::
Home » Verbatim » Verbatim - Third Term 2012 » Tuesday 6th November, 2012

Tuesday 6th November, 2012

NATIONAL ASSEMBLY OF SEYCHELLES

Tuesday 6th November 2012

The Assembly met at 9am

National Anthem

Moment of Reflection

Mr Speaker in the Chair

MR SPEAKER

Bonzour tou bann Manm Onorab, bonzour Minis ek son delegasyon, bonzour tou bann dimoun ki pe ekout nou dan lakour.  Ozordi avek nou i annan Minis pou Ledikasyon, Minis Macsuzy Mondon ki pe vin reponn plizyer kestyon konsernan son Minister e nou ava komans avek premye kestyon par Onorab Kevin Vidot, Manm Elekte pou Larivyer Anglez.  Kestyon 126.

 

HON KEVIN VIDOT

Mersi, bonzour Mr Speaker, bonzour Minis, Koleg e tou dimoun ki alekout.  Mr Speaker avek ou permisyon, eski Minis pou Ledikasyon i kapab eksplik avek sa Lasanble si son Minister i annan lentansyon redevlop e moderniz lekol Larivyer Anglez avek bann fasilite neseser pou asire ki etidyan e ansennyan i ganny en lanvironnman konvenab pou etidye e ansennyen respektivman? Mersi.

 

MINISTER MACSUZY MONDON

Bonzour Mr Speaker, bonzour tou Manm Onorab e bonzour tou dimoun ki pe ekout nou dan lakour.  Mr Speaker, Minister Ledikasyon i annan plan pou redevlop lekol Larivyer Anglez.  Sa i pou ganny fer dan kad proze redevlopman bann lekol dan Lavil.

Mr Speaker, i annan serten travay renovasyon ki’n komans ganny fer kot lekol sa lannen e ki pou kontinnyen an 2013 avek bi rann lanvironnman lekol pli konvenab pou etidyan avek ansennyan.  Mersi Mr Speaker.

 

MR SPEAKER

Onorab Vidot, okenn siplemanter?

 

HON KEVIN VIDOT

Mersi Mr Speaker.  Mr Speaker eski Minis i kapab reasir nou Lasanble ozordi ki lanvironnman lekol e kantite laklas ki egziste ozordi e fasilite ki egziste ozordi i kapab soutenir bezwen kantite etidyan ki annan dan sa lekol e si vreman nou annan ase asennyan pou ansenny nou bann zanfan osi ki ler nou bann zanfan i sorti, i sorti avek en kalifikasyon ki neseser? Mersi Mr Speaker.

 

MINISTER MACSUZY MONDON

Mr Speaker, fasilite ki nou annan pou lemoman nou servi li o pli maximum posib e wi mon satisfe menm si petet nou santi nou lakantite zanfan ki nou annan ki parfwa nou rankontre serten difikilte me sa i pa pe annan en gro lenpak negativ lo letid bann zanfan.  Donk, mon ase satisfe e otan ki mon okouran, loekol Larivyer Anglez napa en gran mank ansennyan.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker, bonzour Minis, bonzour tou dimoun ki alekout.  Mr Speaker, si ou permet mon avan mon demann mon kestyon, lo non Parti mazoriter mon ti ava kontan pas nou senpati a Prezidan Michel e a ou menm Speaker ki toulede sa semenn zot in perdi enn manm zot fanmiy pros.  Mersi Mr Speaker.

Mr Speaker, mon kestyon i lir koumsa.  Ki Minister Ledikasyon pe fer an sa ki konsern zesyon lespas lekol Larivyer Anglez, etan donnen ki lespas ki egziste kot sa lekol i vreman ankonbre e preski napa okenn plas pou sa lekol expand e sa i fas a logmantasyon popilasyon sa lekol e osi pozisyon sa lekol ki sitie dan en landrwa kot i annan en kantite konzesyon trafik.  Mersi.

 

MINISTER MACSUZY MONDON

Mr Speaker, parey mon’n mansyonnen nou annan en plan pou redevlopman bann lekol dan Lavil e sa i pou osi enkli lekol Larivyer Anglez e dan plan osi i annan propozisyon, oubyen konsiderasyon in ganny fer pou en nouvo lekol lo Lil Oror.  Donk mon krwar, letan ki nou plan in ganny aprouve e letan ki nou komans met tou bann keksoz an plas, lekol Larivyer Anglez i ava vwar li dan en pli bon sityasyon pou li kapab zer bann fasilite ki i annan.

Parey nou konnen, dan compound lekol Larivyer Anglez i osi annan en lakres e lo sa travay ki nou pe al fer lo plan devlopman bann lekol dan Lavil, nou pou bouz sa lakres dan compound lekol Larivyer Anglez e sa i ava fer ki lekol i ava annan plis lespas pou nouvo konstriksyon ki nou pou bezwen fer alavenir. Donk, dan plan nou pou bezwen deside, i annan serten travay ki pou ganny fer e i anba travay renovasyon me i annan osi travay nouvo konstriksyon ki nou pou fer lo premis lekol. Mersi Mr Speaker.

 

MR SPEAKER

Onorab Dugasse.

 

HON MELVAL DUGASSE

Mersi Mr Speaker, bonzour Minis.  Minis an vi ki lakantite etidyan lekol Larivyer Anglez, eski ou Minister pe mazinen pou rezourd bann problenm furniture ki lekol Larivyer Anglez ti request pandan 2an pase e si Minister i annan lentansyon konstrir e multi purpose hall pou bann etidyan kapab rasanble?  Mersi Mr Speaker.

 

MINISTER MACSUZY MONDON

Mr Speaker wi, dan plan redevlopman lekol nou annan plan pou nou konstrir en multi purpose hall, an plis ki bann nouvo lezot keksoz ki nou anvi mete dan bann nouvo lekol segonder, par egzanp, changing rooms, shower, room pou performing arts, bann laklas adisyonnel pou vokasyonnel ki nou bezwen konstrir, bann additional computer room kot nou santi nou bezwen mete e tou bann lezot room ki nou santi nou napa pou lemoman me ki nou bezwen azoute.  Donk, sa i dan nou plan ler nou carry out bann renovasyon mazer lo tou bann lekol segonder dan pei e bann nouvo lasal ki nou pou azoute avek lekol e sa i pou enkli osi lekol Larivyer Anglez.  Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker, eski Minis i kapab dir ek sa Lasanble, kan ki son Minister pou enform bann distrik Lavil konsernan son plan proze redevlopman bann lekol Lavil e kan ki son Minister i anvizaze ki sa plan i komanse?  Mersi.

 

MINISTER MACSUZY MONDON

Mr Speaker, tou bann travay de baz, legzersis in fini ganny fer e en proposal in fini ganny devlope.  Nou next phase la se pou nou rankontre tou bann lotorite distrik ki konsernen par bann lekol dan Lavil pou nou diskit nou plan avek zot e apre byensir anmenn plan kot Gouvernman pou laprouvasyon, avan ler ki nou enplimante.  Mersi Mr Speaker.

 

MR SPEAKER

Kestyon 127, Onorab Jacqueline.

HON SULTANE JACQUELINE

Mersi Mr Speaker.  Bonzour Minis avek tou sa ki’n akonpanny ou, bonzour Koleg Onorab.  Eski Minis i kapab enform sa Lasanble kimannyer sa nouvo Scheme of Service ki ti ganny enplimante an 2010 pe ede dan motiv bann ansennyan pou reste dan zot lanplwa?  Mersi Mr Speaker.

 

MINISTER MACSUZY MONDON

Mr Speaker, enn parmi bann bi sa nouvo Scheme of Service sete pou ankouraz teachers pou reste dan sistenm skoler.  Me menm si bokou zefor ti ganny mete dan revizyon sa scheme, tou lendikasyon i montre ki pou retenir ansennyan dan profesyon i reste touzour en gran defi pou nou Minister parske i annan lezot fakter ki osi determinen si en dimoun i reste dan sa travay ou pa.

Sepandan Mr Speaker, dapre statistik, nou’n annan en pti rediksyon lo kote resignation pandan sa 3 dernyen lannen parmi bann ansennyan.  Mersi Mr Speaker.

 

MR SPEAKER

Onorab Jacqueline, okenn siplemanter?

 

HON SULTANE JACQUELINE

Mr Speaker, eski Minis i kapab eksplik sa Lasanble ki bann fakter ki pe koz sa low job satisfaction dan bann ansennyan?  Mersi Mr Speaker.

 

MINISTER MACSUZY MONDON

Mr Speaker, i annan plizyer fakter ki kapab koz low job satisfaction.  I pa neseseman dabor e avan tou en fakter finansman menm si petet finansman i zwe en rol, me parey nou konnen, menm si larzan i motiv nou, i motiv nou pour en serten letan me ler i ariv en staz kot i pa ase, kot sa motivasyon i fini, nou krwar ki nou bezwen ankor finans pou motiv nou.  Me selman i annan lezot fakter, par egzanp, parey nou tou nou konnen latitid serten zanfan, mank korperasyon paran, tre souvan lansennyman i ganny regarde koman en profesyon ki petet i anmenn bokou stress, se pou sa rezon ki dan scheme nou ti met en pe bann incentive ki pou cater en pe pou sa bann letan anplis ki en ansennyan i bezwen pase pou li kapab prepar son travay, prepar son leson eksetera.  E osi nou konnen enn bann fakter se ki i annan bokou loportinite lanplwa ayer e tre souvan package ki lezot landrwa travay i ofer i parfwa pli atiran, sirtou dan sekter prive e byensir i annan osi ki dir ou ki i bezwen rod lezot leksperyans.

Me dernyenman mon krwar enn bann keksoz ki petet bann ansennyan i koz bokou lo la se paran akoz mon konnen poudir i annan ansennyan ki’n menm demann nou, dan bann lekol kot nou’n al fer meeting avek bann ansennyan.  Par egzanp, zot in dir nou poudir in ler osi pou nou komans sanksyonn bann paran akoz deplizanpli i vin pli difisil pou zot travay avek paran dan kominote e dan lekol.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker, bonzour Mr Speaker, bonzour Minis ek ou delegasyon e bonzour tou dimoun.  Mr Speaker, eski Minis i kapab enform nou Lasanble konbyen ansennyan Minister Ledikasyon in perdi pandan sa dernyen 2an apre lentrodiksyon Scheme of Service dan primer, segonder e pos segonder e anmenmtan, eski Minis i kapab osi enform nou si Minister i annan plan pou reviz sa scheme of service tre byento pou fer li vin pli konpetitiv e fer ki bann ansennyan ki’n kit profesyon i retournen?  Mersi.

 

MINISTER MACSUZY MONDON

Mr Speaker, statistik ki mon annan pou 2010 avek 2011.  An 2010, nou ti perdi 21 ansennyan primer, 21 ansennyan segonder e 9 ansennyan pos segonder.  An 2011, nou’n perdi 8 ansennyan primer, 16 ansennyan segonder e 11 ansennyan pos segonder.

Kot i konsern revizyon Scheme of Service Mr Speaker, parey mon ti dir deryen fwa, revizyon scheme i normalman fer tou le 5an.  Me an vi travay ki Minister Ledikasyon pe fer kot i konsern rekritman e bann stratezi pou retain bann ansennyan dan profesyon, si nou santi poudir i annan en nesesite pou fer en rekomandasyon pli boner avek Gouvernman pou en revizyon Scheme of Service avan 5an, nou ava fer li, mersi Mr Speaker.

 

MR SPEAKER

Onorab Valmont.

 

HON SYLVIANNE VALMONT

Mersi Mr Speaker, bonzour Mr Speaker, bonzour Minis.  Eski Minis i kapab dir nou premyerman, si vreman sa Scheme of Service ki in mete i annan en lefe oubyen i merit revize o pli to ki posib e dezyenmman, si i annan okenn lezot mekanizm an plas pou asire ki i kapab retenir bann teachers dan zot lanplwa, mersi.

 

MINISTER MACSUZY MONDON

Mr Speaker, mon krwar mon’n deza komans reponn en pe premye kestyon me selman mon panse osi ler nou regard scheme, ler nou’n met en scheme an plas nou pa regard zis si i pe retenir bann ansennyan dan profesyon, me nou osi regarde si i pe annan en lepak pozitiv lo performans bann ansennyan.

Mon krwar Minister, parey mon’n dir pou pare pou li rekomann en revizyon scheme si nou santi nou bezwen fer li, me anmenmtan osi i pa zis en kestyon toultan pe demann plis larzan avek Minister Finans pou ogmant bann renimerasyon, bann incentive ki nou annan dan scheme.  Me ler nou fer demann pou plis larzan dan scheme, nou bezwen osi montre poudir i annan en lenpak pozitiv lo performans nou bann ansennyan e nou bezwen demontre poudir, wi, nou bann ansennyan pe travay dir e nou krwar poudir in ler pou nou kapab reviz scheme e pou rekomans zot en pe pli byen.  Mon krwar nou bezwen osi balans sa en pti pe.

Mr Speaker, si mon kapab demann li pou repet ……  Bon, lezot mekanizm, parey mon krwar mon ti anonse, nou’n met en komite dan Minister Ledikasyon pou nou revwar en pti pe ki bann lezot mekanizm ki nou bezwen met ansanm.  Par egzanp nou annan sa ki nou’n lanse, nou apel en Celebrating Teachers Project ki nou sey fer bann aktivite, pou nou kapab ankouraz bann ansennyan pou partisip dan serten proze.

Nou’n osi pe travay lo en nouvo plan, lo kimannyer nou rekonnet travay ki bann ansennyan i fer, akoz parey mon’n dir, i pa zis en kestyon finans me osi lezot keksoz ki antre.  Nou annan en nouvo teacher appraisal ki nou pou enplimante lannen prosenn akoz mon krwar enn petet osi bann sours, bann demotivasyon bann ansennyan, ansennyan i dir ou whether ou travay byen oubyen ou pa pe travay byen i pa fer diferans akoz finalman tou dimoun i ganny rekonpanse parey dan scheme.  Donk mon krwar sa sistenm appraisal ki nou pou met an plas i ava osi ede pou motiv bann ansennyan ki travay byen e osi pou fer bann ansennyan ki pa pe travay osi byen pou kapab fer en pli bon travay letan nou’n met sa appraisal an plas.

Nou bezwen osi rod plizyer fason pou nou kapab diversifye kalite petet rekonpans ki nou donnen.  Par egzanp, mon konnen dan sa 2 dernyen lannen, otan ki posib letan nou’n ganny bann pti study tours overseas, nou’n swazir bann ansennyan ki pli performan pou nou kapab koman en pti reward pou zot ki nou’n kapab anvoy zot pou zot kapab santi poudir be kan mon travay dir mon ganny rekonnet.  Donk i annan plizyer keksoz ki nou pe fer o nivo sa komite e byensir ofir e anmezir ki nou travay i kontinnyen nou ava komans enplimant sa bann stratezi ki nou pe travay lo la.  Mersi Mr Speaker.

 

MR SPEAKER

Onorab De Commarmond.

HON CHARLES DE COMMARMOND

Mersi Mr Speaker, bonzour tou dimoun.  Mr Speaker, eski Minis i kapab eksplik nou Lasanble si i annan gran disparite ant saler bann ansennyan Seselwa e bann etranze dan son bann lekol e si i pe mazin recruit plis etranze pou ranplas bann Seselwa, vi ki annan gran mank teachers dan bann lekol?  Mersi.

 

MINISTER MACSUZY MONDON

Mr Speaker, mon krwar avek nouvo Scheme of Service, i napa tro gran diferans dan saler etranze avek Seselwa e kot i konsern kalifikasyon, menm kriter i ganny servi pou pey en travayer etranze.  Byensir, sa ki etranze i gannyen an plis e ki ou bezwen donn zot letan zot vin travay dan ou pei se akomodasyon.  I en incentive pou ou kapab ganny zot pou vin travay kot ou, me kot i konsern saler napa.  Actually, Scheme of Service ler nou’n enplimant li, saler bann ansennyan i annan ki bokou pli bon ki bann saler ansennyan etranze.  Me selman nou’n bezwen vwar nesesite osi resaman pou nou reviz enpe supplementation allowance ki nou donn bann etranze akoz i vin deplizanpli difisil pou nou kapab ganny bann travayer etranze pou vin travay Sesel.

Wi Onorab, zisteman mwan Novanm la, nou pe al fer en recruitment exercise overseas pou nou kapab ranplas nou bann vacant post ki nou pou annan pou lannen prosenn, mersi.

 

MR DEPUTY

Kestyon 128, Onorab Begitta Jeannvol.

 

HON BEGITTA JEANNEVOL

Mersi Mr Speaker, bonzour, bonzour Minis.  Eski Minis i kapab dir ek sa Lasanble ki plan zot annan pou bann non teaching staff konsernan zot saler?  Mersi.

 

MINISTER MACSUZY MONDON

Mr Speaker, dan Minister Ledikasyon i annan plizyer kategori travayer ki fer parti non teaching staff e ki tonm swa dan en kad komen, sa ki nou apel en common cadre, oubyen dan en kad teknik.

Depi lannen 2010, Gouvernman pe fer revizyon saler pou bann diferan kad komen e scheme procurement par egzanp ti ganny enplimante le 1 Zanvye 2012 e lezot scheme in ganny enplimante, in komans ganny enplimante aparti le 1 Zilyey 2012.

Sa i konpri, scheme administrative cadre, accounting, IT, Human Resources avek en scheme pou bann project officers.  An sa ki konsern bann kad teknik pou Minister Ledikasyon, sa bann travayer swivan zot scheme in fini ganny enplimante e sa i enkli school librarian ki ti enplimante an Zilyet 2012, school support specialist ki ti osi enplimante an Zilyet, school councelors ki tonm ansanm avek Social Services cadre, sa ti ganny enplimante an Zanvye 2011 e scheme pou laboratory technician i dan faz finalizasyon e ler i ganny enplimante, i pou ganny pran lefe aparti le 1 Zilyet 2012.  Mersi Mr Speaker.

 

MR SPEAKER

Okenn siplemanter Onorab?

HON BEGITTA JEANNEVOL

Mersi Mr Speaker, eski Minis i kapab donn nou en pe detay sa scheme e dir nou kimannyer sa nouvo scheme in ankouraz bann non teaching staff pou reste dan lekol?  Mersi.

 

MINISTER MACSUZY MONDON

Mr Speaker, mon’n koz lo 8 scheme e mon napa detay sa 8 scheme avek mwan.  Donk mon pa tro konnen lo ki scheme osi ki Onorab pe demann mwan detay lo la.  Me si i annan en scheme an partikilye, mon kapab anvoy ou en kopi sa scheme akoz bann scheme i bann bulky documents ok.  Mersi Mr Speaker.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.  Bonzour tou dimoun.  Mr Speaker, eski Minis i kapab enform sa Lasanble ki pe arive avek larzan ki ban lab technicians ki osi form parti non-teaching staff, larzan ki dan Bidze sa lannen ki Vis Prezidan in dir Departman Ladministrasyon Piblik i ankor pe atann bann dernyen lenformasyon kot Minister Ledikasyon pou finalize e akoz sa Minister pa’n pran bann pa neseser pou kapab enplimant sa scheme atan, lefet ki Bidze pe al terminen?  Mersi.

 

MINISTER MACSUZY MONDON

Mr Speaker, Minister Ledikasyon in fini fer tou son bann ground work kot i konsern sa scheme e tou lenformasyon i dan posesyon DPA.  Larzan pou enplimant scheme i la, tou travay ki nou nou annan pou nou fer ler nou ganny dernyen lenformasyon final avek DPA.  Nou’n fini prepar nou pou nou zis enplimant scheme.

Dernyen lenformasyon ki nou’n gannyen avek DPA akoz nou’n dir zot poudir nou ti a kontan, nou larzan i la e nou ti ava kontan fini enplimant scheme avan lafen lannen pou ki bann lab technicians i ganny zot larzan e DPA in donn nou lasirans ki lafen dimwan Novanm nou pou’n fini ganny tou bann laprouvasyon neseser, en mannyer ki bann lab technicians ava ganny peye tou zot larzan avek zot saler Desanm.  Mersi Mr Speaker.

MR SPEAKER

Onorab Murielle Marie.

 

HON MURIELLE MARIE

Mersi Mr Speaker.  Mr Speaker, an vi ki mazorite sa bann non teaching staff i osi fer bann replacement dan laklas ler napa teachers, eski Minister pe konsider en incentive anplis apard ki zot saler e si ti annan osi meeting konsiltativ avek sa bann non teaching staff konsernan zot saler oubyen zot scheme of service. Mersi.

 

MINISTER MACSUZY MONDON

Mr Speaker, mon pans pa si tou sa bann non teaching staff i al ansennyen dan laklas akoz pa zot tou ki sipoze.  Petet ou ava annan petet en lab technician ki ava manage en laklas zanfan letan zot dan lab, akoz i ansarz son lab, si i annan serten travay ki zanfan ki pe ganny fer.  Librarian i manage son library, en accountant pa pou al teach dan laklas, en office manager mon pa ekspekte li al teach dan laklas oubyen al manage en laklas, donk, mon krwar ladan i tre pe, oubyen i pa ni menm bann dimoun ki la ki mon’n nonmen, zot pa sipoze pe teach dan laklas akoz nou annan bann helpers ki sipoze pe teach dan laklas, zot konnen zot ki sipoze al ede pou al teach dan laklas.  Donk sa i pa en konsiderasyon ki nou mete dan scheme.  Par kont, ler nou annan bann dimoun ki bezwen al pran bann laklas, par egzanp dizon ou annan bann support specialists ki dan Minister Ledikasyon ki bezwen al teach, dizon enn ki en science teacher, mon napa en teacher dan lekol Pointe Larue, nou demann ek sa dimoun, ok ou en science teacher ou ale ou al teach pou sa trimes antye ziska ler nou ganny nou ansennyan.  Scheme i fer provizyon pou peye sa bann dimoun, nou konsider zot konman bann part timers ki al teach e scheme i fer provizyon pou pey zot.

Normalman ler nou pe diskit lo en scheme, nou fer konsiltasyon  avek bann dimoun konsernen.  Kot i konsern bann common cadre ki ganny travay o nivo DPA akoz scheme i responsabilite DPA.  Donk, tou bann common cadres se DPA ki travay lo la.  Mon panse i annan bann travay neseser ki ganny fer avek konsiltasyon neseser ki ganny fer kan i fodre avek serten sa bann diferan group.  Me ler i konsern en group teknik pou Minister Ledikasyon kot nou ki bezwen fer bann travay pou rekomann avek DPA.  Wi, nou fer bann travay konsiltasyon parey nou fer avek ansennyan letan nou pe fer bann travay lo zot scheme pou nou kapab submit, pou DPA kapab fer bann travay final lo la.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Thank you Mr Speaker, Mr Speaker, eski Minis i kapab dir nou si bann school auxiliaries ouswa general helper i ganny konsidere konman non teaching staff e ki son Minister pe fer pou zot e ki pe arive osi avek larzan bann child minders?  Mersi.

 

MINISTER MACSUZY MONDON

Mr Speaker, nou napa school auxiliaries konmela, nou annan sa ki nou apel general assistant.  E bann general assistant zot napa en scheme pou zot, an vi natir zot travay.  Se pou sa rezon zot apel general assistant.  Donk, ziska prezan zot pa tonm dan okenn scheme.  Kot i konsern larzan bann child minders, mon krwar travay in fini ganny fer.  Parfwa nou ganny serten difikilte akoz nou annan plis child minders dan lekol.  E mon krwar nou konnen poudir larzan pou child minders nou ganny dan Children’s Fund pou nou pey avek e parfwa nou pa kapab arive pou pey child minders tou le mwan, petet nou pey zot tou le 2 mwan.  E kan larzan pa ase nou bezwen al dan Bidze pou nou kapab rod larzan dan financial assistance pou nou kapab pey nou bann child minders.  Se pou sa rezon ki parfwa nou annan serten pti retar avek larzan pou child minders, me selman mon panse bann child minders pe….., mon krwar ti annan en pti retar 2 mwan me mon krwar sa mwan zot pe fini ganny peye zot larzan ok.  Mersi Mr Speaker.

 

MR SPEAKER

Kestyon 129, Onorab Jeannvol.

 

HON BEGITTA JEANNEVOL

Mersi Mr Speaker.  Eski Minister Ledikasyon i annan plan pou revwar sekirite dan lekol, an vi lakantite vandalizm in kontinnyelman ogmante malgre sekirite prive ki vey lekol?  Mersi.

 

MINISTER MACSUZY MONDON

Mr Speaker, depi 2006, Minister in outsource son servis sekirite kot lekol.  Lo komansman ti napa bokou security firm ki ti’n anrezistre, alor nou ti vwar li neseser pou nou allocate en gran group lekol avek en sel lazans sekirite.  Sa ti koz bokou difikilte akoz serten parmi sa bann firm pa ti neseserman kapab delivre dapre lekspektasyon nou Minister.

Mr Speaker, parey nou konnen, avek lankourazman Gouvernman bokou plis dimoun in aprezan envestir dan sa biznes e sa in fer ki in annan en logmantasyon dan lakantite lazans sekirite ki’n partisip dan nouvo tender.

An rezilta sa, bann lazans sekirite in ganny donnen mwens lekol pou veye e nou ekspekte ganny en pli bon servis avek zot.  An vi ki Minister i ganny afekte bokou kan i annan vol avek vandalizm nou’n vwar li neseser pou fer antre dan kontra en clause ki pou permet nou reklanm bann kou ki asosye avek bann akt vol oubyen vandalizm ki arive.  Reklanm sa bann kou avek sa lazans sekirite, si ler nou’n fer lenvestigasyon e lenformasyon i montre ki i annan neglizans lo zot par.  Mersi Mr Speaker.

 

MR SPEAKER

Onorab Jeannevol, okenn siplemanter?

 

HON BEGITTA JEANNEVOL

Wi Mr Speaker, mersi.  Eski Minis i kapab dir nou ki arive ek en dimoun ki ganny trouve koupab pou vandalizm dan lekol e parey Minis in dir zot in reklanm sa kou avek sa lakonpannyen sekirite, eski i annan okenn ka ki sa in deza arive?  Mersi.

 

MINISTER MACSUZY MONDON

Mersi Mr Speaker.  Be bann dimoun ki ganny trouve koupab byensir i ganny met dan lanmen lapolis e en case i ganny fer e wi, dan ka dan lepase kot nou’n santi poudir in annan nesesite ki nou reklanmen, sa in ganny fer o nivo Minister e sa lazans sekirite in ganny demande pou meet the cost bann keksoz ki’n perdi.  Mersi Mr Speaker.

 

MR SPEAKER

Onorab Bristol.

 

HON ALDERIC BRISTOL

Mersi Mr Speaker.  Mr Speaker, eski Minis i kapab enform sa Lasanble ki bann kriter ki gid son Minister ler zot pe swazir bann sekirite pou vey bann lekol Gouvernman? Mersi bokou.

 

MINISTER MACSUZY MONDON

Mersi Mr Speaker.  Kriter ki nou servi i byensir baze lo bann spesifikasyon ki nou gannyen dapre bann biding instructions e sa pou nonm enn de par egzanp i sa quotation ki sa lazans sekirite in donnen, si nou santi i within sa margin ki Minister in set, ki nou santi pou sa lazans kapab arive realiz sa travay.  Byensir osi i bezwen en lazans ki’n anrezistre e ki annan en licence ki valid.  O nivo Minister nou osi, si en lazans ki’n deza travay avek nou, nou osi regard son performans dan lepase, son servis ki in donn nou, si nou satisfe avek, si nou krwar profil son lakonpannyen osi, nou krwar poudir i kapab donn nou en bon servis e byensir in bezwen kapab respekte tou bann kriter ki ganny demande, bann kondisyon ki ganny met an plas aparti tender document.  Mersi Mr Speaker.

MR SPEAKER

Onorab Fideria.

HON EMMANUEL FIDERIA

Mersi Mr Speaker, bonzour Minis.  Mr Speaker eski Minis i kapab enform sa Lasanble konbyen in kout Minister ou Gouverman, an term finansyel pou konbat sa problenm vandalizm kot lekol dan sa dernyen 3an.  E lot kestyon eski Minis osi i kapab enform sa Lasanble si i annan okenn ka kot en lazans sekirite limenm li in involve dan vandalizm kot lekol?  Mersi.

 

MINISTER MACSUZY MONDON

Mr Speaker, mon napa figures, mon pa tro konnen.  Si nou pe koz lo vandalizm ki arive entern o nivo lekol, par egzanp ki bann zanfan i fer, sa nou konnen poudir an mwanyenn petet en lekol i kapab ariv ant en R3,000 oubyen  a R4, 000 dan en lannen.  Akoz kot i konsern vandalizm par bann zanfan, nou santi poudir i annan en rediksyon e nou pa pe gannyen sa lakantite vandalizm parey nou ti pe gannyen avan.

E kot i konsern sekirite, mon napa lenformasyon pou mwan donn ou pou dir ki kantite ki’n kout Minister me si ou oule lenformasyon spesifik nou kapab fer ou gannyen apre.  Mersi.

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker, eski Minis i kapab enform nou ki sort of internal monitoring system zot annan an plas pou asire ki sa bann lakonpannyen sekirite pe deliver e ki zot lo site a tou moman, sirtou pandan letan weekend?  Mersi.

 

MINISTER MACSUZY MONDON

Mr Speaker, nou annan nou monitoring, nou spot check ki nou nou fer o nivo Minister Ledikasyon e anmenmtan osi kot nou santi poudir nou bezwen lasistans lapolis pou kapab donn nou en pe lasistans pou nou kapab monitor en pe travay ki bann sekirite i fer, nou ganny lasistans lapolis, sirtou dan serten lekol kot nou santi poudir petet nou pe fer fas avek plis problenm, oubyen si nou santi en lazans sekirite nou pa tro satisfe e nou anvi monitor en pe pli byen travay ki pe ganny fer.  Mersi Mr Speaker.

 

MR SPEAKER

Onorab Vel.

 

HON JENIFFER VEL

Mersi Mr Speaker, bonzour tou dimoun.  Mr Speaker eski Minis i kapab dir nou Lasanble si depi 2010 ki son Minister in outsource sa servis sekirite kot bann lekol, si in annan en logmantasyon dan vandalizm kot bann lekol, konpare avek letan kot Minister Ledikasyon ti anploy bann …… watchmen kot bann lekol?  Mersi.

 

MINISTER MACSUZY MONDON

Mr Speaker, mon krwar ler nou ti anploy watchmen petet ti en lot letap.  Nou ti ganny serten problenm, me pa menm kalite problenm ki nou pe gannyen konmela e bann problenm ki nou pe gannyen konmela, mon krwar nou tou nou konnen bann problenm ki annan dan kominote e bann keksoz ki nou fer fas avek preski toulezour.  Me selman mon kapab dir poudir avek sa dezyenm group lazans sekirite ki nou’n donn kontra, nou santi en amelyorasyon dan bann problenm ki nou pe rankontre avek lekol.

Pou lemoman, mon kapab dir nou annan petet 2 lekol ki nou pe rankontre problenm en pti pe plis e sa sete Mont Fleuri avek Pointe Larue e pou sa 2 lekol nou’n komans en proze pilot ki nou pe travay, ki nou pe fer konzwentman avek sa ki nou apel sensitive building security, kot nou pe fer zot fer en travay avek nou pou nou vwar egzakteman kwa ki problenm, kwa egzakteman ki nou bezwen pou nou kapab ranforsi oubyen annan en sistenm sekirite ki mars byen kot nou lekol.  Sa proze nou fek komans ki trwazyenm trimes e baze lo lenformasyon ki nou pou gannyen sorti kot sa 2 lekol sa i a permet nou si i annan nesesite pou nou revwar kimannyer nou revwar nou bann sistenm sekirite dan nou bann lekol alavenir.  Mersi Mr Speaker.

 

MR SPEAKER

Kestyon 130, Onorab Arnephy.

 

HON BERNARD ARNEPHY

Mersi Mr Speaker.  Mr Speaker, eski Minis i kapab enform nou Lasanble ki plan son Minister i annan pou asire ki sak lekol primer e segonder i annan en counselor kalifye pou mye ed lekol fer fas e adres bann issues e serten bezwen spesifik bann etidyan?  Mersi.

 

MINISTER MACSUZY MONDON

Mr Speaker, nou plan se ki tou lekol i annan son counselor ki kalifye e ki kapab desarz son responsabilite dan en fason efikas.  Sa i en lobzekstif dan nou plan daksyon pou Renesans Sosyal.

Par kont Mr Speaker, nou rankontre serten difikilte avek rekritman counselors pou plizyer rezon.  An vi natir sa travay, i pa souvan fasil pou nou ganny sa kalite dimoun avek sa kalifikasyon e konpetans neseser ki nou anvi.  Dezyenmman, nou’n osi donn sans nou bann counselors ki dan servis pou swiv Diploma Course dan Social Work avek NIHSS.  Serten counselors in osi ganny sans al fer letid a letranze lo nivo degre.  Sa in fer ki i annan lekol ki’n perdi zot counselor.  Nou’n osi annan enn de counselor ki nou’n formen e ki’n al zwenn lezot Departman ou lazans e Minister i pa’n toultan ganny finansman pou tou bann pos counselor ki nou ti bezwen.  Par egzanp, an 2011 nou ti bezwen 22 pos counselor, me nou ti ganny finansman pou nou kapab anploy zis 11 counselor.

Lo size kalifikasyon, mon ti a kontan azoute Mr Speaker ki Minister i fer osi proper induction e bann short courses attachment pou tou bann nouvo counselor ki nou anploye e ki nou santi napa tou sa kalifikasyon konplet ki nou, nou bezwen pou zot kapab fe sa travay.  Donk, nou sey fer nou mye parey mon’n dir pou ki nou rekrit otan posib counselors pou tou nou bann lekol.  Mersi Mr Speaker.

 

MR SPEAKER

Onorab, okenn siplemanter?

 

HON BERNARD ARNEPHY

Mersi Mr Speaker.  Mr Speaker, eski Minis i kapab donn nou Lasanble sif lo konbyen counselor i manke dan lekol primer e konbyen counselor i manke dan segonder e si son Minister in fer request dan Bidze 2013 pou anploy sa bann counselor ki ti fer request me ki pa ti ganny finansman pou anploy zot? Mersi.

 

MINISTER MACSUZY MONDON

Mr Speaker, an semoman nou annan nou 24 counselors dan post e nou annan 9 lekol primer ki napa counselor.  Sa 24 counselor i ganny reparti ant 14 lekol primer e avek 10 lekol segonder.  Wi Onorab, nou demann pou 2012 nou’n refer ankor avek Finans, nou’n renegosye ankor avek Finans letan nou’n fer mid year review e finalman nou’n ganny tou nou post. Resaman la nou’n ganny laprouvasyon pou nou kapab rekrit pou bann vacancies ki reste nou dan nou bann lekol primer pou sa lannen e byensir lannen prosenn.  Mersi Mr Speaker.

 

MR SPEAKER

Onorab Samson.

 

HON DEREK SAMSON

Mersi Mr Speaker, bonzour.  Bonzour Minis.  Mr Speaker, eski Minis i kapab eksplik nou prosedir kolaborasyon paran, ansennyan, etidyan avek counselor, an ka bann issue kot lekol, problenm disiplin kot lekol e si en counselor i ase pou en lekol e dan lekol pos segonder ki egziste koman en sistenm pou deal ek bann issues etidyan?  Mersi.

 

MINISTER MACSUZY MONDON

Mr Speaker, byensir counselor i annan son rol ki i zwe e kan i annan li pou pran bann aksyon i ganny gide par nou Code of Conduct e i annan prosedir ki etabli o nivo lekol kot en counselor i konnen keler ki i bezwen refer avek Head Teacher, kimannyer i travay avek ansennyan oubyen kimannyer i travay avek paran e menm avek tou bann lezot lotorite ki annan o nivo distrik akoz bann counselor i travay osi avek Social Workers dan distrik e zot osi travay letan i neseser al kot DA.  Donk mon krwar si ou annan ou en bon counselor i pou annan sa bon lapros travay e i pou annan sa bon kolaborasyon ki i fer avek tou bann lezot lotorite dan distrik e enkli osi kan i santi poudir petet sa problenm i, i andeor son kontrol, i konnen poudir i annan lazans parey NCC ki i kapab rod led e anmenmtan dan Minister Ledikasyon, nou annan Students Welfare Unit ki travay tre pros avek bann counselor, ki ed zot par egzanp pou deal avek zot bann cases ki annan dan lekol e mon krwar poudir bann counselor i santi zot lib letan zot anvi pou zot kapab apros sa bann dimoun pou zot kapab kontinnyen fer zot travay.

Kot i konsern si en counselor i ase pou en lekol, mon krwar nou priyorite la se fer sir ki tou lekol i annan son counselor.  Parey mon’n eksplik zot, deza zot vwar difikilte ki nou gannyen pou ganny post pou nou kapab met en counselor dan sak lekol e si nou santi poudir alavenir, depandan grander lekol, i annan lekol ki petet wi, nou bezwen annan 2 counselor me i i pou nesesit ki nou fer ankor demann pou kapab annan plis post counselor pou nou kapab anploy plis.

Kot i konsern bann lekol pos segonder, tou lekol pos segonder i annan sa ki nou apel en Student Affairs Officer e ki fer osi travay counseling avek bann etidyan dan lekol segonder.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Thank you Mr Speaker.  Mr Speaker, an vi ki mazorite zanfan Seselwa i pas atraver lekol sistenm ledikasyon Gouvernman, piblik, eski Minis i kapab dir nou si i annan en sistenm ki i pe met an plas pou ankouraz nou prop zanfan dan nou prop lekol pou pran en karyer koman en counselor, pou pli tar benefisye nou prop lekol e osi si zot in fer en exit interview avek bann counselor ki’n kit lekol, ki’n resign pou konnen vre lakoz akoz zot in ale?  Mersi.

 

MINISTER MACSUZY MONDON

Mersi Mr Speaker.  Wi Onorab nou annan en travay la ki nou pe al fer avek bann school leavers, an vi bann difikilte ki nou gannyen pou ganny counselors, pou nou kapab rekrit en group school leavers e komans prepar zot pou donn zot training pou zot kapab travay koman counselors dan lekol, akoz nou santi poudir i enportan ki nou komans nou menm nou, prepar en group dimoun pou komans travay koman counselors dan lekol.  Onorab mon kapab ganny ou dezyenm bout kestyon silvouple?  Mr Speaker.

 

HON KEVIN VIDOT

Yes Mr Speaker, mersi.  Si zot in fer en exit interview avek bann counselor ki’n resign e konn vre lakoz akoz zot pe ale? Mersi.

 

MINISTER MACSUZY MONDON

Sa enn de counselors ki’n resign in resign pou zot petet zot santi zot pou pli alez al fer en travay dan en lazans ki travay avek zanfan oubyen dan en lot Departman.  Petet zot santi poudir dan lekol, bann cases ki zot bezwen travay avek, swa i bokou oubyen natir travay limenm.  Petet zot pa ti realize natir travay apre zot santi zot ki zot bezwen kite.  Me selman nou napa vreman sa lakantite counselors ki’n resign e mon krwar lannen pase, avek nouvo scheme counselors, nou’n napa okenn counselors ki’n resign an 2011.  Mersi Mr Speaker.

 

MR SPEAKER

Onorab Vel.

 

HON JENIFFER VEL

Mersi Mr Speaker.  Mr Speaker, an vi ki ozordi nou pe fer fas avek bann problenm e sitiasyon ki pa ti egziste oparavan e an vi spesifisite serten lekol par egzanp, Pointe Larue primer ki tonm dan en sensitive zone, eski Minis i kapab dir nou dan rekritman bann counselors si zot pran kont leksperyans koman en fakter enportan pou met dan sa bann lekol ki tonm dan sa kategori?  Mersi.

 

MINISTER MACSUZY MONDON

Mr Speaker wi, normalman letan nou interview bann counselor nou regard osi en pti pe spesifisite lekol.  E ler nou reparti osi bann counselor nou regard en pe ki bezwen sa lekol e nou otan ki posib fer sir ki nou donn sa lekol en counselor ki nou santi i a kapab travay en pe pli byen pou ede kapab deal avek bann issues ki sa lekol i fer fas avek.  E byensir, si nou santi ki en lekol i bezwen en counselor pli eksperyanse nou pou donn li en counselor pli eksperyanse. Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Prenan kont ki lekol La Rosiere i parmi sa 9 lekol primer san en counselor e pli gran lekol primer avek 1208 etidyan, eski Minis i kapab dir avek sa Lasanble ki son Minister pe fer dan limedya pou rezourd sa problenm mank counselor dan sa lekol e ki mekanizm ki annan an plas dan sa lekol pou deservi plizyer sa bann zanfan ki bezwen servis en counselor dan lemoman?  Mersi.

 

MINISTER MACSUZY MONDON

Mr Speaker, lekol La Rosiere nou pe ganny bokou sipor avek Social Worker dan distrik e byensir bann lekol ki napa counselor, Student Welfare Unit i fer fason ki zot travay en pe pli pros avek sa bann lekol pou kapab donn zot en pe plis sipor.  Donk, dan Student Welfare Unit dan Minister osi nou annan bann counselors ki travay dan unit, ki kalifye e nou donn en pe plis sipor sa bann lekol ki nou santi, enkli La Rosiere ki napa en counselor pou lemoman.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker mon ti a kontan demann Minis, etan donnen ki lekol La Rosiere i pli gran lekol primer dan pei e avek en gran kantite problenm sosyal, eski son Minister i kapab konsider sa lekol koman en priyorite pou ganny en counselor, an prenan kont bezwen sa lekol?  Mersi.

 

MINISTER MACSUZY MONDON

Mr Speaker wi, si nou kapab recruit, ki nou pe komans bann prosedir zisteman la, menm si nou’n ganny larzan en pe tar, nou pa krwar nou merit esper lannen prosenn.  Nou’n fini advertise bann post e nou’n ganny en pe laplikasyon, nou pe komans prosedir.  Lekol La Rosiere i enn bann lekol ki letan nou pe apwent bann counselor la avan lafen lannen i pou ganny son counselor.  Mersi Mr Speaker.

 

MR SPEAKER

Kestyon 131, Onorab Charles pa la.  Onorab Fideria i sipoze demann kestyon dan son plas.  Onorab Fideria.

 

HON EMMANUEL FIDERIA

Mersi Mr Speaker.  Mr Speaker, eski Minis i kapab enform sa Lasanble si zot annan okenn lentansyon revwar PSE pou fer li vin relevan pou bezwen e demann zanfan ozordi?  Mersi.

 

MINISTER MACSUZY MONDON

Mr Speaker, koman parti reform dan ledikasyon, nou’n komans revwar progranm PSE.  Nou’n entrodwir citizenship education dan lekol sa lannen, ki ti form en parti entegral PSE.  Citizenship education i lo timetable koman en size e PSE aprezan i kouver bann laspe plito parey lasante, byennet bann zanfan, konpetans lavi, valer moral e imen.

Dan kad reform, revizyon curriculum PSE parey mon’n dir in komanse e definitivman nou pou fer li vin pli azour avek larealite ki nou pe viv ladan ozordi.  Sa i enkli revwar son metodolozi, bann resours ki nou bezwen pou nou ansenny sa size, sipor e osi byen ki formasyon bann ansennyan ki pe ansenny PSE.  Mersi Mr Speaker.

 

MR SPEAKER

Onorab Fideria, okenn siplemanter?

 

HON EMMANUEL FIDERIA

Wi Mr Speaker.  Mr Speaker, eski Minis i kapab dir nou, vi di bann nouvo dinamik ki nou pe vwar dan nou sosyete e kalite problenm e nou vwar ki PSE pe vin en size tre, tre enportan, eski Minister pe mazinen pou ogmant lakantite period ki PSE i ganny teach dan lekol e si dan tou lekol nou annan ase ansennyan kalifye pou teach sa size? Mersi.

 

MINISTER MACSUZY MONDON

Mr Speaker, dan lekol primer nou deza annan 2 peryod PSE avek parey mon’n dir en peryod ki pou citizenship education.  O nivo S1 a S3 nou annan 1 peryod PSE ek 1 citizenship education e o nivo S1, S4 a S5 nou annan en peryod PSE.

Pou lemoman nou napa lentansyon ogmant peryod PSE, me ler nou’n fini fer travay lo revizyon progranm limenm, si nou santi poudir i annan en nesesite nou ava bezwen revwar anlinny avek tou lezot size ki byensir nou annan lo time table.  Akoz nou bezwen konnen nou annan tan peryod dan en semenn e ler ou ogmant lo en size, savedir ou bezwen al rode kote ou pou tire lo sa lot size pou ou kapab donn PSE.  Donk, i en travay ki nou pou bezwen vwar si i annan nesesite e si nou kapab fer li alavenir.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker, eski Minis i kapab dir nou ki plan i annan o nivo primer pou asire ki nou annan specialist teachers pou PSE parey i annan dan segonder e ki plan Minister ouswa ki provizyon pe ganny fer pou asire ki PSE i ganny son vre pla lo time table e non pa ganny servi pou fer lezot size ouswa training danse whatever pandan bann moman festivite?  Mersi.

 

MINISTER MACSUZY MONDON

Mr Speaker, mon krwar PSE o nivo primer i enportan.  Serten size dan primer i enportan ki i ganny ansennyen par sa ansennyan limenm, par sa class teacher akoz nou tou nou konnen poudir PSE i en size ki ase sansib e sa class teacher limenm deza in etablir sa relasyon avek son bann zanfan, donk i enportan ki limenm ki ansenny sa size e mon pa krwar pwennvi ledikasyon i pou byen si nou al met spesyalis dan lekol primer pou al ansenny size PSE.

Dezyenmman, peryod PSE i bezwen ganny servi pou PSE lo time table.  E si i pe ganny servi pou en lot keksoz, sa i pa merit arive.  Boner mon’n koz lo performans ansennyan e enn bann keksoz ki nou pe revwar zisteman se lafason ki curriculum time i ganny servi dan nou bann lekol e si ansennyan pe vreman, dabor e avan tou, servi efektivman son peryod 40 minit ki i ganny servi e si parey ou’n dir Onorab, i pa pe pran serten peryod kot i pe fer lezot keksoz ladan kan i merit pe ansenny sa size ki i bezwen ansennyen.

Donk si sa i pe arive, mon krwar bann Head Teachers i bezwen pe monitor sa tre pros e en ansennyan i pa merit pe servi en peryod PSE pou li fer okenn lezot keksoz ladan, eksepte PSE.  Mersi Mr Speaker.

MR SPEAKER

Onorab Souris.

 

HON MIRENA SOURIS

Mersi Mr Speaker.  Mr Speaker, baze lo larepons Minis kot PSE pou tous en pti pe lo lasante ensidswit e prenan kont sa logmantasyon dan fleo ki relye avek la seksyalite parmi bann zenn.  E nou’n vwar osi ki lansentman ant 15an a 19 an pe ogmante, eski Minis i kapab dir ek sa Lasanble si son Minister pe donn menm lenportans pou size PSE parey lezot size akademik pou zwenn larealite ozordi?  Mersi.

 

MINISTER MACSUZY MONDON

Mr Speaker, tou size ki lo nou time table i enportan e nou merit donn li menm lenportans, whether i PSE, whether i angle, whether i PE, tou sa ki nou vwar nou met lo nou time table pou nou bann zanfan etidye, nou santi poudir i enportan pou zot gannyen letan zot dan lekol primer e letan zot dan lekol segonder e osi letan zot dan lekol pos segonder.

Donk, nou merit pe donn PSE zisteman son lenportans ki li i bezwen.  E mon santi poudir si nou bann ansennyan i servi sa peryod PSE byen, i ava annan en kantite bon travay ki ava kapab ganny fer pou nou kapab deal avek, parey ou pe dir, sa bann issues ki nou pe fer fas avek konmela.  Anmenmtan osi i pa merit neseserman zis esper dan peryod PSE, bann valer ki nou enkilke dan en zanfan.  Sa pou mwan, ou fer li toudilon lazournen dan ou laklas.  Nou annan bann letan ki nou pase ek zanfan avanler ki nou komans bann leson normal.  Nou annan 15 minit bomaten par egzanp, nou annan bann letan ki nou pase en pti pe avek nou bann zanfan avan ler ki nou kit laklas.  Pou mwan, en bon ansennyan i annan en kantite keksoz ki i kapab fer andeor son peryod 40 minit ki i annan pou en leson e ki kapab benefisye sa zanfan.

E petet mon ti ava kontan azoute Mr Speaker, poudir premye ansennyan PSE i en paran e si koman paran nou osi nou komans fer enpe PSE kot lakour, en kantite sa bann problenm ki nou pe fer fas avek dan lavi ozordi i ava rezourd.  E si nou tou nou pran nou responsabilite nou fer nou bout, mon pa vwar akoz nou pa kapab finalman deal avek sa bann social ills ki pe afekte nou sosyete.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Thank you Mr Speaker.  Mr Speaker, eski Minis i kapab dir ek sa Lasanble si zot in pran tou bann rekomandasyon ki sa komite dan reform dan ledikasyon ki ti pe diskit lo PSE, Minister Ledikasyon in pran an konsiderasyon e osi si i pe mazin fer PSE avek civic education vin en examinable subject? Mersi.

 

MINISTER MACSUZY MONDON

Mr Speaker, byensir ler komite pe travay lo curriculum, i annan en travay, en legzersis ki fer e i bezwen pran kont tou bann rekomandasyon ki ganny fer, enkli bann rekomandasyon oubyen bann komanter ki ganny fer par bann ansennyan ki pe ansenny sa size, akoz mon krwar sa i enportan e i annan bokou sa bann konsiltasyon ki nou fer.

Bon, si nou pou fer PSE vin en examinable subject pou lemoman nou pankor ariv la.  Si ler nou bann dimoun, nou bann expert ki pe travay i santi poudir nou merit fer li vin en examinable subject, nou ava fer li si i annan en nesesite.  Mersi Mr Speaker.

 

MR SPEAKER

Kestyon 132 par Onorab Joevana Charles pou ganny demande par Onorab Fideria.

 

HON EMMANUEL FIDERIA

Mersi Mr Speaker.  Mr Speaker, eski Minis i kapab eksplik sa Lasanble ki arive avek en zanfan ki kas oubyen detri bann meb oubyen bann materyo lekol?  Mersi Mr Speaker.

 

MINISTER MACSUZY MONDON

Mr Speaker, provizyon pou restitisyon i ganny fer dan Kod Kondwit primer osi byen ki pou segonder.  Kod i fer resorti klerman, anba seksyon ki koz lo vandalizm ki si ou andomaz oubyen detri materyo e resours lekol ou ava responsab pou repare oubyen pou ranplas zot.  Dan sa ka Mr Speaker, kan en etidyan i komet en tel lofans, son paran i ganny enformen e prosedir i ganny fer kot lekol pou li rann oubyen repare sa ki in detri.

I osi kapab annan konsekans adisyonnel ki lekol i kapab fer, par egzanp sispansyon ek travay ekstra, tel ki osi al donn lanmen aranz bann meb kot nou pe aranze ki kase kot lekol.  Oubyen parfwa, zot ganny donnen bann lezot pti travay pou fer e i annan zanfan osi ki kapab end up avek en warning.  Mersi Mr Speaker.

 

MR SPEAKER

Onorab Fideria, okenn siplemanter?

 

HON EMMANUEL FIDERIA

Yes Mr Speaker.  Mr Speaker, eski Minis i kapab enform sa Lasanble ki i arive ek en zanfan ki repet sa akt pou en dezyenm fwa?  Eski i annan bann mezir pli sever ki Minister ouswa lekol, school management i pran ek sa zanfan?  Mersi.

 

MINISTER MACSUZY MONDON

Mr Speaker, lekol i pou azir baze lo sa ki dir dan Code of Conduct e definitivman, si ou’n fer li ankor en dezyenm fwa ou pou ganny en pinisyon ki en pe pli sever.  Sa laspe kot ou bezwen rann ou ranplase i pou la toultan.  Me si nou vwar poudir ou pe kontinnyelman detri enn, nou pou bezwen vwar si i annan en problenm avek ou, parske en zanfan pa merit pe detri bann keksoz ki i pe servi dan lekol.  Donk, petet dabor, petet i en zanfan ki bezwen osi serten led ki i pe kontinnyen repet sa fot.  Nou bezwen vwar, fer serten travay avek li pou vwar akoz i pe fer sa e byensir apre, pran lezot mezir neseser ki nou santi nou bezwen pran.  E mon krwar i annan tout en travay ki ganny fer o nivo lekol, o nivo paran kot i annan counselor avek counselor pou nou kapab ede.  Akoz mon krwar en keksoz ki nou bezwen realize, nou lentansyon se pa zis pini en zanfan ok.  Nou la pou nou edik zanfan, pou nou ed zot vin pli responsab e dan tou travay ki nou fer, nou toultan annan sa deryer nou lespri.  Mersi Mr Speaker.

 

MR SPEAKER

Onorab Aglae.

 

HON ROMA AGLAE

Mr Speaker mersi.  Mr Speaker, eski Minis i kapab enform sa Lasanble si i annan aktyelman en lekol egzanpler ki pe deza met sa sitiasyon detri meb ou propriyete lekol anba kontrol, pou ki leres lekol i ava esey adopte menm lapros?  Mersi.

 

MINISTER MACSUZY MONDON

Mr Speaker, mon krwar mon’n mansyonn en pti pe taler poudir kot i konsern vandalizm dan lekol limenm, in annan en gran amelyorasyon.  E ler mon to nonmen poudir napa bokou zanfan ki pe detri bann keksoz.  Par egzanp mon kapab dir, mon konnen ti annan en letan kot ler ti ariv vakans kot serten zanfan ti zis kas meb dan lekol ok.  E sa i nepli, nou napa ankor sa bann sitiasyon konmela.  Mon krwar tou lekol in annan en gran amelyorasyon e diferan lekol i servi diferan stratezi, akoz stratezi osi ki ou servi i bezwen ankor enn fwa baze lo en pti pe sa zanfan ki ou pe deal avek, ki kalite zanfan ki ou pe deal avek.  Anmenmtan osi petet ki kalite paran ki ou pe deal avek.  Donk nou tant pou les bann lekol lib pou zot met an plas sistenm ki zot santi ki mars pli byen pou zot lekol.  I annan lekol par egzanp ki dir ou, mon pa demann paran, me mon fer sa zanfan konpran poudir si ozordi in anmenn R25 lekol, i a donn mon R1 lo la.  I a donn mwan R1 tou le semenn oubyen R1 toulezour ziska ler i ava fini peye pou sa keksoz ki’n ganny ranplase.  Apre byensir at the end i annan en sistenm kot i ganny donnen en resi.  Donk ou vwar, anmenmtan avek sa ki nou pe sey fer i annan en ledikasyon ki nou pe sey mete e petet osi ki pa vedir, pa akoz ou’n kase ki toultan ou bezwen kase e ki ou paran i bezwen rann.  Ou osi en zour petet ou bezwen rod en fason dan sa ki ou annan pou ou kapab rann sa ki ou’n kase.  Mersi Mr Speaker.

 

MR SPEAKER

Onorab Murielle Marie.

 

HON MURIELLE MARIE

Mersi Mr Speaker.  Mr Speaker, eski Minis i kapab enform sa Lasanble, si en paran i refize repar oubyen ranplas sa bann propriyete lekol ki zot zanfan in andomaze, ki lot mezir ki son Minister i pran?  Mersi.

 

MINISTER MACSUZY MONDON

Mr Speaker, dabor e avan tou, i pa ganny drwa refize.  Si i refize nou pou deal ek li.  Kantmenm dan gard nou pou met li.  Mersi Mr Speaker.

 

MR SPEAKER

Onorab Samson.

 

HON DEREK SAMSON

Mersi Mr Speaker.  Eski Minis i kapab dir nou si i egziste dan sistenm ledikasyon, en formil kot zanfan i ganny ankouraze pou partisip dan maintenance lekol, kot petet dan vakans zot kapab desann pou ede organiz bann meb e santi en sans ownership anver bann diferan servis ki ofer kot lekol?  Mersi.

 

MINISTER MACSUZY MONDON

Mersi Mr Speaker.  I annan lekol ki fer li.  Parey mon pe dir, i annan lekol kot nou fer reparasyon nou bann meb on site e zanfan i ganny ankouraze pou zot partisip ladan.  Parey ou pe dir devlop dan zot sa sans responsabilite, sa sans ownership, me i pa pe arive dan tou lekol.  Nou napa li koman en sistenm ki nou pe enplimante as such.  Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, eski Minis i kapab eksplik nou Lasanble ki son Minister pe antisipe fer, oubyen planifye pou fer avek bann zanfan ki vreman entolerab dan lekol lo nivo vandalizm, bullying eksetera.  Eski son Minister pe pous ase pou etabli en juvenile prison pou deal avek bann tel ka si i neseser?  Mersi.

 

MINISTER MACSUZY MONDON

Mr Speaker, en bon pe sa bann keksoz i ganny deal avek byensir dapre Code of Conduct, me kot i konsern bann zanfan ki annan bann acute behavioral problems parey ou pe dir.  Bann zanfan ki lekol i dir nou tel zanfan, an vi son konportman i pa merit lo lakour lekol akoz se sa osi parfwa ki fer osi travay nou bann ansennyan pli difisil.  La mon pe koz lo bann zanfan ki petet dan lepase nou ti pou’n anvoy zot dan YRTC, ki parey nou konnen prezan in fermen.  Me anba bann stratezi ki nou pe met an plas anba progranm Renesans Sosyal ansanm avek Departman Sosyal e anba Minister konsernen, i annan bann travay ki nou pe fer pou nou kapab etablir en sant ki pou alavenir kot nou pou kapab met sa bann zanfan, rehabilitate zot e refer zot ki nou swete plitar zot a kapab ganny re entegre dan sistenm skoler.  Anmenmtan ki mon pe koze la, mon konnen i annan en delegason Minister Ledikasyon e en delegasyon Departman Sosyal ki pe fer serten vizit pou regarde kote ki nou pou kapab etablir sa sant.  Mersi Mr Speaker.

 

MR SPEAKER

Onorab Vangadasamy.

 

HON SHERYL VANGADASAMY

Mersi Mr Speaker.  Eski Minis i kapab dir avek sa Lasanble konbyen ki son Minister i depanse dan maintenance e ranplasman bann tel meb e materyo rezilta vandalizm e si i annan okenn aksyon legal ki’n deza ganny anmennen par son Minister kont serten sa bann paran e sa bann zanfan?  Mersi.

 

MINISTER MACSUZY MONDON

Mr Speaker, nou Bidze pou ranplas bann meb kot lekol tou le lannen, me selman sa i pa zis meb ki ganny kase par vandalizm dan lekol, me osi bann meb ki nou bezwen ranplase i apepre R300 mil tou le lannen.  Kot i konsern sa ki zanfan i kontribye parey mon dir i en sonm minimum.  I petet en maximum R3000 a R4000 dan en lannen.  E nou napa okenn ka kot nou’n bezwen , erezman, nou’n bezwen anmenn paran, met paran dan lanmen lapolis akoz mon krwar paran osi i komans realize e ler nou’n annan bann ka kot nou’n bezwen demann paran pou travay avek nou pou fer en zanfan ranplas en meb ki in kase, ziska prezan nou’n ganny korperasyon avek paran pou nou kapab fer li.  Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Mr Speaker mon ti a kontan demann Minis, etan donnen ki i annan en nouvo kiltir anti sosyal ki pe montre son latet si oule, ki mesaz Minis i annan pou lasosyete e pou li ganny sipor tou dimoun e non pa zis ledikasyon pou reelman met sa problenm anba kontrol e anmenn plis awareness anver lasosyete pou donn en koudmen pou ki nou ganny en prosen zenerasyon e grandir koman bann bon sitwayen avek bann bon bonn kondwit?  Mersi.

 

MINISTER MACSUZY MONDON

Mersi Mr Speaker.  Mon mesaz se ki dabor e avan tou mon krwar nou tou ki form sa lasosyete, ki swa nou en ansennyan, ki swa nou en paran, ki swa nou en Manm Lasanble, ki swa nou en anplwaye.  Nenport ki landrwa kot nou ete, mon krwar nou tou nou annan en rol pou zwe e nou tou nou bezwen zwe nou rol e nou tou nou bezwen pran nou responsabilite e nou tou nou bezwen “walk the talk” parey nou dir, vin bann model pou bann zanfan, enkilke dan bann zanfan bann bon valer, montre zot bann keksoz ki byen.  Pa mank okenn loportinite.  Nenport ki landrwa ki nou ete, whether nou dan en magazen, whether nou obor semen.  Partou kot nou ete, annou pa mank okenn loportinite pou nou kapab enkilke bann bon valer dan nou bann zanfan, bann bon fason viv ki zot kapab grandi avek, ki apre i ava vin en labitid pou zot akoz ler en keksoz in vin en bon labitid, ler ou’n devlop en bon labitid dan ou, apre i vin en fason viv pou ou.  Ou pa mazinen pou ou kapab fer bann keksoz lot fason.

Mon krwar si nou tou nou donn lanmen, si petet kan en paran pe al bazar Victoria i mazin 2 fwa avanler i anmenn en pti zanfan 3an, en zanfan 4an, en zanfan primer, byensir mon panse bann zanfan segonder zot al zot menm.  Oubyen i les son zanfan laz segonder pou ale, mon krwar si i mazin 2 fwa lefe ki sa i kapab annan lo son zanfan, ki apre byensir i dekoul partou dan lekol, dan lasosyete, mon krwar deza sa ti ava en pa an avan.  I annan en kantite keksoz ki nou kapab fer me nou tou nou bezwen realize poudir nou annan en rol pou zwe, poudir nou kapab fer li si nou tou nou korpere e nou met latet ansanm.

Mon ava donn Onorab en legzanp, mon ti pe al regard Sware Kreativite, sa osi mon krwar i enn bann keksoz ki Minister i bezwen met lanmen lo la e revwar en pti pe bann keksoz ki nou pe vwar dan sware kreativite.  Mon vwar en garson segonder i vini dan en semiz, ‘I like women on top’.  Si en paran ou les en zanfan laz S1 al aste en semiz parey dan en magazen pou li mete, pou li marse dan semen, me pou mwan, se la ki i komanse.  Ler sa zanfan i kit lekol ki i pou fer?  I komans dan sa bann keksoz ki nou pe vann dan nou magazen.  Mon ti ava menm fer en lapel dan sa bann magazen kot nou pe vann sa bann keksoz ki endesan, kot nou zanfan i ale i ganny tante pou ase.  Petet nou osi si nou annan en konsyans nou bezwen sey revwar.  Sesel i en pti sosyete, eski sa i bann keksoz ki nou anvi vwar nou bann zanfan pe marse ladan dan semen?  Donk se pou sa rezon mon dir, nou tou dan nenport ki landrwa ki nou ete, whether nou pe vann, whether nou pe aste, whether nou pe ale oubyen nou pe organize, mon krwar nou tou nou annan en travay serye ki nou bezwen fer.  Nou annan en refleksyon serye ki nou bezwen fer konsyansyezman, annou azir konsyansyezman si vreman nou anvi vwar nou zanfan alavenir, nou anvi vwar nou pe viv dan en pei kot nou zanfan pe annan pli bon valer, pe annan bann pli bon keksoz ki zot kapab grandi avek dan nou sosyete.  Mersi Mr Speaker.

 

MR SPEAKER

Ok.  Mon bezwen kontrol pwa.  Kestyon 133, Onorab Fideria ankor lo lapar Onorab Charles.

 

HON EMMANUEL FIDERIA

Mersi Mr Speaker.  Mr Speaker, eski Minis i kapab enform sa Lasanble si son Minister i annan okenn lentansyon pou entrodwir a Teacher’s Council?  Mersi.

 

MINISTER MACSUZY MONDON

Mersi Mr Speaker.  Education Act 2004, Seksyon 87(2) i fer provizyon pou Minister kree en Teacher’s Council, mon a quote: ‘Without prejudice to the generality of subsection 1, the Minister may make regulations providing for the establishment of a Teacher’s Council that will maintain a register for all teachers and assist in the professional development of teachers’.

Dan konteks reform dan ledikasyon, travay pou devlop Teachers Council ti ganny entansifye an 2011 e an semoman Mr Speaker, tou bann travay teknik ki annan pou fer avek kreasyon Council pe ganny finalize.  Mersi Mr Speaker.

 

MR SPEAKER

Okenn siplemanter Onorab Fideria?

 

HON EMMANUEL FIDERIA

Wi Mr Speaker.  Mr Speaker, eski Minis i kapab dir nou ki bann difikilte ki nou rankontre, ki nou pa’n vwar sa teachers council tre aktiv?  Mersi.

 

MINISTER MACSUZY MONDON

Mr. Speaker, si mon’n konpran byen kestyon.  Pou ou kapab met en Teachers Council an plas, mon krwar i pran bokou travay de baz, i pran bokou refleksyon e i annan en kantite travay ki ou bezwen fer e si nou anvi enplimant li byen, nou bezwen fer sir ki tou keksoz i an plas, ki son regilasyon, tou sa ki annan pou fer in fini pare, en mannyer ki ler nou enplimante nou konnen poudir i pou mars byen e ki i pou ganny enplimante dan fason ki i merit ganny enplimante.  Mersi Mr Speaker.

 

MR SPEAKER

Onorab Meggy Marie.

 

HON MEGGY MARIE

Mersi Mr Speaker.  Eski Minis i kapab eksplik nou, letan zot pe travay lo sa teknik pou met Teachers Council an plas, eski sa i pou embody zis lekol Gouvernman oubyen lekol prive osi tou?  Mersi Mr Speaker.

 

MINISTER MACSUZY MONDON

Mr Speaker, ler Council in vin an plas, tou ansennyan dan Sesel pou bezwen anrezistre.  Ki swa ou pe travay dan en lekol prive oubyen ou pe travay dan en lekol Gouvernman, tou dimoun i bezwen anrezistre akoz nou tou nou bezwen, nou rezis i bezwen kouver tou ansennyan ki nou annan dan pei.  Mersi Mr Speaker.

 

MR SPEAKER

Onorab Jacqueline.

 

HON SULTANE JACQUELINE

Mersi Mr Speaker.  Eski Minis i kapab eksplike ki rol en Council pe antisipe annan, pou zwe pou amelyor kalite e standar lansennyman?  Mersi Mr Speaker.

 

MINISTER MACSUZY MONDON

Mr Speaker, dabor e avan tou, en Council se pou permet nou parey mon’n dir sertifye e anrezistre tou nou bann ansennyan ki nou annan atraver sistenm ledikasyon e atraver pei antye.  I ava osi permet nou vwar ki mank ki annan parmi nou bann ansennyan an term petet zot kalifikasyon, an term leksperyans e petet osi anmenmtan fitness parey nou dir pou zot ansennyen e sa i a permet nou pou nou kapab organiz osi en pe pli byen bann training, bann professional development ki nou organize pou nou bann ansennyan.  Donk, lenpak ki mon ekspekte i ava annan se en lenpak pozitiv lo lansennyman avek laprantisaz dan nou bann lekol.  Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Mr Speaker eski ler Minister Ledikasyon ti pe travay pou met an plas sa Council eski i annan okenn model spesifik ki zot pe swiv pou asire ki ler sa council i in an fors si i enn ki aplikab, ki kapab anmenn serten benefis pozitiv pou nou sistenm ledikasyon e espesyalman in terms of teacher retention? Mersi.

 

MINISTER MACSUZY MONDON

Mr Speaker wi, definitivman.  Ler nou fer bann travay parey, nou regard en pe bann diferan model e normalman nou, nou regard bann model bann small states ki pe enplimante.  Nou ti osi regard en pti pe Nursing Council, en pti pe ki bann keksoz ki annan ladan.  Donk, mon krwar nou’n fer en bon travay an term resers lo bann literatir ki annan, pou nou kapab finalman devlop en model ki nou santi i ava pli adapte pou Sesel.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Thank you Mr Speaker.  Mr Speaker, eski Minis i kapab dir avek nou Lasanble ki bann mekanizm zot pou met an plas pou asire ki bann ansennyan ki dan bann sekter prive, ki dan bann lekol prive pou vreman anrezistre avek sa Council, si zot pou vwar benefis akoz zot bezwen anrezistre?  Mersi.

 

MINISTER MACSUZY MONDON

Mr Speaker, mon pa pou al dan bann detay me an zeneral mon ava dir, i parey en license to teach.  Si ou pa anrezistre ou pa pou ganny drwa teach okenn landrwa dan Sesel.  So, ou pou bezwen anrezistre pou ou teach.  Mersi Mr Speaker.

MR SPEAKER

Egzakteman.  Avek sa nou ariv lafen Question Time.  Mon ava remersye Minis….,

 

(Technical Problem)

 

(Break)

MR SPEAKER

Bon, nou ava pran dezyenm item lo Order Paper e sa se The Public Finance Management Bill ki pou ganny prezante par Minis Finans, Minis Pierre Laporte.  Mon pe fer son first and second reading ozordi.  Mon ava ganny en first reading silvouple.

 

THE CLERK

This Act may be cited as the Public Finance Management Act, 2012.

 

MR SPEAKER

Pou nou kapab pran son second reading nou pou bezwen en Mosyon pou waive sa 7 zour requirement ant first and second reading, Onorab.

 

HON MARIE-ANTOINETTE ROSE

Mersi Mr Speaker.  Mr Speaker anba Orders 91(1) mon move ki nou sispann Orders 64(1) pou nou kapab waive sa 7 zour requirement ki Standing Orders i demande.

 

MR SPEAKER

Okenn ki segonn Mosyon.

 

HON CHARLES DE COMMARMOND

Mr Speaker, mon segonn Mosyon.

 

MR SPEAKER

Ok, nou pran en vot lo sa Mosyon, tou bann ki an faver?  Ok nou ava donk al lo second reading.  Mon ava ganny mon en Motion for second reading.

 

HON MARIE-ANTOINETTE ROSE

Mr Speaker, anba Order 64 (2) mon move ki sa Bill i ganny lir en dezyenm fwa.

 

MR SPEAKER

Okenn ki segonde.

 

HON CHARLES DE COMMARMOND

Mr Speaker, the Motion is segonded.

 

MR SPEAKER

Bon, mon ava envit Minis aprezan pou entrodwir son Bill.

 

MINISTER PIERRE LAPORTE

Mr Speaker, mon annan gran plezir pou prezant nou Lasanble Nasyonal e Lepep Seselwa sa Public Finance Management Bill 2012. Sa i en nouvo Proze de Lwa ki pou gouvern zesyon finans piblik dan nou pei.

Sa Proze de Lwa i annan pou armoniz bann diferan prosedir bidzeter Gouverman, amelyor efikasite, asir disiplin bidzeter e osi fer ki i annan meyer sipervizyon e kontrol e plis transparan e responsabilizasyon dan lafason ki larzan Gouvernman e finalman, larzan Lepep i ganny depanse.

Lentrodiksyon sa Proze de Lwa i vin dan konteks nou bann demars kontinnyel pou amelyor mekanizm preparasyon e enplimantasyon Bidze nasyonal.  Sa limenm i form par nou lobzektiv global pou kontinnyelman reform nou lekonomi.

Mr Speaker, depi 2008 boku in ganny fer pou amelyor lafason ki bidze i ganny prepare e ganny prezante, me sa pa devret anpes nou tou fason pou nou fer mye ankor.  Parmi bann provizyon sa Proze de Lwa i enn ki pou fer li obligatwar pou Minis Finans sak fwa ki i prezant Bidze anyel pou li prezant en plan makro ekonomik e fiskal ki pou gid polisi e direksyon ekonomik son Gouvernman pou nou pei pou sa prosen 3an.  Sa i ava fasilit analiz lo leta lekonomi Sesel kote nou pe ale ekonomikman, sa i ava osi ed biznes e piblik an zeneral pou annan en meyer lide lo perspektiv ekonomik e mye prepar zot dan zot prediksyon mwayenn term.  E pou bann lenvestiser, i a permet zot annan en meyer vizyon lo lavenir nou lekonomi e anmenn plis konfyans.

Mr Speaker, sa Lalwa i osi fer provizyon pou Minis responsab pou Finans pou prezant en rapor semi-anyel lo reveni e depans Gouvernman avek Lasanble Nasyonal.  Sa i ava donn en meyer apresiasyon lo performans koleksyon reveni e osi depans ki’n ganny fer dan premye lanmwatye en lannen.  San ki nou bezwen esper prosen Bidze pou sa ganny prezante.

Mr Speaker, parey nou konnen, tou depans Gouvernman ki ganny fer i bezwen ganny sa ki nou dir an Angle, appropriated dan en Lalwa.  Sa i en prosedir kot sak depans ki bezwen ganny fer i ganny klasifye avek sa Minister ou departman respektiv anba Lalwa avan ki depans i ganny fer.

Sa nouvo Lalwa i ava met lobligasyon lo Gouvernman pou eksplik Lasanble e piblik an zeneral lo okenn depans adisyonnel ki ganny fer e sa depans adisyonnel i bezwen ganny aprouve par Lasanble Nasyonal avan ki depans i ganny fer.  Sa Lalwa i osi fer provizyon pou ki Minis responsab pou Finans i kapab koup depans Gouvernman si i vwar li neseser pou diferan rezon, tel ki, si lekonomi pe ralanti, ou si reveni ki pe ganny kolekte i mwens ki sa ki ti’n ganny prozekte.  Sa i ava ed Gouvernman pou reste anlinny avek son bann lobzektif tel ki, son target pou soutenabilite det piblik.  An fezan sa, nou ava asire ki zesyon bidzeter i ava anlinny avek lobzektif global pou gard stabilite makro ekonomik e asir soutenabilite nou lekonomi.

Mr Speaker, sa Lalwa i kouver tou lazans piblik ki enkli tou bann parastatal.  I annan en provizyon spesyal ki kouver spesifikman laspe efikasite e transparans dan zestyon risk e prosedir kontrol entern dan bann lorganizasyon.

Ozordi sistenm kontrol entern e zestyon risk dan bokou lazans gouvernmantal i demann amelyorasyon.  E sa Lalwa pou ede ranforsi mekanizm pou amelyor sa bann sistenm.

Sa Lalwa i osi etablir ki bann parastatal i bezwen annan an plas en sistenm ki evalye tou bann gro proze lenvestisman avan ariv lo en desizyon final.  An plis, sa Lalwa i demande ki si en Sef Egzekitiv i vwar ki i pa kapab konform avek tou bann responsabilite ki sa Lalwa i demande, sa Sef Egzekitiv i oblize enform son Minis ki responsab sa lorganizasyon e osi Prezidan Larepiblik.  Sa Proze de Lwa ki devan Lasanble ozordi Mr Speaker, i osi fer provizyon ki Minister Finans i komans raport performans bann Minister dan son bann progranm avek Lasanble Nasyonal.

Mr Speaker, Minister Finans pe byento lans en linisyativ ki nou apel an Angle, Program Performance Based Budgeting.  Lobzektiv sa legzersis, se pou asire ki bann Minister pou bezwen met an plas bann lobzektiv ferm pou asir lefikasite e meyer performans dan zot depans.  Parey nou konnen, souvandfwa, se pa kantite ki konte me plito kalite.  Sa sistenm Program Performance Based Budgeting pou ed bann lenstitisyon gouvernmantal e paratatik asir en meyer kalite performans bidzeter ki zot lorganizasyon i donn Pep Seselwa.  Sa pou enkli bann revi lo depans pou asir zot lefikasite e valer pou larzan pou nou Pep.  Nou pou donn plis detay lo sa nouvo linisyativ pli pre avek son lenplimantasyon.  Me lesansyel, se ki i pou permet en meyer analiz nou lefikasite depans dan sak Minister, departman ou lazans Gouvernman.

Mr Speaker, sa Proze de Lwa i osi fer provizyon ki Minis ki responsab pou Finans pou osi annan pouvwar pou demande a nenport moman ki en odit i ganny fer par divizyon odit entern dan Minister Finans lo nenport Minister, Departman Gouvernman, lazans e lantrepriz piblik.

Sa nouvo Lalwa i osi fer provizyon pou kreasyon en komite odit Gouvernman dan en kapasite konseye pou Minister Finans.  Mon anvi fer resorti fortman, ki rol sa komite pa pou an konfli avek sa ki pou Oditer Zeneral ou divizyon odit entern dan Minister Finans.

Sa komite, pou plito fer swivi, rekonmandasyon apre ki in annan en rapor sorti ki Oditer Zeneral ou divizyon odit entern dan sa Minister lo bann Minister e departman Gouvernman.  Sa i ava ede annan en meyer swivi e enplimantasyon bann rekonmandasyon e mezir remedial bann odit Oditer Zeneral e divizyon odit entern.  Zot ava dakor avek mwan mon espere, ki i pa vo lapenn met resours dan lodit si apre bann defayans i ganny idantifye e pa ganny adrese.

Mr Speaker, sa Bill i osi fer provizyon ki ler i neseser, tou bann Sekreter Prensipal, Sef Egzekitiv, Direkter Zeneral ouswa lezot zofiye ki dan en pozisyon ki son responsabilite i enkli zestyon finans piblik pou personnelman raport devan Lasanble Nasyonal atraver zot komite Finans e Kont Piblik pou okenn aksyon ki zot pran dan depans ki ganny fer dan fon piblik e bann resours ki ganny resevwar, garde ouswa ganny depoze par lorganizasyon ki zot responsab.

Mr Speaker, mon anvi profit sa lokazyon ozordi pou osi anons en mezir enportan pou ranforsi kontrol fiskal ki menm si i pa ganny kouver anba sa Proze de Lwa ki devan nou, i pou ede ranforsi li.  Sa mezir ki pou ganny enplimante atraver regilasyon, pou fer ki tou bann staff dan bann Minister e Departman Gouvernman ki travay dan zot seksyon finans, pou aprezan tonm anba responsabilite Minister Finans.

Sa kantmenm, pa pou enkli bann parastatal ensi ki lezot lotorite tel ki Lasanble Nasyonal, Oditer Zeneral eksetera.  Regilasyon ki byento pou ganny pibliye, pou fer sorti klerman lekel lorganizasyon ki pou ganny afekte par sa mezir.  Sa mezir Mr Speaker, i ava ede annan plis sipervizyon e kontrol lo finans piblik e osi armoniz lezot keksoz parey formasyon ki ganny fer pou tou sa bann staff ki travay dan seksyon Finans dan bann landrwa Gouvernman.

Mon pou byento komans en seri formasyon pou tou travayer Finans dan sekter piblik.  Nou osi pe travay avek Seychelles Institute of Management lo en sertifika ou en diplonm lo zestyon finans piblik ki pou en nesesite pou tou travayer ki travay dan seksyon Finans bann Minister e lezot lorganizasyon gouvernmantal.

Mr Speaker, sa Proze de Lwa ki devan Lasanble Nasyonal ozordi, i demontre komitman sa Gouvernman pou a sak lokazyon kontinnyen rod fason pou amelyor zestyon resours piblik e i montre nou komitman pou annan plis transparans.

Sa Proze de Lwa, i enn ki reflekte bann pratik modern e enternasyonal.  Parey mon’n deza dir, i tre, tre enportan ki Lepep Seselwa i annan konfyans dan lafason ki finans piblik i ganny zere.  Mon osi profite ozordi pou lans en lapel avek tou bann zofisye Gouvernman pou vin pli responsab dan zot rol koman protekter resours Lepep.  Parey nou’n dir a plizyer repriz mon Minister i reste determinen pou kontinnyen dan sa lalinny e i enportan ki lezot i swiv.

Avan mon konklir mon prezantasyon bomaten Mr Speaker, mon anvi remersye ankor enn fwa Lasanble Nasyonal pou zot sipor kontinnyel pou tou sa bann reform ki nou pe kontinnyen fer.  E mon alor rekomann laprouvasyon Lasanble Nasyonal pou Public Finance Management Bill 2012, mersi.

 

MR SPEAKER

Ok, deba i ouver, i annan okenn entervenan, Onorab Rose.

 

HON MARIE-ANTOINETTE ROSE

Mersi Mr Speaker, Mr Speaker, Minis in donn detay ozordi devan nou Lasanble, kimannyer sa Bill pou ganny met an pratik, kimannyer sa Proze de Lwa letan in vin Lalwa pou ganny met an pratik e i reasir nou Lasanble e sa i en nouvo lapros ki Gouvernman e son Minister pe pran an sa ki konsern zesyon finans piblik.

Ler Minis pe prezant sa Proze de Lwa devan nou Lasanble ozordi bomaten, i annan 2 gro levennman dan lemonn sa semenn.  Ler nou Lasanble pe zwenn ozordi Lanmerik, bann pli gran lekonomi pe desid lo son lavenir atraver en eleksyon, en eleksyon evidaman i enteres tou politisyen me en eleksyon ki pou desid lo lavenir pep Ameriken me osi lo lemonn antye akoz nou konnen sa ki Lanmerik i fer i annan en lenpakt enportan lo Lerop e lo lezot lekonomi mondyal.

Sanmenm sa semenn Chinese Communist Party pou zwenn zot osi pou desid lo lavenir Lasin e sa osi i en gro levennman ki petet pa pe ganny otan piblisite parey sa eleksyon Lanmerik me i en levennman kot lot pli gran lekonomi mondyal pou osi pe fer en desizyon lo lavenir Lasin.  E enn fwa ki bann Sinwan i desid lo zot lavenir, sa osi i annan en lenpakt direk lo bann lezot lekonomi mondyal.

So, mon krwar i enportan ki nou pti Sesel dan nou pti Lasanble nou obzerv byen ki pe arive otour lemonn akoz tou sa ki arive otour lemonn i annan en lenpakt direk ozordi lo nou lekonomi e nou ti aprann en gran leson lo la an 2008 ler ti annan kriz ekonomik e nou Pep ti konmans realize ki menm si nou en group zil, Sesel pa en zil e Sesel pa depan lo limenm e Sesel pa kapab zer son lekonomi zis lo limenm e ki lekonomi i en relasyon dinamik e konpleks ant diferan lekonomi mondyal e kimannyer sa bann lekonomi i egzert zot relasyon lo kanmarad.

Zisteman an 2008 ler nou ti al dan reform, Prezidan Michel ti dir nou ki letan Lanmerik i enternen lemonn antye i ganny li en move latou e i paret mwan Mr Speaker ki sa latou depi 2008 pankor kit nou, i pankor kit lemonn.  I paret mwan Lerop pe ganny en lemoni avek sa latou akoz larealite Lerop ozordi se ki it will get worse before it gets better.  Mon pe dir sa akoz Sesel nou tant pou toultan rann nou dan en sitiasyon konfortab e oubliye ki pe arive avek lemonn e krwar ki enn fwa ki nou’n ariv lo lafen sa progranm IMF e nou santi ki nou ase eze alors nou kapab pran lavol lo nou menm.  E mon welcome alors desizyon Gouvernman avek IMF pou IMF reste ankor Sesel dan ankor 1an pou nou kontinnyen vin bokou pli rezilyan e bokou pli virzilan si oule lo lafason ki nou zer nou lekonomi.

An Lerop, 2 pli gro problenm Minis i konn tre byen, i annan high unemployment me i annan bokou Gouvernman ki pe koup lo Government spending, ki pe dir ek Gouvernman, bon alors ou bezwen koup ou depans.  E nou konnen ler i koup depans se bann dimoun ki ganny plis afekte se bann dimoun ki pli vilnerab.

E zisteman Mr Speaker, sa Proze de Lwa ozordi devan nou i annan pou fer avek Government spending.  Enn dan sa 2 gro problenm ki Lerop pe fer fas avek e lemonn pe fer fas avek, sa Proze de Lwa devan nou i annan pou fer avek depans Gouvernman.  Me i pa zis pou koup depans Gouvernman, nou konnen Minister Finans i responsab pou Bidze e vwar kimannyer tou le zan letan Minister i demann plis, li i vwar kimannyer pou koupe.  Me ozordi Finans pe dir nou, be nou pa zis koup Bidze, nou fer sir ki bidze i ganny byen zere.  Letan nou donn ou en larzan, nou pa zis koupe pou anpes ou depanse me nou pou donn ou me fer sir ki ou depans byen.  So, the Bill Mr Speaker, is about proper budget management.  E mon krwar nou Lasanble nou bezwen rekonnet ladiferans ant zis koup larzan, ki souvandfwa nou pa neseserman dakor avek Finans nou menm akoz konman politisyen nou pe demann plis injection larzan dan nou constituency, dan nou bann Minister, dan bann progranm ki fer marse, ki annan en lenpakt direk lo bann dimoun dan sosyete.  Me nou Lasanble i bezwen rekonnet osi ki i bezwen annan proper financial budget management.

Listwar in montre nou Mr Speaker, ki an 2008 bann pei ki ti ganny pli mwens afekte par kriz ekonomik.  Par egzanp, Canada, i bann pei ki ti annan 2 keksoz.  Zot ti annan proper legislative framework, savedir, zot ti annan bann bon Lalwa ki ti pe fer lekonomi marse e dezyenm, zot ti annan proper culture of financial management.

Nou bezwen rekonnet e nou bezwen aprann avek sa bann pei ki’n kapab si oule pa ganny tro touse avek kriz mondyal, kimannyer zot in fer.  E mon krwar nou’n aprann, nou pe aprann par lefe ki nou vwar devan nou en Lalwa ki fer zisteman sa.

Bi sa Lalwa, parey Minis in dir, se pou fer Gouvernman vin pli accountable, pli fleksib e pli transparan ler zot depans larzan tax, ler zot depans larzan piblik, ler zot depans larzan ki limenm li Gouvernman in kolekte.  Mon’n dir larzan tax, larzan piblik akoz i annan petet parfwa serten mindset anver depans piblik ki larzan i la alors annou depanse.

Alors sa Proze de Lwa i osi met lafaz lo public finance, i osi met lanfaz lo be kote nou pou ganny sa larzan ki nou depanse.  Alors ler nou pran nou kont ki be sa larzan ki nou gannyen i nou prop dimoun ki pe sakrifye pou redonnen alors nou komans etabli en kiltir kot nou vin bokou pli konsyan lo lafason ki nou depans larzan piblik.

Alors ozordi nou annan devan nou Lasanble Mr Speaker, en Lalwa tre kler ki gid konportman Minis, PS e seksyon kontabilite dan sak Minister.

Ozordi ler nou’n pas sa Lalwa, tou Minis, tou PS, tou seksyon kontabilite, tou seksyon procurement tou dimoun ki depans larzan Gouvernman i devret tre kler dan son lespri kimannyer sa i ganny fer.  E mon welcome move Minis e Minister Finans pou pa zis met en Lalwa me montre dimoun kimannyer pou met sa Lalwa an pratik.  Si nou bezwen training parey Minister Finans in propoze, annou train sa bann dimoun dan en fason fer pou tou Minister.  Napa en Minister ki kapab depans larzan piblik diferaman avek en lot Minister oubyen en parastatal i deside depans larzan dimoun diferaman.  I bezwen annan en standar en sel fason fer e nou welcome alors pozisyon Minister Finans ki kantite fwa dan nou Gouvernman nou pas en Lalwa  apre nou menm nou dan Lasanble nou retournen nou dir be, ki’n arive avek sa Lalwa.  Nou annan bon Lalwa, kimannyer sa Lalwa i ganny met an pratik.  Alors la nou vwar pa zis en move pou nou annan en bon Lalwa me en move pou fer sir ki sa Lalwa i ganny lavi.  I ganny lavi e dimoun i annan konesans lo sa Lalwa, bann dimoun ki bezwen rann kont i bezwen aprann kimannyer sa Lalwa i marse pou ki a lafen dizour, nou pei an zeneral nou annan nou en nouvo kiltir anver depans piblik.

Mr Speaker, bout enportan ki nou nou rezouir dan Lasanble konsernan sa Lalwa, sa Proze de Lwa ki devan nou se ki i fer provizyon neseser pou Lasanble Nasyonal fer pli byen, e egzers pli byen son rol oversight an sa ki konsern zesyon finans piblik.

Mr Speaker sa i en rekonesans lenportans Lasanble Nasyonal, i en rekonesans rol oversight ki Lasanble Nasyonal i annan e i en rekonesans dan kapasite Lasanble Nasyonal pou donn en koudmen Gouvernman an sa ki konsern accountability ek oversight.  Ler nou nouvo Lasanble ti sermante, bokou dimoun ti dir be en Lasanble avek en gran mazorite sorti dan Parti Lepep pa pou kapab desarz son responsabilite oversight akoz i pou per son prop Gouvernman e i pa pou fer son prop Gouvernman rann kont.  E Gouvernman ek Lasanble Nasyonal in fer tou le kontrer, nou’n prouv bann kritik e bann sinik wrong.  Gouvernman ozordi i met en Proze de Lwa devan nou Lasanble e i dir avek gran parti mazorite Lepep, mon pe donn ou plis pouvwar pou ou egzers ou rol an sa ki konsern depans piblik.

Mr Speaker, pou mwan sa mesaz i kler, sa mesaz mon kapab dir i istorik e sa mesaz i en departure from en vye lepok pou nou antre dan en nouvo Sesel e avek nouvo fason fer.  Alors Mr Speaker, mon felisit Gouvernman e mon felisit Minister Finans pou rekonet the growing importance of Parliament, of the National Assembly e rol kle ki Lasanble Nasyonal pou zwe pou egzers plis disiplin fiskal opre depans piblik.

Mr Speaker, sa Lalwa ki devan nou pe fer zisteman sa 2 keksoz ki bann gran lekonomi mondyal ki’n reisi sov sa kriz ekonomik in fer.  1, se etablir proper legislative framework e 2, se etablir en kiltir of proper financial management e mon anvi koz lo sa dezyenm pwen Mr Speaker akoz ozordi, e mon mazinen aparti ozordi i nesesit en nouvo kiltir pou kapab met an pratik sa Lalwa.

I pe demann nou prop Gouvernman pou etablir en nouvo kiltir travay, i pe sanz vye fason fer e bann fason fer ki nou dan sa Lasanble nou’n konplent lo la en kantite, nou’n kestyonn lo la en kantite, nou’n summon bann Minis pou reponn kestyon.  Nou’n demann bann Minis pou vin devan nou Lasanble pou rann nou kont lo lapar piblik, lo lapar Lepep, lo lapar bann dimoun ki’n elekte nou.  Zisteman akoz a plizyer lenstans nou’n santi nou tre, tre konsernen avek en kiltir kot i annan en move pratik e nou’n anvi etablir en kiltir avek bon pratik.

Mr Speaker, ti annan en kantite propozisyon ki bann Manm Lasanble ti fer an 2011 ki mon’n vwar dan sa Proze de Lwa ler mon’n pas lo la.  En kantite propozisyon lo lafason ki nou bezwen depans larzan Gouvernman e mon felisit Minister Finans pou pran kont sa bann propozisyon ki nou ti fer zisteman 1an pase letan Vis Prezidan ti vin dan nou Lasanble pou prezant Bidze 2012.  En kantite propozisyon ki nou bann komite dan Lasanble in met devan e nou vwar li ozordi dan sa Proze de Lwa.  Me keksoz ki bokou, bokou pli signifikan an term la pratik sa Lalwa ki nou nou welcome Mr Speaker, se sa program performance based budgeting.  I pa fer sans, nou annan larzan, nou’n depans larzan byen me nou pa efektiv dan lafason ki nou depans larzan e sa larzan napa rezilta anver nou Pep.

Minis mon a donn ou en legzanp, dernyen fwa ou ti anmenn en Supplementary Estimate devan nou, ti napa larzan an plis pou Welfare Agency, Social Protection Agency e mesaz pou nou sete ki sa lazans ti pe manage zot larzan tre byen.  Sa i mesaz ki ou ti dir nou e sa i mesaz ki nou nou ti gannyen. Zot pa ti bezwen larzan an plis akoz larzan ki zot ti’n gannyen, finans ki zot ti’n gannyen, bidze ki zot ti’n gannyen ti sifi e ti pe ganny byen zere.  Me nou nou reste ankor tre desatisfe, nou pa satisfe avek rannman ki Social Welfare Agency pe donn nou dimoun deor.

Sa diferans ant en bon zesyon larzan e en program performance based budgeting.  Nou bezwen ganny valer pou nou larzan, en keksoz ki nou’n toultan demande dan sa Lasanble.  I bezwen annan valer pou nou larzan e sa pou osi re-oriant travay Lasanble Nasyonal pou nou pa zis regarde be ki’n arive avek larzan, konbyen larzan pou koute, konbyen sa proze pou koute, me ki efektive sa proze.  Ki lenpak sa proze pou annan lo sosyete, konbyen fanmiy pou benefisye, konbyen dimoun ki nou konman en sosyete nou pa pe tyanbo, nou pa pe anmase akoz Welfare Agency pa pe efficient dan son zesyon larzan.  I pa pe target dimoun ki vreman merite e i annan dimoun ki merite ki gannyen, ki merite ki pa gannyen, i annan dimoun ki pa merite ki gannyen.

So, mon pran sa legzanp akoz i en legzanp ki mon mazinen i lo lespri tou bann Manm Elekte dan Lasanble e i en konsern ki nou kontinnyen eksprimen dan nou Lasanble, i en konsern ki mon konnen nou Gouvernman i konsernen avek me i en legzanp kot sa program performance based budgeting i devret antre.  Kot performans Minister Gouvernman i devret vin osi enportan ki zis demann larzan.

Minis, nou tre, tre kontan ki sa in vini, pa zis welfare.  Me i annan bokou, bokou Minister ki tou le semenn nou dir be nou ava voudre, oli sa progranm e en kantite Minister e departman i vin devan nou e i dir nou nou annan en nouvo progranm oubyen nou pe al enplimant en nouvo progranm.  Oubyen nou pe revwar sa progranm, oubyen nou pe revwar polisi.  I en keksoz ki tou le semenn nou tande isi dan sa Lasanble e ti ava bon fer en bon evaliasyon lo sa bann progranm oubyen avan en Minister i enplimant en progranm.  Annou demann li be, ki rezilta?  Kote pou anmenn nou, konbyen dimoun pou ganny afekte par sa progranm.  Dan 3an, 4an nou Lasanble pou recall sa Minister pou demann li be ki’n arive avek progranm x, y, z e kote sa larzan in ale e si vreman nou’n ganny valer pou nou larzan.  So, mon kontan ki osi Gouvernman in rekonnet sa ki nou bezwen performen, nou bezwen donn dimoun valer pou zot larzan.

Mr Speaker, sa kiltir alors pa zis zer byen larzan me delivre anver Lepep Seselwa i en promes eleksyon ki Prezidan Michel ti fer.  Letan i ti dir nou vot pou en nouvo Sesel oubyen en nouvo Lasanble pou en nouvo Sesel, i ti dir i anvi etablir en nouvo kiltir dan sa nouvo Sesel.  I pa kapab nouvo Sesel avek vye kiltir, i pa kapab nouvo Sesel avek menm fason fer.  E si i bezwen Lalwa i ti dir nou, i ava anmenn Lalwa neseser si i bezwen Lalwa pou sanz fason fer.  E i en promes eleksyon ki’n ganny delivre, e nou nou rezouir ladan, nou kontan akoz nou koman politisyen nou bezwen fer sir ki bann promes eleksyon e bann promes lo ki nou tiket in ganny elekte lo la i ganny delivre a Lepep Seselwa.

Alors Mr Speaker, en nouvo Sesel, pli enportan ankor en nouvo mind set Mr Speaker.  En nouvo mind set, isi dan sa Lasanble depi bomaten Minis Ledikasyon in vini, in koz longman, in fer en gran deklarasyon lo en nouvo mindset dan sistenm Ledikasyon.  En nouvo fason ki nou bann zanfan i bezwen vwar ledikasyon, en nouvo fason ki Minister Ledikasyon limenm i bezwen vwar Ledikasyon.  En nouvo fason ki lasosyete i bezwen vwar li anver Ledikasyon.  I annan en kantite keksoz ki nou bezwen revwar, me pli enportan si i annan en mind set ki rekonnet from the onset ki nou bezwen vin pli responsab.  Pli responsab anver nou travay, program performance based budgeting anver nou travay e pli responsab anver tou sa ki nou ganny donnen pou fer nou travay avek.  Nou sez, nou latab, nou kreyon, nou saler, resours finansyel eksetera.

En kantite fwa dan Lasanble menm nou demande ki i annan plis resours ki ganny donnen, me kot sa bann resours i ale?  Ki in ganny fer avek sa bann resours?  So, nouvo mindset, nouvo fason azir Mr Speaker e nouvo fason reazir.  Mon dir nouvo fason reazir akoz sa Proze de Lwa pe donn en kantite pouvwar Finance and Public Accounts Committee.  E ler Finance and Public Accounts Committee oubyen ler bann Parlmanter i fer zot travay nou ekspekte Minis, en nouvo fason reazir anver sa nouvo latas ki sa Proze de Lwa pe donn nou Lasanble.

I pou nesesit en nouvo lapros travay ant Egzekitiv avek Parlman.  Sa Proze de Lwa i pou egziz sa an pratik, i pou egziz en lapros travay ki annan bokou plis konprenezon, ki annan bokou plis link ant Parlman e Gouvernman tout an prenan kont ki Gouvernman i bezwen fonksyonnen.  Gouvernman i bezwen en Bidze, Gouvernman i bezwen delivre e Parlman sa Proze de Lwa in fer provizyon, Parlman i bezwen fer si ki sa i ganny fer.

Mr Speaker, lemonn pe sanze, sa semenn lemonn pe sanze.  Depi 2008 nou’n vwar en sanzman enkrwayab dan lemonn e Sesel osi pe sanze.  Nou’n sanz en kantite keksoz depi 2008 e Sesel pe sanz vit.  E lefe ki nou’n pran kont ki pa zis larzan ki enportan me lafason ki nou reazir anver larzan i fer nou realize ki nou bezwen met en kantite lanfaz lo resours imen, lo imen, lo lafason ki imen i reazir e mon kontan ki i pe annan sanzman pozitiv dan Sesel.

Nou’n akonpli bokou sa lannen san serten negativite, san serten lespri negativ, san serten lespri pesimiz ki dir nou pa pou kapab fer.  E ler Minis Finans ti vin dan nou Lasanble an 2008, Lopozisyon ti demann li, Minis eski ou pou annan kouraz pou kontinny sa progranm reform.  E ozordi Minis Finans, en nouvo Minis Finans e Gouvernman in dir be nou napa zis kouraz pou kontinny sa reform.  IMF pe reste ankor 1an pou fer sir, pou nou travay ansanm avek IMF pou fer sir ki reform i konplete.

Minis, dernyen pwen mon anvi fer se ki IMF i la pou ed nou, pou donn nou gidans me mon kontan lapros Gouvernman ki nou lekonomi i reste a Seselwa e nou bezwen pran kont bann spesifisite Sesel ler nou pe fer sa sanzman.  Nou bezwen pran kont bann spesifisite nou Demokrasi letan nou pe fer sa bann sanzman.  E mon osi welcome sa lapros pou ki wi, IMF i ed nou, i donn nou gidans, i donn nou sipor.  Me depi 2008 nou’n met nou lipye ater an sa ki konsern serten prensip de baz ki nou pe kontinnyen garde.  E se sa ki’n fer sikse reform ekonomik e se sa ki pou anmenn sikse sa dezyenm zenerasyon reform ki pe ganny antreprann.

Lo sa not Mr Speaker, mon pou san okenn rezervasyon siport sa Proze de Lwa ki devan nou, i istorik, i inovativ, i annan en nouvo mindset, i annan en nouvo lapros e i zisteman sa ki nou Lasanble in toultan demande.

Mr Speaker, avek sa mon annan 3 pti lamannman, mon pa konnen anba ou gidans si nou ava pran li la.

 

MR SPEAKER

Mon krwar nou ava pran li la.

 

HON MARIE-ANTOINETTE ROSE

Nou ava pran li la Mr Speaker, 3 lamannman ki mon mazinen in fini ganny sirkile.  Anba seksyon 8(c), nou pe fer koreksyon tipo, 8(c) trwazyenm lalinny pou retir budget years e substitute li avek budget year pou li lir, ‘impact of any new policy for the upcoming budget year and the following 2 years’. Sa i premye amannman ki nou pe propoze.

Dan seksyon 30 Mr Speaker, nou ti a kontan retir, ‘pursuant to Order 34 of the National Assembly of Seychelles Standing Orders 2009’ pou li lir, ‘The Minister shall submit a mid-year fiscal statement report to the National Assembly by the end of August’.  Sa i fer referans avek the mid-year report ki i osi en nouvo fason fer me i pe donn Lasanble Nasyonal plis fleksibilite pou olye annan zis en statement ki Minis i fer an sa ki konsern mid-year report, i ganny soumet konman en rapor devan Lasanble Nasyonal pou ki bann Manm Lasanble Nasyonal i kapab pas zot komanter atraver en deba olye zis demann Minis kestyon.  So, sa i en lamannman ki nou’n propoze.

E dernyen lamannman i osi en pti fot.  Seksyon l35(1)(f), senkyenm lalinny, dernyen mo.  Nou pe retir its e nou pe substitute li avek his or her pou li lir, ‘and allow the Minister reasonable time to submit his or her decision prior to formal establishment’.

Vwala bann lamannman Mr Speaker, avek sa mon pe dir avek Minister Finans avek Gouvernman ki nou pe donn tou sipor sa Proze de Lwa, mersi.

 

MR SPEAKER

Bon, i annan sa bann lamannman, malgre nou pa pe pran li dan Committee Stage, i bann lamannman ki straight forward.  Le 2 premye amannman, dezyenm i fer en pti pe sanzman dan prosedir, ok, nou ava kontinnyen ek deba apre nou ava get response Minis lo apre nou ava pran en desizyon.  Onorab De Commarmond.

 

HON CHARLES DE COMMARMOND

Mersi Mr Speaker.  Mr Speaker, i en plezir pou mwan pronons mon lo sa Proze de Lwa ki devan nou, sa Public Finance Management Bill 2012.  I en Bill modern ki permet Minister Finans annan plis kontrol, transparans e amelyorasyon dan lefikasite zerans larzan piblik e Bidze.

Mon kontan sa Bill in vin devan nou e ki nou pe fer sa bann lepa pozitiv dan zerans larzan piblik akoz mon koman en Manm FPAC san ki mon al dan detay pou mwan antisip travay ki komite FPAC pe fer akoz i annan still rapor ki nou pe travay lo la, san antisip sa travay, me mon vwar ki sa Bill i adres en kantite keksoz ki plizyer lenstans nou ape dir avek Gouvernman, avek Minister Finans spesifikman, fodre ou fer, oubyen avek serten lezot departman Gouvernman akoz sa keksoz i koumsa, akoz ou’n depans sa, akoz ti annan sa larzan pou sa tel proze me selman ou pa’n fer proze me larzan in depanse.

Akoz Minister Finans ti sipoze met sa mekanizm an plas pou kontrol depans e zerans larzan dan sa tel Departman ou Minister me i pa’n ganny fer.  E tou sa alor dan sa Proze de Lwa Mr Speaker, mon trouve poudir Minister Finans, Gouvernman in ekout nou e i pe travay ansanm avek Parlman dan sa direksyon pou kapab anmenn en pli bon kontrol e en pli bon fason pou nou kapab depans larzan piblik.  Apre, lot keksoz ki nou vwar i kler ladan osi, nou pa kapab depans larzan ki nou napa.  Sa i anmenn plis disiplin dan lafason bann Minister, bann departman i depans larzan.  Ou pa kapab depans larzan ki ou napa, zisteman.  E Minister Finans la i ava bezwen antre pou transe, pou met en kontrol pou dir vwala, nou pa kapab fer sa proze sa lannen akoz nou napa vreman.

E sa parey mon dir, i ava ed bann Minister e Departman pou pli byen planifye zot Bidze.  I a konnen li poudir initil mon pou al zis met en larzan koumsa pou zis depanse konmsi pou dir ki ou pe met en Bidze devan.  Me sa Bidze i bezwen atraver sa Bill la, sa Bidze, bann Departman Gouvernman e Minister i bezwen pli reel, pli vre.  Vwar i pou reflekte vreman larzan ki annan pou depanse.

Lefe ki mon’n dir tou sa, i fer osi en lot gran lepa devan, se ki i fer travay Oditer Zeneral akoz ek sa Bill la nou pou annan en internal audit, par Minister Finans.  Sa i bon, i bon i pou fer travay Minister Finans vin pli fasil, pou kapab kontrol e vwar koman larzan dan bann Minister e Departman i depanse e menm bann lezot lakonpannyen parastatal ki tonm anba Minister Finans pou regard zot depans.

E prezan lefe ki pou annan sa, i fer travay Oditer Zeneral ki li pou li i endepandan, pli fasil pou kapab konmsi letan i fer son rapor e anmenmtan i fer travay FPAC avek Oditer Zeneral dan Lasanble Nasyonal sa travay osi pou vin pli fasil akoz nou deza annan sa bann lenstans la ki pou kapab deza anmenn en lenformasyon pli kredib pou permet nou kapab fer osi nou analiz e rapor dan FPAC.  Mon vwar li koumsa alor sa travay oversight ki Lasanble pou annan, sirtou atraver FPAC i pou kapab ganny fer pli byen e pli vit akoz lenformasyon petet i pou pli avek nou la.  E nou kontan akoz i pou permet nou kapab donn rapor pli up to date.  Akoz mazinen ou la ki nou pe koze, bann lannen nou pankor donn okenn rapor nou Pep atraver Lasanble.  So, i ava fer ki sa bann rapor i ava vin pli up to date e Lepep, tax payers pou pli kontan akoz zot pou vwar vreman konmsi ou pa pe depans son larzan ozordi, apre dan 10an ki ou pou donn rapor.  Me ou ava depans li ozordi e lannmen ou ava donn rapor, konmsi i ava vin pli kredib osi sa bann rapor, nou ava pli up to date avek nou depans e lot keksoz ki pli fantastik ankor avek sa Proze de Lwa e ki mon kontan mon e in ganny mansyonnen par Leader of Government Business se sa progranm Performance Based budgeting.  Sa i vreman valer pou nou larzan, vreman se sa direksyon dan tou bann analiz e travay ki nou pe fer FPAC nou pe dir sanmenm sa.  E prezan, nou annan osi analiz e rapor lo sa kote pou fer e mon kontan Minister Finans li i pe vin on board la avek nou akoz sansan ti pou fer nou travay bokou pli difisil si zot lo kote Gouvernman, si lo kote Gouvernman pa ti annan Minister Finans la, pa ti annan sa bout travay ki zot pe komanse la avek sa Proze de Lwa.

So, i pou anmenn nou lo sa lot nivo ki nou anvi ale, nou dan Lasanble e ki mon konnen Lepep deor osi letan i kriye, i dir vey byen nou larzan, depans byen i pou permet alor en bon rapor pou li gannyen, en bon travay ki nou ava fer.

I annan kantmenm en lot pwen ki mon oule fer resorti.  Dan part 2 sa Bill li Policy Deveploment, Seksyon 5(4) i koz lo, ‘The Minister shall’, mon ensiste lo la ‘shall provide the National Assembly with such additional reports and information as may be reasonable during the financial year that ensure that the National Assembly is kept fully informed of the state of the economy of Seychelles and the finances of the Government’.  Mon kontan sa i la, i permet, sa en travay ki estimates committee i kapab fer.  E nou dan Lasanble nou pe get dan sa direksyon nou, FPAC konmsi son rol i bezwen agrandi.  Nou bezwen komans vwar koman Bidze letan pe vin dan Lasanble, avan menm i ganny anmennen in the House, nou bezwen pe travay lo li davans.  E sa i pou permet nou annan lenformasyon up to date avek Minister Finans pou nou osi konmsi nou a konn pli byen ki pe pase dan lekonomi Gouvernman.

Akoz souvandfwa Lasanble ou a krwar enpe dan lepase i pa tro, tro konn nanryen ki pe pase laba, zis ou vini ou donn li, li i anvale.  Me i pa pou kapab koumsa akoz nou pa rubber stamps, nou devret nou, i enportan ki nou ganny sa bann lenformasyon pou permet nou fer nou travay e sa parey mon pe dir, nouvo komite ki mon krwar Lasanble pe travay avek Gouvernman e Minister Finans pou kapab annan sa konprenezon pou nou evalye Bidze, menm avan.  I ava permet, sa i en travay alor ki estimates committee i a kapab fer dan nou Lasanble.

So, pou mwan, mon vwar ankor sa Bill i a bon.  Lot keksoz Mr Speaker, letan nou’n koz lo performance based budgeting, Leader of Government Business in nonm lo Welfare Agency mwan mon pou ensiste ankor lo Welfare Agency.  Mon mansyonn li par ekspre la, par ekspre pa par malis, ganny mon kler.  Akoz mon anvi mwan ki Welfare Agency i perform pli byen.  Larzan i annan, i pa kestyon i annan ki i depans nenport ki fason me selman nou annan bokou ka kot nou dimoun i byen bezwen.  I annan en sitiasyon pa fasil la deor, nou tou nou konnen, tou dimoun i pe ganny afekte me i annan plis ki pli vilnerab, ki ganny afekte plis e se sa rezon ki nou Gouvernman ti deside pou etablir sa Welfare Agency e aprouve par IMF.  Lot zour letan nou ti pe koz avek IMF, IMF i dir be zot pa bezwen tou sa larzan pou Welfare zot.  Nou demann li akoz, i dir be larzan i la, zot pa depanse.  Me ankor pourtan nou vwar i annan nou fanmiy, i annan bann fanmiy bann dimoun deor la ki pe travay.  Mon pa pe neseserman pe dir dimoun ki pa pe travay mwan, i annan dimoun ki pe travay me i annan problenm.  Ozordi, i annan sa madanm ki’n ganny met deor dan travay, parfwa malapropriye, ok, par malis ou whatever.  E prezan reveni kot lakour i ganny afekte sibitman koumsa.  E i fer son laplikasyon, 2 mwan napa larepons, zour larepons i vini apre ki ou’n fer enpe tapaz, i negativ.  Eski ou’n vreman evalye case sa dimoun?  Ou ganny ou en prizonyen ki sorit dan prizon, mon pa pe dir konmsi nou vini zis donn prizonyen larzan, me evalye case sa dimoun.  Vwar kimannyer sa dimoun i pa kapab re entegre dan sosyete si ou pa kapab tyanbo son lanmen en pti pe konmsi.

Annou gete, vwar son sitiasyon, sa pa bezwen konmsi, pa bezwen ou met legan parey nou dir an Kreol sa Mr Speaker.  Nou devret pe vwar, bann zofisye i la, nou gete, laba kot prizon li osi i bezwen fer son case anmenn devan e nou devret pe kapab ede sa bann dimoun parey pou permet zot kapab pran sa lanplwa, ganny en lanplwa enpe vitman e ki zot lavi i vin pli ok.  Ou annan ou plizyer ka, maladi ki tap en dimoun, so many cases deor la, be nou nou pe demande, nou pe lans en lapel pou mon pa al lo la bokou, nou lans en lapel, en serious appeal avek Welfare Agency, silvouple donn nou valer pou nou larzan.  Travay pli byen avek nou dimoun, i annan tro bokou kritik e move kritik ki annan deor.  Mon dir ou, case ou ava nonmen ekrwayab, si ou al dan lekol, an relasyon avek manrmay lekol ou pou vwar ou, kote fanmiy, lekel fanmiy ki bezwen sa help.  E Welfare i la pou fer sa alor nou lans en lapel e mon konnen mwan ki Minis Dezinyen la ki Minis pou Welfare i pe tann nou, i pou travay dan sa direksyon enpe pli byen.

Mr Speaker, avan mon fini, mon krwar mon ki i annan en lot keksoz, en pwen enportan ki toultan Minister Finans i oule fer avek bann Minister e Departman e bann konpannyen parastatal ensidswit.  I oule, souvandfwa letan Minister Finans i regard sa bann Departman i vwar poudir i annan defayans la, larzan in enpe mal depanse.  Akfer ou’n ouver sa suspense account, i annan bann kont parfwa ki ganny ouver par bann Minister, parfwa avek laprouvasyon Finans tou.  Me selman lo zerans i annan problenm.  Prezan Minister Finans i difisil li, lafason kimannyer i ti ete pou li kapab etabli sa bann kontrol, pou li kapab fer sir ki i kapab vwar byen konmsi sa Minister enpe pli anba microscope.

Me la avek sa Lalwa, kimannyer ou pou fer, Minister Finans pe al fer la, i pe met son zofisye laba dan sa Minister, dan sa Departman i pou byen.  I pou byen akoz i pou raport direk ek zot e i pa kapab zis depans dapre ki, ou konnen, en zofisye laba in dir annou fer sa koumsa.  I pa pou kapab fer li zis koumsa, i pou bezwen fer li plis avek gidans Finans e alor i pou annan plis latransparans, i ava permet annan plis kontrol osi dan sa fason e i ava fer ki parey nou dir, larzan i a ganny depanse according to son valer.

Sa pa vedir ki tou zafer pou mars roz konmsi me nou pou bezwen nou Lasanble kontinnyen zwe nou rol oversight, Oditer Zeneral i bezwen kontinnyen li osi zwe son rol pou vwar ki sa bann keksoz i marse, suspense account e tou i ava arete la.  Nou ava vwar bann kont ki ava ganny fer an deor, i ava ganny fer anba gidans Labank Santral e Minister Finans ki i ava annan plis kontrol lo la.

Vwala mon krwar Mr Speaker, i annan bokou, bokou nou ti kapab dir ankor me selman i annan lezot dimoun ki pou entervenir e mon kontan alor mwan ki sa Bill in vin devan nou e i tonm anlinny avek sa ki Lasanble pe dir e mon vwar ladan i konsider serten lendepandans, serten lotonomi pou Lasanble, ki Lasanble li i fonksyonn enpe dan son fason.  E parey zidisyer osi byento i ava vin avek pou li e sa i ava permet nou vreman dan la Demokrasi, dan latransparan, dan zerans larzan piblik, i a permet nou pas lo sa lot gir ki lemonn ozordi i pe demande.  E pou mwan alor koman en Manm FPAC, koman Manm Lasanble mon vwar ki la Gouvernman pe ekout nou e mon dir felisitasyon e prezan nou ava met li korekteman an pratik e nou demann tou Minister, Departman e bann konpannyen parastatal tousala konmsi pou konpran sa byen, pran li positive.  Pa krwar konmsi nou pe vin an mal avek zot, pran li pozitiv e annou travay nou tou dan sa direksyon.  Avek sa Mr Speaker, mon pou siport sa Bill e mon remersye ou.

 

MR SPEAKER

Onorab Dugasse.

 

HON MELVAL DUGASSE

Mersi Mr Speaker, bonzour Minis.  Mr Speaker, sa Bill devan nou Lasanble prezante par Minis Finans ozordi i vin dan en moman enteresan e apropriye pou nou pei.  Pou mwan, kot Sesel pe arive lo some son transformasyon ekonomik, i neseser dan sa konteks Gouvernman pe revwar lafason ki i fonksyonnen e kontinnyen delivre e devlop son progranm ekonomik.

Mr Speaker, sa Bill ozordi i pou tou Seselwa an zeneral, i pa zis pou dimoun konsernen avek rapor Oditer Zeneral e bann ki manage kont piblik me pou tou ki kontribye dan sa pei.  Parey letan nou fanmiy, kot nou plan nou Bidze e nou zer nou larzan pou ki napa gaspiyaz, bann pti proze ki nou anvi fer kot lakour, nou fer sir ki i a la oter e nou ganny valer pou nou larzan ki nou’n save.

En Minister Gouvernman osi i devret pe swiv sa bann menm legzanp.  Me i malere Mr Speaker, ki i annan nou nou bann public servant ki ganny responsabilite pou zer nou larzan piblik, pa pe fer li responsableman.  I kapab en pli o zofisye ziska sa junior staff, konbyen nou ki satisfe avek lafason ki serten Minister i delivre bann proze piblik.

Parfwa nou menm koman paran nou pa satisfe avek bann lekipman ki ganny ase kot lekol.  Lekipman kot lopital, servis bis piblik, bann lakaz ki ganny konstri par Gouvermnman eski i en problenm monitoring, eski i en problenm bon marse pe kout nou ser; eski i en problenm kot nou pe fer dalon ganny gro larzan e Lepep pe sibir le konsekans?

Ler nou koz lo pli bon fason zer larzan piblik, bokou nou i annan sa persepsyon ki sa i konsern zis bann ki annan pos pli o dan management, ki sa i fo.  Par egzanp, en drayver dan en transpor Gouvernman kip ran koupon fuel e i pa servi e servi dan son prop lentere, I enn.  En zofisye ki fail pou monitor en proze e kot en completion form i ganny endorse menm siproze ki’n konplete pa lo standar.

Sa Bill pou fer provizyon pou fer sir ki sa enn ki pe vann oubyen aste en servis lo non Gouvernman i vin accountable pou son aksyon e ki bann public servants ki zot travay dan en fason onnet e pa konpromet lentegrite sa Gouvernman ki anploy zot.

Mr Speaker, pou mwan koripsyon se en dimoun ki vin koripte osi lontan ki i annan plis posibilite pou li fer koripsyon.  E zisteman sa Bill devan nou ozordi pe ferm sa bann loop holes ki serten pe vwar semen pase e pou met an plas en penalti pou sa bann ki pou les zot responsabilite esap zot.  Mon kontan ki sa Bill ozordi i fer provizyon pou ki i annan odit dan bann lorganizasyon parastatal tel ki SPTC, SEPEC eksetera.  Sa i ava ede pou annan en pli bon apersi lo kimannyer sa bann lorganizasyon pe zer finans e osi met en kontrol lo lafason kot depans e sa i a ed dekouraz sa persepsyon koripsyon e fer ki sa bann lorganizasyon i ganny manage dan en fason pli transparan e efikas.

Mr Speaker, rol Lasanble in klerman ganny demarke dan sa Bill koman bann vre watchdog lo Legzekitiv.  Nou responsabilite i kler, se ki nou Lasanble ki atraver Finance and Public Accounts Committee pou zisteman desarz sa responsabilite e fer son vre oversight role.  Alors i tre enportan ki nou bann Manm i ganny plis bagaz pou zot kapab desarz zot bann responsabilite.  Nou devret azour lo tou sa bann size sirtou son konteni teknik e konn byen sa Lalwa.  Nou pou kapab kestyonn bann rapor ki pou ganny prezante avek sa Lasanble.

Mr Speaker, nou pa kapab koz lo menazman kont san get son laspe kontrol.  Mon dir sa Mr Speaker akoz i annan en kantite referans ki ganny fer dan rapor kot kontrol i swadizan manke oubyen pa egziste.  I enportan Mr Speaker, letan nou pe koz lo kontrol ki nou fer sir ki sa ki sipoze egzekit kontrol i konn egzakteman ki i annan pou fer e pou ou kapab fer sa limenm i bezwen annan provizyon premyerman ki sa dimoun i ganny byen train.  Si i en dimoun ki pa ganny train byen i pa pou kapab zanmen fer sa ki i sipoze pe fer dan sa domenn e si i annan responsabilite pou get lo kont piblik, i bezwen fer sir ki i annan lantrennman dan sa domenn.

Mr Speaker, a sa pwen osi i enportan pou note ki ler ou annan responsabilite ou bezwen konnen ki ou lobzektif, kwa ki ou annan pou fer e kimannyer ou pou fer li byen.

Mr Speaker, mon deryen pwen se ki sa Bill pou an menm tan met en lord avek bann ki nou’n responsabiliz zot pou depans nou larzan.  I pou osi dir avek Lepep Seselwa sezi bann loportinite.  I pe osi anvoy en mesaz kler, en mesaz tre kler ek bann zofisye piblik ki annan sa responsabilite pou depans larzan piblik.  Fer li byen pou ofer Lepep Seselwa en servis i nivo.

Mr Speaker, avek sa enn de mo, mon pou siport sa Lalwa akoz mon konnen ki nou pei pe al dan en bon direksyon e mon konnen ki sa Gouvernman pou enn fwa pou tou met en lord avek kont piblik.  Mersi Mr Speaker.

 

MR SPEAKER

Onorab Vidot.

 

HON KEVIN VIDOT

Thank you Mr Speaker.  Bonzour Minis.  Mr Speaker, sa Proze de Lwa i annan lobzektiv pou klarifye e reform sistenm pou pli bon zestyon e kontrol lo larzan piblik pou fer li vin pli byen rann kont e fleksib e osi pou pli byen soulinny bann prensip de baz an sa ki konsern finans Gouvernman e pou osi klarifye lobligasyon Gouvernman an sa ki konsern Bidze e kontabilite.

Mr Speaker, senpleman en bon pa ver en bon direksyon, en bon pa ver progre, en bon pa ver sa nouvo Sesel ki Prezidan Michel ti prezant avek Pep Seselwa.

Mr Speaker, mon pou limit mon lentervansyon lo parti 3 sa Bill, lartik 6, paragraf 1(a) ki ekrir klerman ki Minis ki devan nou Lasanble ozordi i bezwen fer sir ki i annan bann sistenm ki’n ganny etablir atraver Gouvernman pou planifikasyon, alokasyon e bidzete pou servi bann resours dan en fason pou amelyor lekonomi, lefikasite e efektivite nou Gouvernman.

Mr Speaker, i en loner pou mon bomaten, pou mon adres sa Lasanble e dan prezans Minis pou mon koz lo ki fason mon avek mon 3 Koleg dan sa Lasanble ki’n pas atraver progranm Young Leaders kot nou ti annan enn nou module lo Finance, kot nou ti adres sa program performance based budgeting. Lermon ti pe pas atraver sa training pou mon ti en privilez e mon ti vwar sa konman en eye opener ki fason nou Gouvernman prezan i kapab al ver sa direksyon kot nou kapab enplimant nou bann progranm e allocate bann Bidze, nou resours larzan piblik atraver bann progranm.  E i annan en sistenm an plas ki pou asir zot performans.

Mr Speaker, nou ti ganny sans pou nou al fer resers lo sa style of budgeting parey nou dir e vwar si i en keksoz ki pou ideal pou Gouvernman enplimante.  E ozordi i en loner pou mwan koman en Manm Lasanble e koman en graduate pou Young Leaders pou vwar Minis pe vin prezant nou en tel Bill bomaten.  Vreman ti’n ler Mr Speaker, pou nou al ver sa direksyon.  Vreman ti’n ler pou nou Gouvernman asire e re-asir Lepep Seselwa ki zot larzan, nou larzan, larzan bann tax payer ki al ver bann bon direksyon e pe al ver bann bon progranm ki alafen nou ava vwar rezilta nou sakrifis tax ki nou peye tou le mwan.

Mr Speaker, i neseser ki ler larzan leta, larzan piblik pe ganny depanse, i ganny depanse pou enpakte, pou enfliyans lavi ouswa pou amelyor lavi Lepep Seselwa e se sa pou kwa Minister e Minis pou Finans i bezwen fer sir sa Proze de Lwa ki devan nou Lasanble to the letter, i ganny enplimante.  Fodre i pa vin en lot Lalwa ki nou met dan en shelf ki ganny lapousyer me i bezwen en Lalwa ki ganny enplimante e nou monitor nou fer sir ki i pe pran son plas ki i merit pran dan nou sosyete e dan lavi Lepep Seselwa.

Mr Speaker, ozordi koman Manm Elekte pou distrik Larivyer Anglez, i en plezir ankor enn fwa ki mon pe asiz lo sa kote latab koman en Manm Elekte pou Parti Lepep.  I reasir mon e rekonfort mon ki vreman sa parti ki o pouvwar Parti Lepep i sa parti ki annan Lepep Seselwa a ker.  I sa parti atraver direksyon Prezidan Michel ki anvi vwar en diferans dan nou sosyete.  I anvi vwar en diferans dan kimannyer nou zer larzan Leta, larzan piblik.  E pou mon i en privilez ankor enn fwa pu mon asiz lo sa kote latab e pou mon debat lo sa Proze de Lwa e pou mon osi vot lo la e ki ava vin Lalwa e nou ava kapab met li an apliksyon.

Vreman Lepep Seselwa pan fer en move swa dan sa dernyen eleksyon.  Letan mon dir i pan fer en move swa, i pan fer move swa zis pou elekte Prezidan Michel koman Prezidan Larepibik Sesel me osi i pa’n fer en move swa parey nou Leader of Government Business in dir, in elekte en gran mazorite reprezantan Lepep dan sa Lasanble.  Zot in fer en bon swa akoz ozordi nou pe donn en koudmen pou nou fer sa pei, pou nou fer nou Gouvernman, Legzekitiv travay e travay byen pou byennet Lepep Seselwa e travay dan lefikasite.  Nou bezwen vwar valer pou nou larzan, nou bezwen vwar sak roupi ki ganny depanse dan sa pei i depanse ankor enn fwa pou amelyor lavi Lepep Seselwa.

Si Lepep Seselwa ki’n met nou la, in met Prezidan Michel la e Prezidan Michel in met son bann Minis la pou travay pou Lepep e Prezidan Michel in dir ki nou bezwen donn en meyer deal Lepep Seselwa.  Mon krwar sa Proze de Lwa pe al ver sa bon direksyon.  Mon krwar sa Proze de Lwa i ava servi son purpose ki i merit servi.  Me byensir Minis avek sipervizyon e kontrol e monitoring ou prop Minister i pou esansyel ki sa i arive e i ariv dan en fason pozitiv.

En keksoz ki mon pa pou manke pou koz lo la Mr Speaker, se mon kontan ozordi osi pou annan en kontrol lo ki fason bann parastatal i depans zot larzan ouswa i zer zot larzan.  I nepli ler dan sa pei pou annan bann dimoun ki asize dan bann pozisyon ase o dan bann parastatal kot zot pe ganny bann gro, gro saler, manke zot menm zot saler i pli o ki en Bidze pou enplimant sa progranm ouswa pou run sa parastatal.  E zot pa rann kont ek personn, mon krwar in ariv en ler dan sa pei kot tou dimoun i rann kont avek Lepep Seselwa e nou konman bann Manm Elekte Parti Lepep dan sa Lasanble, nou bann Manm responsab, nou bezwen fer sir zwe nou rol ki sa bann lorganizasyon, sa bann parastatal, bann public enterprise zot zwe zot rol zot osi e zot montre valer pou larzan e nou pa vwar bann larzan ki zis disparet san vwar kote in al terminen.  Mon krwar i neseser Mr Speaker, pou nou etre fran ozordi, i neseser pou nou bouz ver sa direksyon akoz pou mon sa ki pli enportan se pa sa dimoun ki asiz dan sa sez laba dan sa lorganizasyon ouswa dan sa parastatal.  Mon sa ki enportan pou mwan se Lepep Seselwa.  Sa ki enportan pou mwan se mon zabitan si i pe ganny sa meyer deal.  E LGB e Koleg Onorab ki’n koz avan mwan in koz lo Social Welfare Agency, mon pa pou koz lo la me selman i neseser ki nou ganny en meyer deal dan tou sa bann keksoz se Lepep ki stand at the winning end.

Mr Speaker, ozordi letan nou pe koz lo sa Bill, i enportan pou rekonnet osi ki sa ki sa Bill pe koz lo la an sa ki konsern nou Lasanble Nasyonal e sa Lartik 6, paragraf C i koz kler lo la, ki montre nou ki nou koman en Lasanble nou annan en pli gran rol pou nou zwe e nou bezwen fer sir nou fer sir, nou annan sa lasirans e sa konviksyon ki vreman ki larzan e resours piblik pe ganny byen manage dan en fason transparan.

Dan sa Bill Mr Speaker, i koz lo ki fason serten lorganizasyon i kapab dispose of zot bann assets e i montre nou a en serten sonm mon krwar ki Minis i bezwen klarifye klerman avek nou ler mon’n pas lo sa Bill a en serten sonm 1 milyon, par anba en milyon ki sa lorganizasyon i kapab dispose ouswa vann sa asset san permisyon Minis.  Mr Speaker, pou mwan sa i en keksoz ki nou bezwen fer sir, asire ki sa i ganny fer byen akoz mon pa anvi demen ki en asset Gouvernman ouswa kantmenm parastatal pe ganny vann par anba 1 milyon kot parey Onorab in dir oparavan ki dalon ki pran, ouswa lot ki pran kot nou napa vreman en kontrol.

So, mon oule ki Minis Finans ozordi i asir ek nou Lasanble, avek Lepep Seselwa ki vreman sa ki apartenir a Gouvernman e ki ler sa parastatal ou sa lorganizasyon i vwar ki i merit vann, i ganny fer li byen e se Lepep ki kontinnyen benefisye dan sa deal.  Ki pa enn nou dalon, ki pa enn zot dalon ouswa enn nou menm ouswa sinyatir parey zot menm ki benefisye me selman ki Lepep Seselwa i vwar li pe ganny gete dan tousala.

Mr Speaker, mon pa anvi kontinnyen koz plis lo la, i annan en kantite keksoz pou koz lo la lo sa Bill me i annan Koleg apre mwan ki pou koze me mon anvi konkli ozordi par dir Mr Speaker, ki sa parti ankor enn fwa ki o pouvwar, Parti Lepep, ki Seselwa in met konfyans ladan, ankor enn fwa atraver Prezidan Michel, i konsernen e angaze pou ofer en meyer deal Lepep Seselwa Mr Speaker e nou bezwen fer sir ki nou Gouvernman i travay pou zot byennet e fer sir ki nou larzan pe ganny byen servi me pa pe disparet parey mon’n dir oparavan e nou bezwen asire Mr Speaker ki nou resours, resours piblik pe ganny servi pou satisfer dezir.  Fer sir ki resours piblik pa pe ganny servi pou satisfer dezir en endividi dan plas servi en Minister ou Departman konsernen.  Mon dir thumbs up Mr Speaker, thumbs up pu Prezidan Michel e son ladministrasyon pou gard son parol avek Lepep Seselwa.

E avek sa Mr Speaker, mon pou kontinnyen donn sipor Prezidan Michel ek son Gouvernman e mon ava dir mersi pou zot pasyans.

MR SPEAKER

Onorab Samson.

 

HON DEREK SAMSON

Mersi Mr Speaker, Minister bonzour.  Mr Speaker, avek levenman yer e osi avek sa Proze de Lwa bomaten, mon premye lenpresyon se ki Gouvernman Prezidan Michel pa pe dormi ek pei me i pe plito batir vreman en Nouvo Sesel.

Me kestyon fondamantal vreman letan mon pe get sa Proze de Lwa bomaten se akoz vreman en tel Lalwa, akoz en tel Proze de Lwa pou Sesel e sirtou en Proze de Lwa ki pe koz lo larzan piblik, tax payers money parey nou annan labitid pou dir.  E vreman i en Lalwa ki ti’n deza egziste, mon pe koz lo sa enn ki ti ganny, ki date depi 1996 ki pe ganny ranplase la, i enteresan Mr Speaker akoz mon pa krwar larepons pou sa kestyon i sitan senp oubyen akoz ki en Lalwa in vye nou bezwen ranplase oubyen nenport ki rezon kel konk.

Me sa ki mon pe analize ozordi se ki Sesel in pas atraver en transformasyon enorm depi 1996 ziska ozordi.  En transformasyon zeneral petet dan lafason ki nou pei vreman in devlope.  Nou’n vwar nou pei Sesel, en leta zil pe port plis latansyon avek sa vilaz global, avek Linyon Eropeen, avek bann diferan aktivite ki pe arive menm dan Nor Lanmerik e menm dan nou pti rezyon Losean Endyen, Lafrik, nou pe osi sirveye ki bann deroulman ekonomik pe pase akoz nou’n pran kont ki natirelman i annan en lenpak lo aktivite ekonomik Sesel koman en pti zil.

E Mr Speaker, sa langaz Global Village ki mon rapel ase klerman dan mon latet la ki dan bann diferan diskisyon youth voices ki Departman Lazenes ti fer de trwa lannen pase, en pti pe avan lannen 2000.  I ti sa letan en term ki petet mon menm mon pa ti pe vreman konpran akoz nou komans koz ki en Global Village me ozordi mon krwar mon vwar li klerman ki nou pa kapab reste an izolasyon.  Nou pa kapab reste koman en pti zil, me nou bezwen rekonnet ki nou pa endispansab, nou bezwen lezot pei, pti ou gro, nou bezwen kanmarad.

Nou’n rekonnet lenportans lanmitye enternasyonal e nou’n osi vwar en aksyon ferm par Prezidan Michel pou etabli en Active International Diplomacy, par annan bann bon relasyon avek lezot pei.  E mon krwar i byen note ki menm pou sa Proze de Lwa ki devan nou ozordi, nou’n ganny sipor oubyen si pa sipor me legzanp plizyer pei dan larezyon enkli Moris ki Minister i ava dakor ki bokou son bann staff ki’n fer plizyer vizit pou ki a lafen nou ganny en tel Proze de Lwa.

E mon krwar i osi enportan a sa pwen la Mr Speaker pou fer mansyon ki IMF mon mazinen in zwe en kantite rol, en rol ase enportan pou ed nou vreman vizavi etablir en tel Proze de Lwa.  Me sa i pa zis akoz presyon oubyen demann sa bann tel lorganizasyon oubyen legzanp sa bann tel pei, me i en demars personnel Gouvernman Prezidan Michel pou vwar kimannyer nou bezwen kondisyonn nou pti pei Sesel pou ki nou pa perdi dan sa kriz, dan sa bann konba kriz ekonomik ki pe pase globalman.

Mr Speaker, dan sa transformasyon ki Sesel in pas ladan, nou’n vwar nou fas a plizyer defi, a plizyer sanzman ki’n arive dan nou pei.  Mon pe koz lokalman, Sesel in vwar li avek en logmantasyon dan lakantite biznes, pti ou gro.  Nou’n vwar bokou plis batiman, mon pe koz lotel, bann diferan lenfrastriktir enportan ki pe anmenn en kou lo nou pei.  Nou’n vwar plis servis piblik e plis servis prive osi egalman e konsonmasyon Lepep Seselwa in monte, mon krwar nou bezwen admet ki nou nasyon i manz pli byen malgre kou lavi.  Zot bwar pli byen konpare avek de trwa lannen pase e nou vwar ki depans pei limenm lo lenportasyon in ogmante e byensir nou’n vwar en lenpakt atraver logmantasyon dan pri fuel ki fer ki nou’n bezwen adapte.

Annefe Mr Speaker, mon krwar nou konn tre byen ki depi 2008 bokou keksoz in sanze baze lo aktivite ekonomik Sesel, nou rapel flotasyon roupi vizavi kriz ekonomik mondyal e nou ti bezwen antre pli seryezman dan en reform ekonomik dan sa menm lannen 2008 e keksoz i ankor pe kontinnyen.

Me sa ki enportan ladan Mr Speaker, se ki finalman ler ou vwar bokou aktivite otour en size, en lobze, i merit annan plis disiplin pou annan plis kontrol, plis responsabilite oubyen plis lord dan aktivite otour sa lobze.  E la mon pe koz lo nou roupi, lo larzan piblik ki sa Proze de Lwa i zisteman pe prezante ozordi.  Ki i annan en sitan, sitan kantite aktivite otour nou roupi ozordi ki nou’n santi, nou’n vwar li neseser ki nou bezwen anmenn en serten disiplin, en serten lord prezante ankor par sa Proze de Lwa ki ava annan kontrol lo kimannyer nou depans e zer nou larzan piblik.

E sa i rezon ankor akoz ki mwan mon pou dir ki byensir Gouvernman Prezidan Michel pa pe dormi ditou avek pei, pe vreman ansanm avek li batir en Nouvo Sesel.  E mon kontan vreman letan mon vwar ki sa Proze de Lwa i enn ki prezant en direksyon kler, nou pa be bouz dan vid.  Mon pa krwar personn pou kapab vin dir ki nou napa en plan bidzeter, nou pa konnen ki nou pe fer avek larzan, piblik.  Mon krwar sa Proze de Lwa i demontre klerman a lanvironnman enternasyonal ki nou konnen ki nou pe fer.  Sa Gouvernman i konnen ki i pe fer e ki vreman Minister responsab, Minister Finans in fer en travay enteresan.

E sa ankor i fer mon refer lo en parti sa Proze de Lwa kot i koz lo responsabilite Minis pou li zisteman apre sa Lalwa etablir bann polisi kler dan en lespas 3 mwan pou ki nou annan vreman en plan konkret lo kimannyer nou pou zer sa larzan piblik.  E mon krwar ki parey Proze de Lwa i dir, Minis pou byensir devret kapab konsey Gouvernman, dir Gouvernman vreman si i santi i annan serten defayans, vin devan Lasanble vin eksplik Lasanble, oubyen demann Lasanble serten permisyon dan serten ka lo kimannyer nou devret antreprann nou lekonomi.

Mr Speaker, mon ti a kontan koz lo 2 Lartik pou kontinnyen anba sa Proze de Lwa.  Sa se Lartik 7 ki koz lo duties bann accounting officers e Minis in fek anonse ki dezorme bann tel zofisye pou bezwen responsab pou tonm anba Minister Finans direkteman.  E mwan mon get lo dan en fason zot pou pe reponn parey Proze de Lwa i dir avek National Assembly dan bann letan ki i neseser.

E sa ki enteres mon ankor anba sa Proze de Lwa se ki parey nou konnen ozordi oubyen enpe letan pase i ti ete ki bann accounting officers ti bezwen toudfwa ganny permisyon avek PS pou fer serten depans, tranzaksyon finansyer dan en Minister.  E bokou fwa zot ti ganny bokou presyon par bann PS oubyen Minis zot menm lo ki kalite depans pou bezwen ganny fer.    E nou’n antann pli boner ki serten ka, i annan larzan ki’n ganny depanse ki Gouvernman napa oubyen sa Minister vreman napa.  Me mwan mon kontan vreman Mr Speaker ki la i pou annan en pli bon disiplin dan lafason ki sa bann tel aktivite pou deroule e mon krwar i ava annan plis respe anver bann accounting officers pou ki ler i konsey en PS pou dir be gete, Lalwa i egziste, nou pou bezwen fer atansyon la.  Nou bezwen swiv direksyon procurement ki nou bezwen swiv pou fer tel depans oubyen request atraver Minister Finans lo ki posibilite nou annan pou fer tel ou tel aktivite.  E mon krwar sa i ava anmenn serten konfor pou sa bann tel accounting officers pou ki zot kapab fer zot travay pli byen e kontinnyelman ede dan devlopman nou pei.

E pou konklir, sa dernyen lartik Mr Speaker, se lartik 35 ki pe met lanfaz lo aktivite bann antreprener, bann public enterprise, bann parastatals ki zot osi zot kapab korpor konfortableman avek nou plan ekonomik pou ki zot osi zot donn koudmen pou ki larzan piblik i byen ganny depanse.

E pou terminen Mr Speaker, mon krwar i byen ki malgre National Assembly, nou Lasanble Nasyonal i ganny mansyonnen bokou dan sa Proze de Lwa.  Finalman, Lasanble Nasyonal i devret ganny regarde koman Lepep Seselwa.  I pa vedir ki Minis oubyen sa bann tel dosye ki pou ganny prezante avek National Assembly i konsern larzan, piblik i pe ganny vin demann permisyon Lasanble Nasyonal, non.  Me se nasyon Seselwa ki finalman pe reponn anver tousala alafen se nou reprezantan Lepep, se nou ki lavwa Lepep.

E mon ti a kontan pou terminen Mr Speaker, dir ki parey in ganny refer sorti, training mon krwar i enportan otour sa Proze de Lwa e sa Proze de Lwa fodre i ganny met an pratik non pa selman in words me osi an pratik ki vreman i ganny resantir dan nou bann diferan Minister dan diferan moman ki i pou ganny servi, mersi bokou.

 

MR SPEAKER

Onorab Vangadasamy.

 

HON SHERYL VANGADASAMY

Mr Speaker, Minis.  En bon politisyen i enn ki aksepte e rekonnet kot Gouvernman e pei pe al byen.  I enn ki osi merit fer lavwa tande pou pous pou sanzman e meyer fason fer kot nou pei, kot nou Gouvernman pe al mal.  En bon Gouvernman i enn ki aksepte kritik pozitiv e fonde.  En bon Gouvernman i enn ki toultan pe analize, rode meyer mekanizm pou amelyor son fonksyonnman e servis.  En bon Gouvernman i enn ki annan abilite e grander lespri pou fer sanzman, the right change kan i neseser e se sa ki sa Bill devan sa Lasanble pe fer.

Sa kontinnyasyon, sa sanzman ki nou anvi vwar, ki nou kontan koz lo la e swete vwar dan nou lekonomi, dan finansman dan servis piblik, dan latitid, dan delivrans nou Gouvernman dan nou pei e dan nou Pep.

Mon enn Mr Speaker, ki toultan krwar dan disiplin, dan disiplin fiskal, bon fason zer larzan piblik, delivre lo promes e lasirans.  Leksplikasyon kler kot nou pa kapab delivre e larzan ki nou mal depanse.  Transparans e accountability, mon enn ki krwar dan tax payers money is not our money, i pa nou larzan personnel.  Tax payers money is state money ki merit ganny servi byen comme il faut e accounted for at all times.

Sa Bill Mr Speaker, i enn ki donn mon lespwar, ki donn mon lespwar pou sa.  I enn ki met plis kontrol, kontrol neseser dan lafason ki servis piblik i zer larzan leta.  Lafason ki nou determin proze e depans aktivite sak Minister e lezot lorganizasyon piblik.

Sa Bill i met bokou plis lanfaz e responsabilite lo bann endividi kle dan sak Minister e lorganizasyon piblik ki pou reponn lo depans leta e asire ki i annan en plan proze lon term e ki finansman ki en fakter kle i ganny byen depanse, byen delivre e accounted for.

Sa Bill Mr Speaker, i donn nou Lasanble plis louvertir e loportinite pou pli byen scrutinize depans Gouvernman.  Pou donn plis pouvwar oversight e swivi neseser Bidze anyel Gouvernman.

Mr Speaker, lontan ti’n ler pou Gouvernman antreprann en program performance based budgeting system.  Lontan ti’n ler pou nou fer analiz e adopte bann polisi ki asire ki nou get value for money, value for tax payers money.  Lontan ti’n ler pou annan plan lon term finansman bann Minister e nou Gouvernman e asire ki i annan comparative analysis lo performans dan Gouvernman dan sekter piblik e cost lo depans ki nou fer.

Mr Speaker, mon siport e felisit Minister Finans for the step being taken ki pou sanz depans e mannyer fer nou Gouvernman.  Ki pou sanz depans e mannyer nou zer depans piblik.  The right step in the right direction, we are making the right choice at the right time.  Mr Speaker, se sa kalite sanzman ki Lepep Seselwa i anvi vwar, se sa kalite sanzman ki nou kontan koz lo la, ki nou koman en parti ti koz avek Lepep lannen pase dan eleksyon.  Se sa kalite sanzman ki mon anvi mon Gouvernman i kontinnyelman fer e antreprann.

Mr Speaker, ti’n ler pou sa sanzman e mon felisit Gouvernman pou sa grander lespri, pou aksepte ki nou pa pou ganny okenn sanzman si nou kontinnyelman fer mannyer nou ti toultan pe fer.

A new era Mr Speaker calls for new changes, calls for new ways of thinking and doing.  Se sa en nouvo letap, se sa en Nouvo Sesel ki nou kontan koz lo la, mersi.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker, Mr Speaker, mon pou tre bref, mon krwar ki preski tou keksoz in ganny dir.  Mon krwar sa Proze de Lwa ki devan nou i pou ed nou move dan sa Nouvo Sesel parey nou’n dir.  Zisteman, Mardi pase Minis Meriton ti vin devan nou Lasanble e ti prezant nou son plan aksyon pou Renesans Sosyal 2012, 2016 e avek tenm Moving to a new Seychelles.  E mon krwar sa plan i annan en lenpakt lo tou sa ki arive dan lekonomi pei akoz letan mon’n regard sa plan, en kantite keksoz ki pou posib pou son lenplimantasyon i pou demann bon zesyon resours.  Nou pou bezwen finans e nou pou bezwen kapab manage nou finans pou nou asire ki i annan sa bon sinerzi ant tou bann Departman e Minister konsernen e sa i ava anpese ki pou annan duplication.

Sa Bill osi mon panse i pe fer provizyon pou ki nou Gouvernman i vin enn ki vin pli pro-aktiv sirtou Minister Finans.  Ok, so, Minister Finans i pou bezwen fer li son devwar pou konnen krwa ki pe pase dan sak Minister, sak Departman be it Gouvernman ou parastatal la ki parastatal pou bezwen accountable pou tou sa ki zot fer.  So, mon panse ki sa Bill in vin a en moman apropriye e ki i ava donn loportinite Minister Finans e an plis ki sa parey bann Koleg in dir, Lasanble Nasyonal nou komite FPAC me mon osi panse ki nou komite Lasirans Gouvernman pou annan en rol kle pou zwe dan provizyon sa Bill, sirtou kot bann proze Gouvernman i konsernen.

Mr Speaker, mon ti a zis kontan petet demann Minis pou met en pti pe klarifikasyon lo enn de issues.  Premyerman, an vi ki pou annan enpe strict control lo lafason ki depans i ganny fer.  Eski Minis i kapab dir nou si sa pa pou fer ki pou annan enpe tro birokrasi e sa i ava ede pou retard serten proze ki Gouvernman i anvi enplimante, in good faith, petet Minis ti ava donn nou enpe klarifikasyon lo la.

Answit, vi ki nou konnen poudir i annan bokou iregilarite dan lafason ki bann parastatal i operate sirtou kot bann kestyon saler, incentives pou zot bann zofisye i konsernen, ki lasirans ki Minis pe donn nou pou dir sa pou met en lord dan tou sa keksoz.  Petet osi Minis ti ava donn nou enpe plis leksplikasyon vi ki i annan serten departman ki pou ganny lotorizasyon pou zot kapab manage en suspense account, petet donn nou en pti pe plis leksplikasyon lo kimannyer sa pou ganny fer.

Answit petet Minis ti ava donn nou en pti pe klarifikasyon lo ki pou arive avek bann officers, bann accounting officers ki al against bann norms, bann rules and regulations ki pou ganny set baze lo sa Bill.  Kalite mezir pou ganny pran e pli enportan, ki pou rol Minister Finans in terms of ed Lasanble Nasyonal, ed biro Oditer Zeneral pou zot kapab ogmant zot kapasite pou zot kapab desarz byen sa rol oversight ki zot annan pou zwe.

So, an gro parey mon’n dir sa Bill i enn ki tre bon, fotespere ki i anmenn nou dan sa lot letap e nou a vwar fri sa nouvo Sesel ki nou anvi kree.  Mersi Mr Speaker.

 

MR SPEAKER

Bon avan mon donn Minis the right of reply, ti annan enn de bann pti fot tipografi.  Mon ava demann Leader of Government Business pou entrodwir vitman.

 

HON MARIE-ANTOINETTE ROSE

Mersi Mr Speaker, Mr Speaker, an adisyon avek serten lamannman ki monn met devan, ou lofis in port a mon latansyon serten lamannman ki mon santi i neseser pou nou ganny konsiderasyon, laprouvasyon Minis.  Anba seksyon 6(1)(c), nou ti a kontan retir sa dezyenm mo oversight, savedir sa mo oversight apre National Assembly pou ranplas li par over.  Savedir i lir, “enhance the oversight of the National Assembly over public resources and public monies”.  I annan 2 repetisyon of oversight e sa dezyenm oversight i devret ganny ranplase par over.

Seksyon 7(6), Mr Speaker, sub-section 6, dezyenm lalinny, sub-section 6 should be sub-section 5 – akoz i koz lo the accounting officer ki ganny trouve dan sub-section 5 zis par lao olye sub-section 6 ki limenm li sa sub-section ki nou pe koz lo la.

E seksyon 17, i annan plizyer lamannman, 17(1) Mr Speaker, i fer referans a en sonm 1 milyon, savedir 1 avek 6 zero e Seychelles Rupees e 17(3) i fer referans selman a si mon konpran byen 100 mil savedir i mank en zero.  Aprezan Financial Controller in dir mwan ki Seychelles Rupees is SR, parey proposal in mete.  Savedir i pa RS dan 17(1) i devret SR, RS mon mazinen dan bann lezot zirisdiksyon.

 

MR SPEAKER

Ok, mon krwar i straight forward, i pa alter konteni e sibstans sa Bill dan okenn fason.  Nou ava pran li koman bann fot tipografi e mon ava demann Minis pou fer son reply. Eksepte mon pa konnen si zot ti oule fer vin 100 mil olye 1 milyon, zot bezwen deside si 100 mil ouswa 1 milyon.

 

HON MARIE-ANTOINETTE ROSE

Nou nou ti ava prefere i 1 milyon Minis.

 

MR SPEAKER

I annan en gran diferans.  Ok Minis, right of reply.

 

MINISTER PIERRE LAPORTE

Mr Speaker, mon anvi remersi ou pou diriz sa sesyon ozordi, mon anvi remersi tou bann Onorab Lasanble Nasyonal pou zot lankourazman.  I donn mwan gran soulazman pou vwar ki i annan sipor inanim pou sa Proze de Lwa e sirtou ki Lasanble i apresye sibstans sa Lalwa ki parey zot in dir i montre ki i en Lasanble ki matir, en Lasanble ki konpran parey serten Onorab in dir, new times, new changes.

Mr Speaker, mon pou tous zis detrwa pwen an gro.  Dabor zis pou fer rapel bann Manm Lasanble kestyon ki’n poze.  Rezon det sa Proze de Lwa se dabor pou konsolid bann mezir ki deza pe ganny fer ozordi e ki pe ganny fer dan en fason en pe loose, parey nou dir an Angle e nou anmennn sa dan en fason konkret anba en Lalwa.  Anplis, anmenn bann nouvo mezir, nouvo prosedir ki anlinny, parey mon’n dir dan mon diskour pli boner, anlinny avek norm enternasyonal e anlinny avek nesesite pou nou moderniz lafason ki nou operate.  I annan serten mo ki sorti klerman dan sa Lalwa e ki’n ganny reflekte par zot lentervansyon se oversight e kontrol.  Sa Lalwa i enportan pou nou, parey nou’n dir donn oversight e kontrol pli byen lo Minister Finans e evantyelman lo Lasanble Nasyonal e mon kontan pou vwar ki Lasanble i rekonnet ki Gouvernman, Minister Finans, Cabinet an zeneral, nou’n ekout zot bann konsern, nou’n ekout zot bann bezwen e ki zot satisfe ki sa in ganny pran an konsiderasyon.  Petet lo sa mon a zis dir en pti parol ki mon a rann en pti omaz Vis Prezidan Faure akoz i vre ozordi, mwan Minis la mon pe prezant sa Bill, me sa travay ti komanse depi ler VP Faure ti la e bann staff ki la.  Alor mon rekonnet son drive ki in kontribye pou son travay ki mwan, mon’n vini mon’n vin fini, ensi ki Prezidan e Cabinet ki’n diskit longman lo sa Bill.  Ti komanse ankor avan mon ti la, ti deza dan Cabinet.  Mon’n vini detrwa fwa nou’n retournen akoz nou’n oule fer sir ki vreman nou annan en Lalwa ki serye e ki reflekte nou bezwen e ki ler i vini, nou pa bezwen retourn ankor deryer.

Mr Speaker, enn bann pwen ki’n fer sorti tre klerman bomaten se ki Lasanble Nasyonal i anvi vwar valer pou larzan.  Valer pou larzan pa pou zot, pa pou nou, sirtou valer pou larzan pou pep ki zot reprezante la ozordi.  Onorab Vangadasamy in dir taler ki tax payer’s money i belong to the State.  Actually State i manageTax payer’s money belong to tax payer.  It belongs to the people e nou, nou rol nou, Minister Finans ensi ki Lasanble Nasyonal se pou al pli lwen pou asire ki ler nou anmas sa larzan, lepep i vwar kot sa larzan i ale e i santi ki son larzan i ganny byen depanse.  E nou espere ki atraver sa Lalwa, nou kot Minister Finans nou a kapab attain sa lobzektiv pou zot.

Sa pwen oversight in ganny resorti Mr Speaker, an plizyer repriz e mwan mon satisfe ki Lasanble i met bokou lanfaz lo la.  Parey Onorab Vidot in dir, ou pa kapab annan en Lalwa ki napa ledan.  Si ou annan en Lalwa ki pa bite, savedir pa vo lapenn ou annan en Lalwa.  E nou, nou pe rely lo korperasyon tou bann Minister e tou mon bann koleg Minis pou asire ki zot osi zot kontribye ki zot bann dimoun dan zot Minister, pa zis neseserman bann account staff, me tou lezot travayer i zwe zot rol, pou nou kapab anmenn en pli bon zestyon larzan piblik.  Dan sa sans, i annan serten travay ki nou bezwen fer.  Nou’n koz lo odit, Onorab De Commarmond in koz bokou lo odit, mon met en kantite lanfaz lo la.  I enportan selman ki parey mon’n dir taler, ler nou annan en komite lo odit ki vwar rekomandasyon bann odit, kot i annan en defayans, i enportan ki nou al pli lwen e i enportan ki Gouvernman i kontinnyen met an plas striktir, par egzanp petet biff up CID, biff up petet lo kote AG’s Office, ki ler nou anvoy en Lalwa kot zot, ouswa nou anvoy en rapor odit kot zot, ki nou nou vwar klerman i annan en problenm, nou pa ganny en keksoz, en file ki retourn kot nou ki dir nou napa ase levidans.  Savedir i enport ki nou, the whole chain, lasenn antye i ganny biff up e sa mon rekonnet ki i annan travay pou nou fer, Finans i bezwen petet trouv resours adisyonnel pou donnen me i enportan ki sa prosesis pa aret la kot Minister Finans, pa aret kot Lasanble Nasyonal, me i al ziska Lakour si fodre e kot dimoun ki parey ou’n dir taler Onorab Arnephy, ki pou arive ek bann dimoun ki pa respekte?  Senp.  Aksyon i ganny pran ek zot.  Sa ki pa respekte i a sorti dan Gouvernman i ava al dan en lot landrwa kot i anvi fer son prop Lalwa e dimoun ki ganny, mon espere vwar, the Ministry’s public funds, Lalwa i met an plas prosedir, nou ekspekte sipor Gouvernman pou deal avek sa bann sitiasyon.

En konsern ki’n ganny raise Mr Speaker, se kestyon sale of assets ki mon rekonnet ki wi, by the way nou pe koz lo R1 milyon, par lao R1 milyon, nou anvoy kot Cabinet.  Anba R1 milyon, Minister Finans ava konsidere me selman i enportan pou nou vwar osi dan Seksyon 18, akoz kot sa file in pase.  Sa acquisition of an asset by Government Entity shall be provided for in the Budget and charge against appropriation.  Savedir menm anba R1 milyon, kot Minis Finans i ava donn laprouvasyon ki nou pou vann en sale of assets, sa i pou bezwen ganny rikorde dan Bidze e remontre kot sa larzan osi – so, mon kapab asir zot ki prosedir i la pou sovgard sa e si i neseser, nou ava met an plas bann direktiv adisyonnel pour asire ki ler i annan sale of asset ki ganny fer par anba R1 milyon, ki sa ava ganny klerman monitored e reported.

Bann Manm Onorab ozordi Mr Speaker, in fer tre kler, in voice zot konsern lo bann parastatals.  E mwan, mon welcome sa konsern akoz parastatal parey nou’n dir i byen lepep, i byen leta, i larzan ki zot manage pou leta, alor mon pa vwar why parastatal i devret ganny trete diferaman.  Ler dan sa bann reform ki nou’n fer, nou ti fer serten mezir par egzanp pou konsolid bokou larzan ki ti dan bann kont partou.  Plizyer paraytatik ti ganny anmennen anba sa ki nou ape treasury single account, en kont kot Trezor kot tou larzan i al ladan.  Ti annan serten parastatal ki ti ganny permi pou gard en pe zot kont, par egzanp dizon Revenue Commission kot i bezwen anmas larzan from diferan dimoun ki pe pey tax, i annan zistifikasyon par egzanp kot suspense account ki ou’n demann mwan taler, be i annan ankor detrwa parastatal kot ozordi mwan koman Minis Finans mon pa vwar li normal ki millions of Rupees, santenn de milyon de Roupi pe asize dan en kont kot nou, nou pe grat latet tou le mwan, tou le quarter, kimannyer nou pou pey lasante, kimannyer nou pou pey lekol kan i annan en ta larzan ki pe asize dan labank, kot Labank Santral pe al dan market pe sey aste en pti pe foreign exchange pou biff rezerv ki pe afekte nou exchange rate kan i annan en ta dolar pe asize pou en bann parastatalsSo, sa i bann travay ki nou bezwen fer e nou ekspekte ki nou ganny sipor e understanding sa bann lenstitisyon.  I pa vedir ki nou pe pran zot lendepandans ouswa zot otonomi, zot lendepandans kot fodre a ganny proteze anba Lalwa, me resours ki pa pe ganny servi i vin dan Bidze pou rann back kot lepep i bezwen.

Finalman Mr Speaker, mon a zis tous en pti pe lo parey Leader of Government Business in fer resorti, fodre pa nou bliye nou ankor pe viv dan en lemonn kot lekonomi i tre frazil.  Malerezman nou pa ni menm kapab vwar lespwar ki world economy, lekonomi mondyal pou recover dan en fason enportan, anytime soon.  Savedir nou isi nou bezwen kontinnyen gard nou disiplin akoz parey nou konnen, ler ti annan kriz an 2008 se sa bann reform ki nou’n met an plas, nou’n build up rezerv, nou’n run en surplus dan nou Bidze ki’n ed nou kapab reste rezilyan an fas sa bann difikilte mondyal.  Alor i enportan ki nou gard sa disiplin e nou ekspekte, nou hope nou ganny sipor Lasanble Nasyonal lo la.  kestyon IMF wi, IMF parey nou’n dir, nou pou reste ankor 1an.  Wi IMF i donn nou en pe larzan me IMF osi i ouver laport pou lezot lenstitisyon parey European Union, Labank Mondyal, African Development Bank vini, donn nou lapwi bidzeter ki nou ankor bezwen me toutfwa parey nou’n dir, nou rapel Seselwa ki sa progranm i pa progranm IMF.  I progranm Gouvernman Sesel ki IMF i siporte, ki World Bank i siporte e parey Onorab Rose in dir, ownership i enportan wi, on this programme.  Sa progranm i own by nou.  Nou diskit avek zot, nou diskit avek Cabinet e ler i annan en keksoz ki nou pa feel i dan lentere Sesel, i pa vedir ki nou pou pran, me selman nou annan en bon understanding ek IMF depu 2008 e nou pou kontinnyen travay ansanm.

Mr Speaker, mon a reponn kestyon Onorab Arnephy vitman.  Onorab Arnephy in koz si kontrol pa pou anmenn plis prokrasi?  Mon larepons i non.  Si ou fer ou kontrol byen, annefe kontrol pou tir birokrasi akoz ler ou annan kontrol ki efikas, ki anplas, ou pa bezwen fer much.  Kontrol i la, ou ekspekte ki dimoun i respekte kontrol e ki keksoz i ganny fer dapre prosedir ki’n ganny laid out klerman ki dimoun i konnen, i pou swiv.

Lo kote iregilarite dan serten parastatals, Onorab Arnephy mon kontan ou’n koz lo sa size akoz i en konsern ki Gouvernman i annan kot ozordi i annan sa kestyon saler dan bann parastatals ki souvan pe depas saler Minis, pe depas saler lezot dimoun lo menm nivo dan Gouvernman ki pe swiv DPA.  Ki Gouvernman pe fer avek sa i annan en o komite lo Ladministrasyon Piblik ki Vis Prezidan i Chair, ki nou zwenn tou le mwan e sa i en issue ki’n ganny met devan sa komite e nou ekspekte ki DPA pou come up avek serten mezir an konsiltasyon avek Minister Finans lo kimannyer evantyelman nou kapab tackle sa problenm ki malerezman si nou pa veye nou pou perdi kontrol.

Suspense Account parey mon’n dir Onorab Arnephy i en keksoz ki nou pe evite otan ki posib, me i annan serten ka parey mon’n dir kot ou bezwen set en account lo en baz operasyonnel, SRC i bezwen sa bann kont Barclays kot dimoun i pey zot larzan ki finalman i ganny anmase i met dan Bidze.  Selman i pa vedir ki nou pa pou go back pou regarde bann kont ki i annan out there, si vre i annan.  An 2008 parey mon’n dir, depi ler nou’n anmenn Treasury Single Account, nou’n sipoze anmas tousala, me nou pou kontinnyen regarde atraver public reporting ki bann parastatal i kontinnyen fer avek nou kot i annan account ki kont regilasyon zot pou ganny fermen.  Finalman mon’n reponn lo kote accounting officers, zot bezwen swiv prosedir, sinon i annan mezir disipliner i ganny pran e finalman rol Minister Finans ek Lasanble Nasyonal.  Mon krwar en keksoz ki’n come out klerman dan sa diskisyon ozordi se ki Lasanble i deryer Minister Finans dan sa Bill me nou rekonnet osi ki Minister Finans i bezwen deryer Lasanble Nasyonal, alor nou pou kontinnyen travay ansanm avek zot kot i annan training ki nou bezwen partaz avek zot, nou ava fer.  Parey ou’n dir taler, tou dimoun i annan bezwen pou son Bidze.  Kot nou kapab nou a donn en pti pe plis, kot nou pa kapab nou a dir zot me mon krwar lesansyel se ki nou a travay ansanm pou kontinnyen asire ki training i pa zis reste dan Gouvernman me i al kot bann lenstitisyon parey kot Oditer Zeneral.

Finalman Mr Speaker, mon napa lobzeksyon avek okenn sa bann Lamannman ki’n ganny met devan, sirtou Lamannman lo Seksyon 30 ki mon rekonnet ki i fer ki Lasanble Nasyonal ler en rapor i ganny donn devan li, ki i ganny sa letan pou li analize pou li gete.  Alor propozisyon pou elimin sa parti ki Onorab Rose in demande, mon napa lobzeksyon kont sa.  Mersi.

 

 

MR SPEAKER

Bon, nou ava prezan pran en vot lo merit Bill.  Tou bann ki an faver.  Okenn ki kont?  Personn pa kont.  Mon a ganny mwan en Formal Second Reading.

 

MADAM CLERK

A Bill of an Act to Repeal and replace the Public Finances Act 1996 to provide for the development of an Economic and Fiscal Policy Framework for Seychelles, the Financial Management of the Government, the responsibilities of persons interested with financial management in the Government, the transparent and effective management of the Finance of Seychelles, the control of finance of Government, statutory co-operations and other bodies under the control of Government and for connected matters.

 

MR SPEAKER

Nou oule sot Committee Stage. Mon a ganny en Mosyon.

 

HON MARIE-ANTOINETTE ROSE

Mr Speaker, anba Order 91(1), mon move ki nou sispann Orders 65 to 70, nou sot Committee Stage.

 

MR SPEAKER

Okenn ki segonde?

 

HON CHARLES DE COMMARMOND

Mon segonde Mr Speaker.

 

MR SPEAKER

Ok, tou bann ki an faver lev zot lanmen.  Okenn ki kont?  Ok, aprezan mon a ganny mwan en Motion for Third Reading.

 

HON MARIE-ANTOINETTE ROSE

Mr Speaker, anba Order 71(1) mon move ki nou lir sa Bill en trwazyenm fwa.

 

MR SPEAKER

Okenn ki segonde?

 

HON CHARLES DE COMMARMOND

Motion seconded Mr Speaker.

MR SPEAKER

Ok nou a pran en vot.  Tou bann ki an faver?  Okenn ki kont?  Bon, mon a ganny mwan en third reading.

MADAM CLERK

This Act may be cited as the Public Finance Management Act 2012.

 

 

 

MR SPEAKER

Ok, Bill in pase.  Mon ava remersye Minis ek son delegasyon ki’n pas sa apre midi avek nou.  nou pou adjourn me avan nou adjourn mon oule enform bann, napa Leaders, i annan zis ou, ki nou pou zwenn 2er pou meeting ABC e nou pou adjourn ziska 2.30

 

(Lunch)

MR DEPUTY SPEAKER

Bon, mon a dir bonn apre midi zot tou e nou a kontinnyen nou travay lo Order Paper.  Nou pran bann Motions e mon ava envit Onorab Rose, Leader Zafer Gouvernman pou prezant nou premye Mosyon.

 

HON MARIE-ANTOINETTE ROSE

Mersi Mr Deputy.  Bonn apre midi tou dimoun.  Mr Deputy, sa Mosyon ki devan nou Lasanble pe demann nou Lasanble pou aprouv en Lagreman ant Gouvernman Sesel e Indian Ocean Commission pou setup en Anti-Piracy Cell dan Sesel, baze Sesel pour Losean Endyen.

Mr Deputy, sa Mosyon i vin a en bon moman pour Sesel dan son lalit kont piratri.  I en lalit ki depi ler Sesel in vwar devlopman aktivite piratri dan Losean Endyen, in pran en pozisyon kler e net ki nou bezwen lager kont sa fleo e nou Lasanble Nasyonal ti pran en desizyon politik e si oule partizan e politik akoz sete selman kote mazoriter ki ti pran en desizyon pou pas Lalwa pour ki Sesel i lead sa batay kont bann latak piratri dan Losean Endyen.

E yer Mr Deputy, 2 lensidan in ariv konzwentman.  Premyerman mon ti a kontan felisit Prezidan Michel ek son Gouvernman pou non selman lager kont bann pirat me anmenn rezilta pozitiv e konkret pour Sesel dan sa batay.  Nou Lasanble i zwaye ki nou Prezidan in kapab retourn Mr Marc Songoire e Mr Rolly Tambara lo later Sesel, sen e sof e pou sa nou felisit li, me apre tou nou dir li mersi pou sa travay ki in fer.  Nou drwa li en mersi akoz i pran politisyen ki for, politisyen ki fair e politisyen ki annan en leker pour fer sa kalite travay ki in fer e in annan en kantite dimoun ki’n ganny kaptire, en kantite nasyonalite ki’n ganny kaptire par pirat dan Losean Endyen e nou pa’n byen, byen vwar sa kalite sipor personnel par en Sef Deta, parey nou’n vwar Prezidan Michel fer e nou konsider nou isi Sesel lucky pou annan sa kalite leadership anba direksyon Prezidan Michel. So, nou felisit li e nou dir li mersi.

Mr Deputy, osi de la par the majority Party dan nou Lasanble Nasyonal, mon ti a kontan swet Mr Marc Songoire e Mr Rolly Tambara bon retour Sesel, lo later Sesel e bon reinifikasyon avek zot fanmiy e zot pros.  Nou konnen ki sa ki zot in pas ladan pandan 1an, se selman zot ki konnen, se selman zot ki konn douler, ki konn soufrans sa ki zot in pas ladan, avek zot fanmiy.  Nou pa kapab ariv pros pour komans dekrir sa ki zot in pas ladan me sipor Sesel an antye i ganny rekonnet dan sa demars e sipor nou Lasanble Nasyonal pour kontinnyen fer sir ki nou anvoy lavwa e nou annan Lalwa neseser e sirtou, nou annan bann Lagreman avek bann pei zanmi pour nou kontinnyen sa batay.  Sa Lagreman ki vin devan nou Mr Deputy i senkyenm sa lannen, in annan plis avan.  Senkyenm selman sa lannen ki nou Lasanble Nasyonal i ratifye.  E sak fwa ki nou lev lanmen e nou ratifye sa bann tel lagreman, malgre kritik, mon rapel ler premye sofa ti vin devan nou Lasanble, ti annan en kantite kritik par lopozisyon me malgre kritik, nou konnen akoz nou bezwen kontinnyen siport sa bann tel lagreman e rezilta i reel, i vre e i annan lenpakt direk lo nou bann fanmiy Seselwa, parey nou’n vwar dan ka nou 2 konpatriyot Seselwa Mr Songoire ek Mr Tambara.

Mr Deputy, menm zour ki nou 2 konpatriyot in retour Sesel e zot in retrouv lazwa pou retourn avek zot fanmiy, mon reste kantmenm sagren ki nou pa pe pran bann pozisyon osi for e osi tough ki nou devret pe pran avek bann pirat ki pe komet sa bann krim kont nou prop Seselwa, kont nou lekonomi, kont stabilite nou pei, kont stabilite Losean Endyen e si oule, pe kout nou pei plizyer milyon e pe kout nou bann fanmiy en kantite soufrans.  Nou Lasanble Nasyonal nou pa satisfe avek santans ki’n pase lo sa bann pirat, menm zour ki nou 2 konpatriyot in retourn Sesel, nou demande ki santans pli sever i ganny pase lo zot e ki nou kontinnyen anvoy en mesaz for pou ki sa bann dimoun ki komet sa bann akt kont nou soverennte e kont nou nasyonalite zot ganny pinisyon pli sever posib.

Mr Deputy, set alors dan sa menm lenstans ki mon demann Zidisyer, pour nou travay ansanm avek Zidisyer pou vwar kimannyer nou kapab anvoy sa mesaz kler e san konpromi ki nou lalit i kontinnyen e ki nou pour kontinnyen lager kont sa fleo ki apel piratri.  Tou lenstans pe fer son bout.  Tou dimoun pe fer son bout, sa ki pa kapab fer bokou i priye, i ofer sipor a bann fanmiy.  Sa ki kapab fer plis i fer, sa ki annan pourvwar ganny lavwa i koz for e sa ki Lalwa i dan son lanmen i merit osi donn en koudmen anvoy en mesaz kler.

Mr Deputy, nou pe dir sa an bonn fwa akoz si nou pran en soft stems, si nou pran en pozisyon ki soft kont piratri, sa fleo pour kontinnyen ronz nou.  Depi o komansman, Prezidan Michel ti’n set en direksyon e i ti’n dir ki nou pour pran en pozisyon for e kler kont bann pirat ki atak Sesel, ki atak nou soverennte, nou Lasanble Nasyonal, kote Parti Lepep ti swiv par Lalwa en pozisyon for e kler e nou pour kontinnyen koz for e pli for ankor e pli for ankor pour ki nou anmenn sa lalit, nou tou nou donn koudmen pour anmenn sa lalit kont sa fleo.

So Mr Deputy, nou pe demann tough sentences, tough measures e en mesaz ki al avek sa bann aksyon ki nou pe pran.  Nou 2 konpatriyot i kler ki sa dernyen lannen in en tre move lannen pour zot.  Ler ou sorti dan en pei parey Sesel e ou an kaptivite dan en pei parey la Somali, personn pa kapab dekrir kantite mizer ou pase e lemosyon ki zot in eksprimen, ou vwar poudir nou 2 konpatriyot in pas en kantite mizer.  E zot pa’n komet lofans zot.  Sa 2 dimoun ti pe travay.  Zot ti lo lanmer pe rod zot lavi e pour zot pas sa 1an lafason ki zot in pase e it is not fair.  An retour, sa bann pirat ki atak nou i komet en lofans.  I detri nou.  Zot detri nou pei.  Zot atak nou soverennte.  Zot atak nou lekonomi.  Zot atak tou zefor ki nou pe fer pour nou kontinnyen bouz devan koman en pei.  Zot atak nou bann fanmiy Seselwa.  Zot atak nou bann peser.  Zot atak nou lendistri tourizm.  Zot atak nou Mr Deputy.  E nou pa kapab toler sa e nou bezwen vreman kontinnyen parey nou dir, lalit i kontinnyen e nou lo kote Parti mazoriter, nou lalit i kontinnyen dan sa demars e sa i rezon akoz mon pe demann nou Lasanble pou san rezervasyon, siport sa Konvansyon ki devan nou, siport sa Lagreman ki devan nou, ki demande deza Komisyon Losean Endyen ki’n prensidir set up en Anti-Piracy Cell dan Sesel e nou, nou Lasanble nou bezwen ratifye formelman sa Lagreman e dezormen, pozisyonn Sesel koman en leader kler e net dan sa lager kont piratri.  Deroulman aktivite, lager kont pirat i santre otour tou sa ki Sesel pe fer e sa Anti-Piracy Cell baze Sesel i en mesaz, osi en mesaz e en lendikasyon tre kler avek bann pirat ki we will fight back e nou napa okenn lentansyon aret la, aret ozordi, la ki tou nou Seselwa i se nou, me nou bezwen fer sir ki nou konpletman derasin sa fleo ki pe atak nou dan Losean Endyen.

Mr Deputy, si mon koz koumsa se ki akoz ou santi soufrans e ou santi douler sa bann fanmiy, me parfwa ou osi santi ki difikilte nou Prezidan e nou Gouvernman e nou pei i pas ladan pou nou kapab fer sir ki sak Seselwa ki al an mer i sen e sof.  Pour nou fer sir ki nou lendistri i kontinnyen fonksyonnen.  Pou nou fer sir, bomaten Minis Finans in vin devan nou Lasanble e nou’n koz longman lo pozisyon Sesel fas a lekonomi mondyal.  E nou konnen ki okenn pti aktivite ki disturb nou lekonomi i sekwe nou kannot, i savir nou tou.  E nou tou nou dan menm bato.  Napa dimoun ki lo sek, ki ater e i annan en pe dan bato.  Nou tou nou dan menm bato e nou bezwen nou tou fer sa zefor e kontinnyen lager e ankor enn fwa nou Lasanble i fyer pour aport son sipor inanim a sa Lagreman ki devan nou.  Mersi Mr Deputy.

 

MR DEPUTY SPEAKER

Bon, okenn Manm ki oule segonn sa Mosyon?  Onorab De Commarmond.

 

HON CHARLES DE COMMARMOND

Mr Deputy Speaker, mon segonn sa Mosyon ki devan nou me mon a koz en pti pe apre.

 

MR DEPUTY SPEAKER

Ok.  Okenn Manm ki oule entervenir?

 

HON EMMANUEL FIDERIA

Mr Deputy, mersi.  Manm Koleg MNA.  Mr Deputy, Mosyon ki devan nou pe demann nou Lasanble pou aprouv en Lagreman ant Gouvernman Sesel e Komisyon Losean Endyen pou enstal en Selil Anti-Piratri ki operasyonnel depi Zen sa lannen.

Mr Deputy, mon oule atir latansyon bann koleg Onorab e popilasyon Sesel an zeneral lo lefe ki i en koensidans e ki erezman nou pe diskit sa Mosyon ozordi.  Koensidans se ki nou pe diskit sa Mosyon a en moman kot nou pei antye pe viv en moman lazwa entans  depi Dimans swar letan nou ti aprann nouvel lo SBC ki le 2 otaz Seselwa, Rolly Tambara e Marc Songoire in ganny libere, in annan en leksplozyon lazwa dan Sesel.  Sa imans santiman lazwa ki nou 2 frer ti santi letan zot ti ganny libere e sa i soulazman ki zot fanmiy ti resanti letan zot ti aprann sa dan nouvel, ti rezonnen dan leker tou Seselwa ki ti partaz sa lazwa.  Sa 2 ansyen otaz e zot fanmiy, sa 2 peser ki ti’n fer 369 zour an kaptivite Somali i senboliz rezon det zefor ki Sesel pe fer pou elimin sa fleo piratri dan Losean Endyen.  Lontan nou ti kriye ki nou ti oule en lape dan Losean Endyen akoz bann gran pwisans ti pe anmenn tro bokou zarm dan nou rezyon.  Ozordi nou pe dir, oli sekirite dan nou Losean akoz pirat Somalyen pe menas bato e bann peser e maren ki navig lo nou Losean.  Pirat Somalyen i en problenm plizyer dimansyon.  I fer fanmiy Seselwa soufer parey nou’n vwar avek legzanp Mr Tambara e Songoire.  I ranpli bann peser ek maren ek zot fanmiy avek lafreyer akoz letan ou lo lanmer, ou viv avek risk ganny pran otaz.  I afekte nou pei ki bezwen servi resours ki nou kapab gannyen ayer pou konbat sa fleo.

Mr Deputy Speaker, retour Mr Tambara e Songoire lo later Sesel i senboliz determinasyon nou Gouvernman pou pa zanmen bes lebra dan lalit kont piratri e sa lakor ki nou pe gannyen pour demande pour aprouve i ilistre parfetman nou determinasyon pou ranport sa lager kont piratri.

Mr Deputy Speaker, letablisman sa sant rezyonnal anti-piratri i demontre senserite Sesel dan son langazman.  Sa sant i reprezant premye striktir ki Komisyon Losean Endyen i etablir an deor teritwar ki pa kout headquarters sa Komisyon i baze.  I toutafe lozik ki sa striktir i baze sesel akoz se nou pei ki ti ekspoze avek menas ki piratri Somalyen i reprezante.  Dezyenmman, Sesel i premye pei ki ti debout e dir non a bann pirat.  Nou pa ti esper lemonn koz lo problenm piratri me nou ti deside lit kont li e atraver nou zefors ki lemonn ti reveye lo problenm piratri e deside ed nou.

Mr Deputy, Prezidan, Komandan an Sef nou Lafors Defans, Prezidan Michel ti deside restriktir nou larme e kree en lafors spesyal.  Tou Seselwa ti tre fyer sa tre bon travay ki nou lafors spesyal Tazar in reisir fer kont bann pirat Somalyen.  Nou Lafors spesyal in leber plizyer peser Sesel ki ti’n ganny pran otaz e kaptir plizyer pirat.  Dan sakenn son bann loperasyon kont pirat Somalyen, nou bann solda in sorti venker.  Mon oule profit sa lokazyon la, ki nou pa lwen avek zournen Lafors Defans le 25 Novanm pou mwan salye linisyativ Komandan an Sef Lafors Defans Sesel, pour kree en lafors spesyal e pour mwan osi dir felisitasyon tou bann Manm sa lafors spesyal ki’n fer nou pep fyer.  Fodre ki pirat Somalyen i ganny en mesaz tre kler.  Pa zwe avek nou pti pei Sesel.  Bann mersener Sid Afriken ti aprann en leson 32an pase e aprezan i reste bann pirat Somalyen pou konn defet avek solda Seselwa.

Mr Deputy, desizyon Gouvernman Sesel pour akey en sant rezyonnal lalit kont piratri i reflekte konviksyon Parti o pourvwar, Parti Lepep pour tret sa size piratri koman enn ki tre enportan.  Nou’n toultan krwar ki latansyon spesyal i devret donnen a tou nivo dan Gouvernman e osi tou nou sitwayen i devret donn en koutdmen pou sa lalit, ki alafen nou tou nou a sorti viktorye.  Sa Mosyon dan limenm i kontinnyasyon sa travay ki nou Gouvernman e Lasanble in fer ansanm.  Lo kote Gouvernman, sa lalit in pran en laform diplomasi avek en lalit arme kont bann pirat.  Lo kote Lasanble, sa lalit in pran en laform sipor pou plizyer proze de lwa ek lakor.  Lasanble Nasyonal in pas tou bann Lalwa neseser pour aprouv bann lagreman ki vin devan nou, san ezite akoz nou konpran tre byen kler lanpler sa problenm piratri.

Mr Deputy, fodre note, mon osi salye kouraz ek determinasyon nou katriyenm Lasanble pour komans travay nob.  Nou rapel ki sa letan, bann politisyen dan lopozisyon pa ti siport sa demars kont bann bandi Somalyen ki pe atak nou bann yot ki ti pe fer bann aktivite lwazir dan nou lanmer e fer nou frer soufer e en kantite fanmiy soufer.  Sa nou ti demontre klerman ki Prezidan Michel i annan en vizyon e son Gouvernman i vwar lwen, tandis ki ansyen lopozisyon pa konpran konpleksite problenm piratri ki nou pei i fer fas avek.  Sa bann politisyen amater dan lopozisyon, Gouvernman Parti Lepep in reste touzour determinen e met toultan son sitwayen premye.  Nou’n lager lebra kase pou nou trouv en solisyon e ozordi Mr Deputy, nou vwar laklerte lo lorizon.  Fodre fer realize ki latitid ansyen lopozisyon i parey en akt traizon.  Mr Deputy, sa se laverite e sa se larealite.

Mr Deputy, Sesel in pran en leadership serye dan sa batay kont lalit kont piratri.  Letablisman sa sant anti-piratri i laprev sa rol leadership ki nou pe zwe dan nou zefor pour elimin piratri.  Nou leadership in vin an term nou langazman militer kont bann pirat.  Nou diplomasi aktiv lo sa size, nou desizyon pour nou ziz bann pirat e kondann zot san ezitasyon bann pei dan larezyon in sivre leadership Sesel lo sa kestyon piratri e sa i rezon akoz bann Manm Komisyon Losean Endyen in siport linisyativ Sesel pour etablir sa selil anti-piratri isi dan nou pei.

Mr Deputy Speaker, aktivite piratri dan nou rezyon Losean Endyen pe afekte tou Seselwa atraver son lefe direk lo pri lavi lo nou pei.  Sa sant rezyonnal dan lalit kont piratri i ganny operate par bann profesyonnel e expert dan diferan domenn.  Sa bann profesyonnel i sorti dan bann pei Komisyon Losean Endyen e zot annan lekspertiz pour permet zot deal avek sa fenomenn piratri dan en fason pli profesyonnel.  Rol sa sant rezyonnal se pour kree en stabilite maritim pou nou rezyon e donn la kominote enternasyonal sa persepsyon e lasirans ki nou pe met sa sitiasyon anba kontrol.  Par redonn lakominote enternasyonal konfyans, bann eksper dan sa sant a ede pou fer bann aktivite ekonomik repran e fer nou lanmer revin en Losean dan trankilite.  Ki bann maren ek nou bann sours pour prosperite a la pou bann peser eksplwate.

Mr Deputy, se Gouvernman Sesel ki’n lite pran leadership pour kree sa Anti-Piracy Cell isi dan nou pei e sa ti ganny anonse le 24 Zen par Minis pour Zafer Etranzer dan rankont o nivo dan lalit kont piratri.  Sa unit Mr Deputy, pou anmenn en kantite benefis kot i a kree sa bon kordinasyon antre bann expert konsernen dan larezyon e osi bann partener o nivo mondyal.  I enportan note ki i fer premye fwa ki sa senk pei COI i zwenn ansanm formelman pou enplimant e pran bann mezir neseser dan lalit kont bann bandi e fodre note ki nou pe ganny sipor bann lorganizasyon parey UNODC, INTERPOL, IMO, eksetera.

Mr Deputy, sa Anti-Piracy Cell isi pe garanti en lapros pli profesyonnel, kot bann expert dan larezyon a ganny sans analiz, diskite e pran desizyon ek aksyon dan en fason tre kalkile dan lalit kont piratri.  I osi enportan note ki sa Anti-Piracy Cell i bezwen mobiliz kominote enternasyonal pou ganny finansman neseser pou nou kontinnyen lite kont sa fenomenn.

Mr Deputy, nou bezwen toultan reste vizilan, rode, serse bann mezir e met devan e fer sir ki toultan nou devan sa bann bandi, ki alafen sa rezilta ki nou a gannyen i a toultan sorti pozitiv.  Mon pour vot an faver sa Mosyon e mon demann tou mon bann koleg pou fer osi parey.  Mr Deputy, mon remersi ou.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mr Deputy Speaker, mersi.  Mr Deputy Speaker, i en plezir pou mwan koz lo sa Mosyon ki devan nou.  Avan mon al direk lo Mosyon, mon anvi an pasan dir 2 mo, nou konn tre byen ki yer, nou’n fer en reisit vreman eksepsyonnel e formidab, atraver liberasyon Mr Songoire ek Mr Tambara.  Dan sa sans, nou Lasanble i renouvle son sipor pou Prezidan Michel dan sa lalit san ses e reisit ki’n anmenn liberasyon Mr Songoire e Mr Tambara.  E mon ti ava demande ki nou Lasanble, pou montre sa renouvleman sipor pou Prezidan Michel i donn li en ovasyon, nou debout e nou donn li en aklamen.

 

(Stand up and applaud)

 

HON CHARLES DE COMMARMOND

Mersi.  Mr Deputy Speaker, nou isi osi dan sa Lasanble nou konn tre byen ki nou Prezidan pe fer e lalit san ses kont piratri.  En lalit ki i pe anmennen pou en pe letan la e nou pe vwar kote i pe aboutir.  Nou vwar poudir aktivite pe desann, nou vwar osi ki stabilite an Somali li menm i pe komans annan.  Savedir nou vwar lespwar devan nou.  dan sa sans nou osi profite pour swet Mr Songoire e Mr Tambara bonn sante e bon retour dan zot lavi normal.  Mon vwar sa leksperyans i ava ed nou peser pour vin pli vizilan anmenmtan e osi nou konnen poudir letan zot lasante i retourn normal, zot kapab akont nou e eksplik avek nou dimoun osi sa ki zot in santi.  Nou konnen poudir zot in soufer bokou me pou ki nou santi nou pli pros avek zot anmenmtan me anmenmtan pou nou tou met sa zefor ansanm pou vreman lager kont sa bebet pirat la.  mon profite pou lans lapel ek tou nou dimoun pou lanmes Dimans dan bann legliz pou nou vini pou lanmes aksyon de gras ki Monsennyer in dir, annou vini an gran nonm pou nou vin priye akoz nou pa kapab zis priye letan nou dan problenm me nou bezwen priye osi letan pou nou remersye Bondye pou zefor ki in fer pou gidans, pou la reisit ki in anmenn pou nou koman en pep, pou lafanmiy Tambara e Songoire osi e pou nou osi koman en Gouvernman, koman en pep, nou remersye Bondye pou sa travay ki in donn nou lanmen fer, in gid nou ladan.

Me selman Mr Deputy Speaker, i domaz, malgre tou sa zefor ki pe ganny fer, espesyalman par Prezidan Michel parey mon’n dir, i vreman, vreman domaz e mon vwar li malere ki pa tou dimoun ki on board dan sa lalit kont piratri.  Pa tou dimoun ki pe fer menm zefor pou nou konbat piratri.  Menm zour ki nou vwar liberasyon Mr Tambara ek Mr Songoire, ki nou vwar, Zidisyer i pas santans lo en bann pirat ki sipoze ganny kondannen, mwan mon ti a dir lavi prizon, nou vwar santans 4 a 18an prizon, san tans ki mars ansanm.  Mon oule dir osi ki nou Lasanble e nou pep i kont sa ki Zidisyer in fer dan son pli gros term, nou pa dakor e nou demande ki zot revwar lafason donk zot pe anmenn zot lager dan zot kote kont piratri.  Nou pa kontan.  Savedir ki Zidisyer pe fer la?  eski i pe anvoy en mesaz ki pe dir avek nou zenn, plito ou al fer en aktivite pirat ki al vole?  Konmela si en zenn Sesel la i vole, i ganny kondannen ziska 20an prizon, selman aktivite pirat, mars ansanm 18an.  4an a 18an.  Be konmsi ou pe dir al laba?  Nou krwar i mal e nou dir ki Zidisyer i bezwen aranz li, nou krwar poudir la i annan bann Ziz ki mon pa konnen kimannyer pou eksplike, mon pa oule, taler a krwar mon pe maltrete, me selman nou pa dakor kimannyer zot in desid sa case, ok.  Nou demande ki next time, letan pirat i vin devan zot pou zize, nou kondann zot avek pli gro kondannasyon posib e si fodre, pa bezwen pas bann soft sentences, si fodre met santans ki pou dekouraz sa bann dimoun fer sa bann aktivite barbar e kriminel.

Having said that Mr Deputy Speaker, nou vwar poudir sa Mosyon alor ki devan nou lo letablisman Selil Anti-Piratri dan Losean Endyen, Sesel i, byen plase pou li kapab pran leadership ladan e pou li pran si oule dir, pou ki sa Selil i ganny fer isi Sesel.  Nou konnen i pe marse depi Zen me i byen li ki Sesel i ganny sa manda, i ganny sa responsabilite akoz Sesel, son leksperyans dan sa lalit, savedir dan sa bann pei Losean Endyen la, sirtou bann pei zil, nou’n deza, premye afekte nou menm e nou deza pran en bon pe leksperyans ladan.  Nou annan osi bann lekipman ki deza in annan dan Sesel, ki nou ti pe servi, lenfrastriktir in deza komans etablir e nou proksimite avek sa aktivite limenm, anler obor gulf nou en pti pe pli anler la, savedir nou ki ganny plis afekte e tou sa i donn nou sa merit pou nou kapab pran sa responsabilite e ki sa baz i ganny fer Sesel.  I vre ki anmenmtan, bann lorganizasyon ki pou donn nou sipor, i annan bokou plis sipor ki ava vin direkteman la, me i pa vedir ki nou pa pou get lezot pei.  Nou pe pran aktivite rezyonnal la, en lanpler rezyonnal me osi pli tar nou pou vwar kote lezot pei, sirtou pei ki stab dan larezyon, Moris par egzanp, kot li osi i bezwen benefisye, li osi i ava annan serten sou baz kot li, serten bout ki li i pou peye.  Li ki pou pran responsabilite.  E anmenmtan, sa Selil la, i pa zis kestyon Selil Anti-Piratri ki deal zis ek pirat, me i pou donn lanmen pou vey tou nou rezyon Losean Endyen, sirtou nou, nou a konsantre anler kot nou, Moris a konsantre anba kot nou e tousala, nou borde ek kanmarad.  Lot zour nou annan bann soz ki nou’n ratifye la lo bann zafer maritim e tou sa i form par nou responsabilite pou nou vey nou teritwar e dan sa sans osi, bann zofisye, nou bann human resource nou oule dir la, nou bann solda ki’n annan sa formasyon dan piratri, dan lalit anti-piratri, zot osi si ou byen gete dan larezyon, zot pli formen ki lezot tel ki Moris e Madagascar li ou pa tann li, deza li osi i dan problenm laba, so nou, nou bezwen, alor i byen ki Moris ki lezot pei in met sa konfyans dan nou e nou, nou bezwen pa dezapwent zot e mon konnen ki Sesel li, i pa dezapwent bann dimoun fasilman, alor nou demande ki lezot pei osi, lezot lorganizasyon i kontinnyen siport sa Selil.  Si zot pa siport sa Selil byensir, Sesel i tipti, nou pou tonbe.  E i enportan e UNODC e tou sa bann lezot lorganizasyon ki nou’n sinny sa bann Lakor avek, sa bann sofa avek, i annan Linyon Eropeen, i annan menm Endyen, i annan lo kote Lasin e tou sa, i annan EU, Lemirat Arab Ini e tou sa Dennmark, Lanmerik limenm, zot devret pe donn nou sa sipor, siport sa Selil bokou akoz si zot pa siport sa Selil, nou osi i pou difisil pou zot zot.  Sa selil i vin sa baz ki zot osi zot pou servi dan en serten kote pou nou fer sa lalit ansanm, sa lalit kont aktivite barbar piratri.

Vwala, avek sa, taler letan mon’n dir pa tou dimoun ki on board, mon pankor tann lopozisyon Mr Deputy Speaker pou anvoy okenn mesaz pou lareisit ki nou’n fer.  Mon dir sa akoz mon konnen Leader Lopozisyon pa la, pa kestyon m pe koz deryer ledo, me mon konnen i pa la, i lo en misyon deor, me mon panse i online, in bezwen konnen ki pe pase e mwan mon ti li mon ti’n anvoy en mesaz deza e lezot lopozisyon ki swadizan i annan ankor dan Sesel la, ki egziste.  Ki toulezour i annan serten papye ki zot dir sepa kwa, be zot osi la, zot pa’n fer nanryen, zis montre lo papye zot, sanmenm tou.  Met en nespes swadizan presyon, be nou, nou pe fer keksoz konkret.  Alors zot osi konmsi, nou ti a voudre vwar zot, bann ki isi, lanmes Dimans pou vin donn lanmen priye pou nou kapab fer pli byen pour ki sa Selil limenm, akoz sa Selil la, nou pa zis fer li la, me nou bezwen gidans.  E mwan toultan mon dir gidans Bondye i enportan dan tou sa bann aktivite e tou sa bann keksoz ki nou pe fer akoz sa i en defans pou nou pep e Bondye i kontan letan lepep an zeneral pe ganny gete, pe ganny defann, i pe epanouir, i pe avans devan.  Alor i enportan ki nou vin donn nou sipor e pa zis koz lo papye laba deor.  Mr Deputy Speaker, avek sa mon pou siport sa Mosyon e mon ava remersi ou.  Mersi.

 

MR DEPUTY SPEAKER

Right of Reply, loter Mosyon.

 

HON MARIE-ANTOINETTE ROSE

Mersi Mr Deputy.  Mr Deputy, mon krwar bokou keksoz in ganny dir, bokou parol for in sorti apre midi e si nou koz koumsa se ki akoz nou pasyonnen, nou determinen pou vwar en lafen avek sa fleo ki pe afekte nou e nou osi determinen pou kontinnyen donn Prezidan Michel ek son Gouvernman tou sipor posib pou anmenn sa lalit kont bann pirat e pou a sak fwa, mon kapab dir, i fer preski lenposib pou li ale, al retir nou bann Seselwa dan kaptivite e reini zot avek zot fanmiy e ankor enn fwa mon krwar nou drwa li en gro mersi pou sa travay ki i fer e pour sa travay ki son Gouvernman e Minister konsernen i fer.  Mon osi sezi sa loportinite pou remersi nou bann Manm Lasanble pou sa sipor ki nou kontinnyelman donnen.  Mersi.

 

MR DEPUTY SPEAKER

Bon, nou pran en vot lo sa Mosyon.  Tou bann ki an faver lev zot lanmen?  Inanim.  Mosyon in ganny aprouve.  Nou ava al lo dezyenm Mosyon e mon ava envit Onorab Chantal Ghislain pou prezant son Mosyon.

 

HON CHANTAL GHISLAIN

Mersi Mr Deputy.  Mr Deputy Speaker, Mosyon devan Lasanble ozordi pe demande ki Gouvernman i met lanfaz pli serye pour entrodwir, ankouraz e demontre lenportans en kiltir resers e dokimantasyon lo nivo nasyonal dan Sesel.

Mr Deputy Speaker, nou bezwen admet ki Sesel in devlope, en devlopman ki’n sirpas lekspektasyon bokou.  Letan nou ti komanse, tou ti komans avek en vizyon en senp zonm ki ti anvi trouv Sesel debout lo son lipye e pa lo depandans direk bann gran pourvwar parey Lafrans ek Langleter.  Lendepandans ti alors premye pa ver sa demars me avek lapovrete, mizer, diferans ant bann diferan klas, pourvwar dan lanmen en pti minorite, tou sa ti bann keksoz ki ti’n anglouti nou koman en nasyon, ki fer nou pa ti pou kapab al pli lwen ki sa.  Le 5 Zen 1977, kontan ou pa kontan me sa i fe, Seselwa koman en nasyon ti ganny libere avek tou sa e vwala kot nou’n arive ozordi.  San gran resers, nou’n bouze.  Sesel in devlope.

Mr Deputy, ozordi bann gran pei lemonn parey Leta Ini ek Grann Bretanny pe koz lo inovasyon ek resers.  Zot in konpran ki resers, dokimantasyon e inovasyon i fondamantal dan sikse ekonomik e son krwasans.  E pou sa rezon ki zot depans de milyon tou le lannen dan sa ki zot apel innovation and research strategy for growth. Zot in vwar ki san sa 2, pou napa krwasans dan lekonomi.  Grann Bretanny par egzanp, i depans 4.6 bilyon Liv Sterlen dan zot Bidze tou-le-zan, zis pou bann progranm resers e sa, mon’n konte i ariv 4 fwa plis ki nou Bidze nasyonal an antye.  Leta Ini li i devan avek en alokasyon Bidze 21 bilyon dolar ki sa i reprezant 61 fwa plis ki nou Bidze nasyonal.  E nou isi Sesel, avek letan ki pase kot pei in arive e plase lo map lemonn, koman en Gouvernman nou nepli zis kapab pran en desizyon ouswa formil en polisi baze lo prezanpsyon e vizyon san byen analize.  Nou bezwen laprev konkret ki sa i pou marse.  Donk, sel fason pou fer sa se ki i annan resers e bon dokimantasyon pou ed nou fer bann desizyon ki pli smart.

Mr Deputy, permet mwan pou donn en pti legzanp e mon pa pou al pli lwen ki mon pti zil La Digue.  Ozordi, nivo devlopman lo sa zil in vreman deborde.  Nou annan en kantite biznes e dimoun La Digue in ganny vwar koman zot bann pli eze e trwa kar zot, zot annan zot bann prop biznes e pe debrouye.  En keksoz ki nou tou Digwa nou devret fyer avek.  Sekter tourizm i pli komen me ler in arive pou nou dir tyonbo en kou e fer en letid lo ki kantite sa pti zil pou kapab pran ankor, tout an prenan kont sa popilalsyon zenn ki pe monte e ki pou osi vwar nesesite pou devlop en biznes pou zot menm.  Kestyon ki letid i devret kapab reponn se eski sa zil pou kapab abzorb sa kantite salte ki pou ganny zenere disi 10an devan nou?  Eski sa kantite elektrisite pou sifi?  Eski sa kantite delo potab pou sifi pou sa popilasyon?  E pli enportan ankor i eski nou later pou kapab soutenir ankor plis piperdi pou desarz kabinen, kan set anba sa menm later ki nou ponp nou delo potab?  Mon kontan aprann ki Gouvernman in nobou antann nou e aret en pe aprouv bann gran proze devlopman ziska la ki letid Carrying Capacity La Digue i terminen.  E mon fek aprann ki deza sa letid in komanse e bann semenn ki pe vini, sa 2 serser pou pe kestyonn piblik pou anmas otan lenformasyon.  E la mon ti a profite pou dir Digwa, silvouple pa per pou koze e donn lenformasyon parske se lavenir e lasante nou zil ki nou pou pe koz lo la.

Mr Deputy, an parlan letid, mon pou profit mon Mosyon pou demann Gouvernman pou fer en letid aprofondi lo sa kalite delo ki nou pe servi La Digue parske lefet ki nou tou nou konnen ki i en zil avek bokou bef, tou delo sewage i al direk anba later e nou delo i ganny ponpe dan plato.  Donk, i annan en persepsyon deza ki sa delo i pa bon pou konsonmasyon.  E sa i osi anmenn mwan lo sa pwen nesesite irzan pou en sewage plant lo zil.

Mr Deputy, resers i enportan e endispansab dan nou lavi e travay toulezour.  Mon’n en zournalis pandan 20an e toulezour mon’n bezwen fer resers.  Rezon se ki koman en lenstitisyon ki edik popilasyon, zournalis i oblize donn lenformasyon, lenformasyon ki korek e zis.  Me pa krwar in en latas fasil pou bann rezon ki mon pou komant lo la en pe pli tar dan deba.  Koman en Manm Parlman, avan vin partisip dan okenn biznes Lasanble, sa Manm i bezwen fer resers.  Ankor, pou divers rezon, i pa fasil sirtou ler i ariv resers lo keksoz isi menm Sesel.  Tou bann etidyan ki al Liniversite, fer resers i zot fason letid, me apre Liniversite, eski sa bann graduate, ler zot retournen, eski zot ganny sans met an pratik sa ki zot in aprann Liniversite?  Eski nou sistenm e fason fonksyonnman pou nou bann Lazans e Departman ki anploy sa bann zenn i donn zot sans pou met an pratik sa ki zot in aprann?

Mr Deputy, sa i bann pwen ki mon swete ki bann Manm ki pou koze lo sa Mosyon, zot kapab debat lo la.  isi Sesel, i annan plizyer resers e letid ki’n ganny fer, legzanp dan ledikasyon, lanvironnman sosyal e kiltirel e fodre remarke ki trwa kar sa bann letid in fer par nou bann prop Seselwa e nou siatis.  Me ki arive avek sa bann letid?  Eski nou pe servi e enplimant li dan nou bann polisi?  Eski nou retir keksoz ladan, ouswa zis gard li parla lo en shelf, dan tirwar e zis pe akimil lapousyer?  E pli gro kestyon i eski nou koman en pei, nou vreman rekonnet e met an valer nou bann prop serser?  Ouswa zis ou vwar en dimoun sorti deor ki vin pran nou bann prop resers, met ansanm, apre prodwir en dokiman ki dir vwala, letid lo en tel size, fer par tel ou tel profeser sorti dan tel ou tel pei.

Mr Deputy, apre i annan sa zafer resers e letid kot fason anmas lenformasyon i enplik kestyonn manm piblik.  Mon’n baz mon Mosyon lo en case study tre resan.  Le 11 Zilyet 2012, Sesel ti zwenn larestan lemonn pou selebre lazournen mondyal popolasyon e pou komemor sa lazournen, Minister responsab Zafer Sosyal ti prezant piblik rezilta en letid lo migrasyon entern nou popilasyon.  En letid, menm si konplet, byen fer, byen prepare e byen prezante, partisipasyon manm piblik dan sa letid ti tre minim, pourtan se rezilta sa letid ki pou ed sa Minister pou formil plan daksyon pou polisi devlopman soutenab popilasyon nasyonal.  En rezilta ki ti pou esansyel pou en kantite Minister e Lorganizasyon.

Mr Deputy, en bon resers e en bon dokimantasyon bann lenformasyon e statistik i tre enportan.  Listwar in montre nou ki isi Sesel, i pa toultan fer en resers, ouswa les mon a dir, letid pou en nenport size.  A sak fwa ki i annan kek resers ouswa letid pou fer pou kapab anmas lenformasyon, i souvandfwa annan bann limitasyon.  Seselwa limenm pa telman port latansyon ouswa trouv lenportans donn lenformasyon, sirtou kan i ariv pou donn lenformasyon ki konsern sa endividi limenm.  Piblik i retisan pou donn lenformasyon lo zot, sirtou si napa en lenpakt direk lo zot.  Bokou i krwar ki lenformasyon devwale pou kapab annan en lenpakt negativ lo zot fason viv, zot saler, ouswa menm bann pti larzan ki zot kapab pe gannyen e byensir si dimoun pa donn lenformasyon, sa resers ouswa letid pa pou konkret.  Sa lafreyer ou zis pa anvi donn lenformasyon pa zis sorti kot dimoun ordiner ouswa kot lakour.  Isi Sesel i osi annan en problenm avek akse avek lenformasyon piblik.  Souvandfwa, i annan en mank lenformasyon pou asire ki i annan en analiz konpreansiv bann problenm, ouswa menm napa lenformasyon ou data ditou. En lot pli gro problenm e konsern anrasinen e anzandre isi Sesel se sa mank kolaborasyon sorti kot bann lorganizasyon konsernen, pou fourni lenformasyon ler letid pe ganny fer isi Sesel.  I annan en nesesite alors pou konsyantiz bann zofisye Gouvernman e dimoun an zeneral pou partisip dan bann legzersis resers e pou donn lenformasyn ki vre e kredib.  Tou sa i kapab rezourd si selman nou devlop sa kiltir resers dan nou koman en nasyon.

“En nouvo Sesel”.  Mr Delputy, in pran mwan en bon pti pe letan pou mwan kapab konpran vreman, ki mon Prezidan ti pe vreman dir, me letan mon ti pe travay lo sa Mosyon, mon’n finalman kapab konpran.  Tou i tonm an plas prezan.  Ozordi i enkrwayab en.  “En nouvo Sesel” se senpleman inovasyon Sesel.  Mr Deputy, I beg to move.

 

MR DEPUTY SPEAKER

Bon, Mosyon in ganny prezante.  Okenn Manm ki oule segonde?

 

 

 

HON MARIA PAYET-MARIE

Mr Deputy Speaker, mon oule segonn Mosyon table par Onorab Ghislain.  Mon ti a kontan entervenir lo sa Mosyon.  Mersi.

 

MR DEPUTY SPEAKER

Proceed.

 

HON MARIA PAYET-MARIE

Konesans nou listwar e son bann levennman i en fenomenonn sivilizasyon.  Par lefe ki nou donn lenportans e latansyon spesyal anver listwar, en nasyon i retenir leson valab ki vreman fasilit resers pou progre e prosperite en nasyon.  Ler nou sofgard bann dokiman istrorik ou lezot dokiman enportan pou nou fitir zenerasyon, i en responsabilite enportan en pei.  Ler nou arsiv ou dokimant byen nou bann dokiman istorik, i fason ideal pou en nasyon prezerv son leritaz.

Sa Mosyon pe demann Gouvernman pou met lanfaz pli serye pou ankouraz e demontre lenportans en kiltir resers ek dokimantasyon, lo nivo nasyonal dan Sesel.  Sa kiltir resers e dokimantasyon i devret responsabilite tou lorganizasyon, ki swa lorganizasyon gouvernmantal, parastatal ou prive.  I osi enportan pou nou konpran ki nou pa devret zis depanse, fer resers e kit lo letazer parey Onorab Ghislain in dir.  What about zefor e travay dir sa endividi, ou group dimoun ki’n fer tou pou kapab prodwir en resers, an krwayan ki sa resers pou ganny byen servi?  Mon dir sa akoz souvandfwa, parey Onorab Ghislain in fek fer resorti osi, nou vwar en konsiltan etranze i ganny peye pou fer en resers pou nou pei.  E ki nou vwar, sa menm konsiltan ki servi resers ki annan lide ek bon rekomandasyon nou prop Seselwa profesyonnel e sa menm konsiltan i soumet sa resers ou rapor ki in swadizan fer avek nou pei.  Mon pa pe dir ki nou pa bezwen konsiltan etranze.  Nou pou toultan bezwen zot me i depan lo ki kalite resers nou anvi fer.  Se pour sa rezon ki sa Mosyon pe koz lo kiltir resers ek dokimantasyon e son lenportans pou Sesel, pou zisteman ki nou pti pei Sesel i ava a lavenir annan son prop sant kot tou resers ek dokimantasyon nou pei i ava ganny trouve ladan.  E san gran difikilte, en etidyan, en reserser, nou menm nou, nou a konnen egzakteman kote pou ale pou ganny lenformasyon lo nou pei.  Sa sant pou sirman facilitate resers dan bann sitiasyon tel ki sitiasyon dezas e lezot problenm nasyonal ankor e fasilit travay anver preparasyon en rapor, en polisi ou en prezantasyon.  Mon’n profite, pandan ki mon ti pe fer mon pti resers lo sa Mosyon devan nou, pou koz ek serten endividi e lorganizasyon, an sa ki konsern lenportans resers an zeneral dan Sesel.  Lopinyon in plizoumwen an faver sa Mosyon me in annan serten pwen konsern ki ti’n ganny fer resorti tel ki i annan tro bokou resers ki’n ganny fer Sesel par Seselwa e ou pa vwar kote zot ete akoz zisteman sa bon resers pa’n ganny byen dokimante.  Serten lorganizasyon pa met ase zefor dan zot resers, ki fer ki napa ase lenformasyon enportan ou statistik pou siport sa bann resers.  Resers ki ganny fer par serten lorganizasyon, pa ganny soumet devan Gouvernman pou benefis pei.  Reserser ou konsiltan lokal pa ganny ase sipor ou lankourazman kan zot prodwir en resers pou zot pei.  Pei i depans tro bokou anver konsiltan enternasyonal, kan Sesel i annan ase profesyonnel e reserser kalifye.  Problenm resours finansyel e imen i osi en gro fakter.  In annan Mr Deputy Speaker bokou lezot pwen enportan ki’n ganny met devan par sa bann endividi ou lorganizasyon me pou rezon letan, mon’n met zis serten ki pli relevan dan mon lentervansyon.  Mon pou profite la osi pou salye zefor e rokonnet responsabilite e travay dir nou bann reserser e konsiltan lokal e tou lezot ki ede dan en fason ou en lot dan prodiksyon resers pou nou pei.  Zot bann dimoun ordiner, tel ki nou bann ansennyan, nou bann etidyan, par egzanp nou bann zenn dirizan young leaders, profeser, ekriven e politisyen, pou nonm enn de.  Mon pou ankouraz zot pou kontinnyen fer sa bon travay e mon demande ki zot travay i ganny byen valorize e siporte a tou pri.  Mon vwar ki koman en bon lenvestisman, i pli fer sans pou nou Gouvernman ou lezot lorganizasyon isi Sesel pou envestir dan nou prop dimoun pou fer resers.  Zot pli konpran nou sitiasyon.  Zot pli byen konpran nou kiltir e zot pou fer en louvraz pli senser.  Ankor mon dir ki mon pa kont ki dan serten lenstans, Sesel pou bezwen lekspertiz bann konsiltan etranze.

Mon’n osi fer en pti resers baze lo sa Mosyon avek Biro Statistik Sesel, pou vwar en pti pe ki zot pe fer, ki zot bann defi e plan pou toultan a la servis nou pep, an sa ki konsern prodwir lenformasyon e statistik enportan.  Sa lorganizasyon in toultan enn ki enportan e travay an korperasyon avek bokou nou lorganizasyon lokal pou asire ki lenformasyon ki an demann i disponib.  National Bureau of Statistic ti ganny etablir an July 2012 i ranplas National Statistics Bureau ki ti ganny set up an 2005.  Biro Statistik Sesel i operate koman en semi autonomous lazans Gouvernman pou ki i responsab pou kolekte, compile, analiz e pibliy lenformasyon lo statistik an zeneral tel ki kantite touris ki vizit nou pei, price index e lezot ankor.  Biro statistik i osi responsab pou kordin, sirvey e siperviz National Statistical System Sesel.  Avek son vizyon pou vin en sant ekselans dan prodiksyon e efas lenformasyon an sa ki konsern statistik dan Sesel, Biro Statistik pou kapab fer pli byen ankor si i ganny plis sipor e resours tel ki plis anplwayer e plis lenformasyon enportan, relevan e korek avek tou lezot lorganizasyon Sesel.  Pou lemoman, Biro Statistik pe delivre en nivo servis egzanpler avek selman en trantenn travayer.  Pou sa biro reste a la oter e avek le bi pou vin pli inovativ, zot annan konm plan pou revwar zot institutional set up, devlop e mentenir en user friendly website ki byen enformativ, pou ogmant profesyonnalizm ek lefikasite, amelyor kalite ki i pe prodwir e servis ki i pe ofer e pou reste sa premye sours lenformasyon an sa ki konsern statistik Sesel.  Biro statistik i sa lofis ki kordin resansman apard ki fer bann lezot resers e statistik e bann surveys par egzanp i ganny komisyonnen par Prezidan Larepiblik dan serten ka e lorganizasyon tel ki UNDP. Biro statistik i alors retenir lenformasyon dan 2 fason.  Sa i sa ki nou apel lenformasyon primer e lenformasyon segonder.  Lenformasyon primer i ganny kolekte atraver bann legzersis tel ki resansman e serten surveys. Dan sa bann tel legzersis par egzanp resansman, sa lofis i servi son prop staff e osi rod lasistans par egzanp bann ansennyan.  Anviron 4 a 500 teachers/ansennyan i ganny rekrite anver resansman.  Bann kou tel ki transportasyon e allowance i ganny peye par National Bureau of Statistic. Me pou fer sa bann tel legzersis materyalize, biro statistik i bezwen partisipasyon e konprenezon piblik Seselwa.  Biro statistik in fer resorti klerman avek mwan ki dan tou bann survey ek legzersis parey ki zot fer, konfidansyalite i toultan ganny respekte.  Lo kote data segonder, la nou pe koz lenformasyon ki biro statistik i gannyen avek lezot lorganizasyon e Sesel pou asire ki lenformasyon neseser e enportan i ganny anmase.  Biro statistik i par kont rekonnet zefor ki serten lorganizasyon i donn sa lofis, i annan bon korperasyon me avek plis korperasyon ankor e sipor lezot lorganizasyon ou Lazans an zeneral, sa biro pou sirman al pli devan.  Mon’n aprann resaman ki serten lorganizasyon non-gouvernmantal in partaz ek lezot lorganizasyon e menm ek Gouvernman bann resers ki zot in fer e sa i tre byen akoz sa bann lorganizasyon i pe ed pei dan plizyer fason.  E par lefe ki zot zefor e korperasyon i ganny byen rekonnet, sa i devret en lankourazman pou lezot lorganizasyon ki ler zot fer zot resers zot pa gard li pou zot, zot partaze akoz apre tou, zot pou benefisye nou pei.  Menm si parfwa lenformasyon pa neseserman disponib ou serten fwa pa konplet, biro statistik in fer sir ki tou lenformasyon ki i anmase i toultan available, par egzanp lo zot website.  An sa ki konsern dokimantasyon, mon ti ganny enformen ki biro statistik pe move away avek sistenm anmas dokiman, parey nou dir bann hard copies e pe moderniz zot sistenm par met lenformasyon lo computer, en legzersis ki serten lezot lorganizasyon pe osi fer.  i annan son lavantaz tel ki depans pou mwens e mwens lespas pou stoke.  Sa bann gro dokiman sepandan, menm en vye sistenm dokimantasyon i ganny ranplase par sa ki pli modern, i devret annan kantmenm en back up plan oubyen sistenm la kot sa sant pou resers ek dokimantasyon ki mon’n fer resorti pli boner i antre.  Malgre biro statistik pe fer son mye pou prodwir avek son kliyan tou lenformasyon enportan baze lo resers, survey eksetera, ki i fer e pe ofer le meyer servis posib, i reste touzour bann defi ki sa lofis ti a swete sirmonte.  Sa lofis pou sirman kapab ofer en pli o nivo servis pli modern, enn ki pli byen ekipe e lenformasyon enportan si par egzanp i ganny plis sipor an sa ki konsern resours finansyel ouswa imen e osi ofer serten training son bann staff, travayer Seselwa.  I neseser, baze lo sa ki mon’n dir menm si nou annan bann reserser profesyonnel dan nou pti pei, ki Liniversite Sesel i konsider en module lo lenportans resers, statistik ek dokimantasyon dan curriculum sa Liniversite.  Sa pou otomatikman ankouraz e demontre lenportans en kiltir resers e dokimantasyon dan nou pei, depi kot nou bann zenn ziska kot lezot travayer dan nou pei.  Annou osi pa bliye ki apard lezot konsiltan ou reserser Seselwa tel ki bann ansennyan, Sesel in osi prodwir bann etidyan, zenn dirizan ki nou’n apel Young Leaders Programme ki’n konplet zot letid anba sa progranm e ki’n osi konplet module lo research method ki osi form par dan sa progranm.  Bann resers lo bann size enportan tel ki resers lo problenm sosyal, resers lo sitiasyon lapolis Sesel, sitiasyon dan sistenm ledikasyon, zenn dan politik, tourizm e kiltir e lezot ankor.  Sa bann zenn dirizan in travay dir e rezilta zot travay dir i byensir dan sa bann resers.  Gouvernman i devret osi konsider dokimant byen sa bann tel resers e byen servi resers lezot profesyonnel pou met dan sa sant resers ek dokimantasyon ki mon’n propoze pli boner.

Mon pou profite an terminan, pou mwan ankouraz nou bann reserser e konsiltan lokal, pou zot osi apros Gouvernman ek lide lo ki pli bon fason, ki pli bon mekanizm ek zouti ki pou kapab ganny servi an sipor pou sa Mosyon e ki lenportans kiltir resers ek dokimantasyon a ganny met an aplikasyon.  Mon pou osi rekomande ki Gouvernman, Liniversite e lezot lenstitisyon ki servi lekspertiz ek skills nou bann konsiltan, nou bann reserser, nou bann etidyan par egzanp zenn dirizan a tou pri e byen rekonpans zot otan ki posib.  Mon pou aport mon sipor a sa Mosyon e demann tou lezot Manm Onorab pou vot an faver sa Mosyon e donn li son lenportans.  Mersi Mr Deputy Speaker.

 

MR DEPUTY SPEAKER

Bon, avek sa nou a pran en break e nou a rezwenn 4er.

 

(Break)

 

MR DEPUTY SPEAKER

Bon, nou a kontinnyen avek nou deba lo Mosyon prezante par Onorab Ghislain e mon ava envit Onorab Valmont pou fer son prezantasyon.

 

HON SYLVIANNE VALMONT

Mersi Mr Deputy Speaker, bonn apre midi.  Mr Deputy Speaker, akse a lenformasyon i en laspe tre enportan pou devlopman en pei an zeneral, osi pou devlopman limenm dan diferan konteks tel ki devlopman ekonomik ou devlopman sosyal.  Mon pa kapab dir ki resers e dokimantasyon i 2 laspe kle ki relye avek lenformasyon ki la baz bann gran desizyon e polisi dan en pei, pou asire ki i annan progre e rezilta konkret dan lenplimantasyon bann progranm oubyen bann aksyon.

Mr Deputy Speaker, Mosyon pe demande pou ki lanfaz serye i ganny mete pou entrodwir, ankouraz e demontre lenportans en kiltir resers e dokimantasyon dan nou pei.  Nou bezwen rekonnet ki resers e dokimantasyon pa’n ganny totalman neglize nasyonalman isi Sesel.  Plizyer lenstitisyon prive e piblik in kontinnyelman fer zefor dan sa domenn pour ki i annan bann lenformasyon relevan e adekwat pou ganny itilize kan i neseser, me i evidan osi ki i annan bann lenstans kot sa size in ganny neglize ouswa lanfaz pa’n ase pou promouvwar devlopman en tel kiltir dan en fason proaktiv e soutenab.

Nou bezwen Mr Deputy Speaker, a sa pwen rekonnet travay ki’n ganny fer e pe kontinnyen ganny fer par Minister Ledikasyon, Lasante, Lanplwa, Lanvironnman, Biro Statistik e plizyer lezot Lazans ankor.  Par egzanp, kot i konsern Minister Ledikasyon, nou konnen ki i annan tre lontan kot en seksyon resers pe fonksyonnen e en kantite travay in ganny fer lo bann size spesifik e menm parfwa ganny pibliye.  Lo nivo dokimantasyon, i osi evidan ki sa i en travay kontinnyel dan sa Minister.  La ki nou sistenm kominikasyon pe bokou avanse e modernize, i petet neseser pou en tel lenstitisyon revwar fason pli modern dan konteks nouvo teknolozi, pou zer sa 2 sistenm ankor pli byen.  Petet a sa pwen, nou bezwen pran an konsiderasyon bann defi oubyen defayans ki sa bann lenstitisyon i fer fas avek.  Bomaten menm, nou’n ekout Minis pou Ledikasyon koz lo enn de sa bann sitiasyon.  Pou ki zot kapab fer ganny realize, sa 2 laspe i ganny realize dan en fason sistematik e konsistan.  Anplis ki sa, bann fakter tel ki konpetans e letan i osi merit ganny konsidere, ler nou pe koz lo problenm resers ek dokimantasyon.  Nou bezwen osi rekonnet ki pou fer bann resers aprofondi, i nesesit 2 resours kle e tre valab.  Sa se pa lot ki resours imen e resours finansyel.  Si in annan mankman dan la pratik, se petet akoz sa 2 rezon prensipal, an prenan kont nou prop listwar e kiltir an zeneral.

A sa pwen, i osi enportan ki mon pran sa loportinite pou fer mansyon spesyal pou Minister Lanvironnman koman en legzanp, ki nou kapab dir in en sanpyon dan domenn resers ek dokimantasyon.  In annan en sant o nivo dan sa Minister ki petet pa pe ganny ase piblisite, valorize e itilize parey fodre.

Mr Deputy Speaker, mon ti a kontan fer enn de propozisyon an linny avek sa ki sa Mosyon pe demande.  Dabor, ki Gouvernman i envestir plis resours finansyel dan bann lenstitisyon pou ki resers i vin en konponan obligatwar.  Ki bann lenstitisyon i ankouraz e ofer training dan sa domenn respektiv.  Petet, Liniversite Sesel i devret pran en leading role dan sa domenn.  Ki i annan osi en Protokol spesifik kot resers ek dokimantasyon i konsernen dan bann lenstitisyon.  Ki bann resers enportan i ganny pibliye en pe pli souvan lo medya, ki bann zenn etidyan, bann lekol depi komansman primer, segonder an montan i ganny ankouraze pou fer bann resers e dokimant bann lenformasyon pli boner parey nou dir, i devlop sa latitid e labitid anver resers.  Sa i kapab pran laform konpetisyon.  Ki en sistenm award i ganny enplimante pou rekonnet bann resers inovativ e enportan ki annan en lenpakt lo nivo nasyonal.

Mr Deputy Speaker, i pa ti mon lentansyon repet bann keksoz ki bann lezot Onorab in dir avan mwan, avek sa mon ti a kontan aport mon sipor pour sa Mosyon.  Mersi.

 

MR DEPUTY SPEAKER

Onorab Jacqueline.

 

HON SULTANE JACQUELINE

Mersi Mr Deputy Speaker.  Mosyon Onorab Ghislain Mr Deputy Speaker pe fer nou reflesir lo en laspe enportan dan nou devlopman koman en sosyete e en nasyon.  Dan en monn kot sanzman i inevitab e sistematik, nou vwar nou koman en pti pei pe bezwen de tanzantan pran desizyon pou fer keksoz diferaman pou nou pa ganny kit deryer dan nou devlopman.  Pour antisip progre e sikse, nou bezwen vin pli inovativ, kreativ dan nou fason fer e panse pou rezourd problenm e pli byen cope avek bann challenges.  Avek bi, pou nou bann aksyon vin pli relevan avek konteks sa monn ki nou pe viv ladan.  Bann levennman dan sa monn pe san dout enfliyans nou fason viv e avek lavansman lenformasyon, kominikasyon e teknolozi ki pe kontinnyen vin pli sofistike, sanzman dan konportman imen vizavi zot bezwen e kou lavi pou fors tou dimoun pour adapte pour sirviv.

Resers i enportan Mr Deputy Speaker, akoz atraver listwar, letan in demontre son byen fe dan devlopman nou plannet dan laplipar ditan, pou amelyor lavi imen, sirtou kot i konsern domenn lasante, kot resers i reste vivan, an vi ki i annan kantite maladi ki ganny aparet de tanzantan e bann reserser i bezwen touzour aktiv pou zot rod solisyon pour gerizon akoz laras imen pou ganny menase.  Ledikasyon i en lot domenn kot bann educationist pe rod bann meyer fason pou vwar kimannyer pou adapte lansennyman pou fasilit laprantisaz dan sa monn nouvo.  Lasyans osi i kontinnyelman pe montre nou lenportans resers pou nou konpran pli byen nou legzistans e cope avek sanzman tel ki sanzman klima.  Sa i zis enn de ki mon mansyonnen e lot ki pli resan ki toultan nou tann bann dekouvert, annan de ler ou a dir tou le semenn i annan en nouvo dekouvert ek teknolozi.  Telefonn, ou pas laboutik, ozordi ou trouv en model e lannmen ou trouv en lot model.  I montre nou nesesite sanzman dan sa lemonn konpetitiv.

I vre Mr Deputy Speaker, resers i ede prodwir lenformasyon kredib ki ed nou aprann e fer bon swa letan nou pe pran en desizyon.  Nou pa kapab kontinnyen e aksepte bann sitiasyon kot resers oubyen investigation pa ganny valorize e move desizyon i ganny pran akoz en mank lenformasyon byen fonde.  Souvandfwa i antrenn konsekans grav kot i annan fristrasyon, gaspiyaz letan e larzan e byensir met retar dan devlopman.  Sesel i bezwen vin en pei ki valorize lenportans annan resers.  Resers a plizyer nivo selon bezwen imedya.  Mon pa pe koz bann gran resers syantifik me en pti investigation pou ede anmas lenformasyon pou pran desizyon pou rezourd problenm pratik dan nou kominote.  Mon anvi soulinny en legzanp Mr Deputy Speaker.  I annan drenaz par egzanp, nou trouv ki pe ganny konstrir san en bon investigation teren i fer.  lobzervasyon aprofondi e entansiv letan lapli i tonbe, pou vwar parkour e resours delo.  I bezwen annan diskisyon, en pti interview e pwennvi bann dimoun ki reste sa landrwa pou en pe letan pour eksplik pattern lapli e son dega.  Nou bann vye paran, zot annan bann konsey saz akoz zot in fer serten dekouver ki en pti resers dan limenm, over the years pou obzerv bann pattern pou zot kapab pran bann bon desizyon e donn bann bon direksyon.  Sa dan limenm i en pti resers ki pou ed sa enzenyer avek lenformasyon byen fonde, pou li fer en bon plan pou li donn kontrakter, me pa selman en latres pou mezir longer e larzer drenaz pou met en kou avek, apre donn kontrakter.  Ledikasyon i en domenn ki bezwen annan resers kontinnyel pou ki bann ansennyan i adopte bann meyer lapros pou ed laprantisaz.  Rol ansennyan i bezwen pe enspir en zanfan pou partisip aktivman dan son laprantisaz kot zot ganny ekspoze avek bokou kestyon e refleksyon, kot zot fer konparezon e analiz e ki zot larepons i baze lo levidans.  Levidans ki kapab provok bokou diskisyon pou zistifye pwennvi.  Sa Mr Deputy Speaker, i bezwen ganny ankouraze depi dan pti laklas, ansennyan i bezwen zwe en rol enportan pou enspir sa eleman resers de baz dan zanfan ki pou ede pli tar pou motiv li pou komans devlop lapros resers e kontinnyen aprann lo limenm tou dilon son lavi.  Ansennyan i bezwen konsyan ki tou in sanze e pe kontinnyelman sanze.  Pou li prepar en zanfan pou le fitir, i bezwen pe fer bokou plis ki zis donn lenformasyon e konesans pou pas en legzanmen.  Lansennyman i bezwen vin pli relevan pou zwenn bezwen nou bann zanfan dan sa konteks modern pou zot lepanwisman demen.  Bokou in ganny akonplir Mr Deputy Speaker, dan kad donn en bon ledikasyon a en pli o nivo posib pou tou bann ki’n annan sa abilite, ki’n sezi loportinite pou zot avanse lo nivo diplonm oubyen Liniversite.  Sa i levidans ki bokou, in ganny ekspoze avek loportinite e nesesite pou planifye e fer resers ki en konponan enportan e endispansab pou graduate a sa nivo.  I annan en labank resers nou kapab mazinen a nou dispozisyon, etan done nou bann etidyan ki’n graduate dan en varyete topik dan tou bann Minister e dan bann size spesifik.  Me kestyon i reste, parey in ganny demande, kote sa bann resers i ete e kimannyer i pe servi nou.  Koman en travayer Minister Ledikasyon avan, mon konsyan ki bokou zefor in ganny pran dan sa Minister pou annan en landrwa pou dokimant sa bann resers pou ki i kapab ganny servi koman referans lapliparditan plito par bann ki pe etidye.  E mon osi aprann ki i annan serten Minister pe vwar li neseser pou swiv, pou fer en pti resers lo bann etidyan past graduates ki’n fer resers, pou demann zot kopi zot decertation zot resers pou ki zot kapab dokimant serten lenformasyon pou zot pran desizyon.  Me sa i pa toultan leka pou tou Minister e Lorganizasyon.  I malere Mr Deputy Speaker, sa bann dokiman valab ki’n etidye, analize e fer rekomandasyon pou adres konsern pertinan tel ki job satisfaction and teacher retention, school improvement and teacher empowerment, leadership in the 21st century, discipline and behavior management pa toultan ganny byen valorize par bann decision makers oubyen policy makers, sankrwa mon asire bokou nou bann konsern ti pou’n ganny adrese.  Dan bokou ka, parey in ganny konstate, zot ganny met lo letazer oubyen dan bife, me rarman ganny pran an konsiderasyon.  I annan menm ki etidyan i sorti study, napa personn ki oze demann li pou donn en apersi, en feedback lo son resers e sa etidyan nou pe demande kote son bann findings i ete, i dan lakour.  Research findings i devret pe enfliyans e enform bann policy makers pou ki lanfaz i ganny mete pou bann aksyon ki pou falisit lenplimantasyon sanzman inovativ.  Me si sa i pa leka, ler in arive pou nou pran sa defi.  Nou defi se ki nou bezwen adopte en kiltir servi bann levidans resers pou nou pran desizyon e pou devlop bann polisi ki pli relevan pou speed up nou devlopman, sankrwa nou pou kontinnyen tourn an ron e mon pou repete parey mon bann koleg in dir, en dimoun ki nou apel souvandfwa bann expert sorti aletranze pou vin lo nou shelf, pran nou rekomandasyon e dir nou ki pou fer.  Sa i malere e tre domaz Mr Deputy Speaker.  Mon sizere ki bann graduates motive ki ankor annan sa labitid fer resers oubyen bann profesyonnel ki pasyonnen pou fer resers pou idantifye bann areas dan zot lorganizasyon pou antreprann bann resers.  Sa pou ede anmenn lespri travay ansanm, promouvwar inovasyon e kreativite parey Prezidan Michel in toultan pe kosyonn nou, ki an retour a amelyor standar e anmenn rannman dan travay.  Pou ede donn lenportans pou devlop en kiltir resers Mr Deputy Speaker, mon osi sizere ki bann graduates, ensi ki lezot profesyonnel i ganny ankouraze pou pibliy zot bann resers ki’n ganny byen fer e ganny valide dan bann research journals kot zot a ganny droit d’oteur pou ki dimoun i kapab lir e aprann lo bann dekouvert ki lokal e ki enteres nou.  Sa i kapab motiv bann profesyonnel pou kontribye pli pozitivman pou son lorganizasyon e partaz en common sense of purpose, osi retenir zot dan zot lanplwa.  Organiz bann forum i en lot rekomandasyon, en lo sizezyon, kot sa bann profesyonnel, sa bann graduates zot a kapab prezant zot resers e ekout bann kritik, defann, donn leklersisman lo bann findings.  Sa pou rann zot resers pli kredib e ankouraz lezot pou devlop sa kiltir resers.  Nou annan bokou profesyonnel kalifye dan Sesel ki kapab fer bann resers o nivo e aport bokou soutyen dan nou devlopman.  Mon sezi sa lokazyon pou dir mersi tou bann dimoun ki’n kontribye avek bann bon resers remarkab dan Sesel, spesyalman dan konteks kiltir, listwar, lasante, ledikasyon, lanvironnman zis pou nonm enn de.  Mon swete si sa rekomandasyon i ganny pran an kont, zot a kontinnyen zwe rol enportan pour pous resers pli devan.  Par kont, i annan bokou areas kot nou kapab idantifye en lentere pertinan, en konsern nasyonal pou fer resers dan Sesel, spesyalman dan lasante, pou ede amelyor lavi nou zabitan.  Alavenir, nou kapab osi sa ki nou apel think-thanks en group dimoun endepandan ki kapab ganny demande pou fer resers kot i annan sa bezwen, olye depan lo etranze ki souvandfwa zot kapab annan bann ki nou apel culture bias dan zot lapros e zot persepsyon.  Sa ki bon pou zot pa neseserman marse dan nou konteks lokal.

Mr Deputy Speaker, mon pou donn mon sipor Mosyon Onorab Ghisalain.  Mersi.

 

MR DEPUTY SPEAKER

Onorab Bresson.

 

HON GALEN BRESSON

Mersi Mr Deputy Speaker.  En kiltir resers i enn ki bezwen akoz dan sa lemonn modern ki nou viv ladan, si nou pa fer resers, nou pei pou reste an aryer ek lemonn.  Ozordi, en devlopman dezirab pou nenport ki pei i annan serten keksoz kle ki zot ti a voudre vwar.  En lekonomi modern, en pep ki byen kadre e prodiktif, en vizibilite kredib e konpetitif dan sa lemonn global e en popilasyon ki dinamik.  Pou ou kapab modern, prodiktif, vizib, konpetitiv e dinamik, resers byen kadre lo bezwen pei avek son lenplimantasyon pou inovasyon i merit kapab asir sa.

Levidans in la depi byen lontan Mr Deputy.  Byen avan revolisyon endistriyel, se lagrikiltir in komanse, revolisyon in vini e inovasyon ti kle.  Devlopman resers, sa ti la baz.  Dan lemonn modern, konmela nou pe servi bann term tel ki lenerzi renouvlab, digital network, bio mimicry e lezot ankor.  E sa i pa reste bann gran, gran mo, plito i bann keksoz ki tou pei dan lemonn pe eseye pour etablir zis pour sirviv dan sa lemonn.

Mr Deputy, ozordi Sesel in en pei ki’n envestir bokou dan ledikasyon son pep e sa limenm se en baz resers ki fer nou en pep natirel pou fer resers.  E parey loter Mosyon in demande, demontre lenportans en kiltir resers Mr Deputy Speaker, sa lenportans si i pa ganny demontre, resers pou reste lo shelf. Bann reserser pou al kot zot resers i ganny bezwen, ganny valorize e ganny enplimante.  E Sesel li, ki i reste avek, pe lager pe rode kote i pe ale.  En fason ilistre sa, i atraver 3 serk ki mon’n sey kalifye.

Premye serk nou met resers.  Dan resers, kot li i annan bann facts ek figures, la nou met bann akademik.  Se zot ki fer bann resers.

Dan sa dezyenm serk i vin bann fasilitater, bann developer ouswa teknolozi limenm, akoz zot ki annan tou sa posibilite e aplikasyon.  Bann teknokrat, enfrastriktir pou pran sa resers e devlop li.

E dan sa trwazyenm serk, se limenm li sa inovasyon, sa lenplimantasyon kot nou menm bann dimoun nou asiz ladan e se nou ki servi sa bann inovasyon nou tou.

Si sa 3 serk pa vin ansanm, i reste separe, la sa kiltir resers ki pe ganny demande, resers pou reste resers e pou reste dan shelf e lapousyer i kontinnyen ganny kolekte.

Mr Deputy, les mwan aport serten legzanp, petet pou eklersi sa, ki pe reflekte dan lemonn, sirtou dan Lafrik e isi menm Sesel.  Mon premye ilistrasyon i komans avek en zanmi ki mon’n fer pa tro lontan, Dokter Bindy ki li, parey en zenn i aspire pou sorti dan son lakour Nigeria, son fanmiy i en planter, mizer, i aspire e study e finalman i ganny labours i al Langleter e laba i study. Ler i retourn Nigeria, son lenspirasyon, son ledikasyon ki in gannyen, son degre i dir li i pou bezwen rann sa son pei.  Fantastik.  I regard en keksoz nasyonal ki Nigeria i fer e la cash crop Nigeria sa letan ti pistas.  E dan son degre, i en enzenyer, i devlop en masin, i fer en resers e la i al partou lo bann laferm kot bann dimoun pe kiltiv sa, i regarde kimannyer zot kiltive, ki prosedir i pas ladan apre e kimannyer, kote i ale e finalman kote i ganny anbale.  E sa letan, bokou anbale pe ganny fer a leksteryer Nigeria.  I devlop en masin e sa nou apel en prototype.  I anmenn kot son Gouvernman i dir vwala, mon’n al etidye, mon’n fer sa prototype ki nou pou fer sa lendistri vin mekanikal.  Zot aksepte, tap li lo son zepol e sa resers i ganny shelf. Avek son dekourazman, sa msye i kit son pei natal e i deside al etablir dan bann rezyon Lostrali.

Laba, ankor enn fwa i regarde kimannyer bann dimoun ti pe kiltiv koko.  E la dan sa landrwa i en pe parey Sesel.  Andeor Lostrali bann pti zil, zot pe anmas koko, zot pe plis koko e zot pran sa prodwi koko zot fer bann prodwir ki debaz e la, sa i ganny eksporte e i ganny anbale e met lo shelf i ganny vann, bann pharmaceuticals i servi and so on.  Sa msye i etidye e i fer en resers.  Deswit, ler i fer en prototype mekanikal ki retir imen, ki pran sa koko i plis sa koko, ziska ler i vin sa prodwir de baz, Gouvernman Lostrali i met sa mekanizm i dir vin isi e ozordi, i en patant ki’n ganny anrezistre anba son non e pe ganny devlope, pe vin lo market ek son non me en Nigirian ki’n al devlope pou pei Lostrali, ki sorti Lostrali e mon asir ou, sa masin pou al lemonn antye kot koko pe ganny servi ozordi.

Dezormen Mr Deputy, dan konteks Sesel, nou tourn en kou dan konteks Sesel, set avek sagren ki mon’n tann en pti keksoz pa tro lontan in arive.  Ler mon ti Liniversite, i ti normal pour vwar en etidyan en pti pe pli vye ki ou, si mon kapab met li koman sa term vin mon tre ou en serten module, ouswa gid ou lo en serten module e ler ou demann li ki i pe fer, i dir ou li son louvraz i resers kot sa Liniversite e Liniversite limenm, bokou son larzan i gannyen akoz zot dan sa kiltir resers.  Zot fer bokou resers e se bann gran lakonpannyen ki donn zot sa bann kontra e zot, zot servi sa human resource ki zot annan e bann etidyan zot, zot kontan pou al fer sa resers, zot fer bann resers teknolozi, zot fer resers lo nenport kwa e li sa lakonpannyen i pey en kantite larzan, i pran sa resers i met sa lo market. Ozordi, Sesel i annan son Liniversite Sesel.  Nou annan en zenn ki pe retournen, zenn reserser, in ekrir Liniversite, i tande Liniversite i la, pou ganny anploye koman en reserser.  I pankor ni retourn Sesel zot in fini dir li nou pa bezwen ou e sa zenn ki i fer?  I pankor retourn Sesel li, nou pa bezwen ou, nou pa fer resers dan Liniversite.  Annandeler mon pe demann mon lekor maintenant, nou Liniversite, i pa pe servi bann model ki egziste a leksteryer Sesel, nou pa pou fer resers kot nou pou ganny bann larzan pou run sa Liniversite, kote nou pe ale dan le fitir?  En kiltir resers.

En lot ankor mon aprann ozordi i en kriz, teachers. Bomaten nou’n tann Minis in dir pe al rod aletranze.  Nou annan en resers ki’n ganny fer depi 2005/2006 ki ti prozekte kwa ki kapab arive, ki nou bezwen fer pou kiltiv dan Sesel teachers pou re-input dan sistenm.  Sa resers i ankor lo shelf. 2012, sa ki resers in dir in arive.  Li i lo shelf e nou, nou bezwen al rod etranze pou vin dan lekol.  Eski nou pe train ankor teachers? I en kestyon.  Eski i annan teachers ki pou kapab ranplase desito pandan sa 5an ki vini, menm 6an ki vini Seselwa?

En lot laspe i tourizm e sa yer menm mon’n anmas sa dan en workshop kot en resers lo tourizm dan Sesel koman en pilye nou lekonomi pe ganny fer.  La, en dekouvert ki zot in fer se ki deza STA pe prodwir bokou workforce dan tourism e en gran mazorite sa workforce i bann madanm.  Problenm ki pe arive, dan 100 madanm ki zot met deor, ler zot repas dan bann landrwa touristik apre menm 1an/2an, 60/75 in fini kite.  Alor, ki arive ek son training, son letan ki’n ganny depanse ki’n kout sa Gouvernman pou train li e i pa pe rann dan sa domenn.  En Lotel senk zetwal par kont i vwar i pe perdi tro bokou staff lokal Seselwa in fer son prop pti resers e in vwar, dan nou konteks ekonomik ozordi, akoz i pe perdi bann madanm ki mazorite son workforce e zot osi bann bon travayer se ki bokou zot enn, i single parent, lot zot annan bann zanfan.  Kantmenm i annan zot msye obor zot me ki zot fer ek zot bann zanfan ler zot pe travay?  E sa Lotel in fer solisyon kot i fer en day care.  Ozordi, i pe retain bokou son bann travayer madanm me le problenm i reste lo en nivo nasyonal.  Eski en resers pe ganny fer?  Alor sa kiltir resers i merit ganny met an plas pou kontinnyen pou regard non pa ler nou delivre etidyan dan lendistri, me en swivi ki pe arive dan lendistri ki swa gard sa dimoun dan lendistri, ouswa fer li arete dan lendistri.  Mon’n nonm 1, i kapab annan plizyer.  Resers i a prouve.

Mr Deputy Speaker, ankor enn fwa sa mo ‘sinerzi’ i aparet kot si napa ant sa 3 serk mansyonnen oparavan, resers, devloper e finalman enplimantasyon, tou i manke.  Tou i tonm dan delo.

Mr Deputy, en sistenm lozik e sistematik i bezwen egziste dan nou pei ki ler resers i ganny fer pou zwenn en bezwen, bann staz kler e defini i ganny met an plas e sa prodwir ki ler li i ariv lo marse, la sa marse in pare pou li e i akey li e i servi li.

Mr Deputy Speaker, en lot laspe resers, vizavi etablir sa bon kiltir ziska lenplimantasyon i ganny bokou neglize me mon’n tann Onorab Jacqueline avan mwan in tous lo la.  E sa i laspe drwa entelektyel.  Intellectual property, IP. Sa nou kapab diviz li an 2.  Industrial property, drwa endistriyel ki la nou vwar 2 kategori.  En kategori kot nou vwar bann patant trade marks eksetera e la dan limenm i fer mwan mazinen, ler mon pase toulezour, zis kot i annan bann kiosk kot bokou bann touris i aste bann souvenir Sesel, i annan enn sa bann marsan i vann bann diferan prodwir t-shirt, pareo and so on ki met “I love Seychelles” e sa ‘love’ sign ki in servi i en kokodmer ki inik pou Sesel.  E toultan mon pase, mon regarde, mon dir be sa i en zoli travay.  Eski sa marsan ou sa dimoun ki’n devlope in fer en bon resers?  Eski in met en patant lo la ki protez li, prenan kont ki tousala i ganny aste e bokou i kit nou pei e al avek.  Annou pa bliye ki dan lemonn ozordi en milyoner i egziste, ki i ti pran 4 let e li i fer “FCUK” i met lo t-shirt, lo cap, ozordi i en milyoner ki ti deza egziste.  Alor, nou pran sa an kont.  Resers in prouve, nou bezwen fer sir.

Lo sa dezyenm kategori ki Onorab Jacqueline in tous lo la e in mansyonnen se drwa doter, copyright, geographical indicators, traditional knowledge eksetera.  Geographical indicators pa tro lontan dan sa Lasanble nou ti diskit lo enn.  Plato Mascareine ki Sesel in fer son resers, in vwar e li in al tous tou bann pei ki border li, se Sesel ki’n lead, alor sa resers i deza la pou nou Seselwa.  Sa kiltir i egziste dan en serten faz, dan en serten landrwa.  Me si sa lot devloper li, i pa pran pou anmenn devan, dan sa ka in pran li all the way, i pa bridge sa gap, nou ti kapab perdi sa plato avek en lot pei.  E traditional knowledge, lo konesans tradisyonnel, nou annan bokou isi.  Bokou resers in ganny fer, bokou dokimantasyon in ganny fer.  Eski nou pe protez li pou Sesel?  E dan en lot konteks, nou annan sa ki nou apel copyable property e sa i parey bann resers nasyonal ki li i fer pou la baz nasyonal byennet parey The National Social Renesance Plan, ki sa tou dimoun i kapab kopi, servi e adapte.

Sesel Mr Deputy, nou pe prepar nou pou bann Konvansyon Enternasyonal.  Nou deza sinny bokou parey Burn Convention e li i deal spesifikman vize ver bann resers kalifye, sirtou dan inovasyon teknolozi.  Si ou pa protez ou, bann lot pei pou vini pou pran, zot pou al anrezistre e i pou vin pou zot.  Ozordi ler nou koz drwa doter ki deza egziste son Lalwa.  Lalwa ti ganny pase isi menm dan sa Lasanble, dan katriyenm Lasanble.  I sagren pou vwar, akoz i pou egziste sa, dan nou pei, kot ler i pe ganny enplimante dan sa pei, kot bann gran, gran lasenn ki mon kapab, bann chain of hotels ki egziste, ki pe operate dan nou pei, i dir li i pa krwar i pou abide to sa rules and regulations. Ankor nou dir, kiltir resers i la, i bezwen annan tou son bann faz kot tou bann ankadrer, menm ler ou pe al rod en license i dir ou sa i la, ou pou bezwen abide to.

Mr Deputy, problenm serye dan sa kiltir resers, ki menm ozordi i egziste se ki bann bon resers i kapab fini dan sa ki nou ganny apele, nou term li the valley of death.  Akoz sa pon ki sipoze zwenn sa resers akademik ek lenplimantasyon ki marse, li son stratezi i fay, son sipor i pa bon, i pa konnen kimannyer pou protez sa resers, alor tou i collapse e i fini.  Bokou nou dan sa Lasanble, pa pou al tro lwen, in fer bann degre e bokou sa bann degre i baze lo bann issues isi dan Sesel.  Konbyen ki’n pran sa bann resers pour regarde e dir vre, vwala en resers konplet ki en etidyan in fer koman athysis. e i baze lo en issue reel dan nou pei.  Konbyen ki’n pran pou regarde, enplimante, rafin li e met li lo market e solve enn sa bann issues dan nou pei?  Mr Deputy, mon pa konnen.

An konklizyon, en kiltir resers, resers e reserser i bezwen devlop dan en fason lozik e sistematik kot nou vwar resers akademik i pas dan sa tranzaksyon ziska lenplimantasyon e sa pon ki nou met an plas i byen fonde e i byen for.  Avek sa Mr Deputy, mon pou donn mon sipor sa Mosyon.  Mersi.

 

MR DEPUTY SPEAKER

Onorab Meggy Marie.

 

HON MEGGY MARIE

Mersi Mr Deputy Speaker.  Bonn apre midi tou koleg Onorab.  Mr Deputy, bokou sa ki nou fer dan nou lavi toulezour i baze lo common sense lo kwa ki nou’n aprann ek lezot e osi par leksperyans oubyen lobzervasyon.  Parey nou konnen, parfwa zis leksperyans ek lobzervasyon pa osi sifizan pou nou konnen si sa i pli bon lapros ki pou marse ou non dan son sitiasyon partikilye.  Sa dan son totalite i toultan kit nou dan en sitiasyon kot laplikasyon en lapros ki pa fonde lo en resers konkret, i pa toultan anmenn meyer rezilta.  Tousala pa pou kapab amelyore si napa en lapros konkret kot nou kapab sers lenformasyon e osi dokimant rezilta kot lezot ki annan lentere i kapab ganny akse e fer en swivi.  Sa kalite lapros pe ganny pratike dan plizyer lenstans me mon santi ki dan bokou lenstans, desizyon pa pe ganny pran lo en baz resers me plito asanpsyon ouswa santiman, diskisyon oubyen zis lo nou prop krwayans.  I osi annan bann dimoun ki travay resers i zot metye, me ler zot prezant rezilta zot travay, sa pa pe neseserman ganny byen apresye ouswa konsilte.  Rezilta bann travay resers dan nou pei pe ganny dokimante, me eski zot pe ganny konsilte ler en desizyon konsernan tel ou tel size i leve.  Eski napa resers ki pe zis reste lo shelf serten Minister ouswa Departman kan pei ti pou kapab benefisye bokou si nou ti konsilte rezilta e propozisyon sa bann travay resers.  Anplis ki sa, bokou dimoun pa pe konnen kote pou ale pou ganny tel lenformasyon.  Mon pa santi ki lanfaz pe ganny mete ase pou enkilke sa latitid resers dan nou zenn, pou pran letid resers e dokimantasyon koman en metye oubyen en pasyon, ouswa menm koman en lapros oubyen fason travay.  Bokou rezilta bann reserser ki’n ganny fer e dokimante dan lepase pa pe ariv kot bann zabitan ki bezwen tel lenformasyon.  E zot bann rezilta pa pe ganny servi par bann zabitan ki byen bezwen sa bann lenformasyon.  Sa i anmenn mwan dan en analiz ki fer mwan vreman konvenki ki si nou met lanfaz pli serye pour entrodwir, ankouraz e demontre lenportans en kiltir resers e dokimantasyon lo nivo nasyonal dan Sesel, pou en laspe enportan ki mon krwar pou anmenn rezilta pozitiv pou endividi, par egzanp i kapab devlop keksoz pou son lekor personnel, pou son kominote, pa bezwen ki resers i al lo en gran lanpler, me resers i ganny fer pou nou kapab fer keksoz ki konkret.  Pou lendistri i kapab ogmant son prodiktivite e menm vin pli inovativ.  Pou bann lorganizasyon fonksyonn pli efikas, lekol, servi lapros pli efikas e pli modern.  Vin pli inovatif.  Fer manrmay vin form par dan resers ki pou pli bon pou sa Lenstitisyon limenm.  I bon pou nou pei osi, pou son devlopman e lezot ka ki dan nesesite, espesyalman bann ki annan rezilta pozitiv lo devlopman imen e pei dan son totalite.  Pa bliye, en bon resers avan lenplimantasyon i osi ede pou redwir gaspiyaz.

Mr Deputy, nou en pei an devlopman.  Nou en pei ki mon krwar nou annan bokou nou bann dimoun ki annan potansyel e leksperyans ki kapab fer bokou pou ede dna devlopman nou pei.  Me parfwa swa nou pa trouv zot akoz zot pa vin devan e menm i kapab akoz nou pa donn zot sa latansyon ki zot merite, anplis ki sa, bokou zot konesans, leksperyans e rezilta zot travay pa ganny byen dokimante, kot lezot i kapab fer en kontinnyasyon e osi servi li pou en bonn koz.  Pou nou pei kapab dan le fitir kontinnyen annan en baz ki solid, kontinnyen fer bann desizyon ki konkret e enplimant bann lapros ki pou efektiv, se par byen boner, komans travay avek bann zenn e ankouraz sa ki dan sa profesyon.  Sesel i en pei ki bezwen kontinnyen devlope.  Devlop dan en fason kot bann bon desizyon i kapab kontinnyen ganny pran, apre ki bann bon resers i ganny fer, byen analize e osi byen dokimante.  Sa i ava ed nou pou nou fer bann sanzman ki kredib, efikas e prodiktiv.  Nou pa pou toultan bezwen pran etranze pou vin fer resers dan nou pei, kot nou depans gro sonm larzan.  I vre ki nou bezwen serten zot lekspertiz, me nou bezwen komans ankouraz nou Seselwa apresye, donn valer zot travay ek zot konsey, pour nou kapab byen akonplir, nou bezwen a sa moman met lanfaz lo kree en kiltir resers e dokimantasyon byen boner dan nou bann zenn, kot plitar nou a vwar plis rezilta.  Sa i ava osi ede pou nou komans valoriz sa travay e donn nou Seselwa ki pe pratik sa metye son valer.

Mr Deputy, fodre nou note ki lefikasite i baze lo rezilta en bon resers ki son rezilta in ganny byen an alize e byen enplimante.  Si nou komans sa osi boner, mon senserman krwar ki sa i pou en laport ouver pour bokou nou bann zenn Seselwa pou devlop zot abilite, annan en vizyon, osi asire ki dan le fitir, nou kapab annan plis siantis e serser Seselwa.  I osi en fakter ki pou kontribye bokou dan devlopman, sirtou lekonomi nou pei.  Senpleman apre en bon resers, nou kapab sirmont bann defi ki nou bezwen fer fas avek, an plis ki nou bezwen fer fas dan le fitir.

Mon pe siport sa Mosyon akoz mon vreman krwar ki Gouvernman i met lanfaz pli serye pou entrodwir, ankouraz e demontre lenportans en kiltir resers e dokimantasyon lo nivo nasyonal dan sesel, ki en Mosyon ki’n ganny anmennen par mon koleg Onorab Ghislain.

Mr Deputy, nou pa pou kapab anmenn okenn sanzman efikas si nou napa en resers ki’n ganny byen fer e osi byen dokimante.  Lemonn pe bouz dan sa direksyon.  Annou bouze nou osi.  Sa i en bon direksyon ver “En Nouvo Sesel”, kot plis sitwayen i form par devlopman pozitiv nou pei e finalman i ava ede pou nou kontinnyen pran bann bon desizyon.  Mon pe siport sa Mosyon e osi demann mon bann koleg pou siport sa Mosyon.  Mersi Mr Deputy.

 

MR DEPPUTY SPEAKER

Bon, avek sa mon ava envit loter Mosyon pou fer son right of reply.

 

HON CHANTAL GHISLAIN

Mersi Mr Deputy.  Mr Deputy, bokou in ganny dir lo sa Mosyon.  Donk, avan sa mon bezwen remersye tou bann ki’n koze an sipor sa Mosyon e mon espere ki lezot osi, menm si zot pa’n koze me zot kapab aport zot sipor.  San vreman repet tou ki’n ganny dir, kantmenm i annan keksoz ki tou bann Manm ki’n koze lo la, zot in kapab fer resorti.  Sa se inovasyon ouswa nouvote.  Legzizans en nouvo fason fer, tout an gardan e an prezervan nou idantite koman en nasyon.  Bann propozisyon i enkli nesesite pou prezerv nou bann konesans entelektyel, nesesite pou valorize nou bann resers e bann serser lokal, ki resers i vin en konponan enportan ouswa obligatwar e tou bann Manm i sizere ki se Liniversite Sesel ki speer head sa koman enn son konponan mazer e enportan dan son curriculum. Nesesite osi pou en sant resers e dokimantasyon nasyonal pou fasilit akse vit e fasil a bann lenformasyon.

Okour mon resers pour finalman table sa Mosyon, mon’n aprann ki Sesel, ki sel letid e resers ki dan Lalwa e ki obliz dimoun pou donn lenformasyon se selman resansman.  Donk, okour deba, in annan rekomandasyon ki i annan en nesesite pou Gouvernman anmenn plis Lalwa ki obliz dimoun donn lenformasyon pou bokou plis resers.  2 semenn pase, ti annan en Mosyon dan Lasanble table par Onorab Vel, ki ti pe demann Minister Lasante pou fer en letid lo lakoz sa logmantasyon dan Kanser.  En letid tre enportan.  Me si napa en Lalwa ki obliz dimoun donn lenformasyon, lekel ki pou donnen, sirtou si sa lenformasyon i annan pou fer avek zot bouse manze?

An konklizyon Mr Deputy, rekomandasyon pli for ki’n resorti se bezwen imedyat pou retourn dan bann liv rapor ouswa bann letid ki pe akimil lapousyer.  Ladan, nou asire ki i annan bokou keksoz inovativ, an dot mo nouvote.  Vwala akoz mon ti dir ki inovasyon Sesel i senpleman en lot fraz pou “En Nouvo Sesel”.  Mersi Mr Deputy.

 

MR DEPUTY SPEAKER

Bon, nou pran en vot lo sa Mosyon.  Tou bann ki an faver?  Inanim, Mosyon in ganny aprouve.  Nou fini nou travay pou ozordi e nou ava rezwenn …

 

(Technical Problem)

(Adjournment)