ede redwir nivo prevalans overweight e obesite dan nou bann zanfan e adolesan e osi promot avek viger healthy eating e healthy living ki nou Prezidan menm, Prezidan Michel ti koz lo la.

Mon krwar, si nou met sa zefor ekstra nou kapab fer li ansanm pou nou zanfan e fitir nou pei me nou bezwen konmans ozordi menm akoz demen i riske tro tar.  Alors se avek sa detrwa mo ki mon ankouraz mon bann Koleg pou vot an faver sa Mosyon e nou osi ede kot nou kapab pou promouvwar healthy eating e healthy living.  Mr Deputy Speaker, mon remersye ou.

 

MR DEPUTY SPEAKER

Ou resers i osi montre ki Anse Boileau i distrik ki annan plis manze.  Onorab Dr Payet.

 

HON DAVID PAYET

Mersi Mr Deputy.  Bonn apremidi tou dimoun.  Mr Deputy, Mosyon prezante par Onorab reprezantan distrik Bel Air, i ofer nou loportinite pou reflesir lo natir devlopman e son relasyon avek byennet imen ki enkli lasante.

Devlopman i anmenn modernite ki vedir, fasilite pou viv dan plis konfor.  Sa, i enkli servis parey akse avek transpor, koneksyon lakaz avek semen motorable e akse avek televizyon.  Devlopman i osi vedir fason pli efikas pou manage letan par fer sa ki nou abitye fer dan mwens letan.  Par egzanp, atraver bann landrwa ki vann fast food, nou ganny akse avek bann manze enpe pli vit akoz nou pa bezwen depans bokou letan pou prepar sa repa kot lakour.          Malerezman Mr Deputy, sa devlopman ki anmenn modernite i osi annan en kou.  Kou devlopman i an term sa ki imen i peye letan i sanz son labitid manze e son fason viv.  Ozordi zour limanite pe pey ser pou sa devlopman.  Kou devlopman in vin an term logmantasyon dan prevalans maladi parey bann maladi kardyovaskiler, dyabet e kanser.

Sa lyen ant devlopman e logmantasyon dan sa bann maladi, i fer ki medya i refer avek sa bann maladi konman bann diseases of development.  Resers in prouve ki logmantasyon dan sa bann diseases of development, in souvan relye avek bann kondisyon e sa se pwa an ekse ki nou apel overweight oubyen lobesite.  Dan prezantasyon son Mosyon, Onorab Barbe in fer resorti ki anviron enn dan sak 10 zanfan lekol i overweight oubyen obese e sa sif in ogmante akoz 10an pase ti annan zis enn dan 20 zanfan lekol ki ti swa overweight oubyen obese.

Mr Deputy, nou sistenm lasante piblik pe konstat lensidans logmantasyon dan pwa bann zanfan lo zot lasante.  Nou pe vwar laparisyon dyabet, sa ki nou apel type one, parmi serten zanfan lekol ki overweight oubyen obese.  Nou’n osi vwar lezot konplikasyon lasante ki lye avek zot kondisyon pwa an ekse.

Mr Deputy, letan en zanfan i overweight oubyen obes, sa pa zis ogmant son risk ganny serten konplikasyon lasante konman en zanfan, me i osi ogmant son risk konplikasyon lasante plitar dan son lavi adilt.  An dot mo, letan en zanfan i overweight oubyen obes, sa i annan en lenpak negativ lo son kalite lavi.  De-no-zour, bann ekspert nepli koz lo life expectancy ki vedir lakantite lannen an bonn sante ki en dimoun i ekspekte viv.  Me zot plito koz lo healthy life expectancy, ki vedir lakantite lannen an bonn sante ki en dimoun i ekspekte viv.  Akoz menm si en dimoun i viv lontan, ou bezwen pran an kont bann lannen ki in viv avek konplikasyon lasante ki’n redwir son kapasite lavi.

Mr Deputy, nou annan nou en gran defi dan Sesel.  Sa defi se pou nou fer sir ki Seselwa pa zis viv lontan me viv lontan an bonn sante.  E pou nou relev sa defi, nou pou bezwen konmans avek nou bann zanfan lekol.  Se dan konteks ki mon salye linisyativ Onorab Barbe pou vin avek sa Mosyon ki pe demann Gouvernman ki i rapidman met an mars National School Nutrition Policy akoz sa Polisi i lakle nou stratezi nasyonal pou devlop en pep an bonn sante.

En nasyon an bonn sante set en nasyon ki manz byen e viv aktivman.  E sa labitid healthy eating ek healthy living i konmans avek bann ki zot sistenm valer e gou i ankor dan staz formasyon e kapab sanze.  Sa i vedir ki pou nou annan en nasyon an bonn sante, nou bezwen enkli nouvo labitid an sa ki konsern nouritir, fason viv avek bann zanfan.

Sa National School Nutrition Policy, i labaz en nouvo kiltir an sa ki konsern nouritir e fason viv dan Sesel.  Mr Deputy, lasante se lavi e nouritir se lasante.  Serten kiltir milener in konpran tre byen sa lyen ki egziste ant nouritir e lasante e zot konsevwar nouritir konman bann keksoz ki nou donn nou lekor pou anpes nou tonm malad.  Sa i bann kiltir parey medsin ayurveda an Lenn e sistenm manze sinwan ki vwar nouritir konman en fason prezervasyon maladi.

Se sa kalite kiltir ki nou bezwen enkilke dan nou zanfan lekol atraver sa National School Nutrition Policy.  Mon napa okenn dout ki nou zefor pou pey fre akoz letan nou travay ansanm, nou’n toultan fer sikse.  Lenplimantasyon The National School Nutrition Policy, i annan proyoriye nasyonal akoz i konsern lavenir nou pei.  Nou dir ki nou zanfan i nou trezor e nou lavenir, i enportan ki nou azir pou protez nou zanfan e asir lavenir nou pei par konbat bann move labitid manze e move form nouritir ki pe annan lenpak negativ lo lasante nou zanfan.  Mr Deputy Speaker, mon remersi ou e mon pou siport sa Mosyon.

 

MR DEPUTY SPEAKER

Onorab Houareau.  Switch off mic.  Proceed.

 

HON HERBERT HOUAREAU

Bonn apremidi Mr Deputy.  Bonn apremidi tou bann Onorab e en bonn apremidi spesyal pou tou zabitan St Louis.

Mr Deputy, ozordi, nou pe koz lo manze e mon konmans mon lentervansyon avek en pti not rar ki dir, ‘ou riy mwan, ou dir mwan mon en zardinyen, mon pa ni plant fler dan mon zarden pour mwan fer zoli.  Mon plant manze pou fer zot tou kontan, e mon bezwen fer ou konnen poudir sak vid pa kapab debout’.  La mon dakor avek ou, ki Anse Boileau i annan bokou manze.

 

(Laughter)

HON HERBERT HOUAREAU

Mr Deputy, sa not rar i fer mwan mazin lekol St Jean Bosco ki ozordi i lekol Belonie.  Wi, bann zanfan St Louis, mon’n pas dan sa lekol e bokou zot paran in pas dan sa lekol.  Dan sa lekol ti annan en zarden legim kot tou bann etidyan ti aprann lagrikiltir e bann zengredyen lakwizin Seselwa.

Ozordi, laklos lekol i sonnen 8er bomaten e lekol pe konmanse e bokou bann zanfan be antre lekol segonder avek en limonad dan zot lanmen e pa pe respekte School Nutrition Policy.  Letan Head Teacher i koze, paran in arive.  Wi, sa i tris ki serten paran pe toler zot zanfan konsonm bann prodwi ki’n ganny klasifye e pa ganny tolere par nou School Nutrition Policy, se samenm sa bann paran ki dapre lenformasyon ki zot osi zot obese, pa oule respekte lareg Minister Ledikasyon ki’n met an plas.

La, mon pou demann SBC pou filmen sa dokiman ki nou vwar isi e montre sa bann paran kot lakour.  Sa i apel School Nutrition Policy, Guidelines pou bann snack shops ki’n ganny fer par Minister Lasante e Minister Ledikasyon an Me 2012.  Ladan i dir samoosa ki met dan four i pli bon ki samoosa ki fri.  E coca cola pa bon.  E pou zot lenformasyon bann zanfan, mwan osi mon’n grosi avek sa 2 zafer.

Dapre lenformasyon ki mon’n gannyen, i annan paran, detrwa zot, ki repros Head Teacher lo sa size e i annan bann paran ki al dir bann marsan ki lekol pa oule aksepte zot prodwi e i annan menm bann distribiter ki annan kouraz pou telefonn Head Teacher e kosyonn zot.  Sa i montre nou ki Lalwa cartel i an plas dan komers e letan in ariv sa nivo, mon konsider li ki nou pe vin lo en Lalwa mafya.  Sa se laverite e sa pe ganny pratike dan nou pei Sesel ozordi.

Mwan, konman en Manm Parlman responsab, mon kondann sa bann aksyon e si zanmen i ariv ankor dan mon distrik, mon pou pran ka avek.  Mwan, konman en paran responsab, mon fer sir ki mon zanfan pa konsonm sa bann prodwi dan lakour lekol.  Disik ek lagres i pa bon pou nou lasante.  Annou azir responsab e annou donn nou zanfan en sans pou li konsonm sa ki bon.

Menm si ou ris ou pov, ou kapab fer en zefor pou lasante ou zanfan.  Gran maten letan mon leve sak zour, mon demann mon lekor ki bann tuck shop pe vann.  Dapre rapor, i annan problenm dan serten lekol e sa, fodre ganny adrese.  Si i annan bokou paran ki fer zefor pou montre zanfan en bon semen dan en fason byen pou manze, fodre ki bann tuck shop osi i vann sa ki bon pou nou zanfan e fer zot gard sa bon mannyer e grandi avek en bon pratik.

La, i fer mwan mazin osi manze lekol parey nou dir, sa ki school meal i kwi parey nou dir.  Wi, sa manze ki Gouvernman i kontribye pour ki tou zanfan Seselwa i manz byen.  Zanfan silvouple, sa manze lekol i bon pou zot lasante e zot devlopman.  I fer mwan dimal letan mon tande ki en lekol parey Belonie segonder ki annan 610 zanfan zis 10 zanfan ki manz en repa so midi dan kantin lekol.  Dapre lenformasyon, i annan bokou kastrol ki monte me gaspiyaz i ganny fer.  Bokou zanfan pa kontan sa manze lekol akoz zot krwar i pa bon pou zot.  E zot esey gard zot fyerte menm si zot fer fas avek difikilte kot lakour.

Bokou i dir, ‘si i ti en take away mon ti a manze’.  La, mon konpran zot e mon demann ou Mr Deputy pou demann Minister Ledikasyon pou fer en zefor pou rebrand manze kantin lekol e fer li vin pli atiran dan en sort ki bann zenn a kapab manze e gard zot fyerte.  Mon krwar ki i pa neseser ki bann zenn i al rod manze take away R15 midi.

Remark in ganny fer, si ou met sa menm manze dan en bwat take away, zanfan i pran e al dan en kwen e manz li.  Mon sizere osi Mr Deputy, ki en survey i ganny fer dan sak lekol pou analiz sa problenm manze avek bann zanfan e osi bann teachers.  Mon plis ki krwar ki sa survey pou montre ki i annan bokou gaspiyaz e sa ki responsab pa oule koz lo la.

Mr Deputy, manze i pa zis lekol.  Fodre kot tou lakour bann Minister konsernen i lans en kanpanny manz byen.  Sa i ava montre bann zenn paran kwa ki zot kapab fer pou amelyor lasante zot fanmiy.      Dan nou pei, i annan tro bokou keksoz ki pe antre e serten marsan pe enport tro bokou gonaz e vann lokal.  Mwan, mon’n toultan koz lo sa size e in plis ki ler ki i annan en lord dan sa zafer.  Bann delwil ki ganny dir pa bon pou lasante me pe ganny vann isi dan nou pei.  Bann lasos ki pe ganny vann isi dan nou pei, nou pa ni menm konn tou son konteni.  Bann legim ki pouri apre 2 zour ki plant avek tro bokou kemikal, i osi pe ganny vann dan nou pei.  Tou sa i pa bon pou nou zanfan e i senpleman pa bon pou nou pep.

Ler la, i fer mwan mazin bann manze zenetikman modifye.  Sa i pa bon pou nou lasante ki afekte nou bann kod zenetik dan nou lekor e sa, i pa bon pou en pep inik o monn ki kapab sanz tou pou nou e mwan, i fer mwan per.  Nou pei pa kapab aksepte sa bann manze OGM pou nou pep menm si nou aste, ou ganny kado.  Fodre ki Minister Lasante e Customs i kapab annan kouraz pou demann kote sa manze i sorti menm trasabilite depi lagrenn ziska ki in ariv dan nou lasyet.

Mr Deputy, sa i pa fasil me neseser pou lavenir nou pep e lekonomi nou pti zil.  Mon terminen Mr Deputy, e an terminan mon lentervansyon avek sa pti sanson lakres ki dir, ‘pou fer en lakaz fodre dibwa, pou annan dibwa fodre en pye dibwa, pou fer en pye dibwa fodre lagrenn, sa lagrenn fodre nou senmen pou li pouse.  Si nou pa konmans senm ozordi, nou zanfan pa pou annan en lakaz demen’.  Mersi Mr Deputy.

 

MR DEPUTY SPEAKER

Mon ti krwar ou pe al sante.

 

(Laughter)

MR DEPUTY SPEAKER

Onorab Payet-Marie.  Request.

 

HON MARIA PAYET-MARIE

Mersi Mr Deputy Speaker.  Mon osi mon konn tre byen sa sanson, i en sanson Franse.

Mr Deputy Speaker, Mosyon table par Onorab Barbe i en bon Mosyon.  En Mosyon enportan ki devret en konsern pa zis Minister Ledikasyon oubyen Minister Lasante oubyen Minister Devlopman Kominoter ek Sport me osi i devret en konsern pou paran, en konsern tou zanfan, en konsern nou sosyete.

Mosyon ki mon pou koz lo la ozordi Mr Deputy Speaker i annan enn de pti lalinny parey Mosyon Onorab Barbe in prezante.  Parey nou konnen, Gouvernman ti met an plas School Meal Centre avek le bi pou fer provizyon, en repa gratwit pou zanfan lekol dan Sesel.  Me apre ki School Meal Centre ti privatize, i normal pour ki en kontribisyon i ganny donnen pour ki School Meal Centre anba son nouvo management i kapab run sa biznes.  En kontribisyon selman R2 ki a mon avi, i afordab, i kontribisyon aktyel ki en paran i devret peye pou ganny en repa par zour fourni par School Meal Centre.

Menm si School Meal Centre pa pe neseserman fer en gran benefis, i fourni kantmenm en repa byen balanse pou bann zanfan ki pe pran en repa prepare par sa sant.  Ler mon koz lo School Meal Centre Mr Deputy Speaker, i fer mwan osi mazin ler mon ti ankor pe lekol segonder apepre 25an pase.  Sa letan preski tou zanfan ti dezenn kot lekol menm.  Rezon se ki ti napa sa kantite take aways oubyen tuck shops pre avek lekol.  Oubyen paran ti senpleman vwar li pli konvenab pour ki son zanfan i dezenn kot lekol menm.

Serten zanfan parkont, ki ti reste enpe pros ek lekol ti kapab avek permisyon management lekol, al dezenn kot zot reste.  Mr Deputy Speaker, menm si serten zanfan pa ti neseserman tro kontan pou dezenn kot lekol akoz dapre zot dezennen ki ti prepare par School Meal Centre pa ti tro goute, oubyen ti napa ase varyete, serten nou ti parkont look forward pou midi pou zwenn e dezenn ansanm avek nou bann lezot kanmarad.  Nou ti menm fer en pti zefor tou le midi pou anmenn enpe asar, enpe piman zis pou fer sir ki nou ankouraz kanmarad pou vin ansanm dan midi.

A mon avi, sa bann moman parey i osi kapab ganny konsidere oubyen form par sa ki nou dir healthy living.  Akoz sa lantant ki nou ti annan antre nou pandan sa bann letan ti byen gou.  Sa ki ti remarkab avek sa letan, letan ki mon ti ankor dan segonder Mr Deputy Speaker, se ki nou ti pli involved dan bann aktivite sportiv.  Ti napa sa gran problenm obesite parey i le ka konmela.  Sa laspe healthy living, healthy eating a mon avi, ti pe ganny byen pratike pandan sa letan.

Me ki nou remarke Mr Deputy Speaker, se ki dousman, dousman avek plis devlopman, kot lavi i vin pli ser, kot toulede paran i oblize al travay e menm parfwa i annan serten zot ki oblize fer overtime, kot i annan plis swa osi an sa ki konsern sa ki nou annan pou manze, keksoz i sanze.  Sa quality time ek fanmiy i pa neseserman la.  Me sa a mon avi, i pa devret anpes nou bann paran responsab ede pou fer nou zanfan viv an bonn sante.  E sa pa devret dekouraz bann ansennyan osi pou rod plis siport e lasistans pou promot sa bon valer healthy living, healthy eating kot lekol, sa pratik ki Mosyon pe aborde ozordi.

Me par lefe Mr Deputy Speaker, ki bokou nou bann zanfan i konsonm nenport kwa, ki napa sa bon valer nitrisyonnel, zot vin osi mwen aktiv kot nou pe vwar zot vin pli obese.  Kot zot nivo fizik, zot lenerzi, lendirans eksetera i desann, kot zot vin pli maladif parey nou dir.  Kot serten sa bann zanfan i ganny sikannen par lefe ki zot gro.  Sa dan limenm i fer serten sa bann zanfan perdi lentere e la zot nivo ledikasyon i souvandfwa desann.

Mon pou profite la a sa lenstans Mr Deputy Speaker, pou felisit tou bann paran ki fer en zefor spesyal pou ankouraz zot zanfan pou aktivman partisip dan bann aktivite lekol tel ki bann aktivite sportif.

Mr Deputy Speaker, sa ki mon osi remarke ki konmela, de zour an zour, plizyer nou bann zanfan pa pe ganny vreman ankouraze pou manz en repa ki byen balanse.  Par egzanp, pou konsonm plis pwason, plis legim, manz en pti pe plis fri e osi nou gro manze.  I annan plizyer fakter parkont ki koz sa a mon avi, e pwennvi serten lezot dimoun ki mon’n koz avek.

Par egzanp, parey mon’n aborde pli boner, toulede paran i travay.  Sa letan ki zot annan pou prepar en bon repa, en repa byen balanse i napa.  E plizyer paran parkont zot profit dan weekend parfwa pou zot asiz ansanm e fer en bon repa, en repa byen balanse parey nou pe diskit lo la.  Oubyen, en lot fakter se serten paran i zis anvi fer plezir zot zanfan e senpleman prepar en repa ki pa neseserman bon pou lasante.  Parey nou dir, manze vitman kot nou vwar bokou bann chips, poul fri, sosis fri, luncheon meat eksetera.

Mon konpran ki parfwa ek lafatig oubyen ler ou sorti travay i pran bokou letan pou pran en morso pwason pou defrost pou kwi eksetera.  Me i enportan toudmenm ki nou pa devret pran sa konman en leskiz e pou nou toultan pandan lasemenm fer manze vitman.

Mr Deputy Speaker, mon pa pe dir paran ki pou fer, zot annan zot swa anver lasante zot zanfan, me mon pe plito ankouraz zot pou fer en pti zefor an plis anver en meyer lasante, en meyer fason viv pou zot zanfan.  En lot fakter sirtou pou bann paran tousel ki annan plizyer zanfan.  Kot zot senpleman pa kapab afford pou prepar en bon repa byen balanse, kot zot napa gran swa.  Me la osi mon pou ankouraz zot kantmenm pou fer en pti zefor ankor an plis pou amelyor en pti pe lafason ki zot kwi zot manze pour lasante zot zanfan.

Mon pou profite osi la pou felisit tou bann paran ki pe fer sa zefor an plis anver healthy living ek healthy eating pou zot zanfan.  Dapre serten paran ki mon’n koz avek Mr Deputy Speaker e osi mon pwennvi pou mwan personnel, se ki lamazorite zanfan lakres e primer i ganny souvandfwa ankouraze pou dezenn kot lekol menm.  La mon pe koz pou pran dezennen sorti kot School Meal Centre.  Me le moman ki zanfan i antre dan segonder, tou i sanze.  Lamazorite zanfan dan lekol segonder parey in ganny souleve oparavan, pa enterese pou pran dezennen ki School Meal Centre i fourni.

Dapre serten sa bann zanfan, zot rezon prensipal se ki, dezennen ki pe ganny fourni par School Meal Centre pa bon.  Ou, plito zot manz chicken and chips.  Dezennen i tro pti git, oubyen zot dir ou ki zot ganny sikannen oubyen bullied avek zot bann lezot koleg akoz zot pe manz dan lasal a manze lekol.  I annan menm zanfan ki kanmi pou manz sa repa ki son paran ki’n leve gran maten, bomaten pou prepare pou li e sa menm zanfan i souvandfwa pe vwar li pe obliz son paran pou donn li larzan.  E ki pou li al aste?  En cola ek en chips oubyen si paran napa larzan, sa menm zanfan i plifere pa manz nanryen dan midi e la kot mank konsantrasyon dan laklas i antre e i fer li perdi lentere pou swiv son leson a lafen lazournen, finisyon lazournen.

Menm sa opsyon dedicated fund pou serten zanfan ganny en repa kot lekol pa pe ganny seryezman konsidere par serten sa bann zanfan dan lekol segonder.  Mon zis demann mon lekor Mr Deputy Speaker, si sa bann zanfan pa konsyan sakrifis ki zot paran pe fer pou zot?  Mon demande kwa ki fer zot kanmi oubyen anbarase pou konsider at least en fason pli meyer pou benefisye zot lasante.

Par lefe Mr Deputy Speaker, ki serten sa bann zanfan, sirtou zanfan segonder, pa pe neseserman manz en bon repa balanse dan midi, i en konsern e pou vin en gro problenm obesite e si nanryen pa ganny fer o pli vit posib pou adres sa problenm, nou pou vwar nou isi Sesel avek en group zanfan tro gro ek plis problenm lasante.  En zenerasyon, nou fitir zenerasyon ki pa pou prodiktiv ditou.

Se pour sa rezon ki Mosyon Onorab Barbe ki an diskisyon ozordi, i annan son merit ek son lenportans.  Mr Deputy Speaker, mon konpran ki serten paran i annan swa an sa ki konsern sa ki i donn son zanfan.  Mon napa okenn problenm ek sa parey mon’n dir avan.  Me parkont, mon krwar ki paran i devret fer en bon swa an sa ki konsern lasante son zanfan.  En bon swa i reste responsabilite sa paran e pour bann zanfan lekol, sirtou zanfan lekol segonder, in ler pou zot aret konplike ek delika.  In ler pou zot serye zot enpe, in ler pou zot pli serye e mazin zot lavenir.  En bon repa, en bon lasante i ekivalan en bon lavenir pou zot.  En lavi an bonn sante.  In ler pou zot vin pli prodiktiv, in ler pou zot involve zot lekor plis dan bann aktivite sportif, bann aktivite skoler.

Pou bann ansennyan zot, zot la pou siporte e ankouraze otan ki posib.  Me parkont, ansennyan pa kapab fors zanfan pou manz en repa balanse menm kantmenm zot seye parfwa.  Zot la pou zot siporte dan tou fason ki zot kapab me ankor zot osi zot bezwen serten sipor sa paran ek sa zanfan zot menm.

Mon krwar Mr Deputy Speaker, ki lasante e ledikasyon i annan en lyen direk ek kanmarad.  Se pour sa rezon ki mon vwar rezon-det par deryer sa Mosyon.  Zanfan i pas bokou zot letan kot lekol, dan lanvironnman lekol.  Akote paran, akote lakour kot zanfan i reste, lekol i annan son lenpakt pou form en zanfan.  Son lasante, sa ki i konsonmen ler i kot lekol, i osi tre enportan.

Mon rekonnet sepandan Mr Deputy Speaker, ki bokou paran i fer tou sa ki zot kapab pou satisfer zot zanfan.  Nou tou nou gat nou zanfan en pti pe parfwa me i osi enportan ki nou konpran ki problenm lobesite dan zanfan pe vin en gro konsern, en gran konsern.  Menm si nou reste lo en pti zil antoure ek lanmer, avek bokou pwason, nou remarke ki deplizanpli nou bann zanfan pe perdi labitid manz en bon repa kot zot pa pe manz ase pwason, fri ek legim parey mon’n mansyonnen avan.

Mon pou profite la pou felisit management School Meal Centre menm si parey mon’n fer resorti ki zot pa pe fer en gran benefis lo manze ki zot pe vann ek zanfan lekol.  Mon konnen ki repa ki zot prepare pou sa bann zanfan i en repa ki byen balanse, pli goute, i annan plis varyete konpare ek mon letan ler mon ti dan segonder.

Mon pou osi felisit bann owners, oubyen operators bann tuck shops oubyen take aways ki fourni serten zanfan lekol avek en repa byen balanse.  Mon ankouraz zot pou kontinnyen e ankouraz zot osi pou petet vann en pti pe plis fri, petet en pti pe plis zi fri lokal kot i posib.  La kot prodiksyon lokal, prodiksyon agrikol i antre.

Kot ler nou bann fermye i prodwi plis, i pou osi benefisye nou zanfan pou vin en zenerasyon an bonn sante, for e pli solid.  Mon konpran sepandan ki i pa toultan fasil pou ganny sa kalite ou kantite legim ou fri, ou parfwa menm pwason ki avek sa letan vannswet ki nou ladan i en pti pe pli ser.  Me Seselwa nou konn byen rakomod nou repa e nou manze Kreol.  Manze Kreol Seselwa i en manze ki tou dimoun i apresye.  En pti zefor an plis pou vann en repa byen balanse, i pou benefisye ou zanfan, mon zanfan.  E en bon repa i ekivalan en meyer lasante pou nou zanfan.

I annan detrwa sizesyon ki mon pou met devan Mr Deputy Speaker avan mon konklir.  Baze lo bann pwen ki mon’n fer resorti Mr Deputy Speaker, mon pou sizere par egzanp ki Minister Ledikasyon ansanm ek Minister Lasante, i kapab fer en resers, parey Onorab Houareau in mansyonnen li osi, en survey avek bann etidyan primer oubyen segonder pou vwar vreman kwa ki pe dekouraz bann zanfan pou swazir en meyer repa ler zot kot lekol.  Akoz zot anbarase oubyen kanmi pou pran en repa fourni par School Meal Centre par egzanp ki ekonomikman pli ekitab pou zot paran.  Ki zot ti a kontan vwar arive pour ki plis zanfan i vin pli konsyan lenportans lo healthy living ek healthy eating.

Petet en lot survey i a kapab ganny fer adrese ver bann paran pou zot osi met serten pwennvi devan ki ava ede anver en bon enplimantasyon sa Polisi an kestyon.  En lot sizesyon se par egzanp, Minister Ledikasyon petet an partenarya avek Minister Lasante e NGOs kot zot a kapab travay ansanm anver bann progranm anlinny avek sa Polisi tel ki sansibilizasyon e promosyon bann bon valer nitrisyonnel dan lekol.  Met plis posters, provide plis leaflet kot lekol menm e pou fer bann etidyan konsyan plis lo danze manz nenport kwa.  Par egzanp, junk food e lo lenportans manz an bonn sante e lenportans fer plis legzersis.

Nou kapab osi konsider bann open-days kot lekol petet pandan avan vakans, kot zanfan i a vin ek bann proze ki zot in fer anlinny avek sa Polisi.  Petet prepar serten pla ou reset lo bann pla byen balanse.  Oubyen petet ganny ankouraze pou annan zot pti zarden kot lekol menm kot tou sa i ava motiv sa bann zenn anver en meyer lasante.

Pou konklir Mr Deputy Speaker, mon krwar ki tou bann pwen, tou bann sizesyon ki’n ganny fer resorti lo sa Mosyon i devret ganny fer seryezman.  Kot tou partner kle i a ganny konsilte pou zot nide an sa ki konsern sa Polisi lo nitrisyon dan bann lekol Sesel.  Kot paran i ava vwar zot pe benefisye dan en fason sirtou pou bann paran ki pa neseserman kapab afford pou donn zot zanfan larzan pou aste manze toulezour.  Kot nou zanfan i a pli an sekirite ler zot pe dezenn kot lekol menm, kot stil lavi nou zanfan i ava vin pli meyer, pli byen, kot nou zanfan i ava kapab manz en repa byen balanse.  Kot serten nou bann zanfan pa neseserman bezwen ganny bullied akoz zot groser, kot sosyete an zeneral i a benefisye.

Mr Deputy Speaker, zis mon’n mank en sizesyon la.  Mon ti pe sizere ki apard bann lezot pwen ki mon’n mansyonnen, ki petet Minister konsernen, byensir avek lezot sipor, zot konsider monderniz lasal a manze lekol.  Kot sa lasal a manze i ava en landrwa kot zanfan i a kontan pou vin pran zot goute e zot repa, an menm tan zwenn ansanm dan en lot latmosfer.  Sa sizesyon pou moderniz lasal a manze lekol pou osi ede pou anpes zanfan sorti an deor lekol.  Kot zot sekirite i a ganny pli byen asire parey mon’n dir oparavan.

Mon pou siport sa Mosyon Mr Deputy Speaker akoz mon krwar ki sa Polisi an kestyon, i enn ki neseser e ki i ganny met an mars o pli vit posib akoz sa Polisi pou ede kre en pli bon lanvironnman kot lekol.  Sa Polisi pou ankouraz zanfan pou konsider en meyer swa anver en meyer lasante.  Sa Polisi pou ede amelyor nutritional intake bann zanfan lekol.  Sa Polisi pou osi kontribye anver prevansyon primer bann maladi kronik.  Bann maladi tel ki kanser kolonn, problenm leker, dyabet e lezot ankor ki pe ogmante dan nou sosyete.

E mon krwar senserman ki travay kolektivman ansanm i lakle anver sa National School Nutrition Policy e anver promosyon lo healthy living e healthy eating dan nou pei.  Tou sa pou benefisye, ou zanfan, mon zanfan e nou zanfan.  Nou kapab fer li ansanm, mersi Mr Deputy Speaker.

MR DEPUTY SPEAKER

Bon, si napa lot entervenan.  Onorab Bresson.  Bon, mon pou vin enpe pli strikt lo sa zafer tranpe la en.  Annou lev byen nou lanmen, nou non i vin lo lalis e nou pa esper ler deba pe al fermen ki nou lev lanmen.  Proceed Onorab Bresson.

 

HON GALEN BRESSON

Mersi Deputy Speaker.  Deswit mon a dir, donn mwan senk, donn mwan senk, donn mwan senk.  Mon krwar nou tou nou mazin sa kanpanny ki ti vreman efektiv ler i ti ganny fer lo televizyon, radyo, enpe partou e sa i vizavi zisteman sa ki bann zanfan i manze e sa ki nou tou annefe nou manze.  Me ki’n arive, kwa ki’n arive ek sa kanpanny?

Ki son lenpak ki in fer lo lasosyete Mr Deputy, mon krwar i enpe alarman akoz si sa kanpanny in pas dan en pti pe letan pase, la, ozordi nou pe ekout bann statistik ki pe ganny met lo latab par bann diferan Onorab ki’n koz avan mwan.  I fer mwan en pti pe enkyet, sirtou ler nou regard enpe ki nou stil lavi isi Sesel, nou stil lavi i pa bokou parey bann stil an deor Sesel kot i annan bokou bann fast food chains.  Isi nou annan bann take away ki kwi lot kalite manze.  I en pti pe alarman pou sa grander popilasyon alor ki vreman i vwar le nesesite ki sa National School Nutrition Policy i ganny met an mars.

Nou ti osi konnen ki dan lemonn antye, bokou-d-fwa nou’n vwar en slogan ki dir, ‘an apple a day keeps the doctor away’.  Li osi i ti pou zis sey edik dimoun ki manz fri, pran en ladyet balanse, i ede pou redwir bann risk bann maladi e osi kit ou an bonn sante.  Tousala, met lo latab ozordi, nou vwar ki dan lemonn antye i annan pa mal problenm, san ki i konsern healthy living and healthy eating.

Bann Manm avan mwan, bann Koleg Manm Onorab avan mwan in koz lo en laspe ki apel School Meal Centre, bann school meals ki nou gannyen dan lekol.  Ti enteresan pou vwar, en pti pe plis ki en semenn pase si mon pa tronpe, kot dan Bonzour Sesel sa ti ganny pase e ti ganny met lo latab kot sa current caterer ki pe fer sa bann school meals ti pe koz enpe lo bann manze ki ganny anvoye dan lekol.  E ler nou get nou Nutrition Policy ki egziste, mon pe ekout bann manze, mwan menm mon dir be, sa bann manze i enteresan, i byen balanse.

Me selman lo kote lekol, bann zanfan zot menm pa kantite ki pe pran sa loportinite pou manz sa manze.  E i fer mwan mazin ler mwan mon ti pe fer lekol dan bann lannen 90, e la nou ti vwar ki school meals, sa ki ou manz dan kantin lekol, ki ganny aporte, was not a fashion.  I en keksoz fashion sa, e menm si i ti en keksoz ki ti balanse, ti byen bon.  Mwan menm mon ti demann bokou bann zanfan, be akoz zot pa pran school meal? Zot dir mwan, manrmay pou riy mwan alor i ti en keksoz zafer en fashion.  Alor manze osi ozordi in vin fashion ki an lye avek sa ki pe ganny dir dan sa ki Onorab Barbe pe met lo latab, fashion manze in sanze, manrmay pa vwar li fashion pou manz en keksoz ki byen.  Zot vwar li plito fashion pou sey swiv e manz en lot keksoz ki posibleman, mon pe dir posibleman mon pa kapab dir ou konkretman, ki i pa pe bon pou zot lasante.

En imen, nou tou, en imen an grandisan, nou pas pa mal letan dan en lakour lekol.  apepre 3 kar nou lavi an grandisan, ler nou zwenn lekol, skoler, nou dan en lakour lekol e laba nou ganny bokou lenfliyans, ek nou bann zanmi, bann dimoun.  I form nou dan nou fason fer, i form nou ki nou pou vini demen e i form nou fason panse.  Sa i son ledikasyon me i osi annan bann lot formasyon ki nou gannyen.  Nou manz lanmenm.  Nou pas enpe letan, egzakteman ki mon krwar Onorab Payet-Marie in mansyonnen kot i ti fer li enteresan pou manz school meals ek son bann dalon e anmenn bann pti zengredyen pou fer li en pti pe enteresan.

Alor tousala i form nou.  Si dan lekol ozordi nou pe dir met sa Nutrition Policy an mars e fer li morde dan lekol, si dan lekol, nou pa pe fer li en fashion, nou pa pe fer li an mars dan en lekol ki pou fer li ki sa manrmay ki pe grandi, ki pe pas 3 kar son letan dan en lekol, demen i sorti dan sa lakour lekol, i vin dan sa lemonn travay, i kontinnyen annan sa latitid.  Akoz i pran tou son bann latitid i form kot sa lekol e la i kontinnyen anmenn serten latitid an deor sa lenstiti kot in ganny formen.

Mr Deputy, osi nou vwar en zanfan an grandisan, ki nou pe koz lo sa staz la, i bezwen bokou keksoz.  I bezwen lenerzi, lenerzi ozordi i annan physical education ki ganny fer kot lekol.  nou bezwen lenerzi pou sa e pa tro lontan mon ti pe swiv en interview avek sa msye ki tay 100 met enternasyonal, i annan rikord Bolton e li i dir an kestyonnan, ti demann li be kimannyer i kapab kas tou sa rikord 100 met, 200 met e i dir son lenerzi li, i gannyen akoz i manz sa ki nou isi nou apel gro manze.  Patat e mayok.  E mwan menm mon riye, mon dir ozordi is i pa fashion ankor pou nou manz sa bann manze.  I pa fashion pou nou zenn dir, i kontan manz en ladob mon krwar.  I pa kontan sa, plito i al lo ice cream. En ladob patat, mayok ki annan tou son valer nitritif ladan e i donn li sa lenerzi.  Ozordi enternasyonalman en dimoun ki dir ou in manz bokou sa i pe ganny li de milyon e de milyon pou taye 100 met, 200 met.

Me nou isi, bokou nou nou pe dir dan 80, 000 mil, ‘be sa pa bon pou nou sa, sa i old fashion.  Alor nou vwar kot bokou keksoz i bezwen ganny remet ansanm e ganny revamp anba sa National School Nutrition Policy e fer li pli aktiv e nou bann zenn i bezwen sa lenerzi e sa bann manze koumsa pourkwa pa i ganny enkli osi.  En zenn an grandisan osi i bezwen annan en lespri ki pe fonksyonn tre, tre byen aktiv akoz apre tou, i annan ledikasyon.  I bezwen asiz dan en laklas.  7er edmi i antre, i bezwen la kot lakour lekol.  I annan son kote akademik e i pou fer ou aktiv pou ou kapab konsantre dan laklas, ou bezwen annan en ladyet byen balanse.  Pa’n byen manze, en problenm, manz sa ki mal, i fer ou sonmey, fatige, ou pa konsantre.  Alor ankor nou vwar akoz nou bezwen en manze tre, tre balanse e akoz sa Mosyon i vreman enportan.

Devlopman miskiler, zot pe devlope.  Bann zenn pe devlope dan en lekol, zot pe grandi, tousala i annan bann valer nitritif si nou kapab konsantre lo sa laspe e fer sir ki bann zenn dan lekol i fizikman e mantalman ganny byen kadre lo sa laspe.  I enportan pou dir, parey Onorab Barbe in mansyonnen, Wild Life Clubs in fer keksoz fantastik e mon krwar sa i kapab repanti atraver The National School Nutrition Policy osi.  Pourkwa pa?

En keksoz ki mars avek tousala i osi Lezislasyon.  Si napa Lezislasyon ki gid sa enn ler, ki fer li mandantwar, i pa pou morde.  En legzanp mon kapab dir, se ki fimen dan landrwa piblik.  Bokou-d-fwa nou’n tande fimen dan landrwa piblik, isi Sesel pa tro lontan in ganny enplimante.  I pa ti en nesesite, ti ganny dir pa fimen me, it was not Law.  Ler i fer li, ozordi tou dimoun i kapab rezouir, antre dan en landrwa piblik parey en restoran e pa ganny afekte ek bann dimoun ki fimen.  Zot ava al fim deor, an deor sa letablisman, alor Lezislasyon osi i zwe son rol.  E si National School Nutrition Policy i bezwen ganny sa, se nou dan sa Lasanble ki bezwen met nou bout lo la e se nou ki bezwen vote ki fer egzakteman parey Koleg Onorab St Louis in dir, ki demen sa bann legren ki pe formen i an bonn sante e i annan en bon valer kimannyer li i kapab grandi.

An relasyon ek Lezislasyon, dan lemonn antye ozordi nou vwar ki i annan sa problenm ki pe arive e dan diferan pei zot tackle li diferan fason.  Lo kontinan Lanmerik, presizaman Canada, se zisteman, sa semenn ki la, ki se Leta, Legzekitiv ki’n pas en manda lo en pti lekol e li i pe konmans en pilot project pou enplimant en nouvo Polisi vizavi healthy eating.  E la, antye progranm dan lekol in ganny sanze.  Sa ki zot manze dan school canteen e sa ki ganny vann dan lakour lekol in sanz konpletman pou regarde si sa i kapab redwir tou sa bann problenm ki bann zenn pe grandi avek e nou pe vwar arive dan lasosyete.

Egalman, prive..man, Langleter nou annan Chef Jamie Oliver, ki mon mazin tre byen, mon’n swiv sa progranm.  Ki li i ti konmans en progranm endividyelman e i ti demann Gouvernman pou li antre dan bann lekol e met bann valer nitritif dan bann manze ki pe ganny servi dan bann lekol.  E sa in fer li volonterman e in konmans dan en lekol, in sey repanti pou montre bann manrmay.  I vin ek son ledikasyon, sa ki ou pe manze la, sa chicken nuggets eski ou konnen kimannyer in ganny fer?  Be sa in ganny fer ek tel keksoz dan en poul e i montre zot ek kwa in ganny fer i ki valer nitrisyon ki i annan vizavi ek sa ki mannyer li i kwi e kimannyer nou merit pe manze en balanced diet.  E sa in mars tre byen e in fer sa lo en bidze in ozordi Gouvernman, atraver Langleter, pe pran sa Polisi ki zot pe met annord pou met dan tou lekol.

Avek sa, vitman ki mon’n dir sa 2 pwen, Mr Deputy Speaker, mon krwar i vreman enportan ki tou bann Manm, mon bann Koleg Onorab i siport sa Mosyon akoz i vreman, vreman enportan ki i donn en valer healthy eating and healthy living pou tou bann zenn ki pe grandi ozordi.  Mersi bokou.

 

MR DEPUTY SPEAKER

Onorab Samson.

 

HON DEREK SAMSON

Mersi Mr Deputy, mon pa sipoze tro long.  Mosyon i fer en mansyon spesifik lo Minister Ledikasyon, vedir zanfan lekol ki Polisi an referans pe koz lo la.  Me nou osi konnen ki annefe Minister Lasante in zwe en rol enportan dan konsepsyon sa Polisi ki Mosyon i pe koz lo la ozordi.

Sa ki mon klerman rapel Mr Deputy, se ledikasyon danter dan mon letan lekol ti enn parmi bann means ki ledikasyon lo nitrisyon ti pli for, kot dantis ti endik bann zanfan e osi bokou fwa paran pou redwir lo manz keksoz dou neport ki ler, pou annan en ler apropriye, pou en repa balanse pandan en zournen, pou sey pran bann keksoz parey draze apre dezennen.  Nou toultan ganny ankouraze pou manz plito bann fri ek legim lokal ki konteni bokou bann nitriyan enportan dan en repa.  Par egzanp, ki bann lekol ki pe fer progranm plant pye dibwa kot lakour lekol, ki zot favoriz plant bann pye dibwa ki raport plito bann fri ek legim ki ordinerman nou konsonmen.

Lo sa pwen Mr Deputy Speaker, mon krwar i osi byen ki nou fer leve sa kestyon aktivite lagrikiltir ki ti annan kot bann lekok sirtou segonder dan nou bann lekol en letan ki ziska la ozordi i pa paret ki bann lekol i lo en tel progranm.  Petet konman en rekomandasyon nou devret fer retournen sa enn aktivite vokasyonnel dan nou bann lekol pos segonder.  Alor eski nou pe vreman fer ase pou ankouraz healthy lifestyle or healthy living, sirtou dan nou bann lekol.

Mosyon pe demande ki Minister Ledikasyon i vin sa Minister prensipal pou son lenplimantasyon sa Polisi e sa i tre normal Mr Deputy akoz nou bann lekol kot nou bann zanfan i trouve i gann responsab par Minister Ledikasyon.  Me byensir nou konsyan ki sa Minister li tousel pa pou kapab vreman neseserman sirvey oubyen enplimant sa Polisi li tousel.  Mon krwar ki nou bezwen tou dimoun on board otour sa progranm, depi bann paran ziska petet nou menm nou bann Manm Parlman.  Me oli problenm otour sa size ki Onorab Barbe in met devan nou Lasanble, sa Mosyon ozordi Mr Deputy?  Eski bann teachers in ganny ase bagaz pou edik nou bann zanfan pou pratik en healthy eating, en healthy living an deor size PSE?  Eski bann tuck shop owners zot osi zot ase konvenki atraver sa Polisi ki vreman sa Polisi i annan son plas, i annan son lenportans dan lakour lekol?  Eski sa Polisi i sitan egzizan ki i fer li vin plito enposib pou ganny enplimante oubyen servi dan nou lakour lekol?  An kesyon i osi sa zafer pri lavi otour bann healthy foods ki sipoze ganny vann dan lekour lekol e kwa vreman ki nou vreman apel healthy foods?  Eski nou bann zanfan dan lekol zot annan ase swa letan zot nariv ler goute, eski zot annan ase swa pou swazir vreman kwa ki zot kapab aste dan en lakour lekol, oubyen se zisteman bann unhealthy foods ki available pou zot aste.

Mon krwar ki rekomandasyon ki sa Mosyon pe anmenn devan nou apremidi, i tourn otour serten kestyon ki mon pe met devan.  Lizyenn prodiksyon sa bann manze oubyen bann snacks ki ganny vann kot lekol, eski nivo lizyenn otour prodiksyon i favorab?  Rent ki bann tuck shop owners i peye kot lekol pou zot vann supposedly bann healthy foods, eski i en rent rezonnab ki kapab permet zot annan en profi anmenmtan vann healthy foods?

Kou prodiksyon bann manze nitriyan petet nou devret vwar kimannyer nou kapab ed bann tuck shop owners pou kapab fer ki son prodiksyon i vin pli ba.  E lankourazman ki nou bezwen donn nou bann paran pou ed zot zanfan manz healthy foods malgre pri lavi, kwa ki nou vreman kapab fer pou ankouraz bann paran pou fer vreman.  Par egzanp petet met en boutey delo dan sak zot zanfan.  E school meal ki bokou Koleg Onorab in koz lo la, eski nou school meal pe vreman donn nou le meyer deal atraver kalite manze ki nou bann zanfan i devret pe manze.  E Mr Deputy en size enportan otour sa kestyon healthy foods e healthy lifestyle se size physical education ki zis en progranm, en peryod kot zanfan i byensir mont lo laplenn zot fer legzersis, zot aprann diferan sport.  Me eski petet in ariv ler pou nou vwar bann zanfan ki overweight parey loter Mosyon in koz lo la, bann zanfan ki obese.  Eski nou devret annan en progranm separe pandan physical education pou ed sa bann zanfan redwir zot lapeze.

So, pou konklir Mr Deputy mon krwar ki Polisi ki petet in reste dormi pou en pe letan dan sistenm ledikasyon Sesel, i devret ganny siporte atraver sa Mosyon e i devret ganny lankourazman tou dimoun parey nou’n koz lo la bomaten dan lot Mosyon, kot distrik an antye vreman i vin avek lekol pou ede ki lekol i kapab met li anfors, i kapab met li anmars dan nou lakour lekol.  Mersi bokou e mon pou donn mon sipor sa Mosyon.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.   Mr Deputy mon’n toultan dir ki kot en keksoz i bon mon pou totalman siporte e la i enn bann lenstans kot mon krwar Mosyon ki devan Lasanble ozordi i enn ki enteresan, i enn ki enportan e i enn ki vreman bon.

Mon krwar moman n’arive pou Sesel an zeneral, pou Gouvernman, pou Minister Ledikasyon fer tou sa ki i bezwen fer pou garanti ki premyerman, i annan en bon Polisi an relasyon avek school nutrition and then dezyenman, i bezwen fer sir ki sa bon Polisi i kapab ganny met an aplikasyon dan en fason ki efektiv.  Me selman nou konnen pou dir petet enn bann rezon akoz ki menm si sa Polisi i la i pa pe ganny met an pratik, i akoz i en keksoz ki pa fasil, i vreman, vreman difisil.  I annan en seri fakter ki ou bezwen pran an kosiderasyon, i annen en seri issues ki ou bezwen met anba kontrol avan ki ou kapab met an aplikasyon en tel Polisi.  Me selman toudmenm, i reste enportan ki nou konmans somewhere e now i sa moman pou nou konmanse.  Lasanble Nasyonal pe anvoy en mesaz kler, Lasanble Nasyonal pe dir, annou fer li e mon krwar Minister Ledikasyon i bezwen pran sa o serye e vwar kimannyer i pou konmanse e kimannyer i pou met sa an aplikasyon.

Mr Deputy, mon krwar poudir tou bann entervenan ki’n koze avan mwan in fer sorti bann pwen ki valab e bann pwen ki enportan.  Mwan mon pe dir poudir i annan en kantite benefis ki Sesel konman en pei i kapab anmase atraver annan en tel Polisi dan nou bann lekol akoz atraver sa Polisi, nou pou kapab premyerman ed nou bann zanfan an relasyon avek zot lasante.  Sa i primordial, sa i enportan.  Bann sif ki’n ganny met devan sa Lasanble ozordi, i efreyan.  Enn dan sak dis zanfan dan Sesel, i over weight. Me keksoz pli efreyan pou mwan i se ki, sa sif in double dan zis en lespas 10an e mon krwar poudir sa i vreman, vreman trakasan.  E sa i donn nou en rezon ozordi pou nou tou konman bann Seselwa focus lo sa size e pou Minister Ledikasyon met son lipye ater e fer en keksoz about it.

I annan en kantite konsern Mr Deputy ki’n leve e enn bann konsern ki’n vreman in tous mwan en pti git i se ki the issue of an term kou, an term kou ki son lenplikasyon i pou annan, enn, lo lafanmiy, lo bann zanfan zot menm e dezyenmman, lo sa dimoun ki pe fer sa biznes par egzanp, tuck shop dan nou bann lekol.  Mon krwar poudir sa i en siz primordial e i en keksoz ki nou bezwen gete.  I pa kout bon marse pou ou ganny bann manze ki healthy.  Mon pou repete nou bezwen, nou bezwen fer li me selman nou bezwen pran kont poudir i pa kout bon marse.  E Minister Ledikasyon dan son policy i bezwen fer sir ki i pran sa an konsiderasyon sansan nou pou fail.  Nou pou fail dan le sans ki, swa nou pa pou ganny bann dimoun ki pou vin vann manze ki healthy dan nou bann lekol oubyen nou pou ganny bann dimoun me pri sa bann manze i kapab vin bann pri ki nou bann zanfan pa kapab afford. So, Minister Ledikasyon i bezwen gete ki manyer i pou deal avek sa size akoz sa size i enn bann impediments ki petet i anpes li met an aplikasyon en tel, son Polisi an relasyon avek healthy eating.

Mr Deputy i enportan parey mon’n dir ki nou ankouraz e promot healthy eating dan nou bann lekol.  Ler nou fer sa, nou pe egalman promot healthy living.  Mr Deputy ler nou annan bann zanfan ki an bonn sante, i annan en kantite lavantaz.  Premyerman zot an bonn sante, zot pa bezwen al kot dokter souvan e sa i ed pei save an relasyon avek lakantite larzan ki Minister Lasante i depanse pou sonny bann maladi dan okenn peryod letan.

Dezyenm keksoz ki i fer, i donn nou bann zanfan sa posibilite pou zot aprann pli byen lekol.  Parey serten entervenan in dir avan mwan, ler en zanfan i manz byen i an bonn sante, i kapab konsantre pli byen dan laklas e i kapab aprann e nou, nou konnen poudir, letan ou pe donn ledikasyon en zanfan, i pe anmase, i pe aprann, son rezilta plitar i se ki i anmenn benefis pou pei akoz sa zanfan i kapab plitar kontribye dan en fason for e dan en fason efektiv towards devlopman ekonomik pei.  Sa zanfan i ganny en travay, i travay, i kontribye dan lekonomi e i kontribye ver elevman son fanmiy.

Lot keksoz ki sa i fer i se ki ozordi nou vwar dan Sesel ki bann maladi parey dyabet e malad leker i vreman, vreman o.  Son prevalans i vreman o e i kout en kantite larzan parey in deza ganny dir dan sa Lasanble, pou tret bann tel maladi.  Dyabet per egzanp, i en maladi ki i la, i pou la avek ou pou touzour e ou pou bezwen toultan reste lo serten medikaman, ou bou bezwen vey kalite manze ki ou manze pou ou kapab kontrol sa dyabet pou anpes li devlop dan bann konplikasyon ki kapab fer ou perdi ou lavi.  So, parey mon’n dir Minister Ledikasyon i kapab save en kantite e en kantite larzan lo la.

Me Mr Deputy, enn bann keksoz ki petet sa Lasanble i bezwen reflesir lo la i se ki, sistenm ledikasyon Sesel i capture 100 poursan tou nou bann zanfan ant laz 5an e 15an e menm mon dir ant laz 4an avek 15an.  Me selman mon’n servi sa term 5an akoz 5an en zanfan i enpe pli konpran e en pti pe pli fasil pou konmans edik li.  Tou sa ki nou anvi achieve konman en pei, nou kapab fer li atraver kalite sistenm ledikasyon ki nou kapab donn nou zanfan dan lekol e si nou anvi ki zanfan i apresye lenportans healthy eating avek healthy living, lekol i sa landrwa kot nou kapab konmans shape the trend of thinking nou bann zanfan.  Nou fer li boner, nou edik nou bann zanfan e mon garanti ou ki dan 5, dan 10an, dan 15an, sa problenm ki nou pe gannyen ozordi ki plizyer Manm Parlman in re fer sorti konmkwa i annan serten zanfan ki kanmi e i dir ou zanfan pou sikann li si i manz lekol, mon krwar sa problenm pou ganny deal avek efektivman.  Annou konman en pei profit sa loportinite pou nou shape the trend of thinking e annou met li konman parti sa Polisi.

I annan de keksoz ki noi bezwen fer.  Enn annou edik nou zanfan accordingly, me i pa zis nou zanfan ki nou bezwen edike Mr Deputy, nou bezwen egalman fer sir ki bann teachers i annan sa konesans pou zot partaz sa Polisi e sa ledikasyon avek nou bann zanfan.  Nou bezwen egalman kapab edik nou bann paran.      En zanfan i spend en kantite letan dan lekol and therefore lekol i kapab shape son trend of thinking.  Letan lekol i shape the trend of thinking tou zanfan, lenfliyans lezot zanfan i reste parey akoz sa zanfan osi son trend of thinking in ganny shaped pou li aksepte sa konman en way of lifeSo, sa problenm i ganny deal avek efektivman.  Me selman nou konnen poudir en zanfan i egalman pas letan dan lakour, en zanfan i egalman manz dan lakour parey i manze kot lekol.  Midi, i pran son dezennen kot lekol me selman aswar i pran son dinen dan lakour.  So, i egalman enportan pou nou nasyonalman edik bann paran pou zot konpran lenportans healthy eating e healthy living.

So, mon krwar mon pa pou repet bann keksoz ki’n ganny dir me selman mon krwar i annan de dimansyon lo ki nou kapab get sa problenm.  Enn, i lo ledikasyon pour sa zanfan limenm e fer sir ki dan lekol nou enplimant bann Polisi vizavi tuck shop par egzanp, kot en tuck shop ki vin vann bann manze kot lekol i vann bann manze ki nitritif, bann manze ki bon pou bann manrmay, bann manze ki pou anpes en zanfan vin over weight oubyen anpes sa zanfan vin obes.

Sa i en kote e lo lot kote nou bezwen fer sir ki dan nou sistenm ledikasyon nou met anplas sa kalite ledikasyon ki pou permet nou shape the trend of thinking nou bann zanfan pou zot aksepte sa konman en way of life and then thirdly nou bezwen egalman vwar ki mannyer nou kapab edik nou bann paran pou fer sir ki nou bann paran osi i vin on board.

An gro Mr Deputy, mon kwar lide i en lide ki fantastik e mon krwar Minister Ledikasyon i bezwen as of today, letan ki bann Manm Parlman pe koze, mon krwar ki zot devret pe ekout nou e fer tou le neseser pou konmans met en tel Polisi an pratik akoz sa i en keksoz ki bon pou Sesel, i bon pou nou bann zanfan e i bon pou lavenir nou pei.  Mersi Mr Deputy.

 

MR DEPUTY SPEAKER

Right of reply, Onorab Barbe.

 

HON NICHOLE BARBE

Mersi Mr Deputy Speaker, Mr Deputy mon ti a kontan premyerman remersye tou bann Manm ki’n entervenir lo sa Mosyon atraver zot bann lentervannsyon.  Bann Manm Onorab ki’n pran par dan deba dan sa Mosyon in soulinny lenportans pou annan, pou pas a laksyon, baz nou aksyon, se sa National School Nutrition Policy ki nou bezwen met an mars e parey in ganny fer resorti, i kler ki nitrisyon ek stil lavi.  Se sa de fakter ki lakoz over weight ek lobesite e savedir nou bezwen konbin lanfaz lo sa National School Nutrition Policy avek zefor lezot sekter osi byen ki zefor personnel.

Nou’n vwar pandan bann deliberasyon.  Nou’n osi vwar ki nou bezwen regarde, asiz ansanm kot nou anmenn diferan sekter pou kapab pli byen ranforsi sa Policy, nou’n osi ranforsi lanfaz lo lenportans annan en tel Polisi.  I annan Manm ki’n fer resorti ki i annan zanfan lekol ki pa pe manz, ki pa pe servi sa servis school meal e petet nou bezwen vwar kimannyer nou kapab rod mwayen pou kapab pete ankouraz plis zanfan pou partisip e manz sa bann manze ki healthy.

Nou osi nou bezwen petet, i annan en Manm ki’n osi mansyonnen ki petet nou bezwen vwar posibilite annan en Lezislasyon pou ki pli kapab pli byen morde, ler nou pe koz lo sa Polisi osi e osi i annan Manm ki’n osi montre lenportans pou kapab kilitiv petet lo nivo lekol limenm li, ki zot kapab plant zot prop fri e petet osi vwar mwayen kimannyer nou kapab servi sa bann fri lokal ki nou annan dan pei pou kapab petet redwir en pti pe cost ki Onorab Pierre in koz lo la ki in dir i annan en konsern.  Me selman an zeneral nou’n vwar ki i pa zis Minister Ledikasyon, nou bezwen vwar tou sa bann sekter, an efe se Seselwa an antye ki bezwen zwe en rol pou kapab asire ki sa Polisi i ganny enplimante full, byen menm.  E dan sa lalit Deputy Speaker, Minister Ledikasyon pa merit vwar li tousel, lezot lazans i merit donn en koudmen parey nou’n fer resorti.  Manze se lavi, nou devret manze pou ganny lenerzi e sa ki neseser pou nou lekol e non pa pou detri nou lasante e defigir nou lekor.  Nou devret alors met plis lanfaz lo lenplimantasyon sa Polisi e sa i pou redwir kou nou pei e ki pou kout nou pei mwen ser ki ler nou pe tret bann konplikasyon ki rezilta en pei ki pa’n met an pratik bann mezir prevanson antraver nou stil lavi, sa Mosyon i alo,r i form parti en revolisyon pou fer Seselwa vin en pep an bonn sante e viv byen.

Alor pou terminen, mon pou demann tou mon bann Koleg pou vot an faver sa Mosyon.  Mersi Mr Deputy.

 

MR DEPUTY SPEAKER

Bon, lo sa Mosyon nou pran en vot.  Tou bann ki an faver lev lanmen?  Inanim, Mosyon in ganny aprouve e nou fini nou travay pou ozordi.  Nou a rezwenn Mardi prosen.

 

(ADJOURNMENT)