::
Home » Verbatim » Verbatim - Second Term 2013 » Tuesday 2nd July, 2013

Tuesday 2nd July, 2013

NATIONAL ASSEMBLY OF SEYCHELLES

Tuesday 2nd July 2013

The Assembly met at 9.00am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon, bonzour tou bann ki pe ekout mwan dan lakour.

Ozordi avek nou i annan Minis pour Lanvironnman ek Lenerzi, Profeser Rolph Payet ki pe vin reponn plizyer kestyon konsernan son Minister.  Avan mon envit premye oter kestyon pour demann son kestyon, mon ti oule senpleman enform Lasanble ki ozordi nou pou adjourn apre Question Time akoz apremidi i annan bokou Manm ki’n eksprim lentere pou al lanterman enn nou Koleg travay dan le pase e sa se Msye Clepair Pothin, son lanterman apremidi e mon ti ava demann, malerezman Onorab pa la, pou demann li pou pas nou kondoleans avek lafanmiy.  Mon pe fer sa o non Lasanble Nasyonal e les sa fanmiy konnen ki nou pe mazin zot dan nou lapriyer.  Petet mon ava demann Leader of Government Business pou fer sa o non Lasanble, mon pa vwar Onorab Bristol la.

Bon nou a komans avek nou bann kestyon.  Kestyon 83, Onorab Mirena Souris.

 

HON MIRENA SOURIS

Mersi Mr Speaker, bonzour Mr Speaker, bonzour Minis ek ou delegasyon e tou Manm Koleg e tou dimoun ki alekout.  Mr Speaker, an vi ki deplizanpli later pou re-konstrir pwi perdi, pe napa, eski Minis pou Lanvironnman e Lenerzi i kapab enform sa Lasanble ki plan son Minister pou kontinnyen sa proze central sewage system dan distrik Beau Vallon?  Mersi Mr Speaker.

 

MINISTER ROLPH PAYET

Mersi Mr Speaker.  Bonzour Mr Speaker, tou bann Manm Onorab e bonzour tou bann ki alekout.  Mersi pou ou kestyon Onorab Souris.

PUC ti depans li apepre 14 milyon Dolar an 2003 pou li konstrir en nouvo sistenm sewage pou kouver rezyon Nor Mahe.  Dan sa proze 324 koneksyon lakaz ti ganny enkli pou bann lakaz kapab konekte avek sa sistenm desarz.  Malerezman ziska ozordi zis 126 ki’n ganny konekte avek sa sistenm pou plizyer rezon.

I bon note ki bann letablisman touristik dan rezyon Nor tel koman lotel Fisherman’s Cove, Berjaya Beau Vallon Bay, Coral Strand, Coco D’or, Beau Vallon Bungalows, bann restoran parey La Perle Noire, Boat House ek restoran Al Mare, in fini ganny konekte avek sa sistenm sewage.  Bann nouvo lotel osi parey lotel Bel Ombre, lotel Savoy pou osi ganny konekte avek sa sistenm.

Pandan sa dernyen lannen PUC in osi agrandi sa sistenm e upgrade li pou kouver bann lezot landrwa swivan.  En lot parti dan leo Beau Belle, en parti dan leo Beau Vallon, par anba stasyon petrol, dan plato Beau Vallon, dan rezyon Dessiva complex e osi par deryer lekol segonder Beau Vallon e bann flat CashouguyPUC i annan plan dan prosen lavenir pou agrandi ankor sa sistenm desarz pou kouver lezot parti dan Beau Vallon.  Sa bann landrwa i konm swivan; bann lezot parti Beau Belle, dan Paskal Vilaz e osi Nouvelle Vallee e sa i pou depan byensir lo finansman ki pankor ganny idantifye.

Finansman pou sa bann pti proze ki mon’n mansyonnen par lao, pou sorti dan loan ki PUC in fek gannyen avek EIB e sa bann travay pou ganny antrepann ver milye 2014 e 2015.  Mersi Mr Speaker.

 

MR SPEAKER

Okenn siplemanter Onorab Souris?

 

HON MIRENA SOURIS

Mersi Mr Speaker.  Mr Speaker, eski Minis i kapab dir nou si in nobou konvenk sa 198 lakaz ki pa ankor ganny konekte.  E si son Minister i anvizaze fer en survey pou vwar konbyen nouvo lakaz ki ti anvizaze fer koneksyon.  E si osi i annan okenn letid ki’n fer pou vwar nivo kontaminasyon delo an vi ki rezilta napa later pou rekonstri pwi perdi.  E ki garanti bann zabiatan Beau Vallon ki sa central sewage system pou antrepann an 2014.  Mersi Mr Speaker.

 

MINISTER ROLPH PAYET

Mr Speaker i annan 4 kestyon dan sa kestyon.  Premye kestyon, nou konnen lekel tou sa bann lakaz.  Parey mon’n dir oparavan, i anann plizyer rezon akoz sa bann lakaz pa ankor ganny konekte.  Enn bann rezon primer se afordabilite akoz i finansman pou fer en sistenm tretman desarz.  Letan i ganny finanse, i ganny finans zis son bann main, savedir son main sewer line e bann dimoun prezan zot bezwen peye parey ou fer koneksyon delo, zot bezwen peye pou zot konekte avek sa sistenm e ziska prezan pa tou dimoun ki’n kapab annan sa afordabilite pou zot kapab.  So nou bezwen devlop en progranm enplimantasyon avek sa bann dimoun pou fer sir ki zot kapab konekte avek sistenm sewerage.

Lot rezon se of course parey tou proze ki PUC i antrepann se annan access avek bann diferan propriyete pou zot fer pas bann koneksyon e tousala i en travay ki pe ganny fer pou fer sir ki bann dimoun i kapab ganny koneksyon dan rezyon Beau Vallon.

Wi, i annan travay ki ganny fer pou mezir kantite kontaminasyon dan labe Beau Vallon e parey oparavan nou’n fer sorti ki labe Beau Vallon pandan bann letan lapli i ganny kontaminen akoz tou bann desarz, bann drenaz i devid dan labe Beau Vallon.  E parey zot konnen napa okenn desarz, tretman sewage ki pe desarz dan labe Beau Vallon ozordi.  Tousala pe ganny mete dan sa sistenm sewage kot i ganny trete e la ganny servi pou lezot, ou kapab dir olye desarz li direkteman dan lanmer.

Si nou ti napa sa sistenm desarz ozordi, tou bann lotel ti pou bezwen annan en desarz ki tonm dan lanmer, so, sa sistenm tretman ki pran sirtou bann lotel i redwir en kantite okenn lenpak ki desarz i pou annan dan labe Beau Vallon.  Mersi Mr Spraker.

 

MR SPEAKER

Onorab Vangadasamy.

 

HON SHERYL VANGADASMY

Mersi Mr Speaker, bonzour Minis.  Eski Minis i kapab dir ek sa Lasanble ki plan son Minister osi pou bann lezot distrik ki sa proze in komanse, parey bann lezot distrik santral avek menm sitiasyon dilenm limitasyon later, pou ki sa bann proze ki’n komanse i osi i a konplete dan sa menm dele letan osi.  Mersi Mr Speaker.

 

 

 

MINISTER ROLPH PAYET

Mersi Mr Speaker, parey zot konnen, bann sistenm tretman desarz i vreman ser, i vreman kout bokou.  Mon Minister pou fer en lanons lo bann diferan laspe pou lezot distrik pandan lannen e lannen prosenn.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Bonzour Minis ek son delegasyon, bonzour tou Koleg Onorab e bonzour tou bann ki alekout.  Mr Speaker eski Minis i kapab dir avek nou, si baze lo leson ki zot in tire pou distrik Beau Vallon, bann defayans ki zot in rankontre.  Eski Minis i kapab dir nou si i annan nesesite pou Gouvernman envestir ankor plis an relasyon avek sa proze pou Beau Vallon e pou bann lezot distrik.  E si wi, konbyen Gouvernman i anvizaze envestir an plis pou fer sir ki sa proze i vin en sikse total.  Mersi Mr Speaker.

 

MINISTER ROLPH PAYET

Mersi pou ou kestyon.  I enportan mon krwar ki letan nou dansifye popilasyon, savedir nou konstri plis lakaz, nou konstri plis bann vilaz, bann lavil, pou nou avoid ki nou annan bann sistiasyon epidemik, bann sistiasyon lasante e bann lezot sitiasyon ki pou annan lefe advers lo bann popilasyon konsantre, ki bann proper system tretman desarz i ganny fer.  E bann rezyon konsantrasyon parey ou’n vwar dan Sesel se Beau Vallon, rezyon Nor, rezyon Santral e rezyon Sid Les, savedir Point Larue, Anse Aux Pins, Au Cap, Anse Royale.

E parey ti’n ganny anonse dan en dernyen sesyon isi kot Lasanble, kot nou ti prezante lo dezas ki ti arive Anse Aux Pins, Au Cap ek Point Larue i annan en proze ki apepre 20 milyon Dolar ki’n ganny soumet avek OFID e sa tim ekspert pe vin Sesel pou zot fer travay inisyal pou planifye sa sistenm sewage pou sa 3 distrik.  So, pou le moman sa ki mon kapab dir se letan popilasyon i grandi, letan nou devlop bann nouvo vilaz i enportan ki nou osi planifye pou bann sistenm sewage.  I pli difisil dan bann landrwa teren ki konplike parey dan Beau Vallon, dan bann diferan sa.  I pli fasil parey bann landrwa parey Perseverance, Roche Ciman ki parey ou konnen, zot konnen i annan dezan sistenm tretman sewage pou sa bann distrik ki dan bann zone reklamasyon.

Lo bann kestyon konstrent wi, akoz i en nouvo fason pou deal avek bann desarz.  Parey ou konnen, ozordi en dimoun letan i fer son desarz dan lakour, i zet li dan en pwi perdi i pa pey nanryen.  I pey zis pou sa lenvestisman ki in fer dan sa pwi perdi.  Me letan ou met en sistenm desarz, sa dimoun i bezwen peye toulemwan parey i pey elektrisite, parey i pey delo pou sa tretman desarz akoz tretman desarz i annan son kou envestisman dan tiyo, dan son kou laponp pou ponp sa desarz e osi son kou tretman pou tret sa desarz e sa i vin ek en kou ki bezwen ganny pase avek konsomater.  Mersi Mr Speaker.

 

MR SPEAKER

Kestyon 84, Onorab Jacqueline.

 

HON SULTANE JACQUELINE

Mersi Mr Speaker.  Bonzour Minis ek ou delegasyon, bonzour tou dimoun alekout.  Eski Minis i kapab enform sa Lasanble ki plan son Minister i annan pou enn fwa pour tou koup tou bann gro pye dibwa ki pous tre pre avek semen dan bann distrik, espesyalman sa ki tre menasan an ka dezas natirel.  Mersi Mr Speaker.

 

MINISTER ROLPH PAYET

Mersi Mr Speaker, mersi Onorab Jacqueline.  Avan mon komanse, mon ti a kontan, mon ti a voudre fer resorti ankor enn fwa, ki responsabilite pou koup pye dibwa danzere i tonm lo sa propriyeter later kot sa pye dibwa i ete.  Si i propriyeter prive, se sa dimoun ki sa propriyete pou li, ki responsab pou retir sa danze.  Si i lo later Gouvernman, i sa Minister ki responsab pou sa propriyete ki koup sa pye dibwa.

Kot i annan bann pye dibwa ki annan valer komersyal lo later Gouvernman, mon Minister i travay avek sa Minister responsab pou fer le neseser pou vann sa dibwa avek bann marsan ki koup sa pye dibwa e la i kapab rekoup enpe sa kou pou li manage sa pye dibwa ki danzere.

Dan lezot ka, pye dibwa ki napa valer komersyal, ki konsern nou, nou donn lenstriksyon pou sa ki responsab pou fer koup sa pye dibwa.  Sa Minister i fer li lo en baz toulezour kot nou Minister.  Si i lo later ki mon Minister i responsab, nou fer le neseser pou koup sa pye dibwa.  I annan osi PUC ki trim bann pye dibwa ki lo bann poto elektrik e osi bann distrik i ganny larzan anba bann pti proze pou kot bann landrwa ki annan pye dibwa danzere.

Apre sa dezas ki ti arive lafen Zanvye 2013, Gouvernman ti komans en legzersis pou li idantifye e koup bann pye dibwa danzere.  An sa ki konsern idantifikasyon bann pye dibwa danzere, lo bor semen, an zeneral sa legzersis in deza ganny fer depi Sans Souci, Morne Blanc ziska Port Glaud.  Nou’n osi kouver Le Niole, St Louis, Beau Vallon ziska Glacis dan Nor e Montagne Posee dan Les Mahe.

An tou i annan anviron mil pye dibwa ki’n ganny idantifye dan sa bann landrwa ki mon’n mansyonnen.  E sa i zis bann ki lo main road. Bann lespes i varye e zot enkli albizya, santol, sed e lezot lespes ankor.  Sa travay ti’n ganny fer par mon Minister ansanm avek SLTA dan proze Task Force pou dezas.  Finans pou koup sa bann pye dibwa, i ankor pe ganny idantifye akoz depi 2008 mon Minister i nepli annan en bidze ki dedye pou koup pye dibwa.  Mersi Mr Speaker.

 

MR SPEAKER

Onorab?

 

HON SULTANE JACQUELINE

Mersi Mr Speaker.  Eski Minis i kapab dir ek sa Lasanble, ki bann resours ki son Minister pe anvizaze met disponib dan distrik pou amelyor sa ki deza annan, an ka evantyalite en dezas.  Mersi.

 

MINISTER ROLPH PAYET

Mersi Mr Speaker.  Dan en dernyen entervansyon nou ti fer lo dezas, nou ti fer resorti poudir sak distrik i annan li en contingency plan o nivo distrik.  Mon Minister pe deza travay, in komans travay ek bann distrik enn par enn, pou revwar sa Disaster Contingency Plan e idantifye ladan ki training bann dimoun i bezwen, ki resours bann dimoun i bezwen, koumsa nou kapab fer bann provizyon adekwat pou nou kapab enplimant sa Contingency Plan.  Mersi Mr Speaker.

 

MR SPEAKER

Onorab Lucas.

 

HON WILBY LUCAS

Mersi Mr Speaker.  Mon kestyon pou Minis, i annan serten distrik ki pa’n ganny idantifye dan sa legzersis.  Eski zot pe ganny konsidere oubyen zot pe ganny kit deor?  Mersi.

 

MINISTER ROLPH PAYET

Mersi bokou Mr Speaker.  I toultan nou swe pou nou kouver tou distrik.  I ti dan plan Task Force pou idantifye bann distrik ki’n montre plis risk pandan sa bann letan ki’n pase.  E definitivman letan nou fini sa legzersis, e nou’n idantifye finansman pou adres sa bann problenm dan sa bann distrik, then i pou permet nou pou nou kapab bouz lo lezot distrik.  Mersi Mr Speaker.

 

MR SPEAKER

Onorab Vel.

 

HON JENIFFER VEL

Mersi Mr Speaker.  Mr Speaker, mon ti a kontan demann Minis, an vi ki depi Roche Caiman ziska lo highway finisyon Airport i annan en kantite pye sed ki koz en kantite danze e an vi ki Minis in mansyonn bidze koman kontrent ki son Minister i fer fas avek, Minis eski i pa ti a pli ekonomik ki nou fer sa travay lo en baz regilye olye ki nou vwar ki letan i annan gro divan nou al kot bann kontrakter nou fer zot vin koup sa louvraz lo en baz irzan ki a mon avi, i kout bokou pli ser.  Si ou Minister i annan en plan kontinnyel pou tir sa bann pye sed danzere ki olye esper letan dezas.  Mersi.

 

MINISTER ROLPH PAYET

Mersi bokou Mr Speaker.  Parey toultan mon’n dir, lanvironnman i parey en lanvironnman dinamik.  Savedir keksoz pe bouze toultan.  E si Gouvernman i provide nou avek sa bidze pou nou kapab fer maintenance lo tou bann diferan laspe, zot kapab imazinen konbyen i kapab kout sa pei.  I pa toultan fasil pou nou fer sir ki tou bann pye dibwa i ganny koupe, i ganny garde byen letan ou pran kont tou lezot keksoz ki Gouvernman i bezwen antretenir dan pei.  Sa mon premye pwen.

Mon dezyenm pwen lo sa size se, depi Zanvye nou’n antreprann en proze pou nou kapab redwir oter tou bann pye sed ki annan lo highway.  Mon krwar zot in vwar bann kontrakter pe fer travay.  Nou’n malerezman bezwen tir kontrakter pou anvoy zot lezot landrwa kot i annan lezot pli gro pye dibwa.  E sa travay pou kontinnyen ganny fer sa lannen.  Selman parey mon’n dir, i pa toultan fasil pou fer sir ki sa bann pye dibwa i reste en oter rezonnab akoz pye dibwa i pous vreman vit e resours ki nou annan i pa permet nou pou nou kapab gard li parey nou ti a kontan e nou ti a kontan vwar.  Mersi Mr Speaker.

 

MR SPEAKER

Kestyon 85, Onorab Jacqueline.

 

HON SULTANE JACQUELINE

Mersi Mr Speaker.  Ki mezir son Minister pe pran pou asire ki bann konpannyen telefonn i pran zot responsabilite pou ki difil telefonn ki pas lo poto PUC pa koz en nwizans e menas pou piblik e transpor.  Mersi Mr Speaker.

 

MINISTER ROLPH PAYET

Mersi Mr Speaker, mersi Onorab Jacqueline.  Mr Speaker, an se moman, PUC i annan lakor partenarya avek tou lakonpannyen ki servi poto elektrik dan pei.  Sa lagreman i klerman endike ki avan okenn travay i ganny antreprann lo poto, sa bann lakonpannyen i devret konsilte PUC pou fer sir ki tou mezir neseser i ganny pran.  Sa i enkli bann mezir pou asire ki dimoun pa ganny afekte dan en fason ou en lot.

An plis ki sa, sa bann lakonpannyen i ganny demande pou soumet detay zot travay, ki swa zot pe anvizaze antreprann, enkli zot progranm travay avek PUC avan zot komans okenn travay lo poto.  Mr Speaker, sa i neseser pou PUC kapab monitor progre zot travay e osi anpese pou ariv sa bann problenm ki Onorab in fer sorti.

An plis ki sa, de ki bann lalinny kab e lezot materyo lo poto i komans deteryore, PUC i demann sa lakonpannyen pou repar son bann lekipman o pli vit posib.  Fodre note ki responsabilite sa bann lakonpannyen pou mentenir zot bann difil lo poto.  E depi lannen pase, mon’n enstri PUC pou fer sir ki bann lakonpannyen ki pa swiv bann regilasyon an sa ki konsern servi poto, ki zot ganny fine ouswa zot ganny kosyonnen.  Akoz parey Onorab in dir, i annan bokou bann ka atraver pei kot sa bann keksoz pa pe ganny fer byen.  Mersi Mr Speaker.

 

MR SPEAKER

Wi Onorab?

 

HON SULTANE JACQUELINE

Mersi Mr Speaker.  Eski Minis pe anvizaze fer en survey pou vwar e konstat bann menas ki sa bann kab i kapab koze pou transpor e piblik an zeneral.  E eski Minis osi pe anvizaz en monitoring kontinnyel pou vwar si sa bann konpannyen i vreman retir sa bann kab e kote zot dispoz letan zot tire.  Mersi Mr Speaker.

 

MINISTER ROLPH PAYET

Mersi bokou Mr Speaker.  Sa travay i ganny fer toulezour, touletan.  Ki mon’n konstate se dan bann pti semen ouswa dan bann landrwa kot PUC pa al souvan, i annan sa bann ka ki arive e la toultan nou demann bann manm piblik e lezot dimoun ankor pou les PUC konnen e PUC aprezan i kapab reakte e fer sir ki sa bann lakonpannyen i kapab met sa bann difil annord.

I pa toultan fasil, mon konnen i annan problenm.  Me selman mon ti a kontan ki nou tou nou fer sa zefor pou nou ed PUC fer sa travay dan en fason pli profesyonnel ki pe ganny fer ozordi.  Mersi Mr Speaker.

 

MR SPEAKER

Onorab Pillay.

 

HON SEBASTIEN PILLAY

Mersi Mr Speaker.  Mr Speaker, an relasyon avek larepons ki Minis in donnen, mon ti a kontan demann li, ki mechanism oubyen Polisi son Minister an relasyon avek letan kot sa bann konpannyen pa move ase vit pou retir sa bann kab kot parfwa nou vwar swa i tonm lo semen oubyen i vin en polisyon dan serten landrwa oubyen i koz danze pou bann drayver.  Ki bann penalti i kapab annan an relasyon avek sa pou sa bann konpannyen ki pa fer sa oubyen si son Minister i annan plan entrodwi bann penalti kan bann konpannyen pa konform avek regilasyon ki annan an plas.  Mersi.

 

MINISTER ROLPH PAYET

Mersi Mr Speaker.  Parey mon’n mansyonnen dan mon repons kestyon, bann lakonpannyen i ganny fine si zot pa swiv bann regilasyon ek bann kondisyon ki PUC i met lo son bann lalinny.  E parey mon’n osi fer mansyonnen, i pa toultan pe mars parefetman e mon pou kontinnyen enpoz lo PUC pou fer sir ki sa travay enforcement osi i ganny fer.

E parey zot konnen, nou annan nouvo striktir ki ganny mete anba Seychelles Energy Commission.  I annan osi en rol regilatwar ki bezwen ganny fer, i bezwen ganny ranforsi pou fer sir bann poto elektrik i ganny servi byen e lo standar ki pe ganny ekspekte i ganny servi.  Mersi Mr Speaker.

 

MR SPEAKER

Onorab Samson.

 

HON DEREK SAMSON

Mersi Mr Speaker.  Bonzour tou dimoun.  Mr Speaker, mon ti a kontan demann Minis si i annan en standar kler lo oter ki bann difil i devret ete lo poto ek zistans ki bann poto i devret ete avek lezot striktir batiman ki trouve dan nou pei.  Mersi.

 

MINISTER ROLPH PAYET

Mersi bokou Mr Speaker.  Sa i en size ki mon ti diskit ek PUC depi lannen pase e mon assume ki zot annan en standar kler akoz mon’n demann sa kestyon mon osi.  Zot dir mwan zot annan en standar kler lo kimannyer difil i ganny mete lo poto.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, Minis in koz lo bann fines, eski Minis alors i kapab donn nou en lendikasyon kler lo bann lenstans kot bann lakonpannyen in ganny fine dizon pandan sa dernyen 2an e konbyen zot in ganny fine?  Mersi Mr Speaker.

 

MINISTER ROLPH PAYET

Mersi Mr Speaker.  Mon napa sa lenformasyon avek mwan ozordi.

 

MR SPEAKER

Ok.  Kestyon 86, Onorab Wilby Lucas.

 

HON WILBY LUCAS

Mersi Mr Speaker.  Mon kestyon pou Minis i lir koumsa.  An vi demann dan tou distrik pou enkorpor plis feeder road anba sa progranm netwayaz, eski Minis i kapab enform sa Lasanble si son Minister i annan plan pou ogmant kontrakter netwayaz dan bann distrik.  Mersi.

 

MINISTER ROLPH PAYET

Mersi bokou Mr Speaker, mersi bokou Onorab Lucas.  Mon Minister pou selman kapab kontinnyen ogmant lakantite kontrakter kot nou vwar i annan en bezwen tre kler e ler nou annan resours pou siport sa ogmantasyon.  I toultan Polisi mon Minister pou fer sir ki tou semen primer i ganny netwaye regilyerman e ki okenn semen piblik pa ganny lese dan en leta sal.  Anmenmtan, i enportan ki kominote i osi korpere ansanm pou gard bann pti feeder road kot zot reste, pli prop.  Mersi Mr Speaker.

 

MR SPEAKER

Onorab Lucas.

 

HON WILBY LUCAS

Mersi Mr Speaker.  Minis, eski ou Minister in resevwar demann sorti dan bann distrik e si wi, ki ou pe propoze e ki konsiderasyon ou Minister pe pran.

 

MINISTER ROLPH PAYET

Mersi bokou Mr Speaker.  Wi, mon Minister i resevwar avek bann distrik bann request pou netway bann feeder road.  Mon Minister i met sa dan nou progranm bidzeter e la i depan lo kantite bidze ki nou ganny ofer par Gouvernman toule lannen.  Nou priyorite sertennman se pou maintain netwayaz lo bann semen egzistan, lo bann semen adisyonnel i pou depan lo bidze ki nou gannyen.  Parey zot konnen osi, i annan serten kou ki bann kontrakter i demann nou pou ganny revize deplizanplis e sa i pa fer li fasil pou kontinnyen azout semen lo lakantite bidze ki nou gannyen.  Mersi Mr Speaker.

 

MR SPEAKER

Onorab Payet.

 

HON DAVID PAYET

Mersi Mr Speaker.  Bonzour tou dimoun.  Mr Speaker, lefe ki sa progranm netwayaz semen dan distrik i osi en mwayen pou empower bann pti antreprener e sours reveni enportan pou plizyer lakour, eski Minis i kapab enform sa Lasanble si zot annan en Polisi pou asire ki kontra netway sa bann semen i byen ganny partaze e pa konsantre dan lanmen zis serten kontrakter.  Mersi Mr Speaker.

 

MINISTER ROLPH PAYET

Mersi Mr Speaker.  Wi, nou annan en Polisi ki mars ansanm avek biro distrik kot bann kontrakter ki baze lo nivo lokal i ganny priyorite avan.  Mon anvi fer resorti se si sa kontrakter pa performen, definitivman nou pou dir sa kontrakter mersi bokou e la nou pou rod en lot kontrakter pou fer sa travay.  So i enportan ki okenn manm kontrakter zot kapab perform lo sa nivo ki ganny demande pou zot performen akoz alafen dizour se Minister ki ganny blanmen letan semen pa ganny netway byen e pa ganny performen lo sa standar.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Bonzour tou dimoun.  Mr Speaker, an vi ki sa konsern larzan ki kontrakter i gannyen pou maintain bann semen i en konsern ki bann kontrakter in met devan lotorite konsernen souvandfwa.  Eski Minis pe mazinen ki sa i en top priority pou reviz sa kou ki bann kontrakter i ganny peye an vi ki zot bezwen sustain an kantite depans in terms of fuel, transportasyon and so on e ki zot vwar zot souvan dan bann difikilte finansyer.  Mersi.

 

MINISTER ROLPH PAYET

Mersi bokou Mr Speaker.  Parey mon’n mansyonnen, kantite kontrakter nou kapab donnen i baze lo kantite bidze nou kapab donnen.  Ogmantasyon pou larzan kontrakter i kapab donnen, i depan ankor lo bidze ki nou gannyen.  Sertennman, Minister in met an plas serten striktir pou fasilitet e siport bann pti kontrakter, e sa nou’n vwar an diskisyon avek zot par egzanp eski zot kapab afford en pick up ouswa non?  Nou sey rod bann provizyon pou kapab ed zot pou zot kapab parey letan zot anmas salte pou zot kapab depoz sa salte.

So i annan diferan travay, sipor ki mon Minister i travay avek bann kontrakter pou fer sir ki zot kapab fer sa travay byen e osi redwir zot kou on site, akoz nou realize vre ki koman en pti kontrakter i pa fasil pou annan tou bann lekipman posib e tou bann sipor posib pou kapab fer sa travay dan en fason ki ou kapab redwir ou kou letan ou pe fer sa travay.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Spaker.  Bonzour Minis, bonzour tou dimoun.  Minis lefe ki i annan bokou distrik ki bann semen segonder sirtou, napa beton lo la e menm letan i fer sa bann kontra sa bann semen kot napa beton pa ganny netwaye.  Eski Minister pe konsidere pou enkli osi sa bann semen ladan.  Mersi.

 

MINISTER ROLPH PAYET

Mersi bokou Mr Speaker.  Mon anvi reponn ou kestyon me selman again mon pou go back to le pwen ki nou pa pou kapab enkli ankor okenn semen si nou napa bidze pou nou kapab enkli okenn semen, menm sa ki enkli sa bann ki lo beton, menm sa bann ki napa beton.  Alafen dizour i depan lo bidze ki nou ganny donnen.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  En kestyon senp pou Minis.  Minis eski zot annan okenn plan alavenir tre pros, pou zot reviz tou bann kontra ki zot in donn bann pti kontrakter pou netway semen dan nou distrik.  Mersi Mr Speaker.

 

MINISTER ROLPH PAYET

Mersi bokou Mr Speaker.  Wi, parey zot konnen, avek tou kontra letan nou enplimante i annan serten keksoz ki nou dekouver ki pa pe mars byen, ouswa serten regilasyon ouswa serten kondisyon i annan serten konstrent avek.  Alor i dan plan mon Minister pou toultan revwar kontra.  Me selman nou ti a kontan revwar li dan en fason transparan ki tou dimoun i ganny sans osi fer zot komanter lo la e nou osi nou ganny sans fer bann konsiltasyon legal ki toultan nou kontinnyen annan en kontra ki asire ki nou ganny en travay de kalite pou sa larzan ki nou pe peye.

 

MR SPEAKER

Kestyon 87, Onorab Souris.

 

HON MIRENA SOURIS

Mersi Mr Speaker.  Eski Minis pou Lenerzi ek Lanvironnman i kapab dir ek sa Lasanble plan son Minister pou netway e deblok lanmar dan distrik.  Mersi Mr Speaker.

 

MINISTER ROLPH PAYET

Mersi pou ou kestyon Onorab Souris.  Mr Speaker depi 2009, Minister Lanvironnman ek Lenerzi pe netway e mentenir bann lanmar ek larivyer dan tou distrik lo Mahe, Praslin ek La Digue.  I annan plizyer kontrakter ki ganny donnen kontra anba Minister Lanvironnman e Lenerzi pou zot netway sa bann landrwa enn fwa par mwan.

Pandan sa 4 dernyen lannen divizyon ki responsab pou lamenazman bann lanmar ek larivyer, in ogmant osi bann sit ki ganny netwaye regilyerman.  Ozordi, i annan 10 larivyer ek lanmar ki pe ganny netwaye dan distrik Beau Vallon e sa pe kout Gouvernman R145 mil par an.  Ankor sa lannen, i annan plan pou ogmant landrwa ki pou ganny netwaye dan nouvo kontra ki pou ganny fer pou Beau Vallon e sa pou ariv 14 larivyer dan sa apepre 18 larivyer ek lanmar ki annan dan Beau Vallon.

Sa bann nouvo landrwa swivan; La Batie – Goila River, Anba Banbou, Msye Gill River, Beau Vallon Clinic River e Beau Vallon Bay Marsh channel. Bann landrwa ki pe ganny netwaye anba kontra deza, se Beau Vallon Pizzeria Marsh ek son outlet, Beau Vallon Madanm Betini River, Beau Vallon Le Niole Junction River, Beau Vallon Secondary School River, Pascal Village River – Kot Madanm Hoareau, Nouvelle Vallee River Flats, La Flute River, Canada River, La Batie River upper and lower, Mare Anglaise River.  Mersi Mr Speaker.

 

MR SPEAKER

Yes Onorab.  Onorab Souris.

 

HON MIRENA SOURIS

Mersi Mr Speaker.  Baze lo larepons Minis, eski Minis i kapab dir ek sa Lasanble plan son Minister pou rezourd inondasyon dan plato Beau Vallon a sak fwa ki lapli i tonbe malgre ki sa ki sa lanmar obor pe ganny netwaye e sirtou otour bann popriyete landrwa rezidansyel obor lotel Savoy ki en gro problenm.  Mersi Mr Speaker.

 

MINISTER ROLPH PAYET

Mersi bokou Mr Speaker.  Minister in fini prezant en plan avek distrik kimannyer pou rezourd problenm linondasyon e drenaz dan plato Beau Vallon espesyalman ki konsern sa nouvo lotel Savoy.  Mon pe reflesir la si sa prezantasyon ti ganny fer dan dernyen meeting piblik ki nou ti fer pou Golden Mahe Project. Mon krwar sa prezantasyon ti ganny fer, si i pa ti ganny fer, mon a demann Onorab avek ou permisyon Mr Speaker, pou pran kontak avek mon Minister ki nou ava organiz en meeting piblik pou tou bann dimoun dan sa rezidans pou zot ganny en prezantasyon lo sa plan drenaz dan sa landrwa.  Mersi Mr Speaker.

 

MR SPEAKER

Onorab Meggy Marie.

 

HON MEGGY MARIE

Mersi Mr Speaker.  Bonzour Minis ek son delegasyon.  Bonzour tou dimoun ki alekout.  Eski Minis pou Lanvironnman ek Lenerzi i kapab dir ek sa Lasanble kan ki son Minister pe konsider komans travay e kan i pou konplet travay lo bann lanmar dan distrik Anse Aux Pins.  E si zot pe konsider agrandi bann debousman ki sa lanmar pou al dan delo sale ki en konsern pou zabitan Anse Aux Pins depi dezas Zanvye 2013.  Mersi Mr Speaker.

 

MR SPEAKER

Bon mon krwar kestyon i, Minis pou bezwen reponn 25 kestyon lo sak distrik.  Mon pa pou les sa – mon pa konnen si Minis i annan sa bann lenformasyon avek li me nou pe al ouver en laport la si mon les sa kestyon pase kot tou Manm pou komans koz lo lanmar dan son distrik.  Minis mon krwar ou kapab fer zot ganny sa lenformasyon an ekrir laprosenn fwa.  So, nou a pran en lot supplementary.  Onorab Samson.

 

HON DEREK SAMSON

Mersi Mr Speaker.  En kestyon zeneral lo lanmar pou Minis.  Se lekel ki responsab pou sign-off lo konplisyon netwayaz bann lanmar dan bann distrik lo Mahe dan Sesel.  Mersi.

 

MINISTER ROLPH PAYET

Mersi bokou Mr Speaker.  Mon krwar mon ti’n deza reponn sa kestyon dan en lot fason.  Se distrik, akoz parey nou travay ansanm avek distrik pou sign-off bann netwayaz semen, bann drenaz, bann larivyer ek bann lanmar, i osi tonm anba responsabilite Minister Lanvrironnman ki ansanm avek distrik, ek DA ouswa son zofisye pou sign-off pou fer sir ki tou dimoun i satisfe avek sa travay ki’n ganny fer.  Mersi Mr Speaker.

 

MR SPEAKER

Onorab Lucas.

 

HON WILBY LUCAS

Mr Speaker mersi.  Mon pou senpleman demann Minis si son Minister i annan en progranm nasyonal ki tous tou distrik lo sa size ki kestyon pe demande.  Mersi.

 

MINISTER ROLPH PAYET

Mersi Mr Speaker.  Ankor enn fwa, dan mon dernyen prezantasyon lo prezantasyon lo dezas, mon ti fer resorti konbyen i pou koute o nivo nasyonal pou nou fer bann netwayaz lanmar avek larivyer e mon ti dir poudir sa larzan pou ganny mete dan next bidze e mon ti demann Lasanble pou siporte ki sa larzan i ganny retenir dan bidze pou Minister kapab fer son travay lo nivo nasyonal.  Mesi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble si zot santi, si son Minister i santi ki i annan ase resours imen e finansyel pou garanti nou ki zot annan en sistenm monitoring efektiv an plas pou fer sir ki lepep Seselwa i ganny value for money an relasyon avek sa size deblok lanmar.  Mersi Mr Speaker.

 

MINISTER ROLPH PAYET

Mersi bokou Mr Speaker.  I pa toultan fasil pou nou annan lizye partou e parey ou’n fer sorti, nou annan nou konstren imen.  Mon Minister sa lannen pe propoz avek Gouvernman pou nou ogmant nou kapasite atraver bann diferan sitiasyon ki’n pase, bann diferan responsabilite ki nou’n gannyen pou nou kapab fer sa travay dan en fason pli byen.       Me nou osi bezwen realize ki monitoring i pa zis rol Gouvernman, i rol sakenn de nou e toultan mon’n dir dan lanvironnman nou tou nou lizye lanvironnman e nou tou nou annan en rol pou nou zwe pou asire ki nou Minister Lanvironnman nou kapab fer sa travay dan en fason pli efikas e pli efektiv.

E parey mon’n mansyonnen avan, se sanmenm sa nou travay etrwat avek distrik pou fer sir ki sa i arive e mon demann bann Onorab ki zot vwar si i annan serten zot distrik ki pa pe fer sa travay ki zot zwenn avek mon Minister e ki nou asire ki nou kapab fer sa travay pli byen e pli efikas.  E mon krwar sa i pli bon fason pou nou travay dan en fason toulezour, toule semenn e toule mwan.  Mersi Mr Speaker.

 

MR SPEAKER

Kestyon 88 Onorab Samson.

 

HON DEREK SAMSON

Mersi Mr Speaker.  Eski Minis ki responsab pou Lenerzi i kapab enform nou Lasanble, ki PUC pe anvizaze fer pou rezourd sa problenm iregilyarite dan lakantite kouran ki sirkil lo bann sistenm distribisyon dan rezyon Les ek Sid Mahe?  Mersi.

 

 

MINISTER ROLPH PAYET

Mersi Onorab Samson pou ou kestyon.  Mr Speaker PUC i distribye elektrisite dan rezyon Sid Mahe atraver en lalinny 33 mil volt sorti Victoria an pasan par Sans Soucis ziska Anse Boileau.  Ler I ariv Anse Boileau, distribisyon i desann sorti 33 mil volt pou li vin 11 mil volt e sa i ganny distribye dan rezyon Sid Mahe.  Mon kapab dir an se moman, ki sa lalinny 33 mil volt in vin fully loaded ant 7er ek 8er diswar e sepandan sa letan la ki konsomater dan rezyon Sid Mahe i eksperyans en rediskyon dan sa kalite kouran ki ganny distribye dan sa bann rezyon.  I osi parfwa annan bann lenteripsyon dan distribisyon kouran e sa i arive akoz serten lekipman i fail ouswa i annan lezot lakoz ki pa dan kontrol PUC parey zekler, salte dan ler, brans dibwa ki tonm lo difisil, aksidan ek poto elektrik.

Pou kapab adres sa bann problenm ki mon’n mansyonnen, PUC pe anvizaze etablir en nouvo lalinny ki pou pas lot kote zil savedir en lot laliny 33 mil volt, ki pou fourni kouran tou dilon Providence ziska Sid Mahe.  E sa Mr Speaker pou zwenn avek sa lalinny 33 mil volt ki’n ariv Anse Boileau ki egziste deza.  Sa proze in deza in komanse e premye faz se pou enstal kab sorti Providence ziska Airport.  Lezot faz proze ki ekspekte ganny enplimante dan sa bann lannen ki pe vini baze lo finansman e bann letid fezabilite ki pe ganny fer la par labank BADEA.

Bann zabitan Sid Mahe pou kapab vwar lamelyorasyon dan kalite servis ki zot pe gannyen ler sa proze i gradyelman progrese.  Mersi Mr Speaker.

 

MR SPEAKER

Onorab.

 

HON DEREK SAMSON

Mersi Mr Speaker.  Mr Speaker mon ti a kontan demann Minis ki konsey i annan pou donn bann konsomater an-atandan ki sa proze i ganny konplete.  Mersi.

 

MINISTER ROLPH PAYET

Mersi bokou Mr Speaker.  Mon konnen ki bokou dimoun letan zot ariv dan lakour zot met tou keksoz on par egzanp nou pe drese, nou pe kwi manze, nou pe met washing machine e tou sa bann lekipman i servi bokou kouran.  Mon ti a sizere ki nou esey redwir pandan sa peryod ki mon’n koze la ant 7er e 8er diswar, kantite presyon ki i annan lo sistenm elektisite pandan sa peryod.

I annan osi bann lezot aktivite ki pe ganny fer par egzanp welding ki servi bokou kouran, bann lezot air conditioning tousala i pran bokou, i met bokou presyon lo lalinny.  So, si zot kapab distribye enpe zot bann aktivite sa i pou ede pou PUC kapab gard sa kalite kouran dan en fason pli stab posib.  Mersi Mr Speaker.

 

MR SPEAKER

Onorab Vel.

 

HON JENIFFER VEL

Mersi Mr Speaker.  Mr Speaker, an vi ki rezyon Les ki kouver mon distrik Point Larue i enn parmi sa bann rezyon kot nou eksperyans sa problenm, eski Minis i kapab dir nou depi kan ki PUC i okouran sa problenm i egziste?

E an vi ki mon distrik spesifikman Point Larue pandan bann dernyen lannen, nou’n eksperyans en o nivo lensidans bann dife lakaz, eski PUC pe fer okenn letid pou determinen si sa fluctuation dan nivo elektrisite i annan okenn relasyon avek sa bann lensidans.  Mersi.

 

MINISTER ROLPH PAYET

Mersi bokou Mr Speaker.  Mon napa dat egzakt kan PUC i aware sa bann problenm me selman PUC i definitivman aware akoz i vwar lo son sistenm ki kantite demann kouran pe ogmante.  E parey mon ti anonse lo mwan Mars, poudir pei in ariv li 50 mega watt konsanpsyon kouran savedir i en rikord premye fwa dan nou listwar ki nou ariv 50 mega watt litiliazsyon kouran e sa in met serten konsern lo demann kouran dan Sesel.  I montre poudir nou pe annan plis lekipman ki servi elektrisite e osi nou pe servi plis alafwa e osi an mezir nou pei pe devlope plis dimoun pe met air conditioning kot zot e dan lezot landrwa ankor.  Wi, apre nou annan plis devlopman lotel e lezot devlopman ankor ki pe arive.

Lot laspe konsernan dife, non, i pa korek.  Sak sa bann levennman dife parey ou konnen i annan lenvestigasyon ki ganny fer par Fire Brigade e Fire Brigade i fer sorti son rapor e la si i annan en rezon konsernan eletrik e la i ganny fer sorti dan son rapor.  So, i pa korek ditou poudir poudir sa bann lensidans dife ki arive i an relasyon avek problenm lo poto PUC.  Mersi Mr Speaker.

MR SPEAKER

Kestyon 89, Onorab Samson.

 

HON DEREK SAMSON

Mersi Mr Speaker.  Kestyon pou demann Minis responsab pou Lenerzi, ki Polisi son Minister kot i konsern perd bann lakour i resevwar ler zot bann lekipman elektronik i ganny andomaze an rezilta kouran koupe okazyonnen par lafot PUC? Mersi.

 

MINISTER ROLPH PAYET

Mersi Onorab Samson pou ou kestyon.  Mr Speaker, ou kestyon i fer lie avek lafot PUC.  PUC, parey nenport ki lezot lakonpannyen litilite dan lemonn pa kapab garanti son konsomater servis elektrisite san enteripsyon.  Menm si PUC i fer son mye pou donn son kliyan en servis de kalite, i pou touzour annan problenm akoz pa tou keksoz ki afekte distribisyon elektrisite ki PUC i annan kontrol lo la.    Lamazorite fwa, problenm ki arive avek lalinny elektrisite i an deor kontrol PUC akoz son bann lalinny i ganny ekspoze avek diferan lefe natirel e imen.  Sa i enkli zekler, aksidan avek poto elektrisite, sov souri e kekfwa zot ava riye, lezar.  Lezar i enn bann zannimo ki afekte en kantite PUC akoz son longer e son zistans i kapab mete ant bann difil, dan bann sistenm wiring PUC.

Mon ti a kontan osi fer sorti ki i annan osi bann dimoun ki zwe avek zot bann sistenm kouran, ouswa servi bann lekipman ki pa ganny adapte pou nou sistenm isi Sesel e sa i koz serten problenm dan sistenm PUC.  Mersi bokou Mr Speaker.

 

MR SPEAKER

Onorab?

 

HON DEREK SAMSON

Mersi Mr Speaker.  Eski Minis i kapab dir nou ki swa oubyen opsyon en kliyan PUC i annan, apre ki plizyer lekipman dan son lakour in ganny andomaze an rezilta fot lo lalinny?  Mersi.

 

MINISTER ROLPH PAYET

Mersi bokou Mr Speaker.  In annan de ka dan lepase kot PUC in asiste bann dimoun kot zot lekipman in ganny brile, si in kapab ganny prouve poudir sa problenm ti lafot PUC. Sa in arive dan lepase e mon menm mwan, mon’n involve dan detrwa distrik kot sa problenm in arive, me kot ka ki sa problenm pa relye avek fot ki PUC in fer, malerezman sa kliyan either i bezwen annan lasirans lo son lekipman, ouswa i bezwen rod en lot mwayen pou li kapab ranplas son lekipman.  Mersi bokou Mr Speaker.

 

MR SPEAKER

Onorab Payet.

 

HON DAVID PAYET

Mersi Mr Speaker.  Mr Speaker, eski Minis i kapab enform sa Lasanble si son Minister e PUC pou konsider ankouraz lakonpannyen lasirans oubyen bann marsan pou ofer lasirans pou bann lekipman elektronik an ka domaz koze par koupir kouran?  Mersi Mr Speaker.

 

MINISTER ROLPH PAYET

Mersi bokou Mr Speaker.  Mon krwar sa fasilite i deza an egzistans.  Mon pa pou kapab pronons mon lekor lo la.  Selman sak fwa mwan, mon asir mon lakaz, mon ganny demande si mon anvi asir mon bann lekipman dan mon lakaz kont okenn keksoz ki enkli osi lefe zekler.  E les mwan fer mansyonnen, pou osi lefe zekler osi, i annan bokou lakaz ki zot earthing pa byen e sa osi pou afekte zot bann lekipman dan zot lakaz e pa neseserman sorti kot PUC.

So, i enportan ki elektrisyen osi i fer sa bon travay e osi ki nou asire osi ki dan nou pei, nou ganny bon kalite wayer, kalite plug, kalite switch e kalite bann lekipman osi ki pou kapab protez nou bann lekipman elektronik ki nou annan dan lakour.  Sa osi i annan en rol vreman enportan dan asire ki nou kapab gard nou bann lekipman byen dan lakour.  Mersi Mr Speaker.

 

MR SPEAKER

Onorab Murielle Marie.

 

HON MURIELLE MARIE

Mersi Mr Speaker.  Bonzour.  Bonzour Minis avek ou delegasyon.  Mr Speaker, baze lo repons Minis, eski Minis i kapab enform sa Lasanble si Gouvernman, atraver PUC i annan an plas serten kondisyon e standar mandatwar ki bann enportater lekipman elektronik oubyen elektrik i bezwen respekte ler zot anmenn bann tel lekipman dan pei?  Mersi.

 

MINISTER ROLPH PAYET

Mr Speaker, PUC i annan serten gidans minimum ki i donn bann lotorite, bann dimoun ki pe fer konstriksyon, pou asire ki sa bann lekipman i ganny mete byen.  Me PUC son lekip lenspeksyon i zis verifye poudir kouran in ganny fer byen.  I pa ekspekte sa kalite wayer akoz sa i ganny mete lo sa kontrakter ki pe fer sa travay pou asire sa.  Nou annan en lot lenstitisyon dan Sesel ki apel Seychelles Bureau of Standards ki li ou konstate i annan standar pou bann diferan lekipman elektrik dan Sesel.  Selman i pa dan mon portfolio pou mwan kapab donn en repons detaye lo sa size kalite bann lekipman elektrisite ki enporte dan pei.  Mersi Mr Speaker.

 

MR SPEAKER

Onorab Jeannevol.

 

HON BEGITTA JEANNEVOL

Mersi Mr Speaker.  Minis, ki arive dan bann ka kot kouran koupe i akoz piblik in tamper avek zot bann meter room, ki li i pa dan en landrwa ki ase safe, ou sinon i pa lock? Mersi Mr Speaker.

 

MINISTER ROLPH PAYET

Mr Speaker, mon anvi fer sorti ki tampering avek okenn lekipman elektrik, meter PUC ek son lekipman, i en lofans kriminel e PUC i kapab anmenn zot Ankour e zot kapab ganny kondannen pou sa lofans.  Nou annan bokou ka ki’n arive kot bann dimoun in tamper e PUC in fine zot e osi si nou vwar ki sa tampering in kapab cause en keksoz kriminel, sa i ganny mete devan Lakour.  Mon napa okenn detay devan mwan, selman mon ti a kontan fer sorti e ranforsi ki PUC i pran sa bann keksoz serye.

I annan en ka, detrwa ka ki nou’n gannyen dan lepase, kot bann dimoun pe fer lakaz, parey extension lakaz, ouswa fer en pti lakaz next door, kot zot pran en wayer kot paran pou fer travay kot sa pti lakaz.  E sa wayer i ganny fer dan en fason pa profesyonnel.  Sa osi i anmenn gran risk pou dimoun, pou sa kontrakter e i annan dimoun ki’n perdi zot lavi akoz sa bann tampering ki zot fer avek bann sistenm elektrisite.

I annan trwazyenmman osi, i annan bokou dimoun ki’n vin vwar nou konsernan pou met bann sistenm pano soler e mon’n fer resorti avek sa bann dimoun ki zot bezwen en sertifika elektrisyen pou zot kapab met pano soler akoz malgre i fasil pou ou vis sa pano soler anler lo twa, ou bezwen annan leksperyans elektrisite pou ou kapab konekte li avek sistenm kouran dan ou lakaz.  Mersi Mr Speaker.

 

MR SPEAKER

Onorab Leader Lopozisyon.

 

HON DAVID PIERRE

Mersi Mr Speaker.  Mr Speaker, Minis in koz lo lasistans ki PUC in deza donnen an relasyon avek bann tel sitiasyon ler en lekipman in brile.  Eski Minis alors i kapab dir avek sa Lasanble, pour konsomasyon piblik, dan en ka kot in kapab ganny byen etablir ki PUC i lafot.  Eski i annan bann prosedir kler ki bann manm piblik i kapab swiv pou zot kapab ganny asiste vitman san gran difikilte?  Mersi Mr Speaker.

 

MINISTER ROLPH PAYET

Mersi bokou Mr Speaker.  Wi, PUC i annan prosedir kler e parey mon’n fer sorti avan, i annan assessment ki bezwen ganny fer akoz tou dimoun i kapab vini dir ou poudir son lekipman in ganny brile akoz ti annan bann ka kot lekipman in ganny brile depi lontan e i ganny anmennen.  E i annan diferan ka labi osi.  So, i annan prosedir kler ki ganny servi e i annan osi en limit lo ki kalite lasistans ki kapab ganny donnen, dan bann ka kot i ganny vwar ki PUC i responsab pou bann lekipman.  Mersi.

 

MR SPEAKER

Kestyon 90, Onorab Fideria.

 

HON EMMANUEL FIDERIA

Mersi Mr Speaker.  Bonzour Minis.  Bonzour tou Koleg.  Bonzour tou dimoun alekout.  Mr Speaker, eski Minis pou Lanvironnman ek Lenerzi i kapab enform sa Lasanble kan ki son Minister i ekspekte ranplas sa bann bin ki’n ganny andomaze dan bann distrik?  Mersi.

 

MINISTER ROLPH PAYET

Mersi bokou Onorab Fideria pou ou kestyon.  Mr Speaker, tou bin andomaze ki trouve dan distrik Les Mamelles i ganny ranplase depi lafen Fevriye 2013, kan nouvo kargezon bin ti ariv dan pei.  Ranplasman in fini dan semen primer e pe kontinnyen dan lezot landrwa.  Se lakonpannyen STAR ki responsab pou enport e sanz bin ki andomaze, kase ouswa manke dan pei, anba direksyon e gidans Lazans pou Zestyon Salte e Lanbelisman, ouswa LWMA.

Distrik Les Mamelles dezormen i parmi sa 4 distrik kot statistik lo bin ki kase, vole e andomaze i vreman o.  I enportan pou fer sorti ki progranm sanz bin kase, andomaze e manke dan distrik i enn ki ganny fer lo en baz anyel.  Sepandan, i annan serten rezyon dan distrik, bann sou distrik, kot sak moman ki bin nef i ganny mete, bin i ganny vole par bann rezidan menm e i ganny servi pou swa stok delo lapli, fer lapire ladan, met salezon pwason ouswa lavyann.  Bin i osi ganny vole e vann dan bann landrwa komersyal.  Lazans i reste vizilan lo sa bann aksyon malonnet e avek lasistans lapolis, an plizyer repriz nou’n sezi bin kot bann letablisman komersyal.

Mon ti a kontan sezi sa loportinite pou lans en lapel avek tou dimoun dan Sesel pou raport okenn dimoun ki zot vwar pe vol ouswa andomaz bin par ekspre.  E sa mon pe koz lo sirtou bann dimoun ki sorti disco aswar, 1er bomaten ki vid bann bin, ki kas bann bin, ki koudpye bann bin ki ganny mete pou Seselwa servi.  Nou bezwen pran konsyans ki sa bann bin i kout ser e i la alaporte e servis pou fer sir ki bann transpor ki vin anmas salte i kapab anmas salte dan en fason pli efikas.  Mersi Mr Speaker.

 

MR SPEAKER

Onorab Fideria.

HON EMMANUEL FIDERIA

Yes.  Mersi Mr Speaker.  Mr Speaker, eski Minis i kapab enform sa Lasanble si Minister i annan lentansyon servi lot kalite bin, par egzanp bann ki servi pedal ki en pti pe pli izyenik.  E si Minister osi i annan plan ogmant son progranm sansibilizasyon, pour pli byen edik sitwayen koman pou servi bin, sirtou dan bann sirkonstans kot nou vwar bann dimoun ki annan kontra pou tir salte kot bann building, olye al met dan landfill, nou vwar zot, zot met dan plizyer bin dan semen kot zot zwenn?  Mersi.

 

MR SPEAKER

Request Minister.  Yes.

 

MINISTER ROLPH PAYET

Mersi bokou Mr Speaker.  Wi, toultan nou revwar teknolozi bin.  Globalman, i annan resers ki pe ongoing pou fer sir ki bann bin i adapte avek nou bann litilizasyon imen.  Mon ti vizit an Kore en sistenm kot i annan en trou, i parey en vacuum cleaner kot zot zet zot salte ladan e zot in met tiyo partou anba later ki ponp sa salte all the way pou al kot sa lendistri ki bril sa salte, ouswa i convert li, i transform li an lenerzi.

So, teknolozi i toultan pe ganny teste pou sey overcome sa natir imen pou pa servi bin byen.  Mon krwar sa bann bin ki nou annan, i bann bin ki rezonnab an term pri.  Pou nou revwar son teknolozi ankor i pou kout nou plis, i osi vin lo ou dezyenm kestyon ledikasyon.

Mon Minister i fer bokou ledikasyon lanvironnman lo televizyon.  Nou fer lo netwayaz, nou fer lo drenaz, nou fer lo bin.  Mon kestyon se, kimannyer nou kapab fer plis ankor?  Kekfwa lo nivo kominoter, lo nivo lekol, pou nou sansibiliz nou dimoun kimannyer pou servi sa bann bin pli byen.

Trwazyenm kestyon, wi.  I en travay ongoing ki fer.  Si ozordi okenn Seselwa ki konnen en lendistri ou en lakonpannyen ki pe servi bin piblik pou son salte, i les nou konnen akoz pou nou, i en reveni pou nou.  Letan nou ganny reveni, nou kapab fer plis netwayaz ankor.  So, okenn dimoun ki konnen okenn lakonpannyen ki pe servi bin pibllik pou zet son salte, i les nou konnen e la nou apros sa lakonpannyen e nou fer li pey pou annan koleksyon kot li ouswa pou ogmant frekans koleksyon kot li e sa i anmenn plis reveni pou LWMA. Letan nou ganny plis reveni nou kapab fer plis travay o nivo kominoter.  Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Eski Minis i kapab dir ek sa Lasanble, si son Minister i annan plan pou revwar e asir lenplimantasyon Lalwa, par egzanp bann fines, fixed penalty ki Minister i kapab donnen e pran aksyon pli sever kont bann dimoun ki pa pe servi bin parey e osi ki vandaliz nou bann bin?  Mersi Mr Speaker.

 

MINISTER ROLPH PAYET

Mersi bokou Mr Speaker.  Parey zot konnen, nou pe revwar Lalwa Lanvironnman, Environmental Protection Act ek tou bann fines ki enkorpor dan sa Proze De Lwa e sa pou ganny prezante devan Lasanble.  Parey osi Onorab i konnen, pou nou kapab tyonbo en dimoun e fer en konviksyon, nou bezwen annan levidans.  Nou bezwen vwar sa dimoun pe fer sa keksoz.  I pa pratik parey zot konnen, pou nou annan dimoun pou vey nou bann bin.

Sertennman si nou ganny rapor e si rapor i ganny donnen, nou annan levidans ki en dimoun in vandaliz bin, mon Minister pou pran aksyon kont sa bann dimoun, kont sa bann lorganizasyon ki vandaliz bann bin.  Mersi bokou Mr Speaker.

 

MR SPEAKER

Kestyon 91, Onorab Dugasse.

 

HON MELVAL DUGASSE

Mersi Mr Speaker.  Bonzour Minis.  Bonzour tou dimoun alekout e bonzour tou Manm Onorab.  Eski Minis i kapab enform sa Lasanble si son Minister, ansanm avek Gouvernman i annan lentansyon revwar ou renegosye sa kontra tir salte ek netwayaz semen ek STAR Seychelles? Mersi Mr Speaker.

 

MINISTER ROLPH PAYET

Mersi bokou Onorab Dugasse pou ou kestyon.  Mr Speaker wi, i annan enpe letan depi ki Gouvernman pe renegosye kontra tir salte ek netwayaz semen avek STAR Seychelles.  Negosiasyon final kontra STAR pe ganny fer ansemoman e nou ekspekte ki byento nou kapab tonm dakor avek en addendum, avek sa kontra egzistan avan ki nou diskit en nouvo kontra avek zot.  I enportan pou note ki STAR i annan en kontra 20an ekskliziv avek Gouvernman Sesel, ki pou terminen an 2016.

Nou plan se pou revwar sa kontra, ki’n kapab fer ladan, ki pa’n kapab fer e vwar par egzanp si nou kapab donn serten lezot dimoun serten kontra.  E en keksoz ki nou’n tonm dakor lo la se konsernan netway serten semen e netway serten lans.  E sa once nou’n fini finaliz sa addendum mon kapab dir, avek sa kontra egzistan, avek STAR, nou pou anonse ki bann keksoz ki pou prezan available avek lezot dimoun.  Selman main kontra STAR pou kolekte salte, sa i pou reste an fors avek bann nouvo kondisyon ki nou pou enplimante avek STAR ziska an 2016.  Mersi Mr Speaker.

 

MR SPEAKER

Onorab Dugasse.

 

HON MELVAL DUGASSE

Mersi Mr Speaker.  Minis, akoz ki nou kontinnyen pe vwar STAR pe fer netwayaz lo bann semen prensipal ki bann pti kontrakter distrik in deza ou fini netwaye e souvandfwa i zis en repetitiv?  Mersi.

 

MINISTER ROLPH PAYET

Mr Speaker, mon napa devan mwan detay spesifik ki bann semen ki STAR pe netwaye, selman parey mon’n dir dan mon larepons mon kestyon.  Sa pe ganny revwar e nou pou anonse byento egzakteman ki STAR i pou annan pou fer e ki lezot landrwa, lezot keksoz ki lezot kontrakter Seselwa pou ganny sans fer.  Mersi Mr Speaker.

 

MR SPEAKER

Leader Lopozisyon.

 

HON DAVID PIERRE

Mersi Mr Speaker.  Mr Speaker, eski Minis i kapab dir avek sa Lasanble akoz ki STAR Seychelles in rann Praslin ek La Digue e si sa pe annan bann lefe advers lo sa 2 zil?  Mersi Mr Speaker.

 

MINISTER ROLPH PAYET

Mersi bokou Mr Speaker.  Mon a komans avek La Digue.  Lo La Digue, STAR ti’n ganny en kontra pou li kolekte salte apre zer sa landfill e avek nou bann negosiasyon avek STAR ek bann diferan kou ki ti pe arive, desizyon ti ganny pran par Gouvernman pou li repran sa kontra lo Praslin e sub-contract li avek bann kontrakter Seselwa.  E sa pe ganny fer ozordi.  Mon pankor ganny okenn lenformasyon poudir sa pa pe mars byen.  Mon krwar i pe mars byen e dernyen vizit ki mon ti fer La Digue se bann dimoun i happy.  Kekfwa i annan bann pti problenm me selman mon ava revwar, mon ava gete si vreman sistenm pe mars byen lo La Digue.

Kot i konsern Praslin, parey zot konnen, STAR ti annan kontra pou serten travay lo La Digue, koleksyon salte e apre osi pou manage landfill Praslin.  E nou ti annan osi Praslin Development Fund ki ti osi responsab, PDF ti osi responsab serten laspe.  Letan tousala in sanze, Gouvernman in repran back tou bann kontra e la in redonn avek bann kontrakter Seselwa pou zot kapab fer sa travay lo Praslin.  So, ozordi lo Praslin, se bann kontrakter Seselwa ki pe kolekte salte e again mon lenformasyon ki mon gannyen, se sa travay pe ganny fer lo en nivo ki satisfezan.  Mersi Mr Speaker.

 

MR SPEAKER

Onorab Arnephy.

 

 

HON BERNARD ARNEPHY

Mersi Mr Speaker.  Mr Speaker, mon ti a kontan demann Minis ki bann demars ouswa mezir serye pe ganny pran pou rektifye sa sitiasyon kot 2 kontrakter i ganny demande pou manage en bin site, 1 pou retir salte e lot pou netway bin site e kot ler salte pa ganny tire, aprezan sa 1 ki sipoze netway bin site i pa kapab netwaye.  Me ler bann zofisye i pase, sa 1 ki sipoze netway bin site li i ganny penalize akoz bin site i sal, an rezilta sa 1 ki sipoze tir salte pa’n tire.  So, ki pe ganny fer pou rezourd sa sitiasyon.  E sa ki pli sagrinan ladan se ki sa bann ki sipoze netway bin site, zot lapey i ganny koupe.  E ler zofisye i anvoy en ranplasman, ki kriter ki ganny servi pou anvoy en ranplasman pou netway sa bin site? Mersi.

 

MINISTER ROLPH PAYET

Mr Speaker, mersi bokou Onorab pou ou kestyon.  Sa i en problenm ki mon pe fer fas avek, avek bokou kontrakter e lafason ki bann kontra i ganny enplimante.  Sa ankor i tonm lo kontra ki zot sinnyen akoz zot sinny en kontra pou delivre en serten travay pandan en serten letan, pandan en serten frequency.  I zot field pou delivre sa travay, alor bann kontrakter i ganny demande pou zot antre pou vin fer sa travay ki akoz mon Minister e tou lezot, enkli zot menm zot call pou dir tel landrwa pankor ganny netwaye.

Mon Minister ki i pe fer, i pe revwar sa sistenm pou fer sir ki i ganny fer dan en fason ou kapab dir pli transparan, pli ekitab e pli byen ki sa.  E sa i tonm dan kad revwar ou kapab dir, bann kontra ki konsern netway semen, tir salte, netway bin.  Mersi bokou Mr Speaker.

 

MR SPEAKER

Onorab Houareau.

 

HON HERBERT HOUAREAU

Mersi Mr Speaker.  Eski Minis i kapab dir ek sa Lasanble si i annan Seselwa ou konpannyen ki san poursan Seselwa ki’n eksprim lentere pou fer sa louvraz parey STAR pe fer, pou benefis nou pei?  Mersi.

 

MINISTER ROLPH PAYET

Mr Speaker, mon ganny en kantite propozisyon.  Wi.  Selman i depan lo zot kapasite, zot kapabilite e parey mon’n dir, Sesel i annan en kontra avel STAR ziska 2016 e once sa kontra i fini, la Gouvernman ava deside ki direksyon i pou ale.  E parey mon’n mansyonnen avan, lo La Digue ek lo Praslin, tou sa bann kontra pe ganny fer par Seselwa.  Mersi Mr Speaker.

 

MR SPEAKER

Kestyon 92, Onorab Valmont.

 

HON SYLVIANNE VALMONT

Mersi Mr Speaker, bonzour.  Bonzour Minis e ou lekip.  Bonzour Koleg Onorab e tou dimoun alekout.  Eski Minis i kapab enform nou Lasanble lo plan son Minister pou ankouraz piblik an zeneral, pou envestir dan lenerzi renouvlab tel ki solar energy koman en mwayen pou redwir kou elektrisite ki pe vin deplizanpli ser?  Mersi Mr Speaker.

 

MINISTER ROLPH PAYET

Mersi Onorab Valmont pou ou kestyon.  Mersi Mr Speaker.  (Mon pe loke ozordi.)  Mr Speaker, mon Minister in deza komans en progranm pou ankouraz dimoun fer bann sanzman neseser e komans premyerman redwir lakantite lenerzi ki zot servi e dezyenmman, entrodwir litilizasyon lenerzi renouvlab lo nivo domestik.

Plan mon Minister an kolaborasyon avek lazans lenerzi i koumsa.  Premyerman nou’n komans en kanpanny pou enform dimoun lo lenportans koup lo lakantite lenerzi ki zot servi kot lakour.  Sa i akoz ki i bokou pli fasil e pli bon marse pou redwir litilizasyon lenerzi an servi bann lekipman pli efikas parey fridge e glob ki konserv lenerzi ki pou envestir dan lenerzi renouvlab parey pano photovoltaic.  I enportan pou note ki pou prodwir lenerzi dan okenn fason i koute.  Alor, tan ki ou pa bezwen prodwir plis lenerzi, i pli bon.  Nou pou osi fer le neseser pou fer sir ki bann lekipman elektrik ki ganny enporte i bann ki konserv lenerzi e pa gaspiy lenerzi.

En legzanp, pratik ki nou kapab komans fer dan lakour se komans sanz nou bann glob sekirite akoz mon pas bokou lakaz annandeler aswar, nou pe servi bann glob ordiner.  Annou aste en glob parey tubelight la.  Mon pa konnen kimannyer i dir an kreol, compact fluorescent lamp, ki kout en pti gin pli ser me selman nou pou vwar en gran diferans dan nou kouran toulezour akoz mon konnen Seselwa i konsern pou zot sekirite kot lakour.

Dezyenmman, nou’n fini en lot laspe se parey boulwar elektrik.  Annou bwi nou delo avek en boulwar gas.  Sa osi i pou redwir nou kantite kouran dan lakour.  Me sa i tou bann progranm ledikasyon ki nou pe fer avek nou bann manm piblik.

Dezyenmman, nou’n fini met anplas nouvo Lalwa ki permet bann endividi prodwir lenerzi atraver bann teknolozi lenerzi renouvlab e vann sa ki anplis avek PUC atraver son sistenm distribisyon lenerzi.  Bann diferan prosedir pe ganny devlope e sa pou ganny anonse plitar.

Trwazyenmman, anba sa menm Lalwa Lenerzi, i annan provizyon pou bann endividi ki enterese ganny sipor pou envestir dan lenerzi renouvlab e sa Minister Finans ti’n fer serten lanons detrwa mwan pase lo akse avek serten fon o nivo domestik pou zot kapab envestir dan lenerzi renouvlab.  Plis lenformasyon pou ganny donnen plitar sorti kot Minister Finans.

Katriyenmman, Gouvernman pe enplimant en proze avek Global Environment Facility avek UNDP ki pou ed bann endividi ki enterese met bann sistenm soler kot zot.  Nou premye plan se pou fer sir i annan ase materyo de kalite e osi teknisyen ki’n ganny lantrennman neseser pou soutenir en progranm parey.  Sa pou ganny swivi par en kanpanny sansibilizasyon pou ogmant nivo konpreansyon piblik lo sa bann teknolozi.  Sa proze i en proze 4an ki nou’n komanse lannen pase, 2012.  Sa proze limenm li pe kout en pti gin plis ki 7 milyon Dolar.  Mersi bokou Mr Speaker.

 

MR SPEAKER

Okenn siplemanter?

 

HON SYLVIANNE VALMONT

Mersi Mr Speaker.  Eski Minis i kapab dir nou Lasanble si son Minister pe osi konsider en tel proze pilot kot i konsern lenerzi soler lo bann housing estates pou vwar ki benefis sa i anmennen.  Mersi Mr Speaker.

 

MINISTER ROLPH PAYET

Mersi bokou Mr Speaker.  I deza annan proze pilot lo bann lakaz.  Perseverance i deza annan detrwa lakaz proze pilot.  I pe mars tre byen, lo bann lakaz prive i deza annan bann proze pilot.  So, lenformasyon ki nou pe gannyen se i pe mars tre byen.  Mersi bokou Mr Speaker.

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Mr Speaker, eski Minis i kapab enform sa Lasanble si bann dimoun ki’n fer lenvestisman dan lenerzi renouvlab, si PUC in komans aste bann kouran ki ekse avek zot.  Mersi.

 

MINISTER ROLPH PAYET

Mersi bokou Mr Speaker.  Parey mon ti’n fer sorti dan mon larepons, bann prosedir pou kapab aste kouran i ankor pe ganny ekrir malgre Lalwa i fer sa provizyon, bann prosedir pou zot aste kouran pa ankor ganny met anplas.

I annan serten endividi ozordi dan Sesel, i annan enn ou de ki pe prodwi kouran sirplis me zot pa ankor kapab fer provizyon pou zot vann sa avek PUC.  E sanmenm sa mon’n fer resorti dan mon kestyon orizinal se annou fer lenvestisman dan lefikasite sa bann lekipman ki nou annan dan lakour, annou fer lenvestisman dan bann lenerzi pou nou prop bezwen an mezir ki PUC, pa PUC sa se Seychelles Energy Commission ki pou fer sa bann prosedir.  I met anplas sa bann prosedir pou dimoun kapab vann kouran avek PUC. Mersi bokou Mr Speaker.

 

MR SPEAKER

Onorab David Pierre, kestyon 93.

 

HON DAVID PIERRE

Mersi Mr Speaker.  Mr Speaker, eski Minis i kapab enform sa Lasanble si son Minister i annan okenn plan pou antrepann en letid avek bi pou devlop en risk map dan nou pei Sesel.  Mersi Mr Speaker.

 

MINISTER ROLPH PAYET

Mersi bokou Mr Speaker.  Mersi Onorab Pierre pou ou kestyon.  Mr Speaker, apre tsunami 2004, Gouvernman ti etablir sa ki nou apel son Departman Risk ek Dezas e la demars ti ganny fer pou rod lasistans avek bann diferan partener etranzer pou devlop en risk map pou nou pei.  A sa moman la, nou bann teknisyen zeolozik ti zis baze dan Minister ki ti fer leksplorasyon petrol e nou ti bezwen rod kapasite pou nou devlop bann teknisyen zeolozik pou nou kapab fer bann resansman bann zone de risk.

An 2008 avek lasistan UNDP, Departman Risk ek Dezas avek partisipasyon Minister Devlopman Lokal ti devlop bann plan o nivo distrik.  E dan sa plan dan tou le 25 distrik, nou ti idantifye bann diferan risk ki sa bann distrik i fer fas avek.

Risk mapping, mapping.  Sa lapros ki nou servi pou tou distrik ti ganny fer e sa i ti ganny atase avek plan distrik.  Lo sa map i montre nou tou landrwa ki vilnerab oubyen landrwa ki annan potansyel pou li ganny inonde.  Byensir sa map i en zouti travay, i pa en zouti final akoz parey zot konnen devlopman i kontinnyen, risk i sanze letan devlopman i kontinnyen.  Sa travay i bezwen ganny fer osi lo nivo son rezolisyon.  Nou kapab annan en map ki lo nivo global en distrik me selman i pa nou nivo en kominoter, en kanton pou nou idantifye sak ros, sak gale, sak larivyer e sak ou kapab dir ba fon akoz pou nou kapab idantifye bann landrwa inondasyon, ou bezwen fer survey, ou bezwen pran bann mezir survey e tou sa bann keksoz parey mon’n mansyonnen i dinamik.  Alor nou bezwen kontinnyen envestir pou nou fer sir ki tou bann risk map i reste azour e osi nou devlop li lo en rezolisyon ki demen nou kapab servi li dan bann ka dezas e lo sa ka planifikasyon parey Planning Authority. Mersi Mr Speaker.

 

MR SPEAKER

Onorab okenn siplemanter?

 

HON DAVID PIERRE

Mersi Mr Speaker.  Mr Speaker premyerman, an relasyon avek repons Minis, eski Minis i kapab dir avek sa Lasanble si zot annan en striktir anplas pou zot update sa bann risk maps ki Minis in koz lo la.

E dezyenmman, eski Minis i kapab enform sa Lasanble si son Minister i annan en proper oubyen en bon flood hazard data system e si zot in kapab devlop en bon sound and practical hazard mitigation plan pou Sesel pou ki alavenir nou kapab mitigate e deal pli byen ek bann risk asosye ek bann dezas kot nou a kapab kre bann kominote ki pli safe e pou nou kapab ede redwir bann perd lavi e perd propriyete dan bann dezas alavenir.  Mersi Mr Speaker.

 

MINISTER ROLPH PAYET

Mersi bokou Mr Speaker, nou’n sorti lwen.  Letan nou’n fer fas ek dezas dan lepase nou’n kontinnyen devlop nou kapasite ek nou resours pou nou kapab prevent bann dezas.  Prevansyon dezas i en travay primordyal e i en komitman sa Gouvernman pou fer sir ki nou annan ase prevansyon akoz i kout bokou pou fer reabilitasyon e osi pou sorti dan en dezas.  E sa bann demars ki’n ganny fer, par egzanp, nou’n apros diferan Gouvernman atraver lemonn, Gouvernman Zaponnen ki parey zot konnen i annan earthquake, i annan tsunami i annan bann diferan dezas zot fer fas laba ki pe ed nou deza anba JICA pou nou devlop.  Nou’n apros Gouvernman Cuba ki annan bann lanvironnman parey pou nou ki zot osi zot fer fas avek bann Hurricane tou le lannen, e parey ou konnen Cuba i enn bann pei dan Karaib ki soufer mwens sa bann lenpak dezas konpare ek lezot pei akoz zot sistenm zot in devlope atraver letan, sistenm ki’n ganny teste.  Nou osi travay avek diferan lorganizasyon dezas pou nou kapab kontinnyen devlop nou kapasite.  Nou annan nou bann travayer dan DRDM, Departman Risk ek Dezas ki pe ganny training, i annan enn ki pe finaliz son Master, i annan lezot ki pe ganny idantifye pou fer training.

Nou annan nou sistenm GIS ki pe ganny ranforsi akoz san en sistenm GIS nou pa pou kapab enterpret sa bann lenformasyon pou nou fer devlopman, pou nou fer bann diferan semen, drenaz.  I annan bann travay detaye ki’n ganny fer par egzanp pou bann distrik, par egzanp Anse Aux Pins, Au Cap, Point Larue, La Digue ki kout ase ser me selman pe ganny fer pou kapab ed nou pou fer pli bon planifikasyon dan sa bann landrwa.

E parey nou’n mansyonnen avan, ti annan bann travay ki’n ganny fer dan lepase ki’n ganny pran bann nivo, ki’n ganny vwar bann gran size bann pon e sa i en travay ki on-going e i baze lo kapasite ki nou bezwen devlope Sesel pou fer sir ki nou kapab redwir bann dezas.

Nou annan bann prosedir anplas e sa bann prosedir pe kontinnyen ganny teste.  Parey ou konnen nou annan bann mock exercise ki ganny fer dan ka dezas, dan ka delwil ki ganny zete dan lanmer, dan ka bann dezas medikal, dan ka bann risk kemikal.  Tou sa bann legzersis i ganny fer atraver lannen.  Ki nou involve tou nou bann lorganizasyon.

I annan osi bann legzersis de-tab, savedir lo latab, ki ganny fer pou vwar bann nimero telefonn, bann dimoun ki sanz telefonn, bann lenfrastriktir anplas, bann lekipman ki gannyen.  Sa travay i ganny fer ou kapab dir, toultan e nou pou kontinnyen met an plas bann striktir pou kontinnyen fer sir ki nou kapab redwir risk dan nou pei.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Mersi Mr Speaker.  Bonzour tou dimoun alekout.  Mr Speaker, an lir ek repons Minis, eski Minis i kapab dir nou ki demars son Minister pe fer an kolaborasyon avek Minister Litilizasyon Later ek Lakaz pou vwar bann lakaz ouswa housing estate ki’n kapab ganny konstri en bon pe letan pase ki dan bann risk zone.  E an vi serten konsern later desann e lakaz pe fele parmi lezot konsern.  Mersi.

 

MR SPEAKER

Request Minister.

 

MINISTER ROLPH PAYET

Mersi Mr Speaker, mersi Onorab pou ou kestyon.  Letan Prezidan ti setup the task force pou dezas, mon Minister osi in setup en sou komite ki konsern bann housing estate.  E sa sou komoite i sipoze fer en survey tou bann housing estate dan Sesel e idantifye pou nou, tou bann diferan risk sa bann housing estate i fer fas avek.  Sa legzersis pa ankor fini e mon a swete letan sa legzersis in fini ki i ava donn nou lo en nivo priyorite ouswa lo en baz bann diferan issues ki nou annan avek sa bann diferan housing estate.  So, sa travay pe ganny fer.  Mersi Mr Speaker.

MR SPEAKER

Bon nou’n ariv alafen Question Time, nou ava ekskiz Minis e remersye li pou pas bomaten avek nou.  Minis e son delegasyon.

Avan nou terminen nou pou pran 2 First ReadingsInsolvency Bill avek Companies (Amendment) Bill.   Mon a demann Clerk pou fer First Reading.

 

THE CLERK

This Act maybe cited as the Insolvency Act, 2013.

This Act may be cited as the Companies (Amendment) Act, 2013.

 

MR SPEAKER

Bon mersi e mon oule enform le 2 leaders nou pou fer ABC 11er olye 11.30 e nou ava adjourn ziska Mardi prosen, 9er bomaten.

(ADJOURNMENT)